📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀅𑀝𑁆𑀞𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀫𑁂𑀢𑁆𑀢𑀸𑀯𑀕𑁆𑀕𑁄

𑁧. 𑀫𑁂𑀢𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀅𑀝𑁆𑀞𑀓𑀦𑀺𑀧𑀸𑀢𑀲𑁆𑀲 ¶ ¶ 𑀧𑀞𑀫𑁂 𑀯𑀟𑁆𑀠𑀺𑀢𑀸𑀬𑀸𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀸𑀬. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀬𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸𑀬. 𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀓𑀢𑀸𑀬𑀸𑀢𑀺 𑀬𑀣𑀸 𑀬𑀼𑀢𑁆𑀢𑀆𑀚𑀜𑁆𑀜𑀬𑀸𑀦𑀁 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀸𑀭𑀳𑀢𑀁 𑀕𑀫𑀺𑀢𑀸𑀬. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀬𑀸𑀢𑀺 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑁂𑀳𑀺 𑀧𑀢𑀺 𑀧𑀢𑀺 𑀉𑀧𑀝𑁆𑀞𑀺𑀢𑀸𑀬 𑀅𑀯𑀺𑀚𑀳𑀺𑀢𑀸𑀬. 𑀲𑀫𑀦𑁆𑀢𑀢𑁄 𑀘𑀺𑀢𑀸𑀬𑀸𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀸𑀦𑀼𑀭𑀽𑀧𑀁 𑀘𑀬𑀁 𑀕𑀫𑀺𑀢𑀸𑀬. 𑀢𑁂𑀦𑀸𑀳 ‘‘𑀉𑀧𑀘𑀺𑀢𑀸𑀬𑀸’’𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀅𑀢𑀺𑀯𑀺𑀬 𑀲𑀫𑁆𑀫𑀤𑁂𑀯 𑀦𑀺𑀩𑁆𑀩𑀢𑁆𑀢𑀺𑀕𑀢𑀸𑀬.

𑀬𑁄 ¶ 𑀘 𑀫𑁂𑀢𑁆𑀢𑀁 𑀪𑀸𑀯𑀬𑀢𑀻𑀢𑀺𑀆𑀤𑀻𑀲𑀼 𑀬𑁄 𑀓𑁄𑀘𑀺 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸. 𑀫𑁂𑀢𑁆𑀢𑀦𑁆𑀢𑀺 𑀫𑁂𑀢𑁆𑀢𑀸𑀛𑀸𑀦𑀁.

𑀅𑀧𑁆𑀧𑀫𑀸𑀡𑀦𑁆𑀢𑀺 𑀪𑀸𑀯𑀦𑀸𑀯𑀲𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀁. 𑀅𑀲𑀼𑀪𑀪𑀸𑀯𑀦𑀸𑀤𑀬𑁄 𑀯𑀺𑀬 𑀳𑀺 𑀆𑀭𑀫𑁆𑀫𑀡𑁂 𑀏𑀓𑀤𑁂𑀲𑀕𑁆𑀕𑀳𑀡𑀁 𑀅𑀓𑀢𑁆𑀯𑀸 𑀅𑀦𑀯𑀲𑁂𑀲𑀨𑀭𑀡𑀯𑀲𑁂𑀦 𑀅𑀦𑁄𑀥𑀺𑀲𑁄 𑀨𑀭𑀡𑀯𑀲𑁂𑀦 𑀘, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸𑀬 𑀧𑀕𑀼𑀡𑀪𑀸𑀯𑀦𑀸𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀁. 𑀢𑀦𑀽 𑀲𑀁𑀬𑁄𑀚𑀦𑀸 𑀳𑁄𑀦𑁆𑀢𑀻𑀢𑀺 𑀫𑁂𑀢𑁆𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑁆𑀫𑀲𑀺𑀢𑁆𑀯𑀸 𑀳𑁂𑀝𑁆𑀞𑀺𑀫𑁂 𑀅𑀭𑀺𑀬𑀫𑀕𑁆𑀕𑁂 𑀅𑀥𑀺𑀕𑀘𑁆𑀙𑀦𑁆𑀢𑀲𑁆𑀲 𑀲𑀼𑀔𑁂𑀦𑁂𑀯 𑀧𑀝𑀺𑀖𑀲𑀁𑀬𑁄𑀚𑀦𑀸𑀤𑀬𑁄 𑀧𑀳𑀻𑀬𑀫𑀸𑀦𑀸 𑀢𑀦𑀽 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀯𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀜𑁆𑀘 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀲𑀺𑀔𑀸𑀧𑁆𑀧𑀢𑁆𑀢𑀫𑀸𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑁂𑀧𑀺 𑀆𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀫𑁆𑀧𑀺 𑀘𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀫𑁂𑀢𑁆𑀢𑀸𑀩𑀮𑁂𑀦 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑀺𑀢𑀩𑁆𑀬𑀸𑀧𑀸𑀤𑀢𑀸𑀬 𑀩𑁆𑀬𑀸𑀧𑀸𑀤𑁂𑀦 𑀅𑀤𑀽𑀲𑀺𑀢𑀘𑀺𑀢𑁆𑀢𑁄. 𑀫𑁂𑀢𑁆𑀢𑀸𑀬𑀢𑀻𑀢𑀺 𑀳𑀺𑀢𑀨𑀭𑀡𑀯𑀲𑁂𑀦 𑀫𑁂𑀢𑁆𑀢𑀁 ¶ 𑀓𑀭𑁄𑀢𑀺. 𑀓𑀼𑀲𑀮𑀻𑀢𑀺 𑀅𑀢𑀺𑀲𑀬𑁂𑀦 𑀓𑀼𑀲𑀮𑀯𑀸 𑀫𑀳𑀸𑀧𑀼𑀜𑁆𑀜𑁄, 𑀧𑀝𑀺𑀖𑀸𑀤𑀺𑀅𑀦𑀢𑁆𑀣𑀯𑀺𑀕𑀫𑁂𑀦 𑀔𑁂𑀫𑀻. 𑀲𑀩𑁆𑀩𑁂 𑀘 𑀧𑀸𑀡𑁂𑀢𑀺 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁄. 𑀫𑀦𑀲𑀸𑀦𑀼𑀓𑀫𑁆𑀧𑀻𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀓𑀫𑁆𑀧𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑀲𑀢𑁆𑀢𑀯𑀺𑀲𑀬𑀸𑀧𑀺 𑀢𑀸𑀯 𑀫𑁂𑀢𑁆𑀢𑀸 𑀫𑀳𑀸𑀓𑀼𑀲𑀮𑀭𑀸𑀲𑀺, 𑀲𑀩𑁆𑀩𑁂 𑀧𑀦 𑀧𑀸𑀡𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀺𑀬 𑀳𑀺𑀢𑀨𑀭𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑁄 𑀧𑀳𑀼𑀓𑀁 𑀧𑀳𑀼𑀁 𑀅𑀦𑀧𑁆𑀧𑀓𑀁 𑀅𑀧𑀭𑀺𑀬𑀦𑁆𑀢𑀁 𑀘𑀢𑀼𑀲𑀝𑁆𑀞𑀺𑀫𑀳𑀸𑀓𑀧𑁆𑀧𑁂𑀧𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀧𑁆𑀧𑀩𑀦𑁆𑀥𑀁 𑀧𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑀁 𑀉𑀴𑀸𑀭𑀁 𑀧𑀼𑀜𑁆𑀜𑀁 𑀅𑀭𑀺𑀬𑁄 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄𑀯 𑀓𑀭𑁄𑀢𑀺 𑀦𑀺𑀧𑁆𑀨𑀸𑀤𑁂𑀢𑀻𑀢𑀺. 𑀲𑀢𑁆𑀢𑀪𑀭𑀺𑀢𑀦𑁆𑀢𑀺 𑀲𑀢𑁆𑀢𑁂𑀳𑀺 𑀅𑀯𑀺𑀭𑀴𑀁, 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀦𑁆𑀢𑀺 𑀅𑀢𑁆𑀣𑁄.

𑀲𑀗𑁆𑀕𑀳𑀯𑀢𑁆𑀣𑀽𑀦𑀻𑀢𑀺 (𑀲𑀁. 𑀦𑀺. 𑀝𑀻. 𑁧.𑁧.𑁧𑁨𑁦) 𑀮𑁄𑀓𑀲𑁆𑀲 𑀲𑀗𑁆𑀕𑀡𑁆𑀳𑀦𑀓𑀸𑀭𑀡𑀸𑀦𑀺. 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀢𑁄 𑀦𑀯 𑀪𑀸𑀕𑁂 𑀓𑀲𑁆𑀲𑀓𑀲𑁆𑀲 𑀤𑀢𑁆𑀯𑀸 𑀭𑀜𑁆𑀜𑀁 𑀏𑀓𑀪𑀸𑀕𑀕𑁆𑀕𑀳𑀡𑀁 𑀤𑀲𑀫𑀪𑀸𑀕𑀕𑁆𑀕𑀳𑀡𑀁. 𑀏𑀯𑀁 𑀓𑀲𑁆𑀲𑀓𑀸 𑀳𑀝𑁆𑀞𑀢𑀼𑀝𑁆𑀞𑀸 𑀲𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀆𑀳 ‘‘𑀲𑀲𑁆𑀲𑀲𑀫𑁆𑀧𑀸𑀤𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑀢𑁄 𑀑𑀭𑀪𑀸𑀕𑁂 𑀓𑀺𑀭 𑀙𑀪𑀸𑀕𑀕𑁆𑀕𑀳𑀡𑀁 𑀚𑀸𑀢𑀁. 𑀙𑀫𑀸𑀲𑀺𑀓𑀦𑁆𑀢𑀺 𑀙𑀦𑁆𑀦𑀁 𑀙𑀦𑁆𑀦𑀁 𑀫𑀸𑀲𑀸𑀦𑀁 𑀧𑀳𑁄𑀦𑀓𑀁. 𑀧𑀸𑀲𑁂𑀢𑀻𑀢𑀺 𑀧𑀸𑀲𑀕𑀢𑁂 𑀯𑀺𑀬 𑀓𑀭𑁄𑀢𑀺. 𑀯𑀸𑀘𑀸𑀬 𑀧𑀺𑀬𑀁 𑀯𑀸𑀘𑀸𑀧𑀺𑀬𑀁, 𑀢𑀲𑁆𑀲 𑀓𑀫𑁆𑀫𑀁 𑀯𑀸𑀘𑀸𑀧𑁂𑀬𑁆𑀬𑀁. 𑀲𑀩𑁆𑀩𑀲𑁄 𑀭𑀝𑁆𑀞𑀲𑁆𑀲 𑀇𑀤𑁆𑀥𑀸𑀤𑀺𑀪𑀸𑀯𑀢𑁄 𑀔𑁂𑀫𑀁. 𑀦𑀺𑀭𑀩𑁆𑀩𑀼𑀤𑀁 𑀘𑁄𑀭𑀺𑀬𑀸𑀪𑀸𑀯𑀢𑁄. 𑀇𑀤𑁆𑀥𑀜𑁆𑀳𑀺 𑀭𑀝𑁆𑀞𑀁 𑀅𑀘𑁄𑀭𑀺𑀬𑀁. ‘‘𑀦𑀺𑀭𑀕𑁆𑀕𑀴’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀧𑀸𑀭𑀼𑀢𑀖𑀭𑀪𑀸𑀯𑀢𑁄.

𑀉𑀤𑁆𑀥𑀁𑀫𑀽𑀮𑀓𑀁 𑀓𑀢𑁆𑀯𑀸𑀢𑀺 𑀉𑀫𑁆𑀫𑀽𑀮𑀁 𑀓𑀢𑁆𑀯𑀸. 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀻𑀢𑀺 𑀫𑀳𑀸𑀬𑀜𑁆𑀜𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀘𑁆𑀙𑀸 𑀘 𑀧𑀯𑀢𑁆𑀢𑁂𑀢𑀩𑁆𑀩𑁂𑀳𑀺 𑀤𑁆𑀯𑀻𑀳𑀺 𑀧𑀭𑀺𑀯𑀸𑀭𑀬𑀜𑁆𑀜𑁂𑀳𑀺. 𑀲𑀢𑁆𑀢…𑀧𑁂… 𑀪𑀻𑀲𑀦𑀲𑁆𑀲𑀸𑀢𑀺 𑀲𑀢𑁆𑀢𑀦𑀯𑀼𑀢𑀸𑀥𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀲𑀼𑀲𑀢𑀸𑀦𑀁 𑀫𑀸𑀭𑀡𑁂𑀦 𑀪𑁂𑀭𑀯𑀲𑁆𑀲 𑀧𑀸𑀧𑀪𑀻𑀭𑀼𑀓𑀸𑀦𑀁 𑀪𑀬𑀸𑀯𑀳𑀲𑁆𑀲. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀙𑀲𑀢𑀸𑀦𑀺 ¶ 𑀦𑀺𑀬𑀼𑀚𑁆𑀚𑀦𑁆𑀢𑀺, 𑀧𑀲𑀽𑀦𑀁 𑀫𑀚𑁆𑀛𑀺𑀫𑁂 𑀳𑀦𑀺;

𑀅𑀲𑁆𑀲𑀫𑁂𑀥𑀲𑁆𑀲 𑀬𑀜𑁆𑀜𑀲𑁆𑀲, 𑀊𑀦𑀸𑀦𑀺 𑀧𑀲𑀽𑀳𑀺 𑀢𑀻𑀳𑀻’’𑀢𑀺. (𑀲𑀁. 𑀦𑀺. 𑀝𑀻. 𑁧.𑁧.𑁧𑁨𑁦; 𑀅. 𑀦𑀺. 𑀝𑀻. 𑁨.𑁪.𑁩𑁯);

𑀲𑀫𑁆𑀫𑀦𑁆𑀢𑀺 𑀬𑀼𑀕𑀘𑁆𑀙𑀺𑀤𑁆𑀤𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑀤𑀡𑁆𑀟𑀓𑀁. 𑀧𑀸𑀲𑀦𑁆𑀢𑀻𑀢𑀺 𑀔𑀺𑀧𑀦𑁆𑀢𑀺. 𑀲𑀁𑀳𑀸𑀭𑀺𑀫𑁂𑀳𑀻𑀢𑀺 𑀲𑀓𑀝𑁂𑀳𑀺 𑀯𑀳𑀺𑀢𑀩𑁆𑀩𑁂𑀳𑀺. 𑀧𑀼𑀩𑁆𑀩𑁂 𑀓𑀺𑀭 𑀏𑀓𑁄 𑀭𑀸𑀚𑀸 𑀲𑀫𑁆𑀫𑀸𑀧𑀸𑀲𑀁 𑀬𑀚𑀦𑁆𑀢𑁄 𑀲𑀭𑀲𑁆𑀲𑀢𑀺𑀦𑀤𑀺𑀢𑀻𑀭𑁂 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀦𑀺𑀫𑀼𑀕𑁆𑀕𑁄𑀬𑁂𑀯 𑀅𑀳𑁄𑀲𑀺. 𑀅𑀦𑁆𑀥𑀩𑀸𑀮𑀩𑁆𑀭𑀸𑀳𑁆𑀫𑀡𑀸 𑀕𑀢𑀸𑀦𑀼𑀕𑀢𑀺𑀕𑀢𑀸 ‘‘𑀅𑀬𑀁 𑀢𑀲𑁆𑀲 𑀲𑀕𑁆𑀕𑀕𑀫𑀦𑀫𑀕𑁆𑀕𑁄’’𑀢𑀺 𑀲𑀜𑁆𑀜𑀸𑀬 𑀢𑀢𑁆𑀣 𑀲𑀫𑁆𑀫𑀸𑀧𑀸𑀲𑀁 𑀬𑀜𑁆𑀜𑀁 𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀻’’𑀢𑀺 ¶ . 𑀅𑀬𑀽𑀧𑁄 𑀅𑀧𑁆𑀧𑀓𑀤𑀺𑀯𑀲𑁄 𑀬𑀸𑀕𑁄, 𑀲𑀬𑀽𑀧𑁄 𑀩𑀳𑀼𑀤𑀺𑀯𑀲𑀁 𑀲𑀸𑀥𑁂𑀬𑁆𑀬𑁄 𑀲𑀢𑁆𑀭𑀬𑀸𑀕𑁄. 𑀫𑀦𑁆𑀢𑀧𑀤𑀸𑀪𑀺𑀲𑀗𑁆𑀔𑀢𑀸𑀦𑀁 𑀲𑀧𑁆𑀧𑀺𑀫𑀥𑀽𑀦𑀁 ‘‘𑀯𑀸𑀚’’𑀫𑀺𑀢𑀺 𑀲𑀫𑀜𑁆𑀜𑀸. 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑁄𑀫𑀳𑀺𑀁𑀲𑀸𑀤𑀺 𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲. 𑀲𑀸𑀭𑀕𑀩𑁆𑀪𑀓𑁄𑀝𑁆𑀞𑀸𑀕𑀸𑀭𑀸𑀤𑀻𑀲𑀼 𑀦𑀢𑁆𑀣𑀺 𑀏𑀢𑁆𑀣 𑀅𑀕𑁆𑀕𑀴𑀸𑀢𑀺 𑀦𑀺𑀭𑀕𑁆𑀕𑀴𑁄. 𑀢𑀢𑁆𑀣 𑀓𑀺𑀭 𑀬𑀜𑁆𑀜𑁂 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑀁 𑀅𑀦𑀯𑀲𑁂𑀲𑀢𑁄 𑀅𑀦𑀺𑀕𑀽𑀳𑀺𑀢𑁆𑀯𑀸 𑀦𑀺𑀬𑁆𑀬𑀸𑀢𑀻𑀬𑀢𑀺.

𑀘𑀦𑁆𑀤𑀧𑁆𑀧𑀪𑀸𑀢𑀺 (𑀇𑀢𑀺𑀯𑀼. 𑀅𑀝𑁆𑀞. 𑁨𑁭) 𑀘𑀦𑁆𑀤𑀺𑀫𑀲𑁆𑀲𑁂𑀯 𑀧𑀪𑀸𑀬. 𑀢𑀸𑀭𑀸𑀕𑀡𑀸𑀯 𑀲𑀩𑁆𑀩𑁂𑀢𑀺 𑀬𑀣𑀸 𑀲𑀩𑁆𑀩𑁂𑀧𑀺 𑀢𑀸𑀭𑀸𑀕𑀡𑀸 𑀘𑀦𑁆𑀤𑀺𑀫𑀲𑁄𑀪𑀸𑀬 𑀲𑁄𑀴𑀲𑀺𑀫𑁆𑀧𑀺 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺, 𑀏𑀯𑀁 𑀢𑁂 𑀅𑀲𑁆𑀲𑀫𑁂𑀥𑀸𑀤𑀬𑁄 𑀬𑀜𑁆𑀜𑀸 𑀫𑁂𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀲𑀼𑀪𑀸𑀯𑀺𑀢𑀲𑁆𑀲 𑀲𑁄𑀴𑀲𑀺𑀫𑁆𑀧𑀺 𑀓𑀮𑀁 𑀦𑀸𑀦𑀼𑀪𑀯𑀦𑁆𑀢𑀺, 𑀦 𑀧𑀸𑀧𑀼𑀡𑀦𑁆𑀢𑀺, 𑀦𑀸𑀕𑁆𑀖𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀧𑀭𑁂𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀦 𑀳𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄𑀢𑀺 𑀫𑁂𑀢𑁆𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄. 𑀦 𑀳𑀦𑁆𑀢𑀻𑀢𑀺 𑀢𑁂𑀦𑁂𑀯 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀤𑀽𑀭𑀯𑀺𑀓𑁆𑀔𑀫𑁆𑀪𑀺𑀢𑀩𑁆𑀬𑀸𑀧𑀸𑀤𑀢𑀸𑀬 𑀦 𑀓𑀜𑁆𑀘𑀺 𑀲𑀢𑁆𑀢𑀁 𑀳𑀺𑀁𑀲𑀢𑀺, 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀦 𑀯𑀺𑀩𑀸𑀥𑀢𑀺 𑀯𑀸. 𑀦 𑀖𑀸𑀢𑁂𑀢𑀻𑀢𑀺 𑀧𑀭𑀁 𑀲𑀫𑀸𑀤𑀧𑁂𑀢𑁆𑀯𑀸 𑀦 𑀲𑀢𑁆𑀢𑁂 𑀫𑀸𑀭𑀸𑀧𑁂𑀢𑀺 𑀦 𑀯𑀺𑀩𑀸𑀥𑀸𑀧𑁂𑀢𑀺 𑀘. 𑀦 𑀚𑀺𑀦𑀸𑀢𑀻𑀢𑀺 𑀲𑀸𑀭𑀫𑁆𑀪𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀤𑀺𑀯𑀲𑁂𑀦 𑀦 𑀓𑀜𑁆𑀘𑀺 𑀚𑀺𑀦𑀸𑀢𑀺 𑀲𑀸𑀭𑀫𑁆𑀪𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀚𑀸𑀦𑀺𑀓𑀭𑀡𑀯𑀲𑁂𑀦 𑀯𑀸 𑀅𑀝𑁆𑀝𑀓𑀭𑀡𑀸𑀤𑀺𑀦𑀸 𑀦 𑀓𑀜𑁆𑀘𑀺 𑀚𑀺𑀦𑀸𑀢𑀺. 𑀢𑁂𑀦𑀸𑀳 ‘‘𑀦 𑀅𑀢𑁆𑀢𑀦𑀸 𑀧𑀭𑀲𑁆𑀲 𑀚𑀸𑀦𑀺𑀁 𑀓𑀭𑁄𑀢𑀻’’𑀢𑀺. 𑀦 𑀚𑀸𑀧𑀬𑁂𑀢𑀺 𑀧𑀭𑁂𑀳𑀺 𑀧𑀬𑁄𑀚𑁂𑀢𑁆𑀯𑀸 𑀧𑀭𑁂𑀲𑀫𑁆𑀧𑀺 𑀥𑀦𑀚𑀸𑀦𑀺𑀁 𑀦 𑀓𑀸𑀭𑀸𑀧𑁂𑀬𑁆𑀬. 𑀢𑁂𑀦𑀸𑀳 ‘‘𑀦 𑀧𑀭𑁂𑀦 𑀧𑀭𑀲𑁆𑀲 𑀚𑀸𑀦𑀺𑀁 𑀓𑀸𑀭𑁂𑀢𑀻’’𑀢𑀺. 𑀫𑁂𑀢𑁆𑀢𑀸𑀬 𑀯𑀸 𑀅𑀁𑀲𑁄 𑀅𑀯𑀺𑀳𑁂𑀞𑀦𑀝𑁆𑀞𑁂𑀦 𑀅𑀯𑀬𑀯𑀪𑀽𑀢𑁄𑀢𑀺 𑀫𑁂𑀢𑁆𑀢𑀁𑀲𑁄.

𑀫𑁂𑀢𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁪. 𑀧𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨-𑁪. 𑀤𑀼𑀢𑀺𑀬𑁂 ¶ 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸𑀬𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸. 𑀢𑁂𑀦𑀸𑀳 ‘‘𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀬𑀸’’𑀢𑀺. 𑀅𑀭𑀺𑀬𑁄𑀢𑀺 𑀦𑀺𑀤𑁆𑀤𑁄𑀲𑁄 𑀧𑀭𑀺𑀲𑀼𑀤𑁆𑀥𑁄. 𑀢𑀼𑀡𑁆𑀳𑀻𑀪𑀸𑀯𑁄 𑀦 𑀢𑀺𑀢𑁆𑀣𑀺𑀬𑀸𑀦𑀁 𑀫𑀽𑀕𑀩𑁆𑀩𑀢𑀕𑀳𑀡𑀁 𑀯𑀺𑀬 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺𑀧𑀺 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 ¶ 𑀕𑀘𑁆𑀙𑀦𑁆𑀢𑀺. 𑀚𑀸𑀦𑀦𑁆𑀢𑀺 𑀇𑀤𑀁 𑀓𑀫𑁆𑀫𑀲𑀸𑀥𑀦𑀦𑁆𑀢𑀺 𑀆𑀳 ‘‘𑀚𑀸𑀦𑀺𑀢𑀩𑁆𑀩𑀓𑀁 𑀚𑀸𑀦𑀸𑀢𑀻’’𑀢𑀺. 𑀬𑀣𑀸 𑀯𑀸 𑀏𑀓𑀘𑁆𑀘𑁄 𑀯𑀺𑀧𑀭𑀻𑀢𑀁 𑀕𑀡𑁆𑀳𑀦𑁆𑀢𑁄 𑀚𑀸𑀦𑀦𑁆𑀢𑁄𑀧𑀺 𑀦 𑀚𑀸𑀦𑀸𑀢𑀺, 𑀧𑀲𑁆𑀲𑀦𑁆𑀢𑁄𑀧𑀺 𑀦 𑀧𑀲𑁆𑀲𑀢𑀺, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺, 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀻𑀢𑀺 𑀏𑀯𑀫𑁂𑀢𑁆𑀣 𑀤𑀝𑁆𑀞𑀩𑁆𑀩𑁄. 𑀢𑀢𑀺𑀬𑀸𑀤𑀻𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀧𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀮𑁄𑀓𑀲𑁆𑀲 𑀥𑀫𑁆𑀫𑀸𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀥𑀫𑁆𑀫𑀸. 𑀢𑁂𑀦𑀸𑀳 ‘‘𑀏𑀢𑁂𑀳𑀺 𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺’’𑀢𑀺𑀆𑀤𑀺. 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀦𑀁 𑀮𑀤𑁆𑀥𑀺 𑀮𑀸𑀪𑁄, 𑀢𑀸𑀦𑀺 𑀏𑀯 𑀯𑀸 𑀮𑀤𑁆𑀥𑀩𑁆𑀩𑀢𑁄 𑀮𑀸𑀪𑁄, 𑀢𑀤𑀪𑀸𑀯𑁄 𑀅𑀮𑀸𑀪𑁄, 𑀮𑀸𑀪𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀩𑁆𑀩𑀺𑀲𑀬𑁄 𑀅𑀦𑀼𑀭𑁄𑀥𑁄 𑀕𑀳𑀺𑀢𑁄, 𑀅𑀮𑀸𑀪𑀕𑁆𑀕𑀳𑀡𑁂𑀦 𑀯𑀺𑀭𑁄𑀥𑁄. 𑀬𑀲𑁆𑀫𑀸 𑀮𑁄𑀳𑀺𑀢𑁂 𑀲𑀢𑀺 𑀢𑀤𑀼𑀧𑀖𑀸𑀢𑀯𑀲𑁂𑀦 𑀧𑀼𑀩𑁆𑀩𑁄 𑀯𑀺𑀬 𑀅𑀦𑀼𑀭𑁄𑀥𑁄 𑀮𑀤𑁆𑀥𑀸𑀯𑀲𑀭𑁄 𑀏𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀮𑀸𑀪𑁂 𑀆𑀕𑀢𑁂 𑀅𑀮𑀸𑀪𑁄 𑀆𑀕𑀢𑁄𑀬𑁂𑀯𑀸’’𑀢𑀺. 𑀏𑀲 𑀦𑀬𑁄 𑀬𑀲𑀸𑀤𑀻𑀲𑀼𑀧𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀞𑀫𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀤𑀼𑀢𑀺𑀬𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬-𑁮. 𑀙𑀝𑁆𑀞𑁂 𑀅𑀥𑀺𑀓𑀁 𑀧𑀬𑀲𑀢𑀺 𑀧𑀬𑀼𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀬𑀸𑀲𑁄, 𑀲𑀯𑀺𑀲𑁂𑀲𑀁 𑀇𑀢𑀺𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸. 𑀢𑁂𑀦𑀸𑀳 ‘‘𑀅𑀥𑀺𑀓𑀧𑁆𑀧𑀬𑁄𑀕𑁄’’𑀢𑀺. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀤𑀼𑀢𑀺𑀬𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 ¶ 𑀤𑀼𑀯𑀺𑀥𑀸 𑀓𑀼𑀮𑀧𑀼𑀢𑁆𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘. 𑀢𑀢𑁆𑀣 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑁂 ¶ 𑀅𑀕𑁆𑀕𑀓𑀼𑀮𑀺𑀓𑀲𑁆𑀲 𑀧𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁨.𑁨𑁯𑁪) 𑀏𑀯𑀁 𑀆𑀕𑀢𑀸 𑀉𑀘𑁆𑀘𑀸𑀓𑀼𑀮𑀧𑀼𑀢𑁆𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸. ‘‘𑀲𑀤𑁆𑀥𑀸𑀬𑁂𑀢𑁂 𑀓𑀼𑀮𑀧𑀼𑀢𑁆𑀢𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸’’𑀢𑀺 (𑀫. 𑀦𑀺. 𑁩.𑁭𑁮) 𑀏𑀯𑀁 𑀆𑀕𑀢𑀸 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀧𑀲𑀼𑀢𑀸𑀧𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀦𑀸𑀫. 𑀇𑀥 𑀧𑀦 𑀉𑀘𑁆𑀘𑀸𑀓𑀼𑀮𑀧𑁆𑀧𑀲𑀼𑀢𑀢𑀁 𑀲𑀦𑁆𑀥𑀸𑀬 ‘‘𑀓𑀼𑀮𑀧𑀼𑀢𑁆𑀢𑁄𑀢𑀺, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄’’𑀢𑀺. 𑀉𑀪𑁄𑀳𑀺𑀧𑀺 𑀧𑀦 𑀓𑀸𑀭𑀡𑁂𑀳𑀺 𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀪𑀸𑀯𑁄𑀬𑁂𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀸𑀭𑀡𑁆𑀟𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀧𑀝𑀺𑀘𑀭𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀺. 𑀧𑀝𑀺𑀘𑁆𑀙𑀸𑀤𑀦𑀝𑁆𑀞𑁄 𑀏𑀯 𑀯𑀸 𑀘𑀭𑀢𑀺-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺. 𑀅𑀜𑁆𑀜𑁂𑀦𑀸𑀜𑁆𑀜𑀦𑁆𑀢𑀺 𑀧𑀦 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀘𑀦𑀁 𑀯𑀸𑀢𑀺 𑀬𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀲𑁆𑀲 𑀤𑁄𑀲𑀯𑀺𑀪𑀸𑀯𑀦𑀁 𑀓𑀸𑀭𑀡𑀁, 𑀯𑀘𑀦𑀁 𑀯𑀸 𑀯𑀼𑀢𑁆𑀢𑀁, 𑀢𑀁 𑀢𑀢𑁄 𑀅𑀜𑁆𑀜𑁂𑀦𑁂𑀯 𑀓𑀸𑀭𑀡𑁂𑀦, 𑀯𑀘𑀦𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀓𑀸𑀭𑀡𑁂𑀦𑀸𑀢𑀺 𑀘𑁄𑀤𑀦𑀸𑀬 𑀅𑀫𑀽𑀮𑀸𑀬 𑀅𑀫𑀽𑀮𑀺𑀓𑀪𑀸𑀯𑀤𑀻𑀧𑀦𑀺𑀬𑀸 𑀬𑀼𑀢𑁆𑀢𑀺𑀬𑀸 𑀯𑀸. 𑀯𑀘𑀦𑁂𑀦𑀸𑀢𑀺 𑀢𑀤𑀢𑁆𑀣𑀩𑁄𑀥𑀓𑁂𑀦 𑀯𑀘𑀦𑁂𑀦. ‘‘𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀯𑀺𑀓𑁆𑀔𑁂𑀧𑀸𑀧𑀚𑁆𑀚𑀦𑀁 𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀡𑀁. 𑀩𑀳𑀺𑀤𑁆𑀥𑀸 𑀓𑀣𑀸𑀧𑀦𑀸𑀫𑀦𑀸 𑀦𑀸𑀫 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀬𑁄 𑀳𑀺 ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑀸, 𑀓𑀁 𑀪𑀡𑀣, 𑀓𑀺𑀁 𑀪𑀡𑀣𑀸’’𑀢𑀺 𑀯𑀸 𑀯𑀤𑀢𑀺, ‘‘𑀏𑀯𑀭𑀽𑀧𑀁 𑀓𑀺𑀜𑁆𑀘𑀺 𑀢𑀬𑀸 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀁 𑀯𑀸 𑀉𑀧𑀦𑁂𑀢𑀺, 𑀅𑀬𑀁 𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀢𑀺 𑀦𑀸𑀫. 𑀬𑁄 𑀧𑀦 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀢𑀯 𑀧𑀸𑀝𑀮𑀺𑀧𑀼𑀢𑁆𑀢𑀕𑀫𑀦𑀁 𑀧𑀼𑀘𑁆𑀙𑀸𑀫, 𑀆𑀧𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁄 ‘‘𑀭𑀸𑀚𑀕𑀳𑀁 𑀕𑀢𑁄𑀫𑁆𑀳𑀺. 𑀭𑀸𑀚𑀕𑀳𑀁 𑀯𑀸 𑀬𑀸𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀁 𑀯𑀸, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻𑀢𑀺. 𑀢𑀁 𑀢𑀢𑁆𑀣 𑀫𑁂 𑀲𑀽𑀓𑀭𑀫𑀁𑀲𑀁 𑀮𑀤𑁆𑀥’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀅𑀬𑀁 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀺 𑀦𑀸𑀫 ¶ . 𑀲𑀫𑀡𑀓𑀘𑀯𑀭𑁄𑀢𑀺 𑀲𑀫𑀡𑀯𑁂𑀲𑀥𑀸𑀭𑀡𑁂𑀦 𑀲𑀫𑀡𑀧𑁆𑀧𑀢𑀺𑀭𑀽𑀧𑀓𑀢𑀸𑀬 𑀲𑀫𑀡𑀸𑀦𑀁 𑀓𑀘𑀯𑀭𑀪𑀽𑀢𑀁.

𑀓𑀸𑀭𑀡𑁆𑀟𑀯𑀁 ¶ (𑀲𑀼. 𑀦𑀺. 𑀅𑀝𑁆𑀞. 𑁨.𑁨𑁮𑁩-𑁨𑁮𑁪) 𑀦𑀺𑀤𑁆𑀥𑀫𑀣𑀸𑀢𑀺 𑀯𑀺𑀧𑀦𑁆𑀦𑀲𑀻𑀮𑀢𑀸𑀬 𑀓𑀘𑀯𑀭𑀪𑀽𑀢𑀁 𑀧𑀼𑀕𑁆𑀕𑀮𑀁 𑀓𑀘𑀯𑀭𑀫𑀺𑀯 𑀅𑀦𑀧𑁂𑀓𑁆𑀔𑀸 𑀅𑀧𑀦𑁂𑀣. 𑀓𑀲𑀫𑁆𑀩𑀼𑀁 𑀅𑀧𑀓𑀲𑁆𑀲𑀣𑀸𑀢𑀺 𑀓𑀲𑀫𑁆𑀩𑀼𑀪𑀽𑀢𑀜𑁆𑀘 𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀫𑀚𑁆𑀛𑀕𑀢𑀁 𑀧𑀪𑀺𑀦𑁆𑀦𑀧𑀕𑁆𑀖𑀭𑀺𑀢𑀓𑀼𑀝𑁆𑀞𑀁 𑀘𑀡𑁆𑀟𑀸𑀮𑀁 𑀯𑀺𑀬 𑀅𑀧𑀓𑀟𑁆𑀠𑀣. 𑀓𑀺𑀁 𑀓𑀸𑀭𑀡𑀁? 𑀲𑀗𑁆𑀖𑀸𑀭𑀸𑀫𑁄 𑀦𑀸𑀫 𑀲𑀻𑀮𑀯𑀦𑁆𑀢𑀸𑀦𑀁 𑀓𑀢𑁄, 𑀦 𑀤𑀼𑀲𑁆𑀲𑀻𑀮𑀸𑀦𑀁. 𑀬𑀢𑁄 𑀏𑀢𑀤𑁂𑀯 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂’’𑀢𑀺. 𑀬𑀣𑀸 𑀧𑀮𑀸𑀧𑀸 𑀅𑀦𑁆𑀢𑁄𑀲𑀸𑀭𑀭𑀳𑀺𑀢𑀸 𑀅𑀢𑀡𑁆𑀟𑀼𑀮𑀸 𑀩𑀳𑀺 𑀣𑀼𑀲𑁂𑀦 𑀯𑀻𑀳𑀻 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀧𑀸𑀧𑀪𑀺𑀓𑁆𑀔𑀽 𑀅𑀦𑁆𑀢𑁄 𑀲𑀻𑀮𑀭𑀳𑀺𑀢𑀸𑀧𑀺 𑀩𑀳𑀺 𑀓𑀸𑀲𑀸𑀯𑀸𑀤𑀺𑀧𑀭𑀺𑀓𑁆𑀔𑀸𑀭𑁂𑀦 𑀪𑀺𑀓𑁆𑀔𑀽 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀮𑀸𑀧𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀮𑀸𑀧𑁂 𑀯𑀸𑀳𑁂𑀣 𑀑𑀧𑀼𑀦𑀣 𑀯𑀺𑀥𑀫𑀣, 𑀧𑀭𑀫𑀢𑁆𑀣𑀢𑁄 𑀅𑀲𑁆𑀲𑀫𑀡𑁂 𑀲𑀫𑀡𑀯𑁂𑀲𑀫𑀢𑁆𑀢𑁂𑀦 𑀲𑀫𑀡𑀫𑀸𑀦𑀺𑀦𑁂. 𑀓𑀧𑁆𑀧𑀬𑀯𑁆𑀳𑁄𑀢𑀺 𑀓𑀧𑁆𑀧𑁂𑀣, 𑀓𑀭𑁄𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀢𑀺𑀲𑁆𑀲𑀢𑀸𑀢𑀺 𑀲𑀧𑁆𑀧𑀢𑀺𑀲𑁆𑀲𑀸. 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀣, 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀓𑀸𑀭𑀡𑁆𑀟𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑁂𑀢𑁆𑀢𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀳𑀸𑀯𑀕𑁆𑀕𑁄

𑁧. 𑀯𑁂𑀭𑀜𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧) 𑀏𑀢𑁆𑀣 𑀯𑁂𑀭𑀜𑁆𑀚𑀸𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀲𑀁 𑀯𑁂𑀭𑀜𑁆𑀚𑀸𑀬𑀁. 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂𑀢𑀺 𑀏𑀢𑁆𑀣 𑀦𑀴𑁂𑀭𑀼 𑀦𑀸𑀫 𑀬𑀓𑁆𑀔𑁄. 𑀧𑀼𑀘𑀺𑀫𑀦𑁆𑀤𑁄𑀢𑀺 𑀦𑀺𑀫𑁆𑀩𑀭𑀼𑀓𑁆𑀔𑁄. 𑀫𑀽𑀮𑀦𑁆𑀢𑀺 𑀲𑀫𑀻𑀧𑀁. 𑀅𑀬𑀜𑁆𑀳𑀺 𑀫𑀽𑀮-𑀲𑀤𑁆𑀤𑁄 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁯𑁫) 𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀺. ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁦𑁫; 𑀧𑀭𑀺. 𑁩𑁨𑁩) 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁯𑁪) 𑀲𑀫𑀻𑀧𑁂. 𑀇𑀥 𑀧𑀦 𑀲𑀫𑀻𑀧𑁂 ¶ 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀦𑀴𑁂𑀭𑀼𑀬𑀓𑁆𑀔𑁂𑀦 𑀅𑀥𑀺𑀕𑁆𑀕𑀳𑀺𑀢𑀲𑁆𑀲 𑀧𑀼𑀘𑀺𑀫𑀦𑁆𑀤𑀲𑁆𑀲 𑀲𑀫𑀻𑀧𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁄 𑀓𑀺𑀭 𑀧𑀼𑀘𑀺𑀫𑀦𑁆𑀤𑁄 𑀭𑀫𑀡𑀻𑀬𑁄 𑀧𑀸𑀲𑀸𑀤𑀺𑀓𑁄 𑀅𑀦𑁂𑀓𑁂𑀲𑀁 𑀭𑀼𑀓𑁆𑀔𑀸𑀦𑀁 𑀆𑀥𑀺𑀧𑀘𑁆𑀘𑀁 𑀯𑀺𑀬 𑀓𑀼𑀭𑀼𑀫𑀸𑀦𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀅𑀳𑁄𑀲𑀺. 𑀅𑀣 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀕𑀦𑁆𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀯𑀺𑀳𑀭𑀦𑁆𑀢𑁄 ¶ 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂 𑀳𑁂𑀝𑁆𑀞𑀸𑀪𑀸𑀕𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺.

𑀧𑀘𑁆𑀘𑀼𑀝𑁆𑀞𑀸𑀦𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁨) 𑀦𑀸𑀫 𑀆𑀲𑀦𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀦𑀸𑀲𑀦𑀸 𑀯𑀼𑀝𑁆𑀞𑀸𑀢𑀻’’𑀢𑀺. 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀦 𑀯𑀼𑀝𑁆𑀞𑀳𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀚𑀺𑀡𑁆𑀡𑁂…𑀧𑁂… 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀉𑀧𑀬𑁄𑀕𑀯𑀘𑀦𑀁 𑀆𑀲𑀦𑀸 𑀯𑀼𑀝𑁆𑀞𑀸𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀁 𑀦 𑀳𑁄𑀢𑀺. 𑀢𑀲𑁆𑀫𑀸 ‘‘𑀚𑀺𑀡𑁆𑀡𑁂…𑀧𑁂… 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀤𑀺𑀲𑁆𑀯𑀸’’𑀢𑀺 𑀅𑀚𑁆𑀛𑀸𑀳𑀸𑀭𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀁 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀫𑀸 𑀦 𑀧𑀘𑁆𑀘𑀼𑀝𑁆𑀞𑀸𑀢𑀻𑀢𑀺 𑀉𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀼𑀕𑁆𑀕𑀫𑀦𑀫𑁆𑀧𑀺 𑀳𑀺 𑀧𑀘𑁆𑀘𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀘𑀭𑀺𑀬𑀁 𑀧𑀦 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀘𑁆𑀘𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀓𑀭𑀡𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺. 𑀦𑀸𑀲𑀦𑀸 𑀯𑀼𑀝𑁆𑀞𑀸𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀘𑁆𑀘𑀼𑀕𑁆𑀕𑀫𑀦𑀸𑀪𑀸𑀯𑀲𑁆𑀲 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀪𑀸𑀯𑀦𑁂 𑀦𑀸𑀫 𑀅𑀢𑁆𑀣𑁂𑀢𑀺 𑀧𑀓𑀢𑀺𑀯𑀺𑀪𑀸𑀯𑀦𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. 𑀦 𑀅𑀪𑀺𑀯𑀸𑀤𑁂𑀢𑀺 𑀯𑀸𑀢𑀺 𑀦 𑀅𑀪𑀺𑀯𑀸𑀤𑁂𑀢𑀩𑁆𑀩𑀦𑁆𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀁 𑀅𑀜𑁆𑀜𑀸𑀡𑀦𑁆𑀢𑀺 ‘‘𑀅𑀬𑀁 𑀫𑀫 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀸𑀢𑀼𑀁 𑀅𑀭𑀳𑀭𑀽𑀧𑁄 𑀦 𑀳𑁄𑀢𑀻’’𑀢𑀺 𑀅𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀜𑁆𑀜𑀸𑀡𑀁. 𑀑𑀮𑁄𑀓𑁂𑀦𑁆𑀢𑁄𑀢𑀺 ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀭𑁂𑀬𑁆𑀬𑀁 𑀕𑀭𑀼𑀁 𑀓𑀭𑁂𑀬𑁆𑀬’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦𑁂𑀯 (𑀅. 𑀦𑀺. 𑁪.𑁨𑁧) 𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄. 𑀦𑀺𑀧𑀘𑁆𑀘𑀓𑀸𑀭𑀸𑀭𑀳𑀦𑁆𑀢𑀺 𑀧𑀡𑀺𑀧𑀸𑀢𑀸𑀭𑀳𑀁. 𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑀚𑀸𑀢𑁄, 𑀚𑀸𑀢𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀢𑁆𑀢𑀭𑁂𑀦 𑀫𑀼𑀔𑁄𑀢𑀺 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑁄. ‘‘𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀓𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺’’𑀦𑁆𑀢𑀺 𑀇𑀤𑀁 𑁋

‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀢𑀺𑀚𑀸𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀘𑁆𑀙𑀢𑀺, 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂 𑀲𑀩𑁆𑀩𑀸 𑀤𑀺𑀲𑀸 𑀯𑀺𑀮𑁄𑀓𑁂𑀢𑀺, 𑀆𑀲𑀪𑀺𑀜𑁆𑀘 𑀯𑀸𑀘𑀁 𑀪𑀸𑀲𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁧) 𑁋

𑀏𑀯𑀁 ¶ 𑀧𑀸𑀴𑀺𑀬𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀼𑀧𑀭𑀺 𑀞𑀺𑀢𑀲𑁆𑀲 𑀯𑀺𑀬 𑀲𑀩𑁆𑀩𑀸𑀤𑀺𑀲𑀸𑀦𑀼𑀮𑁄𑀓𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀢𑁄 𑀧𑀕𑁂𑀯 𑀤𑀺𑀲𑀸𑀯𑀺𑀮𑁄𑀓𑀦𑀲𑁆𑀲 𑀓𑀢𑀢𑁆𑀢𑀸. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸, ‘‘𑀫𑀳𑀸𑀧𑀼𑀭𑀺𑀲, 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸, 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀤𑀲𑀧𑀺 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀤𑀺𑀲𑀸’’𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 ¶ 𑀅𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀑𑀮𑁄𑀓𑁂𑀲𑀺𑀦𑁆𑀢𑀺 𑀫𑀫 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑁂 𑀚𑀸𑀢𑁂 𑀧𑀜𑁆𑀜𑀸𑀬𑀫𑀸𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀫𑀁𑀲𑀘𑀓𑁆𑀔𑀼𑀦𑀸𑀯 𑀑𑀮𑁄𑀓𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀫𑀳𑀸𑀧𑀼𑀭𑀺𑀲𑁄𑀢𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑁆𑀧𑀤𑁂𑀲𑀸𑀤𑀺𑀯𑀲𑁂𑀦 𑀫𑀳𑀦𑁆𑀢𑀧𑀼𑀭𑀺𑀲𑁄. 𑀅𑀕𑁆𑀕𑁄𑀢𑀺 𑀕𑀼𑀡𑁂𑀳𑀺 𑀲𑀩𑁆𑀩𑀧𑁆𑀧𑀥𑀸𑀦𑁄. 𑀚𑁂𑀝𑁆𑀞𑁄𑀢𑀺 𑀕𑀼𑀡𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀁 𑀯𑀼𑀤𑁆𑀥𑀢𑀫𑁄, 𑀕𑀼𑀡𑁂𑀳𑀺 𑀫𑀳𑀮𑁆𑀮𑀓𑀢𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀝𑁆𑀞𑁄𑀢𑀺 𑀕𑀼𑀡𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀁 𑀧𑀲𑀢𑁆𑀣𑀢𑀫𑁄. 𑀅𑀢𑁆𑀣𑀢𑁄 𑀧𑀦 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀉𑀢𑁆𑀢𑀭𑀺𑀢𑀭𑁄𑀢𑀺 𑀅𑀥𑀺𑀓𑀢𑀭𑁄. 𑀧𑀢𑀺𑀫𑀸𑀦𑁂𑀲𑀻𑀢𑀺 𑀧𑀽𑀚𑁂𑀲𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀭𑀳𑁄 𑀧𑀼𑀕𑁆𑀕𑀮𑁄𑀢𑀺 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀺𑀭𑀺𑀬𑀸𑀬 𑀅𑀭𑀳𑁄 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀕𑁆𑀕𑀮𑁄. 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀧𑀦𑁂𑀢𑁆𑀣 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸𑀕𑀢𑀸𑀢𑀺 𑀢𑀣𑀸𑀕𑀢𑀢𑁄, 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀭𑀽𑀧𑀦𑁆𑀢𑀺 𑀅𑀪𑀺𑀯𑀸𑀤𑀦𑀸𑀤𑀺𑀲𑀪𑀸𑀯𑀁. 𑀧𑀭𑀺𑀧𑀸𑀓𑀲𑀺𑀣𑀺𑀮𑀩𑀦𑁆𑀥𑀦𑀦𑁆𑀢𑀺 𑀧𑀭𑀺𑀧𑀸𑀓𑁂𑀦 𑀲𑀺𑀣𑀺𑀮𑀩𑀦𑁆𑀥𑀦𑀁.

𑀢𑀁 𑀯𑀘𑀦𑀦𑁆𑀢𑀺 ‘‘𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀯𑀘𑀦𑀁. ‘‘𑀦𑀸𑀳𑀁 𑀅𑀭𑀲𑀭𑀽𑀧𑁄, 𑀫𑀸𑀤𑀺𑀲𑀸 𑀯𑀸 𑀅𑀭𑀲𑀭𑀽𑀧𑀸’’𑀢𑀺 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀣𑀤𑁆𑀥𑁄 𑀪𑀯𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀚𑀦𑀦𑀢𑁆𑀣’’𑀦𑁆𑀢𑀺.

𑀓𑀢𑀫𑁄 𑀧𑀦 𑀲𑁄𑀢𑀺 𑀧𑀭𑀺𑀬𑀸𑀬𑀸𑀧𑁂𑀓𑁆𑀔𑁄 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄, 𑀓𑀢𑀫𑁄 𑀲𑁄 𑀧𑀭𑀺𑀬𑀸𑀬𑁄𑀢𑀺 𑀅𑀢𑁆𑀣𑁄? 𑀚𑀸𑀢𑀺𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀯𑀲𑁂𑀦. 𑀉𑀧𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺𑀯𑀲𑁂𑀦. 𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀫𑁆𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀅𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀦𑀦𑁆𑀤𑀦𑁆𑀢𑀸𑀦𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦 𑀧𑀫𑁄𑀤𑀫𑀸𑀦𑀸𑀦𑀁. 𑀭𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀩𑀮𑀯𑀭𑀸𑀕𑀯𑀲𑁂𑀦 𑀭𑀚𑁆𑀚𑀦𑁆𑀢𑀸𑀦𑀁. 𑀭𑀽𑀧𑀧𑀭𑀺𑀪𑁄𑀕𑁂𑀦 𑀉𑀧𑁆𑀧𑀦𑁆𑀦𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀭𑀽𑀧𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑀤𑀬𑀢𑀧𑁆𑀧𑀦𑀢𑁄 ¶ 𑀅𑀫𑁆𑀩𑀭𑀲𑀸𑀤𑀬𑁄 𑀯𑀺𑀬 𑀭𑀽𑀧𑀭𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀯𑀺𑀜𑁆𑀘𑀦𑁆𑀢𑀻𑀢𑀺 𑀆𑀓𑀟𑁆𑀠𑀦𑁆𑀢𑀺. 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀲𑀸𑀫𑀕𑁆𑀕𑀺𑀬𑀦𑁆𑀢𑀺 𑀯𑀢𑁆𑀣𑀼𑀆𑀭𑀫𑁆𑀫𑀡𑀸𑀤𑀺𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀁. 𑀅𑀦𑀼𑀓𑁆𑀔𑀺𑀧𑀦𑁆𑀢𑁄𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀯𑀲𑁂𑀦 𑀓𑀣𑀺𑀢𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑀧𑁆𑀧𑀸𑀬𑀪𑀸𑀯𑀢𑁄 𑀅𑀢𑁆𑀢𑀸𑀦𑀁 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀅𑀦𑀼𑀓𑁆𑀓𑀁𑀲𑁂𑀦𑁆𑀢𑁄.

𑀏𑀢𑀲𑁆𑀫𑀺𑀁 𑀧𑀦𑀢𑁆𑀣𑁂 𑀓𑀭𑀡𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 ‘‘𑀚𑀳𑀺𑀢𑀸’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀢𑀣𑀸𑀕𑀢𑀲𑁆𑀲𑀸𑀢𑀺 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀢𑀣𑀸𑀕𑀢𑁂𑀦 𑀚𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀽𑀮𑀦𑁆𑀢𑀺 𑀪𑀯𑀫𑀽𑀮𑀁. ‘‘𑀢𑀸𑀮𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀑𑀝𑁆𑀞𑀫𑀼𑀔𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀫𑀚𑁆𑀛𑁂𑀧𑀤𑀮𑁄𑀧𑀁 𑀓𑀢𑁆𑀯𑀸 𑀅-𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺. 𑀢𑀢𑁆𑀣 𑀢𑀸𑀮𑀲𑁆𑀲 𑀯𑀢𑁆𑀣𑀼 𑀢𑀸𑀮𑀯𑀢𑁆𑀣𑀼. 𑀬𑀣𑀸 𑀆𑀭𑀸𑀫𑀲𑁆𑀲 𑀯𑀢𑁆𑀣𑀼𑀪𑀽𑀢𑀧𑀼𑀩𑁆𑀩𑁄 𑀧𑀤𑁂𑀲𑁄 𑀆𑀭𑀸𑀫𑀲𑁆𑀲 𑀅𑀪𑀸𑀯𑁂 ‘‘𑀆𑀭𑀸𑀫𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀸𑀮𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁄 𑀲𑀫𑀽𑀮𑀁 𑀉𑀤𑁆𑀥𑀭𑀺𑀢𑁂 𑀢𑀸𑀮𑁂 𑀧𑀤𑁂𑀲𑀫𑀢𑁆𑀢𑁂 𑀞𑀺𑀢𑁂 ¶ 𑀢𑀸𑀮𑀲𑁆𑀲 𑀯𑀢𑁆𑀣𑀼𑀪𑀽𑀢𑀧𑀼𑀩𑁆𑀩𑀢𑁆𑀢𑀸 ‘‘𑀢𑀸𑀮𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. 𑀦𑁂𑀲𑀦𑁆𑀢𑀺 𑀭𑀽𑀧𑀭𑀲𑀸𑀤𑀻𑀦𑀁. 𑀓𑀣𑀁 𑀧𑀦 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀭𑀽𑀧𑀸𑀤𑀺𑀧𑀭𑀺𑀪𑁄𑀕𑁂𑀦 𑀉𑀧𑁆𑀧𑀦𑁆𑀦𑀢𑀡𑁆𑀳𑀸𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀲𑀗𑁆𑀔𑀸𑀢𑀭𑀽𑀧𑀭𑀲𑀸𑀤𑀻𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀪𑀸𑀯𑁂𑀦 𑀯𑀢𑁆𑀣𑀼𑀫𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀢𑁂’’𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂𑀢𑀺 𑀧𑀼𑀭𑁂, 𑀲𑀭𑀸𑀕𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀅𑀢𑁆𑀢𑀦𑁄 𑀯𑀢𑁆𑀣𑀼𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀭𑀲𑀸𑀤𑀬𑁄 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀧𑀼𑀦 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄.

𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀢𑁆𑀢𑀸𑀢𑀺 𑀅𑀯𑀺𑀭𑀼𑀴𑁆𑀳𑀺𑀲𑀪𑀸𑀯𑀢𑀸𑀬. 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀢𑀸𑀮𑁄 𑀧𑀢𑁆𑀢𑀨𑀮𑀸𑀤𑀻𑀦𑀁 𑀅𑀯𑀢𑁆𑀣𑀼𑀪𑀽𑀢𑁄 𑀢𑀸𑀮𑀸𑀯𑀢𑁆𑀣𑀽𑀢𑀺 𑀆𑀳 ‘‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸’’𑀢𑀺. 𑀏𑀢𑁂𑀦 ‘‘𑀢𑀸𑀮𑀸𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀅𑀬𑀁 𑀯𑀺𑀕𑁆𑀕𑀳𑁄 𑀤𑀲𑁆𑀲𑀺𑀢𑁄. 𑀏𑀢𑁆𑀣 𑀧𑀦 ‘‘𑀅𑀯𑀢𑁆𑀣𑀼𑀪𑀽𑀢𑁄 𑀢𑀸𑀮𑁄 𑀯𑀺𑀬 𑀓𑀢𑀸𑀢𑀺 𑀅𑀯𑀢𑁆𑀣𑀼𑀢𑀸𑀮𑀓𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀧𑀦𑀢𑁆𑀣𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀭𑀽𑀧𑀭𑀲𑀸𑀤𑀺𑀯𑀘𑀦𑁂𑀦 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀕𑀳𑀺𑀢𑀸, 𑀢𑁂 𑀉𑀧𑁆𑀧𑀦𑁆𑀦𑀸𑀧𑀺 𑀫𑀢𑁆𑀣𑀓𑀲𑀤𑀺𑀲𑀸𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀫𑀕𑁆𑀕𑀲𑀢𑁆𑀣𑁂𑀦 𑀙𑀺𑀦𑁆𑀦𑀢𑁆𑀢𑀸 𑀆𑀬𑀢𑀺𑀁 𑀢𑀸𑀮𑀧𑀢𑁆𑀢𑀲𑀤𑀺𑀲𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀸 𑀚𑀸𑀢𑀸, 𑀢𑀲𑁆𑀫𑀸 𑀢𑀸𑀮𑀸𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀭𑀽𑀧𑀭𑀲𑀸𑀤𑀬𑁄𑀢𑀺 ¶ . 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀅𑀪𑀺𑀦𑀦𑁆𑀤𑀦𑁆𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑀼𑀲𑀮𑀲𑁄𑀫𑀦𑀲𑁆𑀲𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀦𑀪𑀸𑀯𑀁 𑀓𑀢𑀸𑀢𑀺 𑀏𑀢𑁆𑀣 𑀅𑀦𑀼-𑀲𑀤𑁆𑀤𑁄 𑀧𑀘𑁆𑀙𑀸𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀬𑀣𑀸 𑀦𑁂𑀲𑀁 𑀧𑀘𑁆𑀙𑀸𑀪𑀸𑀯𑁄 𑀦 𑀳𑁄𑀢𑀻’’𑀢𑀺𑀆𑀤𑀺.

𑀬𑀜𑁆𑀘 𑀔𑁄 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺, 𑀲𑁄 𑀧𑀭𑀺𑀬𑀸𑀬𑁄 𑀦 𑀳𑁄𑀢𑀻𑀢𑀺 𑀬𑀁 𑀯𑀦𑁆𑀤𑀦𑀸𑀤𑀺𑀲𑀸𑀫𑀕𑁆𑀕𑀺𑀭𑀲𑀸𑀪𑀸𑀯𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀅𑀭𑀲𑀭𑀽𑀧𑀢𑀸𑀬 𑀯𑀤𑁂𑀲𑀺, 𑀢𑀁 𑀓𑀸𑀭𑀡𑀁 𑀦 𑀳𑁄𑀢𑀺, 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀘𑀸𑀬𑀁 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀯𑀦𑁆𑀤𑀦𑀸𑀤𑀺𑀲𑀸𑀫𑀕𑁆𑀕𑀺𑀭𑀲𑀸𑀪𑀸𑀯𑀲𑀗𑁆𑀔𑀸𑀢𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 ‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺 𑀆𑀳, ‘‘𑀲𑁄 𑀧𑀭𑀺𑀬𑀸𑀬𑁄 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀯𑀦𑁆𑀤𑀦𑀸𑀤𑀻𑀦𑀺 𑀪𑀕𑀯𑀸 𑀓𑀭𑁄𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀇𑀫𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀦𑀼 𑀘𑀸’’𑀢𑀺𑀆𑀤𑀺.

𑀲𑀩𑁆𑀩𑀧𑀭𑀺𑀬𑀸𑀬𑁂𑀲𑀽𑀢𑀺 𑀲𑀩𑁆𑀩𑀯𑀸𑀭𑁂𑀲𑀼. 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀢𑀦𑁆𑀢𑀺 𑀬𑀁 𑀲𑀦𑁆𑀥𑀸𑀬 𑀩𑁆𑀭𑀸𑀳𑁆𑀫𑀡𑁄 ‘‘𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀘 𑀬𑀁 𑀲𑀦𑁆𑀥𑀸𑀬 𑀦𑀺𑀩𑁆𑀪𑁄𑀕𑀢𑀸𑀤𑀺𑀁 𑀅𑀢𑁆𑀢𑀦𑀺 𑀅𑀦𑀼𑀚𑀸𑀦𑀸𑀢𑀺, 𑀢𑀁 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀢𑀁. 𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁄𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀧𑀭𑀺𑀪𑁄𑀕𑁄. 𑀅𑀧𑀭𑀁 𑀧𑀭𑀺𑀬𑀸𑀬𑀦𑁆𑀢𑀺 𑀅𑀜𑁆𑀜𑀁 𑀓𑀸𑀭𑀡𑀁.

𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀦𑁆𑀢𑀺 𑀓𑀼𑀮𑀸𑀘𑀸𑀭𑀲𑀗𑁆𑀔𑀸𑀢𑀁 𑀓𑀫𑁆𑀫𑀁, 𑀓𑀼𑀮𑀘𑀸𑀭𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀺𑀭𑀺𑀬𑀦𑁆𑀢𑀺 𑀅𑀓𑀭𑀡𑀪𑀸𑀯𑀁 ¶ . ‘‘𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀧𑀺 𑀧𑀸𑀭𑀺𑀲𑁂𑀲𑀜𑀸𑀬𑀢𑁄 𑀯𑀼𑀢𑁆𑀢𑀸𑀯𑀲𑁂𑀲𑀸 𑀅𑀓𑀼𑀲𑀮𑀥𑀫𑁆𑀫𑀸 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀢𑁂 𑀥𑀫𑁆𑀫𑁂’’𑀢𑀺𑀆𑀤𑀺, 𑀢𑁂 𑀬𑀣𑀸𑀯𑀼𑀢𑁆𑀢𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑁂 𑀅𑀓𑀼𑀲𑀮𑀥𑀫𑁆𑀫𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀯𑀺𑀳𑀺𑀢𑀸𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸.

𑀅𑀬𑀁 𑀮𑁄𑀓𑀢𑀦𑁆𑀢𑀻𑀢𑀺 𑀅𑀬𑀁 𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀺𑀭𑀺𑀬𑀮𑀓𑁆𑀔𑀡𑀸 𑀮𑁄𑀓𑀧𑁆𑀧𑀯𑁂𑀡𑀻. 𑀅𑀦𑀸𑀕𑀸𑀫𑀺𑀩𑁆𑀭𑀳𑁆𑀫𑀸𑀦𑀁 𑀅𑀮𑀗𑁆𑀓𑀸𑀭𑀸𑀤𑀻𑀲𑀼 𑀅𑀦𑀸𑀕𑀸𑀫𑀺𑀪𑀺𑀓𑁆𑀔𑀽𑀦𑀜𑁆𑀘 𑀘𑀻𑀯𑀭𑀸𑀤𑀻𑀲𑀼 𑀦𑀺𑀓𑀦𑁆𑀢𑀺𑀯𑀲𑁂𑀦 𑀭𑀸𑀕𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀯 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑀸’’𑀢𑀺. 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀢𑁆𑀣𑀼𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀭𑀸𑀕𑁄 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀝𑁆𑀞𑀸𑀲𑀯𑀘𑀦𑁄 𑀳𑁂𑀢𑁆𑀣 ¶ 𑀕𑀼𑀡-𑀲𑀤𑁆𑀤𑁄 ‘‘𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁪) 𑀯𑀺𑀬. 𑀅𑀓𑀼𑀲𑀮𑀘𑀺𑀢𑁆𑀢𑀤𑁆𑀯𑀬𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀤𑁆𑀯𑀬𑀲𑀫𑁆𑀧𑀬𑀼𑀢𑁆𑀢𑀲𑁆𑀲. 𑀫𑁄𑀳𑀲𑁆𑀲 𑀲𑀩𑁆𑀩𑀸𑀓𑀼𑀲𑀮𑀲𑀸𑀥𑀸𑀭𑀡𑀢𑁆𑀢𑀸 𑀆𑀳 ‘‘𑀲𑀩𑁆𑀩𑀸𑀓𑀼𑀲𑀮𑀲𑀫𑁆𑀪𑀯𑀲𑁆𑀲𑀸’’𑀢𑀺. 𑀅𑀯𑀲𑁂𑀲𑀸𑀦𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀁.

𑀚𑀺𑀕𑀼𑀘𑁆𑀙𑀢𑀺 𑀫𑀜𑁆𑀜𑁂𑀢𑀺 𑀅𑀳𑀫𑀪𑀺𑀚𑀸𑀢𑁄 𑀭𑀽𑀧𑀯𑀸 𑀧𑀜𑁆𑀜𑀯𑀸 𑀓𑀣𑀁 𑀦𑀸𑀫 𑀅𑀜𑁆𑀜𑁂𑀲𑀁 𑀅𑀪𑀺𑀯𑀸𑀤𑀦𑀸𑀤𑀺𑀁 𑀓𑀭𑁂𑀬𑁆𑀬𑀦𑁆𑀢𑀺 𑀚𑀺𑀕𑀼𑀘𑁆𑀙𑀢𑀺 𑀯𑀺𑀬, 𑀚𑀺𑀕𑀼𑀘𑁆𑀙𑀢𑀻𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀫𑀺. 𑀅𑀓𑀼𑀲𑀮𑀥𑀫𑁆𑀫𑁂 𑀚𑀺𑀕𑀼𑀘𑁆𑀙𑀫𑀸𑀦𑁄 𑀢𑁂𑀲𑀁 𑀲𑀫𑀗𑁆𑀕𑀺𑀪𑀸𑀯𑀫𑁆𑀧𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀚𑀺𑀕𑀼𑀘𑁆𑀙𑀢𑀻’’𑀢𑀺. 𑀲𑀫𑀸𑀧𑀢𑁆𑀢𑀻𑀢𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀲𑀫𑀸𑀧𑀚𑁆𑀚𑀦𑀸 𑀲𑀫𑀗𑁆𑀕𑀺𑀪𑀸𑀯𑁄𑀢𑀺. 𑀫𑀡𑁆𑀟𑀦𑀚𑀸𑀢𑀺𑀓𑁄𑀢𑀺 𑀫𑀡𑁆𑀟𑀦𑀓𑀲𑀪𑀸𑀯𑁄, 𑀫𑀡𑁆𑀟𑀦𑀓𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀚𑁂𑀕𑀼𑀘𑁆𑀙𑀺𑀢𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑀲𑀻𑀮𑀢𑀁.

𑀮𑁄𑀓𑀚𑁂𑀝𑁆𑀞𑀓𑀓𑀫𑁆𑀫𑀦𑁆𑀢𑀺 𑀮𑁄𑀓𑀚𑁂𑀝𑁆𑀞𑀓𑀸𑀦𑀁 𑀓𑀢𑁆𑀢𑀩𑁆𑀩𑀓𑀫𑁆𑀫𑀁, 𑀮𑁄𑀓𑁂 𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑀁 𑀓𑀫𑁆𑀫𑀁. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼. 𑀧𑀤𑀸𑀪𑀺𑀳𑀺𑀢𑁄 𑀅𑀢𑁆𑀣𑁄 𑀧𑀤𑀢𑁆𑀣𑁄, 𑀩𑁆𑀬𑀜𑁆𑀚𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑀁 𑀯𑀸 𑀅𑀭𑀳𑀢𑀻𑀢𑀺 𑀏𑀢𑁆𑀣 𑀯𑀺𑀦𑀬𑀦𑀁 𑀯𑀺𑀦𑀬𑁄, 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀕𑁆𑀕𑀳𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀦𑀦𑀼 𑀘 𑀧𑀞𑀫𑀁 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀲𑀓𑀢𑁆𑀣𑁂 𑀅𑀭𑀳𑀢𑁆𑀣𑁂 𑀘 𑀢𑀤𑁆𑀥𑀺𑀢𑀧𑀘𑁆𑀘𑀬𑁄 𑀲𑀤𑁆𑀤𑀮𑀓𑁆𑀔𑀡𑀢𑁄 𑀤𑀺𑀲𑁆𑀲𑀢𑀺, 𑀦 𑀧𑀦 ‘‘𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂. 𑀢𑀲𑁆𑀫𑀸 𑀓𑀣𑀫𑁂𑀢𑁆𑀣 𑀢𑀤𑁆𑀥𑀺𑀢𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀻’’𑀢𑀺. 𑀯𑀺𑀘𑀺𑀢𑁆𑀭𑀢𑀸 𑀘𑁂𑀢𑁆𑀣 𑀮𑁄𑀓𑀧𑁆𑀧𑀫𑀸𑀡𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀅𑀢𑁆𑀣𑁂 𑀢𑀤𑁆𑀥𑀺𑀢𑀧𑁆𑀧𑀬𑁄𑀕𑁄 𑀮𑁄𑀓𑀲𑁆𑀲, 𑀢𑀢𑁆𑀣 𑀢𑀢𑁆𑀣 𑀢𑀤𑁆𑀥𑀺𑀢𑀯𑀼𑀢𑁆𑀢𑀺 𑀮𑁄𑀓𑀢𑁄 𑀲𑀺𑀤𑁆𑀥𑀸𑀢𑀺 𑀯𑀺𑀘𑀺𑀢𑁆𑀭𑀸 𑀢𑀤𑁆𑀥𑀺𑀢𑀯𑀼𑀢𑁆𑀢𑀺, 𑀢𑀲𑁆𑀫𑀸 𑀬𑀣𑀸 ‘‘𑀫𑀸 𑀲𑀤𑁆𑀤𑀫𑀓𑀸𑀲𑀻’’𑀢𑀺 𑀯𑀤𑀦𑁆𑀢𑁄 ‘‘𑀫𑀸𑀲𑀤𑁆𑀤𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀦𑀬𑀺𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀧𑀡𑀧𑀼𑀭𑀺𑀲𑁄𑀢𑀺 𑀕𑀼𑀡𑀯𑀺𑀭𑀳𑀺𑀢𑀢𑀸𑀬 𑀤𑀻𑀦𑀫𑀦𑀼𑀲𑁆𑀲𑁄. 𑀩𑁆𑀬𑀜𑁆𑀚𑀦𑀸𑀦𑀺 𑀅𑀯𑀺𑀘𑀸𑀭𑁂𑀢𑁆𑀯𑀸𑀢𑀺 𑀢𑀺𑀲𑁆𑀲𑀤𑀢𑁆𑀢𑀸𑀤𑀺𑀲𑀤𑁆𑀤𑁂𑀲𑀼 ¶ 𑀯𑀺𑀬 ‘‘𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀬𑀁 𑀦𑀸𑀫 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀩𑁆𑀬𑀜𑁆𑀚𑀦𑀯𑀺𑀘𑀸𑀭𑀁 𑀅𑀓𑀢𑁆𑀯𑀸, 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀤𑁂𑀯𑀮𑁄𑀓𑀕𑀩𑁆𑀪𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺 𑀯𑀢𑁆𑀯𑀸𑀧𑀺 𑀞𑀧𑁂𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑁂 𑀲𑁂𑀲𑀤𑁂𑀯𑁂𑀲𑀼 𑀕𑀩𑁆𑀪𑀕𑁆𑀕𑀳𑀡𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀲𑀦𑁆𑀥𑀺𑀬𑁂𑀯𑁂𑀢𑁆𑀣 𑀕𑀩𑁆𑀪𑀲𑀫𑁆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺. 𑀅𑀲𑁆𑀲𑀸𑀢𑀺 𑀅𑀪𑀺𑀯𑀸𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀲𑁆𑀲. 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 ¶ 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀫𑀸𑀢𑀺𑀢𑁄 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄, 𑀅𑀓𑁆𑀓𑁄𑀲𑀺𑀢𑀼𑀓𑀸𑀫𑀲𑁆𑀲 𑀤𑀸𑀲𑀺𑀬𑀸 𑀧𑀼𑀢𑁆𑀢𑁄𑀢𑀺 𑀤𑀸𑀲𑀺𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀓𑁆𑀓𑁄𑀲𑀦𑀁 𑀯𑀺𑀬 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑁄𑀧𑀺 𑀏𑀯𑀫𑀸𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀩𑁆𑀪𑀢𑁄𑀢𑀺 𑀤𑁂𑀯𑀮𑁄𑀓𑀧𑁆𑀧𑀝𑀺𑀲𑀦𑁆𑀥𑀺𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀪𑀩𑁆𑀩𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. ‘‘𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄’’𑀢𑀺 𑀇𑀫𑀲𑁆𑀲 𑀯𑀺𑀕𑁆𑀕𑀳𑀲𑁆𑀲 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁂𑀯𑀮𑁄𑀓𑀕𑀩𑁆𑀪𑀧𑀭𑀺𑀩𑀸𑀳𑀺𑀭𑀢𑁆𑀢𑀸 𑀆𑀬𑀢𑀺𑀁 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻’’𑀢𑀺. 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀆𑀬𑀢𑀺𑀫𑁆𑀧𑀺 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻, 𑀢𑀲𑁆𑀫𑀸 𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀦 𑀢𑀲𑁆𑀲𑁂𑀯 𑀯𑀺𑀕𑁆𑀕𑀳𑀲𑁆𑀲 ‘‘𑀓𑁄𑀥𑀯𑀲𑁂𑀦…𑀧𑁂… 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀲𑁆𑀲 𑀅𑀦𑀼𑀭𑀽𑀧𑀁 𑀓𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀻𑀦𑁄 𑀯𑀸𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑀯𑀸𑀲𑁄 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀕𑀩𑁆𑀪-𑀲𑀤𑁆𑀤𑁄 𑀅𑀢𑁆𑀣𑀺 𑀫𑀸𑀢𑀼𑀓𑀼𑀘𑁆𑀙𑀺𑀧𑀭𑀺𑀬𑀸𑀬𑁄 ‘‘𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁩𑁬𑁩) 𑀯𑀺𑀬. 𑀅𑀢𑁆𑀣𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀧𑀭𑀺𑀬𑀸𑀬𑁄 ‘‘𑀅𑀦𑁆𑀢𑀫𑀲𑁄 𑀕𑀩𑁆𑀪𑀧𑀸𑀢𑀦𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁨𑁯) 𑀯𑀺𑀬. 𑀢𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀧𑀭𑀺𑀬𑀸𑀬𑀁 𑀕𑀳𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀸𑀕𑀢𑁂 𑀕𑀩𑁆𑀪𑀲𑁂𑀬𑁆𑀬𑀸’’𑀢𑀺. 𑀕𑀩𑁆𑀪𑁂 𑀲𑁂𑀬𑁆𑀬𑀸 𑀕𑀩𑁆𑀪𑀲𑁂𑀬𑁆𑀬𑀸. 𑀅𑀦𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦. 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀯𑀺𑀳𑀢𑀢𑁆𑀢𑀸 𑀆𑀳 ‘‘𑀯𑀺𑀳𑀢𑀓𑀸𑀭𑀡𑀢𑁆𑀢𑀸’’𑀢𑀺. 𑀇𑀢𑀭𑀸 𑀢𑀺𑀲𑁆𑀲𑁄𑀧𑀻𑀢𑀺 𑀅𑀡𑁆𑀟𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸. 𑀏𑀢𑁆𑀣 𑀘 𑀬𑀤𑀺𑀧𑀺 ‘‘𑀅𑀧𑀕𑀩𑁆𑀪𑁄’’𑀢𑀺 𑀇𑀫𑀲𑁆𑀲 𑀅𑀦𑀼𑀭𑀽𑀧𑀢𑁄 𑀕𑀩𑁆𑀪𑀲𑁂𑀬𑁆𑀬𑀸 𑀏𑀯 𑀯𑀢𑁆𑀢𑀩𑁆𑀩𑀸, 𑀧𑀲𑀗𑁆𑀕𑀢𑁄 𑀧𑀦 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀫𑁆𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀧𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀲𑀢𑁆𑀢𑀧𑀭𑀺𑀬𑀸𑀬𑀲𑁆𑀲 𑀕𑀩𑁆𑀪-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀯𑀺𑀕𑁆𑀕𑀳𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀧𑀦 𑀯𑀺𑀓𑀧𑁆𑀧𑁂 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀉𑀪𑀬𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀦𑀼 𑀘 ‘‘𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀳𑀻𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀩𑁆𑀪𑀲𑁆𑀲 𑀲𑁂𑀬𑁆𑀬𑀸 𑀏𑀯 𑀧𑀳𑀻𑀦𑀸, 𑀦 𑀧𑀦 𑀕𑀩𑁆𑀪𑁄𑀢𑀺 𑀆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀬𑀣𑀸 𑀘𑀸’’𑀢𑀺𑀆𑀤𑀺. 𑀅𑀣 ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 𑀧𑀼𑀦𑀩𑁆𑀪𑀯𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀦𑁆𑀢𑀺 𑀆𑀳 ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀘 𑀦𑀸𑀫𑀸’’𑀢𑀺𑀆𑀤𑀺. 𑀅𑀧𑀼𑀦𑀩𑁆𑀪𑀯𑀪𑀽𑀢𑀸𑀢𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺.

𑀥𑀫𑁆𑀫𑀥𑀸𑀢𑀼𑀦𑁆𑀢𑀺 ¶ ¶ 𑀏𑀢𑁆𑀣 𑀥𑀫𑁆𑀫𑁂 𑀅𑀦𑀯𑀲𑁂𑀲𑁂 𑀥𑀸𑀭𑁂𑀢𑀺 𑀬𑀸𑀣𑀸𑀯𑀢𑁄 𑀉𑀧𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀸𑀢𑀼, 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀲𑀪𑀸𑀯𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀲𑀘𑁆𑀙𑀺𑀓𑀢𑁆𑀯𑀸, 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀧𑀝𑀺𑀮𑀸𑀪𑀳𑁂𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀭𑀼𑀘𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀫𑀢𑁆𑀣𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑁄, 𑀢𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀨𑀭𑀡𑀁. 𑀢𑀸𑀤𑀺𑀮𑀓𑁆𑀔𑀡𑀫𑁂𑀯 𑀧𑀼𑀦 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀣𑀯𑀻𑀲𑀫𑀘𑀺𑀢𑁆𑀢𑀢’’𑀦𑁆𑀢𑀺. 𑀬𑀣𑀸 𑀧𑀣𑀯𑀻 𑀲𑀼𑀘𑀺𑀅𑀲𑀼𑀘𑀺𑀦𑀺𑀓𑁆𑀔𑁂𑀧𑀘𑁆𑀙𑁂𑀤𑀦𑀪𑁂𑀤𑀦𑀸𑀤𑀻𑀲𑀼 𑀦 𑀯𑀺𑀓𑀫𑁆𑀧𑀢𑀺, 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀦 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀮𑀸𑀪𑀸𑀮𑀸𑀪𑀸𑀤𑀻𑀲𑀼 𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑁆𑀧𑀳𑀸𑀦𑀢𑁄 𑀅𑀯𑀺𑀓𑀫𑁆𑀧𑀺𑀢𑀘𑀺𑀢𑁆𑀢𑀢𑀸𑀬 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀼𑀧𑁆𑀧𑀥𑀫𑁆𑀫𑀢𑀦𑁆𑀢𑀺 𑀏𑀢𑁆𑀣 𑀅𑀓𑀼𑀧𑁆𑀧𑀥𑀫𑁆𑀫𑁄 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. ‘‘𑀧𑀭𑁂𑀲𑀼 𑀧𑀦 𑀅𑀓𑁆𑀓𑁄𑀲𑀦𑁆𑀢𑁂𑀲𑀼𑀧𑀺 𑀅𑀢𑁆𑀢𑀦𑁄 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀸𑀬 𑀅𑀓𑀼𑀧𑁆𑀧𑀦𑀲𑀪𑀸𑀯𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀚𑀭𑀸𑀬 𑀅𑀦𑀼𑀲𑀝𑀦𑁆𑀢𑀺 𑀚𑀭𑀸𑀬 𑀧𑀮𑀺𑀯𑁂𑀞𑀺𑀢𑀁. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀤𑁆𑀥𑀢𑀸𑀬 𑀆𑀲𑀦𑁆𑀦𑀯𑀼𑀢𑁆𑀢𑀺𑀫𑀭𑀡𑀦𑁆𑀢𑀺 𑀲𑀫𑁆𑀪𑀸𑀯𑀦𑀯𑀲𑁂𑀦 ‘‘𑀅𑀚𑁆𑀚 𑀫𑀭𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀫𑀳𑀦𑁆𑀢𑁂𑀦 𑀔𑁄 𑀧𑀦 𑀉𑀲𑁆𑀲𑀸𑀳𑁂𑀦𑀸’’𑀢𑀺 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺 𑀏𑀯𑀁 𑀲𑀜𑁆𑀚𑀸𑀢𑀫𑀳𑀼𑀲𑁆𑀲𑀸𑀳𑁂𑀦. 𑀅𑀧𑁆𑀧𑀝𑀺𑀲𑀫𑀁 𑀧𑀼𑀭𑁂𑀚𑀸𑀢𑀪𑀸𑀯𑀦𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀧𑀼𑀭𑁂𑀚𑀸𑀢𑀪𑀸𑀯𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀲𑀫𑁄𑀢𑀺 𑀅𑀧𑁆𑀧𑀝𑀺𑀲𑀫𑁄, 𑀧𑀼𑀭𑁂𑀚𑀸𑀢𑀪𑀸𑀯𑁄.

𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸𑀢𑀺 𑀧𑀢𑁆𑀢𑁂 𑀘𑀸𑀮𑁂𑀦𑁆𑀢𑀸. 𑀦𑀺𑀓𑁆𑀔𑀫𑀦𑁆𑀢𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀦𑀺𑀓𑁆𑀔𑀦𑁆𑀢𑁂𑀲𑀽𑀢𑀺 𑀅𑀢𑁆𑀣𑁄.

𑀲𑁄 𑀚𑁂𑀝𑁆𑀞𑁄 𑀇𑀢𑀺 𑀅𑀲𑁆𑀲 𑀯𑀘𑀦𑀻𑀬𑁄𑀢𑀺 𑀬𑁄 𑀧𑀞𑀫𑀢𑀭𑀁 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀦𑁆𑀢𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄, 𑀲𑁄 𑀚𑁂𑀝𑁆𑀞𑁄𑀢𑀺 𑀯𑀘𑀦𑀻𑀬𑁄 𑀅𑀲𑁆𑀲, 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀲𑀁𑀲𑀦𑁆𑀤𑁂𑀦𑁆𑀢𑁄. 𑀢𑀺𑀪𑀽𑀫𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀅𑀧𑁆𑀧𑀳𑀻𑀦𑀸𑀬 𑀅𑀯𑀺𑀚𑁆𑀚𑀸𑀬 𑀯𑁂𑀞𑀺𑀢𑀢𑁆𑀢𑀸𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂𑀲𑀼 𑀲𑀢𑁆𑀢𑁂𑀲𑀽’’𑀢𑀺 𑀅𑀡𑁆𑀟𑀓𑁄𑀲𑀦𑁆𑀢𑀺 𑀩𑀻𑀚𑀓𑀧𑀸𑀮𑀁. 𑀮𑁄𑀓𑀲𑀦𑁆𑀦𑀺𑀯𑀸𑀲𑁂𑀢𑀺 𑀮𑁄𑀓𑁄𑀬𑁂𑀯 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀦𑀺𑀯𑀸𑀲𑀦𑀝𑁆𑀞𑁂𑀦 𑀮𑁄𑀓𑀲𑀦𑁆𑀦𑀺𑀯𑀸𑀲𑁄, 𑀲𑀢𑁆𑀢𑀦𑀺𑀓𑀸𑀬𑁄. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀏𑀢𑁆𑀣 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑁄, 𑀲𑀁-𑀲𑀤𑁆𑀤𑁄 𑀲𑀸𑀫𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑁂𑀦𑀸𑀓𑀸𑀭𑁂𑀦 ¶ 𑀲𑀬𑀫𑁂𑀯 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺’’𑀦𑁆𑀢𑀺, 𑀲𑀫𑁆𑀫𑀸 𑀲𑀬𑀫𑁂𑀯 𑀘 𑀩𑀼𑀚𑁆𑀛𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀢𑀺 𑀯𑀸 𑀧𑀲𑀢𑁆𑀣𑀯𑀘𑀦𑁄, 𑀲𑀁-𑀲𑀤𑁆𑀤𑁄 𑀲𑀼𑀦𑁆𑀤𑀭𑀯𑀘𑀦𑁄𑀢𑀺 𑀆𑀳 ‘‘𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺’’𑀦𑁆𑀢𑀺.

𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸𑀢𑀺 𑀲𑀩𑁆𑀩𑀕𑀼𑀡𑀸𑀦𑀁 𑀅𑀤𑀸𑀬𑀓𑀢𑁆𑀢𑀸. 𑀲𑀩𑁆𑀩𑀕𑀼𑀡𑁂 𑀦 𑀤𑀤𑀸𑀢𑀻𑀢𑀺 𑀳𑀺 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑁄 ¶ , 𑀅𑀲𑀫𑀢𑁆𑀣𑀲𑀫𑀸𑀲𑁄𑀬𑀁 𑀕𑀫𑀓𑀢𑁆𑀢𑀸 𑀬𑀣𑀸 ‘‘𑀅𑀲𑀽𑀭𑀺𑀬𑀧𑀲𑁆𑀲𑀸𑀦𑀺 𑀫𑀼𑀔𑀸𑀦𑀻’’𑀢𑀺. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀉𑀧𑀦𑀺𑀲𑁆𑀲𑀬𑀯𑀢𑁄 𑀲𑀳𑁂𑀯 𑀅𑀭𑀳𑀢𑁆𑀢𑀨𑀮𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀤𑁂𑀢𑀺. 𑀦𑀦𑀼 𑀘𑁂𑀢𑁆𑀣 𑀢𑀻𑀲𑀼 𑀯𑀺𑀚𑁆𑀚𑀸𑀲𑀼 𑀆𑀲𑀯𑀓𑁆𑀔𑀬𑀜𑀸𑀡𑀲𑁆𑀲 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀣𑀫𑁂𑀢𑀁 𑀬𑀼𑀚𑁆𑀚𑀢𑀺 ‘‘𑀫𑀕𑁆𑀕𑁄 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀤𑁂𑀢𑀻’’𑀢𑀺? 𑀦𑀸𑀬𑀁 𑀤𑁄𑀲𑁄. 𑀲𑀢𑀺𑀧𑀺 𑀆𑀲𑀯𑀓𑁆𑀔𑀬𑀜𑀸𑀡𑀲𑁆𑀲 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂 𑀅𑀝𑁆𑀞𑀗𑁆𑀕𑀺𑀓𑁂 𑀫𑀕𑁆𑀕𑁂 𑀲𑀢𑀺 𑀫𑀕𑁆𑀕𑀜𑀸𑀡𑁂𑀦 𑀲𑀤𑁆𑀥𑀺𑀁 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 ‘‘𑀫𑀕𑁆𑀕𑁄 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀤𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀙 𑀅𑀪𑀺𑀜𑁆𑀜𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀦𑁆𑀢𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀧𑀝𑀺𑀮𑀪𑀺𑀢𑀩𑁆𑀩𑀫𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁. 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀚𑀸𑀦𑀺𑀁. 𑀚𑀸𑀦𑀦𑀜𑁆𑀘 𑀦 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀝𑀺𑀯𑀺𑀚𑁆𑀛𑀺’’𑀦𑁆𑀢𑀺, 𑀧𑀘𑁆𑀘𑀓𑁆𑀔𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄𑀧𑀺 𑀦 𑀤𑀽𑀭𑁂 𑀞𑀺𑀢𑀲𑁆𑀲 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁄 𑀯𑀺𑀬𑀸𑀢𑀺 𑀆𑀳 ‘‘𑀧𑀢𑁆𑀢𑁄𑀫𑁆𑀳𑀻’’𑀢𑀺, 𑀧𑀸𑀧𑀼𑀡𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀧𑀼𑀡𑀦𑀜𑁆𑀘 𑀦 𑀲𑀬𑀁 𑀕𑀦𑁆𑀢𑁆𑀯𑀸𑀢𑀺 𑀆𑀳 ‘‘𑀅𑀥𑀺𑀕𑀢𑁄𑀫𑁆𑀳𑀻’’𑀢𑀺, 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀧𑀝𑀺𑀮𑀪𑀺𑀦𑁆𑀢𑀺 𑀅𑀢𑁆𑀣𑁄.

𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀦𑁆𑀢𑀺 𑀑𑀧𑀫𑁆𑀫𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑁂𑀦 𑀲𑀫𑁆𑀫𑀤𑁂𑀯 𑀧𑀝𑀺𑀧𑀸𑀤𑀦𑀁. 𑀅𑀢𑁆𑀣𑁂𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑁂𑀦. 𑀬𑀣𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀓𑀸𑀭𑀡𑀁, 𑀏𑀯𑀁 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑀣𑀸 𑀳𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸…𑀧𑁂… 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡’’𑀦𑁆𑀢𑀺. ‘‘𑀲𑀦𑁆𑀢𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀡𑁆𑀟𑀲𑀤𑀺𑀲𑀢𑀸 𑀲𑀦𑁆𑀢𑀸𑀦𑀲𑁆𑀲, 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑀤𑀺𑀲𑀢𑀸 𑀩𑀼𑀤𑁆𑀥𑀕𑀼𑀡𑀸𑀦𑀁, 𑀩𑀼𑀤𑁆𑀥𑀕𑀼𑀡𑀸𑀢𑀺 𑀘 𑀅𑀢𑁆𑀣𑀢𑁄 𑀩𑀼𑀤𑁆𑀥𑁄𑀬𑁂𑀯 ‘‘𑀢𑀣𑀸𑀕𑀢𑀲𑁆𑀲 𑀔𑁄 𑀏𑀢𑀁, 𑀯𑀸𑀲𑁂𑀝𑁆𑀞, 𑀅𑀥𑀺𑀯𑀘𑀦𑀁 𑀥𑀫𑁆𑀫𑀓𑀸𑀬𑁄 𑀇𑀢𑀺𑀧𑀻’’𑀢𑀺 𑀯𑀘𑀦𑀢𑁄. 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄, 𑀧𑀝𑀺𑀘𑁆𑀙𑀸𑀤𑀦𑀲𑀸𑀫𑀜𑁆𑀜𑁂𑀦 𑀘 𑀅𑀯𑀺𑀚𑁆𑀚𑀸𑀬 𑀅𑀡𑁆𑀟𑀓𑁄𑀲𑀲𑀤𑀺𑀲𑀢𑀸. 𑀫𑀼𑀤𑀼𑀪𑀽𑀢𑀲𑁆𑀲𑀧𑀺 𑀔𑀭𑀪𑀸𑀯𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 ¶ 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀣𑀤𑁆𑀥𑀔𑀭𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄𑀢𑀺 𑀏𑀢𑁆𑀣 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀼𑀔𑀸𑀦𑀼𑀧𑁆𑀧𑀯𑁂𑀲𑁄 𑀢𑀺𑀓𑁆𑀔𑀢𑀸, 𑀅𑀦𑀼𑀧𑀯𑀺𑀲𑀺𑀢𑁆𑀯𑀸𑀧𑀺 𑀲𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀅𑀦𑀢𑀺𑀓𑁆𑀓𑀫𑀦𑀢𑁄 𑀅𑀓𑀼𑀡𑁆𑀞𑀢𑀸 𑀔𑀭𑀪𑀸𑀯𑁄. 𑀢𑀺𑀓𑁆𑀔𑁄𑀧𑀺 𑀳𑀺 𑀏𑀓𑀘𑁆𑀘𑁄 𑀲𑀭𑁄 𑀮𑀓𑁆𑀔𑀁 𑀧𑀢𑁆𑀯𑀸 𑀓𑀼𑀡𑁆𑀞𑁄 𑀳𑁄𑀢𑀺, 𑀦 𑀢𑀣𑀸 𑀇𑀤𑀁. 𑀲𑀢𑀺𑀧𑀺 𑀔𑀭𑀪𑀸𑀯𑁂 𑀲𑀼𑀔𑀼𑀫𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀲𑀗𑁆𑀔𑁄𑀪𑀭𑀳𑀺𑀢𑀢𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀧𑀲𑀦𑁆𑀦𑀪𑀸𑀯𑁄, 𑀲𑀢𑀺𑀧𑀺 𑀧𑀲𑀦𑁆𑀦𑀪𑀸𑀯𑁂 𑀅𑀦𑁆𑀢𑀭𑀸 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀓𑀺𑀮𑁂𑀲𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀽𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀫𑁂𑀳𑀺 𑀧𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀫𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀸𑀧𑀢𑁆𑀢𑀺. 𑀢𑀤𑀸 𑀘 𑀲𑀸 𑀫𑀕𑁆𑀕𑀜𑀸𑀡𑀕𑀩𑁆𑀪𑀁 𑀥𑀸𑀭𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄’’𑀢𑀺. 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀅𑀦𑀦𑁆𑀢𑀭𑀁 𑀲𑀺𑀔𑀸𑀧𑁆𑀧𑀢𑁆𑀢𑀅𑀦𑀼𑀮𑁄𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀫𑀕𑁆𑀕𑀯𑀺𑀚𑀸𑀬𑀦𑀢𑁆𑀣𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀅𑀪𑀺𑀜𑁆𑀜𑀸𑀧𑀓𑁆𑀔𑁂𑀢𑀺 ¶ 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀧𑀓𑁆𑀔𑁂. 𑀮𑁄𑀓𑀼𑀢𑁆𑀢𑀭𑀸𑀪𑀺𑀜𑁆𑀜𑀸 𑀳𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑀺𑀢𑀸. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀙𑀸𑀪𑀺𑀜𑁆𑀜𑀸𑀧𑀓𑁆𑀔𑁂’’𑀢𑀺 𑀮𑀺𑀔𑀦𑁆𑀢𑀺, 𑀲𑁄 𑀅𑀧𑀸𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀚𑁂𑀝𑁆𑀞𑁄 𑀲𑁂𑀝𑁆𑀞𑁄𑀢𑀺 𑀯𑀼𑀤𑁆𑀥𑀢𑀫𑀢𑁆𑀢𑀸 𑀚𑁂𑀝𑁆𑀞𑁄, 𑀲𑀩𑁆𑀩𑀕𑀼𑀡𑁂𑀳𑀺 𑀉𑀢𑁆𑀢𑀫𑀢𑁆𑀢𑀸 𑀧𑀲𑀢𑁆𑀣𑀢𑀫𑁄𑀢𑀺 𑀲𑁂𑀝𑁆𑀞𑁄.

𑀇𑀤𑀸𑀦𑀺 ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀻𑀭𑀺𑀬’’𑀦𑁆𑀢𑀺𑀆𑀤𑀺𑀓𑀸𑀬 𑀤𑁂𑀲𑀦𑀸𑀬 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀪𑀕𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀻𑀢𑀺 𑀪𑀸𑀯𑀦𑀸𑀬 𑀧𑀼𑀩𑁆𑀩𑀪𑀸𑀕𑀻𑀬𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀢𑁄 𑀧𑀝𑁆𑀞𑀸𑀬. 𑀫𑀼𑀝𑁆𑀞𑀲𑁆𑀲𑀢𑀺𑀦𑀸𑀢𑀺 𑀯𑀺𑀦𑀝𑁆𑀞𑀲𑁆𑀲𑀢𑀺𑀦𑀸, 𑀲𑀢𑀺𑀯𑀺𑀭𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀸𑀭𑀤𑁆𑀥𑀓𑀸𑀬𑁂𑀦𑀸𑀢𑀺 𑀲𑀤𑀭𑀣𑀓𑀸𑀬𑁂𑀦. 𑀩𑁄𑀥𑀺𑀫𑀡𑁆𑀟𑁂𑀢𑀺 𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀫𑀡𑁆𑀟𑀪𑀸𑀯𑀧𑁆𑀧𑀢𑁆𑀢𑁂 𑀞𑀸𑀦𑁂. 𑀩𑁄𑀥𑀻𑀢𑀺 𑀳𑀺 𑀧𑀜𑁆𑀜𑀸 𑀯𑀼𑀘𑁆𑀘𑀢𑀺. 𑀲𑀸 𑀏𑀢𑁆𑀣 𑀫𑀡𑁆𑀟𑀸 𑀧𑀲𑀦𑁆𑀦𑀸 𑀚𑀸𑀢𑀸𑀢𑀺 𑀲𑁄 𑀧𑀤𑁂𑀲𑁄 ‘‘𑀩𑁄𑀥𑀺𑀫𑀡𑁆𑀟𑁄’’𑀢𑀺 𑀧𑀜𑁆𑀜𑀸𑀢𑁄. 𑀧𑀕𑁆𑀕𑀳𑀺𑀢𑀦𑁆𑀢𑀺 𑀆𑀭𑀫𑁆𑀪𑀁 𑀲𑀺𑀣𑀺𑀮𑀁 𑀅𑀓𑀢𑁆𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑀲𑀗𑁆𑀔𑀸𑀢𑀼𑀲𑁆𑀲𑀳𑀦𑀪𑀸𑀯𑁂𑀦 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢’’𑀦𑁆𑀢𑀺. 𑀅𑀲𑀮𑁆𑀮𑀻𑀦𑀦𑁆𑀢𑀺 𑀅𑀲𑀗𑁆𑀓𑀼𑀘𑀺𑀢𑀁 𑀓𑁄𑀲𑀚𑁆𑀚𑀯𑀲𑁂𑀦 𑀲𑀗𑁆𑀓𑁄𑀘𑀁 𑀅𑀦𑀸𑀧𑀦𑁆𑀦𑀁. 𑀉𑀧𑀝𑁆𑀞𑀺𑀢𑀸𑀢𑀺 𑀑𑀕𑀸𑀳𑀦𑀲𑀗𑁆𑀔𑀸𑀢𑁂𑀦 𑀅𑀧𑀺𑀮𑀸𑀧𑀦𑀪𑀸𑀯𑁂𑀦 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀸. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀻𑀪𑀸𑀯𑁂𑀦𑀸’’𑀢𑀺. 𑀲𑀫𑁆𑀫𑁄𑀲𑀲𑁆𑀲 𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀦 𑀲𑀫𑁆𑀫𑀼𑀝𑁆𑀞𑀸𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀓𑀺𑀜𑁆𑀘𑀸𑀧𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘𑀺𑀢𑁆𑀢𑀫𑁂𑀯 𑀧𑀲𑁆𑀲𑀤𑁆𑀥𑀁, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑁂𑀯 𑀘 𑀓𑀸𑀬𑁄 𑀧𑀲𑁆𑀲𑀤𑁆𑀥𑁄 𑀳𑁄𑀢𑀺 ¶ , 𑀢𑀣𑀸𑀧𑀺 𑀬𑀲𑁆𑀫𑀸 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀬𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑀸’’𑀢𑀺. 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀉𑀪𑀬𑁂𑀲𑀫𑁆𑀧𑀺 𑀓𑀸𑀬𑀸𑀦𑀁 𑀧𑀲𑁆𑀲𑀫𑁆𑀪𑀦𑀸𑀯𑀳𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀻’’𑀢𑀺.

𑀲𑁄 𑀘 𑀔𑁄𑀢𑀺 𑀲𑁄 𑀘 𑀔𑁄 𑀓𑀸𑀬𑁄. 𑀯𑀺𑀕𑀢𑀤𑀭𑀣𑁄𑀢𑀺 𑀯𑀺𑀕𑀢𑀓𑀺𑀮𑁂𑀲𑀤𑀭𑀣𑁄. 𑀦𑀸𑀫𑀓𑀸𑀬𑁂 𑀳𑀺 𑀯𑀺𑀕𑀢𑀤𑀭𑀣𑁂 𑀭𑀽𑀧𑀓𑀸𑀬𑁄𑀧𑀺 𑀯𑀽𑀧𑀲𑀦𑁆𑀢𑀤𑀭𑀣𑀧𑀭𑀺𑀴𑀸𑀳𑁄 𑀳𑁄𑀢𑀺. 𑀲𑀫𑁆𑀫𑀸 𑀆𑀳𑀺𑀢𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀥𑀸𑀯𑀦𑀲𑀗𑁆𑀔𑀸𑀢𑀁 𑀯𑀺𑀓𑁆𑀔𑁂𑀧𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀸𑀧𑀸𑀤𑀦𑁂𑀦 𑀲𑀫𑁆𑀫𑀤𑁂𑀯 𑀆𑀳𑀺𑀢𑀁 𑀞𑀧𑀺𑀢𑀁. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼 𑀞𑀧𑀺𑀢’’𑀦𑁆𑀢𑀺𑀆𑀤𑀺. 𑀘𑀺𑀢𑁆𑀢𑀲𑁆𑀲 𑀅𑀦𑁂𑀓𑀕𑁆𑀕𑀪𑀸𑀯𑁄 𑀯𑀺𑀓𑁆𑀔𑁂𑀧𑀯𑀲𑁂𑀦 𑀘𑀜𑁆𑀘𑀮𑀢𑀸, 𑀲𑀸 𑀲𑀢𑀺 𑀏𑀓𑀕𑁆𑀕𑀢𑀸𑀬 𑀦 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦’’𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀆𑀭𑀤𑁆𑀥𑀁 𑀔𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀻𑀭𑀺𑀬𑀲𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀻𑀦𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦. 𑀦𑀦𑀼 𑀘 𑀲𑀤𑁆𑀥𑀸𑀧𑀜𑁆𑀜𑀸𑀦𑀫𑁆𑀧𑀺 𑀓𑀺𑀘𑁆𑀘𑀲𑀺𑀤𑁆𑀥𑀺 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸𑀬 𑀇𑀘𑁆𑀙𑀺𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁, 𑀲𑀸 𑀧𑀦 𑀦𑀸𑀦𑀦𑁆𑀢𑀭𑀺𑀓𑀪𑀸𑀯𑁂𑀦 𑀅𑀯𑀼𑀢𑁆𑀢𑀲𑀺𑀤𑁆𑀥𑀸𑀢𑀺 𑀦 𑀕𑀳𑀺𑀢𑀸. 𑀅𑀲𑀢𑀺 𑀳𑀺 𑀲𑀤𑁆𑀥𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀻𑀦𑀁 𑀅𑀲𑀫𑁆𑀪𑀯𑁄𑀬𑁂𑀯, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑁂 𑀘 𑀦𑁂𑀲𑀁 𑀅𑀲𑀢𑀺 𑀜𑀸𑀬𑀸𑀭𑀫𑁆𑀪𑀸𑀤𑀺𑀪𑀸𑀯𑁄 𑀦 𑀲𑀺𑀬𑀸, 𑀢𑀣𑀸 𑀅𑀲𑀮𑁆𑀮𑀻𑀦𑀸𑀲𑀫𑁆𑀫𑁄𑀲𑀢𑀸𑀤𑀬𑁄 𑀯𑀻𑀭𑀺𑀬𑀸𑀤𑀻𑀦𑀦𑁆𑀢𑀺 𑀅𑀲𑀮𑁆𑀮𑀻𑀦𑀢𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀧𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺 ¶ 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀛𑀸𑀦𑀪𑀸𑀯𑀦𑀸𑀬𑀁 𑀯𑀸 𑀲𑀫𑀸𑀥𑀺𑀓𑀺𑀘𑁆𑀘𑀁 𑀅𑀥𑀺𑀓𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀸𑀥𑀺𑀧𑀭𑀺𑀬𑁄𑀲𑀸𑀦𑀸𑀯 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸 𑀓𑀣𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀢𑀻𑀢𑀪𑀯𑁂 𑀔𑀦𑁆𑀥𑀸 𑀢𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺 𑀘 𑀲𑀩𑁆𑀩𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁𑀢𑁆𑀯𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀓𑀺𑀁 𑀯𑀺𑀤𑀺𑀢𑀁 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲’’𑀦𑁆𑀢𑀺. 𑀫𑁄𑀳𑁄 𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 𑀢𑀫𑁄 𑀯𑀺𑀬 𑀢𑀫𑁄𑀢𑀺 𑀆𑀳 ‘‘𑀲𑁆𑀯𑁂𑀯 𑀫𑁄𑀳𑁄’’𑀢𑀺. 𑀑𑀪𑀸𑀲𑀓𑀭𑀡𑀝𑁆𑀞𑁂𑀦𑀸𑀢𑀺 𑀓𑀸𑀢𑀩𑁆𑀩𑀢𑁄 𑀓𑀭𑀡𑀁. 𑀑𑀪𑀸𑀲𑁄𑀯 𑀓𑀭𑀡𑀁 𑀑𑀪𑀸𑀲𑀓𑀭𑀡𑀁. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀑𑀪𑀸𑀲𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀦𑁆𑀢𑀺 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀦𑀁 𑀩𑁄𑀥𑀦𑀢𑁄 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸𑀢𑀺 𑀏𑀢𑁂𑀦 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀚𑁆𑀚𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸. 𑀧𑀝𑀺𑀧𑀓𑁆𑀔𑀢𑀸 𑀘𑀲𑁆𑀲𑀸 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀺𑀚𑁆𑀚𑀸𑀬 𑀘 𑀧𑀳𑀸𑀬𑀓𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂𑀢𑀺 𑀇𑀫𑀺𑀦𑀸 ‘‘𑀢𑀫𑁄 𑀯𑀺𑀳𑀢𑁄 𑀯𑀺𑀦𑀝𑁆𑀞𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀝𑁆𑀞𑁂𑀦 ¶ 𑀯𑀻𑀭𑀺𑀬𑀁 𑀆𑀢𑀸𑀧𑁄𑀢𑀺 𑀆𑀳 ‘‘𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄’’𑀢𑀺, 𑀯𑀻𑀭𑀺𑀬𑀯𑀢𑁄𑀢𑀺 𑀅𑀢𑁆𑀣𑁄. 𑀧𑁂𑀲𑀺𑀢𑀢𑁆𑀢𑀲𑁆𑀲𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀁 𑀧𑀢𑀺 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑀲𑁆𑀲. 𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄𑀢𑀺 𑀅𑀜𑁆𑀜𑀲𑁆𑀲𑀧𑀺 𑀓𑀲𑁆𑀲𑀘𑀺 𑀫𑀸𑀤𑀺𑀲𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀥𑀸𑀦𑀸𑀦𑀼𑀬𑁄𑀕𑀲𑁆𑀲𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑀲𑁆𑀲.

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀦 𑀧𑀞𑀫𑀤𑀼𑀢𑀺𑀬𑀜𑀸𑀡𑀤𑁆𑀯𑀬𑀸𑀥𑀺𑀕𑀫𑀁 𑀯𑀺𑀬 𑀓𑁂𑀯𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀲𑁆𑀲𑁂𑀦𑁆𑀢𑁄𑀢𑀺 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄. 𑀲𑀭𑀽𑀧𑀢𑁄 𑀳𑀺 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀫𑁂𑀯𑀸𑀢𑀺.

𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀞𑀫𑀯𑀺𑀚𑁆𑀚𑀸𑀬 𑀚𑀸𑀢𑁄𑀬𑁂𑀯 𑀧𑀼𑀭𑁂𑀚𑀸𑀢𑀲𑁆𑀲 𑀲𑀳𑀚𑀸𑀢𑀲𑁆𑀲 𑀯𑀸 𑀅𑀪𑀸𑀯𑀢𑁄 𑀲𑀩𑁆𑀩𑁂𑀲𑀁 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄, 𑀓𑀺𑀫𑀗𑁆𑀕𑀁 𑀧𑀦 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄’’𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀢𑀩𑁆𑀪𑀸𑀯𑀺𑀪𑀸𑀯𑀢𑁄 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀁 𑀧𑀓𑀸𑀲𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺 𑀅𑀢𑀻𑀢𑀓𑁆𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀔𑀸𑀢𑁂 𑀅𑀢𑀻𑀢𑁂 𑀓𑁄𑀝𑁆𑀞𑀸𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀘 𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯 𑀇𑀚𑁆𑀛𑀦𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀭𑀺𑀪𑀡𑁆𑀟𑀜𑀸𑀡𑀢𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀺𑀬𑁂𑀯 𑀘 𑀞𑀺𑀢𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑀺𑀤𑁆𑀥𑀺𑀢𑁄 𑀯𑀼𑀢𑁆𑀢𑀁 ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡’’𑀦𑁆𑀢𑀺. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀲𑀧𑀭𑀺𑀪𑀡𑁆𑀟𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁄 𑀘 𑀅𑀦𑀸𑀕𑀢𑀁𑀲𑁄 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀁, 𑀢𑀢𑁆𑀣 𑀜𑀸𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁. 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑁂𑀦𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀬 𑀲𑁂𑀲𑀸𑀲𑀸𑀥𑀸𑀭𑀡𑀙𑀜𑀸𑀡𑀤𑀲𑀩𑀮𑀜𑀸𑀡𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀸𑀤𑀻𑀦𑀫𑁆𑀧𑀺 ¶ 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀇𑀚𑁆𑀛𑀦𑀢𑁄 𑀯𑀼𑀢𑁆𑀢𑀁 ‘‘𑀆𑀲𑀯𑀓𑁆𑀔𑀬𑁂𑀦 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡’’𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸’’𑀢𑀺.

𑀧𑀻𑀢𑀺𑀯𑀺𑀧𑁆𑀨𑀸𑀭𑀧𑀭𑀺𑀧𑀼𑀡𑁆𑀡𑀕𑀢𑁆𑀢𑀘𑀺𑀢𑁆𑀢𑁄𑀢𑀺 𑀧𑀻𑀢𑀺𑀨𑀭𑀡𑁂𑀦 𑀧𑀭𑀺𑀧𑀼𑀡𑁆𑀡𑀓𑀸𑀬𑀘𑀺𑀢𑁆𑀢𑁄. 𑀅𑀜𑁆𑀜𑀸𑀡𑀦𑁆𑀢𑀺 𑀅𑀜𑁆𑀜𑀸𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀥𑀺-𑀲𑀤𑁆𑀤𑀬𑁄𑀕𑀢𑁄 𑀳𑀺 𑀲𑀸𑀫𑀺𑀅𑀢𑁆𑀣𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑁂𑀭𑀜𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 ¶ 𑀲𑀦𑁆𑀣𑀸𑀕𑀸𑀭𑀁 (𑀫. 𑀦𑀺. 𑀅𑀝𑁆𑀞. 𑁧.𑁨𑁨; 𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁨𑁪𑁩) 𑀦𑀸𑀫 𑀏𑀓𑀸 𑀫𑀳𑀸𑀲𑀸𑀮𑀸𑀯. 𑀉𑀬𑁆𑀬𑁄𑀕𑀓𑀸𑀮𑀸𑀤𑀻𑀲𑀼 𑀳𑀺 𑀭𑀸𑀚𑀸𑀦𑁄 𑀢𑀢𑁆𑀣 𑀞𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀏𑀢𑁆𑀢𑀓𑀸 𑀧𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀲𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀫𑀭𑀺𑀬𑀸𑀤𑀁 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀞𑀸𑀦𑀁 ‘‘𑀲𑀦𑁆𑀣𑀸𑀕𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀬𑁆𑀬𑁄𑀕𑀝𑁆𑀞𑀸𑀦𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀬𑀸𑀯 𑀕𑁂𑀳𑁂 𑀕𑁄𑀫𑀬𑀧𑀭𑀺𑀪𑀡𑁆𑀟𑀸𑀤𑀺𑀯𑀲𑁂𑀦 𑀧𑀝𑀺𑀚𑀕𑁆𑀕𑀦𑀁 𑀓𑀭𑁄𑀦𑁆𑀢𑀺, 𑀢𑀸𑀯 𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀢𑁂 𑀭𑀸𑀚𑀸𑀦𑁄 𑀢𑀢𑁆𑀣 𑀲𑀦𑁆𑀣𑀫𑁆𑀪𑀦𑁆𑀢𑀻𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁. 𑀢𑁂𑀲𑀁 𑀭𑀸𑀚𑀽𑀦𑀁 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁. 𑀕𑀡𑀭𑀸𑀚𑀸𑀦𑁄 𑀳𑀺 𑀢𑁂, 𑀢𑀲𑁆𑀫𑀸 𑀉𑀧𑁆𑀧𑀦𑁆𑀦𑀁 𑀓𑀺𑀘𑁆𑀘𑀁 𑀏𑀓𑀲𑁆𑀲 𑀯𑀲𑁂𑀦 𑀦 𑀲𑀺𑀚𑁆𑀛𑀢𑀺, 𑀲𑀩𑁆𑀩𑁂𑀲𑀁 𑀙𑀦𑁆𑀤𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀲𑀸𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭’’𑀦𑁆𑀢𑀺. 𑀬𑀲𑁆𑀫𑀸 𑀯𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀧𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀖𑀭𑀸𑀯𑀸𑀲𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀦𑁆𑀢𑀬𑀦𑁆𑀢𑀺, 𑀢𑀲𑁆𑀫𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀖𑀭𑀸𑀯𑀸𑀲𑀁 𑀲𑀦𑁆𑀣𑀭𑀦𑁆𑀢𑀻𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁.

𑀧𑀼𑀢𑁆𑀢𑀤𑀸𑀭𑀥𑀦𑀸𑀤𑀺𑀉𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁄 𑀧𑀸𑀭𑀫𑀺𑀬𑁄. 𑀅𑀢𑁆𑀢𑀦𑁄 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀉𑀧𑀧𑀸𑀭𑀫𑀺𑀬𑁄. 𑀅𑀢𑁆𑀢𑀦𑁄𑀯 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄. 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸. 𑀮𑁄𑀓𑀲𑁆𑀲 𑀅𑀢𑁆𑀣𑀘𑀭𑀺𑀬𑀸 𑀮𑁄𑀓𑀢𑁆𑀣𑀘𑀭𑀺𑀬𑀸. 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀯𑀲𑁂𑀦 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀧𑀭𑀺𑀘𑀬𑀯𑀲𑁂𑀦 𑀔𑀦𑁆𑀥𑀸𑀬𑀢𑀦𑀸𑀤𑀺𑀧𑀭𑀺𑀘𑀬𑀯𑀲𑁂𑀦 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀯𑀲𑁂𑀦 𑀘 𑀜𑀸𑀡𑀘𑀸𑀭𑁄 𑀩𑀼𑀤𑁆𑀥𑀘𑀭𑀺𑀬𑀸. 𑀅𑀗𑁆𑀕𑀦𑀬𑀦𑀥𑀦𑀭𑀚𑁆𑀚𑀧𑀼𑀢𑁆𑀢𑀤𑀸𑀭𑀧𑀭𑀺𑀚𑁆𑀚𑀸𑀕𑀯𑀲𑁂𑀦 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁂𑀦. 𑀲𑀢𑀺𑀧𑀺 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀤𑀸𑀦𑀧𑀸𑀭𑀫𑀺𑀪𑀸𑀯𑁂 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁, 𑀢𑀢𑁄𑀬𑁂𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁. 𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 ¶ 𑀥𑀦𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀢𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀜𑁆𑀘 𑀯𑀺𑀲𑀼𑀁 𑀓𑀢𑀁. 𑀧𑀩𑁆𑀩𑀚𑁆𑀚𑀸𑀯 𑀲𑀗𑁆𑀔𑁂𑀧𑁄.

𑀲𑀢𑁆𑀢𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀽𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀢𑀺 𑀇𑀫𑀸𑀲𑀼 𑀲𑀢𑁆𑀢𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼.

𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 ¶ 𑀅𑀯𑁂𑀘𑁆𑀘𑀓𑀭𑀡𑀁. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀞𑀺𑀢𑀸 𑀅𑀢𑁆𑀢𑀦𑁄 𑀲𑀸𑀯𑀓𑀢𑁆𑀢𑀁 𑀉𑀧𑀕𑀢𑁂 𑀧𑀕𑁆𑀕𑀡𑁆𑀳𑀦𑁆𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁨.𑁭𑁫-𑁭𑁬) 𑀅𑀦𑀼𑀧𑀼𑀩𑁆𑀩𑀁 𑀓𑀣𑁂𑀢𑀩𑁆𑀩𑀓𑀣𑀁. 𑀓𑀸 𑀧𑀦 𑀲𑀸𑀢𑀺? 𑀤𑀸𑀦𑀸𑀤𑀺𑀓𑀣𑀸. 𑀢𑀢𑁆𑀣 𑀤𑀸𑀦𑀓𑀣𑀸 𑀢𑀸𑀯 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀲𑀼𑀓𑀭𑀢𑁆𑀢𑀸 𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀘 𑀆𑀤𑀺𑀢𑁄 𑀓𑀣𑀺𑀢𑀸. 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀧𑀭𑀺𑀕𑁆𑀕𑀳𑀯𑀢𑁆𑀣𑀽𑀲𑀼 𑀦𑀺𑀲𑁆𑀲𑀗𑁆𑀕𑀪𑀸𑀯𑀢𑁄 𑀲𑀼𑀔𑁂𑀦𑁂𑀯 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀢𑀢𑁆𑀣 𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀻𑀮𑁂𑀦 𑀤𑀸𑀬𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑀯𑀺𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄 𑀓𑀺𑀭𑀺𑀬𑀸𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀸𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀓𑀣𑀸𑀦𑀦𑁆𑀢𑀭𑀁 𑀲𑀻𑀮𑀓𑀣𑀸 𑀓𑀣𑀺𑀢𑀸. ‘‘𑀢𑀜𑁆𑀘 𑀲𑀻𑀮𑀁 𑀯𑀝𑁆𑀝𑀦𑀺𑀲𑁆𑀲𑀺𑀢𑀁, 𑀅𑀬𑀁 𑀪𑀯𑀲𑀫𑁆𑀧𑀢𑁆𑀢𑀺 𑀢𑀲𑁆𑀲 𑀨𑀮’’𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁. ‘‘𑀇𑀫𑁂𑀳𑀺 𑀘 𑀤𑀸𑀦𑀲𑀻𑀮𑀫𑀬𑁂𑀳𑀺 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀏𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀅𑀧𑀭𑀺𑀫𑁂𑀬𑁆𑀬𑀸 𑀤𑀺𑀩𑁆𑀩𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀮𑀤𑁆𑀥𑀩𑁆𑀩𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀸. ‘‘𑀲𑁆𑀯𑀸𑀬𑀁 𑀲𑀕𑁆𑀕𑁄 𑀭𑀸𑀕𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑁄, 𑀲𑀩𑁆𑀩𑀣𑀸𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀅𑀭𑀺𑀬𑀫𑀕𑁆𑀕𑁄’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑁄, 𑀫𑀕𑁆𑀕𑀜𑁆𑀘 𑀓𑀣𑁂𑀦𑁆𑀢𑁂𑀦 𑀢𑀤𑀥𑀺𑀕𑀫𑀽𑀧𑀸𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀧𑀕𑁂𑀯 𑀇𑀢𑀭𑁂 𑀲𑀩𑁆𑀩𑁂𑀧𑀺 𑀓𑀸𑀫𑀸 𑀦𑀸𑀫 𑀩𑀳𑁆𑀯𑀸𑀤𑀻𑀦𑀯𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄. ‘‘𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀁𑀳𑀺𑀢𑀸’’𑀢𑀺 𑀢𑁂𑀲𑀁 𑀑𑀓𑀸𑀭𑁄 𑀮𑀸𑀫𑀓𑀪𑀸𑀯𑁄. 𑀲𑀩𑁆𑀩𑁂𑀧𑀺 𑀪𑀯𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀢𑀺 𑀢𑀢𑁆𑀣 𑀲𑀁𑀓𑀺𑀮𑁂𑀲𑁄. 𑀲𑀩𑁆𑀩𑀲𑁄 𑀲𑀁𑀓𑀺𑀮𑁂𑀲𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄 𑀘 𑀓𑀣𑁂𑀢𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀫𑀕𑁆𑀕𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀆𑀤𑀺-𑀅𑀢𑁆𑀣𑁂𑀦 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀔𑀸𑀦𑀁 𑀦𑀺𑀤𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀦𑀺𑀩𑁆𑀩𑀸𑀦𑀼𑀧𑀲𑀁𑀳𑀺𑀢𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀼𑀔𑀸𑀦𑀁 𑀓𑀸𑀭𑀡𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀮𑁄𑀓𑁂 𑀪𑁄𑀕𑀲𑀼𑀔𑀁 𑀦𑀸𑀫, 𑀢𑀁 𑀲𑀩𑁆𑀩𑀁 𑀤𑀸𑀦𑀸𑀥𑀻𑀦𑀦𑁆𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀬𑀁 𑀧𑀦 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀲𑁆𑀲𑀧𑀺 𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯 ¶ . 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀦𑁆𑀢𑀺 𑀬𑀸 𑀇𑀫𑀸 𑀮𑁄𑀓𑁂 𑀧𑀤𑁂𑀲𑀭𑀚𑁆𑀚𑀲𑀺𑀭𑀺𑀲𑁆𑀲𑀭𑀺𑀬𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀤𑀸𑀢𑀺 𑀏𑀯𑀁𑀧𑀪𑁂𑀤𑀸 𑀫𑀸𑀦𑀼𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀬𑀸 𑀘 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀕𑀢𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 ¶ , 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀇𑀤𑀁 𑀫𑀽𑀮𑀓𑀸𑀭𑀡𑀁. 𑀪𑁄𑀕𑀸𑀦𑀦𑁆𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑁄’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀧𑀺𑀬𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀦𑀁 𑀢𑀦𑁆𑀦𑀺𑀲𑁆𑀲𑀬𑀸𑀦𑀁 𑀯𑀸 𑀉𑀧𑀪𑁄𑀕𑀲𑀼𑀔𑀸𑀦𑀁 𑀧𑀢𑀺𑀝𑁆𑀞𑀸 𑀦𑀺𑀘𑁆𑀘𑀮𑀸𑀥𑀺𑀝𑁆𑀞𑀸𑀦𑀢𑀸𑀬. 𑀯𑀺𑀲𑀫𑀕𑀢𑀲𑁆𑀲𑀸𑀢𑀺 𑀩𑁆𑀬𑀲𑀦𑀧𑁆𑀧𑀢𑁆𑀢𑀲𑁆𑀲. 𑀢𑀸𑀡𑀦𑁆𑀢𑀺 𑀭𑀓𑁆𑀔𑀸, 𑀢𑀢𑁄 𑀧𑀭𑀺𑀧𑀸𑀮𑀦𑀢𑁄. 𑀮𑁂𑀡𑀦𑁆𑀢𑀺 𑀩𑁆𑀬𑀲𑀦𑁂𑀳𑀺 𑀧𑀭𑀺𑀧𑀸𑀢𑀺𑀬𑀫𑀸𑀦𑀲𑁆𑀲 𑀑𑀮𑀻𑀬𑀦𑀧𑁆𑀧𑀤𑁂𑀲𑁄. 𑀕𑀢𑀻𑀢𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁. 𑀧𑀭𑀸𑀬𑀡𑀦𑁆𑀢𑀺 𑀧𑀝𑀺𑀲𑀭𑀡𑀁. 𑀅𑀯𑀲𑁆𑀲𑀬𑁄𑀢𑀺 𑀯𑀺𑀦𑀺𑀧𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀦𑀺𑀲𑁆𑀲𑀬𑁄. 𑀆𑀭𑀫𑁆𑀫𑀡𑀦𑁆𑀢𑀺 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀁.

𑀭𑀢𑀦𑀫𑀬𑀲𑀻𑀳𑀸𑀲𑀦𑀲𑀤𑀺𑀲𑀦𑁆𑀢𑀺 𑀲𑀩𑁆𑀩𑀭𑀢𑀦𑀫𑀬𑀲𑀢𑁆𑀢𑀗𑁆𑀕𑀫𑀳𑀸𑀲𑀻𑀳𑀸𑀲𑀦𑀲𑀤𑀺𑀲𑀁. 𑀏𑀯𑀁 𑀳𑀺𑀲𑁆𑀲 𑀫𑀳𑀕𑁆𑀖𑀁 𑀳𑀼𑀢𑁆𑀯𑀸 𑀲𑀩𑁆𑀩𑀲𑁄 𑀯𑀺𑀦𑀺𑀧𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀝𑁆𑀞𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀫𑀳𑀸𑀧𑀣𑀯𑀻𑀲𑀤𑀺𑀲𑀁 𑀕𑀢𑀕𑀢𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀮𑀪𑀸𑀧𑀦𑀢𑁄. 𑀬𑀣𑀸 𑀤𑀼𑀩𑁆𑀩𑀮𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀮𑀫𑁆𑀩𑀦𑀭𑀚𑁆𑀚𑀼 𑀉𑀢𑁆𑀢𑀺𑀝𑁆𑀞𑀢𑁄 𑀢𑀺𑀝𑁆𑀞𑀢𑁄 𑀘 𑀉𑀧𑀢𑁆𑀣𑀫𑁆𑀪𑁄, 𑀏𑀯𑀁 𑀤𑀸𑀦𑀁 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀪𑀯𑁂 𑀉𑀧𑀧𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑀘 𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀆𑀮𑀫𑁆𑀩𑀦𑀝𑁆𑀞𑁂𑀦 𑀆𑀮𑀫𑁆𑀩𑀦𑀭𑀚𑁆𑀚𑀼𑀲𑀤𑀺𑀲’’𑀦𑁆𑀢𑀺. 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦𑀸𑀢𑀺 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀝𑁆𑀞𑀸𑀦𑀦𑀺𑀢𑁆𑀣𑀭𑀡𑀝𑁆𑀞𑁂𑀦. 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦𑀸𑀢𑀺 𑀮𑁄𑀪𑀫𑀘𑁆𑀙𑀭𑀺𑀬𑀸𑀤𑀺𑀧𑀝𑀺𑀲𑀢𑁆𑀢𑀼𑀧𑀤𑁆𑀤𑀯𑀢𑁄 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦. 𑀪𑀬𑀧𑀭𑀺𑀢𑁆𑀢𑀸𑀡𑀝𑁆𑀞𑁂𑀦𑀸𑀢𑀺 𑀤𑀸𑀮𑀺𑀤𑁆𑀤𑀺𑀬𑀪𑀬𑀢𑁄 𑀧𑀭𑀺𑀧𑀸𑀮𑀦𑀝𑁆𑀞𑁂𑀦. 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀻𑀢𑀺 𑀫𑀘𑁆𑀙𑁂𑀭𑀮𑁄𑀪𑀤𑁄𑀲𑀫𑀤𑀇𑀲𑁆𑀲𑀸𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀘𑀺𑀢𑁆𑀢𑀫𑀮𑁂𑀳𑀺. 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦𑀸𑀢𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬. 𑀢𑁂𑀲𑀦𑁆𑀢𑀺 𑀫𑀘𑁆𑀙𑁂𑀭𑀫𑀮𑀸𑀤𑀻𑀦𑀁. 𑀢𑁂𑀲𑀁 𑀏𑀯 𑀤𑀼𑀭𑀸𑀲𑀤𑀝𑁆𑀞𑁂𑀦. 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦𑀸𑀢𑀺 𑀲𑀦𑁆𑀢𑀸𑀲𑀳𑁂𑀢𑀼𑀅𑀪𑀸𑀯𑁂𑀦. 𑀬𑁄 𑀳𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀲𑁄 𑀲𑀫𑁆𑀧𑀢𑀺𑀧𑀺 𑀦 𑀓𑀼𑀢𑁄𑀘𑀺 𑀲𑀦𑁆𑀢𑀲𑀢𑀺, 𑀧𑀕𑁂𑀯 𑀆𑀬𑀢𑀺𑀁. 𑀩𑀮𑀯𑀦𑁆𑀢𑀝𑁆𑀞𑁂𑀦𑀸𑀢𑀺 𑀫𑀳𑀸𑀩𑀮𑀯𑀢𑀸𑀬. 𑀤𑀸𑀬𑀓𑁄 𑀳𑀺 𑀤𑀸𑀦𑀧𑀢𑀺 𑀲𑀫𑁆𑀧𑀢𑀺 𑀧𑀓𑁆𑀔𑀩𑀮𑁂𑀦 𑀩𑀮𑀯𑀸 𑀳𑁄𑀢𑀺, 𑀆𑀬𑀢𑀺𑀁 𑀧𑀦 𑀓𑀸𑀬𑀩𑀮𑀸𑀤𑀻𑀳𑀺𑀧𑀺. 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦𑀸𑀢𑀺 ‘‘𑀯𑀟𑁆𑀠𑀺𑀓𑀸𑀭𑀡’’𑀦𑁆𑀢𑀺 𑀅𑀪𑀺𑀲𑀫𑁆𑀫𑀢𑀪𑀸𑀯𑁂𑀦. 𑀯𑀺𑀧𑀢𑁆𑀢𑀺𑀪𑀯𑀢𑁄 𑀲𑀫𑁆𑀧𑀢𑁆𑀢𑀺𑀪𑀯𑀽𑀧𑀦𑀬𑀦𑀁 𑀔𑁂𑀫𑀦𑁆𑀢𑀪𑀽𑀫𑀺𑀲𑀫𑁆𑀧𑀸𑀧𑀦𑀁.

