📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀩𑀼𑀤𑁆𑀥𑀁 ¶ ¶ ¶ 𑀲𑀭𑀡𑀁 𑀕𑀘𑁆𑀙𑀸𑀫𑀺;

𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺;

𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺.

𑀅𑀬𑀁 𑀲𑀭𑀡𑀕𑀫𑀦𑀦𑀺𑀤𑁆𑀤𑁂𑀲𑁄 𑀔𑀼𑀤𑁆𑀤𑀓𑀸𑀦𑀁 𑀆𑀤𑀺.

𑀇𑀫𑀲𑁆𑀲 𑀤𑀸𑀦𑀺 𑀅𑀢𑁆𑀣𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀝𑁆𑀞𑀓𑀣𑀸𑀬 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁 𑀇𑀤𑀁 𑀯𑀼𑀘𑁆𑀘𑀢𑀺 𑁋

𑀉𑀢𑁆𑀢𑀫𑀁 ¶ 𑀯𑀦𑁆𑀤𑀦𑁂𑀬𑁆𑀬𑀸𑀦𑀁, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁;

𑀔𑀼𑀤𑁆𑀤𑀓𑀸𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀓𑁂𑀲𑀜𑁆𑀘𑀺 𑀅𑀢𑁆𑀣𑀯𑀡𑁆𑀡𑀦𑀁.

𑀔𑀼𑀤𑁆𑀤𑀓𑀸𑀦𑀁 𑀕𑀫𑁆𑀪𑀻𑀭𑀢𑁆𑀢𑀸, 𑀓𑀺𑀜𑁆𑀘𑀸𑀧𑀺 𑀅𑀢𑀺𑀤𑀼𑀓𑁆𑀓𑀭𑀸;

𑀯𑀡𑁆𑀡𑀦𑀸 𑀫𑀸𑀤𑀺𑀲𑁂𑀦𑁂𑀲𑀸, 𑀅𑀩𑁄𑀥𑀦𑁆𑀢𑁂𑀦 𑀲𑀸𑀲𑀦𑀁.

𑀅𑀚𑁆𑀚𑀸𑀧𑀺 𑀢𑀼 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁄, 𑀧𑀼𑀩𑁆𑀩𑀸𑀘𑀭𑀺𑀬𑀦𑀺𑀘𑁆𑀙𑀬𑁄;

𑀢𑀣𑁂𑀯 𑀘 𑀞𑀺𑀢𑀁 𑀬𑀲𑁆𑀫𑀸, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁.

𑀢𑀲𑁆𑀫𑀸𑀳𑀁 𑀓𑀸𑀢𑀼𑀫𑀺𑀘𑁆𑀙𑀸𑀫𑀺, 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀇𑀫𑀁;

𑀲𑀸𑀲𑀦𑀜𑁆𑀘𑁂𑀯 𑀦𑀺𑀲𑁆𑀲𑀸𑀬, 𑀧𑁄𑀭𑀸𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀁.

𑀲𑀤𑁆𑀥𑀫𑁆𑀫𑀩𑀳𑀼𑀫𑀸𑀦𑁂𑀦, 𑀦𑀸𑀢𑁆𑀢𑀼𑀓𑁆𑀓𑀁𑀲𑀦𑀓𑀫𑁆𑀬𑀢𑀸;

𑀦𑀸𑀜𑁆𑀜𑁂𑀲𑀁 𑀯𑀫𑁆𑀪𑀦𑀢𑁆𑀣𑀸𑀬, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑀔𑀼𑀤𑁆𑀤𑀓𑀯𑀯𑀢𑁆𑀣𑀸𑀦𑀁

𑀢𑀢𑁆𑀣 ¶ ‘‘𑀔𑀼𑀤𑁆𑀤𑀓𑀸𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀓𑁂𑀲𑀜𑁆𑀘𑀺 𑀅𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀔𑀼𑀤𑁆𑀤𑀓𑀸𑀦𑀺 𑀢𑀸𑀯 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀔𑀼𑀤𑁆𑀤𑀓𑀸𑀦𑀺 𑀦𑀸𑀫 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑁆𑀲 𑀏𑀓𑀤𑁂𑀲𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀦𑀺𑀓𑀸𑀬𑀸𑀦𑀁 𑀏𑀓𑀤𑁂𑀲𑁄. 𑀧𑀜𑁆𑀘 𑀦𑀺𑀓𑀸𑀬𑀸 𑀦𑀸𑀫 𑁋

𑀤𑀻𑀖𑀫𑀚𑁆𑀛𑀺𑀫𑀲𑀁𑀬𑀼𑀢𑁆𑀢, 𑀅𑀗𑁆𑀕𑀼𑀢𑁆𑀢𑀭𑀺𑀓𑀔𑀼𑀤𑁆𑀤𑀓𑀸;

𑀦𑀺𑀓𑀸𑀬𑀸 𑀧𑀜𑁆𑀘 𑀕𑀫𑁆𑀪𑀻𑀭𑀸, 𑀥𑀫𑁆𑀫𑀢𑁄 𑀅𑀢𑁆𑀣𑀢𑁄 𑀘𑀺𑀫𑁂.

𑀢𑀢𑁆𑀣 ¶ 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀸𑀤𑀻𑀦𑀺 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀤𑀻𑀖𑀦𑀺𑀓𑀸𑀬𑁄. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀻𑀦𑀺 𑀤𑀺𑀬𑀟𑁆𑀠𑀲𑀢𑀁 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑁄. 𑀑𑀖𑀢𑀭𑀡𑀲𑀼𑀢𑁆𑀢𑀸𑀤𑀻𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀲𑀼𑀢𑁆𑀢𑀲𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀘 𑀲𑀼𑀢𑁆𑀢𑀸𑀦𑀺 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄. 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀸𑀤𑀻𑀦𑀺 𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀧𑀜𑁆𑀘 𑀘 𑀲𑀼𑀢𑁆𑀢𑀲𑀢𑀸𑀦𑀺 𑀲𑀢𑁆𑀢𑀧𑀜𑁆𑀜𑀸𑀲𑀜𑁆𑀘 𑀲𑀼𑀢𑁆𑀢𑀸𑀦𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄. 𑀔𑀼𑀤𑁆𑀤𑀓𑀧𑀸𑀞𑁄, 𑀥𑀫𑁆𑀫𑀧𑀤𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀲𑀼𑀢𑁆𑀢𑀦𑀺𑀧𑀸𑀢𑁄, 𑀯𑀺𑀫𑀸𑀦𑀯𑀢𑁆𑀣𑀼, 𑀧𑁂𑀢𑀯𑀢𑁆𑀣𑀼, 𑀣𑁂𑀭𑀕𑀸𑀣𑀸, 𑀣𑁂𑀭𑀻𑀕𑀸𑀣𑀸, 𑀚𑀸𑀢𑀓𑀁, 𑀦𑀺𑀤𑁆𑀤𑁂𑀲𑁄, 𑀧𑀝𑀺𑀲𑀫𑁆𑀪𑀺𑀤𑀸 ¶ , 𑀅𑀧𑀤𑀸𑀦𑀁, 𑀩𑀼𑀤𑁆𑀥𑀯𑀁𑀲𑁄, 𑀘𑀭𑀺𑀬𑀸𑀧𑀺𑀝𑀓𑀁, 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀺, 𑀞𑀧𑁂𑀢𑁆𑀯𑀸 𑀯𑀸 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑁄.

𑀓𑀲𑁆𑀫𑀸 𑀧𑀦𑁂𑀲 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺? 𑀩𑀳𑀽𑀦𑀁 𑀔𑀼𑀤𑁆𑀤𑀓𑀸𑀦𑀁 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀲𑀫𑀽𑀳𑀢𑁄 𑀦𑀺𑀯𑀸𑀲𑀢𑁄 𑀘. 𑀲𑀫𑀽𑀳𑀦𑀺𑀯𑀸𑀲𑀸 𑀳𑀺 ‘‘𑀦𑀺𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 (𑀲𑀁. 𑀦𑀺. 𑁩.𑁧𑁦𑁦). 𑀧𑁄𑀡𑀺𑀓𑀦𑀺𑀓𑀸𑀬𑁄, 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄’’𑀢𑀺 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺 𑀲𑀸𑀲𑀦𑀢𑁄 𑀮𑁄𑀓𑀢𑁄 𑀘. 𑀅𑀬𑀫𑀲𑁆𑀲 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑁆𑀲 𑀏𑀓𑀤𑁂𑀲𑁄. 𑀇𑀫𑀸𑀦𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀅𑀢𑁆𑀣𑀢𑁄 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀜𑁆𑀘 𑀅𑀥𑀺𑀧𑁆𑀧𑁂𑀢𑀸𑀦𑀺 𑀔𑀼𑀤𑁆𑀤𑀓𑀸𑀦𑀺, 𑀢𑁂𑀲𑀫𑁆𑀧𑀺 𑀔𑀼𑀤𑁆𑀤𑀓𑀸𑀦𑀁 𑀲𑀭𑀡𑀲𑀺𑀓𑁆𑀔𑀸𑀧𑀤𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀼𑀫𑀸𑀭𑀧𑀜𑁆𑀳𑀫𑀗𑁆𑀕𑀮𑀲𑀼𑀢𑁆𑀢- 𑀭𑀢𑀦𑀲𑀼𑀢𑁆𑀢𑀢𑀺𑀭𑁄𑀓𑀼𑀝𑁆𑀝𑀦𑀺𑀥𑀺𑀓𑀡𑁆𑀟𑀫𑁂𑀢𑁆𑀢𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀦𑀯𑀧𑁆𑀧𑀪𑁂𑀤𑁄 𑀔𑀼𑀤𑁆𑀤𑀓𑀧𑀸𑀞𑁄 𑀆𑀤𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀯𑀲𑁂𑀦 𑀦 𑀪𑀕𑀯𑀢𑀸 𑀯𑀼𑀢𑁆𑀢𑀯𑀲𑁂𑀦. 𑀪𑀕𑀯𑀢𑀸 𑀳𑀺 𑀯𑀼𑀢𑁆𑀢𑀯𑀲𑁂𑀦 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 ¶ ¶ 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪) 𑁋

𑀇𑀤𑀁 𑀕𑀸𑀣𑀸𑀤𑁆𑀯𑀬𑀁 𑀲𑀩𑁆𑀩𑀲𑁆𑀲𑀸𑀧𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀆𑀤𑀺. 𑀢𑀜𑁆𑀘 𑀫𑀦𑀲𑀸𑀯 𑀯𑀼𑀢𑁆𑀢𑀯𑀲𑁂𑀦, 𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀼𑀢𑁆𑀢𑀯𑀲𑁂𑀦. 𑀯𑀘𑀻𑀪𑁂𑀤𑀁 𑀧𑀦 𑀓𑀢𑁆𑀯𑀸 𑀯𑀼𑀢𑁆𑀢𑀯𑀲𑁂𑀦 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸,

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸,

𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺. (𑀉𑀤𑀸. 𑁧; 𑀫𑀳𑀸𑀯. 𑁧) 𑁋

𑀅𑀬𑀁 𑀕𑀸𑀣𑀸 𑀆𑀤𑀺. 𑀢𑀲𑁆𑀫𑀸 𑀬𑁆𑀯𑀸𑀬𑀁 𑀦𑀯𑀧𑁆𑀧𑀪𑁂𑀤𑁄 𑀔𑀼𑀤𑁆𑀤𑀓𑀧𑀸𑀞𑁄 𑀇𑀫𑁂𑀲𑀁 𑀔𑀼𑀤𑁆𑀤𑀓𑀸𑀦𑀁 𑀆𑀤𑀺, 𑀢𑀲𑁆𑀲 𑀆𑀤𑀺𑀢𑁄 𑀧𑀪𑀼𑀢𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀆𑀭𑀪𑀺𑀲𑁆𑀲𑀸𑀫𑀺.

𑀦𑀺𑀤𑀸𑀦𑀲𑁄𑀥𑀦𑀁

𑀢𑀲𑁆𑀲 ¶ 𑀘𑀸𑀬𑀫𑀸𑀤𑀺 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺. 𑀢𑀲𑁆𑀲𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸𑀬 𑀫𑀸𑀢𑀺𑀓𑀸 𑁋

‘‘𑀓𑁂𑀦 𑀓𑀢𑁆𑀣 𑀓𑀤𑀸 𑀓𑀲𑁆𑀫𑀸, 𑀪𑀸𑀲𑀺𑀢𑀁 𑀲𑀭𑀡𑀢𑁆𑀢𑀬𑀁;

𑀓𑀲𑁆𑀫𑀸 𑀘𑀺𑀥𑀸𑀤𑀺𑀢𑁄 𑀯𑀼𑀢𑁆𑀢, 𑀫𑀯𑀼𑀢𑁆𑀢𑀫𑀧𑀺 𑀆𑀤𑀺𑀢𑁄.

‘‘𑀦𑀺𑀤𑀸𑀦𑀲𑁄𑀥𑀦𑀁 𑀓𑀢𑁆𑀯𑀸, 𑀏𑀯𑀫𑁂𑀢𑁆𑀣 𑀢𑀢𑁄 𑀧𑀭𑀁;

𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀁, 𑀕𑀫𑀓𑀜𑁆𑀘 𑀯𑀺𑀪𑀸𑀯𑀬𑁂.

‘‘𑀪𑁂𑀤𑀸𑀪𑁂𑀤𑀁 𑀨𑀮𑀜𑁆𑀘𑀸𑀧𑀺, 𑀕𑀫𑀦𑀻𑀬𑀜𑁆𑀘 𑀤𑀻𑀧𑀬𑁂;

𑀥𑀫𑁆𑀫𑀁 𑀲𑀭𑀡𑀫𑀺𑀘𑁆𑀘𑀸𑀤𑀺, 𑀤𑁆𑀯𑀬𑁂𑀧𑁂𑀲 𑀦𑀬𑁄 𑀫𑀢𑁄.

‘‘𑀅𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑁂, 𑀓𑀸𑀭𑀡𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂;

𑀲𑀭𑀡𑀢𑁆𑀢𑀬𑀫𑁂𑀢𑀜𑁆𑀘, 𑀉𑀧𑀫𑀸𑀳𑀺 𑀧𑀓𑀸𑀲𑀬𑁂’’𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀇𑀤𑀁 𑀲𑀭𑀡𑀢𑁆𑀢𑀬𑀁 𑀓𑁂𑀦 𑀪𑀸𑀲𑀺𑀢𑀁, 𑀓𑀢𑁆𑀣 𑀪𑀸𑀲𑀺𑀢𑀁, 𑀓𑀤𑀸 𑀪𑀸𑀲𑀺𑀢𑀁, 𑀓𑀲𑁆𑀫𑀸 𑀪𑀸𑀲𑀺𑀢𑀁 ¶ 𑀅𑀯𑀼𑀢𑁆𑀢𑀫𑀧𑀺𑀘𑀸𑀤𑀺𑀢𑁄 𑀢𑀣𑀸𑀕𑀢𑁂𑀦 𑀓𑀲𑁆𑀫𑀸 𑀇𑀥𑀸𑀤𑀺𑀢𑁄 𑀯𑀼𑀢𑁆𑀢𑀦𑁆𑀢𑀺 𑀧𑀜𑁆𑀘 𑀧𑀜𑁆𑀳𑀸.

𑀢𑁂𑀲𑀁 ¶ 𑀯𑀺𑀲𑁆𑀲𑀚𑁆𑀚𑀦𑀸 𑀓𑁂𑀦 𑀪𑀸𑀲𑀺𑀢𑀦𑁆𑀢𑀺 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀦 𑀲𑀸𑀯𑀓𑁂𑀳𑀺, 𑀦 𑀇𑀲𑀻𑀳𑀺, 𑀦 𑀤𑁂𑀯𑀢𑀸𑀳𑀺. 𑀓𑀢𑁆𑀣𑀸𑀢𑀺 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀓𑀤𑀸𑀢𑀺 𑀆𑀬𑀲𑁆𑀫𑀦𑁆𑀢𑁂 𑀬𑀲𑁂 𑀲𑀤𑁆𑀥𑀺𑀁 𑀲𑀳𑀸𑀬𑀓𑁂𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑁂𑀲𑀼 𑀩𑀳𑀼𑀚𑀦𑀳𑀺𑀢𑀸𑀬 𑀮𑁄𑀓𑁂 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀦𑁆𑀢𑁂𑀲𑀼. 𑀓𑀲𑁆𑀫𑀸𑀢𑀺 𑀧𑀩𑁆𑀩𑀚𑁆𑀚𑀢𑁆𑀣𑀜𑁆𑀘 𑀉𑀧𑀲𑀫𑁆𑀧𑀤𑀢𑁆𑀣𑀜𑁆𑀘. 𑀬𑀣𑀸𑀳 𑁋

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 ‘𑀏𑀯𑀁 𑀯𑀤𑁂𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄 ‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’’𑀢𑀺 (𑀫𑀳𑀸𑀯. 𑁩𑁪).

𑀓𑀲𑁆𑀫𑀸 ¶ 𑀘𑀺𑀥𑀸𑀤𑀺𑀢𑁄 𑀯𑀼𑀢𑁆𑀢𑀦𑁆𑀢𑀺 𑀇𑀤𑀜𑁆𑀘 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑁂𑀦𑁆𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀬𑀲𑁆𑀫𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀤𑁂𑀯𑀫𑀦𑀼𑀲𑁆𑀲𑀸 𑀉𑀧𑀸𑀲𑀓𑀪𑀸𑀯𑁂𑀦 𑀯𑀸 𑀧𑀩𑁆𑀩𑀚𑀺𑀢𑀪𑀸𑀯𑁂𑀦 𑀯𑀸 𑀲𑀸𑀲𑀦𑀁 𑀑𑀢𑀭𑀦𑁆𑀢𑀺, 𑀢𑀲𑁆𑀫𑀸 𑀲𑀸𑀲𑀦𑁄𑀢𑀸𑀭𑀲𑁆𑀲 𑀫𑀕𑁆𑀕𑀪𑀽𑀢𑀢𑁆𑀢𑀸 𑀇𑀥 𑀔𑀼𑀤𑁆𑀤𑀓𑀧𑀸𑀞𑁂 𑀆𑀤𑀺𑀢𑁄 𑀯𑀼𑀢𑁆𑀢𑀦𑁆𑀢𑀺 𑀜𑀸𑀢𑀩𑁆𑀩𑀁.

𑀓𑀢𑀁 𑀦𑀺𑀤𑀸𑀦𑀲𑁄𑀥𑀦𑀁.

𑁧. 𑀲𑀭𑀡𑀢𑁆𑀢𑀬𑀯𑀡𑁆𑀡𑀦𑀸

𑀩𑀼𑀤𑁆𑀥𑀯𑀺𑀪𑀸𑀯𑀦𑀸

𑀇𑀤𑀸𑀦𑀺 ¶ 𑀬𑀁 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀁, 𑀕𑀫𑀓𑀜𑁆𑀘 𑀯𑀺𑀪𑀸𑀯𑀬𑁂’’𑀢𑀺, 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀦𑀺𑀫𑀺𑀢𑁆𑀢𑀸𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑀧𑀭𑀺𑀪𑀸𑀯𑀺𑀢𑀁 𑀔𑀦𑁆𑀥𑀲𑀦𑁆𑀢𑀸𑀦𑀫𑀼𑀧𑀸𑀤𑀸𑀬, 𑀧𑀜𑁆𑀜𑀢𑁆𑀢𑀺𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀯𑀸 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀺𑀫𑀼𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀢𑁄 𑀲𑀢𑁆𑀢𑀯𑀺𑀲𑁂𑀲𑁄 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 ¶ 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁧).

𑀅𑀬𑀁 𑀢𑀸𑀯 𑀅𑀢𑁆𑀣𑀢𑁄 𑀩𑀼𑀤𑁆𑀥𑀯𑀺𑀪𑀸𑀯𑀦𑀸.

𑀩𑁆𑀬𑀜𑁆𑀚𑀦𑀢𑁄 𑀧𑀦 ‘‘𑀩𑀼𑀚𑁆𑀛𑀺𑀢𑀸𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸𑀢𑀺 𑀩𑀼𑀤𑁆𑀥𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄? 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀓𑀲𑀺𑀢𑀸𑀬 ¶ 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 ¶ 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁨).

𑀏𑀢𑁆𑀣 𑀘 𑀬𑀣𑀸 𑀮𑁄𑀓𑁂 𑀅𑀯𑀕𑀦𑁆𑀢𑀸 𑀅𑀯𑀕𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄. 𑀬𑀣𑀸 𑀧𑀡𑁆𑀡𑀲𑁄𑀲𑀸 𑀯𑀸𑀢𑀸 𑀧𑀡𑁆𑀡𑀲𑀼𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄. 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀩𑀼𑀚𑁆𑀛𑀦𑀲𑀫𑀢𑁆𑀣𑀸𑀬 𑀩𑀼𑀤𑁆𑀥𑀺𑀬𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀩𑁄𑀥𑀦𑀲𑀫𑀢𑁆𑀣𑀸𑀬 𑀩𑀼𑀤𑁆𑀥𑀺𑀬𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄𑀢𑀺 𑀅𑀜𑁆𑀜𑁂𑀦 𑀅𑀩𑁄𑀥𑀺𑀢𑁄 𑀲𑀬𑀫𑁂𑀯 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀓𑀲𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀦𑀸𑀦𑀸𑀕𑀼𑀡𑀯𑀺𑀓𑀲𑀦𑀢𑁄 𑀧𑀤𑀼𑀫𑀫𑀺𑀯 𑀯𑀺𑀓𑀲𑀦𑀝𑁆𑀞𑁂𑀦 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄𑀢𑀺 𑀏𑀯𑀫𑀸𑀤𑀻𑀳𑀺 𑀘𑀺𑀢𑁆𑀢𑀲𑀗𑁆𑀓𑁄𑀘𑀓𑀭𑀥𑀫𑁆𑀫𑀧𑀳𑀸𑀦𑀢𑁄 ¶ 𑀦𑀺𑀤𑁆𑀤𑀸𑀓𑁆𑀔𑀬𑀯𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀯𑀺𑀬 𑀲𑀩𑁆𑀩𑀓𑀺𑀮𑁂𑀲𑀦𑀺𑀤𑁆𑀤𑀸𑀓𑁆𑀔𑀬𑀯𑀺𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀺𑀬𑀢𑁆𑀣𑀸𑀦𑀁 𑀕𑀫𑀦𑀢𑁆𑀣𑀧𑀭𑀺𑀬𑀸𑀬𑀢𑁄 𑀬𑀣𑀸 𑀫𑀕𑁆𑀕𑀁 𑀕𑀢𑁄𑀧𑀺 𑀧𑀼𑀭𑀺𑀲𑁄 𑀕𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑀢𑁆𑀢𑀸𑀧𑀺 𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄𑀢𑀺 𑀦 𑀧𑀭𑁂𑀳𑀺 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄, 𑀓𑀺𑀦𑁆𑀢𑀼 𑀲𑀬𑀫𑁂𑀯 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁 𑀩𑁄𑀥𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀢𑀢𑁆𑀣 𑀬𑀣𑀸 𑀦𑀻𑀮𑀭𑀢𑁆𑀢𑀕𑀼𑀡𑀬𑁄𑀕𑀢𑁄 ‘‘𑀦𑀻𑀮𑁄 𑀧𑀝𑁄, 𑀭𑀢𑁆𑀢𑁄 𑀧𑀝𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀤𑁆𑀥𑀺𑀕𑀼𑀡𑀬𑁄𑀕𑀢𑁄 𑀩𑀼𑀤𑁆𑀥𑁄𑀢𑀺 𑀜𑀸𑀧𑁂𑀢𑀼𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀦𑁆𑀢𑀺 𑀏𑀯𑀫𑀸𑀤𑀺 𑀅𑀢𑁆𑀣𑀫𑀦𑀼𑀕𑀢𑀸 𑀅𑀬𑀁 𑀧𑀜𑁆𑀜𑀢𑁆𑀢𑀻𑀢𑀺 𑀩𑁄𑀥𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀏𑀯𑀭𑀽𑀧𑁂𑀦 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀧𑀤𑀸𑀦𑀁 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀲𑀸𑀥𑀦𑀲𑀫𑀢𑁆𑀣𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀩𑁆𑀬𑀜𑁆𑀚𑀦𑀢𑁄𑀧𑀺 𑀩𑀼𑀤𑁆𑀥𑀯𑀺𑀪𑀸𑀯𑀦𑀸.

𑀲𑀭𑀡𑀕𑀫𑀦𑀕𑀫𑀓𑀯𑀺𑀪𑀸𑀯𑀦𑀸

𑀇𑀤𑀸𑀦𑀺 𑀲𑀭𑀡𑀕𑀫𑀦𑀸𑀤𑀻𑀲𑀼 𑀳𑀺𑀁𑀲𑀢𑀻𑀢𑀺 𑀲𑀭𑀡𑀁, 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀁 𑀧𑀭𑀺𑀓𑁆𑀓𑀺𑀮𑁂𑀲𑀁 𑀳𑀺𑀁𑀲𑀢𑀺 𑀯𑀺𑀥𑀫𑀢𑀺 𑀦𑀻𑀳𑀭𑀢𑀺 𑀦𑀺𑀭𑁄𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀩𑀼𑀤𑁆𑀥𑁄, 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀭𑀡𑁂𑀦 𑀅𑀲𑁆𑀲𑀸𑀲𑀤𑀸𑀦𑁂𑀦 𑀘 𑀥𑀫𑁆𑀫𑁄, 𑀅𑀧𑁆𑀧𑀓𑀸𑀦𑀫𑁆𑀧𑀺 𑀓𑀸𑀭𑀸𑀦𑀁 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀗𑁆𑀖𑁄. 𑀢𑀲𑁆𑀫𑀸 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀢𑀁 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁. 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸𑀳𑀺 𑀯𑀺𑀳𑀢𑀯𑀺𑀤𑁆𑀥𑀁𑀲𑀺𑀢𑀓𑀺𑀮𑁂𑀲𑁄 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁. 𑀢𑀁𑀲𑀫𑀗𑁆𑀕𑀻 𑀲𑀢𑁆𑀢𑁄 𑀢𑀁 𑀲𑀭𑀡𑀁 𑀕𑀘𑁆𑀙𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 ‘‘𑀏𑀲 𑀫𑁂 𑀲𑀭𑀡𑀁, 𑀏𑀲 𑀫𑁂 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀫𑁂𑀢𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄 ¶ . 𑀉𑀧𑁂𑀦𑁆𑀢𑁄 𑀘 ‘‘𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫, 𑀥𑀫𑁆𑀫𑀜𑁆𑀘, 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀽’’𑀢𑀺 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀤𑀬𑁄 ¶ 𑀯𑀺𑀬 𑀲𑀫𑀸𑀤𑀸𑀦𑁂𑀦 𑀯𑀸, ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀯𑀺𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦 𑀯𑀸, ‘‘𑀏𑀯𑀁 𑀯𑀼𑀢𑁆𑀢𑁂 𑀩𑁆𑀭𑀳𑁆𑀫𑀸𑀬𑀼 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 ‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀦𑀫𑁄 𑀢𑀲𑁆𑀲…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’’𑀢𑀺 ¶ (𑀫. 𑀦𑀺. 𑁨.𑁩𑁮𑁮) 𑀩𑁆𑀭𑀳𑁆𑀫𑀸𑀬𑀼𑀆𑀤𑀬𑁄 𑀯𑀺𑀬 𑀢𑀧𑁆𑀧𑁄𑀡𑀢𑁆𑀢𑁂𑀦 𑀯𑀸, 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀺𑀦𑁄 𑀯𑀺𑀬 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑁂𑀦 𑀯𑀸, 𑀅𑀭𑀺𑀬𑀧𑀼𑀕𑁆𑀕𑀮𑀸 𑀯𑀺𑀬 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦 𑀯𑀸𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀁 𑀯𑀺𑀲𑀬𑀢𑁄 𑀓𑀺𑀘𑁆𑀘𑀢𑁄 𑀘 𑀉𑀧𑁂𑀢𑀺.

𑀅𑀬𑀁 𑀲𑀭𑀡𑀕𑀫𑀦𑀲𑁆𑀲 𑀕𑀫𑀓𑀲𑁆𑀲 𑀘 𑀯𑀺𑀪𑀸𑀯𑀦𑀸.

𑀪𑁂𑀤𑀸𑀪𑁂𑀤𑀨𑀮𑀤𑀻𑀧𑀦𑀸

𑀇𑀤𑀸𑀦𑀺 ‘‘𑀪𑁂𑀤𑀸𑀪𑁂𑀤𑀁 𑀨𑀮𑀜𑁆𑀘𑀸𑀧𑀺, 𑀕𑀫𑀦𑀻𑀬𑀜𑁆𑀘 𑀤𑀻𑀧𑀬𑁂’’𑀢𑀺 𑀯𑀼𑀢𑁆𑀢𑀸𑀦𑀁 𑀪𑁂𑀤𑀸𑀤𑀻𑀦𑀁 𑀅𑀬𑀁 𑀤𑀻𑀧𑀦𑀸, 𑀏𑀯𑀁 𑀲𑀭𑀡𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀼𑀯𑀺𑀥𑁄 𑀲𑀭𑀡𑀕𑀫𑀦𑀪𑁂𑀤𑁄 𑁋 𑀲𑀸𑀯𑀚𑁆𑀚𑁄 𑀘 𑀅𑀦𑀯𑀚𑁆𑀚𑁄 𑀘. 𑀅𑀦𑀯𑀚𑁆𑀚𑁄 𑀓𑀸𑀮𑀓𑀺𑀭𑀺𑀬𑀸𑀬, 𑀲𑀸𑀯𑀚𑁆𑀚𑁄 𑀅𑀜𑁆𑀜𑀲𑀢𑁆𑀣𑀭𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸, 𑀢𑀲𑁆𑀫𑀺𑀜𑁆𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀬𑀸. 𑀲𑁄 𑀤𑀼𑀯𑀺𑀥𑁄𑀧𑀺 𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀯. 𑀩𑀼𑀤𑁆𑀥𑀕𑀼𑀡𑁂𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑀸𑀤𑀭𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀸 𑀘 𑀢𑁂𑀲𑀁 𑀲𑀭𑀡𑀁 𑀲𑀁𑀓𑀺𑀮𑀺𑀝𑁆𑀞𑀁 𑀳𑁄𑀢𑀺. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀧𑀦 𑀅𑀪𑀺𑀦𑁆𑀦𑀲𑀭𑀡𑀸 𑀘𑁂𑀯 𑀅𑀲𑀁𑀓𑀺𑀮𑀺𑀝𑁆𑀞𑀲𑀭𑀡𑀸 𑀘 𑀳𑁄𑀦𑁆𑀢𑀺. 𑀬𑀣𑀸𑀳 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁧.𑁨𑁭𑁬; 𑀫. 𑀦𑀺. 𑁩.𑁧𑁨𑁮; 𑀯𑀺𑀪. 𑁮𑁦𑁯). 𑀧𑀼𑀣𑀼𑀚𑁆𑀚𑀦𑀸 𑀢𑀼 𑀬𑀸𑀯𑀤𑁂𑀯 𑀲𑀭𑀡𑀪𑁂𑀤𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯𑀤𑁂𑀯 𑀅𑀪𑀺𑀦𑁆𑀦𑀲𑀭𑀡𑀸. 𑀲𑀸𑀯𑀚𑁆𑀚𑁄𑀯 𑀦𑁂𑀲𑀁 𑀲𑀭𑀡𑀪𑁂𑀤𑁄, 𑀲𑀁𑀓𑀺𑀮𑁂𑀲𑁄 𑀘 𑀅𑀦𑀺𑀝𑁆𑀞𑀨𑀮𑀤𑁄 𑀳𑁄𑀢𑀺. 𑀅𑀦𑀯𑀚𑁆𑀚𑁄 𑀅𑀯𑀺𑀧𑀸𑀓𑀢𑁆𑀢𑀸 𑀅𑀨𑀮𑁄, 𑀅𑀪𑁂𑀤𑁄 𑀧𑀦 𑀨𑀮𑀢𑁄 𑀇𑀝𑁆𑀞𑀫𑁂𑀯 𑀨𑀮𑀁 𑀤𑁂𑀢𑀺.

𑀬𑀣𑀸𑀳 𑁋

‘‘𑀬𑁂𑀓𑁂𑀘𑀺 ¶ 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀢𑀢𑁆𑀭 ¶ 𑀘 𑀬𑁂 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦 𑀲𑀭𑀡𑀁 𑀕𑀢𑀸, 𑀢𑁂 𑀅𑀧𑀸𑀬𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺. 𑀇𑀢𑀭𑁂 𑀧𑀦 𑀲𑀭𑀡𑀕𑀫𑀦𑁂𑀦 𑀦 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀕𑀸𑀣𑀸𑀬 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀢𑀸𑀯 𑀪𑁂𑀤𑀸𑀪𑁂𑀤𑀨𑀮𑀤𑀻𑀧𑀦𑀸.

𑀕𑀫𑀦𑀻𑀬𑀤𑀻𑀧𑀦𑀸

𑀕𑀫𑀦𑀻𑀬𑀤𑀻𑀧𑀦𑀸𑀬𑀁 𑀘𑁄𑀤𑀓𑁄 𑀆𑀳 𑁋 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀏𑀢𑁆𑀣 𑀬𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀢𑀺, 𑀏𑀲 𑀩𑀼𑀤𑁆𑀥𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀲𑀭𑀡𑀁 𑀯𑀸, 𑀉𑀪𑀬𑀣𑀸𑀧𑀺 𑀘 𑀏𑀓𑀲𑁆𑀲 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁. 𑀓𑀲𑁆𑀫𑀸? 𑀕𑀫𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀤𑁆𑀯𑀬𑀸𑀪𑀸𑀯𑀢𑁄. 𑀦 𑀳𑁂𑀢𑁆𑀣 ‘‘𑀅𑀚𑀁 𑀕𑀸𑀫𑀁 𑀦𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀁 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀇𑀘𑁆𑀙𑀦𑁆𑀢𑀺.

‘‘𑀕𑀘𑁆𑀙𑀢𑁂𑀯 𑀧𑀼𑀩𑁆𑀩𑀁 ¶ 𑀤𑀺𑀲𑀁, 𑀕𑀘𑁆𑀙𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁫𑁯; 𑁩.𑁮𑁭) 𑀯𑀺𑀬 𑀲𑀸𑀢𑁆𑀣𑀓𑀫𑁂𑀯𑀸𑀢𑀺 𑀘𑁂? 𑀦, 𑀩𑀼𑀤𑁆𑀥𑀲𑀭𑀡𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲𑀸𑀦𑀥𑀺𑀧𑁆𑀧𑁂𑀢𑀢𑁄. 𑀏𑀢𑁂𑀲𑀜𑁆𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂 𑀅𑀥𑀺𑀧𑁆𑀧𑁂𑀢𑁂 𑀧𑀝𑀺𑀳𑀢𑀘𑀺𑀢𑁆𑀢𑁄𑀧𑀺 𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀲𑀺𑀬𑀸. 𑀬𑀜𑁆𑀳𑀺 𑀢𑀁 𑀩𑀼𑀤𑁆𑀥𑁄𑀢𑀺 𑀯𑀺𑀲𑁂𑀲𑀺𑀢𑀁 𑀲𑀭𑀡𑀁, 𑀢𑀫𑁂𑀯𑁂𑀲 𑀕𑀢𑁄𑀢𑀺. ‘‘𑀏𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫’’𑀦𑁆𑀢𑀺 (𑀥. 𑀧. 𑁧𑁯𑁨) 𑀯𑀘𑀦𑀢𑁄 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑁂𑀯𑀸𑀢𑀺 𑀘𑁂? 𑀦, 𑀢𑀢𑁆𑀣𑁂𑀯 𑀢𑀩𑁆𑀪𑀸𑀯𑀢𑁄. 𑀢𑀢𑁆𑀣𑁂𑀯 𑀳𑀺 𑀕𑀸𑀣𑀸𑀧𑀤𑁂 𑀏𑀢𑀁 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀁 𑀲𑀭𑀡𑀕𑀢𑀸𑀦𑀁 𑀪𑀬𑀳𑀭𑀡𑀢𑁆𑀢𑀲𑀗𑁆𑀔𑀸𑀢𑁂 𑀲𑀭𑀡𑀪𑀸𑀯𑁂 𑀅𑀩𑁆𑀬𑀪𑀺𑀘𑀭𑀡𑀢𑁄 ‘‘𑀔𑁂𑀫𑀫𑀼𑀢𑁆𑀢𑀫𑀜𑁆𑀘 𑀲𑀭𑀡’’𑀦𑁆𑀢𑀺 𑀅𑀬𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀅𑀜𑁆𑀜𑀢𑁆𑀣 𑀢𑀼 𑀕𑀫𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀲𑀭𑀡𑀕𑀫𑀦𑀲𑁆𑀲 𑀅𑀧𑁆𑀧𑀲𑀺𑀤𑁆𑀥𑀺𑀢𑁄 𑀅𑀦𑀥𑀺𑀧𑁆𑀧𑁂𑀢𑁄𑀢𑀺 𑀅𑀲𑀸𑀥𑀓𑀫𑁂𑀢𑀁. ‘‘𑀏𑀢𑀁 ¶ 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀏𑀢𑁆𑀣 𑀕𑀫𑀺𑀲𑀫𑁆𑀩𑀦𑁆𑀥𑁂𑀧𑀺 𑀲𑀭𑀡𑀕𑀫𑀦𑀧𑀲𑀺𑀤𑁆𑀥𑀺𑀢𑁄 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑁂𑀯𑀸𑀢𑀺 𑀘𑁂? 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀧𑁆𑀧𑀲𑀗𑁆𑀕𑀢𑁄. 𑀢𑀢𑁆𑀭𑀸𑀧𑀺 𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂 𑀲𑀢𑀺 𑀏𑀢𑀁 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀭𑀡𑀁 𑀧𑀝𑀺𑀳𑀢𑀘𑀺𑀢𑁆𑀢𑁄𑀧𑀺 𑀆𑀕𑀫𑁆𑀫 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀧𑁆𑀧𑀲𑀗𑁆𑀕𑁄 𑀏𑀯 𑀲𑀺𑀬𑀸, 𑀦 𑀘 𑀦𑁄 𑀤𑁄𑀲𑁂𑀦 𑀅𑀢𑁆𑀣𑀺 𑀅𑀢𑁆𑀣𑁄𑀢𑀺 𑀅𑀲𑀸𑀥𑀓𑀫𑁂𑀢𑀁. 𑀬𑀣𑀸 ‘‘𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁨𑁯) 𑀏𑀢𑁆𑀣 𑀪𑀕𑀯𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀭𑀺𑀫𑀼𑀘𑁆𑀘𑀫𑀸𑀦𑀸 𑀲𑀢𑁆𑀢𑀸 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀏𑀯𑀫𑀺𑀥𑀸𑀧𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑁆𑀲 𑀲𑀭𑀡𑀲𑁆𑀲𑀸𑀦𑀼𑀪𑀸𑀯𑁂𑀦 𑀫𑀼𑀘𑁆𑀘𑀫𑀸𑀦𑁄 ‘‘𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑀩𑁆𑀩𑀣𑀸𑀧𑀺 𑀦 𑀩𑀼𑀤𑁆𑀥𑀲𑁆𑀲 𑀕𑀫𑀦𑀻𑀬𑀢𑁆𑀢𑀁 𑀬𑀼𑀚𑁆𑀚𑀢𑀺, 𑀦 𑀲𑀭𑀡𑀲𑁆𑀲, 𑀦 𑀉𑀪𑀬𑁂𑀲𑀁, 𑀇𑀘𑁆𑀙𑀺𑀢𑀩𑁆𑀩𑀜𑁆𑀘 ¶ 𑀕𑀘𑁆𑀙𑀸𑀫𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀕𑀫𑀓𑀲𑁆𑀲 𑀕𑀫𑀦𑀻𑀬𑀁, 𑀢𑀢𑁄 𑀯𑀢𑁆𑀢𑀩𑁆𑀩𑀸 𑀏𑀢𑁆𑀣 𑀬𑀼𑀢𑁆𑀢𑀻𑀢𑀺. 𑀯𑀼𑀘𑁆𑀘𑀢𑁂 𑁋

𑀩𑀼𑀤𑁆𑀥𑁄𑀬𑁂𑀯𑁂𑀢𑁆𑀣 𑀕𑀫𑀦𑀻𑀬𑁄, 𑀕𑀫𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀢𑀼 𑀢𑀁 𑀲𑀭𑀡𑀯𑀘𑀦𑀁, 𑀩𑀼𑀤𑁆𑀥𑀁 𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀺. 𑀏𑀲 𑀫𑁂 𑀲𑀭𑀡𑀁, 𑀏𑀲 𑀫𑁂 𑀧𑀭𑀸𑀬𑀡𑀁, 𑀅𑀖𑀲𑁆𑀲, 𑀢𑀸𑀢𑀸, 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸𑀢𑀺 ¶ 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀏𑀢𑀁 𑀕𑀘𑁆𑀙𑀸𑀫𑀺 𑀪𑀚𑀸𑀫𑀺 𑀲𑁂𑀯𑀸𑀫𑀺 𑀧𑀬𑀺𑀭𑀼𑀧𑀸𑀲𑀸𑀫𑀺, 𑀏𑀯𑀁 𑀯𑀸 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄𑀢𑀺. 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀧𑁆𑀧𑀬𑁄𑀕𑀸 𑀅𑀬𑀼𑀢𑁆𑀢𑀫𑀺𑀢𑀺 𑀘𑁂? 𑀢𑀁 𑀦. 𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀘𑁂𑀢𑁆𑀣 𑀏𑀯𑀫𑀢𑁆𑀣𑁄 𑀪𑀯𑁂𑀬𑁆𑀬, 𑀢𑀢𑁄 ‘‘𑀅𑀦𑀺𑀘𑁆𑀘𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀭𑀽𑀧𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁫, 𑁮𑁫) 𑀯𑀺𑀬 𑀇𑀢𑀺-𑀲𑀤𑁆𑀤𑁄 𑀧𑀬𑀼𑀢𑁆𑀢𑁄 𑀲𑀺𑀬𑀸, 𑀦 𑀘 𑀧𑀬𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀬𑀼𑀢𑁆𑀢𑀫𑁂𑀢𑀦𑁆𑀢𑀺. 𑀢𑀜𑁆𑀘 𑀦, 𑀓𑀲𑁆𑀫𑀸? 𑀢𑀤𑀢𑁆𑀣𑀲𑀫𑁆𑀪𑀯𑀸. ‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁧𑁯𑁦) 𑀯𑀺𑀬 𑀇𑀥𑀸𑀧𑀺 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀦 𑀘 𑀯𑀺𑀚𑁆𑀚𑀫𑀸𑀦𑀢𑁆𑀣𑀲𑀫𑁆𑀪𑀯𑀸 𑀇𑀢𑀺-𑀲𑀤𑁆𑀤𑀸 𑀲𑀩𑁆𑀩𑀢𑁆𑀣 𑀧𑀬𑀼𑀚𑁆𑀚𑀦𑁆𑀢𑀺, 𑀅𑀧𑁆𑀧𑀬𑀼𑀢𑁆𑀢𑀲𑁆𑀲𑀸𑀧𑁂𑀢𑁆𑀣 𑀧𑀬𑀼𑀢𑁆𑀢𑀲𑁆𑀲 𑀯𑀺𑀬 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀅𑀜𑁆𑀜𑁂𑀲𑀼 𑀘 𑀏𑀯𑀁𑀚𑀸𑀢𑀺𑀓𑁂𑀲𑀼, 𑀢𑀲𑁆𑀫𑀸 𑀅𑀤𑁄𑀲𑁄 𑀏𑀯 𑀲𑁄𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁩𑁪) 𑀲𑀭𑀡𑀲𑁆𑀲𑁂𑀯 𑀕𑀫𑀦𑀻𑀬𑀢𑁄 𑀬𑀁 𑀯𑀼𑀢𑁆𑀢𑀁 ‘‘𑀕𑀫𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀢𑀼 𑀲𑀭𑀡𑀯𑀘𑀦’’𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀫𑀺𑀢𑀺 𑀘𑁂. 𑀢𑀁 ¶ 𑀦𑀸𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀢𑀤𑀢𑁆𑀣𑀲𑀫𑁆𑀪𑀯𑀸 𑀏𑀯. 𑀢𑀢𑁆𑀭𑀸𑀧𑀺 𑀳𑀺 𑀢𑀲𑁆𑀲 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀬𑀢𑁄 𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀅𑀧𑁆𑀧𑀬𑀼𑀢𑁆𑀢𑁄𑀧𑀺 𑀧𑀬𑀼𑀢𑁆𑀢𑁄 𑀯𑀺𑀬 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀧𑁆𑀧𑀲𑀗𑁆𑀕𑁄 𑀏𑀯 𑀲𑀺𑀬𑀸, 𑀢𑀲𑁆𑀫𑀸 𑀬𑀣𑀸𑀦𑀼𑀲𑀺𑀝𑁆𑀞𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀅𑀬𑀁 𑀕𑀫𑀦𑀻𑀬𑀤𑀻𑀧𑀦𑀸.

𑀥𑀫𑁆𑀫𑀲𑀗𑁆𑀖𑀲𑀭𑀡𑀯𑀺𑀪𑀸𑀯𑀦𑀸

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀁 𑀲𑀭𑀡𑀫𑀺𑀘𑁆𑀘𑀸𑀤𑀺, 𑀤𑁆𑀯𑀬𑁂𑀧𑁂𑀲 𑀦𑀬𑁄 𑀫𑀢𑁄’’𑀢𑀺 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑁆𑀯𑀸𑀬𑀁 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁄 𑀯𑀼𑀢𑁆𑀢𑁄, ‘‘𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂 𑀏𑀲𑁄𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀸𑀧𑀺 𑀳𑀺 𑀥𑀫𑁆𑀫𑀲𑀗𑁆𑀖𑀸𑀦𑀁 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀯𑀺𑀪𑀸𑀯𑀦𑀫𑀢𑁆𑀢𑀫𑁂𑀯 𑀅𑀲𑀤𑀺𑀲𑀁, 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀬𑀢𑁄 𑀬𑀤𑁂𑀯𑁂𑀢𑁆𑀣 𑀅𑀲𑀤𑀺𑀲𑀁, 𑀢𑀁 𑀯𑀼𑀘𑁆𑀘𑀢𑁂 𑁋 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀥𑀫𑁆𑀫𑁄𑀢𑀺 𑀏𑀓𑁂. 𑀪𑀸𑀯𑀺𑀢𑀫𑀕𑁆𑀕𑀸𑀦𑀁 𑀲𑀘𑁆𑀙𑀺𑀓𑀢𑀦𑀺𑀩𑁆𑀩𑀸𑀦𑀸𑀦𑀜𑁆𑀘 𑀅𑀧𑀸𑀬𑁂𑀲𑀼 𑀅𑀧𑀢𑀦𑀪𑀸𑀯𑁂𑀦 𑀥𑀸𑀭𑀡𑀢𑁄 𑀧𑀭𑀫𑀲𑁆𑀲𑀸𑀲𑀯𑀺𑀥𑀸𑀦𑀢𑁄 𑀘 𑀫𑀕𑁆𑀕𑀯𑀺𑀭𑀸𑀕𑀸 𑀏𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀥𑀫𑁆𑀫𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀜𑁆𑀘𑁂𑀯 𑀲𑀸𑀥𑀓𑀁. 𑀯𑀼𑀢𑁆𑀢𑀜𑁆𑀘𑁂𑀢𑁆𑀣 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 ¶ , 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀏𑀯𑀫𑀸𑀤𑀺 ¶ (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀘𑀢𑀼𑀩𑁆𑀩𑀺𑀥𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀘𑀢𑀼𑀲𑀸𑀫𑀜𑁆𑀜𑀨𑀮𑀲𑀫𑀥𑀺𑀯𑀸𑀲𑀺𑀢𑀔𑀦𑁆𑀥𑀲𑀦𑁆𑀢𑀸𑀦𑀸𑀦𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑁄 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦 𑀲𑀁𑀳𑀢𑀢𑁆𑀢𑀸 𑀲𑀗𑁆𑀖𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀦𑀦𑁆𑀤, 𑀬𑁂 𑀯𑁄 𑀫𑀬𑀸 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸, 𑀲𑁂𑀬𑁆𑀬𑀣𑀺𑀤𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀆𑀦𑀦𑁆𑀤, 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀤𑁆𑀯𑁂𑀧𑀺 𑀪𑀺𑀓𑁆𑀔𑀽 𑀦𑀸𑀦𑀸𑀯𑀸𑀤𑁂’’𑀢𑀺 (𑀫. 𑀦𑀺. 𑁩.𑁪𑁩).

𑀅𑀬𑀜𑁆𑀳𑀺 𑀧𑀭𑀫𑀢𑁆𑀣𑀲𑀗𑁆𑀖𑁄 𑀲𑀭𑀡𑀦𑁆𑀢𑀺 𑀕𑀫𑀦𑀻𑀬𑁄. 𑀲𑀼𑀢𑁆𑀢𑁂 𑀘 ‘‘𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 ¶ (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪, 𑁧𑁮𑁧) 𑀯𑀼𑀢𑁆𑀢𑁄. 𑀏𑀢𑀁 𑀧𑀦 𑀲𑀭𑀡𑀁 𑀕𑀢𑀲𑁆𑀲 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀯𑀸 𑀲𑀗𑁆𑀖𑁂 𑀲𑀫𑁆𑀫𑀼𑀢𑀺𑀲𑀗𑁆𑀖𑁂 𑀯𑀸 𑀘𑀢𑀼𑀯𑀕𑁆𑀕𑀸𑀤𑀺𑀪𑁂𑀤𑁂 𑀏𑀓𑀧𑀼𑀕𑁆𑀕𑀮𑁂𑀧𑀺 𑀯𑀸 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁂 𑀯𑀦𑁆𑀤𑀦𑀸𑀤𑀺𑀓𑀺𑀭𑀺𑀬𑀸𑀬 𑀲𑀭𑀡𑀕𑀫𑀦𑀁 𑀦𑁂𑀯 𑀪𑀺𑀚𑁆𑀚𑀢𑀺 𑀦 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀯𑀼𑀢𑁆𑀢𑀸𑀯𑀲𑁂𑀲𑀦𑁆𑀢𑀼 𑀇𑀫𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀲𑀭𑀡𑀕𑀫𑀦𑀲𑁆𑀲 𑀪𑁂𑀤𑀸𑀪𑁂𑀤𑀸𑀤𑀺𑀯𑀺𑀥𑀸𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀢𑀸𑀯 ‘‘𑀥𑀫𑁆𑀫𑀁 𑀲𑀭𑀡𑀫𑀺𑀘𑁆𑀘𑀸𑀤𑀺, 𑀤𑁆𑀯𑀬𑁂𑀧𑁂𑀲 𑀦𑀬𑁄 𑀫𑀢𑁄’’𑀢𑀺 𑀏𑀢𑀲𑁆𑀲 𑀯𑀡𑁆𑀡𑀦𑀸.

𑀅𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑀓𑀸𑀭𑀡𑀦𑀺𑀤𑁆𑀤𑁂𑀲𑁄

𑀇𑀤𑀸𑀦𑀺 𑀅𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑁂, 𑀓𑀸𑀭𑀡𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀏𑀢𑁆𑀣 𑀏𑀢𑁂𑀲𑀼 𑀘 𑀢𑀻𑀲𑀼 𑀲𑀭𑀡𑀯𑀘𑀦𑁂𑀲𑀼 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀕𑁆𑀕𑁄𑀢𑀺 𑀓𑀢𑁆𑀯𑀸 𑀧𑀞𑀫𑀁 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑀢𑁄 𑀢𑀤𑀼𑀧𑀤𑁂𑀲𑀺𑀢𑀢𑁄 𑀘 𑀅𑀦𑀦𑁆𑀢𑀭𑀁 𑀥𑀫𑁆𑀫𑁄, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀥𑀸𑀭𑀓𑀢𑁄 𑀢𑀤𑀸𑀲𑁂𑀯𑀦𑀢𑁄 𑀘 𑀅𑀦𑁆𑀢𑁂 𑀲𑀗𑁆𑀖𑁄. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀳𑀺𑀢𑁂 𑀦𑀺𑀬𑁄𑀚𑀓𑁄𑀢𑀺 𑀓𑀢𑁆𑀯𑀸 𑀧𑀞𑀫𑀁 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑀢𑁄 𑀲𑀩𑁆𑀩𑀲𑀢𑁆𑀢𑀳𑀺𑀢𑀢𑁆𑀢𑀸 𑀅𑀦𑀦𑁆𑀢𑀭𑀁 𑀥𑀫𑁆𑀫𑁄, 𑀳𑀺𑀢𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑁄 𑀅𑀥𑀺𑀕𑀢𑀳𑀺𑀢𑁄 𑀘𑀸𑀢𑀺 𑀓𑀢𑁆𑀯𑀸 𑀅𑀦𑁆𑀢𑁂 𑀲𑀗𑁆𑀖𑁄 𑀲𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀓𑀸𑀲𑀺𑀢𑁄𑀢𑀺 𑀏𑀯𑀁 𑀅𑀦𑀼𑀧𑀼𑀩𑁆𑀩𑀯𑀯𑀢𑁆𑀣𑀸𑀦𑁂 𑀓𑀸𑀭𑀡𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂.

𑀉𑀧𑀫𑀸𑀧𑀓𑀸𑀲𑀦𑀸

𑀇𑀤𑀸𑀦𑀺 ¶ 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀲𑀭𑀡𑀢𑁆𑀢𑀬𑀫𑁂𑀢𑀜𑁆𑀘, 𑀉𑀧𑀫𑀸𑀳𑀺 𑀧𑀓𑀸𑀲𑀬𑁂’’𑀢𑀺 ¶ , 𑀢𑀫𑁆𑀧𑀺 𑀯𑀼𑀘𑁆𑀘𑀢𑁂 𑁋 𑀏𑀢𑁆𑀣 𑀧𑀦 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀩𑀼𑀤𑁆𑀥𑁄, 𑀘𑀦𑁆𑀤𑀓𑀺𑀭𑀡𑀦𑀺𑀓𑀭𑁄 𑀯𑀺𑀬 𑀢𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀧𑀼𑀡𑁆𑀡𑀘𑀦𑁆𑀤𑀓𑀺𑀭𑀡𑀲𑀫𑀼𑀧𑁆𑀧𑀸𑀤𑀺𑀢𑀧𑀻𑀡𑀺𑀢𑁄 𑀮𑁄𑀓𑁄 𑀯𑀺𑀬 𑀲𑀗𑁆𑀖𑁄. 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀩𑀼𑀤𑁆𑀥𑁄, 𑀢𑀲𑁆𑀲 𑀭𑀲𑁆𑀫𑀺𑀚𑀸𑀮𑀫𑀺𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀥𑀫𑁆𑀫𑁄, 𑀢𑁂𑀦 𑀯𑀺𑀳𑀢𑀦𑁆𑀥𑀓𑀸𑀭𑁄 𑀮𑁄𑀓𑁄 𑀯𑀺𑀬 𑀲𑀗𑁆𑀖𑁄. 𑀯𑀦𑀤𑀸𑀳𑀓𑀧𑀼𑀭𑀺𑀲𑁄 𑀯𑀺𑀬 𑀩𑀼𑀤𑁆𑀥𑁄, 𑀯𑀦𑀤𑀳𑀦𑀕𑁆𑀕𑀺 𑀯𑀺𑀬 𑀓𑀺𑀮𑁂𑀲𑀯𑀦𑀤𑀳𑀦𑁄 𑀥𑀫𑁆𑀫𑁄, 𑀤𑀟𑁆𑀠𑀯𑀦𑀢𑁆𑀢𑀸 𑀔𑁂𑀢𑁆𑀢𑀪𑀽𑀢𑁄 𑀯𑀺𑀬 𑀪𑀽𑀫𑀺𑀪𑀸𑀕𑁄 𑀤𑀟𑁆𑀠𑀓𑀺𑀮𑁂𑀲𑀢𑁆𑀢𑀸 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑁄 𑀲𑀗𑁆𑀖𑁄. 𑀫𑀳𑀸𑀫𑁂𑀖𑁄 𑀯𑀺𑀬 𑀩𑀼𑀤𑁆𑀥𑁄, 𑀲𑀮𑀺𑀮𑀯𑀼𑀝𑁆𑀞𑀺 𑀯𑀺𑀬 𑀥𑀫𑁆𑀫𑁄, 𑀯𑀼𑀝𑁆𑀞𑀺𑀦𑀺𑀧𑀸𑀢𑀽𑀧𑀲𑀫𑀺𑀢𑀭𑁂𑀡𑀼 𑀯𑀺𑀬 𑀚𑀦𑀧𑀤𑁄 𑀉𑀧𑀲𑀫𑀺𑀢𑀓𑀺𑀮𑁂𑀲𑀭𑁂𑀡𑀼 𑀲𑀗𑁆𑀖𑁄. 𑀲𑀼𑀲𑀸𑀭𑀣𑀺 ¶ 𑀯𑀺𑀬 𑀩𑀼𑀤𑁆𑀥𑁄, 𑀅𑀲𑁆𑀲𑀸𑀚𑀸𑀦𑀻𑀬𑀯𑀺𑀦𑀬𑀽𑀧𑀸𑀬𑁄 𑀯𑀺𑀬 𑀥𑀫𑁆𑀫𑁄, 𑀲𑀼𑀯𑀺𑀦𑀻𑀢𑀲𑁆𑀲𑀸𑀚𑀸𑀦𑀻𑀬𑀲𑀫𑀽𑀳𑁄 𑀯𑀺𑀬 𑀲𑀗𑁆𑀖𑁄. 𑀲𑀩𑁆𑀩𑀤𑀺𑀝𑁆𑀞𑀺𑀲𑀮𑁆𑀮𑀼𑀤𑁆𑀥𑀭𑀡𑀢𑁄 𑀲𑀮𑁆𑀮𑀓𑀢𑁆𑀢𑁄 𑀯𑀺𑀬 𑀩𑀼𑀤𑁆𑀥𑁄, 𑀲𑀮𑁆𑀮𑀼𑀤𑁆𑀥𑀭𑀡𑀽𑀧𑀸𑀬𑁄 𑀯𑀺𑀬 𑀥𑀫𑁆𑀫𑁄, 𑀲𑀫𑀼𑀤𑁆𑀥𑀝𑀲𑀮𑁆𑀮𑁄 𑀯𑀺𑀬 𑀚𑀦𑁄 𑀲𑀫𑀼𑀤𑁆𑀥𑀝𑀤𑀺𑀝𑁆𑀞𑀺𑀲𑀮𑁆𑀮𑁄 𑀲𑀗𑁆𑀖𑁄. 𑀫𑁄𑀳𑀧𑀝𑀮𑀲𑀫𑀼𑀧𑁆𑀧𑀸𑀝𑀦𑀢𑁄 𑀯𑀸 𑀲𑀸𑀮𑀸𑀓𑀺𑀬𑁄 𑀯𑀺𑀬 𑀩𑀼𑀤𑁆𑀥𑁄, 𑀧𑀝𑀮𑀲𑀫𑀼𑀧𑁆𑀧𑀸𑀝𑀦𑀼𑀧𑀸𑀬𑁄 𑀯𑀺𑀬 𑀥𑀫𑁆𑀫𑁄, 𑀲𑀫𑀼𑀧𑁆𑀧𑀸𑀝𑀺𑀢𑀧𑀝𑀮𑁄 𑀯𑀺𑀧𑁆𑀧𑀲𑀦𑁆𑀦𑀮𑁄𑀘𑀦𑁄 𑀯𑀺𑀬 𑀚𑀦𑁄 𑀲𑀫𑀼𑀧𑁆𑀧𑀸𑀝𑀺𑀢𑀫𑁄𑀳𑀧𑀝𑀮𑁄 𑀯𑀺𑀧𑁆𑀧𑀲𑀦𑁆𑀦𑀜𑀸𑀡𑀮𑁄𑀘𑀦𑁄 𑀲𑀗𑁆𑀖𑁄. 𑀲𑀸𑀦𑀼𑀲𑀬𑀓𑀺𑀮𑁂𑀲𑀩𑁆𑀬𑀸𑀥𑀺𑀳𑀭𑀡𑀲𑀫𑀢𑁆𑀣𑀢𑀸𑀬 𑀯𑀸 𑀓𑀼𑀲𑀮𑁄 𑀯𑁂𑀚𑁆𑀚𑁄 𑀯𑀺𑀬 𑀩𑀼𑀤𑁆𑀥𑁄, 𑀲𑀫𑁆𑀫𑀸 𑀧𑀬𑀼𑀢𑁆𑀢𑀪𑁂𑀲𑀚𑁆𑀚𑀫𑀺𑀯 𑀥𑀫𑁆𑀫𑁄, 𑀪𑁂𑀲𑀚𑁆𑀚𑀧𑀬𑁄𑀕𑁂𑀦 𑀲𑀫𑀼𑀧𑀲𑀦𑁆𑀢𑀩𑁆𑀬𑀸𑀥𑀺 𑀯𑀺𑀬 𑀚𑀦𑀲𑀫𑀼𑀤𑀸𑀬𑁄 𑀲𑀫𑀼𑀧𑀲𑀦𑁆𑀢𑀓𑀺𑀮𑁂𑀲𑀩𑁆𑀬𑀸𑀥𑀸𑀦𑀼𑀲𑀬𑁄 𑀲𑀗𑁆𑀖𑁄.

𑀅𑀣 𑀯𑀸 𑀲𑀼𑀤𑁂𑀲𑀓𑁄 𑀯𑀺𑀬 𑀩𑀼𑀤𑁆𑀥𑁄, 𑀲𑀼𑀫𑀕𑁆𑀕𑁄 𑀯𑀺𑀬 𑀔𑁂𑀫𑀦𑁆𑀢𑀪𑀽𑀫𑀺 𑀯𑀺𑀬 𑀘 𑀥𑀫𑁆𑀫𑁄, 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀔𑁂𑀫𑀦𑁆𑀢𑀪𑀽𑀫𑀺𑀧𑁆𑀧𑀢𑁆𑀢𑁄 𑀯𑀺𑀬 𑀲𑀗𑁆𑀖𑁄. 𑀲𑀼𑀦𑀸𑀯𑀺𑀓𑁄 𑀯𑀺𑀬 𑀩𑀼𑀤𑁆𑀥𑁄, 𑀦𑀸𑀯𑀸 𑀯𑀺𑀬 𑀥𑀫𑁆𑀫𑁄, 𑀧𑀸𑀭𑀧𑁆𑀧𑀢𑁆𑀢𑁄 𑀲𑀫𑁆𑀧𑀢𑁆𑀢𑀺𑀓𑁄 𑀯𑀺𑀬 𑀚𑀦𑁄 𑀲𑀗𑁆𑀖𑁄. 𑀳𑀺𑀫𑀯𑀸 𑀯𑀺𑀬 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑁄𑀲𑀥𑀫𑀺𑀯 𑀥𑀫𑁆𑀫𑁄, 𑀑𑀲𑀥𑀽𑀧𑀪𑁄𑀕𑁂𑀦 𑀦𑀺𑀭𑀸𑀫𑀬𑁄 𑀯𑀺𑀬 𑀚𑀦𑁄 𑀲𑀗𑁆𑀖𑁄. 𑀥𑀦𑀤𑁄 𑀯𑀺𑀬 𑀩𑀼𑀤𑁆𑀥𑁄, 𑀥𑀦𑀁 𑀯𑀺𑀬 𑀥𑀫𑁆𑀫𑁄, 𑀬𑀣𑀸𑀥𑀺𑀧𑁆𑀧𑀸𑀬𑀁 𑀮𑀤𑁆𑀥𑀥𑀦𑁄 𑀯𑀺𑀬 𑀚𑀦𑁄 𑀲𑀫𑁆𑀫𑀸𑀮𑀤𑁆𑀥𑀅𑀭𑀺𑀬𑀥𑀦𑁄 𑀲𑀗𑁆𑀖𑁄. 𑀦𑀺𑀥𑀺𑀤𑀲𑁆𑀲𑀦𑀓𑁄 𑀯𑀺𑀬 ¶ 𑀩𑀼𑀤𑁆𑀥𑁄, 𑀦𑀺𑀥𑀺 𑀯𑀺𑀬 𑀥𑀫𑁆𑀫𑁄, 𑀦𑀺𑀥𑀺𑀧𑁆𑀧𑀢𑁆𑀢𑁄 𑀯𑀺𑀬 𑀚𑀦𑁄 𑀲𑀗𑁆𑀖𑁄.

𑀅𑀧𑀺𑀘 𑀅𑀪𑀬𑀤𑁄 𑀯𑀺𑀬 𑀯𑀻𑀭𑀧𑀼𑀭𑀺𑀲𑁄 𑀩𑀼𑀤𑁆𑀥𑁄, 𑀅𑀪𑀬𑀫𑀺𑀯 𑀥𑀫𑁆𑀫𑁄, 𑀲𑀫𑁆𑀧𑀢𑁆𑀢𑀸𑀪𑀬𑁄 𑀯𑀺𑀬 𑀚𑀦𑁄 𑀅𑀘𑁆𑀘𑀦𑁆𑀢𑀲𑀩𑁆𑀩𑀪𑀬𑁄 𑀲𑀗𑁆𑀖𑁄. 𑀅𑀲𑁆𑀲𑀸𑀲𑀓𑁄 𑀯𑀺𑀬 𑀩𑀼𑀤𑁆𑀥𑁄, 𑀅𑀲𑁆𑀲𑀸𑀲𑁄 𑀯𑀺𑀬 𑀥𑀫𑁆𑀫𑁄, 𑀅𑀲𑁆𑀲𑀢𑁆𑀣𑀚𑀦𑁄 𑀯𑀺𑀬 𑀲𑀗𑁆𑀖𑁄. 𑀲𑀼𑀫𑀺𑀢𑁆𑀢𑁄 𑀯𑀺𑀬 𑀩𑀼𑀤𑁆𑀥𑁄, 𑀳𑀺𑀢𑀽𑀧𑀤𑁂𑀲𑁄 𑀯𑀺𑀬 𑀥𑀫𑁆𑀫𑁄, 𑀳𑀺𑀢𑀽𑀧𑀬𑁄𑀕𑁂𑀦 𑀧𑀢𑁆𑀢𑀲𑀤𑀢𑁆𑀣𑁄 𑀯𑀺𑀬 𑀚𑀦𑁄 𑀲𑀗𑁆𑀖𑁄. 𑀥𑀦𑀸𑀓𑀭𑁄 𑀯𑀺𑀬 𑀩𑀼𑀤𑁆𑀥𑁄, 𑀥𑀦𑀲𑀸𑀭𑁄 𑀯𑀺𑀬 𑀥𑀫𑁆𑀫𑁄, 𑀥𑀦𑀲𑀸𑀭𑀽𑀧𑀪𑁄𑀕𑁄 𑀯𑀺𑀬 𑀚𑀦𑁄 𑀲𑀗𑁆𑀖𑁄. 𑀭𑀸𑀚𑀓𑀼𑀫𑀸𑀭𑀦𑁆𑀳𑀸𑀧𑀓𑁄 𑀯𑀺𑀬 𑀩𑀼𑀤𑁆𑀥𑁄, 𑀲𑀻𑀲𑀦𑁆𑀳𑀸𑀦𑀲𑀮𑀺𑀮𑀁 𑀯𑀺𑀬 𑀥𑀫𑁆𑀫𑁄, 𑀲𑀼𑀦𑁆𑀳𑀸𑀢𑀭𑀸𑀚𑀓𑀼𑀫𑀸𑀭𑀯𑀕𑁆𑀕𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑀮𑀺𑀮𑀲𑀼𑀦𑁆𑀳𑀸𑀢𑁄 𑀲𑀗𑁆𑀖𑁄. 𑀅𑀮𑀗𑁆𑀓𑀸𑀭𑀓𑀸𑀭𑀓𑁄 𑀯𑀺𑀬 𑀩𑀼𑀤𑁆𑀥𑁄, 𑀅𑀮𑀗𑁆𑀓𑀸𑀭𑁄 𑀯𑀺𑀬 𑀥𑀫𑁆𑀫𑁄, 𑀅𑀮𑀗𑁆𑀓𑀢𑀭𑀸𑀚𑀧𑀼𑀢𑁆𑀢𑀕𑀡𑁄 ¶ 𑀯𑀺𑀬 𑀲𑀤𑁆𑀥𑀫𑁆𑀫𑀸𑀮𑀗𑁆𑀓𑀢𑁄 𑀲𑀗𑁆𑀖𑁄. 𑀘𑀦𑁆𑀤𑀦𑀭𑀼𑀓𑁆𑀔𑁄 𑀯𑀺𑀬 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑀕𑀦𑁆𑀥𑁄 𑀯𑀺𑀬 𑀥𑀫𑁆𑀫𑁄, 𑀘𑀦𑁆𑀤𑀦𑀼𑀧𑀪𑁄𑀕𑁂𑀦 𑀲𑀦𑁆𑀢𑀧𑀭𑀺𑀴𑀸𑀳𑁄 𑀯𑀺𑀬 𑀚𑀦𑁄 𑀲𑀤𑁆𑀥𑀫𑁆𑀫𑀽𑀧𑀪𑁄𑀕𑁂𑀦 𑀲𑀦𑁆𑀢𑀧𑀭𑀺𑀴𑀸𑀳𑁄 𑀲𑀗𑁆𑀖𑁄. 𑀤𑀸𑀬𑀚𑁆𑀚𑀲𑀫𑁆𑀧𑀤𑀸𑀦𑀓𑁄 𑀯𑀺𑀬 𑀧𑀺𑀢𑀸 𑀩𑀼𑀤𑁆𑀥𑁄, 𑀤𑀸𑀬𑀚𑁆𑀚𑀁 𑀯𑀺𑀬 𑀥𑀫𑁆𑀫𑁄, 𑀤𑀸𑀬𑀚𑁆𑀚𑀳𑀭𑁄 𑀧𑀼𑀢𑁆𑀢𑀯𑀕𑁆𑀕𑁄 𑀯𑀺𑀬 𑀲𑀤𑁆𑀥𑀫𑁆𑀫𑀤𑀸𑀬𑀚𑁆𑀚𑀳𑀭𑁄 𑀲𑀗𑁆𑀖𑁄. 𑀯𑀺𑀓𑀲𑀺𑀢𑀧𑀤𑀼𑀫𑀁 ¶ 𑀯𑀺𑀬 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑀫𑀥𑀼 𑀯𑀺𑀬 𑀥𑀫𑁆𑀫𑁄, 𑀢𑀤𑀼𑀧𑀪𑁄𑀕𑀻𑀪𑀫𑀭𑀕𑀡𑁄 𑀯𑀺𑀬 𑀲𑀗𑁆𑀖𑁄. 𑀏𑀯𑀁 𑀲𑀭𑀡𑀢𑁆𑀢𑀬𑀫𑁂𑀢𑀜𑁆𑀘, 𑀉𑀧𑀫𑀸𑀳𑀺 𑀧𑀓𑀸𑀲𑀬𑁂.

𑀏𑀢𑁆𑀢𑀸𑀯𑀢𑀸 𑀘 𑀬𑀸 𑀧𑀼𑀩𑁆𑀩𑁂 ‘‘𑀓𑁂𑀦 𑀓𑀢𑁆𑀣 𑀓𑀤𑀸 𑀓𑀲𑁆𑀫𑀸, 𑀪𑀸𑀲𑀺𑀢𑀁 𑀲𑀭𑀡𑀢𑁆𑀢𑀬’’𑀦𑁆𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀢𑁆𑀣𑀯𑀡𑁆𑀡𑀦𑀸𑀬 𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀲𑀸 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀲𑀭𑀡𑀢𑁆𑀢𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀺𑀓𑁆𑀔𑀸𑀧𑀤𑀧𑀸𑀞𑀫𑀸𑀢𑀺𑀓𑀸

𑀏𑀯𑀁 ¶ 𑀲𑀭𑀡𑀕𑀫𑀦𑁂𑀳𑀺 𑀲𑀸𑀲𑀦𑁄𑀢𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀲𑀸𑀲𑀦𑀁 𑀑𑀢𑀺𑀡𑁆𑀡𑁂𑀦 𑀉𑀧𑀸𑀲𑀓𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸 𑀬𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀞𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀸𑀞𑀲𑁆𑀲 𑀇𑀤𑀸𑀦𑀺 𑀯𑀡𑁆𑀡𑀦𑀢𑁆𑀣𑀁 𑀅𑀬𑀁 𑀫𑀸𑀢𑀺𑀓𑀸 𑁋

‘‘𑀬𑁂𑀦 ¶ 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀯𑀼𑀢𑁆𑀢𑀸𑀦𑁂𑀢𑀸𑀦𑀺 𑀢𑀁 𑀦𑀬𑀁;

𑀯𑀢𑁆𑀯𑀸 𑀓𑀢𑁆𑀯𑀸 𑀯𑀯𑀢𑁆𑀣𑀸𑀦𑀁, 𑀲𑀸𑀥𑀸𑀭𑀡𑀯𑀺𑀲𑁂𑀲𑀢𑁄.

‘‘𑀧𑀓𑀢𑀺𑀬𑀸 𑀘 𑀬𑀁 𑀯𑀚𑁆𑀚𑀁, 𑀯𑀚𑁆𑀚𑀁 𑀧𑀡𑁆𑀡𑀢𑁆𑀢𑀺𑀬𑀸 𑀘 𑀬𑀁;

𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁 𑀓𑀢𑁆𑀯𑀸, 𑀧𑀤𑀸𑀦𑀁 𑀩𑁆𑀬𑀜𑁆𑀚𑀦𑀢𑁆𑀣𑀢𑁄.

‘‘𑀲𑀸𑀥𑀸𑀭𑀡𑀸𑀦𑀁 𑀲𑀩𑁆𑀩𑁂𑀲𑀁, 𑀲𑀸𑀥𑀸𑀭𑀡𑀯𑀺𑀪𑀸𑀯𑀦𑀁;

𑀅𑀣 𑀧𑀜𑁆𑀘𑀲𑀼 𑀧𑀼𑀩𑁆𑀩𑁂𑀲𑀼, 𑀯𑀺𑀲𑁂𑀲𑀢𑁆𑀣𑀧𑁆𑀧𑀓𑀸𑀲𑀢𑁄.

‘‘𑀧𑀸𑀡𑀸𑀢𑀺𑀧𑀸𑀢𑀧𑀪𑀼𑀢𑀺-𑀳𑁂𑀓𑀢𑀸𑀦𑀸𑀦𑀢𑀸𑀤𑀺𑀢𑁄;

𑀆𑀭𑀫𑁆𑀫𑀡𑀸𑀤𑀸𑀦𑀪𑁂𑀤𑀸, 𑀫𑀳𑀸𑀲𑀸𑀯𑀚𑁆𑀚𑀢𑁄 𑀢𑀣𑀸.

‘‘𑀧𑀬𑁄𑀕𑀗𑁆𑀕𑀲𑀫𑀼𑀝𑁆𑀞𑀸𑀦𑀸, 𑀯𑁂𑀤𑀦𑀸𑀫𑀽𑀮𑀓𑀫𑁆𑀫𑀢𑁄;

𑀯𑀺𑀭𑀫𑀢𑁄 𑀘 𑀨𑀮𑀢𑁄, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

‘‘𑀬𑁄𑀚𑁂𑀢𑀩𑁆𑀩𑀁 ¶ 𑀢𑀢𑁄 𑀬𑀼𑀢𑁆𑀢𑀁, 𑀧𑀘𑁆𑀙𑀺𑀫𑁂𑀲𑁆𑀯𑀧𑀺 𑀧𑀜𑁆𑀘𑀲𑀼;

𑀆𑀯𑁂𑀡𑀺𑀓𑀜𑁆𑀘 𑀯𑀢𑁆𑀢𑀩𑁆𑀩𑀁, 𑀜𑁂𑀬𑁆𑀬𑀸 𑀳𑀻𑀦𑀸𑀤𑀺𑀢𑀸𑀧𑀺 𑀘𑀸’’𑀢𑀺.

𑀢𑀢𑁆𑀣 𑀏𑀢𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀻𑀢𑀺𑀆𑀤𑀻𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀕𑀯𑀢𑀸 𑀏𑀯 𑀯𑀼𑀢𑁆𑀢𑀸𑀦𑀺, 𑀦 ¶ 𑀲𑀸𑀯𑀓𑀸𑀤𑀻𑀳𑀺. 𑀢𑀸𑀦𑀺 𑀘 𑀲𑀸𑀯𑀢𑁆𑀣𑀺𑀬𑀁 𑀯𑀼𑀢𑁆𑀢𑀸𑀦𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀢𑁄 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁂𑀦 𑀲𑀸𑀫𑀡𑁂𑀭𑀸𑀦𑀁 𑀲𑀺𑀓𑁆𑀔𑀸𑀧𑀤𑀯𑀯𑀢𑁆𑀣𑀸𑀧𑀦𑀢𑁆𑀣𑀁. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀅𑀣 𑀔𑁄 𑀪𑀕𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 …𑀧𑁂… 𑀅𑀣 𑀔𑁄 𑀲𑀸𑀫𑀡𑁂𑀭𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀓𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀓𑀢𑁆𑀣 𑀘 𑀅𑀫𑁆𑀳𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀲𑀼 𑀘 𑀲𑀸𑀫𑀡𑁂𑀭𑁂𑀳𑀺 𑀲𑀺𑀓𑁆𑀔𑀺𑀢𑀼𑀁 ¶ , 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀻…𑀧𑁂… 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀯𑁂𑀭𑀫𑀡𑀻’’𑀢𑀺 (𑀫𑀳𑀸𑀯. 𑁧𑁦𑁫).

𑀢𑀸𑀦𑁂𑀢𑀸𑀦𑀺 ‘‘𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 (𑀤𑀻. 𑀦𑀺. 𑁧.𑁧𑁯𑁩; 𑀫. 𑀦𑀺. 𑁨.𑁨𑁪; 𑀯𑀺𑀪. 𑁫𑁦𑁮) 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀭𑀡𑀕𑀫𑀦𑁂𑀲𑀼 𑀘 𑀤𑀲𑁆𑀲𑀺𑀢𑀧𑀸𑀞𑀸𑀦𑀼𑀲𑀸𑀭𑁂𑀦 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀏𑀯𑀁 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀢𑀸𑀯 ‘‘𑀬𑁂𑀦 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀯𑀼𑀢𑁆𑀢𑀸𑀦𑁂𑀢𑀸𑀦𑀺 𑀢𑀁 𑀦𑀬𑀁 𑀯𑀢𑁆𑀯𑀸’’𑀢𑀺 𑀲𑁄 𑀦𑀬𑁄 𑀤𑀝𑁆𑀞𑀩𑁆𑀩𑁄.

𑀲𑀸𑀥𑀸𑀭𑀡𑀯𑀺𑀲𑁂𑀲𑀯𑀯𑀢𑁆𑀣𑀸𑀦𑀁

𑀏𑀢𑁆𑀣 𑀘 𑀆𑀤𑀺𑀢𑁄 𑀤𑁆𑀯𑁂 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀉𑀧𑀸𑀲𑀓𑀸𑀦𑀁 𑀲𑀸𑀫𑀡𑁂𑀭𑀸𑀦𑀜𑁆𑀘 𑀲𑀸𑀥𑀸𑀭𑀡𑀸𑀦𑀺 𑀦𑀺𑀘𑁆𑀘𑀲𑀻𑀮𑀯𑀲𑁂𑀦. 𑀉𑀧𑁄𑀲𑀣𑀲𑀻𑀮𑀯𑀲𑁂𑀦 𑀧𑀦 𑀉𑀧𑀸𑀲𑀓𑀸𑀦𑀁 𑀲𑀢𑁆𑀢𑀫𑀝𑁆𑀞𑀫𑀁 𑀘𑁂𑀓𑀁 𑀅𑀗𑁆𑀕𑀁 𑀓𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀺𑀫𑀯𑀚𑁆𑀚𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀲𑀸𑀫𑀡𑁂𑀭𑁂𑀳𑀺 𑀲𑀸𑀥𑀸𑀭𑀡𑀸𑀦𑀺, 𑀧𑀘𑁆𑀙𑀺𑀫𑀁 𑀧𑀦 𑀲𑀸𑀫𑀡𑁂𑀭𑀸𑀦𑀫𑁂𑀯 𑀯𑀺𑀲𑁂𑀲𑀪𑀽𑀢𑀦𑁆𑀢𑀺 𑀏𑀯𑀁 𑀲𑀸𑀥𑀸𑀭𑀡𑀯𑀺𑀲𑁂𑀲𑀢𑁄 𑀯𑀯𑀢𑁆𑀣𑀸𑀦𑀁 𑀓𑀸𑀢𑀩𑁆𑀩𑀁. 𑀧𑀼𑀭𑀺𑀫𑀸𑀦𑀺 𑀘𑁂𑀢𑁆𑀣 𑀧𑀜𑁆𑀘 𑀏𑀓𑀦𑁆𑀢𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀧𑀓𑀢𑀺𑀯𑀚𑁆𑀚𑀢𑁄 𑀯𑁂𑀭𑀫𑀡𑀺𑀬𑀸, 𑀲𑁂𑀲𑀸𑀦𑀺 ¶ 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑁄𑀢𑀺 𑀏𑀯𑀁 𑀧𑀓𑀢𑀺𑀬𑀸 𑀘 𑀬𑀁 𑀯𑀚𑁆𑀚𑀁, 𑀯𑀚𑁆𑀚𑀁 𑀧𑀡𑁆𑀡𑀢𑁆𑀢𑀺𑀬𑀸 𑀘 𑀬𑀁, 𑀢𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁.

𑀲𑀸𑀥𑀸𑀭𑀡𑀯𑀺𑀪𑀸𑀯𑀦𑀸

𑀬𑀲𑁆𑀫𑀸 𑀘𑁂𑀢𑁆𑀣 ‘‘𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀏𑀢𑀸𑀦𑀺 𑀲𑀩𑁆𑀩𑀲𑀸𑀥𑀸𑀭𑀡𑀸𑀦𑀺 𑀧𑀤𑀸𑀦𑀺, 𑀢𑀲𑁆𑀫𑀸 𑀏𑀢𑁂𑀲𑀁 𑀧𑀤𑀸𑀦𑀁 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀬𑀁 𑀲𑀸𑀥𑀸𑀭𑀡𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋

𑀢𑀢𑁆𑀣 ¶ 𑀩𑁆𑀬𑀜𑁆𑀚𑀦𑀢𑁄 𑀢𑀸𑀯 𑀯𑁂𑀭𑀁 𑀫𑀡𑀢𑀻𑀢𑀺 𑀯𑁂𑀭𑀫𑀡𑀻, 𑀯𑁂𑀭𑀁 𑀧𑀚𑀳𑀢𑀺, 𑀯𑀺𑀦𑁄𑀤𑁂𑀢𑀺, 𑀩𑁆𑀬𑀦𑁆𑀢𑀻𑀓𑀭𑁄𑀢𑀺, 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀫𑀢𑀺 𑀯𑀸 𑀏𑀢𑀸𑀬 𑀓𑀭𑀡𑀪𑀽𑀢𑀸𑀬 𑀯𑁂𑀭𑀫𑁆𑀳𑀸 𑀧𑀼𑀕𑁆𑀕𑀮𑁄𑀢𑀺, 𑀯𑀺𑀓𑀸𑀭𑀲𑁆𑀲 𑀯𑁂𑀓𑀸𑀭𑀁 𑀓𑀢𑁆𑀯𑀸 𑀯𑁂𑀭𑀫𑀡𑀻. 𑀢𑁂𑀦𑁂𑀯 𑀘𑁂𑀢𑁆𑀣 ‘‘𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀯𑀺𑀭𑀫𑀡𑀺𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀤𑁆𑀯𑀺𑀥𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀺. 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸, 𑀧𑀚𑁆𑀚𑀢𑁂 𑀅𑀦𑁂𑀦𑀸𑀢𑀺 𑀧𑀤𑀁. 𑀲𑀺𑀓𑁆𑀔𑀸𑀬 𑀧𑀤𑀁 𑀲𑀺𑀓𑁆𑀔𑀸𑀧𑀤𑀁, 𑀲𑀺𑀓𑁆𑀔𑀸𑀬 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀽𑀮𑀁 𑀦𑀺𑀲𑁆𑀲𑀬𑁄 𑀧𑀢𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀭𑀫𑀡𑀻 𑀏𑀯 𑀲𑀺𑀓𑁆𑀔𑀸𑀧𑀤𑀁 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁, 𑀯𑀺𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀯𑀸 𑀤𑀼𑀢𑀺𑀬𑁂𑀦 𑀦𑀬𑁂𑀦. 𑀲𑀫𑁆𑀫𑀸 𑀆𑀤𑀺𑀬𑀸𑀫𑀺 𑀲𑀫𑀸𑀤𑀺𑀬𑀸𑀫𑀺, 𑀅𑀯𑀻𑀢𑀺𑀓𑁆𑀓𑀫𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀔𑀡𑁆𑀟𑀓𑀸𑀭𑀺𑀢𑀸𑀬 𑀅𑀘𑁆𑀙𑀺𑀤𑁆𑀤𑀓𑀸𑀭𑀺𑀢𑀸𑀬 𑀅𑀲𑀩𑀮𑀓𑀸𑀭𑀺𑀢𑀸𑀬 𑀘 𑀆𑀤𑀺𑀬𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀢𑁆𑀣𑀢𑁄 𑀧𑀦 𑀯𑁂𑀭𑀫𑀡𑀻𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺, 𑀲𑀸 ¶ 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀦𑁆𑀢𑀲𑁆𑀲 ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀡𑀸𑀢𑀺𑀧𑀸𑀢𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄’’𑀢𑀺 𑀏𑀯𑀫𑀸𑀤𑀺𑀦𑀸 (𑀯𑀺𑀪. 𑁭𑁦𑁪) 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸. 𑀓𑀸𑀫𑀜𑁆𑀘𑁂𑀲𑀸 𑀯𑁂𑀭𑀫𑀡𑀻 𑀦𑀸𑀫 𑀮𑁄𑀓𑀼𑀢𑁆𑀢𑀭𑀸𑀧𑀺 𑀅𑀢𑁆𑀣𑀺, 𑀇𑀥 𑀧𑀦 𑀲𑀫𑀸𑀤𑀺𑀬𑀸𑀫𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀫𑀸𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀸𑀭𑀳𑀸, 𑀢𑀲𑁆𑀫𑀸 𑀲𑀸 𑀦 𑀳𑁄𑀢𑀻𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀻𑀢𑀺 𑀯𑀼𑀢𑁆𑀢𑀸.

𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀲𑀻𑀮𑀁 𑀮𑁄𑀓𑀺𑀓𑀸 𑀯𑀺𑀧𑀲𑁆𑀲𑀦𑀸 𑀭𑀽𑀧𑀸𑀭𑀽𑀧𑀛𑀸𑀦𑀸𑀦𑀺 𑀅𑀭𑀺𑀬𑀫𑀕𑁆𑀕𑁄 𑀘 𑀲𑀺𑀓𑁆𑀔𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀬𑀣𑀸𑀳 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 ¶ 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸.

‘‘𑀓𑀢𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸.

‘‘𑀓𑀢𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀧𑀢𑁆𑀢𑀺𑀬𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀳𑀕𑀢𑀁…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸.

‘‘𑀓𑀢𑀫𑁂 ¶ 𑀥𑀫𑁆𑀫𑀸 𑀲𑀺𑀓𑁆𑀔𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸’’𑀢𑀺 (𑀯𑀺𑀪. 𑁭𑁧𑁨-𑁭𑁧𑁩).

𑀏𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀬𑀸𑀬 𑀓𑀸𑀬𑀘𑀺 𑀲𑀺𑀓𑁆𑀔𑀸𑀬 𑀧𑀤𑀁 𑀅𑀥𑀺𑀕𑀫𑀽𑀧𑀸𑀬𑁄, 𑀅𑀣 𑀯𑀸 𑀫𑀽𑀮𑀁 𑀦𑀺𑀲𑁆𑀲𑀬𑁄 𑀧𑀢𑀺𑀝𑁆𑀞𑀸𑀢𑀺 𑀲𑀺𑀓𑁆𑀔𑀸𑀧𑀤𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄’’𑀢𑀺 𑀏𑀯𑀫𑀸𑀤𑀺 (𑀲𑀁. 𑀦𑀺. 𑁫.𑁧𑁮𑁨). 𑀏𑀯𑀫𑁂𑀢𑁆𑀣 𑀲𑀸𑀥𑀸𑀭𑀡𑀸𑀦𑀁 𑀧𑀤𑀸𑀦𑀁 𑀲𑀸𑀥𑀸𑀭𑀡𑀸 𑀩𑁆𑀬𑀜𑁆𑀚𑀦𑀢𑁄 𑀅𑀢𑁆𑀣𑀢𑁄 𑀘 𑀯𑀺𑀪𑀸𑀯𑀦𑀸 𑀓𑀸𑀢𑀩𑁆𑀩𑀸.

𑀧𑀼𑀭𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 𑁋 ‘‘𑀅𑀣 𑀧𑀜𑁆𑀘𑀲𑀼 𑀧𑀼𑀩𑁆𑀩𑁂𑀲𑀼, 𑀯𑀺𑀲𑁂𑀲𑀢𑁆𑀣𑀧𑁆𑀧𑀓𑀸𑀲𑀢𑁄…𑀧𑁂… 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄’’𑀢𑀺 ¶ , 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀏𑀢𑁆𑀣 𑀢𑀸𑀯 𑀧𑀸𑀡𑁄𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀝𑀺𑀩𑀤𑁆𑀥𑀸 𑀔𑀦𑁆𑀥𑀲𑀦𑁆𑀢𑀢𑀺, 𑀢𑀁 𑀯𑀸 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀲𑀢𑁆𑀢𑁄. 𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀢𑀲𑁆𑀲 𑀧𑀸𑀡𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀬𑀢𑁆𑀣 𑀧𑀭𑁄 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄 𑀅𑀦𑀼𑀧𑀯𑀚𑁆𑀚𑁄 𑀘 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀏𑀯 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀁, 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀫𑁂𑀣𑀼𑀦𑀧𑁆𑀧𑀝𑀺𑀲𑁂𑀯𑀦𑀸 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑁂𑀯𑀦𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 ¶ . 𑀫𑀼𑀲𑀸𑀯𑀸𑀤𑁄𑀢𑀺 𑀏𑀢𑁆𑀣 𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑀬𑁄𑀕𑁄 𑀯𑀸, 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀫𑁂𑀯 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀫𑀺𑀘𑁆𑀙𑀸𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀲𑀼𑀭𑀸𑀢𑀺 𑀧𑀜𑁆𑀘 𑀲𑀼𑀭𑀸 𑁋 𑀧𑀺𑀝𑁆𑀞𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸 𑀘𑀸𑀢𑀺. 𑀫𑁂𑀭𑀬𑀫𑁆𑀧𑀺 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀕𑀼𑀴𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑀁. 𑀫𑀚𑁆𑀚𑀦𑁆𑀢𑀺 𑀢𑀤𑀼𑀪𑀬𑀫𑁂𑀯 𑀫𑀤𑀦𑀺𑀬𑀝𑁆𑀞𑁂𑀦 𑀫𑀚𑁆𑀚𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀫𑀤𑀦𑀺𑀬𑀁, 𑀬𑁂𑀦 𑀧𑀻𑀢𑁂𑀦 𑀫𑀢𑁆𑀢𑁄 𑀳𑁄𑀢𑀺 𑀧𑀫𑀢𑁆𑀢𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀚𑁆𑀚𑀁. 𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀧𑀺𑀯𑀢𑀺 𑀅𑀚𑁆𑀛𑁄𑀳𑀭𑀢𑀺, 𑀲𑀸 𑀘𑁂𑀢𑀦𑀸 𑀫𑀤𑀧𑁆𑀧𑀫𑀸𑀤𑀳𑁂𑀢𑀼𑀢𑁄 𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀢𑁄 𑀅𑀚𑁆𑀛𑁄𑀳𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀸𑀦𑀁 𑀅𑀚𑁆𑀛𑁄𑀳𑀭𑀡𑀘𑁂𑀢𑀦𑀸 ‘‘𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦’’𑀦𑁆𑀢𑀺 ¶ 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀪𑀼𑀢𑀻𑀳𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀓𑀢𑀸𑀦𑀸𑀦𑀢𑀸𑀤𑀺𑀯𑀺𑀦𑀺𑀘𑁆𑀙𑀬𑀁

𑀏𑀓𑀢𑀸𑀦𑀸𑀦𑀢𑀸𑀤𑀺𑀢𑁄𑀢𑀺 ¶ 𑀏𑀢𑁆𑀣 𑀆𑀳 𑁋 𑀓𑀺𑀁 𑀧𑀦 𑀯𑀚𑁆𑀛𑀯𑀥𑀓𑀧𑁆𑀧𑀬𑁄𑀕𑀘𑁂𑀢𑀦𑀸𑀤𑀻𑀦𑀁 𑀏𑀓𑀢𑀸𑀬 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀜𑁆𑀜𑀲𑁆𑀲 𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀦𑁄 𑀏𑀓𑀢𑁆𑀢𑀁, 𑀦𑀸𑀦𑀢𑀸𑀬 𑀦𑀸𑀦𑀢𑁆𑀢𑀁 𑀳𑁄𑀢𑀺, 𑀉𑀤𑀸𑀳𑀼 𑀦𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑀁 𑀯𑀼𑀘𑁆𑀘𑀢𑀺? 𑀬𑀤𑀺 𑀢𑀸𑀯 𑀏𑀓𑀢𑀸𑀬 𑀏𑀓𑀢𑁆𑀢𑀁, 𑀅𑀣 𑀬𑀤𑀸 𑀏𑀓𑀁 𑀯𑀚𑁆𑀛𑀁 𑀩𑀳𑀽 𑀯𑀥𑀓𑀸 𑀯𑀥𑁂𑀦𑁆𑀢𑀺, 𑀏𑀓𑁄 𑀯𑀸 𑀯𑀥𑀓𑁄 𑀩𑀳𑀼𑀓𑁂 𑀯𑀚𑁆𑀛𑁂 𑀯𑀥𑁂𑀢𑀺, 𑀏𑀓𑁂𑀦 𑀯𑀸 𑀲𑀸𑀳𑀢𑁆𑀣𑀺𑀓𑀸𑀤𑀺𑀦𑀸 𑀧𑀬𑁄𑀕𑁂𑀦 𑀩𑀳𑀽 𑀯𑀚𑁆𑀛𑀸 𑀯𑀥𑀻𑀬𑀦𑁆𑀢𑀺, 𑀏𑀓𑀸 𑀯𑀸 𑀘𑁂𑀢𑀦𑀸 𑀩𑀳𑀽𑀦𑀁 𑀯𑀚𑁆𑀛𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀤𑀸 𑀏𑀓𑁂𑀦 𑀧𑀸𑀡𑀸𑀢𑀺𑀧𑀸𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀦𑀸𑀦𑀢𑀸𑀬 𑀦𑀸𑀦𑀢𑁆𑀢𑀁. 𑀅𑀣 𑀬𑀤𑀸 𑀏𑀓𑁄 𑀯𑀥𑀓𑁄 𑀏𑀓𑀲𑁆𑀲𑀢𑁆𑀣𑀸𑀬 𑀏𑀓𑀁 𑀧𑀬𑁄𑀕𑀁 𑀓𑀭𑁄𑀦𑁆𑀢𑁄 𑀩𑀳𑀽 𑀯𑀚𑁆𑀛𑁂 𑀯𑀥𑁂𑀢𑀺, 𑀩𑀳𑀽 𑀯𑀸 𑀯𑀥𑀓𑀸 𑀤𑁂𑀯𑀤𑀢𑁆𑀢𑀬𑀜𑁆𑀜𑀤𑀢𑁆𑀢𑀲𑁄𑀫𑀤𑀢𑁆𑀢𑀸𑀤𑀻𑀦𑀁 𑀩𑀳𑀽𑀦𑀫𑀢𑁆𑀣𑀸𑀬 𑀩𑀳𑀽 𑀧𑀬𑁄𑀕𑁂 𑀓𑀭𑁄𑀦𑁆𑀢𑀸 𑀏𑀓𑀫𑁂𑀯 𑀤𑁂𑀯𑀤𑀢𑁆𑀢𑀁 𑀬𑀜𑁆𑀜𑀤𑀢𑁆𑀢𑀁 𑀲𑁄𑀫𑀤𑀢𑁆𑀢𑀁 𑀯𑀸 𑀯𑀥𑁂𑀦𑁆𑀢𑀺, 𑀩𑀳𑀽𑀳𑀺 𑀯𑀸 𑀲𑀸𑀳𑀢𑁆𑀣𑀺𑀓𑀸𑀤𑀻𑀳𑀺 𑀧𑀬𑁄𑀕𑁂𑀳𑀺 𑀏𑀓𑁄 𑀯𑀚𑁆𑀛𑁄 𑀯𑀥𑀻𑀬𑀢𑀺. 𑀩𑀳𑀽 𑀯𑀸 𑀘𑁂𑀢𑀦𑀸 𑀏𑀓𑀲𑁆𑀲𑁂𑀯 𑀯𑀚𑁆𑀛𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀢𑀤𑀸 𑀩𑀳𑀽𑀳𑀺 𑀧𑀸𑀡𑀸𑀢𑀺𑀧𑀸𑀢𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀉𑀪𑀬𑀫𑁆𑀧𑀺 𑀘𑁂𑀢𑀫𑀬𑀼𑀢𑁆𑀢𑀁. 𑀅𑀣 𑀦𑁂𑀯 𑀏𑀢𑁂𑀲𑀁 𑀯𑀚𑁆𑀛𑀸𑀤𑀻𑀦𑀁 𑀏𑀓𑀢𑀸𑀬 𑀏𑀓𑀢𑁆𑀢𑀁, 𑀦𑀸𑀦𑀢𑀸𑀬 𑀦𑀸𑀦𑀢𑁆𑀢𑀁, 𑀅𑀜𑁆𑀜𑀣𑁂𑀯 𑀢𑀼 𑀏𑀓𑀢𑁆𑀢𑀁 𑀦𑀸𑀦𑀢𑁆𑀢𑀜𑁆𑀘 𑀳𑁄𑀢𑀺, 𑀢𑀁 𑀯𑀢𑁆𑀢𑀩𑁆𑀩𑀁 𑀧𑀸𑀡𑀸𑀢𑀺𑀧𑀸𑀢𑀲𑁆𑀲, 𑀏𑀯𑀁 𑀲𑁂𑀲𑀸𑀦𑀫𑁆𑀧𑀻𑀢𑀺.

