📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀧𑀜𑁆𑀘𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀲𑁂𑀔𑀩𑀮𑀯𑀕𑁆𑀕𑁄

𑁧. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀧𑀜𑁆𑀘𑀓𑀦𑀺𑀧𑀸𑀢𑀲𑁆𑀲 ¶ ¶ 𑀧𑀞𑀫𑁂 𑀓𑀸𑀫𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁄𑀧𑀺 𑀩𑀮𑀝𑁆𑀞𑁄 𑀏𑀯, 𑀧𑀝𑀺𑀧𑀓𑁆𑀔𑁂𑀳𑀺 𑀧𑀦 𑀅𑀓𑀫𑁆𑀧𑀦𑀻𑀬𑀢𑁆𑀢𑀁 𑀲𑀸𑀢𑀺𑀲𑀬𑀁 𑀩𑀮𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀻’’𑀢𑀺.

𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁬. 𑀯𑀺𑀢𑁆𑀣𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨-𑁬. 𑀤𑀼𑀢𑀺𑀬𑁂 ¶ 𑀳𑀺𑀭𑀻𑀬𑀢𑀻𑀢𑀺 𑀮𑀚𑁆𑀚𑀢𑀺 𑀯𑀺𑀭𑀚𑁆𑀚𑀢𑀺. 𑀬𑀲𑁆𑀫𑀸 𑀳𑀺𑀭𑀻 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸, 𑀢𑀲𑁆𑀫𑀸 ‘‘𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀑𑀢𑁆𑀢𑀧𑁆𑀧𑀢𑀻𑀢𑀺 𑀉𑀢𑁆𑀭𑀲𑀢𑀺. 𑀧𑀸𑀧𑀼𑀢𑁆𑀭𑀸𑀲𑀮𑀓𑁆𑀔𑀡𑀜𑁆𑀳𑀺 𑀑𑀢𑁆𑀢𑀧𑁆𑀧𑀁.

𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄𑀢𑀺 ¶ 𑀲𑀗𑁆𑀓𑁄𑀘𑀁 𑀅𑀦𑀸𑀧𑀦𑁆𑀦𑀯𑀻𑀭𑀺𑀬𑁄. 𑀢𑁂𑀦𑀸𑀳 ‘‘𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑁄’’𑀢𑀺. 𑀧𑀳𑀸𑀦𑀢𑁆𑀣𑀸𑀬𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀣𑀸𑀬. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀲𑀫𑀥𑀺𑀕𑀫𑁄 𑀏𑀯𑀸𑀢𑀺 𑀆𑀳 ‘‘𑀧𑀝𑀺𑀮𑀸𑀪𑀢𑁆𑀣𑀸𑀬𑀸’’𑀢𑀺.

𑀕𑀢𑀺𑀅𑀢𑁆𑀣𑀸 𑀥𑀸𑀢𑀼𑀲𑀤𑁆𑀤𑀸 𑀩𑀼𑀤𑁆𑀥𑀺𑀅𑀢𑁆𑀣𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬𑀸’’𑀢𑀺. 𑀫𑀺𑀲𑁆𑀲𑀓𑀦𑀬𑁂𑀦𑀸𑀬𑀁 𑀤𑁂𑀲𑀦𑀸 𑀕𑀢𑀸𑀢𑀺 𑀆𑀳 ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘𑀸’’𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯 𑀫𑀕𑁆𑀕𑀧𑀜𑁆𑀜𑀸𑀬 𑀘𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀯𑀺𑀓𑁆𑀔𑀫𑁆𑀪𑀦𑀓𑀺𑀭𑀺𑀬𑀢𑁄 𑀲𑀸 𑀘 𑀔𑁄 𑀧𑀤𑁂𑀲𑀺𑀓𑀸𑀢𑀺 𑀦𑀺𑀧𑁆𑀧𑀤𑁂𑀲𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀪𑀸𑀯𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀢𑀺 𑀬𑀸𑀣𑀸𑀯𑀢𑁄. 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀳𑀺 𑀫𑀕𑁆𑀕𑀧𑀜𑁆𑀜𑀸𑀬 𑀔𑁂𑀧𑀺𑀢𑀁 𑀔𑁂𑀧𑀺𑀢𑀫𑁂𑀯, 𑀦𑀸𑀲𑁆𑀲 𑀧𑀼𑀦 𑀔𑁂𑀧𑀦𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺 𑀉𑀧𑀸𑀬𑁂𑀦 𑀜𑀸𑀬𑁂𑀦 𑀲𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀳𑁂𑀢𑀼𑀦𑀸 𑀦𑀬𑁂𑀦𑀸’’𑀢𑀺. 𑀢𑀢𑀺𑀬𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀯𑀺𑀢𑁆𑀣𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀅𑀲𑀦𑁆𑀢𑀺 𑀮𑀽𑀦𑀦𑁆𑀢𑀺 𑀢𑁂𑀦𑀸𑀢𑀺 𑀅𑀲𑀺𑀢𑀁, 𑀤𑀸𑀢𑁆𑀢𑀁. 𑀯𑀺𑀯𑀺𑀥𑀸 𑀆𑀪𑀜𑁆𑀚𑀦𑁆𑀢𑀺 𑀪𑀸𑀭𑀁 𑀑𑀮𑀫𑁆𑀩𑁂𑀦𑁆𑀢𑀺 𑀢𑁂𑀦𑀸𑀢𑀺 𑀩𑁆𑀬𑀸𑀪𑀗𑁆𑀕𑀻, 𑀯𑀺𑀥𑀁. 𑀓𑀼𑀮𑀧𑀼𑀢𑁆𑀢𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑁄 𑀓𑀼𑀮𑀧𑀼𑀢𑁆𑀢𑁄 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄, 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀘. 𑀢𑀢𑁆𑀣 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀝𑁆𑀞𑀧𑀸𑀮𑁄 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑁂 𑀅𑀕𑁆𑀕𑀓𑀼𑀮𑀺𑀓𑀲𑁆𑀲 𑀧𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁨.𑁨𑁯𑁪) 𑀏𑀯𑀁 𑀆𑀕𑀢𑁄 𑀉𑀘𑁆𑀘𑀓𑀼𑀮𑀧𑁆𑀧𑀲𑀼𑀢𑁄 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄 𑀦𑀸𑀫. ‘‘𑀬𑁂 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁪) 𑀏𑀯𑀁 𑀆𑀕𑀢𑀸 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀧𑀲𑀼𑀢𑀸𑀧𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀦𑀸𑀫. 𑀇𑀥 𑀧𑀦 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀓𑀼𑀮𑀧𑀼𑀢𑁆𑀢𑁄𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄’’𑀢𑀺. 𑀬𑀼𑀢𑁆𑀢𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀁, 𑀏𑀯𑀁 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀘𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 ¶ ¶ 𑀲𑀤𑁆𑀥𑀸𑀬𑀸𑀢𑀺 𑀇𑀫𑀺𑀦𑀸 𑀅𑀥𑀺𑀕𑀫𑀲𑀤𑁆𑀥𑀸 𑀤𑀲𑁆𑀲𑀺𑀢𑀸. 𑀘𑀢𑀼𑀩𑁆𑀩𑀺𑀥𑀸 𑀳𑀺 𑀲𑀤𑁆𑀥𑀸 𑁋 𑀆𑀕𑀫𑀦𑀻𑀬𑀲𑀤𑁆𑀥𑀸, 𑀅𑀥𑀺𑀕𑀫𑀲𑀤𑁆𑀥𑀸, 𑀧𑀲𑀸𑀤𑀲𑀤𑁆𑀥𑀸, 𑀑𑀓𑀧𑁆𑀧𑀦𑀲𑀤𑁆𑀥𑀸𑀢𑀺. 𑀢𑀢𑁆𑀣 𑀆𑀕𑀫𑀦𑀻𑀬𑀲𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑀸 𑀳𑁄𑀢𑀺. 𑀆𑀕𑀫𑀦𑀻𑀬𑀧𑁆𑀧𑀝𑀺𑀧𑀤𑀸𑀬 𑀆𑀕𑀢𑀸 𑀳𑀺 𑀲𑀤𑁆𑀥𑀸 𑀲𑀸𑀢𑀺𑀲𑀬𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀅𑀯𑀺𑀧𑀭𑀻𑀢𑀢𑁄 𑀕𑀳𑁂𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀦𑀢𑁄. 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀢𑁄 𑀆𑀕𑀢𑀲𑀤𑁆𑀥𑀸 𑀅𑀥𑀺𑀕𑀫𑀲𑀤𑁆𑀥𑀸 𑀲𑀼𑀧𑁆𑀧𑀩𑀼𑀤𑁆𑀥𑀸𑀤𑀻𑀦𑀁 𑀯𑀺𑀬. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀧𑁆𑀧𑀲𑀸𑀤𑁄 𑀧𑀲𑀸𑀤𑀲𑀤𑁆𑀥𑀸 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸𑀤𑀻𑀦𑀁 𑀯𑀺𑀬. ‘‘𑀏𑀯𑀫𑁂𑀢’’𑀦𑁆𑀢𑀺 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀤𑁆𑀤𑀳𑀦𑀯𑀲𑁂𑀦 𑀓𑀧𑁆𑀧𑀦𑀁 𑀑𑀓𑀧𑁆𑀧𑀦𑀁, 𑀢𑀤𑁂𑀯 𑀲𑀤𑁆𑀥𑀸𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸. 𑀢𑀢𑁆𑀣 𑀧𑀲𑀸𑀤𑀲𑀤𑁆𑀥𑀸 𑀧𑀭𑀦𑁂𑀬𑁆𑀬𑀭𑀽𑀧𑀸 𑀳𑁄𑀢𑀺, 𑀲𑀯𑀦𑀫𑀢𑁆𑀢𑁂𑀦𑀧𑀺 𑀧𑀲𑀻𑀤𑀦𑀢𑁄. 𑀑𑀓𑀧𑁆𑀧𑀦𑀲𑀤𑁆𑀥𑀸 𑀲𑀤𑁆𑀥𑁂𑀬𑁆𑀬𑀁 𑀯𑀢𑁆𑀣𑀼𑀁 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 ‘‘𑀏𑀯𑀫𑁂𑀢’’𑀦𑁆𑀢𑀺 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑀻 𑀯𑀺𑀬 𑀧𑀯𑀢𑁆𑀢𑀢𑀺.

𑀘𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀅𑀧𑁆𑀧𑀢𑀺𑀲𑁆𑀲𑀬𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑀯𑁄 𑀯-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀕𑀭𑀼𑀦𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀢𑁆𑀢𑁄 𑀕𑀸𑀭𑀯𑀯𑀲𑁂𑀦 𑀧𑀢𑀺𑀲𑁆𑀲𑀯𑀦𑀁, 𑀧𑀢𑀺𑀲𑁆𑀲𑀯𑁄, 𑀧𑀢𑀺𑀲𑁆𑀲𑀯𑀪𑀽𑀢𑀁, 𑀢𑀁𑀲𑀪𑀸𑀯𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀕𑀸𑀭𑀯𑀁. 𑀦𑀢𑁆𑀣𑀺 𑀏𑀢𑀲𑁆𑀫𑀺𑀁 𑀧𑀢𑀺𑀲𑁆𑀲𑀯𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑀯𑁄, 𑀕𑀸𑀭𑀯𑀯𑀺𑀭𑀳𑀺𑀢𑁄. 𑀢𑁂𑀦𑀸𑀳 ‘‘𑀅𑀚𑁂𑀝𑁆𑀞𑀓𑁄 𑀅𑀦𑀻𑀘𑀯𑀼𑀢𑁆𑀢𑀻’’𑀢𑀺.

𑀧𑀞𑀫𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀯𑀼𑀤𑁆𑀥𑀺𑀦𑁆𑀢𑀺𑀆𑀤𑀻𑀲𑀼 𑀲𑀻𑀮𑁂𑀦 𑀯𑀼𑀤𑁆𑀥𑀺𑀁, 𑀫𑀕𑁆𑀕𑁂𑀦 𑀯𑀺𑀭𑀼𑀴𑁆𑀳𑀺𑀁, 𑀦𑀺𑀩𑁆𑀩𑀸𑀦𑁂𑀦 𑀯𑁂𑀧𑀼𑀮𑁆𑀮𑀁. 𑀲𑀻𑀮𑀲𑀫𑀸𑀥𑀻𑀳𑀺 𑀯𑀸 𑀯𑀼𑀤𑁆𑀥𑀺𑀁, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀯𑀺𑀭𑀼𑀴𑁆𑀳𑀺𑀁, 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀯𑁂𑀧𑀼𑀮𑁆𑀮𑀁. 𑀏𑀢𑁆𑀣 𑀘 𑀬𑀲𑁆𑀲 𑀘𑀢𑀼𑀩𑁆𑀩𑀺𑀥𑀁 𑀲𑀻𑀮𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀁 𑀯𑀺𑀲𑁂𑀲𑀪𑀸𑀕𑀺𑀬𑀢𑁆𑀢𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀫𑀕𑁆𑀕𑀨𑀮𑀸𑀯𑀳𑀁 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀲𑁄 𑀢𑀸𑀤𑀺𑀲𑁂𑀦 𑀲𑀻𑀮𑁂𑀦 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 ¶ 𑀆𑀧𑀚𑁆𑀚𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀻𑀮𑁂𑀦 𑀯𑀼𑀤𑁆𑀥𑀺’’𑀦𑁆𑀢𑀺. 𑀬𑀲𑁆𑀲 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀯𑀺𑀭𑀽𑀴𑁆𑀳𑀫𑀽𑀮𑁄 𑀯𑀺𑀬 𑀧𑀸𑀤𑀧𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀲𑀸𑀲𑀦𑁂 𑀯𑀺𑀭𑀽𑀴𑁆𑀳𑀺𑀁 𑀆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ¶ 𑁋 ‘‘𑀫𑀕𑁆𑀕𑁂𑀦 𑀯𑀺𑀭𑀽𑀴𑁆𑀳𑀺’’𑀦𑁆𑀢𑀺. 𑀬𑁄 𑀲𑀩𑁆𑀩𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄, 𑀲𑁄 𑀅𑀭𑀳𑀸 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀬𑀸 𑀲𑀢𑀺 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑁂𑀦 𑀯𑁂𑀧𑀼𑀮𑁆𑀮’’𑀦𑁆𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀅𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀔𑀩𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀩𑀮𑀯𑀕𑁆𑀕𑁄

𑁧. 𑀅𑀦𑀦𑀼𑀲𑁆𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀲𑁆𑀲𑀸𑀢𑀺 ‘‘𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄. 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄. 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄. 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄. 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, 𑀲𑁂𑀝𑁆𑀞𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦’’𑀦𑁆𑀢𑀺. 𑀧𑀭𑀢𑁄 𑀤𑀲𑁆𑀲𑀺𑀢𑀩𑀮𑀬𑁄𑀕𑁂𑀦 ‘‘𑀤𑀲𑀩𑀮𑁄𑀳’’𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺. 𑀩𑁆𑀭𑀳𑁆𑀫𑀘𑀓𑁆𑀓𑀦𑁆𑀢𑀺 𑀏𑀢𑁆𑀣 𑀲𑁂𑀝𑁆𑀞𑀧𑀭𑀺𑀬𑀸𑀬𑁄. 𑀩𑁆𑀭𑀳𑁆𑀫𑀲𑀤𑁆𑀤𑁄𑀢𑀺 𑀆𑀳 ‘‘𑀲𑁂𑀝𑁆𑀞𑀘𑀓𑁆𑀓’’𑀦𑁆𑀢𑀺. 𑀘𑀓𑁆𑀓𑀜𑁆𑀘𑁂𑀢𑀁 𑀥𑀫𑁆𑀫𑀘𑀓𑁆𑀓𑀁 𑀅𑀥𑀺𑀧𑁆𑀧𑁂𑀢𑀁.

𑀅𑀦𑀦𑀼𑀲𑁆𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀓𑀸𑀫𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁄𑀧𑀺 𑀩𑀮𑀝𑁆𑀞𑁄 𑀏𑀯, 𑀧𑀝𑀺𑀧𑀓𑁆𑀔𑁂𑀳𑀺 𑀧𑀦 𑀅𑀓𑀫𑁆𑀧𑀦𑀻𑀬𑀢𑁆𑀢𑀁 𑀲𑀸𑀢𑀺𑀲𑀬𑀁 𑀩𑀮𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 ‘‘𑀫𑀼𑀝𑁆𑀞𑀲𑁆𑀲𑀘𑁆𑀘𑁂 𑀦 𑀓𑀫𑁆𑀧𑀢𑀻’’𑀢𑀺.

𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀢𑁆𑀣𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 ¶ ¶ 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀲𑀢𑀺𑀬𑀸 𑀦𑁂𑀧𑀓𑁆𑀓𑁂𑀦, 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑁂𑀧𑀓𑁆𑀓𑀁 𑀦𑀸𑀫 𑀧𑀜𑁆𑀜𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺 𑀅𑀜𑁆𑀜𑁄 𑀦𑀺𑀤𑁆𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀲𑀢𑀺𑀫𑀸𑀢𑀺 𑀘 𑀇𑀫𑀺𑀦𑀸 𑀲𑀯𑀺𑀲𑁂𑀲𑀸 𑀲𑀢𑀺 𑀕𑀳𑀺𑀢𑀸𑀢𑀺 𑀧𑀭𑀢𑁄𑀧𑀺 ‘‘𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸’’𑀢𑀺 𑀲𑀢𑀺𑀓𑀺𑀘𑁆𑀘𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀦 𑀧𑀜𑁆𑀜𑀸𑀓𑀺𑀘𑁆𑀘𑀁, 𑀢𑀲𑁆𑀫𑀸 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀲𑀢𑀺𑀬𑀸 𑀦𑁂𑀧𑀓𑁆𑀓𑀪𑀸𑀯𑁂𑀦𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀮𑀩𑁆𑀪𑀢𑁂𑀯. 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀅𑀜𑁆𑀜𑀥𑀫𑁆𑀫𑀦𑀺𑀭𑀧𑁂𑀓𑁆𑀔𑁄 𑀲𑀢𑀺𑀬𑀸 𑀩𑀮𑀯𑀪𑀸𑀯𑁄. 𑀢𑀣𑀸 𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀲𑀚𑁆𑀛𑀸𑀬𑀦𑀲𑀫𑁆𑀫𑀲𑀦𑀸𑀦𑀺 𑀲𑀫𑁆𑀪𑀯𑀦𑁆𑀢𑀺.

𑀘𑀺𑀭𑀓𑀢𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀓𑀸𑀬𑁂𑀦 𑀘𑀺𑀭𑀓𑀢𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀺𑀫𑀳𑀸𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁. 𑀘𑀺𑀭𑀪𑀸𑀲𑀺𑀢𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀯𑀸𑀘𑀸𑀬 𑀘𑀺𑀭𑀪𑀸𑀲𑀺𑀢𑀁 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀦𑀉𑀤𑁆𑀤𑀺𑀲𑀸𑀧𑀦𑀥𑀫𑁆𑀫𑀸𑀲𑀸𑀭𑀡𑀥𑀫𑁆𑀫𑀤𑁂𑀲𑀦𑀸𑀉𑀧𑀦𑀺𑀲𑀺𑀦𑁆𑀦𑀓𑀧𑀭𑀺𑀓𑀣𑀸𑀅𑀦𑀼𑀫𑁄𑀤𑀦𑀻𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀯𑀘𑀻𑀓𑀫𑁆𑀫𑀁. 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀢𑀲𑁆𑀫𑀺𑀁 𑀓𑀸𑀬𑁂𑀦 𑀘𑀺𑀭𑀓𑀢𑁂 𑀓𑀸𑀬𑁄 𑀦𑀸𑀫 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀘𑀺𑀭𑀪𑀸𑀲𑀺𑀢𑁂 𑀯𑀸𑀘𑀸 𑀦𑀸𑀫 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀭𑀽𑀧𑀁, 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀅𑀭𑀽𑀧𑀁. 𑀇𑀢𑀺 𑀇𑀫𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀯𑀁 𑀦𑀺𑀭𑀼𑀤𑁆𑀥𑀸𑀢𑀺 𑀲𑀭𑀢𑀺 𑀘𑁂𑀯 𑀅𑀦𑀼𑀲𑁆𑀲𑀭𑀢𑀺 𑀘, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀳𑀺 𑀲𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀸𑀬 𑀲𑀢𑀺𑀬𑀸 𑀏𑀲 𑀲𑀓𑀺𑀁 𑀲𑀭𑀡𑁂𑀦 𑀲𑀭𑀺𑀢𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑁂𑀦 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀢𑁆𑀣𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫-𑁨𑁦. 𑀧𑀜𑁆𑀘𑀫𑁂 𑀲𑀯𑀺𑀲𑀬𑀲𑁆𑀫𑀺𑀁𑀬𑁂𑀯𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀯. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀓𑀣𑁂𑀢𑀼𑀦𑁆𑀢𑀺 𑀮𑁄𑀓𑀺𑀬𑀥𑀫𑁆𑀫𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀘 𑀢𑁂𑀦 𑀢𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀓𑀣𑁂𑀢𑀼𑀁. 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀽𑀢𑀺 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑀸𑀭𑀡𑁂𑀲𑀼. 𑀓𑀸𑀫𑀜𑁆𑀘 𑀢𑁂𑀲𑀼 𑀲𑀢𑀺𑀆𑀤𑀬𑁄𑀧𑀺 𑀥𑀫𑁆𑀫𑀸 𑀇𑀘𑁆𑀙𑀺𑀢𑀩𑁆𑀩𑀸𑀯 𑀢𑁂𑀳𑀺 𑀯𑀺𑀦𑀸 𑀢𑁂𑀲𑀁 𑀅𑀲𑀫𑁆𑀪𑀯𑀢𑁄 ¶ , 𑀢𑀣𑀸𑀧𑀺 𑀘𑁂𑀢𑁆𑀣 𑀲𑀤𑁆𑀥𑀸 𑀯𑀺𑀲𑁂𑀲𑀢𑁄 𑀓𑀺𑀘𑁆𑀘𑀓𑀸𑀭𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁆𑀥𑁄 𑀏𑀯 𑀳𑀺 𑀲𑀧𑁆𑀧𑀼𑀭𑀺𑀲𑁂 𑀧𑀬𑀺𑀭𑀼𑀧𑀸𑀲𑀢𑀺, 𑀲𑀤𑁆𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀅𑀭𑀺𑀬𑀫𑀕𑁆𑀕𑀲𑁆𑀲 ¶ 𑀘 𑀅𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀲𑀤𑁆𑀥𑀸𑀩𑀮𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀩𑀮𑁂𑀲𑀼𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀽𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀪𑀸𑀯𑀦𑀸𑀬. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀽𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑁄𑀢𑀸𑀧𑀢𑁆𑀢𑀺𑀅𑀗𑁆𑀕𑁂𑀲𑀼 𑀲𑀤𑁆𑀥𑀸 𑀯𑀺𑀬, 𑀲𑀫𑁆𑀫𑀧𑁆𑀧𑀥𑀸𑀦𑀪𑀸𑀯𑀦𑀸𑀬 𑀯𑀻𑀭𑀺𑀬𑀁 𑀯𑀺𑀬 𑀘 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀬𑀲𑁆𑀫𑀸 ‘‘𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬) 𑀯𑀘𑀦𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑀺𑀘𑁆𑀘𑀢𑁄 𑀲𑀢𑀺 𑀅𑀥𑀺𑀓𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀏𑀯𑀁 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀲𑀫𑀸𑀥𑀺, ‘‘𑀅𑀭𑀺𑀬𑀲𑀘𑁆𑀘𑀪𑀸𑀯𑀦𑀸 𑀧𑀜𑁆𑀜𑀸𑀪𑀸𑀯𑀦𑀸’’𑀢𑀺 𑀓𑀢𑁆𑀯𑀸 𑀢𑀢𑁆𑀣 𑀧𑀜𑁆𑀜𑀸 𑀧𑀼𑀩𑁆𑀩𑀪𑀸𑀕𑁂 𑀅𑀥𑀺𑀓𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀅𑀥𑀺𑀕𑀫𑀓𑁆𑀔𑀡𑁂 𑀧𑀦 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀯𑀺𑀬 𑀲𑀩𑁆𑀩𑁂𑀲𑀫𑁆𑀧𑀺 𑀩𑀮𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀲𑀫𑀢𑀸𑀯 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀣𑀸 𑀳𑀺 ‘‘𑀏𑀢𑁆𑀣 𑀲𑀤𑁆𑀥𑀸𑀩𑀮’’𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀏𑀢𑁆𑀣𑀕𑁆𑀕𑀳𑀡𑀁 𑀓𑀢𑀁.

𑀇𑀤𑀸𑀦𑀺 𑀲𑀤𑁆𑀥𑀸𑀤𑀻𑀦𑀁 𑀢𑀢𑁆𑀣 𑀢𑀢𑁆𑀣 𑀅𑀢𑀺𑀭𑁂𑀓𑀓𑀺𑀘𑁆𑀘𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀺𑀤𑀁 𑀉𑀧𑀫𑀸 𑀲𑀁𑀲𑀦𑁆𑀤𑀦𑀁 𑁋 𑀭𑀸𑀚𑀧𑀜𑁆𑀘𑀫𑀲𑀳𑀸𑀬𑀸 𑀯𑀺𑀬 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺. 𑀦𑁂𑀲𑀁 𑀓𑀻𑀴𑀦𑀢𑁆𑀣𑀁 𑀏𑀓𑀚𑁆𑀛𑀁 𑀯𑀻𑀣𑀺𑀑𑀢𑀭𑀡𑀁 𑀯𑀺𑀬 𑀩𑀮𑀸𑀦𑀁 𑀏𑀓𑀚𑁆𑀛𑀁 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀑𑀢𑀭𑀡𑀁, 𑀲𑀳𑀸𑀬𑁂𑀲𑀼 𑀧𑀞𑀫𑀸𑀤𑀻𑀦𑀁 𑀬𑀣𑀸𑀲𑀓𑀁 𑀕𑁂𑀳𑁂𑀯 𑀯𑀺𑀘𑀸𑀭𑀡𑀸 𑀯𑀺𑀬 𑀲𑀤𑁆𑀥𑀸𑀤𑀻𑀦𑀁 𑀲𑁄𑀢𑀸𑀧𑀢𑁆𑀢𑀺𑀅𑀗𑁆𑀕𑀸𑀤𑀻𑀦𑀺 𑀧𑀢𑁆𑀯𑀸 𑀧𑀼𑀩𑁆𑀩𑀗𑁆𑀕𑀫𑀢𑀸. 𑀲𑀳𑀸𑀬𑁂𑀲𑀼 𑀇𑀢𑀭𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀢𑀼𑀡𑁆𑀳𑀻𑀪𑀸𑀯𑁄 𑀯𑀺𑀬 𑀲𑁂𑀲𑀩𑀮𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀢𑀤𑀦𑁆𑀯𑀬𑀢𑀸, 𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀩𑀮𑀲𑁆𑀲 𑀓𑀺𑀘𑁆𑀘𑀸𑀦𑀼𑀕𑀢𑀸. 𑀦 𑀳𑀺 𑀢𑀤𑀸 𑀢𑁂𑀲𑀁 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀆𑀧𑀸𑀤𑀻𑀦𑀁 𑀯𑀺𑀬 𑀓𑀺𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺, 𑀲𑀤𑁆𑀥𑀸𑀤𑀻𑀦𑀁𑀬𑁂𑀯 𑀧𑀦 𑀓𑀺𑀘𑁆𑀘𑀁 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀧𑀼𑀭𑁂𑀢𑀭𑀁 𑀢𑀣𑀸𑀧𑀘𑁆𑀘𑀬𑁂𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀪𑀺𑀲𑀗𑁆𑀔𑀢𑀢𑁆𑀢𑀸. 𑀏𑀢𑁆𑀣 𑀘 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀪𑀸𑀯𑀦𑀸 𑀯𑀺𑀲𑁂𑀲𑀢𑁄 𑀧𑀜𑁆𑀜𑀼𑀢𑁆𑀢𑀭𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀭𑀸𑀚𑀸𑀦𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. 𑀙𑀝𑁆𑀞𑀸𑀤𑀻𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀘𑀗𑁆𑀕𑀺𑀓𑀯𑀕𑁆𑀕𑁄

𑁧-𑁨. 𑀧𑀞𑀫𑀅𑀕𑀸𑀭𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧-𑁨𑁨. 𑀢𑀢𑀺𑀬𑀲𑁆𑀲 ¶ ¶ 𑀧𑀞𑀫𑁂 𑀆𑀪𑀺𑀲𑀫𑀸𑀘𑀸𑀭𑀺𑀓𑀦𑁆𑀢𑀺 𑀅𑀪𑀺𑀲𑀫𑀸𑀘𑀸𑀭𑁂 𑀉𑀢𑁆𑀢𑀫𑀲𑀫𑀸𑀘𑀸𑀭𑁂 𑀪𑀯𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀯𑀢𑁆𑀢𑀯𑀲𑁂𑀦 𑀧𑀜𑁆𑀜𑀢𑁆𑀢𑀲𑀻𑀮’’𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀤𑀼𑀢𑀺𑀬𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀅𑀕𑀸𑀭𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩-𑁨𑁪. 𑀢𑀢𑀺𑀬𑁂 𑀦 𑀘 𑀧𑀪𑀸𑀯𑀦𑁆𑀢𑀦𑁆𑀢𑀺 𑀦 𑀘 𑀧𑀪𑀸𑀲𑀫𑁆𑀧𑀦𑁆𑀦𑀁. 𑀧𑀪𑀺𑀚𑁆𑀚𑀦𑀲𑀪𑀸𑀯𑀦𑁆𑀢𑀺 𑀢𑀸𑀧𑁂𑀢𑁆𑀯𑀸 𑀢𑀸𑀴𑀓𑀚𑁆𑀚𑀦𑀧𑀪𑀗𑁆𑀕𑀼𑀭𑀁. 𑀅𑀯𑀲𑁂𑀲𑀁 𑀮𑁄𑀳𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀲𑀚𑀸𑀢𑀺𑀮𑁄𑀳𑀁, 𑀯𑀺𑀚𑀸𑀢𑀺𑀮𑁄𑀳𑀁, 𑀧𑀺𑀲𑀸𑀘𑀮𑁄𑀳𑀁, 𑀓𑀺𑀢𑁆𑀢𑀺𑀫𑀮𑁄𑀳𑀦𑁆𑀢𑀺 𑀏𑀯𑀁𑀧𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀮𑁄𑀳𑀁. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦𑀸𑀢𑀺 𑀏𑀢𑁆𑀣 𑀦𑀦𑀼 𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀲𑁆𑀲𑀧𑀺 𑀲𑀼𑀯𑀺𑀲𑀼𑀤𑁆𑀥𑀲𑁆𑀲𑀧𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦𑁂𑀯 𑀉𑀧𑀓𑁆𑀓𑀺𑀮𑁂𑀲𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂 𑀦𑀻𑀯𑀭𑀡𑀸𑀦𑀺 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀸𑀦𑀺, 𑀢𑀢𑁆𑀣 𑀫𑀳𑀕𑁆𑀕𑀢𑀓𑀼𑀲𑀮𑀲𑁆𑀲𑀧𑀺 𑀅𑀲𑀫𑁆𑀪𑀯𑁄, 𑀧𑀕𑁂𑀯 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲. 𑀧𑀭𑀺𑀢𑁆𑀢𑀓𑀼𑀲𑀮𑀁 𑀧𑀦 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦𑀻𑀯𑀭𑀡𑁂𑀳𑀺 𑀉𑀧𑀳𑀢𑁂 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀦𑁆𑀢𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀝𑀺𑀢𑁂𑀮𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑀻𑀧𑁄 𑀯𑀺𑀬. 𑀅𑀧𑀺𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦𑁂𑀯 𑀢𑁂𑀲𑀁 𑀉𑀧𑀓𑁆𑀓𑀺𑀮𑁂𑀲𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀕𑁆𑀕𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀆𑀭𑀫𑁆𑀫𑀡𑁂 𑀯𑀺𑀓𑁆𑀔𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺𑀆𑀤𑀺𑀦𑀸 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸𑀦𑀁 𑀫𑀢𑁂𑀦 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀆𑀭𑀤𑁆𑀥𑀸, 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦𑁂𑀢𑁆𑀣 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁪𑁫𑁨) 𑁋

‘‘𑀅𑀦𑀼𑀕𑁆𑀕𑀳𑀺𑀢𑀸’’𑀢𑀺 ¶ ¶ 𑀮𑀤𑁆𑀥𑀽𑀧𑀓𑀸𑀭𑀸. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀨𑀮𑀓𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀨𑀮𑀁 𑀅𑀲𑁆𑀲𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸. 𑀢𑀤𑁂𑀯 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀨𑀮𑀁 𑀆𑀦𑀺𑀲𑀁𑀲𑁄 𑀅𑀲𑁆𑀲𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘𑀢𑀼𑀢𑁆𑀣𑀨𑀮𑀧𑀜𑁆𑀜𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀻𑀮𑀸𑀦𑀼𑀕𑁆𑀕𑀳𑀺𑀢𑀸’’𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀼𑀢𑀦𑁆𑀢𑀺 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁. 𑀲𑀸𑀓𑀘𑁆𑀙𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀓𑀣𑀸. 𑀲𑀫𑀣𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀯𑀺𑀧𑀲𑁆𑀲𑀦𑀸𑀢𑀺 𑀲𑀢𑁆𑀢𑀯𑀺𑀥𑀸 𑀅𑀦𑀼𑀧𑀲𑁆𑀲𑀦𑀸. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀳𑀺 𑀧𑀽𑀭𑁂𑀦𑁆𑀢𑀲𑁆𑀲, 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀡𑀦𑁆𑀢𑀲𑁆𑀲, 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸𑀲𑀼 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑁆𑀢𑀯𑀺𑀥𑀁 𑀅𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀨𑀮𑀁 𑀤𑁂𑀢𑀺.

‘‘𑀬𑀣𑀸 𑀳𑀺 𑀫𑀥𑀼𑀭𑀁 𑀅𑀫𑁆𑀩𑀧𑀓𑁆𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀫𑁆𑀩𑀧𑁄𑀢𑀓𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀓𑁄𑀝𑁆𑀞𑀓𑀁 𑀣𑀺𑀭𑀁 𑀓𑀢𑁆𑀯𑀸 𑀩𑀦𑁆𑀥𑀢𑀺, 𑀖𑀝𑀁 𑀕𑀳𑁂𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑀁 𑀆𑀲𑀺𑀜𑁆𑀘𑀢𑀺, 𑀉𑀤𑀓𑀲𑁆𑀲 𑀅𑀦𑀺𑀓𑁆𑀔𑀫𑀦𑀢𑁆𑀣𑀁 𑀫𑀭𑀺𑀬𑀸𑀤𑀁 𑀣𑀺𑀭𑀁 𑀓𑀭𑁄𑀢𑀺. 𑀬𑀸 𑀳𑁄𑀢𑀺 𑀲𑀫𑀻𑀧𑁂 𑀯𑀮𑁆𑀮𑀺 𑀯𑀸 𑀲𑀼𑀓𑁆𑀔𑀤𑀡𑁆𑀟𑀓𑁄 𑀯𑀸 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁄 𑀯𑀸 𑀫𑀓𑁆𑀓𑀝𑀓𑀚𑀸𑀮𑀁 𑀯𑀸, 𑀢𑀁 𑀅𑀧𑀦𑁂𑀢𑀺, 𑀔𑀡𑀺𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀫𑀽𑀮𑀸𑀦𑀺 𑀧𑀭𑀺𑀔𑀡𑀢𑀺, 𑀏𑀯𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀲𑁆𑀲 𑀇𑀫𑀸𑀦𑀺 𑀧𑀜𑁆𑀘 𑀓𑀸𑀭𑀡𑀸𑀦𑀺 𑀓𑀭𑁄𑀢𑁄 𑀲𑁄 𑀅𑀫𑁆𑀩𑁄 𑀯𑀟𑁆𑀠𑀺𑀢𑁆𑀯𑀸 𑀨𑀮𑀁 𑀤𑁂𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀼𑀓𑁆𑀔𑀲𑁆𑀲 𑀲𑀫𑀦𑁆𑀢𑀢𑁄 𑀓𑁄𑀝𑁆𑀞𑀓𑀩𑀦𑁆𑀥𑀦𑀁 𑀯𑀺𑀬 𑀳𑀺 𑀲𑀻𑀮𑀁 𑀤𑀝𑁆𑀞𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑀲𑀺𑀜𑁆𑀘𑀦𑀁 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑀁, 𑀫𑀭𑀺𑀬𑀸𑀤𑀸𑀬 𑀣𑀺𑀭𑀪𑀸𑀯𑀓𑀭𑀡𑀁 𑀯𑀺𑀬 𑀲𑀫𑀣𑁄, 𑀲𑀫𑀻𑀧𑁂 𑀯𑀮𑁆𑀮𑀺𑀆𑀤𑀻𑀦𑀁 𑀳𑀭𑀡𑀁 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀁, 𑀓𑀸𑀮𑁂𑀦 𑀓𑀸𑀮𑀁 𑀔𑀡𑀺𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀫𑀽𑀮𑀔𑀡𑀦𑀁 𑀯𑀺𑀬 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀪𑀸𑀯𑀦𑀸, 𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀫𑀥𑀼𑀭𑀨𑀮𑀤𑀸𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀭𑀳𑀢𑁆𑀢𑀨𑀮𑀤𑀸𑀦𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀏𑀢𑁆𑀣 𑀘 𑀮𑀤𑁆𑀥𑀽𑀧𑀓𑀸𑀭𑀸𑀢𑀺 𑀬𑀣𑀸𑀭𑀳𑀁 𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀮𑀤𑁆𑀥𑀧𑀘𑁆𑀘𑀬𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀲𑀼 𑀘 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 ¶ . 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀥𑀺 𑀧𑀝𑀺𑀲𑁂𑀥𑁄 𑀯𑀸, 𑀅𑀕𑁆𑀕𑀨𑀮𑀲𑀫𑀸𑀥𑀺𑀫𑁆𑀳𑀺 𑀢𑀧𑁆𑀧𑀭𑀺𑀓𑁆𑀔𑀸𑀭𑀥𑀫𑁆𑀫𑁂𑀲𑀼𑀬𑁂𑀯 𑀘 𑀓𑁂𑀯𑀮𑁄 𑀘𑁂𑀢𑁄𑀧𑀭𑀺𑀬𑀸𑀬𑁄 𑀦𑀺𑀭𑀼𑀴𑁆𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀨𑀮𑀓𑁆𑀔𑀡𑁂𑀢𑀺 𑀅𑀦𑀦𑁆𑀢𑀭𑀁 𑀓𑀸𑀮𑀦𑁆𑀢𑀭𑁂 𑀘𑀸𑀢𑀺 𑀤𑀼𑀯𑀺𑀥𑁂𑀧𑀺 𑀨𑀮𑀓𑁆𑀔𑀡𑁂. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀲𑀩𑁆𑀩𑀲𑀁𑀓𑀺𑀮𑁂𑀲𑁂𑀳𑀺 𑀘𑁂𑀢𑁄𑀯𑀺𑀫𑀼𑀘𑁆𑀘𑀢𑀺 𑀏𑀢𑀸𑀬𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀕𑁆𑀕𑀨𑀮𑀧𑀜𑁆𑀜𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀨𑀮𑀥𑀫𑁆𑀫𑀸. 𑀢𑁂𑀦𑀸𑀳 ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀨𑀮𑀁 𑀅𑀲𑁆𑀲𑀸𑀢𑀺, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 ¶ 𑀨𑀮𑀁 𑀆𑀦𑀺𑀲𑀁𑀲𑁄’’𑀢𑀺. 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀘𑁂𑀢𑀲𑁄 𑀯𑀺𑀫𑀼𑀘𑁆𑀘𑀦𑀲𑀗𑁆𑀔𑀸𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀲𑀜𑁆𑀜𑀺𑀢𑀁 𑀧𑀳𑀸𑀦𑀁 𑀨𑀮𑀁 𑀆𑀦𑀺𑀲𑀁𑀲𑁄 𑀘𑀸𑀢𑀺 𑀬𑁄𑀚𑀦𑀸. 𑀇𑀥 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀤𑁆𑀤𑁂𑀦 𑀧𑀳𑀸𑀦𑀫𑀢𑁆𑀢𑀁 𑀕𑀳𑀺𑀢𑀁, 𑀧𑀼𑀩𑁆𑀩𑁂 𑀧𑀳𑀸𑀬𑀓𑀥𑀫𑁆𑀫𑀸. 𑀅𑀜𑁆𑀜𑀣𑀸 𑀨𑀮𑀥𑀫𑁆𑀫𑀸 𑀏𑀯 𑀆𑀦𑀺𑀲𑀁𑀲𑁄𑀢𑀺 𑀕𑀬𑁆𑀳𑀫𑀸𑀦𑁂 𑀧𑀼𑀦𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀲𑀻𑀮𑀲𑀪𑀸𑀯𑀢𑁆𑀢𑀸 𑀯𑀺𑀲𑁂𑀲𑀢𑁄 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀸, 𑀢𑀣𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀛𑀸𑀦𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀳𑀺 𑀲𑁄 ‘‘𑀅𑀧𑁆𑀧𑀦𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀲𑀫𑁆𑀫𑀸𑀲𑀢𑀺𑀲𑀫𑁆𑀫𑀸𑀯𑀸𑀬𑀸𑀫𑀸 𑀧𑀦 𑀲𑀫𑀸𑀥𑀺𑀧𑀓𑁆𑀔𑀺𑀬𑀸 𑀏𑀯𑀸𑀢𑀺 𑀆𑀳 ‘‘𑀅𑀯𑀲𑁂𑀲𑀸 𑀥𑀫𑁆𑀫𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀼𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀭𑁄𑀘𑀦𑀯𑀲𑁂𑀦 𑀲𑀳 𑀓𑀣𑀦𑀁 𑀲𑀁𑀓𑀣𑀸, 𑀲𑀁𑀓𑀣𑀸𑀯 𑀲𑀸𑀓𑀘𑁆𑀙𑀸. 𑀇𑀥 𑀧𑀦 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑁂…𑀧𑁂… 𑀓𑀣𑀸’’𑀢𑀺. 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀏𑀓𑀯𑀸𑀭𑀁 𑀯𑀺𑀥𑀺𑀬𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀁 𑀔𑀮𑀦𑀁, 𑀅𑀦𑁂𑀓𑀯𑀸𑀭𑀁 𑀧𑀓𑁆𑀔𑀮𑀦𑀁, 𑀢𑀤𑀼𑀪𑀬𑀲𑁆𑀲 𑀯𑀺𑀘𑁆𑀙𑁂𑀤𑀦𑀻 𑀅𑀧𑀦𑀬𑀦𑀻 𑀓𑀣𑀸 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀓𑀣𑀸. 𑀧𑀽𑀭𑁂𑀦𑁆𑀢𑀲𑁆𑀲𑀸𑀢𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀧𑀸𑀮𑁂𑀦𑁆𑀢𑀲𑁆𑀲 𑀩𑁆𑀭𑀽𑀳𑁂𑀦𑁆𑀢𑀲𑁆𑀲 𑀘. 𑀲𑀼𑀡𑀦𑁆𑀢𑀲𑁆𑀲𑀸𑀢𑀺 ‘‘𑀬𑀣𑀸𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀲𑀼𑀡𑀦𑁆𑀢𑀲𑁆𑀲. 𑀢𑁂𑀦𑁂𑀯 𑀳𑀺 ‘‘𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲. 𑀧𑀜𑁆𑀘𑀲𑀼𑀧𑀺 𑀞𑀸𑀦𑁂𑀲𑀼 𑀅𑀦𑁆𑀢-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑀚𑁄𑀢𑀦𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀸 𑀅𑀫𑁆𑀩𑀽𑀧𑀫𑀸 𑀬𑀼𑀚𑁆𑀚𑁂𑀬𑁆𑀬.

𑀉𑀤𑀓𑀓𑁄𑀝𑁆𑀞𑀓𑀦𑁆𑀢𑀺 𑀚𑀮𑀸𑀯𑀸𑀝𑀁. 𑀣𑀺𑀭𑀁 𑀓𑀢𑁆𑀯𑀸 𑀩𑀦𑁆𑀥𑀢𑀻𑀢𑀺 𑀅𑀲𑀺𑀣𑀺𑀮𑀁 𑀤𑀴𑁆𑀳𑀁 𑀦𑀸𑀢𑀺𑀫𑀳𑀦𑁆𑀢𑀁 𑀦𑀸𑀢𑀺𑀔𑀼𑀤𑁆𑀤𑀓𑀁 𑀓𑀢𑁆𑀯𑀸 𑀬𑁄𑀚𑁂𑀢𑀺. 𑀣𑀺𑀭𑀁 𑀓𑀭𑁄𑀢𑀻𑀢𑀺 𑀉𑀤𑀓𑀲𑀺𑀜𑁆𑀘𑀦𑀓𑀸𑀮𑁂 𑀢𑀢𑁄 𑀢𑀢𑁄 𑀧𑀯𑀢𑁆𑀢𑀺𑀢𑁆𑀯𑀸 𑀉𑀤𑀓𑀲𑁆𑀲 𑀅𑀦𑀺𑀓𑁆𑀔𑀫𑀦𑀢𑁆𑀣𑀁 𑀚𑀮𑀸𑀯𑀸𑀝𑀧𑀸𑀴𑀺𑀁 𑀣𑀺𑀭𑀢𑀭𑀁 𑀓𑀭𑁄𑀢𑀺. 𑀲𑀼𑀓𑁆𑀔𑀤𑀡𑁆𑀟𑀓𑁄𑀢𑀺 𑀢𑀲𑁆𑀲𑁂𑀯 𑀅𑀫𑁆𑀩𑀕𑀘𑁆𑀙𑀲𑁆𑀲 𑀲𑀼𑀓𑁆𑀔𑀓𑁄 𑀲𑀸𑀔𑀸𑀲𑀻𑀲𑀓𑁄 ¶ . 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁄𑀢𑀺 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁄. 𑀔𑀡𑀺𑀢𑁆𑀢𑀺𑀦𑁆𑀢𑀺 𑀓𑀼𑀤𑀸𑀮𑀁. 𑀓𑁄𑀝𑁆𑀞𑀓𑀩𑀦𑁆𑀥𑀦𑀁 𑀯𑀺𑀬 𑀲𑀻𑀮𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀟𑁆𑀠𑀦𑀽𑀧𑀸𑀬𑀲𑁆𑀲 𑀫𑀽𑀮𑀪𑀸𑀯𑀢𑁄. 𑀉𑀤𑀓𑀲𑀺𑀜𑁆𑀘𑀦𑀁 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑀁 𑀪𑀸𑀯𑀦𑀸𑀬 𑀧𑀭𑀺𑀩𑁆𑀭𑀽𑀳𑀦𑀢𑁄. 𑀫𑀭𑀺𑀬𑀸𑀤𑀸𑀬 𑀣𑀺𑀭𑀪𑀸𑀯𑀓𑀭𑀡𑀁 𑀯𑀺𑀬 𑀲𑀫𑀣𑁄 𑀬𑀣𑀸𑀯𑀼𑀢𑁆𑀢𑀸𑀬 𑀪𑀸𑀯𑀦𑀸𑀥𑀺𑀝𑁆𑀞𑀸𑀦𑀸𑀬 𑀲𑀻𑀮𑀫𑀭𑀺𑀬𑀸𑀤𑀸𑀬 𑀤𑀴𑁆𑀳𑀻𑀪𑀸𑀯𑀸𑀧𑀸𑀤𑀦𑀢𑁄. 𑀲𑀫𑀸𑀳𑀺𑀢𑀲𑁆𑀲 𑀳𑀺 𑀲𑀻𑀮𑀁 𑀣𑀺𑀭𑀢𑀭𑀁 𑀳𑁄𑀢𑀺. 𑀲𑀫𑀻𑀧𑁂 𑀯𑀮𑁆𑀮𑀺𑀆𑀤𑀻𑀦𑀁 𑀳𑀭𑀡𑀁 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀁 𑀇𑀘𑁆𑀙𑀺𑀢𑀩𑁆𑀩𑀪𑀸𑀯𑀦𑀸𑀬 𑀯𑀺𑀩𑀦𑁆𑀥𑀦𑀸𑀧𑀦𑀬𑀦𑀢𑁄. 𑀫𑀽𑀮𑀔𑀡𑀦𑀁 𑀯𑀺𑀬 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀪𑀸𑀯𑀦𑀸 𑀢𑀲𑁆𑀲𑀸 𑀯𑀺𑀩𑀦𑁆𑀥𑀲𑁆𑀲 𑀫𑀽𑀮𑀪𑀽𑀢𑀸𑀦𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀧𑀮𑀺𑀔𑀡𑀦𑀢𑁄. 𑀏𑀢𑁆𑀣 𑀘 𑀬𑀲𑁆𑀫𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀢𑁄 𑀬𑀣𑀸𑀲𑀼𑀢𑁂 𑀅𑀢𑁆𑀣𑁂 𑀲𑀸𑀓𑀘𑁆𑀙𑀸𑀲𑀫𑀸𑀧𑀚𑁆𑀚𑀦𑀁, 𑀢𑀢𑁄 𑀓𑀫𑁆𑀫𑀝𑁆𑀞𑀸𑀦𑀯𑀺𑀲𑁄𑀥𑀦𑁂𑀦 𑀲𑀫𑀣𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀲𑀫𑀸𑀳𑀺𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀧𑀽𑀭𑀺, 𑀧𑀭𑀺𑀧𑀼𑀡𑁆𑀡𑀸 ¶ 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀩𑁆𑀭𑀽𑀳𑁂𑀢𑀻𑀢𑀺 𑀏𑀯𑀫𑁂𑀢𑁂𑀲𑀁 𑀅𑀗𑁆𑀕𑀸𑀦𑀁 𑀧𑀭𑀫𑁆𑀧𑀭𑀸𑀬 𑀲𑀫𑁆𑀫𑀼𑀔𑀸 𑀅𑀦𑀼𑀕𑁆𑀕𑀡𑁆𑀳𑀦𑀢𑁄 𑀅𑀬𑀫𑀸𑀦𑀼𑀧𑀼𑀩𑁆𑀩𑀻 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀯𑀺𑀫𑀼𑀢𑁆𑀢𑀺𑀬𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀦𑀲𑁆𑀲 𑀆𑀬𑀢𑀦𑀸𑀦𑀺 𑀓𑀸𑀭𑀡𑀸𑀦𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀻𑀢𑀺 𑀆𑀳 𑁋 ‘‘𑀯𑀺𑀫𑀼𑀘𑁆𑀘𑀦𑀓𑀸𑀭𑀡𑀸𑀦𑀻’’𑀢𑀺. 𑀧𑀸𑀴𑀺𑀅𑀢𑁆𑀣𑀁 𑀚𑀸𑀦𑀦𑁆𑀢𑀲𑁆𑀲𑀸𑀢𑀺 ‘‘𑀇𑀥 𑀲𑀻𑀮𑀁 𑀆𑀕𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀧𑀸𑀴𑀺𑀅𑀢𑁆𑀣𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀲𑁆𑀲. 𑀧𑀸𑀴𑀺𑀁 𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀢𑀤𑀢𑁆𑀣𑀩𑁄𑀥𑀺𑀦𑀺𑀁 𑀧𑀸𑀴𑀺𑀁 𑀬𑀸𑀣𑀸𑀯𑀢𑁄 𑀉𑀧𑀥𑀸𑀭𑁂𑀦𑁆𑀢𑀲𑁆𑀲. 𑀢𑀭𑀼𑀡𑀧𑀻𑀢𑀻𑀢𑀺 𑀲𑀜𑁆𑀚𑀸𑀢𑀫𑀢𑁆𑀢𑀸 𑀫𑀼𑀤𑀼𑀓𑀸 𑀧𑀻𑀢𑀺 𑀚𑀸𑀬𑀢𑀺. 𑀓𑀣𑀁 𑀚𑀸𑀬𑀢𑀺? 𑀬𑀣𑀸𑀤𑁂𑀲𑀺𑀢𑀁 𑀥𑀫𑁆𑀫𑀁 𑀉𑀧𑀥𑀸𑀭𑁂𑀦𑁆𑀢𑀲𑁆𑀲 𑀢𑀤𑀦𑀼𑀘𑁆𑀙𑀯𑀺𑀓𑀫𑁂𑀯 𑀅𑀢𑁆𑀢𑀦𑁄 𑀓𑀸𑀬𑀯𑀸𑀘𑀸𑀫𑀦𑁄𑀲𑀫𑀸𑀘𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀁 𑀧𑀢𑁆𑀢𑀲𑁆𑀲 𑀧𑀫𑁄𑀤𑀮𑀓𑁆𑀔𑀡𑀁 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺. 𑀢𑀼𑀝𑁆𑀞𑀸𑀓𑀸𑀭𑀪𑀽𑀢𑀸 𑀩𑀮𑀯𑀧𑀻𑀢𑀻𑀢𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸 𑀅𑀢𑀺𑀯𑀺𑀬 𑀢𑀼𑀝𑁆𑀞𑀸𑀓𑀸𑀭𑀪𑀽𑀢𑀸 𑀓𑀸𑀬𑀘𑀺𑀢𑁆𑀢𑀤𑀭𑀣𑀲𑁆𑀲 𑀧𑀲𑁆𑀲𑀫𑁆𑀪𑀦𑀲𑀫𑀢𑁆𑀣𑀢𑀸𑀬 𑀧𑀲𑁆𑀲𑀤𑁆𑀥𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀸 𑀩𑀮𑀧𑁆𑀧𑀢𑁆𑀢𑀸 𑀧𑀻𑀢𑀺 𑀚𑀸𑀬𑀢𑀺. 𑀬𑀲𑁆𑀫𑀸 𑀦𑀸𑀫𑀓𑀸𑀬𑁂 𑀧𑀲𑁆𑀲𑀤𑁆𑀥𑁂 𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀦𑀸𑀫𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀲𑀼𑀔𑀁 ¶ 𑀧𑀝𑀺𑀮𑀪𑀢𑀻𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑀫𑀸𑀥𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀘𑁂𑀢𑀲𑀺𑀓𑀁 𑀦𑀺𑀭𑀸𑀫𑀺𑀲𑀲𑀼𑀔𑀁 𑀧𑀝𑀺𑀮𑀪𑀢𑀺 𑀯𑀺𑀦𑁆𑀤𑀢𑀺. 𑀲𑀫𑀸𑀥𑀺𑀬𑀢𑀻𑀢𑀺 𑀏𑀢𑁆𑀣 𑀧𑀦 𑀦 𑀬𑁄 𑀓𑁄𑀘𑀺 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀅𑀦𑀼𑀢𑁆𑀢𑀭𑀲𑀫𑀸𑀥𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀳𑀢𑁆𑀢…𑀧𑁂… 𑀲𑀫𑀸𑀥𑀺𑀬𑀢𑀻’’𑀢𑀺 𑀆𑀳. ‘‘𑀅𑀬𑀁 𑀳𑀻’’𑀢𑀺𑀆𑀤𑀺 𑀢𑀲𑁆𑀲𑀁 𑀤𑁂𑀲𑀦𑀸𑀬𑀁 𑀢𑀸𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀧𑀝𑀺𑀮𑀸𑀪𑀲𑁆𑀲 𑀓𑀸𑀭𑀡𑀪𑀸𑀯𑀯𑀺𑀪𑀸𑀯𑀦𑀁, 𑀬𑀁 𑀢𑀣𑀸 𑀯𑀺𑀫𑀼𑀢𑁆𑀢𑀸𑀬𑀢𑀦𑀪𑀸𑀯𑁄. 𑀑𑀲𑀓𑁆𑀓𑀺𑀢𑀼𑀦𑁆𑀢𑀺 𑀤𑀲𑁆𑀲𑀺𑀢𑀼𑀁. 𑀲𑀫𑀸𑀥𑀺𑀬𑁂𑀯 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀧𑀸𑀴𑀺𑀬𑀸 𑀆𑀭𑀼𑀴𑁆𑀳𑁄 𑀲𑀫𑀸𑀥𑀺 𑀏𑀯 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀪𑀸𑀯𑀦𑀸𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺𑀆𑀤𑀺.

𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 ¶ 𑀲𑀩𑁆𑀩𑀲𑁄 𑀓𑀺𑀮𑁂𑀲𑀤𑀼𑀓𑁆𑀔𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀺𑀕𑀢𑀢𑁆𑀢𑀸 𑀲𑀸𑀢𑀺𑀲𑀬𑀫𑁂𑀢𑁆𑀣 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄’’𑀢𑀺. 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀯𑀲𑁂𑀦 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀲𑀦𑁆𑀢𑀧𑀡𑀻𑀢𑀢𑀭𑀪𑀸𑀯𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑁄…𑀧𑁂… 𑀲𑀼𑀔𑀯𑀺𑀧𑀸𑀓𑁄’’𑀢𑀺. 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁂𑀦 𑀮𑀤𑁆𑀥𑀢𑁆𑀢𑀸. ‘‘𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀪𑀸𑀯𑀁. 𑀮𑀤𑁆𑀥𑀢𑁆𑀢𑀸 𑀧𑀢𑁆𑀢𑀢𑁆𑀢𑀸 𑀢𑀩𑁆𑀪𑀸𑀯𑀁 𑀉𑀧𑀕𑀢𑀢𑁆𑀢𑀸. 𑀮𑁄𑀓𑀺𑀬𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀦𑀻𑀓𑀸𑀦𑀺 𑀦𑀻𑀯𑀭𑀡𑀧𑀞𑀫𑀚𑁆𑀛𑀸𑀦𑀦𑀺𑀓𑀦𑁆𑀢𑀺𑀆𑀤𑀻𑀦𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺, 𑀅𑀜𑁆𑀜𑁂 𑀓𑀺𑀮𑁂𑀲𑀸 𑀯𑀸𑀭𑁂𑀢𑀩𑁆𑀩𑀸. 𑀇𑀫𑀲𑁆𑀲 𑀧𑀦 𑀅𑀭𑀳𑀢𑁆𑀢𑀲𑀫𑀸𑀥𑀺𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀓𑀺𑀮𑁂𑀲𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀯𑀸𑀭𑁂𑀢𑀩𑁆𑀩𑀜𑁆𑀘 𑀅𑀢𑁆𑀣𑀻𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀘 𑀅𑀧𑁆𑀧𑀬𑁄𑀕𑁂𑀦 𑀅𑀥𑀺𑀕𑀢𑀢𑁆𑀢𑀸 𑀅𑀧𑁆𑀧𑀺𑀢𑀢𑁆𑀢𑀸 𑀘 𑀅𑀧𑀭𑀺𑀳𑀸𑀦𑀺𑀯𑀲𑁂𑀦 𑀯𑀸 𑀅𑀧𑁆𑀧𑀺𑀢𑀢𑁆𑀢𑀸 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸𑀢𑀺 𑀏𑀢𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀬𑀧𑀺 𑀲𑀢𑀺𑀬𑀸 𑀲𑀢𑀺𑀩𑀳𑀼𑀮𑀢𑀸𑀬 𑀲𑀢𑁄 𑀏𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦𑀸𑀢𑀺 𑀏𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲𑀢𑀺𑀬𑀸 𑀲𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑁂𑀲𑀽𑀢𑀺 𑀜𑀸𑀡𑁂𑀲𑀼.

𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀧𑀜𑁆𑀘𑀗𑁆𑀕𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁮-𑁨𑁯. 𑀅𑀝𑁆𑀞𑀫𑁂 ¶ 𑀓𑀭𑁄 𑀯𑀼𑀘𑁆𑀘𑀢𑀺 𑀧𑀼𑀧𑁆𑀨𑀲𑀫𑁆𑀪𑀯𑀁 ‘‘𑀕𑀩𑁆𑀪𑀸𑀲𑀬𑁂 𑀓𑀺𑀭𑀻𑀬𑀢𑀻’’𑀢𑀺 𑀓𑀢𑁆𑀯𑀸. 𑀓𑀭𑀢𑁄 𑀚𑀸𑀢𑁄 𑀓𑀸𑀬𑁄 𑀓𑀭𑀚𑀓𑀸𑀬𑁄, 𑀢𑀤𑀼𑀧𑀦𑀺𑀲𑁆𑀲𑀬𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑀫𑀼𑀤𑀸𑀬𑁄. 𑀓𑀸𑀫𑀁 𑀦𑀸𑀫𑀓𑀸𑀬𑁄𑀧𑀺 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀢𑀣𑀸𑀮𑀤𑁆𑀥𑀽𑀧𑀓𑀸𑀭𑁄, ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀦 𑀭𑀽𑀧𑀓𑀸𑀬𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀇𑀫𑀁 𑀓𑀭𑀚𑀓𑀸𑀬’’𑀦𑁆𑀢𑀺. 𑀅𑀪𑀺𑀲𑀦𑁆𑀤𑁂𑀢𑀻𑀢𑀺 𑀅𑀪𑀺𑀲𑀦𑁆𑀤𑀦𑀁 𑀓𑀭𑁄𑀢𑀺. 𑀢𑀁 𑀧𑀦 𑀅𑀪𑀺𑀲𑀦𑁆𑀤𑀦𑀁 𑀛𑀸𑀦𑀫𑀬𑁂𑀦 𑀧𑀻𑀢𑀺𑀲𑀼𑀔𑁂𑀦 𑀓𑀭𑀚𑀓𑀸𑀬𑀲𑁆𑀲 𑀢𑀺𑀦𑁆𑀢𑀪𑀸𑀯𑀸𑀧𑀸𑀤𑀦𑀁 𑀲𑀩𑁆𑀩𑀢𑁆𑀣𑀓𑀫𑁂𑀯 𑀮𑀽𑀔𑀪𑀸𑀯𑀸𑀧𑀦𑀬𑀦𑀦𑁆𑀢𑀺 𑀆𑀳 ‘‘𑀢𑁂𑀫𑁂𑀢𑀻’’𑀢𑀺𑀆𑀤𑀺. 𑀢𑀬𑀺𑀤𑀁 𑀅𑀪𑀺𑀲𑀦𑁆𑀤𑀦𑀁 𑀅𑀢𑁆𑀣𑀢𑁄 𑀬𑀣𑀸𑀯𑀼𑀢𑁆𑀢𑀧𑀻𑀢𑀺𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀧𑀭𑀺𑀧𑁆𑀨𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀲𑀦𑁆𑀤𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀩𑀸𑀯𑀸, 𑀢𑀲𑁆𑀲 𑀲𑀩𑁆𑀩𑀸𑀯𑀢𑁄. 𑀅𑀯𑀬𑀯𑀸𑀯𑀬𑀯𑀺𑀲𑀫𑁆𑀩𑀦𑁆𑀥𑁂 𑀅𑀯𑀬𑀯𑀺𑀦𑀺 𑀲𑀸𑀫𑀺𑀯𑀘𑀦𑀦𑁆𑀢𑀺 𑀅𑀯𑀬𑀯𑀯𑀺𑀲𑀬𑁄 𑀲𑀩𑁆𑀩-𑀲𑀤𑁆𑀤𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀓𑁄𑀝𑁆𑀞𑀸𑀲𑀯𑀢𑁄’’𑀢𑀺. 𑀅𑀨𑀼𑀝𑀁 𑀦𑀸𑀫 𑀦 𑀳𑁄𑀢𑀺 𑀬𑀢𑁆𑀣 𑀬𑀢𑁆𑀣 𑀓𑀫𑁆𑀫𑀚𑀭𑀽𑀧𑀁, 𑀢𑀢𑁆𑀣 𑀢𑀢𑁆𑀣 𑀘𑀺𑀢𑁆𑀢𑀚𑀭𑀽𑀧𑀲𑁆𑀲 𑀅𑀪𑀺𑀩𑁆𑀬𑀸𑀧𑀦𑀢𑁄. 𑀢𑁂𑀦𑀸𑀳 ‘‘𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀢𑀻’’𑀢𑀺𑀆𑀤𑀺.

𑀙𑁂𑀓𑁄𑀢𑀺 ¶ 𑀓𑀼𑀲𑀮𑁄. 𑀢𑀁 𑀧𑀦𑀲𑁆𑀲 𑀓𑁄𑀲𑀮𑁆𑀮𑀁 𑀦𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀁 𑀓𑀭𑀡𑁂 𑀧𑀺𑀡𑁆𑀟𑀺𑀓𑀭𑀡𑁂 𑀘 𑀲𑀫𑀢𑁆𑀣𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀝𑀺𑀩𑀮𑁄’’𑀢𑀺𑀆𑀤𑀺. 𑀓𑀁𑀲-𑀲𑀤𑁆𑀤𑁄 ‘‘𑀫𑀳𑀢𑀺𑀬𑀸 𑀓𑀁𑀲𑀧𑀸𑀢𑀺𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁬𑁧) 𑀲𑀼𑀯𑀡𑁆𑀡𑁂 𑀆𑀕𑀢𑁄.‘‘𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁩𑁪) 𑀓𑀺𑀢𑁆𑀢𑀺𑀫𑀮𑁄𑀳𑁂. 𑀓𑀢𑁆𑀣𑀘𑀺 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑁂 ‘‘𑀉𑀧𑀓𑀁𑀲𑁄 𑀦𑀸𑀫 𑀭𑀸𑀚𑀸𑀲𑀺, 𑀫𑀳𑀸𑀓𑀁𑀲𑀲𑁆𑀲 𑀅𑀢𑁆𑀭𑀚𑁄’’𑀢𑀺𑀆𑀤𑀺 (𑀚𑀸. 𑀅𑀝𑁆𑀞. 𑁪.𑁧𑁦.𑁧𑁬𑁪 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸). 𑀇𑀥 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀮𑁄𑀳𑁂𑀢𑀺 𑀆𑀳 ‘‘𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀪𑀸𑀚𑀦𑁂’’𑀢𑀺. 𑀲𑁆𑀦𑁂𑀳𑀸𑀦𑀼𑀕𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀅𑀦𑀼𑀧𑁆𑀧𑀯𑀺𑀲𑀦𑀯𑀲𑁂𑀦 𑀕𑀢𑀸 𑀉𑀧𑀕𑀢𑀸. 𑀲𑁆𑀦𑁂𑀳𑀧𑀭𑁂𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀧𑀭𑀺𑀢𑁄 𑀕𑀢𑀸 𑀲𑀫𑀦𑁆𑀢𑀢𑁄 𑀨𑀼𑀝𑀸. 𑀢𑀢𑁄 𑀏𑀯 𑀲𑀦𑁆𑀢𑀭𑀩𑀸𑀳𑀺𑀭𑀸 𑀨𑀼𑀝𑀸 𑀲𑁆𑀦𑁂𑀳𑁂𑀦. 𑀏𑀢𑁂𑀦 𑀲𑀩𑁆𑀩𑀲𑁄 𑀉𑀤𑀓𑁂𑀦 𑀢𑁂𑀫𑀺𑀢𑀪𑀸𑀯𑀫𑀸𑀳. 𑀦 𑀘 𑀧𑀕𑁆𑀖𑀭𑀺𑀡𑀻𑀢𑀺 𑀏𑀢𑁂𑀦 𑀢𑀺𑀦𑁆𑀢𑀲𑁆𑀲𑀧𑀺 𑀢𑀲𑁆𑀲 𑀖𑀦𑀣𑀤𑁆𑀥𑀪𑀸𑀯𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀦 𑀩𑀺𑀦𑁆𑀤𑀼𑀩𑀺𑀦𑁆𑀤𑀽’’𑀢𑀺𑀆𑀤𑀺.

𑀢𑀸𑀳𑀺 𑀢𑀸𑀳𑀺 𑀉𑀤𑀓𑀲𑀺𑀭𑀸𑀳𑀺 𑀉𑀩𑁆𑀪𑀺𑀚𑁆𑀚𑀢𑀻𑀢𑀺 𑀉𑀩𑁆𑀪𑀺𑀤𑀁, 𑀉𑀩𑁆𑀪𑀺𑀤𑀁 𑀉𑀤𑀓𑀁 𑀏𑀢𑀲𑁆𑀲𑀸𑀢𑀺 𑀉𑀩𑁆𑀪𑀺𑀤𑁄𑀤𑀓𑁄. 𑀉𑀩𑁆𑀪𑀺𑀦𑁆𑀦𑀉𑀤𑀓𑁄𑀢𑀺 𑀦𑀤𑀻𑀢𑀻𑀭𑁂 𑀔𑀢𑀓𑀽𑀧𑀓𑁄 𑀯𑀺𑀬 𑀉𑀩𑁆𑀪𑀺𑀚𑁆𑀚𑀦𑀓𑀉𑀤𑀓𑁄. 𑀉𑀕𑁆𑀕𑀘𑁆𑀙𑀦𑀉𑀤𑀓𑁄𑀢𑀺 𑀥𑀸𑀭𑀸𑀯𑀲𑁂𑀦 𑀉𑀝𑁆𑀞𑀳𑀦𑀉𑀤𑀓𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀩𑁆𑀪𑀺𑀤𑁄𑀤𑀓𑁄𑀯 ¶ 𑀭𑀳𑀤𑁄 𑀕𑀳𑀺𑀢𑁄, 𑀦 𑀇𑀢𑀭𑁄𑀢𑀺 𑀆𑀳 ‘‘𑀳𑁂𑀝𑁆𑀞𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑀜𑁆𑀳𑀻’’𑀢𑀺𑀆𑀤𑀺. 𑀥𑀸𑀭𑀸𑀦𑀺𑀧𑀸𑀢𑀩𑀼𑀩𑁆𑀩𑀼𑀴𑀓𑁂𑀳𑀻𑀢𑀺 𑀥𑀸𑀭𑀸𑀦𑀺𑀧𑀸𑀢𑁂𑀳𑀺 𑀘 𑀉𑀤𑀓𑀩𑀼𑀩𑁆𑀩𑀼𑀴𑁂𑀳𑀺 𑀘. ‘‘𑀨𑁂𑀡𑀧𑀝𑀮𑁂𑀳𑀺 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯 𑀅𑀧𑀭𑀺𑀓𑁆𑀔𑁄𑀪𑀢𑀸𑀬 𑀦𑀺𑀘𑁆𑀘𑀮𑀫𑁂𑀯, 𑀲𑀼𑀧𑁆𑀧𑀲𑀦𑁆𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀦𑁆𑀢𑀺 ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀓𑀁.

𑀉𑀧𑁆𑀧𑀮𑀸𑀦𑀻𑀢𑀺 𑀉𑀧𑁆𑀧𑀮𑀕𑀘𑁆𑀙𑀸𑀦𑀺. 𑀲𑁂𑀢𑀭𑀢𑁆𑀢𑀦𑀻𑀮𑁂𑀲𑀽𑀢𑀺 𑀉𑀧𑁆𑀧𑀮𑁂𑀲𑀼, 𑀲𑁂𑀢𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀉𑀧𑁆𑀧𑀮𑀁 𑀉𑀧𑁆𑀧𑀮𑀫𑁂𑀯 𑀲𑀸𑀫𑀜𑁆𑀜𑀕𑁆𑀕𑀳𑀡𑀢𑁄. 𑀲𑀢𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑀢-𑀲𑀤𑁆𑀤𑁄 𑀩𑀳𑀼𑀧𑀭𑀺𑀬𑀸𑀬𑁄 ‘‘𑀲𑀢𑀕𑁆𑀖𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦 𑀅𑀦𑁂𑀓𑀲𑀢𑀧𑀢𑁆𑀢𑀲𑁆𑀲𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀮𑁄𑀓𑁂 𑀧𑀦 𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀸𑀯 𑀅𑀕𑁆𑀕𑀸 𑀬𑀸𑀯 𑀘 𑀫𑀽𑀮𑀸 𑀉𑀤𑀓𑁂𑀦 𑀅𑀪𑀺𑀲𑀦𑁆𑀤𑀦𑀸𑀤𑀺𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 𑀉𑀤𑀓𑀸𑀦𑀼𑀕𑁆𑀕𑀢𑀕𑁆𑀕𑀳𑀡𑀁. 𑀇𑀥 𑀉𑀧𑁆𑀧𑀮𑀸𑀤𑀻𑀦𑀺 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀤𑀓𑀁 𑀯𑀺𑀬 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁.

𑀬𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑀸𑀳, 𑀢𑀜𑁆𑀘 𑀭𑀸𑀕𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀫𑀮𑀸𑀧𑀕𑀫𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀦𑀺𑀫𑁆𑀫𑀮𑀁, 𑀢𑀲𑁆𑀫𑀸 𑀆𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀏𑀯 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀧𑀭𑀺𑀬𑁄𑀤𑀸𑀢𑀢𑀸 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀖𑀁𑀲𑀦𑁂𑀦 𑀧𑀪𑀲𑁆𑀲𑀭𑀢𑀸 𑀯𑀺𑀬, 𑀢𑀲𑁆𑀫𑀸 𑀆𑀳 ‘‘𑀧𑀪𑀲𑁆𑀲𑀭𑀝𑁆𑀞𑁂𑀦 𑀧𑀭𑀺𑀬𑁄𑀤𑀸𑀢𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀇𑀤𑀦𑁆𑀢𑀺 𑀑𑀤𑀸𑀢𑀯𑀘𑀦𑀁. 𑀉𑀢𑀼𑀨𑀭𑀡𑀢𑁆𑀣𑀦𑁆𑀢𑀺 𑀉𑀢𑀼𑀦𑁄 𑀨𑀭𑀡𑀤𑀲𑁆𑀲𑀦𑀢𑁆𑀣𑀁. 𑀉𑀢𑀼𑀨𑀭𑀡𑀁 𑀦 𑀳𑁄𑀢𑀺 𑀲𑁂𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀗𑁆𑀔𑀡 ¶ …𑀧𑁂… 𑀩𑀮𑀯𑀁 𑀳𑁄𑀢𑀻’’𑀢𑀺. 𑀯𑀢𑁆𑀣𑀁 𑀯𑀺𑀬 𑀓𑀭𑀚𑀓𑀸𑀬𑁄𑀢𑀺 𑀬𑁄𑀕𑀺𑀦𑁄 𑀓𑀭𑀚𑀓𑀸𑀬𑁄 𑀯𑀢𑁆𑀣𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄 𑀉𑀢𑀼𑀨𑀭𑀡𑀲𑀤𑀺𑀲𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑁂𑀦 𑀨𑀭𑀺𑀢𑀩𑁆𑀩𑀢𑁆𑀢𑀸. 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀤𑀝𑁆𑀞𑀩𑁆𑀩𑀁 𑀉𑀢𑀼𑀨𑀭𑀡𑀝𑁆𑀞𑀸𑀦𑀺𑀬𑀲𑁆𑀲 𑀲𑀼𑀔𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀘 ‘‘𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸’’𑀢𑀺 𑀘𑁂𑀢𑁄𑀕𑀳𑀡𑁂𑀦 𑀛𑀸𑀦𑀲𑀼𑀔𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀉𑀢𑀼𑀨𑀭𑀡𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔’’𑀦𑁆𑀢𑀺. 𑀦𑀦𑀼 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀼𑀔𑀫𑁂𑀯 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀲𑀸𑀢𑀮𑀓𑁆𑀔𑀡𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀧𑀦𑁂𑀢𑁆𑀣 𑀉𑀧𑁂𑀓𑁆𑀔𑀸 ‘‘𑀲𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁨𑁩𑁨) ‘‘𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺.

𑀢𑀲𑁆𑀲 ¶ 𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀲𑀭𑀽𑀧𑀤𑀲𑁆𑀲𑀦𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁. 𑀲𑀫𑀪𑀭𑀺𑀢𑁄𑀢𑀺 𑀲𑀫𑀧𑀼𑀡𑁆𑀡𑁄.

𑀫𑀡𑁆𑀟𑀪𑀽𑀫𑀻𑀢𑀺 𑀧𑀧𑀸𑀯𑀡𑁆𑀡𑀪𑀽𑀫𑀺. 𑀬𑀢𑁆𑀣 𑀲𑀮𑀺𑀮𑀲𑀺𑀜𑁆𑀘𑀦𑁂𑀦 𑀯𑀺𑀦𑀸𑀯 𑀲𑀲𑁆𑀲𑀸𑀦𑀺 𑀞𑀺𑀢𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀬𑀼𑀕𑁂 𑀬𑁄𑀚𑁂𑀢𑀩𑁆𑀩𑀸𑀦𑀺 𑀬𑁄𑀕𑁆𑀕𑀸𑀦𑀺, 𑀢𑁂𑀲𑀁 𑀆𑀘𑀭𑀺𑀬𑁄 𑀬𑁄𑀕𑁆𑀕𑀸𑀘𑀭𑀺𑀬𑁄. 𑀢𑁂𑀲𑀁 𑀲𑀺𑀓𑁆𑀔𑀸𑀧𑀦𑀢𑁄 𑀳𑀢𑁆𑀣𑀺𑀆𑀤𑀬𑁄𑀧𑀺 ‘‘𑀬𑁄𑀕𑁆𑀕𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 𑀧𑀸𑀴𑀺𑀬𑀁 ‘‘𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺. 𑀬𑁂𑀦 𑀬𑁂𑀦𑀸𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀬𑁂𑀦 𑀬𑁂𑀦 𑀫𑀕𑁆𑀕𑁂𑀦. 𑀬𑀁 𑀬𑀁 𑀕𑀢𑀺𑀦𑁆𑀢𑀺 𑀚𑀯𑀲𑀫𑀚𑀯𑀸𑀤𑀺𑀪𑁂𑀤𑀸𑀲𑀼 𑀕𑀢𑀻𑀲𑀼 𑀬𑀁 𑀬𑀁 𑀕𑀢𑀺𑀁. 𑀦𑀯𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀜𑁆𑀘𑀗𑁆𑀕𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀸𑀕𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀢𑀺 𑀉𑀤𑁆𑀥𑀁 𑀉𑀕𑁆𑀕𑀢𑀢𑁆𑀢𑀸 𑀉𑀘𑁆𑀘𑁄 𑀧𑀢𑁆𑀣𑀝𑁄 𑀫𑀳𑀦𑁆𑀢𑁄 𑀯𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀲𑀤𑁆𑀤𑁄 𑀏𑀢𑁂𑀲𑀦𑁆𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸. 𑀯𑀘𑀻𑀖𑁄𑀲𑁄𑀧𑀺 𑀳𑀺 𑀩𑀳𑀽𑀳𑀺 𑀏𑀓𑀚𑁆𑀛𑀁 𑀧𑀯𑀢𑁆𑀢𑀺𑀢𑁄 𑀅𑀢𑁆𑀣𑀢𑁄 𑀲𑀤𑁆𑀤𑀢𑁄 𑀘 𑀤𑀼𑀭𑀯𑀩𑁄𑀥𑁄 𑀓𑁂𑀯𑀮𑀁 𑀫𑀳𑀸𑀦𑀺𑀕𑁆𑀖𑁄𑀲𑁄 𑀏𑀯 𑀳𑀼𑀢𑁆𑀯𑀸 𑀲𑁄𑀢𑀧𑀣𑀫𑀸𑀕𑀘𑁆𑀙𑀢𑀺. 𑀫𑀘𑁆𑀙𑀯𑀺𑀮𑁄𑀧𑁂𑀢𑀺 𑀫𑀘𑁆𑀙𑀸𑀦𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀺𑀬 𑀕𑀳𑀡𑁂, 𑀫𑀘𑁆𑀙𑀸𑀦𑀁 𑀯𑀸 𑀯𑀺𑀮𑀼𑀫𑁆𑀧𑀦𑁂. 𑀓𑁂𑀯𑀝𑁆𑀝𑀸𑀦𑀜𑁆𑀳𑀺 𑀫𑀘𑁆𑀙𑀧𑀘𑁆𑀙𑀺𑀞𑀧𑀺𑀢𑀝𑁆𑀞𑀸𑀦𑁂 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀥 𑀅𑀜𑁆𑀜𑀁 𑀏𑀓𑀁 𑀫𑀘𑁆𑀙𑀁 𑀤𑁂𑀳𑀺, 𑀏𑀓𑀁 𑀫𑀘𑁆𑀙𑀨𑀸𑀮𑀁 𑀤𑁂𑀳𑀻’’𑀢𑀺, ‘‘𑀏𑀢𑀲𑁆𑀲 𑀢𑁂 𑀫𑀳𑀸 𑀤𑀺𑀦𑁆𑀦𑁄, 𑀫𑀬𑁆𑀳𑀁 𑀔𑀼𑀤𑁆𑀤𑀓𑁄’’𑀢𑀺 𑀏𑀯𑀁 𑀉𑀘𑁆𑀘𑀸𑀲𑀤𑁆𑀤𑀁 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀫𑀘𑁆𑀙𑀕𑁆𑀕𑀳𑀡𑀢𑁆𑀣𑀁 𑀚𑀸𑀮𑁂 𑀧𑀓𑁆𑀔𑀺𑀢𑁆𑀢𑁂𑀧𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀓𑁂𑀯𑀝𑁆𑀝𑀸 𑀘𑁂𑀯 𑀅𑀜𑁆𑀜𑁂 𑀘 ‘‘𑀧𑀯𑀺𑀝𑁆𑀞𑁄 𑀕𑀳𑀺𑀢𑁄’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀲𑀼𑀘𑀺𑀲𑀼𑀔𑀦𑁆𑀢𑀺 𑀓𑀸𑀬𑀸𑀲𑀼𑀘𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀓𑀺𑀮𑁂𑀲𑀸𑀲𑀼𑀘𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 ¶ 𑀘 𑀅𑀲𑀼𑀘𑀺𑀲𑀦𑁆𑀦𑀺𑀲𑁆𑀲𑀺𑀢𑀲𑀼𑀔𑀁. 𑀦𑁂𑀓𑁆𑀔𑀫𑁆𑀫𑀲𑀼𑀔𑀲𑁆𑀲𑀸𑀢𑀺 𑀓𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀲𑀼𑀔𑀲𑁆𑀲. 𑀧𑀯𑀺𑀯𑁂𑀓𑀲𑀼𑀔𑀲𑁆𑀲𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀢𑁄 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀢𑁄 𑀘 𑀯𑀺𑀕𑀢𑀲𑁆𑀲 𑀲𑀼𑀔𑀲𑁆𑀲. 𑀉𑀧𑀲𑀫𑀲𑀼𑀔𑀲𑁆𑀲𑀸𑀢𑀺 𑀭𑀸𑀕𑀸𑀤𑀺𑀯𑀽𑀧𑀲𑀫𑀸𑀯𑀳𑀲𑁆𑀲 𑀲𑀼𑀔𑀲𑁆𑀲. 𑀲𑀫𑁆𑀩𑁄𑀥𑀲𑀼𑀔𑀦𑁆𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀲𑀫𑁆𑀩𑁄𑀥𑀲𑁆𑀲 𑀦𑀺𑀝𑁆𑀞𑀧𑁆𑀧𑀢𑁆𑀢𑀢𑁆𑀣𑀸𑀬 𑀲𑀼𑀔𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀸𑀕𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀗𑁆𑀕𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀫𑀦𑀯𑀕𑁆𑀕𑁄

𑁧. 𑀲𑀼𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀞𑀫𑁂 𑀲𑀢𑀓𑁆𑀓𑀓𑀽𑀢𑀺 𑀲𑀢𑀲𑀺𑀔𑀭𑁄, 𑀅𑀦𑁂𑀓𑀓𑀽𑀝𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑀲𑁆𑀲 𑀫𑀳𑀸𑀫𑁂𑀖𑀪𑀸𑀯𑀤𑀲𑁆𑀲𑀦𑀁. 𑀲𑁄 𑀳𑀺 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀢𑁄 𑀘𑀺𑀢𑁄 𑀘 𑀉𑀝𑁆𑀞𑀺𑀢𑁂𑀦 𑀯𑀮𑀸𑀳𑀓𑀓𑀽𑀝𑀲𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀤𑀲𑁆𑀲𑀦𑀁 𑀦𑀸𑀫 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀲𑁄 𑀳𑀺 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺𑀧𑀺 𑀢𑀁 𑀕𑁄𑀢𑁆𑀭𑀪𑀼 𑀧𑀞𑀫𑀢𑀭𑀁 𑀧𑀲𑁆𑀲𑀢𑀺, 𑀤𑀺𑀲𑁆𑀯𑀸 𑀧𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀅𑀓𑀭𑀡𑀢𑁄 𑀦 𑀢𑀁 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀜𑁆𑀳𑀺 𑀢𑀁 𑀜𑀸𑀡𑀁. 𑀫𑀕𑁆𑀕𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀲𑀸𑀫𑀜𑁆𑀜𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀦 𑀦𑀺𑀩𑁆𑀩𑀸𑀦𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦, 𑀢𑀲𑁆𑀫𑀸 𑀥𑀫𑁆𑀫𑀘𑀓𑁆𑀔𑀼𑀁 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦 𑀪𑀸𑀯𑀦𑀁 𑀅𑀧𑁆𑀧𑀢𑁆𑀢𑀁 𑀤𑀲𑁆𑀲𑀦𑀁, 𑀥𑀫𑁆𑀫𑀘𑀓𑁆𑀔𑀼𑀜𑁆𑀘 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀁 𑀢𑀤𑀪𑀺𑀲𑀫𑀬𑁄𑀢𑀺 𑀦𑀢𑁆𑀣𑁂𑀢𑁆𑀣 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑀼𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 ‘‘𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁧𑁭𑁯) 𑀅𑀭𑀺𑀬𑀓𑀦𑁆𑀢𑀸𑀦𑀻𑀢𑀺 𑀧𑀜𑁆𑀘𑀲𑀻𑀮𑀸𑀦𑀺 𑀆𑀕𑀢𑀸𑀦𑀺. 𑀅𑀭𑀺𑀬𑀓𑀦𑁆𑀢𑀸𑀦𑀺 ¶ 𑀳𑀺 𑀧𑀜𑁆𑀘𑀲𑀻𑀮𑀸𑀦𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀸𑀦𑀺 𑀧𑀺𑀬𑀸𑀦𑀺, 𑀪𑀯𑀦𑁆𑀢𑀭𑀕𑀢𑀸𑀧𑀺 𑀅𑀭𑀺𑀬𑀸 𑀢𑀸𑀦𑀺 𑀦 𑀯𑀺𑀚𑀳𑀦𑁆𑀢𑀺. 𑀇𑀥 𑀧𑀦 ‘‘𑀬𑀸𑀯𑀢𑀸, 𑀘𑀼𑀦𑁆𑀤, 𑀲𑀻𑀮𑀸𑀦𑀺 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺, 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺…𑀧𑁂… 𑀅𑀕𑁆𑀕𑁂 𑀢𑁂 𑀧𑀭𑀺𑀧𑀽𑀭𑀓𑀸𑀭𑀺𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀕𑁆𑀕𑀨𑀮𑀸𑀦𑀺 𑀲𑀻𑀮𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀆𑀳 ‘‘𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀻𑀢𑀺 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀲𑀻𑀮𑀸𑀦𑀻’’𑀢𑀺.

𑀘𑀼𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀕𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 ¶ 𑀲𑀩𑁆𑀩𑀧𑀞𑀫𑀁 𑀉𑀝𑁆𑀞𑀸𑀦𑀲𑀻𑀮𑀸𑀢𑀺 𑀭𑀢𑁆𑀢𑀺𑀬𑀸 𑀯𑀺𑀪𑀸𑀬𑀦𑀯𑁂𑀮𑀸𑀬 𑀲𑀸𑀫𑀺𑀓𑁂 𑀧𑀭𑀺𑀚𑀦𑁂 𑀲𑁂𑀬𑁆𑀬𑀸𑀬 𑀅𑀯𑀼𑀝𑁆𑀞𑀺𑀢𑁂 𑀲𑀩𑁆𑀩𑀧𑀞𑀫𑀁 𑀉𑀝𑁆𑀞𑀸𑀦𑀲𑀻𑀮𑀸. 𑀲𑀸𑀫𑀺𑀓𑀁 𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀅𑀕𑁆𑀕𑀺𑀤𑀟𑁆𑀠𑀸 𑀯𑀺𑀬 𑀧𑀞𑀫𑀫𑁂𑀯 𑀯𑀼𑀝𑁆𑀞𑀳𑀦𑁆𑀢𑀻𑀢𑀺 𑀯𑀸 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀺𑀬𑁄. 𑀓𑀺𑀁𑀓𑀸𑀭𑀦𑁆𑀢𑀺 𑀓𑀺𑀁𑀓𑀭𑀡𑀻𑀬𑀁, 𑀓𑀺𑀁𑀓𑀭𑀡𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀢𑀩𑁆𑀩𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀝𑀺𑀲𑁆𑀲𑀼𑀡𑀦𑁆𑀢𑀸 𑀯𑀺𑀘𑀭𑀦𑁆𑀢𑀻𑀢𑀺 𑀓𑀺𑀁𑀓𑀸𑀭𑀧𑁆𑀧𑀝𑀺𑀲𑁆𑀲𑀸𑀯𑀺𑀦𑀺𑀬𑁄. 𑀫𑀦𑀸𑀧𑀁𑀬𑁂𑀯 𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀫𑀦𑀸𑀧𑀘𑀸𑀭𑀺𑀦𑀺𑀬𑁄. 𑀧𑀺𑀬𑀫𑁂𑀯 𑀯𑀤𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀧𑀺𑀬𑀯𑀸𑀤𑀺𑀦𑀺𑀬𑁄.

𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 𑀢𑀢𑁆𑀭 𑀓𑀫𑁆𑀫𑁂 𑀲𑀸𑀥𑁂𑀢𑀩𑁆𑀩𑀉𑀧𑀸𑀬𑀪𑀽𑀢𑀸𑀬 𑀯𑀻𑀫𑀁𑀲𑀸𑀬. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀉𑀡𑁆𑀡𑀸𑀓𑀧𑁆𑀧𑀸𑀲𑀲𑀁𑀯𑀺𑀥𑀸𑀦𑁂’’𑀢𑀺𑀆𑀤𑀺. 𑀅𑀮𑀁 𑀓𑀸𑀢𑀼𑀦𑁆𑀢𑀺 𑀓𑀸𑀢𑀼𑀁 𑀲𑀫𑀢𑁆𑀣𑀸. 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀯𑀺𑀘𑀸𑀭𑁂𑀢𑀼𑀁 𑀲𑀫𑀢𑁆𑀣𑀸. 𑀢𑁂𑀦𑀸𑀳 ‘‘𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀅𑀢𑁆𑀢𑀦𑀸 𑀓𑀸𑀢𑀼𑀫𑁆𑀧𑀺 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀫𑁆𑀧𑀻’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀉𑀕𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀲𑀻𑀳𑀲𑁂𑀦𑀸𑀧𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁪-𑁩𑁫. 𑀘𑀢𑀼𑀢𑁆𑀣𑁂 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀅𑀲𑀫𑁆𑀧𑀭𑀸𑀬𑀺𑀓𑀢𑀸𑀬 𑀲𑀸𑀫𑀁 𑀤𑀝𑁆𑀞𑀩𑁆𑀩𑀁. 𑀲𑀬𑀁 𑀅𑀦𑀼𑀪𑀯𑀺𑀢𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯 𑀢𑀺𑀝𑁆𑀞𑀢𑀻𑀢𑀺 ‘‘𑀤𑀸𑀦𑀁 𑀦𑀸𑀫 𑀲𑀸𑀥𑀼 𑀲𑀼𑀦𑁆𑀤𑀭𑀁, 𑀩𑀼𑀤𑁆𑀥𑀸𑀤𑀻𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀲𑀢𑁆𑀣’’𑀦𑁆𑀢𑀺 𑀏𑀯𑀁 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯 𑀦 𑀢𑀺𑀝𑁆𑀞𑀢𑀺. 𑀬𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀲𑁆𑀲 𑀤𑁂𑀢𑀺. 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸𑀢𑀺 𑀢𑀩𑁆𑀩𑀺𑀲𑀬𑀁 𑀮𑁄𑀪𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑁆𑀢𑁄 𑀢𑀲𑁆𑀲 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺. 𑀢𑁂𑀦 𑀅𑀦𑀥𑀺𑀪𑀯𑀦𑀻𑀬𑀢𑁆𑀢𑀸 𑀦 𑀤𑀸𑀲𑁄 𑀦 𑀲𑀳𑀸𑀬𑁄𑀢𑀺. 𑀢𑀢𑁆𑀣 𑀢𑀤𑀼𑀪𑀬𑀁 𑀅𑀦𑁆𑀯𑀬𑀢𑁄 ¶ 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀲𑁆𑀲 𑀉𑀧𑀕𑀢𑀢𑁆𑀢𑀸. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀲𑁆𑀲 𑀧𑀺𑀬𑀪𑀸𑀯𑀸𑀯𑀺𑀲𑁆𑀲𑀚𑁆𑀚𑀦𑀢𑁄. 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀢𑁆𑀣 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄. 𑀅𑀣 𑀯𑀸 𑀬𑁄 𑀤𑀸𑀦𑀲𑀻𑀮𑀢𑀸𑀬 𑀤𑀸𑀬𑀓𑁄 𑀧𑀼𑀕𑁆𑀕𑀮𑁄, 𑀲𑁄 𑀤𑀸𑀦𑁂 𑀧𑀯𑀢𑁆𑀢𑀺𑀪𑁂𑀤𑁂𑀦 𑀤𑀸𑀦𑀤𑀸𑀲𑁄, 𑀤𑀸𑀦𑀲𑀳𑀸𑀬𑁄, 𑀤𑀸𑀦𑀧𑀢𑀻𑀢𑀺 𑀢𑀺𑀧𑁆𑀧𑀓𑀸𑀭𑁄 𑀳𑁄𑀢𑀺. 𑀢𑀤𑀲𑁆𑀲 𑀢𑀺𑀧𑁆𑀧𑀓𑀸𑀭𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀦𑀁, 𑀅𑀦𑁆𑀦𑀧𑀸𑀦𑀸𑀤𑀺.

𑀢𑀢𑁆𑀣 ¶ 𑀬𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀡𑁆𑀳𑀸𑀥𑀺𑀧𑀦𑁆𑀦𑀢𑀸𑀬 𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀦𑀢𑁄 𑀤𑀸𑀲𑁄 𑀯𑀺𑀬 𑀳𑁄𑀢𑀺. 𑀬𑀁 𑀧𑀭𑁂𑀲𑀁 𑀤𑀻𑀬𑀢𑀺, 𑀢𑀢𑁆𑀣𑀸𑀧𑀺 𑀅𑀦𑁆𑀦𑀧𑀸𑀦𑀲𑀸𑀫𑀜𑁆𑀜𑁂𑀦 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀲𑁄 𑀳𑀼𑀢𑁆𑀯𑀸’’𑀢𑀺. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀧𑀭𑁂𑀲𑀁 𑀤𑀸𑀢𑀩𑁆𑀩𑀲𑁆𑀲 𑀘 𑀲𑀫𑀲𑀫𑀁 𑀞𑀧𑀦𑀢𑁄. 𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺 𑀲𑀬𑀁 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀢𑁄. 𑀅𑀧𑀭𑁄 𑀦𑀬𑁄 𑁋 𑀬𑁄 𑀅𑀢𑁆𑀢𑀦𑀸 𑀧𑀡𑀻𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑁂𑀲𑀁 𑀦𑀺𑀳𑀻𑀦𑀁 𑀤𑁂𑀢𑀺, 𑀲𑁄 𑀤𑀸𑀦𑀤𑀸𑀲𑁄 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀦𑀺𑀳𑀻𑀦𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑁄 𑀬𑀸𑀤𑀺𑀲𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀸𑀤𑀺𑀲𑀫𑁂𑀯 𑀧𑀭𑁂𑀲𑀁 𑀤𑁂𑀢𑀺, 𑀲𑁄 𑀤𑀸𑀦𑀲𑀳𑀸𑀬𑁄 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀳𑀻𑀦𑀸𑀥𑀺𑀓𑀪𑀸𑀯𑀯𑀺𑀯𑀚𑁆𑀚𑀦𑁂𑀦 𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑁄 𑀅𑀢𑁆𑀢𑀦𑀸 𑀦𑀺𑀳𑀻𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑁂𑀲𑀁 𑀧𑀡𑀻𑀢𑀁 𑀤𑁂𑀢𑀺, 𑀲𑁄 𑀤𑀸𑀦𑀧𑀢𑀺 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀲𑁂𑀝𑁆𑀞𑀪𑀸𑀯𑀸𑀧𑀢𑁆𑀢𑀺𑀢𑁄.

𑀦𑀺𑀢𑁆𑀢𑁂𑀚𑀪𑀽𑀢𑁄 𑀢𑁂𑀚𑀳𑀸𑀦𑀺𑀧𑁆𑀧𑀢𑁆𑀢𑀺𑀬𑀸. 𑀲𑀳 𑀩𑁆𑀬𑀢𑀺 𑀕𑀘𑁆𑀙𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀧𑀯𑀢𑁆𑀢𑀦𑀓𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸, 𑀲𑀳𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀲𑀳𑀪𑀸𑀯𑀁 𑀏𑀓𑀻𑀪𑀸𑀯𑀁 𑀕𑀢𑀸’’𑀢𑀺. 𑀅𑀲𑀺𑀢𑀲𑁆𑀲𑀸𑀢𑀺 𑀯𑀸 𑀅𑀩𑀦𑁆𑀥𑀲𑁆𑀲, 𑀢𑀡𑁆𑀳𑀸𑀩𑀦𑁆𑀥𑀦𑁂𑀦 𑀅𑀩𑀦𑁆𑀥𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀻𑀳𑀲𑁂𑀦𑀸𑀧𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁭. 𑀓𑀸𑀮𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁬-𑁩𑁭. 𑀙𑀝𑁆𑀞𑁂 𑀆𑀭𑀸𑀫𑀢𑁄𑀢𑀺 𑀨𑀮𑀸𑀭𑀸𑀫𑀢𑁄. 𑀧𑀞𑀫𑀼𑀧𑁆𑀧𑀦𑁆𑀦𑀸𑀦𑀻𑀢𑀺 𑀲𑀩𑁆𑀩𑀧𑀞𑀫𑀁 𑀲𑀼𑀚𑀸𑀢𑀸𑀦𑀺. 𑀪𑀸𑀲𑀺𑀢𑀜𑁆𑀜𑀽𑀢𑀺 𑀪𑀺𑀓𑁆𑀔𑀽 𑀖𑀭𑀤𑁆𑀯𑀸𑀭𑁂 𑀞𑀺𑀢𑀸 𑀓𑀺𑀜𑁆𑀘𑀸𑀧𑀺 𑀢𑀼𑀡𑁆𑀳𑀻 𑀳𑁄𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 ‘‘𑀪𑀺𑀓𑁆𑀔𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺 𑀦𑀸𑀫 𑀅𑀭𑀺𑀬𑀸𑀬 𑀬𑀸𑀘𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀉𑀤𑁆𑀥𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦𑀁 𑀬𑀸𑀘𑀦𑀸’’𑀢𑀺. 𑀢𑀢𑁆𑀭 𑀬𑁂 ‘‘𑀫𑀬𑀁 𑀧𑀘𑀸𑀫, 𑀇𑀫𑁂 𑀦 𑀧𑀘𑀦𑁆𑀢𑀺, 𑀧𑀘𑀫𑀸𑀦𑁂 𑀧𑀢𑁆𑀯𑀸 𑀅𑀮𑀪𑀦𑁆𑀢𑀸 𑀓𑀼𑀳𑀺𑀁 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 ¶ 𑀤𑁂𑀬𑁆𑀬𑀥𑀫𑁆𑀫𑀁 𑀲𑀁𑀯𑀺𑀪𑀚𑀦𑁆𑀢𑀺, 𑀢𑁂 𑀪𑀸𑀲𑀺𑀢𑀜𑁆𑀜𑀽 𑀦𑀸𑀫 𑀜𑀢𑁆𑀯𑀸 𑀓𑀢𑁆𑀢𑀩𑁆𑀩𑀲𑁆𑀲 𑀓𑀭𑀡𑀢𑁄. 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀢𑀺 𑀤𑀸𑀢𑀼𑀁 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂. 𑀅𑀧𑁆𑀧𑀝𑀺𑀯𑀸𑀦𑀘𑀺𑀢𑁆𑀢𑁄𑀢𑀺 𑀅𑀦𑀺𑀯𑀢𑁆𑀢𑀦𑀘𑀺𑀢𑁆𑀢𑁄. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀓𑀸𑀮𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 ¶ 𑀅𑀦𑀼𑀓𑀫𑁆𑀧𑀦𑁆𑀢𑀻𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀏𑀯𑀁 𑀳𑀺𑀢𑀨𑀭𑀡𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺. 𑀅𑀧𑀺𑀘 𑀉𑀧𑀝𑁆𑀞𑀸𑀓𑀸𑀦𑀁 𑀕𑁂𑀳𑀁 𑀅𑀜𑁆𑀜𑁂 𑀲𑀻𑀮𑀯𑀦𑁆𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀕𑀳𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀸𑀧𑀺 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺 𑀦𑀸𑀫. 𑀦𑀻𑀘𑀯𑀼𑀢𑁆𑀢𑀺𑀦𑁆𑀢𑀺 𑀧𑀡𑀺𑀧𑀸𑀢𑀲𑀻𑀮𑀁. 𑀓𑁄𑀥𑀫𑀸𑀦𑀣𑀤𑁆𑀥𑀢𑀸𑀬 𑀭𑀳𑀺𑀢𑀦𑁆𑀢𑀺 𑀓𑁄𑀥𑀫𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀬𑁄 𑀣𑀤𑁆𑀥𑀪𑀸𑀯𑁄 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀮𑀓𑁆𑀔𑀡𑁄, 𑀢𑁂𑀦 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀭𑀘𑁆𑀘𑁂𑀦𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑁄𑀭𑀘𑁆𑀘𑀁? 𑀬𑁄 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀭𑀘𑁆𑀘𑀁. 𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄 𑀲𑁄𑀭𑀘𑁆𑀘’’𑀦𑁆𑀢𑀺 𑀏𑀯𑀫𑀸𑀕𑀢𑁂𑀦 𑀲𑀻𑀮𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀲𑁄𑀭𑀢𑀪𑀸𑀯𑁂𑀦. 𑀲𑀔𑀺𑀮𑀦𑁆𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬𑀁? 𑀬𑀸 𑀲𑀸 𑀯𑀸𑀘𑀸 𑀣𑀤𑁆𑀥𑀓𑀸 𑀓𑀓𑁆𑀓𑀲𑀸 𑀨𑀭𑀼𑀲𑀸 𑀓𑀝𑀼𑀓𑀸 𑀅𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀧𑀳𑀸𑀬 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀬𑀸 𑀢𑀢𑁆𑀣 𑀲𑀡𑁆𑀳𑀯𑀸𑀘𑀢𑀸 𑀲𑀔𑀺𑀮𑀯𑀸𑀘𑀢𑀸 𑀅𑀨𑀭𑀼𑀲𑀯𑀸𑀘𑀢𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀸𑀔𑀮𑁆𑀬’’𑀦𑁆𑀢𑀺 (𑀥. 𑀲. 𑁧𑁩𑁫𑁦) 𑀏𑀯𑀁 𑀯𑀼𑀢𑁆𑀢𑁂𑀦 𑀲𑀫𑁆𑀫𑁄𑀤𑀓𑀫𑀼𑀤𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀢𑁂𑀦𑀸𑀳 ‘‘𑀲𑀔𑀺𑀮𑀦𑁆𑀢𑀺 𑀲𑀫𑁆𑀫𑁄𑀤𑀓’’𑀦𑁆𑀢𑀺.

𑀲𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀧𑀼𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯-𑁪𑁦. 𑀦𑀯𑀫𑁂 𑀪𑀢𑁄𑀢𑀺 𑀧𑁄𑀲𑀺𑀢𑁄. 𑀢𑀁 𑀧𑀦 𑀪𑀭𑀡𑀁 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀼𑀔𑀧𑀘𑁆𑀘𑀬𑀽𑀧𑀳𑀭𑀡𑁂𑀦 𑀤𑀼𑀓𑁆𑀔𑀧𑀘𑁆𑀘𑀬𑀸𑀧𑀳𑀭𑀡𑁂𑀦 𑀘 𑀧𑀯𑀢𑁆𑀢𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀫𑁆𑀳𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀸𑀤𑀯𑀟𑁆𑀠𑀦𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀔𑁂𑀦 𑀲𑀺𑀗𑁆𑀖𑀸𑀦𑀺𑀓𑀸𑀧𑀦𑀬𑀦𑀦𑀳𑀸𑀧𑀦𑀫𑀡𑁆𑀟𑀦𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀔𑁂𑀢𑁆𑀢𑀸𑀤𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀭𑀓𑁆𑀔𑀺𑀢𑀁 𑀢𑁂𑀲𑀁 𑀧𑀭𑀫𑁆𑀧𑀭𑀸𑀬 𑀞𑀺𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀁…𑀧𑁂… 𑀓𑀼𑀮𑀯𑀁𑀲𑁄 𑀘𑀺𑀭𑀁 𑀞𑀲𑁆𑀲𑀢𑀻’’𑀢𑀺. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀬𑀲𑁆𑀫𑀸 𑀤𑀸𑀬𑀚𑁆𑀚𑀧𑁆𑀧𑀝𑀺𑀮𑀸𑀪𑀲𑁆𑀲 𑀬𑁄𑀕𑁆𑀬𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑁄𑀬𑁂𑀯 ¶ 𑀤𑀸𑀬𑀲𑁆𑀲 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀺, 𑀦 𑀇𑀢𑀭𑁄𑀢𑀺 𑀆𑀳 ‘‘𑀓𑀼𑀮𑀯𑀁𑀲𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺 ¶ . 𑀅𑀢𑁆𑀢𑀦𑀸 𑀤𑀸𑀬𑀚𑁆𑀚𑀸𑀭𑀳𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀢𑀸𑀦𑀁 𑀤𑀸𑀬𑀚𑁆𑀚𑀸𑀭𑀳𑀁 𑀓𑀭𑁄𑀦𑁆𑀢𑁄. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀅𑀯𑀢𑁆𑀢𑀫𑀸𑀦𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂 𑀤𑀸𑀭𑀓𑁂 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 𑀅𑀧𑀼𑀢𑁆𑀢𑁂 𑀓𑀭𑁄𑀦𑁆𑀢𑀺, 𑀢𑁂 𑀤𑀸𑀬𑀚𑁆𑀚𑀸𑀭𑀳𑀸 𑀦 𑀳𑁄𑀦𑁆𑀢𑀺. 𑀑𑀯𑀸𑀤𑁂 𑀯𑀢𑁆𑀢𑀫𑀸𑀦𑁂 𑀧𑀦 𑀓𑀼𑀮𑀲𑀦𑁆𑀢𑀓𑀲𑁆𑀲 𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑀺. 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀫𑀢𑀤𑀺𑀯𑀲𑀢𑁄 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀼𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀫𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀼𑀡𑁆𑀟𑀭𑀸𑀚𑀯𑀕𑁆𑀕𑁄

𑁧-𑁨. 𑀆𑀤𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁧-𑁪𑁨. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀻𑀢𑀺 𑀯𑀸 𑀉𑀝𑁆𑀞𑀸𑀦𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀅𑀥𑀺𑀕𑀢𑁂𑀳𑀺. 𑀢𑀢𑁆𑀣 𑀉𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁. 𑀯𑀻𑀭𑀺𑀬𑀦𑁆𑀢𑀺 𑀘𑁂𑀢𑀲𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀝𑁆𑀞𑀸𑀦𑀦𑁆𑀢𑀺 𑀯𑀸 𑀪𑁄𑀕𑀼𑀧𑁆𑀧𑀸𑀤𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸. 𑀯𑀻𑀭𑀺𑀬𑀁 𑀢𑀚𑁆𑀚𑁄 𑀉𑀲𑁆𑀲𑀸𑀳𑁄. 𑀧𑀻𑀡𑀺𑀢𑀦𑁆𑀢𑀺 𑀥𑀸𑀢𑀁 𑀲𑀼𑀢𑀺𑀢𑁆𑀢𑀁. 𑀢𑀣𑀸𑀪𑀽𑀢𑁄 𑀧𑀦 𑀬𑀲𑁆𑀫𑀸 𑀣𑀽𑀮𑀲𑀭𑀻𑀭𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀣𑀽𑀮𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀆𑀤𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀇𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀢𑀢𑀺𑀬𑁂 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀻𑀢𑀺 ‘‘𑀏𑀢𑀸𑀦𑀺 𑀆𑀬𑀼𑀆𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦 𑀅𑀧𑁆𑀧𑀫𑀸𑀤𑁄 𑀓𑀸𑀢𑀩𑁆𑀩𑁄’’𑀢𑀺 𑀅𑀧𑁆𑀧𑀫𑀸𑀤𑀫𑁂𑀯 𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀬𑀲𑁆𑀫𑀸 𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀢𑀲𑁆𑀫𑀸 𑀆𑀬𑀼𑀆𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦 𑀅𑀧𑁆𑀧𑀫𑀸𑀤𑁄𑀯 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀽’’𑀢𑀺 𑀧𑀤𑀲𑁆𑀲 ‘‘𑀅𑀧𑁆𑀧𑀫𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 ¶ 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀬𑀲𑁆𑀫𑀸 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀉𑀪𑁄 𑀅𑀢𑁆𑀣𑁂 𑀅𑀥𑀺𑀕𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀬𑀼𑀆𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦 𑀅𑀧𑁆𑀧𑀫𑀸𑀤𑁄𑀯 ¶ 𑀓𑀸𑀢𑀩𑁆𑀩𑁄. 𑀤𑀼𑀢𑀺𑀬𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺. 𑀓𑀢𑁆𑀣𑀸𑀢𑀺? 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀅𑀧𑁆𑀧𑀫𑀢𑁆𑀢𑁄 𑀉𑀪𑁄 𑀅𑀢𑁆𑀣𑁂 𑀅𑀥𑀺𑀕𑁆𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀧𑁆𑀧𑀝𑀺𑀮𑀸𑀪𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀳𑀺𑀢𑀧𑁆𑀧𑀝𑀺𑀮𑀸𑀪𑁂𑀦.

𑀇𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀦𑀸𑀧𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀫𑀦𑁄𑀫𑀬𑀦𑁆𑀢𑀺 𑀆𑀳 ‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀏𑀓𑀁 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑁂𑀯𑀓𑀸𑀬’’𑀦𑁆𑀢𑀺. 𑀲𑀢𑀺𑀧𑀺 𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀫𑀦𑁄𑀫𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀸𑀯𑀘𑀭𑀲𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀸𑀫𑀪𑀯𑁂 𑀑𑀧𑀧𑀸𑀢𑀺𑀓𑀲𑀢𑁆𑀢𑀸𑀦𑀫𑁆𑀧𑀺 𑀫𑀦𑁄𑀫𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑀢𑁆𑀣 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀸𑀲𑀗𑁆𑀓𑀸𑀬 𑀏𑀯 𑀅𑀪𑀸𑀯𑀢𑁄 ‘‘𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀅𑀯𑀥𑀸𑀭𑀡𑀸𑀲𑀫𑁆𑀪𑀯𑀢𑁄. 𑀦𑀺𑀭𑀼𑀴𑁆𑀳𑁄 𑀯𑀸𑀬𑀁 𑀮𑁄𑀓𑁂 𑀫𑀦𑁄𑀫𑀬𑀯𑁄𑀳𑀸𑀭𑁄 𑀭𑀽𑀧𑀸𑀯𑀘𑀭𑀲𑀢𑁆𑀢𑁂𑀲𑀼. 𑀢𑀣𑀸 𑀳𑀺 ‘‘𑀅𑀦𑁆𑀦𑀫𑀬𑁄, 𑀧𑀸𑀡𑀫𑀬𑁄, 𑀫𑀦𑁄𑀫𑀬𑁄, 𑀆𑀦𑀦𑁆𑀤𑀫𑀬𑁄, 𑀯𑀺𑀜𑁆𑀜𑀸𑀡𑀫𑀬𑁄’’𑀢𑀺 𑀧𑀜𑁆𑀘𑀥𑀸 𑀅𑀢𑁆𑀢𑀸𑀦𑀁 𑀯𑁂𑀤𑀯𑀸𑀤𑀺𑀦𑁄𑀧𑀺 𑀯𑀤𑀦𑁆𑀢𑀺. 𑀉𑀘𑁆𑀙𑁂𑀤𑀯𑀸𑀤𑀺𑀦𑁄𑀧𑀺 𑀯𑀤𑀦𑁆𑀢𑀺 ‘‘𑀤𑀺𑀩𑁆𑀩𑁄 𑀭𑀽𑀧𑀻 𑀫𑀦𑁄𑀫𑀬𑁄’’𑀢𑀺 (𑀤𑀻. 𑀦𑀺. 𑁧.𑁮𑁭). 𑀢𑀻𑀲𑀼 𑀯𑀸 𑀓𑀼𑀮𑀲𑀫𑁆𑀧𑀢𑁆𑀢𑀻𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀔𑀢𑁆𑀢𑀺𑀬𑀯𑁂𑀲𑁆𑀲𑀲𑀗𑁆𑀔𑀸𑀢𑁂𑀲𑀼 𑀲𑀫𑁆𑀧𑀦𑁆𑀦𑀓𑀼𑀮𑁂𑀲𑀼. 𑀙𑀲𑀼 𑀯𑀸 𑀓𑀸𑀫𑀲𑀕𑁆𑀕𑁂𑀲𑀽𑀢𑀺 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼.

𑀫𑀦𑀸𑀧𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁫-𑁪𑁬. 𑀧𑀜𑁆𑀘𑀫𑁂 𑀅𑀲𑀗𑁆𑀔𑁂𑀬𑁆𑀬𑁄𑀢𑀺 𑀆𑀴𑁆𑀳𑀓𑀕𑀡𑀦𑀸𑀬 𑀅𑀲𑀗𑁆𑀔𑁂𑀬𑁆𑀬𑁄. 𑀬𑁄𑀚𑀦𑀯𑀲𑁂𑀦 𑀧𑀦𑀲𑁆𑀲 𑀲𑀗𑁆𑀔𑀸 𑀅𑀢𑁆𑀣𑀺 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀉𑀧𑀭𑀺 𑀆𑀓𑀸𑀲𑁂𑀦 𑀧𑀭𑀺𑀲𑀫𑀦𑁆𑀢𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦 𑀫𑀚𑁆𑀛𑁂 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀓𑁂𑀳𑀺 𑀤𑀻𑀧𑀧𑀩𑁆𑀩𑀢𑀧𑀭𑀺𑀬𑀦𑁆𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀚𑀸𑀦𑀦𑁆𑀢𑁂𑀦 𑀬𑁄𑀚𑀦𑀢𑁄 𑀲𑀗𑁆𑀔𑀸𑀢𑀼𑀁 𑀲𑀓𑁆𑀓𑀸𑀢𑀺 𑀓𑀢𑁆𑀯𑀸. 𑀫𑀳𑀸𑀲𑀭𑀻𑀭𑀫𑀘𑁆𑀙𑀓𑀼𑀫𑁆𑀪𑀻𑀮𑀬𑀓𑁆𑀔𑀭𑀓𑁆𑀔𑀲𑀫𑀳𑀸𑀦𑀸𑀕𑀤𑀸𑀦𑀯𑀸𑀤𑀻𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀩𑀮𑀯𑀸𑀫𑀼𑀔𑀧𑀸𑀢𑀸𑀮𑀸𑀤𑀻𑀦𑀁 ¶ 𑀅𑀯𑀺𑀜𑁆𑀜𑀸𑀡𑀓𑀸𑀦𑀁 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀩𑀳𑀼𑀪𑁂𑀭𑀯𑀁 ¶ . 𑀧𑀼𑀣𑀽𑀢𑀺 𑀩𑀳𑀽. 𑀲𑀯𑀦𑁆𑀢𑀻𑀢𑀺 𑀲𑀦𑁆𑀤𑀫𑀸𑀦𑀸. 𑀉𑀧𑀬𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀥𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁭-𑁪𑁮. 𑀲𑀢𑁆𑀢𑀫𑁂 𑀲𑀤𑁆𑀥𑀸𑀢𑀺 𑀫𑀕𑁆𑀕𑁂𑀦𑀸𑀕𑀢𑀸 𑀲𑀤𑁆𑀥𑀸. 𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀦𑁆𑀢𑀺 𑀓𑀮𑁆𑀬𑀸𑀡𑀲𑀻𑀮𑀁 𑀦𑀸𑀫 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀺𑀬𑀓𑀦𑁆𑀢𑀁 𑀲𑀻𑀮𑀁 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀓𑀲𑀻𑀮𑀫𑁆𑀧𑀺 𑀅𑀓𑀦𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀪𑀯𑀦𑁆𑀢𑀭𑁂𑀧𑀺 𑀅𑀧𑁆𑀧𑀳𑀻𑀦𑀁 𑀧𑀜𑁆𑀘𑀲𑀻𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀥𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀧𑀢𑀺𑀢𑀓𑁆𑀔𑀦𑁆𑀥𑁄𑀢𑀺 𑀲𑀫𑁆𑀫𑀼𑀔𑀸 𑀓𑀺𑀜𑁆𑀘𑀺 𑀑𑀮𑁄𑀓𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀥𑁄𑀫𑀼𑀔𑁄. 𑀦𑀺𑀧𑁆𑀧𑀝𑀺𑀪𑀸𑀦𑁄𑀢𑀺 𑀲𑀳𑀥𑀫𑁆𑀫𑀺𑀓𑀁 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑀢𑁄 𑀦𑀺𑀧𑁆𑀧𑀝𑀺𑀪𑀸𑀦𑁄 𑀧𑀝𑀺𑀪𑀸𑀦𑀭𑀳𑀺𑀢𑁄.

𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀸𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀅𑀚𑁆𑀛𑁄𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀫𑀢𑁆𑀢𑀸𑀬 𑀢𑀡𑁆𑀳𑀸𑀫𑀼𑀘𑁆𑀙𑀸𑀬 𑀫𑀼𑀘𑁆𑀙𑀺𑀢𑁄, 𑀫𑀼𑀘𑁆𑀙𑀁 𑀫𑁄𑀳𑀁 𑀧𑀫𑀸𑀤𑀁 𑀆𑀧𑀦𑁆𑀦𑁄. 𑀢𑁂𑀦𑀸𑀳 ‘‘𑀕𑀺𑀮𑀺𑀢𑁆𑀯𑀸…𑀧𑁂… 𑀅𑀢𑀺𑀭𑁂𑀓𑀫𑀼𑀘𑁆𑀙𑀸𑀬 𑀢𑀡𑁆𑀳𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀫𑀳𑀘𑁆𑀘𑀸𑀢𑀺 𑀫𑀳𑀢𑀺𑀬𑀸. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦𑀸’’𑀢𑀺.

𑀦𑀸𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀼𑀡𑁆𑀟𑀭𑀸𑀚𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀦𑀻𑀯𑀭𑀡𑀯𑀕𑁆𑀕𑁄

𑁧-𑁨. 𑀆𑀯𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁧-𑁫𑁨. 𑀤𑀼𑀢𑀺𑀬𑀲𑁆𑀲 ¶ ¶ 𑀧𑀞𑀫𑁂 𑀆𑀯𑀭𑀦𑁆𑀢𑀻𑀢𑀺 𑀆𑀯𑀭𑀡𑀸, 𑀦𑀻𑀯𑀸𑀭𑀬𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀏𑀢𑁆𑀣 𑀘 𑀆𑀯𑀭𑀦𑁆𑀢𑀻𑀢𑀺 𑀓𑀼𑀲𑀮𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀁 𑀆𑀤𑀺𑀢𑁄 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀦𑀻𑀯𑀸𑀭𑀬𑀦𑁆𑀢𑀻𑀢𑀺 𑀦𑀺𑀭𑀯𑀲𑁂𑀲𑀢𑁄 𑀯𑀸𑀭𑀬𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀆𑀯𑀭𑀡𑀯𑀲𑁂𑀦𑀸𑀢𑀺 𑀆𑀤𑀺𑀢𑁄 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀯𑀸𑀭𑀡𑀯𑀲𑁂𑀦. 𑀦𑀻𑀯𑀭𑀡𑀯𑀲𑁂𑀦𑀸𑀢𑀺 𑀦𑀺𑀭𑀯𑀲𑁂𑀲𑀢𑁄 𑀯𑀸𑀭𑀡𑀯𑀲𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀧𑀜𑁆𑀘 𑀦𑀻𑀯𑀭𑀡𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀧𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀯𑀸 𑀅𑀪𑀺𑀜𑁆𑀜𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀉𑀧𑀘𑁆𑀙𑀺𑀦𑁆𑀤𑀦𑀁 𑀧𑀸𑀢𑀦𑀜𑁆𑀘𑁂𑀢𑁆𑀣 𑀢𑀸𑀲𑀁 𑀧𑀜𑁆𑀜𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀫𑁂𑀯. 𑀇𑀢𑀺 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀧𑀜𑁆𑀜𑀸𑀦𑀁 𑀏𑀓𑀘𑁆𑀘𑀸𑀬 𑀘 𑀧𑀭𑀺𑀢𑁆𑀢𑀧𑀜𑁆𑀜𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀦𑀻𑀯𑀭𑀡𑀥𑀫𑁆𑀫𑀸 𑀇𑀢𑀭𑀸𑀲𑀁 𑀲𑀫𑀢𑁆𑀣𑀢𑀁 𑀯𑀺𑀳𑀦𑀦𑁆𑀢𑀺𑀬𑁂𑀯𑀸𑀢𑀺 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸 𑀯𑀼𑀢𑁆𑀢𑀸. 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦 𑀯𑀺𑀦𑀸 𑀧𑀓𑀢𑀺𑀬𑀸 𑀫𑀦𑀼𑀲𑁆𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁄 𑀥𑀫𑁆𑀫𑁄𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑁄, 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀯𑀳𑁄 𑀯𑀸 𑀥𑀫𑁆𑀫𑁄 𑀫𑀦𑀼𑀲𑁆𑀲𑀥𑀫𑁆𑀫𑁄, 𑀅𑀦𑀼𑀴𑀸𑀭𑀁 𑀧𑀭𑀺𑀢𑁆𑀢𑀓𑀼𑀲𑀮𑀁. 𑀬𑀁 𑀅𑀲𑀢𑀺𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀢𑁆𑀢𑀢𑀺, 𑀬𑀜𑁆𑀘 𑀲𑀦𑁆𑀥𑀸𑀬𑀸𑀳 ‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀻’’𑀢𑀺 (𑀚𑀸. 𑁧.𑁮.𑁭𑁫). 𑀅𑀮𑀁 𑀅𑀭𑀺𑀬𑀸𑀬 𑀅𑀭𑀺𑀬𑀪𑀸𑀯𑀸𑀬𑀸𑀢𑀺 𑀅𑀮𑀫𑀭𑀺𑀬𑁄, 𑀅𑀭𑀺𑀬𑀪𑀸𑀯𑀸𑀬 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀸𑀡𑀤𑀲𑁆𑀲𑀦𑀫𑁂𑀯 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄, 𑀅𑀮𑀫𑀭𑀺𑀬𑁄 𑀘 𑀲𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀘𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄.

𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀘 𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀨𑀮𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀅𑀧𑁆𑀧𑀫𑀢𑁆𑀢𑁄 𑀲𑀫𑀸𑀦𑁄 𑀜𑀸𑀡𑀤𑀲𑁆𑀲𑀦𑀁 𑀆𑀭𑀸𑀥𑁂𑀢𑀻’’𑀢𑀺 (𑀫. 𑀦𑀺. 𑁧.𑁩𑁧𑁧) 𑀳𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫. ‘‘𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁪) 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. ‘‘𑀅𑀪𑀩𑁆𑀩𑀸 𑀢𑁂 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬𑀸’’𑀢𑀺 (𑀅. 𑀦𑀺. 𑁪.𑁧𑁯𑁬) 𑀏𑀢𑁆𑀣 𑀫𑀕𑁆𑀕𑁄. ‘‘𑀅𑀬𑀫𑀜𑁆𑀜𑁄 ¶ 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺 (𑀫. 𑀦𑀺. 𑁧.𑁩𑁨𑁮) 𑀏𑀢𑁆𑀣 ¶ 𑀨𑀮𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀧𑀝𑀺. 𑀫. 𑁨.𑁩𑁦) 𑀏𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 ‘𑀲𑀢𑁆𑀢𑀸𑀳𑀓𑀸𑀮𑀓𑀢𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄’’’𑀢𑀺 (𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁦) 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀢𑁆𑀣 𑀘 𑀭𑀽𑀧𑀸𑀬𑀢𑀦𑀁 𑀚𑀸𑀦𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬 𑀧𑀲𑁆𑀲𑀢𑀺 𑀘𑀸𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀤𑀺𑀩𑁆𑀩𑀘𑀓𑁆𑀔𑀼. 𑀲𑀫𑁆𑀫𑀲𑀦𑀽𑀧𑀘𑀸𑀭𑁂 𑀘 𑀥𑀫𑁆𑀫𑀮𑀓𑁆𑀔𑀡𑀢𑁆𑀢𑀬𑀜𑁆𑀘 𑀢𑀣𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀘𑀸𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀸𑀦𑀁 𑀘𑀢𑁆𑀢𑀸𑀭𑀺 𑀯𑀸 𑀲𑀘𑁆𑀘𑀸𑀦𑀺 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀘𑀸𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀫𑀕𑁆𑀕𑁄. 𑀨𑀮𑀁 𑀧𑀦 𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀫𑀕𑁆𑀕𑀸𑀥𑀺𑀕𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀩𑁆𑀩𑀲𑁄 𑀚𑁄𑀢𑀦𑀝𑁆𑀞𑁂𑀦 𑀜𑀸𑀡𑀤𑀲𑁆𑀲𑀦𑀁. 𑀲𑀩𑁆𑀩𑀜𑁆𑀜𑀼𑀢𑀸 𑀅𑀦𑀸𑀯𑀭𑀡𑀢𑀸𑀬 𑀲𑀫𑀦𑁆𑀢𑀘𑀓𑁆𑀔𑀼𑀢𑀸𑀬 𑀘 𑀜𑀸𑀡𑀤𑀲𑁆𑀲𑀦𑀁. 𑀩𑁆𑀬𑀸𑀤𑀺𑀡𑁆𑀡𑀓𑀸𑀮𑁄𑀢𑀺 𑀧𑀭𑀺𑀬𑀸𑀤𑀺𑀦𑁆𑀦𑀓𑀸𑀮𑁄. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀆𑀯𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀧𑀥𑀸𑀦𑀺𑀬𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁩-𑁫𑁪. 𑀢𑀢𑀺𑀬𑁂 𑀧𑀤𑀳𑀢𑀻𑀢𑀺 𑀧𑀤𑀳𑀦𑁄, 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄 𑀬𑁄𑀕𑀻, 𑀢𑀲𑁆𑀲 𑀪𑀸𑀯𑁄 𑀪𑀸𑀯𑀦𑀸𑀦𑀼𑀬𑁄𑀕𑁄 𑀧𑀤𑀳𑀦𑀪𑀸𑀯𑁄. 𑀧𑀥𑀸𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀥𑀸𑀦𑀺𑀓𑁄, 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 ‘‘𑀧𑀥𑀸𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀆𑀕𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀫𑁆𑀧𑀺 𑀧𑀡𑀺𑀥𑀸𑀦𑀢𑁄 𑀧𑀪𑀼𑀢𑀺 𑀆𑀕𑀢𑀲𑀤𑁆𑀥𑀸 𑀆𑀕𑀫𑀦𑀲𑀤𑁆𑀤𑀸 𑀏𑀯, 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀧𑀦 ‘‘𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀕𑀫𑀢𑁄 𑀲𑀫𑀼𑀤𑀸𑀕𑀢𑀢𑁆𑀢𑀸 𑀅𑀕𑁆𑀕𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀧𑀺 𑀅𑀥𑀺𑀕𑀫𑀲𑀤𑁆𑀥𑀸 𑀦𑀸𑀫, 𑀬𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀅𑀘𑀮𑀪𑀸𑀯𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑁂𑀦 𑀅𑀦𑀥𑀺𑀪𑀯𑀦𑀻𑀬𑀢𑁆𑀢𑀸 𑀦𑀺𑀘𑁆𑀘𑀮𑀪𑀸𑀯𑁂𑀦. 𑀑𑀓𑀧𑁆𑀧𑀦𑀦𑁆𑀢𑀺 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀦𑀁, 𑀧𑀲𑀸𑀤𑀼𑀧𑁆𑀧𑀢𑁆𑀢𑀺𑀬𑀸 𑀧𑀲𑀸𑀤𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀦𑀫𑁂𑀯. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀦𑁆𑀢𑀺 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀁. 𑀬𑀣𑀸 𑀢𑁂𑀦 𑀧𑀝𑀺𑀯𑀺𑀤𑁆𑀥𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀳𑀢𑁆𑀣𑀕𑀢𑀁 𑀅𑀳𑁄𑀲𑀺, 𑀢𑀣𑀸 𑀧𑀝𑀺𑀯𑀺𑀤𑁆𑀥𑀁. 𑀬𑀲𑁆𑀲 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀲𑀤𑁆𑀥𑀸 𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀺, 𑀢𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀬 ¶ 𑀢𑁂𑀦 𑀧𑀝𑀺𑀯𑁂𑀥𑁂𑀦 𑀲𑀤𑁆𑀥𑀸 𑀦 𑀢𑀣𑀸𑀢𑀺 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀥𑀫𑁆𑀫𑁂 𑀧𑀲𑀦𑁆𑀦𑁄 𑀲𑀗𑁆𑀖𑁂 𑀧𑀲𑀦𑁆𑀦𑁄’’𑀢𑀺𑀆𑀤𑀺. 𑀧𑀥𑀸𑀦𑀯𑀻𑀭𑀺𑀬𑀁 𑀇𑀚𑁆𑀛𑀢𑀺 ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀲𑀓𑁆𑀓𑀘𑁆𑀘𑀁 𑀧𑀤𑀳𑀦𑀢𑁄.

𑀅𑀧𑁆𑀧-𑀲𑀤𑁆𑀤𑁄 ¶ 𑀅𑀪𑀸𑀯𑀢𑁆𑀣𑁄 ‘‘𑀅𑀧𑁆𑀧𑀲𑀤𑁆𑀤𑀲𑁆𑀲…𑀧𑁂… 𑀔𑁄 𑀧𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 ‘‘𑀅𑀭𑁄𑀕𑁄’’𑀢𑀺. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺 𑀬𑀣𑀸𑀪𑀼𑀢𑁆𑀢𑀫𑀸𑀳𑀸𑀭𑀁 𑀲𑀫𑀸𑀓𑀸𑀭𑁂𑀦𑁂𑀯 𑀧𑀘𑀦𑀲𑀻𑀮𑀸𑀬. 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀘𑀦𑁆𑀢𑀻 𑀳𑀺 𑀕𑀳𑀡𑀻 𑀖𑁄𑀭𑀪𑀸𑀯𑁂𑀦 𑀧𑀺𑀢𑁆𑀢𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀭𑁄𑀕𑀁 𑀚𑀦𑁂𑀢𑀺, 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀧𑀘𑀦𑁆𑀢𑀻 𑀫𑀦𑁆𑀤𑀪𑀸𑀯𑁂𑀦 𑀯𑀸𑀢𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀢𑁂𑀦𑀸𑀳 ‘‘𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬𑀸’’𑀢𑀺. 𑀕𑀳𑀡𑀺𑀢𑁂𑀚𑀲𑁆𑀲 𑀫𑀦𑁆𑀤𑀧𑀝𑀼𑀢𑀸𑀯𑀲𑁂𑀦 𑀲𑀢𑁆𑀢𑀸𑀦𑀁 𑀬𑀣𑀸𑀓𑁆𑀓𑀫𑀁 𑀲𑀻𑀢𑀼𑀡𑁆𑀳𑀲𑀳𑀢𑀸𑀢𑀺 𑀆𑀳 ‘‘𑀅𑀢𑀺𑀲𑀻𑀢𑀮𑀕𑁆𑀕𑀳𑀡𑀺𑀓𑁄’’𑀢𑀺𑀆𑀤𑀺. 𑀬𑀸𑀣𑀸𑀯𑀢𑁄 𑀅𑀘𑁆𑀘𑀬𑀤𑁂𑀲𑀦𑀸 𑀅𑀢𑁆𑀢𑀦𑁄 𑀆𑀯𑀺𑀓𑀭𑀡𑀁 𑀦𑀸𑀫𑀸𑀢𑀺 𑀆𑀳 ‘‘𑀬𑀣𑀸𑀪𑀽𑀢𑀁 𑀅𑀢𑁆𑀢𑀦𑁄 𑀅𑀕𑀼𑀡𑀁 𑀧𑀓𑀸𑀲𑁂𑀢𑀸’’𑀢𑀺. 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀦𑁆𑀢𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀉𑀤𑀬𑀜𑁆𑀘𑀸’’𑀢𑀺𑀆𑀤𑀺. 𑀧𑀭𑀺𑀲𑀼𑀤𑁆𑀥𑀸𑀬𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸𑀬. 𑀦𑀺𑀩𑁆𑀩𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬𑀸𑀢𑀺 𑀢𑀤𑀗𑁆𑀕𑀯𑀲𑁂𑀦 𑀲𑀯𑀺𑀲𑁂𑀲𑀁 𑀧𑀚𑀳𑀺𑀢𑀼𑀁 𑀲𑀫𑀢𑁆𑀣𑀸𑀬. 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀬𑀁 𑀤𑀼𑀓𑁆𑀔𑀁 𑀇𑀫𑀲𑁆𑀫𑀺𑀁 𑀜𑀸𑀡𑁂 𑀅𑀦𑀥𑀺𑀕𑀢𑁂 𑀧𑀯𑀢𑁆𑀢𑀺𑀭𑀳𑀁, 𑀅𑀥𑀺𑀕𑀢𑁂 𑀦 𑀧𑀯𑀢𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀣𑀸𑀳𑁂𑀲 𑀬𑁄𑀕𑀸𑀯𑀘𑀭𑁄 ‘‘𑀘𑀽𑀴𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀥𑀸𑀦𑀺𑀬𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀸𑀢𑀸𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀧𑀜𑁆𑀘𑀫𑁂 𑀯𑀺𑀲𑁆𑀲𑀸𑀲𑁄𑀢𑀺 𑀯𑀺𑀲𑀘𑁆𑀙𑀸𑀬𑀲𑀦𑁆𑀢𑀸𑀦𑁄 𑀪𑀸𑀯𑁄. 𑀑𑀢𑀸𑀭𑁄𑀢𑀺 𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀯𑁂𑀲𑁄. 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀏𑀯 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸. 𑀔𑁂𑀧𑁂𑀢𑁆𑀯𑀸𑀢𑀺 𑀓𑀼𑀲𑀮𑀯𑀸𑀭𑀁 𑀔𑁂𑀧𑁂𑀢𑁆𑀯𑀸.

𑀖𑀝𑁆𑀝𑁂𑀬𑁆𑀬𑀸𑀢𑀺 𑀅𑀓𑁆𑀓𑀫𑀦𑀸𑀤𑀺𑀯𑀲𑁂𑀦 𑀩𑀸𑀥𑁂𑀬𑁆𑀬. 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀻𑀢𑀺 𑀜𑀸𑀢𑀢𑀻𑀭𑀡𑀧𑁆𑀧𑀳𑀸𑀦𑀲𑀗𑁆𑀔𑀸𑀢𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀓𑀼𑀢𑁄𑀘𑀺 𑀪𑀬𑀦𑁆𑀢𑀺 𑀅𑀓𑀼𑀢𑁄𑀪𑀬𑀸, 𑀦𑀺𑀩𑁆𑀪𑀬𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁, 𑀲𑀁𑀲𑀸𑀭𑀫𑀳𑁄𑀖𑀲𑁆𑀲𑁂𑀯 𑀯𑀸 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑀸. 𑀢𑁂𑀦𑀸𑀳 ‘‘𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺.

𑀫𑀸𑀢𑀸𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀉𑀧𑀚𑁆𑀛𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀙𑀝𑁆𑀞𑁂 ¶ 𑀫𑀥𑀼𑀭𑀓𑀪𑀸𑀯𑁄 𑀦𑀸𑀫 𑀲𑀭𑀻𑀭𑀲𑁆𑀲 𑀣𑀫𑁆𑀪𑀺𑀢𑀢𑁆𑀢𑀁, 𑀢𑀁 𑀧𑀦 𑀕𑀭𑀼𑀪𑀸𑀯𑀧𑀼𑀩𑁆𑀩𑀓𑀦𑁆𑀢𑀺 𑀆𑀳 ‘‘𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄’’𑀢𑀺 ¶ . 𑀦 𑀧𑀓𑁆𑀔𑀸𑀬𑀦𑁆𑀢𑀻𑀢𑀺 𑀦𑀧𑁆𑀧𑀓𑀸𑀲𑁂𑀦𑁆𑀢𑀺, 𑀦𑀸𑀦𑀸𑀓𑀸𑀭𑀡𑀢𑁄 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦𑀸𑀳 ‘‘𑀘𑀢𑀲𑁆𑀲𑁄 𑀤𑀺𑀲𑀸 𑀘 𑀅𑀦𑀼𑀤𑀺𑀲𑀸 𑀘 𑀫𑀬𑁆𑀳𑀁 𑀦 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀉𑀧𑀚𑁆𑀛𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀪𑀺𑀡𑁆𑀳𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀲𑀢𑁆𑀢𑀫𑁂 𑀚𑀭𑀸𑀥𑀫𑁆𑀫𑁄𑀢𑀺 𑀥𑀫𑁆𑀫-𑀲𑀤𑁆𑀤𑁄 ‘‘𑀅𑀲𑀫𑁆𑀫𑁄𑀲𑀥𑀫𑁆𑀫𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁭𑁬𑁩) 𑀯𑀺𑀬 𑀧𑀓𑀢𑀺𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀚𑀭𑀸𑀧𑀓𑀢𑀺𑀓𑁄 𑀚𑀺𑀡𑁆𑀡𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀚𑀭𑀸𑀲𑀪𑀸𑀯𑁄’’𑀢𑀺𑀆𑀤𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀫𑁆𑀫𑀼𑀦𑀸 𑀤𑀸𑀢𑀩𑁆𑀩𑀁 𑀆𑀤𑀺𑀬𑀢𑀻𑀢𑀺 𑀓𑀫𑁆𑀫𑀤𑀸𑀬𑀸𑀤𑁄, 𑀅𑀢𑁆𑀢𑀦𑀸 𑀬𑀣𑀽𑀧𑀘𑀺𑀢𑀓𑀫𑁆𑀫𑀨𑀮𑀪𑀸𑀕𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀤𑀸𑀬𑀚𑁆𑀚𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀤𑀦𑁆𑀢𑁄 ‘‘𑀓𑀫𑁆𑀫𑀁 𑀫𑀬𑁆𑀳𑀁 𑀤𑀸𑀬𑀚𑁆𑀚𑀁 𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀆𑀳 𑀬𑀣𑀸 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼, 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻’’𑀢𑀺 (𑀤𑀻. 𑀦𑀺. 𑁩.𑁮𑁦). 𑀬𑁄𑀦𑀻𑀳𑀺 𑀨𑀮𑀁 𑀲𑀪𑀸𑀯𑀢𑁄 𑀪𑀺𑀦𑁆𑀦𑀫𑁆𑀧𑀺 𑀅𑀪𑀺𑀦𑁆𑀦𑀁 𑀯𑀺𑀬 𑀫𑀺𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀓𑀫𑁆𑀫𑀁 𑀫𑀬𑁆𑀳𑀁 𑀬𑁄𑀦𑀺 𑀓𑀸𑀭𑀡’’𑀦𑁆𑀢𑀺. 𑀫𑀫𑀢𑁆𑀢𑀯𑀲𑁂𑀦 𑀩𑀚𑁆𑀛𑀦𑁆𑀢𑀻𑀢𑀺 𑀩𑀦𑁆𑀥𑀽, 𑀜𑀸𑀢𑀺 𑀲𑀸𑀮𑁄𑀳𑀺𑀢𑁄 𑀘, 𑀓𑀫𑁆𑀫𑀁 𑀧𑀦 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀯𑀸𑀢𑀺 𑀆𑀳 ‘‘𑀓𑀫𑁆𑀫𑀁 𑀫𑀬𑁆𑀳𑀁 𑀩𑀦𑁆𑀥𑀽’’𑀢𑀺. 𑀧𑀢𑀺𑀝𑁆𑀞𑀸𑀢𑀺 𑀅𑀯𑀲𑁆𑀲𑀬𑁄. 𑀓𑀫𑁆𑀫𑀲𑀤𑀺𑀲𑁄 𑀳𑀺 𑀲𑀢𑁆𑀢𑀸𑀦𑀁 𑀅𑀯𑀲𑁆𑀲𑀬𑁄 𑀦𑀢𑁆𑀣𑀺.

𑀬𑁄𑀩𑁆𑀩𑀦𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀫𑀤𑁄𑀢𑀺 ‘‘𑀫𑀳𑀮𑁆𑀮𑀓𑀓𑀸𑀮𑁂 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀸𑀫, 𑀤𑀳𑀭𑀫𑁆𑀳 𑀢𑀸𑀯𑀸’’𑀢𑀺 𑀬𑁄𑀩𑁆𑀩𑀦𑀁 𑀅𑀧𑀲𑁆𑀲𑀸𑀬 𑀫𑀸𑀦𑀓𑀭𑀡𑀁. ‘‘𑀅𑀳𑀁 𑀦𑀺𑀭𑁄𑀕𑁄 𑀲𑀝𑁆𑀞𑀺 𑀯𑀸 𑀲𑀢𑁆𑀢𑀢𑀺 𑀯𑀸 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀦 𑀫𑁂 𑀳𑀭𑀻𑀢𑀓𑀔𑀡𑁆𑀟𑀫𑁆𑀧𑀺 𑀔𑀸𑀤𑀺𑀢𑀩𑁆𑀩𑀁, 𑀇𑀫𑁂 𑀧𑀦𑀜𑁆𑀜𑁂 ‘𑀅𑀲𑀼𑀓𑀁 𑀦𑁄 𑀞𑀸𑀦𑀁 𑀭𑀼𑀚𑁆𑀚𑀢𑀺, 𑀪𑁂𑀲𑀚𑁆𑀚𑀁 𑀔𑀸𑀤𑀸𑀫𑀸’𑀢𑀺 𑀯𑀺𑀘𑀭𑀦𑁆𑀢𑀺, 𑀓𑁄 𑀅𑀜𑁆𑀜𑁄 𑀫𑀬𑀸 𑀲𑀤𑀺𑀲𑁄 𑀦𑀺𑀭𑁄𑀕𑁄 𑀦𑀸𑀫𑀸’’𑀢𑀺 𑀏𑀯𑀁 𑀫𑀸𑀦𑀓𑀭𑀡𑀁 𑀆𑀭𑁄𑀕𑁆𑀬𑀫𑀤𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀚𑀻𑀯𑀺𑀢𑀁 𑀦𑀸𑀫 𑀧𑀪𑀗𑁆𑀕𑀼𑀭𑀁 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀜𑁆𑀘, 𑀢𑀤𑀼𑀪𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀩𑀦𑁆𑀥𑀝𑁆𑀞𑀺𑀢𑀺𑀁 𑀧𑀘𑁆𑀘𑀬𑀲𑀼𑀮𑀪𑀢𑀜𑁆𑀘 𑀦𑀺𑀲𑁆𑀲𑀸𑀬 ‘‘𑀘𑀺𑀭𑀁 𑀚𑀻𑀯𑀺𑀁, 𑀘𑀺𑀭𑀁 𑀚𑀻𑀯𑀸𑀫𑀺, 𑀘𑀺𑀭𑀁 𑀚𑀻𑀯𑀺𑀲𑁆𑀲𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀁, 𑀲𑀼𑀔𑀁 𑀚𑀻𑀯𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀫𑀸𑀦𑀓𑀭𑀡𑀁 𑀚𑀻𑀯𑀺𑀢𑀫𑀤𑁄.

𑀉𑀧𑀥𑀺𑀭𑀳𑀺𑀢𑀦𑁆𑀢𑀺 ¶ 𑀓𑀸𑀫𑀽𑀧𑀥𑀺𑀭𑀳𑀺𑀢𑀁. 𑀘𑀢𑁆𑀢𑀸𑀭𑁄 𑀳𑀺 𑀉𑀧𑀥𑀻 𑁋 𑀓𑀸𑀫𑀽𑀧𑀥𑀺, 𑀔𑀦𑁆𑀥𑀽𑀧𑀥𑀺, 𑀓𑀺𑀮𑁂𑀲𑀽𑀧𑀥𑀺, 𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀢𑀺. 𑀓𑀸𑀫𑀸𑀧𑀺 ‘‘𑀬𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 ‘‘𑀉𑀧𑀥𑀺𑀬𑀢𑀺 𑀏𑀢𑁆𑀣 𑀲𑀼𑀔’’𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 ‘‘𑀉𑀧𑀥𑀻’’𑀢𑀺 𑀯𑀼𑀘𑁆𑀘𑀢𑀺, 𑀔𑀦𑁆𑀥𑀸𑀧𑀺 𑀔𑀦𑁆𑀥𑀫𑀽𑀮𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 ¶ 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀅𑀪𑀺𑀲𑀗𑁆𑀔𑀸𑀭𑀸𑀧𑀺 𑀪𑀯𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀪𑀺𑀡𑁆𑀳𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁦. 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁮-𑁬𑁦. 𑀅𑀝𑁆𑀞𑀫𑁂 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀲𑀁 𑀯𑀼𑀘𑁆𑀘𑀢𑀺 𑀥𑀦𑀁, 𑀢𑀲𑁆𑀲 𑀧𑀢𑀻𑀢𑀺 𑀲𑀧𑀢𑀺, 𑀥𑀦𑀲𑀸𑀫𑀺𑀓𑁄. 𑀢𑀲𑁆𑀲 𑀳𑀺𑀢𑀸𑀯𑀳𑀢𑁆𑀢𑀸 𑀲𑀸𑀧𑀢𑁂𑀬𑁆𑀬𑀁, 𑀤𑁆𑀭𑀩𑁆𑀬𑀁, 𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀕𑀸𑀫𑀓𑀺𑀘𑁆𑀘𑀁 𑀦𑁂𑀢𑀻𑀢𑀺 𑀕𑀸𑀫𑀦𑀺𑀬𑁄, 𑀕𑀸𑀫𑀦𑀺𑀬𑁄𑀬𑁂𑀯 𑀕𑀸𑀫𑀡𑀺𑀓𑁄.

𑀅𑀦𑁆𑀯𑀸𑀬 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑀲𑀻𑀮𑀸 𑀅𑀦𑀼𑀚𑀻𑀯𑀺𑀦𑁄𑀢𑀺 𑀆𑀳 ‘‘𑀬𑁂 𑀘 𑀏𑀢𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻’’𑀢𑀺. 𑀏𑀓𑀁 𑀫𑀳𑀸𑀓𑀼𑀮𑀁 𑀦𑀺𑀲𑁆𑀲𑀸𑀬 𑀧𑀡𑁆𑀡𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀓𑀼𑀮𑀸𑀦𑀺 𑀚𑀻𑀯𑀦𑁆𑀢𑀺, 𑀢𑁂 𑀫𑀦𑀼𑀲𑁆𑀲𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀦𑀯𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀻𑀯𑀭𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁭) 𑁨. 𑀲𑀜𑁆𑀜𑀸𑀯𑀕𑁆𑀕𑁄

𑁧-𑁫. 𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁧-𑁬𑁫. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 ‘‘𑀫𑀳𑀧𑁆𑀨𑀮𑀸 𑀫𑀳𑀸𑀦𑀺𑀲𑀁𑀲𑀸’’𑀢𑀺 𑀉𑀪𑀬𑀫𑁆𑀧𑁂𑀢𑀁 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺 𑀆𑀳 ‘‘𑀫𑀳𑀧𑁆𑀨𑀮𑀸’’𑀢𑀺𑀆𑀤𑀺. ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄 𑀆𑀦𑀺𑀲𑀁𑀲𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁭𑁬) 𑀆𑀦𑀺𑀲𑀁𑀲-𑀲𑀤𑁆𑀤𑁄 𑀨𑀮𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺 ¶ . 𑀫𑀳𑀢𑁄 𑀮𑁄𑀓𑀼𑀢𑁆𑀢𑀭𑀲𑁆𑀲 𑀲𑀼𑀔𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀅𑀫𑀢𑁄𑀕𑀥𑀸𑀢𑀺 𑀅𑀫𑀢𑀩𑁆𑀪𑀦𑁆𑀢𑀭𑀸 𑀅𑀫𑀢𑀁 𑀅𑀦𑀼𑀧𑁆𑀧𑀯𑀺𑀝𑁆𑀞𑀸 𑀦𑀺𑀩𑁆𑀩𑀸𑀦𑀤𑀺𑀝𑁆𑀞𑀢𑁆𑀢𑀸, 𑀢𑀢𑁄 𑀧𑀭𑀁 𑀦 𑀕𑀘𑁆𑀙𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀫𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺. 𑀅𑀫𑀢𑀁 𑀧𑀭𑀺𑀬𑁄𑀲𑀸𑀦𑀁 𑀅𑀯𑀲𑀸𑀦𑀁 𑀏𑀢𑀸𑀲𑀦𑁆𑀢𑀺 ¶ 𑀅𑀫𑀢𑀧𑀭𑀺𑀬𑁄𑀲𑀸𑀦𑀸. 𑀫𑀭𑀡𑀲𑀜𑁆𑀜𑀸𑀢𑀺 𑀫𑀭𑀡𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀜𑁆𑀜𑀸. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀆𑀳𑀸𑀭𑀁 𑀕𑀫𑀦𑀸𑀤𑀺𑀯𑀲𑁂𑀦 𑀧𑀝𑀺𑀓𑀽𑀮𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀉𑀓𑁆𑀓𑀡𑁆𑀞𑀺𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀲𑁆𑀲 𑀓𑀢𑁆𑀣𑀘𑀺𑀧𑀺 𑀅𑀲𑀚𑁆𑀚𑀦𑁆𑀢𑀲𑁆𑀲. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁧𑁦. 𑀲𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁬-𑁭𑁦. 𑀙𑀝𑁆𑀞𑁂 𑀲𑀳 𑀆𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀸𑀚𑀻𑀯𑁄, 𑀧𑀜𑁆𑀳𑀲𑁆𑀲 𑀧𑀼𑀘𑁆𑀙𑀦𑀁 𑀯𑀺𑀲𑁆𑀲𑀚𑁆𑀚𑀦𑀜𑁆𑀘. 𑀢𑁂𑀦𑀸𑀳 ‘‘𑀲𑀸𑀚𑀻𑀯𑁄𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀜𑁆𑀘𑁂𑀯 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀜𑁆𑀘𑀸’’𑀢𑀺𑀆𑀤𑀺. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀘𑀺𑀢𑀁. 𑀲𑀢𑁆𑀢𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀜𑁆𑀜𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁮) 𑁩. 𑀬𑁄𑀥𑀸𑀚𑀻𑀯𑀯𑀕𑁆𑀕𑁄

𑁧-𑁨. 𑀧𑀞𑀫𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁧-𑁭𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀯𑀺𑀚𑁆𑀚𑀸𑀧𑀮𑀺𑀖𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀢𑀺 𑀯𑀝𑁆𑀝𑀫𑀽𑀮𑀺𑀓𑀸 𑀅𑀯𑀺𑀚𑁆𑀚𑀸, 𑀅𑀬𑀁 𑀧𑀘𑀼𑀭𑀚𑀦𑁂𑀳𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄 𑀤𑀼𑀓𑁆𑀔𑀺𑀧𑀦𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀤𑁆𑀯𑀸𑀭𑀧𑁆𑀧𑀯𑁂𑀲𑀯𑀺𑀩𑀦𑁆𑀥𑀦𑁂𑀦 𑀘 ‘‘𑀧𑀮𑀺𑀖𑁄 𑀯𑀺𑀬𑀸𑀢𑀺 𑀧𑀮𑀺𑀖𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀲 𑀢𑀲𑁆𑀲𑀸 𑀉𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄’’𑀢𑀺 𑀯𑀼𑀢𑁆𑀢𑁄. 𑀧𑀼𑀦𑀩𑁆𑀪𑀯𑀲𑁆𑀲 𑀓𑀭𑀡𑀲𑀻𑀮𑁄, 𑀧𑀼𑀦𑀩𑁆𑀪𑀯𑀁 𑀯𑀸 𑀨𑀮𑀁 𑀅𑀭𑀳𑀢𑀻𑀢𑀺 𑀧𑁄𑀦𑁄𑀪𑀯𑀺𑀓𑀸, 𑀧𑀼𑀦𑀩𑁆𑀪𑀯𑀤𑀸𑀬𑀺𑀓𑀸𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀲𑀁𑀲𑀸𑀭𑁄𑀢𑀺 𑀚𑀸𑀬𑀦𑀯𑀲𑁂𑀦 𑀘𑁂𑀯 𑀲𑀁𑀲𑀭𑀡𑀯𑀲𑁂𑀦 𑀘 𑀏𑀯𑀁𑀮𑀤𑁆𑀥𑀦𑀸𑀫𑀸𑀦𑀁 𑀧𑀼𑀦𑀩𑁆𑀪𑀯𑀓𑁆𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁄. 𑀚𑀸𑀢𑀺𑀲𑀁𑀲𑀸𑀭𑁄𑀢𑀺 𑀳𑀺 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀯𑀲𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀧𑀭𑀺𑀔𑀸’’𑀢𑀺 𑀯𑀼𑀘𑁆𑀘𑀢𑀺 𑀲𑀦𑁆𑀢𑀸𑀦𑀲𑁆𑀲 ¶ 𑀧𑀭𑀺𑀓𑁆𑀔𑀺𑀧𑀦𑀢𑁄. 𑀢𑁂𑀦𑁂𑀲 𑀢𑀲𑁆𑀲 𑀲𑀁𑀓𑀺𑀡𑁆𑀡𑀢𑁆𑀢𑀸 𑀯𑀺𑀓𑀺𑀡𑁆𑀡𑀢𑁆𑀢𑀸 𑀲𑀩𑁆𑀩𑀲𑁄 𑀔𑀺𑀢𑁆𑀢𑀢𑁆𑀢𑀸 𑀯𑀺𑀦𑀸𑀲𑀺𑀢𑀢𑁆𑀢𑀸 ‘‘𑀲𑀁𑀓𑀺𑀡𑁆𑀡𑀧𑀭𑀺𑀔𑁄’’𑀢𑀺 𑀯𑀼𑀢𑁆𑀢𑁄.

𑀢𑀡𑁆𑀳𑀸𑀲𑀗𑁆𑀔𑀸𑀢𑀦𑁆𑀢𑀺 ¶ 𑀏𑀢𑁆𑀣 𑀢𑀡𑁆𑀳𑀸𑀢𑀺 𑀯𑀝𑁆𑀝𑀫𑀽𑀮𑀺𑀓𑀸 𑀢𑀡𑁆𑀳𑀸. 𑀅𑀬𑀜𑁆𑀳𑀺 𑀕𑀫𑁆𑀪𑀻𑀭𑀸𑀦𑀼𑀕𑀢𑀝𑁆𑀞𑁂𑀦 ‘‘𑀏𑀲𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀮𑀼𑀜𑁆𑀘𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸. 𑀑𑀭𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀑𑀭𑀫𑁆𑀪𑀸𑀕𑀚𑀦𑀓𑀸𑀦𑀺 𑀓𑀸𑀫𑀪𑀯𑁂 𑀉𑀧𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀻𑀦𑀺. 𑀏𑀢𑀸𑀦𑀺 𑀳𑀺 𑀓𑀯𑀸𑀝𑀁 𑀯𑀺𑀬 𑀦𑀕𑀭𑀤𑁆𑀯𑀸𑀭𑀁 𑀘𑀺𑀢𑁆𑀢𑀁 𑀧𑀺𑀤𑀳𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀅𑀕𑁆𑀕𑀴𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑁂𑀲 𑀢𑁂𑀲𑀁 𑀦𑀺𑀕𑁆𑀕𑀢𑀢𑁆𑀢𑀸 𑀪𑀺𑀦𑁆𑀦𑀢𑁆𑀢𑀸 ‘‘𑀦𑀺𑀭𑀕𑁆𑀕𑀴𑁄’’𑀢𑀺 𑀯𑀼𑀢𑁆𑀢𑁄𑀢𑀺. 𑀅𑀕𑁆𑀕𑀫𑀕𑁆𑀕𑁂𑀦 𑀧𑀦𑁆𑀦𑁄 𑀅𑀧𑀘𑀺𑀢𑁄 𑀫𑀸𑀦𑀤𑁆𑀥𑀚𑁄 𑀏𑀢𑀲𑁆𑀲𑀸𑀢𑀺 𑀧𑀦𑁆𑀦𑀤𑁆𑀥𑀚𑁄. 𑀧𑀦𑁆𑀦𑀪𑀸𑀭𑁄𑀢𑀺 𑀔𑀦𑁆𑀥𑀪𑀸𑀭𑀓𑀺𑀮𑁂𑀲𑀪𑀸𑀭𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑀸 𑀑𑀭𑁄𑀧𑀺𑀢𑀸 𑀅𑀲𑁆𑀲𑀸𑀢𑀺 𑀧𑀦𑁆𑀦𑀪𑀸𑀭𑁄. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀘 𑀯𑀺𑀲𑀁𑀬𑀼𑀢𑁆𑀢𑁄. 𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄, 𑀯𑁂𑀤𑀦𑀸𑀬, 𑀲𑀜𑁆𑀜𑀸𑀬, 𑀲𑀗𑁆𑀔𑀸𑀭𑁂𑀲𑀼, 𑀯𑀺𑀜𑁆𑀜𑀸𑀡𑁂 𑀅𑀲𑁆𑀫𑀺𑀫𑀸𑀦𑁄. 𑀏𑀢𑁆𑀣 𑀳𑀺 𑀧𑀜𑁆𑀘𑀧𑀺 𑀔𑀦𑁆𑀥𑁂 𑀅𑀯𑀺𑀲𑁂𑀲𑀢𑁄 ‘‘𑀅𑀲𑁆𑀫𑀻’’𑀢𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀅𑀲𑁆𑀫𑀺𑀫𑀸𑀦𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀦𑀕𑀭𑀤𑁆𑀯𑀸𑀭𑀲𑁆𑀲 𑀧𑀭𑀺𑀲𑁆𑀲𑀬𑀧𑀝𑀺𑀩𑀸𑀳𑀦𑀢𑁆𑀣𑀜𑁆𑀘𑁂𑀯 𑀲𑁄𑀥𑀦𑀢𑁆𑀣𑀜𑁆𑀘 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀏𑀲𑀺𑀓𑀸𑀣𑀫𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 𑀞𑀧𑁂𑀢𑀻𑀢𑀺 𑀆𑀳 ‘‘𑀦𑀕𑀭𑀤𑁆𑀯𑀸𑀭𑁂 𑀉𑀲𑁆𑀲𑀸𑀧𑀺𑀢𑁂 𑀏𑀲𑀺𑀓𑀸𑀣𑀫𑁆𑀪𑁂’’𑀢𑀺. 𑀧𑀸𑀓𑀸𑀭𑀯𑀺𑀤𑁆𑀥𑀁𑀲𑀦𑁂𑀦𑁂𑀯 𑀧𑀭𑀺𑀔𑀸𑀪𑀽𑀫𑀺𑀲𑀫𑀓𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀔𑀁 𑀯𑀺𑀓𑀺𑀭𑀺𑀢𑁆𑀯𑀸’’𑀢𑀺. ‘‘𑀏𑀯’’𑀦𑁆𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄 𑀥𑀫𑁆𑀫𑀲𑀫𑀽𑀳𑁄𑀢𑀺 𑀲𑀓𑁆𑀓𑀸𑀬𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀸 𑀤𑀼𑀓𑁆𑀔𑀓𑁆𑀔𑀦𑁆𑀥𑁂 𑀆𑀕𑀢𑀤𑀼𑀓𑁆𑀔𑀸𑀦𑀺. 𑀅𑀓𑁆𑀔𑀺𑀭𑁄𑀕𑀲𑀻𑀲𑀭𑁄𑀕𑀸𑀤𑀬𑁄. 𑀅𑀝𑁆𑀞𑀦𑀯𑀼𑀢𑀺 𑀭𑁄𑀕𑀸, 𑀭𑀸𑀚𑀪𑀬𑀸𑀤𑀻𑀦𑀺 𑀧𑀜𑁆𑀘𑀯𑀻𑀲𑀢𑀺𑀫𑀳𑀸𑀪𑀬𑀸𑀦𑀺. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀧𑀞𑀫𑀥𑀫𑁆𑀫𑀯𑀺𑀳𑀸𑀭𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁩-𑁭𑁪. 𑀢𑀢𑀺𑀬𑁂 𑀦𑀺𑀬𑀓𑀚𑁆𑀛𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂. 𑀫𑁂𑀢𑁆𑀢𑀸𑀬 𑀉𑀧𑀲𑀁𑀳𑀭𑀡𑀯𑀲𑁂𑀦 𑀳𑀺𑀢𑀁 𑀏𑀲𑀦𑁆𑀢𑁂𑀦. 𑀓𑀭𑀼𑀡𑀸𑀬 𑀯𑀲𑁂𑀦 𑀅𑀦𑀼𑀓𑀫𑁆𑀧𑀫𑀸𑀦𑁂𑀦. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀭𑀺𑀢𑁄 𑀕𑀳𑁂𑀢𑁆𑀯𑀸, 𑀨𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀘𑁆𑀘𑀸𑀢𑀺 𑀧𑀭𑀺𑀢𑁄 𑀓𑀢𑁆𑀯𑀸, 𑀲𑀫𑀦𑁆𑀢𑀢𑁄 𑀨𑀭𑀺𑀢𑁆𑀯𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. ‘‘𑀧𑀝𑀺𑀘𑁆𑀘𑀸’’𑀢𑀺𑀧𑀺 ¶ 𑀧𑀸𑀞𑁄. 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸𑀢𑀺 ‘‘𑀛𑀸𑀬𑀣𑀸’’𑀢𑀺 𑀯𑀼𑀢𑁆𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀦𑀦𑀼𑀬𑀼𑀜𑁆𑀚𑀦𑁂𑀦 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀧𑀫𑀸𑀤𑀓𑀸𑀭𑀡𑁂𑀦 𑀫𑀸 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀣. 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀅𑀓𑀢𑁆𑀢𑀩𑁆𑀩𑀓𑀭𑀡𑀁 𑀯𑀺𑀬 𑀓𑀢𑁆𑀢𑀩𑁆𑀩𑀸𑀓𑀭𑀡𑀫𑁆𑀧𑀺 𑀧𑀫𑀸𑀤𑁄𑀢𑀺. 𑀯𑀺𑀧𑀢𑁆𑀢𑀺𑀓𑀸𑀮𑁂𑀢𑀺 𑀲𑀢𑁆𑀢𑀅𑀲𑀧𑁆𑀧𑀸𑀬𑀸𑀤𑀺𑀯𑀺𑀧𑀢𑁆𑀢𑀺𑀬𑀼𑀢𑁆𑀢𑁂 𑀓𑀸𑀮𑁂. 𑀲𑀩𑁆𑀩𑁂𑀧𑀺 𑀲𑀸𑀲𑀦𑁂 𑀕𑀼𑀡𑀸 𑀇𑀥𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀛𑀸𑀬𑀣 𑀫𑀸 𑀧𑀫𑀸𑀤𑀢𑁆𑀣…𑀧𑁂… 𑀅𑀦𑀼𑀲𑀸𑀲𑀦𑀻’’𑀢𑀺. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀥𑀫𑁆𑀫𑀯𑀺𑀳𑀸𑀭𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀧𑀜𑁆𑀘𑀫𑁂 ¶ 𑀬𑀼𑀚𑁆𑀛𑀦𑀁 𑀬𑁄𑀥𑁄, 𑀲𑁄 𑀆𑀚𑀻𑀯𑁄 𑀏𑀢𑁂𑀲𑀦𑁆𑀢𑀺 𑀬𑁄𑀥𑀸𑀚𑀻𑀯𑀸. 𑀢𑁂𑀦𑀸𑀳 ‘‘𑀬𑀼𑀤𑁆𑀥𑀽𑀧𑀚𑀻𑀯𑀺𑀦𑁄’’𑀢𑀺. 𑀲𑀦𑁆𑀣𑀫𑁆𑀪𑀺𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀩𑀤𑁆𑀥𑁄 𑀥𑀺𑀢𑀺𑀲𑀫𑁆𑀧𑀦𑁆𑀦𑁄 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀫𑀸𑀕𑀢𑁂𑀢𑀺 𑀲𑀫𑁆𑀧𑀢𑁆𑀢𑁂. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀧𑀓𑀢𑀺𑀪𑀸𑀯𑀁 𑀚𑀳𑀢𑀻’’𑀢𑀺.

𑀭𑀚𑀕𑁆𑀕𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀺𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀚𑀕𑁆𑀕𑀁 𑀦𑀸𑀫𑀸’’𑀢𑀺. 𑀯𑀺𑀦𑀺𑀩𑁆𑀩𑁂𑀞𑁂𑀢𑁆𑀯𑀸𑀢𑀺 𑀕𑀳𑀺𑀢𑀕𑁆𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸. 𑀫𑁄𑀘𑁂𑀢𑁆𑀯𑀸𑀢𑀺 𑀲𑀭𑀻𑀭𑀢𑁄 𑀅𑀧𑀦𑁂𑀢𑁆𑀯𑀸.

𑀧𑀞𑀫𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀘𑀫𑁆𑀫𑀦𑁆𑀢𑀺 𑀇𑀫𑀺𑀦𑀸 𑀘𑀫𑁆𑀫𑀫𑀬𑀁 𑀘𑀫𑁆𑀫𑀫𑀺𑀢𑀺 𑀲𑀺𑀩𑁆𑀩𑀺𑀢𑀁, 𑀅𑀜𑁆𑀜𑀁 𑀯𑀸 𑀓𑁂𑀝𑀓𑀨𑀮𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀥𑀦𑀼𑀜𑁆𑀘𑁂𑀯 𑀢𑀽𑀡𑀺𑀭𑀜𑁆𑀘 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀚𑁆𑀚𑁂𑀢𑁆𑀯𑀸. 𑀥𑀦𑀼𑀤𑀡𑁆𑀟𑀲𑁆𑀲 𑀚𑀺𑀬𑀸𑀬𑀢𑁆𑀢𑀪𑀸𑀯𑀓𑀭𑀡𑀸𑀤𑀺𑀧𑀺 𑀳𑀺 𑀥𑀦𑀼𑀦𑁄 𑀲𑀦𑁆𑀦𑀬𑁆𑀳𑀦𑀁. 𑀢𑁂𑀦𑁂𑀯𑀸𑀳 ‘‘𑀥𑀦𑀼𑀜𑁆𑀘 𑀲𑀭𑀓𑀮𑀸𑀧𑀜𑁆𑀘 𑀲𑀦𑁆𑀦𑀬𑁆𑀳𑀺𑀢𑁆𑀯𑀸’’𑀢𑀺. 𑀬𑀼𑀤𑁆𑀥𑀲𑀦𑁆𑀦𑀺𑀯𑁂𑀲𑁂𑀦 𑀞𑀺𑀢𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀩𑁆𑀬𑀽𑀳𑀦𑀲𑀁𑀯𑀺𑀥𑀸𑀦𑀦𑀬𑁂𑀦 𑀓𑀢𑁄 𑀬𑁄 𑀲𑀦𑁆𑀦𑀺𑀯𑁂𑀲𑁄, 𑀢𑀲𑁆𑀲 𑀯𑀲𑁂𑀦 𑀞𑀺𑀢𑀁, 𑀲𑁂𑀦𑀸𑀩𑁆𑀬𑀽𑀳𑀲𑀁𑀯𑀺𑀥𑀸𑀦𑀯𑀲𑁂𑀦 𑀲𑀦𑁆𑀦𑀺𑀯𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀲𑁆𑀲𑀸𑀳𑀜𑁆𑀘 𑀯𑀸𑀬𑀸𑀫𑀜𑁆𑀘 𑀓𑀭𑁄𑀢𑀻𑀢𑀺 𑀬𑀼𑀚𑁆𑀛𑀦𑀯𑀲𑁂𑀦 𑀉𑀲𑁆𑀲𑀸𑀳𑀁 𑀯𑀸𑀬𑀸𑀫𑀜𑁆𑀘 𑀓𑀭𑁄𑀢𑀺. 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀻𑀢𑀺 𑀫𑀭𑀡𑀧𑀭𑀺𑀬𑀦𑁆𑀢𑀺𑀓𑀁 𑀅𑀧𑀭𑀁 𑀧𑀸𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀬𑀸𑀧𑀸𑀤𑀬𑀦𑁆𑀢𑀻’’𑀢𑀺, 𑀚𑀻𑀯𑀺𑀢𑀁 𑀧𑀭𑀺𑀬𑀸𑀧𑀸𑀤𑀬𑀦𑁆𑀢𑀺 𑀫𑀭𑀡𑀁 𑀧𑀝𑀺𑀧𑀚𑁆𑀚𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀭𑀓𑁆𑀔𑀺𑀢𑁂𑀦𑁂𑀯 ¶ 𑀓𑀸𑀬𑁂𑀦𑀸𑀢𑀺𑀆𑀤𑀻𑀲𑀼 𑀳𑀢𑁆𑀣𑀧𑀸𑀤𑁂 𑀓𑀻𑀴𑀸𑀧𑁂𑀦𑁆𑀢𑁄 𑀕𑀻𑀯𑀁 𑀯𑀺𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀓𑀸𑀬𑀁 𑀦 𑀭𑀓𑁆𑀔𑀢𑀺 𑀦𑀸𑀫. 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀝𑁆𑀞𑀼𑀮𑁆𑀮𑀁 𑀓𑀭𑁄𑀦𑁆𑀢𑁄 𑀯𑀸𑀘𑀁 𑀦 𑀭𑀓𑁆𑀔𑀢𑀺 𑀦𑀸𑀫. 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀘𑀺𑀢𑁆𑀢𑀁 𑀦 𑀭𑀓𑁆𑀔𑀢𑀺 𑀦𑀸𑀫. 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸𑀢𑀺 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀅𑀦𑀼𑀧𑀝𑁆𑀞𑀺𑀢𑀸𑀬. 𑀭𑀸𑀕𑁂𑀦 𑀅𑀦𑀼𑀕𑀢𑁄𑀢𑀺 𑀭𑀸𑀕𑁂𑀦 𑀅𑀦𑀼𑀧𑀳𑀢𑁄. 𑀭𑀸𑀕𑀧𑀭𑁂𑀢𑁄𑀢𑀺 𑀯𑀸 𑀭𑀸𑀕𑁂𑀦 𑀨𑀼𑀝𑁆𑀞𑁄 𑀨𑀼𑀝𑁆𑀞𑀯𑀺𑀲𑁂𑀦 𑀯𑀺𑀬 𑀲𑀧𑁆𑀧𑁂𑀦.

𑀅𑀦𑀼𑀤𑀳𑀦𑀝𑁆𑀞𑁂𑀦𑀸𑀢𑀺 𑀅𑀦𑀼𑀧𑀸𑀬𑀧𑁆𑀧𑀝𑀺𑀧𑀢𑁆𑀢𑀺𑀬𑀸. 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀫𑀳𑀸𑀪𑀺𑀢𑀸𑀧𑀝𑁆𑀞𑁂𑀦. 𑀅𑀦𑀯𑀢𑁆𑀣𑀺𑀢𑀲𑀪𑀸𑀯𑀢𑀸𑀬 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦. 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀢𑀸𑀬 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦. 𑀩𑁆𑀬𑀢𑁆𑀢𑁂𑀳𑀺 𑀅𑀪𑀺𑀪𑀯𑀦𑀻𑀬𑀢𑀸𑀬 ¶ 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦. 𑀙𑁂𑀤𑀦𑀪𑁂𑀤𑀦𑀸𑀤𑀺𑀅𑀥𑀺𑀓𑀭𑀡𑀪𑀸𑀯𑁂𑀦 𑀉𑀕𑁆𑀖𑀝𑁆𑀝𑀦𑀲𑀤𑀺𑀲𑀢𑀸𑀬 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦. 𑀅𑀯𑀡𑁂 𑀯𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀲𑀦𑀲𑀪𑀸𑀯𑀢𑀸𑀬 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓 𑀅𑀦𑀢𑁆𑀣𑀦𑀺𑀫𑀺𑀢𑁆𑀢𑀢𑀸𑀬 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦.

𑀤𑀼𑀢𑀺𑀬𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀧𑀞𑀫𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁭-𑁭𑁮. 𑀲𑀢𑁆𑀢𑀫𑁂 𑀯𑀺𑀲𑁂𑀲𑀲𑁆𑀲 𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀲𑁆𑀲 𑀧𑀸𑀧𑀼𑀡𑀦𑀢𑁆𑀣𑀁. 𑀯𑀻𑀭𑀺𑀬𑀦𑁆𑀢𑀺 𑀧𑀥𑀸𑀦𑀯𑀻𑀭𑀺𑀬𑀁. 𑀢𑀁 𑀧𑀦 𑀘𑀗𑁆𑀓𑀫𑀦𑀯𑀲𑁂𑀦 𑀓𑀭𑀡𑁂 ‘‘𑀓𑀸𑀬𑀺𑀓’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀆𑀳 𑁋 ‘‘𑀤𑀼𑀯𑀺𑀥𑀫𑁆𑀧𑀻’’𑀢𑀺. 𑀲𑀢𑁆𑀣𑀓𑀯𑀸𑀢𑀸𑀢𑀺 𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺 𑀓𑀢𑁆𑀢𑀭𑀺𑀬𑀸 𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀯𑀸𑀢𑀸. 𑀢𑁂𑀦𑀸𑀳 𑁋 ‘‘𑀲𑀢𑁆𑀣𑀁 𑀯𑀺𑀬𑀸’’𑀢𑀺𑀆𑀤𑀺. 𑀓𑀢𑀓𑀫𑁆𑀫𑁂𑀳𑀻𑀢𑀺 𑀓𑀢𑀘𑁄𑀭𑀓𑀫𑁆𑀫𑁂𑀳𑀺. 𑀢𑁂 𑀓𑀺𑀭 𑀓𑀢𑀓𑀫𑁆𑀫𑀸 𑀬𑀁 𑀦𑁂𑀲𑀁 𑀤𑁂𑀯𑀢𑀁 𑀆𑀬𑀸𑀘𑀺𑀢𑁆𑀯𑀸 𑀓𑀫𑁆𑀫𑀁 𑀦𑀺𑀧𑁆𑀨𑀦𑁆𑀦𑀁, 𑀢𑀲𑁆𑀲 𑀉𑀧𑀓𑀸𑀭𑀢𑁆𑀣𑀸𑀬 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑀸𑀦𑀺 𑀕𑀡𑁆𑀳𑀦𑁆𑀢𑀺. 𑀢𑁂 ‘‘𑀅𑀜𑁆𑀜𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀫𑀸𑀭𑀺𑀬𑀫𑀸𑀦𑁂𑀲𑀼 𑀓𑁄𑀮𑀸𑀳𑀮𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀧𑀩𑁆𑀩𑀚𑀺𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀓𑀢𑀓𑀫𑁆𑀫𑁂𑀳𑀻𑀢𑀺 𑀅𑀝𑀯𑀺𑀢𑁄 𑀕𑀸𑀫𑀁 𑀆𑀕𑀫𑀦𑀓𑀸𑀮𑁂 𑀓𑀫𑁆𑀫𑀦𑀺𑀧𑁆𑀨𑀢𑁆𑀢𑀢𑁆𑀣𑀁 𑀧𑀼𑀭𑁂𑀢𑀭𑀁 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑁂𑀳𑀺. 𑀢𑁂𑀦𑁂𑀯𑀸𑀳 𑁋 ‘‘𑀘𑁄𑀭𑀺𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸 𑀓𑀢𑀓𑀫𑁆𑀫𑀸 𑀦𑀸𑀫𑀸’’𑀢𑀺𑀆𑀤𑀺. 𑀅𑀝𑁆𑀞𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀢𑀺𑀬𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀦𑀯𑀫𑁂 ¶ 𑀧𑀸𑀴𑀺𑀕𑀫𑁆𑀪𑀻𑀭𑀸𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁨𑁨𑁯) 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀸 𑀅𑀕𑀸𑀥𑀸 𑀤𑀼𑀓𑁆𑀔𑁄𑀕𑀸𑀳𑀸 𑀲𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸. 𑀲𑀮𑁆𑀮𑀲𑀼𑀢𑁆𑀢𑀜𑁆𑀳𑀺 (𑀲𑀼. 𑀦𑀺. 𑁫𑁭𑁯) ‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀁, 𑀦 𑀅𑀢𑁆𑀣𑀕𑀫𑁆𑀪𑀻𑀭𑀁. 𑀢𑀣𑀸 𑀳𑀺 𑀢𑀢𑁆𑀣 𑀢𑀸 𑀢𑀸 𑀕𑀸𑀣𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀢𑀺𑀝𑁆𑀞𑀦𑁆𑀢𑀺. 𑀤𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀳𑀺 𑀜𑀸𑀡𑁂𑀦 𑀤𑀼𑀓𑁆𑀔𑁄𑀕𑀸𑀳𑀦𑁆𑀢𑀺 𑀓𑀢𑁆𑀯𑀸 ‘‘𑀕𑀫𑁆𑀪𑀻𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑀸𑀧𑀭𑀁𑀧𑁂𑀢𑁆𑀣 𑀓𑀸𑀲𑀜𑁆𑀘𑀺 𑀕𑀸𑀣𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀫𑁂𑀯, 𑀢𑀲𑁆𑀫𑀸 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀁. 𑀅𑀢𑁆𑀣𑀕𑀫𑁆𑀪𑀻𑀭𑀸𑀢𑀺 𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀸 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸, 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀲𑁆𑀲 (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄) 𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀢𑀸 𑀧𑀸𑀓𑀝𑀸𑀬𑁂𑀯. 𑀮𑁄𑀓𑀁 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑁄, 𑀲𑁄 𑀅𑀢𑁆𑀣𑀪𑀽𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀢𑁂𑀦𑀸𑀳 𑁋 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀻𑀧𑀓𑀸’’𑀢𑀺. 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀢𑁆𑀢𑀲𑀼𑀜𑁆𑀜𑀥𑀫𑁆𑀫𑀧𑁆𑀧𑀓𑀸𑀲𑀓𑀸 ¶ . 𑀢𑁂𑀦𑀸𑀳 ‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺. 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀘 𑀮𑀺𑀗𑁆𑀕𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀕𑁆𑀕𑀳𑁂𑀢𑀩𑁆𑀩𑁂 𑀘𑁂𑀯 𑀯𑀴𑀜𑁆𑀚𑁂𑀢𑀩𑁆𑀩𑁂 𑀘𑀸’’𑀢𑀺. 𑀓𑀯𑀺𑀦𑁄 𑀓𑀫𑁆𑀫𑀁 𑀓𑀯𑀺𑀢𑀸. 𑀬𑀲𑁆𑀲 𑀧𑀦 𑀬𑀁 𑀓𑀫𑁆𑀫𑀁, 𑀢𑀁 𑀢𑁂𑀦 𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀯𑀺𑀢𑀸𑀢𑀺 𑀓𑀯𑀻𑀳𑀺 𑀓𑀢𑀸’’𑀢𑀺. 𑀓𑀸𑀯𑁂𑀬𑁆𑀬𑀦𑁆𑀢𑀺 𑀓𑀩𑁆𑀬𑀁, 𑀓𑀩𑁆𑀬𑀦𑁆𑀢𑀺 𑀘 𑀓𑀯𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀘𑀺𑀢𑁆𑀢𑀓𑁆𑀔𑀭𑀸𑀢𑀺 𑀘𑀺𑀢𑁆𑀭𑀸𑀓𑀸𑀭𑀅𑀓𑁆𑀔𑀭𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀞𑀺𑀢𑀸𑀢𑀺 𑀦 𑀲𑀸𑀲𑀦𑀸𑀯𑀘𑀭𑀸. 𑀩𑀸𑀳𑀺𑀭𑀓𑀲𑀸𑀯𑀓𑁂𑀳𑀻𑀢𑀺 ‘‘𑀩𑀼𑀤𑁆𑀥𑀸’’𑀢𑀺 𑀅𑀧𑁆𑀧𑀜𑁆𑀜𑀸𑀢𑀸𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀸𑀯𑀓𑁂𑀳𑀺. 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀓𑁆𑀔𑀭𑀘𑀺𑀢𑁆𑀢𑀢𑀸𑀬 𑀘𑁂𑀯 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀼𑀫𑀸𑀢𑀼𑀕𑀸𑀫𑀫𑀳𑀸𑀕𑀳𑀧𑀢𑀺𑀓𑀸𑀤𑀬𑁄 ‘‘𑀏𑀲 𑀥𑀫𑁆𑀫𑀓𑀣𑀺𑀓𑁄’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑁄𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀢𑀢𑀺𑀬𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀢𑀼𑀢𑁆𑀣𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀤𑀲𑀫𑁂 𑀧𑀜𑁆𑀘𑀯𑀺𑀥𑁂𑀦 𑀲𑀁𑀲𑀕𑁆𑀕𑁂𑀦𑀸𑀢𑀺 ‘‘𑀲𑀯𑀦𑀲𑀁𑀲𑀕𑁆𑀕𑁄, 𑀤𑀲𑁆𑀲𑀦𑀲𑀁𑀲𑀕𑁆𑀕𑁄, 𑀲𑀫𑀼𑀮𑁆𑀮𑀸𑀧𑀲𑀁𑀲𑀕𑁆𑀕𑁄, 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄, 𑀓𑀸𑀬𑀲𑀁𑀲𑀕𑁆𑀕𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀧𑀜𑁆𑀘𑀯𑀺𑀥𑁂𑀦 𑀲𑀁𑀲𑀕𑁆𑀕𑁂𑀦. 𑀲𑀁𑀲𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀲𑀁𑀲𑀕𑁆𑀕𑁄, 𑀭𑀸𑀕𑁄. 𑀲𑀯𑀦𑀳𑁂𑀢𑀼𑀓𑁄, 𑀲𑀯𑀦𑀯𑀲𑁂𑀦 𑀯𑀸 𑀧𑀯𑀢𑁆𑀢𑁄 𑀲𑀁𑀲𑀕𑁆𑀕𑁄 𑀲𑀯𑀦𑀲𑀁𑀲𑀕𑁆𑀕𑁄. 𑀏𑀲 𑀦𑀬𑁄 ¶ 𑀲𑁂𑀲𑁂𑀲𑀼𑀧𑀺. 𑀓𑀸𑀬𑀲𑀁𑀲𑀕𑁆𑀕𑁄 𑀧𑀦 𑀓𑀸𑀬𑀧𑀭𑀸𑀫𑀸𑀲𑁄. 𑀢𑁂𑀲𑀼 𑀧𑀭𑁂𑀳𑀺 𑀯𑀸 𑀓𑀣𑀺𑀬𑀫𑀸𑀦𑀁 𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀯𑀸 𑀲𑀺𑀢𑀮𑀧𑀺𑀢𑀕𑀻𑀢𑀲𑀤𑁆𑀤𑀁 𑀲𑀼𑀡𑀦𑁆𑀢𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀯𑀺𑀲𑀪𑀸𑀕𑀭𑀽𑀧𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀅𑀜𑁆𑀜𑀫𑀜𑁆𑀜𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑀼𑀮𑁆𑀮𑀸𑀧𑀲𑀁𑀲𑀕𑁆𑀕𑁄 𑀦𑀸𑀫. 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀓𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀓𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫.

𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁆𑀦𑀲𑀦𑁆𑀦𑀺𑀥𑀺𑀧𑀸𑀦𑀲𑀦𑁆𑀦𑀺𑀥𑀺𑀯𑀢𑁆𑀣𑀲𑀦𑁆𑀦𑀺𑀥𑀺𑀬𑀸𑀦𑀲𑀦𑁆𑀦𑀺𑀥𑀺𑀲𑀬𑀦𑀲𑀦𑁆𑀦𑀺𑀥𑀺𑀕𑀦𑁆𑀥𑀲𑀦𑁆𑀦𑀺𑀥𑀺- 𑀆𑀫𑀺𑀲𑀲𑀦𑁆𑀦𑀺𑀥𑀺𑀯𑀲𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀁. 𑀲𑀦𑁆𑀦𑀺𑀥𑀺𑀓𑀢𑀲𑁆𑀲𑀸𑀢𑀺 𑀏𑀢𑁂𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕’’𑀦𑁆𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁦) 𑀏𑀢𑁆𑀣 𑀓𑀸𑀭-𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀯𑀸 ‘‘𑀆𑀘𑀬𑀁 𑀕𑀸𑀫𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀆𑀘𑀬𑀕𑀸𑀫𑀺𑀦𑁄’’𑀢𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀏𑀯𑀁 ‘‘𑀲𑀦𑁆𑀦𑀺𑀥𑀺𑀓𑀸𑀭𑀁 𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀧𑀭𑀺𑀪𑁄𑀕𑀦𑁆𑀢𑀺 𑀅𑀢𑁆𑀣𑁄.

‘‘𑀲𑀦𑁆𑀦𑀺𑀥𑀺𑀓𑀢𑀲𑁆𑀲 ¶ 𑀧𑀭𑀺𑀪𑁄𑀕’’𑀦𑁆𑀢𑀺 𑀏𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁨) 𑀧𑀦 𑀤𑀼𑀯𑀺𑀥𑀸 𑀓𑀣𑀸 𑀯𑀺𑀦𑀬𑀯𑀲𑁂𑀦 𑀲𑀮𑁆𑀮𑁂𑀔𑀯𑀲𑁂𑀦 𑀘. 𑀯𑀺𑀦𑀬𑀯𑀲𑁂𑀦 𑀢𑀸𑀯 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀦𑀁 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀁 𑀅𑀧𑀭𑀚𑁆𑀚𑀼 𑀲𑀦𑁆𑀦𑀺𑀥𑀺𑀓𑀸𑀭𑀁 𑀳𑁄𑀢𑀺, 𑀢𑀲𑁆𑀲 𑀧𑀭𑀺𑀪𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀦 𑀲𑀸𑀫𑀡𑁂𑀭𑀸𑀦𑀁 𑀤𑀢𑁆𑀯𑀸 𑀢𑁂𑀳𑀺 𑀮𑀤𑁆𑀥𑀁 𑀯𑀸 𑀧𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀮𑁆𑀮𑁂𑀔𑁄 𑀧𑀦 𑀦 𑀳𑁄𑀢𑀺. 𑀧𑀸𑀦𑀲𑀦𑁆𑀦𑀺𑀥𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀯𑀢𑁆𑀣𑀲𑀦𑁆𑀦𑀺𑀥𑀺𑀫𑁆𑀳𑀺 𑀅𑀦𑀥𑀺𑀝𑁆𑀞𑀺𑀢𑀸𑀯𑀺𑀓𑀧𑁆𑀧𑀺𑀢𑀁 𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺. 𑀅𑀬𑀁 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸. 𑀧𑀭𑀺𑀬𑀸𑀬𑀢𑁄 𑀧𑀦 𑀢𑀺𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀘𑀢𑀼𑀢𑁆𑀣𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀲𑁆𑀲 𑀧𑀦 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀲𑁄 𑀉𑀤𑁆𑀤𑁂𑀲𑀢𑁆𑀣𑀸𑀬 𑀯𑀸 𑀧𑀭𑀺𑀧𑀼𑀘𑁆𑀙𑀢𑁆𑀣𑀸𑀬 𑀯𑀸 𑀕𑀢𑁄, 𑀆𑀕𑀢𑀫𑀢𑁆𑀢𑁂 𑀤𑀸𑀢𑀩𑁆𑀩𑀁, 𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑀻𑀯𑀭𑁂 𑀧𑀦 𑀅𑀧𑁆𑀧𑀳𑁄𑀦𑁆𑀢𑁂, 𑀲𑀢𑀺𑀬𑀸 𑀯𑀸 𑀧𑀘𑁆𑀘𑀸𑀲𑀸𑀬 𑀅𑀦𑀼𑀜𑁆𑀜𑀸𑀢𑀓𑀸𑀮𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀽𑀘𑀺𑀲𑀼𑀢𑁆𑀢𑀘𑀻𑀯𑀭𑀓𑀸𑀭𑀓𑀸𑀦𑀁 𑀅𑀮𑀸𑀪𑁂 𑀢𑀢𑁄𑀧𑀺 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺 ‘‘𑀇𑀫𑀲𑁆𑀫𑀺𑀁 𑀚𑀺𑀡𑁆𑀡𑁂 𑀧𑀼𑀦 𑀈𑀤𑀺𑀲𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺.

𑀬𑀸𑀦𑀲𑀦𑁆𑀦𑀺𑀥𑀺𑀫𑁆𑀳𑀺 ¶ 𑀬𑀸𑀦𑀁 𑀦𑀸𑀫 𑀯𑀬𑁆𑀳𑀁 𑀭𑀣𑁄 𑀲𑀓𑀝𑀁 𑀲𑀦𑁆𑀤𑀫𑀸𑀦𑀺𑀓𑀸 𑀧𑀸𑀝𑀗𑁆𑀓𑀻𑀢𑀺. 𑀦 𑀧𑀦𑁂𑀢𑀁 𑀧𑀩𑁆𑀩𑀚𑀺𑀢𑀲𑁆𑀲 𑀬𑀸𑀦𑀁, 𑀉𑀧𑀸𑀳𑀦𑀁 𑀧𑀦 𑀬𑀸𑀦𑀁. 𑀏𑀓𑀪𑀺𑀓𑁆𑀔𑀼𑀲𑁆𑀲 𑀳𑀺 𑀏𑀓𑁄 𑀅𑀭𑀜𑁆𑀜𑀯𑀸𑀲𑀢𑁆𑀣𑀸𑀬, 𑀏𑀓𑁄 𑀥𑁄𑀢𑀧𑀸𑀤𑀓𑀢𑁆𑀣𑀸𑀬𑀸𑀢𑀺 𑀉𑀓𑁆𑀓𑀁𑀲𑀢𑁄 𑀤𑁆𑀯𑁂 𑀉𑀧𑀸𑀳𑀦𑀲𑀗𑁆𑀖𑀸𑀝𑀓𑀸 𑀯𑀝𑁆𑀝𑀦𑁆𑀢𑀺, 𑀢𑀢𑀺𑀬𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑁄. ‘‘𑀇𑀫𑀲𑁆𑀫𑀺𑀁 𑀚𑀺𑀡𑁆𑀡𑁂 𑀅𑀜𑁆𑀜𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺. 𑀲𑀬𑀦𑀲𑀦𑁆𑀦𑀺𑀥𑀺𑀫𑁆𑀳𑀺 𑀲𑀬𑀦𑀦𑁆𑀢𑀺 𑀫𑀜𑁆𑀘𑁄. 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁄 𑀲𑀬𑀦𑀕𑀩𑁆𑀪𑁂, 𑀏𑀓𑁄 𑀤𑀺𑀯𑀸𑀝𑁆𑀞𑀸𑀦𑁂𑀢𑀺 𑀉𑀓𑁆𑀓𑀁𑀲𑀢𑁄 𑀤𑁆𑀯𑁂 𑀫𑀜𑁆𑀘𑀸 𑀯𑀝𑁆𑀝𑀦𑁆𑀢𑀺. 𑀢𑀢𑁄 𑀉𑀢𑁆𑀢𑀭𑀺𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀕𑀡𑀲𑁆𑀲 𑀯𑀸 𑀤𑀸𑀢𑀩𑁆𑀩𑁄, 𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺 𑀘𑁂𑀯 𑀳𑁄𑀢𑀺, 𑀲𑀮𑁆𑀮𑁂𑀔𑁄 𑀘 𑀓𑀼𑀧𑁆𑀧𑀢𑀺. 𑀕𑀦𑁆𑀥𑀲𑀦𑁆𑀦𑀺𑀥𑀺𑀫𑁆𑀳𑀺 𑀪𑀺𑀓𑁆𑀔𑀼𑀦𑁄 𑀓𑀡𑁆𑀟𑀼𑀓𑀘𑁆𑀙𑀼𑀙𑀯𑀺𑀤𑁄𑀲𑀸𑀤𑀺𑀆𑀩𑀸𑀥𑁂 𑀲𑀢𑀺 𑀕𑀦𑁆𑀥𑀸 𑀯𑀝𑁆𑀝𑀦𑁆𑀢𑀺. 𑀕𑀦𑁆𑀥𑀢𑁆𑀣𑀺𑀓𑁂𑀦 𑀕𑀦𑁆𑀥𑀜𑁆𑀘 𑀆𑀳𑀭𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀅𑀜𑁆𑀜𑁂𑀲𑀁 𑀯𑀸 𑀆𑀩𑀸𑀥𑀺𑀓𑀸𑀦𑀁 𑀤𑀸𑀢𑀩𑁆𑀩𑀁, 𑀤𑁆𑀯𑀸𑀭𑁂 𑀧𑀜𑁆𑀘𑀗𑁆𑀕𑀼𑀮𑀺𑀖𑀭𑀥𑀽𑀧𑀦𑀸𑀤𑀻𑀲𑀼 𑀯𑀸 𑀉𑀧𑀦𑁂𑀢𑀩𑁆𑀩𑀁. ‘‘𑀧𑀼𑀦 𑀭𑁄𑀕𑁂 𑀲𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀕𑀦𑁆𑀥𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺, 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀺.

𑀆𑀫𑀺𑀲𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 ‘‘𑀢𑀣𑀸𑀭𑀽𑀧𑁂 𑀓𑀸𑀮𑁂 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀺𑀮𑀢𑀡𑁆𑀟𑀼𑀮𑀫𑀼𑀕𑁆𑀕𑀫𑀸𑀲𑀦𑀸𑀴𑀺𑀓𑁂𑀭𑀮𑁄𑀡𑀫𑀘𑁆𑀙𑀲𑀧𑁆𑀧𑀺𑀢𑁂𑀮𑀓𑀼𑀮𑀸𑀮𑀪𑀸𑀚𑀦𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀲𑁄 𑀯𑀲𑁆𑀲𑀓𑀸𑀮𑁂 𑀓𑀸𑀮𑀲𑁆𑀲𑁂𑀯 𑀲𑀸𑀫𑀡𑁂𑀭𑁂𑀳𑀺 𑀬𑀸𑀕𑀼𑀁 𑀧𑀘𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀲𑀸𑀫𑀡𑁂𑀭 𑀉𑀤𑀓𑀓𑀤𑁆𑀤𑀫𑁂 𑀤𑀼𑀓𑁆𑀔𑀁 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁, 𑀕𑀘𑁆𑀙 𑀅𑀲𑀼𑀓𑀓𑀼𑀮𑀁 𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀆𑀭𑁄𑀘𑁂𑀳𑀺, 𑀅𑀲𑀼𑀓𑀓𑀼𑀮𑀢𑁄 𑀤𑀥𑀺𑀆𑀤𑀻𑀦𑀺 𑀆𑀳𑀭𑀸’’𑀢𑀺 𑀧𑁂𑀲𑁂𑀢𑀺. 𑀪𑀺𑀓𑁆𑀔𑀽𑀳𑀺 ‘‘𑀓𑀺𑀁, 𑀪𑀦𑁆𑀢𑁂 ¶ , 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀤𑀼𑀧𑁆𑀧𑀯𑁂𑀲𑁄, 𑀆𑀯𑀼𑀲𑁄, 𑀇𑀤𑀸𑀦𑀺 𑀕𑀸𑀫𑁄’’𑀢𑀺 𑀯𑀤𑀢𑀺. 𑀢𑁂 ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀘𑁆𑀙𑀣 𑀢𑀼𑀫𑁆𑀳𑁂, 𑀫𑀬𑀁 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀣 𑀲𑀸𑀫𑀡𑁂𑀭𑁄 𑀤𑀥𑀺𑀆𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀧𑀦𑁂𑀢𑀺, 𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀉𑀧𑀝𑁆𑀞𑀸𑀓𑀸 𑀪𑀢𑁆𑀢𑀁 𑀧𑀳𑀺𑀡𑀦𑁆𑀢𑀺, 𑀢𑀢𑁄𑀧𑀺 𑀫𑀦𑀸𑀧𑀫𑀦𑀸𑀧𑀁 𑀪𑀼𑀜𑁆𑀚𑀢𑀺. 𑀅𑀣 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁄𑀧𑀺 𑀫𑀦𑀸𑀧𑀫𑀦𑀸𑀧𑀁 𑀪𑀼𑀜𑁆𑀚𑀢𑀺𑀬𑁂𑀯. 𑀏𑀯𑀁 𑀘𑀢𑀼𑀫𑀸𑀲𑀫𑁆𑀧𑀺 𑀯𑀻𑀢𑀺𑀦𑀸𑀫𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀼 𑀫𑀼𑀡𑁆𑀟𑀓𑀼𑀝𑀼𑀫𑁆𑀩𑀺𑀓𑀚𑀻𑀯𑀺𑀓𑀁 𑀚𑀻𑀯𑀢𑀺, 𑀦 𑀲𑀫𑀡𑀚𑀻𑀯𑀺𑀓𑀦𑁆𑀢𑀺. 𑀏𑀯𑀭𑀽𑀧𑁄 𑀆𑀫𑀺𑀲𑀲𑀦𑁆𑀦𑀺𑀥𑀺 𑀦𑀸𑀫 𑀳𑁄𑀢𑀺. 𑀪𑀺𑀓𑁆𑀔𑀼𑀦𑁄 𑀧𑀦 𑀯𑀲𑀦𑀝𑁆𑀞𑀸𑀦𑁂 𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺 𑀏𑀓𑁄 𑀕𑀼𑀴𑀧𑀺𑀡𑁆𑀟𑁄 ¶ 𑀓𑀼𑀟𑀼𑀯𑀫𑀢𑁆𑀢𑀁 𑀲𑀧𑁆𑀧𑀻𑀢𑀺 𑀏𑀢𑁆𑀢𑀓𑀁 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺 𑀅𑀓𑀸𑀮𑁂 𑀲𑀫𑁆𑀧𑀢𑁆𑀢𑀘𑁄𑀭𑀸𑀦𑀁 𑀅𑀢𑁆𑀣𑀸𑀬. 𑀢𑁂 𑀳𑀺 𑀏𑀢𑁆𑀢𑀓𑀁 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑀁 𑀅𑀮𑀪𑀦𑁆𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀲𑀘𑁂 𑀳𑀺 𑀏𑀢𑁆𑀢𑀓𑀁 𑀦𑀢𑁆𑀣𑀺, 𑀆𑀳𑀭𑀸𑀧𑁂𑀢𑁆𑀯𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀨𑀸𑀲𑀼𑀓𑀓𑀸𑀮𑁂 𑀘 𑀬𑀤𑁂𑀢𑁆𑀣 𑀓𑀧𑁆𑀧𑀺𑀬𑀁, 𑀢𑀁 𑀅𑀢𑁆𑀢𑀦𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀧𑀦 𑀩𑀳𑀼𑀁 𑀞𑀧𑁂𑀦𑁆𑀢𑀲𑁆𑀲𑀧𑀺 𑀲𑀦𑁆𑀦𑀺𑀥𑀺 𑀦𑀸𑀫 𑀦𑀢𑁆𑀣𑀺.

𑀘𑀢𑀼𑀢𑁆𑀣𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑁄𑀥𑀸𑀚𑀻𑀯𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁯) 𑁪. 𑀣𑁂𑀭𑀯𑀕𑁆𑀕𑁄

𑁧-𑁨. 𑀭𑀚𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁧-𑁮𑁨. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀤𑀼𑀢𑀺𑀬𑁂 𑀕𑀼𑀡𑀫𑀓𑁆𑀔𑀦𑀸𑀬 𑀧𑀯𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀕𑀽𑀣𑁂𑀦 𑀧𑀳𑀭𑀦𑁆𑀢𑀁 𑀕𑀽𑀣𑁄 𑀯𑀺𑀬 𑀧𑀞𑀫𑀢𑀭𑀁 𑀫𑀓𑁆𑀔𑁂𑀢𑀻𑀢𑀺 𑀫𑀓𑁆𑀔𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀓𑁆𑀔𑀻. 𑀧𑀴𑀸𑀲𑀢𑀻𑀢𑀺 𑀧𑀴𑀸𑀲𑁄, 𑀧𑀭𑀲𑁆𑀲 𑀕𑀼𑀡𑁂 𑀟𑀁𑀲𑀺𑀢𑁆𑀯𑀸 𑀯𑀺𑀬 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀴𑀸𑀲𑀻. 𑀧𑀴𑀸𑀲𑀻 𑀧𑀼𑀕𑁆𑀕𑀮𑁄 𑀳𑀺 𑀤𑀼𑀢𑀺𑀬𑀲𑁆𑀲 𑀥𑀼𑀭𑀁 𑀦 𑀤𑁂𑀢𑀺, 𑀲𑀫𑁆𑀧𑀲𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑀭𑀚𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀼𑀳𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀢𑀢𑀺𑀬𑁂 ¶ 𑀢𑀻𑀳𑀺 𑀓𑀼𑀳𑀦𑀯𑀢𑁆𑀣𑀽𑀳𑀻𑀢𑀺 𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦𑀪𑁂𑀤𑀢𑁄 𑀢𑀺𑀧𑁆𑀧𑀪𑁂𑀤𑁂𑀳𑀺 𑀓𑀼𑀳𑀦𑀯𑀢𑁆𑀣𑀽𑀳𑀺. 𑀢𑀺𑀯𑀺𑀥𑁂𑀦 𑀓𑀼𑀳𑀦𑀯𑀢𑁆𑀣𑀼𑀦𑀸 𑀮𑁄𑀓𑀁 𑀓𑀼𑀳𑀬𑀢𑀺 𑀯𑀺𑀫𑁆𑀳𑀸𑀧𑀬𑀢𑀺 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄’’𑀢𑀺 𑀅𑀢𑁆𑀢𑀦𑀺 𑀧𑀭𑁂𑀲𑀁 𑀯𑀺𑀫𑁆𑀳𑀬𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀓𑀼𑀳𑀓𑁄. 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀮𑀧𑀢𑀺 𑀅𑀢𑁆𑀢𑀸𑀦𑀁 𑀤𑀸𑀬𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀲𑁄 𑀓𑀺𑀜𑁆𑀘𑀺 𑀤𑀤𑀸𑀢𑀺, 𑀏𑀯𑀁 𑀉𑀓𑁆𑀓𑀸𑀘𑁂𑀢𑁆𑀯𑀸 𑀓𑀣𑁂𑀢𑀻𑀢𑀺 𑀮𑀧𑀓𑁄. 𑀦𑀺𑀫𑀺𑀢𑁆𑀢𑀁 𑀲𑀻𑀮𑀁 𑀢𑀲𑁆𑀲𑀸𑀢𑀺 𑀦𑁂𑀫𑀺𑀢𑁆𑀢𑀺𑀓𑁄, 𑀦𑀺𑀫𑀺𑀢𑁆𑀢𑁂𑀦 𑀯𑀸 𑀘𑀭𑀢𑀺, 𑀦𑀺𑀫𑀺𑀢𑁆𑀢𑀁 𑀯𑀸 𑀓𑀭𑁄𑀢𑀻𑀢𑀺 𑀦𑁂𑀫𑀺𑀢𑁆𑀢𑀺𑀓𑁄. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀧𑀭𑁂𑀲𑀁 𑀧𑀘𑁆𑀘𑀬𑀤𑀸𑀦𑀲𑀜𑁆𑀜𑀼𑀧𑁆𑀧𑀸𑀤𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀯𑀼𑀘𑁆𑀘𑀢𑀺 ¶ . 𑀦𑀺𑀧𑁆𑀧𑁂𑀲𑁄 𑀲𑀻𑀮𑀫𑀲𑁆𑀲𑀸𑀢𑀺 𑀦𑀺𑀧𑁆𑀧𑁂𑀲𑀺𑀓𑁄. 𑀦𑀺𑀧𑁆𑀧𑀺𑀲𑀢𑀻𑀢𑀺 𑀯𑀸 𑀦𑀺𑀧𑁆𑀧𑁂𑀲𑁄, 𑀦𑀺𑀧𑁆𑀧𑁂𑀲𑁄𑀬𑁂𑀯 𑀦𑀺𑀧𑁆𑀧𑁂𑀲𑀺𑀓𑁄. 𑀦𑀺𑀧𑁆𑀧𑁂𑀲𑁄𑀢𑀺 𑀘 𑀲𑀞𑀧𑀼𑀭𑀺𑀲𑁄 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀁 𑀅𑀓𑁆𑀓𑁄𑀲𑀦𑀼𑀧𑁆𑀧𑀡𑁆𑀟𑀦𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀤𑀺.

𑀓𑀼𑀳𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁭. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁬-𑁮𑁭. 𑀙𑀝𑁆𑀞𑁂 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀉𑀘𑁆𑀘𑀦𑀻𑀘𑀸𑀦𑀺. 𑀢𑁂𑀦𑀸𑀳 ‘‘𑀫𑀳𑀦𑁆𑀢𑀔𑀼𑀤𑁆𑀤𑀓𑀸𑀦𑀻’’𑀢𑀺. 𑀓𑀺𑀁𑀓𑀭𑀡𑀻𑀬𑀸𑀦𑀻𑀢𑀺 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀺. 𑀢𑀢𑁆𑀣 𑀉𑀘𑁆𑀘𑀓𑀫𑁆𑀫𑀸𑀦𑀺 𑀦𑀸𑀫 𑀘𑀻𑀯𑀭𑀲𑁆𑀲 𑀓𑀭𑀡𑀁, 𑀭𑀚𑀦𑀁, 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀁, 𑀉𑀧𑁄𑀲𑀣𑀸𑀕𑀸𑀭𑀘𑁂𑀢𑀺𑀬𑀖𑀭𑀩𑁄𑀥𑀺𑀖𑀭𑁂𑀲𑀼 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑀺 𑀏𑀯𑀫𑀸𑀤𑀺. 𑀅𑀯𑀘𑀓𑀫𑁆𑀫𑀁 𑀦𑀸𑀫 𑀧𑀸𑀤𑀥𑁄𑀯𑀦𑀫𑀓𑁆𑀔𑀦𑀸𑀤𑀺 𑀔𑀼𑀤𑁆𑀤𑀓𑀓𑀫𑁆𑀫𑀁. 𑀢𑀢𑁆𑀭𑀼𑀧𑀸𑀬𑀸𑀲𑀸𑀢𑀺 𑀢𑀢𑁆𑀭𑀼𑀧𑀕𑀫𑀦𑀺𑀬𑀸, 𑀢𑀢𑁆𑀭 𑀢𑀢𑁆𑀭 𑀫𑀳𑀦𑁆𑀢𑁂 𑀔𑀼𑀤𑁆𑀤𑀓𑁂 𑀘 𑀓𑀫𑁆𑀫𑁂 𑀲𑀸𑀥𑀦𑀯𑀲𑁂𑀦 𑀉𑀧𑀕𑀘𑁆𑀙𑀦𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀸𑀤𑀦𑁂 𑀲𑀫𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 𑀯𑀸 𑀢𑀢𑁆𑀭 𑀢𑀢𑁆𑀭 𑀓𑀫𑁆𑀫𑁂 𑀲𑀸𑀥𑁂𑀢𑀩𑁆𑀩𑁂 𑀉𑀧𑀸𑀬𑀪𑀽𑀢𑀸𑀬. 𑀅𑀮𑀁 𑀓𑀸𑀢𑀼𑀦𑁆𑀢𑀺 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀯𑀺𑀘𑀸𑀭𑁂𑀢𑀼𑀁 𑀲𑀫𑀢𑁆𑀣𑁄. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀣𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀅𑀝𑁆𑀞𑀫𑁂 ¶ 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑁄𑀢𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀁 𑀅𑀦𑀺𑀯𑀢𑁆𑀢𑀺𑀪𑀸𑀯𑀁 𑀧𑀢𑁆𑀣𑁄. 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀸𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀢𑁂𑀦𑀸𑀳 ‘‘𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀧𑀸𑀓𑀝𑁄𑀢𑀺 𑀅𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀘𑁂𑀯 𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀘 𑀲𑀫𑀼𑀕𑁆𑀕𑀢𑁄. 𑀬𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀻, 𑀬𑀲𑀁 𑀲𑀺𑀢𑁄 𑀦𑀺𑀲𑁆𑀲𑀺𑀢𑁄 𑀯𑀸 𑀬𑀲𑀲𑁆𑀲𑀻. 𑀢𑁂𑀦𑀸𑀳 ‘‘𑀬𑀲𑀦𑀺𑀲𑁆𑀲𑀺𑀢𑁄’’𑀢𑀺. 𑀅𑀲𑀢𑀁 𑀅𑀲𑀸𑀥𑀽𑀦𑀁 𑀥𑀫𑁆𑀫𑀸 𑀅𑀲𑀤𑁆𑀥𑀫𑁆𑀫𑀸, 𑀅𑀲𑀦𑁆𑀢𑀸 𑀯𑀸 𑀅𑀲𑀼𑀦𑁆𑀤𑀭𑀸 𑀕𑀸𑀭𑀬𑁆𑀳𑀸 𑀮𑀸𑀫𑀓𑀸 𑀥𑀫𑁆𑀫𑀸𑀢𑀺 𑀅𑀲𑀤𑁆𑀥𑀫𑁆𑀫𑀸. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀤𑁆𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀣𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀦𑀯𑀫𑁂 ¶ 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀓𑀫𑁆𑀫𑀁 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀸𑀭𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀓𑀫𑁆𑀫𑀸𑀭𑀸𑀫𑀢𑀸. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀇𑀢𑀺𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀻𑀯𑀭𑀯𑀺𑀘𑀸𑀭𑀡𑀁 𑀘𑀻𑀯𑀭𑀓𑀫𑁆𑀫𑀓𑀭𑀡𑀁 𑀉𑀧𑀢𑁆𑀣𑀫𑁆𑀪𑀦𑀁 𑀧𑀢𑁆𑀢𑀢𑁆𑀣𑀯𑀺𑀓𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀥𑀫𑁆𑀫𑀓𑀭𑀡𑀆𑀥𑀸𑀭𑀓𑀧𑀸𑀤𑀓𑀣𑀮𑀺𑀓𑀲𑀫𑁆𑀫𑀚𑁆𑀚𑀦𑀺𑀆𑀤𑀻𑀦𑀁 𑀓𑀭𑀡𑀦𑁆𑀢𑀺. 𑀏𑀓𑀘𑁆𑀘𑁄 𑀳𑀺 𑀏𑀢𑀸𑀦𑀺 𑀓𑀭𑁄𑀦𑁆𑀢𑁄 𑀲𑀓𑀮𑀤𑀺𑀯𑀲𑀁 𑀏𑀢𑀸𑀦𑁂𑀯 𑀓𑀭𑁄𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀲 𑀧𑀝𑀺𑀓𑁆𑀔𑁂𑀧𑁄. 𑀬𑁄 𑀧𑀦 𑀏𑀢𑁂𑀲𑀁 𑀓𑀭𑀡𑀯𑁂𑀮𑀸𑀬𑀫𑁂𑀯 𑀢𑀸𑀦𑀺 𑀓𑀭𑁄𑀢𑀺, 𑀉𑀤𑁆𑀤𑁂𑀲𑀯𑁂𑀮𑀸𑀬 𑀉𑀤𑁆𑀤𑁂𑀲𑀁 𑀕𑀡𑁆𑀳𑀸𑀢𑀺, 𑀲𑀚𑁆𑀛𑀸𑀬𑀯𑁂𑀮𑀸𑀬 𑀲𑀚𑁆𑀛𑀸𑀬𑀢𑀺, 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀯𑁂𑀮𑀸𑀬 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀭𑁄𑀢𑀺, 𑀫𑀦𑀲𑀺𑀓𑀸𑀭𑀯𑁂𑀮𑀸𑀬 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀺, 𑀦 𑀲𑁄 𑀓𑀫𑁆𑀫𑀸𑀭𑀸𑀫𑁄 𑀦𑀸𑀫. 𑀪𑀲𑁆𑀲𑀸𑀭𑀸𑀫𑀢𑀸𑀢𑀺 𑀏𑀢𑁆𑀣 𑀬𑁄 𑀇𑀢𑁆𑀣𑀺𑀯𑀡𑁆𑀡𑀧𑀼𑀭𑀺𑀲𑀯𑀡𑁆𑀡𑀸𑀤𑀺𑀯𑀲𑁂𑀦 𑀆𑀮𑀸𑀧𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑁄𑀬𑁂𑀯 𑀤𑀺𑀯𑀲𑀜𑁆𑀘 𑀭𑀢𑁆𑀢𑀺𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑀺, 𑀏𑀯𑀭𑀽𑀧𑁄 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀻 𑀦 𑀳𑁄𑀢𑀺, 𑀅𑀬𑀁 𑀪𑀲𑁆𑀲𑀸𑀭𑀸𑀫𑁄 𑀦𑀸𑀫. 𑀬𑁄 𑀧𑀦 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀲𑀫𑁆𑀧𑀺 𑀥𑀫𑁆𑀫𑀁 𑀓𑀣𑁂𑀢𑀺, 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀁 𑀅𑀧𑁆𑀧𑀪𑀲𑁆𑀲𑁄 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀻𑀬𑁂𑀯. 𑀓𑀲𑁆𑀫𑀸? ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑀥𑀫𑁆𑀫𑀻 𑀯𑀸 𑀓𑀣𑀸, 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 (𑀫. 𑀦𑀺. 𑁧.𑁨𑁭𑁩; 𑀉𑀤𑀸. 𑁧𑁨, 𑁨𑁮, 𑁨𑁯) 𑀯𑀼𑀢𑁆𑀢𑀢𑁆𑀢𑀸.

𑀦𑀺𑀤𑁆𑀤𑀸𑀭𑀸𑀫𑀢𑀸𑀢𑀺 𑀏𑀢𑁆𑀣 𑀬𑁄 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀦𑀺𑀧𑀦𑁆𑀦𑁄𑀧𑀺 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄 𑀦𑀺𑀤𑁆𑀤𑀸𑀬𑀢𑀺𑀬𑁂𑀯, 𑀅𑀬𑀁 𑀦𑀺𑀤𑁆𑀤𑀸𑀭𑀸𑀫𑁄 𑀦𑀸𑀫. 𑀬𑀲𑁆𑀲 𑀧𑀦 𑀓𑀭𑀚𑀓𑀸𑀬𑁂 𑀕𑁂𑀮𑀜𑁆𑀜𑁂𑀦 𑀘𑀺𑀢𑁆𑀢𑀁 𑀪𑀯𑀗𑁆𑀕𑁂 𑀑𑀢𑀭𑀢𑀺, 𑀦𑀸𑀬𑀁 𑀦𑀺𑀤𑁆𑀤𑀸𑀭𑀸𑀫𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁮𑁭). 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀢𑀺 𑀏𑀢𑁆𑀣 ¶ 𑀬𑁄 𑀏𑀓𑀲𑁆𑀲 𑀤𑀼𑀢𑀺𑀬𑁄, 𑀤𑁆𑀯𑀺𑀦𑁆𑀦𑀁 𑀢𑀢𑀺𑀬𑁄, 𑀢𑀺𑀡𑁆𑀡𑀁 𑀘𑀢𑀼𑀢𑁆𑀣𑁄𑀢𑀺 𑀏𑀯𑀁 𑀲𑀁𑀲𑀝𑁆𑀞𑁄𑀯 𑀯𑀺𑀳𑀭𑀢𑀺, 𑀏𑀓𑀓𑁄 𑀅𑀲𑁆𑀲𑀸𑀤𑀁 𑀦 𑀮𑀪𑀢𑀺, 𑀅𑀬𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑁄. 𑀬𑁄 𑀧𑀦 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀅𑀲𑁆𑀲𑀸𑀤𑀁 𑀮𑀪𑀢𑀺, 𑀦𑀸𑀬𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀔𑀸𑀦𑀁 𑀧𑀝𑀺𑀮𑀤𑁆𑀥𑀕𑀼𑀡𑀲𑁆𑀲 𑀧𑀭𑀺𑀳𑀸𑀦𑀸𑀲𑀫𑁆𑀪𑀯𑀢𑁄 ‘‘𑀉𑀧𑀭𑀺𑀕𑀼𑀡𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀞𑀫𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀤𑀲𑀫𑁂 ¶ 𑀅𑀢𑀺𑀧𑀸𑀢𑁄𑀯𑀸𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑁂 𑀓𑁄𑀝𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀣𑁄𑀓𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼𑀪𑀺𑀓𑁆𑀔𑀢𑁆𑀣𑀸𑀬 𑀧𑀸𑀢𑁄𑀯 𑀧𑀯𑀺𑀲𑀢𑀺. 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀕𑀺𑀳𑀺𑀲𑀁𑀲𑀕𑁆𑀕𑀯𑀲𑁂𑀦 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀓𑁆𑀓𑀫𑀢𑀺. 𑀧𑀸𑀢𑁄𑀬𑁂𑀯 𑀳𑀺 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀪𑁄𑀚𑀦𑀯𑁂𑀮𑀸𑀬 ‘‘𑀧𑀡𑀻𑀢𑀪𑀺𑀓𑁆𑀔𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀓𑀝𑁆𑀞𑁂 𑀫𑀚𑁆𑀛𑀦𑁆𑀳𑀺𑀓𑁂 𑀉𑀝𑁆𑀞𑀸𑀬 𑀥𑀫𑁆𑀫𑀓𑀭𑀡𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀺𑀳𑀺𑀲𑀁𑀲𑀝𑁆𑀞𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀚𑁆𑀛𑀦𑁆𑀳𑁂 𑀯𑀻𑀢𑀺𑀯𑀢𑁆𑀢𑁂 𑀧𑀝𑀺𑀓𑁆𑀓𑀫𑀢𑀺.

𑀅𑀧𑁆𑀧𑀺𑀘𑁆𑀙𑀓𑀣𑀸𑀢𑀺, ‘‘𑀆𑀯𑀼𑀲𑁄, 𑀅𑀢𑁆𑀭𑀺𑀘𑁆𑀙𑀢𑀸 𑀧𑀸𑀧𑀺𑀘𑁆𑀙𑀢𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀢𑁂𑀲𑀼 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀅𑀧𑁆𑀧𑀺𑀘𑁆𑀙𑀢𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀓𑀣𑀸. 𑀢𑀻𑀳𑀺 𑀯𑀺𑀯𑁂𑀓𑁂𑀳𑀻𑀢𑀺 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺. 𑀢𑀢𑁆𑀣 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀻𑀢𑀺 𑀅𑀬𑀁 𑀓𑀸𑀬𑀯𑀺𑀯𑁂𑀓𑁄 𑀦𑀸𑀫. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁫𑁭). 𑀤𑀼𑀯𑀺𑀥𑀁 𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀺𑀓𑀁, 𑀘𑁂𑀢𑀲𑀺𑀓𑀜𑁆𑀘 𑀯𑀻𑀭𑀺𑀬𑀁. 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀫𑀸𑀥𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀯𑀺𑀫𑀼𑀢𑁆𑀢𑀺𑀓𑀣𑀸𑀢𑀺 𑀯𑀸 𑀅𑀭𑀺𑀬𑀨𑀮𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀓𑀣𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀤𑀼𑀢𑀺𑀬𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁦) 𑁫. 𑀓𑀓𑀼𑀥𑀯𑀕𑁆𑀕𑁄

𑁧-𑁧𑁦. 𑀧𑀞𑀫𑀲𑀫𑁆𑀧𑀤𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁧-𑁧𑁦𑁦. 𑀧𑀜𑁆𑀘𑀫𑀲𑁆𑀲 ¶ ¶ 𑀧𑀞𑀫𑁂 𑀤𑀼𑀢𑀺𑀬𑁂 𑀘 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀢𑀢𑀺𑀬𑁂 𑀆𑀚𑀸𑀦𑀦𑀢𑁄 𑀅𑀜𑁆𑀜𑀸, 𑀉𑀧𑀭𑀺𑀫𑀕𑁆𑀕𑀧𑀜𑁆𑀜𑀸 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬 𑀏𑀯 𑀚𑀸𑀦𑀦𑀢𑁄. 𑀢𑀲𑁆𑀲𑀸 𑀧𑀦 𑀨𑀮𑀪𑀸𑀯𑀢𑁄 𑀫𑀕𑁆𑀕𑀨𑀮𑀧𑀜𑁆𑀜𑀸 𑀢𑀁𑀲𑀳𑀕𑀢𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀘 𑀇𑀥 ‘‘𑀅𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸. 𑀅𑀜𑁆𑀜𑀸𑀬 𑀩𑁆𑀬𑀸𑀓𑀭𑀡𑀸𑀦𑀺 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀸𑀦𑀻𑀢𑀺 𑀅𑀭𑀳𑀢𑁆𑀢𑀩𑁆𑀬𑀸𑀓𑀭𑀡𑀸𑀦𑀻’’𑀢𑀺. 𑀅𑀥𑀺𑀕𑀢𑀫𑀸𑀦𑁂𑀦𑀸𑀢𑀺 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻, 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀅𑀥𑀺𑀕𑀢𑀁 𑀫𑀬𑀸𑀢𑀺 𑀫𑀸𑀦𑁂𑀦. 𑀘𑀢𑀼𑀢𑁆𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀲𑀫𑁆𑀧𑀤𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀓𑀼𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀨𑀸𑀲𑀼𑀯𑀺𑀳𑀸𑀭𑀯𑀕𑁆𑀕𑁄

𑁧-𑁪. 𑀲𑀸𑀭𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁧-𑁪. 𑀢𑀢𑀺𑀬𑀲𑁆𑀲 ¶ ¶ 𑀧𑀞𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀢𑀺𑀬𑁂 𑀧𑀺𑀡𑁆𑀟𑀧𑀸𑀢𑀸𑀤𑀺𑀅𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁 𑀕𑁄𑀘𑀭𑁄, 𑀯𑁂𑀲𑀺𑀬𑀸 𑀕𑁄𑀘𑀭𑁄 𑀅𑀲𑁆𑀲𑀸𑀢𑀺 𑀯𑁂𑀲𑀺𑀬𑀸𑀕𑁄𑀘𑀭𑁄, 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑁂𑀲𑀺𑀬𑀸 𑀦𑀸𑀫 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄, 𑀢𑀸 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀲𑀫𑀡𑀪𑀸𑀯𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀢𑁆𑀢𑀸, 𑀧𑀭𑀺𑀲𑀼𑀤𑁆𑀥𑀸𑀲𑀬𑀲𑁆𑀲𑀧𑀺 𑀕𑀭𑀳𑀸𑀳𑁂𑀢𑀼𑀢𑁄, 𑀢𑀲𑁆𑀫𑀸 𑀤𑀓𑁆𑀔𑀺𑀡𑀸𑀤𑀸𑀦𑀯𑀲𑁂𑀦 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁. 𑀯𑀺𑀥𑀯𑀸 𑀯𑀼𑀘𑁆𑀘𑀦𑁆𑀢𑀺 𑀫𑀢𑀧𑀢𑀺𑀓𑀸, 𑀧𑀯𑀼𑀢𑁆𑀣𑀧𑀢𑀺𑀓𑀸 𑀯𑀸. 𑀣𑀼𑀮𑁆𑀮𑀓𑀼𑀫𑀸𑀭𑀺𑀬𑁄𑀢𑀺 𑀫𑀳𑀮𑁆𑀮𑀺𑀓𑀸 𑀅𑀦𑀺𑀯𑀺𑀤𑁆𑀥𑀸 𑀓𑀼𑀫𑀸𑀭𑀺𑀬𑁄. 𑀧𑀡𑁆𑀟𑀓𑀸𑀢𑀺 𑀦𑀧𑀼𑀁𑀲𑀓𑀸. 𑀢𑁂 𑀳𑀺 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀅𑀯𑀽𑀧𑀲𑀦𑁆𑀢𑀧𑀭𑀺𑀴𑀸𑀳𑀸 𑀮𑁄𑀓𑀸𑀫𑀺𑀲𑀦𑀺𑀲𑁆𑀲𑀺𑀢𑀓𑀣𑀸𑀩𑀳𑀼𑀮𑀸, 𑀢𑀲𑁆𑀫𑀸 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸. 𑀪𑀺𑀓𑁆𑀔𑀼𑀦𑀺𑀬𑁄 𑀦𑀸𑀫 𑀉𑀲𑁆𑀲𑀦𑁆𑀦𑀩𑁆𑀭𑀳𑁆𑀫𑀘𑀭𑀺𑀬𑀸. 𑀢𑀣𑀸 𑀪𑀺𑀓𑁆𑀔𑀽𑀧𑀺. 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀯𑀢𑁆𑀣𑀼𑀪𑀸𑀯𑀢𑁄 𑀲𑀦𑁆𑀣𑀯𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁂 𑀓𑀢𑀺𑀧𑀸𑀳𑁂𑀦𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀲𑀺𑀬𑀸, 𑀢𑀲𑁆𑀫𑀸 𑀦 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸, 𑀕𑀺𑀮𑀸𑀦𑀧𑀼𑀘𑁆𑀙𑀦𑀸𑀤𑀺𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁂 𑀲𑀢𑁄𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀸𑀭𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀧𑀜𑁆𑀘𑀫𑁂 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁. 𑀏𑀲 𑀦𑀬𑁄 𑀲𑁂𑀲𑀤𑁆𑀯𑀬𑁂𑀧𑀺. 𑀆𑀯𑀻𑀢𑀺 𑀧𑀓𑀸𑀲𑀦𑀁. 𑀧𑀓𑀸𑀲𑀪𑀸𑀯𑁄 𑀘𑁂𑀢𑁆𑀣 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀫𑁆𑀫𑀼𑀔𑀸’’𑀢𑀺. 𑀭𑀳𑁄𑀢𑀺 𑀅𑀧𑁆𑀧𑀓𑀸𑀲𑀁. 𑀅𑀧𑁆𑀧𑀓𑀸𑀲𑀢𑀸 𑀘 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀭𑀫𑁆𑀫𑀼𑀔𑀸’’𑀢𑀺. 𑀇𑀫𑀸𑀦𑀺 𑀫𑁂𑀢𑁆𑀢𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺 𑀢𑁂𑀲𑀁 𑀲𑁂𑀝𑁆𑀞𑀧𑀭𑀺𑀲𑀪𑀸𑀯𑀢𑁄, 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀧𑀽𑀭𑀡𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫 ¶ . 𑀕𑀺𑀳𑀻𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 ¶ 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀲𑀗𑁆𑀖𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀕𑀫𑀦𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀧𑀢𑁆𑀢𑀧𑁆𑀧𑀝𑀺𑀕𑁆𑀕𑀳𑀡𑀁 𑀆𑀲𑀦𑀧𑀜𑁆𑀜𑀸𑀧𑀦𑀁 𑀅𑀦𑀼𑀕𑀫𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀘𑀸𑀭𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀦𑀁 𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑀁 𑀥𑀫𑁆𑀫𑀤𑁂𑀲𑀦𑀸 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘‘𑀘𑁂𑀢𑀺𑀬𑀯𑀦𑁆𑀤𑀦𑀸𑀬 𑀕𑀘𑁆𑀙𑀸𑀫, 𑀩𑁄𑀥𑀺𑀯𑀦𑁆𑀤𑀦𑀸𑀬 𑀕𑀘𑁆𑀙𑀸𑀫, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀺𑀲𑁆𑀲𑀸𑀫, 𑀤𑀻𑀧𑀫𑀸𑀮𑀁 𑀧𑀼𑀧𑁆𑀨𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫, 𑀅𑀚𑁆𑀚 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀲𑁆𑀲𑀸𑀫, 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀲𑀁𑀯𑀺𑀤𑀳𑀣, 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀣, 𑀲𑀗𑁆𑀖𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀆𑀦𑁂𑀣, 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀣, 𑀙𑀦𑁆𑀤𑀚𑀸𑀢𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀣𑀸’’𑀢𑀺𑀆𑀤𑀺𑀓𑀣𑀦𑀓𑀸𑀮𑁂 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀪𑀺𑀓𑁆𑀔𑀽𑀦𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀯𑀢𑁆𑀢𑀸𑀤𑀻𑀦𑀺 𑀓𑀢𑁆𑀯𑀸 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫, 𑀕𑀺𑀳𑀻𑀦𑀁 ‘‘𑀅𑀬𑁆𑀬𑀸 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀢𑀢𑁆𑀣 𑀦𑀯𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀲𑀳𑀸𑀬𑀪𑀸𑀯𑀕𑀫𑀦𑀁 𑀲𑀫𑁆𑀫𑀼𑀔𑀸 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀣𑁂𑀭𑀸𑀦𑀁 𑀧𑀦 𑀧𑀸𑀤𑀥𑁄𑀯𑀦𑀲𑀺𑀜𑁆𑀘𑀦𑀩𑀻𑀚𑀦𑀤𑀸𑀦𑀸𑀤𑀺𑀪𑁂𑀤𑀫𑁆𑀧𑀺 𑀲𑀩𑁆𑀩𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀉𑀪𑀬𑁂𑀳𑀺𑀧𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀤𑀸𑀭𑀼𑀪𑀡𑁆𑀟𑀸𑀤𑀻𑀦𑀁 𑀢𑁂𑀲𑀼 𑀅𑀯𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀯𑀺𑀬 𑀧𑀝𑀺𑀲𑀸𑀫𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. ‘‘𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀯𑀼𑀢𑁆𑀢𑀁 𑀏𑀯𑀁 𑀧𑀕𑁆𑀕𑀬𑁆𑀳𑀯𑀘𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫, 𑀯𑀺𑀳𑀸𑀭𑁂 𑀅𑀲𑀦𑁆𑀢𑀁 𑀧𑀦 𑀧𑀝𑀺𑀧𑀼𑀘𑁆𑀙𑀦𑁆𑀢𑀲𑁆𑀲 ‘‘𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀤𑁂𑀯𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀢𑀺𑀲𑁆𑀲𑀢𑁆𑀣𑁂𑀭𑁄, 𑀓𑀤𑀸 𑀦𑀼 𑀔𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀺𑀬𑀯𑀘𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀺 𑀧𑀦 𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫, ‘‘𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀭𑁄𑀕𑁄 𑀳𑁄𑀢𑀼 𑀅𑀩𑁆𑀬𑀸𑀧𑀚𑁆𑀚𑁄’’𑀢𑀺 𑀲𑀫𑀦𑁆𑀦𑀸𑀳𑀭𑀡𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀓𑀸𑀫𑀜𑁆𑀘𑁂𑀢𑁆𑀣 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀁 𑀦𑀬𑀦𑀸𑀦𑀁 𑀉𑀫𑁆𑀫𑀻𑀮𑀦𑀁, 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀜𑁆𑀘 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀫𑁂𑀯. 𑀬𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀬𑀦𑀸𑀦𑀁 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀢𑀸, 𑀫𑀼𑀔𑀲𑁆𑀲 𑀘 𑀧𑀲𑀦𑁆𑀦𑀢𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸’’𑀢𑀺. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀧𑁆𑀧𑀬𑁄𑀚𑀦𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺.

𑀲𑀫𑀸𑀦𑀲𑀻𑀮𑀢𑀁 ¶ 𑀕𑀢𑁄𑀢𑀺 𑀢𑁂𑀲𑀼 𑀢𑁂𑀲𑀼 𑀤𑀺𑀲𑀸𑀪𑀸𑀕𑁂𑀲𑀼 𑀯𑀺𑀳𑀭𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀲𑀻𑀮𑀢𑀁 𑀕𑀢𑁄. 𑀬𑀸𑀬𑀦𑁆𑀢𑀺 𑀬𑀸 𑀅𑀬𑀁 𑀫𑀬𑁆𑀳𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀸. 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀭𑀺𑀬𑀸𑀢𑀺 𑀦𑀺𑀤𑁆𑀤𑁄𑀲𑀸. 𑀦𑀺𑀬𑁆𑀬𑀸𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀢𑀺 𑀦𑀺𑀕𑁆𑀕𑀘𑁆𑀙𑀢𑀺. 𑀲𑀬𑀁 𑀦𑀺𑀬𑁆𑀬𑀦𑁆𑀢𑀻𑀬𑁂𑀯 𑀳𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀲𑀢𑁆𑀣𑀼 𑀅𑀦𑀼𑀲𑀺𑀝𑁆𑀞𑀺, 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄 ¶ , 𑀢𑀲𑁆𑀲, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀢𑁆𑀣𑀁. 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄𑀢𑀺 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀁 𑀉𑀧𑀕𑀢𑁄.

𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁧𑁦. 𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁬-𑁧𑁧𑁦. 𑀙𑀝𑁆𑀞𑁂 𑀅𑀥𑀺𑀲𑀻𑀮𑁂𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀲𑀻𑀮𑀦𑀺𑀫𑀺𑀢𑁆𑀢𑀁 𑀦 𑀉𑀧𑀯𑀤𑀢𑀺 𑀦 𑀦𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑀺 𑀓𑀫𑁆𑀫𑁂 𑀘 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀢𑀺 𑀲𑀻𑀮𑁂𑀦𑀸𑀢𑀺 𑀅𑀢𑁆𑀢𑀸𑀦𑀼𑀧𑁂𑀓𑁆𑀔𑀻. 𑀲𑀢𑁆𑀢𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀨𑀸𑀲𑀼𑀯𑀺𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁨) 𑁨. 𑀅𑀦𑁆𑀥𑀓𑀯𑀺𑀦𑁆𑀤𑀯𑀕𑁆𑀕𑁄

𑁧-𑁪. 𑀓𑀼𑀮𑀽𑀧𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁧-𑁧𑁧𑁪. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀲𑀦𑁆𑀣𑀯𑁂𑀲𑀼 𑀓𑀼𑀮𑁂𑀲𑀼 𑀯𑀺𑀲𑁆𑀲𑀸𑀲𑁄 𑀏𑀢𑀲𑁆𑀲𑀸𑀢𑀺 𑀅𑀲𑀦𑁆𑀣𑀯𑀯𑀺𑀲𑁆𑀲𑀸𑀲𑀻. 𑀅𑀦𑀺𑀲𑁆𑀲𑀭𑁄 𑀳𑀼𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀺 𑀲𑀁𑀯𑀺𑀤𑀳𑀢𑀺 𑀲𑀻𑀮𑁂𑀦𑀸𑀢𑀺 𑀅𑀦𑀺𑀲𑁆𑀲𑀭𑀯𑀺𑀓𑀧𑁆𑀧𑀻. 𑀯𑀺𑀲𑁆𑀲𑀝𑁆𑀞𑀸𑀦𑀺 𑀯𑀺𑀲𑀼𑀁 𑀔𑀺𑀢𑁆𑀢𑀸𑀦𑀺 𑀪𑁂𑀤𑁂𑀦 𑀅𑀯𑀢𑁆𑀣𑀺𑀢𑀸𑀦𑀺 𑀓𑀼𑀮𑀸𑀦𑀺 𑀖𑀝𑀦𑀢𑁆𑀣𑀸𑀬 𑀉𑀧𑀲𑁂𑀯𑀢𑀺 𑀲𑀻𑀮𑁂𑀦𑀸𑀢𑀺 𑀯𑀺𑀲𑁆𑀲𑀝𑁆𑀞𑀼𑀧𑀲𑁂𑀯𑀻. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀓𑀼𑀮𑀽𑀧𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁩. 𑀫𑀘𑁆𑀙𑀭𑀺𑀦𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁫-𑁧𑁨𑁩. 𑀧𑀜𑁆𑀘𑀫𑁂 ¶ ¶ 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀦𑀺 𑀧𑀜𑁆𑀘 𑀇𑀥 𑀪𑀺𑀓𑁆𑀔𑀼𑀦𑀺𑀬𑀸 𑀯𑀲𑁂𑀦 𑀆𑀕𑀢𑀸𑀦𑀺, 𑀪𑀺𑀓𑁆𑀔𑀼𑀲𑁆𑀲 𑀯𑀲𑁂𑀦𑀧𑀺 𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀕𑀦𑁆𑀢𑀼𑀓𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀣 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀭𑀺𑀓𑁆𑀔𑀸𑀭𑁄 𑀞𑀧𑀺𑀢𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀗𑁆𑀖𑀺𑀓𑀆𑀯𑀸𑀲𑀁 𑀦 𑀤𑁂𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀓𑀼𑀮𑁂 𑀅𑀜𑁆𑀜𑁂𑀲𑀁 𑀧𑀯𑁂𑀲𑀫𑁆𑀧𑀺 𑀦𑀺𑀯𑀸𑀭𑁂𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀗𑁆𑀖𑀺𑀓𑀫𑁆𑀧𑀺 𑀮𑀸𑀪𑀁 𑀫𑀘𑁆𑀙𑀭𑀸𑀬𑀦𑁆𑀢𑁄 𑀬𑀣𑀸 𑀅𑀜𑁆𑀜𑁂 𑀦 𑀮𑀪𑀦𑁆𑀢𑀺, 𑀏𑀯𑀁 𑀓𑀭𑁄𑀢𑀺 𑀅𑀢𑁆𑀢𑀦𑀸 𑀯𑀺𑀲𑀫𑀦𑀺𑀲𑁆𑀲𑀺𑀢𑀢𑀸𑀬 𑀩𑀮𑀯𑀦𑀺𑀲𑁆𑀲𑀺𑀢𑀢𑀸𑀬 𑀘. 𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀢𑁆𑀢𑀦𑁄 𑀯𑀡𑁆𑀡𑀁 𑀯𑀡𑁆𑀡𑁂𑀢𑀺, 𑀧𑀭𑁂𑀲𑀁 𑀯𑀡𑁆𑀡𑁂 ‘‘𑀓𑀺𑀁 𑀯𑀡𑁆𑀡𑁄 𑀏𑀲𑁄’’𑀢𑀺 𑀢𑀁 𑀢𑀁 𑀤𑁄𑀲𑀁 𑀯𑀤𑀢𑀺. 𑀯𑀡𑁆𑀡𑁄𑀢𑀺 𑀘𑁂𑀢𑁆𑀣 𑀲𑀭𑀻𑀭𑀯𑀡𑁆𑀡𑁄𑀧𑀺, 𑀕𑀼𑀡𑀯𑀡𑁆𑀡𑁄𑀧𑀺 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑁋 ‘‘𑀇𑀫𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀏𑀲𑁄 𑀫𑀁 𑀅𑀪𑀺𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀲𑁆𑀲 𑀦 𑀤𑁂𑀢𑀺. 𑀬𑁄 𑀧𑀦 𑁋 ‘‘𑀅𑀬𑀁 𑀇𑀫𑀁 𑀥𑀫𑁆𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀦𑀼𑀕𑁆𑀕𑀳𑁂𑀦 𑀯𑀸 𑁋 ‘‘𑀅𑀬𑀁 𑀇𑀫𑀁 𑀥𑀫𑁆𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀉𑀤𑁆𑀥𑀢𑁄 𑀉𑀦𑁆𑀦𑀴𑁄 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀅𑀧𑀼𑀜𑁆𑀜𑀁 𑀧𑀲𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀕𑁆𑀕𑀮𑀸𑀦𑀼𑀕𑁆𑀕𑀳𑁂𑀦 𑀯𑀸 𑀦 𑀤𑁂𑀢𑀺, 𑀦 𑀢𑀁 𑀫𑀘𑁆𑀙𑀭𑀺𑀬𑀁. 𑀥𑀫𑁆𑀫𑁄𑀢𑀺 𑀘𑁂𑀢𑁆𑀣 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀧𑀝𑀺𑀯𑁂𑀥𑀥𑀫𑁆𑀫𑁄 𑀳𑀺 𑀅𑀭𑀺𑀬𑀸𑀦𑀁𑀬𑁂𑀯 𑀳𑁄𑀢𑀺, 𑀢𑁂 𑀘 𑀦𑀁 𑀦 𑀫𑀘𑁆𑀙𑀭𑀸𑀬𑀦𑁆𑀢𑀺 𑀫𑀘𑁆𑀙𑀭𑀺𑀬𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸𑀢𑀺 𑀢𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯. 𑀢𑀢𑁆𑀣 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀮𑁄𑀳𑀕𑁂𑀳𑁂 𑀧𑀘𑁆𑀘𑀢𑀺, 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀳𑀼𑀢𑁆𑀯𑀸 𑀢𑀲𑁆𑀲𑁂𑀯 𑀆𑀯𑀸𑀲𑀲𑁆𑀲 𑀲𑀗𑁆𑀓𑀸𑀭𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀅𑀧𑁆𑀧𑀪𑁄𑀕𑁄 𑀳𑁄𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀕𑀽𑀣𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀮𑀸𑀪𑀁 𑀫𑀘𑁆𑀙𑀭𑀸𑀬𑀺𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀫𑀳𑀸𑀅𑀚𑀕𑀭𑁄 𑀯𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀯𑀡𑁆𑀡𑁄 𑀦𑀸𑀫 𑀦 𑀳𑁄𑀢𑀺. 𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀓𑀼𑀓𑁆𑀓𑀼𑀴𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀫𑀘𑁆𑀙𑀭𑀺𑀦𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑁆𑀥𑀓𑀯𑀺𑀦𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁩) 𑁩. 𑀕𑀺𑀮𑀸𑀦𑀯𑀕𑁆𑀕𑁄

𑁧𑁨𑁪-𑁧𑁩𑁦. 𑀢𑀢𑀺𑀬𑁄 ¶ ¶ 𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

(𑁧𑁪) 𑁪. 𑀭𑀸𑀚𑀯𑀕𑁆𑀕𑁄

𑁧. 𑀧𑀞𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀢𑁆𑀣𑀜𑁆𑀜𑀽𑀢𑀺 𑀳𑀺𑀢𑀜𑁆𑀜𑀽. 𑀳𑀺𑀢𑀧𑀭𑀺𑀬𑀸𑀬𑁄 𑀳𑁂𑀢𑁆𑀣 𑀅𑀢𑁆𑀣-𑀲𑀤𑁆𑀤𑁄 ‘‘𑀅𑀢𑁆𑀢𑀢𑁆𑀣𑁄 𑀧𑀭𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁮𑁫; 𑀧𑀝𑀺. 𑀫. 𑁩.𑁫) 𑀯𑀺𑀬. 𑀬𑀲𑁆𑀫𑀸 𑀘𑁂𑀲 𑀧𑀭𑁂𑀲𑀁 𑀳𑀺𑀢𑀁 𑀚𑀸𑀦𑀦𑁆𑀢𑁄 𑀢𑁂 𑀅𑀢𑁆𑀢𑀦𑀺 𑀭𑀜𑁆𑀚𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀭𑀜𑁆𑀚𑀺𑀢𑀼𑀁 𑀚𑀸𑀦𑀸𑀢𑀻’’𑀢𑀺. 𑀤𑀡𑁆𑀟𑁂𑀢𑀺 𑀅𑀧𑀭𑀸𑀥𑀸𑀦𑀼𑀭𑀽𑀧𑁂 𑀤𑀡𑁆𑀟𑀦𑁂. 𑀩𑀮𑀫𑁆𑀳𑀻𑀢𑀺 𑀩𑀮𑀓𑀸𑀬𑁂. 𑀧𑀜𑁆𑀘 𑀅𑀢𑁆𑀣𑁂𑀢𑀺 𑀅𑀢𑁆𑀢𑀢𑁆𑀣𑁄, 𑀧𑀭𑀢𑁆𑀣𑁄, 𑀉𑀪𑀬𑀢𑁆𑀣𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀅𑀢𑁆𑀣𑁄𑀢𑀺 𑀏𑀯𑀁 𑀧𑀜𑁆𑀘𑀧𑁆𑀧𑀪𑁂𑀤𑁂 𑀅𑀢𑁆𑀣𑁂. 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂, 𑀓𑀸𑀫𑀭𑀽𑀧𑀸𑀭𑀽𑀧𑀮𑁄𑀓𑀼𑀢𑁆𑀢𑀭𑀪𑁂𑀤𑁂 𑀯𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂. 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀫𑀢𑁆𑀢𑀜𑁆𑀜𑀼𑀢𑀸𑀬 𑀏𑀯 𑀧𑀭𑀺𑀬𑁂𑀲𑀦𑀯𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀩𑁄𑀥𑀺𑀢𑀸 𑀳𑁄𑀦𑁆𑀢𑀻𑀢𑀺 ‘‘𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀫𑀢𑁆𑀢𑀁 𑀚𑀸𑀦𑀸𑀢𑀺’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀉𑀢𑁆𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀺, 𑀅𑀪𑀺𑀪𑀯𑀢𑀻𑀢𑀺 𑀯𑀸 𑀉𑀢𑁆𑀢𑀭𑀁, 𑀦𑀢𑁆𑀣𑀺 𑀏𑀢𑁆𑀣 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁. 𑀅𑀦𑀢𑀺𑀲𑀬𑀁, 𑀅𑀧𑁆𑀧𑀝𑀺𑀪𑀸𑀕𑀁 𑀯𑀸 𑀅𑀦𑁂𑀓𑀸𑀲𑀼 𑀤𑁂𑀯𑀫𑀦𑀼𑀲𑁆𑀲𑀧𑀭𑀺𑀲𑀸𑀲𑀼 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀢𑁂𑀲𑀁 𑀅𑀭𑀺𑀬𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑀫𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀥𑀫𑁆𑀫𑀘𑀓𑁆𑀓𑀁. 𑀅𑀧𑀺𑀘 𑀲𑀩𑁆𑀩𑀧𑀞𑀫𑀁 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸𑀬 𑀅𑀝𑁆𑀞𑀸𑀭𑀲𑀧𑀭𑀺𑀲𑀕𑀡𑀸𑀬 𑀩𑁆𑀭𑀳𑁆𑀫𑀓𑁄𑀝𑀺𑀬𑀸 𑀘𑀢𑀼𑀲𑀘𑁆𑀘𑀲𑁆𑀲 𑀧𑀝𑀺𑀯𑁂𑀥𑀯𑀺𑀥𑀸𑀬𑀺𑀦𑀻 𑀬𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀲𑁆𑀲𑀸 𑀲𑀸𑀢𑀺𑀲𑀬𑀸 𑀥𑀫𑁆𑀫𑀘𑀓𑁆𑀓𑀲𑀫𑀜𑁆𑀜𑀸. 𑀢𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀥𑀫𑁆𑀫𑁄 𑀏𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀘𑀓𑁆𑀓𑀦𑁆𑀢𑀺 𑀯𑀸 𑀆𑀡𑀸 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸, 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 ‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁦-𑁪𑁧). 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 ¶ 𑀅𑀦𑀼𑀢𑁆𑀢𑀭𑀪𑀸𑀯𑀢𑁄 𑀅𑀧𑁆𑀧𑀝𑀺𑀲𑁂𑀥𑀦𑀻𑀬𑀁. 𑀓𑁂𑀳𑀺 𑀧𑀦 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀆𑀳 𑁋 ‘‘𑀲𑀫𑀡𑁂𑀦 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀫𑀡𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁂𑀦. 𑀩𑁆𑀭𑀸𑀳𑁆𑀫𑀡𑁂𑀦𑀸𑀢𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂𑀦. 𑀲𑀸𑀲𑀦𑀧𑀭𑀫𑀢𑁆𑀣𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀳𑀺 𑀧𑀝𑀺𑀮𑁄𑀫𑀘𑀺𑀢𑁆𑀢𑀁𑀬𑁂𑀯 𑀦𑀢𑁆𑀣𑀺. 𑀤𑁂𑀯𑁂𑀦𑀸𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑁂𑀦. 𑀓𑁂𑀦𑀘𑀻𑀢𑀺 𑀬𑁂𑀦 ¶ 𑀓𑁂𑀦𑀘𑀺 𑀅𑀯𑀲𑀺𑀝𑁆𑀞𑀧𑀸𑀭𑀺𑀲𑀚𑁆𑀚𑁂𑀦. 𑀏𑀢𑁆𑀢𑀸𑀯𑀢𑀸 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂.

𑀧𑀞𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀤𑀼𑀢𑀺𑀬𑁂 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀦𑁆𑀢𑀺 𑀤𑀲𑀯𑀺𑀥𑀁, 𑀤𑁆𑀯𑀸𑀤𑀲𑀯𑀺𑀥𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀁 𑀯𑀢𑁆𑀢𑀁. 𑀢𑀢𑁆𑀣 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀩𑀮𑀓𑀸𑀬𑁂 𑀥𑀫𑁆𑀫𑀺𑀓𑀸𑀬𑁂𑀯 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀲𑀁𑀯𑀺𑀥𑀸𑀦𑀁, 𑀔𑀢𑁆𑀢𑀺𑀬𑁂𑀲𑀼, 𑀅𑀦𑀼𑀬𑀦𑁆𑀢𑁂𑀲𑀼, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼, 𑀦𑁂𑀕𑀫𑀚𑀸𑀦𑀧𑀤𑁂𑀲𑀼, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼, 𑀫𑀺𑀕𑀧𑀓𑁆𑀔𑀻𑀲𑀼, 𑀅𑀥𑀫𑁆𑀫𑀺𑀓𑀧𑀝𑀺𑀓𑁆𑀔𑁂𑀧𑁄, 𑀅𑀥𑀦𑀸𑀦𑀁 𑀥𑀦𑀸𑀦𑀼𑀧𑁆𑀧𑀤𑀸𑀦𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑀇𑀤𑀁 𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁. 𑀇𑀤𑀫𑁂𑀯 𑀘 𑀕𑀳𑀧𑀢𑀺𑀓𑁂 𑀧𑀓𑁆𑀔𑀺𑀚𑀸𑀢𑁂 𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀳𑀡𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀁. 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀫𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀻𑀢𑀺 𑀤𑀲𑀯𑀺𑀥𑀁 𑀯𑀸 𑀤𑁆𑀯𑀸𑀤𑀲𑀯𑀺𑀥𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀢𑁆𑀢𑀲𑁆𑀲 𑀅𑀜𑁆𑀜𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀢𑀁 𑀧𑀯𑀢𑁆𑀢𑁂𑀢𑀺. 𑀭𑀢𑀦𑀫𑀬𑀢𑁆𑀢𑀸 𑀧𑀦 𑀲𑀤𑀺𑀲𑀝𑁆𑀞𑁂𑀦 𑀢𑀤𑁂𑀯𑁂𑀢𑀦𑁆𑀢𑀺 𑀓𑀢𑁆𑀯𑀸 ‘‘𑀧𑀺𑀢𑀭𑀸 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀲𑁄 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀢𑁆𑀯𑀁 𑀤𑁂𑀯, 𑀳𑁄𑀳𑀺, 𑀅𑀳𑀫𑀦𑀼𑀲𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀫𑀸 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀆𑀡𑀸𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀜𑁆𑀳𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑀁 𑀘𑀓𑁆𑀓𑀭𑀢𑀦𑀁, 𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀢𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫, 𑀦𑁂𑀢𑀭𑀦𑁆𑀢𑀺 𑀧𑀞𑀫𑀦𑀬𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀯𑀢𑁆𑀢𑀺𑀢𑀲𑁆𑀲𑁂𑀯 𑀅𑀦𑀼𑀯𑀢𑁆𑀢𑀦𑀁, 𑀧𑀞𑀫𑀦𑀬𑁄 𑀘 𑀢𑀁𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄.