𑀇𑀤𑀸𑀦𑀺 𑀫𑀳𑀸𑀩𑁄𑀥𑀺𑀘𑀭𑀺𑀬𑀪𑀸𑀯𑁂𑀦𑀧𑀺 𑀤𑀸𑀦𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀁 𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁂𑀦𑀸𑀢𑀺 𑀏𑀢𑁂𑀦 ‘‘𑀤𑀸𑀦𑀨𑀮𑀁 𑀲𑀫𑁆𑀫𑀤𑁂𑀯 𑀧𑀲𑁆𑀲𑀦𑁆𑀢𑀸 𑀫𑀳𑀸𑀧𑀼𑀭𑀺𑀲𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀲𑁆𑀫𑀸 𑀓𑁄 𑀦𑀸𑀫 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀩𑀸𑀳𑀺𑀭𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀕𑁂𑀯 𑀲𑀗𑁆𑀕𑀁 𑀓𑀭𑁂𑀬𑁆𑀬𑀸’’𑀢𑀺 𑀑𑀯𑀸𑀤𑀁 𑀤𑁂𑀢𑀺. 𑀇𑀤𑀸𑀦𑀺 𑀬𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀉𑀓𑁆𑀓𑀁𑀲𑀕𑀢𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀢𑀸 𑀲𑀩𑁆𑀩𑀸 𑀤𑀸𑀦𑀢𑁄𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ¶ 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀅𑀢𑁆𑀢𑀳𑀺𑀢𑀸𑀬 𑀏𑀯, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀧𑀦 𑀅𑀢𑁆𑀢𑀳𑀺𑀢𑀸𑀬 𑀧𑀭𑀳𑀺𑀢𑀸𑀬 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 𑀲𑀸 𑀢𑀸𑀲𑀁 𑀧𑀭𑀢𑁄 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀏𑀢𑀸 𑀮𑁄𑀓𑀺𑀬𑀸, 𑀇𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀓𑀧𑀸𑀭𑀫𑀺𑀜𑀸𑀡’’𑀦𑁆𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀢𑀸𑀲𑀼𑀧𑀺 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀢𑀭𑀼𑀓𑁆𑀓𑀝𑁆𑀞𑀢𑀫𑀢𑀁 𑀤𑀲𑁆𑀲𑁂𑀢𑀼𑀁 𑀓𑀫𑁂𑀦 𑀜𑀸𑀡𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀦 𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀏𑀢𑁂𑀦𑁂𑀯 𑀢𑀲𑁆𑀲 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀧𑀘𑁆𑀘𑀬𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀸𑀦𑀜𑁆𑀘 𑀦𑀸𑀫 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑁂𑀦 𑀧𑀽𑀚𑀦𑀚𑁆𑀛𑀸𑀲𑀬𑁂𑀦 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀧𑀭𑁂𑀲𑀁 𑀧𑀭𑀺𑀘𑁆𑀘𑀚𑀦𑀁, 𑀢𑀲𑁆𑀫𑀸 𑀤𑀸𑀬𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀭𑁂 𑀳𑀦𑁆𑀢𑀺, 𑀧𑀭𑁂𑀲𑀁 𑀯𑀸 𑀲𑀦𑁆𑀢𑀓𑀁 𑀳𑀭𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀤𑀸𑀦𑀁 𑀤𑁂𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺. 𑀲𑀻𑀮𑀸𑀮𑀗𑁆𑀓𑀸𑀭𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺 𑀲𑁄𑀪𑀸𑀯𑀺𑀲𑁂𑀲𑀸𑀯𑀳𑀢𑁆𑀢𑀸 𑀲𑀻𑀮𑀲𑁆𑀲. 𑀲𑀻𑀮𑀧𑀼𑀧𑁆𑀨𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀻𑀢𑀺 𑀏𑀢𑁆𑀣 ‘‘𑀘𑀦𑁆𑀤𑀦𑀁 𑀢𑀕𑀭𑀁 𑀯𑀸𑀧𑀻’’𑀢𑀺𑀆𑀤𑀺𑀓𑀸 (𑀥. 𑀧. 𑁫𑁫) 𑀕𑀸𑀣𑀸 𑁋 ‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀺 𑀫𑀸𑀮𑀼𑀢𑁂𑀦𑀸’’𑀢𑀺𑀆𑀤𑀺𑀓𑀸 (𑀚𑀸. 𑁨.𑁧𑁭.𑁫𑁫) 𑀚𑀸𑀢𑀓𑀕𑀸𑀣𑀸𑀬𑁄 𑀘 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀲𑀻𑀮𑀜𑁆𑀳𑀺 𑀲𑀢𑁆𑀢𑀸𑀦𑀁 𑀆𑀪𑀭𑀡𑀜𑁆𑀘𑁂𑀯 𑀅𑀮𑀗𑁆𑀓𑀸𑀭𑁄 𑀘 𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘 𑀧𑀭𑀲𑁆𑀲 𑀤𑀲𑁆𑀲𑀦𑀻𑀬𑀪𑀸𑀯𑀸𑀯𑀳𑀜𑁆𑀘. 𑀢𑁂𑀦𑀸𑀳 ‘‘𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀻’’𑀢𑀺𑀆𑀤𑀺.

𑀅𑀬𑀁 𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀇𑀤𑀁 𑀫𑀚𑁆𑀛𑀺𑀫𑁂𑀳𑀺 𑀆𑀭𑀤𑁆𑀥𑀁 𑀲𑀻𑀮𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦𑁂𑀯𑀸𑀳 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑁋

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺. (𑀚𑀸. 𑁧.𑁮.𑁭𑁫);

𑀇𑀝𑁆𑀞𑁄𑀢𑀺 𑀲𑀼𑀔𑁄. 𑀓𑀦𑁆𑀢𑁄𑀢𑀺 𑀓𑀫𑀦𑀻𑀬𑁄. 𑀫𑀦𑀸𑀧𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀢𑀁 𑀧𑀦 𑀢𑀲𑁆𑀲 𑀇𑀝𑁆𑀞𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀘𑁆𑀘𑀫𑁂𑀢𑁆𑀣 𑀓𑀻𑀴𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑁄𑀲𑁄𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀦𑀸 𑀅𑀧𑁆𑀧𑀲𑁆𑀲𑀸𑀤𑀸𑀤𑀺𑀦𑀸 𑀘 𑀤𑀽𑀲𑀺𑀢𑀪𑀸𑀯𑁄, 𑀬𑀢𑁄 𑀢𑁂 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀦𑁆𑀢𑀺. 𑀅𑀣 𑀯𑀸 𑀆𑀤𑀻𑀦𑀁 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀤𑀻𑀦𑀯𑁄, 𑀧𑀭𑀫𑀓𑀧𑀡𑀢𑀸. 𑀢𑀣𑀸 𑀘 𑀓𑀸𑀫𑀸 𑀬𑀣𑀸𑀢𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀧𑀘𑁆𑀘𑀼𑀧𑀢𑀺𑀝𑁆𑀞𑀦𑁆𑀢𑀺. 𑀮𑀸𑀫𑀓𑀪𑀸𑀯𑁄𑀢𑀺 𑀅𑀲𑁂𑀝𑁆𑀞𑁂𑀳𑀺 𑀲𑁂𑀯𑀺𑀢𑀩𑁆𑀩𑁄, 𑀲𑁂𑀝𑁆𑀞𑁂𑀳𑀺 𑀦 𑀲𑁂𑀯𑀺𑀢𑀩𑁆𑀩𑁄 𑀦𑀺𑀳𑀻𑀦𑀪𑀸𑀯𑁄. 𑀲𑀁𑀓𑀺𑀮𑀺𑀲𑁆𑀲𑀦𑀦𑁆𑀢𑀺 𑀯𑀺𑀩𑀸𑀥𑀓𑀢𑀸 𑀉𑀧𑀢𑀸𑀧𑀓𑀢𑀸 𑀘.

𑀦𑁂𑀓𑁆𑀔𑀫𑁆𑀫𑁂 ¶ 𑀆𑀦𑀺𑀲𑀁𑀲𑀦𑁆𑀢𑀺 𑀏𑀢𑁆𑀣 ‘‘𑀬𑀢𑁆𑀢𑀓𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀢𑀢𑁆𑀢𑀓𑀸 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀸. 𑀅𑀧𑀺𑀘 𑀦𑁂𑀓𑁆𑀔𑀫𑁆𑀫𑀁 𑀦𑀸𑀫𑁂𑀢𑀁 𑀅𑀲𑀫𑁆𑀩𑀸𑀥𑀁 𑀅𑀲𑀁𑀓𑀺𑀮𑀺𑀝𑁆𑀞𑀁, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑁂𑀳𑀺, 𑀦𑀺𑀓𑁆𑀔𑀦𑁆𑀢𑀁 ¶ 𑀓𑀸𑀫𑀲𑀜𑁆𑀜𑀸𑀬, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑀯𑀺𑀢𑀓𑁆𑀓𑁂𑀳𑀺, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑀧𑀭𑀺𑀴𑀸𑀳𑁂𑀳𑀺, 𑀦𑀺𑀓𑁆𑀔𑀦𑁆𑀢𑀁 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁂 𑀧𑀓𑀸𑀲𑁂𑀲𑀺. 𑀧𑀩𑁆𑀩𑀚𑁆𑀚𑀸𑀬𑀁 𑀛𑀸𑀦𑀸𑀤𑀻𑀲𑀼 𑀘 𑀕𑀼𑀡𑁂 𑀯𑀺𑀪𑀸𑀯𑁂𑀲𑀺 𑀯𑀡𑁆𑀡𑁂𑀲𑀺. 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀦𑀺𑀬𑀘𑀺𑀢𑁆𑀢𑀁 𑀳𑁂𑀝𑁆𑀞𑀸 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀬 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀘𑀺𑀢𑁆𑀢𑀤𑁄𑀲𑀸𑀦𑀁 𑀯𑀺𑀕𑀢𑀢𑁆𑀢𑀸 𑀉𑀧𑀭𑀺 𑀤𑁂𑀲𑀦𑀸𑀬 𑀪𑀸𑀚𑀦𑀪𑀸𑀯𑀽𑀧𑀕𑀫𑁂𑀦 𑀓𑀫𑁆𑀫𑀓𑁆𑀔𑀫𑀘𑀺𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀬𑁄 𑀘𑀺𑀢𑁆𑀢𑀲𑁆𑀲 𑀭𑁄𑀕𑀪𑀽𑀢𑀸, 𑀢𑀤𑀸 𑀢𑁂 𑀯𑀺𑀕𑀢𑀸, 𑀢𑀲𑁆𑀫𑀸 𑀆𑀳 ‘‘𑀅𑀭𑁄𑀕𑀘𑀺𑀢𑁆𑀢’’𑀦𑁆𑀢𑀺. 𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀯𑀺𑀕𑀫𑁂𑀦 𑀫𑀼𑀤𑀼𑀘𑀺𑀢𑁆𑀢𑀁. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀯𑀺𑀕𑀫𑁂𑀦 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀉𑀴𑀸𑀭𑀧𑀻𑀢𑀺𑀧𑀸𑀫𑁄𑀚𑁆𑀚𑀬𑁄𑀕𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀘𑀺𑀢𑁆𑀢𑀁. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀯𑀺𑀕𑀫𑁂𑀦 𑀅𑀭𑁄𑀕𑀘𑀺𑀢𑁆𑀢𑀁. 𑀫𑀼𑀤𑀼𑀘𑀺𑀢𑁆𑀢𑀦𑁆𑀢𑀺 𑀩𑁆𑀬𑀸𑀧𑀸𑀤𑀯𑀺𑀕𑀫𑁂𑀦 𑀫𑁂𑀢𑁆𑀢𑀸𑀯𑀲𑁂𑀦 𑀅𑀓𑀞𑀺𑀦𑀘𑀺𑀢𑁆𑀢𑀁. 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀕𑀫𑁂𑀦 𑀅𑀯𑀺𑀓𑁆𑀔𑁂𑀧𑀢𑁄 𑀢𑁂𑀦 𑀅𑀧𑀺𑀳𑀺𑀢𑀘𑀺𑀢𑁆𑀢𑀁. 𑀉𑀤𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀯𑀺𑀕𑀫𑁂𑀦 𑀲𑀫𑁆𑀧𑀕𑁆𑀕𑀳𑀺𑀢𑀯𑀲𑁂𑀦 𑀅𑀮𑀻𑀦𑀘𑀺𑀢𑁆𑀢𑀁. 𑀧𑀲𑀦𑁆𑀦𑀘𑀺𑀢𑁆𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀕𑀫𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑁂𑀲𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀦𑀸 𑀉𑀧𑀫𑀸𑀯𑀲𑁂𑀦 𑀲𑀻𑀳𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀭𑀺𑀬𑀫𑀕𑁆𑀕𑀼𑀧𑁆𑀧𑀸𑀤𑀦𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀧𑀕𑀢𑀓𑀸𑀴𑀓𑀦𑁆𑀢𑀺 𑀯𑀺𑀕𑀢𑀓𑀸𑀴𑀓𑀁. 𑀲𑀫𑁆𑀫𑀤𑁂𑀯𑀸𑀢𑀺 𑀲𑀼𑀝𑁆𑀞𑀼𑀤𑁂𑀯. 𑀭𑀚𑀦𑀦𑁆𑀢𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑀸𑀤𑀺𑀭𑀗𑁆𑀕𑀚𑀸𑀢𑀁. 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀧𑀪𑀲𑁆𑀲𑀭𑀁 𑀪𑀯𑁂𑀬𑁆𑀬. 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂𑀢𑀺 𑀢𑀲𑁆𑀲𑀁𑀬𑁂𑀯 𑀦𑀺𑀲𑀚𑁆𑀚𑀸𑀬𑀁. 𑀏𑀢𑁂𑀦𑀲𑁆𑀲 𑀮𑀳𑀼𑀯𑀺𑀧𑀲𑁆𑀲𑀓𑀢𑀸 𑀢𑀺𑀓𑁆𑀔𑀧𑀜𑁆𑀜𑀢𑀸 𑀲𑀼𑀔𑀧𑁆𑀧𑀝𑀺𑀧𑀤𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀸 𑀘 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀯𑀺𑀭𑀚𑀦𑁆𑀢𑀺 𑀅𑀧𑀸𑀬𑀕𑀫𑀦𑀻𑀬𑀭𑀸𑀕𑀭𑀚𑀸𑀤𑀻𑀦𑀁 𑀯𑀺𑀕𑀫𑁂𑀦 𑀯𑀺𑀭𑀚𑀁. 𑀅𑀦𑀯𑀲𑁂𑀲𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀫𑀮𑀸𑀧𑀕𑀫𑁂𑀦 𑀯𑀻𑀢𑀫𑀮𑀁. 𑀧𑀞𑀫𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀭𑀚𑀸𑀪𑀸𑀯𑁂𑀦 𑀯𑀸 𑀯𑀺𑀭𑀚𑀁. 𑀧𑀜𑁆𑀘𑀯𑀺𑀥𑀤𑀼𑀲𑁆𑀲𑀻𑀮𑁆𑀬𑀫𑀮𑀯𑀺𑀕𑀫𑁂𑀦 𑀯𑀻𑀢𑀫𑀮𑀁. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀫𑀕𑁆𑀕𑀜𑀸𑀡𑀁 𑀅𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀯𑀺𑀚𑁆𑀛𑀦𑁆𑀢𑀦𑁆𑀢𑀺 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀁. 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺. 𑀢𑀢𑁆𑀭𑀺𑀤𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑁋 𑀯𑀢𑁆𑀣𑀁 𑀯𑀺𑀬 𑀘𑀺𑀢𑁆𑀢𑀁, 𑀯𑀢𑁆𑀣𑀲𑁆𑀲 𑀆𑀕𑀦𑁆𑀢𑀼𑀓𑀫𑀮𑁂𑀳𑀺 𑀓𑀺𑀮𑀺𑀝𑁆𑀞𑀪𑀸𑀯𑁄 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀭𑀸𑀕𑀸𑀤𑀺𑀫𑀮𑁂𑀳𑀺 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁄, 𑀥𑁄𑀯𑀦𑀲𑀺𑀮𑀸𑀢𑀮𑀁 𑀯𑀺𑀬 𑀅𑀦𑀼𑀧𑀼𑀩𑁆𑀩𑀻𑀓𑀣𑀸, 𑀉𑀤𑀓𑀁 𑀯𑀺𑀬 𑀲𑀤𑁆𑀥𑀸, 𑀉𑀤𑀓𑁂𑀦 ¶ 𑀢𑁂𑀫𑁂𑀢𑁆𑀯𑀸 𑀊𑀲𑀕𑁄𑀫𑀬𑀙𑀸𑀭𑀺𑀓𑀔𑀸𑀭𑁂𑀳𑀺 𑀓𑀸𑀴𑀓𑁂 𑀲𑀫𑁆𑀫𑀤𑁆𑀤𑀺𑀢𑁆𑀯𑀸 𑀯𑀢𑁆𑀣𑀲𑁆𑀲 𑀥𑁄𑀯𑀦𑀧𑁆𑀧𑀬𑁄𑀕𑁄 𑀯𑀺𑀬 𑀲𑀤𑁆𑀥𑀸𑀲𑀺𑀦𑁂𑀳𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀳𑀺 𑀤𑁄𑀲𑁂 𑀲𑀺𑀣𑀺𑀮𑁂 𑀓𑀢𑁆𑀯𑀸 𑀲𑀼𑀢𑀸𑀤𑀺𑀯𑀺𑀥𑀺𑀦𑀸 𑀘𑀺𑀢𑁆𑀢𑀲𑁆𑀲 𑀲𑁄𑀥𑀦𑁂 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀢𑁂𑀦 𑀧𑀬𑁄𑀕𑁂𑀦 𑀯𑀢𑁆𑀣𑁂 𑀓𑀸𑀴𑀓𑀸𑀧𑀕𑀫𑁄 𑀯𑀺𑀬 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀁, 𑀭𑀗𑁆𑀕𑀚𑀸𑀢𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀲𑀼𑀤𑁆𑀥𑀯𑀢𑁆𑀣𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑁄 𑀯𑀺𑀬 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀫𑀕𑁆𑀕𑁂𑀦 𑀧𑀭𑀺𑀬𑁄𑀤𑀧𑀦𑀦𑁆𑀢𑀺.

‘‘𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺 𑀯𑀢𑁆𑀯𑀸 𑀤𑀲𑁆𑀲𑀦𑀁 𑀦𑀸𑀫 𑀜𑀸𑀡𑀤𑀲𑁆𑀲𑀦𑀢𑁄 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀢𑁆𑀢𑀥𑀫𑁆𑀫𑁄’’𑀢𑀺 ¶ 𑀯𑀼𑀢𑁆𑀢𑀁. 𑀧𑀢𑁆𑀢𑀺 𑀦𑀸𑀫 𑀜𑀸𑀡𑀲𑀫𑁆𑀧𑀢𑁆𑀢𑀺𑀢𑁄 𑀅𑀜𑁆𑀜𑀸𑀧𑀺 𑀯𑀺𑀚𑁆𑀚𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀯𑀺𑀤𑀺𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑁂𑀲𑀸 𑀯𑀺𑀤𑀺𑀢𑀥𑀫𑁆𑀫𑀢𑀸 𑀥𑀫𑁆𑀫𑁂𑀲𑀼 𑀏𑀓𑀤𑁂𑀲𑁂𑀦𑀧𑀺 𑀳𑁄𑀢𑀻𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁. ‘‘𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀁𑀬𑁂𑀯 𑀤𑀻𑀧𑁂𑀢𑀺. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀦𑀺𑀧𑁆𑀧𑀤𑁂𑀲𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑀦𑁆𑀢𑀢𑁄 𑀑𑀕𑀸𑀴𑁆𑀳𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺. 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀧𑁆𑀧𑀝𑀺𑀪𑀬𑀓𑀦𑁆𑀢𑀸𑀭𑀲𑀤𑀺𑀲𑀸 𑀲𑁄𑀴𑀲𑀯𑀢𑁆𑀣𑀼𑀓𑀸 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀢𑀺𑀡𑁆𑀡𑀸 𑀦𑀺𑀢𑁆𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀕𑀢𑀸 𑀓𑀣𑀁𑀓𑀣𑀸𑀢𑀺 𑀧𑀯𑀢𑁆𑀢𑀺𑀆𑀤𑀻𑀲𑀼 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀓𑀸 𑀯𑀺𑀕𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀓𑀣𑀁𑀓𑀣𑀸. 𑀲𑀸𑀭𑀚𑁆𑀚𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀻𑀦𑀢𑁆𑀢𑀸 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀯𑁂𑀲𑀸𑀭𑀚𑁆𑀚𑀁 𑀯𑀺𑀲𑀸𑀭𑀤𑀪𑀸𑀯𑀁 𑀯𑁂𑀬𑁆𑀬𑀢𑁆𑀢𑀺𑀬𑀁 𑀧𑀢𑁆𑀢𑁄. 𑀅𑀢𑁆𑀢𑀦𑀸 𑀏𑀯 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀢𑁆𑀢𑀸 𑀦 𑀧𑀭𑀁 𑀧𑀘𑁆𑀘𑁂𑀢𑀺, 𑀦 𑀘𑀲𑁆𑀲 𑀧𑀭𑁄 𑀧𑀘𑁆𑀘𑁂𑀢𑀩𑁆𑀩𑁄 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄.

𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀢𑀦𑁆𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀫𑀸𑀭𑀡𑀯𑀲𑁂𑀦 𑀓𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀁 𑀫𑀁𑀲𑀁. 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄 𑀅𑀢𑀻𑀢𑀓𑀸𑀮𑀺𑀓𑁄 𑀘𑀸𑀢𑀺 𑀆𑀳 ‘‘𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘𑀓𑀢’’𑀦𑁆𑀢𑀺. 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 ‘‘𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁪.𑁭𑁫) 𑀯𑀺𑀬. 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑀸𑀢𑀺 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀮𑀤𑁆𑀥𑀩𑁆𑀩𑀓𑀫𑁆𑀫𑀲𑁆𑀲. 𑀓𑀭𑀡𑀯𑀲𑁂𑀦 𑀧𑀝𑀺𑀘𑁆𑀘𑀓𑀫𑁆𑀫𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀫𑀁𑀲𑀁 𑀧𑀝𑀺𑀘𑁆𑀘𑀓𑀫𑁆𑀫𑀁 𑀬𑀣𑀸 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁. 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀩𑀼𑀤𑁆𑀥𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀅𑀲𑁆𑀲𑀸𑀚𑀸𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩-𑁧𑁪. 𑀢𑀢𑀺𑀬𑁂 ¶ 𑀲𑀸𑀞𑁂𑀬𑁆𑀬𑀸𑀦𑀻𑀢𑀺 𑀲𑀞𑀢𑁆𑀢𑀸𑀦𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀦𑀺 𑀧𑀦𑀲𑁆𑀲 𑀲𑀸𑀞𑁂𑀬𑁆𑀬𑀸𑀤𑀻𑀦𑀺 𑀓𑀸𑀬𑀘𑀺𑀢𑁆𑀢𑀼𑀚𑀼𑀓𑀢𑀸𑀧𑀝𑀺𑀧𑀓𑁆𑀔𑀪𑀽𑀢𑀸 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀸. 𑀢𑀢𑁆𑀣 𑀬𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀞𑀸𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀲𑀧𑁆𑀧𑀝𑀺𑀪𑀬𑀝𑁆𑀞𑀸𑀦𑁂𑀯 𑀞𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀪𑀸𑀯𑀢𑁄 𑀞𑀸𑀢𑀼𑀓𑀸𑀫𑀝𑁆𑀞𑀸𑀦𑁂𑀬𑁂𑀯 𑀦𑀺𑀔𑀸𑀢𑀢𑁆𑀣𑀫𑁆𑀪𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀦𑀺𑀘𑁆𑀘𑀸𑀮𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀬𑀁 𑀲𑀞𑁄 𑀦𑀸𑀫, 𑀇𑀫𑀲𑁆𑀲 𑀲𑀸𑀞𑁂𑀬𑁆𑀬𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀢𑀣𑀸 𑀬𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀔𑀦𑁆𑀥𑀕𑀢𑀁 𑀧𑀸𑀢𑁂𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀧𑀸𑀢𑁂𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀧𑀸𑀢𑁂𑀢𑀼𑀓𑀸𑀫𑀝𑁆𑀞𑀸𑀦𑁂𑀬𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀢𑁂𑀢𑀺, 𑀅𑀬𑀁 𑀓𑀽𑀝𑁄 𑀦𑀸𑀫. 𑀬𑀲𑁆𑀲 𑀓𑀸𑀮𑁂𑀦 𑀯𑀸𑀫𑀢𑁄, 𑀓𑀸𑀮𑁂𑀦 𑀤𑀓𑁆𑀔𑀺𑀡𑀢𑁄, 𑀓𑀸𑀮𑁂𑀦 𑀉𑀚𑀼𑀫𑀕𑁆𑀕𑁂𑀦𑁂𑀯 𑀘 𑀕𑀦𑁆𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 ¶ 𑀦 𑀳𑁄𑀢𑀺, 𑀬𑀤𑀺𑀘𑁆𑀙𑀓𑀁 𑀕𑀦𑁆𑀢𑀼𑀓𑀸𑀫𑀝𑁆𑀞𑀸𑀦𑁂𑀬𑁂𑀯 𑀓𑀸𑀮𑁂𑀦 𑀯𑀸𑀫𑀢𑁄, 𑀓𑀸𑀮𑁂𑀦 𑀤𑀓𑁆𑀔𑀺𑀡𑀢𑁄, 𑀓𑀸𑀮𑁂𑀦 𑀉𑀚𑀼𑀫𑀕𑁆𑀕𑀁 𑀕𑀘𑁆𑀙𑀢𑀺, 𑀢𑀣𑀸 𑀮𑁂𑀡𑁆𑀟𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀓𑀸𑀫𑀲𑁆𑀲 𑀇𑀤𑀁 𑀞𑀸𑀦𑀁 𑀲𑀼𑀲𑀫𑁆𑀫𑀝𑁆𑀞𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀭𑀫𑀡𑀻𑀬𑀁. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀯𑀭𑀽𑀧𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀢𑀢𑁆𑀣𑁂𑀯 𑀓𑀭𑁄𑀢𑀺, 𑀅𑀬𑀁 𑀚𑀺𑀫𑁆𑀳𑁄 𑀦𑀸𑀫. 𑀬𑀲𑁆𑀲 𑀧𑀦 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀫𑀕𑁆𑀕𑀸 𑀉𑀓𑁆𑀓𑀫𑁆𑀫 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀝𑀺𑀫𑀕𑁆𑀕𑀁 𑀆𑀭𑁄𑀳𑀺𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀧𑀝𑀺𑀫𑀕𑁆𑀕𑀁 𑀆𑀭𑁄𑀳𑀺𑀢𑀼𑀓𑀸𑀫𑀝𑁆𑀞𑀸𑀦𑁂𑀬𑁂𑀯 𑀫𑀕𑁆𑀕𑀸 𑀉𑀓𑁆𑀓𑀫𑁆𑀫 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀝𑀺𑀫𑀕𑁆𑀕𑀁 𑀆𑀭𑁄𑀳𑀢𑀺, 𑀅𑀬𑀁 𑀯𑀗𑁆𑀓𑁄 𑀦𑀸𑀫. 𑀇𑀢𑀺 𑀇𑀫𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀓𑀺𑀭𑀺𑀬𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀢𑀸𑀦𑀺 𑀲𑀸𑀞𑁂𑀬𑁆𑀬𑀸𑀦𑀺…𑀧𑁂… 𑀆𑀯𑀺𑀓𑀢𑁆𑀢𑀸 𑀳𑁄𑀢𑀻’’𑀢𑀺. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀲𑁆𑀲𑀸𑀚𑀸𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁮. 𑀫𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫-𑁧𑁮. 𑀧𑀜𑁆𑀘𑀫𑁂 (𑀥. 𑀧. 𑀅𑀝𑁆𑀞. 𑁨.𑁨𑁪𑁧) 𑀬𑀸 𑀓𑀸𑀘𑀺 𑀧𑀭𑀺𑀬𑀢𑁆𑀢𑀺 𑀯𑀸 𑀲𑀺𑀧𑁆𑀧𑀁 𑀯𑀸 𑀬𑀲𑁆𑀫𑀸 𑀅𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀦𑀲𑁆𑀲𑀢𑀺, 𑀦𑀺𑀭𑀦𑁆𑀢𑀭𑀁 𑀯𑀸 𑀦 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 ‘‘𑀅𑀲𑀚𑁆𑀛𑀸𑀬𑀫𑀮𑀸 𑀫𑀦𑁆𑀢𑀸’’𑀢𑀺 ¶ 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑀲𑁆𑀲 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀚𑀺𑀡𑁆𑀡𑀧𑁆𑀧𑀝𑀺𑀲𑀗𑁆𑀔𑀭𑀡𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀲𑁆𑀲 𑀖𑀭𑀁 𑀦𑀸𑀫 𑀯𑀺𑀦𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀕𑀺𑀳𑀺𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀓𑁄𑀲𑀚𑁆𑀚𑀯𑀲𑁂𑀦 𑀲𑀭𑀻𑀭𑀧𑁆𑀧𑀚𑀕𑁆𑀕𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀧𑁆𑀧𑀝𑀺𑀚𑀕𑁆𑀕𑀦𑀁 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀕𑀸𑀯𑁄 𑀭𑀓𑁆𑀔𑀦𑁆𑀢𑀲𑁆𑀲 𑀧𑀫𑀸𑀤𑀯𑀲𑁂𑀦 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀯𑀸 𑀓𑀻𑀴𑀦𑁆𑀢𑀲𑁆𑀲 𑀯𑀸 𑀢𑀸 𑀕𑀸𑀯𑁄 𑀅𑀢𑀺𑀢𑁆𑀣𑀧𑀓𑁆𑀔𑀦𑁆𑀤𑀦𑀸𑀤𑀻𑀳𑀺 𑀯𑀸 𑀯𑀸𑀴𑀫𑀺𑀕𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑁂𑀦 𑀯𑀸 𑀧𑀭𑁂𑀲𑀁 𑀲𑀸𑀮𑀺𑀓𑁆𑀔𑁂𑀢𑁆𑀢𑀸𑀤𑀻𑀦𑀺 𑀑𑀢𑀭𑀺𑀢𑁆𑀯𑀸 𑀔𑀸𑀤𑀦𑀯𑀲𑁂𑀦 𑀯𑀸 𑀯𑀺𑀦𑀸𑀲𑀫𑀸𑀧𑀚𑁆𑀚𑀦𑁆𑀢𑀺, 𑀲𑀬𑀫𑁆𑀧𑀺 𑀤𑀡𑁆𑀟𑀁 𑀯𑀸 𑀧𑀭𑀺𑀪𑀸𑀲𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀧𑀩𑁆𑀩𑀚𑀺𑀢𑀁 𑀯𑀸 𑀧𑀦 𑀙𑀤𑁆𑀯𑀸𑀭𑀸𑀤𑀻𑀦𑀺 𑀅𑀭𑀓𑁆𑀔𑀦𑁆𑀢𑀁 𑀧𑀫𑀸𑀤𑀯𑀲𑁂𑀦 𑀓𑀺𑀮𑁂𑀲𑀸 𑀑𑀢𑀭𑀺𑀢𑁆𑀯𑀸 𑀲𑀸𑀲𑀦𑀸 𑀘𑀸𑀯𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁄 𑀳𑀺𑀲𑁆𑀲 𑀯𑀺𑀦𑀸𑀲𑀸𑀯𑀳𑁂𑀦 𑀫𑀮𑀝𑁆𑀞𑀸𑀦𑀺𑀬𑀢𑁆𑀢𑀸 𑀫𑀮𑀁.

𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀅𑀢𑀺𑀘𑀸𑀭𑁄. 𑀅𑀢𑀺𑀘𑀸𑀭𑀺𑀦𑀺𑀜𑁆𑀳𑀺 𑀇𑀢𑁆𑀣𑀺𑀁 𑀲𑀸𑀫𑀺𑀓𑁄𑀧𑀺 𑀕𑁂𑀳𑀸 𑀦𑀻𑀳𑀭𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀕𑀢𑀫𑁆𑀧𑀺 ‘‘𑀢𑁆𑀯𑀁 𑀓𑀼𑀮𑀲𑁆𑀲 𑀅𑀗𑁆𑀕𑀸𑀭𑀪𑀽𑀢𑀸, 𑀅𑀓𑁆𑀔𑀻𑀳𑀺𑀧𑀺 𑀦 𑀤𑀝𑁆𑀞𑀩𑁆𑀩𑀸’’𑀢𑀺 𑀢𑀁 𑀫𑀸𑀢𑀸𑀧𑀺𑀢𑀭𑁄𑀧𑀺 𑀦𑀻𑀳𑀭𑀦𑁆𑀢𑀺, 𑀲𑀸 𑀅𑀦𑀸𑀣𑀸 𑀯𑀺𑀘𑀭𑀦𑁆𑀢𑀻 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀲𑁆𑀲𑀸 𑀤𑀼𑀘𑁆𑀘𑀭𑀺𑀢𑀁 ‘‘𑀫𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀤𑀢𑁄𑀢𑀺 𑀤𑀸𑀬𑀓𑀲𑁆𑀲. 𑀬𑀲𑁆𑀲 𑀳𑀺 𑀔𑁂𑀢𑁆𑀢𑀓𑀲𑀦𑀓𑀸𑀮𑁂 ‘‘𑀇𑀫𑀲𑁆𑀫𑀺𑀁 𑀔𑁂𑀢𑁆𑀢𑁂 𑀲𑀫𑁆𑀧𑀦𑁆𑀦𑁂 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸𑀧𑀺 𑀦𑀺𑀧𑁆𑀨𑀦𑁆𑀦𑁂 𑀲𑀲𑁆𑀲𑁂 𑀫𑀘𑁆𑀙𑁂𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀸𑀕𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀺, 𑀲𑁄 𑀫𑀘𑁆𑀙𑁂𑀭𑀯𑀲𑁂𑀦 𑀘𑀸𑀕𑀘𑀺𑀢𑁆𑀢𑁂 𑀅𑀯𑀺𑀭𑀼𑀳𑀦𑁆𑀢𑁂 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺, 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀻𑀢𑀺 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀦 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀘𑁆𑀙𑁂𑀭𑀁 𑀤𑀤𑀢𑁄 𑀫𑀮’’𑀦𑁆𑀢𑀺. 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀏𑀲𑁂𑀯 𑀦𑀬𑁄. 𑀧𑀸𑀧𑀓𑀸 𑀥𑀫𑁆𑀫𑀸𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀢𑁂 𑀧𑀦 𑀇𑀥𑀮𑁄𑀓𑁂 𑀧𑀭𑀮𑁄𑀓𑁂 𑀘 𑀫𑀮𑀫𑁂𑀯. 𑀢𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑀮𑀢𑁄. 𑀫𑀮𑀢𑀭𑀦𑁆𑀢𑀺 𑀅𑀢𑀺𑀭𑁂𑀓𑀫𑀮𑀁. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀫𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀳𑀸𑀭𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 (𑀉𑀤𑀸. 𑀅𑀝𑁆𑀞. 𑁪𑁫; 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁮𑁪) 𑀅𑀲𑀼𑀭𑀸𑀢𑀺 𑀤𑁂𑀯𑀸 𑀯𑀺𑀬 𑀦 𑀲𑀼𑀭𑀦𑁆𑀢𑀺 𑀦 𑀓𑀻𑀴𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀻𑀢𑀺 𑀅𑀲𑀼𑀭𑀸. 𑀲𑀼𑀭𑀸 𑀦𑀸𑀫 𑀤𑁂𑀯𑀸, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀢𑀺 𑀯𑀸 𑀅𑀲𑀼𑀭𑀸, 𑀯𑁂𑀧𑀘𑀺𑀢𑁆𑀢𑀺𑀧𑀳𑀸𑀭𑀸𑀤𑀸𑀤𑀬𑁄 ¶ . 𑀢𑁂𑀲𑀁 𑀪𑀯𑀦𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂. 𑀢𑁂 𑀢𑀢𑁆𑀣 𑀧𑀯𑀺𑀲𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀸 𑀲𑀺𑀦𑁂𑀭𑀼𑀧𑀸𑀤𑁂 𑀫𑀡𑁆𑀟𑀧𑀸𑀤𑀻𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀻𑀴𑀦𑁆𑀢𑀸 𑀅𑀪𑀺𑀭𑀫𑀦𑁆𑀢𑀺. 𑀲𑀸 𑀢𑀢𑁆𑀣 𑀢𑁂𑀲𑀁 𑀅𑀪𑀺𑀭𑀢𑀺. 𑀇𑀫𑁂 𑀕𑀼𑀡𑁂 𑀤𑀺𑀲𑁆𑀯𑀸𑀢𑀺 𑀆𑀳 ‘‘𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀻’’𑀢𑀺.

𑀬𑀲𑁆𑀫𑀸 𑀮𑁄𑀓𑀺𑀬𑀸 𑀚𑀫𑁆𑀩𑀼𑀤𑀻𑀧𑁄, 𑀳𑀺𑀫𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑀫𑀼𑀤𑁆𑀤𑀤𑀳𑀧𑀩𑁆𑀩𑀢𑀸 𑀢𑀧𑁆𑀧𑀪𑀯𑀸 𑀦𑀤𑀺𑀬𑁄𑀢𑀺 𑀏𑀢𑁂𑀲𑀼 𑀬𑀁 𑀬𑀁 𑀦 𑀫𑀦𑀼𑀲𑁆𑀲𑀕𑁄𑀘𑀭𑀁, 𑀢𑀢𑁆𑀣 𑀲𑀬𑀁 𑀲𑀫𑁆𑀫𑀽𑀴𑁆𑀳𑀸 𑀅𑀜𑁆𑀜𑁂𑀧𑀺 𑀲𑀫𑁆𑀫𑁄𑀳𑀬𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀲𑀫𑁆𑀫𑁄𑀳𑀯𑀺𑀥𑀫𑀦𑀢𑁆𑀣𑀁 ‘‘𑀅𑀬𑀁 𑀢𑀸𑀯 𑀚𑀫𑁆𑀩𑀼𑀤𑀻𑀧𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄 𑀆𑀬𑀸𑀫𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀢𑀤𑀼𑀧𑀪𑁄𑀕𑀺𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀓𑁆𑀔𑀬𑁂𑀦. 𑀲𑀼𑀦𑁆𑀤𑀭𑀤𑀲𑁆𑀲𑀦𑀁 𑀓𑀽𑀝𑀦𑁆𑀢𑀺 𑀲𑀼𑀤𑀲𑁆𑀲𑀦𑀓𑀽𑀝𑀁, 𑀬𑀁 𑀮𑁄𑀓𑁂 ‘‘𑀳𑁂𑀫𑀓𑀽𑀝’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀽𑀮𑀕𑀦𑁆𑀥𑁄 𑀓𑀸𑀮𑀸𑀦𑀼𑀲𑀸𑀭𑀺𑀬𑀸𑀤𑀺. 𑀲𑀸𑀭𑀕𑀦𑁆𑀥𑁄 𑀘𑀦𑁆𑀤𑀦𑀸𑀤𑀺. 𑀨𑁂𑀕𑁆𑀕𑀼𑀕𑀦𑁆𑀥𑁄 𑀲𑀮𑀮𑀸𑀤𑀺. 𑀢𑀘𑀕𑀦𑁆𑀥𑁄 𑀮𑀯𑀗𑁆𑀕𑀸𑀤𑀺. 𑀧𑀧𑀝𑀺𑀓𑀸𑀕𑀦𑁆𑀥𑁄 𑀓𑀧𑀺𑀢𑁆𑀣𑀸𑀤𑀺. 𑀭𑀲𑀕𑀦𑁆𑀥𑁄 𑀲𑀚𑁆𑀚𑀼𑀮𑀲𑀸𑀤𑀺. 𑀧𑀢𑁆𑀢𑀕𑀦𑁆𑀥𑁄 𑀢𑀫𑀸𑀮𑀳𑀺𑀭𑀺𑀯𑁂𑀭𑀸𑀤𑀺. 𑀧𑀼𑀧𑁆𑀨𑀕𑀦𑁆𑀥𑁄 𑀦𑀸𑀕𑀓𑀼𑀲𑀼𑀫𑀸𑀤𑀺. 𑀨𑀮𑀕𑀦𑁆𑀥𑁄 𑀚𑀸𑀢𑀺𑀨𑀮𑀸𑀤𑀺. 𑀕𑀦𑁆𑀥𑀕𑀦𑁆𑀥𑁄 𑀲𑀩𑁆𑀩𑁂𑀲𑀁 𑀕𑀦𑁆𑀥𑀸𑀦𑀁 𑀕𑀦𑁆𑀥𑁄. ‘‘𑀲𑀩𑁆𑀩𑀸𑀦𑀺 𑀧𑀼𑀣𑀼𑀮𑀢𑁄 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺, 𑀆𑀬𑀸𑀫𑀢𑁄 𑀧𑀦 𑀉𑀩𑁆𑀩𑁂𑀥𑀢𑁄 𑀯𑀺𑀬 𑀤𑁆𑀯𑀺𑀬𑁄𑀚𑀦𑀲𑀢𑀸𑀦𑁂𑀯𑀸’’𑀢𑀺 𑀯𑀤𑀦𑁆𑀢𑀺.

𑀫𑀦𑁄𑀳𑀭𑀲𑀺𑀮𑀸𑀢𑀮𑀸𑀦𑀻𑀢𑀺 𑀭𑀢𑀦𑀫𑀬𑀢𑁆𑀢𑀸 𑀫𑀦𑀼𑀜𑁆𑀜𑀲𑁄𑀧𑀸𑀦𑀲𑀺𑀮𑀸𑀢𑀮𑀸𑀦𑀺. 𑀲𑀼𑀧𑀝𑀺𑀬𑀢𑁆𑀢𑀸𑀦𑀻𑀢𑀺 𑀢𑀤𑀼𑀧𑀪𑁄𑀕𑀺𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀼𑀦𑀸𑀯 𑀲𑀼𑀝𑁆𑀞𑀼 𑀧𑀝𑀺𑀬𑀢𑁆𑀢𑀸𑀦𑀺 𑀲𑀼𑀲𑀡𑁆𑀞𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀦𑀺 𑀉𑀤𑀓𑀁 𑀫𑀮𑀁 𑀓𑀭𑁄𑀦𑁆𑀢𑀺, 𑀢𑀤𑀪𑀸𑀯𑀢𑁄 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑁄𑀤𑀓𑀸𑀦𑀺. 𑀢𑀺𑀭𑀺𑀬𑀢𑁄 𑀤𑀻𑀖𑀁 𑀉𑀕𑁆𑀕𑀢𑀓𑀽𑀝𑀦𑁆𑀢𑀺 ‘‘𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢’’𑀦𑁆𑀢𑀺 ¶ 𑀆𑀳. 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀦𑀤𑀻 𑀦𑀺𑀦𑁆𑀦𑀕𑀸𑀢𑀺𑀆𑀤𑀺𑀓𑀁 𑀕𑁄𑀢𑁆𑀢𑀁, 𑀕𑀗𑁆𑀕𑀸 𑀬𑀫𑀼𑀦𑀸𑀢𑀺𑀆𑀤𑀺𑀓𑀁 𑀦𑀸𑀫𑀁.

𑀲𑀯𑀫𑀸𑀦𑀸𑀢𑀺 𑀲𑀦𑁆𑀤𑀫𑀸𑀦𑀸. 𑀧𑀽𑀭𑀢𑁆𑀢𑀦𑁆𑀢𑀺 𑀧𑀼𑀡𑁆𑀡𑀪𑀸𑀯𑁄. 𑀫𑀲𑀸𑀭𑀕𑀮𑁆𑀮𑀁 ‘‘𑀘𑀺𑀢𑁆𑀢𑀨𑀮𑀺𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀳𑀢𑀁 𑀪𑀽𑀢𑀸𑀦𑀦𑁆𑀢𑀺 𑀫𑀳𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁. 𑀢𑀺𑀫𑀻 𑀢𑀺𑀫𑀺𑀗𑁆𑀕𑀮𑀸 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀸𑀢𑀺 𑀢𑀺𑀲𑁆𑀲𑁄 𑀫𑀘𑁆𑀙𑀚𑀸𑀢𑀺𑀬𑁄. 𑀢𑀺𑀫𑀺𑀁 𑀕𑀺𑀮𑀦𑀲𑀫𑀢𑁆𑀣𑀸 𑀢𑀺𑀫𑀺𑀗𑁆𑀕𑀮𑀸. 𑀢𑀺𑀫𑀺𑀜𑁆𑀘 𑀢𑀺𑀫𑀺𑀗𑁆𑀕𑀮𑀜𑁆𑀘 𑀕𑀺𑀮𑀦𑀲𑀫𑀢𑁆𑀣𑀸 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀸𑀢𑀺 𑀯𑀤𑀦𑁆𑀢𑀺.

𑀫𑀫 ¶ 𑀲𑀸𑀯𑀓𑀸𑀢𑀺 𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑁂 𑀅𑀭𑀺𑀬𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀲𑀁𑀯𑀲𑀢𑀻𑀢𑀺 𑀉𑀧𑁄𑀲𑀣𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀁𑀯𑀸𑀲𑀁 𑀦 𑀓𑀭𑁄𑀢𑀺. 𑀉𑀓𑁆𑀔𑀺𑀧𑀢𑀻𑀢𑀺 𑀅𑀧𑀦𑁂𑀢𑀺. 𑀯𑀺𑀫𑀼𑀢𑁆𑀢𑀺𑀭𑀲𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀭𑀲𑁄. 𑀲𑀩𑁆𑀩𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀺𑀅𑀢𑁆𑀣𑀸.

𑀭𑀢𑀦𑀸𑀦𑀻𑀢𑀺 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀸𑀦𑀺. 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀳𑀺 𑀪𑀸𑀯𑀺𑀬𑀫𑀸𑀦𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀧𑀕𑁂𑀯 𑀅𑀧𑀭𑀪𑀸𑀕𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪) 𑁋

𑀮𑁄𑀓𑀺𑀬𑀭𑀢𑀦𑀦𑀺𑀩𑁆𑀩𑀢𑁆𑀢𑀁 𑀧𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦 𑀢𑀲𑁆𑀲 𑀓𑀮𑀪𑀸𑀕𑀫𑁆𑀧𑀺 𑀅𑀕𑁆𑀖𑀢𑀺. 𑀅𑀧𑀺𑀘 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺’’. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦);

𑀬𑀤𑀺 𑀘 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁂𑀦 𑀭𑀢𑀦𑀁 𑀦𑀸𑀫 𑀳𑁄𑀢𑀺, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁𑀬𑁂𑀯 𑀪𑀽𑀢𑀢𑁄 𑀭𑀢𑀦𑀪𑀸𑀯𑁄. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀜𑁆𑀳𑀺 𑀲𑁄 𑀆𑀦𑀼𑀪𑀸𑀯𑁄, 𑀬𑀁 𑀲𑀸𑀯𑀓𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀘𑁆𑀙𑀦𑁆𑀢𑀺 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸. 𑀆𑀲𑀦𑁆𑀦𑀓𑀸𑀭𑀡𑀜𑁆𑀳𑀺 𑀤𑀸𑀦𑀸𑀤𑀺𑀉𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑁂𑀦 𑀘 𑀭𑀢𑀦𑀪𑀸𑀯𑁄 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 ¶ 𑀲𑀸𑀢𑀺𑀲𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀆𑀭𑀫𑁆𑀫𑀡𑁂 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀉𑀧𑀝𑁆𑀞𑀸𑀦𑀁, 𑀲𑀢𑀺𑀬𑁂𑀯 𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑀲𑁆𑀲 𑀧𑀦 𑀓𑀸𑀬𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺. 𑀢𑀣𑀸 𑀳𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀲𑀜𑁆𑀜𑀸𑀦𑀁 𑀧𑀳𑀸𑀦𑀢𑁄 𑀅𑀲𑀼𑀪𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀪𑀸𑀯𑀕𑁆𑀕𑀳𑀡𑀢𑁄 𑀘 𑀦𑁂𑀲𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄.

𑀲𑀫𑁆𑀫𑀸 𑀧𑀤𑀳𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀲𑀫𑁆𑀫𑀸 𑀧𑀤𑀳𑀢𑀺, 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀁 𑀯𑀸 𑀧𑀤𑀳𑀦𑁆𑀢𑀻𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀫𑁆𑀫𑀤𑁂𑀯 𑀧𑀥𑀸𑀦𑀪𑀸𑀯𑀓𑀭𑀡𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀁 ¶ 𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀫𑁆𑀧𑀺 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀧𑁆𑀧𑀳𑀸𑀦𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀦𑀝𑁆𑀞𑀸𑀧𑀦𑀯𑀲𑁂𑀦 𑀘 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺.

𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺. 𑀇𑀢𑀺 𑀧𑀞𑀫𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀧𑀢𑀺𑀝𑁆𑀞𑀸 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀢𑁂𑀦 𑀳𑀺 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺. 𑀲𑁆𑀯𑀸𑀬𑀁 𑀇𑀤𑁆𑀥𑀺𑀧𑀸𑀤𑁄 𑀬𑀲𑁆𑀫𑀸 𑀙𑀦𑁆𑀤𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀺𑀥𑀫𑁆𑀫𑁂 𑀥𑀼𑀭𑁂 𑀚𑁂𑀝𑁆𑀞𑀓𑁂 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺.

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀢𑁆𑀣 𑀅𑀲𑁆𑀲𑀤𑁆𑀥𑀺𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀕𑁆𑀕𑀳𑀮𑀓𑁆𑀔𑀡𑁂, 𑀧𑀫𑀸𑀤𑀁 𑀅𑀪𑀺𑀪𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂, 𑀯𑀺𑀓𑁆𑀔𑁂𑀧𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂, 𑀅𑀜𑁆𑀜𑀸𑀡𑀁 𑀅𑀪𑀺𑀪𑀯𑀺𑀢𑁆𑀯𑀸 𑀤𑀲𑁆𑀲𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀢𑀸𑀦𑀺𑀬𑁂𑀯 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦 𑀘 𑀩𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑀩𑁄𑀥𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀬𑀸 𑀳𑀺 𑀏𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀬𑀸𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 ¶ 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀺, 𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀯𑀼𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬. 𑀬𑁄𑀧𑁂𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀅𑀗𑁆𑀕𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁪𑁬𑁬; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁮𑁨; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁧𑁭). ‘‘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁧𑁭) 𑀦𑀬𑁂𑀦𑀧𑀺 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑁄 ¶ 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑁂𑀳𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸, 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸, 𑀅𑀭𑀺𑀬𑀨𑀮𑀧𑁆𑀧𑀝𑀺𑀮𑀸𑀪𑀓𑀭𑀢𑁆𑀢𑀸 𑀘 𑀅𑀭𑀺𑀬𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀅𑀲𑁆𑀲 𑀅𑀢𑁆𑀣𑀺, 𑀅𑀝𑁆𑀞 𑀅𑀗𑁆𑀕𑀸𑀦𑀺𑀬𑁂𑀯 𑀯𑀸 𑀅𑀝𑁆𑀞𑀗𑁆𑀕𑀺𑀓𑁄. 𑀫𑀸𑀭𑁂𑀦𑁆𑀢𑁄 𑀓𑀺𑀮𑁂𑀲𑁂 𑀕𑀘𑁆𑀙𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀯𑀸 𑀫𑀕𑁆𑀕𑀻𑀬𑀢𑀺, 𑀲𑀬𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀻𑀢𑀺 𑀫𑀕𑁆𑀕𑁄𑀢𑀺 𑀏𑀯𑀫𑁂𑀢𑁂𑀲𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀅𑀢𑁆𑀣𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁄𑀢𑀸𑀧𑀦𑁆𑀦𑁄𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑁄𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀭𑀡𑀸𑀬 𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀞𑀫𑀫𑀕𑁆𑀕𑀝𑁆𑀞𑁄, 𑀬𑁄 𑀅𑀝𑁆𑀞𑀫𑀓𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀓𑀤𑀸𑀕𑀸𑀫𑀻𑀢𑀺 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀆𑀕𑀫𑀦𑀲𑀻𑀮𑁄 𑀤𑀼𑀢𑀺𑀬𑀨𑀮𑀝𑁆𑀞𑁄. 𑀅𑀦𑀸𑀕𑀸𑀫𑀻𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀓𑀸𑀫𑀮𑁄𑀓𑀁 𑀅𑀦𑀸𑀕𑀫𑀦𑀲𑀻𑀮𑁄 𑀢𑀢𑀺𑀬𑀨𑀮𑀝𑁆𑀞𑁄. 𑀬𑁄 𑀧𑀦 𑀲𑀤𑁆𑀥𑀸𑀦𑀼𑀲𑀸𑀭𑀻 𑀥𑀫𑁆𑀫𑀸𑀦𑀼𑀲𑀸𑀭𑀻 𑀏𑀓𑀩𑀻𑀚𑀻𑀢𑀺𑀏𑀯𑀫𑀸𑀤𑀺𑀓𑁄 𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑁄, 𑀲𑁄 𑀏𑀢𑁂𑀲𑀁𑀬𑁂𑀯 𑀧𑀪𑁂𑀤𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀲𑀤𑀺𑀲𑀫𑁂𑀯.

𑀧𑀳𑀸𑀭𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀢𑀤𑀳𑀼𑀧𑁄𑀲𑀣𑁂𑀢𑀺 (𑀉𑀤𑀸. 𑀅𑀝𑁆𑀞. 𑁪𑁫; 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁮𑁩) 𑀢𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑀪𑀽𑀢𑁂 𑀅𑀳𑀦𑀺. 𑀉𑀧𑁄𑀲𑀣𑀓𑀭𑀡𑀢𑁆𑀣𑀸𑀬𑀸𑀢𑀺 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁. 𑀉𑀤𑁆𑀥𑀲𑁆𑀢𑀁 𑀅𑀭𑀼𑀡𑀦𑁆𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀁. 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀬𑀸𑀘𑀺. 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁩𑁬) 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀧𑀜𑁆𑀜𑀢𑁆𑀢𑀢𑁆𑀢𑀸. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑀺𑀬𑀸𑀫𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺 ¶ ? 𑀢𑀢𑁄 𑀧𑀝𑁆𑀞𑀸𑀬 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀅𑀦𑀼𑀤𑁆𑀤𑀺𑀲𑀺𑀢𑀼𑀓𑀸𑀫𑁄 𑀢𑀲𑁆𑀲 𑀯𑀢𑁆𑀣𑀼𑀁 𑀧𑀸𑀓𑀝𑀁 𑀓𑀸𑀢𑀼𑀁. 𑀅𑀤𑁆𑀤𑀲𑀸𑀢𑀺 𑀓𑀣𑀁 𑀅𑀤𑁆𑀤𑀲? 𑀅𑀢𑁆𑀢𑀦𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀦𑀺 𑀧𑀭𑀺𑀚𑀸𑀦𑀦𑁆𑀢𑁄 𑀢𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲 𑀘𑀺𑀢𑁆𑀢𑀁 𑀧𑀲𑁆𑀲𑀺. 𑀬𑀲𑁆𑀫𑀸 𑀧𑀦 𑀘𑀺𑀢𑁆𑀢𑁂 𑀤𑀺𑀝𑁆𑀞𑁂 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ¶ 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀲𑁆𑀲𑀻𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑁂𑀯 𑀳𑀺 𑀅𑀦𑀸𑀕𑀢𑁂 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀧𑀯𑀢𑁆𑀢𑀁 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀚𑀸𑀦𑀸𑀢𑀺, 𑀏𑀯𑀁 𑀅𑀢𑀻𑀢𑁂𑀧𑀻𑀢𑀺. 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑀦𑁆𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑀁. 𑀤𑀺𑀝𑁆𑀞𑁄𑀲𑀻𑀢𑀺 𑀅𑀬𑀁 𑀦 𑀧𑀓𑀢𑀢𑁆𑀢𑁄𑀢𑀺 𑀪𑀕𑀯𑀢𑀸 𑀤𑀺𑀝𑁆𑀞𑁄 𑀅𑀲𑀺. 𑀬𑀲𑁆𑀫𑀸 𑀘 𑀏𑀯𑀁 𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀦𑀢𑁆𑀣𑀺 𑀢𑁂 𑀢𑀯 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑁄. 𑀬𑀲𑁆𑀫𑀸 𑀧𑀦 𑀲𑁄 𑀲𑀁𑀯𑀸𑀲𑁄 𑀢𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀅𑀦𑁂𑀓𑀯𑀸𑀭𑀁 𑀯𑀢𑁆𑀯𑀸𑀧𑀺 ‘‘𑀣𑁂𑀭𑁄 𑀲𑀬𑀫𑁂𑀯 𑀦𑀺𑀩𑁆𑀩𑀺𑀦𑁆𑀦𑁄 𑀑𑀭𑀫𑀺𑀲𑁆𑀲𑀢𑀻’’𑀢𑀺 𑀯𑀸, ‘‘𑀇𑀤𑀸𑀦𑀺 𑀇𑀫𑁂𑀲𑀁 𑀧𑀝𑀺𑀧𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁂𑀦 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀪𑀕𑀯𑀢𑀸 𑀫𑀬𑀸 𑀘 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑁄, 𑀬𑀸𑀯𑀢𑀢𑀺𑀬𑀁 ‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄’𑀢𑀺 𑀘 𑀯𑀼𑀢𑁆𑀢𑁄 𑀦 𑀯𑀼𑀝𑁆𑀞𑀸𑀢𑀺, 𑀇𑀤𑀸𑀦𑀺𑀲𑁆𑀲 𑀦𑀺𑀓𑁆𑀓𑀟𑁆𑀠𑀦𑀓𑀸𑀮𑁄, 𑀫𑀸 𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀦𑁆𑀢𑀭𑀸𑀬𑁄 𑀅𑀳𑁄𑀲𑀻’’𑀢𑀺 𑀢𑀁 𑀩𑀸𑀳𑀸𑀬𑀁 𑀅𑀕𑁆𑀕𑀳𑁂𑀲𑀺, 𑀢𑀣𑀸 𑀕𑀳𑁂𑀢𑁆𑀯𑀸. 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀤𑁆𑀯𑀸𑀭𑀲𑀸𑀮𑀸𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸. 𑀩𑀳𑀻𑀢𑀺 𑀧𑀦 𑀦𑀺𑀓𑁆𑀔𑀸𑀫𑀺𑀢𑀝𑁆𑀞𑀸𑀦𑀤𑀲𑁆𑀲𑀦𑀁. 𑀅𑀣 𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀢𑀺 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄𑀧𑀺 𑀦𑀺𑀓𑁆𑀔𑀸𑀫𑁂𑀢𑁆𑀯𑀸, 𑀦 𑀅𑀦𑁆𑀢𑁄𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀏𑀯. 𑀉𑀪𑀬𑀢𑁆𑀣𑀸𑀧𑀺 𑀯𑀺𑀳𑀸𑀭𑀢𑁄 𑀩𑀳𑀺𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸𑀢𑀺 𑀅𑀕𑁆𑀕𑀴𑀲𑀽𑀘𑀺𑀜𑁆𑀘 𑀉𑀧𑀭𑀺𑀖𑀝𑀺𑀓𑀜𑁆𑀘 𑀆𑀤𑀳𑀺𑀢𑁆𑀯𑀸, 𑀲𑀼𑀝𑁆𑀞𑀼𑀢𑀭𑀁 𑀓𑀯𑀸𑀝𑀁 𑀣𑀓𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫𑀸𑀢𑀺 𑀇𑀫𑀺𑀦𑀸 ‘‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀯 𑀳𑀺 𑀢𑁂𑀦 𑀧𑀓𑁆𑀓𑀫𑀺𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀅𑀧𑀓𑁆𑀓𑀫𑀺𑀢𑁆𑀯𑀸 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀆𑀕𑀫𑁂𑀲𑁆𑀲𑀢𑀺, 𑀅𑀘𑁆𑀙𑀭𑀺𑀬𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀕𑀭𑀳𑀦𑀘𑁆𑀙𑀭𑀺𑀬𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀩𑁆𑀩𑀼𑀤𑁄 𑀚𑀸𑀢𑁄, 𑀅𑀧𑀭𑀺𑀲𑀼𑀤𑁆𑀥𑀸 𑀧𑀼𑀕𑁆𑀕𑀮𑀸 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦 𑀘 𑀢𑀣𑀸𑀕𑀢𑀸 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀅𑀦𑀼𑀤𑁆𑀤𑀺𑀲𑀦𑁆𑀢𑁂 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑁄 𑀧𑀘𑁆𑀙𑀺𑀚𑁆𑀚𑀢𑀺. 𑀬𑀁𑀦𑀽𑀦𑀸𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸…𑀧𑁂… 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺. 𑀢𑀢𑁆𑀣 𑀦 𑀤𑀸𑀦𑀸𑀳𑀦𑁆𑀢𑀺 𑀇𑀤𑀸𑀦𑀺 𑀅𑀳𑀁 𑀉𑀧𑁄𑀲𑀣𑀁 𑀦 ¶ 𑀓𑀭𑀺𑀲𑁆𑀲𑀸𑀫𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻𑀢𑀺 𑀧𑀘𑁆𑀘𑁂𑀓𑀁 𑀦-𑀓𑀸𑀭𑁂𑀦 𑀲𑀫𑁆𑀩𑀦𑁆𑀥𑁄. 𑀤𑀼𑀯𑀺𑀥𑀜𑁆𑀳𑀺 𑀧𑀸𑀢𑀺𑀫𑁄𑀓𑁆𑀔𑀁 𑁋 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁, 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 ¶ . 𑀢𑁂𑀲𑀼 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂’’𑀢𑀺𑀆𑀤𑀺𑀓𑀁 (𑀫𑀳𑀸𑀯. 𑁧𑁩𑁪) 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁. 𑀢𑀁 𑀲𑀸𑀯𑀓𑀸𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸, 𑀬𑀁 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀤𑁆𑀤𑀺𑀲𑀻𑀬𑀢𑀺. ‘‘𑀔𑀦𑁆𑀢𑀻 𑀧𑀭𑀫𑀁…𑀧𑁂… 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁…𑀧𑁂… 𑀅𑀦𑀼𑀧𑀯𑀸𑀤𑁄 𑀅𑀦𑀼𑀧𑀖𑀸𑀢𑁄…𑀧𑁂… 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩-𑁧𑁮𑁫; 𑀉𑀤𑀸. 𑁩𑁬; 𑀦𑁂𑀢𑁆𑀢𑀺. 𑁩𑁦) 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀕𑀸𑀣𑀸 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫. 𑀢𑀁 𑀩𑀼𑀤𑁆𑀥𑀸𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀲𑀸𑀯𑀓𑀸, 𑀙𑀦𑁆𑀦𑀫𑁆𑀧𑀺 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀤𑁆𑀤𑀺𑀲𑀦𑁆𑀢𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀥𑀭𑀫𑀸𑀦𑀓𑀸𑀮𑁂 𑀅𑀬𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄, 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀧𑀦 𑀧𑀞𑀫𑀩𑁄𑀥𑀺𑀬𑀁𑀬𑁂𑀯. 𑀢𑀢𑁄 𑀧𑀭𑀁 𑀇𑀢𑀭𑁄. 𑀢𑀜𑁆𑀘 𑀔𑁄 𑀪𑀺𑀓𑁆𑀔𑀽𑀬𑁂𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀯𑀻𑀲𑀢𑀺𑀯𑀲𑁆𑀲𑀫𑀢𑁆𑀢𑀁 𑀇𑀫𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀫𑀁 𑀅𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀭𑀁 𑀦 𑀉𑀤𑁆𑀤𑀺𑀲𑀺. 𑀅𑀝𑁆𑀞𑀸𑀦𑀦𑁆𑀢𑀺 𑀅𑀓𑀸𑀭𑀡𑀁. 𑀅𑀦𑀯𑀓𑀸𑀲𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀸𑀭𑀡𑀜𑁆𑀳𑀺 𑀬𑀣𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 ‘‘𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀅𑀯𑀓𑀸𑀲𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁.

𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀬𑁆𑀯𑀸𑀬𑀁 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀅𑀦𑀼𑀤𑁆𑀤𑁂𑀲𑁄 𑀯𑀼𑀢𑁆𑀢𑁄, 𑀲𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄𑀢𑀺 𑀢𑀁 𑀅𑀧𑀭𑁂𑀳𑀺𑀧𑀺 𑀲𑀢𑁆𑀢𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀢𑁂𑀲𑀁 𑀉𑀧𑀫𑀸𑀪𑀸𑀯𑁂𑀦 𑀫𑀳𑀸𑀲𑀫𑀼𑀤𑁆𑀤𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂’’𑀢𑀺𑀆𑀤𑀺𑀫𑀸𑀳.

𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀕𑀳𑀧𑀢𑀺𑀯𑀕𑁆𑀕𑁄

𑁧-𑁭. 𑀧𑀞𑀫𑀉𑀕𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧-𑁨𑁭. 𑀢𑀢𑀺𑀬𑀲𑁆𑀲 𑀧𑀞𑀫𑀤𑀼𑀢𑀺𑀬𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀢𑀢𑀺𑀬𑁂 ‘‘𑀳𑀢𑁆𑀣𑀕𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀳𑀢𑁆𑀣𑀓𑁄’’𑀢𑀺 𑀯𑀼𑀢𑁆𑀢𑀁. 𑀲𑁄 𑀳𑀺 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀢𑁄 ¶ 𑀬𑀓𑁆𑀔𑀲𑁆𑀲 𑀳𑀢𑁆𑀣𑀁, 𑀬𑀓𑁆𑀔𑀲𑁆𑀲 𑀳𑀢𑁆𑀣𑀢𑁄 𑀪𑀕𑀯𑀢𑁄 𑀳𑀢𑁆𑀣𑀁 ¶ , 𑀪𑀕𑀯𑀢𑁄 𑀳𑀢𑁆𑀣𑀢𑁄 𑀧𑀼𑀦 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀁 𑀕𑀢𑀢𑁆𑀢𑀸 𑀦𑀸𑀫𑀢𑁄 𑀳𑀢𑁆𑀣𑀓𑁄 𑀆𑀴𑀯𑀓𑁄𑀢𑀺 𑀚𑀸𑀢𑁄. 𑀢𑁂𑀦𑀸𑀳 ‘‘𑀆𑀴𑀯𑀓𑀬𑀓𑁆𑀔𑀲𑁆𑀲 𑀳𑀢𑁆𑀣𑀢𑁄 𑀳𑀢𑁆𑀣𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀳𑀢𑁆𑀣𑀓𑁄𑀢𑀺 𑀮𑀤𑁆𑀥𑀦𑀸𑀫𑁄 𑀭𑀸𑀚𑀓𑀼𑀫𑀸𑀭𑁄’’𑀢𑀺. 𑀘𑀢𑀼𑀢𑁆𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀉𑀕𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀢𑀺𑀬𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀔𑀻𑀡𑀸𑀲𑀯𑀲𑁆𑀲 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸 𑀅𑀲𑀫𑁆𑀫𑁄𑀳𑀯𑀲𑁂𑀦 𑀓𑀺𑀘𑁆𑀘𑀢𑁄 𑀫𑀕𑁆𑀕𑀧𑀜𑁆𑀜𑀸𑀬 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬𑀸’’𑀢𑀺. 𑀇𑀫𑁂 𑀓𑀸𑀫𑀸𑀢𑀺 𑀤𑁆𑀯𑁂𑀧𑀺 𑀓𑀸𑀫𑁂 𑀯𑀤𑀢𑀺. 𑀓𑀺𑀮𑁂𑀲𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀺 𑀧𑀭𑀺𑀴𑀸𑀳𑁄 𑀯𑀢𑁆𑀣𑀼𑀓𑀸𑀫𑀲𑀦𑁆𑀦𑀺𑀲𑁆𑀲𑀬𑁄 𑀯𑀢𑁆𑀣𑀼𑀓𑀸𑀫𑀯𑀺𑀲𑀬𑁄 𑀯𑀸𑀢𑀺 𑀤𑁆𑀯𑁂𑀧𑀺 𑀲𑀧𑀭𑀺𑀴𑀸𑀳𑀝𑁆𑀞𑁂𑀦 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬𑀸𑀢𑀺 ‘‘𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸’’𑀢𑀺 𑀯𑀼𑀢𑁆𑀢𑀸. 𑀅𑀦𑁆𑀢𑁄 𑀯𑀼𑀘𑁆𑀘𑀢𑀺 𑀮𑀸𑀫𑀓𑀝𑁆𑀞𑁂𑀦 𑀢𑀡𑁆𑀳𑀸, 𑀩𑁆𑀬𑀦𑁆𑀢𑀁 𑀯𑀺𑀕𑀢𑀦𑁆𑀢𑀁 𑀪𑀽𑀢𑀦𑁆𑀢𑀺 𑀩𑁆𑀬𑀦𑁆𑀢𑀺𑀪𑀽𑀢𑀦𑁆𑀢𑀺 𑀆𑀳 ‘‘𑀯𑀺𑀕𑀢𑀦𑁆𑀢𑀪𑀽𑀢’’𑀦𑁆𑀢𑀺, 𑀦𑀺𑀢𑁆𑀢𑀡𑁆𑀳𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀬𑀲𑁆𑀫𑀸 𑀫𑀳𑀺𑀤𑁆𑀥𑀺𑀓𑀧𑁂𑀢𑀸 𑀤𑁂𑀯𑀸𑀲𑀼𑀭𑀸𑀦𑀁 𑀆𑀯𑀸𑀳𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀯𑀸𑀳𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀧𑁂𑀢𑁆𑀢𑀺𑀯𑀺𑀲𑀬𑁂𑀦𑁂𑀯 𑀅𑀲𑀼𑀭𑀓𑀸𑀬𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑁂𑀢𑀸𑀲𑀼𑀭𑀸 𑀧𑀦 𑀧𑁂𑀢𑀸 𑀏𑀯𑀸𑀢𑀺 𑀢𑁂𑀲𑀁 𑀧𑁂𑀢𑁂𑀳𑀺 𑀲𑀗𑁆𑀕𑀳𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀯.

𑀅𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀼𑀭𑀼𑀤𑁆𑀥𑀫𑀳𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 ¶ 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀢𑀺 𑀦 𑀇𑀘𑁆𑀙𑀲𑁆𑀲. 𑀅𑀪𑀸𑀯𑀢𑁆𑀣𑁄 𑀳𑁂𑀢𑁆𑀣 𑀅𑀧𑁆𑀧𑀲𑀤𑁆𑀤𑁄 ‘‘𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁧𑁧) 𑀯𑀺𑀬. 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑁄, 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂𑀲𑀼 𑀇𑀘𑁆𑀙𑀸𑀭𑀳𑀺𑀢𑁄. 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄𑀢𑀺 𑀛𑀸𑀦𑀸𑀤𑀺𑀅𑀥𑀺𑀕𑀫𑀯𑀺𑀪𑀸𑀯𑀦𑁂 𑀇𑀘𑁆𑀙𑀸𑀭𑀳𑀺𑀢𑁄 ¶ . 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄𑀢𑀺 𑀧𑀭𑀺𑀬𑀢𑁆𑀢𑀺𑀬𑀁 𑀩𑀸𑀳𑀼𑀲𑀘𑁆𑀘𑀯𑀺𑀪𑀸𑀯𑀦𑁂 𑀇𑀘𑁆𑀙𑀸𑀭𑀳𑀺𑀢𑁄. 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄𑀢𑀺 𑀥𑀼𑀢𑀗𑁆𑀕𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀪𑀸𑀯𑀯𑀺𑀪𑀸𑀯𑀦𑁂 𑀇𑀘𑁆𑀙𑀸𑀭𑀳𑀺𑀢𑁄. 𑀲𑀦𑁆𑀢𑀕𑀼𑀡𑀦𑀺𑀕𑀼𑀳𑀦𑁂𑀦𑀸𑀢𑀺 𑀅𑀢𑁆𑀢𑀦𑀺 𑀲𑀁𑀯𑀺𑀚𑁆𑀚𑀫𑀸𑀦𑀸𑀦𑀁 𑀛𑀸𑀦𑀸𑀤𑀺𑀕𑀼𑀡𑀸𑀦𑀜𑁆𑀘𑁂𑀯 𑀩𑀸𑀳𑀼𑀲𑀘𑁆𑀘𑀕𑀼𑀡𑀲𑁆𑀲 𑀥𑀼𑀢𑀗𑁆𑀕𑀕𑀼𑀡𑀲𑁆𑀲 𑀘 𑀦𑀺𑀕𑀼𑀳𑀦𑁂𑀦 𑀙𑀸𑀤𑀦𑁂𑀦. 𑀲𑀫𑁆𑀧𑀚𑁆𑀚𑀢𑀻𑀢𑀺 𑀦𑀺𑀧𑁆𑀨𑀚𑁆𑀚𑀢𑀺 𑀲𑀺𑀚𑁆𑀛𑀢𑀺. 𑀦𑁄 𑀫𑀳𑀺𑀘𑁆𑀙𑀲𑁆𑀲𑀸𑀢𑀺 𑀫𑀳𑀢𑀺𑀬𑀸 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀦𑁄 𑀲𑀫𑁆𑀧𑀚𑁆𑀚𑀢𑀺 𑀅𑀦𑀼𑀥𑀫𑁆𑀫𑀲𑁆𑀲𑀧𑀺 𑀅𑀦𑀺𑀧𑁆𑀨𑀚𑁆𑀚𑀦𑀢𑁄. 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀧𑀓𑀸𑀭𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲. 𑀢𑁂𑀦𑀸𑀳 ‘‘𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲𑀸’’𑀢𑀺. 𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀪𑀸𑀯𑀦𑀸𑀪𑀺𑀬𑁄𑀕𑀯𑀲𑁂𑀦 𑀏𑀓𑀻𑀪𑀸𑀯𑁄𑀯 𑀓𑀸𑀬𑀯𑀺𑀯𑁂𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀕𑀡𑀲𑀗𑁆𑀕𑀡𑀺𑀓𑀸𑀪𑀸𑀯𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀦𑁆𑀢𑀺 𑀬𑁄𑀕𑀓𑀫𑁆𑀫𑀁.

𑀲𑀢𑁆𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀘 𑀲𑀗𑁆𑀕𑀡𑀦𑀁 𑀲𑀫𑁄𑀥𑀸𑀦𑀁 𑀲𑀗𑁆𑀕𑀡𑀺𑀓𑀸, 𑀲𑀸 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄, 𑀢𑀲𑁆𑀲. 𑀢𑁂𑀦𑀸𑀳 ‘‘𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯𑀸’’𑀢𑀺𑀆𑀤𑀺. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀲𑁆𑀲. 𑀢𑀜𑁆𑀘 𑀔𑁄 𑀉𑀧𑀥𑀺𑀯𑀺𑀯𑁂𑀓𑁂 𑀦𑀺𑀦𑁆𑀦𑀢𑀸𑀯𑀲𑁂𑀦 ‘‘𑀅𑀬𑀁 𑀥𑀫𑁆𑀫𑁄’’𑀢𑀺 𑀯𑀘𑀦𑀢𑁄. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁𑀬𑁂𑀯 𑀳𑀺 𑀲𑀫𑀸𑀥𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀣𑀸 𑀧𑀜𑁆𑀜𑀸𑀧𑀺. 𑀓𑀫𑁆𑀫𑀲𑁆𑀲-𑀓𑀢𑀧𑀜𑁆𑀜𑀸𑀬 𑀳𑀺 𑀞𑀺𑀢𑁄 𑀓𑀫𑁆𑀫𑀯𑀲𑁂𑀦 𑀪𑀯𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑁄 𑀅𑀦𑀢𑁆𑀣𑁄𑀢𑀺 𑀚𑀸𑀦𑀦𑁆𑀢𑁄 𑀓𑀫𑁆𑀫𑀓𑁆𑀔𑀬𑀓𑀭𑀁 𑀜𑀸𑀡𑀁 𑀅𑀪𑀺𑀧𑀢𑁆𑀣𑁂𑀢𑀺, 𑀢𑀤𑀢𑁆𑀣𑀜𑁆𑀘 𑀉𑀲𑁆𑀲𑀸𑀳𑀁 𑀓𑀭𑁄𑀢𑀺. 𑀫𑀸𑀦𑀸𑀤𑀬𑁄 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀭𑀳𑀺𑀢𑀢𑁆𑀢𑀸’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀼𑀭𑀼𑀤𑁆𑀥𑀫𑀳𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀳𑀧𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀸𑀦𑀯𑀕𑁆𑀕𑁄

𑁧-𑁪. 𑀧𑀞𑀫𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁧-𑁩𑁪. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀞𑀫𑁂 𑀆𑀲𑀚𑁆𑀚𑀸𑀢𑀺 𑀬𑀲𑁆𑀲 𑀤𑁂𑀢𑀺, 𑀢𑀲𑁆𑀲 𑀆𑀕𑀫𑀦𑀳𑁂𑀢𑀼 𑀢𑁂𑀦 𑀲𑀫𑀸𑀕𑀫𑀦𑀺𑀫𑀺𑀢𑁆𑀢𑀁. 𑀪𑀬𑀸𑀢𑀺 𑀪𑀬𑀳𑁂𑀢𑀼. 𑀦𑀦𑀼 𑀪𑀬𑀁 𑀦𑀸𑀫 𑀮𑀤𑁆𑀥𑀓𑀸𑀫𑀢𑀸𑀭𑀸𑀕𑀸𑀤𑀬𑁄 𑀯𑀺𑀬 𑀘𑁂𑀢𑀦𑀸𑀬 𑀅𑀯𑀺𑀲𑀼𑀤𑁆𑀥𑀺𑀓𑀭𑀁, 𑀢𑀁 𑀓𑀲𑁆𑀫𑀸 𑀇𑀥 𑀕𑀳𑀺𑀢𑀦𑁆𑀢𑀺? 𑀦𑀬𑀺𑀤𑀁 𑀢𑀸𑀤𑀺𑀲𑀁 𑀯𑁄𑀳𑀸𑀭𑀪𑀬𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀅𑀤𑀸𑀬𑀓𑁄 𑀅𑀓𑀸𑀭𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀤𑀸𑀲𑀺 𑀫𑁂𑀢𑀺 𑀬𑀁 𑀧𑀼𑀩𑁆𑀩𑁂 𑀓𑀢𑀁 𑀉𑀧𑀓𑀸𑀭𑀁 𑀘𑀺𑀦𑁆𑀢𑁂𑀢𑁆𑀯𑀸 ¶ 𑀤𑀻𑀬𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑁆𑀲𑀢𑀺 𑀫𑁂𑀢𑀺 𑀧𑀘𑁆𑀘𑀼𑀧𑀓𑀸𑀭𑀸𑀲𑀻𑀲𑀸𑀬 𑀬𑀁 𑀤𑀻𑀬𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀸𑀳𑀼 𑀤𑀸𑀦𑀦𑁆𑀢𑀺 𑀤𑀸𑀦𑀁 𑀦𑀸𑀫𑁂𑀢𑀁 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀸𑀥𑀼𑀲𑀫𑀸𑀘𑀸𑀭𑁂 𑀞𑀢𑁆𑀯𑀸 𑀤𑁂𑀢𑀺. 𑀅𑀮𑀗𑁆𑀓𑀸𑀭𑀢𑁆𑀣𑀦𑁆𑀢𑀺 𑀉𑀧𑀲𑁄𑀪𑀦𑀢𑁆𑀣𑀁. 𑀤𑀸𑀦𑀜𑁆𑀳𑀺 𑀤𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀮𑁄𑀪𑀤𑁄𑀲𑀇𑀲𑁆𑀲𑀸𑀫𑀘𑁆𑀙𑁂𑀭𑀸𑀤𑀬𑁄𑀧𑀺 𑀯𑀺𑀤𑀽𑀭𑀻 𑀪𑀯𑀦𑁆𑀢𑀺. 𑀇𑀤𑀸𑀦𑀺 𑀤𑀸𑀦𑀁 𑀅𑀦𑀼𑀓𑀽𑀮𑀥𑀫𑁆𑀫𑀧𑀭𑀺𑀩𑁆𑀭𑀽𑀳𑀦𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑀯𑀺𑀤𑀽𑀭𑀻𑀓𑀭𑀡𑁂𑀦 𑀘 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀉𑀧𑀲𑁄𑀪𑀦𑀸𑀬 𑀘 𑀧𑀭𑀺𑀓𑁆𑀔𑀸𑀭𑀸𑀬 𑀘 𑀳𑁄𑀢𑀻𑀢𑀺 ‘‘𑀅𑀮𑀗𑁆𑀓𑀸𑀭𑀢𑁆𑀣𑀜𑁆𑀘𑁂𑀯 𑀧𑀭𑀺𑀓𑁆𑀔𑀸𑀭𑀢𑁆𑀣𑀜𑁆𑀘 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀤𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀻’’𑀢𑀺𑀆𑀤𑀺. 𑀫𑀼𑀤𑀼𑀘𑀺𑀢𑁆𑀢𑁄 𑀳𑁄𑀢𑀺 𑀮𑀤𑁆𑀥𑀸 𑀤𑀸𑀬𑀓𑁂 ‘‘𑀇𑀫𑀺𑀦𑀸 𑀫𑀬𑁆𑀳𑀁 𑀲𑀗𑁆𑀕𑀳𑁄 𑀓𑀢𑁄’’𑀢𑀺, 𑀤𑀸𑀢𑀸𑀧𑀺 𑀮𑀤𑁆𑀥𑀭𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀻’’𑀢𑀺.

𑀅𑀤𑀦𑁆𑀢𑀤𑀫𑀦𑀦𑁆𑀢𑀺 𑀅𑀤𑀦𑁆𑀢𑀸 𑀅𑀦𑀲𑁆𑀲𑀯𑀸𑀧𑀺𑀲𑁆𑀲 𑀤𑀸𑀦𑁂𑀦 𑀤𑀦𑁆𑀢𑀸 𑀅𑀲𑁆𑀲𑀯𑀸 𑀳𑁄𑀦𑁆𑀢𑀺, 𑀯𑀲𑁂 𑀯𑀢𑁆𑀢𑀦𑁆𑀢𑀺. 𑀅𑀤𑀸𑀦𑀁 𑀤𑀦𑁆𑀢𑀤𑀽𑀲𑀓𑀦𑁆𑀢𑀺 𑀅𑀤𑀸𑀦𑀁 𑀧𑀼𑀩𑁆𑀩𑁂 𑀤𑀦𑁆𑀢𑀸𑀦𑀁 𑀅𑀲𑁆𑀲𑀯𑀸𑀦𑀫𑁆𑀧𑀺 𑀯𑀺𑀖𑀸𑀢𑀼𑀧𑁆𑀧𑀸𑀤𑀦𑁂𑀦 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺. 𑀉𑀦𑁆𑀦𑀫𑀦𑁆𑀢𑀺 𑀤𑀸𑀬𑀓𑀸 𑀧𑀺𑀬𑀁𑀯𑀤𑀸 𑀘 𑀧𑀭𑁂𑀲𑀁 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀝𑁆𑀞𑀸𑀦𑀢𑀸𑀬. 𑀦𑀫𑀦𑁆𑀢𑀺𑀧𑀝𑀺𑀕𑁆𑀕𑀸𑀳𑀓𑀸 𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬 𑀘 𑀮𑀤𑁆𑀥𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀸𑀦𑀁.

𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀤𑀸𑀦𑀫𑁂𑀯 𑀉𑀢𑁆𑀢𑀫𑀁 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀲𑀼𑀧𑀭𑀺𑀲𑀼𑀤𑁆𑀥𑀢𑀸𑀬 𑀕𑀼𑀡𑀯𑀺𑀲𑁂𑀲𑀧𑀘𑁆𑀘𑀬𑀢𑀸𑀬 𑀘. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀸𑀦𑀽𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 ¶ 𑀤𑀸𑀦𑀧𑀘𑁆𑀘𑀬𑀸𑀢𑀺 𑀤𑀸𑀦𑀓𑀸𑀭𑀡𑀸, 𑀤𑀸𑀦𑀫𑀬𑀧𑀼𑀜𑁆𑀜𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀧𑀢𑁆𑀢𑀺𑀬𑁄𑀢𑀺 𑀫𑀦𑀼𑀲𑁆𑀲𑁂𑀲𑀼 𑀤𑁂𑀯𑁂𑀲𑀼 𑀘 𑀦𑀺𑀩𑁆𑀩𑀢𑁆𑀢𑀺𑀬𑁄. 𑀞𑀧𑁂𑀢𑀻𑀢𑀺 𑀏𑀓𑀯𑀸𑀭𑀫𑁂𑀯 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀣𑀸 𑀉𑀧𑀭𑀺 𑀢𑁂𑀦𑁂𑀯𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀞𑀧𑁂𑀢𑀺. 𑀢𑀤𑁂𑀯 𑀘𑀲𑁆𑀲 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀯𑀟𑁆𑀠𑁂𑀢𑀻𑀢𑀺 𑀩𑁆𑀭𑀽𑀳𑁂𑀢𑀺 𑀦 𑀳𑀸𑀧𑁂𑀢𑀺. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀁, 𑀦𑀺𑀦𑁆𑀦𑀁 𑀧𑁄𑀡𑀁 𑀧𑀩𑁆𑀪𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀸 𑀯𑀺𑀲𑁆𑀲𑀝𑁆𑀞𑀁. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀢𑁆𑀢𑀭𑀺 𑀦𑀸𑀫 𑀧𑀡𑀻𑀢𑀁 𑀫𑀚𑁆𑀛𑁂𑀧𑀺 𑀳𑀻𑀦𑀫𑀚𑁆𑀛𑀺𑀫𑀯𑀺𑀪𑀸𑀕𑀲𑁆𑀲 𑀮𑀩𑁆𑀪𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀭𑀺 𑀅𑀪𑀸𑀯𑀺𑀢𑀦𑁆𑀢𑀺 𑀢𑀢𑁄 𑀉𑀧𑀭𑀺𑀫𑀕𑁆𑀕𑀨𑀮𑀢𑁆𑀣𑀸𑀬 𑀅𑀪𑀸𑀯𑀺𑀢’’𑀦𑁆𑀢𑀺. 𑀲𑀁𑀯𑀢𑁆𑀢𑀢𑀺 𑀢𑀣𑀸𑀧𑀡𑀺𑀳𑀺𑀢𑀁 𑀤𑀸𑀦𑀫𑀬𑀁 𑀘𑀺𑀢𑁆𑀢𑀁. 𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀢𑀜𑁆𑀘 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀢𑀢𑁆𑀭𑀼𑀧𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀓𑀭𑀤𑀼𑀲𑁆𑀲𑀻𑀮𑁆𑀬𑀸𑀪𑀸𑀯𑀤𑀲𑁆𑀲𑀦𑀧𑀭𑀁 𑀤𑀝𑁆𑀞𑀩𑁆𑀩𑀁, 𑀦 𑀤𑀸𑀦𑀫𑀬𑀲𑁆𑀲 𑀧𑀼𑀜𑁆𑀜𑀲𑁆𑀲 𑀓𑁂𑀯𑀮𑀲𑁆𑀲 𑀢𑀁𑀲𑀁𑀯𑀢𑁆𑀢𑀦𑀢𑀸𑀤𑀲𑁆𑀲𑀦𑀧𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀲𑁆𑀲𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀓𑀸𑀫𑀭𑀸𑀕𑀲𑁆𑀲. 𑀢𑀲𑁆𑀲 𑀳𑀺 ¶ 𑀲𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀢𑁆𑀢𑀺, 𑀦 𑀲𑀫𑀼𑀘𑁆𑀙𑀺𑀦𑁆𑀦𑀪𑀯𑀭𑀸𑀕𑀲𑁆𑀲. 𑀯𑀻𑀢𑀭𑀸𑀕𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀬𑀸𑀬 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺 𑀲𑀺𑀬𑀸. 𑀢𑁂𑀦𑀸𑀳 ‘‘𑀤𑀸𑀦𑀫𑀢𑁆𑀢𑁂𑀦𑁂𑀯𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀤𑀸𑀦𑀁 𑀢𑀢𑁆𑀣 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀤𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀤𑀸𑀦𑁂𑀦 𑀫𑀼𑀤𑀼𑀘𑀺𑀢𑁆𑀢𑁄𑀢𑀺 𑀩𑀤𑁆𑀥𑀸𑀖𑀸𑀢𑁂 𑀯𑁂𑀭𑀺𑀧𑀼𑀕𑁆𑀕𑀮𑁂𑀧𑀺 𑀅𑀢𑁆𑀢𑀦𑁄 𑀤𑀸𑀦𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀫𑀼𑀤𑀼𑀪𑀽𑀢𑀘𑀺𑀢𑁆𑀢𑁄.

𑀤𑀸𑀦𑀽𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀧𑀼𑀚𑁆𑀚𑀪𑀯𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀦𑀦𑁆𑀢𑀻𑀢𑀺 𑀯𑀸 𑀧𑀼𑀜𑁆𑀜𑀸𑀦𑀺 𑀘 𑀢𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀓𑀢𑁆𑀢𑀩𑁆𑀩𑀢𑁄 𑀓𑀺𑀭𑀺𑀬𑀸 𑀘𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸, 𑀢𑀸𑀬𑁂𑀯 𑀘 𑀢𑁂𑀲𑀁 𑀢𑁂𑀲𑀁 𑀧𑀺𑀬𑀫𑀦𑀸𑀧𑀢𑀸𑀤𑀺𑀆𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺.

𑀅𑀦𑀼𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀲𑁆𑀲 𑀅𑀦𑀼𑀕𑁆𑀕𑀳𑀯𑀲𑁂𑀦, 𑀧𑀽𑀚𑀸𑀯𑀲𑁂𑀦 𑀯𑀸 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀲𑁆𑀲 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸 𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀸𑀦𑀁, 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁. 𑀧𑀤𑀧𑀽𑀭𑀡𑀫𑀢𑁆𑀢𑀁 𑀫𑀬-𑀲𑀤𑁆𑀤𑁄. 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫), 𑀅𑀦𑁆𑀦𑀸𑀤𑀻𑀲𑀼 𑀯𑀸 ¶ 𑀤𑀲𑀲𑀼 𑀤𑀸𑀦𑀯𑀢𑁆𑀣𑀽𑀲𑀼, 𑀭𑀽𑀧𑀸𑀤𑀻𑀲𑀼 𑀯𑀸 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀁 𑀢𑀁 𑀤𑁂𑀦𑁆𑀢𑀲𑁆𑀲 𑀢𑁂𑀲𑀁 𑀉𑀧𑁆𑀧𑀸𑀤𑀦𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀘𑁆𑀘𑀸𑀕𑀓𑀸𑀮𑁂 𑀧𑀘𑁆𑀙𑀸 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀅𑀦𑀼𑀲𑁆𑀲𑀭𑀡𑁂 𑀘𑀸𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀯𑀢𑁆𑀢𑀘𑁂𑀢𑀦𑀸 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫.

𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀲𑀻𑀮𑀸𑀤𑀺𑀯𑀲𑁂𑀦 𑀧𑀜𑁆𑀘 𑀅𑀝𑁆𑀞 𑀤𑀲 𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 ‘‘𑀲𑀻𑀮𑀧𑀽𑀭𑀡𑀢𑁆𑀣𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀩𑁆𑀩𑀚𑀦𑁆𑀢𑀲𑁆𑀲, 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑁄 𑀯𑀢𑀫𑁆𑀳𑀺 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲, 𑀲𑀤𑁆𑀥𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲, 𑀧𑀜𑁆𑀜𑀸𑀬 𑀘𑀻𑀯𑀭𑀸𑀤𑀺𑀓𑁂 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀲𑀢𑀺𑀬𑀸 𑀆𑀧𑀸𑀣𑀕𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀲𑀁𑀯𑀭𑀦𑁆𑀢𑀲𑁆𑀲, 𑀯𑀻𑀭𑀺𑀬𑁂𑀦 𑀆𑀚𑀻𑀯𑀁 𑀲𑁄𑀥𑁂𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀘𑁂𑀢𑀦𑀸 𑀲𑀻𑀮𑀢𑀺, 𑀲𑀻𑀮𑁂𑀢𑀻𑀢𑀺 𑀯𑀸 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫.

𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁪𑁮) 𑀯𑀼𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀲𑁆𑀲, 𑀲𑁄𑀢𑀁…𑀧𑁂… 𑀖𑀸𑀦𑀁…𑀧𑁂… 𑀚𑀺𑀯𑁆𑀳𑀁…𑀧𑁂… 𑀓𑀸𑀬𑀁…𑀧𑁂… 𑀭𑀽𑀧𑁂…𑀧𑁂… 𑀥𑀫𑁆𑀫𑁂…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 ¶ …𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁…𑀧𑁂… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀬𑀸 𑀘𑁂𑀢𑀦𑀸, 𑀬𑀸 𑀘 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀲𑀩𑁆𑀩𑀸𑀲𑀼 𑀅𑀝𑁆𑀞𑀢𑁆𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀸 𑀛𑀸𑀦𑀘𑁂𑀢𑀦𑀸, 𑀬𑀸 𑀘 𑀅𑀦𑀯𑀚𑁆𑀚𑁂𑀲𑀼 𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀲𑀩𑁆𑀩𑀸 𑀲𑀸 𑀪𑀸𑀯𑁂𑀢𑀺 𑀏𑀢𑀸𑀬𑀸𑀢𑀺 𑀪𑀸𑀯𑀦𑀸𑀫𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘𑀸𑀢𑀺 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼.

𑀏𑀓𑀫𑁂𑀓𑀜𑁆𑀘𑁂𑀢𑁆𑀣 𑀬𑀣𑀸𑀭𑀳𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀢𑀤𑀢𑁆𑀣𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁. 𑀓𑀸𑀬𑀗𑁆𑀕𑀁 𑀯𑀸𑀘𑀗𑁆𑀕𑀜𑁆𑀘 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸 𑀘𑀺𑀦𑁆𑀢𑀬𑀦𑁆𑀢𑀲𑁆𑀲 𑀫𑀦𑁄𑀓𑀫𑁆𑀫𑀁. 𑀅𑀦𑁆𑀦𑀸𑀤𑀻𑀦𑀺 𑀤𑁂𑀦𑁆𑀢𑀲𑁆𑀲 𑀘𑀸𑀧𑀺 ‘‘𑀅𑀦𑁆𑀦𑀤𑀸𑀦𑀸𑀤𑀻𑀦𑀺 𑀤𑁂𑀫𑀻’’𑀢𑀺 𑀯𑀸, 𑀤𑀸𑀦𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀯𑀸 𑀤𑀸𑀦𑀓𑀸𑀮𑁂 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺. 𑀬𑀣𑀸 𑀳𑀺 𑀓𑁂𑀯𑀮𑀁 ‘‘𑀅𑀦𑁆𑀦𑀤𑀸𑀦𑀸𑀤𑀻𑀦𑀺 𑀤𑁂𑀫𑀻’’𑀢𑀺 𑀤𑀸𑀦𑀓𑀸𑀮𑁂 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺, 𑀏𑀯𑀁 ‘‘𑀇𑀤𑀁 𑀤𑀸𑀦𑀫𑀬𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀤𑀸𑀦𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀤𑀸𑀦𑀓𑀸𑀮𑁂𑀧𑀺 𑀤𑀸𑀦𑀲𑀻𑀲𑁂𑀦𑁂𑀯 𑀧𑀯𑀢𑁆𑀢𑀺𑀢𑀢𑁆𑀢𑀸. 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀤𑀤𑀦𑁆𑀢𑁄 ‘‘𑀏𑀢𑀁 𑀤𑀸𑀦𑀁 𑀦𑀸𑀫 𑀫𑀬𑁆𑀳𑀁 ¶ 𑀓𑀼𑀮𑀯𑀁𑀲𑀳𑁂𑀢𑀼 𑀧𑀯𑁂𑀡𑀺𑀘𑀸𑀭𑀺𑀢𑁆𑀢’’𑀦𑁆𑀢𑀺 𑀘𑀸𑀭𑀺𑀢𑁆𑀢𑀲𑀻𑀲𑁂𑀦 𑀯𑀸 𑀤𑁂𑀦𑁆𑀢𑁄 𑀘𑀸𑀭𑀺𑀢𑁆𑀢𑀲𑀻𑀮𑀢𑁆𑀢𑀸 𑀲𑀻𑀮𑀫𑀬𑀁. 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀤𑀤𑀢𑁄 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺. 𑀬𑀣𑀸 𑀳𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀯𑀢𑁆𑀢𑀫𑀸𑀦𑀸𑀧𑀺 𑀤𑀸𑀦𑀘𑁂𑀢𑀦𑀸 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀤𑀤𑀢𑁄 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀧𑀭𑀪𑀸𑀕𑁂 𑀘𑁂𑀢𑀦𑀸𑀬 𑀘 𑀢𑀣𑀸𑀧𑀯𑀢𑁆𑀢𑀢𑁆𑀢𑀸.

𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁭-𑁩𑁮. 𑀲𑀢𑁆𑀢𑀫𑁂 𑀯𑀺𑀘𑁂𑀬𑁆𑀬 𑀤𑁂𑀢𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀯𑀺𑀘𑀺𑀦𑀦𑀸𑀦𑀺 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀺𑀦𑀦𑀁, 𑀤𑀓𑁆𑀔𑀺𑀡𑀸𑀯𑀺𑀘𑀺𑀦𑀦𑀜𑁆𑀘. 𑀢𑁂𑀲𑀼 𑀯𑀺𑀧𑀦𑁆𑀦𑀲𑀻𑀮𑁂 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀜𑁆𑀘𑀦𑀯𑀼𑀢𑀺 𑀧𑀸𑀲𑀡𑁆𑀟𑀪𑁂𑀤𑁂 𑀘 𑀤𑀓𑁆𑀔𑀺𑀡𑁂𑀬𑁆𑀬𑁂 𑀧𑀳𑀸𑀬 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸𑀦𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀺𑀦𑀦𑀁 𑀦𑀸𑀫. 𑀮𑀸𑀫𑀓𑀮𑀸𑀫𑀓𑁂 𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀧𑀡𑀻𑀢𑀧𑀡𑀻𑀢𑁂 𑀯𑀺𑀘𑀺𑀦𑀺𑀢𑁆𑀯𑀸 𑀢𑁂𑀲𑀁 𑀤𑀸𑀦𑀁 𑀤𑀓𑁆𑀔𑀺𑀡𑀸𑀯𑀺𑀘𑀺𑀦𑀦𑀁 𑀦𑀸𑀫. 𑀢𑁂𑀦𑀸𑀳 ‘‘𑀇𑀫𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀅𑀝𑁆𑀞𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯-𑁪𑁦. 𑀦𑀯𑀫𑁂 ¶ 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸𑀢𑀺 𑀧𑀼𑀜𑁆𑀜𑀦𑀤𑀺𑀬𑁄. 𑀓𑀼𑀲𑀮𑀸𑀪𑀺𑀲𑀦𑁆𑀤𑀸𑀢𑀺 𑀓𑀼𑀲𑀮𑀸𑀦𑀁 𑀧𑀯𑀸𑀳𑀸. 𑀲𑀼𑀔𑀲𑁆𑀲𑀸𑀳𑀸𑀭𑀸𑀢𑀺 𑀲𑀼𑀔𑀧𑀘𑁆𑀘𑀬𑀸. 𑀅𑀕𑁆𑀕𑀸𑀦𑀻𑀢𑀺 𑀜𑀸𑀢𑀢𑁆𑀢𑀸 𑀅𑀕𑁆𑀕𑀜𑁆𑀜𑀸𑀦𑀺. 𑀘𑀺𑀭𑀭𑀢𑁆𑀢𑀁 𑀜𑀸𑀢𑀢𑁆𑀢𑀸 𑀭𑀢𑁆𑀢𑀜𑁆𑀜𑀸𑀦𑀺. 𑀅𑀭𑀺𑀬𑀸𑀦𑀁 𑀲𑀸𑀥𑀽𑀦𑀁 𑀯𑀁𑀲𑀸𑀦𑀻𑀢𑀺 𑀜𑀸𑀢𑀢𑁆𑀢𑀸 𑀯𑀁𑀲𑀜𑁆𑀜𑀸𑀦𑀺. 𑀧𑁄𑀭𑀸𑀡𑀸𑀦𑀁 𑀆𑀤𑀺𑀧𑀼𑀭𑀺𑀲𑀸𑀦𑀁 𑀏𑀢𑀸𑀦𑀻𑀢𑀺 𑀧𑁄𑀭𑀸𑀡𑀸𑀦𑀺. 𑀲𑀩𑁆𑀩𑀲𑁄 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀲𑀸𑀥𑀽𑀳𑀺 𑀦 𑀓𑀺𑀡𑁆𑀡𑀸𑀦𑀺 𑀦 𑀔𑀺𑀢𑁆𑀢𑀸𑀦𑀺 𑀙𑀟𑁆𑀟𑀺𑀢𑀸𑀦𑀻𑀢𑀺 𑀅𑀲𑀁𑀓𑀺𑀡𑁆𑀡𑀸𑀦𑀺. 𑀅𑀬𑀜𑁆𑀘 𑀦𑀬𑁄 𑀦𑁂𑀲𑀁 𑀬𑀣𑀸 𑀅𑀢𑀻𑀢𑁂, 𑀏𑀯𑀁 𑀏𑀢𑀭𑀳𑀺 𑀅𑀦𑀸𑀕𑀢𑁂 𑀘𑀸𑀢𑀺 𑀆𑀳 ‘‘𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺 𑀦 𑀲𑀁𑀓𑀺𑀬𑀦𑁆𑀢𑀺 𑀦 𑀲𑀁𑀓𑀺𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 𑀏𑀯 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺. 𑀦 𑀳𑀺 𑀓𑀤𑀸𑀘𑀺 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀳𑀺𑀁𑀲𑀸𑀤𑀺𑀧𑀸𑀧𑀥𑀫𑁆𑀫𑀁 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑁂𑀢𑀻𑀢𑀺 𑀲𑀩𑁆𑀩𑁂𑀲𑀼 ¶ 𑀪𑀽𑀢𑁂𑀲𑀼 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀲𑀓𑀮𑀲𑁆𑀲𑀧𑀺 𑀲𑀢𑁆𑀢𑀓𑀸𑀬𑀲𑁆𑀲 𑀪𑀬𑀸𑀪𑀸𑀯𑀁 𑀤𑁂𑀢𑀺. 𑀅𑀯𑁂𑀭𑀦𑁆𑀢𑀺 𑀯𑁂𑀭𑀸𑀪𑀸𑀯𑀁. 𑀅𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀁. 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑁄𑀲𑀣𑀯𑀕𑁆𑀕𑁄

𑁧-𑁮. 𑀲𑀁𑀔𑀺𑀢𑁆𑀢𑀽𑀧𑁄𑀲𑀣𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁧-𑁪𑁮. 𑀧𑀜𑁆𑀘𑀫𑀲𑁆𑀲 𑀧𑀞𑀫𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁. 𑀙𑀝𑁆𑀞𑁂 (𑀲𑀁. 𑀦𑀺. 𑀝𑀻. 𑁧.𑁧.𑁧𑁬𑁫) 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀗𑁆𑀕𑀁, 𑀧𑀜𑁆𑀘𑀗𑁆𑀕𑀫𑁂𑀯 𑀧𑀜𑁆𑀘𑀗𑁆𑀕𑀺𑀓𑀁, 𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀲𑁆𑀲. 𑀫𑀳𑀢𑀻 𑀤𑀤𑁆𑀤𑀭𑀻 𑀯𑀻𑀡𑀸𑀯𑀺𑀲𑁂𑀲𑁄𑀧𑀺 𑀆𑀢𑀢𑀫𑁂𑀯𑀸𑀢𑀺 ‘‘𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀽’’𑀢𑀺 𑀯𑀺𑀲𑁂𑀲𑀦𑀁 𑀓𑀢𑀁. 𑀏𑀓𑀢𑀮𑀢𑀽𑀭𑀺𑀬𑀁 𑀓𑀼𑀫𑁆𑀪𑀣𑀼𑀦𑀤𑀤𑁆𑀤𑀭𑀺𑀓𑀸𑀤𑀺. 𑀉𑀪𑀬𑀢𑀮𑀁 𑀪𑁂𑀭𑀺𑀫𑀼𑀤𑀺𑀗𑁆𑀕𑀸𑀤𑀺. 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀁 𑀳𑀼𑀢𑁆𑀯𑀸 𑀯𑀺𑀦𑀺𑀩𑀤𑁆𑀥𑀁 𑀆𑀢𑀢𑀯𑀺𑀢𑀢𑀁. 𑀲𑀩𑁆𑀩𑀲𑁄 𑀧𑀭𑀺𑀬𑁄𑀦𑀤𑁆𑀥𑀁 𑀦𑀸𑀫 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀁 𑀧𑀡𑀯𑀸𑀤𑀺 𑀘. 𑀕𑁄𑀫𑀼𑀔𑀻𑀆𑀤𑀻𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀁𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀫𑁆𑀫𑀸𑀤𑀻𑀢𑀺 𑀲𑀫𑁆𑀫𑀢𑀸𑀴𑀓𑀁𑀲𑀢𑀸𑀴𑀲𑀺𑀮𑀸𑀲𑀮𑀸𑀓𑀢𑀸𑀴𑀸𑀤𑀺. 𑀢𑀢𑁆𑀣 𑀲𑀫𑁆𑀫𑀢𑀸𑀴𑀁 𑀦𑀸𑀫 𑀤𑀦𑁆𑀢𑀫𑀬𑀢𑀸𑀴𑀁. 𑀓𑀁𑀲𑀢𑀸𑀴𑀁 𑀮𑁄𑀳𑀫𑀬𑀁. 𑀲𑀺𑀮𑀸𑀫𑀬𑀁 𑀅𑀬𑁄𑀧𑀢𑁆𑀢𑁂𑀦 𑀘 𑀯𑀸𑀤𑀦𑀢𑀸𑀴𑀁 𑀲𑀺𑀮𑀸𑀲𑀮𑀸𑀓𑀢𑀸𑀴𑀁. 𑀲𑀼𑀫𑀼𑀘𑁆𑀙𑀺𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀧𑀝𑀺𑀬𑀢𑁆𑀢𑀲𑁆𑀲. 𑀧𑀫𑀸𑀡𑁂𑀢𑀺 ¶ 𑀦𑀸𑀢𑀺𑀤𑀴𑁆𑀳𑀦𑀸𑀢𑀺𑀲𑀺𑀣𑀺𑀮𑀲𑀗𑁆𑀔𑀸𑀢𑁂 𑀫𑀚𑁆𑀛𑀺𑀫𑁂 𑀫𑀼𑀘𑁆𑀙𑀦𑀸𑀧𑀫𑀸𑀡𑁂. 𑀙𑁂𑀓𑁄𑀢𑀺 𑀧𑀝𑀼 𑀧𑀝𑁆𑀞𑁄. 𑀲𑁄 𑀘𑀲𑁆𑀲 𑀧𑀝𑀼𑀪𑀸𑀯𑁄 𑀫𑀦𑁄𑀳𑀭𑁄𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁄’’𑀢𑀺. 𑀭𑀜𑁆𑀚𑁂𑀢𑀼𑀦𑁆𑀢𑀺 𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀔𑀫𑀢𑁂𑀯𑀸𑀢𑀺 𑀭𑁄𑀘𑀢𑁂𑀯. 𑀦 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀦 𑀢𑀚𑁆𑀚𑁂𑀢𑀺, 𑀲𑁄𑀢𑀲𑀼𑀔𑀪𑀸𑀯𑀢𑁄 𑀧𑀺𑀬𑀸𑀬𑀺𑀢𑀩𑁆𑀩𑁄𑀯 𑀳𑁄𑀢𑀺.

𑀪𑀢𑁆𑀢𑀸𑀭𑀁 𑀦𑀸𑀢𑀺𑀫𑀜𑁆𑀜𑀢𑀻𑀢𑀺 𑀲𑀸𑀫𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀫𑀦𑀲𑀸𑀧𑀺 𑀦 𑀧𑀢𑁆𑀣𑁂𑀢𑀺. 𑀉𑀝𑁆𑀞𑀸𑀳𑀺𑀓𑀸𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀸. 𑀅𑀦𑀮𑀲𑀸𑀢𑀺 𑀦𑀺𑀓𑁆𑀓𑁄𑀲𑀚𑁆𑀚𑀸. 𑀲𑀗𑁆𑀕𑀳𑀺𑀢𑀧𑀭𑀺𑀚𑁆𑀚𑀦𑀸𑀢𑀺 𑀲𑀫𑁆𑀫𑀸𑀦𑀦𑀸𑀤𑀻𑀳𑀺 𑀘𑁂𑀯 𑀙𑀡𑀸𑀤𑀻𑀲𑀼 𑀧𑁂𑀲𑁂𑀢𑀩𑁆𑀩-𑀧𑀺𑀬𑀪𑀡𑁆𑀟𑀸𑀤𑀺𑀧𑀡𑁆𑀡𑀸𑀓𑀸𑀭𑀧𑁂𑀲𑀦𑀸𑀤𑀻𑀳𑀺 𑀘 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸. 𑀇𑀥 𑀧𑀭𑀺𑀚𑀦𑁄 𑀦𑀸𑀫 𑀲𑀸𑀫𑀺𑀓𑀲𑁆𑀲 𑀘𑁂𑀯 ¶ 𑀅𑀢𑁆𑀢𑀦𑁄 𑀘 𑀜𑀸𑀢𑀺𑀚𑀦𑁄. 𑀲𑀫𑁆𑀪𑀢𑀦𑁆𑀢𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀦𑀺 𑀓𑀢𑁆𑀯𑀸 𑀆𑀪𑀢𑀥𑀦𑀁. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀲𑀁𑀔𑀺𑀢𑁆𑀢𑀽𑀧𑁄𑀲𑀣𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀧𑀞𑀫𑀇𑀥𑀮𑁄𑀓𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯-𑁫𑁦. 𑀦𑀯𑀫𑁂 𑀇𑀥𑀮𑁄𑀓𑀯𑀺𑀚𑀬𑀸𑀬𑀸𑀢𑀺 𑀇𑀥𑀮𑁄𑀓𑀯𑀺𑀚𑀺𑀦𑀦𑀢𑁆𑀣𑀸𑀬 𑀅𑀪𑀺𑀪𑀯𑀢𑁆𑀣𑀸𑀬. 𑀬𑁄 𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑀦𑀯𑀲𑁂𑀦 𑀅𑀪𑀺𑀪𑀯𑀢𑀺, 𑀢𑀢𑁄 𑀏𑀯 𑀢𑀤𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀺, 𑀲𑁄 𑀇𑀥𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺 𑀧𑀘𑁆𑀘𑀢𑁆𑀣𑀺𑀓𑀦𑀺𑀕𑁆𑀕𑀡𑁆𑀳𑀦𑀢𑁄 𑀲𑀤𑀢𑁆𑀣𑀲𑀫𑁆𑀧𑀸𑀤𑀦𑀢𑁄 𑀘. 𑀢𑁂𑀦𑀸𑀳 ‘‘𑀅𑀬𑀁𑀲 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀻’’𑀢𑀺. (𑀧𑀲𑀁𑀲𑀸𑀯𑀳𑀢𑁄 𑀢𑀬𑀺𑀤𑀁 𑀧𑀲𑀁𑀲𑀸𑀯𑀳𑀦𑀁 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀇𑀥𑀮𑁄𑀓𑁂 𑀲𑀤𑁆𑀤𑀸𑀦𑀁 𑀘𑀺𑀢𑁆𑀢𑀢𑁄𑀲𑀦𑀯𑀺𑀤𑁆𑀥𑁂𑀬𑁆𑀬𑀪𑀸𑀯𑀸𑀧𑀸𑀤𑀦𑁂𑀦 𑀘 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.) 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑁄𑀢𑀺 𑀬𑀸𑀕𑀼𑀪𑀢𑁆𑀢𑀧𑀘𑀦𑀓𑀸𑀮𑀸𑀤𑀻𑀦𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀲𑀸𑀥𑀼𑀓𑀁 𑀓𑀭𑀡𑁂𑀦 𑀲𑀼𑀝𑁆𑀞𑀼 𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑁄. 𑀧𑀭𑀮𑁄𑀓𑀯𑀺𑀚𑀬𑀸𑀬𑀸𑀢𑀺 𑀧𑀭𑀮𑁄𑀓𑀲𑁆𑀲 𑀯𑀺𑀚𑀺𑀦𑀦𑀢𑁆𑀣𑀸𑀬 𑀅𑀪𑀺𑀪𑀯𑀢𑁆𑀣𑀸𑀬. 𑀬𑁄 𑀳𑀺 𑀲𑀫𑁆𑀧𑀭𑀸𑀬𑀺𑀓𑀁 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑀦𑀯𑀲𑁂𑀦 𑀅𑀪𑀺𑀪𑀯𑀢𑀺, 𑀢𑀢𑁄 𑀏𑀯 𑀢𑀤𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀺, 𑀲𑁄 𑀧𑀭𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀇𑀥𑀮𑁄𑀓𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁄𑀲𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀕𑁄𑀢𑀫𑀻𑀯𑀕𑁆𑀕𑁄

𑁧-𑁩. 𑀕𑁄𑀢𑀫𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁧-𑁫𑁩. 𑀙𑀝𑁆𑀞𑀲𑁆𑀲 ¶ ¶ 𑀧𑀞𑀫𑁂 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁪𑁦𑁨) 𑀕𑁄𑀢𑀫𑀻𑀢𑀺 𑀕𑁄𑀢𑁆𑀢𑀁. 𑀦𑀸𑀫𑀓𑀭𑀡𑀤𑀺𑀯𑀲𑁂 𑀧𑀦𑀲𑁆𑀲𑀸 𑀮𑀤𑁆𑀥𑀲𑀓𑁆𑀓𑀸𑀭𑀸 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀅𑀬𑀁 𑀥𑀻𑀢𑀭𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀻𑀢𑀺 𑀉𑀪𑀬𑀣𑀸𑀧𑀺 𑀫𑀳𑀢𑀻𑀬𑁂𑀯𑀲𑁆𑀲𑀸 𑀧𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀅𑀣𑀲𑁆𑀲𑀸 ‘‘𑀫𑀳𑀸𑀧𑀚𑀸𑀧𑀢𑀻’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂𑀦𑀸𑀳 ‘‘𑀧𑀼𑀢𑁆𑀢𑀧𑀚𑀸𑀬 𑀘𑁂𑀯 𑀥𑀻𑀢𑀼𑀧𑀚𑀸𑀬 𑀘 𑀫𑀳𑀦𑁆𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀸’’𑀢𑀺.

‘‘𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁, 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁;

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸’’𑀢𑀺. (𑀲𑀼. 𑀦𑀺. 𑁯𑁪𑁧; 𑀫𑀳𑀸𑀦𑀺. 𑁧𑁭𑁦) 𑁋

𑀆𑀤𑀺𑀦𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀢𑀁𑀢𑀁𑀧𑀮𑁄𑀪𑀦𑀓𑀺𑀭𑀺𑀬𑀸 𑀓𑀸𑀬𑀯𑀸𑀘𑀸𑀳𑀺 𑀧𑀭𑀓𑁆𑀓𑀫𑀦𑁆𑀢𑀺𑀬𑁄 𑀉𑀓𑁆𑀓𑀡𑁆𑀞𑀦𑁆𑀢𑀽𑀢𑀺 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺 𑀦𑀸𑀫𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸’’𑀢𑀺. 𑀓𑀼𑀡𑀸𑀮𑀤𑀳𑀦𑁆𑀢𑀺 𑀓𑀼𑀡𑀸𑀮𑀤𑀳𑀢𑀻𑀭𑀁. 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀇𑀢𑁆𑀣𑀻𑀦𑀁 𑀤𑁄𑀲𑀤𑀲𑁆𑀲𑀦𑀫𑀼𑀔𑁂𑀦 𑀓𑀸𑀫𑀸𑀦𑀁 𑀯𑁄𑀓𑀸𑀭𑀲𑀁𑀓𑀺𑀮𑁂𑀲𑀯𑀺𑀪𑀸𑀯𑀦𑁂𑀦 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸.

𑀆𑀧𑀸𑀤𑀺𑀓𑀸𑀢𑀺 𑀲𑀁𑀯𑀤𑁆𑀥𑀓𑀸, 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀧𑀸𑀤𑁂𑀲𑀼 𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑁂𑀲𑀼 𑀳𑀢𑁆𑀣𑁂 𑀘 𑀧𑀸𑀤𑁂 𑀘 𑀯𑀟𑁆𑀠𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑀸𑀢𑀺 𑀅𑀢𑁆𑀣𑁄. 𑀧𑁄𑀲𑀺𑀓𑀸𑀢𑀺 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀦𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀸𑀬𑁂𑀢𑁆𑀯𑀸 𑀢𑀼𑀫𑁆𑀳𑁂 𑀧𑁄𑀲𑁂𑀲𑀺. 𑀣𑀜𑁆𑀜𑀁 𑀧𑀸𑀬𑁂𑀲𑀻𑀢𑀺 𑀦𑀦𑁆𑀤𑀓𑀼𑀫𑀸𑀭𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀢𑁄 𑀓𑀢𑀺𑀧𑀸𑀳𑁂𑀦𑁂𑀯 𑀤𑀳𑀭𑁄, 𑀢𑀲𑁆𑀫𑀺𑀁 𑀚𑀸𑀢𑁂 𑀫𑀳𑀸𑀧𑀚𑀸𑀧𑀢𑀻 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀲𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀸𑀢𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀢𑁆𑀢𑀦𑁄 𑀣𑀜𑁆𑀜𑀁 𑀧𑀸𑀬𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀏𑀯𑀫𑀸𑀳. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀜𑁆𑀜𑁂 ¶ 𑀞𑀺𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀅𑀮𑀗𑁆𑀓𑀸𑀭𑀲𑀪𑀸𑀯𑁄. 𑀢𑀢𑁆𑀣 𑀓𑁄𑀘𑀺 𑀢𑀭𑀼𑀡𑁄𑀧𑀺 𑀬𑀼𑀯𑀸 𑀦 𑀳𑁄𑀢𑀺 𑀬𑀣𑀸 𑀅𑀢𑀺𑀢𑀭𑀼𑀡𑁄. 𑀓𑁄𑀘𑀺 𑀬𑀼𑀯𑀸𑀧𑀺 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀦 𑀳𑁄𑀢𑀺 𑀬𑀣𑀸 𑀉𑀧𑀲𑀦𑁆𑀢𑀲𑀪𑀸𑀯𑁄, 𑀆𑀮𑀲𑀺𑀬𑀩𑁆𑀬𑀲𑀦𑀸𑀤𑀻𑀳𑀺 𑀯𑀸 𑀅𑀪𑀺𑀪𑀽𑀢𑁄. 𑀇𑀥 𑀧𑀦 𑀤𑀳𑀭𑁄 ¶ 𑀘𑁂𑀯 𑀬𑀼𑀯𑀸 𑀘 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀉𑀧𑁆𑀧𑀮𑀸𑀤𑀻𑀦𑀺 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀘 𑀮𑁄𑀓𑀲𑀫𑁆𑀫𑀢𑀢𑁆𑀢𑀸 𑀯𑀼𑀢𑁆𑀢𑀸𑀦𑀺.

𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸𑀢𑀺 𑀇𑀤𑀁 𑀧𑀜𑁆𑀘𑀯𑀲𑁆𑀲𑀲𑀢𑀢𑁄 𑀉𑀤𑁆𑀥𑀁 𑀅𑀝𑁆𑀞𑀢𑁆𑀯𑀸 𑀧𑀜𑁆𑀘𑀲𑀼𑀬𑁂𑀯 𑀯𑀲𑁆𑀲𑀲𑀢𑁂𑀲𑀼 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀓𑀸𑀭𑀡𑀦𑀺𑀤𑀲𑁆𑀲𑀦𑀁. 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀕𑁆𑀕𑀳𑀡𑁂𑀦 𑀛𑀸𑀦𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀦 𑀳𑀺 𑀦𑀺𑀚𑁆𑀛𑀸𑀦𑀓𑀸𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑀲𑀫𑁆𑀧𑀢𑁆𑀢𑀺 𑀇𑀚𑁆𑀛𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺𑀆𑀤𑀺𑀦𑀸 𑀘 𑀬𑀁 𑀯𑀼𑀢𑁆𑀢𑀁, 𑀢𑀁 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀦𑀬𑀝𑁆𑀞𑀓𑀣𑀸𑀬𑀫𑁆𑀧𑀺 (𑀘𑀽𑀴𑀯. 𑀅𑀝𑁆𑀞. 𑁪𑁦𑁩) 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀼𑀢𑁆𑀢𑀁.

𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁬𑁧) 𑀧𑀦 ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀢𑁂𑀯𑀺𑀚𑁆𑀚𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀧𑀸𑀢𑀺𑀫𑁄𑀓𑁆𑀔𑁂𑀦 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀲𑀸𑀲𑀦𑀦𑁆𑀢𑀭𑀥𑀸𑀦𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦) ‘‘𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀙 𑀅𑀪𑀺𑀜𑁆𑀜𑀸, 𑀢𑀢𑁄 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀦𑀸𑀕𑀸𑀫𑀺𑀦𑁄, 𑀲𑀓𑀤𑀸𑀕𑀸𑀫𑀺𑀦𑁄, 𑀲𑁄𑀢𑀸𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁.

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁫𑁬) 𑀧𑀦 ‘‘𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀪𑀺𑀓𑁆𑀔𑀽 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀅𑀣 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, 𑀙𑀴𑀪𑀺𑀜𑁆𑀜𑀸 𑀅𑀳𑁂𑀲𑀼𑀁. 𑀢𑀢𑁄 𑀙 𑀅𑀪𑀺𑀜𑁆𑀜𑀸 𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀺𑀁𑀲𑀼. 𑀇𑀤𑀸𑀦𑀺 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀆𑀲𑀯𑀓𑁆𑀔𑀬𑀫𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑀸𑀕𑀸𑀫𑀺𑀨𑀮𑀁, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀧𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘𑁂𑀢𑀁 𑀲𑀩𑁆𑀩𑀁 𑀅𑀜𑁆𑀜𑀫𑀜𑁆𑀜𑀧𑁆𑀧𑀝𑀺𑀯𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀪𑀸𑀡𑀓𑀸𑀦𑀁 𑀫𑀢𑀫𑁂𑀯 𑀆𑀘𑀭𑀺𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀳𑀺 𑀆𑀘𑀭𑀺𑀬𑀲𑁆𑀲𑁂𑀯 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺.