𑀯𑀼𑀘𑁆𑀘𑀢𑁂 ¶ 𑁋 𑀢𑀢𑁆𑀣 𑀢𑀸𑀯 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀦 𑀯𑀚𑁆𑀛𑀯𑀥𑀓𑀸𑀤𑀻𑀦𑀁 𑀧𑀘𑁆𑀘𑁂𑀓𑀫𑁂𑀓𑀢𑀸𑀬 𑀏𑀓𑀢𑀸, 𑀦𑀸𑀦𑀢𑀸𑀬 𑀦𑀸𑀦𑀢𑀸, 𑀓𑀺𑀦𑁆𑀢𑀼 𑀯𑀚𑁆𑀛𑀯𑀥𑀓𑀸𑀤𑀻𑀦𑀁 𑀬𑀼𑀕𑀦𑀦𑁆𑀥𑀫𑁂𑀓𑀢𑀸𑀬 𑀏𑀓𑀢𑀸, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑀼 𑀢𑁂𑀲𑀁, 𑀢𑀢𑁄 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀦𑀸𑀦𑀢𑀸𑀬 𑀦𑀸𑀦𑀢𑀸. 𑀢𑀣𑀸 𑀳𑀺 𑀩𑀳𑀽𑀲𑀼 𑀯𑀥𑀓𑁂𑀲𑀼 𑀩𑀳𑀽𑀳𑀺 𑀲𑀭𑀓𑁆𑀔𑁂𑀧𑀸𑀤𑀻𑀳𑀺 𑀏𑀓𑁂𑀦 𑀯𑀸 𑀑𑀧𑀸𑀢𑀔𑀡𑀦𑀸𑀤𑀺𑀦𑀸 𑀧𑀬𑁄𑀕𑁂𑀦 𑀩𑀳𑀽 𑀯𑀚𑁆𑀛𑁂 𑀯𑀥𑁂𑀦𑁆𑀢𑁂𑀲𑀼𑀧𑀺 𑀩𑀳𑀽 𑀧𑀸𑀡𑀸𑀢𑀺𑀧𑀸𑀢𑀸 𑀳𑁄𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀯𑀥𑀓𑁂 𑀏𑀓𑁂𑀦, 𑀩𑀳𑀽𑀳𑀺 𑀯𑀸 𑀧𑀬𑁄𑀕𑁂𑀳𑀺 𑀢𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸𑀬 𑀘 𑀏𑀓𑀸𑀬, 𑀩𑀳𑀽𑀳𑀺 𑀯𑀸 𑀘𑁂𑀢𑀦𑀸𑀳𑀺 𑀩𑀳𑀽 𑀯𑀚𑁆𑀛𑁂 𑀯𑀥𑁂𑀦𑁆𑀢𑁂𑀧𑀺 𑀩𑀳𑀽 𑀧𑀸𑀡𑀸𑀢𑀺𑀧𑀸𑀢𑀸 𑀳𑁄𑀦𑁆𑀢𑀺, 𑀩𑀳𑀽𑀲𑀼 𑀘 𑀯𑀥𑀓𑁂𑀲𑀼 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀩𑀳𑀽𑀳𑀺, 𑀏𑀓𑁂𑀦 𑀯𑀸 𑀧𑀬𑁄𑀕𑁂𑀦 𑀏𑀓𑀁 𑀯𑀚𑁆𑀛𑀁 𑀯𑀥𑁂𑀦𑁆𑀢𑁂𑀲𑀼𑀧𑀺 𑀩𑀳𑀽 𑀧𑀸𑀡𑀸𑀢𑀺𑀧𑀸𑀢𑀸 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀻𑀢𑀺. 𑀏𑀯𑀫𑁂𑀢𑁆𑀣 𑀏𑀓𑀢𑀸𑀦𑀸𑀦𑀢𑀸𑀤𑀺𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀆𑀭𑀫𑁆𑀫𑀡𑀢𑁄𑀢𑀺 ¶ 𑀧𑀸𑀡𑀸𑀢𑀺𑀧𑀸𑀢𑁄 𑀘𑁂𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑁄. 𑀅𑀤𑀺𑀦𑁆𑀦𑀸𑀤𑀸𑀦𑀅𑀩𑁆𑀭𑀳𑁆𑀫𑀘𑀭𑀺𑀬𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸𑀦𑀺 𑀭𑀽𑀧𑀥𑀫𑁆𑀫𑁂𑀲𑀼 𑀭𑀽𑀧𑀸𑀬𑀢𑀦𑀸𑀤𑀺𑀅𑀜𑁆𑀜𑀢𑀭𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀦𑀺. 𑀫𑀼𑀲𑀸𑀯𑀸𑀤𑁄 𑀬𑀲𑁆𑀲 𑀫𑀼𑀲𑀸 𑀪𑀡𑀢𑀺, 𑀢𑀫𑀸𑀭𑀪𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀲𑀢𑁆𑀢𑀸𑀭𑀫𑁆𑀫𑀡𑁄. 𑀅𑀩𑁆𑀭𑀳𑁆𑀫𑀘𑀭𑀺𑀬𑀫𑁆𑀧𑀺 𑀲𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀏𑀓𑁂. 𑀅𑀤𑀺𑀦𑁆𑀦𑀸𑀤𑀸𑀦𑀜𑁆𑀘 𑀬𑀤𑀸 𑀲𑀢𑁆𑀢𑁄 𑀳𑀭𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀤𑀸 𑀲𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺. 𑀅𑀧𑀺 𑀘𑁂𑀢𑁆𑀣 𑀲𑀗𑁆𑀔𑀸𑀭𑀯𑀲𑁂𑀦𑁂𑀯 𑀲𑀢𑁆𑀢𑀸𑀭𑀫𑁆𑀫𑀡𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀲𑁂𑀦𑀸𑀢𑀺. 𑀏𑀯𑀫𑁂𑀢𑁆𑀣 𑀆𑀭𑀫𑁆𑀫𑀡𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀆𑀤𑀸𑀦𑀢𑁄𑀢𑀺 ¶ 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀸𑀤𑀻𑀦𑀺 𑀘𑁂𑀢𑀸𑀦𑀺 𑀲𑀸𑀫𑀡𑁂𑀭𑁂𑀦 𑀪𑀺𑀓𑁆𑀔𑀼𑀲𑀦𑁆𑀢𑀺𑀓𑁂 𑀲𑀫𑀸𑀤𑀺𑀦𑁆𑀦𑀸𑀦𑁂𑀯 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀸𑀲𑀓𑁂𑀦 𑀧𑀦 𑀅𑀢𑁆𑀢𑀦𑀸 𑀲𑀫𑀸𑀤𑀺𑀬𑀦𑁆𑀢𑁂𑀦𑀸𑀧𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀸𑀤𑀺𑀬𑀦𑁆𑀢𑁂𑀦𑀸𑀧𑀺. 𑀏𑀓𑀚𑁆𑀛𑀁 𑀲𑀫𑀸𑀤𑀺𑀦𑁆𑀦𑀸𑀦𑀺𑀧𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀘𑁆𑀘𑁂𑀓𑀁 𑀲𑀫𑀸𑀤𑀺𑀦𑁆𑀦𑀸𑀦𑀺𑀧𑀺. 𑀓𑀺𑀦𑁆𑀢𑀼 𑀦𑀸𑀦𑀁 𑀏𑀓𑀚𑁆𑀛𑀁 𑀲𑀫𑀸𑀤𑀺𑀬𑀢𑁄 𑀏𑀓𑀸𑀬𑁂𑀯 𑀯𑀺𑀭𑀢𑀺, 𑀏𑀓𑀸𑀯 𑀘𑁂𑀢𑀦𑀸 𑀳𑁄𑀢𑀺, 𑀓𑀺𑀘𑁆𑀘𑀯𑀲𑁂𑀦 𑀧𑀦𑁂𑀢𑀸𑀲𑀁 𑀧𑀜𑁆𑀘𑀯𑀺𑀥𑀢𑁆𑀢𑀁 𑀯𑀺𑀜𑁆𑀜𑀸𑀬𑀢𑀺. 𑀧𑀘𑁆𑀘𑁂𑀓𑀁 𑀲𑀫𑀸𑀤𑀺𑀬𑀢𑁄 𑀧𑀦 𑀧𑀜𑁆𑀘𑁂𑀯 𑀯𑀺𑀭𑀢𑀺𑀬𑁄, 𑀧𑀜𑁆𑀘 𑀘 𑀘𑁂𑀢𑀦𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑁂𑀢𑁆𑀣 𑀆𑀤𑀸𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀪𑁂𑀤𑀢𑁄𑀢𑀺 𑀲𑀸𑀫𑀡𑁂𑀭𑀸𑀦𑀜𑁆𑀘𑁂𑀢𑁆𑀣 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀲𑀩𑁆𑀩𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑀺𑀬𑀸𑀦𑀺 𑀳𑀺 𑀢𑀸𑀦𑀺 𑀢𑁂𑀲𑀁, 𑀬𑀁 𑀢𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑁄𑀢𑀺, 𑀢𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀕𑀳𑀝𑁆𑀞𑀸𑀦𑀁 𑀧𑀦 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀏𑀓𑀫𑁂𑀯 𑀪𑀺𑀦𑁆𑀦𑀁 𑀳𑁄𑀢𑀺, 𑀬𑀢𑁄 ¶ 𑀢𑁂𑀲𑀁 𑀢𑀁𑀲𑀫𑀸𑀤𑀸𑀦𑁂𑀦𑁂𑀯 𑀧𑀼𑀦 𑀧𑀜𑁆𑀘𑀗𑁆𑀕𑀺𑀓𑀢𑁆𑀢𑀁 𑀲𑀻𑀮𑀲𑁆𑀲 𑀲𑀫𑁆𑀧𑀚𑁆𑀚𑀢𑀺. 𑀅𑀧𑀭𑁂 𑀧𑀦𑀸𑀳𑀼 𑁋 ‘‘𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑀸𑀤𑀺𑀦𑁆𑀦𑁂𑀲𑀼 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀏𑀓𑀫𑁂𑀯 𑀪𑀺𑀦𑁆𑀦𑀁 𑀳𑁄𑀢𑀺, ‘𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀁 𑀲𑀫𑀸𑀤𑀺𑀬𑀸𑀫𑀻’𑀢𑀺 𑀏𑀯𑀁 𑀧𑀦 𑀏𑀓𑀢𑁄 𑀲𑀫𑀸𑀤𑀺𑀦𑁆𑀦𑁂𑀲𑀼 𑀏𑀓𑀲𑁆𑀫𑀺𑀁 𑀪𑀺𑀦𑁆𑀦𑁂 𑀲𑁂𑀲𑀸𑀦𑀺𑀧𑀺 𑀲𑀩𑁆𑀩𑀸𑀦𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀲𑀫𑀸𑀤𑀺𑀦𑁆𑀦𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸, 𑀬𑀁 𑀢𑀁 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀢𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄’’𑀢𑀺. 𑀏𑀯𑀫𑁂𑀢𑁆𑀣 𑀪𑁂𑀤𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀫𑀳𑀸𑀲𑀸𑀯𑀚𑁆𑀚𑀢𑁄𑀢𑀺 𑀕𑀼𑀡𑀯𑀺𑀭𑀳𑀺𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼 𑀧𑀸𑀡𑁂𑀲𑀼 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀧𑀸𑀡𑀸𑀢𑀺𑀧𑀸𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀲𑀭𑀻𑀭𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬. 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬. 𑀕𑀼𑀡𑀯𑀦𑁆𑀢𑁂𑀲𑀼 𑀧𑀦 𑀫𑀦𑀼𑀲𑁆𑀲𑀸𑀤𑀻𑀲𑀼 𑀅𑀧𑁆𑀧𑀕𑀼𑀡𑁂 𑀧𑀸𑀡𑀸𑀢𑀺𑀧𑀸𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄 ¶ . 𑀲𑀭𑀻𑀭𑀕𑀼𑀡𑀸𑀦𑀦𑁆𑀢𑀼 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀢𑀸, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀧𑀺 𑀘𑁂𑀢𑁆𑀣 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀫𑁂𑀯 𑀫𑀳𑀸𑀲𑀸𑀯𑀚𑁆𑀚𑀁, 𑀦 𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄. 𑀓𑀲𑁆𑀫𑀸? 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸𑀧𑀺 𑀉𑀫𑁆𑀫𑀢𑁆𑀢𑀓𑀪𑀸𑀯𑀲𑀁𑀯𑀢𑁆𑀢𑀦𑁂𑀦 𑀅𑀭𑀺𑀬𑀥𑀫𑁆𑀫𑀦𑁆𑀢𑀭𑀸𑀬𑀓𑀭𑀡𑀢𑁄𑀢𑀺. 𑀏𑀯𑀫𑁂𑀢𑁆𑀣 𑀫𑀳𑀸𑀲𑀸𑀯𑀚𑁆𑀚𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀬𑁄𑀕𑀢𑁄𑀢𑀺 𑀏𑀢𑁆𑀣 𑀘 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀣𑀸𑀯𑀭𑁄, 𑀯𑀺𑀚𑁆𑀚𑀸𑀫𑀬𑁄, 𑀇𑀤𑁆𑀥𑀺𑀫𑀬𑁄𑀢𑀺 𑀙𑀧𑁆𑀧𑀬𑁄𑀕𑀸. 𑀢𑀢𑁆𑀣 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀁 𑀲𑀸𑀳𑀢𑁆𑀣𑀺𑀓𑁄 𑀧𑀬𑁄𑀕𑁄, 𑀲𑁄 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀤𑁆𑀤𑀺𑀲𑁆𑀲𑀓𑁂 𑀬𑀁 𑀉𑀤𑁆𑀤𑀺𑀲𑁆𑀲 𑀧𑀳𑀭𑀢𑀺, 𑀢𑀲𑁆𑀲𑁂𑀯 𑀫𑀭𑀡𑁂𑀦 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. ‘‘𑀬𑁄 𑀓𑁄𑀘𑀺 𑀫𑀭𑀢𑀽’’𑀢𑀺 𑀏𑀯𑀁 𑀅𑀦𑀼𑀤𑁆𑀤𑀺𑀲𑁆𑀲𑀓𑁂 𑀧𑀳𑀸𑀭𑀧𑀘𑁆𑀘𑀬𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀫𑀭𑀡𑁂𑀦. 𑀉𑀪𑀬𑀣𑀸𑀧𑀺 𑀘 𑀧𑀳𑀭𑀺𑀢𑀫𑀢𑁆𑀢𑁂 𑀯𑀸 𑀫𑀭𑀢𑀼, 𑀧𑀘𑁆𑀙𑀸 𑀯𑀸 𑀢𑁂𑀦𑁂𑀯 ¶ 𑀭𑁄𑀕𑁂𑀦, 𑀧𑀳𑀭𑀺𑀢𑀓𑁆𑀔𑀡𑁂 𑀏𑀯 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀘 𑀧𑀳𑀸𑀭𑀁 𑀤𑀢𑁆𑀯𑀸 𑀢𑁂𑀦 𑀅𑀫𑀢𑀲𑁆𑀲 𑀧𑀼𑀦 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀘𑁆𑀙𑀸𑀧𑀺 𑀬𑀤𑀺 𑀧𑀞𑀫𑀧𑀳𑀸𑀭𑁂𑀦𑁂𑀯 𑀫𑀭𑀢𑀺, 𑀢𑀤𑀸 𑀏𑀯 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄 𑀳𑁄𑀢𑀺. 𑀅𑀣 𑀤𑀼𑀢𑀺𑀬𑀧𑀳𑀸𑀭𑁂𑀦, 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀉𑀪𑀬𑁂𑀳𑀺 𑀫𑀢𑁂𑀧𑀺 𑀧𑀞𑀫𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄, 𑀉𑀪𑀬𑁂𑀳𑀺𑀧𑀺 𑀅𑀫𑀢𑁂 𑀦𑁂𑀯𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀏𑀲 𑀦𑀬𑁄 𑀩𑀳𑀼𑀓𑁂𑀳𑀺𑀧𑀺 ¶ 𑀏𑀓𑀲𑁆𑀲 𑀧𑀳𑀸𑀭𑁂 𑀤𑀺𑀦𑁆𑀦𑁂. 𑀢𑀢𑁆𑀭𑀸𑀧𑀺 𑀳𑀺 𑀬𑀲𑁆𑀲 𑀧𑀳𑀸𑀭𑁂𑀦 𑀫𑀭𑀢𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄 𑀳𑁄𑀢𑀺.

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀦 𑀆𑀡𑀸𑀧𑀦𑀁 𑀆𑀡𑀢𑁆𑀢𑀺𑀓𑁄 𑀧𑀬𑁄𑀕𑁄. 𑀢𑀢𑁆𑀣𑀧𑀺 𑀲𑀸𑀳𑀢𑁆𑀣𑀺𑀓𑁂 𑀧𑀬𑁄𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄. 𑀙𑀩𑁆𑀩𑀺𑀥𑁄 𑀘𑁂𑀢𑁆𑀣 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀯𑀢𑁆𑀣𑀼 𑀓𑀸𑀮𑁄 𑀘 𑀑𑀓𑀸𑀲𑁄, 𑀆𑀯𑀼𑀥𑀁 𑀇𑀭𑀺𑀬𑀸𑀧𑀣𑁄;

𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀇𑀫𑁂, 𑀙 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸’’𑀢𑀺. (𑀧𑀸𑀘𑀺. 𑀅𑀝𑁆𑀞. 𑁨.𑁧𑁭𑁪);

𑀢𑀢𑁆𑀣 ¶ 𑀯𑀢𑁆𑀣𑀽𑀢𑀺 𑀫𑀸𑀭𑁂𑀢𑀩𑁆𑀩𑁄 𑀧𑀸𑀡𑁄. 𑀓𑀸𑀮𑁄𑀢𑀺 𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀸𑀤𑀺𑀓𑀸𑀮𑁄 𑀘, 𑀬𑁄𑀩𑁆𑀩𑀦𑀣𑀸𑀯𑀭𑀺𑀬𑀸𑀤𑀺𑀓𑀸𑀮𑁄 𑀘. 𑀑𑀓𑀸𑀲𑁄𑀢𑀺 𑀕𑀸𑀫𑁄 𑀯𑀸 𑀦𑀺𑀕𑀫𑁄 𑀯𑀸 𑀯𑀦𑀁 𑀯𑀸 𑀭𑀘𑁆𑀙𑀸 𑀯𑀸 𑀲𑀺𑀗𑁆𑀖𑀸𑀝𑀓𑀁 𑀯𑀸𑀢𑀺 𑀏𑀯𑀫𑀸𑀤𑀺. 𑀆𑀯𑀼𑀥𑀦𑁆𑀢𑀺 𑀅𑀲𑀺 𑀯𑀸 𑀉𑀲𑀼 𑀯𑀸 𑀲𑀢𑁆𑀢𑀺 𑀯𑀸𑀢𑀺 𑀏𑀯𑀫𑀸𑀤𑀺. 𑀇𑀭𑀺𑀬𑀸𑀧𑀣𑁄𑀢𑀺 𑀫𑀸𑀭𑁂𑀢𑀩𑁆𑀩𑀲𑁆𑀲 𑀫𑀸𑀭𑀓𑀲𑁆𑀲 𑀘 𑀞𑀸𑀦𑀁 𑀯𑀸 𑀦𑀺𑀲𑀚𑁆𑀚𑀸 𑀯𑀸𑀢𑀺 𑀏𑀯𑀫𑀸𑀤𑀺.

𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀯𑀺𑀚𑁆𑀛𑀦𑀁 𑀯𑀸 𑀙𑁂𑀤𑀦𑀁 𑀯𑀸 𑀪𑁂𑀤𑀦𑀁 𑀯𑀸 𑀲𑀗𑁆𑀔𑀫𑀼𑀡𑁆𑀟𑀺𑀓𑀁 𑀯𑀸𑀢𑀺 𑀏𑀯𑀫𑀸𑀤𑀺. 𑀬𑀤𑀺 𑀳𑀺 𑀯𑀢𑁆𑀣𑀼𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 ‘‘𑀬𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀦𑀢𑁆𑀣𑀺 𑀓𑀫𑁆𑀫𑀩𑀤𑁆𑀥𑁄. 𑀅𑀣 𑀯𑀢𑁆𑀣𑀼𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂 𑀆𑀡𑀢𑁆𑀢𑀲𑁆𑀲 𑀫𑀸𑀭𑀡𑀓𑁆𑀔𑀡𑁂𑀢𑀺 𑀉𑀪𑀬𑁂𑀲𑀫𑁆𑀧𑀺 𑀓𑀫𑁆𑀫𑀩𑀤𑁆𑀥𑁄. 𑀏𑀲 𑀦𑀬𑁄 𑀓𑀸𑀮𑀸𑀤𑀻𑀲𑀼𑀧𑀺.

𑀫𑀸𑀭𑀡𑀢𑁆𑀣𑀦𑁆𑀢𑀼 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑁄 𑀧𑀬𑁄𑀕𑁄. 𑀲𑁄𑀧𑀺 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑁄 𑀏𑀯, 𑀓𑀫𑁆𑀫𑀩𑀤𑁆𑀥𑁄 𑀘𑁂𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀭𑀡𑀢𑁆𑀣𑀫𑁂𑀯 𑀑𑀧𑀸𑀢𑀔𑀡𑀦𑀁, 𑀅𑀧𑀲𑁆𑀲𑁂𑀦𑀉𑀧𑀦𑀺𑀓𑁆𑀔𑀺𑀧𑀦𑀁, 𑀪𑁂𑀲𑀚𑁆𑀚𑀯𑀺𑀲𑀬𑀦𑁆𑀢𑀸𑀤𑀺𑀧𑁆𑀧𑀬𑁄𑀚𑀦𑀁 𑀯𑀸 𑀣𑀸𑀯𑀭𑁄 𑀧𑀬𑁄𑀕𑁄. 𑀲𑁄𑀧𑀺 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑁄, 𑀬𑀢𑁄 𑀢𑀢𑁆𑀣𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀦𑁆𑀢𑀼 𑀯𑀺𑀲𑁂𑀲𑁄 𑁋 𑀫𑀽𑀮𑀝𑁆𑀞𑁂𑀦 𑀑𑀧𑀸𑀢𑀸𑀤𑀻𑀲𑀼 𑀧𑀭𑁂𑀲𑀁 𑀫𑀽𑀮𑁂𑀦 𑀯𑀸 𑀫𑀼𑀥𑀸 𑀯𑀸 𑀤𑀺𑀦𑁆𑀦𑁂𑀲𑀼𑀧𑀺 𑀬𑀤𑀺 𑀢𑀧𑁆𑀧𑀘𑁆𑀘𑀬𑀸 𑀓𑁄𑀘𑀺 𑀫𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀬𑀤𑀺𑀧𑀺 𑀘 𑀢𑁂𑀦 𑀅𑀜𑁆𑀜𑁂𑀦 𑀯𑀸 ¶ 𑀢𑀢𑁆𑀣 𑀑𑀧𑀸𑀢𑁂 𑀯𑀺𑀦𑀸𑀲𑁂𑀢𑁆𑀯𑀸 𑀪𑀽𑀫𑀺𑀲𑀫𑁂 𑀓𑀢𑁂𑀧𑀺 𑀧𑀁𑀲𑀼𑀥𑁄𑀯𑀓𑀸 𑀯𑀸 𑀧𑀁𑀲𑀼𑀁 𑀕𑀡𑁆𑀳𑀦𑁆𑀢𑀸, 𑀫𑀽𑀮𑀔𑀡𑀓𑀸 𑀯𑀸 𑀫𑀽𑀮𑀸𑀦𑀺 𑀔𑀡𑀦𑁆𑀢𑀸 𑀆𑀯𑀸𑀝𑀁 𑀓𑀭𑁄𑀦𑁆𑀢𑀺 ¶ , 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀓𑀤𑁆𑀤𑀫𑁄 𑀚𑀸𑀬𑀢𑀺, 𑀢𑀢𑁆𑀣 𑀘 𑀓𑁄𑀘𑀺 𑀑𑀢𑀭𑀺𑀢𑁆𑀯𑀸 𑀯𑀸 𑀮𑀕𑁆𑀕𑀺𑀢𑁆𑀯𑀸 𑀯𑀸 𑀫𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀬𑀤𑀺 𑀧𑀦 𑀬𑁂𑀦 𑀮𑀤𑁆𑀥𑀁, 𑀲𑁄 𑀅𑀜𑁆𑀜𑁄 𑀯𑀸 𑀢𑀁 𑀯𑀺𑀢𑁆𑀣𑀝𑀢𑀭𑀁 𑀕𑀫𑁆𑀪𑀻𑀭𑀢𑀭𑀁 𑀯𑀸 𑀓𑀭𑁄𑀢𑀺, 𑀢𑀧𑁆𑀧𑀘𑁆𑀘𑀬𑀸𑀯 𑀓𑁄𑀘𑀺 𑀫𑀭𑀢𑀺, 𑀉𑀪𑀬𑁂𑀲𑀫𑁆𑀧𑀺 𑀓𑀫𑁆𑀫𑀩𑀤𑁆𑀥𑁄. 𑀬𑀣𑀸 𑀢𑀼 𑀫𑀽𑀮𑀸𑀦𑀺 𑀫𑀽𑀮𑁂𑀳𑀺 𑀲𑀁𑀲𑀦𑁆𑀤𑀦𑁆𑀢𑀺, 𑀢𑀣𑀸 𑀢𑀢𑁆𑀭 𑀣𑀮𑁂 𑀓𑀢𑁂 𑀫𑀼𑀘𑁆𑀘𑀢𑀺. 𑀏𑀯𑀁 𑀅𑀧𑀲𑁆𑀲𑁂𑀦𑀸𑀤𑀻𑀲𑀼𑀧𑀺 𑀬𑀸𑀯 𑀢𑁂𑀲𑀁 𑀧𑀯𑀢𑁆𑀢𑀺, 𑀢𑀸𑀯 𑀬𑀣𑀸𑀲𑀫𑁆𑀪𑀯𑀁 𑀓𑀫𑁆𑀫𑀩𑀤𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀭𑀡𑀢𑁆𑀣𑀁 𑀧𑀦 𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑀁 𑀯𑀺𑀚𑁆𑀚𑀸𑀫𑀬𑁄 𑀧𑀬𑁄𑀕𑁄. 𑀤𑀸𑀞𑀸𑀯𑀼𑀥𑀸𑀤𑀻𑀦𑀁 𑀤𑀸𑀞𑀸𑀓𑁄𑀝𑀦𑀸𑀤𑀺𑀫𑀺𑀯 𑀫𑀸𑀭𑀡𑀢𑁆𑀣𑀁 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀯𑀺𑀓𑀸𑀭𑀓𑀭𑀡𑀁 𑀇𑀤𑁆𑀥𑀺𑀫𑀬𑁄 𑀧𑀬𑁄𑀕𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀢𑀼 𑀣𑁂𑀬𑁆𑀬𑀧𑀲𑀬𑁆𑀳𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀓𑀧𑁆𑀧𑀓𑀼𑀲𑀸𑀯𑀳𑀸𑀭𑀯𑀲𑀧𑁆𑀧𑀯𑀢𑁆𑀢𑀸 ¶ 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀸𑀤𑀬𑁄 𑀧𑀬𑁄𑀕𑀸, 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀲𑀸𑀳𑀢𑁆𑀣𑀺𑀓𑁄 𑀏𑀯 𑀧𑀬𑁄𑀕𑁄 𑀮𑀩𑁆𑀪𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀧𑀬𑁄𑀕𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀗𑁆𑀕𑀢𑁄𑀢𑀺 𑀏𑀢𑁆𑀣 𑀘 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀪𑀯𑀦𑁆𑀢𑀺 𑁋 𑀧𑀸𑀡𑁄 𑀘 𑀳𑁄𑀢𑀺, 𑀧𑀸𑀡𑀲𑀜𑁆𑀜𑀻 𑀘, 𑀯𑀥𑀓𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀯𑀸𑀬𑀫𑀢𑀺, 𑀢𑁂𑀦 𑀘 𑀫𑀭𑀢𑀻𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲𑀸𑀧𑀺 𑀧𑀜𑁆𑀘𑁂𑀯 𑁋 𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀻 𑀘, 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀯𑀸𑀬𑀫𑀢𑀺, 𑀢𑁂𑀦 𑀘 𑀆𑀤𑀸𑀢𑀩𑁆𑀩𑀁 𑀆𑀤𑀸𑀦𑀁 𑀕𑀘𑁆𑀙𑀢𑀻𑀢𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀦 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀪𑀯𑀦𑁆𑀢𑀺 𑁋 𑀅𑀚𑁆𑀛𑀸𑀘𑀭𑀺𑀬𑀯𑀢𑁆𑀣𑀼 𑀘 𑀳𑁄𑀢𑀺, 𑀢𑀢𑁆𑀣 𑀘 𑀲𑁂𑀯𑀦𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀲𑁂𑀯𑀦𑀧𑀘𑁆𑀘𑀬𑀸 𑀧𑀬𑁄𑀕𑀜𑁆𑀘 𑀲𑀫𑀸𑀧𑀚𑁆𑀚𑀢𑀺, 𑀲𑀸𑀤𑀺𑀬𑀢𑀺 𑀘𑀸𑀢𑀺, 𑀢𑀣𑀸 𑀧𑀭𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺. 𑀢𑀢𑁆𑀣 𑀫𑀼𑀲𑀸𑀯𑀸𑀤𑀲𑁆𑀲 𑀢𑀸𑀯 𑀫𑀼𑀲𑀸 𑀘 𑀳𑁄𑀢𑀺 𑀢𑀁 𑀯𑀢𑁆𑀣𑀼, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀢𑀚𑁆𑀚𑁄 𑀘 𑀯𑀸𑀬𑀸𑀫𑁄, 𑀧𑀭𑀯𑀺𑀲𑀁𑀯𑀸𑀤𑀦𑀜𑁆𑀘 𑀯𑀺𑀜𑁆𑀜𑀸𑀧𑀬𑀫𑀸𑀦𑀸 𑀯𑀺𑀜𑁆𑀜𑀢𑁆𑀢𑀺 𑀧𑀯𑀢𑁆𑀢𑀢𑀻𑀢𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀲𑁆𑀲 𑀧𑀦 𑀲𑀼𑀭𑀸𑀤𑀻𑀦𑀜𑁆𑀘 𑀅𑀜𑁆𑀜𑀢𑀭𑀁 𑀳𑁄𑀢𑀺 𑀫𑀤𑀦𑀻𑀬𑀧𑀸𑀢𑀼𑀓𑀫𑁆𑀬𑀢𑀸𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀢𑀚𑁆𑀚𑀜𑁆𑀘 𑀯𑀸𑀬𑀸𑀫𑀁 𑀆𑀧𑀚𑁆𑀚𑀢𑀺, 𑀧𑀻𑀢𑁂 𑀘 𑀧𑀯𑀺𑀲𑀢𑀻𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 𑀅𑀗𑁆𑀕𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀫𑀼𑀝𑁆𑀞𑀸𑀦𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀸 𑀘𑁂𑀢𑁆𑀣 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺 𑀢𑀺𑀲𑀫𑀼𑀝𑁆𑀞𑀸𑀦𑀸 𑀳𑁄𑀦𑁆𑀢𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀸𑀬𑀘𑀺𑀢𑁆𑀢𑀯𑀲𑁂𑀦 𑀏𑀓𑀲𑀫𑀼𑀝𑁆𑀞𑀸𑀦𑀫𑁂𑀯. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀓𑀸𑀬𑀢𑁄 𑀘, 𑀓𑀸𑀬𑀘𑀺𑀢𑁆𑀢𑀢𑁄 𑀘𑀸𑀢𑀺 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀲𑀫𑀼𑀝𑁆𑀞𑀸𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀯𑁂𑀤𑀦𑀸𑀢𑁄𑀢𑀺 ¶ ¶ 𑀏𑀢𑁆𑀣 𑀘 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁄𑀯. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀜𑁆𑀜𑀢𑀭𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀁, 𑀢𑀣𑀸 𑀫𑀼𑀲𑀸𑀯𑀸𑀤𑁄. 𑀇𑀢𑀭𑀸𑀦𑀺 𑀤𑁆𑀯𑁂 𑀲𑀼𑀔𑀸𑀬 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑀸 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 𑀯𑁂𑀤𑀦𑀸𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀫𑀽𑀮𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀘𑁂𑀢𑁆𑀣 𑀤𑁄𑀲𑀫𑁄𑀳𑀫𑀽𑀮𑁄. 𑀅𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀸 ¶ 𑀮𑁄𑀪𑀫𑁄𑀳𑀫𑀽𑀮𑀸 𑀯𑀸 𑀤𑁄𑀲𑀫𑁄𑀳𑀫𑀽𑀮𑀸 𑀯𑀸. 𑀇𑀢𑀭𑀸𑀦𑀺 𑀤𑁆𑀯𑁂 𑀮𑁄𑀪𑀫𑁄𑀳𑀫𑀽𑀮𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 𑀫𑀽𑀮𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀫𑁆𑀫𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀺 𑀘𑁂𑀢𑁆𑀣 𑀓𑀸𑀬𑀓𑀫𑁆𑀫𑀫𑁂𑀯 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑁂𑀯 𑀘, 𑀫𑀼𑀲𑀸𑀯𑀸𑀤𑁄 𑀯𑀘𑀻𑀓𑀫𑁆𑀫𑀫𑁂𑀯. 𑀬𑁄 𑀧𑀦 𑀅𑀢𑁆𑀣𑀪𑀜𑁆𑀚𑀓𑁄, 𑀲𑁄 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑁄. 𑀇𑀢𑀭𑁄 𑀓𑀫𑁆𑀫𑀫𑁂𑀯. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀫𑁂𑀯𑀸𑀢𑀺. 𑀏𑀯𑀫𑁂𑀢𑁆𑀣 𑀓𑀫𑁆𑀫𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀯𑀺𑀭𑀫𑀢𑁄𑀢𑀺 𑀏𑀢𑁆𑀣 𑀆𑀳 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑁄 𑀓𑀼𑀢𑁄 𑀯𑀺𑀭𑀫𑀢𑀻’’𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀫𑀸𑀤𑀸𑀦𑀯𑀲𑁂𑀦 𑀢𑀸𑀯 𑀯𑀺𑀭𑀫𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀢𑁄 𑀯𑀺𑀭𑀫𑀢𑀺. 𑀓𑀺𑀫𑀸𑀭𑀪𑀺𑀢𑁆𑀯𑀸? 𑀬𑀢𑁄 𑀯𑀺𑀭𑀫𑀢𑀺, 𑀢𑀤𑁂𑀯. 𑀲𑀫𑁆𑀧𑀢𑁆𑀢𑀯𑀲𑁂𑀦𑀸𑀧𑀺 𑀯𑀺𑀭𑀫𑀦𑁆𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀓𑀼𑀲𑀮𑀢𑁄𑀯. 𑀓𑀺𑀫𑀸𑀭𑀪𑀺𑀢𑁆𑀯𑀸? 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀯𑀼𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯. 𑀓𑁂𑀘𑀺 𑀧𑀦 𑀪𑀡𑀦𑁆𑀢𑀺 ‘‘𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀲𑀗𑁆𑀔𑀸𑀢𑁂 𑀲𑀗𑁆𑀔𑀸𑀭𑁂 𑀆𑀭𑀪𑀺𑀢𑁆𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑀺𑀭𑀫𑀢𑀺, 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀬𑀁 𑀧𑀦 𑀅𑀯𑀳𑀭𑀺𑀢𑀩𑁆𑀩𑀁 𑀪𑀜𑁆𑀚𑀺𑀢𑀩𑁆𑀩𑀜𑁆𑀘, 𑀢𑀁 𑀆𑀭𑀪𑀺𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀫𑀼𑀲𑀸𑀯𑀸𑀤𑀸 𑀘, 𑀲𑀢𑁆𑀢𑁂𑀬𑁂𑀯𑀸𑀭𑀪𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸 𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸’’𑀢𑀺. 𑀢𑀤𑀜𑁆𑀜𑁂 ‘‘𑀏𑀯𑀁 𑀲𑀦𑁆𑀢𑁂 ‘𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀓𑀭𑁂𑀬𑁆𑀬, 𑀬𑀜𑁆𑀘 𑀧𑀚𑀳𑀢𑀺, 𑀢𑀁 𑀦 𑀚𑀸𑀦𑁂𑀬𑁆𑀬𑀸’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸 𑀳𑀼𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀸 𑀬𑀤𑁂𑀯 𑀧𑀚𑀳𑀢𑀺, 𑀢𑀁 𑀅𑀢𑁆𑀢𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀫𑁂𑀯𑀸𑀭𑀪𑀺𑀢𑁆𑀯𑀸 𑀯𑀺𑀭𑀫𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀤𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀸𑀯𑀢𑁄 𑀩𑀳𑀺𑀤𑁆𑀥𑀸𑀪𑀸𑀯𑀢𑁄 𑀘. 𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀳𑀺 𑀯𑀺𑀪𑀗𑁆𑀕𑀧𑀸𑀞𑁂 ‘‘𑀧𑀜𑁆𑀘𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑀢𑀺 𑀓𑀼𑀲𑀮𑀸…𑀧𑁂… 𑀓𑀢𑀺 𑀅𑀭𑀡𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀼𑀲𑀮𑀸𑀬𑁂𑀯, 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀯𑀺𑀪. 𑁭𑁧𑁬) 𑀏𑀯𑀁 𑀧𑀯𑀢𑁆𑀢𑀫𑀸𑀦𑁂 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀘 ‘‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺 𑀘 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀅𑀢𑁆𑀢𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀁 𑀆𑀭𑀪𑀺𑀢𑁆𑀯𑀸 𑀯𑀺𑀭𑀫𑀦𑁆𑀢𑀲𑁆𑀲 𑀦 𑀬𑀼𑀚𑁆𑀚𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑀁 ¶ 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀓𑀭𑁂𑀬𑁆𑀬, 𑀬𑀜𑁆𑀘 𑀧𑀚𑀳𑀢𑀺, 𑀢𑀁 𑀦 𑀚𑀸𑀦𑁂𑀬𑁆𑀬𑀸’’𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀦 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 ¶ 𑀅𑀜𑁆𑀜𑀁 𑀓𑀭𑁄𑀢𑀻𑀢𑀺 𑀯𑀸, 𑀬𑀜𑁆𑀘 𑀧𑀚𑀳𑀢𑀺, 𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀯𑀸 𑀯𑀼𑀘𑁆𑀘𑀢𑀺.

‘‘𑀆𑀭𑀪𑀺𑀢𑁆𑀯𑀸𑀦 ¶ 𑀅𑀫𑀢𑀁, 𑀚𑀳𑀦𑁆𑀢𑁄 𑀲𑀩𑁆𑀩𑀧𑀸𑀧𑀓𑁂;

𑀦𑀺𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀪𑀯𑁂, 𑀫𑀕𑁆𑀕𑀝𑁆𑀞𑁄𑀭𑀺𑀬𑀧𑀼𑀕𑁆𑀕𑀮𑁄’’𑀢𑀺.

𑀏𑀯𑀫𑁂𑀢𑁆𑀣 𑀯𑀺𑀭𑀫𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀨𑀮𑀢𑁄𑀢𑀺 𑀲𑀩𑁆𑀩𑁂 𑀏𑀯 𑀘𑁂𑀢𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀤𑀼𑀕𑁆𑀕𑀢𑀺𑀨𑀮𑀦𑀺𑀩𑁆𑀩𑀢𑁆𑀢𑀓𑀸 𑀳𑁄𑀦𑁆𑀢𑀺, 𑀲𑀼𑀕𑀢𑀺𑀬𑀜𑁆𑀘 𑀅𑀦𑀺𑀝𑁆𑀞𑀸𑀓𑀦𑁆𑀢𑀸𑀫𑀦𑀸𑀧𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀓𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀭𑀸𑀬𑁂 𑀤𑀺𑀝𑁆𑀞𑀥𑀫𑁆𑀫𑁂 𑀏𑀯 𑀘 𑀅𑀯𑁂𑀲𑀸𑀭𑀚𑁆𑀚𑀸𑀤𑀺𑀨𑀮𑀦𑀺𑀩𑁆𑀩𑀢𑁆𑀢𑀓𑀸. 𑀅𑀧𑀺𑀘 ‘‘𑀬𑁄 𑀲𑀩𑁆𑀩𑀮𑀳𑀼𑀲𑁄 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀯𑀺𑀧𑀸𑀓𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁮.𑁪𑁦) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀨𑀮𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀧𑀺 𑀘𑁂𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑁂𑀭𑀫𑀡𑀻𑀦𑀫𑁆𑀧𑀺 𑀲𑀫𑀼𑀝𑁆𑀞𑀸𑀦𑀯𑁂𑀤𑀦𑀸𑀫𑀽𑀮𑀓𑀫𑁆𑀫𑀨𑀮𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑀢𑁆𑀣𑀸𑀬𑀁 𑀯𑀺𑀜𑁆𑀜𑀸𑀧𑀦𑀸 𑁋 𑀲𑀩𑁆𑀩𑀸 𑀏𑀯 𑀘𑁂𑀢𑀸 𑀯𑁂𑀭𑀫𑀡𑀺𑀬𑁄 𑀘𑀢𑀽𑀳𑀺 𑀲𑀫𑀼𑀝𑁆𑀞𑀳𑀦𑁆𑀢𑀺 𑀓𑀸𑀬𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺. 𑀲𑀩𑁆𑀩𑀸 𑀏𑀯 𑀘 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀸, 𑀅𑀮𑁄𑀪𑀸𑀤𑁄𑀲𑀫𑀽𑀮𑀸 𑀯𑀸 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀫𑀽𑀮𑀸 𑀯𑀸. 𑀘𑀢𑀲𑁆𑀲𑁄𑀧𑀺 𑀘𑁂𑀢𑁆𑀣 𑀓𑀸𑀬𑀓𑀫𑁆𑀫𑀁, 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀻 𑀯𑀘𑀻𑀓𑀫𑁆𑀫𑀁, 𑀫𑀕𑁆𑀕𑀓𑁆𑀔𑀡𑁂 𑀘 𑀘𑀺𑀢𑁆𑀢𑀢𑁄𑀯 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀲𑀩𑁆𑀩𑀸𑀧𑀺 𑀫𑀦𑁄𑀓𑀫𑁆𑀫𑀁.

𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀘𑁂𑀢𑁆𑀣 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑀢𑀸 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀢𑀸 𑀚𑀯𑀲𑀫𑁆𑀧𑀢𑁆𑀢𑀺𑀢𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸 𑀘𑀸𑀭𑀼𑀢𑀸 𑀫𑀼𑀤𑀼𑀢𑀸 𑀲𑀼𑀘𑀺𑀢𑀸 𑀲𑀽𑀭𑀢𑀸 𑀫𑀳𑀩𑁆𑀩𑀮𑀢𑀸 𑀯𑀺𑀲𑁆𑀲𑀢𑁆𑀣𑀯𑀘𑀦𑀢𑀸 𑀮𑁄𑀓𑀧𑀺𑀬𑀢𑀸 𑀦𑁂𑀮𑀢𑀸 𑀅𑀪𑁂𑀚𑁆𑀚𑀧𑀭𑀺𑀲𑀢𑀸 𑀅𑀘𑁆𑀙𑀫𑁆𑀪𑀺𑀢𑀸 𑀤𑀼𑀧𑁆𑀧𑀥𑀁𑀲𑀺𑀢𑀸 𑀧𑀭𑀽𑀧𑀓𑁆𑀓𑀫𑁂𑀦 𑀅𑀫𑀭𑀡𑀢𑀸 𑀅𑀦𑀦𑁆𑀢𑀧𑀭𑀺𑀯𑀸𑀭𑀢𑀸 𑀲𑀼𑀭𑀽𑀧𑀢𑀸 𑀲𑀼𑀲𑀡𑁆𑀞𑀸𑀦𑀢𑀸 𑀅𑀧𑁆𑀧𑀸𑀩𑀸𑀥𑀢𑀸 𑀅𑀲𑁄𑀓𑀺𑀢𑀸 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀲𑀤𑁆𑀥𑀺𑀁 𑀅𑀯𑀺𑀧𑁆𑀧𑀬𑁄𑀕𑀢𑀸 𑀤𑀻𑀖𑀸𑀬𑀼𑀓𑀢𑀸𑀢𑀺 𑀏𑀯𑀫𑀸𑀤𑀻𑀦𑀺 𑀨𑀮𑀸𑀦𑀺.

𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀫𑀳𑀤𑁆𑀥𑀦𑀢𑀸 𑀧𑀳𑀽𑀢𑀥𑀦𑀥𑀜𑁆𑀜𑀢𑀸 𑀅𑀦𑀦𑁆𑀢𑀪𑁄𑀕𑀢𑀸 𑀅𑀦𑀼𑀧𑁆𑀧𑀦𑁆𑀦𑀪𑁄𑀕𑀼𑀧𑁆𑀧𑀢𑁆𑀢𑀺𑀢𑀸 𑀉𑀧𑁆𑀧𑀦𑁆𑀦𑀪𑁄𑀕𑀣𑀸𑀯𑀭𑀢𑀸 𑀇𑀘𑁆𑀙𑀺𑀢𑀸𑀦𑀁 𑀪𑁄𑀕𑀸𑀦𑀁 𑀔𑀺𑀧𑁆𑀧𑀧𑁆𑀧𑀝𑀺𑀮𑀸𑀪𑀺𑀢𑀸 𑀭𑀸𑀚𑀘𑁄𑀭𑀼𑀤𑀓𑀕𑁆𑀕𑀺𑀅𑀧𑁆𑀧𑀺𑀬𑀤𑀸𑀬𑀸𑀤𑁂𑀳𑀺 𑀅𑀲𑀸𑀥𑀸𑀭𑀡𑀪𑁄𑀕𑀢𑀸 ¶ ¶ 𑀅𑀲𑀸𑀥𑀸𑀭𑀡𑀥𑀦𑀧𑁆𑀧𑀝𑀺𑀮𑀸𑀪𑀺𑀢𑀸 𑀮𑁄𑀓𑀼𑀢𑁆𑀢𑀫𑀢𑀸 𑀦𑀢𑁆𑀣𑀺𑀓𑀪𑀸𑀯𑀲𑁆𑀲 𑀅𑀚𑀸𑀦𑀦𑀢𑀸 𑀲𑀼𑀔𑀯𑀺𑀳𑀸𑀭𑀺𑀢𑀸𑀢𑀺 𑀏𑀯𑀫𑀸𑀤𑀻𑀦𑀺.

𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑁂𑀭𑀫𑀡𑀺𑀬𑀸 𑀯𑀺𑀕𑀢𑀧𑀘𑁆𑀘𑀢𑁆𑀣𑀺𑀓𑀢𑀸 𑀲𑀩𑁆𑀩𑀚𑀦𑀧𑀺𑀬𑀢𑀸 𑀅𑀦𑁆𑀦𑀧𑀸𑀦𑀯𑀢𑁆𑀣𑀲𑀬𑀦𑀸𑀤𑀻𑀦𑀁 𑀮𑀸𑀪𑀺𑀢𑀸 ¶ 𑀲𑀼𑀔𑀲𑀬𑀦𑀢𑀸 𑀲𑀼𑀔𑀧𑁆𑀧𑀝𑀺𑀩𑀼𑀚𑁆𑀛𑀦𑀢𑀸 𑀅𑀧𑀸𑀬𑀪𑀬𑀯𑀺𑀦𑀺𑀫𑀼𑀢𑁆𑀢𑀢𑀸 𑀇𑀢𑁆𑀣𑀺𑀪𑀸𑀯𑀧𑁆𑀧𑀝𑀺𑀮𑀸𑀪𑀲𑁆𑀲 𑀯𑀸 𑀦𑀧𑀼𑀁𑀲𑀓𑀪𑀸𑀯𑀧𑁆𑀧𑀝𑀺𑀮𑀸𑀪𑀲𑁆𑀲 𑀯𑀸 𑀅𑀪𑀩𑁆𑀩𑀢𑀸 𑀅𑀓𑁆𑀓𑁄𑀥𑀦𑀢𑀸 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸 𑀅𑀧𑀢𑀺𑀢𑀓𑁆𑀔𑀦𑁆𑀥𑀢𑀸 𑀅𑀦𑀥𑁄𑀫𑀼𑀔𑀢𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀺𑀬𑀢𑀸 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀢𑀸 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀢𑀸 𑀦𑀺𑀭𑀸𑀲𑀗𑁆𑀓𑀢𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸 𑀲𑀼𑀔𑀯𑀺𑀳𑀸𑀭𑀺𑀢𑀸 𑀅𑀓𑀼𑀢𑁄𑀪𑀬𑀢𑀸 𑀧𑀺𑀬𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑀸𑀢𑀺 𑀏𑀯𑀫𑀸𑀤𑀻𑀦𑀺.

𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀯𑀺𑀧𑁆𑀧𑀲𑀦𑁆𑀦𑀺𑀦𑁆𑀤𑁆𑀭𑀺𑀬𑀢𑀸 𑀯𑀺𑀲𑁆𑀲𑀝𑁆𑀞𑀫𑀥𑀼𑀭𑀪𑀸𑀡𑀺𑀢𑀸 𑀲𑀫𑀲𑀺𑀢𑀲𑀼𑀤𑁆𑀥𑀤𑀦𑁆𑀢𑀢𑀸 𑀦𑀸𑀢𑀺𑀣𑀽𑀮𑀢𑀸 𑀦𑀸𑀢𑀺𑀓𑀺𑀲𑀢𑀸 𑀦𑀸𑀢𑀺𑀭𑀲𑁆𑀲𑀢𑀸 𑀦𑀸𑀢𑀺𑀤𑀻𑀖𑀢𑀸 𑀲𑀼𑀔𑀲𑀫𑁆𑀨𑀲𑁆𑀲𑀢𑀸 𑀉𑀧𑁆𑀧𑀮𑀕𑀦𑁆𑀥𑀫𑀼𑀔𑀢𑀸 𑀲𑀼𑀲𑁆𑀲𑀽𑀲𑀓𑀧𑀭𑀺𑀚𑀦𑀢𑀸 𑀆𑀤𑁂𑀬𑁆𑀬𑀯𑀘𑀦𑀢𑀸 𑀓𑀫𑀮𑀼𑀧𑁆𑀧𑀮𑀲𑀤𑀺𑀲𑀫𑀼𑀤𑀼𑀮𑁄𑀳𑀺𑀢𑀢𑀦𑀼𑀚𑀺𑀯𑁆𑀳𑀢𑀸 𑀅𑀦𑀼𑀤𑁆𑀥𑀢𑀢𑀸 𑀅𑀘𑀧𑀮𑀢𑀸𑀢𑀺 𑀏𑀯𑀫𑀸𑀤𑀻𑀦𑀺.

𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀬𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀲𑀩𑁆𑀩𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀔𑀺𑀧𑁆𑀧𑀁 𑀧𑀝𑀺𑀚𑀸𑀦𑀦𑀢𑀸 𑀲𑀤𑀸 𑀉𑀧𑀝𑁆𑀞𑀺𑀢𑀲𑀢𑀺𑀢𑀸 𑀅𑀦𑀼𑀫𑁆𑀫𑀢𑁆𑀢𑀓𑀢𑀸 𑀜𑀸𑀡𑀯𑀦𑁆𑀢𑀢𑀸 𑀅𑀦𑀮𑀲𑀢𑀸 𑀅𑀚𑀴𑀢𑀸 𑀅𑀦𑁂𑀮𑀫𑀽𑀕𑀢𑀸 𑀅𑀫𑀢𑁆𑀢𑀢𑀸 𑀅𑀧𑁆𑀧𑀫𑀢𑁆𑀢𑀢𑀸 𑀅𑀲𑀫𑁆𑀫𑁄𑀳𑀢𑀸 𑀅𑀘𑁆𑀙𑀫𑁆𑀪𑀺𑀢𑀸 𑀅𑀲𑀸𑀭𑀫𑁆𑀪𑀺𑀢𑀸 𑀅𑀦𑀼𑀲𑁆𑀲𑀗𑁆𑀓𑀺𑀢𑀸 𑀲𑀘𑁆𑀘𑀯𑀸𑀤𑀺𑀢𑀸 𑀅𑀧𑀺𑀲𑀼𑀡𑀸𑀨𑀭𑀼𑀲𑀸𑀲𑀫𑁆𑀨𑀧𑀮𑀸𑀧𑀯𑀸𑀤𑀺𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀢𑀸 𑀓𑀢𑀜𑁆𑀜𑀼𑀢𑀸 𑀓𑀢𑀯𑁂𑀤𑀺𑀢𑀸 𑀅𑀫𑀘𑁆𑀙𑀭𑀺𑀢𑀸 𑀘𑀸𑀕𑀯𑀦𑁆𑀢𑀢𑀸 𑀲𑀻𑀮𑀯𑀦𑁆𑀢𑀢𑀸 𑀉𑀚𑀼𑀢𑀸 𑀅𑀓𑁆𑀓𑁄𑀥𑀦𑀢𑀸 𑀳𑀺𑀭𑀺𑀫𑀦𑀢𑀸 𑀑𑀢𑁆𑀢𑀧𑁆𑀧𑀺𑀢𑀸 𑀉𑀚𑀼𑀤𑀺𑀝𑁆𑀞𑀺𑀓𑀢𑀸 𑀫𑀳𑀸𑀧𑀜𑁆𑀜𑀢𑀸 𑀫𑁂𑀥𑀸𑀯𑀺𑀢𑀸 𑀧𑀡𑁆𑀟𑀺𑀢𑀢𑀸 𑀅𑀢𑁆𑀣𑀸𑀦𑀢𑁆𑀣𑀓𑀼𑀲𑀮𑀢𑀸𑀢𑀺 𑀏𑀯𑀫𑀸𑀤𑀻𑀦𑀺 𑀨𑀮𑀸𑀦𑀺. 𑀏𑀯𑀫𑁂𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑁂𑀭𑀫𑀡𑀻𑀦𑀁 𑀲𑀫𑀼𑀝𑁆𑀞𑀸𑀦𑀯𑁂𑀤𑀦𑀸𑀫𑀽𑀮𑀓𑀫𑁆𑀫𑀨𑀮𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 𑁋

‘‘𑀬𑁄𑀚𑁂𑀢𑀩𑁆𑀩𑀁 𑀢𑀢𑁄 𑀬𑀼𑀢𑁆𑀢𑀁, 𑀧𑀘𑁆𑀙𑀺𑀫𑁂𑀲𑁆𑀯𑀧𑀺 𑀧𑀜𑁆𑀘𑀲𑀼;

𑀆𑀯𑁂𑀡𑀺𑀓𑀜𑁆𑀘 𑀯𑀢𑁆𑀢𑀩𑁆𑀩𑀁, 𑀜𑁂𑀬𑁆𑀬𑀸 𑀳𑀻𑀦𑀸𑀤𑀺𑀢𑀸𑀧𑀺 𑀘𑀸’’𑀢𑀺.

𑀢𑀲𑁆𑀲𑀸𑀬𑀁 ¶ 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀏𑀢𑀺𑀲𑁆𑀲𑀸 𑀧𑀼𑀭𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬 ¶ 𑀬𑀁 𑀬𑀼𑀚𑁆𑀚𑀢𑀺, 𑀢𑀁 𑀢𑀢𑁄 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑁂𑀲𑁆𑀯𑀧𑀺 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀬𑀣𑁂𑀯 𑀳𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀭𑀫𑁆𑀫𑀡𑀢𑁄 𑀘 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀭𑀽𑀧𑀸𑀬𑀢𑀦𑀸𑀤𑀺𑀅𑀜𑁆𑀜𑀢𑀭𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁, 𑀢𑀣𑀸 𑀇𑀥 𑀯𑀺𑀓𑀸𑀮𑀪𑁄𑀚𑀦𑀁. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀆𑀭𑀫𑁆𑀫𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀸𑀦𑀢𑁄 𑀘 𑀬𑀣𑀸 𑀧𑀼𑀭𑀺𑀫𑀸𑀦𑀺 𑀲𑀸𑀫𑀡𑁂𑀭𑁂𑀦 𑀯𑀸 𑀉𑀧𑀸𑀲𑀓𑁂𑀦 𑀯𑀸 𑀲𑀫𑀸𑀤𑀺𑀬𑀦𑁆𑀢𑁂𑀦 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀏𑀢𑀸𑀦𑀺𑀧𑀺. 𑀅𑀗𑁆𑀕𑀢𑁄𑀧𑀺 ¶ 𑀬𑀣𑀸 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀗𑁆𑀕𑀪𑁂𑀤𑁄 𑀯𑀼𑀢𑁆𑀢𑁄, 𑀏𑀯𑀫𑀺𑀥𑀸𑀧𑀺 𑀯𑀺𑀓𑀸𑀮𑀪𑁄𑀚𑀦𑀲𑁆𑀲 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑁋 𑀯𑀺𑀓𑀸𑀮𑁄, 𑀬𑀸𑀯𑀓𑀸𑀮𑀺𑀓𑀁, 𑀅𑀚𑁆𑀛𑁄𑀳𑀭𑀡𑀁, 𑀅𑀦𑀼𑀫𑁆𑀫𑀢𑁆𑀢𑀓𑀢𑀸𑀢𑀺. 𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀲𑁂𑀲𑀸𑀦𑀫𑁆𑀧𑀺 𑀅𑀗𑁆𑀕𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀢𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘𑀸𑀢𑀺 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁, 𑀏𑀯𑀫𑀺𑀥 𑀯𑀺𑀓𑀸𑀮𑀪𑁄𑀚𑀦𑀁. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀲𑀫𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀢𑀢𑁆𑀣 𑀯𑁂𑀤𑀦𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀜𑁆𑀜𑀢𑀭𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀁, 𑀢𑀣𑀸 𑀇𑀥 𑀯𑀺𑀓𑀸𑀮𑀪𑁄𑀚𑀦𑀁. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑀢𑁆𑀣 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀮𑁄𑀪𑀫𑁄𑀳𑀫𑀽𑀮𑀁, 𑀏𑀯𑀫𑀺𑀥 𑀯𑀺𑀓𑀸𑀮𑀪𑁄𑀚𑀦𑀁. 𑀅𑀧𑀭𑀸𑀦𑀺 𑀘 𑀤𑁆𑀯𑁂 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀫𑀽𑀮𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀓𑀸𑀬𑀓𑀫𑁆𑀫𑀁, 𑀏𑀯𑀫𑀺𑀥𑀸𑀧𑀺 𑀯𑀺𑀓𑀸𑀮𑀪𑁄𑀚𑀦𑀸𑀤𑀻𑀦𑀺. 𑀚𑀸𑀢𑀭𑀽𑀧𑀭𑀚𑀢𑀧𑁆𑀧𑀝𑀺𑀕𑁆𑀕𑀳𑀡𑀁 𑀧𑀦 𑀓𑀸𑀬𑀓𑀫𑁆𑀫𑀁 𑀯𑀸 𑀲𑀺𑀬𑀸 𑀯𑀘𑀻𑀓𑀫𑁆𑀫𑀁 𑀯𑀸 𑀓𑀸𑀬𑀤𑁆𑀯𑀸𑀭𑀸𑀤𑀻𑀳𑀺 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀧𑀭𑀺𑀬𑀸𑀬𑁂𑀦, 𑀦 𑀓𑀫𑁆𑀫𑀧𑀣𑀯𑀲𑁂𑀦. 𑀯𑀺𑀭𑀫𑀢𑁄𑀢𑀺 𑀬𑀣𑀸 𑀘 𑀢𑀢𑁆𑀣 𑀯𑀺𑀭𑀫𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀢𑁄 𑀯𑀺𑀭𑀫𑀢𑀺, 𑀏𑀯𑀫𑀺𑀥𑀸𑀧𑀺 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀅𑀓𑀼𑀲𑀮𑀢𑁄, 𑀓𑀼𑀲𑀮𑀢𑁄𑀧𑀺 𑀯𑀸 𑀏𑀓𑀢𑁄. 𑀬𑀣𑀸 𑀘 𑀧𑀼𑀭𑀺𑀫𑀸 𑀧𑀜𑁆𑀘 𑀯𑁂𑀭𑀫𑀡𑀺𑀬𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀓𑀸𑀬𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘𑀸𑀢𑀺, 𑀲𑀩𑁆𑀩𑀸 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀸, 𑀅𑀮𑁄𑀪𑀸𑀤𑁄𑀲𑀫𑀽𑀮𑀸 𑀯𑀸 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀫𑀽𑀮𑀸 𑀯𑀸, 𑀲𑀩𑁆𑀩𑀸 𑀘 𑀦𑀸𑀦𑀧𑁆𑀧𑀓𑀸𑀭𑀇𑀝𑁆𑀞𑀨𑀮𑀦𑀺𑀩𑁆𑀩𑀢𑁆𑀢𑀓𑀸, 𑀢𑀣𑀸 𑀇𑀥𑀸𑀧𑀻𑀢𑀺.

‘‘𑀬𑁄𑀚𑁂𑀢𑀩𑁆𑀩𑀁 𑀢𑀢𑁄 𑀬𑀼𑀢𑁆𑀢𑀁, 𑀧𑀘𑁆𑀙𑀺𑀫𑁂𑀲𑁆𑀯𑀧𑀺 𑀧𑀜𑁆𑀘𑀲𑀼;

𑀆𑀯𑁂𑀡𑀺𑀓𑀜𑁆𑀘 𑀯𑀢𑁆𑀢𑀩𑁆𑀩𑀁, 𑀜𑁂𑀬𑁆𑀬𑀸 𑀳𑀻𑀦𑀸𑀤𑀺𑀢𑀸𑀧𑀺 𑀘𑀸’’𑀢𑀺. 𑁋

𑀏𑀢𑁆𑀣 𑀧𑀦 ¶ 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀫𑀚𑁆𑀛𑀦𑁆𑀳𑀺𑀓𑀯𑀻𑀢𑀺𑀓𑁆𑀓𑀫𑁂 𑀪𑁄𑀚𑀦𑀁. 𑀏𑀢𑀜𑁆𑀳𑀺 𑀅𑀦𑀼𑀜𑁆𑀜𑀸𑀢𑀓𑀸𑀮𑁂 𑀯𑀻𑀢𑀺𑀓𑁆𑀓𑀦𑁆𑀢𑁂 𑀪𑁄𑀚𑀦𑀁, 𑀢𑀲𑁆𑀫𑀸 ‘‘𑀯𑀺𑀓𑀸𑀮𑀪𑁄𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 ¶ , 𑀢𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀦𑀘𑁆𑀘𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀦𑀘𑁆𑀘𑀁, 𑀕𑀻𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑀻𑀢𑀁, 𑀯𑀸𑀤𑀺𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀯𑀸𑀤𑀺𑀢𑀁. 𑀯𑀺𑀲𑀽𑀓𑀤𑀲𑁆𑀲𑀦𑀦𑁆𑀢𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀢𑁄 𑀓𑀼𑀲𑀮𑀧𑀓𑁆𑀔𑀪𑀺𑀦𑁆𑀤𑀦𑁂𑀦 𑀯𑀺𑀲𑀽𑀓𑀸𑀦𑀁 𑀤𑀲𑁆𑀲𑀦𑀁, 𑀯𑀺𑀲𑀽𑀓𑀪𑀽𑀢𑀁 𑀯𑀸 𑀤𑀲𑁆𑀲𑀦𑀁 𑀯𑀺𑀲𑀽𑀓𑀤𑀲𑁆𑀲𑀦𑀁. 𑀦𑀘𑁆𑀘𑀸 𑀘 𑀕𑀻𑀢𑀸 𑀘 𑀯𑀸𑀤𑀺𑀢𑀸 𑀘 𑀯𑀺𑀲𑀽𑀓𑀤𑀲𑁆𑀲𑀦𑀸 𑀘 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸. 𑀯𑀺𑀲𑀽𑀓𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁, 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 𑀯𑁂𑀢𑀸𑀮𑀁 𑀓𑀼𑀫𑁆𑀪𑀣𑀽𑀡𑀁 𑀲𑁄𑀪𑀦𑀓𑀁 𑀘𑀡𑁆𑀟𑀸𑀮𑀁 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 ¶ 𑀫𑀳𑀺𑀁𑀲𑀬𑀼𑀤𑁆𑀥𑀁 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸, 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 (𑀤𑀻. 𑀦𑀺. 𑁧.𑁧𑁨).

𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀦𑀺 𑀏𑀯 𑀯𑀺𑀲𑀽𑀓𑀸𑀦𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀸𑀦𑀺, 𑀢𑁂𑀲𑀁 𑀤𑀲𑁆𑀲𑀦𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀁, 𑀢𑀲𑁆𑀫𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸. ‘‘𑀤𑀲𑁆𑀲𑀦𑀲𑀯𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀬𑀣𑀸 ‘‘𑀲𑁄 𑀘 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀧𑀭𑀻𑀢𑀤𑀲𑁆𑀲𑀦𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁧.𑁩𑁦𑁮) 𑀅𑀘𑀓𑁆𑀔𑀼𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀫𑁆𑀧𑀺 𑀯𑀺𑀲𑀬𑀕𑁆𑀕𑀳𑀡𑀁 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀯𑀦𑀫𑁆𑀧𑀺 ‘‘𑀤𑀲𑁆𑀲𑀦’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀓𑀫𑁆𑀬𑀢𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀲𑁆𑀲𑀢𑁄 𑀏𑀯 𑀘𑁂𑀢𑁆𑀣 𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀞𑀺𑀢𑀦𑀺𑀲𑀺𑀦𑁆𑀦𑀲𑀬𑀦𑁄𑀓𑀸𑀲𑁂 𑀧𑀦 𑀆𑀕𑀢𑀁 𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀆𑀧𑀸𑀣𑀕𑀢𑀁 𑀧𑀲𑁆𑀲𑀢𑁄 𑀲𑀺𑀬𑀸 𑀲𑀁𑀓𑀺𑀮𑁂𑀲𑁄, 𑀦 𑀯𑀻𑀢𑀺𑀓𑁆𑀓𑀫𑁄. 𑀥𑀫𑁆𑀫𑀽𑀧𑀲𑀁𑀳𑀺𑀢𑀫𑁆𑀧𑀺 𑀘𑁂𑀢𑁆𑀣 𑀕𑀻𑀢𑀁 𑀦 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀧𑀦 𑀥𑀫𑁆𑀫𑁄 ¶ 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀮𑀸𑀤𑀻𑀦𑀺 𑀥𑀸𑀭𑀡𑀸𑀤𑀻𑀳𑀺 𑀬𑀣𑀸𑀲𑀗𑁆𑀔𑁆𑀬𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀫𑀸𑀮𑀸𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀯𑀺𑀮𑁂𑀧𑀦𑀢𑁆𑀣𑀁 𑀧𑀺𑀲𑀺𑀢𑁆𑀯𑀸 𑀧𑀝𑀺𑀬𑀢𑁆𑀢𑀁. 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀯𑀸𑀲𑀘𑀼𑀡𑁆𑀡𑀥𑀽𑀧𑀦𑀸𑀤𑀺𑀓𑀁 𑀕𑀦𑁆𑀥𑀚𑀸𑀢𑀁 𑀕𑀦𑁆𑀥𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀫𑀡𑁆𑀟𑀦𑀯𑀺𑀪𑀽𑀲𑀦𑀢𑁆𑀣𑀁 𑀦 𑀯𑀝𑁆𑀝𑀢𑀺, 𑀪𑁂𑀲𑀚𑁆𑀚𑀢𑁆𑀣𑀦𑁆𑀢𑀼 𑀯𑀝𑁆𑀝𑀢𑀺, 𑀧𑀽𑀚𑀦𑀢𑁆𑀣𑀜𑁆𑀘 𑀅𑀪𑀺𑀳𑀝𑀁 𑀲𑀸𑀤𑀺𑀬𑀢𑁄 𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀦 𑀯𑀝𑁆𑀝𑀢𑀺. 𑀉𑀘𑁆𑀘𑀸𑀲𑀬𑀦𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺. 𑀫𑀳𑀸𑀲𑀬𑀦𑀦𑁆𑀢𑀺 𑀅𑀓𑀧𑁆𑀧𑀺𑀬𑀲𑀬𑀦𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑀜𑁆𑀘. 𑀢𑀤𑀼𑀪𑀬𑀫𑁆𑀧𑀺 𑀲𑀸𑀤𑀺𑀬𑀢𑁄 ¶ 𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀝𑁆𑀝𑀢𑀺. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑁄, 𑀮𑁄𑀳𑀫𑀸𑀲𑀓𑀤𑀸𑀭𑀼𑀫𑀸𑀲𑀓𑀚𑀢𑀼𑀫𑀸𑀲𑀓𑀸𑀤𑀺 𑀬𑀁 𑀬𑀁 𑀢𑀢𑁆𑀣 𑀢𑀢𑁆𑀣 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀚𑀸𑀢𑀭𑀽𑀧𑀭𑀚𑀢𑀁. 𑀢𑀲𑁆𑀲 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀲𑀸𑀤𑀺𑀬𑀦𑀁 𑀧𑀝𑀺𑀕𑁆𑀕𑀳𑁄 𑀦𑀸𑀫, 𑀲𑁄 𑀦 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀝𑁆𑀝𑀢𑀻𑀢𑀺 𑀏𑀯𑀁 𑀆𑀯𑁂𑀡𑀺𑀓𑀁 𑀯𑀢𑁆𑀢𑀩𑁆𑀩𑀁.

𑀤𑀲𑀧𑀺 𑀘𑁂𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑀻𑀦𑁂𑀦 𑀙𑀦𑁆𑀤𑁂𑀦 𑀘𑀺𑀢𑁆𑀢𑀯𑀻𑀭𑀺𑀬𑀯𑀻𑀫𑀁𑀲𑀸𑀳𑀺 𑀯𑀸 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑀻𑀦𑀸𑀦𑀺, 𑀫𑀚𑁆𑀛𑀺𑀫𑁂𑀳𑀺 𑀫𑀚𑁆𑀛𑀺𑀫𑀸𑀦𑀺, 𑀧𑀡𑀻𑀢𑁂𑀳𑀺 𑀧𑀡𑀻𑀢𑀸𑀦𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑁂𑀳𑀺 𑀯𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀸𑀦𑀺 𑀳𑀻𑀦𑀸𑀦𑀺, 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀸𑀦𑀺 𑀫𑀚𑁆𑀛𑀺𑀫𑀸𑀦𑀺, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑀺𑀢𑀸𑀦𑀺 𑀧𑀡𑀻𑀢𑀸𑀦𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀸 𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑀻𑀦𑀸𑀦𑀺, 𑀲𑀲𑀗𑁆𑀔𑀸𑀭𑀺𑀓𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀦 𑀫𑀚𑁆𑀛𑀺𑀫𑀸𑀦𑀺, 𑀅𑀲𑀗𑁆𑀔𑀸𑀭𑀺𑀓𑁂𑀦 𑀧𑀡𑀻𑀢𑀸𑀦𑀻𑀢𑀺 𑀏𑀯𑀁 𑀜𑁂𑀬𑁆𑀬𑀸 𑀳𑀻𑀦𑀸𑀤𑀺𑀢𑀸𑀧𑀺 𑀘𑀸𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑀬𑀸 𑀧𑀼𑀩𑁆𑀩𑁂 ‘‘𑀬𑁂𑀦 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸’’𑀢𑀺𑀆𑀤𑀻𑀳𑀺 𑀙𑀳𑀺 𑀕𑀸𑀣𑀸𑀳𑀺 𑀲𑀺𑀓𑁆𑀔𑀸𑀧𑀤𑀧𑀸𑀞𑀲𑁆𑀲 𑀯𑀡𑁆𑀡𑀦𑀢𑁆𑀣𑀁 𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀲𑀸 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀡𑁆𑀡𑀦𑀸

𑀧𑀤𑀲𑀫𑁆𑀩𑀦𑁆𑀥𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ 𑀬𑀤𑀺𑀤𑀁 𑀏𑀯𑀁 𑀤𑀲𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀧𑀭𑀺𑀲𑀼𑀤𑁆𑀥𑀧𑀬𑁄𑀕𑀲𑁆𑀲 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀆𑀲𑀬𑀧𑀭𑀺𑀲𑀼𑀤𑁆𑀥𑀢𑁆𑀣𑀁 ¶ 𑀘𑀺𑀢𑁆𑀢𑀪𑀸𑀯𑀦𑀢𑁆𑀣𑀜𑁆𑀘 𑀅𑀜𑁆𑀜𑀢𑁆𑀭 𑀩𑀼𑀤𑁆𑀥𑀼𑀧𑁆𑀧𑀸𑀤𑀸 𑀅𑀧𑁆𑀧𑀯𑀢𑁆𑀢𑀧𑀼𑀩𑁆𑀩𑀁 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑀪𑀽𑀢𑀁 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑁋

‘‘𑀏𑀓𑀥𑀫𑁆𑀫𑁄, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀫𑀳𑀢𑁄 𑀲𑀁𑀯𑁂𑀕𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀳𑀢𑁄 𑀬𑁄𑀕𑀓𑁆𑀔𑁂𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀫𑀳𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬 𑀲𑀁𑀯𑀢𑁆𑀢𑀢𑀺. 𑀜𑀸𑀡𑀤𑀲𑁆𑀲𑀦𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑁄 ¶ 𑀏𑀓𑀥𑀫𑁆𑀫𑁄? 𑀓𑀸𑀬𑀕𑀢𑀸 𑀲𑀢𑀺. 𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀫𑀢𑀁 𑀢𑁂𑀲𑀁, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀪𑀼𑀢𑁆𑀢𑀁 𑀧𑀭𑀺𑀪𑀼𑀢𑁆𑀢𑀁, 𑀧𑀭𑀺𑀳𑀻𑀦𑀁 𑀅𑀧𑀭𑀺𑀳𑀻𑀦𑀁, 𑀯𑀺𑀭𑀤𑁆𑀥𑀁 𑀆𑀭𑀤𑁆𑀥𑀁, 𑀬𑁂𑀲𑀁 𑀓𑀸𑀬𑀕𑀢𑀸 𑀲𑀢𑀺 𑀆𑀭𑀤𑁆𑀥𑀸’’𑀢𑀺. (𑀅. 𑀦𑀺. 𑁧.𑁫𑁬𑁪-𑁫𑁭𑁦) 𑁋

𑀏𑀯𑀁 𑀪𑀕𑀯𑀢𑀸 𑀅𑀦𑁂𑀓𑀸𑀓𑀸𑀭𑁂𑀦 𑀧𑀲𑀁𑀲𑀺𑀢𑁆𑀯𑀸 𑁋

‘‘𑀓𑀣𑀁 𑀪𑀸𑀯𑀺𑀢𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀕𑀢𑀸𑀲𑀢𑀺 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀫𑀳𑀩𑁆𑀩𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺 (𑀫. 𑀦𑀺. 𑁩.𑁧𑁫𑁪) 𑁋

𑀆𑀤𑀺𑀦𑀸 𑀦𑀬𑁂𑀦 𑀆𑀦𑀸𑀧𑀸𑀦𑀧𑀩𑁆𑀩𑀁 𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀯 𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀻𑀢𑀺 𑀇𑀫𑁂𑀲𑀁 𑀘𑀼𑀤𑁆𑀤𑀲𑀦𑁆𑀦𑀁 𑀧𑀩𑁆𑀩𑀸𑀦𑀁 𑀯𑀲𑁂𑀦 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀲𑁆𑀲 𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀦𑀯 𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼𑀬𑁂𑀯 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀬𑀸𑀧𑀺 𑀘𑁂𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀲𑀫𑀸𑀥𑀺𑀪𑀸𑀯𑀦𑀸 ¶ 𑀇𑀘𑁆𑀙𑁂𑀬𑁆𑀬, 𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀅𑀲𑀼𑀪𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑁂 𑀧𑀓𑀸𑀲𑀺𑀢𑀸 𑀏𑀯. 𑀆𑀦𑀸𑀧𑀸𑀦𑀧𑀩𑁆𑀩𑀁 𑀧𑀦 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀜𑁆𑀘𑁂𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀲𑀫𑀸𑀥𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀆𑀦𑀸𑀧𑀸𑀦𑀧𑀩𑁆𑀩𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀯𑀲𑁂𑀦 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯. 𑀬𑀁 𑀧𑀦𑁂𑀢𑀁 𑁋

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸, 𑀮𑁄𑀫𑀸…𑀧𑁂… 𑀫𑀼𑀢𑁆𑀢’’𑀦𑁆𑀢𑀺 (𑀫. 𑀦𑀺. 𑁩.𑁧𑁫𑁪).

𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀫𑀢𑁆𑀣𑀮𑀼𑀗𑁆𑀕𑀁 𑀅𑀝𑁆𑀞𑀺𑀫𑀺𑀜𑁆𑀚𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑁂𑀲𑀺𑀢𑀁 𑀓𑀸𑀬𑀕𑀢𑀸𑀲𑀢𑀺𑀓𑁄𑀝𑁆𑀞𑀸𑀲𑀪𑀸𑀯𑀦𑀸𑀧𑀭𑀺𑀬𑀸𑀬𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀆𑀭𑀤𑁆𑀥𑀁, 𑀢𑀲𑁆𑀲𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋

𑀢𑀢𑁆𑀣 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀇𑀫𑀲𑁆𑀫𑀺𑀦𑁆𑀢𑀺 𑀬𑁆𑀯𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑁄 𑀧𑀽𑀭𑁄 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 ¶ . 𑀓𑀸𑀬𑁂𑀢𑀺 𑀲𑀭𑀻𑀭𑁂. 𑀲𑀭𑀻𑀭𑀜𑁆𑀳𑀺 𑀅𑀲𑀼𑀘𑀺𑀲𑀜𑁆𑀘𑀬𑀢𑁄, 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀓𑁂𑀲𑀸𑀤𑀻𑀦𑀜𑁆𑀘𑁂𑀯 𑀘𑀓𑁆𑀔𑀼𑀭𑁄𑀕𑀸𑀤𑀻𑀦𑀜𑁆𑀘 𑀭𑁄𑀕𑀲𑀢𑀸𑀦𑀁 𑀆𑀬𑀪𑀽𑀢𑀢𑁄 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀲𑀸…𑀧𑁂… 𑀫𑀼𑀢𑁆𑀢𑀦𑁆𑀢𑀺 𑀏𑀢𑁂 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸, 𑀢𑀢𑁆𑀣 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀅𑀢𑁆𑀣𑀺 𑀮𑁄𑀫𑀸’’𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀢𑁂𑀦 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀇𑀫𑀲𑁆𑀫𑀺𑀁 𑀧𑀸𑀤𑀢𑀮𑀸 𑀧𑀝𑁆𑀞𑀸𑀬 𑀉𑀧𑀭𑀺, 𑀓𑁂𑀲𑀫𑀢𑁆𑀣𑀓𑀸 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀢𑀘𑀢𑁄 𑀧𑀝𑁆𑀞𑀸𑀬 𑀧𑀭𑀺𑀢𑁄𑀢𑀺 𑀏𑀢𑁆𑀢𑀓𑁂 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀩𑁆𑀩𑀸𑀓𑀸𑀭𑁂𑀦𑀸𑀧𑀺 𑀯𑀺𑀘𑀺𑀦𑀦𑁆𑀢𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀁 𑀯𑀸 𑀫𑀡𑀺𑀁 𑀯𑀸 𑀯𑁂𑀴𑀼𑀭𑀺𑀬𑀁 𑀯𑀸 𑀅𑀕𑀭𑀼𑀁 𑀯𑀸 𑀘𑀦𑁆𑀤𑀦𑀁 𑀯𑀸 𑀓𑀼𑀗𑁆𑀓𑀼𑀫𑀁 𑀯𑀸 𑀓𑀧𑁆𑀧𑀽𑀭𑀁 𑀯𑀸 𑀯𑀸𑀲𑀘𑀼𑀡𑁆𑀡𑀸𑀤𑀺𑀁 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀢𑀺, 𑀅𑀣 𑀔𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀁 𑀅𑀲𑁆𑀲𑀺𑀭𑀺𑀓𑀤𑀲𑁆𑀲𑀦𑀁 𑀦𑀸𑀦𑀧𑁆𑀧𑀓𑀸𑀭𑀁 𑀓𑁂𑀲𑀮𑁄𑀫𑀸𑀤𑀺𑀪𑁂𑀤𑀁 𑀅𑀲𑀼𑀘𑀺𑀫𑁂𑀯 𑀧𑀲𑁆𑀲𑀢𑀻𑀢𑀺.

𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑀢𑁄 𑀯𑀡𑁆𑀡𑀦𑀸.

𑀅𑀲𑀼𑀪𑀪𑀸𑀯𑀦𑀸

𑀅𑀲𑀼𑀪𑀪𑀸𑀯𑀦𑀸𑀯𑀲𑁂𑀦 𑀧𑀦𑀲𑁆𑀲 𑀏𑀯𑀁 𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀯𑀫𑁂𑀢𑀲𑁆𑀫𑀺𑀁 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀸𑀤𑀺𑀪𑁂𑀤𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀧𑀬𑁄𑀕𑀲𑀼𑀤𑁆𑀥𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀦𑀢𑁆𑀣𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀜𑁆𑀚𑀺𑀢𑀼𑀓𑀸𑀫𑁂𑀦 𑀧𑀞𑀫𑀁 𑀢𑀸𑀯𑀲𑁆𑀲 𑀆𑀯𑀸𑀲𑀓𑀼𑀮𑀮𑀸𑀪𑀕𑀡𑀓𑀫𑁆𑀫𑀤𑁆𑀥𑀸𑀦𑀜𑀸𑀢𑀺𑀕𑀦𑁆𑀣𑀭𑁄𑀕𑀇𑀤𑁆𑀥𑀺𑀧𑀮𑀺𑀩𑁄𑀥𑁂𑀦 𑀓𑀺𑀢𑁆𑀢𑀺𑀧𑀮𑀺𑀩𑁄𑀥𑁂𑀦 𑀯𑀸 𑀲𑀳 𑀤𑀲 𑀧𑀮𑀺𑀩𑁄𑀥𑀸 ¶ 𑀳𑁄𑀦𑁆𑀢𑀺. 𑀅𑀣𑀸𑀦𑁂𑀦 𑀆𑀯𑀸𑀲𑀓𑀼𑀮𑀮𑀸𑀪𑀕𑀡𑀜𑀸𑀢𑀺𑀓𑀺𑀢𑁆𑀢𑀻𑀲𑀼 𑀲𑀗𑁆𑀕𑀧𑁆𑀧𑀳𑀸𑀦𑁂𑀦, 𑀓𑀫𑁆𑀫𑀤𑁆𑀥𑀸𑀦𑀕𑀦𑁆𑀣𑁂𑀲𑀼 𑀅𑀩𑁆𑀬𑀸𑀧𑀸𑀭𑁂𑀦, 𑀭𑁄𑀕𑀲𑁆𑀲 𑀢𑀺𑀓𑀺𑀘𑁆𑀙𑀸𑀬𑀸𑀢𑀺 𑀏𑀯𑀁 𑀢𑁂 𑀤𑀲 𑀧𑀮𑀺𑀩𑁄𑀥𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸, 𑀅𑀣𑀸𑀦𑁂𑀦 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀅𑀦𑀼𑀧𑀘𑁆𑀙𑀺𑀦𑁆𑀦𑀦𑁂𑀓𑁆𑀔𑀫𑁆𑀫𑀸𑀪𑀺𑀮𑀸𑀲𑁂𑀦 𑀓𑁄𑀝𑀺𑀧𑁆𑀧𑀢𑁆𑀢𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀫𑁆𑀧𑀺 𑀯𑀺𑀦𑀬𑀸𑀘𑀸𑀭𑀁 𑀅𑀧𑁆𑀧𑀚𑀳𑀦𑁆𑀢𑁂𑀦 𑀆𑀕𑀫𑀸𑀥𑀺𑀕𑀫𑀲𑀫𑀦𑁆𑀦𑀸𑀕𑀢𑁄 𑀢𑀢𑁄 𑀅𑀜𑁆𑀜𑀢𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀯𑀸 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑁄 𑀆𑀘𑀭𑀺𑀬𑁄 𑀯𑀺𑀦𑀬𑀸𑀦𑀼𑀭𑀽𑀧𑁂𑀦 𑀯𑀺𑀥𑀺𑀦𑀸 𑀉𑀧𑀕𑀦𑁆𑀢𑀩𑁆𑀩𑁄, 𑀯𑀢𑁆𑀢𑀲𑀫𑁆𑀧𑀤𑀸𑀬 𑀘 𑀆𑀭𑀸𑀥𑀺𑀢𑀘𑀺𑀢𑁆𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁄 𑀦𑀺𑀯𑁂𑀤𑁂𑀢𑀩𑁆𑀩𑁄. 𑀢𑁂𑀦 𑀢𑀲𑁆𑀲 𑀦𑀺𑀫𑀺𑀢𑁆𑀢𑀚𑁆𑀛𑀸𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀪𑁂𑀤𑀁 𑀜𑀢𑁆𑀯𑀸 𑀬𑀤𑀺 𑀏𑀢𑀁 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀭𑀽𑀧𑀁, 𑀅𑀣 ¶ 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀢𑁆𑀢𑀦𑀸 𑀯𑀲𑀢𑀺, 𑀬𑀤𑀺 𑀢𑀲𑁆𑀫𑀺𑀁𑀬𑁂𑀯 𑀲𑁄𑀧𑀺 𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁄 𑀲𑀗𑁆𑀔𑁂𑀧𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀤𑀸𑀢𑀩𑁆𑀩𑀁. 𑀅𑀣 𑀅𑀜𑁆𑀜𑀢𑁆𑀭 ¶ 𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁄 𑀧𑀳𑀸𑀢𑀩𑁆𑀩𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀤𑀺𑀓𑀣𑀦𑀯𑀲𑁂𑀦 𑀲𑀧𑀼𑀭𑁂𑀓𑁆𑀔𑀸𑀭𑀁 𑀭𑀸𑀕𑀘𑀭𑀺𑀢𑀸𑀦𑀼𑀓𑀼𑀮𑀸𑀤𑀺𑀓𑀣𑀦𑀯𑀲𑁂𑀦 𑀲𑀧𑁆𑀧𑀪𑁂𑀤𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑀩𑁆𑀩𑀁. 𑀢𑁂𑀦 𑀢𑀁 𑀲𑀧𑀼𑀭𑁂𑀓𑁆𑀔𑀸𑀭𑀁 𑀲𑀧𑁆𑀧𑀪𑁂𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀬𑀸𑀦𑀺 𑀢𑀸𑀦𑀺 𑁋

‘‘𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

‘‘𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

‘‘𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀲𑀧𑁆𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁨) 𑁋

𑀏𑀯𑀁 𑀅𑀝𑁆𑀞𑀸𑀭𑀲 𑀲𑁂𑀦𑀸𑀲𑀦𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀯𑀚𑁆𑀚𑁂𑀢𑁆𑀯𑀸, 𑀬𑀁 𑀢𑀁 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺, 𑀦𑀘𑁆𑀘𑀸𑀲𑀦𑁆𑀦𑀁, 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁, 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺? 𑀢𑀲𑁆𑀲, 𑀢𑁂 𑀆𑀬𑀲𑁆𑀫𑀦𑁆𑀢𑁄 ¶ 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧). 𑁋

𑀏𑀯𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁. 𑀢𑀣𑀸𑀭𑀽𑀧𑀁 𑀲𑁂𑀦𑀸𑀲𑀦𑀁 𑀉𑀧𑀕𑀫𑁆𑀫 𑀓𑀢𑀲𑀩𑁆𑀩𑀓𑀺𑀘𑁆𑀘𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁, 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 ¶ 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 ¶ 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀬 𑀘 𑀅𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀬𑀁 𑀢𑀁 𑁋

‘‘𑀯𑀘𑀲𑀸 𑀫𑀦𑀲𑀸 𑀘𑁂𑀯, 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀤𑀺𑀲𑀸;

𑀑𑀓𑀸𑀲𑀢𑁄 𑀧𑀭𑀺𑀘𑁆𑀙𑁂𑀤𑀸, 𑀲𑀢𑁆𑀢𑀥𑀼𑀕𑁆𑀕𑀳𑀡𑀁 𑀯𑀺𑀤𑀽’’𑀢𑀺. 𑁋

𑀏𑀯𑀁 𑀲𑀢𑁆𑀢𑀯𑀺𑀥𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁; 𑀅𑀦𑀼𑀧𑀼𑀩𑁆𑀩𑀢𑁄, 𑀦𑀸𑀢𑀺𑀲𑀻𑀖𑀢𑁄, 𑀦𑀸𑀢𑀺𑀲𑀡𑀺𑀓𑀢𑁄, 𑀯𑀺𑀓𑁆𑀔𑁂𑀧𑀧𑁆𑀧𑀝𑀺𑀩𑀸𑀳𑀦𑀢𑁄, 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀢𑁄, 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄, 𑀅𑀧𑁆𑀧𑀦𑀸𑀢𑁄, 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀏𑀯𑀁 𑀤𑀲𑀯𑀺𑀥𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀜𑁆𑀘 𑀯𑀼𑀢𑁆𑀢𑀁. 𑀢𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁂𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀪𑀸𑀯𑀦𑀸 𑀆𑀭𑀪𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀆𑀭𑀪𑀢𑁄 𑀲𑀩𑁆𑀩𑀸𑀓𑀸𑀭𑁂𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺 𑀦𑁄 𑀅𑀜𑁆𑀜𑀣𑀸.

𑀢𑀢𑁆𑀣 𑀆𑀤𑀺𑀢𑁄𑀯 𑀢𑀘𑀧𑀜𑁆𑀘𑀓𑀁 𑀢𑀸𑀯 𑀕𑀳𑁂𑀢𑁆𑀯𑀸 𑀅𑀧𑀺 𑀢𑁂𑀧𑀺𑀝𑀓𑁂𑀦 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀮𑁄𑀫𑀢𑁄, 𑀢𑀲𑁆𑀫𑀺𑀁 𑀧𑀕𑀼𑀡𑀻𑀪𑀽𑀢𑁂 ‘‘𑀢𑀘𑁄 𑀤𑀦𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑀝𑀺𑀮𑁄𑀫𑀢𑁄, 𑀢𑀲𑁆𑀫𑀺𑀫𑁆𑀧𑀺 𑀧𑀕𑀼𑀡𑀻𑀪𑀽𑀢𑁂 𑀢𑀤𑀼𑀪𑀬𑀦𑀬𑁂𑀦𑁂𑀯 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀢𑁄 𑀩𑀳𑀺 𑀯𑀺𑀲𑀝𑀯𑀺𑀢𑀓𑁆𑀓𑀯𑀺𑀘𑁆𑀙𑁂𑀤𑀦𑀢𑁆𑀣𑀁 𑀧𑀸𑀴𑀺𑀧𑀕𑀼𑀡𑀻𑀪𑀸𑀯𑀢𑁆𑀣𑀜𑁆𑀘 𑀯𑀘𑀲𑀸 𑀓𑁄𑀝𑁆𑀞𑀸𑀲𑀲𑀪𑀸𑀯𑀧𑀭𑀺𑀕𑁆𑀕𑀳𑀢𑁆𑀣𑀁 𑀫𑀦𑀲𑀸 𑀘 𑀅𑀤𑁆𑀥𑀫𑀸𑀲𑀁 𑀪𑀸𑀯𑁂𑀢𑀩𑁆𑀩𑀁. 𑀯𑀘𑀲𑀸 𑀳𑀺𑀲𑁆𑀲 𑀪𑀸𑀯𑀦𑀸 𑀩𑀳𑀺 𑀯𑀺𑀲𑀝𑀯𑀺𑀢𑀓𑁆𑀓𑁂 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀦𑀲𑀸 𑀪𑀸𑀯𑀦𑀸𑀬 𑀧𑀸𑀴𑀺𑀧𑀕𑀼𑀡𑀢𑀸𑀬 𑀘 𑀧𑀘𑁆𑀘𑀬𑁄 𑀳𑁄𑀢𑀺, 𑀫𑀦𑀲𑀸 𑀪𑀸𑀯𑀦𑀸 𑀅𑀲𑀼𑀪𑀯𑀡𑁆𑀡𑀮𑀓𑁆𑀔𑀡𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀧𑀭𑀺𑀕𑁆𑀕𑀳𑀲𑁆𑀲, 𑀅𑀣 𑀢𑁂𑀦𑁂𑀯 𑀦𑀬𑁂𑀦 𑀯𑀓𑁆𑀓𑀧𑀜𑁆𑀘𑀓𑀁 𑀅𑀤𑁆𑀥𑀫𑀸𑀲𑀁, 𑀢𑀢𑁄 𑀢𑀤𑀼𑀪𑀬𑀫𑀤𑁆𑀥𑀫𑀸𑀲𑀁, 𑀢𑀢𑁄 𑀧𑀧𑁆𑀨𑀸𑀲𑀧𑀜𑁆𑀘𑀓𑀫𑀤𑁆𑀥𑀫𑀸𑀲𑀁, 𑀢𑀢𑁄 𑀢𑀁 𑀧𑀜𑁆𑀘𑀓𑀢𑁆𑀢𑀬𑀫𑁆𑀧𑀺 𑀅𑀤𑁆𑀥𑀫𑀸𑀲𑀁, 𑀅𑀣 𑀅𑀦𑁆𑀢𑁂 𑀅𑀯𑀼𑀢𑁆𑀢𑀫𑁆𑀧𑀺 𑀫𑀢𑁆𑀣𑀮𑀼𑀗𑁆𑀕𑀁 𑀧𑀣𑀯𑀻𑀥𑀸𑀢𑀼𑀆𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀸𑀯𑀦𑀢𑁆𑀣𑀁 𑀇𑀥 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀢𑁆𑀣𑀮𑀼𑀗𑁆𑀕𑀧𑀜𑁆𑀘𑀓𑀁 𑀅𑀤𑁆𑀥𑀫𑀸𑀲𑀁, 𑀢𑀢𑁄 𑀧𑀜𑁆𑀘𑀓𑀘𑀢𑀼𑀓𑁆𑀓𑀫𑁆𑀧𑀺 𑀅𑀤𑁆𑀥𑀫𑀸𑀲𑀁, 𑀅𑀣 𑀫𑁂𑀤𑀙𑀓𑁆𑀓𑀫𑀤𑁆𑀥𑀫𑀸𑀲𑀁, 𑀢𑀢𑁄 𑀫𑁂𑀤𑀙𑀓𑁆𑀓𑁂𑀦 𑀲𑀳 𑀧𑀜𑁆𑀘𑀓𑀘𑀢𑀼𑀓𑁆𑀓𑀫𑁆𑀧𑀺 𑀅𑀤𑁆𑀥𑀫𑀸𑀲𑀁, 𑀅𑀣 𑀫𑀼𑀢𑁆𑀢𑀙𑀓𑁆𑀓𑀫𑀤𑁆𑀥𑀫𑀸𑀲𑀁, 𑀢𑀢𑁄 𑀲𑀩𑁆𑀩𑀫𑁂𑀯 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀫𑀤𑁆𑀥𑀫𑀸𑀲𑀦𑁆𑀢𑀺 𑀏𑀯𑀁 𑀙 𑀫𑀸𑀲𑁂 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀢𑁄 𑀯𑀯𑀢𑁆𑀣𑀧𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀁. 𑀏𑀢𑀁 𑀫𑀚𑁆𑀛𑀺𑀫𑀧𑀜𑁆𑀜𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢𑀁. 𑀫𑀦𑁆𑀤𑀧𑀜𑁆𑀜𑁂𑀦 𑀢𑀼 𑀬𑀸𑀯𑀚𑀻𑀯𑀁 𑀪𑀸𑀯𑁂𑀢𑀩𑁆𑀩𑀁 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀦 𑀘𑀺𑀭𑁂𑀦𑁂𑀯 𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀻𑀢𑀺.

𑀏𑀢𑁆𑀣𑀸𑀳 ¶ ¶ 𑁋 ‘‘𑀓𑀣𑀁 𑀧𑀦𑀸𑀬𑀫𑀺𑀫𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀻’’𑀢𑀺? 𑀅𑀬𑀜𑁆𑀳𑀺 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑀘𑀧𑀜𑁆𑀘𑀓𑀸𑀤𑀺𑀯𑀺𑀪𑀸𑀕𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀪𑀸𑀯𑁂𑀦𑁆𑀢𑁄 𑀓𑁂𑀲𑀸 𑀢𑀸𑀯 𑀯𑀡𑁆𑀡𑀢𑁄 𑀓𑀸𑀴𑀓𑀸𑀢𑀺 𑀯𑀯𑀢𑁆𑀣𑀧𑁂𑀢𑀺, 𑀬𑀸𑀤𑀺𑀲𑀓𑀸 𑀯𑀸𑀦𑁂𑀦 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀲𑀡𑁆𑀞𑀸𑀦𑀢𑁄 𑀤𑀻𑀖𑀯𑀝𑁆𑀝𑀮𑀺𑀓𑀸 𑀢𑀼𑀮𑀸𑀤𑀡𑁆𑀟𑀫𑀺𑀯𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀤𑀺𑀲𑀢𑁄 𑀧𑀦 𑀬𑀲𑁆𑀫𑀸 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀦𑀸𑀪𑀺𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀸 𑀤𑀺𑀲𑀸 𑀅𑀥𑁄 𑀳𑁂𑀝𑁆𑀞𑀺𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀑𑀓𑀸𑀲𑀢𑁄 𑀦𑀮𑀸𑀝𑀦𑁆𑀢𑀓𑀡𑁆𑀡𑀘𑀽𑀴𑀺𑀓𑀕𑀮𑀯𑀸𑀝𑀓𑀧𑀭𑀺𑀘𑁆𑀙𑀺𑀦𑁆𑀦𑁂 𑀲𑀻𑀲𑀘𑀫𑁆𑀫𑁂 𑀚𑀸𑀢𑀸𑀢𑀺. 𑀢𑀢𑁆𑀣 𑀬𑀣𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀸𑀦𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀸𑀦𑀻’’𑀢𑀺; 𑀦𑀧𑀺 𑀯𑀫𑁆𑀫𑀺𑀓𑀫𑀢𑁆𑀣𑀓𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀢𑀸𑀦𑀻’’𑀢𑀺; 𑀏𑀯𑀫𑁂𑀯 𑀦 𑀓𑁂𑀲𑀸 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀲𑀻𑀲𑀘𑀫𑁆𑀫𑁂 𑀚𑀸𑀢𑀸’’𑀢𑀺, 𑀦𑀧𑀺 𑀲𑀻𑀲𑀘𑀫𑁆𑀫𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀓𑁂𑀲𑀸 𑀚𑀸𑀢𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸 𑀅𑀘𑁂𑀢𑀦𑀸 𑀅𑀩𑁆𑀬𑀸𑀓𑀢𑀸 𑀲𑀼𑀜𑁆𑀜𑀸 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑁆𑀧𑀝𑀺𑀓𑀽𑀮𑀸, 𑀦 𑀲𑀢𑁆𑀢𑁄 𑀦 𑀧𑀼𑀕𑁆𑀕𑀮𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀤𑀼𑀯𑀺𑀥𑁄 𑀧𑀭𑀺𑀘𑁆𑀙𑁂𑀤𑁄 𑀲𑀪𑀸𑀕𑀯𑀺𑀲𑀪𑀸𑀕𑀯𑀲𑁂𑀦. 𑀢𑀢𑁆𑀣 𑀓𑁂𑀲𑀸 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀘𑀫𑁆𑀫𑀢𑀮𑁂𑀦 𑀢𑀢𑁆𑀣 𑀯𑀻𑀳𑀕𑁆𑀕𑀫𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦 𑀘 𑀉𑀧𑀭𑀺 𑀆𑀓𑀸𑀲𑁂𑀦 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀏𑀯𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑀢𑁄, 𑀓𑁂𑀲𑀸 𑀦 𑀅𑀯𑀲𑁂𑀲𑀏𑀓𑀢𑀺𑀁𑀲𑀸𑀓𑀸𑀭𑀸. 𑀅𑀯𑀲𑁂𑀲𑀸 𑀏𑀓𑀢𑀺𑀁𑀲𑀸 𑀦 𑀓𑁂𑀲𑀸𑀢𑀺 𑀏𑀯𑀁 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑀢𑁄 𑀘 𑀯𑀯𑀢𑁆𑀣𑀧𑁂𑀢𑀺. 𑀏𑀯𑀁 𑀢𑀸𑀯 𑀓𑁂𑀲𑁂 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀅𑀯𑀲𑁂𑀲𑁂𑀲𑀼 𑀮𑁄𑀫𑀸 𑀯𑀡𑁆𑀡𑀢𑁄 𑀬𑁂𑀪𑀼𑀬𑁆𑀬𑁂𑀦 𑀦𑀻𑀮𑀯𑀡𑁆𑀡𑀸𑀢𑀺 𑀯𑀯𑀢𑁆𑀣𑀧𑁂𑀢𑀺, 𑀬𑀸𑀤𑀺𑀲𑀓𑀸 𑀯𑀸𑀦𑁂𑀦 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀡𑀢𑀘𑀸𑀧𑀲𑀡𑁆𑀞𑀸𑀦𑀸, 𑀉𑀧𑀭𑀺 𑀯𑀗𑁆𑀓𑀢𑀸𑀮𑀳𑀻𑀭𑀲𑀡𑁆𑀞𑀸𑀦𑀸 𑀯𑀸, 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸, 𑀑𑀓𑀸𑀲𑀢𑁄 𑀳𑀢𑁆𑀣𑀢𑀮𑀧𑀸𑀤𑀢𑀮𑁂 𑀞𑀧𑁂𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀯𑀲𑁂𑀲𑀲𑀭𑀻𑀭𑀘𑀫𑁆𑀫𑁂 ¶ 𑀚𑀸𑀢𑀸𑀢𑀺.