𑀤𑀼𑀢𑀺𑀬𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀬𑀲𑁆𑀲𑀁𑀤𑀺𑀲𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀘𑀢𑀼𑀢𑁆𑀣𑁂 ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀲𑀼𑀚𑀸𑀢𑀢𑀸 𑀧𑀜𑁆𑀜𑀸𑀧𑁂𑀬𑁆𑀬, 𑀲𑀼𑀚𑀸𑀢-𑀲𑀤𑁆𑀤𑁄 𑀘 ‘‘𑀲𑀼𑀚𑀸𑀢𑁄 𑀘𑀸𑀭𑀼𑀤𑀲𑁆𑀲𑀦𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁩; 𑀣𑁂𑀭𑀕𑀸. 𑁮𑁧𑁮) 𑀆𑀭𑁄𑀳𑀲𑀫𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄𑀢𑀺 ¶ 𑀚𑀸𑀢𑀺𑀯𑀲𑁂𑀦 ¶ 𑀲𑀼𑀚𑀸𑀢𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑁄𑀭𑀲𑀧𑀼𑀢𑁆𑀢𑀯𑀲𑁂𑀦𑀧𑀺 𑀮𑁄𑀓𑁂 𑀫𑀸𑀢𑀼𑀧𑀺𑀢𑀼𑀲𑀫𑀜𑁆𑀜𑀸 𑀤𑀺𑀲𑁆𑀲𑀢𑀺, 𑀇𑀥 𑀧𑀦 𑀲𑀸 𑀑𑀭𑀲𑀧𑀼𑀢𑁆𑀢𑀯𑀲𑁂𑀦 𑀇𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀼𑀤𑁆𑀥𑀕𑁆𑀕𑀳𑀡𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀕𑀳𑀡𑀻, 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁄. 𑀢𑁂𑀦𑀸𑀳 ‘‘𑀲𑀁𑀲𑀼𑀤𑁆𑀥𑀸𑀬 𑀫𑀸𑀢𑀼𑀓𑀼𑀘𑁆𑀙𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀺𑀧𑀸𑀘𑀦𑀯𑀲𑁂𑀦 𑀕𑀡𑁆𑀳𑀦𑀢𑁄 𑀅𑀙𑀟𑁆𑀟𑀦𑀢𑁄 𑀕𑀳𑀡𑀻, 𑀢𑁂𑀚𑁄𑀥𑀸𑀢𑀼. 𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄. 𑀧𑀺𑀢𑀽𑀦𑀁 𑀧𑀺𑀢𑀭𑁄 𑀧𑀺𑀢𑀸𑀫𑀳𑀸. 𑀢𑁂𑀲𑀁 𑀬𑀼𑀕𑁄 𑀧𑀺𑀢𑀸𑀫𑀳𑀬𑀼𑀕𑁄, 𑀢𑀲𑁆𑀫𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸, 𑀧𑀺𑀢𑀸𑀫𑀳𑀤𑁆𑀯𑀦𑁆𑀤𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀫𑀸𑀢𑀸𑀫𑀳𑁄𑀧𑀺 𑀕𑀳𑀺𑀢𑁄𑀢𑀺 𑀲𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀼𑀁 𑀦 𑀉𑀤𑁆𑀥𑀢𑁄. 𑀬𑀼𑀕-𑀲𑀤𑁆𑀤𑁄 𑀘𑁂𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀤𑀝𑁆𑀞𑀩𑁆𑀩𑁄 ‘‘𑀬𑀼𑀕𑁄 𑀘 𑀬𑀼𑀕𑁄 𑀘 𑀬𑀼𑀕𑁄’’𑀢𑀺. 𑀏𑀯𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸’’𑀢𑀺. 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 ‘‘𑀫𑀸𑀢𑀺𑀢𑁄’’𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀓𑁆𑀔𑁂𑀧𑁄. 𑀅𑀦𑀯𑀓𑁆𑀔𑀺𑀢𑁆𑀢𑁄𑀢𑀺 𑀲𑀫𑁆𑀧𑀢𑁆𑀢𑀯𑀺𑀯𑀸𑀤𑀸𑀤𑀻𑀲𑀼 𑀦 𑀅𑀯𑀓𑁆𑀔𑀺𑀢𑁆𑀢𑁄 𑀦 𑀙𑀟𑁆𑀟𑀺𑀢𑁄. 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀉𑀪𑀢𑁄…𑀧𑁂… 𑀧𑀺𑀢𑀸𑀫𑀳𑀬𑀼𑀕𑀸’’𑀢𑀺 𑀏𑀢𑁂𑀦 𑀔𑀢𑁆𑀢𑀺𑀬𑀲𑁆𑀲 𑀬𑁄𑀦𑀺𑀤𑁄𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀁𑀲𑀼𑀤𑁆𑀥𑀕𑁆𑀕𑀳𑀡𑀺𑀓𑀪𑀸𑀯𑀓𑀺𑀢𑁆𑀢𑀦𑀢𑁄. ‘‘𑀅𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀭𑀸𑀥𑀸𑀪𑀸𑀯𑁄. 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀳𑀺 𑀲𑀢𑁆𑀢𑀸 𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑀺. ‘‘𑀅𑀦𑀼𑀧𑀓𑁆𑀓𑀼𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀸𑀪𑀸𑀯𑁄. 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀜𑁆𑀳𑀺 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀅𑀓𑁆𑀓𑁄𑀲𑀁 𑀮𑀪𑀦𑁆𑀢𑀺.

𑀅𑀟𑁆𑀠𑀢𑀸 𑀦𑀸𑀫 𑀯𑀺𑀪𑀯𑀲𑀫𑁆𑀧𑀦𑁆𑀦𑀢𑀸, 𑀲𑀸 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀬𑁄 𑀓𑁄𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀅𑀟𑁆𑀠𑁄 𑀳𑁄𑀢𑀻’’𑀢𑀺. 𑀢𑀣𑀸 𑀫𑀳𑀤𑁆𑀥𑀦𑀢𑀸𑀧𑀻𑀢𑀺 𑀢𑀁 𑀉𑀓𑁆𑀓𑀁𑀲𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀢𑀸 𑀅𑀧𑀭𑀺𑀫𑀸𑀡𑀲𑀗𑁆𑀔𑁂𑀦 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑀢𑁄 𑀓𑀸𑀫𑀸 𑀪𑁄𑀕𑀸 𑀦𑀸𑀫𑀸𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦𑀸’’𑀢𑀺. 𑀓𑁄𑀝𑁆𑀞𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀲𑁆𑀲 𑀆𑀯𑀲𑀦𑀝𑁆𑀞𑀸𑀦𑀁, 𑀓𑁄𑀝𑁆𑀞𑀪𑀽𑀢𑀁 𑀅𑀕𑀸𑀭𑀁 𑀓𑁄𑀝𑁆𑀞𑀸𑀕𑀸𑀭𑀁. 𑀢𑁂𑀦𑀸𑀳 ‘‘𑀥𑀜𑁆𑀜𑁂𑀦 𑀘 𑀧𑀭𑀺𑀧𑀼𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑁄’’𑀢𑀺. 𑀏𑀯𑀁 𑀲𑀸𑀭𑀕𑀩𑁆𑀪𑀁 𑀓𑁄𑀲𑁄, 𑀥𑀜𑁆𑀜𑀧𑀭𑀺𑀝𑁆𑀞𑀧𑀦𑀝𑁆𑀞𑀸𑀦𑀜𑁆𑀘 𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀅𑀜𑁆𑀜𑀣𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀅𑀲𑀺𑀦𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀸𑀭𑀓𑁄 ¶ 𑀧𑀝𑀺𑀘𑁆𑀙𑀤𑁄 ‘‘𑀓𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀭𑀜𑁆𑀜𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀸𑀭𑀁 𑀓𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 𑀓𑁄𑀲𑁄𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻’’𑀢𑀺. 𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀕𑁆𑀕𑀳𑀡𑁂𑀦𑁂𑀯 𑀲𑀩𑁆𑀩𑀲𑁆𑀲𑀧𑀺 𑀪𑀡𑁆𑀟𑀝𑁆𑀞𑀧𑀦𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀢𑀺𑀯𑀺𑀥𑀁 𑀓𑁄𑀝𑁆𑀞𑀸𑀕𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀲𑀸 ¶ 𑀧𑀜𑁆𑀜𑀸𑀬 𑀯𑀲𑁂𑀦 𑀧𑀼𑀭𑀺𑀲𑁄 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀡𑁆𑀟𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀁𑀢𑀁𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀙𑁂𑀓𑀪𑀸𑀯𑁄 𑀩𑁆𑀬𑀢𑁆𑀢𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁. 𑀲𑀫𑁆𑀫𑁄𑀳𑀁 𑀳𑀺𑀁𑀲𑀢𑀺 𑀯𑀺𑀥𑀫𑀢𑀻𑀢𑀺 𑀫𑁂𑀥𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀥𑀸𑀯𑀻. 𑀞𑀸𑀦𑁂 𑀞𑀸𑀦𑁂 𑀉𑀧𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺, 𑀞𑀸𑀦𑀲𑁄 𑀉𑀧𑁆𑀧𑀚𑁆𑀚𑀦𑀧𑀜𑁆𑀜𑀸. 𑀯𑀟𑁆𑀠𑀺𑀅𑀢𑁆𑀣𑁂𑀢𑀺 𑀯𑀟𑁆𑀠𑀺𑀲𑀗𑁆𑀔𑀸𑀢𑁂 𑀅𑀢𑁆𑀣𑁂.

𑀬𑀲𑁆𑀲𑀁𑀤𑀺𑀲𑀁𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁯. 𑀧𑀢𑁆𑀣𑀦𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁫-𑁯. 𑀧𑀜𑁆𑀘𑀫𑁂 𑀳𑀢𑁆𑀣𑀺𑀲𑁆𑀫𑀺𑀦𑁆𑀢𑀺 𑀳𑀢𑁆𑀣𑀺𑀲𑀺𑀧𑁆𑀧𑁂. 𑀳𑀢𑁆𑀣𑀻𑀢𑀺 𑀳𑀺 𑀳𑀢𑁆𑀣𑀺𑀯𑀺𑀲𑀬𑀢𑁆𑀢𑀸 𑀳𑀢𑁆𑀣𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀳𑀢𑁆𑀣𑀺𑀲𑀺𑀧𑁆𑀧𑀁 𑀕𑀳𑀺𑀢𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀬𑀢𑀻𑀢𑀺 𑀯𑀬𑁄, 𑀲𑁄𑀪𑀦𑁂𑀲𑀼 𑀓𑀢𑁆𑀣𑀘𑀺 𑀅𑀧𑀓𑁆𑀔𑀮𑀦𑁆𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁄 𑀢𑀸𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀯𑀬𑁄 𑀅𑀯𑀬𑁄, 𑀢𑀸𑀦𑀺 𑀅𑀢𑁆𑀣𑀢𑁄 𑀲𑀤𑁆𑀤𑀢𑁄 𑀘 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀯𑀬𑁄 𑀦 𑀳𑁄𑀢𑀻𑀢𑀺 𑀅𑀦𑀯𑀬𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀁 𑀕𑀫𑁂𑀦𑁆𑀢𑀻𑀢𑀺 𑀆𑀳 ‘‘𑀅𑀦𑀯𑀬𑁄𑀢𑀺 𑀲𑀫𑀢𑁆𑀣𑁄’’𑀢𑀺. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀢𑁆𑀣𑀦𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀤𑀲𑀫𑁂 𑀢𑀺𑀩𑁆𑀩𑀸𑀦𑀦𑁆𑀢𑀺 𑀢𑀺𑀓𑁆𑀔𑀸𑀦𑀁. 𑀔𑀭𑀸𑀦𑀦𑁆𑀢𑀺 𑀓𑀓𑁆𑀓𑀲𑀸𑀦𑀁. 𑀓𑀝𑀼𑀓𑀸𑀦𑀦𑁆𑀢𑀺 𑀤𑀸𑀭𑀼𑀡𑀸𑀦𑀁. 𑀅𑀲𑀸𑀢𑀸𑀦𑀦𑁆𑀢𑀺 𑀦𑀲𑀸𑀢𑀸𑀦𑀁 𑀅𑀧𑁆𑀧𑀺𑀬𑀸𑀦𑀁. 𑀦 𑀢𑀸𑀲𑀼 𑀫𑀦𑁄 𑀅𑀧𑁆𑀧𑁂𑀢𑀺, 𑀦 𑀢𑀸 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀅𑀫𑀦𑀸𑀧𑀸.

𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀸𑀚𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁫) 𑁫. 𑀢𑀺𑀓𑀡𑁆𑀟𑀓𑀻𑀯𑀕𑁆𑀕𑁄

𑁧. 𑀅𑀯𑀚𑀸𑀦𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀧𑀜𑁆𑀘𑀫𑀲𑁆𑀲 ¶ ¶ 𑀧𑀞𑀫𑁂 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀏𑀓𑁄 𑀪𑀺𑀓𑁆𑀔𑀼 𑀫𑀳𑀸𑀧𑀼𑀜𑁆𑀜𑁄 𑀘𑀢𑀼𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺, 𑀲𑁄 𑀘𑀻𑀯𑀭𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀧𑁆𑀧𑀧𑀼𑀜𑁆𑀜𑀁 𑀆𑀧𑀼𑀘𑁆𑀙𑀢𑀺. 𑀲𑁄𑀧𑀺 𑀢𑀲𑁆𑀫𑀺𑀁 𑀧𑀼𑀦𑀧𑁆𑀧𑀼𑀦𑀁 𑀆𑀧𑀼𑀘𑁆𑀙𑀦𑁆𑀢𑁂𑀧𑀺 𑀕𑀡𑁆𑀳𑀸𑀢𑀺𑀬𑁂𑀯. 𑀅𑀣𑀲𑁆𑀲 𑀇𑀢𑀭𑁄 𑀣𑁄𑀓𑀁 𑀓𑀼𑀧𑀺𑀢𑁄 𑀳𑀼𑀢𑁆𑀯𑀸 𑀫𑀗𑁆𑀓𑀼𑀪𑀸𑀯𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀯𑀤𑀢𑀺 ‘‘𑀅𑀬𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀻𑀯𑀭𑀸𑀤𑀻𑀦𑀺 𑀦 𑀮𑀪𑀢𑀺, 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀮𑀪𑀢𑀻’’𑀢𑀺. 𑀏𑀯𑀫𑁆𑀧𑀺 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀺 𑀦𑀸𑀫. 𑀏𑀓𑁄 𑀧𑀦 𑀏𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀧𑀼𑀩𑁆𑀩𑁂 𑀢𑀁 𑀧𑀼𑀕𑁆𑀕𑀮𑀁 𑀕𑀭𑀼𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀢𑀺, 𑀆𑀲𑀦𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀫𑁆𑀧𑀺 𑀦 𑀕𑀘𑁆𑀙𑀢𑀺. 𑀅𑀬𑀫𑁆𑀧𑀺 𑀧𑀼𑀕𑁆𑀕𑀮𑁄 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺 𑀦𑀸𑀫. 𑀆𑀥𑁂𑀬𑁆𑀬𑀫𑀼𑀔𑁄𑀢𑀺 𑀆𑀤𑀺𑀢𑁄 𑀥𑁂𑀬𑁆𑀬𑀫𑀼𑀔𑁄, 𑀧𑀞𑀫𑀯𑀘𑀦𑀲𑁆𑀫𑀺𑀁𑀬𑁂𑀯 𑀞𑀧𑀺𑀢𑀫𑀼𑀔𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀬𑀁 𑀦𑀬𑁄 𑁋 𑀏𑀓𑁄 𑀧𑀼𑀕𑁆𑀕𑀮𑁄 𑀲𑀸𑀭𑀼𑀧𑁆𑀧𑀁𑀬𑁂𑀯 𑀪𑀺𑀓𑁆𑀔𑀼𑀁 ‘‘𑀅𑀲𑀸𑀭𑀼𑀧𑁆𑀧𑁄 𑀏𑀲𑁄’’𑀢𑀺 𑀓𑀣𑁂𑀢𑀺. 𑀢𑀁 𑀲𑀼𑀢𑁆𑀯𑀸 𑀏𑀲 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺, 𑀧𑀼𑀦 𑀅𑀜𑁆𑀜𑁂𑀦 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀲𑀸𑀭𑀼𑀧𑁆𑀧𑁄 𑀅𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀯𑀘𑀦𑀁 𑀦 𑀕𑀡𑁆𑀳𑀸𑀢𑀺. 𑀅𑀲𑀼𑀓𑁂𑀦 𑀦𑀸𑀫 ‘‘𑀅𑀲𑀸𑀭𑀼𑀧𑁆𑀧𑁄 𑀅𑀬’’𑀦𑁆𑀢𑀺 𑀅𑀫𑁆𑀳𑀸𑀓𑀁 𑀓𑀣𑀺𑀢𑀦𑁆𑀢𑀺 𑀧𑀼𑀭𑀺𑀫𑀪𑀺𑀓𑁆𑀔𑀼𑀦𑁄𑀯 𑀓𑀣𑀁 𑀕𑀡𑁆𑀳𑀸𑀢𑀺. 𑀅𑀧𑀭𑁄𑀧𑀺𑀲𑁆𑀲 𑀤𑀼𑀲𑁆𑀲𑀻𑀮𑀁 ‘‘𑀲𑀻𑀮𑀯𑀸’’𑀢𑀺 𑀓𑀣𑁂𑀢𑀺. 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦 ‘‘𑀅𑀲𑀸𑀭𑀼𑀧𑁆𑀧𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑀸𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀁𑀬𑁂𑀯 𑀓𑀣𑀁 𑀕𑀡𑁆𑀳𑀸𑀢𑀺. 𑀅𑀧𑀭𑁄 𑀯𑀡𑁆𑀡𑀫𑁆𑀧𑀺 𑀓𑀣𑀺𑀢𑀁 𑀕𑀡𑁆𑀳𑀸𑀢𑀺, 𑀅𑀯𑀡𑁆𑀡𑀫𑁆𑀧𑀺 𑀓𑀣𑀺𑀢𑀁 𑀕𑀡𑁆𑀳𑀸𑀢𑀺𑀬𑁂𑀯. 𑀅𑀬𑀫𑁆𑀧𑀺 𑀆𑀥𑁂𑀬𑁆𑀬𑀫𑀼𑀔𑁄𑀬𑁂𑀯 𑀦𑀸𑀫 𑀆𑀥𑀸𑀢𑀩𑁆𑀩𑀫𑀼𑀔𑁄, 𑀬𑀁 𑀬𑀁 𑀲𑀼𑀡𑀸𑀢𑀺, 𑀢𑀢𑁆𑀣 𑀢𑀢𑁆𑀣 𑀞𑀧𑀺𑀢𑀫𑀼𑀔𑁄𑀢𑀺 𑀅𑀢𑁆𑀣𑁄.

𑀮𑁄𑀮𑁄𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀢𑁆𑀢𑀭𑀓𑀸𑀮𑀧𑁆𑀧𑀢𑀺𑀢𑀢𑁆𑀢𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀮𑀼𑀮𑀺𑀢𑀪𑀸𑀯𑁂𑀦 𑀮𑁄𑀮𑁄. 𑀇𑀢𑁆𑀢𑀭𑀪𑀢𑁆𑀢𑀻𑀢𑀺𑀆𑀤𑀻𑀲𑀼 𑀧𑀼𑀦𑀧𑁆𑀧𑀼𑀦𑀁 𑀪𑀚𑀦𑁂𑀦 𑀲𑀤𑁆𑀥𑀸𑀯 𑀪𑀢𑁆𑀢𑀺𑀧𑁂𑀫𑀁. 𑀲𑀤𑁆𑀥𑀸𑀧𑁂𑀫𑀫𑁆𑀧𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀲𑀸𑀤𑁄 𑀲𑀤𑁆𑀥𑀸𑀧𑀲𑀸𑀤𑁄. 𑀏𑀯𑀁 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀳𑁄𑀢𑀻𑀢𑀺 𑀏𑀯𑀁 𑀇𑀢𑁆𑀢𑀭𑀲𑀤𑁆𑀥𑀸𑀤𑀺𑀢𑀸𑀬 𑀧𑀼𑀕𑁆𑀕𑀮𑁄 𑀮𑁄𑀮𑁄 𑀦𑀸𑀫 𑀳𑁄𑀢𑀺. 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬, 𑀣𑀼𑀲𑀭𑀸𑀲𑀺𑀫𑁆𑀳𑀺 𑀓𑁄𑀝𑁆𑀝𑀺𑀢𑀔𑀸𑀦𑀼𑀓𑁄 𑀯𑀺𑀬, 𑀅𑀲𑁆𑀲𑀧𑀺𑀝𑁆𑀞𑀺𑀬𑀁 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀁 𑀯𑀺𑀬 𑀘 𑀅𑀦𑀺𑀩𑀤𑁆𑀥𑀝𑁆𑀞𑀸𑀦𑁂 𑀫𑀼𑀳𑀼𑀢𑁆𑀢𑁂𑀦 𑀓𑀼𑀧𑁆𑀧𑀢𑀺. 𑀫𑀦𑁆𑀤𑁄 𑀫𑁄𑀫𑀽𑀳𑁄𑀢𑀺 𑀅𑀜𑁆𑀜𑀸𑀡𑀪𑀸𑀯𑁂𑀦 𑀫𑀦𑁆𑀤𑁄, 𑀅𑀯𑀺𑀲𑀬𑀢𑀸𑀬 𑀫𑁄𑀫𑀽𑀳𑁄, 𑀫𑀳𑀸𑀫𑀽𑀴𑁆𑀳𑁄𑀢𑀺 𑀅𑀢𑁆𑀣𑁄.

𑀅𑀯𑀚𑀸𑀦𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀆𑀭𑀪𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁨-𑁩. 𑀤𑀼𑀢𑀺𑀬𑁂 ¶ ¶ 𑀆𑀭𑀪𑀢𑀻𑀢𑀺 𑀏𑀢𑁆𑀣 𑀆𑀭𑀫𑁆𑀪-𑀲𑀤𑁆𑀤𑁄 𑀓𑀫𑁆𑀫𑀓𑀺𑀭𑀺𑀬𑀳𑀺𑀁𑀲𑀦𑀯𑀻𑀭𑀺𑀬𑀓𑁄𑀧𑀦𑀸𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂𑀲𑀼 𑀯𑀢𑁆𑀢𑀢𑀺. 𑀢𑀣𑀸 𑀳𑁂𑀲 ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸’’𑀢𑀺 (𑀲𑀼. 𑀦𑀺. 𑁭𑁪𑁯) 𑀓𑀫𑁆𑀫𑁂 𑀆𑀕𑀢𑁄. ‘‘𑀫𑀳𑀸𑀭𑀫𑁆𑀪𑀸 𑀫𑀳𑀸𑀬𑀜𑁆𑀜𑀸, 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸’’𑀢𑀺 (𑀲𑀁. 𑀦𑀺. 𑁧.𑁧𑁨𑁦; 𑀅. 𑀦𑀺. 𑁪.𑁩𑁯) 𑀓𑀺𑀭𑀺𑀬𑀸𑀬. ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀆𑀭𑀪𑀦𑁆𑀢𑀻’’𑀢𑀺 (𑀫. 𑀦𑀺. 𑁨.𑁫𑁧) 𑀳𑀺𑀁𑀲𑀦𑁂. ‘‘𑀆𑀭𑀫𑁆𑀪𑀣 𑀦𑀺𑀓𑁆𑀔𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 (𑀲𑀁. 𑀦𑀺. 𑁧.𑁧𑁮𑁫; 𑀦𑁂𑀢𑁆𑀢𑀺. 𑁨𑁯; 𑀧𑁂𑀝𑀓𑁄. 𑁩𑁮; 𑀫𑀺. 𑀧. 𑁫.𑁧.𑁪) 𑀯𑀻𑀭𑀺𑀬𑁂. ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁫; 𑀫. 𑀦𑀺. 𑁧.𑁨𑁯𑁩) 𑀓𑁄𑀧𑀦𑁂. ‘‘𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁨; 𑀧𑀼. 𑀧. 𑁧𑁯𑁧) 𑀅𑀬𑀁 𑀧𑀦 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂 𑀆𑀕𑀢𑁄, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀭𑀪𑀢𑀺 𑀘𑁂𑀯, 𑀢𑀧𑁆𑀧𑀘𑁆𑀘𑀬𑀸 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀦𑀥𑀺𑀕𑀢𑀢𑁆𑀢𑀸 𑀬𑀣𑀸𑀲𑀪𑀸𑀯𑀢𑁄 𑀦 𑀚𑀸𑀦𑀸𑀢𑀺. 𑀬𑀢𑁆𑀣𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀅𑀲𑁆𑀲, 𑀬𑀁 𑀞𑀸𑀦𑀁 𑀧𑀢𑁆𑀯𑀸 𑀏𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀧𑀢𑁆𑀯𑀸 𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? 𑀅𑀭𑀳𑀢𑁆𑀢𑀫𑀕𑁆𑀕𑀁, 𑀨𑀮𑀧𑁆𑀧𑀢𑁆𑀢𑀲𑁆𑀲 𑀧𑀦 𑀦𑀺𑀭𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥 𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦 𑀧𑀦 𑀨𑀮𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀭𑀪𑀢𑀻 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀁 𑀧𑀦𑁂𑀲 𑀤𑁂𑀲𑁂𑀢𑀼𑀁 𑀲𑀪𑀸𑀕𑀧𑀼𑀕𑁆𑀕𑀮𑀁 𑀧𑀭𑀺𑀬𑁂𑀲𑀢𑀺, 𑀢𑀲𑁆𑀫𑀸 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀦 𑀆𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀦 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻’’𑀢𑀺 𑀬𑁄 𑀯𑀼𑀢𑁆𑀢𑁄, 𑀓𑀢𑀭𑁄 𑀲𑁄 𑀧𑀼𑀕𑁆𑀕𑀮𑁄? 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀧𑀼𑀕𑁆𑀕𑀮𑁄. 𑀲𑁄 𑀳𑀺 ‘‘𑀓𑀺𑀁 𑀫𑁂 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀦𑁂𑀦, 𑀅𑀦𑀸𑀕𑀢𑁂 𑀫𑁂𑀢𑁆𑀢𑁂𑀬𑁆𑀬𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀼𑀤𑁆𑀥𑀲𑀻𑀮𑁄𑀧𑀺 𑀧𑀝𑀺𑀧𑀢𑁆𑀢𑀺𑀁 𑀦 𑀧𑀽𑀭𑁂𑀢𑀺. 𑀲𑁄 𑀳𑀺 ‘‘𑀓𑀺𑀫𑀢𑁆𑀣𑀁 𑀆𑀬𑀲𑁆𑀫𑀸 𑀧𑀫𑀢𑁆𑀢𑁄 𑀯𑀺𑀳𑀭𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀸𑀫 𑀕𑀢𑀺 𑀅𑀦𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀳𑀺 𑀫𑁂𑀢𑁆𑀢𑁂𑀬𑁆𑀬𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀮𑀪𑁂𑀬𑁆𑀬𑀸𑀲𑀺, 𑀅𑀭𑀳𑀢𑁆𑀢𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀳𑀻’’𑀢𑀺 𑀑𑀯𑀤𑀺𑀢𑀩𑁆𑀩𑁄𑀯.

𑀲𑀸𑀥𑀽𑀢𑀺 ¶ 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯 𑀅𑀧𑀭𑀤𑁆𑀥𑀁 𑀯𑀢 𑀆𑀬𑀲𑁆𑀫𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀬𑀸𑀘𑀸𑀫, 𑀤𑁂𑀲𑁂𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀤𑁂𑀲𑀦𑀸𑀬, 𑀯𑀼𑀝𑁆𑀞𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀯𑀼𑀝𑁆𑀞𑀸𑀦𑁂𑀦, 𑀆𑀯𑀺𑀓𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀆𑀯𑀺𑀓𑀺𑀭𑀺𑀬𑀸𑀬 𑀆𑀭𑀫𑁆𑀪𑀚𑁂 𑀆𑀲𑀯𑁂 𑀧𑀳𑀸𑀬 𑀲𑀼𑀤𑁆𑀥𑀦𑁆𑀢𑁂 𑀞𑀺𑀢𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 ¶ 𑀯𑀺𑀧𑁆𑀧𑀝𑀺𑀲𑀸𑀭𑀚𑁂 𑀆𑀲𑀯𑁂 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀜𑁆𑀘 𑀯𑀟𑁆𑀠𑁂𑀢𑀽𑀢𑀺. 𑀅𑀫𑀼𑀦𑀸 𑀧𑀜𑁆𑀘𑀫𑁂𑀦 𑀧𑀼𑀕𑁆𑀕𑀮𑁂𑀦𑀸𑀢𑀺 𑀏𑀢𑁂𑀦 𑀧𑀜𑁆𑀘𑀫𑁂𑀦 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑁂𑀦. 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀲𑀫𑀪𑀸𑀯𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀔𑀻𑀡𑀸𑀲𑀯𑁂𑀦 𑀑𑀯𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀆𑀭𑀪𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁬. 𑀢𑀺𑀓𑀡𑁆𑀟𑀓𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁪-𑁬. 𑀘𑀢𑀼𑀢𑁆𑀣𑁂 𑀧𑀝𑀺𑀓𑀽𑀮𑁂𑀢𑀺 𑀅𑀫𑀦𑀼𑀜𑁆𑀜𑁂 𑀅𑀦𑀺𑀝𑁆𑀞𑁂. 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻𑀢𑀺 𑀇𑀝𑁆𑀞𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀘𑀺𑀢𑁆𑀢𑁄. 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺 𑀉𑀧𑀦𑁂𑀢𑀺 𑀧𑀯𑀢𑁆𑀢𑁂𑀢𑀺. 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀦𑀺𑀝𑁆𑀞𑁂 𑀲𑀢𑁆𑀢𑀲𑀜𑁆𑀜𑀺𑀢𑁂 𑀆𑀭𑀫𑁆𑀫𑀡𑁂. 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀻𑀢𑀺 𑀫𑁂𑀢𑁆𑀢𑀁 𑀳𑀺𑀢𑁂𑀲𑀺𑀢𑀁 𑀉𑀧𑀲𑀁𑀳𑀭𑀦𑁆𑀢𑁄 𑀲𑀩𑁆𑀩𑀢𑁆𑀣𑀓𑀫𑁂𑀯 𑀯𑀸 𑀢𑀢𑁆𑀣 𑀨𑀭𑀢𑀺. 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻𑀢𑀺 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀦𑁂𑀦 𑀥𑀸𑀢𑀼𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀢𑀢𑁆𑀣 𑀧𑀯𑀢𑁆𑀢𑁂𑀢𑀺. 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸𑀢𑀺 𑀲𑀪𑀸𑀯𑀢𑁄 𑀆𑀦𑀼𑀪𑀸𑀯𑀢𑁄 𑀘 𑀉𑀧𑀢𑀺𑀝𑁆𑀞𑀦𑁆𑀢𑀁 𑀆𑀭𑀫𑁆𑀫𑀡𑁂 𑀧𑀝𑀺𑀓𑀽𑀮𑀪𑀸𑀯𑀁 𑀅𑀧𑁆𑀧𑀝𑀺𑀓𑀽𑀮𑀪𑀸𑀯𑀜𑁆𑀘𑀸𑀢𑀺 𑀢𑀁 𑀉𑀪𑀬𑀁 𑀧𑀳𑀸𑀬 𑀅𑀕𑁆𑀕𑀳𑁂𑀢𑁆𑀯𑀸, 𑀲𑀩𑁆𑀩𑀲𑁆𑀫𑀺𑀁 𑀧𑀦 𑀢𑀲𑁆𑀫𑀺𑀁 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑁄 𑀧𑀦 𑀓𑀺𑀁 𑀓𑀭𑁄𑀢𑀻𑀢𑀺? 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀆𑀧𑀸𑀣𑀁 𑀕𑀢𑁂𑀲𑀼 𑀦𑁂𑀯 𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺, 𑀦 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑁄 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑁄 𑀬𑀣𑀸 𑀅𑀜𑁆𑀜𑁂 𑀅𑀲𑀫𑀧𑁂𑀓𑁆𑀔𑀦𑁂𑀦 𑀫𑁄𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀏𑀯𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬. 𑀢𑁂𑀦𑁂𑀯𑀸𑀳 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀧𑀜𑁆𑀘𑀫𑁄’’𑀢𑀺. 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀮𑀓𑁆𑀔𑀡𑀸𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀦𑀢𑁄 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀯𑀲𑁂𑀦 𑀧𑀜𑁆𑀘𑀫𑁄 𑀯𑀸𑀭𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀁 𑀙𑀝𑁆𑀞𑀜𑁆𑀘 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀓𑀡𑁆𑀟𑀓𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁭-𑁧𑁫𑁦. 𑀲𑀢𑁆𑀢𑀫𑁂 ¶ 𑀅𑀲𑀓𑁆𑀓𑀘𑁆𑀘𑀦𑁆𑀢𑀺 𑀅𑀦𑀸𑀤𑀭𑀁 𑀓𑀢𑁆𑀯𑀸. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀲𑀓𑁆𑀓𑀘𑁆𑀘𑀓𑀭𑀡𑀁 𑀦𑀸𑀫 𑀅𑀲𑀫𑁆𑀧𑀦𑁆𑀦𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀦 𑀲𑀓𑁆𑀓𑀭𑀺𑀢𑁆𑀯𑀸 𑀲𑀼𑀘𑀺𑀁 𑀓𑀢𑁆𑀯𑀸 𑀤𑁂𑀢𑀻’’𑀢𑀺, 𑀉𑀢𑁆𑀢𑀡𑁆𑀟𑀼𑀮𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀁 ¶ 𑀲𑀼𑀘𑀺𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀦 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀘𑀺𑀢𑁆𑀢𑀻𑀓𑀢𑁆𑀯𑀸𑀢𑀺 𑀦 𑀘𑀺𑀢𑁆𑀢𑁂 𑀓𑀢𑁆𑀯𑀸, 𑀦 𑀧𑀽𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀽𑀚𑁂𑀦𑁆𑀢𑁄 𑀳𑀺 𑀧𑀽𑀚𑁂𑀢𑀩𑁆𑀩𑀯𑀢𑁆𑀣𑀼𑀁 𑀘𑀺𑀢𑁆𑀢𑁂 𑀞𑀧𑁂𑀢𑀺, 𑀦 𑀢𑀢𑁄 𑀩𑀳𑀺 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀯𑀸 𑀅𑀘𑁆𑀙𑀭𑀺𑀬𑀁 𑀓𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀯𑀺𑀓𑀭𑀡𑀁 𑀲𑀫𑁆𑀪𑀸𑀯𑀦𑀓𑀺𑀭𑀺𑀬𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀘𑀺𑀢𑁆𑀢𑀻𑀓𑀭𑀡𑀁 𑀅𑀲𑀫𑁆𑀪𑀸𑀯𑀦𑀓𑀺𑀭𑀺𑀬𑀸. 𑀅𑀕𑀸𑀭𑀯𑁂𑀦 𑀤𑁂𑀢𑀻𑀢𑀺 𑀧𑀼𑀕𑁆𑀕𑀮𑁂 𑀅𑀕𑀭𑀼𑀁 𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀦𑀝𑁆𑀞𑀸𑀦𑁂 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀆𑀥𑀸𑀭𑀓𑀁 𑀞𑀧𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺. 𑀅𑀲𑀳𑀢𑁆𑀣𑀸𑀢𑀺 𑀦 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀤𑁂𑀢𑀺, 𑀤𑀸𑀲𑀓𑀫𑁆𑀫𑀓𑀭𑁄𑀤𑀻𑀳𑀺 𑀤𑀸𑀧𑁂𑀢𑀺. 𑀅𑀧𑀯𑀺𑀤𑁆𑀥𑀁 𑀤𑁂𑀢𑀻𑀢𑀺 𑀅𑀦𑁆𑀢𑀭𑀸 𑀅𑀧𑀯𑀺𑀤𑁆𑀥𑀁 𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀤𑁂𑀢𑀺. 𑀢𑁂𑀦𑀸𑀳 ‘‘𑀦 𑀦𑀺𑀭𑀦𑁆𑀢𑀭𑀁 𑀤𑁂𑀢𑀻’’𑀢𑀺. 𑀅𑀣 𑀯𑀸 𑀅𑀧𑀯𑀺𑀤𑁆𑀥𑀁 𑀤𑁂𑀢𑀻𑀢𑀺 𑀉𑀘𑁆𑀙𑀺𑀝𑁆𑀞𑀸𑀤𑀺𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀯𑀺𑀬 𑀅𑀯𑀓𑁆𑀔𑀺𑀢𑁆𑀢𑀓𑀁 𑀓𑀢𑁆𑀯𑀸 𑀤𑁂𑀢𑀺. 𑀢𑁂𑀦𑀸𑀳 ‘‘𑀙𑀟𑁆𑀟𑁂𑀢𑀼𑀓𑀸𑀫𑁄 𑀯𑀺𑀬 𑀤𑁂𑀢𑀻’’𑀢𑀺. ‘‘𑀅𑀤𑁆𑀥𑀸 𑀇𑀫𑀲𑁆𑀲 𑀤𑀸𑀦𑀲𑁆𑀲 𑀨𑀮𑀫𑁂𑀯 𑀆𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀬𑀲𑁆𑀲 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺 𑀅𑀢𑁆𑀣𑀺, 𑀲𑁄 𑀆𑀕𑀫𑀦𑀤𑀺𑀝𑁆𑀞𑀺𑀓𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄𑀢𑀺 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄. 𑀢𑁂𑀦𑀸𑀳 ‘‘𑀓𑀢𑀲𑁆𑀲 𑀦𑀸𑀫 𑀨𑀮𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀅𑀝𑁆𑀞𑀫𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀡𑁆𑀟𑀓𑀻𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁪. 𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁

(𑁧𑁬) 𑁧. 𑀲𑀤𑁆𑀥𑀫𑁆𑀫𑀯𑀕𑁆𑀕𑁄

𑁧𑁫𑁧-𑁧𑁬𑁦. 𑀧𑀞𑀫𑁄 ¶ 𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

(𑁧𑁭) 𑁨. 𑀆𑀖𑀸𑀢𑀯𑀕𑁆𑀕𑁄

𑁧-𑁫. 𑀧𑀞𑀫𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁧-𑁧𑁬𑁫. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀤𑀼𑀢𑀺𑀬𑁂 𑀆𑀖𑀸𑀢𑁄 𑀧𑀝𑀺𑀯𑀺𑀦𑀬𑀢𑀺 𑀏𑀢𑁆𑀣, 𑀏𑀢𑁂𑀳𑀻𑀢𑀺 𑀯𑀸 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀢𑁂𑀦𑀸𑀳 ‘‘𑀆𑀖𑀸𑀢𑁄 𑀏𑀢𑁂𑀳𑀺 𑀧𑀝𑀺𑀯𑀺𑀦𑁂𑀢𑀩𑁆𑀩𑁄’’𑀢𑀺𑀆𑀤𑀺.

𑀦𑀦𑁆𑀢𑀓𑀦𑁆𑀢𑀺 𑀅𑀦𑀦𑁆𑀢𑀓𑀁, 𑀅𑀦𑁆𑀢𑀯𑀺𑀭𑀳𑀺𑀢𑀁 𑀯𑀢𑁆𑀣𑀔𑀡𑁆𑀟𑀁. 𑀬𑀤𑀺 𑀳𑀺 𑀢𑀲𑁆𑀲 𑀅𑀦𑁆𑀢𑁄 𑀪𑀯𑁂𑀬𑁆𑀬, ‘‘𑀧𑀺𑀮𑁄𑀢𑀺𑀓𑀸’’𑀢𑀺 𑀲𑀗𑁆𑀔𑀁 𑀦 𑀕𑀘𑁆𑀙𑁂𑀬𑁆𑀬.

𑀲𑁂𑀯𑀸𑀮𑁂𑀦𑀸𑀢𑀺 𑀩𑀻𑀚𑀓𑀡𑁆𑀡𑀺𑀓𑀓𑁂𑀲𑀭𑀸𑀤𑀺𑀪𑁂𑀤𑁂𑀦 𑀲𑁂𑀯𑀸𑀮𑁂𑀦. 𑀉𑀤𑀓𑀧𑀧𑁆𑀧𑀝𑀓𑁂𑀦𑀸𑀢𑀺 𑀦𑀻𑀮𑀫𑀡𑁆𑀟𑀽𑀓𑀧𑀺𑀝𑁆𑀞𑀺𑀯𑀡𑁆𑀡𑁂𑀦 𑀉𑀤𑀓𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀦 𑀉𑀤𑀓𑀧𑀺𑀝𑁆𑀞𑀺𑀓𑁂𑀦. 𑀖𑀫𑁆𑀫𑁂𑀦 𑀅𑀦𑀼𑀕𑀢𑁄𑀢𑀺 𑀖𑀫𑁆𑀫𑁂𑀦 𑀨𑀼𑀝𑁆𑀞𑁄 𑀅𑀪𑀺𑀪𑀽𑀢𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁆𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀁.

𑀯𑀺𑀲𑀪𑀸𑀕𑀯𑁂𑀤𑀦𑀼𑀧𑁆𑀧𑀢𑁆𑀢𑀺𑀬𑀸 𑀓𑀓𑀘𑁂𑀦𑁂𑀯 𑀇𑀭𑀺𑀬𑀸𑀧𑀣𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀙𑀺𑀦𑁆𑀤𑀦𑁆𑀢𑁄 𑀆𑀩𑀸𑀥𑀢𑀺 𑀧𑀻𑀴𑁂𑀢𑀻𑀢𑀺 𑀆𑀩𑀸𑀥𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑁄. 𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀤𑀼𑀓𑁆𑀔𑀺𑀢𑁄 𑀲𑀜𑁆𑀚𑀸𑀢𑀤𑀼𑀓𑁆𑀔𑁄. 𑀩𑀸𑀴𑁆𑀳𑀕𑀺𑀮𑀸𑀦𑁄𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄. 𑀕𑀸𑀫𑀦𑁆𑀢𑀦𑀸𑀬𑀓𑀲𑁆𑀲𑀸𑀢𑀺 𑀕𑀸𑀫𑀦𑁆𑀢𑀲𑀫𑁆𑀧𑀸𑀧𑀓𑀲𑁆𑀲.

𑀧𑀲𑀦𑁆𑀦𑀪𑀸𑀯𑁂𑀦 ¶ 𑀉𑀤𑀓𑀲𑁆𑀲 𑀅𑀘𑁆𑀙𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀘𑁆𑀙𑁄𑀤𑀓𑀸𑀢𑀺 𑀧𑀲𑀦𑁆𑀦𑁄𑀤𑀓𑀸’’𑀢𑀺. 𑀲𑀸𑀤𑀼𑀭𑀲𑀢𑀸𑀬 𑀲𑀸𑀢𑀢𑀸𑀢𑀺 𑀆𑀳 ‘‘𑀫𑀥𑀼𑀭𑁄𑀤𑀓𑀸’’𑀢𑀺. 𑀢𑀦𑀼𑀓𑀫𑁂𑀯 𑀲𑀮𑀺𑀮𑀁 𑀯𑀺𑀲𑁂𑀲𑀢𑁄 𑀲𑀻𑀢𑀮𑀁, 𑀦 𑀩𑀳𑀮𑀸𑀢𑀺 𑀆𑀳 ‘‘𑀢𑀦𑀼𑀲𑀻𑀢𑀲𑀮𑀺𑀮𑀸’’𑀢𑀺. 𑀲𑁂𑀢𑀓𑀸𑀢𑀺 𑀦𑀺𑀓𑁆𑀓𑀤𑁆𑀤𑀫𑀸. 𑀲𑀘𑀺𑀓𑁆𑀔𑀮𑁆𑀮𑀸𑀤𑀺𑀯𑀲𑁂𑀦 𑀳𑀺 𑀉𑀤𑀓𑀲𑁆𑀲 𑀯𑀺𑀯𑀡𑁆𑀡𑀢𑀸. 𑀲𑀪𑀸𑀯𑀢𑁄 𑀧𑀦 𑀢𑀁 𑀲𑁂𑀢𑀯𑀡𑁆𑀡𑀫𑁂𑀯. 𑀢𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀙𑀝𑁆𑀞𑁂 ¶ 𑀅𑀫𑀭𑀺𑀲𑀦𑀢𑁆𑀣𑁂𑀢𑀺 𑀅𑀲𑀳𑀦𑀢𑁆𑀣𑁂. 𑀅𑀦𑀸𑀕𑀢𑀯𑀘𑀦𑀁 𑀓𑀢𑀦𑁆𑀢𑀺 𑀅𑀦𑀸𑀕𑀢𑀲𑀤𑁆𑀤𑀧𑁆𑀧𑀬𑁄𑀕𑁄 𑀓𑀢𑁄, 𑀅𑀢𑁆𑀣𑁄 𑀧𑀦 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄𑀯. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 (𑀧𑀸𑀡𑀺𑀦𑀺. 𑁩.𑁩.𑁧𑁪𑁫-𑁧𑁪𑁬) 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀦𑁄𑀓𑀧𑁆𑀧𑀦𑀸𑀫𑀭𑀺𑀲𑀦𑀢𑁆𑀣𑀯𑀲𑁂𑀦 𑀅𑀢𑁆𑀣𑀺𑀲𑀤𑁆𑀤𑁂 𑀉𑀧𑀧𑀤𑁂 𑀯𑀢𑁆𑀢𑀫𑀸𑀦𑀓𑀸𑀮𑁂𑀧𑀺 𑀅𑀦𑀸𑀕𑀢𑀯𑀘𑀦𑀁 𑀓𑀭𑁄𑀦𑁆𑀢𑀺.

𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁯. 𑀘𑁄𑀤𑀦𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁭-𑁯. 𑀲𑀢𑁆𑀢𑀫𑁂 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸𑀢𑀺 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀆𑀧𑀢𑁆𑀢𑀺, 𑀢𑀲𑁆𑀲 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁. 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸𑀢𑀺 𑀬𑀁 𑀆𑀧𑀢𑁆𑀢𑀺𑀁 𑀲𑁄 𑀆𑀧𑀦𑁆𑀦𑁄, 𑀢𑀲𑁆𑀲𑀸 𑀤𑀲𑁆𑀲𑀦𑀁. 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀺𑀲𑀁𑀯𑀸𑀲𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁 𑀅𑀓𑀭𑀡𑀁. 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀪𑀺𑀯𑀸𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀺𑀭𑀺𑀬𑀸𑀬 𑀅𑀓𑀭𑀡𑀁. 𑀘𑁄𑀤𑀬𑀫𑀸𑀦𑁂𑀦𑀸𑀢𑀺 𑀘𑁄𑀤𑁂𑀦𑁆𑀢𑁂𑀦. 𑀘𑀼𑀤𑀺𑀢𑀓𑀲𑁆𑀲 𑀓𑀸𑀮𑁄𑀢𑀺 𑀘𑀼𑀤𑀺𑀢𑀓𑀲𑁆𑀲 𑀘𑁄𑀤𑁂𑀢𑀩𑁆𑀩𑀓𑀸𑀮𑁄. 𑀧𑀼𑀕𑁆𑀕𑀮𑀦𑁆𑀢𑀺 𑀘𑁄𑀤𑁂𑀢𑀩𑁆𑀩𑀧𑀼𑀕𑁆𑀕𑀮𑀁. 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀢𑀺 ‘‘𑀅𑀬𑀁 𑀘𑀼𑀤𑀺𑀢𑀓𑀮𑀓𑁆𑀔𑀡𑁂 𑀢𑀺𑀝𑁆𑀞𑀢𑀺, 𑀦 𑀢𑀺𑀝𑁆𑀞𑀢𑀻’’𑀢𑀺 𑀯𑀻𑀫𑀁𑀲𑀺𑀢𑁆𑀯𑀸. 𑀅𑀬𑀲𑀁 𑀆𑀭𑁄𑀧𑁂𑀢𑀻𑀢𑀺 ‘‘𑀇𑀫𑁂 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀸 𑀅𑀬𑀲𑀁 𑀩𑁆𑀬𑀲𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀅𑀬𑀲𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀘𑁄𑀤𑀦𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀪𑀤𑁆𑀤𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁦. 𑀤𑀲𑀫𑁂 ¶ 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄 𑀇𑀫𑁂 𑀲𑀢𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀲𑁄 ‘‘𑀧𑀸𑀲𑀁𑀲𑀪𑀸𑀯𑁂𑀦 𑀉𑀢𑁆𑀢𑀫𑀪𑀸𑀯𑁂𑀦 𑀘 𑀢𑁂 𑀲𑀢𑁆𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀚𑁂𑀝𑁆𑀞𑀓𑁄’’𑀢𑀺. 𑀅𑀜𑁆𑀜𑀤𑀢𑁆𑀣𑀼 𑀤𑀲𑁄𑀢𑀺 𑀤𑀲𑁆𑀲𑀦𑁂 𑀅𑀦𑁆𑀢𑀭𑀸𑀬𑀸𑀪𑀸𑀯𑀯𑀘𑀦𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀧𑀭𑀺𑀕𑁆𑀕𑀸𑀳𑀺𑀓𑀪𑀸𑀯𑁂𑀦 ¶ 𑀘 𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀺𑀢𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑀪𑀤𑁆𑀤𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁮) 𑁩. 𑀉𑀧𑀸𑀲𑀓𑀯𑀕𑁆𑀕𑁄

𑁧-𑁬. 𑀲𑀸𑀭𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁧-𑁧𑁭𑁬. 𑀢𑀢𑀺𑀬𑀲𑁆𑀲 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀧𑀜𑁆𑀘𑀫𑁂 𑀉𑀧𑀸𑀲𑀓𑀧𑀘𑁆𑀙𑀺𑀫𑀓𑁄𑀢𑀺 𑀉𑀧𑀸𑀲𑀓𑀦𑀺𑀳𑀻𑀦𑁄. ‘‘𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀸 𑀇𑀤𑀁 𑀦𑀸𑀫 𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀓𑁄𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀇𑀤𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀻𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀪𑁂𑀤𑀁 𑀫𑀗𑁆𑀕𑀮𑀫𑁂𑀯 𑀧𑀢𑁆𑀣𑀺𑀬𑀸𑀬𑀢𑀺. 𑀦𑁄 𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀁 𑀦𑁄 𑀧𑀢𑁆𑀣𑀺𑀬𑀸𑀬𑀢𑀺. 𑀇𑀫𑀫𑁆𑀳𑀸 𑀲𑀸𑀲𑀦𑀸𑀢𑀺 𑀇𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑀢𑁄. 𑀩𑀳𑀺𑀤𑁆𑀥𑀸𑀢𑀺 𑀩𑀸𑀳𑀺𑀭𑀓𑀲𑀫𑀬𑁂. 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀻𑀢𑀺 ‘‘𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀤𑀓𑁆𑀔𑀺𑀡𑁂𑀬𑁆𑀬𑀸’’𑀢𑀺 𑀲𑀜𑁆𑀜𑀻 𑀕𑀯𑁂𑀲𑀢𑀺. 𑀏𑀢𑁆𑀣 𑀤𑀓𑁆𑀔𑀺𑀡𑀧𑀭𑀺𑀬𑁂𑀲𑀦𑀧𑀼𑀩𑁆𑀩𑀓𑀸𑀭𑁂 𑀏𑀓𑀁 𑀓𑀢𑁆𑀯𑀸 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀸𑀭𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀯𑀡𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁭-𑁮. 𑀲𑀢𑁆𑀢𑀫𑁂 ¶ 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀆𑀯𑀼𑀥𑀪𑀡𑁆𑀟𑀁 𑀓𑀢𑁆𑀯𑀸 𑀯𑀸 𑀓𑀸𑀭𑁂𑀢𑁆𑀯𑀸 𑀯𑀸 𑀓𑀢𑀁 𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀆𑀯𑀼𑀥𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄𑀢𑀺 𑀇𑀤𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑀽𑀓𑀭𑀫𑀺𑀕𑀸𑀤𑀬𑁄 𑀧𑁄𑀲𑁂𑀢𑁆𑀯𑀸 𑀢𑁂𑀲𑀁 𑀯𑀺𑀓𑁆𑀓𑀬𑁄𑀢𑀺 𑀲𑀽𑀓𑀭𑀫𑀺𑀕𑀸𑀤𑀬𑁄 𑀧𑁄𑀲𑁂𑀢𑁆𑀯𑀸 𑀢𑁂𑀲𑀁 𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀬𑁄. 𑀏𑀢𑁆𑀣 𑀘 𑀲𑀢𑁆𑀣𑀯𑀡𑀺𑀚𑁆𑀚𑀸 𑀧𑀭𑁄𑀧𑀭𑀸𑀥𑀦𑀺𑀫𑀺𑀢𑁆𑀢𑀢𑀸𑀬 𑀅𑀓𑀭𑀡𑀻𑀬𑀸 𑀯𑀼𑀢𑁆𑀢𑀸, 𑀲𑀢𑁆𑀢𑀯𑀡𑀺𑀚𑁆𑀚𑀸 𑀅𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄, 𑀫𑀁𑀲𑀯𑀺𑀲𑀯𑀡𑀺𑀚𑁆𑀚𑀸 𑀯𑀥𑀳𑁂𑀢𑀼𑀢𑁄, 𑀫𑀚𑁆𑀚𑀯𑀡𑀺𑀚𑁆𑀚𑀸 𑀧𑀫𑀸𑀤𑀝𑁆𑀞𑀸𑀦𑀢𑁄. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀯𑀡𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀕𑀺𑀳𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀦𑀯𑀫𑁂 ¶ 𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀪𑀺𑀘𑁂𑀢𑁄𑀢𑀺 𑀅𑀪𑀺𑀓𑁆𑀓𑀦𑁆𑀢𑀁 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺 𑀅𑀥𑀺𑀘𑀺𑀢𑁆𑀢𑀁 𑀯𑀸, 𑀅𑀪𑀺𑀘𑁂𑀢𑀲𑀺 𑀚𑀸𑀢𑀸𑀦𑀺 𑀆𑀪𑀺𑀘𑁂𑀢𑀲𑀺𑀓𑀸𑀦𑀺, 𑀅𑀪𑀺𑀘𑁂𑀢𑁄 𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀻𑀢𑀺 𑀯𑀸 𑀆𑀪𑀺𑀘𑁂𑀢𑀲𑀺𑀓𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀉𑀢𑁆𑀢𑀫𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸𑀦’’𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀦𑀺 𑀳𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀛𑀸𑀬𑀺𑀦𑁄 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀲𑀁𑀓𑀺𑀮𑀺𑀝𑁆𑀞𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀘𑀢𑀼𑀩𑁆𑀩𑀺𑀥𑀫𑁂𑀭𑀬𑀦𑁆𑀢𑀺 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀕𑀼𑀴𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄𑀢𑀺 𑀏𑀯𑀁 𑀘𑀢𑀼𑀧𑁆𑀧𑀪𑁂𑀤𑀁 𑀫𑁂𑀭𑀬𑀁. 𑀧𑀜𑁆𑀘𑀯𑀺𑀥𑀜𑁆𑀘 𑀲𑀼𑀭𑀦𑁆𑀢𑀺 𑀧𑀽𑀯𑀲𑀼𑀭𑀸, 𑀧𑀺𑀝𑁆𑀞𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀏𑀯𑀁 𑀧𑀜𑁆𑀘𑀧𑁆𑀧𑀪𑁂𑀤𑀁 𑀲𑀼𑀭𑀁. 𑀧𑀼𑀜𑁆𑀜𑀁 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀧𑀼𑀜𑁆𑀜𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀲 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑀲𑁆𑀲𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀕𑀺𑀳𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀕𑀯𑁂𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁦. 𑀤𑀲𑀫𑁂 𑀲𑀼𑀓𑀸𑀭𑀡𑀦𑁆𑀢𑀺 𑀩𑁄𑀥𑀺𑀧𑀭𑀺𑀧𑀸𑀘𑀦𑀲𑁆𑀲 𑀏𑀓𑀦𑁆𑀢𑀺𑀓𑀁 𑀲𑀼𑀦𑁆𑀤𑀭𑀁 𑀓𑀸𑀭𑀡𑀁. 𑀫𑀦𑁆𑀤𑀳𑀲𑀺𑀢𑀦𑁆𑀢𑀺 𑀈𑀲𑀓𑀁 ¶ 𑀳𑀲𑀺𑀢𑀁. 𑀓𑀳𑀁 𑀓𑀳𑀦𑁆𑀢𑀺 𑀳𑀸𑀲𑀲𑀤𑁆𑀤𑀲𑁆𑀲 𑀅𑀦𑀼𑀓𑀭𑀡𑀫𑁂𑀢𑀁. 𑀳𑀝𑁆𑀞𑀧𑁆𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀦𑁆𑀢𑀺 𑀳𑀝𑁆𑀞𑀲𑁆𑀲 𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀁. 𑀬𑀣𑀸 𑀕𑀳𑀺𑀢𑀲𑀗𑁆𑀓𑁂𑀢𑀸 ‘‘𑀧𑀳𑀝𑁆𑀞𑁄 𑀪𑀕𑀯𑀸’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀏𑀯𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀫𑀢𑁆𑀢𑀁.

𑀇𑀤𑀸𑀦𑀺 𑀇𑀫𑀺𑀦𑀸 𑀧𑀲𑀗𑁆𑀕𑁂𑀦 𑀳𑀸𑀲𑀲𑀫𑀼𑀝𑁆𑀞𑀸𑀦𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀳𑀲𑀺𑀢𑀜𑁆𑀘 𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑀧𑀺 𑀳𑀸𑀲𑁄 𑀦 𑀲𑀫𑁆𑀪𑀯𑀢𑀺, 𑀧𑀕𑁂𑀯 𑀤𑁄𑀫𑀦𑀲𑁆𑀲𑀯𑀲𑁂𑀦𑀸𑀢𑀺 𑀆𑀳 ‘‘𑀢𑁂𑀭𑀲𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀳𑀻’’𑀢𑀺. 𑀦𑀦𑀼 𑀘 𑀓𑁂𑀘𑀺 𑀓𑁄𑀥𑀯𑀲𑁂𑀦𑀧𑀺 𑀳𑀲𑀦𑁆𑀢𑀻𑀢𑀺? 𑀦, 𑀢𑁂 𑀲𑀫𑁆𑀧𑀺𑀬𑀦𑁆𑀢𑀺 𑀓𑁄𑀥𑀯𑀢𑁆𑀣𑀼𑀁 𑀢𑀢𑁆𑀣 ‘‘𑀫𑀬𑀁 𑀤𑀸𑀦𑀺 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀭𑁂𑀦 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑁂𑀯 𑀳𑀸𑀲𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀢𑁂𑀲𑀽𑀢𑀺 ¶ 𑀧𑀜𑁆𑀘𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼. 𑀩𑀮𑀯𑀸𑀭𑀫𑁆𑀫𑀡𑁂𑀢𑀺 𑀉𑀴𑀸𑀭𑀢𑀫𑁂 𑀆𑀭𑀫𑁆𑀫𑀡𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑁂. 𑀤𑀼𑀩𑁆𑀩𑀮𑀸𑀭𑀫𑁆𑀫𑀡𑁂𑀢𑀺 𑀅𑀦𑀼𑀴𑀸𑀭𑀆𑀭𑀫𑁆𑀫𑀡𑁂.

‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂…𑀧𑁂… 𑀉𑀧𑁆𑀧𑀸𑀤𑁂𑀢𑀻’’𑀢𑀺 𑀇𑀤𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀢𑀣𑀸 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀳𑀺 𑀪𑀕𑀯𑀢𑁄 𑀲𑀺𑀢𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀢𑀁. 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 (𑀥. 𑀲. 𑀫𑀽𑀮𑀝𑀻. 𑁯𑁬𑁮) 𑀧𑀦 ‘‘𑀅𑀢𑀻𑀢𑀁𑀲𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁 𑀯𑀢𑁆𑀯𑀸 ‘𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀦𑀺. 𑁧𑁫𑁬; 𑀧𑀝𑀺. 𑀫. 𑁩.𑁫) ‘𑀪𑀕𑀯𑀢𑁄 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀺𑀦𑀸 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀫𑁆𑀧𑀺 𑀪𑀕𑀯𑀢𑁄 𑀲𑀺𑀢𑀓𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀅𑀦𑀼𑀯𑀢𑁆𑀢𑀓𑀢𑁆𑀢𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀬𑁂𑀯𑀸𑀢𑀺 𑀏𑀯𑀁 𑀧𑀦 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂 𑀲𑀢𑀺 𑀦 𑀓𑁄𑀘𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀁 𑀯𑀺𑀭𑁄𑀥𑁄. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁫𑁬𑁮) ‘‘𑀢𑁂𑀲𑀁 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀜𑁆𑀘𑁂𑀢𑀁 𑀏𑀯𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑁆𑀲𑀧𑀺 𑀪𑀕𑀯𑀢𑁄 𑀢𑀣𑀸𑀭𑀽𑀧𑁂 𑀓𑀸𑀮𑁂 𑀦 𑀬𑀼𑀚𑁆𑀚𑁂𑀬𑁆𑀬. 𑀢𑀲𑁆𑀲𑀧𑀺 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀏𑀯𑀜𑁆𑀘 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀁 𑀉𑀧𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀥. 𑀲. 𑀫𑀽𑀮𑀝𑀻. 𑁧 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸) 𑀦 𑀘 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀦𑀪𑀸𑀯𑁄 𑀯𑀺𑀲𑁆𑀲𑀚𑁆𑀚𑀢𑀻𑀢𑀺.

𑀳𑀲𑀺𑀢𑀦𑁆𑀢𑀺 𑀲𑀺𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀻’’𑀢𑀺. 𑀲𑀫𑁄𑀲𑀭𑀺𑀢𑀸 𑀯𑀺𑀚𑁆𑀚𑀼𑀮𑀢𑀸. 𑀲𑀸 𑀳𑀺 𑀇𑀢𑀭𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀔𑀡𑀝𑁆𑀞𑀺𑀢𑀺𑀬𑀸 𑀲𑀻𑀖𑀦𑀺𑀭𑁄𑀥𑀸 𑀘 𑀦 𑀳𑁄𑀢𑀺, 𑀅𑀧𑀺𑀘 𑀔𑁄 𑀤𑀦𑁆𑀥𑀦𑀺𑀭𑁄𑀥𑀸, 𑀦 𑀘 𑀲𑀩𑁆𑀩𑀓𑀸𑀮𑀺𑀓𑀸. 𑀤𑀻𑀥𑀺𑀢𑀺 𑀧𑀸𑀯𑀓𑀫𑀳𑀸𑀫𑁂𑀖𑀢𑁄 𑀯𑀸 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀢𑁄 𑀯𑀸 ¶ 𑀦𑀺𑀘𑁆𑀙𑀭𑀢𑀺. 𑀢𑁂𑀦𑀸𑀳 ‘‘𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀫𑀼𑀔𑀢𑁄’’𑀢𑀺. 𑀅𑀬𑀁 𑀓𑀺𑀭 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀥𑀫𑁆𑀫𑀢𑀸, 𑀬𑀤𑀺𑀤𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀲𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀸𑀞𑀕𑁆𑀕𑁂𑀲𑀼𑀬𑁂𑀯 𑀅𑀦𑁆𑀢𑀭𑀥𑀸𑀦𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀕𑀯𑁂𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁯) 𑁪. 𑀅𑀭𑀜𑁆𑀜𑀯𑀕𑁆𑀕𑁄

𑁧. 𑀆𑀭𑀜𑁆𑀜𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁧. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀞𑀫𑁂 𑀅𑀧𑁆𑀧𑀻𑀘𑁆𑀙𑀢𑀁𑀬𑁂𑀯 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀻𑀲𑀼 ‘‘𑀇𑀢𑀺 𑀅𑀧𑁆𑀧𑀺𑀘𑁆𑀙𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀫𑁂 𑀆𑀭𑀜𑁆𑀜𑀺𑀓𑀗𑁆𑀕𑀁 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺, ‘‘𑀇𑀢𑀺 𑀲𑀦𑁆𑀢𑀼𑀝𑁆𑀞𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀫𑁂 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀺𑀲𑁆𑀲𑀢𑀺, ‘‘𑀇𑀢𑀺 𑀓𑀺𑀮𑁂𑀲𑁂 𑀲𑀮𑁆𑀮𑀺𑀔𑀺𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀫𑁂 𑀆𑀭𑀜𑁆𑀜𑀺𑀓𑀗𑁆𑀕𑀁 𑀓𑀺𑀮𑁂𑀲𑀲𑀮𑁆𑀮𑀺𑀔𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺. 𑀅𑀕𑁆𑀕𑁄𑀢𑀺 𑀚𑁂𑀝𑁆𑀞𑀓𑁄. 𑀲𑁂𑀲𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺.

𑀕𑀯𑀸 𑀔𑀻𑀭𑀦𑁆𑀢𑀺 𑀕𑀸𑀯𑀺𑀢𑁄 𑀔𑀻𑀭𑀁 𑀦𑀸𑀫 𑀳𑁄𑀢𑀺, 𑀦 𑀕𑀸𑀯𑀺𑀬𑀸 𑀤𑀥𑀺. 𑀔𑀻𑀭𑀫𑁆𑀳𑀸 𑀤𑀥𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀕𑁄𑀭𑀲𑁂𑀲𑀼 𑀲𑀧𑁆𑀧𑀺𑀫𑀡𑁆𑀟𑁄 𑀅𑀕𑁆𑀕𑁄, 𑀏𑀯𑀫𑁂𑀯𑀁 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀆𑀭𑀜𑁆𑀜𑀺𑀓𑁂𑀲𑀼 𑀬𑁄 𑀅𑀬𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀅𑀬𑀁 𑀅𑀕𑁆𑀕𑁄 𑀘𑁂𑀯 𑀲𑁂𑀝𑁆𑀞𑁄 𑀘 𑀫𑁄𑀓𑁆𑀔𑁄 𑀘 𑀧𑀯𑀭𑁄 𑀘. 𑀇𑀫𑁂𑀲𑀼 𑀆𑀭𑀜𑁆𑀜𑀺𑀓𑁂𑀲𑀼 𑀚𑀸𑀢𑀺𑀆𑀭𑀜𑁆𑀜𑀺𑀓𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀆𑀭𑀜𑁆𑀜𑀺𑀓𑀦𑀸𑀫𑀫𑀢𑁆𑀢𑁂𑀦 𑀆𑀭𑀜𑁆𑀜𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀁𑀲𑀼𑀓𑀽𑀮𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀭𑀜𑁆𑀜𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀜𑁆𑀜𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨𑁦) 𑁫. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁧. 𑀧𑀜𑁆𑀘𑀫𑀲𑁆𑀲 ¶ 𑀧𑀞𑀫𑁂 𑀲𑀫𑁆𑀧𑀺𑀬𑁂𑀦𑁂𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀧𑁂𑀫𑁂𑀦𑁂𑀯 𑀓𑀸𑀬𑁂𑀦 𑀘 𑀘𑀺𑀢𑁆𑀢𑁂𑀦 𑀘 𑀫𑀺𑀲𑁆𑀲𑀻𑀪𑀽𑀢𑀸 𑀲𑀗𑁆𑀖𑀝𑁆𑀝𑀺𑀢𑀸 𑀲𑀁𑀲𑀝𑁆𑀞𑀸 𑀳𑀼𑀢𑁆𑀯𑀸 𑀲𑀁𑀯𑀸𑀲𑀁 𑀯𑀢𑁆𑀢𑁂𑀦𑁆𑀢𑀺, 𑀦 𑀅𑀧𑁆𑀧𑀺𑀬𑁂𑀦 𑀦𑀺𑀕𑁆𑀕𑀳𑁂𑀦 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀺𑀬’’𑀦𑁆𑀢𑀺𑀆𑀤𑀺. 𑀉𑀤𑀭𑀁 𑀅𑀯𑀤𑀺𑀳𑀢𑀺 𑀉𑀧𑀘𑀺𑀦𑁄𑀢𑀺 𑀧𑀽𑀭𑁂𑀢𑀻𑀢𑀺 𑀉𑀤𑀭𑀸𑀯𑀤𑁂𑀳𑀓𑀁. 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁, 𑀉𑀤𑀭𑀸𑀯𑀤𑁂𑀳𑀓𑀁 𑀓𑀢𑁆𑀯𑀸 𑀉𑀤𑀭𑀁 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀤𑀭𑀁 𑀅𑀯𑀤𑀺𑀳𑀺𑀢𑁆𑀯𑀸’’𑀢𑀺𑀆𑀤𑀺.

𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑁄𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁨. 𑀤𑀼𑀢𑀺𑀬𑁂 ¶ 𑀧𑀯𑀢𑁆𑀢𑀸𑀭𑁄𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁮𑁫) 𑀧𑀸𑀯𑀘𑀦𑀪𑀸𑀯𑁂𑀦 𑀯𑀢𑁆𑀢𑀸𑀭𑁄. 𑀬𑀲𑁆𑀫𑀸 𑀢𑁂 𑀢𑁂𑀲𑀁 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀦𑀓𑀸, 𑀢𑀲𑁆𑀫𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀸𑀭𑁄’’𑀢𑀺. 𑀲𑀼𑀤𑁆𑀤𑁂 𑀩𑀳𑀺 𑀓𑀢𑁆𑀯𑀸 𑀭𑀳𑁄𑀪𑀸𑀲𑀺𑀢𑀩𑁆𑀩𑀝𑁆𑀞𑁂𑀦 𑀫𑀦𑁆𑀢𑀸 𑀏𑀯 𑀢𑀁𑀢𑀁𑀅𑀢𑁆𑀣𑀧𑁆𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀫𑀦𑁆𑀢𑀧𑀤𑀁. 𑀅𑀦𑀼𑀧𑀦𑀻𑀢𑀸𑀲𑀸𑀥𑀸𑀭𑀡𑀢𑀸𑀬 𑀭𑀳𑀲𑁆𑀲𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀬 𑀅𑀥𑀺𑀕𑀫𑀽𑀧𑀸𑀬𑀁. 𑀲𑀚𑁆𑀛𑀸𑀬𑀺𑀢𑀦𑁆𑀢𑀺 𑀕𑀸𑀬𑀦𑀯𑀲𑁂𑀦 𑀲𑀚𑁆𑀛𑀸𑀬𑀺𑀢𑀁. 𑀢𑀁 𑀧𑀦 𑀉𑀤𑀢𑁆𑀢𑀸𑀦𑀼𑀤𑀢𑁆𑀢𑀸𑀤𑀻𑀦𑀁 𑀲𑀭𑀸𑀦𑀁 𑀲𑀫𑁆𑀧𑀤𑀸𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀦𑁆𑀢𑀺 𑀆𑀳 ‘‘𑀲𑀭𑀲𑀫𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺. 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀦𑁆𑀢𑀺 𑀧𑀸𑀯𑀘𑀦𑀪𑀸𑀯𑁂𑀦 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀁. 𑀲𑀫𑀼𑀧𑀩𑁆𑀬𑀽𑀴𑁆𑀳𑀦𑁆𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀜𑁆𑀜𑀽𑀴𑁆𑀳𑀁. 𑀭𑀸𑀲𑀺𑀓𑀢𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀧𑀘𑁆𑀘𑁂𑀓𑀁 𑀫𑀦𑁆𑀢𑀩𑁆𑀭𑀳𑁆𑀫𑀸𑀤𑀺𑀯𑀲𑁂𑀦, 𑀅𑀚𑁆𑀛𑀸𑀬𑀸𑀦𑀼𑀯𑀸𑀓𑀸𑀤𑀺𑀯𑀲𑁂𑀦 𑀘 𑀭𑀸𑀲𑀺𑀓𑀢𑀁. 𑀢𑁂𑀲𑀦𑁆𑀢𑀺 𑀫𑀦𑁆𑀢𑀸𑀦𑀁 𑀓𑀢𑁆𑀢𑀽𑀦𑀁. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀁, 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀲𑀤𑀺𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀓𑀧𑁆𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑁆𑀢𑀚𑁆𑀛𑁂𑀦𑀯𑀺𑀥𑀺𑀜𑁆𑀘 𑀑𑀮𑁄𑀓𑁂𑀢𑁆𑀯𑀸. 𑀧𑀸𑀯𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑁂𑀢𑁆𑀯𑀸𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀁 𑀯𑀘𑀦𑀁 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑁂𑀦 𑀲𑀳 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸. 𑀦 𑀳𑀺 𑀢𑁂𑀲𑀁 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁄 𑀅𑀢𑁆𑀣𑁄 𑀧𑀘𑁆𑀘𑀓𑁆𑀔𑁄 𑀳𑁄𑀢𑀺. 𑀅𑀧𑀭𑀸𑀧𑀭𑁂𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀅𑀧𑀭𑀸𑀧𑀭𑁂 𑀧𑀘𑁆𑀙𑀺𑀫𑀸 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀕𑀦𑁆𑀣𑀺𑀢𑀫𑀦𑁆𑀢𑀧𑀤𑁂𑀲𑀼 𑀓𑀺𑀮𑁂𑀲𑀲𑀦𑁆𑀦𑀺𑀲𑁆𑀲𑀺𑀢𑀧𑀤𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀤𑁂 𑀧𑀓𑁆𑀔𑀺𑀧𑀦𑀁 𑀓𑀢𑁆𑀯𑀸. 𑀯𑀺𑀭𑀼𑀤𑁆𑀥𑁂 𑀅𑀓𑀁𑀲𑀽𑀢𑀺 ¶ 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀸𑀤𑀻𑀲𑀼 (𑀲𑀼. 𑀦𑀺. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀁 𑁨𑁮𑁬 𑀆𑀤𑀬𑁄) 𑀆𑀕𑀢𑀦𑀬𑁂𑀦 𑀲𑀁𑀓𑀺𑀮𑁂𑀲𑀢𑁆𑀣𑀤𑀻𑀧𑀦𑀢𑁄 𑀧𑀘𑁆𑀘𑀦𑀻𑀓𑀪𑀽𑀢𑁂 𑀅𑀓𑀁𑀲𑀼.

𑀉𑀲𑀽𑀦𑀁 𑀅𑀲𑀦𑀓𑀫𑁆𑀫𑀁 𑀇𑀲𑁆𑀲𑀢𑁆𑀣𑀁, 𑀥𑀦𑀼𑀲𑀺𑀧𑁆𑀧𑁂𑀦 𑀚𑀻𑀯𑀺𑀓𑀸. 𑀇𑀥 𑀧𑀦 𑀇𑀲𑁆𑀲𑀢𑁆𑀣𑀁 𑀯𑀺𑀬𑀸𑀢𑀺 𑀇𑀲𑁆𑀲𑀢𑁆𑀣𑀁, 𑀲𑀩𑁆𑀩𑀆𑀯𑀼𑀥𑀚𑀻𑀯𑀺𑀓𑀸𑀢𑀺 𑀆𑀳 ‘‘𑀬𑁄𑀥𑀸𑀚𑀻𑀯𑀓𑀫𑁆𑀫𑁂𑀦𑀸’’𑀢𑀺, 𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀸𑀦𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀭𑀸𑀚𑀧𑁄𑀭𑀺𑀲𑀁 𑀦𑀸𑀫 𑀯𑀺𑀦𑀸 𑀆𑀯𑀼𑀥𑁂𑀦 𑀧𑁄𑀭𑁄𑀳𑁂𑀘𑁆𑀘𑀸𑀫𑀘𑁆𑀘𑀓𑀫𑁆𑀫𑀸𑀤𑀺𑀭𑀸𑀚𑀓𑀫𑁆𑀫𑀁 𑀓𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁. 𑀲𑀺𑀧𑁆𑀧𑀜𑁆𑀜𑀢𑀭𑁂𑀦𑀸𑀢𑀺 𑀕𑀳𑀺𑀢𑀸𑀯𑀲𑁂𑀲𑁂𑀦 𑀳𑀢𑁆𑀣𑀺𑀅𑀲𑁆𑀲𑀲𑀺𑀧𑁆𑀧𑀸𑀤𑀺𑀦𑀸. 𑀓𑀼𑀫𑀸𑀭𑀪𑀸𑀯𑀢𑁄 𑀧𑀪𑀼𑀢𑀺 𑀘𑀭𑀡𑁂𑀦 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁.

𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀤𑁆𑀯𑀸𑀭𑁂 𑀞𑀺𑀢𑀲𑁆𑀲𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀸 ‘‘𑀇𑀤𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀪𑀭𑀺𑀬𑀁 𑀧𑁄𑀲𑀸𑀧𑀦𑀢𑁆𑀣𑀸𑀬 𑀤𑁂𑀫𑀸’’𑀢𑀺 𑀯𑀢𑁆𑀯𑀸 ¶ 𑀤𑁂𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀢𑁂 𑀏𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸𑀧𑀺 𑀤𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀦 𑀬𑀸𑀯𑀚𑀻𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦. 𑀢𑁂𑀲𑀜𑁆𑀳𑀻 𑀏𑀯𑀁 𑀤𑀺𑀝𑁆𑀞𑀺 𑀳𑁄𑀢𑀺 ‘‘𑀬𑁄 𑀧𑀼𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀓𑀼𑀮𑀯𑀁𑀲𑀘𑁆𑀙𑁂𑀤𑀓𑀭𑁄 𑀳𑁄𑀢𑀺, 𑀢𑀢𑁄 𑀦𑀺𑀭𑀬𑁂 𑀧𑀘𑁆𑀘𑀢𑀻’’𑀢𑀺. 𑀘𑀢𑁆𑀢𑀸𑀭𑁄 𑀓𑀺𑀭 𑀅𑀪𑀸𑀬𑀺𑀢𑀩𑁆𑀩𑀁 𑀪𑀸𑀬𑀦𑁆𑀢𑀺 𑀕𑀡𑁆𑀟𑀼𑀧𑁆𑀧𑀸𑀤𑀓𑁄, 𑀓𑀺𑀓𑀻, 𑀓𑁄𑀦𑁆𑀢𑀺𑀦𑀻, 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀕𑀡𑁆𑀟𑀼𑀧𑁆𑀧𑀸𑀤𑀸 𑀓𑀺𑀭 𑀫𑀳𑀸𑀧𑀣𑀯𑀺𑀬𑀸 𑀔𑀬𑀦𑀪𑀬𑁂𑀦 𑀫𑀢𑁆𑀢𑀪𑁄𑀚𑀦𑀸 𑀳𑁄𑀦𑁆𑀢𑀺, 𑀦 𑀩𑀳𑀼𑀁 𑀫𑀢𑁆𑀢𑀺𑀓𑀁 𑀔𑀸𑀤𑀦𑁆𑀢𑀺. 𑀓𑀺𑀓𑀻 𑀲𑀓𑀼𑀡𑀺𑀓𑀸 𑀆𑀓𑀸𑀲𑀧𑀢𑀦𑀪𑀬𑁂𑀦 𑀅𑀡𑁆𑀟𑀲𑁆𑀲 𑀉𑀧𑀭𑀺 𑀉𑀢𑁆𑀢𑀸𑀦𑀸 𑀲𑁂𑀢𑀺. 𑀓𑁄𑀦𑁆𑀢𑀺𑀦𑀻 𑀲𑀓𑀼𑀡𑀻 𑀧𑀣𑀯𑀻𑀓𑀫𑁆𑀧𑀦𑀪𑀬𑁂𑀦 𑀧𑀸𑀤𑁂𑀳𑀺 𑀪𑀽𑀫𑀺𑀁 𑀦 𑀲𑀼𑀝𑁆𑀞𑀼 𑀅𑀓𑁆𑀓𑀫𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀓𑀼𑀮𑀯𑀁𑀲𑀽𑀧𑀘𑁆𑀙𑁂𑀤𑀪𑀬𑁂𑀦 𑀤𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀆𑀳𑀼 𑀘𑁂𑀢𑁆𑀣 𑁋

‘‘𑀕𑀡𑁆𑀟𑀼𑀧𑁆𑀧𑀸𑀤𑁄 𑀓𑀺𑀓𑀻 𑀘𑁂𑀯, 𑀓𑁄𑀦𑁆𑀢𑀻 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑁄;

𑀏𑀢𑁂 𑀅𑀪𑀬𑀁 𑀪𑀸𑀬𑀦𑁆𑀢𑀺, 𑀲𑀫𑁆𑀫𑀽𑀴𑁆𑀳𑀸 𑀘𑀢𑀼𑀭𑁄 𑀚𑀦𑀸’’𑀢𑀺. (𑀲𑀼. 𑀦𑀺. 𑀅𑀝𑁆𑀞. 𑁨.𑁨𑁯𑁩);

𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀤𑁄𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁩. 𑀢𑀢𑀺𑀬𑁂 (𑀲𑀁. 𑀦𑀺. 𑀝𑀻. 𑁨.𑁫.𑁨𑁩𑁬) 𑀧𑀞𑀫𑀜𑁆𑀜𑁂𑀯𑀸𑀢𑀺 𑀧𑀼𑀭𑁂𑀢𑀭𑀁𑀬𑁂𑀯, 𑀅𑀲𑀚𑁆𑀛𑀸𑀬𑀓𑀢𑀸𑀦𑀁 ¶ 𑀫𑀦𑁆𑀢𑀸𑀦𑀁 𑀅𑀧𑁆𑀧𑀝𑀺𑀪𑀸𑀦𑀁 𑀧𑀕𑁂𑀯 𑀧𑀞𑀫𑀁𑀬𑁂𑀯 𑀲𑀺𑀤𑁆𑀥𑀁, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀸𑀫 𑀅𑀪𑀺𑀪𑀯𑁄 𑀕𑀳𑀡𑀦𑁆𑀢𑀺 𑀆𑀳 ‘‘𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀓𑀸𑀫𑀭𑀸𑀕𑀕𑁆𑀕𑀳𑀺𑀢𑁂𑀦𑀸’’𑀢𑀺. 𑀯𑀺𑀓𑁆𑀔𑀫𑁆𑀪𑁂𑀢𑀺 𑀅𑀧𑀦𑁂𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀁, 𑀧𑀝𑀺𑀧𑀓𑁆𑀔𑀢𑁄 𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁. 𑀯𑀺𑀓𑁆𑀔𑀫𑁆𑀪𑀦𑀜𑁆𑀘 𑀢𑀁 𑀦𑀺𑀲𑁆𑀲𑀭𑀡𑀜𑁆𑀘𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑀸 𑀅𑀭𑀡𑀻𑀬𑁄 𑀧𑀢𑁆𑀢𑀩𑁆𑀩𑁄 𑀅𑀢𑁆𑀣𑁄 𑀅𑀢𑁆𑀢𑀢𑁆𑀣𑁄. 𑀢𑀣𑀸 𑀧𑀭𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁫𑁨) 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀅𑀦𑀸𑀕𑀢𑀢𑁆𑀢𑀸 𑀩𑁆𑀬𑀸𑀧𑀸𑀤𑀯𑀸𑀭𑁂 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀁 𑀦 𑀕𑀳𑀺𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀕𑀳𑀺𑀢𑀁, 𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦 𑀢𑀲𑁆𑀲 𑀯𑀺𑀦𑁄𑀤𑁂𑀢𑀩𑁆𑀩𑀢𑀸𑀬 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀫𑁆𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀆𑀮𑁄𑀓𑀲𑀜𑁆𑀜𑀸 𑀉𑀧𑀘𑀸𑀭𑀧𑁆𑀧𑀢𑁆𑀢𑀸 𑀯𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 ¶ 𑀯𑀸. 𑀬𑁄 𑀓𑁄𑀘𑀺 𑀓𑀲𑀺𑀡𑀚𑁆𑀛𑀸𑀦𑀸𑀤𑀺𑀪𑁂𑀤𑁄 𑀲𑀫𑀣𑁄. 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀁.

𑀓𑀼𑀥𑀺𑀢𑁄𑀢𑀺 𑀢𑀢𑁆𑀢𑁄. 𑀉𑀲𑁆𑀲𑀽𑀭𑀓𑀚𑀸𑀢𑁄𑀢𑀺 𑀢𑀲𑁆𑀲𑁂𑀯 𑀓𑀼𑀥𑀺𑀢𑀪𑀸𑀯𑀲𑁆𑀲 𑀉𑀲𑁆𑀲𑀽𑀭𑀓𑀁 𑀅𑀘𑁆𑀘𑀼𑀡𑁆𑀳𑀢𑀁 𑀧𑀢𑁆𑀢𑁄. 𑀢𑁂𑀦𑀸𑀳 ‘‘𑀉𑀲𑀼𑀫𑀓𑀚𑀸𑀢𑁄’’𑀢𑀺. 𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑁂𑀦𑀸𑀢𑀺 𑀢𑀺𑀮𑀩𑀻𑀚𑀓𑀡𑁆𑀡𑀺𑀓𑀓𑁂𑀲𑀭𑀸𑀤𑀺𑀪𑁂𑀤𑁂𑀦 𑀲𑁂𑀯𑀸𑀮𑁂𑀦. 𑀧𑀡𑀓𑁂𑀦𑀸𑀢𑀺 𑀉𑀤𑀓𑀧𑀺𑀘𑁆𑀙𑀺𑀮𑁆𑀮𑁂𑀦. 𑀅𑀧𑁆𑀧𑀲𑀦𑁆𑀦𑁄 𑀆𑀓𑀼𑀮𑀢𑀸𑀬. 𑀅𑀲𑀦𑁆𑀦𑀺𑀲𑀺𑀦𑁆𑀦𑁄 𑀓𑀮𑀮𑀼𑀧𑁆𑀧𑀢𑁆𑀢𑀺𑀬𑀸. 𑀅𑀦𑀸𑀮𑁄𑀓𑀝𑁆𑀞𑀸𑀦𑁂𑀢𑀺 𑀆𑀮𑁄𑀓𑀭𑀳𑀺𑀢𑁂 𑀞𑀸𑀦𑁂.

𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀸𑀭𑀡𑀧𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁪. 𑀘𑀢𑀼𑀢𑁆𑀣𑁂 𑀧𑀡𑁆𑀟𑀺𑀢𑁄 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀫𑀜𑁆𑀜𑁂𑀢𑀺 𑀇𑀤𑀁 ‘‘𑀫𑀜𑁆𑀜𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀧𑀤𑀁. 𑀢𑀲𑁆𑀲 𑀇𑀢𑀺-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀡𑁆𑀟𑀺𑀢𑁄𑀢𑀺 𑀫𑀜𑁆𑀜𑀢𑀻’’𑀢𑀺 𑀆𑀳. 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀉𑀤𑀸𑀳𑀼 𑀦𑁄’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺 𑀪𑀯𑀁 𑀧𑀺𑀗𑁆𑀕𑀺𑀬𑀸𑀦𑀻 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀼𑀦 𑀕𑀡𑁆𑀳𑀦𑁆𑀢𑁄 ‘‘𑀧𑀡𑁆𑀟𑀺𑀢𑁄 𑀫𑀜𑁆𑀜𑁂’’𑀢𑀺 𑀆𑀳, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀯𑀁 𑀧𑀺𑀗𑁆𑀕𑀺𑀬𑀸𑀦𑀻 𑀲𑀫𑀡𑀁 𑀕𑁄𑀢𑀫𑀁 𑀧𑀡𑁆𑀟𑀺𑀢𑁄𑀢𑀺 𑀫𑀜𑁆𑀜𑀢𑀺 𑀉𑀤𑀸𑀳𑀼 𑀦𑁄’’𑀢𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀓𑀣𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀳𑀁 𑀓𑁄 𑀦𑀸𑀫, 𑀫𑀫 𑀅𑀯𑀺𑀲𑀬𑁄 𑀏𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀓𑁄 𑀘𑀸𑀢𑀺 𑀳𑁂𑀢𑀼𑀦𑀺𑀲𑁆𑀲𑀓𑁆𑀓𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀼𑀢𑁄 𑀘𑀸’’𑀢𑀺. 𑀢𑀣𑀸 𑀘𑀸𑀳 ‘‘𑀓𑁂𑀦 𑀓𑀸𑀭𑀡𑁂𑀦 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺, 𑀬𑁂𑀦 𑀓𑀸𑀭𑀡𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑁂𑀬𑁆𑀬𑀁 ¶ , 𑀢𑀁 𑀓𑀸𑀭𑀡𑀁 𑀫𑀬𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀼𑀤𑁆𑀥𑁄𑀬𑁂𑀯 𑀪𑀯𑁂𑀬𑁆𑀬 𑀅𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑀣𑀸 𑀩𑀼𑀤𑁆𑀥𑀜𑀸𑀡𑀸𑀦𑀼𑀪𑀸𑀯𑀁 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀑𑀭𑀫𑀢𑁆𑀢𑀓𑀁 𑀲𑀻𑀮𑀫𑀢𑁆𑀢𑀓𑀁, 𑀬𑁂𑀦 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 (𑀤𑀻. 𑀦𑀺. 𑁧.𑁭). 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀽𑀢𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁧.𑁨𑁮) 𑀘. 𑀏𑀢𑁆𑀣𑀸𑀢𑀺 ‘‘𑀲𑁄𑀧𑀺 𑀦𑀽𑀦𑀲𑁆𑀲 𑀢𑀸𑀤𑀺𑀲𑁄’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂.

𑀧𑀲𑀢𑁆𑀣𑀧𑁆𑀧𑀲𑀢𑁆𑀣𑁄𑀢𑀺 ¶ 𑀧𑀲𑀢𑁆𑀣𑁂𑀳𑀺 𑀧𑀸𑀲𑀁𑀲𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑁂𑀯 𑀲𑁄 𑀧𑀲𑀢𑁆𑀣𑁄, 𑀦 𑀢𑀲𑁆𑀲 𑀓𑀺𑀢𑁆𑀢𑀺𑀦𑀸, 𑀧𑀲𑀁𑀲𑀸𑀲𑀪𑀸𑀯𑁂𑀦𑁂𑀯 𑀧𑀸𑀲𑀁𑀲𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀕𑀼𑀡𑀸𑀦’’𑀦𑁆𑀢𑀺𑀆𑀤𑀺. 𑀫𑀡𑀺𑀭𑀢𑀦𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀡𑀺𑀭𑀢𑀦𑀁.

𑀲𑀤𑁂𑀯𑀓𑁂 𑀧𑀸𑀲𑀁𑀲𑀸𑀦𑀫𑁆𑀧𑀺 𑀧𑀸𑀲𑀁𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀲𑀢𑁆𑀣𑁂𑀳𑀺 𑀯𑀸’’𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀕𑀳𑀺𑀢𑁄. 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄, 𑀲𑁄 𑀏𑀯 𑀯𑀲𑀢𑀻𑀢𑀺 𑀯𑀲𑁄𑀢𑀺 𑀅𑀢𑁆𑀣𑀯𑀲𑁄. 𑀢𑀲𑁆𑀲 𑀢𑀲𑁆𑀲 𑀧𑀬𑁄𑀕𑀲𑁆𑀲 𑀆𑀦𑀺𑀲𑀁𑀲𑀪𑀽𑀢𑀁 𑀨𑀮𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀯𑀲𑀦𑁆𑀢𑀺 𑀅𑀢𑁆𑀣𑀸𑀦𑀺𑀲𑀁𑀲’’𑀦𑁆𑀢𑀺. 𑀅𑀢𑁆𑀣𑁄 𑀯𑀸 𑀨𑀮𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀓𑀸𑀭𑀡𑀁.

𑀔𑀼𑀤𑁆𑀤𑀓𑀫𑀥𑀽𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀤𑀡𑁆𑀟𑀓𑀫𑀥𑀼. 𑀅𑀦𑁂𑀴𑀓𑀦𑁆𑀢𑀺 𑀦𑀺𑀤𑁆𑀤𑁄𑀲𑀁 𑀅𑀧𑀕𑀢𑀫𑀓𑁆𑀔𑀺𑀓𑀡𑁆𑀟𑀓𑀁.

𑀉𑀤𑀸𑀳𑀭𑀻𑀬𑀢𑀺 𑀉𑀩𑁆𑀩𑁂𑀕𑀧𑀻𑀢𑀺𑀯𑀲𑁂𑀦𑀸𑀢𑀺 𑀉𑀤𑀸𑀦𑀁, 𑀢𑀣𑀸 𑀯𑀸 𑀉𑀤𑀸𑀳𑀭𑀡𑀁 𑀉𑀤𑀸𑀦𑀁. 𑀢𑁂𑀦𑀸𑀳 ‘‘𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀻’’𑀢𑀺. 𑀬𑀣𑀸 𑀧𑀦 𑀢𑀁 𑀯𑀘𑀦𑀁 𑀉𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀸𑀭𑀡𑀧𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀺𑀗𑁆𑀕𑀺𑀬𑀸𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁫. 𑀧𑀜𑁆𑀘𑀫𑁂 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑁆𑀢𑀺 𑀲𑀭𑀻𑀭𑀕𑀢𑀲𑁆𑀲 𑀘𑁂𑀯 𑀯𑀢𑁆𑀣𑀸𑀮𑀗𑁆𑀓𑀸𑀭𑀕𑀢𑀲𑁆𑀲 𑀘𑀸𑀢𑀺 𑀲𑀩𑁆𑀩𑀲𑁆𑀲 𑀦𑀻𑀮𑀪𑀸𑀯𑀲𑁆𑀲 𑀲𑀗𑁆𑀕𑀸𑀳𑀓𑀯𑀘𑀦𑀁. 𑀢𑀲𑁆𑀲𑁂𑀯𑀸𑀢𑀺 𑀦𑀻𑀮𑀸𑀤𑀺𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀅𑀢𑁆𑀣𑀲𑁆𑀲𑁂𑀯. 𑀯𑀺𑀪𑀸𑀕𑀤𑀲𑁆𑀲𑀦𑀦𑁆𑀢𑀺 𑀧𑀪𑁂𑀤𑀤𑀲𑁆𑀲𑀦𑀁. 𑀬𑀣𑀸 𑀢𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀅𑀧𑀻𑀢𑀸𑀤𑀺𑀯𑀡𑁆𑀡𑀸 𑀏𑀯 𑀓𑁂𑀘𑀺 𑀓𑁂𑀘𑀺 𑀯𑀺𑀮𑁂𑀧𑀦𑀯𑀲𑁂𑀦 ¶ 𑀧𑀻𑀢𑀸𑀤𑀺𑀯𑀡𑁆𑀡𑀸 𑀔𑀸𑀬𑀺𑀁𑀲𑀼, 𑀏𑀯𑀁 𑀅𑀦𑀻𑀮𑀸𑀤𑀺𑀯𑀡𑁆𑀡𑀸 𑀏𑀯 𑀓𑁂𑀘𑀺 𑀯𑀺𑀮𑁂𑀧𑀦𑀯𑀲𑁂𑀦 𑀦𑀻𑀮𑀸𑀤𑀺𑀯𑀡𑁆𑀡𑀸 𑀔𑀸𑀬𑀺𑀁𑀲𑀼. 𑀢𑁂 𑀓𑀺𑀭 𑀲𑀼𑀯𑀡𑁆𑀡𑀯𑀺𑀘𑀺𑀢𑁆𑀢𑁂𑀳𑀺 𑀫𑀡𑀺𑀑𑀪𑀸𑀲𑁂𑀳𑀺 𑀏𑀓𑀦𑀻𑀮𑀸 𑀯𑀺𑀬 𑀔𑀸𑀬𑀦𑁆𑀢𑀺.

𑀓𑁄𑀓𑀦𑀤𑀦𑁆𑀢𑀺 𑀯𑀸 𑀧𑀤𑀼𑀫𑀯𑀺𑀲𑁂𑀲𑀦𑀁 𑀬𑀣𑀸 ‘‘𑀓𑁄𑀓𑀸𑀲𑀓’’𑀦𑁆𑀢𑀺. 𑀢𑀁 𑀓𑀺𑀭 𑀩𑀳𑀼𑀧𑀢𑁆𑀢𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀅𑀢𑀺𑀯𑀺𑀬 𑀲𑀼𑀕𑀦𑁆𑀥𑀜𑁆𑀘 𑀳𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 ¶ 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀧𑀤𑀼𑀫𑀁 𑀧𑀸𑀢𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬 𑀨𑀼𑀮𑁆𑀮𑀁 𑀯𑀺𑀓𑀲𑀺𑀢𑀁 𑀅𑀯𑀻𑀢𑀕𑀦𑁆𑀥𑀁 𑀲𑀺𑀬𑀸 𑀯𑀺𑀭𑁄𑀘𑀫𑀸𑀦𑀁, 𑀏𑀯𑀁 𑀲𑀭𑀻𑀭𑀕𑀦𑁆𑀥𑁂𑀦 𑀕𑀼𑀡𑀕𑀦𑁆𑀥𑁂𑀦 𑀘 𑀲𑀼𑀕𑀦𑁆𑀥𑀁, 𑀲𑀭𑀤𑀓𑀸𑀮𑁂 𑀅𑀦𑁆𑀢𑀮𑀺𑀓𑁆𑀔𑁂 𑀆𑀤𑀺𑀘𑁆𑀘𑀫𑀺𑀯 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀢𑀧𑀦𑁆𑀢𑀁, 𑀅𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀦𑁆𑀢𑀚𑀼𑀢𑀺𑀢𑀸𑀬 𑀅𑀗𑁆𑀕𑀻𑀭𑀲𑀁 𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀸𑀢𑀺.

𑀧𑀺𑀗𑁆𑀕𑀺𑀬𑀸𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀳𑀸𑀲𑀼𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁬. 𑀙𑀝𑁆𑀞𑁂 𑀥𑀸𑀢𑀼𑀓𑁆𑀔𑁄𑀪𑀓𑀭𑀡𑀧𑀘𑁆𑀘𑀬𑁄 𑀦𑀸𑀫 𑀯𑀺𑀲𑀪𑀸𑀕𑀪𑁂𑀲𑀚𑁆𑀚𑀲𑁂𑀦𑀸𑀲𑀦𑀸𑀳𑀸𑀭𑀸𑀤𑀺𑀧𑀘𑁆𑀘𑀬𑁄. 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸𑀢𑀺 𑀧𑀲𑀦𑁆𑀦𑀸 𑀅𑀢𑁆𑀣𑀓𑀸𑀫𑀢𑀸𑀬, 𑀓𑀼𑀤𑁆𑀥𑀸 𑀅𑀦𑀢𑁆𑀣𑀓𑀸𑀫𑀢𑀸𑀬. 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸𑀢𑀺 𑀲𑀪𑀸𑀯𑀢𑁄 𑀪𑀯𑀺𑀢𑀩𑁆𑀩𑀸𑀬 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸. 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀤𑁂𑀯𑀸𑀦𑀼𑀪𑀸𑀯𑁂𑀦 𑀉𑀧𑀦𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀤𑀸 𑀓𑀺𑀭 𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀕𑀢𑀲𑀼𑀭𑀸𑀧𑀸𑀦𑀁 𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀺𑀪𑀽𑀢𑀺𑀲𑀫𑁆𑀧𑀦𑁆𑀦𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀕𑀦𑁆𑀥𑁄𑀤𑀓𑁂𑀦 𑀦𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀫𑀸𑀦𑀸 𑀇𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲 𑁋 𑀘𑀢𑁆𑀢𑀸𑀭𑁄 𑀓𑀺𑀭 𑀦𑀁 𑀫𑀳𑀸𑀭𑀸𑀚𑀸𑀦𑁄 𑀲𑀬𑀦𑁂𑀦𑁂𑀯 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑁂𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀭𑀚𑀢𑀧𑀩𑁆𑀩𑀢𑁄, 𑀢𑀲𑁆𑀲 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀸𑀘𑀻𑀦𑀢𑁄 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑁂𑀢𑀯𑀭𑀯𑀸𑀭𑀡𑁄 𑀳𑀼𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀢𑀢𑁆𑀣 𑀘𑀭𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀩𑁆𑀩𑀢𑀁 𑀆𑀭𑀼𑀳𑀺𑀢𑁆𑀯𑀸 𑀓𑀦𑀓𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀨𑀸𑀮𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀅𑀳𑁄𑀲𑀺. 𑀇𑀫𑀁 𑀲𑀼𑀧𑀺𑀦𑀁 𑀲𑀦𑁆𑀥𑀸𑀬 𑀏𑀢𑀁 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀓𑁄𑀲𑀮𑀭𑀸𑀚𑀸 ¶ ¶ 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂𑀢𑀺 𑁋

‘‘𑀉𑀲𑀪𑀸 𑀭𑀼𑀓𑁆𑀔𑀸 𑀕𑀸𑀯𑀺𑀬𑁄 𑀕𑀯𑀸 𑀘,

𑀅𑀲𑁆𑀲𑁄 𑀓𑀁𑀲𑁄 𑀲𑀺𑀗𑁆𑀕𑀸𑀮𑀻 𑀘 𑀓𑀼𑀫𑁆𑀪𑁄;

𑀧𑁄𑀓𑁆𑀔𑀭𑀡𑀻 𑀘 𑀅𑀧𑀸𑀓𑀘𑀦𑁆𑀤𑀦𑀁,

𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺 𑀲𑀺𑀮𑀸𑀧𑁆𑀮𑀯𑀦𑁆𑀢𑀺.

‘‘𑀫𑀡𑁆𑀟𑀽𑀓𑀺𑀬𑁄 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑁆𑀢𑀺,

𑀓𑀸𑀓𑀁 𑀲𑀼𑀯𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀺;

𑀢𑀲𑀸 𑀯𑀓𑀸 𑀏𑀴𑀓𑀸𑀦𑀁 𑀪𑀬𑀸 𑀳𑀻’’𑀢𑀺. (𑀚𑀸. 𑁧.𑁧.𑁭𑁭) 𑁋

𑀇𑀫𑁂 𑀲𑁄𑀴𑀲 𑀲𑀼𑀧𑀺𑀦𑁂 𑀧𑀲𑁆𑀲𑀦𑁆𑀢𑁄 𑀓𑁄𑀲𑀮𑀭𑀸𑀚𑀸 𑀯𑀺𑀬.

𑁧. 𑀏𑀓𑀤𑀺𑀯𑀲𑀁 𑀓𑀺𑀭 𑀓𑁄𑀲𑀮𑀫𑀳𑀸𑀭𑀸𑀚𑀸 𑀭𑀢𑁆𑀢𑀺𑀁 𑀦𑀺𑀤𑁆𑀤𑀽𑀧𑀕𑀢𑁄 𑀧𑀘𑁆𑀙𑀺𑀫𑀬𑀸𑀫𑁂 𑀲𑁄𑀴𑀲 𑀫𑀳𑀸𑀲𑀼𑀧𑀺𑀦𑁂 𑀧𑀲𑁆𑀲𑀺 (𑀚𑀸. 𑀅𑀝𑁆𑀞. 𑁧.𑁧.𑁭𑁬 𑀫𑀳𑀸𑀲𑀼𑀧𑀺𑀦𑀚𑀸𑀢𑀓𑀯𑀡𑁆𑀡𑀦𑀸). 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀅𑀜𑁆𑀚𑀦𑀯𑀡𑁆𑀡𑀸 𑀓𑀸𑀴𑀉𑀲𑀪𑀸 ‘‘𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀭𑀸𑀚𑀗𑁆𑀕𑀡𑀁 𑀆𑀕𑀦𑁆𑀢𑁆𑀯𑀸 ‘‘𑀉𑀲𑀪𑀬𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀢𑀺𑀢𑁂 𑀬𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀦𑀤𑀺𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀅𑀬𑀼𑀚𑁆𑀛𑀺𑀢𑁆𑀯𑀸𑀯 𑀧𑀝𑀺𑀓𑁆𑀓𑀦𑁆𑀢𑀸. 𑀇𑀫𑀁 𑀧𑀞𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲.

𑁨. 𑀔𑀼𑀤𑁆𑀤𑀓𑀸 𑀭𑀼𑀓𑁆𑀔𑀸 𑀘𑁂𑀯 𑀕𑀘𑁆𑀙𑀸 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀫𑁆𑀧𑀺 𑀭𑀢𑀦𑀫𑀢𑁆𑀢𑀫𑁆𑀧𑀺 𑀅𑀦𑀼𑀕𑁆𑀕𑀦𑁆𑀢𑁆𑀯𑀸𑀯 𑀧𑀼𑀧𑁆𑀨𑀦𑁆𑀢𑀺 𑀘𑁂𑀯 𑀨𑀮𑀦𑁆𑀢𑀺 𑀘. 𑀇𑀫𑀁 𑀤𑀼𑀢𑀺𑀬𑀁 𑀅𑀤𑁆𑀤𑀲.

𑁩. 𑀕𑀸𑀯𑀺𑀬𑁄 𑀢𑀤𑀳𑀼𑀚𑀸𑀢𑀸𑀦𑀁 𑀯𑀘𑁆𑀙𑀸𑀦𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺𑀬𑁄 𑀅𑀤𑁆𑀤𑀲. 𑀅𑀬𑀁 𑀢𑀢𑀺𑀬𑁄 𑀲𑀼𑀧𑀺𑀦𑁄.

𑁪. 𑀥𑀼𑀭𑀯𑀸𑀳𑁂 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑁂 𑀫𑀳𑀸𑀕𑁄𑀡𑁂 𑀬𑀼𑀕𑀧𑀭𑀫𑁆𑀧𑀭𑀸𑀬 𑀅𑀬𑁄𑀚𑁂𑀢𑁆𑀯𑀸 𑀢𑀭𑀼𑀡𑁂 𑀕𑁄𑀤𑀫𑁆𑀫𑁂 𑀥𑀼𑀭𑁂 𑀬𑁄𑀚𑁂𑀦𑁆𑀢𑁂 𑀅𑀤𑁆𑀤𑀲. 𑀢𑁂 𑀥𑀼𑀭𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀙𑀟𑁆𑀟𑁂𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀲𑀓𑀝𑀸𑀦𑀺 𑀦𑀧𑁆𑀧𑀯𑀢𑁆𑀢𑀺𑀁𑀲𑀼. 𑀅𑀬𑀁 𑀘𑀢𑀼𑀢𑁆𑀣𑁄 𑀲𑀼𑀧𑀺𑀦𑁄.

𑁫. 𑀏𑀓𑀁 𑀉𑀪𑀢𑁄𑀫𑀼𑀔𑀁 𑀅𑀲𑁆𑀲𑀁 𑀅𑀤𑁆𑀤𑀲. 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀬𑀯𑀲𑀁 𑀤𑁂𑀦𑁆𑀢𑀺, 𑀲𑁄 𑀤𑁆𑀯𑀻𑀳𑀺𑀧𑀺 𑀫𑀼𑀔𑁂𑀳𑀺 𑀔𑀸𑀤𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀲𑀼𑀧𑀺𑀦𑁄.

𑁬. 𑀫𑀳𑀸𑀚𑀦𑁄 ¶ ¶ 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 ‘‘𑀇𑀥 𑀧𑀲𑁆𑀲𑀸𑀯𑀁 𑀓𑀭𑁄𑀳𑀻’’𑀢𑀺 𑀏𑀓𑀲𑁆𑀲 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀉𑀧𑀦𑀸𑀫𑁂𑀲𑀺. 𑀢𑀁 𑀢𑀢𑁆𑀣 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀁 𑀅𑀤𑁆𑀤𑀲. 𑀅𑀬𑀁 𑀙𑀝𑁆𑀞𑁄 𑀲𑀼𑀧𑀺𑀦𑁄.

𑁭. 𑀏𑀓𑁄 𑀧𑀼𑀭𑀺𑀲𑁄 𑀭𑀚𑁆𑀚𑀼𑀁 𑀯𑀝𑁆𑀝𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀧𑀢𑀺. 𑀢𑁂𑀦 𑀦𑀺𑀲𑀺𑀦𑁆𑀦𑀧𑀻𑀞𑀲𑁆𑀲 𑀳𑁂𑀝𑁆𑀞𑀸 𑀲𑀬𑀺𑀢𑀸 𑀙𑀸𑀢𑀲𑀺𑀗𑁆𑀕𑀸𑀮𑀻 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀢𑀁 𑀔𑀸𑀤𑀢𑀺. 𑀇𑀫𑀁 𑀲𑀢𑁆𑀢𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲.

𑁮. 𑀭𑀸𑀚𑀤𑁆𑀯𑀸𑀭𑁂 𑀩𑀳𑀽𑀳𑀺 𑀢𑀼𑀘𑁆𑀙𑀓𑀼𑀫𑁆𑀪𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀧𑀺𑀢𑀁 𑀏𑀓𑀁 𑀫𑀳𑀦𑁆𑀢𑀁 𑀧𑀽𑀭𑀺𑀢𑀓𑀼𑀫𑁆𑀪𑀁 𑀅𑀤𑁆𑀤𑀲. 𑀘𑀢𑁆𑀢𑀸𑀭𑁄𑀧𑀺 𑀧𑀦 𑀯𑀡𑁆𑀡𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀘𑀢𑀽𑀳𑀺 𑀅𑀦𑀼𑀤𑀺𑀲𑀸𑀳𑀺 𑀘 𑀖𑀝𑁂𑀳𑀺 𑀉𑀤𑀓𑀁 𑀆𑀦𑁂𑀢𑁆𑀯𑀸 𑀧𑀽𑀭𑀺𑀢𑀓𑀼𑀫𑁆𑀪𑀫𑁂𑀯 𑀧𑀽𑀭𑁂𑀦𑁆𑀢𑀺, 𑀧𑀽𑀭𑀺𑀢𑀁 𑀧𑀽𑀭𑀺𑀢𑀁 𑀉𑀤𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀮𑀸𑀬𑀢𑀺. 𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀢𑁆𑀣𑁂𑀯 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀺, 𑀢𑀼𑀘𑁆𑀙𑀓𑀼𑀫𑁆𑀪𑁂 𑀑𑀮𑁄𑀓𑁂𑀦𑁆𑀢𑀸𑀧𑀺 𑀦𑀢𑁆𑀣𑀺. 𑀅𑀬𑀁 𑀅𑀝𑁆𑀞𑀫𑁄 𑀲𑀼𑀧𑀺𑀦𑁄.

𑁯. 𑀏𑀓𑀁 𑀧𑀜𑁆𑀘𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀕𑀫𑁆𑀪𑀻𑀭𑀁 𑀲𑀩𑁆𑀩𑀢𑁄𑀢𑀺𑀢𑁆𑀣𑀁 𑀧𑁄𑀓𑁆𑀔𑀭𑀡𑀺𑀁 𑀅𑀤𑁆𑀤𑀲. 𑀲𑀫𑀦𑁆𑀢𑀢𑁄 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸 𑀑𑀢𑀭𑀺𑀢𑁆𑀯𑀸 𑀢𑀢𑁆𑀣 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺. 𑀢𑀲𑁆𑀲 𑀫𑀚𑁆𑀛𑁂 𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀉𑀤𑀓𑀁 𑀆𑀯𑀺𑀮𑀁, 𑀢𑀻𑀭𑀧𑁆𑀧𑀤𑁂𑀲𑁂 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀅𑀓𑁆𑀓𑀫𑀦𑀝𑁆𑀞𑀸𑀦𑁂 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁. 𑀅𑀬𑀁 𑀦𑀯𑀫𑁄 𑀲𑀼𑀧𑀺𑀦𑁄.

𑁧𑁦. 𑀏𑀓𑀺𑀲𑁆𑀲𑀸𑀬𑁂𑀯 𑀓𑀼𑀫𑁆𑀪𑀺𑀬𑀸 𑀧𑀘𑁆𑀘𑀫𑀸𑀦𑀁 𑀑𑀤𑀦𑀁 𑀅𑀧𑀸𑀓𑀁 𑀅𑀤𑁆𑀤𑀲. ‘‘𑀅𑀧𑀸𑀓’’𑀦𑁆𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀢𑀻𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀫𑀸𑀦𑀁 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀅𑀢𑀺𑀓𑀺𑀮𑀺𑀦𑁆𑀦𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀉𑀢𑁆𑀢𑀡𑁆𑀟𑀼𑀮𑁄, 𑀏𑀓𑀲𑁆𑀫𑀺𑀁 𑀲𑀼𑀧𑀓𑁆𑀓𑁄𑀢𑀺. 𑀅𑀬𑀁 𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁧. 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀘𑀦𑁆𑀤𑀦𑀲𑀸𑀭𑀁 𑀧𑀽𑀢𑀺𑀢𑀓𑁆𑀓𑁂𑀦 𑀯𑀺𑀓𑁆𑀓𑀺𑀡𑀦𑁆𑀢𑁂 𑀅𑀤𑁆𑀤𑀲. 𑀅𑀬𑀁 𑀏𑀓𑀸𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁨. 𑀢𑀼𑀘𑁆𑀙𑀮𑀸𑀩𑀽𑀦𑀺 𑀉𑀤𑀓𑁂 𑀲𑀻𑀤𑀦𑁆𑀢𑀸𑀦𑀺 𑀅𑀤𑁆𑀤𑀲. 𑀅𑀬𑀁 𑀤𑁆𑀯𑀸𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁩. 𑀫𑀳𑀦𑁆𑀢𑀫𑀳𑀦𑁆𑀢𑀸 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀸 𑀖𑀦𑀲𑀺𑀮𑀸 𑀦𑀸𑀯𑀸 𑀯𑀺𑀬 𑀉𑀤𑀓𑁂 𑀧𑁆𑀮𑀯𑀫𑀸𑀦𑀸 𑀅𑀤𑁆𑀤𑀲. 𑀅𑀬𑀁 𑀢𑁂𑀭𑀲𑀫𑁄 𑀲𑀼𑀧𑀺𑀦𑁄.

𑁧𑁪. 𑀔𑀼𑀤𑁆𑀤𑀓𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸 𑀫𑀡𑁆𑀟𑀽𑀓𑀺𑀬𑁄 𑀫𑀳𑀦𑁆𑀢𑁂 𑀓𑀡𑁆𑀳𑀲𑀧𑁆𑀧𑁂 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀮𑀦𑀸𑀴𑁂 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀕𑀺𑀮𑀦𑁆𑀢𑀺𑀬𑁄 𑀅𑀤𑁆𑀤𑀲. 𑀅𑀬𑀁 𑀘𑀼𑀤𑁆𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁫. 𑀤𑀲𑀳𑀺 ¶ ¶ 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀕𑀸𑀫𑀕𑁄𑀘𑀭𑀁 𑀓𑀸𑀓𑀁 𑀓𑀜𑁆𑀘𑀦𑀯𑀡𑁆𑀡𑀯𑀡𑁆𑀡𑀢𑀸𑀬 ‘‘𑀲𑀼𑀯𑀡𑁆𑀡𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁂 𑀧𑀭𑀺𑀯𑀸𑀭𑁂𑀦𑁆𑀢𑁂 𑀅𑀤𑁆𑀤𑀲. 𑀅𑀬𑀁 𑀧𑀦𑁆𑀦𑀭𑀲𑀫𑁄 𑀲𑀼𑀧𑀺𑀦𑁄.

𑁧𑁬. 𑀧𑀼𑀩𑁆𑀩𑁂 𑀤𑀻𑀧𑀺𑀦𑁄 𑀏𑀴𑀓𑁂 𑀔𑀸𑀤𑀦𑁆𑀢𑀺. 𑀢𑁂 𑀧𑀦 𑀏𑀴𑀓𑁂 𑀤𑀻𑀧𑀺𑀦𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀫𑀼𑀭𑀫𑀼𑀭𑀸𑀢𑀺 𑀔𑀸𑀤𑀦𑁆𑀢𑁂 𑀅𑀤𑁆𑀤𑀲. 𑀅𑀣𑀜𑁆𑀜𑁂 𑀢𑀲𑀸 𑀯𑀓𑀸 𑀏𑀴𑀓𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀢𑀲𑀺𑀢𑀸 𑀢𑀸𑀲𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀏𑀴𑀓𑀸𑀦𑀁 𑀪𑀬𑀸 𑀧𑀮𑀸𑀬𑀺𑀢𑁆𑀯𑀸 𑀕𑀼𑀫𑁆𑀩𑀕𑀳𑀦𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀬𑀺𑀁𑀲𑀼. 𑀅𑀬𑀁 𑀲𑁄𑀴𑀲𑀫𑁄 𑀲𑀼𑀧𑀺𑀦𑁄.

𑁧. 𑀢𑀢𑁆𑀣 𑀅𑀥𑀫𑁆𑀫𑀺𑀓𑀸𑀦𑀁 𑀭𑀸𑀚𑀽𑀦𑀁, 𑀅𑀥𑀫𑁆𑀫𑀺𑀓𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀁 𑀓𑀸𑀮𑁂 𑀮𑁄𑀓𑁂 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑁂 𑀓𑀼𑀲𑀮𑁂 𑀑𑀲𑀦𑁆𑀦𑁂 𑀅𑀓𑀼𑀲𑀮𑁂 𑀉𑀲𑁆𑀲𑀦𑁆𑀦𑁂 𑀮𑁄𑀓𑀲𑁆𑀲 𑀧𑀭𑀺𑀳𑀸𑀦𑀓𑀸𑀮𑁂 𑀤𑁂𑀯𑁄 𑀦 𑀲𑀫𑁆𑀫𑀸 𑀯𑀲𑀺𑀲𑁆𑀲𑀢𑀺, 𑀫𑁂𑀖𑀧𑀸𑀤𑀸 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀺𑀲𑁆𑀲𑀦𑁆𑀢𑀺, 𑀤𑀼𑀩𑁆𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀯𑀲𑁆𑀲𑀺𑀢𑀼𑀓𑀸𑀫𑀸 𑀯𑀺𑀬 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀫𑁂𑀖𑀸 𑀉𑀝𑁆𑀞𑀳𑀺𑀢𑁆𑀯𑀸 𑀇𑀢𑁆𑀣𑀺𑀓𑀸𑀳𑀺 𑀆𑀢𑀧𑁂 𑀧𑀢𑁆𑀣𑀝𑀸𑀦𑀁 𑀯𑀻𑀳𑀺𑀆𑀤𑀻𑀦𑀁 𑀢𑁂𑀫𑀦𑀪𑀬𑁂𑀦 𑀅𑀦𑁆𑀢𑁄𑀧𑀯𑁂𑀲𑀺𑀢𑀓𑀸𑀮𑁂 𑀧𑀼𑀭𑀺𑀲𑁂𑀲𑀼 𑀓𑀼𑀤𑀸𑀮𑀧𑀺𑀝𑀓𑁂 𑀆𑀤𑀸𑀬 𑀆𑀴𑀺𑀩𑀦𑁆𑀥𑀦𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁂𑀲𑀼 𑀯𑀲𑁆𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀉𑀲𑀪𑀸 𑀯𑀺𑀬 𑀅𑀬𑀼𑀚𑁆𑀛𑀺𑀢𑁆𑀯𑀸 𑀅𑀯𑀲𑁆𑀲𑀺𑀢𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀧𑀞𑀫𑀲𑁆𑀲 𑀯𑀺𑀧𑀸𑀓𑁄.

𑁨. 𑀮𑁄𑀓𑀲𑁆𑀲 𑀧𑀭𑀺𑀳𑀻𑀦𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀸𑀬𑀼𑀓𑀓𑀸𑀮𑁂 𑀲𑀢𑁆𑀢𑀸 𑀢𑀺𑀩𑁆𑀩𑀭𑀸𑀕𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀲𑀫𑁆𑀧𑀢𑁆𑀢𑀯𑀬𑀸𑀯 𑀓𑀼𑀫𑀸𑀭𑀺𑀬𑁄 𑀧𑀼𑀭𑀺𑀲𑀦𑁆𑀢𑀭𑀁 𑀕𑀦𑁆𑀢𑁆𑀯𑀸 𑀉𑀢𑀼𑀦𑀺𑀬𑁄 𑀘𑁂𑀯 𑀕𑀩𑁆𑀪𑀺𑀦𑀺𑀬𑁄 𑀘 𑀳𑀼𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀔𑀼𑀤𑁆𑀤𑀓𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀁 𑀯𑀺𑀬 𑀳𑀺 𑀢𑀸𑀲𑀁 𑀉𑀢𑀼𑀦𑀺𑀪𑀸𑀯𑁄, 𑀨𑀮𑀁 𑀯𑀺𑀬 𑀘 𑀧𑀼𑀢𑁆𑀢𑀥𑀻𑀢𑀭𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀤𑀼𑀢𑀺𑀬𑀲𑁆𑀲 𑀯𑀺𑀧𑀸𑀓𑁄.

𑁩. 𑀫𑀦𑀼𑀲𑁆𑀲𑀸𑀦𑀁 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀲𑁆𑀲 𑀦𑀝𑁆𑀞𑀓𑀸𑀮𑁂 𑀲𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀲𑀼 𑀯𑀸 𑀲𑀲𑁆𑀲𑀼𑀲𑀲𑀼𑀭𑁂𑀲𑀼 𑀯𑀸 𑀮𑀚𑁆𑀚𑀁 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀓𑀼𑀝𑀼𑀫𑁆𑀩𑀁 𑀲𑀁𑀯𑀺𑀤𑀳𑀦𑁆𑀢𑀸𑀯 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀫𑀳𑀮𑁆𑀮𑀓𑀸𑀦𑀁 𑀤𑀸𑀢𑀼𑀓𑀸𑀫𑀸 𑀤𑀲𑁆𑀲𑀦𑁆𑀢𑀺, 𑀅𑀤𑀸𑀢𑀼𑀓𑀸𑀫𑀸 𑀦 𑀤𑀲𑁆𑀲𑀦𑁆𑀢𑀺. 𑀫𑀳𑀮𑁆𑀮𑀓𑀸 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀅𑀲𑀬𑀁𑀯𑀲𑀻 𑀤𑀸𑀭𑀓𑁂 𑀆𑀭𑀸𑀥𑁂𑀢𑁆𑀯𑀸 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀤𑀳𑀼𑀚𑀸𑀢𑀸𑀦𑀁 𑀯𑀘𑁆𑀙𑀓𑀸𑀦𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺𑀬𑁄 𑀫𑀳𑀸𑀕𑀸𑀯𑀺𑀬𑁄 𑀯𑀺𑀬. 𑀅𑀬𑀁 𑀢𑀢𑀺𑀬𑀲𑁆𑀲 𑀯𑀺𑀧𑀸𑀓𑁄.

𑁪. 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 ¶ 𑀓𑀸𑀮𑁂 𑀅𑀥𑀫𑁆𑀫𑀺𑀓𑀭𑀸𑀚𑀸𑀦𑁄 𑀧𑀡𑁆𑀟𑀺𑀢𑀸𑀦𑀁 𑀧𑀯𑁂𑀡𑀺𑀓𑀼𑀲𑀮𑀸𑀦𑀁 𑀓𑀫𑁆𑀫𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑀸𑀦𑀁 𑀫𑀳𑀸𑀫𑀢𑁆𑀢𑀸𑀦𑀁 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀥𑀫𑁆𑀫𑀲𑀪𑀸𑀬𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀧𑀺 𑀧𑀡𑁆𑀟𑀺𑀢𑁂 𑀯𑁄𑀳𑀸𑀭𑀓𑀼𑀲𑀮𑁂 𑀫𑀳𑀮𑁆𑀮𑀓𑁂 𑀅𑀫𑀘𑁆𑀘𑁂 𑀦 𑀞𑀧𑁂𑀲𑁆𑀲𑀦𑁆𑀢𑀺, 𑀢𑀩𑁆𑀩𑀺𑀧𑀭𑀻𑀢𑀸𑀦𑀁 𑀧𑀦 𑀢𑀭𑀼𑀡𑀢𑀭𑀼𑀡𑀸𑀦𑀁 𑀬𑀲𑀁 𑀤𑀲𑁆𑀲𑀦𑁆𑀢𑀺, 𑀢𑀣𑀸𑀭𑀽𑀧𑁂 𑀏𑀯 𑀘 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀦𑁆𑀢𑀺. 𑀢𑁂 𑀭𑀸𑀚𑀓𑀫𑁆𑀫𑀸𑀦𑀺 𑀘𑁂𑀯 𑀬𑀼𑀢𑁆𑀢𑀸𑀬𑀼𑀢𑁆𑀢𑀜𑁆𑀘 𑀅𑀚𑀸𑀦𑀦𑁆𑀢𑀸 ¶ 𑀦𑁂𑀯 𑀢𑀁 𑀬𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀦 𑀭𑀸𑀚𑀓𑀫𑁆𑀫𑀸𑀦𑀺 𑀦𑀺𑀢𑁆𑀣𑀭𑀺𑀢𑀼𑀁. 𑀢𑁂 𑀅𑀲𑀓𑁆𑀓𑁄𑀦𑁆𑀢𑀸 𑀓𑀫𑁆𑀫𑀥𑀼𑀭𑀁 𑀙𑀟𑁆𑀟𑁂𑀲𑁆𑀲𑀦𑁆𑀢𑀺, 𑀫𑀳𑀮𑁆𑀮𑀓𑀸𑀧𑀺 𑀧𑀡𑁆𑀟𑀺𑀢𑀸𑀫𑀘𑁆𑀘𑀸 𑀬𑀲𑀁 𑀅𑀮𑀪𑀦𑁆𑀢𑀸 𑀓𑀺𑀘𑁆𑀘𑀸𑀦𑀺 𑀦𑀺𑀢𑁆𑀣𑀭𑀺𑀢𑀼𑀁 𑀲𑀫𑀢𑁆𑀣𑀸𑀧𑀺 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀏𑀢𑁂𑀳𑀺, 𑀫𑀬𑀁 𑀩𑀸𑀳𑀺𑀭𑀓𑀸 𑀚𑀸𑀢𑀸, 𑀅𑀩𑁆𑀪𑀦𑁆𑀢𑀭𑀺𑀓𑀸 𑀢𑀭𑀼𑀡𑀤𑀸𑀭𑀓𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀢𑁂𑀲𑀁 𑀭𑀸𑀚𑀽𑀦𑀁 𑀳𑀸𑀦𑀺𑀬𑁂𑀯 𑀪𑀯𑀺𑀲𑁆𑀲𑀢𑀺, 𑀥𑀼𑀭𑀁 𑀯𑀳𑀺𑀢𑀼𑀁 𑀅𑀲𑀫𑀢𑁆𑀣𑀸𑀦𑀁 𑀯𑀘𑁆𑀙𑀤𑀫𑁆𑀫𑀸𑀦𑀁 𑀥𑀼𑀭𑁂 𑀬𑁄𑀚𑀺𑀢𑀓𑀸𑀮𑁄 𑀯𑀺𑀬 𑀤𑀽𑀭𑀯𑀸𑀳𑀸𑀦𑀜𑁆𑀘 𑀫𑀳𑀸𑀕𑁄𑀡𑀸𑀦𑀁 𑀬𑀼𑀕𑀧𑀭𑀫𑁆𑀧𑀭𑀸𑀬 𑀅𑀬𑁄𑀚𑀺𑀢𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀘𑀢𑀼𑀢𑁆𑀣𑀲𑁆𑀲 𑀯𑀺𑀧𑀸𑀓𑁄.