𑀢𑀸𑀦𑀺𑀬𑁂𑀯𑀸𑀢𑀺 ¶ 𑀢𑀸𑀦𑀺𑀬𑁂𑀯 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺. 𑀧𑀭𑀺𑀬𑀢𑁆𑀢𑀺𑀫𑀽𑀮𑀓𑀁 𑀲𑀸𑀲𑀦𑀦𑁆𑀢𑀺 𑀆𑀳 ‘‘𑀦 𑀳𑀺 𑀧𑀭𑀺𑀬𑀢𑁆𑀢𑀺𑀬𑀸 ¶ 𑀅𑀲𑀢𑀺 𑀧𑀝𑀺𑀯𑁂𑀥𑁄 𑀅𑀢𑁆𑀣𑀻’’𑀢𑀺𑀆𑀤𑀺. 𑀧𑀭𑀺𑀬𑀢𑁆𑀢𑀺𑀬𑀸 𑀳𑀺 𑀅𑀦𑁆𑀢𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀬𑀢𑀺, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀅𑀥𑀺𑀕𑀫𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀓𑀺𑀁𑀓𑀸𑀭𑀡𑀸? 𑀅𑀬𑀜𑁆𑀳𑀺 𑀧𑀭𑀺𑀬𑀢𑁆𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀝𑀺𑀧𑀢𑁆𑀢𑀺 𑀅𑀥𑀺𑀕𑀫𑀲𑁆𑀲. 𑀇𑀢𑀺 𑀧𑀝𑀺𑀧𑀢𑁆𑀢𑀺𑀢𑁄𑀧𑀺 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀕𑁄𑀢𑀫𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀤𑀻𑀖𑀚𑀸𑀡𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁪-𑁫𑁫. 𑀘𑀢𑀼𑀢𑁆𑀣𑁂 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁬𑁫) 𑀏𑀓𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀏𑀓𑁂𑀦 𑀓𑁄𑀝𑁆𑀞𑀸𑀲𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬, 𑀯𑀺𑀦𑀺𑀪𑀼𑀜𑁆𑀚𑁂𑀬𑁆𑀬 𑀯𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀻𑀳𑀺 𑀓𑀫𑁆𑀫𑀦𑁆𑀢𑀺 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀧𑀬𑁄𑀚𑁂𑀬𑁆𑀬. 𑀦𑀺𑀥𑀸𑀧𑁂𑀬𑁆𑀬𑀸𑀢𑀺 𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑀁 𑀦𑀺𑀥𑁂𑀢𑁆𑀯𑀸 𑀞𑀧𑁂𑀬𑁆𑀬, 𑀦𑀺𑀤𑀳𑀺𑀢𑁆𑀯𑀸 𑀪𑀽𑀫𑀺𑀕𑀢𑀁 𑀓𑀢𑁆𑀯𑀸 𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀓𑀼𑀮𑀸𑀦𑀜𑁆𑀳𑀺 𑀦 𑀲𑀩𑁆𑀩𑀓𑀸𑀮𑀁 𑀏𑀓𑀲𑀤𑀺𑀲𑀁 𑀯𑀢𑁆𑀢𑀢𑀺, 𑀓𑀤𑀸𑀘𑀺 𑀭𑀸𑀚𑀅𑀕𑁆𑀕𑀺𑀘𑁄𑀭𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀯𑀲𑁂𑀦 𑀆𑀧𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀆𑀧𑀤𑀸𑀲𑀼 𑀉𑀧𑁆𑀧𑀦𑁆𑀦𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀦𑀺𑀥𑀸𑀧𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀓𑀢𑀭𑀁 𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀓𑀼𑀲𑀮𑀁 𑀓𑀸𑀢𑀩𑁆𑀩𑀦𑁆𑀢𑀺? ‘‘𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀁. 𑀢𑀢𑁄 𑀕𑀡𑁆𑀳𑀺𑀢𑁆𑀯𑀸 𑀳𑀺 𑀪𑀺𑀓𑁆𑀔𑀽𑀦𑀫𑁆𑀧𑀺 𑀓𑀧𑀡𑀤𑁆𑀥𑀺𑀓𑀸𑀦𑀫𑁆𑀧𑀺 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀧𑁂𑀲𑀓𑀸𑀭𑀦𑁆𑀳𑀸𑀧𑀺𑀢𑀸𑀤𑀻𑀦𑀫𑁆𑀧𑀺 𑀯𑁂𑀢𑀦𑀁 𑀤𑀸𑀢𑀩𑁆𑀩𑀁. 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦𑀯𑀲𑁂𑀦 𑀘𑁂𑀯, 𑀅𑀥𑀺𑀯𑀢𑁆𑀣𑀤𑁂𑀯𑀢𑀸𑀤𑀻𑀦𑀁 𑀧𑁂𑀢𑀩𑀮𑀺𑀯𑀲𑁂𑀦, 𑀦𑁆𑀳𑀸𑀧𑀺𑀢𑀸𑀤𑀻𑀦𑀁 𑀯𑁂𑀢𑀦𑀯𑀲𑁂𑀦 𑀘 𑀯𑀺𑀦𑀺𑀬𑁄𑀕𑁄𑀧𑀺 𑀉𑀧𑀬𑁄𑀕𑁄 𑀏𑀯.

𑀅𑀧𑁂𑀦𑁆𑀢𑀺 𑀕𑀘𑁆𑀙𑀦𑁆𑀢𑀺, 𑀅𑀧𑁂𑀦𑁆𑀢𑀸 𑀯𑀸 𑀏𑀢𑁂𑀳𑀻𑀢𑀺 𑀅𑀧𑀸𑀬𑀸, 𑀅𑀧𑀸𑀬𑀸 𑀏𑀯 𑀫𑀼𑀔𑀸𑀦𑀺 𑀤𑁆𑀯𑀸𑀭𑀸𑀦𑀻𑀢𑀺 𑀅𑀧𑀸𑀬𑀫𑀼𑀔𑀸𑀦𑀺. 𑀯𑀺𑀦𑀸𑀲𑀤𑁆𑀯𑀸𑀭𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀤𑀻𑀖𑀚𑀸𑀡𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀪𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁬-𑁫𑁮. 𑀙𑀝𑁆𑀞𑁂 ¶ 𑀕𑀩𑁆𑀪𑀯𑀸𑀲𑁄 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀕𑀩𑁆𑀪𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀕𑀩𑁆𑀪𑁄𑀢𑀺 𑀕𑀩𑁆𑀪𑀯𑀸𑀲𑁄’’𑀢𑀺. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀪𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁧𑁦. 𑀧𑀼𑀕𑁆𑀕𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁯-𑁬𑁦. 𑀦𑀯𑀫𑁂 ¶ 𑀤𑀸𑀦𑀁 𑀤𑀤𑀦𑁆𑀢𑀸𑀦𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀸𑀦𑀁. 𑀉𑀧𑀥𑀻 𑀯𑀺𑀧𑀘𑁆𑀘𑀦𑁆𑀢𑀺 𑀏𑀢𑁂𑀦, 𑀉𑀧𑀥𑀻𑀲𑀼 𑀯𑀸 𑀯𑀺𑀧𑀘𑁆𑀘𑀢𑀺, 𑀉𑀧𑀥𑀬𑁄 𑀯𑀸 𑀯𑀺𑀧𑀸𑀓𑀸 𑀏𑀢𑀲𑁆𑀲𑀸𑀢𑀺 𑀉𑀧𑀥𑀺𑀯𑀺𑀧𑀸𑀓𑀁. 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑁂 𑀤𑀺𑀦𑁆𑀦𑀁 𑀯𑀺𑀧𑁆𑀨𑀸𑀭𑀝𑁆𑀞𑀸𑀦𑀁 𑀳𑁄𑀢𑀺, 𑀯𑀺𑀧𑀼𑀮𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀼𑀕𑁆𑀕𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑁄𑀢𑀫𑀻𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁭) 𑁨. 𑀪𑀽𑀫𑀺𑀘𑀸𑀮𑀯𑀕𑁆𑀕𑁄

𑁧-𑁫. 𑀇𑀘𑁆𑀙𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁧-𑁬𑁫. 𑀲𑀢𑁆𑀢𑀫𑀲𑁆𑀲 𑀧𑀞𑀫𑀸𑀤𑀻𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. 𑀧𑀜𑁆𑀘𑀫𑁂 (𑀤𑀻.𑀦𑀺.𑀝𑀻. 𑁨.𑁧𑁭𑁩) 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀼, 𑀧𑀭𑀺𑀓𑀫𑁆𑀫𑀁, 𑀜𑀸𑀡𑀁 𑀯𑀸. 𑀅𑀪𑀺𑀪𑀼 𑀆𑀬𑀢𑀦𑀁 𑀏𑀢𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁, 𑀛𑀸𑀦𑀁. 𑀅𑀪𑀺𑀪𑀯𑀺𑀢𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀆𑀬𑀢𑀦𑀁 𑀏𑀢𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁. 𑀅𑀣 𑀯𑀸 𑀆𑀭𑀫𑁆𑀫𑀡𑀸𑀪𑀺𑀪𑀯𑀦𑀢𑁄 𑀅𑀪𑀺𑀢𑀼 𑀘 𑀢𑀁 𑀆𑀬𑀢𑀦𑀜𑁆𑀘 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀪𑀸𑀯𑀢𑁄 𑀘𑀸𑀢𑀺𑀧𑀺 𑀲𑀲𑀫𑁆𑀧𑀬𑀼𑀢𑁆𑀢𑀚𑁆𑀛𑀸𑀦𑀁 𑀅𑀪𑀺𑀪𑀸𑀬𑀢𑀦𑀁. 𑀢𑁂𑀦𑀸𑀳 ‘‘𑀅𑀪𑀺𑀪𑀯𑀦𑀓𑀸𑀭𑀡𑀸𑀦𑀻’’𑀢𑀺𑀆𑀤𑀺. 𑀢𑀸𑀦𑀺 𑀳𑀻𑀢𑀺 𑀅𑀪𑀺𑀪𑀸𑀬𑀢𑀦𑀲𑀜𑁆𑀜𑀺𑀢𑀸𑀦𑀺 𑀛𑀸𑀦𑀸𑀦𑀺. ‘‘𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀼𑀢𑁆𑀢𑀭𑀺𑀬𑀢𑀸𑀬𑀸’’𑀢𑀺 𑀇𑀤𑀁 𑀉𑀪𑀬𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀣𑀁? 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀅𑀪𑀺𑀪𑀯𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀼𑀢𑁆𑀢𑀭𑀺𑀬𑀢𑀸𑀬 𑀆𑀭𑀫𑁆𑀫𑀡𑀸𑀦𑀺 𑀅𑀪𑀺𑀪𑀯𑀦𑁆𑀢𑀺. 𑀜𑀸𑀡𑀩𑀮𑁂𑀦𑁂𑀯 𑀳𑀺 𑀆𑀭𑀫𑁆𑀫𑀡𑀸𑀪𑀺𑀪𑀯𑀦𑀁 𑀯𑀺𑀬 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑁄𑀧𑀻𑀢𑀺.

𑀧𑀭𑀺𑀓𑀫𑁆𑀫𑀯𑀲𑁂𑀦 ¶ 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻, 𑀦 𑀅𑀧𑁆𑀧𑀦𑀸𑀯𑀲𑁂𑀦. 𑀦 𑀳𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀅𑀧𑁆𑀧𑀦𑀸 𑀅𑀚𑁆𑀛𑀢𑁆𑀢𑀯𑀺𑀲𑀬𑀸 𑀲𑀫𑁆𑀪𑀯𑀢𑀺. 𑀢𑀁 𑀧𑀦 𑀅𑀚𑁆𑀛𑀢𑁆𑀢𑀧𑀭𑀺𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀯𑀺𑀲𑀼𑀤𑁆𑀥𑀫𑁂𑀯 𑀳𑁄𑀢𑀺, 𑀦 𑀩𑀳𑀺𑀤𑁆𑀥𑀸𑀧𑀭𑀺𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀁 𑀯𑀺𑀬 𑀯𑀺𑀲𑀼𑀤𑁆𑀥𑀁.

𑀧𑀭𑀺𑀢𑁆𑀢𑀸𑀦𑀻𑀢𑀺 ¶ 𑀬𑀣𑀸𑀮𑀤𑁆𑀥𑀸𑀦𑀺 𑀲𑀼𑀧𑁆𑀧𑀲𑀭𑀸𑀯𑀫𑀢𑁆𑀢𑀸𑀦𑀺. 𑀢𑁂𑀦𑀸𑀳 ‘‘𑀅𑀯𑀟𑁆𑀠𑀺𑀢𑀸𑀦𑀻’’𑀢𑀺. 𑀧𑀭𑀺𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀯𑀡𑁆𑀡𑀯𑀲𑁂𑀦 𑀆𑀪𑁄𑀕𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑀺𑀢𑁆𑀢𑀯𑀲𑁂𑀦𑁂𑀯 𑀇𑀤𑀁 𑀅𑀪𑀺𑀪𑀸𑀬𑀢𑀦𑀁 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀢𑀸 𑀳𑁂𑀢𑁆𑀣 𑀅𑀪𑀺𑀪𑀯𑀦𑀲𑁆𑀲 𑀓𑀸𑀭𑀡𑀁. 𑀯𑀡𑁆𑀡𑀸𑀪𑁄𑀕𑁂 𑀲𑀢𑀺𑀧𑀺 𑀅𑀲𑀢𑀺𑀧𑀺 𑀅𑀪𑀺𑀪𑀸𑀬𑀢𑀦𑀪𑀸𑀯𑀦𑀸 𑀦𑀸𑀫 𑀢𑀺𑀓𑁆𑀔𑀧𑀜𑁆𑀜𑀲𑁆𑀲𑁂𑀯 𑀲𑀫𑁆𑀪𑀯𑀢𑀺, 𑀦 𑀇𑀢𑀭𑀲𑁆𑀲𑀸𑀢𑀺 𑀆𑀳 ‘‘𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄’’𑀢𑀺. 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀅𑀪𑀺𑀪𑀯𑀦𑀁 𑀲𑀫𑀸𑀧𑀚𑁆𑀚𑀦𑀜𑁆𑀘 𑀉𑀧𑀘𑀸𑀭𑀚𑁆𑀛𑀸𑀦𑀸𑀥𑀺𑀕𑀫𑀲𑀫𑀦𑀦𑁆𑀢𑀭𑀫𑁂𑀯 𑀅𑀧𑁆𑀧𑀦𑀸𑀛𑀸𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻’’𑀢𑀺. 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑀸𑀢𑀺 𑀘 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀸𑀪𑀸𑀯𑀲𑁆𑀲 𑀮𑀓𑁆𑀔𑀡𑀯𑀘𑀦𑀫𑁂𑀢𑀁. 𑀬𑁄 ‘‘𑀔𑀺𑀧𑁆𑀧𑀸𑀪𑀺𑀜𑁆𑀜𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄𑀧𑀺 𑀜𑀸𑀡𑀼𑀢𑁆𑀢𑀭𑀲𑁆𑀲𑁂𑀯 𑀅𑀪𑀺𑀪𑀸𑀬𑀢𑀦𑀪𑀸𑀯𑀦𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂. 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀪𑀸𑀯𑀦𑀁 𑀅𑀧𑁆𑀧𑀦𑀁 𑀦𑁂𑀢𑀺.

𑀏𑀢𑁆𑀣 𑀘 𑀓𑁂𑀘𑀺 ‘‘𑀉𑀧𑁆𑀧𑀦𑁆𑀦𑁂 𑀉𑀧𑀘𑀸𑀭𑀚𑁆𑀛𑀸𑀦𑁂 𑀢𑀁 𑀆𑀭𑀩𑁆𑀪 𑀬𑁂 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀉𑀧𑀘𑀸𑀭𑀚𑁆𑀛𑀸𑀦𑀧𑀓𑁆𑀔𑀺𑀓𑀸 𑀏𑀯, 𑀢𑀤𑀦𑀦𑁆𑀢𑀭𑀜𑁆𑀘 𑀪𑀯𑀗𑁆𑀕𑀧𑀭𑀺𑀯𑀸𑀲𑁂𑀦 𑀉𑀧𑀘𑀸𑀭𑀸𑀲𑁂𑀯𑀦𑀸𑀬 𑀘 𑀯𑀺𑀦𑀸 𑀅𑀧𑁆𑀧𑀦𑀸 𑀳𑁄𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀦 𑀳𑀺 𑀧𑀸𑀭𑀺𑀯𑀸𑀲𑀺𑀓𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀯𑀸𑀭𑁄 𑀇𑀘𑁆𑀙𑀺𑀢𑁄, 𑀦𑀸𑀧𑀺 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀚𑁆𑀛𑀸𑀦𑁂𑀲𑀼 𑀯𑀺𑀬 𑀉𑀧𑀘𑀸𑀭𑀚𑁆𑀛𑀸𑀦𑁂 𑀏𑀓𑀦𑁆𑀢𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀉𑀧𑀘𑀸𑀭𑀚𑁆𑀛𑀸𑀦𑀸𑀥𑀺𑀕𑀫𑀢𑁄 𑀧𑀭𑀁 𑀓𑀢𑀺𑀧𑀬𑀪𑀯𑀗𑁆𑀕𑀘𑀺𑀢𑁆𑀢𑀸𑀯𑀲𑀸𑀦𑁂 𑀅𑀧𑁆𑀧𑀦𑀁 𑀧𑀸𑀧𑀼𑀡𑀦𑁆𑀢𑁄 ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁄. ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑀸’’𑀢𑀺 𑀘 𑀅𑀥𑀺𑀧𑁆𑀧𑀸𑀬𑀺𑀓𑀫𑀺𑀤𑀁 𑀯𑀘𑀦𑀁, 𑀦 𑀦𑀻𑀢𑀢𑁆𑀣𑀁. 𑀅𑀥𑀺𑀧𑁆𑀧𑀸𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀢𑀤𑀸 𑀢𑀣𑀸𑀭𑀽𑀧𑀲𑁆𑀲 𑀆𑀪𑁄𑀕𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀆𑀪𑁄𑀕𑁄 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀯𑀲𑁂𑀦 𑀛𑀸𑀦𑀓𑁆𑀔𑀡𑁂 𑀧𑀯𑀢𑁆𑀢𑀁 𑀅𑀪𑀺𑀪𑀯𑀦𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁨𑁦𑁪) 𑀧𑀦 ‘‘𑀇𑀫𑀺𑀦𑀸 𑀧𑀦𑀲𑁆𑀲 𑀧𑀼𑀩𑁆𑀩𑀪𑁄𑀕𑁄 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 ¶ 𑀢𑀣𑀸 𑀆𑀪𑁄𑀕𑀸𑀪𑀸𑀯𑁂 𑀓𑀲𑁆𑀫𑀸 ‘‘𑀛𑀸𑀦𑀲𑀜𑁆𑀜𑀸𑀬𑀧𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀪𑀺𑀪𑀯𑀦…𑀧𑁂… 𑀅𑀢𑁆𑀣𑀻’’𑀢𑀺.

𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀺𑀧𑀼𑀮𑀧𑁆𑀧𑀫𑀸𑀡𑀸𑀦𑀻𑀢𑀺 𑀅𑀢𑁆𑀣𑁄, 𑀦 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀤𑀺𑀯𑀲𑁂𑀦 𑀯𑀟𑁆𑀠𑀺𑀁 𑀧𑀸𑀧𑀺𑀢𑀸𑀦𑀻𑀢𑀺 𑀢𑀣𑀸𑀯𑀟𑁆𑀠𑀦𑀲𑁆𑀲𑁂𑀯𑁂𑀢𑁆𑀣 𑀅𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀫𑀳𑀦𑁆𑀢𑀸𑀦𑀻’’𑀢𑀺. 𑀪𑀢𑁆𑀢𑀯𑀟𑁆𑀠𑀺𑀢𑀓𑀦𑁆𑀢𑀺 𑀪𑀼𑀜𑁆𑀚𑀦𑀪𑀸𑀚𑀦𑁂 𑀯𑀟𑁆𑀠𑀺𑀢𑁆𑀯𑀸 𑀤𑀺𑀦𑁆𑀦𑀁 𑀪𑀢𑁆𑀢𑀁, 𑀏𑀓𑀸𑀲𑀦𑁂 𑀧𑀼𑀭𑀺𑀲𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀪𑀢𑁆𑀢𑀢𑁄 𑀉𑀧𑀟𑁆𑀠𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀲𑀜𑁆𑀜𑀻, 𑀦 𑀭𑀽𑀧𑀲𑀜𑁆𑀜𑀻 𑀅𑀭𑀽𑀧𑀲𑀜𑁆𑀜𑀻. 𑀲𑀜𑁆𑀜𑀸𑀲𑀻𑀲𑁂𑀦 ¶ 𑀛𑀸𑀦𑀁 𑀯𑀤𑀢𑀺. 𑀭𑀽𑀧𑀲𑀜𑁆𑀜𑀸𑀬 𑀅𑀦𑀼𑀧𑁆𑀧𑀸𑀤𑀦𑀫𑁂𑀯𑁂𑀢𑁆𑀣 𑀅𑀮𑀸𑀪𑀺𑀢𑀸. 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀦𑁆𑀦𑀦𑁆𑀢𑀺 𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀉𑀧𑁆𑀧𑀦𑁆𑀦𑀁. 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁨𑁦𑁪-𑁨𑁦𑁯) 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺, 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 𑀏𑀯𑀁 𑀘𑀢𑀼𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀆𑀕𑀢𑀢𑁆𑀢𑀸 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 ‘‘𑀓𑀲𑁆𑀫𑀸 𑀧𑀦 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀻𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀏𑀯𑀁 𑀅𑀯𑀢𑁆𑀯𑀸 𑀇𑀥 𑀘𑀢𑀽𑀲𑀼𑀧𑀺 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀺𑀢𑀸𑀯 𑀯𑀼𑀢𑁆𑀢𑀸’’𑀢𑀺 𑀘𑁄𑀤𑀦𑀁 𑀓𑀢𑁆𑀯𑀸 ‘‘𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑁄’’𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀢𑀢𑁆𑀣 𑀯𑀸 𑀇𑀥 𑀯𑀸 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑁂𑀯 𑀅𑀪𑀺𑀪𑀯𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀦𑀺𑀬𑀫𑀢𑁄𑀯 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀢𑀢𑁆𑀭𑀸𑀧𑀺 𑀇𑀥𑀸𑀧𑀺 𑀯𑀼𑀢𑁆𑀢𑀸𑀦𑀺, ‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’𑀢𑀺 𑀇𑀤𑀁 𑀧𑀦 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑀫𑀢𑁆𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀲𑀳𑀺𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺 ‘‘𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀣𑀸 ‘‘𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺. 𑀅𑀢𑁆𑀣𑀺 𑀳𑀺 𑀲𑁄 𑀧𑀭𑀺𑀬𑀸𑀬𑁄 ‘‘𑀧𑀭𑀺𑀢𑁆𑀢𑀸𑀦𑀺 𑀅𑀪𑀺𑀪𑀼𑀬𑁆𑀬, 𑀢𑀸𑀦𑀺 𑀘𑁂 𑀓𑀤𑀸𑀘𑀺 𑀯𑀡𑁆𑀡𑀯𑀲𑁂𑀦 𑀆𑀪𑀼𑀚𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 𑀅𑀪𑀺𑀪𑀼𑀬𑁆𑀬𑀸’’𑀢𑀺. 𑀧𑀭𑀺𑀬𑀸𑀬𑀓𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺, 𑀢𑀣𑀸 𑀲𑀳𑀺𑀢𑀸𑀦𑀺. 𑀅𑀢𑁆𑀣𑀺 𑀳𑀺 𑀉𑀪𑀬𑀢𑁆𑀣 𑀅𑀪𑀺𑀪𑀯𑀦𑀯𑀺𑀲𑁂𑀲𑁄𑀢𑀺, 𑀢𑀣𑀸 𑀇𑀥 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀦𑀫𑁆𑀧𑀺 𑀅𑀪𑀺𑀪𑀯𑀦𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀧𑀞𑀫𑀤𑀼𑀢𑀺𑀬𑀅𑀪𑀺𑀪𑀸𑀬𑀢𑀦𑁂𑀲𑀼 𑀧𑀞𑀫𑀯𑀺𑀫𑁄𑀓𑁆𑀔𑁄, 𑀢𑀢𑀺𑀬𑀘𑀢𑀼𑀢𑁆𑀣𑀅𑀪𑀺𑀪𑀸𑀬𑀢𑀦𑁂𑀲𑀼 𑀤𑀼𑀢𑀺𑀬𑀯𑀺𑀫𑁄𑀓𑁆𑀔𑁄, 𑀯𑀡𑁆𑀡𑀸𑀪𑀺𑀪𑀸𑀬𑀢𑀦𑁂𑀲𑀼 𑀢𑀢𑀺𑀬𑀯𑀺𑀫𑁄𑀓𑁆𑀔𑁄 𑀘 𑀅𑀪𑀺𑀪𑀯𑀦𑀧𑁆𑀧𑀯𑀢𑁆𑀢𑀺𑀢𑁄 𑀲𑀗𑁆𑀕𑀳𑀺𑀢𑁄. 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁨𑁦𑁪-𑁨𑁦𑁯, 𑁨𑁪𑁭-𑁨𑁪𑁯) 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀪𑀺𑀪𑀸𑀬𑀢𑀦𑀸𑀦𑀺 ¶ 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀯𑀺𑀫𑁄𑀓𑁆𑀔𑁂 𑀯𑀚𑁆𑀚𑁂𑀢𑁆𑀯𑀸 𑀅𑀪𑀺𑀪𑀸𑀬𑀢𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀘 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀸𑀦𑀺 𑀛𑀸𑀦𑀸𑀦𑀺 𑀯𑀺𑀫𑁄𑀓𑁆𑀔𑀤𑁂𑀲𑀦𑀸𑀬𑀁 𑀯𑀼𑀢𑁆𑀢𑀸𑀦𑀺. 𑀢𑀤𑁂𑀢𑀁 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺 𑀆𑀕𑀢𑀲𑁆𑀲 𑀅𑀪𑀺𑀪𑀸𑀬𑀢𑀦𑀤𑁆𑀯𑀬𑀲𑁆𑀲 𑀅𑀪𑀺𑀥𑀫𑁆𑀫𑁂 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀯𑀘𑀦𑀢𑁄 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀜𑁆𑀘 𑀲𑀩𑁆𑀩𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄 𑀯𑀯𑀢𑁆𑀣𑀸𑀦𑀁 𑀓𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑁄’’𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑁂 𑀓𑀢𑁆𑀣𑀘𑀺𑀧𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺, 𑀢𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑁂𑀦 𑀬𑀁 𑀅𑀜𑁆𑀜𑀳𑁂𑀢𑀼𑀓𑀁, 𑀢𑀁 𑀢𑁂𑀦 𑀳𑁂𑀢𑀼𑀦𑀸 𑀯𑀼𑀢𑁆𑀢𑀁. 𑀬𑀁 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑀳𑁂𑀢𑀼𑀓𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀺𑀢𑀸𑀬 𑀏𑀯 𑀅𑀪𑀺𑀥𑀫𑁆𑀫𑁂 𑀯𑀘𑀦𑀁, 𑀦 𑀢𑀲𑁆𑀲 𑀅𑀜𑁆𑀜𑀁 𑀓𑀸𑀭𑀡𑀁 𑀫𑀕𑁆𑀕𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑀸 𑀘 𑀢𑁂𑀲𑀁 𑀩𑀳𑀺𑀤𑁆𑀥𑀸𑀭𑀽𑀧𑀸𑀦𑀁 𑀯𑀺𑀬 𑀅𑀯𑀺𑀪𑀽𑀢𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑁄 ¶ 𑀘 𑀬𑀣𑀸𑀯𑀼𑀢𑁆𑀢𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀧𑀭𑀺𑀬𑀸𑀬𑀓𑀣𑀸𑀪𑀸𑀯𑀢𑁄. ‘‘𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 𑀦 𑀦𑀻𑀮𑀸𑀤𑀺𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀘𑁂? 𑀢𑀁 𑀦. 𑀦𑀻𑀮𑀸𑀤𑀻𑀲𑀼 𑀓𑀢𑀸𑀥𑀺𑀓𑀸𑀭𑀸𑀦𑀁 𑀦𑀻𑀮𑀸𑀤𑀺𑀪𑀸𑀯𑀲𑁆𑀲𑁂𑀯 𑀅𑀪𑀺𑀪𑀯𑀦𑀓𑀸𑀭𑀡𑀢𑁆𑀢𑀸. 𑀦 𑀳𑀺 𑀢𑁂𑀲𑀁 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀸𑀦𑀁 𑀧𑀭𑀺𑀢𑁆𑀢𑀢𑀸 𑀯𑀸 𑀅𑀧𑁆𑀧𑀫𑀸𑀡𑀢𑀸 𑀯𑀸 𑀅𑀪𑀺𑀪𑀯𑀦𑀓𑀸𑀭𑀡𑀁, 𑀅𑀣 𑀔𑁄 𑀦𑀻𑀮𑀸𑀤𑀺𑀪𑀸𑀯𑁄 𑀏𑀯𑀸𑀢𑀺. 𑀏𑀢𑁂𑀲𑀼 𑀘 𑀧𑀭𑀺𑀢𑁆𑀢𑀸𑀤𑀺𑀓𑀲𑀺𑀡𑀭𑀽𑀧𑁂𑀲𑀼 𑀬𑀁 𑀬𑀁 𑀘𑀭𑀺𑀢𑀲𑁆𑀲 𑀇𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀇𑀚𑁆𑀛𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑀸𑀢𑀺 𑀦𑀻𑀮𑀯𑀡𑁆𑀡𑀦𑀻𑀮𑀦𑀺𑀤𑀲𑁆𑀲𑀦𑀦𑀻𑀮𑀦𑀺𑀪𑀸𑀲𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦. 𑀯𑀡𑁆𑀡𑀯𑀲𑁂𑀦𑀸𑀢𑀺 𑀲𑀪𑀸𑀯𑀯𑀡𑁆𑀡𑀯𑀲𑁂𑀦. 𑀦𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀧𑀲𑁆𑀲𑀺𑀢𑀩𑁆𑀩𑀢𑀸𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀕𑀳𑁂𑀢𑀩𑁆𑀩𑀢𑀸𑀯𑀲𑁂𑀦. 𑀑𑀪𑀸𑀲𑀯𑀲𑁂𑀦𑀸𑀢𑀺 𑀲𑀧𑁆𑀧𑀪𑀸𑀲𑀢𑀸𑀬 𑀅𑀯𑀪𑀸𑀲𑀦𑀯𑀲𑁂𑀦.

𑀇𑀘𑁆𑀙𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 (𑀤𑀻. 𑀦𑀺. 𑀝𑀻. 𑁨.𑁧𑁨𑁯) 𑀓𑁂𑀦𑀝𑁆𑀞𑁂𑀦𑀸𑀢𑀺 𑀓𑁂𑀦 𑀲𑀪𑀸𑀯𑁂𑀦. 𑀲𑀪𑀸𑀯𑁄 𑀳𑀺 𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀅𑀭𑀡𑀻𑀬𑀢𑁄 𑀜𑀸𑀢𑀩𑁆𑀩𑀢𑁄 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀏𑀯 ¶ 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄. 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀓𑀁 𑀲𑀯𑀺𑀲𑁂𑀲𑀁 𑀫𑀼𑀘𑁆𑀘𑀦𑀝𑁆𑀞𑁂𑀦. 𑀏𑀢𑁂𑀦 𑀲𑀢𑀺𑀧𑀺 𑀲𑀩𑁆𑀩𑀲𑁆𑀲𑀧𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀪𑀸𑀯𑁂 𑀬𑁂𑀦 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀢𑀁 𑀛𑀸𑀦𑀁 𑀲𑀸𑀢𑀺𑀲𑀬𑀁 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑁄 𑀪𑀸𑀯𑀦𑀸𑀯𑀺𑀲𑁂𑀲𑁄 𑀤𑀻𑀧𑀺𑀢𑁄. 𑀪𑀯𑀢𑀺 𑀳𑀺 𑀲𑀫𑀸𑀦𑀚𑀸𑀢𑀺𑀬𑀼𑀢𑁆𑀢𑁄𑀧𑀺 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄. 𑀬𑀣𑀸 𑀢𑀁 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲, 𑀢𑀣𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀢𑀸𑀬 𑀏𑀯 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦𑀧𑀺 𑀯𑀺𑀫𑁄𑀓𑁆𑀔𑁄. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑁂 𑀘𑀸’’𑀢𑀺𑀆𑀤𑀺. 𑀅𑀬𑀁 𑀧𑀦𑀢𑁆𑀣𑁄𑀢𑀺 𑀅𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀧𑀘𑁆𑀙𑀺𑀫𑁂 𑀯𑀺𑀫𑁄𑀓𑁆𑀔𑁂 𑀦𑀺𑀭𑁄𑀥𑁂 𑀦𑀢𑁆𑀣𑀺. 𑀓𑁂𑀯𑀮𑁄 𑀯𑀺𑀫𑀼𑀢𑁆𑀢𑀝𑁆𑀞𑁄 𑀏𑀯 𑀢𑀢𑁆𑀣 𑀮𑀩𑁆𑀪𑀢𑀺, 𑀢𑀁 𑀲𑀬𑀫𑁂𑀯 𑀧𑀭𑀢𑁄 𑀯𑀓𑁆𑀔𑀢𑀺.

𑀭𑀽𑀧𑀻𑀢𑀺 𑀬𑁂𑀦𑀸𑀬𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀦 𑀭𑀽𑀧𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀁 𑀬𑀲𑁆𑀲 𑀛𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀯𑀺𑀲𑀺𑀝𑁆𑀞𑀭𑀽𑀧𑀁 𑀳𑁄𑀢𑀺, 𑀬𑁂𑀦 𑀯𑀺𑀲𑀺𑀝𑁆𑀞𑁂𑀦 𑀭𑀽𑀧𑁂𑀦 ‘‘𑀭𑀽𑀧𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬 𑀭𑀽𑀧𑀻𑀲𑀤𑁆𑀤𑀲𑁆𑀲 𑀅𑀢𑀺𑀲𑀬𑀢𑁆𑀣𑀤𑀻𑀧𑀦𑀢𑁄, 𑀢𑀤𑁂𑀯 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀭𑀽𑀧𑀲𑁆𑀲 𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀁 𑀇𑀥 𑀧𑀭𑀫𑀢𑁆𑀣𑀢𑁄 𑀭𑀽𑀧𑀺𑀪𑀸𑀯𑀲𑀸𑀥𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺. 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀭𑀽𑀧𑀸𑀦𑀻𑀢𑀺 𑀧𑀦𑁂𑀢𑁆𑀣 𑀧𑀼𑀭𑀺𑀫𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀻𑀮𑀓𑀲𑀺𑀡𑀸𑀤𑀻𑀦𑀺 𑀭𑀽𑀧𑀸𑀦𑀻’’𑀢𑀺. 𑀭𑀽𑀧𑁂 𑀓𑀲𑀺𑀡𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸 ¶ , 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀲𑀜𑁆𑀜𑀻, 𑀲𑀜𑁆𑀜𑀸𑀲𑀻𑀲𑁂𑀦 𑀛𑀸𑀦𑀁 𑀯𑀤𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀭𑀽𑀧𑀲𑀜𑁆𑀜𑀻. 𑀢𑁂𑀦𑀸𑀳 ‘‘𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻’’𑀢𑀺𑀆𑀤𑀺.

𑀅𑀦𑁆𑀢𑁄 𑀅𑀧𑁆𑀧𑀦𑀸𑀬𑀁 ‘‘𑀲𑀼𑀪’’𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀸𑀪𑁄𑀕𑀯𑀲𑁂𑀦 𑀢𑀣𑀸 𑀅𑀥𑀺𑀫𑀼𑀢𑁆𑀢𑀺 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑁂𑀢𑁆𑀣 𑀢𑀣𑀸𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺𑀘𑁄𑀤𑀦𑀸 𑀅𑀦𑀯𑀝𑁆𑀞𑀸𑀦𑀸 𑀳𑁄𑀢𑀺. 𑀬𑀲𑁆𑀫𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀢𑀢𑁆𑀣 𑀓𑀢𑀸𑀥𑀺𑀓𑀸𑀭𑀸𑀦𑀁 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀢𑀣𑀸 𑀢𑀢𑀺𑀬𑁄 𑀯𑀺𑀫𑁄𑀓𑁆𑀔𑁄 𑀲𑀁𑀯𑀡𑁆𑀡𑀺𑀢𑁄. 𑀬𑀲𑁆𑀫𑀸 𑀧𑀦 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀸 𑀲𑀢𑁆𑀢𑁂 𑀅𑀧𑁆𑀧𑀝𑀺𑀓𑀽𑀮𑀢𑁄 𑀤𑀳𑀦𑁆𑀢𑀺, 𑀢𑁂 𑀲𑀼𑀪𑀢𑁄 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁨𑁧𑁨-𑁨𑁧𑁩) 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸 ‘‘𑀲𑀼𑀪𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀸. 𑀢𑀬𑀺𑀤𑀁 𑀉𑀪𑀬𑀫𑁆𑀧𑀺 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑁄𑀢𑀺 ¶ 𑀅𑀦𑀯𑀲𑁂𑀲𑀢𑁄. 𑀦 𑀳𑀺 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀏𑀓𑀤𑁂𑀲𑁄𑀧𑀺 𑀢𑀢𑁆𑀣 𑀅𑀯𑀲𑀺𑀲𑁆𑀲𑀢𑀺. 𑀯𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀦𑀺𑀭𑁄𑀥𑀺𑀢𑀢𑁆𑀢𑀸. 𑀉𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫 𑀅𑀭𑀺𑀬𑁂𑀳𑁂𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀅𑀭𑀺𑀬𑀨𑀮𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀪𑀸𑀯𑀢𑁄 𑀘.

𑀯𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀭𑀺𑀬𑀯𑁄𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀅𑀦𑀭𑀺𑀬𑀸𑀦𑀁 𑀮𑀸𑀫𑀓𑀸𑀦𑀁 𑀯𑁄𑀳𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑁄. 𑀤𑀺𑀝𑁆𑀞𑀯𑀸𑀤𑀺𑀢𑀸𑀢𑀺 𑀤𑀺𑀝𑁆𑀞𑀁 𑀫𑀬𑀸𑀢𑀺 𑀏𑀯𑀁 𑀯𑀸𑀤𑀺𑀢𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀢𑁆𑀣 𑀘 𑀢𑀁𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀸𑀳𑀺 𑀘𑁂𑀢𑀦𑀸𑀳𑀻’’𑀢𑀺𑀆𑀤𑀺.

𑀅𑀦𑀭𑀺𑀬𑀯𑁄𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 (𑀤𑀻. 𑀦𑀺. 𑀝𑀻. 𑁨.𑁧𑁭𑁨) 𑀲𑀫𑀸𑀕𑀦𑁆𑀢𑀩𑁆𑀩𑀢𑁄, 𑀲𑀫𑀸𑀕𑀘𑁆𑀙𑀢𑀻𑀢𑀺 𑀯𑀸 𑀲𑀫𑀸𑀕𑀫𑁄, 𑀧𑀭𑀺𑀲𑀸. 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑁄 𑀲𑀫𑀸𑀕𑀫𑁄 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀩𑀺𑀫𑁆𑀩𑀺𑀲𑀸𑀭…𑀧𑁂… 𑀲𑀫𑀸𑀕𑀫𑀲𑀤𑀺𑀲𑀁 𑀔𑀢𑁆𑀢𑀺𑀬𑀧𑀭𑀺𑀲𑀦𑁆𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀮𑀩𑁆𑀪𑀢𑁂𑀯 𑀲𑀢𑁆𑀣𑀼 ¶ 𑀔𑀢𑁆𑀢𑀺𑀬𑀧𑀭𑀺𑀲𑀸𑀤𑀺𑀉𑀧𑀲𑀗𑁆𑀓𑀫𑀦𑀁. 𑀆𑀤𑀺𑀢𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀪𑀸𑀲𑀦𑀁 𑀆𑀮𑀸𑀧𑁄, 𑀓𑀣𑀦𑀧𑁆𑀧𑀝𑀺𑀓𑀣𑀦𑀁 𑀲𑀮𑁆𑀮𑀸𑀧𑁄. 𑀥𑀫𑁆𑀫𑀽𑀧𑀲𑀁𑀳𑀺𑀢𑀸 𑀧𑀼𑀘𑁆𑀙𑀸𑀧𑀝𑀺𑀧𑀼𑀘𑁆𑀙𑀸 𑀥𑀫𑁆𑀫𑀲𑀸𑀓𑀘𑁆𑀙𑀸. 𑀲𑀡𑁆𑀞𑀸𑀦𑀁 𑀧𑀝𑀺𑀘𑁆𑀘 𑀓𑀣𑀺𑀢𑀁 𑀲𑀡𑁆𑀞𑀸𑀦𑀧𑀭𑀺𑀬𑀸𑀬𑀢𑁆𑀢𑀸 𑀯𑀡𑁆𑀡-𑀲𑀤𑁆𑀤𑀲𑁆𑀲 ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀯𑀺𑀬. 𑀢𑁂𑀲𑀦𑁆𑀢𑀺 𑀧𑀤𑀁 𑀉𑀪𑀬𑀧𑀤𑀸𑀧𑁂𑀓𑁆𑀔𑀁 ‘‘𑀢𑁂𑀲𑀫𑁆𑀧𑀺 𑀮𑀓𑁆𑀔𑀡𑀲𑀡𑁆𑀞𑀸𑀦𑀁 𑀯𑀺𑀬 𑀲𑀢𑁆𑀣𑀼 𑀲𑀭𑀻𑀭𑀲𑀡𑁆𑀞𑀸𑀦𑀁 𑀢𑁂𑀲𑀁 𑀓𑁂𑀯𑀮𑀁 𑀧𑀜𑁆𑀜𑀸𑀬𑀢𑀺 𑀏𑀯𑀸’’𑀢𑀺. 𑀦𑀸𑀧𑀺 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑁄 𑀪𑀕𑀯𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀙𑀺𑀦𑁆𑀦𑀲𑁆𑀲𑀭𑀸𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀲𑁆𑀲𑀭𑀸. 𑀕𑀕𑁆𑀕𑀭𑀲𑁆𑀲𑀭𑀸𑀢𑀺 𑀚𑀚𑁆𑀚𑀭𑀺𑀢𑀲𑁆𑀲𑀭𑀸. 𑀪𑀸𑀲𑀦𑁆𑀢𑀭𑀦𑁆𑀢𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀪𑀸𑀲𑀸𑀢𑁄 𑀅𑀜𑁆𑀜𑀁 𑀪𑀸𑀲𑀁. 𑀯𑀻𑀫𑀁𑀲𑀸𑀢𑀺 𑀘𑀺𑀦𑁆𑀢𑀦𑀸. 𑀓𑀺𑀫𑀢𑁆𑀣𑀁…𑀧𑁂… 𑀤𑁂𑀲𑁂𑀢𑀻𑀢𑀺 𑀇𑀤𑀁 𑀦𑀦𑀼 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸 𑀥𑀫𑁆𑀫𑁂 𑀓𑀣𑀺𑀢𑁂 𑀢𑁂𑀲𑀁 𑀲𑀸𑀢𑀺𑀲𑀬𑁄 ¶ 𑀧𑀲𑀸𑀤𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁? 𑀬𑁂𑀲𑀁 𑀅𑀢𑁆𑀢𑀸𑀦𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀥𑀫𑁆𑀫𑁂 𑀓𑀣𑀺𑀢𑁂 𑀧𑀲𑀸𑀤𑁄 𑀳𑁄𑀢𑀺, 𑀦 𑀚𑀸𑀦𑀸𑀧𑁂𑀢𑁆𑀯𑀸, 𑀢𑀸𑀤𑀺𑀲𑁂 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀢𑀣𑀸 𑀓𑀭𑁄𑀢𑀺. 𑀢𑀢𑁆𑀣 𑀧𑀬𑁄𑀚𑀦𑀫𑀸𑀳 ‘‘𑀯𑀸𑀲𑀦𑀢𑁆𑀣𑀸𑀬𑀸’’𑀢𑀺. 𑀏𑀯𑀁 𑀲𑀼𑀢𑁄𑀧𑀻𑀢𑀺 𑀏𑀯𑀁 𑀅𑀯𑀺𑀜𑁆𑀜𑀸𑀢𑀤𑁂𑀲𑀓𑁄 𑀅𑀯𑀺𑀜𑁆𑀜𑀸𑀢𑀸𑀕𑀫𑀦𑁄𑀧𑀺 𑀲𑀼𑀢𑁄 𑀥𑀫𑁆𑀫𑁄 𑀅𑀢𑁆𑀢𑀦𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬𑁂𑀯 𑀅𑀦𑀸𑀕𑀢𑁂 𑀧𑀘𑁆𑀘𑀬𑁄 𑀳𑁄𑀢𑀺 𑀲𑀼𑀡𑀦𑁆𑀢𑀲𑁆𑀲.

𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀪𑀽𑀫𑀺𑀘𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 (𑀤𑀻. 𑀦𑀺. 𑀝𑀻. 𑁨.𑁧𑁬𑁭; 𑀲𑀁. 𑀦𑀺. 𑀝𑀻. 𑁨.𑁫.𑁮𑁨𑁨) 𑀉𑀤𑁂𑀦𑀬𑀓𑁆𑀔𑀲𑁆𑀲 𑀘𑁂𑀢𑀺𑀬𑀝𑁆𑀞𑀸𑀦𑁂𑀢𑀺 𑀉𑀤𑁂𑀦𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀆𑀬𑀢𑀦𑀪𑀸𑀯𑁂𑀦 𑀇𑀝𑁆𑀞𑀓𑀸𑀳𑀺 𑀓𑀢𑁂 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀻𑀓𑀢𑀝𑁆𑀞𑀸𑀦𑁂. 𑀓𑀢𑀯𑀺𑀳𑀸𑀭𑁄𑀢𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀓𑀢𑀯𑀺𑀳𑀸𑀭𑁄. 𑀯𑀼𑀘𑁆𑀘𑀢𑀻𑀢𑀺 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 ‘‘𑀉𑀤𑁂𑀦𑀁 𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀢𑀫𑀓𑀸𑀤𑀻𑀲𑀼𑀧𑀻𑀢𑀺 ‘‘𑀕𑁄𑀢𑀫𑀓𑀁 𑀘𑁂𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀏𑀲𑁂𑀯 𑀦𑀬𑁄𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑀪𑀸𑀯𑀁 𑀅𑀢𑀺𑀤𑀺𑀲𑀢𑀺. 𑀢𑀣𑀸 𑀳𑀺 𑀲𑀢𑁆𑀢𑀫𑁆𑀩𑀦𑁆𑀢𑀺 𑀓𑀺𑀓𑀺𑀲𑁆𑀲 𑀭𑀜𑁆𑀜𑁄 𑀥𑀻𑀢𑀭𑁄 𑀲𑀢𑁆𑀢 𑀓𑀼𑀫𑀸𑀭𑀺𑀬𑁄 𑀲𑀁𑀯𑁂𑀕𑀚𑀸𑀢𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀧𑀥𑀸𑀦𑀁 𑀧𑀤𑀳𑀺𑀁𑀲𑀼, 𑀢𑀁 𑀞𑀸𑀦𑀁 ‘‘𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀩𑀳𑀼𑀧𑀼𑀢𑁆𑀢𑀓𑀦𑁆𑀢𑀺 𑀘 𑀩𑀳𑀼𑀧𑀸𑀭𑁄𑀳𑁄 𑀏𑀓𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄, 𑀢𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑀁 𑀤𑁂𑀯𑀢𑀁 𑀩𑀳𑀽 𑀫𑀦𑀼𑀲𑁆𑀲𑀸 𑀧𑀼𑀢𑁆𑀢𑁂 𑀧𑀢𑁆𑀣𑁂𑀦𑁆𑀢𑀺, 𑀢𑀤𑀼𑀧𑀸𑀤𑀸𑀬 𑀢𑀁 𑀞𑀸𑀦𑀁 ‘‘𑀩𑀳𑀼𑀧𑀼𑀢𑁆𑀢𑀓𑀁 𑀘𑁂𑀢𑀺𑀬’’𑀦𑁆𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀸𑀭𑀦𑁆𑀤𑀤𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀯𑀲𑀺𑀢𑀝𑁆𑀞𑀸𑀦𑀁, 𑀘𑀸𑀧𑀸𑀮𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀯𑀲𑀺𑀢𑀝𑁆𑀞𑀸𑀦𑀁, 𑀇𑀢𑀺 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑀤𑁂𑀯𑀢𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀯𑁄𑀳𑀸𑀭𑁂𑀦 𑀯𑁄𑀳𑀭𑀺𑀢𑀸𑀦𑀺, 𑀪𑀕𑀯𑀢𑁄 𑀯𑀺𑀳𑀸𑀭𑁂 𑀓𑀢𑁂𑀧𑀺 𑀢𑀣𑁂𑀯 𑀲𑀜𑁆𑀚𑀸𑀦𑀦𑁆𑀢𑀺. 𑀭𑀫𑀡𑀻𑀬𑀸𑀢𑀺 𑀏𑀢𑁆𑀣 𑀯𑁂𑀲𑀸𑀮𑀺𑀬𑀸 𑀢𑀸𑀯 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀮𑀪𑀧𑀺𑀡𑁆𑀟𑀢𑀸𑀬 𑀭𑀫𑀡𑀻𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀳𑀸𑀭𑀸𑀦𑀁 𑀧𑀦 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑀢𑀸𑀬 𑀦𑀘𑁆𑀘𑀸𑀲𑀦𑁆𑀦𑀢𑀸𑀬 𑀕𑀫𑀦𑀸𑀕𑀫𑀦𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀸𑀓𑀺𑀡𑁆𑀡𑀯𑀺𑀳𑀸𑀭𑀝𑁆𑀞𑀸𑀦𑀢𑀸𑀬 𑀙𑀸𑀬𑀼𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀧𑀯𑀺𑀯𑁂𑀓𑀧𑀢𑀺𑀭𑀽𑀧𑀢𑀸𑀬 𑀘 𑀭𑀫𑀡𑀻𑀬𑀢𑀸 𑀤𑀝𑁆𑀞𑀩𑁆𑀩𑀸.

𑀯𑀟𑁆𑀠𑀺𑀢𑀸𑀢𑀺 ¶ 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸. 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀢𑀺 𑀬𑀣𑀸 ¶ 𑀬𑀼𑀢𑁆𑀢𑀫𑀸𑀚𑀜𑁆𑀜𑀬𑀸𑀦𑀁 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀭𑀳𑀢𑀁 𑀕𑀫𑀺𑀢𑀸. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑁂𑀦 𑀇𑀤𑁆𑀥𑀺𑀯𑀺𑀲𑀬𑀢𑀸𑀬 𑀧𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀼𑀯𑀺𑀲𑁄𑀥𑀺𑀢𑀧𑀭𑀺𑀲𑁆𑀲𑀬𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀢𑀁𑀢𑀁𑀅𑀥𑀺𑀝𑁆𑀞𑀸𑀦𑀬𑁄𑀕𑁆𑀬𑀢𑀸𑀬 𑀞𑀧𑀺𑀢𑀸. 𑀲𑀫𑀦𑁆𑀢𑀢𑁄 𑀘𑀺𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀼𑀧𑀘𑀬𑀁 𑀕𑀫𑀺𑀢𑀸. 𑀢𑁂𑀦𑀸𑀳 ‘‘𑀲𑀼𑀯𑀟𑁆𑀠𑀺𑀢𑀸’’𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀢𑀺 𑀇𑀤𑁆𑀥𑀺𑀪𑀸𑀯𑀦𑀸𑀬 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀲𑀁𑀲𑁂𑀯𑀺𑀢𑀸.

𑀅𑀦𑀺𑀬𑀫𑁂𑀦𑀸𑀢𑀺 ‘‘𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺 𑀅𑀦𑀺𑀬𑀫𑀯𑀘𑀦𑁂𑀦. 𑀦𑀺𑀬𑀫𑁂𑀢𑁆𑀯𑀸𑀢𑀺 ‘‘𑀢𑀣𑀸𑀕𑀢𑀲𑁆𑀲𑀸’’𑀢𑀺 𑀲𑀭𑀽𑀧𑀤𑀲𑁆𑀲𑀦𑁂𑀦 𑀦𑀺𑀬𑀫𑁂𑀢𑁆𑀯𑀸. 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁪𑁦; 𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁪𑁦) 𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑀁 𑀯𑀤𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀧𑀭𑀫𑀸𑀬𑀼 𑀦𑀸𑀫, 𑀓𑀣𑀁 𑀯𑀸 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑀯𑀺𑀲𑁂𑀲𑁂 𑀧𑀼𑀭𑀺𑀫𑀲𑀺𑀤𑁆𑀥𑀪𑀯𑀧𑀢𑁆𑀣𑀦𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀭𑀻𑀭𑀸𑀯𑀬𑀯𑀯𑀡𑁆𑀡𑀲𑀡𑁆𑀞𑀸𑀦𑀧𑁆𑀧𑀫𑀸𑀡𑀸𑀤𑀺𑀯𑀺𑀲𑁂𑀲𑀸 𑀯𑀺𑀬 𑀢𑀁𑀢𑀁𑀕𑀢𑀺𑀦𑀺𑀓𑀸𑀬𑀸𑀤𑀻𑀲𑀼 𑀬𑁂𑀪𑀼𑀬𑁆𑀬𑁂𑀦 𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑁄 𑀕𑀩𑁆𑀪𑀲𑁂𑀬𑁆𑀬𑀓𑀓𑀸𑀫𑀸𑀯𑀘𑀭𑀤𑁂𑀯𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀲𑀼𑀓𑁆𑀓𑀲𑁄𑀡𑀺𑀢𑀉𑀢𑀼𑀪𑁄𑀚𑀦𑀸𑀤𑀺𑀉𑀢𑀼𑀆𑀤𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀽𑀧𑀢𑁆𑀣𑀫𑁆𑀪𑀺𑀢𑁄 𑀯𑀺𑀧𑀸𑀓𑀧𑁆𑀧𑀩𑀦𑁆𑀥𑀲𑁆𑀲 𑀞𑀺𑀢𑀺𑀓𑀸𑀮𑀦𑀺𑀬𑀫𑁄. 𑀲𑁄 𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀬𑀻𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀳𑀚𑀸𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀞𑀧𑀦𑀸𑀓𑀸𑀭𑀯𑀼𑀢𑁆𑀢𑀺𑀢𑀸𑀬 𑀧𑀯𑀢𑁆𑀢𑀦𑀓𑀸𑀦𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀢𑁂𑀲𑀁 𑀔𑀡𑀞𑀺𑀢𑀺𑀬𑀸 𑀏𑀯 𑀓𑀸𑀭𑀡𑀪𑀸𑀯𑁂𑀦 𑀅𑀦𑀼𑀧𑀸𑀮𑀓𑀸𑀦𑀺, 𑀅𑀣 𑀔𑁄 𑀬𑀸𑀯 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀸 𑀅𑀦𑀼𑀧𑀩𑀦𑁆𑀥𑀲𑁆𑀲 𑀅𑀯𑀺𑀘𑁆𑀙𑁂𑀤𑀳𑁂𑀢𑀼𑀪𑀸𑀯𑁂𑀦𑀧𑀺, 𑀢𑀲𑁆𑀫𑀸 𑀆𑀬𑀼𑀳𑁂𑀢𑀼𑀓𑀢𑁆𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀆𑀬𑀼, 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀭𑀫𑀸𑀬𑀽𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀤𑁂𑀯𑀸𑀦𑀁 𑀦𑁂𑀭𑀬𑀺𑀓𑀸𑀦𑀁 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀜𑁆𑀘 𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀁. 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀦 𑀏𑀓𑀦𑁆𑀢𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀫𑁂𑀯, 𑀅𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀧𑁂𑀢𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀦 𑀘𑀺𑀭𑀝𑁆𑀞𑀺𑀢𑀺𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀩𑀳𑀼𑀮𑁂 𑀓𑀸𑀮𑁂 𑀢𑀁𑀓𑀫𑁆𑀫𑀲𑀳𑀺𑀢𑀲𑀦𑁆𑀢𑀸𑀦𑀚𑀦𑀺𑀢𑀲𑀼𑀓𑁆𑀓𑀲𑁄𑀡𑀺𑀢𑀧𑀘𑁆𑀘𑀬𑀸𑀦𑀁 𑀢𑀁𑀫𑀽𑀮𑀓𑀸𑀦𑀜𑁆𑀘 𑀘𑀦𑁆𑀤𑀲𑀽𑀭𑀺𑀬𑀲𑀫𑀯𑀺𑀲𑀫𑀧𑀭𑀺𑀯𑀢𑁆𑀢𑀦𑀸𑀤𑀺𑀚𑀦𑀺𑀢𑀉𑀢𑀼𑀆𑀳𑀸𑀭𑀸𑀤𑀺𑀲𑀫𑀯𑀺𑀲𑀫𑀧𑀘𑁆𑀘𑀬𑀸𑀦𑀜𑁆𑀘 𑀯𑀲𑁂𑀦 𑀘𑀺𑀭𑀸𑀘𑀺𑀭𑀓𑀸𑀮𑀢𑁄 𑀅𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀁, 𑀢𑀲𑁆𑀲 𑀘 𑀬𑀣𑀸 𑀧𑀼𑀭𑀺𑀫𑀲𑀺𑀤𑁆𑀥𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀢𑀁𑀢𑀁𑀕𑀢𑀺𑀦𑀺𑀓𑀸𑀬𑀸𑀤𑀻𑀲𑀼 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀦𑀺𑀬𑀫𑁄 𑀲𑀺𑀤𑁆𑀥𑁄 𑀤𑀲𑁆𑀲𑀦𑀸𑀦𑀼𑀲𑁆𑀲𑀯𑀸𑀤𑀻𑀳𑀺, 𑀢𑀣𑀸 𑀆𑀤𑀺𑀢𑁄 𑀕𑀳𑀡𑀲𑀺𑀤𑁆𑀥𑀺𑀬𑀸. 𑀏𑀯𑀁 𑀢𑀸𑀲𑀼 𑀢𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀲𑀫𑀧𑁆𑀧𑀫𑀸𑀡𑀝𑁆𑀞𑀺𑀢𑀺𑀓𑀸𑀮𑀁 ¶ 𑀤𑀲𑁆𑀲𑀦𑀸𑀦𑀼𑀲𑁆𑀲𑀯𑁂𑀳𑀺 𑀮𑀪𑀺𑀢𑁆𑀯𑀸 𑀢𑀁𑀧𑀭𑀫𑀢𑀁 𑀅𑀚𑁆𑀛𑁄𑀲𑀸𑀬 𑀧𑀯𑀢𑁆𑀢𑀺𑀢𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀆𑀤𑀺𑀢𑁄 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀓𑀫𑁆𑀫𑀁 𑀢𑀸𑀲𑀼 𑀢𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀬𑀣𑀸 𑀢𑀁𑀢𑀁𑀉𑀧𑀧𑀢𑁆𑀢𑀺𑀦𑀺𑀬𑀢𑀯𑀡𑁆𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀢𑁆𑀣𑀁, 𑀏𑀯𑀁 𑀦𑀺𑀬𑀢𑀸𑀬𑀼𑀧𑀭𑀺𑀘𑁆𑀙𑁂𑀤𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁂𑀦 ¶ 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀢𑁆𑀣𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀤𑀸𑀬𑀺𑀦𑁄 𑀓𑀫𑁆𑀫𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀲𑀫𑀢𑁆𑀣𑀢𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀜𑁆𑀘 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀧𑀭𑀺𑀲𑁆𑀲𑀬𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸 𑀧𑀸𑀴𑀺𑀬𑀁 𑀆𑀕𑀢𑀸 𑀏𑀯𑀸𑀢𑀺 𑀇𑀫𑀁 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀅𑀯𑁄𑀘. 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀏𑀢𑁂𑀦 𑀬𑀣𑀸 𑀇𑀤𑁆𑀥𑀺𑀩𑀮𑁂𑀦 𑀚𑀭𑀸𑀬 𑀦 𑀧𑀝𑀺𑀖𑀸𑀢𑁄, 𑀏𑀯𑀁 𑀢𑁂𑀦 𑀫𑀭𑀡𑀲𑁆𑀲𑀧𑀺 𑀦 𑀧𑀝𑀺𑀖𑀸𑀢𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺. ‘‘𑀓𑁆𑀯 𑀲𑀭𑁄 𑀔𑀺𑀢𑁆𑀢𑁄, 𑀓𑁆𑀯 𑀘 𑀦𑀺𑀧𑀢𑀺𑀢𑁄’’𑀢𑀺 𑀅𑀜𑁆𑀜𑀣𑀸 𑀯𑀼𑀝𑁆𑀞𑀺𑀢𑁂𑀦𑀧𑀺 𑀣𑁂𑀭𑀯𑀸𑀤𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀲𑀫𑀢𑁆𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑁄 𑀧𑀦 𑀯𑀼𑀘𑁆𑀘𑀢𑀺…𑀧𑁂… 𑀦𑀺𑀬𑀸𑀫𑀺𑀢’’𑀦𑁆𑀢𑀺.

𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂𑀢𑀺 𑀣𑀽𑀮𑁂 𑀲𑀜𑁆𑀜𑀼𑀧𑁆𑀧𑀸𑀤𑀦𑁂. 𑀣𑀽𑀮𑀲𑀜𑁆𑀜𑀼𑀧𑁆𑀧𑀸𑀤𑀦𑀜𑁆𑀳𑁂𑀢𑀁 ‘‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧’’𑀦𑁆𑀢𑀺 𑀲𑀓𑀮𑀁 𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀬𑀸𑀘𑀦𑀸𑀬, 𑀬𑀤𑀺𑀤𑀁 ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀲𑀫𑀢𑁆𑀣𑀢𑀸𑀯𑀺𑀪𑀸𑀯𑀦𑀁. 𑀑𑀪𑀸𑀲𑁂𑀢𑀺 𑀧𑀸𑀓𑀝𑀯𑀘𑀦𑁂. 𑀧𑀸𑀓𑀝𑀯𑀘𑀦𑀜𑁆𑀳𑁂𑀢𑀁, 𑀬𑀤𑀺𑀤𑀁 𑀧𑀭𑀺𑀬𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁. 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀬𑀣𑀸 𑀓𑀺𑀜𑁆𑀘𑀺 𑀅𑀢𑁆𑀣𑀸𑀦𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀅𑀪𑀺𑀪𑀽𑀢𑀘𑀺𑀢𑁆𑀢𑁄. 𑀲𑁄 𑀧𑀦 𑀅𑀪𑀺𑀪𑀯𑁄 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀅𑀧𑁆𑀧𑀓𑀲𑁆𑀲 𑀉𑀤𑀓𑀲𑁆𑀲 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀺𑀬 𑀅𑀳𑁄𑀲𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄’’𑀢𑀺. 𑀅𑀜𑁆𑀜𑁄𑀢𑀺 𑀣𑁂𑀭𑀢𑁄, 𑀅𑀭𑀺𑀬𑁂𑀳𑀺 𑀯𑀸 𑀅𑀜𑁆𑀜𑁄𑀧𑀺 𑀬𑁄 𑀓𑁄𑀘𑀺 𑀧𑀼𑀣𑀼𑀚𑁆𑀚𑀦𑁄. 𑀧𑀼𑀣𑀼𑀚𑁆𑀚𑀦𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀬𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀓𑀺𑀜𑁆𑀘𑀺 𑀅𑀢𑁆𑀣𑀸𑀦𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀣𑁂𑀭𑁄 𑀪𑀕𑀯𑀢𑀸 𑀓𑀢𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀲𑀩𑁆𑀩𑀲𑁄 𑀦 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀫𑀸𑀭𑁄 𑀳𑀻’’𑀢𑀺𑀆𑀤𑀺.

𑀘𑀢𑁆𑀢𑀸𑀭𑁄 ¶ 𑀯𑀺𑀧𑀮𑁆𑀮𑀸𑀲𑀸𑀢𑀺 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀢𑁂𑀦𑀸𑀢𑀺 𑀬𑀤𑀺𑀧𑀺 𑀇𑀢𑀭𑁂 𑀅𑀝𑁆𑀞 𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀦𑀸, 𑀢𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀦. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀫𑀤𑁆𑀤𑀢𑀻𑀢𑀺 𑀨𑀼𑀲𑀦𑀫𑀢𑁆𑀢𑁂𑀦 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀅𑀜𑁆𑀜𑀣𑀸 𑀢𑁂𑀦 𑀫𑀤𑁆𑀤𑀺𑀢𑁂 𑀲𑀢𑁆𑀢𑀸𑀦𑀁 𑀫𑀭𑀡𑀫𑁂𑀯 𑀲𑀺𑀬𑀸. 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀦𑀦𑀼 𑀏𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑁄𑀢𑀺? 𑀲𑀘𑁆𑀘𑀁 𑀧𑀯𑀺𑀝𑁆𑀞𑁄, 𑀢𑀜𑁆𑀘 𑀔𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀦 𑀯𑀺𑀩𑀸𑀥𑀦𑀸𑀥𑀺𑀧𑁆𑀧𑀸𑀬𑁂𑀦. 𑀯𑀺𑀩𑀸𑀥𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦 𑀇𑀥 ‘‘𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁 𑀳𑀤𑀬𑀫𑀤𑁆𑀤𑀦𑀲𑁆𑀲 𑀅𑀥𑀺𑀓𑀢𑀢𑁆𑀢𑀸. 𑀦𑀺𑀫𑀺𑀢𑁆𑀢𑁄𑀪𑀸𑀲𑀦𑁆𑀢𑀺 𑀏𑀢𑁆𑀣 ‘‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧’’𑀦𑁆𑀢𑀺 𑀲𑀓𑀮𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀬𑀸𑀘𑀦𑀸𑀬 ¶ ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀲𑀜𑁆𑀜𑀼𑀧𑁆𑀧𑀸𑀤𑀦𑀁 𑀦𑀺𑀫𑀺𑀢𑁆𑀢𑀁. 𑀢𑀣𑀸 𑀧𑀦 𑀧𑀭𑀺𑀬𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁 𑀑𑀪𑀸𑀲𑁄. 𑀚𑀸𑀦𑀦𑁆𑀢𑁄𑀬𑁂𑀯𑀸𑀢𑀺 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀪𑀸𑀯𑀁 𑀚𑀸𑀦𑀦𑁆𑀢𑁄𑀬𑁂𑀯. 𑀅𑀢𑁆𑀢𑀦𑁄 𑀅𑀧𑀭𑀸𑀥𑀳𑁂𑀢𑀼𑀢𑁄 𑀲𑀢𑁆𑀢𑀸𑀦𑀁 𑀲𑁄𑀓𑁄 𑀢𑀦𑀼𑀓𑁄 𑀳𑁄𑀢𑀺, 𑀦 𑀩𑀮𑀯𑀸𑀢𑀺 𑀆𑀳 ‘‘𑀤𑁄𑀲𑀸𑀭𑁄𑀧𑀦𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣’’𑀦𑁆𑀢𑀺. 𑀓𑀺𑀁 𑀧𑀦 𑀣𑁂𑀭𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀺𑀁 𑀧𑀘𑁆𑀙𑀸 𑀚𑀸𑀦𑀸𑀢𑀻𑀢𑀺? 𑀦 𑀚𑀸𑀦𑀸𑀢𑀺 𑀲𑀪𑀸𑀯𑁂𑀦, 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀦 𑀚𑀸𑀦𑀸𑀢𑀺.

𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀇𑀥𑀸𑀕𑀢𑁄, 𑀢𑀲𑁆𑀫𑀸, 𑀆𑀦𑀦𑁆𑀤, 𑀕𑀘𑁆𑀙 𑀢𑁆𑀯𑀁 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑀁 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀢𑁂𑀦𑀸𑀳 ‘‘𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀕𑀼𑀡𑀫𑀸𑀭𑀡𑁂𑀦 𑀫𑀸𑀭𑁂𑀢𑀺, 𑀯𑀺𑀭𑀸𑀕𑀯𑀺𑀩𑀦𑁆𑀥𑀦𑁂𑀦 𑀯𑀸 𑀚𑀸𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀁 𑀫𑀸𑀭𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀫𑀸𑀭𑁂𑀢𑀻𑀢𑀺 𑀫𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑀺 𑀯𑀺𑀬 𑀧𑀸𑀧𑀢𑀸𑀬 𑀧𑀸𑀧𑀺𑀫𑀸. 𑀓𑀡𑁆𑀳𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀡𑁆𑀳𑁄. 𑀯𑀺𑀭𑀸𑀕𑀸𑀤𑀺𑀕𑀼𑀡𑀸𑀦𑀁 𑀅𑀦𑁆𑀢𑀓𑀭𑀡𑀢𑁄 𑀅𑀦𑁆𑀢𑀓𑁄. 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀁 𑀧𑀝𑀺𑀧𑀢𑁆𑀢𑀺𑀁 𑀦 𑀫𑀼𑀜𑁆𑀘𑀢𑀻𑀢𑀺 𑀦𑀫𑀼𑀘𑀺. 𑀅𑀢𑁆𑀢𑀦𑁄 𑀫𑀸𑀭𑀧𑀸𑀲𑁂𑀦 𑀧𑀫𑀢𑁆𑀢𑁂 𑀩𑀦𑁆𑀥𑀢𑀺, 𑀧𑀫𑀢𑁆𑀢𑀸 𑀯𑀸 𑀩𑀦𑁆𑀥𑀽 𑀏𑀢𑀲𑁆𑀲𑀸𑀢𑀺 𑀧𑀫𑀢𑁆𑀢𑀩𑀦𑁆𑀥𑀼. 𑀲𑀢𑁆𑀢𑀫𑀲𑀢𑁆𑀢𑀸𑀳𑀢𑁄 𑀧𑀭𑀁 𑀲𑀢𑁆𑀢 𑀅𑀳𑀸𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺 𑀦 𑀧𑀦 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀸𑀤𑀺 𑀯𑀺𑀬 𑀦𑀺𑀬𑀢𑀓𑀺𑀘𑁆𑀘𑀲𑁆𑀲 𑀅𑀝𑁆𑀞𑀫𑀲𑀢𑁆𑀢𑀸𑀳𑀲𑁆𑀲 𑀦𑀸𑀫 𑀮𑀩𑁆𑀪𑀦𑀢𑁄. 𑀲𑀢𑁆𑀢𑀫𑀲𑀢𑁆𑀢𑀸𑀳𑀲𑁆𑀲 𑀳𑀺 𑀧𑀭𑀢𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 ¶ 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀓𑁆𑀓𑀲𑁆𑀲 𑀘 𑀤𑁂𑀯𑀭𑀜𑁆𑀜𑁄 𑀧𑀝𑀺𑀜𑁆𑀜𑀸𑀢𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀦𑁆𑀢𑀁 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀲𑀢𑁆𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀫𑀫 𑀯𑀺𑀲𑀬𑀁 𑀲𑀫𑀢𑀺𑀓𑁆𑀓𑀫𑀸𑀧𑁂𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀤𑁄𑀫𑀦𑀲𑁆𑀲𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀳𑀦𑁆𑀤 𑀤𑀸𑀦𑀸𑀳𑀁 𑀦𑀁 𑀉𑀧𑀸𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀺, 𑀏𑀯𑀫𑀲𑁆𑀲 𑀫𑀦𑁄𑀭𑀣𑁄 𑀅𑀜𑁆𑀜𑀣𑀢𑁆𑀢𑀁 𑀕𑀫𑀺𑀲𑁆𑀲𑀢𑀺, 𑀫𑀫 𑀘 𑀫𑀦𑁄𑀭𑀣𑁄 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀬𑀸𑀘𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺𑀆𑀤𑀺. 𑀢𑀢𑁆𑀣 𑀅𑀚𑁆𑀚𑀸𑀢𑀺 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀤𑀺𑀯𑀲𑀁 𑀲𑀦𑁆𑀥𑀸𑀬𑀸𑀳. 𑀪𑀕𑀯𑀸 𑀘𑀲𑁆𑀲 𑀅𑀢𑀺𑀩𑀦𑁆𑀥𑀦𑀸𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁄𑀧𑀺 𑀢𑀁 𑀅𑀦𑀸𑀯𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀅𑀓𑀸𑀮𑀪𑀸𑀯𑀫𑁂𑀯 𑀧𑀓𑀸𑀲𑁂𑀦𑁆𑀢𑁄 𑀬𑀸𑀘𑀦𑀁 𑀧𑀝𑀺𑀓𑁆𑀔𑀺𑀧𑀺. 𑀢𑁂𑀦𑀸𑀳 ‘‘𑀦 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀺.

𑀫𑀕𑁆𑀕𑀯𑀲𑁂𑀦 𑀩𑁆𑀬𑀢𑁆𑀢𑀸𑀢𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀩𑁆𑀬𑀢𑁆𑀢𑀸. 𑀢𑀣𑁂𑀯 𑀯𑀺𑀦𑀻𑀢𑀸𑀢𑀺 𑀫𑀕𑁆𑀕𑀯𑀲𑁂𑀦𑁂𑀯 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑁂𑀦 𑀯𑀺𑀦𑀻𑀢𑀸. 𑀢𑀣𑀸 𑀯𑀺𑀲𑀸𑀭𑀤𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀲𑀢𑁆𑀣𑀼𑀲𑀸𑀲𑀦𑁂 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀸𑀭𑀤𑀸, 𑀲𑀸𑀭𑀚𑁆𑀚𑀓𑀭𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀕𑀫𑁂𑀦 𑀯𑀺𑀲𑀸𑀭𑀤𑀪𑀸𑀯𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀲𑀼𑀢𑀲𑁆𑀲 𑀯𑀲𑁂𑀦 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀁 𑀲𑀫𑁆𑀪𑀯𑀢𑀺, 𑀢𑀁 𑀇𑀥 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀲𑀼𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀢𑁂𑀧𑀺𑀝𑀓𑀯𑀲𑁂𑀦𑀸’’𑀢𑀺. 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀲𑀫𑀽𑀳𑁄 𑀢𑁂𑀧𑀺𑀝𑀓𑀁 ¶ , 𑀢𑀻𑀡𑀺 𑀯𑀸 𑀧𑀺𑀝𑀓𑀸𑀦𑀺 𑀢𑀺𑀧𑀺𑀝𑀓𑀁, 𑀢𑀺𑀧𑀺𑀝𑀓𑀫𑁂𑀯 𑀢𑁂𑀧𑀺𑀝𑀓𑀁, 𑀢𑀲𑁆𑀲 𑀯𑀲𑁂𑀦. 𑀢𑀫𑁂𑀯𑀸𑀢𑀺 𑀬𑀁 𑀢𑀁 𑀢𑁂𑀧𑀺𑀝𑀓𑀁 𑀲𑁄𑀢𑀩𑁆𑀩𑀪𑀸𑀯𑁂𑀦 ‘‘𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁂𑀯. 𑀥𑀫𑁆𑀫𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁. 𑀥𑀸𑀭𑁂𑀦𑁆𑀢𑀻𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀁 𑀯𑀺𑀬 𑀅𑀯𑀺𑀦𑀲𑁆𑀲𑀦𑁆𑀢𑀁 𑀓𑀢𑁆𑀯𑀸 𑀲𑀼𑀧𑁆𑀧𑀕𑀼𑀡𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀥𑀸𑀭𑁂𑀦𑁆𑀢𑀺 𑀳𑀤𑀬𑁂 𑀞𑀧𑁂𑀦𑁆𑀢𑀺. 𑀇𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀥𑀫𑁆𑀫𑀥𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀯𑁂𑀥𑀥𑀫𑁆𑀫𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀥𑀫𑁆𑀫𑀲𑁆𑀲𑀸𑀢𑀺 𑀫𑀕𑁆𑀕𑀨𑀮𑀥𑀫𑁆𑀫𑀲𑁆𑀲, 𑀦𑀯𑀯𑀺𑀥𑀲𑁆𑀲𑀧𑀺 𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲. 𑀅𑀦𑀼𑀥𑀫𑁆𑀫𑀪𑀽𑀢𑀦𑁆𑀢𑀺 𑀅𑀥𑀺𑀕𑀫𑀸𑀬 𑀅𑀦𑀼𑀭𑀽𑀧𑀥𑀫𑁆𑀫𑀪𑀽𑀢𑀁. 𑀅𑀦𑀼𑀘𑁆𑀙𑀯𑀺𑀓𑀧𑁆𑀧𑀝𑀺𑀧𑀤𑀦𑁆𑀢𑀺 𑀘 𑀢𑀫𑁂𑀯 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀫𑀸𑀳, 𑀙𑀩𑁆𑀩𑀺𑀥𑀸 𑀯𑀺𑀲𑀼𑀤𑁆𑀥𑀺𑀬𑁄 𑀯𑀸. 𑀅𑀦𑀼𑀥𑀫𑁆𑀫𑀦𑁆𑀢𑀺 𑀢𑀲𑁆𑀲𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀝𑀺𑀧𑀤𑀸𑀬 𑀅𑀦𑀼𑀭𑀽𑀧𑀁 𑀅𑀪𑀺𑀲𑀮𑁆𑀮𑁂𑀔𑀺𑀢𑀁 𑀅𑀧𑁆𑀧𑀺𑀙𑀢𑀸𑀤𑀺𑀥𑀫𑁆𑀫𑀁. 𑀘𑀭𑀡𑀲𑀻𑀮𑀸𑀢𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑀲𑀻𑀮𑀸. 𑀅𑀦𑀼𑀫𑀕𑁆𑀕𑀨𑀮𑀥𑀫𑁆𑀫𑁄 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀅𑀦𑀼𑀥𑀫𑁆𑀫𑀸, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀯𑀺𑀧𑀲𑁆𑀲𑀦𑀸. 𑀢𑀲𑁆𑀲𑀸 𑀘𑀭𑀡𑀲𑀻𑀮𑀸. 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀸𑀤𑀁. 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀆𑀘𑀭𑀺𑀬𑁄, 𑀪𑀕𑀯𑀸, 𑀢𑀲𑁆𑀲 𑀯𑀸𑀤𑁄, 𑀘𑀢𑀼𑀲𑀘𑁆𑀘𑀤𑁂𑀲𑀦𑀸.

𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 ¶ 𑀆𑀤𑀺𑀢𑁄 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀧𑀭𑁂 𑀉𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑁂𑀲𑁆𑀲𑀦𑁆𑀢𑀻𑀢𑀺 𑀯𑀸𑀘𑁂𑀲𑁆𑀲𑀦𑁆𑀢𑀺, 𑀧𑀸𑀴𑀺𑀁 𑀲𑀫𑁆𑀫𑀸 𑀧𑀩𑁄𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀚𑀸𑀦𑀸𑀧𑁂𑀲𑁆𑀲𑀦𑁆𑀢𑀺, 𑀲𑀗𑁆𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀓𑀸𑀭𑁂𑀳𑀺 𑀞𑀧𑁂𑀲𑁆𑀲𑀦𑁆𑀢𑀺, 𑀧𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀯𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀺𑀪𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀯𑀺𑀬𑀸𑀢𑀺 𑀆𑀳 ‘‘𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦𑀸’’𑀢𑀺. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀲𑀦𑀺𑀲𑁆𑀲𑀭𑀡𑀁. 𑀬𑀣𑀸 𑀧𑀭𑀯𑀸𑀤𑀁 𑀪𑀜𑁆𑀚𑀺𑀢𑁆𑀯𑀸 𑀲𑀓𑀯𑀸𑀤𑁄 𑀧𑀢𑀺𑀝𑁆𑀞𑀳𑀢𑀺, 𑀏𑀯𑀁 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 𑀬𑀣𑀸𑀥𑀺𑀕𑀢𑀫𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺, 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀩𑁄𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀙 𑀅𑀢𑁆𑀣𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀆𑀤𑀺𑀢𑁄 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭𑁄) ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸’’𑀢𑀺.

𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀁. 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀦𑀯𑀲𑁂𑀲𑀁 𑀲𑀢𑁆𑀣𑀼𑀲𑀸𑀲𑀦𑀪𑀽𑀢𑀁 𑀲𑁂𑀝𑁆𑀞𑀘𑀭𑀺𑀬𑀁. 𑀲𑀫𑀺𑀤𑁆𑀥𑀦𑁆𑀢𑀺 𑀲𑀫𑁆𑀫𑀤𑁂𑀯 𑀯𑀟𑁆𑀠𑀺𑀢𑀁. 𑀛𑀸𑀦𑀲𑁆𑀲𑀸𑀤𑀯𑀲𑁂𑀦𑀸𑀢𑀺 𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑀥𑀺𑀕𑀢𑀚𑁆𑀛𑀸𑀦𑀲𑀼𑀔𑀯𑀲𑁂𑀦. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀦𑁆𑀢𑀺 𑀉𑀴𑀸𑀭𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦 𑀲𑀩𑁆𑀩𑀲𑁄 𑀧𑀭𑀺𑀯𑀼𑀤𑁆𑀥𑀺𑀫𑀼𑀧𑀕𑀢𑀁. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀅𑀪𑀺𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀪𑀺𑀜𑁆𑀜𑀸𑀲𑀫𑁆𑀧𑀤𑀸𑀳𑀺 𑀲𑀸𑀲𑀦𑀸𑀪𑀺𑀯𑀼𑀤𑁆𑀥𑀺𑀬𑀸 ¶ 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀢𑁄. 𑀧𑀢𑀺𑀝𑁆𑀞𑀺𑀢𑀯𑀲𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀦𑀯𑀲𑁂𑀦, 𑀧𑀢𑀺𑀝𑁆𑀞𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀯𑁂𑀥𑀯𑀲𑁂𑀦 𑀩𑀳𑀼𑀦𑁄 𑀚𑀦𑀲𑁆𑀲 𑀳𑀺𑀢𑀦𑁆𑀢𑀺 𑀩𑀸𑀳𑀼𑀚𑀜𑁆𑀜𑀁. 𑀢𑁂𑀦𑀸𑀳 ‘‘𑀫𑀳𑀸𑀚𑀦𑀸𑀪𑀺𑀲𑀫𑀬𑀯𑀲𑁂𑀦𑀸’’𑀢𑀺. 𑀧𑀼𑀣𑀼 𑀧𑀼𑀣𑀼𑀮𑀁 𑀪𑀽𑀢𑀁 𑀚𑀸𑀢𑀁, 𑀧𑀼𑀣𑀼 𑀯𑀸 𑀧𑀼𑀣𑀼𑀢𑁆𑀢𑀁 𑀧𑀢𑁆𑀢𑀦𑁆𑀢𑀺 𑀧𑀼𑀣𑀼𑀪𑀽𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀸…𑀧𑁂... 𑀧𑀢𑁆𑀢’’𑀦𑁆𑀢𑀺. 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀲𑀫𑁆𑀫𑀤𑁂𑀯 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁂𑀦 𑀧𑀯𑁂𑀤𑀺𑀢𑀁.

𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸𑀢𑀺 𑀅𑀬𑀁 𑀓𑀸𑀬𑀸𑀤𑀺𑀯𑀺𑀪𑀸𑀕𑁄 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀤𑀼𑀓𑁆𑀔𑀪𑀸𑀭𑁄 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀳𑀺𑀢𑁄, 𑀇𑀤𑀸𑀦𑀺 𑀧𑀦 𑀦 𑀯𑀳𑀺𑀢𑀩𑁆𑀩𑁄, 𑀏𑀢𑀲𑁆𑀲 𑀅𑀯𑀳𑀦𑀢𑁆𑀣𑀜𑁆𑀳𑀺 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀭𑀺𑀬𑀫𑀕𑁆𑀕𑀲𑀫𑁆𑀪𑀸𑀭𑁄 𑀲𑀫𑁆𑀪𑀢𑁄, 𑀲𑁆𑀯𑀸𑀬𑀁 𑀅𑀭𑀺𑀬𑀫𑀕𑁆𑀕𑁄 𑀧𑀝𑀺𑀯𑀺𑀤𑁆𑀥𑁄. 𑀬𑀢𑁄 𑀇𑀫𑁂 𑀓𑀸𑀬𑀸𑀤𑀬𑁄 𑀅𑀲𑀼𑀪𑀸𑀤𑀺𑀢𑁄 ¶ 𑀲𑀪𑀸𑀯𑀸𑀤𑀺𑀢𑁄 𑀲𑀫𑁆𑀫𑀤𑁂𑀯 𑀧𑀭𑀺𑀜𑁆𑀜𑀸𑀢𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀫𑁆𑀫𑀸𑀲𑀢𑀺𑀁 𑀬𑀢𑀸𑀢𑀣𑀁 𑀯𑀺𑀲𑀬𑁂 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀁 𑀓𑀢𑁆𑀯𑀸. 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀲𑁆𑀲 𑀤𑀼𑀓𑁆𑀔𑀪𑀸𑀭𑀲𑁆𑀲 𑀯𑀳𑀦𑁂 𑀧𑀬𑁄𑀚𑀦𑀪𑀽𑀢𑀁 𑀅𑀢𑁆𑀢𑀳𑀺𑀢𑀁 𑀢𑀸𑀯 𑀩𑁄𑀥𑀺𑀫𑀽𑀮𑁂 𑀏𑀯 𑀧𑀭𑀺𑀲𑀫𑀸𑀧𑀺𑀢𑀁, 𑀧𑀭𑀳𑀺𑀢𑀁 𑀧𑀦 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀯𑀺𑀦𑀬𑀁 𑀧𑀭𑀺𑀲𑀫𑀸𑀧𑀺𑀢𑀩𑁆𑀩𑀁, 𑀢𑀁 𑀇𑀤𑀸𑀦𑀺 𑀫𑀸𑀲𑀢𑁆𑀢𑀬𑁂𑀦𑁂𑀯 𑀧𑀭𑀺𑀲𑀫𑀸𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀸𑀬𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀩𑀼𑀤𑁆𑀥𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀪𑀸𑀕𑁂𑀦 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸. 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑀻𑀢𑀺 𑀆𑀬𑀼𑀦𑁄 𑀚𑀻𑀯𑀺𑀢𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀁 𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀺𑀲𑁆𑀲𑀚𑁆𑀚𑀺. 𑀢𑀁𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀢𑁂𑀦 𑀅𑀪𑀺𑀲𑀗𑁆𑀔𑀭𑀺𑀬𑀫𑀸𑀦𑀁 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 ‘‘𑀦 𑀧𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀞𑀸𑀦𑀫𑀳𑀦𑁆𑀢𑀢𑀸𑀬𑀧𑀺 𑀧𑀯𑀢𑁆𑀢𑀺𑀆𑀓𑀸𑀭𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑁄. 𑀢𑀢𑁆𑀣 𑀞𑀸𑀦𑀫𑀳𑀦𑁆𑀢𑀢𑀸𑀬 𑀪𑀽𑀫𑀺𑀘𑀸𑀮𑀲𑁆𑀲 𑀫𑀳𑀦𑁆𑀢𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸 𑀓𑀺𑀭…𑀧𑁂… 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 𑀚𑀸𑀪𑀺𑀓𑁆𑀔𑁂𑀢𑁆𑀢𑀪𑀽𑀢𑀸 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀯, 𑀦 𑀬𑀸 𑀓𑀸𑀘𑀺. 𑀬𑀸 𑀫𑀳𑀸𑀪𑀺𑀦𑀻𑀳𑀸𑀭𑀫𑀳𑀸𑀪𑀺𑀚𑀸𑀢𑀺𑀆𑀤𑀻𑀲𑀼𑀧𑀺 𑀓𑀫𑁆𑀧𑀺𑀢𑁆𑀣, 𑀢𑀤𑀸𑀧𑀺 𑀢𑀢𑁆𑀢𑀺𑀓𑀸𑀬 𑀏𑀯 𑀓𑀫𑁆𑀧𑀦𑁂 𑀓𑀺𑀁 𑀓𑀸𑀭𑀡𑀁? 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀸𑀯𑁂𑀦 𑀢𑀲𑁆𑀲𑁂𑀯 𑀆𑀤𑀺𑀢𑁄 𑀧𑀭𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸, 𑀧𑀭𑀺𑀕𑁆𑀕𑀳𑀓𑀭𑀡𑀁 𑀘𑀲𑁆𑀲 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀢𑀸𑀯𑀢𑁆𑀢𑀓𑀫𑁂𑀯 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀅𑀳𑁄𑀲𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼, 𑀦𑀺𑀲𑁆𑀲𑀤𑁆𑀤𑀸 𑀳𑁄𑀢𑀺 𑀦𑀺𑀭𑀸𑀓𑀼𑀮𑀸…𑀧𑁂… 𑀫𑀳𑀸𑀲𑀫𑀼𑀤𑁆𑀤𑁄 𑀆𑀪𑀼𑀚𑀢𑀺, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀢𑀻’’𑀢𑀺 (𑀩𑀼. 𑀯𑀁. 𑁨.𑁮𑁪-𑁯𑁧) 𑀘 𑀆𑀤𑀺. 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀙𑀧𑁆𑀧𑀓𑀸𑀭𑀧𑀯𑁂𑀥𑀦𑁂𑀦 𑀅𑀯𑀻𑀢𑀭𑀸𑀕𑁂 𑀪𑀺𑀁𑀲𑁂𑀢𑀻𑀢𑀺 𑀪𑀺𑀁𑀲𑀦𑁄, 𑀲𑁄 𑀏𑀯 𑀪𑀺𑀁𑀲𑀦𑀓𑁄𑀢𑀺 𑀆𑀳 ‘‘𑀪𑀬𑀚𑀦𑀓𑁄’’𑀢𑀺. 𑀤𑁂𑀯𑀪𑁂𑀭𑀺𑀬𑁄𑀢𑀺 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀁. 𑀦 𑀘𑁂𑀢𑁆𑀣 𑀓𑀸𑀘𑀺 𑀪𑁂𑀭𑀻 ‘‘𑀤𑀼𑀦𑁆𑀤𑀼𑀪𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀅𑀣 𑀔𑁄 𑀉𑀧𑁆𑀧𑀸𑀢𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑁄 𑀆𑀓𑀸𑀲𑀕𑀢𑁄 𑀦𑀺𑀕𑁆𑀖𑁄𑀲𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀤𑁂𑀯𑁄’’𑀢𑀺𑀆𑀤𑀺. 𑀤𑁂𑀯𑁄𑀢𑀺 𑀫𑁂𑀖𑁄. 𑀢𑀲𑁆𑀲 𑀳𑀺 𑀕𑀚𑁆𑀚𑀪𑀸𑀯𑁂𑀦 𑀆𑀓𑀸𑀲𑀲𑁆𑀲 𑀯𑀲𑁆𑀲𑀸𑀪𑀸𑀯𑁂𑀦 𑀲𑀼𑀓𑁆𑀔𑀕𑀚𑁆𑀚𑀺𑀢𑀲𑀜𑁆𑀜𑀺𑀢𑁂 𑀲𑀤𑁆𑀤𑁂 𑀦𑀺𑀘𑁆𑀙𑀭𑀦𑁆𑀢𑁂 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀻’’𑀢𑀺.

𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀦𑁆𑀢𑀺 ¶ ‘‘𑀏𑀯𑀁 𑀘𑀺𑀭𑀢𑀭𑀁 𑀓𑀸𑀮𑀁 𑀯𑀳𑀺𑀢𑁄 𑀅𑀬𑀁 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀤𑀼𑀓𑁆𑀔𑀪𑀸𑀭𑁄, 𑀇𑀤𑀸𑀦𑀺 𑀦 𑀘𑀺𑀭𑀲𑁆𑀲𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀪𑀕𑀯𑀸 𑀲𑀪𑀸𑀯𑁂𑀦𑁂𑀯 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀏𑀯𑀁 ¶ 𑀧𑀦 𑀉𑀤𑀸𑀦𑁂𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀼𑀮𑀻𑀬𑀢𑀻𑀢𑀺 𑀢𑀼𑀮𑀦𑁆𑀢𑀺 𑀢𑀼𑀮-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀮𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀣𑀸 𑀳𑀺 𑀢𑀁 𑀧𑀭𑀺𑀢𑁄 𑀔𑀡𑁆𑀟𑀺𑀢𑀪𑀸𑀯𑁂𑀦 ‘‘𑀧𑀭𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀢𑁄 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀯𑀺𑀧𑀼𑀮𑀨𑀮𑀢𑀸𑀬 𑀘 𑀦 𑀢𑀼𑀮𑀁 𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀧𑀼𑀩𑁆𑀩𑁂 𑀅𑀯𑀺𑀲𑁂𑀲𑀢𑁄 𑀫𑀳𑀕𑁆𑀕𑀢𑀁 ‘‘𑀅𑀢𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀭𑀽𑀧𑀸𑀯𑀘𑀭𑀢𑁄 𑀅𑀭𑀽𑀧𑀲𑁆𑀲 𑀲𑀸𑀢𑀺𑀲𑀬𑀸𑀦𑀺 𑀯𑀺𑀚𑁆𑀚𑀦𑁆𑀢𑀻𑀢𑀺 𑀅𑀭𑀽𑀧𑀸𑀯𑀘𑀭𑀁 ‘‘𑀅𑀢𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀁 𑀇𑀢𑀭𑀜𑁆𑀘 ‘‘𑀢𑀼𑀮’’𑀦𑁆𑀢𑀺. 𑀅𑀧𑁆𑀧𑀯𑀺𑀧𑀸𑀓𑀦𑁆𑀢𑀺 𑀢𑀻𑀲𑀼𑀧𑀺 𑀓𑀫𑁆𑀫𑁂𑀲𑀼 𑀬𑀁 𑀢𑀦𑀼𑀯𑀺𑀧𑀸𑀓𑀁 𑀳𑀻𑀦𑀁, 𑀢𑀁 𑀢𑀼𑀮𑀁. 𑀩𑀳𑀼𑀯𑀺𑀧𑀸𑀓𑀦𑁆𑀢𑀺 𑀬𑀁 𑀫𑀳𑀸𑀯𑀺𑀧𑀸𑀓𑀁 𑀧𑀡𑀻𑀢𑀁, 𑀢𑀁 𑀅𑀢𑀼𑀮𑀁. 𑀬𑀁 𑀧𑀦𑁂𑀢𑁆𑀣 𑀫𑀚𑁆𑀛𑀺𑀫𑀁, 𑀢𑀁 𑀳𑀻𑀦𑀁 𑀉𑀓𑁆𑀓𑀝𑁆𑀞𑀦𑁆𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀲𑀼𑀧𑀺 𑀪𑀸𑀕𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀳𑀻𑀦𑀢𑁆𑀢𑀺𑀓𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁪) 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀅𑀧𑁆𑀧𑀩𑀳𑀼𑀯𑀺𑀧𑀸𑀓𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 𑀢𑀼𑀮𑀸𑀢𑀼𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀲𑀫𑁆𑀪𑀯𑀳𑁂𑀢𑀼𑀪𑀽𑀢’’𑀦𑁆𑀢𑀺. 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄𑀢𑀺 𑀲𑀲𑀦𑁆𑀢𑀸𑀦𑀥𑀫𑁆𑀫𑁂𑀲𑀼 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑁄𑀘𑀭𑀸𑀲𑁂𑀯𑀦𑀸𑀬 𑀘 𑀦𑀺𑀭𑀢𑁄. 𑀲𑀯𑀺𑀧𑀸𑀓𑀫𑁆𑀧𑀺 𑀲𑀫𑀸𑀦𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀤𑀸𑀬𑀺𑀓𑀫𑁆𑀫𑀁 𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁, 𑀦 𑀘 𑀢𑀁 𑀓𑀸𑀫𑀸𑀤𑀺𑀪𑀯𑀸𑀪𑀺𑀲𑀗𑁆𑀔𑀸𑀭𑀓𑀦𑁆𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀫𑁆𑀪𑀯’’𑀦𑁆𑀢𑀺 𑀯𑀢𑁆𑀯𑀸 ‘‘𑀪𑀯𑀲𑀗𑁆𑀔𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀲𑁆𑀲𑀚𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑀺. 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀢𑁆𑀢𑀸 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀪𑀺𑀦𑁆𑀤𑀻𑀢𑀺 𑀓𑀺𑀮𑁂𑀲𑀪𑁂𑀤𑀲𑀳𑀪𑀸𑀯𑀺𑀓𑀫𑁆𑀫𑁄𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀢𑀤𑀼𑀪𑀬𑀲𑁆𑀲 𑀓𑀸𑀭𑀡𑀫𑀯𑁄𑀘 ‘‘𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄’’𑀢𑀺.

𑀧𑀞𑀫𑀯𑀺𑀓𑀧𑁆𑀧𑁂 𑀅𑀯𑀲𑀚𑁆𑀚𑀦𑀫𑁂𑀯 𑀯𑀼𑀢𑁆𑀢𑀁, 𑀏𑀢𑁆𑀣 𑀅𑀯𑀲𑀚𑁆𑀚𑀦𑀸𑀓𑀸𑀭𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀻𑀭𑁂𑀦𑁆𑀢𑁄𑀢𑀺 ‘‘𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁦) 𑀯𑀻𑀫𑀁𑀲𑀦𑁆𑀢𑁄. ‘‘𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀪𑀯𑀲𑀗𑁆𑀔𑀸𑀭𑀲𑁆𑀲 𑀅𑀯𑀲𑀚𑁆𑀚𑀦𑀸𑀓𑀸𑀭𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀏𑀯𑀦𑁆𑀢𑀺𑀆𑀤𑀺𑀦𑀸 𑀧𑀦 𑀉𑀤𑀸𑀦𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀆𑀤𑀺𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑀯𑀲𑁂𑀦 𑀤𑀲𑁆𑀲𑁂𑀢𑀺.

𑀬𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁨.𑁧𑁭𑁧) 𑀓𑀭𑀡𑁂, 𑀅𑀥𑀺𑀓𑀭𑀡𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁂𑀦 𑀲𑀫𑀬𑁂𑀦, 𑀬𑀲𑁆𑀫𑀺𑀁 𑀯𑀸 𑀲𑀫𑀬𑁂’’𑀢𑀺. 𑀉𑀓𑁆𑀔𑁂𑀧𑀓𑀯𑀸𑀢𑀸𑀢𑀺 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 ¶ 𑀔𑁂𑀧𑀓𑀯𑀸𑀢𑀸. 𑀲𑀝𑁆𑀞𑀺…𑀧𑁂… 𑀩𑀳𑀮𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀯𑀸𑀢𑀲𑁆𑀲 𑀉𑀩𑁆𑀩𑁂𑀥𑀧𑁆𑀧𑀫𑀸𑀡𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ¶ , 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀧𑀦 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑁆𑀧𑀫𑀸𑀡𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑁆𑀧𑀫𑀸𑀡𑀫𑁆𑀧𑀺 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀢𑀺𑀬𑁂𑀯. 𑀆𑀓𑀸𑀲𑁂𑀢𑀺 𑀧𑀼𑀩𑁆𑀩𑁂 𑀯𑀸𑀢𑁂𑀦 𑀧𑀢𑀺𑀝𑁆𑀞𑀺𑀢𑀸𑀓𑀸𑀲𑁂. 𑀧𑀼𑀦 𑀯𑀸𑀢𑁄𑀢𑀺 𑀉𑀓𑁆𑀔𑁂𑀧𑀓𑀯𑀸𑀢𑁂 𑀢𑀣𑀸 𑀓𑀢𑁆𑀯𑀸 𑀯𑀺𑀕𑀢𑁂 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑁄 𑀧𑀼𑀦 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀬𑀣𑀸 𑀢𑀁 𑀉𑀤𑀓𑀁 𑀦 𑀪𑀲𑁆𑀲𑀢𑀺, 𑀏𑀯𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀁 𑀆𑀩𑀦𑁆𑀥𑀦𑀯𑀺𑀢𑀸𑀦𑀯𑀲𑁂𑀦 𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀢𑁄 𑀉𑀤𑀓𑀁 𑀉𑀕𑁆𑀕𑀘𑁆𑀙𑀢𑀻𑀢𑀺 𑀢𑀢𑁄 𑀆𑀩𑀦𑁆𑀥𑀺𑀢𑁆𑀯𑀸 𑀕𑀳𑀡𑀢𑁄 𑀢𑁂𑀦 𑀯𑀸𑀢𑁂𑀦 𑀉𑀝𑁆𑀞𑀸𑀧𑀺𑀢𑀁 𑀉𑀤𑀓𑀁 𑀉𑀕𑁆𑀕𑀘𑁆𑀙𑀢𑀺 𑀉𑀧𑀭𑀺 𑀕𑀘𑁆𑀙𑀢𑀺. 𑀳𑁄𑀢𑀺𑀬𑁂𑀯𑀸𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀳𑁄𑀢𑀺𑀬𑁂𑀯. 𑀩𑀳𑀼𑀪𑀸𑀯𑁂𑀦𑀸𑀢𑀺 𑀫𑀳𑀸𑀧𑀣𑀯𑀺𑀬𑀸 𑀫𑀳𑀦𑁆𑀢𑀪𑀸𑀯𑁂𑀦. 𑀲𑀓𑀮𑀸 𑀳𑀺 𑀫𑀳𑀸𑀧𑀣𑀯𑀻 𑀢𑀤𑀸 𑀑𑀕𑁆𑀕𑀘𑁆𑀙𑀢𑀺 𑀘 𑀉𑀕𑁆𑀕𑀘𑁆𑀙𑀢𑀺 𑀘, 𑀢𑀲𑁆𑀫𑀸 𑀓𑀫𑁆𑀧𑀦𑀁 𑀦 𑀧𑀜𑁆𑀜𑀸𑀬𑀢𑀺.

𑀇𑀚𑁆𑀛𑀦𑀲𑁆𑀲𑀸𑀢𑀺 𑀇𑀘𑁆𑀙𑀺𑀢𑀢𑁆𑀣𑀲𑀺𑀚𑁆𑀛𑀦𑀲𑁆𑀲 𑀅𑀦𑀼𑀪𑀯𑀺𑀢𑀩𑁆𑀩𑀲𑁆𑀲 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀆𑀤𑀺𑀓𑀲𑁆𑀲. 𑀧𑀭𑀺𑀢𑁆𑀢𑀸𑀢𑀺 𑀧𑀝𑀺𑀮𑀤𑁆𑀥𑀫𑀢𑁆𑀢𑀸 𑀦𑀸𑀢𑀺𑀲𑀼𑀪𑀸𑀯𑀺𑀢𑀸. 𑀢𑀣𑀸 𑀘 𑀪𑀸𑀯𑀦𑀸 𑀩𑀮𑀯𑀢𑀻 𑀦 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀩𑁆𑀩𑀮𑀸’’𑀢𑀺. 𑀲𑀜𑁆𑀜𑀸𑀲𑀻𑀲𑁂𑀦 𑀳𑀺 𑀪𑀸𑀯𑀦𑀸 𑀯𑀼𑀢𑁆𑀢𑀸. 𑀅𑀧𑁆𑀧𑀫𑀸𑀡𑀸𑀢𑀺 𑀧𑀕𑀼𑀡𑀸 𑀲𑀼𑀪𑀸𑀯𑀺𑀢𑀸. 𑀲𑀸 𑀳𑀺 𑀣𑀺𑀭𑀸 𑀤𑀴𑁆𑀳𑀢𑀭𑀸 𑀳𑁄𑀢𑀻𑀢𑀺 𑀆𑀳 ‘‘𑀩𑀮𑀯𑀸’’𑀢𑀺. ‘‘𑀧𑀭𑀺𑀢𑁆𑀢𑀸 𑀧𑀣𑀯𑀻𑀲𑀜𑁆𑀜𑀸, 𑀅𑀧𑁆𑀧𑀫𑀸𑀡𑀸 𑀆𑀧𑁄𑀲𑀜𑁆𑀜𑀸’’𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀆𑀧𑁄𑀲𑀜𑁆𑀜𑀸𑀬 𑀧𑀦 𑀲𑀼𑀪𑀸𑀯𑀺𑀢𑀸𑀬 𑀧𑀣𑀯𑀻𑀓𑀫𑁆𑀧𑁄 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀯𑁂𑀚𑁂𑀦𑁆𑀢𑁄 𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀢𑁆𑀢𑀁 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁, 𑀯𑀻𑀫𑀁𑀲𑀦𑁆𑀢𑁄 𑀯𑀸 𑀢𑀸𑀯𑀤𑁂𑀯 𑀲𑀫𑀥𑀺𑀕𑀢𑀁 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑀁. 𑀲𑁄 𑀓𑀺𑀭𑀸𑀬𑀲𑁆𑀫𑀸 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁭𑁧) 𑀔𑀼𑀭𑀕𑁆𑀕𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀬𑁂𑀦 𑀧𑀩𑁆𑀩𑀚𑀺𑀢𑀤𑀺𑀯𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑁂𑀚𑀬𑀦𑁆𑀢𑁄 𑀧𑀸𑀲𑀸𑀤𑁄 𑀓𑀫𑁆𑀧𑀺𑀢𑀧𑀼𑀩𑁆𑀩𑁄’’𑀢𑀺. 𑀢𑀢𑁄 ‘‘𑀦𑀢𑁆𑀣𑀺 𑀓𑁄𑀘𑀻’’𑀢𑀺 𑀜𑀢𑁆𑀯𑀸 ‘‘𑀅𑀳𑀁 𑀓𑀫𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀜𑁆𑀜𑀸𑀩𑀮𑁂𑀦 𑀯𑁂𑀚𑀬𑀦𑁆𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀓𑀫𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀲𑀓𑁆𑀓𑀲𑁆𑀲 𑀦𑀸𑀝𑀓𑀺𑀢𑁆𑀣𑀺𑀬𑁄 𑀆𑀳𑀁𑀲𑀼 𑁋 ‘‘𑀧𑀼𑀢𑁆𑀢 𑀲𑀗𑁆𑀖𑀭𑀓𑁆𑀔𑀺𑀢, 𑀢𑁆𑀯𑀁 𑀧𑀽𑀢𑀺𑀕𑀦𑁆𑀥𑁂𑀦𑁂𑀯 𑀲𑀻𑀲𑁂𑀦 𑀯𑁂𑀚𑀬𑀦𑁆𑀢𑀁 𑀓𑀫𑁆𑀧𑁂𑀢𑀼𑀁 𑀇𑀘𑁆𑀙𑀲𑀺, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀢𑀸𑀢, 𑀧𑀸𑀲𑀸𑀤𑁄, 𑀓𑀣𑀁 𑀓𑀫𑁆𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺.

𑀲𑀸𑀫𑀡𑁂𑀭𑁄 ‘‘𑀇𑀫𑀸 𑀤𑁂𑀯𑀢𑀸 𑀫𑀬𑀸 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑀺, 𑀅𑀳𑀁 𑀔𑁄 𑀧𑀦 𑀆𑀘𑀭𑀺𑀬𑀁 𑀦𑀸𑀮𑀢𑁆𑀣𑀁, 𑀓𑀳𑀁 𑀦𑀼 𑀔𑁄 𑀫𑁂 𑀆𑀘𑀭𑀺𑀬𑁄 𑀲𑀸𑀫𑀼𑀤𑁆𑀤𑀺𑀓𑀫𑀳𑀸𑀦𑀸𑀕𑀢𑁆𑀣𑁂𑀭𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀮𑁂𑀡𑀁 𑀫𑀸𑀧𑁂𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 ¶ 𑀦𑀺𑀲𑀺𑀦𑁆𑀦𑁄’’𑀢𑀺 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀦𑀁 𑀣𑁂𑀭𑁄, ‘‘𑀢𑀸𑀢 𑀲𑀗𑁆𑀖𑀭𑀓𑁆𑀔𑀺𑀢, 𑀅𑀲𑀺𑀓𑁆𑀔𑀺𑀢𑁆𑀯𑀸𑀯 𑀬𑀼𑀤𑁆𑀥𑀁 𑀧𑀯𑀺𑀝𑁆𑀞𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀦𑀸𑀲𑀓𑁆𑀔𑀺, 𑀢𑀸𑀢, 𑀯𑁂𑀚𑀬𑀦𑁆𑀢𑀁 𑀓𑀫𑁆𑀧𑁂𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. 𑀆𑀘𑀭𑀺𑀬𑀁, 𑀪𑀦𑁆𑀢𑁂, 𑀦𑀸𑀮𑀢𑁆𑀣𑀦𑁆𑀢𑀺. 𑀅𑀣 𑀦𑀁 𑀣𑁂𑀭𑁄, ‘‘𑀢𑀸𑀢, 𑀢𑀼𑀫𑁆𑀳𑀸𑀤𑀺𑀲𑁂 𑀅𑀓𑀫𑁆𑀧𑁂𑀦𑁆𑀢𑁂 𑀅𑀜𑁆𑀜𑁄 𑀓𑁄 𑀓𑀫𑁆𑀧𑁂𑀲𑁆𑀲𑀢𑀺, 𑀤𑀺𑀝𑁆𑀞𑀧𑀼𑀩𑁆𑀩𑀁 𑀢𑁂, 𑀢𑀸𑀢, 𑀉𑀤𑀓𑀧𑀺𑀝𑁆𑀞𑁂 𑀕𑁄𑀫𑀬𑀔𑀡𑁆𑀟𑀁 𑀧𑀺𑀮𑀯𑀦𑁆𑀢𑀁, 𑀢𑀸𑀢, 𑀓𑀧𑀮𑁆𑀮𑀧𑀽𑀯𑀁 𑀧𑀘𑁆𑀘𑀦𑁆𑀢𑀁 𑀅𑀦𑁆𑀢𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀇𑀫𑀺𑀦𑀸 𑀑𑀧𑀫𑁆𑀫𑁂𑀦 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀯𑀝𑁆𑀝𑀺𑀲𑁆𑀲𑀢𑀺, 𑀪𑀦𑁆𑀢𑁂, 𑀏𑀢𑁆𑀢𑀓𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀧𑀸𑀲𑀸𑀤𑁂𑀦 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀉𑀤𑀓𑀁 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 ¶ 𑀯𑁂𑀚𑀬𑀦𑁆𑀢𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀤𑁂𑀯𑀥𑀻𑀢𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀓𑀯𑀸𑀭𑀁 𑀮𑀚𑁆𑀚𑀺𑀢𑁆𑀯𑀸 𑀕𑀢𑁄, 𑀧𑀼𑀦𑀧𑀺 𑀲𑀸𑀫𑀡𑁂𑀭𑁄 𑀏𑀢𑀺, 𑀧𑀼𑀦𑀧𑀺 𑀏𑀢𑀻’’𑀢𑀺 𑀯𑀤𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀫𑀸 𑀫𑀬𑁆𑀳𑀁 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑀬𑀺𑀢𑁆𑀣, 𑀇𑀤𑀸𑀦𑀺 𑀢𑁂𑀦 𑀆𑀘𑀭𑀺𑀬𑁄 𑀮𑀤𑁆𑀥𑁄 𑀔𑀡𑁂𑀦 𑀧𑀸𑀲𑀸𑀤𑀁 𑀓𑀫𑁆𑀧𑁂𑀲𑁆𑀲𑀢𑀻’’𑀢𑀺 𑀆𑀳. 𑀲𑀸𑀫𑀡𑁂𑀭𑁄𑀧𑀺 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀧𑀸𑀲𑀸𑀤𑀣𑀽𑀧𑀺𑀓𑀁 𑀧𑀳𑀭𑀺, 𑀧𑀸𑀲𑀸𑀤𑁄 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀑𑀡𑀫𑀢𑀺. 𑀤𑁂𑀯𑀢𑀸 ‘‘𑀧𑀢𑀺𑀝𑁆𑀞𑀸𑀢𑀼𑀁 𑀤𑁂𑀳𑀺, 𑀢𑀸𑀢, 𑀧𑀸𑀲𑀸𑀤𑀲𑁆𑀲, 𑀧𑀢𑀺𑀝𑁆𑀞𑀸𑀢𑀼𑀁 𑀤𑁂𑀳𑀺, 𑀢𑀸𑀢, 𑀧𑀸𑀲𑀸𑀤𑀲𑁆𑀲𑀸’’𑀢𑀺 𑀯𑀺𑀭𑀯𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀧𑀸𑀲𑀸𑀤𑀁 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀤𑀫𑀢𑁆𑀣𑀓𑁂 𑀞𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀚𑁆𑀚 𑀧𑀢𑁆𑀢𑀸𑀲𑀯𑀓𑁆𑀔𑀬𑀁;

𑀅𑀚𑁆𑀚 𑀓𑀫𑁆𑀧𑁂𑀫𑀺 𑀧𑀸𑀲𑀸𑀤𑀁, 𑀅𑀳𑁄 𑀩𑀼𑀤𑁆𑀥𑀲𑁆𑀲𑀼𑀴𑀸𑀭𑀢𑀸.

‘‘𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀚𑁆𑀚 𑀧𑀢𑁆𑀢𑀸𑀲𑀯𑀓𑁆𑀔𑀬𑀁;

𑀅𑀚𑁆𑀚 𑀓𑀫𑁆𑀧𑁂𑀫𑀺 𑀧𑀸𑀲𑀸𑀤𑀁, 𑀅𑀳𑁄 𑀥𑀫𑁆𑀫𑀲𑁆𑀲𑀼𑀴𑀸𑀭𑀢𑀸.

‘‘𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀚𑁆𑀚 𑀧𑀢𑁆𑀢𑀸𑀲𑀯𑀓𑁆𑀔𑀬𑀁;

𑀅𑀚𑁆𑀚 𑀓𑀫𑁆𑀧𑁂𑀫𑀺 𑀧𑀸𑀲𑀸𑀤𑀁, 𑀅𑀳𑁄 𑀲𑀗𑁆𑀖𑀲𑁆𑀲𑀼𑀴𑀸𑀭𑀢𑀸’’𑀢𑀺.

‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮) 𑀯𑀢𑁆𑀯𑀸 ‘‘𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀻’’𑀢𑀺 (𑀤𑀻. 𑀦𑀺. 𑁨.𑁧𑁮), 𑀢𑀣𑀸 ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁨) 𑀯𑀢𑁆𑀯𑀸 ‘‘𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀻’’𑀢𑀺 (𑀤𑀻. 𑀦𑀺. 𑁨.𑁩𑁨) 𑀘 𑀫𑀳𑀸𑀲𑀢𑁆𑀢𑀲𑁆𑀲 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀁 𑀅𑀪𑀺𑀚𑀸𑀢𑀺𑀜𑁆𑀘 𑀥𑀫𑁆𑀫𑀢𑀸𑀯𑀲𑁂𑀦 𑀫𑀳𑀸𑀧𑀤𑀸𑀦𑁂 𑀧𑀣𑀯𑀻𑀓𑀫𑁆𑀧𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑁂𑀲𑀼𑀧𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀣𑀯𑀻𑀓𑀫𑁆𑀧𑁄 𑀥𑀫𑁆𑀫𑀢𑀸𑀯𑀲𑁂𑀦𑁂𑀯𑀸𑀢𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 ¶ 𑀦𑁂𑀲𑀁 𑀧𑀣𑀯𑀻𑀓𑀫𑁆𑀧𑀸𑀦𑀁 𑀓𑀸𑀭𑀡𑀢𑁄 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺 𑀇𑀫𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀸𑀢𑀼𑀓𑁄𑀧𑁂𑀦𑀸𑀢𑀺 𑀉𑀓𑁆𑀔𑁂𑀧𑀓𑀯𑀸𑀢𑀲𑀗𑁆𑀔𑀸𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀧𑀓𑁄𑀧𑁂𑀦. 𑀇𑀤𑁆𑀥𑀸𑀦𑀼𑀪𑀸𑀯𑁂𑀦𑀸𑀢𑀺 𑀜𑀸𑀡𑀺𑀤𑁆𑀥𑀺𑀬𑀸, 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀬𑀸 𑀯𑀸 𑀲𑀪𑀸𑀯𑁂𑀦, 𑀢𑁂𑀚𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀢𑁂𑀚𑁂𑀦𑀸𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀩𑀮𑁂𑀦𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀢𑁂𑀚𑁂𑀦𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁂𑀦. 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦𑀸𑀢𑀺 𑀬𑀣𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑁆𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁂𑀦 𑀅𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀓𑀫𑁆𑀧𑀺𑀢𑁆𑀣, 𑀏𑀯𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀤𑁂𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑁂𑀦 ¶ 𑀅𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑁆𑀣, 𑀢𑀁 𑀧𑀦𑀲𑁆𑀲𑀸 𑀲𑀸𑀥𑀼𑀓𑀸𑀭𑀤𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀬𑁂𑀦 𑀧𑀦 𑀪𑀕𑀯𑀸 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀭𑀭𑀽𑀧𑀓𑀸𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀭𑀢𑀦𑀲𑀫𑀺𑀤𑁆𑀥𑀺𑀥𑀫𑁆𑀫𑀓𑀸𑀬𑁄 𑀧𑀼𑀜𑁆𑀜𑀫𑀳𑀢𑁆𑀢𑀣𑀸𑀫𑀫𑀳𑀢𑁆𑀢𑀇𑀤𑁆𑀥𑀺𑀫𑀳𑀢𑁆𑀢𑀬𑀲𑀫𑀳𑀢𑁆𑀢𑀧𑀜𑁆𑀜𑀸𑀫𑀳𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀓𑀧𑁆𑀧𑀁 𑀯𑀸 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄𑀧𑀺 𑀲𑀗𑁆𑀔𑀢𑀥𑀫𑁆𑀫𑀧𑀭𑀺𑀚𑀺𑀕𑀼𑀘𑁆𑀙𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀜𑀸𑀡𑀯𑀺𑀲𑁂𑀲𑁂𑀦 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀯𑀺𑀥𑀺𑀦𑀸 𑀦𑀺𑀭𑀧𑁂𑀓𑁆𑀔𑁄 𑀑𑀲𑁆𑀲𑀚𑁆𑀚𑀺. 𑀢𑀤𑀦𑀼𑀪𑀸𑀯𑀸𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀆𑀬𑀼𑀲𑀗𑁆𑀔𑀭𑁄𑀲𑁆𑀲𑀚𑁆𑀚𑀦𑁂 𑀅𑀓𑀫𑁆𑀧𑀺𑀢𑁆𑀣. 𑀢𑀁 𑀧𑀦𑀲𑁆𑀲𑀸 𑀓𑀸𑀭𑀼𑀜𑁆𑀜𑀲𑀪𑀸𑀯𑀲𑀡𑁆𑀞𑀺𑀢𑀸 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀭𑀼𑀜𑁆𑀜𑀪𑀸𑀯𑁂𑀦𑀸’’𑀢𑀺.

𑀬𑀲𑁆𑀫𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺, 𑀅𑀦𑁆𑀢𑀭𑀦𑁆𑀢𑀭𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂𑀦 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀲𑀸𑀢𑀺𑀲𑀬𑀁 𑀢𑀺𑀓𑁆𑀔𑀁 𑀲𑀽𑀭𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀧𑀯𑀢𑁆𑀢𑁂𑀲𑀺. ‘‘𑀬𑀤𑀢𑁆𑀣𑀜𑁆𑀘 𑀫𑀬𑀸 𑀏𑀯𑀁 𑀲𑀼𑀘𑀺𑀭𑀓𑀸𑀮𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀜𑀸𑀡𑀲𑀫𑁆𑀪𑀸𑀭𑁄 𑀲𑀫𑁆𑀪𑀢𑁄, 𑀅𑀦𑀼𑀢𑁆𑀢𑀭𑁄 𑀘 𑀯𑀺𑀫𑁄𑀓𑁆𑀔𑁄 𑀲𑀫𑀥𑀺𑀕𑀢𑁄, 𑀢𑀲𑁆𑀲 𑀯𑀢 𑀫𑁂 𑀲𑀺𑀔𑀸𑀧𑁆𑀧𑀢𑁆𑀢𑀨𑀮𑀪𑀽𑀢𑀸 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀚𑁆𑀚 𑀲𑀫𑀺𑀚𑁆𑀛𑀢𑀻’’𑀢𑀺 𑀪𑀺𑀬𑁆𑀬𑁄 𑀅𑀢𑀺𑀯𑀺𑀬 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀧𑀻𑀢𑀺𑀯𑀺𑀧𑁆𑀨𑀸𑀭𑀸𑀤𑀺𑀕𑀼𑀡𑀯𑀺𑀧𑀼𑀮𑀢𑀭𑀸𑀦𑀼𑀪𑀸𑀯𑁄 𑀧𑀭𑁂𑀳𑀺 𑀅𑀲𑀸𑀥𑀸𑀭𑀡𑀜𑀸𑀡𑀸𑀢𑀺𑀲𑀬𑁄 𑀉𑀤𑀧𑀸𑀤𑀺, 𑀬𑀲𑁆𑀲 𑀲𑀫𑀸𑀧𑀢𑁆𑀢𑀺𑀩𑀮𑀲𑀫𑀼𑀧𑀩𑁆𑀭𑀽𑀳𑀺𑀢𑀲𑁆𑀲 𑀜𑀸𑀡𑀸𑀢𑀺𑀲𑀬𑀲𑁆𑀲 𑀆𑀦𑀼𑀪𑀸𑀯𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑁆𑀯𑁂𑀫𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀲𑀫𑀯𑀺𑀧𑀸𑀓𑀸’’𑀢𑀺𑀆𑀤𑀺 ¶ (𑀉𑀤𑀸. 𑁭𑁫), 𑀢𑀲𑁆𑀫𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀫𑀪𑀺𑀳𑀢𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣, 𑀢𑀁 𑀧𑀦𑀲𑁆𑀲𑀸 𑀢𑀲𑁆𑀲𑀁 𑀯𑁂𑀮𑀸𑀬𑀁 𑀆𑀭𑁄𑀤𑀦𑀸𑀓𑀸𑀭𑀧𑁆𑀧𑀢𑁆𑀢𑀺 𑀯𑀺𑀬 𑀳𑁄𑀢𑀻𑀢𑀺 ‘‘𑀅𑀝𑁆𑀞𑀫𑁄 𑀆𑀭𑁄𑀤𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀧𑀦𑀢𑁆𑀣𑁄𑀢𑀺 ‘‘𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢 𑀅𑀢𑁆𑀣𑁄. 𑀧𑀣𑀯𑀻𑀤𑁂𑀯𑀢𑀸𑀬 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀲𑀫𑀼𑀤𑁆𑀤𑀤𑁂𑀯𑀢𑀸 𑀯𑀺𑀬 𑀫𑀳𑀸𑀧𑀣𑀯𑀺𑀬𑀸 𑀅𑀥𑀺𑀤𑁂𑀯𑀢𑀸 𑀓𑀺𑀭 𑀦𑀸𑀫 𑀅𑀢𑁆𑀣𑀺, 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀲𑀢𑀺 𑀢𑀲𑁆𑀲𑀸 𑀘𑀺𑀢𑁆𑀢𑀯𑀲𑁂𑀦 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀬𑀣𑀸 𑀯𑀸𑀢𑀯𑀮𑀸𑀳𑀓𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀯𑀲𑁂𑀦 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀻𑀢𑀼𑀡𑁆𑀳𑀅𑀩𑁆𑀪𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀯𑀲𑁂𑀦 𑀲𑀻𑀢𑀸𑀤𑀬𑁄 𑀪𑀯𑀦𑁆𑀢𑀺, 𑀢𑀣𑀸 𑀳𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀅𑀪𑀺𑀲𑀫𑁆𑀩𑁄𑀥𑀺𑀅𑀢𑁆𑀣𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀉𑀧𑀝𑁆𑀞𑀺𑀢𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑀼𑀁 𑁋

‘‘𑀅𑀘𑁂𑀢𑀦𑀸𑀬𑀁 ¶ 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺. (𑀘𑀭𑀺𑀬𑀸. 𑁧.𑁧𑁨𑁪) 𑁋

𑀯𑀘𑀦𑀲𑀫𑀦𑀦𑁆𑀢𑀭𑀁 𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 𑀲𑀧𑀭𑀺𑀲𑀁 𑀫𑀸𑀭𑀁 𑀧𑀭𑀺𑀯𑀢𑁆𑀢𑁂𑀲𑀺. 𑀏𑀢𑀦𑁆𑀢𑀺 𑀲𑀸𑀥𑀼𑀓𑀸𑀭𑀤𑀸𑀦𑀸𑀤𑀺. 𑀬𑀤𑀺𑀧𑀺 𑀦𑀢𑁆𑀣𑀺 𑀅𑀘𑁂𑀢𑀦𑀢𑁆𑀢𑀸, 𑀥𑀫𑁆𑀫𑀢𑀸𑀯𑀲𑁂𑀦 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀲𑀺𑀬𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀥𑀫𑁆𑀫𑀢𑀸 𑀧𑀦 𑀅𑀢𑁆𑀣𑀢𑁄 𑀥𑀫𑁆𑀫𑀪𑀸𑀯𑁄, 𑀲𑁄 𑀧𑀼𑀜𑁆𑀜𑀥𑀫𑁆𑀫𑀲𑁆𑀲 𑀯𑀸 𑀜𑀸𑀡𑀥𑀫𑁆𑀫𑀲𑁆𑀲 𑀯𑀸 𑀆𑀦𑀼𑀪𑀸𑀯𑀲𑀪𑀸𑀯𑁄𑀢𑀺. 𑀢𑀬𑀺𑀤𑀁 𑀲𑀩𑁆𑀩𑀁 𑀯𑀺𑀘𑀸𑀭𑀺𑀢𑀫𑁂𑀯. 𑀏𑀯𑀜𑁆𑀘 𑀓𑀢𑁆𑀯𑀸 𑁋

‘‘𑀇𑀫𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄, 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑁂;

𑀥𑀫𑁆𑀫𑀢𑁂𑀚𑁂𑀦 𑀯𑀲𑀼𑀥𑀸, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀣𑀸’’𑀢𑀺. (𑀩𑀼. 𑀯𑀁. 𑁨.𑁧𑁬𑁬) 𑁋

𑀆𑀤𑀺𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀅𑀬𑀁 𑀧𑀦 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁪𑁯) 𑀫𑀳𑀸𑀧𑀣𑀯𑀻 𑀅𑀧𑀭𑁂𑀲𑀼𑀧𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁂 𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑁂 𑀧𑀁𑀲𑀼𑀓𑀽𑀮𑀕𑁆𑀕𑀳𑀡𑁂 𑀧𑀁𑀲𑀼𑀓𑀽𑀮𑀥𑁄𑀯𑀦𑁂 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑁂 𑀕𑁄𑀢𑀫𑀓𑀲𑀼𑀢𑁆𑀢𑁂 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 𑀩𑁆𑀭𑀳𑁆𑀫𑀚𑀸𑀮𑁂𑀢𑀺. 𑀢𑀢𑁆𑀣 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑁂𑀲𑀼 𑀯𑀻𑀭𑀺𑀬𑀩𑀮𑁂𑀦 𑀅𑀓𑀫𑁆𑀧𑀺𑀢𑁆𑀣. 𑀧𑀁𑀲𑀼𑀓𑀽𑀮𑀕𑁆𑀕𑀳𑀡𑁂 ‘‘𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀦𑁆𑀢𑁂𑀦 𑀤𑀼𑀓𑁆𑀓𑀭𑀁 𑀪𑀕𑀯𑀢𑀸 ¶ 𑀓𑀢’’𑀦𑁆𑀢𑀺 𑀅𑀘𑁆𑀙𑀭𑀺𑀬𑀯𑁂𑀕𑀸𑀪𑀺𑀳𑀢𑀸 𑀅𑀓𑀫𑁆𑀧𑀺𑀢𑁆𑀣. 𑀧𑀁𑀲𑀼𑀓𑀽𑀮𑀥𑁄𑀯𑀦𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂𑀲𑀼 𑀅𑀓𑀸𑀮𑀓𑀫𑁆𑀧𑀦𑁂𑀦 𑀅𑀓𑀫𑁆𑀧𑀺𑀢𑁆𑀣. 𑀓𑀸𑀴𑀓𑀸𑀭𑀸𑀫𑀕𑁄𑀢𑀫𑀓𑀲𑀼𑀢𑁆𑀢𑁂𑀲𑀼 (𑀅. 𑀦𑀺. 𑁪.𑁨𑁪; 𑁩.𑁧𑁨𑁬) ‘‘𑀅𑀳𑀁 𑀲𑀓𑁆𑀔𑀻 𑀪𑀕𑀯𑀸’’𑀢𑀺 𑀲𑀓𑁆𑀔𑀺𑀪𑀸𑀯𑁂𑀦 𑀅𑀓𑀫𑁆𑀧𑀺𑀢𑁆𑀣. 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁧𑁪𑁭) 𑀧𑀦 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼 𑀯𑀺𑀚𑀝𑁂𑀢𑁆𑀯𑀸 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑁂𑀲𑀼 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦 𑀅𑀓𑀫𑁆𑀧𑀺𑀢𑁆𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦 𑀓𑁂𑀯𑀮𑀜𑁆𑀘 𑀏𑀢𑁂𑀲𑀼𑀬𑁂𑀯 𑀞𑀸𑀦𑁂𑀲𑀼 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣, 𑀅𑀣 𑀔𑁄 𑀢𑀻𑀲𑀼 𑀲𑀗𑁆𑀕𑀳𑁂𑀲𑀼𑀧𑀺 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀇𑀫𑀁 𑀤𑀻𑀧𑀁 𑀆𑀕𑀦𑁆𑀢𑁆𑀯𑀸 𑀚𑁄𑀢𑀺𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀺𑀢𑀤𑀺𑀯𑀲𑁂𑀧𑀺 𑀅𑀓𑀫𑁆𑀧𑀺𑀢𑁆𑀣. 𑀓𑀮𑁆𑀬𑀸𑀡𑀺𑀬𑀫𑀳𑀸𑀯𑀺𑀳𑀸𑀭𑁂 𑀘 𑀧𑀺𑀡𑁆𑀟𑀧𑀸𑀢𑀺𑀬𑀢𑁆𑀣𑁂𑀭𑀲𑁆𑀲 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀆𑀭𑀤𑁆𑀥𑀲𑁆𑀲 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀓𑀫𑁆𑀧𑀺𑀢𑁆𑀣. 𑀮𑁄𑀳𑀧𑀸𑀲𑀸𑀤𑀲𑁆𑀲 𑀧𑀸𑀘𑀻𑀦𑀅𑀫𑁆𑀩𑀮𑀝𑁆𑀞𑀺𑀓𑀝𑁆𑀞𑀸𑀦𑀁 𑀦𑀸𑀫 𑀅𑀳𑁄𑀲𑀺, 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀤𑀻𑀖𑀪𑀸𑀡𑀓𑀢𑁆𑀣𑁂𑀭𑀸 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀆𑀭𑀪𑀺𑀁𑀲𑀼. 𑀢𑁂𑀲𑀁 𑀲𑀚𑁆𑀛𑀸𑀬𑀧𑀭𑀺𑀬𑁄𑀲𑀸𑀦𑁂𑀧𑀺 𑀉𑀤𑀓𑀧𑀭𑀺𑀬𑀦𑁆𑀢𑀫𑁂𑀯 𑀓𑀢𑁆𑀯𑀸 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣.