𑀢𑀢𑁆𑀣 𑀬𑀣𑀸 𑀧𑀼𑀭𑀸𑀡𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑀸𑀦𑀺 𑀤𑀩𑁆𑀩𑀢𑀺𑀡𑀸𑀦𑀺 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀧𑀼𑀭𑀸𑀡𑀕𑀸𑀫𑀝𑁆𑀞𑀸𑀦𑁂 𑀚𑀸𑀢𑀸𑀦𑀻’’𑀢𑀺, 𑀦 𑀘 𑀧𑀼𑀭𑀸𑀡𑀕𑀸𑀫𑀝𑁆𑀞𑀸𑀦𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀤𑀩𑁆𑀩𑀢𑀺𑀡𑀸𑀦𑀺 𑀚𑀸𑀢𑀸𑀦𑀻’’𑀢𑀺, 𑀏𑀯𑀫𑁂𑀯 𑀦 𑀮𑁄𑀫𑀸 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀲𑀭𑀻𑀭𑀘𑀫𑁆𑀫𑁂 𑀚𑀸𑀢𑀸’’𑀢𑀺, 𑀦𑀧𑀺 𑀲𑀭𑀻𑀭𑀘𑀫𑁆𑀫𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀮𑁄𑀫𑀸 𑀚𑀸𑀢𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸 𑀅𑀘𑁂𑀢𑀦𑀸 𑀅𑀩𑁆𑀬𑀸𑀓𑀢𑀸 𑀲𑀼𑀜𑁆𑀜𑀸 ¶ 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀸, 𑀦 𑀲𑀢𑁆𑀢𑁄 𑀦 𑀧𑀼𑀕𑁆𑀕𑀮𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀘𑀫𑁆𑀫𑀢𑀮𑁂𑀦 𑀢𑀢𑁆𑀣 𑀮𑀺𑀓𑁆𑀔𑀸𑀫𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀅𑀢𑁆𑀢𑀦𑁄 𑀫𑀽𑀮𑁂𑀦 𑀘 𑀉𑀧𑀭𑀺 𑀆𑀓𑀸𑀲𑁂𑀦 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀮𑁄𑀫𑁂 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀦𑀔𑀸 𑀬𑀲𑁆𑀲 𑀧𑀭𑀺𑀧𑀼𑀡𑁆𑀡𑀸, 𑀢𑀲𑁆𑀲 𑀯𑀻𑀲𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀯𑀡𑁆𑀡𑀢𑁄 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑁄𑀓𑀸𑀲𑁂 ¶ 𑀲𑁂𑀢𑀸, 𑀫𑀁𑀲𑀲𑀫𑁆𑀩𑀦𑁆𑀥𑁂 𑀢𑀫𑁆𑀩𑀯𑀡𑁆𑀡𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀬𑀣𑀸𑀲𑀓𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀲𑀡𑁆𑀞𑀸𑀦𑀸, 𑀬𑁂𑀪𑀼𑀬𑁆𑀬𑁂𑀦 𑀫𑀥𑀼𑀓𑀨𑀮𑀝𑁆𑀞𑀺𑀓𑀲𑀡𑁆𑀞𑀸𑀦𑀸, 𑀫𑀘𑁆𑀙𑀲𑀓𑀮𑀺𑀓𑀲𑀡𑁆𑀞𑀸𑀦𑀸 𑀯𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸, 𑀑𑀓𑀸𑀲𑀢𑁄 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀢𑀺.

𑀢𑀢𑁆𑀣 𑀬𑀣𑀸 𑀦𑀸𑀫 𑀕𑀸𑀫𑀤𑀸𑀭𑀓𑁂𑀳𑀺 𑀤𑀡𑁆𑀟𑀓𑀕𑁆𑀕𑁂𑀲𑀼 𑀫𑀥𑀼𑀓𑀨𑀮𑀝𑁆𑀞𑀺𑀓𑀸 𑀞𑀧𑀺𑀢𑀸 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀤𑀡𑁆𑀟𑀓𑀕𑁆𑀕𑁂𑀲𑀼 𑀞𑀧𑀺𑀢𑀸’’𑀢𑀺, 𑀦𑀧𑀺 𑀤𑀡𑁆𑀟𑀓𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀲𑀼 𑀫𑀥𑀼𑀓𑀨𑀮𑀝𑁆𑀞𑀺𑀓𑀸 𑀞𑀧𑀺𑀢𑀸’’𑀢𑀺; 𑀏𑀯𑀫𑁂𑀯 𑀦𑀔𑀸 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀅𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑁂𑀲𑀼 𑀧𑀢𑀺𑀝𑁆𑀞𑀺𑀢𑀸’’𑀢𑀺, 𑀦𑀧𑀺 𑀅𑀗𑁆𑀕𑀼𑀮𑀺𑀬𑁄 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑀸𑀓𑀁 𑀅𑀕𑁆𑀕𑁂𑀲𑀼 𑀦𑀔𑀸 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸 𑀅𑀘𑁂𑀢𑀦𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀫𑀽𑀮𑁂 𑀘 𑀅𑀗𑁆𑀕𑀼𑀮𑀺𑀫𑀁𑀲𑁂𑀦, 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀢𑀮𑁂𑀦 𑀯𑀸 𑀉𑀧𑀭𑀺 𑀅𑀕𑁆𑀕𑁂 𑀘 𑀆𑀓𑀸𑀲𑁂𑀦, 𑀉𑀪𑀢𑁄𑀧𑀲𑁆𑀲𑁂𑀲𑀼 𑀅𑀗𑁆𑀕𑀼𑀮𑀻𑀦𑀁 𑀉𑀪𑀢𑁄𑀓𑁄𑀝𑀺𑀘𑀫𑁆𑀫𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀦𑀔𑁂 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀤𑀦𑁆𑀢𑀸 𑀬𑀲𑁆𑀲 𑀧𑀭𑀺𑀧𑀼𑀡𑁆𑀡𑀸, 𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲. 𑀢𑁂 𑀲𑀩𑁆𑀩𑁂𑀧𑀺 𑀯𑀡𑁆𑀡𑀢𑁄 𑀲𑁂𑀢𑀯𑀡𑁆𑀡𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀬𑀲𑁆𑀲 𑀲𑀫𑀲𑀡𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀔𑀭𑀧𑀢𑁆𑀢𑀘𑁆𑀙𑀺𑀦𑁆𑀦𑀲𑀗𑁆𑀔𑀧𑀝𑀮𑀫𑀺𑀯 𑀲𑀫𑀕𑀦𑁆𑀣𑀺𑀢𑀲𑁂𑀢𑀓𑀼𑀲𑀼𑀫𑀫𑀓𑀼𑀴𑀫𑀸𑀮𑀸 ¶ 𑀯𑀺𑀬 𑀘 𑀔𑀸𑀬𑀦𑁆𑀢𑀺. 𑀬𑀲𑁆𑀲 𑀯𑀺𑀲𑀫𑀲𑀡𑁆𑀞𑀺𑀢𑀸, 𑀢𑀲𑁆𑀲 𑀚𑀺𑀡𑁆𑀡𑀆𑀲𑀦𑀲𑀸𑀮𑀸𑀧𑀻𑀞𑀓𑀧𑀝𑀺𑀧𑀸𑀝𑀺 𑀯𑀺𑀬 𑀦𑀸𑀦𑀸𑀲𑀡𑁆𑀞𑀸𑀦𑀸𑀢𑀺 𑀲𑀡𑁆𑀞𑀸𑀦𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀢𑁂𑀲𑀜𑁆𑀳𑀺 𑀉𑀪𑀬𑀤𑀦𑁆𑀢𑀧𑀦𑁆𑀢𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀳𑁂𑀝𑁆𑀞𑀢𑁄 𑀉𑀧𑀭𑀺𑀢𑁄 𑀘 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀅𑀝𑁆𑀞 𑀤𑀦𑁆𑀢𑀸 𑀘𑀢𑀼𑀓𑁄𑀝𑀺𑀓𑀸 𑀘𑀢𑀼𑀫𑀽𑀮𑀺𑀓𑀸 𑀆𑀲𑀦𑁆𑀤𑀺𑀓𑀲𑀡𑁆𑀞𑀸𑀦𑀸, 𑀢𑁂𑀲𑀁 𑀑𑀭𑀢𑁄 𑀢𑁂𑀦𑁂𑀯 ¶ 𑀓𑀫𑁂𑀦 𑀲𑀦𑁆𑀦𑀺𑀯𑀺𑀝𑁆𑀞𑀸 𑀅𑀝𑁆𑀞 𑀤𑀦𑁆𑀢𑀸 𑀢𑀺𑀓𑁄𑀝𑀺𑀓𑀸 𑀢𑀺𑀫𑀽𑀮𑀺𑀓𑀸 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸. 𑀢𑁂𑀲𑀫𑁆𑀧𑀺 𑀑𑀭𑀢𑁄 𑀢𑁂𑀦𑁂𑀯 𑀓𑀫𑁂𑀦 𑀳𑁂𑀝𑁆𑀞𑀢𑁄 𑀉𑀧𑀭𑀺𑀢𑁄 𑀘 𑀏𑀓𑀫𑁂𑀓𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀤𑀦𑁆𑀢𑀸 𑀤𑁆𑀯𑀺𑀓𑁄𑀝𑀺𑀓𑀸 𑀤𑁆𑀯𑀺𑀫𑀽𑀮𑀺𑀓𑀸 𑀬𑀸𑀦𑀓𑀽𑀧𑀢𑁆𑀣𑀫𑁆𑀪𑀺𑀦𑀻𑀲𑀡𑁆𑀞𑀸𑀦𑀸. 𑀢𑁂𑀲𑀫𑁆𑀧𑀺 𑀑𑀭𑀢𑁄 𑀢𑁂𑀦𑁂𑀯 𑀓𑀫𑁂𑀦 𑀲𑀦𑁆𑀦𑀺𑀯𑀺𑀝𑁆𑀞𑀸 𑀘𑀢𑁆𑀢𑀸𑀭𑁄 𑀤𑀸𑀞𑀸𑀤𑀦𑁆𑀢𑀸 𑀏𑀓𑀓𑁄𑀝𑀺𑀓𑀸 𑀏𑀓𑀫𑀽𑀮𑀺𑀓𑀸 𑀫𑀮𑁆𑀮𑀺𑀓𑀸𑀫𑀓𑀼𑀴𑀲𑀡𑁆𑀞𑀸𑀦𑀸. 𑀢𑀢𑁄 𑀉𑀪𑀬𑀤𑀦𑁆𑀢𑀧𑀦𑁆𑀢𑀺𑀯𑁂𑀫𑀚𑁆𑀛𑁂 𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑁄 𑀉𑀧𑀭𑀺 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀅𑀝𑁆𑀞 𑀤𑀦𑁆𑀢𑀸 𑀏𑀓𑀓𑁄𑀝𑀺𑀓𑀸 𑀏𑀓𑀫𑀽𑀮𑀺𑀓𑀸 𑀢𑀼𑀫𑁆𑀩𑀩𑀻𑀚𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀸. 𑀑𑀓𑀸𑀲𑀢𑁄 𑀉𑀧𑀭𑀺𑀫𑀸 𑀉𑀧𑀭𑀺𑀫𑀳𑀦𑀼𑀓𑀝𑁆𑀞𑀺𑀓𑁂 𑀅𑀥𑁄𑀓𑁄𑀝𑀺𑀓𑀸, 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀳𑀦𑀼𑀓𑀝𑁆𑀞𑀺𑀓𑁂 𑀉𑀤𑁆𑀥𑀁𑀓𑁄𑀝𑀺𑀓𑀸 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀸𑀢𑀺.

𑀢𑀢𑁆𑀣 𑀬𑀣𑀸 𑀦𑀯𑀓𑀫𑁆𑀫𑀺𑀓𑀧𑀼𑀭𑀺𑀲𑁂𑀦 𑀳𑁂𑀝𑁆𑀞𑀸 𑀲𑀺𑀮𑀸𑀢𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑀸 𑀉𑀧𑀭𑀺𑀫𑀢𑀮𑁂 𑀧𑀯𑁂𑀲𑀺𑀢𑀸 𑀣𑀫𑁆𑀪𑀸 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀳𑁂𑀝𑁆𑀞𑀸𑀲𑀺𑀮𑀸𑀢𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑀸, 𑀉𑀧𑀭𑀺𑀫𑀢𑀮𑁂 𑀧𑀯𑁂𑀲𑀺𑀢𑀸’’𑀢𑀺, 𑀦 𑀳𑁂𑀝𑁆𑀞𑀸𑀲𑀺𑀮𑀸𑀢𑀮𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀣𑀫𑁆𑀪𑀸 𑀧𑀢𑀺𑀝𑁆𑀞𑀸𑀧𑀺𑀢𑀸’’𑀢𑀺, 𑀦 𑀉𑀧𑀭𑀺𑀫𑀢𑀮𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀣𑀫𑁆𑀪𑀸 𑀧𑀯𑀺𑀝𑁆𑀞𑀸’’𑀢𑀺; 𑀏𑀯𑀫𑁂𑀯 𑀤𑀦𑁆𑀢𑀸 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀳𑁂𑀝𑁆𑀞𑀸𑀳𑀦𑀼𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀉𑀧𑀭𑀺𑀫𑀳𑀦𑀼𑀓𑀝𑁆𑀞𑀺𑀓𑁂 𑀧𑀯𑀺𑀝𑁆𑀞𑀸’’𑀢𑀺, 𑀦𑀸𑀧𑀺 ¶ 𑀳𑁂𑀝𑁆𑀞𑀸𑀳𑀦𑀼𑀓𑀝𑁆𑀞𑀺𑀓𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀤𑀦𑁆𑀢𑀸 𑀧𑀢𑀺𑀝𑁆𑀞𑀺𑀢𑀸’’𑀢𑀺, 𑀦 𑀉𑀧𑀭𑀺𑀫𑀳𑀦𑀼𑀓𑀝𑁆𑀞𑀺𑀓𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀤𑀦𑁆𑀢𑀸 𑀧𑀯𑀺𑀝𑁆𑀞𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀳𑀦𑀼𑀓𑀝𑁆𑀞𑀺𑀓𑀽𑀧𑁂𑀦 𑀳𑀦𑀼𑀓𑀝𑁆𑀞𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁂𑀦 𑀅𑀢𑁆𑀢𑀦𑁄 𑀫𑀽𑀮𑀢𑀮𑁂𑀦 𑀘 𑀉𑀧𑀭𑀺 𑀆𑀓𑀸𑀲𑁂𑀦 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀤𑀦𑁆𑀢𑁂 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺 ¶ .

𑀢𑀢𑁄 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀦𑀸𑀦𑀸𑀓𑀼𑀡𑀧𑀲𑀜𑁆𑀘𑀬𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀢𑀘𑁄 𑀯𑀡𑁆𑀡𑀢𑁄 𑀲𑁂𑀢𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑁄 𑀳𑀺 𑀬𑀤𑀺𑀧𑀺 𑀙𑀯𑀺𑀭𑀸𑀕𑀭𑀜𑁆𑀚𑀺𑀢𑀢𑁆𑀢𑀸 𑀓𑀸𑀴𑀓𑁄𑀤𑀸𑀢𑀸𑀤𑀺𑀯𑀡𑁆𑀡𑀯𑀲𑁂𑀦 𑀦𑀸𑀦𑀸𑀯𑀡𑁆𑀡𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀲𑀪𑀸𑀕𑀯𑀡𑁆𑀡𑁂𑀦 𑀲𑁂𑀢𑁄 𑀏𑀯. 𑀲𑁄 𑀧𑀦𑀲𑁆𑀲 𑀲𑁂𑀢𑀪𑀸𑀯𑁄 𑀅𑀕𑁆𑀕𑀺𑀚𑀸𑀮𑀸𑀪𑀺𑀖𑀸𑀢𑀧𑀳𑀭𑀡𑀧𑀳𑀸𑀭𑀸𑀤𑀻𑀳𑀺 𑀯𑀺𑀤𑁆𑀥𑀁𑀲𑀺𑀢𑀸𑀬 𑀙𑀯𑀺𑀬𑀸 𑀧𑀸𑀓𑀝𑁄 𑀳𑁄𑀢𑀺. 𑀲𑀡𑁆𑀞𑀸𑀦𑀢𑁄 𑀲𑀗𑁆𑀔𑁂𑀧𑁂𑀦 𑀓𑀜𑁆𑀘𑀼𑀓𑀲𑀡𑁆𑀞𑀸𑀦𑁄, 𑀯𑀺𑀢𑁆𑀣𑀸𑀭𑁂𑀦 𑀦𑀸𑀦𑀸𑀲𑀡𑁆𑀞𑀸𑀦𑁄𑀢𑀺. 𑀢𑀣𑀸 𑀳𑀺 𑀧𑀸𑀤𑀗𑁆𑀕𑀼𑀮𑀺𑀢𑁆𑀢𑀘𑁄 𑀓𑁄𑀲𑀓𑀸𑀭𑀓𑀓𑁄𑀲𑀲𑀡𑁆𑀞𑀸𑀦𑁄, 𑀧𑀺𑀝𑁆𑀞𑀺𑀧𑀸𑀤𑀢𑁆𑀢𑀘𑁄 𑀧𑀼𑀝𑀩𑀤𑁆𑀥𑀽𑀧𑀸𑀳𑀦𑀲𑀡𑁆𑀞𑀸𑀦𑁄, 𑀚𑀗𑁆𑀖𑀢𑁆𑀢𑀘𑁄 𑀪𑀢𑁆𑀢𑀧𑀼𑀝𑀓𑀢𑀸𑀮𑀧𑀡𑁆𑀡𑀲𑀡𑁆𑀞𑀸𑀦𑁄 ¶ , 𑀊𑀭𑀼𑀢𑁆𑀢𑀘𑁄 𑀢𑀡𑁆𑀟𑀼𑀮𑀪𑀭𑀺𑀢𑀤𑀻𑀖𑀢𑁆𑀣𑀯𑀺𑀓𑀲𑀡𑁆𑀞𑀸𑀦𑁄, 𑀆𑀦𑀺𑀲𑀤𑀢𑁆𑀢𑀘𑁄 𑀉𑀤𑀓𑀧𑀽𑀭𑀺𑀢𑀧𑀝𑀧𑀭𑀺𑀲𑁆𑀲𑀸𑀯𑀦𑀲𑀡𑁆𑀞𑀸𑀦𑁄, 𑀧𑀺𑀝𑁆𑀞𑀺𑀢𑁆𑀢𑀘𑁄 𑀨𑀮𑀓𑁄𑀦𑀤𑁆𑀥𑀘𑀫𑁆𑀫𑀲𑀡𑁆𑀞𑀸𑀦𑁄, 𑀓𑀼𑀘𑁆𑀙𑀺𑀢𑁆𑀢𑀘𑁄 𑀯𑀻𑀡𑀸𑀤𑁄𑀡𑀺𑀓𑁄𑀦𑀤𑁆𑀥𑀘𑀫𑁆𑀫𑀲𑀡𑁆𑀞𑀸𑀦𑁄, 𑀉𑀭𑀢𑁆𑀢𑀘𑁄 𑀬𑁂𑀪𑀼𑀬𑁆𑀬𑁂𑀦 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑁄, 𑀤𑁆𑀯𑀺𑀩𑀸𑀳𑀼𑀢𑁆𑀢𑀘𑁄 𑀢𑀽𑀡𑀻𑀭𑁄𑀦𑀤𑁆𑀥𑀘𑀫𑁆𑀫𑀲𑀡𑁆𑀞𑀸𑀦𑁄, 𑀧𑀺𑀝𑁆𑀞𑀺𑀳𑀢𑁆𑀣𑀢𑁆𑀢𑀘𑁄 𑀔𑀼𑀭𑀓𑁄𑀲𑀲𑀡𑁆𑀞𑀸𑀦𑁄 𑀨𑀡𑀓𑀢𑁆𑀣𑀯𑀺𑀓𑀲𑀡𑁆𑀞𑀸𑀦𑁄 𑀯𑀸, 𑀳𑀢𑁆𑀣𑀗𑁆𑀕𑀼𑀮𑀺𑀢𑁆𑀢𑀘𑁄 𑀓𑀼𑀜𑁆𑀘𑀺𑀓𑀸𑀓𑁄𑀲𑀲𑀡𑁆𑀞𑀸𑀦𑁄, 𑀕𑀻𑀯𑀢𑁆𑀢𑀘𑁄 𑀕𑀮𑀓𑀜𑁆𑀘𑀼𑀓𑀲𑀡𑁆𑀞𑀸𑀦𑁄, 𑀫𑀼𑀔𑀢𑁆𑀢𑀘𑁄 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀓𑀺𑀫𑀺𑀓𑀼𑀮𑀸𑀯𑀓𑀲𑀡𑁆𑀞𑀸𑀦𑁄, 𑀲𑀻𑀲𑀢𑁆𑀢𑀘𑁄 𑀧𑀢𑁆𑀢𑀢𑁆𑀣𑀯𑀺𑀓𑀲𑀡𑁆𑀞𑀸𑀦𑁄𑀢𑀺.

𑀢𑀘𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀘 𑀬𑁄𑀕𑀸𑀯𑀘𑀭𑁂𑀦 𑀉𑀢𑁆𑀢𑀭𑁄𑀝𑁆𑀞𑀢𑁄 𑀧𑀝𑁆𑀞𑀸𑀬 𑀢𑀘𑀲𑁆𑀲 𑀫𑀁𑀲𑀲𑁆𑀲 𑀘 𑀅𑀦𑁆𑀢𑀭𑁂𑀦 𑀘𑀺𑀢𑁆𑀢𑀁 𑀧𑁂𑀲𑁂𑀦𑁆𑀢𑁂𑀦 𑀧𑀞𑀫𑀁 𑀢𑀸𑀯 𑀫𑀼𑀔𑀢𑁆𑀢𑀘𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄, 𑀢𑀢𑁄 𑀲𑀻𑀲𑀢𑁆𑀢𑀘𑁄, 𑀅𑀣 𑀩𑀳𑀺𑀕𑀻𑀯𑀢𑁆𑀢𑀘𑁄, 𑀢𑀢𑁄 𑀅𑀦𑀼𑀮𑁄𑀫𑁂𑀦 𑀧𑀝𑀺𑀮𑁄𑀫𑁂𑀦 𑀘 𑀤𑀓𑁆𑀔𑀺𑀡𑀳𑀢𑁆𑀣𑀢𑁆𑀢𑀘𑁄. 𑀅𑀣 𑀢𑁂𑀦𑁂𑀯 𑀓𑀫𑁂𑀦 𑀯𑀸𑀫𑀳𑀢𑁆𑀣𑀢𑁆𑀢𑀘𑁄, 𑀢𑀢𑁄 𑀧𑀺𑀝𑁆𑀞𑀺𑀢𑁆𑀢𑀘𑁄, 𑀅𑀣 𑀆𑀦𑀺𑀲𑀤𑀢𑁆𑀢𑀘𑁄, 𑀢𑀢𑁄 𑀅𑀦𑀼𑀮𑁄𑀫𑁂𑀦 𑀧𑀝𑀺𑀮𑁄𑀫𑁂𑀦 𑀘 𑀤𑀓𑁆𑀔𑀺𑀡𑀧𑀸𑀤𑀢𑁆𑀢𑀘𑁄, 𑀅𑀣 𑀯𑀸𑀫𑀧𑀸𑀤𑀢𑁆𑀢𑀘𑁄, 𑀢𑀢𑁄 𑀯𑀢𑁆𑀣𑀺𑀉𑀤𑀭𑀳𑀤𑀬𑀅𑀩𑁆𑀪𑀦𑁆𑀢𑀭𑀕𑀻𑀯𑀢𑁆𑀢𑀘𑁄, 𑀢𑀢𑁄 𑀳𑁂𑀝𑁆𑀞𑀺𑀫𑀳𑀦𑀼𑀓𑀢𑁆𑀢𑀘𑁄, 𑀅𑀣 𑀅𑀥𑀭𑁄𑀝𑁆𑀞𑀢𑁆𑀢𑀘𑁄. 𑀏𑀯𑀁 𑀬𑀸𑀯 𑀧𑀼𑀦 𑀉𑀧𑀭𑀺 𑀑𑀝𑁆𑀞𑀢𑁆𑀢𑀘𑁄𑀢𑀺 ¶ . 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀲𑀓𑀮𑀲𑀭𑀻𑀭𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑁄𑀢𑀺.

𑀢𑀢𑁆𑀣 𑀬𑀣𑀸 𑀅𑀮𑁆𑀮𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀸𑀬 𑀧𑁂𑀴𑀸𑀬 𑀦 𑀅𑀮𑁆𑀮𑀘𑀫𑁆𑀫𑀁 𑀚𑀸𑀦𑀸𑀢𑀺 ‘‘𑀫𑀬𑀸 𑀧𑁂𑀴𑀸 𑀧𑀭𑀺𑀬𑁄𑀦𑀤𑁆𑀥𑀸’’𑀢𑀺, 𑀦𑀧𑀺 𑀧𑁂𑀴𑀸 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀮𑁆𑀮𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑀸’’𑀢𑀺; 𑀏𑀯𑀫𑁂𑀯 𑀦 𑀢𑀘𑁄 𑀚𑀸𑀦𑀸𑀢𑀺 ‘‘𑀫𑀬𑀸 𑀇𑀤𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀲𑀭𑀻𑀭𑀁 𑀑𑀦𑀤𑁆𑀥’’𑀦𑁆𑀢𑀺, 𑀦𑀧𑀺 𑀇𑀤𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀲𑀭𑀻𑀭𑀁 𑀚𑀸𑀦𑀸𑀢𑀺 ¶ ‘‘𑀅𑀳𑀁 𑀢𑀘𑁂𑀦 𑀑𑀦𑀤𑁆𑀥’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀓𑁂𑀯𑀮𑀁 𑀢𑀼 𑁋

‘‘𑀅𑀮𑁆𑀮𑀘𑀫𑁆𑀫𑀧𑀝𑀺𑀘𑁆𑀙𑀦𑁆𑀦𑁄, 𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄;

𑀲𑀫𑀦𑁆𑀢𑀢𑁄 𑀧𑀕𑁆𑀖𑀭𑀢𑀺, 𑀅𑀲𑀼𑀘𑀺𑀧𑀽𑀢𑀺𑀕𑀦𑁆𑀥𑀺𑀬𑁄’’𑀢𑀺.

𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀫𑀁𑀲𑁂𑀦 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀢𑀮𑁂𑀦 𑀯𑀸 𑀉𑀧𑀭𑀺 𑀙𑀯𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀢𑀘𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 ¶ 𑀧𑀭𑀁 𑀲𑀭𑀻𑀭𑁂 𑀦𑀯𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑀁 𑀫𑀁𑀲𑀁 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀧𑀸𑀮𑀺𑀪𑀤𑁆𑀤𑀓𑀧𑀼𑀧𑁆𑀨𑀲𑀦𑁆𑀦𑀺𑀪𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀦𑀸𑀦𑀸𑀲𑀡𑁆𑀞𑀸𑀦𑀦𑁆𑀢𑀺. 𑀢𑀣𑀸 𑀳𑀺 𑀢𑀢𑁆𑀣 𑀚𑀗𑁆𑀖𑀫𑀁𑀲𑀁 𑀢𑀸𑀮𑀧𑀢𑁆𑀢𑀧𑀼𑀝𑀪𑀢𑁆𑀢𑀲𑀡𑁆𑀞𑀸𑀦𑀁, 𑀅𑀯𑀺𑀓𑀲𑀺𑀢𑀓𑁂𑀢𑀓𑀻𑀫𑀓𑀼𑀴𑀲𑀡𑁆𑀞𑀸𑀦𑀦𑁆𑀢𑀺𑀧𑀺 𑀓𑁂𑀘𑀺. 𑀊𑀭𑀼𑀫𑀁𑀲𑀁 𑀲𑀼𑀥𑀸𑀧𑀺𑀲𑀦𑀦𑀺𑀲𑀤𑀧𑁄𑀢𑀓𑀲𑀡𑁆𑀞𑀸𑀦𑀁, 𑀆𑀦𑀺𑀲𑀤𑀫𑀁𑀲𑀁 𑀉𑀤𑁆𑀥𑀦𑀓𑁄𑀝𑀺𑀲𑀡𑁆𑀞𑀸𑀦𑀁, 𑀧𑀺𑀝𑁆𑀞𑀺𑀫𑀁𑀲𑀁 𑀢𑀸𑀮𑀕𑀼𑀴𑀧𑀝𑀮𑀲𑀡𑁆𑀞𑀸𑀦𑀁, 𑀨𑀸𑀲𑀼𑀓𑀤𑁆𑀯𑀬𑀫𑀁𑀲𑀁 𑀯𑀁𑀲𑀫𑀬𑀓𑁄𑀝𑁆𑀞𑀓𑀼𑀘𑁆𑀙𑀺𑀧𑀤𑁂𑀲𑀫𑁆𑀳𑀺 𑀢𑀦𑀼𑀫𑀢𑁆𑀢𑀺𑀓𑀸𑀮𑁂𑀧𑀲𑀡𑁆𑀞𑀸𑀦𑀁, 𑀣𑀦𑀫𑀁𑀲𑀁 𑀯𑀝𑁆𑀝𑁂𑀢𑁆𑀯𑀸 𑀅𑀯𑀓𑁆𑀔𑀺𑀢𑁆𑀢𑀤𑁆𑀥𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑀡𑁆𑀞𑀸𑀦𑀁, 𑀤𑁆𑀯𑁂𑀩𑀸𑀳𑀼𑀫𑀁𑀲𑀁 𑀦𑀗𑁆𑀕𑀼𑀝𑁆𑀞𑀲𑀻𑀲𑀧𑀸𑀤𑁂 𑀙𑁂𑀢𑁆𑀯𑀸 𑀦𑀺𑀘𑁆𑀘𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢𑀫𑀳𑀸𑀫𑀽𑀲𑀺𑀓𑀲𑀡𑁆𑀞𑀸𑀦𑀁, 𑀫𑀁𑀲𑀲𑀽𑀦𑀓𑀲𑀡𑁆𑀞𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀕𑀡𑁆𑀟𑀫𑀁𑀲𑀁 𑀕𑀡𑁆𑀟𑀧𑁆𑀧𑀤𑁂𑀲𑁂 𑀞𑀧𑀺𑀢𑀓𑀭𑀜𑁆𑀚𑀩𑀻𑀚𑀲𑀡𑁆𑀞𑀸𑀦𑀁, 𑀫𑀡𑁆𑀟𑀽𑀓𑀲𑀡𑁆𑀞𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀚𑀺𑀯𑁆𑀳𑀸𑀫𑀁𑀲𑀁 𑀦𑀼𑀳𑀻𑀧𑀢𑁆𑀢𑀲𑀡𑁆𑀞𑀸𑀦𑀁, 𑀦𑀸𑀲𑀸𑀫𑀁𑀲𑀁 𑀑𑀫𑀼𑀔𑀦𑀺𑀓𑁆𑀔𑀺𑀢𑁆𑀢𑀧𑀡𑁆𑀡𑀓𑁄𑀲𑀲𑀡𑁆𑀞𑀸𑀦𑀁, 𑁦.𑀅𑀓𑁆𑀔𑀺𑀓𑀽𑀧𑀫𑀁𑀲𑀁 𑀅𑀤𑁆𑀥𑀧𑀓𑁆𑀓𑀉𑀤𑀼𑀫𑁆𑀩𑀭𑀲𑀡𑁆𑀞𑀸𑀦𑀁, 𑀲𑀻𑀲𑀫𑀁𑀲𑀁 𑀧𑀢𑁆𑀢𑀧𑀘𑀦𑀓𑀝𑀸𑀳𑀢𑀦𑀼𑀮𑁂𑀧𑀲𑀡𑁆𑀞𑀸𑀦𑀦𑁆𑀢𑀺 ¶ . 𑀫𑀁𑀲𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀘 𑀬𑁄𑀕𑀸𑀯𑀘𑀭𑁂𑀦 𑀏𑀢𑀸𑀦𑁂𑀯 𑀑𑀴𑀸𑀭𑀺𑀓𑀫𑀁𑀲𑀸𑀦𑀺 𑀲𑀡𑁆𑀞𑀸𑀦𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀦𑀺. 𑀏𑀯𑀜𑁆𑀳𑀺 𑀯𑀯𑀢𑁆𑀣𑀸𑀧𑀬𑀢𑁄 𑀲𑀼𑀔𑀼𑀫𑀸𑀦𑀺 𑀫𑀁𑀲𑀸𑀦𑀺 𑀜𑀸𑀡𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻𑀢𑀺. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀣𑀽𑀮𑀫𑀢𑁆𑀢𑀺𑀓𑀸𑀦𑀼𑀮𑀺𑀢𑁆𑀢𑀸𑀬 𑀪𑀺𑀢𑁆𑀢𑀺𑀬𑀸 𑀦 𑀣𑀽𑀮𑀫𑀢𑁆𑀢𑀺𑀓𑀸 𑀚𑀸𑀦𑀸𑀢𑀺 ‘‘𑀫𑀬𑀸 𑀪𑀺𑀢𑁆𑀢𑀺 𑀅𑀦𑀼𑀮𑀺𑀢𑁆𑀢𑀸’’𑀢𑀺, 𑀦𑀧𑀺 𑀪𑀺𑀢𑁆𑀢𑀺 𑀚𑀸𑀦𑀸𑀢𑀺 ‘‘𑀅𑀳𑀁 𑀣𑀽𑀮𑀫𑀢𑁆𑀢𑀺𑀓𑀸𑀬 𑀅𑀦𑀼𑀮𑀺𑀢𑁆𑀢𑀸’’𑀢𑀺, 𑀏𑀯𑀫𑁂𑀯𑀁 𑀦 𑀦𑀯𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑀁 𑀫𑀁𑀲𑀁 𑀚𑀸𑀦𑀸𑀢𑀺 ‘‘𑀫𑀬𑀸 𑀅𑀝𑁆𑀞𑀺𑀲𑀢𑀢𑁆𑀢𑀬𑀁 𑀅𑀦𑀼𑀮𑀺𑀢𑁆𑀢’’𑀦𑁆𑀢𑀺, 𑀦𑀧𑀺 𑀅𑀝𑁆𑀞𑀺𑀲𑀢𑀢𑁆𑀢𑀬𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀦𑀯𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑁂𑀦 𑀫𑀁𑀲𑁂𑀦 𑀅𑀦𑀼𑀮𑀺𑀢𑁆𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀓𑁂𑀯𑀮𑀁 𑀢𑀼 𑁋

‘‘𑀦𑀯𑀧𑁂𑀲𑀺𑀲𑀢𑀸 ¶ 𑀫𑀁𑀲𑀸, 𑀅𑀦𑀼𑀮𑀺𑀢𑁆𑀢𑀸 𑀓𑀴𑁂𑀯𑀭𑀁;

𑀦𑀸𑀦𑀸𑀓𑀺𑀫𑀺𑀓𑀼𑀮𑀸𑀓𑀺𑀡𑁆𑀡𑀁, 𑀫𑀻𑀴𑁆𑀳𑀝𑁆𑀞𑀸𑀦𑀁𑀯 𑀧𑀽𑀢𑀺𑀓’’𑀦𑁆𑀢𑀺.

𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀅𑀝𑁆𑀞𑀺𑀲𑀗𑁆𑀖𑀸𑀝𑁂𑀦 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀢𑀮𑁂𑀦 𑀯𑀸 𑀉𑀧𑀭𑀺 𑀢𑀘𑁂𑀦 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀫𑀁𑀲𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀦𑀯𑀲𑀢𑀧𑁆𑀧𑀪𑁂𑀤𑀸 𑀦𑁆𑀳𑀸𑀭𑀽 𑀯𑀡𑁆𑀡𑀢𑁄 𑀲𑁂𑀢𑀸𑀢𑀺 𑀯𑀯𑀢𑁆𑀣𑀧𑁂𑀢𑀺, 𑀫𑀥𑀼𑀯𑀡𑁆𑀡𑀸𑀢𑀺𑀧𑀺 𑀏𑀓𑁂. 𑀲𑀡𑁆𑀞𑀸𑀦𑀢𑁄 𑀦𑀸𑀦𑀸𑀲𑀡𑁆𑀞𑀸𑀦𑀸𑀢𑀺. 𑀢𑀣𑀸 ¶ 𑀳𑀺 𑀢𑀢𑁆𑀣 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀦𑁆𑀳𑀸𑀭𑀽 𑀓𑀦𑁆𑀤𑀮𑀫𑀓𑀼𑀴𑀲𑀡𑁆𑀞𑀸𑀦𑀸, 𑀢𑀢𑁄 𑀲𑀼𑀔𑀼𑀫𑀢𑀭𑀸 𑀲𑀽𑀓𑀭𑀯𑀸𑀕𑀼𑀭𑀭𑀚𑁆𑀚𑀼𑀲𑀡𑁆𑀞𑀸𑀦𑀸, 𑀢𑀢𑁄 𑀅𑀡𑀼𑀓𑀢𑀭𑀸 𑀧𑀽𑀢𑀺𑀮𑀢𑀸𑀲𑀡𑁆𑀞𑀸𑀦𑀸, 𑀢𑀢𑁄 𑀅𑀡𑀼𑀓𑀢𑀭𑀸 𑀲𑀻𑀳𑀴𑀫𑀳𑀸𑀯𑀻𑀡𑀸𑀢𑀦𑁆𑀢𑀺𑀲𑀡𑁆𑀞𑀸𑀦𑀸, 𑀢𑀢𑁄 𑀅𑀡𑀼𑀓𑀢𑀭𑀸 𑀣𑀽𑀮𑀲𑀼𑀢𑁆𑀢𑀓𑀲𑀡𑁆𑀞𑀸𑀦𑀸, 𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀧𑀺𑀝𑁆𑀞𑀻𑀲𑀼 𑀦𑁆𑀳𑀸𑀭𑀽 𑀲𑀓𑀼𑀡𑀧𑀸𑀤𑀲𑀡𑁆𑀞𑀸𑀦𑀸, 𑀲𑀻𑀲𑁂 𑀦𑁆𑀳𑀸𑀭𑀽 𑀕𑀸𑀫𑀤𑀸𑀭𑀓𑀸𑀦𑀁 𑀲𑀻𑀲𑁂 ¶ 𑀞𑀧𑀺𑀢𑀯𑀺𑀭𑀴𑀢𑀭𑀤𑀼𑀓𑀽𑀮𑀲𑀡𑁆𑀞𑀸𑀦𑀸, 𑀧𑀺𑀝𑁆𑀞𑀺𑀬𑀸 𑀦𑁆𑀳𑀸𑀭𑀽 𑀢𑁂𑀫𑁂𑀢𑁆𑀯𑀸 𑀆𑀢𑀧𑁂 𑀧𑀲𑀸𑀭𑀺𑀢𑀫𑀘𑁆𑀙𑀚𑀸𑀮𑀲𑀡𑁆𑀞𑀸𑀦𑀸, 𑀅𑀯𑀲𑁂𑀲𑀸 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀢𑀁𑀢𑀁𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀼𑀕𑀢𑀸 𑀦𑁆𑀳𑀸𑀭𑀽 𑀲𑀭𑀻𑀭𑁂 𑀧𑀝𑀺𑀫𑀼𑀓𑁆𑀓𑀚𑀸𑀮𑀓𑀜𑁆𑀘𑀼𑀓𑀲𑀡𑁆𑀞𑀸𑀦𑀸𑀢𑀺. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸. 𑀢𑁂𑀲𑀼 𑀘 𑀤𑀓𑁆𑀔𑀺𑀡𑀓𑀡𑁆𑀡𑀘𑀽𑀴𑀺𑀓𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀓𑀡𑁆𑀟𑀭𑀦𑀸𑀫𑀓𑀸 𑀫𑀳𑀸𑀦𑁆𑀳𑀸𑀭𑀽 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀯𑀺𑀦𑀦𑁆𑀥𑀫𑀸𑀦𑀸 𑀯𑀸𑀫𑀧𑀲𑁆𑀲𑀁 𑀕𑀢𑀸, 𑀯𑀸𑀫𑀓𑀡𑁆𑀡𑀘𑀽𑀴𑀺𑀓𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀯𑀺𑀦𑀦𑁆𑀥𑀫𑀸𑀦𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀕𑀢𑀸, 𑀤𑀓𑁆𑀔𑀺𑀡𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀯𑀺𑀦𑀦𑁆𑀥𑀫𑀸𑀦𑀸 𑀯𑀸𑀫𑀧𑀲𑁆𑀲𑀁 𑀕𑀢𑀸, 𑀯𑀸𑀫𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀯𑀺𑀦𑀦𑁆𑀥𑀫𑀸𑀦𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀕𑀢𑀸, 𑀤𑀓𑁆𑀔𑀺𑀡𑀳𑀢𑁆𑀣𑀁 𑀯𑀺𑀦𑀦𑁆𑀥𑀫𑀸𑀦𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀜𑁆𑀘 𑀧𑀜𑁆𑀘𑀸𑀢𑀺 𑀤𑀲 𑀓𑀡𑁆𑀟𑀭𑀦𑀸𑀫𑀓𑀸 𑀏𑀯 𑀫𑀳𑀸𑀦𑁆𑀳𑀸𑀭𑀽 𑀆𑀭𑀼𑀴𑁆𑀳𑀸. 𑀢𑀣𑀸 𑀯𑀸𑀫𑀳𑀢𑁆𑀣𑀁, 𑀤𑀓𑁆𑀔𑀺𑀡𑀧𑀸𑀤𑀁, 𑀯𑀸𑀫𑀧𑀸𑀤𑀜𑁆𑀘𑀸𑀢𑀺 𑀏𑀯𑀫𑁂𑀢𑁂 𑀲𑀝𑁆𑀞𑀺 𑀫𑀳𑀸𑀦𑁆𑀳𑀸𑀭𑀽 𑀲𑀭𑀻𑀭𑀥𑀸𑀭𑀓𑀸 𑀲𑀭𑀻𑀭𑀦𑀺𑀬𑀸𑀫𑀓𑀸𑀢𑀺𑀧𑀺 𑀯𑀯𑀢𑁆𑀣𑀧𑁂𑀢𑀺. 𑀑𑀓𑀸𑀲𑀢𑁄 𑀲𑀓𑀮𑀲𑀭𑀻𑀭𑁂 𑀅𑀝𑁆𑀞𑀺𑀘𑀫𑁆𑀫𑀸𑀦𑀁 𑀅𑀝𑁆𑀞𑀺𑀫𑀁𑀲𑀸𑀦𑀜𑁆𑀘 𑀅𑀦𑁆𑀢𑀭𑁂 𑀅𑀝𑁆𑀞𑀻𑀦𑀺 𑀆𑀩𑀦𑁆𑀥𑀫𑀸𑀦𑀸 𑀞𑀺𑀢𑀸𑀢𑀺.

𑀢𑀢𑁆𑀣 𑀬𑀣𑀸 𑀯𑀮𑁆𑀮𑀺𑀲𑀦𑁆𑀢𑀸𑀦𑀩𑀤𑁆𑀥𑁂𑀲𑀼 𑀓𑀼𑀝𑁆𑀝𑀤𑀸𑀭𑀽𑀲𑀼 𑀦 𑀯𑀮𑁆𑀮𑀺𑀲𑀦𑁆𑀢𑀸𑀦𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀳𑀺 𑀓𑀼𑀝𑁆𑀝𑀤𑀸𑀭𑀽𑀦𑀺 𑀆𑀩𑀤𑁆𑀥𑀸𑀦𑀻’’𑀢𑀺, 𑀦𑀧𑀺 𑀓𑀼𑀝𑁆𑀝𑀤𑀸𑀭𑀽𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀯𑀮𑁆𑀮𑀺𑀲𑀦𑁆𑀢𑀸𑀦𑁂𑀳𑀺 𑀆𑀩𑀤𑁆𑀥𑀸𑀦𑀻’’𑀢𑀺; 𑀏𑀯𑀫𑁂𑀯 𑀦 𑀦𑁆𑀳𑀸𑀭𑀽 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀳𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀆𑀩𑀤𑁆𑀥𑀸𑀦𑀻’’𑀢𑀺, 𑀦𑀧𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀦𑁆𑀳𑀸𑀭𑀽𑀳𑀺 𑀆𑀩𑀤𑁆𑀥𑀸𑀦𑀻’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀓𑁂𑀯𑀮𑀁 𑀢𑀼 𑁋

‘‘𑀦𑀯𑀦𑁆𑀳𑀸𑀭𑀼𑀲𑀢𑀸 ¶ 𑀳𑁄𑀦𑁆𑀢𑀺, 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂;

𑀩𑀦𑁆𑀥𑀦𑁆𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀝𑀁, 𑀅𑀕𑀸𑀭𑀫𑀺𑀯 𑀯𑀮𑁆𑀮𑀺𑀬𑁄’’𑀢𑀺.

𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀢𑀮𑁂𑀳𑀺 𑀯𑀸 𑀉𑀧𑀭𑀺 𑀢𑀘𑀫𑀁𑀲𑁂𑀳𑀺 𑀢𑀺𑀭𑀺𑀬𑀁 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀦𑁆𑀳𑀸𑀭𑀽 𑀯𑀡𑁆𑀡𑀸𑀤𑀺𑀢𑁄 ¶ 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 ¶ 𑀧𑀭𑀁 𑀲𑀭𑀻𑀭𑁂 𑀤𑁆𑀯𑀢𑁆𑀢𑀺𑀁𑀲𑀤𑀦𑁆𑀢𑀝𑁆𑀞𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀦𑀺 𑀘𑀢𑀼𑀲𑀝𑁆𑀞𑀺 𑀳𑀢𑁆𑀣𑀝𑁆𑀞𑀺𑀓𑀸𑀦𑀺 𑀘𑀢𑀼𑀲𑀝𑁆𑀞𑀺 𑀧𑀸𑀤𑀝𑁆𑀞𑀺𑀓𑀸𑀦𑀺 𑀘𑀢𑀼𑀲𑀝𑁆𑀞𑀺 𑀫𑀼𑀤𑀼𑀓𑀝𑁆𑀞𑀺𑀓𑀸𑀦𑀺 𑀫𑀁𑀲𑀦𑀺𑀲𑁆𑀲𑀺𑀢𑀸𑀦𑀺 𑀤𑁆𑀯𑁂 𑀧𑀡𑁆𑀳𑀺𑀓𑀝𑁆𑀞𑀻𑀦𑀺 𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀤𑁆𑀯𑁂 𑀤𑁆𑀯𑁂 𑀕𑁄𑀧𑁆𑀨𑀓𑀝𑁆𑀞𑀺𑀓𑀸𑀦𑀺 𑀤𑁆𑀯𑁂 𑀚𑀗𑁆𑀖𑀝𑁆𑀞𑀺𑀓𑀸𑀦𑀺 𑀏𑀓𑀁 𑀚𑀡𑁆𑀡𑀼𑀓𑀝𑁆𑀞𑀺 𑀏𑀓𑀁 𑀊𑀭𑀼𑀝𑁆𑀞𑀺 𑀤𑁆𑀯𑁂 𑀓𑀝𑀺𑀝𑁆𑀞𑀻𑀦𑀺 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀦𑀺 𑀘𑀢𑀼𑀯𑀻𑀲𑀢𑀺 𑀨𑀸𑀲𑀼𑀓𑀝𑁆𑀞𑀻𑀦𑀺 𑀘𑀼𑀤𑁆𑀤𑀲 𑀉𑀭𑀝𑁆𑀞𑀻𑀦𑀺 𑀏𑀓𑀁 𑀳𑀤𑀬𑀝𑁆𑀞𑀺 𑀤𑁆𑀯𑁂 𑀅𑀓𑁆𑀔𑀓𑀝𑁆𑀞𑀻𑀦𑀺 𑀤𑁆𑀯𑁂 𑀧𑀺𑀝𑁆𑀞𑀺𑀩𑀸𑀳𑀝𑁆𑀞𑀻𑀦𑀺 𑀤𑁆𑀯𑁂 𑀩𑀸𑀳𑀝𑁆𑀞𑀻𑀦𑀺 𑀤𑁆𑀯𑁂 𑀤𑁆𑀯𑁂 𑀅𑀕𑁆𑀕𑀩𑀸𑀳𑀝𑁆𑀞𑀻𑀦𑀺 𑀲𑀢𑁆𑀢 𑀕𑀻𑀯𑀝𑁆𑀞𑀻𑀦𑀺 𑀤𑁆𑀯𑁂 𑀳𑀦𑀼𑀓𑀝𑁆𑀞𑀻𑀦𑀺 𑀏𑀓𑀁 𑀦𑀸𑀲𑀺𑀓𑀝𑁆𑀞𑀺 𑀤𑁆𑀯𑁂 𑀅𑀓𑁆𑀔𑀺𑀝𑁆𑀞𑀻𑀦𑀺 𑀤𑁆𑀯𑁂 𑀓𑀡𑁆𑀡𑀝𑁆𑀞𑀻𑀦𑀺 𑀏𑀓𑀁 𑀦𑀮𑀸𑀝𑀝𑁆𑀞𑀺 𑀏𑀓𑀁 𑀫𑀼𑀤𑁆𑀥𑀝𑁆𑀞𑀺 𑀦𑀯 𑀲𑀻𑀲𑀓𑀧𑀸𑀮𑀝𑁆𑀞𑀻𑀦𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀺 𑀅𑀝𑁆𑀞𑀻𑀦𑀺 𑀲𑀩𑁆𑀩𑀸𑀦𑁂𑀯 𑀯𑀡𑁆𑀡𑀢𑁄 𑀲𑁂𑀢𑀸𑀦𑀻𑀢𑀺 𑀯𑀯𑀢𑁆𑀣𑀧𑁂𑀢𑀺.

𑀲𑀡𑁆𑀞𑀸𑀦𑀢𑁄 𑀦𑀸𑀦𑀸𑀲𑀡𑁆𑀞𑀸𑀦𑀸𑀦𑀺. 𑀢𑀣𑀸 𑀳𑀺 𑀢𑀢𑁆𑀣 𑀅𑀕𑁆𑀕𑀧𑀸𑀤𑀗𑁆𑀕𑀼𑀮𑀺𑀬𑀝𑁆𑀞𑀻𑀦𑀺 𑀓𑀢𑀓𑀩𑀻𑀚𑀲𑀡𑁆𑀞𑀸𑀦𑀸𑀦𑀺, 𑀢𑀤𑀦𑀦𑁆𑀢𑀭𑀸𑀦𑀺 𑀅𑀗𑁆𑀕𑀼𑀮𑀻𑀦𑀁 𑀫𑀚𑁆𑀛𑀧𑀩𑁆𑀩𑀝𑁆𑀞𑀻𑀦𑀺 𑀅𑀧𑀭𑀺𑀧𑀼𑀡𑁆𑀡𑀧𑀦𑀲𑀝𑁆𑀞𑀺𑀲𑀡𑁆𑀞𑀸𑀦𑀸𑀦𑀺, 𑀫𑀽𑀮𑀧𑀩𑁆𑀩𑀝𑁆𑀞𑀻𑀦𑀺 𑀧𑀡𑀯𑀲𑀡𑁆𑀞𑀸𑀦𑀸𑀦𑀺, 𑀫𑁄𑀭𑀲𑀓𑀮𑀺𑀲𑀡𑁆𑀞𑀸𑀦𑀸𑀦𑀻𑀢𑀺𑀧𑀺 𑀏𑀓𑁂. 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀻𑀦𑀺 𑀓𑁄𑀝𑁆𑀝𑀺𑀢𑀓𑀦𑁆𑀤𑀮𑀓𑀦𑁆𑀤𑀭𑀸𑀲𑀺𑀲𑀡𑁆𑀞𑀸𑀦𑀸𑀦𑀺 𑀧𑀡𑁆𑀳𑀺𑀓𑀝𑁆𑀞𑀻𑀦𑀺 𑀏𑀓𑀝𑁆𑀞𑀺𑀢𑀸𑀮𑀨𑀮𑀩𑀻𑀚𑀲𑀡𑁆𑀞𑀸𑀦𑀸𑀦𑀺, 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀏𑀓𑀢𑁄𑀩𑀤𑁆𑀥𑀓𑀻𑀴𑀸𑀕𑁄𑀴𑀓𑀲𑀡𑁆𑀞𑀸𑀦𑀸𑀦𑀺, 𑀚𑀗𑁆𑀖𑀝𑁆𑀞𑀺𑀓𑁂𑀲𑀼 𑀔𑀼𑀤𑁆𑀤𑀓𑀁 𑀥𑀦𑀼𑀤𑀡𑁆𑀟𑀲𑀡𑁆𑀞𑀸𑀦𑀁, 𑀫𑀳𑀦𑁆𑀢𑀁 𑀔𑀼𑀧𑁆𑀧𑀺𑀧𑀸𑀲𑀸𑀫𑀺𑀮𑀸𑀢𑀥𑀫𑀦𑀺𑀧𑀺𑀝𑁆𑀞𑀺𑀲𑀡𑁆𑀞𑀸𑀦𑀁, 𑀚𑀗𑁆𑀖𑀝𑁆𑀞𑀺𑀓𑀲𑁆𑀲 𑀕𑁄𑀧𑁆𑀨𑀓𑀝𑁆𑀞𑀺𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀧𑀦𑀻𑀢𑀢𑀘𑀔𑀚𑁆𑀚𑀽𑀭𑀻𑀓𑀴𑀻𑀭𑀲𑀡𑁆𑀞𑀸𑀦𑀁, 𑀚𑀗𑁆𑀖𑀝𑁆𑀞𑀺𑀓𑀲𑁆𑀲 𑀚𑀡𑁆𑀡𑀼𑀓𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀫𑀼𑀤𑀺𑀗𑁆𑀕𑀫𑀢𑁆𑀣𑀓𑀲𑀡𑁆𑀞𑀸𑀦𑀁 𑀚𑀡𑁆𑀡𑀼𑀓𑀝𑁆𑀞𑀺 𑀏𑀓𑀧𑀲𑁆𑀲𑀢𑁄 𑀖𑀝𑁆𑀝𑀺𑀢𑀨𑁂𑀡𑀲𑀡𑁆𑀞𑀸𑀦𑀁, 𑀊𑀭𑀼𑀝𑁆𑀞𑀻𑀦𑀺 𑀤𑀼𑀢𑁆𑀢𑀘𑁆𑀙𑀺𑀢𑀯𑀸𑀲𑀺𑀨𑀭𑀲𑀼𑀤𑀡𑁆𑀟𑀲𑀡𑁆𑀞𑀸𑀦𑀸𑀦𑀺, 𑀊𑀭𑀼𑀝𑁆𑀞𑀺𑀓𑀲𑁆𑀲 𑀓𑀝𑀝𑁆𑀞𑀺𑀓𑁂 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀅𑀕𑁆𑀕𑀺𑀚𑀸𑀮𑀦𑀓𑀲𑀮𑀸𑀓𑀸𑀩𑀼𑀦𑁆𑀤𑀺𑀲𑀡𑁆𑀞𑀸𑀦𑀁 ¶ , 𑀢𑀧𑁆𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁄 𑀅𑀕𑁆𑀕𑀘𑁆𑀙𑀺𑀦𑁆𑀦𑀧𑀼𑀦𑁆𑀦𑀸𑀕𑀨𑀮𑀲𑀡𑁆𑀞𑀸𑀦𑁄, 𑀓𑀝𑀺𑀝𑁆𑀞𑀻𑀦𑀺 𑀤𑁆𑀯𑁂𑀧𑀺 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑁂𑀳𑀺 𑀓𑀢𑀘𑀼𑀮𑁆𑀮𑀺𑀲𑀡𑁆𑀞𑀸𑀦𑀸𑀦𑀺, 𑀢𑀸𑀧𑀲𑀪𑀺𑀲𑀺𑀓𑀸𑀲𑀡𑁆𑀞𑀸𑀦𑀸𑀦𑀻𑀢𑀺𑀧𑀺 𑀏𑀓𑁂. 𑀆𑀦𑀺𑀲𑀤𑀝𑁆𑀞𑀻𑀦𑀺 𑀳𑁂𑀝𑁆𑀞𑀸𑀫𑀼𑀔𑀞𑀧𑀺𑀢𑀲𑀧𑁆𑀧𑀨𑀡𑀲𑀡𑁆𑀞𑀸𑀦𑀸𑀦𑀺, 𑀲𑀢𑁆𑀢𑀝𑁆𑀞𑀝𑁆𑀞𑀸𑀦𑁂𑀲𑀼 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀸𑀦𑀺 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀦𑀺 𑀅𑀩𑁆𑀪𑀦𑁆𑀢𑀭𑀢𑁄 𑀉𑀧𑀭𑀽𑀧𑀭𑀺 𑀞𑀧𑀺𑀢𑀲𑀻𑀲𑀓𑀧𑀝𑁆𑀝𑀯𑁂𑀞𑀓𑀲𑀡𑁆𑀞𑀸𑀦𑀸𑀦𑀺, 𑀩𑀸𑀳𑀺𑀭𑀢𑁄 𑀯𑀝𑁆𑀝𑀦𑀸𑀯𑀮𑀺𑀲𑀡𑁆𑀞𑀸𑀦𑀸𑀦𑀺, 𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀓𑀘𑀤𑀦𑁆𑀢𑀲𑀤𑀺𑀲𑀸𑀦𑀺 𑀤𑁆𑀯𑁂 𑀢𑀻𑀡𑀺 𑀓𑀡𑁆𑀝𑀓𑀸𑀦𑀺 𑀳𑁄𑀦𑁆𑀢𑀺, 𑀘𑀢𑀼𑀯𑀻𑀲𑀢𑀺𑀬𑀸 ¶ 𑀨𑀸𑀲𑀼𑀓𑀝𑁆𑀞𑀻𑀲𑀼 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀭𑀺𑀧𑀼𑀡𑁆𑀡𑀲𑀻𑀳𑀴𑀤𑀸𑀢𑁆𑀢𑀲𑀡𑁆𑀞𑀸𑀦𑀸𑀦𑀺 ¶ , 𑀅𑀧𑀭𑀺𑀧𑀼𑀡𑁆𑀡𑀸𑀦𑀺 𑀅𑀧𑀭𑀺𑀧𑀼𑀡𑁆𑀡𑀲𑀻𑀳𑀴𑀤𑀸𑀢𑁆𑀢𑀲𑀡𑁆𑀞𑀸𑀦𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀑𑀤𑀸𑀢𑀓𑀼𑀓𑁆𑀓𑀼𑀝𑀲𑁆𑀲 𑀧𑀲𑀸𑀭𑀺𑀢𑀧𑀓𑁆𑀔𑀤𑁆𑀯𑀬𑀲𑀡𑁆𑀞𑀸𑀦𑀸𑀦𑀻𑀢𑀺𑀧𑀺 𑀏𑀓𑁂. 𑀘𑀼𑀤𑁆𑀤𑀲 𑀉𑀭𑀝𑁆𑀞𑀻𑀦𑀺 𑀚𑀺𑀡𑁆𑀡𑀲𑀦𑁆𑀤𑀫𑀸𑀦𑀺𑀓𑀨𑀮𑀓𑀧𑀦𑁆𑀢𑀺𑀲𑀡𑁆𑀞𑀸𑀦𑀸𑀦𑀺, 𑀳𑀤𑀬𑀝𑁆𑀞𑀺 𑀤𑀩𑁆𑀩𑀺𑀨𑀡𑀲𑀡𑁆𑀞𑀸𑀦𑀁, 𑀅𑀓𑁆𑀔𑀓𑀝𑁆𑀞𑀻𑀦𑀺 𑀔𑀼𑀤𑁆𑀤𑀓𑀮𑁄𑀳𑀯𑀸𑀲𑀺𑀤𑀡𑁆𑀟𑀲𑀡𑁆𑀞𑀸𑀦𑀸𑀦𑀺, 𑀢𑁂𑀲𑀁 𑀳𑁂𑀝𑁆𑀞𑀸 𑀅𑀝𑁆𑀞𑀺 𑀅𑀤𑁆𑀥𑀘𑀦𑁆𑀤𑀲𑀡𑁆𑀞𑀸𑀦𑀁, 𑀧𑀺𑀝𑁆𑀞𑀺𑀩𑀸𑀳𑀝𑁆𑀞𑀻𑀦𑀺 𑀨𑀭𑀲𑀼𑀨𑀡𑀲𑀡𑁆𑀞𑀸𑀦𑀸𑀦𑀺, 𑀉𑀧𑀟𑁆𑀠𑀘𑁆𑀙𑀺𑀦𑁆𑀦𑀲𑀻𑀳𑀴𑀓𑀼𑀤𑀸𑀮𑀲𑀡𑁆𑀞𑀸𑀦𑀸𑀦𑀻𑀢𑀺𑀧𑀺 𑀏𑀓𑁂. 𑀩𑀸𑀳𑀝𑁆𑀞𑀻𑀦𑀺 𑀆𑀤𑀸𑀲𑀤𑀡𑁆𑀟𑀲𑀡𑁆𑀞𑀸𑀦𑀸𑀦𑀺, 𑀫𑀳𑀸𑀯𑀸𑀲𑀺𑀤𑀡𑁆𑀟𑀲𑀡𑁆𑀞𑀸𑀦𑀸𑀦𑀻𑀢𑀺𑀧𑀺 𑀏𑀓𑁂. 𑀅𑀕𑁆𑀕𑀩𑀸𑀳𑀝𑁆𑀞𑀻𑀦𑀺 𑀬𑀫𑀓𑀢𑀸𑀮𑀓𑀦𑁆𑀤𑀲𑀡𑁆𑀞𑀸𑀦𑀸𑀦𑀺, 𑀫𑀡𑀺𑀩𑀦𑁆𑀥𑀝𑁆𑀞𑀻𑀦𑀺 𑀏𑀓𑀢𑁄 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸 𑀞𑀧𑀺𑀢𑀲𑀻𑀲𑀓𑀧𑀝𑁆𑀝𑀯𑁂𑀞𑀓𑀲𑀡𑁆𑀞𑀸𑀦𑀸𑀦𑀺, 𑀧𑀺𑀝𑁆𑀞𑀺𑀳𑀢𑁆𑀣𑀝𑁆𑀞𑀻𑀦𑀺 𑀓𑁄𑀝𑁆𑀝𑀺𑀢𑀓𑀦𑁆𑀤𑀮𑀓𑀦𑁆𑀤𑀭𑀸𑀲𑀺𑀲𑀡𑁆𑀞𑀸𑀦𑀸𑀦𑀺, 𑀳𑀢𑁆𑀣𑀗𑁆𑀕𑀼𑀮𑀺𑀫𑀽𑀮𑀧𑀩𑁆𑀩𑀝𑁆𑀞𑀻𑀦𑀺 𑀧𑀡𑀯𑀲𑀡𑁆𑀞𑀸𑀦𑀸𑀦𑀺, 𑀫𑀚𑁆𑀛𑀧𑀩𑁆𑀩𑀝𑁆𑀞𑀻𑀦𑀺 𑀅𑀧𑀭𑀺𑀧𑀼𑀡𑁆𑀡𑀧𑀦𑀲𑀝𑁆𑀞𑀺𑀲𑀡𑁆𑀞𑀸𑀦𑀸𑀦𑀺, 𑀅𑀕𑁆𑀕𑀧𑀩𑁆𑀩𑀝𑁆𑀞𑀻𑀦𑀺 𑀓𑀢𑀓𑀩𑀻𑀚𑀲𑀡𑁆𑀞𑀸𑀦𑀸𑀦𑀺, 𑀲𑀢𑁆𑀢 𑀕𑀻𑀯𑀝𑁆𑀞𑀻𑀦𑀺 𑀤𑀡𑁆𑀟𑁂 𑀯𑀺𑀚𑁆𑀛𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀯𑀁𑀲𑀓𑀴𑀻𑀭𑀔𑀡𑁆𑀟𑀲𑀡𑁆𑀞𑀸𑀦𑀸𑀦𑀺, 𑀳𑁂𑀝𑁆𑀞𑀺𑀫𑀳𑀦𑀼𑀓𑀝𑁆𑀞𑀺 𑀓𑀫𑁆𑀫𑀸𑀭𑀸𑀦𑀁 𑀅𑀬𑁄𑀓𑀽𑀝𑀬𑁄𑀢𑁆𑀢𑀓𑀲𑀡𑁆𑀞𑀸𑀦𑀁, 𑀉𑀧𑀭𑀺𑀫𑀳𑀦𑀼𑀓𑀝𑁆𑀞𑀺 𑀅𑀯𑀮𑁂𑀔𑀦𑀲𑀢𑁆𑀣𑀓𑀲𑀡𑁆𑀞𑀸𑀦𑀁, 𑀅𑀓𑁆𑀔𑀺𑀦𑀸𑀲𑀓𑀽𑀧𑀝𑁆𑀞𑀻𑀦𑀺 𑀅𑀧𑀦𑀻𑀢𑀫𑀺𑀜𑁆𑀚𑀢𑀭𑀼𑀡𑀢𑀸𑀮𑀝𑁆𑀞𑀺𑀲𑀡𑁆𑀞𑀸𑀦𑀸𑀦𑀺 ¶ , 𑀦𑀮𑀸𑀝𑀝𑁆𑀞𑀺 𑀅𑀥𑁄𑀫𑀼𑀔𑀞𑀧𑀺𑀢𑀪𑀺𑀦𑁆𑀦𑀲𑀗𑁆𑀔𑀓𑀧𑀸𑀮𑀲𑀡𑁆𑀞𑀸𑀦𑀁, 𑀓𑀡𑁆𑀡𑀘𑀽𑀴𑀺𑀓𑀝𑁆𑀞𑀻𑀦𑀺 𑀦𑁆𑀳𑀸𑀧𑀺𑀢𑀔𑀼𑀭𑀓𑁄𑀲𑀲𑀡𑁆𑀞𑀸𑀦𑀸𑀦𑀺, 𑀦𑀮𑀸𑀝𑀓𑀡𑁆𑀡𑀘𑀽𑀴𑀺𑀓𑀸𑀦𑀁 𑀉𑀧𑀭𑀺 𑀧𑀝𑁆𑀝𑀩𑀦𑁆𑀥𑀦𑁄𑀓𑀸𑀲𑁂 𑀅𑀝𑁆𑀞𑀺𑀩𑀳𑀮𑀖𑀝𑀧𑀼𑀡𑁆𑀡𑀧𑀝𑀧𑀺𑀮𑁄𑀢𑀺𑀓𑀔𑀡𑁆𑀟𑀲𑀡𑁆𑀞𑀸𑀦𑀁, 𑀫𑀼𑀤𑁆𑀥𑀦𑀝𑁆𑀞𑀺 𑀫𑀼𑀔𑀘𑁆𑀙𑀺𑀦𑁆𑀦𑀯𑀗𑁆𑀓𑀦𑀸𑀴𑀺𑀓𑁂𑀭𑀲𑀡𑁆𑀞𑀸𑀦𑀁, 𑀲𑀻𑀲𑀝𑁆𑀞𑀻𑀦𑀺 𑀲𑀺𑀩𑁆𑀩𑁂𑀢𑁆𑀯𑀸 𑀞𑀧𑀺𑀢𑀚𑀚𑁆𑀚𑀭𑀸𑀮𑀸𑀩𑀼𑀓𑀝𑀸𑀳𑀲𑀡𑁆𑀞𑀸𑀦𑀸𑀦𑀻𑀢𑀺. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸𑀦𑀺.

𑀑𑀓𑀸𑀲𑀢𑁄 𑀅𑀯𑀺𑀲𑁂𑀲𑁂𑀦 𑀲𑀓𑀮𑀲𑀭𑀻𑀭𑁂 𑀞𑀺𑀢𑀸𑀦𑀺, 𑀯𑀺𑀲𑁂𑀲𑁂𑀦 𑀢𑀼 𑀲𑀻𑀲𑀝𑁆𑀞𑀻𑀦𑀺 𑀕𑀻𑀯𑀝𑁆𑀞𑀺𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀕𑀻𑀯𑀝𑁆𑀞𑀻𑀦𑀺 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀻𑀦𑀺 𑀓𑀝𑀺𑀝𑁆𑀞𑀻𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀓𑀝𑀺𑀝𑁆𑀞𑀻𑀦𑀺 𑀊𑀭𑀼𑀝𑁆𑀞𑀺𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀉𑀭𑀼𑀝𑁆𑀞𑀻𑀦𑀺 𑀚𑀡𑁆𑀡𑀼𑀓𑀝𑁆𑀞𑀺𑀓𑁂𑀲𑀼, 𑀚𑀡𑁆𑀡𑀼𑀓𑀝𑁆𑀞𑀻𑀦𑀺 𑀚𑀗𑁆𑀖𑀝𑁆𑀞𑀺𑀓𑁂𑀲𑀼, 𑀚𑀗𑁆𑀖𑀝𑁆𑀞𑀻𑀦𑀺 𑀕𑁄𑀧𑁆𑀨𑀓𑀝𑁆𑀞𑀺𑀓𑁂𑀲𑀼, 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀺𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀺𑀓𑀸𑀦𑀺 𑀘 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸𑀦𑀺, 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀚𑀗𑁆𑀖𑀝𑁆𑀞𑀻𑀦𑀺…𑀧𑁂… 𑀕𑀻𑀯𑀝𑁆𑀞𑀻𑀦𑀺 𑀲𑀻𑀲𑀝𑁆𑀞𑀻𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸𑀦𑀻𑀢𑀺 𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀅𑀯𑀲𑁂𑀲𑀸𑀦𑀺𑀧𑀺 𑀅𑀝𑁆𑀞𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀬𑀣𑀸 𑀇𑀝𑁆𑀞𑀓𑀕𑁄𑀧𑀸𑀦𑀲𑀺𑀘𑀬𑀸𑀤𑀻𑀲𑀼 𑀦 𑀉𑀧𑀭𑀺𑀫𑀸 𑀇𑀝𑁆𑀞𑀓𑀸𑀤𑀬𑁄 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀳𑁂𑀝𑁆𑀞𑀺𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑀸’’𑀢𑀺, 𑀦𑀧𑀺 𑀳𑁂𑀝𑁆𑀞𑀺𑀫𑀸 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀉𑀧𑀭𑀺𑀫𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸’’𑀢𑀺; 𑀏𑀯𑀫𑁂𑀯 𑀦 𑀲𑀻𑀲𑀝𑁆𑀞𑀺𑀓𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀕𑀻𑀯𑀝𑁆𑀞𑀺𑀓𑁂𑀲𑀼 ¶ 𑀧𑀢𑀺𑀝𑁆𑀞𑀺𑀢𑀸𑀦𑀻’’𑀢𑀺…𑀧𑁂… 𑀦 𑀕𑁄𑀧𑁆𑀨𑀓𑀝𑁆𑀞𑀺𑀓𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀺𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀻’’𑀢𑀺, 𑀦𑀧𑀺 𑀧𑀺𑀝𑁆𑀞𑀺𑀧𑀸𑀤𑀝𑁆𑀞𑀺𑀓𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀕𑁄𑀧𑁆𑀨𑀓𑀝𑁆𑀞𑀻𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸𑀦𑀻’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀓𑁂𑀯𑀮𑀁 𑀢𑀼 𑀇𑀫𑀸𑀦𑀺 𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀦𑀯𑀳𑀺 𑀦𑁆𑀳𑀸𑀭𑀼𑀲𑀢𑁂𑀳𑀺 𑀦𑀯𑀳𑀺 𑀘 ¶ 𑀫𑀁𑀲𑀧𑁂𑀲𑀺𑀲𑀢𑁂𑀳𑀺 𑀆𑀩𑀤𑁆𑀥𑀸𑀦𑀼𑀮𑀺𑀢𑁆𑀢𑀸𑀦𑀺, 𑀏𑀓𑀖𑀦𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀸𑀦𑀺, 𑀲𑀢𑁆𑀢𑀭𑀲𑀳𑀭𑀡𑀻𑀲𑀳𑀲𑁆𑀲𑀸𑀦𑀼𑀕𑀢𑀲𑀺𑀦𑁂𑀳𑀲𑀺𑀦𑁂𑀳𑀺𑀢𑀸𑀦𑀺, 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑀧𑀭𑀺𑀲𑁆𑀲𑀯𑀫𑀸𑀦𑀲𑁂𑀤𑀚𑀮𑁆𑀮𑀺𑀓𑀸𑀦𑀺 𑀅𑀲𑀻𑀢𑀺𑀓𑀺𑀫𑀺𑀓𑀼𑀮𑀸𑀦𑀺, 𑀓𑀸𑀬𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑀸𑀦𑀺, 𑀬𑀁 𑀲𑀪𑀸𑀯𑀢𑁄 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑀢𑀺, 𑀓𑁂𑀯𑀮𑀁 𑀢𑀼 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁 𑀦𑀸𑀦𑀸𑀓𑀼𑀡𑀧𑀲𑀗𑁆𑀓𑀺𑀡𑁆𑀡𑀁 ¶ 𑀅𑀝𑁆𑀞𑀺𑀲𑀗𑁆𑀖𑀸𑀝𑀫𑁂𑀯 𑀧𑀲𑁆𑀲𑀢𑀺. 𑀬𑀁 𑀤𑀺𑀲𑁆𑀯𑀸 𑀤𑀲𑀩𑀮𑀲𑁆𑀲 𑀧𑀼𑀢𑁆𑀢𑀪𑀸𑀯𑀁 𑀉𑀧𑁂𑀢𑀺. 𑀬𑀣𑀸𑀳 𑁋

‘‘𑀧𑀝𑀺𑀧𑀸𑀝𑀺𑀬𑀝𑁆𑀞𑀻𑀦𑀺 𑀞𑀺𑀢𑀸𑀦𑀺 𑀓𑁄𑀝𑀺𑀬𑀸,

𑀅𑀦𑁂𑀓𑀲𑀦𑁆𑀥𑀺𑀬𑀫𑀺𑀢𑁄 𑀦 𑀓𑁂𑀳𑀺𑀘𑀺;

𑀩𑀤𑁆𑀥𑁄 𑀦𑀳𑀸𑀭𑀽𑀳𑀺 𑀚𑀭𑀸𑀬 𑀘𑁄𑀤𑀺𑀢𑁄,

𑀅𑀘𑁂𑀢𑀦𑁄 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄.

‘‘𑀓𑀼𑀡𑀧𑀁 𑀓𑀼𑀡𑀧𑁂 𑀚𑀸𑀢𑀁, 𑀅𑀲𑀼𑀘𑀺𑀫𑁆𑀳𑀺 𑀘 𑀧𑀽𑀢𑀺𑀦𑀺;

𑀤𑀼𑀕𑁆𑀕𑀦𑁆𑀥𑁂 𑀘𑀸𑀧𑀺 𑀤𑀼𑀕𑁆𑀕𑀦𑁆𑀥𑀁, 𑀪𑁂𑀤𑀦𑀫𑁆𑀳𑀺 𑀘 𑀯𑀬𑀥𑀫𑁆𑀫𑀁.

‘‘𑀅𑀝𑁆𑀞𑀺𑀧𑀼𑀝𑁂 𑀅𑀝𑁆𑀞𑀺𑀧𑀼𑀝𑁄, 𑀦𑀺𑀩𑁆𑀩𑀢𑁆𑀢𑁄 𑀧𑀽𑀢𑀺𑀦𑀺 𑀧𑀽𑀢𑀺𑀓𑀸𑀬𑀫𑁆𑀳𑀺;

𑀢𑀫𑁆𑀳𑀺 𑀘 𑀯𑀺𑀦𑁂𑀣 𑀙𑀦𑁆𑀤𑀁, 𑀳𑁂𑀲𑁆𑀲𑀣 𑀧𑀼𑀢𑁆𑀢𑀸 𑀤𑀲𑀩𑀮𑀲𑁆𑀲𑀸’’𑀢𑀺 𑀘.

𑀧𑀭𑀺𑀘𑁆𑀙𑁂𑀤𑀢𑁄 𑀅𑀦𑁆𑀢𑁄 𑀅𑀝𑁆𑀞𑀺𑀫𑀺𑀜𑁆𑀚𑁂𑀦 𑀉𑀧𑀭𑀺𑀢𑁄 𑀫𑀁𑀲𑁂𑀦 𑀅𑀕𑁆𑀕𑁂 𑀫𑀽𑀮𑁂 𑀘 𑀅𑀜𑁆𑀜𑀫𑀜𑁆𑀜𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀻𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑁂𑀲𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀅𑀝𑁆𑀞𑀻𑀦𑀺 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀡𑁆𑀡𑀢𑁄 𑀲𑁂𑀢𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀅𑀢𑁆𑀢𑀦𑁄 𑀑𑀓𑀸𑀲𑀲𑀡𑁆𑀞𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀁 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀁 𑀲𑁂𑀤𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀫𑀳𑀦𑁆𑀢𑁂𑀲𑀼 𑀯𑀁𑀲𑀦𑀴𑀓𑀧𑀩𑁆𑀩𑁂𑀲𑀼 𑀧𑀓𑁆𑀔𑀺𑀢𑁆𑀢𑀫𑀳𑀸𑀯𑁂𑀢𑁆𑀢𑀗𑁆𑀓𑀼𑀭𑀲𑀡𑁆𑀞𑀸𑀦𑀁, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀁 ¶ 𑀅𑀩𑁆𑀪𑀦𑁆𑀢𑀭𑀕𑀢𑀁 𑀲𑁂𑀤𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑁂𑀲𑀼 𑀯𑀁𑀲𑀦𑀴𑀓𑀧𑀩𑁆𑀩𑁂𑀲𑀼 𑀧𑀓𑁆𑀔𑀺𑀢𑁆𑀢𑀢𑀦𑀼𑀯𑁂𑀢𑁆𑀢𑀗𑁆𑀓𑀼𑀭𑀲𑀡𑁆𑀞𑀸𑀦𑀦𑁆𑀢𑀺. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀯𑁂𑀴𑀼𑀦𑀴𑀓𑀸𑀤𑀻𑀦𑀁 𑀅𑀦𑁆𑀢𑁄𑀕𑀢𑀸𑀦𑀺 𑀤𑀥𑀺𑀨𑀸𑀡𑀺𑀢𑀸𑀦𑀺 𑀦 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀯𑁂𑀴𑀼𑀦𑀴𑀓𑀸𑀤𑀻𑀦𑀁 𑀅𑀦𑁆𑀢𑁄𑀕𑀢𑀸𑀦𑀻’’𑀢𑀺, 𑀦𑀧𑀺 𑀯𑁂𑀴𑀼𑀦𑀴𑀓𑀸𑀤𑀬𑁄 𑀚𑀸𑀦𑀦𑁆𑀢𑀺 ‘‘𑀤𑀥𑀺𑀨𑀸𑀡𑀺𑀢𑀸𑀦𑀺 𑀅𑀫𑁆𑀳𑀸𑀓𑀁 𑀅𑀦𑁆𑀢𑁄𑀕𑀢𑀸𑀦𑀻’’𑀢𑀺; 𑀏𑀯𑀫𑁂𑀯 𑀦 𑀅𑀝𑁆𑀞𑀺𑀫𑀺𑀜𑁆𑀚𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀝𑁆𑀞𑀻𑀦𑀁 𑀅𑀦𑁆𑀢𑁄𑀕𑀢’’𑀦𑁆𑀢𑀺, 𑀦𑀧𑀺 𑀅𑀝𑁆𑀞𑀻𑀦𑀺 ¶ 𑀚𑀸𑀦𑀦𑁆𑀢𑀺 ‘‘𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁄𑀕𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀝𑁆𑀞𑀻𑀦𑀁 𑀅𑀩𑁆𑀪𑀦𑁆𑀢𑀭𑀢𑀮𑁂𑀳𑀺 ¶ 𑀅𑀝𑁆𑀞𑀺𑀫𑀺𑀜𑁆𑀚𑀪𑀸𑀕𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀕𑁄𑀴𑀓𑀧𑁆𑀧𑀪𑁂𑀤𑀁 𑀯𑀓𑁆𑀓𑀁 𑀯𑀡𑁆𑀡𑀢𑁄 𑀫𑀦𑁆𑀤𑀭𑀢𑁆𑀢𑀁 𑀧𑀸𑀴𑀺𑀪𑀤𑁆𑀤𑀓𑀝𑁆𑀞𑀺𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀕𑀸𑀫𑀤𑀸𑀭𑀓𑀸𑀦𑀁 𑀲𑀼𑀢𑁆𑀢𑀸𑀯𑀼𑀢𑀓𑀻𑀴𑀸𑀕𑁄𑀴𑀓𑀲𑀡𑁆𑀞𑀸𑀦𑀁, 𑀏𑀓𑀯𑀡𑁆𑀝𑀲𑀳𑀓𑀸𑀭𑀤𑁆𑀯𑀬𑀲𑀡𑁆𑀞𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀕𑀮𑀯𑀸𑀝𑀓𑀸 𑀯𑀺𑀦𑀺𑀓𑁆𑀔𑀦𑁆𑀢𑁂𑀦 𑀏𑀓𑀫𑀽𑀮𑁂𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀤𑁆𑀯𑀺𑀥𑀸 𑀪𑀺𑀦𑁆𑀦𑁂𑀦 𑀣𑀽𑀮𑀦𑁆𑀳𑀸𑀭𑀼𑀦𑀸 𑀯𑀺𑀦𑀺𑀩𑀤𑁆𑀥𑀁 𑀳𑀼𑀢𑁆𑀯𑀸 𑀳𑀤𑀬𑀫𑀁𑀲𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀯𑀡𑁆𑀝𑀽𑀧𑀦𑀺𑀩𑀤𑁆𑀥𑀁 𑀲𑀳𑀓𑀸𑀭𑀤𑁆𑀯𑀬𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀯𑀡𑁆𑀝𑁂𑀦 𑀉𑀧𑀦𑀺𑀩𑀤𑁆𑀥’’𑀦𑁆𑀢𑀺, 𑀦𑀧𑀺 𑀯𑀡𑁆𑀝𑀁 𑀚𑀸𑀦𑀸𑀢𑀺 ‘‘𑀫𑀬𑀸 𑀲𑀳𑀓𑀸𑀭𑀤𑁆𑀯𑀬𑀁 𑀉𑀧𑀦𑀺𑀩𑀤𑁆𑀥’’𑀦𑁆𑀢𑀺; 𑀏𑀯𑀫𑁂𑀯 𑀦 𑀯𑀓𑁆𑀓𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀣𑀽𑀮𑀦𑁆𑀳𑀸𑀭𑀼𑀦𑀸 𑀉𑀧𑀦𑀺𑀩𑀤𑁆𑀥’’𑀦𑁆𑀢𑀺, 𑀦𑀧𑀺 𑀣𑀽𑀮𑀦𑁆𑀳𑀸𑀭𑀼 𑀚𑀸𑀦𑀸𑀢𑀺 ‘‘𑀫𑀬𑀸 𑀯𑀓𑁆𑀓𑀁 𑀉𑀧𑀦𑀺𑀩𑀤𑁆𑀥’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀯𑀓𑁆𑀓𑀁 𑀯𑀓𑁆𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀯𑀓𑁆𑀓𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀳𑀤𑀬𑀁 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀭𑀢𑁆𑀢𑀧𑀤𑀼𑀫𑀧𑀢𑁆𑀢𑀧𑀺𑀝𑁆𑀞𑀺𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀩𑀸𑀳𑀺𑀭𑀧𑀢𑁆𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 𑀅𑀥𑁄𑀫𑀼𑀔𑀞𑀧𑀺𑀢𑀧𑀤𑀼𑀫𑀫𑀓𑀼𑀴𑀲𑀡𑁆𑀞𑀸𑀦𑀁, 𑀢𑀜𑁆𑀘 𑀅𑀕𑁆𑀕𑀘𑁆𑀙𑀺𑀦𑁆𑀦𑀧𑀼𑀦𑁆𑀦𑀸𑀕𑀨𑀮𑀫𑀺𑀯 𑀯𑀺𑀯𑀝𑁂𑀓𑀧𑀲𑁆𑀲𑀁 𑀩𑀳𑀺 𑀫𑀝𑁆𑀞𑀁 𑀅𑀦𑁆𑀢𑁄 𑀓𑁄𑀲𑀸𑀢𑀓𑀻𑀨𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀤𑀺𑀲𑀁. 𑀧𑀜𑁆𑀜𑀸𑀩𑀳𑀼𑀮𑀸𑀦𑀁 𑀣𑁄𑀓𑀁 ¶ 𑀯𑀺𑀓𑀲𑀺𑀢𑀁, 𑀫𑀦𑁆𑀤𑀧𑀜𑁆𑀜𑀸𑀦𑀁 𑀫𑀓𑀼𑀴𑀺𑀢𑀫𑁂𑀯. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀫𑀁𑀲𑀧𑀺𑀡𑁆𑀟𑀲𑀗𑁆𑀔𑀸𑀢𑀳𑀤𑀬𑀩𑁆𑀪𑀦𑁆𑀢𑀭𑁂 𑀅𑀤𑁆𑀥𑀧𑀲𑀢𑀫𑀢𑁆𑀢𑀁 ¶ 𑀮𑁄𑀳𑀺𑀢𑀁 𑀲𑀡𑁆𑀞𑀸𑀢𑀺, 𑀢𑀁 𑀭𑀸𑀕𑀘𑀭𑀺𑀢𑀲𑁆𑀲 𑀭𑀢𑁆𑀢𑀁, 𑀤𑁄𑀲𑀘𑀭𑀺𑀢𑀲𑁆𑀲 𑀓𑀸𑀴𑀓𑀁, 𑀫𑁄𑀳𑀘𑀭𑀺𑀢𑀲𑁆𑀲 𑀫𑀁𑀲𑀥𑁄𑀯𑀦𑁄𑀤𑀓𑀲𑀤𑀺𑀲𑀁, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀓𑀼𑀮𑀢𑁆𑀣𑀬𑀽𑀲𑀯𑀡𑁆𑀡𑀁, 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁, 𑀧𑀜𑁆𑀜𑀸𑀘𑀭𑀺𑀢𑀲𑁆𑀲 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁, 𑀦𑀺𑀤𑁆𑀥𑁄𑀢𑀚𑀸𑀢𑀺𑀫𑀡𑀺 𑀯𑀺𑀬 𑀚𑀼𑀢𑀺𑀫𑀦𑁆𑀢𑀁 𑀔𑀸𑀬𑀢𑀺. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀫𑀚𑁆𑀛𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄 𑀅𑀕𑁆𑀕𑀴𑀢𑁆𑀣𑀫𑁆𑀪𑀓𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀤𑁆𑀯𑀺𑀦𑁆𑀦𑀁 ¶ 𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄’’𑀢𑀺, 𑀦𑀧𑀺 𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑀸𑀓𑀁 𑀫𑀚𑁆𑀛𑁂 𑀅𑀕𑁆𑀕𑀴𑀢𑁆𑀣𑀫𑁆𑀪𑀓𑁄 𑀞𑀺𑀢𑁄’’𑀢𑀺; 𑀏𑀯𑀫𑁂𑀯𑀁 𑀦 𑀳𑀤𑀬𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀫𑀚𑁆𑀛𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀣𑀦𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀳𑀤𑀬𑀁 𑀅𑀫𑁆𑀳𑀸𑀓𑀁 𑀫𑀚𑁆𑀛𑁂 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀳𑀤𑀬𑀁 𑀳𑀤𑀬𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀳𑀤𑀬𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀬𑀓𑀦𑀲𑀜𑁆𑀜𑀺𑀢𑀁 𑀬𑀫𑀓𑀫𑀁𑀲𑀧𑀺𑀡𑁆𑀟𑀁 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀭𑀢𑁆𑀢𑀓𑀼𑀫𑀼𑀤𑀩𑀸𑀳𑀺𑀭𑀧𑀢𑁆𑀢𑀧𑀺𑀝𑁆𑀞𑀺𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀏𑀓𑀫𑀽𑀮𑀁 𑀳𑀼𑀢𑁆𑀯𑀸 𑀅𑀕𑁆𑀕𑁂 𑀬𑀫𑀓𑀁 𑀓𑁄𑀯𑀺𑀴𑀸𑀭𑀧𑀢𑁆𑀢𑀲𑀡𑁆𑀞𑀸𑀦𑀁, 𑀢𑀜𑁆𑀘 𑀤𑀦𑁆𑀥𑀸𑀦𑀁 𑀏𑀓𑀁𑀬𑁂𑀯 𑀳𑁄𑀢𑀺 𑀫𑀳𑀦𑁆𑀢𑀁, 𑀧𑀜𑁆𑀜𑀯𑀦𑁆𑀢𑀸𑀦𑀁 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀔𑀼𑀤𑁆𑀤𑀓𑀸𑀦𑀻𑀢𑀺. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀧𑀺𑀞𑀭𑀓𑀧𑀲𑁆𑀲𑁂 𑀮𑀕𑁆𑀕𑀸 𑀫𑀁𑀲𑀧𑁂𑀲𑀺 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀧𑀺𑀞𑀭𑀓𑀧𑀲𑁆𑀲𑁂 𑀮𑀕𑁆𑀕𑀸’’𑀢𑀺, 𑀦𑀧𑀺 𑀧𑀺𑀞𑀭𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀫𑀁𑀲𑀧𑁂𑀲𑀺 𑀮𑀕𑁆𑀕𑀸’’𑀢𑀺; 𑀏𑀯𑀫𑁂𑀯 𑀦 𑀬𑀓𑀦𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢’’𑀦𑁆𑀢𑀺, 𑀦𑀧𑀺 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀓𑁆𑀔𑀺𑀡𑀧𑀲𑁆𑀲𑀁 𑀚𑀸𑀦𑀸𑀢𑀺 ‘‘𑀫𑀁 𑀦𑀺𑀲𑁆𑀲𑀸𑀬 𑀬𑀓𑀦𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀧𑀦 𑀬𑀓𑀦𑀁 𑀬𑀓𑀦𑀪𑀸𑀕𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺 ¶ . 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀬𑀓𑀦𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀪𑁂𑀤𑀢𑁄 𑀤𑀼𑀯𑀺𑀥𑀁 𑀓𑀺𑀮𑁄𑀫𑀓𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀅𑀢𑁆𑀢𑀦𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀳𑀤𑀬𑀜𑁆𑀘 𑀯𑀓𑁆𑀓𑀜𑁆𑀘 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀁 𑀲𑀓𑀮𑀲𑀭𑀻𑀭𑁂 𑀘𑀫𑁆𑀫𑀲𑁆𑀲 𑀳𑁂𑀝𑁆𑀞𑀢𑁄 𑀫𑀁𑀲𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀧𑀺𑀮𑁄𑀢𑀺𑀓𑀸𑀬 𑀧𑀮𑀺𑀯𑁂𑀞𑀺𑀢𑁂 𑀫𑀁𑀲𑁂 𑀦 𑀧𑀺𑀮𑁄𑀢𑀺𑀓𑀸 𑀚𑀸𑀦𑀸𑀢𑀺 ‘‘𑀫𑀬𑀸 𑀫𑀁𑀲𑀁 𑀧𑀮𑀺𑀯𑁂𑀞𑀺𑀢’’𑀦𑁆𑀢𑀺, 𑀦𑀧𑀺 𑀫𑀁𑀲𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀧𑀺𑀮𑁄𑀢𑀺𑀓𑀸𑀬 𑀧𑀮𑀺𑀯𑁂𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀓𑀺𑀮𑁄𑀫𑀓𑀁 𑀚𑀸𑀦𑀸𑀢𑀺 ‘‘𑀫𑀬𑀸 𑀳𑀤𑀬𑀯𑀓𑁆𑀓𑀸𑀦𑀺 𑀲𑀓𑀮𑀲𑀭𑀻𑀭𑁂 𑀘 𑀘𑀫𑁆𑀫𑀲𑁆𑀲 𑀳𑁂𑀝𑁆𑀞𑀢𑁄 𑀫𑀁𑀲𑀁 𑀧𑀮𑀺𑀯𑁂𑀞𑀺𑀢’’𑀦𑁆𑀢𑀺. 𑀦𑀧𑀺 𑀳𑀤𑀬𑀯𑀓𑁆𑀓𑀸𑀦𑀺 𑀲𑀓𑀮𑀲𑀭𑀻𑀭𑁂 𑀘 𑀫𑀁𑀲𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀓𑀺𑀮𑁄𑀫𑀓𑁂𑀦 𑀧𑀮𑀺𑀯𑁂𑀞𑀺𑀢’’𑀦𑁆𑀢𑀺 ¶ . 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀫𑀁𑀲𑁂𑀦 𑀉𑀧𑀭𑀺 𑀘𑀫𑁆𑀫𑁂𑀦 𑀢𑀺𑀭𑀺𑀬𑀁 𑀓𑀺𑀮𑁄𑀫𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀓𑀺𑀮𑁄𑀫𑀓𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀧𑀺𑀳𑀓𑀁 𑀯𑀡𑁆𑀡𑀢𑁄 𑀦𑀻𑀮𑀁 𑀫𑀻𑀮𑀸𑀢𑀦𑀺𑀕𑁆𑀕𑀼𑀡𑁆𑀟𑀻𑀧𑀼𑀧𑁆𑀨𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀅𑀩𑀦𑁆𑀥𑀦𑀁 𑀓𑀸𑀴𑀯𑀘𑁆𑀙𑀓𑀚𑀺𑀯𑁆𑀳𑀸𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀳𑀤𑀬𑀲𑁆𑀲 𑀯𑀸𑀫𑀧𑀲𑁆𑀲𑁂 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁, 𑀬𑀫𑁆𑀳𑀺 𑀧𑀳𑀭𑀡𑀧𑀳𑀸𑀭𑁂𑀦 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀬𑀣𑀸 𑀓𑁄𑀝𑁆𑀞𑀓𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀦 𑀕𑁄𑀫𑀬𑀧𑀺𑀡𑁆𑀟𑀺 𑀚𑀸𑀦𑀸𑀢𑀺 ‘‘𑀅𑀳𑀁 𑀓𑁄𑀝𑁆𑀞𑀓𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’’𑀢𑀺, 𑀦𑀧𑀺 𑀓𑁄𑀝𑁆𑀞𑀓𑀫𑀢𑁆𑀣𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 ‘‘𑀕𑁄𑀫𑀬𑀧𑀺𑀡𑁆𑀟𑀺 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’’𑀢𑀺; 𑀏𑀯𑀫𑁂𑀯 𑀦 𑀧𑀺𑀳𑀓𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢’’𑀦𑁆𑀢𑀺, 𑀦𑀧𑀺 𑀉𑀤𑀭𑀧𑀝𑀮𑀲𑁆𑀲 𑀫𑀢𑁆𑀣𑀓𑀧𑀲𑁆𑀲𑀁 𑀚𑀸𑀦𑀸𑀢𑀺 ‘‘𑀧𑀺𑀳𑀓𑀁 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 ¶ 𑀧𑀺𑀳𑀓𑀁 𑀧𑀺𑀳𑀓𑀪𑀸𑀕𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀧𑀺𑀳𑀓𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀤𑁆𑀯𑀢𑁆𑀢𑀺𑀁𑀲𑀫𑀁𑀲𑀔𑀡𑁆𑀟𑀧𑁆𑀧𑀪𑁂𑀤𑀁 𑀧𑀧𑁆𑀨𑀸𑀲𑀁 𑀯𑀡𑁆𑀡𑀢𑁄 𑀭𑀢𑁆𑀢𑀁 𑀦𑀸𑀢𑀺𑀧𑀭𑀺𑀧𑀓𑁆𑀓𑀉𑀤𑀼𑀫𑁆𑀩𑀭𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀯𑀺𑀲𑀫𑀘𑁆𑀙𑀺𑀦𑁆𑀦𑀧𑀽𑀯𑀲𑀡𑁆𑀞𑀸𑀦𑀁, 𑀙𑀤𑀦𑀺𑀝𑁆𑀞𑀓𑀔𑀡𑁆𑀟𑀧𑀼𑀜𑁆𑀚𑀲𑀡𑁆𑀞𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀢𑀤𑁂𑀢𑀁 𑀅𑀩𑁆𑀪𑀦𑁆𑀢𑀭𑁂 𑀅𑀲𑀺𑀢𑀧𑀻𑀢𑀸𑀤𑀻𑀦𑀁 𑀅𑀪𑀸𑀯𑁂 𑀉𑀕𑁆𑀕𑀢𑁂𑀦 𑀓𑀫𑁆𑀫𑀚𑀢𑁂𑀚𑀼𑀲𑁆𑀫𑀦𑀸 𑀅𑀩𑁆𑀪𑀸𑀳𑀢𑀢𑁆𑀢𑀸 𑀲𑀗𑁆𑀔𑀸𑀤𑀺𑀢𑀧𑀮𑀸𑀮𑀧𑀺𑀡𑁆𑀟𑀫𑀺𑀯 𑀦𑀺𑀭𑀲𑀁 𑀦𑀺𑀭𑁄𑀚𑀁 𑀳𑁄𑀢𑀺. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀳𑀤𑀬𑀜𑁆𑀘 𑀬𑀓𑀦𑀜𑁆𑀘 𑀉𑀧𑀭𑀺 𑀙𑀸𑀤𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑀁 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑁂 𑀮𑀫𑁆𑀩𑀫𑀸𑀦𑁄 𑀲𑀓𑀼𑀡𑀓𑀼𑀮𑀸𑀯𑀓𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑁂 𑀮𑀫𑁆𑀩𑀫𑀸𑀦𑁄 𑀞𑀺𑀢𑁄’’𑀢𑀺, 𑀦𑀧𑀺 𑀚𑀺𑀡𑁆𑀡𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘‘𑀲𑀓𑀼𑀡𑀓𑀼𑀮𑀸𑀯𑀓𑁄 𑀫𑀬𑀺 𑀮𑀫𑁆𑀩𑀫𑀸𑀦𑁄 𑀞𑀺𑀢𑁄’’𑀢𑀺; 𑀏𑀯𑀫𑁂𑀯 𑀦 𑀧𑀧𑁆𑀨𑀸𑀲𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀦𑁆𑀢𑀭𑁂 𑀮𑀫𑁆𑀩𑀫𑀸𑀦𑀁 𑀞𑀺𑀢’’𑀦𑁆𑀢𑀺, 𑀦𑀧𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦𑀁 𑀅𑀦𑁆𑀢𑀭𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀧𑀧𑁆𑀨𑀸𑀲𑀁 𑀮𑀫𑁆𑀩𑀫𑀸𑀦𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 ¶ 𑀧𑀧𑁆𑀨𑀸𑀲𑀁 𑀧𑀧𑁆𑀨𑀸𑀲𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀧𑀧𑁆𑀨𑀸𑀲𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀧𑀼𑀭𑀺𑀲𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀳𑀢𑁆𑀣𑀁, 𑀇𑀢𑁆𑀣𑀺𑀬𑀸 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀁, 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀑𑀪𑀕𑁆𑀕𑀁 𑀅𑀦𑁆𑀢𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀲𑀓𑁆𑀔𑀭𑀲𑀼𑀥𑀸𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀺𑀢𑀤𑁄𑀡𑀺𑀬𑀁 𑀲𑀁𑀯𑁂𑀮𑁆𑀮𑁂𑀢𑁆𑀯𑀸 𑀞𑀧𑀺𑀢𑀥𑀫𑁆𑀫𑀦𑀺𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀉𑀧𑀭𑀺 𑀕𑀮𑀯𑀸𑀝𑀓𑁂 𑀳𑁂𑀝𑁆𑀞𑀸 𑀘 𑀓𑀭𑀻𑀲𑀫𑀕𑁆𑀕𑁂 𑀯𑀺𑀦𑀺𑀩𑀦𑁆𑀥𑀢𑁆𑀢𑀸 𑀕𑀮𑀯𑀸𑀝𑀓𑀓𑀭𑀻𑀲𑀫𑀕𑁆𑀕𑀧𑀭𑀺𑀬𑀦𑁆𑀢𑁂 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 ¶ 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀮𑁄𑀳𑀺𑀢𑀤𑁄𑀡𑀺𑀬𑀁 𑀞𑀧𑀺𑀢𑀁 𑀙𑀺𑀦𑁆𑀦𑀲𑀻𑀲𑀁 𑀥𑀫𑁆𑀫𑀦𑀺𑀓𑀴𑁂𑀯𑀭𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀮𑁄𑀳𑀺𑀢𑀤𑁄𑀡𑀺𑀬𑀁 𑀞𑀺𑀢’’𑀦𑁆𑀢𑀺, 𑀦𑀧𑀺 𑀮𑁄𑀳𑀺𑀢𑀤𑁄𑀡𑀺 𑀚𑀸𑀦𑀸𑀢𑀺 ‘‘𑀫𑀬𑀺 𑀙𑀺𑀦𑁆𑀦𑀲𑀻𑀲𑀁 𑀥𑀫𑁆𑀫𑀦𑀺𑀓𑀴𑁂𑀯𑀭𑀁 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀅𑀦𑁆𑀢𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀅𑀦𑁆𑀢𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 ¶ 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀦𑁆𑀢𑀁 𑀅𑀦𑁆𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀅𑀦𑁆𑀢𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀅𑀦𑁆𑀢𑀦𑁆𑀢𑀭𑁂 𑀅𑀦𑁆𑀢𑀕𑀼𑀡𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀤𑀓𑀲𑀻𑀢𑀮𑀺𑀓𑀫𑀽𑀮𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀤𑀓𑀲𑀻𑀢𑀮𑀺𑀓𑀫𑀽𑀮𑀲𑀡𑁆𑀞𑀸𑀦𑀫𑁂𑀯𑀸𑀢𑀺, 𑀕𑁄𑀫𑀼𑀢𑁆𑀢𑀲𑀡𑁆𑀞𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀓𑀼𑀤𑀸𑀮𑀨𑀭𑀲𑀼𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀁 𑀬𑀦𑁆𑀢𑀸𑀓𑀟𑁆𑀠𑀦𑀓𑀸𑀮𑁂 𑀬𑀦𑁆𑀢𑀲𑀼𑀢𑁆𑀢𑀓𑀫𑀺𑀯 𑀬𑀦𑁆𑀢𑀨𑀮𑀓𑀸𑀦𑀺 𑀅𑀦𑁆𑀢𑀪𑁄𑀕𑁂 𑀏𑀓𑀢𑁄 𑀅𑀕𑁆𑀕𑀴𑀦𑁆𑀢𑁂 𑀆𑀩𑀦𑁆𑀥𑀺𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀲𑁆𑀲 𑀅𑀦𑁆𑀢𑀭𑀸 𑀢𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀭𑀚𑁆𑀚𑀼𑀓𑀸 𑀯𑀺𑀬 𑀏𑀓𑀯𑀻𑀲𑀢𑀺𑀬𑀸 𑀅𑀦𑁆𑀢𑀪𑁄𑀕𑀸𑀦𑀁 𑀅𑀦𑁆𑀢𑀭𑀸 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀭𑀚𑁆𑀚𑀼𑀓𑀸 𑀦 𑀚𑀸𑀦𑀸𑀢𑀺 ‘‘𑀫𑀬𑀸 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀲𑀺𑀩𑁆𑀩𑀺𑀢’’𑀦𑁆𑀢𑀺, 𑀦𑀧𑀺 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀓𑀁 𑀚𑀸𑀦𑀸𑀢𑀺 ‘‘𑀭𑀚𑁆𑀚𑀼𑀓𑀸 𑀫𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸’’𑀢𑀺, 𑀏𑀯𑀫𑁂𑀯 𑀅𑀦𑁆𑀢𑀕𑀼𑀡𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀦𑁆𑀢𑀁 𑀏𑀓𑀯𑀻𑀲𑀢𑀺𑀪𑁄𑀕𑀩𑁆𑀪𑀦𑁆𑀢𑀭𑁂 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺, 𑀦𑀧𑀺 𑀅𑀦𑁆𑀢𑀁 𑀚𑀸𑀦𑀸𑀢𑀺 ‘‘𑀅𑀦𑁆𑀢𑀕𑀼𑀡𑀁 𑀫𑀁 𑀆𑀩𑀦𑁆𑀥𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀦𑁆𑀢𑀕𑀼𑀡𑀁 𑀅𑀦𑁆𑀢𑀕𑀼𑀡𑀪𑀸𑀕𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀅𑀦𑁆𑀢𑀕𑀼𑀡𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀉𑀤𑀭𑀺𑀬𑀁 𑀯𑀡𑁆𑀡𑀢𑁄 𑀅𑀚𑁆𑀛𑁄𑀳𑀝𑀸𑀳𑀸𑀭𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀧𑀭𑀺𑀲𑁆𑀲𑀸𑀯𑀦𑁂 𑀲𑀺𑀣𑀺𑀮𑀩𑀤𑁆𑀥𑀢𑀡𑁆𑀟𑀼𑀮𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀉𑀤𑀭𑁂 𑀞𑀺𑀢𑀦𑁆𑀢𑀺 ¶ . 𑀉𑀤𑀭𑀁 𑀦𑀸𑀫 𑀉𑀪𑀢𑁄 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀲𑁆𑀲 𑀅𑀮𑁆𑀮𑀲𑀸𑀝𑀓𑀲𑁆𑀲 𑀫𑀚𑁆𑀛𑁂 𑀲𑀜𑁆𑀚𑀸𑀢𑀨𑁄𑀝𑀓𑀲𑀤𑀺𑀲𑀁 𑀅𑀦𑁆𑀢𑀧𑀝𑀮𑀁, 𑀩𑀳𑀺 𑀫𑀝𑁆𑀞𑀁, 𑀅𑀦𑁆𑀢𑁄 𑀫𑀁𑀲𑀓𑀲𑀫𑁆𑀩𑀼𑀧𑀮𑀺𑀯𑁂𑀞𑀺𑀢𑀁, 𑀓𑀺𑀮𑀺𑀝𑁆𑀞𑀧𑀸𑀯𑀸𑀭𑀧𑀼𑀧𑁆𑀨𑀲𑀤𑀺𑀲𑀁, 𑀓𑀼𑀣𑀺𑀢𑀧𑀦𑀲𑀨𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀤𑀺𑀲𑀦𑁆𑀢𑀺𑀧𑀺 𑀏𑀓𑁂. 𑀢𑀢𑁆𑀣 𑀢𑀓𑁆𑀓𑁄𑀮𑀓𑀸 𑀕𑀡𑁆𑀟𑀼𑀧𑁆𑀧𑀸𑀤𑀓𑀸𑀢𑀸𑀮𑀳𑀻𑀭𑀓𑀸𑀲𑀽𑀘𑀺𑀫𑀼𑀔𑀓𑀸𑀧𑀝𑀢𑀦𑁆𑀢𑀼𑀲𑀼𑀢𑁆𑀢𑀓𑀸𑀢𑀺 𑀏𑀯𑀫𑀸𑀤𑀺𑀤𑁆𑀯𑀢𑁆𑀢𑀺𑀁𑀲𑀓𑀼𑀮𑀧𑁆𑀧𑀪𑁂𑀤𑀸 𑀓𑀺𑀫𑀬𑁄 𑀆𑀓𑀼𑀮𑀩𑁆𑀬𑀸𑀓𑀼𑀮𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑁄 𑀳𑀼𑀢𑁆𑀯𑀸 𑀦𑀺𑀯𑀲𑀦𑁆𑀢𑀺, 𑀬𑁂 𑀧𑀸𑀦𑀪𑁄𑀚𑀦𑀸𑀤𑀺𑀫𑁆𑀳𑀺 𑀅𑀯𑀺𑀚𑁆𑀚𑀫𑀸𑀦𑁂 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀯𑀺𑀭𑀯𑀦𑁆𑀢𑀸 ¶ 𑀳𑀤𑀬𑀫𑀁𑀲𑀁 𑀅𑀪𑀺𑀢𑀼𑀤𑀦𑁆𑀢𑀺 𑀧𑀸𑀦𑀪𑁄𑀚𑀦𑀸𑀤𑀻𑀦𑀺 𑀅𑀚𑁆𑀛𑁄𑀳𑀭𑀡𑀯𑁂𑀮𑀸𑀬𑀜𑁆𑀘 𑀉𑀤𑁆𑀥𑀁𑀫𑀼𑀔𑀸 𑀳𑀼𑀢𑁆𑀯𑀸 𑀧𑀞𑀫𑀚𑁆𑀛𑁄𑀳𑀝𑁂 𑀤𑁆𑀯𑁂 𑀢𑀬𑁄 𑀆𑀮𑁄𑀧𑁂 𑀢𑀼𑀭𑀺𑀢𑀢𑀼𑀭𑀺𑀢𑀸 𑀯𑀺𑀮𑀼𑀫𑁆𑀧𑀦𑁆𑀢𑀺. 𑀬𑀁 𑀏𑀢𑁂𑀲𑀁 𑀓𑀺𑀫𑀻𑀦𑀁 𑀧𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀺, 𑀬𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑁂 𑀘𑀦𑁆𑀤𑀦𑀺𑀓𑀸𑀬 𑀲𑀭𑀤𑀲𑀫𑀬𑁂 𑀣𑀽𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀆𑀯𑀽𑀴𑁆𑀳𑀁 𑀫𑀼𑀢𑁆𑀢𑀓𑀭𑀻𑀲𑀘𑀫𑁆𑀫𑀝𑁆𑀞𑀺𑀦𑁆𑀳𑀸𑀭𑀼𑀔𑀡𑁆𑀟𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀮𑁄𑀳𑀺𑀢𑀧𑁆𑀧𑀪𑀼𑀢𑀺𑀦𑀸𑀦𑀸𑀓𑀼𑀡𑀧𑀚𑀸𑀢𑀁 𑀦𑀺𑀧𑀢𑀺𑀢𑁆𑀯𑀸 𑀓𑀤𑁆𑀤𑀫𑁄𑀤𑀓𑀸𑀮𑀼𑀴𑀺𑀢𑀁 𑀲𑀜𑁆𑀚𑀸𑀢𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀳𑀼𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀲𑀽𑀭𑀺𑀬𑀸𑀢𑀧𑀲𑀦𑁆𑀢𑀸𑀧𑀯𑁂𑀕𑀓𑀼𑀣𑀺𑀢𑀁 𑀉𑀧𑀭𑀺 𑀨𑁂𑀡𑀧𑀼𑀧𑁆𑀨𑀼𑀴𑀓𑁂 𑀫𑀼𑀜𑁆𑀘𑀦𑁆𑀢𑀁 𑀅𑀪𑀺𑀦𑀻𑀮𑀯𑀡𑁆𑀡𑀁 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀁 𑀉𑀧𑀕𑀦𑁆𑀢𑀼𑀁 𑀯𑀸 𑀤𑀝𑁆𑀞𑀼𑀁 𑀯𑀸 𑀅𑀦𑀭𑀳𑀭𑀽𑀧𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀖𑀸𑀬𑀺𑀢𑀼𑀁 𑀯𑀸 𑀲𑀸𑀬𑀺𑀢𑀼𑀁 𑀯𑀸; 𑀏𑀯𑀫𑁂𑀯 𑀦𑀸𑀦𑀧𑁆𑀧𑀓𑀸𑀭𑀧𑀸𑀦𑀪𑁄𑀚𑀦𑀸𑀤𑀺 𑀤𑀦𑁆𑀢𑀫𑀼𑀲𑀮𑀲𑀁𑀘𑀼𑀡𑁆𑀡𑀺𑀢𑀁 𑀚𑀺𑀯𑁆𑀳𑀸𑀳𑀢𑁆𑀣𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑀁 𑀔𑁂𑀴𑀮𑀸𑀮𑀸𑀧𑀮𑀺𑀩𑀼𑀤𑁆𑀥𑀁 𑀢𑀗𑁆𑀔𑀡𑀯𑀺𑀕𑀢𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀺𑀲𑀫𑁆𑀧𑀤𑀁 𑀓𑁄𑀮𑀺𑀬𑀔𑀮𑀺𑀲𑀼𑀯𑀸𑀦𑀯𑀫𑀣𑀼𑀲𑀤𑀺𑀲𑀁 𑀦𑀺𑀧𑀢𑀺𑀢𑁆𑀯𑀸 𑀧𑀺𑀢𑁆𑀢𑀲𑁂𑀫𑁆𑀳𑀯𑀸𑀢𑀧𑀮𑀺𑀯𑁂𑀞𑀺𑀢𑀁 𑀳𑀼𑀢𑁆𑀯𑀸 𑀉𑀤𑀭𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀓𑀼𑀣𑀺𑀢𑀁 𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀉𑀧𑀭𑀽𑀧𑀭𑀺 𑀨𑁂𑀡𑀧𑀼𑀧𑁆𑀨𑀼𑀴𑀓𑀸𑀦𑀺 𑀫𑀼𑀜𑁆𑀘𑀦𑁆𑀢𑀁 𑀧𑀭𑀫𑀓𑀲𑀫𑁆𑀩𑀼𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀪𑀸𑀯𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑀁 𑀲𑀼𑀢𑁆𑀯𑀸𑀧𑀺 ¶ 𑀧𑀸𑀦𑀪𑁄𑀚𑀦𑀸𑀤𑀻𑀲𑀼 𑀅𑀫𑀦𑀼𑀜𑁆𑀜𑀢𑀸 𑀲𑀡𑁆𑀞𑀸𑀢𑀺, 𑀧𑀕𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸. 𑀬𑀢𑁆𑀣 𑀘 𑀧𑀢𑀺𑀢𑀁 𑀧𑀸𑀦𑀪𑁄𑀚𑀦𑀸𑀤𑀺 𑀧𑀜𑁆𑀘𑀥𑀸 𑀯𑀺𑀯𑁂𑀓𑀁 𑀕𑀘𑁆𑀙𑀢𑀺, 𑀏𑀓𑀁 𑀪𑀸𑀕𑀁 𑀧𑀸𑀡𑀓𑀸 𑀔𑀸𑀤𑀦𑁆𑀢𑀺, 𑀏𑀓𑀁 𑀪𑀸𑀕𑀁 𑀉𑀤𑀭𑀕𑁆𑀕𑀺 𑀛𑀸𑀧𑁂𑀢𑀺, 𑀏𑀓𑁄 𑀪𑀸𑀕𑁄 𑀫𑀼𑀢𑁆𑀢𑀁 𑀳𑁄𑀢𑀺, 𑀏𑀓𑁄 𑀪𑀸𑀕𑁄 𑀓𑀭𑀻𑀲𑀁 𑀳𑁄𑀢𑀺, 𑀏𑀓𑁄 𑀪𑀸𑀕𑁄 𑀭𑀲𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑁄𑀡𑀺𑀢𑀫𑀁𑀲𑀸𑀤𑀻𑀦𑀺 𑀉𑀧𑀩𑁆𑀭𑀽𑀳𑀬𑀢𑀻𑀢𑀺.