𑁫. 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂𑀬𑁂𑀯 𑀅𑀥𑀫𑁆𑀫𑀺𑀓𑀩𑀸𑀮𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑁂 𑀮𑁄𑀮𑀫𑀦𑀼𑀲𑁆𑀲𑁂 𑀯𑀺𑀦𑀺𑀘𑁆𑀙𑀬𑁂 𑀞𑀧𑁂𑀲𑁆𑀲𑀦𑁆𑀢𑀺, 𑀢𑁂 𑀧𑀸𑀧𑀧𑀼𑀜𑁆𑀜𑁂𑀲𑀼 𑀅𑀦𑀸𑀤𑀭𑀸 𑀩𑀸𑀮𑀸 𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀤𑁂𑀦𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀳𑀢𑁆𑀣𑀢𑁄 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀦𑁆𑀢𑀺 𑀅𑀲𑁆𑀲𑁄 𑀯𑀺𑀬 𑀤𑁆𑀯𑀻𑀳𑀺 𑀫𑀼𑀔𑁂𑀳𑀺 𑀬𑀯𑀲𑀁. 𑀅𑀬𑀁 𑀧𑀜𑁆𑀘𑀫𑀲𑁆𑀲 𑀯𑀺𑀧𑀸𑀓𑁄.

𑁬. 𑀅𑀥𑀫𑁆𑀫𑀺𑀓𑀸𑀬𑁂𑀯 𑀯𑀺𑀚𑀸𑀢𑀺𑀭𑀸𑀚𑀸𑀦𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀆𑀲𑀗𑁆𑀓𑀸𑀬 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀅𑀓𑀼𑀮𑀻𑀦𑀸𑀦𑀁𑀬𑁂𑀯 𑀤𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀳𑀸𑀓𑀼𑀮𑀸𑀦𑀺 𑀤𑀼𑀕𑁆𑀕𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀮𑀸𑀫𑀓𑀓𑀼𑀮𑀸𑀦𑀺 𑀇𑀲𑁆𑀲𑀭𑀸𑀦𑀺. 𑀢𑁂 𑀘 𑀓𑀼𑀮𑀻𑀦𑀧𑀼𑀭𑀺𑀲𑀸 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀇𑀫𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀓𑀼𑀮𑀻𑀦𑀸𑀦𑀁 𑀥𑀻𑀢𑀭𑁄 𑀤𑀲𑁆𑀲𑀦𑁆𑀢𑀺, 𑀇𑀢𑀺 𑀢𑀸𑀲𑀁 𑀓𑀼𑀮𑀥𑀻𑀢𑀸𑀦𑀁 𑀅𑀓𑀼𑀮𑀻𑀦𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀧𑀲𑁆𑀲𑀸𑀯𑀓𑀭𑀡𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀙𑀝𑁆𑀞𑀲𑁆𑀲 𑀯𑀺𑀧𑀸𑀓𑁄.

𑁭. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀮𑁄𑀮𑀸 𑀲𑀼𑀭𑀸𑀮𑁄𑀮𑀸 𑀅𑀮𑀗𑁆𑀓𑀸𑀭𑀮𑁄𑀮𑀸 𑀯𑀺𑀲𑀺𑀔𑀸𑀮𑁄𑀮𑀸 𑀆𑀫𑀺𑀲𑀮𑁄𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀤𑀼𑀭𑀸𑀘𑀸𑀭𑀸. 𑀢𑀸 𑀲𑀸𑀫𑀺𑀓𑁂𑀳𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 ¶ 𑀓𑀲𑀺𑀭𑁂𑀦 𑀲𑀫𑁆𑀪𑀢𑀁 𑀥𑀦𑀁 𑀚𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀼𑀭𑀁 𑀧𑀺𑀯𑀦𑁆𑀢𑀺𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀫𑀸𑀦𑀸 𑀅𑀦𑁆𑀢𑁄𑀕𑁂𑀳𑁂 𑀅𑀘𑁆𑀘𑀸𑀬𑀺𑀓𑀫𑁆𑀧𑀺 𑀓𑀺𑀘𑁆𑀘𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀕𑁂𑀳𑀧𑀭𑀺𑀓𑁆𑀔𑁂𑀧𑀲𑁆𑀲 𑀉𑀧𑀭𑀺𑀪𑀸𑀕𑁂𑀦𑀧𑀺 𑀙𑀺𑀤𑁆𑀤𑀝𑁆𑀞𑀸𑀦𑁂𑀳𑀺𑀧𑀺 𑀚𑀸𑀭𑁂 𑀉𑀧𑀥𑀸𑀭𑀬𑀫𑀸𑀦𑀸 𑀲𑁆𑀯𑁂 𑀯𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀩𑀻𑀚𑀫𑁆𑀧𑀺 𑀓𑁄𑀝𑁆𑀝𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀸𑀦𑀺 𑀧𑀘𑀺𑀢𑁆𑀯𑀸 𑀔𑀸𑀤𑀫𑀸𑀦𑀸 𑀯𑀺𑀮𑀼𑀫𑁆𑀧𑀺𑀲𑁆𑀲𑀦𑁆𑀢𑀺 𑀳𑁂𑀝𑁆𑀞𑀸𑀧𑀻𑀞𑀓𑁂 𑀦𑀺𑀧𑀦𑁆𑀦𑀙𑀸𑀢𑀲𑀺𑀗𑁆𑀕𑀸𑀮𑀻 𑀯𑀺𑀬 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀢𑁆𑀢𑀭𑀚𑁆𑀚𑀼𑀁. 𑀅𑀬𑀁 𑀲𑀢𑁆𑀢𑀫𑀲𑁆𑀲 𑀯𑀺𑀧𑀸𑀓𑁄.

𑁮. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀮𑁄𑀓𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀭𑀝𑁆𑀞𑀁 𑀦𑀺𑀭𑁄𑀚𑀁 𑀪𑀯𑀺𑀲𑁆𑀲𑀢𑀺, 𑀭𑀸𑀚𑀸𑀦𑁄 𑀤𑀼𑀕𑁆𑀕𑀢𑀸 𑀓𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁄 𑀇𑀲𑁆𑀲𑀭𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁂 𑀏𑀯𑀁𑀤𑀼𑀕𑁆𑀕𑀢𑀸 𑀲𑀩𑁆𑀩𑁂 𑀚𑀸𑀦𑀧𑀤𑁂 𑀅𑀢𑁆𑀢𑀦𑁄𑀯 𑀓𑀫𑁆𑀫𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀉𑀧𑀤𑁆𑀤𑀼𑀢𑀸 𑀫𑀦𑀼𑀲𑁆𑀲𑀸 𑀲𑀓𑁂 𑀓𑀫𑁆𑀫𑀦𑁆𑀢𑁂 𑀙𑀟𑁆𑀟𑁂𑀢𑁆𑀯𑀸 𑀭𑀸𑀚𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀦𑀺 𑀯𑀧𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀮𑀸𑀬𑀦𑁆𑀢𑀸 𑀫𑀤𑁆𑀤𑀦𑁆𑀢𑀸 ¶ 𑀧𑀯𑁂𑀲𑁂𑀦𑁆𑀢𑀸 𑀉𑀘𑁆𑀙𑀼𑀓𑁆𑀔𑁂𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑀸 𑀬𑀦𑁆𑀢𑀸𑀦𑀺 𑀯𑀸𑀳𑁂𑀦𑁆𑀢𑀸 𑀨𑀸𑀡𑀺𑀢𑀸𑀤𑀻𑀦𑀺 𑀧𑀘𑀦𑁆𑀢𑀸 𑀧𑀼𑀧𑁆𑀨𑀸𑀭𑀸𑀫𑁂 𑀨𑀮𑀸𑀭𑀸𑀫𑁂 𑀘 𑀓𑀭𑁄𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀧𑁆𑀨𑀦𑁆𑀦𑀸𑀦𑀺 𑀧𑀼𑀩𑁆𑀩𑀡𑁆𑀡𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀓𑁄𑀝𑁆𑀞𑀸𑀕𑀸𑀭𑀫𑁂𑀯 𑀧𑀽𑀭𑁂𑀲𑁆𑀲𑀦𑁆𑀢𑀺. 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀢𑀼𑀘𑁆𑀙𑀓𑁄𑀝𑁆𑀞𑁂 𑀑𑀮𑁄𑀓𑁂𑀦𑁆𑀢𑀸𑀧𑀺 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀘𑁆𑀙𑀓𑀼𑀫𑁆𑀪𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀽𑀭𑀺𑀢𑀓𑀼𑀫𑁆𑀪𑀧𑀽𑀭𑀡𑀲𑀤𑀺𑀲𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀅𑀝𑁆𑀞𑀫𑀲𑁆𑀲 𑀯𑀺𑀧𑀸𑀓𑁄.

𑁯. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀸 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀦 𑀤𑀲𑁆𑀲𑀦𑁆𑀢𑀺 𑀮𑀜𑁆𑀚𑀯𑀺𑀢𑁆𑀢𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀥𑀦𑀮𑁄𑀮𑀸, 𑀭𑀝𑁆𑀞𑀯𑀸𑀲𑀺𑀓𑁂𑀲𑀼 𑀢𑁂𑀲𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸 𑀦𑀸𑀫 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀓𑁆𑀔𑀴𑀸 𑀨𑀭𑀼𑀲𑀸 𑀉𑀘𑁆𑀙𑀼𑀬𑀦𑁆𑀢𑁂 𑀉𑀘𑁆𑀙𑀼𑀪𑀡𑁆𑀟𑀺𑀓𑀸 𑀯𑀺𑀬 𑀫𑀦𑀼𑀲𑁆𑀲𑁂 𑀧𑀻𑀴𑁂𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀁 𑀩𑀮𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀥𑀦𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀩𑀮𑀺𑀧𑀻𑀴𑀺𑀢𑀸 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀕𑀸𑀫𑀦𑀺𑀕𑀫𑀸𑀤𑀬𑁄 𑀙𑀟𑁆𑀟𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀺. 𑀫𑀚𑁆𑀛𑀺𑀫𑀚𑀦𑀧𑀤𑁄 𑀲𑀼𑀜𑁆𑀜𑁄 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑀦𑁆𑀢𑁄 𑀖𑀦𑀯𑀸𑀲𑁄 𑀲𑁂𑀬𑁆𑀬𑀣𑀸𑀧𑀺 𑀧𑁄𑀓𑁆𑀔𑀭𑀡𑀺𑀬𑀸 𑀫𑀚𑁆𑀛𑁂 𑀉𑀤𑀓𑀁 𑀆𑀯𑀺𑀮𑀁 𑀧𑀭𑀺𑀬𑀦𑁆𑀢𑁂 𑀯𑀺𑀧𑁆𑀧𑀲𑀦𑁆𑀦𑀁. 𑀅𑀬𑀁 𑀦𑀯𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁦. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀭𑀸𑀚𑀬𑀼𑀢𑁆𑀢𑀸𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀧𑀺 𑀦𑁂𑀕𑀫𑀚𑀸𑀦𑀧𑀤𑀸𑀧𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 ¶ 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀆𑀭𑀓𑁆𑀔𑀤𑁂𑀯𑀢𑀸, 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀤𑁂𑀯𑀢𑀸, 𑀭𑀼𑀓𑁆𑀔𑀤𑁂𑀯𑀢𑀸, 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀢𑀺 𑀏𑀯𑀁 𑀤𑁂𑀯𑀢𑀸𑀧𑀺 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀭𑀚𑁆𑀚𑁂 𑀯𑀸𑀢𑀸 𑀯𑀺𑀲𑀫𑀸 𑀔𑀭𑀸 𑀯𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀓𑀫𑁆𑀧𑁂𑀲𑁆𑀲𑀦𑁆𑀢𑀺. 𑀢𑁂𑀲𑀼 𑀓𑀫𑁆𑀧𑀺𑀢𑁂𑀲𑀼 𑀤𑁂𑀯𑀢𑀸 𑀓𑀼𑀧𑀺𑀢𑀸 𑀤𑁂𑀯𑀁 𑀯𑀲𑁆𑀲𑀺𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺. 𑀯𑀲𑁆𑀲𑀫𑀸𑀦𑁄𑀧𑀺 𑀲𑀓𑀮𑀭𑀝𑁆𑀞𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀯𑀲𑁆𑀲𑀫𑀸𑀦𑁄𑀧𑀺 𑀲𑀩𑁆𑀩𑀢𑁆𑀣 𑀓𑀲𑀺𑀓𑀫𑁆𑀫𑀲𑁆𑀲 𑀯𑀸 𑀯𑀧𑁆𑀧𑀓𑀫𑁆𑀫𑀲𑁆𑀲 𑀯𑀸 𑀉𑀧𑀓𑀸𑀭𑁄 𑀳𑀼𑀢𑁆𑀯𑀸 𑀦 𑀯𑀲𑁆𑀲𑀺𑀲𑁆𑀲𑀢𑀺. 𑀬𑀣𑀸 𑀘 𑀭𑀝𑁆𑀞𑁂, 𑀏𑀯𑀁 𑀚𑀦𑀧𑀤𑁂𑀧𑀺 𑀕𑀸𑀫𑁂𑀧𑀺 𑀏𑀓𑀢𑀴𑀸𑀓𑀲𑀭𑁂𑀧𑀺 𑀏𑀓𑀧𑁆𑀧𑀳𑀸𑀭𑁂𑀦 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀢𑀴𑀸𑀓𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯𑀲𑁆𑀲𑀦𑁆𑀢𑁄 𑀳𑁂𑀝𑁆𑀞𑀸𑀪𑀸𑀕𑁂 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀳𑁂𑀝𑁆𑀞𑀸 𑀯𑀲𑁆𑀲𑀦𑁆𑀢𑁄 𑀉𑀧𑀭𑀺 𑀦 𑀯𑀲𑁆𑀲𑀺𑀲𑁆𑀲𑀢𑀺. 𑀏𑀓𑀲𑁆𑀫𑀺𑀁 𑀪𑀸𑀕𑁂 𑀲𑀲𑁆𑀲𑀁 𑀅𑀢𑀺𑀯𑀲𑁆𑀲𑁂𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀅𑀯𑀲𑁆𑀲𑀦𑁂𑀦 𑀫𑀺𑀮𑀸𑀬𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀲𑀫𑁆𑀫𑀸 𑀯𑀲𑁆𑀲𑀫𑀸𑀦𑁄 𑀲𑀫𑁆𑀧𑀸𑀤𑁂𑀲𑁆𑀲𑀢𑀺. 𑀏𑀯𑀁 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁂 𑀯𑀼𑀢𑁆𑀢𑀲𑀲𑁆𑀲𑀸 𑀯𑀺𑀧𑀸𑀓𑁄. 𑀢𑀺𑀧𑁆𑀧𑀓𑀸𑀭𑀸 𑀪𑀯𑀺𑀲𑁆𑀲𑀦𑁆𑀢𑀺 𑀏𑀓𑀓𑀼𑀫𑁆𑀪𑀺𑀬𑀸 𑀑𑀤𑀦𑁄 𑀯𑀺𑀬. 𑀅𑀬𑀁 𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁧. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂𑀬𑁂𑀯 𑀓𑀸𑀮𑁂 𑀲𑀸𑀲𑀦𑁂 𑀧𑀭𑀺𑀳𑀸𑀬𑀦𑁆𑀢𑁂 𑀧𑀘𑁆𑀘𑀬𑀮𑁄𑀮𑀸 𑀅𑀮𑀚𑁆𑀚𑀺𑀓𑀸 𑀩𑀳𑀽 𑀪𑀺𑀓𑁆𑀔𑀽 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁂 𑀪𑀕𑀯𑀢𑀸 𑀧𑀘𑁆𑀘𑀬𑀮𑁄𑀮𑀼𑀧𑁆𑀧𑀁 𑀦𑀺𑀫𑁆𑀫𑀣𑁂𑀢𑁆𑀯𑀸 𑀓𑀣𑀺𑀢𑀥𑀫𑁆𑀫𑀤𑁂𑀲𑀦𑀁 𑀘𑀻𑀯𑀭𑀸𑀤𑀺𑀘𑀢𑀼𑀧𑀘𑁆𑀘𑀬𑀳𑁂𑀢𑀼 𑀧𑀭𑁂𑀲𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀧𑀘𑁆𑀘𑀬𑁂𑀳𑀺 𑀫𑀼𑀘𑁆𑀙𑀺𑀢𑁆𑀯𑀸 𑀦𑀺𑀢𑁆𑀣𑀭𑀡𑀧𑀓𑁆𑀔𑁂 𑀞𑀺𑀢𑀸 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀓𑁂𑀯𑀮𑀁 ‘‘𑀧𑀤𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀜𑁆𑀘𑁂𑀯 𑀫𑀥𑀼𑀭𑀲𑀤𑁆𑀤𑀜𑁆𑀘 𑀲𑀼𑀢𑁆𑀯𑀸 ¶ 𑀫𑀳𑀕𑁆𑀖𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀤𑀲𑁆𑀲𑀦𑁆𑀢𑀺’’𑀇𑀘𑁆𑀘𑁂𑀯𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀅𑀧𑀭𑁂 𑀅𑀦𑁆𑀢𑀭𑀯𑀻𑀣𑀺𑀘𑀢𑀼𑀓𑁆𑀓𑀭𑀸𑀚𑀤𑁆𑀯𑀸𑀭𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀓𑀳𑀸𑀧𑀡𑀅𑀟𑁆𑀠𑀓𑀳𑀸𑀧𑀡𑀧𑀸𑀤𑀫𑀸𑀲𑀓𑀭𑀽𑀧𑀸𑀤𑀻𑀦𑀺𑀧𑀺 𑀦𑀺𑀲𑁆𑀲𑀸𑀬 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀇𑀢𑀺 𑀪𑀕𑀯𑀢𑀸 𑀦𑀺𑀩𑁆𑀩𑀸𑀦𑀕𑁆𑀖𑀦𑀓𑀁 𑀓𑀢𑁆𑀯𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀘𑁂𑀯 𑀓𑀳𑀸𑀧𑀡𑀸𑀤𑀺𑀅𑀢𑁆𑀣𑀸𑀬 𑀘 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀤𑁂𑀲𑁂𑀦𑁆𑀢𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀘𑀦𑁆𑀤𑀦𑀲𑀸𑀭𑀁 𑀧𑀽𑀢𑀺𑀢𑀓𑁆𑀓𑁂𑀦 𑀯𑀺𑀓𑁆𑀓𑀺𑀡𑀦𑁆𑀢𑀸 𑀯𑀺𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀏𑀓𑀸𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁨. 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂 𑀮𑁄𑀓𑁂 𑀯𑀺𑀧𑀭𑀺𑀯𑀢𑁆𑀢𑀦𑁆𑀢𑁂𑀬𑁂𑀯 𑀭𑀸𑀚𑀸𑀦𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀅𑀓𑀼𑀮𑀻𑀦𑀸𑀦𑀜𑁆𑀜𑁂𑀯 𑀤𑀲𑁆𑀲𑀦𑁆𑀢𑀺. 𑀢𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀢𑀭𑀸 𑀤𑀮𑀺𑀤𑁆𑀤𑀸. 𑀭𑀸𑀚𑀲𑀫𑁆𑀫𑀼𑀔𑁂𑀧𑀺 𑀭𑀸𑀚𑀤𑁆𑀯𑀸𑀭𑁂𑀧𑀺 𑀅𑀫𑀘𑁆𑀘𑀲𑀫𑁆𑀫𑀼𑀔𑁂𑀧𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀧𑀺 𑀢𑀼𑀘𑁆𑀙𑀮𑀸𑀩𑀼𑀲𑀤𑀺𑀲𑀸𑀦𑀁 𑀅𑀓𑀼𑀮𑀻𑀦𑀸𑀦𑀁𑀬𑁂𑀯 𑀓𑀣𑀸 𑀑𑀲𑀻𑀤𑀺𑀢𑁆𑀯𑀸 𑀞𑀺𑀢𑀸 𑀯𑀺𑀬 𑀦𑀺𑀘𑁆𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀪𑀯𑀺𑀲𑁆𑀲𑀢𑀺. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂𑀧𑀺 𑀲𑀗𑁆𑀖𑀓𑀫𑁆𑀫𑀕𑀡𑀓𑀫𑁆𑀫𑀝𑁆𑀞𑀸𑀦𑁂𑀲𑀼 ¶ 𑀘𑁂𑀯 𑀧𑀢𑁆𑀢𑀘𑀻𑀯𑀭𑀧𑀭𑀺𑀯𑁂𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀲𑀼 𑀘 𑀤𑀼𑀲𑁆𑀲𑀻𑀮𑀸𑀦𑀁 𑀧𑀸𑀧𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀓𑀣𑀸 𑀦𑀺𑀬𑁆𑀬𑀸𑀦𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀦 𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀢𑀼𑀘𑁆𑀙𑀮𑀸𑀩𑀽𑀦𑀁 𑀲𑀻𑀤𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀤𑁆𑀯𑀸𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁩. 𑀢𑀸𑀤𑀺𑀲𑁂𑀬𑁂𑀯 𑀓𑀸𑀮𑁂 𑀅𑀥𑀫𑁆𑀫𑀺𑀓𑀭𑀸𑀚𑀸𑀦𑁄 𑀅𑀓𑀼𑀮𑀻𑀦𑀸𑀦𑀁 𑀬𑀲𑀁 𑀤𑀲𑁆𑀲𑀦𑁆𑀢𑀺. 𑀢𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀮𑀻𑀦𑀸 𑀤𑀼𑀕𑁆𑀕𑀢𑀸. 𑀢𑁂𑀲𑀼 𑀦 𑀓𑁂𑀘𑀺 𑀕𑀸𑀭𑀯𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀇𑀢𑀭𑁂𑀲𑀼𑀬𑁂𑀯 𑀓𑀭𑀺𑀲𑁆𑀲𑀦𑁆𑀢𑀺. 𑀭𑀸𑀚𑀲𑀫𑁆𑀫𑀼𑀔𑁂 𑀯𑀸 𑀅𑀫𑀘𑁆𑀘𑀲𑀫𑁆𑀫𑀼𑀔𑁂 𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀯𑀸 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀸𑀦𑀁 𑀖𑀦𑀲𑀺𑀮𑀸𑀲𑀤𑀺𑀲𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀓𑀣𑀸 𑀦 𑀑𑀕𑀸𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺. 𑀢𑁂𑀲𑀼 𑀓𑀣𑁂𑀦𑁆𑀢𑁂𑀲𑀼 ‘‘𑀓𑀺𑀁 𑀇𑀫𑁂 𑀓𑀣𑁂𑀦𑁆𑀢𑀻’’𑀢𑀺 𑀇𑀢𑀭𑁂 𑀧𑀭𑀺𑀳𑀸𑀲𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺. 𑀪𑀺𑀓𑁆𑀔𑀼𑀲𑀦𑁆𑀦𑀺𑀧𑀸𑀢𑁂𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀞𑀸𑀦𑁂𑀲𑀼 𑀦𑁂𑀯 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀕𑀭𑀼𑀓𑀸𑀢𑀩𑁆𑀩𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀦𑀸𑀧𑀺 𑀦𑁂𑀲𑀁 𑀓𑀣𑀸 𑀧𑀭𑀺𑀬𑁄𑀕𑀸𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀲𑀺𑀮𑀸𑀦𑀁 𑀧𑁆𑀮𑀯𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀢𑁂𑀭𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁪. 𑀮𑁄𑀓𑁂 𑀧𑀭𑀺𑀳𑀸𑀬𑀦𑁆𑀢𑁂𑀬𑁂𑀯 𑀫𑀦𑀼𑀲𑁆𑀲𑀸 𑀢𑀺𑀩𑁆𑀩𑀭𑀸𑀕𑀸𑀤𑀺𑀚𑀸𑀢𑀺𑀓𑀸 𑀓𑀺𑀮𑁂𑀲𑀸𑀦𑀼𑀯𑀢𑁆𑀢𑀓𑀸 𑀳𑀼𑀢𑁆𑀯𑀸 𑀢𑀭𑀼𑀡𑀸𑀦𑀁 𑀅𑀢𑁆𑀢𑀦𑁄 𑀪𑀭𑀺𑀬𑀸𑀦𑀁 𑀯𑀲𑁂 𑀯𑀢𑁆𑀢𑀺𑀲𑁆𑀲𑀦𑁆𑀢𑀺. 𑀕𑁂𑀳𑁂 𑀤𑀸𑀲𑀓𑀫𑁆𑀫𑀓𑀸𑀭𑀸𑀤𑀬𑁄𑀧𑀺 𑀕𑁄𑀫𑀳𑀺𑀁𑀲𑀸𑀤𑀬𑁄𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑁆𑀧𑀺 𑀲𑀩𑁆𑀩𑀁 𑀢𑀸𑀲𑀁𑀬𑁂𑀯 𑀆𑀬𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. ‘‘𑀅𑀲𑀼𑀓𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀸 𑀧𑀭𑀺𑀘𑁆𑀙𑀤𑀸𑀤𑀺𑀚𑀸𑀢𑀁 𑀯𑀸 𑀓𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀳𑁄𑀢𑀼, 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀩𑁆𑀬𑀸𑀧𑀸𑀭𑁂𑀦, 𑀢𑁆𑀯𑀁 𑀫𑀬𑁆𑀳𑀁 𑀖𑀭𑁂 𑀲𑀦𑁆𑀢𑀁 𑀯𑀸 𑀅𑀲𑀦𑁆𑀢𑀁 𑀯𑀸 𑀚𑀸𑀦𑀺𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀼𑀔𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀤𑀸𑀲𑀘𑁂𑀝𑀓𑁂 𑀯𑀺𑀬 𑀯𑀲𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸𑀦𑀁 𑀫𑀡𑁆𑀟𑀽𑀓𑀻𑀦𑀁 𑀆𑀲𑀺𑀯𑀺𑀲𑁂 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀘𑀼𑀤𑁆𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁫. 𑀤𑀼𑀩𑁆𑀩𑀮𑀭𑀸𑀚𑀓𑀸𑀮𑁂 ¶ 𑀧𑀦 𑀭𑀸𑀚𑀸𑀦𑁄 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀻𑀲𑀼 𑀅𑀓𑀼𑀲𑀮𑀸 𑀬𑀼𑀤𑁆𑀥𑁂𑀲𑀼 𑀅𑀯𑀺𑀲𑀸𑀭𑀤𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁂 𑀅𑀢𑁆𑀢𑀦𑁄 𑀭𑀸𑀚𑀸𑀥𑀺𑀧𑀘𑁆𑀘𑀁 𑀆𑀲𑀗𑁆𑀓𑀫𑀸𑀦𑀸 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀫𑀽𑀮𑀺𑀓𑀦𑀳𑀸𑀧𑀦𑀓𑀧𑁆𑀧𑀓𑀸𑀤𑀻𑀦𑀁 𑀤𑀲𑁆𑀲𑀦𑁆𑀢𑀺. 𑀚𑀸𑀢𑀺𑀕𑁄𑀢𑁆𑀢𑀲𑀫𑁆𑀧𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸 𑀭𑀸𑀚𑀓𑀼𑀮𑁂 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀼𑀁 𑀅𑀲𑀫𑀢𑁆𑀣𑀸 𑀳𑀼𑀢𑁆𑀯𑀸 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂 𑀚𑀸𑀢𑀺𑀕𑁄𑀢𑁆𑀢𑀳𑀻𑀦𑁂 𑀅𑀓𑀼𑀮𑀻𑀦𑁂 𑀉𑀧𑀝𑁆𑀞𑀳𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁂𑀳𑀺 𑀓𑀸𑀓𑀲𑁆𑀲 𑀧𑀭𑀺𑀯𑀸𑀭𑀺𑀢𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁆𑀦𑀭𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁬. 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂𑀬𑁂𑀯 ¶ 𑀘 𑀅𑀓𑀼𑀮𑀻𑀦𑀸𑀯 𑀭𑀸𑀚𑀯𑀮𑁆𑀮𑀪𑀸 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀮𑀻𑀦𑀸 𑀅𑀧𑀜𑁆𑀜𑀸𑀢𑀸 𑀤𑀼𑀕𑁆𑀕𑀢𑀸. 𑀢𑁂 𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀲𑀼 𑀩𑀮𑀯𑀦𑁆𑀢𑁄 𑀳𑀼𑀢𑁆𑀯𑀸 𑀤𑀼𑀩𑁆𑀩𑀮𑀸𑀦𑀁 𑀧𑀯𑁂𑀡𑀺𑀆𑀕𑀢𑀸𑀦𑀺 𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀸𑀦𑀻’’𑀢𑀺 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀢𑁂 ‘‘𑀦 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀸𑀓’’𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀯𑀤𑀦𑁆𑀢𑁂 𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀧𑀳𑀭𑀸𑀧𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀅𑀧𑀓𑀟𑁆𑀠𑀸𑀧𑁂𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀣, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀣, 𑀇𑀤𑀸𑀦𑀺 𑀯𑁄 𑀧𑀳𑀭𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀸𑀤𑀻𑀦𑀺 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀲𑁆𑀲𑀦𑁆𑀢𑀺. 𑀢𑁂 𑀢𑁂𑀲𑀁 𑀪𑀬𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀺 𑀯𑀢𑁆𑀣𑀽𑀦𑀺 ‘‘𑀢𑀼𑀫𑁆𑀳𑀸𑀓𑀁𑀬𑁂𑀯 𑀢𑀸𑀦𑀺, 𑀕𑀡𑁆𑀳𑀣𑀸’’𑀢𑀺 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀪𑀻𑀢𑀸 𑀦𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀧𑀸𑀧𑀪𑀺𑀓𑁆𑀔𑀽𑀧𑀺 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀬𑀣𑀸𑀭𑀼𑀘𑀺 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺. 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀧𑀝𑀺𑀲𑀭𑀡𑀁 𑀅𑀮𑀪𑀫𑀸𑀦𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑁂𑀲𑀼 𑀦𑀺𑀮𑀻𑀬𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀳𑀻𑀦𑀚𑀘𑁆𑀘𑁂𑀳𑀺 𑀘𑁂𑀯 𑀧𑀸𑀧𑀪𑀺𑀓𑁆𑀔𑀽𑀳𑀺 𑀘 𑀉𑀧𑀤𑁆𑀤𑀼𑀢𑀸𑀦𑀁 𑀚𑀸𑀢𑀺𑀫𑀦𑁆𑀢𑀓𑀼𑀮𑀧𑀼𑀢𑁆𑀢𑀸𑀦𑀜𑁆𑀘𑁂𑀯 𑀧𑁂𑀲𑀮𑀪𑀺𑀓𑁆𑀔𑀽𑀦𑀜𑁆𑀘 𑀏𑀴𑀓𑀸𑀦𑀁 𑀪𑀬𑁂𑀦 𑀢𑀲𑀯𑀓𑀸𑀦𑀁 𑀧𑀮𑀸𑀬𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀲𑁄𑀴𑀲𑀫𑀲𑁆𑀲 𑀯𑀺𑀧𑀸𑀓𑁄. 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀅𑀦𑀢𑁆𑀣𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑁂 𑀲𑁄𑀴𑀲 𑀫𑀳𑀸𑀲𑀼𑀧𑀺𑀦𑁂 𑀧𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑁄𑀲𑀮𑀭𑀸𑀚𑀸 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂’’𑀢𑀺. 𑀏𑀢𑁆𑀣 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀦𑀢𑁆𑀣𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀲𑁆𑀲𑀢𑀺. 𑀓𑁄𑀲𑀮𑀭𑀸𑀚𑀸 𑀯𑀺𑀬 𑀮𑁄𑀓𑀲𑁆𑀲 𑀅𑀢𑁆𑀣𑀸𑀦𑀢𑁆𑀣𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀧𑀦 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸𑀢𑀺 𑀫𑀳𑀸𑀦𑀸𑀕𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀤𑁂𑀯𑀢𑀸 𑀯𑀺𑀬. 𑀭𑁄𑀳𑀡𑁂 𑀓𑀺𑀭 𑀫𑀳𑀸𑀦𑀸𑀕𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀧𑀮𑁄𑀓𑁂𑀢𑁆𑀯𑀸𑀯 𑀏𑀓𑀁 𑀦𑀸𑀕𑀭𑀼𑀓𑁆𑀔𑀁 𑀙𑀺𑀦𑁆𑀤𑀸𑀧𑁂𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀧𑀞𑀫𑀫𑁂𑀯 𑀦𑀁 𑀲𑀘𑁆𑀘𑀲𑀼𑀧𑀺𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀧𑀘𑁆𑀙𑀸 ‘‘𑀇𑀢𑁄 𑀢𑁂 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀉𑀧𑀝𑁆𑀞𑀸𑀓𑁄 𑀭𑀸𑀚𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀧𑀺𑀦𑁂 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀢𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀭𑀸𑀚𑁄𑀭𑁄𑀥𑀸𑀦𑀁 𑀆𑀘𑀺𑀓𑁆𑀔𑀺. 𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸 ‘‘𑀏𑀯𑀁 𑀣𑁂𑀭𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀤𑀺𑀯𑀲𑀁 𑀕𑀡𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀣𑁂𑀭𑀲𑁆𑀲 𑀳𑀢𑁆𑀣𑀧𑀸𑀤𑁂 𑀙𑀺𑀦𑁆𑀤𑀸𑀧𑁂𑀲𑀺. 𑀏𑀓𑀦𑁆𑀢𑀁 𑀲𑀘𑁆𑀘𑀫𑁂𑀯 𑀳𑁄𑀢𑀻𑀢𑀺 𑀨𑀮𑀲𑁆𑀲 𑀲𑀘𑁆𑀘𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀤𑀲𑁆𑀲𑀦𑀁 ¶ 𑀧𑀦 𑀯𑀺𑀧𑀮𑁆𑀮𑀢𑁆𑀣𑀫𑁂𑀯 ¶ . 𑀢𑁂𑀦𑁂𑀯 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀫𑁆𑀧𑀺 𑀲𑀼𑀧𑀺𑀦𑀁 𑀦 𑀧𑀲𑁆𑀲𑀦𑁆𑀢𑀺. 𑀤𑁆𑀯𑀻𑀳𑀺 𑀢𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀓𑀤𑀸𑀘𑀺 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺 𑀆𑀳 ‘‘𑀲𑀁𑀲𑀕𑁆𑀕𑀪𑁂𑀤𑀢𑁄’’𑀢𑀺. ‘‘𑀅𑀲𑁂𑀔𑀸 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸’’𑀢𑀺 𑀯𑀘𑀦𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀓𑀸𑀭𑀡𑀸𑀦𑀁 𑀯𑀺𑀧𑀮𑁆𑀮𑀸𑀲𑀸 𑀏𑀯 𑀫𑀽𑀮𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀦𑁆𑀢𑀺 𑀲𑀼𑀧𑀺𑀦𑀓𑀸𑀮𑁂 𑀧𑀯𑀢𑁆𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀦𑁆𑀢𑀺 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀈𑀤𑀺𑀲𑀸𑀦𑀻𑀢𑀺 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀘𑁂𑀯 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘. 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦𑀸𑀢𑀺 𑀧𑀓𑀢𑀺𑀘𑀺𑀢𑁆𑀢𑁂𑀦.

𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄. 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂𑀢𑀺 𑀇𑀤𑀁 𑀬𑀸𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑀘𑀺𑀢𑁆𑀢𑀯𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀼𑀧𑀺𑀦𑁂𑀦𑁂𑀯 𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂𑀢𑀺 𑀓𑀣𑀦𑀓𑀸𑀮𑁂 𑀧𑀦 𑀅𑀩𑁆𑀬𑀸𑀓𑀢𑁄𑀬𑁂𑀯 𑀆𑀯𑀚𑁆𑀚𑀦𑀫𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑁂𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀤𑀼𑀢𑀺𑀬𑀫𑁄𑀖𑀯𑀸𑀭𑁂 𑀯𑀺𑀬 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀯𑀚𑁆𑀚𑀦𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀲𑁆𑀲 𑀆𑀯𑀚𑁆𑀚𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 ‘‘𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂’’𑀢𑀺 𑀓𑀧𑁆𑀧𑀦𑀸𑀬 𑀅𑀲𑀫𑁆𑀪𑀯𑀢𑁄. 𑀏𑀢𑁆𑀣 𑀘 ‘‘𑀲𑀼𑀧𑀺𑀦𑀦𑁆𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀯𑀘𑀦𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀅𑀢𑀻𑀢𑀯𑀲𑁂𑀦 𑀯𑀸 𑀲𑀪𑀸𑀯𑀥𑀫𑁆𑀫𑀸 𑀲𑀼𑀧𑀺𑀦𑀦𑁆𑀢𑁂 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀬𑀤𑀺𑀧𑀺 𑀲𑀼𑀧𑀺𑀦𑀦𑁆𑀢𑁂 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀺𑀢𑁂 𑀭𑀽𑀧𑀸𑀤𑀺𑀯𑀢𑁆𑀣𑀼𑀫𑁆𑀳𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀲𑀼𑀧𑀺𑀦𑀦𑁆𑀢𑁂 𑀉𑀧𑀝𑁆𑀞𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀧𑀭𑀺𑀓𑀧𑁆𑀧𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑀢𑁄 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀓𑀭𑀚𑀓𑀸𑀬𑀲𑁆𑀲 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑀳𑀤𑀬𑀯𑀢𑁆𑀣𑀼 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑀸𑀧𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦 𑀲𑀼𑀧𑁆𑀧𑀲𑀦𑁆𑀦𑀸 𑀅𑀲𑀼𑀧𑁆𑀧𑀲𑀦𑁆𑀦𑀯𑀝𑁆𑀝𑀺𑀦𑀺𑀲𑁆𑀲𑀺𑀢𑀤𑀻𑀧𑀧𑁆𑀧𑀪𑀸 𑀯𑀺𑀬, 𑀢𑀲𑁆𑀫𑀸 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀏𑀢𑁆𑀣 𑀤𑀼𑀩𑁆𑀩𑀮𑀳𑀤𑀬𑀯𑀢𑁆𑀣𑀼𑀓𑀢𑁆𑀢𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁.

𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸. 𑀲𑀼𑀧𑀺𑀦𑀜𑁆𑀳𑀺 𑀧𑀲𑁆𑀲𑀦𑁆𑀢𑁄 𑀫𑀦𑁄𑀤𑁆𑀯𑀸𑀭𑀺𑀓𑁂𑀦𑁂𑀯 𑀚𑀯𑀦𑁂𑀦 𑀧𑀲𑁆𑀲𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀧𑀝𑀺𑀩𑀼𑀚𑁆𑀛𑀦𑁆𑀢𑁄 𑀘 𑀫𑀦𑁄𑀤𑁆𑀯𑀸𑀭𑀺𑀓𑁂𑀦𑁂𑀯 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀳𑀺 𑀫𑀳𑀸𑀯𑀝𑁆𑀝𑀺𑀁 𑀚𑀸𑀮𑁂𑀢𑁆𑀯𑀸 𑀤𑀻𑀧𑁂 𑀘𑀓𑁆𑀔𑀼𑀲𑀫𑀻𑀧𑀁 𑀉𑀧𑀦𑀻𑀢𑁂 𑀧𑀞𑀫𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀁 𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀦 𑀆𑀯𑀝𑁆𑀝𑁂𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀝𑁆𑀝𑁂𑀢𑀺. 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺 ¶ , 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀧𑀯𑀢𑁆𑀢𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦 ‘‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀮𑁄𑀓𑁄’’𑀢𑀺 𑀚𑀸𑀦𑀸𑀢𑀺. 𑀢𑀣𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀓𑀡𑁆𑀡𑀲𑀫𑀻𑀧𑁂 𑀢𑀽𑀭𑀺𑀬𑁂𑀲𑀼 𑀧𑀕𑁆𑀕𑀳𑀺𑀢𑁂𑀲𑀼 ¶ , 𑀖𑀸𑀦𑀲𑀫𑀻𑀧𑁂 𑀲𑀼𑀕𑀦𑁆𑀥𑁂𑀲𑀼 𑀯𑀸 𑀤𑀼𑀕𑁆𑀕𑀦𑁆𑀥𑁂𑀲𑀼 𑀯𑀸 𑀧𑀼𑀧𑁆𑀨𑁂𑀲𑀼 𑀉𑀧𑀦𑀻𑀢𑁂𑀲𑀼, 𑀫𑀼𑀔𑁂 𑀲𑀧𑁆𑀧𑀺𑀫𑁆𑀳𑀺 𑀯𑀸 𑀨𑀸𑀡𑀺𑀢𑁂 𑀯𑀸 𑀧𑀓𑁆𑀔𑀺𑀢𑁆𑀢𑁂, 𑀧𑀺𑀝𑁆𑀞𑀺𑀬𑀁 𑀧𑀸𑀡𑀺𑀦𑀸 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀞𑀫𑀁 𑀲𑁄𑀢𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀦 𑀆𑀯𑀝𑁆𑀝𑁂𑀦𑁆𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀝𑁆𑀝𑁂𑀢𑀺, 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀲𑁄𑀢𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀦𑁆𑀢𑀺, 𑀢𑀢𑁄 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀯𑀢𑁆𑀢𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀢𑀺, 𑀢𑁂𑀦 𑀘𑀺𑀢𑁆𑀢𑁂𑀦 𑀜𑀢𑁆𑀯𑀸 ‘‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀤𑁆𑀤𑁄, 𑀲𑀗𑁆𑀔𑀲𑀤𑁆𑀤𑁄 𑀪𑁂𑀭𑀺𑀲𑀤𑁆𑀤𑁄’’𑀢𑀺 𑀯𑀸 ‘‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀕𑀦𑁆𑀥𑁄, 𑀫𑀽𑀮𑀕𑀦𑁆𑀥𑁄’’𑀢𑀺 𑀯𑀸 ‘‘𑀓𑀺𑀁 𑀇𑀤𑀁 𑀫𑀬𑁆𑀳𑀁 𑀫𑀼𑀔𑀁 𑀧𑀓𑁆𑀔𑀺𑀢𑁆𑀢𑀁, 𑀲𑀧𑁆𑀧𑀻𑀢𑀺 𑀯𑀸 𑀨𑀸𑀡𑀺𑀢’’𑀦𑁆𑀢𑀺 𑀯𑀸 ‘‘𑀓𑁂𑀦𑀫𑁆𑀳𑀺 𑀧𑀺𑀝𑁆𑀞𑀺𑀬𑀁 𑀧𑀳𑀝𑁄, 𑀅𑀢𑀺𑀩𑀤𑁆𑀥𑁄 𑀫𑁂 𑀧𑀳𑀸𑀭𑁄’’𑀢𑀺 𑀯𑀸 𑀯𑀢𑁆𑀢𑀸 𑀳𑁄𑀢𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀦𑁂𑀯 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀲𑀼𑀧𑀺𑀦𑀫𑁆𑀧𑀺 𑀢𑁂𑀦𑁂𑀯 𑀧𑀲𑁆𑀲𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀲𑀼𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀲𑀢𑁆𑀢𑀫𑁂 𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀉𑀧𑁆𑀧𑀦𑁆𑀦𑀁. 𑀅𑀓𑀸𑀮𑁂𑀧𑀻𑀢𑀺 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑁂𑀲𑀼𑀧𑀺. 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑀸𑀦𑀜𑁆𑀳𑀺 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀓𑀻𑀴𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀅𑀓𑀸𑀮𑁂𑀧𑀺 𑀤𑁂𑀯𑁄 𑀯𑀲𑁆𑀲𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑁄 𑀯𑀸𑀓𑀭𑀓𑀼𑀝𑀓𑀯𑀸𑀲𑀺𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀣𑁂𑀭𑁄 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀳𑀁, 𑀪𑀦𑁆𑀢𑁂, 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑁄𑀢𑀺. 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀘𑀺𑀢𑁆𑀢𑁂𑀦 𑀤𑁂𑀯𑁄 𑀯𑀲𑁆𑀲𑀢𑀻𑀢𑀺. 𑀆𑀫, 𑀪𑀦𑁆𑀢𑁂𑀢𑀺. 𑀧𑀲𑁆𑀲𑀺𑀢𑀼𑀓𑀸𑀫𑀸 𑀫𑀬𑀦𑁆𑀢𑀺. 𑀢𑁂𑀫𑀺𑀲𑁆𑀲𑀣, 𑀪𑀦𑁆𑀢𑁂𑀢𑀺. 𑀫𑁂𑀖𑀲𑀻𑀲𑀁 𑀯𑀸 𑀕𑀚𑁆𑀚𑀺𑀢𑀁 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀓𑀣𑀁 𑀢𑁂𑀫𑀺𑀲𑁆𑀲𑀸𑀫𑀸𑀢𑀺. 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀘𑀺𑀢𑁆𑀢𑁂𑀦 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀣𑀸𑀢𑀺. ‘‘𑀲𑀸𑀥𑀼, 𑀤𑁂𑀯𑀧𑀼𑀢𑁆𑀢𑀸’’𑀢𑀺 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 ¶ 𑀧𑀸𑀯𑀺𑀲𑀺. 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀫𑀺𑀁 𑀧𑀯𑀺𑀲𑀦𑁆𑀢𑁂𑀬𑁂𑀯 𑀏𑀓𑀁 𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺, 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀝𑁆𑀞𑀸𑀦𑀁 𑀏𑀓𑀫𑁂𑀖𑀁 𑀅𑀳𑁄𑀲𑀺. 𑀣𑁂𑀭𑁄 𑀅𑀤𑁆𑀥𑀢𑀺𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀝𑁆𑀞𑁄𑀢𑀺.

𑀯𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀯𑀸𑀘𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁮-𑁯. 𑀅𑀝𑁆𑀞𑀫𑁂 ¶ 𑀅𑀗𑁆𑀕𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀅𑀗𑁆𑀕𑀻𑀬𑀦𑁆𑀢𑀺 𑀳𑁂𑀢𑀼𑀪𑀸𑀯𑁂𑀦 𑀜𑀸𑀬𑀦𑁆𑀢𑀻𑀢𑀺 𑀅𑀗𑁆𑀕𑀸𑀦𑀺, 𑀓𑀸𑀭𑀡𑀸𑀦𑀺. 𑀓𑀸𑀭𑀡𑀢𑁆𑀣𑁂 𑀘 𑀅𑀗𑁆𑀕-𑀲𑀤𑁆𑀤𑁄. 𑀧𑀜𑁆𑀘𑀳𑀻𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀦𑀼𑀆𑀕𑀢𑀸 𑀧𑀯𑀢𑁆𑀢𑀸 𑀬𑀼𑀢𑁆𑀢𑀸 𑀘. 𑀯𑀸𑀘𑀸𑀢𑀺 𑀲𑀫𑀼𑀮𑁆𑀮𑀧𑀦-𑀯𑀸𑀘𑀸. 𑀬𑀸 ‘‘𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄’’𑀢𑀺 (𑀥. 𑀲. 𑁬𑁩𑁬) 𑀘, ‘‘𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺 (𑀤𑀻. 𑀦𑀺. 𑁧.𑁯) 𑀘 𑀆𑀕𑀘𑁆𑀙𑀢𑀺. 𑀬𑀸 𑀧𑀦 ‘‘𑀯𑀸𑀘𑀸𑀬 𑀘𑁂 𑀓𑀢𑀁 𑀓𑀫𑁆𑀫’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁧 𑀓𑀸𑀬𑀓𑀫𑁆𑀫𑀤𑁆𑀯𑀸𑀭) 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺 𑀘, ‘‘𑀬𑀸 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀯𑀸𑀘𑀸’’𑀢𑀺 (𑀥. 𑀲. 𑁨𑁯𑁯) 𑀏𑀯𑀁 𑀯𑀺𑀭𑀢𑀺 𑀘, ‘‘𑀨𑀭𑀼𑀲𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀆𑀲𑁂𑀯𑀺𑀢𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀢𑀻’’𑀢𑀺 (𑀅. 𑀦𑀺. 𑁮.𑁪𑁦) 𑀏𑀯𑀁 𑀘𑁂𑀢𑀦𑀸 𑀘 𑀯𑀸𑀘𑀸𑀢𑀺 𑀆𑀕𑀢𑀸, 𑀦 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀓𑀲𑁆𑀫𑀸? 𑀅𑀪𑀸𑀲𑀺𑀢𑀩𑁆𑀩𑀢𑁄. ‘‘𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀼𑀪𑀸𑀲𑀺𑀢𑀸𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸. 𑀢𑁂𑀦𑀲𑁆𑀲𑀸 𑀅𑀢𑁆𑀣𑀸𑀯𑀳𑀢𑀁 𑀤𑀻𑀧𑁂𑀢𑀺. 𑀅𑀦𑀯𑀚𑁆𑀚𑀸𑀢𑀺 𑀭𑀸𑀕𑀸𑀤𑀺𑀅𑀯𑀚𑁆𑀚𑀭𑀳𑀺𑀢𑀸. 𑀇𑀫𑀺𑀦𑀸𑀲𑁆𑀲 𑀓𑀸𑀭𑀡𑀲𑀼𑀤𑁆𑀥𑀺𑀁 𑀅𑀕𑀢𑀺𑀕𑀫𑀦𑀸𑀤𑀺𑀧𑁆𑀧𑀯𑀢𑁆𑀢𑀤𑁄𑀲𑀸𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀭𑀸𑀕𑀤𑁄𑀲𑀸𑀤𑀺𑀯𑀺𑀫𑀼𑀢𑁆𑀢𑀜𑁆𑀳𑀺 𑀬𑀁 𑀪𑀸𑀲𑀢𑁄 𑀅𑀦𑀼𑀭𑁄𑀥𑀯𑀺𑀯𑀚𑁆𑀚𑀦𑀢𑁄 𑀅𑀕𑀢𑀺𑀕𑀫𑀦𑀁 𑀤𑀼𑀭𑀲𑀫𑀼𑀲𑁆𑀲𑀺𑀢𑀫𑁂𑀯𑀸𑀢𑀺. 𑀅𑀦𑀦𑀼𑀯𑀚𑁆𑀚𑀸𑀢𑀺 𑀅𑀦𑀼𑀯𑀸𑀤𑀯𑀺𑀫𑀼𑀢𑁆𑀢𑀸. 𑀇𑀫𑀺𑀦𑀸𑀲𑁆𑀲𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀲𑀢𑀺 𑀳𑀺 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀢𑁆𑀢𑀺𑀬𑀁 𑀅𑀦𑀦𑀼𑀯𑀚𑁆𑀚𑀢𑀸𑀢𑀺. 𑀯𑀺𑀜𑁆𑀜𑀽𑀦𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀁. 𑀢𑁂𑀦 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀩𑀸𑀮𑀸 𑀅𑀧𑁆𑀧𑀫𑀸𑀡𑀸𑀢𑀺 𑀤𑀻𑀧𑁂𑀢𑀺.

𑀇𑀫𑁂𑀳𑀺 𑀔𑁄𑀢𑀺𑀆𑀤𑀻𑀦𑀺 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑁄 𑀢𑀁 𑀯𑀸𑀘𑀁 𑀦𑀺𑀕𑀫𑁂𑀢𑀺. 𑀬𑀜𑁆𑀘 𑀅𑀜𑁆𑀜𑁂 𑀧𑀝𑀺𑀜𑁆𑀜𑀸𑀤𑀻𑀳𑀺 𑀅𑀯𑀬𑀯𑁂𑀳𑀺, 𑀦𑀸𑀫𑀸𑀤𑀻𑀳𑀺 𑀧𑀤𑁂𑀳𑀺, 𑀮𑀺𑀗𑁆𑀕𑀯𑀘𑀦𑀯𑀺𑀪𑀢𑁆𑀢𑀺𑀓𑀸𑀮𑀓𑀸𑀭𑀓𑀲𑀫𑁆𑀧𑀢𑁆𑀢𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁 𑀫𑀼𑀲𑀸𑀯𑀸𑀤𑀸𑀤𑀺𑀯𑀸𑀘𑀫𑁆𑀧𑀺 𑀲𑀼𑀪𑀸𑀲𑀺𑀢𑀦𑁆𑀢𑀺 𑀫𑀜𑁆𑀜𑀦𑁆𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀢𑀺. 𑀅𑀯𑀬𑀯𑀸𑀤𑀺𑀲𑀫𑀦𑁆𑀦𑀸𑀕𑀢𑀸𑀧𑀺 𑀳𑀺 𑀢𑀣𑀸𑀭𑀽𑀧𑀻 ¶ 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸𑀯 𑀳𑁄𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀸𑀯𑀳𑀢𑁆𑀢𑀸. 𑀇𑀫𑁂𑀳𑀺 𑀧𑀦 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀘𑁂𑀧𑀺 𑀫𑀺𑀮𑀓𑁆𑀔𑀼𑀪𑀸𑀲𑀸𑀧𑀭𑀺𑀬𑀸𑀧𑀦𑁆𑀦𑀸 𑀖𑀝𑀘𑁂𑀝𑀺𑀓𑀸𑀕𑀻𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀳𑁄𑀢𑀺, 𑀢𑀣𑀸𑀧𑀺 𑀲𑀼𑀪𑀸𑀲𑀺𑀢𑀸𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸. 𑀢𑀣𑀸 𑀳𑀺 𑀫𑀕𑁆𑀕𑀧𑀲𑁆𑀲𑁂 𑀲𑀲𑁆𑀲𑀁 𑀭𑀓𑁆𑀔𑀦𑁆𑀢𑀺𑀬𑀸 𑀲𑀻𑀳𑀴𑀘𑁂𑀝𑀺𑀓𑀸𑀬 𑀲𑀻𑀳𑀴𑀓𑁂𑀦𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀬𑀼𑀢𑁆𑀢𑀁 𑀕𑀻𑀢𑀺𑀓𑀁 𑀕𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀲𑀝𑁆𑀞𑀺𑀫𑀢𑁆𑀢𑀸 𑀯𑀺𑀧𑀲𑁆𑀲𑀓𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀢𑀣𑀸 𑀢𑀺𑀲𑁆𑀲𑁄 𑀦𑀸𑀫 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀲𑁆𑀲𑀭𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄 𑀧𑀤𑀼𑀫𑀲𑁆𑀲𑀭𑁂 𑀧𑀤𑀼𑀫𑀸𑀦𑀺 𑀪𑀜𑁆𑀚𑀺𑀢𑁆𑀯𑀸 𑁋

‘‘𑀧𑀸𑀢𑁄𑀯 ¶ 𑀨𑀼𑀮𑁆𑀮𑀺𑀢𑀓𑁄𑀓𑀦𑀤𑀁,

𑀲𑀽𑀭𑀺𑀬𑀸𑀮𑁄𑀓𑁂𑀦 𑀪𑀺𑀚𑁆𑀚𑀺𑀬𑀢𑁂;

𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀁 𑀕𑀢𑀸 𑀲𑀢𑁆𑀢𑀸,

𑀚𑀭𑀸𑀪𑀺𑀯𑁂𑀕𑁂𑀦 𑀫𑀤𑁆𑀤𑀻𑀬𑀦𑁆𑀢𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁩; 𑀲𑀼. 𑀦𑀺. 𑀅𑀝𑁆𑀞. 𑁨.𑁪𑁫𑁨 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸) 𑁋

𑀇𑀫𑀁 𑀕𑀻𑀢𑀺𑀁 𑀕𑀸𑀬𑀦𑁆𑀢𑀺𑀬𑀸 𑀘𑁂𑀝𑀺𑀓𑀸𑀬 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄.

𑀩𑀼𑀤𑁆𑀥𑀦𑁆𑀢𑀭𑁂𑀧𑀺 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀢𑁆𑀢𑀳𑀺 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀅𑀝𑀯𑀺𑀢𑁄 𑀆𑀕𑀫𑁆𑀫 𑀅𑀜𑁆𑀜𑀢𑀭𑀸𑀬 𑀇𑀢𑁆𑀣𑀺𑀬𑀸 𑀫𑀼𑀲𑀮𑁂𑀦 𑀢𑀡𑁆𑀟𑀼𑀮𑁂 𑀓𑁄𑀝𑁆𑀝𑁂𑀦𑁆𑀢𑀺𑀬𑀸 𑁋

‘‘𑀚𑀭𑀸𑀬 𑀧𑀭𑀺𑀫𑀤𑁆𑀤𑀺𑀢𑀁 𑀏𑀢𑀁, 𑀫𑀺𑀮𑀸𑀢𑀘𑀫𑁆𑀫𑀦𑀺𑀲𑁆𑀲𑀺𑀢𑀁;

𑀫𑀭𑀡𑁂𑀦 𑀪𑀺𑀚𑁆𑀚𑀢𑀺 𑀏𑀢𑀁, 𑀫𑀘𑁆𑀘𑀼𑀲𑁆𑀲 𑀖𑀸𑀲𑀫𑀸𑀫𑀺𑀲𑀁.

‘‘𑀓𑀺𑀫𑀻𑀦𑀁 𑀆𑀮𑀬𑀁 𑀏𑀢𑀁, 𑀦𑀸𑀦𑀸𑀓𑀼𑀡𑀧𑁂𑀦 𑀧𑀽𑀭𑀺𑀢𑀁;

𑀅𑀲𑀼𑀘𑀺𑀪𑀸𑀚𑀦𑀁 𑀏𑀢𑀁, 𑀢𑀤𑀮𑀺𑀓𑁆𑀔𑀦𑁆𑀥𑀲𑀫𑀁 𑀇𑀤’’𑀦𑁆𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁩; 𑀲𑀼. 𑀦𑀺. 𑀅𑀝𑁆𑀞. 𑁨.𑁪𑁫𑁨 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸) 𑁋

𑀇𑀫𑀁 𑀕𑀻𑀢𑀁 𑀲𑀼𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀳 𑀧𑀼𑀢𑁆𑀢𑁂𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀢𑁄. 𑀏𑀯𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀘𑁂𑀧𑀺 𑀫𑀺𑀮𑀓𑁆𑀔𑀼𑀪𑀸𑀲𑀸𑀬 𑀧𑀭𑀺𑀬𑀸𑀧𑀦𑁆𑀦𑀸 𑀖𑀝𑀘𑁂𑀝𑀺𑀓𑀸𑀕𑀻𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸 𑀯𑀸𑀘𑀸 𑀳𑁄𑀢𑀺, 𑀢𑀣𑀸𑀧𑀺 𑀲𑀼𑀪𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀪𑀸𑀲𑀺𑀢𑀸 𑀏𑀯 𑀅𑀦𑀯𑀚𑁆𑀚𑀸 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀢𑁆𑀣𑀺𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀧𑁆𑀧𑀝𑀺𑀲𑀭𑀡𑀸𑀦𑀁, 𑀦𑁄 𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀲𑀭𑀡𑀸𑀦𑀦𑁆𑀢𑀺. 𑀦𑀯𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀯𑀸𑀘𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁦. 𑀤𑀲𑀫𑁂 ¶ 𑀦𑀺𑀲𑁆𑀲𑀭𑀦𑁆𑀢𑀻𑀢𑀺 𑀦𑀺𑀲𑁆𑀲𑀭𑀡𑀻𑀬𑀸𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀓𑀢𑁆𑀢𑀭𑀺 𑀳𑁂𑀲 𑀅𑀦𑀻𑀬-𑀲𑀤𑁆𑀤𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀬𑀸’’𑀢𑀺. 𑀢𑁂𑀦𑀸𑀳 ‘‘𑀦𑀺𑀲𑁆𑀲𑀝𑀸’’𑀢𑀺. 𑀓𑀼𑀢𑁄 𑀧𑀦 𑀦𑀺𑀲𑁆𑀲𑀝𑀸? 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀢𑁄. 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀼𑀬𑁄𑀢𑀺 𑀆𑀳 ‘‘𑀅𑀢𑁆𑀢𑀲𑀼𑀜𑁆𑀜𑀲𑀪𑀸𑀯𑀸’’𑀢𑀺. 𑀅𑀢𑁆𑀣𑀢𑁄 𑀧𑀦 𑀥𑀫𑁆𑀫𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀺𑀲𑁂𑀲𑁄 ¶ . 𑀢𑀸𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀮𑁂𑀲𑀯𑀲𑁂𑀦 𑀓𑀸𑀫𑁂𑀲𑀼 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀯𑀻𑀫𑀁𑀲𑀦𑀢𑁆𑀣’’𑀦𑁆𑀢𑀺, ‘‘𑀦𑁂𑀓𑁆𑀔𑀫𑁆𑀫𑀦𑀺𑀬𑀢𑀁 𑀇𑀤𑀸𑀦𑀺 𑀫𑁂 𑀘𑀺𑀢𑁆𑀢𑀁, 𑀓𑀺𑀁 𑀦𑀼 𑀔𑁄 𑀓𑀸𑀫𑀯𑀺𑀢𑀓𑁆𑀓𑁄𑀧𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀻𑀫𑀁𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀦𑁆𑀤𑀦𑀁 𑀦𑀸𑀫 𑀅𑀦𑀼𑀧𑁆𑀧𑀯𑁂𑀲𑁄. 𑀲𑁄 𑀧𑀦 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀆𑀳 ‘‘𑀦𑀧𑁆𑀧𑀯𑀺𑀲𑀢𑀻’’𑀢𑀺. 𑀧𑀲𑀻𑀤𑀦𑀁 𑀦𑀸𑀫 𑀅𑀪𑀺𑀭𑀼𑀘𑀺. 𑀲𑀦𑁆𑀢𑀺𑀝𑁆𑀞𑀦𑀁 𑀧𑀢𑀺𑀝𑁆𑀞𑀸𑀦𑀁. 𑀯𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑀼𑀘𑁆𑀘𑀦𑀦𑁆𑀢𑀺. 𑀢𑀁 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀯𑀤𑀢𑀺 ‘‘𑀧𑀲𑀸𑀤𑀁 𑀦𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺. 𑀏𑀯𑀁𑀪𑀽𑀢𑀁 𑀧𑀦𑀲𑁆𑀲 𑀘𑀺𑀢𑁆𑀢𑀁 𑀢𑀲𑁆𑀲 𑀓𑀣𑀁 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀬𑀣𑀸’’𑀢𑀺𑀆𑀤𑀺.

𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀛𑀸𑀦𑀘𑀺𑀢𑁆𑀢𑀁 𑀏𑀓𑀢𑁆𑀢𑀯𑀲𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀤𑀢𑀺. 𑀕𑁄𑀘𑀭𑁂 𑀕𑀢𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑁂 𑀏𑀯 𑀧𑀯𑀢𑁆𑀢𑀢𑁆𑀢𑀸. 𑀅𑀳𑀸𑀦𑀪𑀸𑀕𑀺𑀬𑀢𑁆𑀢𑀸𑀢𑀺 𑀞𑀺𑀢𑀺𑀪𑀸𑀕𑀺𑀬𑀢𑁆𑀢𑀸. 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀯𑀺𑀫𑀼𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲 𑀘 𑀓𑀸𑀬𑀲𑁆𑀲 𑀘 𑀯𑀺𑀳𑀦𑀦𑀢𑁄 𑀯𑀺𑀖𑀸𑀢𑁄. 𑀤𑀼𑀓𑁆𑀔𑀁 𑀧𑀭𑀺𑀤𑀳𑀦𑀢𑁄 𑀧𑀭𑀺𑀴𑀸𑀳𑁄. 𑀓𑀸𑀫𑀯𑁂𑀤𑀦𑀁 𑀦 𑀯𑁂𑀤𑀺𑀬𑀢𑀺 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀦𑀺𑀲𑁆𑀲𑀭𑀦𑁆𑀢𑀺 𑀢𑀢𑁄𑀢𑀺 𑀦𑀺𑀲𑁆𑀲𑀭𑀡𑀁. 𑀓𑁂 𑀦𑀺𑀲𑁆𑀲𑀭𑀦𑁆𑀢𑀺? 𑀓𑀸𑀫𑀸. 𑀏𑀯𑀜𑁆𑀘 𑀓𑀸𑀫𑀸𑀦𑀦𑁆𑀢𑀺 𑀓𑀢𑁆𑀢𑀼𑀲𑀸𑀫𑀺𑀯𑀘𑀦𑀁 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀺. 𑀬𑀤𑀕𑁆𑀕𑁂𑀦 𑀓𑀸𑀫𑀸 𑀢𑀢𑁄 𑀦𑀺𑀲𑁆𑀲𑀝𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀛𑀸𑀦𑀫𑁆𑀧𑀺 𑀓𑀸𑀫𑀢𑁄 𑀦𑀺𑀲𑁆𑀲𑀝𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀫𑁂𑀳𑀺 𑀦𑀺𑀲𑁆𑀲𑀝𑀢𑁆𑀢𑀸’’𑀢𑀺. 𑀏𑀯𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀸𑀫𑀦𑀺𑀲𑁆𑀲𑀭𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀘𑁆𑀘𑀦𑁆𑀢𑀢𑁄 𑀦𑀺𑀲𑁆𑀲𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀧𑀤𑁂𑀲𑀽𑀢𑀺 𑀲𑁂𑀲𑀓𑁄𑀝𑁆𑀞𑀸𑀲𑁂𑀲𑀼.

𑀅𑀬𑀁 𑀧𑀦 𑀯𑀺𑀲𑁂𑀲𑁄𑀢𑀺 𑀯𑀺𑀲𑁂𑀲𑀁 𑀯𑀤𑀦𑁆𑀢𑁂𑀦 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺𑀆𑀤𑀺𑀓𑁄 𑀅𑀯𑀺𑀲𑁂𑀲𑁄𑀢𑀺 𑀓𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀯𑀸𑀭𑁂𑀲𑀼 𑀲𑀩𑁆𑀩𑀲𑁄 𑀅𑀦𑀸𑀫𑀝𑁆𑀞𑁄, 𑀘𑀢𑀼𑀢𑁆𑀣𑀯𑀸𑀭𑁂 𑀧𑀦 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀘𑀦𑁆𑀢𑀦𑀺𑀲𑁆𑀲𑀭𑀡𑀜𑁆𑀘𑁂𑀢𑁆𑀣 𑀅𑀭𑀳𑀢𑁆𑀢𑀨𑀮𑀁 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀅𑀭𑀽𑀧𑀚𑁆𑀛𑀸𑀦𑀁 ¶ 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀁 𑀅𑀥𑀺𑀕𑀦𑁆𑀢𑁆𑀯𑀸 𑀅𑀭𑀳𑀢𑁆𑀢𑁂 𑀞𑀺𑀢𑀲𑁆𑀲 𑀘𑀺𑀢𑁆𑀢𑀁 𑀲𑀩𑁆𑀩𑀲𑁄 𑀭𑀽𑀧𑁂𑀳𑀺 𑀦𑀺𑀲𑁆𑀲𑀝𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀻𑀫𑀁𑀲𑀦𑀢𑁆𑀣𑀁 𑀭𑀽𑀧𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀧𑁂𑀲𑁂𑀦𑁆𑀢𑀲𑁆𑀲. 𑀇𑀤𑀫𑀓𑁆𑀔𑀸𑀢𑀦𑁆𑀢𑀺 𑀲𑀫𑀣𑀬𑀸𑀦𑀺𑀓𑀸𑀦𑀁 𑀯𑀲𑁂𑀦 𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑁄 𑀯𑀸𑀭𑀸 𑀕𑀳𑀺𑀢𑀸. 𑀇𑀤𑀁 𑀧𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀯𑀲𑁂𑀦𑀸𑀢𑀺 𑀆𑀳 ‘‘𑀲𑀼𑀤𑁆𑀥𑀲𑀗𑁆𑀔𑀸𑀭𑁂’’𑀢𑀺𑀆𑀤𑀺. ‘‘𑀧𑀼𑀦 𑀲𑀓𑁆𑀓𑀸𑀬𑁄 𑀦𑀢𑁆𑀣𑀻’’𑀢𑀺 𑀉𑀧𑁆𑀧𑀦𑁆𑀦𑀦𑁆𑀢𑀺 ‘‘𑀇𑀤𑀸𑀦𑀺 𑀫𑁂 𑀲𑀓𑁆𑀓𑀸𑀬𑀧𑁆𑀧𑀩𑀦𑁆𑀥𑁄 𑀦𑀢𑁆𑀣𑀻’’𑀢𑀺 𑀯𑀻𑀫𑀁𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁.

𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁫. 𑀧𑀜𑁆𑀘𑀫𑀧𑀡𑁆𑀡𑀸𑀲𑀓𑀁

(𑁨𑁧) 𑁧. 𑀓𑀺𑀫𑀺𑀮𑀯𑀕𑁆𑀕𑁄

𑁧-𑁪. 𑀓𑀺𑀫𑀺𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁧-𑁪. 𑀧𑀜𑁆𑀘𑀫𑀲𑁆𑀲 ¶ ¶ 𑀧𑀞𑀫𑀤𑀼𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀢𑀢𑀺𑀬𑁂 𑀅𑀥𑀺𑀯𑀸𑀲𑀦𑀁 𑀔𑀫𑀦𑀁, 𑀧𑀭𑁂𑀲𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀢𑁆𑀢𑀜𑁆𑀘 𑀧𑀝𑀺𑀯𑀺𑀭𑁄𑀥𑀸𑀓𑀭𑀡𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑀦𑀁 𑀅𑀥𑀺𑀯𑀸𑀲𑀦𑀁, 𑀢𑀤𑁂𑀯 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺. 𑀲𑀼𑀪𑁂 𑀭𑀢𑁄𑀢𑀺 𑀲𑀽𑀭𑀢𑁄, 𑀲𑀼𑀝𑁆𑀞𑀼 𑀯𑀸 𑀧𑀸𑀧𑀢𑁄 𑀑𑀭𑀢𑁄 𑀯𑀺𑀭𑀢𑁄 𑀲𑁄𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁. 𑀢𑁂𑀦𑀸𑀳 ‘‘𑀲𑁄𑀭𑀘𑁆𑀘𑁂𑀦𑀸𑀢𑀺 𑀲𑀼𑀘𑀺𑀲𑀻𑀮𑀢𑀸𑀬𑀸’’𑀢𑀺. 𑀲𑀸 𑀳𑀺 𑀲𑁄𑀪𑀦𑀓𑀫𑁆𑀫𑀭𑀢𑀢𑀸, 𑀲𑀼𑀝𑁆𑀞𑀼 𑀯𑀸 𑀧𑀸𑀧𑀢𑁄 𑀑𑀭𑀢𑀪𑀸𑀯𑁄 𑀯𑀺𑀭𑀢𑀢𑀸. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀓𑀺𑀫𑀺𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁫. 𑀧𑀜𑁆𑀘𑀫𑁂 𑀘𑁂𑀢𑁄𑀔𑀺𑀮𑀸 𑀦𑀸𑀫 𑀅𑀢𑁆𑀣𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀓𑁄𑀥𑁄 𑀘. 𑀢𑁂 𑀧𑀦 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀔𑀭𑀪𑀸𑀯𑁄 𑀓𑀓𑁆𑀔𑀴𑀪𑀸𑀯𑁄 𑀳𑀼𑀢𑁆𑀯𑀸 𑀉𑀧𑀢𑀺𑀝𑁆𑀞𑀦𑁆𑀢𑀺, 𑀧𑀕𑁂𑀯 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀆𑀳 ‘‘𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀸’’𑀢𑀺. 𑀬𑀣𑀸 𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀬𑀸 𑀕𑀳𑀺𑀢𑀸𑀬 𑀲𑀩𑁆𑀩𑀸 𑀲𑀢𑁆𑀣𑀼 𑀭𑀽𑀧𑀓𑀸𑀬𑀲𑀺𑀭𑀻 𑀕𑀳𑀺𑀢𑀸 𑀏𑀯 𑀦𑀸𑀫 𑀳𑁄𑀢𑀺 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀩𑁆𑀩𑀥𑀫𑁆𑀫𑀓𑀸𑀬𑀲𑀺𑀭𑀻 𑀕𑀳𑀺𑀢𑀸 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀢𑀤𑀼𑀪𑀬𑀯𑀢𑁆𑀣𑀼𑀓𑀫𑁂𑀯 𑀓𑀗𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀭𑀻𑀭𑁂 𑀓𑀗𑁆𑀔𑀫𑀸𑀦𑁄’’𑀢𑀺𑀆𑀤𑀺𑀫𑀸𑀳. 𑀯𑀺𑀘𑀺𑀦𑀦𑁆𑀢𑁄𑀢𑀺 𑀥𑀫𑁆𑀫𑀲𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑁄. 𑀓𑀺𑀘𑁆𑀙𑀢𑀻𑀢𑀺 𑀓𑀺𑀮𑀫𑀢𑀺. 𑀯𑀺𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀆𑀢𑀧𑀢𑀺 𑀓𑀺𑀮𑁂𑀲𑁂𑀢𑀺 𑀆𑀢𑀧𑁆𑀧𑀁, 𑀲𑀫𑁆𑀫𑀸𑀯𑀸𑀬𑀸𑀫𑁄𑀢𑀺 𑀆𑀳 ‘‘𑀆𑀢𑀧𑁆𑀧𑀸𑀬𑀸𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀦𑀯𑀻𑀭𑀺𑀬𑀓𑀭𑀡𑀢𑁆𑀣𑀸𑀬𑀸’’𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀬𑁄𑀕𑀸𑀬𑀸𑀢𑀺 𑀪𑀸𑀯𑀦𑀁 𑀧𑀼𑀦𑀧𑁆𑀧𑀼𑀦𑀁 𑀬𑀼𑀜𑁆𑀚𑀦𑀸𑀬. 𑀲𑀢𑀢𑀓𑀺𑀭𑀺𑀬𑀸𑀬𑀸𑀢𑀺 𑀪𑀸𑀯𑀦𑀸𑀬 𑀦𑀺𑀭𑀦𑁆𑀢𑀭𑀧𑁆𑀧𑀬𑁄𑀕𑀸𑀬.

𑀧𑀝𑀺𑀯𑁂𑀥𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄𑀢𑀺 𑀏𑀢𑁆𑀣 𑀓𑀣𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀓𑀗𑁆𑀔𑀸 𑀧𑀯𑀢𑁆𑀢𑀻𑀢𑀺? 𑀦 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 ¶ , 𑀅𑀦𑀼𑀲𑁆𑀲𑀼𑀢𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀮𑀤𑁆𑀥𑁂 𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑁂 𑀓𑀗𑁆𑀔𑀸 ¶ 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀯𑀤𑀦𑁆𑀢𑀺, 𑀢𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻𑀢𑀺 𑀓𑀗𑁆𑀔𑀢𑀻’’𑀢𑀺. 𑀲𑀺𑀓𑁆𑀔𑀸𑀢𑀺 𑀘𑁂𑀢𑁆𑀣 𑀧𑀼𑀩𑁆𑀩𑀪𑀸𑀕𑀲𑀺𑀓𑁆𑀔𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀜𑁆𑀘𑁂𑀢𑁆𑀣 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀘𑁂𑀯 𑀲𑀁𑀯𑀸𑀲𑀦𑀺𑀫𑀺𑀢𑁆𑀢𑀁 𑀖𑀝𑀦𑀸𑀳𑁂𑀢𑀼 𑀅𑀪𑀺𑀡𑁆𑀳𑀼𑀧𑁆𑀧𑀢𑁆𑀢𑀺𑀓𑀢𑀸𑀬 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀽𑀢𑀺 𑀓𑁄𑀧𑀲𑁆𑀲 𑀯𑀺𑀲𑀬𑁄 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀅𑀜𑁆𑀜𑀢𑁆𑀣𑀸𑀧𑀺 𑀓𑁄𑀧𑁄 𑀦 𑀘𑁂𑀢𑁄𑀔𑀺𑀮𑁄𑀢𑀺 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀓𑁂𑀘𑀺. 𑀬𑀤𑀺 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀬𑀧𑀺 𑀅𑀬𑀁 𑀦𑀬𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀬𑀣𑀸𑀭𑀼𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀁.

𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀯𑀺𑀦𑀺𑀩𑀦𑁆𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁬-𑁮. 𑀙𑀝𑁆𑀞𑁂 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀓𑀼𑀲𑀮𑀘𑀺𑀢𑁆𑀢𑀁 𑀯𑀺𑀦𑀺𑀩𑀦𑁆𑀥𑀦𑁆𑀢𑀻𑀢𑀺 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸. 𑀢𑀁 𑀧𑀦 𑀯𑀺𑀦𑀺𑀩𑀦𑁆𑀥𑀦𑁆𑀢𑀸 𑀫𑀼𑀝𑁆𑀞𑀺𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀁 𑀯𑀺𑀦𑀺𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺. 𑀓𑀸𑀫𑀕𑀺𑀤𑁆𑀥𑁄 𑀧𑀼𑀕𑁆𑀕𑀮𑁄 𑀯𑀢𑁆𑀣𑀼𑀓𑀸𑀫𑁂𑀧𑀺 𑀓𑀺𑀮𑁂𑀲𑀓𑀸𑀫𑁂𑀧𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀓𑀸𑀫𑁂𑀧𑀺 𑀓𑀺𑀮𑁂𑀲𑀓𑀸𑀫𑁂𑀧𑀻’’𑀢𑀺. 𑀅𑀢𑁆𑀢𑀦𑁄 𑀓𑀸𑀬𑁂𑀢𑀺 𑀅𑀢𑁆𑀢𑀦𑁄 𑀦𑀸𑀫𑀓𑀸𑀬𑁂, 𑀅𑀢𑁆𑀢𑀪𑀸𑀯𑁂 𑀯𑀸. 𑀩𑀳𑀺𑀤𑁆𑀥𑀸𑀭𑀽𑀧𑁂𑀢𑀺 𑀧𑀭𑁂𑀲𑀁 𑀓𑀸𑀬𑁂 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂 𑀘. 𑀉𑀤𑀭𑀁 𑀅𑀯𑀤𑀺𑀳𑀢𑀺 𑀉𑀧𑀘𑀺𑀦𑁄𑀢𑀺 𑀧𑀽𑀭𑁂𑀢𑀻𑀢𑀺 𑀉𑀤𑀭𑀸𑀯𑀤𑁂𑀳𑀓𑀁. 𑀲𑁂𑀬𑁆𑀬𑀲𑀼𑀔𑀦𑁆𑀢𑀺 𑀲𑁂𑀬𑁆𑀬𑀸𑀬 𑀲𑀬𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁. 𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑁆𑀯𑀸. 𑀧𑀡𑀺𑀥𑀸𑀬𑀸𑀢𑀺 𑀢𑀡𑁆𑀳𑀸𑀯𑀲𑁂𑀦𑁂𑀯 𑀧𑀡𑀺𑀤𑀳𑀺𑀢𑁆𑀯𑀸. 𑀇𑀢𑀺 𑀧𑀜𑁆𑀘𑀯𑀺𑀥𑁄𑀧𑀺 𑀮𑁄𑀪𑀯𑀺𑀲𑁂𑀲𑁄 𑀏𑀯 ‘‘𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀯𑀺𑀦𑀺𑀩𑀦𑁆𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀕𑀻𑀢𑀲𑁆𑀲𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁯-𑁨𑁧𑁦. 𑀦𑀯𑀫𑁂 𑀆𑀬𑀢𑀓𑁄 𑀦𑀸𑀫 𑀕𑀻𑀢𑀲𑁆𑀲𑀭𑁄 𑀢𑀁 𑀢𑀁 𑀯𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀯𑀺𑀦𑀸𑀲𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀆𑀬𑀢𑀓𑁂𑀦𑀸’’𑀢𑀺𑀆𑀤𑀺. 𑀥𑀫𑁆𑀫𑁂𑀳𑀺 𑀲𑀼𑀢𑁆𑀢𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀕𑀸𑀣𑀸𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑀺𑀤𑀻𑀖𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀥𑀫𑁆𑀫𑀜𑁆𑀳𑀺 𑀪𑀸𑀲𑀦𑁆𑀢𑁂𑀦 𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀸𑀦𑀺 ¶ 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀭𑀪𑀜𑁆𑀜’’𑀦𑁆𑀢𑀺 (𑀘𑀽𑀴𑀯. 𑁨𑁪𑁯) 𑀘 𑀯𑀘𑀦𑀢𑁄 𑀲𑀭𑁂𑀦 𑀥𑀫𑁆𑀫𑀁 𑀪𑀡𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀭𑀪𑀜𑁆𑀜𑁂 𑀓𑀺𑀭 𑀢𑀭𑀗𑁆𑀕𑀯𑀢𑁆𑀢𑀥𑁄𑀢𑀓𑀯𑀢𑁆𑀢𑀪𑀸𑀕𑀕𑁆𑀕𑀳𑀓𑀯𑀢𑁆𑀢𑀸𑀤𑀻𑀦𑀺 ¶ 𑀤𑁆𑀯𑀢𑁆𑀢𑀺𑀁𑀲 𑀯𑀢𑁆𑀢𑀸𑀦𑀺 𑀅𑀢𑁆𑀣𑀺. 𑀢𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀸𑀢𑀼𑀁 𑀮𑀪𑀢𑀻𑀢𑀺. 𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀕𑀻𑀢𑀲𑁆𑀲𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀫𑀺𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨𑁨) 𑁨. 𑀅𑀓𑁆𑀓𑁄𑀲𑀓𑀯𑀕𑁆𑀕𑁄

𑁧-𑁨. 𑀅𑀓𑁆𑀓𑁄𑀲𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁧-𑁨. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀓𑁄𑀢𑀺 ‘‘𑀩𑀸𑀮𑁄𑀲𑀺, 𑀫𑀽𑀴𑁆𑀳𑁄𑀲𑀺, 𑀑𑀝𑁆𑀞𑁄𑀲𑀺, 𑀕𑁄𑀡𑁄𑀲𑀺, 𑀕𑀤𑁆𑀭𑀪𑁄𑀲𑀻’’𑀢𑀺𑀆𑀤𑀺𑀦𑀸 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀓𑁄. ‘‘𑀳𑁄𑀢𑀼, 𑀫𑀼𑀡𑁆𑀟𑀓𑀲𑀫𑀡, 𑀅𑀤𑀡𑁆𑀟𑁄 𑀅𑀳𑀦𑁆𑀢𑀺 𑀓𑀭𑁄𑀲𑀺, 𑀇𑀤𑀸𑀦𑀺 𑀢𑁂 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀤𑀡𑁆𑀟𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀭𑀺𑀪𑀸𑀲𑀓𑁄 𑀦𑀸𑀫𑀸𑀢𑀺 𑀆𑀳 ‘‘𑀪𑀬𑀤𑀲𑁆𑀲𑀦𑁂𑀦 𑀧𑀭𑀺𑀪𑀸𑀲𑀓𑁄’’𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀅𑀧𑀸𑀬𑀫𑀕𑁆𑀕𑀲𑁆𑀲 𑀧𑀭𑀺𑀧𑀦𑁆𑀣𑀪𑀸𑀯𑀢𑁄 𑀧𑀭𑀺𑀧𑀦𑁆𑀣𑁄 𑀦𑀸𑀫𑀸𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀧𑀭𑀺𑀧𑀦𑁆𑀣𑀲𑁆𑀲 𑀙𑀺𑀦𑁆𑀦𑀢𑁆𑀢𑀸’’𑀢𑀺, 𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀢𑀲𑁆𑀲 𑀅𑀧𑀸𑀬𑀫𑀕𑁆𑀕𑀧𑀭𑀺𑀧𑀦𑁆𑀣𑀲𑁆𑀲 𑀙𑀺𑀦𑁆𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀓𑁆𑀓𑁄𑀲𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁧𑁦. 𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁩-𑁨𑁨𑁦. 𑀢𑀢𑀺𑀬𑁂 (𑀤𑀻. 𑀦𑀺. 𑀝𑀻. 𑁨.𑁧𑁪𑁯) 𑀤𑀼𑀲𑁆𑀲𑀻𑀮𑁄𑀢𑀺 𑀏𑀢𑁆𑀣 𑀤𑀼-𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄 ‘‘𑀤𑀼𑀧𑁆𑀧𑀜𑁆𑀜𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁪𑁯) 𑀯𑀺𑀬, 𑀦 𑀕𑀭𑀳𑀡𑀢𑁆𑀣𑁄𑀢𑀺 𑀆𑀳 ‘‘𑀅𑀲𑀻𑀮𑁄 𑀦𑀺𑀲𑁆𑀲𑀻𑀮𑁄’’𑀢𑀺. 𑀪𑀺𑀦𑁆𑀦𑀲𑀁𑀯𑀭𑁄𑀢𑀺 𑀏𑀢𑁆𑀣 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀲𑀻𑀮𑀪𑁂𑀤𑀁 𑀧𑀢𑁆𑀢𑁄, 𑀲𑁄 𑀢𑀸𑀯 𑀪𑀺𑀦𑁆𑀦𑀲𑀁𑀯𑀭𑁄 𑀳𑁄𑀢𑀼. 𑀬𑁄 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀆𑀘𑀸𑀭𑀳𑀻𑀦𑁄, 𑀲𑁄 𑀓𑀣𑀁 𑀪𑀺𑀦𑁆𑀦𑀲𑀁𑀯𑀭𑁄 𑀦𑀸𑀫 𑀳𑁄𑀢𑀻𑀢𑀺 ¶ ? 𑀲𑁄𑀧𑀺 𑀲𑀸𑀥𑀼𑀲𑀫𑀸𑀘𑀸𑀭𑀲𑁆𑀲 𑀧𑀭𑀺𑀳𑀭𑀡𑀻𑀬𑀲𑁆𑀲 𑀪𑁂𑀤𑀺𑀢𑀢𑁆𑀢𑀸 𑀪𑀺𑀦𑁆𑀦𑀲𑀁𑀯𑀭𑁄 𑀏𑀯 𑀦𑀸𑀫. 𑀯𑀺𑀦𑀝𑁆𑀞𑀲𑀁𑀯𑀭𑁄 𑀲𑀁𑀯𑀭𑀭𑀳𑀺𑀢𑁄𑀢𑀺 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀢𑀁 𑀲𑀺𑀧𑁆𑀧𑀝𑁆𑀞𑀸𑀦𑀁. 𑀫𑀸𑀖𑀸𑀢𑀓𑀸𑀮𑁂𑀢𑀺 ‘‘𑀫𑀸 𑀖𑀸𑀢𑁂𑀣 𑀧𑀸𑀡𑀻𑀦’’𑀦𑁆𑀢𑀺 ¶ 𑀏𑀯𑀁 𑀫𑀸𑀖𑀸𑀢𑀖𑁄𑀲𑀦𑀁 𑀖𑁄𑀲𑀺𑀢𑀤𑀺𑀯𑀲𑁂. 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀅𑀚𑁆𑀛𑀸𑀲𑀬𑁂𑀦 𑀫𑀗𑁆𑀓𑀼 𑀳𑁄𑀢𑀺𑀬𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑀺𑀪𑀸𑀯𑀢𑁄.

𑀢𑀲𑁆𑀲𑀸𑀢𑀺 𑀤𑀼𑀲𑁆𑀲𑀻𑀮𑀲𑁆𑀲. 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀝𑁆𑀞𑀸𑀦𑀦𑁆𑀢𑀺 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀓𑀢𑀓𑀸𑀭𑀡𑀁. 𑀆𑀧𑀸𑀣𑀁 𑀆𑀕𑀘𑁆𑀙𑀢𑀻𑀢𑀺 𑀢𑀁 𑀫𑀦𑀲𑁄 𑀉𑀧𑀝𑁆𑀞𑀸𑀢𑀺. 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀥𑀮𑁄𑀓𑀦𑁆𑀢𑀺 𑀉𑀫𑁆𑀫𑀻𑀮𑀦𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀸𑀤𑀺𑀯𑀲𑁂𑀦 𑀇𑀥𑀮𑁄𑀓𑀁 𑀧𑀲𑁆𑀲𑀢𑀺. 𑀦𑀺𑀫𑀻𑀮𑁂𑀢𑁆𑀯𑀸 𑀧𑀭𑀮𑁄𑀓𑀦𑁆𑀢𑀺 𑀦𑀺𑀫𑀻𑀮𑀦𑀓𑀸𑀮𑁂 𑀕𑀢𑀺𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀧𑀭𑀮𑁄𑀓𑀁 𑀧𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑁄 𑀅𑀧𑀸𑀬𑀸’’𑀢𑀺𑀆𑀤𑀺. 𑀧𑀜𑁆𑀘𑀫𑀧𑀤𑀦𑁆𑀢𑀺 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀧𑀜𑁆𑀘𑀫𑁄 𑀆𑀤𑀻𑀦𑀯𑀓𑁄𑀝𑁆𑀞𑀸𑀲𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀣𑀸𑀬 𑀆𑀤𑀻𑀦𑀯𑀓𑀣𑀸𑀬 𑀯𑀺𑀧𑀭𑀺𑀬𑀸𑀬𑁂𑀦 ‘‘𑀅𑀧𑁆𑀧𑀫𑀢𑁆𑀢𑁄 𑀢𑀁 𑀢𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀁 𑀬𑀣𑀸𑀓𑀸𑀮𑀁 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺𑀆𑀤𑀺𑀦𑀸. 𑀧𑀸𑀲𑀁𑀲𑀁 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀧𑀦𑁆𑀦𑀲𑀻𑀮𑁄𑀢𑀺 𑀏𑀯𑀫𑀸𑀤𑀺𑀓𑀁 𑀧𑀦 𑀅𑀢𑁆𑀣𑀯𑀘𑀦𑀁 𑀲𑀼𑀓𑀭𑀦𑁆𑀢𑀺 𑀅𑀦𑀸𑀫𑀝𑁆𑀞𑀁. 𑀘𑀢𑀼𑀢𑁆𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑁆𑀓𑁄𑀲𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨𑁩) 𑁩. 𑀤𑀻𑀖𑀘𑀸𑀭𑀺𑀓𑀯𑀕𑁆𑀕𑁄

𑁧-𑁧𑁦. 𑀧𑀞𑀫𑀤𑀻𑀖𑀘𑀸𑀭𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁧-𑁨𑁩𑁦. 𑀢𑀢𑀺𑀬𑀲𑁆𑀲 𑀧𑀞𑀫𑀸𑀤𑀻𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. 𑀧𑀜𑁆𑀘𑀫𑁂 𑀭𑀳𑁄 𑀦𑀺𑀲𑀚𑁆𑀚𑀸𑀬 𑀆𑀧𑀚𑁆𑀚𑀢𑀻𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁨𑁯𑁦) 𑀯𑀼𑀢𑁆𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀆𑀧𑀚𑁆𑀚𑀢𑀻𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀯𑀼𑀢𑁆𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀫𑀸𑀢𑀼𑀕𑀸𑀫𑀲𑁆𑀲 𑀉𑀢𑁆𑀢𑀭𑀺 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ¶ 𑀆𑀧𑀚𑁆𑀚𑀢𑀻𑀢𑀺 ‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑀲𑁆𑀲 𑀉𑀢𑁆𑀢𑀭𑀺 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬 𑀅𑀜𑁆𑀜𑀢𑁆𑀭 ¶ 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦𑀸’’𑀢𑀺 (𑀧𑀸𑀘𑀺. 𑁬𑁩) 𑀏𑀯𑀁 𑀯𑀼𑀢𑁆𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀧𑀞𑀫𑀤𑀻𑀖𑀘𑀸𑀭𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀻𑀖𑀘𑀸𑀭𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁧-𑁩𑁦𑁨. 𑀘𑀢𑀼𑀢𑁆𑀣𑀯𑀕𑁆𑀕𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀧𑀜𑁆𑀘𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀙𑀓𑁆𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀆𑀳𑀼𑀦𑁂𑀬𑁆𑀬𑀯𑀕𑁆𑀕𑁄

𑁧. 𑀧𑀞𑀫𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀙𑀓𑁆𑀓𑀦𑀺𑀧𑀸𑀢𑀲𑁆𑀲 ¶ ¶ 𑀧𑀞𑀫𑁂 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀲𑀲𑀫𑁆𑀪𑀸𑀭𑀓𑀦𑀺𑀤𑁆𑀤𑁂𑀲𑁄𑀬𑀁 𑀬𑀣𑀸 ‘‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’’𑀢𑀺, 𑀢𑀲𑁆𑀫𑀸 𑀦𑀺𑀲𑁆𑀲𑀬𑀲𑀻𑀲𑁂𑀦 𑀦𑀺𑀲𑁆𑀲𑀺𑀢𑀲𑁆𑀲 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀬𑀫𑀢𑁆𑀣𑁄 ‘‘𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀲𑁆𑀯𑀸’’𑀢𑀺. 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀻𑀢𑀺 𑀚𑀯𑀦𑀓𑁆𑀔𑀡𑁂 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀭𑀸𑀕𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦𑀧𑀺 𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀭𑀸𑀕𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀦 𑀤𑀼𑀫𑁆𑀫𑀦𑁄𑀢𑀺 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑁄 𑀦 𑀤𑀼𑀫𑁆𑀫𑀦𑁄. 𑀧𑀲𑀸𑀤𑀜𑁆𑀜𑀣𑀢𑁆𑀢𑀯𑀲𑁂𑀦𑀧𑀺 𑀇𑀝𑁆𑀞𑁂𑀧𑀺 𑀅𑀦𑀺𑀝𑁆𑀞𑁂𑀧𑀺 𑀫𑀚𑁆𑀛𑀢𑁆𑀢𑁂𑀧𑀺 𑀆𑀭𑀫𑁆𑀫𑀡𑁂 𑀦 𑀲𑀫𑀁 𑀲𑀫𑁆𑀫𑀸 𑀅𑀬𑁄𑀦𑀺𑀲𑁄 𑀕𑀳𑀡𑀁 𑀅𑀲𑀫𑀧𑁂𑀓𑁆𑀔𑀦𑀁. 𑀅𑀬𑀜𑁆𑀘𑀲𑁆𑀲 𑀧𑀝𑀺𑀧𑀢𑁆𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 ¶ 𑀘𑀸𑀢𑀺 𑀆𑀳 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸’’𑀢𑀺. 𑀲𑀢𑀺𑀬𑀸 𑀬𑀼𑀢𑁆𑀢𑀢𑁆𑀢𑀸 𑀲𑀢𑁄. 𑀲𑀫𑁆𑀧𑀚𑀜𑁆𑀜𑁂𑀦 𑀬𑀼𑀢𑁆𑀢𑀢𑁆𑀢𑀸 𑀲𑀫𑁆𑀧𑀚𑀸𑀦𑁄. 𑀜𑀸𑀡𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀭𑀳𑀺𑀢𑀓𑀸𑀮𑁂𑀧𑀺 𑀧𑀯𑀢𑁆𑀢𑀺𑀪𑁂𑀤𑀦𑀢𑁄 ‘‘𑀲𑀢𑀢𑀯𑀺𑀳𑀸𑀭𑁄 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀢𑀢𑀯𑀺𑀳𑀸𑀭𑁄𑀢𑀺 𑀔𑀻𑀡𑀸𑀲𑀯𑀲𑁆𑀲 𑀦𑀺𑀘𑁆𑀘𑀯𑀺𑀳𑀸𑀭𑁄 𑀲𑀩𑁆𑀩𑀤𑀸 𑀧𑀯𑀢𑁆𑀢𑀦𑀓𑀯𑀺𑀳𑀸𑀭𑁄. 𑀞𑀧𑁂𑀢𑁆𑀯𑀸 𑀳𑀺 𑀲𑀫𑀸𑀧𑀢𑁆𑀢𑀺𑀯𑁂𑀮𑀁 𑀪𑀯𑀗𑁆𑀕𑀯𑁂𑀮𑀜𑁆𑀘 𑀔𑀻𑀡𑀸𑀲𑀯𑀸 𑀇𑀫𑀺𑀦𑀸𑀯 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀺.

𑀏𑀢𑁆𑀣 𑀘 ‘‘𑀙𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀓𑀣𑀺𑀢𑀸. ‘‘𑀲𑀫𑁆𑀧𑀚𑀸𑀦𑁄’’𑀢𑀺 𑀯𑀘𑀦𑀢𑁄 𑀧𑀦 𑀘𑀢𑁆𑀢𑀸𑀭𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺 𑀢𑁂𑀳𑀺 𑀯𑀺𑀦𑀸 𑀲𑀫𑁆𑀧𑀚𑀸𑀦𑀢𑀸𑀬 𑀅𑀲𑀫𑁆𑀪𑀯𑀢𑁄. 𑀲𑀢𑀢𑀯𑀺𑀳𑀸𑀭𑀪𑀸𑀯𑀢𑁄 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. ‘‘𑀦𑁂𑀯 𑀲𑀼𑀫𑀦𑁄 𑀦 𑀤𑀼𑀫𑁆𑀫𑀦𑁄’’𑀢𑀺 𑀯𑀘𑀦𑀢𑁄 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀳𑀲𑀺𑀢𑀼𑀧𑁆𑀧𑀸𑀤𑁄, 𑀯𑁄𑀝𑁆𑀞𑀩𑁆𑀩𑀦𑀜𑁆𑀘𑀸𑀢𑀺 𑀤𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀭𑀸𑀕𑀤𑁄𑀲𑀲𑀳𑀚𑀸𑀢𑀸𑀦𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀪𑀸𑀯𑁄 𑀢𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀕𑀢𑀸𑀦𑀁 𑀇𑀫𑁂𑀲𑀁 𑀲𑀢𑀢𑀯𑀺𑀳𑀸𑀭𑀸𑀦𑀁 𑀲𑁄𑀫𑀦𑀲𑁆𑀲𑀁 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀘𑁂? 𑀆𑀲𑁂𑀯𑀦𑀢𑁄. 𑀓𑀺𑀜𑁆𑀘𑀸𑀧𑀺 ¶ 𑀔𑀻𑀡𑀸𑀲𑀯𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀧𑀺 𑀆𑀭𑀫𑁆𑀫𑀡𑁂 𑀫𑀚𑁆𑀛𑀢𑁆𑀢𑁄 𑀯𑀺𑀬 𑀩𑀳𑀼𑀮𑀁 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀢𑁄, 𑀓𑀤𑀸𑀘𑀺 𑀧𑀦 𑀢𑀣𑀸 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀸𑀪𑀸𑀯𑁂 𑀬𑀁 𑀢𑀁 𑀲𑀪𑀸𑀯𑀢𑁄 𑀇𑀝𑁆𑀞𑀁 𑀆𑀭𑀫𑁆𑀫𑀡𑀁, 𑀢𑀲𑁆𑀲 𑀬𑀸𑀣𑀸𑀯𑀲𑀪𑀸𑀯𑀕𑁆𑀕𑀳𑀡𑀯𑀲𑁂𑀦𑀧𑀺 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀧𑀼𑀩𑁆𑀩𑀸𑀲𑁂𑀯𑀦𑀯𑀲𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑁂𑀯.

𑀧𑀞𑀫𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁭. 𑀤𑀼𑀢𑀺𑀬𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨-𑁭. 𑀤𑀼𑀢𑀺𑀬𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁮𑁦) 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀁. 𑀇𑀤𑁆𑀥𑀺𑀯𑀺𑀥𑀦𑁆𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀁. 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀧𑀘𑁆𑀘𑀦𑀼𑀪𑀯𑀢𑀺, 𑀨𑀼𑀲𑀢𑀺 𑀲𑀘𑁆𑀙𑀺𑀓𑀭𑁄𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺𑀲𑁆𑀲 𑀅𑀦𑁂𑀓𑀯𑀺𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀭𑀡𑀢𑁄 𑀧𑀼𑀩𑁆𑀩𑁂𑀯 𑀧𑀓𑀢𑀺𑀬𑀸 𑀏𑀓𑁄𑀧𑀺 𑀳𑀼𑀢𑁆𑀯𑀸. 𑀩𑀳𑀼𑀥𑀸 𑀳𑁄𑀢𑀻𑀢𑀺 𑀩𑀳𑀽𑀦𑀁 𑀲𑀦𑁆𑀢𑀺𑀓𑁂 𑀘𑀗𑁆𑀓𑀫𑀺𑀢𑀼𑀓𑀸𑀫𑁄 𑀯𑀸 𑀲𑀚𑁆𑀛𑀸𑀬𑀁 𑀓𑀸𑀢𑀼𑀓𑀸𑀫𑁄 𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀯𑀸 𑀳𑀼𑀢𑁆𑀯𑀸 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀳𑁄𑀢𑀺. 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀦𑁆𑀢𑀺 𑀏𑀢𑁆𑀣 𑀆𑀯𑀺𑀪𑀸𑀯𑀁 𑀓𑀭𑁄𑀢𑀺, 𑀢𑀺𑀭𑁄𑀪𑀸𑀯𑀁 𑀓𑀭𑁄𑀢𑀻𑀢𑀺 𑀅𑀬𑀫𑀢𑁆𑀣𑁄. 𑀇𑀤𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁩.𑁧𑁧) 𑀯𑀼𑀢𑁆𑀢𑀁 𑁋 ‘‘𑀆𑀯𑀺𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀅𑀦𑀸𑀯𑀼𑀝𑀁 𑀳𑁄𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀝𑀁, 𑀢𑀺𑀭𑁄𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀆𑀯𑀼𑀝𑀁 𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀧𑀺𑀳𑀺𑀢𑀁 𑀧𑀝𑀺𑀓𑀼𑀚𑁆𑀚𑀺𑀢’’𑀦𑁆𑀢𑀺. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂𑀢𑀺 𑀏𑀢𑁆𑀣 𑀢𑀺𑀭𑁄𑀓𑀼𑀝𑁆𑀝𑀦𑁆𑀢𑀺 𑀧𑀭𑀓𑀼𑀝𑁆𑀝𑀁, 𑀓𑀼𑀝𑁆𑀝𑀲𑁆𑀲 𑀧𑀭𑀪𑀸𑀕𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼. 𑀓𑀼𑀝𑁆𑀝𑁄𑀢𑀺 𑀘 𑀕𑁂𑀳𑀪𑀺𑀢𑁆𑀢𑀺𑀬𑀸 ¶ 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀓𑀸𑀭𑁄𑀢𑀺 𑀕𑁂𑀳𑀯𑀺𑀳𑀸𑀭𑀕𑀸𑀫𑀸𑀤𑀻𑀦𑀁 𑀧𑀭𑀺𑀓𑁆𑀔𑁂𑀧𑀧𑀸𑀓𑀸𑀭𑁄. 𑀧𑀩𑁆𑀩𑀢𑁄𑀢𑀺 𑀧𑀁𑀲𑀼𑀧𑀩𑁆𑀩𑀢𑁄 𑀯𑀸 𑀧𑀸𑀲𑀸𑀡𑀧𑀩𑁆𑀩𑀢𑁄 𑀯𑀸. 𑀅𑀲𑀚𑁆𑀚𑀫𑀸𑀦𑁄𑀢𑀺 𑀅𑀮𑀕𑁆𑀕𑀫𑀸𑀦𑁄 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂 𑀯𑀺𑀬.

𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀦𑁆𑀢𑀺 𑀏𑀢𑁆𑀣 𑀉𑀫𑁆𑀫𑀼𑀚𑁆𑀚𑀦𑁆𑀢𑀺 𑀉𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀦𑀺𑀫𑀼𑀚𑁆𑀚𑀦𑁆𑀢𑀺 𑀲𑀁𑀲𑀻𑀤𑀦𑀁. 𑀉𑀫𑁆𑀫𑀼𑀚𑁆𑀚𑀜𑁆𑀘 𑀦𑀺𑀫𑀼𑀚𑁆𑀚𑀜𑁆𑀘 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁. 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀬𑀁 𑀉𑀤𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀁𑀲𑀻𑀤𑀢𑀺, 𑀢𑀁 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀯𑀺𑀧𑀭𑀻𑀢𑀁 𑀅𑀪𑀺𑀚𑁆𑀚𑀫𑀸𑀦𑀁. 𑀧𑀮𑁆𑀮𑀗𑁆𑀓𑁂𑀦 𑀕𑀘𑁆𑀙𑀢𑀺. 𑀧𑀓𑁆𑀔𑀻 ¶ 𑀲𑀓𑀼𑀡𑁄𑀢𑀺 𑀧𑀓𑁆𑀔𑁂𑀳𑀺 𑀬𑀼𑀢𑁆𑀢𑀲𑀓𑀼𑀡𑁄. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀻𑀢𑀺 𑀏𑀢𑁆𑀣 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀲𑁆𑀲 𑀉𑀧𑀭𑀺 𑀘𑀭𑀡𑁂𑀦 𑀫𑀳𑀺𑀤𑁆𑀥𑀺𑀓𑀢𑀸, 𑀢𑀻𑀲𑀼 𑀤𑀻𑀧𑁂𑀲𑀼 𑀏𑀓𑀓𑁆𑀔𑀡𑁂 𑀆𑀮𑁄𑀓𑀓𑀭𑀡𑁂𑀦 𑀫𑀳𑀸𑀦𑀼𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀉𑀧𑀭𑀺𑀘𑀭𑀡𑀆𑀮𑁄𑀓𑀓𑀭𑀡𑁂𑀳𑀺 𑀫𑀳𑀺𑀤𑁆𑀥𑀺𑀓𑁂 𑀫𑀳𑀸𑀦𑀼𑀪𑀸𑀯𑁂. 𑀧𑀭𑀸𑀫𑀲𑀢𑀻𑀢𑀺 𑀕𑀡𑁆𑀳𑀸𑀢𑀺, 𑀏𑀓𑀤𑁂𑀲𑁂 𑀯𑀸 𑀙𑀼𑀧𑀢𑀺. 𑀧𑀭𑀺𑀫𑀚𑁆𑀚𑀢𑀻𑀢𑀺 𑀲𑀫𑀦𑁆𑀢𑀢𑁄 𑀆𑀤𑀸𑀲𑀢𑀮𑀸 𑀯𑀺𑀬 𑀧𑀭𑀺𑀫𑀚𑁆𑀚𑀢𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀻𑀢𑀺 𑀩𑁆𑀭𑀳𑁆𑀫𑀮𑁄𑀓𑀫𑁆𑀧𑀺 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀢𑀢𑁆𑀭 𑀩𑁆𑀭𑀳𑁆𑀫𑀮𑁄𑀓𑁂 𑀓𑀸𑀬𑁂𑀦 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀢𑀺.

𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸𑀢𑀺 𑀏𑀢𑁆𑀣 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀸. 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀸 𑀤𑀺𑀩𑁆𑀩𑀸 𑀧𑀲𑀸𑀤𑀲𑁄𑀢𑀥𑀸𑀢𑀼 𑀳𑁄𑀢𑀺. 𑀅𑀬𑀜𑁆𑀘𑀸𑀧𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀸 𑀜𑀸𑀡𑀲𑁄𑀢𑀥𑀸𑀢𑀼 𑀢𑀸𑀤𑀺𑀲𑀸𑀬𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀸. 𑀅𑀧𑀺𑀘 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀸. 𑀲𑀯𑀦𑀝𑁆𑀞𑁂𑀦 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀘 𑀲𑁄𑀢𑀥𑀸𑀢𑀼. 𑀲𑁄𑀢𑀥𑀸𑀢𑀼𑀓𑀺𑀘𑁆𑀘𑀓𑀭𑀡𑁂𑀦 𑀲𑁄𑀢𑀥𑀸𑀢𑀼 𑀯𑀺𑀬𑀸𑀢𑀺𑀧𑀺 𑀲𑁄𑀢𑀥𑀸𑀢𑀼. 𑀢𑀸𑀬 𑀲𑁄𑀢𑀥𑀸𑀢𑀼𑀬𑀸. 𑀯𑀺𑀲𑀼𑀤𑁆𑀥𑀸𑀬𑀸𑀢𑀺 𑀲𑀼𑀤𑁆𑀥𑀸𑀬 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸𑀬. 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬𑀸𑀢𑀺 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀤𑁆𑀤𑀲𑀯𑀦𑁂 𑀫𑀸𑀦𑀼𑀲𑀺𑀓𑀁 𑀫𑀁𑀲𑀲𑁄𑀢𑀥𑀸𑀢𑀼𑀁 𑀅𑀢𑀺𑀓𑁆𑀓𑀦𑁆𑀢𑀸𑀬 𑀯𑀻𑀢𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑀸𑀬. 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀻𑀢𑀺 𑀤𑁆𑀯𑁂 𑀲𑀤𑁆𑀤𑁂 𑀲𑀼𑀡𑀸𑀢𑀺. 𑀓𑀢𑀫𑁂 𑀤𑁆𑀯𑁂? 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘, 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀲𑀤𑁆𑀤𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀧𑀤𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘𑀸𑀢𑀺 𑀬𑁂 𑀲𑀤𑁆𑀤𑀸 𑀤𑀽𑀭𑁂 𑀧𑀭𑀘𑀓𑁆𑀓𑀯𑀸𑀴𑁂𑀧𑀺, 𑀬𑁂 𑀘 𑀲𑀦𑁆𑀢𑀺𑀓𑁂 𑀅𑀦𑁆𑀢𑀫𑀲𑁄 𑀲𑀤𑁂𑀳𑀲𑀦𑁆𑀦𑀺𑀲𑁆𑀲𑀺𑀢𑀧𑀸𑀡𑀓𑀲𑀤𑁆𑀤𑀸𑀧𑀺, 𑀢𑁂 𑀲𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀦𑀺𑀧𑁆𑀧𑀤𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀇𑀤𑀫𑁆𑀧𑀺 𑀇𑀫𑀺𑀦𑀸 𑀏𑀓𑀢𑁆𑀣𑀫𑁂𑀯. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀩𑁆𑀬𑀜𑁆𑀚𑀦𑀦𑀸𑀦𑀢𑁆𑀢𑀁 𑀓𑀢𑀁. 𑀘𑁂𑀢𑀲𑀸 𑀘𑁂𑀢𑁄𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀢𑁂𑀲𑀁 𑀘𑀺𑀢𑁆𑀢𑀁. 𑀧𑀭𑀺𑀘𑁆𑀘𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀧𑀚𑀸𑀦𑀸𑀢𑀻𑀢𑀺 𑀲𑀭𑀸𑀕𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀸𑀢𑀺. 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀲𑁂𑀲𑀁 𑀘𑀸𑀢𑀼𑀪𑀽𑀫𑀓𑀁 ¶ 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁. 𑀤𑁆𑀯𑁂 ¶ 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀸𑀦𑀺, 𑀤𑁆𑀯𑁂 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀘𑀺𑀢𑁆𑀢𑀸𑀦𑀻𑀢𑀺 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 𑀢𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀤𑀼𑀯𑀺𑀥𑀁 𑀧𑀦 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀁 𑀲𑀤𑁄𑀲𑀁 𑀘𑀺𑀢𑁆𑀢𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑀸𑀢𑀼𑀪𑀽𑀫𑀓𑀁 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀁 𑀯𑀻𑀢𑀤𑁄𑀲𑀁. 𑀲𑁂𑀲𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀇𑀫𑀲𑁆𑀫𑀺𑀁 𑀤𑀼𑀓𑁂 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 𑀢𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀲𑀫𑁄𑀳𑀁 𑀯𑀻𑀢𑀫𑁄𑀳𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀦𑀬𑁂𑀦 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀤𑁆𑀯𑀬𑀫𑁂𑀯 𑀲𑀫𑁄𑀳𑀁. 𑀫𑁄𑀳𑀲𑁆𑀲 𑀧𑀦 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀲𑀫𑁆𑀪𑀯𑀢𑁄 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀁 𑀲𑀫𑁄𑀳𑀁 𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀲𑁂𑀲𑀁 𑀯𑀻𑀢𑀫𑁄𑀳𑀁. 𑀣𑀺𑀦𑀫𑀺𑀤𑁆𑀥𑀸𑀦𑀼𑀕𑀢𑀁 𑀧𑀦 𑀲𑀁𑀔𑀺𑀢𑁆𑀢𑀁, 𑀉𑀤𑁆𑀥𑀘𑁆𑀘𑀸𑀦𑀼𑀕𑀢𑀁 𑀯𑀺𑀓𑁆𑀔𑀺𑀢𑁆𑀢𑀁. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀁 𑀫𑀳𑀕𑁆𑀕𑀢𑀁, 𑀅𑀯𑀲𑁂𑀲𑀁 𑀅𑀫𑀳𑀕𑁆𑀕𑀢𑀁. 𑀲𑀩𑁆𑀩𑀫𑁆𑀧𑀺 𑀢𑁂𑀪𑀽𑀫𑀓𑀁 𑀲𑀉𑀢𑁆𑀢𑀭𑀁, 𑀮𑁄𑀓𑀼𑀢𑁆𑀢𑀭𑀁 𑀅𑀦𑀼𑀢𑁆𑀢𑀭𑀁. 𑀉𑀧𑀘𑀸𑀭𑀧𑁆𑀧𑀢𑁆𑀢𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀜𑁆𑀘 𑀲𑀫𑀸𑀳𑀺𑀢𑀁, 𑀉𑀪𑀬𑀫𑀧𑁆𑀧𑀢𑁆𑀢𑀁 𑀅𑀲𑀫𑀸𑀳𑀺𑀢𑀁. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀁 𑀧𑀢𑁆𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀏𑀢𑀁 𑀯𑀺𑀫𑀼𑀢𑁆𑀢𑀁, 𑀯𑀺𑀫𑀼𑀢𑁆𑀢𑀺𑀫𑀧𑁆𑀧𑀢𑁆𑀢𑀁 𑀯𑀸 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁨) 𑀅𑀦𑁂𑀓𑀯𑀺𑀥𑀁, 𑀅𑀦𑁂𑀓𑁂𑀳𑀺 𑀯𑀸 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑀪𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦𑀁. 𑀅𑀦𑀼𑀲𑁆𑀲𑀭𑀢𑀻𑀢𑀺 𑀔𑀦𑁆𑀥𑀧𑀝𑀺𑀧𑀸𑀝𑀺𑀯𑀲𑁂𑀦, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁…𑀧𑁂… 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀻𑀢𑀺. 𑀢𑀢𑁆𑀣 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑀽𑀮𑀁 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁. 𑀏𑀲 𑀦𑀬𑁄 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺𑀆𑀤𑀻𑀲𑀼𑀧𑀺. 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺𑀆𑀤𑀻𑀲𑀼 𑀧𑀦 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀓𑀧𑁆𑀧𑁄, 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀁𑀯𑀝𑁆𑀝𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀕𑀳𑀺𑀢𑁄 𑀳𑁄𑀢𑀺 𑀢𑀁𑀫𑀽𑀮𑀓𑀢𑁆𑀢𑀸, 𑀯𑀺𑀯𑀝𑁆𑀝𑁂𑀦 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻’’𑀢𑀺 (𑀅. 𑀦𑀺. 𑁪.𑁧𑁫𑁬) 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀳𑀁 𑀅𑀫𑀼𑀫𑁆𑀳𑀺 𑀪𑀯𑁂 𑀯𑀸 𑀬𑁄𑀦𑀺𑀬𑀸 𑀯𑀸 𑀕𑀳𑀺𑀬𑀸 𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀆𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺 𑀢𑀺𑀲𑁆𑀲𑁄 𑀯𑀸 𑀨𑀼𑀲𑁆𑀲𑁄 𑀯𑀸. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀕𑁄𑀢𑀫𑁄 𑀯𑀸 𑀓𑀘𑁆𑀘𑀸𑀬𑀦𑁄 𑀯𑀸 𑀓𑀲𑁆𑀲𑀧𑁄 𑀯𑀸. 𑀇𑀤𑀫𑀲𑁆𑀲 𑀅𑀢𑀻𑀢𑀪𑀯𑁂 𑀅𑀢𑁆𑀢𑀦𑁄 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀢𑀦𑁄 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀮𑀽𑀔𑀧𑀡𑀻𑀢𑀚𑀻𑀯𑀺𑀓𑀪𑀸𑀯𑀁 ¶ 𑀲𑀼𑀔𑀤𑀼𑀓𑁆𑀔𑀩𑀳𑀼𑀮𑀢𑀁 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀪𑀸𑀯𑀁 𑀯𑀸 𑀅𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀫𑁆𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀏𑀯𑀁𑀯𑀡𑁆𑀡𑁄…𑀧𑁂… 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺. 𑀢𑀢𑁆𑀣 𑀏𑀯𑀁𑀯𑀡𑁆𑀡𑁄𑀢𑀺 𑀑𑀤𑀸𑀢𑁄 𑀯𑀸 𑀲𑀸𑀫𑁄 𑀯𑀸. 𑀏𑀯𑀫𑀸𑀳𑀸𑀭𑁄𑀢𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 ¶ 𑀅𑀦𑁂𑀦 𑀧𑀓𑀸𑀭𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀝𑀺𑀲𑀁𑀯𑁂𑀤𑀻. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀧𑀭𑀺𑀫𑀸𑀡𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸. 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀲𑁄 𑀅𑀳𑀁 𑀢𑀢𑁄 𑀪𑀯𑀢𑁄 𑀬𑁄𑀦𑀺𑀢𑁄 𑀕𑀳𑀺𑀢𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀢𑁄 𑀲𑀢𑁆𑀢𑀸𑀯𑀸𑀲𑀢𑁄 𑀲𑀢𑁆𑀢𑀦𑀺𑀓𑀸𑀬𑀢𑁄 𑀯𑀸 𑀘𑀼𑀢𑁄 𑀧𑀼𑀦𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀓𑁆𑀓𑀦𑀺𑀓𑀸𑀬𑁂 𑀯𑀸 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀢𑀢𑁆𑀭𑀸𑀧𑀺 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀧𑀼𑀦 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀺𑀘 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀅𑀦𑀼𑀲𑁆𑀲𑀭𑀡𑀁. 𑀲𑁄 𑀢𑀢𑁄𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀢𑀲𑁆𑀫𑀸 ‘‘𑀇𑀥𑀽𑀧𑀧𑀦𑁆𑀦𑁄’’𑀢𑀺 𑀇𑀫𑀺𑀲𑁆𑀲𑀸 𑀇𑀥𑀽𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀫𑁂𑀯 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀅𑀫𑀼𑀢𑁆𑀭 𑀉𑀤𑀧𑀸𑀤𑀺’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀏𑀯𑀫𑀸𑀤𑀺 𑀧𑀦𑀲𑁆𑀲 𑀢𑀢𑁆𑀭𑀸𑀧𑀺 𑀇𑀫𑀺𑀲𑁆𑀲𑀸 𑀉𑀧𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑁂 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀦𑀸𑀫𑀕𑁄𑀢𑁆𑀢𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺 𑀲𑁆𑀯𑀸𑀳𑀁 𑀢𑀢𑁄 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀘𑀼𑀢𑁄 𑀇𑀥 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀇𑀢𑀻𑀢𑀺 𑀏𑀯𑀁. 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀲𑀉𑀤𑁆𑀤𑁂𑀲𑀁, 𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀸𑀓𑀸𑀭𑀁. 𑀦𑀸𑀫𑀕𑁄𑀢𑁆𑀢𑁂𑀦 𑀳𑀺 𑀲𑀢𑁆𑀢𑁄 ‘‘𑀢𑀺𑀲𑁆𑀲𑁄 𑀓𑀲𑁆𑀲𑀧𑁄’’𑀢𑀺 𑀉𑀤𑁆𑀤𑀺𑀲𑀻𑀬𑀢𑀺, 𑀯𑀡𑁆𑀡𑀸𑀤𑀻𑀳𑀺 ‘‘𑀲𑀸𑀫𑁄 𑀑𑀤𑀸𑀢𑁄’’𑀢𑀺 𑀦𑀸𑀦𑀢𑁆𑀢𑀢𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦𑀸𑀫𑀕𑁄𑀢𑁆𑀢𑀁 𑀉𑀤𑁆𑀤𑁂𑀲𑁄, 𑀇𑀢𑀭𑁂 𑀆𑀓𑀸𑀭𑀸.

𑀤𑀺𑀩𑁆𑀩𑁂𑀦𑀸𑀢𑀺𑀆𑀤𑀻𑀲𑀼 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀜𑁆𑀘𑀸𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑁄 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 ¶ 𑀤𑀺𑀩𑁆𑀩𑀁. 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼. 𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑀁. 𑀬𑁄 𑀳𑀺 𑀘𑀼𑀢𑀺𑀫𑁂𑀯 𑀧𑀲𑁆𑀲𑀢𑀺, 𑀦 𑀉𑀧𑀧𑀸𑀢𑀁, 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀉𑀧𑀧𑀸𑀢𑀫𑁂𑀯 𑀧𑀲𑁆𑀲𑀢𑀺, 𑀦 𑀘𑀼𑀢𑀺𑀁, 𑀲𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀢𑀤𑀼𑀪𑀬𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀅𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀳𑁄𑀢𑀺. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀩𑀼𑀤𑁆𑀥𑀧𑀼𑀢𑁆𑀢𑀸 𑀧𑀲𑁆𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥’’𑀦𑁆𑀢𑀺. 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁, 𑀫𑀸𑀦𑀼𑀲𑀁 𑀯𑀸 𑀫𑀁𑀲𑀘𑀓𑁆𑀔𑀼𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 ¶ 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦.

𑀲𑀢𑁆𑀢𑁂 𑀧𑀲𑁆𑀲𑀢𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀲𑀢𑁆𑀢𑁂 𑀑𑀮𑁄𑀓𑁂𑀢𑀺. 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀘𑀼𑀢𑀺𑀓𑁆𑀔𑀡𑁂 𑀯𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸. 𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸 𑀇𑀤𑀸𑀦𑀺 𑀘𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀘𑀯𑀫𑀸𑀦𑀸𑀢𑀺, 𑀬𑁂 𑀘 𑀕𑀳𑀺𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀲𑀫𑁆𑀧𑀢𑀺𑀦𑀺𑀩𑁆𑀩𑀢𑁆𑀢𑀸 𑀘, 𑀢𑁂 𑀉𑀧𑀧𑀚𑁆𑀚𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀏𑀯𑀭𑀽𑀧𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀦𑁂𑀢𑀺 𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀳𑀻𑀦𑀸𑀦𑀁 𑀚𑀸𑀢𑀺𑀓𑀼𑀮𑀪𑁄𑀕𑀸𑀤𑀻𑀦𑀁 𑀯𑀲𑁂𑀦 𑀳𑀻𑀴𑀺𑀢𑁂 𑀉𑀜𑁆𑀜𑀸𑀢𑁂. 𑀧𑀡𑀻𑀢𑁂𑀢𑀺 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀢𑀩𑁆𑀩𑀺𑀧𑀭𑀻𑀢𑁂. 𑀲𑀼𑀯𑀡𑁆𑀡𑁂𑀢𑀺 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀸𑀓𑀦𑁆𑀢𑀸𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂, 𑀯𑀺𑀭𑀽𑀧𑀯𑀺𑀭𑀽𑀧𑁂𑀢𑀺𑀧𑀺 𑀅𑀢𑁆𑀣𑁄. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀺𑀕𑀢𑁂, 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂. 𑀤𑀼𑀕𑁆𑀕𑀢𑁂𑀢𑀺 𑀤𑀼𑀕𑁆𑀕𑀢𑀺𑀕𑀢𑁂, 𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂.

𑀬𑀣𑀸𑀓𑀫𑁆𑀫𑀽𑀧𑀕𑁂𑀢𑀺 𑀬𑀁 𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀢𑁂𑀦 𑀢𑁂𑀦 𑀉𑀧𑀕𑀢𑁂. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 𑀤𑀼𑀝𑁆𑀞𑀼 𑀘𑀭𑀺𑀢𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸𑀢𑀺 𑀤𑀼𑀘𑁆𑀘𑀭𑀺𑀢𑀁. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀺𑀪𑀽𑀢𑀸. 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀅𑀦𑁆𑀢𑀫𑀲𑁄 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀯𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀯𑀸 𑀉𑀧𑀯𑀸𑀤𑀓𑀸, 𑀅𑀓𑁆𑀓𑁄𑀲𑀓𑀸 𑀕𑀭𑀳𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸 ¶ . 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀦𑀸𑀦𑀸𑀯𑀺𑀥𑀓𑀫𑁆𑀫𑀸, 𑀬𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀽𑀮𑀓𑁂𑀲𑀼 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑁂𑀧𑀺 𑀲𑀫𑀸𑀤𑀸𑀧𑁂𑀦𑁆𑀢𑀺.

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑀸. 𑀅𑀣 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀽𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀫𑁂𑀯. 𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀢𑀢𑁆𑀣 𑀤𑀼𑀓𑁆𑀓𑀝𑁆𑀝𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄, 𑀯𑀺𑀦𑀲𑁆𑀲𑀦𑁆𑀢𑀸 𑀯𑀸 𑀏𑀢𑁆𑀣 𑀧𑀢𑀦𑁆𑀢𑀺 𑀲𑀫𑁆𑀪𑀺𑀚𑁆𑀚𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸 ¶ , 𑀦 𑀤𑀼𑀕𑁆𑀕𑀢𑀺 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀜𑁆𑀘. 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸, 𑀦 𑀢𑀼 𑀯𑀺𑀦𑀺𑀧𑀸𑀢𑁄 𑀅𑀲𑀼𑀭𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁. 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀺 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 𑀅𑀯𑀻𑀘𑀺𑀆𑀤𑀺𑀓𑀫𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯𑀸𑀢𑀺. 𑀉𑀧𑀧𑀦𑁆𑀦𑀸𑀢𑀺 𑀉𑀧𑀕𑀢𑀸, 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀸𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺, 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺𑀬𑁂𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀻𑀢𑀺 𑀲𑀼𑀕𑀢𑀺. 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄. 𑀲𑁄 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑁆𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀢𑁄 𑀕𑀳𑁂𑀢𑀩𑁆𑀩𑁄. 𑀢𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀤𑀼𑀢𑀺𑀬𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 ¶ 𑀦𑀢𑁆𑀣𑀺 𑀏𑀢𑁂𑀲𑀁 𑀉𑀢𑁆𑀢𑀭𑀸𑀦𑀺 𑀯𑀺𑀲𑀺𑀝𑁆𑀞𑀸𑀦𑀻𑀢𑀺 𑀅𑀦𑀼𑀢𑁆𑀢𑀭𑀸𑀦𑀺, 𑀅𑀦𑀼𑀢𑁆𑀢𑀭𑀸𑀦𑀺 𑀏𑀯 𑀅𑀦𑀼𑀢𑁆𑀢𑀭𑀺𑀬𑀸𑀦𑀺 𑀬𑀣𑀸 ‘‘𑀅𑀦𑀦𑁆𑀢𑀫𑁂𑀯 𑀅𑀦𑀦𑁆𑀢𑀭𑀺𑀬’’𑀦𑁆𑀢𑀺 𑀆𑀳 ‘‘𑀦𑀺𑀭𑀼𑀢𑁆𑀢𑀭𑀸𑀦𑀻’’𑀢𑀺. 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫 𑀨𑀮𑀯𑀺𑀲𑁂𑀲𑀸𑀯𑀳𑀢𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀢𑁆𑀢𑀯𑀺𑀥𑀅𑀭𑀺𑀬𑀥𑀦𑀮𑀸𑀪𑁄𑀢𑀺 𑀲𑀢𑁆𑀢𑀯𑀺𑀥𑀲𑀤𑁆𑀥𑀸𑀤𑀺𑀮𑁄𑀓𑀼𑀢𑁆𑀢𑀭𑀥𑀦𑀮𑀸𑀪𑁄. 𑀲𑀺𑀓𑁆𑀔𑀸𑀢𑁆𑀢𑀬𑀲𑁆𑀲 𑀧𑀽𑀭𑀡𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀧𑀽𑀭𑀡𑀁. 𑀢𑀢𑁆𑀣 𑀧𑀽𑀭𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀲𑁂𑀓𑁆𑀔𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀢𑁆𑀢 𑀲𑁂𑀔𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀽𑀭𑁂𑀦𑁆𑀢𑀺 𑀦𑀸𑀫, 𑀅𑀭𑀳𑀸 𑀧𑀭𑀺𑀧𑀼𑀡𑁆𑀡𑀲𑀺𑀓𑁆𑀔𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀅𑀦𑀼𑀢𑁆𑀢𑀭𑀺𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀣𑀺𑀢𑀸𑀦𑀺.

𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀅𑀦𑀼𑀲𑁆𑀲𑀢𑀺𑀬𑁄 𑀏𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀳𑀺𑀢𑀲𑀼𑀔𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀞𑀸𑀦𑀸𑀦𑀻𑀢𑀺 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺. 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸 𑀲𑀢𑀻𑀢𑀺 𑀬𑀣𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀞𑀸𑀦𑀁 𑀳𑁄𑀢𑀺, 𑀏𑀯𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪𑁂 𑀉𑀧𑁆𑀧𑀦𑁆𑀦𑀸 𑀲𑀢𑀺. 𑀏𑀯𑀁 𑀅𑀦𑀼𑀲𑁆𑀲𑀭𑀢𑁄 ¶ 𑀳𑀺 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀁 𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀉𑀧𑀘𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫𑁂𑀢𑀁 𑀕𑀺𑀳𑀻𑀦𑀫𑁆𑀧𑀺 𑀮𑀩𑁆𑀪𑀢𑀺. 𑀉𑀧𑀘𑀸𑀭𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀘 𑀧𑀘𑁆𑀘𑀓𑁆𑀔𑀢𑁄 𑀉𑀧𑀘𑀸𑀭𑀚𑁆𑀛𑀸𑀦𑀸𑀯𑀳𑀁 𑀓𑀫𑁆𑀫𑀝𑁆𑀞𑀸𑀦𑀧𑀭𑀫𑁆𑀧𑀭𑀸𑀬 𑀲𑀫𑁆𑀫𑀲𑀦𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀯𑀳𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀫𑀳𑀸𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀩𑀼𑀤𑁆𑀥𑀸𑀕𑀼𑀡𑀸𑀦𑀼𑀲𑁆𑀲𑀭𑀡𑀲𑀫𑀬𑁂. 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀦𑁆𑀢𑀺 𑀭𑀸𑀕𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀁. 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀧𑀺, 𑀭𑀸𑀕𑁂𑀦 𑀯𑀸 𑀲𑀁𑀳𑀺𑀢𑀁 𑀘𑀺𑀢𑁆𑀢𑀁 ¶ 𑀅𑀭𑀜𑁆𑀜𑀫𑀺𑀯 𑀘𑁄𑀭𑁂𑀳𑀺 𑀢𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀝𑁆𑀞𑀸𑀦𑀪𑀸𑀯𑀢𑁄𑀧𑀺 𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀬𑀜𑁆𑀚𑀦𑀁 𑀧𑀦 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀭𑀸𑀕𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀕𑀳𑀺𑀢’’𑀦𑁆𑀢𑀺 𑀆𑀳. 𑀉𑀚𑀼𑀓𑀫𑁂𑀯𑀸𑀢𑀺 𑀧𑀕𑁂𑀯 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀅𑀧𑀦𑀻𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀘 𑀅𑀦𑀼𑀚𑀼𑀪𑀸𑀯𑀓𑀭𑀸𑀦𑀁 𑀫𑀸𑀦𑀸𑀤𑀻𑀦𑀁 𑀅𑀪𑀸𑀯𑀢𑁄, 𑀭𑀸𑀕𑀸𑀤𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀸𑀯𑁂𑀦 𑀯𑀸 𑀑𑀡𑀢𑀺𑀉𑀡𑁆𑀡𑀢𑀺𑀯𑀺𑀭𑀳𑀢𑁄 𑀉𑀚𑀼𑀪𑀸𑀯𑀫𑁂𑀯 𑀕𑀢𑀁. 𑀅𑀣 𑀯𑀸 𑀉𑀚𑀼𑀓𑀫𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀣𑀺𑀦𑀁 𑀫𑀺𑀤𑁆𑀥𑀁 𑀑𑀢𑀺𑀡𑁆𑀡𑀢𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀕𑀫𑀢𑁄 𑀫𑀚𑁆𑀛𑀺𑀫𑀲𑀫𑀣𑀦𑀺𑀫𑀺𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀉𑀚𑀼𑀪𑀸𑀯𑀫𑁂𑀯 𑀕𑀢𑀁. 𑀅𑀝𑁆𑀞𑀓𑀣𑀁 𑀦𑀺𑀲𑁆𑀲𑀸𑀬𑀸𑀢𑀺 𑀪𑀯𑀚𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀦𑀺𑀲𑁆𑀲𑀸𑀬. 𑀅𑀢𑁆𑀣𑀯𑁂𑀤𑀦𑁆𑀢𑀺 𑀯𑀸 𑀳𑁂𑀢𑀼𑀨𑀮𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀢𑀼𑀝𑁆𑀞𑀺𑀫𑀸𑀳. 𑀥𑀫𑁆𑀫𑀯𑁂𑀤𑀦𑁆𑀢𑀺 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀢𑀼𑀝𑁆𑀞𑀺𑀁. ‘‘𑀆𑀭𑀓𑀢𑁆𑀢𑀸 𑀅𑀭𑀳’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀳𑀺 𑀬𑀤𑀺𑀤𑀁 𑀪𑀕𑀯𑀢𑁄 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀁, 𑀲𑁄 𑀳𑁂𑀢𑀼. 𑀜𑀸𑀧𑀓𑁄 𑀘𑁂𑀢𑁆𑀣 𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄, 𑀦 𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄. 𑀢𑀢𑁄𑀦𑁂𑀦 𑀜𑀸𑀬𑀫𑀸𑀦𑁄 𑀅𑀭𑀳𑀢𑁆𑀢𑀢𑁆𑀣𑁄 𑀨𑀮𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀳𑁂𑀢𑀼𑀲𑁄 𑀨𑀮𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼𑀧𑀺 𑀳𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀸𑀤𑀬𑁄 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀆𑀤𑀬𑁄 𑀘 𑀢𑀢𑁆𑀣 𑀢𑀢𑁆𑀣 𑀳𑁂𑀢𑀼𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀬𑁂𑀯. 𑀥𑀫𑁆𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀨𑀮𑀲𑀗𑁆𑀔𑀸𑀢𑀕𑀼𑀡𑀽𑀧𑀲𑀁𑀳𑀺𑀢𑀁.

𑀫𑀳𑀸𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀳𑀼𑀦𑁂𑀬𑁆𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀭𑀡𑀻𑀬𑀯𑀕𑁆𑀕𑁄

𑁧. 𑀧𑀞𑀫𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀢𑀺 𑀅𑀦𑀼𑀲𑁆𑀲𑀭𑀡𑀸𑀭𑀳𑀸. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀺 𑀏𑀢𑀸𑀬𑀸𑀢𑀺 𑀫𑁂𑀢𑁆𑀢𑀸, 𑀫𑀺𑀢𑁆𑀢𑀪𑀸𑀯𑁄. 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀓𑀸𑀬𑀓𑀫𑁆𑀫𑀁. 𑀢𑀁 𑀧𑀦 𑀬𑀲𑁆𑀫𑀸 𑀫𑁂𑀢𑁆𑀢𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀢𑀩𑁆𑀩𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑀤𑁆𑀯𑀬𑁂𑀧𑀺. 𑀇𑀫𑀸𑀦𑀻𑀢𑀺 𑀫𑁂𑀢𑁆𑀢𑀓𑀸𑀬𑀓𑀫𑁆𑀫𑀸𑀤𑀻𑀦𑀺. 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺 𑀢𑁂𑀲𑀁 𑀲𑁂𑀝𑁆𑀞𑀧𑀭𑀺𑀲𑀪𑀸𑀯𑀢𑁄. 𑀬𑀣𑀸 𑀧𑀦 𑀪𑀺𑀓𑁆𑀔𑀼𑀦𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺 𑀘𑀢𑀼𑀧𑀭𑀺𑀲𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀽𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀪𑀺𑀓𑁆𑀔𑀼𑀦𑁄 ¶ 𑀲𑀩𑁆𑀩𑀫𑁆𑀧𑀺 𑀅𑀦𑀯𑀚𑁆𑀚𑀓𑀸𑀬𑀓𑀫𑁆𑀫𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀓𑀫𑁆𑀫𑀦𑁆𑀢𑁄𑀕𑀥𑀫𑁂𑀯𑀸𑀢𑀺 𑀆𑀳 ‘‘𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦…𑀧𑁂… 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸’’𑀢𑀺. 𑀪𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀘𑁂𑀢𑀺𑀬𑀩𑁄𑀥𑀻𑀦𑀁 𑀯𑀦𑁆𑀤𑀦𑀸 𑀫𑁂𑀢𑁆𑀢𑀸𑀲𑀺𑀤𑁆𑀥𑀸𑀢𑀺 𑀓𑀢𑁆𑀯𑀸 𑀢𑀤𑀢𑁆𑀣𑀸𑀬 𑀕𑀫𑀦𑀁 ‘‘𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑀺𑀬𑀩𑁄𑀥𑀺𑀪𑀺𑀓𑁆𑀔𑀽𑀲𑀼 𑀯𑀼𑀢𑁆𑀢𑀸𑀯𑀲𑁂𑀲𑀸𑀧𑀘𑀸𑀬𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑁂𑀢𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀬𑀺𑀓𑀁 𑀓𑀺𑀭𑀺𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀓𑀣𑀺𑀬𑀫𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀧𑀼𑀘𑁆𑀙𑀦𑀅𑀢𑁆𑀣𑀓𑀣𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀫𑁂𑀯 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀳𑀺𑀢𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑀩𑁆𑀩𑀢𑁄. 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀻𑀢𑀺 𑀓𑀸𑀬𑀯𑀘𑀻𑀫𑀦𑁄𑀲𑀼𑀘𑀭𑀺𑀢𑀸𑀦𑀺. 𑀘𑀺𑀦𑁆𑀢𑀦𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑀦𑀫𑀢𑁆𑀢𑀫𑁆𑀧𑀺 𑀫𑀦𑁄𑀓𑀫𑁆𑀫𑀁, 𑀧𑀕𑁂𑀯 𑀧𑀝𑀺𑀧𑀦𑁆𑀦𑀸 𑀪𑀸𑀯𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀆𑀯𑀻𑀢𑀺 𑀧𑀓𑀸𑀲𑀁. 𑀧𑀓𑀸𑀲𑀪𑀸𑀯𑁄 𑀘𑁂𑀢𑁆𑀣 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀫𑁆𑀫𑀼𑀔𑀸’’𑀢𑀺. 𑀭𑀳𑁄𑀢𑀺 𑀅𑀧𑁆𑀧𑀓𑀸𑀲𑀁. 𑀅𑀧𑁆𑀧𑀓𑀸𑀲𑀢𑀸 𑀘 𑀬𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀓𑀸𑀬𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀭𑀫𑁆𑀫𑀼𑀔𑀸’’𑀢𑀺. 𑀲𑀳𑀸𑀬𑀪𑀸𑀯𑀕𑀫𑀦𑀁 𑀢𑁂𑀲𑀁 𑀧𑀼𑀭𑀢𑁄. 𑀢𑁂𑀲𑀼 𑀓𑀭𑁄𑀦𑁆𑀢𑁂𑀲𑀼𑀬𑁂𑀯 𑀳𑀺 𑀲𑀳𑀸𑀬𑀪𑀸𑀯𑀕𑀫𑀦𑀁 𑀲𑀫𑁆𑀫𑀼𑀔𑀸 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀉𑀪𑀬𑁂𑀳𑀻𑀢𑀺 𑀦𑀯𑀓𑁂𑀳𑀺 𑀣𑁂𑀭𑁂𑀳𑀺 𑀘. 𑀧𑀕𑁆𑀕𑀬𑁆𑀳𑀸𑀢𑀺 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀤𑁆𑀥𑀁 𑀓𑀢𑁆𑀯𑀸 𑀓𑁂𑀯𑀮𑀁 ‘‘𑀤𑁂𑀯𑁄’’𑀢𑀺 𑀅𑀯𑀢𑁆𑀯𑀸 𑀕𑀼𑀡𑁂𑀳𑀺 𑀣𑀺𑀭𑀪𑀸𑀯𑀚𑁄𑀢𑀦𑀁 ‘‘𑀤𑁂𑀯𑀢𑁆𑀣𑁂𑀭𑁄’’𑀢𑀺 𑀯𑀘𑀦𑀁 𑀧𑀕𑁆𑀕𑀬𑁆𑀳 𑀯𑀘𑀦𑀁. 𑀫𑀫𑀢𑁆𑀢𑀩𑁄𑀥𑀦𑀁 𑀯𑀘𑀦𑀁 𑀫𑀫𑀸𑀬𑀦𑀯𑀘𑀦𑀁. 𑀏𑀓𑀦𑁆𑀢𑀧𑀭𑀫𑁆𑀫𑀼𑀔𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀢𑀸 𑀦𑀸𑀫 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦 𑀳𑁄𑀢𑀺, 𑀢𑀜𑁆𑀘 𑀔𑁄 𑀮𑁄𑀓𑁂 𑀓𑀸𑀬𑀓𑀫𑁆𑀫𑀦𑁆𑀢𑀺 𑀧𑀸𑀓𑀝𑀁 𑀧𑀜𑁆𑀜𑀸𑀢𑀁. 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀏𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀁 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀁 𑀦𑀬𑀦𑀸𑀦𑀁 𑀉𑀫𑁆𑀫𑀻𑀮𑀦𑀸 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀜𑁆𑀘 ¶ 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀫𑁂𑀯, 𑀬𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀬𑀦𑀸𑀦𑀁 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀢𑀸 𑀫𑀼𑀔𑀲𑁆𑀲 𑀘 𑀧𑀲𑀦𑁆𑀦𑀢𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸’’𑀢𑀺.

𑀮𑀸𑀪-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄 ‘‘𑀮𑀸𑀪𑀸 𑀯𑀢, 𑀪𑁄, 𑀮𑀤𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀲𑁄 𑀘𑁂𑀢𑁆𑀣 ‘‘𑀥𑀫𑁆𑀫𑀮𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀅𑀢𑀻𑀢𑀓𑀸𑀮𑀺𑀓𑁄𑀢𑀺 𑀆𑀳 ‘‘𑀘𑀻𑀯𑀭𑀸𑀤𑀬𑁄 𑀮𑀤𑁆𑀥𑀧𑀘𑁆𑀘𑀬𑀸’’𑀢𑀺. 𑀥𑀫𑁆𑀫𑀢𑁄 𑀆𑀕𑀢𑀸𑀢𑀺 𑀥𑀫𑁆𑀫𑀺𑀓𑀸, 𑀧𑀭𑀺𑀲𑀼𑀤𑁆𑀥𑀕𑀫𑀦𑀸 𑀧𑀘𑁆𑀘𑀬𑀸. 𑀢𑁂𑀦𑀸𑀳 ‘‘𑀥𑀫𑁆𑀫𑀮𑀤𑁆𑀥𑀸’’𑀢𑀺. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀳𑀦𑀸𑀤𑀻’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀦 𑀲𑀫𑁆𑀫𑀸 𑀕𑀬𑁆𑀳𑀫𑀸𑀦𑀸 𑀳𑀺 𑀥𑀫𑁆𑀫𑀮𑀤𑁆𑀥𑀸 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺 𑀢𑀧𑁆𑀧𑀝𑀺𑀲𑁂𑀥𑀦𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀥𑀫𑁆𑀫𑀮𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀤𑁂𑀬𑁆𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀜𑁆𑀘 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀓𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀤𑁆𑀯𑁂 𑀧𑀝𑀺𑀯𑀺𑀪𑀢𑁆𑀢𑀸𑀦𑀺 𑀦𑀸𑀫𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀦𑁆𑀢𑀺 𑀏𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀯𑀺𑀪𑀚𑀦𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫, 𑀧𑀕𑁂𑀯 𑀧𑀬𑁄𑀕𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀧𑀼𑀩𑁆𑀩𑀓𑀁 𑀯𑀸 𑀓𑀸𑀬𑁂𑀦 𑀯𑀺𑀪𑀚𑀦𑀦𑁆𑀢𑀺 𑀫𑀽𑀮𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀧𑀝𑀺𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀮𑀸𑀪𑀁 𑀪𑀼𑀜𑁆𑀚𑀢𑀻𑀢𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄 𑀯𑀸. 𑀢𑀁 𑀦𑁂𑀯 𑀕𑀺𑀳𑀻𑀦𑀁 𑀤𑁂𑀢𑀺 𑀅𑀢𑁆𑀢𑀦𑁄 𑀆𑀚𑀻𑀯𑀲𑁄𑀥𑀦𑀢𑁆𑀣𑀁. 𑀦 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺 ‘‘𑀫𑀬𑁆𑀳𑀁 𑀅𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀫𑀸 𑀳𑁄𑀢𑀽’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘…𑀧𑁂… 𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀸𑀥𑀸𑀭𑀡𑀩𑀼𑀤𑁆𑀥𑀺𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀳𑀺𑀲𑁆𑀲 𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀲𑀼𑀓𑀭𑀸, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀘𑀲𑁆𑀲 𑀧𑀽𑀭𑁄 𑀳𑁄𑀢𑀺.

𑀅𑀣 𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘…𑀧𑁂… 𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀮𑀸𑀪𑀲𑁆𑀲 𑀢𑀻𑀲𑀼 𑀓𑀸𑀮𑁂𑀲𑀼 𑀲𑀸𑀥𑀸𑀭𑀡𑀢𑁄 𑀞𑀧𑀦𑀁 𑀤𑀲𑁆𑀲𑀺𑀢𑀁. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀡𑀓𑀸𑀮𑁄 𑀤𑀲𑁆𑀲𑀺𑀢𑁄. 𑀕𑀳𑁂𑀢𑁆𑀯𑀸…𑀧𑁂… 𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑀺𑀢𑀓𑀸𑀮𑁄. 𑀢𑀤𑀼𑀪𑀬𑀁 𑀧𑀦 𑀢𑀸𑀤𑀺𑀲𑁂𑀦 𑀧𑀼𑀩𑁆𑀩𑀪𑀸𑀕𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀲𑀺𑀤𑁆𑀥𑁄 𑀧𑀼𑀭𑀺𑀫𑀓𑀸𑀮𑁄. 𑀢𑀬𑀺𑀤𑀁 𑀧𑀝𑀺𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀳𑁄𑀢𑀺 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀳𑀺 𑀧𑀝𑀺𑀕𑁆𑀕𑀳𑀺𑀢𑀁 𑀫𑀬𑀸’’𑀢𑀺. 𑀏𑀯𑀁 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀮𑀤𑁆𑀥𑀁 𑀮𑀸𑀪𑀁 𑀑𑀲𑀸𑀭𑀡𑀮𑀓𑁆𑀔𑀡𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀸𑀥𑀸𑀭𑀡𑀪𑁄𑀕𑀻 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀘 𑀳𑁄𑀢𑀺.

𑀇𑀫𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑀦𑁆𑀢𑀺 𑀇𑀫𑀁 𑀘𑀢𑀼𑀢𑁆𑀣𑀁 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀥𑀫𑀁. 𑀦 𑀳𑀺…𑀧𑁂… 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀤𑀼𑀲𑁆𑀲𑀻𑀮𑀲𑁆𑀲 𑀦𑀢𑁆𑀣𑀻𑀢𑀺 𑀆𑀭𑀫𑁆𑀪𑁄𑀧𑀺 𑀢𑀸𑀯 𑀦 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀧𑀽𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀢𑀺 𑀇𑀫𑀺𑀦𑀸 𑀮𑀸𑀪𑀲𑁆𑀲 𑀥𑀫𑁆𑀫𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀢𑀁 𑀅𑀔𑀡𑁆𑀟𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀺𑀢𑀁 𑀲𑀸𑀥𑀸𑀭𑀡𑀪𑁄𑀕𑀺𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀢𑀺 𑀧𑀦 𑀢𑀤𑀼𑀪𑀬𑁂 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀽𑀭𑀺𑀢𑁄 𑀏𑀯 ¶ 𑀳𑁄𑀢𑀻𑀢𑀺 𑀆𑀳 ‘‘𑀧𑀽𑀭𑁂𑀢𑀻’’𑀢𑀺. 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸𑀢𑀺 𑀏𑀢𑁂𑀦 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀧𑀺𑀢𑀼𑀦𑁄, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀸 ¶ 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑁂𑀦𑁆𑀢𑀲𑁆𑀲 𑀲𑀸𑀭𑀡𑀻𑀬𑀥𑀫𑁆𑀫𑁄𑀬𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀢𑀩𑁆𑀩𑀦𑁆𑀢𑀺 𑀅𑀯𑀲𑁆𑀲𑀁 𑀤𑀸𑀢𑀩𑁆𑀩𑀁. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀦𑀲𑁆𑀲 𑀦 𑀳𑁄𑀢𑀺 𑀧𑀝𑀺𑀚𑀕𑁆𑀕𑀝𑁆𑀞𑀸𑀦𑁂 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀮𑀺𑀩𑁄𑀥𑀚𑀕𑁆𑀕𑀦𑀁 𑀦𑀸𑀫 𑀳𑁄𑀢𑀻’’𑀢𑀺. 𑀫𑀼𑀢𑁆𑀢𑀧𑀮𑀺𑀩𑁄𑀥𑀲𑁆𑀲 𑀯𑀝𑁆𑀝𑀢𑀺 𑀅𑀫𑀼𑀢𑁆𑀢𑀧𑀮𑀺𑀩𑁄𑀥𑀲𑁆𑀲 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀬𑀤𑀺 𑀏𑀯𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀭𑀡𑀻𑀬𑀥𑀫𑁆𑀫𑀁 𑀧𑀽𑀭𑁂𑀦𑁆𑀢𑀲𑁆𑀲 𑀑𑀤𑀺𑀲𑁆𑀲𑀓𑀤𑀸𑀦𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? 𑀦𑁄 𑀦 𑀯𑀝𑁆𑀝𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀑𑀤𑀺𑀲𑁆𑀲𑀓𑀤𑀸𑀦𑀁 𑀧𑀦𑀲𑁆𑀲 𑀦 𑀲𑀩𑁆𑀩𑀢𑁆𑀣 𑀯𑀸𑀭𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀕𑀺𑀮𑀸𑀦𑀸𑀤𑀻𑀦𑀜𑁆𑀳𑀺 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀧𑁆𑀧𑀝𑀺𑀯𑀺𑀪𑀸𑀕𑀧𑀓𑁆𑀔𑀺𑀓𑀁 ‘‘𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀪𑀸𑀯𑀢𑁄. 𑀩𑁆𑀬𑀢𑀺𑀭𑁂𑀓𑀧𑁆𑀧𑀥𑀸𑀦𑁄 𑀳𑀺 𑀧𑀝𑀺𑀪𑀸𑀕𑁄. 𑀢𑁂𑀦𑀸𑀳 ‘‘𑀅𑀯𑀲𑁂𑀲’’𑀦𑁆𑀢𑀺𑀆𑀤𑀺. 𑀅𑀤𑀸𑀢𑀼𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀜𑁆𑀘 𑀔𑁄 𑀓𑀭𑀼𑀡𑀸𑀬𑀦𑀯𑀲𑁂𑀦, 𑀦 𑀯𑀢𑁆𑀢𑀧𑀭𑀺𑀧𑀽𑀭𑀡𑀯𑀲𑁂𑀦, 𑀢𑀲𑁆𑀫𑀸 𑀤𑀼𑀲𑁆𑀲𑀻𑀮𑀲𑁆𑀲𑀧𑀺 𑀅𑀢𑁆𑀣𑀺𑀓𑀲𑁆𑀲 𑀲𑀢𑀺 𑀲𑀫𑁆𑀪𑀯𑁂 𑀤𑀸𑀢𑀩𑁆𑀩𑀁. 𑀤𑀸𑀦𑀜𑁆𑀳𑀺 𑀦𑀸𑀫 𑀦 𑀓𑀲𑁆𑀲𑀘𑀺 𑀦𑀺𑀯𑀸𑀭𑀺𑀢𑀁.

𑀲𑀼𑀲𑀺𑀓𑁆𑀔𑀺𑀢𑀸𑀬𑀸𑀢𑀺 𑀲𑀸𑀭𑀡𑀻𑀬𑀧𑀽𑀭𑀡𑀯𑀺𑀥𑀺𑀫𑁆𑀳𑀺 𑀲𑀼𑀲𑀺𑀓𑁆𑀔𑀺𑀢𑀸𑀬, 𑀲𑀼𑀓𑀼𑀲𑀮𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀲𑁆𑀲 𑀓𑁄𑀲𑀮𑁆𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀲𑀺𑀓𑁆𑀔𑀺𑀢𑀸𑀬 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀧𑀽𑀭𑁂𑀳𑀺, 𑀦 𑀢𑀢𑁄 𑀑𑀭𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀤𑀼𑀧𑁆𑀧𑀽𑀭𑀢𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀲𑁄 𑀫𑀳𑀧𑁆𑀨𑀮𑁄 𑀫𑀳𑀸𑀦𑀺𑀲𑀁𑀲𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀳𑀺𑀧𑀺 𑀢𑀸𑀯𑀕𑀭𑀼𑀢𑀭𑁂𑀳𑀺 𑀨𑀮𑀸𑀦𑀺𑀲𑀁𑀲𑁂𑀳𑀺 𑀅𑀦𑀼𑀕𑀢𑁄𑀢𑀺 𑀢𑀁𑀲𑀫𑀗𑁆𑀕𑀻 𑀘 𑀧𑀼𑀕𑁆𑀕𑀮𑁄 𑀯𑀺𑀲𑁂𑀲𑀮𑀸𑀪𑀻 𑀅𑀭𑀺𑀬𑀧𑀼𑀕𑁆𑀕𑀮𑁄 𑀯𑀺𑀬 𑀮𑁄𑀓𑁂 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀢𑀣𑀸 𑀳𑀺 𑀲𑁄 𑀤𑀼𑀧𑁆𑀧𑀚𑀳𑀤𑀸𑀦𑀫𑀬𑀲𑁆𑀲 𑀲𑀻𑀮𑀫𑀬𑀲𑁆𑀲 𑀧𑀼𑀜𑁆𑀜𑀲𑁆𑀲 𑀧𑀝𑀺𑀧𑀓𑁆𑀔𑀥𑀫𑁆𑀫𑀁 𑀲𑀼𑀤𑀽𑀭𑁂 𑀯𑀺𑀓𑁆𑀔𑀫𑁆𑀪𑀺𑀢𑀁 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀲𑁆𑀲𑀺𑀫𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀤𑀸𑀦𑀺𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀘 𑀆𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀧𑀽𑀭𑀺𑀢𑀲𑀸𑀭𑀡𑀻𑀬𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑁂𑀯 𑀇𑀲𑁆𑀲𑀸 𑀦 𑀫𑀘𑁆𑀙𑀭𑀺𑀬𑀁 𑀳𑁄𑀢𑀺 𑀘𑀺𑀭𑀓𑀸𑀮𑀪𑀸𑀯𑀦𑀸𑀬 𑀯𑀺𑀥𑀼𑀢𑀪𑀸𑀯𑀢𑁄. 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀧𑀭𑀺𑀘𑁆𑀘𑀸𑀕𑀲𑀻𑀮𑀢𑀸𑀬 𑀯𑀺𑀲𑁆𑀲𑀼𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀤𑀁 𑀧𑀺𑀬𑁄 𑀳𑁄𑀢𑀺 𑀪𑀚𑀦𑁆𑀢𑀺 𑀦𑀁 𑀩𑀳𑀽’’𑀢𑀺𑀆𑀤𑀺 (𑀅. 𑀦𑀺. 𑁫.𑁩𑁪). 𑀲𑀼𑀮𑀪𑀧𑀘𑁆𑀘𑀬𑁄 𑀳𑁄𑀢𑀺 𑀤𑀸𑀦𑀯𑀲𑁂𑀦 𑀉𑀴𑀸𑀭𑀚𑁆𑀛𑀸𑀲𑀬𑀸𑀦𑀁 𑀧𑀘𑁆𑀘𑀬𑀮𑀸𑀪𑀲𑁆𑀲 𑀇𑀥𑀸𑀦𑀺𑀲𑀁𑀲𑀲𑀪𑀸𑀯𑀢𑁄 𑀤𑀸𑀦𑀲𑁆𑀲. 𑀧𑀢𑁆𑀢𑀕𑀢𑀫𑀲𑁆𑀲 𑀤𑀺𑀬𑁆𑀬𑀫𑀸𑀦𑀁 ¶ 𑀦 𑀔𑀻𑀬𑀢𑀺 𑀧𑀢𑁆𑀢𑀕𑀢𑀲𑁆𑀲𑁂𑀯 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀲𑁆𑀲 𑀫𑀳𑀸𑀯𑀢𑁆𑀢𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀧𑀽𑀭𑀺𑀢𑀢𑁆𑀢𑀸. 𑀅𑀕𑁆𑀕𑀪𑀡𑁆𑀟𑀁 𑀮𑀪𑀢𑀺 𑀤𑁂𑀯𑀲𑀺𑀓𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀤𑀸𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀪𑀬𑁂 𑀯𑀸…𑀧𑁂… 𑀆𑀧𑀚𑁆𑀚𑀦𑁆𑀢𑀺 𑀤𑁂𑀬𑁆𑀬𑀧𑁆𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀺 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑁂𑀦 𑀘𑀺𑀭𑀓𑀸𑀮𑀁 𑀤𑀸𑀦𑀲𑁆𑀲 𑀧𑀽𑀭𑀺𑀢𑀢𑀸𑀬 𑀧𑀲𑀸𑀭𑀺𑀢𑀘𑀺𑀢𑁆𑀢𑀢𑁆𑀢𑀸.

𑀢𑀢𑁆𑀭𑀸𑀢𑀺 ¶ 𑀢𑁂𑀲𑀼 𑀆𑀦𑀺𑀲𑀁𑀲𑁂𑀲𑀼 𑀯𑀺𑀪𑀸𑀯𑁂𑀢𑀩𑁆𑀩𑁂𑀲𑀼. 𑀇𑀫𑀸𑀦𑀺 𑀨𑀮𑀸𑀦𑀺 𑀯𑀢𑁆𑀣𑀽𑀦𑀺 𑀓𑀸𑀭𑀡𑀸𑀦𑀺. 𑀫𑀳𑀸𑀕𑀺𑀭𑀺𑀕𑀸𑀫𑁄 𑀦𑀸𑀫 𑀦𑀸𑀕𑀤𑀻𑀧𑀧𑀲𑁆𑀲𑁂 𑀏𑀓𑁄 𑀕𑀸𑀫𑁄𑀯. 𑀅𑀮𑀪𑀦𑁆𑀢𑀸𑀧𑀻𑀢𑀺 𑀅𑀧𑁆𑀧𑀧𑀼𑀜𑁆𑀜𑀢𑀸𑀬 𑀅𑀮𑀸𑀪𑀺𑀦𑁄 𑀲𑀫𑀸𑀦𑀸𑀧𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑀪𑀸𑀕𑀦𑁆𑀢𑀺 𑀲𑀪𑀸𑀕𑀁 𑀢𑀩𑁆𑀪𑀸𑀕𑀺𑀬𑀁 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀁 𑀚𑀸𑀦𑀦𑁆𑀢𑀺. 𑀅𑀦𑀼𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀢𑁆𑀢𑀸 𑀣𑁂𑀭𑀸𑀦𑀁 𑀲𑀁𑀲𑀬𑀯𑀺𑀦𑁄𑀤𑀦𑀢𑁆𑀣𑀜𑁆𑀘 ‘‘𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀺𑀢𑁄’’𑀢𑀺 𑀆𑀳. 𑀢𑀣𑀸 𑀳𑀺 𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀣𑁂𑀭𑁂𑀦 𑀅𑀢𑁆𑀢𑀸 𑀧𑀓𑀸𑀲𑀺𑀢𑁄. 𑀤𑀳𑀭𑀓𑀸𑀮𑁂 𑀏𑀯𑀁 𑀓𑀺𑀭 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑀢𑀸𑀬 𑀲𑀼𑀮𑀪𑀧𑀘𑁆𑀘𑀬𑀢𑀸𑀬𑀧𑀺 𑀇𑀤𑀁 𑀯𑀢𑁆𑀣𑀼𑀫𑁂𑀯. 𑀧𑀢𑁆𑀢𑀕𑀢𑀸𑀔𑀻𑀬𑀦𑀲𑁆𑀲 𑀧𑀦 𑀯𑀺𑀲𑁂𑀲𑀁 𑀯𑀺𑀪𑀸𑀯𑀦𑀢𑁄 ‘‘𑀇𑀤𑀁 𑀢𑀸𑀯…𑀧𑁂… 𑀏𑀢𑁆𑀣 𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁.

𑀕𑀺𑀭𑀺𑀪𑀡𑁆𑀟𑀫𑀳𑀸𑀧𑀽𑀚𑀸𑀬𑀸𑀢𑀺 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀬𑁄𑀚𑀦𑀧𑁆𑀧𑀫𑀸𑀡𑁂 𑀲𑀫𑀼𑀤𑁆𑀤𑁂 𑀘 𑀦𑀸𑀯𑀸𑀲𑀗𑁆𑀖𑀸𑀝𑀸𑀤𑀺𑀓𑁂 𑀞𑀧𑁂𑀢𑁆𑀯𑀸 𑀤𑀻𑀧𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀓𑀭𑀺𑀬𑀫𑀸𑀦𑀸𑀬 𑀫𑀳𑀸𑀧𑀽𑀚𑀸𑀬. 𑀢𑀲𑁆𑀲𑀸 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀅𑀯𑀜𑁆𑀛𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁 ‘‘𑀏𑀢𑁂 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀧𑀭𑀺𑀬𑀸𑀬𑁂𑀦𑀧𑀺 𑀮𑁂𑀲𑁂𑀦𑀧𑀺. 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 ‘‘𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄’’𑀢𑀺 𑀬𑀣𑀸𑀪𑀽𑀢𑀧𑀯𑁂𑀤𑀦𑀁 𑀢𑀼𑀫𑁆𑀳𑀸𑀓𑀁 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼 𑀘𑁄𑀭𑀪𑀬𑁂𑀦. ‘‘𑀅𑀢𑁆𑀢𑀦𑁄 𑀤𑀼𑀚𑁆𑀚𑀻𑀯𑀺𑀓𑀸𑀬𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀳𑀁 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸, 𑀫𑀫 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂𑀦𑀧𑀺 𑀲𑀩𑁆𑀩𑀸𑀧𑀺𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀫𑀸 𑀢𑀼𑀫𑁆𑀳𑁂 𑀢𑁂𑀲𑀁 𑀕𑀢𑀪𑀸𑀯𑀁 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺. 𑀯𑀝𑁆𑀝𑀺𑀲𑁆𑀲𑀢𑀻𑀢𑀺 𑀓𑀧𑁆𑀧𑀺𑀲𑁆𑀲𑀢𑀺. 𑀣𑁂𑀭𑀻 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸 𑀅𑀳𑁄𑀲𑀺, 𑀣𑁂𑀭𑀲𑁆𑀲 𑀧𑀦 𑀲𑀻𑀮𑀢𑁂𑀚𑁂𑀦𑁂𑀯 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺.

𑀦𑀢𑁆𑀣𑀺 𑀏𑀢𑁂𑀲𑀁 𑀔𑀡𑁆𑀟𑀦𑁆𑀢𑀺 𑀅𑀔𑀡𑁆𑀟𑀸𑀦𑀺. 𑀢𑀁 𑀧𑀦 𑀦𑁂𑀲𑀁 𑀔𑀡𑁆𑀟𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀆𑀤𑀺𑀅𑀦𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀽’’𑀢𑀺𑀆𑀤𑀺. 𑀦 𑀳𑀺 𑀅𑀜𑁆𑀜𑁄 𑀓𑁄𑀘𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 ¶ 𑀅𑀦𑀼𑀓𑁆𑀓𑀫𑁄 𑀅𑀢𑁆𑀣𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀲𑀫𑀸𑀤𑀸𑀦𑀓𑁆𑀓𑀫𑁂𑀦𑀧𑀺 𑀆𑀤𑀺𑀅𑀦𑁆𑀢𑀸 𑀮𑀩𑁆𑀪𑀦𑁆𑀢𑀺. 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬𑀸𑀢𑀺 𑀢𑀢𑁆𑀭𑀦𑁆𑀢𑁂 𑀤𑀲𑀦𑁆𑀢𑁂 𑀯𑀸 𑀙𑀺𑀦𑁆𑀦𑀯𑀢𑁆𑀣𑀁 𑀯𑀺𑀬. 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀜𑁆𑀘𑁂𑀢𑀁 ‘‘𑀅𑀔𑀡𑁆𑀟𑀸𑀦𑀻’’𑀢𑀺 𑀇𑀫𑀲𑁆𑀲 𑀅𑀥𑀺𑀓𑀢𑀢𑁆𑀢𑀸. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀉𑀤𑀸𑀳𑀭𑀡𑀸𑀦𑀺. 𑀔𑀡𑁆𑀟𑀺𑀓𑀢𑀸 𑀪𑀺𑀦𑁆𑀦𑀢𑀸 𑀔𑀡𑁆𑀟𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀔𑀡𑁆𑀟𑀁, 𑀲𑀻𑀮𑀁. 𑀙𑀺𑀤𑁆𑀤𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀁 𑀯𑀺𑀦𑀺𑀯𑀺𑀚𑁆𑀛𑀦𑀯𑀲𑁂𑀦. 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀕𑀸𑀯𑀻 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀉𑀧𑀟𑁆𑀠𑀁 𑀢𑀢𑀺𑀬𑀪𑀸𑀕𑀕𑀢𑀁 𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀁 𑀲𑀩𑀮𑀁, 𑀯𑀺𑀲𑀪𑀸𑀕𑀯𑀡𑁆𑀡𑁂𑀳𑁂𑀯 𑀩𑀺𑀦𑁆𑀤𑀽𑀳𑀺 𑀅𑀦𑁆𑀢𑀭𑀦𑁆𑀢𑀭𑀸𑀳𑀺 𑀯𑀺𑀫𑀺𑀲𑁆𑀲𑀁 𑀓𑀫𑁆𑀫𑀸𑀲𑀁. 𑀅𑀬𑀁 𑀇𑀫𑁂𑀲𑀁 𑀯𑀺𑀲𑁂𑀲𑁄. 𑀲𑀩𑀮𑀭𑀳𑀺𑀢𑀸𑀦𑀺 𑀅𑀲𑀩𑀮𑀸𑀦𑀺, 𑀢𑀣𑀸 𑀅𑀓𑀫𑁆𑀫𑀸𑀲𑀸𑀦𑀺. 𑀲𑀻𑀮𑀲𑁆𑀲 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀦𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀸𑀯𑀸𑀧𑀸𑀤𑀦𑀁, 𑀢𑀲𑁆𑀫𑀸 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀦𑀯𑀘𑀦𑁂𑀦 𑀢𑁂𑀲𑀁 𑀲𑀻𑀮𑀸𑀦𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀫𑀸𑀳. 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄𑀢𑀺 𑀇𑀫𑀺𑀦𑀸 𑀪𑀼𑀚𑀺𑀲𑁆𑀲𑀓𑀭𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀻𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 ¶ 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀯𑀸 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀲𑁂𑀭𑀻 𑀲𑀬𑀁𑀯𑀲𑀻 𑀪𑀼𑀚𑀺𑀲𑁆𑀲𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀪𑀼𑀚𑀺𑀲𑁆𑀲𑀸𑀦𑀺. 𑀅𑀯𑀺𑀜𑁆𑀜𑀽𑀦𑀁 𑀅𑀧𑁆𑀧𑀫𑀸𑀡𑀢𑀸𑀬 ‘‘𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀼𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀯𑀸 𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀸𑀦𑀻𑀢𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺.

𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀢𑀡𑁆𑀳𑀸𑀧𑀭𑀸𑀫𑀸𑀲𑁂𑀦, ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀘 𑀅𑀧𑀭𑀸𑀫𑀝𑁆𑀞𑀢𑁆𑀢𑀸. 𑀧𑀭𑀸𑀫𑀝𑁆𑀞𑀼𑀦𑁆𑀢𑀺 ‘‘𑀅𑀬𑀁 𑀢𑁂 𑀲𑀻𑀮𑁂𑀲𑀼 𑀤𑁄𑀲𑁄’’𑀢𑀺 𑀘𑀢𑀽𑀲𑀼 𑀯𑀺𑀧𑀢𑁆𑀢𑀻𑀲𑀼 𑀬𑀸𑀬 𑀓𑀸𑀬𑀘𑀺 𑀯𑀺𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑁂𑀦 𑀧𑀭𑀸𑀫𑀝𑁆𑀞𑀼𑀁, 𑀅𑀦𑀼𑀤𑁆𑀥𑀁𑀲𑁂𑀢𑀼𑀁 𑀘𑁄𑀤𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀮𑀁 𑀦𑀸𑀫 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀧𑀸𑀭𑀫𑁆𑀧𑀭𑀺𑀬𑁂𑀦 𑀬𑀸𑀯𑀤𑁂𑀯 𑀲𑀫𑀸𑀥𑀺𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻’’𑀢𑀺. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀧𑁆𑀧𑀬𑁄𑀚𑀦𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺.

𑀲𑀫𑀸𑀦𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀧𑀭𑀺𑀧𑀼𑀡𑁆𑀡𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀪𑁂𑀤𑀸𑀪𑀸𑀯𑀢𑁄 𑀲𑀻𑀮𑁂𑀦 𑀲𑀸𑀫𑀜𑁆𑀜𑀁 𑀲𑀻𑀮𑀲𑀸𑀫𑀜𑁆𑀜𑀁, 𑀢𑀁 𑀕𑀢𑁄 𑀉𑀧𑀕𑀢𑁄𑀢𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄’’𑀢𑀺, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀸𑀦𑀪𑀸𑀯𑀁 𑀉𑀧𑀕𑀢𑀲𑀻𑀮𑁄 𑀲𑀪𑀸𑀕𑀯𑀼𑀢𑁆𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀓𑀸𑀫𑀁 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀦𑀸𑀦𑀢𑁆𑀢𑀁 𑀦 𑀲𑀺𑀬𑀸, 𑀢𑀁 𑀧𑀦 𑀦 𑀏𑀓𑀦𑁆𑀢𑀺𑀓𑀁, 𑀇𑀤𑀁 𑀏𑀓𑀦𑁆𑀢𑀺𑀓𑀁 𑀦𑀺𑀬𑀢𑀪𑀸𑀯𑀢𑁄𑀢𑀺 𑀆𑀳 ‘‘𑀦𑀢𑁆𑀣𑀺 ¶ 𑀫𑀕𑁆𑀕𑀲𑀻𑀮𑁂 𑀦𑀸𑀦𑀢𑁆𑀢’’𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀫𑀕𑁆𑀕𑀲𑀻𑀮𑀁 𑀲𑀦𑁆𑀥𑀸𑀬 𑀢𑀁 ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀸𑀬𑀦𑁆𑀢𑀺 𑀬𑀸 𑀅𑀬𑀁 𑀫𑀬𑁆𑀳𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀸. 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀦𑀺𑀤𑁆𑀤𑁄𑀲𑀸𑀢𑀺 𑀦𑀺𑀤𑁆𑀥𑀼𑀢𑀤𑁄𑀲𑀸, 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀢𑀺 𑀦𑀺𑀕𑁆𑀕𑀘𑁆𑀙𑀢𑀺. 𑀲𑀬𑀁 𑀦𑀺𑀬𑁆𑀬𑀦𑁆𑀢𑀻𑀬𑁂𑀯 𑀳𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀲𑀢𑁆𑀣𑀼 𑀅𑀦𑀼𑀲𑀺𑀝𑁆𑀞𑀺, 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄, 𑀢𑀲𑁆𑀲, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀦𑁆𑀢𑀺 𑀲𑀤𑀺𑀲𑀤𑀺𑀝𑁆𑀞𑀺𑀪𑀸𑀯𑀁 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁂𑀦 𑀅𑀪𑀺𑀦𑁆𑀦𑀤𑀺𑀝𑁆𑀞𑀺𑀪𑀸𑀯𑀁.

𑀧𑀞𑀫𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀦𑁆𑀢𑀺 𑀲𑀳𑀥𑀫𑁆𑀫𑀺𑀓𑀸𑀦𑀁. 𑀧𑀺𑀬𑀁 𑀧𑀺𑀬𑀸𑀬𑀺𑀢𑀩𑁆𑀩𑀓𑀁 𑀓𑀭𑁄𑀦𑁆𑀢𑀻𑀢𑀺 𑀧𑀺𑀬𑀓𑀭𑀡𑀸. 𑀕𑀭𑀼𑀁 𑀕𑀭𑀼𑀝𑁆𑀞𑀸𑀦𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀕𑀭𑀼𑀓𑀭𑀡𑀸. 𑀲𑀗𑁆𑀕𑀡𑁆𑀳𑀦𑀢𑁆𑀣𑀸𑀬𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀯𑀺𑀲𑁂𑀲𑀪𑀸𑀯𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 ¶ 𑀲𑀗𑁆𑀕𑀳𑀡𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀺𑀯𑀤𑀦𑀢𑁆𑀣𑀸𑀬𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀪𑀸𑀯𑀢𑁄 𑀏𑀯 𑀦 𑀯𑀺𑀯𑀤𑀦𑀢𑁆𑀣𑀸𑀬. 𑀲𑀢𑀺 𑀘 𑀅𑀯𑀺𑀯𑀤𑀦𑀳𑁂𑀢𑀼𑀪𑀽𑀢𑀲𑀗𑁆𑀕𑀳𑀓𑀢𑁆𑀢𑁂 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀫𑀕𑁆𑀕𑀪𑀸𑀯𑁄 𑀪𑁂𑀤𑀸𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯𑀸𑀢𑀺 𑀆𑀳 ‘‘𑀲𑀸𑀫𑀕𑁆𑀕𑀺𑀬𑀸’’𑀢𑀺𑀆𑀤𑀺.

𑀤𑀼𑀢𑀺𑀬𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀯𑀟𑁆𑀠𑀺𑀢𑀸𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸. 𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀸 𑀓𑀢𑀸𑀢𑀺 𑀬𑀣𑀸 𑀬𑀼𑀢𑁆𑀢𑀫𑀸𑀚𑀜𑁆𑀜𑀬𑀸𑀦𑀁 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀭𑀳𑀁 𑀕𑀳𑀺𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀯𑀸 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸, 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑁂𑀦 𑀇𑀤𑁆𑀥𑀺𑀯𑀺𑀲𑁂𑀲𑀢𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀼𑀯𑀺𑀲𑁄𑀥𑀺𑀢𑀧𑀭𑀺𑀲𑁆𑀲𑀬𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 ¶ 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀢𑀁𑀢𑀁𑀅𑀥𑀺𑀝𑁆𑀞𑀸𑀦𑀬𑁄𑀕𑁆𑀬𑀢𑀸𑀬 𑀞𑀧𑀺𑀢𑀸. 𑀲𑀫𑀦𑁆𑀢𑀢𑁄 𑀘𑀺𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀽𑀧𑀘𑀬𑀁 𑀕𑀫𑀺𑀢𑀸. 𑀢𑁂𑀦𑀸𑀳 ‘‘𑀉𑀧𑀘𑀺𑀢𑀸’𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀢𑀺 𑀇𑀤𑁆𑀥𑀺𑀪𑀸𑀯𑀦𑀸𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀲𑀫𑁆𑀪𑀸𑀯𑀺𑀢𑀸. 𑀅𑀪𑀽𑀢𑀩𑁆𑀬𑀸𑀓𑀭𑀡𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 ‘‘𑀫𑁂𑀢𑁆𑀢𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀪𑀺𑀩𑁆𑀬𑀸𑀳𑀸𑀭𑀁 𑀩𑁆𑀬𑀸𑀳𑀭𑀢𑀺. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀦𑀺𑀲𑁆𑀲𑀝𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀩𑁆𑀬𑀸𑀧𑀸𑀤𑁄 𑀦𑀢𑁆𑀣𑀻𑀢𑀺 𑀇𑀤𑀸𑀦𑀺 𑀫𑀫 𑀩𑁆𑀬𑀸𑀧𑀸𑀤𑁄 𑀦𑀸𑀫 𑀲𑀩𑁆𑀩𑀲𑁄 𑀦𑀢𑁆𑀣𑀻𑀢𑀺 𑀜𑀢𑁆𑀯𑀸.

𑀩𑀮𑀯𑀯𑀺𑀧𑀲𑁆𑀲𑀦𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀜𑀸𑀡𑀁, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀪𑀗𑁆𑀕𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀬𑁂𑀲𑀁 𑀦𑀺𑀫𑀺𑀢𑁆𑀢𑀸𑀦𑀁 𑀅𑀪𑀸𑀯𑁂𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀺𑀫𑀺𑀢𑁆𑀢𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀕𑀲𑁆𑀲 𑀦𑀺𑀫𑀺𑀢𑁆𑀢𑀁, 𑀭𑀸𑀕𑁄 𑀏𑀯 𑀯𑀸 𑀦𑀺𑀫𑀺𑀢𑁆𑀢𑀁 𑀭𑀸𑀕𑀦𑀺𑀫𑀺𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀤𑁄𑀲𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀭𑀽𑀧𑀯𑁂𑀤𑀦𑀸𑀤𑀺𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺. 𑀢𑁂𑀲𑀁𑀬𑁂𑀯 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺. 𑀢𑀬𑀺𑀤𑀁 𑀦𑀺𑀫𑀺𑀢𑁆𑀢𑀁 𑀬𑀲𑁆𑀫𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀭𑀳𑀢𑁆𑀢𑀨𑀮𑁂 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀸 𑀳𑀺…𑀧𑁂… 𑀅𑀦𑀺𑀫𑀺𑀢𑁆𑀢𑀸’’𑀢𑀺. 𑀦𑀺𑀫𑀺𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑀺 𑀅𑀦𑀼𑀕𑀘𑁆𑀙𑀢𑀺 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺 𑀲𑀻𑀮𑁂𑀦𑀸𑀢𑀺 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀦𑀺𑀫𑀺𑀢𑁆𑀢𑀁 𑀅𑀦𑀼𑀲𑀭𑀡𑀲𑀪𑀸𑀯’’𑀦𑁆𑀢𑀺.

𑀅𑀲𑁆𑀫𑀺𑀫𑀸𑀦𑁄𑀢𑀺 ‘‘𑀅𑀲𑁆𑀫𑀻’’𑀢𑀺 𑀧𑀯𑀢𑁆𑀢𑁄 𑀅𑀢𑁆𑀢𑀯𑀺𑀲𑀬𑁄 𑀫𑀸𑀦𑁄. 𑀅𑀬𑀁 𑀦𑀸𑀫 𑀅𑀳𑀫𑀲𑁆𑀫𑀻𑀢𑀺 𑀭𑀽𑀧𑀮𑀓𑁆𑀔𑀡𑁄 ¶ 𑀯𑁂𑀤𑀦𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀮𑀓𑁆𑀔𑀡𑁄 𑀅𑀬𑀁 𑀦𑀸𑀫 𑀅𑀢𑁆𑀢𑀸 𑀅𑀳𑀁 𑀅𑀲𑁆𑀫𑀻𑀢𑀺. 𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀕𑁆𑀖𑀸𑀢𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀧𑀼𑀦 𑀅𑀲𑁆𑀫𑀺𑀫𑀸𑀦𑁄 𑀦𑀢𑁆𑀣𑀻𑀢𑀺 𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁 𑀓𑀺𑀢𑁆𑀢𑁂𑀦𑁆𑀢𑁄 𑀲𑀫𑀼𑀕𑁆𑀖𑀸𑀢𑀢𑁆𑀢𑀫𑁂𑀯 𑀯𑀺𑀪𑀸𑀯𑁂𑀢𑀺.

𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀪𑀤𑁆𑀤𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪-𑁧𑁫. 𑀘𑀢𑀼𑀢𑁆𑀣𑁂 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀯𑀸 𑀓𑀫𑁆𑀫𑀁 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀸𑀭𑀸𑀫𑁄. 𑀓𑀫𑁆𑀫𑁂 𑀭𑀢𑁄 𑀦 𑀕𑀦𑁆𑀣𑀥𑀼𑀭𑁂 𑀯𑀺𑀧𑀲𑁆𑀲𑀦𑀸𑀥𑀼𑀭𑁂 𑀯𑀸𑀢𑀺 𑀓𑀫𑁆𑀫𑀭𑀢𑁄. 𑀧𑀼𑀦𑀧𑁆𑀧𑀼𑀦𑀁 𑀬𑀼𑀢𑁆𑀢𑁄𑀢𑀺 𑀢𑀧𑁆𑀧𑀭𑀪𑀸𑀯𑁂𑀦 𑀅𑀦𑀼 𑀅𑀦𑀼 𑀬𑀼𑀢𑁆𑀢𑁄 𑀧𑀲𑀼𑀢𑁄. 𑀆𑀮𑀸𑀧𑀲𑀮𑁆𑀮𑀸𑀧𑁄𑀢𑀺 𑀇𑀢𑁆𑀣𑀺𑀯𑀡𑁆𑀡𑀧𑀼𑀭𑀺𑀲𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀮𑀧𑀦𑀁. 𑀧𑀜𑁆𑀘𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀪𑀤𑁆𑀤𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 ¶ 𑀯𑀺𑀲𑀪𑀸𑀕𑀯𑁂𑀤𑀦𑀼𑀧𑁆𑀧𑀢𑁆𑀢𑀺𑀬𑀸 𑀓𑀓𑀘𑁂𑀦𑁂𑀯 𑀘𑀢𑀼𑀇𑀭𑀺𑀬𑀸𑀧𑀣𑀁 𑀙𑀺𑀦𑁆𑀤𑀦𑁆𑀢𑁄 𑀆𑀩𑀸𑀥𑀬𑀢𑀻𑀢𑀺 𑀆𑀩𑀸𑀥𑁄, 𑀲𑁄 𑀬𑀲𑁆𑀲 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑁄. 𑀢𑀁𑀲𑀫𑀼𑀝𑁆𑀞𑀸𑀦𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄. 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄𑀢𑀺 𑀥𑀸𑀢𑀼𑀲𑀗𑁆𑀔𑀬𑁂𑀦 𑀧𑀭𑀺𑀓𑁆𑀔𑀻𑀡𑀲𑀭𑀻𑀭𑁄.

𑀲𑀧𑁆𑀧𑀝𑀺𑀪𑀬𑀓𑀦𑁆𑀢𑀸𑀭𑀲𑀤𑀺𑀲𑀸 𑀲𑁄𑀴𑀲𑀯𑀢𑁆𑀣𑀼𑀓𑀸 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀢𑀺𑀡𑁆𑀡𑀸 𑀇𑀫𑀸𑀬𑀸𑀢𑀺 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀕𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀧𑀯𑀢𑁆𑀢𑀺𑀆𑀤𑀻𑀲𑀼 ‘‘𑀏𑀯𑀁 𑀦𑀼 𑀔𑁄 𑀦 𑀦𑀼 𑀔𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀓𑀸 𑀓𑀣𑀁𑀓𑀣𑀸 𑀅𑀲𑁆𑀲𑀸𑀢𑀺 𑀯𑀺𑀕𑀢𑀓𑀣𑀁𑀓𑀣𑀸. 𑀲𑀸𑀭𑀚𑁆𑀚𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀻𑀦𑀢𑁆𑀢𑀸 𑀭𑀸𑀕𑀯𑀺𑀓𑁆𑀔𑁂𑀧𑁂𑀲𑀼 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀘 𑀢𑀺𑀝𑁆𑀞𑀓𑀢𑁆𑀢𑀸 𑀯𑁂𑀲𑀸𑀭𑀚𑁆𑀚𑀁, 𑀯𑀺𑀲𑀸𑀭𑀤𑀪𑀸𑀯𑀁 𑀯𑁂𑀬𑁆𑀬𑀢𑁆𑀢𑀺𑀬𑀁 𑀧𑀢𑁆𑀢𑀸𑀢𑀺 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸. 𑀅𑀢𑁆𑀢𑀦𑀸 𑀏𑀯 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀢𑁆𑀢𑀸 𑀦 𑀧𑀭𑀁 𑀧𑀘𑁆𑀘𑁂𑀢𑀺, 𑀦𑀲𑁆𑀲 𑀧𑀭𑁄 𑀧𑀘𑁆𑀘𑁂𑀢𑀩𑁆𑀩𑁄 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑀸.

𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑀪𑀸𑀯𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑁄. 𑀪𑀸𑀯𑀧𑁆𑀧𑀥𑀸𑀦𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀯𑀼𑀝𑁆𑀞𑀺𑀢𑁄𑀢𑀺 𑀇𑀤𑀁 𑀧𑀦 𑀅𑀢𑁆𑀣𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑁄𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 ¶ 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀉𑀧𑀸𑀲𑀓𑀸𑀤𑀺𑀲𑀢𑁆𑀢𑁂𑀳𑀺 𑀘𑁂𑀯 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀲𑀗𑁆𑀔𑀸𑀭𑁂𑀳𑀺 𑀘 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸 𑀦𑀺𑀮𑀻𑀬𑀦𑀁 𑀯𑀺𑀯𑁂𑀘𑀦𑀁. 𑀓𑀸𑀬𑀘𑀺𑀢𑁆𑀢𑁂𑀳𑀺 𑀢𑀢𑁄 𑀯𑀺𑀯𑀺𑀢𑁆𑀢𑁄 𑀏𑀓𑀻𑀪𑀸𑀯𑁄 𑀧𑀯𑀺𑀯𑁂𑀓𑁄𑀢𑀺 𑀆𑀳 ‘‘𑀏𑀓𑀻𑀪𑀸𑀯𑀸𑀬𑀸’’𑀢𑀺𑀆𑀤𑀺. 𑀏𑀓𑀻𑀪𑀸𑀯𑀢𑁄𑀢𑀺 𑀘 𑀇𑀫𑀺𑀦𑀸 𑀓𑀸𑀬𑀯𑀺𑀯𑁂𑀓𑀢𑁄 𑀯𑀼𑀝𑁆𑀞𑀸𑀦𑀫𑀸𑀳. 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀢𑁄𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀯𑀺𑀯𑁂𑀓𑀢𑁄. 𑀯𑀼𑀝𑁆𑀞𑀺𑀢𑁄𑀢𑀺 𑀢𑀢𑁄 𑀤𑀼𑀯𑀺𑀥𑀯𑀺𑀯𑁂𑀓𑀢𑁄 𑀪𑀯𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀫𑀸𑀕𑀫𑁂𑀦 𑀉𑀧𑁂𑀢𑁄.

𑀲𑁄𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀘𑁆𑀙𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 ¶ 𑀫𑀘𑁆𑀙𑀖𑀸𑀢𑀓𑀦𑁆𑀢𑀺 𑀫𑀘𑁆𑀙𑀩𑀦𑁆𑀥𑀁 𑀓𑁂𑀯𑀝𑁆𑀝𑀁. 𑀑𑀭𑀩𑁆𑀪𑀺𑀓𑀸𑀤𑀻𑀲𑀼 𑀉𑀭𑀩𑁆𑀪𑀸 𑀯𑀼𑀘𑁆𑀘𑀦𑁆𑀢𑀺 𑀏𑀴𑀓𑀸, 𑀉𑀭𑀩𑁆𑀪𑁂 𑀳𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑁄. 𑀲𑀽𑀓𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀘𑁆𑀙𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂𑀢𑀺 𑀦𑀸𑀢𑀺𑀓𑀸𑀦𑀸𑀫𑀓𑀁 𑀕𑀸𑀫𑀁 𑀦𑀺𑀲𑁆𑀲𑀸𑀬. 𑀤𑁆𑀯𑀺𑀦𑁆𑀦𑀁 𑀘𑀽𑀴𑀧𑀺𑀢𑀺𑀫𑀳𑀸𑀧𑀺𑀢𑀺𑀧𑀼𑀢𑁆𑀢𑀸𑀦𑀁 𑀤𑁆𑀯𑁂 𑀕𑀸𑀫𑀸, 𑀢𑁂𑀲𑀼 𑀏𑀓𑀲𑁆𑀫𑀺𑀁 𑀕𑀸𑀫𑁂. 𑀜𑀸𑀢𑀻𑀦𑀜𑁆𑀳𑀺 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁄 𑀕𑀸𑀫𑁄 𑀜𑀸𑀢𑀺𑀓𑁄, 𑀜𑀸𑀢𑀺𑀓𑁄𑀬𑁂𑀯 𑀦𑀸𑀢𑀺𑀓𑁄 𑀜-𑀓𑀸𑀭𑀲𑁆𑀲 𑀦-𑀓𑀸𑀭𑀸𑀤𑁂𑀲𑁄 ‘‘𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁪; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁦; 𑀚𑀸. 𑀅𑀝𑁆𑀞. 𑁨.𑁨.𑁩𑁪) 𑀯𑀺𑀬. 𑀲𑁄 𑀓𑀺𑀭 𑀕𑀸𑀫𑁄 𑀬𑁂𑀲𑀁 𑀢𑀤𑀸 𑀢𑁂𑀲𑀁 𑀧𑀼𑀩𑁆𑀩𑀧𑀼𑀭𑀺𑀲𑁂𑀦 𑀅𑀢𑁆𑀢𑀦𑁄 𑀜𑀸𑀢𑀻𑀦𑀁 𑀲𑀸𑀥𑀸𑀭𑀡𑀪𑀸𑀯𑁂𑀦 𑀦𑀺𑀯𑀲𑀺𑀢𑁄, 𑀢𑁂𑀦 𑀜𑀸𑀢𑀺𑀓𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣 𑀧𑀘𑁆𑀙𑀸 𑀤𑁆𑀯𑀻𑀳𑀺 𑀤𑀸𑀬𑀸𑀤𑁂𑀳𑀺 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑁄. 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀢𑀺 𑀇𑀝𑁆𑀞𑀓𑀸, 𑀕𑀺𑀜𑁆𑀚𑀓𑀸𑀳𑀺𑀬𑁂𑀯 𑀓𑀢𑁄 𑀆𑀯𑀲𑀣𑁄𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁄. 𑀲𑁄 𑀳𑀺 𑀆𑀯𑀸𑀲𑁄 𑀬𑀣𑀸 𑀲𑀼𑀥𑀸𑀧𑀭𑀺𑀓𑀫𑁆𑀫𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀏𑀯𑀁 𑀇𑀝𑁆𑀞𑀓𑀸𑀳𑀺 𑀏𑀯 𑀘𑀺𑀦𑀺𑀢𑁆𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑁄. 𑀢𑀲𑁆𑀫𑀺𑀁 𑀓𑀺𑀭 𑀧𑀤𑁂𑀲𑁂 𑀫𑀢𑁆𑀢𑀺𑀓𑀸 𑀲𑀓𑁆𑀔𑀭𑀫𑀭𑀼𑀫𑁆𑀧𑀯𑀸𑀮𑀼𑀓𑀸𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀓𑀣𑀺𑀦𑀸 𑀲𑀡𑁆𑀳𑀲𑀼𑀔𑀼𑀫𑀸, 𑀢𑀸𑀬 𑀓𑀢𑀸𑀦𑀺 𑀓𑀼𑀮𑀸𑀮𑀪𑀸𑀚𑀦𑀸𑀦𑀺𑀧𑀺 𑀲𑀺𑀮𑀸𑀫𑀬𑀸𑀦𑀺 𑀯𑀺𑀬 𑀤𑀴𑁆𑀳𑀸𑀦𑀺. 𑀢𑀲𑁆𑀫𑀸 𑀢𑁂 𑀉𑀧𑀸𑀲𑀓𑀸 𑀢𑀸𑀬 𑀫𑀢𑁆𑀢𑀺𑀓𑀸𑀬 𑀤𑀻𑀖𑀧𑀼𑀣𑀽 ¶ 𑀇𑀝𑁆𑀞𑀓𑀸 𑀓𑀸𑀭𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑀢𑀼𑀮𑀸𑀬𑁄 𑀲𑀩𑁆𑀩𑀁 𑀤𑀩𑁆𑀩𑀲𑀫𑁆𑀪𑀸𑀭𑁂𑀦 𑀯𑀺𑀦𑀸 𑀢𑀸𑀳𑀺 𑀇𑀝𑁆𑀞𑀓𑀸𑀳𑀺𑀬𑁂𑀯 𑀧𑀸𑀲𑀸𑀤𑀁 𑀓𑀸𑀭𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀝𑁆𑀞𑀓𑀸𑀫𑀬𑁂 𑀧𑀸𑀲𑀸𑀤𑁂’’𑀢𑀺.

𑀭𑀢𑁆𑀢𑀺𑀦𑁆𑀤𑀺𑀯𑀦𑁆𑀢𑀺 𑀏𑀓𑀭𑀢𑁆𑀢𑀺𑀤𑀺𑀯𑀁. 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀸𑀯𑀳𑀁 𑀲𑀢𑁆𑀣𑀼 𑀑𑀯𑀸𑀤𑀁. 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺 𑀩𑀳𑀼 𑀯𑀢 𑀫𑀬𑀸 𑀅𑀢𑁆𑀢𑀳𑀺𑀢𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀓𑀢𑀁 𑀪𑀯𑁂𑀬𑁆𑀬.

𑀢𑀤𑀦𑁆𑀢𑀭𑀦𑁆𑀢𑀺 𑀢𑀢𑁆𑀢𑀓𑀁 𑀯𑁂𑀮𑀁. 𑀏𑀓𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀏𑀓𑀁 𑀤𑀺𑀯𑀲𑀁 𑀬𑀸𑀧𑀦𑀧𑁆𑀧𑀳𑁄𑀦𑀓𑀁 𑀧𑀺𑀡𑁆𑀟𑀧𑀸𑀢𑀁. 𑀬𑀸𑀯 𑀅𑀦𑁆𑀢𑁄 𑀧𑀯𑀺𑀝𑁆𑀞𑀯𑀸𑀢𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀩𑀳𑀺 𑀦𑀺𑀓𑁆𑀔𑀦𑁆𑀢𑀯𑀸𑀢𑁄 ¶ 𑀯𑀸 𑀅𑀦𑁆𑀢𑁄 𑀧𑀯𑀺𑀲𑀢𑀻𑀢𑀺 𑀏𑀓𑀲𑁆𑀲𑁂𑀯 𑀧𑀯𑁂𑀲𑀦𑀺𑀓𑁆𑀔𑀫𑁄 𑀯𑀺𑀬 𑀯𑀼𑀢𑁆𑀢𑀁, 𑀢𑀁 𑀦𑀸𑀲𑀺𑀓𑀸𑀯𑀸𑀢𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀞𑀫𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀦𑀺𑀓𑁆𑀔𑀦𑁆𑀢𑁂𑀢𑀺 𑀯𑀻𑀢𑀺𑀯𑀢𑁆𑀢𑁂. 𑀧𑀢𑀺𑀕𑀢𑀸𑀬𑀸𑀢𑀺 𑀧𑀘𑁆𑀘𑀸𑀕𑀢𑀸𑀬, 𑀲𑀫𑁆𑀧𑀢𑁆𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀝𑀺𑀧𑀦𑁆𑀦𑀸𑀬𑀸’’𑀢𑀺. 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀸 𑀦 𑀓𑁂𑀯𑀮𑀁 𑀓𑀸𑀮𑀓𑀺𑀭𑀺𑀬𑀸𑀯, 𑀫𑀫 𑀅𑀢𑀺𑀤𑀼𑀮𑁆𑀮𑀪𑀁 𑀔𑀡𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀫𑀦𑀲𑀺𑀓𑀸𑀭𑀲𑁆𑀲 𑀘𑁂𑀯 𑀚𑀻𑀯𑀺𑀢𑀲𑁆𑀲 𑀘 𑀲𑀕𑁆𑀕𑀫𑁄𑀓𑁆𑀔𑀸𑀦𑀜𑁆𑀘 𑀅𑀦𑁆𑀢𑀭𑀸𑀬𑁄 𑀅𑀲𑁆𑀲, 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀺𑀯𑀺𑀥𑁄 𑀅𑀦𑁆𑀢𑀭𑀸𑀬𑁄’’𑀢𑀺𑀆𑀤𑀺. 𑀯𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀧𑀢𑁆𑀢𑀺𑀁 𑀕𑀘𑁆𑀙𑁂𑀬𑁆𑀬. 𑀲𑀢𑁆𑀣𑀓𑁂𑀦 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑀦𑁆𑀢𑀦𑀓𑀸𑀭𑀓𑀸 𑀓𑀸𑀬𑁂 𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀓𑀯𑀸𑀢𑀸 𑀲𑀢𑁆𑀣𑀓𑀯𑀸𑀢𑀸. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄𑀢𑀺 𑀦𑀺𑀬𑁆𑀬𑀸𑀦𑀸𑀯𑀳𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄. 𑀧𑀬𑁄𑀕𑀯𑀻𑀭𑀺𑀬𑀦𑁆𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑀯𑀻𑀭𑀺𑀬𑀁. 𑀦 𑀧𑀝𑀺𑀯𑀸𑀢𑀺 𑀦 𑀧𑀝𑀺𑀦𑀺𑀯𑀢𑁆𑀢𑀢𑀻𑀢𑀺 𑀅𑀧𑁆𑀧𑀝𑀺𑀯𑀸𑀦𑀻, 𑀅𑀦𑁆𑀢𑀭𑀸 𑀯𑁄𑀲𑀸𑀦𑀸𑀦𑀸𑀧𑀚𑁆𑀚𑀦𑀯𑀻𑀭𑀺𑀬𑀁. 𑀢𑁂𑀦𑀸𑀳 ‘‘𑀅𑀦𑀼𑀓𑁆𑀓𑀡𑁆𑀞𑀦𑀸 𑀅𑀧𑁆𑀧𑀝𑀺𑀲𑀗𑁆𑀖𑀭𑀡𑀸’’𑀢𑀺.

𑀤𑀼𑀢𑀺𑀬𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀡𑀻𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀼𑀢𑁆𑀢𑀭𑀺𑀬𑀯𑀕𑁆𑀕𑁄

𑁧-𑁨. 𑀲𑀸𑀫𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧-𑁨𑁨. 𑀢𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮-𑀲𑀤𑁆𑀤𑁄 𑀅𑀦𑀯𑀲𑁂𑀲𑀢𑁆𑀣𑁄, 𑀓𑀧𑁆𑀧-𑀲𑀤𑁆𑀤𑁄 𑀲𑀫𑀦𑁆𑀢𑀪𑀸𑀯𑀢𑁆𑀣𑁄. 𑀢𑀲𑁆𑀫𑀸 𑀓𑁂𑀯𑀮𑀓𑀧𑁆𑀧𑀁 𑀧𑁄𑀓𑁆𑀔𑀭𑀡𑀺𑀬𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀯𑀲𑁂𑀲𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑀧𑀺 𑀑𑀪𑀸𑀲𑀲𑁆𑀲 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀏𑀓𑀤𑁂𑀲𑀨𑀭𑀡𑀫𑁆𑀧𑀺 𑀲𑀺𑀬𑀸, 𑀅𑀬𑀁 𑀧𑀦 𑀲𑀩𑁆𑀩𑀲𑁄𑀯 𑀨𑀭𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀦𑁆𑀢𑀢𑁆𑀣𑁄 𑀓𑀧𑁆𑀧-𑀲𑀤𑁆𑀤𑁄 𑀕𑀳𑀺𑀢𑁄. 𑀅𑀢𑁆𑀢𑀦𑁄 𑀑𑀪𑀸𑀲𑁂𑀦 𑀨𑀭𑀺𑀢𑁆𑀯𑀸𑀢𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑀲𑀭𑀻𑀭𑀲𑀫𑀼𑀝𑁆𑀞𑀺𑀢𑁂𑀦 𑀑𑀪𑀸𑀲𑁂𑀦 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 ¶ 𑀯𑀺𑀬 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀦𑀼𑀜𑁆𑀜𑁄𑀢𑀺 𑀲𑀫𑁆𑀫𑀤𑁂𑀯 𑀓𑀢𑀫𑀦𑀼𑀜𑁆𑀜𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀘𑀺𑀢𑁆𑀢𑁄’’𑀢𑀺, 𑀲𑀫𑀸𑀦𑀚𑁆𑀛𑀸𑀲𑀬𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀦𑁆𑀢𑀺 𑀤𑀼𑀩𑁆𑀩𑀘𑁄, 𑀢𑀲𑁆𑀲 𑀓𑀫𑁆𑀫𑀁 𑀤𑁄𑀯𑀘𑀲𑁆𑀲𑀁, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀤𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀣𑀺𑀢𑀸 𑀤𑁄𑀯𑀘𑀲𑁆𑀲𑀢𑀸. 𑀅𑀣 𑀯𑀸 𑀤𑁄𑀯𑀘𑀲𑁆𑀲𑀫𑁂𑀯 𑀤𑁄𑀯𑀘𑀲𑁆𑀲𑀢𑀸. 𑀲𑀸 𑀅𑀢𑁆𑀣𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺. 𑀘𑁂𑀢𑀦𑀸𑀧𑀥𑀸𑀦𑁄 𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀘𑀢𑀼𑀦𑁆𑀦𑀁 𑀯𑀸 𑀔𑀦𑁆𑀥𑀸𑀦𑀁 𑀅𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀸𑀧𑀸 𑀅𑀲𑁆𑀲𑀤𑁆𑀥𑀸𑀤𑀬𑁄 𑀧𑀼𑀕𑁆𑀕𑀮𑀸 𑀏𑀢𑀲𑁆𑀲 𑀫𑀺𑀢𑁆𑀢𑀸𑀢𑀺 𑀧𑀸𑀧𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸. 𑀲𑀸𑀧𑀺 𑀅𑀢𑁆𑀣𑀢𑁄 𑀤𑁄𑀯𑀘𑀲𑁆𑀲𑀢𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀬𑀸𑀬 𑀳𑀺 𑀘𑁂𑀢𑀦𑀸𑀬 𑀧𑀼𑀕𑁆𑀕𑀮𑁄 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄 𑀦𑀸𑀫 𑀳𑁄𑀢𑀺, 𑀲𑀸 𑀘𑁂𑀢𑀦𑀸 𑀧𑀸𑀧𑀫𑀺𑀢𑁆𑀢𑀢𑀸. 𑀘𑀢𑁆𑀢𑀸𑀭𑁄𑀧𑀺 𑀯𑀸 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀧𑀸𑀧𑀫𑀺𑀢𑁆𑀢𑀢𑀸. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀸𑀫𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀲𑀫𑁆𑀪𑀯𑀢𑀺 𑀚𑀸𑀢𑀺𑀫𑀭𑀡𑀁 𑀏𑀢𑁂𑀦𑀸𑀢𑀺 𑀲𑀫𑁆𑀪𑀯𑁄, 𑀉𑀧𑀸𑀤𑀸𑀦𑀦𑁆𑀢𑀺 𑀆𑀳 ‘‘𑀚𑀸𑀢𑀺𑀬𑀸 𑀘 𑀫𑀭𑀡𑀲𑁆𑀲 𑀘 𑀲𑀫𑁆𑀪𑀯𑁂 𑀧𑀘𑁆𑀘𑀬𑀪𑀽𑀢𑁂’’𑀢𑀺. 𑀅𑀦𑀼𑀧𑀸𑀤𑀸𑀢𑀺 𑀅𑀦𑀼𑀧𑀸𑀤𑀸𑀬. 𑀢𑁂𑀦𑀸𑀳 ‘‘𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸’’𑀢𑀺. 𑀚𑀸𑀢𑀺𑀫𑀭𑀡𑀸𑀦𑀺 𑀲𑀫𑁆𑀫𑀸 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 ‘‘𑀚𑀸𑀢𑀺𑀫𑀭𑀡𑀸𑀦𑀁 𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂’’𑀢𑀺. 𑀲𑀩𑁆𑀩𑀤𑀼𑀓𑁆𑀔𑀁 𑀉𑀧𑀘𑁆𑀘𑀕𑀼𑀦𑁆𑀢𑀺 𑀲𑀓𑀮𑀫𑁆𑀧𑀺 𑀯𑀝𑁆𑀝𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀦𑁆𑀢𑀸 𑀘𑀭𑀺𑀫𑀘𑀺𑀢𑁆𑀢𑀦𑀺𑀭𑁄𑀥𑁂𑀦 𑀯𑀝𑁆𑀝𑀤𑀼𑀓𑁆𑀔𑀮𑁂𑀲𑀲𑁆𑀲𑀧𑀺 𑀅𑀲𑀫𑁆𑀪𑀯𑀢𑁄.

𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀳𑀺𑀫𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 ¶ 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀳𑁄𑀢𑀻𑀢𑀺 𑀲𑀫𑀸𑀧𑀚𑁆𑀚𑀦𑀓𑀼𑀲𑀮𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀫𑀸𑀧𑀚𑁆𑀚𑀺𑀢𑀼𑀁 𑀓𑀼𑀲𑀮𑁄’’𑀢𑀺. 𑀢𑀢𑁆𑀣 𑀅𑀦𑁆𑀢𑁄𑀕𑀢𑀳𑁂𑀢𑀼𑀅𑀢𑁆𑀣𑁄 𑀞𑀺𑀢𑀺-𑀲𑀤𑁆𑀤𑁄, 𑀢𑀲𑁆𑀫𑀸 𑀞𑀧𑀦𑀓𑀼𑀲𑀮𑁄𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀫𑀸𑀥𑀺𑀁 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀢𑀢𑁆𑀣 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀲𑀢𑁆𑀢𑀝𑁆𑀞𑀅𑀘𑁆𑀙𑀭𑀸𑀫𑀢𑁆𑀢𑀁 ¶ 𑀔𑀡𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀺 𑀅𑀥𑀺𑀝𑁆𑀞𑀸𑀦𑀯𑀲𑀺𑀪𑀸𑀯𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸. 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀦. 𑀯𑀼𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀢𑀺 𑀯𑀼𑀝𑁆𑀞𑀸𑀦𑀯𑀲𑀺𑀪𑀸𑀯𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸. 𑀓𑀮𑁆𑀮𑀁 𑀲𑀜𑁆𑀚𑀸𑀢𑀁 𑀅𑀲𑁆𑀲𑀸𑀢𑀺 𑀓𑀮𑁆𑀮𑀺𑀢𑀁, 𑀢𑀲𑁆𑀫𑀺𑀁 𑀓𑀮𑁆𑀮𑀺𑀢𑁂 𑀓𑀮𑁆𑀮𑀺𑀢𑀪𑀸𑀯𑁂 𑀓𑀼𑀲𑀮𑁄 𑀓𑀮𑁆𑀮𑀺𑀢𑀓𑀼𑀲𑀮𑁄. 𑀳𑀸𑀲𑁂𑀢𑀼𑀁 𑀢𑁄𑀲𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀓𑀮𑁆𑀮𑀁 𑀓𑀸𑀢𑀼𑀦𑁆𑀢𑀺 𑀲𑀫𑀸𑀥𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀓𑀭𑀡𑁂𑀦 𑀲𑀳𑀓𑀸𑀭𑀻𑀓𑀸𑀭𑀡𑀸𑀦𑀜𑁆𑀘 𑀲𑀫𑀧𑁆𑀧𑀥𑀸𑀦𑁂𑀦 𑀲𑀫𑀸𑀧𑀚𑁆𑀚𑀦𑁂 𑀘𑀺𑀢𑁆𑀢𑀁 𑀲𑀫𑀢𑁆𑀣𑀁 𑀓𑀸𑀢𑀼𑀁. 𑀲𑀫𑀸𑀥𑀺𑀲𑁆𑀲 𑀕𑁄𑀘𑀭𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀢𑀲𑁆𑀲 𑀕𑁄𑀘𑀭𑁂 𑀓𑀫𑁆𑀫𑀝𑁆𑀞𑀸𑀦𑀲𑀜𑁆𑀜𑀺𑀢𑁂 𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑁄𑀕𑀢𑁄 𑀓𑀼𑀲𑀮𑁄 𑀙𑁂𑀓𑁄. 𑀢𑁂𑀦𑀸𑀳 ‘‘𑀲𑀫𑀸𑀥𑀺𑀲𑁆𑀲 𑀅𑀲𑀧𑁆𑀧𑀸𑀬𑁂 𑀅𑀦𑀼𑀧𑀓𑀸𑀭𑀓𑁂 𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸’’𑀢𑀺𑀆𑀤𑀺. 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀁 𑀅𑀪𑀺𑀦𑀻𑀳𑀭𑀺𑀢𑀼𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀁 𑀯𑀺𑀲𑁂𑀲𑀪𑀸𑀕𑀺𑀬𑀢𑀸𑀬 𑀅𑀪𑀺𑀦𑀻𑀳𑀭𑀺𑀢𑀼𑀁 𑀉𑀧𑀦𑁂𑀢𑀼𑀁.

𑀳𑀺𑀫𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀅𑀦𑀼𑀲𑁆𑀲𑀢𑀺𑀓𑀸𑀭𑀡𑀸𑀦𑀻𑀢𑀺 𑀅𑀦𑀼𑀲𑁆𑀲𑀢𑀺𑀬𑁄 𑀏𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀳𑀺𑀢𑀲𑀼𑀔𑀸𑀦𑀁 𑀳𑁂𑀢𑀼𑀪𑀸𑀯𑀢𑁄 𑀓𑀸𑀭𑀡𑀸𑀦𑀺. 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀦𑀺𑀲𑁆𑀲𑀝𑀁. 𑀫𑀼𑀢𑁆𑀢𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀁. 𑀯𑀼𑀝𑁆𑀞𑀺𑀢𑀦𑁆𑀢𑀺 𑀅𑀧𑁂𑀢𑀁. 𑀲𑀩𑁆𑀩𑀫𑁂𑀢𑀁 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀕𑁂𑀥𑀫𑁆𑀳𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀢𑁄. 𑀇𑀤𑀫𑁆𑀧𑀻𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀮𑀤𑁆𑀥𑀁 𑀉𑀧𑀘𑀸𑀭𑀚𑁆𑀛𑀸𑀦𑀫𑀸𑀳. 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸𑀢𑀺 𑀧𑀘𑁆𑀘𑀬𑀁 𑀓𑀭𑀺𑀢𑁆𑀯𑀸, 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀳𑀸𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀲𑀫𑁆𑀩𑀸𑀥𑁂𑀢𑀺 𑀯𑀸 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀻𑀦𑀁 𑀲𑀫𑁆𑀧𑀻𑀴𑁂 𑀲𑀗𑁆𑀓𑀭𑁂 𑀖𑀭𑀸𑀯𑀸𑀲𑁂. 𑀑𑀓𑀸𑀲𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀫𑀕𑁆𑀕𑀨𑀮𑀲𑀼𑀔𑀸𑀥𑀺𑀕𑀫𑀸𑀬 𑀑𑀓𑀸𑀲𑀪𑀸𑀯𑀢𑁄 𑀑𑀓𑀸𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 ¶ 𑀅𑀥𑀺𑀕𑀫𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑀑𑀓𑀸𑀲𑁄. 𑀯𑀺𑀲𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀭𑀸𑀕𑀸𑀤𑀻𑀳𑀺 𑀫𑀮𑁂𑀳𑀺 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀺 ¶ 𑀘 𑀉𑀧𑀓𑁆𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀢𑁆𑀣𑀸𑀬. 𑀲𑀸 𑀧𑀦𑀸𑀬𑀁 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺 𑀲𑀺𑀚𑁆𑀛𑀫𑀸𑀦𑀸 𑀬𑀲𑁆𑀫𑀸 𑀲𑁄𑀓𑀸𑀤𑀻𑀦𑀁 𑀅𑀦𑀼𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑁄𑀘𑀦𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀘𑁂𑀢𑀲𑁄 𑀲𑀦𑁆𑀢𑀸𑀧𑁄 𑀅𑀦𑁆𑀢𑁄𑀢𑀸𑀧𑁄 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀲𑁄𑀓𑁄, 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑁄𑀘𑀺𑀓𑀢𑀸. ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁩𑁫𑁩-𑁩𑁫𑁪; 𑀲𑀁. 𑀦𑀺. 𑁨.𑁬𑁩) 𑀧𑀭𑀺𑀤𑁂𑀯𑀦𑀯𑀲𑁂𑀦 𑀮𑀧𑀦𑀁 𑀧𑀭𑀺𑀤𑁂𑀯𑁄. 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬𑀸𑀢𑀺 𑀧𑀳𑀸𑀦𑀸𑀬. 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀜𑁆𑀳𑀺 𑀇𑀥 𑀲𑀫𑀢𑀺𑀓𑁆𑀓𑀫𑁄. 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬𑀸𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀗𑁆𑀕𑀫𑀸𑀬, 𑀦𑀺𑀭𑁄𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀅𑀭𑀺𑀬𑀫𑀕𑁆𑀕𑁄. 𑀇𑀥 𑀧𑀦 𑀲𑀳 𑀧𑀼𑀩𑁆𑀩𑀪𑀸𑀕𑁂𑀦 𑀅𑀭𑀺𑀬𑀫𑀕𑁆𑀕𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀲𑀳𑀯𑀺𑀧𑀲𑁆𑀲𑀦𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀦𑀢𑁆𑀣𑀸𑀬𑀸’’𑀢𑀺. 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀘𑁆𑀘𑀬𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀢𑀁 𑀅𑀫𑀢𑀥𑀸𑀢𑀼𑀫𑁂𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀫𑀳𑀸𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀞𑀫𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀯𑀟𑁆𑀠𑁂𑀢𑀻𑀢𑀺 𑀫𑀦𑀲𑁄 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀯𑀟𑁆𑀠𑀺𑀁 𑀆𑀯𑀳𑀢𑀺. 𑀫𑀦𑁄𑀪𑀸𑀯𑀦𑀻𑀬𑁄𑀢𑀺 𑀯𑀸 𑀫𑀦𑀲𑀸 𑀪𑀸𑀯𑀺𑀢𑁄 𑀲𑀫𑁆𑀪𑀸𑀯𑀺𑀢𑁄. 𑀬𑀜𑁆𑀘 𑀆𑀯𑀚𑁆𑀚𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀓𑀫𑁆𑀫𑀲𑀸𑀥𑀦𑁄 𑀲𑀫𑁆𑀪𑀸𑀯𑀦𑀢𑁆𑀣𑁄 𑀪𑀸𑀯𑀦𑀻𑀬-𑀲𑀤𑁆𑀤𑁄. ‘‘𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀆𑀮𑁄𑀓𑀲𑀜𑁆𑀜𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀆𑀤𑀻𑀦𑀁 𑀯𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀇𑀥 𑀅𑀯𑀼𑀢𑁆𑀢𑀸𑀦𑀁 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸’’𑀢𑀺 (𑀇𑀢𑀺𑀯𑀼. 𑀅𑀝𑁆𑀞. 𑁧𑁧𑁧). 𑀅𑀦𑁆𑀢𑀭𑀸𑀬𑀲𑀤𑁆𑀤𑀧𑀭𑀺𑀬𑀸𑀬𑁄 𑀇𑀥 𑀅𑀦𑁆𑀢𑀭𑀸-𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀦𑀦𑁆𑀢𑀭𑀸𑀬𑁂𑀦𑀸’’𑀢𑀺.

𑀧𑀞𑀫𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀢𑀺𑀬𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 ¶ ¶ 𑀫𑀡𑁆𑀟𑀮𑀲𑀡𑁆𑀞𑀸𑀦𑀫𑀸𑀴𑀲𑀗𑁆𑀔𑁂𑀧𑁂𑀦 𑀓𑀢𑀸 𑀪𑁄𑀚𑀦𑀲𑀸𑀮𑀸 𑀫𑀡𑁆𑀟𑀮𑀫𑀸𑀴𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀪𑁄𑀚𑀦𑀲𑀸𑀮𑀸𑀬𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀼𑀢𑀺𑀬𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂’’𑀢𑀺. 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀦𑀺𑀭𑀸𑀫𑀺𑀲𑁂𑀦 𑀲𑀼𑀔𑁂𑀦 𑀯𑀺𑀳𑀸𑀭𑀢𑁆𑀣𑀸𑀬. 𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀲𑀽𑀭𑀺𑀬𑀘𑀦𑁆𑀤𑀧𑀚𑁆𑀚𑁄𑀢𑀫𑀡𑀺𑀉𑀓𑁆𑀓𑀸𑀯𑀺𑀚𑁆𑀚𑀼𑀆𑀤𑀻𑀦𑀁 𑀆𑀮𑁄𑀓𑁄 𑀤𑀺𑀯𑀸 𑀭𑀢𑁆𑀢𑀺𑀜𑁆𑀘 𑀉𑀧𑀮𑀤𑁆𑀥𑁄, 𑀬𑀣𑀸𑀮𑀤𑁆𑀥𑀯𑀲𑁂𑀦𑁂𑀯 𑀆𑀮𑁄𑀓𑀁 𑀫𑀦𑀲𑀺 𑀓𑀭𑁄𑀢𑀺, 𑀘𑀺𑀢𑁆𑀢𑁂 𑀞𑀧𑁂𑀢𑀺. 𑀢𑀣𑀸 𑀘 𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀬𑀣𑀸𑀲𑁆𑀲 𑀲𑀼𑀪𑀸𑀯𑀺𑀢𑀸𑀮𑁄𑀓𑀓𑀲𑀺𑀡𑀲𑁆𑀲 𑀯𑀺𑀬 𑀓𑀲𑀺𑀡𑀸𑀮𑁄𑀓𑁄 𑀬𑀣𑀺𑀘𑁆𑀙𑀓𑀁 𑀬𑀸𑀯𑀤𑀺𑀘𑁆𑀙𑀓𑀜𑁆𑀘 𑀲𑁄 𑀆𑀮𑁄𑀓𑁄 𑀭𑀢𑁆𑀢𑀺𑀬𑀁 𑀉𑀧𑀢𑀺𑀝𑁆𑀞𑀢𑀺. 𑀬𑁂𑀦 𑀢𑀢𑁆𑀣 𑀤𑀺𑀯𑀸𑀲𑀜𑁆𑀜𑀁 𑀞𑀧𑁂𑀢𑀺, 𑀤𑀺𑀯𑀸𑀭𑀺𑀯 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺’’𑀦𑁆𑀢𑀺. 𑀤𑀺𑀯𑀸𑀢𑀺 𑀲𑀜𑁆𑀜𑀁 𑀞𑀧𑁂𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀫𑀦𑀲𑀺 𑀓𑀢𑁆𑀯𑀸 𑀤𑀺𑀯𑀸𑀭𑀺𑀯 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺. 𑀬𑀣𑀸𑀦𑁂𑀦 𑀤𑀺𑀯𑀸…𑀧𑁂… 𑀢𑀣𑁂𑀯 𑀢𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀬𑀣𑀸𑀦𑁂𑀦 𑀤𑀺𑀯𑀸 𑀉𑀧𑀮𑀤𑁆𑀥𑁄 𑀲𑀽𑀭𑀺𑀬𑀸𑀮𑁄𑀓𑁄, 𑀏𑀯𑀁 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸 𑀤𑀺𑀝𑁆𑀞𑀸𑀓𑀸𑀭𑁂𑀦𑁂𑀯 𑀢𑀁 𑀆𑀮𑁄𑀓𑀁 𑀫𑀦𑀲𑀺 𑀓𑀭𑁄𑀢𑀺. 𑀬𑀣𑀸 𑀘𑀦𑁂𑀦 𑀭𑀢𑁆𑀢𑀺𑀁…𑀧𑁂… 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀬𑀣𑀸 𑀭𑀢𑁆𑀢𑀺𑀬𑀁 𑀘𑀦𑁆𑀤𑀸𑀮𑁄𑀓𑁄 𑀉𑀧𑀮𑀤𑁆𑀥𑁄, 𑀏𑀯𑀁 𑀤𑀺𑀯𑀸𑀧𑀺 𑀭𑀢𑁆𑀢𑀺𑀁 𑀤𑀺𑀝𑁆𑀞𑀸𑀓𑀸𑀭𑁂𑀦𑁂𑀯 𑀢𑀁 𑀆𑀮𑁄𑀓𑀁 𑀫𑀦𑀲𑀺 𑀓𑀭𑁄𑀢𑀺, 𑀘𑀺𑀢𑁆𑀢𑁂 𑀞𑀧𑁂𑀢𑀺. 𑀯𑀺𑀯𑀝𑁂𑀦𑀸𑀢𑀺 𑀣𑀺𑀦𑀫𑀺𑀤𑁆𑀥𑁂𑀦 𑀅𑀧𑀺𑀳𑀺𑀢𑀢𑁆𑀢𑀸 𑀯𑀺𑀯𑀝𑁂𑀦. 𑀅𑀦𑁄𑀦𑀤𑁆𑀥𑁂𑀦𑀸𑀢𑀺 𑀅𑀲𑀜𑁆𑀙𑀸𑀤𑀺𑀢𑁂𑀦. 𑀲𑀳𑁄𑀪𑀸𑀲𑀓𑀦𑁆𑀢𑀺 𑀲𑀜𑁆𑀜𑀸𑀡𑁄𑀪𑀸𑀲𑀁. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀭𑀽𑀧𑀕𑀢𑀲𑁆𑀲 𑀤𑀺𑀩𑁆𑀩𑀲𑁆𑀲 𑀇𑀢𑀭𑀲𑁆𑀲 𑀘 𑀤𑀲𑁆𑀲𑀦𑀝𑁆𑀞𑁂𑀦 𑀇𑀥 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺.

𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀢𑀺 𑀚𑀻𑀯𑀺𑀢𑀓𑁆𑀔𑀬𑀢𑁄 𑀉𑀧𑀭𑀺 𑀫𑀭𑀡𑀢𑁄 𑀧𑀭𑀁. 𑀲𑀫𑀼𑀕𑁆𑀕𑀢𑁂𑀦𑀸𑀢𑀺 𑀉𑀝𑁆𑀞𑀺𑀢𑁂𑀦. 𑀥𑀼𑀫𑀸𑀢𑀢𑁆𑀢𑀸𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀥𑀼𑀫𑀸𑀢𑀢𑁆𑀢𑀸 𑀲𑀽𑀦𑀢𑁆𑀢𑀸 ¶ . 𑀲𑁂𑀢𑀭𑀢𑁆𑀢𑁂𑀳𑀺 𑀯𑀺𑀧𑀭𑀺𑀪𑀺𑀦𑁆𑀦𑀁 𑀯𑀺𑀫𑀺𑀲𑁆𑀲𑀺𑀢𑀁 𑀦𑀻𑀮𑀁, 𑀧𑀼𑀭𑀺𑀫𑀯𑀡𑁆𑀡𑀯𑀺𑀧𑀭𑀺𑀡𑀸𑀫𑀪𑀽𑀢𑀁 𑀯𑀸 𑀦𑀻𑀮𑀁 𑀯𑀺𑀦𑀻𑀮𑀁, 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀦𑁆𑀢𑀺 𑀓-𑀓𑀸𑀭𑁂𑀦 𑀧𑀤𑀯𑀟𑁆𑀠𑀦𑀫𑀸𑀳 𑀅𑀦𑀢𑁆𑀣𑀦𑁆𑀢𑀭𑀢𑁄 𑀬𑀣𑀸 ‘‘𑀧𑀻𑀢𑀓𑀁 𑀮𑁄𑀳𑀺𑀢𑀓’’𑀦𑁆𑀢𑀺. 𑀧𑀝𑀺𑀓𑀽𑀮𑀢𑁆𑀢𑀸𑀢𑀺 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸. 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀁 𑀯𑀺𑀦𑀻𑀮𑀓𑀦𑁆𑀢𑀺 𑀓𑀼𑀘𑁆𑀙𑀦𑀢𑁆𑀣𑁄 𑀯𑀸 𑀅𑀬𑀁 𑀓-𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩). 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀳𑀺 𑀓𑀸𑀓𑀥𑀗𑁆𑀓𑀸𑀤𑀻𑀳𑀺 ¶ . 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀧𑀼𑀩𑁆𑀩𑀦𑁆𑀢𑀺 𑀯𑀺𑀲𑁆𑀲𑀯𑀦𑁆𑀢𑀧𑀼𑀩𑁆𑀩𑀁, 𑀢𑀳𑀁 𑀢𑀳𑀁 𑀧𑀕𑁆𑀖𑀭𑀦𑁆𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀸𑀯𑀦𑁆𑀢𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀢𑀁.

𑀲𑁄 𑀪𑀺𑀓𑁆𑀔𑀽𑀢𑀺 𑀬𑁄 ‘‘𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀻𑀯𑀣𑀺𑀓𑀸𑀬 𑀙𑀟𑁆𑀟𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑁄 𑀪𑀺𑀓𑁆𑀔𑀼. 𑀉𑀧𑀲𑀁𑀳𑀭𑀢𑀺 𑀲𑀤𑀺𑀲𑀢𑀁. 𑀅𑀬𑀫𑁆𑀧𑀺 𑀔𑁄𑀢𑀺𑀆𑀤𑀺 𑀉𑀧𑀲𑀁𑀳𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀆𑀬𑀽𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦𑁂𑀢𑁆𑀣 𑀯𑀺𑀜𑁆𑀜𑀸𑀡𑀕𑀢𑀺𑀓𑀫𑁂𑀯. 𑀉𑀲𑁆𑀫𑀸𑀢𑀺 𑀓𑀫𑁆𑀫𑀚𑀢𑁂𑀚𑁄. 𑀏𑀯𑀁𑀧𑀽𑀢𑀺𑀓𑀲𑀪𑀸𑀯𑁄𑀢𑀺 𑀏𑀯𑀁 𑀅𑀢𑀺𑀯𑀺𑀬 𑀧𑀽𑀢𑀺𑀲𑀪𑀸𑀯𑁄 𑀆𑀬𑀼𑀆𑀤𑀺𑀯𑀺𑀕𑀫𑁂 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀤𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁𑀪𑀸𑀯𑀻𑀢𑀺 𑀆𑀳 ‘‘𑀏𑀯𑀫𑁂𑀯𑀁 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑁂𑀤𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀮𑀼𑀜𑁆𑀘𑀺𑀢𑁆𑀯𑀸 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀢𑁆𑀯𑀸. 𑀲𑁂𑀲𑀸𑀯𑀲𑁂𑀲𑀫𑀁𑀲𑀮𑁄𑀳𑀺𑀢𑀬𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑁄 𑀅𑀓𑁆𑀔𑀸𑀤𑀺𑀢𑀢𑁆𑀢𑀸 𑀢𑀳𑀁 𑀢𑀳𑀁 𑀲𑁂𑀲𑁂𑀦 𑀅𑀧𑁆𑀧𑀸𑀯𑀲𑁂𑀲𑁂𑀦 𑀫𑀁𑀲𑀮𑁄𑀳𑀺𑀢𑁂𑀦 𑀬𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀳𑀢𑁆𑀣𑀝𑁆𑀞𑀺𑀓𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀳𑀢𑁆𑀣𑀝𑁆𑀞𑀺𑀓𑀸𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀢𑀸 𑀚𑁄𑀢𑀺𑀢𑀸𑀢𑀺 𑀅𑀦𑀯𑀲𑁂𑀲𑀢𑁄 𑀢𑁂𑀲𑀁 𑀯𑀺𑀧𑁆𑀧𑀓𑀺𑀡𑁆𑀡𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀲𑀝𑁆𑀞𑀺𑀪𑁂𑀤𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀻𑀢𑀺 𑀢𑀺𑀭𑁄𑀯𑀲𑁆𑀲𑀕𑀢𑀸𑀦𑀺. 𑀢𑀸𑀦𑀺 𑀧𑀦 𑀲𑀁𑀯𑀘𑁆𑀙𑀭𑀁 𑀯𑀻𑀢𑀺𑀯𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀢𑀺𑀓𑁆𑀓𑀦𑁆𑀢𑀲𑀁𑀯𑀘𑁆𑀙𑀭𑀸𑀦𑀻’’𑀢𑀺. 𑀧𑀼𑀭𑀸𑀡𑀢𑀸𑀬 𑀖𑀦𑀪𑀸𑀯𑀯𑀺𑀕𑀫𑁂𑀦 𑀯𑀺𑀘𑀼𑀡𑁆𑀡𑀢𑀸 𑀇𑀥 𑀧𑀽𑀢𑀺𑀪𑀸𑀯𑁄. 𑀲𑁄 𑀬𑀣𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀩𑁆𑀪𑁄𑀓𑀸𑀲𑁂’’𑀢𑀺𑀆𑀤𑀺𑀫𑀸𑀳. 𑀅𑀦𑁂𑀓𑀥𑀸𑀢𑀽𑀦𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀦𑀁, 𑀓𑀸𑀫𑀥𑀸𑀢𑀼𑀆𑀤𑀻𑀦𑀁 𑀯𑀸. 𑀲𑀢𑀺𑀬𑀸 𑀘 𑀜𑀸𑀡𑀲𑁆𑀲 𑀘 𑀅𑀢𑁆𑀣𑀸𑀬𑀸𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁪; 𑁨.𑁩𑁭𑁬; 𑀫. 𑀦𑀺. 𑁧.𑁧𑁦𑁯) 𑀯𑀼𑀢𑁆𑀢𑀸𑀬 𑀲𑀢𑁆𑀢𑀝𑁆𑀞𑀸𑀦𑀺𑀓𑀸𑀬 𑀲𑀢𑀺𑀬𑀸 𑀘𑁂𑀯 𑀢𑀁𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀲𑁆𑀲 𑀘 𑀅𑀢𑁆𑀣𑀸𑀬.

𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 ¶ 𑀦𑀺𑀳𑀻𑀦𑀦𑁆𑀢𑀺 𑀮𑀸𑀫𑀓𑀁, 𑀓𑀺𑀮𑀺𑀝𑁆𑀞𑀁 𑀯𑀸. 𑀕𑀸𑀫𑀯𑀸𑀲𑀺𑀓𑀸𑀦𑀦𑁆𑀢𑀺 𑀩𑀸𑀮𑀸𑀦𑀁. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀇𑀤𑀦𑁆𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀁. 𑀢𑁂𑀦𑀸𑀳 ‘‘𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀦𑁆𑀢𑀓’’𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑁂𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀲𑀦𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀭𑀺𑀬𑀦𑁆𑀢𑀺 𑀦 𑀦𑀺𑀤𑁆𑀤𑁄𑀲𑀁. 𑀦𑀺𑀤𑁆𑀤𑁄𑀲𑀝𑁆𑀞𑁄 𑀳𑀺 𑀅𑀭𑀺𑀬𑀝𑁆𑀞𑁄. 𑀢𑁂𑀦𑀸𑀳 ‘‘𑀦 𑀉𑀢𑁆𑀢𑀫𑀁 𑀦 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀅𑀭𑀺𑀬𑁂𑀳𑀺 𑀯𑀸 𑀦 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀅𑀦𑀭𑀺𑀬𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀯𑀺𑀯𑀺𑀥𑀯𑀺𑀧𑀼𑀮𑀸𑀦𑀢𑁆𑀣𑀲𑀳𑀺𑀢𑀁. 𑀢𑀸𑀤𑀺𑀲𑀜𑁆𑀘 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀦 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀪𑀸𑀯𑀢𑁄. 𑀅𑀲𑀢𑀺 𑀧𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀤𑀻𑀦𑀁 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺 𑀆𑀳 ‘‘𑀦 𑀯𑀺𑀭𑀸𑀕𑀸𑀬𑀸’’𑀢𑀺𑀆𑀤𑀺.

𑀅𑀦𑀼𑀢𑁆𑀢𑀫𑀁 ¶ 𑀅𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀆𑀳 ‘‘𑀏𑀢𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺. 𑀳𑀢𑁆𑀣𑀺𑀲𑁆𑀫𑀺𑀦𑁆𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀳𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀳𑀢𑁆𑀣𑀺𑀯𑀺𑀲𑀬𑀢𑁆𑀢𑀸 𑀳𑀢𑁆𑀣𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀳𑀢𑁆𑀣𑀺𑀲𑀺𑀧𑁆𑀧𑀁 ‘‘𑀳𑀢𑁆𑀣𑀻’’𑀢𑀺 𑀕𑀳𑁂𑀢𑁆𑀯𑀸 ‘‘𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀳𑀢𑁆𑀣𑀺𑀲𑀺𑀧𑁆𑀧𑁂 𑀲𑀺𑀓𑁆𑀔𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 𑀧𑀸𑀭𑀺𑀘𑀭𑀺𑀬𑁂𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀸𑀭𑀺𑀘𑀭𑀺𑀬𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀢𑁆𑀢𑀭𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑁂𑀯𑀢𑀸𑀯𑀕𑁆𑀕𑁄

𑁧-𑁪. 𑀲𑁂𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁧-𑁩𑁪. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑁂𑀔𑀸𑀦𑀁 𑀧𑀝𑀺𑀮𑀤𑁆𑀥𑀕𑀼𑀡𑀲𑁆𑀲 𑀧𑀭𑀺𑀳𑀸𑀦𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀉𑀧𑀭𑀽𑀧𑀭𑀺𑀕𑀼𑀡𑀧𑀭𑀺𑀳𑀸𑀦𑀸𑀬𑀸’’𑀢𑀺, 𑀉𑀧𑀭𑀽𑀧𑀭𑀺𑀮𑀤𑁆𑀥𑀩𑁆𑀩𑀸𑀦𑀁 𑀫𑀕𑁆𑀕𑀨𑀮𑀸𑀦𑀁 𑀧𑀭𑀺𑀳𑀸𑀦𑀸𑀬 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑁂𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀺𑀚𑁆𑀚𑀸𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 ¶ 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀁 𑀪𑀚𑀦𑁆𑀢𑀺, 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀢𑀸𑀬 𑀲𑀳 𑀏𑀓𑀻𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀅𑀣 𑀯𑀸 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀺 𑀯𑀺𑀚𑁆𑀚𑀸𑀲𑀪𑀸𑀕𑀢𑀸𑀬 𑀢𑀤𑁂𑀓𑀤𑁂𑀲𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀫𑀦𑁄𑀫𑀬𑀺𑀤𑁆𑀥𑀺, 𑀙 𑀅𑀪𑀺𑀜𑁆𑀜𑀸𑀢𑀺 𑀅𑀝𑁆𑀞 𑀯𑀺𑀚𑁆𑀚𑀸. 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸𑀯 𑀯𑀺𑀚𑁆𑀚𑀸 ¶ 𑀯𑀺𑀚𑁆𑀚𑀸, 𑀲𑁂𑀲𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀏𑀯𑀁 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 ‘‘𑀯𑀺𑀚𑁆𑀚𑀸𑀪𑀸𑀕𑀺𑀬𑀸’’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀯 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀆𑀕𑀢𑀸, 𑀲𑀜𑁆𑀜𑀸𑀲𑀻𑀲𑁂𑀦 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸, 𑀢𑁂𑀦 𑀲𑀳𑀕𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀺𑀚𑁆𑀚𑀸𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀺𑀯𑀸𑀤𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀲𑀻𑀮𑁄. 𑀬𑀲𑁆𑀫𑀸 𑀲𑁄 𑀅𑀧𑁆𑀧𑀳𑀻𑀦𑀓𑁄𑀥𑀢𑀸𑀬 𑀅𑀥𑀺𑀕𑀢𑀓𑁄𑀥𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀆𑀳. 𑀉𑀧𑀦𑀸𑀳𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀧𑀦𑀸𑀳𑀻, 𑀉𑀧𑀦𑀬𑁆𑀳𑀦𑀲𑀻𑀮𑁄𑀢𑀺 𑀯𑀸 𑀉𑀧𑀦𑀸𑀳𑀻. 𑀯𑀺𑀯𑀸𑀤𑁄 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀧𑀞𑀫𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀯𑀸𑀤𑁄’’𑀢𑀺. 𑀲𑁄 𑀧𑀦 𑀬𑀣𑀸 𑀩𑀳𑀽𑀦𑀁 𑀅𑀦𑀢𑁆𑀣𑀸𑀯𑀳𑁄 𑀳𑁄𑀢𑀺, 𑀢𑀁 𑀦𑀺𑀤𑀲𑁆𑀲𑀦𑀫𑀼𑀔𑁂𑀦 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀩𑁆𑀪𑀦𑁆𑀢𑀭𑀧𑀭𑀺𑀲𑀸𑀬𑀸𑀢𑀺 𑀧𑀭𑀺𑀲𑀩𑁆𑀪𑀦𑁆𑀢𑀭𑁂.

𑀕𑀼𑀡𑀫𑀓𑁆𑀔𑀦𑀸𑀬 𑀧𑀯𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀕𑀽𑀣𑁂𑀦 𑀧𑀳𑀭𑀦𑁆𑀢𑀺𑀁 𑀕𑀽𑀣𑁄 𑀯𑀺𑀬 𑀧𑀞𑀫𑀢𑀭𑀁 𑀫𑀓𑁆𑀔𑁂𑀢𑀻𑀢𑀺 𑀫𑀓𑁆𑀔𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀓𑁆𑀔𑀻. 𑀧𑀴𑀸𑀲𑀢𑀻𑀢𑀺 𑀧𑀴𑀸𑀲𑁄, 𑀧𑀭𑀲𑁆𑀲 𑀕𑀼𑀡𑁂 𑀟𑀁𑀲𑀺𑀢𑁆𑀯𑀸 𑀯𑀺𑀬 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀴𑀸𑀲𑀻. 𑀧𑀴𑀸𑀲𑀻 𑀧𑀼𑀕𑁆𑀕𑀮𑁄 𑀳𑀺 𑀤𑀼𑀢𑀺𑀬𑀲𑁆𑀲 𑀥𑀼𑀭𑀁 𑀦 𑀤𑁂𑀢𑀺, 𑀲𑀫𑀁 𑀳𑀭𑀺𑀢𑁆𑀯𑀸 𑀅𑀢𑀺𑀯𑀤𑀢𑀺. 𑀢𑁂𑀦𑀸𑀳 ‘‘𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀇𑀲𑁆𑀲𑀢𑀻𑀢𑀺 𑀇𑀲𑁆𑀲𑀼𑀓𑀻. 𑀫𑀘𑁆𑀙𑀭𑀸𑀬𑀢𑀻𑀢𑀺 𑀫𑀘𑁆𑀙𑀭𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 ¶ 𑀫𑀘𑁆𑀙𑀭𑀻. 𑀲𑀞𑀬𑀢𑀺 𑀦 𑀲𑀫𑁆𑀫𑀸 𑀪𑀸𑀲𑀢𑀻𑀢𑀺 𑀲𑀞𑁄 𑀅𑀜𑁆𑀜𑀣𑀸 𑀲𑀦𑁆𑀢𑀁 𑀅𑀢𑁆𑀢𑀸𑀦𑀁 𑀅𑀜𑁆𑀜𑀣𑀸 𑀧𑀯𑁂𑀤𑀦𑀢𑁄. 𑀫𑀸𑀬𑀸 𑀏𑀢𑀲𑁆𑀲 𑀅𑀢𑁆𑀣𑀻 𑀫𑀸𑀬𑀸𑀯𑀻. 𑀫𑀺𑀘𑁆𑀙𑀸 𑀧𑀸𑀧𑀺𑀓𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀏𑀢𑀲𑁆𑀲 𑀤𑀺𑀝𑁆𑀞𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀸𑀬 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀢𑁆𑀣𑀺𑀓𑀯𑀸𑀤𑀻’’𑀢𑀺𑀆𑀤𑀺.

𑀲𑀁 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁, 𑀲𑀬𑀁 𑀯𑀸 𑀅𑀢𑁆𑀢𑀦𑀸 𑀬𑀣𑀸𑀕𑀳𑀺𑀢𑀁 𑀧𑀭𑀸𑀫𑀲𑀢𑀺, 𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀻𑀧𑀭𑀸𑀫𑀸𑀲𑀻. 𑀆𑀥𑀸𑀦𑀁 𑀤𑀴𑁆𑀳𑀁 𑀕𑀡𑁆𑀳𑀸𑀢𑀻𑀢𑀺 𑀆𑀥𑀸𑀦𑀕𑁆𑀕𑀸𑀳𑀻, 𑀤𑀴𑁆𑀳𑀕𑁆𑀕𑀸𑀳𑀻, ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀣𑀺𑀭𑀕𑁆𑀕𑀸𑀳𑀻𑀢𑀺 𑀅𑀢𑁆𑀣𑁄. 𑀬𑀼𑀢𑁆𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸𑀯 𑀮𑀤𑁆𑀥𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀻𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀩𑀳𑀼𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀓𑀸𑀢𑀼𑀦𑁆𑀢𑀺 ¶ 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀁 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀺 𑀩𑀼𑀤𑁆𑀥𑀸𑀤𑀻𑀳𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁄 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀤𑀺𑀲𑁄 𑀳𑀺 𑀧𑀼𑀕𑁆𑀕𑀮𑁄 𑀬𑀁 𑀬𑀤𑁂𑀯 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸 𑀲𑀼𑀡𑀸𑀢𑀺, 𑀢𑀁 𑀲𑀩𑁆𑀩𑀁 ‘‘𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁂𑀳𑀺 𑀓𑀣𑀺𑀢𑀁, 𑀏𑀯𑀁 𑀅𑀫𑁆𑀳𑁂𑀳𑀺 𑀲𑀼𑀢’’𑀦𑁆𑀢𑀺 𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀅𑀦𑁆𑀢𑁄𑀬𑁂𑀯 𑀲𑀫𑁄𑀤𑀳𑀢𑀺. 𑀬𑀣𑀸 𑀳𑀺 𑀓𑀘𑁆𑀙𑀧𑁄 𑀅𑀢𑁆𑀢𑀦𑁄 𑀳𑀢𑁆𑀣𑀧𑀸𑀤𑀸𑀤𑀺𑀓𑁂 𑀅𑀗𑁆𑀕𑁂 𑀓𑁂𑀦𑀘𑀺 𑀖𑀝𑀺𑀢𑁂 𑀲𑀩𑁆𑀩𑀸𑀦𑀺 𑀅𑀗𑁆𑀕𑀸𑀦𑀺 𑀅𑀢𑁆𑀢𑀦𑁄 𑀓𑀧𑀸𑀮𑁂𑀬𑁂𑀯 𑀲𑀫𑁄𑀤𑀳𑀢𑀺, 𑀦 𑀩𑀳𑀺 𑀦𑀻𑀳𑀭𑀢𑀺, 𑀏𑀯𑀫𑀬𑀫𑁆𑀧𑀺 ‘‘𑀦 𑀲𑀼𑀦𑁆𑀤𑀭𑁄 𑀢𑀯 𑀕𑀸𑀳𑁄, 𑀙𑀟𑁆𑀟𑁂𑀳𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑁄 𑀢𑀁 𑀦 𑀯𑀺𑀲𑁆𑀲𑀚𑁆𑀚𑀢𑀺, 𑀅𑀦𑁆𑀢𑁄𑀬𑁂𑀯 𑀅𑀢𑁆𑀢𑀦𑁄 𑀳𑀤𑀬𑁂 𑀏𑀯 𑀞𑀧𑁂𑀢𑁆𑀯𑀸 𑀯𑀺𑀘𑀭𑀢𑀺, 𑀓𑀼𑀫𑁆𑀪𑀻𑀮𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺. 𑀬𑀣𑀸 𑀲𑀼𑀲𑀼𑀫𑀸𑀭𑀸 𑀕𑀳𑀺𑀢𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀏𑀯𑀁 𑀕𑀡𑁆𑀳𑀸𑀢𑀺.

𑀯𑀺𑀯𑀸𑀤𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀙𑀴𑀗𑁆𑀕𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑀸𑀬𑀸𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀁, 𑀢𑀲𑁆𑀲𑀽𑀧𑀓𑀭𑀡𑀪𑀽𑀢𑁄 𑀤𑁂𑀬𑁆𑀬𑀥𑀫𑁆𑀫𑁄 𑀘. 𑀇𑀥 𑀧𑀦 𑀤𑁂𑀬𑁆𑀬𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑁂𑀯𑀸𑀳 ‘‘𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀻’’𑀢𑀺. 𑀇𑀢𑁄 𑀉𑀝𑁆𑀞𑀺𑀢𑁂𑀦𑀸𑀢𑀺 𑀇𑀢𑁄 𑀔𑁂𑀢𑁆𑀢𑀢𑁄 𑀉𑀧𑁆𑀧𑀦𑁆𑀦𑁂𑀦. 𑀭𑀸𑀕𑁄 𑀯𑀺𑀦𑀬𑀢𑀺 𑀏𑀢𑁂𑀦𑀸𑀢𑀺 𑀭𑀸𑀕𑀯𑀺𑀦𑀬𑁄, 𑀭𑀸𑀕𑀲𑁆𑀲 𑀲𑀫𑀼𑀘𑁆𑀙𑁂𑀤𑀺𑀓𑀸 𑀧𑀝𑀺𑀧𑀤𑀸. 𑀢𑁂𑀦𑀸𑀳 ‘‘𑀭𑀸𑀕𑀯𑀺𑀦𑀬𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸’’𑀢𑀺.

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄’’𑀢𑀺𑀆𑀤𑀺𑀕𑀸𑀣𑀸𑀬 𑀧𑀼𑀩𑁆𑀩𑁂𑀯 𑀤𑀸𑀦𑀸 𑀫𑀼𑀜𑁆𑀘𑀘𑁂𑀢𑀦𑀸𑀬 𑀧𑀼𑀩𑁆𑀩𑁂 𑀤𑀸𑀦𑀽𑀧𑀓𑀭𑀡𑀲𑀫𑁆𑀪𑀭𑀡𑀢𑁄 𑀧𑀝𑁆𑀞𑀸𑀬 𑀲𑀼𑀫𑀦𑁄 ‘‘𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀤𑀸𑀦𑀁 𑀅𑀦𑀼𑀕𑀸𑀫𑀺𑀓𑀤𑀸𑀦𑀁 ¶ 𑀤𑀲𑁆𑀲𑀸𑀫𑀻’’𑀢𑀺 𑀲𑁄𑀫𑀦𑀲𑁆𑀲𑀺𑀢𑁄 𑀪𑀯𑁂𑀬𑁆𑀬. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂𑀢𑀺 𑀤𑀤𑀦𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑀁 𑀤𑀓𑁆𑀔𑀺𑀡𑁂𑀬𑁆𑀬𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 ‘‘𑀅𑀲𑀸𑀭𑀢𑁄 𑀥𑀦𑀢𑁄 𑀲𑀸𑀭𑀸𑀤𑀸𑀦𑀁 𑀓𑀭𑁄𑀫𑀻’’𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬. 𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 ‘‘𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀁 𑀦𑀸𑀫 𑀫𑀬𑀸 𑀅𑀦𑀼𑀝𑁆𑀞𑀺𑀢𑀁, 𑀅𑀳𑁄 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀺. 𑀏𑀲𑀸𑀢𑀺 𑀬𑀸 𑀅𑀬𑀁 𑀧𑀼𑀩𑁆𑀩𑀘𑁂𑀢𑀦𑀸 𑀫𑀼𑀜𑁆𑀘𑀘𑁂𑀢𑀦𑀸 𑀅𑀧𑀭𑀘𑁂𑀢𑀦𑀸𑀢𑀺 𑀇𑀫𑀸𑀲𑀁 𑀓𑀫𑁆𑀫𑀨𑀮𑀸𑀦𑀁 𑀲𑀤𑁆𑀥𑀸𑀦𑀼𑀕𑀢𑀸𑀦𑀁 𑀲𑁄𑀫𑀦𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸𑀦𑀁 𑀢𑀺𑀯𑀺𑀥𑀸𑀦𑀁 𑀘𑁂𑀢𑀦𑀸𑀦𑀁 𑀧𑀸𑀭𑀺𑀧𑀽𑀭𑀻, 𑀏𑀲𑀸.

𑀲𑀻𑀮𑀲𑀜𑁆𑀜𑀫𑁂𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦. 𑀳𑀢𑁆𑀣𑀧𑀸𑀤𑁂𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀳𑀢𑁆𑀣𑀧𑀸𑀤𑁂. 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸𑀢𑀺 𑀢𑁂𑀲𑀁𑀬𑁂𑀯 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸, 𑀅𑀢𑁆𑀢𑀦𑀸𑀯 𑀫𑀼𑀔𑁄𑀤𑀓𑀁 𑀤𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀙𑀴𑀗𑁆𑀕𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁧. 𑀅𑀢𑁆𑀢𑀓𑀸𑀭𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮-𑁪𑁧. 𑀅𑀝𑁆𑀞𑀫𑁂 ¶ 𑀓𑀼𑀲𑀮𑀓𑀺𑀭𑀺𑀬𑀸𑀬 𑀆𑀤𑀺𑀆𑀭𑀫𑁆𑀪𑀪𑀸𑀯𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁 𑀞𑀺𑀢𑀲𑀪𑀸𑀯𑀢𑀸𑀬 𑀲𑀪𑀸𑀯𑀥𑀸𑀭𑀡𑀝𑁆𑀞𑁂𑀦 𑀥𑀸𑀢𑀽𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀆𑀭𑀫𑁆𑀪𑀥𑀸𑀢𑀽𑀢𑀺 𑀆𑀭𑀪𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬’’𑀦𑁆𑀢𑀺. 𑀮𑀤𑁆𑀥𑀸𑀲𑁂𑀯𑀦𑀁 𑀯𑀻𑀭𑀺𑀬𑀁 𑀩𑀮𑀧𑁆𑀧𑀢𑁆𑀢𑀁 𑀳𑀼𑀢𑁆𑀯𑀸 𑀧𑀝𑀺𑀧𑀓𑁆𑀔𑁂 𑀯𑀺𑀥𑀫𑀢𑀻𑀢𑀺 𑀆𑀳 ‘‘𑀦𑀺𑀓𑁆𑀓𑀫𑀥𑀸𑀢𑀽𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀫𑀦𑀲𑀪𑀸𑀯𑀁 𑀯𑀻𑀭𑀺𑀬’’𑀦𑁆𑀢𑀺. 𑀧𑀭𑀓𑁆𑀓𑀫𑀦𑀲𑀪𑀸𑀯𑁄𑀢𑀺 𑀅𑀥𑀺𑀫𑀢𑁆𑀢𑀢𑀭𑀸𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀥𑀫𑀦𑀲𑀫𑀢𑁆𑀣𑀢𑀸𑀬 𑀧𑀝𑀼𑀧𑀝𑀼𑀢𑀭𑀪𑀸𑀯𑁂𑀦 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀲𑀪𑀸𑀯𑁄. 𑀦𑀯𑀫𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀢𑁆𑀢𑀓𑀸𑀭𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀦𑀸𑀕𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑁆𑀯𑀸𑀤𑀲𑀫𑁂 𑀫𑀸𑀳𑀁 𑀦𑀸𑀕𑀺𑀢 𑀬𑀲𑁂𑀦 𑀲𑀫𑀸𑀕𑀫𑀦𑁆𑀢𑀺 𑀫𑀸 𑀅𑀳𑀁 𑀬𑀲𑁂𑀦 𑀲𑀫𑀸𑀕𑀫𑀦𑀁 𑀧𑀢𑁆𑀣𑁂𑀫𑀺. 𑀫𑀸 𑀘 𑀫𑀬𑀸 𑀬𑀲𑁄𑀢𑀺 𑀬𑀲𑁄 𑀘 𑀫𑀬𑀸 𑀫𑀸 𑀲𑀫𑀸𑀕𑀘𑁆𑀙𑀢𑀽𑀢𑀺 ¶ 𑀅𑀢𑁆𑀣𑁄. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀮𑀸𑀪𑀲𑀓𑁆𑀓𑀸𑀭𑁂𑀦 𑀅𑀦𑀢𑁆𑀣𑀺𑀓𑀢𑀁 𑀯𑀺𑀪𑀸𑀯𑁂𑀢𑀺. 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀻𑀢𑀺 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀦𑀸𑀕𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀯𑀢𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀧𑀭𑀺𑀲𑀺𑀜𑁆𑀘𑀺𑀢𑀼𑀦𑁆𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁨𑁭𑁨) 𑀬𑁄 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀤𑀻𑀳𑀺 𑀕𑀢𑁆𑀢𑀸𑀦𑀺 𑀉𑀩𑁆𑀩𑀝𑁆𑀝𑁂𑀦𑁆𑀢𑁄 𑀫𑀮𑁆𑀮𑀓𑀫𑀼𑀝𑁆𑀞𑀸𑀤𑀻𑀳𑀺 𑀯𑀸 𑀖𑀁𑀲𑀦𑁆𑀢𑁄 𑀦𑀳𑀸𑀬𑀢𑀺, 𑀲𑁄 ‘‘𑀦𑀳𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀢𑀣𑀸 𑀅𑀓𑀢𑁆𑀯𑀸 𑀧𑀓𑀢𑀺𑀬𑀸𑀯 𑀦𑀳𑀸𑀬𑀢𑀺, 𑀲𑁄 ‘‘𑀧𑀭𑀺𑀲𑀺𑀜𑁆𑀘𑀢𑀻’’𑀢𑀺 𑀯𑀼𑀘𑁆𑀘𑀢𑀺 ¶ . 𑀪𑀕𑀯𑀢𑁄 𑀘 𑀲𑀭𑀻𑀭𑁂 𑀢𑀣𑀸 𑀳𑀭𑀺𑀢𑀩𑁆𑀩𑀁 𑀭𑀚𑁄𑀚𑀮𑁆𑀮𑀁 𑀦𑀸𑀫 𑀦𑀼𑀧𑀮𑀺𑀫𑁆𑀧𑀢𑀺 𑀅𑀘𑁆𑀙𑀙𑀯𑀺𑀪𑀸𑀯𑀢𑁄, 𑀉𑀢𑀼𑀕𑁆𑀕𑀳𑀡𑀢𑁆𑀣𑀁 𑀧𑀦 𑀪𑀕𑀯𑀸 𑀓𑁂𑀯𑀮𑀁 𑀉𑀤𑀓𑁂 𑀑𑀢𑀭𑀢𑀺. 𑀢𑁂𑀦𑀸𑀳 ‘‘𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼’’𑀦𑁆𑀢𑀺.