𑀬𑀤𑀺 ¶ 𑀏𑀯𑀁 ‘‘𑀅𑀝𑁆𑀞𑀺𑀫𑁂, 𑀆𑀦𑀦𑁆𑀤, 𑀳𑁂𑀢𑀽 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺 𑀓𑀲𑁆𑀫𑀸 𑀅𑀝𑁆𑀞𑁂𑀯 𑀳𑁂𑀢𑀽 𑀯𑀼𑀢𑁆𑀢𑀸𑀢𑀺? 𑀦𑀺𑀬𑀫𑀳𑁂𑀢𑀼𑀪𑀸𑀯𑀢𑁄. 𑀇𑀫𑁂𑀬𑁂𑀯 𑀳𑀺 𑀅𑀝𑁆𑀞 𑀳𑁂𑀢𑀽 𑀦𑀺𑀬𑀫𑀦𑁆𑀢𑀺, 𑀦𑀸𑀜𑁆𑀜𑁂. 𑀢𑁂 𑀳𑀺 𑀓𑀤𑀸𑀘𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀅𑀦𑀺𑀬𑀫𑀪𑀸𑀯𑀢𑁄 𑀦 𑀕𑀡𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 (𑀫𑀺. 𑀧. 𑁪.𑁧.𑁪) 𑁋

‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀳𑁂𑀢𑀽 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸𑀢𑀺. 𑀬𑀁 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀢𑀜𑁆𑀘 𑀧𑀦 𑀅𑀓𑀸𑀮𑀺𑀓𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀕𑀡𑀺𑀢𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀢𑀬𑁄𑀬𑁂𑀯 𑀫𑁂𑀖𑀸 𑀕𑀡𑀻𑀬𑀦𑁆𑀢𑀺 𑀯𑀲𑁆𑀲𑀺𑀓𑁄, 𑀳𑁂𑀫𑀦𑁆𑀢𑀺𑀓𑁄, 𑀧𑀸𑀯𑀼𑀲𑀓𑁄𑀢𑀺. 𑀬𑀤𑀺 𑀢𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀫𑁂𑀖𑁄 𑀧𑀯𑀲𑁆𑀲𑀢𑀺, 𑀦 𑀲𑁄 𑀫𑁂𑀖𑁄 𑀕𑀡𑀻𑀬𑀢𑀺 𑀲𑀫𑁆𑀫𑀢𑁂𑀳𑀺 𑀫𑁂𑀖𑁂𑀳𑀺, 𑀅𑀓𑀸𑀮𑀫𑁂𑀖𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 ¶ 𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀅𑀓𑀸𑀮𑀺𑀓𑀁 𑀏𑀢𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀦 𑀢𑀁 𑀕𑀡𑀻𑀬𑀢𑀺 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀸 𑀧𑀩𑁆𑀩𑀢𑀸 𑀧𑀜𑁆𑀘 𑀦𑀤𑀺𑀲𑀢𑀸𑀦𑀺 𑀲𑀦𑁆𑀤𑀦𑁆𑀢𑀺, 𑀢𑁂𑀲𑀁, 𑀫𑀳𑀸𑀭𑀸𑀚, 𑀧𑀜𑁆𑀘𑀦𑁆𑀦𑀁 𑀦𑀤𑀺𑀲𑀢𑀸𑀦𑀁 𑀤𑀲𑁂𑀯 𑀦𑀤𑀺𑀬𑁄 𑀦𑀤𑀺𑀕𑀡𑀦𑀸𑀬 𑀕𑀡𑀻𑀬𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻, 𑀲𑀺𑀦𑁆𑀥𑀼, 𑀲𑀭𑀲𑁆𑀲𑀢𑀻, 𑀯𑁂𑀢𑁆𑀭𑀯𑀢𑀻, 𑀯𑀻𑀢𑀁𑀲𑀸, 𑀘𑀦𑁆𑀤𑀪𑀸𑀕𑀸𑀢𑀺. 𑀅𑀯𑀲𑁂𑀲𑀸 𑀦𑀤𑀺𑀬𑁄 𑀦𑀤𑀺𑀕𑀡𑀦𑀸𑀬 𑀅𑀕𑀡𑀺𑀢𑀸. 𑀓𑀺𑀁𑀓𑀸𑀭𑀡𑀸? 𑀦 𑀢𑀸 𑀦𑀤𑀺𑀬𑁄 𑀥𑀼𑀯𑀲𑀮𑀺𑀮𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀅𑀓𑀸𑀮𑀺𑀓𑀁 𑀏𑀢𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀦 𑀢𑀁 𑀕𑀡𑀻𑀬𑀢𑀺 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀲𑀢𑀫𑁆𑀧𑀺 𑀤𑁆𑀯𑀺𑀲𑀢𑀫𑁆𑀧𑀺 𑀢𑀺𑀲𑀢𑀫𑁆𑀧𑀺 𑀅𑀫𑀘𑁆𑀘𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀙𑀬𑁂𑀯 𑀚𑀦𑀸 𑀅𑀫𑀘𑁆𑀘𑀕𑀡𑀦𑀸𑀬 𑀕𑀡𑀻𑀬𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁂𑀦𑀸𑀧𑀢𑀺, 𑀧𑀼𑀭𑁄𑀳𑀺𑀢𑁄, 𑀅𑀓𑁆𑀔𑀤𑀲𑁆𑀲𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀙𑀢𑁆𑀢𑀕𑁆𑀕𑀸𑀳𑀓𑁄, 𑀔𑀕𑁆𑀕𑀕𑁆𑀕𑀸𑀳𑀓𑁄, 𑀏𑀢𑁂𑀬𑁂𑀯 𑀅𑀫𑀘𑁆𑀘𑀕𑀡𑀦𑀸𑀬 𑀕𑀡𑀻𑀬𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀬𑀼𑀢𑁆𑀢𑀢𑁆𑀢𑀸 𑀭𑀸𑀚𑀕𑀼𑀡𑁂𑀳𑀺. 𑀅𑀯𑀲𑁂𑀲𑀸 𑀅𑀕𑀡𑀺𑀢𑀸, 𑀲𑀩𑁆𑀩𑁂 𑀅𑀫𑀘𑁆𑀘𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 ¶ 𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀅𑀓𑀸𑀮𑀺𑀓𑀁 𑀏𑀢𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀦 𑀢𑀁 𑀕𑀡𑀻𑀬𑀢𑀺 𑀅𑀝𑁆𑀞𑀳𑀺 𑀳𑁂𑀢𑀽𑀳𑀻’’𑀢𑀺.

𑀪𑀽𑀫𑀺𑀘𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀸𑀧𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁮) 𑁩. 𑀬𑀫𑀓𑀯𑀕𑁆𑀕𑁄

𑁧-𑁧𑁦. 𑀲𑀤𑁆𑀥𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁧-𑁮𑁦. 𑀅𑀝𑁆𑀞𑀫𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀤𑀲𑀫𑁂 𑀓𑀼𑀘𑁆𑀙𑀺𑀢𑀁 𑀲𑀻𑀤𑀢𑀻𑀢𑀺 𑀓𑀼𑀲𑀻𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 ¶ 𑀧𑀼𑀕𑁆𑀕𑀮𑁄 ‘‘𑀓𑀼𑀲𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀓𑀼𑀲𑀺𑀢𑀪𑀸𑀯𑁄 𑀇𑀥 𑀓𑀼𑀲𑀺𑀢-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀯𑀺𑀦𑀸𑀧𑀺 𑀳𑀺 𑀪𑀸𑀯𑀚𑁄𑀢𑀦𑀲𑀤𑁆𑀤𑀁 𑀪𑀸𑀯𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀧𑀝𑀲𑁆𑀲 𑀲𑀼𑀓𑁆𑀓’’𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀻𑀢𑀪𑀸𑀯𑀯𑀢𑁆𑀣𑀽𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄’’𑀢𑀺. 𑀓𑀫𑁆𑀫𑀁 𑀦𑀸𑀫 𑀲𑀫𑀡𑀲𑀸𑀭𑀼𑀧𑁆𑀧𑀁 𑀈𑀤𑀺𑀲𑀦𑁆𑀢𑀺 𑀆𑀳 ‘‘𑀘𑀻𑀯𑀭𑀯𑀺𑀘𑀸𑀭𑀡𑀸𑀤𑀻’’𑀢𑀺. 𑀯𑀻𑀭𑀺𑀬𑀦𑁆𑀢𑀺 𑀧𑀥𑀸𑀦𑀯𑀻𑀭𑀺𑀬𑀁. 𑀢𑀁 𑀧𑀦 𑀘𑀗𑁆𑀓𑀫𑀦𑀯𑀲𑁂𑀦 𑀓𑀭𑀡𑁂 𑀓𑀸𑀬𑀺𑀓𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀆𑀳 ‘‘𑀤𑀼𑀯𑀺𑀥𑀫𑁆𑀧𑀻’’𑀢𑀺. 𑀧𑀢𑁆𑀢𑀺𑀬𑀸𑀢𑀺 𑀧𑀸𑀧𑀼𑀡𑀦𑀢𑁆𑀣𑀁. 𑀑𑀲𑀻𑀤𑀦𑀦𑁆𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑁂 𑀲𑀗𑁆𑀓𑁄𑀘𑁄. 𑀫𑀸𑀲𑁂𑀳𑀺 𑀆𑀘𑀺𑀢𑀁 𑀦𑀺𑀘𑀺𑀢𑀁 𑀯𑀺𑀬𑀸𑀢𑀺 𑀫𑀸𑀲𑀸𑀘𑀺𑀢𑀁, 𑀢𑀁 𑀫𑀜𑁆𑀜𑁂. 𑀬𑀲𑁆𑀫𑀸 𑀫𑀸𑀲𑀸 𑀢𑀺𑀦𑁆𑀢𑀸 𑀯𑀺𑀲𑁂𑀲𑁂𑀦 𑀕𑀭𑀼𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀬𑀣𑀸 𑀢𑀺𑀦𑁆𑀢𑀫𑀸𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺 𑀕𑀺𑀮𑀸𑀦𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀲𑀦𑁆𑀢𑀺 𑀆𑀭𑀫𑁆𑀪𑀯𑀢𑁆𑀣𑀽𑀦𑀁. 𑀇𑀫𑀺𑀦𑀸𑀯 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀓𑀼𑀲𑀻𑀢𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 ‘‘𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀁 𑀆𑀭𑀪𑀢𑀻’’𑀢𑀺𑀆𑀤𑀺𑀦𑀸. 𑀇𑀤𑀁 𑀧𑀞𑀫𑀦𑁆𑀢𑀺 ‘‘𑀇𑀤𑀁, 𑀳𑀦𑁆𑀤𑀸𑀳𑀁, 𑀯𑀻𑀭𑀺𑀬𑀁 𑀆𑀭𑀪𑀸𑀫𑀻’’𑀢𑀺, ‘‘𑀏𑀯𑀁 𑀪𑀸𑀯𑀦𑀸𑀬 𑀅𑀩𑁆𑀪𑀼𑀲𑁆𑀲𑀳𑀦𑀁 𑀧𑀞𑀫𑀁 𑀆𑀭𑀫𑁆𑀪𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀢𑀣𑀸 𑀧𑀞𑀫𑀁 𑀧𑀯𑀢𑁆𑀢𑀁 𑀅𑀩𑁆𑀪𑀼𑀲𑁆𑀲𑀳𑀦𑀜𑁆𑀳𑀺 𑀉𑀧𑀭𑀺 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺. 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀲𑀳𑀺𑀢𑀸𑀦𑀺 ¶ 𑀳𑀺 𑀅𑀩𑁆𑀪𑀼𑀲𑁆𑀲𑀳𑀦𑀸𑀦𑀺 𑀢𑀫𑁆𑀫𑀽𑀮𑀓𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀤𑁆𑀥𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁧-𑁬𑁨𑁬. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀅𑀝𑁆𑀞𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀦𑀯𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀲𑀫𑁆𑀩𑁄𑀥𑀺𑀯𑀕𑁆𑀕𑁄

𑁧-𑁨. 𑀲𑀫𑁆𑀩𑁄𑀥𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀦𑀯𑀓𑀦𑀺𑀧𑀸𑀢𑀲𑁆𑀲 ¶ ¶ 𑀧𑀞𑀫𑀤𑀼𑀢𑀺𑀬𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑁩. 𑀫𑁂𑀖𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 (𑀉𑀤𑀸. 𑀅𑀝𑁆𑀞. 𑁩𑁧) 𑀫𑁂𑀖𑀺𑀬𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻𑀢𑀺 𑀧𑀭𑀺𑀘𑀸𑀭𑀓𑁄 𑀳𑁄𑀢𑀺. 𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀉𑀧𑀝𑁆𑀞𑀸𑀓𑀸 𑀅𑀦𑀺𑀩𑀤𑁆𑀥𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀦𑀸𑀕𑀲𑀫𑀮𑁄, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀡𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 ¶ , 𑀏𑀓𑀤𑀸 𑀲𑀸𑀕𑀢𑁄, 𑀏𑀓𑀤𑀸 𑀫𑁂𑀖𑀺𑀬𑁄, 𑀢𑀤𑀸𑀧𑀺 𑀫𑁂𑀖𑀺𑀬𑀢𑁆𑀣𑁂𑀭𑁄𑀯 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻’’𑀢𑀺.

𑀓𑀺𑀫𑀺𑀓𑀸𑀴𑀸𑀬𑀸𑀢𑀺 𑀓𑀸𑀴𑀓𑀺𑀫𑀻𑀦𑀁 𑀩𑀳𑀼𑀮𑀢𑀸𑀬 ‘‘𑀓𑀺𑀫𑀺𑀓𑀸𑀴𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀦𑀤𑀺𑀬𑀸. 𑀚𑀗𑁆𑀖𑀸𑀯𑀺𑀳𑀸𑀭𑀦𑁆𑀢𑀺 𑀘𑀺𑀭𑀦𑀺𑀲𑀚𑁆𑀚𑀸𑀬 𑀚𑀗𑁆𑀖𑀸𑀲𑀼 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑀁 𑀯𑀺𑀘𑀭𑀡𑀁. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀅𑀯𑀺𑀭𑀴𑀭𑀼𑀓𑁆𑀔𑀢𑀸𑀬 𑀲𑀺𑀦𑀺𑀤𑁆𑀥𑀧𑀢𑁆𑀢𑀢𑀸𑀬 𑀘 𑀧𑀲𑁆𑀲𑀦𑁆𑀢𑀸𑀦𑀁 𑀧𑀲𑀸𑀤𑀁 𑀆𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑀁. 𑀲𑀦𑁆𑀤𑀘𑁆𑀙𑀸𑀬𑀢𑀸𑀬 𑀫𑀦𑀼𑀜𑁆𑀜𑀪𑀽𑀫𑀺𑀪𑀸𑀕𑀢𑀸𑀬 𑀘 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀦𑀝𑁆𑀞𑁂𑀦 𑀘𑀺𑀢𑁆𑀢𑀁 𑀭𑀫𑁂𑀢𑀻𑀢𑀺 𑀭𑀫𑀡𑀻𑀬𑀁. 𑀅𑀮𑀦𑁆𑀢𑀺 𑀧𑀭𑀺𑀬𑀢𑁆𑀢𑀁, 𑀬𑀼𑀢𑁆𑀢𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀧𑀥𑀸𑀦𑀢𑁆𑀣𑀺𑀓𑀲𑁆𑀲𑀸𑀢𑀺 𑀧𑀥𑀸𑀦𑁂𑀦 𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀅𑀢𑁆𑀣𑀺𑀓𑀲𑁆𑀲. 𑀬𑀲𑁆𑀫𑀸 𑀲𑁄 𑀧𑀥𑀸𑀦𑀓𑀫𑁆𑀫𑁂 𑀬𑀼𑀢𑁆𑀢𑁄 𑀧𑀥𑀸𑀦𑀓𑀫𑁆𑀫𑀺𑀓𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀥𑀸𑀦𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺. 𑀆𑀕𑀘𑁆𑀙𑁂𑀬𑁆𑀬𑀸𑀳𑀦𑁆𑀢𑀺 𑀆𑀕𑀘𑁆𑀙𑁂𑀬𑁆𑀬𑀁 𑀅𑀳𑀁. 𑀣𑁂𑀭𑁂𑀦 𑀓𑀺𑀭 𑀧𑀼𑀩𑁆𑀩𑁂 𑀢𑀁 𑀞𑀸𑀦𑀁 𑀅𑀦𑀼𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀭𑀜𑁆𑀜𑀸 𑀏𑀯 𑀲𑀢𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀉𑀬𑁆𑀬𑀸𑀦𑀁 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀢𑀢𑁆𑀣 𑀯𑀺𑀳𑀭𑀺𑀢𑀼𑀁 𑀘𑀺𑀢𑁆𑀢𑀁 𑀦𑀫𑀺.

𑀬𑀸𑀯 ¶ 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻𑀢𑀺 𑀅𑀜𑁆𑀜𑁄 𑀓𑁄𑀘𑀺𑀧𑀺 𑀪𑀺𑀓𑁆𑀔𑀼 𑀫𑀫 𑀲𑀦𑁆𑀢𑀺𑀓𑀁 𑀬𑀸𑀯 𑀆𑀕𑀘𑁆𑀙𑀢𑀺, 𑀢𑀸𑀯 𑀆𑀕𑀫𑁂𑀳𑀻𑀢𑀺 𑀅𑀢𑁆𑀣𑁄. ‘‘𑀓𑁄𑀘𑀺 𑀪𑀺𑀓𑁆𑀔𑀼 𑀤𑀺𑀲𑁆𑀲𑀢𑀻’’𑀢𑀺𑀧𑀺 𑀧𑀸𑀞𑁄, ‘‘𑀆𑀕𑀘𑁆𑀙𑀢𑀽’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀣𑀸 ‘‘𑀤𑀺𑀲𑁆𑀲𑀢𑀽’’𑀢𑀺𑀧𑀺. 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀤𑀻𑀦𑀁 𑀲𑁄𑀴𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀓𑀢𑀢𑁆𑀢𑀸 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀢𑀢𑁄 𑀅𑀜𑁆𑀜𑀁 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁 𑀦𑀸𑀫 𑀦𑀢𑁆𑀣𑀺. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀓𑀢𑀢𑁆𑀢𑀸𑀢𑀺 𑀇𑀤𑀁 𑀧𑀦 𑀫𑀕𑁆𑀕𑀯𑀲𑁂𑀦 𑀮𑀩𑁆𑀪𑀪𑀸𑀦𑀁 𑀪𑁂𑀤𑀁 𑀅𑀦𑀼𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀓𑀢𑀲𑁆𑀲 𑀧𑀝𑀺𑀘𑀬𑁄𑀢𑀺 𑀫𑀬𑁆𑀳𑀁 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀸𑀤𑀺𑀢𑀲𑁆𑀲 𑀲𑀻𑀮𑀸𑀤𑀺𑀥𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀢𑀤𑀢𑁆𑀣𑀁 𑀧𑀼𑀦 𑀯𑀟𑁆𑀠𑀦𑀲𑀗𑁆𑀔𑀸𑀢𑁄 𑀧𑀝𑀺𑀘𑀬𑁄 𑀅𑀢𑁆𑀣𑀺, 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀢𑀺𑀯𑀺𑀥𑀦𑀸𑀝𑀓𑀧𑀭𑀺𑀯𑀸𑀭𑁄𑀢𑀺 𑀫𑀳𑀦𑁆𑀢𑀺𑀢𑁆𑀣𑀺𑀬𑁄 𑀫𑀚𑁆𑀛𑀺𑀫𑀺𑀢𑁆𑀣𑀺𑀬𑁄 𑀅𑀢𑀺𑀢𑀭𑀼𑀡𑀺𑀢𑁆𑀣𑀺𑀬𑁄𑀢𑀺 𑀏𑀯𑀁 𑀯𑀥𑀽𑀓𑀼𑀫𑀸𑀭𑀺𑀓𑀓𑀜𑁆𑀜𑀸𑀯𑀢𑁆𑀣𑀸𑀳𑀺 𑀢𑀺𑀯𑀺𑀥𑀸𑀳𑀺 𑀦𑀸𑀝𑀓𑀺𑀢𑁆𑀣𑀻𑀳𑀺 𑀧𑀭𑀺𑀯𑀼𑀢𑁄. 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺. 𑀅𑀧𑀭𑁂 𑀧𑀦 ‘‘𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀮𑁄𑀪𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑁄, 𑀔𑀭𑀲𑁆𑀲𑀭𑀸𑀦𑀁 𑀧𑀓𑁆𑀔𑀺𑀆𑀤𑀻𑀦𑀁 𑀲𑀤𑁆𑀤𑀲𑁆𑀲𑀯𑀦𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀮𑁂𑀟𑁆𑀟𑀼𑀆𑀤𑀻𑀳𑀺 𑀢𑁂𑀲𑀁 𑀯𑀺𑀳𑁂𑀞𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. ‘𑀇𑀥𑁂𑀯𑀸𑀳𑀁 𑀯𑀲𑁂𑀬𑁆𑀬’𑀦𑁆𑀢𑀺 𑀢𑀢𑁆𑀣 𑀲𑀸𑀧𑁂𑀓𑁆𑀔𑀢𑀸𑀯𑀲𑁂𑀦 𑀯𑀸 𑀓𑀸𑀫𑀯𑀺𑀢𑀓𑁆𑀓𑁄, 𑀯𑀦𑀘𑀭𑀓𑁂 𑀢𑀢𑁆𑀣 𑀢𑀢𑁆𑀣 𑀤𑀺𑀲𑁆𑀯𑀸 𑀢𑁂𑀲𑀼 𑀘𑀺𑀢𑁆𑀢𑀤𑀼𑀩𑁆𑀪𑀦𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀢𑁂𑀲𑀁 𑀯𑀺𑀳𑁂𑀞𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀬𑀣𑀸 𑀢𑀣𑀸 𑀯𑀸 𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀧𑁆𑀧𑀯𑀢𑁆𑀢𑀺𑀬𑁂𑀯 𑀅𑀘𑁆𑀙𑀭𑀺𑀬𑀓𑀸𑀭𑀡𑀁. 𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄𑀢𑀺 𑀕𑀭𑀳𑀡𑀘𑁆𑀙𑀭𑀺𑀬𑀁 𑀦𑀸𑀫 𑀓𑀺𑀭𑁂𑀢𑀁 ¶ . 𑀬𑀣𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀯𑀮𑀺𑀬𑀕𑀢𑁆𑀢𑀁 𑀤𑀺𑀲𑁆𑀯𑀸 𑀅𑀯𑁄𑀘 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁫𑁧𑁧). 𑀲𑀫𑁆𑀧𑀭𑀺𑀯𑀸𑀭𑀺𑀢𑀸𑀢𑀺 𑀯𑁄𑀓𑀺𑀡𑁆𑀡𑀸. 𑀅𑀢𑁆𑀢𑀦𑀺 𑀕𑀭𑀼𑀫𑁆𑀳𑀺 𑀘 𑀏𑀓𑀢𑁆𑀢𑁂𑀧𑀺 𑀩𑀳𑀼𑀯𑀘𑀦𑀁 𑀤𑀺𑀲𑁆𑀲𑀢𑀺. ‘‘𑀅𑀦𑁆𑀯𑀸𑀲𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀓𑀲𑁆𑀫𑀸 𑀧𑀦𑀲𑁆𑀲 𑀪𑀕𑀯𑀸 𑀢𑀢𑁆𑀣 𑀕𑀫𑀦𑀁 𑀅𑀦𑀼𑀚𑀸𑀦𑀺? ‘‘𑀅𑀦𑀦𑀼𑀜𑁆𑀜𑀸𑀢𑁄𑀧𑀺 𑀘𑀸𑀬𑀁 𑀫𑀁 𑀑𑀳𑀸𑀬 𑀕𑀘𑁆𑀙𑀺𑀲𑁆𑀲𑀢𑁂𑀯, 𑀧𑀭𑀺𑀘𑀸𑀭𑀓𑀸𑀫𑀢𑀸𑀬 𑀫𑀜𑁆𑀜𑁂 𑀪𑀕𑀯𑀸 𑀕𑀦𑁆𑀢𑀼𑀁 𑀦 𑀤𑁂𑀢𑀻𑀢𑀺 𑀘𑀲𑁆𑀲 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁, 𑀢𑀤𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀅𑀦𑀼𑀚𑀸𑀦𑀺.

𑀏𑀯𑀁 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀣𑀲𑁆𑀲 𑀪𑀕𑀯𑀸 𑀲𑀧𑁆𑀧𑀸𑀬𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ‘‘𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀧𑀭𑀺𑀧𑀓𑁆𑀓𑀸𑀬𑀸’’𑀢𑀺 𑀧𑀭𑀺𑀧𑀸𑀓𑀁 𑀅𑀧𑁆𑀧𑀢𑁆𑀢𑀸𑀬. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 ¶ 𑀓𑀺𑀮𑁂𑀲𑁂𑀳𑀺 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺𑀬𑀸. 𑀧𑀼𑀩𑁆𑀩𑀪𑀸𑀕𑁂 𑀳𑀺 𑀢𑀤𑀗𑁆𑀕𑀯𑀲𑁂𑀦 𑀘𑁂𑀯 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀅𑀧𑀭𑀪𑀸𑀕𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘𑁂𑀯 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘. 𑀲𑀸𑀬𑀁 𑀯𑀺𑀫𑀼𑀢𑁆𑀢𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑀺𑀢𑀸𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀆𑀲𑀬𑁂 𑀧𑀭𑀺𑀧𑀸𑀘𑀺𑀢𑁂 𑀲𑁄𑀥𑀺𑀢𑁂 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺𑀬𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺𑀬𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀭𑀺𑀧𑀓𑁆𑀓𑀸 𑀦𑀸𑀫 𑀳𑁄𑀢𑀺, 𑀢𑀤𑀪𑀸𑀯𑁂 𑀅𑀧𑀭𑀺𑀧𑀓𑁆𑀓𑀸.

𑀓𑀢𑀫𑁂 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀭𑀡𑀯𑀲𑁂𑀦 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀲𑀸𑀤𑀦𑀻𑀬𑁂 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀓𑀼𑀲𑀻𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀫𑀼𑀝𑁆𑀞𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀢𑀺𑀧𑀝𑁆𑀞𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀅𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀤𑀼𑀧𑁆𑀧𑀜𑁆𑀜𑁂 ¶ 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀜𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀇𑀢𑀺 𑀇𑀫𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁮𑁫).

𑀅𑀧𑀭𑁂𑀳𑀺𑀧𑀺 ¶ 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀲𑀼𑀚𑁆𑀛𑀦𑁆𑀢𑀺. 𑀅𑀧𑀭𑁂𑀧𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸. 𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀦𑀺𑀘𑁆𑀘𑁂, 𑀤𑀼𑀓𑁆𑀔𑀲𑀜𑁆𑀜𑀸 𑀤𑀼𑀓𑁆𑀔𑁂, 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸𑀢𑀺 𑀇𑀫𑀸 𑀧𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀻𑀮𑀲𑀁𑀯𑀭𑁄, 𑀅𑀪𑀺𑀲𑀮𑁆𑀮𑁂𑀔𑀢𑀸, 𑀯𑀻𑀭𑀺𑀬𑀸𑀭𑀫𑁆𑀪𑁄, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀢𑀺. 𑀢𑁂𑀲𑀼 𑀯𑁂𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀲𑀢𑁆𑀣𑀸 𑀯𑁂𑀦𑁂𑀬𑁆𑀬𑀲𑁆𑀲 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑁂 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑁂 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀓𑀮𑁆𑀬𑀸𑀡𑁄 𑀪𑀤𑁆𑀤𑁄 𑀲𑀼𑀦𑁆𑀤𑀭𑁄 𑀫𑀺𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀬𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 ‘‘𑀅𑀖𑀲𑁆𑀲 𑀢𑀸𑀢𑀸 𑀳𑀺𑀢𑀲𑁆𑀲 𑀯𑀺𑀥𑀸𑀢𑀸’’𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑁂𑀦 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀳𑁄𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀯. 𑀬𑀣𑀸𑀯𑀼𑀢𑁆𑀢𑁂𑀳𑀺 𑀓𑀮𑁆𑀬𑀸𑀡𑀧𑀼𑀕𑁆𑀕𑀮𑁂𑀳𑁂𑀯 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀳 𑀅𑀬𑀢𑀺 𑀧𑀯𑀢𑁆𑀢𑀢𑀺, 𑀦 𑀯𑀺𑀦𑀸 𑀢𑁂𑀳𑀻𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄. 𑀓𑀮𑁆𑀬𑀸𑀡𑀧𑀼𑀕𑁆𑀕𑀮𑁂𑀲𑀼 𑀏𑀯 𑀘𑀺𑀢𑁆𑀢𑁂𑀦 𑀘𑁂𑀯 𑀓𑀸𑀬𑁂𑀦 𑀘 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀧𑀤𑀢𑁆𑀢𑀬𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂 𑀆𑀤𑀭𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀬𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀆𑀤𑀺𑀪𑀸𑀯𑀢𑁄 𑀲𑀩𑁆𑀩𑁂𑀲𑀜𑁆𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀩𑀳𑀼𑀓𑀸𑀭𑀢𑀸𑀬 𑀧𑀥𑀸𑀦𑀪𑀸𑀯𑀢𑁄 𑀘 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀞𑀫𑁄 𑀅𑀦𑀯𑀚𑁆𑀚𑀥𑀫𑁆𑀫𑁄 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀭𑀡𑀯𑀲𑁂𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀢𑀺. 𑀏𑀢𑁆𑀣 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀩𑀳𑀼𑀓𑀸𑀭𑀢𑀸 𑀧𑀥𑀸𑀦𑀢𑀸 𑀘 ‘‘𑀉𑀧𑀟𑁆𑀠𑀫𑀺𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺 𑀯𑀤𑀦𑁆𑀢𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤𑀸’’𑀢𑀺 𑀤𑁆𑀯𑀺𑀓𑁆𑀔𑀢𑀼𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 ‘‘𑀲𑀓𑀮𑀫𑁂𑀯 𑀳𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸’’𑀢𑀺 𑁋 𑀆𑀤𑀺𑀲𑀼𑀢𑁆𑀢𑀧𑀤𑁂𑀳𑀺 (𑀲𑀁. 𑀦𑀺. 𑁧.𑁧𑁨𑁯; 𑁫.𑁨) 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀦 𑀘𑀧𑀭𑀦𑁆𑀢𑀺 𑀧𑀼𑀦 𑀘 𑀅𑀧𑀭𑀁 𑀥𑀫𑁆𑀫𑀚𑀸𑀢𑀁. 𑀲𑀻𑀮𑀯𑀸𑀢𑀺 𑀏𑀢𑁆𑀣 𑀓𑁂𑀦𑀝𑁆𑀞𑁂𑀦 𑀲𑀻𑀮𑀁? 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁 ¶ . 𑀓𑀺𑀫𑀺𑀤𑀁 𑀲𑀻𑀮𑀦𑀁 𑀦𑀸𑀫? 𑀲𑀫𑀸𑀥𑀸𑀦𑀁, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑀥𑀸𑀭𑀡𑀁, 𑀛𑀸𑀦𑀸𑀤𑀺𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀆𑀥𑀸𑀭𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀲𑀻𑀮𑁂𑀢𑀺, 𑀲𑀻𑀮𑀢𑀻𑀢𑀺 𑀯𑀸 𑀲𑀻𑀮𑀁. 𑀅𑀬𑀁 𑀢𑀸𑀯 𑀲𑀤𑁆𑀤𑀮𑀓𑁆𑀔𑀡𑀦𑀬𑁂𑀦 𑀲𑀻𑀮𑀝𑁆𑀞𑁄. 𑀅𑀧𑀭𑁂 ¶ 𑀧𑀦 ‘‘𑀲𑀺𑀭𑀝𑁆𑀞𑁄 𑀲𑀻𑀮𑀝𑁆𑀞𑁄, 𑀲𑀻𑀢𑀮𑀝𑁆𑀞𑁄, 𑀲𑀻𑀮𑀝𑁆𑀞𑁄’’𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺. 𑀢𑀬𑀺𑀤𑀁 𑀧𑀸𑀭𑀺𑀧𑀽𑀭𑀺𑀢𑁄 𑀅𑀢𑀺𑀲𑀬𑀢𑁄 𑀯𑀸 𑀲𑀻𑀮𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸, 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄.

𑀬𑀣𑀸 𑀘 𑀲𑀻𑀮𑀯𑀸 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀜𑁆𑀳𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀓𑀸𑀬𑀯𑀸𑀘𑀸𑀳𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀢𑁂𑀦 𑀲𑀁𑀯𑀼𑀢𑁄 𑀧𑀺𑀳𑀺𑀢𑀓𑀸𑀬𑀯𑀸𑀘𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄. 𑀇𑀤𑀫𑀲𑁆𑀲 𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁. 𑀯𑀺𑀳𑀭𑀢𑀻𑀢𑀺 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀳𑁂𑀝𑁆𑀞𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲 𑀉𑀧𑀭𑀺 𑀯𑀺𑀲𑁂𑀲𑀸𑀦𑀁 𑀬𑁄𑀕𑀲𑁆𑀲 𑀘 𑀉𑀧𑀓𑀸𑀭𑀥𑀫𑁆𑀫𑀧𑀭𑀺𑀤𑀻𑀧𑀦𑀁. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀢𑁄 𑀅𑀘𑀯𑀦𑀥𑀫𑁆𑀫𑀢𑀸𑀧𑀭𑀺𑀤𑀻𑀧𑀦𑀁. 𑀲𑀫𑀸𑀤𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀯𑀲𑁂𑀲𑀢𑁄 𑀆𑀤𑀸𑀦𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀢𑀻𑀢𑀺 𑀲𑀺𑀓𑁆𑀔𑀸𑀬 𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀤𑀻𑀧𑀦𑀁.

𑀅𑀧𑀭𑁄 𑀦𑀬𑁄 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄 𑀧𑀸𑀧𑀓𑀺𑀭𑀺𑀬𑀸𑀬 𑀲𑀼𑀓𑀭𑀪𑀸𑀯𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄. 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀼𑀓𑁆𑀔𑀺𑀢𑁆𑀢𑁄 𑀖𑀝𑀺𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻. 𑀫𑀭𑀡𑀯𑀲𑁂𑀦 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀢𑀦𑀲𑀻𑀮𑁄 𑀯𑀸 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄, 𑀘𑀺𑀢𑁆𑀢𑀫𑁂𑀯 𑀯𑀸. 𑀢𑀁 𑀧𑀸𑀢𑀺𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄 ‘‘𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁦𑁦), ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘.

𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀺. ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 ¶ ¶ 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀻 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁬𑁨). 𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘𑀸𑀢𑀺 𑀧𑀸𑀢𑀺, 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 (𑀲𑀁. 𑀦𑀺. 𑁧.𑁫𑁫). 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀅. 𑀦𑀺. 𑁪.𑁯; 𑀇𑀢𑀺𑀯𑀼. 𑁧𑁫, 𑁧𑁦𑁫) 𑀘 𑀆𑀤𑀺. 𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁.

𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀼. 𑀦𑀺. 𑁧𑁭𑁧). 𑀢𑀢𑁄 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀅𑀣 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 𑀧𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄, 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀆𑀤𑀺𑀫𑁂𑀢𑀁 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁫) 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧-𑀇𑀢𑀺 𑀧𑀓𑀸𑀭𑁂, 𑀅𑀢𑀻𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀇𑀤𑀜𑁆𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀧𑀢𑀺 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀫𑁄𑀓𑁆𑀔𑁄𑀢𑀺 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑁄. 𑀲𑀻𑀮𑀲𑀁𑀯𑀭𑁄 𑀳𑀺 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄𑀯 𑀬𑀣𑀸𑀭𑀳𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄. 𑀧𑀢𑀺𑀫𑁄𑀓𑁆𑀔𑁄𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁. 𑀅𑀣 𑀯𑀸 𑀫𑁄𑀓𑁆𑀔𑀁 𑀧𑀢𑀺 𑀯𑀢𑁆𑀢𑀢𑀺, 𑀫𑁄𑀓𑁆𑀔𑀸𑀪𑀺𑀫𑀼𑀔𑀦𑁆𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀯𑀁 𑀢𑀸𑀯 𑀏𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀁𑀯𑀭𑀢𑀺 ¶ 𑀧𑀺𑀤𑀳𑀢𑀺 𑀏𑀢𑁂𑀦𑀸𑀢𑀺 𑀲𑀁𑀯𑀭𑁄, 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀅𑀢𑁆𑀣𑀢𑁄 𑀧𑀦 𑀢𑀢𑁄 𑀢𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀯𑀺𑀭𑀢𑀺𑀬𑁄 𑀘𑁂𑀢𑀦𑀸 𑀘, 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 ¶ 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 (𑀯𑀺𑀪. 𑁫𑁧𑁧).

𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀯𑁂𑀴𑀼𑀤𑀸𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀦𑀜𑁆𑀘 𑀅𑀓𑀭𑀡𑁂𑀦 𑀲𑀩𑁆𑀩𑀲𑁄 𑀅𑀦𑀸𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄𑀢𑀺 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀼 𑀲𑀸𑀭𑀼𑀧𑁆𑀧𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀲𑀺𑀬𑀸𑀤𑀺𑀅𑀕𑁄𑀘𑀭𑀁 𑀯𑀚𑁆𑀚𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀸𑀤𑀺𑀅𑀢𑁆𑀣𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑀕𑁄𑀘𑀭𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑀢𑁆𑀢𑀸 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄.

𑀅𑀧𑀺𑀘 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀲𑀓𑁆𑀓𑀘𑁆𑀘𑀓𑀸𑀭𑀻 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄.

𑀕𑁄𑀘𑀭𑁄 𑀧𑀦 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄, 𑀆𑀭𑀓𑁆𑀔𑀕𑁄𑀘𑀭𑁄, 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀬𑁄 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀯𑀼𑀢𑁆𑀢𑀮𑀓𑁆𑀔𑀡𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀼𑀢𑀁 𑀲𑀼𑀡𑀸𑀢𑀺, 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀓𑀗𑁆𑀔𑀁 𑀯𑀺𑀢𑀭𑀢𑀺, 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀬𑀲𑁆𑀲 𑀘 𑀅𑀦𑀼𑀲𑀺𑀓𑁆𑀔𑀦𑁆𑀢𑁄 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦, 𑀲𑀼𑀢𑁂𑀦, 𑀘𑀸𑀕𑁂𑀦, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄.

𑀬𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀬𑀼𑀕𑀫𑀢𑁆𑀢𑀤𑀲𑁆𑀲𑀻 𑀲𑀁𑀯𑀼𑀢𑁄 𑀕𑀘𑁆𑀙𑀢𑀺, 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁, 𑀦 𑀭𑀣𑀁 ¶ , 𑀦 𑀧𑀢𑁆𑀢𑀺𑀁, 𑀦 𑀇𑀢𑁆𑀣𑀺𑀁, 𑀦 𑀧𑀼𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑁄, 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺, 𑀅𑀬𑀁 𑀆𑀭𑀓𑁆𑀔𑀕𑁄𑀘𑀭𑁄.

𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄 𑀧𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀬𑀢𑁆𑀣 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 (𑀲𑀁. 𑀦𑀺. 𑁫.𑁩𑁭𑁨). 𑀢𑀢𑁆𑀣 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑁂𑀲𑀁 ¶ 𑀯𑀲𑁂𑀦𑁂𑀢𑁆𑀣 𑀕𑁄𑀘𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀇𑀫𑀸𑀬 𑀘 𑀕𑁄𑀘𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄.

𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀢𑁆𑀢𑀸 𑀅𑀡𑀼𑀧𑁆𑀧𑀫𑀸𑀡𑁂𑀲𑀼 𑀅𑀲𑁆𑀲𑀢𑀺𑀬𑀸 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑁂𑀔𑀺𑀬𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀧𑀭𑀫𑀸𑀡𑀼𑀫𑀢𑁆𑀢𑀁 𑀯𑀚𑁆𑀚𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀬𑁄𑀧𑀺 𑀲𑀩𑁆𑀩𑀮𑀳𑀼𑀓𑀁 𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀁 𑀧𑀸𑀭𑀸𑀚𑀺𑀓𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀅𑀬𑀫𑁆𑀧𑀺 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀦𑀸𑀫. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀦𑀯𑀲𑁂𑀲𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀺, 𑀯𑀢𑁆𑀢𑀢𑀺 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀪𑀺𑀲𑀮𑁆𑀮𑁂𑀔𑀺𑀓𑀸𑀢𑀺 𑀅𑀢𑀺𑀯𑀺𑀬 𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑁂𑀔𑀦𑀻𑀬𑀸, 𑀢𑁂𑀲𑀁 𑀢𑀦𑀼𑀪𑀸𑀯𑀸𑀬 𑀧𑀳𑀸𑀦𑀸𑀬 𑀬𑀼𑀢𑁆𑀢𑀭𑀽𑀧𑀸. 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸𑀢𑀺 𑀘𑁂𑀢𑀲𑁄 𑀧𑀝𑀺𑀘𑁆𑀙𑀸𑀤𑀓𑀸𑀦𑀁 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑀓𑀭𑀡𑁂𑀦 𑀘𑁂𑀢𑁄𑀯𑀺𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑀧𑁆𑀧𑀸𑀬𑀸, 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲𑁂𑀯 𑀯𑀸 𑀯𑀺𑀯𑀭𑀡𑀸𑀬 𑀧𑀸𑀓𑀝𑀻𑀓𑀭𑀡𑀸𑀬 𑀯𑀸 𑀲𑀧𑁆𑀧𑀸𑀬𑀸 𑀉𑀧𑀓𑀸𑀭𑀺𑀓𑀸𑀢𑀺 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸.

𑀇𑀤𑀸𑀦𑀺 𑀬𑁂𑀦 𑀦𑀺𑀩𑁆𑀩𑀺𑀤𑀸𑀤𑀺𑀆𑀯𑀳𑀡𑁂𑀦 𑀅𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸 𑀘 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀏𑀓𑀁𑀲𑁂𑀦𑁂𑀯 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬𑀸𑀢𑀺 𑀢𑀲𑁆𑀲𑁂𑀯 𑀯𑀺𑀭𑀚𑁆𑀚𑀦𑀢𑁆𑀣𑀸𑀬 𑀘 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬 𑀘. 𑀉𑀧𑀲𑀫𑀸𑀬𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀯𑀽𑀧𑀲𑀫𑀸𑀬. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 ¶ 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀺𑀚𑀸𑀦𑀦𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀘𑀢𑀼𑀫𑀕𑁆𑀕𑀲𑀫𑁆𑀩𑁄𑀥𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀸𑀬. 𑀏𑀢𑁂𑀲𑀼 𑀳𑀺 𑀆𑀤𑀺𑀢𑁄 𑀢𑀻𑀳𑀺 𑀧𑀤𑁂𑀳𑀺 𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸, 𑀤𑁆𑀯𑀻𑀳𑀺 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀆𑀤𑀺𑀁 𑀓𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑁄 𑀅𑀬𑀁 𑀲𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑁄 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀢𑀁 𑀓𑀣𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀺𑀘𑁆𑀙𑀓𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑁄𑀢𑀺 𑀦𑀺𑀇𑀘𑁆𑀙𑁄, 𑀢𑀲𑁆𑀲 𑀓𑀣𑀸 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸 𑀯𑀸 𑀅𑀧𑁆𑀧𑀺𑀘𑁆𑀙𑀓𑀣𑀸. 𑀏𑀢𑁆𑀣 𑀘 𑀅𑀢𑁆𑀭𑀺𑀘𑁆𑀙𑁄, 𑀧𑀸𑀧𑀺𑀘𑁆𑀙𑁄, 𑀫𑀳𑀺𑀘𑁆𑀙𑁄, 𑀅𑀧𑁆𑀧𑀺𑀘𑁆𑀙𑁄𑀢𑀺 𑀇𑀘𑁆𑀙𑀸𑀯𑀲𑁂𑀦 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀢𑁂𑀲𑀼 𑀅𑀢𑁆𑀢𑀦𑀸 𑀬𑀣𑀸𑀮𑀤𑁆𑀥𑁂𑀦 𑀮𑀸𑀪𑁂𑀦 𑀅𑀢𑀺𑀢𑁆𑀢𑁄 𑀉𑀧𑀭𑀽𑀧𑀭𑀺 𑀮𑀸𑀪𑀁 𑀇𑀘𑁆𑀙𑀦𑁆𑀢𑁄 𑀅𑀢𑁆𑀭𑀺𑀘𑁆𑀙𑁄 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑁋

‘‘𑀘𑀢𑀼𑀩𑁆𑀪𑀺 ¶ 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺. (𑀚𑀸. 𑁧.𑁫.𑁧𑁦𑁩) 𑀘;

‘‘𑀅𑀢𑁆𑀭𑀺𑀘𑁆𑀙𑀁 𑀅𑀢𑀺𑀮𑁄𑀪𑁂𑀦, 𑀅𑀢𑀺𑀮𑁄𑀪𑀫𑀤𑁂𑀦 𑀘𑀸’’𑀢𑀺. 𑀘 𑀯𑀼𑀢𑁆𑀢𑀁;

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀸𑀫𑀬𑀫𑀸𑀦𑀸𑀬 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀧𑀸𑀧𑀺𑀘𑁆𑀙𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀤𑀼𑀲𑁆𑀲𑀻𑀮𑁄 𑀲𑀫𑀸𑀦𑁄 ‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀻’’𑀢𑀺𑀆𑀤𑀺 (𑀯𑀺𑀪. 𑁮𑁫𑁧).

𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀽 𑀫𑀳𑀺𑀘𑁆𑀙𑁄, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀲𑀤𑁆𑀥𑁄 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀲𑀻𑀮𑀯𑀸 𑀲𑀫𑀸𑀦𑁄 ‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀻’’𑀢𑀺𑀆𑀤𑀺. 𑀤𑀼𑀢𑁆𑀢𑀧𑁆𑀧𑀺𑀬𑀢𑀸𑀬 𑀳𑀺𑀲𑁆𑀲 𑀯𑀺𑀚𑀸𑀢𑀫𑀸𑀢𑀸𑀧𑀺 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀲𑀓𑀝𑁂𑀦 𑀧𑀘𑁆𑀘𑀬𑁂 𑀤𑁂𑀦𑁆𑀢𑀼, 𑀢𑀬𑁄𑀧𑁂𑀢𑁂 𑀅𑀢𑀧𑁆𑀧𑀬𑀸’’𑀢𑀺.

𑀏𑀢𑁂 𑀧𑀦 𑀅𑀢𑁆𑀭𑀺𑀘𑁆𑀙𑀢𑀸𑀤𑀬𑁄 𑀤𑁄𑀲𑁂 𑀆𑀭𑀓𑀸 𑀯𑀺𑀯𑀚𑁆𑀚𑁂𑀢𑁆𑀯𑀸 𑀲𑀦𑁆𑀢𑀕𑀼𑀡𑀦𑀺𑀕𑀼𑀳𑀦𑀸𑀥𑀺𑀧𑁆𑀧𑀸𑀬𑁄 𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀽 𑀅𑀧𑁆𑀧𑀺𑀘𑁆𑀙𑁄. 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 ¶ 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀲𑀤𑁆𑀥𑁄 𑀲𑀫𑀸𑀦𑁄 ‘‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺, 𑀲𑀻𑀮𑀯𑀸, 𑀩𑀳𑀼𑀲𑁆𑀲𑀼𑀢𑁄, 𑀧𑀯𑀺𑀯𑀺𑀢𑁆𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺, 𑀲𑀫𑀸𑀳𑀺𑀢𑁄, 𑀧𑀜𑁆𑀜𑀯𑀸 𑀲𑀫𑀸𑀦𑁄 ‘‘𑀧𑀜𑁆𑀜𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺. 𑀲𑁆𑀯𑀸𑀬𑀁 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑁄, 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄, 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀤𑀸𑀬𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀅𑀢𑁆𑀢𑀦𑁄 𑀣𑀸𑀫𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀲𑀘𑁂𑀧𑀺 𑀳𑀺 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑁂𑀯 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄 𑀘𑁂 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑁂𑀯 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀘𑁂 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺. 𑀏𑀯𑀭𑀽𑀧𑁄 𑀳𑀺 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀣𑀸𑀯𑀭𑀁 𑀓𑀭𑁄𑀢𑀺, 𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺. 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀲𑁆𑀲 𑀧𑀦 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄. 𑀬𑁄 𑀅𑀢𑁆𑀢𑀦𑁄 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 ¶ . 𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄. 𑀏𑀯𑀫𑁂𑀢𑁂𑀲𑀁 𑀅𑀧𑁆𑀧𑀺𑀘𑁆𑀙𑀸𑀦𑀁 𑀬𑀸 𑀅𑀧𑁆𑀧𑀺𑀘𑁆𑀙𑀢𑀸, 𑀢𑀲𑁆𑀲𑀸 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑀯𑀲𑁂𑀦 𑀲𑀧𑁆𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀪𑁂𑀤𑀲𑁆𑀲 𑀇𑀘𑁆𑀙𑀸𑀘𑀸𑀭𑀲𑁆𑀲 𑀆𑀤𑀻𑀦𑀯𑀯𑀺𑀪𑀸𑀯𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀅𑀧𑁆𑀧𑀺𑀘𑁆𑀙𑀓𑀣𑀸.

𑀲𑀦𑁆𑀢𑀼𑀝𑁆𑀞𑀺𑀓𑀣𑀸𑀢𑀺 𑀏𑀢𑁆𑀣 𑀲𑀦𑁆𑀢𑀼𑀝𑁆𑀞𑀻𑀢𑀺 𑀲𑀓𑁂𑀦 𑀅𑀢𑁆𑀢𑀦𑀸 𑀮𑀤𑁆𑀥𑁂𑀦 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺. 𑀅𑀣 𑀯𑀸 𑀯𑀺𑀲𑀫𑀁 𑀧𑀘𑁆𑀘𑀬𑀺𑀘𑁆𑀙𑀁 𑀧𑀳𑀸𑀬 𑀲𑀫𑀁 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺, 𑀲𑀦𑁆𑀢𑁂𑀦 𑀯𑀸 𑀯𑀺𑀚𑁆𑀚𑀫𑀸𑀦𑁂𑀦 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀅𑀢𑀻𑀢𑀁 𑀦𑀸𑀦𑀼𑀩𑀤𑁆𑀥𑁄 𑀲𑁄, 𑀦𑀧𑁆𑀧𑀚𑀧𑁆𑀧𑀫𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑁄, 𑀲𑀦𑁆𑀢𑀼𑀝𑁆𑀞𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀲𑀫𑁆𑀫𑀸 𑀯𑀸 𑀜𑀸𑀬𑁂𑀦 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀯𑀺𑀥𑀺𑀦𑀸 𑀧𑀘𑁆𑀘𑀬𑁂𑀳𑀺 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺, 𑀅𑀢𑁆𑀣𑀢𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄, 𑀲𑁄 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀓𑀣𑀁? 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄. 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼.

𑀢𑀢𑁆𑀭𑀸𑀬𑀁 ¶ 𑀧𑀪𑁂𑀤𑀯𑀡𑁆𑀡𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺, 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺, 𑀲𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁 𑀤𑀼𑀩𑁆𑀩𑀮𑀸𑀦𑀁 𑀅𑀧𑁆𑀧𑀮𑀸𑀪𑀻𑀦𑀁 𑀳𑁄𑀢𑀽’’𑀢𑀺 𑀢𑁂𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀢𑁂𑀲𑀁 𑀯𑀸 𑀧𑀼𑀭𑀸𑀡𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀆𑀩𑀸𑀥𑀺𑀓𑁄 𑀳𑁄𑀢𑀺, 𑀮𑀽𑀔𑀁 𑀧𑀡𑀻𑀢𑀁 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀸𑀴𑁆𑀳𑀁 𑀯𑀸 𑀭𑁄𑀕𑀸𑀩𑀸𑀥𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 ¶ 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀩𑀳𑀼𑀁 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 ‘‘𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀼𑀭𑀽𑀧𑁄’’𑀢𑀺 𑀘𑀻𑀯𑀭𑀁 𑀯𑀺𑀬 𑀢𑁂𑀲𑀁 𑀤𑀢𑁆𑀯𑀸 𑀢𑁂𑀲𑀁 𑀯𑀸 𑀲𑁂𑀲𑀓𑀁 𑀅𑀢𑁆𑀢𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀯𑀸 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺 𑀫𑀦𑀸𑀧𑀁 𑀯𑀸 𑀆𑀫𑀦𑀸𑀧𑀁 𑀯𑀸 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀸𑀭𑀓𑀫𑁆𑀧𑀺, 𑀲𑁄 𑀢𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀢𑀺, 𑀧𑀼𑀦 𑀅𑀜𑁆𑀜𑀁 𑀲𑀼𑀦𑁆𑀤𑀭𑀢𑀭𑀁 𑀧𑀸𑀧𑀼𑀡𑀸𑀢𑀺, 𑀢𑀁 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀩𑁆𑀩𑀮𑁄 𑀯𑀸, 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁄 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 ¶ 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀲𑀼𑀦𑁆𑀤𑀭𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺 ‘‘𑀧𑀡𑀻𑀢𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦’’𑀦𑁆𑀢𑀺, 𑀫𑀳𑀸𑀧𑀼𑀜𑁆𑀜𑀢𑀸𑀬 𑀯𑀸 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀩𑀳𑀽𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺, 𑀲𑁄 𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀢𑀼𑀲𑁆𑀲𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀁 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀢𑁂𑀮𑁂𑀦 𑀅𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀬𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑁂𑀦 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑀓𑁂𑀦 𑀬𑁂𑀦 𑀓𑁂𑀦𑀘𑀺 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀫𑀼𑀢𑁆𑀢𑀳𑀭𑀻𑀢𑀓𑀁, 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁 𑀞𑀧𑁂𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀇𑀤𑀁 𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢’’𑀦𑁆𑀢𑀺, ‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄’’𑀢𑀺 (𑀫𑀳𑀸𑀯. 𑁧𑁨𑁮) 𑀯𑀘𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀲𑁄 𑀏𑀯𑀁𑀧𑀪𑁂𑀤𑁄 𑀲𑀩𑁆𑀩𑁄𑀧𑀺 𑀲𑀦𑁆𑀢𑁄𑀲𑁄 𑀲𑀦𑁆𑀢𑀼𑀝𑁆𑀞𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄’’𑀢𑀺. 𑀢𑀲𑁆𑀲𑀸 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀆𑀦𑀺𑀲𑀁𑀲𑀯𑀺𑀪𑀸𑀯𑀦𑀯𑀲𑁂𑀦 ¶ 𑀢𑀧𑁆𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀪𑁂𑀤𑀲𑁆𑀲 𑀇𑀘𑁆𑀙𑀸𑀘𑀸𑀭𑀲𑁆𑀲 𑀆𑀤𑀻𑀦𑀯𑀯𑀺𑀪𑀸𑀯𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸. 𑀇𑀢𑁄 𑀧𑀭𑀸𑀲𑀼𑀧𑀺 𑀓𑀣𑀸𑀲𑀼 𑀏𑀲𑁂𑀯 𑀦𑀬𑁄. 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑀧𑀯𑀺𑀯𑁂𑀓𑀓𑀣𑀸𑀢𑀺 𑀏𑀢𑁆𑀣 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸. 𑀢𑁂𑀲𑀼 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺 ¶ , 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀺, 𑀏𑀯𑀁 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀺𑀯𑀺𑀢𑁆𑀢𑀯𑀸𑀲𑁄 𑀓𑀸𑀬𑀯𑀺𑀯𑁂𑀓𑁄 𑀦𑀸𑀫. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁫𑁭). 𑀯𑀺𑀯𑁂𑀓𑁄𑀬𑁂𑀯 𑀧𑀯𑀺𑀯𑁂𑀓𑁄, 𑀧𑀯𑀺𑀯𑁂𑀓𑁂 𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀧𑀯𑀺𑀯𑁂𑀓𑀓𑀣𑀸.

𑀅𑀲𑀁𑀲𑀕𑁆𑀕𑀓𑀣𑀸𑀢𑀺 𑀏𑀢𑁆𑀣 𑀲𑀯𑀦𑀲𑀁𑀲𑀕𑁆𑀕𑁄, 𑀤𑀲𑁆𑀲𑀦𑀲𑀁𑀲𑀕𑁆𑀕𑁄, 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄, 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄, 𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀧𑀜𑁆𑀘 𑀲𑀁𑀲𑀕𑁆𑀕𑀸. 𑀢𑁂𑀲𑀼 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 ‘‘𑀅𑀫𑀼𑀓𑀲𑁆𑀫𑀺𑀁 𑀞𑀸𑀦𑁂 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺, 𑀲𑁄 𑀢𑀁 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀏𑀯𑀁 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀲𑁆𑀲𑀯𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺, 𑀅𑀧𑀺𑀘 𑀔𑁄 𑀲𑀸𑀫𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁, 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀏𑀯𑀁 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀤𑀲𑁆𑀲𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀤𑀺𑀲𑁆𑀯𑀸 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀓𑀺𑀮𑁂𑀲𑀲𑀦𑁆𑀣𑀯𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀲𑀜𑁆𑀚𑀕𑁆𑀖𑀦𑀸𑀤𑀺𑀧𑀺 𑀏𑀢𑁂𑀦𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀅𑀢𑁆𑀢𑀦𑁄 𑀧𑀦 𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀤𑀢𑁆𑀯𑀸 𑀅𑀤𑀢𑁆𑀯𑀸 𑀯𑀸 𑀢𑁂𑀦 𑀤𑀺𑀦𑁆𑀦𑀲𑁆𑀲 𑀯𑀦𑀪𑀗𑁆𑀕𑀺𑀦𑀺𑀬𑀸𑀤𑀺𑀦𑁄 𑀧𑀭𑀺𑀪𑁄𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀓𑀺𑀮𑁂𑀲𑀲𑀦𑁆𑀣𑀯𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀫𑀸𑀢𑀼𑀕𑀸𑀫𑀲𑁆𑀲 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑀦𑁆𑀣𑀯𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫.

𑀬𑁄𑀧𑀺 𑀘𑁂𑀲 ‘‘𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦 𑀲𑀳𑀲𑁄𑀓𑀻 𑀲𑀳𑀦𑀦𑁆𑀤𑀻 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑁄 𑀬𑁄𑀕𑀁 𑀆𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁩.𑁩; 𑀫𑀳𑀸𑀦𑀺. 𑁧𑁬𑁪) 𑀏𑀯𑀁 ¶ 𑀯𑀼𑀢𑁆𑀢𑁄 𑀅𑀦𑀦𑀼𑀮𑁄𑀫𑀺𑀓𑁄 𑀕𑀺𑀳𑀺𑀲𑀁𑀲𑀕𑁆𑀕𑁄 𑀦𑀸𑀫, 𑀬𑁄 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺𑀧𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀁𑀲𑀕𑁆𑀕𑁄, 𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀬𑁆𑀯𑀸𑀬𑀁 ¶ 𑀲𑀁𑀲𑀸𑀭𑁂 𑀣𑀺𑀭𑀢𑀭𑀁 𑀲𑀁𑀯𑁂𑀕𑀲𑀗𑁆𑀔𑀸𑀭𑁂𑀲𑀼 𑀢𑀺𑀩𑁆𑀩𑀁 𑀪𑀬𑀲𑀜𑁆𑀜𑀁 𑀲𑀭𑀻𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀚𑀺𑀕𑀼𑀘𑁆𑀙𑀸𑀧𑀼𑀩𑁆𑀩𑀗𑁆𑀕𑀫𑀁 𑀳𑀺𑀭𑁄𑀢𑁆𑀢𑀧𑁆𑀧𑀁 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀲𑀩𑁆𑀩𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀢𑁆𑀣 𑀅𑀮𑀕𑁆𑀕𑀪𑀸𑀯𑁄, 𑀅𑀬𑀁 𑀲𑀩𑁆𑀩𑀲𑀁𑀲𑀕𑁆𑀕𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀅𑀲𑀁𑀲𑀕𑁆𑀕𑁄, 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸.

𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸𑀢𑀺 𑀏𑀢𑁆𑀣 𑀯𑀻𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁, 𑀯𑀺𑀥𑀺𑀦𑀸 𑀈𑀭𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀜𑁆𑀘 𑀢𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀆𑀭𑀪𑀦𑀁 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀲𑁆𑀯𑀸𑀬𑀁 𑀓𑀸𑀬𑀺𑀓𑁄, 𑀘𑁂𑀢𑀲𑀺𑀓𑁄 𑀘𑀸𑀢𑀺 𑀤𑀼𑀯𑀺𑀥𑁄, 𑀆𑀭𑀫𑁆𑀪𑀥𑀸𑀢𑀼, 𑀦𑀺𑀓𑁆𑀓𑀫𑀥𑀸𑀢𑀼, 𑀧𑀭𑀓𑁆𑀓𑀫𑀥𑀸𑀢𑀼, 𑀘𑀸𑀢𑀺 𑀢𑀺𑀯𑀺𑀥𑁄, 𑀲𑀫𑁆𑀫𑀧𑁆𑀧𑀥𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀲𑁄 𑀲𑀩𑁆𑀩𑁄𑀧𑀺 𑀬𑁄 𑀪𑀺𑀓𑁆𑀔𑀼 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀞𑀸𑀦𑁂 𑀉𑀧𑁆𑀧𑀦𑁆𑀦𑀁 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀁 𑀲𑀬𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀓𑀡𑁆𑀳𑀲𑀧𑁆𑀧𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀅𑀫𑀺𑀢𑁆𑀢𑀁 𑀕𑀻𑀯𑀸𑀬 𑀧𑀳𑀭𑀦𑁆𑀢𑁄 𑀯𑀺𑀬 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀯𑀻𑀭𑀺𑀬𑀩𑀮𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀯𑀻𑀭𑀺𑀬𑀸𑀭𑀫𑁆𑀪𑁄 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸.

𑀲𑀻𑀮𑀓𑀣𑀸𑀢𑀺𑀆𑀤𑀻𑀲𑀼 𑀤𑀼𑀯𑀺𑀥𑀁 𑀲𑀻𑀮𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀢𑀢𑁆𑀣 𑀮𑁄𑀓𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀮𑁄𑀓𑀼𑀢𑁆𑀢𑀭𑀁 𑀫𑀕𑁆𑀕𑀲𑀻𑀮𑀁 𑀨𑀮𑀲𑀻𑀮𑀜𑁆𑀘. 𑀢𑀣𑀸 𑀲𑀫𑀸𑀥𑀺𑀧𑀺. 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀽𑀢𑀸 𑀲𑀳 𑀉𑀧𑀘𑀸𑀭𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀮𑁄𑀓𑀺𑀬𑁄 𑀲𑀫𑀸𑀥𑀺, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀧𑀦𑁂𑀢𑁆𑀣 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺 𑀦𑀸𑀫. 𑀢𑀣𑀸 𑀧𑀜𑁆𑀜𑀸𑀧𑀺. 𑀮𑁄𑀓𑀺𑀬𑀸 𑀲𑀼𑀢𑀫𑀬𑀸, 𑀘𑀺𑀦𑁆𑀢𑀸𑀫𑀬𑀸, 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸, 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀕𑀳𑁂𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀸 𑀫𑀕𑁆𑀕𑀧𑀜𑁆𑀜𑀸 𑀨𑀮𑀧𑀜𑁆𑀜𑀸 𑀘. 𑀯𑀺𑀫𑀼𑀢𑁆𑀢𑀺 𑀅𑀭𑀺𑀬𑀨𑀮𑀯𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘. 𑀅𑀧𑀭𑁂 𑀧𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀻𑀦𑀫𑁆𑀧𑀺 𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀫𑁆𑀧𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀇𑀢𑀺 𑀇𑀫𑁂𑀲𑀁 𑀲𑀻𑀮𑀸𑀤𑀻𑀦𑀁 𑀲𑀤𑁆𑀥𑀺𑀁 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀆𑀦𑀺𑀲𑀁𑀲𑀯𑀺𑀪𑀸𑀯𑀦𑀯𑀲𑁂𑀦 𑀘𑁂𑀯 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀁 𑀆𑀤𑀻𑀦𑀯𑀯𑀺𑀪𑀸𑀯𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸, 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀯𑀸 𑀲𑀻𑀮𑀸𑀤𑀺𑀓𑀣𑀸 𑀦𑀸𑀫.

𑀏𑀢𑁆𑀣 ¶ 𑀘 ‘‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺, 𑀅𑀧𑁆𑀧𑀺𑀘𑁆𑀙 𑀓𑀣𑀜𑁆𑀘 𑀧𑀭𑁂𑀲𑀁 𑀓𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁨𑁫𑁨; 𑀅. 𑀦𑀺. 𑁧𑁦.𑁭𑁦) ‘‘𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁪; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁧𑁨𑁮) 𑀘 𑀆𑀤𑀺𑀯𑀘𑀦𑀢𑁄 𑀲𑀬𑀜𑁆𑀘 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 𑀧𑀭𑁂𑀲𑀫𑁆𑀧𑀺 𑀢𑀤𑀢𑁆𑀣𑀸𑀬 𑀳𑀺𑀢𑀚𑁆𑀛𑀸𑀲𑀬𑁂𑀦 ¶ 𑀧𑀯𑀢𑁆𑀢𑁂𑀢𑀩𑁆𑀩𑀸 𑀢𑀣𑀸𑀭𑀽𑀧𑀻 𑀓𑀣𑀸. 𑀬𑀸 𑀇𑀥 𑀅𑀪𑀺𑀲𑀮𑁆𑀮𑁂𑀔𑀺𑀓𑀸𑀤𑀺𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸 𑀅𑀧𑁆𑀧𑀺𑀘𑁆𑀙𑀓𑀣𑀸𑀤𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀭𑀓𑀲𑁆𑀲𑁂𑀯 𑀳𑀺 𑀓𑀣𑀸 𑀯𑀺𑀲𑁂𑀲𑀢𑁄 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀺𑀦𑀻. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁…𑀧𑁂… 𑀅𑀓𑀲𑀺𑀭𑀮𑀸𑀪𑀻’’𑀢𑀺 (𑀅. 𑀦𑀺. 𑁯.𑁩).

𑀏𑀯𑀭𑀽𑀧𑀺𑀬𑀸𑀢𑀺 𑀈𑀤𑀺𑀲𑀸𑀬 𑀬𑀣𑀸𑀯𑀼𑀢𑁆𑀢𑀸𑀬. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀬𑀣𑀺𑀘𑁆𑀙𑀺𑀢𑀮𑀸𑀪𑀻 𑀬𑀣𑀸𑀭𑀼𑀘𑀺𑀮𑀸𑀪𑀻, 𑀲𑀩𑁆𑀩𑀓𑀸𑀮𑀁 𑀇𑀫𑀁 𑀓𑀣𑀁 𑀲𑁄𑀢𑀼𑀁 𑀯𑀺𑀘𑀸𑀭𑁂𑀢𑀼𑀜𑁆𑀘 𑀬𑀣𑀸𑀲𑀼𑀔𑀁 𑀮𑀪𑀦𑁆𑀢𑁄. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀦𑀺𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀚𑀳𑀦𑀢𑁆𑀣𑀸𑀬. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀸𑀤𑀺𑀅𑀢𑁆𑀣𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀘 𑀓𑀼𑀲𑀮𑀸𑀦𑀁 𑀲𑀳𑀯𑀺𑀧𑀲𑁆𑀲𑀦𑀸𑀦𑀁 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀲𑀫𑁆𑀧𑀸𑀤𑀦𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀸𑀬. 𑀣𑀸𑀫𑀯𑀸𑀢𑀺 𑀉𑀲𑁆𑀲𑁄𑀴𑁆𑀳𑀺𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑀣𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑀧𑀭𑀓𑁆𑀓𑀫𑁄 𑀅𑀲𑀺𑀣𑀺𑀮𑀯𑀻𑀭𑀺𑀬𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 𑀅𑀦𑁄𑀭𑁄𑀳𑀺𑀢𑀥𑀼𑀭𑁄 𑀅𑀦𑁄𑀲𑀓𑁆𑀓𑀯𑀻𑀭𑀺𑀬𑁄.

𑀧𑀜𑁆𑀜𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀜𑁆𑀜𑀯𑀸. 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀦𑁆𑀢𑀺𑀬𑀸. 𑀅𑀭𑀺𑀬𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀺𑀮𑁂𑀲𑁂𑀳𑀺 𑀆𑀭𑀓𑀸 𑀤𑀽𑀭𑁂 𑀞𑀺𑀢𑀸𑀬 𑀦𑀺𑀤𑁆𑀤𑁄𑀲𑀸𑀬. 𑀦𑀺𑀩𑁆𑀩𑁂𑀥𑀺𑀓𑀸𑀬𑀸𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀬. 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀔𑁂𑀧𑀦𑀢𑁄 ‘‘𑀤𑀼𑀓𑁆𑀔𑀓𑁆𑀔𑀬𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀅𑀭𑀺𑀬𑀫𑀕𑁆𑀕𑀁 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀕𑀘𑁆𑀙𑀦𑁆𑀢𑀺𑀬𑀸. 𑀇𑀫𑁂𑀲𑀼 𑀘 𑀧𑀦 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀲𑀻𑀮𑀁 𑀯𑀻𑀭𑀺𑀬𑀁 𑀧𑀜𑁆𑀜𑀸 𑀘 𑀬𑁄𑀕𑀺𑀦𑁄 𑀅𑀚𑁆𑀛𑀢𑁆𑀢𑀺𑀓𑀁 𑀅𑀗𑁆𑀕𑀁, 𑀇𑀢𑀭𑀤𑁆𑀯𑀬𑀁 𑀩𑀸𑀳𑀺𑀭𑀁 𑀅𑀗𑁆𑀕𑀁. 𑀢𑀢𑁆𑀣𑀸𑀧𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀲𑁂𑀲𑀁 𑀘𑀢𑀼𑀩𑁆𑀩𑀺𑀥𑀁 𑀇𑀚𑁆𑀛𑀢𑀺, 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀯𑁂𑀢𑁆𑀣 𑀩𑀳𑀼𑀓𑀸𑀭𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀯𑀟𑁆𑀠𑁂𑀲𑀺. 𑀢𑀢𑁆𑀣 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀏𑀓𑀁𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 ¶ . 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀯𑀦𑁆𑀢𑀢𑀸𑀬 𑀪𑀯𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀁, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀸 𑀏𑀢𑀁 𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀁, 𑀅𑀯𑀲𑁆𑀲𑀁𑀪𑀸𑀯𑀻 𑀏𑀓𑀁𑀲𑁂𑀦𑁂𑀯 𑀢𑀲𑁆𑀲 𑀢𑀢𑁆𑀣 𑀦𑀺𑀬𑁄𑀚𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀪𑀕𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀉𑀢𑁆𑀢𑀫𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑀁 ¶ 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀤𑀺𑀲𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑀲𑁆𑀲 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀺𑀦𑀸 𑀲𑀓𑀮𑀁 𑀲𑀸𑀲𑀦𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀢𑀢𑁆𑀣 𑀆𑀤𑀭𑀚𑀸𑀢𑀲𑁆𑀲 𑀧𑀼𑀩𑁆𑀩𑁂 𑀬𑁂𑀳𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀢𑁆𑀢𑀸 𑀘 𑀪𑀸𑀯𑀦𑀸𑀦𑀬𑀁 𑀧𑀓𑀸𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀭𑀳𑀢𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀢𑁂𑀦 𑀘 𑀧𑀦, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 𑀪𑀸𑀯𑁂𑀢𑀩𑁆𑀩𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦𑀸𑀢𑀺 𑀏𑀯𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦 𑀬𑀣𑀸𑀯𑀼𑀢𑁆𑀢𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦. 𑀢𑁂𑀦𑁂𑀯𑀸𑀳 ‘‘𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬𑀸’’𑀢𑀺. 𑀉𑀢𑁆𑀢𑀭𑀻𑀢𑀺 𑀆𑀭𑀤𑁆𑀥𑀢𑀭𑀼𑀡𑀯𑀺𑀧𑀲𑁆𑀲𑀦𑀲𑁆𑀲 𑀭𑀸𑀕𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀯𑀺𑀲𑁄𑀥𑀦𑀢𑁆𑀣𑀁 𑀢𑀢𑁄 𑀉𑀤𑁆𑀥𑀁 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸 𑀯𑀟𑁆𑀠𑁂𑀢𑀩𑁆𑀩𑀸 𑀘.

𑀅𑀲𑀼𑀪𑀸𑀢𑀺 𑀏𑀓𑀸𑀤𑀲𑀲𑀼 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑀣𑀸𑀭𑀳𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀲𑀼𑀪𑀪𑀸𑀯𑀦𑀸. 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀓𑀸𑀫𑀭𑀸𑀕𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀅𑀬𑀫𑀢𑁆𑀣𑁄 𑀲𑀸𑀮𑀺𑀮𑀸𑀯𑀓𑁄𑀧𑀫𑀸𑀬 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀏𑀯𑀁𑀪𑀽𑀢𑀁 𑀪𑀸𑀯𑀦𑀸𑀯𑀺𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺. 𑀫𑁂𑀢𑁆𑀢𑀸𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁. 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀦𑁆𑀦𑀲𑁆𑀲 𑀓𑁄𑀧𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺. 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀧𑀘𑁆𑀙𑁂𑀤𑀦𑀢𑁆𑀣𑀸𑀬. 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 ‘‘𑀅𑀲𑁆𑀫𑀻’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀦𑀯𑀯𑀺𑀥𑀲𑁆𑀲 𑀫𑀸𑀦𑀲𑁆𑀲 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬.

𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑁄 𑀧𑀪𑀗𑁆𑀕𑀼𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀘 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 (𑀥. 𑀧. 𑁨𑁭𑁭; 𑀘𑀽𑀴𑀦𑀺. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁫𑁬) 𑀧𑀯𑀢𑁆𑀢𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 ¶ 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄. 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀻𑀢𑀺 𑀅𑀲𑀸𑀭𑀓𑀢𑁄 𑀅𑀯𑀲𑀯𑀢𑁆𑀢𑀦𑀢𑁄 𑀧𑀭𑀢𑁄 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀘 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀥. 𑀧. 𑁨𑁭𑁯; 𑀘𑀽𑀴𑀦𑀺. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁫𑁬) 𑀏𑀯𑀁 𑀧𑀯𑀢𑁆𑀢𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀅𑀦𑀢𑁆𑀢𑀲𑀜𑁆𑀜𑀸 𑀘𑀺𑀢𑁆𑀢𑁂 𑀲𑀡𑁆𑀞𑀳𑀢𑀺 𑀅𑀢𑀺𑀤𑀴𑁆𑀳𑀁 𑀧𑀢𑀺𑀝𑁆𑀞𑀳𑀢𑀺. 𑀅𑀦𑀺𑀘𑁆𑀘𑀮𑀓𑁆𑀔𑀡𑁂 𑀳𑀺 𑀤𑀺𑀝𑁆𑀞𑁂 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀳𑀺 𑀏𑀓𑀲𑁆𑀫𑀺𑀁 𑀤𑀺𑀝𑁆𑀞𑁂 𑀇𑀢𑀭𑀤𑁆𑀯𑀬𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀻’’𑀢𑀺. 𑀅𑀦𑀢𑁆𑀢𑀮𑀓𑁆𑀔𑀡𑁂 𑀲𑀼𑀤𑀺𑀝𑁆𑀞𑁂 ‘‘𑀅𑀲𑁆𑀫𑀻’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀫𑀸𑀦𑁄 𑀲𑀼𑀧𑁆𑀧𑀚𑀳𑁄𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀲𑀼𑀪𑀸𑀤𑀺𑀪𑀸𑀯𑀦𑀸𑀦𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀫𑁂𑀖𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀦𑀦𑁆𑀤𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪-𑁫. 𑀘𑀢𑀼𑀢𑁆𑀣𑁂 ¶ 𑀆𑀕𑀫𑀬𑀫𑀸𑀦𑁄𑀢𑀺 𑀑𑀮𑁄𑀓𑀬𑀫𑀸𑀦𑁄, 𑀩𑀼𑀤𑁆𑀥𑁄 𑀲𑀳𑀲𑀸 𑀅𑀧𑀯𑀺𑀲𑀺𑀢𑁆𑀯𑀸 𑀬𑀸𑀯 𑀲𑀸 𑀓𑀣𑀸 𑀦𑀺𑀝𑁆𑀞𑀸𑀢𑀺, 𑀢𑀸𑀯 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀤𑀫𑀯𑁄𑀘𑀸𑀢𑀺 𑀇𑀤𑀁 𑀓𑀣𑀸𑀯𑀲𑀸𑀦𑀁 𑀉𑀤𑀺𑀓𑁆𑀔𑀫𑀸𑀦𑁄’’𑀢𑀺. 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀲𑀦𑁆𑀢𑀻𑀭𑀡𑀁 𑀅𑀥𑀺𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲𑀸’’𑀢𑀺. 𑀫𑀸𑀦𑀲𑀦𑁆𑀢𑀺 𑀭𑀸𑀕𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀅𑀭𑀳𑀢𑁆𑀢𑀫𑁆𑀧𑀺. ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩) 𑀏𑀢𑁆𑀣 𑀭𑀸𑀕𑁄 𑀫𑀸𑀦𑀲𑀁. ‘‘𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲’’𑀦𑁆𑀢𑀺 (𑀥. 𑀲. 𑁬) 𑀏𑀢𑁆𑀣 𑀘𑀺𑀢𑁆𑀢𑀁. ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀔𑁄, 𑀓𑀸𑀮𑀁 𑀓𑀬𑀺𑀭𑀸 𑀚𑀦𑁂 𑀲𑀼𑀢𑀸’’𑀢𑀺 (𑀲𑀁. 𑀦𑀺. 𑁧.𑁧𑁫𑁯) 𑀏𑀢𑁆𑀣 𑀅𑀭𑀳𑀢𑁆𑀢𑀁. 𑀇𑀥𑀸𑀧𑀺 𑀅𑀭𑀳𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑀸𑀢𑀺 𑀅𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑀸’’𑀢𑀺. 𑀅𑀧𑁆𑀧𑀢𑁆𑀢𑀁 𑀫𑀸𑀦𑀲𑀁 𑀅𑀭𑀳𑀢𑁆𑀢𑀁 𑀏𑀢𑁂𑀳𑀻𑀢𑀺 𑀅𑀧𑁆𑀧𑀢𑁆𑀢𑀫𑀸𑀦𑀲𑀸. 𑀇𑀤𑀸𑀦𑀺 𑀘𑀺𑀢𑁆𑀢𑀧𑀭𑀺𑀬𑀸𑀬𑀫𑁂𑀯 𑀫𑀸𑀦𑀲𑀲𑀤𑁆𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀭𑀳𑀢𑁆𑀢𑀁 𑀯𑀸’’𑀢𑀺𑀆𑀤𑀺. 𑀧𑀜𑁆𑀘𑀫𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀦𑁆𑀤𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁂𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 ¶ 𑀚𑀻𑀯𑀺𑀢𑀲𑀫𑁆𑀪𑀸𑀭𑀸𑀢𑀺 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀫𑁆𑀪𑀸𑀭𑀸 𑀧𑀘𑁆𑀘𑀬𑀸. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑁆𑀫𑀸 𑀜𑀸𑀬𑁂𑀦 𑀅𑀦𑀯𑀚𑁆𑀚𑀉𑀜𑁆𑀙𑀸𑀘𑀭𑀺𑀬𑀸𑀤𑀺𑀦𑀸 𑀉𑀤𑁆𑀥𑀫𑀼𑀤𑁆𑀥𑀫𑀸𑀦𑁂𑀢𑀩𑁆𑀩𑀸 𑀧𑀸𑀧𑀼𑀡𑀺𑀢𑀩𑁆𑀩𑀸. 𑀢𑁂 𑀧𑀦 𑀲𑀫𑀼𑀤𑀸𑀦𑀺𑀢𑀸 𑀲𑀫𑀸𑀳𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀳𑀭𑀺𑀢𑀩𑁆𑀩𑀸’’𑀢𑀺. 𑀤𑀼𑀓𑁆𑀔𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀮𑀪𑀼𑀧𑁆𑀧𑀸𑀤𑀸 𑀦 𑀳𑁄𑀦𑁆𑀢𑀺. 𑀏𑀢𑁂𑀦 𑀕𑁄𑀘𑀭𑀅𑀲𑀧𑁆𑀧𑀸𑀬𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀢𑁆𑀢𑀺𑀓𑁄𑀝𑁆𑀞𑀸𑀲𑁂 𑀯𑀸 𑀤𑀺𑀯𑀲𑀓𑁄𑀝𑁆𑀞𑀸𑀲𑁂 𑀯𑀸’’𑀢𑀺. 𑀭𑀢𑁆𑀢𑀺𑀁𑀬𑁂𑀯 𑀧𑀓𑁆𑀓𑀫𑀺𑀢𑀩𑁆𑀩𑀁 𑀲𑀫𑀡𑀥𑀫𑁆𑀫𑀲𑁆𑀲 𑀢𑀢𑁆𑀣 𑀅𑀦𑀺𑀧𑁆𑀨𑀚𑁆𑀚𑀦𑀢𑁄. 𑀲𑀗𑁆𑀔𑀸𑀧𑀻𑀢𑀺 ‘‘𑀬𑀤𑀢𑁆𑀣𑀫𑀳𑀁 𑀧𑀩𑁆𑀩𑀚𑀺𑀢𑁄, 𑀦 𑀫𑁂𑀢𑀁 𑀇𑀥 𑀦𑀺𑀧𑁆𑀨𑀚𑁆𑀚𑀢𑀺, 𑀘𑀻𑀯𑀭𑀸𑀤𑀺 𑀧𑀦 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀦𑀸𑀳𑀁 𑀢𑀤𑀢𑁆𑀣𑀁 𑀧𑀩𑁆𑀩𑀚𑀺𑀢𑁄, 𑀓𑀺𑀁 𑀫𑁂 𑀇𑀥 𑀯𑀸𑀲𑁂𑀦𑀸’’𑀢𑀺 𑀧𑀝𑀺𑀲𑀗𑁆𑀔𑀸𑀬𑀧𑀺. 𑀢𑁂𑀦𑀸𑀳 ‘‘𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀅𑀕𑀫𑀦𑀁 𑀚𑀸𑀦𑀺𑀢𑁆𑀯𑀸’’𑀢𑀺. 𑀅𑀦𑀦𑁆𑀢𑀭𑀯𑀸𑀭𑁂 𑀲𑀗𑁆𑀔𑀸𑀧𑀻𑀢𑀺 𑀲𑀫𑀡𑀥𑀫𑁆𑀫𑀲𑁆𑀲 𑀦𑀺𑀧𑁆𑀨𑀚𑁆𑀚𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸. 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄𑀢𑀺 ‘‘𑀲𑁄 𑀧𑀼𑀕𑁆𑀕𑀮𑁄’’𑀢𑀺 𑀧𑀤𑀲𑁆𑀲 ‘‘𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲 𑀬𑁂𑀦 𑀳𑀺 𑀲𑀫𑁆𑀩𑀦𑁆𑀥𑁄, 𑀤𑀽𑀭𑀝𑁆𑀞𑁂𑀦𑀧𑀺 𑀲𑁄 𑀪𑀯𑀢𑀺. 𑀢𑀁 𑀧𑀼𑀕𑁆𑀕𑀮𑀦𑁆𑀢𑀺 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁 𑀉𑀧𑀬𑁄𑀕𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑁆𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀯𑀲𑁂𑀦 𑀳𑀺 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑁄𑀢𑀺. 𑀆𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀘 𑀓𑀢𑀜𑁆𑀜𑀼𑀓𑀢𑀯𑁂𑀤𑀺𑀢𑀸𑀬 𑀦𑀺𑀬𑁄𑀚𑀦𑀁. 𑀏𑀯𑀭𑀽𑀧𑁄𑀢𑀺 𑀬𑀁 ¶ 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑁄 𑀕𑀼𑀡𑁂𑀳𑀺 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀧𑀘𑁆𑀘𑀬𑁂𑀳𑀺 𑀦 𑀧𑀭𑀺𑀲𑁆𑀲𑀬𑁄, 𑀏𑀯𑀭𑀽𑀧𑁄 𑀤𑀡𑁆𑀟𑀓𑀫𑁆𑀫𑀸𑀤𑀻𑀳𑀺 𑀦𑀺𑀕𑁆𑀕𑀡𑁆𑀳𑀸𑀢𑀺 𑀘𑁂𑀧𑀺, 𑀦 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀘𑁂𑀧𑀻’’𑀢𑀺𑀆𑀤𑀺𑀦𑀸.

𑀲𑁂𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀲𑀼𑀢𑀯𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭-𑁧𑁦. 𑀲𑀢𑁆𑀢𑀫𑁂 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀧𑀸𑀡𑀦𑁆𑀢𑀺𑀆𑀤𑀺 𑀤𑁂𑀲𑀦𑀸𑀲𑀻𑀲𑀫𑁂𑀯, 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀧𑀺 𑀧𑀦 𑀅𑀪𑀩𑁆𑀩𑀸𑀯, 𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀦𑀺𑀦𑁆𑀤𑀸𑀧𑀲𑀁𑀲𑀢𑁆𑀣𑀫𑁆𑀧𑀺 𑀏𑀯𑀁 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑁄 𑀦𑀸𑀫 𑀕𑀸𑀭𑀬𑁆𑀳𑁄 𑀫𑀸𑀢𑀼𑀖𑀸𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀔𑀻𑀡𑀸𑀲𑀯𑁄 𑀧𑀦 𑀧𑀸𑀲𑀁𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀖𑀸𑀢𑀸𑀤𑀻𑀦𑀺𑀧𑀺 𑀦 𑀓𑀭𑁄𑀢𑀻𑀢𑀺. 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀬𑀣𑀸 𑀕𑀺𑀳𑀺𑀪𑀽𑀢𑁄 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀁 𑀢𑀺𑀮𑀢𑀡𑁆𑀟𑀼𑀮𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀲𑀦𑁆𑀦𑀺𑀥𑀺𑀁 ¶ 𑀓𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀪𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀓𑀸𑀫𑁂 𑀧𑀦 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀦𑁆𑀦𑀺𑀲𑁆𑀲𑀺𑀢𑀁 𑀓𑀺𑀮𑁂𑀲𑀓𑀸𑀫𑀫𑁆𑀧𑀺 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂’’𑀢𑀺. 𑀦𑀦𑀼 𑀘 𑀔𑀻𑀡𑀸𑀲𑀯𑀲𑁆𑀲𑁂𑀯 𑀯𑀲𑀦𑀝𑁆𑀞𑀸𑀦𑁂 𑀢𑀺𑀮𑀢𑀡𑁆𑀟𑀼𑀮𑀸𑀤𑀬𑁄 𑀧𑀜𑁆𑀜𑀸𑀬𑀦𑁆𑀢𑀻𑀢𑀺? 𑀦 𑀧𑀦 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀦𑀺𑀥𑁂𑀦𑁆𑀢𑀺, 𑀅𑀨𑀸𑀲𑀼𑀓𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀦𑀺𑀥𑁂𑀦𑁆𑀢𑀺. 𑀅𑀦𑀸𑀕𑀸𑀫𑀺𑀲𑁆𑀲 𑀓𑀣𑀦𑁆𑀢𑀺? 𑀢𑀲𑁆𑀲𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀩𑁆𑀩𑀲𑁄𑀯 𑀧𑀳𑀻𑀦𑀸, 𑀥𑀫𑁆𑀫𑁂𑀦 𑀧𑀦 𑀮𑀤𑁆𑀥𑀁 𑀯𑀺𑀘𑀸𑀭𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀓𑀧𑁆𑀧𑀺𑀬𑀓𑀸𑀫𑀕𑀼𑀡𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀦 𑀫𑀜𑁆𑀘𑀧𑀻𑀞𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀁. 𑀲𑁂𑀬𑁆𑀬𑀸𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀕𑀺𑀳𑀺𑀪𑀽𑀢𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀪𑀩𑁆𑀩𑁄. 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀸 𑀳𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀬𑀸𑀯𑀚𑀻𑀯𑀁 𑀕𑀺𑀳𑀺𑀩𑁆𑀬𑀜𑁆𑀚𑀦𑁂𑀦 𑀢𑀺𑀝𑁆𑀞𑀦𑁆𑀢𑀺. 𑀔𑀻𑀡𑀸𑀲𑀯𑁄 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀫𑀦𑀼𑀲𑁆𑀲𑀪𑀽𑀢𑁄 𑀧𑀭𑀺𑀦𑀺𑀩𑁆𑀩𑀸𑀢𑀺 𑀯𑀸 𑀧𑀩𑁆𑀩𑀚𑀢𑀺 𑀯𑀸. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺. 𑀓𑀲𑁆𑀫𑀸? 𑀯𑀺𑀯𑁂𑀓𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸. 𑀪𑀼𑀫𑁆𑀫𑀤𑁂𑀯𑀢𑁆𑀢𑀪𑀸𑀯𑁂 𑀧𑀦 𑀞𑀺𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀢𑀺𑀝𑁆𑀞𑀢𑀺 𑀯𑀺𑀯𑁂𑀓𑀝𑁆𑀞𑀸𑀦𑀲𑀫𑁆𑀪𑀯𑀸. 𑀅𑀝𑁆𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑀼𑀢𑀯𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀩𑁄𑀥𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀻𑀳𑀦𑀸𑀤𑀯𑀕𑁆𑀕𑁄

𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀅𑀯𑀸𑀧𑀼𑀭𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀤𑁆𑀯𑀸𑀭𑀁 𑀏𑀢𑁂𑀦𑀸𑀢𑀺 𑀅𑀯𑀸𑀧𑀼𑀭𑀡𑀁. 𑀭𑀚𑀁 𑀳𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀭𑀚𑁄𑀳𑀭𑀡𑀁. 𑀓𑀴𑁄𑀧𑀺𑀳𑀢𑁆𑀣𑁄𑀢𑀺 𑀯𑀺𑀮𑀻𑀯𑀫𑀬𑀪𑀸𑀚𑀦𑀳𑀢𑁆𑀣𑁄, ‘‘𑀘𑀫𑁆𑀫𑀫𑀬𑀪𑀸𑀚𑀦𑀳𑀢𑁆𑀣𑁄’’𑀢𑀺 𑀘 𑀯𑀤𑀦𑁆𑀢𑀺. 𑀙𑀺𑀦𑁆𑀦𑀸𑀦𑀺 𑀯𑀺𑀲𑀸𑀡𑀸𑀦𑀺 𑀏𑀢𑀲𑁆𑀲𑀸𑀢𑀺 𑀙𑀺𑀦𑁆𑀦𑀯𑀺𑀲𑀸𑀡𑁄, 𑀉𑀲𑀪𑁄 𑀘 𑀲𑁄 𑀙𑀺𑀦𑁆𑀦𑀯𑀺𑀲𑀸𑀡𑁄 𑀘𑀸𑀢𑀺 𑀉𑀲𑀪𑀙𑀺𑀦𑁆𑀦𑀯𑀺𑀲𑀸𑀡𑁄. 𑀯𑀺𑀲𑁂𑀲𑀦𑀧𑀭𑁄𑀬𑀁 𑀲𑀫𑀸𑀲𑁄. 𑀅𑀳𑀺𑀓𑀼𑀡𑀧𑁂𑀦 𑀯𑀸𑀢𑀺𑀆𑀤𑀺 𑀅𑀢𑀺𑀚𑁂𑀕𑀼𑀘𑁆𑀙𑀧𑁆𑀧𑀝𑀺𑀓𑀽𑀮𑀓𑀼𑀡𑀧𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀧𑀘𑁆𑀘𑀢𑁆𑀣𑀺𑀓𑁂𑀦 𑀆𑀦𑁂𑀢𑁆𑀯𑀸 𑀓𑀡𑁆𑀞𑁂 𑀩𑀤𑁆𑀥𑁂𑀦, 𑀑𑀫𑀼𑀓𑁆𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀝𑁄 𑀆𑀢𑀼𑀭𑁄 𑀤𑀼𑀕𑁆𑀕𑀦𑁆𑀥𑀧𑀻𑀴𑀸𑀬 𑀧𑀻𑀴𑀺𑀢𑁄. 𑀅𑀘𑁆𑀘𑀬𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑀁 𑀯𑀸 𑀅𑀥𑀺𑀯𑀸𑀲𑀦𑀁. 𑀏𑀯𑀜𑁆𑀳𑀺 𑀲𑁄 𑀓𑀸𑀭𑀡𑁂 𑀤𑁂𑀲𑀺𑀬𑀫𑀸𑀦𑁂 𑀢𑀢𑁄 ¶ 𑀯𑀺𑀕𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀕𑁆𑀕𑀡𑁆𑀳𑀢𑀽𑀢𑀺 𑀔𑀫𑀢𑀽’’𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀉𑀧𑀸𑀤𑀺𑀲𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀪𑀯𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀢𑀸 𑀦𑀸𑀫 𑀇𑀢𑁆𑀢𑀭𑀓𑀸𑀮𑀢𑀸𑀬𑀸𑀢𑀺 𑀆𑀳 ‘‘𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀻’’𑀢𑀺.

𑀲𑀉𑀧𑀸𑀤𑀺𑀲𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀅𑀢𑁆𑀢𑀪𑀸𑀯𑁄, 𑀢𑀲𑁆𑀫𑀺𑀁 𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀢𑁂𑀦𑀸𑀳 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂’’𑀢𑀺. 𑀘𑀢𑀼𑀧𑁆𑀧𑀜𑁆𑀘𑀓𑁆𑀔𑀦𑁆𑀥𑀨𑀮𑀢𑀸𑀬 𑀲𑀜𑁆𑀜𑀸𑀪𑀯𑀽𑀧𑀕𑀁 𑀓𑀫𑁆𑀫𑀁 𑀩𑀳𑀼𑀯𑁂𑀤𑀦𑀻𑀬𑀁. 𑀏𑀓𑀓𑁆𑀔𑀦𑁆𑀥𑀨𑀮𑀢𑁆𑀢𑀸 𑀅𑀲𑀜𑁆𑀜𑀸𑀪𑀯𑀽𑀧𑀕𑀁 𑀓𑀫𑁆𑀫𑀁 ‘‘𑀅𑀧𑁆𑀧𑀯𑁂𑀤𑀦𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀅𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀩𑀳𑀼𑀓𑀸𑀮𑀁 𑀯𑁂𑀤𑀺𑀢𑀩𑁆𑀩𑀨𑀮𑀢𑁆𑀢𑀸 𑀩𑀳𑀼𑀯𑁂𑀤𑀦𑀻𑀬𑀁, 𑀇𑀢𑀭𑀁 𑀅𑀧𑁆𑀧𑀯𑁂𑀤𑀦𑀻𑀬𑀁. 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀯𑀸 𑀩𑀳𑀼𑀯𑁂𑀤𑀦𑀻𑀬𑀁, 𑀧𑀭𑀺𑀢𑁆𑀢𑀁 𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑁂𑀤𑀦𑀻𑀬𑀦𑁆𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 ¶ 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀁, 𑀦 𑀆𑀭𑀤𑁆𑀥𑀯𑀺𑀧𑀸𑀓𑀫𑁂𑀯. 𑀅𑀯𑁂𑀤𑀦𑀻𑀬𑀦𑁆𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀅𑀲𑀫𑀢𑁆𑀣𑀁 𑀅𑀳𑁄𑀲𑀺𑀓𑀫𑁆𑀫𑀸𑀤𑀺𑀪𑁂𑀤𑀁.

𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀲𑀫𑀺𑀤𑁆𑀥𑀻𑀢𑀺 𑀣𑁂𑀭𑀲𑁆𑀲 𑀓𑀺𑀭 𑀅𑀢𑁆𑀢𑀪𑀸𑀯𑁄 𑀲𑀫𑀺𑀤𑁆𑀥𑁄 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄, 𑀢𑀲𑁆𑀫𑀸 𑀲𑀫𑀺𑀤𑁆𑀥𑀻𑀢𑁆𑀯𑁂𑀯 𑀲𑀗𑁆𑀔𑀸𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀢𑀸𑀬𑀸’’𑀢𑀺𑀆𑀤𑀺. 𑀭𑀽𑀧𑀥𑀸𑀢𑀼𑀆𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀤𑁆𑀤𑀥𑀸𑀢𑀼𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁯. 𑀕𑀡𑁆𑀟𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫-𑁧𑁯. 𑀧𑀜𑁆𑀘𑀫𑁂 ¶ 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲𑀸𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀦𑀺𑀩𑁆𑀩𑀢𑁆𑀢𑁂𑀦 𑀫𑀸𑀢𑀸𑀧𑁂𑀢𑁆𑀢𑀺𑀓𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑁂𑀦 𑀲𑀫𑁆𑀪𑀽𑀢𑀲𑁆𑀲. 𑀉𑀘𑁆𑀙𑀸𑀤𑀦𑀥𑀫𑁆𑀫𑀲𑁆𑀲𑀸𑀢𑀺 𑀉𑀘𑁆𑀙𑀸𑀤𑁂𑀢𑀩𑁆𑀩𑀲𑀪𑀸𑀯𑀲𑁆𑀲. 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑀲𑁆𑀲𑀸𑀢𑀺 𑀧𑀭𑀺𑀫𑀤𑁆𑀤𑀺𑀢𑀩𑁆𑀩𑀲𑀪𑀸𑀯𑀲𑁆𑀲. 𑀏𑀢𑁆𑀣 𑀘 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀉𑀘𑁆𑀙𑀸𑀤𑀦𑀧𑀤𑁂𑀳𑀺 𑀯𑀟𑁆𑀠𑀺 𑀓𑀣𑀺𑀢𑀸, 𑀅𑀦𑀺𑀘𑁆𑀘𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀧𑀤𑁂𑀳𑀺 𑀳𑀸𑀦𑀺. 𑀧𑀼𑀭𑀺𑀫𑁂𑀳𑀺 𑀯𑀸 𑀲𑀫𑀼𑀤𑀬𑁄, 𑀧𑀘𑁆𑀙𑀺𑀫𑁂𑀳𑀺 𑀅𑀢𑁆𑀣𑀗𑁆𑀕𑀫𑁄𑀢𑀺 𑀏𑀯𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀯𑀟𑁆𑀠𑀺𑀧𑀭𑀺𑀳𑀸𑀦𑀺𑀦𑀺𑀩𑁆𑀩𑀢𑁆𑀢𑀺𑀪𑁂𑀤𑀸 𑀤𑀲𑁆𑀲𑀺𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀕𑀡𑁆𑀟𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁂𑀮𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀲𑀓𑀼𑀡𑁆𑀟𑀓𑀪𑀢𑁆𑀢𑀦𑁆𑀢𑀺 𑀲𑀓𑀼𑀡𑁆𑀟𑀓𑀁 𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢𑀁. 𑀧𑀭𑀺𑀢𑁆𑀢𑁂𑀳𑀺 𑀲𑀓𑀼𑀡𑁆𑀟𑁂𑀳𑀺 𑀢𑀡𑁆𑀟𑀼𑀮𑁂𑀳𑀺𑀧𑀺 𑀲𑀤𑁆𑀥𑀺𑀁 𑀯𑀺𑀧𑀓𑁆𑀓𑀪𑀢𑁆𑀢𑀁 𑀉𑀢𑁆𑀢𑀡𑁆𑀟𑀼𑀮𑀫𑁂𑀯 𑀳𑁄𑀢𑀺. 𑀩𑀺𑀴𑀗𑁆𑀕𑀁 𑀯𑀼𑀘𑁆𑀘𑀢𑀺 𑀆𑀭𑀦𑀸𑀴𑀁, 𑀩𑀺𑀴𑀗𑁆𑀕𑀢𑁄 𑀦𑀺𑀩𑁆𑀩𑀢𑁆𑀢𑀦𑀢𑁄 𑀢𑀤𑁂𑀯 𑀓𑀜𑁆𑀚𑀺𑀬𑀢𑁄 𑀚𑀸𑀢𑀦𑁆𑀢𑀺 𑀓𑀜𑁆𑀚𑀺𑀬𑀁, 𑀢𑀁 𑀤𑀼𑀢𑀺𑀬𑀁 𑀏𑀢𑀲𑁆𑀲𑀸𑀢𑀺 𑀩𑀺𑀴𑀗𑁆𑀕𑀤𑀼𑀢𑀺𑀬𑀁, 𑀢𑀁 𑀓𑀜𑁆𑀚𑀺𑀬𑀤𑀼𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀲𑀓𑁆𑀓𑀭𑀺𑀢𑁆𑀯𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀫𑁆𑀧𑀺 𑀧𑀼𑀕𑁆𑀕𑀮𑀫𑁆𑀧𑀺 𑀅𑀲𑀓𑁆𑀓𑀭𑀺𑀢𑁆𑀯𑀸. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀲𑀓𑁆𑀓𑀭𑀡𑀁 𑀅𑀲𑀫𑁆𑀧𑀦𑁆𑀦𑀓𑀸𑀭𑁄, 𑀧𑀼𑀕𑁆𑀕𑀮𑀲𑁆𑀲 𑀅𑀲𑀓𑁆𑀓𑀭𑀡𑀁 𑀅𑀕𑀭𑀼𑀓𑀭𑀡𑀁. 𑀤𑁂𑀬𑁆𑀬𑀥𑀫𑁆𑀫𑀁 𑀅𑀲𑀓𑁆𑀓𑀭𑁄𑀦𑁆𑀢𑁄 𑀳𑀺 𑀉𑀢𑁆𑀢𑀡𑁆𑀟𑀼𑀮𑀸𑀤𑀺𑀤𑁄𑀲𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀤𑁂𑀢𑀺, 𑀦 𑀲𑀫𑁆𑀧𑀦𑁆𑀦𑀁 𑀓𑀭𑁄𑀢𑀺. 𑀧𑀼𑀕𑁆𑀕𑀮𑀁 𑀅𑀲𑀓𑁆𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 ¶ 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀬𑀢𑁆𑀣 𑀢𑀢𑁆𑀣 𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀤𑀸𑀭𑀓𑀁 𑀧𑁂𑀲𑁂𑀢𑁆𑀯𑀸 𑀤𑁂𑀢𑀺. 𑀅𑀘𑀺𑀢𑁆𑀢𑀻𑀓𑀢𑁆𑀯𑀸𑀢𑀺 𑀦 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸, 𑀦 𑀧𑀽𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀽𑀚𑁂𑀦𑁆𑀢𑁄 𑀳𑀺 𑀧𑀽𑀚𑁂𑀢𑀩𑁆𑀩𑀯𑀢𑁆𑀣𑀼𑀁 𑀘𑀺𑀢𑁆𑀢𑁂 𑀞𑀧𑁂𑀢𑀺, 𑀦 𑀢𑀢𑁄 𑀩𑀳𑀺 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀯𑀸 𑀅𑀘𑁆𑀙𑀭𑀺𑀬𑀁 𑀓𑀢𑁆𑀯𑀸 𑀧𑀝𑀺𑀧𑀢𑁆𑀢𑀺 𑀘𑀺𑀢𑁆𑀢𑀻𑀓𑀭𑀡𑀁 𑀲𑀫𑁆𑀪𑀸𑀯𑀦𑀓𑀺𑀭𑀺𑀬𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀘𑀺𑀢𑁆𑀢𑀻𑀓𑀭𑀡𑀁 𑀅𑀲𑀫𑁆𑀪𑀸𑀯𑀦𑀓𑀺𑀭𑀺𑀬𑀸. 𑀅𑀧𑀯𑀺𑀤𑁆𑀥𑀦𑁆𑀢𑀺 𑀉𑀘𑁆𑀙𑀺𑀝𑁆𑀞𑀸𑀤𑀺𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀯𑀺𑀬 𑀅𑀯𑀔𑀺𑀢𑁆𑀢𑀓𑀁. 𑀬𑁄 𑀳𑀺 𑀙𑀟𑁆𑀟𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀭𑁄𑀕𑀺𑀦𑁄 𑀲𑀭𑀻𑀭𑁂 𑀑𑀤𑀦𑀸𑀤𑀻𑀦𑀺 𑀫𑀚𑁆𑀚𑀺𑀢𑁆𑀯𑀸 𑀯𑀫𑁆𑀫𑀺𑀓𑁂 𑀭𑁄𑀕𑀁 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀤𑁂𑀢𑀺, 𑀅𑀬𑀁 𑀅𑀧𑀯𑀺𑀤𑁆𑀥𑀁 𑀤𑁂𑀢𑀺 𑀦𑀸𑀫. 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄𑀢𑀺 ‘‘𑀅𑀤𑁆𑀥𑀸 𑀇𑀫𑀲𑁆𑀲 𑀤𑀸𑀦𑀲𑁆𑀲 𑀨𑀮𑀁 𑀫𑀫 𑀆𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀬𑀲𑁆𑀲 𑀓𑀫𑁆𑀫𑀲𑁆𑀲𑀓𑀢𑀤𑀺𑀝𑁆𑀞𑀺 𑀅𑀢𑁆𑀣𑀺, 𑀲𑁄 𑀆𑀕𑀫𑀦𑀤𑀺𑀝𑁆𑀞𑀺𑀓𑁄. 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄𑀢𑀺 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄, 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀳𑀼𑀢𑁆𑀯𑀸 𑀦 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑁂𑀢𑀻’’𑀢𑀺.

𑀯𑁂𑀮𑀸𑀫𑁄𑀢𑀺 ¶ 𑀏𑀢𑁆𑀣 𑀫𑀸-𑀲𑀤𑁆𑀤𑁄 𑀧𑀝𑀺𑀲𑁂𑀥𑀯𑀘𑀦𑁄. 𑀚𑀸𑀢𑀺𑀕𑁄𑀢𑁆𑀢𑀭𑀽𑀧𑀪𑁄𑀕𑀸𑀤𑀺𑀕𑀼𑀡𑀸𑀦𑀁 𑀯𑁂𑀮𑀸 𑀫𑀭𑀺𑀬𑀸𑀤𑀸 𑀦𑀢𑁆𑀣𑀺 𑀏𑀢𑀲𑁆𑀫𑀺𑀦𑁆𑀢𑀺 𑀯𑁂𑀮𑀸𑀫𑁄. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀕𑀼𑀡𑀸𑀦𑀁 𑀯𑁂𑀮𑀸 𑀫𑀭𑀺𑀬𑀸𑀤𑀸 𑀅𑀫𑀢𑀺 𑀑𑀲𑀸𑀦𑀁 𑀕𑀘𑁆𑀙𑀢𑀺 𑀏𑀢𑀲𑁆𑀫𑀺𑀦𑁆𑀢𑀺 𑀯𑁂𑀮𑀸𑀫𑁄, 𑀯𑁂𑀮𑀁 𑀯𑀸 𑀫𑀭𑀺𑀬𑀸𑀤𑀁 𑀅𑀫𑀢𑀺 𑀕𑀘𑁆𑀙𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀯𑁂𑀮𑀸𑀫𑁄. 𑀢𑁂𑀦𑀸𑀳 ‘‘𑀚𑀸𑀢𑀺𑀕𑁄𑀢𑁆𑀢…𑀧𑁂… 𑀏𑀯𑀁𑀮𑀤𑁆𑀥𑀦𑀸𑀫𑁄’’𑀢𑀺. 𑀤𑀻𑀬𑀢𑀻𑀢𑀺 𑀤𑀸𑀦𑀁, 𑀤𑀸𑀦𑀯𑀢𑁆𑀣𑀼. 𑀢𑀁 𑀅𑀕𑁆𑀕𑀻𑀬𑀢𑀺 𑀦𑀺𑀲𑁆𑀲𑀚𑁆𑀚𑀻𑀬𑀢𑀺 𑀏𑀢𑁆𑀣𑀸𑀢𑀺 𑀤𑀸𑀦𑀕𑁆𑀕𑀁. 𑀤𑀸𑀦𑀁 𑀯𑀸 𑀕𑀡𑁆𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀤𑀸𑀦𑀕𑁆𑀕𑀁, 𑀏𑀯𑀁 𑀪𑀢𑁆𑀢𑀕𑁆𑀕𑀁, 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑀁. 𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀻𑀢𑀺 𑀭𑀚𑀢𑀪𑀸𑀚𑀦𑀸𑀤𑀺𑀦𑀺𑀲𑁆𑀲𑀺𑀢𑁂 𑀤𑀼𑀓𑀽𑀮𑁂 𑀔𑀻𑀭𑀲𑁆𑀲 𑀲𑀦𑁆𑀤𑀦𑀁 𑀏𑀢𑁂𑀲𑀦𑁆𑀢𑀺 𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀺. 𑀓𑀁𑀲𑀽𑀧𑀥𑀸𑀭𑀡𑀸𑀦𑀻𑀢𑀺 𑀭𑀚𑀢𑀫𑀬𑀤𑁄𑀳𑀪𑀸𑀚𑀦𑀸𑀦𑀺. 𑀢𑁂𑀦𑀸𑀳 ‘‘𑀭𑀚𑀢𑀫𑀬𑀔𑀻𑀭𑀧𑀝𑀺𑀘𑁆𑀙𑀓𑀸𑀦𑀻’’𑀢𑀺. 𑀭𑀚𑀢𑀫𑀬𑀸𑀦𑀺 𑀔𑀻𑀭𑀧𑀝𑀺𑀘𑁆𑀙𑀓𑀸𑀦𑀺 𑀔𑀻𑀭𑀧𑀝𑀺𑀕𑁆𑀕𑀳𑀪𑀸𑀚𑀦𑀸𑀦𑀺 𑀏𑀢𑁂𑀲𑀦𑁆𑀢𑀺 𑀭𑀚𑀢𑀫𑀬𑀔𑀻𑀭𑀧𑀝𑀺𑀘𑁆𑀙𑀓𑀸𑀦𑀺. 𑀲𑁄𑀥𑁂𑀬𑁆𑀬𑀸𑀢𑀺 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀯𑀺𑀲𑁄𑀥𑁂𑀬𑁆𑀬. 𑀫𑀳𑀧𑁆𑀨𑀮𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀳𑀺 𑀤𑀓𑁆𑀔𑀺𑀡𑀸 𑀯𑀺𑀲𑀼𑀚𑁆𑀛𑀢𑀺 𑀦𑀸𑀫.

𑀫𑀕𑁆𑀕𑁂𑀦𑀸𑀕𑀢𑀁 𑀅𑀦𑀺𑀯𑀢𑁆𑀢𑀦𑀲𑀭𑀡𑀦𑁆𑀢𑀺 𑀇𑀫𑀺𑀦𑀸 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀁 𑀤𑀻𑀧𑁂𑀢𑀺. 𑀅𑀧𑀭𑁂𑀢𑀺𑀆𑀤𑀺𑀦𑀸 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀯𑀼𑀢𑁆𑀢𑀁. 𑀲𑀭𑀡𑀁 𑀦𑀸𑀫 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀢𑀲𑁆𑀫𑀸 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀘 𑁋 ‘‘𑀲𑀘𑁂 𑀢𑁆𑀯𑀁 𑀬𑀣𑀸 𑀕𑀳𑀺𑀢𑀁 𑀲𑀭𑀡𑀁 𑀦 𑀪𑀺𑀦𑁆𑀤𑀺𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀫𑀸𑀭𑁂𑀫𑀻’’𑀢𑀺 𑀬𑀤𑀺𑀧𑀺 𑀓𑁄𑀘𑀺 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀢𑀣𑀸𑀧𑀺 ‘‘𑀦𑁂𑀯𑀸𑀳𑀁 𑀩𑀼𑀤𑁆𑀥𑀁 𑀦 𑀩𑀼𑀤𑁆𑀥𑁄𑀢𑀺, 𑀥𑀫𑁆𑀫𑀁 𑀦 𑀥𑀫𑁆𑀫𑁄𑀢𑀺, 𑀲𑀗𑁆𑀖𑀁 𑀦 𑀲𑀗𑁆𑀖𑁄𑀢𑀺 𑀯𑀤𑀸𑀫𑀻’’𑀢𑀺 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀕𑀳𑀺𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀕𑁆𑀕𑁂𑀦𑀸𑀕𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀧𑀭𑁂𑀢𑀺𑀆𑀤𑀺𑀦𑀸 𑀧𑀦 𑀮𑁄𑀓𑀺𑀬𑀲𑀻𑀮𑀁 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀤𑀸𑀦𑀸𑀤𑀺𑀦𑀺𑀳𑀺𑀢𑀤𑀡𑁆𑀟𑀢𑀸𑀬 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘𑀲𑁆𑀲 𑀫𑀳𑀧𑁆𑀨𑀮𑀫𑀳𑀸𑀦𑀺𑀲𑀁𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀉𑀧𑀲𑀺𑀗𑁆𑀖𑀦𑀫𑀢𑁆𑀢𑀦𑁆𑀢𑀺 ¶ 𑀖𑀸𑀬𑀦𑀫𑀢𑁆𑀢𑀁. 𑀕𑀤𑁆𑀤𑁄𑀳𑀦𑀫𑀢𑁆𑀢𑀦𑁆𑀢𑀺 𑀧𑀸𑀞𑀦𑁆𑀢𑀭𑁂 𑀕𑁄𑀤𑁄𑀳𑀦𑀫𑀢𑁆𑀢𑀁 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀘 𑀦 𑀲𑀓𑀮𑁄 𑀕𑁄𑀤𑁄𑀳𑀦𑀓𑁆𑀔𑀡𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀯𑀺𑀬𑀸 𑀏𑀓𑀯𑀸𑀭𑀁 𑀣𑀦𑀅𑀜𑁆𑀙𑀦𑀫𑀢𑁆𑀢’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀜𑁆𑀙𑀦𑀫𑀢𑁆𑀢𑀦𑁆𑀢𑀺 𑀆𑀓𑀟𑁆𑀠𑀦𑀫𑀢𑁆𑀢𑀁. 𑀕𑀸𑀯𑀺𑀬𑀸 𑀣𑀦𑀁 𑀕𑀳𑁂𑀢𑁆𑀯𑀸 𑀏𑀓𑀔𑀻𑀭𑀩𑀺𑀦𑁆𑀤𑀼𑀤𑀼𑀳𑀦𑀓𑀸𑀮𑀫𑀢𑁆𑀢𑀫𑁆𑀧𑀺 𑀕𑀤𑁆𑀤𑀼𑀳𑀦𑀫𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀓𑀫𑁆𑀧𑀺 𑀳𑀺 𑀓𑀸𑀮𑀁 𑀬𑁄 𑀯𑀲𑀦𑀕𑀩𑁆𑀪𑀧𑀭𑀺𑀯𑁂𑀡𑀯𑀺𑀳𑀸𑀭𑀽𑀧𑀘𑀸𑀭𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 ¶ 𑀲𑀩𑁆𑀩𑀲𑀢𑁆𑀢𑁂 𑀳𑀺𑀢𑀨𑀭𑀡𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀇𑀤𑀁 𑀢𑀢𑁄 𑀬𑀣𑀸𑀯𑀼𑀢𑁆𑀢𑀤𑀸𑀦𑀸𑀤𑀺𑀢𑁄 𑀫𑀳𑀧𑁆𑀨𑀮𑀢𑀭𑀁.

𑀯𑁂𑀮𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀻𑀳𑀦𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀢𑁆𑀢𑀸𑀯𑀸𑀲𑀯𑀕𑁆𑀕𑁄

𑁧. 𑀢𑀺𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀫𑀫𑀸𑀢𑀺 𑀯𑀢𑁆𑀣𑀸𑀪𑀭𑀡𑀧𑀸𑀦𑀪𑁄𑀚𑀦𑀸𑀤𑀻𑀲𑀼𑀧𑀺 𑀫𑀫𑀢𑁆𑀢𑀯𑀺𑀭𑀳𑀺𑀢𑀸. 𑀅𑀧𑀭𑀺𑀕𑁆𑀕𑀳𑀸𑀢𑀺 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀅𑀧𑀭𑀺𑀕𑁆𑀕𑀳𑀸. 𑀢𑁂𑀲𑀁 𑀓𑀺𑀭 ‘‘𑀅𑀬𑀁 𑀫𑀬𑁆𑀳𑀁 𑀪𑀭𑀺𑀬𑀸’’𑀢𑀺 𑀫𑀫𑀢𑁆𑀢𑀁 𑀦 𑀳𑁄𑀢𑀺, 𑀫𑀸𑀢𑀭𑀁 𑀯𑀸 𑀪𑀕𑀺𑀦𑀺𑀁 𑀯𑀸 𑀤𑀺𑀲𑁆𑀯𑀸 𑀙𑀦𑁆𑀤𑀭𑀸𑀕𑁄 𑀦 𑀉𑀧𑁆𑀧𑀚𑁆𑀚𑀢𑀺. 𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀼𑀢𑁆𑀢𑁂 𑀤𑀺𑀝𑁆𑀞𑀫𑀢𑁆𑀢𑁂 𑀏𑀯 𑀫𑀸𑀢𑀼𑀣𑀦𑀢𑁄 𑀣𑀜𑁆𑀜𑀁 𑀧𑀕𑁆𑀖𑀭𑀢𑀺, 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀦𑁂𑀲𑀁 𑀫𑀸𑀢𑀭𑀺 𑀧𑀼𑀢𑁆𑀢𑀲𑁆𑀲 𑀫𑀸𑀢𑀼𑀲𑀜𑁆𑀜𑀸, 𑀫𑀸𑀢𑀼 𑀘 𑀧𑀼𑀢𑁆𑀢𑁂 𑀧𑀼𑀢𑁆𑀢𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀢𑀺 𑀓𑁂𑀘𑀺.

𑀅𑀧𑀺𑀘𑁂𑀢𑁆𑀣 (𑀲𑀸𑀭𑀢𑁆𑀣. 𑀝𑀻. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑁄 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀺𑀭 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀖𑀦𑀦𑀺𑀘𑀺𑀢𑀧𑀢𑁆𑀢𑀲𑀜𑁆𑀙𑀦𑁆𑀦𑀲𑀸𑀔𑀸𑀧𑀲𑀸𑀔𑀸 𑀓𑀽𑀝𑀸𑀕𑀸𑀭𑀲𑀫𑀸 𑀫𑀦𑁄𑀭𑀫𑀸 𑀭𑀼𑀓𑁆𑀔𑀸 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑁂𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺. 𑀬𑀢𑁆𑀣 𑀲𑀼𑀔𑀁 𑀦𑀺𑀯𑀲𑀦𑁆𑀢𑀺, 𑀅𑀜𑁆𑀜𑁂𑀧𑀺 𑀢𑀢𑁆𑀣 𑀭𑀼𑀓𑁆𑀔𑀸 𑀲𑀼𑀚𑀸𑀢𑀸 𑀲𑀩𑁆𑀩𑀤𑀸𑀧𑀺 𑀧𑀼𑀧𑁆𑀨𑀺𑀢𑀕𑁆𑀕𑀸 𑀢𑀺𑀝𑁆𑀞𑀦𑁆𑀢𑀺. 𑀚𑀮𑀸𑀲𑀬𑀸𑀧𑀺 𑀯𑀺𑀓𑀲𑀺𑀢𑀓𑀫𑀮𑀓𑀼𑀯𑀮𑀬𑀧𑀼𑀡𑁆𑀟𑀭𑀻𑀓𑀲𑁄𑀕𑀦𑁆𑀥𑀺𑀓𑀸𑀤𑀺𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑀸 𑀲𑀩𑁆𑀩𑀓𑀸𑀮𑀁 𑀧𑀭𑀫𑀲𑀼𑀕𑀦𑁆𑀥𑀁 𑀲𑀫𑀦𑁆𑀢𑀢𑁄 𑀧𑀯𑀸𑀬𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀲𑀭𑀻𑀭𑀫𑁆𑀧𑀺 𑀢𑁂𑀲𑀁 𑀅𑀢𑀺𑀤𑀻𑀖𑀸𑀤𑀺𑀤𑁄𑀲𑀭𑀳𑀺𑀢𑀁 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑀁 𑀚𑀭𑀸𑀬 𑀅𑀦𑀪𑀺𑀪𑀽𑀢𑀢𑁆𑀢𑀸 𑀯𑀮𑀺𑀢𑀧𑀮𑀺𑀢𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀁 𑀬𑀸𑀯𑀢𑀸𑀬𑀼𑀓𑀁 𑀅𑀧𑀭𑀺𑀓𑁆𑀔𑀻𑀡𑀚𑀯𑀩𑀮𑀧𑀭𑀓𑁆𑀓𑀫𑀲𑁄𑀪𑀫𑁂𑀯 𑀳𑀼𑀢𑁆𑀯𑀸 ¶ 𑀢𑀺𑀝𑁆𑀞𑀢𑀺. 𑀅𑀦𑀼𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀢𑀸𑀬 𑀦 𑀘 𑀦𑁂𑀲𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀯𑀲𑁂𑀦 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀯𑀲𑁂𑀦 𑀤𑀼𑀓𑁆𑀔𑀁 𑀅𑀢𑁆𑀣𑀺, 𑀢𑀢𑁄 𑀏𑀯 𑀦 𑀤𑀸𑀲𑀤𑀸𑀲𑀺𑀓𑀫𑁆𑀫𑀓𑀭𑀸𑀤𑀺𑀧𑀭𑀺𑀕𑁆𑀕𑀳𑁄 𑀅𑀢𑁆𑀣𑀺, 𑀦 𑀘 𑀢𑀢𑁆𑀣 𑀲𑀻𑀢𑀼𑀡𑁆𑀳𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀯𑀸𑀴𑀸𑀤𑀺𑀧𑀭𑀺𑀲𑁆𑀲𑀬𑁄 𑀅𑀢𑁆𑀣𑀺. 𑀬𑀣𑀸 𑀦𑀸𑀫𑁂𑀢𑁆𑀣 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀲𑀫𑀲𑀻𑀢𑀼𑀡𑁆𑀳𑁄 𑀉𑀢𑀼 ¶ 𑀳𑁄𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀓𑀸𑀮𑀁 𑀢𑀢𑁆𑀣 𑀲𑀫𑀲𑀻𑀢𑀼𑀡𑁆𑀳𑁄𑀯 𑀉𑀢𑀼 𑀳𑁄𑀢𑀺, 𑀦 𑀘 𑀦𑁂𑀲𑀁 𑀓𑁄𑀘𑀺 𑀉𑀧𑀖𑀸𑀢𑁄 𑀯𑀺𑀳𑁂𑀲𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀓𑀝𑁆𑀞𑀧𑀸𑀓𑀺𑀫𑁂𑀯 𑀲𑀸𑀮𑀺𑀁 𑀅𑀓𑀡𑀁 𑀅𑀣𑀼𑀲𑀁 𑀲𑀼𑀤𑁆𑀥𑀁 𑀲𑀼𑀕𑀦𑁆𑀥𑀁 𑀢𑀡𑁆𑀟𑀼𑀮𑀧𑁆𑀨𑀮𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑀁 𑀪𑀼𑀜𑁆𑀚𑀦𑁆𑀢𑀸𑀦𑀁 𑀦𑁂𑀲𑀁 𑀓𑀼𑀝𑁆𑀞𑀁, 𑀕𑀡𑁆𑀟𑁄, 𑀓𑀺𑀮𑀸𑀲𑁄, 𑀲𑁄𑀲𑁄, 𑀓𑀸𑀲𑁄, 𑀲𑀸𑀲𑁄, 𑀅𑀧𑀫𑀸𑀭𑁄, 𑀚𑀭𑁄𑀢𑀺 𑀏𑀯𑀫𑀸𑀤𑀺𑀓𑁄 𑀦 𑀓𑁄𑀘𑀺 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀘 𑀢𑁂 𑀔𑀼𑀚𑁆𑀚𑀸 𑀯𑀸 𑀯𑀸𑀫𑀦𑀸 𑀯𑀸 𑀓𑀸𑀡𑀸 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑀸 𑀯𑀸 𑀧𑀓𑁆𑀔𑀳𑀢𑀸 𑀯𑀸 𑀯𑀺𑀓𑀮𑀗𑁆𑀕𑀸 𑀯𑀸 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸 𑀯𑀸 𑀳𑁄𑀦𑁆𑀢𑀺.