𑀢𑀢𑁆𑀣 𑀬𑀣𑀸 𑀧𑀭𑀫𑀚𑁂𑀕𑀼𑀘𑁆𑀙𑀸𑀬 𑀲𑀼𑀯𑀸𑀦𑀤𑁄𑀡𑀺𑀬𑀸 𑀞𑀺𑀢𑁄 𑀲𑀼𑀯𑀸𑀦𑀯𑀫𑀣𑀼 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀼𑀯𑀸𑀦𑀤𑁄𑀡𑀺𑀬𑀸 𑀞𑀺𑀢𑁄’’𑀢𑀺; 𑀦𑀧𑀺 𑀲𑀼𑀯𑀸𑀦𑀤𑁄𑀡𑀺 𑀚𑀸𑀦𑀸𑀢𑀺 ‘‘𑀫𑀬𑀺 𑀲𑀼𑀯𑀸𑀦𑀯𑀫𑀣𑀼 𑀞𑀺𑀢𑁄’’𑀢𑀺. 𑀏𑀯𑀫𑁂𑀯 𑀦 𑀉𑀤𑀭𑀺𑀬𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀇𑀫𑀲𑁆𑀫𑀺𑀁 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑁂 𑀉𑀤𑀭𑁂 𑀞𑀺𑀢’’𑀦𑁆𑀢𑀺; 𑀦𑀧𑀺 𑀉𑀤𑀭𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀉𑀤𑀭𑀺𑀬𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺 ¶ . 𑀧𑀭𑀺𑀘𑁆𑀙𑁂𑀤𑀢𑁄 𑀉𑀤𑀭𑀺𑀬𑀁 𑀉𑀤𑀭𑀺𑀬𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀉𑀤𑀭𑀺𑀬𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 ¶ 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀓𑀭𑀻𑀲𑀁 𑀯𑀡𑁆𑀡𑀢𑁄 𑀬𑁂𑀪𑀼𑀬𑁆𑀬𑁂𑀦 𑀅𑀚𑁆𑀛𑁄𑀳𑀝𑀸𑀳𑀸𑀭𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁, 𑀤𑀺𑀲𑀢𑁄 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁, 𑀑𑀓𑀸𑀲𑀢𑁄 𑀧𑀓𑁆𑀓𑀸𑀲𑀬𑁂 𑀞𑀺𑀢𑀦𑁆𑀢𑀺. 𑀧𑀓𑁆𑀓𑀸𑀲𑀬𑁄 𑀦𑀸𑀫 𑀳𑁂𑀝𑁆𑀞𑀸 𑀦𑀸𑀪𑀺𑀧𑀺𑀝𑁆𑀞𑀺𑀓𑀡𑁆𑀝𑀓𑀫𑀽𑀮𑀸𑀦𑀁 𑀅𑀦𑁆𑀢𑀭𑁂 𑀅𑀦𑁆𑀢𑀸𑀯𑀲𑀸𑀦𑁂 𑀉𑀩𑁆𑀩𑁂𑀥𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄 𑀯𑀁𑀲𑀦𑀴𑀓𑀩𑁆𑀪𑀦𑁆𑀢𑀭𑀲𑀤𑀺𑀲𑁄 𑀧𑀤𑁂𑀲𑁄, 𑀬𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑀭𑀺𑀪𑀽𑀫𑀺𑀪𑀸𑀕𑁂 𑀧𑀢𑀺𑀢𑀁 𑀯𑀲𑁆𑀲𑁄𑀤𑀓𑀁 𑀑𑀕𑀴𑀺𑀢𑁆𑀯𑀸 𑀳𑁂𑀝𑁆𑀞𑀸𑀪𑀽𑀫𑀺𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀬𑀁𑀓𑀺𑀜𑁆𑀘𑀺 𑀆𑀫𑀸𑀲𑀬𑁂 𑀧𑀢𑀺𑀢𑀁 𑀧𑀸𑀦𑀪𑁄𑀚𑀦𑀸𑀤𑀺𑀓𑀁 𑀉𑀤𑀭𑀕𑁆𑀕𑀺𑀦𑀸 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀓𑁆𑀓𑀁 𑀧𑀓𑁆𑀓𑀁 𑀲𑀡𑁆𑀳𑀓𑀭𑀡𑀺𑀬𑀸 𑀧𑀺𑀝𑁆𑀞𑀫𑀺𑀯 𑀲𑀡𑁆𑀳𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑀩𑀺𑀮𑁂𑀦 𑀑𑀕𑀴𑀺𑀢𑁆𑀯𑀸 𑀑𑀫𑀤𑁆𑀤𑀺𑀢𑁆𑀯𑀸 𑀯𑀁𑀲𑀦𑀴𑀓𑁂 𑀧𑀓𑁆𑀔𑀺𑀢𑁆𑀢𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀯𑀺𑀬 𑀲𑀦𑁆𑀦𑀺𑀘𑀺𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀢𑀢𑁆𑀣 𑀬𑀣𑀸 𑀯𑀁𑀲𑀦𑀴𑀓𑁂 𑀑𑀫𑀤𑁆𑀤𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀯𑀁𑀲𑀦𑀴𑀓𑁂 𑀞𑀺𑀢𑀸’’𑀢𑀺, 𑀦𑀧𑀺 𑀯𑀁𑀲𑀦𑀴𑀓𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸 𑀞𑀺𑀢𑀸’’𑀢𑀺; 𑀏𑀯𑀫𑁂𑀯 𑀦 𑀓𑀭𑀻𑀲𑀁 𑀚𑀸𑀦𑀸𑀢𑀺 ¶ ‘‘𑀅𑀳𑀁 𑀧𑀓𑁆𑀓𑀸𑀲𑀬𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀧𑀓𑁆𑀓𑀸𑀲𑀬𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀓𑀭𑀻𑀲𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀓𑀭𑀻𑀲𑀁 𑀓𑀭𑀻𑀲𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀓𑀭𑀻𑀲𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀫𑀢𑁆𑀣𑀮𑀼𑀗𑁆𑀕𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀅𑀳𑀺𑀙𑀢𑁆𑀢𑀓𑀧𑀺𑀡𑁆𑀟𑀺𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀧𑀓𑁆𑀓𑀼𑀣𑀺𑀢𑀤𑀼𑀤𑁆𑀥𑀯𑀡𑁆𑀡𑀦𑁆𑀢𑀺𑀧𑀺 𑀏𑀓𑁂. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀲𑀻𑀲𑀓𑀝𑀸𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀘𑀢𑁆𑀢𑀸𑀭𑁄 𑀲𑀺𑀩𑁆𑀩𑀺𑀦𑀺𑀫𑀕𑁆𑀕𑁂 𑀦𑀺𑀲𑁆𑀲𑀸𑀬 𑀲𑀫𑁄𑀥𑀸𑀬 𑀞𑀧𑀺𑀢𑀸 𑀘𑀢𑁆𑀢𑀸𑀭𑁄 𑀧𑀺𑀝𑁆𑀞𑀧𑀺𑀡𑁆𑀟𑀺𑀓𑀸 𑀯𑀺𑀬 𑀲𑀫𑁄𑀳𑀺𑀢𑀁 𑀘𑀢𑀼𑀫𑀢𑁆𑀣𑀮𑀼𑀗𑁆𑀕𑀧𑀺𑀡𑁆𑀟𑀧𑁆𑀧𑀪𑁂𑀤𑀁 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀧𑀼𑀭𑀸𑀡𑀮𑀸𑀩𑀼𑀓𑀝𑀸𑀳𑁂 𑀧𑀓𑁆𑀔𑀺𑀢𑁆𑀢𑀧𑀺𑀝𑁆𑀞𑀧𑀺𑀡𑁆𑀟𑀺 𑀧𑀓𑁆𑀓𑀼𑀣𑀺𑀢𑀤𑀼𑀤𑁆𑀥𑀁 𑀯𑀸 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀧𑀼𑀭𑀸𑀡𑀮𑀸𑀩𑀼𑀓𑀝𑀸𑀳𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀧𑀼𑀭𑀸𑀡𑀮𑀸𑀩𑀼𑀓𑀝𑀸𑀳𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀧𑀺𑀝𑁆𑀞𑀧𑀺𑀡𑁆𑀟𑀺 𑀧𑀓𑁆𑀓𑀼𑀣𑀺𑀢𑀤𑀼𑀤𑁆𑀥𑀁 𑀯𑀸 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀫𑀢𑁆𑀣𑀮𑀼𑀗𑁆𑀕𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀲𑀻𑀲𑀓𑀝𑀸𑀳𑀩𑁆𑀪𑀦𑁆𑀢𑀭𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀫𑀢𑁆𑀣𑀮𑀼𑀗𑁆𑀕𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀫𑀢𑁆𑀣𑀮𑀼𑀗𑁆𑀕𑀁 𑀫𑀢𑁆𑀣𑀮𑀼𑀗𑁆𑀕𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 ¶ 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀫𑀢𑁆𑀣𑀮𑀼𑀗𑁆𑀕𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 ¶ 𑀧𑀭𑀁 𑀲𑀭𑀻𑀭𑁂 𑀩𑀤𑁆𑀥𑀸𑀩𑀤𑁆𑀥𑀪𑁂𑀤𑀢𑁄 𑀤𑀼𑀯𑀺𑀥𑀫𑁆𑀧𑀺 𑀧𑀺𑀢𑁆𑀢𑀁 𑀯𑀡𑁆𑀡𑀢𑁄 𑀩𑀳𑀮𑀫𑀥𑀼𑀓𑀢𑁂𑀮𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀩𑀤𑁆𑀥𑀧𑀺𑀢𑁆𑀢𑀁 𑀫𑀺𑀮𑀸𑀢𑀩𑀓𑀼𑀮𑀧𑀼𑀧𑁆𑀨𑀯𑀡𑁆𑀡𑀦𑁆𑀢𑀺𑀧𑀺 𑀏𑀓𑁂. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀁. 𑀑𑀓𑀸𑀲𑀢𑁄 𑀅𑀩𑀤𑁆𑀥𑀧𑀺𑀢𑁆𑀢𑀁 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀁 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀉𑀤𑀓𑀫𑀺𑀯 𑀢𑁂𑀮𑀩𑀺𑀦𑁆𑀤𑀼 𑀅𑀯𑀲𑁂𑀲𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁, 𑀬𑀫𑁆𑀳𑀺 𑀓𑀼𑀧𑀺𑀢𑁂 𑀅𑀓𑁆𑀔𑀻𑀦𑀺 𑀧𑀻𑀢𑀓𑀸𑀦𑀺 𑀳𑁄𑀦𑁆𑀢𑀺 𑀪𑀫𑀦𑁆𑀢𑀺, 𑀕𑀢𑁆𑀢𑀁 𑀓𑀫𑁆𑀧𑀢𑀺 𑀓𑀡𑁆𑀟𑀽𑀬𑀢𑀺. 𑀩𑀤𑁆𑀥𑀧𑀺𑀢𑁆𑀢𑀁 𑀳𑀤𑀬𑀧𑀧𑁆𑀨𑀸𑀲𑀸𑀦𑀫𑀦𑁆𑀢𑀭𑁂 ¶ 𑀬𑀓𑀦𑀫𑀁𑀲𑀁 𑀦𑀺𑀲𑁆𑀲𑀸𑀬 𑀧𑀢𑀺𑀝𑁆𑀞𑀺𑀢𑁂 𑀫𑀳𑀸𑀓𑁄𑀲𑀸𑀢𑀓𑀺𑀓𑁄𑀲𑀓𑀲𑀤𑀺𑀲𑁂 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀁, 𑀬𑀫𑁆𑀳𑀺 𑀓𑀼𑀧𑀺𑀢𑁂 𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑀓𑀸 𑀳𑁄𑀦𑁆𑀢𑀺, 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀙𑀟𑁆𑀟𑁂𑀢𑁆𑀯𑀸 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀺, 𑀅𑀪𑀸𑀲𑀺𑀢𑀩𑁆𑀩𑀁 𑀪𑀸𑀲𑀦𑁆𑀢𑀺, 𑀅𑀘𑀺𑀦𑁆𑀢𑀺𑀢𑀩𑁆𑀩𑀁 𑀘𑀺𑀦𑁆𑀢𑁂𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀉𑀤𑀓𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁 𑀢𑁂𑀮𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀉𑀤𑀓𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’’𑀦𑁆𑀢𑀺, 𑀦𑀧𑀺 𑀉𑀤𑀓𑀁 𑀚𑀸𑀦𑀸𑀢𑀺 ‘‘𑀢𑁂𑀮𑀁 𑀫𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀅𑀩𑀤𑁆𑀥𑀧𑀺𑀢𑁆𑀢𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’’𑀦𑁆𑀢𑀺, 𑀦𑀧𑀺 𑀲𑀭𑀻𑀭𑀁 𑀚𑀸𑀦𑀸𑀢𑀺 ‘‘𑀅𑀩𑀤𑁆𑀥𑀧𑀺𑀢𑁆𑀢𑀁 𑀫𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢’’𑀦𑁆𑀢𑀺. 𑀬𑀣𑀸 𑀘 𑀓𑁄𑀲𑀸𑀢𑀓𑀺𑀓𑁄𑀲𑀓𑁂 𑀞𑀺𑀢𑀁 𑀯𑀲𑁆𑀲𑁄𑀤𑀓𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀓𑁄𑀲𑀸𑀢𑀓𑀺𑀓𑁄𑀲𑀓𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀓𑁄𑀲𑀸𑀢𑀓𑀺𑀓𑁄𑀲𑀓𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀯𑀲𑁆𑀲𑁄𑀤𑀓𑀁 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀩𑀤𑁆𑀥𑀧𑀺𑀢𑁆𑀢𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀧𑀺𑀢𑁆𑀢𑀓𑁄𑀲𑀓𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀩𑀤𑁆𑀥𑀧𑀺𑀢𑁆𑀢𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀧𑀺𑀢𑁆𑀢𑀁 𑀧𑀺𑀢𑁆𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀧𑀺𑀢𑁆𑀢𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀏𑀓𑀧𑀢𑁆𑀢𑀧𑀽𑀭𑀧𑁆𑀧𑀫𑀸𑀡𑀁 𑀲𑁂𑀫𑁆𑀳𑀁 𑀯𑀡𑁆𑀡𑀢𑁄 𑀲𑁂𑀢𑀁 𑀓𑀘𑁆𑀙𑀓𑀧𑀡𑁆𑀡𑀭𑀲𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀉𑀤𑀭𑀧𑀝𑀮𑁂 𑀞𑀺𑀢𑀦𑁆𑀢𑀺. 𑀬𑀁 ¶ 𑀧𑀸𑀦𑀪𑁄𑀚𑀦𑀸𑀤𑀺𑀅𑀚𑁆𑀛𑁄𑀳𑀭𑀡𑀓𑀸𑀮𑁂 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀤𑀓𑁂 𑀲𑁂𑀯𑀸𑀮𑀧𑀡𑀓𑀁 𑀓𑀝𑁆𑀞𑁂 𑀯𑀸 𑀓𑀣𑀮𑁂 𑀯𑀸 𑀧𑀢𑀦𑁆𑀢𑁂 𑀙𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀧𑀸𑀦𑀪𑁄𑀚𑀦𑀸𑀤𑀺𑀫𑁆𑀳𑀺 𑀦𑀺𑀧𑀢𑀦𑁆𑀢𑁂 𑀙𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀬𑀫𑁆𑀳𑀺 𑀘 𑀫𑀦𑁆𑀤𑀻𑀪𑀽𑀢𑁂 𑀧𑀓𑁆𑀓𑀫𑀺𑀯 𑀕𑀡𑁆𑀟𑀁 𑀧𑀽𑀢𑀺𑀓𑀫𑀺𑀯 𑀓𑀼𑀓𑁆𑀓𑀼𑀝𑀡𑁆𑀟𑀁 𑀉𑀤𑀭𑀧𑀝𑀮𑀁 𑀧𑀭𑀫𑀚𑁂𑀕𑀼𑀘𑁆𑀙𑀓𑀼𑀡𑀧𑀕𑀦𑁆𑀥𑀁 𑀳𑁄𑀢𑀺. 𑀢𑀢𑁄 𑀉𑀕𑁆𑀕𑀢𑁂𑀦 𑀘 𑀕𑀦𑁆𑀥𑁂𑀦 𑀉𑀕𑁆𑀕𑀸𑀭𑁄𑀧𑀺 𑀫𑀼𑀔𑀫𑁆𑀧𑀺 𑀤𑀼𑀕𑁆𑀕𑀦𑁆𑀥𑀁 𑀧𑀽𑀢𑀺𑀓𑀼𑀡𑀧𑀲𑀤𑀺𑀲𑀁 𑀳𑁄𑀢𑀺, 𑀲𑁄 𑀘 𑀧𑀼𑀭𑀺𑀲𑁄 ‘‘𑀅𑀧𑁂𑀳𑀺 ¶ 𑀤𑀼𑀕𑁆𑀕𑀦𑁆𑀥𑀁 𑀯𑀸𑀬𑀲𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 ¶ 𑀆𑀧𑀚𑁆𑀚𑀢𑀺, 𑀬𑀜𑁆𑀘 𑀅𑀪𑀺𑀯𑀟𑁆𑀠𑀺𑀢𑀁 𑀩𑀳𑀮𑀢𑁆𑀢𑀫𑀸𑀧𑀦𑁆𑀦𑀁 𑀧𑀝𑀺𑀓𑀼𑀚𑁆𑀚𑀦𑀨𑀮𑀓𑀫𑀺𑀯 𑀯𑀘𑁆𑀘𑀓𑀼𑀝𑀺𑀬𑀸 𑀉𑀤𑀭𑀧𑀝𑀮𑀩𑁆𑀪𑀦𑁆𑀢𑀭𑁂 𑀏𑀯 𑀓𑀼𑀡𑀧𑀕𑀦𑁆𑀥𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀢𑀢𑁆𑀣 𑀬𑀣𑀸 𑀘𑀦𑁆𑀤𑀦𑀺𑀓𑀸𑀬 𑀉𑀧𑀭𑀺𑀨𑁂𑀡𑀧𑀝𑀮𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀘𑀦𑁆𑀤𑀦𑀺𑀓𑀸𑀬 𑀞𑀺𑀢’’𑀦𑁆𑀢𑀺, 𑀦𑀧𑀺 𑀘𑀦𑁆𑀤𑀦𑀺𑀓𑀸 𑀚𑀸𑀦𑀸𑀢𑀺 ‘‘𑀫𑀬𑀺 𑀨𑁂𑀡𑀧𑀝𑀮𑀁 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀲𑁂𑀫𑁆𑀳𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀉𑀤𑀭𑀧𑀝𑀮𑁂 𑀞𑀺𑀢’’𑀦𑁆𑀢𑀺, 𑀦𑀧𑀺 𑀉𑀤𑀭𑀧𑀝𑀮𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀲𑁂𑀫𑁆𑀳𑀁 𑀞𑀺𑀢𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀲𑁂𑀫𑁆𑀳𑀁 𑀲𑁂𑀫𑁆𑀳𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀲𑁂𑀫𑁆𑀳𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀧𑀼𑀩𑁆𑀩𑁄 𑀯𑀡𑁆𑀡𑀢𑁄 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀧𑀼𑀩𑁆𑀩𑀲𑁆𑀲 𑀑𑀓𑀸𑀲𑁄 𑀦𑀸𑀫 𑀦𑀺𑀩𑀤𑁆𑀥𑁄 𑀦𑀢𑁆𑀣𑀺. 𑀬𑀢𑁆𑀣 𑀧𑀼𑀩𑁆𑀩𑁄 𑀲𑀦𑁆𑀦𑀺𑀘𑀺𑀢𑁄 𑀢𑀺𑀝𑁆𑀞𑁂𑀬𑁆𑀬, 𑀬𑀢𑁆𑀭 𑀬𑀢𑁆𑀭 𑀔𑀸𑀡𑀼𑀓𑀡𑁆𑀝𑀓𑀧𑁆𑀧𑀳𑀭𑀡𑀕𑁆𑀕𑀺𑀚𑀸𑀮𑀸𑀤𑀻𑀳𑀺 𑀅𑀪𑀺𑀳𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂 𑀮𑁄𑀳𑀺𑀢𑀁 𑀲𑀡𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀢𑀺, 𑀕𑀡𑁆𑀟𑀧𑀺𑀴𑀓𑀸𑀤𑀬𑁄 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭 𑀢𑀺𑀝𑁆𑀞𑀢𑀺.

𑀢𑀢𑁆𑀣 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀨𑀭𑀲𑀼𑀥𑀸𑀭𑀸𑀤𑀻𑀳𑀺 𑀧𑀳𑀢𑀧𑁆𑀧𑀤𑁂𑀲𑁂 𑀅𑀯𑀕𑀴𑀺𑀢𑁆𑀯𑀸 𑀞𑀺𑀢𑁄 𑀦𑀺𑀬𑁆𑀬𑀸𑀲𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀭𑀼𑀓𑁆𑀔𑀲𑁆𑀲 𑀧𑀳𑀢𑀧𑁆𑀧𑀤𑁂𑀲𑁂 𑀞𑀺𑀢𑁄’’𑀢𑀺, 𑀦𑀧𑀺 𑀭𑀼𑀓𑁆𑀔𑀲𑁆𑀲 𑀧𑀳𑀢𑀧𑁆𑀧𑀤𑁂𑀲𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀦𑀺𑀬𑁆𑀬𑀸𑀲𑁄 𑀞𑀺𑀢𑁄’’𑀢𑀺; 𑀏𑀯𑀫𑁂𑀯 𑀦 𑀧𑀼𑀩𑁆𑀩𑁄 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀭𑀻𑀭𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀳𑀺 𑀅𑀪𑀺𑀳𑀢𑀧𑁆𑀧𑀤𑁂𑀲𑁂 𑀕𑀡𑁆𑀟𑀧𑀺𑀴𑀓𑀸𑀤𑀻𑀦𑀁 𑀉𑀝𑁆𑀞𑀺𑀢𑀧𑁆𑀧𑀤𑁂𑀲𑁂 𑀯𑀸 𑀞𑀺𑀢𑁄’’𑀢𑀺, 𑀦𑀧𑀺 𑀲𑀭𑀻𑀭𑀧𑁆𑀧𑀤𑁂𑀲𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀧𑀼𑀩𑁆𑀩𑁄 𑀞𑀺𑀢𑁄’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 ¶ 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀧𑀼𑀩𑁆𑀩𑁄 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀧𑀼𑀩𑁆𑀩𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀲𑀁𑀲𑀭𑀡𑀮𑁄𑀳𑀺𑀢𑀦𑁆𑀢𑀺 𑀏𑀯𑀁 𑀤𑀼𑀯𑀺𑀥𑁂 𑀮𑁄𑀳𑀺𑀢𑁂 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀢𑀸𑀯 𑀯𑀡𑁆𑀡𑀢𑁄 𑀩𑀳𑀮𑀓𑀼𑀣𑀺𑀢𑀮𑀸𑀔𑀸𑀭𑀲𑀯𑀡𑁆𑀡𑀦𑁆𑀢𑀺 ¶ 𑀯𑀯𑀢𑁆𑀣𑀧𑁂𑀢𑀺, 𑀲𑀁𑀲𑀭𑀡𑀮𑁄𑀳𑀺𑀢𑀁 𑀅𑀘𑁆𑀙𑀮𑀸𑀔𑀸𑀭𑀲𑀯𑀡𑁆𑀡𑀦𑁆𑀢𑀺. 𑀲𑀡𑁆𑀞𑀸𑀦𑀢𑁄 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀦𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁, 𑀲𑀁𑀲𑀭𑀡𑀮𑁄𑀳𑀺𑀢𑀁 𑀤𑁆𑀯𑀻𑀲𑀼𑀧𑀻𑀢𑀺. 𑀑𑀓𑀸𑀲𑀢𑁄 𑀲𑀁𑀲𑀭𑀡𑀮𑁄𑀳𑀺𑀢𑀁 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘𑁂𑀯 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 ¶ 𑀲𑀩𑁆𑀩𑀁 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁. 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀧𑀽𑀭𑁂𑀢𑁆𑀯𑀸 𑀏𑀓𑀧𑀢𑁆𑀢𑀧𑀽𑀭𑀡𑀫𑀢𑁆𑀢𑀁 𑀯𑀓𑁆𑀓𑀳𑀤𑀬𑀧𑀧𑁆𑀨𑀸𑀲𑀸𑀦𑀁 𑀉𑀧𑀭𑀺 𑀣𑁄𑀓𑀁 𑀣𑁄𑀓𑀁 𑀩𑀺𑀦𑁆𑀤𑀼𑀁 𑀧𑀸𑀢𑁂𑀦𑁆𑀢𑀁 𑀯𑀓𑁆𑀓𑀳𑀤𑀬𑀬𑀓𑀦𑀧𑀧𑁆𑀨𑀸𑀲𑁂 𑀢𑁂𑀫𑁂𑀦𑁆𑀢𑀁 𑀞𑀺𑀢𑀁, 𑀬𑀫𑁆𑀳𑀺 𑀯𑀓𑁆𑀓𑀳𑀤𑀬𑀸𑀤𑀻𑀦𑀺 𑀅𑀢𑁂𑀫𑁂𑀦𑁆𑀢𑁂 𑀲𑀢𑁆𑀢𑀸 𑀧𑀺𑀧𑀸𑀲𑀺𑀢𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀚𑀚𑁆𑀚𑀭𑀓𑀧𑀸𑀮𑁂 𑀞𑀺𑀢𑀁 𑀉𑀤𑀓𑀁 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀢𑁂𑀫𑁂𑀦𑁆𑀢𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀚𑀚𑁆𑀚𑀭𑀓𑀧𑀸𑀮𑁂 𑀞𑀺𑀢𑀁 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀢𑁂𑀫𑁂𑀫𑀻’’𑀢𑀺, 𑀦𑀧𑀺 𑀚𑀚𑁆𑀚𑀭𑀓𑀧𑀸𑀮𑀁 𑀳𑁂𑀝𑁆𑀞𑀸 𑀮𑁂𑀟𑁆𑀟𑀼𑀔𑀡𑁆𑀟𑀸𑀤𑀻𑀦𑀺 𑀯𑀸 𑀚𑀸𑀦𑀦𑁆𑀢𑀺 ‘‘𑀫𑀬𑀺 𑀉𑀤𑀓𑀁 𑀞𑀺𑀢𑀁, 𑀅𑀫𑁆𑀳𑁂 𑀯𑀸 𑀢𑁂𑀫𑁂𑀦𑁆𑀢𑀁 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀮𑁄𑀳𑀺𑀢𑀁 𑀚𑀸𑀦𑀸𑀢𑀺 ‘‘𑀅𑀳𑀁 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂 𑀯𑀓𑁆𑀓𑀳𑀤𑀬𑀸𑀤𑀻𑀦𑀺 𑀢𑁂𑀫𑁂𑀦𑁆𑀢𑀁 𑀞𑀺𑀢’’𑀦𑁆𑀢𑀺, 𑀦𑀧𑀺 𑀬𑀓𑀦𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀝𑁆𑀞𑀸𑀦𑀁 𑀯𑀓𑁆𑀓𑀳𑀤𑀬𑀸𑀤𑀻𑀦𑀺 𑀯𑀸 𑀚𑀸𑀦𑀦𑁆𑀢𑀺 ‘‘𑀫𑀬𑀺 𑀮𑁄𑀳𑀺𑀢𑀁 𑀞𑀺𑀢𑀁, 𑀅𑀫𑁆𑀳𑁂 𑀯𑀸 𑀢𑁂𑀫𑁂𑀦𑁆𑀢𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀮𑁄𑀳𑀺𑀢𑀁 𑀮𑁄𑀳𑀺𑀢𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀮𑁄𑀳𑀺𑀢𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀲𑁂𑀤𑁄 𑀯𑀡𑁆𑀡𑀢𑁄 𑀧𑀲𑀦𑁆𑀦𑀢𑀺𑀮𑀢𑁂𑀮𑀯𑀡𑁆𑀡𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀲𑁂𑀤𑀲𑁆𑀲 𑀑𑀓𑀸𑀲𑁄 𑀦𑀸𑀫 𑀦𑀺𑀩𑀤𑁆𑀥𑁄 𑀦𑀢𑁆𑀣𑀺, 𑀬𑀢𑁆𑀣 𑀲𑁂𑀤𑁄 𑀮𑁄𑀳𑀺𑀢𑀁 𑀯𑀺𑀬 𑀲𑀤𑀸 𑀢𑀺𑀝𑁆𑀞𑁂𑀬𑁆𑀬. 𑀬𑀲𑁆𑀫𑀸 𑀯𑀸 𑀬𑀤𑀸 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑀽𑀭𑀺𑀬𑀲𑀦𑁆𑀢𑀸𑀧𑀉𑀢𑀼𑀯𑀺𑀓𑀸𑀭𑀸𑀤𑀻𑀳𑀺 ¶ 𑀲𑀭𑀻𑀭𑀁 𑀲𑀦𑁆𑀢𑀧𑀢𑀺, 𑀅𑀣 𑀉𑀤𑀓𑀢𑁄 𑀅𑀩𑁆𑀩𑀽𑀴𑁆𑀳𑀫𑀢𑁆𑀢𑀯𑀺𑀲𑀫𑀘𑁆𑀙𑀺𑀦𑁆𑀦𑀪𑀺𑀲𑀫𑀼𑀴𑀸𑀮𑀓𑀼𑀫𑀼𑀤𑀦𑀸𑀮𑀓𑀮𑀸𑀧𑀉𑀤𑀓𑀫𑀺𑀯 𑀲𑀩𑁆𑀩𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸𑀦𑀁 𑀯𑀲𑁂𑀦 𑀢𑀁 ¶ 𑀲𑀡𑁆𑀞𑀸𑀦𑀢𑁄 𑀯𑀯𑀢𑁆𑀣𑀧𑁂𑀢𑀺. ‘‘𑀲𑁂𑀤𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀘 𑀬𑁄𑀕𑀸𑀯𑀘𑀭𑁂𑀦 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀯𑀲𑁂𑀦𑁂𑀯 𑀲𑁂𑀤𑁄 𑀫𑀦𑀲𑀺𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺.

𑀢𑀢𑁆𑀣 𑀬𑀣𑀸 𑀪𑀺𑀲𑀫𑀼𑀴𑀸𑀮𑀓𑀼𑀫𑀼𑀤𑀦𑀸𑀮𑀓𑀮𑀸𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀦𑁆𑀢𑀁 𑀉𑀤𑀓𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀪𑀺𑀲𑀫𑀼𑀴𑀸𑀮𑀓𑀼𑀫𑀼𑀤𑀦𑀸𑀮𑀓𑀮𑀸𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀸𑀫𑀻’’𑀢𑀺, 𑀦𑀧𑀺 𑀪𑀺𑀲𑀫𑀼𑀴𑀸𑀮𑀓𑀼𑀫𑀼𑀤𑀦𑀸𑀮𑀓𑀮𑀸𑀧𑀯𑀺𑀯𑀭𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀳𑀺 𑀉𑀤𑀓𑀁 𑀧𑀕𑁆𑀖𑀭𑀢𑀻’’𑀢𑀺; 𑀏𑀯𑀫𑁂𑀯 𑀦 𑀲𑁂𑀤𑁄 𑀚𑀸𑀦𑀸𑀢𑀺 ‘‘𑀅𑀳𑀁 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑁂𑀳𑀺 𑀧𑀕𑁆𑀖𑀭𑀸𑀫𑀻’’𑀢𑀺, 𑀦𑀧𑀺 𑀓𑁂𑀲𑀮𑁄𑀫𑀓𑀽𑀧𑀯𑀺𑀯𑀭𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀳𑀺 𑀲𑁂𑀤𑁄 𑀧𑀕𑁆𑀖𑀭𑀢𑀻’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀲𑁂𑀤𑁄 𑀲𑁂𑀤𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀲𑁂𑀤𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 ¶ 𑀧𑀭𑀁 𑀲𑀭𑀻𑀭𑁂 𑀘𑀫𑁆𑀫𑀫𑀁𑀲𑀦𑁆𑀢𑀭𑁂 𑀫𑁂𑀤𑁄 𑀯𑀡𑁆𑀡𑀢𑁄 𑀨𑀸𑀮𑀺𑀢𑀳𑀮𑀺𑀤𑁆𑀤𑀺𑀯𑀡𑁆𑀡𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄. 𑀢𑀣𑀸 𑀳𑀺 𑀲𑀼𑀔𑀺𑀦𑁄 𑀣𑀽𑀮𑀲𑀭𑀻𑀭𑀲𑁆𑀲 𑀘𑀫𑁆𑀫𑀫𑀁𑀲𑀦𑁆𑀢𑀭𑁂 𑀨𑀭𑀺𑀢𑁆𑀯𑀸 𑀞𑀺𑀢𑁄 𑀳𑀮𑀺𑀤𑁆𑀤𑀺𑀭𑀢𑁆𑀢𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀲𑀡𑁆𑀞𑀸𑀦𑁄, 𑀓𑀺𑀲𑀲𑀭𑀻𑀭𑀲𑁆𑀲 𑀚𑀗𑁆𑀖𑀫𑀁𑀲𑀊𑀭𑀼𑀫𑀁𑀲𑀧𑀺𑀝𑁆𑀞𑀺𑀓𑀡𑁆𑀝𑀓𑀦𑀺𑀲𑁆𑀲𑀺𑀢𑀧𑀺𑀝𑁆𑀞𑀺𑀫𑀁𑀲𑀉𑀤𑀭𑀧𑀝𑀮𑀫𑀁𑀲𑀸𑀦𑀺 𑀦𑀺𑀲𑁆𑀲𑀸𑀬 𑀲𑀁𑀯𑁂𑀮𑁆𑀮𑀺𑀢𑁆𑀯𑀸 𑀞𑀧𑀺𑀢𑀳𑀮𑀺𑀤𑁆𑀤𑀺𑀭𑀢𑁆𑀢𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀔𑀡𑁆𑀟𑀲𑀡𑁆𑀞𑀸𑀦𑁄. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑁄. 𑀑𑀓𑀸𑀲𑀢𑁄 𑀣𑀽𑀮𑀲𑀭𑀻𑀭𑀲𑁆𑀲 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀓𑀺𑀲𑀲𑁆𑀲 𑀚𑀗𑁆𑀖𑀸𑀫𑀁𑀲𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀞𑀺𑀢𑁄, 𑀬𑁄 𑀲𑀺𑀦𑁂𑀳𑀲𑀗𑁆𑀔𑀸𑀢𑁄𑀧𑀺 𑀳𑀼𑀢𑁆𑀯𑀸 𑀧𑀭𑀫𑀚𑁂𑀕𑀼𑀘𑁆𑀙𑀢𑁆𑀢𑀸 𑀦 𑀫𑀢𑁆𑀣𑀓𑀢𑁂𑀮𑀢𑁆𑀣𑀁 𑀦 𑀕𑀡𑁆𑀟𑀽𑀲𑀢𑁂𑀮𑀢𑁆𑀣𑀁 𑀦 𑀤𑀻𑀧𑀚𑀸𑀮𑀦𑀢𑁆𑀣𑀁 𑀲𑀗𑁆𑀕𑀬𑁆𑀳𑀢𑀺.

𑀢𑀢𑁆𑀣 𑀬𑀣𑀸 𑀫𑀁𑀲𑀧𑀼𑀜𑁆𑀚𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀳𑀮𑀺𑀤𑁆𑀤𑀺𑀭𑀢𑁆𑀢𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀸 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀫𑀁𑀲𑀧𑀼𑀜𑁆𑀚𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’’𑀢𑀺, 𑀦𑀧𑀺 𑀫𑀁𑀲𑀧𑀼𑀜𑁆𑀚𑁄 𑀚𑀸𑀦𑀸𑀢𑀺 ‘‘𑀳𑀮𑀺𑀤𑁆𑀤𑀺𑀭𑀢𑁆𑀢𑀤𑀼𑀓𑀽𑀮𑀧𑀺𑀮𑁄𑀢𑀺𑀓𑀸 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸’’𑀢𑀺; 𑀏𑀯𑀫𑁂𑀯 𑀦 𑀫𑁂𑀤𑁄 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀓𑀮𑀲𑀭𑀻𑀭𑀁 𑀚𑀗𑁆𑀖𑀸𑀤𑀻𑀲𑀼 𑀯𑀸 𑀫𑀁𑀲𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄’’𑀢𑀺, 𑀦𑀧𑀺 𑀲𑀓𑀮𑀲𑀭𑀻𑀭𑀁 𑀚𑀸𑀦𑀸𑀢𑀺 𑀚𑀗𑁆𑀖𑀸𑀤𑀻𑀲𑀼 𑀯𑀸 𑀫𑀁𑀲𑀁 ‘‘𑀫𑁂𑀤𑁄 𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀫𑁂𑀤𑁄 𑀳𑁂𑀝𑁆𑀞𑀸 𑀫𑀁𑀲𑁂𑀦, 𑀉𑀧𑀭𑀺 𑀘𑀫𑁆𑀫𑁂𑀦, 𑀲𑀫𑀦𑁆𑀢𑀢𑁄 𑀫𑁂𑀤𑀪𑀸𑀕𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 ¶ 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀫𑁂𑀤𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀅𑀲𑁆𑀲𑀼 𑀯𑀡𑁆𑀡𑀢𑁄 𑀧𑀲𑀦𑁆𑀦𑀢𑀺𑀮𑀢𑁂𑀮𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀞𑀺𑀢𑀦𑁆𑀢𑀺. 𑀦 𑀘𑁂𑀢𑀁 𑀧𑀺𑀢𑁆𑀢𑀓𑁄𑀲𑀓𑁂 𑀧𑀺𑀢𑁆𑀢𑀫𑀺𑀯 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀲𑀤𑀸 𑀲𑀦𑁆𑀦𑀺𑀘𑀺𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀓𑀺𑀦𑁆𑀢𑀼 𑀬𑀤𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀢𑁆𑀢𑀸 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀺, 𑀤𑁄𑀫𑀦𑀲𑁆𑀲𑀚𑀸𑀢𑀸 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀢𑀣𑀸𑀭𑀽𑀧𑀁 𑀯𑀺𑀲𑀫𑀸𑀳𑀸𑀭𑀁 𑀯𑀸 𑀳𑀭𑀦𑁆𑀢𑀺, 𑀬𑀤𑀸 𑀘 𑀢𑁂𑀲𑀁 𑀅𑀓𑁆𑀔𑀻𑀦𑀺 𑀥𑀽𑀫𑀭𑀚𑀧𑀁𑀲𑀼𑀓𑀸𑀤𑀻𑀳𑀺 𑀅𑀪𑀺𑀳𑀜𑁆𑀜𑀦𑁆𑀢𑀺, 𑀢𑀤𑀸 𑀏𑀢𑁂𑀳𑀺 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀯𑀺𑀲𑀫𑀸𑀳𑀸𑀭𑀸𑀤𑀻𑀳𑀺 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀲𑁆𑀲𑀼 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺 𑀧𑀕𑁆𑀖𑀭𑀢𑀺 𑀘. ‘‘𑀅𑀲𑁆𑀲𑀼𑀧𑀭𑀺𑀕𑁆𑀕𑀡𑁆𑀳𑀓𑁂𑀦 𑀘 𑀬𑁄𑀕𑀸𑀯𑀘𑀭𑁂𑀦 𑀅𑀓𑁆𑀔𑀺𑀓𑀽𑀧𑀓𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀯𑀲𑁂𑀦𑁂𑀯 𑀢𑀁 𑀫𑀦𑀲𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀸 𑀯𑀡𑁆𑀡𑀬𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀞𑀺𑀢𑀁 𑀉𑀤𑀓𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑁂𑀲𑀼 𑀞𑀺𑀢’’𑀦𑁆𑀢𑀺, 𑀦𑀧𑀺 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀭𑀼𑀡𑀢𑀸𑀮𑀝𑁆𑀞𑀺𑀓𑀽𑀧𑀓𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀲𑀼 𑀉𑀤𑀓𑀁 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀅𑀲𑁆𑀲𑀼 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀓𑁆𑀔𑀺𑀓𑀽𑀧𑀓𑁂𑀲𑀼 𑀞𑀺𑀢’’𑀦𑁆𑀢𑀺, 𑀦𑀧𑀺 𑀅𑀓𑁆𑀔𑀺𑀓𑀽𑀧𑀓𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀲𑀼 𑀅𑀲𑁆𑀲𑀼 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 ¶ 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀅𑀲𑁆𑀲𑀼 𑀅𑀲𑁆𑀲𑀼𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀅𑀲𑁆𑀲𑀼𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀯𑀺𑀮𑀻𑀦𑀲𑀺𑀦𑁂𑀳𑀲𑀗𑁆𑀔𑀸𑀢𑀸 𑀯𑀲𑀸 𑀯𑀡𑁆𑀡𑀢𑁄 𑀆𑀘𑀸𑀫𑁂 𑀆𑀲𑀺𑀢𑁆𑀢𑀢𑁂𑀮𑀯𑀡𑁆𑀡𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸. 𑀑𑀓𑀸𑀲𑀢𑁄 𑀳𑀢𑁆𑀣𑀢𑀮𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀢𑀮𑀧𑀸𑀤𑀧𑀺𑀝𑁆𑀞𑀺𑀦𑀸𑀲𑀸𑀧𑀼𑀝𑀦𑀮𑀸𑀝𑀅𑀁𑀲𑀓𑀽𑀝𑁂𑀲𑀼 𑀞𑀺𑀢𑀸𑀢𑀺. 𑀦 𑀘𑁂𑀲𑀸 𑀏𑀢𑁂𑀲𑀼 𑀑𑀓𑀸𑀲𑁂𑀲𑀼 𑀲𑀤𑀸 𑀯𑀺𑀮𑀻𑀦𑀸 𑀏𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀓𑀺𑀦𑁆𑀢𑀼 𑀬𑀤𑀸 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑀽𑀭𑀺𑀬𑀲𑀦𑁆𑀢𑀸𑀧𑀉𑀢𑀼𑀯𑀺𑀲𑀪𑀸𑀕𑀥𑀸𑀢𑀼𑀯𑀺𑀲𑀪𑀸𑀕𑁂𑀳𑀺 𑀢𑁂 𑀧𑀤𑁂𑀲𑀸 𑀉𑀲𑁆𑀫𑀸𑀚𑀸𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑀢𑁆𑀣 𑀯𑀺𑀮𑀻𑀦𑀸𑀯 𑀳𑀼𑀢𑁆𑀯𑀸 𑀧𑀲𑀦𑁆𑀦𑀲𑀮𑀺𑀮𑀸𑀲𑀼 𑀉𑀤𑀓𑀲𑁄𑀡𑁆𑀟𑀺𑀓𑀸𑀲𑀼 𑀦𑀻𑀳𑀸𑀭𑁄 𑀯𑀺𑀬 𑀲𑀭𑀢𑀺.

𑀢𑀢𑁆𑀣 ¶ 𑀬𑀣𑀸 𑀉𑀤𑀓𑀲𑁄𑀡𑁆𑀟𑀺𑀬𑁄 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 ¶ 𑀞𑀺𑀢𑁄 𑀦𑀻𑀳𑀸𑀭𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀉𑀤𑀓𑀲𑁄𑀡𑁆𑀟𑀺𑀬𑁄 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁄’’𑀢𑀺, 𑀦𑀧𑀺 𑀉𑀤𑀓𑀲𑁄𑀡𑁆𑀟𑀺𑀬𑁄 𑀚𑀸𑀦𑀦𑁆𑀢𑀺 ‘‘𑀦𑀻𑀳𑀸𑀭𑁄 𑀅𑀫𑁆𑀳𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁄’’𑀢𑀺; 𑀏𑀯𑀫𑁂𑀯 𑀦 𑀯𑀲𑀸 𑀚𑀸𑀦𑀸𑀢𑀺 ‘‘𑀅𑀳𑀁 𑀳𑀢𑁆𑀣𑀢𑀮𑀸𑀤𑀻𑀦𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸’’𑀢𑀺, 𑀦𑀧𑀺 𑀳𑀢𑁆𑀣𑀢𑀮𑀸𑀤𑀻𑀦𑀺 𑀚𑀸𑀦𑀦𑁆𑀢𑀺 ‘‘𑀯𑀲𑀸 𑀅𑀫𑁆𑀳𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀯𑀲𑀸 𑀯𑀲𑀸𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀺𑀲𑁆𑀲𑀸 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀯𑀲𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀲𑀭𑀻𑀭𑁂 𑀫𑀼𑀔𑀲𑁆𑀲𑀩𑁆𑀪𑀦𑁆𑀢𑀭𑁂 𑀔𑁂𑀴𑁄 𑀯𑀡𑁆𑀡𑀢𑁄 𑀲𑁂𑀢𑁄 𑀨𑁂𑀡𑀯𑀡𑁆𑀡𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑁄𑀢𑀺, 𑀲𑀫𑀼𑀤𑁆𑀤𑀨𑁂𑀡𑀲𑀡𑁆𑀞𑀸𑀦𑁄𑀢𑀺𑀧𑀺 𑀏𑀓𑁂. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑁄. 𑀑𑀓𑀸𑀲𑀢𑁄 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀬 𑀞𑀺𑀢𑁄𑀢𑀺. 𑀦 𑀘𑁂𑀲𑁄 𑀏𑀢𑁆𑀣 𑀲𑀤𑀸 𑀲𑀦𑁆𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀓𑀺𑀦𑁆𑀢𑀼 𑀬𑀤𑀸 𑀲𑀢𑁆𑀢𑀸 𑀢𑀣𑀸𑀭𑀽𑀧𑀁 𑀆𑀳𑀸𑀭𑀁 𑀧𑀲𑁆𑀲𑀦𑁆𑀢𑀺 𑀯𑀸 𑀲𑀭𑀦𑁆𑀢𑀺 𑀯𑀸, 𑀉𑀡𑁆𑀳𑀢𑀺𑀢𑁆𑀢𑀓𑀝𑀼𑀓𑀮𑁄𑀡𑀫𑁆𑀩𑀺𑀮𑀸𑀦𑀁 𑀯𑀸 𑀓𑀺𑀜𑁆𑀘𑀺 𑀫𑀼𑀔𑁂 𑀞𑀧𑁂𑀦𑁆𑀢𑀺. 𑀬𑀤𑀸 𑀘 𑀢𑁂𑀲𑀁 𑀳𑀤𑀬𑀁 𑀆𑀕𑀺𑀮𑀸𑀬𑀢𑀺, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀸 𑀚𑀺𑀕𑀼𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀔𑁂𑀴𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀡𑁆𑀞𑀸𑀢𑀺. 𑀅𑀕𑁆𑀕𑀚𑀺𑀯𑁆𑀳𑀸𑀬 𑀘𑁂𑀲 𑀔𑁂𑀴𑁄 𑀢𑀦𑀼𑀓𑁄 𑀳𑁄𑀢𑀺, 𑀫𑀽𑀮𑀚𑀺𑀯𑁆𑀳𑀸𑀬 𑀩𑀳𑀮𑁄, 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀜𑁆𑀘 𑀧𑀼𑀣𑀼𑀓𑀁 𑀯𑀸 𑀢𑀡𑁆𑀟𑀼𑀮𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀦𑀤𑀺𑀧𑀼𑀮𑀺𑀦𑁂 𑀔𑀢𑀓𑀽𑀧𑀲𑀮𑀺𑀮𑀫𑀺𑀯 𑀧𑀭𑀺𑀓𑁆𑀔𑀬𑀫𑀕𑀘𑁆𑀙𑀦𑁆𑀢𑁄𑀯 𑀲𑀤𑀸 𑀢𑁂𑀫𑀦𑀲𑀫𑀢𑁆𑀣𑁄 𑀳𑁄𑀢𑀺.

𑀢𑀢𑁆𑀣 𑀬𑀣𑀸 𑀦𑀤𑀺𑀧𑀼𑀮𑀺𑀦𑁂 𑀔𑀢𑀓𑀽𑀧𑀢𑀮𑁂 𑀲𑀡𑁆𑀞𑀺𑀢𑀁 𑀉𑀤𑀓𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀓𑀽𑀧𑀢𑀮𑁂 𑀲𑀡𑁆𑀞𑀺𑀢’’𑀦𑁆𑀢𑀺 ¶ , 𑀦𑀧𑀺 𑀓𑀽𑀧𑀢𑀮𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀉𑀤𑀓𑀁 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀔𑁂𑀴𑁄 𑀚𑀸𑀦𑀸𑀢𑀺 ‘‘𑀅𑀳𑀁 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀚𑀺𑀯𑁆𑀳𑀸𑀢𑀮𑁂 𑀲𑀡𑁆𑀞𑀺𑀢𑁄’’𑀢𑀺, 𑀦𑀧𑀺 𑀚𑀺𑀯𑁆𑀳𑀸𑀢𑀮𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀉𑀪𑁄𑀳𑀺 𑀓𑀧𑁄𑀮𑀧𑀲𑁆𑀲𑁂𑀳𑀺 𑀑𑀭𑁄𑀳𑀺𑀢𑁆𑀯𑀸 𑀔𑁂𑀴𑁄 𑀲𑀡𑁆𑀞𑀺𑀢𑁄’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀔𑁂𑀴𑁄 𑀔𑁂𑀴𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀔𑁂𑀴𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 ¶ ¶ 𑀧𑀭𑀁 𑀲𑀭𑀻𑀭𑁂 𑀲𑀺𑀗𑁆𑀖𑀸𑀡𑀺𑀓𑀸 𑀯𑀡𑁆𑀡𑀢𑁄 𑀲𑁂𑀢𑀸 𑀢𑀭𑀼𑀡𑀢𑀸𑀮𑀫𑀺𑀜𑁆𑀚𑀯𑀡𑁆𑀡𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀸, 𑀲𑁂𑀤𑁂𑀢𑁆𑀯𑀸 𑀲𑁂𑀤𑁂𑀢𑁆𑀯𑀸 𑀦𑀸𑀲𑀸𑀧𑀼𑀝𑁂 𑀦𑀺𑀭𑀦𑁆𑀢𑀭𑀁 𑀧𑀓𑁆𑀔𑀺𑀢𑁆𑀢𑀯𑁂𑀢𑁆𑀢𑀗𑁆𑀓𑀼𑀭𑀲𑀡𑁆𑀞𑀸𑀦𑀸𑀢𑀺𑀧𑀺 𑀏𑀓𑁂. 𑀤𑀺𑀲𑀢𑁄 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀸. 𑀑𑀓𑀸𑀲𑀢𑁄 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸𑀢𑀺. 𑀦 𑀘𑁂𑀲𑀸 𑀏𑀢𑁆𑀣 𑀲𑀤𑀸 𑀲𑀦𑁆𑀦𑀺𑀘𑀺𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀓𑀺𑀦𑁆𑀢𑀼 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀤𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀳𑁂𑀝𑁆𑀞𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑀁 𑀓𑀡𑁆𑀝𑀓𑁂𑀦 𑀯𑀺𑀚𑁆𑀛𑁂𑀬𑁆𑀬, 𑀅𑀣 𑀢𑁂𑀦 𑀙𑀺𑀤𑁆𑀤𑁂𑀦 𑀤𑀥𑀺𑀧𑀺𑀡𑁆𑀟𑀁 𑀕𑀴𑀺𑀢𑁆𑀯𑀸 𑀩𑀳𑀺 𑀧𑀧𑀢𑁂𑀬𑁆𑀬; 𑀏𑀯𑀫𑁂𑀯 𑀬𑀤𑀸 𑀲𑀢𑁆𑀢𑀸 𑀭𑁄𑀤𑀦𑁆𑀢𑀺, 𑀯𑀺𑀲𑀪𑀸𑀕𑀸𑀳𑀸𑀭𑀉𑀢𑀼𑀯𑀲𑁂𑀦 𑀯𑀸 𑀲𑀜𑁆𑀚𑀸𑀢𑀥𑀸𑀢𑀼𑀓𑁆𑀔𑁄𑀪𑀸 𑀳𑁄𑀦𑁆𑀢𑀺, 𑀢𑀤𑀸 𑀅𑀦𑁆𑀢𑁄𑀲𑀻𑀲𑀢𑁄 𑀧𑀽𑀢𑀺𑀲𑁂𑀫𑁆𑀳𑀪𑀸𑀯𑀁 𑀆𑀧𑀦𑁆𑀦𑀁 𑀫𑀢𑁆𑀣𑀮𑀼𑀗𑁆𑀕𑀁 𑀕𑀴𑀺𑀢𑁆𑀯𑀸 𑀢𑀸𑀮𑀼𑀫𑀢𑁆𑀣𑀓𑀯𑀺𑀯𑀭𑁂𑀦 𑀑𑀢𑀭𑀺𑀢𑁆𑀯𑀸 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀢𑀢𑁆𑀣 𑀬𑀣𑀸 𑀲𑀺𑀧𑁆𑀧𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑀁 𑀧𑀽𑀢𑀺𑀤𑀥𑀺 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀲𑀺𑀧𑁆𑀧𑀺𑀓𑀸𑀬 𑀞𑀺𑀢’’𑀦𑁆𑀢𑀺, 𑀦𑀧𑀺 𑀲𑀺𑀧𑁆𑀧𑀺𑀓𑀸 𑀚𑀸𑀦𑀸𑀢𑀺 ‘‘𑀫𑀬𑀺 𑀧𑀽𑀢𑀺𑀓𑀁 𑀤𑀥𑀺 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀲𑀺𑀗𑁆𑀖𑀸𑀡𑀺𑀓𑀸 𑀚𑀸𑀦𑀸𑀢𑀺 ‘‘𑀅𑀳𑀁 𑀦𑀸𑀲𑀸𑀧𑀼𑀝𑁂𑀲𑀼 𑀞𑀺𑀢𑀸’’𑀢𑀺, 𑀦𑀧𑀺 𑀦𑀸𑀲𑀸𑀧𑀼𑀝𑀸 𑀚𑀸𑀦𑀦𑁆𑀢𑀺 ‘‘𑀅𑀫𑁆𑀳𑁂𑀲𑀼 𑀲𑀺𑀗𑁆𑀖𑀸𑀡𑀺𑀓𑀸 𑀞𑀺𑀢𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀲𑀺𑀗𑁆𑀖𑀸𑀡𑀺𑀓𑀸 𑀲𑀺𑀗𑁆𑀖𑀸𑀡𑀺𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀺𑀲𑁆𑀲𑀸 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀲𑀺𑀗𑁆𑀖𑀸𑀡𑀺𑀓𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀮𑀲𑀺𑀓𑀸𑀢𑀺 𑀲𑀭𑀻𑀭𑀲𑀦𑁆𑀥𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀧𑀺𑀘𑁆𑀙𑀺𑀮𑀓𑀼𑀡𑀧𑀁. 𑀲𑀸 𑀯𑀡𑁆𑀡𑀢𑁄 𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑀯𑀡𑁆𑀡𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀑𑀓𑀸𑀲𑀲𑀡𑁆𑀞𑀸𑀦𑀸. 𑀤𑀺𑀲𑀢𑁄 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀚𑀸𑀢𑀸. 𑀑𑀓𑀸𑀲𑀢𑁄 𑀅𑀝𑁆𑀞𑀺𑀲𑀦𑁆𑀥𑀻𑀦𑀁 𑀅𑀩𑁆𑀪𑀜𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀲𑀻𑀢𑀺𑀲𑀢𑀲𑀦𑁆𑀥𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀸𑀢𑀺. 𑀬𑀲𑁆𑀲 𑀘𑁂𑀲𑀸 𑀫𑀦𑁆𑀤𑀸 𑀳𑁄𑀢𑀺, 𑀢𑀲𑁆𑀲 𑀉𑀝𑁆𑀞𑀳𑀦𑁆𑀢𑀲𑁆𑀲 𑀦𑀺𑀲𑀻𑀤𑀦𑁆𑀢𑀲𑁆𑀲 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀲𑀫𑀺𑀜𑁆𑀚𑀦𑁆𑀢𑀲𑁆𑀲 𑀧𑀲𑀸𑀭𑁂𑀦𑁆𑀢𑀲𑁆𑀲 𑀅𑀝𑁆𑀞𑀺𑀓𑀸𑀦𑀺 𑀓𑀝𑀓𑀝𑀸𑀬𑀦𑁆𑀢𑀺, 𑀅𑀘𑁆𑀙𑀭𑀺𑀓𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀯𑀺𑀘𑀭𑀢𑀺 ¶ , 𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀲𑁆𑀲 𑀯𑀸𑀬𑁄𑀥𑀸𑀢𑀼 𑀓𑀼𑀧𑁆𑀧𑀢𑀺, 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀦𑁆𑀢𑀺 ¶ 𑀬𑀲𑁆𑀲 𑀧𑀦 𑀘𑁂𑀲𑀸 𑀩𑀳𑀼𑀓𑀸 𑀳𑁄𑀢𑀺, 𑀢𑀲𑁆𑀲 𑀉𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀦 𑀅𑀝𑁆𑀞𑀻𑀦𑀺 𑀓𑀝𑀓𑀝𑀸𑀬𑀦𑁆𑀢𑀺, 𑀤𑀻𑀖𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀲𑁆𑀲 𑀦 𑀯𑀸𑀬𑁄𑀥𑀸𑀢𑀼 𑀓𑀼𑀧𑁆𑀧𑀢𑀺, 𑀦 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀦𑁆𑀢𑀺.

𑀢𑀢𑁆𑀣 ¶ 𑀬𑀣𑀸 𑀅𑀩𑁆𑀪𑀜𑁆𑀚𑀦𑀢𑁂𑀮𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺, 𑀦𑀧𑀺 𑀅𑀓𑁆𑀔𑁄 𑀚𑀸𑀦𑀸𑀢𑀺 ‘‘𑀫𑀁 𑀢𑁂𑀮𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺; 𑀏𑀯𑀫𑁂𑀯 𑀦 𑀮𑀲𑀺𑀓𑀸 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀲𑀻𑀢𑀺𑀲𑀢𑀲𑀦𑁆𑀥𑀺𑀬𑁄 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀸’’𑀢𑀺, 𑀦𑀧𑀺 𑀅𑀲𑀻𑀢𑀺𑀲𑀢𑀲𑀦𑁆𑀥𑀺𑀬𑁄 𑀚𑀸𑀦𑀦𑁆𑀢𑀺 ‘‘𑀮𑀲𑀺𑀓𑀸 𑀅𑀫𑁆𑀳𑁂 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀞𑀺𑀢𑀸’’𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀮𑀲𑀺𑀓𑀸 𑀮𑀲𑀺𑀓𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀺𑀲𑁆𑀲𑀸 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀮𑀲𑀺𑀓𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀢𑁄 𑀧𑀭𑀁 𑀅𑀦𑁆𑀢𑁄𑀲𑀭𑀻𑀭𑁂 𑀫𑀼𑀢𑁆𑀢𑀁 𑀯𑀡𑁆𑀡𑀢𑁄 𑀫𑀸𑀲𑀔𑀸𑀭𑁄𑀤𑀓𑀯𑀡𑁆𑀡𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀲𑀡𑁆𑀞𑀸𑀦𑀢𑁄 𑀉𑀤𑀓𑀁 𑀧𑀽𑀭𑁂𑀢𑁆𑀯𑀸 𑀅𑀥𑁄𑀫𑀼𑀔𑀞𑀧𑀺𑀢𑀉𑀤𑀓𑀓𑀼𑀫𑁆𑀪𑀅𑀦𑁆𑀢𑀭𑀕𑀢𑀉𑀤𑀓𑀲𑀡𑁆𑀞𑀸𑀦𑀁. 𑀤𑀺𑀲𑀢𑁄 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀚𑀸𑀢𑀁. 𑀑𑀓𑀸𑀲𑀢𑁄 𑀯𑀢𑁆𑀣𑀺𑀲𑁆𑀲𑀩𑁆𑀪𑀦𑁆𑀢𑀭𑁂 𑀞𑀺𑀢𑀦𑁆𑀢𑀺. 𑀯𑀢𑁆𑀣𑀺 𑀦𑀸𑀫 𑀯𑀢𑁆𑀣𑀺𑀧𑀼𑀝𑁄 𑀯𑀼𑀘𑁆𑀘𑀢𑀺, 𑀬𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀘𑀦𑁆𑀤𑀦𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑁂 𑀅𑀫𑀼𑀔𑁂 𑀧𑁂𑀴𑀸𑀖𑀝𑁂 𑀘𑀦𑁆𑀤𑀦𑀺𑀓𑀸𑀭𑀲𑁄 𑀧𑀯𑀺𑀲𑀢𑀺, 𑀦 𑀘𑀲𑁆𑀲 𑀧𑀯𑀺𑀲𑀦𑀫𑀕𑁆𑀕𑁄 𑀧𑀜𑁆𑀜𑀸𑀬𑀢𑀺; 𑀏𑀯𑀫𑁂𑀯 𑀲𑀭𑀻𑀭𑀢𑁄 𑀫𑀼𑀢𑁆𑀢𑀁 𑀧𑀯𑀺𑀲𑀢𑀺, 𑀦 𑀘𑀲𑁆𑀲 𑀧𑀯𑀺𑀲𑀦𑀫𑀕𑁆𑀕𑁄 𑀧𑀜𑁆𑀜𑀸𑀬𑀢𑀺 𑀦𑀺𑀓𑁆𑀔𑀫𑀦𑀫𑀕𑁆𑀕𑁄 𑀏𑀯 𑀢𑀼 𑀧𑀸𑀓𑀝𑁄 𑀳𑁄𑀢𑀺, 𑀬𑀫𑁆𑀳𑀺 𑀘 𑀫𑀼𑀢𑁆𑀢𑀲𑁆𑀲 𑀪𑀭𑀺𑀢𑁂 ‘‘𑀧𑀲𑁆𑀲𑀸𑀯𑀁 𑀓𑀭𑁄𑀫𑀸’’𑀢𑀺 𑀲𑀢𑁆𑀢𑀸𑀦𑀁 𑀆𑀬𑀽𑀳𑀦𑀁 𑀳𑁄𑀢𑀺. 𑀢𑀢𑁆𑀣 𑀬𑀣𑀸 𑀘𑀦𑁆𑀤𑀦𑀺𑀓𑀸𑀬 𑀧𑀓𑁆𑀔𑀺𑀢𑁆𑀢𑁂 𑀅𑀫𑀼𑀔𑁂 𑀧𑁂𑀴𑀸𑀖𑀝𑁂 𑀞𑀺𑀢𑁄 𑀘𑀦𑁆𑀤𑀦𑀺𑀓𑀸𑀭𑀲𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀅𑀫𑀼𑀔𑁂 𑀧𑁂𑀴𑀸𑀖𑀝𑁂 𑀞𑀺𑀢𑁄’’𑀢𑀺, 𑀦𑀧𑀺 𑀧𑁂𑀴𑀸𑀖𑀝𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀘𑀦𑁆𑀤𑀦𑀺𑀓𑀸𑀭𑀲𑁄 𑀞𑀺𑀢𑁄’’𑀢𑀺; 𑀏𑀯𑀫𑁂𑀯 𑀫𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀯𑀢𑁆𑀣𑀺𑀫𑁆𑀳𑀺 𑀞𑀺𑀢’’𑀦𑁆𑀢𑀺, 𑀦𑀧𑀺 𑀯𑀢𑁆𑀣𑀺 𑀚𑀸𑀦𑀸𑀢𑀺 ‘‘𑀫𑀬𑀺 𑀫𑀼𑀢𑁆𑀢𑀁 𑀞𑀺𑀢’’𑀦𑁆𑀢𑀺. 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀭𑀳𑀺𑀢𑀸 𑀳𑀺 𑀏𑀢𑁂 𑀥𑀫𑁆𑀫𑀸…𑀧𑁂… 𑀦 𑀧𑀼𑀕𑁆𑀕𑀮𑁄𑀢𑀺. 𑀧𑀭𑀺𑀘𑁆𑀙𑁂𑀤𑀢𑁄 𑀯𑀢𑁆𑀣𑀺𑀅𑀩𑁆𑀪𑀦𑁆𑀢𑀭𑁂𑀦 𑀘𑁂𑀯 𑀫𑀼𑀢𑁆𑀢𑀪𑀸𑀕𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀅𑀬𑀫𑁂𑀢𑀲𑁆𑀲 ¶ 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄, 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑁂𑀲𑀲𑀤𑀺𑀲𑁄 𑀏𑀯𑀸𑀢𑀺 𑀏𑀯𑀁 𑀫𑀼𑀢𑁆𑀢𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀏𑀯𑀫𑀬𑀁 𑀇𑀫𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀯𑀡𑁆𑀡𑀸𑀤𑀺𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀢𑀲𑁆𑀲𑁂𑀯𑀁 𑀇𑀫𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀯𑀡𑁆𑀡𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀧𑁂𑀦𑁆𑀢𑀲𑁆𑀲 𑀢𑀁 𑀢𑀁 𑀪𑀸𑀯𑀦𑀸𑀦𑀼𑀬𑁄𑀕𑀁 𑀆𑀕𑀫𑁆𑀫 𑀓𑁂𑀲𑀸𑀤𑀬𑁄 𑀧𑀕𑀼𑀡𑀸 𑀳𑁄𑀦𑁆𑀢𑀺, 𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀯𑀡𑁆𑀡𑀸𑀦𑀁 𑀧𑀼𑀧𑁆𑀨𑀸𑀦𑀁 𑀏𑀓𑀲𑀼𑀢𑁆𑀢𑀕𑀦𑁆𑀣𑀺𑀢𑀁 𑀫𑀸𑀮𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀧𑀼𑀩𑁆𑀩𑀸𑀧𑀭𑀺𑀬𑀫𑀺𑀯 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺; 𑀏𑀯𑀫𑁂𑀯 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 ¶ 𑀓𑁂𑀲𑀸’’𑀢𑀺 𑀇𑀫𑀁 𑀓𑀸𑀬𑀁 𑀲𑀢𑀺𑀬𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀧𑀼𑀩𑁆𑀩𑀸𑀧𑀭𑀺𑀬𑀫𑀺𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀓𑁂𑀲𑁂𑀲𑀼 𑀆𑀯𑀚𑁆𑀚𑀺𑀢𑁂𑀲𑀼 ¶ 𑀅𑀲𑀡𑁆𑀞𑀳𑀫𑀸𑀦𑀸𑀯 𑀲𑀢𑀺 𑀬𑀸𑀯 𑀫𑀼𑀢𑁆𑀢𑀁, 𑀢𑀸𑀯 𑀧𑀯𑀢𑁆𑀢𑀢𑀺. 𑀢𑀢𑁄 𑀧𑀪𑀼𑀢𑀺 𑀢𑀲𑁆𑀲 𑀆𑀳𑀺𑀡𑁆𑀟𑀦𑁆𑀢𑀸 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀬𑁄 𑀘 𑀲𑀢𑁆𑀢𑀸𑀓𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀓𑁄𑀝𑁆𑀞𑀸𑀲𑀭𑀸𑀲𑀺𑀯𑀲𑁂𑀦𑁂𑀯 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀳𑀺 𑀘 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑀁 𑀧𑀸𑀦𑀪𑁄𑀚𑀦𑀸𑀤𑀺 𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀧𑀓𑁆𑀔𑀺𑀧𑁆𑀧𑀫𑀸𑀦𑀫𑀺𑀯 𑀉𑀧𑀝𑁆𑀞𑀸𑀢𑀻𑀢𑀺.

𑀏𑀢𑁆𑀣𑀸𑀳 ‘‘𑀅𑀣𑀸𑀦𑁂𑀦 𑀢𑀢𑁄 𑀧𑀭𑀁 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀺𑀢𑀩𑁆𑀩𑀁 𑀪𑀸𑀯𑁂𑀢𑀩𑁆𑀩𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀓𑀣𑀁 𑀧𑀦𑀸𑀬𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀻𑀢𑀺? 𑀅𑀬𑀜𑁆𑀳𑀺 𑀢𑀁 𑀓𑁂𑀲𑀸𑀤𑀻𑀦𑀁 𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀢𑀺, 𑀲𑀢𑀺𑀬𑀸 𑀅𑀮𑁆𑀮𑀺𑀬𑀢𑀺 𑀪𑀚𑀢𑀺 𑀉𑀧𑀕𑀘𑁆𑀙𑀢𑀺, 𑀲𑀢𑀺𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑀺. 𑀢𑀢𑁆𑀣 𑀮𑀤𑁆𑀥𑀁 𑀯𑀸 𑀲𑀢𑀺𑀁 𑀯𑀟𑁆𑀠𑁂𑀦𑁆𑀢𑁄 𑀢𑀁 𑀪𑀸𑀯𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀩𑁆𑀪𑀸𑀳𑀢𑀁 𑀓𑀭𑁄𑀢𑀺. 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀻𑀢𑀺 𑀬𑀣𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀺𑀢𑀁 𑀳𑁄𑀢𑀺, 𑀦 𑀧𑀼𑀦 𑀅𑀦𑁆𑀢𑀭𑀥𑀸𑀦𑀁 𑀕𑀘𑁆𑀙𑀢𑀺, 𑀢𑀣𑀸 𑀢𑀁 𑀲𑀢𑀺𑀬𑀸 𑀯𑀯𑀢𑁆𑀣𑀧𑁂𑀢𑀺, 𑀉𑀧𑀥𑀸𑀭𑁂𑀢𑀺 𑀉𑀧𑀦𑀺𑀩𑀦𑁆𑀥𑀢𑀺.

𑀅𑀣 𑀯𑀸 𑀬𑀁 ¶ 𑀧𑀼𑀩𑁆𑀩𑁂 𑀅𑀦𑀼𑀧𑀼𑀩𑁆𑀩𑀢𑁄, 𑀦𑀸𑀢𑀺𑀲𑀻𑀖𑀢𑁄, 𑀦𑀸𑀢𑀺𑀲𑀡𑀺𑀓𑀢𑁄, 𑀯𑀺𑀓𑁆𑀔𑁂𑀧𑀧𑁆𑀧𑀳𑀸𑀦𑀢𑁄, 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄, 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄, 𑀮𑀓𑁆𑀔𑀡𑀢𑁄, 𑀢𑀬𑁄 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀏𑀯𑀁 𑀤𑀲𑀯𑀺𑀥𑀁 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀆𑀲𑁂𑀯𑀢𑀺, 𑀦𑀸𑀢𑀺𑀲𑀻𑀖𑀢𑁄 𑀦𑀸𑀢𑀺𑀲𑀡𑀺𑀓𑀢𑁄 𑀘 𑀫𑀦𑀲𑀺𑀓𑀭𑁄𑀦𑁆𑀢𑁄 𑀪𑀸𑀯𑁂𑀢𑀺, 𑀯𑀺𑀓𑁆𑀔𑁂𑀧𑀧𑁆𑀧𑀳𑀸𑀦𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀩𑀳𑀼𑀮𑀻 𑀓𑀭𑁄𑀢𑀺, 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣𑀸𑀳 ‘‘𑀓𑀣𑀁 𑀧𑀦𑀸𑀬𑀁 𑀅𑀦𑀼𑀧𑀼𑀩𑁆𑀩𑀸𑀤𑀺𑀯𑀲𑁂𑀦 𑀏𑀢𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀻’’𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀬𑀜𑁆𑀳𑀺 𑀓𑁂𑀲𑁂 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀮𑁄𑀫𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀦𑀔𑁂. 𑀢𑀣𑀸 𑀮𑁄𑀫𑁂 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀦𑀔𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀤𑀦𑁆𑀢𑁂. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀲𑁆𑀫𑀸? 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀓𑀼𑀲𑀮𑁄 𑀧𑀼𑀭𑀺𑀲𑁄 𑀤𑁆𑀯𑀢𑁆𑀢𑀺𑀁𑀲𑀧𑀤𑀁 𑀦𑀺𑀲𑁆𑀲𑁂𑀡𑀺𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀆𑀭𑁄𑀳𑀦𑁆𑀢𑁄 𑀓𑀺𑀮𑀦𑁆𑀢𑀓𑀸𑀬𑁄 𑀢𑀢𑁄 𑀦𑀺𑀲𑁆𑀲𑁂𑀡𑀺𑀢𑁄 ¶ 𑀧𑀧𑀢𑀢𑀺, 𑀦 𑀆𑀭𑁄𑀳𑀦𑀁 𑀲𑀫𑁆𑀧𑀸𑀤𑁂𑀢𑀺; 𑀏𑀯𑀫𑁂𑀯 𑀪𑀸𑀯𑀦𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀲𑁆𑀲𑀸𑀤𑀲𑁆𑀲 𑀅𑀦𑀥𑀺𑀕𑀫𑀦𑀢𑁄 𑀓𑀺𑀮𑀦𑁆𑀢𑀘𑀺𑀢𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀪𑀸𑀯𑀦𑀸𑀢𑁄 𑀧𑀧𑀢𑀢𑀺, 𑀦 𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀻𑀢𑀺.

𑀅𑀦𑀼𑀧𑀼𑀩𑁆𑀩𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄𑀧𑀺 𑀘 𑀓𑁂𑀲𑀸 𑀮𑁄𑀫𑀸𑀢𑀺 𑀦𑀸𑀢𑀺𑀲𑀻𑀖𑀢𑁄𑀧𑀺 𑀫𑀦𑀲𑀺 𑀓𑀭𑁄𑀢𑀺. 𑀅𑀢𑀺𑀲𑀻𑀖𑀢𑁄 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀤𑁆𑀥𑀸𑀦𑀁 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀲𑀫𑀯𑀺𑀲𑀫𑀭𑀼𑀓𑁆𑀔𑀣𑀮𑀦𑀺𑀦𑁆𑀦𑀤𑁆𑀯𑁂𑀥𑀸𑀧𑀣𑀸𑀤𑀻𑀦𑀺 𑀫𑀕𑁆𑀕𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀢𑁄 𑀦 𑀫𑀕𑁆𑀕𑀓𑀼𑀲𑀮𑁄 𑀳𑁄𑀢𑀺, 𑀅𑀤𑁆𑀥𑀸𑀦𑀜𑁆𑀘 𑀧𑀭𑀺𑀓𑁆𑀔𑀬𑀁 𑀦𑁂𑀢𑀺; 𑀏𑀯𑀫𑁂𑀯 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀦𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀦𑀺𑀫𑀺𑀢𑁆𑀢𑀸𑀦𑀺 ¶ 𑀉𑀧𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀢𑁄 𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀓𑀼𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀧𑀭𑀺𑀓𑁆𑀔𑀬𑀁 𑀦𑁂𑀢𑀺.

𑀬𑀣𑀸 𑀘 𑀦𑀸𑀢𑀺𑀲𑀻𑀖𑀢𑁄, 𑀏𑀯𑀁 𑀦𑀸𑀢𑀺𑀲𑀡𑀺𑀓𑀢𑁄𑀧𑀺 𑀫𑀦𑀲𑀺 𑀓𑀭𑁄𑀢𑀺. 𑀅𑀢𑀺𑀲𑀡𑀺𑀓𑀢𑁄 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀼𑀓𑁆𑀔𑀧𑀩𑁆𑀩𑀢𑀢𑀴𑀸𑀓𑀸𑀤𑀻𑀲𑀼 𑀯𑀺𑀮𑀫𑁆𑀩𑀫𑀸𑀦𑁄 𑀇𑀘𑁆𑀙𑀺𑀢𑀧𑁆𑀧𑀤𑁂𑀲𑀁 𑀅𑀧𑀸𑀧𑀼𑀡𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺; 𑀏𑀯𑀫𑁂𑀯 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀪𑀸𑀯𑀦𑀸𑀲𑀫𑁆𑀧𑀤𑀁 𑀅𑀧𑀸𑀧𑀼𑀡𑀦𑁆𑀢𑁄 ¶ 𑀪𑀸𑀯𑀦𑀸𑀯𑀺𑀘𑁆𑀙𑁂𑀤𑁂𑀦 𑀅𑀦𑁆𑀢𑀭𑀸𑀬𑁂𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺.

𑀦𑀸𑀢𑀺𑀲𑀡𑀺𑀓𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄𑀧𑀺 𑀘 𑀯𑀺𑀓𑁆𑀔𑁂𑀧𑀧𑁆𑀧𑀳𑀸𑀦𑀢𑁄𑀧𑀺 𑀫𑀦𑀲𑀺 𑀓𑀭𑁄𑀢𑀺. 𑀯𑀺𑀓𑁆𑀔𑁂𑀧𑀧𑁆𑀧𑀳𑀸𑀦𑀢𑁄 𑀦𑀸𑀫 𑀬𑀣𑀸 𑀅𑀜𑁆𑀜𑁂𑀲𑀼 𑀦𑀯𑀓𑀫𑁆𑀫𑀸𑀤𑀻𑀲𑀼 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑀺𑀧𑀢𑀺, 𑀢𑀣𑀸 𑀫𑀦𑀲𑀺 𑀓𑀭𑁄𑀢𑀺. 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀫𑀸𑀦𑀘𑀺𑀢𑁆𑀢𑁄 𑀳𑀺 𑀓𑁂𑀲𑀸𑀤𑀻𑀲𑁆𑀯𑁂𑀯 𑀅𑀲𑀫𑀸𑀳𑀺𑀢𑀘𑁂𑀢𑁄𑀯𑀺𑀢𑀓𑁆𑀓𑁄 𑀪𑀸𑀯𑀦𑀸𑀲𑀫𑁆𑀧𑀤𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑀭𑀸𑀯 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺 𑀢𑀓𑁆𑀓𑀲𑀺𑀮𑀸𑀕𑀫𑀦𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀯𑀺𑀬. 𑀅𑀯𑀺𑀓𑁆𑀔𑀺𑀧𑀫𑀸𑀦𑀘𑀺𑀢𑁆𑀢𑁄 𑀧𑀦 𑀓𑁂𑀲𑀸𑀤𑀻𑀲𑁆𑀯𑁂𑀯 𑀲𑀫𑀸𑀳𑀺𑀢𑀘𑁂𑀢𑁄𑀯𑀺𑀢𑀓𑁆𑀓𑁄 𑀪𑀸𑀯𑀦𑀸𑀲𑀫𑁆𑀧𑀤𑀁 𑀧𑀸𑀧𑀼𑀡𑀸𑀢𑀺 𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀢𑀓𑁆𑀓𑀲𑀺𑀮𑀭𑀚𑁆𑀚𑀲𑀫𑁆𑀧𑀤𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀯𑀺𑀓𑁆𑀔𑁂𑀧𑀧𑁆𑀧𑀳𑀸𑀦𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀓𑀸𑀭𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑀢𑁂 𑀥𑀫𑁆𑀫𑀸 𑀅𑀲𑀼𑀪𑀢𑁄 𑀯𑀸 𑀯𑀡𑁆𑀡𑀢𑁄 𑀯𑀸 𑀲𑀼𑀜𑁆𑀜𑀢𑁄 𑀯𑀸 𑀉𑀧𑀝𑁆𑀞𑀳𑀦𑁆𑀢𑀺.

𑀅𑀣 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄 𑀢𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺. 𑀧𑀡𑁆𑀡𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀢𑁄𑀢𑀺 𑀓𑁂𑀲𑀸 𑀮𑁄𑀫𑀸𑀢𑀺 𑀏𑀯𑀫𑀸𑀤𑀺𑀯𑁄𑀳𑀸𑀭𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀬𑀣𑀽𑀧𑀝𑁆𑀞𑀺𑀢𑀸𑀦𑀁 𑀅𑀲𑀼𑀪𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀺. 𑀓𑀣𑀁 ¶ ? 𑀬𑀣𑀸 𑀅𑀭𑀜𑁆𑀜𑀦𑀺𑀯𑀸𑀲𑀽𑀧𑀕𑀢𑀸 𑀫𑀦𑀼𑀲𑁆𑀲𑀸 𑀅𑀧𑀭𑀺𑀘𑀺𑀢𑀪𑀽𑀫𑀺𑀪𑀸𑀕𑀢𑁆𑀢𑀸 𑀉𑀤𑀓𑀝𑁆𑀞𑀸𑀦𑀲𑀜𑁆𑀚𑀸𑀦𑀦𑀢𑁆𑀣𑀁 𑀲𑀸𑀔𑀸𑀪𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑀤𑀸 𑀧𑀦 𑀧𑀭𑀺𑀘𑀺𑀢𑀪𑀽𑀫𑀺𑀪𑀸𑀕𑀸 𑀳𑁄𑀦𑁆𑀢𑀺, 𑀅𑀣 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀫𑀦𑀲𑀺𑀓𑀢𑁆𑀯𑀸𑀯 𑀉𑀤𑀓𑀝𑁆𑀞𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀯𑀫𑁂𑀯𑀸𑀬𑀁 𑀓𑁂𑀲𑀸 𑀮𑁄𑀫𑀸𑀢𑀺𑀆𑀤𑀺𑀦𑀸 𑀢𑀁𑀢𑀁𑀯𑁄𑀳𑀸𑀭𑀲𑁆𑀲 𑀯𑀲𑁂𑀦 𑀧𑀞𑀫𑀁 𑀢𑁂 𑀥𑀫𑁆𑀫𑁂 𑀫𑀦𑀲𑀸𑀓𑀸𑀲𑀺, 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀼𑀪𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀢𑀁 𑀯𑁄𑀳𑀸𑀭𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀲𑀼𑀪𑀸𑀤𑀺𑀢𑁄𑀯 𑀫𑀦𑀲𑀺 𑀓𑀭𑁄𑀢𑀺.