𑀧𑀼𑀩𑁆𑀩𑀓𑁄𑀝𑁆𑀞𑀓𑁄𑀢𑀺 𑀧𑀸𑀘𑀻𑀦𑀓𑁄𑀝𑁆𑀞𑀓𑁄. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀚𑁂𑀢𑀯𑀦𑀯𑀺𑀳𑀸𑀭𑁄 𑀓𑀤𑀸𑀘𑀺 𑀫𑀳𑀸, 𑀓𑀤𑀸𑀘𑀺 𑀔𑀼𑀤𑁆𑀤𑀓𑁄. 𑀢𑀣𑀸 𑀳𑀺 𑀲𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀬𑁄𑀚𑀦𑀺𑀓𑁄 𑀅𑀳𑁄𑀲𑀺, 𑀲𑀺𑀔𑀺𑀲𑁆𑀲 𑀢𑀺𑀕𑀸𑀯𑀼𑀢𑁄, 𑀯𑁂𑀲𑁆𑀲𑀪𑀼𑀲𑁆𑀲 𑀅𑀟𑁆𑀠𑀬𑁄𑀚𑀦𑀺𑀓𑁄, 𑀓𑀓𑀼𑀲𑀦𑁆𑀥𑀲𑁆𑀲 𑀕𑀸𑀯𑀼𑀢𑀧𑁆𑀧𑀫𑀸𑀡𑁄, 𑀓𑁄𑀡𑀸𑀕𑀫𑀦𑀲𑁆𑀲 𑀅𑀟𑁆𑀠𑀕𑀸𑀯𑀼𑀢𑀧𑁆𑀧𑀫𑀸𑀡𑁄, 𑀓𑀲𑁆𑀲𑀧𑀲𑁆𑀲 𑀯𑀻𑀲𑀢𑀺𑀉𑀲𑀪𑀧𑁆𑀧𑀫𑀸𑀡𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑁄 𑀚𑀸𑀢𑁄. 𑀢𑀫𑁆𑀧𑀺 𑀦𑀕𑀭𑀁 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀤𑀸𑀘𑀺 𑀧𑀸𑀘𑀻𑀦𑀢𑁄 𑀳𑁄𑀢𑀺, 𑀓𑀤𑀸𑀘𑀺 𑀤𑀓𑁆𑀔𑀺𑀡𑀢𑁄, 𑀓𑀤𑀸𑀘𑀺 𑀧𑀘𑁆𑀙𑀺𑀫𑀢𑁄, 𑀓𑀤𑀸𑀘𑀺 𑀉𑀢𑁆𑀢𑀭𑀢𑁄. 𑀚𑁂𑀢𑀯𑀦𑀕𑀦𑁆𑀥𑀓𑀼𑀝𑀺𑀬𑀁 𑀧𑀦 𑀘𑀢𑀼𑀦𑁆𑀦𑀁 𑀫𑀜𑁆𑀘𑀧𑀸𑀤𑀸𑀦𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀘𑀮𑀫𑁂𑀯. 𑀘𑀢𑁆𑀢𑀸𑀭𑀺 𑀳𑀺 𑀅𑀘𑀮𑀘𑁂𑀢𑀺𑀬𑀝𑁆𑀞𑀸𑀦𑀸𑀦𑀺 𑀦𑀸𑀫 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀁, 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀝𑁆𑀞𑀸𑀦𑀁, 𑀲𑀗𑁆𑀓𑀲𑁆𑀲𑀦𑀕𑀭𑁂 𑀤𑁂𑀯𑁄𑀭𑁄𑀳𑀦𑀓𑀸𑀮𑁂 𑀲𑁄𑀧𑀸𑀦𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁, 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀦𑁆𑀢𑀺. 𑀅𑀬𑀁 𑀧𑀦 𑀧𑀼𑀩𑁆𑀩𑀓𑁄𑀝𑁆𑀞𑀓𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀯𑀻𑀲𑀢𑀺𑀉𑀲𑀪𑀯𑀺𑀳𑀸𑀭𑀓𑀸𑀮𑁂 𑀧𑀸𑀘𑀻𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀅𑀳𑁄𑀲𑀺. 𑀲𑁄 𑀇𑀤𑀸𑀦𑀺 ‘‘𑀧𑀼𑀩𑁆𑀩𑀓𑁄𑀝𑁆𑀞𑀓𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺.

𑀓𑀲𑁆𑀲𑀧𑀤𑀲𑀩𑀮𑀲𑁆𑀲 ¶ 𑀓𑀸𑀮𑁂 𑀅𑀘𑀺𑀭𑀯𑀢𑀻 𑀦𑀕𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀤𑀫𑀸𑀦𑀸 𑀧𑀼𑀩𑁆𑀩𑀓𑁄𑀝𑁆𑀞𑀓𑀁 𑀧𑀢𑁆𑀯𑀸 𑀉𑀤𑀓𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀉𑀤𑀓𑀭𑀳𑀤𑀁 𑀫𑀸𑀧𑁂𑀲𑀺 𑀲𑀫𑀢𑀺𑀢𑁆𑀢𑀺𑀓𑀁 𑀅𑀦𑀼𑀧𑀼𑀩𑁆𑀩𑀕𑀫𑁆𑀪𑀻𑀭𑀁. 𑀢𑀢𑁆𑀣 𑀏𑀓𑀁 𑀭𑀜𑁆𑀜𑁄 𑀦𑁆𑀳𑀸𑀦𑀢𑀺𑀢𑁆𑀣𑀁, 𑀏𑀓𑀁 𑀦𑀸𑀕𑀭𑀸𑀦𑀁, 𑀏𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀏𑀓𑀁 𑀩𑀼𑀤𑁆𑀥𑀸𑀦𑀦𑁆𑀢𑀺 𑀏𑀯𑀁 𑀧𑀸𑀝𑀺𑀏𑀓𑁆𑀓𑀸𑀦𑀺 𑀦𑁆𑀳𑀸𑀦𑀢𑀺𑀢𑁆𑀣𑀸𑀦𑀺 𑀳𑁄𑀦𑁆𑀢𑀺 𑀭𑀫𑀡𑀻𑀬𑀸𑀦𑀺𑀯𑀺𑀧𑁆𑀧𑀓𑀺𑀡𑁆𑀡𑀭𑀚𑀢𑀧𑀝𑁆𑀝𑀲𑀤𑀺𑀲𑀯𑀸𑀮𑀼𑀓𑀸𑀦𑀺. 𑀇𑀢𑀺 𑀪𑀕𑀯𑀢𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀩𑁆𑀩𑀓𑁄𑀝𑁆𑀞𑀓𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀤𑀓𑀲𑀸𑀝𑀺𑀓𑀁 𑀉𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀅𑀧𑀦𑁂𑀢𑁆𑀯𑀸 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀲𑀺. 𑀣𑁂𑀭𑁄 𑀤𑀼𑀧𑀝𑁆𑀝𑁂𑀦 𑀲𑀤𑁆𑀥𑀺𑀁 𑀫𑀳𑀸𑀘𑀻𑀯𑀭𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀅𑀓𑀸𑀲𑀺. 𑀪𑀕𑀯𑀸 𑀉𑀤𑀓𑀁 𑀑𑀢𑀭𑀺, 𑀲𑀳𑁄𑀢𑀭𑀡𑁂𑀦𑁂𑀯𑀲𑁆𑀲 𑀉𑀤𑀓𑁂 𑀫𑀘𑁆𑀙𑀓𑀘𑁆𑀙𑀧𑀸 𑀲𑀩𑁆𑀩𑁂 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀳𑁂𑀲𑀼𑀁, 𑀬𑀦𑁆𑀢𑀦𑀸𑀴𑀺𑀓𑀸𑀳𑀺 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀦𑀺 𑀲𑀺𑀜𑁆𑀘𑀦𑀓𑀸𑀮𑁄 𑀯𑀺𑀬 𑀲𑀼𑀯𑀡𑁆𑀡𑀧𑀝𑀧𑁆𑀧𑀲𑀸𑀭𑀡𑀓𑀸𑀮𑁄 𑀯𑀺𑀬 𑀘 𑀅𑀳𑁄𑀲𑀺. 𑀅𑀣 𑀪𑀕𑀯𑀢𑁄 𑀦𑀳𑀸𑀦𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀺𑀡𑁆𑀡𑀲𑁆𑀲 𑀣𑁂𑀭𑁄 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀉𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀤𑀺𑀲𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑀳𑀸𑀘𑀻𑀯𑀭𑀁 𑀅𑀦𑁆𑀢𑀦𑁆𑀢𑁂𑀦 𑀲𑀁𑀳𑀭𑀺𑀢𑁆𑀯𑀸 𑀧𑀤𑀼𑀫𑀕𑀩𑁆𑀪𑀲𑀤𑀺𑀲𑀁 𑀓𑀢𑁆𑀯𑀸 𑀉𑀧𑀦𑀻𑀢𑀁 𑀤𑁆𑀯𑀻𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀓𑁄𑀝𑁆𑀞𑀓𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀻’’𑀢𑀺.

𑀏𑀯𑀁 𑀞𑀺𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀁 𑀯𑀺𑀓𑀲𑀺𑀢𑀧𑀤𑀼𑀫𑀧𑀼𑀧𑁆𑀨𑀲𑀤𑀺𑀲𑀁 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀁, 𑀢𑀸𑀭𑀸𑀫𑀭𑀻𑀘𑀺𑀯𑀺𑀓𑀲𑀺𑀢𑀜𑁆𑀘 𑀕𑀕𑀦𑀢𑀮𑀁 𑀲𑀺𑀭𑀺𑀬𑀸 𑀅𑀯𑀳𑀲𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣, 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀺𑀦𑀻 ¶ 𑀘𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀫𑀸𑀮𑀸 𑀕𑀦𑁆𑀣𑀺𑀢𑁆𑀯𑀸 𑀞𑀧𑀺𑀢𑀸 𑀤𑁆𑀯𑀢𑁆𑀢𑀺𑀁𑀲 𑀘𑀦𑁆𑀤𑀺𑀫𑀸 𑀯𑀺𑀬, 𑀤𑁆𑀯𑀢𑁆𑀢𑀺𑀁𑀲 𑀲𑀽𑀭𑀺𑀬𑀸 𑀯𑀺𑀬, 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀺𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀯𑀺𑀬 𑀘 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀬𑀲𑁆𑀫𑀸 𑀘 𑀪𑀕𑀯𑀢𑁄 𑀲𑀭𑀻𑀭𑀁 𑀲𑀼𑀥𑀦𑁆𑀢𑀘𑀸𑀫𑀻𑀓𑀭𑀲𑀫𑀸𑀦𑀯𑀡𑁆𑀡𑀁, 𑀲𑀼𑀧𑀭𑀺𑀲𑁄𑀥𑀺𑀢𑀧𑀯𑀸𑀴𑀭𑀼𑀘𑀺𑀭𑀢𑁄𑀭𑀡𑀁, 𑀲𑀼𑀯𑀺𑀲𑀼𑀤𑁆𑀥𑀦𑀻𑀮𑀭𑀢𑀦𑀸𑀯𑀮𑀺𑀲𑀤𑀺𑀲𑀓𑁂𑀲𑀢𑀦𑀼𑀭𑀼𑀳𑀁, 𑀢𑀲𑁆𑀫𑀸 𑀢𑀳𑀁 𑀢𑀳𑀁 𑀯𑀺𑀦𑀺𑀕𑁆𑀕𑀢𑀲𑀼𑀚𑀸𑀢𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀭𑀲𑀽𑀧𑀲𑁄𑀪𑀺𑀢𑀁 𑀉𑀧𑀭𑀺 𑀲𑀢𑀫𑁂𑀖𑀭𑀢𑀦𑀸𑀯𑀮𑀺𑀲𑀼𑀘𑁆𑀙𑀸𑀤𑀺𑀢𑀁 𑀚𑀗𑁆𑀕𑀫𑀫𑀺𑀯 𑀓𑀦𑀓𑀕𑀺𑀭𑀺𑀲𑀺𑀔𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀤𑀲𑀩𑀮𑀲𑁆𑀲 𑀲𑀭𑀻𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀥𑀸𑀯𑀦𑁆𑀢𑀻 𑀯𑀺𑀥𑀸𑀯𑀦𑁆𑀢𑀻 𑀭𑀢𑀦𑀸𑀯𑀮𑀺𑀭𑀢𑀦𑀤𑀸𑀫𑀭𑀢𑀦𑀘𑀼𑀡𑁆𑀡𑀯𑀺𑀧𑁆𑀧𑀓𑀺𑀡𑁆𑀡𑀁 𑀯𑀺𑀬 𑀧𑀲𑀸𑀭𑀺𑀢𑀭𑀢𑀦𑀘𑀺𑀢𑁆𑀢𑀓𑀜𑁆𑀘𑀦𑀧𑀝𑁆𑀝𑀫𑀺𑀯 𑀆𑀲𑀺𑀜𑁆𑀘𑀫𑀸𑀦𑀮𑀸𑀔𑀸𑀭𑀲𑀥𑀸𑀭𑀸𑀘𑀺𑀢𑁆𑀢𑀫𑀺𑀯 𑀉𑀓𑁆𑀓𑀸𑀲𑀢𑀦𑀺𑀧𑀸𑀢𑀲𑀫𑀸𑀓𑀼𑀮𑀫𑀺𑀯 𑀦𑀺𑀭𑀦𑁆𑀢𑀭𑀯𑀺𑀧𑁆𑀧𑀓𑀺𑀡𑁆𑀡𑀓𑀡𑀺𑀓𑀸𑀭𑀓𑀺𑀗𑁆𑀓𑀺𑀡𑀺𑀓𑀧𑀼𑀧𑁆𑀨𑀫𑀺𑀯 𑀯𑀸𑀬𑀼𑀯𑁂𑀕𑀲𑀫𑀼𑀤𑁆𑀥𑀢𑀘𑀺𑀦𑀧𑀺𑀝𑁆𑀞𑀘𑀼𑀡𑁆𑀡𑀭𑀜𑁆𑀚𑀺𑀢𑀫𑀺𑀯 ¶ 𑀇𑀦𑁆𑀤𑀥𑀦𑀼𑀯𑀺𑀚𑁆𑀚𑀼𑀮𑁆𑀮𑀢𑀸𑀯𑀺𑀢𑀸𑀦𑀲𑀦𑁆𑀣𑀢𑀫𑀺𑀯 𑀘 𑀕𑀕𑀦𑀢𑀮𑀁, 𑀢𑀁 𑀞𑀸𑀦𑀁 𑀧𑀯𑀦𑀜𑁆𑀘 𑀲𑀫𑁆𑀫𑀸 𑀨𑀭𑀦𑁆𑀢𑀺. 𑀯𑀡𑁆𑀡𑀪𑀽𑀫𑀺 𑀦𑀸𑀫𑁂𑀲𑀸. 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀯𑀡𑁆𑀡𑀁 𑀯𑀸 𑀕𑀼𑀡𑀯𑀡𑁆𑀡𑀁 𑀯𑀸 𑀘𑀼𑀡𑁆𑀡𑀺𑀬𑀧𑀤𑁂𑀳𑀺 𑀯𑀸 𑀕𑀸𑀣𑀸𑀳𑀺 𑀯𑀸 𑀅𑀢𑁆𑀣𑀜𑁆𑀘 𑀉𑀧𑀫𑀸𑀬𑁄 𑀘 𑀓𑀸𑀭𑀡𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀧𑀝𑀺𑀩𑀮𑁂𑀦 𑀥𑀫𑁆𑀫𑀓𑀣𑀺𑀓𑁂𑀦 𑀧𑀽𑀭𑁂𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀭𑀽𑀧𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀥𑀫𑁆𑀫𑀓𑀣𑀺𑀓𑀲𑁆𑀲 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀩𑁆𑀩𑀲𑀤𑀺𑀲𑀸𑀦𑀺 𑀓𑀼𑀭𑀼𑀫𑀸𑀦𑁄𑀢𑀺 𑀦𑀺𑀭𑀼𑀤𑀓𑀸𑀦𑀺 𑀓𑀼𑀭𑀼𑀫𑀸𑀦𑁄, 𑀲𑀼𑀓𑁆𑀔𑀸𑀧𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀲𑁄𑀤𑀓𑁂 𑀕𑀢𑁆𑀢𑁂 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀲𑁆𑀲 𑀳𑀺 𑀘𑀻𑀯𑀭𑁂 𑀓𑀡𑁆𑀡𑀺𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀁 𑀤𑀼𑀲𑁆𑀲𑀢𑀺, 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑀺, 𑀧𑀤𑀼𑀫𑀧𑀢𑁆𑀢𑁂 𑀉𑀓𑁆𑀔𑀺𑀢𑁆𑀢𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀉𑀤𑀓𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀺𑀓𑁆𑀔𑀸𑀕𑀸𑀭𑀯𑀢𑀸𑀬 𑀪𑀕𑀯𑀸 ‘‘𑀧𑀩𑁆𑀩𑀚𑀺𑀢𑀯𑀢𑁆𑀢𑀁 𑀦𑀸𑀫𑁂𑀢’’𑀦𑁆𑀢𑀺 𑀫𑀳𑀸𑀘𑀻𑀯𑀭𑀁 𑀉𑀪𑁄𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀓𑀸𑀬𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀸𑀴𑀺𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀢𑀸𑀴𑀺𑀢𑀯𑀸𑀤𑀺𑀢𑀁, 𑀢𑀽𑀭𑀺𑀬𑀸𑀦𑀁 𑀢𑀸𑀴𑀺𑀢𑀯𑀸𑀤𑀺𑀢𑀁 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑀁. 𑀫𑀳𑀦𑁆𑀢𑀜𑁆𑀘 𑀢𑀁 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑀜𑁆𑀘𑀸𑀢𑀺 𑀫𑀳𑀸𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑀁. 𑀢𑁂𑀦𑀸𑀳 ‘‘𑀫𑀳𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀅𑀣 𑀯𑀸 𑀪𑁂𑀭𑀺𑀫𑀼𑀤𑀺𑀗𑁆𑀕𑀧𑀡𑀯𑀸𑀤𑀺𑀢𑀽𑀭𑀺𑀬𑀸𑀦𑀁 𑀢𑀸𑀴𑀺𑀢𑀁 𑀯𑀻𑀡𑀸𑀯𑁂𑀴𑀼𑀕𑁄𑀫𑀼𑀔𑀺𑀆𑀤𑀻𑀦𑀁 𑀯𑀸𑀤𑀺𑀢𑀜𑁆𑀘 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑀦𑁆𑀢𑀺 𑀯𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀪𑀺𑀜𑁆𑀜𑀸𑀧𑀸𑀭𑀁 𑀕𑀢𑁄𑀢𑀺 𑀅𑀪𑀺𑀜𑁆𑀜𑀸𑀧𑀸𑀭𑀕𑀽. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑁄 𑀳𑀺 𑀪𑀕𑀯𑀸 𑀲𑀩𑁆𑀩𑀥𑀫𑁆𑀫𑁂 𑀅𑀪𑀺𑀚𑀸𑀦𑀦𑁆𑀢𑁄 𑀕𑀢𑁄𑀢𑀺 𑀅𑀪𑀺𑀜𑁆𑀜𑀸𑀧𑀸𑀭𑀕𑀽. 𑀢𑁂𑀲𑀼 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀦𑁆𑀢𑁄 𑀕𑀢𑁄𑀢𑀺 𑀧𑀭𑀺𑀜𑁆𑀜𑀸𑀧𑀸𑀭𑀕𑀽. 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀕𑀢𑁄𑀢𑀺 𑀧𑀳𑀸𑀦𑀧𑀸𑀭𑀕𑀽. 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀪𑀸𑀯𑁂𑀦𑁆𑀢𑁄 𑀕𑀢𑁄𑀢𑀺 𑀪𑀸𑀯𑀦𑀸𑀧𑀸𑀭𑀕𑀽. 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀕𑀢𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽. 𑀲𑀩𑁆𑀩𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀕𑀢𑁄𑀢𑀺 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽. 𑀲𑀼𑀩𑁆𑀭𑀳𑁆𑀫𑀤𑁂𑀯𑀧𑀼𑀢𑁆𑀢𑀸𑀤𑀬𑁄𑀢𑀺 𑀏𑀢𑁆𑀣 𑀲𑁄 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀦𑁆𑀤𑀦𑀓𑀻𑀴𑀺𑀢𑀁 𑀓𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀢𑀁 𑀧𑀜𑁆𑀘𑀲𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ¶ , 𑀧𑀜𑁆𑀘𑀲𑀢𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀸𑀢𑁂𑀦𑁆𑀢𑀺. 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀇𑀢𑀭𑀸 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀸𑀯 𑀕𑀦𑁆𑀣𑁂𑀦𑁆𑀢𑀺. 𑀅𑀣 𑀭𑀼𑀓𑁆𑀔𑀁 𑀅𑀪𑀺𑀭𑀼𑀴𑁆𑀳𑀸 𑀉𑀧𑀘𑁆𑀙𑁂𑀤𑀓𑀯𑀲𑁂𑀦 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺. 𑀅𑀣 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁄 ‘‘𑀇𑀫𑀸𑀲𑀁 𑀦𑁂𑀯 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺 ¶ , 𑀦 𑀧𑀼𑀧𑁆𑀨𑀸𑀦𑀺 𑀧𑀸𑀢𑁂𑀦𑁆𑀢𑀺, 𑀓𑀳𑀁 𑀦𑀼 𑀔𑁄 𑀕𑀢𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀧𑀺𑀬𑀯𑀢𑁆𑀣𑀼𑀓𑀲𑁄𑀓𑁂𑀦 𑀭𑀼𑀧𑁆𑀧𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑀸 𑀢𑀸𑀯 𑀬𑀣𑀸𑀓𑀫𑁆𑀫𑁂𑀦 𑀕𑀢𑀸, 𑀫𑀬𑁆𑀳𑀁 𑀆𑀬𑀼𑀲𑀗𑁆𑀔𑀸𑀭𑁄 𑀓𑀺𑀢𑁆𑀢𑀓𑁄’’𑀢𑀺. 𑀲𑁄 ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀬𑀸𑀧𑀺 𑀅𑀯𑀲𑁂𑀲𑀸𑀳𑀺 𑀧𑀜𑁆𑀘𑀲𑀢𑀸𑀳𑀺 𑀲𑀤𑁆𑀥𑀺𑀁 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀤𑀺𑀲𑁆𑀯𑀸 𑀩𑀮𑀯𑀢𑀭𑁂𑀦 𑀲𑁄𑀓𑁂𑀦 𑀲𑀫𑀧𑁆𑀧𑀺𑀢𑁄. ‘‘𑀇𑀫𑀁 𑀫𑀬𑁆𑀳𑀁 𑀲𑁄𑀓𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑁋

‘‘𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀫𑀺𑀤𑀁 𑀫𑀦𑁄;

𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀼, 𑀅𑀣𑁄 𑀉𑀧𑁆𑀧𑀢𑀺𑀢𑁂𑀲𑀼 𑀘;

𑀲𑀘𑁂 𑀅𑀢𑁆𑀣𑀺 𑀅𑀦𑀼𑀢𑁆𑀭𑀲𑁆𑀢𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺. (𑀲𑀁. 𑀦𑀺. 𑁧.𑁯𑁮) 𑁋

𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀪𑀕𑀯𑀸𑀧𑀺𑀲𑁆𑀲 𑁋

‘‘𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀸 𑀢𑀧𑀲𑀸, 𑀦𑀸𑀜𑁆𑀜𑀢𑁆𑀭𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀸;

𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀫𑀺 𑀧𑀸𑀡𑀺𑀦’’𑀦𑁆𑀢𑀺. (𑀲𑀁. 𑀦𑀺. 𑁧.𑁯𑁮) 𑁋

𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀯𑀺𑀕𑀢𑀲𑁄𑀓𑁄 𑀧𑀜𑁆𑀘𑀳𑀺 𑀅𑀘𑁆𑀙𑀭𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀲𑀼𑀩𑁆𑀭𑀳𑁆𑀫𑀤𑁂𑀯𑀧𑀼𑀢𑁆𑀢𑀸𑀤𑀬𑁄’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀘𑀦𑁆𑀤𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀢𑀽𑀳𑀺 𑀓𑀸𑀭𑀡𑁂𑀳𑀻𑀢𑀺 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺.

𑀤𑀲𑀯𑀺𑀥𑀲𑀁𑀬𑁄𑀚𑀦𑀸𑀦𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀼𑀤𑁆𑀥𑀫𑁆𑀪𑀸𑀕𑀺𑀬𑀪𑁂𑀤𑀢𑁄 𑀤𑀲𑀯𑀺𑀥𑀲𑀁𑀬𑁄𑀚𑀦𑀸𑀦𑀺. 𑀲𑀩𑁆𑀩𑁂 𑀅𑀘𑁆𑀘𑀭𑀼𑀘𑀻𑀢𑀺 𑀲𑀩𑁆𑀩𑀲𑀢𑁆𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺. 𑀅𑀝𑁆𑀞𑀫𑀓𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀨𑀮𑀝𑁆𑀞𑁄 𑀕𑀳𑀺𑀢𑁄.

𑀲𑁄𑀭𑀘𑁆𑀘𑀦𑁆𑀢𑀺 ¶ ‘‘𑀢𑀢𑁆𑀣 𑀓𑀢𑀫𑀁 𑀲𑁄𑀭𑀘𑁆𑀘𑀁? 𑀬𑁄 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀭𑀘𑁆𑀘𑀁, 𑀲𑀩𑁆𑀩𑀸𑀧𑀺 𑀲𑀻𑀮𑀲𑀁𑀯𑀭𑁄 𑀲𑁄𑀭𑀘𑁆𑀘’’𑀦𑁆𑀢𑀺 (𑀥. 𑀲. 𑁧𑁩𑁪𑁯) 𑀯𑀘𑀦𑀢𑁄 𑀲𑀼𑀘𑀺𑀲𑀻𑀮𑀁 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀭𑀽𑀡𑀸𑀢𑀺 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀸𑀳. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀁 𑀉𑀧𑀘𑀸𑀭𑀚𑁆𑀛𑀸𑀦𑀁 𑀯𑀤𑀢𑀺.

𑀤𑀼𑀯𑀺𑀥𑁂𑀦 ¶ 𑀛𑀸𑀦𑁂𑀦𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀪𑁂𑀤𑀢𑁄 𑀤𑀼𑀯𑀺𑀥𑁂𑀦 𑀛𑀸𑀦𑀫𑀦𑁂𑀦. 𑀧𑀜𑁆𑀘𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦𑀸𑀢𑀺 𑀓𑀼𑀳𑀦𑀸𑀮𑀧𑀦𑀸𑀦𑁂𑀫𑀺𑀢𑁆𑀢𑀺𑀓𑀢𑀸𑀦𑀺𑀧𑁆𑀧𑁂𑀲𑀺𑀓𑀢𑀸𑀮𑀸𑀪𑁂𑀦𑀮𑀸𑀪𑀁𑀦𑀺𑀚𑀺𑀕𑀻𑀲𑀦𑀢𑀸𑀲𑀗𑁆𑀔𑀸𑀢- 𑀧𑀜𑁆𑀘𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦. 𑀦 𑀮𑀺𑀧𑁆𑀧𑀢𑀻𑀢𑀺 𑀦 𑀅𑀮𑁆𑀮𑀻𑀬𑀢𑀺 𑀅𑀦𑀼𑀲𑀬𑀢𑁄 𑀆𑀭𑀫𑁆𑀫𑀡𑀓𑀭𑀡𑀢𑁄 𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀪𑀺𑀦𑀺𑀯𑁂𑀲𑀸𑀪𑀸𑀯𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀤𑀼𑀢𑀺𑀬𑁂 𑀲𑀫𑀲𑀫𑀕𑀢𑀺𑀬𑀸𑀢𑀺 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀯𑀲𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀲𑀫𑀪𑀸𑀯𑁂𑀦𑁂𑀯 𑀲𑀫𑀕𑀢𑀺𑀓𑀸’’𑀢𑀺. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑀻𑀢𑀢𑁆𑀣𑁂 𑀅𑀦𑀸𑀕𑀢𑀯𑀘𑀦𑀁 𑀓𑀢𑀦𑁆𑀢𑀺 𑀆𑀳 ‘‘𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀚𑀸𑀢𑀸’’𑀢𑀺. 𑀧𑀼𑀭𑀸𑀡𑀲𑁆𑀲 𑀳𑀺 𑀇𑀲𑀺𑀤𑀢𑁆𑀢𑀲𑁆𑀲 𑀘 𑀲𑀫𑀕𑀢𑀺𑀓𑀁 𑀲𑀦𑁆𑀥𑀸𑀬 𑀲𑀸 𑀏𑀯𑀫𑀸𑀳.

𑀅𑀫𑁆𑀫𑀓𑀸𑀢𑀺 𑀫𑀸𑀢𑀼𑀕𑀸𑀫𑁄. 𑀉𑀧𑀘𑀸𑀭𑀯𑀘𑀦𑀜𑁆𑀳𑁂𑀢𑀁. 𑀇𑀢𑁆𑀣𑀻𑀲𑀼 𑀬𑀤𑀺𑀤𑀁 𑀅𑀫𑁆𑀫𑀓𑀸 𑀫𑀸𑀢𑀼𑀕𑀸𑀫𑁄 𑀚𑀦𑀦𑀻 𑀚𑀦𑀺𑀓𑀸𑀢𑀺. 𑀢𑁂𑀦𑀸𑀳 ‘‘𑀇𑀢𑁆𑀣𑀻 𑀳𑀼𑀢𑁆𑀯𑀸 𑀇𑀢𑁆𑀣𑀺𑀲𑀜𑁆𑀜𑀸𑀬 𑀏𑀯 𑀲𑀫𑀦𑁆𑀦𑀸𑀕𑀢𑀸’’𑀢𑀺.

𑀤𑀺𑀝𑁆𑀞𑀺𑀬𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺 𑀅𑀢𑁆𑀣𑀢𑁄 𑀓𑀸𑀭𑀡𑀢𑁄 𑀘 𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀬𑀸𑀣𑀸𑀯𑀢𑁄 𑀅𑀯𑀺𑀤𑀺𑀢𑀁 𑀳𑁄𑀢𑀺. 𑀲𑀫𑀬𑁂 𑀲𑀫𑀬𑁂 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀇𑀥 𑀲𑀸𑀫𑀸𑀬𑀺𑀓𑀁 𑀫-𑀓𑀸𑀭𑁂 𑀅𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸. 𑀢𑁂𑀦𑀸𑀳 𑁋 ‘‘𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀻𑀢𑀺 𑀓𑀸𑀮𑀸𑀦𑀼𑀓𑀸𑀮𑀁 𑀥𑀫𑁆𑀫𑀲𑁆𑀲𑀯𑀦𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦 𑀮𑀪𑀢𑀻’’𑀢𑀺. 𑀧𑀫𑀺𑀡𑀦𑁆𑀢𑀻𑀢𑀺 𑀏𑀢𑁆𑀣 𑀆𑀭𑀫𑁆𑀪𑀢𑁆𑀣𑁄 𑀧-𑀲𑀤𑁆𑀤𑁄𑀢𑀺 𑀆𑀳 ‘‘𑀢𑀼𑀮𑁂𑀢𑀼𑀁 𑀆𑀭𑀪𑀦𑁆𑀢𑀻’’𑀢𑀺. 𑀧𑀡𑀻𑀢𑁄𑀢𑀺 𑀯𑀺𑀲𑀺𑀝𑁆𑀞𑁄.

𑀢𑀤𑀦𑁆𑀢𑀭𑀦𑁆𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀓𑀢𑀦𑁆𑀢𑀺 𑀆𑀳 ‘‘𑀢𑀁 𑀅𑀦𑁆𑀢𑀭𑀁 𑀢𑀁 𑀓𑀸𑀭𑀡’’𑀦𑁆𑀢𑀺 ¶ . 𑀮𑁄𑀪𑀲𑁆𑀲 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀩𑀳𑀼𑀯𑀘𑀦𑀯𑀲𑁂𑀦 ‘‘𑀮𑁄𑀪𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸. 𑀲𑀻𑀮𑁂𑀦 𑀯𑀺𑀲𑁂𑀲𑀻 𑀅𑀳𑁄𑀲𑀺 𑀫𑁂𑀣𑀼𑀦𑀥𑀫𑁆𑀫𑀯𑀺𑀭𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸.

𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁬. 𑀇𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁫-𑁪𑁮. 𑀢𑀢𑀺𑀬𑁂 ¶ 𑀤𑀮𑀺𑀤𑁆𑀤𑁄 𑀦𑀸𑀫 𑀤𑀼𑀕𑁆𑀕𑀢𑁄, 𑀢𑀲𑁆𑀲 𑀪𑀸𑀯𑁄 𑀤𑀸𑀮𑀺𑀤𑁆𑀤𑀺𑀬𑀁. 𑀦 𑀏𑀢𑀲𑁆𑀲 𑀲𑀓𑀁 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀅𑀲𑁆𑀲𑀓𑁄, 𑀅𑀲𑀸𑀧𑀢𑁂𑀬𑁆𑀬𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀭𑀳𑀺𑀢𑁄’’𑀢𑀺. ‘‘𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀓𑁂𑀦𑀘𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦 𑀑𑀓𑀧𑁆𑀧𑀦𑀁 𑀭𑀢𑀦𑀢𑁆𑀢𑀬𑀕𑀼𑀡𑁂 𑀑𑀕𑀸𑀳𑁂𑀢𑁆𑀯𑀸 𑀓𑀧𑁆𑀧𑀦𑀁 𑀑𑀓𑀧𑁆𑀧𑀦𑀲𑀤𑁆𑀥𑀸 𑀦𑀸𑀫. ‘‘𑀇𑀤𑀁 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀦𑁄 𑀲𑀓𑀁, 𑀇𑀤𑀁 𑀧𑀦 𑀓𑀫𑁆𑀫𑀁 𑀲𑀓’’𑀦𑁆𑀢𑀺 𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀓𑀫𑁆𑀫𑀲𑁆𑀲𑀓𑀢𑀚𑀸𑀦𑀦𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸. 𑀢𑀺𑀯𑀺𑀥𑀜𑁆𑀳𑀺 𑀤𑀼𑀘𑁆𑀘𑀭𑀺𑀢𑀁 𑀅𑀢𑁆𑀢𑀦𑀸 𑀓𑀢𑀫𑁆𑀧𑀺 𑀲𑀓𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺 𑀅𑀢𑁆𑀣𑀪𑀜𑁆𑀚𑀦𑀢𑁄. 𑀲𑀼𑀘𑀭𑀺𑀢𑀁 𑀲𑀓𑀓𑀫𑁆𑀫𑀁 𑀦𑀸𑀫 𑀅𑀢𑁆𑀣𑀚𑀦𑀦𑀢𑁄. 𑀇𑀡𑀸𑀤𑀸𑀦𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁂 𑀏𑀢𑀁 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀇𑀡𑀕𑁆𑀕𑀳𑀡𑀁 𑀯𑀤𑀸𑀫𑀻’’𑀢𑀺.

𑀓𑀝𑀕𑁆𑀕𑀸𑀳𑁄𑀢𑀺 𑀓𑀢𑀁 𑀲𑀩𑁆𑀩𑀲𑁄 𑀲𑀺𑀤𑁆𑀥𑀫𑁂𑀯 𑀓𑀢𑁆𑀯𑀸 𑀕𑀳𑀡𑀁. 𑀲𑁄 𑀧𑀦 𑀯𑀺𑀚𑀬𑀮𑀸𑀪𑁄 𑀳𑁄𑀢𑀻𑀢𑀺 𑀆𑀳 ‘‘𑀚𑀬𑀕𑁆𑀕𑀸𑀳𑁄’’𑀢𑀺. 𑀳𑀺𑀭𑀺𑀫𑀦𑁄 𑀏𑀢𑀲𑁆𑀲𑀸𑀢𑀺 𑀳𑀺𑀭𑀺𑀫𑀦𑁄𑀢𑀺 𑀆𑀳 ‘‘𑀳𑀺𑀭𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄’’𑀢𑀺, 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀳𑀺𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀑𑀢𑁆𑀢𑀧𑁆𑀧𑀢𑀺 𑀉𑀩𑁆𑀩𑀺𑀚𑁆𑀚𑀢𑀺 𑀪𑀸𑀬𑀢𑀺 𑀲𑀻𑀮𑁂𑀦𑀸𑀢𑀺 𑀑𑀢𑁆𑀢𑀧𑁆𑀧𑀻, 𑀑𑀢𑁆𑀢𑀧𑁆𑀧𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀦𑀺𑀭𑀸𑀫𑀺𑀲𑀁 𑀲𑀼𑀔𑀦𑁆𑀢𑀺 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀓𑀸𑀫𑀸𑀫𑀺𑀲𑀢𑁆𑀢𑀸. 𑀉𑀧𑁂𑀓𑁆𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁, 𑀦 𑀬𑀁 𑀓𑀺𑀜𑁆𑀘𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔’’𑀦𑁆𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀧𑀭𑀺𑀧𑀼𑀡𑁆𑀡𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀬𑁄 𑀕𑀡𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀝𑁆𑀞𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦 𑀏𑀓𑀓𑁄 𑀳𑁄𑀢𑀺, 𑀢𑀲𑁆𑀲 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀘𑀺𑀢𑁆𑀢𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀏𑀓𑀓𑁄 𑀳𑁄𑀢𑀺. 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀞𑀸𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀲𑀬𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀉𑀧𑁆𑀧𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀲𑁂𑀝𑁆𑀞𑀝𑁆𑀞𑁂𑀦 𑀘 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀏𑀓𑀕𑁆𑀕𑀢𑀸. 𑀢𑀲𑁆𑀲 𑀬𑁄𑀕𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀇𑀥 𑀏𑀓𑁄𑀤𑀺. 𑀧𑀝𑀺𑀧𑀓𑁆𑀔𑀢𑁄 𑀅𑀢𑁆𑀢𑀸𑀦𑀁 𑀦𑀺𑀧𑀸𑀢𑀺, 𑀢𑀁 𑀯𑀸 𑀦𑀺𑀧𑀬𑀢𑀺 𑀯𑀺𑀲𑁄𑀲𑁂𑀢𑀻𑀢𑀺 𑀦𑀺𑀧𑀓𑁄. 𑀅𑀜𑁆𑀜𑀢𑀭𑀁 𑀓𑀸𑀬𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀸𑀢𑀺𑀲𑀬𑀸𑀬 𑀲𑀢𑀺𑀬𑀸 𑀲𑀭𑀢𑀻𑀢𑀺 𑀲𑀢𑁄. 𑀢𑁂𑀦𑀸𑀳 ‘‘𑀏𑀓𑀕𑁆𑀕𑀘𑀺𑀢𑁆𑀢𑁄’’𑀢𑀺𑀆𑀤𑀺.

𑀅𑀓𑀼𑀧𑁆𑀧𑀸 ¶ 𑀫𑁂 𑀯𑀺𑀫𑀼𑀢𑁆𑀢𑀻𑀢𑀺 𑀫𑀬𑁆𑀳𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺 𑀅𑀓𑀼𑀧𑁆𑀧𑀢𑀸𑀬 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑀸𑀬 𑀘 𑀅𑀓𑀼𑀧𑁆𑀧𑀸. 𑀲𑀸 𑀳𑀺 𑀭𑀸𑀕𑀸𑀤𑀻𑀳𑀺 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀓𑀼𑀧𑁆𑀧𑀢𑀸𑀬𑀧𑀺 𑀅𑀓𑀼𑀧𑁆𑀧𑀸 ¶ . 𑀅𑀓𑀼𑀧𑁆𑀧𑀁 𑀦𑀺𑀩𑁆𑀩𑀸𑀦𑀫𑀲𑁆𑀲𑀸 𑀆𑀭𑀫𑁆𑀫𑀡𑀦𑁆𑀢𑀺 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑀸𑀬𑀧𑀺 𑀅𑀓𑀼𑀧𑁆𑀧𑀸. 𑀢𑁂𑀦𑁂𑀯𑀸𑀳 ‘‘𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺𑀆𑀤𑀺. 𑀪𑀯𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀓𑀸𑀫𑀭𑀸𑀕𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀪𑀯𑀭𑀸𑀕𑀇𑀲𑁆𑀲𑀸𑀫𑀘𑁆𑀙𑀭𑀺𑀬- 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀸𑀦𑀁 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁. 𑀇𑀫𑀸𑀦𑀺 𑀳𑀺 𑀲𑀢𑁆𑀢𑁂 𑀪𑀯𑁂𑀲𑀼 𑀲𑀁𑀬𑁄𑀚𑁂𑀦𑁆𑀢𑀺 𑀉𑀧𑀦𑀺𑀩𑀦𑁆𑀥𑀦𑁆𑀢𑀺 𑀪𑀯𑀸𑀪𑀯𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀢𑀲𑁆𑀫𑀸 𑀪𑀯𑀲𑀁𑀬𑁄𑀚𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀔𑀻𑀡𑀸𑀲𑀯𑁄 𑀉𑀢𑁆𑀢𑀫𑀅𑀡𑀡𑁄 𑀓𑀺𑀮𑁂𑀲𑀇𑀡𑀸𑀦𑀁 𑀅𑀪𑀸𑀯𑀢𑁄. 𑀅𑀜𑁆𑀜𑁂 𑀳𑀺 𑀲𑀢𑁆𑀢𑀸 𑀬𑀸𑀯 𑀦 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀸𑀯 𑀲𑀇𑀡𑀸 𑀦𑀸𑀫 𑀅𑀲𑁂𑀭𑀺𑀯𑀺𑀳𑀸𑀭𑀪𑀸𑀯𑀢𑁄. 𑀘𑀢𑀼𑀢𑁆𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀇𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀔𑁂𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀲𑀢𑁆𑀢𑀫𑁂 𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀦𑀺𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀓𑀢𑀓𑀭𑀡𑀻𑀬𑁄𑀢𑀺 𑀏𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀫𑀸𑀳. 𑀢𑀁 𑀧𑀦 𑀬𑀲𑁆𑀫𑀸 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀘𑁆𑀘𑁂𑀓𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀢𑁆𑀢𑀩𑁆𑀩𑀢𑁆𑀢𑀸 𑀲𑁄𑀴𑀲𑀯𑀺𑀥𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩’’𑀦𑁆𑀢𑀺. 𑀔𑀦𑁆𑀥𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀸 𑀢𑀬𑁄 𑀑𑀲𑀻𑀤𑀸𑀧𑀦𑀝𑁆𑀞𑁂𑀦 𑀪𑀸𑀭𑀸 𑀯𑀺𑀬𑀸𑀢𑀺 𑀪𑀸𑀭𑀸. 𑀢𑁂 𑀑𑀳𑀺𑀢𑀸 𑀑𑀭𑁄𑀧𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀸 𑀧𑀸𑀢𑀺𑀢𑀸 𑀏𑀢𑁂𑀦𑀸𑀢𑀺 𑀑𑀳𑀺𑀢𑀪𑀸𑀭𑁄. 𑀢𑁂𑀦𑀸𑀳 ‘‘𑀔𑀦𑁆𑀥𑀪𑀸𑀭𑀁…𑀧𑁂… 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑁄’’𑀢𑀺. 𑀅𑀦𑀼𑀧𑁆𑀧𑀢𑁆𑀢𑁄 𑀲𑀤𑀢𑁆𑀣𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄. 𑀲𑀤𑀢𑁆𑀣𑁄𑀢𑀺 𑀘 𑀲𑀓𑀢𑁆𑀣𑀫𑀸𑀳 𑀓-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸. 𑀏𑀢𑁆𑀣 𑀳𑀺 𑀅𑀭𑀳𑀢𑁆𑀢𑀁 𑀅𑀢𑁆𑀢𑀦𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀢𑁆𑀢𑀸 𑀅𑀢𑁆𑀢𑀽𑀧𑀦𑀺𑀩𑀦𑁆𑀥𑀝𑁆𑀞𑁂𑀦 𑀲𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀢𑁆𑀢𑀸𑀦𑀁 𑀅𑀯𑀺𑀚𑀳𑀦𑀝𑁆𑀞𑁂𑀦 𑀅𑀢𑁆𑀢𑀦𑁄 𑀉𑀢𑁆𑀢𑀫𑀢𑁆𑀣𑁂𑀦 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀢𑁆𑀢𑀸 ‘‘𑀲𑀓𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀤𑀢𑁆𑀣𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑁆𑀫𑀸 𑀅𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄, 𑀅𑀘𑁆𑀙𑀺𑀦𑁆𑀦𑀪𑀽𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀬𑀣𑀸𑀪𑀽𑀢𑀁 𑀤𑀼𑀓𑁆𑀔𑀸𑀤𑀻𑀲𑀼 𑀬𑁄 𑀬𑀣𑀸 𑀚𑀸𑀦𑀺𑀢𑀩𑁆𑀩𑁄, 𑀢𑀣𑀸 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀳𑁂𑀢𑀼𑀦𑀸’’𑀢𑀺𑀆𑀤𑀺. 𑀯𑀺𑀫𑀼𑀢𑁆𑀢𑁄𑀢𑀺 𑀘 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑀲𑀩𑁆𑀩𑀲𑁆𑀲 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑀺 𑀘. 𑀦𑀺𑀩𑁆𑀩𑀸𑀦𑁂 𑀅𑀥𑀺𑀫𑀼𑀘𑁆𑀘𑀦𑀁 𑀢𑀢𑁆𑀣 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸𑀬. 𑀅𑀭𑀳𑀸 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄. 𑀦𑀺𑀩𑁆𑀩𑀸𑀦𑀁 𑀅𑀥𑀺𑀫𑀼𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀔𑁂𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀅𑀝𑁆𑀞𑀫𑁂 ¶ ¶ 𑀉𑀧𑀦𑀺𑀲𑀻𑀤𑀢𑀺 𑀨𑀮𑀁 𑀏𑀢𑁆𑀣𑀸𑀢𑀺 𑀓𑀸𑀭𑀡𑀁 𑀉𑀧𑀦𑀺𑀲𑀸. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀬𑀣𑀸𑀲𑀪𑀸𑀯𑀚𑀸𑀦𑀦𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁. 𑀏𑀢𑁂𑀦 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀳𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀢𑀺 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂 𑀜𑀸𑀡𑀁, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀜𑀸𑀡𑀁, 𑀲𑀫𑁆𑀫𑀲𑀦𑁂 𑀜𑀸𑀡𑀁, 𑀫𑀕𑁆𑀕𑀸𑀫𑀕𑁆𑀕𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀞𑀺𑀢𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀦𑀺𑀩𑁆𑀩𑀺𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀦𑀺𑀩𑁆𑀩𑀺𑀤𑀸. 𑀩𑀮𑀯𑀯𑀺𑀧𑀲𑁆𑀲𑀦𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑁂 𑀜𑀸𑀡𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀧𑀦 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀓𑁆𑀔𑀺𑀓𑀸 𑀏𑀯. ‘‘𑀬𑀸𑀯 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀢𑀸𑀯 𑀢𑀭𑀼𑀡𑀯𑀺𑀧𑀲𑁆𑀲𑀦𑀸’’𑀢𑀺 𑀳𑀺 𑀯𑀘𑀦𑀢𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀉𑀤𑀬𑀩𑁆𑀩𑀬𑀜𑀸𑀡𑀢𑁄 𑀩𑀮𑀯𑀯𑀺𑀧𑀲𑁆𑀲𑀦𑀸. 𑀯𑀺𑀭𑀚𑁆𑀚𑀢𑀺 𑀅𑀭𑀺𑀬𑁄 𑀲𑀗𑁆𑀔𑀸𑀭𑀢𑁄 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄, 𑀅𑀭𑀺𑀬𑀫𑀕𑁆𑀕𑁄. 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀢𑁄 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀲𑀻𑀮𑀭𑀓𑁆𑀔𑀡𑀳𑁂𑀢𑀼𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀻𑀮𑀸𑀦𑀼𑀭𑀓𑁆𑀔𑀡𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀓𑀣𑀺𑀢𑁄’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀦𑀯𑀫𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸𑀢𑀺𑀆𑀤𑀺𑀧𑀸𑀴𑀺𑀧𑀤𑁂𑀲𑀼 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀣𑁂𑀭𑀸. 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀩𑀳𑀼 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀯𑀸𑀘𑀼𑀕𑁆𑀕𑀢𑀥𑀸𑀭𑀡𑁂𑀦 𑀲𑀫𑁆𑀫𑀤𑁂𑀯 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀆𑀕𑀫𑀺𑀢𑀪𑀸𑀯𑁂𑀦 𑀆𑀕𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑁄 𑀆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀆𑀕𑀢𑀸𑀕𑀫𑀸. 𑀲𑀼𑀢𑁆𑀢𑀸𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲 𑀥𑀸𑀭𑀡𑁂𑀦 𑀥𑀫𑁆𑀫𑀥𑀭𑀸. 𑀯𑀺𑀦𑀬𑀥𑀸𑀭𑀡𑁂𑀦 𑀯𑀺𑀦𑀬𑀥𑀭𑀸. 𑀢𑁂𑀲𑀁𑀬𑁂𑀯 𑀥𑀫𑁆𑀫𑀯𑀺𑀦𑀬𑀸𑀦𑀁 𑀫𑀸𑀢𑀺𑀓𑀸𑀬 𑀥𑀸𑀭𑀡𑁂𑀦 𑀫𑀸𑀢𑀺𑀓𑀸𑀥𑀭𑀸. 𑀢𑀢𑁆𑀣 𑀢𑀢𑁆𑀣 𑀥𑀫𑁆𑀫𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀧𑀼𑀘𑁆𑀙𑀢𑀺. 𑀢𑀁 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀧𑀜𑁆𑀳𑀢𑀺 𑀯𑀻𑀫𑀁𑀲𑀢𑀺 𑀯𑀺𑀘𑀸𑀭𑁂𑀢𑀺. 𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄𑀢𑀺 𑀧𑀭𑀺𑀧𑀼𑀘𑁆𑀙𑀦𑀧𑀜𑁆𑀳𑀦𑀸𑀓𑀸𑀭𑀤𑀲𑁆𑀲𑀦𑀁. 𑀆𑀯𑀺𑀯𑀝𑀜𑁆𑀘𑁂𑀯 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀧𑀤𑁂𑀲𑀦𑁆𑀢𑀭𑀧𑀸𑀴𑀺𑀤𑀲𑁆𑀲𑀦𑁂𑀦 𑀆𑀕𑀫𑀢𑁄 𑀯𑀺𑀯𑀭𑀦𑁆𑀢𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀬𑀼𑀢𑁆𑀢𑀺𑀯𑀺𑀪𑀸𑀯𑀦𑁂𑀦 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺. 𑀓𑀗𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀬𑀸 ¶ 𑀳𑁂𑀢𑀼𑀬𑀸 𑀕𑀡𑁆𑀞𑀺𑀝𑁆𑀞𑀸𑀦𑀪𑀽𑀢𑁂𑀲𑀼 𑀧𑀸𑀴𑀺𑀧𑀤𑁂𑀲𑀼 𑀬𑀸𑀣𑀸𑀯𑀢𑁄 𑀯𑀺𑀦𑀺𑀘𑁆𑀙𑀬𑀤𑀸𑀦𑁂𑀦 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀲𑀫𑁂 ¶ 𑀪𑁄𑀕𑁂 𑀅𑀥𑀺𑀧𑁆𑀧𑀸𑀬𑁄 𑀏𑀢𑁂𑀲𑀦𑁆𑀢𑀺 𑀪𑁄𑀕𑀸𑀥𑀺𑀧𑁆𑀧𑀸𑀬𑀸. 𑀧𑀜𑁆𑀜𑀢𑁆𑀣𑀸𑀬 𑀏𑀢𑁂𑀲𑀁 𑀫𑀦𑁄 𑀉𑀧𑀯𑀺𑀘𑀭𑀢𑀻𑀢𑀺 𑀧𑀜𑁆𑀜𑀽𑀧𑀯𑀺𑀘𑀸𑀭𑀸. 𑀧𑀣𑀯𑀺𑀬𑀸 𑀤𑀸𑀬𑀢𑁆𑀣𑀸𑀬 𑀯𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑁄 𑀏𑀢𑁂𑀲𑀦𑁆𑀢𑀺 𑀧𑀣𑀯𑀻𑀪𑀺𑀦𑀺𑀯𑁂𑀲𑀸. 𑀫𑀦𑁆𑀢𑀸 𑀅𑀥𑀺𑀝𑁆𑀞𑀸𑀦𑀁 𑀧𑀢𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀏𑀓𑀸𑀤𑀲𑀫𑁂 𑀚𑀗𑁆𑀕𑀮𑀸𑀦𑀦𑁆𑀢𑀺 𑀏𑀢𑁆𑀣 𑀬𑁄 𑀦𑀺𑀧𑀺𑀘𑁆𑀙𑀮𑁄 𑀦 𑀅𑀦𑀽𑀧𑁄 𑀦𑀺𑀭𑀼𑀤𑀓𑀢𑀸𑀬 𑀣𑀤𑁆𑀥𑀮𑀽𑀔𑁄 𑀪𑀽𑀫𑀺𑀧𑁆𑀧𑀤𑁂𑀲𑁄, 𑀲𑁄 ‘‘𑀚𑀗𑁆𑀕𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀩𑁆𑀩𑀳𑀼𑀮𑀢𑀸𑀬 𑀧𑀦 𑀇𑀥 𑀲𑀩𑁆𑀩𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀚𑀗𑁆𑀕𑀮𑁄. 𑀢𑀲𑁆𑀫𑀺𑀁 𑀚𑀗𑁆𑀕𑀮𑁂 𑀚𑀸𑀢𑀸 𑀪𑀯𑀸𑀢𑀺 𑀯𑀸 𑀚𑀗𑁆𑀕𑀮𑀸, 𑀢𑁂𑀲𑀁 𑀚𑀗𑁆𑀕𑀮𑀸𑀦𑀁. 𑀏𑀯𑀜𑁆𑀳𑀺 𑀦𑀤𑀺𑀘𑀭𑀸𑀦𑀫𑁆𑀧𑀺 𑀳𑀢𑁆𑀣𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺 𑀲𑀫𑁄𑀥𑀸𑀢𑀩𑁆𑀩𑀸𑀦𑀁 𑀯𑀺𑀬 𑀲𑀫𑁄𑀥𑀸𑀬𑀓𑀸𑀦𑀫𑁆𑀧𑀺 𑀇𑀥 𑀚𑀗𑁆𑀕𑀮𑀕𑁆𑀕𑀳𑀡𑁂𑀦 𑀕𑀳𑁂𑀢𑀩𑁆𑀩𑀢𑁄. 𑀧𑀣𑀯𑀻𑀢𑀮𑀘𑀸𑀭𑀻𑀦𑀦𑁆𑀢𑀺 𑀇𑀫𑀺𑀦𑀸 𑀚𑀮𑀘𑀸𑀭𑀺𑀦𑁄 𑀘 𑀦𑀺𑀯𑀢𑁆𑀢𑁂𑀢𑀺 𑀅𑀤𑀺𑀲𑁆𑀲𑀫𑀸𑀦𑀧𑀸𑀤𑀢𑁆𑀢𑀸. ‘‘𑀧𑀸𑀡𑀸𑀦’’𑀦𑁆𑀢𑀺 𑀲𑀸𑀥𑀸𑀭𑀡𑀯𑀘𑀦𑀫𑁆𑀧𑀺 ‘‘𑀧𑀤𑀚𑀸𑀢𑀸𑀦𑀻’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀧𑀸𑀤𑀓𑀧𑀸𑀡𑀸𑀦’’𑀦𑁆𑀢𑀺. ‘‘𑀫𑀼𑀢𑁆𑀢𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧) 𑀕𑀢-𑀲𑀤𑁆𑀤𑁄 𑀯𑀺𑀬 𑀇𑀥 𑀚𑀸𑀢-𑀲𑀤𑁆𑀤𑁄 𑀅𑀦𑀢𑁆𑀣𑀦𑁆𑀢𑀭𑁄𑀢𑀺 𑀆𑀳 ‘‘𑀧𑀤𑀚𑀸𑀢𑀸𑀦𑀻𑀢𑀺 𑀧𑀤𑀸𑀦𑀻’’𑀢𑀺. 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀯𑀭𑁄𑀥𑀁, 𑀅𑀦𑁆𑀢𑁄𑀕𑀥𑀁 𑀯𑀸. 𑀢𑁂𑀦𑀸𑀳 ‘‘𑀑𑀥𑀸𑀦𑀁 𑀉𑀧𑀦𑀺𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀓𑀽𑀝𑀗𑁆𑀕𑀫𑀸𑀢𑀺 𑀧𑀸𑀭𑀺𑀫𑀦𑁆𑀢𑁂𑀦 𑀓𑀽𑀝𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀓𑀽𑀝𑀦𑀺𑀦𑁆𑀦𑀸𑀢𑀺 𑀓𑀽𑀝𑀘𑁆𑀙𑀺𑀤𑁆𑀤𑀫𑀕𑁆𑀕𑁂 𑀧𑀯𑀺𑀲𑀦𑀯𑀲𑁂𑀦 𑀓𑀽𑀝𑁂 𑀦𑀺𑀦𑁆𑀦𑀸. 𑀓𑀽𑀝𑀲𑀫𑁄𑀲𑀭𑀡𑀸𑀢𑀺 𑀙𑀺𑀤𑁆𑀤𑁂 𑀅𑀦𑀼𑀧𑀯𑀺𑀲𑀦𑀯𑀲𑁂𑀦 𑀘 𑀆𑀳𑀘𑁆𑀘 𑀅𑀯𑀢𑁆𑀣𑀸𑀦𑁂𑀦 𑀘 𑀓𑀽𑀝𑁂 𑀲𑀫𑁄𑀤𑀳𑀺𑀢𑁆𑀯𑀸 𑀞𑀺𑀢𑀸. 𑀯𑀡𑁆𑀝𑁂 ¶ 𑀧𑀢𑀫𑀸𑀦𑁂 𑀲𑀩𑁆𑀩𑀸𑀦𑀺 𑀪𑀽𑀫𑀺𑀬𑀁 𑀧𑀢𑀦𑁆𑀢𑀻𑀢𑀺 𑀆𑀳 ‘‘𑀯𑀡𑁆𑀝𑀸𑀦𑀼𑀯𑀢𑁆𑀢𑀓𑀸𑀦𑀺 𑀪𑀯𑀦𑁆𑀢𑀻’’𑀢𑀺.

𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀤𑁆𑀯𑀸𑀤𑀲𑀫𑁂 𑀚𑀸𑀢𑀺𑀪𑀽𑀫𑀺𑀬𑀦𑁆𑀢𑀺 𑀏𑀢𑁆𑀣 𑀚𑀦𑀦𑀁 𑀚𑀸𑀢𑀺, 𑀚𑀸𑀢𑀺𑀬𑀸 𑀪𑀽𑀫𑀺 𑀚𑀸𑀢𑀺𑀪𑀽𑀫𑀺, 𑀚𑀸𑀢𑀝𑁆𑀞𑀸𑀦𑀁. 𑀢𑀁 𑀔𑁄 𑀧𑀦𑁂𑀢𑀁 𑀦𑁂𑀯 𑀓𑁄𑀲𑀮𑀫𑀳𑀸𑀭𑀸𑀚𑀸𑀤𑀻𑀦𑀁, 𑀦 𑀘𑀗𑁆𑀓𑀺𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁, 𑀦 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀸𑀤𑀻𑀦𑀁 ¶ , 𑀦 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁, 𑀦 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 ‘‘𑀚𑀸𑀢𑀺𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀦 𑀚𑀸𑀢𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀤𑁆𑀥𑀚𑀫𑀸𑀮𑀸𑀯𑀺𑀧𑁆𑀧𑀓𑀺𑀡𑁆𑀡𑀓𑀼𑀲𑀼𑀫𑀯𑀸𑀲𑀘𑀼𑀡𑁆𑀡𑀕𑀡𑀲𑀼𑀕𑀦𑁆𑀥𑀸 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀫𑀺𑀯 𑀦𑀦𑁆𑀤𑀦𑀯𑀦𑀁 𑀯𑀺𑀭𑁄𑀘𑀫𑀸𑀦𑀸 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀅𑀓𑀫𑁆𑀧𑀺𑀢𑁆𑀣, 𑀚𑀘𑁆𑀘𑀦𑁆𑀥𑀸𑀤𑀻𑀦𑀜𑁆𑀘 𑀭𑀽𑀧𑀤𑀲𑁆𑀲𑀦𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀯𑀢𑁆𑀢𑀺𑀁𑀲𑀼. 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀝𑁆𑀞𑀸𑀦𑀁, 𑀲𑀸𑀢𑀺𑀲𑀬𑀲𑁆𑀲 𑀧𑀦 𑀚𑀦𑀓𑀓𑀧𑀺𑀮𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁄 ‘‘𑀚𑀸𑀢𑀺𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺. 𑀚𑀸𑀢𑀺𑀪𑀽𑀫𑀓𑀸 𑀉𑀧𑀸𑀲𑀓𑀸𑀢𑀺 𑀚𑀸𑀢𑀺𑀪𑀽𑀫𑀺𑀯𑀸𑀲𑀺𑀦𑁄 𑀉𑀧𑀸𑀲𑀓𑀸. 𑀲𑀦𑁆𑀢𑀦𑁂𑀢𑁆𑀯𑀸 𑀲𑀩𑁆𑀩𑀲𑁄 𑀢𑀦𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀫𑀽𑀮𑀸𑀦𑀺 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺. 𑀢𑀸𑀦𑀺 𑀧𑀦 𑀅𑀢𑁆𑀣𑀢𑁄 𑀫𑀽𑀮𑀸𑀦𑀺𑀬𑁂𑀯𑀸𑀢𑀺 𑀆𑀳 ‘‘𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀦𑁆𑀢𑀺 𑀫𑀽𑀮𑀸𑀦’’𑀦𑁆𑀢𑀺.

𑀚𑀸𑀢𑀤𑀺𑀯𑀲𑁂 𑀆𑀯𑀼𑀥𑀸𑀦𑀁 𑀚𑁄𑀢𑀺𑀢𑀢𑁆𑀢𑀸, 𑀭𑀜𑁆𑀜𑁄 𑀅𑀧𑀭𑀺𑀫𑀺𑀢𑀲𑁆𑀲 𑀘 𑀲𑀢𑁆𑀢𑀓𑀸𑀬𑀲𑁆𑀲 𑀅𑀦𑀢𑁆𑀣𑀢𑁄 𑀧𑀭𑀺𑀧𑀸𑀮𑀦𑀲𑀫𑀢𑁆𑀣𑀢𑀸𑀬 𑀘 ‘‘𑀚𑁄𑀢𑀺𑀧𑀸𑀮𑁄’’𑀢𑀺 𑀮𑀤𑁆𑀥𑀦𑀸𑀫𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀦𑀸𑀫𑁂𑀦 𑀚𑁄𑀢𑀺𑀧𑀸𑀮𑁄’’𑀢𑀺. 𑀕𑁄𑀯𑀺𑀦𑁆𑀤𑁄𑀢𑀺 𑀕𑁄𑀯𑀺𑀦𑁆𑀤𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑁄, 𑀕𑁄𑀯𑀺𑀦𑁆𑀤𑀲𑁆𑀲 𑀞𑀸𑀦𑁂 𑀞𑀧𑀦𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀭 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀮𑀧𑀭𑀫𑁆𑀧𑀭𑀸𑀕𑀢𑀁 𑀞𑀸𑀦𑀦𑁆𑀢𑀭𑀁. 𑀢𑁂𑀦𑀸𑀳 ‘‘𑀞𑀸𑀦𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄’’𑀢𑀺. 𑀕𑀯𑀁 𑀧𑀜𑁆𑀜𑀜𑁆𑀘 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺 𑀕𑁄𑀯𑀺𑀦𑁆𑀤𑁄, 𑀫𑀳𑀦𑁆𑀢𑁄 𑀕𑁄𑀯𑀺𑀦𑁆𑀤𑁄𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑁄. 𑀕𑁄𑀢𑀺 𑀳𑀺 𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁 ‘‘𑀕𑀘𑁆𑀙𑀢𑀺 𑀅𑀢𑁆𑀣𑁂 𑀩𑀼𑀚𑁆𑀛𑀢𑀻’’𑀢𑀺 𑀓𑀢𑁆𑀯𑀸. 𑀫𑀳𑀸𑀕𑁄𑀯𑀺𑀦𑁆𑀤𑁄 𑀘 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄𑀬𑁂𑀯. 𑀲𑁄 𑀓𑀺𑀭 𑀤𑀺𑀲𑀫𑁆𑀧𑀢𑀺𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀢𑀼𑀲𑁆𑀲 𑀘 𑀭𑀜𑁆𑀜𑁄 𑀘 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀧𑀼𑀢𑁆𑀢𑁄 𑀭𑁂𑀡𑀼, 𑀲𑀳𑀸𑀬𑀸 ¶ 𑀘𑀲𑁆𑀲 𑀲𑀢𑁆𑀢𑀪𑀽, 𑀩𑁆𑀭𑀳𑁆𑀫𑀤𑀢𑁆𑀢𑁄, 𑀯𑁂𑀲𑁆𑀲𑀪𑀽, 𑀪𑀭𑀢𑁄, 𑀤𑁆𑀯𑁂 𑀥𑀢𑀭𑀝𑁆𑀞𑀸𑀢𑀺 𑀇𑀫𑁂 𑀲𑀢𑁆𑀢 𑀭𑀸𑀚𑀸𑀦𑁄 𑀬𑀣𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀯𑀤𑀦𑁆𑀢𑀺. 𑀏𑀯𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑁂 𑀅𑀦𑀼𑀲𑀸𑀲𑀦𑁆𑀢𑁂 𑀚𑀫𑁆𑀩𑀼𑀤𑀻𑀧𑀢𑀮𑁂 𑀲𑀩𑁆𑀩𑁂𑀲𑀁 𑀭𑀸𑀚𑀸𑀯 𑀭𑀜𑁆𑀜𑀁, 𑀩𑁆𑀭𑀳𑁆𑀫𑀸𑀯 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀤𑁂𑀯𑁄𑀯 𑀕𑀳𑀧𑀢𑀺𑀓𑀸𑀦𑀁 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀉𑀢𑁆𑀢𑀫𑀕𑀸𑀭𑀯𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑁂𑀡𑀼𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀧𑀼𑀭𑁄𑀳𑀺𑀢𑁄’’𑀢𑀺. 𑀇𑀫𑁂𑀯 𑀲𑀢𑁆𑀢 𑀪𑀸𑀭𑀥𑀸𑀭𑀸 𑀫𑀳𑀸𑀭𑀸𑀚𑀸𑀦𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀪𑀽 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘, 𑀯𑁂𑀲𑁆𑀲𑀪𑀽 𑀪𑀭𑀢𑁄 𑀲𑀳;

𑀭𑁂𑀡𑀼 𑀤𑁆𑀯𑁂 𑀘 𑀥𑀢𑀭𑀝𑁆𑀞𑀸, 𑀢𑀤𑀸𑀲𑀼𑀁 𑀲𑀢𑁆𑀢 𑀪𑀸𑀭𑀥𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁦𑁮);

𑀭𑀜𑁆𑀜𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀸𑀦𑀁 𑀧𑀼𑀭𑁄 𑀯𑀺𑀥𑀸𑀦𑀢𑁄 𑀧𑀼𑀭𑁂 𑀲𑀁𑀯𑀺𑀥𑀸𑀦𑀢𑁄 𑀧𑀼𑀭𑁄𑀳𑀺𑀢𑁄. 𑀓𑁄𑀥𑀸𑀫𑀕𑀦𑁆𑀥𑁂𑀦𑀸𑀢𑀺 𑀓𑁄𑀥𑀲𑀗𑁆𑀔𑀸𑀢𑁂𑀦 𑀧𑀽𑀢𑀺𑀕𑀦𑁆𑀥𑁂𑀦. 𑀓𑀭𑀼𑀡𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀭𑀼𑀡𑀦𑁆𑀢𑀺 𑀲𑀧𑀼𑀩𑁆𑀩𑀪𑀸𑀕𑀓𑀭𑀼𑀡𑀚𑁆𑀛𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀭𑀼𑀡𑀸𑀬 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁂 𑀘 𑀞𑀺𑀢𑀸’’𑀢𑀺. 𑀬𑀓𑀸𑀭𑁄 𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄𑀢𑀺 𑀆𑀳 ‘‘𑀬𑁂𑀢𑁂𑀢𑀺 𑀏𑀢𑁂’’𑀢𑀺. 𑀅𑀭𑀳𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀫𑁄𑀢𑀺 𑀲𑀓𑀤𑀸𑀕𑀸𑀫𑀻. 𑀲𑀓𑀤𑀸𑀕𑀸𑀫𑀺𑀁 ¶ 𑀉𑀧𑀸𑀤𑀸𑀬𑀸𑀢𑀺 𑀲𑀓𑀤𑀸𑀕𑀸𑀫𑀺𑀪𑀸𑀯𑀁 𑀧𑀝𑀺𑀘𑁆𑀘. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀳𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀓𑀤𑀸𑀕𑀸𑀫𑀺𑀪𑀸𑀯𑀁 𑀧𑀝𑀺𑀘𑁆𑀘 𑀫𑀼𑀤𑀽𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

𑁬. 𑀫𑀳𑀸𑀯𑀕𑁆𑀕𑁄

𑁧. 𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀙𑀝𑁆𑀞𑀲𑁆𑀲 ¶ ¶ 𑀧𑀞𑀫𑁂 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂𑀢𑀺 𑀏𑀢𑁆𑀣 𑀓𑀺𑀁 𑀢𑀁 𑀆𑀲𑀦𑀁 𑀧𑀞𑀫𑀫𑁂𑀯 𑀧𑀜𑁆𑀜𑀢𑁆𑀢𑀁, 𑀉𑀤𑀸𑀳𑀼 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀘𑁂? 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀧𑀥𑀸𑀦𑀺𑀓𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀫𑁂𑀢𑀁, 𑀬𑀤𑀺𑀤𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀥𑀸𑀦𑀺𑀓𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀬𑀢𑁆𑀣 𑀬𑀢𑁆𑀣 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺, 𑀲𑀩𑁆𑀩𑀢𑁆𑀣 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀪𑀕𑀯𑀸 𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀯𑀺𑀳𑀭𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺 𑁋 ‘‘𑀅𑀲𑀼𑀓𑁄 𑀫𑀬𑁆𑀳𑀁 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀅𑀲𑀓𑁆𑀔𑀺 𑀦𑀼 𑀔𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀦𑁄’’𑀢𑀺. 𑀅𑀣 𑀦𑀁 𑀧𑀲𑁆𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑀬𑀫𑀸𑀦𑀁, 𑀢𑀢𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀅𑀥𑀺𑀪𑀯𑀺𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀯𑀝𑁆𑀝𑀤𑀼𑀓𑁆𑀔𑁂 𑀲𑀁𑀲𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀢𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀢𑀢𑁆𑀣𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀓𑀼𑀮𑀧𑀼𑀢𑁆𑀢𑀁 𑀑𑀯𑀤𑀺𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀅𑀣𑁂𑀯𑀁 𑀑𑀯𑀤𑀺𑀬𑀫𑀸𑀦𑀸 𑀢𑁂 𑀪𑀺𑀓𑁆𑀔𑀽 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀫𑀦𑀁 𑀚𑀸𑀦𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀫𑀻𑀧𑁂 𑀞𑀺𑀢𑀁𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀺𑀁 𑀔𑀡𑁂, ‘𑀪𑀦𑁆𑀢𑁂, 𑀇𑀥 𑀦𑀺𑀲𑀻𑀤𑀣 𑀦𑀺𑀲𑀻𑀤𑀣𑀸’𑀢𑀺 𑀆𑀲𑀦𑀧𑀭𑀺𑀬𑁂𑀲𑀦𑀁 𑀦𑀸𑀫 𑀪𑀸𑀭𑁄’’𑀢𑀺. 𑀢𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀯 𑀯𑀺𑀳𑀭𑀦𑁆𑀢𑀺. 𑀬𑀲𑁆𑀲 𑀧𑀻𑀞𑀁 𑀅𑀢𑁆𑀣𑀺, 𑀲𑁄 𑀢𑀁 𑀧𑀜𑁆𑀜𑀧𑁂𑀢𑀺. 𑀬𑀲𑁆𑀲 𑀦𑀢𑁆𑀣𑀺, 𑀲𑁄 𑀫𑀜𑁆𑀘𑀁 𑀯𑀸 𑀨𑀮𑀓𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀯𑀸𑀮𑀺𑀓𑀸𑀧𑀼𑀜𑁆𑀚𑀁 𑀯𑀸 𑀧𑀜𑁆𑀜𑀧𑁂𑀢𑀺. 𑀢𑀁 𑀅𑀮𑀪𑀫𑀸𑀦𑀸 𑀧𑀼𑀭𑀸𑀡𑀧𑀡𑁆𑀡𑀸𑀦𑀺𑀧𑀺 𑀲𑀁𑀓𑀟𑁆𑀠𑀺𑀢𑁆𑀯𑀸 𑀢𑀢𑁆𑀣 𑀧𑀁𑀲𑀼𑀓𑀽𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀺.

𑀲𑀢𑁆𑀢 𑀲𑀭𑀸𑀢𑀺 𑁋 𑀙𑀚𑁆𑀚𑁄, 𑀉𑀲𑀪𑁄, 𑀕𑀦𑁆𑀥𑀸𑀭𑁄, 𑀫𑀚𑁆𑀛𑀺𑀫𑁄, 𑀧𑀜𑁆𑀘𑀫𑁄, 𑀥𑁂𑀯𑀢𑁄, 𑀦𑀺𑀲𑀸𑀤𑁄𑀢𑀺 𑀏𑀢𑁂 𑀲𑀢𑁆𑀢 𑀲𑀭𑀸. 𑀢𑀬𑁄 𑀕𑀸𑀫𑀸𑀢𑀺 𑁋 𑀙𑀚𑁆𑀚𑀕𑀸𑀫𑁄, 𑀫𑀚𑁆𑀛𑀺𑀫𑀕𑀸𑀫𑁄, 𑀲𑀸𑀥𑀸𑀭𑀡𑀕𑀸𑀫𑁄𑀢𑀺 𑀢𑀬𑁄 𑀕𑀸𑀫𑀸, 𑀲𑀫𑀽𑀳𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀮𑁄𑀓𑁂 𑀯𑀻𑀡𑀸𑀯𑀸𑀤𑀦𑀸 𑀏𑀓𑁂𑀓𑀲𑁆𑀲 𑀲𑀭𑀲𑁆𑀲 𑀯𑀲𑁂𑀦 𑀢𑀬𑁄 𑀢𑀬𑁄 𑀫𑀼𑀘𑁆𑀙𑀦𑀸𑀢𑀺 𑀓𑀢𑁆𑀯𑀸 𑀏𑀓𑀯𑀻𑀲𑀢𑀺 𑀫𑀼𑀘𑁆𑀙𑀦𑀸. 𑀤𑁂𑀯𑀮𑁄𑀓𑁂 𑀯𑀻𑀡𑀸𑀯𑀸𑀤𑀦𑀸 𑀧𑀦 𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 ¶ 𑀏𑀓𑁂𑀓𑀲𑁆𑀲 𑀲𑀭𑀲𑁆𑀲 𑀯𑀲𑁂𑀦 𑀲𑀢𑁆𑀢 ¶ 𑀲𑀢𑁆𑀢 𑀫𑀼𑀘𑁆𑀙𑀦𑀸, 𑀅𑀦𑁆𑀢𑀭𑀲𑁆𑀲 𑀲𑀭𑀲𑁆𑀲 𑀘 𑀏𑀓𑀸𑀢𑀺 𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸. 𑀢𑁂𑀦𑁂𑀯 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁪𑁫) ‘‘𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸 𑀫𑀼𑀘𑁆𑀙𑁂𑀢𑁆𑀯𑀸’’𑀢𑀺 𑀧𑀜𑁆𑀘𑀲𑀺𑀔𑀲𑁆𑀲 𑀯𑀻𑀡𑀸𑀯𑀸𑀤𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀼𑀢𑁆𑀢𑀁. 𑀞𑀸𑀦𑀸 𑀏𑀓𑀽𑀦𑀧𑀜𑁆𑀜𑀸𑀲𑀸𑀢𑀺 𑀏𑀓𑁂𑀓𑀲𑁆𑀲𑁂𑀯 𑀲𑀭𑀲𑁆𑀲 𑀲𑀢𑁆𑀢 𑀲𑀢𑁆𑀢 𑀞𑀸𑀦𑀪𑁂𑀤𑀸, 𑀬𑀢𑁄 𑀲𑀭𑀲𑁆𑀲 𑀫𑀡𑁆𑀟𑀮𑀢𑀸𑀯𑀯𑀢𑁆𑀣𑀸𑀦𑀁 𑀳𑁄𑀢𑀺. 𑀏𑀓𑀽𑀦𑀧𑀜𑁆𑀜𑀸𑀲𑀝𑁆𑀞𑀸𑀦𑀯𑀺𑀲𑁂𑀲𑁄 𑀢𑀺𑀲𑁆𑀲𑁄 𑀤𑀼𑀯𑁂 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀢𑀺𑀲𑁆𑀲𑁄 𑀤𑀼𑀯𑁂 𑀘𑀢𑀲𑁆𑀲𑁄𑀢𑀺 𑀤𑁆𑀯𑀸𑀯𑀻𑀲𑀢𑀺 𑀲𑀼𑀢𑀺𑀪𑁂𑀤𑀸 𑀘 𑀇𑀘𑁆𑀙𑀺𑀢𑀸.

𑀅𑀢𑀺𑀕𑀸𑀴𑁆𑀳𑀁 𑀆𑀭𑀤𑁆𑀥𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀙𑀫𑁆𑀪𑀺𑀢𑀢𑁆𑀢𑀸𑀦𑀁 𑀯𑀽𑀧𑀲𑀫𑀢𑁆𑀣𑀁 𑀅𑀢𑀺𑀯𑀺𑀬 𑀆𑀭𑀤𑁆𑀥𑀁. 𑀲𑀩𑁆𑀩𑀢𑁆𑀣 𑀦𑀺𑀬𑀼𑀢𑁆𑀢𑀸 𑀲𑀩𑁆𑀩𑀢𑁆𑀣𑀺𑀓𑀸. 𑀲𑀩𑁆𑀩𑁂𑀦 𑀯𑀸 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁂𑀦 𑀅𑀢𑁆𑀣𑁂𑀢𑀩𑁆𑀩𑀸 𑀲𑀩𑁆𑀩𑀢𑁆𑀣𑀺𑀓𑀸. 𑀲𑀫𑀣𑁄𑀬𑁂𑀯 𑀲𑀫𑀣𑀦𑀺𑀫𑀺𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀩𑀸𑀳𑀺𑀭𑀓𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀦 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑁄 𑀲𑀩𑁆𑀩𑀲𑁄 𑀅𑀯𑀺𑀧𑁆𑀧𑀳𑀻𑀦𑀭𑀸𑀕𑀢𑁆𑀢𑀸. 𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑁄 𑀳𑀺 𑀲𑁄. 𑀅𑀭𑀳𑀸 𑀧𑀦 𑀔𑀬𑀸 𑀏𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸’’𑀢𑀺. 𑀏𑀲 𑀦𑀬𑁄 𑀤𑁄𑀲𑀫𑁄𑀳𑁂𑀲𑀼𑀧𑀺.

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀺𑀓𑀸𑀫𑀬𑀫𑀸𑀦𑁄𑀢𑀺 𑀏𑀢𑁆𑀣 𑀮𑀩𑁆𑀪𑀢𑀺 𑀧𑀸𑀧𑀼𑀡𑀻𑀬𑀢𑀻𑀢𑀺 𑀮𑀸𑀪𑁄, 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀓𑁆𑀓𑀘𑁆𑀘𑀁 𑀓𑀸𑀢𑀩𑁆𑀩𑁄𑀢𑀺 𑀲𑀓𑁆𑀓𑀸𑀭𑁄. 𑀧𑀘𑁆𑀘𑀬𑀸 𑀏𑀯 𑀳𑀺 𑀧𑀡𑀻𑀢𑀧𑀡𑀻𑀢𑀸 𑀲𑀼𑀦𑁆𑀤𑀭𑀲𑀼𑀦𑁆𑀤𑀭𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀸 ‘‘𑀲𑀓𑁆𑀓𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀬𑀸 𑀘 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀕𑀸𑀭𑀯𑀓𑀺𑀭𑀺𑀬𑀸, 𑀧𑀼𑀧𑁆𑀨𑀸𑀤𑀻𑀳𑀺 𑀯𑀸 𑀧𑀽𑀚𑀸. 𑀲𑀺𑀮𑁄𑀓𑁄𑀢𑀺 𑀯𑀡𑁆𑀡𑀪𑀡𑀦𑀁. 𑀢𑀁 𑀮𑀸𑀪𑀜𑁆𑀘, 𑀲𑀓𑁆𑀓𑀸𑀭𑀜𑁆𑀘, 𑀲𑀺𑀮𑁄𑀓𑀜𑁆𑀘, 𑀦𑀺𑀓𑀸𑀫𑀬𑀫𑀸𑀦𑁄, 𑀧𑀯𑀢𑁆𑀢𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀘𑀢𑀼𑀧𑀘𑁆𑀘𑀬𑀮𑀸𑀪𑀜𑁆𑀘…𑀧𑁂… 𑀧𑀢𑁆𑀣𑀬𑀫𑀸𑀦𑁄’’𑀢𑀺.

𑀣𑀽𑀡𑀦𑁆𑀢𑀺 𑀧𑀲𑀽𑀦𑀁 𑀩𑀦𑁆𑀥𑀦𑀢𑁆𑀣𑀸𑀬 𑀦𑀺𑀔𑀸𑀢𑀢𑁆𑀣𑀫𑁆𑀪𑀲𑀗𑁆𑀔𑀸𑀢𑀁 𑀣𑀽𑀡𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀨𑀕𑁆𑀕𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀤𑀼𑀢𑀺𑀬𑁂 𑀲𑀫𑀥𑁄𑀲𑀻𑀢𑀺 𑀲𑀫𑀦𑁆𑀢𑀢𑁄 𑀅𑀥𑁄𑀲𑀺. 𑀲𑀩𑁆𑀩𑀪𑀸𑀕𑁂𑀦 𑀧𑀭𑀺𑀨𑀦𑁆𑀤𑀦𑀘𑀮𑀦𑀸𑀓𑀸𑀭𑁂𑀦 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀢𑀁 𑀓𑀺𑀭𑁂𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑁂𑀦𑀧𑀺 𑀯𑀼𑀟𑁆𑀠𑀢𑀭𑀁 ¶ 𑀤𑀺𑀲𑁆𑀯𑀸 𑀉𑀝𑁆𑀞𑀺𑀢𑀸𑀓𑀸𑀭𑁂𑀦 𑀅𑀧𑀘𑀺𑀢𑀺 𑀤𑀲𑁆𑀲𑁂𑀢𑀩𑁆𑀩𑀸. 𑀢𑁂𑀦 𑀧𑀦 ‘‘𑀫𑀸 𑀘𑀮𑀺 𑀫𑀸 𑀘𑀮𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀁 𑀧𑀦 𑀘𑀮𑀦𑀁 𑀉𑀝𑁆𑀞𑀸𑀦𑀸𑀓𑀸𑀭𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 ¶ 𑀆𑀳 ‘‘𑀉𑀝𑁆𑀞𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀻’’𑀢𑀺. 𑀲𑀦𑁆𑀢𑀺𑀫𑀸𑀦𑀺 𑀆𑀲𑀦𑀸𑀦𑀻𑀢𑀺 𑀧𑀞𑀫𑀫𑁂𑀯 𑀧𑀜𑁆𑀜𑀢𑁆𑀣𑀸𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀩𑀼𑀤𑁆𑀥𑀓𑀸𑀮𑀲𑁆𑀫𑀺𑀜𑁆𑀳𑀺 𑀏𑀓𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀯𑀲𑀦𑀝𑁆𑀞𑀸𑀦𑁂 𑁋 ‘‘𑀲𑀘𑁂 𑀲𑀢𑁆𑀣𑀸 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀆𑀲𑀦𑀁 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀽’’𑀢𑀺 𑀅𑀦𑁆𑀢𑀫𑀲𑁄 𑀨𑀮𑀓𑀫𑀢𑁆𑀢𑀫𑁆𑀧𑀺 𑀧𑀡𑁆𑀡𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀧𑀜𑁆𑀜𑀢𑁆𑀢𑀫𑁂𑀯. 𑀔𑀫𑀦𑀻𑀬𑀁 𑀬𑀸𑀧𑀦𑀻𑀬𑀦𑁆𑀢𑀺 𑀓𑀘𑁆𑀘𑀺 𑀤𑀼𑀓𑁆𑀔𑀁 𑀔𑀫𑀺𑀢𑀼𑀁, 𑀇𑀭𑀺𑀬𑀸𑀧𑀣𑀁 𑀯𑀸 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸𑀢𑀺 𑀧𑀼𑀘𑁆𑀙𑀢𑀺. 𑀲𑀻𑀲𑀯𑁂𑀤𑀦𑀸𑀢𑀺 𑀓𑀼𑀢𑁄𑀘𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀫𑀸𑀦𑁂𑀳𑀺 𑀯𑀸𑀢𑁂𑀳𑀺 𑀲𑀫𑀼𑀝𑁆𑀞𑀸𑀧𑀺𑀢𑀸 𑀩𑀮𑀯𑀢𑀺𑀬𑁄 𑀲𑀻𑀲𑀯𑁂𑀤𑀦𑀸 𑀳𑁄𑀦𑁆𑀢𑀺.

𑀨𑀕𑁆𑀕𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀙𑀴𑀪𑀺𑀚𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀢𑀢𑀺𑀬𑁂 𑀅𑀪𑀺𑀚𑀸𑀢𑀺𑀬𑁄𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀦 𑀅𑀢𑁆𑀣𑀯𑀺𑀲𑁂𑀲𑀚𑁄𑀢𑀓𑁄𑀢𑀺 𑀆𑀳 ‘‘𑀙 𑀚𑀸𑀢𑀺𑀬𑁄’’𑀢𑀺. 𑀅𑀪𑀺𑀚𑀸𑀬𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀉𑀭𑀩𑁆𑀪𑁂 𑀳𑀦𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑀸. 𑀏𑀯𑀁 𑀲𑀽𑀓𑀭𑀺𑀓𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀭𑁄𑀤𑁂𑀦𑁆𑀢𑀺 𑀓𑀼𑀭𑀼𑀭𑀓𑀫𑁆𑀫𑀦𑁆𑀢𑀢𑀸𑀬 𑀲𑀧𑁆𑀧𑀝𑀺𑀩𑀤𑁆𑀥𑁂 𑀲𑀢𑁆𑀢𑁂 𑀅𑀲𑁆𑀲𑀽𑀦𑀺 𑀫𑁄𑀘𑁂𑀦𑁆𑀢𑀻𑀢𑀺 𑀭𑀼𑀤𑁆𑀤𑀸, 𑀢𑁂 𑀏𑀯 𑀮𑀼𑀤𑁆𑀤𑀸 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸. 𑀇𑀫𑀺𑀦𑀸 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀫𑀸𑀕𑀯𑀺𑀓𑀸 𑀦𑁂𑀲𑀸𑀤𑀸 𑀯𑀼𑀢𑁆𑀢𑀸, 𑀢𑁂 𑀧𑀸𑀧𑀓𑀫𑁆𑀫𑀧𑁆𑀧𑀲𑀼𑀢𑀢𑀸𑀬 ‘‘𑀓𑀡𑁆𑀳𑀸𑀪𑀺𑀚𑀸𑀢𑀻’’𑀢𑀺 𑀯𑀤𑀢𑀺.

𑀪𑀺𑀓𑁆𑀔𑀽𑀢𑀺 𑀘 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀓𑁆𑀔𑀽. 𑀢𑁂 𑀓𑀺𑀭 𑀲𑀘𑁆𑀙𑀦𑁆𑀤𑀭𑀸𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 ‘‘𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸’’𑀢𑀺 𑀯𑀤𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀢𑁂 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑀻𑀢𑀺 𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄. 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑁆𑀕𑀸𑀳𑀺𑀢𑀸𑀬 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀢𑀻𑀢𑀺. 𑀅𑀣 𑀯𑀸 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸 𑀏𑀯𑀁𑀦𑀸𑀫𑀓𑀸 𑀏𑀓𑁂 𑀧𑀩𑁆𑀩𑀚𑀺𑀢𑀸, 𑀬𑁂 𑀲𑀯𑀺𑀲𑁂𑀲𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 ‘‘𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀇𑀫𑀫𑁂𑀯 𑀘 𑀅𑀢𑁆𑀣𑀯𑀺𑀓𑀧𑁆𑀧𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀲𑀫𑀡𑀸 𑀦𑀸𑀫𑁂𑀢𑁂’’𑀢𑀺.

𑀮𑁄𑀳𑀺𑀢𑀸𑀪𑀺𑀚𑀸𑀢𑀺 ¶ 𑀦𑀸𑀫 𑀦𑀺𑀕𑀡𑁆𑀞𑀸 𑀏𑀓𑀲𑀸𑀝𑀓𑀸𑀢𑀺 𑀯𑀼𑀢𑁆𑀢𑀸. 𑀢𑁂 𑀓𑀺𑀭 𑀞𑀢𑁆𑀯𑀸 𑀪𑀼𑀜𑁆𑀚𑀦𑀦𑀳𑀸𑀦𑀧𑁆𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀡𑁆𑀟𑀭𑀢𑀭𑀸.

𑀅𑀘𑁂𑀮𑀓𑀲𑀸𑀯𑀓𑀸𑀢𑀺 ¶ 𑀆𑀚𑀻𑀯𑀓𑀲𑀸𑀯𑀓𑁂 𑀯𑀤𑀢𑀺. 𑀢𑁂 𑀓𑀺𑀭 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀲𑀼𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀤𑀸𑀬𑀓𑁂 𑀦𑀺𑀕𑀡𑁆𑀞𑁂𑀳𑀺𑀧𑀺 𑀚𑁂𑀝𑁆𑀞𑀓𑀢𑀭𑁂 𑀓𑀭𑁄𑀢𑀺.

𑀆𑀚𑀻𑀯𑀓𑀸 𑀆𑀚𑀻𑀯𑀓𑀺𑀦𑀺𑀬𑁄 ‘‘𑀲𑀼𑀓𑁆𑀓𑀸𑀪𑀺𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀸. 𑀢𑁂 𑀓𑀺𑀭 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀧𑀡𑁆𑀟𑀭𑀢𑀭𑀸. 𑀦𑀦𑁆𑀤𑀸𑀤𑀬𑁄 𑀳𑀺 𑀢𑀣𑀸𑀭𑀽𑀧𑀁 𑀆𑀚𑀻𑀯𑀓𑀧𑁆𑀧𑀝𑀺𑀧𑀢𑁆𑀢𑀺𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀘 𑀧𑀡𑁆𑀟𑀭𑀢𑀭𑀸𑀢𑀺 ‘‘𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀸.

𑀩𑀺𑀮𑀁 𑀑𑀮𑀕𑁆𑀕𑁂𑀬𑁆𑀬𑀼𑀦𑁆𑀢𑀺 𑀫𑀁𑀲𑀪𑀸𑀕𑀁 𑀦𑁆𑀳𑀸𑀭𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀕𑀦𑁆𑀣𑀺𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀯𑀸 𑀓𑁂𑀲𑁂 𑀯𑀸 𑀑𑀮𑀫𑁆𑀩𑀦𑀯𑀲𑁂𑀦 𑀩𑀦𑁆𑀥𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀲𑀢𑁆𑀣𑀥𑀫𑁆𑀫𑀁 𑀦𑀸𑀫 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀯𑀸𑀳𑁄 𑀓𑀺𑀭 𑀫𑀳𑀸𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑁄𑀡𑁂 𑀫𑀢𑁂 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀲𑀢𑁆𑀣𑀺𑀓𑀸𑀦𑀁 ‘‘𑀇𑀤𑀁 𑀔𑀸𑀤𑀺𑀢𑁆𑀯𑀸 𑀏𑀢𑁆𑀢𑀓𑀁 𑀫𑀽𑀮𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀓𑁄𑀝𑁆𑀞𑀸𑀲𑀁 𑀑𑀮𑀫𑁆𑀩𑀢𑀺. 𑀕𑁄𑀡𑀫𑀁𑀲𑀁 𑀦𑀸𑀫 𑀔𑀸𑀤𑀦𑁆𑀢𑀸𑀧𑀺 𑀅𑀢𑁆𑀣𑀺, 𑀅𑀔𑀸𑀤𑀦𑁆𑀢𑀸𑀧𑀺 𑀅𑀢𑁆𑀣𑀺, 𑀔𑀸𑀤𑀦𑁆𑀢𑀸𑀧𑀺 𑀫𑀽𑀮𑀁 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑀸𑀧𑀺. 𑀲𑀢𑁆𑀣𑀯𑀸𑀳𑁄 𑀬𑁂𑀦 𑀫𑀽𑀮𑁂𑀦 𑀕𑁄𑀡𑁄 𑀕𑀳𑀺𑀢𑁄, 𑀢𑀁 𑀫𑀽𑀮𑀁 𑀲𑀢𑁆𑀣𑀺𑀓𑁂𑀳𑀺 𑀥𑀸𑀭𑀡𑀢𑁆𑀣𑀁 𑀲𑀩𑁆𑀩𑁂𑀲𑀁 𑀩𑀮𑀓𑁆𑀓𑀸𑀭𑁂𑀦 𑀓𑁄𑀝𑁆𑀞𑀸𑀲𑀁 𑀤𑀢𑁆𑀯𑀸 𑀫𑀽𑀮𑀁 𑀕𑀡𑁆𑀳𑀸𑀢𑀺. 𑀅𑀬𑀁 𑀲𑀢𑁆𑀣𑀥𑀫𑁆𑀫𑁄.

𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄𑀢𑀺 𑀓𑀡𑁆𑀳𑁂 𑀦𑀻𑀘𑀓𑀼𑀮𑁂 𑀚𑀸𑀢𑁄 𑀳𑀼𑀢𑁆𑀯𑀸. 𑀓𑀡𑁆𑀳𑀥𑀫𑁆𑀫𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀡𑁆𑀳𑀲𑀪𑀸𑀯𑁄 𑀳𑀼𑀢𑁆𑀯𑀸 𑀅𑀪𑀺𑀚𑀸𑀬𑀢𑀻’’𑀢𑀺, 𑀢𑀁 𑀅𑀦𑁆𑀢𑁄𑀕𑀥𑀳𑁂𑀢𑀼𑀅𑀢𑁆𑀣𑀁 𑀧𑀤𑀁, 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀻𑀢𑀺 𑀓𑀸𑀴𑀓𑀁 𑀤𑀲𑀤𑀼𑀲𑁆𑀲𑀻𑀮𑁆𑀬𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀻𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 ‘‘𑀅𑀳𑀁 𑀧𑀼𑀩𑁆𑀩𑁂𑀧𑀺 𑀧𑀼𑀜𑁆𑀜𑀸𑀦𑀁 𑀅𑀓𑀢𑀢𑁆𑀢𑀸 𑀦𑀻𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀤𑀸𑀦𑀺 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀜𑁆𑀜𑀲𑀗𑁆𑀔𑀸𑀢𑀁 𑀧𑀡𑁆𑀟𑀭𑀥𑀫𑁆𑀫𑀁 𑀓𑀭𑁄𑀢𑀺.

𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀘𑁂 𑀓𑀡𑁆𑀳𑀁 𑀪𑀯𑁂𑀬𑁆𑀬, 𑀓𑀡𑁆𑀳𑀯𑀺𑀧𑀸𑀓𑀁 𑀤𑀤𑁂𑀬𑁆𑀬 𑀬𑀣𑀸 𑀤𑀲𑀯𑀺𑀥𑀁 𑀤𑀼𑀲𑁆𑀲𑀻𑀮𑁆𑀬𑀥𑀫𑁆𑀫𑀁. 𑀲𑀘𑁂 𑀲𑀼𑀓𑁆𑀓𑀁, 𑀲𑀼𑀓𑁆𑀓𑀯𑀺𑀧𑀸𑀓𑀁 𑀤𑀤𑁂𑀬𑁆𑀬 𑀬𑀣𑀸 𑀤𑀸𑀦𑀲𑀻𑀮𑀸𑀤𑀺𑀓𑀼𑀲𑀮𑀓𑀫𑁆𑀫𑀁. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀧𑁆𑀧𑀤𑀸𑀦𑀢𑁄 ‘‘𑀅𑀓𑀡𑁆𑀳𑀁 𑀅𑀲𑀼𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀜𑁆𑀘 𑀦𑀸𑀫 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀭𑀳𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀅𑀪𑀺𑀚𑀸𑀬𑀢𑀻’’𑀢𑀺 𑀯𑀘𑀦𑀢𑁄 ¶ . 𑀢𑀜𑁆𑀳𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀬𑀣𑀸 ‘‘𑀭𑀸𑀕𑀸𑀤𑀻𑀦𑀁 𑀔𑀬𑀦𑁆𑀢𑁂 𑀚𑀸𑀢𑀢𑁆𑀢𑀸 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄’’𑀢𑀺. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀯𑀸 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀸𑀧𑀦𑀢𑁄 𑀦𑀺𑀩𑁆𑀩𑀸𑀦𑀁. 𑀢𑀁 𑀏𑀲 𑀅𑀪𑀺𑀚𑀸𑀬𑀢𑀺 𑀧𑀲𑀯𑀢𑀺. 𑀇𑀥𑀸𑀧𑀺 𑀳𑀺 𑀅𑀦𑁆𑀢𑁄𑀕𑀥𑀳𑁂𑀢𑀼 𑀅𑀢𑁆𑀣𑀁 ‘‘𑀚𑀸𑀬𑀢𑀻’’𑀢𑀺 𑀧𑀤𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀚𑀸𑀬𑀢𑀻’’𑀢𑀺 𑀇𑀫𑀲𑁆𑀲 𑀧𑀸𑀧𑀼𑀡𑀸𑀢𑀻𑀳𑀺 𑀅𑀢𑁆𑀣𑀁 ¶ 𑀕𑀳𑁂𑀢𑁆𑀯𑀸𑀯 ‘‘𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄𑀢𑀺 𑀲𑀼𑀓𑁆𑀓𑁂 𑀉𑀘𑁆𑀘𑀓𑀼𑀮𑁂 𑀚𑀸𑀢𑁄 𑀳𑀼𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀙𑀴𑀪𑀺𑀚𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀆𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀘𑀢𑀼𑀢𑁆𑀣𑁂 𑀲𑀁𑀯𑀭𑁂𑀦𑀸𑀢𑀺 𑀲𑀁𑀯𑀭𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀸. 𑀇𑀥𑀸𑀢𑀺 𑀅𑀬𑀁 𑀇𑀥-𑀲𑀤𑁆𑀤𑁄 𑀲𑀩𑁆𑀩𑀸𑀓𑀸𑀭𑀢𑁄 𑀇𑀦𑁆𑀤𑀺𑀬𑀲𑀁𑀯𑀭𑀲𑀁𑀯𑀼𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑁄, 𑀅𑀜𑁆𑀜𑀲𑁆𑀲 𑀢𑀣𑀸𑀪𑀸𑀯𑀧𑁆𑀧𑀝𑀺𑀲𑁂𑀥𑀦𑁄 𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀥𑀸𑀢𑀺 𑀇𑀥𑀲𑁆𑀫𑀺𑀁 𑀲𑀸𑀲𑀦𑁂’’𑀢𑀺. 𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀬. 𑀲𑀗𑁆𑀔𑀸-𑀲𑀤𑁆𑀤𑁄 𑀜𑀸𑀡𑀓𑁄𑀝𑁆𑀞𑀸𑀲𑀧𑀜𑁆𑀜𑀢𑁆𑀢𑀺𑀕𑀡𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺 ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁬𑁮) 𑀳𑀺 𑀜𑀸𑀡𑁂 𑀤𑀺𑀲𑁆𑀲𑀢𑀺. ‘‘𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁨, 𑁨𑁦𑁪) 𑀓𑁄𑀝𑁆𑀞𑀸𑀲𑁂. ‘‘𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁨𑁮) 𑀕𑀡𑀦𑀸𑀬. 𑀇𑀥 𑀧𑀦 𑀜𑀸𑀡𑁂 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀧𑀝𑀺𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀆𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸 𑀆𑀤𑀻𑀦𑀯𑀧𑀝𑀺𑀲𑀗𑁆𑀔𑀸𑀢𑀺 𑀬𑁄𑀚𑀦𑀸. 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 𑀖𑀁𑀲𑀺𑀢𑀁. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀳𑀢𑁆𑀣𑀧𑀸𑀤𑀲𑀺𑀢𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀧𑁆𑀧𑀓𑀸𑀭𑀪𑀸𑀕𑀲𑁄. 𑀢𑀜𑁆𑀳𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀓𑀺𑀮𑁂𑀲𑀸𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀢𑁄 ‘‘𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀲𑁆𑀲 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀕𑀸𑀳𑁄. 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁂 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀇𑀢𑁆𑀣𑀺𑀬𑀸 𑀇𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀦 𑀏𑀯𑀫𑀺𑀤𑀁, 𑀇𑀤𑀁 𑀧𑀦 𑀘𑀓𑁆𑀔𑀼𑀫𑁂𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀫𑁂𑀯 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀬𑀣𑀸 𑀆𑀯𑀸𑀝𑁂 𑀦𑀺𑀬𑀢𑀝𑁆𑀞𑀺𑀢𑀺𑀓𑁄 𑀓𑀘𑁆𑀙𑀧𑁄 ‘‘𑀆𑀯𑀸𑀝𑀓𑀘𑁆𑀙𑀧𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀢𑀁 𑀞𑀸𑀦𑁄 ¶ 𑀲𑀁𑀯𑀭𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄’’𑀢𑀺. 𑀦𑀦𑀼 𑀘 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀦𑀢𑁆𑀣𑀺. 𑀦 𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀲𑀢𑀺 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀧𑀺𑀘 𑀬𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀢𑀤𑀸 𑀪𑀯𑀗𑁆𑀕𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁, 𑀢𑀢𑁄 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁, 𑀢𑀢𑁄 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁, 𑀢𑀢𑁄 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺 ¶ , 𑀢𑀤𑀦𑀦𑁆𑀢𑀭𑀁 𑀚𑀯𑀦𑀁 𑀚𑀯𑀢𑀺. 𑀢𑀢𑁆𑀣𑀸𑀧𑀺 𑀦𑁂𑀯 𑀪𑀯𑀗𑁆𑀕𑀲𑀫𑀬𑁂, 𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀫𑀬𑁂 𑀘 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀅𑀢𑁆𑀣𑀺. 𑀚𑀯𑀦𑀓𑁆𑀔𑀡𑁂 𑀧𑀦 𑀲𑀘𑁂 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀅𑀜𑁆𑀜𑀸𑀡𑀁 𑀯𑀸 𑀅𑀓𑁆𑀔𑀦𑁆𑀢𑀺 𑀯𑀸 𑀓𑁄𑀲𑀚𑁆𑀚𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀁𑀯𑀭𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀁𑀯𑀭𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀚𑀯𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀳𑁂𑀲…𑀧𑁂… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀕𑀭𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀕𑀩𑁆𑀪𑀸𑀤𑀬𑁄 𑀲𑀼𑀲𑀁𑀯𑀼𑀢𑀸, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀅𑀭𑀓𑁆𑀔𑀺𑀢𑀁 𑀅𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀬𑀤𑀺𑀘𑁆𑀙𑀓𑀁 𑀓𑀭𑁂𑀬𑁆𑀬𑀼𑀁, 𑀏𑀯𑀫𑁂𑀯𑀁 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺. 𑀬𑀣𑀸 𑀧𑀦 𑀦𑀕𑀭𑀤𑁆𑀯𑀸𑀭𑁂𑀲𑀼 𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀸𑀤𑀬𑁄 𑀅𑀲𑀁𑀯𑀼𑀢𑀸, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀲𑀼 𑀳𑀺 𑀧𑀺𑀳𑀺𑀢𑁂𑀲𑀼 𑀘𑁄𑀭𑀸𑀦𑀁 𑀧𑀯𑁂𑀲𑁄 𑀦𑀢𑁆𑀣𑀺, 𑀏𑀯𑀫𑁂𑀯𑀁 𑀚𑀯𑀦𑁂 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀲𑀼𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺, 𑀢𑀲𑁆𑀫𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀯𑀼𑀢𑁆𑀢𑁄𑀢𑀺.

𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀲𑀁𑀯𑀼𑀢𑁄𑀢𑀺 𑀆𑀳 ‘‘𑀉𑀧𑁂𑀢𑁄’’𑀢𑀺. 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄 𑀲𑀼𑀦𑁆𑀤𑀭𑀢𑀭𑁄𑀢𑀺 𑀉𑀧𑀭𑀺 𑀧𑀸𑀴𑀺𑀬𑀁 𑀲𑀦𑁆𑀤𑀺𑀲𑁆𑀲𑀦𑀢𑁄 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺.

𑀬𑀦𑁆𑀢𑀺 𑀆𑀤𑁂𑀲𑁄𑀢𑀺 𑀇𑀫𑀺𑀦𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀲𑀤𑁆𑀥𑀺𑀁 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀦𑀺𑀧𑀸𑀢𑀧𑀤𑀁 𑀯𑀸 𑀏𑀢𑀁 𑀧𑀼𑀣𑀼𑀯𑀘𑀦𑀢𑁆𑀣𑀁. 𑀯𑀺𑀖𑀸𑀢𑀓𑀭𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑀓𑀭𑀸 ¶ , 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀸 𑀯𑀸. 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀳𑁂𑀢𑀼𑀓𑀸 𑀤𑀸𑀳𑀸𑀦𑀼𑀩𑀦𑁆𑀥𑀸 𑀯𑀺𑀧𑀸𑀓𑀸 𑀏𑀯 𑀯𑀺𑀧𑀸𑀓𑀧𑀭𑀺𑀴𑀸𑀳𑀸. 𑀬𑀣𑀸 𑀧𑀦𑁂𑀢𑁆𑀣 𑀆𑀲𑀯𑀸 𑀅𑀜𑁆𑀜𑁂 𑀘 𑀯𑀺𑀖𑀸𑀢𑀓𑀭𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀏𑀢𑁆𑀣 𑀘 𑀲𑀁𑀯𑀭𑀡𑀽𑀧𑀸𑀬𑁄, 𑀲𑀁𑀯𑀭𑀺𑀢𑀩𑁆𑀩𑀁, 𑀲𑀁𑀯𑀭𑁄, 𑀬𑀢𑁄 𑀲𑁄 𑀲𑀁𑀯𑀭𑁄, 𑀬𑀢𑁆𑀣 𑀲𑀁𑀯𑀭𑁄, 𑀬𑀣𑀸 𑀲𑀁𑀯𑀭𑁄, 𑀬𑀜𑁆𑀘 𑀲𑀁𑀯𑀭𑀨𑀮𑀦𑁆𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺 𑀳𑀺 𑀲𑀁𑀯𑀭𑀡𑀽𑀧𑀸𑀬𑁄. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀁𑀯𑀭𑀺𑀢𑀩𑁆𑀩𑀁. 𑀲𑀁𑀯𑀭𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀲𑀢𑀺 𑀲𑀁𑀯𑀭𑁄. ‘‘𑀅𑀲𑀁𑀯𑀼𑀢𑀲𑁆𑀲𑀸’’𑀢𑀺 𑀲𑀁𑀯𑀭𑀡𑀸𑀯𑀥𑀺. 𑀅𑀲𑀁𑀯𑀭𑀢𑁄 𑀳𑀺 𑀲𑀁𑀯𑀭𑀡𑀁. 𑀲𑀁𑀯𑀭𑀺𑀢𑀩𑁆𑀩𑀕𑁆𑀕𑀳𑀡𑀲𑀺𑀤𑁆𑀥𑁄 𑀇𑀥 𑀲𑀁𑀯𑀭𑀯𑀺𑀲𑀬𑁄. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀳𑀺 𑀲𑀁𑀯𑀭𑀡𑀁 𑀜𑀸𑀡𑀁 𑀭𑀽𑀧𑀸𑀭𑀫𑁆𑀫𑀡𑁂 𑀲𑀁𑀯𑀭𑀬𑀢𑀻𑀢𑀺 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀬𑀫𑀢𑁆𑀣𑁄. 𑀆𑀲𑀯𑀢𑀦𑁆𑀦𑀺𑀫𑀺𑀢𑁆𑀢𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁄 𑀨𑀮𑀁. 𑀏𑀯𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀘𑀤𑁆𑀯𑀸𑀭𑁂 𑀘𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀤𑁆𑀯𑀸𑀭𑁂.

𑀧𑀝𑀺𑀲𑀗𑁆𑀔𑀸 ¶ 𑀬𑁄𑀦𑀺𑀲𑁄 𑀘𑀻𑀯𑀭𑀦𑁆𑀢𑀺𑀆𑀤𑀻𑀲𑀼 ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀫𑁂𑀯 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸. 𑀈𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀪𑀯𑀧𑀢𑁆𑀣𑀦𑀸𑀬 𑀅𑀲𑁆𑀲𑀸𑀤𑀬𑀢𑁄𑀢𑀺 𑀪𑀯𑀧𑀢𑁆𑀣𑀦𑀸𑀫𑀼𑀔𑁂𑀦 𑀪𑀸𑀯𑀺𑀢𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲. 𑀘𑀻𑀯𑀭𑀦𑁆𑀢𑀺 𑀦𑀺𑀯𑀸𑀲𑀦𑀸𑀤𑀺 𑀬𑀁 𑀓𑀺𑀜𑁆𑀘𑀺𑀘𑀻𑀯𑀭𑀁. 𑀧𑀝𑀺𑀲𑁂𑀯𑀢𑀻𑀢𑀺 𑀦𑀺𑀯𑀸𑀲𑀦𑀸𑀤𑀺𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀬𑀸𑀯𑀤𑁂𑀯𑀸𑀢𑀺 𑀧𑀬𑁄𑀚𑀦𑀧𑀭𑀺𑀫𑀸𑀡𑀦𑀺𑀬𑀫𑀦𑀁. 𑀲𑀻𑀢𑀧𑁆𑀧𑀝𑀺𑀖𑀸𑀢𑀸𑀤𑀺𑀬𑁂𑀯 𑀳𑀺 𑀬𑁄𑀕𑀺𑀦𑁄 𑀘𑀻𑀯𑀭𑀧𑁆𑀧𑀝𑀺𑀲𑁂𑀯𑀦𑀧𑁆𑀧𑀬𑁄𑀚𑀦𑀁. 𑀲𑀻𑀢𑀲𑁆𑀲𑀸𑀢𑀺 𑀲𑀻𑀢𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀉𑀢𑀼𑀧𑀭𑀺𑀡𑀸𑀫𑀢𑁄 𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀲𑀻𑀢𑀲𑁆𑀲. 𑀧𑀝𑀺𑀖𑀸𑀢𑀸𑀬𑀸𑀢𑀺 𑀧𑀝𑀺𑀖𑀸𑀢𑀦𑀢𑁆𑀣𑀁 𑀢𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀓𑀸𑀭𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁. 𑀉𑀡𑁆𑀳𑀲𑁆𑀲𑀸𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀉𑀡𑁆𑀳𑀲𑁆𑀲. 𑀟𑀁𑀲𑀸𑀤𑀬𑁄 𑀧𑀸𑀓𑀝𑀸𑀬𑁂𑀯. 𑀧𑀼𑀦 𑀬𑀸𑀯𑀤𑁂𑀯𑀸𑀢𑀺 𑀦𑀺𑀬𑀢𑀧𑁆𑀧𑀬𑁄𑀚𑀦𑀧𑀭𑀺𑀫𑀸𑀡𑀦𑀺𑀬𑀫𑀦𑀁. 𑀦𑀺𑀬𑀢𑀜𑁆𑀳𑀺 𑀧𑀬𑁄𑀚𑀦𑀁 𑀘𑀻𑀯𑀭𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀳𑀺𑀭𑀺𑀓𑁄𑀧𑀻𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀁, 𑀇𑀢𑀭𑀁 𑀓𑀤𑀸𑀘𑀺. 𑀳𑀺𑀭𑀺𑀓𑁄𑀧𑀻𑀦𑀦𑁆𑀢𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑀁. 𑀬𑀲𑁆𑀫𑀺𑀜𑁆𑀳𑀺 𑀅𑀗𑁆𑀕𑁂 𑀯𑀺𑀯𑀝𑁂 𑀳𑀺𑀭𑀻 𑀓𑀼𑀧𑁆𑀧𑀢𑀺 𑀯𑀺𑀦𑀲𑁆𑀲𑀢𑀺, 𑀢𑀁 𑀳𑀺𑀭𑀺𑀬𑀸 𑀓𑁄𑀧𑀦𑀢𑁄 𑀳𑀺𑀭𑀺𑀓𑁄𑀧𑀻𑀦𑀁, 𑀢𑀁𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺.

𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀆𑀳𑀸𑀭𑀁. 𑀲𑁄 𑀳𑀺 𑀧𑀺𑀡𑁆𑀟𑁄𑀮𑁆𑀬𑁂𑀦 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁂 𑀧𑀢𑀦𑀢𑁄, 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀪𑀺𑀓𑁆𑀔𑀸𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀲𑀦𑁆𑀦𑀺𑀧𑀸𑀢𑁄𑀢𑀺 𑀯𑀸 ‘‘𑀧𑀺𑀡𑁆𑀟𑀧𑀸𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑁂𑀯 𑀤𑀯𑀸𑀬𑀸𑀢𑀺 𑀦 𑀓𑀻𑀴𑀦𑀸𑀬. 𑀦 𑀫𑀤𑀸𑀬𑀸𑀢𑀺 𑀦 𑀩𑀮𑀫𑀤𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀢𑁆𑀣𑀁. 𑀦 𑀫𑀡𑁆𑀟𑀦𑀸𑀬𑀸𑀢𑀺 𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀧𑀻𑀡𑀦𑀪𑀸𑀯𑀢𑁆𑀣𑀁. 𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀦 𑀢𑁂𑀲𑀁𑀬𑁂𑀯 𑀲𑁄𑀪𑀢𑁆𑀣𑀁, 𑀙𑀯𑀺𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑁄 ¶ . 𑀇𑀫𑀸𑀦𑀺 𑀬𑀣𑀸𑀓𑁆𑀓𑀫𑀁 𑀫𑁄𑀳𑀤𑁄𑀲𑀲𑀡𑁆𑀞𑀸𑀦𑀯𑀡𑁆𑀡𑀭𑀸𑀕𑀽𑀧𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀢𑁆𑀣𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀼𑀭𑀺𑀫𑀁 𑀯𑀸 𑀤𑁆𑀯𑀬𑀁 𑀅𑀢𑁆𑀢𑀦𑁄 𑀲𑀁𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀦𑀺𑀲𑁂𑀥𑀦𑀢𑁆𑀣𑀁, 𑀇𑀢𑀭𑀁 𑀧𑀭𑀲𑁆𑀲𑀧𑀺. 𑀘𑀢𑁆𑀢𑀸𑀭𑀺𑀧𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑁆𑀲 𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀸𑀬𑀲𑁆𑀲𑀸𑀢𑀺 𑀭𑀽𑀧𑀓𑀸𑀬𑀲𑁆𑀲. 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸𑀢𑀺 𑀧𑀩𑀦𑁆𑀥𑀝𑁆𑀞𑀺𑀢𑀢𑁆𑀣𑀜𑁆𑀘𑁂𑀯 𑀧𑀯𑀢𑁆𑀢𑀺𑀬𑀸 𑀅𑀯𑀺𑀘𑁆𑀙𑁂𑀤𑀦𑀢𑁆𑀣𑀜𑁆𑀘, 𑀘𑀺𑀭𑀓𑀸𑀮𑀝𑁆𑀞𑀺𑀢𑀢𑁆𑀣𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀸𑀧𑀦𑀢𑁆𑀣𑀁. 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑀲𑁆𑀲 𑀉𑀧𑀭𑀫𑀢𑁆𑀣𑀁. 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀸𑀲𑀦𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀁. 𑀇𑀢𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀉𑀧𑀸𑀬𑁂𑀦. 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻𑀢𑀺 𑀧𑀼𑀭𑀸𑀡𑀁 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀁 𑀧𑀝𑀺𑀳𑀦𑀺𑀲𑁆𑀲𑀸𑀫𑀺. 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀦𑀯𑀁 𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺. 𑀢𑀲𑁆𑀲𑀸 𑀳𑀺 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀫𑁂𑀯 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀏𑀢𑁆𑀣 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀚𑀺𑀖𑀘𑁆𑀙𑀸𑀦𑀺𑀫𑀺𑀢𑁆𑀢𑀸 𑀯𑁂𑀤𑀦𑀸. 𑀲𑀸 𑀳𑀺 𑀅𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄𑀧𑀯𑀟𑁆𑀠𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀪𑀼𑀢𑁆𑀢𑀧𑀘𑁆𑀘𑀬𑀸 𑀅𑀦𑀼𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸𑀧𑀺 𑀔𑀼𑀤𑀸𑀦𑀺𑀫𑀺𑀢𑁆𑀢𑀸𑀯 𑀅𑀗𑁆𑀕𑀤𑀸𑀳𑀲𑀽𑀮𑀸𑀤𑀺𑀯𑁂𑀤𑀦𑀸 𑀅𑀧𑁆𑀧𑀯𑀢𑁆𑀢𑀸. 𑀲𑀸 𑀳𑀺 𑀪𑀼𑀢𑁆𑀢𑀧𑀘𑁆𑀘𑀬𑀸 𑀅𑀦𑀼𑀧𑁆𑀧𑀦𑁆𑀦𑀸𑀯 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀯𑀺𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀢𑀸 𑀘𑁂𑀢𑀸𑀲𑀁 𑀯𑀺𑀳𑀺𑀁𑀲𑀸𑀬 𑀯𑀺𑀲𑁂𑀲𑁄.

𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑀸𑀧𑀦𑀸 𑀘 𑀫𑁂 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀪𑀯𑀺𑀲𑁆𑀲𑀢𑀺. ‘‘𑀬𑀸𑀧𑀦𑀸𑀬𑀸’’𑀢𑀺 ¶ 𑀇𑀫𑀺𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀸 𑀯𑀼𑀢𑁆𑀢𑀸, 𑀇𑀥 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀅𑀯𑀺𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀬𑀸𑀧𑀦𑀸𑀢𑀺 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄. 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀅𑀬𑀼𑀢𑁆𑀢𑀧𑀭𑀺𑀬𑁂𑀲𑀦𑀧𑁆𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀧𑀭𑀺𑀯𑀚𑁆𑀚𑀦𑁂𑀦 𑀅𑀦𑀯𑀚𑁆𑀚𑀢𑀸, 𑀧𑀭𑀺𑀫𑀺𑀢𑀧𑀭𑀺𑀪𑁄𑀕𑁂𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀸 𑀅𑀭𑀢𑀺𑀢𑀦𑁆𑀤𑀻𑀯𑀺𑀚𑀫𑁆𑀪𑀺𑀢𑀸𑀯𑀺𑀜𑁆𑀜𑀼𑀕𑀭𑀳𑀸𑀤𑀺𑀤𑁄𑀲𑀸𑀪𑀸𑀯𑁂𑀦 𑀯𑀸 𑀅𑀦𑀯𑀚𑁆𑀚𑀢𑀸. 𑀲𑀧𑁆𑀧𑀸𑀬𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀸 𑀓𑀸𑀬𑀩𑀮𑀲𑀫𑁆𑀪𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀪𑁄𑀚𑀦𑀧𑀭𑀺𑀯𑀚𑁆𑀚𑀦𑁂𑀦 𑀯𑀸 𑀲𑁂𑀬𑁆𑀬𑀲𑀼𑀔𑀧𑀲𑁆𑀲𑀲𑀼𑀔𑀫𑀺𑀤𑁆𑀥𑀲𑀼𑀔𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀦𑀯𑀚𑁆𑀚𑀢𑀸. 𑀘𑀢𑀼𑀧𑀜𑁆𑀘𑀸𑀮𑁄𑀧𑀫𑀢𑁆𑀢𑀊𑀦𑀪𑁄𑀚𑀦𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑀬𑁄𑀕𑁆𑀬𑀢𑀸𑀧𑀸𑀤𑀦𑀢𑁄 𑀨𑀸𑀲𑀼𑀯𑀺𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩; 𑀫𑀺. 𑀧. 𑁬.𑁫.𑁧𑁦);

𑀏𑀢𑁆𑀢𑀸𑀯𑀢𑀸 ¶ 𑀘 𑀧𑀬𑁄𑀚𑀦𑀧𑀭𑀺𑀕𑁆𑀕𑀳𑁄, 𑀫𑀚𑁆𑀛𑀺𑀫𑀸 𑀘 𑀧𑀝𑀺𑀧𑀤𑀸 𑀤𑀻𑀧𑀺𑀢𑀸 𑀳𑁄𑀢𑀺. 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀧𑀬𑁄𑀚𑀦𑀧𑀭𑀺𑀕𑁆𑀕𑀳𑀤𑀻𑀧𑀦𑀸. 𑀬𑀸𑀢𑁆𑀭𑀸 𑀳𑀺 𑀦𑀁 𑀆𑀳𑀸𑀭𑀽𑀧𑀬𑁄𑀕𑀁 𑀧𑀬𑁄𑀚𑁂𑀢𑀺. 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀳𑁂𑀢𑀼𑀓𑁄 𑀨𑀸𑀲𑀼𑀯𑀺𑀳𑀸𑀭𑁄 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀅𑀦𑁆𑀢𑀤𑁆𑀯𑀬𑀧𑀭𑀺𑀯𑀚𑁆𑀚𑀦𑀢𑁄.