𑀇𑀢𑁆𑀣𑀺𑀬𑁄𑀧𑀺 𑀢𑀢𑁆𑀣 𑀦𑀸𑀢𑀺𑀤𑀻𑀖𑀸, 𑀦𑀸𑀢𑀺𑀭𑀲𑁆𑀲𑀸, 𑀦𑀸𑀢𑀺𑀓𑀺𑀲𑀸, 𑀦𑀸𑀢𑀺𑀣𑀽𑀮𑀸, 𑀦𑀸𑀢𑀺𑀓𑀸𑀴𑀸, 𑀦𑀘𑁆𑀘𑁄𑀤𑀸𑀢𑀸, 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀭𑀽𑀧𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀤𑀻𑀖𑀗𑁆𑀕𑀼𑀮𑀻, 𑀢𑀫𑁆𑀩𑀦𑀔𑀸, 𑀅𑀮𑀫𑁆𑀩𑀣𑀦𑀸, 𑀢𑀦𑀼𑀫𑀚𑁆𑀛𑀸, 𑀧𑀼𑀡𑁆𑀡𑀘𑀦𑁆𑀤𑀫𑀼𑀔𑀻, 𑀯𑀺𑀲𑀸𑀮𑀓𑁆𑀔𑀻, 𑀫𑀼𑀤𑀼𑀕𑀢𑁆𑀢𑀸, 𑀲𑀳𑀺𑀢𑁄𑀭𑀽, 𑀑𑀤𑀸𑀢𑀤𑀦𑁆𑀢𑀸, 𑀕𑀫𑁆𑀪𑀻𑀭𑀦𑀸𑀪𑀻, 𑀢𑀦𑀼𑀚𑀗𑁆𑀖𑀸, 𑀤𑀻𑀖𑀦𑀻𑀮𑀯𑁂𑀮𑁆𑀮𑀺𑀢𑀓𑁂𑀲𑀻, 𑀧𑀼𑀣𑀼𑀮𑀲𑀼𑀲𑁆𑀲𑁄𑀡𑀻, 𑀦𑀸𑀢𑀺𑀮𑁄𑀫𑀸, 𑀦𑀸𑀮𑁄𑀫𑀸, 𑀲𑀼𑀪𑀕𑀸, 𑀉𑀢𑀼𑀲𑀼𑀔𑀲𑀫𑁆𑀨𑀲𑁆𑀲𑀸, 𑀲𑀡𑁆𑀳𑀸, 𑀲𑀔𑀺𑀮𑀸, 𑀲𑀼𑀔𑀲𑀫𑁆𑀪𑀸𑀲𑀸, 𑀦𑀸𑀦𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀯𑀺𑀘𑀭𑀦𑁆𑀢𑀺. 𑀲𑀩𑁆𑀩𑀤𑀸𑀧𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀦𑁆𑀢𑀺, 𑀧𑀼𑀭𑀺𑀲𑀸 𑀘 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬. 𑀦 𑀧𑀼𑀢𑁆𑀢𑀤𑀸𑀭𑁂𑀲𑀼 𑀭𑀚𑁆𑀚𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀢𑀸.

𑀲𑀢𑁆𑀢𑀸𑀳𑀺𑀓𑀫𑁂𑀯 𑀘 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸 𑀓𑀸𑀫𑀭𑀢𑀺𑀬𑀸 𑀯𑀺𑀳𑀭𑀦𑁆𑀢𑀺. 𑀢𑀢𑁄 𑀯𑀻𑀢𑀭𑀸𑀕𑀸 𑀯𑀺𑀬 𑀬𑀣𑀸𑀲𑀓𑀁 𑀕𑀘𑁆𑀙𑀦𑁆𑀢𑀺, 𑀦 𑀢𑀢𑁆𑀣 𑀇𑀥 𑀯𑀺𑀬 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁, 𑀕𑀩𑁆𑀪𑀧𑀭𑀺𑀳𑀭𑀡𑀫𑀽𑀮𑀓𑀁, 𑀯𑀺𑀚𑀸𑀬𑀦𑀫𑀽𑀮𑀓𑀁 𑀯𑀸 𑀤𑀼𑀓𑁆𑀔𑀁 𑀳𑁄𑀢𑀺. 𑀭𑀢𑁆𑀢𑀓𑀜𑁆𑀘𑀼𑀓𑀢𑁄 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀤𑀸𑀭𑀓𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀫𑀓𑁆𑀔𑀺𑀢𑀸 𑀏𑀯 𑀲𑁂𑀫𑁆𑀳𑀸𑀤𑀺𑀦𑀸 𑀲𑀼𑀔𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀢𑀸.

𑀫𑀸𑀢𑀸 𑀧𑀦 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀯𑀺𑀚𑀸𑀬𑀺𑀢𑁆𑀯𑀸 𑀢𑁂 𑀯𑀺𑀘𑀭𑀡𑀓𑀧𑁆𑀧𑀤𑁂𑀲𑁂 𑀞𑀧𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑀸 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀺. 𑀢𑁂𑀲𑀁 𑀢𑀢𑁆𑀣 𑀲𑀬𑀺𑀢𑀸𑀦𑀁 𑀬𑁂 𑀧𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀸 𑀯𑀸 𑀇𑀢𑁆𑀣𑀺𑀬𑁄 𑀯𑀸, 𑀢𑁂 𑀅𑀢𑁆𑀢𑀦𑁄 𑀅𑀗𑁆𑀕𑀼𑀮𑀺𑀬𑁄 𑀉𑀧𑀦𑀸𑀫𑁂𑀦𑁆𑀢𑀺. 𑀢𑁂𑀲𑀁 𑀓𑀫𑁆𑀫𑀩𑀮𑁂𑀦 𑀢𑀢𑁄 𑀔𑀻𑀭𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀢𑁂 𑀤𑀸𑀭𑀓𑀸 𑀬𑀸𑀧𑁂𑀦𑁆𑀢𑀺. 𑀏𑀯𑀁 𑀧𑀦 𑀯𑀟𑁆𑀠𑁂𑀦𑁆𑀢𑀸 𑀓𑀢𑀺𑀧𑀬𑀤𑀺𑀯𑀲𑁂𑀳𑁂𑀯 𑀮𑀤𑁆𑀥𑀩𑀮𑀸 𑀳𑀼𑀢𑁆𑀯𑀸 𑀤𑀸𑀭𑀺𑀓𑀸 𑀇𑀢𑁆𑀣𑀺𑀬𑁄 𑀉𑀧𑀕𑀘𑁆𑀙𑀦𑁆𑀢𑀺, 𑀤𑀸𑀭𑀓𑀸 𑀧𑀼𑀭𑀺𑀲𑁂. 𑀓𑀧𑁆𑀧𑀭𑀼𑀓𑁆𑀔𑀢𑁄 𑀏𑀯 𑀘 𑀢𑁂𑀲𑀁 𑀢𑀢𑁆𑀣 𑀯𑀢𑁆𑀣𑀸𑀪𑀭𑀡𑀸𑀦𑀺 𑀦𑀺𑀧𑁆𑀨𑀚𑁆𑀚𑀦𑁆𑀢𑀺. 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀸𑀦𑀺 𑀳𑀺 𑀲𑀼𑀔𑀼𑀫𑀸𑀦𑀺 𑀫𑀼𑀤𑀼𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀯𑀢𑁆𑀣𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀓𑀧𑁆𑀧𑀭𑀼𑀓𑁆𑀔𑁂𑀲𑀼 𑀑𑀮𑀫𑁆𑀩𑀦𑁆𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀦𑀸𑀦𑀸𑀯𑀺𑀥𑀭𑀲𑁆𑀫𑀺𑀚𑀸𑀮𑀲𑀫𑀼𑀚𑁆𑀚𑀮𑀯𑀺𑀯𑀺𑀥𑀯𑀡𑁆𑀡𑀭𑀢𑀦𑀯𑀺𑀦𑀤𑁆𑀥𑀸𑀦𑀺 ¶ 𑀅𑀦𑁂𑀓𑀯𑀺𑀥𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀪𑀺𑀢𑁆𑀢𑀺𑀓𑀫𑁆𑀫𑀯𑀺𑀘𑀺𑀢𑁆𑀢𑀸𑀦𑀺 ¶ 𑀲𑀻𑀲𑀽𑀧𑀕𑀕𑀻𑀯𑀽𑀧𑀕𑀳𑀢𑁆𑀣𑀽𑀧𑀕𑀓𑀝𑀽𑀧𑀕𑀧𑀸𑀤𑀽𑀧𑀕𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀆𑀪𑀭𑀡𑀸𑀦𑀺 𑀓𑀧𑁆𑀧𑀭𑀼𑀓𑁆𑀔𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀢𑀣𑀸 𑀯𑀻𑀡𑀸𑀫𑀼𑀤𑀺𑀗𑁆𑀕𑀧𑀡𑀯𑀲𑀫𑁆𑀫𑀢𑀸𑀴𑀲𑀗𑁆𑀔𑀯𑀁𑀲𑀯𑁂𑀢𑀸𑀴𑀧𑀭𑀺𑀯𑀸𑀤𑀺𑀦𑀻𑀯𑀮𑁆𑀮𑀓𑀻𑀧𑀪𑀼𑀢𑀺𑀓𑀸 𑀢𑀽𑀭𑀺𑀬𑀪𑀡𑁆𑀟𑀸𑀧𑀺 𑀢𑀢𑁄 𑀢𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀢𑀢𑁆𑀣 𑀩𑀳𑀽 𑀨𑀮𑀭𑀼𑀓𑁆𑀔𑀸 𑀓𑀼𑀫𑁆𑀪𑀫𑀢𑁆𑀢𑀸𑀦𑀺 𑀨𑀮𑀸𑀦𑀺 𑀨𑀮𑀦𑁆𑀢𑀺 𑀫𑀥𑀼𑀭𑀭𑀲𑀸𑀦𑀺, 𑀬𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀲𑀢𑁆𑀢𑀸𑀳𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀦 𑀩𑀸𑀥𑀻𑀬𑀦𑁆𑀢𑀺.

𑀦𑀚𑁆𑀚𑁄𑀧𑀺 𑀢𑀢𑁆𑀣 𑀲𑀼𑀯𑀺𑀲𑀼𑀤𑁆𑀥𑀚𑀮𑀸 𑀲𑀼𑀧𑁆𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸 𑀅𑀓𑀤𑁆𑀤𑀫𑀸 𑀯𑀸𑀮𑀼𑀓𑀢𑀮𑀸 𑀦𑀸𑀢𑀺𑀲𑀻𑀢𑀸 𑀦𑀘𑁆𑀘𑀼𑀡𑁆𑀳𑀸 𑀲𑀼𑀭𑀪𑀺𑀕𑀦𑁆𑀥𑀻𑀳𑀺 𑀚𑀮𑀚𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑀸 𑀲𑀩𑁆𑀩𑀓𑀸𑀮𑀁 𑀲𑀼𑀭𑀪𑀻 𑀯𑀸𑀬𑀦𑁆𑀢𑀺𑀬𑁄 𑀲𑀦𑁆𑀤𑀦𑁆𑀢𑀺, 𑀦 𑀢𑀢𑁆𑀣 𑀓𑀡𑁆𑀝𑀓𑀺𑀓𑀸 𑀓𑀓𑁆𑀔𑀴𑀕𑀘𑁆𑀙𑀮𑀢𑀸 𑀳𑁄𑀦𑁆𑀢𑀺, 𑀅𑀓𑀡𑁆𑀝𑀓𑀸 𑀧𑀼𑀧𑁆𑀨𑀨𑀮𑀲𑀫𑁆𑀧𑀦𑁆𑀦𑀸 𑀏𑀯 𑀳𑁄𑀦𑁆𑀢𑀺, 𑀘𑀦𑁆𑀤𑀦𑀦𑀸𑀕𑀭𑀼𑀓𑁆𑀔𑀸 𑀲𑀬𑀫𑁂𑀯 𑀭𑀲𑀁 𑀧𑀕𑁆𑀖𑀭𑀦𑁆𑀢𑀺, 𑀦𑀳𑀸𑀬𑀺𑀢𑀼𑀓𑀸𑀫𑀸 𑀘 𑀦𑀤𑀺𑀢𑀺𑀢𑁆𑀣𑁂 𑀏𑀓𑀚𑁆𑀛𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀉𑀢𑁆𑀢𑀺𑀡𑁆𑀡𑀼𑀢𑁆𑀢𑀺𑀡𑁆𑀡𑀸 𑀉𑀧𑀭𑀺𑀝𑁆𑀞𑀺𑀫𑀁 𑀉𑀧𑀭𑀺𑀝𑁆𑀞𑀺𑀫𑀁 𑀯𑀢𑁆𑀣𑀸𑀪𑀭𑀡𑀁 𑀕𑀡𑁆𑀳𑀦𑁆𑀢𑀺, 𑀦 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀇𑀤𑀁 𑀫𑀫, 𑀇𑀤𑀁 𑀧𑀭𑀲𑁆𑀲𑀸’’𑀢𑀺. 𑀢𑀢𑁄 𑀏𑀯 𑀦 𑀢𑁂𑀲𑀁 𑀓𑁄𑀘𑀺 𑀯𑀺𑀕𑁆𑀕𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸. 𑀲𑀢𑁆𑀢𑀸𑀳𑀺𑀓𑀸 𑀏𑀯 𑀘 𑀦𑁂𑀲𑀁 𑀓𑀸𑀫𑀭𑀢𑀺𑀓𑀻𑀴𑀸 𑀳𑁄𑀢𑀺, 𑀢𑀢𑁄 𑀯𑀻𑀢𑀭𑀸𑀕𑀸 𑀯𑀺𑀬 𑀯𑀺𑀘𑀭𑀦𑁆𑀢𑀺. 𑀬𑀢𑁆𑀣 𑀘 𑀭𑀼𑀓𑁆𑀔𑁂 𑀲𑀬𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯 𑀲𑀬𑀦𑀁 𑀉𑀧𑀮𑀩𑁆𑀪𑀢𑀺. 𑀫𑀢𑁂 𑀘 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀦 𑀭𑁄𑀤𑀦𑁆𑀢𑀺 𑀦 𑀲𑁄𑀘𑀦𑁆𑀢𑀺. 𑀢𑀜𑁆𑀘 𑀫𑀡𑁆𑀟𑀬𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀢𑀸𑀯𑀤𑁂𑀯 𑀘 𑀦𑁂𑀲𑀁 𑀢𑀣𑀸𑀭𑀽𑀧𑀸 𑀲𑀓𑀼𑀡𑀸 𑀉𑀧𑀕𑀦𑁆𑀢𑁆𑀯𑀸 𑀫𑀢𑀁 𑀤𑀻𑀧𑀦𑁆𑀢𑀭𑀁 𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀲𑀸𑀦𑀁 𑀯𑀸 𑀅𑀲𑀼𑀘𑀺𑀝𑁆𑀞𑀸𑀦𑀁 𑀯𑀸 𑀢𑀢𑁆𑀣 𑀦𑀢𑁆𑀣𑀺, 𑀦 𑀘 𑀢𑀢𑁄 𑀫𑀢𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀧𑀜𑁆𑀘𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀘 𑀦𑁂𑀲𑀁 𑀲𑀩𑁆𑀩𑀓𑀸𑀮𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀲𑀩𑁆𑀩𑀫𑁂𑀢𑀁 𑀢𑁂𑀲𑀁 𑀧𑀜𑁆𑀘𑀲𑀻𑀮𑀁 𑀯𑀺𑀬 𑀥𑀫𑁆𑀫𑀢𑀸𑀲𑀺𑀤𑁆𑀥𑀫𑁂𑀯𑀸𑀢𑀺.

𑀢𑀺𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀡𑁆𑀳𑀸𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 (𑀤𑀻. 𑀦𑀺. 𑀝𑀻. 𑁨.𑁧𑁦𑁩) 𑀏𑀲𑀦𑀢𑀡𑁆𑀳𑀸𑀢𑀺 𑀪𑁄𑀕𑀸𑀦𑀁 𑀧𑀭𑀺𑀬𑁂𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀢𑀡𑁆𑀳𑀸. 𑀏𑀲𑀺𑀢𑀢𑀡𑁆𑀳𑀸𑀢𑀺 𑀧𑀭𑀺𑀬𑀺𑀝𑁆𑀞𑁂𑀲𑀼 𑀪𑁄𑀕𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀢𑀡𑁆𑀳𑀸. 𑀧𑀭𑀺𑀢𑀲𑁆𑀲𑀦𑀯𑀲𑁂𑀦 ¶ 𑀧𑀭𑀺𑀬𑁂𑀲𑀢𑀺 𑀏𑀢𑀸𑀬𑀸𑀢𑀺 𑀧𑀭𑀺𑀬𑁂𑀲𑀦𑀸, 𑀆𑀲𑀬𑀢𑁄 𑀧𑀬𑁄𑀕𑀢𑁄 𑀘 𑀧𑀭𑀺𑀬𑁂𑀲𑀦𑀸 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀻’’𑀢𑀺. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑁄𑀢𑀺 𑀲𑀯𑀢𑁆𑀣𑀼𑀓𑀸𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀕𑀯𑁂𑀲𑀦𑀯𑀲𑁂𑀦 𑀧𑀝𑀺𑀮𑀸𑀪𑁄. 𑀬𑀁 𑀧𑀦 𑀅𑀧𑀭𑀺𑀬𑀺𑀝𑁆𑀞𑀁𑀬𑁂𑀯 𑀮𑀩𑁆𑀪𑀢𑀺, 𑀢𑀫𑁆𑀧𑀺 𑀅𑀢𑁆𑀣𑀢𑁄 𑀧𑀭𑀺𑀬𑁂𑀲𑀦𑀸𑀬 𑀮𑀤𑁆𑀥𑀫𑁂𑀯 𑀦𑀸𑀫 𑀢𑀣𑀸𑀭𑀽𑀧𑀲𑁆𑀲 𑀓𑀫𑁆𑀫𑀲𑁆𑀲 𑀧𑀼𑀩𑁆𑀩𑁂𑀓𑀢𑀢𑁆𑀢𑀸 𑀏𑀯 𑀮𑀩𑁆𑀪𑀦𑀢𑁄. 𑀢𑁂𑀦𑀸𑀳 ‘‘𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀻’’𑀢𑀺.

𑀲𑀼𑀔𑀯𑀺𑀦𑀺𑀘𑁆𑀙𑀬𑀦𑁆𑀢𑀺 ¶ 𑀲𑀼𑀔𑀁 𑀯𑀺𑀲𑁂𑀲𑀢𑁄 𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀲𑀼𑀔𑀯𑀺𑀦𑀺𑀘𑁆𑀙𑀬𑁄. 𑀲𑀼𑀔𑀁 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀘 𑀬𑀸𑀣𑀸𑀯𑀢𑁄 𑀚𑀸𑀦𑀺𑀢𑁆𑀯𑀸 𑀧𑀯𑀢𑁆𑀢𑀜𑀸𑀡𑀁𑀯 𑀲𑀼𑀔𑀯𑀺𑀦𑀺𑀘𑁆𑀙𑀬𑀁. 𑀚𑀜𑁆𑀜𑀸𑀢𑀺 𑀚𑀸𑀦𑁂𑀬𑁆𑀬. ‘‘𑀲𑀼𑀪𑀁 𑀲𑀼𑀔’’𑀦𑁆𑀢𑀺𑀆𑀤𑀺𑀓𑀁 𑀆𑀭𑀫𑁆𑀫𑀡𑁂 𑀅𑀪𑀽𑀢𑀸𑀓𑀸𑀭𑀁 𑀯𑀺𑀯𑀺𑀥𑀁 𑀦𑀺𑀦𑁆𑀦𑀪𑀸𑀯𑁂𑀦 𑀘𑀺𑀦𑁄𑀢𑀺 𑀆𑀭𑁄𑀧𑁂𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸 𑀢𑀡𑁆𑀳𑀸. 𑀤𑀺𑀝𑁆𑀞𑀺𑀬𑀸𑀧𑀺 𑀏𑀯𑀫𑁂𑀯 𑀯𑀺𑀦𑀺𑀘𑁆𑀙𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀺𑀢𑀓𑁆𑀓𑁄𑀬𑁂𑀯 𑀆𑀕𑀢𑁄𑀢𑀺 𑀬𑁄𑀚𑀦𑀸. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂𑀢𑀺 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁫𑁮). 𑀢𑀢𑁆𑀣 𑀳𑀺 ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺 𑀆𑀕𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀻𑀢𑀺 𑀏𑀢𑁂𑀦 ‘‘𑀯𑀺𑀦𑀺𑀘𑁆𑀙𑀺𑀦𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀯𑀺𑀦𑀺𑀘𑁆𑀙𑀬𑀲𑀤𑁆𑀤𑀲𑁆𑀲 𑀓𑀭𑀡𑀲𑀸𑀥𑀦𑀫𑀸𑀳. 𑀏𑀢𑁆𑀢𑀓𑀦𑁆𑀢𑀺𑀆𑀤𑀺 𑀯𑀺𑀦𑀺𑀘𑁆𑀙𑀬𑀦𑀸𑀓𑀸𑀭𑀤𑀲𑁆𑀲𑀦𑀁.

𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄, 𑀏𑀯𑀁 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄𑀢𑀺 𑀙𑀦𑁆𑀤𑀭𑀸𑀕𑁄. 𑀲𑁆𑀯𑀸𑀬𑀁 𑀅𑀦𑀸𑀲𑁂𑀯𑀦𑀢𑀸𑀬 𑀫𑀦𑁆𑀤𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀤𑀼𑀩𑁆𑀩𑀮𑀭𑀸𑀕𑀲𑁆𑀲𑀸𑀥𑀺𑀯𑀘𑀦’’𑀦𑁆𑀢𑀺. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀦𑀁. ‘‘𑀫𑀬𑁆𑀳𑀁 𑀇𑀤’’𑀦𑁆𑀢𑀺 𑀳𑀺 𑀢𑀡𑁆𑀳𑀸𑀕𑀸𑀳𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀕𑁆𑀕𑀸𑀳𑀲𑀦𑁆𑀦𑀺𑀲𑁆𑀲𑀬𑁄𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀳𑀁 𑀫𑀫𑀦𑁆𑀢𑀻’’𑀢𑀺. 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀘 𑀢𑁂𑀲𑀁 𑀕𑀸𑀳𑀸𑀦𑀁 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀫𑀸𑀳. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀦𑁆𑀢𑀺 𑀅𑀳𑀁 𑀫𑀫𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀅𑀢𑁆𑀢𑀢𑁆𑀢𑀦𑀺𑀬𑀕𑁆𑀕𑀸𑀳𑀯𑀢𑁆𑀣𑀼𑀦𑁄 𑀅𑀜𑁆𑀜𑀸𑀲𑀸𑀥𑀸𑀭𑀡𑀁 𑀯𑀺𑀬 𑀓𑀢𑁆𑀯𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀞𑀸𑀦𑀁, 𑀢𑀣𑀸𑀧𑀯𑀢𑁆𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀅𑀢𑁆𑀢𑀦𑀸 𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀬𑀲𑁆𑀲 𑀯𑀲𑁂𑀦 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀫𑀸𑀦𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄, 𑀲𑁄 𑀥𑀫𑁆𑀫𑁄 𑀅𑀲𑀳𑀦𑀢𑀸. 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀲𑀤𑁆𑀤𑀮𑀓𑁆𑀔𑀡𑁂𑀦 𑀧𑀦 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀫𑀘𑁆𑀙𑀭𑀺𑀬𑀬𑁄𑀕𑀢𑁄 𑀧𑀼𑀕𑁆𑀕𑀮𑁄 𑀫𑀘𑁆𑀙𑀭𑁄 ¶ , 𑀢𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑁄 𑀥𑀫𑁆𑀫𑁄. 𑀫𑀘𑁆𑀙𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀢𑁄 𑀆𑀤𑀭𑁂𑀦 𑀭𑀓𑁆𑀔𑀡𑀁 𑀆𑀭𑀓𑁆𑀔𑁄𑀢𑀺 𑀆𑀳 ‘‘𑀤𑁆𑀯𑀸𑀭…𑀧𑁂… 𑀲𑀼𑀝𑁆𑀞𑀼 𑀭𑀓𑁆𑀔𑀡’’𑀦𑁆𑀢𑀺.

𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀭𑀡𑀁, 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁. 𑀅𑀥𑀺𑀓𑀁 𑀓𑀭𑀡𑀦𑁆𑀢𑀺 𑀅𑀥𑀺𑀓𑀭𑀡𑀁, 𑀯𑀺𑀲𑁂𑀲𑀓𑀸𑀭𑀡𑀁. 𑀯𑀺𑀲𑁂𑀲𑀓𑀸𑀭𑀡𑀜𑁆𑀘 𑀪𑁄𑀕𑀸𑀦𑀁 𑀆𑀭𑀓𑁆𑀔𑀤𑀡𑁆𑀟𑀸𑀤𑀸𑀦𑀸𑀤𑀺𑀅𑀦𑀢𑁆𑀣𑀲𑀫𑁆𑀪𑀯𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀭𑀓𑁆𑀔𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺. 𑀧𑀭𑀦𑀺𑀲𑁂𑀥𑀦𑀢𑁆𑀣𑀦𑁆𑀢𑀺 𑀫𑀸𑀭𑀡𑀸𑀤𑀺𑀦𑀸 𑀧𑀭𑁂𑀲𑀁 𑀯𑀺𑀩𑀸𑀥𑀦𑀢𑁆𑀣𑀁. 𑀆𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀤𑀸𑀦𑀁, 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁, 𑀤𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀧𑀭𑀯𑀺𑀳𑁂𑀞𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑀢𑁆𑀣𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀓𑀸𑀬𑁂𑀦 𑀓𑀸𑀢𑀩𑁆𑀩𑁄 𑀓𑀮𑀳𑁄 𑀓𑀸𑀬𑀓𑀮𑀳𑁄. 𑀫𑀫𑁆𑀫𑀖𑀝𑁆𑀝𑀦𑀸𑀤𑀺𑀯𑀲𑁂𑀦 𑀯𑀸𑀘𑀸𑀬 𑀓𑀸𑀢𑀩𑁆𑀩𑁄 𑀓𑀮𑀳𑁄 𑀯𑀸𑀘𑀸𑀓𑀮𑀳𑁄. 𑀯𑀺𑀭𑀼𑀚𑁆𑀛𑀦𑀯𑀲𑁂𑀦 𑀯𑀺𑀭𑀽𑀧𑀁 𑀕𑀡𑁆𑀳𑀸𑀢𑀺 𑀏𑀢𑁂𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀭𑀼𑀤𑁆𑀥𑀁 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀺𑀯𑀸𑀤𑁄. ‘‘𑀢𑀼𑀯𑀁 𑀢𑀼𑀯’’𑀦𑁆𑀢𑀺 𑀅𑀕𑀸𑀭𑀯𑀯𑀘𑀦𑀲𑀳𑀘𑀭𑀡𑀢𑁄 ¶ 𑀢𑀼𑀯𑀁𑀢𑀼𑀯𑀁. 𑀲𑀩𑁆𑀩𑁂𑀧𑀺 𑀢𑁂 𑀢𑀣𑀸𑀧𑀯𑀢𑁆𑀢𑀤𑁄𑀲𑀲𑀳𑀕𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺.

𑀢𑀡𑁆𑀳𑀸𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀲𑀢𑁆𑀢𑀸𑀯𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁪-𑁨𑁫. 𑀘𑀢𑀼𑀢𑁆𑀣𑁂 𑀲𑀢𑁆𑀢𑀸 𑀆𑀯𑀲𑀦𑁆𑀢𑀺 𑀏𑀢𑁂𑀲𑀽𑀢𑀺 𑀲𑀢𑁆𑀢𑀸𑀯𑀸𑀲𑀸, 𑀦𑀸𑀦𑀢𑁆𑀢𑀲𑀜𑁆𑀜𑀺𑀆𑀤𑀺𑀪𑁂𑀤𑀸 𑀲𑀢𑁆𑀢𑀦𑀺𑀓𑀸𑀬𑀸. 𑀬𑀲𑁆𑀫𑀸 𑀢𑁂 𑀢𑁂 𑀲𑀢𑁆𑀢𑀦𑀺𑀯𑀸𑀲𑀸 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀢𑀸𑀬 𑀏𑀯 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀆𑀥𑀸𑀭𑁄 𑀯𑀺𑀬 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀲𑀫𑀼𑀤𑀸𑀬𑀸𑀘𑀸𑀭𑁄 𑀳𑀺 𑀅𑀯𑀬𑀯𑀲𑁆𑀲 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺, 𑀢𑀲𑁆𑀫𑀸 ‘‘𑀲𑀢𑁆𑀢𑀸𑀦𑀁 𑀆𑀯𑀸𑀲𑀸, 𑀯𑀲𑀦𑀝𑁆𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀲𑀢𑁆𑀢𑀸𑀯𑀸𑀲𑁄𑀯 ‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀯𑀸𑀲𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀫𑀬𑀸 𑀅𑀦𑀸𑀯𑀼𑀢𑁆𑀣𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑁂𑀯𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁯𑁧) 𑀯𑀘𑀦𑀢𑁄. 𑀬𑀤𑀺 𑀏𑀯𑀁 𑀢𑁂 𑀓𑀲𑁆𑀫𑀸 𑀇𑀥 𑀦 𑀕𑀳𑀺𑀢𑀸𑀢𑀺 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸’’𑀢𑀺𑀆𑀤𑀺. 𑀯𑁂𑀳𑀧𑁆𑀨𑀮𑀸 𑀧𑀦 𑀘𑀢𑀼𑀢𑁆𑀣𑁂𑀬𑁂𑀯 𑀲𑀢𑁆𑀢𑀸𑀯𑀸𑀲𑁂 𑀪𑀚𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀢𑁆𑀢𑀸𑀯𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀺𑀮𑀸𑀬𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 ¶ 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀯𑀻𑀲𑀢𑀗𑁆𑀕𑀼𑀮𑀺𑀓𑁄 𑀳𑀢𑁆𑀣𑁄 𑀓𑀼𑀓𑁆𑀓𑀼, ‘‘𑀓𑀓𑁆𑀓𑀽’’𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀅𑀝𑁆𑀞 𑀓𑀼𑀓𑁆𑀓𑀽 𑀉𑀧𑀭𑀺 𑀦𑁂𑀫𑀲𑁆𑀲𑀸𑀢𑀺 𑀅𑀝𑁆𑀞 𑀳𑀢𑁆𑀣𑀸 𑀆𑀯𑀸𑀝𑀲𑁆𑀲 𑀉𑀧𑀭𑀺 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀸 𑀪𑀯𑁂𑀬𑁆𑀬𑀼𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀺𑀮𑀸𑀬𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀞𑀫𑀯𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 (𑀲𑀁. 𑀦𑀺. 𑀝𑀻. 𑁨.𑁨𑁪𑁧) 𑀬𑀢𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀅𑀬𑀜𑁆𑀳𑀺 𑀢𑁄-𑀲𑀤𑁆𑀤𑁄 𑀤𑀸-𑀲𑀤𑁆𑀤𑁄 𑀯𑀺𑀬 𑀇𑀥 𑀓𑀸𑀮𑀯𑀺𑀲𑀬𑁄, 𑀬𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀬𑀸𑀦𑀺 𑀯𑁂𑀭𑀸𑀦𑀻𑀢𑀺 𑀪𑀻𑀬𑀢𑁂 𑀪𑀬𑀁, 𑀪𑀬𑁂𑀦 𑀬𑁄𑀕𑀸, 𑀪𑀸𑀬𑀺𑀢𑀩𑁆𑀩𑁂𑀦 𑀯𑀸 𑀪𑀬𑀁 𑀏𑀯 𑀯𑁂𑀭𑀧𑁆𑀧𑀲𑀯𑀝𑁆𑀞𑁂𑀦 𑀯𑁂𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀸 𑀘𑁂𑀢𑀦𑀸𑀤𑀬𑁄. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 ¶ 𑀳𑀺 𑀬𑀲𑁆𑀲 𑀧𑀯𑀢𑁆𑀢𑀦𑁆𑀢𑀺, 𑀬𑀜𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀻𑀬𑀦𑁆𑀢𑀺, 𑀉𑀪𑀬𑁂𑀲𑀜𑁆𑀘 𑀯𑁂𑀭𑀸𑀯𑀳𑀸, 𑀢𑀢𑁄 𑀏𑀯 𑀘𑁂𑀢𑁂 𑀪𑀸𑀬𑀺𑀢𑀩𑁆𑀩𑀸 𑀯𑁂𑀭𑀲𑀜𑁆𑀚𑀦𑀓𑀸 𑀦𑀸𑀫𑀸𑀢𑀺. 𑀲𑁄𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀤𑀺𑀢𑁄 𑀧𑀚𑁆𑀚𑀦𑀁 𑀧𑀝𑀺𑀧𑀢𑁆𑀢𑀺 𑀅𑀥𑀺𑀕𑀫𑁄 𑀲𑁄𑀢𑀸𑀧𑀢𑁆𑀢𑀺. 𑀢𑀤𑀢𑁆𑀣𑀸𑀬 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑁆𑀲 𑀘 𑀅𑀗𑁆𑀕𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺. 𑀤𑀼𑀯𑀺𑀥𑀜𑁆𑀳𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁪𑁧) 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀁 𑀲𑁄𑀢𑀸𑀧𑀢𑁆𑀢𑀺𑀅𑀢𑁆𑀣𑀸𑀬 𑀘 𑀅𑀗𑁆𑀕𑀁 𑀓𑀸𑀭𑀡𑀁, 𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀢𑁄 𑀧𑀼𑀩𑁆𑀩𑀪𑀸𑀕𑁂 𑀲𑁄𑀢𑀸𑀧𑀢𑁆𑀢𑀺𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺, ‘‘𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁧𑁧) 𑀏𑀯𑀁 𑀆𑀕𑀢𑀁. 𑀧𑀝𑀺𑀮𑀤𑁆𑀥𑀕𑀼𑀡𑀲𑁆𑀲 𑀘 𑀲𑁄𑀢𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀞𑀺𑀢𑀲𑁆𑀲 𑀅𑀗𑁆𑀕𑀁, 𑀬𑀁 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺 ‘‘𑀲𑁄𑀢𑀸𑀧𑀦𑁆𑀦𑁄 𑀅𑀗𑁆𑀕𑀻𑀬𑀢𑀺 𑀜𑀸𑀬𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀤𑀫𑀺𑀥𑀸𑀥𑀺𑀧𑁆𑀧𑁂𑀢𑀁.

𑀔𑀻𑀡𑀦𑀺𑀭𑀬𑁄𑀢𑀺𑀆𑀤𑀻𑀲𑀼 𑀆𑀬𑀢𑀺𑀁 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑀸𑀬 𑀔𑀻𑀡𑁄 𑀦𑀺𑀭𑀬𑁄 𑀫𑀬𑁆𑀳𑀢𑀺, 𑀲𑁄 𑀅𑀳𑀁 𑀔𑀻𑀡𑀦𑀺𑀭𑀬𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀫𑀕𑁆𑀕𑀲𑁄𑀢𑀁 𑀆𑀧𑀦𑁆𑀦𑁄. 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀦 𑀯𑀺𑀦𑀺𑀧𑀸𑀢𑀲𑀪𑀸𑀯𑁄. 𑀦𑀺𑀬𑀢𑁄𑀢𑀺 𑀧𑀞𑀫𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑁄 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 ¶ 𑀫𑀬𑁆𑀳𑀦𑁆𑀢𑀺 𑀲𑁄𑀳𑀁 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑀫𑁆𑀩𑁄𑀥𑀺𑀁 𑀅𑀯𑀲𑁆𑀲𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑁄𑀢𑀺 𑀅𑀢𑁆𑀣𑁄.

𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀓𑀭𑀡𑀳𑁂𑀢𑀼. 𑀪𑀬𑀁 𑀯𑁂𑀭𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀯𑀺𑀭𑁄𑀥𑁄, 𑀢𑀤𑁂𑀯 𑀪𑀸𑀬𑀺𑀢𑀩𑁆𑀩𑀢𑁄 ‘‘𑀪𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀧𑀦𑁂𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀩𑀸𑀳𑀺𑀭𑀁, 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺. 𑀏𑀓𑁂𑀦 𑀳𑀺 𑀏𑀓𑀲𑁆𑀲 𑀧𑀺𑀢𑀸 𑀫𑀸𑀭𑀺𑀢𑁄 𑀳𑁄𑀢𑀺. 𑀲𑁄 𑀘𑀺𑀦𑁆𑀢𑁂𑀢𑀺 ‘‘𑀏𑀢𑁂𑀦 𑀓𑀺𑀭 𑀫𑁂 𑀧𑀺𑀢𑀸 𑀫𑀸𑀭𑀺𑀢𑁄, 𑀅𑀳𑀫𑁆𑀧𑀺 𑀢𑀁𑀬𑁂𑀯 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀢𑀁 𑀲𑀢𑁆𑀣𑀁 𑀆𑀤𑀸𑀬 𑀘𑀭𑀢𑀺. 𑀬𑀸 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀸 𑀯𑁂𑀭𑀘𑁂𑀢𑀦𑀸, 𑀇𑀤𑀁 𑀩𑀸𑀳𑀺𑀭𑀁 𑀯𑁂𑀭𑀁 𑀦𑀸𑀫 𑀢𑀲𑁆𑀲 𑀯𑁂𑀭𑀲𑁆𑀲 𑀫𑀽𑀮𑀪𑀽𑀢𑀢𑁄 𑀯𑁂𑀭𑀓𑀸𑀭𑀓𑀧𑀼𑀕𑁆𑀕𑀮𑀢𑁄 𑀩𑀳𑀺𑀪𑀸𑀯𑀢𑁆𑀢𑀸. 𑀬𑀸 𑀧𑀦 𑀇𑀢𑀭𑀲𑁆𑀲 ‘‘𑀅𑀬𑀁 𑀓𑀺𑀭 𑀫𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀘𑀭𑀢𑀺, 𑀅𑀳𑀫𑁂𑀯 𑀦𑀁 𑀧𑀞𑀫𑀢𑀭𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀅𑀚𑁆𑀛𑀢𑁆𑀢𑀺𑀓𑀁 𑀯𑁂𑀭𑀁 𑀦𑀸𑀫. 𑀇𑀤𑀁 𑀢𑀸𑀯 𑀉𑀪𑀬𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯. 𑀬𑀸 𑀧𑀦 𑀢𑀁 𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀚𑀮𑀺𑀢𑀁 𑀅𑀬𑀫𑀼𑀕𑁆𑀕𑀭𑀁 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀭𑀬𑀧𑀸𑀮𑀲𑁆𑀲 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀫𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀁 𑀩𑀸𑀳𑀺𑀭𑀁 𑀯𑁂𑀭𑀁. 𑀬𑀸 𑀘𑀲𑁆𑀲 ‘‘𑀅𑀬𑀁 𑀦𑀺𑀤𑁆𑀤𑁄𑀲𑀁 𑀫𑀁 𑀧𑀳𑀭𑀺𑀲𑁆𑀲𑀸𑀫𑀻𑀢𑀺 𑀆𑀕𑀘𑁆𑀙𑀢𑀺, 𑀅𑀳𑀫𑁂𑀯 𑀦𑀁 𑀧𑀞𑀫𑀢𑀭𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀫𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀁 𑀅𑀚𑁆𑀛𑀢𑁆𑀢𑀁 𑀯𑁂𑀭𑀁. 𑀬𑀁 𑀧𑀦𑁂𑀢𑀁 𑀩𑀸𑀳𑀺𑀭𑀁 𑀯𑁂𑀭𑀁, 𑀢𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀧𑀼𑀕𑁆𑀕𑀮𑀯𑁂𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁂𑀲𑁂𑀲𑀼𑀧𑀺 ‘‘𑀇𑀫𑀺𑀦𑀸 𑀫𑀫 𑀪𑀡𑁆𑀟𑀁 𑀳𑀝𑀁, 𑀫𑀬𑁆𑀳𑀁 𑀤𑀸𑀭𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀦𑁆𑀦𑀁, 𑀫𑀼𑀲𑀸 𑀯𑀢𑁆𑀯𑀸 𑀅𑀢𑁆𑀣𑁄 𑀪𑀕𑁆𑀕𑁄, 𑀲𑀼𑀭𑀸𑀫𑀤𑀫𑀢𑁆𑀢𑁂𑀦 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀭𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 ¶ 𑀅𑀥𑀺𑀕𑀢𑁂𑀦 𑀅𑀘𑀮𑀧𑁆𑀧𑀲𑀸𑀤𑁂𑀦. 𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀧𑀜𑁆𑀘𑀳𑀺 𑀲𑀻𑀮𑁂𑀳𑀺. 𑀢𑀸𑀦𑀺 𑀳𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀸𑀦𑀺 𑀧𑀺𑀬𑀸𑀦𑀺 𑀪𑀯𑀦𑁆𑀢𑀺, 𑀪𑀯𑀦𑁆𑀢𑀭𑀕𑀢𑀸𑀧𑀺 𑀅𑀭𑀺𑀬𑀸 𑀢𑀸𑀦𑀺 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀭𑀺𑀬𑀓𑀦𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀯𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀆𑀖𑀸𑀢𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 ¶ 𑀯𑀲𑀢𑀺 𑀏𑀢𑁆𑀣 𑀨𑀮𑀁 𑀢𑀦𑁆𑀦𑀺𑀫𑀺𑀢𑁆𑀢𑀢𑀸𑀬 𑀧𑀯𑀢𑁆𑀢𑀢𑀻𑀢𑀺 𑀯𑀢𑁆𑀣𑀼, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀆𑀖𑀸𑀢𑀯𑀢𑁆𑀣𑀽𑀦𑀻’’𑀢𑀺. 𑀓𑁄𑀧𑁄 𑀦𑀸𑀫𑀸𑀬𑀁 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀢𑁆𑀣 𑀏𑀓𑀯𑀸𑀭𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀣 𑀔𑁄 𑀧𑀼𑀦𑀧𑀺 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀦𑁆𑀥𑀢𑀻’’𑀢𑀺. 𑀅𑀣 𑀯𑀸 𑀬𑁄 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀆𑀖𑀸𑀢𑁄 𑀲𑀯𑀺𑀲𑀬𑁂 𑀩𑀤𑁆𑀥𑁄 𑀯𑀺𑀬 𑀦 𑀯𑀺𑀕𑀘𑁆𑀙𑀢𑀺, 𑀧𑀼𑀦𑀧𑀺 𑀉𑀧𑁆𑀧𑀚𑁆𑀚𑀢𑁂𑀯. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀖𑀸𑀢𑀁 𑀩𑀦𑁆𑀥𑀢𑀻’’𑀢𑀺. 𑀢𑀁 𑀧𑀦𑀲𑁆𑀲 𑀧𑀘𑁆𑀘𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀦𑀁 𑀉𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑁂𑀢𑀻’’𑀢𑀺.

𑀆𑀖𑀸𑀢𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀧𑀤𑀚𑁆𑀛𑀸𑀳𑀸𑀭𑁂𑀦 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 ‘‘𑀢𑀁 𑀅𑀦𑀢𑁆𑀣𑀘𑀭𑀡𑀁 𑀫𑀸 𑀅𑀳𑁄𑀲𑀻’’𑀢𑀺𑀆𑀤𑀺𑀫𑀸𑀳. 𑀓𑁂𑀦 𑀓𑀸𑀭𑀡𑁂𑀦 𑀮𑀤𑁆𑀥𑀩𑁆𑀩𑀁 𑀦𑀺𑀭𑀢𑁆𑀣𑀓𑀪𑀸𑀯𑀢𑁄. 𑀓𑀫𑁆𑀫𑀲𑁆𑀲𑀓𑀸 𑀳𑀺 𑀲𑀢𑁆𑀢𑀸. 𑀢𑁂 𑀓𑀲𑁆𑀲 𑀭𑀼𑀘𑀺𑀬𑀸 𑀤𑀼𑀓𑁆𑀔𑀺𑀢𑀸 𑀲𑀼𑀔𑀺𑀢𑀸 𑀯𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀓𑁂𑀯𑀮𑀁 𑀢𑀲𑁆𑀫𑀺𑀁 𑀫𑀬𑁆𑀳𑀁 𑀅𑀦𑀢𑁆𑀣𑀘𑀭𑀡𑀁, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀢𑀁 𑀓𑁄𑀧𑀓𑀸𑀭𑀡𑀁 𑀏𑀢𑁆𑀣 𑀧𑀼𑀕𑁆𑀕𑀮𑁂 𑀓𑀼𑀢𑁄 𑀮𑀩𑁆𑀪𑀸 𑀧𑀭𑀫𑀢𑁆𑀣𑀢𑁄 𑀓𑀼𑀚𑁆𑀛𑀺𑀢𑀩𑁆𑀩𑀲𑁆𑀲 𑀓𑀼𑀚𑁆𑀛𑀦𑀓𑀲𑁆𑀲 𑀘 𑀅𑀪𑀸𑀯𑀢𑁄. 𑀲𑀗𑁆𑀔𑀸𑀭𑀫𑀢𑁆𑀢𑀜𑁆𑀳𑁂𑀢𑀁, 𑀬𑀤𑀺𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀬𑀁 ‘‘𑀲𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀲𑀗𑁆𑀔𑀸𑀭𑀸 𑀇𑀢𑁆𑀢𑀭𑀔𑀡𑀺𑀓𑀸, 𑀓𑀲𑁆𑀲 𑀓𑁄 𑀓𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀮𑀸𑀪𑀸 𑀦𑀸𑀫 𑀓𑁂 𑀲𑀺𑀬𑀼𑀁 𑀅𑀜𑁆𑀜𑀢𑁆𑀭 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀢𑁄.

𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀏𑀓𑀸𑀤𑀲𑀫𑁂 ¶ 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀸𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀓𑁆𑀓𑀫𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀦𑀺𑀭𑁄𑀥𑀸. 𑀢𑁂𑀦𑀸𑀳 ‘‘𑀅𑀦𑀼𑀧𑀝𑀺𑀧𑀸𑀝𑀺𑀦𑀺𑀭𑁄𑀥𑀸’’𑀢𑀺.

𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀸𑀯𑀸𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀳𑀸𑀯𑀕𑁆𑀕𑁄

𑁧. 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀞𑀫𑁂 𑀅𑀦𑀼𑀧𑀼𑀩𑁆𑀩𑀢𑁄 𑀯𑀺𑀳𑀭𑀺𑀢𑀩𑁆𑀩𑀸𑀢𑀺 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸. 𑀅𑀦𑀼𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀦𑀼𑀓𑁆𑀓𑀫𑁂𑀦. 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀯𑀺𑀳𑀸𑀭𑀸𑀢𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀩𑁆𑀩𑀯𑀺𑀳𑀸𑀭𑀸.

𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁩-𑁩𑁪. 𑀤𑀼𑀢𑀺𑀬𑁂 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀓𑀸𑀫𑀸𑀦𑀁 𑀧𑀸𑀢𑀩𑁆𑀩𑀢𑁄 𑀢𑀸𑀲𑀁 𑀯𑀲𑁂𑀦 𑀯𑀢𑁆𑀢𑀦𑀢𑁄, 𑀢𑀦𑁆𑀦𑀺𑀦𑁆𑀦𑀢𑁆𑀢𑀸 𑀦𑀢𑁆𑀣𑀺 𑀏𑀢𑁂𑀲𑀼 𑀙𑀸𑀢𑀦𑁆𑀢𑀺 𑀦𑀺𑀘𑁆𑀙𑀸𑀢𑀸. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑁆𑀙𑀸𑀢𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑀺𑀬𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀕𑀸𑀯𑀻𑀉𑀧𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀘𑀢𑀼𑀢𑁆𑀣𑁂 ¶ 𑀧𑀩𑁆𑀩𑀢𑀘𑀸𑀭𑀺𑀦𑀻𑀢𑀺 𑀧𑀓𑀢𑀺𑀬𑀸 𑀧𑀩𑁆𑀩𑀢𑁂 𑀩𑀳𑀼𑀮𑀘𑀸𑀭𑀺𑀦𑀻. 𑀅𑀔𑁂𑀢𑁆𑀢𑀜𑁆𑀜𑀽𑀢𑀺 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁭𑁭) 𑀅𑀕𑁄𑀘𑀭𑀜𑁆𑀜𑀽. 𑀲𑀫𑀸𑀥𑀺𑀧𑀭𑀺𑀧𑀦𑁆𑀢𑀸𑀦𑀁 𑀯𑀺𑀲𑁄𑀥𑀦𑀸𑀦𑀪𑀺𑀜𑁆𑀜𑀢𑀸𑀬 𑀩𑀸𑀮𑁄. 𑀛𑀸𑀦𑀲𑁆𑀲 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑀯𑁂𑀬𑁆𑀬𑀢𑁆𑀢𑀺𑀬𑀲𑁆𑀲 𑀅𑀪𑀸𑀯𑁂𑀦 𑀅𑀩𑁆𑀬𑀢𑁆𑀢𑁄. 𑀉𑀧𑀭𑀺𑀛𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑀸𑀦𑀯𑀩𑁄𑀥𑁂𑀦 𑀅𑀔𑁂𑀢𑁆𑀢𑀜𑁆𑀜𑀽. 𑀲𑀩𑁆𑀩𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀓𑁄𑀲𑀮𑁆𑀮𑀸𑀪𑀸𑀯𑁂𑀦 𑀅𑀓𑀼𑀲𑀮𑁄. 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀲𑁆𑀲 𑀯𑀸 𑀅𑀦𑀸𑀲𑁂𑀯𑀦𑀸𑀬 𑀩𑀸𑀮𑁄. 𑀅𑀪𑀸𑀯𑀦𑀸𑀬 𑀅𑀩𑁆𑀬𑀢𑁆𑀢𑁄. 𑀅𑀩𑀳𑀼𑀮𑀻𑀓𑀸𑀭𑁂𑀦 𑀅𑀔𑁂𑀢𑁆𑀢𑀜𑁆𑀜𑀽. 𑀲𑀫𑁆𑀫𑀤𑁂𑀯 𑀅𑀦𑀥𑀺𑀝𑁆𑀞𑀸𑀦𑀢𑁄 𑀅𑀓𑀼𑀲𑀮𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀪𑀢𑁄 𑀪𑀝𑁆𑀞𑁄𑀢𑀺 𑀉𑀪𑀬𑀢𑁄 𑀛𑀸𑀦𑀢𑁄 𑀪𑀝𑁆𑀞𑁄. 𑀲𑁄 𑀳𑀺 𑀅𑀧𑁆𑀧𑀕𑀼𑀡𑀢𑀸𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀲𑀉𑀲𑁆𑀲𑀸𑀳𑁄𑀧𑀺 𑀯𑀺𑀦𑀸𑀲𑀢𑁄 𑀅𑀲𑀸𑀫𑀢𑁆𑀣𑀺𑀬𑀢𑁄 𑀘 𑀛𑀸𑀦𑀤𑁆𑀯𑀬𑀢𑁄 𑀧𑀭𑀺𑀳𑀻𑀦𑁄.

𑀕𑀸𑀯𑀻𑀉𑀧𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀛𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀧𑀜𑁆𑀘𑀫𑁂 ¶ 𑀅𑀦𑀺𑀘𑁆𑀘𑀢𑁄𑀢𑀺 𑀇𑀫𑀺𑀦𑀸 𑀦𑀺𑀘𑁆𑀘𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀢𑁂𑀲𑀁 𑀅𑀦𑀺𑀘𑁆𑀘𑀢𑀫𑀸𑀳. 𑀢𑀢𑁄 𑀏𑀯 𑀉𑀤𑀬𑀯𑀬𑀯𑀦𑁆𑀢𑀢𑁄 𑀯𑀺𑀧𑀭𑀺𑀡𑀸𑀫𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀘 𑀢𑁂 𑀅𑀦𑀺𑀘𑁆𑀘𑀸𑀢𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀬𑀜𑁆𑀳𑀺 𑀦𑀺𑀘𑁆𑀘𑀁 𑀦 𑀳𑁄𑀢𑀺, 𑀢𑀁 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀯𑀺𑀧𑀭𑀺𑀡𑀢𑀁 𑀇𑀢𑁆𑀢𑀭𑀓𑁆𑀔𑀡𑀫𑁂𑀯 𑀘 𑀳𑁄𑀢𑀺. 𑀤𑀼𑀓𑁆𑀔𑀢𑁄𑀢𑀺 𑀦 𑀲𑀼𑀔𑀢𑁄. 𑀇𑀫𑀺𑀦𑀸 𑀲𑀼𑀔𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀢𑁂𑀲𑀁 𑀤𑀼𑀓𑁆𑀔𑀢𑀫𑀸𑀳. 𑀢𑀢𑁄 𑀏𑀯 𑀘 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘 𑀢𑁂 𑀤𑀼𑀓𑁆𑀔𑀸𑀢𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀉𑀤𑀬𑀯𑀬𑀯𑀦𑁆𑀢𑀢𑀸𑀬 𑀳𑀺 𑀢𑁂 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀦𑀢𑁄 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀲𑁆𑀲𑁂𑀯 𑀘 𑀅𑀥𑀺𑀝𑁆𑀞𑀸𑀦𑀪𑀽𑀢𑁄. 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬 𑀭𑁄𑀕𑀫𑀽𑀮𑀢𑀸𑀬 𑀘 𑀭𑁄𑀕𑀢𑁄. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀢𑁄 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀓𑁆𑀓𑀪𑀺𑀚𑁆𑀚𑀦𑀢𑁄 𑀘 𑀕𑀡𑁆𑀟𑀢𑁄. 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀢𑁄 𑀘 𑀲𑀮𑁆𑀮𑀢𑁄. 𑀅𑀯𑀟𑁆𑀠𑀺𑀆𑀯𑀳𑀦𑀢𑁄 𑀅𑀖𑀯𑀢𑁆𑀣𑀼𑀢𑁄 𑀘 𑀅𑀖𑀢𑁄. 𑀅𑀲𑁂𑀭𑀺𑀪𑀸𑀯𑀚𑀦𑀦𑀢𑁄 𑀆𑀩𑀸𑀥𑀧𑁆𑀧𑀢𑀺𑀝𑁆𑀞𑀸𑀦𑀢𑀸𑀬 𑀘 𑀆𑀩𑀸𑀥𑀢𑁄. 𑀅𑀯𑀲𑀯𑀢𑁆𑀢𑀦𑀢𑁄 𑀅𑀯𑀺𑀥𑁂𑀬𑁆𑀬𑀢𑀸𑀬 𑀘 𑀧𑀭𑀢𑁄. 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀧𑀮𑀼𑀚𑁆𑀚𑀦𑀻𑀬𑀢𑀸𑀬 𑀧𑀮𑁄𑀓𑀢𑁄. 𑀲𑀸𑀫𑀺𑀦𑀺𑀯𑀸𑀲𑀻𑀓𑀸𑀭𑀓𑀯𑁂𑀤𑀓𑀅𑀥𑀺𑀝𑁆𑀞𑀸𑀬𑀓𑀯𑀺𑀭𑀳𑀢𑁄 𑀲𑀼𑀜𑁆𑀜𑀢𑁄. 𑀅𑀢𑁆𑀢𑀧𑁆𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦 𑀅𑀦𑀢𑁆𑀢𑀢𑁄. 𑀭𑀽𑀧𑀸𑀤𑀺𑀥𑀫𑁆𑀫𑀸𑀧𑀺 𑀬𑀣𑀸 𑀦 𑀏𑀢𑁆𑀣 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀅𑀦𑀢𑁆𑀢𑀸, 𑀏𑀯𑀁 𑀲𑀬𑀫𑁆𑀧𑀺 𑀅𑀢𑁆𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀦𑀢𑁆𑀢𑀸. 𑀢𑁂𑀦 𑀅𑀩𑁆𑀬𑀸𑀧𑀸𑀭𑀢𑁄 𑀦𑀺𑀭𑀻𑀳𑀢𑁄 𑀢𑀼𑀘𑁆𑀙𑀢𑁄 𑀅𑀦𑀢𑁆𑀢𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑀮𑀓𑁆𑀔𑀡𑀢𑁆𑀢𑀬𑀫𑁂𑀯 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀅𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀲𑀫𑀸𑀧𑀢𑁆𑀢𑀻𑀦𑀁 𑀲𑀳𑀚𑀸𑀢𑀢𑀸𑀬 𑀲𑀫𑀸𑀧𑀢𑁆𑀢𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 ¶ 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀢𑀻𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀢𑀺. 𑀢𑁂𑀦𑀸𑀳 ‘‘𑀫𑁄𑀘𑁂𑀢𑀺 𑀅𑀧𑀦𑁂𑀢𑀻’’𑀢𑀺. 𑀲𑀯𑀦𑀯𑀲𑁂𑀦𑀸𑀢𑀺 ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺𑀆𑀤𑀺𑀦𑀸 𑀲𑀯𑀦𑀯𑀲𑁂𑀦. 𑀣𑀼𑀢𑀺𑀯𑀲𑁂𑀦𑀸𑀢𑀺 𑀢𑀣𑁂𑀯 𑀣𑁄𑀫𑀦𑀸𑀯𑀲𑁂𑀦 𑀕𑀼𑀡𑀢𑁄 𑀲𑀁𑀓𑀺𑀢𑁆𑀢𑀦𑀯𑀲𑁂𑀦. 𑀧𑀭𑀺𑀬𑀢𑁆𑀢𑀺𑀯𑀲𑁂𑀦𑀸𑀢𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀯𑀲𑁂𑀦. 𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑀸𑀢𑀺 𑀢𑀤𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀯𑀲𑁂𑀦. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 𑀉𑀧𑀲𑀁𑀳𑀭𑀢𑀺 𑀫𑀕𑁆𑀕𑀘𑀺𑀢𑁆𑀢𑀁, ‘‘𑀏𑀢𑀁 𑀲𑀦𑁆𑀢’’𑀦𑁆𑀢𑀺𑀆𑀤𑀺 𑀧𑀦 𑀅𑀯𑀥𑀸𑀭𑀡𑀦𑀺𑀯𑀢𑁆𑀢𑀺𑀢𑀢𑁆𑀣𑀤𑀲𑁆𑀲𑀦𑀁. 𑀬𑀣𑀸 𑀯𑀺𑀧𑀲𑁆𑀲𑀦𑀸 ‘‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀏𑀯𑀁 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀦𑁆𑀢𑁄 𑀢𑀢𑁆𑀣 𑀮𑀩𑁆𑀪𑀫𑀸𑀦𑁂 𑀲𑀩𑁆𑀩𑁂𑀧𑀺 𑀯𑀺𑀲𑁂𑀲𑁂 ¶ 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀧𑀦 𑀆𑀓𑀸𑀭𑁂𑀦𑀸’’𑀢𑀺𑀆𑀤𑀺.

𑀲𑁄 𑀢𑀢𑁆𑀣 𑀞𑀺𑀢𑁄𑀢𑀺 𑀲𑁄 𑀅𑀤𑀦𑁆𑀥𑀯𑀺𑀧𑀲𑁆𑀲𑀓𑁄 𑀬𑁄𑀕𑀻 𑀢𑀢𑁆𑀣 𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀸𑀬 𑀞𑀺𑀢𑁄. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼. 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀻𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀯𑀳𑀸𑀲𑀼 𑀏𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀳𑀸𑀬 𑀅𑀕𑁆𑀕𑀫𑀕𑁆𑀕𑀸𑀯𑀳𑀸𑀲𑀼 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀺𑀢𑀸𑀬𑀫𑁂𑀯 𑀲𑀡𑁆𑀞𑀸𑀢𑀺.

𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸𑀢𑀺 𑀲𑀫𑀣𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀸𑀢𑀺 𑀲𑀩𑁆𑀩𑀣𑀸𑀧𑀺 𑀭𑀽𑀧𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀅𑀦𑁂𑀦𑀸𑀢𑀺 𑀬𑁄𑀕𑀺𑀦𑀸. 𑀢𑀁 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀇𑀤𑀁 𑀬𑁄 𑀧𑀞𑀫𑀁 𑀧𑀜𑁆𑀘𑀯𑁄𑀓𑀸𑀭𑀏𑀓𑀯𑁄𑀓𑀸𑀭𑀧𑀭𑀺𑀬𑀸𑀧𑀦𑁆𑀦𑁂 𑀥𑀫𑁆𑀫𑁂 𑀲𑀫𑁆𑀫𑀤𑁂𑀯 𑀲𑀫𑁆𑀫𑀲𑀺𑀢𑁆𑀯𑀸 𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀭𑀽𑀧𑀥𑀫𑁆𑀫𑁂 𑀲𑀫𑁆𑀫𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀅𑀭𑀽𑀧𑀁 𑀲𑀫𑁆𑀫𑀲𑀢𑀻’’𑀢𑀺.

𑀛𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀙𑀝𑁆𑀞𑁂 𑀑𑀓𑀸𑀲𑀁 𑀅𑀯𑀲𑀭𑀁 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀑𑀓𑀸𑀲𑀸𑀥𑀺𑀕𑀫𑁄, 𑀫𑀕𑁆𑀕𑀨𑀮𑀲𑀼𑀔𑀸𑀥𑀺𑀕𑀫𑀸𑀬 𑀑𑀓𑀸𑀲𑀪𑀸𑀯𑀢𑁄 𑀯𑀸 𑀑𑀓𑀸𑀲𑁄, 𑀢𑀲𑁆𑀲 𑀅𑀥𑀺𑀕𑀫𑁄 𑀑𑀓𑀸𑀲𑀸𑀥𑀺𑀕𑀫𑁄. 𑀏𑀢𑁆𑀣 𑀘 𑀤𑀻𑀖𑀦𑀺𑀓𑀸𑀬𑁂𑀦𑁂𑀯 (𑀤𑀻. 𑀦𑀺. 𑁨.𑁨𑁮𑁮) 𑀧𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬𑀁 𑀧𑀞𑀫𑀚𑁆𑀛𑀸𑀦𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄𑀢𑀺 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑀸 𑀆𑀕𑀢𑀸. 𑀢𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁮𑁮) 𑀧𑀞𑀫𑀁 𑀛𑀸𑀦𑀁 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 ‘‘𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 ¶ 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀦 𑀲𑀼𑀔𑀤𑀼𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀤𑀼𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀩𑁆𑀩𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 ‘‘𑀢𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀯𑀼𑀢𑁆𑀢𑁄. 𑀇𑀥 𑀧𑀦 𑀯𑀓𑁆𑀔𑀫𑀸𑀦𑀸𑀦𑀺 𑀢𑀻𑀡𑀺 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀲𑀦𑁆𑀥𑀸𑀬 ‘‘𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁𑀬𑁂𑀯 𑀘 𑀕𑀳𑀡𑁂 𑀓𑀸𑀭𑀡𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀲𑀢𑁆𑀢𑀸𑀦𑀁 ¶ 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀦𑀢𑁆𑀣𑀸𑀬𑀸𑀢𑀺 𑀭𑀸𑀕𑀸𑀤𑀻𑀳𑀺 𑀫𑀮𑁂𑀳𑀺 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀺 𑀘 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀧𑀸𑀧𑀦𑀢𑁆𑀣𑀸𑀬 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬. 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀜𑁆𑀳𑀺 𑀇𑀥 ‘‘𑀲𑀫𑀢𑀺𑀓𑁆𑀓𑀫𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀁 𑀕𑀫𑀦𑀢𑁆𑀣𑀸𑀬𑀸𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀗𑁆𑀕𑀫𑀸𑀬, 𑀦𑀺𑀭𑁄𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀲𑀫𑀼𑀘𑁆𑀙𑁂𑀤𑀪𑀸𑀯𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀲𑀳𑀯𑀺𑀧𑀲𑁆𑀲𑀦𑀓𑀲𑁆𑀲 𑀫𑀕𑁆𑀕𑀲𑁆𑀲𑀸’’𑀢𑀺. 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬. 𑀧𑀭𑀧𑀘𑁆𑀘𑀬𑁂𑀦 𑀯𑀺𑀦𑀸 𑀧𑀘𑁆𑀘𑀓𑁆𑀔𑀓𑀭𑀡𑀜𑁆𑀳𑀺 ‘‘𑀲𑀘𑁆𑀙𑀺𑀓𑀺𑀭𑀺𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑀫𑁆𑀪𑀺𑀦𑁆𑀦𑀦𑁆𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀅𑀦𑀼𑀧𑀳𑀢𑀁.

𑀭𑀸𑀕𑀸𑀦𑀼𑀕𑀢𑁄 𑀲𑀫𑀸𑀥𑀺 𑀅𑀪𑀺𑀦𑀢𑁄 𑀦𑀸𑀫 𑀳𑁄𑀢𑀺 𑀆𑀭𑀫𑁆𑀫𑀡𑁂 𑀅𑀪𑀺𑀫𑀼𑀔𑀸𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸, 𑀤𑁄𑀲𑀸𑀦𑀼𑀕𑀢𑁄 𑀧𑀦 𑀅𑀧𑀦𑀢𑁄 𑀅𑀧𑀕𑀫𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸, 𑀢𑀤𑀼𑀪𑀬𑀧𑁆𑀧𑀝𑀺𑀓𑁆𑀔𑁂𑀧𑁂𑀦 ‘‘𑀦 𑀘𑀸𑀪𑀺𑀦𑀢𑁄 𑀦 𑀘𑀸𑀧𑀦𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀭𑀸𑀕𑀯𑀲𑁂𑀦𑀸’’𑀢𑀺𑀆𑀤𑀺. 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄𑀢𑀺 𑀮𑁄𑀓𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺 𑀯𑀺𑀬 𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦 𑀘 𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀭𑁂𑀢𑁆𑀯𑀸 𑀞𑀺𑀢𑁄. 𑀓𑀺𑀜𑁆𑀘𑀭𑀳𑀺 𑀓𑀺𑀮𑁂𑀲𑀸𑀦𑀁 𑀙𑀺𑀦𑁆𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑁄. 𑀢𑀣𑀸𑀪𑀽𑀢𑀁 𑀨𑀮𑀲𑀫𑀸𑀥𑀺𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀙𑀺𑀦𑁆𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑁄’’𑀢𑀺.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀲𑀢𑁆𑀢𑀫𑁂 𑀮𑁄𑀓𑀸𑀬𑀢𑀯𑀸𑀤𑀓𑀸𑀢𑀺 𑀆𑀬𑀢𑀺𑀁 𑀳𑀺𑀢𑀁 𑀮𑁄𑀓𑁄 𑀦 𑀬𑀢𑀢𑀺 𑀦 𑀯𑀺𑀭𑀼𑀳𑀢𑀺 𑀏𑀢𑁂𑀦𑀸𑀢𑀺 𑀮𑁄𑀓𑀸𑀬𑀢𑀁, 𑀯𑀺𑀢𑀡𑁆𑀟𑀲𑀢𑁆𑀣𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀁 𑀯𑀤𑀦𑁆𑀢𑀻𑀢𑀺 𑀮𑁄𑀓𑀸𑀬𑀢𑀯𑀸𑀤𑀓𑀸.

𑀤𑀴𑁆𑀳𑀁 ¶ 𑀣𑀺𑀭𑀁 𑀥𑀦𑀼 𑀏𑀢𑀲𑁆𑀲𑀸𑀢𑀺 𑀤𑀴𑁆𑀳𑀥𑀦𑁆𑀯𑀸 (𑀅. 𑀦𑀺. 𑀝𑀻. 𑁨.𑁪.𑁪𑁫-𑁪𑁬; 𑀲𑀁. 𑀦𑀺. 𑀝𑀻. 𑁧.𑁧.𑁧𑁦𑁭), 𑀲𑁄 𑀏𑀯 ‘‘𑀤𑀴𑁆𑀳𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁄. 𑀧𑀝𑀺𑀲𑀢𑁆𑀢𑀼𑀯𑀺𑀥𑀫𑀦𑀢𑁆𑀣𑀁 𑀥𑀦𑀼𑀁 𑀕𑀡𑁆𑀳𑀸𑀢𑀻𑀢𑀺 𑀥𑀦𑀼𑀕𑁆𑀕𑀳𑁄. 𑀲𑁄 𑀏𑀯 𑀉𑀲𑀼𑀁 𑀲𑀭𑀁 𑀅𑀲𑀢𑀺 𑀔𑀺𑀧𑀢𑀻𑀢𑀺 𑀇𑀲𑁆𑀲𑀸𑀲𑁄. 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀦𑁆𑀢𑀺 𑀮𑁄𑀳𑀸𑀤𑀺𑀪𑀸𑀭𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑀁 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁. 𑀢𑁂𑀦𑀸𑀳 ‘‘𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫𑀸’’𑀢𑀺𑀆𑀤𑀺. 𑀤𑀡𑁆𑀟𑁂𑀢𑀺 𑀥𑀦𑀼𑀤𑀡𑁆𑀟𑁂. 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸𑀢𑀺 𑀤𑀻𑀖𑀢𑁄 𑀬𑀢𑁆𑀢𑀓𑀁 𑀓𑀡𑁆𑀟𑀲𑁆𑀲 𑀧𑀫𑀸𑀡𑀁, 𑀢𑀢𑁆𑀢𑀓𑁂 ¶ 𑀥𑀦𑀼𑀤𑀡𑁆𑀟𑁂 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀭𑁄𑀧𑀺𑀢𑁂𑀲𑀼𑀬𑁂𑀯 𑀚𑀺𑀬𑀸𑀤𑀡𑁆𑀟𑁂𑀲𑀼 𑀲𑁄 𑀘𑁂 𑀪𑀸𑀭𑁄 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺, 𑀏𑀯𑀁 𑀇𑀤𑀁 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫 𑀥𑀦𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄𑀢𑀺 𑀉𑀕𑁆𑀕𑀳𑀺𑀢𑀥𑀦𑀼𑀲𑀺𑀧𑁆𑀧𑁄. 𑀓𑀢𑀳𑀢𑁆𑀣𑁄𑀢𑀺 𑀣𑀺𑀭𑀢𑀭𑀁 𑀮𑀓𑁆𑀔𑁂𑀲𑀼 𑀅𑀯𑀺𑀭𑀚𑁆𑀛𑀦𑀲𑀭𑀓𑁆𑀔𑁂𑀧𑁄. 𑀈𑀤𑀺𑀲𑁄 𑀧𑀦 𑀢𑀢𑁆𑀣 𑀯𑀲𑀺𑀪𑀽𑀢𑁄 𑀓𑀢𑀳𑀢𑁆𑀣𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀘𑀺𑀡𑁆𑀡𑀯𑀲𑀺𑀪𑀸𑀯𑁄’’𑀢𑀺. 𑀓𑀢𑀁 𑀭𑀸𑀚𑀓𑀼𑀮𑀸𑀤𑀻𑀲𑀼 𑀉𑀧𑁂𑀘𑁆𑀘 𑀅𑀲𑀦𑀁 𑀏𑀢𑁂𑀦 𑀲𑁄 𑀓𑀢𑀽𑀧𑀸𑀲𑀦𑁄𑀢𑀺 𑀆𑀳 ‘‘𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑁄’’𑀢𑀺. 𑀏𑀯𑀁 𑀓𑀢𑀦𑁆𑀢𑀺 𑀏𑀯𑀁 𑀅𑀦𑁆𑀢𑁄𑀲𑀼𑀲𑀺𑀭𑀓𑀭𑀡𑀸𑀤𑀺𑀦𑀸 𑀲𑀮𑁆𑀮𑀳𑀼𑀓𑀁 𑀓𑀢𑀁.

𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯-𑁪𑁦. 𑀅𑀝𑁆𑀞𑀫𑁂 𑀅𑀪𑀺𑀬𑀺𑀁𑀲𑀽𑀢𑀺 𑀓𑀤𑀸 𑀅𑀪𑀺𑀬𑀺𑀁𑀲𑀼? 𑀬𑀤𑀸 𑀩𑀮𑀯𑀦𑁆𑀢𑁄 𑀅𑀳𑁂𑀲𑀼𑀁, 𑀢𑀤𑀸. 𑀢𑀢𑁆𑀭𑀸𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁭; 𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑁋 𑀲𑀓𑁆𑀓𑁄 𑀓𑀺𑀭 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑀓𑁂 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀩𑀮𑀯𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀧𑀭𑀺𑀲𑀁 𑀲𑁂𑀲𑀤𑁂𑀯𑀢𑀸 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸’’𑀢𑀺 𑀦𑁂𑀯𑀸𑀲𑀺𑀓𑀸 𑀕𑀦𑁆𑀥𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀲𑀓𑀧𑀭𑀺𑀲𑀸𑀬 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀫𑀸𑀭𑀺𑀲𑀸 𑀫𑀸 𑀕𑀦𑁆𑀥𑀧𑀸𑀦𑀁 𑀧𑀺𑀯𑀺𑀢𑁆𑀣, 𑀧𑀺𑀯𑀦𑀸𑀓𑀸𑀭𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀦𑁂𑀯𑀸𑀲𑀺𑀓𑀤𑁂𑀯𑀢𑀸 𑀲𑀼𑀯𑀡𑁆𑀡𑀲𑀭𑀓𑁂𑀳𑀺 𑀉𑀧𑀦𑀻𑀢𑀁 𑀕𑀦𑁆𑀥𑀧𑀸𑀦𑀁 𑀬𑀸𑀯𑀤𑀢𑁆𑀣𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀲𑀼𑀯𑀡𑁆𑀡𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀲𑀬𑀺𑀁𑀲𑀼. 𑀲𑀓𑁆𑀓𑁄 ‘‘𑀕𑀡𑁆𑀳𑀣 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁂’’𑀢𑀺 𑀢𑁂 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀸𑀤𑁂 𑀔𑀺𑀧𑀸𑀧𑁂𑀲𑀺. 𑀲𑀓𑁆𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀢𑀤𑀦𑀼𑀯𑀢𑁆𑀢𑀓𑀸𑀧𑀺 𑀲𑀩𑁆𑀩𑁂 𑀢𑀢𑁆𑀣𑁂𑀯 𑀧𑀢𑀺𑀁𑀲𑀼. 𑀢𑁂 𑀲𑀺𑀦𑁂𑀭𑀼𑀯𑁂𑀫𑀚𑁆𑀛𑀓𑀸𑀮𑁂 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸, ‘‘𑀢𑀸𑀢𑀸, 𑀲𑀼𑀭𑀁 𑀦 𑀧𑀺𑀯𑀺𑀫𑁆𑀳, 𑀲𑀼𑀭𑀁 𑀦 𑀧𑀺𑀯𑀺𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀅𑀲𑀼𑀭𑀸 𑀦𑀸𑀫 𑀚𑀸𑀢𑀸. 𑀅𑀣 𑀦𑁂𑀲𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀅𑀲𑀼𑀭𑀪𑀯𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀓𑁆𑀓𑁄 𑀢𑁂𑀲𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑀸𑀕𑀫𑀦𑀢𑁆𑀣𑀸𑀬 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀦𑁆𑀢𑀭𑀸 ¶ ¶ 𑀤𑁆𑀯𑀺𑀦𑁆𑀦𑀁 𑀅𑀬𑀼𑀚𑁆𑀛𑀧𑀼𑀭𑀸𑀦𑀁,

𑀧𑀜𑁆𑀘𑀯𑀺𑀥𑀸 𑀞𑀧𑀺𑀢𑀸 𑀅𑀪𑀺𑀭𑀓𑁆𑀔𑀸;

𑀉𑀭𑀕-𑀓𑀭𑁄𑀝𑀺-𑀧𑀬𑀲𑁆𑀲 𑀘 𑀳𑀸𑀭𑀻,

𑀫𑀤𑀦𑀬𑀼𑀢𑀸 𑀘𑀢𑀼𑀭𑁄 𑀘 𑀫𑀳𑀢𑁆𑀣𑀸’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁭; 𑀲𑀸𑀭𑀢𑁆𑀣. 𑀝𑀻. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸);

𑀤𑁆𑀯𑁂 𑀦𑀕𑀭𑀸𑀦𑀺 𑀳𑀺 𑀬𑀼𑀤𑁆𑀥𑁂𑀦 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺 𑀤𑁂𑀯𑀦𑀕𑀭𑀜𑁆𑀘 𑀅𑀲𑀼𑀭𑀦𑀕𑀭𑀜𑁆𑀘. 𑀬𑀤𑀸 𑀳𑀺 𑀅𑀲𑀼𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀤𑁂𑀯𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀤𑀳𑀺𑀢𑁂 𑀅𑀲𑀼𑀭𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀤𑀸 𑀤𑁂𑀯𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣𑀸𑀲𑀼𑀭𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀅𑀲𑀼𑀭𑀦𑀕𑀭𑀲𑁆𑀲 𑀤𑁆𑀯𑀸𑀭𑁂 𑀧𑀺𑀤𑀳𑀺𑀢𑁂 𑀲𑀓𑁆𑀓𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀦𑀕𑀭𑀸𑀦𑀺 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫. 𑀢𑁂𑀲𑀁 𑀅𑀦𑁆𑀢𑀭𑀸 𑀏𑀢𑁂𑀲𑀼 𑀉𑀭𑀕𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀓𑁆𑀓𑁂𑀦 𑀆𑀭𑀓𑁆𑀔𑀸 𑀞𑀧𑀺𑀢𑀸. 𑀢𑀢𑁆𑀣 𑀉𑀭𑀕𑀲𑀤𑁆𑀤𑁂𑀦 𑀦𑀸𑀕𑀸 𑀕𑀳𑀺𑀢𑀸. 𑀢𑁂 𑀳𑀺 𑀉𑀤𑀓𑁂 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀦𑁂𑀭𑀼𑀲𑁆𑀲 𑀧𑀞𑀫𑀸𑀮𑀺𑀦𑁆𑀤𑁂 𑀏𑀢𑁂𑀲𑀁 𑀆𑀭𑀓𑁆𑀔𑀸. 𑀓𑀭𑁄𑀝𑀺𑀲𑀤𑁆𑀤𑁂𑀦 𑀲𑀼𑀧𑀡𑁆𑀡𑀸 𑀕𑀳𑀺𑀢𑀸. 𑀢𑁂𑀲𑀁 𑀓𑀺𑀭 𑀓𑀭𑁄𑀝𑀺 𑀦𑀸𑀫 𑀧𑀸𑀦𑀪𑁄𑀚𑀦𑀁, 𑀢𑁂𑀦 𑀢𑀁 𑀦𑀸𑀫𑀁 𑀮𑀪𑀺𑀁𑀲𑀼, 𑀤𑀼𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀧𑀬𑀲𑁆𑀲𑀳𑀸𑀭𑀺𑀲𑀤𑁆𑀤𑁂𑀦 𑀓𑀼𑀫𑁆𑀪𑀡𑁆𑀟𑀸 𑀕𑀳𑀺𑀢𑀸, 𑀤𑀸𑀦𑀯𑀭𑀓𑁆𑀔𑀲𑀸 𑀓𑀺𑀭 𑀢𑁂, 𑀢𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀫𑀤𑀦𑀬𑀼𑀢𑀲𑀤𑁆𑀤𑁂𑀦 𑀬𑀓𑁆𑀔𑀸 𑀕𑀳𑀺𑀢𑀸. 𑀯𑀺𑀲𑀫𑀘𑀸𑀭𑀺𑀦𑁄 𑀓𑀺𑀭 𑀢𑁂 𑀬𑀼𑀚𑁆𑀛𑀲𑁄𑀡𑁆𑀟𑀸, 𑀘𑀢𑀼𑀢𑁆𑀣𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀘𑀢𑀼𑀭𑁄 𑀘 𑀫𑀳𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀯𑀼𑀢𑁆𑀢𑀸, 𑀧𑀜𑁆𑀘𑀫𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸, 𑀢𑀲𑁆𑀫𑀸 𑀬𑀤𑀺 𑀅𑀲𑀼𑀭𑀸 𑀓𑀼𑀧𑀺𑀢𑀸𑀯𑀺𑀮𑀘𑀺𑀢𑁆𑀢𑀸 𑀤𑁂𑀯𑀧𑀼𑀭𑀁 𑀉𑀧𑀬𑀦𑁆𑀢𑀺 𑀬𑀼𑀚𑁆𑀛𑀺𑀢𑀼𑀁. 𑀬𑀁 𑀕𑀺𑀭𑀺𑀦𑁄 𑀧𑀞𑀫𑀁 𑀧𑀭𑀺𑀪𑀡𑁆𑀟𑀁, 𑀢𑀁 𑀉𑀭𑀕𑀸 𑀧𑀝𑀺𑀩𑀸𑀳𑀬𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼 𑀲𑁂𑀲𑀸.

𑀢𑁂 𑀧𑀦 𑀅𑀲𑀼𑀭𑀸 𑀆𑀬𑀼𑀯𑀡𑁆𑀡𑀬𑀲𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀻𑀳𑀺 𑀢𑀸𑀯𑀢𑀺𑀁𑀲𑀲𑀤𑀺𑀲𑀸𑀯, 𑀢𑀲𑁆𑀫𑀸 𑀅𑀦𑁆𑀢𑀭𑀸 𑀅𑀢𑁆𑀢𑀸𑀦𑀁 𑀅𑀚𑀸𑀦𑀺𑀢𑁆𑀯𑀸 𑀧𑀸𑀝𑀮𑀺𑀬𑀸 𑀧𑀼𑀧𑁆𑀨𑀺𑀢𑀸𑀬 ‘‘𑀦 𑀇𑀤𑀁 𑀤𑁂𑀯𑀦𑀕𑀭𑀁, 𑀢𑀢𑁆𑀣 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀼𑀧𑁆𑀨𑀢𑀺, 𑀇𑀥 𑀧𑀦 𑀘𑀺𑀢𑁆𑀢𑀧𑀸𑀝𑀮𑀻, 𑀚𑀭𑀲𑀓𑁆𑀓𑁂𑀦𑀸𑀫𑁆𑀳𑀸𑀓𑀁 𑀲𑀼𑀭𑀁 𑀧𑀸𑀬𑁂𑀢𑁆𑀯𑀸 𑀯𑀜𑁆𑀘𑀺𑀢𑀸, 𑀤𑁂𑀯𑀦𑀕𑀭𑀜𑁆𑀘 𑀦𑁄 𑀕𑀳𑀺𑀢𑀁, 𑀕𑀘𑁆𑀙𑀸𑀫, 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑁂 𑀆𑀭𑀼𑀬𑁆𑀳 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀨𑀮𑀓𑀸𑀦𑀺 𑀕𑀳𑁂𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑀸 𑀳𑀼𑀢𑁆𑀯𑀸 𑀅𑀲𑀼𑀭𑀪𑁂𑀭𑀺𑀬𑁄 𑀯𑀸𑀤𑁂𑀦𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀤𑁆𑀯𑀺𑀥𑀸 𑀪𑁂𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀺. 𑀢𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀯𑀫𑁆𑀫𑀺𑀓𑀫𑀓𑁆𑀔𑀺𑀓𑀸 ¶ 𑀯𑀫𑁆𑀫𑀺𑀓𑀁 𑀯𑀺𑀬 𑀲𑀺𑀦𑁂𑀭𑀼𑀁 𑀆𑀭𑀼𑀳𑀺𑀢𑀼𑀁 𑀆𑀭𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀞𑀫𑀁 𑀦𑀸𑀕𑁂𑀳𑀺 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀬𑀼𑀤𑁆𑀥𑁂 𑀦 𑀓𑀲𑁆𑀲𑀘𑀺 𑀙𑀯𑀺 𑀯𑀸 𑀘𑀫𑁆𑀫𑀁 𑀯𑀸 𑀙𑀺𑀚𑁆𑀚𑀢𑀺, 𑀦 𑀮𑁄𑀳𑀺𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀓𑀼𑀫𑀸𑀭𑀓𑀸𑀦𑀁 𑀤𑀸𑀭𑀼𑀫𑁂𑀡𑁆𑀟𑀓𑀬𑀼𑀤𑁆𑀥𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀲𑀦𑁆𑀢𑀸𑀲𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀓𑁄𑀝𑀺𑀲𑀢𑀸𑀧𑀺 𑀓𑁄𑀝𑀺𑀲𑀳𑀲𑁆𑀲𑀸𑀧𑀺 𑀦𑀸𑀕𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀢𑁂 𑀅𑀲𑀼𑀭𑀧𑀼𑀭𑀁𑀬𑁂𑀯 𑀧𑀯𑁂𑀲𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀺. 𑀬𑀤𑀸 𑀧𑀦 𑀅𑀲𑀼𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀦𑀸𑀕𑀸 𑀑𑀲𑀓𑁆𑀓𑀺𑀢𑁆𑀯𑀸 𑀤𑀼𑀢𑀺𑀬𑁂 𑀆𑀮𑀺𑀦𑁆𑀤𑁂 𑀲𑀼𑀧𑀡𑁆𑀡𑁂𑀳𑀺 ¶ 𑀲𑀤𑁆𑀥𑀺𑀁 𑀏𑀓𑀢𑁄𑀯 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀺. 𑀏𑀲 𑀦𑀬𑁄 𑀲𑀼𑀧𑀡𑁆𑀡𑀸𑀤𑀻𑀲𑀼𑀧𑀺. 𑀬𑀤𑀸 𑀧𑀦 𑀢𑀸𑀦𑀺 𑀧𑀜𑁆𑀘𑀧𑀺 𑀞𑀸𑀦𑀸𑀦𑀺 𑀅𑀲𑀼𑀭𑀸 𑀫𑀤𑁆𑀤𑀦𑁆𑀢𑀺, 𑀢𑀤𑀸 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀺𑀧𑀺 𑀢𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀑𑀲𑀓𑁆𑀓𑀦𑁆𑀢𑀺. 𑀅𑀣 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀕𑀦𑁆𑀢𑁆𑀯𑀸 𑀲𑀓𑁆𑀓𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑀺. 𑀲𑀓𑁆𑀓𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀯𑁂𑀚𑀬𑀦𑁆𑀢𑀭𑀣𑀁 𑀆𑀭𑀼𑀬𑁆𑀳 𑀲𑀬𑀁 𑀯𑀸 𑀦𑀺𑀓𑁆𑀔𑀫𑀢𑀺, 𑀏𑀓𑀁 𑀧𑀼𑀢𑁆𑀢𑀁 𑀯𑀸 𑀧𑁂𑀲𑁂𑀢𑀺. 𑀬𑀤𑀸 𑀤𑁂𑀯𑀸 𑀧𑀼𑀦 𑀅𑀧𑀘𑁆𑀘𑀸𑀕𑀫𑀦𑀸𑀬 𑀅𑀲𑀼𑀭𑁂 𑀚𑀺𑀦𑀺𑀁𑀲𑀼, 𑀢𑀤𑀸 𑀲𑀓𑁆𑀓𑁄 𑀅𑀲𑀼𑀭𑁂 𑀧𑀮𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀯𑁂𑀤𑀺𑀬𑀧𑀸𑀤𑁂 𑀯𑀚𑀺𑀭𑀳𑀢𑁆𑀣𑀸 𑀇𑀦𑁆𑀤𑀧𑀝𑀺𑀫𑀸𑀬𑁄 𑀞𑀧𑁂𑀲𑀺. 𑀅𑀲𑀼𑀭𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀝𑁆𑀞𑀳𑀺𑀢𑁆𑀯𑀸 𑀧𑀝𑀺𑀫𑀸𑀬𑁄 𑀤𑀺𑀲𑁆𑀯𑀸 ‘‘𑀲𑀓𑁆𑀓𑁄 𑀅𑀧𑁆𑀧𑀫𑀢𑁆𑀢𑁄 𑀢𑀺𑀝𑁆𑀞𑀢𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀦𑁆𑀢𑀺. 𑀇𑀥 𑀧𑀦 𑀬𑀤𑀸 𑀅𑀲𑀼𑀭𑀸𑀦𑀁 𑀚𑀬𑁄 𑀅𑀳𑁄𑀲𑀺, 𑀤𑁂𑀯𑀸𑀦𑀁 𑀧𑀭𑀸𑀚𑀬𑁄, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀅𑀧𑀬𑀺𑀁𑀲𑀼𑀬𑁂𑀯 𑀉𑀢𑁆𑀢𑀭𑁂𑀦𑀸𑀪𑀺𑀫𑀼𑀔𑀸, 𑀅𑀪𑀺𑀬𑀺𑀁𑀲𑀼 𑀅𑀲𑀼𑀭𑀸’’𑀢𑀺.

𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑀸 𑀳𑀼𑀢𑁆𑀯𑀸𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸𑀪𑀺𑀫𑀼𑀔𑀸 𑀳𑀼𑀢𑁆𑀯𑀸. 𑀅𑀲𑀼𑀭𑀸 𑀓𑀺𑀭 𑀤𑁂𑀯𑁂𑀳𑀺 𑀧𑀭𑀸𑀚𑀺𑀢𑀸 𑀧𑀮𑀸𑀬𑀦𑁆𑀢𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑀺𑀬𑀁 𑀭𑀚𑀢𑀧𑀝𑁆𑀝𑀯𑀡𑁆𑀡𑁂 𑀯𑀸𑀮𑀺𑀓𑀸𑀧𑀼𑀮𑀺𑀦𑁂 𑀬𑀢𑁆𑀣 𑀧𑀡𑁆𑀡𑀓𑀼𑀝𑀺𑀬𑁄 𑀫𑀸𑀧𑁂𑀢𑁆𑀯𑀸 𑀇𑀲𑀬𑁄 𑀯𑀲𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀇𑀲𑀻𑀦𑀁 𑀅𑀲𑁆𑀲𑀫𑀧𑀤𑁂𑀦 𑀕𑀘𑁆𑀙𑀦𑁆𑀢𑀸 ‘‘𑀲𑀓𑁆𑀓𑁄 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀅𑀫𑁆𑀳𑁂 𑀦𑀸𑀲𑁂𑀢𑀺, 𑀕𑀡𑁆𑀳𑀣 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁂’’𑀢𑀺 𑀓𑀼𑀧𑀺𑀢𑀸 𑀅𑀲𑁆𑀲𑀫𑀧𑀤𑁂 𑀧𑀸𑀦𑀻𑀬𑀖𑀝𑀘𑀗𑁆𑀓𑀫𑀦𑀧𑀡𑁆𑀡𑀲𑀸𑀮𑀸𑀤𑀻𑀦𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀺. 𑀇𑀲𑀬𑁄 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁 𑀆𑀤𑀸𑀬 𑀆𑀕𑀢𑀸 𑀤𑀺𑀲𑁆𑀯𑀸 𑀧𑀼𑀦 𑀤𑀼𑀓𑁆𑀔𑁂𑀦 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀦𑁆𑀢𑀺, 𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀧𑀭𑀸𑀚𑀺𑀢𑀸 𑀕𑀦𑁆𑀢𑁆𑀯𑀸 𑀯𑀺𑀦𑀸𑀲𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀭𑀸𑀚𑀺𑀢𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀅𑀧𑀬𑀺𑀁𑀲𑀼𑀬𑁂𑀯 𑀤𑀓𑁆𑀔𑀺𑀡𑁂𑀦𑀸𑀪𑀺𑀫𑀼𑀔𑀸’’𑀢𑀺. 𑀦𑀯𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀢𑀧𑀼𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀤𑀲𑀫𑁂 ¶ 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀯𑀺𑀲𑀢𑀺. 𑀧𑀲𑀻𑀤𑀢𑀻𑀢𑀺 𑀧𑀲𑀸𑀤𑀁 𑀅𑀪𑀺𑀭𑀼𑀘𑀺𑀁 𑀆𑀧𑀚𑁆𑀚𑀢𑀺, 𑀧𑀢𑀺𑀝𑁆𑀞𑀸𑀢𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀸𑀧𑀸𑀪𑀢𑀦𑁆𑀢𑀺 𑀓𑀣𑀸𑀬 𑀫𑀽𑀮𑀁. 𑀫𑀽𑀮𑀜𑁆𑀳𑀺 ‘‘𑀧𑀸𑀪𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪);

𑀢𑁂𑀦𑁂𑀯𑀸𑀳 ¶ ‘‘𑀓𑀣𑀸𑀧𑀸𑀪𑀢𑀦𑁆𑀢𑀺 𑀓𑀣𑀸𑀫𑀽𑀮’’𑀦𑁆𑀢𑀺. 𑀯𑀺𑀢𑀓𑁆𑀓𑀕𑁆𑀕𑀳𑀡𑁂𑀦𑁂𑀯 𑀢𑀁𑀲𑀳𑀘𑀭𑀺𑀢𑁄 𑀯𑀺𑀘𑀸𑀭𑁄𑀧𑀺 𑀕𑀳𑀺𑀢𑁄. 𑀢𑁂𑀦𑁂𑀯𑁂𑀢𑁆𑀣 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀆𑀳 ‘‘𑀯𑀺𑀢𑀓𑁆𑀓𑁂𑀲𑀽𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀽’’𑀢𑀺.

𑀢𑀧𑀼𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀸𑀫𑀜𑁆𑀜𑀯𑀕𑁆𑀕𑁄

𑁧-𑁧𑁦. 𑀲𑀫𑁆𑀩𑀸𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁨-𑁫𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀉𑀤𑀸𑀬𑀻𑀢𑀺 𑀢𑀬𑁄 𑀣𑁂𑀭𑀸 𑀉𑀤𑀸𑀬𑀻 𑀦𑀸𑀫 𑀓𑀸𑀴𑀼𑀤𑀸𑀬𑀻, 𑀮𑀸𑀴𑀼𑀤𑀸𑀬𑀻, 𑀫𑀳𑀸𑀉𑀤𑀸𑀬𑀻𑀢𑀺, 𑀇𑀥 𑀓𑀸𑀴𑀼𑀤𑀸𑀬𑀻 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀉𑀤𑀸𑀬𑀻𑀢𑀺 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄’’𑀢𑀺. 𑀲𑀫𑁆𑀩𑀸𑀥𑁂𑀢𑀺 𑀲𑀫𑁆𑀧𑀻𑀴𑀺𑀢𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀲𑀉𑀧𑁆𑀧𑀻𑀴𑀦𑀢𑀸𑀬 𑀧𑀭𑀫𑀲𑀫𑁆𑀩𑀸𑀥𑁂. 𑀅𑀢𑀺𑀯𑀺𑀬 𑀲𑀗𑁆𑀓𑀭𑀝𑁆𑀞𑀸𑀦𑀪𑀽𑀢𑁄 𑀳𑀺 𑀦𑀻𑀯𑀭𑀡𑀲𑀫𑁆𑀩𑀸𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀑𑀓𑀸𑀲𑁄𑀢𑀺 𑀛𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀦𑀻𑀯𑀭𑀡𑀲𑀫𑁆𑀩𑀸𑀥𑀸𑀪𑀸𑀯𑁂𑀦 𑀳𑀺 𑀛𑀸𑀦𑀁 𑀇𑀥 ‘‘𑀑𑀓𑀸𑀲𑁄’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀮𑀻𑀦𑀦𑀺𑀲𑀪𑁄𑀢𑀺 𑀯𑀸 𑀧𑀝𑀺𑀮𑀻𑀦𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑁄, 𑀧𑀝𑀺𑀮𑀻𑀦𑀸𑀦𑀁 𑀯𑀸 𑀲𑁂𑀝𑁆𑀞𑁄𑀢𑀺 𑀧𑀝𑀺𑀮𑀻𑀦𑀦𑀺𑀲𑀪𑁄. 𑀧𑀝𑀺𑀮𑀻𑀦𑀸 𑀦𑀸𑀫 𑀧𑀳𑀻𑀦𑀫𑀸𑀦𑀸 𑀯𑀼𑀘𑁆𑀘𑀦𑁆𑀢𑀺 𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀉𑀡𑁆𑀡𑀢𑀸𑀪𑀸𑀯𑀢𑁄. 𑀬𑀣𑀸𑀳 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀮𑀻𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀕𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄’’𑀢𑀺 (𑀅. 𑀦𑀺. 𑁪.𑁩𑁮; 𑀫𑀳𑀸𑀦𑀺. 𑁮𑁭). 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀫𑁆𑀩𑀸𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀦𑀯𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀤𑀲𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀆𑀦𑀺𑀲𑀁𑀲𑀯𑀕𑁆𑀕𑁄

𑁧. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀤𑀲𑀓𑀦𑀺𑀧𑀸𑀢𑀲𑁆𑀲 ¶ ¶ 𑀧𑀞𑀫𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑁆𑀧𑀬𑁄𑀚𑀦𑀸𑀦𑀺. 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀼𑀤𑀬𑀸𑀦𑀺. 𑀏𑀢𑁂𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀦𑀸𑀫 𑀲𑀻𑀮𑀲𑁆𑀲 𑀉𑀤𑀬𑀫𑀢𑁆𑀢𑀁, 𑀲𑀁𑀯𑀤𑁆𑀥𑀺𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀧𑀼𑀧𑁆𑀨𑀲𑀤𑀺𑀲𑀁, 𑀅𑀜𑁆𑀜𑁄 𑀏𑀯 𑀧𑀦𑀸𑀦𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁄 𑀲𑀫𑀸𑀥𑀺𑀆𑀤𑀺𑀕𑀼𑀡𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀸𑀯 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀢𑀸𑀯 𑀢𑀭𑀼𑀡𑀯𑀺𑀧𑀲𑁆𑀲𑀦𑀸’’𑀢𑀺 𑀳𑀺 𑀯𑀘𑀦𑀢𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀉𑀤𑀬𑀩𑁆𑀩𑀬𑀜𑀸𑀡𑀢𑁄 𑀧𑀭𑀁 𑀅𑀬𑀜𑁆𑀘 𑀯𑀺𑀧𑀲𑁆𑀲𑀦𑀸 𑀯𑀺𑀭𑀚𑁆𑀚𑀢𑀺 𑀬𑁄𑀕𑀸𑀯𑀘𑀭𑁄 𑀯𑀺𑀭𑀢𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀪𑀭𑀺𑀬𑀸𑀬 𑀲𑀗𑁆𑀔𑀸𑀭𑀢𑁄 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄.

𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁫. 𑀘𑁂𑀢𑀦𑀸𑀓𑀭𑀡𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨-𑁫. 𑀤𑀼𑀢𑀺𑀬𑁂 ¶ 𑀲𑀁𑀲𑀸𑀭𑀫𑀳𑁄𑀖𑀲𑁆𑀲 𑀧𑀭𑀢𑀻𑀭𑀪𑀸𑀯𑀢𑁄 𑀬𑁄 𑀦𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀁 𑀧𑀸𑀭𑁂𑀢𑀺 𑀕𑀫𑁂𑀢𑀻𑀢𑀺 𑀧𑀸𑀭𑀁, 𑀦𑀺𑀩𑁆𑀩𑀸𑀦𑀁. 𑀢𑀩𑁆𑀩𑀺𑀤𑀽𑀭𑀢𑀸𑀬 𑀦𑀢𑁆𑀣𑀺 𑀏𑀢𑁆𑀣 𑀧𑀸𑀭𑀦𑁆𑀢𑀺 𑀅𑀧𑀸𑀭𑀁, 𑀲𑀁𑀲𑀸𑀭𑁄. 𑀢𑁂𑀦𑀸𑀳 ‘‘𑀑𑀭𑀺𑀫𑀢𑀻𑀭𑀪𑀽𑀢𑀸 𑀢𑁂𑀪𑀽𑀫𑀓𑀯𑀝𑁆𑀝𑀸’’𑀢𑀺𑀆𑀤𑀺. 𑀢𑀢𑀺𑀬𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀘𑁂𑀢𑀦𑀸𑀓𑀭𑀡𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀲𑀦𑁆𑀢𑀁 𑀲𑀦𑁆𑀢𑀦𑁆𑀢𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺𑀆𑀤𑀻𑀲𑀼 𑀲𑀦𑁆𑀢𑀁 𑀲𑀦𑁆𑀢𑀁 𑀧𑀡𑀻𑀢𑀁 𑀧𑀡𑀻𑀢𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀺. 𑀇𑀫𑀺𑀦𑀸 𑀧𑀦 𑀆𑀓𑀸𑀭𑁂𑀦 𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 ¶ 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀢𑀣𑀸 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀦𑀺𑀲𑀁𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀸𑀣𑀯𑀕𑁆𑀕𑁄

𑁧-𑁪. 𑀲𑁂𑀦𑀸𑀲𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧-𑁧𑁪. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀦𑀸𑀢𑀺𑀤𑀽𑀭𑀦𑁆𑀢𑀺 𑀕𑁄𑀘𑀭𑀝𑁆𑀞𑀸𑀦𑀢𑁄 𑀅𑀟𑁆𑀠𑀕𑀸𑀯𑀼𑀢𑀢𑁄 𑀑𑀭𑀪𑀸𑀕𑀢𑀸𑀬 𑀦𑀸𑀢𑀺𑀤𑀽𑀭𑀁. 𑀦𑀸𑀘𑁆𑀘𑀸𑀲𑀦𑁆𑀦𑀦𑁆𑀢𑀺 𑀧𑀘𑁆𑀙𑀺𑀫𑁂𑀦 𑀧𑀫𑀸𑀡𑁂𑀦 𑀕𑁄𑀘𑀭𑀝𑁆𑀞𑀸𑀦𑀢𑁄 𑀧𑀜𑁆𑀘𑀥𑀦𑀼𑀲𑀢𑀺𑀓𑀢𑀸𑀬 𑀦 𑀅𑀢𑀺𑀆𑀲𑀦𑁆𑀦𑀁. 𑀢𑀸𑀬 𑀘 𑀧𑀦 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀬 𑀕𑁄𑀘𑀭𑀝𑁆𑀞𑀸𑀦𑀧𑀝𑀺𑀧𑀭𑀺𑀲𑁆𑀲𑀬𑀸𑀤𑀺𑀭𑀳𑀺𑀢𑀫𑀕𑁆𑀕𑀢𑀸𑀬 𑀘 𑀕𑀫𑀦𑀲𑁆𑀲 𑀘 𑀆𑀕𑀫𑀦𑀲𑁆𑀲 𑀘 𑀬𑀼𑀢𑁆𑀢𑀭𑀽𑀧𑀢𑁆𑀢𑀸 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁. 𑀤𑀺𑀯𑀲𑀪𑀸𑀕𑁂 𑀫𑀳𑀸𑀚𑀦𑀲𑀁𑀓𑀺𑀡𑁆𑀡𑀢𑀸𑀪𑀸𑀯𑁂𑀦 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁. 𑀅𑀪𑀸𑀯𑀢𑁆𑀣𑁄 𑀳𑀺 𑀅𑀬𑀁 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀭𑀢𑁆𑀢𑀺𑀬𑀁 𑀫𑀦𑀼𑀲𑁆𑀲𑀲𑀤𑁆𑀤𑀸𑀪𑀸𑀯𑁂𑀦 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁. 𑀲𑀩𑁆𑀩𑀤𑀸𑀧𑀺 𑀚𑀦𑀲𑀦𑁆𑀦𑀺𑀧𑀸𑀢𑀦𑀺𑀕𑁆𑀖𑁄𑀲𑀸𑀪𑀸𑀯𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲𑀁.

𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 ¶ 𑀅𑀓𑀲𑀺𑀭𑁂𑀦 𑀲𑀼𑀔𑁂𑀦𑁂𑀯. 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀣𑁂𑀭𑀸. 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀩𑀳𑀼 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀫𑀼𑀕𑁆𑀕𑀳𑀥𑀸𑀭𑀡𑁂𑀦 𑀲𑀫𑁆𑀫𑀤𑁂𑀯 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀆𑀕𑀫𑀺𑀢𑀪𑀸𑀯𑁂𑀦 𑀘 𑀆𑀕𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑁄 𑀆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀆𑀕𑀢𑀸𑀕𑀫𑀸. 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲 𑀥𑀸𑀭𑀡𑁂𑀦 𑀥𑀫𑁆𑀫𑀥𑀭𑀸. 𑀯𑀺𑀦𑀬𑀲𑁆𑀲 𑀥𑀸𑀭𑀡𑁂𑀦 𑀯𑀺𑀦𑀬𑀥𑀭𑀸. 𑀢𑁂𑀲𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀫𑀸𑀢𑀺𑀓𑀸𑀬 𑀥𑀸𑀭𑀡𑁂𑀦 𑀫𑀸𑀢𑀺𑀓𑀸𑀥𑀭𑀸. 𑀢𑀢𑁆𑀣 𑀢𑀢𑁆𑀣 𑀥𑀫𑁆𑀫𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀧𑀼𑀘𑁆𑀙𑀢𑀺. 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀧𑀜𑁆𑀳𑀢𑀺 𑀯𑀻𑀫𑀁𑀲𑀢𑀺 𑀯𑀺𑀘𑀸𑀭𑁂𑀢𑀺. 𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀧𑀭𑀺𑀧𑀼𑀘𑁆𑀙𑀸𑀧𑀭𑀺𑀧𑀜𑁆𑀳𑀸𑀓𑀸𑀭𑀤𑀲𑁆𑀲𑀦𑀁. 𑀅𑀯𑀺𑀯𑀝𑀜𑁆𑀘𑁂𑀯 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀧𑀤𑁂𑀲𑀦𑁆𑀢𑀭𑀧𑀸𑀴𑀺𑀤𑀲𑁆𑀲𑀦𑁂𑀦 𑀆𑀕𑀫𑀢𑁄 𑀯𑀺𑀯𑀭𑀦𑁆𑀢𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀬𑀼𑀢𑁆𑀢𑀺𑀯𑀺𑀪𑀸𑀯𑀦𑁂𑀦 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺. 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀢𑀸𑀬 𑀕𑀡𑁆𑀞𑀺𑀝𑁆𑀞𑀸𑀦𑀪𑀽𑀢𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀬𑀸𑀣𑀸𑀯𑀢𑁄 𑀯𑀺𑀦𑀺𑀘𑁆𑀙𑀬𑀧𑁆𑀧𑀤𑀸𑀦𑁂𑀦 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺.

𑀏𑀢𑁆𑀣 ¶ 𑀘 𑀦𑀸𑀢𑀺𑀤𑀽𑀭𑀁 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀓𑀁 𑀅𑀗𑁆𑀕𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁, 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁, 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀏𑀓𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀦𑁆𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸…𑀧𑁂… 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀻𑀢𑀺 𑀏𑀓𑀁. 𑀏𑀯𑀁 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀲𑁂𑀦𑀸𑀲𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫-𑁧𑁬. 𑀧𑀜𑁆𑀘𑀫𑁂 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄 𑀦𑀸𑀫 ‘‘𑀇𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸, 𑀇𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀢𑀁𑀢𑀁𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀯𑀚𑁆𑀚𑀦𑀲𑀫𑁆𑀧𑀸𑀤𑁂𑀢𑀩𑁆𑀩𑀲𑀫𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀫𑀸𑀤𑁄. 𑀏𑀲𑀸𑀢𑀺 𑀅𑀧𑁆𑀧𑀫𑀸𑀤𑁄. 𑀮𑁄𑀓𑀺𑀬𑁄𑀯 𑀦 𑀮𑁄𑀓𑀼𑀢𑁆𑀢𑀭𑁄. 𑀅𑀬𑀜𑁆𑀘𑀸𑀢𑀺 𑀘 𑀏𑀲𑀸𑀢𑀺 𑀘 𑀅𑀧𑁆𑀧𑀫𑀸𑀤𑀫𑁂𑀯 𑀯𑀤𑀢𑀺. 𑀢𑁂𑀲𑀦𑁆𑀢𑀺 𑀘𑀸𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁. 𑀧𑀝𑀺𑀮𑀸𑀪𑀓𑀢𑁆𑀢𑁂𑀦𑀸𑀢𑀺 𑀧𑀝𑀺𑀮𑀸𑀪𑀸𑀧𑀦𑀓𑀢𑁆𑀢𑁂𑀦.

𑀚𑀗𑁆𑀕𑀮𑀸𑀦𑀦𑁆𑀢𑀺 𑀚𑀗𑁆𑀕𑀮𑀘𑀸𑀭𑀻𑀦𑀁. 𑀚𑀗𑁆𑀕𑀮-𑀲𑀤𑁆𑀤𑁄 𑀘𑁂𑀢𑁆𑀣 𑀔𑀭𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀣𑀯𑀻𑀧𑀭𑀺𑀬𑀸𑀬𑁄, 𑀦 𑀅𑀦𑀼𑀧𑀝𑁆𑀞𑀸𑀦𑀯𑀺𑀤𑀽𑀭𑀤𑁂𑀲𑀯𑀸𑀘𑀻. 𑀢𑁂𑀦𑀸𑀳 ‘‘𑀧𑀣𑀯𑀻𑀢𑀮𑀘𑀸𑀭𑀻𑀦’’𑀦𑁆𑀢𑀺. 𑀧𑀤𑀸𑀦𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀲𑀧𑀸𑀤𑀓𑀧𑀸𑀡𑀸𑀦’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑁄𑀥𑀸𑀦𑀦𑁆𑀢𑀺 𑀅𑀦𑁆𑀢𑁄𑀕𑀥𑀪𑀸𑀯𑀁. 𑀢𑁂𑀦𑀸𑀳 ‘‘𑀑𑀥𑀸𑀦𑀁 𑀧𑀓𑁆𑀔𑁂𑀧’’𑀦𑁆𑀢𑀺. ‘‘𑀉𑀧𑀓𑁆𑀔𑁂𑀧’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀉𑀧𑀦𑁂𑀢𑁆𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀺𑀓𑀸𑀬 𑀧𑀼𑀧𑁆𑀨𑀁 𑀯𑀲𑁆𑀲𑀺𑀓𑀁 𑀬𑀣𑀸 ‘‘𑀆𑀫𑀮𑀓𑀺𑀬𑀸 𑀨𑀮𑀁 𑀆𑀫𑀮𑀓’’𑀦𑁆𑀢𑀺. 𑀫𑀳𑀸𑀢𑀮𑀲𑁆𑀫𑀺𑀦𑁆𑀢𑀺 𑀉𑀧𑀭𑀺𑀧𑀸𑀲𑀸𑀤𑁂. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀧𑀞𑀫𑀦𑀸𑀣𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭-𑁧𑁮. 𑀲𑀢𑁆𑀢𑀫𑁂 ¶ 𑀬𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀥𑀫𑁆𑀫𑀲𑀭𑀡𑀢𑀸𑀬 𑀥𑀫𑁆𑀫𑁂𑀦𑁂𑀯 𑀦𑀸𑀣𑀢𑀺 𑀆𑀲𑀻𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀦𑀸𑀣𑁄 𑀯𑀼𑀘𑁆𑀘𑀢𑀺, 𑀢𑁂 ¶ 𑀢𑀲𑁆𑀲 𑀦𑀸𑀣𑀪𑀸𑀯𑀓𑀭𑀸 𑀥𑀫𑁆𑀫𑀸 𑀦𑀸𑀣𑀓𑀭𑀡𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀦𑀸𑀣𑀪𑀸𑀯𑀓𑀭𑀸 𑀧𑀢𑀺𑀝𑁆𑀞𑀓𑀭𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀓𑀭𑀸𑀢𑀺 𑀬𑀲𑁆𑀲 𑀦𑀸𑀣𑀪𑀸𑀯𑀓𑀭𑀸, 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀯𑀺𑀥𑀸𑀬𑀺𑀦𑁄. 𑀅𑀧𑁆𑀧𑀢𑀺𑀝𑁆𑀞𑁄 𑀅𑀦𑀸𑀣𑁄, 𑀲𑀧𑁆𑀧𑀢𑀺𑀝𑁆𑀞𑁄 𑀲𑀦𑀸𑀣𑁄𑀢𑀺 𑀧𑀢𑀺𑀝𑁆𑀞𑀢𑁆𑀣𑁄 𑀦𑀸𑀣-𑀲𑀤𑁆𑀤𑁄. 𑀓𑀮𑁆𑀬𑀸𑀡𑀕𑀼𑀡𑀬𑁄𑀕𑀢𑁄 𑀓𑀮𑁆𑀬𑀸𑀡𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸’’𑀢𑀺 𑀆𑀳. 𑀫𑀺𑀚𑁆𑀚𑀦𑀮𑀓𑁆𑀔𑀡𑀸 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀺𑀢𑁆𑀢𑁄. 𑀲𑁄 𑀯𑀼𑀢𑁆𑀢𑀦𑀬𑁂𑀦 𑀓𑀮𑁆𑀬𑀸𑀡𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀲𑁆𑀲 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀧𑀤𑁂𑀦 𑀯𑀼𑀢𑁆𑀢𑀁. 𑀅𑀲𑁆𑀲 𑀢𑁂𑀦 𑀲𑀩𑁆𑀩𑀓𑀸𑀮𑀁 𑀅𑀯𑀺𑀚𑀳𑀺𑀢𑀯𑀸𑀲𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀮𑁆𑀬𑀸𑀡𑀲𑀳𑀸𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑁂𑀯𑀲𑁆𑀲𑀸’’𑀢𑀺. 𑀢𑁂 𑀏𑀯 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀳 𑀅𑀬𑀦𑀢𑁄𑀢𑀺 𑀲𑀳 𑀧𑀯𑀢𑁆𑀢𑀦𑀢𑁄. 𑀅𑀲𑀫𑁄𑀥𑀸𑀦𑁂 𑀘𑀺𑀢𑁆𑀢𑁂𑀦, 𑀲𑀫𑁄𑀥𑀸𑀦𑁂 𑀧𑀦 𑀘𑀺𑀢𑁆𑀢𑁂𑀦 𑀘𑁂𑀯 𑀓𑀸𑀬𑁂𑀦 𑀘 𑀲𑀫𑁆𑀧𑀯𑀗𑁆𑀓𑁄. 𑀲𑀼𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀅𑀦𑀼𑀓𑀽𑀮𑀕𑀸𑀳𑀺𑀫𑁆𑀳𑀺 𑀆𑀤𑀭𑀕𑀸𑀭𑀯𑀯𑀢𑀺 𑀧𑀼𑀕𑁆𑀕𑀮𑁂𑀢𑀺 𑀲𑀼𑀯𑀘𑁄. 𑀢𑁂𑀦𑀸𑀳 ‘‘𑀲𑀼𑀔𑁂𑀦 𑀯𑀢𑁆𑀢𑀩𑁆𑀩𑁄’’𑀢𑀺𑀆𑀤𑀺. 𑀔𑀫𑁄𑀢𑀺 𑀔𑀦𑁆𑀢𑁄. 𑀢𑀫𑁂𑀯𑀲𑁆𑀲 𑀔𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀴𑁆𑀳𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀸𑀫𑀢𑁄𑀢𑀺 𑀫𑀺𑀘𑁆𑀙𑀸, 𑀅𑀬𑁄𑀦𑀺𑀲𑁄 𑀯𑀸 𑀕𑀡𑁆𑀳𑀸𑀢𑀺. 𑀧𑀝𑀺𑀧𑁆𑀨𑀭𑀢𑀻𑀢𑀺 𑀧𑀝𑀸𑀡𑀺𑀓𑀪𑀸𑀯𑁂𑀦 𑀢𑀺𑀝𑁆𑀞𑀢𑀺. 𑀧𑀤𑀓𑁆𑀔𑀺𑀡𑀁 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀫𑀸, 𑀬𑁄𑀦𑀺𑀲𑁄 𑀯𑀸 𑀕𑀡𑁆𑀳𑀸𑀢𑀺.

𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀯𑀺𑀧𑀼𑀮𑀔𑀼𑀤𑁆𑀤𑀓𑀸𑀦𑀺. 𑀢𑀢𑁆𑀭𑀼𑀧𑀕𑀫𑀦𑀺𑀬𑀸𑀬𑀸𑀢𑀺 𑀢𑀢𑁆𑀭 𑀢𑀢𑁆𑀭 𑀫𑀳𑀦𑁆𑀢𑁂 𑀔𑀼𑀤𑁆𑀤𑀓𑁂 𑀘 𑀓𑀫𑁆𑀫𑁂 𑀲𑀸𑀥𑀦𑀯𑀲𑁂𑀦 𑀉𑀧𑀸𑀬𑁂𑀦 𑀉𑀧𑀕𑀘𑁆𑀙𑀦𑁆𑀢𑀺𑀬𑀸, 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀸𑀤𑀦𑁂 𑀲𑀫𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 𑀯𑀸 𑀢𑀢𑁆𑀭 𑀢𑀢𑁆𑀭 𑀓𑀫𑁆𑀫𑁂 𑀲𑀸𑀥𑁂𑀢𑀩𑁆𑀩𑁂 𑀉𑀧𑀸𑀬𑀪𑀽𑀢𑀸𑀬.

𑀥𑀫𑁆𑀫𑁂 𑀅𑀲𑁆𑀲 𑀓𑀸𑀫𑁄𑀢𑀺 𑀥𑀫𑁆𑀫𑀓𑀸𑀫𑁄𑀢𑀺 𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺 𑀩𑀸𑀳𑀺𑀭𑀢𑁆𑀣𑁄 𑀲𑀫𑀸𑀲𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀫𑁂𑀢𑀩𑁆𑀩𑀢𑁄 𑀯𑀸 𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀓𑀸𑀫𑁄, 𑀥𑀫𑁆𑀫𑁄. 𑀥𑀫𑁆𑀫𑁄 𑀓𑀸𑀫𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀓𑀸𑀫𑁄. 𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀧𑀺𑀬𑀸𑀬𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀲𑀫𑀼𑀤𑀸𑀳𑀭𑀡𑀁 𑀓𑀣𑀦𑀁 𑀲𑀫𑀼𑀤𑀸𑀳𑀸𑀭𑁄, 𑀧𑀺𑀬𑁄 𑀲𑀫𑀼𑀤𑀸𑀳𑀸𑀭𑁄 𑀏𑀢𑀲𑁆𑀲𑀸𑀢𑀺 𑀧𑀺𑀬𑀲𑀫𑀼𑀤𑀸𑀳𑀸𑀭𑁄. 𑀲𑀬𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 ‘‘𑀲𑀓𑁆𑀓𑀘𑁆𑀘’’𑀦𑁆𑀢𑀺 𑀧𑀤𑀁 𑀅𑀦𑀼𑀓𑀟𑁆𑀠𑀢𑀺. 𑀢𑁂𑀦 𑀲𑀬𑀜𑁆𑀘 𑀲𑀓𑁆𑀓𑀘𑁆𑀘𑀁 𑀤𑁂𑀲𑁂𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀪𑀺𑀥𑀫𑁆𑀫𑁄 𑀲𑀢𑁆𑀢 𑀧𑀓𑀭𑀡𑀸𑀦𑀺 ‘‘𑀅𑀥𑀺𑀓𑁄 𑀅𑀪𑀺𑀯𑀺𑀲𑀺𑀝𑁆𑀞𑁄 𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄’’𑀢𑀺 𑀓𑀢𑁆𑀯𑀸. 𑀯𑀺𑀦𑀬𑁄 𑀉𑀪𑀢𑁄𑀯𑀺𑀪𑀗𑁆𑀕𑀸 ¶ 𑀯𑀺𑀦𑀬𑀦𑀢𑁄 𑀓𑀸𑀬𑀯𑀸𑀘𑀸𑀦𑀁. 𑀅𑀪𑀺𑀯𑀺𑀦𑀬𑁄 𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀯𑀺𑀲𑁂𑀲𑀢𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀓𑀺𑀢𑁆𑀢𑀦𑀢𑁄. 𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀯𑀲𑁂𑀦𑁂𑀯 𑀳𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀥𑀫𑁆𑀫𑀧𑀸𑀭𑀺𑀧𑀽𑀭𑀻. 𑀥𑀫𑁆𑀫𑁄 𑀏𑀯 𑀧𑀺𑀝𑀓𑀤𑁆𑀯𑀬𑀲𑁆𑀲𑀧𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀪𑀸𑀯𑀢𑁄. 𑀫𑀕𑁆𑀕𑀨𑀮𑀸𑀦𑀺 𑀅𑀪𑀺𑀥𑀫𑁆𑀫𑁄 ‘‘𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 ¶ 𑀅𑀪𑀺𑀫𑀼𑀔𑁄’’𑀢𑀺 𑀓𑀢𑁆𑀯𑀸. 𑀓𑀺𑀮𑁂𑀲𑀯𑀽𑀧𑀲𑀫𑀓𑀭𑀡𑀁 𑀧𑀼𑀩𑁆𑀩𑀪𑀸𑀕𑀺𑀬𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀗𑁆𑀔𑁂𑀧𑀢𑁄 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘. 𑀉𑀴𑀸𑀭𑀧𑀸𑀫𑁄𑀚𑁆𑀚𑁄𑀢𑀺 𑀩𑀮𑀯𑀧𑀸𑀫𑁄𑀚𑁆𑀚𑁄. 𑀓𑀸𑀭𑀡𑀢𑁆𑀣𑁂𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂. 𑀓𑀼𑀲𑀮𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀳𑀺𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀢𑁂𑀦𑀸𑀳 ‘‘𑀢𑁂𑀲𑀁 𑀅𑀥𑀺𑀕𑀫𑀢𑁆𑀣𑀸𑀬𑀸’’𑀢𑀺. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀯𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀪𑀼𑀫𑁆𑀫𑀁 𑀬𑀣𑀸 ‘‘𑀘𑁂𑀢𑀲𑁄 𑀅𑀯𑀽𑀧𑀲𑀫𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀅𑀝𑁆𑀞𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀦𑀸𑀣𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀅𑀭𑀺𑀬𑀸𑀦𑀁 𑀏𑀯 𑀆𑀯𑀸𑀲𑀸𑀢𑀺 𑀅𑀭𑀺𑀬𑀸𑀯𑀸𑀲𑀸 𑀅𑀦𑀭𑀺𑀬𑀸𑀦𑀁 𑀢𑀸𑀤𑀺𑀲𑀸𑀦𑀁 𑀅𑀲𑀫𑁆𑀪𑀯𑀢𑁄. 𑀅𑀭𑀺𑀬𑀸𑀢𑀺 𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀔𑀻𑀡𑀸𑀲𑀯𑀸 𑀕𑀳𑀺𑀢𑀸. 𑀢𑁂 𑀘 𑀬𑀲𑁆𑀫𑀸 𑀢𑁂𑀳𑀺 𑀲𑀩𑁆𑀩𑀓𑀸𑀮𑀁 𑀅𑀯𑀺𑀚𑀳𑀺𑀢𑀯𑀸𑀲𑀸 𑀏𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑁂 𑀆𑀯𑀲𑀺𑀁𑀲𑀼 𑀆𑀯𑀲𑀦𑁆𑀢𑀺 𑀆𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁆𑀣 𑀆𑀯𑀲𑀺𑀁𑀲𑀽𑀢𑀺 𑀦𑀺𑀲𑁆𑀲𑀸𑀬 𑀆𑀯𑀲𑀺𑀁𑀲𑀼. 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸𑀤𑀬𑁄 𑀳𑀺 𑀅𑀭𑀺𑀬𑀸𑀦𑀁 𑀅𑀧𑀲𑁆𑀲𑀬𑀸. 𑀢𑁂𑀲𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀸𑀦𑀧𑀘𑁆𑀘𑁂𑀓𑀲𑀘𑁆𑀘𑀧𑀦𑁄𑀤𑀦𑀏𑀲𑀦𑀸𑀑𑀲𑀝𑁆𑀞𑀸𑀦𑀺, ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀺, 𑀅𑀥𑀺𑀯𑀸𑀲𑁂𑀢𑀺 𑀧𑀭𑀺𑀯𑀚𑁆𑀚𑁂𑀢𑀺 𑀯𑀺𑀦𑁄𑀤𑁂𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁮; 𑀫. 𑀦𑀺. 𑁨.𑁧𑁬𑁮; 𑀅. 𑀦𑀺. 𑁧𑁦.𑁨𑁦) 𑀯𑀼𑀢𑁆𑀢𑁂𑀲𑀼 𑀅𑀧𑀲𑁆𑀲𑁂𑀦𑁂𑀲𑀼 𑀯𑀺𑀦𑁄𑀤𑀦𑀜𑁆𑀘 𑀫𑀕𑁆𑀕𑀓𑀺𑀘𑁆𑀘𑀸𑀦𑁂𑀯, 𑀇𑀢𑀭𑁂 𑀫𑀕𑁆𑀕𑁂𑀦 𑀘 𑀲𑀫𑀺𑀚𑁆𑀛𑀦𑁆𑀢𑀻𑀢𑀺.