𑀏𑀢𑁆𑀣𑀸𑀳 ‘‘𑀓𑀣𑀁 𑀧𑀦𑀲𑁆𑀲 𑀏𑀢𑁂 𑀥𑀫𑁆𑀫𑀸 𑀅𑀲𑀼𑀪𑀸𑀤𑀺𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀓𑀣𑀁 𑀯𑀡𑁆𑀡𑀢𑁄, 𑀓𑀣𑀁 𑀲𑀼𑀜𑁆𑀜𑀢𑁄 𑀯𑀸, 𑀓𑀣𑀜𑁆𑀘𑀸𑀬𑀫𑁂𑀢𑁂 𑀅𑀲𑀼𑀪𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀓𑀣𑀁 𑀯𑀡𑁆𑀡𑀢𑁄, 𑀓𑀣𑀁 𑀲𑀼𑀜𑁆𑀜𑀢𑁄 𑀯𑀸’’𑀢𑀺? 𑀓𑁂𑀲𑀸 𑀢𑀸𑀯𑀲𑁆𑀲 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 𑀅𑀲𑀼𑀪𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀜𑁆𑀘𑀥𑀸 𑀏𑀯 𑀅𑀬𑀫𑁂𑀢𑁂 𑀅𑀲𑀼𑀪𑀢𑁄 𑀫𑀦𑀲𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑀸 𑀦𑀸𑀫𑁂𑀢𑁂 𑀯𑀡𑁆𑀡𑀢𑁄 𑀅𑀲𑀼𑀪𑀸 ¶ 𑀧𑀭𑀫𑀧𑁆𑀧𑀝𑀺𑀓𑀽𑀮𑀚𑁂𑀕𑀼𑀘𑁆𑀙𑀸 ¶ . 𑀢𑀣𑀸 𑀳𑀺 𑀫𑀦𑀼𑀲𑁆𑀲𑀸 𑀤𑀺𑀯𑀸 𑀧𑀸𑀦𑀪𑁄𑀚𑀦𑁂 𑀧𑀢𑀺𑀢𑀁 𑀓𑁂𑀲𑀯𑀡𑁆𑀡𑀁 𑀯𑀸𑀓𑀁 𑀯𑀸 𑀲𑀼𑀢𑁆𑀢𑀁 𑀯𑀸 𑀤𑀺𑀲𑁆𑀯𑀸 𑀓𑁂𑀲𑀲𑀜𑁆𑀜𑀸𑀬 𑀫𑀦𑁄𑀭𑀫𑀫𑁆𑀧𑀺 𑀧𑀸𑀦𑀪𑁄𑀚𑀦𑀁 𑀙𑀟𑁆𑀟𑁂𑀦𑁆𑀢𑀺 𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑀺 𑀯𑀸. 𑀲𑀡𑁆𑀞𑀸𑀦𑀢𑁄𑀧𑀺 𑀅𑀲𑀼𑀪𑀸. 𑀢𑀣𑀸 𑀳𑀺 𑀭𑀢𑁆𑀢𑀺𑀁 𑀧𑀸𑀦𑀪𑁄𑀚𑀦𑁂 𑀧𑀢𑀺𑀢𑀁 𑀓𑁂𑀲𑀲𑀡𑁆𑀞𑀸𑀦𑀁 𑀯𑀸𑀓𑀁 𑀯𑀸 𑀲𑀼𑀢𑁆𑀢𑀁 𑀯𑀸 𑀨𑀼𑀲𑀺𑀢𑁆𑀯𑀸 𑀓𑁂𑀲𑀲𑀜𑁆𑀜𑀸𑀬 𑀫𑀦𑁄𑀭𑀫𑀫𑁆𑀧𑀺 𑀧𑀸𑀦𑀪𑁄𑀚𑀦𑀁 𑀙𑀟𑁆𑀟𑁂𑀦𑁆𑀢𑀺 𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑀺 𑀯𑀸. 𑀕𑀦𑁆𑀥𑀢𑁄𑀧𑀺 𑀅𑀲𑀼𑀪𑀸. 𑀢𑀣𑀸 𑀳𑀺 𑀢𑁂𑀮𑀫𑀓𑁆𑀔𑀦𑀧𑀼𑀧𑁆𑀨𑀥𑀽𑀫𑀸𑀤𑀺𑀲𑀗𑁆𑀔𑀸𑀭𑁂𑀳𑀺 𑀯𑀺𑀭𑀳𑀺𑀢𑀸𑀦𑀁 𑀓𑁂𑀲𑀸𑀦𑀁 𑀕𑀦𑁆𑀥𑁄 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀺, 𑀅𑀕𑁆𑀕𑀻𑀲𑀼 𑀧𑀓𑁆𑀔𑀺𑀢𑁆𑀢𑀲𑁆𑀲 𑀓𑁂𑀲𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀢𑁆𑀢𑀸 𑀦𑀸𑀲𑀺𑀓𑀁 𑀧𑀺𑀥𑁂𑀦𑁆𑀢𑀺, 𑀫𑀼𑀔𑀫𑁆𑀧𑀺 𑀯𑀺𑀓𑀼𑀚𑁆𑀚𑁂𑀦𑁆𑀢𑀺. 𑀆𑀲𑀬𑀢𑁄𑀧𑀺 𑀅𑀲𑀼𑀪𑀸. 𑀢𑀣𑀸 𑀳𑀺 𑀦𑀸𑀦𑀸𑀯𑀺𑀥𑁂𑀦 𑀫𑀦𑀼𑀲𑁆𑀲𑀸𑀲𑀼𑀘𑀺𑀦𑀺𑀲𑁆𑀲𑀦𑁆𑀤𑁂𑀦 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀢𑀡𑁆𑀟𑀼𑀮𑁂𑀬𑁆𑀬𑀓𑀸𑀤𑀻𑀦𑀺 𑀯𑀺𑀬 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀦𑀺𑀲𑁆𑀲𑀦𑁆𑀤𑁂𑀦 𑀢𑁂 𑀆𑀘𑀺𑀢𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀕𑀫𑀺𑀢𑀸𑀢𑀺. 𑀑𑀓𑀸𑀲𑀢𑁄𑀧𑀺 𑀅𑀲𑀼𑀪𑀸. 𑀢𑀣𑀸 𑀳𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀯𑀺𑀬 𑀢𑀡𑁆𑀟𑀼𑀮𑁂𑀬𑁆𑀬𑀓𑀸𑀤𑀻𑀦𑀺 𑀧𑀭𑀫𑀚𑁂𑀕𑀼𑀘𑁆𑀙𑁂 𑀮𑁄𑀫𑀸𑀤𑀺𑀏𑀓𑀢𑀺𑀁𑀲𑀓𑀼𑀡𑀧𑀭𑀸𑀲𑀺𑀫𑀢𑁆𑀣𑀓𑁂 𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑀧𑀮𑀺𑀯𑁂𑀞𑀓𑁂 𑀅𑀮𑁆𑀮𑀘𑀫𑁆𑀫𑁂 𑀚𑀸𑀢𑀸𑀢𑀺. 𑀏𑀲 𑀦𑀬𑁄 𑀮𑁄𑀫𑀸𑀤𑀻𑀲𑀼. 𑀏𑀯𑀁 𑀢𑀸𑀯 𑀅𑀬𑀫𑁂𑀢𑁂 𑀥𑀫𑁆𑀫𑁂 𑀅𑀲𑀼𑀪𑀢𑁄 𑀉𑀧𑀝𑁆𑀞𑀳𑀦𑁆𑀢𑁂 𑀅𑀲𑀼𑀪𑀢𑁄 𑀫𑀦𑀲𑀺 𑀓𑀭𑁄𑀢𑀺.

𑀬𑀤𑀺 𑀧𑀦𑀲𑁆𑀲 𑀯𑀡𑁆𑀡𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀣 𑀓𑁂𑀲𑀸 𑀦𑀻𑀮𑀓𑀲𑀺𑀡𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀣𑀸 𑀮𑁄𑀫𑀸 𑀤𑀦𑁆𑀢𑀸 𑀑𑀤𑀸𑀢𑀓𑀲𑀺𑀡𑀯𑀲𑁂𑀦𑀸𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 ¶ . 𑀢𑀁𑀢𑀁𑀓𑀲𑀺𑀡𑀯𑀲𑁂𑀦𑁂𑀯 𑀅𑀬𑀫𑁂𑀢𑁂 𑀫𑀦𑀲𑀺 𑀓𑀭𑁄𑀢𑀺, 𑀏𑀯𑀁 𑀯𑀡𑁆𑀡𑀢𑁄 𑀉𑀧𑀝𑁆𑀞𑀳𑀦𑁆𑀢𑁂 𑀯𑀡𑁆𑀡𑀢𑁄 𑀫𑀦𑀲𑀺 𑀓𑀭𑁄𑀢𑀺. 𑀬𑀤𑀺 𑀧𑀦𑀲𑁆𑀲 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀣 𑀓𑁂𑀲𑀸 𑀖𑀦𑀯𑀺𑀦𑀺𑀩𑁆𑀪𑁄𑀕𑀯𑀯𑀢𑁆𑀣𑀸𑀦𑁂𑀦 𑀑𑀚𑀝𑁆𑀞𑀫𑀓𑀲𑀫𑀽𑀳𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀣𑀸 𑀮𑁄𑀫𑀸𑀤𑀬𑁄, 𑀬𑀣𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀅𑀬𑀫𑁂𑀢𑁂 𑀢𑀣𑁂𑀯 𑀫𑀦𑀲𑀺 𑀓𑀭𑁄𑀢𑀺. 𑀏𑀯𑀁 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀳𑀦𑁆𑀢𑁂 𑀲𑀼𑀜𑁆𑀜𑀢𑁄 𑀫𑀦𑀲𑀺 𑀓𑀭𑁄𑀢𑀺.

𑀏𑀯𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀬𑀫𑁂𑀢𑁂 𑀥𑀫𑁆𑀫𑁂 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄 𑀫𑀦𑀲𑀺 𑀓𑀭𑁄𑀢𑀺. 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄𑀢𑀺 𑀅𑀲𑀼𑀪𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀉𑀧𑀝𑁆𑀞𑀺𑀢𑁂 𑀓𑁂𑀲𑁂 𑀫𑀼𑀜𑁆𑀘𑀺𑀢𑁆𑀯𑀸 𑀮𑁄𑀫𑁂 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀚𑀮𑀽𑀓𑀸 𑀦𑀗𑁆𑀕𑀼𑀝𑁆𑀞𑁂𑀦 𑀕𑀳𑀺𑀢𑀧𑁆𑀧𑀤𑁂𑀲𑁂 𑀲𑀸𑀧𑁂𑀓𑁆𑀔𑀸𑀯 𑀳𑀼𑀢𑁆𑀯𑀸 𑀢𑀼𑀡𑁆𑀟𑁂𑀦 𑀅𑀜𑁆𑀜𑀁 𑀧𑀤𑁂𑀲𑀁 𑀕𑀡𑁆𑀳𑀸𑀢𑀺, 𑀕𑀳𑀺𑀢𑁂 𑀘 𑀢𑀲𑁆𑀫𑀺𑀁 𑀇𑀢𑀭𑀁 𑀫𑀼𑀜𑁆𑀘𑀢𑀺, 𑀏𑀯𑀫𑁂𑀯 𑀓𑁂𑀲𑁂𑀲𑀼 𑀲𑀸𑀧𑁂𑀓𑁆𑀔𑁄𑀯 𑀳𑀼𑀢𑁆𑀯𑀸 𑀮𑁄𑀫𑁂 𑀫𑀦𑀲𑀺 𑀓𑀭𑁄𑀢𑀺, 𑀮𑁄𑀫𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑁂 𑀫𑀦𑀲𑀺𑀓𑀸𑀭𑁂 ¶ 𑀓𑁂𑀲𑁂 𑀫𑀼𑀜𑁆𑀘𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀯𑀁 𑀳𑀺𑀲𑁆𑀲 𑀅𑀦𑀼𑀧𑀼𑀩𑁆𑀩𑀫𑀼𑀜𑁆𑀘𑀦𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀲𑀼𑀪𑀸𑀤𑀻𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀢𑁂 𑀥𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑀸 𑀅𑀦𑀯𑀲𑁂𑀲𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀸𑀓𑀝𑀢𑀭𑀽𑀧𑀝𑁆𑀞𑀸𑀦𑀸 𑀘 𑀳𑁄𑀦𑁆𑀢𑀺.

𑀅𑀣 𑀬𑀲𑁆𑀲 𑀢𑁂 𑀥𑀫𑁆𑀫𑀸 𑀅𑀲𑀼𑀪𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀸𑀓𑀝𑀢𑀭𑀽𑀧𑀝𑁆𑀞𑀸𑀦𑀸 𑀘 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀓𑁆𑀓𑀝𑁄 𑀤𑁆𑀯𑀢𑁆𑀢𑀺𑀁𑀲𑀢𑀸𑀮𑀓𑁂 𑀢𑀸𑀮𑀯𑀦𑁂 𑀩𑁆𑀬𑀸𑀥𑁂𑀦 𑀧𑀭𑀺𑀧𑀸𑀢𑀺𑀬𑀫𑀸𑀦𑁄 𑀏𑀓𑀭𑀼𑀓𑁆𑀔𑁂𑀧𑀺 𑀅𑀲𑀡𑁆𑀞𑀳𑀦𑁆𑀢𑁄 𑀧𑀭𑀺𑀥𑀸𑀯𑀺𑀢𑁆𑀯𑀸 𑀬𑀤𑀸 𑀦𑀺𑀯𑀢𑁆𑀢𑁄 𑀳𑁄𑀢𑀺 𑀓𑀺𑀮𑀦𑁆𑀢𑁄, 𑀅𑀣 𑀏𑀓𑀫𑁂𑀯 𑀖𑀦𑀢𑀸𑀮𑀧𑀡𑁆𑀡𑀧𑀭𑀺𑀯𑁂𑀞𑀺𑀢𑀁 𑀢𑀸𑀮𑀲𑀼𑀘𑀺𑀁 ¶ 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀺; 𑀏𑀯𑀫𑁂𑀯 𑀘𑀺𑀢𑁆𑀢𑀫𑀓𑁆𑀓𑀝𑁄 𑀤𑁆𑀯𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑀓𑁂 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀢𑁂𑀦𑁂𑀯 𑀬𑁄𑀕𑀺𑀦𑀸 𑀧𑀭𑀺𑀧𑀸𑀢𑀺𑀬𑀫𑀸𑀦𑁄 𑀏𑀓𑀓𑁄𑀝𑁆𑀞𑀸𑀲𑀓𑁂𑀧𑀺 𑀅𑀲𑀡𑁆𑀞𑀳𑀦𑁆𑀢𑁄 𑀧𑀭𑀺𑀥𑀸𑀯𑀺𑀢𑁆𑀯𑀸 𑀬𑀤𑀸 𑀅𑀦𑁂𑀓𑀸𑀭𑀫𑁆𑀫𑀡𑀯𑀺𑀥𑀸𑀯𑀦𑁂 𑀅𑀪𑀺𑀮𑀸𑀲𑀸𑀪𑀸𑀯𑁂𑀦 𑀦𑀺𑀯𑀢𑁆𑀢𑁄 𑀳𑁄𑀢𑀺 𑀓𑀺𑀮𑀦𑁆𑀢𑁄. 𑀅𑀣 𑀬𑁆𑀯𑀸𑀲𑁆𑀲 𑀓𑁂𑀲𑀸𑀤𑀻𑀲𑀼 𑀥𑀫𑁆𑀫𑁄 𑀧𑀕𑀼𑀡𑀢𑀭𑁄 𑀘𑀭𑀺𑀢𑀸𑀦𑀼𑀭𑀽𑀧𑀢𑀭𑁄 𑀯𑀸, 𑀬𑀢𑁆𑀣 𑀯𑀸 𑀧𑀼𑀩𑁆𑀩𑁂 𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀉𑀧𑀘𑀸𑀭𑀯𑀲𑁂𑀦 𑀢𑀺𑀝𑁆𑀞𑀢𑀺. 𑀅𑀣 𑀢𑀫𑁂𑀯 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀧𑀞𑀫𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀫𑀸𑀭𑀪𑀺𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺.

𑀬𑀲𑁆𑀲 𑀧𑀦 𑀢𑁂 𑀥𑀫𑁆𑀫𑀸 𑀯𑀡𑁆𑀡𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀲𑀸𑀧𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀓𑁆𑀓𑀝𑁄…𑀧𑁂… 𑀅𑀣 𑀬𑁆𑀯𑀸𑀲𑁆𑀲 𑀓𑁂𑀲𑀸𑀤𑀻𑀲𑀼 𑀥𑀫𑁆𑀫𑁄 𑀧𑀕𑀼𑀡𑀢𑀭𑁄 𑀘𑀭𑀺𑀢𑀸𑀦𑀼𑀭𑀽𑀧𑀢𑀭𑁄 ¶ 𑀯𑀸, 𑀬𑀢𑁆𑀣 𑀯𑀸 𑀧𑀼𑀩𑁆𑀩𑁂 𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀉𑀧𑀘𑀸𑀭𑀯𑀲𑁂𑀦 𑀢𑀺𑀝𑁆𑀞𑀢𑀺. 𑀅𑀣 𑀢𑀫𑁂𑀯 𑀦𑀺𑀫𑀺𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀦𑀻𑀮𑀓𑀲𑀺𑀡𑀯𑀲𑁂𑀦 𑀧𑀻𑀢𑀓𑀲𑀺𑀡𑀯𑀲𑁂𑀦 𑀯𑀸 𑀧𑀜𑁆𑀘𑀧𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑀺, 𑀢𑁂𑀲𑀜𑁆𑀘 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺.

𑀬𑀲𑁆𑀲 𑀧𑀦 𑀢𑁂 𑀥𑀫𑁆𑀫𑀸 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀲𑁄 𑀮𑀓𑁆𑀔𑀡𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀮𑀓𑁆𑀔𑀡𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀢𑀢𑁆𑀣 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀅𑀣 𑀫𑀦𑀲𑀺𑀓𑀭𑁄𑀦𑁆𑀢𑁄 𑀢𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀼𑀢𑁆𑀢𑀢𑁆𑀢𑀬𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀺 ¶ . 𑀅𑀬𑀫𑀲𑁆𑀲 𑀯𑀺𑀧𑀲𑁆𑀲𑀦𑀸𑀦𑀬𑁄. 𑀲𑁄 𑀇𑀫𑀁 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀜𑁆𑀘 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀬𑀁 𑀯𑀼𑀢𑁆𑀢𑀁 𑁋 ‘‘𑀓𑀣𑀁 𑀧𑀦𑀸𑀬𑀁 𑀅𑀦𑀼𑀧𑀼𑀩𑁆𑀩𑀸𑀤𑀺𑀯𑀲𑁂𑀦 𑀏𑀢𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀻’’𑀢𑀺, 𑀢𑀁 𑀩𑁆𑀬𑀸𑀓𑀢𑀁 𑀳𑁄𑀢𑀺. 𑀬𑀜𑁆𑀘𑀸𑀧𑀺 𑀯𑀼𑀢𑁆𑀢𑀁 𑁋 ‘‘𑀪𑀸𑀯𑀦𑀸𑀯𑀲𑁂𑀦 𑀧𑀦𑀲𑁆𑀲 𑀏𑀯𑀁 𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺, 𑀢𑀲𑁆𑀲𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺.

𑀧𑀓𑀺𑀡𑁆𑀡𑀓𑀦𑀬𑁄

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁𑀬𑁂𑀯 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀯𑀡𑁆𑀡𑀦𑀸𑀧𑀭𑀺𑀘𑀬𑀧𑀸𑀝𑀯𑀢𑁆𑀣𑀁 𑀅𑀬𑀁 𑀧𑀓𑀺𑀡𑁆𑀡𑀓𑀦𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀦𑀺𑀫𑀺𑀢𑁆𑀢𑀢𑁄 𑀮𑀓𑁆𑀔𑀡𑀢𑁄, 𑀥𑀸𑀢𑀼𑀢𑁄 𑀲𑀼𑀜𑁆𑀜𑀢𑁄𑀧𑀺 𑀘;

𑀔𑀦𑁆𑀥𑀸𑀤𑀺𑀢𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄, 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀦𑀺𑀘𑁆𑀙𑀬𑁄’’𑀢𑀺.

𑀢𑀢𑁆𑀣 ¶ 𑀦𑀺𑀫𑀺𑀢𑁆𑀢𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀇𑀫𑀲𑁆𑀫𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀲𑀝𑁆𑀞𑀺𑀲𑀢𑀁 𑀦𑀺𑀫𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀓𑁄𑀝𑁆𑀞𑀸𑀲𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑀲𑁆𑀲 𑀯𑀡𑁆𑀡𑀦𑀺𑀫𑀺𑀢𑁆𑀢𑀁, 𑀲𑀡𑁆𑀞𑀸𑀦𑀦𑀺𑀫𑀺𑀢𑁆𑀢𑀁, 𑀤𑀺𑀲𑀸𑀦𑀺𑀫𑀺𑀢𑁆𑀢𑀁, 𑀑𑀓𑀸𑀲𑀦𑀺𑀫𑀺𑀢𑁆𑀢𑀁, 𑀧𑀭𑀺𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀮𑁄𑀫𑀸𑀤𑀻𑀲𑀼.

𑀮𑀓𑁆𑀔𑀡𑀢𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀅𑀝𑁆𑀞𑀯𑀻𑀲𑀢𑀺𑀲𑀢𑀁 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀮𑀓𑁆𑀔𑀡𑀢𑁄 𑀫𑀦𑀲𑀺 𑀓𑀭𑁄𑀢𑀺 ¶ . 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑀲𑁆𑀲 𑀣𑀤𑁆𑀥𑀮𑀓𑁆𑀔𑀡𑀁, 𑀆𑀩𑀦𑁆𑀥𑀦𑀮𑀓𑁆𑀔𑀡𑀁, 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁, 𑀲𑀫𑀼𑀤𑀻𑀭𑀡𑀮𑀓𑁆𑀔𑀡𑀦𑁆𑀢𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀮𑁄𑀫𑀸𑀤𑀻𑀲𑀼.

𑀥𑀸𑀢𑀼𑀢𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 ‘‘𑀙𑀥𑀸𑀢𑀼𑀭𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’’𑀢𑀺 (𑀫. 𑀦𑀺. 𑁩.𑁩𑁪𑁩-𑁩𑁪𑁪) 𑀏𑀢𑁆𑀣 𑀯𑀼𑀢𑁆𑀢𑀸𑀲𑀼 𑀥𑀸𑀢𑀽𑀲𑀼 𑀅𑀝𑁆𑀞𑀯𑀻𑀲𑀢𑀺𑀲𑀢𑀁 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀬𑀸𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀥𑀸𑀢𑀼𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀬𑀸 𑀓𑁂𑀲𑁂 𑀣𑀤𑁆𑀥𑀢𑀸, 𑀲𑀸 𑀧𑀣𑀯𑀻𑀥𑀸𑀢𑀼; 𑀬𑀸 𑀆𑀩𑀦𑁆𑀥𑀦𑀢𑀸, 𑀲𑀸 𑀆𑀧𑁄𑀥𑀸𑀢𑀼; 𑀬𑀸 𑀧𑀭𑀺𑀧𑀸𑀘𑀦𑀢𑀸, 𑀲𑀸 𑀢𑁂𑀚𑁄𑀥𑀸𑀢𑀼; 𑀬𑀸 𑀯𑀺𑀢𑁆𑀣𑀫𑁆𑀪𑀦𑀢𑀸, 𑀲𑀸 𑀯𑀸𑀬𑁄𑀥𑀸𑀢𑀽𑀢𑀺 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺. 𑀏𑀯𑀁 𑀮𑁄𑀫𑀸𑀤𑀻𑀲𑀼.

𑀲𑀼𑀜𑁆𑀜𑀢𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀅𑀝𑁆𑀞𑀯𑀻𑀲𑀢𑀺𑀲𑀢𑀁 𑀲𑀼𑀜𑁆𑀜𑀢𑀸 𑀳𑁄𑀦𑁆𑀢𑀺, 𑀬𑀸𑀲𑀁 𑀯𑀲𑁂𑀦 𑀬𑁄𑀕𑀸𑀯𑀘𑀭𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀼𑀜𑁆𑀜𑀢𑁄 𑀯𑀺𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑁂 𑀢𑀸𑀯 𑀧𑀣𑀯𑀻𑀥𑀸𑀢𑀼 ¶ 𑀆𑀧𑁄𑀥𑀸𑀢𑁆𑀯𑀸𑀤𑀻𑀳𑀺 𑀲𑀼𑀜𑁆𑀜𑀸, 𑀢𑀣𑀸 𑀆𑀧𑁄𑀥𑀸𑀢𑁆𑀯𑀸𑀤𑀬𑁄 𑀧𑀣𑀯𑀻𑀥𑀸𑀢𑁆𑀯𑀸𑀤𑀻𑀳𑀻𑀢𑀺 𑀘𑀢𑀲𑁆𑀲𑁄 𑀲𑀼𑀜𑁆𑀜𑀢𑀸 𑀳𑁄𑀦𑁆𑀢𑀺. 𑀏𑀯𑀁 𑀮𑁄𑀫𑀸𑀤𑀻𑀲𑀼.

𑀔𑀦𑁆𑀥𑀸𑀤𑀺𑀢𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀓𑁂𑀲𑀸𑀤𑀻𑀲𑀼 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀬𑁆𑀳𑀫𑀸𑀦𑁂𑀲𑀼 ‘‘𑀓𑁂𑀲𑀸 𑀓𑀢𑀺 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀓𑀢𑀺 𑀆𑀬𑀢𑀦𑀸𑀦𑀺, 𑀓𑀢𑀺 𑀥𑀸𑀢𑀼𑀬𑁄, 𑀓𑀢𑀺 𑀲𑀘𑁆𑀘𑀸𑀦𑀺, 𑀓𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀘𑀲𑁆𑀲 𑀯𑀺𑀚𑀸𑀦𑀢𑁄 𑀢𑀺𑀡𑀓𑀝𑁆𑀞𑀲𑀫𑀽𑀳𑁄 𑀯𑀺𑀬 𑀓𑀸𑀬𑁄 𑀔𑀸𑀬𑀢𑀺. 𑀬𑀣𑀸𑀳 𑁋

‘‘𑀦𑀢𑁆𑀣𑀺 𑀲𑀢𑁆𑀢𑁄 𑀦𑀭𑁄 𑀧𑁄𑀲𑁄, 𑀧𑀼𑀕𑁆𑀕𑀮𑁄 𑀦𑀽𑀧𑀮𑀩𑁆𑀪𑀢𑀺;

𑀲𑀼𑀜𑁆𑀜𑀪𑀽𑀢𑁄 𑀅𑀬𑀁 𑀓𑀸𑀬𑁄, 𑀢𑀺𑀡𑀓𑀝𑁆𑀞𑀲𑀫𑀽𑀧𑀫𑁄’’𑀢𑀺.

𑀅𑀣𑀲𑁆𑀲 𑀬𑀸 𑀲𑀸 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺. 𑁋

𑀏𑀯𑀁 ¶ 𑀅𑀫𑀸𑀦𑀼𑀲𑀻 𑀭𑀢𑀺 𑀯𑀼𑀢𑁆𑀢𑀸, 𑀲𑀸 𑀅𑀤𑀽𑀭𑀢𑀭𑀸 𑀳𑁄𑀢𑀺. 𑀢𑀢𑁄 𑀬𑀁 𑀢𑀁 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁩-𑁩𑁭𑁪) 𑁋

𑀏𑀯𑀁 ¶ 𑀯𑀺𑀧𑀲𑁆𑀲𑀦𑀸𑀫𑀬𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀸𑀫𑀢𑀁 𑀯𑀼𑀢𑁆𑀢𑀁. 𑀢𑀁 𑀅𑀦𑀼𑀪𑀯𑀦𑁆𑀢𑁄 𑀦 𑀘𑀺𑀭𑁂𑀦𑁂𑀯 𑀅𑀭𑀺𑀬𑀚𑀦𑀲𑁂𑀯𑀺𑀢𑀁 𑀅𑀚𑀭𑀸𑀫𑀭𑀁 𑀦𑀺𑀩𑁆𑀩𑀸𑀦𑀸𑀫𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀼𑀫𑀸𑀭𑀧𑀜𑁆𑀳𑀯𑀡𑁆𑀡𑀦𑀸

𑀅𑀝𑁆𑀞𑀼𑀧𑁆𑀧𑀢𑁆𑀢𑀺

𑀇𑀤𑀸𑀦𑀺 ¶ 𑀏𑀓𑀁 𑀦𑀸𑀫 𑀓𑀺𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀓𑀼𑀫𑀸𑀭𑀧𑀜𑁆𑀳𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀜𑁆𑀘 𑀯𑀢𑁆𑀯𑀸 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫 𑁋

𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀢𑀸𑀯 𑀦𑁂𑀲𑀁 𑀲𑁄𑀧𑀸𑀓𑁄 𑀦𑀸𑀫 𑀪𑀕𑀯𑀢𑁄 𑀫𑀳𑀸𑀲𑀸𑀯𑀓𑁄 𑀅𑀳𑁄𑀲𑀺. 𑀢𑁂𑀦𑀸𑀬𑀲𑁆𑀫𑀢𑀸 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦𑁂𑀯 𑀅𑀜𑁆𑀜𑀸 𑀆𑀭𑀸𑀥𑀺𑀢𑀸, 𑀢𑀲𑁆𑀲 𑀪𑀕𑀯𑀸 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀉𑀧𑀲𑀫𑁆𑀧𑀤𑀁 𑀅𑀦𑀼𑀜𑁆𑀜𑀸𑀢𑀼𑀓𑀸𑀫𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀸𑀦𑀁 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑀢𑀁 ¶ 𑀧𑀲𑁆𑀲𑀦𑁆𑀢𑁄 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑁄 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀘 𑀩𑁆𑀬𑀸𑀓𑀭𑀡𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑀺. 𑀲𑀸𑀯 𑀢𑀲𑁆𑀲𑀸𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀅𑀬𑀁 𑀢𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺.

𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁

𑀬𑀲𑁆𑀫𑀸 𑀧𑀦 𑀲𑀭𑀡𑀕𑀫𑀦𑁂𑀳𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀪𑀸𑀯𑀦𑀸, 𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀻𑀮𑀪𑀸𑀯𑀦𑀸, 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂𑀦 𑀘 𑀓𑀸𑀬𑀪𑀸𑀯𑀦𑀸 𑀧𑀓𑀸𑀲𑀺𑀢𑀸, 𑀢𑀲𑁆𑀫𑀸 𑀇𑀤𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀜𑁆𑀜𑀸𑀪𑀸𑀯𑀦𑀸𑀫𑀼𑀔𑀤𑀲𑁆𑀲𑀦𑀢𑁆𑀣𑀁 𑀇𑀫𑁂 𑀧𑀜𑁆𑀳𑀩𑁆𑀬𑀸𑀓𑀭𑀡𑀸 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸. 𑀬𑀲𑁆𑀫𑀸 𑀯𑀸 𑀲𑀻𑀮𑀧𑀤𑀝𑁆𑀞𑀸𑀦𑁄 𑀲𑀫𑀸𑀥𑀺, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸 𑀘 𑀧𑀜𑁆𑀜𑀸; 𑀬𑀣𑀸𑀳 𑁋 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 ¶ 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨), 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀻𑀮𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂𑀦 𑀢𑀁𑀕𑁄𑀘𑀭𑀁 𑀲𑀫𑀸𑀥𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀦𑀸𑀦𑀸𑀥𑀫𑁆𑀫𑀧𑀭𑀺𑀓𑁆𑀔𑀸𑀭𑀸𑀬 𑀧𑀜𑁆𑀜𑀸𑀬 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸𑀢𑀺𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀸.

𑀇𑀤𑀁 𑀢𑁂𑀲𑀁 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁.

𑀧𑀜𑁆𑀳𑀯𑀡𑁆𑀡𑀦𑀸

𑀏𑀓𑀁 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ 𑀢𑁂𑀲𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺 𑁋 𑀏𑀓𑀁 𑀦𑀸𑀫 𑀓𑀺𑀦𑁆𑀢𑀺 𑀪𑀕𑀯𑀸 𑀬𑀲𑁆𑀫𑀺𑀁 𑀏𑀓𑀥𑀫𑁆𑀫𑀲𑁆𑀫𑀺𑀁 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀘𑀸𑀬𑀫𑀸𑀬𑀲𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀫𑀓𑀸𑀲𑀺, 𑀢𑀁 𑀥𑀫𑁆𑀫𑀁 𑀲𑀦𑁆𑀥𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀣𑁂𑀭𑁄 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀺. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 (𑀲𑀁. 𑀦𑀺. 𑁫.𑁮) 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀼𑀢𑁆𑀢𑀸𑀦𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀬𑀼𑀢𑁆𑀢𑀺𑀲𑀫𑁆𑀪𑀯𑁂 𑀲𑀸𑀥𑀓𑀸𑀦𑀺. 𑀏𑀢𑁆𑀣 𑀬𑁂𑀦𑀸𑀳𑀸𑀭𑁂𑀦 𑀲𑀩𑁆𑀩𑁂 𑀲𑀢𑁆𑀢𑀸 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑁄 𑀆𑀳𑀸𑀭𑁄 𑀢𑀁 𑀯𑀸 𑀦𑁂𑀲𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑁆𑀢𑀁 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀧𑀼𑀝𑁆𑀞𑁂𑀦 𑀣𑁂𑀭𑁂𑀦 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀪𑀕𑀯𑀢𑀸 𑀇𑀥 𑀏𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀢𑀼 𑀲𑀸𑀲𑀦𑁂 𑀮𑁄𑀓𑁂 𑀯𑀸 𑀅𑀜𑁆𑀜𑀁 𑀏𑀓𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀜𑀸𑀧𑁂𑀢𑀼𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀪𑀕𑀯𑀢𑀸 𑁋

‘‘𑀏𑀓𑀥𑀫𑁆𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀢𑁆𑀢𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀇𑀫𑀲𑁆𑀫𑀺𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀥𑀫𑁆𑀫𑁂 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡’𑀦𑁆𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀘𑁂𑀢𑁆𑀣 𑀬𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁫.𑁨𑁩𑁨) 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ¶ 𑀧𑀘𑁆𑀘𑀬𑀁 𑀆𑀳𑀸𑀭𑀲𑀤𑁆𑀤𑁂𑀦 𑀕𑀳𑁂𑀢𑁆𑀯𑀸 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀘𑀢𑁆𑀢𑀸𑀭𑁄 𑀧𑀦 𑀆𑀳𑀸𑀭𑁂 𑀲𑀦𑁆𑀥𑀸𑀬 𑁋 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂 ‘‘𑀅𑀲𑀜𑁆𑀜𑀲𑀢𑁆𑀢𑀸 𑀤𑁂𑀯𑀸 𑀅𑀳𑁂𑀢𑀼𑀓𑀸 𑀅𑀦𑀸𑀳𑀸𑀭𑀸 𑀅𑀨𑀲𑁆𑀲𑀓𑀸 𑀅𑀯𑁂𑀤𑀦𑀓𑀸’’𑀢𑀺 𑀯𑀘𑀦𑀢𑁄 (𑀯𑀺𑀪. 𑁧𑁦𑁧𑁭) ‘‘𑀲𑀩𑁆𑀩𑁂’’𑀢𑀺 𑀯𑀘𑀦𑀫𑀬𑀼𑀢𑁆𑀢𑀁 𑀪𑀯𑁂𑀬𑁆𑀬.

𑀢𑀢𑁆𑀣 𑀲𑀺𑀬𑀸 𑁋 𑀏𑀯𑀫𑁆𑀧𑀺 𑀯𑀼𑀘𑁆𑀘𑀫𑀸𑀦𑁂 ‘‘𑀓𑀢𑀫𑁂 𑀥𑀫𑁆𑀫𑀸 𑀲𑀧𑀘𑁆𑀘𑀬𑀸? 𑀧𑀜𑁆𑀘𑀓𑁆𑀔𑀦𑁆𑀥𑀸 𑁋 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀥. 𑀲. 𑁧𑁦𑁮𑁯) 𑀯𑀘𑀦𑀢𑁄 𑀔𑀦𑁆𑀥𑀸𑀦𑀁𑀬𑁂𑀯 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀢𑁆𑀢𑀁 𑀬𑀼𑀢𑁆𑀢𑀁, 𑀲𑀢𑁆𑀢𑀸𑀦𑀦𑁆𑀢𑀼 𑀅𑀬𑀼𑀢𑁆𑀢𑀫𑁂𑀯𑁂𑀢𑀁 𑀯𑀘𑀦𑀁 𑀪𑀯𑁂𑀬𑁆𑀬𑀸𑀢𑀺. 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 ¶ ? 𑀲𑀢𑁆𑀢𑁂𑀲𑀼 𑀔𑀦𑁆𑀥𑁄𑀧𑀘𑀸𑀭𑀲𑀺𑀤𑁆𑀥𑀺𑀢𑁄. 𑀲𑀢𑁆𑀢𑁂𑀲𑀼 𑀳𑀺 𑀔𑀦𑁆𑀥𑁄𑀧𑀘𑀸𑀭𑁄 𑀲𑀺𑀤𑁆𑀥𑁄. 𑀓𑀲𑁆𑀫𑀸? 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁄. 𑀓𑀣𑀁? 𑀕𑁂𑀳𑁂 𑀕𑀸𑀫𑁄𑀧𑀘𑀸𑀭𑁄 𑀯𑀺𑀬. 𑀲𑁂𑀬𑁆𑀬𑀣𑀸𑀧𑀺 𑀳𑀺 𑀕𑁂𑀳𑀸𑀦𑀺 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁆𑀢𑀸 𑀕𑀸𑀫𑀲𑁆𑀲 𑀏𑀓𑀲𑁆𑀫𑀺𑀫𑁆𑀧𑀺 𑀤𑁆𑀯𑀻𑀲𑀼 𑀢𑀻𑀲𑀼𑀧𑀺 𑀯𑀸 𑀕𑁂𑀳𑁂𑀲𑀼 𑀤𑀟𑁆𑀠𑁂𑀲𑀼 ‘‘𑀕𑀸𑀫𑁄 𑀤𑀟𑁆𑀠𑁄’’𑀢𑀺 𑀏𑀯𑀁 𑀕𑁂𑀳𑁂 𑀕𑀸𑀫𑁄𑀧𑀘𑀸𑀭𑁄 𑀲𑀺𑀤𑁆𑀥𑁄, 𑀏𑀯𑀫𑁂𑀯 𑀔𑀦𑁆𑀥𑁂𑀲𑀼 𑀧𑀘𑁆𑀘𑀬𑀝𑁆𑀞𑁂𑀦 𑀆𑀳𑀸𑀭𑀝𑁆𑀞𑀺𑀢𑀺𑀓𑁂𑀲𑀼 ¶ ‘‘𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀅𑀬𑀁 𑀉𑀧𑀘𑀸𑀭𑁄 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀫𑀢𑁆𑀣𑀢𑁄 𑀘 𑀔𑀦𑁆𑀥𑁂𑀲𑀼 𑀚𑀸𑀬𑀫𑀸𑀦𑁂𑀲𑀼 𑀚𑀻𑀬𑀫𑀸𑀦𑁂𑀲𑀼 𑀫𑀻𑀬𑀫𑀸𑀦𑁂𑀲𑀼 𑀘 ‘‘𑀔𑀡𑁂 𑀔𑀡𑁂 𑀢𑁆𑀯𑀁 𑀪𑀺𑀓𑁆𑀔𑀼 𑀚𑀸𑀬𑀲𑁂 𑀘 𑀚𑀻𑀬𑀲𑁂 𑀘 𑀫𑀻𑀬𑀲𑁂 𑀘𑀸’’𑀢𑀺 𑀯𑀤𑀢𑀸 𑀪𑀕𑀯𑀢𑀸 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀔𑀦𑁆𑀥𑁄𑀧𑀘𑀸𑀭𑁄 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑀺𑀢𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁄 𑀬𑁂𑀦 𑀧𑀘𑁆𑀘𑀬𑀸𑀔𑁆𑀬𑁂𑀦 𑀆𑀳𑀸𑀭𑁂𑀦 𑀲𑀩𑁆𑀩𑁂 𑀲𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀲𑁄 𑀆𑀳𑀸𑀭𑁄 𑀢𑀁 𑀯𑀸 𑀦𑁂𑀲𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑁆𑀢𑀁 𑀏𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀳𑀸𑀭𑁄 𑀳𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑁆𑀢𑀁 𑀯𑀸 𑀅𑀦𑀺𑀘𑁆𑀘𑀢𑀸𑀓𑀸𑀭𑀡𑀢𑁄 𑀦𑀺𑀩𑁆𑀩𑀺𑀤𑀸𑀝𑁆𑀞𑀸𑀦𑀁 𑀳𑁄𑀢𑀺. 𑀅𑀣 𑀢𑁂𑀲𑀼 𑀲𑀩𑁆𑀩𑀲𑀢𑁆𑀢𑀲𑀜𑁆𑀜𑀺𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀢𑀸𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀬𑀣𑀸𑀳 𑁋

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺. (𑀥. 𑀧. 𑁨𑁭𑁭);

𑀏𑀢𑁆𑀣 𑀘 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀘 ‘‘𑀓𑀺𑀳𑀸’’𑀢𑀺 𑀘 𑀤𑀼𑀯𑀺𑀥𑁄 𑀧𑀸𑀞𑁄, 𑀢𑀢𑁆𑀣 𑀲𑀻𑀳𑀴𑀸𑀦𑀁 𑀓𑀺𑀳𑀸𑀢𑀺 𑀧𑀸𑀞𑁄. 𑀢𑁂 𑀳𑀺 ‘‘𑀓𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑀺𑀳𑀸’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀪𑀡𑀦𑁆𑀢𑀺 ‘‘𑀳-𑀇𑀢𑀺 𑀦𑀺𑀧𑀸𑀢𑁄, 𑀣𑁂𑀭𑀺𑀬𑀸𑀦𑀫𑁆𑀧𑀺 𑀅𑀬𑀫𑁂𑀯 𑀧𑀸𑀞𑁄’’𑀢𑀺 𑀉𑀪𑀬𑀣𑀸𑀧𑀺 𑀧𑀦 𑀏𑀓𑁄𑀯 𑀅𑀢𑁆𑀣𑁄. 𑀬𑀣𑀸 𑀭𑀼𑀘𑁆𑀘𑀢𑀺, 𑀢𑀣𑀸 𑀧𑀞𑀺𑀢𑀩𑁆𑀩𑀁. 𑀬𑀣𑀸 𑀧𑀦 ‘‘𑀲𑀼𑀔𑁂𑀦 𑀨𑀼𑀝𑁆𑀞𑁄 𑀅𑀣 𑀯𑀸 𑀤𑀼𑀔𑁂𑀦 (𑀥. 𑀧. 𑁮𑁩), 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 ¶ 𑀓𑀢𑁆𑀣𑀘𑀺 𑀤𑀼𑀔𑀦𑁆𑀢𑀺 𑀘 𑀓𑀢𑁆𑀣𑀘𑀺 𑀤𑀼𑀓𑁆𑀔𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀢𑁆𑀣𑀘𑀺 𑀏𑀓𑀦𑁆𑀢𑀺, 𑀓𑀢𑁆𑀣𑀘𑀺 𑀏𑀓𑁆𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀏𑀓𑀁 𑀦𑀸𑀫𑀸𑀢𑀺 𑀅𑀬𑀫𑁂𑀯 𑀧𑀸𑀞𑁄.

𑀤𑁆𑀯𑁂 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀏𑀯𑀁 𑀇𑀫𑀺𑀦𑀸 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀤𑁆𑀯𑁂 𑀦𑀸𑀫 𑀓𑀺𑀦𑁆𑀢𑀺? 𑀣𑁂𑀭𑁄 𑀤𑁆𑀯𑁂𑀢𑀺 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄, 𑀘𑀺𑀢𑁆𑀢𑀲𑁆𑀲 𑀘 𑀦𑀢𑀺𑀳𑁂𑀢𑀼𑀢𑁄 𑀲𑀩𑁆𑀩𑀫𑁆𑀧𑀺 ¶ 𑀅𑀭𑀽𑀧𑀁 ‘‘𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀦𑀺𑀩𑁆𑀩𑀺𑀤𑀸𑀳𑁂𑀢𑀼𑀢𑁆𑀢𑀸 𑀲𑀸𑀲𑀯𑀥𑀫𑁆𑀫𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀭𑀼𑀧𑁆𑀧𑀦𑀝𑁆𑀞𑁂𑀦 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸, 𑀲𑀩𑁆𑀩𑀜𑁆𑀘 𑀢𑀤𑀼𑀧𑀸𑀤𑀸𑀬 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀁 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑁂𑀯 𑀘𑁂𑀢𑁆𑀣 ‘‘𑀤𑁆𑀯𑁂 𑀦𑀸𑀫 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀤𑁆𑀯𑀺𑀦𑁆𑀦𑀫𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀤𑁆𑀯𑀻𑀲𑀼 ¶ , 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀤𑁆𑀯𑀻𑀲𑀼? 𑀦𑀸𑀫𑁂 𑀘 𑀭𑀽𑀧𑁂 𑀘. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀤𑁆𑀯𑁂 𑀧𑀜𑁆𑀳𑀸, 𑀤𑁆𑀯𑁂 𑀉𑀤𑁆𑀤𑁂𑀲𑀸, 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀏𑀢𑁆𑀣 𑀘 𑀦𑀸𑀫𑀭𑀽𑀧𑀫𑀢𑁆𑀢𑀤𑀲𑁆𑀲𑀦𑁂𑀦 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀳𑀸𑀬 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦𑁂𑀯 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋

‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺. (𑀥. 𑀧. 𑁨𑁭𑁯);

𑀢𑀻𑀡𑀺 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀇𑀤𑀸𑀦𑀺 𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀢𑀻𑀡𑀺 𑀦𑀸𑀫 𑀓𑀺𑀦𑁆𑀢𑀺? 𑀣𑁂𑀭𑁄 𑀢𑀻𑀡𑀻𑀢𑀺 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 𑀧𑀼𑀦 𑀩𑁆𑀬𑀸𑀓𑀭𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀮𑀺𑀗𑁆𑀕𑀸𑀦𑀼𑀭𑀽𑀧𑀁 𑀲𑀗𑁆𑀔𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀲𑁆𑀲𑁄 𑀯𑁂𑀤𑀦𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀣 𑀯𑀸 ‘‘𑀬𑀸 𑀪𑀕𑀯𑀢𑀸 ‘𑀢𑀺𑀲𑁆𑀲𑁄 𑀯𑁂𑀤𑀦𑀸’𑀢𑀺 𑀯𑀼𑀢𑁆𑀢𑀸, 𑀇𑀫𑀸𑀲𑀫𑀢𑁆𑀣𑀫𑀳𑀁 ¶ 𑀢𑀻𑀡𑀻𑀢𑀺 𑀧𑀘𑁆𑀘𑁂𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁂𑀓𑀫𑀼𑀔𑀸 𑀳𑀺 𑀤𑁂𑀲𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑁂𑀦 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸𑀦𑀁. 𑀓𑁂𑀘𑀺 𑀧𑀦𑀸𑀳𑀼 ‘‘𑀢𑀻𑀡𑀻𑀢𑀺 𑀅𑀥𑀺𑀓𑀧𑀤𑀫𑀺𑀤’’𑀦𑁆𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑁂𑀢𑁆𑀣 ‘‘𑀢𑀺𑀲𑁆𑀲𑁄 𑀯𑁂𑀤𑀦𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀢𑀺𑀡𑁆𑀡𑀫𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀢𑀻𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀢𑀻𑀲𑀼? 𑀢𑀻𑀲𑀼 𑀯𑁂𑀤𑀦𑀸𑀲𑀼. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀢𑀬𑁄 𑀧𑀜𑁆𑀳𑀸, 𑀢𑀬𑁄 𑀉𑀤𑁆𑀤𑁂𑀲𑀸, 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 ¶ , 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀏𑀢𑁆𑀣 𑀘 ‘‘𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯) 𑀯𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑀸. 𑁋

‘‘𑀬𑁄 ¶ 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄’’𑀢𑀺. (𑀇𑀢𑀺𑀯𑀼. 𑁫𑁩) 𑁋

𑀏𑀯𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀦𑀼𑀲𑀸𑀭𑁂𑀦 𑀯𑀸 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀪𑀸𑀯𑀤𑀲𑁆𑀲𑀦𑁂𑀦 𑀲𑀼𑀔𑀲𑀜𑁆𑀜𑀁 𑀧𑀳𑀸𑀬 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺. (𑀥. 𑀧. 𑁨𑁭𑁮);

𑀘𑀢𑁆𑀢𑀸𑀭𑀺 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀏𑀯𑀁 𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀘𑀢𑁆𑀢𑀸𑀭𑀺 𑀦𑀸𑀫 𑀓𑀺𑀦𑁆𑀢𑀺? 𑀢𑀢𑁆𑀣 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀩𑁆𑀬𑀸𑀓𑀭𑀡𑀧𑀓𑁆𑀔𑁂 𑀓𑀢𑁆𑀣𑀘𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀣𑀸𑀳 𑁋

‘‘𑀘𑀢𑀽𑀲𑀼 ¶ , 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀘𑀢𑀽𑀲𑀼? 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀓𑀢𑁆𑀣𑀘𑀺 𑀬𑁂𑀲𑀼 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺. 𑀬𑀣𑀸𑀳 𑀓𑀚𑀗𑁆𑀕𑀮𑀸 𑀪𑀺𑀓𑁆𑀔𑀼𑀦𑀻 𑁋

‘‘𑀘𑀢𑀽𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀢𑁆𑀢𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 ¶ 𑀳𑁄𑀢𑀺. 𑀓𑀢𑀫𑁂𑀲𑀼 𑀘𑀢𑀽𑀲𑀼? 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀘𑀢𑁆𑀢𑀸𑀭𑁄 𑀧𑀜𑁆𑀳𑀸 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁮).

𑀇𑀥 ¶ 𑀧𑀦 𑀬𑁂𑀲𑀁 𑀘𑀢𑀼𑀦𑁆𑀦𑀁 𑀅𑀦𑀼𑀩𑁄𑀥𑀧𑁆𑀧𑀝𑀺𑀯𑁂𑀥𑀢𑁄 𑀪𑀯𑀢𑀡𑁆𑀳𑀸𑀙𑁂𑀤𑁄 𑀳𑁄𑀢𑀺, 𑀬𑀲𑁆𑀫𑀸 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀬𑀲𑁆𑀫𑀸 𑀯𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀩𑁆𑀬𑀸𑀓𑀢𑀁 𑀲𑀼𑀩𑁆𑀬𑀸𑀓𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀘𑀢𑁆𑀢𑀸𑀭𑀻𑀢𑀺 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀅𑀭𑀺𑀬𑀸𑀦𑀺 𑀲𑀘𑁆𑀘𑀸𑀦𑀺, 𑀅𑀯𑀺𑀢𑀣𑀸𑀦𑀺 𑀅𑀯𑀺𑀲𑀁𑀯𑀸𑀤𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁭).

𑀬𑀲𑁆𑀫𑀸 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀅𑀭𑀡𑀻𑀬𑀢𑁄 𑀅𑀪𑀺𑀕𑀫𑀦𑀻𑀬𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀯𑀸𑀬𑀫𑀺𑀢𑀩𑁆𑀩𑀝𑁆𑀞𑀸𑀦𑀲𑀜𑁆𑀜𑀺𑀢𑁂 𑀅𑀬𑁂 𑀯𑀸 𑀇𑀭𑀺𑀬𑀦𑀢𑁄, 𑀅𑀦𑀬𑁂 𑀯𑀸 𑀦 𑀇𑀭𑀺𑀬𑀦𑀢𑁄, 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀅𑀭𑀺𑀬𑀥𑀫𑁆𑀫𑀲𑀫𑀸𑀬𑁄𑀕𑀢𑁄 𑀯𑀸 𑀅𑀭𑀺𑀬𑀲𑀫𑁆𑀫𑀢𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸 𑀏𑀢𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸𑀧𑀺 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀺…𑀧𑁂… 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀭𑀺𑀬𑀸 𑀇𑀫𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺.

𑀅𑀧𑀺𑀘 𑀅𑀭𑀺𑀬𑀲𑁆𑀲 𑀪𑀕𑀯𑀢𑁄 𑀲𑀘𑁆𑀘𑀸𑀦𑀻𑀢𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀭𑀺𑀬𑁄, 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁮).

𑀅𑀣 𑀯𑀸 𑀏𑀢𑁂𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀭𑀺𑀬𑀪𑀸𑀯𑀲𑀺𑀤𑁆𑀥𑀺𑀢𑁄𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋

‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀬𑀣𑀸𑀪𑀽𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁩).

𑀅𑀬𑀫𑁂𑀢𑁂𑀲𑀁 𑀧𑀤𑀢𑁆𑀣𑁄. 𑀏𑀢𑁂𑀲𑀁 𑀧𑀦 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀼𑀩𑁄𑀥𑀧𑁆𑀧𑀝𑀺𑀯𑁂𑀥𑀢𑁄 𑀪𑀯𑀢𑀡𑁆𑀳𑀸𑀙𑁂𑀤𑁄 ¶ 𑀳𑁄𑀢𑀺. 𑀬𑀣𑀸𑀳 𑁋

‘‘𑀢𑀬𑀺𑀤𑀁 ¶ , 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁧).

𑀧𑀜𑁆𑀘 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀧𑀜𑁆𑀘 𑀦𑀸𑀫 𑀓𑀺𑀦𑁆𑀢𑀺? 𑀣𑁂𑀭𑁄 𑀧𑀜𑁆𑀘𑀸𑀢𑀺 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 ‘‘𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀉𑀧𑀸𑀤𑀸𑀦𑀚𑀦𑀺𑀢𑀸 𑀉𑀧𑀸𑀤𑀸𑀦𑀚𑀦𑀓𑀸 𑀯𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀜𑁆𑀘 𑀲𑀸𑀲𑀯𑀸 𑀉𑀧𑀸𑀤𑀸𑀦𑀺𑀬𑀸, 𑀏𑀢𑁂𑀲𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀩𑁆𑀩𑀦𑀬𑁂𑀦𑁂𑀯 𑀘𑁂𑀢𑁆𑀣 ‘‘𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀧𑀜𑁆𑀘𑀦𑁆𑀦𑀫𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀧𑀜𑁆𑀘𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀧𑀜𑁆𑀘𑀲𑀼? 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀧𑀜𑁆𑀘 𑀧𑀜𑁆𑀳𑀸, 𑀧𑀜𑁆𑀘 𑀉𑀤𑁆𑀤𑁂𑀲𑀸 ¶ , 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀏𑀢𑁆𑀣 𑀘 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀫𑁆𑀫𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀸𑀫𑀢𑀁 𑀮𑀤𑁆𑀥𑀸 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀩𑁆𑀩𑀸𑀦𑀸𑀫𑀢𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸𑀳 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀙 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀏𑀯𑀁 𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 ‘‘𑀙 𑀦𑀸𑀫 𑀓𑀺’’𑀦𑁆𑀢𑀺? 𑀣𑁂𑀭𑁄 𑀙𑀇𑀢𑀺 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 ‘𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀙𑀇𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀅𑀚𑁆𑀛𑀢𑁆𑀢𑁂 𑀦𑀺𑀬𑀼𑀢𑁆𑀢𑀸𑀦𑀺, 𑀅𑀢𑁆𑀢𑀸𑀦𑀁 𑀯𑀸 𑀅𑀥𑀺𑀓𑀢𑁆𑀯𑀸 𑀧𑀯𑀢𑁆𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺. 𑀆𑀬𑀢𑀦𑀢𑁄, 𑀆𑀬𑀲𑁆𑀲 𑀯𑀸 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 ¶ 𑀦𑀬𑀦𑀢𑁄 𑀆𑀬𑀢𑀦𑀸𑀦𑀺, 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀩𑁆𑀩𑀦𑀬𑁂𑀦 𑀘𑁂𑀢𑁆𑀣 ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀙𑀦𑁆𑀦𑀫𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀙𑀲𑀼 ¶ , 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀙𑀲𑀼? 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀆𑀬𑀢𑀦𑁂𑀲𑀼. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀙𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀙 𑀧𑀜𑁆𑀳𑀸 𑀙 𑀉𑀤𑁆𑀤𑁂𑀲𑀸 𑀙 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀏𑀢𑁆𑀣 𑀘 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, ‘‘𑀲𑀼𑀜𑁆𑀜𑁄 𑀕𑀸𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀯𑀘𑀦𑀢𑁄 𑀲𑀼𑀜𑁆𑀜𑀢𑁄 𑀧𑀼𑀩𑁆𑀩𑀼𑀴𑀓𑀫𑀭𑀻𑀘𑀺𑀓𑀸𑀤𑀻𑀦𑀺 𑀯𑀺𑀬 𑀅𑀘𑀺𑀭𑀝𑁆𑀞𑀺𑀢𑀺𑀓𑀢𑁄 𑀢𑀼𑀘𑁆𑀙𑀢𑁄 𑀯𑀜𑁆𑀘𑀦𑀢𑁄 𑀘 𑀲𑀫𑀦𑀼𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀢𑁆𑀯𑀸 𑀫𑀘𑁆𑀘𑀼𑀭𑀸𑀚𑀲𑁆𑀲 𑀅𑀤𑀲𑁆𑀲𑀦𑀁 𑀉𑀧𑁂𑀢𑀺. 𑀬𑀣𑀸𑀳 𑁋

‘‘𑀬𑀣𑀸 ¶ 𑀧𑀼𑀩𑁆𑀩𑀼𑀴𑀓𑀁 𑀧𑀲𑁆𑀲𑁂, 𑀬𑀣𑀸 𑀧𑀲𑁆𑀲𑁂 𑀫𑀭𑀻𑀘𑀺𑀓𑀁;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺. (𑀥. 𑀧. 𑁧𑁭𑁦);

𑀲𑀢𑁆𑀢 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀲𑀢𑁆𑀢 𑀦𑀸𑀫 𑀓𑀺𑀦𑁆𑀢𑀺? 𑀣𑁂𑀭𑁄 𑀓𑀺𑀜𑁆𑀘𑀸𑀧𑀺 𑀫𑀳𑀸𑀧𑀜𑁆𑀳𑀩𑁆𑀬𑀸𑀓𑀭𑀡𑁂 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀯𑀼𑀢𑁆𑀢𑀸, 𑀅𑀧𑀺𑀘 𑀔𑁄 𑀧𑀦 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀬𑀫𑁆𑀧𑀺 𑀘𑀢𑁆𑀣𑁄 𑀪𑀕𑀯𑀢𑀸 𑀅𑀦𑀼𑀫𑀢𑁄 𑀏𑀯. 𑀬𑀣𑀸𑀳 𑁋

‘‘𑀧𑀡𑁆𑀟𑀺𑀢𑀸 𑀕𑀳𑀧𑀢𑀬𑁄 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻, 𑀫𑀳𑀸𑀧𑀜𑁆𑀜𑀸 𑀕𑀳𑀧𑀢𑀬𑁄 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻, 𑀫𑀜𑁆𑀘𑁂𑀧𑀺 𑀢𑀼𑀫𑁆𑀳𑁂 𑀕𑀳𑀧𑀢𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀘𑁂𑀢𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀬𑀣𑀸 𑀢𑀁 𑀓𑀚𑀗𑁆𑀕𑀮𑀺𑀓𑀸𑀬 ¶ 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁮).

𑀢𑀸𑀬 𑀘 𑀏𑀯𑀁 𑀩𑁆𑀬𑀸𑀓𑀢𑀁 𑁋

‘‘𑀲𑀢𑁆𑀢𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀲𑀢𑁆𑀢𑀲𑀼? 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼. 𑀇𑀫𑁂𑀲𑀼 𑀔𑁄, 𑀆𑀯𑀼𑀲𑁄, 𑀲𑀢𑁆𑀢𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀲𑀢𑁆𑀢 𑀧𑀜𑁆𑀳𑀸 ¶ 𑀲𑀢𑁆𑀢 𑀉𑀤𑁆𑀤𑁂𑀲𑀸 𑀲𑀢𑁆𑀢 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁮).

𑀏𑀯𑀫𑀬𑀫𑀢𑁆𑀣𑁄 𑀪𑀕𑀯𑀢𑀸 𑀅𑀦𑀼𑀫𑀢𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀢𑁆𑀢𑀸𑀢𑀺 𑀊𑀦𑀸𑀥𑀺𑀓𑀦𑀺𑀯𑀸𑀭𑀡𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀩𑁄𑀚𑁆𑀛𑀗𑁆𑀕𑀸𑀢𑀺 𑀲𑀢𑀺𑀆𑀤𑀻𑀦𑀁 𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀏𑀢𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀺- 𑀅𑀦𑁂𑀓𑀼𑀧𑀤𑁆𑀤𑀯𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑁆𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀼𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀩𑁄𑀥𑀺, 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 ¶ 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀯𑀸 𑀏𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄𑀧𑀺 𑀩𑁄𑀥𑀺. 𑀇𑀢𑀺 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑀪𑀽𑀢𑀢𑁆𑀢𑀸 𑀩𑁄𑀚𑁆𑀛𑀗𑁆𑀕𑀸 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀺 𑀯𑀺𑀬, 𑀢𑀲𑁆𑀲 𑀯𑀸 𑀩𑁄𑀥𑀻𑀢𑀺 𑀮𑀤𑁆𑀥𑀯𑁄𑀳𑀸𑀭𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀗𑁆𑀕𑀪𑀽𑀢𑀢𑁆𑀢𑀸𑀧𑀺 𑀩𑁄𑀚𑁆𑀛𑀗𑁆𑀕𑀸 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬.

𑀅𑀧𑀺𑀘 ‘‘𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀧𑀝𑀺. 𑀫. 𑁨.𑁧𑁭) 𑀇𑀫𑀺𑀦𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀩𑁄𑀚𑁆𑀛𑀗𑁆𑀕𑀸𑀦𑀁 𑀩𑁄𑀚𑁆𑀛𑀗𑁆𑀕𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀤𑀺𑀕𑀼𑀡𑀧𑀝𑀺𑀮𑀸𑀪𑀻 𑀳𑁄𑀢𑀺, 𑀢𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀺 ¶ . 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁦𑁧).

𑀅𑀝𑁆𑀞 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀏𑀯𑀁 𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀅𑀝𑁆𑀞 𑀦𑀸𑀫 𑀓𑀺𑀦𑁆𑀢𑀺? 𑀣𑁂𑀭𑁄 𑀓𑀺𑀜𑁆𑀘𑀸𑀧𑀺 𑀫𑀳𑀸𑀧𑀜𑁆𑀳𑀩𑁆𑀬𑀸𑀓𑀭𑀡𑁂 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀅𑀧𑀺𑀘 𑀔𑁄 𑀧𑀦 𑀬𑁂𑀲𑀼 𑀥𑀫𑁆𑀫𑁂𑀲𑀼 ¶ 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀸𑀦𑀺 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀬𑀲𑁆𑀫𑀸 𑀅𑀝𑁆𑀞𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑁄 𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺, 𑀅𑀝𑁆𑀞𑀗𑁆𑀕𑀫𑀢𑁆𑀢𑀫𑁂𑀯 𑀢𑀼 𑀫𑀕𑁆𑀕𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀪𑀕𑀯𑀢𑀸𑀧𑀺 𑀘𑀸𑀬𑀫𑀢𑁆𑀣𑁄 𑀤𑁂𑀲𑀦𑀸𑀦𑀬𑁄 𑀘 𑀅𑀦𑀼𑀫𑀢𑁄 𑀏𑀯. 𑀬𑀣𑀸𑀳 𑁋

‘‘𑀧𑀡𑁆𑀟𑀺𑀢𑀸 𑀕𑀳𑀧𑀢𑀬𑁄 𑀓𑀚𑀗𑁆𑀕𑀮𑀺𑀓𑀸 𑀪𑀺𑀓𑁆𑀔𑀼𑀦𑀻…𑀧𑁂… 𑀅𑀳𑀫𑁆𑀧𑀺 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀬𑀣𑀸 𑀢𑀁 𑀓𑀚𑀗𑁆𑀕𑀮𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁮).

𑀢𑀸𑀬 ¶ 𑀘 𑀏𑀯𑀁 𑀩𑁆𑀬𑀸𑀓𑀢𑀁 𑁋

‘‘𑀅𑀝𑁆𑀞𑀲𑀼, 𑀆𑀯𑀼𑀲𑁄, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀅𑀝𑁆𑀞 𑀧𑀜𑁆𑀳𑀸, 𑀅𑀝𑁆𑀞 𑀉𑀤𑁆𑀤𑁂𑀲𑀸, 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁮).

𑀏𑀯𑀫𑀬𑀁 𑀅𑀢𑁆𑀣𑁄 𑀘 𑀤𑁂𑀲𑀦𑀸𑀦𑀬𑁄 𑀘 𑀪𑀕𑀯𑀢𑀸 𑀅𑀦𑀼𑀫𑀢𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀅𑀭𑀺𑀬𑁄𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀅𑀪𑀺𑀕𑀦𑁆𑀢𑀩𑁆𑀩𑁄, 𑀅𑀧𑀺𑀘 𑀆𑀭𑀓𑀸 𑀓𑀺𑀮𑁂𑀲𑁂𑀳𑀺 𑀯𑀢𑁆𑀢𑀦𑀢𑁄, 𑀅𑀭𑀺𑀬𑀪𑀸𑀯𑀓𑀭𑀡𑀢𑁄, 𑀅𑀭𑀺𑀬𑀨𑀮𑀧𑀝𑀺𑀮𑀸𑀪𑀢𑁄 𑀘𑀸𑀧𑀺 𑀅𑀭𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀅𑀝𑁆𑀞𑀗𑁆𑀕𑀺𑀓𑁄. 𑀲𑁆𑀯𑀸𑀬𑀁 𑀘𑀢𑀼𑀭𑀗𑁆𑀕𑀺𑀓𑀸 𑀯𑀺𑀬 𑀲𑁂𑀦𑀸, 𑀧𑀜𑁆𑀘𑀗𑁆𑀕𑀺𑀓𑀁 𑀯𑀺𑀬 𑀘 𑀢𑀽𑀭𑀺𑀬𑀁 𑀅𑀗𑁆𑀕𑀯𑀺𑀦𑀺𑀩𑁆𑀪𑁄𑀕𑁂𑀦 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀢𑁄 𑀅𑀗𑁆𑀕𑀫𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀸𑀦𑀁, 𑀲𑀬𑀁 𑀯𑀸 𑀫𑀕𑁆𑀕𑀢𑀺, 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀯𑀸 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄.

𑀏𑀯𑀫𑀝𑁆𑀞𑀧𑁆𑀧𑀪𑁂𑀤𑀜𑁆𑀘𑀺𑀫𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀪𑀺𑀓𑁆𑀔𑀼 ¶ 𑀅𑀯𑀺𑀚𑁆𑀚𑀁 𑀪𑀺𑀦𑁆𑀤𑀢𑀺, 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑀺, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀸𑀮𑀺𑀲𑀽𑀓𑀁 𑀯𑀸 𑀬𑀯𑀲𑀽𑀓𑀁 𑀯𑀸 𑀲𑀫𑁆𑀫𑀸 𑀧𑀡𑀺𑀳𑀺𑀢𑀁 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀅𑀓𑁆𑀓𑀦𑁆𑀢𑀁 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀪𑁂𑀘𑁆𑀙𑀢𑀺, 𑀮𑁄𑀳𑀺𑀢𑀁 𑀯𑀸 𑀉𑀧𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀫𑁆𑀫𑀸 𑀧𑀡𑀺𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀲𑀽𑀓𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂 ¶ , 𑀲𑁄 𑀯𑀢 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀧𑀡𑀺𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸 𑀧𑀡𑀺𑀳𑀺𑀢𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀅𑀯𑀺𑀚𑁆𑀚𑀁 𑀪𑁂𑀘𑁆𑀙𑀢𑀺, 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁧.𑁪𑁨).

𑀦𑀯 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀦𑀯 𑀦𑀸𑀫 𑀓𑀺𑀦𑁆𑀢𑀺? 𑀣𑁂𑀭𑁄 𑀦𑀯𑀇𑀢𑀺 𑀧𑀘𑁆𑀘𑀦𑀼𑀪𑀸𑀲𑀺𑀢𑁆𑀯𑀸 ‘‘𑀲𑀢𑁆𑀢𑀸𑀯𑀸𑀲𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀦𑀯𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀲𑀢𑁆𑀢𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀝𑀺𑀩𑀤𑁆𑀥𑁂 𑀔𑀦𑁆𑀥𑁂 ¶ 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀧𑀸𑀡𑀺𑀦𑁄 𑀧𑀡𑁆𑀡𑀢𑁆𑀢𑀺 𑀯𑀸. 𑀆𑀯𑀸𑀲𑀸𑀢𑀺 𑀆𑀯𑀲𑀦𑁆𑀢𑀺 𑀏𑀢𑁂𑀲𑀽𑀢𑀺 𑀆𑀯𑀸𑀲𑀸, 𑀲𑀢𑁆𑀢𑀸𑀦𑀁 𑀆𑀯𑀸𑀲𑀸 𑀲𑀢𑁆𑀢𑀸𑀯𑀸𑀲𑀸. 𑀏𑀲 𑀤𑁂𑀲𑀦𑀸𑀫𑀕𑁆𑀕𑁄, 𑀅𑀢𑁆𑀣𑀢𑁄 𑀧𑀦 𑀦𑀯𑀯𑀺𑀥𑀸𑀦𑀁 𑀲𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋

‘‘𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸, 𑀅𑀬𑀁 𑀧𑀞𑀫𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺, 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀅𑀬𑀁 𑀤𑀼𑀢𑀺𑀬𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺, 𑀤𑁂𑀯𑀸 𑀆𑀪𑀲𑁆𑀲𑀭𑀸, 𑀅𑀬𑀁 𑀢𑀢𑀺𑀬𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺, 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸, 𑀅𑀬𑀁 𑀘𑀢𑀼𑀢𑁆𑀣𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸 𑀅𑀲𑀜𑁆𑀜𑀺𑀦𑁄 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺, 𑀤𑁂𑀯𑀸 𑀅𑀲𑀜𑁆𑀜𑀲𑀢𑁆𑀢𑀸, 𑀅𑀬𑀁 𑀧𑀜𑁆𑀘𑀫𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸 ¶ , 𑀅𑀬𑀁 𑀙𑀝𑁆𑀞𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸, 𑀅𑀬𑀁 𑀲𑀢𑁆𑀢𑀫𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸, 𑀅𑀬𑀁 𑀅𑀝𑁆𑀞𑀫𑁄 𑀲𑀢𑁆𑀢𑀸𑀯𑀸𑀲𑁄. 𑀲𑀦𑁆𑀢𑀸𑀯𑀼𑀲𑁄, 𑀲𑀢𑁆𑀢𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸, 𑀅𑀬𑀁 𑀦𑀯𑀫𑁄 𑀲𑀢𑁆𑀢𑀸𑀯𑀸𑀲𑁄’’𑀢𑀺 (𑀤𑀻. 𑀦𑀺. 𑁩.𑁩𑁪𑁧).

𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑁂𑀢𑁆𑀣 ‘‘𑀦𑀯 𑀲𑀢𑁆𑀢𑀸𑀯𑀸𑀲𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀦𑀯𑀦𑁆𑀦𑀫𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀦𑀯𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀦𑀯𑀲𑀼? 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀦𑀯 𑀧𑀜𑁆𑀳𑀸 ¶ , 𑀦𑀯 𑀉𑀤𑁆𑀤𑁂𑀲𑀸, 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀏𑀢𑁆𑀣 ¶ 𑀘 ‘‘𑀦𑀯 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸. 𑀓𑀢𑀫𑁂 𑀦𑀯? 𑀦𑀯 𑀲𑀢𑁆𑀢𑀸𑀯𑀸𑀲𑀸’’𑀢𑀺 (𑀤𑀻. 𑀦𑀺. 𑁩.𑁩𑁫𑁯) 𑀯𑀘𑀦𑀢𑁄 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀜𑀸𑀢𑀧𑀭𑀺𑀜𑁆𑀜𑀸𑀬 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀤𑀲𑁆𑀲𑀦𑀁 𑀧𑀳𑀸𑀬 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀫𑀢𑁆𑀢𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑁂𑀦 𑀯𑀺𑀭𑀚𑁆𑀚𑀫𑀸𑀦𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑁂𑀦 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀲𑀫𑁆𑀫𑀢𑁆𑀢𑀫𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀦𑀯𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀦𑀯𑀲𑀼? 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀽’’𑀢𑀺 (𑀅. 𑀦𑀺. 𑁧𑁦.𑁨𑁭).

𑀤𑀲 𑀦𑀸𑀫 𑀓𑀺𑀦𑁆𑀢𑀺𑀧𑀜𑁆𑀳𑀯𑀡𑁆𑀡𑀦𑀸

𑀏𑀯𑀁 𑀇𑀫𑀺𑀦𑀸𑀧𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑁄 𑀲𑀢𑁆𑀣𑀸 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀤𑀲 𑀦𑀸𑀫 𑀓𑀺𑀦𑁆𑀢𑀺? 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀇𑀢𑁄 𑀅𑀜𑁆𑀜𑀢𑁆𑀭 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀯𑀼𑀢𑁆𑀢𑀸. 𑀬𑀣𑀸𑀳 𑁋

‘‘𑀤𑀲𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂… 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. 𑀓𑀢𑀫𑁂𑀲𑀼 𑀤𑀲𑀲𑀼? 𑀤𑀲𑀲𑀼 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼. 𑀇𑀫𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄…𑀧𑁂. ¶ … 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺. ‘𑀤𑀲 𑀧𑀜𑁆𑀳𑀸 𑀤𑀲 𑀉𑀤𑁆𑀤𑁂𑀲𑀸 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁭).

𑀇𑀥 𑀧𑀦 𑀬𑀲𑁆𑀫𑀸 𑀅𑀬𑀫𑀸𑀬𑀲𑁆𑀫𑀸 𑀅𑀢𑁆𑀢𑀸𑀦𑀁 𑀅𑀦𑀼𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀸𑀢𑀼𑀓𑀸𑀫𑁄, 𑀬𑀲𑁆𑀫𑀸 𑀯𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀩𑁆𑀬𑀸𑀓𑀢𑀁 𑀲𑀼𑀩𑁆𑀬𑀸𑀓𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀬𑁂𑀳𑀺 𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀳𑀸𑀢𑀺 𑀧𑀯𑀼𑀘𑁆𑀘𑀢𑀺, 𑀢𑁂𑀲𑀁 𑀅𑀥𑀺𑀕𑀫𑀁 𑀤𑀻𑀧𑁂𑀦𑁆𑀢𑁄 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀳𑀸𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀬𑀢𑁄 𑀏𑀢𑁆𑀣 𑀬𑁂𑀳𑀺 𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀳𑀸𑀢𑀺 𑀧𑀯𑀼𑀘𑁆𑀘𑀢𑀺, 𑀢𑀸𑀦𑀺 𑀤𑀲𑀗𑁆𑀕𑀸𑀦𑀺 ‘‘𑀤𑀲 𑀦𑀸𑀫 𑀓𑀺’’𑀦𑁆𑀢𑀺 𑀧𑀼𑀝𑁆𑀞𑁂𑀦 𑀣𑁂𑀭𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘 𑀤𑀲 𑁋

‘‘𑀅𑀲𑁂𑀔𑁄 ¶ 𑀅𑀲𑁂𑀔𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁄 𑀳𑁄𑀢𑀻𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁂𑀔𑀸𑀬 ¶ 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑀸𑀬 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀆𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑀸𑀬 𑀲𑀫𑁆𑀫𑀸𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑀸𑀬 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧𑁧). 𑁋

𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀓𑀼𑀫𑀸𑀭𑀧𑀜𑁆𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁

𑀇𑀤𑀸𑀦𑀺 ¶ 𑀓𑀼𑀫𑀸𑀭𑀧𑀜𑁆𑀳𑀸𑀦𑀦𑁆𑀢𑀭𑀁 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀫𑀗𑁆𑀕𑀮𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁 𑀯𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀪𑀕𑀯𑀢𑀸 𑀅𑀯𑀼𑀢𑁆𑀢𑀫𑁆𑀧𑀺 𑀬𑁆𑀯𑀸𑀬𑀁 𑀲𑀭𑀡𑀕𑀫𑀦𑁂𑀳𑀺 𑀲𑀸𑀲𑀦𑁄𑀢𑀸𑀭𑁄, 𑀲𑀺𑀓𑁆𑀔𑀸𑀧𑀤𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀼𑀫𑀸𑀭𑀧𑀜𑁆𑀳𑁂𑀳𑀺 ¶ 𑀘 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀧𑁆𑀧𑀪𑁂𑀤𑀦𑀬𑁄 𑀤𑀲𑁆𑀲𑀺𑀢𑁄, 𑀲𑀩𑁆𑀩𑁄𑀧𑁂𑀲 𑀧𑀭𑀫𑀫𑀗𑁆𑀕𑀮𑀪𑀽𑀢𑁄, 𑀬𑀢𑁄 𑀫𑀗𑁆𑀕𑀮𑀢𑁆𑀣𑀺𑀓𑁂𑀦 𑀏𑀢𑁆𑀣𑁂𑀯 𑀅𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄, 𑀲𑁄 𑀘𑀲𑁆𑀲 𑀫𑀗𑁆𑀕𑀮𑀪𑀸𑀯𑁄 𑀇𑀫𑀺𑀦𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀇𑀤𑀫𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸

𑀏𑀯𑀁 ¶ 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀢𑁆𑀣𑀁 𑀅𑀬𑀁 𑀫𑀸𑀢𑀺𑀓𑀸 𑁋

‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀘𑁂𑀢𑀁 𑀯𑀢𑁆𑀯𑀸 𑀇𑀫𑀁 𑀯𑀺𑀥𑀺𑀁;

𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄.

‘‘𑀯𑀡𑁆𑀡𑀬𑀦𑁆𑀢𑁄 𑀲𑀫𑀼𑀝𑁆𑀞𑀸𑀦𑀁, 𑀯𑀢𑁆𑀯𑀸 𑀬𑀁 𑀬𑀢𑁆𑀣 𑀫𑀗𑁆𑀕𑀮𑀁;

𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁 𑀢𑀲𑁆𑀲, 𑀫𑀗𑁆𑀕𑀮𑀢𑁆𑀢𑀁 𑀯𑀺𑀪𑀸𑀯𑀬𑁂’’𑀢𑀺.

𑀢𑀢𑁆𑀣 ‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀘𑁂𑀢𑀁 𑀯𑀢𑁆𑀯𑀸 𑀇𑀫𑀁 𑀯𑀺𑀥𑀺’’𑀦𑁆𑀢𑀺 𑀅𑀬𑀁 𑀢𑀸𑀯 𑀅𑀤𑁆𑀥𑀕𑀸𑀣𑀸 𑀬𑀤𑀺𑀤𑀁 ‘‘𑀏𑀯𑀁 𑀫𑁂 𑀲𑀼𑀢𑀁 𑀏𑀓𑀁 𑀲𑀫𑀬𑀁 𑀪𑀕𑀯𑀸…𑀧𑁂… 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻’’𑀢𑀺, 𑀇𑀤𑀁 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀇𑀤𑀜𑁆𑀳𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀲𑁄 𑀘 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄, 𑀢𑀲𑁆𑀫𑀸 𑀦𑁂𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀬𑀢𑁄 𑀯𑀢𑁆𑀢𑀩𑁆𑀩𑀫𑁂𑀢𑀁 ‘‘𑀇𑀤𑀁 𑀯𑀘𑀦𑀁 𑀓𑁂𑀦 𑀯𑀼𑀢𑁆𑀢𑀁 ¶ , 𑀓𑀤𑀸, 𑀓𑀲𑁆𑀫𑀸 𑀘 𑀯𑀼𑀢𑁆𑀢’’𑀦𑁆𑀢𑀺. 𑀯𑀼𑀘𑁆𑀘𑀢𑁂 𑁋 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀘𑁂𑀲𑀸 𑀲𑀩𑁆𑀩𑀲𑀼𑀢𑁆𑀢𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀫𑀸𑀤𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀺𑀦𑀬𑀦𑀸, 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁂, 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀲𑀗𑁆𑀖𑀢𑁆𑀣𑁂𑀭𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 ¶ 𑀪𑀕𑀯𑀢𑀺 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦, 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫 ‘𑀇𑀤𑀁 𑀯𑁄 𑀓𑀧𑁆𑀧𑀢𑀺 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺, 𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁭; 𑀤𑀻. 𑀦𑀺. 𑁨.𑁨𑁩𑁨) 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀧𑀸𑀧𑀪𑀺𑀓𑁆𑀔𑀽 ‘𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁. 𑀬𑀸𑀯 𑀘 𑀥𑀫𑁆𑀫𑀯𑀺𑀦𑀬𑁄 𑀢𑀺𑀝𑁆𑀞𑀢𑀺, 𑀢𑀸𑀯 𑀅𑀦𑀢𑀻𑀢𑀲𑀢𑁆𑀣𑀼𑀓𑀫𑁂𑀯 𑀧𑀸𑀯𑀘𑀦𑀁 𑀳𑁄𑀢𑀺. 𑀬𑀣𑀸𑀳 𑀪𑀕𑀯𑀸 𑁋

‘‘𑀬𑁄 ¶ 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬).

‘‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀁, 𑀬𑀣𑀬𑀺𑀤𑀁 𑀲𑀸𑀲𑀦𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁’’.

𑀬𑀜𑁆𑀘𑀸𑀳𑀁 𑀪𑀕𑀯𑀢𑀸 𑁋

‘‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁, 𑀓𑀲𑁆𑀲𑀧, 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’’𑀢𑀺 𑀯𑀢𑁆𑀯𑀸 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀘𑁂𑀯 𑁋

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺, 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑁋

𑀏𑀯𑀫𑀸𑀤𑀺𑀦𑀸 ¶ 𑀦𑀬𑁂𑀦 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄, 𑀢𑀲𑁆𑀲 𑀫𑁂 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀺? ‘‘𑀦𑀦𑀼 𑀫𑀁 𑀪𑀕𑀯𑀸 𑀭𑀸𑀚𑀸 𑀯𑀺𑀬 𑀲𑀓𑀓𑀯𑀘𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑁂𑀦 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀁 𑀧𑀼𑀢𑁆𑀢𑀁 ‘𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄 𑀫𑁂 𑀅𑀬𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀫𑀦𑁆𑀢𑁆𑀯𑀸 𑀇𑀫𑀺𑀦𑀸 𑀅𑀲𑀸𑀥𑀸𑀭𑀡𑁂𑀦 𑀅𑀦𑀼𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀳𑁂𑀲𑀻’’𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 ¶ 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺? 𑀬𑀣𑀸𑀳 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄, 𑀲𑀫𑀬𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁩𑁧; 𑀘𑀽𑀴𑀯. 𑁪𑁩𑁭) 𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀢𑀢𑁄 𑀧𑀭𑀁 𑀆𑀳 𑁋

‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺, 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺, 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀪𑀺𑀓𑁆𑀔𑀽 ¶ 𑀆𑀳𑀁𑀲𑀼 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽’’𑀢𑀺. 𑀣𑁂𑀭𑁄 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑁂 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀪𑀺𑀓𑁆𑀔𑀽 𑀅𑀦𑁂𑀓𑀲𑀢𑁂 𑀅𑀦𑁂𑀓𑀲𑀳𑀲𑁆𑀲𑁂 𑀘 𑀯𑀚𑁆𑀚𑁂𑀢𑁆𑀯𑀸 𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂 𑀫𑀳𑀸𑀦𑀼𑀪𑀸𑀯𑁂 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀢𑀸 𑀏𑀢𑀤𑀕𑁆𑀕𑀁 𑀆𑀭𑁄𑀧𑀺𑀢𑁂 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑁂 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯 𑀏𑀓𑀽𑀦𑀧𑀜𑁆𑀘𑀲𑀢𑁂 𑀧𑀭𑀺𑀕𑁆𑀕𑀳𑁂𑀲𑀺. 𑀬𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀓𑁂𑀦𑀽𑀦𑀧𑀜𑁆𑀘𑀅𑀭𑀳𑀦𑁆𑀢𑀲𑀢𑀸𑀦𑀺 𑀉𑀘𑁆𑀘𑀺𑀦𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀓𑀺𑀲𑁆𑀲 𑀧𑀦 𑀣𑁂𑀭𑁄 𑀏𑀓𑁂𑀦𑀽𑀦𑀫𑀓𑀸𑀲𑀻𑀢𑀺? 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀑𑀓𑀸𑀲𑀓𑀭𑀡𑀢𑁆𑀣𑀁. 𑀢𑁂𑀦 𑀳𑀸𑀬𑀲𑁆𑀫𑀢𑀸 𑀲𑀳𑀸𑀧𑀺 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸 𑀥𑀫𑁆𑀫𑀲𑀗𑁆𑀕𑀻𑀢𑀺 𑀓𑀸𑀢𑀼𑀁. 𑀲𑁄 𑀳𑀸𑀬𑀲𑁆𑀫𑀸 𑀲𑁂𑀔𑁄 𑀲𑀓𑀭𑀡𑀻𑀬𑁄, 𑀢𑀲𑁆𑀫𑀸 𑀲𑀳 𑀦 𑀲𑀓𑁆𑀓𑀸, 𑀬𑀲𑁆𑀫𑀸 𑀧𑀦𑀲𑁆𑀲 𑀓𑀺𑀜𑁆𑀘𑀺 𑀤𑀲𑀩𑀮𑀤𑁂𑀲𑀺𑀢𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑀁 𑀪𑀕𑀯𑀢𑁄 𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸. 𑀬𑀤𑀺 𑀏𑀯𑀁 𑀲𑁂𑀔𑁄𑀧𑀺 𑀲𑀫𑀸𑀦𑁄 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀩𑀳𑀽𑀓𑀸𑀭𑀢𑁆𑀢𑀸 𑀣𑁂𑀭𑁂𑀦 𑀉𑀘𑁆𑀘𑀺𑀦𑀺𑀢𑀩𑁆𑀩𑁄 𑀅𑀲𑁆𑀲, 𑀅𑀣 𑀓𑀲𑁆𑀫𑀸 𑀦 𑀉𑀘𑁆𑀘𑀺𑀦𑀺𑀢𑁄𑀢𑀺? 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁄 ¶ . 𑀣𑁂𑀭𑁄 𑀳𑀺 𑀆𑀬𑀲𑁆𑀫𑀦𑁆𑀢𑁂 ¶ 𑀆𑀦𑀦𑁆𑀤𑁂 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑁄 𑀅𑀳𑁄𑀲𑀺. 𑀢𑀣𑀸 𑀳𑀺 𑀦𑀁 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑁂𑀲𑀼 𑀚𑀸𑀢𑁂𑀲𑀼𑀧𑀺 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀓𑀼𑀫𑀸𑀭𑀓𑀯𑀸𑀤𑁂𑀦 𑀑𑀯𑀤𑀢𑀺. 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀘𑀸𑀬𑀁 𑀆𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼 𑀧𑀼𑀢𑁆𑀢𑁄, 𑀢𑀢𑁆𑀭 𑀪𑀺𑀓𑁆𑀔𑀽 𑀙𑀦𑁆𑀤𑀸𑀕𑀫𑀦𑀁 𑀯𑀺𑀬 𑀫𑀜𑁆𑀜𑀫𑀸𑀦𑀸 ‘‘𑀩𑀳𑀽 𑀅𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂 𑀪𑀺𑀓𑁆𑀔𑀽 𑀞𑀧𑁂𑀢𑁆𑀯𑀸 𑀆𑀦𑀦𑁆𑀤𑀁 𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀁 𑀣𑁂𑀭𑁄 𑀉𑀘𑁆𑀘𑀺𑀦𑀻’’𑀢𑀺 𑀉𑀧𑀯𑀤𑁂𑀬𑁆𑀬𑀼𑀁. 𑀢𑀁 𑀧𑀭𑀽𑀧𑀯𑀸𑀤𑀁 𑀧𑀭𑀺𑀯𑀺𑀯𑀚𑁆𑀚𑁂𑀦𑁆𑀢𑁄 ‘‘𑀆𑀦𑀦𑁆𑀤𑀁 𑀯𑀺𑀦𑀸 𑀲𑀗𑁆𑀕𑀻𑀢𑀺 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀦𑀼𑀫𑀢𑀺𑀬𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀦 𑀉𑀘𑁆𑀘𑀺𑀦𑀺.

𑀅𑀣 𑀲𑀬𑀫𑁂𑀯 𑀪𑀺𑀓𑁆𑀔𑀽 𑀆𑀦𑀦𑁆𑀤𑀲𑁆𑀲𑀢𑁆𑀣𑀸𑀬 𑀣𑁂𑀭𑀁 𑀬𑀸𑀘𑀺𑀁𑀲𑀼. 𑀬𑀣𑀸𑀳 𑁋

‘‘𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀺𑀜𑁆𑀘𑀸𑀧𑀺 𑀲𑁂𑀔𑁄, 𑀅𑀪𑀩𑁆𑀩𑁄 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁, 𑀩𑀳𑀼 𑀘𑀸𑀦𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄, 𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 ¶ 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀏𑀯𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀉𑀘𑁆𑀘𑀺𑀦𑀺𑀢𑁂𑀦 𑀢𑁂𑀦𑀸𑀬𑀲𑁆𑀫𑀢𑀸 𑀲𑀤𑁆𑀥𑀺𑀁 𑀧𑀜𑁆𑀘𑀣𑁂𑀭𑀲𑀢𑀸𑀦𑀺 𑀅𑀳𑁂𑀲𑀼𑀁.

𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀫𑀬𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 ‘‘𑀭𑀸𑀚𑀕𑀳𑀁 𑀔𑁄 𑀫𑀳𑀸𑀕𑁄𑀘𑀭𑀁 𑀧𑀳𑀽𑀢𑀲𑁂𑀦𑀸𑀲𑀦𑀁, 𑀬𑀁𑀦𑀽𑀦 𑀫𑀬𑀁 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀦𑀜𑁆𑀜𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺? 𑀇𑀤𑀁 𑀅𑀫𑁆𑀳𑀸𑀓𑀁 𑀣𑀸𑀯𑀭𑀓𑀫𑁆𑀫𑀁, 𑀓𑁄𑀘𑀺 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 ¶ 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑁄𑀝𑁂𑀬𑁆𑀬𑀸𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑀸𑀯𑁂𑀲𑀺. 𑀢𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁩𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀁.

𑀅𑀣 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀼 𑀲𑀢𑁆𑀢𑀲𑀼 𑀘 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀇𑀤𑀸𑀦𑀺 𑀕𑀺𑀫𑁆𑀳𑀸𑀦𑀁 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄, 𑀉𑀧𑀓𑀝𑁆𑀞𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺 𑀫𑀦𑁆𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘‘𑀭𑀸𑀚𑀕𑀳𑀁, 𑀆𑀯𑀼𑀲𑁄, 𑀕𑀘𑁆𑀙𑀸𑀫𑀸’’𑀢𑀺 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀉𑀧𑀟𑁆𑀠𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄, 𑀆𑀦𑀦𑁆𑀤𑀢𑁆𑀣𑁂𑀭𑁄 ¶ 𑀧𑀦 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀁 𑀕𑀦𑁆𑀢𑀼𑀓𑀸𑀫𑁄 𑀬𑁂𑀦 𑀲𑀸𑀯𑀢𑁆𑀣𑀺, 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀕𑀢𑀕𑀢𑀝𑁆𑀞𑀸𑀦𑁂 𑀫𑀳𑀸𑀧𑀭𑀺𑀤𑁂𑀯𑁄 𑀅𑀳𑁄𑀲𑀺, ‘‘𑀪𑀦𑁆𑀢𑁂 𑀆𑀦𑀦𑁆𑀤, 𑀓𑀼𑀳𑀺𑀁 𑀲𑀢𑁆𑀣𑀸𑀭𑀁 𑀞𑀧𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺? 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁂 𑀣𑁂𑀭𑁂 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀯𑀺𑀬 𑀫𑀳𑀸𑀧𑀭𑀺𑀤𑁂𑀯𑁄 𑀅𑀳𑁄𑀲𑀺.

𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀢𑀁 𑀫𑀳𑀸𑀚𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑀲𑀩𑀮𑁂𑀦 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀦𑀻𑀳𑀭𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀺𑀮𑀸𑀢𑀫𑀸𑀮𑀸𑀓𑀘𑀯𑀭𑀁 𑀙𑀟𑁆𑀟𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀪𑀕𑀯𑀢𑁄 𑀞𑀺𑀢𑀓𑀸𑀮𑁂 𑀓𑀭𑀡𑀻𑀬𑀁 𑀯𑀢𑁆𑀢𑀁 𑀲𑀩𑁆𑀩𑀫𑀓𑀸𑀲𑀺. 𑀅𑀣 ¶ 𑀣𑁂𑀭𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀪𑀼𑀢𑀺 𑀞𑀸𑀦𑀦𑀺𑀲𑀚𑁆𑀚𑀩𑀳𑀼𑀮𑀢𑁆𑀢𑀸 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀁 𑀓𑀸𑀬𑀁 𑀲𑀫𑀲𑁆𑀲𑀸𑀲𑁂𑀢𑀼𑀁 𑀤𑀼𑀢𑀺𑀬𑀤𑀺𑀯𑀲𑁂 𑀔𑀻𑀭𑀯𑀺𑀭𑁂𑀘𑀦𑀁 𑀧𑀺𑀯𑀺𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺, 𑀬𑀁 𑀲𑀦𑁆𑀥𑀸𑀬 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀳𑀺𑀢𑀁 𑀫𑀸𑀡𑀯𑀓𑀁 𑀏𑀢𑀤𑀯𑁄𑀘 𑁋

‘‘𑀅𑀓𑀸𑀮𑁄 𑀔𑁄, 𑀫𑀸𑀡𑀯𑀓, 𑀅𑀢𑁆𑀣𑀺 ¶ 𑀫𑁂 𑀅𑀚𑁆𑀚 𑀪𑁂𑀲𑀚𑁆𑀚𑀫𑀢𑁆𑀢𑀸 𑀧𑀻𑀢𑀸, 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’𑀢𑀺 (𑀤𑀻. 𑀦𑀺. 𑁧.𑁪𑁪𑁭).

𑀤𑀼𑀢𑀺𑀬𑀤𑀺𑀯𑀲𑁂 𑀘𑁂𑀢𑀓𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀕𑀦𑁆𑀢𑁆𑀯𑀸 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀼𑀝𑁆𑀞𑁄 𑀤𑀻𑀖𑀦𑀺𑀓𑀸𑀬𑁂 𑀲𑀼𑀪𑀲𑀼𑀢𑁆𑀢𑀁 𑀦𑀸𑀫 𑀤𑀲𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀅𑀣 𑀔𑁄 𑀣𑁂𑀭𑁄 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀭𑀸𑀚𑀕𑀳𑀁 𑀕𑀢𑁄. 𑀢𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀕𑀢𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀙𑀟𑁆𑀟𑀺𑀢𑀧𑀢𑀺𑀢𑀉𑀓𑁆𑀮𑀸𑀧𑀸 𑀅𑀳𑁂𑀲𑀼𑀁. 𑀪𑀕𑀯𑀢𑁄 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑁂 𑀘 𑀧𑀭𑀺𑀯𑁂𑀡𑁂 𑀘 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀢𑀢𑁆𑀣 𑀣𑁂𑀭𑀸 𑀪𑀕𑀯𑀢𑁄 𑀯𑀘𑀦𑀧𑀽𑀚𑀦𑀢𑁆𑀣𑀁 𑀢𑀺𑀢𑁆𑀣𑀺𑀬𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘 ‘‘𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀢𑀺𑀢𑁆𑀣𑀺𑀬𑀸 𑀳𑀺 𑀯𑀤𑁂𑀬𑁆𑀬𑀼𑀁 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀲𑀢𑁆𑀣𑀭𑀺 𑀞𑀺𑀢𑁂𑀬𑁂𑀯 𑀯𑀺𑀳𑀸𑀭𑁂 𑀧𑀝𑀺𑀚𑀕𑁆𑀕𑀺𑀁𑀲𑀼, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀟𑁆𑀟𑁂𑀲𑀼’’𑀦𑁆𑀢𑀺. 𑀢𑁂𑀲𑀁 𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘 𑀘𑀺𑀦𑁆𑀢𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 ¶ 𑀯𑀡𑁆𑀡𑀺𑀢𑀁, 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫, 𑀫𑀚𑁆𑀛𑀺𑀫𑀁 𑀫𑀸𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁮).

𑀢𑁂 𑀤𑀼𑀢𑀺𑀬𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀅𑀚𑀸𑀢𑀲𑀢𑁆𑀢𑀼 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀺, 𑀓𑁂𑀦𑀢𑁆𑀣𑁄’’𑀢𑀺 𑀧𑀯𑀸𑀭𑁂𑀲𑀺. 𑀣𑁂𑀭𑀸 𑀅𑀝𑁆𑀞𑀸𑀭𑀲𑀫𑀳𑀸𑀯𑀺𑀳𑀸𑀭𑀧𑁆𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀧𑀝𑀺𑀯𑁂𑀤𑁂𑀲𑀼𑀁. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀳𑀢𑁆𑀣𑀓𑀫𑁆𑀫𑀓𑀸𑀭𑀓𑁂 𑀫𑀦𑀼𑀲𑁆𑀲𑁂 𑀅𑀤𑀸𑀲𑀺. 𑀣𑁂𑀭𑀸 𑀧𑀞𑀫𑀁 𑀫𑀸𑀲𑀁 𑀲𑀩𑁆𑀩𑀯𑀺𑀳𑀸𑀭𑁂 𑀧𑀝𑀺𑀲𑀗𑁆𑀔𑀭𑀸𑀧𑁂𑀲𑀼𑀁.

𑀅𑀣 ¶ 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚, 𑀯𑀺𑀳𑀸𑀭𑀧𑁆𑀧𑀝𑀺𑀲𑀗𑁆𑀔𑀭𑀡𑀁 ¶ , 𑀇𑀤𑀸𑀦𑀺 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑁄𑀫𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀯𑀺𑀲𑁆𑀲𑀢𑁆𑀣𑀸 𑀓𑀭𑁄𑀣, 𑀫𑀬𑁆𑀳𑀁 𑀆𑀡𑀸𑀘𑀓𑁆𑀓𑀁, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀘𑀓𑁆𑀓𑀁 𑀳𑁄𑀢𑀼. 𑀆𑀡𑀸𑀧𑁂𑀣, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀥𑀫𑁆𑀫𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑁆𑀣 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺? ‘‘𑀯𑁂𑀪𑀸𑀭𑀧𑀩𑁆𑀩𑀢𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀓𑀸𑀢𑀼𑀁 𑀬𑀼𑀢𑁆𑀢𑀁 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄, 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼, 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑀁 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀣𑀫𑁆𑀪𑀲𑁄𑀧𑀸𑀦𑀁 𑀦𑀸𑀦𑀸𑀯𑀺𑀥𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀯𑀺𑀘𑀺𑀢𑁆𑀭𑀁 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀯𑀺𑀥𑀓𑀼𑀲𑀼𑀫𑀤𑀸𑀫𑀑𑀮𑀫𑁆𑀩𑀓𑀯𑀺𑀦𑀺𑀕𑁆𑀕𑀮𑀦𑁆𑀢𑀘𑀸𑀭𑀼𑀯𑀺𑀢𑀸𑀦𑀁 𑀭𑀢𑀦𑀯𑀺𑀘𑀺𑀢𑁆𑀭𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀫𑀺𑀯 𑀘 𑀦𑀁 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀭𑀁 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀓𑀫𑁆𑀫𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀲𑀤𑀺𑀲𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀫𑀳𑀸𑀫𑀡𑁆𑀟𑀧𑁂 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀕𑁆𑀖𑀸𑀦𑀺 𑀧𑀜𑁆𑀘𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀲𑀢𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀪𑀸𑀕𑀁 𑀦𑀺𑀲𑁆𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀣𑁂𑀭𑀸𑀲𑀦𑀁, 𑀫𑀡𑁆𑀟𑀧𑀫𑀚𑁆𑀛𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀲𑀦𑀸𑀭𑀳𑀁 𑀥𑀫𑁆𑀫𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀦𑁆𑀢𑀔𑀘𑀺𑀢𑀁 𑀘𑀺𑀢𑁆𑀢𑀩𑀻𑀚𑀦𑀺𑀜𑁆𑀘𑁂𑀢𑁆𑀣 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑀸𑀧𑁂𑀲𑀺 ‘‘𑀦𑀺𑀝𑁆𑀞𑀺𑀢𑀁, 𑀪𑀦𑁆𑀢𑁂, 𑀓𑀺𑀘𑁆𑀘’’𑀦𑁆𑀢𑀺.

𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀳𑀁𑀲𑀼 ‘‘𑀲𑁆𑀯𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁄, 𑀢𑁆𑀯𑀜𑁆𑀘 𑀲𑁂𑀔𑁄 𑀲𑀓𑀭𑀡𑀻𑀬𑁄, 𑀢𑁂𑀦 𑀢𑁂 𑀦 𑀬𑀼𑀢𑁆𑀢𑀁 𑀲𑀦𑁆𑀦𑀺𑀧𑀸𑀢𑀁 𑀕𑀦𑁆𑀢𑀼𑀁, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀲𑁆𑀯𑁂 𑀲𑀦𑁆𑀦𑀺𑀧𑀸𑀢𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀲𑁂𑀔𑁄 𑀲𑀫𑀸𑀦𑁄 𑀲𑀦𑁆𑀦𑀺𑀧𑀸𑀢𑀁 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀆𑀯𑀚𑁆𑀚𑁂𑀲𑀺. 𑀤𑁆𑀯𑁂 𑀧𑀸𑀤𑀸 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀅𑀧𑁆𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 ¶ 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀘𑀗𑁆𑀓𑀫𑁂𑀦 𑀩𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀦𑀦𑀼 𑀫𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 ¶ 𑀅𑀦𑀸𑀲𑀯𑁄’𑀢𑀺 (𑀤𑀻. 𑀦𑀺. 𑁨.𑁨𑁦𑁭). 𑀩𑀼𑀤𑁆𑀥𑀸𑀦𑀜𑁆𑀘 𑀓𑀣𑀸𑀤𑁄𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀫 𑀧𑀦 𑀅𑀘𑁆𑀘𑀸𑀭𑀤𑁆𑀥𑀁 𑀯𑀻𑀭𑀺𑀬𑀁, 𑀢𑁂𑀦 𑀫𑁂 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀫𑀻’’𑀢𑀺 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀣𑁄𑀓𑀁 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀫𑀜𑁆𑀘𑀓𑁂 𑀉𑀧𑀦𑀸𑀫𑁂𑀲𑀺. 𑀤𑁆𑀯𑁂 𑀧𑀸𑀤𑀸 ¶ 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀲𑀻𑀲𑀜𑁆𑀘 𑀩𑀺𑀫𑁆𑀩𑁄𑀳𑀦𑀫𑀲𑀫𑁆𑀧𑀢𑁆𑀢𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀭𑀳𑀺𑀢𑀁 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀁. 𑀢𑁂𑀦 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀦𑀺𑀲𑀺𑀦𑁆𑀦𑁄 𑀅𑀦𑀺𑀧𑀦𑁆𑀦𑁄 𑀅𑀝𑁆𑀞𑀺𑀢𑁄 𑀅𑀘𑀗𑁆𑀓𑀫𑀦𑁆𑀢𑁄 𑀓𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀣 𑀣𑁂𑀭𑀸 𑀪𑀺𑀓𑁆𑀔𑀽 𑀤𑀼𑀢𑀺𑀬𑀤𑀺𑀯𑀲𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀜𑀸𑀧𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦 𑀕𑀢𑁄. 𑀪𑀺𑀓𑁆𑀔𑀽 𑀬𑀣𑀸𑀯𑀼𑀟𑁆𑀠𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀢𑀢𑁆𑀣 𑀓𑁂𑀳𑀺𑀘𑀺 ‘‘𑀏𑀢𑀫𑀸𑀲𑀦𑀁 𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 𑀆𑀦𑀦𑁆𑀤𑀲𑁆𑀲𑀸𑀢𑀺. ‘‘𑀆𑀦𑀦𑁆𑀤𑁄 𑀧𑀦 𑀓𑀼𑀳𑀺𑀁 𑀕𑀢𑁄’’𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀕𑀫𑀦𑀓𑀸𑀮𑁄’’𑀢𑀺. 𑀢𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀲𑀦𑁂𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀻𑀢𑀺𑀧𑀺 𑀏𑀓𑁂.

𑀏𑀯𑀁 𑀦𑀺𑀲𑀺𑀦𑁆𑀦𑁂 𑀢𑀲𑁆𑀫𑀺𑀁 𑀆𑀬𑀲𑁆𑀫𑀦𑁆𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, ‘‘𑀆𑀯𑀼𑀲𑁄, 𑀓𑀺𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫 𑀥𑀫𑁆𑀫𑀁 𑀯𑀸 𑀯𑀺𑀦𑀬𑀁 𑀯𑀸’’𑀢𑀺? 𑀪𑀺𑀓𑁆𑀔𑀽 𑀆𑀳𑀁𑀲𑀼, ‘‘𑀪𑀦𑁆𑀢𑁂 𑀫𑀳𑀸𑀓𑀲𑁆𑀲𑀧, 𑀯𑀺𑀦𑀬𑁄𑀦𑀸𑀫𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀆𑀬𑀼, 𑀯𑀺𑀦𑀬𑁂 𑀞𑀺𑀢𑁂 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀞𑀫𑀁 𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺. ‘‘𑀓𑀁 𑀥𑀼𑀭𑀁 𑀓𑀢𑁆𑀯𑀸 𑀯𑀺𑀦𑀬𑁄 𑀲𑀗𑁆𑀕𑀸𑀬𑀺𑀢𑀩𑁆𑀩𑁄’’𑀢𑀺? ‘‘𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺’’𑀦𑁆𑀢𑀺 ¶ . ‘‘𑀓𑀺𑀁 𑀆𑀦𑀦𑁆𑀤𑁄 𑀦𑀧𑁆𑀧𑀳𑁄𑀢𑀻’’𑀢𑀺? ‘‘𑀦𑁄 𑀦𑀧𑁆𑀧𑀳𑁄𑀢𑀺, 𑀅𑀧𑀺𑀘 𑀔𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀭𑀫𑀸𑀦𑁄𑀬𑁂𑀯 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’’𑀢𑀺 (𑀅. 𑀦𑀺. 𑁧.𑁨𑁨𑁮). 𑀢𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀫𑀸𑀢𑀺. 𑀢𑀢𑁄 𑀣𑁂𑀭𑁄 𑀯𑀺𑀦𑀬𑀁 𑀧𑀼𑀘𑁆𑀙𑀦𑀢𑁆𑀣𑀸𑀬 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺. 𑀉𑀧𑀸𑀮𑀺𑀢𑁆𑀣𑁂𑀭𑁄𑀧𑀺 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬 𑀲𑀫𑁆𑀫𑀦𑁆𑀦𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀆𑀬𑀲𑁆𑀫𑀸𑀧𑀺 ¶ ¶ 𑀉𑀧𑀸𑀮𑀺 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀆𑀬𑀲𑁆𑀫𑀸, 𑀉𑀧𑀸𑀮𑀺, 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸. 𑀢𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀯𑀺𑀦𑀬𑀁 𑀧𑀼𑀘𑁆𑀙𑀺, 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀩𑁆𑀩𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁 𑀲𑀦𑀺𑀤𑀸𑀦𑀁 𑀓𑀢𑁆𑀯𑀸 𑀏𑀓𑀢𑁄 𑀕𑀡𑀲𑀚𑁆𑀛𑀸𑀬𑀫𑀓𑀁𑀲𑀼. 𑀏𑀯𑀁 𑀲𑁂𑀲𑀸𑀦𑀺𑀧𑀻𑀢𑀺 𑀲𑀩𑁆𑀩𑀁 𑀯𑀺𑀦𑀬𑀝𑁆𑀞𑀓𑀣𑀸𑀬 𑀕𑀳𑁂𑀢𑀩𑁆𑀩𑀁. 𑀏𑀢𑁂𑀦 𑀦𑀬𑁂𑀦 𑀲𑀉𑀪𑀢𑁄𑀯𑀺𑀪𑀗𑁆𑀕𑀁 𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀁 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑀸 𑀑𑀭𑁄𑀳𑀺𑀢𑁆𑀯𑀸 𑀯𑀼𑀟𑁆𑀠𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺.

𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀓𑀸𑀫𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀥𑀫𑁆𑀫𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀓𑀁 𑀧𑀼𑀕𑁆𑀕𑀮𑀁 𑀥𑀼𑀭𑀁 𑀓𑀢𑁆𑀯𑀸 𑀥𑀫𑁆𑀫𑁄 𑀲𑀗𑁆𑀕𑀸𑀬𑀺𑀢𑀩𑁆𑀩𑁄’’𑀢𑀺? 𑀪𑀺𑀓𑁆𑀔𑀽 ‘‘𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺 𑀆𑀳𑀁𑀲𑀼.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀦𑀦𑁆𑀤𑀁 𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀥𑀫𑁆𑀫𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸. 𑀅𑀣 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀫𑁆𑀫𑀁 𑀧𑀼𑀘𑁆𑀙𑀺 ¶ 𑁋 ‘‘𑀩𑁆𑀭𑀳𑁆𑀫𑀚𑀸𑀮𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘‘𑀅𑀦𑁆𑀢𑀭𑀸 𑀘, 𑀪𑀦𑁆𑀢𑁂, 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀭𑀸𑀚𑀸𑀕𑀸𑀭𑀓𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺 ¶ ? ‘‘𑀲𑀼𑀧𑁆𑀧𑀺𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯𑀓’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀜𑁆𑀜𑀨𑀮𑀁; 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘‘𑀭𑀸𑀚𑀕𑀳𑁂, 𑀪𑀦𑁆𑀢𑁂, 𑀚𑀻𑀯𑀓𑀫𑁆𑀩𑀯𑀦𑁂’’𑀢𑀺. ‘‘𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺? ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 ¶ 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀸𑀫𑀜𑁆𑀜𑀨𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀧𑀼𑀘𑁆𑀙𑀺, 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀬𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀧𑀜𑁆𑀘𑀳𑀺 𑀣𑁂𑀭𑀲𑀢𑁂𑀳𑀺 𑀓𑀢𑀸 𑁋

‘‘𑀲𑀢𑁂𑀳𑀺 𑀧𑀜𑁆𑀘𑀳𑀺 𑀓𑀢𑀸, 𑀢𑁂𑀦 𑀧𑀜𑁆𑀘𑀲𑀢𑀸𑀢𑀺 𑀘;

𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀘, 𑀣𑁂𑀭𑀺𑀓𑀸𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀇𑀫𑀺𑀲𑁆𑀲𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀸 𑀯𑀢𑁆𑀢𑀫𑀸𑀦𑀸𑀬 𑀲𑀩𑁆𑀩𑀁 𑀤𑀻𑀖𑀦𑀺𑀓𑀸𑀬𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑀸𑀤𑀺𑀜𑁆𑀘 𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀔𑀼𑀤𑁆𑀤𑀓𑀦𑀺𑀓𑀸𑀬𑀁 𑀧𑀼𑀘𑁆𑀙𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀫𑀗𑁆𑀕𑀮𑀲𑀼𑀢𑁆𑀢𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀯𑀘𑀦𑀸𑀯𑀲𑀸𑀦𑁂 ‘‘𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺 𑀏𑀢𑁆𑀣 𑀦𑀺𑀤𑀸𑀦𑁂 𑀧𑀼𑀘𑁆𑀙𑀺𑀢𑁂 𑀢𑀁 𑀦𑀺𑀤𑀸𑀦𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀬𑀣𑀸 𑀘 𑀪𑀸𑀲𑀺𑀢𑀁, 𑀬𑁂𑀦 𑀘 𑀲𑀼𑀢𑀁, 𑀬𑀤𑀸 𑀘 𑀲𑀼𑀢𑀁, 𑀬𑁂𑀦 𑀘 𑀪𑀸𑀲𑀺𑀢𑀁, 𑀬𑀢𑁆𑀣 𑀘 𑀪𑀸𑀲𑀺𑀢𑀁, 𑀬𑀲𑁆𑀲 𑀘 𑀪𑀸𑀲𑀺𑀢𑀁, 𑀢𑀁 𑀲𑀩𑁆𑀩𑀁 𑀓𑀣𑁂𑀢𑀼𑀓𑀸𑀫𑁂𑀦 ‘‘𑀏𑀯𑀁 𑀪𑀸𑀲𑀺𑀢𑀁 𑀫𑀬𑀸 𑀲𑀼𑀢𑀁, 𑀏𑀓𑀁 𑀲𑀫𑀬𑀁 𑀲𑀼𑀢𑀁, 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀲𑀸𑀯𑀢𑁆𑀣𑀺𑀬𑀁 𑀪𑀸𑀲𑀺𑀢𑀁, 𑀤𑁂𑀯𑀢𑀸𑀬 𑀪𑀸𑀲𑀺𑀢’’𑀦𑁆𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂…𑀧𑁂… 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻’’𑀢𑀺. 𑀏𑀯𑀫𑀺𑀤𑀁 ¶ 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 ‘‘𑀓𑀲𑁆𑀫𑀸 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑀲𑁆𑀫𑀸 𑀅𑀬𑀫𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀦𑀺𑀤𑀸𑀦𑀁 𑀧𑀼𑀝𑁆𑀞𑁄, 𑀢𑀲𑁆𑀫𑀸𑀦𑁂𑀦 𑀢𑀁 𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀆𑀦𑀦𑁆𑀤𑀁 𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀯𑀲𑀻𑀕𑀡𑀧𑀭𑀺𑀯𑀼𑀢𑀁 𑀤𑀺𑀲𑁆𑀯𑀸 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀫𑀼𑀧𑁆𑀧𑀦𑁆𑀦𑀁 ‘‘𑀅𑀬𑀫𑀸𑀬𑀲𑁆𑀫𑀸 𑀯𑁂𑀤𑁂𑀳𑀫𑀼𑀦𑀺 𑀧𑀓𑀢𑀺𑀬𑀸𑀧𑀺 𑀲𑀓𑁆𑀬𑀓𑀼𑀮𑀫𑀦𑁆𑀯𑀬𑁄 𑀪𑀕𑀯𑀢𑁄 𑀤𑀸𑀬𑀸𑀤𑁄, 𑀪𑀕𑀯𑀢𑀸𑀧𑀺 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀏𑀢𑀤𑀕𑁆𑀕𑁂 𑀦𑀺𑀤𑁆𑀤𑀺𑀝𑁆𑀞𑁄, 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄, 𑀇𑀤𑀸𑀦𑀺 𑀫𑀜𑁆𑀜𑁂 𑀪𑀕𑀯𑀢𑁄 𑀥𑀫𑁆𑀫𑀭𑀚𑁆𑀚𑀤𑀸𑀬𑀚𑁆𑀚𑀁 𑀧𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄’’𑀢𑀺. 𑀢𑀲𑁆𑀫𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀁 𑀅𑀪𑀽𑀢𑀕𑀼𑀡𑀲𑀫𑁆𑀪𑀸𑀯𑀦𑀁 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀸𑀯𑀓𑀪𑀸𑀯𑀫𑁂𑀯 𑀤𑀻𑀧𑁂𑀢𑀼𑀁 𑀆𑀳 ‘‘𑀏𑀯𑀁 𑀫𑁂 𑀲𑀼𑀢𑀁 𑀏𑀓𑀁 𑀲𑀫𑀬𑀁 𑀪𑀕𑀯𑀸 ¶ …𑀧𑁂… 𑀅𑀚𑁆𑀛𑀪𑀸𑀲𑀻’’𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘 𑀅𑀭𑀳𑀦𑁆𑀢𑀲𑀢𑀸𑀦𑀺 ¶ 𑀅𑀦𑁂𑀓𑀸𑀦𑀺 𑀘 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺, 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀯𑀲𑁆𑀲𑀁 𑀅𑀦𑁆𑀢𑀮𑀺𑀓𑁆𑀔𑀢𑁄 𑀧𑀧𑀢𑀺, 𑀅𑀜𑁆𑀜𑀸𑀦𑀺 𑀘 𑀩𑀳𑀽𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁, 𑀩𑀳𑀽𑀦𑀜𑁆𑀘 𑀤𑁂𑀯𑀢𑀸𑀦𑀁 𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺 ‘‘𑀬𑀁 𑀅𑀫𑁆𑀳𑁂𑀳𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀇𑀤𑀸𑀦𑁂𑀯 𑀢𑀁 𑀧𑀭𑁄𑀓𑁆𑀔𑀸 𑀚𑀸𑀢’’𑀦𑁆𑀢𑀺. 𑀏𑀯𑀫𑀺𑀤𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀤𑀦𑁆𑀢𑁂𑀦𑀸𑀧𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 ‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀘𑁂𑀢𑀁 𑀯𑀢𑁆𑀯𑀸 𑀇𑀫𑀁 𑀯𑀺𑀥𑀺’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀅𑀤𑁆𑀥𑀕𑀸𑀣𑀸𑀬 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ‘‘𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄’’𑀢𑀺 𑀏𑀯𑀫𑀸𑀤𑀺𑀫𑀸𑀢𑀺𑀓𑀸𑀬 𑀲𑀗𑁆𑀕𑀳𑀺𑀢𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀘𑁆𑀘𑀢𑁂 𑁋 𑀏𑀯𑀦𑁆𑀢𑀺 ¶ 𑀅𑀬𑀁 𑀲𑀤𑁆𑀤𑁄 𑀉𑀧𑀫𑀽𑀧𑀤𑁂𑀲𑀲𑀫𑁆𑀧𑀳𑀁𑀲𑀦𑀕𑀭𑀳𑀡𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑀸𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑁂𑀲 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁫𑁩) 𑀉𑀧𑀫𑀸𑀬𑀁 𑀤𑀺𑀲𑁆𑀲𑀢𑀺. ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁨𑁨) 𑀉𑀧𑀤𑁂𑀲𑁂. ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀲𑀫𑁆𑀧𑀳𑀁𑀲𑀦𑁂. ‘‘𑀏𑀯𑀫𑁂𑀯𑀁 𑀧𑀦𑀸𑀬𑀁 𑀯𑀲𑀮𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁮𑁭) 𑀕𑀭𑀳𑀡𑁂. ‘‘𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁧) 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂. ‘‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁮) 𑀆𑀓𑀸𑀭𑁂. ‘‘𑀏𑀳𑀺 𑀢𑁆𑀯𑀁, 𑀫𑀸𑀡𑀯𑀓, 𑀬𑁂𑀦 𑀲𑀫𑀡𑁄 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙. ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺, 𑀏𑀯𑀜𑁆𑀘 𑀯𑀤𑁂𑀳𑀺 𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁫) 𑀦𑀺𑀤𑀲𑁆𑀲𑀦𑁂. ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸𑀢𑀺? 𑀅𑀓𑀼𑀲𑀮𑀸, 𑀪𑀦𑁆𑀢𑁂. 𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸𑀢𑀺? 𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂. 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 ¶ 𑀯𑀸𑀢𑀺? 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂. 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻𑀢𑀺? 𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀅𑀯𑀥𑀸𑀭𑀡𑁂. 𑀇𑀥 𑀧𑀦 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 ¶ 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁-𑀲𑀤𑁆𑀤𑁂𑀦 ¶ 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀫𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀲𑀩𑁆𑀩𑀣𑀸𑀫𑁂𑀦 𑀧𑀦 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀦𑀺𑀤𑀲𑁆𑀲𑀦𑀢𑁆𑀣𑁂𑀦 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀯𑀁 𑀲𑀼𑀢’’𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺.

𑀅𑀯𑀥𑀸𑀭𑀡𑀢𑁆𑀣𑁂𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀕𑀢𑀺𑀫𑀦𑁆𑀢𑀸𑀦𑀁, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀏𑀯𑀁 𑀪𑀕𑀯𑀢𑀸 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺 ‘‘𑀏𑀯𑀁 𑀫𑁂 𑀲𑀼𑀢𑀁, 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯, 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺𑀲𑁆𑀲 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁮𑁧) 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁮) 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀫𑀫𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀫𑀬𑀸 𑀲𑀼𑀢’’𑀦𑁆𑀢𑀺 𑀘 ‘‘𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀲𑀼𑀢𑀦𑁆𑀢𑀺 𑀅𑀬𑀁 𑀲𑀼𑀢𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘 𑀕𑀫𑀦𑀔𑁆𑀬𑀸𑀢𑀭𑀸𑀕𑀸𑀪𑀺𑀪𑀽𑀢𑀽𑀧𑀘𑀺𑀢𑀸𑀦𑀼𑀬𑁄𑀕𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀲𑁄𑀢𑀤𑁆𑀯𑀸𑀭𑀯𑀺𑀜𑁆𑀜𑀸𑀢𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑀺𑀲𑁆𑀲 ‘‘𑀲𑁂𑀦𑀸𑀬 𑀧𑀲𑀼𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀕𑀘𑁆𑀙𑀦𑁆𑀢𑁄𑀢𑀺 ¶ 𑀅𑀢𑁆𑀣𑁄. ‘‘𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀔𑁆𑀬𑀸𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁬𑁫𑁭) 𑀭𑀸𑀕𑀸𑀪𑀺𑀪𑀽𑀢𑀸 𑀭𑀸𑀕𑀸𑀪𑀺𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀔𑀼. 𑀧𑀸. 𑁭.𑁧𑁨) 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 ¶ 𑀥𑀻𑀭𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁧𑁮𑁧) 𑀛𑀸𑀦𑀸𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁪𑁧) 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁩𑁯) 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀲𑀼𑀢𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 ¶ 𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀫𑀬𑀸𑀢𑀺 𑀅𑀢𑁆𑀣𑁄, 𑀢𑀤𑀸 ‘‘𑀏𑀯𑀁 𑀫𑀬𑀸 𑀲𑀼𑀢𑀁, 𑀲𑁄𑀢𑀯𑀺𑀜𑁆𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀬𑀼𑀚𑁆𑀚𑀢𑀺. 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀫𑀫𑀸𑀢𑀺 𑀅𑀢𑁆𑀣𑁄, 𑀢𑀤𑀸 ‘‘𑀏𑀯𑀁 𑀫𑀫 𑀲𑀼𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀉𑀧𑀥𑀸𑀭𑀡’’𑀦𑁆𑀢𑀺 𑀬𑀼𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀼𑀢𑀦𑁆𑀢𑀺 𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀏𑀯𑀦𑁆𑀢𑀺 𑀲𑀯𑀦𑀸𑀤𑀺𑀘𑀺𑀢𑁆𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀪𑀸𑀯𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀅𑀢𑁆𑀢𑀦𑀺𑀤𑀲𑁆𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀦𑀺𑀤𑀲𑁆𑀲𑀦𑀁.

𑀢𑀣𑀸 𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑀲𑁆𑀲𑀦𑀁.

𑀢𑀣𑀸 𑀏𑀯𑀦𑁆𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀆𑀓𑀸𑀭𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀓𑀢𑁆𑀢𑀸𑀭𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄.

𑀢𑀣𑀸 𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄.

𑀢𑀣𑀸 𑀏𑀯𑀦𑁆𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀢𑀲𑁆𑀲 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄.

𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀲𑀘𑁆𑀙𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀲𑀼𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑀣𑀸 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄 ¶ 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺. 𑀲𑀼𑀢𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 ¶ .

𑀏𑀢𑁆𑀣 𑀘 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀺, 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁. 𑀢𑀣𑀸 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀦𑀸𑀦𑀧𑁆𑀧𑀓𑀸𑀭𑀧𑁆𑀧𑀝𑀺𑀯𑁂𑀥𑀸𑀪𑀸𑀯𑀢𑁄. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀲𑀯𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀣𑀸’’𑀢𑀺 𑀪𑀡𑀢𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀁 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀜𑁆𑀘 ¶ 𑀲𑀸𑀥𑁂𑀢𑀺, 𑀅𑀯𑀺𑀓𑁆𑀔𑁂𑀧𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀜𑁆𑀘. 𑀏𑀯𑀦𑁆𑀢𑀺 𑀘 𑀇𑀫𑀺𑀦𑀸 𑀪𑀤𑁆𑀤𑀓𑁂𑀦 𑀆𑀓𑀸𑀭𑁂𑀦 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑁄 𑀤𑀻𑀧𑁂𑀢𑀺, 𑀲𑀼𑀢𑀦𑁆𑀢𑀺 𑀲𑀯𑀦𑀬𑁄𑀕𑁂𑀦 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀢𑀣𑀸 𑀆𑀲𑀬𑀲𑀼𑀤𑁆𑀥𑀺𑀁 𑀧𑀬𑁄𑀕𑀲𑀼𑀤𑁆𑀥𑀺𑀜𑁆𑀘, 𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀁, 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀁.

𑀏𑀯𑀦𑁆𑀢𑀺 𑀘 𑀇𑀫𑀺𑀦𑀸 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀤𑀁 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀲𑁄𑀢𑀩𑁆𑀩𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀤𑀁 𑀤𑀻𑀧𑁂𑀢𑀺. 𑀏𑀯𑀦𑁆𑀢𑀺 𑀘 𑀇𑀤𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑀁 𑀯𑀘𑀦𑀁 𑀪𑀡𑀦𑁆𑀢𑁄 ‘‘𑀏𑀢𑁂 𑀫𑀬𑀸 𑀥𑀫𑁆𑀫𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀜𑀸𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀤𑀁 𑀲𑀯𑀦𑀬𑁄𑀕𑀤𑀻𑀧𑀓𑀯𑀘𑀦𑀁 𑀪𑀡𑀦𑁆𑀢𑁄 ‘‘𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸’’𑀢𑀺 𑀜𑀸𑀧𑁂𑀢𑀺. 𑀢𑀤𑀼𑀪𑀬𑁂𑀦𑀧𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄 𑀲𑀯𑀦𑁂 𑀆𑀤𑀭𑀁 𑀚𑀦𑁂𑀢𑀺.

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦𑀧𑀺 𑀯𑀘𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁, 𑀅𑀢𑀺𑀓𑁆𑀓𑀫𑀢𑀺, 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀤𑁆𑀥𑀫𑁆𑀫𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀓𑁂𑀯𑀮𑀁 𑀲𑀼𑀢𑀫𑁂𑀯𑁂𑀢𑀁 𑀫𑀬𑀸, 𑀢𑀲𑁆𑀲𑁂𑀯 𑀢𑀼 𑀪𑀕𑀯𑀢𑁄 𑀯𑀘𑀦𑀁 ¶ 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀘 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺, 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀺, 𑀚𑀺𑀦𑀯𑀘𑀦𑀁 𑀅𑀧𑁆𑀧𑁂𑀢𑀺, 𑀥𑀫𑁆𑀫𑀦𑁂𑀢𑁆𑀢𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀺.

𑀅𑀧𑀺𑀘 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀲𑁆𑀲𑀯𑀦𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸 𑀢𑀲𑁆𑀲 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀲𑁆𑀲 ¶ 𑀤𑀲𑀩𑀮𑀥𑀭𑀲𑁆𑀲 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑁄 𑀲𑀻𑀳𑀦𑀸𑀤𑀦𑀸𑀤𑀺𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀥𑀫𑁆𑀫𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀤𑀻𑀧𑀲𑁆𑀲 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑀲𑁆𑀲 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀦 𑀏𑀢𑁆𑀣 𑀅𑀢𑁆𑀣𑁂 𑀯𑀸 𑀥𑀫𑁆𑀫𑁂 𑀯𑀸 𑀧𑀤𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀓𑀸𑀢𑀩𑁆𑀩𑀸’’𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀯𑀺𑀦𑀸𑀲𑀬𑀢𑀺 𑀅𑀲𑁆𑀲𑀤𑁆𑀥𑀁, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀺 𑀲𑀸𑀲𑀦𑁂;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀯𑀁, 𑀯𑀤𑀁 𑀕𑁄𑀢𑀫𑀲𑀸𑀯𑀓𑁄’’𑀢𑀺.

𑀏𑀓𑀦𑁆𑀢𑀺 ¶ 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀭𑀺𑀤𑀻𑀧𑀦𑀁. 𑀢𑀢𑁆𑀣 𑀲𑀫𑀬𑀲𑀤𑁆𑀤𑁄 𑁋

𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺.

𑀢𑀣𑀸 𑀳𑀺𑀲𑁆𑀲 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁭) 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁩𑁫𑁮) 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺, 𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀲𑁄𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺, ‘𑀪𑀤𑁆𑀤𑀸𑀮𑀺, 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 ¶ 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’𑀢𑀺, 𑀅𑀬𑀫𑁆𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁨𑁬𑁦) 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁨𑁯) 𑁋

𑀏𑀯𑀫𑀸𑀤𑀻𑀲𑀼 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁮) 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 ¶ 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀝𑀺. 𑀫. 𑁨.𑁮) 𑀧𑀝𑀺𑀯𑁂𑀥𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄. 𑀢𑁂𑀦 𑀏𑀓𑀁 𑀲𑀫𑀬𑀦𑁆𑀢𑀺 𑀲𑀁𑀯𑀘𑁆𑀙𑀭𑀉𑀢𑀼𑀫𑀸𑀲𑀅𑀟𑁆𑀠𑀫𑀸𑀲𑀭𑀢𑁆𑀢𑀺𑀤𑀺𑀯𑀧𑀼𑀩𑁆𑀩𑀡𑁆𑀳𑀫𑀚𑁆𑀛𑀦𑁆𑀳𑀺𑀓𑀲𑀸𑀬𑀦𑁆𑀳𑀧𑀞𑀫𑀫𑀚𑁆𑀛𑀺𑀫- 𑀧𑀘𑁆𑀙𑀺𑀫𑀬𑀸𑀫𑀫𑀼𑀳𑀼𑀢𑁆𑀢𑀸𑀤𑀻𑀲𑀼 𑀓𑀸𑀮𑀔𑁆𑀬𑁂𑀲𑀼 𑀲𑀫𑀬𑁂𑀲𑀼 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺.

𑀬𑁂 𑀯𑀸 𑀇𑀫𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄 𑀚𑀸𑀢𑀺𑀲𑀫𑀬𑁄 𑀲𑀁𑀯𑁂𑀕𑀲𑀫𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀲𑀫𑀬𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄 𑀫𑀸𑀭𑀯𑀺𑀚𑀬𑀲𑀫𑀬𑁄 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁄𑀢𑀺 𑀏𑀯𑀫𑀸𑀤𑀬𑁄 𑀪𑀕𑀯𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀢𑀺𑀯𑀺𑀬 𑀧𑀓𑀸𑀲𑀸 𑀅𑀦𑁂𑀓𑀓𑀸𑀮𑀔𑁆𑀬𑀸 𑀏𑀯 𑀲𑀫𑀬𑀸. 𑀢𑁂𑀲𑀼 𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑀁 𑀏𑀓𑀁 𑀲𑀫𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 ¶ 𑀘𑀸𑀬𑀁 𑀜𑀸𑀡𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁂𑀲𑀼 𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀫𑀬𑁄, 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀼 𑀥𑀫𑁆𑀫𑀻𑀓𑀣𑀸𑀲𑀫𑀬𑁄, 𑀤𑁂𑀲𑀦𑀸𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑁄, 𑀢𑁂𑀲𑀼𑀧𑀺 𑀲𑀫𑀬𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀣𑀸𑀳 𑁋 𑀅𑀣 𑀓𑀲𑁆𑀫𑀸 𑀬𑀣𑀸 𑀅𑀪𑀺𑀥𑀫𑁆𑀫𑁂 ¶ ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀘 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀘 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀯𑀺𑀦𑀬𑁂 𑀘 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀓𑀭𑀡𑀯𑀘𑀦𑁂𑀦, 𑀢𑀣𑀸 𑀅𑀓𑀢𑁆𑀯𑀸 𑀇𑀥 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀢𑀢𑁆𑀣 𑀢𑀣𑀸, 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀳𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀘 𑀅𑀥𑀺𑀓𑀭𑀡𑀢𑁆𑀣𑁄 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄, 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀯𑀺𑀦𑀬𑁂 𑀘 𑀳𑁂𑀢𑁆𑀯𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀓𑀭𑀡𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀇𑀥 ¶ 𑀧𑀦 𑀅𑀜𑁆𑀜𑀲𑁆𑀫𑀺𑀜𑁆𑀘 𑀏𑀯𑀁𑀚𑀸𑀢𑀺𑀓𑁂 𑀲𑀼𑀢𑁆𑀢𑀦𑁆𑀢𑀧𑀸𑀞𑁂 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀇𑀫𑀁 𑀅𑀜𑁆𑀜𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀲𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸, 𑀪𑀼𑀫𑁆𑀫𑁂𑀦 𑀓𑀭𑀡𑁂𑀦 𑀘;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀉𑀧𑀬𑁄𑀕𑁂𑀦 𑀲𑁄 𑀇𑀥𑀸’’𑀢𑀺.

𑀪𑀕𑀯𑀸𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁. 𑀬𑀣𑀸𑀳 𑁋

‘‘𑀪𑀕𑀯𑀸𑀢𑀺 ¶ 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀘𑀢𑀼𑀩𑁆𑀩𑀺𑀥𑀜𑁆𑀳𑀺 ¶ 𑀦𑀸𑀫𑀁 𑀆𑀯𑀢𑁆𑀣𑀺𑀓𑀁, 𑀮𑀺𑀗𑁆𑀕𑀺𑀓𑀁, 𑀦𑁂𑀫𑀺𑀢𑁆𑀢𑀓𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫 ‘‘𑀬𑀤𑀺𑀘𑁆𑀙𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀯𑀘𑁆𑀙𑁄 𑀤𑀫𑁆𑀫𑁄 𑀩𑀮𑀺𑀩𑀤𑁆𑀥𑁄𑀢𑀺 𑀏𑀯𑀫𑀸𑀤𑀺 𑀆𑀯𑀢𑁆𑀣𑀺𑀓𑀁, 𑀤𑀡𑁆𑀟𑀻 𑀙𑀢𑁆𑀢𑀻 𑀲𑀺𑀔𑀻 𑀓𑀭𑀻𑀢𑀺 𑀏𑀯𑀫𑀸𑀤𑀺 𑀮𑀺𑀗𑁆𑀕𑀺𑀓𑀁, 𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄𑀢𑀺 𑀏𑀯𑀫𑀸𑀤𑀺 𑀦𑁂𑀫𑀺𑀢𑁆𑀢𑀓𑀁, 𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄𑀢𑀺 𑀏𑀯𑀫𑀸𑀤𑀺 𑀯𑀘𑀦𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀇𑀤𑀁 𑀧𑀦 𑀪𑀕𑀯𑀸𑀢𑀺 𑀦𑀸𑀫𑀁 𑀕𑀼𑀡𑀦𑁂𑀫𑀺𑀢𑁆𑀢𑀓𑀁, 𑀦 𑀫𑀳𑀸𑀫𑀸𑀬𑀸𑀬, 𑀦 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦, 𑀦 𑀅𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑁂𑀳𑀺 𑀓𑀢𑀁, 𑀦 𑀲𑀓𑁆𑀓𑀲𑀦𑁆𑀢𑀼𑀲𑀺𑀢𑀸𑀤𑀻𑀳𑀺 𑀤𑁂𑀯𑀢𑀸𑀯𑀺𑀲𑁂𑀲𑁂𑀳𑀺 𑀓𑀢𑀁. 𑀬𑀣𑀸𑀳 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸’’𑀢𑀺 (𑀫𑀳𑀸𑀦𑀺. 𑁮𑁪).

𑀬𑀁 𑀕𑀼𑀡𑀦𑁂𑀫𑀺𑀢𑁆𑀢𑀓𑀜𑁆𑀘𑁂𑀢𑀁 𑀦𑀸𑀫𑀁, 𑀢𑁂𑀲𑀁 𑀕𑀼𑀡𑀸𑀦𑀁 𑀧𑀓𑀸𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀁 𑀯𑀤𑀦𑁆𑀢𑀺 𑁋

‘‘𑀪𑀕𑀻 𑀪𑀚𑀻 𑀪𑀸𑀕𑀻 𑀯𑀺𑀪𑀢𑁆𑀢𑀯𑀸 𑀇𑀢𑀺,

𑀅𑀓𑀸𑀲𑀺 𑀪𑀕𑁆𑀕𑀦𑁆𑀢𑀺 𑀕𑀭𑀽𑀢𑀺 𑀪𑀸𑀕𑁆𑀬𑀯𑀸;

𑀩𑀳𑀽𑀳𑀺 𑀜𑀸𑀬𑁂𑀳𑀺 𑀲𑀼𑀪𑀸𑀯𑀺𑀢𑀢𑁆𑀢𑀦𑁄,

𑀪𑀯𑀦𑁆𑀢𑀕𑁄 𑀲𑁄 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀦𑀺𑀤𑁆𑀤𑁂𑀲𑀸𑀤𑀻𑀲𑀼 (𑀫𑀳𑀸𑀦𑀺. 𑁮𑁪; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀬𑀁 𑀧𑀦 𑀅𑀧𑀭𑁄 𑀧𑀭𑀺𑀬𑀸𑀬𑁄 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺.

𑀢𑀢𑁆𑀣 ¶ ‘‘𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄’’𑀢𑀺 𑀏𑀯𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀲𑀤𑁆𑀤𑀦𑀬𑁂𑀦 𑀯𑀸 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀬𑀲𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀁 ¶ 𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀧𑁆𑀧𑀢𑁆𑀢𑀁 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 𑀪𑀸𑀕𑁆𑀬𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀮𑁄𑀪𑀤𑁄𑀲𑀫𑁄𑀳𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀮𑀸- 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀫𑀸𑀦𑀸𑀢𑀺𑀫𑀸𑀦𑀫𑀤𑀧𑀫𑀸𑀤𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮𑀤𑀼𑀘𑁆𑀘𑀭𑀺𑀢- 𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀫𑀲𑀜𑁆𑀜𑀸𑀯𑀺𑀢𑀓𑁆𑀓𑀧𑀧𑀜𑁆𑀘𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀆𑀲𑀯𑀕𑀦𑁆𑀣𑀑𑀖𑀬𑁄𑀕𑀅𑀕𑀢𑀺𑀢𑀡𑁆𑀳𑀼𑀧𑀸𑀤𑀸𑀦- 𑀧𑀜𑁆𑀘𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀦𑀻𑀯𑀭𑀡𑀸𑀪𑀺𑀦𑀦𑁆𑀤𑀦𑀙𑀯𑀺𑀯𑀸𑀤𑀫𑀽𑀮𑀢𑀡𑁆𑀳𑀸𑀓𑀸𑀬𑀲𑀢𑁆𑀢𑀸𑀦𑀼𑀲𑀬- 𑀅𑀝𑁆𑀞𑀫𑀺𑀘𑁆𑀙𑀢𑁆𑀢𑀦𑀯𑀢𑀡𑁆𑀳𑀸𑀫𑀽𑀮𑀓𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢- 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺 ¶ , 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘 𑀓𑀺𑀮𑁂𑀲𑀓𑁆𑀔𑀦𑁆𑀥𑀅𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑁂 𑀅𑀪𑀜𑁆𑀚𑀺, 𑀢𑀲𑁆𑀫𑀸 𑀪𑀕𑁆𑀕𑀢𑁆𑀢𑀸 𑀏𑀢𑁂𑀲𑀁 𑀧𑀭𑀺𑀲𑁆𑀲𑀬𑀸𑀦𑀁 𑀪𑀕𑁆𑀕𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘𑁂𑀢𑁆𑀣 𑁋

‘‘𑀪𑀕𑁆𑀕𑀭𑀸𑀕𑁄 𑀪𑀕𑁆𑀕𑀤𑁄𑀲𑁄, 𑀪𑀕𑁆𑀕𑀫𑁄𑀳𑁄 𑀅𑀦𑀸𑀲𑀯𑁄;

𑀪𑀕𑁆𑀕𑀸𑀲𑁆𑀲 𑀧𑀸𑀧𑀓𑀸 𑀥𑀫𑁆𑀫𑀸, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀪𑀸𑀕𑁆𑀬𑀯𑀢𑀸𑀬 𑀘𑀲𑁆𑀲 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀥𑀭𑀲𑁆𑀲 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺, 𑀪𑀕𑁆𑀕𑀤𑁄𑀲𑀢𑀸𑀬 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺. 𑀢𑀣𑀸 𑀮𑁄𑀓𑀺𑀬𑀲𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀸𑀦𑀪𑀸𑀯𑁄, 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀪𑀺𑀕𑀫𑀦𑀻𑀬𑀢𑀸. 𑀢𑀣𑀸 𑀅𑀪𑀺𑀕𑀢𑀸𑀦𑀜𑁆𑀘 𑀦𑁂𑀲𑀁 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑁂 𑀧𑀝𑀺𑀩𑀮𑀪𑀸𑀯𑁄, 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀺𑀢𑀸. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀘 𑀲𑀁𑀬𑁄𑀚𑀦𑀲𑀫𑀢𑁆𑀣𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀬𑀲𑁆𑀫𑀸 𑀘 𑀮𑁄𑀓𑁂 𑀇𑀲𑁆𑀲𑀭𑀺𑀬𑀥𑀫𑁆𑀫𑀬𑀲𑀲𑀺𑀭𑀺𑀓𑀸𑀫𑀧𑀬𑀢𑁆𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀪𑀕𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀧𑀭𑀫𑀜𑁆𑀘𑀲𑁆𑀲 𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁, 𑀅𑀡𑀺𑀫𑀸𑀮𑀖𑀺𑀫𑀸𑀤𑀺𑀓𑀁 𑀯𑀸 𑀮𑁄𑀓𑀺𑀬𑀲𑀫𑁆𑀫𑀢𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 ¶ 𑀅𑀢𑁆𑀣𑀺, 𑀢𑀣𑀸 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄, 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀬𑀲𑁄, 𑀭𑀽𑀧𑀓𑀸𑀬𑀤𑀲𑁆𑀲𑀦𑀩𑁆𑀬𑀸𑀯𑀝𑀚𑀦𑀦𑀬𑀦𑀫𑀦𑀧𑁆𑀧𑀲𑀸𑀤𑀚𑀦𑀦𑀲𑀫𑀢𑁆𑀣𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻, 𑀬𑀁 𑀬𑀁 𑀅𑀦𑁂𑀦 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀁 𑀯𑀸, 𑀢𑀲𑁆𑀲 𑀢𑀲𑁆𑀲 𑀢𑀣𑁂𑀯 𑀅𑀪𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀲𑀜𑁆𑀜𑀺𑀢𑁄 𑀓𑀸𑀫𑁄, 𑀲𑀩𑁆𑀩𑀮𑁄𑀓𑀕𑀭𑀼𑀪𑀸𑀯𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀧𑀬𑀢𑁆𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀫𑀸 𑀇𑀫𑁂𑀳𑀺 𑀪𑀕𑁂𑀳𑀺 𑀬𑀼𑀢𑁆𑀢𑀢𑁆𑀢𑀸𑀧𑀺 𑀪𑀕𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 ¶ 𑀧𑀦 𑀓𑀼𑀲𑀮𑀸𑀤𑀺𑀪𑁂𑀤𑁂𑀳𑀺 𑀲𑀩𑁆𑀩𑀥𑀫𑁆𑀫𑁂, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀺 𑀯𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑁂, 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀯𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀁, 𑀆𑀬𑀽𑀳𑀦𑀦𑀺𑀤𑀸𑀦𑀲𑀁𑀬𑁄𑀕𑀧𑀮𑀺𑀩𑁄𑀥𑀝𑁆𑀞𑁂𑀦 𑀲𑀫𑀼𑀤𑀬𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢𑀅𑀫𑀢𑀝𑁆𑀞𑁂𑀦 𑀦𑀺𑀭𑁄𑀥𑀁, 𑀦𑀺𑀬𑁆𑀬𑀸𑀦𑀺𑀓𑀳𑁂𑀢𑀼𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀫𑀕𑁆𑀕𑀁 𑀯𑀺𑀪𑀢𑁆𑀢𑀯𑀸, 𑀯𑀺𑀪𑀚𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑁂𑀲𑀺𑀢𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀪𑀢𑁆𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀘 𑀏𑀲 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂 ¶ 𑀅𑀜𑁆𑀜𑁂 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀺, 𑀢𑀲𑁆𑀫𑀸 𑀪𑀢𑁆𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀁 𑀅𑀦𑁂𑀦 𑀯𑀦𑁆𑀢𑀁, 𑀢𑀲𑁆𑀫𑀸 𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪𑀓𑀸𑀭𑀁 𑀕𑀫𑀦𑀲𑀤𑁆𑀤𑀢𑁄 𑀕𑀓𑀸𑀭𑀁 𑀯𑀦𑁆𑀢𑀲𑀤𑁆𑀤𑀢𑁄 𑀯𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 𑀆𑀤𑀸𑀬 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀮𑁄𑀓𑁂 ‘‘𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑁂𑀔𑀮𑀸’’𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘𑁂𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀥𑀫𑁆𑀫𑀲𑀭𑀻𑀭𑀁 𑀧𑀓𑀸𑀲𑁂𑀢𑀺, 𑀢𑁂𑀦 ‘‘𑀦𑀬𑀺𑀤𑀁 𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁, 𑀅𑀬𑀁 𑀯𑁄 𑀲𑀢𑁆𑀣𑀸’’𑀢𑀺 𑀪𑀕𑀯𑀢𑁄 𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀺.

𑀏𑀓𑀁 𑀲𑀫𑀬𑀁 𑀪𑀕𑀯𑀸𑀢𑀺 𑀯𑀘𑀦𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀓𑀸𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦 ‘‘𑀏𑀯𑀁𑀯𑀺𑀥𑀲𑁆𑀲 𑀇𑀫𑀲𑁆𑀲 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸 𑀤𑀲𑀩𑀮𑀥𑀭𑁄 𑀯𑀚𑀺𑀭𑀲𑀗𑁆𑀖𑀸𑀢𑀓𑀸𑀬𑁄 𑀲𑁄𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀢𑁆𑀣 𑀓𑁂𑀦𑀜𑁆𑀜𑁂𑀦 𑀚𑀻𑀯𑀺𑀢𑁂 𑀆𑀲𑀸 𑀚𑀦𑁂𑀢𑀩𑁆𑀩𑀸’’𑀢𑀺 𑀚𑀻𑀯𑀺𑀢𑀫𑀤𑀫𑀢𑁆𑀢𑀁 𑀚𑀦𑀁 𑀲𑀁𑀯𑁂𑀚𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺.

𑀏𑀯𑀦𑁆𑀢𑀺 𑀘 𑀪𑀡𑀦𑁆𑀢𑁄 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺, 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁, 𑀏𑀓𑀁 𑀲𑀫𑀬𑀦𑁆𑀢𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀁, 𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁.

𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀲𑀸𑀯𑀢𑁆𑀣𑀻𑀢𑀺 𑀲𑀯𑀢𑁆𑀣𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀦𑀕𑀭𑀁, 𑀬𑀣𑀸 𑀓𑀸𑀓𑀦𑁆𑀤𑀻 𑀫𑀸𑀓𑀦𑁆𑀤𑀻𑀢𑀺, 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀲𑀸𑀯𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀓𑁆𑀔𑀭𑀘𑀺𑀦𑁆𑀢𑀓𑀸. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 𑀪𑀡𑀦𑁆𑀢𑀺 ‘‘𑀬𑀁𑀓𑀺𑀜𑁆𑀘𑀺 ¶ 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀲𑀩𑁆𑀩𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀲𑀸𑀯𑀢𑁆𑀣𑀻. 𑀲𑀢𑁆𑀣𑀲𑀫𑀸𑀬𑁄𑀕𑁂 𑀘 ‘‘𑀓𑀺𑀁 𑀪𑀡𑁆𑀟𑀫𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀲𑀩𑁆𑀩𑀫𑀢𑁆𑀣𑀻’’𑀢𑀺 𑀯𑀘𑀦𑀫𑀼𑀧𑀸𑀤𑀸𑀬 𑀲𑀸𑀯𑀢𑁆𑀣𑀻.

‘‘𑀲𑀩𑁆𑀩𑀤𑀸 𑀲𑀩𑁆𑀩𑀽𑀧𑀓𑀭𑀡𑀁, 𑀲𑀸𑀯𑀢𑁆𑀣𑀺𑀬𑀁 𑀲𑀫𑁄𑀳𑀺𑀢𑀁;

𑀢𑀲𑁆𑀫𑀸 𑀲𑀩𑁆𑀩𑀫𑀼𑀧𑀸𑀤𑀸𑀬, 𑀲𑀸𑀯𑀢𑁆𑀣𑀻𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀓𑁄𑀲𑀮𑀸𑀦𑀁 𑀧𑀼𑀭𑀁 𑀭𑀫𑁆𑀫𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁;

𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁, 𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢𑀁.

‘‘𑀯𑀼𑀟𑁆𑀠𑀺𑀁 ¶ ¶ 𑀯𑁂𑀧𑀼𑀮𑁆𑀮𑀢𑀁 𑀧𑀢𑁆𑀢𑀁, 𑀇𑀤𑁆𑀥𑀁 𑀨𑀻𑀢𑀁 𑀫𑀦𑁄𑀭𑀫𑀁;

𑀆𑀴𑀓𑀫𑀦𑁆𑀤𑀸𑀯 𑀤𑁂𑀯𑀸𑀦𑀁, 𑀲𑀸𑀯𑀢𑁆𑀣𑀺𑀧𑀼𑀭𑀫𑀼𑀢𑁆𑀢𑀫’’𑀦𑁆𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪);

𑀢𑀲𑁆𑀲𑀁 𑀲𑀸𑀯𑀢𑁆𑀣𑀺𑀬𑀁. 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁.

𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀺𑀧𑀭𑀺𑀤𑀻𑀧𑀦𑀫𑁂𑀢𑀁. 𑀇𑀥 𑀧𑀦 𑀞𑀸𑀦𑀕𑀫𑀦𑀸𑀲𑀦𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁, 𑀢𑁂𑀦 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀲𑀬𑀸𑀦𑁄𑀧𑀺 𑀪𑀕𑀯𑀸 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀧𑀭𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀯𑀺𑀳𑀭𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀚𑁂𑀢𑀯𑀦𑁂𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑀚𑀦𑀁 𑀚𑀺𑀦𑀸𑀢𑀻𑀢𑀺 𑀚𑁂𑀢𑁄, 𑀭𑀜𑁆𑀜𑀸 𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑀚𑀦𑁂 𑀚𑀺𑀢𑁂 𑀚𑀸𑀢𑁄𑀢𑀺 𑀚𑁂𑀢𑁄, 𑀫𑀗𑁆𑀕𑀮𑀓𑀫𑁆𑀬𑀢𑀸𑀬 𑀯𑀸 𑀢𑀲𑁆𑀲 𑀏𑀯𑀁 𑀦𑀸𑀫𑀫𑁂𑀯 𑀓𑀢𑀦𑁆𑀢𑀺𑀧𑀺 𑀚𑁂𑀢𑁄. 𑀯𑀦𑀬𑀢𑀻𑀢𑀺 𑀯𑀦𑀁, 𑀅𑀢𑁆𑀢𑀲𑀫𑁆𑀧𑀤𑀸𑀬 𑀲𑀢𑁆𑀢𑀸𑀦𑀁 𑀪𑀢𑁆𑀢𑀺𑀁 𑀓𑀸𑀭𑁂𑀢𑀺, 𑀅𑀢𑁆𑀢𑀦𑀺 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀦𑀼𑀢𑁂 𑀇𑀢𑀺 𑀯𑀸 𑀯𑀦𑀁, 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀕𑀦𑁆𑀥𑀲𑀫𑁆𑀫𑁄𑀤𑀫𑀢𑁆𑀢𑀓𑁄𑀓𑀺𑀮𑀸𑀤𑀺𑀯𑀺𑀳𑀗𑁆𑀕𑀯𑀺𑀭𑀼𑀢𑁂𑀳𑀺 𑀫𑀦𑁆𑀤𑀫𑀸𑀮𑀼𑀢𑀘𑀮𑀺𑀢𑀭𑀼𑀓𑁆𑀔𑀲𑀸𑀔𑀸𑀯𑀺𑀝𑀧𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀧𑀮𑀸𑀲𑁂𑀳𑀺 𑀘 ‘‘𑀏𑀣 𑀫𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀧𑀸𑀡𑀺𑀦𑁄 𑀬𑀸𑀘𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀚𑁂𑀢𑀲𑁆𑀲 𑀯𑀦𑀁 𑀚𑁂𑀢𑀯𑀦𑀁. 𑀢𑀜𑁆𑀳𑀺 𑀚𑁂𑀢𑁂𑀦 𑀭𑀸𑀚𑀓𑀼𑀫𑀸𑀭𑁂𑀦 𑀭𑁄𑀧𑀺𑀢𑀁 𑀲𑀁𑀯𑀟𑁆𑀠𑀺𑀢𑀁 𑀧𑀭𑀺𑀧𑀸𑀮𑀺𑀢𑀁, 𑀲𑁄 𑀘 𑀢𑀲𑁆𑀲 𑀲𑀸𑀫𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀚𑁂𑀢𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀚𑁂𑀢𑀯𑀦𑁂.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂𑀢𑀺 𑀏𑀢𑁆𑀣 𑀲𑀼𑀤𑀢𑁆𑀢𑁄 𑀦𑀸𑀫 𑀲𑁄 𑀕𑀳𑀧𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀯𑀲𑁂𑀦, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀢𑀸𑀬 𑀢𑀼 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀬 𑀓𑀭𑀼𑀡𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀁 ¶ 𑀅𑀤𑀸𑀲𑀺, 𑀢𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺 ¶ 𑀲𑀗𑁆𑀔𑁆𑀬𑀁 𑀕𑀢𑁄. 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀧𑀸𑀡𑀺𑀦𑁄, 𑀯𑀺𑀲𑁂𑀲𑁂𑀦 𑀯𑀸 𑀧𑀩𑁆𑀩𑀚𑀺𑀢𑀸𑀢𑀺 𑀆𑀭𑀸𑀫𑁄, 𑀢𑀲𑁆𑀲 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀲𑁄𑀪𑀦𑀢𑀸𑀬 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀤𑀺𑀧𑀜𑁆𑀘𑀯𑀺𑀥𑀲𑁂𑀦𑀸𑀲𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀭𑀫𑀦𑁆𑀢𑀺 𑀅𑀪𑀺𑀭𑀫𑀦𑁆𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀳𑀼𑀢𑁆𑀯𑀸 𑀦𑀺𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀯𑀸 𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀕𑀢𑁂𑀧𑀺 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑀁𑀬𑁂𑀯 𑀆𑀦𑁂𑀢𑁆𑀯𑀸 𑀭𑀫𑁂𑀢𑀻𑀢𑀺 𑀆𑀭𑀸𑀫𑁄. 𑀲𑁄 𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀺𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀲𑁂𑀦𑀸𑀲𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀯𑀺𑀳𑀸𑀭𑀫𑀳𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀁 𑀘𑀢𑀼𑀧𑀜𑁆𑀜𑀸𑀲𑀸𑀬 𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 ¶ 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑁄, 𑀢𑀲𑁆𑀫𑀸 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂.

𑀏𑀢𑁆𑀣 𑀘 ‘‘𑀚𑁂𑀢𑀯𑀦𑁂’’𑀢𑀺 𑀯𑀘𑀦𑀁 𑀧𑀼𑀭𑀺𑀫𑀲𑀸𑀫𑀺𑀧𑀭𑀺𑀓𑀺𑀢𑁆𑀢𑀦𑀁, ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀧𑀘𑁆𑀙𑀺𑀫𑀲𑀸𑀫𑀺𑀧𑀭𑀺𑀓𑀺𑀢𑁆𑀢𑀦𑀁. 𑀓𑀺𑀫𑁂𑀢𑁂𑀲𑀁 𑀧𑀭𑀺𑀓𑀺𑀢𑁆𑀢𑀦𑁂 𑀧𑀬𑁄𑀚𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀥𑀺𑀓𑀸𑀭𑀢𑁄 𑀢𑀸𑀯 ‘‘𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀸𑀦𑀺𑀬𑀸𑀫𑀓𑀭𑀡𑀁 𑀅𑀜𑁆𑀜𑁂𑀲𑀁 𑀧𑀼𑀜𑁆𑀜𑀓𑀸𑀫𑀸𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂 𑀦𑀺𑀬𑁄𑀚𑀦𑀜𑁆𑀘. 𑀢𑀢𑁆𑀣 𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀲𑀸𑀤𑀫𑀸𑀧𑀦𑁂 𑀪𑀽𑀫𑀺𑀯𑀺𑀓𑁆𑀓𑀬𑀮𑀤𑁆𑀥𑀸 𑀅𑀝𑁆𑀞𑀸𑀭𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀅𑀦𑁂𑀓𑀓𑁄𑀝𑀺𑀅𑀕𑁆𑀖𑀦𑀓𑀸 𑀭𑀼𑀓𑁆𑀔𑀸 𑀘 𑀚𑁂𑀢𑀲𑁆𑀲 𑀧𑀭𑀺𑀘𑁆𑀘𑀸𑀕𑁄, 𑀘𑀢𑀼𑀧𑀜𑁆𑀜𑀸𑀲 𑀓𑁄𑀝𑀺𑀬𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲. 𑀬𑀢𑁄 𑀢𑁂𑀲𑀁 𑀧𑀭𑀺𑀓𑀺𑀢𑁆𑀢𑀦𑁂𑀦 ‘‘𑀏𑀯𑀁 𑀧𑀼𑀜𑁆𑀜𑀓𑀸𑀫𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀜𑁆𑀜𑁂𑀧𑀺 𑀧𑀼𑀜𑁆𑀜𑀓𑀸𑀫𑁂 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂 𑀦𑀺𑀬𑁄𑀚𑁂𑀢𑀺. 𑀏𑀯𑀫𑁂𑀢𑁆𑀣 𑀧𑀼𑀜𑁆𑀜𑀓𑀸𑀫𑀸𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂 𑀦𑀺𑀬𑁄𑀚𑀦𑀁 𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 ‘‘𑀬𑀤𑀺 𑀢𑀸𑀯 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, ‘𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀺, ‘𑀲𑀸𑀯𑀢𑁆𑀣𑀺𑀬’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀏𑀓𑀁 ¶ 𑀲𑀫𑀬𑀁 𑀯𑀺𑀳𑀭𑀺𑀢𑀼’’𑀦𑁆𑀢𑀺. 𑀯𑀼𑀘𑁆𑀘𑀢𑁂 𑁋 𑀦𑀦𑀼 𑀯𑀼𑀢𑁆𑀢𑀫𑁂𑀢𑀁 ‘‘𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺, 𑀬𑀢𑁄 𑀬𑀣𑀸 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀲𑀫𑀻𑀧𑁂 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀸𑀦𑀺 ‘‘𑀕𑀗𑁆𑀕𑀸𑀬 𑀘𑀭𑀦𑁆𑀢𑀺, 𑀬𑀫𑀼𑀦𑀸𑀬 𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀤𑀺𑀤𑀁 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄, 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 ¶ 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀲𑀸𑀯𑀢𑁆𑀣𑀺𑀯𑀘𑀦𑀁, 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀢𑁆𑀣𑀁 𑀲𑁂𑀲𑀯𑀘𑀦𑀁.

𑀢𑀢𑁆𑀣 𑀲𑀸𑀯𑀢𑁆𑀣𑀺𑀓𑀺𑀢𑁆𑀢𑀦𑁂𑀦 𑀪𑀕𑀯𑀢𑁄 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀁 𑀤𑀲𑁆𑀲𑁂𑀢𑀺, 𑀚𑁂𑀢𑀯𑀦𑀸𑀤𑀺𑀓𑀺𑀢𑁆𑀢𑀦𑁂𑀦 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀘𑁆𑀘𑀬𑀕𑁆𑀕𑀳𑀡𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀁, 𑀧𑀘𑁆𑀙𑀺𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀢𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀚𑁆𑀚𑀦𑀽𑀧𑀸𑀬𑀤𑀲𑁆𑀲𑀦𑀁. 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑀁, 𑀧𑀘𑁆𑀙𑀺𑀫𑁂𑀦 𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀺𑀁. 𑀧𑀼𑀭𑀺𑀫𑁂𑀦 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁, 𑀧𑀘𑁆𑀙𑀺𑀫𑁂𑀦 𑀘 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁. 𑀧𑀼𑀭𑀺𑀫𑁂𑀦 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀸𑀥𑀺𑀫𑀼𑀢𑁆𑀢𑀺𑀢𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀦𑀺𑀭𑀼𑀧𑀮𑁂𑀧𑀢𑀁. 𑀧𑀼𑀭𑀺𑀫𑁂𑀦 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀦𑀺𑀫𑀺𑀢𑁆𑀢𑀁 𑀨𑀸𑀲𑀼𑀯𑀺𑀳𑀸𑀭𑀁, 𑀧𑀘𑁆𑀙𑀺𑀫𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀼𑀬𑁄𑀕𑀦𑀺𑀫𑀺𑀢𑁆𑀢𑀁. 𑀧𑀼𑀭𑀺𑀫𑁂𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀁, 𑀧𑀘𑁆𑀙𑀺𑀫𑁂𑀦 𑀤𑁂𑀯𑀸𑀦𑀁. 𑀧𑀼𑀭𑀺𑀫𑁂𑀦 𑀮𑁄𑀓𑁂 𑀚𑀸𑀢𑀲𑁆𑀲 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀁, 𑀧𑀘𑁆𑀙𑀺𑀫𑁂𑀦 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀢𑀦𑁆𑀢𑀺 𑀏𑀯𑀫𑀸𑀤𑀺.

𑀅𑀣𑀸𑀢𑀺 𑀅𑀯𑀺𑀘𑁆𑀙𑁂𑀤𑀢𑁆𑀣𑁂, 𑀔𑁄𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑁂𑀬𑁂𑀯 𑀢𑀢𑁆𑀣 ¶ 𑀪𑀕𑀯𑀢𑁄 𑀯𑀺𑀳𑀸𑀭𑁂 𑀇𑀤𑀫𑀥𑀺𑀓𑀸𑀭𑀦𑁆𑀢𑀭𑀁 𑀉𑀤𑀧𑀸𑀤𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀢𑀦𑁆𑀢𑀺? 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀢𑀭𑀸𑀢𑀺 𑀅𑀦𑀺𑀬𑀫𑀺𑀢𑀦𑀺𑀤𑁆𑀤𑁂𑀲𑁄. 𑀲𑀸 𑀳𑀺 𑀦𑀸𑀫𑀕𑁄𑀢𑁆𑀢𑀢𑁄 𑀅𑀧𑀸𑀓𑀝𑀸, 𑀢𑀲𑁆𑀫𑀸 ‘‘𑀅𑀜𑁆𑀜𑀢𑀭𑀸’’𑀢𑀺 𑀯𑀼𑀢𑁆𑀢𑀸. 𑀤𑁂𑀯𑁄 𑀏𑀯 𑀤𑁂𑀯𑀢𑀸, 𑀇𑀢𑁆𑀣𑀺𑀧𑀼𑀭𑀺𑀲𑀲𑀸𑀥𑀸𑀭𑀡𑀫𑁂𑀢𑀁. 𑀇𑀥 𑀧𑀦 𑀧𑀼𑀭𑀺𑀲𑁄 ¶ 𑀏𑀯, 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀓𑀺𑀦𑁆𑀢𑀼, 𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦 𑀤𑁂𑀯𑀢𑀸𑀢𑀺 𑀯𑀼𑀢𑁆𑀢𑁄.

𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁩𑁮𑁩; 𑀅. 𑀦𑀺. 𑁮.𑁨𑁦) 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. (𑀯𑀺. 𑀯. 𑁮𑁫𑁭); 𑁋

𑀏𑀯𑀫𑀸𑀤𑀻𑀲𑀼 ¶ 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁨.𑁧𑁬; 𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥 𑀧𑀦 𑀔𑀬𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀅𑀪𑀺𑀭𑀽𑀧𑁂, 𑀯𑀡𑁆𑀡𑀲𑀤𑁆𑀤𑁄 𑀧𑀦 𑀙𑀯𑀺𑀣𑀼𑀢𑀺𑀓𑀼𑀮𑀯𑀕𑁆𑀕𑀓𑀸𑀭𑀡𑀲𑀡𑁆𑀞𑀸𑀦𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁩) 𑀙𑀯𑀺𑀬𑀁. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂 𑀕𑀳𑀧𑀢𑀺 𑀇𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁭𑁭) 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫) 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 ¶ 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀁 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀭𑀽𑀧𑀘𑁆𑀙𑀯𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀬𑁂𑀪𑀼𑀬𑁆𑀬𑀅𑀩𑁆𑀬𑀸𑀫𑀺𑀲𑁆𑀲𑀸𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄 ¶ . 𑀢𑀣𑀸 𑀳𑀺𑀲𑁆𑀲 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧) 𑀅𑀦𑀯𑀲𑁂𑀲𑀢𑀸 𑀅𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀸𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁪𑁩) 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀯𑀺𑀪. 𑁨𑁨𑁫) 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁨𑁪𑁪) 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄, 𑀪𑀦𑁆𑀢𑁂, 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀬𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁨𑁪𑁩) 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁭) 𑀯𑀺𑀲𑀁𑀬𑁄𑀕𑁄. 𑀇𑀥 𑀧𑀦𑀲𑁆𑀲 𑀅𑀦𑀯𑀲𑁂𑀲𑀢𑁆𑀢𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀙𑁂𑀤𑀦𑀯𑀺𑀓𑀧𑁆𑀧𑀮𑁂𑀲𑀲𑀫𑀦𑁆𑀢𑀪𑀸𑀯𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀻𑀬𑀫𑁂𑀢𑀁 ¶ 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁦) ¶ 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁧𑁦𑁯𑁮; 𑀘𑀽𑀴𑀦𑀺. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑁧𑁧𑁭, 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁧) 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁨.𑁨𑁨.𑁧𑁩𑁬𑁮) 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁪𑁪𑁬) 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁮𑁦) 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦𑀲𑁆𑀲 𑀲𑀫𑀦𑁆𑀢𑀪𑀸𑀯𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀬𑀢𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀦𑁆𑀢𑀺 𑀏𑀢𑁆𑀣 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀚𑁂𑀢𑀯𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀬𑀢𑁄 𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀭𑀲𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁 ¶ . 𑀅𑀣 𑀯𑀸 𑀏𑀯𑀁 𑀕𑀢𑀸 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑀫𑀺𑀢𑁆𑀯𑀸 𑀦𑀫𑀲𑁆𑀲𑀺𑀢𑁆𑀯𑀸.

𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀏𑀓𑁄𑀓𑀸𑀲𑀁 𑀏𑀓𑀧𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁. 𑀅𑀝𑁆𑀞𑀸𑀲𑀻𑀢𑀺 ¶ 𑀦𑀺𑀲𑀚𑁆𑀚𑀸𑀤𑀺𑀧𑀝𑀺𑀓𑁆𑀔𑁂𑀧𑁄, 𑀞𑀸𑀦𑀁 𑀓𑀧𑁆𑀧𑁂𑀲𑀺, 𑀞𑀺𑀢𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀓𑀣𑀁 ¶ 𑀞𑀺𑀢𑀸 𑀧𑀦 𑀲𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀽𑀢𑀺?

‘‘𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀓𑀘𑁆𑀙𑁂 𑀦𑁄𑀧𑀺 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀡𑀢𑀼𑀡𑁆𑀡𑀢𑁂;

𑀇𑀫𑁂 𑀤𑁄𑀲𑁂 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀽’’𑀢𑀺.

𑀓𑀲𑁆𑀫𑀸 𑀧𑀦𑀸𑀬𑀁 𑀅𑀝𑁆𑀞𑀸𑀲𑀺 𑀏𑀯, 𑀦 𑀦𑀺𑀲𑀻𑀤𑀻𑀢𑀺? 𑀮𑀳𑀼𑀁 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑀢𑀸𑀬. 𑀤𑁂𑀯𑀢𑀸𑀬𑁄 𑀳𑀺 𑀓𑀜𑁆𑀘𑀺𑀤𑁂𑀯 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀲𑀼𑀘𑀺𑀧𑀼𑀭𑀺𑀲𑁄 𑀯𑀺𑀬 𑀯𑀘𑁆𑀘𑀝𑁆𑀞𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀧𑀓𑀢𑀺𑀬𑀸 𑀧𑀦 𑀢𑀸𑀲𑀁 𑀬𑁄𑀚𑀦𑀲𑀢𑀢𑁄 𑀧𑀪𑀼𑀢𑀺 𑀫𑀦𑀼𑀲𑁆𑀲𑀮𑁄𑀓𑁄 𑀤𑀼𑀕𑁆𑀕𑀦𑁆𑀥𑀢𑀸𑀬 𑀧𑀝𑀺𑀓𑀽𑀮𑁄 𑀳𑁄𑀢𑀺, 𑀦 𑀏𑀢𑁆𑀣 𑀅𑀪𑀺𑀭𑀫𑀦𑁆𑀢𑀺, 𑀢𑁂𑀦 𑀲𑀸 𑀆𑀕𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀮𑀳𑀼𑀁 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑀢𑀸𑀬 𑀦 𑀦𑀺𑀲𑀻𑀤𑀺. 𑀬𑀲𑁆𑀲 𑀘 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀧𑀭𑀺𑀲𑁆𑀲𑀫𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁 𑀦𑀺𑀲𑀻𑀤𑀦𑁆𑀢𑀺, 𑀲𑁄 𑀤𑁂𑀯𑀸𑀦𑀁 𑀧𑀭𑀺𑀲𑁆𑀲𑀫𑁄 𑀦𑀢𑁆𑀣𑀺, 𑀢𑀲𑁆𑀫𑀸𑀧𑀺 𑀦 𑀦𑀺𑀲𑀻𑀤𑀺. 𑀬𑁂 𑀘 𑀫𑀳𑀸𑀲𑀸𑀯𑀓𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸, 𑀢𑁂 𑀧𑀢𑀺𑀫𑀸𑀦𑁂𑀢𑀺, 𑀢𑀲𑁆𑀫𑀸𑀧𑀺 𑀦 𑀦𑀺𑀲𑀻𑀤𑀺. 𑀅𑀧𑀺𑀘 𑀪𑀕𑀯𑀢𑀺 𑀕𑀸𑀭𑀯𑁂𑀦𑁂𑀯 𑀦 𑀦𑀺𑀲𑀻𑀤𑀺. 𑀤𑁂𑀯𑀢𑀸𑀦𑀜𑁆𑀳𑀺 𑀦𑀺𑀲𑀻𑀤𑀺𑀢𑀼𑀓𑀸𑀫𑀸𑀦𑀁 𑀆𑀲𑀦𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀅𑀦𑀺𑀘𑁆𑀙𑀫𑀸𑀦𑀸 𑀦𑀺𑀲𑀚𑁆𑀚𑀸𑀬 𑀘𑀺𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸𑀢𑀺 𑀏𑀯𑀁 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸. 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻𑀢𑀺 𑀪𑀕𑀯𑀦𑁆𑀢𑀁 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑀕𑀦𑁆𑀣𑀺𑀢𑁂𑀦 𑀯𑀘𑀦𑁂𑀦 𑀅𑀪𑀸𑀲𑀻𑀢𑀺 𑀅𑀢𑁆𑀣𑁄. 𑀓𑀣𑀁? 𑀩𑀳𑀽 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘…𑀧𑁂… 𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺.

𑀫𑀗𑁆𑀕𑀮𑀧𑀜𑁆𑀳𑀲𑀫𑀼𑀝𑁆𑀞𑀸𑀦𑀓𑀣𑀸

𑀢𑀢𑁆𑀣 𑀬𑀲𑁆𑀫𑀸 ‘‘𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄. 𑀯𑀡𑁆𑀡𑀬𑀦𑁆𑀢𑁄 𑀲𑀫𑀼𑀝𑁆𑀞𑀸𑀦𑀁, 𑀯𑀢𑁆𑀯𑀸’’𑀢𑀺 𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀢𑀲𑁆𑀲 𑀘 𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀬𑀁 𑀯𑀢𑁆𑀢𑀩𑁆𑀩𑀢𑀸𑀬 𑀑𑀓𑀸𑀲𑁄, 𑀢𑀲𑁆𑀫𑀸 𑀫𑀗𑁆𑀕𑀮𑀧𑀜𑁆𑀳𑀲𑀫𑀼𑀝𑁆𑀞𑀸𑀦𑀁 𑀢𑀸𑀯 𑀯𑀢𑁆𑀯𑀸 𑀧𑀘𑁆𑀙𑀸 𑀇𑀫𑁂𑀲𑀁 𑀕𑀸𑀣𑀸𑀧𑀤𑀸𑀦𑀫𑀢𑁆𑀣𑀁 ¶ 𑀯𑀡𑁆𑀡𑀬𑀺𑀲𑁆𑀲𑀸𑀫𑀺. 𑀓𑀺𑀜𑁆𑀘 𑀫𑀗𑁆𑀕𑀮𑀧𑀜𑁆𑀳𑀲𑀫𑀼𑀝𑁆𑀞𑀸𑀦𑀁? 𑀚𑀫𑁆𑀩𑀼𑀤𑀻𑀧𑁂 ¶ 𑀓𑀺𑀭 𑀢𑀢𑁆𑀣 𑀢𑀢𑁆𑀣 𑀦𑀕𑀭𑀤𑁆𑀯𑀸𑀭𑀲𑀦𑁆𑀣𑀸𑀕𑀸𑀭𑀲𑀪𑀸𑀤𑀻𑀲𑀼 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀤𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀲𑀻𑀢𑀸𑀳𑀭𑀡𑀸𑀤𑀺𑀓𑀣𑀁 𑀓𑀣𑀸𑀧𑁂𑀢𑀺, 𑀏𑀓𑁂𑀓𑀸 𑀓𑀣𑀸 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀦𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀏𑀓𑀤𑀺𑀯𑀲𑀁 𑀫𑀗𑁆𑀕𑀮𑀓𑀣𑀸 𑀲𑀫𑀼𑀝𑁆𑀞𑀸𑀲𑀺 ‘‘𑀓𑀺𑀁 𑀦𑀼 𑀔𑁄 𑀫𑀗𑁆𑀕𑀮𑀁, 𑀓𑀺𑀁 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁, 𑀲𑀼𑀢𑀁 𑀫𑀗𑁆𑀕𑀮𑀁, 𑀫𑀼𑀢𑀁 𑀫𑀗𑁆𑀕𑀮𑀁, 𑀓𑁄 𑀫𑀗𑁆𑀕𑀮𑀁 𑀚𑀸𑀦𑀸𑀢𑀻’’𑀢𑀺.

𑀅𑀣 ¶ 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀦𑀸𑀫𑁂𑀓𑁄 𑀧𑀼𑀭𑀺𑀲𑁄 𑀆𑀳 ‘‘𑀅𑀳𑀁 𑀫𑀗𑁆𑀕𑀮𑀁 𑀚𑀸𑀦𑀸𑀫𑀺, 𑀤𑀺𑀝𑁆𑀞𑀁 𑀮𑁄𑀓𑁂 𑀫𑀗𑁆𑀕𑀮𑀁 𑀤𑀺𑀝𑁆𑀞𑀁 𑀦𑀸𑀫 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀭𑀽𑀧𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀘𑀸𑀢𑀓𑀲𑀓𑀼𑀡𑀁 𑀯𑀸 𑀧𑀲𑁆𑀲𑀢𑀺, 𑀩𑁂𑀮𑀼𑀯𑀮𑀝𑁆𑀞𑀺𑀁 𑀯𑀸 𑀕𑀩𑁆𑀪𑀺𑀦𑀺𑀁 𑀯𑀸 𑀓𑀼𑀫𑀸𑀭𑀓𑁂 𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀧𑀼𑀡𑁆𑀡𑀖𑀝𑁂 𑀯𑀸 𑀅𑀮𑁆𑀮𑀭𑁄𑀳𑀺𑀢𑀫𑀘𑁆𑀙𑀁 𑀯𑀸 𑀆𑀚𑀜𑁆𑀜𑀁 𑀯𑀸 𑀆𑀚𑀜𑁆𑀜𑀭𑀣𑀁 𑀯𑀸 𑀉𑀲𑀪𑀁 𑀯𑀸 𑀕𑀸𑀯𑀺𑀁 𑀯𑀸 𑀓𑀧𑀺𑀮𑀁 𑀯𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀏𑀯𑀭𑀽𑀧𑀁 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀭𑀽𑀧𑀁 𑀧𑀲𑁆𑀲𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀫𑀗𑁆𑀕𑀮’’𑀦𑁆𑀢𑀺. 𑀢𑀲𑁆𑀲 𑀯𑀘𑀦𑀁 𑀏𑀓𑀘𑁆𑀘𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀦 𑀅𑀕𑁆𑀕𑀳𑁂𑀲𑀼𑀁. 𑀬𑁂 𑀦 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀢𑁂𑀦 𑀲𑀳 𑀯𑀺𑀯𑀤𑀺𑀁𑀲𑀼.

𑀅𑀣 𑀲𑀼𑀢𑀫𑀗𑁆𑀕𑀮𑀺𑀓𑁄 𑀦𑀸𑀫 𑀏𑀓𑁄 𑀧𑀼𑀭𑀺𑀲𑁄 𑀆𑀳 𑁋 ‘‘𑀘𑀓𑁆𑀔𑀼𑀦𑀸𑀫𑁂𑀢𑀁, 𑀪𑁄, 𑀲𑀼𑀘𑀺𑀫𑁆𑀧𑀺 𑀧𑀲𑁆𑀲𑀢𑀺 𑀅𑀲𑀼𑀘𑀺𑀫𑁆𑀧𑀺, 𑀢𑀣𑀸 𑀲𑀼𑀦𑁆𑀤𑀭𑀫𑁆𑀧𑀺, 𑀅𑀲𑀼𑀦𑁆𑀤𑀭𑀫𑁆𑀧𑀺, 𑀫𑀦𑀸𑀧𑀫𑁆𑀧𑀺, 𑀅𑀫𑀦𑀸𑀧𑀫𑁆𑀧𑀺. 𑀬𑀤𑀺 𑀢𑁂𑀦 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁 𑀲𑀺𑀬𑀸, 𑀲𑀩𑁆𑀩𑀫𑁆𑀧𑀺 𑀫𑀗𑁆𑀕𑀮𑀁 𑀲𑀺𑀬𑀸. 𑀢𑀲𑁆𑀫𑀸 𑀦 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁, 𑀅𑀧𑀺𑀘 ¶ 𑀔𑁄 𑀧𑀦 𑀲𑀼𑀢𑀁 𑀫𑀗𑁆𑀕𑀮𑀁. 𑀲𑀼𑀢𑀁 𑀦𑀸𑀫 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑁄 𑀲𑀤𑁆𑀤𑁄. 𑀲𑁂𑀬𑁆𑀬𑀣𑀺𑀤𑀁? 𑀇𑀥𑁂𑀓𑀘𑁆𑀘𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀯𑀟𑁆𑀠𑀸𑀢𑀺 𑀯𑀸 𑀯𑀟𑁆𑀠𑀫𑀸𑀦𑀸𑀢𑀺 𑀯𑀸 𑀧𑀼𑀡𑁆𑀡𑀸𑀢𑀺 𑀯𑀸 𑀨𑀼𑀲𑁆𑀲𑀸𑀢𑀺 𑀯𑀸 𑀲𑀼𑀫𑀦𑀸𑀢𑀺 𑀯𑀸 𑀲𑀺𑀭𑀻𑀢𑀺 𑀯𑀸 𑀲𑀺𑀭𑀺𑀯𑀟𑁆𑀠𑀸𑀢𑀺 𑀯𑀸 𑀅𑀚𑁆𑀚 𑀲𑀼𑀦𑀓𑁆𑀔𑀢𑁆𑀢𑀁 𑀲𑀼𑀫𑀼𑀳𑀼𑀢𑁆𑀢𑀁 𑀲𑀼𑀤𑀺𑀯𑀲𑀁 𑀲𑀼𑀫𑀗𑁆𑀕𑀮𑀦𑁆𑀢𑀺 𑀏𑀯𑀭𑀽𑀧𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀼𑀢𑀫𑀗𑁆𑀕𑀮’’𑀦𑁆𑀢𑀺. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀏𑀓𑀘𑁆𑀘𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀦 𑀅𑀕𑁆𑀕𑀳𑁂𑀲𑀼𑀁. 𑀬𑁂 𑀦 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀢𑁂𑀦 𑀲𑀳 𑀯𑀺𑀯𑀤𑀺𑀁𑀲𑀼.

𑀅𑀣 𑀫𑀼𑀢𑀫𑀗𑁆𑀕𑀮𑀺𑀓𑁄 𑀦𑀸𑀫𑁂𑀓𑁄 𑀧𑀼𑀭𑀺𑀲𑁄 𑀆𑀳 ‘‘𑀲𑁄𑀢𑀫𑁆𑀧𑀺 𑀳𑀺 𑀦𑀸𑀫𑁂𑀢𑀁, 𑀪𑁄, 𑀲𑀸𑀥𑀼𑀫𑁆𑀧𑀺 𑀅𑀲𑀸𑀥𑀼𑀫𑁆𑀧𑀺 𑀫𑀦𑀸𑀧𑀫𑁆𑀧𑀺 𑀅𑀫𑀦𑀸𑀧𑀫𑁆𑀧𑀺 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀬𑀤𑀺 𑀢𑁂𑀦 𑀲𑀼𑀢𑀁 𑀫𑀗𑁆𑀕𑀮𑀁 𑀲𑀺𑀬𑀸, 𑀲𑀩𑁆𑀩𑀫𑁆𑀧𑀺 𑀫𑀗𑁆𑀕𑀮𑀁 𑀲𑀺𑀬𑀸. 𑀢𑀲𑁆𑀫𑀸 𑀦 𑀲𑀼𑀢𑀁 𑀫𑀗𑁆𑀕𑀮𑀁, 𑀅𑀧𑀺𑀘 𑀔𑁄 𑀧𑀦 𑀫𑀼𑀢𑀁 𑀫𑀗𑁆𑀕𑀮𑀁. 𑀫𑀼𑀢𑀁 𑀦𑀸𑀫 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀧𑀤𑀼𑀫𑀕𑀦𑁆𑀥𑀸𑀤𑀺𑀧𑀼𑀧𑁆𑀨𑀕𑀦𑁆𑀥𑀁 𑀯𑀸 𑀖𑀸𑀬𑀢𑀺, 𑀨𑀼𑀲𑁆𑀲𑀤𑀦𑁆𑀢𑀓𑀝𑁆𑀞𑀁 𑀯𑀸 𑀔𑀸𑀤𑀢𑀺, 𑀧𑀣𑀯𑀺𑀁 𑀯𑀸 𑀆𑀫𑀲𑀢𑀺, 𑀳𑀭𑀺𑀢𑀲𑀲𑁆𑀲𑀁 𑀯𑀸 𑀅𑀮𑁆𑀮𑀕𑁄𑀫𑀬𑀁 𑀯𑀸 𑀓𑀘𑁆𑀙𑀧𑀁 𑀯𑀸 𑀢𑀺𑀮𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀆𑀫𑀲𑀢𑀺, 𑀨𑀼𑀲𑁆𑀲𑀫𑀢𑁆𑀢𑀺𑀓𑀸𑀬 𑀯𑀸 𑀲𑀫𑁆𑀫𑀸 𑀮𑀺𑀫𑁆𑀧𑀢𑀺, 𑀨𑀼𑀲𑁆𑀲𑀲𑀸𑀝𑀓𑀁 𑀯𑀸 𑀦𑀺𑀯𑀸𑀲𑁂𑀢𑀺, 𑀨𑀼𑀲𑁆𑀲𑀯𑁂𑀞𑀦𑀁 𑀯𑀸 𑀥𑀸𑀭𑁂𑀢𑀺. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀏𑀯𑀭𑀽𑀧𑀁 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀕𑀦𑁆𑀥𑀁 𑀯𑀸 𑀖𑀸𑀬𑀢𑀺, 𑀭𑀲𑀁 𑀯𑀸 𑀲𑀸𑀬𑀢𑀺, 𑀨𑁄𑀝𑁆𑀞𑀩𑁆𑀩𑀁 ¶ 𑀯𑀸 𑀨𑀼𑀲𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀼𑀢𑀫𑀗𑁆𑀕𑀮’’𑀦𑁆𑀢𑀺. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀏𑀓𑀘𑁆𑀘𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀦 𑀅𑀕𑁆𑀕𑀳𑁂𑀲𑀼𑀁.

𑀢𑀢𑁆𑀣 ¶ 𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀲𑀼𑀢𑀫𑀼𑀢𑀫𑀗𑁆𑀕𑀮𑀺𑀓𑁂 𑀅𑀲𑀓𑁆𑀔𑀺 𑀜𑀸𑀧𑁂𑀢𑀼𑀁, 𑀦 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀇𑀢𑀭𑁂 𑀤𑁆𑀯𑁂. 𑀢𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀬𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀲𑁆𑀲 𑀯𑀘𑀦𑀁 𑀕𑀡𑁆𑀳𑀺𑀁𑀲𑀼, 𑀢𑁂 ‘‘𑀤𑀺𑀝𑁆𑀞𑀁𑀬𑁂𑀯 𑀫𑀗𑁆𑀕𑀮’’𑀦𑁆𑀢𑀺 𑀕𑀢𑀸. 𑀬𑁂 𑀲𑀼𑀢𑀫𑀼𑀢𑀫𑀗𑁆𑀕𑀮𑀺𑀓𑀸𑀦𑀁, 𑀢𑁂 ‘‘𑀲𑀼𑀢𑀁𑀬𑁂𑀯 𑀫𑀼𑀢𑀁𑀬𑁂𑀯 𑀫𑀗𑁆𑀕𑀮’’𑀦𑁆𑀢𑀺 𑀕𑀢𑀸. 𑀏𑀯𑀫𑀬𑀁 𑀫𑀗𑁆𑀕𑀮𑀓𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀸 𑀚𑀸𑀢𑀸.

𑀅𑀣 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸 𑀕𑀼𑀫𑁆𑀩𑀕𑀼𑀫𑁆𑀩𑀸 ¶ 𑀳𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑀗𑁆𑀕𑀮’’𑀦𑁆𑀢𑀺 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀣𑁂𑀯 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀪𑀼𑀫𑁆𑀫𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀢𑀢𑁄 𑀲𑀼𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑀢𑀸𑀧𑀺 𑀢𑀣𑁂𑀯 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀦𑀁 𑀘𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀲𑀼𑀤𑀲𑁆𑀲𑀻𑀤𑁂𑀯𑀢𑀸𑀦𑀁 𑀅𑀓𑀦𑀺𑀝𑁆𑀞𑀤𑁂𑀯𑀢𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀢𑀢𑁄 𑀲𑀼𑀢𑁆𑀯𑀸 𑀅𑀓𑀦𑀺𑀝𑁆𑀞𑀤𑁂𑀯𑀢𑀸𑀧𑀺 𑀢𑀣𑁂𑀯 𑀕𑀼𑀫𑁆𑀩𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀫𑀗𑁆𑀕𑀮𑀸𑀦𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀏𑀯𑀁 𑀬𑀸𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀢𑁆𑀣 𑀫𑀗𑁆𑀕𑀮𑀘𑀺𑀦𑁆𑀢𑀸 𑀉𑀤𑀧𑀸𑀤𑀺. 𑀉𑀧𑁆𑀧𑀦𑁆𑀦𑀸 𑀘 ‘‘𑀇𑀤𑀁 𑀫𑀗𑁆𑀕𑀮𑀁 𑀇𑀤𑀁 𑀫𑀗𑁆𑀕𑀮’’𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀫𑀸𑀦𑀸𑀧𑀺 𑀅𑀧𑁆𑀧𑀢𑁆𑀢𑀸 𑀏𑀯 𑀯𑀺𑀦𑀺𑀘𑁆𑀙𑀬𑀁 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀅𑀝𑁆𑀞𑀸𑀲𑀺. 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀸 𑀘 𑀩𑁆𑀭𑀳𑁆𑀫𑀸𑀦𑁄 𑀘 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀦𑀸. 𑀏𑀓𑁄𑀧𑀺 ‘‘𑀇𑀤𑀫𑁂𑀯 𑀫𑀗𑁆𑀕𑀮’’𑀦𑁆𑀢𑀺 𑀬𑀣𑀸𑀪𑀼𑀘𑁆𑀘𑀢𑁄 𑀦𑀺𑀝𑁆𑀞𑀗𑁆𑀕𑀢𑁄 𑀦𑀸𑀳𑁄𑀲𑀺, 𑀫𑀗𑁆𑀕𑀮𑀓𑁄𑀮𑀸𑀳𑀮𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀓𑁄𑀮𑀸𑀳𑀮𑀁 𑀦𑀸𑀫 𑀧𑀜𑁆𑀘𑀯𑀺𑀥𑀁 𑀓𑀧𑁆𑀧𑀓𑁄𑀮𑀸𑀳𑀮𑀁, 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁, 𑀩𑀼𑀤𑁆𑀥𑀓𑁄𑀮𑀸𑀳𑀮𑀁, 𑀫𑀗𑁆𑀕𑀮𑀓𑁄𑀮𑀸𑀳𑀮𑀁, 𑀫𑁄𑀦𑁂𑀬𑁆𑀬𑀓𑁄𑀮𑀸𑀳𑀮𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑁆𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀳𑁄𑀳𑀺𑀢𑀺, 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄 𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 ¶ 𑀉𑀟𑁆𑀠𑀬𑁆𑀳𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣, 𑀚𑀸𑀕𑀭𑀣 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫.

𑀓𑀸𑀫𑀸𑀯𑀘𑀭𑀤𑁂𑀯𑀸𑀬𑁂𑀯 ‘‘𑀯𑀲𑁆𑀲𑀲𑀢𑀲𑁆𑀲𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 ¶ 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫. 𑀲𑀼𑀤𑁆𑀥𑀸𑀯𑀸𑀲𑀸 𑀧𑀦 𑀤𑁂𑀯𑀸 𑀩𑁆𑀭𑀳𑁆𑀫𑀸𑀪𑀭𑀡𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑁂𑀞𑀦𑀁 ¶ 𑀲𑀻𑀲𑁂 𑀓𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀩𑀼𑀤𑁆𑀥𑀕𑀼𑀡𑀯𑀸𑀤𑀺𑀦𑁄 ‘‘𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫. 𑀲𑀼𑀤𑁆𑀥𑀸𑀯𑀸𑀲𑀸 𑀏𑀯 𑀤𑁂𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 ‘‘𑀤𑁆𑀯𑀸𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀗𑁆𑀕𑀮𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀫𑀗𑁆𑀕𑀮𑀓𑁄𑀮𑀸𑀳𑀮𑀁 𑀦𑀸𑀫. 𑀲𑀼𑀤𑁆𑀥𑀸𑀯𑀸𑀲𑀸 𑀏𑀯 𑀤𑁂𑀯𑀸 ‘‘𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀸𑀕𑀫𑁆𑀫 𑀫𑁄𑀦𑁂𑀬𑁆𑀬𑀧𑁆𑀧𑀝𑀺𑀧𑀤𑀁 𑀧𑀼𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀇𑀤𑀁 𑀫𑁄𑀦𑁂𑀬𑁆𑀬𑀓𑁄𑀮𑀸𑀳𑀮𑀁 𑀦𑀸𑀫. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑁄𑀮𑀸𑀳𑀮𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀤𑀁 𑀫𑀗𑁆𑀕𑀮𑀓𑁄𑀮𑀸𑀳𑀮𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀅𑀣 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀫𑀗𑁆𑀕𑀮𑀸𑀦𑀺 𑀅𑀮𑀪𑀫𑀸𑀦𑁂𑀲𑀼 𑀤𑁆𑀯𑀸𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸 𑀤𑁂𑀯𑀢𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀖𑀭𑀲𑀸𑀫𑀺𑀓𑁄 𑀅𑀦𑁆𑀢𑁄𑀖𑀭𑀚𑀦𑀸𑀦𑀁, 𑀕𑀸𑀫𑀲𑀸𑀫𑀺𑀓𑁄 𑀕𑀸𑀫𑀯𑀸𑀲𑀻𑀦𑀁 ¶ , 𑀭𑀸𑀚𑀸 𑀲𑀩𑁆𑀩𑀫𑀦𑀼𑀲𑁆𑀲𑀸𑀦𑀁, 𑀏𑀯𑀫𑁂𑀯 𑀅𑀬𑀁 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀫𑁆𑀳𑀸𑀓𑀁 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀬𑀤𑀺𑀤𑀁 𑀧𑀼𑀜𑁆𑀜𑁂𑀦 𑀢𑁂𑀚𑁂𑀦 𑀇𑀲𑁆𑀲𑀭𑀺𑀬𑁂𑀦 𑀧𑀜𑁆𑀜𑀸𑀬 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀅𑀥𑀺𑀧𑀢𑀺, 𑀬𑀁𑀦𑀽𑀦 𑀫𑀬𑀁 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺. 𑀢𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀢𑀗𑁆𑀔𑀡𑀸𑀦𑀼𑀭𑀽𑀧𑀦𑀺𑀯𑀸𑀲𑀦𑀸𑀪𑀭𑀡𑀲𑀲𑁆𑀲𑀺𑀭𑀺𑀓𑀲𑀭𑀻𑀭𑀁 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀯𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 ‘‘𑀬𑀕𑁆𑀖𑁂, 𑀫𑀸𑀭𑀺𑀲, 𑀚𑀸𑀦𑁂𑀬𑁆𑀬𑀸𑀲𑀺, 𑀏𑀢𑀭𑀳𑀺 𑀫𑀗𑁆𑀕𑀮𑀧𑀜𑁆𑀳𑀸 𑀲𑀫𑀼𑀝𑁆𑀞𑀺𑀢𑀸, 𑀏𑀓𑁂 ‘𑀤𑀺𑀝𑁆𑀞𑀁 𑀫𑀗𑁆𑀕𑀮’𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀓𑁂 ‘𑀲𑀼𑀢𑀁 𑀫𑀗𑁆𑀕𑀮’𑀦𑁆𑀢𑀺, 𑀏𑀓𑁂 ‘𑀫𑀼𑀢𑀁 𑀫𑀗𑁆𑀕𑀮’𑀦𑁆𑀢𑀺, 𑀢𑀢𑁆𑀣 𑀫𑀬𑀜𑁆𑀘 𑀅𑀜𑁆𑀜𑁂 𑀘 𑀅𑀦𑀺𑀝𑁆𑀞𑀗𑁆𑀕𑀢𑀸, 𑀲𑀸𑀥𑀼 𑀯𑀢 𑀦𑁄 𑀢𑁆𑀯𑀁 𑀬𑀸𑀣𑀸𑀯𑀢𑁄 𑀩𑁆𑀬𑀸𑀓𑀭𑁄𑀳𑀻’’𑀢𑀺. 𑀤𑁂𑀯𑀭𑀸𑀚𑀸 𑀧𑀓𑀢𑀺𑀬𑀸𑀧𑀺 𑀧𑀜𑁆𑀜𑀯𑀸 ‘‘𑀅𑀬𑀁 𑀫𑀗𑁆𑀕𑀮𑀓𑀣𑀸 𑀓𑀢𑁆𑀣 𑀧𑀞𑀫𑀁 𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀆𑀳. ‘‘𑀫𑀬𑀁, 𑀤𑁂𑀯, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀅𑀲𑁆𑀲𑀼𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀦𑀁, 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀪𑀼𑀫𑁆𑀫𑀤𑁂𑀯𑀢𑀸𑀦𑀁, 𑀪𑀼𑀫𑁆𑀫𑀤𑁂𑀯𑀢𑀸 𑀫𑀦𑀼𑀲𑁆𑀲𑀸𑀭𑀓𑁆𑀔𑀤𑁂𑀯𑀢𑀸𑀦𑀁, 𑀫𑀦𑀼𑀲𑁆𑀲𑀸𑀭𑀓𑁆𑀔𑀤𑁂𑀯𑀢𑀸 ‘‘𑀫𑀦𑀼𑀲𑁆𑀲𑀮𑁄𑀓𑁂 𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀆𑀳𑀁𑀲𑀼.

𑀅𑀣 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀢𑁆𑀣 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀢𑀁 𑀪𑀕𑀯𑀦𑁆𑀢𑀁 𑀓𑁄𑀘𑀺 𑀧𑀼𑀘𑁆𑀙𑀻𑀢𑀺, 𑀦 𑀓𑁄𑀘𑀺 𑀤𑁂𑀯𑀸𑀢𑀺 ¶ . 𑀓𑀺𑀦𑁆𑀦𑀼 𑀦𑀸𑀫 𑀢𑀼𑀫𑁆𑀳𑁂 𑀫𑀸𑀭𑀺𑀲𑀸 𑀅𑀕𑁆𑀕𑀺𑀁 𑀙𑀟𑁆𑀟𑁂𑀢𑁆𑀯𑀸 𑀔𑀚𑁆𑀚𑁄𑀧𑀦𑀓𑀁 𑀉𑀚𑁆𑀚𑀸𑀮𑁂𑀣, 𑀬𑁂𑀦 𑀢𑀼𑀫𑁆𑀳𑁂 𑀅𑀦𑀯𑀲𑁂𑀲𑀫𑀗𑁆𑀕𑀮𑀤𑁂𑀲𑀓𑀁 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀣, 𑀆𑀕𑀘𑁆𑀙𑀣 𑀫𑀸𑀭𑀺𑀲𑀸, 𑀢𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀤𑁆𑀥𑀸 𑀲𑀲𑁆𑀲𑀺𑀭𑀺𑀓𑀁 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀮𑀪𑀺𑀲𑁆𑀲𑀸𑀫𑀸𑀢𑀺 𑀏𑀓𑀁 𑀤𑁂𑀯𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 ‘‘𑀢𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸’’𑀢𑀺. 𑀲𑁄 ¶ 𑀤𑁂𑀯𑀧𑀼𑀢𑁆𑀢𑁄 ¶ 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀺𑀚𑁆𑀚𑀼𑀭𑀺𑀯 𑀯𑀺𑀚𑁆𑀚𑁄𑀢𑀫𑀸𑀦𑁄 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀫𑀗𑁆𑀕𑀮𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 ‘‘𑀩𑀳𑀽 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘𑀸’’𑀢𑀺.

𑀇𑀤𑀁 𑀫𑀗𑁆𑀕𑀮𑀧𑀜𑁆𑀳𑀲𑀫𑀼𑀝𑁆𑀞𑀸𑀦𑀁.