𑀲𑁂𑀦𑀸𑀲𑀦𑀦𑁆𑀢𑀺 𑀲𑁂𑀦𑀜𑁆𑀘 𑀆𑀲𑀦𑀜𑁆𑀘. 𑀬𑀢𑁆𑀣 𑀯𑀺𑀳𑀸𑀭𑀸𑀤𑀺𑀓𑁂 𑀲𑁂𑀢𑀺 𑀦𑀺𑀧𑀚𑁆𑀚𑀢𑀺 𑀆𑀲𑀢𑀺 𑀦𑀺𑀲𑀻𑀤𑀢𑀺, 𑀢𑀁 𑀲𑁂𑀦𑀸𑀲𑀦𑀁. 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑁆𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀦𑁆𑀢𑀺 𑀉𑀢𑀼𑀬𑁂𑀯 𑀧𑀭𑀺𑀲𑀳𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑁄 𑀲𑀭𑀻𑀭𑀸𑀩𑀸𑀥𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀓𑀭𑁄, 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁄 𑀉𑀢𑀼 𑀘 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀧𑀸𑀓𑀝𑀧𑀭𑀺𑀲𑁆𑀲𑀬𑁄 𑀘 𑀭𑀸𑀕𑀤𑁄𑀲𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁄 𑀘 𑀉𑀢𑀼𑀧𑀭𑀺𑀲𑁆𑀲𑀬𑁄, 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀜𑁆𑀘𑁂𑀯 𑀏𑀓𑀻𑀪𑀸𑀯𑀨𑀸𑀲𑀼𑀓𑀢𑁆𑀣𑀜𑁆𑀘. 𑀘𑀻𑀯𑀭𑀧𑁆𑀧𑀝𑀺𑀲𑁂𑀯𑀦𑁂 𑀳𑀺𑀭𑀻𑀓𑁄𑀧𑀻𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀁 𑀯𑀺𑀬 𑀢𑀁 𑀦𑀺𑀬𑀢𑀧𑀬𑁄𑀚𑀦𑀦𑁆𑀢𑀺 𑀧𑀼𑀦 ‘‘𑀬𑀸𑀯𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀭𑁄𑀕𑀲𑁆𑀲 𑀧𑀘𑁆𑀘𑀦𑀻𑀓𑀧𑁆𑀧𑀯𑀢𑁆𑀢𑀺𑀬𑀸 𑀕𑀺𑀮𑀸𑀦𑀧𑀘𑁆𑀘𑀬𑁄, 𑀢𑀢𑁄 𑀏𑀯 𑀪𑀺𑀲𑀓𑁆𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀯𑀢𑁆𑀣𑀼𑀢𑀸𑀬 𑀪𑁂𑀲𑀚𑁆𑀚𑀁, 𑀚𑀻𑀯𑀺𑀢𑀲𑁆𑀲 𑀧𑀭𑀺𑀯𑀸𑀭𑀲𑀫𑁆𑀪𑀸𑀭𑀪𑀸𑀯𑁂𑀳𑀺 𑀧𑀭𑀺𑀓𑁆𑀔𑀸𑀭𑁄 𑀘𑀸𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄, 𑀢𑀁. 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀦𑁆𑀢𑀺 𑀯𑁂𑀬𑁆𑀬𑀸𑀩𑀸𑀥𑀢𑁄 𑀥𑀸𑀢𑀼𑀓𑁆𑀔𑁄𑀪𑀢𑁄 𑀘 𑀢𑀁𑀦𑀺𑀩𑁆𑀩𑀢𑁆𑀢𑀓𑀼𑀝𑁆𑀞𑀕𑀡𑁆𑀟𑀧𑀻𑀴𑀓𑀸𑀤𑀺𑀭𑁄𑀕𑀢𑁄 𑀉𑀧𑁆𑀧𑀦𑁆𑀦𑀸𑀦𑀁. 𑀯𑁂𑀤𑀦𑀸𑀦𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀦𑀁. 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀧𑀭𑀫𑀪𑀸𑀯𑀸𑀬. 𑀬𑀸𑀯 𑀢𑀁 𑀤𑀼𑀓𑁆𑀔𑀁 𑀲𑀩𑁆𑀩𑀁 𑀧𑀳𑀻𑀦𑀁 𑀳𑁄𑀢𑀺, 𑀢𑀸𑀯 𑀧𑀝𑀺𑀲𑁂𑀯𑀸𑀫𑀻𑀢𑀺 𑀬𑁄𑀚𑀦𑀸. 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑁂𑀦𑁂𑀯 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀯𑀯𑁂𑀤𑀦𑀼𑀧𑁆𑀧𑀸𑀤𑀢𑁄𑀧𑀻𑀢𑀺 𑀦 𑀓𑁂𑀯𑀮𑀁 𑀆𑀬𑀢𑀺𑀁 𑀏𑀯 𑀯𑀺𑀧𑀸𑀓𑀧𑀭𑀺𑀴𑀸𑀳𑀸 ¶ , 𑀅𑀣 𑀔𑁄 𑀅𑀢𑀺𑀪𑁄𑀚𑀦𑀧𑀘𑁆𑀘𑀬𑀸 𑀅𑀮𑀁𑀲𑀸𑀝𑀓𑀸𑀤𑀻𑀦𑀁 𑀯𑀺𑀬 𑀦𑀯𑀯𑁂𑀤𑀦𑀼𑀧𑁆𑀧𑀸𑀤𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀘𑀮𑀦𑀁 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀘𑁆𑀘𑀸𑀕𑁄𑀢𑀺 𑀆𑀳 ‘‘𑀘𑀮𑀢𑀺 𑀓𑀫𑁆𑀧𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀚𑀳𑀢𑀻’’𑀢𑀺. ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺 𑀏𑀢𑁆𑀣 𑀘 𑀮𑁄𑀫𑀲𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀣𑁂𑀭𑁄 𑀓𑀺𑀭 𑀘𑁂𑀢𑀺𑀬𑀧𑀩𑁆𑀩𑀢𑁂 𑀧𑀺𑀬𑀗𑁆𑀕𑀼𑀕𑀼𑀳𑀸𑀬 𑀧𑀥𑀸𑀦𑀖𑀭𑁂 𑀯𑀺𑀳𑀭𑀦𑁆𑀢𑁄 𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑀲𑀫𑀬𑁂 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀩𑁆𑀪𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀲𑀺. 𑀕𑀺𑀫𑁆𑀳𑀲𑀫𑀬𑁂 𑀘 𑀧𑀘𑁆𑀙𑀸𑀪𑀢𑁆𑀢𑀁 𑀩𑀳𑀺𑀘𑀗𑁆𑀓𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀲𑁂𑀤𑀸𑀧𑀺𑀲𑁆𑀲 𑀓𑀘𑁆𑀙𑁂𑀳𑀺 𑀫𑀼𑀘𑁆𑀘𑀦𑁆𑀢𑀺. 𑀅𑀣 𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀳 𑁋 ‘‘𑀇𑀥, 𑀪𑀦𑁆𑀢𑁂, 𑀦𑀺𑀲𑀻𑀤𑀣, 𑀲𑀻𑀢𑀮𑁄 𑀑𑀓𑀸𑀲𑁄’’𑀢𑀺. 𑀣𑁂𑀭𑁄 ‘‘𑀉𑀡𑁆𑀳𑀪𑀬𑁂𑀦𑁂𑀯𑀫𑁆𑀳𑀺, 𑀆𑀯𑀼𑀲𑁄, 𑀇𑀥 𑀦𑀺𑀲𑀺𑀦𑁆𑀦𑁄’’𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ¶ 𑀦𑀺𑀲𑀻𑀤𑀺𑀬𑁂𑀯. 𑀉𑀡𑁆𑀳𑀦𑁆𑀢𑀺 𑀘𑁂𑀢𑁆𑀣 𑀅𑀕𑁆𑀕𑀺𑀲𑀦𑁆𑀢𑀸𑀧𑁄𑀯 𑀯𑁂𑀤𑀺𑀢𑀩𑁆𑀩𑁄 𑀲𑀽𑀭𑀺𑀬𑀲𑀦𑁆𑀢𑀸𑀧𑀲𑁆𑀲 𑀧𑀭𑀢𑁄 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀲𑀽𑀭𑀺𑀬𑀲𑀦𑁆𑀢𑀸𑀧𑀯𑀲𑁂𑀦 𑀧𑀦𑁂𑀢𑀁 𑀯𑀢𑁆𑀣𑀼 𑀯𑀼𑀢𑁆𑀢𑀁.

𑀬𑁄 𑀘 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀪𑀢𑁆𑀢𑀁 𑀯𑀸 𑀧𑀸𑀦𑀻𑀬𑀁 𑀯𑀸 𑀅𑀮𑀪𑀫𑀸𑀦𑁄𑀧𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀢𑁆𑀢𑀦𑁄 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀯𑁂𑀥𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺𑀬𑁂𑀯. 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀫𑁆𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀘𑁂𑀧𑀺 𑀢𑀺𑀭𑀘𑁆𑀙𑀸𑀦𑀽𑀧𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀯𑁂𑀥𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺𑀬𑁂𑀯. 𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀘𑀸𑀧𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀫𑀼𑀔𑁂𑀲𑀼 𑀅𑀦𑁂𑀓𑀯𑀸𑀭𑀁 𑀧𑀭𑀺𑀯𑀢𑁆𑀢𑀺𑀢𑀧𑀼𑀩𑁆𑀩𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀯𑁂𑀥𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺𑀬𑁂𑀯 𑀧𑀥𑀸𑀦𑀺𑀬𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 ‘‘𑀔𑀫𑁄 𑀚𑀺𑀖𑀘𑁆𑀙𑀸𑀬…𑀧𑁂… 𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀣𑁂𑀭𑀁 𑀓𑀺𑀭 𑀔𑀡𑁆𑀟𑀘𑁂𑀮𑀯𑀺𑀳𑀸𑀭𑁂 𑀓𑀡𑀺𑀓𑀸𑀭𑀧𑀥𑀸𑀦𑀺𑀬𑀖𑀭𑁂 𑀅𑀭𑀺𑀬𑀯𑀁𑀲𑀥𑀫𑁆𑀫𑀁 𑀲𑀼𑀡𑀦𑁆𑀢𑀜𑁆𑀜𑁂𑀯 𑀖𑁄𑀭𑀯𑀺𑀲𑁄 𑀲𑀧𑁆𑀧𑁄 𑀟𑀁𑀲𑀺. 𑀣𑁂𑀭𑁄 𑀚𑀸𑀦𑀺𑀢𑁆𑀯𑀸𑀧𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁𑀬𑁂𑀯 𑀲𑀼𑀡𑀸𑀢𑀺, 𑀯𑀺𑀲𑀯𑁂𑀕𑁄 𑀣𑀤𑁆𑀥𑁄 𑀅𑀳𑁄𑀲𑀺. 𑀣𑁂𑀭𑁄 𑀉𑀧𑀲𑀫𑁆𑀧𑀤𑀫𑀸𑀴𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀯𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’’𑀢𑀺 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀲𑀺, 𑀲𑀳 𑀧𑀻𑀢𑀼𑀧𑁆𑀧𑀸𑀤𑀸 𑀯𑀺𑀲𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀣𑁂𑀭𑁄 𑀢𑀢𑁆𑀣𑁂𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀬𑁄 𑀧𑀦 𑀅𑀓𑁆𑀓𑁄𑀲𑀯𑀲𑁂𑀦 𑀤𑀼𑀭𑀼𑀢𑁆𑀢𑁂 𑀤𑀼𑀭𑀼𑀢𑁆𑀢𑀢𑁆𑀢𑀸𑀬𑁂𑀯 𑀘 𑀤𑀼𑀭𑀸𑀕𑀢𑁂 𑀅𑀧𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀲𑀜𑁆𑀜𑀺𑀢𑁂 𑀯𑀘𑀦𑀧𑀣𑁂 𑀲𑀼𑀢𑁆𑀯𑀸 𑀔𑀦𑁆𑀢𑀺𑀕𑀼𑀡𑀁𑀬𑁂𑀯 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦 𑀯𑁂𑀥𑀢𑀺 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 ‘‘𑀔𑀫𑁄 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀣𑁂𑀭𑁄 𑀓𑀺𑀭 𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀢𑀸𑀬 𑀫𑀳𑀸𑀅𑀭𑀺𑀬𑀯𑀁𑀲𑀧𑁆𑀧𑀝𑀺𑀧𑀤𑀁 𑀓𑀣𑁂𑀲𑀺, 𑀲𑀩𑁆𑀩𑁄 𑀫𑀳𑀸𑀕𑀸𑀫𑁄 𑀆𑀕𑀘𑁆𑀙𑀢𑀺, 𑀣𑁂𑀭𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀢𑀁 𑀅𑀜𑁆𑀜𑀢𑀭𑁄 𑀫𑀳𑀸𑀣𑁂𑀭𑁄 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀤𑀻𑀖𑀪𑀸𑀡𑀓𑁄 ¶ ‘𑀅𑀭𑀺𑀬𑀯𑀁𑀲𑀁 𑀓𑀣𑁂𑀫𑀻’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀓𑁄𑀮𑀸𑀳𑀮𑀁 𑀓𑀭𑁄𑀢𑀻’’𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀺. 𑀉𑀪𑁄𑀧𑀺 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸 𑀕𑀸𑀯𑀼𑀢𑀫𑀢𑁆𑀢𑀁 𑀏𑀓𑀧𑀣𑁂𑀦 𑀅𑀕𑀫𑀁𑀲𑀼. 𑀲𑀓𑀮𑀕𑀸𑀯𑀼𑀢𑀫𑁆𑀧𑀺 𑀲𑁄 𑀢𑀁 𑀅𑀓𑁆𑀓𑁄𑀲𑀺𑀬𑁂𑀯. 𑀢𑀢𑁄 𑀬𑀢𑁆𑀣 𑀤𑁆𑀯𑀺𑀦𑁆𑀦𑀁 𑀯𑀺𑀳𑀸𑀭𑀸𑀦𑀁 𑀫𑀕𑁆𑀕𑁄 𑀪𑀺𑀚𑁆𑀚𑀢𑀺, 𑀢𑀢𑁆𑀣 𑀞𑀢𑁆𑀯𑀸 𑀤𑀻𑀖𑀪𑀸𑀡𑀓𑀢𑁆𑀣𑁂𑀭𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀏𑀲𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀫𑀕𑁆𑀕𑁄’’𑀢𑀺 𑀆𑀳. 𑀲𑁄 𑀅𑀲𑁆𑀲𑀼𑀡𑀦𑁆𑀢𑁄 ¶ 𑀯𑀺𑀬 𑀅𑀕𑀫𑀸𑀲𑀺. 𑀣𑁂𑀭𑁄𑀧𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀫𑁂𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 ‘‘𑀓𑀺𑀁, 𑀪𑀦𑁆𑀢𑁂, 𑀲𑀓𑀮𑀕𑀸𑀯𑀼𑀢𑀁 𑀧𑀭𑀺𑀪𑀸𑀲𑀦𑁆𑀢𑀁 𑀦 𑀓𑀺𑀜𑁆𑀘𑀺 𑀅𑀯𑁄𑀘𑀼𑀢𑁆𑀣𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀔𑀦𑁆𑀢𑀺𑀬𑁂𑀯𑀸𑀯𑀼𑀲𑁄, 𑀫𑀬𑁆𑀳𑀁 𑀪𑀸𑀭𑁄, 𑀦 𑀅𑀓𑁆𑀔𑀦𑁆𑀢𑀺, 𑀏𑀓𑀧𑀤𑀼𑀤𑁆𑀥𑀸𑀭𑁂𑀧𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀬𑁄𑀕𑀁 𑀦 𑀧𑀲𑁆𑀲𑀸𑀫𑀻’’𑀢𑀺 𑀆𑀳.

𑀯𑀘𑀦𑀫𑁂𑀯 𑀢𑀤𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑀸𑀦𑀜𑁆𑀘 𑀧𑀣𑁄 𑀉𑀧𑀸𑀬𑁄𑀢𑀺 𑀆𑀳 ‘‘𑀯𑀘𑀦𑀫𑁂𑀯 𑀯𑀘𑀦𑀧𑀣𑁄’’𑀢𑀺. 𑀅𑀲𑀼𑀔𑀝𑁆𑀞𑁂𑀦 𑀯𑀸 𑀢𑀺𑀩𑁆𑀩𑀸. 𑀬𑀜𑁆𑀳𑀺 𑀦 𑀲𑀼𑀔𑀁, 𑀢𑀁 𑀅𑀦𑀺𑀝𑁆𑀞𑀁 𑀢𑀺𑀩𑁆𑀩𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀯𑁂𑀤𑀦𑀸𑀦𑀁 𑀅𑀥𑀺𑀯𑀸𑀲𑀓𑀲𑀪𑀸𑀯𑁄 𑀳𑁄𑀢𑀺. 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀧𑀥𑀸𑀦𑀺𑀬𑀢𑁆𑀣𑁂𑀭𑀲𑁆𑀲 𑀓𑀺𑀭 𑀭𑀢𑁆𑀢𑀺𑀁 𑀧𑀥𑀸𑀦𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀞𑀺𑀢𑀲𑁆𑀲 𑀉𑀤𑀭𑀯𑀸𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀯𑀢𑁆𑀢𑀢𑀺 𑀧𑀭𑀺𑀯𑀢𑁆𑀢𑀢𑀺. 𑀢𑀫𑁂𑀦𑀁 𑀘𑀗𑁆𑀓𑀫𑀦𑀧𑀲𑁆𑀲𑁂 𑀞𑀺𑀢𑁄 𑀧𑀺𑀡𑁆𑀟𑀧𑀸𑀢𑀺𑀬𑀢𑁆𑀣𑁂𑀭𑁄 𑀆𑀳 𑁋 ‘‘𑀆𑀯𑀼𑀲𑁄, 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀅𑀥𑀺𑀯𑀸𑀲𑀦𑀲𑀻𑀮𑁄 𑀳𑁄𑀢𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀦𑀺𑀘𑁆𑀘𑀮𑁄 𑀲𑀬𑀺. 𑀯𑀸𑀢𑁄 𑀦𑀸𑀪𑀺𑀢𑁄 𑀬𑀸𑀯 𑀳𑀤𑀬𑀁 𑀨𑀸𑀮𑁂𑀲𑀺. 𑀣𑁂𑀭𑁄 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀉𑀡𑁆𑀳𑁂𑀦 𑀨𑀼𑀝𑁆𑀞𑀲𑁆𑀲 𑀲𑀻𑀢𑀁 𑀧𑀢𑁆𑀣𑀬𑀢𑁄’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀉𑀡𑁆𑀳𑀸𑀤𑀺𑀦𑀺𑀫𑀺𑀢𑁆𑀢𑀁 𑀓𑀸𑀫𑀸𑀲𑀯𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀢𑁆𑀣𑀺 𑀲𑀼𑀕𑀢𑀺𑀪𑀯𑁂 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸𑀢𑀺 𑀅𑀦𑀺𑀝𑁆𑀞𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀕𑁆𑀕𑀸𑀳𑁂 𑀲𑀢𑀺 𑀅𑀢𑁆𑀢𑀦𑀺𑀬𑀕𑁆𑀕𑀸𑀳𑁄𑀢𑀺 𑀆𑀳 ‘‘𑀫𑀬𑁆𑀳𑀁 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀕𑀸𑀳𑁄 𑀤𑀺𑀝𑁆𑀞𑀸𑀲𑀯𑁄’’𑀢𑀺.

𑀅𑀳𑀁 𑀲𑀫𑀡𑁄𑀢𑀺 ‘‘𑀅𑀳𑀁 𑀲𑀫𑀡𑁄, 𑀓𑀺𑀁 𑀫𑀫 𑀚𑀻𑀯𑀺𑀢𑁂𑀦 𑀯𑀸 𑀫𑀭𑀡𑁂𑀦 𑀯𑀸’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀕𑀸𑀫𑀧𑁆𑀧𑀯𑁂𑀲𑀧𑁆𑀧𑀬𑁄𑀚𑀦𑀸𑀤𑀺𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀧𑀝𑀺𑀓𑁆𑀓𑀫𑀢𑀻𑀢𑀺 𑀳𑀢𑁆𑀣𑀺𑀆𑀤𑀻𑀦𑀁 𑀲𑀫𑀻𑀧𑀕𑀫𑀦𑀢𑁄 𑀅𑀧𑀓𑁆𑀓𑀫𑀢𑀺. 𑀞𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀓𑀡𑁆𑀝𑀓𑀸𑀦𑀁 𑀞𑀸𑀦𑀁 𑀓𑀡𑁆𑀝𑀓𑀝𑁆𑀞𑀸𑀦𑀁, 𑀬𑀢𑁆𑀣 𑀓𑀡𑁆𑀝𑀓𑀸𑀦𑀺 𑀲𑀦𑁆𑀢𑀺, 𑀢𑀁 𑀑𑀓𑀸𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀫𑀦𑀼𑀲𑁆𑀲𑀤𑀼𑀝𑁆𑀞𑀸𑀦𑀻𑀢𑀺 𑀅𑀫𑀦𑀼𑀲𑁆𑀲𑀲𑀜𑁆𑀘𑀸𑀭𑁂𑀦 𑀤𑀽𑀲𑀺𑀢𑀸𑀦𑀺, 𑀲𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀬𑀢𑀯𑀢𑁆𑀣𑀼𑀪𑀽𑀢𑀦𑁆𑀢𑀺 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀓𑀸𑀭𑀡𑀪𑀽𑀢𑀁. 𑀯𑁂𑀲𑀺𑀬𑀸𑀤𑀺𑀪𑁂𑀤𑀢𑁄𑀢𑀺 𑀯𑁂𑀲𑀺𑀬𑀸𑀯𑀺𑀥𑀯𑀸𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀡𑁆𑀟𑀓𑀧𑀸𑀦𑀸𑀕𑀸𑀭𑀪𑀺𑀓𑁆𑀔𑀼𑀦𑀺𑀪𑁂𑀤𑀢𑁄. 𑀲𑀫𑀸𑀦𑀦𑁆𑀢𑀺 𑀲𑀫𑀁, 𑀅𑀯𑀺𑀲𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀸𑀲𑀺 𑀯𑀸𑀢𑀺 𑀢𑀸𑀤𑀺𑀲𑀁 𑀅𑀦𑀸𑀘𑀸𑀭𑀁 𑀅𑀓𑀸𑀲𑀺 𑀯𑀸. 𑀲𑀻𑀮𑀲𑀁𑀯𑀭𑀲𑀗𑁆𑀔𑀸𑀢𑁂𑀦𑀸𑀢𑀺 𑀓𑀣𑀁 𑀧𑀭𑀺𑀯𑀚𑁆𑀚𑀦𑀁 𑀲𑀻𑀮𑀁? 𑀅𑀦𑀸𑀲𑀦𑀧𑀭𑀺𑀯𑀚𑁆𑀚𑀦𑁂𑀦 𑀳𑀺 ¶ 𑀅𑀦𑀸𑀘𑀸𑀭𑀧𑀭𑀺𑀯𑀚𑁆𑀚𑀦𑀁 𑀯𑀼𑀢𑁆𑀢𑀁. 𑀅𑀦𑀸𑀘𑀸𑀭𑀸𑀕𑁄𑀘𑀭𑀧𑀭𑀺𑀯𑀚𑁆𑀚𑀦𑀁 𑀘𑀸𑀭𑀺𑀢𑁆𑀢𑀲𑀻𑀮𑀢𑀸𑀬 𑀲𑀻𑀮𑀲𑀁𑀯𑀭𑁄. 𑀢𑀣𑀸 𑀳𑀺 𑀪𑀕𑀯𑀢𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮) 𑀲𑀻𑀮𑀲𑀁𑀯𑀭𑀯𑀺𑀪𑀚𑀦𑁂 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀢𑁆𑀢𑀺𑀁 ¶ 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀅𑀢𑁆𑀣𑀺 𑀅𑀦𑀸𑀘𑀸𑀭𑁄, 𑀅𑀢𑁆𑀣𑀺 𑀅𑀕𑁄𑀘𑀭𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁧𑁩-𑁫𑁧𑁪) 𑀆𑀘𑀸𑀭𑀕𑁄𑀘𑀭𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. ‘‘𑀘𑀡𑁆𑀟𑀁 𑀳𑀢𑁆𑀣𑀺𑀁 𑀧𑀭𑀺𑀯𑀚𑁆𑀚𑁂𑀢𑀻’’𑀢𑀺 𑀯𑀘𑀦𑀢𑁄 𑀳𑀢𑁆𑀣𑀺𑀆𑀤𑀺𑀧𑀭𑀺𑀯𑀚𑁆𑀚𑀦𑀫𑁆𑀧𑀺 𑀪𑀕𑀯𑀢𑁄 𑀯𑀘𑀦𑀸𑀦𑀼𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀆𑀘𑀸𑀭𑀲𑀻𑀮𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺𑀧𑀻𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀺𑀢𑀢𑁆𑀢𑀸𑀧𑀺, 𑀮𑁄𑀪𑀸𑀤𑀺𑀲𑀳𑀕𑀢𑀢𑁆𑀢𑀸𑀧𑀺, 𑀓𑀼𑀲𑀮𑀧𑁆𑀧𑀝𑀺𑀧𑀓𑁆𑀔𑀢𑁄𑀧𑀻𑀢𑀺𑀆𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀬𑀁 𑀯𑀺𑀢𑀓𑁆𑀓𑁄 𑀅𑀓𑀼𑀲𑀮𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀸𑀯𑀚𑁆𑀚𑁄𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀓𑀼𑀲𑀮𑁄𑀢𑀺𑀆𑀤𑀺𑀦𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀯𑀺𑀧𑀸𑀓𑁄𑀢𑀺 𑀇𑀫𑀺𑀦𑀸 𑀲𑀫𑁆𑀧𑀭𑀸𑀬𑀺𑀓𑀁. 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀆𑀤𑀻𑀦𑀯𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀅𑀦𑀥𑀺𑀯𑀸𑀲𑀦𑀁 𑀦𑀸𑀫 𑀧𑀼𑀦 𑀢𑀸𑀤𑀺𑀲𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀁. 𑀢𑀁 𑀧𑀦𑀲𑁆𑀲 𑀧𑀳𑀸𑀦𑀁 𑀯𑀺𑀦𑁄𑀤𑀦𑀁 𑀩𑁆𑀬𑀦𑁆𑀢𑀺𑀓𑀭𑀡𑀁 𑀅𑀦𑀪𑀸𑀯𑀕𑀫𑀦𑀦𑁆𑀢𑀺 𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀸𑀴𑀺𑀬𑀁 𑁋 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 𑀯𑀢𑁆𑀯𑀸 ‘‘𑀧𑀚𑀳𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀧𑀳𑀸𑀦𑀜𑁆𑀘𑁂𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀫𑁂𑀯, 𑀦 𑀲𑀫𑀼𑀘𑁆𑀙𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀦𑁄𑀤𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀢𑀺 𑀢𑁂𑀲𑀁 𑀧𑀸𑀧𑀯𑀺𑀢𑀓𑁆𑀓𑀸𑀦𑀁 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀕𑀳𑀡𑀁 𑀯𑀸 𑀓𑀢𑀁 𑀲𑀺𑀬𑀸 𑀅𑀦𑀯𑀲𑁂𑀲𑀕𑁆𑀕𑀳𑀡𑀁 𑀯𑀸. 𑀢𑁂𑀲𑀼 𑀧𑀞𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀉𑀧𑁆𑀧𑀦𑁆𑀦𑀫𑀢𑁆𑀢𑁂’’𑀢𑀺, 𑀲𑀫𑁆𑀧𑀢𑀺𑀚𑀸𑀢𑁂𑀢𑀺 𑀅𑀢𑁆𑀣𑁄. 𑀅𑀦𑀯𑀲𑁂𑀲𑀕𑁆𑀕𑀳𑀡𑀁 𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂’’𑀢𑀺 𑀯𑀼𑀢𑁆𑀢𑀁.

𑀜𑀸𑀢𑀺𑀯𑀺𑀢𑀓𑁆𑀓𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀬𑁄 𑀲𑀼𑀔𑀚𑀻𑀯𑀺𑀦𑁄 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦 𑀜𑀸𑀢𑀓𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄. 𑀚𑀦𑀧𑀤𑀯𑀺𑀢𑀓𑁆𑀓𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁄 𑀲𑀼𑀪𑀺𑀓𑁆𑀔𑁄 𑀲𑀫𑁆𑀧𑀦𑁆𑀦𑀲𑀲𑁆𑀲𑁄 𑀭𑀫𑀡𑀻𑀬𑁄’’𑀢𑀺𑀆𑀤𑀺𑀦𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦 𑀚𑀦𑀧𑀤𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄. 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀳𑀺 𑀤𑀼𑀓𑁆𑀔𑁂 𑀦𑀺𑀚𑁆𑀚𑀺𑀡𑁆𑀡𑁂 𑀲𑀫𑁆𑀧𑀭𑀸𑀬𑁂 𑀲𑀢𑁆𑀢𑀸 𑀲𑀼𑀔𑀻 𑀳𑁄𑀦𑁆𑀢𑀺 𑀅𑀫𑀭𑀸𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀅𑀫𑀭𑀢𑁆𑀣𑀸𑀬 𑀯𑀺𑀢𑀓𑁆𑀓𑁄. 𑀢𑀁 𑀯𑀸 𑀆𑀭𑀩𑁆𑀪 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀺𑀲𑀳𑀕𑀢𑁄 𑀅𑀫𑀭𑁄 𑀘 𑀲𑁄 𑀯𑀺𑀢𑀓𑁆𑀓𑁄 𑀘𑀸𑀢𑀺 ¶ 𑀅𑀫𑀭𑀸𑀯𑀺𑀢𑀓𑁆𑀓𑁄. 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀧𑀭𑁂𑀲𑀼 𑀉𑀧𑀝𑁆𑀞𑀸𑀓𑀸𑀤𑀻𑀲𑀼 𑀲𑀳𑀦𑀦𑁆𑀤𑀺𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀅𑀦𑀼𑀤𑁆𑀤𑀬𑀢𑀸𑀧𑀢𑀺𑀭𑀽𑀧𑀓𑁄 𑀕𑁂𑀳𑀲𑁆𑀲𑀺𑀢𑀧𑁂𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀻𑀯𑀭𑀸𑀤𑀺𑀮𑀸𑀪𑁂𑀦 𑀘 𑀲𑀓𑁆𑀓𑀸𑀭𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀘 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀅𑀦𑀯𑀜𑁆𑀜𑀢𑁆𑀢𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼𑀁, 𑀦 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀫𑀜𑁆𑀜𑁂𑀬𑁆𑀬𑀼𑀁, 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄.

𑀓𑀸𑀫𑀯𑀺𑀢𑀓𑁆𑀓𑁄 ¶ 𑀓𑀸𑀫𑀲𑀗𑁆𑀓𑀧𑁆𑀧𑀦𑀲𑀪𑀸𑀯𑀢𑁄 𑀓𑀸𑀫𑀸𑀲𑀯𑀧𑁆𑀧𑀢𑁆𑀢𑀺𑀬𑀸 𑀲𑀸𑀢𑀺𑀲𑀬𑀢𑁆𑀢𑀸 𑀘 𑀓𑀸𑀫𑀦𑀸𑀓𑀸𑀭𑁄𑀢𑀺 𑀆𑀳 ‘‘𑀓𑀸𑀫𑀯𑀺𑀢𑀓𑁆𑀓𑁄 𑀧𑀦𑁂𑀢𑁆𑀣 𑀓𑀸𑀫𑀸𑀲𑀯𑁄’’𑀢𑀺. 𑀢𑀩𑁆𑀩𑀺𑀲𑁂𑀲𑁄𑀢𑀺 𑀓𑀸𑀫𑀸𑀲𑀯𑀯𑀺𑀲𑁂𑀲𑁄 𑀪𑀯𑀲𑀪𑀸𑀯𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀯𑀺𑀦𑁄𑀤𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀦𑀻𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑁄𑀤𑀦𑀁, 𑀯𑀻𑀭𑀺𑀬𑀦𑁆𑀢𑀺 𑀆𑀳 ‘‘𑀯𑀻𑀭𑀺𑀬𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀯𑀺𑀦𑁄𑀤𑀦𑁂𑀦𑀸’’𑀢𑀺.

‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺 𑀯𑀘𑀦𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀦𑀁 𑀅𑀦𑀥𑀺𑀕𑀫𑁄 𑀢𑀢𑁄 𑀘 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀸𑀦𑀢𑀺𑀯𑀢𑁆𑀢𑀺 𑀅𑀪𑀸𑀯𑀦𑀸𑀬 𑀆𑀤𑀻𑀦𑀯𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑀸𑀤𑀺𑀯𑀲𑁂𑀦 𑀘 𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀣𑁄𑀫𑁂𑀦𑁆𑀢𑁄𑀢𑀺 𑀆𑀲𑀯𑀧𑀳𑀸𑀦𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀢𑀸𑀬 𑀏𑀯 𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬 𑀢𑀁 𑀅𑀪𑀺𑀢𑁆𑀣𑀯𑀦𑁆𑀢𑁄. 𑀲𑀁𑀯𑀭𑁂𑀦𑁂𑀯 𑀧𑀳𑀻𑀦𑀸𑀢𑀺 𑀲𑀁𑀯𑀭𑁂𑀦 𑀧𑀳𑀻𑀦𑀸 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀅𑀧𑁆𑀧𑀳𑀻𑀦𑁂𑀲𑀼𑀬𑁂𑀯 𑀧𑀳𑀻𑀦𑀲𑀜𑁆𑀜𑀻’’𑀢𑀺.

𑀆𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀸𑀭𑀼𑀓𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀧𑀜𑁆𑀘𑀫𑁂 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀦𑁆𑀢𑀺 𑀧𑀼𑀢𑁆𑀢𑁂𑀳𑀺 𑀲𑀫𑁆𑀩𑀸𑀥𑀲𑀬𑀦𑀁. 𑀏𑀢𑁆𑀣 𑀧𑀼𑀢𑁆𑀢𑀲𑀻𑀲𑁂𑀦 𑀤𑀸𑀭𑀧𑀭𑀺𑀕𑁆𑀕𑀳𑀁 𑀧𑀼𑀢𑁆𑀢𑀤𑀸𑀭𑁂𑀲𑀼 𑀉𑀧𑁆𑀧𑀺𑀮𑁄 𑀯𑀺𑀬. 𑀢𑁂𑀦 𑀢𑁂𑀲𑀁 𑀭𑁄𑀕𑀸𑀤𑀺𑀳𑁂𑀢𑀼 𑀲𑁄𑀓𑀸𑀪𑀺𑀪𑀯𑁂𑀦 𑀘 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀓𑀸𑀫𑀪𑁄𑀕𑀺𑀦𑀸𑀢𑀺 𑀇𑀫𑀺𑀦𑀸 𑀧𑀦 𑀭𑀸𑀕𑀸𑀪𑀺𑀪𑀯𑀦𑁆𑀢𑀺. 𑀉𑀪𑀬𑁂𑀦𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀓𑀸𑀲𑀺𑀓𑀘𑀦𑁆𑀤𑀦𑀦𑁆𑀢𑀺 𑀉𑀚𑁆𑀚𑀮𑀘𑀦𑁆𑀤𑀦𑀁. 𑀢𑀁 𑀓𑀺𑀭 𑀯𑀡𑁆𑀡𑀯𑀺𑀲𑁂𑀲𑀲𑀫𑀼𑀚𑁆𑀚𑀮𑀁 𑀳𑁄𑀢𑀺 𑀧𑀪𑀲𑁆𑀲𑀭𑀁, 𑀢𑀤𑀢𑁆𑀣𑀫𑁂𑀯 𑀦𑀁 𑀲𑀡𑁆𑀳𑀢𑀭𑀁 𑀓𑀭𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀡𑁆𑀳𑀘𑀦𑁆𑀤𑀦’’𑀦𑁆𑀢𑀺 ¶ , 𑀓𑀸𑀲𑀺𑀓𑀯𑀢𑁆𑀣𑀜𑁆𑀘 𑀘𑀦𑁆𑀤𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀦𑁆𑀢𑀺 𑀯𑀡𑁆𑀡𑀲𑁄𑀪𑀢𑁆𑀣𑀜𑁆𑀘𑁂𑀯 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀜𑁆𑀘 𑀫𑀸𑀮𑀁, 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀸𑀬 𑀕𑀦𑁆𑀥𑀁, 𑀙𑀯𑀺𑀭𑀸𑀕𑀓𑀭𑀡𑀢𑁆𑀣𑀜𑁆𑀘𑁂𑀯 𑀲𑀼𑀪𑀢𑁆𑀣𑀜𑁆𑀘 𑀯𑀺𑀮𑁂𑀧𑀦𑀁 𑀥𑀸𑀭𑁂𑀦𑁆𑀢𑁂𑀦. 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀲𑀼𑀯𑀡𑁆𑀡𑀜𑁆𑀘𑁂𑀯 𑀅𑀯𑀲𑀺𑀝𑁆𑀞𑀥𑀦𑀜𑁆𑀘 𑀲𑀸𑀤𑀺𑀬𑀦𑁆𑀢𑁂𑀦. 𑀲𑀩𑁆𑀩𑁂𑀦𑀧𑀺 𑀓𑀸𑀫𑁂𑀲𑀼 𑀅𑀪𑀺𑀕𑀺𑀤𑁆𑀥𑀪𑀸𑀯𑀫𑁂𑀯 𑀧𑀓𑀸𑀲𑁂𑀢𑀺.

𑀤𑀸𑀭𑀼𑀓𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀙𑀝𑁆𑀞𑁂 𑀳𑀢𑁆𑀣𑀺𑀁 𑀲𑀸𑀭𑁂𑀢𑀻𑀢𑀺 𑀳𑀢𑁆𑀣𑀺𑀲𑀸𑀭𑀻, 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀳𑀢𑁆𑀣𑀺𑀆𑀘𑀭𑀺𑀬𑀲𑁆𑀲 𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀔𑀼𑀫𑁂𑀲𑀼 ¶ 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀻𑀲𑀼 𑀅𑀢𑁆𑀣𑀦𑁆𑀢𑀭𑁂𑀲𑀼 𑀓𑀼𑀲𑀮𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀻’’𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀻𑀢𑀺 𑀣𑁂𑀭𑁂𑀳𑀺 𑀯𑀼𑀘𑁆𑀘𑀫𑀸𑀦𑀲𑁆𑀲 𑀓𑀣𑀸𑀧𑀩𑀦𑁆𑀥𑀲𑁆𑀲 𑀅𑀦𑁆𑀢𑀭𑁂 𑀅𑀦𑁆𑀢𑀭𑁂 𑀅𑀢𑁆𑀢𑀦𑁄 𑀓𑀣𑀁 𑀧𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀳𑀺 𑀲𑀁𑀲𑀕𑁆𑀕𑁂𑀳𑀻𑀢𑀺 𑀲𑀯𑀦𑀲𑀁𑀲𑀕𑁆𑀕𑁄, 𑀤𑀲𑁆𑀲𑀦𑀲𑀁𑀲𑀕𑁆𑀕𑁄, 𑀲𑀫𑀼𑀮𑁆𑀮𑀸𑀧𑀲𑀁𑀲𑀕𑁆𑀕𑁄, 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄, 𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀲𑀁𑀲𑀕𑁆𑀕𑁂𑀳𑀺. 𑀓𑀺𑀝𑁆𑀞𑀔𑀸𑀤𑀓𑁄𑀢𑀺 𑀓𑀺𑀝𑁆𑀞𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀲𑀲𑁆𑀲𑀜𑁆𑀳𑀺 𑀓𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀓𑀸𑀭𑀡𑀽𑀧𑀘𑀸𑀭𑁂𑀦. 𑀲𑀺𑀧𑁆𑀧𑀺𑀬𑁄 𑀲𑀼𑀢𑁆𑀢𑀺𑀬𑁄. 𑀲𑀫𑁆𑀩𑀼𑀓𑀸𑀢𑀺 𑀲𑀗𑁆𑀔𑀫𑀸𑀳.

𑀕𑀺𑀳𑀺𑀪𑀸𑀯𑁂 𑀯𑀡𑁆𑀡𑀁 𑀓𑀣𑁂𑀲𑀻𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁨𑁨) 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀺𑀭 𑀲𑀸𑀲𑀦𑁂 𑀤𑁆𑀯𑁂 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁, 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸 𑀏𑀓𑀢𑁄𑀯 𑀲𑀚𑁆𑀛𑀸𑀬𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀅𑀦𑀪𑀺𑀭𑀢𑁄 𑀕𑀺𑀳𑀺𑀪𑀸𑀯𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀇𑀢𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀕𑀺𑀳𑀺𑀪𑀸𑀯𑁂 𑀆𑀤𑀻𑀦𑀯𑀁, 𑀧𑀩𑁆𑀩𑀚𑁆𑀚𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀅𑀪𑀺𑀭𑀫𑀺𑀢𑁆𑀯𑀸 𑀧𑀼𑀦 𑀏𑀓𑀤𑀺𑀯𑀲𑀁 𑀢𑀸𑀤𑀺𑀲𑁂 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀫𑀸𑀳𑀁 𑀧𑀢𑁆𑀢𑀘𑀻𑀯𑀭𑀁 𑀢𑀼𑀬𑁆𑀳𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀢𑁆𑀢𑀘𑀻𑀯𑀭𑀮𑁄𑀪𑁂𑀦 𑀢𑀲𑁆𑀲 𑀕𑀺𑀳𑀺𑀪𑀸𑀯𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀆𑀤𑀻𑀦𑀯𑀁 𑀓𑀣𑁂𑀲𑀺. 𑀢𑀲𑁆𑀲 𑀢𑀁 𑀲𑀼𑀢𑁆𑀯𑀸𑀯 𑀕𑀺𑀳𑀺𑀪𑀸𑀯𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬𑀫𑁂𑀯 𑀅𑀪𑀺𑀭𑀫𑀺. 𑀏𑀯𑀫𑁂𑀲 𑀢𑀤𑀸 𑀲𑀻𑀮𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀺𑀳𑀺𑀪𑀸𑀯𑁂 ¶ 𑀆𑀦𑀺𑀲𑀁𑀲𑀓𑀣𑀸𑀬 𑀓𑀣𑀺𑀢𑀢𑁆𑀢𑀸 𑀇𑀤𑀸𑀦𑀺 𑀙 𑀯𑀸𑀭𑁂 𑀯𑀺𑀩𑁆𑀪𑀫𑀺𑀢𑁆𑀯𑀸 𑀲𑀢𑁆𑀢𑀫𑀯𑀸𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀲𑁆𑀲 𑀘 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀲𑀺. 𑀅𑀣 𑀦𑀁 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁄 𑀅𑀧𑀲𑀸𑀤𑁂𑀲𑀺. 𑀲𑁄 𑀫𑀳𑀸𑀲𑀸𑀯𑀓𑀲𑁆𑀲 𑀓𑀣𑀺𑀢𑁂 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀺 𑀚𑀸𑀢𑁄. 𑀧𑁄𑀝𑁆𑀞𑀧𑀸𑀤𑀲𑁆𑀲 𑀧𑀦𑀸𑀬𑀁 𑀕𑀺𑀳𑀺𑀲𑀳𑀸𑀬𑀓𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀧𑁄𑀝𑁆𑀞𑀧𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀅𑀣 𑀦𑀁 𑀲𑁄 𑀤𑀺𑀲𑁆𑀯𑀸 𑁋 ‘‘𑀲𑀫𑁆𑀫, 𑀓𑀺𑀁 𑀢𑀬𑀸 𑀓𑀢𑀁, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀲𑀢𑁆𑀣𑀼 𑀲𑀸𑀲𑀦𑀸 𑀅𑀧𑀲𑀓𑁆𑀓𑀦𑁆𑀢𑁄𑀲𑀺, 𑀏𑀳𑀺 𑀧𑀩𑁆𑀩𑀚𑀺𑀢𑀼𑀁 𑀤𑀸𑀦𑀺 𑀢𑁂 𑀯𑀝𑁆𑀝𑀢𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀫𑁂 𑀯𑀸𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻’’𑀢𑀺.

𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀚𑁆𑀛𑁂𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀲𑀢𑁆𑀢𑀫𑁂 𑀫𑀦𑁆𑀢𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀓𑀭𑀡𑀢𑁆𑀣𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑁂𑀦𑀸𑀳 ‘‘𑀢𑀸𑀬 𑀉𑀪𑁄 𑀅𑀦𑁆𑀢𑁂 𑀯𑀺𑀤𑀺𑀢𑁆𑀯𑀸’’𑀢𑀺. 𑀨𑀲𑁆𑀲𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸𑀢𑀺 𑀤𑁆𑀯𑀬𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀬𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀨𑀲𑁆𑀲𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸, ‘‘𑀨𑀲𑁆𑀲𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄 ¶ , 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀇𑀫𑀺𑀦𑀸 𑀘𑀸𑀦𑀼𑀓𑁆𑀓𑀫𑁂𑀦 𑀨𑀲𑁆𑀲𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀨𑀲𑁆𑀲𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀏𑀓𑁄 𑀅𑀦𑁆𑀢𑁄𑀢𑀺 𑀏𑀢𑁆𑀣 𑀅𑀬𑀁 𑀅𑀦𑁆𑀢-𑀲𑀤𑁆𑀤𑁄 𑀅𑀦𑁆𑀢𑀅𑀩𑁆𑀪𑀦𑁆𑀢𑀭𑀫𑀭𑀺𑀬𑀸𑀤𑀮𑀸𑀫𑀓𑀅𑀪𑀸𑀯𑀓𑁄𑀝𑁆𑀞𑀸𑀲𑀧𑀤𑀧𑀽𑀭𑀡𑀲𑀫𑀻𑀧𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀦𑁆𑀢𑀧𑀽𑀭𑁄 𑀉𑀤𑀭𑀧𑀽𑀭𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁯𑁭) 𑀳𑀺 𑀅𑀦𑁆𑀢𑁂 𑀅𑀦𑁆𑀢𑀲𑀤𑁆𑀤𑁄. ‘‘𑀘𑀭𑀦𑁆𑀢𑀺 𑀮𑁄𑀓𑁂 𑀧𑀭𑀺𑀯𑀸𑀭𑀙𑀦𑁆𑀦𑀸 𑀅𑀦𑁆𑀢𑁄 𑀅𑀲𑀼𑀤𑁆𑀥𑀸, 𑀩𑀳𑀺 𑀲𑁄𑀪𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁨) 𑀅𑀩𑁆𑀪𑀦𑁆𑀢𑀭𑁂. ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀅𑀦𑁆𑀢𑁄 𑀚𑀻𑀭𑀢𑀺 (𑀘𑀽𑀴𑀯. 𑁨𑁭𑁮) 𑀲𑀸 𑀳𑀭𑀺𑀢𑀦𑁆𑀢𑀁 𑀯𑀸 𑀧𑀦𑁆𑀣𑀦𑁆𑀢𑀁 𑀯𑀸 𑀲𑁂𑀮𑀦𑁆𑀢𑀁 𑀯𑀸 𑀉𑀤𑀓𑀦𑁆𑀢𑀁 𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁪) 𑀫𑀭𑀺𑀬𑀸𑀤𑀸𑀬𑀁. ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁮𑁦; 𑀇𑀢𑀺𑀯𑀼. 𑁯𑁧) 𑀮𑀸𑀫𑀓𑁂. ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁯𑁩; 𑀲𑀁. 𑀦𑀺. 𑁨.𑁫𑁧) 𑀅𑀪𑀸𑀯𑁂. 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀔𑀬𑁄 𑀳𑀺 𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑁄 ¶ 𑀓𑁄𑀝𑀻𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀢𑀬𑁄 𑀅𑀦𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁦𑁫) 𑀓𑁄𑀝𑁆𑀞𑀸𑀲𑁂. ‘‘𑀇𑀗𑁆𑀖 𑀢𑀸𑀯 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀕𑀸𑀣𑀸𑀬𑁄 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀧𑀭𑀺𑀬𑀸𑀧𑀼𑀡𑀲𑁆𑀲𑀼, 𑀲𑀼𑀢𑁆𑀢𑀦𑁆𑀢𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 (𑀧𑀸𑀘𑀺. 𑁪𑁪𑁨) 𑀘 𑀆𑀤𑀻𑀲𑀼 𑀧𑀤𑀧𑀽𑀭𑀡𑁂. ‘‘𑀕𑀸𑀫𑀦𑁆𑀢𑀁 𑀯𑀸 𑀑𑀲𑀝𑁄 (𑀧𑀸𑀭𑀸. 𑁪𑁦𑁯-𑁪𑁧𑁦; 𑀘𑀽𑀴𑀯. 𑁩𑁪𑁩) 𑀕𑀸𑀫𑀦𑁆𑀢𑀲𑁂𑀦𑀸𑀲𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁦) 𑀲𑀫𑀻𑀧𑁂. 𑀲𑁆𑀯𑀸𑀬𑀫𑀺𑀥 𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀢𑀻𑀢𑀺 𑀅𑀬𑀫𑁂𑀓𑁄 𑀓𑁄𑀝𑁆𑀞𑀸𑀲𑁄𑀢𑀺.

𑀲𑀦𑁆𑀢𑁄 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑁄 𑀥𑀫𑁆𑀫𑀲𑀫𑀽𑀳𑁄𑀢𑀺 𑀲𑀓𑁆𑀓𑀸𑀬𑁄, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀢𑁂𑀦𑀸𑀳 ‘‘𑀢𑁂𑀪𑀽𑀫𑀓𑀯𑀝𑁆𑀝’’𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀚𑁆𑀛𑁂𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀅𑀝𑁆𑀞𑀫𑁂 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀬𑁂𑀦 𑀯𑀸 𑀓𑀫𑁆𑀫𑀼𑀦𑀸 𑀅𑀧𑀸𑀬𑁂𑀲𑀼 𑀦𑀺𑀬𑀼𑀢𑁆𑀢𑁄𑀢𑀺 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀻𑀘𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀆𑀬𑀼𑀓𑀧𑁆𑀧𑀲𑀜𑁆𑀜𑀺𑀢𑀁 𑀅𑀦𑁆𑀢𑀭𑀓𑀧𑁆𑀧𑀁 𑀢𑀺𑀝𑁆𑀞𑀢𑀻𑀢𑀺 𑀓𑀧𑁆𑀧𑀝𑁆𑀞𑁄. 𑀦𑀺𑀭𑀬𑀽𑀧𑀧𑀢𑁆𑀢𑀺𑀧𑀭𑀺𑀳𑀭𑀡𑀯𑀲𑁂𑀦 𑀢𑀺𑀓𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁂𑀓𑀺𑀘𑁆𑀙𑁄. 𑀅𑀔𑀡𑁆𑀟𑀸𑀦𑀻𑀢𑀺 𑀏𑀓𑀤𑁂𑀲𑁂𑀦𑀧𑀺 𑀅𑀔𑀡𑁆𑀟𑀺𑀢𑀸𑀦𑀺. 𑀪𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀅𑀧𑀽𑀢𑀻𑀦𑀻𑀢𑀺 𑀉𑀤𑀓𑀢𑁂𑀫𑀦𑁂𑀦 𑀅𑀧𑀽𑀢𑀺𑀓𑀸𑀦𑀺. 𑀧𑀽𑀢𑀺𑀓𑀜𑁆𑀳𑀺 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀅𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀯𑀸𑀢𑁂𑀦 𑀘 𑀆𑀢𑀧𑁂𑀦 𑀘 𑀦 𑀳𑀢𑀸𑀦𑀺 𑀦𑀺𑀭𑁄𑀚𑀢𑀁 𑀦 𑀧𑀸𑀧𑀺𑀢𑀸𑀦𑀺. 𑀦𑀺𑀭𑁄𑀚𑀜𑁆𑀳𑀺 𑀓𑀲𑀝𑀁 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. ‘‘𑀲𑀸𑀭𑀸𑀤𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀲𑀸𑀭𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀸𑀭𑀸𑀤𑀸𑀦𑀻’’𑀢𑀺. 𑀢𑀡𑁆𑀟𑀼𑀮𑀲𑀸𑀭𑀲𑁆𑀲 𑀆𑀤𑀸𑀦𑀢𑁄 ¶ 𑀲𑀸𑀭𑀸𑀤𑀸𑀦𑀺, 𑀕𑀳𑀺𑀢𑀲𑀸𑀭𑀸𑀦𑀺 𑀧𑀢𑀺𑀝𑁆𑀞𑀺𑀢𑀲𑀸𑀭𑀸𑀦𑀺. 𑀦𑀺𑀲𑁆𑀲𑀭𑀜𑁆𑀳𑀺 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀓𑁄𑀝𑁆𑀞𑁂 𑀧𑀓𑁆𑀔𑀺𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀼𑀔𑀲𑀬𑀺𑀢𑀸𑀦𑀺 𑀲𑀼𑀝𑁆𑀞𑀼 𑀲𑀦𑁆𑀦𑀺𑀘𑀺𑀢𑀸𑀦𑀺. 𑀫𑀡𑁆𑀟𑀔𑁂𑀢𑁆𑀢𑁂𑀢𑀺 𑀊𑀲𑀔𑀸𑀭𑀸𑀤𑀺𑀤𑁄𑀲𑁂𑀳𑀺 𑀅𑀯𑀺𑀤𑁆𑀥𑀲𑁆𑀢𑁂 𑀲𑀸𑀭𑀓𑁆𑀔𑁂𑀢𑁆𑀢𑁂. 𑀅𑀪𑀺𑀤𑁄𑀢𑀺 𑀅𑀪𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀦𑀺𑀧𑀸𑀢𑀧𑀤𑀦𑁆𑀢𑀺 𑀆𑀳 ‘‘𑀅𑀪𑀺𑀅𑀟𑁆𑀠𑀭𑀢𑁆𑀢’’𑀦𑁆𑀢𑀺. 𑀦𑀢𑁆𑀣𑀺 𑀏𑀢𑀲𑁆𑀲 𑀪𑀺𑀤𑀸𑀢𑀺 𑀯𑀸 𑀅𑀪𑀺𑀤𑁄. ‘‘𑀅𑀪𑀺𑀤𑀁 𑀅𑀟𑁆𑀠𑀭𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀅𑀟𑁆𑀠𑀭𑀢𑁆𑀢𑀦𑁆𑀢𑀺 ¶ 𑀘 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀘𑀦𑀁, 𑀪𑀼𑀫𑁆𑀫𑀢𑁆𑀣𑁂 𑀯𑀸. 𑀢𑀲𑁆𑀫𑀸 𑀅𑀪𑀺𑀤𑁄 𑀅𑀟𑁆𑀠𑀭𑀢𑁆𑀢𑀦𑁆𑀢𑀺 𑀅𑀪𑀺𑀦𑁆𑀦𑁂 𑀅𑀟𑁆𑀠𑀭𑀢𑁆𑀢𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀧𑀼𑀡𑁆𑀡𑀫𑀸𑀲𑀺𑀬𑀜𑁆𑀳𑀺 𑀕𑀕𑀦𑀫𑀚𑁆𑀛𑀲𑁆𑀲 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀘𑀦𑁆𑀤𑁂 𑀞𑀺𑀢𑁂 𑀅𑀟𑁆𑀠𑀭𑀢𑁆𑀢𑀲𑀫𑀬𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀫𑀚𑁆𑀛𑁂 𑀏𑀯 𑀧𑀦 𑀞𑀺𑀢𑁂 𑀅𑀪𑀺𑀦𑁆𑀦𑁄 𑀦𑀸𑀫.

𑀲𑀼𑀧𑁆𑀧𑀩𑀼𑀤𑁆𑀥𑀲𑀼𑀦𑀓𑁆𑀔𑀢𑁆𑀢𑀸𑀤𑀬𑁄𑀢𑀺 𑀏𑀢𑁆𑀣 (𑀥. 𑀧. 𑀅𑀝𑁆𑀞. 𑁨.𑁧𑁨𑁭 𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀬𑀯𑀢𑁆𑀣𑀼) 𑀲𑀼𑀧𑁆𑀧𑀩𑀼𑀤𑁆𑀥𑁄 𑀓𑀺𑀭 𑀲𑀸𑀓𑀺𑀬𑁄 ‘‘𑀫𑀫 𑀥𑀻𑀢𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀫𑀫 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀲𑁆𑀲 𑀯𑁂𑀭𑀺𑀝𑁆𑀞𑀸𑀦𑁂 𑀞𑀺𑀢𑁄 𑀘𑀸’’𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀢𑁆𑀣𑀭𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀦 𑀤𑀸𑀦𑀺 𑀦𑀺𑀫𑀦𑁆𑀢𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀫𑀦𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀭𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁂 𑀢𑀁 𑀞𑀸𑀦𑀁 𑀆𑀕𑀢𑁂 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑁄 𑀆𑀳 𑁋 ‘‘𑀧𑀼𑀭𑀢𑁄 𑀕𑀘𑁆𑀙𑀸𑀢𑀺 𑀢𑀲𑁆𑀲 𑀯𑀤𑁂𑀣, 𑀦𑀸𑀬𑀁 𑀫𑀬𑀸 𑀫𑀳𑀮𑁆𑀮𑀓𑀢𑀭𑁄, 𑀦𑀸𑀲𑁆𑀲 𑀫𑀕𑁆𑀕𑀁 𑀤𑀲𑁆𑀲𑀸𑀫𑀻’’𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀣𑁂𑀯 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀫𑀸𑀢𑀼𑀮𑀲𑁆𑀲 𑀲𑀦𑁆𑀢𑀺𑀓𑀸 𑀫𑀕𑁆𑀕𑀁 𑀅𑀮𑀪𑀺𑀢𑁆𑀯𑀸 𑀢𑀢𑁄𑀯 𑀦𑀺𑀯𑀢𑁆𑀢𑀺. 𑀲𑁄𑀧𑀺 𑀘𑀭𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀏𑀳𑀻’’𑀢𑀺. 𑀲𑀢𑁆𑀣𑀸𑀧𑀺 𑀦𑀺𑀯𑀢𑁆𑀢𑀦𑁆𑀢𑁄 𑀲𑀺𑀢𑀁 𑀓𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀺𑀢𑀧𑀸𑀢𑀼𑀓𑀫𑁆𑀫𑁂 𑀧𑀘𑁆𑀘𑀬𑁄’’𑀢𑀺 𑀧𑀼𑀝𑁆𑀞𑁄 𑀆𑀳 𑁋 ‘‘𑀧𑀲𑁆𑀲𑀲𑀺, 𑀆𑀦𑀦𑁆𑀤, 𑀲𑀼𑀧𑁆𑀧𑀩𑀼𑀤𑁆𑀥’’𑀦𑁆𑀢𑀺. 𑀧𑀲𑁆𑀲𑀸𑀫𑀺, 𑀪𑀦𑁆𑀢𑁂. 𑀪𑀸𑀭𑀺𑀬𑀁 𑀢𑁂𑀦 𑀓𑀫𑁆𑀫𑀁 𑀓𑀢𑀁 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀕𑁆𑀕𑀁 𑀅𑀤𑁂𑀦𑁆𑀢𑁂𑀦, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀧𑀸𑀲𑀸𑀤𑀫𑀽𑀮𑁂 𑀧𑀣𑀯𑀺𑀬𑀸 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀆𑀘𑀺𑀓𑁆𑀔𑀺.

𑀲𑀼𑀦𑀓𑁆𑀔𑀢𑁆𑀢𑁄𑀧𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁭) 𑀧𑀼𑀩𑁆𑀩𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀓𑀣𑁂𑀲𑀺. 𑀲𑁄 𑀤𑀺𑀩𑁆𑀩𑀘𑀓𑁆𑀔𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀤𑁂𑀯𑀮𑁄𑀓𑁂 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀨𑀸𑀭𑀼𑀲𑀓𑀯𑀦𑀫𑀺𑀲𑁆𑀲𑀓𑀯𑀦𑁂𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂 𑀤𑁂𑀯𑀧𑀼𑀢𑁆𑀢𑁂 𑀘 𑀤𑁂𑀯𑀥𑀻𑀢𑀭𑁄 𑀘 𑀤𑀺𑀲𑁆𑀯𑀸 𑁋 ‘‘𑀏𑀢𑁂𑀲𑀁 𑀏𑀯𑀭𑀽𑀧𑀸𑀬 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑀸𑀦𑀁 𑀓𑀺𑀭 𑀫𑀥𑀼𑀭𑁄 𑀦𑀼 𑀔𑁄 𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀧𑀦𑀲𑁆𑀲 𑁋 ‘‘𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀻’’𑀢𑀺 𑀜𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀺. 𑀦 𑀳𑀺 𑀩𑀼𑀤𑁆𑀥𑀸 𑀬𑀁 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀣𑁂𑀦𑁆𑀢𑀺. 𑀲𑁄 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀧𑀞𑀫𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 ¶ 𑀧𑀼𑀘𑁆𑀙𑀺𑀁, 𑀲𑁄 𑀫𑀬𑁆𑀳𑀁 ‘𑀲𑀫𑁆𑀧𑀚𑁆𑀚𑀢𑀼 𑀯𑀸 𑀫𑀸 𑀯𑀸 𑀲𑀫𑁆𑀧𑀚𑁆𑀚𑀢𑀽’𑀢𑀺 𑀓𑀣𑁂𑀲𑀺. 𑀅𑀳𑀁 𑀧𑀦 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀁, 𑀢𑀁 𑀫𑁂 𑀦 𑀓𑀣𑁂𑀲𑀺. 𑀅𑀤𑁆𑀥𑀸 𑀏𑀯𑀁 ¶ 𑀳𑁄𑀢𑀺 ‘𑀅𑀬𑀁 𑀭𑀸𑀚𑀧𑀩𑁆𑀩𑀚𑀺𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀘𑁂𑀢𑁄𑀧𑀭𑀺𑀬𑀓𑀫𑁆𑀫𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀫𑀬𑀸 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀯𑀲𑁂𑀦 𑀫𑀬𑁆𑀳𑀁 𑀦 𑀓𑀣𑁂𑀢𑀻’’𑀢𑀺 𑀪𑀺𑀬𑁆𑀬𑁄𑀲𑁄 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸𑀧𑀺 𑀦 𑀢𑀼𑀡𑁆𑀳𑀻𑀪𑀽𑀢𑁄 𑀯𑀺𑀳𑀸𑀲𑀺. 𑀤𑀲𑀩𑀮𑀁 𑀧𑀦 𑀅𑀲𑀢𑀸 𑀢𑀼𑀘𑁆𑀙𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀺𑀢𑁆𑀯𑀸 𑀅𑀧𑀸𑀬𑀽𑀧𑀕𑁄 𑀅𑀳𑁄𑀲𑀺. 𑀢𑀫𑁆𑀧𑀺 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀏𑀯𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 𑀅𑀧𑀓𑁆𑀓𑀫𑁂𑀯 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀬𑀣𑀸 𑀢𑀁 𑀆𑀧𑀸𑀬𑀺𑀓𑁄’’𑀢𑀺 (𑀤𑀻. 𑀦𑀺. 𑁩.𑁬). 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀭𑁂𑀧𑀺 𑀲𑀼𑀧𑁆𑀧𑀩𑀼𑀤𑁆𑀥𑀲𑀼𑀦𑀓𑁆𑀔𑀢𑁆𑀢𑀸𑀤𑀬𑁄 𑀪𑀕𑀯𑀢𑀸 𑀜𑀸𑀢𑀸𑀯𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀓𑁄𑀓𑀸𑀮𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀲𑀼𑀲𑀻𑀫𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁭𑁦) 𑀏𑀯𑀁𑀦𑀸𑀫𑀓𑁄 𑀯𑁂𑀤𑀗𑁆𑀕𑁂𑀲𑀼 𑀓𑀼𑀲𑀮𑁄 𑀧𑀡𑁆𑀟𑀺𑀢𑁄 𑀧𑀭𑀺𑀩𑁆𑀩𑀸𑀚𑀓𑁄. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀳𑀺 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀦 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀦𑀺 𑀆𑀭𑀩𑁆𑀪 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀚𑀸𑀢𑁄, 𑀓𑀯𑀺𑀲𑁂𑀝𑁆𑀞𑁄 𑀧𑀦𑁂𑀲 𑀉𑀢𑁆𑀢𑀫𑀓𑀯𑀺𑀢𑀸𑀬 𑀲𑀸𑀯𑀓𑀸𑀦𑀁 𑀩𑀦𑁆𑀥𑀁 𑀩𑀦𑁆𑀥𑀺𑀢𑁆𑀯𑀸 𑀤𑁂𑀢𑀺. 𑀢𑁂 𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀦𑀁 𑀉𑀧𑀦𑀺𑀲𑀺𑀦𑁆𑀦𑀓𑀣𑀫𑁆𑀧𑀺 𑀅𑀦𑀼𑀫𑁄𑀤𑀦𑀫𑁆𑀧𑀺 𑀲𑀭𑀪𑀜𑁆𑀜𑀫𑁆𑀧𑀻𑀢𑀺 𑀏𑀯𑀫𑀸𑀤𑀻𑀦𑀺 𑀓𑀣𑁂𑀦𑁆𑀢𑀺. 𑀢𑁂 𑀢𑁂𑀲𑀁 𑀧𑀲𑀦𑁆𑀦𑀸𑀦𑀁 𑀮𑀸𑀪𑀁 𑀉𑀧𑀲𑀁𑀳𑀭𑀦𑁆𑀢𑀺. 𑀲𑀘𑁂 𑀫𑀬𑀁 𑀬𑀁 𑀲𑀫𑀡𑁄 𑀕𑁄𑀢𑀫𑀸 𑀚𑀸𑀦𑀸𑀢𑀺, 𑀢𑀢𑁄 𑀣𑁄𑀓𑀁 𑀚𑀸𑀦𑁂𑀬𑁆𑀬𑀸𑀫, 𑀅𑀢𑁆𑀢𑀦𑁄 𑀲𑀫𑀬𑀁 𑀢𑀢𑁆𑀣 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀬𑀫𑁆𑀧𑀺 𑀉𑀧𑀝𑁆𑀞𑀸𑀓𑀸𑀦𑀁 𑀓𑀣𑁂𑀬𑁆𑀬𑀸𑀫. 𑀢𑀢𑁄 𑀏𑀢𑁂𑀳𑀺 𑀮𑀸𑀪𑀺𑀢𑀭𑀸 𑀪𑀯𑁂𑀬𑁆𑀬𑀸𑀫. 𑀓𑁄 𑀦𑀼 𑀔𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀼𑀲𑀺𑀫𑁄 𑀧𑀝𑀺𑀩𑀮𑁄’’𑀢𑀺 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 ‘‘𑀏𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀲𑀻𑀫, 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭, 𑀢𑁆𑀯𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀫𑁆𑀳𑁂 𑀯𑀸𑀘𑁂𑀬𑁆𑀬𑀸𑀲𑀺, 𑀢𑀁 𑀫𑀬𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀕𑀺𑀳𑀻𑀦𑀁 𑀪𑀸𑀲𑀺𑀲𑁆𑀲𑀸𑀫, 𑀏𑀯𑀁 𑀫𑀬𑀫𑁆𑀧𑀺 𑀲𑀓𑁆𑀓𑀢𑀸 𑀪𑀯𑀺𑀲𑁆𑀲𑀸𑀫 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀮𑀸𑀪𑀺𑀦𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁭𑁦).

𑀅𑀣 𑀲𑀼𑀲𑀻𑀫𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀬𑁂𑀦𑀸𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀣𑁂𑀭𑁄 𑀘 𑀢𑀁 𑀆𑀤𑀸𑀬 𑀪𑀕𑀯𑀦𑁆𑀢𑀁 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀧𑀦 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀢𑀺𑀢𑁆𑀣𑀺𑀬𑀲𑀫𑀬𑁂 ‘𑀅𑀳𑀁 𑀧𑀸𑀝𑀺𑀏𑀓𑁆𑀓𑁄 𑀲𑀢𑁆𑀣𑀸’𑀢𑀺 𑀧𑀝𑀺𑀚𑀸𑀦𑀫𑀸𑀦𑁄 𑀘𑀭𑀢𑀺, ‘𑀇𑀥𑁂𑀯 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁 𑀇𑀘𑁆𑀙𑀸𑀫𑀻’𑀢𑀺 𑀓𑀺𑀭 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀫𑀬𑀺 𑀧𑀲𑀦𑁆𑀦𑁄, 𑀉𑀤𑀸𑀳𑀼 𑀫𑀬𑁆𑀳𑀁 𑀯𑀸 𑀫𑀫 𑀲𑀸𑀯𑀓𑀸𑀦𑀁 𑀥𑀫𑁆𑀫𑀓𑀣𑀸𑀬 𑀧𑀲𑀦𑁆𑀦𑁄’’𑀢𑀺. 𑀅𑀣𑀲𑁆𑀲 𑀏𑀓𑀝𑁆𑀞𑀸𑀦𑁂𑀧𑀺 𑀧𑀲𑀸𑀤𑀸𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀫𑀫 𑀲𑀸𑀲𑀦𑁂 ‘𑀥𑀫𑁆𑀫𑀁 𑀣𑁂𑀦𑁂𑀲𑁆𑀲𑀸𑀫𑀻’𑀢𑀺 𑀧𑀩𑁆𑀩𑀚𑀢𑀺, 𑀇𑀢𑀺𑀲𑁆𑀲 𑀆𑀕𑀫𑀦𑀁 ¶ 𑀅𑀧𑀭𑀺𑀲𑀼𑀤𑁆𑀥𑀁, 𑀦𑀺𑀧𑁆𑀨𑀢𑁆𑀢𑀺 𑀦𑀼 𑀔𑁄 𑀓𑀻𑀤𑀺𑀲𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀓𑀺𑀜𑁆𑀘𑀸𑀧𑀺 ‘𑀥𑀫𑁆𑀫𑀁 𑀣𑁂𑀦𑁂𑀲𑁆𑀲𑀸𑀫𑀻’𑀢𑀺 𑀧𑀩𑁆𑀩𑀚𑀢𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀧𑀦 𑀖𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀲𑀻𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀪𑀕𑀯𑀢𑀸 𑀓𑁄 𑀜𑀸𑀢𑁄? 𑀲𑀼𑀲𑀻𑀫𑁄 𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺.

𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄𑀢𑀺 (𑀥. 𑀧. 𑀅𑀝𑁆𑀞. 𑁨.𑁧𑁪𑁧 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀯𑀢𑁆𑀣𑀼) 𑀲𑁄 𑀓𑀺𑀭 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄. 𑀅𑀣𑀲𑁆𑀲 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀭𑀚𑁆𑀚𑀁 𑀤𑀢𑁆𑀯𑀸 𑀏𑀓𑀁 𑀦𑀘𑁆𑀘𑀕𑀻𑀢𑀓𑀼𑀲𑀮𑀁 𑀇𑀢𑁆𑀣𑀺𑀁 𑀅𑀤𑀸𑀲𑀺. 𑀲𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀼𑀭𑀸𑀫𑀤𑀫𑀢𑁆𑀢𑁄 𑀳𑀼𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀳𑀸𑀦𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀤𑁆𑀯𑀸𑀭𑀦𑁆𑀢𑀭𑁂 𑀤𑀺𑀲𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄𑀯 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀯𑀦𑁆𑀤𑀺. 𑀲𑀢𑁆𑀣𑀸 𑀲𑀺𑀢𑀁 𑀓𑀢𑁆𑀯𑀸 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀺𑀢𑀧𑀸𑀢𑀼𑀓𑀭𑀡𑁂 𑀳𑁂𑀢𑀽’’𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀲𑀺𑀢𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋 ‘‘𑀧𑀲𑁆𑀲𑀲𑀺, 𑀆𑀦𑀦𑁆𑀤, 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀁, 𑀅𑀚𑁆𑀚𑁂𑀯 𑀲𑀩𑁆𑀩𑀸𑀪𑀭𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀘𑀸𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀓𑁄 𑀜𑀸𑀢𑁄 𑀪𑀕𑀯𑀢𑀸𑀢𑀺? 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄’’𑀢𑀺.

𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀺𑀩𑁆𑀩𑁂𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀦𑀯𑀫𑁂 𑀧𑀭𑀺𑀳𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀺, 𑀢𑀲𑁆𑀲 𑀯𑀸 𑀓𑀸𑀭𑀡𑀪𑀸𑀯𑀁 𑀉𑀧𑀕𑀘𑁆𑀙𑀢𑀻𑀢𑀺 𑀧𑀭𑀺𑀬𑀸𑀬𑁄𑀢𑀺 𑀇𑀥 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀺𑀩𑁆𑀩𑀺𑀚𑁆𑀛𑀦𑀓𑀸𑀭𑀡’’𑀦𑁆𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀏𑀢𑁆𑀣 𑀳𑀺 𑀧𑀝𑀮𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁪) 𑀏𑀢𑁆𑀣 𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀏𑀢𑁆𑀣 𑀆𑀦𑀺𑀲𑀁𑀲𑀝𑁆𑀞𑁄. ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁄), 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽’’𑀢𑀺 (𑀥. 𑀧. 𑁫𑁩) 𑀏𑀢𑁆𑀣 𑀩𑀦𑁆𑀥𑀦𑀝𑁆𑀞𑁄 𑀕𑀼𑀡𑀝𑁆𑀞𑁄. 𑀇𑀥𑀸𑀧𑀺 𑀏𑀲𑁄𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸’’𑀢𑀺. 𑀓𑀸𑀫𑀭𑀸𑀕𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼𑀧𑀺 𑀩𑀦𑁆𑀥𑀦𑀝𑁆𑀞𑁄 𑀭𑀸𑀲𑀝𑁆𑀞𑁄 𑀯𑀸 𑀕𑀼𑀡𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀚𑀸𑀦𑀺𑀢𑀩𑁆𑀩𑀸. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 ¶ 𑀲𑀪𑀸𑀯𑁂𑀦𑁂𑀯 𑀇𑀝𑁆𑀞𑀸𑀭𑀫𑁆𑀫𑀡𑀚𑀸𑀢𑀺𑀓𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀸𑀯𑀁 𑀯𑀸 𑀧𑀢𑁆𑀢𑀸. 𑀓𑀫𑀦𑀻𑀬𑀸𑀢𑀺 𑀓𑀸𑀫𑁂𑀢𑀩𑁆𑀩𑀸. 𑀫𑀦𑀯𑀟𑁆𑀠𑀦𑀓𑀸𑀢𑀺 𑀫𑀦𑁄𑀳𑀭𑀸. 𑀏𑀢𑁂𑀦 𑀧𑀭𑀺𑀓𑀧𑁆𑀧𑀦𑀢𑁄𑀧𑀺 𑀇𑀝𑁆𑀞𑀸𑀭𑀫𑁆𑀫𑀡𑀪𑀸𑀯𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀺𑀬𑀚𑀸𑀢𑀺𑀓𑀸𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀲𑀪𑀸𑀯𑀸. 𑀓𑀸𑀫𑀽𑀧𑀲𑀜𑁆𑀳𑀺𑀢𑀸𑀢𑀺 𑀓𑀸𑀫𑀭𑀸𑀕𑁂𑀦 𑀉𑀧𑁂𑀘𑁆𑀘 𑀲𑀫𑁆𑀩𑀦𑁆𑀥𑀦𑀻𑀬𑀸 𑀲𑀫𑁆𑀩𑀦𑁆𑀥𑀸 𑀓𑀸𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀲𑀗𑁆𑀓𑀧𑁆𑀧𑀭𑀸𑀕𑁄𑀢𑀺 𑀯𑀸 𑀲𑀼𑀪𑀸𑀤𑀺𑀯𑀲𑁂𑀦 𑀲𑀗𑁆𑀓𑀧𑁆𑀧𑀺𑀢𑀯𑀼𑀢𑁆𑀣𑀫𑁆𑀳𑀺 𑀉𑀧𑁆𑀧𑀦𑁆𑀦𑀭𑀸𑀕𑁄. 𑀏𑀯𑀫𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁄 𑀯𑀼𑀢𑁆𑀢𑁄 𑀢𑀲𑁆𑀲𑁂𑀯 𑀯𑀲𑁂𑀦 𑀢𑁂𑀲𑀫𑁆𑀧𑀺 𑀓𑀸𑀫𑀪𑀸𑀯𑀲𑀺𑀤𑁆𑀥𑀺𑀢𑁄, 𑀓𑀺𑀮𑁂𑀲𑀓𑀸𑀫𑀲𑁆𑀲𑀧𑀺 𑀇𑀝𑁆𑀞𑀯𑁂𑀤𑀦𑀸 𑀤𑀺𑀝𑁆𑀞𑀸𑀤𑀺𑀲𑀫𑁆𑀧𑀬𑁄𑀕𑀪𑁂𑀤𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀘 𑀅𑀢𑁆𑀣𑀺 𑀯𑀺𑀘𑀺𑀢𑁆𑀢𑀓𑀸𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀘𑀺𑀢𑁆𑀭𑀯𑀺𑀘𑀺𑀢𑁆𑀭𑀸𑀭𑀫𑁆𑀫𑀡𑀸𑀦𑀻’’𑀢𑀺 𑀆𑀳, 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀻𑀢𑀺 𑀅𑀢𑁆𑀣𑁄.

𑀅𑀣𑁂𑀢𑁆𑀣 𑀥𑀻𑀭𑀸 𑀯𑀺𑀦𑀬𑀦𑁆𑀢𑀺 𑀙𑀦𑁆𑀤𑀦𑁆𑀢𑀺 𑀅𑀣 𑀏𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀥𑀺𑀢𑀺𑀲𑀫𑁆𑀧𑀦𑁆𑀦𑀸 𑀧𑀡𑁆𑀟𑀺𑀢𑀸 𑀙𑀦𑁆𑀤𑀭𑀸𑀕𑀁 𑀯𑀺𑀦𑀬𑀦𑁆𑀢𑀺.

𑀢𑀚𑁆𑀚𑀸𑀢𑀺𑀓𑀦𑁆𑀢𑀺 𑀢𑀁𑀲𑀪𑀸𑀯𑀁, 𑀅𑀢𑁆𑀣𑀢𑁄 𑀧𑀦 𑀢𑀲𑁆𑀲 𑀓𑀸𑀫𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀜𑁆𑀜𑀲𑁆𑀲 𑀪𑀸𑀕𑁄 𑀧𑀼𑀜𑁆𑀜𑀪𑀸𑀕𑁄, 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑁄. 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀯𑀸 𑀪𑀯𑁄𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑁄. 𑀅𑀧𑀼𑀜𑁆𑀜𑀪𑀸𑀕𑀺𑀬𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀧𑀸𑀓𑁄𑀬𑁂𑀯 𑀯𑁂𑀧𑀓𑁆𑀓𑀦𑁆𑀢𑀺 𑀆𑀳 ‘‘𑀯𑁄𑀳𑀸𑀭𑀯𑀺𑀧𑀸𑀓’’𑀦𑁆𑀢𑀺.

𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑀸𑀥𑀸𑀭𑀡𑀸. 𑀲𑀁𑀯𑀺𑀤𑀳𑀦𑀘𑁂𑀢𑀦𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀲𑀁𑀯𑀺𑀤𑀳𑀦𑀮𑀓𑁆𑀔𑀡𑀸 𑀘𑁂𑀢𑀦𑀸. 𑀉𑀭𑀢𑁆𑀢𑀸𑀴𑀺𑀦𑁆𑀢𑀺 𑀉𑀭𑀁 𑀢𑀸𑀴𑁂𑀢𑁆𑀯𑀸 ¶ . 𑀏𑀓𑀧𑀤𑀦𑁆𑀢𑀺 𑀏𑀓𑀧𑀤𑀘𑀺𑀢𑀁 𑀫𑀦𑁆𑀢𑀁. 𑀢𑁂𑀦𑀸𑀳 ‘‘𑀏𑀓𑀧𑀤𑀫𑀦𑁆𑀢𑀁 𑀯𑀸’’𑀢𑀺𑀆𑀤𑀺.

𑀦𑀺𑀩𑁆𑀩𑁂𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀤𑀲𑀫𑁂 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀺. 𑀦𑀦𑀼 𑀘𑁂𑀢𑀸𑀦𑀺 𑀲𑀸𑀯𑀓𑀸𑀦𑀫𑁆𑀧𑀺 𑀏𑀓𑀘𑁆𑀘𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀓𑀸𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀸𑀤𑀺𑀲𑀸𑀦𑀺 𑀧𑀦 𑀩𑀼𑀤𑁆𑀥𑀸𑀦𑀁 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀻𑀦𑀺, 𑀦 𑀢𑀸𑀤𑀺𑀲𑀸𑀦𑀺 𑀢𑀤𑀜𑁆𑀜𑁂𑀲𑀁 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺. 𑀇𑀫𑀫𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀁 𑀮𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀥𑀸𑀭𑀡𑀪𑀸𑀯𑀢𑁄 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀻𑀲𑀼 𑀏𑀯 𑀅𑀲𑀸𑀥𑀸𑀭𑀡𑀲𑀫𑀜𑁆𑀜𑀸 𑀦𑀺𑀭𑀼𑀴𑁆𑀳𑀸. 𑀬𑀣𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀸𑀦𑀺 𑀧𑀼𑀜𑁆𑀜𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺, 𑀢𑀣𑀸 𑀆𑀕𑀢𑀩𑀮𑀸𑀦𑀻𑀢𑀺 𑀯𑀸 𑀢𑀣𑀸𑀕𑀢𑀩𑀮𑀸𑀦𑀺. 𑀉𑀲𑀪𑀲𑁆𑀲 𑀇𑀤𑀁 𑀆𑀲𑀪𑀁, 𑀲𑁂𑀝𑁆𑀞𑀝𑁆𑀞𑀸𑀦𑀁. 𑀧𑀫𑀼𑀔𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁 ¶ . 𑀧𑀝𑀺𑀯𑁂𑀥𑀜𑀸𑀡𑀜𑁆𑀘𑁂𑀯 𑀤𑁂𑀲𑀦𑀸𑀜𑀸𑀡𑀜𑁆𑀘𑀸𑀢𑀺 𑀏𑀢𑁆𑀣 𑀧𑀜𑁆𑀜𑀸𑀬 𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁. 𑀓𑀭𑀼𑀡𑀸𑀬 𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑀻𑀧𑀗𑁆𑀓𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁, 𑀩𑀼𑀤𑁆𑀥𑀸𑀦𑀜𑁆𑀜𑁂𑀯 𑀑𑀭𑀲𑀜𑀸𑀡𑀁.

𑀞𑀸𑀦𑀜𑁆𑀘 𑀞𑀸𑀦𑀢𑁄 𑀧𑀚𑀸𑀦𑀸𑀢𑀻𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀞𑀸𑀦𑀁, 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀬𑀁 𑀬𑁂𑀬𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀅𑀝𑁆𑀞𑀸𑀦’’𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀞𑀸𑀦𑀢𑁄 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀲𑀫𑀸𑀤𑀺𑀬𑀦𑁆𑀢𑀻𑀢𑀺 ¶ 𑀲𑀫𑀸𑀤𑀸𑀦𑀸𑀦𑀺, 𑀢𑀸𑀦𑀺 𑀧𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦’’𑀦𑁆𑀢𑀺. 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀏𑀢𑁂𑀦 ‘‘𑀲𑀫𑀸𑀤𑀸𑀦’’𑀦𑁆𑀢𑀺 𑀲𑀤𑁆𑀤𑀲𑁆𑀲 𑀅𑀧𑀼𑀩𑁆𑀩𑀢𑁆𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 𑀫𑀼𑀢𑁆𑀢𑀕𑀢𑀲𑀤𑁆𑀤𑁂 𑀕𑀢𑀲𑀤𑁆𑀤𑀲𑁆𑀲 𑀯𑀺𑀬. 𑀕𑀢𑀻𑀢𑀺 𑀦𑀺𑀭𑀬𑀸𑀤𑀺𑀕𑀢𑀺𑀬𑁄. 𑀉𑀧𑀥𑀻𑀢𑀺 𑀅𑀢𑁆𑀢𑀪𑀸𑀯𑁄. 𑀓𑀸𑀮𑁄𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀸𑀭𑀳𑀓𑀸𑀮𑁄. 𑀧𑀬𑁄𑀕𑁄𑀢𑀺 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑀸 𑀓𑀺𑀭𑀺𑀬𑀸.

𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀦𑁆𑀢𑀺 𑀧𑀘𑁆𑀘𑀦𑀻𑀓𑀚𑁆𑀛𑀸𑀧𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀝𑁆𑀞𑁂𑀦 𑀘 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁. 𑀘𑀢𑀼𑀓𑁆𑀓𑀦𑀬𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀦𑁆𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀁 (𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨; 𑀥. 𑀲. 𑁨𑁪𑁮; 𑀧𑀝𑀺. 𑀫. 𑁧.𑁨𑁦𑁯) 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁. 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀦𑁆𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁. 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀏𑀢𑁆𑀣 𑀘 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀦𑁆𑀦𑀁 𑀲𑀫𑀸𑀥𑀻𑀢𑀺𑀧𑀺 𑀦𑀸𑀫𑀁, 𑀲𑀫𑀸𑀧𑀢𑁆𑀢𑀻𑀢𑀺𑀧𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀩𑁆𑀪𑀸𑀯𑀢𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄 𑀦 𑀲𑀫𑀸𑀥𑀻𑀢𑀺 𑀦𑀸𑀫𑀁. 𑀳𑀸𑀦𑀪𑀸𑀕𑀺𑀬𑀁 𑀥𑀫𑁆𑀫𑀦𑁆𑀢𑀺 𑀅𑀧𑁆𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀧𑀓𑁆𑀔𑀦𑁆𑀤𑀦𑀁. 𑀯𑀺𑀲𑁂𑀲𑀪𑀸𑀕𑀺𑀬𑀁 𑀥𑀫𑁆𑀫𑀦𑁆𑀢𑀺 𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀁. 𑀇𑀢𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 ¶ 𑀓𑀸𑀫𑀸𑀤𑀺𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀸𑀦𑀺 𑀳𑀸𑀦𑀪𑀸𑀕𑀺𑀬𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀸𑀢𑀺 𑀤𑀲𑁆𑀲𑀺𑀢𑀸𑀦𑀺. 𑀢𑁂𑀳𑀺 𑀧𑀦 𑀛𑀸𑀦𑀸𑀦𑀁 𑀢𑀁𑀲𑀪𑀸𑀯𑀢𑀸 𑀥𑀫𑁆𑀫𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀯𑁄𑀤𑀸𑀦𑀦𑁆𑀢𑀺 𑀧𑀕𑀼𑀡𑀢𑀸𑀲𑀗𑁆𑀔𑀸𑀢𑀁 𑀯𑁄𑀤𑀸𑀦𑀁. 𑀢𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁂 𑀧𑀦 ‘‘𑀦𑀺𑀭𑁄𑀥𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀧𑀸𑀴𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀢𑁂 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀁 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀧𑀝𑀺𑀲𑁂𑀥𑁂𑀢𑀩𑁆𑀩𑀸.

𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑁂𑀯𑀢𑀸𑀯𑀕𑁆𑀕𑁄

𑁧-𑁩. 𑀅𑀦𑀸𑀕𑀸𑀫𑀺𑀨𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁫-𑁬𑁭. 𑀲𑀢𑁆𑀢𑀫𑀲𑁆𑀲 ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀢𑀢𑀺𑀬𑁂 𑀅𑀪𑀺𑀲𑀫𑀸𑀘𑀸𑀭𑁂 𑀉𑀢𑁆𑀢𑀫𑀲𑀫𑀸𑀘𑀸𑀭𑁂 𑀪𑀯𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀁, 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀯𑀢𑁆𑀢𑀁. 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀲𑀫𑀸𑀘𑀸𑀭𑀪𑀽𑀢’’𑀦𑁆𑀢𑀺𑀆𑀤𑀺. 𑀲𑁂𑀔𑀧𑀡𑁆𑀡𑀢𑁆𑀢𑀺𑀲𑀻𑀮𑀦𑁆𑀢𑀺 𑀲𑁂𑀔𑀺𑀬𑀯𑀲𑁂𑀦 𑀧𑀜𑁆𑀜𑀢𑁆𑀢𑀲𑀻𑀮𑀁.

𑀅𑀦𑀸𑀕𑀸𑀫𑀺𑀨𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁮-𑁬𑁯. 𑀘𑀢𑀼𑀢𑁆𑀣𑁂 𑀕𑀡𑁂𑀦 𑀲𑀗𑁆𑀕𑀡𑀁 𑀲𑀫𑁄𑀥𑀸𑀦𑀁 𑀕𑀡𑀲𑀗𑁆𑀕𑀡𑀺𑀓𑀸, 𑀲𑀸 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑁄. 𑀲𑀗𑁆𑀕𑀡𑀺𑀓𑀸𑀢𑀺 𑀯𑀸 𑀲𑀓𑀧𑀭𑀺𑀲𑀲𑀫𑁄𑀥𑀸𑀦𑀁. 𑀕𑀡𑁄𑀢𑀺 𑀦𑀸𑀦𑀸𑀚𑀦𑀲𑀫𑁄𑀥𑀸𑀦𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀙𑀝𑁆𑀞𑁂 ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀆𑀳 ‘‘𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁂𑀦𑀸𑀢𑀺 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀮𑀤𑁆𑀥𑁂𑀦𑀸’’𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂 𑀲𑀦𑁆𑀢𑁂𑀦𑀸𑀢𑀺𑀆𑀤𑀻𑀲𑀼 𑀅𑀗𑁆𑀕𑀲𑀦𑁆𑀢𑀢𑀸𑀬 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀲𑀩𑁆𑀩𑀓𑀺𑀮𑁂𑀲𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁂𑀦, 𑀅𑀢𑀧𑁆𑀧𑀦𑀺𑀬𑀝𑁆𑀞𑁂𑀦 𑀧𑀡𑀻𑀢𑁂𑀦, 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑀢𑁆𑀢𑀸, 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀁 𑀯𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁂𑀦, 𑀧𑀲𑁆𑀲𑀤𑁆𑀥𑀺𑀓𑀺𑀮𑁂𑀲𑁂𑀦 𑀯𑀸 𑀅𑀭𑀳𑀢𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁂𑀦, 𑀏𑀓𑁄𑀤𑀺𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁂𑀦𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀲𑀓𑁆𑀔𑀺𑀪𑀩𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁧-𑁭𑁪. 𑀲𑀢𑁆𑀢𑀫𑁂 ¶ 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑁂𑀲𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀯𑀺𑀲𑁂𑀲𑁂. 𑀲𑀓𑁆𑀔𑀺𑀪𑀸𑀯𑀸𑀬 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 𑀪𑀩𑁆𑀩𑁄 𑀲𑀓𑁆𑀔𑀺𑀪𑀩𑁆𑀩𑁄, 𑀢𑀲𑁆𑀲 𑀪𑀸𑀯𑁄 𑀲𑀓𑁆𑀔𑀺𑀪𑀩𑁆𑀩𑀢𑀸. 𑀢𑀁 𑀲𑀓𑁆𑀔𑀺𑀪𑀩𑁆𑀩𑀢𑀁. 𑀲𑀢𑀺 𑀲𑀢𑀺𑀆𑀬𑀢𑀦𑁂𑀢𑀺 𑀲𑀢𑀺 𑀲𑀢𑀺𑀓𑀸𑀭𑀡𑁂. 𑀓𑀺𑀜𑁆𑀘𑁂𑀢𑁆𑀣 𑀓𑀸𑀭𑀡𑀁? 𑀅𑀪𑀺𑀜𑁆𑀜𑀸 𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀯𑀸, 𑀅𑀯𑀲𑀸𑀦𑁂 𑀧𑀦 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀅𑀭𑀳𑀢𑁆𑀢𑀁 𑀯𑀸 𑀓𑀸𑀭𑀡𑀁, 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀜𑁆𑀳𑀺 𑀢𑀁 𑀢𑀢𑁆𑀭 𑀢𑀢𑁆𑀭 𑀲𑀓𑁆𑀔𑀺𑀪𑀩𑁆𑀩𑀢𑀸𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺, 𑀢𑀲𑁆𑀲 𑀅𑀪𑀺𑀜𑁆𑀜𑀸 𑀓𑀸𑀭𑀡𑀁. 𑀅𑀣 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺 𑀅𑀪𑀺𑀜𑁆𑀜𑀸, 𑀏𑀯𑀁 𑀲𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀓𑀸𑀭𑀡𑀁. 𑀅𑀭𑀳𑀢𑁆𑀢𑀫𑁆𑀧𑀺 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀙𑀝𑁆𑀞𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀓𑀸𑀭𑀡𑀁. 𑀇𑀤𑀜𑁆𑀘 𑀲𑀩𑁆𑀩𑀲𑀸𑀥𑀸𑀭𑀡𑀁 𑀦 𑀳𑁄𑀢𑀺, 𑀲𑀸𑀥𑀸𑀭𑀡𑀯𑀲𑁂𑀦 𑀧𑀦 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀓𑀸𑀭𑀡𑀁. 𑀅𑀣 𑀯𑀸 𑀲𑀢𑀺 𑀆𑀬𑀢𑀦𑁂𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀗𑁆𑀔𑀸𑀢𑁂 𑀓𑀸𑀭𑀡𑁂 𑀲𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀳𑀸𑀦𑀪𑀸𑀕𑀺𑀬𑀸𑀤𑀻𑀲𑀼 ‘‘𑀧𑀞𑀫𑀚𑁆𑀛𑀸𑀦𑀲𑁆𑀲 𑀮𑀸𑀪𑀺𑀁 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀞𑀺𑀢𑀺𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀭𑀸𑀕𑀽𑀧𑀲𑀁𑀳𑀺𑀢𑀸, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀫𑀸𑀥𑀻’’𑀢𑀺 (𑀯𑀺𑀪. 𑁭𑁯𑁯) 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀳𑀸𑀦𑀪𑀸𑀕𑀺𑀬𑀸𑀤𑀺𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀲𑁆𑀲 𑀮𑀸𑀪𑀺𑀦𑁆𑀢𑀺 ¶ 𑀬𑁆𑀯𑀸𑀬𑀁 𑀅𑀧𑁆𑀧𑀕𑀼𑀡𑀲𑁆𑀲 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀢𑀁. 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀢𑀢𑁄 𑀯𑀼𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀢𑀼𑀤𑀦𑁆𑀢𑀺, 𑀢𑀲𑁆𑀲 𑀓𑀸𑀫𑀸𑀦𑀢𑀻𑀢𑀲𑁆𑀲 𑀓𑀸𑀫𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀳𑀸𑀦𑀪𑀸𑀕𑀺𑀬𑁄 𑀯𑀼𑀢𑁆𑀢𑁄. 𑀢𑀤𑀦𑀼𑀥𑀫𑁆𑀫𑀢𑀸𑀢𑀺 𑀢𑀤𑀦𑀼𑀭𑀽𑀧𑀲𑀪𑀸𑀯𑁄. 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀇𑀤𑀁 𑀫𑀺𑀘𑁆𑀙𑀸𑀲𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀲𑁆𑀲 𑀳𑀺 𑀧𑀞𑀫𑀚𑁆𑀛𑀸𑀦𑀸𑀦𑀼𑀭𑀽𑀧𑀲𑀪𑀸𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀤𑀺𑀲𑁆𑀯𑀸 𑀅𑀲𑁆𑀲𑀸𑀤𑀬𑀫𑀸𑀦𑀸 𑀅𑀪𑀺𑀦𑀦𑁆𑀤𑀫𑀸𑀦𑀸 𑀦𑀺𑀓𑀦𑁆𑀢𑀺 𑀳𑁄𑀢𑀺, 𑀢𑀲𑁆𑀲 𑀦𑀺𑀓𑀦𑁆𑀢𑀺𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀦𑁂𑀯 𑀳𑀸𑀬𑀢𑀺 𑀦 𑀯𑀟𑁆𑀠𑀢𑀺, 𑀞𑀺𑀢𑀺𑀓𑁄𑀝𑁆𑀞𑀸𑀲𑀺𑀓𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ¶ ‘‘𑀞𑀺𑀢𑀺𑀪𑀸𑀕𑀺𑀬𑁄 𑀲𑀫𑀸𑀥𑀻’’𑀢𑀺. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀅𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀢𑀓𑁆𑀓𑀲𑀳𑀕𑀢𑀸. 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀕𑀼𑀡𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀘𑁄𑀤𑁂𑀦𑁆𑀢𑀺 𑀢𑀼𑀤𑀦𑁆𑀢𑀺. 𑀢𑀲𑁆𑀲 𑀉𑀧𑀭𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀯𑀺𑀲𑁂𑀲𑀪𑀽𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀢𑀸𑀬 ‘‘𑀯𑀺𑀲𑁂𑀲𑀪𑀸𑀕𑀺𑀬𑁄’’𑀢𑀺 𑀯𑀼𑀢𑁆𑀢𑁄.

𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸𑀢𑀺 𑀢𑀫𑁂𑀯 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀁 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀦𑀺𑀩𑁆𑀩𑀺𑀤𑀸𑀲𑀗𑁆𑀔𑀸𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀳𑀕𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀛𑀸𑀦𑀗𑁆𑀕𑁂𑀲𑀼 𑀧𑀪𑁂𑀤𑁂𑀦 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀢𑀺 𑀉𑀓𑁆𑀓𑀡𑁆𑀞𑀢𑀺, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀺𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬 𑀘𑁄𑀤𑁂𑀦𑁆𑀢𑀺 𑀢𑀼𑀤𑀦𑁆𑀢𑀺. 𑀯𑀺𑀭𑀸𑀕𑀽𑀧𑀲𑀁𑀳𑀺𑀢𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀉𑀧𑀲𑀁𑀳𑀺𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀲𑀓𑁆𑀓𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀯𑀺𑀭𑀸𑀕𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀢𑀼𑀦𑁆𑀢𑀺 𑀧𑀯𑀢𑁆𑀢𑀺𑀢𑁄 ‘‘𑀯𑀺𑀭𑀸𑀕𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀭𑀸𑀕𑀽𑀧𑀲𑀁𑀳𑀺𑀢𑀸 𑀏𑀯 𑀦𑀸𑀫. 𑀢𑀲𑁆𑀲 𑀢𑁂𑀲𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀅𑀭𑀺𑀬𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀤𑀝𑁆𑀞𑀸𑀦𑀢𑀸𑀬 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄’’𑀢𑀺 𑀯𑀼𑀢𑁆𑀢𑁄. 𑀳𑀸𑀦𑀁 𑀪𑀚𑀦𑁆𑀢𑀻𑀢𑀺 𑀳𑀸𑀦𑀪𑀸𑀕𑀺𑀬𑀸, 𑀳𑀸𑀦𑀪𑀸𑀕𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀳𑀸𑀦𑀪𑀸𑀕𑀺𑀬𑀸, 𑀧𑀭𑀺𑀳𑀸𑀦𑀓𑁄𑀝𑁆𑀞𑀸𑀲𑀺𑀓𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀞𑀺𑀢𑀺𑀪𑀸𑀕𑀺𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀓𑁆𑀔𑀺𑀪𑀩𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀯𑀢𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀭𑀳𑀢𑁆𑀢𑀯𑀕𑁆𑀕𑁄

𑁧-𑁩. 𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁫-𑁭𑁭. 𑀅𑀝𑁆𑀞𑀫𑀲𑁆𑀲 ¶ 𑀧𑀞𑀫𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀢𑀢𑀺𑀬𑁂 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼𑀦𑁆𑀢𑀺 𑀧𑀘𑁆𑀘𑀬𑀧𑁆𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀧𑁆𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑀁 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼𑀁. 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺 ‘‘𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁄 𑀫𑀳𑀸𑀦𑀸𑀯𑀺𑀓𑁄 𑀫𑀳𑀸𑀤𑀸𑀦𑀧𑀢𑀻’’𑀢𑀺𑀆𑀤𑀺𑀦𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀮𑀧𑀦𑀁. 𑀅𑀯𑀓𑁆𑀔𑀺𑀧𑀺𑀢𑁆𑀯𑀸𑀢𑀺 ‘‘𑀓𑀺𑀁 𑀇𑀫𑀲𑁆𑀲 𑀚𑀻𑀯𑀺𑀢𑀁, 𑀩𑀻𑀚𑀪𑁄𑀚𑀦𑁄 𑀦𑀸𑀫𑀸𑀬’’𑀦𑁆𑀢𑀺 𑀳𑀻𑀴𑁂𑀢𑁆𑀯𑀸 𑀮𑀧𑀦𑀁.

𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀔𑀲𑁄𑀫𑀦𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀘𑀢𑀼𑀢𑁆𑀣𑁂 ¶ 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀤𑀻𑀲𑀼 𑀢𑀲𑁆𑀲 𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀅𑀦𑀯𑀲𑁆𑀲𑀦𑀦𑁆𑀢𑀺 ‘‘𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀺𑀓𑀲𑀼𑀔𑀜𑁆𑀘𑁂𑀯 𑀘𑁂𑀢𑀲𑀺𑀓𑀲𑁄𑀫𑀦𑀲𑁆𑀲𑀜𑁆𑀘 𑀩𑀳𑀼𑀮𑀁 𑀅𑀲𑁆𑀲𑀸𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄. 𑀬𑀯𑀢𑀺 𑀢𑁂𑀦 𑀨𑀮𑀁 𑀫𑀺𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀬𑁄𑀦𑀺, 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁. 𑀅𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀯𑀺𑀓𑀮𑀁 𑀅𑀦𑀯𑀲𑁂𑀲𑀁.

𑀲𑀼𑀔𑀲𑁄𑀫𑀦𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀥𑀺𑀕𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀧𑀜𑁆𑀘𑀫𑁂 𑀆𑀕𑀘𑁆𑀙𑀦𑁆𑀢𑀺 𑀏𑀢𑁂𑀦 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸𑀢𑀺 𑀆𑀕𑀫𑀦𑀁, 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀢𑀢𑁆𑀣 𑀓𑀼𑀲𑀮𑁄𑀢𑀺 𑀆𑀕𑀫𑀦𑀓𑀼𑀲𑀮𑁄. 𑀏𑀯𑀁 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄. 𑀅𑀧𑀕𑀘𑁆𑀙𑀦𑁆𑀢𑀺 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀏𑀢𑁂𑀦𑀸𑀢𑀺 𑀅𑀧𑀕𑀫𑀦𑀁. 𑀢𑁂𑀲𑀁 𑀏𑀯 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁, 𑀢𑀢𑁆𑀣 𑀓𑀼𑀲𑀮𑁄𑀢𑀺 𑀅𑀧𑀕𑀫𑀦𑀓𑀼𑀲𑀮𑁄. 𑀏𑀯𑀁 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀥𑀫𑁆𑀫𑀸 𑀦𑀸𑀪𑀺𑀯𑀟𑁆𑀠𑀦𑁆𑀢𑀻𑀢𑀺 𑀏𑀯𑀁 ¶ 𑀚𑀸𑀦𑀦𑁆𑀢𑁄. 𑀉𑀧𑀸𑀬𑀓𑀼𑀲𑀮𑁄𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀲𑀫𑀦𑁆𑀦𑀸𑀕𑀢𑁄. 𑀇𑀤𑀜𑁆𑀘 𑀅𑀘𑁆𑀘𑀸𑀬𑀺𑀓𑀓𑀺𑀘𑁆𑀘𑁂 𑀯𑀸 𑀪𑀬𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀢𑀺𑀓𑀺𑀘𑁆𑀙𑀦𑀢𑁆𑀣𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀚𑀸𑀦𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀅𑀥𑀺𑀕𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁭. 𑀫𑀳𑀦𑁆𑀢𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁦-𑁮𑁧. 𑀙𑀝𑁆𑀞𑁂 𑀲𑀫𑁆𑀧𑀢𑁆𑀢𑁂𑀢𑀺 𑀓𑀺𑀮𑁂𑀲𑁂 𑀲𑀫𑁆𑀧𑀢𑁆𑀢𑁂. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀫𑀳𑀦𑁆𑀢𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁦. 𑀤𑀼𑀢𑀺𑀬𑀦𑀺𑀭𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁨-𑁮𑁪. 𑀅𑀝𑁆𑀞𑀫𑁂 ¶ 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑀁 𑀫𑀦𑁄𑀧𑀸𑀕𑀩𑁆𑀪𑀺𑀬𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀯𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀤𑀼𑀢𑀺𑀬𑀦𑀺𑀭𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀳𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀻𑀢𑀺𑀯𑀕𑁆𑀕𑁄

𑁧. 𑀲𑀻𑀢𑀺𑀪𑀸𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀦𑀯𑀫𑀲𑁆𑀲 𑀧𑀞𑀫𑁂 𑀲𑀻𑀢𑀺𑀪𑀸𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀓𑀺𑀮𑁂𑀲𑀯𑀽𑀧𑀲𑀫𑀁 𑀯𑀸. 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁄 𑀭𑀓𑁆𑀔𑀡𑀯𑀲𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀡𑀯𑀲𑁂𑀦 𑀧𑀕𑁆𑀕𑀡𑁆𑀳𑀸𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀲𑀫𑀧𑁆𑀧𑀯𑀢𑁆𑀢𑀘𑀺𑀢𑁆𑀢𑀁 𑀢𑀣𑀸𑀧𑀯𑀢𑁆𑀢𑀺𑀬𑀁 𑀧𑀜𑁆𑀜𑀸𑀬 𑀢𑁄𑀲𑁂𑀢𑀺 𑀉𑀢𑁆𑀢𑁂𑀚𑁂𑀢𑀺 𑀯𑀸. 𑀬𑀤𑀸 𑀯𑀸 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 ¶ 𑀉𑀧𑀲𑀫𑀲𑀼𑀔𑀸𑀦𑀥𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀪𑀸𑀯𑀦𑀸𑀬 𑀦 𑀧𑀓𑁆𑀔𑀦𑁆𑀤𑀢𑀺, 𑀢𑀤𑀸 𑀚𑀸𑀢𑀺𑀆𑀤𑀻𑀦𑀺 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀬𑀤𑀸 𑀧𑀦 𑀘𑀺𑀢𑁆𑀢𑀁 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀤𑁂𑀯 𑀪𑀸𑀯𑀦𑀸𑀯𑀻𑀢𑀺𑀁 𑀑𑀢𑀺𑀡𑁆𑀡𑀁 𑀳𑁄𑀢𑀺, 𑀢𑀤𑀸 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀓𑀺𑀜𑁆𑀘𑀺 𑀩𑁆𑀬𑀸𑀧𑀸𑀭𑀁 𑀅𑀓𑀢𑁆𑀯𑀸 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼 𑀲𑀸𑀭𑀣𑀻 𑀯𑀺𑀬 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀉𑀧𑁂𑀓𑁆𑀔𑀓𑁄𑀯 𑀳𑁄𑀢𑀺. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁄𑀢𑀺 𑀧𑀡𑀻𑀢𑁂 𑀉𑀢𑁆𑀢𑀫𑁂 𑀫𑀕𑁆𑀕𑀨𑀮𑁂 𑀅𑀥𑀺𑀫𑀼𑀢𑁆𑀢𑁄 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁄.

𑀲𑀻𑀢𑀺𑀪𑀸𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁧𑁧. 𑀆𑀯𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁬-𑁯𑁫. 𑀤𑀼𑀢𑀺𑀬𑁂 𑀅𑀘𑁆𑀙𑀦𑁆𑀤𑀺𑀓𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀭𑀳𑀺𑀢𑁄. 𑀉𑀢𑁆𑀢𑀭𑀓𑀼𑀭𑀼𑀓𑀸 𑀫𑀦𑀼𑀲𑁆𑀲𑀸 𑀅𑀘𑁆𑀙𑀦𑁆𑀤𑀺𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸. 𑀤𑀼𑀧𑁆𑀧𑀜𑁆𑀜𑁄𑀢𑀺 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀭𑀺𑀳𑀻𑀦𑁄 ¶ . 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬𑀧𑀺 𑀬𑀲𑁆𑀲 𑀪𑀯𑀗𑁆𑀕𑀁 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁄𑀧𑀺 𑀤𑀼𑀧𑁆𑀧𑀜𑁆𑀜𑁄 𑀏𑀯 𑀦𑀸𑀫. 𑀅𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀅𑀭𑀺𑀬𑀫𑀕𑁆𑀕𑀁 𑀑𑀓𑁆𑀓𑀫𑀺𑀢𑀼𑀁 𑀅𑀥𑀺𑀕𑀦𑁆𑀢𑀼𑀁 𑀅𑀪𑀩𑁆𑀩𑁄. 𑀦 𑀓𑀫𑁆𑀫𑀸𑀯𑀭𑀡𑀢𑀸𑀬𑀸𑀢𑀺𑀆𑀤𑀻𑀲𑀼 𑀅𑀪𑀩𑁆𑀩𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀆𑀯𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀻𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀦𑀺𑀲𑀁𑀲𑀯𑀕𑁆𑀕𑁄

𑁧-𑁧𑁧. 𑀧𑀸𑀢𑀼𑀪𑀸𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁬-𑁧𑁦𑁬. 𑀤𑀲𑀫𑀲𑁆𑀲 𑀧𑀞𑀫𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀅𑀝𑁆𑀞𑀫𑁂 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀸𑀯𑀸, 𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀸𑀯𑀢𑀸, 𑀫𑁂𑀢𑁆𑀢𑀸𑀧𑀝𑀺𑀧𑀢𑁆𑀢𑀺, 𑀢𑀸𑀬. 𑀲𑀸 𑀧𑀦 𑀫𑁂𑀢𑁆𑀢𑀸𑀯𑀢𑀸 𑀫𑁂𑀢𑁆𑀢𑀸𑀯𑀲𑁂𑀦 𑀧𑀸𑀭𑀺𑀘𑀭𑀺𑀬𑀸𑀢𑀺 ¶ 𑀆𑀳 ‘‘𑀫𑁂𑀢𑁆𑀢𑀸𑀬𑀼𑀢𑁆𑀢𑀸𑀬 𑀧𑀸𑀭𑀺𑀘𑀭𑀺𑀬𑀸𑀬𑀸’’𑀢𑀺. 𑀧𑀭𑀺𑀘𑀭𑀦𑁆𑀢𑀺 𑀯𑀺𑀧𑁆𑀧𑀓𑀢𑀩𑁆𑀭𑀳𑁆𑀫𑀘𑀭𑀺𑀬𑀢𑁆𑀢𑀸. 𑀧𑀭𑀺𑀘𑀺𑀡𑁆𑀡𑀲𑀢𑁆𑀣𑀼𑀓𑁂𑀦 𑀲𑀸𑀯𑀓𑁂𑀦 𑀦𑀸𑀫 𑀲𑀢𑁆𑀣𑀼𑀦𑁄 𑀬𑀸𑀯 𑀥𑀫𑁆𑀫𑁂𑀦 𑀓𑀸𑀢𑀩𑁆𑀩𑀸 𑀧𑀸𑀭𑀺𑀘𑀭𑀺𑀬𑀸, 𑀢𑀸𑀬 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑀺𑀢𑀢𑁆𑀢𑀸. 𑀦𑀯𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀧𑀸𑀢𑀼𑀪𑀸𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀦𑀺𑀲𑀁𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁭-𑁧𑁧𑁬. 𑀏𑀓𑀸𑀤𑀲𑀫𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀙𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀲𑀢𑁆𑀢𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀥𑀦𑀯𑀕𑁆𑀕𑀯𑀡𑁆𑀡𑀦𑀸

𑁧-𑁧𑁦. 𑀲𑀢𑁆𑀢𑀓𑀦𑀺𑀧𑀸𑀢𑀲𑁆𑀲 ¶ 𑀧𑀞𑀫𑁄 𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄.

𑁨. 𑀅𑀦𑀼𑀲𑀬𑀯𑀕𑁆𑀕𑁄

𑁪.𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀤𑀼𑀢𑀺𑀬𑀲𑁆𑀲 ¶ 𑀘𑀢𑀼𑀢𑁆𑀣𑁂 𑀉𑀪𑀢𑁄 𑀉𑀪𑀬𑀣𑀸, 𑀉𑀪𑀢𑁄 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀤𑁆𑀯𑀻𑀳𑀺 𑀪𑀸𑀕𑁂𑀳𑀻𑀢𑀺 𑀓𑀭𑀡𑁂 𑀦𑀺𑀲𑁆𑀲𑀓𑁆𑀓𑁂 𑀘𑁂𑀢𑀁 𑀩𑀳𑀼𑀯𑀘𑀦𑀁 ¶ . 𑀆𑀯𑀼𑀢𑁆𑀢𑀺𑀆𑀤𑀺𑀯𑀲𑁂𑀦 𑀅𑀬𑀁 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺. 𑀏𑀢𑁂𑀦 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑁄, ‘‘𑀦𑀸𑀫𑀓𑀸𑀬𑀢𑁄 𑀭𑀽𑀧𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁄, ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀯𑀸𑀤𑁄 𑀘𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀣𑁂𑀭𑀯𑀸𑀤𑀸𑀦𑀁 𑀏𑀓𑀚𑁆𑀛𑀁 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀧𑀞𑀫𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑀯𑀸𑀤𑁂 𑀉𑀪𑀢𑁄 𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀢𑀢𑀺𑀬𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺. 𑀯𑀺𑀫𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀦𑁂𑀳𑀺 𑀯𑀸 𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄𑀳𑀺 𑀅𑀢𑁆𑀣𑁄.

𑀲𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁆𑀧𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀯𑀺𑀬 𑀤𑀼𑀯𑀗𑁆𑀕𑀺𑀓𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺 𑀭𑀽𑀧𑀓𑀸𑀬𑀢𑁄 ¶ 𑀅𑀯𑀺𑀫𑀼𑀢𑁆𑀢𑀢𑁆𑀢𑀸. 𑀢𑀜𑁆𑀳𑀺 𑀓𑀺𑀮𑁂𑀲𑀓𑀸𑀬𑀢𑁄𑀯 𑀯𑀺𑀫𑀼𑀢𑁆𑀢𑀁, 𑀦 𑀭𑀽𑀧𑀓𑀸𑀬𑀢𑁄, 𑀢𑀲𑁆𑀫𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀅𑀭𑀽𑀧…𑀧𑁂… 𑀧𑀜𑁆𑀘𑀯𑀺𑀥𑁄 𑀳𑁄𑀢𑀻’’𑀢𑀺. 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄𑀢𑀺 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀼𑀢𑁆𑀢𑀁. 𑀦 𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀅𑀦𑀸𑀕𑀸𑀫𑀻 𑀦𑀸𑀫 𑀳𑁄𑀢𑀺. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀅𑀦𑁆𑀢𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀯𑀢𑁆𑀯𑀸 𑁋

‘‘𑀬𑀢𑁄 𑀘 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑁋

𑀬𑀤𑀺𑀧𑀺 𑀫𑀳𑀸𑀦𑀺𑀤𑀸𑀦𑁂 (𑀤𑀻. 𑀦𑀺. 𑁨.𑁧𑁩𑁦) 𑀯𑀼𑀢𑁆𑀢𑀁, 𑀢𑀁 𑀧𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺, 𑀇𑀥 𑀧𑀦 𑀲𑀩𑁆𑀩𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁂 𑀲𑀗𑁆𑀕𑀳𑀡𑀢𑁆𑀣𑀁 ‘‘𑀧𑀜𑁆𑀘𑀯𑀺𑀥𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀧𑀸𑀴𑀺 𑀧𑀦𑁂𑀢𑁆𑀣…𑀧𑁂… 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀺𑀦𑁄 𑀯𑀲𑁂𑀦 𑀆𑀕𑀢𑀸’’𑀢𑀺 𑀆𑀳. 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀧𑀦 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁮𑁨) 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸, 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺 ¶ , 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑁋

𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸, 𑀲𑁂𑀝𑁆𑀞𑁄 𑀘 𑀯𑀼𑀢𑁆𑀢𑁄 𑀯𑀼𑀢𑁆𑀢𑀮𑀓𑁆𑀔𑀡𑀽𑀧𑀧𑀢𑁆𑀢𑀺𑀢𑁄. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀳𑀺 𑀧𑀜𑁆𑀘𑀲𑀼 𑀧𑀼𑀭𑀺𑀫𑀸 𑀘𑀢𑁆𑀢𑀸𑀭𑁄 𑀲𑀫𑀸𑀧𑀢𑁆𑀢𑀺𑀲𑀻𑀲𑀁 𑀦𑀺𑀭𑁄𑀥𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀦𑀸𑀫. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀅𑀦𑀸𑀕𑀸𑀫𑀻 𑀢𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑁄 𑀦𑀸𑀫.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄𑀢𑀺𑀆𑀤𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀴𑀺. 𑀢𑀢𑁆𑀣 𑀓𑀢𑀫𑁄𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀧𑀼𑀕𑁆𑀕𑀮𑁄𑀢𑀺 𑀅𑀲𑀸𑀥𑀸𑀭𑀡𑀢𑁄 𑀧𑀼𑀘𑁆𑀙𑀺𑀢𑀩𑁆𑀩𑀯𑀘𑀦𑀁. 𑀇𑀥𑀸𑀢𑀺 𑀇𑀥𑀲𑁆𑀫𑀺𑀁 𑀲𑀸𑀲𑀦𑁂. 𑀏𑀓𑀘𑁆𑀘𑁄𑀢𑀺 𑀏𑀓𑁄. 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 ¶ 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀸𑀫𑀓𑀸𑀬𑀢𑁄 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀗𑁆𑀔𑀸𑀭𑀕𑀢𑀁, 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀤𑀺𑀲𑁆𑀯𑀸𑀢𑀺 𑀤𑀲𑁆𑀲𑀦𑀳𑁂𑀢𑀼. 𑀦 𑀳𑀺 𑀆𑀲𑀯𑁂 𑀧𑀜𑁆𑀜𑀸𑀬 𑀧𑀲𑁆𑀲𑀦𑁆𑀢𑀺, 𑀤𑀲𑁆𑀲𑀦𑀓𑀸𑀭𑀡𑀸 𑀧𑀦 𑀧𑀭𑀺𑀓𑁆𑀔𑀻𑀡𑀸 𑀤𑀺𑀲𑁆𑀯𑀸 𑀧𑀭𑀺𑀓𑁆𑀔𑀻𑀡𑀸𑀢𑀺 𑀯𑀼𑀢𑁆𑀢𑀸 𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸. 𑀏𑀯𑀜𑁆𑀳𑀺 𑀤𑀲𑁆𑀲𑀦𑀁 𑀆𑀲𑀯𑀸𑀦𑀁 𑀔𑀬𑀲𑁆𑀲 𑀧𑀼𑀭𑀺𑀫𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀼𑀢𑁆𑀢𑀁.

𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀺𑀲𑁂𑀲𑀢𑁄 𑀧𑀜𑁆𑀜𑀸𑀬 𑀏𑀯 𑀯𑀺𑀫𑀼𑀢𑁆𑀢𑁄, 𑀦 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀦 𑀅𑀝𑁆𑀞𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑁂𑀦 𑀲𑀸𑀢𑀺𑀲𑀬𑁂𑀦 𑀲𑀫𑀸𑀥𑀺𑀦𑀸𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀬𑁄 𑀅𑀭𑀺𑀬𑁄 𑀅𑀦𑀥𑀺𑀕𑀢𑀅𑀝𑁆𑀞𑀯𑀺𑀫𑁄𑀓𑁆𑀔𑁄 𑀲𑀩𑁆𑀩𑀲𑁄 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀥𑀺𑀕𑀢𑁂𑀧𑀺 𑀳𑀺 𑀭𑀽𑀧𑀚𑁆𑀛𑀸𑀦𑀯𑀺𑀫𑁄𑀓𑁆𑀔𑁂 𑀦 𑀲𑁄 𑀲𑀸𑀢𑀺𑀲𑀬𑀲𑀫𑀸𑀥𑀺𑀦𑀺𑀲𑁆𑀲𑀺𑀢𑁄𑀢𑀺 𑀦 𑀢𑀲𑁆𑀲 𑀯𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀢𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀧𑀦 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀢𑁂𑀦 𑀳𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀦 𑀢𑀁𑀦𑀸𑀫𑀤𑀸𑀦𑀲𑀫𑀢𑁆𑀣𑁂𑀦 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀸𑀬𑁂 𑀳𑀺 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄 𑀅𑀯𑀬𑀯𑁂𑀧𑀺 𑀤𑀺𑀲𑁆𑀲𑀢𑀺 𑀬𑀣𑀸 𑀢𑀁 ‘‘𑀲𑀢𑁆𑀢𑀺𑀲𑀬𑁄’’𑀢𑀺 𑀅𑀦𑀯𑀲𑁂𑀲𑀢𑁄 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀦 𑀏𑀓𑀤𑁂𑀲𑀪𑀽𑀢𑀭𑀽𑀧𑀚𑁆𑀛𑀸𑀦𑀧𑁆𑀧𑀝𑀺𑀓𑁆𑀔𑁂𑀧𑀯𑀲𑁂𑀦. 𑀏𑀯𑀜𑁆𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀓𑀤𑁂𑀲𑀸𑀪𑀸𑀯𑁂𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑁄 𑀦 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺.

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀢𑁄𑀢𑀺 𑀨𑀼𑀝𑁆𑀞𑀸𑀦𑀁 𑀅𑀦𑁆𑀢𑁄 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀢𑀁 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑁄 ¶ 𑀲𑀘𑁆𑀙𑀺𑀓𑀭𑀡𑀽𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀧𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄. 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑁄 𑀲𑀘𑁆𑀙𑀺𑀓𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀁 𑀬𑀣𑀸𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺 𑀓𑀭𑁄𑀢𑀻𑀢𑀺 ‘‘𑀓𑀸𑀬𑀲𑀓𑁆𑀔𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 ¶ 𑀢𑀼 ‘‘𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀢𑁂𑀦𑀸𑀳 ‘‘𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺. 𑀅𑀬𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀓𑀸𑀬𑀲𑀓𑁆𑀔𑀺𑀪𑀸𑀯𑀁 𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀕𑁆𑀕𑀫𑀕𑁆𑀕𑀧𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀯𑀺𑀬 𑀧𑀜𑁆𑀘𑀯𑀺𑀥𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 (𑀧𑀼. 𑀧. 𑀫𑀽𑀮𑀝𑀻. 𑁨𑁪) ‘‘𑀓𑀸𑀬𑀲𑀓𑁆𑀔𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀏𑀓𑀘𑁆𑀘𑁂 𑀆𑀲𑀯𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸 𑀆𑀲𑀯𑀸.

𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀏𑀢𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀲𑁆𑀲 𑀧𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀧𑀞𑀫𑀨𑀮𑀝𑁆𑀞𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀫𑀕𑁆𑀕𑀝𑁆𑀞𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑁄𑀧𑀺 𑀓𑀸𑀬𑀲𑀓𑁆𑀔𑀻 𑀯𑀺𑀬 𑀙𑀩𑁆𑀩𑀺𑀥𑁄 𑀳𑁄𑀢𑀻’’𑀢𑀺. 𑀬𑀣𑀸 𑀧𑀦 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀏𑀯𑀁 𑀅𑀬𑀫𑁆𑀧𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀘𑀢𑀽𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀦𑁆𑀢𑀺. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀬𑀸𑀣𑀸𑀯𑀢𑁄 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀧𑀦 𑀢𑀡𑁆𑀳𑀸 𑀤𑀼𑀓𑁆𑀔𑀁 𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀢𑁄 𑀢𑀁 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺, 𑀢𑀲𑁆𑀫𑀸 𑀦𑀁 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀧𑀦 𑀇𑀤𑀁 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀭𑀺𑀬𑁄 𑀧𑀦 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺, 𑀢𑁂𑀦 𑀢𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀸𑀓𑁆𑀔𑀡𑁂 𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁. 𑀇𑀤𑀸𑀦𑀺 𑀢𑀁 𑀏𑀓𑀓𑁆𑀔𑀡𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸𑀢𑀺 𑀢𑀣𑀸𑀕𑀢𑁂𑀦 𑀩𑁄𑀥𑀺𑀫𑀡𑁆𑀟𑁂 𑀧𑀝𑀺𑀯𑀺𑀤𑁆𑀥𑀸 𑀯𑀺𑀤𑀺𑀢𑀸 𑀧𑀸𑀓𑀝𑀸 𑀓𑀢𑀸. 𑀥𑀫𑁆𑀫𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸. 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀲𑀼𑀤𑀺𑀝𑁆𑀞𑀸. 𑀯𑁄𑀘𑀭𑀺𑀢𑀸𑀢𑀺 𑀲𑀼𑀘𑀭𑀺𑀢𑀸, 𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀘𑀭𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀬𑀦𑁆𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺.

𑀲𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀤𑀳𑀦𑀯𑀲𑁂𑀦 𑀯𑀺𑀫𑀼𑀢𑁆𑀢𑁄. 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲𑀧𑀺 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑀁 ¶ 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 ¶ 𑀅𑀢𑁆𑀣𑁄. 𑀓𑀺𑀁 𑀧𑀦 𑀦𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀸𑀦𑀢𑁆𑀢𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺? 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑀺 𑀆𑀕𑀫𑀦𑀫𑁆𑀳𑀺 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀅𑀧𑁆𑀧𑀤𑀼𑀓𑁆𑀔𑁂𑀦 𑀅𑀓𑀲𑀺𑀭𑁂𑀦 𑀅𑀓𑀺𑀮𑀫𑀦𑁆𑀢𑁄𑀯 𑀲𑀓𑁆𑀓𑁄𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀼𑀁, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀧𑀦 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀲𑀓𑁆𑀓𑁄𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀼𑀁, 𑀢𑀲𑁆𑀫𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀲𑀤𑁆𑀤𑀳𑀦𑁆𑀢𑀲𑁆𑀲𑀸𑀢𑀺 ‘‘𑀏𑀓𑀁𑀲𑀢𑁄 𑀅𑀬𑀁 𑀧𑀝𑀺𑀧𑀤𑀸 𑀓𑀺𑀮𑁂𑀲𑀓𑁆𑀔𑀬𑀁 𑀆𑀯𑀳𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑀢𑁆𑀢𑀸’’𑀢𑀺 𑀏𑀯𑀁 𑀲𑀤𑁆𑀤𑀳𑀦𑁆𑀢𑀲𑁆𑀲. 𑀬𑀲𑁆𑀫𑀸 𑀧𑀦𑀲𑁆𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀧𑀳𑀸𑀦𑀯𑀲𑁂𑀦 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀧𑀲𑁆𑀲𑀢𑁄 𑀢𑀢𑁆𑀣 𑀢𑀢𑁆𑀣 𑀧𑀘𑁆𑀘𑀓𑁆𑀔𑀢𑀸𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀺𑀬𑀸’’𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀏𑀢𑁆𑀣 𑀘 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸𑀢𑀺 𑀯𑀘𑀦𑁂𑀦 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀦𑀁 𑀧𑀜𑁆𑀜𑀸𑀦𑀸𑀦𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀫𑁆𑀧𑀺 (𑀧𑀼. 𑀧. 𑀅𑀝𑁆𑀞. 𑁨𑁮) ‘‘𑀦𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀧𑀜𑁆𑀜𑀸𑀬 𑀦𑀸𑀦𑀢𑁆𑀢𑀁 𑀅𑀢𑁆𑀣𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀆𑀭𑀫𑁆𑀫𑀡𑀁 𑀬𑀸𑀣𑀸𑀯𑀢𑁄 𑀥𑀸𑀭𑁂𑀢𑀺 𑀅𑀯𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀧𑀜𑁆𑀜𑀸. 𑀢𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀅𑀥𑀺𑀫𑀢𑁆𑀢𑀢𑀸𑀬 𑀧𑀼𑀩𑁆𑀩𑀗𑁆𑀕𑀫𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀢𑁂𑀦𑀸𑀳 ‘‘𑀥𑀫𑁆𑀫𑁄’’𑀢𑀺𑀆𑀤𑀺. 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀧𑀜𑁆𑀜𑀸𑀧𑀥𑀸𑀦𑀁. ‘‘𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀏𑀲𑁂𑀯 𑀦𑀬𑁄𑀢𑀺 𑀅𑀢𑀺𑀤𑀺𑀲𑀢𑀺. 𑀧𑀜𑁆𑀜𑀁 𑀯𑀸𑀳𑁂𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻, 𑀧𑀜𑁆𑀜𑀁 𑀲𑀸𑀢𑀺𑀲𑀬𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺. 𑀧𑀜𑁆𑀜𑀸 𑀯𑀸 𑀧𑀼𑀕𑁆𑀕𑀮𑀁 𑀯𑀸𑀳𑁂𑀢𑀺 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀕𑀫𑁂𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻. 𑀲𑀤𑁆𑀥𑀸𑀯𑀸𑀳𑀻𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀺𑀓𑀣𑀸𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀻𑀲𑀼 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀯𑀢𑁆𑀢𑀩𑁆𑀩𑀓𑀣𑀸. 𑀢𑀲𑁆𑀫𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁭𑁩, 𑁮𑁮𑁯) 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁄 𑀏𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁭𑁭𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀤𑀓𑀽𑀧𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 ¶ 𑀏𑀓𑀦𑁆𑀢𑀓𑀸𑀴𑀓𑁂𑀳𑀻𑀢𑀺 𑀦𑀢𑁆𑀣𑀺𑀓𑀯𑀸𑀤𑀅𑀳𑁂𑀢𑀼𑀓𑀯𑀸𑀤𑀅𑀓𑀺𑀭𑀺𑀬𑀯𑀸𑀤𑀲𑀗𑁆𑀔𑀸𑀢𑁂𑀳𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑁂𑀳𑀺. 𑀢𑁂𑀦𑀸𑀳 ‘‘𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 ¶ 𑀏𑀓𑀯𑀸𑀭𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀬𑁂𑀯 𑀲𑁄 𑀳𑁄𑀢𑀺. 𑀏𑀢𑀲𑁆𑀲 𑀳𑀺 𑀧𑀼𑀦 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺 𑀫𑀓𑁆𑀔𑀮𑀺𑀕𑁄𑀲𑀸𑀮𑀸𑀤𑀬𑁄 𑀯𑀺𑀬. 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸 𑀦𑀭𑀓𑀕𑁆𑀕𑀻𑀦𑀁𑀬𑁂𑀯 𑀆𑀳𑀸𑀭𑁄. 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀽𑀢𑀺 𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀤𑁆𑀥𑀸 𑀦𑀸𑀫 𑀲𑀸𑀳𑀼 𑀮𑀤𑁆𑀥𑀓𑀸𑀢𑀺 𑀉𑀫𑁆𑀫𑀼𑀚𑁆𑀚𑀢𑀺, 𑀲𑁄 𑀢𑀸𑀯𑀢𑁆𑀢𑀓𑁂𑀦𑁂𑀯 𑀓𑀼𑀲𑀮𑁂𑀦 𑀉𑀫𑁆𑀫𑀼𑀚𑁆𑀚𑀢𑀺 𑀦𑀸𑀫. 𑀲𑀸𑀥𑀼 𑀳𑀺𑀭𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀗𑁆𑀓𑀯𑀸𑀭𑁂𑀢𑀺 𑀭𑀚𑀓𑀸𑀦𑀁 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑁂, 𑀲𑀼𑀭𑀸𑀧𑀭𑀺𑀲𑁆𑀲𑀸𑀯𑀦𑁂 𑀯𑀸. 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺 ‘‘𑀏𑀯𑀁 𑀲𑀸𑀥𑀼 𑀲𑀤𑁆𑀥𑀸’’𑀢𑀺 𑀇𑀫𑁂𑀲𑀁 𑀲𑀤𑁆𑀥𑀸𑀤𑀻𑀦𑀁 𑀯𑀲𑁂𑀦 𑀏𑀓𑀯𑀸𑀭𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀳𑀸𑀦𑀺𑀬𑀸 𑀧𑀼𑀦 𑀦𑀺𑀫𑀼𑀚𑁆𑀚𑀢𑀺𑀬𑁂𑀯 𑀤𑁂𑀯𑀤𑀢𑁆𑀢𑀸𑀤𑀬𑁄 𑀯𑀺𑀬. 𑀤𑁂𑀯𑀤𑀢𑁆𑀢𑁄 𑀳𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺 𑀧𑀼𑀦 𑀩𑀼𑀤𑁆𑀥𑀸𑀦𑀁 𑀧𑀝𑀺𑀧𑀓𑁆𑀔𑀢𑀸𑀬 𑀢𑁂𑀳𑀺 𑀕𑀼𑀡𑁂𑀳𑀺 𑀧𑀭𑀺𑀳𑀻𑀦𑁄 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁 𑀲𑀗𑁆𑀖𑀪𑁂𑀤𑀓𑀫𑁆𑀫𑀜𑁆𑀘 𑀓𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂𑀦 𑀘𑀼𑀢𑀺𑀘𑀺𑀢𑁆𑀢𑀫𑀦𑀦𑁆𑀢𑀭𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄. 𑀓𑁄𑀓𑀸𑀮𑀺𑀓𑁄 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀉𑀧𑀯𑀤𑀺𑀢𑁆𑀯𑀸 𑀧𑀤𑀼𑀫𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄.