𑀧𑀞𑀫𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀓𑀼𑀭𑀼𑀲𑀼 𑀯𑀺𑀳𑀭𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀻𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀓𑀼𑀭𑀼𑀭𑀝𑁆𑀞𑀁 𑀓𑀺𑀭 𑀢𑀤𑀸 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀦𑁆𑀢𑀢𑀸𑀤𑀺𑀦𑀸 ¶ 𑀬𑁂𑀪𑀼𑀬𑁆𑀬𑁂𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀬 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀩𑀮𑁂𑀦 𑀯𑀸 𑀢𑀤𑀸 𑀉𑀢𑀼𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀫𑁂𑀯 𑀅𑀳𑁄𑀲𑀺. 𑀓𑁂𑀘𑀺 𑀧𑀦 ‘‘𑀧𑀼𑀩𑁆𑀩𑁂 𑀧𑀯𑀢𑁆𑀢𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑀸𑀦𑀼𑀝𑁆𑀞𑀸𑀦𑀯𑀸𑀲𑀦𑀸𑀬 𑀉𑀢𑁆𑀢𑀭𑀓𑀼𑀭𑀼 𑀯𑀺𑀬 𑀬𑁂𑀪𑀼𑀬𑁆𑀬𑁂𑀦 𑀉𑀢𑀼𑀆𑀤𑀺𑀲𑀫𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀢𑀺𑀲𑀬𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀺𑀬𑀼𑀢𑁆𑀢𑀁 𑀭𑀝𑁆𑀞𑀁 𑀅𑀳𑁄𑀲𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀉𑀢𑀼𑀧𑀘𑁆𑀘𑀬𑀸𑀤𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀲𑁆𑀲 𑀭𑀝𑁆𑀞𑀲𑁆𑀲 𑀲𑀧𑁆𑀧𑀸𑀬𑀉𑀢𑀼𑀧𑀘𑁆𑀘𑀬𑀲𑁂𑀯𑀦𑁂𑀦 𑀦𑀺𑀘𑁆𑀘𑀁 𑀓𑀮𑁆𑀮𑀲𑀭𑀻𑀭𑀸 𑀓𑀮𑁆𑀮𑀘𑀺𑀢𑁆𑀢𑀸 𑀘 𑀳𑁄𑀦𑁆𑀢𑀺. 𑀢𑁂 𑀘𑀺𑀢𑁆𑀢𑀲𑀭𑀻𑀭𑀓𑀮𑁆𑀮𑀢𑀸𑀬 𑀅𑀦𑀼𑀕𑁆𑀕𑀳𑀺𑀢𑀧𑀜𑁆𑀜𑀸𑀩𑀮𑀸 𑀕𑀫𑁆𑀪𑀻𑀭𑀓𑀣𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀺𑀲𑁆𑀲𑀺𑀢𑀸𑀦𑀁 ¶ 𑀕𑀫𑁆𑀪𑀻𑀭𑀧𑀜𑁆𑀜𑀸𑀦𑀜𑁆𑀘 𑀓𑀸𑀭𑀓𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀕𑀫𑁆𑀪𑀻𑀭𑀧𑀜𑁆𑀜𑀸𑀓𑀸𑀭𑀓𑀸’’𑀢𑀺𑀆𑀤𑀺.

𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀬𑀼𑀢𑁆𑀢𑀸 𑀘𑁂𑀯 𑀧𑀬𑀼𑀢𑁆𑀢𑀸 𑀘. 𑀢𑀲𑁆𑀫𑀺𑀜𑁆𑀳𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬) 𑀚𑀦𑀧𑀤𑁂 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀧𑀓𑀢𑀺𑀬𑀸𑀯 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀚𑀦𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀫𑁂𑀯 𑀓𑀣𑀁 𑀓𑀣𑁂𑀦𑁆𑀢𑀺. 𑀉𑀤𑀓𑀢𑀺𑀢𑁆𑀣𑀲𑀼𑀢𑁆𑀢𑀓𑀦𑁆𑀢𑀦𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀦𑀺𑀭𑀢𑁆𑀣𑀓𑀓𑀣𑀸 𑀦𑀸𑀫 𑀦𑀧𑁆𑀧𑀯𑀢𑁆𑀢𑀢𑀺. 𑀲𑀘𑁂 𑀓𑀸𑀘𑀺 𑀇𑀢𑁆𑀣𑀻, ‘‘𑀅𑀫𑁆𑀫, 𑀢𑁆𑀯𑀁 𑀓𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀫𑀦𑀲𑀺 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀦 𑀓𑀺𑀜𑁆𑀘𑀻’’𑀢𑀺 𑀯𑀤𑀢𑀺, 𑀢𑀁 𑀕𑀭𑀳𑀦𑁆𑀢𑀺 ‘‘𑀥𑀻𑀭𑀢𑁆𑀣𑀼 𑀢𑀯 𑀚𑀻𑀯𑀺𑀢𑀁, 𑀚𑀻𑀯𑀫𑀸𑀦𑀸𑀧𑀺 𑀢𑁆𑀯𑀁 𑀫𑀢𑀲𑀤𑀺𑀲𑀸’’𑀢𑀺. 𑀅𑀣 𑀦𑀁 ‘‘𑀫𑀸 𑀤𑀸𑀦𑀺 𑀧𑀼𑀦 𑀏𑀯𑀫𑀓𑀸𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀅𑀜𑁆𑀜𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺. 𑀬𑀸 𑀧𑀦 ‘‘𑀅𑀳𑀁 𑀅𑀲𑀼𑀓𑀁 𑀲𑀢𑀺𑀧𑀝𑁆𑀞𑀸𑀦𑀁 𑀦𑀸𑀫 𑀫𑀦𑀲𑀺 𑀓𑀭𑁄𑀫𑀻’’𑀢𑀺 𑀯𑀤𑀢𑀺, 𑀢𑀲𑁆𑀲𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀢𑀯 𑀚𑀻𑀯𑀺𑀢𑀁 𑀲𑀼𑀚𑀻𑀯𑀺𑀢𑀁, 𑀢𑁆𑀯𑀁 𑀦𑀸𑀫 𑀫𑀦𑀼𑀲𑁆𑀲𑀢𑁆𑀢𑀁 𑀧𑀢𑁆𑀢𑀸, 𑀢𑀯𑀢𑁆𑀣𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀻𑀳𑀺 𑀧𑀲𑀁𑀲𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀬𑁂𑀯 𑀲𑀢𑀺𑀧𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀬𑀼𑀢𑁆𑀢𑀸, 𑀢𑁂 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀦𑀝𑀓𑁄 𑀲𑀼𑀯𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀲𑀼𑀯𑀧𑁄𑀢𑀓𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀕𑀢𑁄. 𑀢𑀁 𑀲𑀸𑀫𑀡𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀁𑀲𑀼, ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄’’𑀢𑀺 𑀘𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀏𑀓𑀤𑀺𑀯𑀲𑀁 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀫𑀳𑀸𑀣𑁂𑀭𑀻 𑀆𑀳 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑀸’’𑀢𑀺. 𑀓𑀺𑀁, 𑀅𑀬𑁆𑀬𑁄𑀢𑀺. 𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄𑀢𑀺? 𑀦𑀢𑁆𑀣𑀬𑁆𑀬𑁂𑀢𑀺. 𑀆𑀯𑀼𑀲𑁄 ¶ , 𑀧𑀩𑁆𑀩𑀚𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁂𑀦 𑀦𑀸𑀫 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁄𑀘𑀺𑀤𑁂𑀯 𑀫𑀦𑀲𑀺𑀓𑀸𑀭𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀢𑁆𑀯𑀁 𑀧𑀦 𑀅𑀜𑁆𑀜𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, ‘‘𑀅𑀝𑁆𑀞𑀺 𑀅𑀝𑁆𑀞𑀻’’𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻𑀢𑀺. 𑀲𑁄 𑀣𑁂𑀭𑀺𑀬𑀸 𑀑𑀯𑀸𑀤𑁂 𑀞𑀢𑁆𑀯𑀸 ‘‘𑀅𑀝𑁆𑀞𑀺 𑀅𑀝𑁆𑀞𑀻’’𑀢𑀺 𑀲𑀚𑁆𑀛𑀸𑀬𑀦𑁆𑀢𑁄 𑀘𑀭𑀢𑀺.

𑀢𑀁 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀢𑁄𑀭𑀡𑀕𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀸𑀮𑀸𑀢𑀧𑀁 𑀢𑀧𑀫𑀸𑀦𑀁 𑀏𑀓𑁄 𑀲𑀓𑀼𑀡𑁄 𑀦𑀔𑀧𑀜𑁆𑀚𑀭𑁂𑀦 𑀅𑀕𑁆𑀕𑀳𑁂𑀲𑀺. 𑀲𑁄 ‘‘𑀓𑀺𑀭𑀺 𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀲𑀸𑀫𑀡𑁂𑀭𑀺𑀬𑁄 𑀲𑀼𑀢𑁆𑀯𑀸, ‘‘𑀅𑀬𑁆𑀬𑁂, 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀲𑀓𑀼𑀡𑁂𑀦 𑀕𑀳𑀺𑀢𑁄, 𑀫𑁄𑀘𑁂𑀫 𑀦’’𑀦𑁆𑀢𑀺 𑀮𑁂𑀟𑁆𑀟𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀫𑁄𑀘𑁂𑀲𑀼𑀁. 𑀢𑀁 𑀆𑀦𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑀺𑀢𑀁 𑀣𑁂𑀭𑀻 𑀆𑀳, ‘‘𑀩𑀼𑀤𑁆𑀥𑀭𑀓𑁆𑀔𑀺𑀢, 𑀲𑀓𑀼𑀡𑁂𑀦 𑀕𑀳𑀺𑀢𑀓𑀸𑀮𑁂 𑀓𑀺𑀁 𑀘𑀺𑀦𑁆𑀢𑁂𑀲𑀻’’𑀢𑀺. 𑀅𑀬𑁆𑀬𑁂, 𑀦 𑀅𑀜𑁆𑀜𑀁 𑀘𑀺𑀦𑁆𑀢𑁂𑀲𑀺𑀁, ‘‘𑀅𑀝𑁆𑀞𑀺𑀧𑀼𑀜𑁆𑀚𑁄𑀯 𑀅𑀝𑁆𑀞𑀺𑀧𑀼𑀜𑁆𑀚𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀢𑀭𑀲𑁆𑀫𑀺𑀁 𑀞𑀸𑀦𑁂 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀢𑀻’’𑀢𑀺 𑀏𑀯𑀁, 𑀅𑀬𑁆𑀬𑁂, 𑀅𑀝𑁆𑀞𑀺𑀧𑀼𑀜𑁆𑀚𑀫𑁂𑀯 𑀘𑀺𑀦𑁆𑀢𑁂𑀲𑀺𑀦𑁆𑀢𑀺. 𑀲𑀸𑀥𑀼 𑀲𑀸𑀥𑀼, 𑀩𑀼𑀤𑁆𑀥𑀭𑀓𑁆𑀔𑀺𑀢 ¶ , 𑀅𑀦𑀸𑀕𑀢𑁂 𑀪𑀯𑀓𑁆𑀔𑀬𑀲𑁆𑀲 𑀢𑁂 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀬𑀼𑀢𑁆𑀢𑀸.

𑀤𑀻𑀖𑀦𑀺𑀓𑀸𑀬𑀸𑀤𑀻𑀲𑀼 𑀫𑀳𑀸𑀦𑀺𑀤𑀸𑀦𑀸𑀤𑀻𑀦𑀻𑀢𑀺 𑀤𑀻𑀖𑀦𑀺𑀓𑀸𑀬𑁂 𑀫𑀳𑀸𑀦𑀺𑀤𑀸𑀦𑀁 (𑀤𑀻. 𑀦𑀺. 𑁨.𑁯𑁫 𑀆𑀤𑀬𑁄) 𑀲𑀢𑀺𑀧𑀝𑁆𑀞𑀸𑀦𑀁 (𑀤𑀻. 𑀦𑀺. 𑁨.𑁩𑁭𑁨 𑀆𑀤𑀬𑁄) 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀲𑀢𑀺𑀧𑀝𑁆𑀞𑀸𑀦𑀁 (𑀫. 𑀦𑀺. 𑁧.𑁧𑁦𑁫 𑀆𑀤𑀬𑁄) 𑀲𑀸𑀭𑁄𑀧𑀫𑀁 (𑀫. 𑀦𑀺. 𑁧.𑁩𑁦𑁭 𑀆𑀤𑀬𑁄) 𑀭𑀼𑀓𑁆𑀔𑁄𑀧𑀫𑀁 𑀭𑀝𑁆𑀞𑀧𑀸𑀮𑀁 𑀫𑀸𑀕𑀡𑁆𑀟𑀺𑀬𑀁 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀦𑁆𑀢𑀺 (𑀫. 𑀦𑀺. 𑁩.𑁬𑁬 𑀆𑀤𑀬𑁄) 𑀏𑀯𑀫𑀸𑀤𑀻𑀦𑀺.

𑀜𑀸𑀡𑀸𑀤𑀬𑁄𑀢𑀺 𑀜𑀸𑀡𑀜𑁆𑀘𑁂𑀯 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘. 𑀢𑁂𑀦𑀸𑀳 ‘‘𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑁂’’𑀢𑀺𑀆𑀤𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺 𑀢𑁂𑀳𑀺 𑀯𑀺𑀦𑀸 𑀲𑀫𑁆𑀧𑀚𑀸𑀦𑀢𑀸𑀬 𑀅𑀲𑀫𑁆𑀪𑀯𑀢𑁄. 𑀫𑀳𑀸𑀘𑀺𑀢𑁆𑀢𑀸𑀦𑀻𑀢𑀺 𑀅𑀝𑁆𑀞𑀧𑀺 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺 ‘‘𑀲𑀢𑀢𑀯𑀺𑀳𑀸𑀭𑀸’’𑀢𑀺 𑀯𑀘𑀦𑀢𑁄 𑀜𑀸𑀡𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀭𑀳𑀺𑀢𑀓𑀸𑀮𑁂𑀧𑀺 𑀧𑀯𑀢𑁆𑀢𑀺𑀚𑁄𑀢𑀦𑀢𑁄. 𑀤𑀲 𑀘𑀺𑀢𑁆𑀢𑀸𑀦𑀻𑀢𑀺 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀳𑀲𑀺𑀢𑀼𑀧𑁆𑀧𑀸𑀤𑀯𑁄𑀝𑁆𑀞𑀩𑁆𑀩𑀦𑀘𑀺𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀅𑀭𑀚𑁆𑀚𑀦𑀸𑀤𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀺 𑀢𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀸𑀢𑀺. ‘‘𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻’’𑀢𑀺 𑀯𑀘𑀦𑀢𑁄 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀕𑀢𑀸𑀦𑀁 𑀇𑀫𑁂𑀲𑀁 𑀲𑀢𑀢𑀯𑀺𑀳𑀸𑀭𑀸𑀦𑀁 𑀲𑁄𑀫𑀦𑀲𑁆𑀲𑀁 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀆𑀲𑁂𑀯𑀦𑀯𑀲𑁂𑀦 𑀮𑀩𑁆𑀪𑀢𑀻’’𑀢𑀺. 𑀓𑀺𑀜𑁆𑀘𑀸𑀧𑀺 𑀔𑀻𑀡𑀸𑀲𑀯𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀧𑀺 𑀆𑀭𑀫𑁆𑀫𑀡𑁂 𑀫𑀚𑁆𑀛𑀢𑁆𑀢𑁄 𑀯𑀺𑀬 𑀩𑀳𑀼𑀮𑀁 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀢𑁄. 𑀓𑀤𑀸𑀘𑀺 𑀧𑀦 𑀢𑀣𑀸 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀸𑀪𑀸𑀯𑁂 𑀬𑀁 𑀢𑀁 𑀲𑀪𑀸𑀯𑀢𑁄 𑀇𑀝𑁆𑀞𑀁 𑀆𑀭𑀫𑁆𑀫𑀡𑀁 ¶ , 𑀢𑀢𑁆𑀣 𑀬𑀸𑀣𑀸𑀯𑀲𑀪𑀸𑀯𑀕𑁆𑀕𑀳𑀡𑀯𑀲𑁂𑀦𑀧𑀺 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑁂𑀯, 𑀢𑀜𑁆𑀘 𑀔𑁄 𑀧𑀼𑀩𑁆𑀩𑀸𑀲𑁂𑀯𑀦𑀯𑀲𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑁂𑀯𑀦𑀯𑀲𑁂𑀦 𑀮𑀩𑁆𑀪𑀢𑀻’’𑀢𑀺. 𑀆𑀭𑀓𑁆𑀔𑀓𑀺𑀘𑁆𑀘𑀁 𑀲𑀸𑀥𑁂𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸. 𑀘𑀭𑀢𑁄𑀢𑀺𑀆𑀤𑀺𑀦𑀸 𑀦𑀺𑀘𑁆𑀘𑀲𑀫𑀸𑀤𑀸𑀦𑀁 𑀤𑀲𑁆𑀲𑁂𑀢𑀺, 𑀢𑀁 𑀯𑀺𑀓𑁆𑀔𑁂𑀧𑀸𑀪𑀸𑀯𑁂𑀦 𑀤𑀝𑁆𑀞𑀩𑁆𑀩𑀁.

𑀧𑀩𑁆𑀩𑀚𑁆𑀚𑀽𑀧𑀕𑀢𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸, 𑀦 𑀲𑀫𑀺𑀢𑀧𑀸𑀧𑀸. 𑀪𑁄𑀯𑀸𑀤𑀺𑀦𑁄𑀢𑀺 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑁂 𑀯𑀤𑀢𑀺. 𑀧𑀸𑀝𑁂𑀓𑁆𑀓𑀲𑀘𑁆𑀘𑀸𑀦𑀻𑀢𑀺 𑀢𑁂𑀳𑀺 𑀢𑁂𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀧𑀸𑀝𑀺𑀬𑁂𑀓𑁆𑀓𑀁 𑀕𑀳𑀺𑀢𑀸𑀦𑀺 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸𑀦𑀺 𑀤𑀺𑀝𑁆𑀞𑀺𑀲𑀘𑁆𑀘𑀸𑀤𑀻𑀦𑀺. 𑀢𑀸𑀦𑀺𑀧𑀺 𑀳𑀺 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀕𑀳𑀡𑀁 𑀉𑀧𑀸𑀤𑀸𑀬 ‘‘𑀲𑀘𑁆𑀘𑀸𑀦𑀻’’𑀢𑀺 𑀯𑁄𑀳𑀭𑀻𑀬𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀤𑀫𑁂𑀯𑀸’’𑀢𑀺𑀆𑀤𑀺. 𑀦𑀻𑀳𑀝𑀸𑀦𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀦𑀻𑀳𑀭𑀺𑀢𑀸𑀦𑀺 𑀅𑀧𑀦𑀻𑀢𑀸𑀦𑀺. 𑀕𑀳𑀺𑀢𑀕𑁆𑀕𑀳𑀡𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀢𑁄 𑀧𑀼𑀩𑁆𑀩𑁂 𑀕𑀳𑀺𑀢𑀲𑁆𑀲 𑀤𑀺𑀝𑁆𑀞𑀺𑀕𑁆𑀕𑀸𑀳𑀲𑁆𑀲. 𑀯𑀺𑀲𑁆𑀲𑀝𑁆𑀞𑀪𑀸𑀯𑀯𑁂𑀯𑀘𑀦𑀸𑀦𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑁆𑀲 𑀅𑀥𑀺𑀯𑀘𑀦𑀸𑀦𑀺.

𑀦𑀢𑁆𑀣𑀺 𑀏𑀢𑀸𑀲𑀁 𑀯𑀬𑁄 𑀯𑁂𑀓𑀮𑁆𑀮𑀦𑁆𑀢𑀺 𑀅𑀯𑀬𑀸𑀢𑀺 𑀆𑀳 ‘‘𑀅𑀦𑀽𑀦𑀸’’𑀢𑀺, 𑀅𑀦𑀯𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀏𑀲𑀦𑀸𑀢𑀺 ¶ 𑀓𑀸𑀫𑁂𑀲𑀦𑀸𑀤𑀬𑁄. 𑀫𑀕𑁆𑀕𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀓𑀣𑀺𑀢𑀸 𑀭𑀸𑀕𑀸𑀤𑀻𑀦𑀁 𑀧𑀳𑀻𑀦𑀪𑀸𑀯𑀤𑀻𑀧𑀦𑀢𑁄. 𑀧𑀘𑁆𑀘𑀯𑁂𑀓𑁆𑀔𑀡𑀨𑀮𑀁 𑀓𑀣𑀺𑀢𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀫𑀼𑀔𑁂𑀦 𑀅𑀭𑀺𑀬𑀨𑀮𑀁 𑀓𑀣𑀺𑀢𑀁. 𑀅𑀥𑀺𑀕𑀢𑁂 𑀳𑀺 𑀅𑀕𑁆𑀕𑀨𑀮𑁂 𑀲𑀩𑁆𑀩𑀲𑁄 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀧𑀚𑀸𑀦𑀸𑀢𑀺, 𑀢𑀜𑁆𑀘 𑀧𑀚𑀸𑀦𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺.

𑀤𑀼𑀢𑀺𑀬𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀯𑀕𑁆𑀕𑁄

𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀯𑀺𑀲𑀫𑀝𑁆𑀞𑀸𑀦𑁂𑀲𑀽𑀢𑀺 𑀧𑀧𑀸𑀢𑀸𑀤𑀻𑀲𑀼 𑀯𑀺𑀲𑀫𑀝𑁆𑀞𑀸𑀦𑁂𑀲𑀼. ‘‘𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀘𑁂𑀢𑀸𑀦𑀺 𑀲𑀸𑀯𑀓𑀸𑀦𑀫𑁆𑀧𑀺 𑀏𑀓𑀘𑁆𑀘𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀓𑀸𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀸𑀤𑀺𑀲𑀸𑀦𑀺 𑀧𑀦 𑀩𑀼𑀤𑁆𑀥𑀸𑀦𑀁 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀻𑀦𑀺, 𑀦 𑀢𑀸𑀤𑀺𑀲𑀸𑀦𑀺 𑀢𑀤𑀜𑁆𑀜𑁂𑀲𑀁 𑀓𑀤𑀸𑀘𑀺𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀻𑀢𑀺 ¶ . 𑀢𑁂𑀦𑀸𑀳 ‘‘𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀻’’𑀢𑀺. 𑀇𑀫𑀫𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀮𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀪𑀸𑀯𑀢𑁄 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀻𑀲𑀼 𑀏𑀯 𑀅𑀲𑀸𑀥𑀸𑀭𑀡𑀲𑀫𑀜𑁆𑀜𑀸 𑀦𑀺𑀭𑀼𑀴𑁆𑀳𑀸. 𑀓𑀸𑀫𑀁 𑀜𑀸𑀡𑀩𑀮𑀸𑀦𑀁 𑀜𑀸𑀡𑀲𑀫𑁆𑀪𑀸𑀭𑁄 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀧𑀼𑀜𑁆𑀜𑀲𑀫𑁆𑀪𑀸𑀭𑁄𑀧𑀺 𑀧𑀦 𑀦𑁂𑀲𑀁 𑀧𑀘𑁆𑀘𑀬𑁄 𑀏𑀯. 𑀜𑀸𑀡𑀲𑀫𑁆𑀪𑀸𑀭𑀲𑁆𑀲𑀧𑀺 𑀯𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀪𑀸𑀯𑀢𑁄 ‘‘𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀦𑁆𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁨𑁨) 𑀕𑀺𑀭𑀺𑀘𑀭𑀦𑀤𑀺𑀘𑀭𑀯𑀦𑀘𑀭𑀸𑀤𑀺𑀧𑁆𑀧𑀪𑁂𑀤𑀸 𑀕𑁄𑀘𑀭𑀺𑀬𑀓𑀸𑀮𑀸𑀯𑀓𑀦𑀸𑀫𑀸 𑀲𑀩𑁆𑀩𑀸𑀧𑀺 𑀩𑀮𑁂𑀦 𑀧𑀸𑀓𑀢𑀺𑀓𑀸 𑀳𑀢𑁆𑀣𑀺𑀚𑀸𑀢𑀺. 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀦𑁆𑀢𑀺 𑀣𑀸𑀫𑀫𑀚𑁆𑀛𑀺𑀫𑀸𑀦𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁. 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀏𑀓𑀲𑁆𑀲𑀸𑀢𑀺 𑀘 𑀢𑀣𑀸 𑀳𑁂𑀝𑁆𑀞𑀸 𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀤𑁂𑀲𑀦𑀸𑀲𑁄𑀢𑁂𑀦 𑀯𑀼𑀢𑁆𑀢𑀁. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀏𑀢𑁆𑀣 𑀦𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀭𑀲𑁆𑀫𑀺𑀬𑁄. 𑀢𑀸 𑀩𑀳𑀽 𑀦𑀸𑀦𑀸𑀯𑀺𑀥𑀸 𑀇𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀸𑀭𑀸𑀬𑀦𑀁, 𑀯𑀚𑀺𑀭𑀁, 𑀢𑀲𑁆𑀫𑀸 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀯𑀚𑀺𑀭𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀩𑀮𑀁 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯, 𑀦 𑀓𑀸𑀬𑀩𑀮𑀁 𑀯𑀺𑀬 𑀅𑀝𑁆𑀞𑀓𑀣𑀸𑀭𑀼𑀴𑁆𑀳𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀁𑀬𑀼𑀢𑁆𑀢𑀓𑁂 ¶ (𑀲𑀁. 𑀦𑀺. 𑁨.𑁩𑁩) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 (𑀯𑀺𑀪. 𑀫𑀽𑀮𑀝𑀻. 𑁭𑁬𑁦) 𑀧𑀦 𑀦𑀺𑀤𑀸𑀦𑀯𑀕𑁆𑀕𑁂 𑀲𑀢𑁆𑀢𑀲𑀢𑁆𑀢𑀢𑀺 𑀆𑀕𑀢𑀸𑀦𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀜𑁆𑀘. 𑀢𑁂𑀲𑀢𑁆𑀢𑀢𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁧) 𑀲𑀼𑀢𑀫𑀬𑀸𑀤𑀻𑀦𑀺 𑀆𑀕𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀦 𑀲𑀁𑀬𑀼𑀢𑁆𑀢𑀓𑁂. 𑀅𑀜𑁆𑀜𑀸𑀦𑀺𑀧𑀻𑀢𑀺 𑀏𑀢𑁂𑀦 𑀜𑀸𑀡𑀯𑀢𑁆𑀣𑀼𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁫𑁧 𑀆𑀤𑀬𑁄) 𑀏𑀓𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀅𑀜𑁆𑀜𑀢𑁆𑀣 𑀘 ‘‘𑀧𑀼𑀩𑁆𑀩𑀦𑁆𑀢𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁬𑁩) 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 𑀘 ‘‘𑀢𑀬𑀺𑀤𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 ‘𑀇𑀫𑀸𑀦𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺 𑀏𑀯𑀁 𑀕𑀳𑀺𑀢𑀸𑀦𑀻’𑀢𑀺’’𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁬) 𑀯𑀼𑀢𑁆𑀢𑀸𑀦𑀺 𑀅𑀦𑁂𑀓𑀸𑀦𑀺 𑀜𑀸𑀡𑀧𑁆𑀧𑀪𑁂𑀤𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀸𑀣𑀸𑀯𑀧𑁆𑀧𑀝𑀺𑀯𑁂𑀥𑀢𑁄 𑀲𑀬𑀜𑁆𑀘 𑀅𑀓𑀫𑁆𑀧𑀺𑀬𑀁 𑀧𑀼𑀕𑁆𑀕𑀮𑀜𑁆𑀘 𑀢𑀁𑀲𑀫𑀗𑁆𑀕𑀺𑀦𑀁 𑀦𑁂𑀬𑁆𑀬𑁂𑀲𑀼 𑀅𑀥𑀺𑀩𑀮𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘𑀸’’𑀢𑀺.

𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, 𑀲𑁂𑀝𑁆𑀞𑀝𑁆𑀞𑀸𑀦𑀁. 𑀲𑀩𑁆𑀩𑀜𑁆𑀜𑀼𑀢𑀸𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀅𑀝𑁆𑀞 𑀯𑀸 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀆𑀲𑀪𑀸, 𑀧𑀼𑀩𑁆𑀩𑀩𑀼𑀤𑁆𑀥𑀸. 𑀇𑀤𑀁 𑀧𑀦𑀸𑀢𑀺 𑀩𑀼𑀤𑁆𑀥𑀸𑀦𑀁 𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀫𑁂𑀯 𑀯𑀤𑀢𑀺. 𑀢𑀺𑀝𑁆𑀞𑀫𑀸𑀦𑁄𑀯𑀸𑀢𑀺 𑀅𑀯𑀤𑀦𑁆𑀢𑁄𑀧𑀺 𑀢𑀺𑀝𑁆𑀞𑀫𑀸𑀦𑁄𑀯 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀉𑀧𑀕𑀘𑁆𑀙𑀢𑀻𑀢𑀺 𑀅𑀦𑀼𑀚𑀸𑀦𑀸𑀢𑀺.

𑀅𑀝𑁆𑀞𑀲𑀼 ¶ 𑀧𑀭𑀺𑀲𑀸𑀲𑀽𑀢𑀺 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀁…𑀧𑁂… 𑀢𑀢𑁆𑀭 𑀯𑀢 𑀫𑀁 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫𑁧) 𑀯𑀼𑀢𑁆𑀢𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀅𑀪𑀻𑀢𑀦𑀸𑀤𑀁 𑀦𑀤𑀢𑀻𑀢𑀺 𑀧𑀭𑀢𑁄 𑀤𑀲𑁆𑀲𑀺𑀢𑀜𑀸𑀡𑀬𑁄𑀕𑁂𑀦 𑀤𑀲𑀩𑀮𑁄𑀳𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺.

𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑁂𑀥𑁄𑀢𑀺 ‘‘𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀧𑀺 𑀤𑁂𑀲𑀦𑀸𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀧𑀭𑀲𑁆𑀲 𑀅𑀯𑀩𑀼𑀚𑁆𑀛𑀦𑀫𑀢𑁆𑀢𑁂𑀦 𑀳𑁄𑀢𑀻𑀢𑀺 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀦 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀤𑁂𑀲𑀦𑀸𑀜𑀸𑀡𑀧𑀯𑀢𑁆𑀢𑀺 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀧𑀯𑀢𑁆𑀢𑀺𑀢𑀘𑀓𑁆𑀓𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘𑀓𑁆𑀓𑀭𑀢𑀦𑀲𑁆𑀲 𑀞𑀸𑀦𑀁 𑀯𑀺𑀬.

𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀪𑀽𑀫𑀺𑀬𑀁 𑀧𑀼𑀭𑀺𑀲𑁄 𑀯𑀺𑀬, 𑀦𑁄𑀢𑀺 𑀆𑀳 ‘‘𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺. 𑀞𑀸𑀦𑀦𑁆𑀢𑀺 𑀘𑁂𑀢𑁆𑀣 𑀅𑀢𑁆𑀢𑀮𑀸𑀪𑁄 𑀥𑀭𑀫𑀸𑀦𑀢𑀸 𑀘, 𑀦 𑀕𑀢𑀺𑀦𑀺𑀯𑀢𑁆𑀢𑀻𑀢𑀺 𑀆𑀳 ‘‘𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘𑀸’’𑀢𑀺. 𑀬𑀢𑁆𑀣 𑀧𑀦𑁂𑀢𑀁 𑀤𑀲𑀩𑀮𑀜𑀸𑀡𑀁 𑀯𑀺𑀢𑁆𑀣𑀸𑀭𑀺𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀥𑀫𑁆𑀫𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑀸𑀤𑀺𑀬𑀦𑁆𑀢𑀻𑀢𑀺 ¶ 𑀲𑀫𑀸𑀤𑀸𑀦𑀸𑀦𑀺, 𑀢𑀸𑀦𑀺 𑀧𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦’’𑀦𑁆𑀢𑀺. 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀏𑀢𑁂𑀦 𑀲𑀫𑀸𑀤𑀸𑀦𑀲𑀤𑁆𑀤𑀲𑁆𑀲 𑀅𑀧𑀼𑀩𑁆𑀩𑀢𑁆𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 𑀫𑀼𑀢𑁆𑀢𑀕𑀢𑀲𑀤𑁆𑀤𑁂 𑀕𑀢𑀲𑀤𑁆𑀤𑀲𑁆𑀲 𑀯𑀺𑀬. 𑀕𑀢𑀻𑀢𑀺 𑀦𑀺𑀭𑀬𑀸𑀤𑀺𑀕𑀢𑀺𑀬𑁄. 𑀉𑀧𑀥𑀻𑀢𑀺 𑀅𑀢𑁆𑀢𑀪𑀸𑀯𑁄. 𑀓𑀸𑀮𑁄𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀸𑀭𑀳𑀓𑀸𑀮𑁄. 𑀧𑀬𑁄𑀕𑁄𑀢𑀺 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑀸 𑀓𑀺𑀭𑀺𑀬𑀸.

𑀅𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀚𑀸𑀦𑀸𑀫𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺 (𑀫. 𑀦𑀺. 𑁧.𑁧𑁫𑁩). 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀖𑀸𑀢𑁂𑀦𑁆𑀢𑁂𑀲𑀼 𑀓𑀸𑀫𑀁 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀢𑀦𑀸 𑀢𑀲𑁆𑀲𑁂𑀯𑁂𑀓𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀸, 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀦𑀸𑀦𑀸𑀓𑀸𑀭𑀁. 𑀢𑁂𑀲𑀼 (𑀯𑀺𑀪. 𑀅𑀝𑁆𑀞. 𑁮𑁧𑁧) 𑀳𑀺 𑀏𑀓𑁄 𑀆𑀤𑀭𑁂𑀦 𑀙𑀦𑁆𑀤𑀚𑀸𑀢𑁄 𑀓𑀭𑁄𑀢𑀺, 𑀏𑀓𑁄 ‘‘𑀏𑀳𑀺 𑀢𑁆𑀯𑀫𑁆𑀧𑀺 𑀓𑀭𑁄𑀳𑀻’’𑀢𑀺 𑀧𑀭𑁂𑀳𑀺 𑀦𑀺𑀧𑁆𑀧𑀻𑀴𑀺𑀢𑁄 𑀓𑀭𑁄𑀢𑀺, 𑀏𑀓𑁄 𑀲𑀫𑀸𑀦𑀘𑁆𑀙𑀦𑁆𑀤𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀧𑁆𑀧𑀝𑀺𑀩𑀸𑀳𑀫𑀸𑀦𑁄 𑀯𑀺𑀘𑀭𑀢𑀺. 𑀢𑁂𑀲𑀼 𑀏𑀓𑁄 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀓𑁄 ¶ 𑀧𑁂𑀢𑁆𑀢𑀺𑀯𑀺𑀲𑀬𑁂. 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀲 𑀧𑁂𑀢𑁆𑀢𑀺𑀯𑀺𑀲𑀬𑁂’’𑀢𑀺 𑀚𑀸𑀦𑀸𑀢𑀺. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 ‘‘𑀏𑀲 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀉𑀲𑁆𑀲𑀤𑀦𑀺𑀭𑀬𑁂’’𑀢𑀺 𑀚𑀸𑀦𑀸𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 ‘‘𑀏𑀲 𑀅𑀧𑀸𑀤𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀤𑁆𑀯𑀺𑀧𑀸𑀤𑀓𑁄, 𑀏𑀲 𑀘𑀢𑀼𑀧𑁆𑀧𑀤𑁄, 𑀏𑀲 𑀩𑀳𑀼𑀧𑁆𑀧𑀤𑁄’’𑀢𑀺 𑀚𑀸𑀦𑀸𑀢𑀺. 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 ‘‘𑀏𑀲 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀔𑀼𑀧𑁆𑀧𑀺𑀧𑀸𑀲𑀺𑀓𑁄, 𑀏𑀲 𑀧𑀭𑀤𑀢𑁆𑀢𑀽𑀧𑀚𑀻𑀯𑀻’’𑀢𑀺 𑀚𑀸𑀦𑀸𑀢𑀺. 𑀢𑁂𑀲𑀼 𑀘 𑀓𑀫𑁆𑀫𑁂𑀲𑀼 ‘‘𑀇𑀤𑀁 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀲𑁆𑀲𑀢𑀺, 𑀇𑀤𑀁 𑀅𑀜𑁆𑀜𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺.

𑀢𑀣𑀸 𑀲𑀓𑀮𑀕𑀸𑀫𑀯𑀸𑀲𑀺𑀓𑁂𑀲𑀼 𑀏𑀓𑀢𑁄 𑀧𑀺𑀡𑁆𑀟𑀧𑀸𑀢𑀁 𑀤𑀤𑀫𑀸𑀦𑁂𑀲𑀼 𑀓𑀸𑀫𑀁 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀢𑀦𑀸 𑀧𑀺𑀡𑁆𑀟𑀧𑀸𑀢𑀸𑀭𑀫𑁆𑀫𑀡𑀸𑀯, 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀦𑀸𑀦𑀸𑀓𑀸𑀭𑀁. 𑀢𑁂𑀲𑀼 𑀳𑀺 𑀏𑀓𑁄 𑀆𑀤𑀭𑁂𑀦 𑀓𑀭𑁄𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀁, 𑀢𑀲𑁆𑀫𑀸 𑀢𑁂𑀲𑀼 𑀓𑁂𑀘𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀓𑁂𑀘𑀺 𑀫𑀦𑀼𑀲𑁆𑀲𑀮𑁄𑀓𑁂. 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀺. ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀤𑁂𑀯𑀮𑁄𑀓𑁂. 𑀢𑀢𑁆𑀣𑀸𑀧𑀺 𑀏𑀲 𑀔𑀢𑁆𑀢𑀺𑀬𑀓𑀼𑀮𑁂, 𑀏𑀲 𑀩𑁆𑀭𑀸𑀳𑁆𑀫𑀡𑀓𑀼𑀮𑁂, 𑀏𑀲 𑀯𑁂𑀲𑁆𑀲𑀓𑀼𑀮𑁂, 𑀏𑀲 𑀲𑀼𑀤𑁆𑀤𑀓𑀼𑀮𑁂, 𑀏𑀲 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼, 𑀏𑀲 𑀦𑀺𑀫𑁆𑀫𑀸𑀦𑀭𑀢𑀻𑀲𑀼, 𑀏𑀲 𑀢𑀼𑀲𑀺𑀢𑁂𑀲𑀼, 𑀏𑀲 𑀬𑀸𑀫𑁂𑀲𑀼, 𑀏𑀲 𑀢𑀸𑀯𑀢𑀺𑀁𑀲𑁂𑀲𑀼, 𑀏𑀲 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼, 𑀏𑀲 𑀪𑀼𑀫𑁆𑀫𑀤𑁂𑀯𑁂𑀲𑀽’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀳𑀻𑀦𑀧𑀡𑀻𑀢𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀅𑀧𑁆𑀧𑀧𑀭𑀺𑀯𑀸𑀭𑀫𑀳𑀸𑀧𑀭𑀺𑀯𑀸𑀭𑀢𑀸𑀤𑀺𑀪𑁂𑀤𑀁 𑀢𑀁 𑀢𑀁 𑀯𑀺𑀲𑁂𑀲𑀁 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀺.

𑀢𑀣𑀸 ¶ 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑁂𑀲𑀼𑀬𑁂𑀯 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀏𑀲 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀏𑀲 𑀫𑀳𑀸𑀪𑀽𑀢𑀫𑀢𑁆𑀢𑀫𑁂𑀯 𑀯𑀯𑀢𑁆𑀣𑀧𑁂𑀲𑁆𑀲𑀢𑀺, 𑀏𑀲 𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯 𑀞𑀲𑁆𑀲𑀢𑀺, 𑀏𑀲 𑀅𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬𑀫𑁂𑀯, 𑀏𑀲 𑀧𑀞𑀫𑀨𑀮𑁂𑀬𑁂𑀯, 𑀏𑀲 𑀤𑀼𑀢𑀺𑀬𑀨𑀮𑁂𑀬𑁂𑀯, 𑀏𑀲 𑀢𑀢𑀺𑀬𑀨𑀮𑁂𑀬𑁂𑀯, 𑀏𑀲 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼𑀧𑀺 ‘‘𑀇𑀫𑀲𑁆𑀲 𑀧𑀭𑀺𑀓𑀫𑁆𑀫𑀫𑀢𑁆𑀢𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀏𑀲 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺, 𑀏𑀲 𑀅𑀧𑁆𑀧𑀦𑀁 𑀏𑀯 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀏𑀲 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀇𑀫𑀲𑁆𑀲 𑀘𑁂𑀢𑀦𑀸’’𑀢𑀺𑀆𑀤𑀺.

𑀓𑀸𑀫𑀦𑀢𑁄 ¶ 𑀓𑀸𑀫𑁂𑀢𑀩𑁆𑀩𑀢𑁄 𑀓𑀸𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀢𑁄 𑀘 𑀥𑀸𑀢𑀼 𑀓𑀸𑀫𑀥𑀸𑀢𑀼. 𑀆𑀤𑀺-𑀲𑀤𑁆𑀤𑁂𑀦 𑀩𑁆𑀬𑀸𑀧𑀸𑀤𑀥𑀸𑀢𑀼𑀭𑀽𑀧𑀥𑀸𑀢𑀼𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀯𑀺𑀮𑀓𑁆𑀔𑀡𑀢𑀸𑀬𑀸𑀢𑀺 𑀯𑀺𑀲𑀤𑀺𑀲𑀲𑀪𑀸𑀯𑀢𑀸𑀬. 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀦𑁆𑀢𑀺 𑀅𑀦𑁂𑀓𑀥𑀸𑀢𑀼𑀁 𑀦𑀸𑀦𑀸𑀥𑀸𑀢𑀼𑀁 𑀔𑀦𑁆𑀥𑀮𑁄𑀓𑀁 𑀆𑀬𑀢𑀦𑀮𑁄𑀓𑀁 𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫. 𑀢𑁂𑀲𑀼𑀧𑀺 𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄…𑀧𑁂… 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀏𑀯𑀁 𑀢𑀸𑀯 𑀔𑀦𑁆𑀥𑀮𑁄𑀓𑀲𑁆𑀲, ‘‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂… 𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀸𑀢𑀼𑀪𑀽𑀫𑀓𑀸’’𑀢𑀺𑀆𑀤𑀺𑀦𑀸 𑀆𑀬𑀢𑀦𑀮𑁄𑀓𑀲𑁆𑀲, ‘‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀸𑀢𑀼𑀪𑀽𑀫𑀓𑀸’’𑀢𑀺𑀆𑀤𑀺𑀦𑀸 𑀥𑀸𑀢𑀼𑀮𑁄𑀓𑀲𑁆𑀲 𑀅𑀦𑁂𑀓𑀲𑀪𑀸𑀯𑀁 𑀦𑀸𑀦𑀸𑀲𑀪𑀸𑀯𑀜𑁆𑀘 𑀧𑀚𑀸𑀦𑀸𑀢𑀺. 𑀦 𑀓𑁂𑀯𑀮𑀁 𑀉𑀧𑀸𑀤𑀺𑀦𑁆𑀦𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑁂𑀯, 𑀅𑀣 𑀔𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀧𑀺 ‘‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄, 𑀇𑀫𑀲𑁆𑀲 𑀓𑀸𑀴𑁄, 𑀇𑀫𑀲𑁆𑀲 𑀫𑀝𑁆𑀞𑁄, 𑀇𑀫𑀲𑁆𑀲 𑀲𑀓𑀡𑁆𑀝𑀓𑁄, 𑀇𑀫𑀲𑁆𑀲 𑀩𑀳𑀮𑀢𑁆𑀢𑀘𑁄, 𑀇𑀫𑀲𑁆𑀲 𑀢𑀦𑀼𑀢𑁆𑀢𑀘𑁄, 𑀇𑀫𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁, 𑀇𑀫𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁 𑀧𑀻𑀢𑀁 𑀮𑁄𑀳𑀺𑀢𑀁 𑀑𑀤𑀸𑀢𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁, 𑀇𑀫𑀲𑁆𑀲 𑀨𑀮𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀤𑀻𑀖𑀁 𑀯𑀝𑁆𑀝𑀁 𑀲𑀼𑀲𑀡𑁆𑀞𑀸𑀦𑀁 𑀤𑀼𑀲𑁆𑀲𑀡𑁆𑀞𑀸𑀦𑀁 𑀫𑀝𑁆𑀞𑀁 𑀨𑀭𑀼𑀲𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀅𑀫𑁆𑀩𑀺𑀮𑀁 𑀓𑀲𑀸𑀯𑀁, 𑀇𑀫𑀲𑁆𑀲 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄 𑀓𑀼𑀡𑁆𑀞𑁄 𑀉𑀚𑀼𑀓𑁄 𑀓𑀼𑀝𑀺𑀮𑁄 𑀢𑀫𑁆𑀩𑁄 𑀓𑀸𑀴𑁄 𑀑𑀤𑀸𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀏𑀯 𑀳𑀺 𑀏𑀢𑀁 𑀩𑀮𑀁, 𑀦 𑀅𑀜𑁆𑀜𑁂𑀲𑀁.

𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀦𑁆𑀢𑀺 𑀦𑀸𑀦𑀚𑁆𑀛𑀸𑀲𑀬𑀢𑀁. 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀅𑀚𑁆𑀛𑀸𑀲𑀬𑀥𑀸𑀢𑀼 𑀅𑀚𑁆𑀛𑀸𑀲𑀬𑀲𑀪𑀸𑀯𑁄. 𑀲𑁄 𑀧𑀦 𑀳𑀻𑀦𑀧𑀡𑀻𑀢𑀢𑀸𑀲𑀸𑀫𑀜𑁆𑀜𑁂𑀦 𑀧𑀸𑀴𑀺𑀬𑀁 𑀤𑁆𑀯𑀺𑀥𑀸𑀯 𑀯𑀼𑀢𑁆𑀢𑁄𑀧𑀺 𑀳𑀻𑀦𑀧𑀡𑀻𑀢𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑁄𑀢𑀺 𑀆𑀳 ‘‘𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯’’𑀦𑁆𑀢𑀺. 𑀢𑀢𑁆𑀣 𑀬𑁂 𑀬𑁂 𑀲𑀢𑁆𑀢𑀸 𑀬𑀁𑀬𑀁𑀅𑀥𑀺𑀫𑀼𑀢𑁆𑀢𑀺𑀓𑀸, 𑀢𑁂 ¶ 𑀢𑁂 𑀢𑀁𑀢𑀤𑀥𑀺𑀫𑀼𑀢𑁆𑀢𑀺𑀓𑁂 𑀏𑀯 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀥𑀸𑀢𑀼𑀲𑀪𑀸𑀕𑀢𑁄. 𑀬𑀣𑀸 𑀕𑀽𑀣𑀸𑀤𑀻𑀦𑀁 𑀥𑀸𑀢𑀽𑀦𑀁 𑀲𑀪𑀸𑀯𑁄 𑀏𑀲𑁄, 𑀬𑀁 𑀕𑀽𑀣𑀸𑀤𑀻𑀳𑀺 𑀏𑀯 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀏𑀯𑀁 𑀳𑀻𑀦𑀚𑁆𑀛𑀸𑀲𑀬𑀸 𑀤𑀼𑀲𑁆𑀲𑀻𑀮𑀸𑀤𑀻𑀳𑁂𑀯 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀲𑀫𑁆𑀧𑀦𑁆𑀦𑀲𑀻𑀮𑀸𑀤𑀬𑁄 𑀘 𑀲𑀫𑁆𑀧𑀦𑁆𑀦𑀲𑀻𑀮𑀸𑀤𑀻𑀳𑁂𑀯. 𑀢𑀁 𑀦𑁂𑀲𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀪𑀕𑀯𑀸 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺.

𑀯𑀼𑀤𑁆𑀥𑀺𑀁 ¶ 𑀳𑀸𑀦𑀺𑀜𑁆𑀘𑀸𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀓𑀢𑀁 𑀅𑀦𑀥𑀺𑀓𑀢𑀜𑁆𑀘. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁮𑁧𑁪; 𑀧𑀝𑀺. 𑀫. 𑁧𑁧𑁩) ‘‘𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀻’’𑀢𑀺 𑀆𑀲𑀬𑀸𑀤𑀺𑀚𑀸𑀦𑀦𑀁 𑀓𑀲𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺? 𑀆𑀲𑀬𑀚𑀸𑀦𑀦𑀸𑀤𑀺𑀦𑀸 𑀬𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑁄𑀧𑀭𑁂𑀳𑀺 𑀲𑀢𑁆𑀢𑀸 𑀓𑀮𑁆𑀬𑀸𑀡𑀧𑀸𑀧𑀸𑀲𑀬𑀸𑀤𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀚𑀸𑀦𑀦𑀲𑁆𑀲 𑀯𑀺𑀪𑀸𑀯𑀦𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀦𑀁 𑀯𑀺𑀲𑀼𑀁 𑀅𑀲𑀸𑀥𑀸𑀭𑀡𑀢𑀸, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀸𑀦𑀁 𑀯𑀺𑀲𑀼𑀁 𑀩𑀮𑀯𑀢𑀸 𑀘 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑀢𑁆𑀣 𑀆𑀲𑀬𑀦𑁆𑀢𑀺 𑀬𑀢𑁆𑀣 𑀲𑀢𑁆𑀢𑀸 𑀦𑀺𑀯𑀲𑀦𑁆𑀢𑀺, 𑀢𑀁 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀕𑀢𑀁 𑀯𑀸 𑀬𑀣𑀸𑀪𑀽𑀢𑀜𑀸𑀡𑀁 𑀯𑀸 𑀆𑀲𑀬𑁄, 𑀅𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀣𑀸𑀫𑀕𑀢𑁄 𑀓𑀺𑀮𑁂𑀲𑁄. 𑀢𑀁 𑀧𑀦 𑀪𑀕𑀯𑀸 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀦𑁆𑀢𑁄 𑀢𑁂𑀲𑀁 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀜𑀸𑀡𑀸𑀦𑀜𑁆𑀘 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀸𑀫𑀁 𑀲𑁂𑀯𑀦𑁆𑀢𑀁𑀬𑁂𑀯 𑀪𑀕𑀯𑀸 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀓𑀸𑀫𑀁 𑀲𑁂𑀯𑀦𑁆𑀢𑀁𑀬𑁂𑀯 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦𑁂𑀓𑁆𑀔𑀫𑁆𑀫𑀁 𑀲𑁂𑀯𑀦𑁆𑀢𑀁𑀬𑁂𑀯 𑀚𑀸𑀦𑀸𑀢𑀺. 𑀩𑁆𑀬𑀸𑀧𑀸𑀤𑀁, 𑀅𑀩𑁆𑀬𑀸𑀧𑀸𑀤𑀁, 𑀣𑀺𑀦𑀫𑀺𑀤𑁆𑀥𑀁, 𑀆𑀮𑁄𑀓𑀲𑀜𑁆𑀜𑀁 𑀲𑁂𑀯𑀦𑁆𑀢𑀁𑀬𑁂𑀯 𑀚𑀸𑀦𑀸𑀢𑀺 𑁋 ‘𑀅𑀬𑀁 𑀧𑀼𑀕𑁆𑀕𑀮𑁄 𑀣𑀺𑀦𑀫𑀺𑀤𑁆𑀥𑀕𑀭𑀼𑀓𑁄 𑀣𑀺𑀦𑀫𑀺𑀤𑁆𑀥𑀸𑀲𑀬𑁄 𑀣𑀺𑀦𑀫𑀺𑀤𑁆𑀥𑀸𑀥𑀺𑀫𑀼𑀢𑁆𑀢𑁄’’’𑀢𑀺 (𑀧𑀝𑀺. 𑀫. 𑁧.𑁧𑁧𑁩).

𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀦𑁆𑀢𑀺 𑀭𑀽𑀧𑀸𑀯𑀘𑀭𑀸𑀦𑀁 𑀧𑀞𑀫𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀚𑁆𑀛𑀸𑀧𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀧𑀦𑀝𑁆𑀞𑁂𑀦 𑀘 𑀛𑀸𑀦𑀸𑀦𑀁. 𑀘𑀢𑀼𑀓𑁆𑀓𑀦𑀬𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀏𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 𑀆𑀭𑀫𑁆𑀫𑀡𑁂 𑀘 𑀅𑀥𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑁄𑀓𑁆𑀔𑀸 𑀦𑀸𑀫. 𑀅𑀝𑁆𑀞𑀫𑁄 𑀧𑀦 𑀲𑀩𑁆𑀩𑀲𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀧𑀕𑀫𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀘𑀢𑀼𑀓𑁆𑀓𑀦𑀬𑀧𑀜𑁆𑀘𑀓𑀦𑀬𑁂𑀲𑀼 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀦𑀸𑀫. 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄. 𑀦𑀬𑀤𑁆𑀯𑀬𑁂𑀧𑀺 𑀉𑀧𑀭𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄. 𑀲𑀫𑀸𑀧𑀢𑁆𑀢𑀻𑀲𑀼 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀦𑁆𑀦𑀁 𑀲𑀫𑀸𑀥𑀻𑀢𑀺𑀧𑀺 𑀦𑀸𑀫𑀁, 𑀲𑀫𑀸𑀧𑀢𑁆𑀢𑀻𑀢𑀺𑀧𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀩𑁆𑀪𑀸𑀯𑀢𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄 𑀦 𑀲𑀫𑀸𑀥𑀻𑀢𑀺 𑀦𑀸𑀫𑀁. 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀦𑁆𑀢𑀺 𑀅𑀧𑁆𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁 ¶ . 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀦𑁆𑀢𑀺 𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 ¶ 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀁. 𑀇𑀢𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀸𑀦𑀺 𑀳𑀸𑀦𑀪𑀸𑀕𑀺𑀬𑀯𑀺𑀲𑁂𑀲𑀪𑀸𑀕𑀺𑀬𑀸 𑀥𑀫𑁆𑀫𑀸𑀢𑀺 𑀤𑀲𑁆𑀲𑀺𑀢𑀸𑀦𑀺. 𑀢𑁂𑀳𑀺 𑀧𑀦 𑀛𑀸𑀦𑀸𑀦𑀁 𑀢𑀁𑀲𑀪𑀸𑀯𑀢𑀸 𑀘 𑀥𑀫𑁆𑀫𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀯𑁄𑀤𑀸𑀦𑀦𑁆𑀢𑀺 𑀧𑀕𑀼𑀡𑀢𑀸𑀲𑀗𑁆𑀔𑀸𑀢𑀁 𑀯𑁄𑀤𑀸𑀦𑀁. 𑀢𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀦𑀺𑀭𑁄𑀥𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀧𑀸𑀴𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀢𑁂 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀧𑀝𑀺𑀲𑁂𑀥𑁂𑀢𑀩𑁆𑀩𑀸. 𑀬𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀫𑀸𑀦𑁄 𑀏𑀯 ‘‘𑀦 𑀮𑀸𑀪𑀻𑀫𑁆𑀳𑀻’’𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑀸𑀦𑀁 𑀏𑀯 ‘‘𑀦 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀲𑁄 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 ‘‘𑀯𑀺𑀧𑀢𑁆𑀢𑀻’’𑀢𑀺 𑀧𑀘𑁆𑀘𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦 𑀢𑀣𑀸 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑀣𑀸 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑀁, 𑀢𑀣𑀸 𑀦 𑀤𑀝𑁆𑀞𑀩𑁆𑀩𑀁. 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀻𑀢𑀺 𑀞𑀸𑀦𑀸𑀝𑁆𑀞𑀸𑀦𑀚𑀸𑀦𑀦𑀸𑀤𑀺𑀲𑀓𑀲𑀓𑀫𑁂𑀯 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀚𑀸𑀦𑀸𑀢𑀺, 𑀬𑀣𑀸𑀲𑀓𑀫𑁂𑀯 𑀯𑀺𑀲𑀬𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀻𑀢𑀺 𑀢𑁂𑀳𑀺 𑀤𑀲𑀩𑀮𑀜𑀸𑀡𑁂𑀳𑀺 𑀚𑀸𑀦𑀺𑀢𑀩𑁆𑀩𑀫𑁆𑀧𑀺. 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀭𑀫𑁂𑀯𑀸𑀢𑀺 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀦𑁆𑀢𑀭𑀫𑁂𑀯 𑀚𑀸𑀦𑀸𑀢𑀺. 𑀘𑁂𑀢𑀦𑀸𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀦𑀺𑀭𑀬𑀸𑀤𑀺𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑁆𑀧𑀝𑀺𑀧𑀤𑀸𑀪𑀽𑀢𑁂 𑀓𑀫𑁆𑀫𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀳 ‘‘𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯𑀸’’𑀢𑀺. 𑀥𑀸𑀢𑀼𑀦𑀸𑀦𑀢𑁆𑀢𑀜𑁆𑀘 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀜𑁆𑀘 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀜𑁆𑀳𑀺 𑀜𑀸𑀡𑀁 𑀢𑀤𑀼𑀪𑀬𑀫𑁆𑀧𑀺 𑀚𑀸𑀦𑀸𑀢𑀺. ‘‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁮𑁧𑁨) 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁. 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀲𑀘𑁆𑀘𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀦𑀫𑁂𑀯. 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀝𑁆𑀞𑀫𑀦𑀯𑀫𑀩𑀮𑀸𑀦𑀺 𑀯𑀺𑀬 𑀢𑀁𑀲𑀤𑀺𑀲𑀁, 𑀇𑀤𑁆𑀥𑀺𑀯𑀺𑀥𑀜𑀸𑀡𑀫𑀺𑀯 𑀯𑀺𑀓𑀼𑀩𑁆𑀩𑀺𑀢𑀼𑀁. 𑀏𑀢𑁂𑀦𑀲𑁆𑀲 𑀩𑀮𑀲𑀤𑀺𑀲𑀢𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀛𑀸𑀦𑀸𑀤𑀺𑀜𑀸𑀡𑀁 𑀯𑀺𑀬 𑀯𑀸 𑀅𑀧𑁆𑀧𑁂𑀢𑀼𑀁 𑀯𑀺𑀓𑀼𑀩𑁆𑀩𑀺𑀢𑀼𑀜𑁆𑀘. 𑀬𑀤𑀺𑀧𑀺 𑀳𑀺 𑀛𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀢𑁆𑀢𑀫𑀩𑀮𑀦𑁆𑀢𑀺 𑀢𑀲𑁆𑀲 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀛𑀸𑀦𑀸𑀤𑀻𑀳𑀺 𑀯𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻𑀢𑀺 𑀛𑀸𑀦𑀸𑀤𑀺𑀲𑀳𑀕𑀢𑀁 𑀜𑀸𑀡𑀁 𑀢𑀤𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀛𑀸𑀦𑀸𑀤𑀺𑀓𑀺𑀘𑁆𑀘𑀁 𑀯𑀺𑀬 𑀦 𑀲𑀩𑁆𑀩𑀁 𑀩𑀮𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀜𑁆𑀘 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀓𑀲𑁆𑀲𑀘𑀺 𑀩𑀮𑀲𑁆𑀲 𑀛𑀸𑀦𑀇𑀤𑁆𑀥𑀺𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 ¶ 𑀓𑀺𑀘𑁆𑀘𑀯𑀺𑀲𑁂𑀲𑀯𑀲𑁂𑀦𑀧𑀺 𑀤𑀲𑀩𑀮𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑀓𑁆𑀓𑀢𑁆𑀢𑀺𑀓𑀪𑀽𑀫𑀦𑁆𑀢𑀭𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀸𑀝𑀺𑀬𑀸𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀧𑀸𑀝𑀺𑀬𑀸.

𑀅𑀦𑀼𑀧𑀤𑀯𑀡𑁆𑀡𑀦𑀁 ¶ 𑀜𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀮𑁂𑀲𑀸𑀯𑀭𑀡𑀁 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀓𑀺𑀮𑁂𑀲𑀸𑀯𑀭𑀡𑀲𑁆𑀲 𑀅𑀪𑀸𑀯𑁄 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑀲𑁆𑀲 𑀞𑀸𑀦𑀁, 𑀢𑀩𑁆𑀪𑀸𑀯𑁄 𑀅𑀝𑁆𑀞𑀸𑀦𑀁. 𑀅𑀦𑀥𑀺𑀕𑀫𑀲𑁆𑀲 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 𑀅𑀝𑁆𑀞𑀸𑀦𑀁 𑀞𑀸𑀦𑀜𑁆𑀘𑀸𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀺𑀬…𑀧𑁂… 𑀤𑀲𑁆𑀲𑀦𑀢𑁄 𑀘𑀸’’𑀢𑀺 𑀆𑀳. 𑀢𑀢𑁆𑀣 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀞𑀺𑀢𑀺 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀞𑀸𑀦𑀁 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀢𑀸. 𑀲𑀸 𑀳𑀺 𑀢𑀲𑁆𑀫𑀺𑀁 𑀲𑀢𑀺 𑀦 𑀳𑁄𑀢𑀺, 𑀅𑀲𑀢𑀺 𑀘 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲𑀸 𑀅𑀝𑁆𑀞𑀺𑀢𑀺𑀬𑀸 𑀢𑀲𑁆𑀲 𑀅𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸 𑀏𑀯. 𑀦𑁂𑀲𑀁 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁. 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀓𑀸𑀫𑀥𑀸𑀢𑀼𑀆𑀤𑀻𑀦𑀁 𑀧𑀯𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁄, 𑀬𑀤𑀕𑁆𑀕𑁂𑀦 𑀥𑀸𑀢𑀼𑀯𑁂𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀢𑀤𑀕𑁆𑀕𑁂𑀦 𑀘𑀭𑀺𑀬𑀸𑀤𑀺𑀯𑀺𑀲𑁂𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀯𑀸 𑀥𑀫𑁆𑀫𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄. 𑀲𑀩𑁆𑀩𑀸𑀧𑀺 𑀳𑀺 𑀘𑀭𑀺𑀬𑀸 𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸 𑀏𑀯𑀸𑀢𑀺. 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀯𑀺𑀬. 𑀤𑀺𑀩𑁆𑀩𑀘𑀓𑁆𑀔𑀸𑀦𑀼𑀪𑀸𑀯𑀢𑁄 𑀧𑀢𑁆𑀢𑀩𑁆𑀩𑁂𑀦𑀸𑀢𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀭𑀲𑁆𑀲 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀮𑁄𑀳𑀺𑀢𑀯𑀡𑁆𑀡𑀤𑀲𑁆𑀲𑀦𑀫𑀼𑀔𑁂𑀦 𑀢𑀤𑀸 𑀧𑀯𑀢𑁆𑀢𑀫𑀸𑀦𑀘𑀺𑀢𑁆𑀢𑀚𑀸𑀦𑀦𑀢𑁆𑀣𑀁 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀸𑀫 𑀲𑀸𑀯𑀓𑀸𑀦𑀁, 𑀢𑀜𑁆𑀘 𑀔𑁄 𑀆𑀤𑀺𑀓𑀫𑁆𑀫𑀺𑀓𑀸𑀦𑀁, 𑀬𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀆𑀦𑀼𑀪𑀸𑀯𑀢𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀢𑁆𑀢𑀩𑁆𑀩𑀢𑀸 𑀲𑀺𑀬𑀸. 𑀩𑀼𑀤𑁆𑀥𑀸𑀦𑀁 𑀧𑀦 𑀬𑀤𑀺𑀧𑀺 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑀢𑁄 𑀧𑀕𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀕𑀫𑁄, 𑀢𑀣𑀸𑀧𑀺 𑀢𑀣𑀸𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀢𑁆𑀣𑀺 𑀯𑀺𑀚𑁆𑀚𑀸𑀢𑁆𑀢𑀬𑀲𑀺𑀤𑁆𑀥𑀺𑀬𑀸 𑀲𑀺𑀚𑁆𑀛𑀦𑀢𑁄. 𑀲𑁂𑀲𑀸𑀪𑀺𑀜𑁆𑀜𑀸𑀢𑁆𑀢𑀬𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀕𑀫𑁂𑀦 𑀧𑀢𑁆𑀢𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁪. 𑀅𑀥𑀺𑀯𑀼𑀢𑁆𑀢𑀺𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨-𑁨𑁪. 𑀤𑀼𑀢𑀺𑀬𑁂 𑀅𑀥𑀺𑀯𑀘𑀦𑀧𑀤𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀧𑀤𑀸𑀦𑀁. 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀲𑀤𑁆𑀤𑀸 𑀯𑀺𑀬 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀅𑀥𑀺𑀯𑀘𑀦𑀁 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀅𑀥𑀺𑀲𑀤𑁆𑀤𑁄 𑀉𑀧𑀭𑀺𑀪𑀸𑀕𑁂. 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀉𑀧𑀭𑀺 𑀯𑀘𑀦𑀁 𑀅𑀥𑀺𑀯𑀘𑀦𑀁, 𑀉𑀧𑀸𑀤𑀸𑀪𑀽𑀢𑀭𑀽𑀧𑀸𑀤𑀻𑀦𑀁 ¶ 𑀉𑀧𑀭𑀺 𑀧𑀜𑁆𑀜𑀧𑀺𑀬𑀫𑀸𑀦𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀤𑀻𑀧𑀓𑀧𑀤𑀸𑀦𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲 𑀧𑀤𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀅𑀥𑀺𑀯𑀘𑀦𑀧𑀤𑀸𑀦𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀬𑁂’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀅𑀥𑀺𑀯𑀘𑀦𑀸𑀦𑀁. 𑀬𑁂𑀢𑀺 𑀔𑀦𑁆𑀥𑀸𑀤𑀬𑁄. 𑀅𑀥𑀺𑀯𑀼𑀢𑁆𑀢𑀺𑀢𑀸𑀬 𑀅𑀥𑀺𑀯𑀼𑀢𑁆𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀅𑀥𑀺𑀓𑀜𑁆𑀳𑀺 𑀲𑀪𑀸𑀯𑀥𑀫𑁆𑀫𑁂𑀲𑀼 𑀲𑀲𑁆𑀲𑀢𑀸𑀤𑀺𑀁, 𑀧𑀓𑀢𑀺𑀆𑀤𑀺𑀁, 𑀤𑁆𑀭𑀩𑁆𑀬𑀸𑀤𑀺𑀁, 𑀚𑀻𑀯𑀸𑀤𑀺𑀁, 𑀓𑀸𑀬𑀸𑀤𑀺𑀜𑁆𑀘, 𑀅𑀪𑀽𑀢𑀁 𑀅𑀢𑁆𑀣𑀁 𑀅𑀚𑁆𑀛𑀸𑀭𑁄𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀬𑁄 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦𑀸𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀅𑀥𑀺𑀯𑀼𑀢𑁆𑀢𑀺𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀲𑀺𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 ¶ 𑀲𑀓𑀮𑀝𑁆𑀞𑁂𑀦𑀸𑀢𑀺 𑀦𑀺𑀲𑁆𑀲𑁂𑀲𑀝𑁆𑀞𑁂𑀦. 𑀅𑀦𑀯𑀲𑁂𑀲𑀨𑀭𑀡𑀯𑀲𑁂𑀦 𑀘𑁂𑀢𑁆𑀣 𑀲𑀓𑀮𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀯𑀺𑀬 𑀏𑀓𑀤𑁂𑀲𑁂 𑀅𑀝𑁆𑀞𑀢𑁆𑀯𑀸 𑀅𑀦𑀯𑀲𑁂𑀲𑀢𑁄 𑀕𑀳𑁂𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀤𑀸𑀭𑀫𑁆𑀫𑀡𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑀁 𑀓𑀲𑀺𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀥𑀫𑁆𑀫𑀸𑀦𑀁. 𑀔𑁂𑀢𑁆𑀢𑀝𑁆𑀞𑁂𑀦𑀸𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀝𑁆𑀞𑁂𑀦. 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂𑀦. 𑀬𑀣𑀸 𑀔𑁂𑀢𑁆𑀢𑀁 𑀲𑀲𑁆𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀯𑀟𑁆𑀠𑀦𑀝𑁆𑀞𑀸𑀦𑀜𑁆𑀘, 𑀏𑀯𑀫𑁂𑀯 𑀢𑀁 𑀢 𑀛𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺. 𑀬𑁄𑀕𑀺𑀦𑁄 𑀯𑀸 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑁂𑀦. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀇𑀤𑀁 ‘‘𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀯 𑀳𑀺 𑀲𑀩𑁆𑀩𑀢𑁆𑀣 𑀓𑀲𑀺𑀡𑀁 𑀯𑀟𑁆𑀠𑁂𑀢𑀩𑁆𑀩𑀁. 𑀢𑁂𑀦 𑀢𑁂𑀦 𑀯𑀸 𑀓𑀸𑀭𑀡𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀉𑀧𑀭𑀺𑀆𑀤𑀻𑀲𑀼 𑀓𑀲𑀺𑀡𑀯𑀟𑁆𑀠𑀦𑀓𑀸𑀭𑀡𑁂𑀦. 𑀬𑀣𑀸 𑀓𑀺𑀦𑁆𑀢𑀺 𑀆𑀳 ‘‘𑀆𑀮𑁄𑀓𑀫𑀺𑀯 𑀭𑀽𑀧𑀤𑀲𑁆𑀲𑀦𑀓𑀸𑀫𑁄’’𑀢𑀺. 𑀬𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀉𑀤𑁆𑀥𑀁 𑀘𑁂 𑀭𑀽𑀧𑀁 𑀤𑀝𑁆𑀞𑀼𑀓𑀸𑀫𑁄, 𑀉𑀤𑁆𑀥𑀁 𑀆𑀮𑁄𑀓𑀁 𑀧𑀲𑀸𑀭𑁂𑀢𑀺. 𑀅𑀥𑁄 𑀘𑁂, 𑀅𑀥𑁄. 𑀲𑀫𑀦𑁆𑀢𑀢𑁄 𑀘𑁂 𑀭𑀽𑀧𑀁 𑀤𑀝𑁆𑀞𑀼𑀓𑀸𑀫𑁄, 𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀧𑀲𑀸𑀭𑁂𑀢𑀺, 𑀏𑀯𑀁 𑀲𑀩𑁆𑀩𑀓𑀲𑀺𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲𑀸𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀏𑀓𑁂𑀓𑀲𑁆𑀲. 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑀦𑀢𑁆𑀣𑀦𑁆𑀢𑀺 𑀅𑀜𑁆𑀜𑀓𑀲𑀺𑀡𑀪𑀸𑀯𑀸𑀦𑀼𑀧𑀕𑀫𑀦𑀤𑀻𑀧𑀦𑀢𑁆𑀣𑀁, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑀺𑀡𑀪𑀸𑀯𑀸𑀦𑀼𑀧𑀕𑀫𑀦𑀤𑀻𑀧𑀦𑀢𑁆𑀣𑀁. 𑀦 𑀳𑀺 𑀅𑀜𑁆𑀜𑁂𑀦 𑀧𑀲𑀸𑀭𑀺𑀢𑀓𑀲𑀺𑀡𑀁 𑀢𑀢𑁄 𑀅𑀜𑁆𑀜𑁂𑀦 𑀧𑀲𑀸𑀭𑀺𑀢𑀓𑀲𑀺𑀡𑀪𑀸𑀯𑀁 𑀉𑀧𑀕𑀘𑁆𑀙𑀢𑀺, 𑀏𑀯𑀫𑁆𑀧𑀺 𑀦𑁂𑀲𑀁 𑀅𑀜𑁆𑀜𑀓𑀲𑀺𑀡𑀲𑀫𑁆𑀪𑁂𑀤𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀅𑀜𑁆𑀜𑀁 𑀧𑀣𑀯𑀻𑀆𑀤𑀺. 𑀦 𑀳𑀺 𑀉𑀤𑀓𑁂𑀦 𑀞𑀺𑀢𑀝𑁆𑀞𑀸𑀦𑁂 𑀲𑀲𑀫𑁆𑀪𑀸𑀭𑀧𑀣𑀯𑀻 𑀅𑀢𑁆𑀣𑀺. 𑀅𑀜𑁆𑀜𑀓𑀲𑀺𑀡𑀲𑀫𑁆𑀪𑁂𑀤𑁄𑀢𑀺 𑀆𑀧𑁄𑀓𑀲𑀺𑀡𑀸𑀤𑀺𑀦𑀸 𑀲𑀗𑁆𑀓𑀭𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑁂𑀲𑀓𑀲𑀺𑀡𑁂𑀲𑀼.

𑀏𑀓𑀤𑁂𑀲𑁂 ¶ 𑀅𑀝𑁆𑀞𑀢𑁆𑀯𑀸 𑀅𑀦𑀯𑀲𑁂𑀲𑀨𑀭𑀡𑀁 𑀧𑀫𑀸𑀡𑀲𑁆𑀲 𑀅𑀕𑁆𑀕𑀳𑀡𑀢𑁄 𑀅𑀧𑁆𑀧𑀫𑀸𑀡𑀁. 𑀢𑁂𑀦𑁂𑀯 𑀳𑀺 𑀦𑁂𑀲𑀁 𑀓𑀲𑀺𑀡𑀲𑀫𑀜𑁆𑀜𑀸. 𑀢𑀣𑀸 𑀘𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀘𑁂𑀢𑀲𑀸 𑀨𑀭𑀦𑁆𑀢𑁄𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑁂𑀦 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁄. 𑀪𑀸𑀯𑀦𑀸𑀘𑀺𑀢𑁆𑀢𑀜𑁆𑀳𑀺 𑀓𑀲𑀺𑀡𑀁 𑀧𑀭𑀺𑀢𑁆𑀢𑀁 𑀯𑀸 𑀯𑀺𑀧𑀼𑀮𑀁 𑀯𑀸 𑀲𑀓𑀮𑀫𑁂𑀯 𑀫𑀦𑀲𑀺 𑀓𑀭𑁄𑀢𑀺, 𑀦 𑀏𑀓𑀤𑁂𑀲𑀁. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀯𑀺𑀜𑁆𑀜𑀸𑀡𑀓𑀲𑀺𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀲𑀺𑀡𑀯𑀲𑁂𑀦𑀸𑀢𑀺 𑀉𑀕𑁆𑀖𑀸𑀝𑀺𑀢𑀓𑀲𑀺𑀡𑀯𑀲𑁂𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀉𑀤𑁆𑀥𑀁𑀅𑀥𑁄𑀢𑀺𑀭𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁆𑀢𑀓𑀜𑁆𑀳𑀺 𑀞𑀸𑀦𑀁 𑀓𑀲𑀺𑀡𑀁 𑀧𑀲𑀸𑀭𑀺𑀢𑀁, 𑀢𑀢𑁆𑀢𑀓𑀁 𑀆𑀓𑀸𑀲𑀪𑀸𑀯𑀦𑀸𑀯𑀲𑁂𑀦 𑀆𑀓𑀸𑀲𑀁 𑀳𑁄𑀢𑀻𑀢𑀺. 𑀏𑀯𑀁 𑀬𑀢𑁆𑀢𑀓𑀁 𑀞𑀸𑀦𑀁 𑀆𑀓𑀸𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀺𑀢𑀁, 𑀢𑀢𑁆𑀢𑀓𑀁 𑀲𑀓𑀮𑀫𑁂𑀯 𑀨𑀭𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀢𑁄 𑀆𑀕𑀫𑀦𑀯𑀲𑁂𑀦 𑀯𑀺𑀜𑁆𑀜𑀸𑀡𑀓𑀲𑀺𑀡𑁂𑀧𑀺 𑀉𑀤𑁆𑀥𑀁𑀅𑀥𑁄𑀢𑀺𑀭𑀺𑀬𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀯𑀲𑁂𑀦 𑀢𑀢𑁆𑀣 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑁂 𑀉𑀤𑁆𑀥𑀁𑀅𑀥𑁄𑀢𑀺𑀭𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀓𑀲𑀺𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀸𑀴𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 ¶ 𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀦𑁆𑀢𑀺 𑀏𑀓𑀦𑁆𑀢𑀢𑁄 𑀳𑀺𑀢𑀸𑀦𑀼𑀧𑁆𑀧𑀢𑁆𑀢𑀺𑀁. 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺 𑀧𑀭𑀫𑀘𑀺𑀢𑁆𑀢𑀽𑀧𑀲𑀫𑀁. 𑀓𑀺𑀮𑁂𑀲𑀲𑁂𑀦𑀦𑁆𑀢𑀺 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀁 𑀧𑀞𑀫𑀁 𑀓𑀺𑀮𑁂𑀲𑀲𑁂𑀦𑀁. 𑀲𑀸 𑀳𑀺 𑀓𑀺𑀮𑁂𑀲𑀲𑁂𑀦𑀸 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀪𑀸𑀯𑀸𑀧𑀺 𑀧𑀝𑀺𑀧𑀢𑁆𑀣𑀬𑀫𑀸𑀦𑀸 𑀧𑀺𑀬𑀸𑀬𑀺𑀢𑀩𑁆𑀩𑀇𑀘𑁆𑀙𑀺𑀢𑀩𑁆𑀩𑀭𑀽𑀧𑀲𑀪𑀸𑀯𑀢𑁄 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀸 𑀦𑀸𑀫 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀲𑁂𑀦. 𑀅𑀳𑀁 𑀏𑀓𑁄𑀯 𑀛𑀸𑀬𑀦𑁆𑀢𑁄𑀢𑀺 𑀅𑀳𑀁 𑀕𑀡𑀲𑀗𑁆𑀕𑀡𑀺𑀓𑀸𑀬 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘 𑀅𑀪𑀸𑀯𑀢𑁄 𑀏𑀓𑁄 𑀅𑀲𑀳𑀸𑀬𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬𑀦𑁆𑀢𑁄. 𑀅𑀦𑀼𑀩𑀼𑀚𑁆𑀛𑀺𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀩𑀼𑀚𑁆𑀛𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀲𑁂𑀦𑀁 𑀚𑀺𑀦𑀺𑀢𑁆𑀯𑀸 𑀅𑀳𑀁 𑀏𑀓𑁄𑀯 𑀛𑀸𑀬𑀦𑁆𑀢𑁄 ‘‘𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀅𑀭𑀳𑀢𑁆𑀢𑀲𑀼𑀔𑀁 𑀧𑀝𑀺𑀯𑀺𑀚𑁆𑀛𑀺𑀁, 𑀢𑀲𑁆𑀫𑀸 𑀚𑀦𑁂𑀦 𑀫𑀺𑀢𑁆𑀢𑀲𑀦𑁆𑀣𑀯𑀁 𑀦 𑀓𑀭𑁄𑀫𑀺, 𑀢𑁂𑀦𑁂𑀯 𑀘 𑀫𑁂 𑀓𑀸𑀭𑀡𑁂𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀓𑁆𑀔𑀻 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺. 𑀅𑀢𑁆𑀣𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼𑀦𑁆𑀢𑀺 𑀇𑀢𑀺𑀲𑀤𑁆𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀢𑁆𑀣𑁄𑀢𑀺 𑀕𑀳𑁂𑀢𑁆𑀯𑀸’’𑀢𑀺.

𑀓𑀸𑀴𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀞𑀫𑀫𑀳𑀸𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 ¶ 𑀯𑀼𑀘𑁆𑀘𑁂𑀣𑀸𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀤𑀼𑀢𑀺𑀬𑀧𑀤𑁂𑀧𑀻𑀢𑀺 ‘‘𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺 𑀏𑀯𑀁 𑀤𑀼𑀢𑀺𑀬𑀯𑀸𑀓𑁆𑀬𑁂𑀧𑀺. 𑀢𑁂 𑀓𑀺𑀭 𑀪𑀺𑀓𑁆𑀔𑀽. 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀦 𑀘𑁂𑀯 𑀲𑀫𑁆𑀫𑀤𑁂𑀯 𑀧𑀓𑀸𑀭𑁂𑀳𑀺 𑀕𑀳𑁂𑀲𑁆𑀲𑀦𑁆𑀢𑀺 𑀜𑀸𑀧𑁂𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀣𑀸 𑀆𑀭𑀸𑀥𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀲𑀧𑀘𑁆𑀘𑀬𑀦𑀸𑀫𑀭𑀽𑀧𑀸𑀦𑀁 𑀬𑀸𑀣𑀸𑀯𑀢𑁄 𑀅𑀯𑀩𑁄𑀥𑁄 𑀏𑀯 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀦𑀢𑁆𑀣𑀺, 𑀓𑀼𑀢𑁄 𑀧𑀯𑁂𑀤𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀭𑀸𑀥𑀦𑀦𑁆𑀢𑀺 𑀬𑀸𑀣𑀸𑀯𑀧𑀯𑁂𑀤𑀦𑁂𑀦 𑀘𑀺𑀢𑁆𑀢𑀲𑁆𑀲 𑀧𑀭𑀺𑀢𑁄𑀲𑀦𑀁.

𑀏𑀓𑁄 𑀧𑀜𑁆𑀳𑁄𑀢𑀺 𑀏𑀓𑁄 𑀧𑀜𑁆𑀳𑀫𑀕𑁆𑀕𑁄, 𑀏𑀓𑀁 𑀧𑀜𑁆𑀳𑀕𑀯𑁂𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑁄 𑀉𑀤𑁆𑀤𑁂𑀲𑁄𑀢𑀺 𑀏𑀓𑀁 𑀉𑀤𑁆𑀤𑀺𑀲𑀦𑀁 𑀅𑀢𑁆𑀣𑀲𑁆𑀲 𑀲𑀁𑀔𑀺𑀢𑁆𑀢𑀯𑀘𑀦𑀁. 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀦𑀺𑀤𑁆𑀤𑀺𑀲𑀦𑀁 𑀅𑀢𑁆𑀣𑀲𑁆𑀲 𑀯𑀺𑀯𑀭𑀺𑀢𑁆𑀯𑀸 𑀓𑀣𑀦𑀁. 𑀳𑁂𑀢𑀼𑀦𑀸𑀢𑀺 ‘‘𑀅𑀦𑁆𑀢𑀯𑀦𑁆𑀢𑀢𑁄 𑀅𑀦𑀘𑁆𑀘𑀦𑁆𑀢𑀺𑀓𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑁆𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑀣𑀸 𑀇𑀫𑁂 𑀲𑀗𑁆𑀔𑀸𑀭𑀸 𑀏𑀢𑀭𑀳𑀺, 𑀏𑀯𑀁 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀘 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸𑀢𑀺 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀦𑀬𑁂𑀦.

𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀅𑀦𑀯𑀲𑁂𑀲𑀸 𑀲𑀢𑁆𑀢𑀸. 𑀢𑁂 𑀧𑀦 𑀪𑀯𑀪𑁂𑀤𑀢𑁄 𑀲𑀗𑁆𑀔𑁂𑀧𑁂𑀦𑁂𑀯 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀪𑀯𑀸𑀤𑀻𑀲𑀽’’𑀢𑀺𑀆𑀤𑀺𑀫𑀸𑀳 ¶ . 𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀳𑁄𑀢𑀺 𑀬𑀣𑀸 ‘‘𑀉𑀭𑀲𑀺𑀮𑁄𑀫𑁄’’𑀢𑀺 𑀆𑀳 ‘‘𑀆𑀳𑀸𑀭𑀢𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺. 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀞𑀺𑀢𑀺, 𑀆𑀳𑀸𑀭𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀲𑀫𑀸𑀲𑀯𑀺𑀕𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀢𑁆𑀣𑁄 𑀳𑁂𑀢𑁆𑀣 𑀆𑀳𑀸𑀭𑀲𑀤𑁆𑀤𑁄 ‘‘𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁩𑁨) 𑀯𑀺𑀬. 𑀏𑀯𑀜𑁆𑀳𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀲𑀜𑁆𑀜𑀲𑀢𑁆𑀢𑀸 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀲𑀸 𑀧𑀦𑀸𑀬𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑀸𑀭𑀥𑀫𑁆𑀫𑁄. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁬). 𑀬𑀤𑀺 𑀏𑀯𑀁 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀤𑁂𑀲𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀢𑁂𑀦𑁂𑀯𑀸𑀳 𑁋 ‘‘𑀏𑀓𑀥𑀫𑁆𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 ¶ 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺. 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀆𑀳𑀸𑀭𑀧𑀭𑀺𑀬𑀸𑀬𑁂𑀦 𑀲𑀸𑀫𑀜𑁆𑀜𑀢𑁄 𑀧𑀘𑁆𑀘𑀬𑀥𑀫𑁆𑀫𑁄 𑀯𑀼𑀢𑁆𑀢𑁄, 𑀅𑀬𑀁 𑀆𑀳𑀸𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄.

𑀘𑁄𑀤𑀓𑁄 𑀯𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀁 𑀬𑀸𑀣𑀸𑀯𑀢𑁄 𑀅𑀧𑁆𑀧𑀝𑀺𑀯𑀺𑀚𑁆𑀛𑀫𑀸𑀦𑁄 𑀦𑁂𑀬𑁆𑀬𑀢𑁆𑀣𑀁 𑀲𑀼𑀢𑁆𑀢𑀧𑀤𑀁 𑀦𑀻𑀢𑀢𑁆𑀣𑀢𑁄 𑀤𑀳𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀯𑀘𑀦𑀫𑀢𑁆𑀢𑁂 𑀞𑀢𑁆𑀯𑀸 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀆𑀘𑀭𑀺𑀬𑁄 𑀅𑀯𑀺𑀧𑀭𑀻𑀢𑀁 𑀢𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑁂𑀲𑀜𑁆𑀳𑀺 𑀛𑀸𑀦𑀁 𑀆𑀳𑀸𑀭𑁄 𑀳𑁄𑀢𑀻’’𑀢𑀺 𑀆𑀳. 𑀛𑀸𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑀸𑀯𑀳𑀁 𑀲𑀜𑁆𑀜𑀸𑀬 𑀯𑀺𑀭𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁. 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑀸𑀳𑀸𑀭𑀸’’𑀢𑀺 𑀯𑀘𑀦𑀁 𑀅𑀲𑀜𑁆𑀜𑀪𑀯𑁂 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀘𑁆𑀘𑀬𑀸𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀇𑀤𑀁 𑀲𑀸𑀲𑀦𑁂 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀢𑁄 𑀆𑀳𑀸𑀭𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄, ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀏𑀢𑁆𑀣 𑀬𑀤𑀺 𑀢𑁂𑀬𑁂𑀯 𑀕𑀬𑁆𑀳𑀦𑁆𑀢𑀺, 𑀅𑀩𑁆𑀬𑀸𑀧𑀺𑀢𑀤𑁄𑀲𑀫𑀸𑀧𑀦𑁆𑀦𑁄. 𑀅𑀣 𑀲𑀩𑁆𑀩𑁄𑀧𑀺 𑀧𑀘𑁆𑀘𑀬𑀥𑀫𑁆𑀫𑁄 𑀆𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀇𑀫𑀸𑀬 𑀆𑀳𑀸𑀭𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀆𑀧𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. ‘‘𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀏𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀻𑀦𑀁 𑀑𑀚𑀝𑁆𑀞𑀫𑀓𑀭𑀽𑀧𑀸𑀳𑀭𑀡𑀸𑀤𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀳𑀸𑀭𑀪𑀸𑀯𑁄. 𑀬𑀣𑀸 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀳𑀭𑀡𑁂𑀦 𑀭𑀽𑀧𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺, 𑀏𑀯𑀁 𑀨𑀲𑁆𑀲𑀸𑀤𑀬𑁄 𑀯𑁂𑀤𑀦𑀸𑀤𑀺𑀆𑀳𑀭𑀡𑁂𑀦 𑀦𑀸𑀫𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀚𑀦𑀓𑀪𑀸𑀯𑁂 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁄 𑀑𑀚𑀸𑀤𑀻𑀲𑀼 𑀲𑀸𑀢𑀺𑀲𑀬𑁄 𑀮𑀩𑁆𑀪𑀫𑀸𑀦𑁄 𑀫𑀼𑀔𑁆𑀬𑁄 𑀆𑀳𑀸𑀭𑀝𑁆𑀞𑁄𑀢𑀺 𑀢𑁂 𑀏𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀳𑀸𑀭𑀮𑀓𑁆𑀔𑀡𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀭𑀺𑀬𑀸𑀬𑁂𑀦 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑁄, 𑀲𑀩𑁆𑀩𑁄 𑀧𑀘𑁆𑀘𑀬𑀥𑀫𑁆𑀫𑁄 𑀅𑀢𑁆𑀢𑀦𑁄 𑀨𑀮𑀁 ¶ 𑀆𑀳𑀭𑀢𑀻𑀢𑀺 𑀇𑀫𑀁 𑀧𑀭𑀺𑀬𑀸𑀬𑀁 𑀮𑀪𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀥𑀫𑁆𑀫𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀦𑁆𑀢𑀺 𑀧𑀘𑁆𑀘𑀬𑀸𑀳𑀸𑀭𑁄. 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄𑀧𑀺 𑀕𑀳𑀺𑀢𑁄𑀯 𑀳𑁄𑀢𑀻𑀢𑀺 𑀬𑀸𑀯𑀢𑀸 𑀲𑁄𑀧𑀺 𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀚𑀦𑀓𑁄 𑀉𑀧𑀢𑁆𑀣𑀫𑁆𑀪𑀓𑁄 𑀘 𑀳𑀼𑀢𑁆𑀯𑀸 𑀢𑀁 𑀢𑀁 𑀨𑀮𑀁 𑀆𑀳𑀭𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺.

𑀢𑀢𑁆𑀣𑀸𑀢𑀺 ¶ 𑀧𑀭𑀺𑀬𑀸𑀬𑀸𑀳𑀸𑀭𑁄, 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄𑀢𑀺 𑀤𑁆𑀯𑀻𑀲𑀼 𑀆𑀳𑀸𑀭𑁂𑀲𑀼 𑀅𑀲𑀜𑁆𑀜𑀪𑀯𑁂 𑀬𑀤𑀺𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄 𑀦 𑀮𑀩𑁆𑀪𑀢𑀺, 𑀧𑀭𑀺𑀬𑀸𑀬𑀸𑀳𑀸𑀭𑁄 𑀧𑀦 𑀮𑀩𑁆𑀪𑀢𑁂𑀯. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀺𑀢𑁆𑀣𑀓𑀭𑀫𑀢𑀦𑀺𑀲𑁆𑀲𑀺𑀢𑀸𑀦𑀁 𑀛𑀸𑀦𑀪𑀸𑀯𑀦𑀸𑀬 𑀅𑀲𑀺𑀚𑁆𑀛𑀦𑀢𑁄 ‘‘𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂’’𑀢𑀺 𑀯𑀼𑀢𑁆𑀢𑀁. 𑀲𑀸𑀲𑀦𑀺𑀓𑀸 𑀢𑀸𑀤𑀺𑀲𑀁 𑀛𑀸𑀦𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 ‘‘𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀺𑀢𑁆𑀣𑀺𑀬𑀸 𑀳𑀺 𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑁂 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄 𑀲𑀜𑁆𑀜𑀸𑀯𑀺𑀭𑀸𑀕𑀸𑀯𑀺𑀭𑀸𑀕𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀺𑀦𑁄𑀯 𑀳𑀼𑀢𑁆𑀯𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀓𑁆𑀔𑀡𑀪𑀽𑀫𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀲𑀸𑀲𑀦𑀺𑀓𑀸. 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑁆𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀯𑀸𑀬𑁄𑀓𑀲𑀺𑀡𑁂 𑀧𑀞𑀫𑀸𑀤𑀻𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑁂 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀥𑀺𑀕𑀫𑀸𑀬 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸’’𑀢𑀺.

𑀓𑀲𑁆𑀫𑀸 (𑀤𑀻. 𑀦𑀺. 𑀝𑀻. 𑁧.𑁬𑁮-𑁭𑁩; 𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁬𑁮-𑁭𑁩) 𑀧𑀦𑁂𑀢𑁆𑀣 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂, 𑀬𑀣𑁂𑀯 𑀳𑀺 𑀭𑀽𑀧𑀧𑀝𑀺𑀪𑀸𑀕𑀪𑀽𑀢𑁂𑀲𑀼 𑀓𑀲𑀺𑀡𑀯𑀺𑀲𑁂𑀲𑁂𑀲𑀼 𑀭𑀽𑀧𑀯𑀺𑀪𑀸𑀯𑀦𑁂𑀦 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀺𑀲𑁂𑀲𑁄 𑀲𑀘𑁆𑀙𑀺𑀓𑀭𑀻𑀬𑀢𑀺, 𑀏𑀯𑀁 𑀅𑀧𑀭𑀺𑀩𑁆𑀬𑀢𑁆𑀢𑀯𑀺𑀕𑁆𑀕𑀳𑀢𑀸𑀬 𑀅𑀭𑀽𑀧𑀧𑀝𑀺𑀪𑀸𑀕𑀪𑀽𑀢𑁂 𑀓𑀲𑀺𑀡𑀯𑀺𑀲𑁂𑀲𑁂 𑀅𑀭𑀽𑀧𑀯𑀺𑀪𑀸𑀯𑀦𑁂𑀦 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀲𑀗𑁆𑀔𑀸𑀢𑁄 𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀺𑀲𑁂𑀲𑁄 𑀅𑀥𑀺𑀕𑀫𑀻𑀬𑀢𑀻𑀢𑀺. 𑀏𑀢𑁆𑀣 𑀘 ‘‘𑀲𑀜𑁆𑀜𑀸 𑀭𑁄𑀕𑁄, 𑀲𑀜𑁆𑀜𑀸 𑀕𑀡𑁆𑀟𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪), ‘‘𑀥𑀺 𑀘𑀺𑀢𑁆𑀢𑀁, 𑀥𑀺 𑀯𑀢𑁂𑀢𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦 𑀅𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀢𑀤𑀪𑀸𑀯𑁂 𑀘 𑀲𑀦𑁆𑀢𑀧𑀡𑀻𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀅𑀪𑀺𑀲𑀗𑁆𑀔𑀭𑀡𑀁 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀧𑀦 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑁂𑀦 𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑀁. 𑀬𑀤𑀺 𑀏𑀯𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑁂𑀧𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀲𑀸𑀧𑀺 𑀅𑀭𑀽𑀧𑀧𑀝𑀺𑀪𑀸𑀕𑀢𑀸 𑀮𑀩𑁆𑀪𑀢𑀻𑀢𑀺? 𑀇𑀘𑁆𑀙𑀺𑀢𑀫𑁂𑀯𑁂𑀢𑀁, 𑀓𑁂𑀲𑀜𑁆𑀘𑀺 𑀅𑀯𑀘𑀦𑀁 𑀧𑀦𑁂𑀢𑁆𑀣 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀕𑁆𑀕𑀳𑀺𑀢𑀪𑀸𑀯𑁂𑀦. 𑀬𑀣𑀸 𑀳𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫𑀸𑀪𑀸𑀯𑀫𑀢𑁆𑀢𑁂𑀦 𑀧𑀭𑀺𑀦𑀺𑀧𑁆𑀨𑀦𑁆𑀦𑀸, 𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫𑀧𑀭𑀺𑀪𑀸𑀲𑀪𑀽𑀢𑁂 𑀘 𑀯𑀺𑀲𑀬𑀯𑀺𑀲𑁂𑀲𑁂 𑀧𑀸𑀢𑀼𑀪𑀯𑀢𑀺, 𑀏𑀯𑀁 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀧𑀻𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀢𑀺𑀢𑁆𑀣𑀺𑀬𑁂𑀳𑁂𑀯 𑀧𑀦 𑀢𑀲𑁆𑀲𑀸 𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑀸𑀬 𑀢𑁂𑀲𑀜𑁆𑀘 𑀯𑀺𑀲𑀬𑀧𑀣𑁂 𑀲𑀽𑀧𑀦𑀺𑀩𑀦𑁆𑀥𑀦𑀲𑁆𑀲𑁂𑀯 𑀢𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀢𑁄 𑀤𑀺𑀝𑁆𑀞𑀺𑀯𑀦𑁆𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀘𑀢𑀼𑀢𑁆𑀣𑁂𑀬𑁂𑀯 𑀪𑀽𑀢𑀓𑀲𑀺𑀡𑁂 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘 ¶ 𑀯𑀡𑁆𑀡𑀓𑀲𑀺𑀡𑁂𑀲𑀼 𑀯𑀺𑀬 𑀧𑀼𑀭𑀺𑀫𑀪𑀽𑀢𑀓𑀲𑀺𑀡𑀢𑁆𑀢𑀬𑁂𑀧𑀺 ¶ 𑀯𑀡𑁆𑀡𑀧𑁆𑀧𑀝𑀺𑀘𑁆𑀙𑀸𑀬𑀸𑀯 𑀧𑀡𑁆𑀡𑀢𑁆𑀢𑀺 𑀆𑀭𑀫𑁆𑀫𑀡𑀁 𑀛𑀸𑀦𑀲𑁆𑀲 𑀮𑁄𑀓𑀯𑁄𑀳𑀸𑀭𑀸𑀦𑀼𑀭𑁄𑀥𑁂𑀦𑁂𑀯 𑀧𑀯𑀢𑁆𑀢𑀺𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁭) 𑀧𑀣𑀯𑀻𑀓𑀲𑀺𑀡𑀲𑁆𑀲 𑀆𑀤𑀸𑀲𑀘𑀦𑁆𑀤𑀫𑀡𑁆𑀟𑀮𑀽𑀧𑀫𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀧𑀦 𑀪𑀽𑀢𑀓𑀲𑀺𑀡𑀁 𑀪𑀽𑀢𑀧𑁆𑀧𑀝𑀺𑀘𑁆𑀙𑀸𑀬𑀫𑁂𑀯 𑀛𑀸𑀦𑀲𑁆𑀲 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲𑁂𑀯𑀁 𑀅𑀭𑀽𑀧𑀧𑀝𑀺𑀪𑀸𑀕𑀢𑀸 𑀬𑀼𑀢𑁆𑀢𑀸𑀢𑀺 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀻𑀢𑀺 𑀚𑀺𑀕𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀥𑀺 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀚𑀺𑀕𑀼𑀘𑁆𑀙𑀸𑀫𑀺. 𑀥𑀺 𑀯𑀢𑁂𑀢𑀁 𑀘𑀺𑀢𑁆𑀢𑀦𑁆𑀢𑀺 𑀏𑀢𑀁 𑀫𑀫 𑀘𑀺𑀢𑁆𑀢𑀁 𑀚𑀺𑀕𑀼𑀘𑁆𑀙𑀺𑀢𑀁 𑀯𑀢 𑀳𑁄𑀢𑀼. 𑀯𑀢𑀸𑀢𑀺 𑀲𑀫𑁆𑀪𑀸𑀯𑀦𑁂. 𑀢𑁂𑀦 𑀚𑀺𑀕𑀼𑀘𑁆𑀙𑀦𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 𑀯𑀤𑀢𑀺. 𑀦𑀸𑀫𑀸𑀢𑀺 𑀘 𑀲𑀫𑁆𑀪𑀸𑀯𑀦𑁂 𑀏𑀯. 𑀢𑁂𑀦 𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀁 𑀲𑀫𑁆𑀪𑀸𑀯𑁂𑀢𑀺. 𑀘𑀺𑀢𑁆𑀢𑀲𑁆𑀲 𑀪𑀸𑀯𑀸𑀪𑀸𑀯𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑁄 𑀏𑀯 𑀲𑀸𑀥𑀼 𑀲𑀼𑀝𑁆𑀞𑀽𑀢𑀺 𑀇𑀫𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀢𑀢𑁆𑀣 𑀘 𑀅𑀪𑀺𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀢𑀣𑀸 𑀪𑀸𑀯𑀺𑀢𑀲𑁆𑀲 𑀛𑀸𑀦𑀲𑁆𑀲 𑀞𑀺𑀢𑀺𑀪𑀸𑀕𑀺𑀬𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸. 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀲𑁆𑀲𑁂𑀯 𑀢𑀣𑀸 𑀛𑀸𑀦𑀪𑀸𑀯𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺. 𑀧𑀡𑀺𑀳𑀺𑀢𑁄 𑀅𑀳𑁄𑀲𑀻𑀢𑀺 𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂 𑀞𑀧𑀺𑀢𑁄 𑀅𑀳𑁄𑀲𑀺. 𑀬𑀤𑀺 𑀞𑀸𑀦𑀸𑀤𑀺𑀦𑀸 𑀆𑀓𑀸𑀭𑁂𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀫𑁆𑀫𑀩𑀮𑁂𑀦, 𑀬𑀸𑀯 𑀪𑁂𑀤𑀸 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀆𑀳 ‘‘𑀢𑁂𑀦 𑀇𑀭𑀺𑀬𑀸𑀧𑀣𑁂𑀦𑀸’’𑀢𑀺𑀆𑀤𑀺. 𑀏𑀯𑀭𑀽𑀧𑀸𑀦𑀫𑁆𑀧𑀻𑀢𑀺 𑀏𑀯𑀁 𑀅𑀘𑁂𑀢𑀦𑀸𑀦𑀫𑁆𑀧𑀺. 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀲𑀘𑁂𑀢𑀦𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀁 𑀧𑀦 𑀅𑀘𑁂𑀢𑀦𑀸𑀦𑀁 𑀦𑁂𑀲𑀁 𑀧𑀘𑁆𑀘𑀬𑀸𑀳𑀸𑀭𑀲𑁆𑀲 𑀉𑀧𑀓𑀧𑁆𑀧𑀦𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀦 𑀓𑁂𑀯𑀮𑀫𑀸𑀕𑀫𑁄𑀬𑁂𑀯, 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀸𑀯 𑀢𑀺𑀝𑁆𑀞𑀦𑁆𑀢𑀻𑀢𑀺 𑀉𑀓𑁆𑀓𑀁𑀲𑀢𑁄 𑀧𑀜𑁆𑀘 𑀫𑀳𑀸𑀓𑀧𑁆𑀧𑀲𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺.

𑀬𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀫𑀢𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 𑀮𑀪𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀢𑁂 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄. 𑀬𑁂 𑀧𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑀫𑁂𑀯 𑀉𑀧𑀚𑀻𑀯𑀦𑁆𑀢𑀺, 𑀢𑁂 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀺𑀦𑁄. 𑀦𑁂𑀭𑀬𑀺𑀓𑀸𑀦𑀁 𑀧𑀦 𑀦𑁂𑀯 𑀉𑀝𑁆𑀞𑀸𑀦𑀯𑀻𑀭𑀺𑀬𑀯𑀲𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀁, 𑀧𑀼𑀜𑁆𑀜𑀨𑀮𑀲𑁆𑀲 𑀧𑀦 𑀮𑁂𑀲𑁄𑀧𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀬𑁂 𑀧𑀦 𑀦𑁂𑀭𑀬𑀺𑀓𑀸…𑀧𑁂… 𑀚𑀻𑀯𑀻𑀢𑀺 𑀯𑀼𑀢𑁆𑀢𑀸’’𑀢𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀆𑀳𑀭𑀡𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑀸, 𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀨𑀮𑀲𑁆𑀲𑀸𑀢𑀺 ¶ 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀺𑀁 𑀧𑀜𑁆𑀘 𑀆𑀳𑀸𑀭𑀸 𑀅𑀢𑁆𑀣𑀻’’𑀢𑀺 𑀘𑁄𑀤𑁂𑀢𑀺. 𑀆𑀘𑀭𑀺𑀬𑁄 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁂 𑀅𑀥𑀺𑀧𑁆𑀧𑁂𑀢𑁂 ‘‘𑀲𑀺𑀬𑀸 𑀢𑀯 𑀘𑁄𑀤𑀦𑀸 𑀅𑀯𑀲𑀭𑀸, 𑀲𑀸 𑀧𑀦 𑀏𑀢𑁆𑀣 𑀅𑀦𑀯𑀲𑀭𑀸’’𑀢𑀺 𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘, 𑀦 𑀧𑀜𑁆𑀘𑀸𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀬𑀸𑀬𑀸𑀳𑀸𑀭𑀲𑁆𑀲𑁂𑀯 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀦𑀼 𑀧𑀘𑁆𑀘𑀬𑁄 𑀆𑀳𑀸𑀭𑁄’𑀢𑀺 𑀯𑀼𑀢𑁆𑀢𑀫𑁂𑀢’’𑀦𑁆𑀢𑀺 𑀆𑀳. 𑀢𑀲𑁆𑀫𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑀲𑁆𑀲 𑀆𑀳𑀸𑀭𑁄𑀢𑀺 𑀇𑀘𑁆𑀙𑀺𑀢𑀢𑁆𑀢𑀸. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀦𑁆𑀢𑁄 ‘‘𑀬𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀫𑀼𑀔𑁆𑀬𑀸𑀳𑀸𑀭𑀯𑀲𑁂𑀦𑀧𑀺 ¶ 𑀦𑁂𑀭𑀬𑀺𑀓𑀸𑀦𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑀁…𑀧𑁂… 𑀲𑀸𑀥𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀦𑁂𑀭𑀬𑀺𑀓𑀸 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀦𑁄𑀧𑀺 𑀳𑁄𑀦𑁆𑀢𑀻𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀔𑁂𑀴𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑁄𑀢𑀺 𑀢𑀬𑁄 𑀅𑀭𑀽𑀧𑀸𑀳𑀸𑀭𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀅𑀯𑀲𑁂𑀲𑀸𑀦𑀦𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑁂𑀳𑀺 𑀅𑀯𑀲𑁂𑀲𑀸𑀦𑀁 𑀓𑀸𑀫𑀪𑀯𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁. 𑀧𑀘𑁆𑀘𑀬𑀸𑀳𑀸𑀭𑁄 𑀳𑀺 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁄𑀢𑀺.

𑀧𑀞𑀫𑀫𑀳𑀸𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀤𑀼𑀢𑀺𑀬𑀫𑀳𑀸𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁮-𑁨𑁯. 𑀅𑀝𑁆𑀞𑀫𑁂 𑀏𑀯𑀁𑀦𑀸𑀫𑀓𑁂𑀢𑀺 𑀓𑀚𑀗𑁆𑀕𑀮𑀸𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀓𑁂 𑀫𑀚𑁆𑀛𑀺𑀫𑀧𑁆𑀧𑀤𑁂𑀲𑀲𑁆𑀲 𑀫𑀭𑀺𑀬𑀸𑀤𑀪𑀽𑀢𑁂 𑀦𑀕𑀭𑁂. ‘‘𑀦𑀺𑀕𑀫𑁂’’𑀢𑀺𑀧𑀺 𑀯𑀤𑀦𑁆𑀢𑀺, ‘‘𑀦𑀺𑀘𑀼𑀮𑀯𑀦𑁂’’𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀺𑀘𑀼𑀮𑀁 𑀦𑀸𑀫 𑀏𑀓𑀸 𑀭𑀼𑀓𑁆𑀔𑀚𑀸𑀢𑀺, ‘‘𑀦𑀻𑀧𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑁂𑀦 𑀲𑀜𑁆𑀙𑀦𑁆𑀦𑁄 𑀫𑀳𑀸𑀯𑀦𑀲𑀡𑁆𑀟𑁄, 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀦𑀸 𑀦𑀬𑁂𑀦𑀸𑀢𑀺 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀦𑀦𑀼 𑀘 ‘‘𑀏𑀲𑁄 𑀘𑁂𑀯 𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀪𑀕𑀯𑀢𑀸 𑀳𑀺 𑀘𑀢𑁆𑀢𑀸𑀭𑁄𑀢𑀺𑀆𑀤𑀺𑀧𑀜𑁆𑀳𑀩𑁆𑀬𑀸𑀓𑀭𑀡𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀤𑀲𑁆𑀲𑀺𑀢𑀥𑀫𑁆𑀫𑀸 𑀅𑀜𑁆𑀜𑁄𑀬𑁂𑀯𑀢𑁆𑀣𑁄 𑀪𑀺𑀓𑁆𑀔𑀼𑀦𑀺𑀬𑀸 𑀤𑀲𑁆𑀲𑀺𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀦𑀯𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀤𑀼𑀢𑀺𑀬𑀫𑀳𑀸𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 ¶ 𑀉𑀕𑁆𑀕𑀦𑁆𑀢𑁆𑀯𑀸 𑀬𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀉𑀬𑁆𑀬𑁄𑀥𑀺𑀓𑀸, 𑀲𑀢𑁆𑀣𑀧𑁆𑀧𑀳𑀸𑀭𑁂𑀳𑀺 𑀬𑀼𑀚𑁆𑀛𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀕𑁆𑀕𑀦𑁆𑀢𑁆𑀯𑀸 𑀬𑀼𑀚𑁆𑀛𑀦𑀁 𑀯𑀸 𑀉𑀬𑁆𑀬𑁄𑀥𑀺𑀓𑁄, 𑀲𑀢𑁆𑀣𑀧𑁆𑀧𑀳𑀸𑀭𑁄. 𑀢𑁂𑀦𑀸𑀳 ‘‘𑀬𑀼𑀤𑁆𑀥𑀢𑁄 𑀦𑀺𑀯𑀢𑁆𑀢𑁄’’𑀢𑀺. 𑀉𑀧𑀲𑁆𑀲𑀼𑀢𑀺𑀯𑀲𑁂𑀦 𑀬𑀼𑀚𑁆𑀛𑀺𑀢𑀩𑁆𑀩𑀸𑀓𑀸𑀭𑀁 𑀜𑀢𑁆𑀯𑀸𑀢𑀺 𑀚𑁂𑀢𑀯𑀦𑁂 𑀓𑀺𑀭 𑀤𑀢𑁆𑀢𑀢𑁆𑀣𑁂𑀭𑁄 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀤𑁆𑀯𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀧𑀡𑁆𑀡𑀲𑀸𑀮𑀸𑀬 𑀯𑀲𑀦𑁆𑀢𑀺. 𑀢𑁂𑀲𑀼 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀘𑁆𑀙𑀺𑀫𑀬𑀸𑀫𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑁄 𑀤𑀢𑁆𑀢𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀬𑀁 𑀢𑁂 𑀫𑀳𑁄𑀤𑀭𑁄 𑀓𑁄𑀲𑀮𑁄 𑀪𑀼𑀢𑁆𑀢𑀪𑀢𑁆𑀢𑀫𑁂𑀯 𑀧𑀽𑀢𑀺𑀁 𑀓𑀭𑁄𑀢𑀺, 𑀬𑀼𑀤𑁆𑀥𑀯𑀺𑀘𑀸𑀭𑀡𑀁 𑀧𑀦 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀧𑀭𑀸𑀚𑀺𑀢𑁄𑀢𑁆𑀯𑁂𑀯 𑀯𑀤𑀸𑀧𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ¶ ‘‘𑀓𑀺𑀁 𑀧𑀦 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀪𑀦𑁆𑀢𑁂, 𑀬𑀼𑀤𑁆𑀥𑁄 𑀦𑀸𑀫 𑀧𑀤𑀼𑀫𑀩𑁆𑀬𑀽𑀳𑁄 𑀘𑀓𑁆𑀓𑀩𑁆𑀬𑀽𑀳𑁄 𑀲𑀓𑀝𑀩𑁆𑀬𑀽𑀳𑁄𑀢𑀺 𑀢𑀬𑁄 𑀩𑁆𑀬𑀽𑀳𑀸 𑀳𑁄𑀦𑁆𑀢𑀺, 𑀅𑀚𑀸𑀢𑀲𑀢𑁆𑀢𑀼𑀁 𑀕𑀡𑁆𑀳𑀺𑀢𑀼𑀓𑀸𑀫𑁂𑀦 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀩𑁆𑀩𑀢𑀓𑀼𑀘𑁆𑀙𑀺𑀲𑁆𑀫𑀺𑀁 𑀤𑁆𑀯𑀻𑀲𑀼 𑀧𑀩𑁆𑀩𑀢𑀪𑀺𑀢𑁆𑀢𑀻𑀲𑀼 𑀫𑀦𑀼𑀲𑁆𑀲𑁂 𑀞𑀧𑁂𑀢𑁆𑀯𑀸 𑀧𑀼𑀭𑀢𑁄 𑀤𑀼𑀩𑁆𑀩𑀮𑀁 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑀭𑀁 𑀧𑀯𑀺𑀝𑁆𑀞𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀧𑀯𑀺𑀝𑁆𑀞𑀫𑀕𑁆𑀕𑀁 𑀭𑀼𑀦𑁆𑀥𑀺𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀉𑀪𑁄𑀲𑀼 𑀧𑀩𑁆𑀩𑀢𑀪𑀺𑀢𑁆𑀢𑀻𑀲𑀼 𑀯𑀕𑁆𑀕𑀺𑀢𑁆𑀯𑀸 𑀦𑀤𑀺𑀢𑁆𑀯𑀸 𑀚𑀸𑀮𑀧𑀓𑁆𑀔𑀺𑀢𑁆𑀢𑀫𑀘𑁆𑀙𑀁 𑀯𑀺𑀬 𑀓𑀢𑁆𑀯𑀸 𑀲𑀓𑁆𑀓𑀸 𑀕𑀳𑁂𑀢𑀼’’𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 ‘‘𑀪𑀺𑀓𑁆𑀔𑀽𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀡𑀸𑀣𑀸’’𑀢𑀺 𑀭𑀜𑁆𑀜𑁄 𑀧𑁂𑀲𑀺𑀢𑀘𑀭𑀧𑀼𑀭𑀺𑀲𑀸 𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀗𑁆𑀕𑀸𑀫𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀓𑀝𑀩𑁆𑀬𑀽𑀳𑀁 𑀓𑀢𑁆𑀯𑀸 𑀅𑀚𑀸𑀢𑀲𑀢𑁆𑀢𑀼𑀁 𑀚𑀻𑀯𑀕𑁆𑀕𑀸𑀳𑀁 𑀕𑀡𑁆𑀳𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀲𑁆𑀲𑀼𑀢𑀺𑀯𑀲𑁂…𑀧𑁂... 𑀅𑀚𑀸𑀢𑀲𑀢𑁆𑀢𑀼𑀁 𑀕𑀡𑁆𑀳𑀻’’𑀢𑀺.

𑀤𑁄𑀡𑀧𑀸𑀓𑀦𑁆𑀢𑀺 𑀤𑁄𑀡𑀢𑀡𑁆𑀟𑀼𑀮𑀸𑀦𑀁 𑀧𑀓𑁆𑀓𑀪𑀢𑁆𑀢𑀁. 𑀤𑁄𑀡𑀦𑁆𑀢𑀺 𑀘𑀢𑀼𑀦𑀸𑀴𑀺𑀓𑀸𑀦𑀫𑁂𑀢𑀫𑀥𑀺𑀯𑀘𑀦𑀁. 𑀫𑀦𑀼𑀚𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀢𑀦𑀼𑀓𑀲𑁆𑀲𑀸𑀢𑀺 𑀢𑀦𑀼𑀓𑀸 𑀅𑀧𑁆𑀧𑀺𑀓𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀪𑀼𑀢𑁆𑀢𑀧𑀘𑁆𑀘𑀬𑀸 𑀯𑀺𑀲𑀪𑀸𑀕𑀯𑁂𑀤𑀦𑀸 𑀦 𑀳𑁄𑀦𑁆𑀢𑀺. 𑀲𑀡𑀺𑀓𑀦𑁆𑀢𑀺 𑀫𑀦𑁆𑀤𑀁 𑀫𑀼𑀤𑀼𑀓𑀁, 𑀅𑀧𑀭𑀺𑀲𑁆𑀲𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀚𑀻𑀭𑀢𑀻𑀢𑀺 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄 𑀧𑀘𑁆𑀘𑀢𑀺. 𑀆𑀬𑀼 𑀧𑀸𑀮𑀬𑀦𑁆𑀢𑀺 𑀦𑀺𑀭𑁄𑀕𑁄 𑀅𑀯𑁂𑀤𑀦𑁄 𑀚𑀻𑀯𑀺𑀢𑀁 𑀭𑀓𑁆𑀔𑀦𑁆𑀢𑁄. 𑀅𑀣 𑀯𑀸 𑀲𑀡𑀺𑀓𑀁 𑀚𑀻𑀭𑀢𑀻𑀢𑀺 𑀲𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀧𑀭𑀺𑀫𑀺𑀢𑀸𑀳𑀸𑀭𑀢𑀸𑀬 𑀲𑀡𑀺𑀓𑀁 𑀘𑀺𑀭𑁂𑀦 𑀚𑀻𑀭𑀢𑀺 𑀚𑀭𑀁 𑀧𑀸𑀧𑀼𑀡𑀸𑀢𑀺 𑀚𑀻𑀯𑀺𑀢𑀁 𑀧𑀸𑀮𑀬𑀦𑁆𑀢𑁄.

𑀇𑀫𑀁 𑀑𑀯𑀸𑀤𑀁 𑀅𑀤𑀸𑀲𑀻𑀢𑀺 𑀏𑀓𑀲𑁆𑀫𑀺𑀁 𑀓𑀺𑀭 (𑀥. 𑀧. 𑀅𑀝𑁆𑀞. 𑁨.𑁨𑁦𑁩 𑀧𑀲𑁂𑀦𑀤𑀺𑀓𑁄𑀲𑀮𑀯𑀢𑁆𑀣𑀼) 𑀲𑀫𑀬𑁂 𑀭𑀸𑀚𑀸 𑀢𑀡𑁆𑀟𑀼𑀮𑀤𑁄𑀡𑀲𑁆𑀲 𑀑𑀤𑀦𑀁 𑀢𑀤𑀼𑀧𑀺𑀬𑁂𑀦 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀪𑀼𑀜𑁆𑀚𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 ¶ 𑀪𑀢𑁆𑀢𑀲𑀫𑁆𑀫𑀤𑀁 𑀅𑀯𑀺𑀦𑁄𑀤𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀦𑀺𑀤𑁆𑀤𑀸𑀬 𑀅𑀪𑀺𑀪𑀼𑀬𑁆𑀬𑀫𑀸𑀦𑁄𑀧𑀺 𑀮𑀳𑀼𑀓𑀁 𑀦𑀺𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀯𑀺𑀲𑁆𑀲𑀫𑀺𑀢𑁆𑀯𑀸𑀯 𑀆𑀕𑀢𑁄𑀲𑀻’’𑀢𑀺. 𑀆𑀫, 𑀪𑀦𑁆𑀢𑁂, 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑁂 𑀫𑀳𑀸𑀤𑀼𑀓𑁆𑀔𑀁 𑀳𑁄𑀢𑀻𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚, 𑀅𑀢𑀺𑀩𑀳𑀼𑀪𑁄𑀚𑀻𑀦𑀁 𑀏𑀢𑀁 𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑁋

‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘,

𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄,

𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺. (𑀥. 𑀧. 𑁩𑁨𑁫; 𑀦𑁂𑀢𑁆𑀢𑀺. 𑁨𑁬, 𑁯𑁦) 𑁋

𑀇𑀫𑀸𑀬 ¶ 𑀕𑀸𑀣𑀸𑀬 𑀑𑀯𑀤𑀺𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀦𑀸𑀫 𑀫𑀢𑁆𑀢𑀸𑀬 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀢𑁆𑀢𑀪𑁄𑀚𑀺𑀦𑁄 𑀳𑀺 𑀲𑀼𑀔𑀁 𑀳𑁄𑀢𑀻’’𑀢𑀺 𑀉𑀢𑁆𑀢𑀭𑀺𑀧𑀺 𑀧𑀼𑀦 𑀑𑀯𑀤𑀦𑁆𑀢𑁄 ‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄’’𑀢𑀺 (𑀲𑀁. 𑀦𑀺. 𑁧.𑁧𑁨𑁪) 𑀇𑀫𑀁 𑀕𑀸𑀣𑀫𑀸𑀳.

𑀭𑀸𑀚𑀸 𑀧𑀦 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀫𑀻𑀧𑁂 𑀞𑀺𑀢𑀁 𑀧𑀦 𑀪𑀸𑀕𑀺𑀦𑁂𑀬𑁆𑀬𑀁 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀫𑀸𑀡𑀯𑀁 ‘‘𑀇𑀫𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳 𑀢𑀸𑀢𑀸’’𑀢𑀺 𑀆𑀳. 𑀲𑁄 𑀢𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳, ‘‘𑀫𑀸𑀡𑀯, 𑀇𑀫𑀁 𑀕𑀸𑀣𑀁 𑀦𑀝𑁄 𑀯𑀺𑀬 𑀧𑀢𑁆𑀢𑀧𑀢𑁆𑀢𑀝𑁆𑀞𑀸𑀦𑁂 𑀫𑀸 𑀅𑀯𑀘, 𑀭𑀜𑁆𑀜𑁄 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀞𑀫𑀧𑀺𑀡𑁆𑀟𑀸𑀤𑀻𑀲𑀼𑀧𑀺 𑀅𑀯𑀢𑁆𑀯𑀸 𑀅𑀯𑀲𑀸𑀦𑁂 𑀧𑀺𑀡𑁆𑀟𑁂 𑀕𑀳𑀺𑀢𑁂 𑀯𑀤𑁂𑀬𑁆𑀬𑀸𑀲𑀺, 𑀭𑀸𑀚𑀸 𑀲𑀼𑀢𑁆𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀙𑀟𑁆𑀟𑁂𑀲𑁆𑀲𑀢𑀺. 𑀅𑀣 𑀭𑀜𑁆𑀜𑁄 𑀳𑀢𑁆𑀣𑁂𑀲𑀼 𑀥𑁄𑀢𑁂𑀲𑀼 𑀧𑀸𑀢𑀺𑀁 𑀅𑀧𑀦𑁂𑀢𑁆𑀯𑀸 𑀲𑀺𑀢𑁆𑀣𑀸𑀦𑀺 𑀕𑀡𑁂𑀢𑁆𑀯𑀸 𑀢𑀤𑀼𑀧𑀺𑀬𑀁 𑀩𑁆𑀬𑀜𑁆𑀚𑀦𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀸𑀯𑀢𑀓𑁂 𑀢𑀡𑁆𑀟𑀼𑀮𑁂 𑀳𑀸𑀭𑁂𑀬𑁆𑀬𑀸𑀲𑀺. 𑀧𑀸𑀢𑀭𑀸𑀲𑁂 𑀘 𑀯𑀢𑁆𑀯𑀸 𑀲𑀸𑀬𑀫𑀸𑀲𑁂 𑀫𑀸 𑀯𑀤𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀭𑀜𑁆𑀜𑁄 𑀧𑀸𑀢𑀭𑀸𑀲𑀁 𑀪𑀼𑀢𑁆𑀯𑀸 𑀕𑀢𑀢𑁆𑀢𑀸 𑀲𑀸𑀬𑀫𑀸𑀲𑁂 𑀪𑀕𑀯𑀢𑁄 𑀅𑀦𑀼𑀲𑀺𑀝𑁆𑀞𑀺𑀦𑀺𑀬𑀸𑀫𑁂𑀦 𑀕𑀸𑀣𑀁 𑀅𑀪𑀸𑀲𑀺. 𑀭𑀸𑀚𑀸 𑀤𑀲𑀩𑀮𑀲𑁆𑀲 𑀯𑀘𑀦𑀁 𑀲𑀭𑀺𑀢𑁆𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀧𑀸𑀢𑀺𑀬𑀁𑀬𑁂𑀯 𑀙𑀟𑁆𑀟𑁂𑀲𑀺. 𑀭𑀜𑁆𑀜𑁄 𑀳𑀢𑁆𑀣𑁂𑀲𑀼 𑀥𑁄𑀢𑁂𑀲𑀼 𑀧𑀸𑀢𑀺𑀁 𑀅𑀧𑀦𑁂𑀢𑁆𑀯𑀸 𑀲𑀺𑀢𑁆𑀣𑀸𑀦𑀺 𑀕𑀡𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀢𑁆𑀢𑀓𑁂 𑀢𑀡𑁆𑀟𑀼𑀮𑁂 𑀳𑀭𑀺𑀁𑀲𑀼, 𑀲𑁄𑀧𑀺 𑀫𑀸𑀡𑀯𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀤𑀲𑀩𑀮𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑁄 𑀅𑀳𑁄𑀲𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀧𑀼𑀘𑁆𑀙𑀺 ‘‘𑀭𑀸𑀚𑀸 𑀓𑀺𑀢𑁆𑀢𑀓𑀁 𑀪𑀼𑀜𑁆𑀚𑀢𑀻’’𑀢𑀺? 𑀲𑁄 ‘‘𑀦𑀸𑀴𑀺𑀓𑁄𑀤𑀦’’𑀦𑁆𑀢𑀺 𑀆𑀳. 𑀯𑀝𑁆𑀝𑀺𑀲𑁆𑀲𑀢𑀺 𑀏𑀢𑁆𑀢𑀸𑀯𑀢𑀸 ¶ 𑀧𑀼𑀭𑀺𑀲𑀪𑀸𑀕𑁄 𑀏𑀲, 𑀇𑀢𑁄 𑀧𑀝𑁆𑀞𑀸𑀬 𑀕𑀸𑀣𑀁 𑀫𑀸 𑀯𑀤𑀻𑀢𑀺. 𑀭𑀸𑀚𑀸 𑀢𑀣𑁂𑀯 𑀲𑀡𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 𑀲𑀡𑁆𑀞𑀸𑀲𑀻’’𑀢𑀺. 𑀭𑀢𑁆𑀢𑀜𑁆𑀜𑀼𑀢𑀸𑀬 𑀯𑀟𑁆𑀠𑀺𑀢𑀁 𑀲𑀻𑀮𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀟𑁆𑀠𑀺𑀢𑀲𑀻𑀮𑁄. 𑀅𑀧𑁄𑀣𑀼𑀚𑁆𑀚𑀦𑀺𑀓𑁂𑀳𑀺 𑀲𑀻𑀮𑁂𑀳𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀳𑀺 𑀲𑀻𑀮𑀁 𑀅𑀭𑀺𑀬𑀁 𑀲𑀼𑀤𑁆𑀥𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀭𑀺𑀬𑀲𑀻𑀮𑁄’’𑀢𑀺. 𑀢𑀤𑁂𑀓𑀁 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀼𑀲𑀮𑀲𑀻𑀮𑁄’’𑀢𑀺.