𑀩𑀳𑀽𑀤𑁂𑀯𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁨. 𑀇𑀤𑀸𑀦𑀺 𑀕𑀸𑀣𑀸𑀧𑀤𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺. 𑀩𑀳𑀽𑀢𑀺 𑀅𑀦𑀺𑀬𑀫𑀺𑀢𑀲𑀗𑁆𑀔𑁆𑀬𑀸𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀅𑀦𑁂𑀓𑀲𑀢𑀸 𑀅𑀦𑁂𑀓𑀲𑀳𑀲𑁆𑀲𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸, 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀓𑀻𑀴𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀸 𑀲𑀺𑀭𑀺𑀬𑀸 𑀚𑁄𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀤𑁂𑀯𑀸𑀢𑀺 𑀢𑀺𑀯𑀺𑀥𑀸 𑀤𑁂𑀯𑀸 𑀲𑀫𑁆𑀫𑀼𑀢𑀺𑀉𑀧𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀺𑀯𑀲𑁂𑀦. 𑀬𑀣𑀸𑀳 𑁋

‘‘𑀤𑁂𑀯𑀸𑀢𑀺 𑀢𑀬𑁄 𑀤𑁂𑀯𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄 𑀤𑁂𑀯𑀺𑀬𑁄 𑀭𑀸𑀚𑀓𑀼𑀫𑀸𑀭𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀢𑁆𑀢𑀭𑀺𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀅𑀭𑀳𑀦𑁆𑀢𑁄 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀘𑀽𑀴𑀦𑀺. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁩𑁨, 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁧𑁯).

𑀢𑁂𑀲𑀼 𑀇𑀥 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸. 𑀫𑀦𑀼𑀦𑁄 𑀅𑀧𑀘𑁆𑀘𑀸𑀢𑀺 𑀫𑀦𑀼𑀲𑁆𑀲𑀸. 𑀧𑁄𑀭𑀸𑀡𑀸 𑀧𑀦 𑀪𑀡𑀦𑁆𑀢𑀺 𑁋 𑀫𑀦𑀲𑁄 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀢𑁂 𑀚𑀫𑁆𑀩𑀼𑀤𑀻𑀧𑀓𑀸, 𑀅𑀧𑀭𑀕𑁄𑀬𑀸𑀦𑀓𑀸, 𑀉𑀢𑁆𑀢𑀭𑀓𑀼𑀭𑀼𑀓𑀸, 𑀧𑀼𑀩𑁆𑀩𑀯𑀺𑀤𑁂𑀳𑀓𑀸𑀢𑀺 𑀘𑀢𑀼𑀩𑁆𑀩𑀺𑀥𑀸, 𑀇𑀥 𑀚𑀫𑁆𑀩𑀼𑀤𑀻𑀧𑀓𑀸 𑀅𑀥𑀺𑀧𑁆𑀧𑁂𑀢𑀸. 𑀫𑀗𑁆𑀕𑀮𑀦𑁆𑀢𑀺 𑀫𑀳𑀦𑁆𑀢𑀺 𑀇𑀫𑁂𑀳𑀺 𑀲𑀢𑁆𑀢𑀸𑀢𑀺 𑀫𑀗𑁆𑀕𑀮𑀸𑀦𑀺, 𑀇𑀤𑁆𑀥𑀺𑀁 𑀯𑀼𑀤𑁆𑀥𑀺𑀜𑁆𑀘 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀘𑀺𑀦𑁆𑀢𑀬𑀼𑀦𑁆𑀢𑀺 𑀘𑀺𑀦𑁆𑀢𑁂𑀲𑀼𑀁 𑀆𑀓𑀗𑁆𑀔𑀫𑀸𑀦𑀸𑀢𑀺 𑀇𑀘𑁆𑀙𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸. 𑀲𑁄𑀢𑁆𑀣𑀸𑀦𑀦𑁆𑀢𑀺 𑀲𑁄𑀢𑁆𑀣𑀺𑀪𑀸𑀯𑀁, 𑀲𑀩𑁆𑀩𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀲𑁄𑀪𑀦𑀸𑀦𑀁 𑀲𑀼𑀦𑁆𑀤𑀭𑀸𑀦𑀁 𑀓𑀮𑁆𑀬𑀸𑀡𑀸𑀦𑀁 𑀥𑀫𑁆𑀫𑀸𑀦𑀫𑀢𑁆𑀣𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑁆𑀭𑀽𑀳𑀻𑀢𑀺 𑀤𑁂𑀲𑁂𑀳𑀺 𑀧𑀓𑀸𑀲𑁂𑀳𑀺, 𑀆𑀘𑀺𑀓𑁆𑀔 𑀯𑀺𑀯𑀭 ¶ 𑀯𑀺𑀪𑀚 ¶ 𑀉𑀢𑁆𑀢𑀸𑀦𑀻𑀓𑀭𑁄𑀳𑀺. 𑀫𑀗𑁆𑀕𑀮𑀦𑁆𑀢𑀺 𑀇𑀤𑁆𑀥𑀺𑀓𑀸𑀭𑀡𑀁 𑀯𑀼𑀤𑁆𑀥𑀺𑀓𑀸𑀭𑀡𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀁. 𑀉𑀢𑁆𑀢𑀫𑀦𑁆𑀢𑀺 𑀯𑀺𑀲𑀺𑀝𑁆𑀞𑀁 𑀧𑀯𑀭𑀁 𑀲𑀩𑁆𑀩𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑁆𑀢𑀺 𑀅𑀬𑀁 𑀕𑀸𑀣𑀸𑀬 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀧𑀺𑀡𑁆𑀟𑀢𑁆𑀣𑁄 𑁋 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀫𑀗𑁆𑀕𑀮𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀢𑀸𑀬 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀯𑀸𑀮𑀕𑁆𑀕𑀓𑁄𑀝𑀺𑀑𑀓𑀸𑀲𑀫𑀢𑁆𑀢𑁂 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 ¶ 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀅𑀲𑀻𑀢𑀺𑀧𑀺 𑀲𑀼𑀔𑀼𑀫𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀩𑁆𑀩𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀸𑀦𑁄 𑀲𑀺𑀭𑀺𑀬𑀸 𑀘 𑀢𑁂𑀚𑀲𑀸 𑀘 𑀅𑀥𑀺𑀕𑁆𑀕𑀬𑁆𑀳 𑀯𑀺𑀭𑁄𑀘𑀫𑀸𑀦𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀤𑀺𑀲𑁆𑀯𑀸 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀅𑀦𑀸𑀕𑀢𑀸𑀦𑀫𑁆𑀧𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀮𑁆𑀮𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀆𑀳 𑁋

‘‘𑀩𑀳𑀽 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀫𑀗𑁆𑀕𑀮𑀸𑀦𑀺 𑀅𑀘𑀺𑀦𑁆𑀢𑀬𑀼𑀁;

𑀆𑀓𑀗𑁆𑀔𑀫𑀸𑀦𑀸 𑀲𑁄𑀢𑁆𑀣𑀸𑀦𑀁, 𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺.

𑀢𑀸𑀲𑀁 𑀤𑁂𑀯𑀢𑀸𑀦𑀁 𑀅𑀦𑀼𑀫𑀢𑀺𑀬𑀸 𑀫𑀦𑀼𑀲𑁆𑀲𑀸𑀦𑀜𑁆𑀘 𑀅𑀦𑀼𑀕𑁆𑀕𑀳𑁂𑀦 𑀫𑀬𑀸 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀬𑀁 𑀲𑀩𑁆𑀩𑁂𑀲𑀫𑁂𑀯 𑀅𑀫𑁆𑀳𑀸𑀓𑀁 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀢𑁄 𑀉𑀢𑁆𑀢𑀫𑀁 𑀫𑀗𑁆𑀕𑀮𑀁, 𑀢𑀁 𑀦𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀩𑁆𑀭𑀽𑀳𑀺 𑀪𑀕𑀯𑀸𑀢𑀺.

𑀅𑀲𑁂𑀯𑀦𑀸𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁩. 𑀏𑀯𑀫𑁂𑀢𑀁 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀲𑁂𑀯𑀦𑀸𑀢𑀺 𑀅𑀪𑀚𑀦𑀸 𑀅𑀧𑀬𑀺𑀭𑀼𑀧𑀸𑀲𑀦𑀸. 𑀩𑀸𑀮𑀸𑀦𑀦𑁆𑀢𑀺 𑀩𑀮𑀦𑁆𑀢𑀺 𑀅𑀲𑁆𑀲𑀲𑀦𑁆𑀢𑀻𑀢𑀺 𑀩𑀸𑀮𑀸, 𑀅𑀲𑁆𑀲𑀲𑀺𑀢𑀧𑀲𑁆𑀲𑀲𑀺𑀢𑀫𑀢𑁆𑀢𑁂𑀦 𑀚𑀻𑀯𑀦𑁆𑀢𑀺, 𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀩𑀸𑀮𑀸𑀦𑀁. 𑀧𑀡𑁆𑀟𑀺𑀢𑀸𑀦𑀦𑁆𑀢𑀺 𑀧𑀡𑁆𑀟𑀦𑁆𑀢𑀻𑀢𑀺 𑀧𑀡𑁆𑀟𑀺𑀢𑀸, 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀲𑀼 𑀅𑀢𑁆𑀣𑁂𑀲𑀼 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀻𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀧𑀡𑁆𑀟𑀺𑀢𑀸𑀦𑀁. 𑀲𑁂𑀯𑀦𑀸𑀢𑀺 𑀪𑀚𑀦𑀸 𑀧𑀬𑀺𑀭𑀼𑀧𑀸𑀲𑀦𑀸 𑀢𑀁𑀲𑀳𑀸𑀬𑀢𑀸 𑀢𑀁𑀲𑀫𑁆𑀧𑀯𑀗𑁆𑀓𑀢𑀸 𑀢𑀁𑀲𑀫𑀗𑁆𑀕𑀺𑀢𑀸 𑀧𑀽𑀚𑀸𑀢𑀺 𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀸. 𑀧𑀽𑀚𑀦𑁂𑀬𑁆𑀬𑀸𑀦𑀦𑁆𑀢𑀺 𑀧𑀽𑀚𑀸𑀭𑀳𑀸𑀦𑀁. 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺 𑀬𑀸 𑀘 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸, 𑀬𑀸 𑀘 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸, 𑀬𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦𑀁 𑀧𑀽𑀚𑀸, 𑀢𑀁 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀆𑀳 ‘‘𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺. 𑀬𑀁 𑀢𑀬𑀸 𑀧𑀼𑀝𑁆𑀞𑀁 ‘‘𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺, 𑀏𑀢𑁆𑀣 𑀢𑀸𑀯 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺 𑀕𑀡𑁆𑀳𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 ¶ 𑀧𑀦𑀲𑁆𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀯𑀫𑁂𑀢𑀁 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑀼𑀩𑁆𑀩𑀺𑀥𑀸 𑀕𑀸𑀣𑀸 𑀧𑀼𑀘𑁆𑀙𑀺𑀢𑀕𑀸𑀣𑀸, 𑀅𑀧𑀼𑀘𑁆𑀙𑀺𑀢𑀕𑀸𑀣𑀸, 𑀲𑀸𑀦𑀼𑀲𑀦𑁆𑀥𑀺𑀓𑀕𑀸𑀣𑀸, 𑀅𑀦𑀦𑀼𑀲𑀦𑁆𑀥𑀺𑀓𑀕𑀸𑀣𑀸𑀢𑀺. 𑀢𑀢𑁆𑀣 ‘‘𑀧𑀼𑀘𑁆𑀙𑀸𑀫𑀺 𑀢𑀁, 𑀕𑁄𑀢𑀫, 𑀪𑀽𑀭𑀺𑀧𑀜𑁆𑀜, 𑀓𑀣𑀗𑁆𑀓𑀭𑁄 𑀲𑀸𑀯𑀓𑁄 𑀲𑀸𑀥𑀼 𑀳𑁄𑀢𑀻’’𑀢𑀺 (𑀲𑀼. 𑀦𑀺. 𑁩𑁭𑁮) 𑀘 ‘‘𑀓𑀣𑀁 𑀦𑀼 𑀢𑁆𑀯𑀁, 𑀫𑀸𑀭𑀺𑀲, 𑀑𑀖𑀫𑀢𑀭𑀻’’𑀢𑀺 ¶ (𑀲𑀁. 𑀦𑀺. 𑁧.𑁧) 𑀘 𑀏𑀯𑀫𑀸𑀤𑀻𑀲𑀼 𑀧𑀼𑀘𑁆𑀙𑀺𑀢𑁂𑀦 𑀓𑀣𑀺𑀢𑀸 𑀧𑀼𑀘𑁆𑀙𑀺𑀢𑀕𑀸𑀣𑀸. ‘‘𑀬𑀁 𑀧𑀭𑁂 𑀲𑀼𑀔𑀢𑁄 𑀆𑀳𑀼, 𑀢𑀤𑀭𑀺𑀬𑀸 𑀆𑀳𑀼 𑀤𑀼𑀓𑁆𑀔𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁭𑁬𑁭) 𑀅𑀧𑀼𑀘𑁆𑀙𑀺𑀢𑁂𑀦 𑀅𑀢𑁆𑀢𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑀸 𑀅𑀧𑀼𑀘𑁆𑀙𑀺𑀢𑀕𑀸𑀣𑀸. 𑀲𑀩𑁆𑀩𑀸𑀧𑀺 𑀩𑀼𑀤𑁆𑀥𑀸𑀦𑀁 𑀕𑀸𑀣𑀸 ‘‘𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 (𑀅. 𑀦𑀺. 𑁩.𑁧𑁨𑁬; 𑀓𑀣𑀸. 𑁮𑁦𑁬) 𑀯𑀘𑀦𑀢𑁄 𑀲𑀸𑀦𑀼𑀲𑀦𑁆𑀥𑀺𑀓𑀕𑀸𑀣𑀸. 𑀅𑀦𑀦𑀼𑀲𑀦𑁆𑀥𑀺𑀓𑀕𑀸𑀣𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀦𑀢𑁆𑀣𑀺. 𑀏𑀯𑀫𑁂𑀢𑀸𑀲𑀼 𑀕𑀸𑀣𑀸𑀲𑀼 𑀅𑀬𑀁 𑀤𑁂𑀯𑀧𑀼𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑁂𑀦 𑀪𑀕𑀯𑀢𑀸 𑀓𑀣𑀺𑀢𑀢𑁆𑀢𑀸 𑀧𑀼𑀘𑁆𑀙𑀺𑀢𑀕𑀸𑀣𑀸. 𑀅𑀬𑀜𑁆𑀘 𑀬𑀣𑀸 𑀙𑁂𑀓𑁄 𑀧𑀼𑀭𑀺𑀲𑁄 𑀓𑀼𑀲𑀮𑁄 𑀫𑀕𑁆𑀕𑀲𑁆𑀲 𑀓𑀼𑀲𑀮𑁄 𑀅𑀫𑀕𑁆𑀕𑀲𑁆𑀲 𑀫𑀕𑁆𑀕𑀁 𑀧𑀼𑀝𑁆𑀞𑁄 𑀧𑀞𑀫𑀁 𑀯𑀺𑀚𑀳𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀸 𑀕𑀳𑁂𑀢𑀩𑁆𑀩𑀁 𑀆𑀘𑀺𑀓𑁆𑀔𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀤𑁆𑀯𑁂𑀥𑀸𑀧𑀣𑁄 𑀳𑁄𑀢𑀺, 𑀢𑀢𑁆𑀣 𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑀣𑀸’’𑀢𑀺, 𑀏𑀯𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑁂𑀲𑀼 𑀅𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀢𑀺 ¶ . 𑀪𑀕𑀯𑀸 𑀘 𑀫𑀕𑁆𑀕𑀓𑀼𑀲𑀮𑀧𑀼𑀭𑀺𑀲𑀲𑀤𑀺𑀲𑁄. 𑀬𑀣𑀸𑀳 𑁋

‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀲𑁄 𑀳𑀺 𑀓𑀼𑀲𑀮𑁄 𑀇𑀫𑀲𑁆𑀲 𑀮𑁄𑀓𑀲𑁆𑀲, 𑀓𑀼𑀲𑀮𑁄 𑀧𑀭𑀲𑁆𑀲 𑀮𑁄𑀓𑀲𑁆𑀲, 𑀓𑀼𑀲𑀮𑁄 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀅𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀫𑀸𑀭𑀥𑁂𑀬𑁆𑀬𑀲𑁆𑀲, 𑀓𑀼𑀲𑀮𑁄 𑀅𑀫𑀸𑀭𑀥𑁂𑀬𑁆𑀬𑀲𑁆𑀲𑀸’’𑀢𑀺.

𑀢𑀲𑁆𑀫𑀸 𑀧𑀞𑀫𑀁 𑀅𑀲𑁂𑀯𑀺𑀢𑀩𑁆𑀩𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀁, 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸’’𑀢𑀺. 𑀯𑀺𑀚𑀳𑀺𑀢𑀩𑁆𑀩𑀫𑀕𑁆𑀕𑁄 𑀯𑀺𑀬 𑀳𑀺 𑀧𑀞𑀫𑀁 𑀩𑀸𑀮𑀸 𑀦 𑀲𑁂𑀯𑀺𑀢𑀩𑁆𑀩𑀸 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀸, 𑀢𑀢𑁄 𑀕𑀳𑁂𑀢𑀩𑁆𑀩𑀫𑀕𑁆𑀕𑁄 𑀯𑀺𑀬 𑀧𑀡𑁆𑀟𑀺𑀢𑀸 𑀲𑁂𑀯𑀺𑀢𑀩𑁆𑀩𑀸 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀸𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀫𑀗𑁆𑀕𑀮𑀁 𑀓𑀣𑁂𑀦𑁆𑀢𑁂𑀦 𑀧𑀞𑀫𑀁 𑀩𑀸𑀮𑀸𑀦𑀫𑀲𑁂𑀯𑀦𑀸 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸 𑀓𑀣𑀺𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀲𑁆𑀫𑀸 𑀇𑀫𑀁 𑀤𑀺𑀝𑁆𑀞𑀸𑀤𑀻𑀲𑀼 𑀫𑀗𑁆𑀕𑀮𑀤𑀺𑀝𑁆𑀞𑀺𑀁 𑀩𑀸𑀮𑀲𑁂𑀯𑀦𑀸𑀬 𑀤𑁂𑀯𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀁𑀲𑀼, 𑀲𑀸 𑀘 𑀅𑀫𑀗𑁆𑀕𑀮𑀁, 𑀢𑀲𑁆𑀫𑀸 𑀢𑁂𑀲𑀁 𑀢𑀁 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀪𑀜𑁆𑀚𑀓𑀁 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀁 𑀕𑀭𑀳𑀦𑁆𑀢𑁂𑀦 𑀉𑀪𑀬𑀮𑁄𑀓𑀢𑁆𑀣𑀲𑀸𑀥𑀓𑀜𑁆𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀁 ¶ 𑀧𑀲𑀁𑀲𑀦𑁆𑀢𑁂𑀦 𑀪𑀕𑀯𑀢𑀸 𑀧𑀞𑀫𑀁 𑀩𑀸𑀮𑀸𑀦𑀫𑀲𑁂𑀯𑀦𑀸 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸 𑀓𑀣𑀺𑀢𑀸𑀢𑀺.

𑀢𑀢𑁆𑀣 𑀩𑀸𑀮𑀸 𑀦𑀸𑀫 𑀬𑁂 𑀓𑁂𑀘𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸, 𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀚𑀸𑀦𑀺𑀢𑀩𑁆𑀩𑀸. 𑀬𑀣𑀸𑀳 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀻’’𑀢𑀺 𑀲𑀼𑀢𑁆𑀢𑀁 (𑀅. 𑀦𑀺. 𑁩.𑁩; 𑀫. 𑀦𑀺. 𑁩.𑁨𑁪𑁬). 𑀅𑀧𑀺𑀘 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀙 𑀲𑀢𑁆𑀣𑀸𑀭𑁄, 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓𑀓𑀝𑀫𑁄𑀤𑀓𑀢𑀺𑀲𑁆𑀲𑀔𑀡𑁆𑀟𑀤𑁂𑀯𑀺𑀬𑀸𑀧𑀼𑀢𑁆𑀢𑀲𑀫𑀼𑀤𑁆𑀤𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀬𑁄 𑀅𑀢𑀻𑀢𑀓𑀸𑀮𑁂 𑀘 𑀤𑀻𑀖𑀯𑀺𑀤𑀲𑁆𑀲 𑀪𑀸𑀢𑀸𑀢𑀺 𑀇𑀫𑁂 𑀅𑀜𑁆𑀜𑁂 ¶ 𑀘 𑀏𑀯𑀭𑀽𑀧𑀸 𑀲𑀢𑁆𑀢𑀸 𑀩𑀸𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂 ¶ 𑀅𑀕𑁆𑀕𑀺𑀧𑀤𑀺𑀢𑁆𑀢𑀫𑀺𑀯 𑀅𑀕𑀸𑀭𑀁 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀢𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀢𑀦𑁄 𑀯𑀘𑀦𑀓𑀸𑀭𑀓𑁂 𑀘 𑀯𑀺𑀦𑀸𑀲𑁂𑀦𑁆𑀢𑀺. 𑀬𑀣𑀸 𑀤𑀻𑀖𑀯𑀺𑀤𑀲𑁆𑀲 𑀪𑀸𑀢𑀸 𑀘𑀢𑀼𑀩𑀼𑀤𑁆𑀥𑀦𑁆𑀢𑀭𑀁 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀢𑁆𑀢𑀸𑀦𑁄 𑀧𑀢𑀺𑀢𑁄 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀢𑀺, 𑀬𑀣𑀸 𑀘 𑀢𑀲𑁆𑀲 𑀤𑀺𑀝𑁆𑀞𑀺𑀁 𑀅𑀪𑀺𑀭𑀼𑀘𑀦𑀓𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀢𑀲𑁆𑀲𑁂𑀯 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑀸𑀦𑀺 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀴𑀸𑀕𑀸𑀭𑀸 𑀯𑀸 𑀢𑀺𑀡𑀸𑀕𑀸𑀭𑀸 𑀯𑀸 𑀅𑀕𑁆𑀕𑀺 𑀫𑀼𑀢𑁆𑀢𑁄 𑀓𑀽𑀝𑀸𑀕𑀸𑀭𑀸𑀦𑀺𑀧𑀺 𑀟𑀳𑀢𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀺 𑀦𑀺𑀯𑀸𑀢𑀸𑀦𑀺 𑀨𑀼𑀲𑀺𑀢𑀕𑁆𑀕𑀴𑀸𑀦𑀺 𑀧𑀺𑀳𑀺𑀢𑀯𑀸𑀢𑀧𑀸𑀦𑀸𑀦𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄. 𑀬𑁂 𑀓𑁂𑀘𑀺 𑀉𑀧𑀤𑁆𑀤𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺…𑀧𑁂… 𑀬𑁂 𑀓𑁂𑀘𑀺 𑀉𑀧𑀲𑀕𑁆𑀕𑀸…𑀧𑁂… 𑀦𑁄 𑀧𑀡𑁆𑀟𑀺𑀢𑀢𑁄. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺 (𑀅. 𑀦𑀺. 𑁩.𑁧).

𑀅𑀧𑀺𑀘 𑀧𑀽𑀢𑀺𑀫𑀘𑁆𑀙𑀲𑀤𑀺𑀲𑁄 𑀩𑀸𑀮𑁄, 𑀧𑀽𑀢𑀺𑀫𑀘𑁆𑀙𑀩𑀦𑁆𑀥𑀧𑀢𑁆𑀢𑀧𑀼𑀝𑀲𑀤𑀺𑀲𑁄 𑀳𑁄𑀢𑀺 𑀢𑀤𑀼𑀧𑀲𑁂𑀯𑀻, 𑀙𑀟𑁆𑀟𑀦𑀻𑀬𑀢𑀁 𑀚𑀺𑀕𑀼𑀘𑁆𑀙𑀦𑀻𑀬𑀢𑀜𑁆𑀘 𑀧𑀸𑀧𑀼𑀡𑀸𑀢𑀺 𑀯𑀺𑀜𑁆𑀜𑀽𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀻 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸’’𑀢𑀺. (𑀚𑀸. 𑁧.𑁧𑁫.𑁧𑁮𑁩; 𑁨.𑁨𑁨.𑁧𑁨𑁫𑁭);

𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀘𑀸𑀧𑀺 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳 𑁋

‘‘𑀩𑀸𑀮𑀁 ¶ 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

‘‘𑀓𑀺𑀦𑁆𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

‘‘𑀅𑀦𑀬𑀁 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦’’𑀦𑁆𑀢𑀺. (𑀚𑀸. 𑁧.𑁧𑁩.𑁯𑁦-𑁯𑁨);

𑀏𑀯𑀁 ¶ ¶ 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀸𑀮𑀽𑀧𑀲𑁂𑀯𑀦𑀁 𑀕𑀭𑀳𑀦𑁆𑀢𑁄 ‘‘𑀩𑀸𑀮𑀸𑀦𑀫𑀲𑁂𑀯𑀦𑀸 𑀫𑀗𑁆𑀕𑀮’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀡𑁆𑀟𑀺𑀢𑀲𑁂𑀯𑀦𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸 𑀫𑀗𑁆𑀕𑀮’’𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀡𑁆𑀟𑀺𑀢𑀸 𑀦𑀸𑀫 𑀬𑁂 𑀓𑁂𑀘𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀺𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸, 𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀚𑀸𑀦𑀺𑀢𑀩𑁆𑀩𑀸. 𑀬𑀣𑀸𑀳 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀻’’𑀢𑀺 (𑀅. 𑀦𑀺. 𑁩.𑁩; 𑀫. 𑀦𑀺. 𑁩.𑁨𑁫𑁩) 𑀲𑀼𑀢𑁆𑀢𑀁. 𑀅𑀧𑀺𑀘 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀅𑀜𑁆𑀜𑁂 𑀘 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸 𑀲𑀼𑀦𑁂𑀢𑁆𑀢𑀫𑀳𑀸𑀕𑁄𑀯𑀺𑀦𑁆𑀤𑀯𑀺𑀥𑀼𑀭𑀲𑀭𑀪𑀗𑁆𑀕𑀫𑀳𑁄𑀲𑀥𑀲𑀼𑀢𑀲𑁄𑀫𑀦𑀺𑀫𑀺𑀭𑀸𑀚- 𑀅𑀬𑁄𑀖𑀭𑀓𑀼𑀫𑀸𑀭𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀸𑀤𑀬𑁄 𑀘 𑀧𑀡𑁆𑀟𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂 𑀪𑀬𑁂 𑀯𑀺𑀬 𑀭𑀓𑁆𑀔𑀸 𑀅𑀦𑁆𑀥𑀓𑀸𑀭𑁂 𑀯𑀺𑀬 𑀧𑀤𑀻𑀧𑁄 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀸𑀪𑀺𑀪𑀯𑁂 𑀯𑀺𑀬 𑀅𑀦𑁆𑀦𑀧𑀸𑀦𑀸𑀤𑀺𑀧𑁆𑀧𑀝𑀺𑀮𑀸𑀪𑁄 𑀅𑀢𑁆𑀢𑀦𑁄 𑀯𑀘𑀦𑀓𑀭𑀸𑀦𑀁 𑀲𑀩𑁆𑀩𑀪𑀬𑀼𑀧𑀤𑁆𑀤𑀯𑀽𑀧𑀲𑀕𑁆𑀕𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀢𑀣𑀸𑀕𑀢𑀁 𑀆𑀕𑀫𑁆𑀫 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑀸𑀡𑀸 𑀤𑁂𑀯𑀫𑀦𑀼𑀲𑁆𑀲𑀸 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀸, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀤𑁂𑀯𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀲𑀼𑀕𑀢𑀺𑀮𑁄𑀓𑁂 𑀉𑀧𑁆𑀧𑀦𑁆𑀦𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀘𑀢𑀽𑀳𑀺 𑀘 𑀧𑀘𑁆𑀘𑀬𑁂𑀳𑀺 𑀣𑁂𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺 𑀓𑀼𑀮𑀲𑀳𑀲𑁆𑀲𑀸𑀦𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀢𑀣𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀧𑁆𑀧𑀪𑀼𑀢𑀻𑀲𑀼 𑀲𑀩𑁆𑀩𑀫𑀳𑀸𑀲𑀸𑀯𑀓𑁂𑀲𑀼, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁…𑀧𑁂… 𑀅𑀧𑁆𑀧𑁂𑀓𑀘𑁆𑀘𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀦𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀢𑁄 𑀪𑀬𑀁, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀤𑁆𑀤𑀯𑁄, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀲𑀕𑁆𑀕𑁄’’𑀢𑀺 (𑀅. 𑀦𑀺. 𑁩.𑁧).

𑀅𑀧𑀺𑀘 ¶ 𑀢𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀲𑀤𑀺𑀲𑁄 𑀧𑀡𑁆𑀟𑀺𑀢𑁄, 𑀢𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀩𑀦𑁆𑀥𑀧𑀮𑀺𑀯𑁂𑀞𑀦𑀧𑀢𑁆𑀢𑀲𑀤𑀺𑀲𑁄 𑀳𑁄𑀢𑀺 𑀢𑀤𑀼𑀧𑀲𑁂𑀯𑀻, 𑀪𑀸𑀯𑀦𑀻𑀬𑀢𑀁 𑀫𑀦𑀼𑀜𑁆𑀜𑀢𑀜𑁆𑀘 𑀆𑀧𑀚𑁆𑀚𑀢𑀺 𑀯𑀺𑀜𑁆𑀜𑀽𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀕𑀭𑀜𑁆𑀘 ¶ 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀻 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸’’𑀢𑀺. (𑀇𑀢𑀺𑀯𑀼. 𑁭𑁬; 𑀚𑀸. 𑁧.𑁧𑁫.𑁧𑁮𑁪; 𑁨.𑁨𑁨.𑁧𑁨𑁫𑁮);

𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀘𑀸𑀧𑀺 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳 𑁋

‘‘𑀥𑀻𑀭𑀁 ¶ 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

‘‘𑀓𑀺𑀦𑁆𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

‘‘𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀥𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀼𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄’’𑀢𑀺. (𑀚𑀸. 𑁧.𑁧𑁩.𑁯𑁪-𑁯𑁬);

𑀏𑀯𑀁 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀧𑀡𑁆𑀟𑀺𑀢𑀲𑁂𑀯𑀦𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸 𑀫𑀗𑁆𑀕𑀮’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀸𑀬 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸𑀬 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸𑀬 𑀘 𑀅𑀦𑀼𑀧𑀼𑀩𑁆𑀩𑁂𑀦 𑀧𑀽𑀚𑀦𑁂𑀬𑁆𑀬𑀪𑀸𑀯𑀁 𑀉𑀧𑀕𑀢𑀸𑀦𑀁 𑀧𑀽𑀚𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀽𑀚𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦𑀁 𑀫𑀗𑁆𑀕𑀮’’𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀽𑀚𑀦𑁂𑀬𑁆𑀬𑀸 𑀦𑀸𑀫 𑀲𑀩𑁆𑀩𑀤𑁄𑀲𑀯𑀺𑀭𑀳𑀺𑀢𑀢𑁆𑀢𑀸 𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑀢𑁄 𑀧𑀘𑁆𑀙𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀅𑀭𑀺𑀬𑀲𑀸𑀯𑀓𑀸 𑀘. 𑀢𑁂𑀲𑀜𑁆𑀳𑀺 𑀧𑀽𑀚𑀸 𑀅𑀧𑁆𑀧𑀓𑀸𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺, 𑀲𑀼𑀫𑀦𑀫𑀸𑀮𑀸𑀓𑀸𑀭𑀫𑀮𑁆𑀮𑀺𑀓𑀸𑀤𑀬𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀢𑀢𑁆𑀣𑁂𑀓𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀪𑀡𑀸𑀫 𑁋 𑀪𑀕𑀯𑀸 𑀳𑀺 𑀏𑀓𑀤𑀺𑀯𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀔𑁄 𑀲𑀼𑀫𑀦𑀫𑀸𑀮𑀸𑀓𑀸𑀭𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀦𑀕𑀭𑀤𑁆𑀯𑀸𑀭𑀫𑀦𑀼𑀧𑁆𑀧𑀢𑁆𑀢𑀁 𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀩𑀼𑀤𑁆𑀥𑀲𑀺𑀭𑀺𑀬𑀸 𑀚𑀮𑀦𑁆𑀢𑀁, 𑀤𑀺𑀲𑁆𑀯𑀸𑀦𑀲𑁆𑀲 ¶ 𑀏𑀢𑀤𑀳𑁄𑀲𑀺 ‘‘𑀭𑀸𑀚𑀸 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀤𑀤𑁂𑀬𑁆𑀬 ¶ , 𑀢𑀜𑁆𑀘 𑀇𑀥𑀮𑁄𑀓𑀫𑀢𑁆𑀢𑀫𑁂𑀯 𑀲𑀼𑀔𑀁 𑀪𑀯𑁂𑀬𑁆𑀬, 𑀪𑀕𑀯𑀢𑁄 𑀧𑀦 𑀧𑀽𑀚𑀸 𑀅𑀧𑁆𑀧𑀫𑁂𑀬𑁆𑀬𑀅𑀲𑀗𑁆𑀔𑁆𑀬𑁂𑀬𑁆𑀬𑀨𑀮𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀲𑀼𑀔𑀸𑀯𑀳𑀸 𑀳𑁄𑀢𑀺, 𑀳𑀦𑁆𑀤𑀸𑀳𑀁 𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀫𑀻’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀏𑀓𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀧𑀝𑀺𑀫𑀼𑀔𑀁 𑀔𑀺𑀧𑀺, 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀉𑀧𑀭𑀺 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀫𑀸𑀮𑀸𑀓𑀸𑀭𑁄 𑀢𑀫𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀢𑀭𑀘𑀺𑀢𑁆𑀢𑁄 𑀧𑀼𑀦 𑀏𑀓𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀔𑀺𑀧𑀺, 𑀢𑀸𑀦𑀺𑀧𑀺 𑀕𑀦𑁆𑀢𑁆𑀯𑀸 𑀫𑀸𑀮𑀸𑀓𑀜𑁆𑀘𑀼𑀓𑁄 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀅𑀝𑁆𑀞 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀔𑀺𑀧𑀺, 𑀢𑀸𑀦𑀺 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀓𑀽𑀝𑀸𑀕𑀸𑀭𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀪𑀕𑀯𑀸 𑀅𑀦𑁆𑀢𑁄𑀓𑀽𑀝𑀸𑀕𑀸𑀭𑁂 𑀅𑀳𑁄𑀲𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺. 𑀪𑀕𑀯𑀸 𑀫𑀸𑀮𑀸𑀓𑀸𑀭𑀁 𑀧𑀲𑁆𑀲𑀦𑁆𑀢𑁄 𑀲𑀺𑀢𑀁 ¶ 𑀧𑀸𑀢𑁆𑀯𑀸𑀓𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀦 𑀩𑀼𑀤𑁆𑀥𑀸 𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀆𑀳 ‘‘𑀏𑀲𑁄, 𑀆𑀦𑀦𑁆𑀤, 𑀫𑀸𑀮𑀸𑀓𑀸𑀭𑁄 𑀇𑀫𑀺𑀲𑁆𑀲𑀸 𑀧𑀽𑀚𑀸𑀬 𑀆𑀦𑀼𑀪𑀸𑀯𑁂𑀦 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀲𑀼𑀫𑀦𑀺𑀲𑁆𑀲𑀭𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀯𑀘𑀦𑀧𑀭𑀺𑀬𑁄𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀜𑁆𑀘 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀧𑀢𑀻𑀢𑁄 𑀲𑀼𑀫𑀦𑁄, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺. (𑀥. 𑀧. 𑁬𑁮);

𑀕𑀸𑀣𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀏𑀯𑀁 𑀅𑀧𑁆𑀧𑀓𑀸𑀧𑀺 𑀢𑁂𑀲𑀁 𑀧𑀽𑀚𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀆𑀫𑀺𑀲𑀧𑀽𑀚𑀸𑀯, 𑀓𑁄 𑀧𑀦 𑀯𑀸𑀤𑁄 𑀧𑀝𑀺𑀧𑀢𑁆𑀢𑀺𑀧𑀽𑀚𑀸𑀬? 𑀬𑀢𑁄 𑀬𑁂 𑀓𑀼𑀮𑀧𑀼𑀢𑁆𑀢𑀸 𑀲𑀭𑀡𑀕𑀫𑀦𑀲𑀺𑀓𑁆𑀔𑀸𑀧𑀤𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀉𑀧𑁄𑀲𑀣𑀗𑁆𑀕𑀲𑀫𑀸𑀤𑀸𑀦𑁂𑀦 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀻𑀳𑀺 𑀘 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀦𑁆𑀢𑀺, 𑀓𑁄 𑀢𑁂𑀲𑀁 𑀧𑀽𑀚𑀸𑀨𑀮𑀁 𑀯𑀡𑁆𑀡𑀬𑀺𑀲𑁆𑀲𑀢𑀺? 𑀢𑁂 𑀳𑀺 𑀢𑀣𑀸𑀕𑀢𑀁 𑀧𑀭𑀫𑀸𑀬 𑀧𑀽𑀚𑀸𑀬 𑀧𑀽𑀚𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋

‘‘𑀬𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑁄 𑀢𑀣𑀸𑀕𑀢𑀁 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 ¶ 𑀧𑀽𑀚𑁂𑀢𑀺 𑀅𑀧𑀘𑀺𑀬𑀢𑀺 𑀧𑀭𑀫𑀸𑀬 𑀧𑀽𑀚𑀸𑀬𑀸’’𑀢𑀺 (𑀤𑀻. 𑀦𑀺. 𑁨.𑁧𑁯𑁯).

𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸𑀦𑀫𑁆𑀧𑀺 𑀧𑀽𑀚𑀸𑀬 𑀳𑀺𑀢𑀲𑀼𑀔𑀸𑀯𑀳𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 ¶ 𑀕𑀳𑀝𑁆𑀞𑀸𑀦𑀁 𑀓𑀦𑀺𑀝𑁆𑀞𑀲𑁆𑀲 𑀚𑁂𑀝𑁆𑀞𑁄 𑀪𑀸𑀢𑀸𑀧𑀺 𑀪𑀕𑀺𑀦𑀻𑀧𑀺 𑀧𑀽𑀚𑀦𑁂𑀬𑁆𑀬𑀸, 𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀓𑀼𑀮𑀯𑀥𑀽𑀦𑀁 𑀲𑀸𑀫𑀺𑀓𑀲𑀲𑁆𑀲𑀼𑀲𑀲𑀼𑀭𑀸𑀢𑀺 𑀏𑀯𑀫𑁂𑀢𑁆𑀣 𑀧𑀽𑀚𑀦𑁂𑀬𑁆𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀫𑁆𑀧𑀺 𑀳𑀺 𑀧𑀽𑀚𑀸 𑀓𑀼𑀲𑀮𑀥𑀫𑁆𑀫𑀲𑀗𑁆𑀔𑀸𑀢𑀢𑁆𑀢𑀸 𑀆𑀬𑀼𑀆𑀤𑀺𑀯𑀼𑀟𑁆𑀠𑀺𑀳𑁂𑀢𑀼𑀢𑁆𑀢𑀸 𑀘 𑀫𑀗𑁆𑀕𑀮𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑁂 𑀫𑀢𑁆𑀢𑁂𑀬𑁆𑀬𑀸 𑀪𑀯𑀺𑀲𑁆𑀲𑀦𑁆𑀢𑀺 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄, 𑀇𑀤𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀢𑁂 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀆𑀬𑀼𑀦𑀸𑀧𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀯𑀡𑁆𑀡𑁂𑀦𑀧𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁧𑁦𑁫).

𑀇𑀤𑀸𑀦𑀺 𑀬𑀲𑁆𑀫𑀸 ‘‘𑀬𑀁 𑀬𑀢𑁆𑀣 𑀫𑀗𑁆𑀕𑀮𑀁. 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁 𑀢𑀲𑁆𑀲, 𑀫𑀗𑁆𑀕𑀮𑀢𑁆𑀢𑀁 𑀯𑀺𑀪𑀸𑀯𑀬𑁂’’𑀢𑀺 𑀇𑀢𑀺 𑀫𑀸𑀢𑀺𑀓𑀸 ¶ 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀇𑀤𑀁 𑀯𑀼𑀘𑁆𑀘𑀢𑀺 𑁋 𑀏𑀯𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸, 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸, 𑀧𑀽𑀚𑀦𑁂𑀬𑁆𑀬𑀸𑀦𑀜𑁆𑀘 𑀧𑀽𑀚𑀸𑀢𑀺 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸 𑀩𑀸𑀮𑀲𑁂𑀯𑀦𑀧𑀘𑁆𑀘𑀬𑀪𑀬𑀸𑀤𑀺𑀧𑀭𑀺𑀢𑁆𑀢𑀸𑀡𑁂𑀦 𑀉𑀪𑀬𑀮𑁄𑀓𑀢𑁆𑀣𑀳𑁂𑀢𑀼𑀢𑁆𑀢𑀸, 𑀧𑀡𑁆𑀟𑀺𑀢𑀸𑀦𑀁 𑀲𑁂𑀯𑀦𑀸 𑀧𑀽𑀚𑀦𑁂𑀬𑁆𑀬𑀸𑀦𑀁 𑀧𑀽𑀚𑀸 𑀘 𑀢𑀸𑀲𑀁 𑀨𑀮𑀯𑀺𑀪𑀽𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀩𑁆𑀩𑀸𑀦𑀲𑀼𑀕𑀢𑀺𑀳𑁂𑀢𑀼𑀢𑁆𑀢𑀸 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀢𑀼 𑀫𑀸𑀢𑀺𑀓𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀯 𑀬𑀁 𑀬𑀢𑁆𑀣 𑀫𑀗𑁆𑀕𑀮𑀁, 𑀢𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀲𑁆𑀲 𑀫𑀗𑁆𑀕𑀮𑀢𑁆𑀢𑀁 𑀯𑀺𑀪𑀸𑀯𑀬𑀺𑀲𑁆𑀲𑀸𑀫𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀦𑁆𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁪. 𑀏𑀯𑀁 𑀪𑀕𑀯𑀸 ‘‘𑀩𑁆𑀭𑀽𑀳𑀺 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺 𑀏𑀓𑀁 𑀅𑀚𑁆𑀛𑁂𑀲𑀺𑀢𑁄𑀧𑀺 𑀅𑀧𑁆𑀧𑀁 𑀬𑀸𑀘𑀺𑀢𑁄 𑀩𑀳𑀼𑀤𑀸𑀬𑀓𑁄 𑀉𑀴𑀸𑀭𑀧𑀼𑀭𑀺𑀲𑁄 𑀯𑀺𑀬 𑀏𑀓𑀸𑀬 ¶ 𑀕𑀸𑀣𑀸𑀬 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀯𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺𑀧𑀺 𑀤𑁂𑀯𑀢𑀸𑀦𑀁 𑀲𑁄𑀢𑀼𑀓𑀸𑀫𑀢𑀸𑀬 𑀫𑀗𑁆𑀕𑀮𑀸𑀦𑀫𑀢𑁆𑀣𑀺𑀢𑀸𑀬 𑀬𑁂𑀲𑀁 𑀬𑁂𑀲𑀁 𑀬𑀁 𑀬𑀁 𑀅𑀦𑀼𑀓𑀼𑀮𑀁, 𑀢𑁂 𑀢𑁂 𑀲𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀫𑀗𑁆𑀕𑀮𑁂 𑀦𑀺𑀬𑁄𑀚𑁂𑀢𑀼𑀓𑀸𑀫𑀢𑀸𑀬 𑀘 ‘‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘𑀸’’𑀢𑀺𑀆𑀤𑀻𑀳𑀺 𑀕𑀸𑀣𑀸𑀳𑀺 𑀧𑀼𑀦𑀧𑀺 𑀅𑀦𑁂𑀓𑀸𑀦𑀺 𑀫𑀗𑁆𑀕𑀮𑀸𑀦𑀺 𑀯𑀢𑁆𑀢𑀼𑀫𑀸𑀭𑀤𑁆𑀥𑁄. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀧𑀢𑀺𑀭𑀽𑀧𑁄𑀢𑀺 𑀅𑀦𑀼𑀘𑁆𑀙𑀯𑀺𑀓𑁄. 𑀤𑁂𑀲𑁄𑀢𑀺 𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀚𑀦𑀧𑀤𑁄𑀧𑀺 𑀬𑁄 𑀓𑁄𑀘𑀺 𑀲𑀢𑁆𑀢𑀸𑀦𑀁 𑀦𑀺𑀯𑀸𑀲𑁄 𑀑𑀓𑀸𑀲𑁄. 𑀯𑀸𑀲𑁄𑀢𑀺 𑀢𑀢𑁆𑀣 ¶ 𑀦𑀺𑀯𑀸𑀲𑁄. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀸 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼. 𑀓𑀢𑀧𑀼𑀜𑁆𑀜𑀢𑀸𑀢𑀺 𑀉𑀧𑀘𑀺𑀢𑀓𑀼𑀲𑀮𑀢𑀸. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺 𑀲𑀓𑀮𑁄 𑀯𑀸 𑀅𑀢𑁆𑀢𑀪𑀸𑀯𑁄, 𑀲𑀫𑁆𑀫𑀸𑀧𑀡𑀺𑀥𑀻𑀢𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀧𑀡𑀺𑀥𑀸𑀦𑀁 𑀦𑀺𑀬𑀼𑀜𑁆𑀚𑀦𑀁, 𑀞𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀦𑀸𑀫 𑀬𑀢𑁆𑀣 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀯𑀺𑀘𑀭𑀦𑁆𑀢𑀺, 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀯𑀢𑁆𑀢𑀦𑁆𑀢𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀤𑀺𑀩𑁆𑀩𑀢𑀺, 𑀢𑀢𑁆𑀣 𑀦𑀺𑀯𑀸𑀲𑁄 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀧𑀘𑁆𑀘𑀬𑀢𑁆𑀢𑀸 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀳𑀴𑀤𑀻𑀧𑀧𑀯𑀺𑀝𑁆𑀞𑀓𑁂𑀯𑀝𑁆𑀝𑀸𑀤𑀬𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀅𑀧𑀭𑁄 𑀦𑀬𑁄 𑁋 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀦𑀸𑀫 𑀪𑀕𑀯𑀢𑁄 𑀩𑁄𑀥𑀺𑀫𑀡𑁆𑀟𑀧𑁆𑀧𑀤𑁂𑀲𑁄 𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀺𑀢𑀧𑁆𑀧𑀤𑁂𑀲𑁄 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀲𑀩𑁆𑀩𑀢𑀺𑀢𑁆𑀣𑀺𑀬𑀫𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀺𑀢𑀓𑀡𑁆𑀟𑀫𑁆𑀩 𑀭𑀼𑀓𑁆𑀔𑀫𑀽𑀮𑀧𑁆𑀧𑀤𑁂𑀲𑁄 𑀤𑁂𑀯𑁄𑀭𑁄𑀳𑀡𑀧𑁆𑀧𑀤𑁂𑀲𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀲𑀸𑀯𑀢𑁆𑀣𑀺𑀭𑀸𑀚𑀕𑀳𑀸𑀤𑀺 ¶ 𑀩𑀼𑀤𑁆𑀥𑀸𑀥𑀺𑀯𑀸𑀲𑀧𑁆𑀧𑀤𑁂𑀲𑁄, 𑀢𑀢𑁆𑀣 𑀦𑀺𑀯𑀸𑀲𑁄 𑀲𑀢𑁆𑀢𑀸𑀦𑀁 𑀙𑀅𑀦𑀼𑀢𑁆𑀢𑀭𑀺𑀬𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀬𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀭𑁄 𑀦𑀬𑁄 (𑀫𑀳𑀸𑀯. 𑁨𑁫𑁯) 𑁋 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 ¶ 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀅𑀬𑀁 𑀫𑀚𑁆𑀛𑀺𑀫𑀤𑁂𑀲𑁄 𑀆𑀬𑀸𑀫𑁂𑀦 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀯𑀺𑀢𑁆𑀣𑀸𑀭𑁂𑀦 𑀅𑀟𑁆𑀠𑀢𑁂𑀬𑁆𑀬𑀸𑀦𑀺, 𑀧𑀭𑀺𑀓𑁆𑀔𑁂𑀧𑁂𑀦 𑀦𑀯 𑀬𑁄𑀚𑀦𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀏𑀲𑁄 𑀧𑀢𑀺𑀭𑀽𑀧𑀤𑁂𑀲𑁄 𑀦𑀸𑀫.

𑀏𑀢𑁆𑀣 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀤𑁆𑀯𑀺𑀲𑀳𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀤𑀻𑀧𑀸𑀦𑀜𑁆𑀘 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀓𑀸𑀭𑀓𑀸 𑀘𑀓𑁆𑀓𑀯𑀢𑁆𑀢𑀻 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀲𑀸𑀯𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀲𑀢𑁆𑀢𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀕𑁆𑀕𑀧𑀭𑀸𑀬𑀡𑀸 𑀳𑁄𑀦𑁆𑀢𑀺. 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀦 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀲𑀕𑁆𑀕𑀧𑀭𑀸𑀬𑀡𑀸 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀸 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀯𑀸𑀲𑁄 𑀇𑀫𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀧𑀘𑁆𑀘𑀬𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸 𑀦𑀸𑀫 𑀅𑀢𑀻𑀢𑀚𑀸𑀢𑀺𑀬𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑁂 𑀆𑀭𑀩𑁆𑀪 𑀉𑀧𑀘𑀺𑀢𑀓𑀼𑀲𑀮𑀢𑀸, 𑀲𑀸𑀧𑀺 𑀫𑀗𑁆𑀕𑀮𑀁. 𑀓𑀲𑁆𑀫𑀸? 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀼𑀔𑀢𑁄 𑀤𑀲𑁆𑀲𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀫𑁆𑀫𑀼𑀔𑀸 𑀲𑀼𑀢𑀸𑀬 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀻𑀢𑀺 𑀓𑀢𑁆𑀯𑀸. 𑀬𑁄 𑀘 𑀫𑀦𑀼𑀲𑁆𑀲𑁄 𑀧𑀼𑀩𑁆𑀩𑁂 𑀓𑀢𑀸𑀥𑀺𑀓𑀸𑀭𑁄 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑁄 𑀳𑁄𑀢𑀺, 𑀲𑁄 𑀢𑁂𑀦𑁂𑀯 𑀓𑀼𑀲𑀮𑀫𑀽𑀮𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺 𑀬𑀣𑀸 𑀭𑀸𑀚𑀸 𑀫𑀳𑀸𑀓𑀧𑁆𑀧𑀺𑀦𑁄 𑀅𑀕𑁆𑀕𑀫𑀳𑁂𑀲𑀻 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸 𑀫𑀗𑁆𑀕𑀮’’𑀦𑁆𑀢𑀺.

𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺 ¶ 𑀦𑀸𑀫 𑀇𑀥𑁂𑀓𑀘𑁆𑀘𑁄 𑀅𑀢𑁆𑀢𑀸𑀦𑀁 𑀤𑀼𑀲𑁆𑀲𑀻𑀮𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀲𑁆𑀲𑀤𑁆𑀥𑀁 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀫𑀘𑁆𑀙𑀭𑀺𑀁 𑀘𑀸𑀕𑀲𑀫𑁆𑀧𑀤𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀻’’𑀢𑀺 ¶ , 𑀏𑀲𑁄 𑀘 𑀫𑀗𑁆𑀕𑀮𑀁. 𑀓𑀲𑁆𑀫𑀸? 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀯𑁂𑀭𑀧𑁆𑀧𑀳𑀸𑀦𑀯𑀺𑀯𑀺𑀥𑀸𑀦𑀺𑀲𑀁𑀲𑀸𑀥𑀺𑀕𑀫𑀳𑁂𑀢𑀼𑀢𑁄𑀢𑀺.

𑀏𑀯𑀁 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘, 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀻 𑀘𑀸𑀢𑀺 𑀢𑀻𑀡𑀺𑀬𑁂𑀯 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀩𑀸𑀳𑀼𑀲𑀘𑁆𑀘𑀜𑁆𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁫. 𑀇𑀤𑀸𑀦𑀺 𑀩𑀸𑀳𑀼𑀲𑀘𑁆𑀘𑀜𑁆𑀘𑀸𑀢𑀺 𑀏𑀢𑁆𑀣 𑀩𑀸𑀳𑀼𑀲𑀘𑁆𑀘𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀪𑀸𑀯𑁄. 𑀲𑀺𑀧𑁆𑀧𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀓𑁄𑀲𑀮𑁆𑀮𑀁. 𑀯𑀺𑀦𑀬𑁄𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀯𑀺𑀦𑀬𑀦𑀁. 𑀲𑀼𑀲𑀺𑀓𑁆𑀔𑀺𑀢𑁄𑀢𑀺 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑁄. 𑀲𑀼𑀪𑀸𑀲𑀺𑀢𑀸𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸. 𑀬𑀸𑀢𑀺 𑀅𑀦𑀺𑀬𑀢𑀦𑀺𑀤𑁆𑀤𑁂𑀲𑁄. 𑀯𑀸𑀘𑀸𑀢𑀺 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 ¶ 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀩𑀸𑀳𑀼𑀲𑀘𑁆𑀘𑀁 𑀦𑀸𑀫 𑀬𑀁 𑀢𑀁 ‘‘𑀲𑀼𑀢𑀥𑀭𑁄 𑀳𑁄𑀢𑀺 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺 (𑀫. 𑀦𑀺. 𑁧.𑁩𑁩𑁯; 𑀅. 𑀦𑀺. 𑁪.𑁨𑁨) 𑀘 ‘‘𑀇𑀥𑁂𑀓𑀘𑁆𑀘𑀲𑁆𑀲 𑀩𑀳𑀼𑀓𑀁 𑀲𑀼𑀢𑀁 𑀳𑁄𑀢𑀺, 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀘 (𑀅. 𑀦𑀺. 𑁪.𑁬) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑀥𑀭𑀢𑁆𑀢𑀁 𑀯𑀡𑁆𑀡𑀺𑀢𑀁, 𑀢𑀁 𑀅𑀓𑀼𑀲𑀮𑀧𑁆𑀧𑀳𑀸𑀦𑀓𑀼𑀲𑀮𑀸𑀥𑀺𑀕𑀫𑀳𑁂𑀢𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀫𑀢𑁆𑀣𑀲𑀘𑁆𑀘𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼𑀢𑁄 𑀘 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁭.𑁬𑁭).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀢𑀺, 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑁄 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀢𑀺 𑀙𑀦𑁆𑀤𑁄 𑀚𑀸𑀬𑀢𑀺, 𑀙𑀦𑁆𑀤𑀚𑀸𑀢𑁄 𑀉𑀲𑁆𑀲𑀳𑀢𑀺, 𑀉𑀲𑁆𑀲𑀳𑀦𑁆𑀢𑁄 𑀢𑀼𑀮𑀬𑀢𑀺 ¶ , 𑀢𑀼𑀮𑀬𑀦𑁆𑀢𑁄 𑀧𑀤𑀳𑀢𑀺 𑀧𑀤𑀳𑀦𑁆𑀢𑁄 𑀓𑀸𑀬𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 ¶ 𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁪𑁩𑁨).

𑀅𑀧𑀺𑀘 𑀅𑀕𑀸𑀭𑀺𑀓𑀩𑀸𑀳𑀼𑀲𑀘𑁆𑀘𑀫𑁆𑀧𑀺 𑀬𑀁 𑀅𑀦𑀯𑀚𑁆𑀚𑀁, 𑀢𑀁 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀺𑀧𑁆𑀧𑀁 𑀦𑀸𑀫 𑀅𑀕𑀸𑀭𑀺𑀓𑀲𑀺𑀧𑁆𑀧𑀜𑁆𑀘 𑀅𑀦𑀕𑀸𑀭𑀺𑀓𑀲𑀺𑀧𑁆𑀧𑀜𑁆𑀘. 𑀢𑀢𑁆𑀣 𑀅𑀕𑀸𑀭𑀺𑀓𑀲𑀺𑀧𑁆𑀧𑀁 𑀦𑀸𑀫 𑀬𑀁 𑀧𑀭𑀽𑀧𑀭𑁄𑀥𑀯𑀺𑀭𑀳𑀺𑀢𑀁 𑀅𑀓𑀼𑀲𑀮𑀯𑀺𑀯𑀚𑁆𑀚𑀺𑀢𑀁 𑀫𑀡𑀺𑀓𑀸𑀭𑀲𑀼𑀯𑀡𑁆𑀡𑀓𑀸𑀭𑀓𑀫𑁆𑀫𑀸𑀤𑀺𑀓𑀁, 𑀢𑀁 𑀇𑀥𑀮𑁄𑀓𑀢𑁆𑀣𑀸𑀯𑀳𑀦𑀢𑁄 𑀫𑀗𑁆𑀕𑀮𑀁. 𑀅𑀦𑀕𑀸𑀭𑀺𑀓𑀲𑀺𑀧𑁆𑀧𑀁 𑀦𑀸𑀫 𑀘𑀻𑀯𑀭𑀯𑀺𑀘𑀸𑀭𑀡𑀲𑀺𑀩𑁆𑀩𑀦𑀸𑀤𑀺𑀲𑀫𑀡𑀧𑀭𑀺𑀓𑁆𑀔𑀸𑀭𑀸𑀪𑀺𑀲𑀗𑁆𑀔𑀭𑀡𑀁, 𑀬𑀁 𑀢𑀁 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀺𑀁 𑀓𑀭𑀡𑀻𑀬𑀸𑀦𑀺, 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁪𑁫; 𑁩𑁬𑁦; 𑀅. 𑀦𑀺. 𑁧𑁦.𑁧𑁭) 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀡𑁆𑀡𑀺𑀢𑀁, 𑀬𑀁 ‘‘𑀦𑀸𑀣𑀓𑀭𑁄 𑀥𑀫𑁆𑀫𑁄’’𑀢𑀺 𑀘 𑀯𑀼𑀢𑁆𑀢𑀁, 𑀢𑀁 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀦𑀬𑁄 𑀦𑀸𑀫 𑀅𑀕𑀸𑀭𑀺𑀓𑀯𑀺𑀦𑀬𑁄 𑀘 𑀅𑀦𑀕𑀸𑀭𑀺𑀓𑀯𑀺𑀦𑀬𑁄 𑀘. 𑀢𑀢𑁆𑀣 𑀅𑀕𑀸𑀭𑀺𑀓𑀯𑀺𑀦𑀬𑁄 𑀦𑀸𑀫 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀺𑀭𑀫𑀡𑀁, 𑀲𑁄 𑀢𑀢𑁆𑀣 𑀲𑀼𑀲𑀺𑀓𑁆𑀔𑀺𑀢𑁄 𑀅𑀲𑀁𑀓𑀺𑀮𑁂𑀲𑀸𑀧𑀚𑁆𑀚𑀦𑁂𑀦 𑀆𑀘𑀸𑀭𑀕𑀼𑀡𑀯𑀯𑀢𑁆𑀣𑀸𑀦𑁂𑀦 𑀘 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 ¶ 𑀫𑀗𑁆𑀕𑀮𑀁. 𑀅𑀦𑀕𑀸𑀭𑀺𑀓𑀯𑀺𑀦𑀬𑁄 𑀦𑀸𑀫 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀅𑀦𑀸𑀧𑀚𑁆𑀚𑀦𑀁, 𑀲𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀲𑀺𑀓𑁆𑀔𑀺𑀢𑁄, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀸 𑀅𑀦𑀕𑀸𑀭𑀺𑀓𑀯𑀺𑀦𑀬𑁄, 𑀲𑁄 𑀬𑀣𑀸 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀲𑀺𑀓𑁆𑀔𑀦𑁂𑀦 𑀲𑀼𑀲𑀺𑀓𑁆𑀔𑀺𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 𑀦𑀸𑀫 𑀫𑀼𑀲𑀸𑀯𑀸𑀤𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀸. 𑀬𑀣𑀸𑀳 ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀻’’𑀢𑀺 (𑀲𑀼. 𑀦𑀺. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀁). 𑀅𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑀸𑀘𑀸 𑀏𑀯 𑀯𑀸 𑀲𑀼𑀪𑀸𑀲𑀺𑀢𑀸. 𑀬𑀣𑀸𑀳 𑁋

‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄,

𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁,

𑀲𑀘𑁆𑀘𑀁 𑀪𑀡𑁂 𑀦𑀸𑀮𑀺𑀓𑀁 𑀢𑀁 𑀘𑀢𑀼𑀢𑁆𑀣’’𑀦𑁆𑀢𑀺. (𑀲𑀼. 𑀦𑀺. 𑁪𑁫𑁨);

𑀅𑀬𑀫𑁆𑀧𑀺 ¶ ¶ 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀦𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀘 𑀅𑀬𑀁 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀸 𑀏𑀯, 𑀢𑀲𑁆𑀫𑀸 𑀯𑀺𑀦𑀬𑀕𑁆𑀕𑀳𑀡𑁂𑀦 𑀏𑀢𑀁 𑀅𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀦𑀬𑁄 𑀲𑀗𑁆𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀓𑀺𑀁 𑀇𑀫𑀺𑀦𑀸 𑀧𑀭𑀺𑀲𑁆𑀲𑀫𑁂𑀦 𑀧𑀭𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀤𑀺𑀯𑀸𑀘𑀸 𑀇𑀥 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 𑀬𑀣𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀏𑀯𑀁 𑀲𑀢𑁆𑀢𑀸𑀦𑀁 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀧𑀘𑁆𑀘𑀬𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘 𑁋

‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸’’𑀢𑀺. (𑀲𑀼. 𑀦𑀺. 𑁪𑁫𑁬);

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀩𑀸𑀳𑀼𑀲𑀘𑁆𑀘𑀁, 𑀲𑀺𑀧𑁆𑀧𑀁, 𑀯𑀺𑀦𑀬𑁄 𑀲𑀼𑀲𑀺𑀓𑁆𑀔𑀺𑀢𑁄, 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀩𑀸𑀳𑀼𑀲𑀘𑁆𑀘𑀜𑁆𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀦𑁆𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁬. 𑀇𑀤𑀸𑀦𑀺 ¶ 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀫𑀸𑀢𑀼 𑀘 𑀧𑀺𑀢𑀼 𑀘𑀸𑀢𑀺 𑀫𑀸𑀢𑀸𑀧𑀺𑀢𑀼. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀳𑀦𑀁. 𑀧𑀼𑀢𑁆𑀢𑀸𑀦𑀜𑁆𑀘 𑀤𑀸𑀭𑀸𑀦𑀜𑁆𑀘𑀸𑀢𑀺 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀡𑁆𑀳𑀦𑀁 𑀲𑀗𑁆𑀕𑀳𑁄. 𑀦 𑀆𑀓𑀼𑀮𑀸 𑀅𑀦𑀸𑀓𑀼𑀮𑀸. 𑀓𑀫𑁆𑀫𑀸𑀦𑀺 𑀏𑀯 𑀓𑀫𑁆𑀫𑀦𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀫𑀸𑀢𑀸 𑀦𑀸𑀫 𑀚𑀦𑀺𑀓𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀧𑀺𑀢𑀸. 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀧𑀸𑀤𑀥𑁄𑀯𑀦𑀲𑀫𑁆𑀩𑀸𑀳𑀦𑀼𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑁂𑀳𑀺 𑀘𑀢𑀼𑀧𑀘𑁆𑀘𑀬𑀲𑀫𑁆𑀧𑀤𑀸𑀦𑁂𑀦 𑀘 𑀉𑀧𑀓𑀸𑀭𑀓𑀭𑀡𑀁. 𑀢𑀢𑁆𑀣 𑀬𑀲𑁆𑀫𑀸 𑀫𑀸𑀢𑀸𑀧𑀺𑀢𑀭𑁄 𑀩𑀳𑀽𑀧𑀓𑀸𑀭𑀸 𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀓𑀸𑀫𑀸 𑀅𑀦𑀼𑀓𑀫𑁆𑀧𑀓𑀸, 𑀬𑁂 𑀧𑀼𑀢𑁆𑀢𑀓𑁂 𑀩𑀳𑀺 𑀓𑀻𑀴𑀺𑀢𑁆𑀯𑀸 𑀧𑀁𑀲𑀼𑀫𑀓𑁆𑀔𑀺𑀢𑀲𑀭𑀻𑀭𑀓𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀧𑀁𑀲𑀼𑀁 𑀧𑀼𑀜𑁆𑀙𑀺𑀢𑁆𑀯𑀸 𑀫𑀢𑁆𑀣𑀓𑀁 𑀉𑀧𑀲𑀺𑀗𑁆𑀖𑀸𑀬𑀦𑁆𑀢𑀸 𑀧𑀭𑀺𑀘𑀼𑀫𑁆𑀩𑀦𑁆𑀢𑀸 𑀘 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀯𑀲𑁆𑀲𑀲𑀢𑀫𑁆𑀧𑀺 𑀫𑀸𑀢𑀸𑀧𑀺𑀢𑀭𑁄 𑀲𑀻𑀲𑁂𑀦 𑀧𑀭𑀺𑀳𑀭𑀦𑁆𑀢𑀸 𑀧𑀼𑀢𑁆𑀢𑀸 𑀢𑁂𑀲𑀁 𑀧𑀢𑀺𑀓𑀸𑀭𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸. 𑀬𑀲𑁆𑀫𑀸 𑀘 𑀢𑁂 𑀆𑀧𑀸𑀤𑀓𑀸 𑀧𑁄𑀲𑀓𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄, 𑀩𑁆𑀭𑀳𑁆𑀫𑀲𑀫𑁆𑀫𑀢𑀸 𑀧𑀼𑀩𑁆𑀩𑀸𑀘𑀭𑀺𑀬𑀲𑀫𑁆𑀫𑀢𑀸, 𑀢𑀲𑁆𑀫𑀸 𑀢𑁂𑀲𑀁 ¶ 𑀉𑀧𑀝𑁆𑀞𑀸𑀦𑀁 𑀇𑀥 𑀧𑀲𑀁𑀲𑀁, 𑀧𑁂𑀘𑁆𑀘 𑀲𑀕𑁆𑀕𑀲𑀼𑀔𑀜𑁆𑀘 𑀆𑀯𑀳𑀢𑀺. 𑀢𑁂𑀦 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀩𑁆𑀭𑀳𑁆𑀫𑀸𑀢𑀺 ¶ 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂;

𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀁, 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸.

‘‘𑀢𑀲𑁆𑀫𑀸 𑀳𑀺 𑀦𑁂 𑀦𑀫𑀲𑁆𑀲𑁂𑀬𑁆𑀬, 𑀲𑀓𑁆𑀓𑀭𑁂𑀬𑁆𑀬 𑀘 𑀧𑀡𑁆𑀟𑀺𑀢𑁄;

𑀅𑀦𑁆𑀦𑁂𑀦 𑀅𑀣 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀉𑀘𑁆𑀙𑀸𑀤𑀦𑁂𑀦 𑀦𑁆𑀳𑀸𑀧𑀦𑁂𑀦, 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘.

‘‘𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. (𑀇𑀢𑀺𑀯𑀼. 𑁧𑁦𑁬; 𑀚𑀸. 𑁨.𑁨𑁦.𑁧𑁮𑁧-𑁧𑁮𑁩);

𑀅𑀧𑀭𑁄 𑀦𑀬𑁄 𑁋 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀪𑀭𑀡𑀓𑀺𑀘𑁆𑀘𑀓𑀭𑀡𑀓𑀼𑀮𑀯𑀁𑀲𑀝𑁆𑀞𑀧𑀦𑀸𑀤𑀺𑀧𑀜𑁆𑀘𑀯𑀺𑀥𑀁, 𑀢𑀁 𑀧𑀸𑀧𑀦𑀺𑀯𑀸𑀭𑀡𑀸𑀤𑀺𑀧𑀜𑁆𑀘𑀯𑀺𑀥𑀤𑀺𑀝𑁆𑀞𑀥𑀫𑁆𑀫𑀺𑀓𑀳𑀺𑀢𑀲𑀼𑀔𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑀪𑀢𑁄 𑀦𑁂 𑀪𑀭𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀺 ¶ , 𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀻’𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁭).

𑀅𑀧𑀺𑀘 𑀬𑁄 𑀫𑀸𑀢𑀸𑀧𑀺𑀢𑀭𑁄 𑀢𑀻𑀲𑀼 𑀯𑀢𑁆𑀣𑀽𑀲𑀼 ¶ 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦, 𑀲𑀻𑀮𑀲𑀫𑀸𑀤𑀸𑀧𑀦𑁂𑀦, 𑀧𑀩𑁆𑀩𑀚𑁆𑀚𑀸𑀬 𑀯𑀸 𑀉𑀧𑀝𑁆𑀞𑀳𑀢𑀺, 𑀅𑀬𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄. 𑀢𑀲𑁆𑀲 𑀢𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀧𑀘𑁆𑀘𑀼𑀧𑀓𑀸𑀭𑀪𑀽𑀢𑀁 𑀅𑀦𑁂𑀓𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀧𑀤𑀝𑁆𑀞𑀸𑀦𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀢𑁆𑀢𑀤𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 𑀅𑀢𑁆𑀢𑀢𑁄 𑀚𑀸𑀢𑀸 𑀧𑀼𑀢𑁆𑀢𑀸𑀧𑀺 𑀥𑀻𑀢𑀭𑁄𑀧𑀺 𑀧𑀼𑀢𑁆𑀢𑀸𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀤𑀸𑀭𑀸𑀢𑀺 𑀯𑀻𑀲𑀢𑀺𑀬𑀸 𑀪𑀭𑀺𑀬𑀸𑀦𑀁 𑀬𑀸 𑀓𑀸𑀘𑀺 𑀪𑀭𑀺𑀬𑀸. 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀧𑀼𑀢𑁆𑀢𑀤𑀸𑀭𑀁, 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀲𑁆𑀲. 𑀲𑀗𑁆𑀕𑀳𑁄𑀢𑀺 𑀲𑀫𑁆𑀫𑀸𑀦𑀦𑀸𑀤𑀻𑀳𑀺 𑀉𑀧𑀓𑀸𑀭𑀓𑀭𑀡𑀁. 𑀢𑀁 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀢𑀸𑀤𑀺𑀤𑀺𑀝𑁆𑀞𑀥𑀫𑁆𑀫𑀺𑀓𑀳𑀺𑀢𑀲𑀼𑀔𑀳𑁂𑀢𑀼𑀢𑁄 ¶ 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀧𑀘𑁆𑀙𑀺𑀫𑀸 𑀤𑀺𑀲𑀸 𑀧𑀼𑀢𑁆𑀢𑀤𑀸𑀭𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀏𑀢𑁆𑀣 𑀉𑀤𑁆𑀤𑀺𑀝𑁆𑀞𑀁 𑀧𑀼𑀢𑁆𑀢𑀤𑀸𑀭𑀁 𑀪𑀭𑀺𑀬𑀸𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑀲𑀫𑁆𑀫𑀸𑀦𑀦𑀸𑀬, 𑀅𑀦𑀯𑀫𑀸𑀦𑀦𑀸𑀬, 𑀅𑀦𑀢𑀺 𑀘𑀭𑀺𑀬𑀸𑀬, 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑁂𑀦, 𑀅𑀮𑀗𑁆𑀓𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑀁 𑀅𑀦𑀼𑀓𑀫𑁆𑀧𑀢𑀺, 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸 𑀘 𑀳𑁄𑀢𑀺, 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸 𑀘, 𑀅𑀦𑀢𑀺𑀘𑀸𑀭𑀺𑀦𑀻 𑀘, 𑀲𑀫𑁆𑀪𑀢𑀜𑁆𑀘 𑀅𑀦𑀼𑀭𑀓𑁆𑀔𑀢𑀺 𑀤𑀓𑁆𑀔𑀸 𑀘 𑀳𑁄𑀢𑀺 𑀅𑀦𑀮𑀲𑀸 𑀲𑀩𑁆𑀩𑀓𑀺𑀘𑁆𑀘𑁂𑀲𑀽’’𑀢𑀺 (𑀤𑀻. 𑀦𑀺. 𑁩.𑁨𑁬𑁯).

𑀅𑀬𑀁 𑀯𑀸 𑀅𑀧𑀭𑁄 𑀦𑀬𑁄 𑁋 𑀲𑀗𑁆𑀕𑀳𑁄𑀢𑀺 𑀥𑀫𑁆𑀫𑀺𑀓𑀸𑀳𑀺 𑀤𑀸𑀦𑀧𑀺𑀬𑀯𑀸𑀘𑀸𑀢𑁆𑀣𑀘𑀭𑀺𑀬𑀸𑀳𑀺 𑀲𑀗𑁆𑀕𑀡𑁆𑀳𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀧𑀭𑀺𑀩𑁆𑀩𑀬𑀤𑀸𑀦𑀁, 𑀦𑀓𑁆𑀔𑀢𑁆𑀢𑀤𑀺𑀯𑀲𑁂𑀲𑀼 𑀦𑀓𑁆𑀔𑀢𑁆𑀢𑀤𑀲𑁆𑀲𑀸𑀧𑀦𑀁, 𑀫𑀗𑁆𑀕𑀮𑀤𑀺𑀯𑀲𑁂𑀲𑀼 𑀫𑀗𑁆𑀕𑀮𑀓𑀭𑀡𑀁, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀲𑀼 𑀅𑀢𑁆𑀣𑁂𑀲𑀼 𑀑𑀯𑀸𑀤𑀸𑀦𑀼𑀲𑀸𑀲𑀦𑀦𑁆𑀢𑀺. 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀳𑀺𑀢𑀳𑁂𑀢𑀼𑀢𑁄 ¶ 𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀳𑁂𑀢𑀼𑀢𑁄 𑀤𑁂𑀯𑀢𑀸𑀳𑀺𑀧𑀺 𑀦𑀫𑀲𑁆𑀲𑀦𑀻𑀬𑀪𑀸𑀯𑀳𑁂𑀢𑀼𑀢𑁄 𑀘 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑁋

‘‘𑀬𑁂 ¶ 𑀕𑀳𑀝𑁆𑀞𑀸 𑀧𑀼𑀜𑁆𑀜𑀓𑀭𑀸, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀺, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀻’’𑀢𑀺. (𑀲𑀁.𑀦𑀺.𑁧.𑁧.𑁨𑁬𑁪);

𑀅𑀦𑀸𑀓𑀼𑀮𑀸 𑀓𑀫𑁆𑀫𑀦𑁆𑀢𑀸 𑀦𑀸𑀫 𑀓𑀸𑀮𑀜𑁆𑀜𑀼𑀢𑀸𑀬 𑀧𑀢𑀺𑀭𑀽𑀧𑀓𑀸𑀭𑀺𑀢𑀸𑀬 𑀅𑀦𑀮𑀲𑀢𑀸𑀬 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀤𑀸𑀬, 𑀅𑀩𑁆𑀬𑀲𑀦𑀻𑀬𑀢𑀸𑀬 𑀘 𑀓𑀸𑀮𑀸𑀢𑀺𑀓𑁆𑀓𑀫𑀦𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀲𑀺𑀣𑀺𑀮𑀓𑀭𑀡𑀸𑀤𑀺𑀆𑀓𑀼𑀮𑀪𑀸𑀯𑀯𑀺𑀭𑀳𑀺𑀢𑀸 𑀓𑀲𑀺𑀕𑁄𑀭𑀓𑁆𑀔𑀯𑀸𑀡𑀺𑀚𑁆𑀚𑀸𑀤𑀬𑁄 𑀓𑀫𑁆𑀫𑀦𑁆𑀢𑀸. 𑀏𑀢𑁂 𑀅𑀢𑁆𑀢𑀦𑁄 𑀯𑀸 𑀧𑀼𑀢𑁆𑀢𑀤𑀸𑀭𑀲𑁆𑀲 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀯𑀸 𑀩𑁆𑀬𑀢𑁆𑀢𑀢𑀸𑀬 𑀏𑀯𑀁 𑀧𑀬𑁄𑀚𑀺𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀥𑀦𑀥𑀜𑁆𑀜𑀯𑀼𑀤𑁆𑀥𑀺𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀧𑀢𑀺𑀭𑀽𑀧𑀓𑀸𑀭𑀻 𑀥𑀼𑀭𑀯𑀸, 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦’’𑀦𑁆𑀢𑀺 𑀘 (𑀲𑀼. 𑀦𑀺. 𑁧𑁮𑁫; 𑀲𑀁. 𑀦𑀺. 𑁧.𑁨𑁪𑁬).

‘‘𑀦 𑀤𑀺𑀯𑀸 𑀲𑁄𑀧𑁆𑀧𑀲𑀻𑀮𑁂𑀦, 𑀭𑀢𑁆𑀢𑀺𑀫𑀼𑀝𑁆𑀞𑀸𑀦𑀤𑁂𑀲𑁆𑀲𑀺𑀦𑀸;

𑀦𑀺𑀘𑁆𑀘𑀁 𑀫𑀢𑁆𑀢𑁂𑀦 𑀲𑁄𑀡𑁆𑀟𑁂𑀦, 𑀲𑀓𑁆𑀓𑀸 𑀆𑀯𑀲𑀺𑀢𑀼𑀁 𑀖𑀭𑀁.

‘‘𑀅𑀢𑀺𑀲𑀻𑀢𑀁 ¶ 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀬𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

‘‘𑀬𑁄𑀥 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀬𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁫𑁩);

‘‘𑀪𑁄𑀕𑁂 𑀲𑀁𑀳𑀭𑀫𑀸𑀦𑀲𑁆𑀲, 𑀪𑀫𑀭𑀲𑁆𑀲𑁂𑀯 𑀇𑀭𑀻𑀬𑀢𑁄;

𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀺, 𑀯𑀫𑁆𑀫𑀺𑀓𑁄𑀯𑀽𑀧𑀘𑀻𑀬𑀢𑀻’’𑀢𑀺. 𑀘 𑀏𑀯𑀫𑀸𑀤𑀺 (𑀤𑀻. 𑀦𑀺. 𑁩.𑁨𑁬𑁫);

𑀏𑀯𑀁 ¶ 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀫𑀸𑀢𑀼𑀉𑀧𑀝𑁆𑀞𑀸𑀦𑀁, 𑀧𑀺𑀢𑀼𑀉𑀧𑀝𑁆𑀞𑀸𑀦𑀁, 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄, 𑀅𑀦𑀸𑀓𑀼𑀮𑀸 𑀘 𑀓𑀫𑁆𑀫𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑀁 𑀯𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀧𑀜𑁆𑀘, 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀯𑀸 𑀏𑀓𑀫𑁂𑀯 𑀓𑀢𑁆𑀯𑀸 𑀢𑀻𑀡𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀤𑀸𑀦𑀜𑁆𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁭. 𑀇𑀤𑀸𑀦𑀺 𑀤𑀸𑀦𑀜𑁆𑀘𑀸𑀢𑀺 𑀏𑀢𑁆𑀣 𑀤𑀻𑀬𑀢𑁂 𑀇𑀫𑀺𑀦𑀸𑀢𑀺 𑀤𑀸𑀦𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀲𑁆𑀲 𑀧𑀝𑀺𑀧𑀸𑀤𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀲𑁆𑀲 𑀘𑀭𑀺𑀬𑀸, 𑀥𑀫𑁆𑀫𑀸 𑀯𑀸 𑀅𑀦𑀧𑁂𑀢𑀸 𑀘𑀭𑀺𑀬𑀸 ¶ 𑀥𑀫𑁆𑀫𑀘𑀭𑀺𑀬𑀸. 𑀜𑀸𑀬𑀦𑁆𑀢𑁂 ‘‘𑀅𑀫𑁆𑀳𑀸𑀓𑀁 𑀇𑀫𑁂’’𑀢𑀺 𑀜𑀸𑀢𑀓𑀸. 𑀦 𑀅𑀯𑀚𑁆𑀚𑀸𑀦𑀺 𑀅𑀦𑀯𑀚𑁆𑀚𑀸𑀦𑀺, 𑀅𑀦𑀺𑀦𑁆𑀤𑀺𑀢𑀸𑀦𑀺 𑀅𑀕𑀭𑀳𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀤𑀸𑀦𑀁 𑀦𑀸𑀫 𑀧𑀭𑀁 𑀉𑀤𑁆𑀤𑀺𑀲𑁆𑀲 𑀲𑀼𑀩𑀼𑀤𑁆𑀥𑀺𑀧𑀼𑀩𑁆𑀩𑀺𑀓𑀸 𑀅𑀦𑁆𑀦𑀸𑀤𑀺𑀤𑀲𑀤𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑀸 𑀅𑀮𑁄𑀪𑁄. 𑀅𑀮𑁄𑀪𑁂𑀦 𑀳𑀺 𑀢𑀁 𑀯𑀢𑁆𑀣𑀼𑀁 𑀧𑀭𑀲𑁆𑀲 𑀧𑀝𑀺𑀧𑀸𑀤𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀻𑀬𑀢𑁂 𑀇𑀫𑀺𑀦𑀸𑀢𑀺 𑀤𑀸𑀦’’𑀦𑁆𑀢𑀺. 𑀢𑀁 𑀩𑀳𑀼𑀚𑀦𑀧𑀺𑀬𑀫𑀦𑀸𑀧𑀢𑀸𑀤𑀻𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀨𑀮𑀯𑀺𑀲𑁂𑀲𑀸𑀦𑀁 𑀅𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀤𑀸𑀬𑀓𑁄, 𑀲𑀻𑀳 𑀤𑀸𑀦𑀧𑀢𑀺, 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄’’𑀢𑀺 𑀏𑀯𑀫𑀸𑀤𑀻𑀦𑀺 (𑀅. 𑀦𑀺. 𑁫.𑁩𑁪) 𑀘𑁂𑀢𑁆𑀣 𑀲𑀼𑀢𑁆𑀢𑀸𑀦𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀺.

𑀅𑀧𑀭𑁄 ¶ 𑀦𑀬𑁄 𑁋 𑀤𑀸𑀦𑀁 𑀦𑀸𑀫 𑀤𑀼𑀯𑀺𑀥𑀁 𑀆𑀫𑀺𑀲𑀤𑀸𑀦𑀁, 𑀥𑀫𑁆𑀫𑀤𑀸𑀦𑀜𑁆𑀘, 𑀢𑀢𑁆𑀣 𑀆𑀫𑀺𑀲𑀤𑀸𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. 𑀇𑀥𑀮𑁄𑀓𑀧𑀭𑀮𑁄𑀓𑀤𑀼𑀓𑁆𑀔𑀓𑁆𑀔𑀬𑀲𑀼𑀔𑀸𑀯𑀳𑀲𑁆𑀲 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑁂𑀲𑀁 𑀳𑀺𑀢𑀓𑀸𑀫𑀢𑀸𑀬 𑀤𑁂𑀲𑀦𑀸 𑀥𑀫𑁆𑀫𑀤𑀸𑀦𑀁 ¶ , 𑀇𑀫𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀤𑀸𑀦𑀸𑀦𑀁 𑀏𑀢𑀤𑁂𑀯 𑀅𑀕𑁆𑀕𑀁. 𑀬𑀣𑀸𑀳 𑁋

‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀺,

𑀲𑀩𑁆𑀩𑀭𑀲𑀁 𑀥𑀫𑁆𑀫𑀭𑀲𑁄 𑀚𑀺𑀦𑀸𑀢𑀺;

𑀲𑀩𑁆𑀩𑀭𑀢𑀺𑀁 𑀥𑀫𑁆𑀫𑀭𑀢𑀺 𑀚𑀺𑀦𑀸𑀢𑀺,

𑀢𑀡𑁆𑀳𑀓𑁆𑀔𑀬𑁄 𑀲𑀩𑁆𑀩𑀤𑀼𑀓𑁆𑀔𑀁 𑀚𑀺𑀦𑀸𑀢𑀻’’𑀢𑀺. (𑀥. 𑀧. 𑁩𑁫𑁪);

𑀢𑀢𑁆𑀣 𑀆𑀫𑀺𑀲𑀤𑀸𑀦𑀲𑁆𑀲 𑀫𑀗𑁆𑀕𑀮𑀢𑁆𑀢𑀁 𑀯𑀼𑀢𑁆𑀢𑀫𑁂𑀯. 𑀥𑀫𑁆𑀫𑀤𑀸𑀦𑀁 𑀧𑀦 𑀬𑀲𑁆𑀫𑀸 𑀅𑀢𑁆𑀣𑀧𑀝𑀺𑀲𑀁𑀯𑁂𑀤𑀺𑀢𑀸𑀤𑀻𑀦𑀁 𑀕𑀼𑀡𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀣𑀸 𑀬𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺, 𑀢𑀣𑀸 𑀢𑀣𑀸 𑀲𑁄 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀢𑁆𑀣𑀧𑀝𑀺𑀲𑀁𑀯𑁂𑀤𑀻 𑀘 𑀳𑁄𑀢𑀺 𑀥𑀫𑁆𑀫𑀧𑀝𑀺𑀲𑀁𑀯𑁂𑀤𑀻 𑀘𑀸’’𑀢𑀺 𑀏𑀯𑀫𑀸𑀤𑀺 (𑀅. 𑀦𑀺. 𑁫.𑁨𑁬).

𑀥𑀫𑁆𑀫𑀘𑀭𑀺𑀬𑀸 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀘𑀭𑀺𑀬𑀸. 𑀬𑀣𑀸𑀳 𑁋 ‘‘𑀢𑀺𑀯𑀺𑀥𑀸 𑀔𑁄 𑀕𑀳𑀧𑀢𑀬𑁄 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸 𑀲𑀫𑀘𑀭𑀺𑀬𑀸 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺. 𑀲𑀸 𑀧𑀦𑁂𑀲𑀸 𑀥𑀫𑁆𑀫𑀘𑀭𑀺𑀬𑀸 𑀲𑀕𑁆𑀕𑀮𑁄𑀓𑀽𑀧𑀧𑀢𑁆𑀢𑀺𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄 𑀕𑀳𑀧𑀢𑀬𑁄 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁪𑁩𑁯).

𑀜𑀸𑀢𑀓𑀸 ¶ 𑀦𑀸𑀫 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀲𑀫𑁆𑀩𑀦𑁆𑀥𑀸. 𑀢𑁂𑀲𑀁 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑁂𑀦 𑀯𑀸 𑀩𑁆𑀬𑀸𑀥𑀺𑀧𑀸𑀭𑀺𑀚𑀼𑀜𑁆𑀜𑁂𑀦 𑀯𑀸 𑀅𑀪𑀺𑀳𑀢𑀸𑀦𑀁 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀆𑀕𑀢𑀸𑀦𑀁 𑀬𑀣𑀸𑀩𑀮𑀁 𑀖𑀸𑀲𑀘𑁆𑀙𑀸𑀤𑀦𑀥𑀦𑀥𑀜𑁆𑀜𑀸𑀤𑀻𑀳𑀺 𑀲𑀗𑁆𑀕𑀳𑁄 𑀧𑀲𑀁𑀲𑀸𑀤𑀻𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀲𑀼𑀕𑀢𑀺𑀕𑀫𑀦𑀸𑀤𑀻𑀦𑀜𑁆𑀘 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀦𑀯𑀚𑁆𑀚𑀸𑀦𑀺 𑀓𑀫𑁆𑀫𑀸𑀦𑀺 𑀦𑀸𑀫 𑀉𑀧𑁄𑀲𑀣𑀗𑁆𑀕𑀲𑀫𑀸𑀤𑀸𑀦𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀆𑀭𑀸𑀫𑀯𑀦𑀭𑁄𑀧𑀦𑀲𑁂𑀢𑀼𑀓𑀭𑀡𑀸𑀤𑀻𑀦𑀺 𑀓𑀸𑀬𑀯𑀘𑀻𑀫𑀦𑁄𑀲𑀼𑀘𑀭𑀺𑀢𑀓𑀫𑁆𑀫𑀸𑀦𑀺. 𑀢𑀸𑀦𑀺 𑀳𑀺 𑀦𑀸𑀦𑀧𑁆𑀧𑀓𑀸𑀭𑀳𑀺𑀢𑀲𑀼𑀔𑀸𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀞𑀸𑀦𑀁 ¶ 𑀔𑁄 𑀧𑀦𑁂𑀢𑀁, 𑀯𑀺𑀲𑀸𑀔𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 ¶ 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀼𑀢𑁆𑀢𑀸𑀦𑀺 (𑀅. 𑀦𑀺. 𑁮.𑁪𑁩) 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀺.

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀤𑀸𑀦𑀜𑁆𑀘, 𑀥𑀫𑁆𑀫𑀘𑀭𑀺𑀬𑀸 𑀘, 𑀜𑀸𑀢𑀓𑀸𑀦𑀜𑁆𑀘 𑀲𑀗𑁆𑀕𑀳𑁄, 𑀅𑀦𑀯𑀚𑁆𑀚𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀤𑀸𑀦𑀜𑁆𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀆𑀭𑀢𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁮. 𑀇𑀤𑀸𑀦𑀺 𑀆𑀭𑀢𑀻 𑀯𑀺𑀭𑀢𑀻𑀢𑀺 𑀏𑀢𑁆𑀣 𑀆𑀭𑀢𑀻𑀢𑀺 𑀆𑀭𑀫𑀡𑀁, 𑀯𑀺𑀭𑀢𑀻𑀢𑀺 𑀯𑀺𑀭𑀫𑀡𑀁, 𑀯𑀺𑀭𑀫𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑀸𑀢𑀺 𑀯𑀺𑀭𑀢𑀺. 𑀧𑀸𑀧𑀸𑀢𑀺 𑀅𑀓𑀼𑀲𑀮𑀸. 𑀫𑀤𑀦𑀻𑀬𑀝𑁆𑀞𑁂𑀦 𑀫𑀚𑁆𑀚𑀁, 𑀫𑀚𑁆𑀚𑀲𑁆𑀲 𑀧𑀸𑀦𑀁 𑀫𑀚𑁆𑀚𑀧𑀸𑀦𑀁, 𑀢𑀢𑁄 𑀫𑀚𑁆𑀚𑀧𑀸𑀦𑀸. 𑀲𑀁𑀬𑀫𑀦𑀁 𑀲𑀁𑀬𑀫𑁄 𑀅𑀧𑁆𑀧𑀫𑀚𑁆𑀚𑀦𑀁 𑀅𑀧𑁆𑀧𑀫𑀸𑀤𑁄. 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑁂𑀲𑀼. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀆𑀭𑀢𑀺 𑀦𑀸𑀫 𑀧𑀸𑀧𑁂 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀫𑀦𑀲𑀸 𑀏𑀯 𑀅𑀦𑀪𑀺𑀭𑀢𑀺. 𑀯𑀺𑀭𑀢𑀺 𑀦𑀸𑀫 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀓𑀸𑀬𑀯𑀸𑀘𑀸𑀳𑀺 𑀯𑀺𑀭𑀫𑀡𑀁, 𑀲𑀸 𑀘𑁂𑀲𑀸 𑀯𑀺𑀭𑀢𑀺 𑀦𑀸𑀫 𑀲𑀫𑁆𑀧𑀢𑁆𑀢𑀯𑀺𑀭𑀢𑀺, 𑀲𑀫𑀸𑀤𑀸𑀦𑀯𑀺𑀭𑀢𑀺, 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺, 𑀢𑀢𑁆𑀣 𑀬𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀚𑀸𑀢𑀺𑀁 𑀯𑀸 𑀓𑀼𑀮𑀁 𑀯𑀸 𑀕𑁄𑀢𑁆𑀢𑀁 𑀯𑀸 𑀧𑀝𑀺𑀘𑁆𑀘 ‘‘𑀦 𑀫𑁂 𑀏𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 ¶ 𑀇𑀫𑀁 𑀧𑀸𑀡𑀁 𑀳𑀦𑁂𑀬𑁆𑀬𑀁, 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀢𑁄 𑀯𑀺𑀭𑀢𑀺, 𑀅𑀬𑀁 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀦𑀸𑀫. 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑀸𑀤𑀸𑀦𑀯𑀺𑀭𑀢𑀺 𑀦𑀸𑀫, 𑀬𑀲𑁆𑀲𑀸 𑀧𑀯𑀢𑁆𑀢𑀺𑀢𑁄 𑀧𑀪𑀼𑀢𑀺 𑀓𑀼𑀮𑀧𑀼𑀢𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀦 𑀓𑀭𑁄𑀢𑀺. 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺 𑀦𑀸𑀫, 𑀬𑀲𑁆𑀲𑀸 𑀧𑀯𑀢𑁆𑀢𑀺𑀢𑁄 𑀧𑀪𑀼𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀸𑀧𑀁 𑀦𑀸𑀫 𑀬𑀁 𑀢𑀁 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀓𑀫𑁆𑀫𑀓𑀺𑀮𑁂𑀲𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄…𑀧𑁂… 𑀫𑀼𑀲𑀸𑀯𑀸𑀤𑁄’’𑀢𑀺 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑁋

‘‘𑀧𑀸𑀡𑀸𑀢𑀺𑀧𑀸𑀢𑁄 ¶ 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀫𑀼𑀲𑀸𑀯𑀸𑀤𑁄 𑀘 𑀯𑀼𑀘𑁆𑀘𑀢𑀺;

𑀧𑀭𑀤𑀸𑀭𑀕𑀫𑀦𑀜𑁆𑀘𑁂𑀯, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺. (𑀤𑀻. 𑀦𑀺. 𑁩.𑁨𑁪𑁫) 𑁋

𑀏𑀯𑀁 ¶ 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀁 𑀓𑀫𑁆𑀫𑀓𑀺𑀮𑁂𑀲𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀓𑀼𑀲𑀮𑀁, 𑀢𑀢𑁄 𑀧𑀸𑀧𑀸. 𑀲𑀩𑁆𑀩𑀸𑀧𑁂𑀲𑀸 𑀆𑀭𑀢𑀺 𑀘 𑀯𑀺𑀭𑀢𑀺 𑀘 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑀬𑀯𑁂𑀭𑀧𑁆𑀧𑀳𑀸𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄’’𑀢𑀺𑀆𑀤𑀻𑀦𑀺 𑀘𑁂𑀢𑁆𑀣 𑀲𑀼𑀢𑁆𑀢𑀸𑀦𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀸𑀦𑀺.

𑀫𑀚𑁆𑀚𑀧𑀸𑀦𑀸 𑀲𑀁𑀬𑀫𑁄 𑀦𑀸𑀫 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀬𑀸 𑀏𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀲𑁆𑀫𑀸 𑀧𑀦 𑀫𑀚𑁆𑀚𑀧𑀸𑀬𑀻 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀫𑀸𑀢𑀼 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀧𑀺𑀢𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑀣𑀸𑀕𑀢𑀲𑀸𑀯𑀓𑀸𑀦𑀫𑁆𑀧𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀭𑀳𑀁 𑀲𑀫𑁆𑀧𑀭𑀸𑀬𑁂 𑀤𑀼𑀕𑁆𑀕𑀢𑀺𑀁 𑀅𑀧𑀭𑀸𑀧𑀭𑀺𑀬𑁂 𑀉𑀫𑁆𑀫𑀸𑀤𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀫𑀚𑁆𑀚𑀧𑀸𑀦𑀸 𑀧𑀦 𑀲𑀁𑀬𑀫𑁄 𑀢𑁂𑀲𑀁 𑀤𑁄𑀲𑀸𑀦𑀁 𑀯𑀽𑀧𑀲𑀫𑀁 𑀢𑀩𑁆𑀩𑀺𑀧𑀭𑀻𑀢𑀕𑀼𑀡𑀲𑀫𑁆𑀧𑀤𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀅𑀬𑀁 𑀫𑀚𑁆𑀚𑀧𑀸𑀦𑀸 𑀲𑀁𑀬𑀫𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀫𑀸𑀤𑁄 𑀦𑀸𑀫 ‘‘𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸, 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸, 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸, 𑀑𑀮𑀻𑀦𑀯𑀼𑀢𑁆𑀢𑀺𑀢𑀸, 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸, 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸, 𑀅𑀦𑀸𑀲𑁂𑀯𑀦𑀸, 𑀅𑀪𑀸𑀯𑀦𑀸, 𑀅𑀩𑀳𑀼𑀮𑀻𑀓𑀫𑁆𑀫𑀁, 𑀅𑀦𑀥𑀺𑀝𑁆𑀞𑀸𑀦𑀁, 𑀅𑀦𑀦𑀼𑀬𑁄𑀕𑁄, 𑀧𑀫𑀸𑀤𑁄. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄’’𑀢𑀺 (𑀯𑀺𑀪. 𑁮𑁪𑁬). 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀢𑁆𑀣𑀢𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀦𑀸𑀦𑀧𑁆𑀧𑀓𑀸𑀭𑀓𑀼𑀲𑀮𑀸𑀥𑀺𑀕𑀫𑀳𑁂𑀢𑀼𑀢𑁄 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀢𑁄 𑀘 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺 ¶ . 𑀢𑀢𑁆𑀣 ¶ ‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄’’𑀢𑀺 𑀘 (𑀫. 𑀦𑀺. 𑁨.𑁧𑁮; 𑀅. 𑀦𑀺. 𑁫.𑁨𑁬), ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤’’𑀦𑁆𑀢𑀺 𑀘, 𑀏𑀯𑀫𑀸𑀤𑀺 (𑀥. 𑀧. 𑁨𑁧) 𑀲𑀢𑁆𑀣𑀼 𑀲𑀸𑀲𑀦𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁.

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀧𑀸𑀧𑀸 𑀯𑀺𑀭𑀢𑀺, 𑀫𑀚𑁆𑀚𑀧𑀸𑀦𑀸 𑀲𑀁𑀬𑀫𑁄, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀫𑀸𑀤𑁄𑀢𑀺 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀆𑀭𑀢𑀻𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀕𑀸𑀭𑀯𑁄𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁯. 𑀇𑀤𑀸𑀦𑀺 𑀕𑀸𑀭𑀯𑁄 𑀘𑀸𑀢𑀺 𑀏𑀢𑁆𑀣 𑀕𑀸𑀭𑀯𑁄𑀢𑀺 𑀕𑀭𑀼𑀪𑀸𑀯𑁄. 𑀦𑀺𑀯𑀸𑀢𑁄𑀢𑀺 𑀦𑀻𑀘𑀯𑀼𑀢𑁆𑀢𑀺𑀢𑀸. 𑀲𑀦𑁆𑀢𑀼𑀝𑁆𑀞𑀻𑀢𑀺 𑀲𑀦𑁆𑀢𑁄𑀲𑁄 ¶ . 𑀓𑀢𑀲𑁆𑀲 𑀚𑀸𑀦𑀦𑀢𑀸 𑀓𑀢𑀜𑁆𑀜𑀼𑀢𑀸. 𑀓𑀸𑀮𑁂𑀦𑀸𑀢𑀺 𑀔𑀡𑁂𑀦 𑀲𑀫𑀬𑁂𑀦. 𑀥𑀫𑁆𑀫𑀲𑁆𑀲 𑀲𑀯𑀦𑀁 𑀥𑀫𑁆𑀫𑀲𑁆𑀲𑀯𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀕𑀸𑀭𑀯𑁄 𑀦𑀸𑀫 𑀕𑀭𑀼𑀓𑀸𑀭𑀧𑁆𑀧𑀬𑁄𑀕𑀸𑀭𑀳𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑀣𑀸𑀕𑀢𑀲𑀸𑀯𑀓𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀫𑀸𑀢𑀸𑀧𑀺𑀢𑀼𑀚𑁂𑀝𑁆𑀞𑀓𑀪𑀸𑀢𑀺𑀓𑀪𑀕𑀺𑀦𑀻𑀆𑀤𑀻𑀲𑀼 𑀬𑀣𑀸𑀦𑀼𑀭𑀽𑀧𑀁 𑀕𑀭𑀼𑀓𑀸𑀭𑁄 𑀕𑀭𑀼𑀓𑀭𑀡𑀁 𑀲𑀕𑀸𑀭𑀯𑀢𑀸. 𑀲 𑀘𑀸𑀬𑀁 𑀕𑀸𑀭𑀯𑁄 𑀬𑀲𑁆𑀫𑀸 𑀲𑀼𑀕𑀢𑀺𑀕𑀫𑀦𑀸𑀤𑀻𑀦𑀁 𑀳𑁂𑀢𑀼. 𑀬𑀣𑀸𑀳 𑁋

‘‘𑀕𑀭𑀼𑀓𑀸𑀢𑀩𑁆𑀩𑀁 𑀕𑀭𑀼𑀁 𑀓𑀭𑁄𑀢𑀺, 𑀫𑀸𑀦𑁂𑀢𑀩𑁆𑀩𑀁 𑀫𑀸𑀦𑁂𑀢𑀺, 𑀧𑀽𑀚𑁂𑀢𑀩𑁆𑀩𑀁 𑀧𑀽𑀚𑁂𑀢𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀏𑀯𑀁 𑀲𑀫𑀢𑁆𑀢𑁂𑀦 𑀏𑀯𑀁 𑀲𑀫𑀸𑀤𑀺𑀦𑁆𑀦𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀦𑁄 𑀘𑁂 𑀓𑀸𑀬𑀲𑁆𑀲…𑀧𑁂… 𑀉𑀧𑀧𑀚𑁆𑀚𑀢𑀺, 𑀲𑀘𑁂 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀬𑀢𑁆𑀣 𑀬𑀢𑁆𑀣 𑀧𑀘𑁆𑀘𑀸𑀚𑀸𑀬𑀢𑀺, 𑀉𑀘𑁆𑀘𑀸𑀓𑀼𑀮𑀻𑀦𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁯𑁫).