𑀦𑁂𑀯 𑀳𑀸𑀬𑀢𑀺 𑀦𑁄 𑀯𑀟𑁆𑀠𑀢𑀻𑀢𑀺 𑀅𑀧𑁆𑀧𑀳𑁄𑀦𑀓𑀓𑀸𑀮𑁂𑀧𑀺 𑀦 𑀳𑀸𑀬𑀢𑀺, 𑀧𑀳𑁄𑀦𑀓𑀓𑀸𑀮𑁂𑀧𑀺 𑀦 𑀯𑀟𑁆𑀠𑀢𑀺. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀕𑀸𑀭𑀺𑀓𑁂𑀦𑀧𑀺 𑀅𑀦𑀕𑀸𑀭𑀺𑀓𑁂𑀦𑀧𑀺 𑀤𑀻𑀧𑁂𑀢𑀩𑁆𑀩𑀁. 𑀏𑀓𑀘𑁆𑀘𑁄 𑀳𑀺 𑀅𑀕𑀸𑀭𑀺𑀓𑁄 𑀅𑀧𑁆𑀧𑀳𑁄𑀦𑀓𑀓𑀸𑀮𑁂 𑀧𑀓𑁆𑀔𑀺𑀓𑀪𑀢𑁆𑀢𑀁 𑀯𑀲𑁆𑀲𑀺𑀓𑀁 𑀯𑀸 𑀉𑀧𑀦𑀺𑀩𑀦𑁆𑀥𑀸𑀧𑁂𑀲𑀺, 𑀲𑁄 𑀧𑀘𑁆𑀙𑀸 𑀧𑀳𑁄𑀦𑀓𑀓𑀸𑀮𑁂𑀧𑀺 𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀫𑀢𑁆𑀢𑀫𑁂𑀯 𑀧𑀯𑀢𑁆𑀢𑁂𑀢𑀺. 𑀅𑀦𑀕𑀸𑀭𑀺𑀓𑁄𑀧𑀺 𑀆𑀤𑀺𑀫𑁆𑀳𑀺 𑀅𑀧𑁆𑀧𑀳𑁄𑀦𑀓𑀓𑀸𑀮𑁂 𑀉𑀤𑁆𑀤𑁂𑀲𑀁 𑀥𑀼𑀢𑀗𑁆𑀕𑀁 𑀯𑀸 𑀕𑀡𑁆𑀳𑀸𑀢𑀺, 𑀫𑁂𑀥𑀸𑀯𑀻 𑀩𑀮𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀳𑁄𑀦𑀓𑀓𑀸𑀮𑁂 𑀢𑀢𑁄 𑀉𑀢𑁆𑀢𑀭𑀺𑀁 𑀦 𑀓𑀭𑁄𑀢𑀺. 𑀏𑀯𑀁 𑀧𑀼𑀕𑁆𑀕𑀮𑁄𑀢𑀺 𑀏𑀯𑀁 𑀇𑀫𑀸𑀬 𑀲𑀤𑁆𑀥𑀸𑀤𑀻𑀦𑀁 𑀞𑀺𑀢𑀺𑀬𑀸 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀻𑀢𑀺 𑀲𑀓𑀤𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑀢𑀦𑀼𑀢𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀤𑀺𑀲𑀸𑀪𑀺𑀫𑀼𑀔𑁄 𑀢𑀭𑀢𑀺 𑀦𑀸𑀫.

𑀧𑀝𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀫𑁂 𑀧𑀦 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀉𑀤𑀓𑁄𑀧𑀫𑁂𑀦 𑀤𑀻𑀧𑀺𑀢𑀸. 𑀲𑀢𑁆𑀢 𑀓𑀺𑀭 𑀚𑀗𑁆𑀖𑀯𑀸𑀡𑀺𑀚𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀧𑀼𑀡𑁆𑀡𑀦𑀤𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀼 𑀧𑀞𑀫𑀁 𑀑𑀢𑀺𑀡𑁆𑀡𑁄 𑀉𑀤𑀓𑀪𑀻𑀭𑀼𑀓𑁄 𑀧𑀼𑀭𑀺𑀲𑁄 𑀑𑀢𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀯𑀲𑁆𑀲𑀁𑀯 𑀫𑀘𑁆𑀙𑀓𑀘𑁆𑀙𑀧𑀪𑀢𑁆𑀢𑀁 𑀚𑀸𑀢𑁄. 𑀤𑀼𑀢𑀺𑀬𑁄 𑀑𑀢𑀺𑀡𑁆𑀡𑀝𑁆𑀞𑀸𑀦𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 ¶ 𑀲𑀓𑀺𑀁 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀦𑀺𑀫𑀼𑀕𑁆𑀕𑁄 𑀉𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀦𑁆𑀢𑁄𑀬𑁂𑀯 𑀫𑀘𑁆𑀙𑀓𑀘𑁆𑀙𑀧𑀪𑀢𑁆𑀢𑀁 𑀚𑀸𑀢𑁄. 𑀢𑀢𑀺𑀬𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀺𑀢𑁄 𑀫𑀚𑁆𑀛𑁂 𑀦𑀤𑀺𑀬𑀸 𑀞𑀢𑁆𑀯𑀸 𑀦𑁂𑀯 𑀑𑀭𑀢𑁄 𑀆𑀕𑀦𑁆𑀢𑀼𑀁, 𑀦 𑀧𑀸𑀭𑀁 𑀕𑀦𑁆𑀢𑀼𑀁 𑀅𑀲𑀓𑁆𑀔𑀺. 𑀘𑀢𑀼𑀢𑁆𑀣𑁄 𑀉𑀝𑁆𑀞𑀸𑀬 𑀞𑀺𑀢𑁄 𑀉𑀢𑁆𑀢𑀭𑀡𑀢𑀺𑀢𑁆𑀣𑀁 𑀑𑀮𑁄𑀓𑁂𑀲𑀺. 𑀧𑀜𑁆𑀘𑀫𑁄 𑀉𑀢𑁆𑀢𑀭𑀡𑀢𑀺𑀢𑁆𑀣𑀁 𑀑𑀮𑁄𑀓𑁂𑀢𑁆𑀯𑀸 𑀧𑀢𑀭𑀢𑀺. 𑀙𑀝𑁆𑀞𑁄 𑀢𑀁 𑀤𑀺𑀲𑁆𑀯𑀸 𑀧𑀸𑀭𑀺𑀫𑀢𑀻𑀭𑀁 𑀕𑀦𑁆𑀢𑁆𑀯𑀸 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀺𑀢𑁄. 𑀲𑀢𑁆𑀢𑀫𑁄 𑀧𑀸𑀭𑀺𑀫𑀢𑀻𑀭𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀸𑀤𑀻𑀳𑀺 𑀦𑁆𑀳𑀢𑁆𑀯𑀸 𑀯𑀭𑀯𑀢𑁆𑀣𑀸𑀤𑀻𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀭𑀪𑀺𑀯𑀺𑀮𑁂𑀧𑀦𑀁 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀫𑀸𑀮𑀸𑀤𑀻𑀦𑀺 𑀧𑀺𑀮𑀦𑁆𑀥𑀺𑀢𑁆𑀯𑀸 𑀦𑀸𑀦𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀫𑀳𑀸𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀫𑀸𑀭𑀼𑀳𑀺𑀢𑁆𑀯𑀸 𑀉𑀢𑁆𑀢𑀫𑀪𑁄𑀚𑀦𑀁 𑀪𑀼𑀜𑁆𑀚𑀢𑀺.

𑀢𑀢𑁆𑀣 ¶ 𑀚𑀗𑁆𑀖𑀯𑀸𑀡𑀺𑀚𑀸 𑀯𑀺𑀬 𑀇𑀫𑁂 𑀲𑀢𑁆𑀢 𑀧𑀼𑀕𑁆𑀕𑀮𑀸, 𑀦𑀤𑀻 𑀯𑀺𑀬 𑀯𑀝𑁆𑀝𑀁, 𑀧𑀞𑀫𑀲𑁆𑀲 𑀉𑀤𑀓𑀪𑀻𑀭𑀼𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀑𑀢𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀦𑀺𑀫𑀼𑀚𑁆𑀚𑀦𑀁 𑀯𑀺𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀦𑀁, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀦𑀧𑀼𑀭𑀺𑀲𑁄 𑀯𑀺𑀬 𑀲𑀤𑁆𑀥𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀫𑀢𑁆𑀣𑀓𑁂𑀦 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀸𑀲𑀁 𑀳𑀸𑀦𑀺𑀬𑀸 𑀦𑀺𑀫𑀼𑀕𑁆𑀕𑀧𑀼𑀕𑁆𑀕𑀮𑁄, 𑀫𑀚𑁆𑀛𑁂 𑀦𑀤𑀺𑀬𑀸 𑀞𑀢𑁆𑀯𑀸 𑀯𑀺𑀬 𑀲𑀤𑁆𑀥𑀸𑀤𑀻𑀦𑀁 𑀞𑀺𑀢𑀺𑀬𑀸 𑀞𑀺𑀢𑀺𑀧𑀼𑀕𑁆𑀕𑀮𑁄, 𑀉𑀢𑁆𑀢𑀭𑀡𑀢𑀺𑀢𑁆𑀣𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀬 𑀲𑁄𑀢𑀸𑀧𑀦𑁆𑀦𑁄, 𑀧𑀢𑀭𑀦𑁆𑀢𑀧𑀼𑀭𑀺𑀲𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑀸𑀯𑀝𑁆𑀝𑀢𑀸𑀬 𑀧𑀢𑀭𑀦𑁆𑀢𑁄 𑀲𑀓𑀤𑀸𑀕𑀸𑀫𑀻, 𑀢𑀭𑀺𑀢𑁆𑀯𑀸 𑀓𑀝𑀺𑀫𑀢𑁆𑀢𑁂 𑀉𑀤𑀓𑁂 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀅𑀦𑀸𑀯𑀝𑁆𑀝𑀥𑀫𑁆𑀫𑀢𑁆𑀢𑀸 𑀅𑀦𑀸𑀕𑀸𑀫𑀻, 𑀦𑁆𑀳𑀢𑁆𑀯𑀸 𑀧𑀸𑀭𑀺𑀫𑀢𑀻𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀣𑀮𑁂 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀑𑀖𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀞𑀺𑀢𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄, 𑀣𑀮𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀉𑀢𑁆𑀢𑀫𑀪𑁄𑀚𑀦𑀪𑀼𑀜𑁆𑀚𑀦𑀁 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀯𑀻𑀢𑀺𑀦𑀸𑀫𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀉𑀤𑀓𑀽𑀧𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁯. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬-𑁧𑁯. 𑀙𑀝𑁆𑀞𑁂 ‘‘𑀇𑀥 𑀲𑀫𑀲𑀻𑀲𑀻 𑀓𑀣𑀺𑀢𑁄’’𑀢𑀺 𑀯𑀢𑁆𑀯𑀸 𑀏𑀯𑀁 𑀲𑀫𑀲𑀻𑀲𑀺𑀢𑀁 𑀯𑀺𑀪𑀚𑀺𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀭𑁄𑀕𑀯𑀲𑁂𑀦 𑀲𑀫𑀲𑀻𑀲𑀻 𑀭𑁄𑀕𑀲𑀫𑀲𑀻𑀲𑀻. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀯𑁂𑀮𑀸𑀬𑀫𑁂𑀯. 𑀬𑁄 𑀘𑀓𑁆𑀔𑀼𑀭𑁄𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺 ‘‘𑀇𑀢𑁄 𑀅𑀦𑀼𑀝𑁆𑀞𑀺𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀅𑀣𑀲𑁆𑀲 𑀅𑀭𑀳𑀢𑁆𑀢𑀜𑁆𑀘 𑀭𑁄𑀕𑀢𑁄 𑀯𑀼𑀝𑁆𑀞𑀸𑀦𑀜𑁆𑀘 𑀏𑀓𑀓𑀸𑀮𑀫𑁂𑀯 𑀳𑁄𑀢𑀺 ¶ , 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀇𑀭𑀺𑀬𑀸𑀧𑀣𑀲𑁆𑀲 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀇𑀭𑀺𑀬𑀸𑀧𑀣𑀦𑁆𑀢𑀭𑀲𑀫𑀸𑀬𑁄𑀕𑁄. 𑀬𑁄 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀁 𑀅𑀥𑀺𑀝𑁆𑀞𑀸𑀬 ‘‘𑀅𑀯𑀺𑀓𑁄𑀧𑁂𑀢𑁆𑀯𑀸𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺. 𑀅𑀣𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀇𑀭𑀺𑀬𑀸𑀧𑀣𑀯𑀺𑀓𑁄𑀧𑀦𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺, 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫𑀸𑀢𑀺 𑀏𑀢𑁆𑀣 ‘‘𑀧𑀮𑀺𑀩𑁄𑀥𑀲𑀻𑀲𑀁 𑀫𑀸𑀦𑁄, 𑀧𑀭𑀸𑀫𑀸𑀲𑀲𑀻𑀲𑀁 𑀤𑀺𑀝𑁆𑀞𑀺, 𑀯𑀺𑀓𑁆𑀔𑁂𑀧𑀲𑀻𑀲𑀁 𑀉𑀤𑁆𑀥𑀘𑁆𑀘𑀁, 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀸, 𑀅𑀥𑀺𑀫𑁄𑀓𑁆𑀔𑀲𑀻𑀲𑀁 𑀲𑀤𑁆𑀥𑀸, 𑀧𑀕𑁆𑀕𑀳𑀲𑀻𑀲𑀁 𑀯𑀻𑀭𑀺𑀬𑀁, 𑀉𑀧𑀝𑁆𑀞𑀸𑀦𑀲𑀻𑀲𑀁 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀲𑀻𑀲𑀁 𑀲𑀫𑀸𑀥𑀺, 𑀤𑀲𑁆𑀲𑀦𑀲𑀻𑀲𑀁 𑀧𑀜𑁆𑀜𑀸, 𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀘𑀼𑀢𑀺𑀲𑀻𑀲𑀁 𑀯𑀺𑀫𑁄𑀓𑁆𑀔𑁄, 𑀲𑀗𑁆𑀔𑀸𑀭𑀲𑀻𑀲𑀁 𑀦𑀺𑀭𑁄𑀥𑁄’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁩.𑁩𑁩) 𑀯𑀼𑀢𑁆𑀢𑁂𑀲𑀼 𑀲𑀢𑁆𑀢𑀭𑀲𑀲𑀼 𑀲𑀻𑀲𑁂𑀲𑀼 𑀧𑀯𑀢𑁆𑀢𑀲𑀻𑀲𑀁 𑀓𑀺𑀮𑁂𑀲𑀲𑀻𑀲𑀦𑁆𑀢𑀺 𑀤𑁆𑀯𑁂 𑀲𑀻𑀲𑀸𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺 𑁋 ‘‘𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘𑀸’’𑀢𑀺 𑀯𑀘𑀦𑀢𑁄. 𑀢𑁂𑀲𑀼 𑀓𑀺𑀮𑁂𑀲𑀲𑀻𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁 𑀅𑀯𑀺𑀚𑁆𑀚𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 ¶ . 𑀅𑀜𑁆𑀜𑀁 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀚𑀻𑀯𑀺𑀢𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁. 𑀬𑀲𑁆𑀲 𑀘𑁂𑀢𑀁 𑀲𑀻𑀲𑀤𑁆𑀯𑀬𑀁 𑀲𑀫𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀲𑁄 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫.

𑀓𑀣𑀁 𑀧𑀦𑀺𑀤𑀁 𑀲𑀫𑀁 𑀳𑁄𑀢𑀻𑀢𑀺? 𑀯𑀸𑀭𑀲𑀫𑀢𑀸𑀬. 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀭𑀳𑀢𑁆𑀢𑀫𑀕𑁆𑀕𑁂 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲𑀧𑀭𑀺𑀬𑀸𑀤𑀸𑀦𑀫𑁆𑀧𑀺 𑀲𑀫𑀁 𑀳𑁄𑀢𑀻𑀢𑀺 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬. 𑀯𑀸𑀭𑀲𑀫𑀯𑀼𑀢𑁆𑀢𑀺𑀤𑀸𑀬𑀓𑁂𑀦 𑀳𑀺 𑀫𑀕𑁆𑀕𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. ‘‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁭𑁮; 𑀲𑀁. 𑀦𑀺. 𑁩.𑁧𑁨, 𑁧𑁪) 𑀯𑀘𑀦𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀲𑀫𑀸𑀧𑀦𑁂𑀦 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀲𑀫𑁆𑀧𑀸𑀧𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀸𑀬 𑀯𑀸𑀭𑀯𑀼𑀢𑁆𑀢𑀺𑀬𑀸 𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀲𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀬𑀲𑁆𑀫𑀸 𑀧𑀦𑀲𑁆𑀲…𑀧𑁂... 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺.

𑀆𑀬𑀼𑀦𑁄 𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑁂𑀦𑀸𑀳 ‘‘𑀬𑁄 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀽’’𑀢𑀺𑀆𑀤𑀺 ¶ . 𑀯𑁂𑀫𑀚𑁆𑀛𑁂𑀢𑀺 𑀅𑀯𑀺𑀳𑀸𑀤𑀻𑀲𑀼 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀆𑀬𑀼𑀦𑁄 𑀯𑁂𑀫𑀚𑁆𑀛𑁂. 𑀆𑀬𑀼𑀯𑁂𑀫𑀚𑁆𑀛𑀁 𑀉𑀧𑀳𑀘𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑁂𑀦𑀸𑀳 ‘‘𑀬𑁄 𑀢𑀢𑁆𑀣𑁂𑀯𑀸’’𑀢𑀺𑀆𑀤𑀺. 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀅𑀦𑀼𑀲𑁆𑀲𑀸𑀳𑁂𑀦 𑀅𑀓𑀺𑀮𑀫𑀦𑁆𑀢𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀢𑀸𑀬 𑀲𑀼𑀔𑁂𑀦𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑁂𑀦𑀸𑀳 ‘‘𑀬𑁄 𑀢𑁂𑀲𑀁𑀬𑁂𑀯𑀸’’𑀢𑀺𑀆𑀤𑀺. 𑀢𑁂𑀲𑀁𑀬𑁂𑀯 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀅𑀧𑁆𑀧𑀬𑁄𑀕𑁂𑀦𑀸𑀢𑀺 𑀅𑀥𑀺𑀫𑀢𑁆𑀢𑀧𑁆𑀧𑀬𑁄𑀕𑁂𑀦 𑀯𑀺𑀦𑀸 𑀅𑀧𑁆𑀧𑀓𑀲𑀺𑀭𑁂𑀦. 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀤𑀼𑀓𑁆𑀔𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦 𑀉𑀤𑁆𑀥𑀫𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀜𑁆𑀘𑀸𑀢𑀺, 𑀉𑀤𑁆𑀥𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁄 𑀉𑀤𑁆𑀥𑀫𑀲𑁆𑀲 𑀫𑀕𑁆𑀕𑀲𑁄𑀢𑀦𑁆𑀢𑀺 𑀉𑀤𑁆𑀥𑀁𑀪𑁄𑀢𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻.

𑀏𑀢𑁆𑀣 𑀧𑀦 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀅𑀯𑀺𑀳𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀅𑀬𑀜𑁆𑀳𑀺 𑀅𑀯𑀺𑀳𑁂𑀲𑀼 𑀓𑀧𑁆𑀧𑀲𑀳𑀲𑁆𑀲𑀁 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀅𑀢𑀧𑁆𑀧𑀁 𑀕𑀘𑁆𑀙𑀢𑀺, 𑀢𑀢𑁆𑀭𑀸𑀧𑀺 𑀤𑁆𑀯𑁂 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀲𑀼𑀤𑀲𑁆𑀲𑀁 𑀕𑀘𑁆𑀙𑀢𑀺, 𑀢𑀢𑁆𑀭𑀸𑀧𑀺 𑀘𑀢𑁆𑀢𑀸𑀭𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀲𑀼𑀤𑀲𑁆𑀲𑀺𑀁 𑀕𑀘𑁆𑀙𑀢𑀺, 𑀢𑀢𑁆𑀭𑀸𑀧𑀺 𑀅𑀝𑁆𑀞 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 ¶ 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀯𑀲𑀦𑁆𑀢𑁄 𑀅𑀕𑁆𑀕𑀫𑀕𑁆𑀕𑀁 𑀅𑀥𑀺𑀕𑀘𑁆𑀙𑀢𑀺. 𑀢𑀢𑁆𑀣 𑀬𑁄 𑀅𑀯𑀺𑀳𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀁 𑀯𑀸 𑀘𑀢𑀼𑀢𑁆𑀣𑀁 𑀯𑀸 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀓𑀸𑀫𑀪𑀯𑀢𑁄 𑀘𑀯𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑁂𑀲𑀼 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀳𑁂𑀝𑁆𑀞𑀸 𑀘𑀢𑀽𑀲𑀼 𑀤𑁂𑀯𑀮𑁄𑀓𑁂𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺.

𑀏𑀢𑁂 𑀧𑀦 𑀅𑀯𑀺𑀳𑁂𑀲𑀼 𑀉𑀧𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑀯𑀲𑁂𑀦 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄𑀢𑀺 𑀧𑀜𑁆𑀘𑀯𑀺𑀥𑁄, 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀯𑀺𑀪𑀸𑀕𑁂𑀦 𑀤𑀲 𑀳𑁄𑀦𑁆𑀢𑀺, 𑀢𑀣𑀸 𑀅𑀢𑀧𑁆𑀧𑀲𑀼𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀽𑀢𑀺 𑀘𑀢𑁆𑀢𑀸𑀭𑁄 𑀤𑀲𑀓𑀸𑀢𑀺 𑀘𑀢𑁆𑀢𑀸𑀭𑀻𑀲𑀁. 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺, 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 ¶ 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀘𑀢𑁆𑀢𑀸𑀭𑁄, 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀯𑀺𑀪𑀸𑀕𑁂𑀦 𑀅𑀝𑁆𑀞𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀭𑀻𑀲𑀁 𑀅𑀦𑀸𑀕𑀸𑀫𑀺𑀦𑁄. 𑀲𑀢𑁆𑀢𑀫𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀺𑀤𑁆𑀤𑀲𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀻𑀢𑀺 𑀆𑀤𑀺𑀲𑀤𑁆𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀦𑀺𑀤𑁆𑀤𑀲𑀸𑀤𑀺𑀯𑀢𑁆𑀣𑀽𑀦𑀻’’𑀢𑀺. 𑀦𑀢𑁆𑀣𑀺 𑀇𑀤𑀸𑀦𑀺 𑀇𑀫𑀲𑁆𑀲 𑀤𑀲𑀸𑀢𑀺 𑀦𑀺𑀤𑁆𑀤𑀲𑁄. 𑀧𑀜𑁆𑀳𑁄𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄. 𑀧𑀼𑀦 𑀤𑀲𑀯𑀲𑁆𑀲𑁄 𑀦 𑀳𑁄𑀢𑀻𑀢𑀺 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀺𑀭𑀸’’𑀢𑀺 𑀓𑀺𑀭𑀲𑀤𑁆𑀤𑀕𑁆𑀕𑀳𑀡𑀁. 𑀦𑀺𑀤𑁆𑀤𑀲𑁄𑀢𑀺 𑀘𑁂𑀢𑀁 𑀯𑀘𑀦𑀫𑀢𑁆𑀢𑀁. 𑀢𑀲𑁆𑀲 𑀦𑀺𑀩𑁆𑀩𑀻𑀲𑀸𑀤𑀺𑀪𑀸𑀯𑀲𑁆𑀲 𑀯𑀺𑀬 𑀦𑀺𑀦𑁆𑀦𑀯𑀸𑀤𑀺𑀪𑀸𑀯𑀲𑁆𑀲 𑀘 𑀇𑀘𑁆𑀙𑀺𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀸𑀫𑁂 𑀯𑀺𑀘𑀭𑀦𑁆𑀢𑁄𑀢𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄. 𑀦 𑀇𑀤𑀁 𑀢𑀺𑀢𑁆𑀣𑀺𑀬𑀸𑀦𑀁 𑀅𑀥𑀺𑀯𑀘𑀦𑀁 𑀢𑁂𑀲𑀼 𑀢𑀦𑁆𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀸𑀯𑀸, 𑀲𑀸𑀲𑀦𑁂𑀧𑀺 𑀲𑁂𑀔𑀲𑁆𑀲𑀧𑀺 𑀦 𑀇𑀤𑀁 𑀅𑀥𑀺𑀯𑀘𑀦𑀁, 𑀓𑀺𑀫𑀗𑁆𑀕𑀁 𑀧𑀦 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀬𑀲𑁆𑀲 𑀧𑀦𑁂𑀢𑀁 𑀅𑀥𑀺𑀯𑀘𑀦𑀁 𑀬𑁂𑀦 𑀘 𑀓𑀸𑀭𑀡𑁂𑀦, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀔𑀻𑀡𑀸𑀲𑀯𑀲𑁆𑀲𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑁄 𑀳𑀺𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀓𑀸𑀭𑀡𑀁. 𑀧𑀭𑀫𑁆𑀧𑀭𑀸𑀬 𑀇𑀢𑀭𑀸𑀦𑀺 𑀬𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺𑀁.

𑀲𑀺𑀓𑁆𑀔𑀸𑀬 𑀲𑀫𑁆𑀫𑀤𑁂𑀯 𑀆𑀤𑀸𑀦𑀁 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁. 𑀢𑀁 𑀧𑀦𑀲𑁆𑀲𑀸 𑀧𑀸𑀭𑀺𑀧𑀽𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀢𑁆𑀢𑀬𑀧𑀽𑀭𑀡𑁂’’𑀢𑀺. 𑀲𑀺𑀓𑁆𑀔𑀸𑀬 𑀯𑀸 𑀲𑀫𑁆𑀫𑀤𑁂𑀯 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀭𑀓𑁆𑀔𑀡𑀁 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁. 𑀢𑀜𑁆𑀘 𑀅𑀢𑁆𑀣𑀢𑁄 𑀧𑀽𑀭𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀭𑀓𑁆𑀔𑀡𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄, 𑀭𑀓𑁆𑀔𑀡𑁂 ¶ 𑀘 𑀧𑀭𑀺𑀧𑀽𑀭𑀡𑀢𑁄. 𑀩𑀮𑀯𑀘𑁆𑀙𑀦𑁆𑀤𑁄𑀢𑀺 𑀤𑀴𑁆𑀳𑀘𑁆𑀙𑀦𑁆𑀤𑁄. 𑀆𑀬𑀢𑀺𑀦𑁆𑀢𑀺 𑀅𑀦𑀦𑁆𑀢𑀭𑀸𑀦𑀸𑀕𑀢𑀤𑀺𑀯𑀲𑀸𑀤𑀺𑀓𑀸𑀮𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀦𑀸𑀕𑀢𑀪𑀯𑁄𑀢𑀺 𑀆𑀳 ‘‘𑀅𑀦𑀸𑀕𑀢𑁂 𑀧𑀼𑀦𑀤𑀺𑀯𑀲𑀸𑀤𑀻𑀲𑀼𑀧𑀻’’𑀢𑀺. 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀢𑀢𑁆𑀣 𑀦𑀺𑀩𑀤𑁆𑀥𑀪𑀢𑁆𑀢𑀺𑀢𑀸 𑀅𑀯𑀺𑀕𑀢𑀧𑁂𑀫𑀢𑀸. 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀤𑁂𑀯 𑀦𑀺𑀚𑁆𑀛𑀸𑀦𑀁 𑀥𑀫𑁆𑀫𑀦𑀺𑀲𑀸𑀫𑀦𑀸𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀡𑁆𑀳𑀸𑀯𑀺𑀦𑀬𑁂𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑀲𑀺𑀤𑁆𑀥𑁂 𑀢𑀡𑁆𑀳𑀸𑀯𑀺𑀓𑁆𑀔𑀫𑁆𑀪𑀦𑁂. 𑀏𑀓𑀻𑀪𑀸𑀯𑁂𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀯𑀺𑀕𑀫𑀲𑀺𑀤𑁆𑀥𑁂 𑀯𑀺𑀯𑁂𑀓𑀯𑀸𑀲𑁂. 𑀯𑀻𑀭𑀺𑀬𑀸𑀭𑀫𑁆𑀪𑁂𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲 𑀧𑀕𑁆𑀕𑀡𑁆𑀳𑀦𑁂 ¶ . 𑀢𑀁 𑀧𑀦 𑀲𑀩𑁆𑀩𑀲𑁄 𑀯𑀻𑀭𑀺𑀬𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀽𑀭𑀡𑁂’’𑀢𑀺. 𑀲𑀢𑀺𑀬𑀜𑁆𑀘𑁂𑀯 𑀦𑀺𑀧𑀓𑀪𑀸𑀯𑁂 𑀘𑀸𑀢𑀺 𑀲𑀢𑁄𑀓𑀸𑀭𑀺𑀢𑀸𑀬 𑀘𑁂𑀯 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸𑀬 𑀘. 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦𑁂𑀯 𑀳𑀺 𑀯𑀻𑀭𑀺𑀬𑀸𑀭𑀫𑁆𑀪𑁄 𑀇𑀚𑁆𑀛𑀢𑀺. 𑀤𑀺𑀝𑁆𑀞𑀺𑀧𑀝𑀺𑀯𑁂𑀥𑁂𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀝𑀺𑀯𑀺𑀚𑁆𑀛𑀦𑁂. 𑀢𑁂𑀦𑀸𑀳 ‘‘𑀫𑀕𑁆𑀕𑀤𑀲𑁆𑀲𑀦𑁂’’𑀢𑀺.

𑀦𑀺𑀤𑁆𑀤𑀲𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀲𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀚𑁆𑀚𑀺𑀲𑀢𑁆𑀢𑀓𑀯𑀕𑁆𑀕𑁄

𑁧. 𑀲𑀸𑀭𑀦𑁆𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀤𑁂𑀯𑀸𑀬𑀢𑀦𑀪𑀸𑀯𑁂𑀦 𑀘𑀺𑀢𑁆𑀢𑀢𑁆𑀢𑀸 𑀮𑁄𑀓𑀲𑁆𑀲 𑀘𑀺𑀢𑁆𑀢𑀻𑀓𑀸𑀭𑀝𑁆𑀞𑀸𑀦𑀢𑀸𑀬 𑀘 𑀘𑁂𑀢𑀺𑀬𑀁 𑀅𑀳𑁄𑀲𑀺. 𑀬𑀸𑀯𑀓𑀻𑀯𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁨.𑁧𑁩𑁪) 𑀏𑀓𑀫𑁂𑀯𑁂𑀢𑀁 𑀧𑀤𑀁 𑀅𑀦𑀺𑀬𑀫𑀢𑁄 𑀧𑀭𑀺𑀫𑀸𑀡𑀯𑀸𑀘𑀻. 𑀓𑀸𑀮𑁄 𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀬𑀢𑁆𑀢𑀓𑀁 𑀓𑀸𑀮’’𑀦𑁆𑀢𑀺. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀢𑀺 𑀦𑀺𑀘𑁆𑀘𑀲𑀦𑁆𑀦𑀺𑀧𑀸𑀢𑀸. 𑀢𑀁 𑀧𑀦 𑀦𑀺𑀘𑁆𑀘𑀲𑀦𑁆𑀦𑀺𑀧𑀸𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀯𑀲𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸𑀢𑀺 𑀧𑀘𑀼𑀭𑀲𑀦𑁆𑀦𑀺𑀧𑀸𑀢𑀸. 𑀯𑁄𑀲𑀸𑀦𑀦𑁆𑀢𑀺 𑀲𑀗𑁆𑀓𑁄𑀘𑀁. ‘‘𑀯𑀼𑀤𑁆𑀥𑀺𑀬𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀡𑁆𑀳𑀁 𑀅𑀲𑀦𑁆𑀦𑀺𑀧𑀢𑀦𑁆𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀓𑀼𑀮𑀸𑀢𑀺 𑀔𑀼𑀪𑀺𑀢𑀸 𑀦 𑀧𑀲𑀦𑁆𑀦𑀸. 𑀪𑀺𑀚𑁆𑀚𑀺𑀢𑁆𑀯𑀸𑀢𑀺 𑀯𑀕𑁆𑀕𑀩𑀦𑁆𑀥𑀢𑁄 𑀯𑀺𑀪𑀚𑁆𑀚 𑀯𑀺𑀲𑀼𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸.

𑀲𑀦𑁆𑀦𑀺𑀧𑀸𑀢𑀪𑁂𑀭𑀺𑀬𑀸𑀢𑀺 𑀲𑀦𑁆𑀦𑀺𑀧𑀸𑀢𑀸𑀭𑁄𑀘𑀦𑀪𑁂𑀭𑀺𑀬𑀸. 𑀅𑀤𑁆𑀥𑀪𑀼𑀢𑁆𑀢𑀸 𑀯𑀸𑀢𑀺 𑀲𑀸𑀫𑀺𑀪𑀼𑀢𑁆𑀢𑀸 𑀯𑀸. 𑀑𑀲𑀻𑀤𑀫𑀸𑀦𑁂𑀢𑀺 𑀳𑀸𑀬𑀫𑀸𑀦𑁂.

𑀲𑀼𑀗𑁆𑀓𑀦𑁆𑀢𑀺 ¶ 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀧𑀩𑁆𑀩𑀢𑀔𑀡𑁆𑀟𑀦𑀸𑀤𑀺𑀢𑀺𑀢𑁆𑀣𑀕𑀸𑀫𑀤𑁆𑀯𑀸𑀭𑀸𑀤𑀻𑀲𑀼 𑀭𑀸𑀚𑀧𑀼𑀭𑀺𑀲𑀸𑀦𑀁 𑀤𑀸𑀢𑀩𑁆𑀩𑀪𑀸𑀕𑀁. 𑀩𑀮𑀺𑀦𑁆𑀢𑀺 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀸𑀤𑀺𑀢𑁄 𑀙𑀪𑀸𑀕𑀁 𑀲𑀢𑁆𑀢𑀪𑀸𑀕𑀦𑁆𑀢𑀺𑀆𑀤𑀺𑀦𑀸 𑀮𑀤𑁆𑀥𑀩𑁆𑀩𑀓𑀭𑀁. 𑀤𑀡𑁆𑀟𑀦𑁆𑀢𑀺 𑀤𑀲𑀯𑀻𑀲𑀢𑀺𑀓𑀳𑀸𑀧𑀡𑀸𑀤𑀺𑀓𑀁 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀕𑀳𑁂𑀢𑀩𑁆𑀩𑀥𑀦𑀤𑀡𑁆𑀟𑀁. 𑀯𑀚𑁆𑀚𑀺𑀥𑀫𑁆𑀫𑀦𑁆𑀢𑀺 𑀯𑀚𑁆𑀚𑀺𑀭𑀸𑀚𑀥𑀫𑁆𑀫𑀁. 𑀇𑀤𑀸𑀦𑀺 𑀅𑀧𑀜𑁆𑀜𑀢𑁆𑀢𑀧𑀜𑁆𑀜𑀸𑀧𑀦𑀸𑀤𑀻𑀲𑀼 𑀢𑀧𑁆𑀧𑀝𑀺𑀓𑁆𑀔𑁂𑀧𑁂 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀘 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀧𑀸𑀭𑀺𑀘𑀭𑀺𑀬𑀓𑁆𑀔𑀫𑀸𑀢𑀺 𑀉𑀧𑀝𑁆𑀞𑀸𑀦𑀓𑁆𑀔𑀫𑀸. 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀓𑀺𑀭 𑀯𑀚𑁆𑀚𑀺𑀭𑀸𑀚𑀸𑀦𑁄 ‘‘𑀅𑀬𑀁 𑀘𑁄𑀭𑁄’’𑀢𑀺 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑁂 ‘‘𑀕𑀡𑁆𑀳𑀣 𑀦𑀁 𑀘𑁄𑀭’’𑀦𑁆𑀢𑀺 𑀅𑀯𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀸𑀦𑀁 𑀤𑁂𑀦𑁆𑀢𑀺. 𑀢𑁂 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀘𑁂 𑀅𑀘𑁄𑀭𑁄 𑀳𑁄𑀢𑀺, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀲𑀘𑁂 𑀘𑁄𑀭𑁄, 𑀅𑀢𑁆𑀢𑀦𑀸 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀯𑁄𑀳𑀸𑀭𑀺𑀓𑀸𑀦𑀁 𑀤𑁂𑀦𑁆𑀢𑀺, 𑀢𑁂𑀧𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀘𑁄𑀭𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀘𑁄𑀭𑁄 𑀘𑁂, 𑀲𑀼𑀢𑁆𑀢𑀥𑀭𑀸𑀦𑀁 𑀤𑁂𑀦𑁆𑀢𑀺. 𑀢𑁂𑀧𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀘𑁄𑀭𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀘𑁄𑀭𑁄 𑀘𑁂, 𑀅𑀝𑁆𑀝𑀓𑀼𑀮𑀺𑀓𑀸𑀦𑀁 𑀤𑁂𑀦𑁆𑀢𑀺, 𑀢𑁂𑀧𑀺 𑀢𑀣𑁂𑀯 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀲𑁆𑀲, 𑀲𑁂𑀦𑀸𑀧𑀢𑀺 𑀉𑀧𑀭𑀸𑀚𑀲𑁆𑀲, 𑀉𑀧𑀭𑀸𑀚𑀸 𑀭𑀜𑁆𑀜𑁄. 𑀭𑀸𑀚𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀘𑁂 𑀅𑀘𑁄𑀭𑁄 𑀳𑁄𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀲𑀘𑁂 𑀧𑀦 𑀘𑁄𑀭𑁄 𑀳𑁄𑀢𑀺, 𑀧𑀯𑁂𑀡𑀺𑀧𑀡𑁆𑀡𑀓𑀁 𑀯𑀸𑀘𑀸𑀧𑁂𑀢𑀺. 𑀢𑀢𑁆𑀣 ‘‘𑀬𑁂𑀦 𑀇𑀤𑀁 𑀦𑀸𑀫 𑀓𑀢𑀁, 𑀢𑀲𑁆𑀲 𑀅𑀬𑀁 𑀦𑀸𑀫𑀤𑀡𑁆𑀟𑁄’’𑀢𑀺 𑀮𑀺𑀔𑀺𑀢𑀁. 𑀭𑀸𑀚𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀢𑁂𑀦 𑀲𑀫𑀸𑀦𑁂𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀤𑀡𑁆𑀟𑀁 𑀓𑀭𑁄𑀢𑀺. 𑀇𑀢𑀺 𑀏𑀢𑀁 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸 𑀦 𑀉𑀚𑁆𑀛𑀸𑀬𑀦𑁆𑀢𑀺. 𑀧𑀭𑀫𑁆𑀧𑀭𑀸𑀕𑀢𑁂𑀲𑀼 𑀅𑀝𑁆𑀝𑀓𑀼𑀮𑁂𑀲𑀼 𑀚𑀸𑀢𑀸 𑀅𑀕𑀢𑀺𑀕𑀫𑀦𑀯𑀺𑀭𑀢𑀸 𑀅𑀝𑁆𑀝𑀫𑀳𑀮𑁆𑀮𑀓𑀧𑀼𑀭𑀺𑀲𑀸 𑀅𑀝𑁆𑀝𑀓𑀼𑀮𑀺𑀓𑀸.

𑀲𑀓𑁆𑀓𑀸𑀭𑀦𑁆𑀢𑀺 𑀉𑀧𑀓𑀸𑀭𑀁. 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸𑀢𑀺 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀕𑀭𑀼𑀦𑁄’’𑀢𑀺 𑀢𑀢𑁆𑀣 𑀕𑀭𑀼𑀪𑀸𑀯𑀁 𑀧𑀝𑀺 𑀧𑀝𑀺 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀫𑀸𑀦𑁂𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀫𑀸𑀦𑁂𑀲𑁆𑀲𑀦𑁆𑀢𑀺. 𑀢𑀁 𑀧𑀦 𑀲𑀫𑁆𑀫𑀸𑀦𑀦𑀁 𑀢𑁂𑀲𑀼 𑀦𑁂𑀲𑀁 𑀅𑀢𑁆𑀢𑀫𑀦𑀢𑀸𑀧𑀼𑀩𑁆𑀩𑀓𑀦𑁆𑀢𑀺 𑀆𑀳 ‘‘𑀫𑀦𑁂𑀦 𑀧𑀺𑀬𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀦𑀺𑀧𑀘𑁆𑀘𑀓𑀸𑀭𑀁 𑀧𑀡𑀺𑀧𑀸𑀢𑀁. 𑀤𑀲𑁆𑀲𑁂𑀦𑁆𑀢𑀻𑀢𑀺 𑀕𑀭𑀼𑀘𑀺𑀢𑁆𑀢𑀪𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀲𑀦𑁆𑀥𑀸𑀦𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀖𑀝𑁂𑀢𑀼𑀁.

𑀧𑀲𑀬𑁆𑀳𑀓𑀸𑀭𑀲𑁆𑀲𑀸𑀢𑀺 𑀩𑀮𑀓𑁆𑀓𑀸𑀭𑀲𑁆𑀲. 𑀓𑀸𑀫𑀁 𑀯𑀼𑀤𑁆𑀥𑀺𑀬𑀸 𑀧𑀽𑀚𑀦𑀻𑀬𑀢𑀸𑀬 ‘‘𑀯𑀼𑀤𑁆𑀥𑀺𑀳𑀸𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑁄 𑀧𑀦 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑁄. 𑀧𑀸𑀴𑀺𑀬𑀁 𑀯𑀸 𑀬𑀲𑁆𑀫𑀸 ‘‘𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀓𑁆𑀓𑀫𑁂𑀦 ‘‘𑀯𑀼𑀤𑁆𑀥𑀺𑀳𑀸𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀁.

𑀯𑀺𑀧𑀘𑁆𑀘𑀺𑀢𑀼𑀁 𑀅𑀮𑀤𑁆𑀥𑁄𑀓𑀸𑀲𑁂 𑀧𑀸𑀧𑀓𑀫𑁆𑀫𑁂, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂 𑀯𑀸 𑀅𑀦𑀯𑀲𑀭𑁄𑀯 𑀤𑁂𑀯𑀲𑁄𑀧𑀲𑀕𑁆𑀕𑁄. 𑀢𑀲𑁆𑀫𑀺𑀁 𑀧𑀦 𑀮𑀤𑁆𑀥𑁄𑀓𑀸𑀲𑁂 𑀲𑀺𑀬𑀸 𑀤𑁂𑀯𑀢𑁄𑀧𑀲𑀕𑁆𑀕𑀲𑁆𑀲 𑀅𑀯𑀲𑀭𑁄𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀟𑁆𑀠𑁂𑀦𑁆𑀢𑀻’’𑀢𑀺. 𑀏𑀢𑁂𑀦𑁂𑀯 𑀅𑀦𑀼𑀧𑁆𑀧𑀦𑁆𑀦𑀁 𑀲𑀼𑀔𑀦𑁆𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀮𑀓𑀸𑀬𑀲𑁆𑀲 𑀤𑀺𑀕𑀼𑀡𑀢𑀺𑀕𑀼𑀡𑀢𑀸𑀤𑀲𑁆𑀲𑀦𑀁 𑀧𑀝𑀺𑀪𑀬𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀤𑁂𑀯𑀢𑀸𑀦𑀁 𑀲𑀗𑁆𑀕𑀸𑀫𑀲𑀻𑀲𑁂 𑀲𑀳𑀸𑀬𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀺𑀘𑁆𑀙𑀺𑀢𑀦𑁆𑀢𑀺 ¶ ¶ 𑀅𑀦𑀺𑀝𑁆𑀞𑀁. 𑀆𑀯𑀭𑀡𑀢𑁄𑀢𑀺 𑀦𑀺𑀲𑁂𑀥𑀦𑀢𑁄. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀸 𑀥𑀫𑁆𑀫𑀺𑀬𑀸𑀢𑀺 𑀇𑀥 ‘‘𑀥𑀫𑁆𑀫𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀫𑀺𑀕𑀲𑀽𑀓𑀭𑀸𑀤𑀺𑀖𑀸𑀢𑀸𑀬 𑀲𑀼𑀦𑀔𑀸𑀤𑀻𑀦𑀁 𑀓𑀟𑁆𑀠𑀺𑀢𑁆𑀯𑀸 𑀯𑀦𑀘𑀭𑀡𑀁 𑀯𑀸𑀚𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸, 𑀢𑁂 𑀯𑀸 𑀯𑀸𑀚𑁂𑀦𑁆𑀢𑀻𑀢𑀺 𑀯𑀸𑀚𑀺𑀓𑀸, 𑀫𑀺𑀕𑀯𑀥𑀘𑀸𑀭𑀺𑀦𑁄.

𑀲𑀸𑀭𑀦𑁆𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀅𑀪𑀺𑀬𑀸𑀢𑀼𑀓𑀸𑀫𑁄𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀅𑀪𑀺𑀪𑀯𑀦𑀢𑁆𑀣𑁄 ‘‘𑀅𑀦𑀪𑀺𑀯𑀺𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 ‘‘𑀅𑀪𑀺𑀪𑀯𑀦𑀢𑁆𑀣𑀸𑀬 𑀬𑀸𑀢𑀼𑀓𑀸𑀫𑁄’’𑀢𑀺. 𑀯𑀚𑁆𑀚𑀺𑀭𑀸𑀚𑀸𑀦𑁄𑀢𑀺 ‘‘𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀆𑀤𑀺𑀢𑁄 𑀧𑀯𑀢𑁆𑀢𑀁 𑀯𑀘𑀦𑀁 𑀉𑀧𑀸𑀤𑀸𑀬 𑀯𑀚𑁆𑀚𑀻𑀢𑀺 𑀮𑀤𑁆𑀥𑀦𑀸𑀫𑀸 𑀭𑀸𑀚𑀸𑀦𑁄, 𑀯𑀚𑁆𑀚𑀺𑀭𑀝𑁆𑀞𑀲𑁆𑀲 𑀯𑀸 𑀭𑀸𑀚𑀸𑀦𑁄 𑀯𑀚𑁆𑀚𑀺𑀭𑀸𑀚𑀸𑀦𑁄. 𑀭𑀝𑁆𑀞𑀲𑁆𑀲 𑀧𑀦 𑀯𑀚𑁆𑀚𑀺𑀲𑀫𑀜𑁆𑀜𑀸 𑀢𑀦𑁆𑀦𑀺𑀯𑀸𑀲𑀺𑀭𑀸𑀚𑀓𑀼𑀫𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀭𑀸𑀚𑀺𑀤𑁆𑀥𑀺𑀬𑀸𑀢𑀺 𑀭𑀸𑀚𑀪𑀸𑀯𑀸𑀦𑀼𑀕𑀢𑁂𑀦 𑀧𑀪𑀸𑀯𑁂𑀦. 𑀲𑁄 𑀧𑀦 𑀧𑀪𑀸𑀯𑁄 𑀦𑁂𑀲𑀁 𑀕𑀡𑀭𑀸𑀚𑀸𑀦𑀁 𑀫𑀺𑀣𑁄 𑀲𑀸𑀫𑀕𑁆𑀕𑀺𑀬𑀸 𑀮𑁄𑀓𑁂 𑀧𑀸𑀓𑀝𑁄. 𑀘𑀺𑀭𑀝𑁆𑀞𑀸𑀬𑀻 𑀘 𑀅𑀳𑁄𑀲𑀻𑀢𑀺 ‘‘𑀲𑀫𑀕𑁆𑀕𑀪𑀸𑀯𑀁 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀼 𑀅𑀦𑀼 𑀢𑀁𑀲𑀫𑀗𑁆𑀕𑀺𑀦𑁄 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀦𑀼𑀪𑀸𑀯𑁄, 𑀅𑀦𑀼𑀪𑀸𑀯𑁄 𑀏𑀯 𑀆𑀦𑀼𑀪𑀸𑀯𑁄, 𑀧𑀢𑀸𑀧𑁄. 𑀲𑁄 𑀧𑀦 𑀦𑁂𑀲𑀁 𑀧𑀢𑀸𑀧𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀸𑀳𑀦𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀘 𑀲𑀼𑀪𑀺𑀓𑁆𑀔𑀺𑀢𑀪𑀸𑀯𑁂𑀦 𑀮𑁄𑀓𑁂 𑀧𑀸𑀓𑀝𑁄 𑀚𑀸𑀢𑁄𑀢𑀺 ‘‘𑀏𑀢𑁂𑀦…𑀧𑁂… 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦𑀸𑀢𑀺 𑀓𑀼𑀜𑁆𑀘𑀺𑀓𑀸𑀙𑀺𑀤𑁆𑀤𑁂𑀦. 𑀅𑀲𑀦𑀦𑁆𑀢𑀺 𑀲𑀭𑀁. 𑀅𑀢𑀺𑀧𑀸𑀢𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀧𑁄𑀗𑁆𑀔𑀲𑁆𑀲 𑀅𑀦𑀼𑀧𑁄𑀗𑁆𑀔𑀁, 𑀧𑀼𑀭𑀺𑀫𑀲𑀭𑀲𑁆𑀲 𑀧𑁄𑀗𑁆𑀔𑀧𑀤𑀸𑀦𑀼𑀕𑀢𑀧𑁄𑀗𑁆𑀔𑀁 𑀇𑀢𑀭𑀁 𑀲𑀭𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀭𑀸𑀥𑀺𑀢𑀦𑁆𑀢𑀺 𑀅𑀯𑀺𑀭𑀚𑁆𑀛𑀺𑀢𑀁. 𑀉𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀉𑀫𑁆𑀫𑀽𑀮𑀦𑀯𑀲𑁂𑀦 𑀓𑀼𑀮𑀲𑀦𑁆𑀢𑀢𑀺𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀺. 𑀅𑀬𑀦𑀁 𑀯𑀟𑁆𑀠𑀦𑀁 𑀅𑀬𑁄, 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀦𑀬𑁄𑀢𑀺 𑀆𑀳 ‘‘𑀅𑀯𑀟𑁆𑀠𑀺’’𑀦𑁆𑀢𑀺. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀯𑀺𑀦𑀸𑀲𑁄 𑀜𑀸𑀢𑀺𑀩𑁆𑀬𑀲𑀦𑀁.

𑀕𑀗𑁆𑀕𑀸𑀬𑀸𑀢𑀺 𑀕𑀗𑁆𑀕𑀸𑀲𑀫𑀻𑀧𑁂. 𑀧𑀝𑁆𑀝𑀦𑀕𑀸𑀫𑀦𑁆𑀢𑀺 𑀲𑀓𑀝𑀧𑀝𑁆𑀝𑀦𑀕𑀸𑀫𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀝𑁆𑀝𑀦𑁂. 𑀩𑀮𑀯𑀸𑀖𑀸𑀢𑀚𑀸𑀢𑁄𑀢𑀺 𑀉𑀧𑁆𑀧𑀦𑁆𑀦𑀩𑀮𑀯𑀓𑁄𑀥𑁄. 𑀫𑁂𑀢𑀺 𑀫𑀬𑁆𑀳𑀁. 𑀕𑀢𑁂𑀦𑀸𑀢𑀺 𑀕𑀫𑀦𑁂𑀦. 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀦𑀢𑁆𑀣𑀺 𑀢𑀸𑀬 𑀯𑁂𑀮𑀸𑀬. 𑀅𑀪𑀺𑀫𑀼𑀔𑀁 𑀬𑀼𑀤𑁆𑀥𑁂𑀦𑀸𑀢𑀺 𑀅𑀪𑀺𑀫𑀼𑀔𑀁 𑀉𑀚𑀼𑀓𑀫𑁂𑀯 𑀲𑀗𑁆𑀕𑀸𑀫𑀓𑀭𑀡𑁂𑀦. 𑀉𑀧𑀮𑀸𑀧𑀦𑀁 𑀲𑀸𑀫𑀁 𑀤𑀸𑀦𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑁂𑀤𑁄𑀧𑀺 𑀇𑀥 𑀉𑀧𑀸𑀬𑁄 𑀏𑀯𑀸𑀢𑀺 ¶ 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸’’𑀢𑀺. 𑀬𑀼𑀤𑁆𑀥𑀲𑁆𑀲 𑀧𑀦 𑀅𑀦𑀼𑀧𑀸𑀬𑀢𑀸 𑀧𑀕𑁂𑀯 𑀧𑀓𑀸𑀲𑀺𑀢𑀸. 𑀇𑀤𑀦𑁆𑀢𑀺 ‘‘𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸’’𑀢𑀺 𑀇𑀤𑀁 𑀯𑀘𑀦𑀁. 𑀓𑀣𑀸𑀬 𑀦𑀬𑀁 𑀮𑀪𑀺𑀢𑁆𑀯𑀸𑀢𑀺 ‘‘𑀬𑀸𑀯𑀓𑀻𑀯𑀜𑁆𑀘 ¶ …𑀧𑁂… 𑀧𑀭𑀺𑀳𑀸𑀦𑀻’’𑀢𑀺 𑀇𑀫𑀸𑀬 𑀪𑀕𑀯𑀢𑁄 𑀓𑀣𑀸𑀬 𑀉𑀧𑀸𑀬𑀁 𑀮𑀪𑀺𑀢𑁆𑀯𑀸. 𑀅𑀦𑀼𑀓𑀫𑁆𑀧𑀸𑀬𑀸𑀢𑀺 𑀯𑀚𑁆𑀚𑀺𑀭𑀸𑀚𑁂𑀲𑀼 𑀅𑀦𑀼𑀕𑁆𑀕𑀳𑁂𑀦.

𑀭𑀸𑀚𑀸𑀧𑀺 𑀢𑀫𑁂𑀯 𑀧𑁂𑀲𑁂𑀢𑁆𑀯𑀸 𑀲𑀩𑁆𑀩𑁂…𑀧𑁂… 𑀧𑀸𑀧𑁂𑀲𑀻𑀢𑀺 𑀭𑀸𑀚𑀸 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 ‘‘𑀓𑀺𑀁, 𑀆𑀘𑀭𑀺𑀬, 𑀪𑀕𑀯𑀸 𑀅𑀯𑀘𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀬𑀣𑀸 𑀪𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀦 𑀲𑀓𑁆𑀓𑀸 𑀯𑀚𑁆𑀚𑀻 𑀓𑁂𑀦𑀘𑀺 𑀕𑀳𑁂𑀢𑀼𑀁, 𑀅𑀧𑀺𑀘 𑀉𑀧𑀮𑀸𑀧𑀦𑀸𑀬 𑀯𑀸 𑀫𑀺𑀣𑀼𑀪𑁂𑀤𑁂𑀦 𑀯𑀸 𑀲𑀓𑁆𑀓𑀸’’𑀢𑀺 𑀆𑀳. 𑀢𑀢𑁄 𑀦𑀁 𑀭𑀸𑀚𑀸 ‘‘𑀉𑀧𑀮𑀸𑀧𑀦𑀸𑀬 𑀅𑀫𑁆𑀳𑀸𑀓𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀪𑁂𑀤𑁂𑀦𑁂𑀯 𑀢𑁂 𑀕𑀳𑁂𑀲𑁆𑀲𑀸𑀫𑀺, 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀯𑀚𑁆𑀚𑀻 𑀆𑀭𑀩𑁆𑀪 𑀧𑀭𑀺𑀲𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀣, 𑀢𑀢𑁄 𑀅𑀳𑀁 ‘‘𑀓𑀺𑀁 𑀢𑁂, 𑀫𑀳𑀸𑀭𑀸𑀚, 𑀢𑁂𑀳𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀦𑀺 𑀓𑀢𑁆𑀯𑀸 𑀚𑀻𑀯𑀦𑁆𑀢𑀼 𑀏𑀢𑁂 𑀭𑀸𑀚𑀸𑀦𑁄’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀺. 𑀢𑀢𑁄 𑀢𑀼𑀫𑁆𑀳𑁂 ‘‘𑀓𑀺𑀁 𑀦𑀼, 𑀪𑁄, 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀯𑀚𑁆𑀚𑀻 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀓𑀣𑀁 𑀧𑀝𑀺𑀩𑀸𑀳𑀢𑀻’’𑀢𑀺 𑀯𑀤𑁂𑀬𑁆𑀬𑀸𑀣. 𑀤𑀺𑀯𑀲𑀪𑀸𑀕𑁂 𑀘𑀸𑀳𑀁 𑀢𑁂𑀲𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀢𑀫𑁆𑀧𑀺 𑀕𑀸𑀳𑀸𑀧𑁂𑀢𑁆𑀯𑀸 𑀢𑀼𑀫𑁆𑀳𑁂𑀧𑀺 𑀫𑀫 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀩𑀦𑁆𑀥𑀦𑀢𑀸𑀴𑀦𑀸𑀤𑀻𑀦𑀺 𑀅𑀓𑀢𑁆𑀯𑀸𑀯 𑀓𑁂𑀯𑀮𑀁 𑀔𑀼𑀭𑀫𑀼𑀡𑁆𑀟𑀁 𑀫𑀁 𑀓𑀢𑁆𑀯𑀸 𑀦𑀕𑀭𑀸 𑀦𑀻𑀳𑀭𑀸𑀧𑁂𑀣, 𑀅𑀣𑀸𑀳𑀁 ‘‘𑀫𑀬𑀸 𑀢𑁂 𑀦𑀕𑀭𑁂 𑀧𑀸𑀓𑀸𑀭𑁄 𑀧𑀭𑀺𑀔𑀸 𑀘 𑀓𑀸𑀭𑀺𑀢𑀸, 𑀅𑀳𑀁 𑀣𑀺𑀭𑀤𑀼𑀩𑁆𑀩𑀮𑀝𑁆𑀞𑀸𑀦𑀜𑁆𑀘 𑀉𑀢𑁆𑀢𑀸𑀦𑀕𑀫𑁆𑀪𑀻𑀭𑀝𑁆𑀞𑀸𑀦𑀜𑁆𑀘 𑀚𑀸𑀦𑀸𑀫𑀺, 𑀦 𑀘𑀺𑀭𑀲𑁆𑀲𑀁 𑀤𑀸𑀦𑀺 𑀢𑀁 𑀉𑀚𑀼𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀓𑁆𑀔𑀸𑀫𑀺. 𑀢𑀁 𑀲𑀼𑀢𑁆𑀯𑀸 𑀢𑀼𑀫𑁆𑀳𑁂 ‘‘𑀕𑀘𑁆𑀙𑀢𑀽’’𑀢𑀺 𑀯𑀤𑁂𑀬𑁆𑀬𑀸𑀣𑀸𑀢𑀺. 𑀭𑀸𑀚𑀸 𑀲𑀩𑁆𑀩𑀁 𑀅𑀓𑀸𑀲𑀺.

𑀮𑀺𑀘𑁆𑀙𑀯𑀻 𑀢𑀲𑁆𑀲 𑀦𑀺𑀓𑁆𑀔𑀫𑀦𑀁 𑀲𑀼𑀢𑁆𑀯𑀸 ‘‘𑀲𑀞𑁄 𑀩𑁆𑀭𑀸𑀳𑁆𑀫𑀡𑁄, 𑀫𑀸 𑀢𑀲𑁆𑀲 𑀕𑀗𑁆𑀕𑀁 𑀉𑀢𑁆𑀢𑀸𑀭𑁂𑀢𑀼𑀁 𑀅𑀤𑀢𑁆𑀣𑀸’’𑀢𑀺 𑀆𑀳𑀁𑀲𑀼. 𑀢𑀢𑁆𑀭 𑀏𑀓𑀘𑁆𑀘𑁂𑀳𑀺 ‘‘𑀅𑀫𑁆𑀳𑁂 𑀆𑀭𑀩𑁆𑀪 𑀓𑀣𑀺𑀢𑀢𑁆𑀢𑀸 𑀓𑀺𑀭 𑀲𑁄 𑀏𑀯𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀪𑀡𑁂 𑀏𑀢𑀽’’𑀢𑀺 𑀯𑀤𑀺𑀁𑀲𑀼. 𑀲𑁄 𑀕𑀦𑁆𑀢𑁆𑀯𑀸 𑀮𑀺𑀘𑁆𑀙𑀯𑀻 𑀤𑀺𑀲𑁆𑀯𑀸 ‘‘𑀓𑀺𑀫𑀸𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀮𑀺𑀘𑁆𑀙𑀯𑀺𑀦𑁄 ‘‘𑀅𑀧𑁆𑀧𑀫𑀢𑁆𑀢𑀓𑁂𑀦 𑀦𑀸𑀫 𑀏𑀯𑀁 𑀕𑀭𑀼𑀁 𑀤𑀡𑁆𑀟𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀢𑁂 𑀢𑀢𑁆𑀭 𑀞𑀸𑀦𑀦𑁆𑀢𑀭’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀘𑁆𑀘𑁄𑀳𑀫𑀲𑁆𑀫𑀻𑀢𑀺. 𑀢𑀤𑁂𑀯 𑀢𑁂 𑀞𑀸𑀦𑀦𑁆𑀢𑀭𑀁 𑀳𑁄𑀢𑀽𑀢𑀺. 𑀲𑁄 𑀲𑀼𑀝𑁆𑀞𑀼𑀢𑀭𑀁 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺. 𑀭𑀸𑀚𑀓𑀼𑀫𑀸𑀭𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀲𑁄 𑀧𑀢𑀺𑀝𑁆𑀞𑀺𑀢𑀕𑀼𑀡𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 ‘‘𑀤𑀸𑀭𑀓𑀸 ¶ 𑀓𑀲𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀓𑀲𑀦𑁆𑀢𑀺. 𑀤𑁆𑀯𑁂 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸𑀢𑀺. 𑀆𑀫, 𑀤𑁆𑀯𑁂 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸𑀢𑀺. 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀢𑀢𑁄 𑀢𑀫𑀜𑁆𑀜𑁄 ‘‘𑀓𑀺𑀁 𑀆𑀘𑀭𑀺𑀬𑁄 𑀆𑀳𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀦 𑀫𑁂𑀲𑁄 𑀬𑀣𑀸𑀪𑀽𑀢𑀁 𑀓𑀣𑁂𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺.

𑀩𑁆𑀭𑀸𑀳𑁆𑀫𑀡𑁄 𑀅𑀧𑀭𑀫𑁆𑀧𑀺 𑀏𑀓𑀤𑀺𑀯𑀲𑀁 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 ‘‘𑀓𑁂𑀦 𑀩𑁆𑀬𑀜𑁆𑀚𑀦𑁂𑀦 𑀪𑀼𑀢𑁆𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀢𑀫𑁆𑀧𑀺 𑀅𑀜𑁆𑀜𑁄 𑀧𑀼𑀘𑁆𑀙𑀺𑀢𑁆𑀯𑀸 𑀅𑀲𑀤𑁆𑀤𑀳𑀦𑁆𑀢𑁄 𑀢𑀣𑁂𑀯 𑀪𑀺𑀚𑁆𑀚𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀧𑀭𑀫𑁆𑀧𑀺 𑀤𑀺𑀯𑀲𑀁 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 ‘‘𑀅𑀢𑀺𑀤𑀼𑀕𑁆𑀕𑀢𑁄𑀲𑀺 𑀓𑀺𑀭𑀸’’𑀢𑀺 𑀧𑀼𑀘𑁆𑀙𑀺. 𑀓𑁄 𑀏𑀯𑀫𑀸𑀳𑀸𑀢𑀺 ¶ . 𑀅𑀲𑀼𑀓𑁄 𑀦𑀸𑀫 𑀮𑀺𑀘𑁆𑀙𑀯𑀻𑀢𑀺. 𑀅𑀧𑀭𑀫𑁆𑀧𑀺 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭 𑀪𑀻𑀭𑀼𑀚𑀸𑀢𑀺𑀓𑁄’’𑀢𑀺 𑀧𑀼𑀘𑁆𑀙𑀺. 𑀓𑁄 𑀏𑀯𑀫𑀸𑀳𑀸𑀢𑀺? 𑀅𑀲𑀼𑀓𑁄 𑀦𑀸𑀫 𑀮𑀺𑀘𑁆𑀙𑀯𑀻𑀢𑀺. 𑀏𑀯𑀁 𑀅𑀜𑁆𑀜𑁂𑀦 𑀅𑀓𑀣𑀺𑀢𑀫𑁂𑀯 𑀅𑀜𑁆𑀜𑀲𑁆𑀲 𑀓𑀣𑁂𑀦𑁆𑀢𑁄 𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀢𑁂 𑀭𑀸𑀚𑀸𑀦𑁄 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀣𑀸 𑀤𑁆𑀯𑁂 𑀏𑀓𑀫𑀕𑁆𑀕𑁂𑀦 𑀦 𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀓𑀢𑁆𑀯𑀸 𑀲𑀦𑁆𑀦𑀺𑀧𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀮𑀺𑀘𑁆𑀙𑀯𑀺𑀦𑁄 ‘‘𑀇𑀲𑁆𑀲𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀼, 𑀲𑀽𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀦 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀤𑀸𑀦𑀺 𑀓𑀸𑀮𑁄, 𑀲𑀻𑀖𑀁 𑀆𑀕𑀘𑁆𑀙𑀢𑀽’’𑀢𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀢𑀺. 𑀭𑀸𑀚𑀸 𑀲𑀼𑀢𑁆𑀯𑀸𑀯 𑀩𑀮𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀯𑁂𑀲𑀸𑀮𑀺𑀓𑀸 𑀲𑀼𑀢𑁆𑀯𑀸 ‘‘𑀭𑀜𑁆𑀜𑁄 𑀕𑀗𑁆𑀕𑀁 𑀉𑀢𑁆𑀢𑀭𑀺𑀢𑀼𑀁 𑀦 𑀤𑀲𑁆𑀲𑀸𑀫𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀢𑁂 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀦𑁆𑀢𑀼 𑀲𑀽𑀭𑀭𑀸𑀚𑀸𑀦𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀦 𑀲𑀦𑁆𑀦𑀺𑀧𑀢𑀺𑀁𑀲𑀼. ‘‘𑀦𑀕𑀭𑀧𑁆𑀧𑀯𑁂𑀲𑀦𑀁 𑀦 𑀤𑀲𑁆𑀲𑀸𑀫, 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀲𑁆𑀲𑀸𑀫𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀏𑀓𑁄𑀧𑀺 𑀦 𑀲𑀦𑁆𑀦𑀺𑀧𑀢𑀺. 𑀬𑀣𑀸𑀯𑀺𑀯𑀝𑁂𑀳𑀺 𑀤𑁆𑀯𑀸𑀭𑁂𑀳𑀺 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑁆𑀯𑀸 𑀕𑀢𑁄. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀭𑀸𑀚𑀸𑀧𑀺 𑀢𑀫𑁂𑀯 𑀧𑁂𑀲𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀻’’𑀢𑀺.

𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀞𑀫𑀲𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀅𑀧𑀭𑀺𑀳𑀸𑀦𑀸𑀬 𑀳𑀺𑀢𑀸𑀢𑀺 𑀅𑀧𑀭𑀺𑀳𑀸𑀦𑀺𑀬𑀸 (𑀤𑀻. 𑀦𑀺. 𑀝𑀻. 𑁨.𑁧𑁩𑁬), 𑀦 𑀧𑀭𑀺𑀳𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸 𑀅𑀧𑀭𑀺𑀳𑀸𑀦𑀺𑀬𑀸. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑀸𑀧𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁄𑀢𑀺𑀆𑀤𑀺 𑀤𑀺𑀲𑀸𑀲𑀼 𑀆𑀕𑀢𑀲𑀸𑀲𑀦𑁂 𑀯𑀼𑀢𑁆𑀢𑀯𑀘𑀦𑀁 𑀯𑀼𑀢𑁆𑀢𑀓𑀣𑀦𑀁. 𑀯𑀺𑀳𑀸𑀭𑀲𑀻𑀫𑀸 𑀆𑀓𑀼𑀮𑀸 𑀬𑀲𑁆𑀫𑀸 ¶ , 𑀢𑀲𑁆𑀫𑀸 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀺𑀢𑀸. 𑀑𑀮𑀻𑀬𑀫𑀸𑀦𑀓𑁄𑀢𑀺 𑀧𑀸𑀴𑀺𑀢𑁄 𑀅𑀢𑁆𑀣𑀢𑁄 𑀘 𑀯𑀺𑀦𑀲𑁆𑀲𑀫𑀸𑀦𑀓𑁄. 𑀉𑀓𑁆𑀔𑀺𑀧𑀸𑀧𑁂𑀦𑁆𑀢𑀸𑀢𑀺 𑀧𑀕𑀼𑀡𑀪𑀸𑀯𑀓𑀭𑀡𑁂𑀦 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀘 𑀧𑀕𑁆𑀕𑀡𑁆𑀳𑀦𑁆𑀢𑀸.

𑀲𑀸𑀯𑀢𑁆𑀣𑀺𑀬𑀁 𑀪𑀺𑀓𑁆𑀔𑀽 𑀯𑀺𑀬 (𑀧𑀸𑀭𑀸. 𑁫𑁬𑁫) 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀸. 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬 (𑀘𑀽𑀴𑀯. 𑁪𑁪𑁬) 𑀤𑀲𑀯𑀢𑁆𑀣𑀼𑀤𑀻𑀧𑀦𑁂𑀦. 𑀢𑀣𑀸 𑀅𑀓𑀭𑁄𑀦𑁆𑀢𑀸𑀢𑀺 𑀦𑀯𑀁 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀅𑀫𑀤𑁆𑀤𑀦𑁆𑀢𑀸 𑀥𑀫𑁆𑀫𑀯𑀺𑀦𑀬𑀢𑁄 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸 𑀔𑀼𑀤𑁆𑀤𑀓𑀫𑁆𑀧𑀺 𑀘 𑀲𑀺𑀓𑁆𑀔𑀸𑀧𑀤𑀁 𑀅𑀲𑀫𑀽𑀳𑀦𑀦𑁆𑀢𑀸. 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀯𑀺𑀬 𑀘𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄, 𑀲𑀦𑁆𑀢𑀸𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀺𑀳𑀺𑀕𑀢𑀸𑀦𑀺. 𑀕𑀺𑀳𑀺𑀦𑁄𑀧𑀺 𑀚𑀸𑀦𑀦𑁆𑀢𑀺 ‘𑀇𑀤𑀁 𑀯𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀓𑀸𑀦𑀁 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺. 𑀲𑀘𑁂𑀧𑀺 𑀳𑀺 𑀫𑀬𑀁 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀥𑀽𑀫𑀓𑀸𑀮𑀺𑀓𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀬𑀸𑀯𑀺𑀫𑁂𑀲𑀁 𑀲𑀢𑁆𑀣𑀸 𑀅𑀝𑁆𑀞𑀸𑀲𑀺, 𑀢𑀸𑀯𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀁𑀲𑀼. 𑀬𑀢𑁄 𑀇𑀫𑁂𑀲𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀤𑀸𑀦𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 ¶ 𑀲𑀺𑀓𑁆𑀔𑀦𑁆𑀢𑀻’𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀬𑁆𑀬, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀇𑀫𑀁 (𑀘𑀽𑀴𑀯. 𑁪𑁪𑁨) 𑀢𑀦𑁆𑀢𑀺𑀁 𑀞𑀧𑁂𑀦𑁆𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀯𑀺𑀬 𑀘.

𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸𑀢𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀁 𑀅𑀦𑀺𑀯𑀢𑁆𑀢𑀺𑀢𑀪𑀸𑀯𑀁 𑀉𑀧𑀕𑀢𑀸. 𑀣𑁂𑀭𑀓𑀸𑀭𑀓𑁂𑀳𑀻𑀢𑀺 𑀣𑁂𑀭𑀪𑀸𑀯𑀲𑀸𑀥𑀓𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀲𑁂𑀓𑁆𑀔𑀥𑀫𑁆𑀫𑁂𑀳𑀺. 𑀩𑀳𑀽 𑀭𑀢𑁆𑀢𑀺𑀬𑁄𑀢𑀺 𑀧𑀩𑁆𑀩𑀚𑀺𑀢𑀸 𑀳𑀼𑀢𑁆𑀯𑀸 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀺. 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀫𑁂𑀯 𑀲𑀸𑀲𑀦𑁂 𑀧𑀭𑀺𑀡𑀸𑀬𑀓𑀢𑀸𑀢𑀺 𑀆𑀳 ‘‘𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀧𑀯𑀢𑁆𑀢𑁂𑀦𑁆𑀢𑀻’’𑀢𑀺. 𑀑𑀯𑀸𑀤𑀁 𑀦 𑀤𑁂𑀦𑁆𑀢𑀺 𑀅𑀪𑀸𑀚𑀦𑀪𑀸𑀯𑀢𑁄. 𑀧𑀯𑁂𑀡𑀺𑀓𑀣𑀦𑁆𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀤𑀻𑀧𑀦𑀁 𑀥𑀫𑁆𑀫𑀓𑀣𑀁. 𑀲𑀸𑀭𑀪𑀽𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀫𑁆𑀧𑀸𑀧𑀦𑁂𑀦 𑀲𑀸𑀲𑀦𑁂 𑀲𑀸𑀭𑀪𑀽𑀢𑀁 𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀅𑀦𑀼𑀢𑁆𑀢𑀭𑀲𑀻𑀢𑀺𑀪𑀸𑀯- (𑀅. 𑀦𑀺. 𑁬.𑁮𑁫) 𑀅𑀥𑀺𑀘𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀥𑀫𑁆𑀫𑀢𑀦𑁆𑀢𑀺𑀁. 𑀆𑀤𑀺𑀓𑀁 𑀑𑀯𑀸𑀤𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀏𑀯𑀁 𑀢𑁂 𑀆𑀮𑁄𑀓𑁂𑀢𑀩𑁆𑀩𑀁, 𑀏𑀯𑀁 𑀢𑁂 𑀯𑀺𑀮𑁄𑀓𑁂𑀢𑀩𑁆𑀩𑀁, 𑀏𑀯𑀁 𑀢𑁂 𑀲𑀫𑀺𑀜𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀲𑀸𑀭𑁂𑀢𑀩𑁆𑀩𑀁, 𑀏𑀯𑀁 𑀢𑁂 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀑𑀯𑀸𑀤𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀼𑀦𑀩𑁆𑀪𑀯𑀤𑀸𑀦𑀁 𑀧𑀼𑀦𑀩𑁆𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀇𑀢𑀭𑁂𑀢𑀺 𑀬𑁂 𑀦 𑀧𑀘𑁆𑀘𑀬𑀯𑀲𑀺𑀓𑀸 𑀦 𑀆𑀫𑀺𑀲𑀘𑀓𑁆𑀔𑀼𑀓𑀸, 𑀢𑁂 𑀦 𑀕𑀘𑁆𑀙𑀦𑁆𑀢𑀺 𑀢𑀡𑁆𑀳𑀸𑀬 𑀯𑀲𑀁.

𑀆𑀭𑀜𑁆𑀜𑀓𑁂𑀲𑀽𑀢𑀺 ¶ 𑀅𑀭𑀜𑁆𑀜𑀪𑀸𑀕𑁂𑀲𑀼 𑀅𑀭𑀜𑁆𑀜𑀧𑀭𑀺𑀬𑀸𑀧𑀦𑁆𑀦𑁂𑀲𑀼. 𑀦𑀦𑀼 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀢𑀡𑁆𑀳𑀸 𑀲𑀸𑀯𑀚𑁆𑀚𑀸 𑀏𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀳𑀻’’𑀢𑀺𑀆𑀤𑀺. 𑀢𑁂𑀦 ‘‘𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀺𑀳𑀸𑀤𑀬𑁄 𑀧𑀺𑀬 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑁂𑀲𑀼 𑀲𑀸𑀮𑀬𑀢𑀸 𑀲𑁂𑀯𑀺𑀢𑀩𑁆𑀩𑀧𑀓𑁆𑀔𑀺𑀓𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀢𑁆𑀢𑀦𑀸𑀯𑀸𑀢𑀺 𑀲𑀬𑀫𑁂𑀯. 𑀢𑁂𑀦 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑀸𑀦𑀁 𑀲𑀭𑀲𑁂𑀦𑁂𑀯 𑀅𑀦𑀸𑀕𑀢𑀸𑀦𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀁, 𑀆𑀕𑀢𑀸𑀦𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦𑀸𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸. 𑀅𑀕𑁆𑀕𑀳𑀺𑀢𑀥𑀫𑁆𑀫𑀕𑁆𑀕𑀳𑀡𑀦𑁆𑀢𑀺 𑀅𑀕𑁆𑀕𑀳𑀺𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀉𑀕𑁆𑀕𑀳𑀡𑀁. 𑀕𑀳𑀺𑀢𑀲𑀚𑁆𑀛𑀸𑀬𑀓𑀭𑀡𑀦𑁆𑀢𑀺 𑀉𑀕𑁆𑀕𑀳𑀺𑀢𑀲𑁆𑀲 𑀲𑀼𑀝𑁆𑀞𑀼 𑀅𑀢𑁆𑀣𑀘𑀺𑀦𑁆𑀢𑀦𑀁. 𑀘𑀺𑀦𑁆𑀢𑀭𑀢𑁆𑀣𑁄 𑀳𑀺 𑀅𑀬𑀁 𑀲𑀚𑁆𑀛𑀸𑀬𑀲𑀤𑁆𑀤𑁄. 𑀏𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺. 𑀦𑀺𑀲𑀻𑀤𑀦𑁆𑀢𑀺 𑀆𑀲𑀦𑀧𑀜𑁆𑀜𑀸𑀧𑀦𑀸𑀤𑀺𑀦𑀸.

𑀧𑀞𑀫𑀲𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁬. 𑀤𑀼𑀢𑀺𑀬𑀲𑀢𑁆𑀢𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁪-𑁨𑁬. 𑀘𑀢𑀼𑀢𑁆𑀣𑁂 ¶ 𑀓𑀭𑁄𑀦𑁆𑀢𑁄𑀬𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑁄𑀬𑁂𑀯. 𑀅𑀢𑀺𑀭𑀘𑁆𑀙𑀸𑀦𑀓𑀣𑀸𑀪𑀸𑀯𑁂𑀧𑀺 𑀢𑀲𑁆𑀲 𑀢𑀢𑁆𑀣 𑀢𑀧𑁆𑀧𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀯𑀘𑀦𑀁. 𑀧𑀭𑀺𑀬𑀦𑁆𑀢𑀓𑀸𑀭𑀻𑀢𑀺 𑀲𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀢𑁆𑀢𑀸. ‘‘𑀧𑀭𑀺𑀬𑀦𑁆𑀢𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 (𑀤𑀻. 𑀦𑀺. 𑁧.𑁯, 𑁧𑁯𑁪) 𑀳𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀪𑀲𑁆𑀲𑁄𑀯𑀸𑀢𑀺 𑀧𑀭𑀺𑀫𑀺𑀢𑀓𑀣𑁄𑀬𑁂𑀯 𑀏𑀓𑀦𑁆𑀢𑁂𑀦 𑀓𑀣𑁂𑀢𑀩𑁆𑀩𑀲𑁆𑀲𑁂𑀯 𑀓𑀣𑀦𑀢𑁄. 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄. 𑀦𑀺𑀤𑁆𑀤𑀸𑀬𑀢𑀺𑀬𑁂𑀯𑀸𑀢𑀺 𑀦𑀺𑀤𑁆𑀤𑁄𑀓𑁆𑀓𑀫𑀦𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑀻 𑀦𑀺𑀤𑁆𑀤𑀸𑀬𑀢𑀺𑀬𑁂𑀯, 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀸𑀤𑀺𑀦𑀸 𑀦 𑀦𑀁 𑀯𑀺𑀦𑁄𑀤𑁂𑀢𑀺. 𑀏𑀯𑀁 𑀲𑀁𑀲𑀝𑁆𑀞𑁄𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀕𑀡𑀲𑀗𑁆𑀕𑀡𑀺𑀓𑀸𑀬 𑀲𑀁𑀲𑀝𑁆𑀞𑁄 𑀏𑀯 𑀯𑀺𑀳𑀭𑀢𑀺. 𑀤𑀼𑀲𑁆𑀲𑀻𑀮𑀸 𑀧𑀸𑀧𑀺𑀘𑁆𑀙𑀸 𑀦𑀸𑀫𑀸𑀢𑀺 𑀲𑀬𑀁 𑀦𑀺𑀲𑁆𑀲𑀻𑀮𑀸 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑀸 𑀮𑀸𑀫𑀓𑀸 𑀇𑀘𑁆𑀙𑀸 𑀏𑀢𑁂𑀲𑀦𑁆𑀢𑀺 𑀧𑀸𑀧𑀺𑀘𑁆𑀙𑀸. 𑀧𑀸𑀧𑀧𑀼𑀕𑁆𑀕𑀮𑁂𑀳𑀺 𑀫𑀺𑀢𑁆𑀢𑀺𑀓𑀭𑀡𑀢𑁄 𑀧𑀸𑀧𑀫𑀺𑀢𑁆𑀢𑀸. 𑀢𑁂𑀳𑀺 𑀲𑀤𑀸 𑀲𑀳𑀧𑀯𑀢𑁆𑀢𑀦𑁂𑀦 𑀧𑀸𑀧𑀲𑀳𑀸𑀬𑀸. 𑀢𑀢𑁆𑀣 𑀦𑀺𑀦𑁆𑀦𑀢𑀸𑀤𑀺𑀦𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀧𑀸𑀧𑀲𑀫𑁆𑀧𑀯𑀗𑁆𑀓𑀸. 𑀧𑀜𑁆𑀘𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺𑀬𑁂𑀯.

𑀤𑀼𑀢𑀺𑀬𑀲𑀢𑁆𑀢𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁧. 𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁭-𑁩𑁧. 𑀲𑀢𑁆𑀢𑀫𑁂 ¶ 𑀅𑀦𑀺𑀘𑁆𑀘𑀸𑀢𑀺 𑀅𑀦𑀼𑀧𑀲𑁆𑀲𑀢𑀺 𑀏𑀢𑀸𑀬𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀢𑀣𑀸𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀸 𑀧𑀦 𑀬𑀲𑁆𑀫𑀸 𑀅𑀢𑁆𑀢𑀦𑀸 𑀲𑀳𑀕𑀢𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀪𑀸𑀯𑀺𑀢𑀸 𑀏𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀲𑀳𑀕𑀢𑀲𑀜𑁆𑀜𑀸’’𑀢𑀺. 𑀇𑀫𑀸 𑀲𑀢𑁆𑀢 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀧𑀺 𑀳𑁄𑀦𑁆𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀦𑀢𑁄. ‘‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀆𑀕𑀢𑀯𑀲𑁂𑀦 𑀧𑀦𑁂𑀢𑁆𑀣 𑀤𑁆𑀯𑁂 𑀮𑁄𑀓𑀼𑀢𑁆𑀢𑀭𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀯𑀺𑀭𑀸𑀕𑁄 𑀦𑀺𑀭𑁄𑀥𑁄’’𑀢𑀺 𑀳𑀺 𑀢𑀢𑁆𑀣 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀯𑀺𑀭𑀸𑀕𑀲𑀜𑁆𑀜𑀸, 𑀢𑀸 𑀯𑀼𑀢𑁆𑀢𑀲𑀜𑁆𑀜𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀧𑀺 𑀲𑀺𑀬𑀼𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀅𑀝𑁆𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀚𑁆𑀚𑀺𑀲𑀢𑁆𑀢𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑁂𑀯𑀢𑀸𑀯𑀕𑁆𑀕𑁄

𑁫. 𑀧𑀞𑀫𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀜𑁆𑀘𑀫𑁂 𑀅𑀢𑁆𑀢𑀦𑁄 𑀕𑀼𑀬𑁆𑀳𑀁 𑀢𑀲𑁆𑀲 𑀆𑀯𑀺𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀕𑀼𑀬𑁆𑀳𑀁 𑀦𑀺𑀕𑁆𑀕𑀼𑀳𑀺𑀢𑀼𑀁 𑀬𑀼𑀢𑁆𑀢𑀓𑀣𑀁 𑀅𑀜𑁆𑀜𑀲𑁆𑀲 𑀅𑀓𑀣𑁂𑀢𑁆𑀯𑀸 𑀢𑀲𑁆𑀲𑁂𑀯 𑀆𑀘𑀺𑀓𑁆𑀔𑀢𑀺. 𑀢𑀲𑁆𑀲 𑀕𑀼𑀬𑁆𑀳𑀁 𑀅𑀜𑁆𑀜𑁂𑀲𑀁 𑀦𑀸𑀘𑀺𑀓𑁆𑀔𑀢𑀻𑀢𑀺 𑀢𑁂𑀦 𑀓𑀣𑀺𑀢𑀕𑀼𑀬𑁆𑀳𑀁 𑀬𑀣𑀸 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀅𑀦𑀸𑀯𑀺𑀓𑀭𑁄𑀦𑁆𑀢𑁄 𑀙𑀸𑀤𑁂𑀢𑀺.

𑀧𑀞𑀫𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁧𑁧. 𑀤𑀼𑀢𑀺𑀬𑀫𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁭-𑁪𑁨. 𑀙𑀝𑁆𑀞𑁂 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀼𑀢𑀲𑀫𑁆𑀧𑀦𑁆𑀦𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄 𑀲𑀢𑀺𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀲𑀫𑁆𑀩𑁄𑀥𑀺𑀁 𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘, 𑀢𑁂𑀦 𑀲𑀫𑁆𑀩𑁄𑀥𑀺𑀬𑀸 𑀳𑁂𑀢𑀼𑀪𑀽𑀢𑀁 𑀲𑀢𑁆𑀢𑁂𑀲𑀼 𑀳𑀺𑀢𑀲𑀼𑀔𑀁 𑀦 𑀧𑀭𑀺𑀘𑁆𑀘𑀚𑀢𑀺 ¶ . 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀕𑀭𑀼 𑀪𑀸𑀯𑀦𑀻𑀬𑁄 𑀘𑁄𑀤𑀓𑁄 𑀧𑀸𑀧𑀕𑀭𑀳𑀻 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄. 𑀲𑀼𑀢𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀸𑀦𑀁 𑀓𑀣𑀸𑀦𑀁 𑀓𑀢𑁆𑀢𑀸 𑀳𑁄𑀢𑀺. 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄. 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁. 𑀲𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀳𑁄𑀢𑀺. 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀲𑀫𑀸𑀳𑀺𑀢𑀘𑀺𑀢𑁄. 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀧𑀭𑀻𑀢𑀁 𑀧𑀚𑀸𑀦𑀸𑀢𑀺. 𑀲𑁄 𑀲𑀢𑀺𑀬𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀫𑀸𑀦𑁄 𑀧𑀜𑁆𑀜𑀸𑀬 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀲𑀫𑀸𑀥𑀺𑀦𑀸 𑀢𑀢𑁆𑀣 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀻𑀭𑀺𑀬𑁂𑀦 𑀲𑀢𑁆𑀢𑁂 𑀅𑀳𑀺𑀢𑁂 𑀦𑀺𑀲𑁂𑀥𑁂𑀢𑁆𑀯𑀸 𑀳𑀺𑀢𑁂 𑀦𑀺𑀬𑁄𑀚𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀺𑀬𑁄…𑀧𑁂… 𑀦𑀺𑀬𑁄𑀚𑁂𑀢𑀻’’𑀢𑀺. 𑀲𑀢𑁆𑀢𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀤𑀼𑀢𑀺𑀬𑀫𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀯𑀢𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀳𑀸𑀬𑀜𑁆𑀜𑀯𑀕𑁆𑀕𑁄

𑁧. 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀧𑀜𑁆𑀘𑀫𑀲𑁆𑀲 ¶ 𑀧𑀞𑀫𑁂 𑀬𑀲𑁆𑀫𑀸 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄 (𑀤𑀻. 𑀦𑀺. 𑀝𑀻. 𑁨.𑁧𑁨𑁭) 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑁂𑀲𑁄 𑀳𑁄𑀢𑀺𑀬𑁂𑀯 𑀲𑀢𑀺𑀧𑀺 𑀩𑀸𑀳𑀺𑀭𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑁂𑀤𑁂 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀪𑀺𑀦𑁆𑀦𑀢𑁆𑀢𑀸. 𑀦𑀸𑀦𑀢𑁆𑀢𑀁 𑀓𑀸𑀬𑁂 𑀏𑀢𑁂𑀲𑀁, 𑀦𑀸𑀦𑀢𑁆𑀢𑁄 𑀯𑀸 𑀓𑀸𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀢𑁆𑀢𑀓𑀸𑀬𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁. 𑀦𑀸𑀦𑀢𑁆𑀢𑀸 𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀸𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀺𑀦𑀺𑀧𑀸𑀢𑀺𑀓𑀸 𑀲𑀢𑀺𑀧𑀺 𑀤𑁂𑀯𑀪𑀸𑀯𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀅𑀧𑀸𑀬𑁂𑀲𑀼 𑀯𑀸 𑀕𑀢𑁄 𑀦𑀢𑁆𑀣𑀺 𑀦𑀺𑀧𑀸𑀢𑁄 𑀏𑀢𑁂𑀲𑀦𑁆𑀢𑀺 𑀯𑀺𑀦𑀺𑀧𑀸𑀢𑀺𑀓𑀸. 𑀢𑁂𑀦𑀸𑀳 ‘‘𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀸’’𑀢𑀺. 𑀧𑀺𑀬𑀗𑁆𑀓𑀭𑀫𑀸𑀢𑀸𑀤𑀻𑀦𑀁 𑀯𑀺𑀬𑀸𑀢𑀺 𑀧𑀺𑀬𑀗𑁆𑀓𑀭𑀫𑀸𑀢𑀸 𑀓𑀺𑀭 𑀬𑀓𑁆𑀔𑀺𑀦𑀻 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀁 𑀲𑀚𑁆𑀛𑀸𑀬𑀢𑁄 𑀲𑀼𑀢𑁆𑀯𑀸 𑁋

‘‘𑀫𑀸 ¶ 𑀲𑀤𑁆𑀤𑀫𑀓𑀭𑀻 𑀧𑀺𑀬𑀗𑁆𑀓𑀭, 𑀪𑀺𑀓𑁆𑀔𑀼 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺;

𑀅𑀧𑀺 𑀥𑀫𑁆𑀫𑀧𑀤𑀁 𑀯𑀺𑀚𑀸𑀦𑀺𑀬, 𑀧𑀝𑀺𑀧𑀚𑁆𑀚𑁂𑀫 𑀳𑀺𑀢𑀸𑀬 𑀦𑁄 𑀲𑀺𑀬𑀸.

‘‘𑀧𑀸𑀡𑁂𑀲𑀼 𑀘 𑀲𑀁𑀬𑀫𑀸𑀫𑀲𑁂, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀡𑀸𑀫𑀲𑁂;

𑀲𑀺𑀓𑁆𑀔𑁂𑀫 𑀲𑀼𑀲𑀻𑀮𑁆𑀬𑀫𑀢𑁆𑀢𑀦𑁄, 𑀅𑀧𑀺 𑀫𑀼𑀘𑁆𑀘𑁂𑀫 𑀧𑀺𑀲𑀸𑀘𑀬𑁄𑀦𑀺𑀬𑀸’’𑀢𑀺. (𑀲𑀁. 𑀦𑀺. 𑁧.𑁨𑁪𑁦) 𑁋

𑀏𑀯𑀁 𑀧𑀼𑀢𑁆𑀢𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸. 𑀉𑀢𑁆𑀢𑀭𑀫𑀸𑀢𑀸 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀯 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸.

𑀩𑁆𑀭𑀳𑁆𑀫𑀓𑀸𑀬𑁂 𑀧𑀞𑀫𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑁂 𑀩𑁆𑀭𑀳𑁆𑀫𑀲𑀫𑀽𑀳𑁂, 𑀩𑁆𑀭𑀳𑁆𑀫𑀦𑀺𑀓𑀸𑀬𑁂 𑀯𑀸 𑀪𑀯𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀭𑀺𑀲𑀸𑀬 𑀪𑀯𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀢𑀲𑁆𑀲 𑀧𑀭𑀺𑀘𑀸𑀭𑀓𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀆𑀬𑀼𑀯𑀡𑁆𑀡𑀸𑀤𑀻𑀳𑀺 𑀫𑀳𑀦𑁆𑀢𑀸 𑀩𑁆𑀭𑀳𑁆𑀫𑀸𑀦𑁄𑀢𑀺 𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀲𑀢𑀺𑀧𑀺 𑀢𑁂𑀲𑀁 𑀢𑀺𑀯𑀺𑀥𑀸𑀦𑀫𑁆𑀧𑀺 𑀧𑀞𑀫𑁂𑀦 𑀛𑀸𑀦𑁂𑀦 𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀛𑀸𑀦𑀲𑁆𑀲 𑀧𑀦 𑀧𑀯𑀢𑁆𑀢𑀺𑀪𑁂𑀤𑁂𑀦 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑁂𑀦𑀸𑀢𑀺 𑀳𑀻𑀦𑁂𑀦. 𑀲𑀸 𑀘𑀲𑁆𑀲 𑀳𑀻𑀦𑀢𑀸 𑀙𑀦𑁆𑀤𑀸𑀤𑀻𑀦𑀁 𑀳𑀻𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀯𑀸 𑀳𑀻𑀦𑀁. 𑀓𑀧𑁆𑀧𑀲𑁆𑀲𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲 ¶ . 𑀳𑀻𑀦𑀧𑀡𑀻𑀢𑀸𑀦𑀁 𑀫𑀚𑁆𑀛𑁂 𑀪𑀯𑀢𑁆𑀢𑀸 𑀫𑀚𑁆𑀛𑀺𑀫𑀁. 𑀲𑀸 𑀘𑀲𑁆𑀲 𑀫𑀚𑁆𑀛𑀺𑀫𑀢𑀸 𑀙𑀦𑁆𑀤𑀸𑀤𑀻𑀦𑀁 𑀫𑀚𑁆𑀛𑀺𑀫𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀮𑀪𑀺𑀢𑁆𑀯𑀸 𑀦𑀸𑀢𑀺𑀲𑀼𑀪𑀸𑀯𑀺𑀢𑀁 𑀯𑀸 𑀫𑀚𑁆𑀛𑀺𑀫𑀁. 𑀉𑀧𑀟𑁆𑀠𑀓𑀧𑁆𑀧𑁄𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲 𑀉𑀧𑀟𑁆𑀠𑀓𑀧𑁆𑀧𑁄. 𑀯𑀺𑀧𑁆𑀨𑀸𑀭𑀺𑀓𑀢𑀭𑁄𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀳𑀺 𑀧𑀫𑀸𑀡𑀢𑁄 𑀯𑀺𑀧𑀼𑀮𑀢𑀭𑁄 𑀲𑀪𑀸𑀯𑀢𑁄 𑀉𑀴𑀸𑀭𑀢𑀭𑁄 𑀘 𑀳𑁄𑀢𑀺. 𑀲𑀪𑀸𑀯𑁂𑀦𑀧𑀺 𑀳𑀺 𑀉𑀴𑀸𑀭𑀢𑀫𑁄𑀯. 𑀢𑀁 𑀧𑀦𑁂𑀢𑁆𑀣 𑀅𑀧𑁆𑀧𑀫𑀸𑀡𑀁. 𑀢𑀲𑁆𑀲 𑀳𑀺 𑀧𑀭𑀺𑀢𑁆𑀢𑀸𑀪𑀸𑀤𑀻𑀦𑀁 𑀧𑀭𑀺𑀢𑁆𑀢𑀲𑀼𑀪𑀸𑀤𑀻𑀦𑀜𑁆𑀘 𑀓𑀸𑀬𑁂 𑀲𑀢𑀺𑀧𑀺 𑀲𑀪𑀸𑀯𑀯𑁂𑀫𑀢𑁆𑀢𑁂 𑀏𑀓𑀢𑁆𑀢𑀯𑀲𑁂𑀦𑁂𑀯 𑀯𑀯𑀢𑁆𑀣𑀧𑀻𑀬𑀢𑀻𑀢𑀺 ‘‘𑀏𑀓𑀢𑁆𑀢𑀓𑀸𑀬𑀸’’𑀢𑁆𑀯𑁂𑀯 𑀢𑁂 𑀯𑀼𑀘𑁆𑀘𑀦𑁆𑀢𑀺. 𑀧𑀡𑀻𑀢𑁂𑀦𑀸𑀢𑀺 𑀉𑀓𑁆𑀓𑀝𑁆𑀞𑁂𑀦. 𑀲𑀸 𑀘𑀲𑁆𑀲 𑀉𑀓𑁆𑀓𑀝𑁆𑀞𑀢𑀸 𑀙𑀦𑁆𑀤𑀸𑀤𑀻𑀦𑀁 𑀉𑀓𑁆𑀓𑀝𑁆𑀞𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀪𑀸𑀯𑀺𑀢𑀁 𑀯𑀸, 𑀲𑀫𑁆𑀫𑀤𑁂𑀯, 𑀯𑀲𑀺𑀪𑀸𑀯𑀁 𑀧𑀸𑀧𑀺𑀢𑀁 𑀧𑀡𑀻𑀢𑀁 ‘‘𑀧𑀥𑀸𑀦𑀪𑀸𑀯𑀁 𑀦𑀻𑀢’’𑀦𑁆𑀢𑀺 𑀓𑀢𑁆𑀯𑀸. 𑀇𑀥𑀸𑀧𑀺 𑀓𑀧𑁆𑀧𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄 𑀧𑀭𑀺𑀧𑀼𑀡𑁆𑀡𑀫𑀳𑀸𑀓𑀧𑁆𑀧𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀢𑁂𑀢𑀺 ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀸 𑀢𑀺𑀯𑀺𑀥𑀸𑀧𑀺 𑀩𑁆𑀭𑀳𑁆𑀫𑀸𑀦𑁄. 𑀲𑀜𑁆𑀜𑀸𑀬 𑀏𑀓𑀢𑁆𑀢𑀸𑀢𑀺 𑀢𑀺𑀳𑁂𑀢𑀼𑀓𑀪𑀸𑀯𑁂𑀦 𑀏𑀓𑀲𑀪𑀸𑀯𑀢𑁆𑀢𑀸. 𑀦 𑀳𑀺 𑀢𑀲𑁆𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑁂𑀤𑁄 𑀅𑀢𑁆𑀣𑀺. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀕𑀳𑀺𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀤𑀡𑁆𑀟𑀉𑀓𑁆𑀓𑀸𑀬𑀸𑀢𑀺 ¶ 𑀤𑀡𑁆𑀟𑀤𑀻𑀧𑀺𑀓𑀸𑀬. 𑀲𑀭𑀢𑀺 𑀥𑀸𑀯𑀢𑀺, 𑀯𑀺𑀲𑁆𑀲𑀭𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀸 𑀯𑀺𑀬 𑀥𑀸𑀯𑀢𑀺. 𑀤𑁆𑀯𑁂 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀫𑀳𑀸𑀓𑀧𑁆𑀧𑀸. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀆𑀪𑀲𑁆𑀲𑀭𑀕𑁆𑀕𑀳𑀡𑁂𑀦𑁂𑀯 𑀲𑀩𑁆𑀩𑁂𑀧𑀺 𑀢𑁂 𑀧𑀭𑀺𑀢𑁆𑀢𑀸𑀪𑀸𑀅𑀧𑁆𑀧𑀫𑀸𑀡𑀸𑀪𑀸𑀧𑀺 𑀕𑀳𑀺𑀢𑀸.

𑀲𑀼𑀦𑁆𑀤𑀭𑀸 𑀧𑀪𑀸 𑀲𑀼𑀪𑀸, 𑀢𑀸𑀬 𑀓𑀺𑀡𑁆𑀡𑀸 𑀲𑀼𑀪𑀸𑀓𑀺𑀡𑁆𑀡𑀸𑀢𑀺 𑀯𑀢𑁆𑀢𑀩𑁆𑀩𑁂. 𑀪𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀅𑀦𑁆𑀢𑀺𑀫-𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀪𑀓𑀺𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺𑀘𑁆𑀘𑀮𑀸𑀬 𑀏𑀓𑀕𑁆𑀖𑀦𑀸𑀬 𑀧𑀪𑀸𑀬 𑀲𑀼𑀪𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 ‘‘𑀲𑀼𑀪𑁂𑀦 𑀑𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀢𑁆𑀣𑀸𑀧𑀺 𑀅𑀦𑁆𑀢𑀺𑀫-𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀓𑀭𑀡𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯. 𑀦 𑀙𑀺𑀚𑁆𑀚𑀺𑀢𑁆𑀯𑀸 𑀧𑀪𑀸 𑀕𑀘𑁆𑀙𑀢𑀺 𑀏𑀓𑀕𑁆𑀖𑀦𑀢𑁆𑀢𑀸. 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀫𑁂𑀯 𑀪𑀚𑀦𑁆𑀢𑀺 𑀓𑀸𑀬𑀲𑁆𑀲 𑀲𑀜𑁆𑀜𑀸𑀬 𑀘 𑀏𑀓𑀭𑀽𑀧𑀢𑁆𑀢𑀸. 𑀯𑀺𑀧𑀼𑀮𑀲𑀦𑁆𑀢𑀲𑀼𑀔𑀸𑀬𑀼𑀯𑀡𑁆𑀡𑀸𑀤𑀺𑀨𑀮𑀢𑁆𑀢𑀸 𑀯𑁂𑀳𑀧𑁆𑀨𑀮𑀸. 𑀏𑀢𑁆𑀣𑀸𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁.

𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀸 𑀅𑀧𑀼𑀦𑀭𑀸𑀯𑀢𑁆𑀢𑀦𑀢𑁄. ‘‘𑀦 𑀲𑀩𑁆𑀩𑀓𑀸𑀮𑀺𑀓𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀬𑀦𑀢𑁄 𑀅𑀜𑁆𑀜𑁂𑀲𑀜𑁆𑀘 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀲𑀼𑀜𑁆𑀜𑀁 𑀢𑀁 𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀸 𑀦 𑀲𑀩𑁆𑀩𑀓𑀸𑀮𑀺𑀓𑀸. 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑁄. 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀲𑀢𑁆𑀢𑀸𑀯𑀸𑀲𑀪𑀸𑀯𑀤𑀻𑀧𑀦𑁂𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀪𑀸𑀯𑁄𑀧𑀺 𑀤𑀻𑀧𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁, 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘𑀢𑀼𑀢𑁆𑀣𑀲𑀢𑁆𑀢𑀸𑀯𑀸𑀲𑀜𑁆𑀘 𑀪𑀚𑀦𑁆𑀢𑀺.

𑀲𑀼𑀔𑀼𑀫𑀢𑁆𑀢𑀸𑀢𑀺 ¶ 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀢𑁆𑀢𑀸. 𑀧𑀭𑀺𑀩𑁆𑀬𑀢𑁆𑀢𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀸𑀪𑀸𑀯𑀢𑁄 𑀦𑁂𑀯 𑀯𑀺𑀜𑁆𑀜𑀸𑀡𑀁, 𑀦 𑀲𑀩𑁆𑀩𑀲𑁄 𑀅𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀦𑀸𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀧𑀭𑀺𑀧𑁆𑀨𑀼𑀢𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀦𑁆𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦 𑀯𑀼𑀢𑁆𑀢𑀁.

𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀤𑀼𑀢𑀺𑀬𑁂 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸𑀢𑀺 𑀏𑀢𑁆𑀣 𑀢𑀬𑁄 𑀧𑀭𑀺𑀓𑁆𑀔𑀸𑀭𑀸. ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺 (𑀲𑀁. 𑀦𑀺. 𑁫.𑁪) 𑀳𑀺 𑀏𑀢𑁆𑀣 𑀅𑀮𑀗𑁆𑀓𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 ¶ 𑀦𑀸𑀫. ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁭.𑁬𑁭) 𑀏𑀢𑁆𑀣 𑀧𑀭𑀺𑀯𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. ‘‘𑀕𑀺𑀮𑀸𑀦𑀧𑀘𑁆𑀘𑀬…𑀧𑁂… 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸’’𑀢𑀺 (𑀫. 𑀦𑀺. 𑁧.𑁧𑁯𑁧-𑁧𑁯𑁨) 𑀏𑀢𑁆𑀣 𑀲𑀫𑁆𑀪𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀲𑀫𑁆𑀪𑀸𑀭𑀸’’𑀢𑀺. 𑀧𑀭𑀺𑀯𑀸𑀭𑀧𑀭𑀺𑀓𑁆𑀔𑀸𑀭𑁄𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀯𑀸𑀭𑁄 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀬𑁄 𑀫𑀕𑁆𑀕𑀥𑀫𑁆𑀫𑀸 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀧𑀭𑀺𑀓𑀭𑀡𑀢𑁄 𑀅𑀪𑀺𑀲𑀗𑁆𑀔𑀭𑀡𑀢𑁄. 𑀧𑀭𑀺𑀓𑁆𑀔𑀢𑀸𑀢𑀺 𑀧𑀭𑀺𑀯𑀸𑀭𑀺𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀬𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀭𑀺𑀯𑀼𑀢𑁄 𑀘𑀓𑁆𑀓𑀯𑀢𑁆𑀢𑀻 𑀯𑀺𑀬 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀧𑀭𑀺𑀯𑀼𑀢𑁄 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀉𑀧𑁂𑀘𑁆𑀘 𑀦𑀺𑀲𑁆𑀲𑀻𑀬𑀢𑀻𑀢𑀺 𑀉𑀧𑀦𑀺𑀲𑀸, 𑀲𑀳 𑀉𑀧𑀦𑀺𑀲𑀸𑀬𑀸𑀢𑀺 𑀲𑀉𑀧𑀦𑀺𑀲𑁄, 𑀲𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑁄, 𑀲𑀧𑀭𑀺𑀯𑀸𑀭𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀳𑀓𑀸𑀭𑀺𑀓𑀸𑀭𑀡𑀪𑀽𑀢𑁄 𑀳𑀺 𑀥𑀫𑁆𑀫𑀲𑀫𑀽𑀳𑁄 𑀇𑀥 ‘‘𑀉𑀧𑀦𑀺𑀲𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀞𑀫𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀢𑀢𑀺𑀬𑁂 𑀅𑀦𑀼𑀟𑀳𑀦𑀝𑁆𑀞𑁂𑀦𑀸𑀢𑀺 𑀓𑀸𑀫𑀁 𑀆𑀳𑀼𑀦𑁂𑀬𑁆𑀬𑀕𑁆𑀕𑀺𑀆𑀤𑀬𑁄 𑀢𑀬𑁄 𑀅𑀕𑁆𑀕𑀻 𑀩𑁆𑀭𑀸𑀳𑁆𑀫𑀡𑁂𑀳𑀺𑀧𑀺 𑀇𑀘𑁆𑀙𑀺𑀢𑀸 𑀲𑀦𑁆𑀢𑀺. 𑀢𑁂 𑀧𑀦 𑀢𑁂𑀳𑀺 𑀇𑀘𑁆𑀙𑀺𑀢𑀫𑀢𑁆𑀢𑀸𑀯, 𑀦 𑀲𑀢𑁆𑀢𑀸𑀦𑀁 𑀢𑀸𑀤𑀺𑀲𑀸 𑀅𑀢𑁆𑀣𑀲𑀸𑀥𑀓𑀸. 𑀬𑁂 𑀧𑀦 𑀲𑀢𑁆𑀢𑀸𑀦𑀁 𑀅𑀢𑁆𑀣𑀲𑀸𑀥𑀓𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀆𑀳𑀼𑀦𑀁 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀦𑁂𑀢𑁆𑀯𑀸 𑀳𑀼𑀦𑀦𑀁 𑀧𑀽𑀚𑀦𑀁 ‘‘𑀆𑀳𑀼𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀆𑀳𑀼𑀦𑀁 𑀅𑀭𑀳𑀦𑁆𑀢𑀻 𑀫𑀸𑀢𑀸𑀧𑀺𑀢𑀭𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀆𑀳𑀼𑀦𑁂𑀬𑁆𑀬𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀇𑀢𑀺𑀯𑀼. 𑁧𑁦𑁬). 𑀬𑀤𑀕𑁆𑀕𑁂𑀦 𑀘 𑀢𑁂 𑀧𑀼𑀢𑁆𑀢𑀸𑀦𑀁 𑀩𑀳𑀽𑀧𑀓𑀸𑀭𑀢𑀸𑀬 ¶ 𑀆𑀳𑀼𑀦𑁂𑀬𑁆𑀬𑀸𑀢𑀺, 𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀦𑁂𑀲𑀁 𑀳𑀺𑀢𑀲𑀼𑀔𑀸𑀯𑀳𑀸, 𑀢𑀤𑀕𑁆𑀕𑁂𑀦 𑀢𑁂𑀲𑀼 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀸𑀢𑀺 𑀆𑀳 ‘‘𑀢𑁂𑀲𑀼…𑀧𑁂… 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺.

𑀲𑁆𑀯𑀸𑀬𑀫𑀢𑁆𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀫𑀺𑀢𑁆𑀢𑀯𑀺𑀦𑁆𑀤𑀓𑀯𑀢𑁆𑀣𑀼𑀦𑀸 𑀯𑁂𑀤𑀺𑀢𑀩𑁆𑀩𑁄. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀳𑀺 𑀫𑀸𑀢𑀭𑀸, ‘‘𑀢𑀸𑀢, 𑀅𑀚𑁆𑀚 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑁂 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀡𑁄𑀳𑀺, 𑀲𑀳𑀲𑁆𑀲𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁄 𑀥𑀦𑀮𑁄𑀪𑁂𑀦 𑀉𑀧𑁄𑀲𑀣𑀁 𑀲𑀫𑀸𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀞𑀸𑀦𑀁 𑀅𑀓𑀼𑀢𑁄𑀪𑀬’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑁄 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀖𑀭𑀁 ¶ 𑀅𑀕𑀫𑀸𑀲𑀺. 𑀫𑀸𑀢𑀸 𑀧𑀸𑀢𑁄𑀯 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀲𑁄 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸𑀯 𑀧𑀺𑀯𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀥𑀦𑀁 𑀲𑀁𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸, ‘‘𑀢𑀸𑀢, 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀅𑀢𑁆𑀣𑀺, 𑀅𑀮𑀁 𑀕𑀫𑀦𑁂𑀦𑀸’’𑀢𑀺 𑀦𑀺𑀯𑀸𑀭𑁂𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀢𑀺 𑀏𑀯. 𑀲𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀧𑀼𑀭𑀢𑁄 𑀢𑀺𑀝𑁆𑀞𑀢𑀻’’𑀢𑀺 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀢𑀺𑀢𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺.

𑀫𑀸𑀢𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀫𑀸𑀤𑀺𑀲𑀸𑀬 𑀫𑀸𑀢𑀭𑀺 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀕𑀢𑀲𑁆𑀲 𑀢𑁂 𑀕𑀢𑀝𑁆𑀞𑀸𑀦𑁂 𑀲𑀼𑀔𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁𑀲𑀜𑁆𑀜𑀻 𑀦𑀸𑀫 𑀢𑁆𑀯𑀁 𑀧𑀼𑀢𑁆𑀢𑀸’’𑀢𑀺 𑀆𑀳. 𑀢𑀲𑁆𑀲 𑀦𑀸𑀯𑀁 𑀆𑀭𑀼𑀬𑁆𑀳 𑀕𑀘𑁆𑀙𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀢𑁂 𑀫𑀦𑀼𑀲𑁆𑀲𑀸 ‘‘𑀅𑀤𑁆𑀥𑀸 𑀏𑀢𑁆𑀣 𑀧𑀸𑀧𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀲𑀮𑀸𑀓𑀁 𑀤𑁂𑀣𑀸’’𑀢𑀺 𑀆𑀳𑀁𑀲𑀼. 𑀲𑀮𑀸𑀓𑀸 𑀤𑀻𑀬𑀫𑀸𑀦𑀸 𑀢𑀲𑁆𑀲𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀧𑀼𑀡𑀺. 𑀢𑁂 𑀢𑀲𑁆𑀲 𑀉𑀴𑀼𑀫𑁆𑀧𑀁 𑀤𑀢𑁆𑀯𑀸 𑀢𑀁 𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀏𑀓𑀁 𑀤𑀻𑀧𑀁 𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀧𑁂𑀢𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀸𑀳𑀺 ‘‘𑀧𑀼𑀭𑀢𑁄 𑀧𑀼𑀭𑀢𑁄 𑀫𑀸 𑀅𑀕𑀫𑀸𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀁 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀔𑀼𑀭𑀘𑀓𑁆𑀓𑀥𑀭𑀁 𑀏𑀓𑀁 𑀅𑀤𑁆𑀤𑀲. 𑀢𑀁 𑀘𑀓𑁆𑀓𑀁 𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀁 𑀆𑀳, ‘‘𑀅𑀫𑁆𑀪𑁄, 𑀇𑀤𑀁 𑀢𑀬𑀸 𑀧𑀺𑀴𑀦𑁆𑀥𑀺𑀢𑀁 𑀧𑀤𑀼𑀫𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺. 𑀦 𑀇𑀤𑀁, 𑀲𑀸𑀫𑀺, 𑀧𑀤𑀼𑀫𑀁, 𑀔𑀼𑀭𑀘𑀓𑁆𑀓𑀁 𑀏𑀢𑀦𑁆𑀢𑀺. 𑀲𑁄 ‘‘𑀯𑀜𑁆𑀘𑁂𑀲𑀺 𑀫𑀁 𑀢𑁆𑀯𑀁, 𑀓𑀺𑀁 𑀫𑀬𑀸 𑀧𑀤𑀼𑀫𑀁 𑀦 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀁 𑀮𑁄𑀳𑀺𑀢𑀘𑀦𑁆𑀤𑀦𑀁 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀧𑀤𑀼𑀫𑀧𑀼𑀧𑁆𑀨𑀁 𑀫𑀬𑁆𑀳𑀁 𑀦 𑀤𑀸𑀢𑀼𑀓𑀸𑀫𑁄’’𑀢𑀺 𑀆𑀳. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀫𑁆𑀧𑀺 𑀫𑀬𑀸 𑀓𑀢𑀲𑀤𑀺𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀨𑀮𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑁄’’𑀢𑀺. 𑀅𑀣 𑀦𑀁 ‘‘𑀕𑀡𑁆𑀳, 𑀭𑁂’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀘𑀓𑁆𑀓𑀁 𑀔𑀺𑀧𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺 𑀧𑀺𑀘 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺. (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩);

𑀲𑁄𑀢𑀺 ¶ 𑀕𑁂𑀳𑀲𑀸𑀫𑀺𑀓𑁄 𑀪𑀢𑁆𑀢𑀸. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀅𑀦𑀼𑀟𑀳𑀦𑀲𑁆𑀲 𑀧𑀘𑁆𑀘𑀬𑀢𑀸𑀬. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀲𑁄𑀢𑀸𑀧𑀦𑁆𑀦𑀲𑁆𑀲 𑀉𑀧𑀸𑀲𑀓𑀲𑁆𑀲 𑀪𑀭𑀺𑀬𑀸 𑀅𑀢𑀺𑀘𑀸𑀭𑀁 𑀘𑀭𑀢𑀺. 𑀲𑁄 𑀢𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀻’’𑀢𑀺 𑀆𑀳. 𑀲𑀸 ‘‘𑀲𑀘𑀸𑀳𑀁 𑀏𑀯𑀭𑀽𑀧𑀁 𑀓𑀭𑁄𑀫𑀺, 𑀅𑀬𑀁 𑀫𑁂 𑀲𑀼𑀦𑀔𑁄 𑀯𑀺𑀮𑀼𑀧𑁆𑀧𑀫𑀸𑀦𑁄 ¶ 𑀔𑀸𑀤𑀢𑀽’’𑀢𑀺 𑀯𑀢𑁆𑀯𑀸 𑀓𑀸𑀮𑀓𑀢𑀸 𑀓𑀡𑁆𑀡𑀫𑀼𑀡𑁆𑀟𑀓𑀤𑀳𑁂 𑀯𑁂𑀫𑀸𑀦𑀺𑀓𑀧𑁂𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀤𑀺𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺, 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀺𑀕𑀯𑀁 𑀘𑀭𑀦𑁆𑀢𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀡𑁆𑀡𑀫𑀼𑀡𑁆𑀟𑀓𑀤𑀳𑀁 𑀲𑀫𑁆𑀧𑀢𑁆𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺. 𑀲𑀸 𑀢𑀁 𑀯𑀜𑁆𑀘𑁂𑀢𑁆𑀯𑀸 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺. 𑀲𑁄 𑀜𑀢𑁆𑀯𑀸 ‘‘𑀓𑀢𑁆𑀣 𑀦𑀼 𑀔𑁄 𑀕𑀘𑁆𑀙𑀢𑀻’’𑀢𑀺 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀓𑀡𑁆𑀡𑀫𑀼𑀡𑁆𑀟𑀓𑀤𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 ‘‘𑀧𑀝𑀧𑀝’’𑀦𑁆𑀢𑀺 𑀔𑀸𑀤𑀫𑀸𑀦𑀁 𑀏𑀓𑀁 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀅𑀲𑀺𑀦𑀸 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺, 𑀤𑁆𑀯𑁂 𑀅𑀳𑁂𑀲𑀼𑀁. 𑀧𑀼𑀦 𑀙𑀺𑀦𑁆𑀦𑁂 𑀘𑀢𑁆𑀢𑀸𑀭𑁄, 𑀧𑀼𑀦 𑀙𑀺𑀦𑁆𑀦𑁂 𑀅𑀝𑁆𑀞, 𑀧𑀼𑀦 𑀙𑀺𑀦𑁆𑀦𑁂 𑀲𑁄𑀴𑀲 𑀅𑀳𑁂𑀲𑀼𑀁. 𑀲𑀸 ‘‘𑀓𑀺𑀁 𑀓𑀭𑁄𑀲𑀺, 𑀲𑀸𑀫𑀻’’𑀢𑀺 𑀆𑀳. 𑀲𑁄 ‘‘𑀓𑀺𑀁 𑀇𑀤’’𑀦𑁆𑀢𑀺 𑀆𑀳. 𑀲𑀸 ‘‘𑀏𑀯𑀁 𑀅𑀓𑀢𑁆𑀯𑀸 𑀔𑁂𑀴𑀧𑀺𑀡𑁆𑀟𑀁 𑀪𑀽𑀫𑀺𑀬𑀁 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀧𑀸𑀤𑁂𑀦 𑀖𑀁𑀲𑀸𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀼𑀦𑀔𑀸 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀫𑀼𑀝𑁆𑀞𑀺𑀬𑁄𑀕𑁄 𑀓𑀺𑀭𑀸𑀬𑀁 𑀢𑀲𑁆𑀲 𑀲𑀼𑀦𑀔𑀦𑁆𑀢𑀭𑀥𑀸𑀦𑀲𑁆𑀲, 𑀬𑀤𑀺𑀤𑀁 𑀔𑁂𑀴𑀧𑀺𑀡𑁆𑀟𑀁 𑀪𑀽𑀫𑀺𑀬𑀁 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀧𑀸𑀤𑁂𑀦 𑀖𑀁𑀲𑀦𑀁, 𑀢𑀁 𑀤𑀺𑀯𑀲𑀁 𑀢𑀲𑁆𑀲𑀸 𑀓𑀫𑁆𑀫𑀁 𑀔𑀻𑀡𑀁. 𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀕𑀦𑁆𑀢𑀼𑀁 𑀆𑀭𑀤𑁆𑀥𑁄. 𑀲𑀸 ‘‘𑀫𑀬𑁆𑀳𑀁, 𑀲𑀸𑀫𑀺, 𑀓𑀫𑁆𑀫𑀁 𑀔𑀻𑀡𑀁, 𑀫𑀸 𑀅𑀕𑀫𑀸𑀲𑀻’’𑀢𑀺 𑀆𑀳. 𑀭𑀸𑀚𑀸 𑀅𑀲𑁆𑀲𑀼𑀢𑁆𑀯𑀸𑀯 𑀕𑀢𑁄.

𑀤𑀓𑁆𑀔𑀺𑀡𑀸𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀤𑀻𑀬𑀫𑀸𑀦𑀸 𑀤𑀓𑁆𑀔𑀦𑁆𑀢𑀺 𑀏𑀢𑁂𑀳𑀺 𑀳𑀺𑀢𑀲𑀼𑀔𑀸𑀦𑀻𑀢𑀺, 𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄.

𑀧𑀞𑀫𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀤𑀼𑀢𑀺𑀬𑀅𑀕𑁆𑀕𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁭-𑁪𑁮. 𑀘𑀢𑀼𑀢𑁆𑀣𑁂 𑀬𑀜𑁆𑀜𑀯𑀸𑀝𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀳𑀸𑀬𑀜𑁆𑀜𑀁 𑀉𑀤𑁆𑀤𑀺𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀸𑀦𑀺 𑀅𑀯𑀺𑀜𑁆𑀜𑀸𑀡𑀓𑀸𑀦𑀺 𑀘 𑀬𑀜𑁆𑀜𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑀺𑀢𑀸𑀦𑀻𑀢𑀺 𑀆𑀳 𑀧𑀸𑀴𑀺𑀬𑀁 ‘‘𑀫𑀳𑀸𑀬𑀜𑁆𑀜𑁄 𑀉𑀧𑀓𑁆𑀔𑀝𑁄’’𑀢𑀺. 𑀢𑀁 𑀉𑀧𑀓𑀭𑀡𑀁 𑀢𑁂𑀲𑀁 𑀢𑀣𑀸𑀲𑀚𑁆𑀚𑀦𑀦𑁆𑀢𑀺 𑀆𑀳 ‘‘𑀉𑀧𑀓𑁆𑀔𑀝𑁄𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄’’𑀢𑀺. 𑀯𑀘𑁆𑀙𑀢𑀭𑀲𑀢𑀸𑀦𑀻𑀢𑀺 𑀬𑀼𑀯𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀦𑀸𑀢𑀺𑀩𑀮𑀯𑀯𑀘𑁆𑀙𑀲𑀢𑀸𑀦𑀺. 𑀢𑁂 𑀧𑀦 𑀯𑀘𑁆𑀙𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀫𑁆𑀫𑀸, 𑀩𑀮𑀻𑀩𑀤𑁆𑀤𑀸 𑀯𑀸. 𑀉𑀭𑀩𑁆𑀪𑀸𑀢𑀺 𑀢𑀭𑀼𑀡𑀫𑁂𑀡𑁆𑀟𑀓