𑀤𑀼𑀢𑀺𑀬𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀧𑀸𑀮𑀺𑀯𑀕𑁆𑀕𑁄

𑁧. 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀞𑀫𑁂 𑀅𑀢𑁆𑀣𑀯𑀲𑁂𑀢𑀺 𑀯𑀼𑀤𑁆𑀥𑀺𑀯𑀺𑀲𑁂𑀲𑁂, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼 𑀅𑀥𑀺𑀕𑀫𑀦𑀻𑀬𑁂 𑀳𑀺𑀢𑀯𑀺𑀲𑁂𑀲𑁂𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄𑀬𑁂𑀯 𑀯𑀸 𑀅𑀢𑁆𑀣𑀯𑀲𑁄, 𑀤𑀲 𑀅𑀢𑁆𑀣𑁂 𑀤𑀲 𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀢𑁆𑀣𑁄 𑀨𑀮𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀳𑁂𑀢𑀽𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀬𑁂 𑀫𑀫 𑀲𑁄𑀢𑀩𑁆𑀩𑀁 𑀲𑀤𑁆𑀤𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀬𑁄 𑀘 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀦𑁆𑀢𑀺 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂 𑀯𑀺𑀬 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸. 𑀲𑀼𑀔𑀯𑀺𑀳𑀸𑀭𑀸𑀪𑀸𑀯𑁂 𑀲𑀳𑀚𑀻𑀯𑀫𑀸𑀦𑀲𑁆𑀲 𑀅𑀪𑀸𑀯𑀢𑁄 𑀲𑀳𑀚𑀻𑀯𑀺𑀢𑀸𑀧𑀺 𑀲𑀼𑀔𑀯𑀺𑀳𑀸𑀭𑁄𑀯 𑀯𑀼𑀢𑁆𑀢𑁄. 𑀲𑀼𑀔𑀯𑀺𑀳𑀸𑀭𑁄 𑀦𑀸𑀫 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀦𑀁 𑀨𑀸𑀲𑀼𑀢𑀸.

𑀫𑀗𑁆𑀓𑀼𑀢𑀦𑁆𑀢𑀺 𑀦𑀺𑀢𑁆𑀢𑁂𑀚𑀢𑀁. 𑀥𑀫𑁆𑀫𑁂𑀦𑀸𑀢𑀺𑀆𑀤𑀻𑀲𑀼 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘.

𑀧𑀺𑀬𑀲𑀻𑀮𑀸𑀦𑀦𑁆𑀢𑀺 𑀲𑀺𑀓𑁆𑀔𑀸𑀓𑀸𑀫𑀸𑀦𑀁. 𑀢𑁂𑀲𑀜𑁆𑀳𑀺 𑀲𑀻𑀮𑀁 𑀧𑀺𑀬𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀺𑀓𑁆𑀔𑀸𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸’’𑀢𑀺. 𑀲𑀦𑁆𑀤𑀺𑀤𑁆𑀥𑀫𑀦𑀸𑀢𑀺 𑀲𑀁𑀲𑀬𑀁 𑀆𑀧𑀚𑁆𑀚𑀫𑀦𑀸 ¶ . 𑀉𑀩𑁆𑀩𑀴𑁆𑀳𑀸 𑀳𑁄𑀦𑁆𑀢𑀻𑀢𑀺 𑀧𑀻𑀴𑀺𑀢𑀸 𑀳𑁄𑀦𑁆𑀢𑀺. 𑀲𑀗𑁆𑀖𑀓𑀫𑁆𑀫𑀸𑀦𑀻𑀢𑀺 𑀲𑀢𑀺𑀧𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀲𑀗𑁆𑀖𑀓𑀫𑁆𑀫𑀪𑀸𑀯𑁂 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦 𑀉𑀧𑁄𑀲𑀣𑀁 𑀧𑀯𑀸𑀭𑀡𑀜𑁆𑀘 𑀞𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀤𑀺𑀲𑁂𑀲𑀲𑀗𑁆𑀖𑀓𑀫𑁆𑀫𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀕𑁆𑀕𑀸𑀦𑀁 𑀪𑀸𑀯𑁄 𑀲𑀸𑀫𑀕𑁆𑀕𑀻.

‘‘𑀦𑀸𑀳𑀁, 𑀘𑀼𑀦𑁆𑀤, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 (𑀤𑀻. 𑀦𑀺. 𑁩.𑁧𑁮𑁨) 𑀏𑀢𑁆𑀣 𑀯𑀺𑀯𑀸𑀤𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀆𑀲𑀯𑀸𑀢𑀺 𑀆𑀕𑀢𑀸.

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬) 𑁋

𑀏𑀢𑁆𑀣 ¶ 𑀢𑁂𑀪𑀽𑀫𑀓𑀁 𑀓𑀫𑁆𑀫𑀁 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀇𑀥 𑀧𑀦 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀪𑀽𑀢𑀸 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸 𑀆𑀲𑀯𑀸𑀢𑀺 𑀆𑀳 ‘‘𑀅𑀲𑀁𑀯𑀭𑁂 𑀞𑀺𑀢𑁂𑀦 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺. 𑀬𑀤𑀺 𑀳𑀺 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀦 𑀘 𑀧𑀜𑁆𑀜𑀧𑁂𑀬𑁆𑀬, 𑀢𑀢𑁄 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑁂𑀯𑀦𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀳𑁂𑀢𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀧𑀭𑀽𑀧𑀯𑀸𑀤𑀸𑀤𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀬𑁂 𑀘 𑀢𑀦𑁆𑀦𑀺𑀫𑀺𑀢𑁆𑀢𑀫𑁂𑀯 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀫𑀳𑀸𑀤𑀼𑀓𑁆𑀔𑀸𑀦𑀼𑀪𑀯𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀪𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸’’𑀢𑀺. 𑀲𑀫𑁆𑀫𑀼𑀔𑀸 𑀕𑀭𑀳𑀦𑀁 𑀅𑀓𑀺𑀢𑁆𑀢𑀺, 𑀧𑀭𑀫𑁆𑀫𑀼𑀔𑀸 𑀕𑀭𑀳𑀦𑀁 𑀅𑀬𑀲𑁄. 𑀅𑀣 𑀯𑀸 𑀲𑀫𑁆𑀫𑀼𑀔𑀸 𑀧𑀭𑀫𑁆𑀫𑀼𑀔𑀸 𑀕𑀭𑀳𑀦𑀁 𑀅𑀓𑀺𑀢𑁆𑀢𑀺, 𑀧𑀭𑀺𑀯𑀸𑀭𑀳𑀸𑀦𑀺 𑀅𑀬𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀕𑀫𑀦𑀫𑀕𑁆𑀕𑀣𑀓𑀦𑀸𑀬𑀸𑀢𑀺 𑀆𑀕𑀫𑀦𑀤𑁆𑀯𑀸𑀭𑀧𑀺𑀤𑀳𑀦𑀢𑁆𑀣𑀸𑀬. 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀧𑁂𑀘𑁆𑀘 𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄𑀢𑀺 𑀆𑀳 ‘‘𑀲𑀫𑁆𑀧𑀭𑀸𑀬𑁂 𑀦𑀭𑀓𑀸𑀤𑀻𑀲𑀽’’𑀢𑀺.

𑀫𑁂𑀣𑀼𑀦𑀸𑀤𑀻𑀦𑀺 𑀭𑀚𑁆𑀚𑀦𑀝𑁆𑀞𑀸𑀦𑀸𑀦𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀼𑀲𑁆𑀲𑀦𑀝𑁆𑀞𑀸𑀦𑀸𑀦𑀺.

𑀲𑀁𑀯𑀭𑀯𑀺𑀦𑀬𑁄𑀢𑀺 𑀲𑀻𑀮𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄 𑀲𑀁𑀯𑀭𑁄. 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺 ¶ . 𑀧𑀳𑀸𑀦𑀯𑀺𑀦𑀬𑁄𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀧𑀝𑀺𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀣𑀯𑀺𑀦𑀬𑁄𑀢𑀺 𑀲𑀢𑁆𑀢 𑀅𑀥𑀺𑀓𑀭𑀡𑀲𑀫𑀣𑀸. 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀫𑁂𑀯. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀯𑀺𑀚𑁆𑀚𑀫𑀸𑀦𑀸𑀬 𑀏𑀯 𑀲𑀺𑀓𑁆𑀔𑀸𑀧𑀤𑀲𑀫𑁆𑀪𑀯𑀢𑁄 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀮𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀓𑁆𑀓𑁄𑀲𑀯𑀕𑁆𑀕𑁄

𑁧-𑁮. 𑀯𑀺𑀯𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁧-𑁪𑁮. 𑀧𑀜𑁆𑀘𑀫𑀲𑁆𑀲 ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀙𑀝𑁆𑀞𑁂 𑀔𑀡𑀪𑀗𑁆𑀕𑀼𑀭𑀢𑀸𑀬 𑀦 𑀦𑀺𑀘𑁆𑀘𑀸 𑀦 𑀥𑀼𑀯𑀸𑀢𑀺 𑀅𑀦𑀺𑀘𑁆𑀘𑀸. 𑀢𑀢𑁄 𑀏𑀯 𑀧𑀡𑁆𑀟𑀺𑀢𑁂𑀳𑀺 𑀦 𑀇𑀘𑁆𑀘𑀸 𑀦 𑀉𑀧𑀕𑀦𑁆𑀢𑀩𑁆𑀩𑀸𑀢𑀺𑀧𑀺 𑀅𑀦𑀺𑀘𑁆𑀘𑀸. 𑀲𑁆𑀯𑀸𑀬𑀁 𑀦𑁂𑀲𑀁 𑀅𑀦𑀺𑀘𑁆𑀘𑀝𑁆𑀞𑁄 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀳𑀼𑀢𑁆𑀯𑀸 𑀅𑀪𑀸𑀯𑀺𑀦𑁄’’𑀢𑀺, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀦𑀲𑁆𑀲𑀓𑀸𑀢𑀺 𑀅𑀢𑁆𑀣𑁄. 𑀲𑀸𑀭𑀭𑀳𑀺𑀢𑀸𑀢𑀺 𑀦𑀺𑀘𑁆𑀘𑀲𑀸𑀭𑀥𑀼𑀯𑀲𑀸𑀭𑀅𑀢𑁆𑀢𑀲𑀸𑀭𑀯𑀺𑀭𑀳𑀺𑀢𑀸. 𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀝𑁆𑀞𑁂𑀦 𑀫𑀼𑀲𑀸, 𑀏𑀓𑀁𑀲𑁂𑀦 𑀅𑀲𑀼𑀪𑀸𑀤𑀺𑀲𑀪𑀸𑀯𑀸 𑀢𑁂 𑀩𑀸𑀮𑀸𑀦𑀁 𑀲𑀼𑀪𑀸𑀤𑀺𑀪𑀸𑀯𑁂𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀼𑀪𑀸𑀤𑀺𑀕𑁆𑀕𑀳𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀲𑀢𑁆𑀢𑁂 𑀯𑀺𑀲𑀁𑀯𑀸𑀤𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀲𑀼𑀪𑀲𑀼𑀔𑀸 𑀯𑀺𑀬𑀸’’𑀢𑀺𑀆𑀤𑀺. 𑀦 𑀧𑀲𑁆𑀲𑀦𑀲𑀪𑀸𑀯𑀸𑀢𑀺 𑀔𑀡𑀧𑀪𑀗𑁆𑀕𑀼𑀭𑀢𑀸𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸𑀬 𑀤𑀺𑀲𑁆𑀲𑀫𑀸𑀦𑀸 𑀯𑀺𑀬 𑀳𑀼𑀢𑁆𑀯𑀸 𑀅𑀤𑀲𑁆𑀲𑀦𑀧𑀓𑀢𑀺𑀓𑀸. 𑀏𑀢𑁂 𑀳𑀺 𑀔𑁂𑀢𑁆𑀢𑀁 𑀯𑀺𑀬 𑀯𑀢𑁆𑀣𑀼 𑀯𑀺𑀬 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀺𑀬 𑀘 𑀧𑀜𑁆𑀜𑀸𑀬𑀺𑀢𑁆𑀯𑀸𑀧𑀺 𑀓𑀢𑀺𑀧𑀸𑀳𑁂𑀦𑁂𑀯 𑀲𑀼𑀧𑀺𑀦𑀓𑁂 𑀤𑀺𑀝𑁆𑀞𑀸 𑀯𑀺𑀬 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑀯𑀺𑀯𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀲𑀭𑀻𑀭𑀝𑁆𑀞𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯-𑁫𑁦. 𑀦𑀯𑀫𑁂 ¶ 𑀧𑀼𑀦𑀩𑁆𑀪𑀯𑀤𑀸𑀦𑀁 𑀧𑀼𑀦𑀩𑁆𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀧𑀼𑀦𑀩𑁆𑀪𑀯𑁄 𑀲𑀻𑀮𑀫𑀲𑁆𑀲𑀸𑀢𑀺 𑀧𑁄𑀦𑁄𑀪𑀯𑀺𑀓𑁄, 𑀧𑀼𑀦𑀩𑁆𑀪𑀯𑀤𑀸𑀬𑀓𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀼𑀦𑀩𑁆𑀪𑀯𑀦𑀺𑀩𑁆𑀩𑀢𑁆𑀢𑀓𑁄’’𑀢𑀺. 𑀪𑀯𑀲𑀗𑁆𑀔𑀭𑀡𑀓𑀫𑁆𑀫𑀦𑁆𑀢𑀺 𑀧𑀼𑀦𑀩𑁆𑀪𑀯𑀦𑀺𑀩𑁆𑀩𑀢𑁆𑀢𑀦𑀓𑀓𑀫𑁆𑀫𑀁. 𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀲𑀭𑀻𑀭𑀝𑁆𑀞𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑁆𑀓𑁄𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀲𑀘𑀺𑀢𑁆𑀢𑀯𑀕𑁆𑀕𑁄

𑁧-𑁧𑁦. 𑀲𑀘𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁧-𑁬𑁦. 𑀤𑀼𑀢𑀺𑀬𑀲𑁆𑀲 ¶ ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀤𑀲𑀫𑁂 𑀧𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀫𑁂𑀢𑁂𑀲𑀦𑁆𑀢𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀧𑀺𑀢𑁆𑀢𑀧𑀘𑁆𑀘𑀬𑀸𑀧𑀺𑀢𑁆𑀢𑀳𑁂𑀢𑀼𑀓𑀸𑀢𑀺 𑀅𑀢𑁆𑀣𑁄. 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀦𑁆𑀦𑀺𑀧𑀸𑀢𑀺𑀓𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀧𑀺𑀢𑁆𑀢𑀸𑀤𑀻𑀦𑀁 𑀓𑁄𑀧𑁂𑀦 𑀲𑀫𑀼𑀝𑁆𑀞𑀺𑀢𑀸. 𑀉𑀢𑀼𑀧𑀭𑀺𑀡𑀸𑀫𑀚𑀸𑀢𑀺 𑀯𑀺𑀲𑀪𑀸𑀕𑀉𑀢𑀼𑀢𑁄 𑀚𑀸𑀢𑀸. 𑀚𑀗𑁆𑀕𑀮𑀤𑁂𑀲𑀯𑀸𑀲𑀻𑀦𑀜𑁆𑀳𑀺 𑀅𑀦𑀽𑀧𑀤𑁂𑀲𑁂 𑀯𑀲𑀦𑁆𑀢𑀸𑀦𑀁 𑀯𑀺𑀲𑀪𑀸𑀕𑁄 𑀘 𑀉𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀽𑀧𑀤𑁂𑀲𑀯𑀸𑀲𑀻𑀦𑀜𑁆𑀘 𑀚𑀗𑁆𑀕𑀮𑀤𑁂𑀲𑁂𑀢𑀺 𑀏𑀯𑀁 𑀧𑀭𑀲𑀫𑀼𑀤𑁆𑀤𑀢𑀻𑀭𑀸𑀤𑀺𑀯𑀲𑁂𑀦𑀧𑀺 𑀉𑀢𑀼𑀯𑀺𑀲𑀪𑀸𑀕𑀢𑀸 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀢𑀢𑁄 𑀚𑀸𑀢𑀸𑀢𑀺 𑀉𑀢𑀼𑀧𑀭𑀺𑀡𑀸𑀫𑀚𑀸. 𑀅𑀢𑁆𑀢𑀦𑁄 𑀧𑀓𑀢𑀺𑀘𑀭𑀺𑀬𑀸𑀦𑀁 𑀯𑀺𑀲𑀬𑀸𑀦𑀁 𑀯𑀺𑀲𑀫𑀁 𑀓𑀸𑀬𑀧𑀭𑀺𑀳𑀭𑀡𑀯𑀲𑁂𑀦 𑀚𑀸𑀢𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸. 𑀢𑁂𑀦𑀸𑀳 ‘‘𑀅𑀢𑀺𑀘𑀺𑀭𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀦𑀸 𑀯𑀺𑀲𑀫𑀧𑀭𑀺𑀳𑀸𑀭𑁂𑀦 𑀚𑀸𑀢𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀸𑀪𑀸𑀭𑀯𑀳𑀦𑀲𑀼𑀥𑀸𑀓𑁄𑀝𑁆𑀝𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀭𑀲𑁆𑀲 𑀉𑀧𑀓𑁆𑀓𑀫𑀢𑁄 𑀦𑀺𑀩𑁆𑀩𑀢𑁆𑀢𑀸 𑀑𑀧𑀓𑁆𑀓𑀫𑀺𑀓𑀸. 𑀩𑀸𑀳𑀺𑀭𑀁 𑀧𑀘𑁆𑀘𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀓𑀫𑁆𑀫𑀯𑀺𑀧𑀸𑀓𑀢𑁄𑀯 𑀚𑀸𑀢𑀸 𑀓𑀫𑁆𑀫𑀯𑀺𑀧𑀸𑀓𑀚𑀸. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁, 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀁 𑀧𑀦 𑀲𑀩𑁆𑀩𑀪𑁂𑀲𑀚𑁆𑀚𑀸𑀦𑀺𑀧𑀺 𑀲𑀩𑁆𑀩𑀧𑀭𑀺𑀢𑁆𑀢𑀸𑀦𑀺𑀧𑀺 𑀦𑀸𑀮𑀁 𑀧𑀝𑀺𑀖𑀸𑀢𑀸𑀬.

𑀲𑀘𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁭) 𑁨. 𑀬𑀫𑀓𑀯𑀕𑁆𑀕𑁄

𑁧-𑁭. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁧-𑁬𑁭. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀲𑀢𑁆𑀢𑀫𑁂 𑀦𑀴𑀓𑀧𑀸𑀦𑀓𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀺𑀕𑀫𑁂. 𑀧𑀼𑀩𑁆𑀩𑁂 𑀓𑀺𑀭 (𑀚𑀸. 𑀅𑀝𑁆𑀞. 𑁧.𑁧.𑁧𑁯 𑀆𑀤𑀬𑁄) 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 ¶ 𑀫𑀳𑀸𑀓𑀸𑀬𑁄 𑀓𑀧𑀺𑀭𑀸𑀚𑀸 𑀳𑀼𑀢𑁆𑀯𑀸 𑀅𑀦𑁂𑀓𑀲𑀢𑀯𑀸𑀦𑀭𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀧𑀩𑁆𑀩𑀢𑀧𑀸𑀤𑁂 𑀯𑀺𑀘𑀭𑀺, 𑀧𑀜𑁆𑀜𑀯𑀸 𑀔𑁄 𑀧𑀦 𑀳𑁄𑀢𑀺 𑀫𑀳𑀸𑀧𑀜𑁆𑀜𑁄. 𑀲𑁄 𑀧𑀭𑀺𑀲𑀁 𑀏𑀯𑀁 𑀑𑀯𑀤𑀢𑀺, ‘‘𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀯𑀺𑀲𑀨𑀮𑀸𑀦𑀺 𑀳𑁄𑀦𑁆𑀢𑀺, 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸 𑀧𑁄𑀓𑁆𑀔𑀭𑀡𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀔𑀸𑀤𑀺𑀢𑀧𑀼𑀩𑁆𑀩𑀸𑀦𑁂𑀯 𑀨𑀮𑀸𑀦𑀺 𑀔𑀸𑀤𑀣, 𑀧𑀻𑀢𑀧𑀼𑀩𑁆𑀩𑀸𑀦𑁂𑀯 𑀧𑀸𑀦𑀻𑀬𑀸𑀦𑀺 𑀧𑀺𑀯𑀣, 𑀏𑀢𑁆𑀣 𑀯𑁄 𑀧𑀝𑀺𑀧𑀼𑀘𑁆𑀙𑀺𑀢𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺. 𑀢𑁂 𑀅𑀧𑀻𑀢𑀧𑀼𑀩𑁆𑀩𑀁 𑀤𑀺𑀲𑁆𑀯𑀸 𑀲𑀳𑀲𑀸𑀯 𑀅𑀧𑀺𑀯𑀺𑀢𑁆𑀯𑀸 𑀲𑀫𑀦𑁆𑀢𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀧𑀸𑀦𑀻𑀬𑀁 𑀦 𑀧𑀺𑀯𑀣𑀸’’𑀢𑀺 𑀆𑀳. 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀑𑀮𑁄𑀓𑁂𑀫𑀸𑀢𑀺. ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀲𑀫𑀦𑁆𑀢𑀸 𑀧𑀤𑀁 𑀧𑀭𑀺𑀬𑁂𑀲𑀫𑀸𑀦𑁄 𑀑𑀢𑀺𑀡𑁆𑀡𑀧𑀤𑀁𑀬𑁂𑀯 𑀅𑀤𑁆𑀤𑀲, 𑀦 𑀉𑀢𑁆𑀢𑀺𑀡𑁆𑀡𑀧𑀤𑀁. 𑀅𑀤𑀺𑀲𑁆𑀯𑀸 ‘‘𑀲𑀧𑀭𑀺𑀲𑁆𑀲𑀬𑀸’’𑀢𑀺 𑀅𑀜𑁆𑀜𑀸𑀲𑀺. 𑀢𑀸𑀯𑀤𑁂𑀯 𑀘 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀅𑀫𑀦𑀼𑀲𑁆𑀲𑁄 𑀉𑀤𑀓𑀁 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀉𑀝𑁆𑀞𑀸𑀲𑀺 𑁋 𑀲𑁂𑀢𑀫𑀼𑀔𑁄, 𑀦𑀻𑀮𑀓𑀼𑀘𑁆𑀙𑀺, 𑀭𑀢𑁆𑀢𑀳𑀢𑁆𑀣𑀧𑀸𑀤𑁄, 𑀫𑀳𑀸𑀤𑀸𑀞𑀺𑀓𑁄, 𑀯𑀦𑁆𑀢𑀤𑀸𑀞𑁄, 𑀯𑀺𑀭𑀽𑀧𑁄, 𑀩𑀻𑀪𑀘𑁆𑀙𑁄, 𑀉𑀤𑀓𑀭𑀓𑁆𑀔𑀲𑁄. 𑀲𑁄 𑀏𑀯𑀫𑀸𑀳 𑁋 ‘‘𑀓𑀲𑁆𑀫𑀸 𑀧𑀸𑀦𑀻𑀬𑀁 𑀦 𑀧𑀺𑀯𑀣, 𑀫𑀥𑀼𑀭𑀁 𑀉𑀤𑀓𑀁 𑀧𑀺𑀯𑀣, 𑀓𑀺𑀁 𑀢𑀼𑀫𑁆𑀳𑁂 𑀏𑀢𑀲𑁆𑀲 𑀯𑀘𑀦𑀁 𑀲𑀼𑀡𑀸𑀣𑀸’’𑀢𑀺. 𑀫𑀳𑀸𑀲𑀢𑁆𑀢𑁄 𑀆𑀳 ‘‘𑀢𑁆𑀯𑀁 𑀅𑀥𑀺𑀯𑀢𑁆𑀣𑁄 𑀅𑀫𑀦𑀼𑀲𑁆𑀲𑁄’’𑀢𑀺? 𑀆𑀫𑀸𑀳𑀦𑁆𑀢𑀺. ‘‘𑀢𑁆𑀯𑀁 𑀇𑀥 𑀑𑀢𑀺𑀡𑁆𑀡𑁂 𑀮𑀪𑀲𑀻’’𑀢𑀺 𑀆𑀳. 𑀆𑀫, 𑀢𑀼𑀫𑁆𑀳𑁂 𑀧𑀦 𑀲𑀩𑁆𑀩𑁂 𑀔𑀸𑀤𑀺𑀲𑁆𑀲𑀸𑀫𑀻𑀢𑀺. 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀬𑀓𑁆𑀔𑀸𑀢𑀺. 𑀧𑀸𑀦𑀻𑀬𑀁 𑀧𑀦 𑀧𑀺𑀯𑀺𑀲𑁆𑀲𑀣𑀸𑀢𑀺. 𑀆𑀫, 𑀧𑀺𑀯𑀺𑀲𑁆𑀲𑀸𑀫𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀏𑀓𑀫𑁆𑀧𑀺 𑀯𑀸𑀦𑀭𑀁 𑀦 𑀫𑀼𑀜𑁆𑀘𑀺𑀲𑁆𑀲𑀦𑁆𑀢𑀺. ‘‘𑀧𑀸𑀦𑀻𑀬𑀜𑁆𑀘 𑀧𑀺𑀯𑀺𑀲𑁆𑀲𑀸𑀫, 𑀦 𑀘 𑀢𑁂 𑀯𑀲𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀴𑀁 𑀆𑀳𑀭𑀸𑀧𑁂𑀢𑁆𑀯𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀥𑀫𑀺. 𑀲𑀩𑁆𑀩𑁄 𑀏𑀓𑀘𑁆𑀙𑀺𑀤𑁆𑀤𑁄 𑀅𑀳𑁄𑀲𑀺. 𑀢𑀻𑀭𑁂 𑀦𑀺𑀲𑀻𑀤𑀺𑀢𑁆𑀯𑀸𑀯 𑀧𑀸𑀦𑀻𑀬𑀁 𑀧𑀺𑀯𑀺. 𑀲𑁂𑀲𑀯𑀸𑀦𑀭𑀸𑀦𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑀁 𑀦𑀴𑀁 𑀆𑀳𑀭𑀸𑀧𑁂𑀢𑁆𑀯𑀸 𑀥𑀫𑀺𑀢𑁆𑀯𑀸 𑀅𑀤𑀸𑀲𑀺. 𑀲𑀩𑁆𑀩𑁂 𑀢𑁂 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀸𑀦𑀻𑀬𑀁 𑀧𑀺𑀯𑀺𑀁𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀺𑀲𑁆𑀯𑀸 𑀧𑀤𑀫𑀦𑀼𑀢𑁆𑀢𑀺𑀡𑁆𑀡𑀁, 𑀤𑀺𑀲𑁆𑀯𑀸𑀦𑁄𑀢𑀭𑀺𑀢𑀁 𑀧𑀤𑀁;

𑀦𑀴𑁂𑀦 𑀯𑀸𑀭𑀺𑀁 𑀧𑀺𑀲𑁆𑀲𑀸𑀫, 𑀦𑁂𑀯 𑀫𑀁 𑀢𑁆𑀯𑀁 𑀯𑀥𑀺𑀲𑁆𑀲𑀲𑀻’’𑀢𑀺. (𑀚𑀸. 𑁧.𑁧.𑁨𑁦);

𑀢𑀢𑁄 ¶ 𑀧𑀝𑁆𑀞𑀸𑀬 𑀬𑀸𑀯 𑀅𑀚𑁆𑀚𑀤𑀺𑀯𑀲𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀴𑀸 𑀏𑀓𑀘𑁆𑀙𑀺𑀤𑁆𑀤𑀸𑀯 𑀳𑁄𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀓𑀧𑁆𑀧𑁂 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀸𑀫 𑀘𑀦𑁆𑀤𑁂 𑀲𑀲𑀮𑀓𑁆𑀔𑀡𑀁 (𑀚𑀸. 𑁧.𑁪.𑁬𑁧 𑀆𑀤𑀬𑁄), 𑀯𑀝𑁆𑀝𑀚𑀸𑀢𑀓𑁂 (𑀚𑀸. 𑁧.𑁧.𑁩𑁫) 𑀲𑀘𑁆𑀘𑀓𑀺𑀭𑀺𑀬𑀝𑁆𑀞𑀸𑀦𑁂 𑀅𑀕𑁆𑀕𑀺𑀚𑀸𑀮𑀲𑁆𑀲 𑀆𑀕𑀫𑀦𑀼𑀧𑀘𑁆𑀙𑁂𑀤𑁄, 𑀖𑀝𑀻𑀓𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑀦𑀝𑁆𑀞𑀸𑀦𑁂 𑀅𑀦𑁄𑀯𑀲𑁆𑀲𑀦𑀁 (𑀫. 𑀦𑀺. 𑁨.𑁨𑁯𑁧), 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀦𑀴𑀸𑀦𑀁 𑀏𑀓𑀘𑁆𑀙𑀺𑀤𑁆𑀤𑀪𑀸𑀯𑁄𑀢𑀺. 𑀇𑀢𑀺 𑀲𑀸 𑀧𑁄𑀓𑁆𑀔𑀭𑀡𑀻 𑀦𑀴𑁂𑀦 𑀧𑀸𑀦𑀻𑀬𑀲𑁆𑀲 𑀧𑀺𑀯𑀺𑀢𑀢𑁆𑀢𑀸 ‘‘𑀦𑀴𑀓𑀧𑀸𑀦𑀓𑀸’’𑀢𑀺 𑀦𑀸𑀫𑀁 𑀮𑀪𑀺. 𑀅𑀧𑀭𑀪𑀸𑀕𑁂 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀦𑀺𑀲𑁆𑀲𑀸𑀬 ¶ 𑀦𑀺𑀕𑀫𑁄 𑀧𑀢𑀺𑀝𑁆𑀞𑀸𑀲𑀺, 𑀢𑀲𑁆𑀲𑀧𑀺 ‘‘𑀦𑀴𑀓𑀧𑀸𑀦’’𑀦𑁆𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀢𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀴𑀓𑀧𑀸𑀦𑁂’’𑀢𑀺. 𑀧𑀮𑀸𑀲𑀯𑀦𑁂𑀢𑀺 𑀓𑀺𑀁𑀲𑀼𑀓𑀯𑀦𑁂.

𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀁 𑀇𑀤𑀁 𑀆𑀫𑁂𑀟𑀺𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀬𑀁 𑀤𑀺𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀦𑀼-𑀲𑀤𑁆𑀤𑁄 ‘‘𑀧𑀭𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀢𑀢𑁄 𑀢𑀢𑁄 𑀯𑀺𑀮𑁄𑀓𑁂𑀢𑁆𑀯𑀸’’𑀢𑀺. 𑀓𑀲𑁆𑀫𑀸 𑀆𑀕𑀺𑀮𑀸𑀬𑀢𑀺 𑀓𑁄𑀝𑀺𑀲𑀳𑀲𑁆𑀲𑀳𑀢𑁆𑀣𑀺𑀦𑀸𑀕𑀸𑀦𑀁 𑀩𑀮𑀁 𑀥𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀭𑀺𑀬𑁄 𑀧𑀦𑀲𑁆𑀲 ‘‘𑀏𑀲 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑁄, 𑀬𑀤𑀺𑀤𑀁 𑀅𑀦𑀺𑀘𑁆𑀘𑀢𑀸. 𑀬𑁂 𑀧𑀦 𑀅𑀦𑀺𑀘𑁆𑀘𑀸, 𑀢𑁂 𑀏𑀓𑀦𑁆𑀢𑁂𑀦𑁂𑀯 𑀉𑀤𑀬𑀯𑀬𑀧𑁆𑀧𑀝𑀺𑀧𑀻𑀴𑀺𑀢𑀢𑀸𑀬 𑀤𑀼𑀓𑁆𑀔𑀸 𑀏𑀯. 𑀤𑀼𑀓𑁆𑀔𑀲𑀪𑀸𑀯𑁂𑀲𑀼 𑀢𑁂𑀲𑀼 𑀲𑀢𑁆𑀣𑀼𑀓𑀸𑀬𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀧𑀘𑁆𑀘𑀬𑁄’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀘 𑀔𑁄 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀧𑀘𑁆𑀘𑀬𑀸. 𑀏𑀢𑁆𑀣𑀸𑀳 ‘‘𑀓𑀺𑀁 𑀧𑀦 𑀢𑀁 𑀓𑀫𑁆𑀫𑀁, 𑀬𑁂𑀦 𑀅𑀧𑀭𑀺𑀫𑀸𑀡𑀓𑀸𑀮𑀁 𑀲𑀓𑁆𑀓𑀘𑁆𑀘𑀁 𑀉𑀧𑀘𑀺𑀢𑀯𑀺𑀧𑀼𑀮𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀲𑀢𑁆𑀣𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀯𑀺𑀧𑀸𑀓𑀫𑀦𑀼𑀪𑀯𑀢𑀻’’𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀬𑀫𑁂𑀯 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀅𑀢𑀻𑀢𑀚𑀸𑀢𑀺𑀬𑀁 𑀫𑀮𑁆𑀮𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀚𑀦𑀲𑁂𑀯𑀻 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑁄 𑀘𑀭𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀺𑀩𑁆𑀩𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑁂 𑀏𑀓𑀁 𑀫𑀮𑁆𑀮𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀸𑀴𑁆𑀳𑀢𑀭𑀁 𑀦𑀺𑀧𑁆𑀧𑀻𑀴𑁂𑀲𑀺. 𑀢𑁂𑀦 𑀓𑀫𑁆𑀫𑁂𑀦 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀧𑀺 𑀤𑀼𑀓𑁆𑀔𑀫𑀦𑀼𑀪𑀯𑀺. 𑀬𑀣𑀸 𑀘𑁂𑀢𑀁, 𑀏𑀯𑀁 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀻𑀦𑀫𑀺𑀢𑁆𑀣𑀻𑀦𑀁 𑀬𑀸𑀦𑀺 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀸𑀤𑀻𑀦𑀺 𑀤𑀼𑀓𑁆𑀔𑀸𑀦𑀺, 𑀲𑀩𑁆𑀩𑀸𑀦𑀺 𑀧𑀼𑀩𑁆𑀩𑁂𑀓𑀢𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑀸𑀦𑀺, 𑀬𑀸𑀦𑀺 𑀓𑀫𑁆𑀫𑀧𑀺𑀮𑁄𑀢𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁩𑁯.𑁬𑁪-𑁯𑁬) 𑁋

‘‘𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑁂, 𑀭𑀫𑀡𑀻𑀬𑁂 𑀲𑀺𑀮𑀸𑀢𑀮𑁂;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀦𑀸𑀦𑀸𑀕𑀦𑁆𑀥𑀯𑀦𑀦𑁆𑀢𑀭𑁂.

‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀧𑀭𑁂𑀢𑁄 𑀮𑁄𑀓𑀦𑀸𑀬𑀓𑁄;

𑀆𑀲𑀻𑀦𑁄 𑀩𑁆𑀬𑀸𑀓𑀭𑀻 𑀢𑀢𑁆𑀣, 𑀧𑀼𑀩𑁆𑀩𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄.

‘‘𑀲𑀼𑀡𑀸𑀣 ¶ 𑀪𑀺𑀓𑁆𑀔𑀯𑁄 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸;

𑀧𑀺𑀮𑁄𑀢𑀺𑀓𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺.

𑁧.

‘‘𑀫𑀼𑀦𑀸𑀴𑀺 𑀦𑀸𑀫𑀳𑀁 𑀥𑀼𑀢𑁆𑀢𑁄, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀼𑀭𑀪𑀺𑀁, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

‘‘𑀢𑁂𑀦 ¶ 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀩𑀳𑀽 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀤𑀼𑀓𑁆𑀔𑀁 𑀯𑁂𑀤𑁂𑀲𑀺 𑀯𑁂𑀤𑀦𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀫𑀬𑀸 𑀮𑀤𑁆𑀥𑀁, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

𑁨.

‘‘𑀲𑀩𑁆𑀩𑀸𑀪𑀺𑀪𑀼𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀲𑀸𑀯𑀓𑁄;

𑀢𑀁 𑀅𑀩𑁆𑀪𑀓𑁆𑀔𑀸𑀬 𑀦𑀺𑀭𑀬𑁂, 𑀘𑀺𑀭𑀁 𑀲𑀁𑀲𑀭𑀺𑀢𑀁 𑀫𑀬𑀸.

‘‘𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀫𑀦𑀼𑀲𑁆𑀲𑀪𑀸𑀯𑀁 𑀮𑀤𑁆𑀥𑀸𑀳𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀩𑀳𑀼𑀁 𑀮𑀪𑀺𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀫𑀫𑀁;

𑀅𑀩𑁆𑀪𑀸𑀘𑀺𑀓𑁆𑀔𑀺 𑀅𑀪𑀽𑀢𑁂𑀦, 𑀚𑀦𑀓𑀸𑀬𑀲𑁆𑀲 𑀅𑀕𑁆𑀕𑀢𑁄.

𑁩.

‘‘𑀩𑁆𑀭𑀸𑀳𑁆𑀫𑀡𑁄 𑀲𑀼𑀢𑀯𑀸 𑀆𑀲𑀺𑀁, 𑀅𑀳𑀁 𑀲𑀓𑁆𑀓𑀢𑀧𑀽𑀚𑀺𑀢𑁄;

𑀫𑀳𑀸𑀯𑀦𑁂 𑀧𑀜𑁆𑀘𑀲𑀢𑁂, 𑀫𑀦𑁆𑀢𑁂 𑀯𑀸𑀘𑁂𑀲𑀺 𑀫𑀸𑀡𑀯𑁂.

‘‘𑀢𑀢𑁆𑀣𑀸𑀕𑀢𑁄 𑀇𑀲𑀺 𑀪𑀻𑀫𑁄, 𑀧𑀜𑁆𑀘𑀸𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀜𑁆𑀘𑀸𑀳𑀁 𑀆𑀕𑀢𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

‘‘𑀢𑀢𑁄𑀳𑀁 𑀅𑀯𑀘𑀁 𑀲𑀺𑀲𑁆𑀲𑁂, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺;

𑀫𑀬𑁆𑀳𑀫𑁆𑀧𑀺 𑀪𑀸𑀲𑀫𑀸𑀦𑀲𑁆𑀲, 𑀅𑀦𑀼𑀫𑁄𑀤𑀺𑀁𑀲𑀼 𑀫𑀸𑀡𑀯𑀸.

‘‘𑀢𑀢𑁄 ¶ 𑀫𑀸𑀡𑀯𑀓𑀸 𑀲𑀩𑁆𑀩𑁂, 𑀪𑀺𑀓𑁆𑀔𑀫𑀸𑀦𑀁 𑀓𑀼𑀮𑁂 𑀓𑀼𑀮𑁂;

𑀫𑀳𑀸𑀚𑀦𑀲𑁆𑀲 𑀆𑀳𑀁𑀲𑀼, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸 𑀇𑀫𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀮𑀪𑀼𑀁 𑀲𑀩𑁆𑀩𑁂, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

𑁪.

‘‘𑀯𑁂𑀫𑀸𑀢𑀼𑀪𑀸𑀢𑀭𑀁 𑀧𑀼𑀩𑁆𑀩𑁂, 𑀥𑀦𑀳𑁂𑀢𑀼 𑀳𑀦𑀺𑀁 𑀅𑀳𑀁;

𑀧𑀓𑁆𑀔𑀺𑀧𑀺𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀲𑀺𑀮𑀸𑀬 𑀘 𑀅𑀧𑀺𑀁𑀲𑀬𑀺𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀤𑁂𑀯𑀤𑀢𑁆𑀢𑁄 𑀲𑀺𑀮𑀁 𑀔𑀺𑀧𑀺;

𑀅𑀗𑁆𑀕𑀼𑀝𑁆𑀞𑀁 𑀧𑀺𑀁𑀲𑀬𑀻 𑀧𑀸𑀤𑁂, 𑀫𑀫 𑀧𑀸𑀲𑀸𑀡𑀲𑀓𑁆𑀔𑀭𑀸.

𑁫.

‘‘𑀧𑀼𑀭𑁂𑀳𑀁 𑀤𑀸𑀭𑀓𑁄 𑀳𑀼𑀢𑁆𑀯𑀸, 𑀓𑀻𑀴𑀫𑀸𑀦𑁄 𑀫𑀳𑀸𑀧𑀣𑁂;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀫𑀕𑁆𑀕𑁂 𑀲𑀓𑀮𑀺𑀓𑀁 𑀔𑀺𑀧𑀺𑀁.

‘‘𑀢𑁂𑀦 ¶ 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀯𑀥𑀢𑁆𑀣𑀁 𑀫𑀁 𑀤𑁂𑀯𑀤𑀢𑁆𑀢𑁄, 𑀅𑀪𑀺𑀫𑀸𑀭𑁂 𑀧𑀬𑁄𑀚𑀬𑀺.

𑁬.

‘‘𑀳𑀢𑁆𑀣𑀸𑀭𑁄𑀳𑁄 𑀧𑀼𑀭𑁂 𑀆𑀲𑀺𑀁, 𑀧𑀘𑁆𑀘𑁂𑀓𑀫𑀼𑀦𑀺𑀫𑀼𑀢𑁆𑀢𑀫𑀁;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀢𑀁, 𑀆𑀲𑀸𑀤𑁂𑀲𑀺𑀁 𑀕𑀚𑁂𑀦𑀳𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀪𑀦𑁆𑀢𑁄 𑀦𑀸𑀴𑀸𑀕𑀺𑀭𑀻 𑀕𑀚𑁄;

𑀕𑀺𑀭𑀺𑀩𑁆𑀩𑀚𑁂 𑀧𑀼𑀭𑀯𑀭𑁂, 𑀤𑀸𑀭𑀼𑀡𑁄 𑀲𑀫𑀼𑀧𑀸𑀕𑀫𑀺.

𑁭.

‘‘𑀭𑀸𑀚𑀸𑀳𑀁 𑀧𑀢𑁆𑀣𑀺𑀯𑁄 𑀆𑀲𑀺𑀁, 𑀲𑀢𑁆𑀢𑀺𑀬𑀸 𑀧𑀼𑀭𑀺𑀲𑀁 𑀳𑀦𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀧𑀘𑁆𑀘𑀺𑀲𑀁 𑀪𑀼𑀲𑀁.

‘‘𑀓𑀫𑁆𑀫𑀼𑀦𑁄 𑀢𑀲𑁆𑀲 𑀲𑁂𑀲𑁂𑀦, 𑀇𑀤𑀸𑀦𑀺 𑀲𑀓𑀮𑀁 𑀫𑀫;

𑀧𑀸𑀤𑁂 𑀙𑀯𑀺𑀁 𑀧𑀓𑀧𑁆𑀧𑁂𑀲𑀺, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺.

𑁮.

‘‘𑀅𑀳𑀁 ¶ 𑀓𑁂𑀯𑀝𑁆𑀝𑀕𑀸𑀫𑀲𑁆𑀫𑀺𑀁, 𑀅𑀳𑀼𑀁 𑀓𑁂𑀯𑀝𑁆𑀝𑀤𑀸𑀭𑀓𑁄;

𑀫𑀘𑁆𑀙𑀓𑁂 𑀖𑀸𑀢𑀺𑀢𑁂 𑀤𑀺𑀲𑁆𑀯𑀸, 𑀚𑀦𑀬𑀺𑀁 𑀲𑁄𑀫𑀦𑀲𑁆𑀲𑀓𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀲𑀻𑀲𑀤𑀼𑀓𑁆𑀔𑀁 𑀅𑀳𑀽 𑀫𑀫;

𑀲𑀩𑁆𑀩𑁂 𑀲𑀓𑁆𑀓𑀸 𑀘 𑀳𑀜𑁆𑀜𑀺𑀁𑀲𑀼, 𑀬𑀤𑀸 𑀳𑀦𑀺 𑀯𑀺𑀝𑀝𑀽𑀪𑁄.

𑁯.

‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀬𑀺𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸 𑀘 𑀪𑀼𑀜𑁆𑀚𑀣 𑀲𑀸𑀮𑀬𑁄.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀫𑀸𑀲𑀁 𑀔𑀸𑀤𑀺𑀢𑀁 𑀬𑀯𑀁;

𑀦𑀺𑀫𑀦𑁆𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺𑀁 𑀢𑀤𑀸.

𑁧𑁦.

‘‘𑀦𑀺𑀩𑁆𑀩𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀫𑀮𑁆𑀮𑀧𑀼𑀢𑁆𑀢𑀁 𑀦𑀺𑀳𑁂𑀞𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀺𑀝𑁆𑀞𑀺𑀤𑀼𑀓𑁆𑀔𑀁 𑀅𑀳𑀽 𑀫𑀫.

𑁧𑁧.

‘‘𑀢𑀺𑀓𑀺𑀘𑁆𑀙𑀓𑁄 𑀅𑀳𑀁 𑀆𑀲𑀺𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀭𑁂𑀘𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀳𑁄𑀢𑀺 𑀧𑀓𑁆𑀔𑀦𑁆𑀤𑀺𑀓𑀸 𑀫𑀫.

𑁧𑁨.

‘‘𑀅𑀯𑀘𑀸𑀳𑀁 𑀚𑁄𑀢𑀺𑀧𑀸𑀮𑁄, 𑀲𑀼𑀕𑀢𑀁 𑀓𑀲𑁆𑀲𑀧𑀁 𑀢𑀤𑀸;

𑀓𑀼𑀢𑁄 𑀦𑀼 𑀩𑁄𑀥𑀺 𑀫𑀼𑀡𑁆𑀟𑀲𑁆𑀲, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀩𑀳𑀼𑀁;

𑀙𑀩𑁆𑀩𑀲𑁆𑀲𑀸𑀦𑀼𑀭𑀼𑀯𑁂𑀮𑀸𑀬𑀁, 𑀢𑀢𑁄 𑀩𑁄𑀥𑀺𑀫𑀧𑀸𑀧𑀼𑀡𑀺𑀁.

‘‘𑀦𑀸𑀳𑀁 ¶ 𑀏𑀢𑁂𑀦 𑀫𑀕𑁆𑀕𑁂𑀦, 𑀧𑀸𑀧𑀼𑀡𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀼𑀫𑁆𑀫𑀕𑁆𑀕𑁂𑀦 𑀕𑀯𑁂𑀲𑀺𑀲𑁆𑀲𑀁, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀯𑀸𑀭𑀺𑀢𑁄.

‘‘𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀻𑀡𑁄, 𑀲𑀩𑁆𑀩𑀲𑀦𑁆𑀢𑀸𑀧𑀯𑀚𑁆𑀚𑀺𑀢𑁄;

𑀅𑀲𑁄𑀓𑁄 𑀅𑀦𑀼𑀧𑀸𑀬𑀸𑀲𑁄, 𑀦𑀺𑀩𑁆𑀩𑀸𑀬𑀺𑀲𑁆𑀲𑀫𑀦𑀸𑀲𑀯𑁄.

‘‘𑀏𑀯𑀁 ¶ 𑀚𑀺𑀦𑁄 𑀯𑀺𑀬𑀸𑀓𑀸𑀲𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀕𑁆𑀕𑀢𑁄;

𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀅𑀦𑁄𑀢𑀢𑁆𑀢𑁂 𑀫𑀳𑀸𑀲𑀭𑁂’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁬𑁪-𑁯𑁬);

𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀧𑀞𑀫𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁯-𑁭𑁦. 𑀦𑀯𑀫𑁂 (𑀤𑀻. 𑀦𑀺. 𑀝𑀻. 𑁧.𑁧𑁭; 𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁧𑁭; 𑀲𑀁. 𑀦𑀺. 𑀝𑀻. 𑁨.𑁫.𑁧𑁦𑁮𑁦) 𑀤𑀼𑀕𑁆𑀕𑀢𑀺𑀢𑁄 𑀲𑀁𑀲𑀸𑀭𑀢𑁄 𑀘 𑀦𑀺𑀬𑁆𑀬𑀸𑀢𑀺 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀁, 𑀲𑀕𑁆𑀕𑀫𑀕𑁆𑀕𑁄, 𑀫𑁄𑀓𑁆𑀔𑀫𑀕𑁆𑀕𑁄 𑀘. 𑀢𑀁 𑀦𑀺𑀬𑁆𑀬𑀸𑀦𑀁 𑀅𑀭𑀳𑀢𑀺, 𑀦𑀺𑀬𑁆𑀬𑀸𑀦𑁂 𑀯𑀸 𑀦𑀺𑀬𑀼𑀢𑁆𑀢𑀸, 𑀦𑀺𑀬𑁆𑀬𑀸𑀦𑀁 𑀯𑀸 𑀨𑀮𑀪𑀽𑀢𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀯𑀸 𑀈𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀬𑀓𑀸𑀭𑀲𑁆𑀲 𑀘 𑀓𑀓𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑀲𑁆𑀲𑀸 𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀺𑀭𑀘𑁆𑀙𑀸𑀦𑀪𑀽𑀢𑀦𑁆𑀢𑀺 𑀢𑀺𑀭𑁄𑀓𑀭𑀡𑀪𑀽𑀢𑀁. 𑀕𑁂𑀳𑀲𑁆𑀲𑀺𑀢𑀓𑀣𑀸𑀢𑀺 𑀕𑁂𑀳𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀢𑀺 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂.

𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑀓𑀁, 𑀳𑀺𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀭𑀸𑀓𑀣𑀸’’𑀢𑀺𑀧𑀺 𑀧𑀸𑀞𑁄𑀢𑀺 𑀆𑀳 ‘‘𑀲𑀼𑀭𑀸𑀓𑀣𑀦𑁆𑀢𑀺 𑀧𑀸𑀴𑀺𑀬𑀁 𑀧𑀦𑀸’’𑀢𑀺. 𑀲𑀸 𑀧𑀦𑁂𑀲𑀸 𑀓𑀣𑀸 ‘‘𑀏𑀯𑀭𑀽𑀧𑀸 𑀦𑀯𑀲𑀼𑀭𑀸 𑀧𑀻𑀢𑀸 𑀭𑀢𑀺𑀚𑀦𑀦𑀻 𑀳𑁄𑀢𑀻’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, 𑀆𑀤𑀻𑀦𑀯𑀯𑀲𑁂𑀦 𑀧𑀦 ‘‘𑀉𑀫𑁆𑀫𑀢𑁆𑀢𑀓𑀲𑀁𑀯𑀢𑁆𑀢𑀦𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀅𑀦𑁂𑀓𑀯𑀺𑀥𑀁…𑀧𑁂… 𑀆𑀤𑀻𑀦𑀯𑀯𑀲𑁂𑀦 𑀯𑀝𑁆𑀝𑀢𑀻’’𑀢𑀺. 𑀯𑀺𑀲𑀺𑀔𑀸𑀢𑀺 𑀖𑀭𑀲𑀦𑁆𑀦𑀺𑀯𑁂𑀲𑁄. 𑀯𑀺𑀲𑀺𑀔𑀸𑀕𑀳𑀡𑁂𑀦 𑀘 𑀢𑀦𑁆𑀦𑀺𑀯𑀸𑀲𑀺𑀦𑁄 𑀕𑀳𑀺𑀢𑀸 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀘 ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺 𑀘. 𑀓𑀼𑀫𑁆𑀪𑀝𑁆𑀞𑀸𑀦𑀧𑁆𑀧𑀤𑁂𑀲𑁂𑀦 𑀓𑀼𑀫𑁆𑀪𑀤𑀸𑀲𑀺𑀬𑁄 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀼𑀫𑁆𑀪𑀤𑀸𑀲𑀺𑀓𑀣𑀸 𑀯𑀸’’𑀢𑀺.

𑀭𑀸𑀚𑀓𑀣𑀸𑀤𑀺𑀧𑀼𑀭𑀺𑀫𑀓𑀣𑀸𑀬 ¶ , 𑀮𑁄𑀓𑀓𑁆𑀔𑀸𑀬𑀺𑀓𑀸𑀤𑀺𑀧𑀘𑁆𑀙𑀺𑀫𑀓𑀣𑀸𑀬 𑀯𑀸 𑀯𑀺𑀦𑀺𑀫𑀼𑀢𑁆𑀢𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸 𑀯𑀺𑀫𑀼𑀢𑁆𑀢𑀸. 𑀉𑀧𑁆𑀧𑀢𑁆𑀢𑀺𑀞𑀺𑀢𑀺𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀮𑁄𑀓𑀁 𑀅𑀓𑁆𑀔𑀸𑀬𑀢𑀻𑀢𑀺 𑀮𑁄𑀓𑀓𑁆𑀔𑀸𑀬𑀺𑀓𑀸. 𑀅𑀲𑀼𑀓𑁂𑀦 𑀦𑀸𑀫𑀸𑀢𑀺 𑀧𑀚𑀸𑀧𑀢𑀺𑀦𑀸 𑀩𑁆𑀭𑀳𑁆𑀫𑀼𑀦𑀸, 𑀇𑀲𑁆𑀲𑀭𑁂𑀦 𑀯𑀸. 𑀯𑀺𑀢𑀡𑁆𑀟𑀲𑀮𑁆𑀮𑀸𑀧𑀓𑀣𑀸𑀢𑀺 ‘‘𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸 𑀲𑁂𑀢𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀧𑀢𑁆𑀢𑀸𑀦𑀁 𑀓𑀸𑀴𑀢𑁆𑀢𑀸 𑀓𑀸𑀴𑁄𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀏𑀯𑀫𑀸𑀤𑀺𑀓𑀸. 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑁂𑀮𑀧𑀼𑀧𑁆𑀨𑀮𑀓𑀸𑀦𑀺 𑀯𑀺𑀬 𑀚𑀻𑀯𑀺𑀤𑀸𑀯𑀺𑀭𑀧𑀸𑀭𑀬𑀢𑁆𑀢𑀺𑀯𑀺𑀲𑀸𑀮𑀸 𑀦𑀢𑁆𑀣𑀺, 𑀬𑀁 𑀬𑁄 𑀓𑁄𑀘𑀺 𑀢𑀺𑀭𑀺𑀬𑀸𑀫𑀸𑀦𑀸 𑀓𑀢𑀢𑁆𑀢𑀸’’𑀢𑀺 ¶ 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀸𑀕𑀭𑀤𑁂𑀯𑁂𑀦𑀸𑀢𑀺 𑀲𑀸𑀕𑀭𑀧𑀼𑀢𑁆𑀢𑀭𑀸𑀚𑀽𑀳𑀺. 𑀔𑀢𑁄𑀢𑀺 𑀏𑀢𑀁 𑀏𑀓𑀯𑀘𑀦𑀁 𑀢𑁂𑀳𑀺 𑀧𑀘𑁆𑀘𑁂𑀓𑀁 𑀔𑀢𑀢𑁆𑀢𑀸 ‘‘𑀲𑀸𑀕𑀭𑀤𑁂𑀯𑁂𑀦 𑀔𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀳𑀫𑀼𑀤𑁆𑀤𑀸 𑀲𑀫𑀼𑀤𑁆𑀤𑁄𑀢𑀺 𑀯𑀼𑀢𑁆𑀢𑁄. 𑀪𑀯𑀢𑀺 𑀯𑀤𑁆𑀥𑀢𑀺 𑀏𑀢𑁂𑀦𑀸𑀢𑀺 𑀪𑀯𑁄. 𑀪𑀯𑀸𑀪𑀯𑀸 𑀳𑁄𑀦𑁆𑀢𑀻𑀢𑀺 𑀇𑀢𑀺𑀪𑀯𑀸𑀪𑀯𑀓𑀣𑀸. 𑀏𑀢𑁆𑀣 𑀘 𑀪𑀯𑁄𑀢𑀺 𑀲𑀲𑁆𑀲𑀢𑀁, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀁. 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀓𑀸𑀫𑀲𑀼𑀔𑀁, 𑀅𑀪𑀯𑁄𑀢𑀺 𑀅𑀢𑁆𑀢𑀓𑀺𑀮𑀫𑀣𑁄𑀢𑀺 𑀇𑀢𑀺 𑀇𑀫𑀸𑀬 𑀙𑀩𑁆𑀩𑀺𑀥𑀸𑀬 𑀇𑀢𑀺𑀪𑀯𑀸𑀪𑀯𑀓𑀣𑀸𑀬 𑀲𑀤𑁆𑀥𑀺𑀁 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀣 𑀯𑀸 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀸𑀧𑀺 𑀅𑀭𑀜𑁆𑀜𑀧𑀩𑁆𑀩𑀢𑀦𑀤𑀻𑀤𑀻𑀧𑀓𑀣𑀸 𑀇𑀢𑀺𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸 𑀯𑀼𑀢𑁆𑀢𑀸. 𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁮) 𑁩. 𑀆𑀓𑀗𑁆𑀔𑀯𑀕𑁆𑀕𑁄

𑁧-𑁪. 𑀆𑀓𑀗𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁧-𑁭𑁪. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀲𑀻𑀮𑀲𑁆𑀲 𑀅𑀦𑀯𑀲𑁂𑀲𑀲𑀫𑀸𑀤𑀸𑀦𑁂𑀦 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀢𑁆𑀢𑀺𑀬𑀸 𑀘 𑀧𑀭𑀺𑀧𑀼𑀡𑁆𑀡𑀲𑀻𑀮𑀸. 𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀅𑀯𑀺𑀘𑁆𑀙𑀺𑀦𑁆𑀤𑀦𑀢𑁄 𑀲𑀻𑀮𑀲𑀫𑀗𑁆𑀕𑀺𑀦𑁄. 𑀏𑀢𑁆𑀢𑀸𑀯𑀢𑀸 𑀓𑀺𑀭𑀸𑀢𑀺 (𑀅. 𑀦𑀺. 𑁨.𑁩𑁭) 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄. 𑀢𑁂𑀦𑁂𑀢𑁆𑀣 𑀆𑀘𑀭𑀺𑀬𑀯𑀸𑀤𑀲𑁆𑀲 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀅𑀦𑀸𑀫𑀝𑁆𑀞𑀯𑀺𑀲𑁂𑀲𑀁 𑀲𑀸𑀫𑀜𑁆𑀜𑀢𑁄 𑀲𑀻𑀮𑀲𑀗𑁆𑀔𑁂𑀧𑁂𑀦 𑀕𑀳𑀺𑀢𑀁. 𑀢𑀜𑁆𑀘 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀆𑀘𑀭𑀺𑀬𑀢𑁆𑀣𑁂𑀭𑁄 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺 𑀆𑀳. 𑀢𑀢𑁆𑀣𑀸𑀢𑀺 ¶ 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂. 𑀚𑁂𑀝𑁆𑀞𑀓𑀲𑀻𑀮𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁧𑁨) 𑀧𑀥𑀸𑀦𑀲𑀻𑀮𑀁. 𑀉𑀪𑀬𑀢𑁆𑀣𑀸𑀢𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂. 𑀇𑀥 𑀦𑀺𑀤𑁆𑀤𑁂𑀲𑁂 𑀯𑀺𑀬 𑀉𑀤𑁆𑀤𑁂𑀲𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀮𑀕𑁆𑀕𑀳𑀡𑀜𑁆𑀳𑀺 𑀧𑀸𑀴𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀲𑁂𑀦 𑀆𑀕𑀢𑀁. 𑀢𑁂𑀦𑀸𑀳 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀯𑀥𑀸𑀭𑀡𑁂𑀦 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀏𑀓𑀤𑁂𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑁄𑀕𑀥𑀢𑀁 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑀅𑀦𑁄𑀮𑁄𑀓𑀺𑀬𑁄𑀮𑁄𑀓𑀦𑁂 𑀆𑀚𑀻𑀯𑀳𑁂𑀢𑀼 𑀙𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁂 𑀕𑀺𑀮𑀸𑀦𑀧𑀘𑁆𑀘𑀬𑀲𑁆𑀲 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀘 𑀆𑀧𑀢𑁆𑀢𑀺 𑀯𑀺𑀳𑀺𑀢𑀸𑀢𑀺. 𑀢𑀻𑀡𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀸𑀤𑀻𑀦𑀺. 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀻𑀮𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀕𑀳𑀺𑀢𑀝𑁆𑀞𑀸𑀦𑀁 𑀦𑀸𑀫 𑀓𑀺𑀁 𑀅𑀢𑁆𑀣𑀺 𑀬𑀣𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀢𑀺 ¶ 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑀢𑁆𑀢𑀸 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀯 𑀉𑀧𑀘𑀸𑀭𑁂𑀦 𑀧𑀼𑀘𑁆𑀙𑀦𑁆𑀢𑁄 𑀯𑀺𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀦𑀦𑀼𑀚𑀸𑀦𑀦𑁆𑀢𑁄’’𑀢𑀺. 𑀙𑀤𑁆𑀯𑀸𑀭𑀭𑀓𑁆𑀔𑀸𑀫𑀢𑁆𑀢𑀓𑀫𑁂𑀯𑀸𑀢𑀺 𑀢𑀲𑁆𑀲 𑀲𑀮𑁆𑀮𑀳𑀼𑀓𑀪𑀸𑀯𑀫𑀸𑀳 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀢𑁆𑀢𑁂𑀦 𑀧𑀝𑀺𑀧𑀸𑀓𑀢𑀺𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀦𑀳𑁂𑀢𑀼𑀓𑀸 𑀳𑀺 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀇𑀤𑀫𑀢𑁆𑀣𑀦𑁆𑀢𑀺 𑀇𑀤𑀁 𑀧𑀬𑁄𑀚𑀦𑀁 𑀇𑀫𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺 𑀢𑀻𑀡𑀺 𑀧𑀥𑀸𑀦𑀲𑁆𑀲 𑀲𑀻𑀮𑀲𑁆𑀲 𑀧𑀭𑀺𑀯𑀸𑀭𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀭𑀺𑀬𑀸𑀬𑀲𑀻𑀮𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀲𑁂𑀲𑀸𑀦𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺. 𑀢𑀲𑁆𑀲𑁂 𑀯𑀸𑀢𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀏𑀢𑁆𑀣 𑀬𑀁 𑀲𑀻𑀮𑀁 𑀯𑀼𑀢𑁆𑀢𑀁, 𑀢𑀲𑁆𑀲𑁂𑀯. 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸𑀢𑀺 𑀏𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀕𑁆𑀕𑀳𑀡𑁂𑀦 𑀯𑁂𑀯𑀘𑀦𑀁 𑀯𑀢𑁆𑀯𑀸 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸…𑀧𑁂… 𑀆𑀤𑀺𑀫𑀸𑀳. 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀻’’𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀉𑀤𑁆𑀤𑀺𑀝𑁆𑀞𑀁 𑀲𑀻𑀮𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮) 𑀦𑀺𑀤𑁆𑀤𑀺𑀝𑁆𑀞𑀁. 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺 𑀤𑁂𑀲𑀦𑀸𑀬 𑀓𑀸𑀭𑀡𑀧𑀼𑀘𑁆𑀙𑀸. 𑀲𑀻𑀮𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀬𑁄𑀚𑀦𑀦𑀺𑀤𑁆𑀤𑁂𑀲𑁄. ‘‘𑀲𑀻𑀮𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀳𑀺 𑀏𑀢𑁆𑀣 𑀩𑁆𑀬𑀢𑀺𑀭𑁂𑀓𑀢𑁄 𑀬𑀁 𑀲𑀻𑀮𑀸𑀦𑀺𑀲𑀁𑀲𑀲𑁆𑀲 𑀅𑀤𑀲𑁆𑀲𑀦𑀁, 𑀢𑀁 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀓𑀸𑀭𑀡𑀦𑁆𑀢𑀺 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺? 𑀯𑁂𑀦𑁂𑀬𑁆𑀬𑀸𑀦𑀁 𑀲𑀻𑀮𑀸𑀦𑀺𑀲𑀁𑀲𑀲𑁆𑀲 𑀅𑀤𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑁄 ¶ 𑀏𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀘𑁂𑀧𑀻’’𑀢𑀺𑀆𑀤𑀺. 𑀲𑀻𑀮𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀦 𑀇𑀫𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀦𑀺𑀲𑀁𑀲𑁄𑀢𑀺 𑀉𑀤𑀬𑁄. ‘‘𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫) 𑀧𑀦 𑀯𑀺𑀧𑀸𑀓𑀨𑀮𑀫𑁆𑀧𑀺 ‘‘𑀆𑀦𑀺𑀲𑀁𑀲𑁄’’𑀢𑀺 𑀯𑀼𑀢𑁆𑀢𑀁. 𑀓𑁄 𑀯𑀺𑀲𑁂𑀲𑁄𑀢𑀺 𑀓𑁄 𑀨𑀮𑀯𑀺𑀲𑁂𑀲𑁄. 𑀓𑀸 𑀯𑀟𑁆𑀠𑀻𑀢𑀺 𑀓𑁄 𑀅𑀩𑁆𑀪𑀼𑀤𑀬𑁄. 𑀯𑀺𑀚𑁆𑀚𑀫𑀸𑀦𑁄𑀧𑀺 𑀕𑀼𑀡𑁄 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑀺𑀢𑁄 𑀏𑀯 𑀅𑀪𑀺𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀦 𑀅𑀯𑀺𑀪𑀸𑀯𑀺𑀢𑁄, 𑀢𑀲𑁆𑀫𑀸 𑀏𑀓𑀦𑁆𑀢𑀢𑁄 𑀆𑀦𑀺𑀲𑀁𑀲𑀓𑀺𑀢𑁆𑀢𑀦𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑁂𑀯 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀧𑀺𑀬𑁄𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑁄. 𑀧𑀺𑀬𑀲𑁆𑀲 𑀦𑀸𑀫 𑀤𑀲𑁆𑀲𑀦𑀁 𑀏𑀓𑀦𑁆𑀢𑀢𑁄 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀺𑀢𑀩𑁆𑀩𑁄’’𑀢𑀺. 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑁆𑀧𑀲𑀦𑁆𑀦𑀲𑁄𑀫𑁆𑀫𑀭𑀽𑀧𑀧𑀭𑀺𑀕𑁆𑀕𑀳𑀜𑁆𑀳𑀺 𑀘𑀓𑁆𑀔𑀼 ‘‘𑀧𑀺𑀬𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀫𑀦𑀯𑀟𑁆𑀠𑀦𑀓𑁄𑀢𑀺 𑀧𑀻𑀢𑀺𑀫𑀦𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀢𑁄 𑀉𑀧𑀭𑀽𑀧𑀭𑀺 𑀧𑀻𑀢𑀺𑀘𑀺𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀸𑀤𑀦𑀓𑁄. 𑀕𑀭𑀼𑀝𑁆𑀞𑀸𑀦𑀺𑀬𑁄𑀢𑀺 𑀕𑀭𑀼𑀓𑀭𑀡𑀲𑁆𑀲 𑀞𑀸𑀦𑀪𑀽𑀢𑁄. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀺. 𑀬𑀣𑀸 𑀯𑀸 𑀅𑀜𑁆𑀜𑁂 𑀅𑀚𑀸𑀦𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺, 𑀦 𑀏𑀯𑀫𑀬𑀁, 𑀅𑀬𑀁 𑀧𑀦 𑀚𑀸𑀦𑀦𑁆𑀢𑁄 𑀏𑀯 𑀚𑀸𑀦𑀸𑀢𑀺. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 ¶ 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀏𑀯 𑀯𑀸 𑀧𑀲𑁆𑀲𑀢𑀺. 𑀏𑀯𑀁 𑀲𑀫𑁆𑀪𑀸𑀯𑀦𑀻𑀬𑁄𑀢𑀺 𑀏𑀯𑀁 𑀯𑀺𑀜𑁆𑀜𑀼𑀢𑀸𑀬 𑀧𑀡𑁆𑀟𑀺𑀢𑀪𑀸𑀯𑁂𑀦 𑀲𑀫𑁆𑀪𑀸𑀯𑁂𑀢𑀩𑁆𑀩𑁄. 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀏𑀯 𑀪𑀯𑁂𑀬𑁆𑀬𑀸𑀢𑀺. 𑀏𑀯𑀁 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 𑀇𑀫𑀺𑀦𑀸 𑀧𑀤𑁂𑀦 𑀉𑀧𑀭𑀺𑀲𑀺𑀓𑁆𑀔𑀸𑀤𑁆𑀯𑀬𑀁 𑀅𑀦𑀺𑀯𑀢𑁆𑀢𑀺𑀢𑀫𑁂𑀯 𑀳𑁄𑀢𑀺. 𑀬𑀣𑀸 𑀧𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀦𑀸𑀫 𑀳𑁄𑀢𑀺, 𑀢𑀁 𑀨𑀮𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀥𑀺𑀝𑁆𑀞𑀸𑀦𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀢𑀸𑀬 𑀳𑀺 𑀇𑀥 𑀲𑀻𑀮𑀲𑁆𑀲 𑀧𑀸𑀭𑀺𑀧𑀽𑀭𑀻, 𑀦 𑀓𑁂𑀯𑀮𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀫𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀅𑀔𑀡𑁆𑀟𑀸𑀦𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺𑀲𑀺𑀓𑁆𑀔𑀸𑀤𑁆𑀯𑀬𑀁 𑀲𑀻𑀮𑀲𑁆𑀲 𑀲𑀫𑁆𑀪𑀸𑀭𑀪𑀸𑀯𑁂𑀦 𑀕𑀳𑀺𑀢𑀦𑁆𑀢𑀺 𑀲𑀻𑀮𑀲𑁆𑀲𑁂𑀯𑁂𑀢𑁆𑀣 𑀧𑀥𑀸𑀦𑀕𑁆𑀕𑀳𑀡𑀁 𑀲𑀺𑀤𑁆𑀥𑀁 𑀳𑁄𑀢𑀺. 𑀲𑀻𑀮𑀸𑀦𑀼𑀭𑀓𑁆𑀔𑀓𑀸 𑀳𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀸. 𑀅𑀦𑀽𑀦𑁂𑀦𑀸𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑁂𑀦, 𑀓𑀲𑁆𑀲𑀘𑀺 𑀯𑀸 𑀅𑀳𑀸𑀧𑀦𑁂𑀦 𑀉𑀧𑀧𑀦𑁆𑀦𑁂𑀦. 𑀆𑀓𑀸𑀭𑁂𑀦𑀸𑀢𑀺 𑀓𑀭𑀡𑁂𑀦 𑀲𑀫𑁆𑀧𑀸𑀤𑀦𑁂𑀦.

𑀅𑀚𑁆𑀛𑀢𑁆𑀢𑀦𑁆𑀢𑀺 ¶ 𑀯𑀸 𑀅𑀢𑁆𑀢𑀦𑁄𑀢𑀺 𑀯𑀸 𑀏𑀓𑀁 𑀏𑀓𑀢𑁆𑀣𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁, ‘‘𑀲𑀫𑀣’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁 ‘‘𑀅𑀦𑀽’’𑀢𑀺 𑀇𑀫𑀺𑀦𑀸 𑀉𑀧𑀲𑀕𑁆𑀕𑁂𑀦 𑀬𑁄𑀕𑁂 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀫𑀣𑁂 𑀬𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀘𑀺𑀢𑁆𑀢𑀲𑀫𑀣𑁂𑀢𑀺 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑁂. 𑀬𑀼𑀢𑁆𑀢𑁄𑀢𑀺 𑀅𑀯𑀺𑀬𑀼𑀢𑁆𑀢𑁄 𑀧𑀲𑀼𑀢𑁄. 𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀛𑀸𑀦𑀪𑀸𑀯𑀦𑀸𑀬 𑀅𑀦𑀦𑀼𑀬𑀼𑀢𑁆𑀢𑁄, 𑀲𑁄 𑀢𑀁 𑀩𑀳𑀺 𑀦𑀻𑀳𑀭𑀢𑀺 𑀦𑀸𑀫. 𑀬𑁄 𑀆𑀭𑀪𑀺𑀢𑁆𑀯𑀸 𑀅𑀦𑁆𑀢𑀭𑀸 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺, 𑀲𑁄 𑀢𑀁 𑀯𑀺𑀦𑀸𑀲𑁂𑀢𑀺 𑀦𑀸𑀫. 𑀬𑁄 𑀧𑀦 𑀈𑀤𑀺𑀲𑁄 𑀅𑀳𑀼𑀢𑁆𑀯𑀸 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀺 𑀅𑀦𑀻𑀳𑀝𑀚𑁆𑀛𑀸𑀦𑁄’’𑀢𑀺𑀆𑀤𑀺𑀫𑀸𑀳. 𑀦𑀻𑀳𑀭𑀡𑀯𑀺𑀦𑀸𑀲𑀢𑁆𑀣𑀜𑁆𑀳𑀺 𑀇𑀤𑀁 𑀦𑀺𑀭𑀸𑀓𑀭𑀡𑀁 𑀦𑀸𑀫. ‘‘𑀣𑀫𑁆𑀪𑀁 𑀦𑀺𑀭𑀁𑀓𑀢𑁆𑀯𑀸 𑀦𑀺𑀯𑀸𑀢𑀯𑀼𑀢𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁩𑁨𑁮) 𑀘𑀲𑁆𑀲 𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄.

𑀲𑀢𑁆𑀢𑀯𑀺𑀥𑀸𑀬 𑀅𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀢𑀺 𑀇𑀫𑀸 𑀲𑀢𑁆𑀢𑀯𑀺𑀥𑀸 𑀅𑀦𑀼𑀧𑀲𑁆𑀲𑀦𑀸. 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀮𑀤𑁆𑀥𑀓𑀸𑀬𑀯𑀺𑀯𑁂𑀓𑀢𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑁄 𑀬𑀣𑀸𑀦𑀼𑀲𑀺𑀝𑁆𑀞𑀧𑀝𑀺𑀧𑀢𑁆𑀢𑀺𑀬𑀸 𑀮𑁄𑀓𑀁 𑀲𑀸𑀲𑀦𑀜𑁆𑀘 𑀅𑀢𑁆𑀢𑀦𑁄 𑀯𑀺𑀲𑁂𑀲𑀸𑀥𑀺𑀕𑀫𑀝𑁆𑀞𑀸𑀦𑀪𑀽𑀢𑀁 𑀲𑀼𑀜𑁆𑀜𑀸𑀕𑀸𑀭𑀜𑁆𑀘 𑀉𑀧𑀲𑁄𑀪𑀬𑀫𑀸𑀦𑁄 𑀕𑀼𑀡𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑀸𑀧𑀸𑀤𑀦𑁂𑀦 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀢𑁄 𑀢𑀁 𑀩𑁆𑀭𑀽𑀳𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀏𑀓𑀪𑀽𑀫𑀓𑀸𑀤𑀺𑀧𑀸𑀲𑀸𑀤𑁂 𑀓𑀼𑀭𑀼𑀫𑀸𑀦𑁄𑀧𑀺 𑀧𑀦 𑀦𑁂𑀯 𑀲𑀼𑀜𑁆𑀜𑀸𑀕𑀸𑀭𑀸𑀦𑀁 𑀩𑁆𑀭𑀽𑀳𑁂𑀢𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀼𑀜𑁆𑀜𑀸𑀕𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀸𑀤𑀺 𑀲𑀩𑁆𑀩𑀁 𑀧𑀥𑀸𑀦𑀸𑀦𑀼𑀬𑁄𑀕𑀓𑁆𑀔𑀫𑀁 𑀲𑁂𑀦𑀸𑀲𑀦𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀢𑀸𑀯𑀢𑀸 𑀬𑀣𑀸 𑀢𑀡𑁆𑀳𑀸𑀯𑀺𑀘𑀭𑀺𑀢𑀤𑁂𑀲𑀦𑀸 𑀧𑀞𑀫𑀁 𑀢𑀡𑁆𑀳𑀸𑀯𑀲𑁂𑀦 𑀆𑀭𑀤𑁆𑀥𑀸𑀧𑀺 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑀢𑁆𑀢𑀸 𑀫𑀸𑀦𑀤𑀺𑀝𑁆𑀞𑀻𑀦𑀁 ¶ 𑀫𑀸𑀦𑀤𑀺𑀝𑁆𑀞𑀺𑀬𑁄 𑀑𑀲𑀭𑀺𑀢𑁆𑀯𑀸 𑀓𑀫𑁂𑀦 𑀧𑀧𑀜𑁆𑀘𑀢𑁆𑀢𑀬𑀤𑁂𑀲𑀦𑀸 𑀚𑀸𑀢𑀸, 𑀏𑀯𑀫𑀬𑀁 𑀤𑁂𑀲𑀦𑀸 𑀧𑀞𑀫𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯𑀲𑁂𑀦 𑀆𑀭𑀤𑁆𑀥𑀸𑀧𑀺 𑀲𑀻𑀮𑀧𑀤𑀝𑁆𑀞𑀸𑀦𑀢𑁆𑀢𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀬𑁄 𑀑𑀲𑀭𑀺𑀢𑁆𑀯𑀸 𑀓𑀫𑁂𑀦 𑀲𑀺𑀓𑁆𑀔𑀸𑀢𑁆𑀢𑀬𑀤𑁂𑀲𑀦𑀸 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀳𑀺 ‘‘𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀯𑀼𑀢𑁆𑀢𑀸, ‘‘𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄’’𑀢𑀺 𑀏𑀢𑁆𑀢𑀸𑀯𑀢𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, ‘‘𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. ‘‘𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀫𑀣𑀯𑀲𑁂𑀦 𑀲𑀼𑀜𑁆𑀜𑀸𑀕𑀸𑀭𑀯𑀟𑁆𑀠𑀦𑁂 ¶ 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺 𑀏𑀯𑀁 𑀤𑁆𑀯𑁂𑀧𑀺 𑀲𑀺𑀓𑁆𑀔𑀸 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀏𑀢𑁆𑀣 𑀘 ‘‘𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄’’𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀻𑀮𑀸𑀦𑀼𑀭𑀓𑁆𑀔𑀺𑀓𑀸 𑀏𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀓𑀣𑀺𑀢𑀸, ‘‘𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀻𑀮𑀸𑀦𑀼𑀭𑀓𑁆𑀔𑀺𑀓𑁄 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑁄.

𑀓𑀣𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀻𑀮𑀫𑀦𑀼𑀭𑀓𑁆𑀔𑀢𑀺? 𑀬𑀲𑁆𑀲 𑀳𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑀢𑁆𑀣𑀺, 𑀲𑁄 𑀩𑁆𑀬𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀯𑀺𑀳𑀜𑁆𑀜𑀢𑀺, 𑀲𑁄 𑀩𑁆𑀬𑀸𑀥𑀺𑀯𑀺𑀳𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑀻𑀮𑀁 𑀯𑀺𑀦𑀸𑀲𑁂𑀢𑁆𑀯𑀸𑀧𑀺 𑀩𑁆𑀬𑀸𑀥𑀺𑀯𑀽𑀧𑀲𑀫𑀁 𑀓𑀢𑁆𑀢𑀸 𑀳𑁄𑀢𑀺. 𑀬𑀲𑁆𑀲 𑀧𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀅𑀢𑁆𑀣𑀺, 𑀲𑁄 𑀢𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀫𑀸𑀧𑀦𑁆𑀦𑀓𑁆𑀔𑀡𑁂 𑀤𑀼𑀓𑁆𑀔𑀁 𑀤𑀽𑀭𑀕𑀢𑀁 𑀳𑁄𑀢𑀺, 𑀩𑀮𑀯𑀢𑀭𑀁 𑀲𑀼𑀔𑀫𑀼𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀻𑀮𑀫𑀦𑀼𑀭𑀓𑁆𑀔𑀢𑀺. 𑀓𑀣𑀁 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑁄 𑀲𑀻𑀮𑀫𑀦𑀼𑀭𑀓𑁆𑀔𑀢𑀺? 𑀬𑀲𑁆𑀲 𑀳𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑁄 𑀦𑀢𑁆𑀣𑀺, 𑀢𑀲𑁆𑀲 ‘‘𑀫𑀫 𑀭𑀽𑀧𑀁 𑀫𑀫 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀅𑀢𑁆𑀢𑀪𑀸𑀯𑁂 𑀩𑀮𑀯𑀫𑀫𑀢𑁆𑀢𑀁 𑀳𑁄𑀢𑀺, 𑀲𑁄 𑀢𑀣𑀸𑀭𑀽𑀧𑁂𑀲𑀼 𑀤𑀼𑀩𑁆𑀪𑀺𑀓𑁆𑀔𑀩𑁆𑀬𑀸𑀥𑀺𑀪𑀬𑀸𑀤𑀻𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀲𑀻𑀮𑀁 𑀦𑀸𑀲𑁂𑀢𑁆𑀯𑀸𑀧𑀺 𑀅𑀢𑁆𑀢𑀪𑀸𑀯𑀁 𑀧𑁄𑀲𑁂𑀢𑀸 𑀳𑁄𑀢𑀺. 𑀬𑀲𑁆𑀲 𑀧𑀦 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑁄 𑀅𑀢𑁆𑀣𑀺, 𑀢𑀲𑁆𑀲 𑀅𑀢𑁆𑀢𑀪𑀸𑀯𑁂 𑀩𑀮𑀯𑀫𑀫𑀢𑁆𑀢𑀁 𑀯𑀸 𑀲𑀺𑀦𑁂𑀳𑁄 𑀯𑀸 𑀦 𑀳𑁄𑀢𑀺, 𑀲𑁄 𑀢𑀣𑀸𑀭𑀽𑀧𑁂𑀲𑀼 𑀤𑀼𑀩𑁆𑀪𑀺𑀓𑁆𑀔𑀩𑁆𑀬𑀸𑀥𑀺𑀪𑀬𑀸𑀤𑀻𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀲𑀘𑁂𑀧𑀺𑀲𑁆𑀲 𑀅𑀦𑁆𑀢𑀸𑀦𑀺 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀲𑀘𑁂𑀧𑀺 𑀉𑀲𑁆𑀲𑀼𑀲𑁆𑀲𑀢𑀺 𑀯𑀺𑀲𑀼𑀲𑁆𑀲𑀢𑀺, 𑀔𑀡𑁆𑀟𑀸𑀔𑀡𑁆𑀟𑀺𑀓𑁄 𑀯𑀸 𑀳𑁄𑀢𑀺 𑀲𑀢𑀥𑀸𑀧𑀺 𑀲𑀳𑀲𑁆𑀲𑀥𑀸𑀧𑀺, 𑀦𑁂𑀯 𑀲𑀻𑀮𑀁 𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀧𑁄𑀲𑁂𑀢𑀸 𑀳𑁄𑀢𑀺. 𑀏𑀯𑀁 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑁄 𑀲𑀻𑀮𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀢𑀲𑁆𑀲𑁂𑀯 𑀉𑀪𑀬𑀲𑁆𑀲 𑀩𑁆𑀭𑀽𑀳𑀦𑀸 𑀯𑀟𑁆𑀠𑀦𑀸 𑀲𑀸𑀢𑀘𑁆𑀘𑀓𑀺𑀭𑀺𑀬𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀪𑀕𑀯𑀸 𑀬𑀲𑁆𑀫𑀸 ‘‘𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘𑀲𑁆𑀲𑀁…𑀧𑁂… 𑀪𑀸𑀯𑀦𑀻𑀬𑁄 𑀘𑀸’’𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀆𑀓𑀗𑁆𑀔𑀦𑁆𑀢𑁂𑀦 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀤𑀢𑁆𑀣𑀼 𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀈𑀤𑀺𑀲𑁄 𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀕𑀭𑀼 𑀪𑀸𑀯𑀦𑀻𑀬𑁄. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀲𑀻𑀮𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁 ¶ , 𑀥𑀫𑁆𑀫𑀝𑁆𑀞𑀁 𑀲𑀘𑁆𑀘𑀯𑁂𑀤𑀺𑀦𑀁;

𑀅𑀢𑁆𑀢𑀦𑁄 𑀓𑀫𑁆𑀫 𑀓𑀼𑀩𑁆𑀩𑀸𑀦𑀁, 𑀢𑀁 𑀚𑀦𑁄 𑀓𑀼𑀭𑀼𑀢𑁂 𑀧𑀺𑀬’’𑀦𑁆𑀢𑀺. (𑀥. 𑀧. 𑁨𑁧𑁭);

𑀢𑀲𑁆𑀫𑀸 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘𑀲𑁆𑀲𑀁…𑀧𑁂… 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻…𑀧𑁂… 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀧𑀘𑁆𑀘𑀬𑀮𑀸𑀪𑀸𑀤𑀺𑀁 ¶ 𑀧𑀢𑁆𑀣𑀬𑀦𑁆𑀢𑁂𑀦𑀧𑀺 𑀇𑀤𑀫𑁂𑀯 𑀓𑀭𑀡𑀻𑀬𑀁, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺, 𑀢𑀲𑁆𑀫𑀸 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀸𑀪𑀻 𑀅𑀲𑁆𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀮𑀸𑀪𑀻 𑀅𑀲𑁆𑀲𑀦𑁆𑀢𑀺 𑀮𑀸𑀪𑀸𑀲𑀸𑀬 𑀲𑀁𑀯𑀭𑀲𑀻𑀮𑀧𑀭𑀺𑀧𑀽𑀭𑀡𑀁 𑀧𑀸𑀴𑀺𑀬𑀁 𑀆𑀕𑀢𑀁. 𑀓𑀺𑀫𑀻𑀤𑀺𑀲𑀁 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀻𑀢𑀺? 𑀦 𑀪𑀕𑀯𑀸 𑀲𑀪𑀸𑀯𑁂𑀦 𑀈𑀤𑀺𑀲𑀁 𑀅𑀦𑀼𑀚𑀸𑀦𑀸𑀢𑀺, 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀖𑀸𑀲𑁂𑀲𑀦𑀁 𑀙𑀺𑀦𑁆𑀦𑀓𑀣𑁄, 𑀦 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀡𑁂𑀢𑀺 𑀙𑀺𑀦𑁆𑀦𑀓𑀣𑁄 𑀫𑀽𑀕𑁄 𑀯𑀺𑀬 𑀳𑀼𑀢𑁆𑀯𑀸 𑀑𑀪𑀸𑀲𑀧𑀭𑀺𑀓𑀣𑀸𑀦𑀺𑀫𑀺𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀧𑀬𑀼𑀢𑁆𑀢𑀁 𑀖𑀸𑀲𑁂𑀲𑀦𑀁 𑀯𑀸𑀘𑀁 𑀦 𑀪𑀡𑁂, 𑀦 𑀓𑀣𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑁂𑀲𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀭𑀲𑁄 𑀲𑀪𑀸𑀯𑀪𑀽𑀢𑁄 𑀆𑀦𑀺𑀲𑀁𑀲𑁄 𑀭𑀲𑀸𑀦𑀺𑀲𑀁𑀲𑁄.

𑀧𑀘𑁆𑀘𑀬𑀤𑀸𑀦𑀓𑀸𑀭𑀸𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀓𑀸𑀭𑀸. 𑀫𑀳𑀧𑁆𑀨𑀮𑀸 𑀫𑀳𑀸𑀦𑀺𑀲𑀁𑀲𑀸𑀢𑀺 𑀉𑀪𑀬𑀫𑁂𑀢𑀁 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁨𑁮𑁫) 𑀳𑀺 𑀆𑀦𑀺𑀲𑀁𑀲𑀲𑀤𑁆𑀤𑁄 𑀨𑀮𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺. 𑀫𑀳𑀦𑁆𑀢𑀁 𑀯𑀸 𑀮𑁄𑀓𑀺𑀬𑀲𑀼𑀔𑀁 𑀨𑀮𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺 𑀫𑀳𑀧𑁆𑀨𑀮𑀸, 𑀫𑀳𑀢𑁄 𑀮𑁄𑀓𑀼𑀢𑁆𑀢𑀭𑀲𑀼𑀔𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀢𑁂𑀦𑀸𑀳 ‘‘𑀮𑁄𑀓𑀺𑀬𑀲𑀼𑀔𑁂𑀦 𑀨𑀮𑀪𑀽𑀢𑁂𑀦𑀸’’𑀢𑀺𑀆𑀤𑀺.

𑀧𑁂𑀘𑁆𑀘𑀪𑀯𑀁 𑀕𑀢𑀸𑀢𑀺 𑀧𑁂𑀢𑀽𑀧𑀧𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀕𑀢𑀸. 𑀢𑁂 𑀧𑀦 𑀬𑀲𑁆𑀫𑀸 𑀇𑀥 𑀓𑀢𑀓𑀸𑀮𑀓𑀺𑀭𑀺𑀬𑀸 𑀓𑀸𑀮𑁂𑀦 𑀓𑀢𑀚𑀻𑀯𑀺𑀢𑀼𑀧𑀘𑁆𑀙𑁂𑀤𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀮𑀓𑀢𑀸’’𑀢𑀺. 𑀲𑀲𑁆𑀲𑀼𑀲𑀲𑀼𑀭𑀸 𑀘 𑀢𑀧𑁆𑀧𑀓𑁆𑀔𑀺𑀓𑀸 𑀘 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸. 𑀢𑁂 𑀜𑀸𑀢𑀺𑀬𑁄𑀦𑀺𑀲𑀫𑁆𑀩𑀦𑁆𑀥𑁂𑀦 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀫𑁆𑀩𑀤𑁆𑀥𑀸 𑀜𑀸𑀢𑀻. 𑀲𑀸𑀮𑁄𑀳𑀺𑀢𑀸𑀢𑀺 𑀬𑁄𑀦𑀺𑀲𑀫𑁆𑀩𑀦𑁆𑀥𑀯𑀲𑁂𑀦. 𑀏𑀓𑀮𑁄𑀳𑀺𑀢𑀩𑀤𑁆𑀥𑀸𑀢𑀺 𑀏𑀓𑁂𑀦 𑀲𑀫𑀸𑀦𑁂𑀦 𑀮𑁄𑀳𑀺𑀢𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀩𑀤𑁆𑀥𑀸. 𑀧𑀲𑀦𑁆𑀦𑀘𑀺𑀢𑁆𑀢𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀓𑁄. 𑀓𑀸𑀮𑀓𑀢𑁄 𑀧𑀺𑀢𑀸 𑀯𑀸 𑀫𑀸𑀢𑀸 𑀯𑀸 𑀧𑁂𑀢𑀬𑁄𑀦𑀺𑀬𑀁 𑀉𑀧𑁆𑀧𑀦𑁆𑀦𑁄𑀢𑀺 𑀅𑀥𑀺𑀓𑀸𑀭𑀢𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀦𑀺𑀲𑀁𑀲𑀫𑁂𑀯 𑀳𑁄𑀢𑀻𑀢𑀺 𑀢𑀲𑁆𑀲 𑀢𑀣𑀸𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀚𑁆𑀛𑁄𑀢𑁆𑀣𑀭𑀺𑀢𑀸𑀢𑀺 ¶ 𑀫𑀤𑁆𑀤𑀺𑀢𑀸. 𑀦 𑀘 𑀫𑀁 𑀅𑀭𑀢𑀺 𑀲𑀳𑁂𑀬𑁆𑀬𑀸𑀢𑀺 𑀫𑀁 𑀘 𑀅𑀭𑀢𑀺 𑀦 𑀅𑀪𑀺𑀪𑀯𑁂𑀬𑁆𑀬 𑀦 𑀫𑀤𑁆𑀤𑁂𑀬𑁆𑀬 𑀦 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬. 𑀉𑀧𑁆𑀧𑀦𑁆𑀦𑀦𑁆𑀢𑀺 𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁. 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀳𑀺 𑀅𑀭𑀢𑀺𑀜𑁆𑀘 𑀭𑀢𑀺𑀜𑁆𑀘 𑀲𑀳𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀫𑀤𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀈𑀤𑀺𑀲𑀫𑀢𑁆𑀢𑀸𑀦𑀁 𑀇𑀘𑁆𑀙𑀦𑁆𑀢𑁂𑀦𑀧𑀺 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 ¶ 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀪𑀸𑀬𑀢𑀻𑀢𑀺 𑀪𑀬𑀁, 𑀆𑀭𑀫𑁆𑀫𑀡𑀁 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀪𑀬𑀁 𑀪𑁂𑀭𑀯𑀜𑁆𑀘 𑀲𑀳𑀢𑀺 𑀅𑀪𑀺𑀪𑀯𑀢𑀻𑀢𑀺 𑀪𑀬𑀪𑁂𑀭𑀯𑀲𑀳𑁄. 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀳𑀺 𑀪𑀬𑀪𑁂𑀭𑀯𑀁 𑀲𑀳𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀫𑀤𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀅𑀭𑀺𑀬𑀓𑁄𑀝𑀺𑀬𑀯𑀸𑀲𑀻 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁄 𑀯𑀺𑀬.

𑀣𑁂𑀭𑁄 𑀓𑀺𑀭 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀜𑁆𑀜𑀢𑀭𑀁 𑀧𑀸𑀲𑀸𑀤𑀺𑀓𑀁 𑀅𑀭𑀜𑁆𑀜𑀁 𑀤𑀺𑀲𑁆𑀯𑀸 ‘‘𑀇𑀥𑁂𑀯𑀚𑁆𑀚 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀼𑀓𑁆𑀔𑀤𑁂𑀯𑀢𑀸𑀬 𑀤𑀸𑀭𑀓𑀸 𑀣𑁂𑀭𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑀺𑀲𑁆𑀲𑀭𑀫𑀓𑀁𑀲𑀼. 𑀤𑁂𑀯𑀢𑀸𑀧𑀺 𑀲𑀓𑀮𑀭𑀼𑀓𑁆𑀔𑀁 𑀘𑀸𑀮𑁂𑀲𑀺. 𑀣𑁂𑀭𑁄 𑀅𑀘𑀮𑁄𑀯 𑀦𑀺𑀲𑀻𑀤𑀺. 𑀲𑀸 𑀤𑁂𑀯𑀢𑀸 𑀥𑀽𑀫𑀸𑀬𑀺 𑀧𑀚𑁆𑀚𑀮𑀺. 𑀦𑁂𑀯 𑀲𑀓𑁆𑀔𑀺 𑀣𑁂𑀭𑀁 𑀘𑀸𑀮𑁂𑀢𑀼𑀁. 𑀢𑀢𑁄 𑀉𑀧𑀸𑀲𑀓𑀯𑀡𑁆𑀡𑁂𑀦𑀸𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀓𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸’’𑀢𑀺 𑀅𑀯𑁄𑀘. 𑀢𑁆𑀯𑀁 𑀏𑀢𑁂 𑀯𑀺𑀓𑀸𑀭𑁂 𑀅𑀓𑀸𑀲𑀻𑀢𑀺. 𑀆𑀫, 𑀪𑀦𑁆𑀢𑁂𑀢𑀺. ‘‘𑀓𑀲𑁆𑀫𑀸’’𑀢𑀺 𑀘 𑀯𑀼𑀢𑁆𑀢𑀸 𑀆𑀳 ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀲𑀻𑀮𑀢𑁂𑀚𑁂𑀦 𑀤𑀸𑀭𑀓𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑀺𑀲𑁆𑀲𑀭𑀫𑀓𑀁𑀲𑀼, 𑀲𑀸𑀳𑀁 𑀢𑀼𑀫𑁆𑀳𑁂 𑀧𑀮𑀸𑀧𑁂𑀢𑀼𑀁 𑀏𑀯𑀫𑀓𑀸𑀲𑀺’’𑀦𑁆𑀢𑀺. 𑀣𑁂𑀭𑁄 𑀆𑀳 ‘‘𑀅𑀣 𑀓𑀲𑁆𑀫𑀸 ‘𑀇𑀥, 𑀪𑀦𑁆𑀢𑁂, 𑀫𑀸 𑀯𑀲𑀣, 𑀫𑀬𑁆𑀳𑀁 𑀅𑀨𑀸𑀲𑀼𑀓’𑀦𑁆𑀢𑀺 𑀧𑀝𑀺𑀓𑀘𑁆𑀘𑁂𑀯 𑀦𑀸𑀯𑀘𑀸𑀲𑀺, 𑀇𑀤𑀸𑀦𑀺 𑀧𑀦 𑀫𑀸 𑀫𑀁 𑀓𑀺𑀜𑁆𑀘𑀺 𑀅𑀯𑀘, ‘𑀅𑀭𑀺𑀬𑀓𑁄𑀝𑀺𑀬𑀫𑀳𑀸𑀤𑀢𑁆𑀢𑁄 𑀅𑀫𑀦𑀼𑀲𑁆𑀲𑀪𑀬𑁂𑀦 𑀕𑀢𑁄’𑀢𑀺 𑀯𑀘𑀦𑀢𑁄 𑀮𑀚𑁆𑀚𑀸𑀫𑀺, 𑀢𑁂𑀦𑀸𑀳𑀁 𑀇𑀥𑁂𑀯 𑀯𑀲𑀺𑀲𑁆𑀲𑀁, 𑀢𑁆𑀯𑀁 𑀧𑀦 𑀅𑀚𑁆𑀚𑁂𑀓𑀤𑀺𑀯𑀲𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀸𑀳𑀻’’𑀢𑀺. 𑀏𑀯𑀁 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀪𑀬𑀪𑁂𑀭𑀯𑀲𑀳𑁄 𑀳𑁄𑀢𑀺, 𑀢𑀲𑁆𑀫𑀸 𑀈𑀤𑀺𑀲𑀫𑀢𑁆𑀢𑀸𑀦𑀁 𑀇𑀘𑁆𑀙𑀦𑁆𑀢𑁂𑀦𑀧𑀺 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀆𑀓𑀗𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁫-𑁮𑁦. 𑀧𑀜𑁆𑀘𑀫𑁂 𑀇𑀫𑀲𑁆𑀲 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀲𑀻𑀮𑀯𑀺𑀭𑀳𑀺𑀢𑀲𑁆𑀲 𑀧𑀜𑁆𑀜𑀸 𑀲𑀻𑀮𑀁 𑀧𑀭𑀺𑀥𑁄𑀯𑀢𑀻𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀲𑀻𑀮𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀜𑁆𑀜𑀸𑀬 ¶ 𑀲𑀼𑀯𑀺𑀲𑁄𑀥𑀺𑀢𑀁 𑀓𑀭𑁄𑀢𑀺. 𑀬𑀲𑁆𑀲 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀲𑀁𑀯𑀭𑁄 𑀦𑀢𑁆𑀣𑀺, 𑀉𑀕𑁆𑀖𑀝𑀺𑀢𑀜𑁆𑀜𑀼𑀢𑀸𑀬 𑀧𑀦 𑀘𑀸𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀜𑀸𑀬 𑀲𑀻𑀮𑀁 ¶ 𑀥𑁄𑀯𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀧𑀜𑁆𑀜𑀸𑀬 𑀲𑀻𑀮𑀁 𑀥𑁄𑀯𑀢𑀺 𑀦𑀸𑀫 𑀲𑁂𑀬𑁆𑀬𑀣𑀸𑀧𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄.

𑀲𑀻𑀮𑀯𑀸 𑀧𑀦 𑀧𑀜𑁆𑀜𑀁 𑀥𑁄𑀯𑀢𑀺. 𑀬𑀲𑁆𑀲 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁧𑁭) 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀻𑀮𑀁 𑀲𑀝𑁆𑀞𑀺𑀅𑀲𑀻𑀢𑀺𑀯𑀲𑁆𑀲𑀸𑀦𑀺 𑀅𑀔𑀡𑁆𑀟𑀁 𑀳𑁄𑀢𑀺, 𑀲𑁄 𑀫𑀭𑀡𑀓𑀸𑀮𑁂𑀧𑀺 𑀲𑀩𑁆𑀩𑀓𑀺𑀮𑁂𑀲𑁂 𑀖𑀸𑀢𑁂𑀢𑁆𑀯𑀸 𑀲𑀻𑀮𑁂𑀦 𑀧𑀜𑁆𑀜𑀁 𑀥𑁄𑀯𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀓𑀦𑁆𑀤𑀭𑀲𑀸𑀮𑀧𑀭𑀺𑀯𑁂𑀡𑁂 𑀫𑀳𑀸𑀲𑀝𑁆𑀞𑀺𑀯𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀣𑁂𑀭𑁂 𑀓𑀺𑀭 𑀫𑀭𑀡𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀩𑀮𑀯𑀯𑁂𑀤𑀦𑀸𑀬 𑀦𑀺𑀢𑁆𑀣𑀼𑀦𑀦𑁆𑀢𑁂 𑀢𑀺𑀲𑁆𑀲𑀫𑀳𑀸𑀭𑀸𑀚𑀸 ‘‘𑀣𑁂𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀭𑀺𑀯𑁂𑀡𑀤𑁆𑀯𑀸𑀭𑁂 𑀞𑀺𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀓𑀲𑁆𑀲 𑀲𑀤𑁆𑀤𑁄 𑀅𑀬’’𑀦𑁆𑀢𑀺. 𑀣𑁂𑀭𑀲𑁆𑀲 𑀦𑀺𑀢𑁆𑀣𑀼𑀦𑀦𑀲𑀤𑁆𑀤𑁄𑀢𑀺. ‘‘𑀧𑀩𑁆𑀩𑀚𑁆𑀚𑀸𑀬 𑀲𑀝𑁆𑀞𑀺𑀯𑀲𑁆𑀲𑁂𑀦 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁆𑀧𑀺 𑀦 𑀓𑀢𑀁, 𑀇𑀤𑀸𑀦𑀺 𑀦 𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀁 𑀕𑀢𑁄. 𑀢𑀢𑁄 𑀉𑀧𑀝𑁆𑀞𑀸𑀓𑀤𑀳𑀭𑁄 𑀣𑁂𑀭𑀁 𑀆𑀳 ‘‘𑀓𑀺𑀁 𑀦𑁄, 𑀪𑀦𑁆𑀢𑁂, 𑀮𑀚𑁆𑀚𑀸𑀧𑁂𑀣, 𑀲𑀤𑁆𑀥𑁄𑀧𑀺 𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘𑀦 𑀯𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀕𑀢𑁄’’𑀢𑀺. 𑀓𑀲𑁆𑀫𑀸, 𑀆𑀯𑀼𑀲𑁄𑀢𑀺? 𑀢𑀼𑀫𑁆𑀳𑀸𑀓𑀁 𑀦𑀺𑀢𑁆𑀣𑀼𑀦𑀦𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺. ‘‘𑀢𑁂𑀦 𑀳𑀺 𑀫𑁂 𑀑𑀓𑀸𑀲𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀤𑀳𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀕𑀘𑁆𑀙𑀸𑀯𑀼𑀲𑁄, 𑀇𑀤𑀸𑀦𑀺 𑀭𑀸𑀚𑀸𑀦𑀁 𑀅𑀫𑁆𑀳𑁂 𑀯𑀦𑁆𑀤𑀸𑀧𑁂𑀳𑀻’’𑀢𑀺. 𑀤𑀳𑀭𑁄 𑀕𑀦𑁆𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀭 𑀣𑁂𑀭𑀁 𑀯𑀦𑁆𑀤𑀣𑀸’’𑀢𑀺 𑀆𑀳. 𑀭𑀸𑀚𑀸 𑀲𑀼𑀲𑀼𑀫𑀸𑀭𑀧𑀢𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀦𑁆𑀢𑁄 ‘‘𑀦𑀸𑀳𑀁 𑀅𑀬𑁆𑀬𑀲𑁆𑀲 𑀅𑀭𑀳𑀢𑁆𑀢𑀁 𑀯𑀦𑁆𑀤𑀸𑀫𑀺, 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀬𑀁 𑀧𑀦 𑀞𑀢𑁆𑀯𑀸 𑀭𑀓𑁆𑀔𑀺𑀢𑀲𑀻𑀮𑀫𑁂𑀯 𑀯𑀦𑁆𑀤𑀸𑀫𑀻’’𑀢𑀺 𑀆𑀳. 𑀏𑀯𑀁 𑀲𑀻𑀮𑁂𑀦 𑀧𑀜𑁆𑀜𑀁 𑀥𑁄𑀯𑀢𑀺 𑀦𑀸𑀫. 𑀲𑁂𑀲𑀁 𑀯𑀼𑀢𑁆𑀢𑀫𑁂𑀯. 𑀙𑀝𑁆𑀞𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀓𑀗𑁆𑀔𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁯) 𑁪. 𑀣𑁂𑀭𑀯𑀕𑁆𑀕𑁄

𑁧-𑁮. 𑀯𑀸𑀳𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁧-𑁮𑁮. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦𑀸𑀢𑀺 𑀦𑀺𑀫𑁆𑀫𑀭𑀺𑀬𑀸𑀤𑀻𑀓𑀢𑁂𑀦. 𑀘𑁂𑀢𑀲𑀸𑀢𑀺 𑀏𑀯𑀁𑀯𑀺𑀥𑁂𑀦 𑀘𑀺𑀢𑁆𑀢𑁂𑀦 𑀯𑀺𑀳𑀭𑀢𑀺. 𑀢𑀢𑁆𑀣 𑀤𑁆𑀯𑁂 𑀫𑀭𑀺𑀬𑀸𑀤𑀸 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀘 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸 𑀘. 𑀲𑀘𑁂 𑀳𑀺𑀲𑁆𑀲 𑀭𑀽𑀧𑀸𑀤𑀺𑀓𑁂 𑀆𑀭𑀩𑁆𑀪 𑀭𑀸𑀕𑀸𑀤𑀬𑁄 ¶ 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀢𑁂𑀦 𑀓𑀢𑀸 𑀪𑀯𑁂𑀬𑁆𑀬. 𑀢𑁂𑀲𑀼 𑀧𑀦𑀲𑁆𑀲 𑀏𑀓𑁄𑀧𑀺 ¶ 𑀦 𑀉𑀧𑁆𑀧𑀦𑁆𑀦𑁄𑀢𑀺 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀦𑀢𑁆𑀣𑀺. 𑀲𑀘𑁂 𑀧𑀦𑀲𑁆𑀲 𑀭𑀽𑀧𑀸𑀤𑀺𑀥𑀫𑁆𑀫𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀏𑀓𑀘𑁆𑀘𑁂 𑀆𑀧𑀸𑀣𑀁 𑀦𑀸𑀕𑀘𑁆𑀙𑁂𑀬𑁆𑀬𑀼𑀁, 𑀏𑀯𑀫𑀲𑁆𑀲 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸 𑀪𑀯𑁂𑀬𑁆𑀬. 𑀢𑁂 𑀧𑀦𑀲𑁆𑀲 𑀥𑀫𑁆𑀫𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀆𑀧𑀸𑀣𑀁 𑀅𑀦𑀸𑀕𑀢𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸𑀧𑀺 𑀦𑀢𑁆𑀣𑀺. 𑀇𑀥 𑀧𑀦 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀓𑀺𑀮𑁂𑀲𑀫𑀭𑀺𑀬𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑀺𑀬𑀸𑀤𑀻𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀯𑀸𑀳𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁯-𑁯𑁦. 𑀦𑀯𑀫𑁂 (𑀲𑀁. 𑀦𑀺. 𑀝𑀻. 𑁧.𑁧.𑁧𑁮𑁧) 𑀓𑁄𑀓𑀸𑀮𑀺𑀓𑀦𑀸𑀫𑀓𑀸 𑀤𑁆𑀯𑁂 𑀪𑀺𑀓𑁆𑀔𑀽. 𑀢𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑁄𑀬𑀁 𑀓𑁄𑀓𑀸𑀮𑀺𑀓𑁄’’𑀢𑀺 𑀧𑀼𑀘𑁆𑀙𑀸. 𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸 𑀘 𑀉𑀧𑀲𑀗𑁆𑀓𑀫𑀻’’𑀢𑀺 𑀧𑀼𑀘𑁆𑀙𑀸. 𑀅𑀬𑀁 𑀓𑀺𑀭𑀸𑀢𑀺𑀆𑀤𑀺 𑀬𑀣𑀸𑀓𑁆𑀓𑀫𑀁 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀢𑁆𑀢𑀸 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀫𑀸 𑀦𑁄 𑀓𑀲𑁆𑀲𑀘𑀺…𑀧𑁂… 𑀯𑀲𑀺𑀁𑀲𑀼. 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀲𑀺 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀺𑀖𑀸𑀢𑀦𑀢𑁄. 𑀣𑁂𑀭𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀬𑀺𑀁𑀲𑀼 𑀧𑀬𑀼𑀢𑁆𑀢𑀯𑀸𑀘𑀸𑀬 𑀅𑀓𑀢𑀢𑁆𑀢𑀸 𑀣𑁂𑀭𑁂𑀳𑀺 𑀘 𑀅𑀤𑀸𑀧𑀺𑀢𑀢𑁆𑀢𑀸. 𑀧𑀼𑀩𑁆𑀩𑁂𑀧𑀺…𑀧𑁂… 𑀫𑀜𑁆𑀜𑁂𑀢𑀺 𑀇𑀫𑀺𑀦𑀸 𑀣𑁂𑀭𑀸𑀦𑀁 𑀓𑁄𑀳𑀜𑁆𑀜𑁂 𑀞𑀺𑀢𑀪𑀸𑀯𑀁 𑀆𑀲𑀗𑁆𑀓𑀢𑀺 𑀅𑀯𑀡𑁂 𑀯𑀡𑀁 𑀧𑀲𑁆𑀲𑀦𑁆𑀢𑁄 𑀯𑀺𑀬, 𑀲𑀼𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑀢𑀮𑁂 𑀚𑀮𑁆𑀮𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀘.

𑀅𑀧𑀭𑀚𑁆𑀛𑀺𑀢𑁆𑀯𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 ‘‘𑀧𑀸𑀧𑀪𑀺𑀓𑁆𑀔𑀽 𑀚𑀸𑀢𑀸’’𑀢𑀺 𑀯𑀢𑁆𑀯𑀸. 𑀫𑀳𑀸𑀲𑀸𑀯𑀚𑁆𑀚𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀫𑀸𑀳𑁂𑀯𑀦𑁆𑀢𑀺 𑀫𑀸 𑀏𑀯𑀫𑀸𑀳, 𑀫𑀸 𑀏𑀯𑀁 𑀪𑀡𑀺. 𑀲𑀤𑁆𑀥𑀸𑀬 𑀅𑀬𑁄 𑀉𑀧𑁆𑀧𑀸𑀤𑁄 𑀲𑀤𑁆𑀥𑀸𑀬𑁄, 𑀢𑀁 𑀆𑀯𑀳𑀢𑀻𑀢𑀺 𑀲𑀤𑁆𑀥𑀸𑀬𑀺𑀓𑁄𑀢𑀺 𑀆𑀳 ‘‘𑀲𑀤𑁆𑀥𑀸𑀬 𑀆𑀕𑀫𑀓𑀭𑁄’’𑀢𑀺. 𑀲𑀤𑁆𑀥𑀸𑀬𑀺𑀓𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀬𑀺𑀢𑀩𑁆𑀩𑁄, 𑀲𑀤𑁆𑀥𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑁄 𑀯𑀸’’𑀢𑀺.

𑀧𑀻𑀴𑀓𑀸 𑀦𑀸𑀫 𑀩𑀸𑀳𑀺𑀭𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀦𑁆𑀢𑀺, 𑀇𑀫𑀸 𑀧𑀦 𑀧𑀞𑀫𑀁𑀬𑁂𑀯 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀸. 𑀢𑁂𑀦𑀸𑀳 ‘‘𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀸𑀳𑀺 𑀧𑀺𑀴𑀓𑀸𑀳𑀻’’𑀢𑀺. 𑀢𑀭𑀼𑀡𑀩𑁂𑀮𑀼𑀯𑀫𑀢𑁆𑀢𑀺𑀬𑁄𑀢𑀺 𑀢𑀭𑀼𑀡𑀩𑀺𑀮𑁆𑀮𑀨𑀮𑀫𑀢𑁆𑀢𑀺𑀬𑁄. 𑀯𑀺𑀲𑀕𑀺𑀮𑀺𑀢𑁄𑀢𑀺 𑀔𑀺𑀢𑁆𑀢𑀧𑀳𑀭𑀡𑁄 ¶ . 𑀢𑀜𑁆𑀘 𑀩𑀴𑀺𑀲𑀁 𑀯𑀺𑀲𑀲𑀫𑀜𑁆𑀜𑀸 𑀮𑁄𑀓𑁂. 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀲𑀼𑀤𑁆𑀥𑀸𑀯𑀸𑀲𑀮𑁄𑀓𑁂. 𑀯𑀭𑀸𑀓𑁄𑀢𑀺 𑀅𑀦𑀼𑀕𑁆𑀕𑀳𑀯𑀘𑀦𑀫𑁂𑀢𑀁. 𑀳𑀻𑀦𑀧𑀭𑀺𑀬𑀸𑀬𑁄𑀢𑀺 𑀓𑁂𑀘𑀺. 𑀧𑀺𑀬𑀲𑀻𑀮𑀸𑀢𑀺 𑀇𑀫𑀺𑀦𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑁂𑀲𑀮𑀸𑀢𑀺 𑀧𑀤𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀩𑀭𑀓𑁆𑀔𑀻𑀦𑀻𑀢𑀺 ¶ 𑀩𑁆𑀬𑀸𑀥𑀺𑀩𑀮𑁂𑀦 𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑀢𑀸𑀬 𑀓𑀩𑀭𑀪𑀽𑀢𑀸𑀦𑀺 𑀅𑀓𑁆𑀔𑀻𑀦𑀺. 𑀬𑀢𑁆𑀢𑀓𑀦𑁆𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀅𑀜𑁆𑀜𑀣𑀸 𑀓𑀭𑁄𑀦𑁆𑀢𑁂𑀦 𑀬𑀢𑁆𑀢𑀓𑀁 𑀢𑀬𑀸 𑀅𑀧𑀭𑀤𑁆𑀥𑀁, 𑀢𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀦𑀸𑀕𑀸𑀫𑀺𑀦𑁄 𑀦𑀸𑀫 𑀧𑀳𑀻𑀦𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀸 𑀳𑁄𑀦𑁆𑀢𑀺, 𑀢𑁆𑀯𑀜𑁆𑀘 𑀤𑀺𑀝𑁆𑀞𑀺𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀯𑀲𑁂𑀦 𑀇𑀥𑀸𑀕𑀢𑁄, 𑀢𑀲𑁆𑀫𑀸 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀤𑀺𑀝𑁆𑀞𑀺𑀓𑁄. 𑀕𑀺𑀮𑀺𑀢𑀯𑀺𑀲𑁄 𑀯𑀺𑀬 𑀯𑀺𑀲𑀁 𑀕𑀺𑀮𑀺𑀢𑁆𑀯𑀸 𑀞𑀺𑀢𑁄 𑀯𑀺𑀬. 𑀓𑀼𑀞𑀸𑀭𑀺𑀲𑀤𑀺𑀲𑀸 𑀫𑀽𑀮𑀧𑀘𑁆𑀙𑀺𑀦𑁆𑀤𑀦𑀝𑁆𑀞𑁂𑀦. 𑀉𑀢𑁆𑀢𑀫𑀢𑁆𑀣𑁂𑀢𑀺 𑀅𑀭𑀳𑀢𑁆𑀢𑁂. 𑀔𑀻𑀡𑀸𑀲𑀯𑁄𑀢𑀺 𑀯𑀤𑀢𑀺 𑀲𑀼𑀦𑀓𑁆𑀔𑀢𑁆𑀢𑁄 𑀯𑀺𑀬 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁. 𑀬𑁄 𑀅𑀕𑁆𑀕𑀲𑀸𑀯𑀓𑁄 𑀯𑀺𑀬 𑀧𑀲𑀁𑀲𑀺𑀢𑀩𑁆𑀩𑁄 𑀔𑀻𑀡𑀸𑀲𑀯𑁄, 𑀢𑀁 ‘‘𑀤𑀼𑀲𑁆𑀲𑀻𑀮𑁄 𑀅𑀬’’𑀦𑁆𑀢𑀺 𑀯𑀤𑀢𑀺. 𑀯𑀺𑀘𑀺𑀦𑀸𑀢𑀻𑀢𑀺 𑀆𑀘𑀺𑀦𑁄𑀢𑀺 𑀧𑀲𑀯𑀢𑀺. 𑀧𑀲𑀁𑀲𑀺𑀬𑀦𑀺𑀦𑁆𑀤𑀸 𑀢𑀸𑀯 𑀲𑀫𑁆𑀧𑀦𑁆𑀦𑀕𑀼𑀡𑀧𑀭𑀺𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑀸𑀯𑀚𑁆𑀚𑀢𑀸𑀬 𑀓𑀝𑀼𑀓𑀯𑀺𑀧𑀸𑀓𑀸, 𑀦𑀺𑀦𑁆𑀤𑀺𑀬𑀧𑁆𑀧𑀲𑀁𑀲𑀸 𑀧𑀦 𑀓𑀣𑀁 𑀢𑀸𑀬 𑀲𑀫𑀯𑀺𑀧𑀸𑀓𑀸𑀢𑀺? 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀲𑀫𑀸𑀭𑁄𑀧𑀦𑁂𑀦 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀧𑀲𑀁𑀲𑀺𑀬𑁂𑀦 𑀢𑀲𑁆𑀲 𑀲𑀫𑀪𑀸𑀯𑀓𑀭𑀡𑀢𑁄 𑀘. 𑀮𑁄𑀓𑁂𑀧𑀺 𑀳𑀺 𑀅𑀲𑀽𑀭𑀁 𑀲𑀽𑀭𑁂𑀦 𑀲𑀫𑀁 𑀓𑀭𑁄𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀢𑀺, 𑀧𑀕𑁂𑀯 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑁂𑀦 𑀲𑀫𑀁 𑀓𑀭𑁄𑀦𑁆𑀢𑁄𑀢𑀺.

𑀲𑀓𑁂𑀦 𑀥𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑁂𑀦. 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀅𑀧𑀭𑀸𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀢𑀸 𑀲𑀧𑁆𑀧𑀢𑀺𑀓𑀸𑀭𑀢𑁆𑀢𑀸 𑀘 𑀢𑀲𑁆𑀲. 𑀅𑀬𑀁 𑀫𑀳𑀦𑁆𑀢𑀢𑀭𑁄 𑀓𑀮𑀺 𑀓𑀢𑀽𑀧𑀘𑀺𑀢𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀢𑁆𑀢𑀸 𑀅𑀧𑁆𑀧𑀢𑀺𑀓𑀸𑀭𑀢𑁆𑀢𑀸 𑀘.

𑀦𑀺𑀭𑀩𑁆𑀩𑀼𑀤𑁄𑀢𑀺 𑀕𑀡𑀦𑀸𑀯𑀺𑀲𑁂𑀲𑁄 𑀏𑀲𑁄𑀢𑀺 𑀆𑀳 ‘‘𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬𑀸’’𑀢𑀺, 𑀲𑀢𑀲𑀳𑀲𑁆𑀲𑀁 𑀦𑀺𑀭𑀩𑁆𑀩𑀼𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀫𑀭𑀺𑀬𑀕𑀭𑀳𑀻 𑀦𑀺𑀭𑀬𑀁 𑀉𑀧𑁂𑀢𑀻𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀆𑀬𑀼𑀧𑁆𑀧𑀫𑀸𑀡𑀁 𑀧𑀸𑀓𑀢𑀺𑀓𑀯𑀲𑁂𑀦 𑀅𑀭𑀺𑀬𑀽𑀧𑀯𑀸𑀤𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀦 𑀕𑀼𑀡𑀫𑀳𑀦𑁆𑀢𑀢𑀸𑀬 𑀢𑀢𑁄𑀧𑀺 𑀅𑀢𑀺𑀯𑀺𑀬 𑀫𑀳𑀦𑁆𑀢𑀢𑀭𑀫𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀅𑀣 ¶ 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀻𑀢𑀺 𑀓𑁄 𑀅𑀬𑀁 𑀩𑁆𑀭𑀳𑁆𑀫𑀸, 𑀓𑀲𑁆𑀫𑀸 𑀘 𑀧𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀸𑀢𑀺? 𑀅𑀬𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀳𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀲𑀳𑀫𑁆𑀧𑀢𑀺 𑀩𑁆𑀭𑀳𑁆𑀫𑀸𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀲𑁄 𑀧𑀦𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀤𑀼𑀫𑀦𑀺𑀭𑀬𑀁 𑀓𑀺𑀢𑁆𑀢𑁂𑀲𑁆𑀲𑀸𑀫𑀺, 𑀢𑀢𑁄 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑁆𑀲𑀢𑀺, 𑀅𑀣𑀸𑀦𑀼𑀲𑀦𑁆𑀥𑀺𑀓𑀼𑀲𑀮𑀸 𑀪𑀺𑀓𑁆𑀔𑀽 𑀢𑀢𑁆𑀣𑀸𑀬𑀼𑀧𑁆𑀧𑀫𑀸𑀡𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀪𑀕𑀯𑀸 𑀆𑀘𑀺𑀓𑁆𑀔𑀦𑁆𑀢𑁄 𑀅𑀭𑀺𑀬𑀽𑀧𑀯𑀸𑀤𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘.

𑀫𑀕𑀥𑀭𑀝𑁆𑀞𑁂 ¶ 𑀲𑀁𑀯𑁄𑀳𑀸𑀭𑀢𑁄 𑀫𑀸𑀕𑀥𑀓𑁄 𑀧𑀢𑁆𑀣𑁄, 𑀢𑁂𑀦. 𑀧𑀘𑁆𑀘𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑀸𑀢𑀺 𑀦𑀺𑀭𑀬𑀤𑀼𑀓𑁆𑀔𑁂𑀦 𑀧𑀘𑁆𑀘𑀺𑀢𑀩𑁆𑀩𑀧𑁆𑀧𑀤𑁂𑀲𑀲𑁆𑀲 𑀏𑀢𑀁 𑀅𑀩𑁆𑀩𑀼𑀤𑁄𑀢𑀺 𑀦𑀸𑀫𑀁. 𑀯𑀲𑁆𑀲𑀕𑀡𑀦𑀸𑀢𑀺 𑀏𑀓𑀢𑁄 𑀧𑀝𑁆𑀞𑀸𑀬 𑀤𑀲𑀕𑀼𑀡𑀺𑀢𑀁 𑀅𑀩𑁆𑀩𑀼𑀤𑀆𑀬𑀼𑀫𑁆𑀳𑀺 𑀢𑀢𑁄 𑀅𑀧𑀭𑀁 𑀯𑀻𑀲𑀢𑀺𑀕𑀼𑀡𑀺𑀢𑀁 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼 𑀯𑀲𑁆𑀲𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀜𑁆𑀘 𑀕𑀡𑀦𑀸 𑀅𑀧𑀭𑀺𑀘𑀺𑀢𑀸𑀦𑀁 𑀤𑀼𑀓𑁆𑀓𑀭𑀸𑀢𑀺 𑀯𑀼𑀢𑁆𑀢𑀁 ‘‘𑀦 𑀢𑀁 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’’𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀢𑀢𑁆𑀣 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸𑀦𑀢𑁆𑀢𑁂𑀦 𑀓𑀫𑁆𑀫𑀓𑀸𑀭𑀡𑀦𑀸𑀦𑀢𑁆𑀢𑁂𑀦𑀧𑀺 𑀇𑀫𑀸𑀦𑀺 𑀦𑀸𑀫𑀸𑀦𑀺 𑀮𑀤𑁆𑀥𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 ‘‘𑀲𑀻𑀢𑀦𑀭𑀓𑀸 𑀏𑀢𑁂’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀅𑀩𑀩𑀸𑀤𑀻𑀲𑀼 𑀧𑀤𑀼𑀫𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀩𑁆𑀩𑁂𑀲𑀼 𑀦𑀺𑀭𑀬𑁂𑀲𑀼. 𑀏𑀲 𑀦𑀬𑁄𑀢𑀺 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑀲𑁆𑀲 𑀯𑀻𑀲𑀢𑀺𑀕𑀼𑀡𑀢𑀁 𑀅𑀢𑀺𑀤𑀺𑀲𑀢𑀺. 𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁦) 𑁫. 𑀉𑀧𑀸𑀮𑀺𑀯𑀕𑁆𑀕𑁄

𑁧-𑁪. 𑀓𑀸𑀫𑀪𑁄𑀕𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁧-𑁯𑁪. 𑀧𑀜𑁆𑀘𑀫𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀘𑀢𑀼𑀢𑁆𑀣𑁂 𑀢𑀧𑀦𑀁 𑀲𑀦𑁆𑀢𑀧𑀦𑀁 𑀓𑀸𑀬𑀲𑁆𑀲 𑀔𑁂𑀤𑀦𑀁 𑀢𑀧𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻, 𑀢𑀁 𑀢𑀧𑀲𑁆𑀲𑀺𑀁. 𑀬𑀲𑁆𑀫𑀸 𑀢𑀣𑀸𑀪𑀽𑀢𑁄 𑀢𑀧𑀦𑀺𑀲𑁆𑀲𑀺𑀢𑁄, 𑀢𑀧𑁄 𑀯𑀸 𑀢𑀦𑁆𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀆𑀳 ‘‘𑀢𑀧𑀦𑀺𑀲𑁆𑀲𑀺𑀢𑀓’’𑀦𑁆𑀢𑀺. 𑀮𑀽𑀔𑀁 𑀨𑀭𑀼𑀲𑀁 𑀲𑀸𑀥𑀼𑀲𑀫𑁆𑀫𑀢𑀸𑀘𑀸𑀭𑀯𑀺𑀭𑀳𑀢𑁄 𑀦 𑀧𑀲𑀸𑀤𑀦𑀻𑀬𑀁 𑀆𑀚𑀻𑀯𑀢𑀺 𑀯𑀢𑁆𑀢𑀢𑀻𑀢𑀺 𑀮𑀽𑀔𑀸𑀚𑀻𑀯𑀻, 𑀢𑀁 𑀮𑀽𑀔𑀸𑀚𑀻𑀯𑀺𑀁. 𑀉𑀧𑀓𑁆𑀓𑁄𑀲𑀢𑀻𑀢𑀺 𑀉𑀧𑁆𑀧𑀡𑁆𑀟𑁂𑀢𑀺 ¶ , 𑀉𑀧𑀳𑀲𑀦𑀯𑀲𑁂𑀦 𑀧𑀭𑀺𑀪𑀸𑀲𑀢𑀺. 𑀉𑀧𑀯𑀤𑀢𑀻𑀢𑀺 𑀅𑀯𑀜𑁆𑀜𑀸𑀧𑀼𑀩𑁆𑀩𑀓𑀁 𑀅𑀧𑀯𑀤𑀢𑀺. 𑀢𑁂𑀦𑀸𑀳 ‘‘𑀳𑀻𑀴𑁂𑀢𑀺 𑀯𑀫𑁆𑀪𑁂𑀢𑀻’’𑀢𑀺.

𑀓𑀸𑀫𑀪𑁄𑀕𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀧𑀜𑁆𑀘𑀫𑁂 𑀧𑀘𑁆𑀘𑀦𑁆𑀢𑁂 𑀪𑀯𑀁 𑀧𑀘𑁆𑀘𑀦𑁆𑀢𑀺𑀫𑀁. 𑀧𑀸𑀓𑀸𑀭𑀲𑁆𑀲 𑀣𑀺𑀭𑀪𑀸𑀯𑀁 𑀉𑀤𑁆𑀥𑀫𑀼𑀤𑁆𑀥𑀁 𑀧𑀸𑀧𑁂𑀢𑀻𑀢𑀺 𑀉𑀤𑁆𑀥𑀸𑀧𑀁, 𑀧𑀸𑀓𑀸𑀭𑀫𑀽𑀮𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀓𑀸𑀭𑀤𑁆𑀯𑀸𑀭𑀩𑀦𑁆𑀥𑀧𑀭𑀺𑀔𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑀝𑁆𑀞𑀸𑀦𑀺𑀬𑀁 ¶ 𑀓𑀢𑁆𑀯𑀸 𑀪𑀕𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀤𑁆𑀯𑀸𑀭𑀦𑁆𑀢𑀺 𑀓𑀲𑁆𑀫𑀸 𑀆𑀳𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀬𑀲𑁆𑀲𑀸 𑀧𑀜𑁆𑀜𑀸𑀬 𑀯𑀲𑁂𑀦 𑀧𑀼𑀭𑀺𑀲𑁄 𑀧𑀡𑁆𑀟𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀡𑁆𑀟𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀁𑀢𑀁𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀙𑁂𑀓𑀪𑀸𑀯𑁄 𑀩𑁆𑀬𑀢𑁆𑀢𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁. 𑀫𑁂𑀥𑀢𑀺 𑀲𑀫𑁆𑀫𑁄𑀳𑀁 𑀳𑀺𑀁𑀲𑀢𑀺 𑀯𑀺𑀥𑀫𑀢𑀻𑀢𑀺 𑀫𑁂𑀥𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀥𑀸𑀯𑀻. 𑀞𑀸𑀦𑁂 𑀞𑀸𑀦𑁂 𑀉𑀧𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸, 𑀞𑀸𑀦𑀲𑁄 𑀉𑀧𑁆𑀧𑀚𑁆𑀚𑀦𑀧𑀜𑁆𑀜𑀸. 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀧𑀭𑀺𑀬𑀸𑀬𑁄, 𑀲𑁄 𑀏𑀯 𑀧𑀣𑁄𑀢𑀺 𑀅𑀦𑀼𑀧𑀭𑀺𑀬𑀸𑀬𑀧𑀣𑁄, 𑀧𑀭𑀺𑀢𑁄 𑀧𑀸𑀓𑀸𑀭𑀲𑁆𑀲 𑀅𑀦𑀼𑀲𑀁𑀬𑀸𑀬𑀦𑀫𑀕𑁆𑀕𑁄. 𑀧𑀸𑀓𑀸𑀭𑀪𑀸𑀕𑀸 𑀲𑀦𑁆𑀥𑀸𑀢𑀩𑁆𑀩𑀸 𑀏𑀢𑁆𑀣𑀸𑀢𑀺 𑀧𑀸𑀓𑀸𑀭𑀲𑀦𑁆𑀥𑀺, 𑀧𑀸𑀓𑀸𑀭𑀲𑁆𑀲 𑀨𑀼𑀮𑁆𑀮𑀺𑀢𑀧𑁆𑀧𑀤𑁂𑀲𑁄. 𑀲𑁄 𑀧𑀦 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀝𑁆𑀞𑀓𑀸𑀦𑀁 𑀯𑀺𑀕𑀫𑁂𑀦 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀇𑀝𑁆𑀞𑀓𑀸𑀦𑀁 𑀅𑀧𑀕𑀢𑀝𑁆𑀞𑀸𑀦’’𑀦𑁆𑀢𑀺. 𑀙𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑁆𑀧𑀤𑁂𑀲𑁄, 𑀙𑀺𑀤𑁆𑀤𑀝𑁆𑀞𑀸𑀦𑀁 𑀯𑀸. 𑀢𑀜𑁆𑀳𑀺 𑀯𑀺𑀯𑀭𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀉𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀓𑁄𑀓𑀦𑀼𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁬-𑁯𑁮. 𑀙𑀝𑁆𑀞𑁂 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀝𑁆𑀞𑁂𑀦 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄. 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄. 𑀬𑀣𑀸𑀳 ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺𑀆𑀤𑀺 (𑀥. 𑀲. 𑁧𑁦𑁦𑁭). 𑀨𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸 ¶ 𑀘𑀸𑀳 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸 (𑀤𑀻. 𑀦𑀺. 𑁧.𑁧𑁧𑁮-𑁧𑁩𑁦) 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀝𑀺𑀲𑀁𑀯𑁂𑀤𑀺𑀬𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁪𑁪) 𑀘. 𑀲𑀜𑁆𑀜𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸 (𑀲𑀼. 𑀦𑀺. 𑁮𑁮𑁦; 𑀫𑀳𑀸𑀦𑀺. 𑁧𑁦𑁯), 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸’’𑀢𑀺 (𑀫. 𑀦𑀺. 𑁧.𑁨) 𑀘 𑀆𑀤𑀺. 𑀯𑀺𑀢𑀓𑁆𑀓𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺 (𑀲𑀼. 𑀦𑀺. 𑁮𑁯𑁨; 𑀫𑀳𑀸𑀦𑀺. 𑁧𑁨𑁧), ‘‘𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻’’𑀢𑀺 (𑀤𑀻. 𑀦𑀺. 𑁧.𑁩𑁪) 𑀘 𑀆𑀤𑀺. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀲𑁆𑀲𑁂𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀢𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁯).

𑀬𑀸 𑀤𑀺𑀝𑁆𑀞𑀻𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀧𑀤𑀸𑀦𑀁 𑀲𑀸𑀥𑀸𑀭𑀡𑀁 𑀫𑀽𑀮𑀧𑀤𑀁. 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁 𑀕𑀽𑀣𑀕𑀢𑀁 𑀯𑀺𑀬, 𑀤𑀺𑀝𑁆𑀞𑀻𑀲𑀼 𑀯𑀸 𑀕𑀢𑀁 𑀇𑀤𑀁 𑀤𑀲𑁆𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀻𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸𑀢𑀺𑀧𑀺 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀺𑀬𑀸 𑀯𑀸 𑀕𑀢𑀁 𑀤𑀺𑀝𑁆𑀞𑀺𑀕𑀢𑀁. 𑀇𑀤𑀜𑁆𑀳𑀺 ‘‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’’𑀢𑀺𑀆𑀤𑀺 𑀤𑀺𑀝𑁆𑀞𑀺𑀬𑀸 𑀕𑀫𑀦𑀫𑀢𑁆𑀢𑀫𑁂𑀯 ¶ , 𑀦𑀢𑁆𑀣𑁂𑀢𑁆𑀣 𑀅𑀢𑁆𑀢𑀸 𑀯𑀸 𑀦𑀺𑀘𑁆𑀘𑁄 𑀯𑀸 𑀓𑁄𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸 𑀘𑀸𑀬𑀁 𑀤𑀺𑀝𑁆𑀞𑀺 𑀤𑀼𑀦𑁆𑀦𑀺𑀕𑁆𑀕𑀫𑀦𑀝𑁆𑀞𑁂𑀦 𑀕𑀳𑀦𑀁. 𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁂𑀦 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦 𑀘 𑀓𑀦𑁆𑀢𑀸𑀭𑁄 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀯𑀸𑀴𑀓𑀦𑁆𑀢𑀸𑀭𑀸𑀤𑀬𑁄 𑀯𑀺𑀬. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦, 𑀯𑀺𑀮𑁄𑀫𑀦𑀝𑁆𑀞𑁂𑀦 𑀯𑀸 𑀯𑀺𑀲𑀽𑀓𑀁. 𑀓𑀤𑀸𑀘𑀺 𑀲𑀲𑁆𑀲𑀢𑀲𑁆𑀲, 𑀓𑀤𑀸𑀘𑀺 𑀉𑀘𑁆𑀙𑁂𑀤𑀲𑁆𑀲 𑀯𑀸 𑀕𑀳𑀡𑀢𑁄 𑀯𑀺𑀭𑀽𑀧𑀁 𑀨𑀦𑁆𑀤𑀺𑀢𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀺𑀢𑀁. 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀁. 𑀤𑀺𑀝𑁆𑀞𑀺𑀬𑁂𑀯 𑀅𑀦𑁆𑀢𑁄 𑀢𑀼𑀤𑀦𑀝𑁆𑀞𑁂𑀦 𑀤𑀼𑀦𑁆𑀦𑀻𑀳𑀭𑀡𑀻𑀬𑀝𑁆𑀞𑁂𑀦 𑀘 𑀲𑀮𑁆𑀮𑀦𑁆𑀢𑀺 𑀤𑀺𑀝𑁆𑀞𑀺𑀲𑀮𑁆𑀮𑀁. 𑀤𑀺𑀝𑁆𑀞𑀺𑀬𑁂𑀯 𑀧𑀻𑀴𑀸𑀓𑀭𑀡𑀝𑁆𑀞𑁂𑀦 𑀲𑀫𑁆𑀩𑀸𑀥𑁄𑀢𑀺 𑀤𑀺𑀝𑁆𑀞𑀺𑀲𑀫𑁆𑀩𑀸𑀥𑁄. 𑀤𑀺𑀝𑁆𑀞𑀺𑀬𑁂𑀯 𑀫𑁄𑀓𑁆𑀔𑀸𑀯𑀭𑀡𑀝𑁆𑀞𑁂𑀦 𑀧𑀮𑀺𑀩𑁄𑀥𑁄𑀢𑀺 𑀤𑀺𑀝𑁆𑀞𑀺𑀧𑀮𑀺𑀩𑁄𑀥𑁄. 𑀤𑀺𑀝𑁆𑀞𑀺𑀬𑁂𑀯 𑀤𑀼𑀫𑁆𑀫𑁄𑀘𑀦𑀻𑀬𑀝𑁆𑀞𑁂𑀦 𑀩𑀦𑁆𑀥𑀦𑀦𑁆𑀢𑀺 𑀤𑀺𑀝𑁆𑀞𑀺𑀩𑀦𑁆𑀥𑀦𑀁. 𑀤𑀺𑀝𑁆𑀞𑀺𑀬𑁂𑀯 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁂𑀦 𑀧𑀧𑀸𑀢𑁄𑀢𑀺 𑀤𑀺𑀝𑁆𑀞𑀺𑀧𑀧𑀸𑀢𑁄. 𑀤𑀺𑀝𑁆𑀞𑀺𑀬𑁂𑀯 𑀣𑀸𑀫𑀕𑀢𑀝𑁆𑀞𑁂𑀦 𑀅𑀦𑀼𑀲𑀬𑁄𑀢𑀺 𑀤𑀺𑀝𑁆𑀞𑀸𑀦𑀼𑀲𑀬𑁄. 𑀤𑀺𑀝𑁆𑀞𑀺𑀬𑁂𑀯 𑀅𑀢𑁆𑀢𑀸𑀦𑀁 𑀲𑀦𑁆𑀢𑀸𑀧𑁂𑀢𑀻𑀢𑀺 𑀤𑀺𑀝𑁆𑀞𑀺𑀲𑀦𑁆𑀢𑀸𑀧𑁄. 𑀤𑀺𑀝𑁆𑀞𑀺𑀬𑁂𑀯 𑀅𑀢𑁆𑀢𑀸𑀦𑀁 𑀅𑀦𑀼𑀤𑀳𑀢𑀻𑀢𑀺 𑀤𑀺𑀝𑁆𑀞𑀺𑀧𑀭𑀺𑀴𑀸𑀳𑁄. 𑀤𑀺𑀝𑁆𑀞𑀺𑀬𑁂𑀯 𑀓𑀺𑀮𑁂𑀲𑀓𑀸𑀬𑀁 𑀕𑀦𑁆𑀣𑁂𑀢𑀻𑀢𑀺 𑀤𑀺𑀝𑁆𑀞𑀺𑀕𑀦𑁆𑀣𑁄. 𑀤𑀺𑀝𑁆𑀞𑀺𑀬𑁂𑀯 𑀪𑀼𑀲𑀁 𑀆𑀤𑀺𑀬𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀤𑀺𑀝𑁆𑀞𑀺𑀬𑁂𑀯 ‘‘𑀲𑀘𑁆𑀘’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄. 𑀤𑀺𑀝𑁆𑀞𑀺𑀬𑁂𑀯 ‘‘𑀇𑀤𑀁 𑀧𑀭’’𑀦𑁆𑀢𑀺 𑀆𑀫𑀲𑀢𑀺, 𑀧𑀭𑀢𑁄 𑀯𑀸 𑀆𑀫𑀲𑀢𑀻𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄, 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀓𑀸𑀭𑀡𑀁. 𑀲𑀫𑀼𑀝𑁆𑀞𑀸𑀦𑀲𑁆𑀲 𑀪𑀸𑀯𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁄, 𑀢𑁂𑀦 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦, 𑀓𑀸𑀭𑀡𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀓𑁄𑀓𑀦𑀼𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀉𑀧𑀸𑀮𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁯-𑁧𑁦𑁦. 𑀦𑀯𑀫𑁂 ¶ 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀲𑀫𑁆𑀪𑀯𑀺𑀢𑀼𑀁 𑀲𑀸𑀥𑁂𑀢𑀼𑀁 𑀤𑀼𑀓𑁆𑀔𑀸𑀦𑀺 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀢𑁆𑀣 𑀦𑀺𑀯𑀸𑀲𑁄𑀬𑁂𑀯 𑀤𑀼𑀓𑁆𑀔𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀪𑀯𑀺𑀢𑀼𑀁 𑀤𑀼𑀓𑁆𑀔𑀸𑀦𑀺 𑀤𑀼𑀲𑁆𑀲𑀳𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺 𑀯𑀦𑀲𑀡𑁆𑀟𑀸𑀦𑀺. 𑀯𑀦𑀧𑀢𑁆𑀣𑀲𑀤𑁆𑀤𑁄 𑀳𑀺 𑀲𑀡𑁆𑀟𑀪𑀽𑀢𑁂 𑀭𑀼𑀓𑁆𑀔𑀲𑀫𑀽𑀳𑁂𑀧𑀺 𑀯𑀢𑁆𑀢𑀢𑀻𑀢𑀺 𑀅𑀭𑀜𑁆𑀜𑀕𑁆𑀕𑀳𑀡𑀁. 𑀧𑀯𑀺𑀯𑁂𑀓𑀦𑁆𑀢𑀺 𑀧𑀓𑀸𑀭𑀢𑁄, 𑀧𑀓𑀸𑀭𑁂𑀳𑀺 𑀯𑀸 𑀯𑀺𑀯𑁂𑀘𑀦𑀁, 𑀭𑀽𑀧𑀸𑀤𑀺𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀧𑀓𑀸𑀭𑀢𑁄 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀧𑁆𑀧𑀓𑀸𑀭𑁂𑀳𑀺 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀯𑀺𑀯𑁂𑀘𑀦𑀁, 𑀕𑀘𑁆𑀙𑀢𑁄𑀧𑀺 𑀢𑀺𑀝𑁆𑀞𑀢𑁄𑀧𑀺 𑀦𑀺𑀲𑀚𑁆𑀚𑀢𑁄𑀧𑀺 𑀦𑀺𑀧𑀚𑁆𑀚𑀢𑁄𑀧𑀺 𑀏𑀓𑀲𑁆𑀲𑁂𑀯 𑀧𑀯𑀢𑁆𑀢𑀺. 𑀢𑁂𑀦𑁂𑀯 𑀳𑀺 𑀯𑀺𑀯𑁂𑀘𑁂𑀢𑀩𑁆𑀩𑀸𑀦𑀁 𑀯𑀺𑀯𑁂𑀘𑀦𑀸𑀓𑀸𑀭𑀲𑁆𑀲 𑀘 𑀪𑁂𑀤𑀢𑁄 𑀩𑀳𑀼𑀯𑀺𑀥𑀢𑁆𑀢𑀸 𑀢𑁂 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 ‘‘𑀧𑀯𑀺𑀯𑁂𑀓’’𑀦𑁆𑀢𑀺 𑀏𑀓𑀯𑀘𑀦𑁂𑀦 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀭𑀁 𑀧𑀯𑀺𑀯𑁂𑀓𑀦𑁆𑀢𑀺 𑀯𑀸 𑀧𑀯𑀺𑀯𑁂𑀓𑀁 𑀓𑀢𑁆𑀢𑀼𑀁 𑀦 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀻𑀪𑀸𑀯𑁂𑀢𑀺 𑀏𑀓𑀢𑁆𑀢𑀪𑀸𑀯𑁂. 𑀤𑁆𑀯𑀬𑀁𑀤𑁆𑀯𑀬𑀸𑀭𑀸𑀫𑁄𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀪𑀸𑀯𑀸𑀪𑀺𑀭𑀢𑁄. 𑀳𑀭𑀦𑁆𑀢𑀺 𑀯𑀺𑀬𑀸𑀢𑀺 𑀲𑀁𑀳𑀭𑀦𑁆𑀢𑀺 𑀯𑀺𑀬 𑀯𑀺𑀖𑀸𑀢𑀼𑀧𑁆𑀧𑀸𑀤𑀦𑁂𑀦. 𑀢𑁂𑀦𑀸𑀳 ‘‘𑀖𑀲𑀦𑁆𑀢𑀺 𑀯𑀺𑀬𑀸’’𑀢𑀺. 𑀪𑀬𑀲𑀦𑁆𑀢𑀸𑀲𑀼𑀧𑁆𑀧𑀸𑀤𑀦𑁂𑀦 𑀔𑀸𑀤𑀺𑀢𑀼𑀁 𑀆𑀕𑀢𑀸 𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀤𑀬𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀈𑀤𑀺𑀲𑀲𑁆𑀲𑀸𑀢𑀺 𑀅𑀮𑀤𑁆𑀥𑀲𑀫𑀸𑀥𑀺𑀦𑁄. 𑀢𑀺𑀡𑀧𑀡𑁆𑀡𑀫𑀺𑀕𑀸𑀤𑀺𑀲𑀤𑁆𑀤𑁂𑀳𑀻𑀢𑀺 𑀯𑀸𑀢𑁂𑀭𑀺𑀢𑀸𑀦𑀁 𑀢𑀺𑀡𑀧𑀡𑁆𑀡𑀸𑀤𑀻𑀦𑀁 𑀫𑀺𑀕𑀧𑀓𑁆𑀔𑀺𑀆𑀤𑀻𑀦𑀜𑁆𑀘 𑀪𑀻𑀲𑀦𑀓𑁂𑀳𑀺 𑀪𑁂𑀭𑀯𑁂𑀳𑀺 𑀲𑀤𑁆𑀤𑁂𑀳𑀺. 𑀯𑀺𑀯𑀺𑀥𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀔𑀸𑀡𑀼𑀆𑀤𑀻𑀳𑀺 ¶ 𑀬𑀓𑁆𑀔𑀸𑀤𑀺𑀆𑀓𑀸𑀭𑁂𑀳𑀺 𑀉𑀧𑀝𑁆𑀞𑀺𑀢𑁂𑀳𑀺 𑀪𑀻𑀲𑀦𑀓𑁂𑀳𑀺. 𑀖𑀝𑁂𑀦 𑀓𑀻𑀴𑀸 𑀖𑀝𑀺𑀓𑀸𑀢𑀺 𑀏𑀓𑁂. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀉𑀧𑀸𑀮𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀮𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀲𑀫𑀡𑀲𑀜𑁆𑀜𑀸𑀯𑀕𑁆𑀕𑁄

𑁧-𑁧𑁨. 𑀲𑀫𑀡𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁧-𑁧𑁧𑁨. 𑀢𑀢𑀺𑀬𑀲𑁆𑀲 ¶ ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀸𑀦𑀺. 𑀙𑀝𑁆𑀞𑁂 𑀦𑀺𑀚𑁆𑀚𑀭𑀓𑀸𑀭𑀡𑀸𑀦𑀻𑀢𑀺 𑀧𑀚𑀳𑀦𑀓𑀸𑀭𑀡𑀸𑀦𑀺. 𑀇𑀫𑀲𑁆𑀫𑀺𑀁 𑀫𑀕𑁆𑀕𑁄 𑀓𑀣𑀻𑀬𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀬𑀁 𑀳𑁂𑀝𑁆𑀞𑀸…𑀧𑁂… 𑀧𑀼𑀦 𑀕𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀦𑀺𑀚𑁆𑀚𑀺𑀡𑁆𑀡𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀺𑀧𑀲𑁆𑀲𑀦𑀸𑀬 𑀦𑀺𑀚𑁆𑀚𑀺𑀡𑁆𑀡𑀸𑀧𑀺 𑀦 𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀕𑀳𑀺𑀢𑀸, 𑀏𑀯𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀯𑀺𑀧𑀲𑁆𑀲𑀦𑀸𑀬 𑀧𑀳𑀻𑀦𑀸𑀧𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀇𑀥 𑀧𑀼𑀦 𑀕𑀳𑀺𑀢𑀸𑀢𑀺 𑀅𑀬𑀫𑀢𑁆𑀣𑁄 ‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸. 𑀏𑀢𑁆𑀣 𑀘𑀸𑀢𑀺 ‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀸𑀴𑀺𑀧𑀤𑁂. 𑀏𑀢𑁆𑀣 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀲𑀫𑁆𑀫𑀤𑁂𑀯 𑀯𑀺𑀫𑀼𑀘𑁆𑀘𑀦𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺. 𑀢𑀧𑁆𑀧𑀘𑁆𑀘𑀬𑀸 𑀘 𑀫𑀕𑁆𑀕𑀨𑀮𑁂𑀲𑀼 𑀅𑀝𑁆𑀞 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀉𑀤𑁆𑀥𑀝𑀸𑀦𑀺. 𑀫𑀕𑁆𑀕𑀯𑀲𑁂𑀦 𑀳𑀺 𑀨𑀮𑁂𑀲𑀼 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀦𑀸𑀫𑀸𑀢𑀺. 𑀅𑀪𑀺𑀦𑀦𑁆𑀤𑀦𑀝𑁆𑀞𑁂𑀦𑀸𑀢𑀺 𑀅𑀢𑀺𑀯𑀺𑀬 𑀲𑀺𑀦𑁂𑀳𑀦𑀝𑁆𑀞𑁂𑀦. 𑀇𑀤𑀜𑁆𑀳𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀓𑁆𑀓𑀁𑀲𑀕𑀢𑀲𑀸𑀢𑀲𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀺𑀦𑁂𑀳𑀦𑁆𑀢𑀁 𑀢𑁂𑀫𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀺. 𑀧𑀯𑀢𑁆𑀢𑀲𑀦𑁆𑀢𑀢𑀺𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦𑀸𑀢𑀺 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀚𑀻𑀯𑀦𑁂 𑀅𑀥𑀺𑀧𑀢𑀺𑀪𑀸𑀯𑁂𑀦. 𑀏𑀯𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁. 𑀲𑀢𑁆𑀢𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑀲𑀫𑀡𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀡𑀲𑀜𑁆𑀜𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁨) 𑁨. 𑀧𑀘𑁆𑀘𑁄𑀭𑁄𑀳𑀡𑀺𑀯𑀕𑁆𑀕𑁄

𑁧-𑁪. 𑀧𑀞𑀫𑀅𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩-𑁬. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑀤𑀼𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀢𑀢𑀺𑀬𑁂 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺 𑀏𑀯. 𑀦 𑀳𑀺 𑀧𑀤𑁂𑀲𑀜𑀸𑀡𑁂 ¶ 𑀞𑀺𑀢𑁄 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀳𑀺 𑀅𑀯𑀺𑀲𑁂𑀲𑀕𑁆𑀕𑀳𑀡𑁂𑀦 𑀘 ‘‘𑀚𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀭𑀯𑀲𑁂𑀲𑀁 𑀜𑁂𑀬𑁆𑀬𑀚𑀸𑀢𑀁 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀢𑀩𑁆𑀩𑀺𑀲𑀬𑀸𑀬 𑀚𑀸𑀦𑀦𑀓𑀺𑀭𑀺𑀬𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀓𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁, 𑀧𑀓𑀭𑀡𑀯𑀲𑁂𑀦 ‘‘𑀪𑀕𑀯𑀸’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀘 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀧𑀲𑁆𑀲𑀺𑀢𑀩𑁆𑀩𑀫𑁂𑀯 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀼𑀥𑀫𑁆𑀫𑀘𑀓𑁆𑀔𑀼𑀩𑀼𑀤𑁆𑀥𑀘𑀓𑁆𑀔𑀼𑀲𑀫𑀦𑁆𑀢𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀜𑀸𑀡𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺 𑀏𑀯. 𑀅𑀣 𑀯𑀸 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀯𑀺𑀧𑀮𑁆𑀮𑀸𑀲𑀸 𑀓𑀸𑀫𑀭𑀽𑀧𑀧𑀭𑀺𑀜𑁆𑀜𑀸𑀯𑀸𑀤𑀺𑀦𑁄 𑀚𑀸𑀦𑀦𑁆𑀢𑀸𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀚𑀸𑀦𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺 𑀏𑀯, 𑀤𑀺𑀝𑁆𑀞𑀺𑀤𑀲𑁆𑀲𑀦𑀲𑁆𑀲 𑀅𑀪𑀸𑀯𑀸 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄𑀢𑀺 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄. 𑀬𑀣𑀸 𑀳𑀺 𑀘𑀓𑁆𑀔𑀼 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀡𑁂𑀢𑀺 𑀲𑀸𑀥𑁂𑀢𑀺, 𑀏𑀯𑀁 𑀮𑁄𑀓𑀲𑁆𑀲 𑀬𑀸𑀣𑀸𑀯𑀤𑀲𑁆𑀲𑀦𑀲𑀸𑀥𑀦𑀢𑁄𑀧𑀺 𑀤𑀲𑁆𑀲𑀦𑀓𑀺𑀘𑁆𑀘𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄, 𑀧𑀜𑁆𑀜𑀸𑀘𑀓𑁆𑀔𑀼𑀫𑀬𑀢𑁆𑀢𑀸 𑀯𑀸 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀯𑀸 𑀘𑀓𑁆𑀔𑀼𑀪𑀽𑀢𑁄.

𑀜𑀸𑀡𑀲𑀪𑀸𑀯𑁄𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀜𑀸𑀡𑀲𑀪𑀸𑀯𑁄. 𑀅𑀯𑀺𑀧𑀭𑀻𑀢𑀲𑀪𑀸𑀯𑀝𑁆𑀞𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑁆𑀧𑀯𑀢𑁆𑀢𑀦𑀢𑁄 𑀯𑀸 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀘𑀸𑀬 𑀦𑀺𑀘𑁆𑀙𑀸𑀭𑀺𑀢𑀥𑀫𑁆𑀫𑀫𑀬𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀢𑁂𑀦𑀸𑀳 ‘‘𑀥𑀫𑁆𑀫𑀲𑀪𑀸𑀯𑁄’’𑀢𑀺. 𑀥𑀫𑁆𑀫𑀸 𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀢𑁂𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄, 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀸 𑀥𑀫𑁆𑀫𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀆𑀳 ‘‘𑀲𑁂𑀝𑁆𑀞𑀲𑀪𑀸𑀯𑁄’’𑀢𑀺. 𑀅𑀣 𑀯𑀸 𑀩𑁆𑀭𑀳𑁆𑀫𑀸 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀢𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄, 𑀢𑀜𑁆𑀘 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀪𑀽𑀢𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀤𑀢𑀻𑀢𑀺 𑀯𑀢𑁆𑀢𑀸. 𑀘𑀺𑀭𑀁 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀧𑀯𑀢𑁆𑀢𑁂𑀦𑁆𑀢𑁄 𑀯𑀤𑀢𑀻𑀢𑀺 𑀧𑀯𑀢𑁆𑀢𑀸. 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑀁 𑀢𑀢𑁆𑀣𑀸𑀧𑀺 𑀧𑀻𑀴𑀦𑀸𑀤𑀺𑀅𑀢𑁆𑀣𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀧𑀭𑀫𑀢𑁆𑀣𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀬𑀺𑀢𑀸 𑀦𑀺𑀦𑁆𑀦𑁂𑀢𑀸. 𑀅𑀫𑀢𑀸𑀥𑀺𑀕𑀫𑀧𑀝𑀺𑀧𑀢𑁆𑀢𑀺𑀤𑁂𑀲𑀦𑀸𑀬 𑀅𑀫𑀢𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀫𑀢𑀁 𑀤𑀤𑀸𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀤𑀸𑀬𑀢𑁆𑀢𑀪𑀸𑀯𑀢𑁄 𑀥𑀫𑁆𑀫𑀲𑀸𑀫𑀻. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀅𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁪𑁨. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁭-𑁧𑁫𑁪. 𑀧𑀜𑁆𑀘𑀫𑁂 ¶ ¶ 𑀅𑀧𑁆𑀧𑀓𑀸𑀢𑀺 𑀣𑁄𑀓𑀸, 𑀦 𑀩𑀳𑀽. 𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸𑀢𑀺 𑀬𑀸 𑀧𑀦𑀸𑀬𑀁 𑀅𑀯𑀲𑁂𑀲𑀸 𑀧𑀚𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀢𑀻𑀭𑀫𑁂𑀯 𑀅𑀦𑀼𑀥𑀸𑀯𑀢𑀺, 𑀅𑀬𑀫𑁂𑀯 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀤𑀓𑁆𑀔𑀸𑀢𑁂𑀢𑀺 𑀲𑀫𑁆𑀫𑀸 𑀅𑀓𑁆𑀔𑀸𑀢𑁂 𑀲𑀼𑀓𑀣𑀺𑀢𑁂. 𑀥𑀫𑁆𑀫𑁂𑀢𑀺 𑀢𑀯 𑀤𑁂𑀲𑀦𑀸𑀥𑀫𑁆𑀫𑁂. 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄𑀢𑀺 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀭𑀡𑁂𑀦 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄. 𑀫𑀘𑁆𑀘𑀼𑀦𑁄 𑀞𑀸𑀦𑀪𑀽𑀢𑀦𑁆𑀢𑀺 𑀓𑀺𑀮𑁂𑀲𑀫𑀸𑀭𑀲𑀗𑁆𑀔𑀸𑀢𑀲𑁆𑀲 𑀫𑀘𑁆𑀘𑀼𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁. 𑀲𑀼𑀤𑀼𑀢𑁆𑀢𑀭𑀁 𑀢𑀭𑀺𑀢𑁆𑀯𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀻𑀢𑀺 𑀬𑁂 𑀚𑀦𑀸 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄, 𑀢𑁂 𑀏𑀢𑀁 𑀲𑀼𑀤𑀼𑀢𑁆𑀢𑀭𑀁 𑀤𑀼𑀭𑀢𑀺𑀓𑁆𑀓𑀫𑀁 𑀫𑀸𑀭𑀥𑁂𑀬𑁆𑀬𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺.

𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀪𑁂𑀤𑀁 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀚𑀳𑀺𑀢𑁆𑀯𑀸. 𑀲𑀼𑀓𑁆𑀓𑀁 𑀪𑀸𑀯𑁂𑀣𑀸𑀢𑀺 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑀁 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀪𑀸𑀯𑁂𑀬𑁆𑀬. 𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫𑀸𑀢𑀺 𑀑𑀓𑀁 𑀯𑀼𑀘𑁆𑀘𑀢𑀺 𑀆𑀮𑀬𑁄, 𑀅𑀦𑁄𑀓𑀁 𑀯𑀼𑀘𑁆𑀘𑀢𑀺 𑀅𑀦𑀸𑀮𑀬𑁄. 𑀆𑀮𑀬𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀸𑀮𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀘𑁆𑀘 𑀆𑀭𑀩𑁆𑀪.

𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀬𑀲𑁆𑀫𑀺𑀁 𑀅𑀦𑀸𑀮𑀬𑀲𑀗𑁆𑀔𑀸𑀢𑁂 𑀯𑀺𑀯𑁂𑀓𑁂 𑀦𑀺𑀩𑁆𑀩𑀸𑀦𑁂 𑀇𑀫𑁂𑀳𑀺 𑀲𑀢𑁆𑀢𑁂𑀳𑀺 𑀤𑀼𑀭𑀪𑀺𑀭𑀫𑀁, 𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬. 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂. 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀻𑀢𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀅𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑁂𑀬𑁆𑀬 𑀯𑁄𑀤𑀸𑀧𑁂𑀬𑁆𑀬, 𑀧𑀭𑀺𑀲𑁄𑀥𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀽𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀲𑀼. 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀦𑁆𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀘𑀺𑀢𑁆𑀢𑀁 𑀲𑀼𑀝𑁆𑀞𑀼 𑀪𑀸𑀯𑀺𑀢𑀁 𑀯𑀟𑁆𑀠𑀺𑀢𑀁. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀆𑀦𑀼𑀪𑀸𑀯𑀯𑀦𑁆𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀚𑀼𑀢𑀺𑀬𑀸 𑀔𑀦𑁆𑀥𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀚𑁄𑀢𑁂𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀢𑁂 𑀇𑀫𑀲𑁆𑀫𑀺𑀁 𑀔𑀦𑁆𑀥𑀸𑀤𑀺𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸 𑀦𑀸𑀫 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀔𑁂𑀧𑀺𑀢𑀢𑁆𑀢𑀸 𑀲𑀉𑀧𑀸𑀤𑀺𑀲𑁂𑀲𑁂𑀦, 𑀘𑀭𑀺𑀫𑀘𑀺𑀢𑁆𑀢𑀦𑀺𑀭𑁄𑀥𑁂𑀦 𑀔𑀦𑁆𑀥𑀯𑀝𑁆𑀝𑀲𑁆𑀲 𑀔𑁂𑀧𑀺𑀢𑀢𑁆𑀢𑀸 𑀅𑀦𑀼𑀧𑀸𑀤𑀺𑀲𑁂𑀲𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑀸, 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀧𑀤𑀻𑀧𑁄 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄.

𑀇𑀢𑁄 𑀧𑀭𑀁 𑀬𑀸𑀯 𑀢𑀢𑀺𑀬𑁄 𑀧𑀡𑁆𑀡𑀸𑀲𑀓𑁄, 𑀢𑀸𑀯 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁪. 𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁

𑁧𑁫𑁫-𑁧𑁬𑁬. 𑀘𑀢𑀼𑀢𑁆𑀣𑀲𑁆𑀲 ¶ ¶ 𑀧𑀞𑀫𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑁧-𑁪𑁪. 𑀩𑁆𑀭𑀸𑀳𑁆𑀫𑀡𑀧𑀘𑁆𑀘𑁄𑀭𑁄𑀳𑀡𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁭-𑁨𑁧𑁦. 𑀤𑀼𑀢𑀺𑀬𑁂 𑀘 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀤𑀲𑀫𑁂 𑀧𑀘𑁆𑀙𑀸𑀪𑀽𑀫𑀺𑀯𑀸𑀲𑀺𑀦𑁄𑀢𑀺 𑀧𑀘𑁆𑀘𑀦𑁆𑀢𑀤𑁂𑀲𑀯𑀸𑀲𑀺𑀦𑁄. 𑀲𑁂𑀯𑀸𑀮𑀫𑀸𑀮𑀺𑀓𑀸𑀢𑀺 𑀧𑀸𑀢𑁄𑀯 𑀉𑀤𑀓𑀁 𑀑𑀭𑁄𑀳𑀺𑀢𑁆𑀯𑀸 𑀲𑁂𑀯𑀸𑀮𑀜𑁆𑀘𑁂𑀯 𑀉𑀧𑁆𑀧𑀮𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀤𑀓𑀲𑀼𑀤𑁆𑀥𑀺𑀓𑀪𑀸𑀯𑀚𑀸𑀦𑀦𑀢𑁆𑀣𑀜𑁆𑀘𑁂𑀯 ‘‘𑀮𑁄𑀓𑀲𑁆𑀲 𑀘 𑀉𑀤𑀓𑁂𑀦 𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀚𑀸𑀦𑀦𑀢𑁆𑀣𑀜𑁆𑀘 𑀫𑀸𑀮𑀁 𑀓𑀢𑁆𑀯𑀸 𑀧𑀺𑀮𑀦𑁆𑀥𑀦𑀓𑀸. 𑀉𑀤𑀓𑁄𑀭𑁄𑀳𑀓𑀸𑀢𑀺 𑀧𑀸𑀢𑁄 𑀫𑀚𑁆𑀛𑀦𑁆𑀳𑁂 𑀲𑀸𑀬𑀦𑁆𑀳𑁂 𑀘 𑀉𑀤𑀓𑀑𑀭𑁄𑀳𑀡𑀓𑀸. 𑀢𑁂𑀦𑀸𑀳 ‘‘𑀲𑀸𑀬𑀢𑀢𑀺𑀬𑀓𑀁 𑀉𑀤𑀓𑁄𑀭𑁄𑀳𑀡𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸’’𑀢𑀺. 𑀏𑀓𑀸𑀤𑀲𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀘𑀢𑀼𑀢𑁆𑀣𑁂 𑀧𑀡𑁆𑀡𑀸𑀲𑀓𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀩𑁆𑀭𑀸𑀳𑁆𑀫𑀡𑀧𑀘𑁆𑀘𑁄𑀭𑁄𑀳𑀡𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

(𑁨𑁧) 𑁧. 𑀓𑀭𑀚𑀓𑀸𑀬𑀯𑀕𑁆𑀕𑁄

𑁧-𑁫𑁩𑁬. 𑀧𑀞𑀫𑀦𑀺𑀭𑀬𑀲𑀕𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁧-𑁭𑁪𑁬. 𑀧𑀜𑁆𑀘𑀫𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀦𑀯𑀫𑁂 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀫𑀳𑀕𑁆𑀕𑀢𑀓𑀫𑁆𑀫𑀜𑁆𑀘 𑀓𑀢𑀽𑀧𑀘𑀺𑀢𑀁 𑀯𑀺𑀧𑀸𑀓𑀤𑀸𑀦𑁂 𑀮𑀤𑁆𑀥𑀸𑀯𑀲𑀭𑀁 𑀳𑀼𑀢𑁆𑀯𑀸 𑀞𑀺𑀢𑀁, 𑀢𑁂𑀲𑀼 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀇𑀢𑀭𑀁 𑀦𑀻𑀳𑀭𑀺𑀢𑁆𑀯𑀸 𑀲𑀬𑀁 𑀢𑀢𑁆𑀣 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀳𑀕𑁆𑀕𑀢𑀓𑀫𑁆𑀫𑀫𑁂𑀯 ¶ 𑀧𑀦 𑀇𑀢𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺 𑀕𑀭𑀼𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀁 𑀫𑀳𑁄𑀖𑁄 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺. 𑀇𑀢𑁄 𑀧𑀭𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀦𑀺𑀭𑀬𑀲𑀕𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀏𑀓𑀸𑀤𑀲𑀓𑀦𑀺𑀧𑀸𑀢-𑀝𑀻𑀓𑀸

𑁧. 𑀦𑀺𑀲𑁆𑀲𑀬𑀯𑀕𑁆𑀕𑁄

𑁧-𑁧𑁦. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁧𑁦. 𑀏𑀓𑀸𑀤𑀲𑀓𑀦𑀺𑀧𑀸𑀢𑀲𑁆𑀲 ¶ ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀤𑀲𑀫𑁂 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂, 𑀚𑀦𑁂 𑀏𑀢𑀲𑁆𑀫𑀺𑀦𑁆𑀢𑀺 𑀯𑀸 𑀚𑀦𑁂𑀢𑀲𑁆𑀫𑀺𑀁, 𑀫𑀦𑀼𑀲𑁆𑀲𑁂𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄’’𑀢𑀺. 𑀚𑀦𑀺𑀢𑀲𑁆𑀫𑀺𑀁-𑀲𑀤𑁆𑀤𑁄 𑀏𑀯 𑀯𑀸 𑀇-𑀓𑀸𑀭𑀲𑁆𑀲 𑀏-𑀓𑀸𑀭𑀁 𑀓𑀢𑁆𑀯𑀸 ‘‘𑀚𑀦𑁂𑀢𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁄. 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀘 𑀚𑀦𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀲𑀸𑀫𑀜𑁆𑀜𑀕𑁆𑀕𑀳𑀡𑁂𑀧𑀺 𑀬𑀢𑁆𑀣 𑀘𑀢𑀼𑀯𑀡𑁆𑀡𑀲𑀫𑀜𑁆𑀜𑀸, 𑀢𑀢𑁆𑀣𑁂𑀯 𑀫𑀦𑀼𑀲𑁆𑀲𑀮𑁄𑀓𑁂. 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄𑀢𑀺 𑀅𑀬𑀁 𑀮𑁄𑀓𑀲𑀫𑀜𑁆𑀜𑀸𑀧𑀺 𑀫𑀦𑀼𑀲𑁆𑀲𑀮𑁄𑀓𑁂𑀬𑁂𑀯, 𑀦 𑀤𑁂𑀯𑀓𑀸𑀬𑁂 𑀩𑁆𑀭𑀳𑁆𑀫𑀓𑀸𑀬𑁂 𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀭𑀦𑁆𑀢𑀻𑀢𑀺 ‘‘𑀅𑀳𑀁 𑀕𑁄𑀢𑀫𑁄, 𑀅𑀳𑀁 𑀓𑀲𑁆𑀲𑀧𑁄’’𑀢𑀺 𑀧𑀝𑀺 𑀧𑀝𑀺 𑀅𑀢𑁆𑀢𑀦𑁄 𑀕𑁄𑀢𑁆𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑀺 𑀯𑀸𑀢𑀺 𑀅𑀢𑁆𑀣𑁄.

𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀲𑁆𑀲𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑀼𑀲𑁆𑀲𑀢𑀺𑀯𑀕𑁆𑀕𑁄

𑁧-𑁪. 𑀧𑀞𑀫𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧-𑁧𑁪. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀢𑀢𑀺𑀬𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀦𑁆𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀻𑀦𑀁. 𑀓𑁄 𑀧𑀦 𑀤𑁂𑀯𑀸𑀦𑀁 𑀆𑀳𑀸𑀭𑁄, 𑀓𑀸 𑀆𑀳𑀸𑀭𑀯𑁂𑀮𑀸𑀢𑀺? 𑀲𑀩𑁆𑀩𑁂𑀲𑀫𑁆𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀲𑀼𑀥𑀸 𑀆𑀳𑀸𑀭𑁄. 𑀲𑀸 𑀳𑁂𑀝𑁆𑀞𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑁂𑀳𑀺 𑀉𑀧𑀭𑀺𑀫𑀸𑀦𑀁 𑀉𑀧𑀭𑀺𑀫𑀸𑀦𑀁 𑀧𑀡𑀻𑀢𑀢𑀫𑀸 𑀳𑁄𑀢𑀺, 𑀢𑀁 𑀬𑀣𑀸𑀲𑀓𑀁 𑀤𑀺𑀯𑀲𑀯𑀲𑁂𑀦𑁂𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀩𑀺𑀴𑀸𑀭𑀧𑀤𑀧𑁆𑀧𑀫𑀸𑀡𑀁 𑀲𑀼𑀥𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀚𑀺𑀯𑁆𑀳𑀸𑀬 𑀞𑀧𑀺𑀢𑀫𑀢𑁆𑀢𑁄 𑀬𑀸𑀯 𑀓𑁂𑀲𑀕𑁆𑀕𑀦𑀔𑀕𑁆𑀕𑀸 𑀓𑀸𑀬𑀁 𑀨𑀭𑀢𑀺, 𑀢𑁂𑀲𑀁𑀬𑁂𑀯 𑀤𑀺𑀯𑀲𑀯𑀲𑁂𑀦 ¶ 𑀲𑀢𑁆𑀢 𑀤𑀺𑀯𑀲𑁂 𑀬𑀸𑀧𑀦𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀲𑀫𑀬𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄. 𑀅𑀝𑁆𑀞𑀦𑁆𑀦𑀜𑁆𑀳𑀺 𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀧𑀚𑁆𑀚𑀦𑀲𑁆𑀲 𑀲𑀫𑀬𑁄𑀧𑀺 𑀅𑀢𑁆𑀣𑀺 𑀢𑀲𑁆𑀲 𑀅𑀲𑀫𑀬𑁄𑀧𑀺, 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀧𑀦 𑀯𑀺𑀫𑀼𑀘𑁆𑀘𑀦𑀲𑁆𑀲 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀺. 𑀬𑀲𑁆𑀲 𑀲𑀤𑁆𑀥𑀸 𑀩𑀮𑀯𑀢𑀻, 𑀯𑀺𑀧𑀲𑁆𑀲𑀦𑀸 𑀘 𑀆𑀭𑀤𑁆𑀥𑀸, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀝𑁆𑀞𑀦𑁆𑀢𑀲𑁆𑀲 𑀦𑀺𑀲𑀻𑀤𑀦𑁆𑀢𑀲𑁆𑀲 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀔𑀸𑀤𑀦𑁆𑀢𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀘 𑀫𑀕𑁆𑀕𑀨𑀮𑀧𑁆𑀧𑀝𑀺𑀯𑁂𑀥𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀻𑀢𑀺 𑀫𑀕𑁆𑀕𑀯𑀺𑀫𑁄𑀓𑁆𑀔𑁄 𑀅𑀲𑀫𑀬𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑁂𑀢𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀲𑁂𑀲𑀚𑀦𑀸𑀢𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀮𑀸𑀪𑀺𑀦𑁄. 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑀸𑀢𑀺 𑀤𑀓𑁆𑀔𑀺𑀡𑁂𑀦𑁂𑀯 𑀧𑀲𑁆𑀲𑁂𑀦 𑀅𑀲𑀬𑀺𑀢𑁆𑀯𑀸 𑀲𑀩𑁆𑀩𑀲𑁄 𑀧𑀭𑀺𑀯𑀢𑁆𑀢𑀫𑀸𑀦𑀸. 𑀓𑀸𑀓𑀘𑁆𑀙𑀫𑀸𑀦𑀸𑀢𑀺 𑀖𑀼𑀭𑀼𑀖𑀼𑀭𑀼𑀧𑀲𑁆𑀲𑀸𑀲𑀯𑀲𑁂𑀦 𑀯𑀺𑀲𑁆𑀲𑀭𑀁 𑀓𑀭𑁄𑀦𑁆𑀢𑀸. 𑀲𑀼𑀔𑀁 𑀲𑀼𑀧𑀢𑀻𑀢𑀺 𑀏𑀢𑁆𑀣 𑀤𑀼𑀯𑀺𑀥𑀸 𑀲𑀼𑀧𑀦𑀸 𑀲𑀬𑀦𑁂 𑀧𑀺𑀝𑁆𑀞𑀺𑀧𑁆𑀧𑀲𑀸𑀭𑀡𑀮𑀓𑁆𑀔𑀡𑀸 𑀓𑀺𑀭𑀺𑀬𑀸𑀫𑀬𑀘𑀺𑀢𑁆𑀢𑁂𑀳𑀺 𑀅𑀯𑁄𑀓𑀺𑀡𑁆𑀡𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀘. 𑀢𑀢𑁆𑀣𑀸𑀬𑀁 𑀉𑀪𑀬𑀢𑁆𑀣𑀸𑀧𑀺 𑀲𑀼𑀔𑀫𑁂𑀯 𑀲𑀼𑀧𑀢𑀺. 𑀬𑀲𑁆𑀫𑀸 𑀲𑀡𑀺𑀓𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀫𑁄𑀥𑀸𑀬 𑀧𑀸𑀲𑀸𑀤𑀺𑀓𑁂𑀦 𑀆𑀓𑀸𑀭𑁂𑀦 𑀲𑀬𑀢𑀺, 𑀦𑀺𑀤𑁆𑀤𑁄𑀓𑁆𑀓𑀫𑀦𑁂𑀧𑀺 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀅𑀲𑀼𑀧𑀺𑀢𑁆𑀯𑀸’’𑀢𑀺𑀆𑀤𑀺.

𑀦𑀺𑀤𑁆𑀤𑀸𑀓𑀸𑀮𑁂 𑀲𑀼𑀔𑀁 𑀅𑀮𑀪𑀺𑀢𑁆𑀯𑀸 𑀤𑀼𑀓𑁆𑀔𑁂𑀦 𑀲𑀼𑀢𑁆𑀢𑀢𑁆𑀢𑀸 𑀏𑀯 𑀧𑀝𑀺𑀩𑀼𑀚𑁆𑀛𑀦𑀓𑀸𑀮𑁂 𑀲𑀭𑀻𑀭𑀔𑁂𑀤𑁂𑀦 𑀦𑀺𑀢𑁆𑀣𑀼𑀦𑀦𑀁 ¶ 𑀯𑀺𑀚𑀫𑁆𑀪𑀦𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑀭𑀺𑀯𑀢𑁆𑀢𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀢𑁆𑀣𑀼𑀦𑀦𑁆𑀢𑀸 𑀯𑀺𑀚𑀫𑁆𑀪𑀦𑁆𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑀸 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀦𑁆𑀢𑀻’’𑀢𑀺. 𑀅𑀬𑀁 𑀧𑀦 𑀲𑀼𑀔𑁂𑀦 𑀲𑀼𑀢𑁆𑀢𑀢𑁆𑀢𑀸 𑀲𑀭𑀻𑀭𑀔𑁂𑀤𑀸𑀪𑀸𑀯𑀢𑁄 𑀦𑀺𑀢𑁆𑀣𑀼𑀦𑀦𑀸𑀤𑀺𑀯𑀺𑀭𑀳𑀺𑀢𑁄𑀯 𑀧𑀝𑀺𑀩𑀼𑀚𑁆𑀛𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀅𑀧𑁆𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸’’𑀢𑀺𑀆𑀤𑀺. 𑀲𑀼𑀔𑀧𑁆𑀧𑀝𑀺𑀩𑁄𑀥𑁄 𑀘 𑀲𑀭𑀻𑀭𑀯𑀺𑀓𑀸𑀭𑀸𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀼𑀔𑀁 𑀦𑀺𑀩𑁆𑀩𑀺𑀓𑀸𑀭’’𑀦𑁆𑀢𑀺.

𑀪𑀤𑁆𑀤𑀓𑀫𑁂𑀯 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺 𑀇𑀤𑀁 𑀅𑀦𑀼𑀪𑀽𑀢𑀧𑀼𑀩𑁆𑀩𑀯𑀲𑁂𑀦 𑀤𑁂𑀯𑀢𑀽𑀧𑀲𑀁𑀳𑀸𑀭𑀯𑀲𑁂𑀦 𑀘𑀲𑁆𑀲 𑀪𑀤𑁆𑀤𑀓𑀫𑁂𑀯 𑀲𑀼𑀧𑀺𑀦𑀁 𑀳𑁄𑀢𑀺, 𑀦 𑀧𑀸𑀧𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑁄 𑀯𑀺𑀬𑀸’’𑀢𑀺𑀆𑀤𑀺. 𑀥𑀸𑀢𑀼𑀓𑁆𑀔𑁄𑀪𑀳𑁂𑀢𑀼𑀓𑀫𑁆𑀧𑀺 𑀘𑀲𑁆𑀲 𑀩𑀳𑀼𑀮𑀁 𑀪𑀤𑁆𑀤𑀓𑀫𑁂𑀯 𑀲𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀘𑀺𑀢𑁆𑀢𑀚𑀭𑀽𑀧𑀸𑀦𑀼𑀕𑀼𑀡𑀢𑀸𑀬 𑀉𑀢𑀼𑀆𑀳𑀸𑀭𑀚𑀭𑀽𑀧𑀸𑀦𑀁.

𑀉𑀭𑁂 ¶ 𑀆𑀫𑀼𑀓𑁆𑀓𑀫𑀼𑀢𑁆𑀢𑀸𑀳𑀸𑀭𑁄 𑀯𑀺𑀬𑀸𑀢𑀺 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀉𑀭𑁂 𑀮𑀫𑁆𑀩𑀺𑀢𑀫𑀼𑀢𑁆𑀢𑀸𑀳𑀸𑀭𑁄 𑀯𑀺𑀬𑀸𑀢𑀺 𑀓𑁂𑀳𑀺𑀘𑀺 𑀢𑀁 𑀏𑀓𑀸𑀯𑀮𑀺𑀯𑀲𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸, 𑀅𑀦𑁂𑀓𑀭𑀢𑀦𑀸𑀯𑀮𑀺𑀲𑀫𑀽𑀳𑀪𑀽𑀢𑁄 𑀧𑀦 𑀫𑀼𑀢𑁆𑀢𑀸𑀳𑀸𑀭𑁄 𑀅𑀁𑀲𑀧𑁆𑀧𑀤𑁂𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀝𑀺𑀧𑁆𑀧𑀤𑁂𑀲𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀸 𑀧𑀮𑀫𑁆𑀩𑀦𑁆𑀢𑁄 𑀉𑀭𑁂 𑀆𑀫𑀼𑀓𑁆𑀓𑁄𑀬𑁂𑀯 𑀦𑀸𑀫 𑀳𑁄𑀢𑀺.

𑀯𑀺𑀲𑀸𑀔𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁫𑁮) 𑀲𑁄 𑀓𑀺𑀭 𑀧𑀸𑀝𑀮𑀺𑀧𑀼𑀢𑁆𑀢𑁂 𑀓𑀼𑀝𑀼𑀫𑁆𑀩𑀺𑀬𑁄 𑀅𑀳𑁄𑀲𑀺. 𑀲𑁄 𑀢𑀢𑁆𑀣𑁂𑀯 𑀯𑀲𑀫𑀸𑀦𑁄 𑀅𑀲𑁆𑀲𑁄𑀲𑀺 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁄 𑀓𑀺𑀭 𑀘𑁂𑀢𑀺𑀬𑀫𑀸𑀮𑀸𑀮𑀗𑁆𑀓𑀢𑁄 𑀓𑀸𑀲𑀸𑀯𑀧𑀚𑁆𑀚𑁄𑀢𑁄, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑁂𑀬𑁂𑀯𑁂𑀢𑁆𑀣 𑀲𑀓𑁆𑀓𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸, 𑀉𑀢𑀼𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀁 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀦𑁆𑀢𑀺 𑀲𑀩𑁆𑀩𑀫𑁂𑀢𑁆𑀣 𑀲𑀼𑀮𑀪’’𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀪𑁄𑀕𑀓𑁆𑀔𑀦𑁆𑀥𑀁 𑀧𑀼𑀢𑁆𑀢𑀤𑀸𑀭𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀤𑀼𑀲𑁆𑀲𑀦𑁆𑀢𑁂 𑀩𑀤𑁆𑀥𑁂𑀦 𑀏𑀓𑀓𑀳𑀸𑀧𑀡𑁂𑀦𑁂𑀯 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀼𑀤𑁆𑀤𑀢𑀻𑀭𑁂 𑀦𑀸𑀯𑀁 𑀉𑀤𑀺𑀓𑁆𑀔𑀫𑀸𑀦𑁄 𑀏𑀓𑀁 𑀫𑀸𑀲𑀁 𑀯𑀲𑀺. 𑀲𑁄 𑀯𑁄𑀳𑀸𑀭𑀓𑀼𑀲𑀮𑀢𑀸𑀬 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀪𑀡𑁆𑀟𑀁 𑀓𑀺𑀡𑀺𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀥𑀫𑁆𑀫𑀺𑀓𑀸𑀬 𑀯𑀡𑀺𑀚𑁆𑀚𑀸𑀬 𑀢𑁂𑀦𑁂𑀯𑀦𑁆𑀢𑀭𑀫𑀸𑀲𑁂𑀦 𑀲𑀳𑀲𑁆𑀲𑀁 𑀅𑀪𑀺𑀲𑀁𑀳𑀭𑀺. 𑀇𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀢𑀺. 𑀲𑁄 𑀧𑀩𑁆𑀩𑀸𑀚𑀦𑀢𑁆𑀣𑀸𑀬 𑀲𑀻𑀫𑀁 𑀦𑀻𑀢𑁄 𑀢𑀁 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀑𑀯𑀝𑁆𑀝𑀺𑀓𑀦𑁆𑀢𑀭𑁂𑀦 𑀪𑀽𑀫𑀺𑀬𑀁 𑀧𑀸𑀢𑁂𑀲𑀺. ‘‘𑀓𑀺𑀫𑁂𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀓𑀳𑀸𑀧𑀡𑀲𑀳𑀲𑁆𑀲𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸, ‘‘𑀉𑀧𑀸𑀲𑀓, 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀲𑀓𑁆𑀓𑀸 𑀯𑀺𑀘𑀸𑀭𑁂𑀢𑀼𑀁, 𑀇𑀤𑀸𑀦𑁂𑀯 𑀦𑀁 𑀯𑀺𑀘𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀯𑀺𑀲𑀸𑀔𑀲𑁆𑀲 𑀧𑀩𑁆𑀩𑀚𑁆𑀚𑀝𑁆𑀞𑀸𑀦𑀁 𑀆𑀕𑀢𑀸 𑀫𑀸 𑀭𑀺𑀢𑁆𑀢𑀳𑀢𑁆𑀣𑀸 𑀕𑀫𑀺𑀁𑀲𑀽’’𑀢𑀺 𑀫𑀼𑀜𑁆𑀘𑀺𑀢𑁆𑀯𑀸 𑀲𑀻𑀫𑀸𑀫𑀸𑀴𑀓𑁂 𑀯𑀺𑀓𑁆𑀓𑀺𑀭𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄. 𑀲𑁄 𑀧𑀜𑁆𑀘𑀯𑀲𑁆𑀲𑁄 𑀳𑀼𑀢𑁆𑀯𑀸 𑀤𑁆𑀯𑁂𑀫𑀸𑀢𑀺𑀓𑀸 𑀧𑀕𑀼𑀡𑀸 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀫𑀧𑀯𑀢𑁆𑀢𑀯𑀸𑀲𑀁 𑀯𑀲𑀫𑀸𑀦𑁄 𑀘𑀭𑀺. 𑀏𑀯𑀁 𑀘𑀭𑀫𑀸𑀦𑁄 𑁋

‘‘𑀯𑀦𑀦𑁆𑀢𑀭𑁂 ¶ 𑀞𑀺𑀢𑁄 𑀣𑁂𑀭𑁄, 𑀯𑀺𑀲𑀸𑀔𑁄 𑀕𑀚𑁆𑀚𑀫𑀸𑀦𑀓𑁄;

𑀅𑀢𑁆𑀢𑀦𑁄 𑀕𑀼𑀡𑀫𑁂𑀲𑀦𑁆𑀢𑁄, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

‘‘𑀬𑀸𑀯𑀢𑀸 𑀉𑀧𑀲𑀫𑁆𑀧𑀦𑁆𑀦𑁄, 𑀬𑀸𑀯𑀢𑀸 𑀇𑀥 𑀫𑀸𑀕𑀢𑁄;

𑀏𑀢𑁆𑀣𑀦𑁆𑀢𑀭𑁂 𑀔𑀮𑀺𑀢𑀁 𑀦𑀢𑁆𑀣𑀺, 𑀅𑀳𑁄 𑀮𑀸𑀪𑁄 𑀢𑁂 𑀫𑀸𑀭𑀺𑀲𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁫𑁮);

𑀲𑁄 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀯𑀸 ‘‘𑀅𑀬𑀁 𑀦𑀼 𑀔𑁄 𑀫𑀕𑁆𑀕𑁄, 𑀉𑀤𑀸𑀳𑀼 𑀅𑀬’’𑀦𑁆𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ¶ 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀲𑁄 𑀫𑀕𑁆𑀕𑁄’’𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸 ‘‘𑀧𑀘𑁆𑀘𑀽𑀲𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀘𑀗𑁆𑀓𑀫𑀲𑀻𑀲𑁂 𑀫𑀡𑀺𑀮𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑁄𑀧𑀸𑀦𑀨𑀮𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑁄𑀤𑀺. 𑀣𑁂𑀭𑁄 ‘‘𑀓𑁄 𑀏𑀲𑁄’’𑀢𑀺 𑀆𑀳. 𑀅𑀳𑀁, 𑀪𑀦𑁆𑀢𑁂, 𑀫𑀡𑀺𑀮𑀺𑀬𑀸𑀢𑀺. 𑀓𑀺𑀲𑁆𑀲 𑀭𑁄𑀤𑀲𑀻𑀢𑀺? 𑀢𑀼𑀫𑁆𑀳𑀸𑀓𑀁 𑀕𑀫𑀦𑀁 𑀧𑀝𑀺𑀘𑁆𑀘𑀸𑀢𑀺. 𑀫𑀬𑀺 𑀇𑀥 𑀯𑀲𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀓𑁄 𑀕𑀼𑀡𑁄𑀢𑀺? 𑀢𑀼𑀫𑁆𑀳𑁂𑀲𑀼, 𑀪𑀦𑁆𑀢𑁂, 𑀇𑀥 𑀯𑀲𑀦𑁆𑀢𑁂𑀲𑀼 𑀅𑀫𑀦𑀼𑀲𑁆𑀲𑀸 𑀅𑀜𑁆𑀜𑀫𑀜𑁆𑀜𑀁 𑀫𑁂𑀢𑁆𑀢𑀁 𑀧𑀝𑀺𑀮𑀪𑀦𑁆𑀢𑀺, 𑀢𑁂 𑀤𑀸𑀦𑀺 𑀢𑀼𑀫𑁆𑀳𑁂𑀲𑀼 𑀕𑀢𑁂𑀲𑀼 𑀓𑀮𑀳𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀤𑀼𑀝𑁆𑀞𑀼𑀮𑁆𑀮𑀫𑁆𑀧𑀺 𑀓𑀣𑀬𑀺𑀲𑁆𑀲𑀦𑁆𑀢𑀻𑀢𑀺. 𑀣𑁂𑀭𑁄 ‘‘𑀲𑀘𑁂 𑀫𑀬𑀺 𑀇𑀥 𑀯𑀲𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀺, 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀢𑁆𑀯𑀸 𑀅𑀜𑁆𑀜𑁂𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦 𑀢𑀣𑁂𑀯 𑀕𑀫𑀦𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀤𑁂𑀯𑀢𑀸𑀧𑀺 𑀧𑀼𑀦 𑀢𑀣𑁂𑀯 𑀧𑀭𑁄𑀤𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀣𑁂𑀭𑁄 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀏𑀯𑀁 𑀥𑀫𑀢𑁆𑀢𑀸𑀯𑀺𑀳𑀸𑀭𑀻 𑀪𑀺𑀓𑁆𑀔𑀼 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺.

𑀩𑀮𑀯𑀧𑀺𑀬𑀘𑀺𑀢𑁆𑀢𑀢𑀸𑀬𑀸𑀢𑀺 𑀇𑀫𑀺𑀦𑀸 𑀩𑀮𑀯𑀧𑀺𑀬𑀘𑀺𑀢𑁆𑀢𑀢𑀸𑀫𑀢𑁆𑀢𑁂𑀦𑀧𑀺 𑀲𑀢𑁆𑀣𑀁 𑀦 𑀓𑀫𑀢𑀺, 𑀧𑀕𑁂𑀯 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀔𑀺𑀧𑁆𑀧𑀫𑁂𑀯 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀓𑁂𑀦𑀘𑀺 𑀧𑀭𑀺𑀧𑀦𑁆𑀣𑁂𑀦 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀪𑀸𑀯𑀢𑁄 𑀔𑀺𑀧𑁆𑀧𑀫𑁂𑀯 𑀲𑀫𑀸𑀥𑀺𑀬𑀢𑀺, ‘‘𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺 𑀓𑁂𑀘𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀇𑀢𑁄 𑀅𑀜𑁆𑀜𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀅𑀥𑀺𑀕𑀢𑀚𑁆𑀛𑀸𑀦𑀸𑀦𑀫𑁆𑀧𑀺 𑀲𑀼𑀔𑀲𑀼𑀧𑀦𑀸𑀤𑀬𑁄 𑀆𑀦𑀺𑀲𑀁𑀲𑀸 𑀮𑀩𑁆𑀪𑀦𑁆𑀢𑀺. 𑀬𑀣𑀸𑀳 𑁋

‘‘𑀲𑀼𑀔𑀁 𑀲𑀼𑀧𑀦𑁆𑀢𑀺 𑀫𑀼𑀦𑀬𑁄, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀸;

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁨𑁫𑁮); 𑀘 𑀆𑀤𑀺 𑁋

𑀢𑀣𑀸𑀧𑀺𑀫𑁂 𑀆𑀦𑀺𑀲𑀁𑀲𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀮𑀸𑀪𑀺𑀦𑁄 𑀅𑀦𑀯𑀲𑁂𑀲𑀸 𑀮𑀩𑁆𑀪𑀦𑁆𑀢𑀺 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀦𑀺𑀲𑁆𑀲𑀭𑀡𑀁 𑀳𑁂𑀢𑀁, 𑀆𑀯𑀼𑀲𑁄, 𑀩𑁆𑀬𑀸𑀧𑀸𑀤𑀲𑁆𑀲, 𑀬𑀤𑀺𑀤𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺𑀆𑀤𑀺 ¶ (𑀤𑀻. 𑀦𑀺. 𑁩.𑁩𑁨𑁬; 𑀅. 𑀦𑀺. 𑁬.𑁧𑁩). 𑀩𑁆𑀬𑀸𑀧𑀸𑀤𑀸𑀤𑀺𑀯𑀲𑁂𑀦 𑀘 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀲𑀼𑀧𑀦𑀸𑀤𑀬𑁄𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑁂𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀲𑀺𑀤𑁆𑀥𑁂𑀲𑀼 𑀲𑀼𑀔𑀲𑀼𑀧𑀦𑀸𑀤𑀬𑁄 𑀳𑀢𑁆𑀣𑀕𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺.

𑀫𑁂𑀢𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 ¶ 𑀩𑁂𑀮𑀼𑀯𑀕𑀸𑀫𑀓𑁂𑀢𑀺 𑀯𑁂𑀲𑀸𑀮𑀺𑀬𑀸 𑀤𑀓𑁆𑀔𑀺𑀡𑀧𑀲𑁆𑀲𑁂 𑀅𑀯𑀺𑀤𑀽𑀭𑁂 𑀩𑁂𑀮𑀼𑀯𑀕𑀸𑀫𑀓𑁄 𑀦𑀸𑀫 𑀅𑀢𑁆𑀣𑀺, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀸𑀭𑀧𑁆𑀧𑀢𑁆𑀢𑀓𑀼𑀮𑀕𑀡𑀦𑀸𑀬𑀸𑀢𑀺 𑀫𑀳𑀸𑀲𑀸𑀭𑀫𑀳𑀧𑁆𑀧𑀢𑁆𑀢𑀓𑀼𑀮𑀕𑀡𑀦𑀸𑀬. 𑀤𑀲𑀫𑁂 𑀞𑀸𑀦𑁂𑀢𑀺 𑀅𑀜𑁆𑀜𑁂 𑀅𑀜𑁆𑀜𑁂𑀢𑀺 𑀤𑀲𑀕𑀡𑀦𑀝𑁆𑀞𑀸𑀦𑁂. 𑀅𑀝𑁆𑀞𑀓𑀦𑀕𑀭𑁂 𑀚𑀸𑀢𑁄 𑀪𑀯𑁄𑀢𑀺 𑀅𑀝𑁆𑀞𑀓𑀦𑀸𑀕𑀭𑁄. 𑀓𑀼𑀓𑁆𑀓𑀼𑀝𑀸𑀭𑀸𑀫𑁄𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑁂 𑀓𑀼𑀓𑁆𑀓𑀼𑀝𑀸𑀭𑀸𑀫𑁄, 𑀦 𑀓𑁄𑀲𑀫𑁆𑀩𑀺𑀬𑀁.

𑀧𑀓𑀢𑀢𑁆𑀣𑀧𑁆𑀧𑀝𑀺𑀦𑀺𑀤𑁆𑀤𑁂𑀲𑁄 𑀢-𑀲𑀤𑁆𑀤𑁄𑀢𑀺 𑀢𑀲𑁆𑀲 ‘‘𑀪𑀕𑀯𑀢𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀬𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀪𑀕𑀯𑀸 𑀧𑀓𑀢𑁄 𑀅𑀥𑀺𑀕𑀢𑁄 𑀲𑀼𑀧𑀸𑀓𑀝𑁄 𑀘, 𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀲𑀤𑁆𑀥𑀺𑀁 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬 𑀅𑀢𑁆𑀣𑀪𑀸𑀯𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀲𑁄…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀆𑀳. 𑀲𑀢𑀺𑀧𑀺 𑀜𑀸𑀡𑀤𑀲𑁆𑀲𑀦𑀲𑀤𑁆𑀤𑀸𑀦𑀁 𑀇𑀥 𑀧𑀜𑁆𑀜𑀸𑀯𑁂𑀯𑀘𑀦𑀪𑀸𑀯𑁂 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀦𑁂𑀲𑀁 𑀯𑀺𑀲𑀬𑀯𑀺𑀲𑁂𑀲𑁂 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀯𑀲𑁂𑀦, 𑀯𑀺𑀚𑁆𑀚𑀸𑀢𑁆𑀢𑀬𑀯𑀲𑁂𑀦, 𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀦𑀸𑀯𑀭𑀡𑀯𑀲𑁂𑀦, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀁𑀲𑀘𑀓𑁆𑀔𑀼𑀯𑀲𑁂𑀦 𑀧𑀝𑀺𑀯𑁂𑀥𑀤𑁂𑀲𑀦𑀸𑀜𑀸𑀡𑀯𑀲𑁂𑀦 𑀘 𑀢𑀤𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦, 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀢𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑁂𑀳𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀲𑀯𑀓𑁆𑀔𑀬𑀜𑀸𑀡𑁂𑀳𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸𑀢𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀪𑁂𑀤𑀁 𑀥𑀫𑁆𑀫𑀁 𑀤𑁂𑀲𑀦𑀸𑀧𑀜𑁆𑀜𑀸𑀬 𑀬𑀸𑀣𑀸𑀯𑀢𑁄 𑀧𑀲𑁆𑀲𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀧𑀜𑁆𑀘𑀯𑀺𑀥𑀫𑀸𑀭𑀸𑀦𑀁 𑀯𑀸 𑀲𑀸𑀲𑀦𑀲𑁆𑀲 𑀯𑀸 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁. 𑀢𑁂𑀲𑀁 𑀧𑀦 𑀳𑀦𑀦𑀁 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀅𑀪𑀺𑀪𑀯𑀦𑀁 𑀅𑀧𑁆𑀧𑀝𑀺𑀪𑀸𑀦𑀢𑀸𑀓𑀭𑀡𑀁 𑀅𑀚𑁆𑀛𑀼𑀧𑁂𑀓𑁆𑀔𑀡𑀜𑁆𑀘. 𑀓𑁂𑀲𑀺𑀯𑀺𑀦𑀬𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀺 𑀚𑀸𑀦𑀢𑀸. 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀲𑁆𑀲𑀢𑀸. 𑀲𑀯𑀸𑀲𑀦𑀸𑀦𑀫𑀸𑀲𑀯𑀸𑀦𑀁 𑀔𑀻𑀡𑀢𑁆𑀢𑀸 𑀅𑀭𑀳𑀢𑀸. 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀢𑁄 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦.

𑀅𑀣 𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀚𑀸𑀦𑀢𑀸. 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀸𑀦𑀁 ¶ 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑁄 𑀦𑀺𑀲𑀫𑁆𑀫𑀓𑀸𑀭𑀺𑀢𑀸𑀬 𑀧𑀲𑁆𑀲𑀢𑀸. 𑀤𑀯𑀸𑀤𑀻𑀦𑀫𑁆𑀧𑀺 𑀅𑀪𑀸𑀯𑀲𑀸𑀥𑀺𑀓𑀸𑀬 𑀧𑀳𑀸𑀦𑀲𑀫𑁆𑀧𑀤𑀸𑀬 𑀅𑀭𑀳𑀢𑀸. 𑀙𑀦𑁆𑀤𑀸𑀤𑀻𑀦𑀁 ¶ 𑀅𑀳𑀸𑀦𑀺𑀳𑁂𑀢𑀼𑀪𑀽𑀢𑀸𑀬 𑀅𑀓𑁆𑀔𑀬𑀧𑀝𑀺𑀪𑀸𑀦𑀲𑀸𑀥𑀺𑀓𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀤𑀲𑀩𑀮𑀅𑀝𑁆𑀞𑀸𑀭𑀲𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀫𑁆𑀫𑀼𑀔𑀪𑀸𑀯𑁂𑀦 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀓𑀢𑀁. 𑀲𑁆𑀯𑀸𑀲𑁆𑀲 𑀓𑀢𑀪𑀸𑀯𑁄 𑀉𑀧𑁆𑀧𑀸𑀤𑀦𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀦 𑀉𑀧𑁆𑀧𑀦𑁆𑀦𑀲𑁆𑀲 𑀧𑀝𑀺𑀲𑀗𑁆𑀔𑀭𑀡𑁂𑀦𑀸𑀢𑀺 𑀆𑀳 ‘‘𑀉𑀧𑁆𑀧𑀸𑀤𑀺𑀢’’𑀦𑁆𑀢𑀺. 𑀢𑁂 𑀘𑀲𑁆𑀲 𑀧𑀘𑁆𑀘𑀬𑀸 𑀘𑁂𑀢𑀦𑀸𑀧𑀥𑀸𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀘𑁂𑀢𑀬𑀺𑀢𑀁 𑀓𑀧𑁆𑀧𑀬𑀺𑀢’’𑀦𑁆𑀢𑀺 𑀅𑀢𑁆𑀣𑀫𑀸𑀳. 𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘 𑀛𑀸𑀦𑀲𑁆𑀲 𑀧𑀸𑀢𑀼𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀯𑀺𑀤𑁆𑀥𑀁𑀲𑀦𑀪𑀸𑀯𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀬𑀜𑁆𑀳𑀺 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑀺, 𑀢𑀁 𑀳𑀼𑀢𑁆𑀯𑀸 𑀧𑀝𑀺𑀯𑁂𑀢𑀺. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀬𑀁 𑀔𑁄 𑀧𑀦𑀸’’𑀢𑀺𑀆𑀤𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀞𑀺𑀢𑁄𑀢𑀺 𑀏𑀢𑁆𑀣 𑀲𑀫𑀣𑀥𑀫𑁆𑀫𑁂 𑀞𑀺𑀢𑀢𑁆𑀢𑀸 𑀲𑀫𑀸𑀳𑀺𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀧𑀚𑀳𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀅𑀦𑀼𑀮𑁄𑀫𑀜𑀸𑀡𑀁 𑀧𑀸𑀧𑁂𑀢𑀸 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀦𑀸𑀥𑀫𑁆𑀫𑁂 𑀞𑀺𑀢𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀲𑀼 𑀥𑀫𑁆𑀫𑁂𑀲𑀼 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻. 𑀢𑀢𑁆𑀣 𑀲𑀼𑀔𑀼𑀫𑀸 𑀅𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀬𑀸 𑀦𑀺𑀓𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀇𑀫𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑁂 𑀕𑀳𑁂𑀢𑀩𑁆𑀩𑁂 𑀲𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄𑀢𑀺 𑀅𑀦𑀸𑀕𑀸𑀫𑀺𑀨𑀮𑀁 𑀅𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑀢𑁆𑀣𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀺 𑀅𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑁂𑀯𑀮𑀁 𑀢𑀢𑁆𑀣 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺. 𑀓𑀲𑁆𑀫𑀸? 𑀢𑁂𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑀭𑀸𑀕𑀫𑀢𑁆𑀢𑁂𑀦 𑀅𑀦𑀸𑀕𑀸𑀫𑀺𑀦𑀸 𑀮𑀤𑁆𑀥𑀩𑁆𑀩𑀲𑁆𑀲 𑀅𑀮𑀤𑁆𑀥𑀅𑀦𑀸𑀕𑀸𑀫𑀺𑀨𑀮𑁂𑀦𑀧𑀺 𑀮𑀤𑁆𑀥𑀩𑁆𑀩𑀢𑁆𑀢𑀸. 𑀢𑀣𑀸 𑀲𑀢𑀺 𑀢𑁂𑀦 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀮𑀤𑁆𑀥𑀩𑁆𑀩𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀸𑀫𑀺𑀨𑀮𑀁 𑀧𑀝𑀺𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀪𑀸𑀯𑀢𑁄 𑀭𑀲𑀺𑀢𑀩𑁆𑀩𑀢𑁆𑀢𑀸 𑀅𑀯𑀺𑀧𑀭𑀻𑀢𑁄 𑀅𑀢𑁆𑀣𑁄 𑀏𑀯 𑀅𑀢𑁆𑀣𑀭𑀲𑁄.

𑀅𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄𑀢𑀺 𑀯𑀺𑀦𑀺𑀧𑀸𑀢𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀅𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄𑀢𑀺 𑀅𑀲𑀼𑀭𑀓𑀸𑀬𑀫𑀸𑀳.

𑀅𑀧𑁆𑀧𑀁 𑀬𑀸𑀘𑀺𑀢𑁂𑀦 𑀩𑀳𑀼𑀁 𑀤𑁂𑀦𑁆𑀢𑁂𑀦 𑀉𑀴𑀸𑀭𑀧𑀼𑀭𑀺𑀲𑁂𑀦 𑀯𑀺𑀬 𑀏𑀓𑀁 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁂𑀦 ‘‘𑀅𑀬𑀫𑁆𑀧𑀺 𑀏𑀓𑀥𑀫𑁆𑀫𑁄’’𑀢𑀺 𑀓𑀣𑀺𑀢𑀢𑁆𑀢𑀸 𑀏𑀓𑀸𑀤𑀲𑀧𑀺 𑀥𑀫𑁆𑀫𑀸 𑀧𑀼𑀘𑁆𑀙𑀸𑀯𑀲𑁂𑀦 𑀏𑀓𑀥𑀫𑁆𑀫𑁄 𑀦𑀸𑀫 𑀚𑀸𑀢𑁄 𑀧𑀘𑁆𑀘𑁂𑀓𑀁 𑀯𑀸𑀓𑁆𑀬𑀧𑀭𑀺𑀲𑀫𑀸𑀧𑀦𑀜𑀸𑀬𑁂𑀦. 𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂 𑀆𑀦𑀦𑁆𑀤, 𑀢𑁂𑀦…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀓𑀥𑀫𑁆𑀫𑁄 𑀲𑀫𑁆𑀫𑀤𑀓𑁆𑀔𑀸𑀢𑁄’’𑀢𑀺 𑀏𑀯𑀁 ¶ 𑀧𑀯𑀢𑁆𑀢𑀧𑀼𑀘𑁆𑀙𑀸𑀯𑀲𑁂𑀦. 𑀅𑀫𑀢𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑁂𑀦𑀸𑀢𑀺 𑀅𑀫𑀢𑀪𑀸𑀯𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬, 𑀲𑀩𑁆𑀩𑀸𑀦𑀺𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀏𑀓𑀭𑀲𑀸𑀧𑀺 𑀅𑀫𑀢𑀸𑀥𑀺𑀕𑀫𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 ¶ 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀅𑀕𑁆𑀕𑀨𑀮𑀪𑀽𑀫𑀺 𑀅𑀦𑀸𑀕𑀸𑀫𑀺𑀨𑀮𑀪𑀽𑀫𑀻𑀢𑀺 𑀤𑁆𑀯𑁂𑀯 𑀪𑀽𑀫𑀺𑀬𑁄 𑀲𑀭𑀽𑀧𑀢𑁄 𑀆𑀕𑀢𑀸, 𑀦𑀸𑀦𑀦𑁆𑀢𑀭𑀺𑀬𑀢𑀸𑀬 𑀧𑀦 𑀳𑁂𑀝𑁆𑀞𑀺𑀫𑀸𑀧𑀺 𑀤𑁆𑀯𑁂 𑀪𑀽𑀫𑀺𑀬𑁄 𑀅𑀢𑁆𑀣𑀢𑁄 𑀆𑀕𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺. 𑀧𑀜𑁆𑀘 𑀲𑀢𑀸𑀦𑀺 𑀅𑀕𑁆𑀖𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀲𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀕𑁄𑀧𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀢𑀺𑀲𑁆𑀲𑁄 𑀓𑀣𑀸𑀢𑀺 𑀢𑀺𑀲𑁆𑀲𑁄 𑀅𑀝𑁆𑀞𑀓𑀣𑀸, 𑀢𑀺𑀯𑀺𑀥𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄. 𑀏𑀓𑁂𑀓𑀁 𑀧𑀤𑀁 𑀦𑀸𑀴𑀁 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀏𑀯𑀁𑀲𑀜𑁆𑀜𑀺𑀢𑀸 𑀏𑀓𑀦𑀸𑀴𑀺𑀓𑀸. 𑀏𑀓𑁂𑀓𑀁 𑀯𑀸 𑀧𑀤𑀁 𑀦𑀸𑀴𑀁 𑀅𑀢𑁆𑀣𑀦𑀺𑀕𑁆𑀕𑀫𑀦𑀫𑀕𑁆𑀕𑁄 𑀏𑀢𑀺𑀲𑁆𑀲𑀸𑀢𑀺 𑀏𑀓𑀦𑀸𑀴𑀺𑀓𑀸. 𑀢𑁂𑀦𑀸𑀳 ‘‘𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀓𑀣𑀦’’𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀅𑀁𑀲𑀸 𑀪𑀸𑀕𑀸 𑀅𑀢𑁆𑀣𑀲𑀮𑁆𑀮𑀓𑁆𑀔𑀡𑀽𑀧𑀸𑀬𑀸 𑀏𑀢𑀺𑀲𑁆𑀲𑀸𑀢𑀺 𑀘𑀢𑀼𑀭𑀲𑁆𑀲𑀸. 𑀢𑁂𑀦𑀸𑀳 ‘‘𑀘𑀢𑀼𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀓𑀣𑀦’’𑀦𑁆𑀢𑀺. 𑀦𑀺𑀬𑀫𑀢𑁄 𑀦𑀺𑀲𑀺𑀦𑁆𑀦𑀲𑁆𑀲 𑀆𑀭𑀤𑁆𑀥𑀲𑁆𑀲 𑀯𑀢𑁆𑀢𑁄 𑀲𑀁𑀯𑀢𑁆𑀢𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸, 𑀬𑀣𑀸𑀭𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑁄𑀲𑀸𑀧𑀺𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺𑀆𑀤𑀺. 𑀏𑀓𑁂𑀓𑀲𑁆𑀲𑀧𑀺 𑀧𑀤𑀲𑁆𑀲 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀩𑀳𑀽𑀦𑀁 𑀧𑀤𑀸𑀦𑀁 𑀏𑀓𑀚𑁆𑀛𑀁 𑀅𑀢𑁆𑀣𑀁 𑀅𑀓𑀣𑁂𑀢𑁆𑀯𑀸 𑀏𑀓𑀫𑁂𑀓𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀅𑀬𑀁 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺. 𑀘𑀢𑀼𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀓𑀡𑁆𑀳𑀧𑀓𑁆𑀔𑁂 𑀉𑀧𑀫𑁄𑀧𑀫𑁂𑀬𑁆𑀬𑀤𑁆𑀯𑀬𑀁, 𑀢𑀣𑀸 𑀲𑀼𑀓𑁆𑀓𑀧𑀓𑁆𑀔𑁂𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀬𑁄𑀚𑁂𑀢𑁆𑀯𑀸. 𑀅𑀬𑀁 𑀏𑀤𑀺𑀲𑁂𑀲𑀼 𑀏𑀯 𑀲𑀼𑀢𑁆𑀢𑁂𑀲𑀼 𑀮𑀩𑁆𑀪𑀢𑀺. 𑀧𑀭𑀺𑀬𑁄𑀲𑀸𑀦𑀕𑀫𑀦𑀦𑁆𑀢𑀺 𑀓𑁂𑀘𑀺 𑀢𑀸𑀯 𑀆𑀳𑀼 ‘‘𑀓𑀡𑁆𑀳𑀧𑀓𑁆𑀔𑁂 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀫𑀸 𑀘 𑀦𑀸𑀫 𑀬𑀸𑀯𑀤𑁂𑀯 𑀉𑀧𑀫𑁂𑀬𑁆𑀬𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑀦𑀺𑀤𑁆𑀤𑁂𑀲𑁄 𑀘 𑀯𑁄𑀤𑀸𑀦𑀧𑀓𑁆𑀔𑀯𑀺𑀪𑀸𑀯𑀦𑀢𑁆𑀣𑀸𑀬𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑀫𑁆𑀧𑀺 𑀉𑀧𑀫𑁄𑀧𑀫𑁂𑀬𑁆𑀬𑀯𑀺𑀪𑀸𑀕𑁂𑀦 𑀆𑀳𑀭𑀺𑀢𑁆𑀯𑀸 𑀲𑀼𑀢𑁆𑀢𑀢𑁆𑀣𑀲𑁆𑀲 𑀧𑀭𑀺𑀬𑁄𑀲𑀸𑀧𑀦𑀁. 𑀓𑀡𑁆𑀳𑀧𑀓𑁆𑀔𑁂 𑀉𑀧𑀫𑁂𑀬𑁆𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀅𑀧𑀭𑁂 𑀧𑀦 ‘‘𑀓𑀡𑁆𑀳𑀧𑀓𑁆𑀔𑁂, 𑀲𑀼𑀓𑁆𑀓𑀧𑀓𑁆𑀔𑁂 𑀘 𑀢𑀁𑀢𑀁𑀉𑀧𑀫𑀽𑀧𑀫𑁂𑀬𑁆𑀬𑀢𑁆𑀣𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸𑀯 𑀓𑀣𑀦𑀁 𑀧𑀭𑀺𑀬𑁄𑀲𑀸𑀦𑀕𑀫𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀬𑀦𑁆𑀢𑀺 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀕𑁄𑀧𑀸𑀮𑀓𑀲𑀼𑀢𑁆𑀢𑁂. 𑀲𑀩𑁆𑀩𑀸𑀘𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀸𑀢𑀺 𑀲𑀩𑁆𑀩𑁂𑀳𑀺𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀆𑀘𑀭𑀺𑀢𑀸 𑀲𑀁𑀯𑀡𑁆𑀡𑀺𑀢𑀸, 𑀢𑀣𑀸 𑀘𑁂𑀯 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺.

𑀅𑀗𑁆𑀕𑀻𑀬𑀦𑁆𑀢𑀺 ¶ 𑀅𑀯𑀬𑀯𑀪𑀸𑀯𑁂𑀦 𑀜𑀸𑀬𑀦𑁆𑀢𑀻𑀢𑀺 𑀅𑀗𑁆𑀕𑀸𑀦𑀺, 𑀓𑁄𑀝𑁆𑀞𑀸𑀲𑀸. 𑀢𑀸𑀦𑀺 𑀧𑀦𑁂𑀢𑁆𑀣 𑀬𑀲𑁆𑀫𑀸 𑀲𑀸𑀯𑀚𑁆𑀚𑀲𑀪𑀸𑀯𑀸𑀦𑀺, 𑀢𑀲𑁆𑀫𑀸 𑀆𑀳 ‘‘𑀅𑀗𑁆𑀕𑁂𑀳𑀻𑀢𑀺 𑀅𑀕𑀼𑀡𑀓𑁄𑀝𑁆𑀞𑀸𑀲𑁂𑀳𑀻’’𑀢𑀺. 𑀕𑁄𑀫𑀡𑁆𑀟𑀮𑀦𑁆𑀢𑀺 𑀕𑁄𑀲𑀫𑀽𑀳𑀁. 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀭𑀓𑁆𑀔𑀺𑀢𑀼𑀁. 𑀢𑀁 𑀧𑀦 𑀧𑀭𑀺𑀳𑀭𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀡𑀦𑁆𑀢𑀺 𑀆𑀳 ‘‘𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼’’𑀦𑁆𑀢𑀺. 𑀯𑀟𑁆𑀠𑀺𑀦𑁆𑀢𑀺 𑀕𑀼𑀦𑁆𑀦𑀁 𑀩𑀳𑀼𑀪𑀸𑀯𑀁 𑀩𑀳𑀼𑀕𑁄𑀭𑀲𑀢𑀸𑀲𑀗𑁆𑀔𑀸𑀢𑀁 𑀧𑀭𑀺𑀯𑀼𑀤𑁆𑀥𑀺𑀁. ‘‘𑀏𑀢𑁆𑀢𑀓𑀫𑀺𑀤’’𑀦𑁆𑀢𑀺 𑀭𑀽𑀧𑀻𑀬𑀢𑀻𑀢𑀺 ¶ 𑀭𑀽𑀧𑀁, 𑀧𑀭𑀺𑀫𑀸𑀡𑀧𑀭𑀺𑀘𑁆𑀙𑁂𑀤𑁄𑀧𑀺 𑀲𑀭𑀻𑀭𑀭𑀽𑀧𑀫𑁆𑀧𑀻𑀢𑀺 𑀆𑀳 ‘‘𑀕𑀡𑀦𑀢𑁄 𑀯𑀸 𑀯𑀡𑁆𑀡𑀢𑁄 𑀯𑀸’’𑀢𑀺. 𑀦 𑀧𑀭𑀺𑀬𑁂𑀲𑀢𑀺 𑀯𑀺𑀦𑀝𑁆𑀞𑀪𑀸𑀯𑀲𑁆𑀲𑁂𑀯 𑀅𑀚𑀸𑀦𑀦𑀢𑁄. 𑀦𑀻𑀮𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀲𑁂𑀢𑀲𑀩𑀮𑀸𑀤𑀺𑀯𑀡𑁆𑀡𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀥𑀦𑀼𑀲𑀢𑁆𑀢𑀺𑀲𑀽𑀮𑀸𑀤𑀻𑀢𑀺 𑀏𑀢𑁆𑀣 𑀇𑀲𑁆𑀲𑀸𑀲𑀸𑀘𑀭𑀺𑀬𑀸𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀥𑀦𑀼𑀮𑀓𑁆𑀔𑀡𑀁. 𑀓𑀼𑀫𑀸𑀭𑀪𑀢𑁆𑀢𑀺𑀕𑀡𑀸𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀲𑀢𑁆𑀢𑀺𑀮𑀓𑁆𑀔𑀡𑀁. 𑀇𑀲𑁆𑀲𑀭𑀪𑀢𑁆𑀢𑀺𑀕𑀡𑀸𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀲𑀽𑀮𑀮𑀓𑁆𑀔𑀡𑀦𑁆𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀭𑀸𑀫𑀯𑀸𑀲𑀼𑀤𑁂𑀯𑀕𑀡𑀸𑀤𑀻𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀨𑀭𑀲𑀼𑀘𑀓𑁆𑀓𑀸𑀤𑀺𑀮𑀓𑁆𑀔𑀡𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀦𑀻𑀮𑀫𑀓𑁆𑀔𑀺𑀓𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸, 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀏𑀯 𑀯𑀸. 𑀲𑀝𑀢𑀺 𑀭𑀼𑀚𑀢𑀺 𑀏𑀢𑀸𑀬𑀸𑀢𑀺 𑀲𑀸𑀝𑀺𑀓𑀸, 𑀲𑀁𑀯𑀟𑁆𑀠𑀸 𑀲𑀸𑀝𑀺𑀓𑀸 𑀆𑀲𑀸𑀝𑀺𑀓𑀸. 𑀢𑁂𑀦𑀸𑀳 ‘‘𑀯𑀟𑁆𑀠𑀦𑁆𑀢𑀻’’𑀢𑀺𑀆𑀤𑀺. 𑀳𑀸𑀭𑁂𑀢𑀸𑀢𑀺 𑀅𑀧𑀦𑁂𑀢𑀸.

𑀯𑀸𑀓𑁂𑀦𑀸𑀢𑀺 𑀯𑀸𑀓𑀧𑀝𑁆𑀝𑁂𑀦. 𑀘𑀻𑀭𑀓𑁂𑀦𑀸𑀢𑀺 𑀧𑀺𑀮𑁄𑀢𑀺𑀓𑁂𑀦. 𑀅𑀦𑁆𑀢𑁄𑀯𑀲𑁆𑀲𑁂𑀢𑀺 𑀯𑀲𑁆𑀲𑀓𑀸𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀦𑀺𑀕𑁆𑀕𑀸𑀳𑀦𑁆𑀢𑀺 𑀲𑀼𑀲𑀼𑀫𑀸𑀭𑀸𑀤𑀺𑀕𑁆𑀕𑀸𑀳𑀭𑀳𑀺𑀢𑀁. 𑀧𑀻𑀢𑀦𑁆𑀢𑀺 𑀧𑀸𑀦𑀻𑀬𑀲𑁆𑀲 𑀧𑀻𑀢𑀪𑀸𑀯𑀁. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀧𑀭𑀺𑀲𑁆𑀲𑀬𑁂𑀦 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄.

𑀧𑀜𑁆𑀘 𑀅𑀳𑀸𑀦𑀺 𑀏𑀓𑀲𑁆𑀲𑀸𑀢𑀺 𑀧𑀜𑁆𑀘𑀸𑀳𑀺𑀓𑁄, 𑀲𑁄 𑀏𑀯 𑀯𑀸𑀭𑁄𑀢𑀺, 𑀧𑀜𑁆𑀘𑀸𑀳𑀺𑀓𑀯𑀸𑀭𑁄. 𑀏𑀯𑀁 𑀲𑀢𑁆𑀢𑀸𑀳𑀺𑀓𑀯𑀸𑀭𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀡𑁆𑀡𑀝𑁆𑀞𑀸𑀦𑀦𑁆𑀢𑀺 𑀘𑀭𑀺𑀢𑀝𑁆𑀞𑀸𑀦𑀁 𑀕𑁄𑀘𑀭𑀕𑁆𑀕𑀳𑀺𑀢𑀝𑁆𑀞𑀸𑀦𑀁.

𑀧𑀺𑀢𑀺𑀝𑁆𑀞𑀸𑀦𑀦𑁆𑀢𑀺 𑀧𑀺𑀢𑀭𑀸 𑀓𑀸𑀢𑀩𑁆𑀩𑀝𑁆𑀞𑀸𑀦𑀁, 𑀧𑀺𑀢𑀭𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀭𑀼𑀘𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀕𑀼𑀦𑁆𑀦𑀁 𑀭𑀼𑀘𑀺𑀅𑀦𑀼𑀭𑀽𑀧𑀁 𑀕𑁄𑀘𑀭𑀪𑀽𑀫𑀺𑀁 𑀯𑀸 𑀦𑀤𑀺𑀧𑀸𑀭𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀕𑁄𑀪𑀢𑁆𑀢𑀦𑁆𑀢𑀺 𑀓𑀧𑁆𑀧𑀸𑀲𑀝𑁆𑀞𑀺𑀓𑀸𑀤𑀺𑀫𑀺𑀲𑁆𑀲𑀁 𑀕𑁄𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑀢𑁆𑀢𑀁. 𑀪𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀬𑀸𑀕𑀼𑀧𑀺 𑀲𑀗𑁆𑀕𑀳𑀺𑀢𑀸.

𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀯𑀼𑀢𑁆𑀢𑀁 𑀆𑀓𑀸𑀭𑀤𑁆𑀯𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀡𑀦𑀢𑁄 𑀯𑀸 𑀲𑀫𑀼𑀝𑁆𑀞𑀸𑀦𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀸𑀴𑀺𑀬𑀁 𑀆𑀕𑀢𑀸𑀢𑀺 ‘‘𑀉𑀧𑀘𑀬𑁄 𑀲𑀦𑁆𑀢𑀢𑀻’’𑀢𑀺 𑀚𑀸𑀢𑀺𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀳𑀤𑀬𑀯𑀢𑁆𑀣𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 𑀤𑀲𑀸𑀬𑀢𑀦𑀸𑀦𑀺 𑀧𑀜𑁆𑀘𑀤𑀲 ¶ 𑀲𑀼𑀔𑀼𑀫𑀭𑀽𑀧𑀸𑀦𑀻𑀢𑀺 𑀏𑀯𑀁 𑀭𑀽𑀧𑀓𑀡𑁆𑀟𑀧𑀸𑀴𑀺𑀬𑀁 (𑀥. 𑀲. 𑁬𑁬𑁬) 𑀆𑀕𑀢𑀸. 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸𑀢𑀺 𑀲𑀮𑀓𑁆𑀔𑀡𑀢𑁄 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑀢𑁄 𑀭𑀽𑀧𑀪𑀸𑀕𑀸. 𑀭𑀽𑀧𑀓𑁄𑀝𑁆𑀞𑀸𑀲𑀸𑀢𑀺 𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀓𑀮𑀸𑀧𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀭𑀽𑀧𑀓𑀮𑀸𑀧𑀸. 𑀓𑁄𑀝𑁆𑀞𑀸𑀲𑀸𑀢𑀺 𑀘 𑀅𑀁𑀲𑀸 𑀅𑀯𑀬𑀯𑀸𑀢𑀺 𑀅𑀢𑁆𑀣𑁄. 𑀓𑁄𑀝𑁆𑀞𑀦𑁆𑀢𑀺 𑀯𑀸 𑀲𑀭𑀻𑀭𑀁, 𑀢𑀲𑁆𑀲 𑀅𑀁𑀲𑀸 𑀓𑁂𑀲𑀸𑀤𑀬𑁄 𑀓𑁄𑀝𑁆𑀞𑀸𑀲𑀸𑀢𑀺 𑀅𑀜𑁆𑀜𑁂𑀧𑀺 𑀅𑀯𑀬𑀯𑀸 𑀓𑁄𑀝𑁆𑀞𑀸𑀲𑀸 𑀯𑀺𑀬 𑀓𑁄𑀝𑁆𑀞𑀸𑀲𑀸.

𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺 ¶ 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀢𑀢𑁆𑀣 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀭𑀽𑀧𑀁 𑀲𑀮𑀓𑁆𑀔𑀡𑀢𑁄 𑀜𑀸𑀡𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸. 𑀅𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀢𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀆𑀭𑀫𑁆𑀫𑀡𑀜𑁆𑀘 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂 𑀯𑁂𑀤𑀦𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀅𑀭𑀽𑀧𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸. 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀼𑀦 𑀢𑀢𑁆𑀣 𑀬𑀁 𑀭𑀽𑀧𑁆𑀧𑀦𑀮𑀓𑁆𑀔𑀡𑀁, 𑀢𑀁 𑀭𑀽𑀧𑀁. 𑀢𑀤𑀜𑁆𑀜𑀁 𑀅𑀭𑀽𑀧𑀁. 𑀉𑀪𑀬𑀯𑀺𑀦𑀺𑀫𑀼𑀢𑁆𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀏𑀯𑀁 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀢𑀤𑀼𑀪𑀬𑀜𑁆𑀘 𑀅𑀯𑀺𑀚𑁆𑀚𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀲𑀧𑀘𑁆𑀘𑀬𑀦𑁆𑀢𑀺 𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀬𑁄 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀓𑁆𑀓𑀫𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀦 𑀯𑀟𑁆𑀠𑀢𑀻𑀢𑀺 𑀬𑁄𑀚𑀦𑀸.

𑀏𑀢𑁆𑀢𑀓𑀁 𑀭𑀽𑀧𑀁 𑀏𑀓𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀝𑁆𑀞𑀯𑀺𑀥𑀁 𑀓𑀫𑁆𑀫𑀯𑀲𑁂𑀦; 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺 𑀇𑀤𑀁 𑀤𑁆𑀯𑀬𑀁 𑀘𑀺𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀏𑀓𑀲𑀫𑀼𑀝𑁆𑀞𑀸𑀦𑀁. 𑀲𑀤𑁆𑀤𑀸𑀬𑀢𑀦𑀫𑁂𑀓𑀁 𑀉𑀢𑀼𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁. 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀯𑀲𑁂𑀦 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀭𑀽𑀧𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀆𑀓𑀸𑀲𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀓𑀫𑁆𑀫𑀯𑀲𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀁. 𑀉𑀧𑀘𑀬𑁄, 𑀲𑀦𑁆𑀢𑀢𑀺, 𑀚𑀭𑀢𑀸, 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀦 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀦 𑀚𑀸𑀦𑀸𑀢𑀺. 𑀲𑀫𑀼𑀝𑁆𑀞𑀸𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 ‘‘𑀕𑀡𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀮𑀓𑁆𑀔𑀡𑁄𑀢𑀺 𑀅𑀢𑁆𑀢𑀦𑀸 𑀓𑀢𑀁 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑁄, 𑀩𑀸𑀮𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀳𑁄𑀢𑀺, 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻, 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 ¶ . 𑀇𑀫𑀸𑀦𑀺 𑀔𑁄…𑀧𑁂… 𑀮𑀓𑁆𑀔𑀡𑀸𑀦𑀻’’𑀢𑀺 (𑀫. 𑀦𑀺. 𑁩.𑁨𑁪𑁬; 𑀅. 𑀦𑀺. 𑁩.𑁩). 𑀅𑀢𑁆𑀢𑀦𑀸 𑀓𑀢𑀁 𑀲𑀼𑀘𑀭𑀺𑀢𑀓𑀫𑁆𑀫𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑁄, 𑀧𑀡𑁆𑀟𑀺𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀳𑁄𑀢𑀺, 𑀲𑀼𑀪𑀸𑀲𑀺𑀢𑀪𑀸𑀲𑀻, 𑀲𑀼𑀓𑀢𑀓𑀫𑁆𑀫𑀓𑀸𑀭𑀻. 𑀇𑀫𑀸𑀦𑀺 𑀔𑁄…𑀧𑁂… 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀻’’𑀢𑀺 (𑀫. 𑀦𑀺. 𑁩.𑁨𑁫𑁩; 𑀅. 𑀦𑀺. 𑁩.𑁩). 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀧𑀡𑁆𑀟𑀺𑀢𑀩𑀸𑀮𑀮𑀓𑁆𑀔𑀡’’𑀦𑁆𑀢𑀺.

𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀦 𑀲𑁂𑀯𑀢𑀻𑀢𑀺 𑀬𑀁 𑀩𑀸𑀮𑀧𑀼𑀕𑁆𑀕𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑀲𑁂𑀯𑀦𑀁 𑀅𑀢𑁆𑀣𑀓𑀸𑀫𑁂𑀦 𑀓𑀸𑀢𑀩𑁆𑀩𑀁, 𑀢𑀁 𑀦 𑀓𑀭𑁄𑀢𑀺. 𑀢𑀣𑀸𑀪𑀽𑀢𑀲𑁆𑀲 𑀘 𑀅𑀬𑀫𑀸𑀤𑀻𑀦𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀪𑀕𑀯𑀢𑀸 ‘‘𑀇𑀤𑀁 𑀯𑁄 𑀓𑀧𑁆𑀧𑀢𑀻’’𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑀤𑀦𑀼𑀮𑁄𑀫𑀜𑁆𑀘𑁂, 𑀢𑀁 ¶ 𑀓𑀧𑁆𑀧𑀺𑀬𑀁. 𑀬𑀁 ‘‘𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀤𑀦𑀼𑀮𑁄𑀫𑀜𑁆𑀘𑁂, 𑀢𑀁 𑀅𑀓𑀧𑁆𑀧𑀺𑀬𑀁. 𑀬𑀁 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀁, 𑀢𑀁 𑀓𑀼𑀲𑀮𑀁, 𑀢𑀧𑁆𑀧𑀝𑀺𑀧𑀓𑁆𑀔𑀁 𑀅𑀓𑀼𑀲𑀮𑀁. 𑀢𑀤𑁂𑀯 𑀲𑀸𑀯𑀚𑁆𑀚𑀁, 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁. 𑀆𑀧𑀢𑁆𑀢𑀺𑀢𑁄 𑀆𑀤𑀺𑀢𑁄 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀕𑀭𑀼𑀓𑀁, 𑀢𑀤𑀜𑁆𑀜𑀁 𑀮𑀳𑀼𑀓𑀁. 𑀥𑀫𑁆𑀫𑀢𑁄 𑀫𑀳𑀸𑀲𑀸𑀯𑀚𑁆𑀚𑀁 𑀕𑀭𑀼𑀓𑀁, 𑀅𑀧𑁆𑀧𑀲𑀸𑀯𑀚𑁆𑀚𑀁 𑀮𑀳𑀼𑀓𑀁. 𑀲𑀧𑁆𑀧𑀝𑀺𑀓𑀸𑀭𑀁 𑀲𑀢𑁂𑀓𑀺𑀘𑁆𑀙𑀁, 𑀅𑀧𑁆𑀧𑀝𑀺𑀓𑀸𑀭𑀁 𑀅𑀢𑁂𑀓𑀺𑀘𑁆𑀙𑀁. 𑀥𑀫𑁆𑀫𑀢𑀸𑀦𑀼𑀕𑀢𑀁 𑀓𑀸𑀭𑀡𑀁, 𑀇𑀢𑀭𑀁 𑀅𑀓𑀸𑀭𑀡𑀁. 𑀢𑀁 𑀅𑀚𑀸𑀦𑀦𑁆𑀢𑁄𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁, 𑀕𑀭𑀼𑀓-𑀮𑀳𑀼𑀓𑀁, 𑀲𑀢𑁂𑀓𑀺𑀘𑁆𑀙𑀸𑀢𑁂𑀓𑀺𑀘𑁆𑀙𑀁 𑀅𑀚𑀸𑀦𑀦𑁆𑀢𑁄 𑀲𑀼𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀼𑀲𑀮𑀸𑀓𑀼𑀲𑀮𑀁, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁, 𑀓𑀸𑀭𑀡𑀸𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 𑀔𑀦𑁆𑀥𑀸𑀤𑀻𑀲𑀼 𑀅𑀓𑀼𑀲𑀮𑀢𑀸𑀬 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀼𑀢𑁄 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑀦𑀸. 𑀢𑁂𑀦𑀸𑀳 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺.

𑀕𑁄𑀯𑀡𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀆𑀲𑀸𑀝𑀺𑀓𑀸 𑀯𑀺𑀬𑀸𑀢𑀺 𑀆𑀲𑀸𑀝𑀺𑀓𑀸𑀢𑀺 𑀆𑀳 ‘‘𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀆𑀲𑀸𑀝𑀺𑀓𑀁 𑀅𑀳𑀸𑀭𑁂𑀢𑁆𑀯𑀸’’𑀢𑀺.

‘‘𑀕𑀡𑁆𑀟𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁦𑁩; 𑀅. 𑀦𑀺. 𑁮.𑁫𑁬; 𑁯.𑁧𑁫) 𑀯𑀘𑀦𑀢𑁄 𑀙𑀳𑀺 𑀯𑀡𑀫𑀼𑀔𑁂𑀳𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀬𑀽𑀲𑁄 𑀕𑀡𑁆𑀟𑁄 𑀯𑀺𑀬 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑁂𑀦 𑀙𑀤𑁆𑀯𑀸𑀭𑁂𑀳𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀓𑀺𑀮𑁂𑀲𑀸𑀲𑀼𑀘𑀺 𑀅𑀢𑁆𑀢𑀪𑀸𑀯𑀯𑀡𑁄 𑀲𑀢𑀺𑀲𑀁𑀯𑀭𑁂𑀦 𑀧𑀺𑀤𑀳𑀺𑀢𑀩𑁆𑀩𑁄, 𑀅𑀬𑀁 𑀧𑀦 𑀏𑀯𑀁 𑀦 𑀓𑀭𑁄𑀢𑀻𑀢𑀺 𑀆𑀳 ‘‘𑀬𑀣𑀸 𑀲𑁄 𑀕𑁄𑀧𑀸𑀮𑀓𑁄 𑀯𑀡𑀁 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀁 𑀲𑀁𑀯𑀭𑀁 𑀦 𑀲𑀫𑁆𑀧𑀸𑀤𑁂𑀢𑀻’’𑀢𑀺.

𑀬𑀣𑀸 ¶ 𑀥𑀽𑀫𑁄 𑀇𑀦𑁆𑀥𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄, 𑀢𑀁 𑀢𑀁 𑀯𑀺𑀯𑀭𑀁 𑀅𑀦𑀼𑀧𑀯𑀺𑀲𑁆𑀲 𑀩𑁆𑀬𑀸𑀧𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀟𑀁𑀲𑀫𑀓𑀲𑀸𑀤𑀺𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀺, 𑀅𑀕𑁆𑀕𑀺𑀚𑀸𑀮𑀸𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺, 𑀏𑀯𑀁 𑀥𑀫𑁆𑀫𑀤𑁂𑀲𑀦𑀸𑀜𑀸𑀡𑀲𑁆𑀲 𑀇𑀦𑁆𑀥𑀦𑀪𑀽𑀢𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀚𑀸𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀡𑁆𑀳𑀸 𑀲𑀼𑀔𑀼𑀫𑀸 𑀢𑀁 𑀢𑀁 𑀔𑀦𑁆𑀥𑀦𑁆𑀢𑀭𑀁 𑀆𑀬𑀢𑀦𑀦𑁆𑀢𑀭𑀜𑁆𑀘 𑀅𑀦𑀼𑀧𑀯𑀺𑀲𑁆𑀲 𑀩𑁆𑀬𑀸𑀧𑁂𑀢𑀺, 𑀲𑀢𑁆𑀢𑀸𑀦𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀤𑀺𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀺, 𑀜𑀸𑀡𑀕𑁆𑀕𑀺𑀚𑀸𑀮𑀸𑀲𑀫𑀼𑀝𑁆𑀞𑀸𑀧𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺, 𑀢𑀲𑁆𑀫𑀸 𑀥𑀽𑀫𑁄 𑀯𑀺𑀬𑀸𑀢𑀺 𑀥𑀽𑀫𑁄𑀢𑀺 𑀆𑀳 ‘‘𑀕𑁄𑀧𑀸𑀮𑀓𑁄 𑀥𑀽𑀫𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀥𑀽𑀫𑀁 𑀦 𑀓𑀭𑁄𑀢𑀻’’𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀢𑀩𑁆𑀩𑀸 𑀢𑀤𑀦𑀼𑀘𑁆𑀙𑀯𑀺𑀓𑀸 𑀥𑀫𑁆𑀫𑀓𑀣𑀸 𑀉𑀧𑀦𑀺𑀲𑀺𑀦𑁆𑀦𑀓𑀓𑀣𑀸. 𑀓𑀢𑀲𑁆𑀲 𑀤𑀸𑀦𑀸𑀤𑀺𑀧𑀼𑀜𑁆𑀜𑀲𑁆𑀲 𑀅𑀦𑀼𑀫𑁄𑀤𑀦𑀓𑀣𑀸 𑀅𑀦𑀼𑀫𑁄𑀤𑀦𑀸. 𑀢𑀢𑁄𑀢𑀺 𑀥𑀫𑁆𑀫𑀓𑀣𑀸𑀤𑀻𑀦𑀁 𑀅𑀓𑀭𑀡𑀢𑁄. ‘‘𑀩𑀳𑀼𑀲𑁆𑀲𑀼𑀢𑁄 𑀕𑀼𑀡𑀯𑀸𑀢𑀺 𑀦 𑀚𑀸𑀦𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀅𑀢𑁆𑀢𑀦𑁄 𑀚𑀸𑀦𑀸𑀧𑀦𑀢𑁆𑀣𑀁 𑀥𑀫𑁆𑀫𑀓𑀣𑀸𑀤𑀺 𑀦 𑀓𑀸𑀢𑀩𑁆𑀩𑀫𑁂𑀯𑀸𑀢𑀺? 𑀲𑀘𑁆𑀘𑀁 𑀦 𑀓𑀸𑀢𑀩𑁆𑀩𑀫𑁂𑀯, 𑀲𑀼𑀤𑁆𑀥𑀸𑀲𑀬𑁂𑀦 𑀧𑀦 𑀥𑀫𑁆𑀫𑁂 𑀓𑀣𑀺𑀢𑁂 𑀢𑀲𑁆𑀲 𑀕𑀼𑀡𑀚𑀸𑀦𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀪𑀸𑀲𑀫𑀸𑀦𑀁 ¶ 𑀚𑀸𑀦𑀦𑁆𑀢𑀺, 𑀫𑀺𑀲𑁆𑀲𑀁 𑀩𑀸𑀮𑁂𑀳𑀺 𑀧𑀡𑁆𑀟𑀺𑀢𑀁;

𑀪𑀸𑀲𑀬𑁂 𑀚𑁄𑀢𑀬𑁂 𑀥𑀫𑁆𑀫𑀁, 𑀧𑀕𑁆𑀕𑀡𑁆𑀳𑁂 𑀇𑀲𑀺𑀦𑀁 𑀥𑀚’’𑀦𑁆𑀢𑀺.

𑀢𑀭𑀦𑁆𑀢𑀺 𑀑𑀢𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀺𑀢𑁆𑀣𑀁, 𑀦𑀤𑀺𑀢𑀴𑀸𑀓𑀸𑀤𑀻𑀦𑀁 𑀦𑀳𑀸𑀦𑀧𑀸𑀦𑀸𑀤𑀺𑀅𑀢𑁆𑀣𑀁 𑀑𑀢𑀭𑀡𑀝𑁆𑀞𑀸𑀦𑀁. 𑀬𑀣𑀸 𑀧𑀦 𑀢𑀁 𑀉𑀤𑀓𑁂𑀦 𑀑𑀢𑀺𑀡𑁆𑀡𑀲𑀢𑁆𑀢𑀸𑀦𑀁 𑀲𑀭𑀻𑀭𑀫𑀮𑀁 𑀧𑀯𑀸𑀳𑁂𑀢𑀺, 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀺, 𑀯𑀺𑀲𑀼𑀤𑁆𑀥𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀑𑀢𑀺𑀡𑁆𑀡𑀲𑀢𑁆𑀢𑀸𑀦𑀁 𑀥𑀫𑁆𑀫𑁄𑀤𑀓𑁂𑀦 𑀘𑀺𑀢𑁆𑀢𑀫𑀮𑀁 𑀧𑀯𑀸𑀳𑁂𑀦𑁆𑀢𑀺, 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀯𑀺𑀲𑀼𑀤𑁆𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀢𑀺𑀢𑁆𑀣𑀁 𑀯𑀺𑀬𑀸𑀢𑀺 𑀢𑀺𑀢𑁆𑀣𑀁. 𑀢𑁂𑀦𑀸𑀳 ‘‘𑀢𑀺𑀢𑁆𑀣𑀪𑀽𑀢𑁂 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽’’𑀢𑀺. 𑀩𑁆𑀬𑀜𑁆𑀚𑀦𑀁 𑀓𑀣𑀁 𑀭𑁄𑀧𑁂𑀢𑀩𑁆𑀩𑀦𑁆𑀢𑀺, 𑀪𑀦𑁆𑀢𑁂, 𑀇𑀤𑀁 𑀩𑁆𑀬𑀜𑁆𑀚𑀦𑀁 𑀅𑀬𑀁 𑀲𑀤𑁆𑀤𑁄 𑀓𑀣𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀭𑁄𑀧𑁂𑀢𑀩𑁆𑀩𑁄, 𑀓𑁂𑀦 𑀧𑀓𑀸𑀭𑁂𑀦 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀚𑀸𑀢𑁄. ‘‘𑀦𑀺𑀭𑀽𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀸 𑀧𑀸𑀞𑁄, 𑀦𑀺𑀭𑀽𑀧𑁂𑀢𑀩𑁆𑀩𑀁 𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀓𑀣𑀫𑁂𑀢𑁆𑀣 𑀦𑀺𑀭𑀽𑀴𑁆𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀲𑀤𑁆𑀤𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀇𑀫𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂. 𑀧𑀸𑀴𑀺 𑀓𑀺𑀁 𑀯𑀤𑀢𑀻𑀢𑀺 𑀪𑀸𑀯𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀅𑀢𑁆𑀣𑁄 𑀓𑀺𑀁 𑀤𑀻𑀧𑁂𑀢𑀻𑀢𑀺 𑀪𑀸𑀯𑀢𑁆𑀣𑀁 𑀯𑀸? 𑀲𑀗𑁆𑀓𑁂𑀢𑀢𑁆𑀣𑀁 𑀯𑀸. 𑀦 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀧𑀼𑀘𑁆𑀙𑀸𑀯𑀲𑁂𑀦 𑀲𑀩𑁆𑀩𑀲𑁄 𑀧𑀼𑀘𑁆𑀙𑀁 𑀦 𑀓𑀭𑁄𑀢𑀺. 𑀦 𑀧𑀭𑀺𑀧𑀜𑁆𑀳𑀢𑀻𑀢𑀺 𑀧𑀭𑀺 𑀧𑀭𑀺 𑀅𑀢𑁆𑀢𑀦𑁄 𑀜𑀸𑀢𑀼𑀁 𑀇𑀘𑁆𑀙𑀁 𑀦 𑀆𑀘𑀺𑀓𑁆𑀔𑀢𑀺, 𑀦 𑀯𑀺𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀦 𑀚𑀸𑀦𑀸𑀧𑁂𑀢𑀻’’𑀢𑀺. 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽. 𑀯𑀺𑀯𑀭𑀡𑀁 𑀦𑀸𑀫 𑀅𑀢𑁆𑀣𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 ¶ 𑀓𑀣𑀦𑀦𑁆𑀢𑀺 𑀆𑀳 ‘‘𑀪𑀸𑀚𑁂𑀢𑁆𑀯𑀸 𑀦 𑀤𑁂𑀲𑁂𑀦𑁆𑀢𑀻’’𑀢𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀁 𑀕𑀼𑀬𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀦 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀦𑁂𑀭𑀼𑀧𑀸𑀤𑀫𑀽𑀮𑁂 𑀯𑀸𑀮𑀺𑀓𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬 𑀧𑀣𑀯𑀻𑀲𑀦𑁆𑀥𑀸𑀭𑁄𑀤𑀓𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀘 𑀉𑀢𑁆𑀢𑀸𑀦𑀁 𑀦 𑀓𑀭𑁄𑀦𑁆𑀢𑀺.

𑀏𑀯𑀁 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀸 ‘‘𑀢𑀺𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑀢𑁄. 𑀇𑀤𑀸𑀦𑀺 𑀢𑀫𑁂𑀯 𑀥𑀫𑁆𑀫𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ‘‘𑀢𑀺𑀢𑁆𑀣’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁄 𑀳𑀺 𑀢𑀭𑀦𑁆𑀢𑀺 𑀑𑀢𑀭𑀦𑁆𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀢𑀴𑀸𑀓𑀦𑁆𑀢𑀺 ‘‘𑀢𑀺𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑀲𑀼𑀫𑁂𑀥𑀪𑀽𑀢𑁄 𑁋

‘‘𑀏𑀯𑀁 𑀓𑀺𑀮𑁂𑀲𑀫𑀮𑀥𑁄𑀯𑀁, 𑀯𑀺𑀚𑁆𑀚𑀦𑁆𑀢𑁂 𑀅𑀫𑀢𑀦𑁆𑀢𑀴𑁂;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀅𑀫𑀢𑀦𑁆𑀢𑀴𑁂’’𑀢𑀺. (𑀩𑀼. 𑀯𑀁. 𑁨.𑁧𑁪) 𑁋

𑀥𑀫𑁆𑀫𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀲𑁆𑀲𑁄𑀢𑀭𑀡𑀢𑀺𑀢𑁆𑀣𑀪𑀽𑀢𑀲𑁆𑀲 𑀑𑀢𑀭𑀡𑀸𑀓𑀸𑀭𑀁 𑀅𑀚𑀸𑀦𑀦𑁆𑀢𑁄 ‘‘𑀥𑀫𑁆𑀫𑀢𑀺𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑁄.

𑀧𑀻𑀢𑀸𑀧𑀻𑀢𑀦𑁆𑀢𑀺 ¶ 𑀕𑁄𑀕𑀡𑁂 𑀧𑀻𑀢𑀁 𑀅𑀧𑀻𑀢𑀜𑁆𑀘 𑀕𑁄𑀭𑀽𑀧𑀁 𑀦 𑀚𑀸𑀦𑀸𑀢𑀺, 𑀦 𑀯𑀺𑀦𑁆𑀤𑀢𑀺. 𑀅𑀯𑀺𑀦𑁆𑀤𑀦𑁆𑀢𑁄 𑀳𑀺 ‘‘𑀦 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑁄. ‘‘𑀆𑀦𑀺𑀲𑀁𑀲𑀁 𑀦 𑀯𑀺𑀦𑁆𑀤𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀯𑀺𑀦𑁆𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀅𑀬𑀁 𑀮𑁄𑀓𑀼𑀢𑁆𑀢𑀭𑁄𑀢𑀺 𑀧𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀭𑀺𑀬’’𑀦𑁆𑀢𑀺. 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀧𑁆𑀧𑀝𑀺𑀲𑁂𑀥𑁄 𑀯𑀸. 𑀅𑀭𑀺𑀬𑀲𑀤𑁆𑀤𑁄 𑀯𑀸 𑀦𑀺𑀤𑁆𑀤𑁄𑀲𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀗𑁆𑀕𑀺𑀓𑀦𑁆𑀢𑀺 𑀘 𑀯𑀺𑀲𑀼𑀁 𑀏𑀓𑀚𑁆𑀛𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀉𑀧𑀸𑀤𑀸𑀬 𑀕𑀳𑁂𑀢𑀩𑁆𑀩𑀁, 𑀅𑀝𑁆𑀞𑀗𑁆𑀕𑀢𑀸 𑀩𑀸𑀳𑀼𑀮𑁆𑀮𑀢𑁄 𑀘. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀢𑁆𑀢𑀗𑁆𑀕𑀲𑁆𑀲𑀧𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺.

𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂𑀢𑀺𑀆𑀤𑀻𑀲𑀼 𑀅𑀯𑀺𑀲𑁂𑀲𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀭𑀫𑁆𑀫𑀡𑀸 𑀲𑀢𑀺𑀧𑀝𑁆𑀞𑀸𑀦𑀸 𑀮𑁄𑀓𑀺𑀬𑀸, 𑀢𑀢𑁆𑀣 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 ‘‘𑀇𑀫𑁂 𑀮𑁄𑀓𑀺𑀬𑀸, 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

𑀅𑀦𑀯𑀲𑁂𑀲𑀁 𑀤𑀼𑀳𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀓𑀺𑀲𑁆𑀫𑀺𑀜𑁆𑀘𑀺 𑀤𑀸𑀬𑀓𑁂 𑀲𑀤𑁆𑀥𑀸𑀳𑀸𑀦𑀺𑀬𑀸, 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑀬𑀳𑀸𑀦𑀺𑀬𑀸 𑀅𑀦𑀯𑀲𑁂𑀲𑀁 𑀤𑀼𑀳𑀢𑀺. 𑀯𑀸𑀘𑀸𑀬 𑀅𑀪𑀺𑀳𑀸𑀭𑁄 𑀯𑀸𑀘𑀸𑀪𑀺𑀳𑀸𑀭𑁄. 𑀧𑀘𑁆𑀘𑀬𑀸𑀦𑀁 𑀅𑀪𑀺𑀳𑀸𑀭𑁄 𑀧𑀘𑁆𑀘𑀬𑀸𑀪𑀺𑀳𑀸𑀭𑁄.

‘‘𑀇𑀫𑁂 ¶ 𑀅𑀫𑁆𑀳𑁂𑀲𑀼 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀦𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀧𑀺𑀢𑀼𑀧𑁂𑀫𑀲𑁆𑀲 𑀅𑀦𑀼𑀧𑀝𑁆𑀞𑀸𑀧𑀦𑀢𑁄, 𑀢𑁂𑀦 𑀘 𑀲𑀺𑀓𑁆𑀔𑀸𑀕𑀸𑀭𑀯𑀢𑀸𑀪𑀸𑀯𑀤𑀻𑀧𑀦𑁂𑀦 𑀲𑀗𑁆𑀕𑀳𑀲𑁆𑀲 𑀅𑀪𑀸𑀚𑀦𑀪𑀸𑀯𑀁, 𑀢𑁂𑀦 𑀣𑁂𑀭𑀸𑀦𑀁 𑀢𑁂𑀲𑀼 𑀅𑀦𑀼𑀕𑁆𑀕𑀳𑀸𑀪𑀸𑀯𑀁. 𑀦 𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸 𑀅𑀦𑀦𑀼𑀕𑁆𑀕𑀳𑁂𑀢𑀩𑁆𑀩𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺, 𑀦𑀺𑀭𑀢𑁆𑀣𑀓𑀁 𑀯𑀸 𑀅𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀯𑀓𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀥𑀫𑁆𑀫𑀓𑀣𑀸𑀩𑀦𑁆𑀥𑀦𑁆𑀢𑀺 𑀧𑀯𑁂𑀡𑀺𑀆𑀕𑀢𑀁 𑀧𑀓𑀺𑀡𑁆𑀡𑀓𑀥𑀫𑁆𑀫𑀓𑀣𑀸𑀫𑀕𑁆𑀕𑀁. 𑀲𑀘𑁆𑀘𑀲𑀢𑁆𑀢𑀧𑁆𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀬𑀸𑀓𑀸𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀜𑁆𑀜𑀢𑀸𑀤𑀻𑀧𑀦𑀁 𑀕𑀼𑀴𑁆𑀳𑀕𑀦𑁆𑀣𑀁. 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑀸𑀢𑀺 ‘‘𑀦 𑀭𑀽