𑀬𑀣𑀸 𑀘𑀸𑀳 𑁋 ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑁆𑀣𑀼𑀕𑀸𑀭𑀯𑀢𑀸’’𑀢𑀺𑀆𑀤𑀺 (𑀅. 𑀦𑀺. 𑁭.𑁩𑁩), 𑀢𑀲𑁆𑀫𑀸 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀦𑀺𑀯𑀸𑀢𑁄 𑀦𑀸𑀫 𑀦𑀻𑀘𑀫𑀦𑀢𑀸 𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀸, 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀦𑀺𑀳𑀢𑀫𑀸𑀦𑁄 𑀦𑀺𑀳𑀢𑀤𑀧𑁆𑀧𑁄 𑀧𑀸𑀤𑀧𑀼𑀜𑁆𑀙𑀦𑀓𑀘𑁄𑀴𑀲𑀤𑀺𑀲𑁄 𑀙𑀺𑀦𑁆𑀦𑀯𑀺𑀲𑀸𑀡𑀉𑀲𑀪𑀲𑀫𑁄 𑀉𑀤𑁆𑀥𑀝𑀤𑀸𑀞𑀲𑀧𑁆𑀧𑀲𑀫𑁄 𑀘 𑀳𑀼𑀢𑁆𑀯𑀸 𑀲𑀡𑁆𑀳𑁄 𑀲𑀔𑀺𑀮𑁄 𑀲𑀼𑀔𑀲𑀫𑁆𑀪𑀸𑀲𑁄 ¶ 𑀳𑁄𑀢𑀺, 𑀅𑀬𑀁 𑀦𑀺𑀯𑀸𑀢𑁄. 𑀲𑁆𑀯𑀸𑀬𑀁 ¶ 𑀬𑀲𑀸𑀤𑀺𑀕𑀼𑀡𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘 ‘‘𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀢𑁆𑀣𑀤𑁆𑀥𑁄, 𑀢𑀸𑀤𑀺𑀲𑁄 𑀮𑀪𑀢𑁂 𑀬𑀲’’𑀦𑁆𑀢𑀺 𑀏𑀯𑀫𑀸𑀤𑀺 (𑀤𑀻. 𑀦𑀺. 𑁩.𑁨𑁭𑁩).

𑀲𑀦𑁆𑀢𑀼𑀝𑁆𑀞𑀺 𑀦𑀸𑀫 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄, 𑀲𑁄 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄. 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼.

𑀢𑀲𑁆𑀲𑀸𑀬𑀁 𑀧𑀪𑁂𑀤𑀯𑀡𑁆𑀡𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸. 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀳𑁄𑀢𑀺, 𑀕𑀭𑀼𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀑𑀡𑀫𑀢𑀺 𑀯𑀸 𑀓𑀺𑀮𑀫𑀢𑀺 𑀯𑀸, 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺, 𑀲𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀜𑁆𑀘 𑀅𑀦𑀼𑀭𑀽𑀧’’𑀦𑁆𑀢𑀺 ¶ 𑀢𑁂𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀅𑀜𑁆𑀜𑀢𑁄 𑀯𑀸 𑀓𑀼𑀢𑁄𑀘𑀺 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀭𑀺𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀳𑁄𑀢𑀺, 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀸𑀴𑁆𑀳𑀁 𑀭𑁄𑀕𑀸𑀢𑀗𑁆𑀓𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀺𑀫𑀥𑀼𑀔𑀻𑀭𑀸𑀤𑀻𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 ¶ 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 ‘‘𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀁 𑀯𑀺𑀦𑀸 𑀅𑀬𑀸𑀧𑁂𑀦𑁆𑀢𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀦𑀼𑀭𑀽𑀧𑁄’’𑀢𑀺 𑀢𑁂𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 ¶ 𑀧𑀦 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺. 𑀲𑁄 𑀢𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀢𑀺, 𑀧𑀼𑀦 𑀅𑀜𑁆𑀜𑀁 𑀲𑀼𑀦𑁆𑀤𑀭𑀢𑀭𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀳𑁄𑀢𑀺, 𑀦𑀺𑀯𑀸𑀢𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄 𑀅𑀢𑀺𑀯𑀺𑀬 𑀧𑀺𑀢𑁆𑀢𑀭𑁄𑀕𑀸𑀤𑀻𑀳𑀺 𑀆𑀢𑀼𑀭𑀻𑀬𑀢𑀺. 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀧𑀸𑀧𑀼𑀡𑀦𑁂 𑀲𑀯𑀸𑀢𑁂 𑀲𑀻𑀢𑀮𑀲𑁂𑀦𑀸𑀲𑀦𑁂 𑀯𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀲𑀼𑀦𑁆𑀤𑀭𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺 ‘‘𑀲𑀼𑀦𑁆𑀤𑀭𑀲𑁂𑀦𑀸𑀲𑀦𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀢𑁆𑀭 𑀦𑀺𑀲𑀺𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲 𑀘 𑀧𑀼𑀦 𑀧𑀝𑀺𑀩𑀼𑀚𑁆𑀛𑀢𑁄 𑀓𑀸𑀫𑀯𑀺𑀢𑀓𑁆𑀓𑁄 𑀲𑀫𑀼𑀤𑀸𑀘𑀭𑀢𑀻’’𑀢𑀺. 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑀭𑀼𑀓𑁆𑀔𑀫𑀽𑀮𑀧𑀡𑁆𑀡𑀓𑀼𑀝𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀳𑀭𑀻𑀢𑀓𑀁 𑀯𑀸 𑀆𑀫𑀮𑀓𑀁 𑀯𑀸. 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑁂𑀳𑀺 𑀮𑀤𑁆𑀥𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀺𑀫𑁆𑀧𑀺 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀳𑁄𑀢𑀺, 𑀢𑁂𑀮𑁂𑀦𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑁂𑀦 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀏𑀓𑀲𑁆𑀫𑀺𑀁 ¶ 𑀪𑀸𑀚𑀦𑁂 𑀧𑀽𑀢𑀺𑀫𑀼𑀢𑁆𑀢𑀳𑀭𑀻𑀢𑀓𑀁 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀘𑀲𑁆𑀲 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑀜𑁆𑀜𑀢𑀭𑁂𑀦𑀧𑀺 𑀩𑁆𑀬𑀸𑀥𑀺 𑀯𑀽𑀧𑀲𑀫𑁆𑀫𑀢𑀺, 𑀅𑀣 ‘‘𑀧𑀽𑀢𑀺𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 ¶ 𑀯𑀡𑁆𑀡𑀺𑀢’’𑀦𑁆𑀢𑀺 𑀘 ‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁧𑁨𑁮) 𑀘 𑀘𑀺𑀦𑁆𑀢𑁂𑀦𑁆𑀢𑁄 𑀘𑀢𑀼𑀫𑀥𑀼𑀭𑀪𑁂𑀲𑀚𑁆𑀚𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀽𑀢𑀺𑀫𑀼𑀢𑁆𑀢𑀳𑀭𑀻𑀢𑀓𑁂𑀦 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀏𑀯𑀁𑀧𑀪𑁂𑀤𑁄 𑀲𑀩𑁆𑀩𑁄𑀧𑁂𑀲𑁄 𑀲𑀦𑁆𑀢𑁄𑀲𑁄 𑀲𑀦𑁆𑀢𑀼𑀝𑁆𑀞𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀅𑀢𑁆𑀭𑀺𑀘𑁆𑀙𑀢𑀸𑀫𑀳𑀺𑀘𑁆𑀙𑀢𑀸𑀧𑀸𑀧𑀺𑀘𑁆𑀙𑀢𑀸𑀤𑀻𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀥𑀺𑀕𑀫𑀳𑁂𑀢𑀼𑀢𑁄, 𑀲𑀼𑀕𑀢𑀺𑀳𑁂𑀢𑀼𑀢𑁄, 𑀅𑀭𑀺𑀬𑀫𑀕𑁆𑀕𑀲𑀫𑁆𑀪𑀸𑀭𑀪𑀸𑀯𑀢𑁄, 𑀘𑀸𑀢𑀼𑀤𑁆𑀤𑀺𑀲𑀸𑀤𑀺𑀪𑀸𑀯𑀳𑁂𑀢𑀼𑀢𑁄 𑀘 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀳 𑀘 𑁋

‘‘𑀘𑀸𑀢𑀼𑀤𑁆𑀤𑀺𑀲𑁄 ¶ 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺,

𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦𑀸’’𑀢𑀺. 𑀏𑀯𑀫𑀸𑀤𑀺 (𑀲𑀼. 𑀦𑀺. 𑁪𑁨);

𑀓𑀢𑀜𑁆𑀜𑀼𑀢𑀸 𑀦𑀸𑀫 𑀅𑀧𑁆𑀧𑀲𑁆𑀲 𑀯𑀸 𑀩𑀳𑀼𑀲𑁆𑀲 𑀯𑀸 𑀬𑁂𑀦 𑀓𑁂𑀦𑀘𑀺 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀲𑁆𑀲𑀭𑀡𑀪𑀸𑀯𑁂𑀦 𑀚𑀸𑀦𑀦𑀢𑀸. 𑀅𑀧𑀺𑀘 𑀦𑁂𑀭𑀬𑀺𑀓𑀸𑀤𑀺𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀡𑀢𑁄 𑀧𑀼𑀜𑁆𑀜𑀸𑀦𑀺 𑀏𑀯 𑀧𑀸𑀡𑀻𑀦𑀁 𑀩𑀳𑀽𑀧𑀓𑀸𑀭𑀸𑀦𑀺, 𑀢𑀢𑁄 𑀢𑁂𑀲𑀫𑁆𑀧𑀺 𑀉𑀧𑀓𑀸𑀭𑀸𑀦𑀼𑀲𑁆𑀲𑀭𑀡𑀢𑀸 𑀓𑀢𑀜𑁆𑀜𑀼𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑀲𑀁𑀲𑀦𑀻𑀬𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀤𑁆𑀯𑁂? 𑀬𑁄 𑀘 𑀧𑀼𑀩𑁆𑀩𑀓𑀸𑀭𑀻 𑀬𑁄 𑀘 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻’’𑀢𑀺 (𑀅. 𑀦𑀺. 𑁨.𑁧𑁨𑁦).

𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀁 𑀦𑀸𑀫 𑀬𑀲𑁆𑀫𑀺𑀁 𑀓𑀸𑀮𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁂𑀦 𑀅𑀪𑀺𑀪𑀽𑀢𑀁, 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂𑀲𑀁 𑀯𑀺𑀦𑁄𑀤𑀦𑀢𑁆𑀣𑀁 𑀥𑀫𑁆𑀫𑀲𑁆𑀲𑀯𑀦𑀁. 𑀅𑀧𑀭𑁂 𑀆𑀳𑀼 ‘‘𑀧𑀜𑁆𑀘𑀫𑁂 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀁 𑀦𑀸𑀫. 𑀬𑀣𑀸𑀳 𑀆𑀬𑀲𑁆𑀫𑀸 ¶ 𑀅𑀦𑀼𑀭𑀼𑀤𑁆𑀥𑁄 ‘𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀦𑀺𑀲𑀻𑀤𑀸𑀫𑀸’’’𑀢𑀺 (𑀫. 𑀦𑀺. 𑁧.𑁩𑁨𑁭; 𑀫𑀳𑀸𑀯. 𑁪𑁬𑁬).

𑀅𑀧𑀺𑀘 𑀬𑀲𑁆𑀫𑀺𑀁 𑀓𑀸𑀮𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁆𑀓𑀸 𑀳𑁄𑀢𑀺 𑀅𑀢𑁆𑀢𑀦𑁄 𑀓𑀗𑁆𑀔𑀸𑀯𑀺𑀦𑁄𑀤𑀓𑀁 𑀥𑀫𑁆𑀫𑀁 𑀲𑁄𑀢𑀼𑀁, 𑀢𑀲𑁆𑀫𑀺𑀁 𑀓𑀸𑀮𑁂𑀧𑀺 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 ‘‘𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁩𑁫𑁮). 𑀢𑀤𑁂𑀢𑀁 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑀘𑀢𑀼𑀭𑀸𑀦𑀺𑀲𑀁𑀲𑀆𑀲𑀯𑀓𑁆𑀔𑀬𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁 ¶ , 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀧𑀜𑁆𑀘𑀲𑁆𑀲 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀻’’𑀢𑀺 𑀘 (𑀲𑀁. 𑀦𑀺. 𑁫.𑁨𑁧𑁯).

‘‘𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁…𑀧𑁂… 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀘 (𑀅. 𑀦𑀺. 𑁪.𑁧𑁯𑁧).

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀮𑁂𑀦 𑀓𑀸𑀮𑀁 𑀲𑀫𑁆𑀫𑀸 𑀪𑀸𑀯𑀺𑀬𑀫𑀸𑀦𑀸 𑀲𑀫𑁆𑀫𑀸 𑀅𑀦𑀼𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦’’𑀦𑁆𑀢𑀺 𑀘 𑀏𑀯𑀫𑀸𑀤𑀺 (𑀅. 𑀦𑀺. 𑁪.𑁧𑁪𑁭).

𑀏𑀯𑀁 ¶ 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀕𑀸𑀭𑀯𑁄, 𑀦𑀺𑀯𑀸𑀢𑁄, 𑀲𑀦𑁆𑀢𑀼𑀝𑁆𑀞𑀺, 𑀓𑀢𑀜𑁆𑀜𑀼𑀢𑀸, 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺 𑀧𑀜𑁆𑀘 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀕𑀸𑀭𑀯𑁄 𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀔𑀦𑁆𑀢𑀻𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁦. 𑀇𑀤𑀸𑀦𑀺 𑀔𑀦𑁆𑀢𑀻 𑀘𑀸𑀢𑀺 𑀏𑀢𑁆𑀣 𑀔𑀫𑀦𑀁 𑀔𑀦𑁆𑀢𑀺. 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸𑀬 𑀲𑀼𑀔𑀁 𑀯𑀘𑁄 𑀅𑀲𑁆𑀫𑀺𑀦𑁆𑀢𑀺 𑀲𑀼𑀯𑀘𑁄, 𑀲𑀼𑀯𑀘𑀲𑁆𑀲 𑀓𑀫𑁆𑀫𑀁 𑀲𑁄𑀯𑀘𑀲𑁆𑀲𑀁, 𑀲𑁄𑀯𑀘𑀲𑁆𑀲𑀲𑁆𑀲 𑀪𑀸𑀯𑁄 𑀲𑁄𑀯𑀘𑀲𑁆𑀲𑀢𑀸. 𑀓𑀺𑀮𑁂𑀲𑀸𑀦𑀁 𑀲𑀫𑀺𑀢𑀢𑁆𑀢𑀸 𑀲𑀫𑀡𑀸. 𑀤𑀲𑁆𑀲𑀦𑀦𑁆𑀢𑀺 𑀧𑁂𑀓𑁆𑀔𑀦𑀁. 𑀥𑀫𑁆𑀫𑀲𑁆𑀲 𑀲𑀸𑀓𑀘𑁆𑀙𑀸 𑀥𑀫𑁆𑀫𑀲𑀸𑀓𑀘𑁆𑀙𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 ¶ 𑁋 𑀔𑀦𑁆𑀢𑀺 𑀦𑀸𑀫 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑁂 𑀯𑀥𑀩𑀦𑁆𑀥𑀸𑀤𑀻𑀳𑀺 𑀯𑀸 𑀯𑀺𑀳𑁂𑀲𑀦𑁆𑀢𑁂 𑀧𑀼𑀕𑁆𑀕𑀮𑁂 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀘 𑀦𑀺𑀩𑁆𑀩𑀺𑀓𑀸𑀭𑁄 𑀳𑁄𑀢𑀺 𑀔𑀦𑁆𑀢𑀺𑀯𑀸𑀤𑀻 𑀯𑀺𑀬. 𑀬𑀣𑀸𑀳 𑁋

‘‘𑀅𑀳𑀼 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀲𑀫𑀡𑁄 𑀔𑀦𑁆𑀢𑀺𑀤𑀻𑀧𑀦𑁄;

𑀢𑀁 𑀔𑀦𑁆𑀢𑀺𑀬𑀸𑀬𑁂𑀯 𑀞𑀺𑀢𑀁, 𑀓𑀸𑀲𑀺𑀭𑀸𑀚𑀸 𑀅𑀙𑁂𑀤𑀬𑀻’’𑀢𑀺. (𑀚𑀸. 𑁧.𑁪.𑁫𑁧);

𑀪𑀤𑁆𑀭𑀓𑀢𑁄 ¶ 𑀯𑀸 𑀫𑀦𑀲𑀺 𑀓𑀭𑁄𑀢𑀺 𑀢𑀢𑁄 𑀉𑀢𑁆𑀢𑀭𑀺 𑀅𑀧𑀭𑀸𑀥𑀸𑀪𑀸𑀯𑁂𑀦 𑀆𑀬𑀲𑁆𑀫𑀸 𑀧𑀼𑀡𑁆𑀡𑀢𑁆𑀣𑁂𑀭𑁄 𑀯𑀺𑀬. 𑀬𑀣𑀸𑀳 𑀲𑁄 𑁋

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀫𑁂 𑀏𑀯𑀁 𑀪𑀯𑀺𑀲𑁆𑀲𑀢𑀺 ‘𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀲𑀼𑀪𑀤𑁆𑀤𑀓𑀸 𑀯𑀢𑀺𑀫𑁂 𑀲𑀼𑀦𑀸𑀧𑀭𑀦𑁆𑀢𑀓𑀸 𑀫𑀦𑀼𑀲𑁆𑀲𑀸, 𑀬𑀁 𑀫𑁂 𑀦𑀬𑀺𑀫𑁂 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑁂𑀦𑁆𑀢𑀻’’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁯𑁬; 𑀲𑀁. 𑀦𑀺. 𑁪.𑁮𑁮).

𑀬𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 𑀇𑀲𑀻𑀦𑀫𑁆𑀧𑀺 𑀧𑀲𑀁𑀲𑀦𑀻𑀬𑁄 𑀳𑁄𑀢𑀺. 𑀬𑀣𑀸𑀳 𑀲𑀭𑀪𑀗𑁆𑀕𑁄 𑀇𑀲𑀺 𑁋

‘‘𑀓𑁄𑀥𑀁 ¶ 𑀯𑀥𑀺𑀢𑁆𑀯𑀸 𑀦 𑀓𑀤𑀸𑀘𑀺 𑀲𑁄𑀘𑀢𑀺,

𑀫𑀓𑁆𑀔𑀧𑁆𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺;

𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣,

𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’’𑀢𑀺. (𑀚𑀸. 𑁨.𑁧𑁭.𑁬𑁪);

𑀤𑁂𑀯𑀢𑀸𑀦𑀫𑁆𑀧𑀺 𑀧𑀲𑀁𑀲𑀦𑀻𑀬𑁄 𑀳𑁄𑀢𑀺. 𑀬𑀣𑀸𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑁋

‘‘𑀬𑁄 𑀳𑀯𑁂 𑀩𑀮𑀯𑀸 𑀲𑀦𑁆𑀢𑁄, 𑀤𑀼𑀩𑁆𑀩𑀮𑀲𑁆𑀲 𑀢𑀺𑀢𑀺𑀓𑁆𑀔𑀢𑀺;

𑀢𑀫𑀸𑀳𑀼 𑀧𑀭𑀫𑀁 𑀔𑀦𑁆𑀢𑀺𑀁, 𑀦𑀺𑀘𑁆𑀘𑀁 𑀔𑀫𑀢𑀺 𑀤𑀼𑀩𑁆𑀩𑀮𑁄’’𑀢𑀺. (𑀲𑀁. 𑀦𑀺. 𑁧.𑁨𑁫𑁦-𑁨𑁫𑁧);

𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀲𑀁𑀲𑀦𑀻𑀬𑁄 𑀳𑁄𑀢𑀺. 𑀬𑀣𑀸𑀳 𑀪𑀕𑀯𑀸 𑁋

‘‘𑀅𑀓𑁆𑀓𑁄𑀲𑀁 𑀯𑀥𑀩𑀦𑁆𑀥𑀜𑁆𑀘, 𑀅𑀤𑀼𑀝𑁆𑀞𑁄 𑀬𑁄 𑀢𑀺𑀢𑀺𑀓𑁆𑀔𑀢𑀺;

𑀔𑀦𑁆𑀢𑀻𑀩𑀮𑀁 𑀩𑀮𑀸𑀡𑀻𑀓𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁩𑁯𑁯);

𑀲𑀸 ¶ 𑀧𑀦𑁂𑀲𑀸 𑀔𑀦𑁆𑀢𑀺 𑀏𑀢𑁂𑀲𑀜𑁆𑀘 𑀇𑀥 𑀯𑀡𑁆𑀡𑀺𑀢𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀕𑀼𑀡𑀸𑀦𑀁 𑀅𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑁄𑀯𑀘𑀲𑁆𑀲𑀢𑀸 𑀦𑀸𑀫 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁂 𑀯𑀺𑀓𑁆𑀔𑁂𑀧𑀁 𑀯𑀸 𑀢𑀼𑀡𑁆𑀳𑀻𑀪𑀸𑀯𑀁 𑀯𑀸 𑀕𑀼𑀡𑀤𑁄𑀲𑀘𑀺𑀦𑁆𑀢𑀦𑀁 𑀯𑀸 ¶ 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀅𑀢𑀺𑀯𑀺𑀬 𑀆𑀤𑀭𑀜𑁆𑀘 𑀕𑀸𑀭𑀯𑀜𑁆𑀘 𑀦𑀻𑀘𑀫𑀦𑀢𑀜𑁆𑀘 𑀧𑀼𑀭𑀓𑁆𑀔𑀢𑁆𑀯𑀸 𑀲𑀸𑀥𑀽𑀢𑀺 𑀯𑀘𑀦𑀓𑀭𑀡𑀢𑀸. 𑀲𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀦𑁆𑀢𑀺𑀓𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀤𑁄𑀲𑀧𑁆𑀧𑀳𑀸𑀦𑀕𑀼𑀡𑀸𑀥𑀺𑀕𑀫𑀳𑁂𑀢𑀼𑀢𑁄 𑀘 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀫𑀡𑀸𑀦𑀁 𑀤𑀲𑁆𑀲𑀦𑀁 𑀦𑀸𑀫 𑀉𑀧𑀲𑀫𑀺𑀢𑀓𑀺𑀮𑁂𑀲𑀸𑀦𑀁 𑀪𑀸𑀯𑀺𑀢𑀓𑀸𑀬𑀯𑀘𑀻𑀘𑀺𑀢𑁆𑀢𑀧𑀜𑁆𑀜𑀸𑀦𑀁 𑀉𑀢𑁆𑀢𑀫𑀤𑀫𑀣𑀲𑀫𑀣𑀲𑀫𑀦𑁆𑀦𑀸𑀕𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀉𑀧𑀲𑀗𑁆𑀓𑀫𑀦𑀼𑀧𑀝𑁆𑀞𑀸𑀦𑀸𑀦𑀼𑀲𑁆𑀲𑀭𑀡𑀲𑁆𑀲𑀯𑀦𑀤𑀲𑁆𑀲𑀦𑀁, 𑀲𑀩𑁆𑀩𑀫𑁆𑀧𑀺 𑀑𑀫𑀓𑀤𑁂𑀲𑀦𑀸𑀬 𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀩𑀳𑀽𑀧𑀓𑀸𑀭𑀢𑁆𑀢𑀸. 𑀆𑀳 𑀘 ‘‘𑀤𑀲𑁆𑀲𑀦𑀫𑁆𑀧𑀳𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀳𑀽𑀧𑀓𑀸𑀭𑀁 𑀯𑀤𑀸𑀫𑀻’’𑀢𑀺𑀆𑀤𑀺 (𑀇𑀢𑀺𑀯𑀼. 𑁧𑁦𑁪). 𑀬𑀢𑁄 𑀳𑀺𑀢𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀲𑀻𑀮𑀯𑀦𑁆𑀢𑁂 𑀪𑀺𑀓𑁆𑀔𑀽 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑀤𑀺𑀲𑁆𑀯𑀸 𑀬𑀤𑀺 𑀤𑁂𑀬𑁆𑀬𑀥𑀫𑁆𑀫𑁄 𑀅𑀢𑁆𑀣𑀺, 𑀬𑀣𑀸𑀩𑀮𑀁 𑀤𑁂𑀬𑁆𑀬𑀥𑀫𑁆𑀫𑁂𑀦 𑀧𑀢𑀺𑀫𑀸𑀦𑁂𑀢𑀩𑁆𑀩𑀸. 𑀬𑀤𑀺 𑀦𑀢𑁆𑀣𑀺, 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑀩𑁆𑀩𑀸. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀫𑀲𑁆𑀲𑀺𑀢𑀩𑁆𑀩𑀸, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀺𑀢𑀩𑁆𑀩𑀸. 𑀏𑀯𑀁 𑀤𑀲𑁆𑀲𑀦𑀫𑀽𑀮𑀓𑁂𑀦𑀧𑀺 𑀳𑀺 𑀧𑀼𑀜𑁆𑀜𑁂𑀦 𑀅𑀦𑁂𑀓𑀸𑀦𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀘𑀓𑁆𑀔𑀼𑀫𑁆𑀳𑀺 𑀭𑁄𑀕𑁄 𑀯𑀸 𑀤𑀸𑀳𑁄 ¶ 𑀯𑀸 𑀉𑀲𑁆𑀲𑀤𑀸 𑀯𑀸 𑀧𑀺𑀴𑀓𑀸 𑀯𑀸 𑀦 𑀳𑁄𑀦𑁆𑀢𑀺, 𑀯𑀺𑀧𑁆𑀧𑀲𑀦𑁆𑀦𑀧𑀜𑁆𑀘𑀯𑀡𑁆𑀡𑀲𑀲𑁆𑀲𑀺𑀭𑀺𑀓𑀸𑀦𑀺 𑀳𑁄𑀦𑁆𑀢𑀺 𑀘𑀓𑁆𑀔𑀽𑀦𑀺 𑀭𑀢𑀦𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀓𑀯𑀸𑀝𑀲𑀤𑀺𑀲𑀸𑀦𑀺, 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀢𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀻𑀦𑀁 𑀮𑀸𑀪𑀻 𑀳𑁄𑀢𑀺. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄 𑀲𑀫𑁆𑀫𑀸 𑀧𑀯𑀢𑁆𑀢𑀺𑀢𑁂𑀦 𑀲𑀫𑀡𑀤𑀲𑁆𑀲𑀦𑀫𑀬𑁂𑀦 𑀧𑀼𑀜𑁆𑀜𑁂𑀦 𑀏𑀯𑀭𑀽𑀧𑀁 𑀯𑀺𑀧𑀸𑀓𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑁂𑀬𑁆𑀬, 𑀬𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑁂𑀦 𑀓𑀢𑀲𑁆𑀲 𑀲𑀫𑀡𑀤𑀲𑁆𑀲𑀦𑀲𑁆𑀲 𑀏𑀯𑀁 𑀯𑀺𑀧𑀸𑀓𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑀬𑀦𑁆𑀢𑀺.

‘‘𑀉𑀮𑀽𑀓𑁄 ¶ 𑀫𑀡𑁆𑀟𑀮𑀓𑁆𑀔𑀺𑀓𑁄, 𑀯𑁂𑀤𑀺𑀬𑀓𑁂 𑀘𑀺𑀭𑀤𑀻𑀖𑀯𑀸𑀲𑀺𑀓𑁄;

𑀲𑀼𑀔𑀺𑀢𑁄 𑀯𑀢 𑀓𑁄𑀲𑀺𑀬𑁄 𑀅𑀬𑀁, 𑀓𑀸𑀮𑀼𑀝𑁆𑀞𑀺𑀢𑀁 𑀧𑀲𑁆𑀲𑀢𑀺 𑀩𑀼𑀤𑁆𑀥𑀯𑀭𑀁.

‘‘𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀦𑀼𑀢𑁆𑀢𑀭𑁂;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀤𑀼𑀕𑁆𑀕𑀢𑁂𑀲𑁄 𑀦 𑀕𑀘𑁆𑀙𑀢𑀺.

‘‘𑀲 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸, 𑀓𑀼𑀲𑀮𑀓𑀫𑁆𑀫𑁂𑀦 𑀘𑁄𑀤𑀺𑀢𑁄;

𑀪𑀯𑀺𑀲𑁆𑀲𑀢𑀺 𑀅𑀦𑀦𑁆𑀢𑀜𑀸𑀡𑁄, 𑀲𑁄𑀫𑀦𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑁄’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁪);

𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸 𑀦𑀸𑀫 𑀧𑀤𑁄𑀲𑁂 𑀯𑀸 𑀧𑀘𑁆𑀘𑀽𑀲𑁂 𑀯𑀸 𑀤𑁆𑀯𑁂 𑀲𑀼𑀢𑁆𑀢𑀦𑁆𑀢𑀺𑀓𑀸 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀲𑀼𑀢𑁆𑀢𑀦𑁆𑀢𑀁 ¶ 𑀲𑀸𑀓𑀘𑁆𑀙𑀦𑁆𑀢𑀺, 𑀯𑀺𑀦𑀬𑀥𑀭𑀸 𑀯𑀺𑀦𑀬𑀁, 𑀆𑀪𑀺𑀥𑀫𑁆𑀫𑀺𑀓𑀸 𑀅𑀪𑀺𑀥𑀫𑁆𑀫𑀁, 𑀚𑀸𑀢𑀓𑀪𑀸𑀡𑀓𑀸 𑀚𑀸𑀢𑀓𑀁, 𑀅𑀝𑁆𑀞𑀓𑀣𑀺𑀓𑀸 𑀅𑀝𑁆𑀞𑀓𑀣𑀁, 𑀮𑀻𑀦𑀼𑀤𑁆𑀥𑀢𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑀘𑀺𑀢𑁆𑀢𑀯𑀺𑀲𑁄𑀥𑀦𑀢𑁆𑀣𑀁 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀓𑀸𑀮𑁂 𑀲𑀸𑀓𑀘𑁆𑀙𑀦𑁆𑀢𑀺, 𑀅𑀬𑀁 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸. 𑀲𑀸 𑀆𑀕𑀫𑀩𑁆𑀬𑀢𑁆𑀢𑀺𑀆𑀤𑀻𑀦𑀁 𑀕𑀼𑀡𑀸𑀦𑀁 𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀔𑀦𑁆𑀢𑀺, 𑀲𑁄𑀯𑀘𑀲𑁆𑀲𑀢𑀸, 𑀲𑀫𑀡𑀤𑀲𑁆𑀲𑀦𑀁, 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀔𑀦𑁆𑀢𑀻 𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀢𑀧𑁄𑀘𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁧. 𑀇𑀤𑀸𑀦𑀺 ¶ 𑀢𑀧𑁄 𑀘𑀸𑀢𑀺 𑀏𑀢𑁆𑀣 𑀧𑀸𑀧𑀓𑁂 𑀥𑀫𑁆𑀫𑁂 𑀢𑀧𑀢𑀻𑀢𑀺 𑀢𑀧𑁄. 𑀩𑁆𑀭𑀳𑁆𑀫𑀁 𑀘𑀭𑀺𑀬𑀁, 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀘𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑁂𑀝𑁆𑀞𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀤𑀲𑁆𑀲𑀦𑀁, 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑀲𑁆𑀲𑀦𑀦𑁆𑀢𑀺𑀧𑀺 𑀏𑀓𑁂, 𑀢𑀁 𑀦 𑀲𑀼𑀦𑁆𑀤𑀭𑀁. 𑀦𑀺𑀓𑁆𑀔𑀦𑁆𑀢𑀁 𑀯𑀸𑀦𑀢𑁄𑀢𑀺 𑀦𑀺𑀩𑁆𑀩𑀸𑀦𑀁, 𑀲𑀘𑁆𑀙𑀺𑀓𑀭𑀡𑀁 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀢𑀧𑁄 𑀦𑀸𑀫 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀤𑀻𑀦𑀁 𑀢𑀧𑀦𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 ¶ , 𑀓𑁄𑀲𑀚𑁆𑀚𑀲𑁆𑀲 𑀯𑀸 𑀢𑀧𑀦𑀢𑁄 𑀯𑀻𑀭𑀺𑀬𑀁, 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀆𑀢𑀸𑀧𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀁 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀳𑀸𑀦𑀛𑀸𑀦𑀸𑀤𑀺𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀫𑁂𑀣𑀼𑀦𑀯𑀺𑀭𑀢𑀺𑀲𑀫𑀡𑀥𑀫𑁆𑀫𑀲𑀸𑀲𑀦𑀫𑀕𑁆𑀕𑀸𑀦𑀫𑀥𑀺𑀯𑀘𑀦𑀁. 𑀢𑀣𑀸 𑀳𑀺 ‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁯𑁪; 𑀫. 𑀦𑀺. 𑁧.𑁨𑁯𑁨) 𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀪𑀕𑀯𑀢𑀺 𑀦𑁄, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻𑀢𑀺? 𑀏𑀯𑀫𑀸𑀯𑀼𑀲𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁫𑁭) 𑀲𑀫𑀡𑀥𑀫𑁆𑀫𑁄. ‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀇𑀤𑁆𑀥𑀜𑁆𑀘𑁂𑀯 𑀪𑀯𑀺𑀲𑁆𑀲𑀢𑀺 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁬𑁮; 𑀲𑀁. 𑀦𑀺. 𑁫.𑁮𑁨𑁨; 𑀉𑀤𑀸. 𑁫𑁧) 𑀲𑀸𑀲𑀦𑀁. ‘‘𑀅𑀬𑀫𑁂𑀯 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀲𑁂𑀬𑁆𑀬𑀣𑀺𑀤𑀁, 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁫.𑁬) 𑀫𑀕𑁆𑀕𑁄. 𑀇𑀥 𑀧𑀦 𑀅𑀭𑀺𑀬𑀲𑀘𑁆𑀘𑀤𑀲𑁆𑀲𑀦𑁂𑀦 𑀧𑀭𑀢𑁄 𑀫𑀕𑁆𑀕𑀲𑁆𑀲 ¶ 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀘𑁂𑀢𑀁 𑀉𑀧𑀭𑀽𑀧𑀭𑀺 𑀦𑀸𑀦𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀭𑀺𑀬𑀲𑀘𑁆𑀘𑀸𑀦 𑀤𑀲𑁆𑀲𑀦𑀁 𑀦𑀸𑀫 𑀓𑀼𑀫𑀸𑀭𑀧𑀜𑁆𑀳𑁂 𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑀯𑀲𑁂𑀦 𑀫𑀕𑁆𑀕𑀤𑀲𑁆𑀲𑀦𑀁, 𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀯𑀻𑀢𑀺𑀓𑁆𑀓𑀫𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸 𑀦𑀸𑀫 𑀇𑀥 𑀅𑀭𑀳𑀢𑁆𑀢𑀨𑀮𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀫𑁆𑀧𑀺 𑀳𑀺 𑀧𑀜𑁆𑀘𑀕𑀢𑀺𑀯𑀸𑀦𑀦𑁂𑀦 𑀯𑀸𑀦𑀲𑀜𑁆𑀜𑀺𑀢𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 ¶ 𑀧𑀢𑁆𑀢𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑁂𑀦𑁂𑀯 𑀲𑀘𑁆𑀙𑀺𑀓𑀺𑀭𑀺𑀬𑀸 𑀲𑀺𑀤𑁆𑀥𑀸, 𑀢𑁂𑀦𑁂𑀢𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁. 𑀏𑀯𑀫𑁂𑀲𑀸 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸 ¶ 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀼𑀔𑀯𑀺𑀳𑀸𑀭𑀸𑀤𑀺𑀳𑁂𑀢𑀼𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀢𑀧𑁄 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀁, 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀢𑀧𑁄 𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀨𑀼𑀝𑁆𑀞𑀲𑁆𑀲𑀮𑁄𑀓𑀥𑀫𑁆𑀫𑁂𑀳𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁨. 𑀇𑀤𑀸𑀦𑀺 𑀨𑀼𑀝𑁆𑀞𑀲𑁆𑀲 𑀮𑁄𑀓𑀥𑀫𑁆𑀫𑁂𑀳𑀻𑀢𑀺 𑀏𑀢𑁆𑀣 𑀨𑀼𑀝𑁆𑀞𑀲𑁆𑀲𑀸𑀢𑀺 𑀨𑀼𑀲𑀺𑀢𑀲𑁆𑀲 𑀙𑀼𑀧𑀺𑀢𑀲𑁆𑀲 𑀲𑀫𑁆𑀧𑀢𑁆𑀢𑀲𑁆𑀲. 𑀮𑁄𑀓𑁂 𑀥𑀫𑁆𑀫𑀸 𑀮𑁄𑀓𑀥𑀫𑁆𑀫𑀸, 𑀬𑀸𑀯 𑀮𑁄𑀓𑀧𑁆𑀧𑀯𑀢𑁆𑀢𑀺, 𑀢𑀸𑀯 𑀅𑀦𑀺𑀯𑀢𑁆𑀢𑀓𑀸 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀫𑀦𑁄 𑀫𑀸𑀦𑀲𑀁. 𑀬𑀲𑁆𑀲𑀸𑀢𑀺 𑀦𑀯𑀲𑁆𑀲 𑀯𑀸 𑀫𑀚𑁆𑀛𑀺𑀫𑀲𑁆𑀲 𑀯𑀸 𑀣𑁂𑀭𑀲𑁆𑀲 𑀯𑀸. 𑀦 𑀓𑀫𑁆𑀧𑀢𑀻𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺. 𑀅𑀲𑁄𑀓𑀦𑁆𑀢𑀺 𑀦𑀺𑀲𑁆𑀲𑁄𑀓𑀁 𑀅𑀩𑁆𑀩𑀽𑀴𑁆𑀳𑀲𑁄𑀓𑀲𑀮𑁆𑀮𑀁. 𑀯𑀺𑀭𑀚𑀦𑁆𑀢𑀺 𑀯𑀺𑀕𑀢𑀭𑀚𑀁 𑀯𑀺𑀤𑁆𑀥𑀁𑀲𑀺𑀢𑀭𑀚𑀁. 𑀔𑁂𑀫𑀦𑁆𑀢𑀺 𑀅𑀪𑀬𑀁 𑀦𑀺𑀭𑀼𑀧𑀤𑁆𑀤𑀯𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀬𑀁 𑀧𑀤𑀯𑀡𑁆𑀡𑀦𑀸.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀨𑀼𑀝𑁆𑀞𑀲𑁆𑀲 𑀮𑁄𑀓𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀬𑀲𑁆𑀲 𑀦 𑀓𑀫𑁆𑀧𑀢𑀺 𑀦𑀸𑀫 𑀬𑀲𑁆𑀲 𑀮𑀸𑀪𑀸𑀮𑀸𑀪𑀸𑀤𑀻𑀳𑀺 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀨𑀼𑀝𑁆𑀞𑀲𑁆𑀲 𑀅𑀚𑁆𑀛𑁄𑀢𑁆𑀣𑀝𑀲𑁆𑀲 𑀘𑀺𑀢𑁆𑀢𑀁 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑀮𑁄𑀓𑀼𑀢𑁆𑀢𑀫𑀪𑀸𑀯𑀸𑀯𑀳𑀦𑀢𑁄 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀲 ¶ 𑀘 𑀏𑀢𑁂𑀳𑀺 𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀁 𑀦 𑀓𑀫𑁆𑀧𑀢𑀻𑀢𑀺? 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲, 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁂𑀮𑁄 𑀬𑀣𑀸 𑀏𑀓𑀕𑁆𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀭𑀽𑀧𑀸 𑀭𑀲𑀸 𑀲𑀤𑁆𑀤𑀸, 𑀕𑀦𑁆𑀥𑀸 𑀨𑀲𑁆𑀲𑀸 𑀘 𑀓𑁂𑀯𑀮𑀸.

‘‘𑀇𑀝𑁆𑀞𑀸 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸 𑀘, 𑀦 𑀧𑀯𑁂𑀥𑁂𑀦𑁆𑀢𑀺 𑀢𑀸𑀤𑀺𑀦𑁄;

𑀞𑀺𑀢𑀁 𑀘𑀺𑀢𑁆𑀢𑀁 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻’’𑀢𑀺. (𑀫𑀳𑀸𑀯. 𑁨𑁪𑁪);

𑀅𑀲𑁄𑀓𑀁 ¶ ¶ 𑀦𑀸𑀫 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀬𑁆𑀯𑀸𑀬𑀁 ‘‘𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄 𑀘𑁂𑀢𑀲𑁄 𑀧𑀭𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁩𑁭) 𑀦𑀬𑁂𑀦 𑀯𑀼𑀘𑁆𑀘𑀢𑀺 𑀲𑁄𑀓𑁄, 𑀢𑀲𑁆𑀲 𑀅𑀪𑀸𑀯𑀢𑁄 𑀅𑀲𑁄𑀓𑀁. 𑀓𑁂𑀘𑀺 𑀦𑀺𑀩𑁆𑀩𑀸𑀦𑀁 𑀯𑀤𑀦𑁆𑀢𑀺, 𑀢𑀁 𑀧𑀼𑀭𑀺𑀫𑀧𑀤𑁂𑀦 𑀦𑀸𑀦𑀼𑀲𑀦𑁆𑀥𑀺𑀬𑀢𑀺. 𑀬𑀣𑀸 𑀘 𑀅𑀲𑁄𑀓𑀁, 𑀏𑀯𑀁 𑀯𑀺𑀭𑀚𑀁 𑀔𑁂𑀫𑀦𑁆𑀢𑀺𑀧𑀺 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀭𑀸𑀕𑀤𑁄𑀲𑀫𑁄𑀳𑀭𑀚𑀸𑀦𑀁 𑀯𑀺𑀕𑀢𑀢𑁆𑀢𑀸 𑀯𑀺𑀭𑀚𑀁, 𑀘𑀢𑀽𑀳𑀺 𑀘 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸 𑀔𑁂𑀫𑀁, 𑀬𑀢𑁄 𑀏𑀢𑀁 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀢𑀫𑁆𑀳𑀺 𑀢𑀫𑁆𑀳𑀺 𑀧𑀯𑀢𑁆𑀢𑀺𑀓𑁆𑀔𑀡𑁂 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀓𑁆𑀔𑀦𑁆𑀥𑀢𑀸𑀤𑀺𑀮𑁄𑀓𑀼𑀢𑁆𑀢𑀫𑀪𑀸𑀯𑀸𑀯𑀳𑀦𑀢𑁄 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀘 𑀫𑀗𑁆𑀕𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀝𑁆𑀞𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀢𑀘𑀺𑀢𑁆𑀢𑀁, 𑀅𑀲𑁄𑀓𑀘𑀺𑀢𑁆𑀢𑀁, 𑀯𑀺𑀭𑀚𑀘𑀺𑀢𑁆𑀢𑀁, 𑀔𑁂𑀫𑀘𑀺𑀢𑁆𑀢𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀫𑀗𑁆𑀕𑀮𑀢𑁆𑀢𑀜𑁆𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑀸 𑀨𑀼𑀝𑁆𑀞𑀲𑁆𑀲 𑀮𑁄𑀓𑀥𑀫𑁆𑀫𑁂𑀳𑀻𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸.

𑀏𑀢𑀸𑀤𑀺𑀲𑀸𑀦𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁩. 𑀏𑀯𑀁 𑀪𑀕𑀯𑀸 𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀦𑁆𑀢𑀺𑀆𑀤𑀻𑀳𑀺 𑀤𑀲𑀳𑀺 𑀕𑀸𑀣𑀸𑀳𑀺 𑀅𑀝𑁆𑀞𑀢𑀺𑀁𑀲 𑀫𑀳𑀸𑀫𑀗𑁆𑀕𑀮𑀸𑀦𑀺 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀏𑀢𑀸𑀦𑁂𑀯 𑀅𑀢𑁆𑀢𑀦𑀸 𑀯𑀼𑀢𑁆𑀢𑀫𑀗𑁆𑀕𑀮𑀸𑀦𑀺 𑀣𑀼𑀦𑀦𑁆𑀢𑁄 ‘‘𑀏𑀢𑀸𑀤𑀺𑀲𑀸𑀦𑀺 𑀓𑀢𑁆𑀯𑀸𑀦𑀸’’𑀢𑀺 𑀅𑀯𑀲𑀸𑀦𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀸𑀬𑀫𑀢𑁆𑀣𑀯𑀡𑁆𑀡𑀦𑀸 𑁋 𑀏𑀢𑀸𑀤𑀺𑀲𑀸𑀦𑀻𑀢𑀺 𑀏𑀢𑀸𑀦𑀺 𑀈𑀤𑀺𑀲𑀸𑀦𑀺 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸𑀤𑀻𑀦𑀺. 𑀓𑀢𑁆𑀯𑀸𑀦𑀸𑀢𑀺 𑀓𑀢𑁆𑀯𑀸. 𑀓𑀢𑁆𑀯𑀸𑀦 𑀓𑀢𑁆𑀯𑀸 𑀓𑀭𑀺𑀢𑁆𑀯𑀸𑀢𑀺 𑀳𑀺 𑀅𑀢𑁆𑀣𑀢𑁄 𑀅𑀦𑀜𑁆𑀜𑀁. 𑀲𑀩𑁆𑀩𑀢𑁆𑀣𑀫𑀧𑀭𑀸𑀚𑀺𑀢𑀸𑀢𑀺 ¶ 𑀲𑀩𑁆𑀩𑀢𑁆𑀣 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀧𑁆𑀧𑀪𑁂𑀤𑁂𑀲𑀼 ¶ 𑀘𑀢𑀽𑀲𑀼 𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀏𑀓𑁂𑀦𑀸𑀧𑀺 𑀅𑀧𑀭𑀸𑀚𑀺𑀢𑀸 𑀳𑀼𑀢𑁆𑀯𑀸, 𑀲𑀬𑀫𑁂𑀯 𑀢𑁂 𑀘𑀢𑁆𑀢𑀸𑀭𑁄 𑀫𑀸𑀭𑁂 𑀧𑀭𑀸𑀚𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀓𑀸𑀭𑁄 𑀘𑁂𑀢𑁆𑀣 𑀧𑀤𑀲𑀦𑁆𑀥𑀺𑀓𑀭𑀫𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑁄.

𑀲𑀩𑁆𑀩𑀢𑁆𑀣 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑀸𑀤𑀺𑀲𑀸𑀦𑀺 𑀫𑀗𑁆𑀕𑀮𑀸𑀦𑀺 𑀓𑀢𑁆𑀯𑀸 𑀘𑀢𑀽𑀳𑀺 𑀫𑀸𑀭𑁂𑀳𑀺 𑀅𑀧𑀭𑀸𑀚𑀺𑀢𑀸 𑀳𑀼𑀢𑁆𑀯𑀸 𑀲𑀩𑁆𑀩𑀢𑁆𑀣 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀞𑀸𑀦𑀘𑀗𑁆𑀓𑀫𑀦𑀸𑀤𑀻𑀲𑀼 𑀘 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀺, 𑀩𑀸𑀮𑀲𑁂𑀯𑀦𑀸𑀤𑀻𑀳𑀺 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 ¶ 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀢𑁂𑀲𑀁 𑀅𑀪𑀸𑀯𑀸 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀦𑀼𑀧𑀤𑁆𑀤𑀼𑀢𑀸 𑀅𑀦𑀼𑀧𑀲𑀝𑁆𑀞𑀸 𑀔𑁂𑀫𑀺𑀦𑁄 𑀅𑀧𑁆𑀧𑀝𑀺𑀪𑀬𑀸 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀦𑀸𑀲𑀺𑀓𑁄 𑀘𑁂𑀢𑁆𑀣 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀁 𑀢𑁂𑀲𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀦𑁆𑀢𑀺 𑀇𑀫𑀺𑀦𑀸 𑀕𑀸𑀣𑀸𑀧𑀤𑁂𑀦 𑀪𑀕𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀓𑀣𑀁? 𑀏𑀯𑀁, 𑀤𑁂𑀯𑀧𑀼𑀢𑁆𑀢, 𑀬𑁂 𑀏𑀢𑀸𑀤𑀺𑀲𑀸𑀦𑀺 𑀓𑀭𑁄𑀦𑁆𑀢𑀺, 𑀢𑁂 𑀬𑀲𑁆𑀫𑀸 𑀲𑀩𑁆𑀩𑀢𑁆𑀣 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀩𑀸𑀮𑀸𑀦𑀁 𑀅𑀲𑁂𑀯𑀦𑀸𑀤𑀺𑀅𑀝𑁆𑀞𑀢𑀺𑀁𑀲𑀯𑀺𑀥𑀫𑁆𑀧𑀺 𑀢𑁂𑀲𑀁 𑀏𑀢𑀸𑀤𑀺𑀲𑀓𑀸𑀭𑀓𑀸𑀦𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀁 𑀲𑁂𑀝𑁆𑀞𑀁 𑀧𑀯𑀭𑀦𑁆𑀢𑀺 𑀕𑀡𑁆𑀳𑀸𑀳𑀻𑀢𑀺.

𑀏𑀯𑀜𑁆𑀘 𑀪𑀕𑀯𑀢𑀸 𑀦𑀺𑀝𑁆𑀞𑀸𑀧𑀺𑀢𑀸𑀬 𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀲𑀫𑁆𑀧𑀢𑁆𑀢𑀸𑀦𑀁 𑀕𑀡𑀦𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀳𑁄𑀲𑀺. 𑀅𑀣 𑀪𑀕𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀧𑀦, 𑀆𑀦𑀦𑁆𑀤, 𑀭𑀢𑁆𑀢𑀺𑀁 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀗𑁆𑀕𑀮𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀅𑀣𑀲𑁆𑀲𑀸𑀳𑀁 𑀅𑀝𑁆𑀞𑀢𑀺𑀁𑀲 𑀫𑀗𑁆𑀕𑀮𑀸𑀦𑀺 𑀅𑀪𑀸𑀲𑀺𑀁, 𑀉𑀕𑁆𑀕𑀡𑁆𑀳𑀸𑀳𑀺, 𑀆𑀦𑀦𑁆𑀤, 𑀇𑀫𑀁 𑀫𑀗𑁆𑀕𑀮𑀧𑀭𑀺𑀬𑀸𑀬𑀁, 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀯𑀸𑀘𑁂𑀳𑀻’’𑀢𑀺. 𑀣𑁂𑀭𑁄 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀯𑀸𑀘𑁂𑀲𑀺. 𑀢𑀬𑀺𑀤𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑀁 𑀬𑀸𑀯𑀚𑁆𑀚𑀢𑀦𑀸 𑀧𑀯𑀢𑁆𑀢𑀢𑀺, ‘‘𑀏𑀯𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 ¶ 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀏𑀢𑁂𑀲𑁆𑀯𑁂𑀯 𑀫𑀗𑁆𑀕𑀮𑁂𑀲𑀼 𑀜𑀸𑀡𑀧𑀭𑀺𑀘𑀬𑀧𑀸𑀝𑀯𑀢𑁆𑀣𑀁 𑀅𑀬𑀫𑀸𑀤𑀺𑀢𑁄 𑀧𑀪𑀼𑀢𑀺 𑀬𑁄𑀚𑀦𑀸 𑁋 𑀏𑀯𑀫𑀺𑀫𑁂 𑀇𑀥𑀮𑁄𑀓𑀧𑀭𑀮𑁄𑀓𑀮𑁄𑀓𑀼𑀢𑁆𑀢𑀭𑀲𑀼𑀔𑀓𑀸𑀫𑀸 𑀲𑀢𑁆𑀢𑀸 𑀩𑀸𑀮𑀚𑀦𑀲𑁂𑀯𑀦𑀁 𑀧𑀳𑀸𑀬, 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬, 𑀧𑀽𑀚𑀦𑁂𑀬𑁆𑀬𑁂 𑀧𑀽𑀚𑁂𑀢𑁆𑀯𑀸, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁂𑀦 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀬 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀁 𑀘𑁄𑀤𑀺𑀬𑀫𑀸𑀦𑀸 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀧𑀡𑀺𑀥𑀸𑀬, 𑀩𑀸𑀳𑀼𑀲𑀘𑁆𑀘𑀲𑀺𑀧𑁆𑀧𑀯𑀺𑀦𑀬𑁂𑀳𑀺 𑀅𑀮𑀗𑁆𑀓𑀢𑀢𑁆𑀢𑀪𑀸𑀯𑀸, 𑀯𑀺𑀦𑀬𑀸𑀦𑀼𑀭𑀽𑀧𑀁 𑀲𑀼𑀪𑀸𑀲𑀺𑀢𑀁 𑀪𑀸𑀲𑀫𑀸𑀦𑀸, 𑀬𑀸𑀯 𑀕𑀺𑀳𑀺𑀪𑀸𑀯𑀁 𑀦 𑀯𑀺𑀚𑀳𑀦𑁆𑀢𑀺, 𑀢𑀸𑀯 𑀫𑀸𑀢𑀸𑀧𑀺𑀢𑀽𑀧𑀝𑁆𑀞𑀸𑀦𑁂𑀦 𑀧𑁄𑀭𑀸𑀡𑀁 𑀇𑀡𑀫𑀽𑀮𑀁 𑀯𑀺𑀲𑁄𑀥𑀬𑀫𑀸𑀦𑀸, 𑀧𑀼𑀢𑁆𑀢𑀤𑀸𑀭𑀲𑀗𑁆𑀕𑀳𑁂𑀦 𑀦𑀯𑀁 𑀇𑀡𑀫𑀽𑀮𑀁 𑀧𑀬𑁄𑀚𑀬𑀫𑀸𑀦𑀸, 𑀅𑀦𑀸𑀓𑀼𑀮𑀓𑀫𑁆𑀫𑀦𑁆𑀢𑀢𑀸𑀬 𑀥𑀦𑀥𑀜𑁆𑀜𑀸𑀤𑀺𑀲𑀫𑀺𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀸, 𑀤𑀸𑀦𑁂𑀦 𑀪𑁄𑀕𑀲𑀸𑀭𑀁 𑀥𑀫𑁆𑀫𑀘𑀭𑀺𑀬𑀸𑀬 𑀚𑀻𑀯𑀺𑀢𑀲𑀸𑀭𑀜𑁆𑀘 𑀕𑀳𑁂𑀢𑁆𑀯𑀸, 𑀜𑀸𑀢𑀺𑀲𑀗𑁆𑀕𑀳𑁂𑀦 𑀲𑀓𑀚𑀦𑀳𑀺𑀢𑀁 𑀅𑀦𑀯𑀚𑁆𑀚𑀓𑀫𑁆𑀫𑀦𑁆𑀢𑀢𑀸𑀬 ¶ 𑀧𑀭𑀚𑀦𑀳𑀺𑀢𑀜𑁆𑀘 𑀓𑀭𑁄𑀦𑁆𑀢𑀸, 𑀧𑀸𑀧𑀯𑀺𑀭𑀢𑀺𑀬𑀸 𑀧𑀭𑀽𑀧𑀖𑀸𑀢𑀁 𑀫𑀚𑁆𑀚𑀧𑀸𑀦𑀲𑀁𑀬𑀫𑁂𑀦 𑀅𑀢𑁆𑀢𑀽𑀧𑀖𑀸𑀢𑀜𑁆𑀘 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀥𑀫𑁆𑀫𑁂𑀲𑀼 𑀅𑀧𑁆𑀧𑀫𑀸𑀤𑁂𑀦 𑀓𑀼𑀲𑀮𑀧𑀓𑁆𑀔𑀁 𑀯𑀟𑁆𑀠𑁂𑀢𑁆𑀯𑀸, 𑀯𑀟𑁆𑀠𑀺𑀢𑀓𑀼𑀲𑀮𑀢𑀸𑀬 𑀕𑀺𑀳𑀺𑀩𑁆𑀬𑀜𑁆𑀚𑀦𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑁂 𑀞𑀺𑀢𑀸𑀧𑀺 𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀽𑀧𑀚𑁆𑀛𑀸𑀬𑀸𑀘𑀭𑀺𑀬𑀸𑀤𑀻𑀲𑀼 𑀕𑀸𑀭𑀯𑁂𑀦 𑀦𑀺𑀯𑀸𑀢𑁂𑀦 𑀘 𑀯𑀢𑁆𑀢𑀲𑀫𑁆𑀧𑀤𑀁 𑀆𑀭𑀸𑀥𑁂𑀢𑁆𑀯𑀸, 𑀲𑀦𑁆𑀢𑀼𑀝𑁆𑀞𑀺𑀬𑀸 ¶ 𑀧𑀘𑁆𑀘𑀬𑀕𑁂𑀥𑀁 𑀧𑀳𑀸𑀬, 𑀓𑀢𑀜𑁆𑀜𑀼𑀢𑀸𑀬 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀬𑀁 𑀞𑀢𑁆𑀯𑀸, 𑀥𑀫𑁆𑀫𑀲𑁆𑀲𑀯𑀦𑁂𑀦 𑀘𑀺𑀢𑁆𑀢𑀮𑀻𑀦𑀢𑀁 𑀧𑀳𑀸𑀬, 𑀔𑀦𑁆𑀢𑀺𑀬𑀸 𑀲𑀩𑁆𑀩𑀧𑀭𑀺𑀲𑁆𑀲𑀬𑁂 𑀅𑀪𑀺𑀪𑀯𑀺𑀢𑁆𑀯𑀸, 𑀲𑁄𑀯𑀘𑀲𑁆𑀲𑀢𑀸𑀬 𑀲𑀦𑀸𑀣𑀁 𑀅𑀢𑁆𑀢𑀸𑀦𑀁 𑀓𑀢𑁆𑀯𑀸, 𑀲𑀫𑀡𑀤𑀲𑁆𑀲𑀦𑁂𑀦 𑀧𑀝𑀺𑀧𑀢𑁆𑀢𑀺𑀧𑀬𑁄𑀕𑀁 𑀧𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀓𑀗𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑀧𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀲𑀫𑀡𑀥𑀫𑁆𑀫𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀁 𑀢𑀢𑁄 𑀧𑀭𑀸 𑀘 𑀘𑀢𑀲𑁆𑀲𑁄 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀦𑁆𑀢𑀸 ¶ , 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀅𑀭𑀺𑀬𑀲𑀘𑁆𑀘𑀤𑀲𑁆𑀲𑀦𑀧𑀭𑀺𑀬𑀸𑀬𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀧𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑁆𑀬𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀬𑀁 𑀲𑀘𑁆𑀙𑀺𑀓𑀭𑀺𑀢𑁆𑀯𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑁄 𑀯𑀺𑀬 𑀯𑀸𑀢𑀯𑀼𑀝𑁆𑀞𑀻𑀳𑀺 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀯𑀺𑀓𑀫𑁆𑀧𑀫𑀸𑀦𑀘𑀺𑀢𑁆𑀢𑀸 𑀅𑀲𑁄𑀓𑀸 𑀯𑀺𑀭𑀚𑀸 𑀔𑁂𑀫𑀺𑀦𑁄 𑀳𑁄𑀦𑁆𑀢𑀺. 𑀬𑁂 𑀘 𑀔𑁂𑀫𑀺𑀦𑁄 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑀢𑁆𑀣 𑀏𑀓𑁂𑀦𑀧𑀺 𑀅𑀧𑀭𑀸𑀚𑀺𑀢𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀢𑀸𑀤𑀺𑀲𑀸𑀦𑀺 𑀓𑀢𑁆𑀯𑀸𑀦, 𑀲𑀩𑁆𑀩𑀢𑁆𑀣𑀫𑀧𑀭𑀸𑀚𑀺𑀢𑀸;

𑀲𑀩𑁆𑀩𑀢𑁆𑀣 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁

𑀇𑀤𑀸𑀦𑀺 ¶ 𑀬𑀸𑀦𑀻𑀥 𑀪𑀽𑀢𑀸𑀦𑀻𑀢𑀺𑀏𑀯𑀫𑀸𑀤𑀺𑀦𑀸 𑀫𑀗𑁆𑀕𑀮𑀲𑀼𑀢𑁆𑀢𑀸𑀦𑀦𑁆𑀢𑀭𑀁 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀭𑀢𑀦𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁 𑀯𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀼𑀧𑀭𑀺𑀲𑀼𑀤𑁆𑀥𑁂𑀦 𑀢𑀺𑀢𑁆𑀣𑁂𑀦 𑀦𑀤𑀺𑀢𑀴𑀸𑀓𑀸𑀤𑀻𑀲𑀼 𑀲𑀮𑀺𑀮𑀚𑁆𑀛𑁄𑀕𑀸𑀳𑀡𑀫𑀺𑀯 𑀲𑀼𑀧𑀭𑀺𑀲𑀼𑀤𑁆𑀥𑁂𑀦 𑀦𑀺𑀤𑀸𑀦𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀚𑁆𑀛𑁄𑀕𑀸𑀳𑀡𑀁 𑀤𑀲𑁆𑀲𑁂𑀢𑀼𑀁 𑁋

‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂𑀢𑀁 𑀇𑀫𑀁 𑀦𑀬𑀁;

𑀧𑀓𑀸𑀲𑁂𑀢𑁆𑀯𑀸𑀦 𑀏𑀢𑀲𑁆𑀲, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁’’.

𑀢𑀢𑁆𑀣 ¶ 𑀬𑀲𑁆𑀫𑀸 𑀫𑀗𑁆𑀕𑀮𑀲𑀼𑀢𑁆𑀢𑁂𑀦 𑀅𑀢𑁆𑀢𑀭𑀓𑁆𑀔𑀸 𑀅𑀓𑀮𑁆𑀬𑀸𑀡𑀓𑀭𑀡𑀓𑀮𑁆𑀬𑀸𑀡𑀸𑀓𑀭𑀡𑀧𑀘𑁆𑀘𑀬𑀸𑀦𑀜𑁆𑀘 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑁄 𑀤𑀲𑁆𑀲𑀺𑀢𑁄, 𑀇𑀫𑀜𑁆𑀘 𑀲𑀼𑀢𑁆𑀢𑀁 𑀧𑀭𑀸𑀭𑀓𑁆𑀔𑀁 𑀅𑀫𑀦𑀼𑀲𑁆𑀲𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀁 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀲𑀺𑀬𑀸𑀢𑀺.

𑀇𑀤𑀁 𑀢𑀸𑀯𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁.

𑀯𑁂𑀲𑀸𑀮𑀺𑀯𑀢𑁆𑀣𑀼

𑀇𑀤𑀸𑀦𑀺 ‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂𑀢’’𑀦𑁆𑀢𑀺 𑀏𑀢𑁆𑀣𑀸𑀳 ‘‘𑀓𑁂𑀦 𑀧𑀦𑁂𑀢𑀁 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀓𑀤𑀸 𑀓𑀢𑁆𑀣, 𑀓𑀲𑁆𑀫𑀸 𑀘 𑀯𑀼𑀢𑁆𑀢’’𑀦𑁆𑀢𑀺. 𑀯𑀼𑀘𑁆𑀘𑀢𑁂 𑁋 𑀇𑀤𑀜𑁆𑀳𑀺 𑀪𑀕𑀯𑀢𑀸 𑀏𑀯 𑀯𑀼𑀢𑁆𑀢𑀁, 𑀦 𑀲𑀸𑀯𑀓𑀸𑀤𑀻𑀳𑀺. 𑀢𑀜𑁆𑀘 𑀬𑀤𑀸 ¶ 𑀤𑀼𑀩𑁆𑀪𑀺𑀓𑁆𑀔𑀸𑀤𑀻𑀳𑀺 𑀉𑀧𑀤𑁆𑀤𑀯𑁂𑀳𑀺 𑀉𑀧𑀤𑁆𑀤𑀼𑀢𑀸𑀬 𑀯𑁂𑀲𑀸𑀮𑀺𑀬𑀸 𑀮𑀺𑀘𑁆𑀙𑀯𑀻𑀳𑀺 𑀭𑀸𑀚𑀕𑀳𑀢𑁄 𑀬𑀸𑀘𑀺𑀢𑁆𑀯𑀸 𑀪𑀕𑀯𑀸 𑀯𑁂𑀲𑀸𑀮𑀺𑀁 𑀆𑀦𑀻𑀢𑁄, 𑀢𑀤𑀸 𑀯𑁂𑀲𑀸𑀮𑀺𑀬𑀁 𑀢𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀅𑀬𑀁 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀲𑀗𑁆𑀔𑁂𑀧𑀯𑀺𑀲𑁆𑀲𑀚𑁆𑀚𑀦𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀯𑁂𑀲𑀸𑀮𑀺𑀯𑀢𑁆𑀣𑀼𑀢𑁄 𑀧𑀪𑀼𑀢𑀺 𑀧𑁄𑀭𑀸𑀡𑁂𑀳𑀺 𑀯𑀡𑁆𑀡𑀻𑀬𑀢𑀺.

𑀢𑀢𑁆𑀭𑀸𑀬𑀁 𑀯𑀡𑁆𑀡𑀦𑀸 𑁋 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺, 𑀲𑀸 𑀢𑀁 ¶ 𑀜𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺, 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀲𑀫𑁆𑀫𑀸 𑀧𑀭𑀺𑀳𑀭𑀺𑀬𑀫𑀸𑀦𑀕𑀩𑁆𑀪𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀯𑀺𑀚𑀸𑀬𑀦𑀖𑀭𑀁 𑀧𑀸𑀯𑀺𑀲𑀺. 𑀧𑀼𑀜𑁆𑀜𑀯𑀢𑀻𑀦𑀁 𑀧𑀘𑁆𑀘𑀽𑀲𑀲𑀫𑀬𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀲𑀸 𑀘 𑀢𑀸𑀲𑀁 𑀅𑀜𑁆𑀜𑀢𑀭𑀸, 𑀢𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀅𑀮𑀢𑁆𑀢𑀓𑀧𑀝𑀮𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑀁 𑀫𑀁𑀲𑀧𑁂𑀲𑀺𑀁 𑀯𑀺𑀚𑀸𑀬𑀺. 𑀢𑀢𑁄 ‘‘𑀅𑀜𑁆𑀜𑀸 𑀤𑁂𑀯𑀺𑀬𑁄 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀦𑁆𑀢𑀺, 𑀅𑀕𑁆𑀕𑀫𑀳𑁂𑀲𑀻 𑀫𑀁𑀲𑀧𑁂𑀲𑀺𑀦𑁆𑀢𑀺 𑀭𑀜𑁆𑀜𑁄 𑀧𑀼𑀭𑀢𑁄 𑀫𑀫 𑀅𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀅𑀯𑀡𑁆𑀡𑀪𑀬𑁂𑀦 𑀢𑀁 𑀫𑀁𑀲𑀧𑁂𑀲𑀺𑀁 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀢𑀭𑁂𑀦 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑁆𑀯𑀸 𑀕𑀗𑁆𑀕𑀸𑀬 𑀲𑁄𑀢𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀲𑀼𑀯𑀡𑁆𑀡𑀧𑀝𑁆𑀝𑀓𑀜𑁆𑀘𑁂𑀢𑁆𑀣 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀚𑀸’’𑀢𑀺 𑀮𑀺𑀔𑀺𑀢𑁆𑀯𑀸 𑀩𑀦𑁆𑀥𑀺𑀁𑀲𑀼. 𑀢𑀢𑁄 𑀢𑀁 𑀪𑀸𑀚𑀦𑀁 𑀊𑀫𑀺𑀪𑀬𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀁 𑀕𑀗𑁆𑀕𑀸𑀲𑁄𑀢𑁂𑀦 𑀧𑀸𑀬𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀕𑁄𑀧𑀸𑀮𑀓𑀼𑀮𑀁 𑀦𑀺𑀲𑁆𑀲𑀸𑀬 𑀕𑀗𑁆𑀕𑀸𑀢𑀻𑀭𑁂 𑀯𑀺𑀳𑀭𑀢𑀺. 𑀲𑁄 𑀧𑀸𑀢𑁄𑀯 𑀕𑀗𑁆𑀕𑀁 𑀑𑀢𑀭𑀦𑁆𑀢𑁄 𑀪𑀸𑀚𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ¶ 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀲𑀺. 𑀢𑀢𑁄 𑀢𑀢𑁆𑀣 𑀢𑀁 𑀅𑀓𑁆𑀔𑀭𑀧𑀝𑁆𑀝𑀓𑀁 𑀭𑀸𑀚𑀫𑀼𑀤𑁆𑀤𑀺𑀓𑀸𑀮𑀜𑁆𑀙𑀦𑀜𑁆𑀘 𑀤𑀺𑀲𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀫𑀁𑀲𑀧𑁂𑀲𑀺𑀁 𑀅𑀤𑁆𑀤𑀲 ¶ , 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑀺𑀬𑀸 𑀕𑀩𑁆𑀪𑁄, 𑀢𑀣𑀸 𑀳𑀺𑀲𑁆𑀲 𑀤𑀼𑀕𑁆𑀕𑀦𑁆𑀥𑀧𑀽𑀢𑀺𑀪𑀸𑀯𑁄 𑀦𑀢𑁆𑀣𑀻’’𑀢𑀺. 𑀢𑀁 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀲𑀼𑀤𑁆𑀥𑁂 𑀑𑀓𑀸𑀲𑁂 𑀞𑀧𑁂𑀲𑀺. 𑀅𑀣 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀤𑁆𑀯𑁂 𑀫𑀁𑀲𑀧𑁂𑀲𑀺𑀬𑁄 𑀅𑀳𑁂𑀲𑀼𑀁. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀲𑀸𑀥𑀼𑀢𑀭𑀁 𑀞𑀧𑁂𑀲𑀺, 𑀢𑀢𑁄 𑀧𑀼𑀦 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀧𑁂𑀲𑀺𑀬𑀸 𑀳𑀢𑁆𑀣𑀧𑀸𑀤𑀲𑀻𑀲𑀸𑀦𑀫𑀢𑁆𑀣𑀸𑀬 𑀧𑀜𑁆𑀘 𑀧𑀜𑁆𑀘 𑀧𑀺𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀧𑀼𑀦 𑀲𑀸𑀥𑀼𑀢𑀭𑀁 𑀞𑀧𑁂𑀲𑀺. 𑀅𑀣 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀸 𑀫𑀁𑀲𑀧𑁂𑀲𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄, 𑀏𑀓𑀸 𑀤𑀸𑀭𑀺𑀓𑀸 𑀅𑀳𑁄𑀲𑀺. 𑀢𑁂𑀲𑀼 𑀢𑀸𑀧𑀲𑀲𑁆𑀲 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀅𑀗𑁆𑀕𑀼𑀝𑁆𑀞𑀓𑀢𑁄 𑀘𑀲𑁆𑀲 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀘 𑀔𑀻𑀭𑀪𑀢𑁆𑀢𑀁 𑀮𑀪𑀢𑀺, 𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀻𑀭𑀁 𑀤𑀸𑀭𑀓𑀸𑀦𑀁 𑀫𑀼𑀔𑁂 𑀆𑀲𑀺𑀜𑁆𑀘𑀢𑀺. 𑀢𑁂𑀲𑀁 𑀬𑀁 𑀬𑀁 𑀉𑀤𑀭𑀁 𑀧𑀯𑀺𑀝𑁆𑀞𑀁, 𑀢𑀁 𑀲𑀩𑁆𑀩𑀁 𑀫𑀡𑀺𑀪𑀸𑀚𑀦𑀕𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀯𑀁 𑀮𑀺𑀘𑁆𑀙𑀯𑀻 𑀅𑀳𑁂𑀲𑀼𑀁. 𑀅𑀧𑀭𑁂 𑀧𑀦𑀸𑀳𑀼 ‘‘𑀲𑀺𑀩𑁆𑀩𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀮𑀻𑀦𑀸 𑀙𑀯𑀺 𑀅𑀳𑁄𑀲𑀻’’𑀢𑀺. 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀺𑀢𑀸𑀬 𑀯𑀸 𑀮𑀻𑀦𑀘𑁆𑀙𑀯𑀺𑀢𑀸𑀬 𑀯𑀸 𑀮𑀺𑀘𑁆𑀙𑀯𑀻𑀢𑀺 𑀧𑀜𑁆𑀜𑀸𑀬𑀺𑀁𑀲𑀼.

𑀢𑀸𑀧𑀲𑁄 𑀤𑀸𑀭𑀓𑁂 𑀧𑁄𑀲𑁂𑀦𑁆𑀢𑁄 𑀉𑀲𑁆𑀲𑀽𑀭𑁂 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀢𑀲𑁆𑀲 𑀢𑀁 𑀩𑁆𑀬𑀸𑀧𑀸𑀭𑀁 𑀜𑀢𑁆𑀯𑀸 𑀕𑁄𑀧𑀸𑀮𑀓𑀸 𑀆𑀳𑀁𑀲𑀼, ‘‘𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀭𑀓𑀧𑁄𑀲𑀦𑀁 𑀧𑀮𑀺𑀩𑁄𑀥𑁄, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀤𑁂𑀣, 𑀫𑀬𑀁 𑀧𑁄𑀲𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑀸𑀧𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀕𑁄𑀧𑀸𑀮𑀓𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀕𑁆𑀕𑀁 𑀲𑀫𑀁 𑀓𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀢𑁆𑀯𑀸 𑀥𑀚𑀧𑀝𑀸𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀽𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺 𑀅𑀲𑁆𑀲𑀫𑀁 𑀆𑀕𑀢𑀸. 𑀢𑀸𑀧𑀲𑁄 ‘‘𑀫𑀳𑀸𑀧𑀼𑀜𑁆𑀜𑀸 𑀤𑀸𑀭𑀓𑀸, 𑀅𑀧𑁆𑀧𑀫𑀸𑀤𑁂𑀦 𑀯𑀟𑁆𑀠𑁂𑀣, 𑀯𑀟𑁆𑀠𑁂𑀢𑁆𑀯𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀣, 𑀧𑀜𑁆𑀘𑀕𑁄𑀭𑀲𑁂𑀦 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 ¶ 𑀦𑀕𑀭𑀁 𑀫𑀸𑀧𑁂𑀣, 𑀢𑀢𑁆𑀣 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀭𑀓𑁂 𑀅𑀤𑀸𑀲𑀺. 𑀢𑁂 ‘‘𑀲𑀸𑀥𑀽’’𑀢𑀺 ¶ 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑀸𑀭𑀓𑁂 𑀦𑁂𑀢𑁆𑀯𑀸 𑀧𑁄𑀲𑁂𑀲𑀼𑀁.

𑀤𑀸𑀭𑀓𑀸 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀓𑀻𑀴𑀦𑁆𑀢𑀸 𑀯𑀺𑀯𑀸𑀤𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑁂 𑀕𑁄𑀧𑀸𑀮𑀤𑀸𑀭𑀓𑁂 𑀳𑀢𑁆𑀣𑁂𑀦𑀧𑀺 𑀧𑀸𑀤𑁂𑀦𑀧𑀺 𑀧𑀳𑀭𑀦𑁆𑀢𑀺, 𑀢𑁂 𑀭𑁄𑀤𑀦𑁆𑀢𑀺. ‘‘𑀓𑀺𑀲𑁆𑀲 𑀭𑁄𑀤𑀣𑀸’’𑀢𑀺 𑀘 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀸 ‘‘𑀇𑀫𑁂 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑀸 𑀢𑀸𑀧𑀲𑀧𑁄𑀲𑀺𑀢𑀸 𑀅𑀫𑁆𑀳𑁂 𑀅𑀢𑀻𑀯 𑀧𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀇𑀫𑁂 𑀤𑀸𑀭𑀓𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀯𑀺𑀳𑁂𑀞𑁂𑀦𑁆𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺, 𑀦 𑀇𑀫𑁂 𑀲𑀗𑁆𑀕𑀳𑁂𑀢𑀩𑁆𑀩𑀸, 𑀯𑀚𑁆𑀚𑀺𑀢𑀩𑁆𑀩𑀸 𑀇𑀫𑁂’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀓𑀺𑀭 𑀲𑁄 𑀧𑀤𑁂𑀲𑁄 ‘‘𑀯𑀚𑁆𑀚𑀻’’𑀢𑀺 ¶ 𑀯𑀼𑀘𑁆𑀘𑀢𑀺, 𑀢𑀺𑀬𑁄𑀚𑀦𑀲𑀢𑀁 𑀧𑀭𑀺𑀫𑀸𑀡𑁂𑀦. 𑀅𑀣 𑀢𑀁 𑀧𑀤𑁂𑀲𑀁 𑀕𑁄𑀧𑀸𑀮𑀓𑀸 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀼𑀁. 𑀢𑀢𑁆𑀣𑁂𑀯 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀢𑀸𑀬 𑀘𑀲𑁆𑀲 𑀤𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀯𑀸𑀭𑁂𑀬𑁆𑀬𑀁 𑀓𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼 ‘‘𑀦 𑀩𑀸𑀳𑀺𑀭𑀢𑁄 𑀤𑀸𑀭𑀺𑀓𑀸 𑀆𑀦𑁂𑀢𑀩𑁆𑀩𑀸, 𑀇𑀢𑁄 𑀤𑀸𑀭𑀺𑀓𑀸 𑀦 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀸’’𑀢𑀺. 𑀢𑁂𑀲𑀁 𑀧𑀞𑀫𑀲𑀁𑀯𑀸𑀲𑁂𑀦 𑀤𑁆𑀯𑁂 𑀤𑀸𑀭𑀓𑀸 𑀚𑀸𑀢𑀸 𑀥𑀻𑀢𑀸 𑀘 𑀧𑀼𑀢𑁆𑀢𑁄 𑀘, 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀤𑁆𑀯𑁂 𑀤𑁆𑀯𑁂 𑀚𑀸𑀢𑀸. 𑀢𑀢𑁄 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀟𑁆𑀠𑀦𑁆𑀢𑀸𑀦𑀁 𑀆𑀭𑀸𑀫𑀼𑀬𑁆𑀬𑀸𑀦𑀦𑀺𑀯𑀸𑀲𑀝𑁆𑀞𑀸𑀦𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀁 𑀢𑀁 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼, 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀓𑀢𑀢𑁆𑀢𑀸 𑀯𑁂𑀲𑀸𑀮𑀻𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀇𑀤𑀁 𑀯𑁂𑀲𑀸𑀮𑀺𑀯𑀢𑁆𑀣𑀼.

𑀪𑀕𑀯𑀢𑁄 𑀦𑀺𑀫𑀦𑁆𑀢𑀦𑀁

𑀅𑀬𑀁 𑀧𑀦 𑀯𑁂𑀲𑀸𑀮𑀻 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀓𑀸𑀮𑁂 𑀇𑀤𑁆𑀥𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀢𑀢𑁆𑀣 𑀳𑀺 𑀭𑀸𑀚𑀽𑀦𑀁𑀬𑁂𑀯 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀅𑀳𑁂𑀲𑀼𑀁. 𑀢𑀣𑀸 𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀪𑀡𑁆𑀟𑀸𑀕𑀸𑀭𑀺𑀓𑀧𑁆𑀧𑀪𑀼𑀢𑀻𑀦𑀁 ¶ . 𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀲𑀼𑀪𑀺𑀓𑁆𑀔𑀸 𑀘, 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀸, 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀸𑀦𑀺, 𑀲𑀢𑁆𑀢 𑀘 𑀆𑀭𑀸𑀫𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀲𑀢𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀸, 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀲𑀢𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀬𑁄’’𑀢𑀺 (𑀫𑀳𑀸𑀯. 𑁩𑁨𑁬).

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀤𑀼𑀩𑁆𑀪𑀺𑀓𑁆𑀔𑀸 𑀅𑀳𑁄𑀲𑀺 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀤𑀼𑀲𑁆𑀲𑀲𑁆𑀲𑀸. 𑀧𑀞𑀫𑀁 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸 𑀫𑀭𑀦𑁆𑀢𑀺 ¶ , 𑀢𑁂 𑀩𑀳𑀺𑀤𑁆𑀥𑀸 𑀙𑀟𑁆𑀟𑁂𑀦𑁆𑀢𑀺. 𑀫𑀢𑀫𑀦𑀼𑀲𑁆𑀲𑀸𑀦𑀁 𑀓𑀼𑀡𑀧𑀕𑀦𑁆𑀥𑁂𑀦 𑀅𑀫𑀦𑀼𑀲𑁆𑀲𑀸 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼, 𑀢𑀢𑁄 𑀩𑀳𑀼𑀢𑀭𑀸 𑀫𑀭𑀦𑁆𑀢𑀺. 𑀢𑀸𑀬 𑀧𑀝𑀺𑀓𑀽𑀮𑀢𑀸𑀬 𑀲𑀢𑁆𑀢𑀸𑀦𑀁 𑀅𑀳𑀺𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀇𑀢𑀺 𑀢𑀻𑀳𑀺 𑀤𑀼𑀩𑁆𑀪𑀺𑀓𑁆𑀔𑀅𑀫𑀦𑀼𑀲𑁆𑀲𑀭𑁄𑀕𑀪𑀬𑁂𑀳𑀺 𑀉𑀧𑀤𑁆𑀤𑀼𑀢𑀸 𑀯𑁂𑀲𑀸𑀮𑀺𑀦𑀕𑀭𑀯𑀸𑀲𑀺𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳𑀁𑀲𑀼, ‘‘𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀢𑀺𑀯𑀺𑀥𑀁 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀇𑀢𑁄 𑀧𑀼𑀩𑁆𑀩𑁂 𑀬𑀸𑀯 𑀲𑀢𑁆𑀢𑀫𑀸 𑀭𑀸𑀚𑀓𑀼𑀮𑀧𑀭𑀺𑀯𑀝𑁆𑀝𑀸 𑀏𑀯𑀭𑀽𑀧𑀁 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀢𑀼𑀫𑁆𑀳𑀸𑀓𑀁 𑀫𑀜𑁆𑀜𑁂 𑀅𑀥𑀫𑁆𑀫𑀺𑀓𑀢𑁆𑀢𑁂𑀦 ¶ 𑀢𑀁 𑀏𑀢𑀭𑀳𑀺 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀭𑀸𑀚𑀸 𑀲𑀩𑁆𑀩𑁂 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀅𑀥𑀫𑁆𑀫𑀺𑀓𑀪𑀸𑀯𑀁 𑀯𑀺𑀘𑀺𑀦𑀣𑀸’’𑀢𑀺 𑀆𑀳. 𑀢𑁂 𑀲𑀩𑁆𑀩𑀁 𑀧𑀯𑁂𑀡𑀺𑀁 𑀯𑀺𑀘𑀺𑀦𑀦𑁆𑀢𑀸 𑀦 𑀓𑀺𑀜𑁆𑀘𑀺 𑀅𑀤𑁆𑀤𑀲𑀁𑀲𑀼.

𑀢𑀢𑁄 𑀭𑀜𑁆𑀜𑁄 𑀤𑁄𑀲𑀫𑀤𑀺𑀲𑁆𑀯𑀸 ‘‘𑀇𑀤𑀁 𑀪𑀬𑀁 𑀅𑀫𑁆𑀳𑀸𑀓𑀁 𑀓𑀣𑀁 𑀯𑀽𑀧𑀲𑀫𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀢𑀢𑁆𑀣 𑀏𑀓𑀘𑁆𑀘𑁂 𑀙 𑀲𑀢𑁆𑀣𑀸𑀭𑁂 𑀅𑀧𑀤𑀺𑀲𑀺𑀁𑀲𑀼 ‘‘𑀏𑀢𑁂𑀳𑀺 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀯𑀽𑀧𑀲𑀫𑁂𑀲𑁆𑀲𑀢𑀻’’𑀢𑀺. 𑀏𑀓𑀘𑁆𑀘𑁂 𑀆𑀳𑀁𑀲𑀼 𑁋 ‘‘𑀩𑀼𑀤𑁆𑀥𑁄 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁄 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀢𑁂𑀦 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀩𑁆𑀩𑀪𑀬𑀸𑀦𑀺 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀢𑁂𑀦 𑀢𑁂 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 ‘‘𑀓𑀳𑀁 𑀧𑀦 𑀲𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺, 𑀅𑀫𑁆𑀳𑁂𑀳𑀺 𑀧𑁂𑀲𑀺𑀢𑁄 ¶ 𑀦 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀆𑀳𑀁𑀲𑀼. 𑀅𑀣𑀸𑀧𑀭𑁂 𑀆𑀳𑀁𑀲𑀼 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀦𑀼𑀓𑀫𑁆𑀧𑀓𑀸, 𑀓𑀺𑀲𑁆𑀲 𑀦𑀸𑀕𑀘𑁆𑀙𑁂𑀬𑁆𑀬𑀼𑀁, 𑀲𑁄 𑀧𑀦 𑀪𑀕𑀯𑀸 𑀏𑀢𑀭𑀳𑀺 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺, 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀢𑀁 𑀉𑀧𑀝𑁆𑀞𑀳𑀢𑀺, 𑀲𑁄 𑀆𑀕𑀦𑁆𑀢𑀼𑀁 𑀦 𑀤𑀤𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀆𑀦𑁂𑀬𑁆𑀬𑀸𑀫𑀸’’𑀢𑀺 𑀤𑁆𑀯𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀧𑀳𑀽𑀢𑀁 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑁂𑀲𑀺𑀁𑀲𑀼 ‘‘𑀩𑀺𑀫𑁆𑀩𑀺𑀲𑀸𑀭𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀦𑁂𑀣𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀦𑀺𑀯𑁂𑀤𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀪𑀕𑀯𑀦𑁆𑀢𑀁 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑁂𑀲𑁂𑀳𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀦 𑀲𑀫𑁆𑀧𑀝𑀺𑀘𑁆𑀙𑀺, ‘‘𑀢𑀼𑀫𑁆𑀳𑁂𑀬𑁂𑀯 𑀚𑀸𑀦𑀸𑀣𑀸’’𑀢𑀺 𑀆𑀳. 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀦𑀕𑀭𑁂 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀲𑀘𑁂 𑀪𑀕𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑁄𑀢𑁆𑀣𑀺 𑀦𑁄 𑀪𑀯𑁂𑀬𑁆𑀬𑀸’’𑀢𑀺. 𑀪𑀕𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀯𑁂𑀲𑀸𑀮𑀺𑀬𑀁 𑀭𑀢𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀲𑀸 𑀭𑀓𑁆𑀔𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀘𑀓𑁆𑀓𑀯𑀸𑀴𑀸𑀦𑀁 𑀨𑀭𑀺𑀲𑁆𑀲𑀢𑀺, 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀅𑀣 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀪𑀕𑀯𑀢𑀸 𑀯𑁂𑀲𑀸𑀮𑀺𑀕𑀫𑀦𑀁 𑀅𑀥𑀺𑀯𑀸𑀲𑀺𑀢’’𑀦𑁆𑀢𑀺 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀲𑀫𑁆𑀧𑀝𑀺𑀘𑁆𑀙𑀣 𑀯𑁂𑀲𑀸𑀮𑀺𑀕𑀫𑀦’’𑀦𑁆𑀢𑀺? 𑀆𑀫, 𑀫𑀳𑀸𑀭𑀸𑀚𑀸𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀢𑀸𑀯 𑀆𑀕𑀫𑁂𑀣, 𑀬𑀸𑀯 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀫𑀻𑀢𑀺.

𑀅𑀣 𑀔𑁄 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀕𑀳𑀲𑁆𑀲 𑀘 𑀕𑀗𑁆𑀕𑀸𑀬 𑀘 𑀅𑀦𑁆𑀢𑀭𑀸 𑀧𑀜𑁆𑀘𑀬𑁄𑀚𑀦𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀫𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀕𑀫𑀦𑀓𑀸𑀮𑀁 𑀧𑀝𑀺𑀯𑁂𑀤𑁂𑀲𑀺. 𑀪𑀕𑀯𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 ¶ 𑀧𑀸𑀬𑀸𑀲𑀺. 𑀭𑀸𑀚𑀸 𑀧𑀜𑁆𑀘𑀬𑁄𑀚𑀦𑀁 𑀫𑀕𑁆𑀕𑀁 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺 𑀚𑀸𑀡𑀼𑀫𑀢𑁆𑀢𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 ¶ 𑀥𑀚𑀧𑀝𑀸𑀓𑀧𑀼𑀡𑁆𑀡𑀖𑀝𑀓𑀤𑀮𑀺𑀆𑀤𑀻𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 ¶ 𑀪𑀕𑀯𑀢𑁄 𑀤𑁆𑀯𑁂 𑀲𑁂𑀢𑀘𑁆𑀙𑀢𑁆𑀢𑀸𑀦𑀺 𑀏𑀓𑀫𑁂𑀓𑀲𑁆𑀲 𑀘 𑀪𑀺𑀓𑁆𑀔𑀼𑀲𑁆𑀲 𑀏𑀓𑀫𑁂𑀓𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀦𑁆𑀢𑀁 𑀯𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀧𑀜𑁆𑀘𑀳𑀺 𑀤𑀺𑀯𑀲𑁂𑀳𑀺 𑀕𑀗𑁆𑀕𑀸𑀢𑀻𑀭𑀁 𑀦𑁂𑀲𑀺. 𑀢𑀢𑁆𑀣 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀦𑀸𑀯𑀁 𑀅𑀮𑀗𑁆𑀓𑀭𑁄𑀦𑁆𑀢𑁄 𑀯𑁂𑀲𑀸𑀮𑀺𑀓𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺 ‘‘𑀆𑀕𑀢𑁄 𑀪𑀕𑀯𑀸, 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀲𑀩𑁆𑀩𑁂 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀣𑀸’’𑀢𑀺. 𑀢𑁂 ‘‘𑀤𑀺𑀕𑀼𑀡𑀁 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑁂𑀲𑀸𑀮𑀺𑀬𑀸 𑀘 𑀕𑀗𑁆𑀕𑀸𑀬 𑀘 𑀅𑀦𑁆𑀢𑀭𑀸 𑀢𑀺𑀬𑁄𑀚𑀦𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀘𑀢𑁆𑀢𑀸𑀭𑀺 𑀏𑀓𑀫𑁂𑀓𑀲𑁆𑀲 𑀘 𑀪𑀺𑀓𑁆𑀔𑀼𑀲𑁆𑀲 𑀤𑁆𑀯𑁂 𑀤𑁆𑀯𑁂 𑀲𑁂𑀢𑀘𑁆𑀙𑀢𑁆𑀢𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀧𑀽𑀚𑀁 𑀓𑀼𑀭𑀼𑀫𑀸𑀦𑀸 𑀕𑀗𑁆𑀕𑀸𑀢𑀻𑀭𑀁 𑀆𑀕𑀦𑁆𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣 𑀩𑀺𑀫𑁆𑀩𑀺𑀲𑀸𑀭𑁄 𑀤𑁆𑀯𑁂 𑀦𑀸𑀯𑀸𑀬𑁄 𑀲𑀗𑁆𑀖𑀝𑁂𑀢𑁆𑀯𑀸 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀧𑀼𑀧𑁆𑀨𑀤𑀸𑀫𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀢𑁆𑀣 𑀲𑀩𑁆𑀩𑀭𑀢𑀦𑀫𑀬𑀁 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀪𑀕𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺. 𑀧𑀜𑁆𑀘 𑀲𑀢𑀸 𑀪𑀺𑀓𑁆𑀔𑀽𑀧𑀺 𑀦𑀸𑀯𑀁 𑀆𑀭𑀼𑀳𑀺𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀦𑀺𑀲𑀻𑀤𑀺𑀁𑀲𑀼. 𑀭𑀸𑀚𑀸 𑀪𑀕𑀯𑀦𑁆𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀕𑀸𑀳𑁂𑀢𑁆𑀯𑀸 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀸 𑀆𑀕𑀘𑁆𑀙𑀢𑀺, 𑀢𑀸𑀯𑀸𑀳𑀁 𑀇𑀥𑁂𑀯 𑀕𑀗𑁆𑀕𑀸𑀢𑀻𑀭𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀉𑀧𑀭𑀺 𑀤𑁂𑀯𑀢𑀸 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀧𑀽𑀚𑀁 𑀅𑀓𑀁𑀲𑀼. 𑀳𑁂𑀝𑁆𑀞𑀸𑀕𑀗𑁆𑀕𑀸𑀦𑀺𑀯𑀸𑀲𑀺𑀦𑁄 𑀓𑀫𑁆𑀩𑀮𑀲𑁆𑀲𑀢𑀭𑀸𑀤𑀬𑁄 𑀦𑀸𑀕𑀭𑀸𑀚𑀸𑀦𑁄 𑀧𑀽𑀚𑀁 𑀅𑀓𑀁𑀲𑀼. 𑀏𑀯𑀁 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀪𑀕𑀯𑀸 𑀬𑁄𑀚𑀦𑀫𑀢𑁆𑀢𑀁 𑀅𑀤𑁆𑀥𑀸𑀦𑀁 𑀕𑀗𑁆𑀕𑀸𑀬 𑀕𑀦𑁆𑀢𑁆𑀯𑀸 𑀯𑁂𑀲𑀸𑀮𑀺𑀓𑀸𑀦𑀁 𑀲𑀻𑀫𑀦𑁆𑀢𑀭𑀁 𑀧𑀯𑀺𑀝𑁆𑀞𑁄.

𑀢𑀢𑁄 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀩𑀺𑀫𑁆𑀩𑀺𑀲𑀸𑀭𑁂𑀦 𑀓𑀢𑀧𑀽𑀚𑀸𑀬 𑀤𑀺𑀕𑀼𑀡𑀁 𑀓𑀭𑁄𑀦𑁆𑀢𑀸 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀺𑀁𑀲𑀼. 𑀢𑁂𑀦𑁂𑀯 𑀔𑀡𑁂𑀦 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀯𑀺𑀚𑁆𑀚𑀼𑀧𑁆𑀧𑀪𑀸𑀯𑀺𑀦𑀤𑁆𑀥𑀦𑁆𑀥𑀓𑀸𑀭𑀯𑀺𑀲𑀝𑀓𑀽𑀝𑁄 𑀕𑀴𑀕𑀴𑀸𑀬𑀦𑁆𑀢𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀢𑀸 𑀧𑀞𑀫𑀧𑀸𑀤𑁂 ¶ 𑀕𑀗𑁆𑀕𑀸𑀢𑀻𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀬𑁂 𑀢𑁂𑀫𑁂𑀢𑀼𑀓𑀸𑀫𑀸, 𑀢𑁂 𑀏𑀯 𑀢𑁂𑀫𑁂𑀦𑁆𑀢𑀺, 𑀅𑀢𑁂𑀫𑁂𑀢𑀼𑀓𑀸𑀫𑀸 𑀦 𑀢𑁂𑀫𑁂𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀚𑀸𑀡𑀼𑀫𑀢𑁆𑀢𑀁 𑀊𑀭𑀼𑀫𑀢𑁆𑀢𑀁 𑀓𑀝𑀺𑀫𑀢𑁆𑀢𑀁 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀯𑀳𑀢𑀺, 𑀲𑀩𑁆𑀩𑀓𑀼𑀡𑀧𑀸𑀦𑀺 𑀉𑀤𑀓𑁂𑀦 𑀕𑀗𑁆𑀕𑀁 𑀧𑀯𑁂𑀲𑀺𑀢𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀪𑀽𑀫𑀺𑀪𑀸𑀕𑁄 𑀅𑀳𑁄𑀲𑀺.

𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀸𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀤𑀺𑀕𑀼𑀡𑀁 𑀧𑀽𑀚𑀁 𑀓𑀭𑁄𑀦𑁆𑀢𑀸 𑀯𑁂𑀲𑀸𑀮𑀺𑀁 𑀦𑀬𑀺𑀁𑀲𑀼 ¶ . 𑀯𑁂𑀲𑀸𑀮𑀺𑀁 𑀲𑀫𑁆𑀧𑀢𑁆𑀢𑁂 𑀪𑀕𑀯𑀢𑀺 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄 𑀆𑀕𑀘𑁆𑀙𑀺. 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀢𑀸𑀦𑀁 𑀲𑀦𑁆𑀦𑀺𑀧𑀸𑀢𑁂𑀦 𑀅𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀧𑀮𑀸𑀬𑀺𑀁𑀲𑀼. 𑀪𑀕𑀯𑀸 𑀦𑀕𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀆𑀦𑀦𑁆𑀤, 𑀭𑀢𑀦𑀲𑀼𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀽𑀧𑀓𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀮𑀺𑀘𑁆𑀙𑀯𑀺𑀭𑀸𑀚𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁 𑀯𑁂𑀲𑀸𑀮𑀺𑀬𑀸 𑀢𑀺𑀧𑀸𑀓𑀸𑀭𑀦𑁆𑀢𑀭𑁂 𑀯𑀺𑀘𑀭𑀦𑁆𑀢𑁄 𑀧𑀭𑀺𑀢𑁆𑀢𑀁 𑀓𑀭𑁄𑀳𑀻’’𑀢𑀺 𑀭𑀢𑀦𑀲𑀼𑀢𑁆𑀢𑀁 𑀅𑀪𑀸𑀲𑀺. ‘‘𑀏𑀯𑀁 𑀓𑁂𑀦 𑀧𑀦𑁂𑀢𑀁 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁 ¶ , 𑀓𑀤𑀸, 𑀓𑀢𑁆𑀣, 𑀓𑀲𑁆𑀫𑀸 𑀘 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀲𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸 𑀯𑀺𑀢𑁆𑀣𑀸𑀭𑁂𑀦 𑀯𑁂𑀲𑀸𑀮𑀺𑀯𑀢𑁆𑀣𑀼𑀢𑁄 𑀧𑀪𑀼𑀢𑀺 𑀧𑁄𑀭𑀸𑀡𑁂𑀳𑀺 𑀯𑀡𑁆𑀡𑀻𑀬𑀢𑀺.

𑀏𑀯𑀁 𑀪𑀕𑀯𑀢𑁄 𑀯𑁂𑀲𑀸𑀮𑀺𑀁 𑀅𑀦𑀼𑀧𑁆𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀯𑁂𑀲𑀸𑀮𑀺𑀦𑀕𑀭𑀤𑁆𑀯𑀸𑀭𑁂 𑀢𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀯𑀼𑀢𑁆𑀢𑀫𑀺𑀤𑀁 𑀭𑀢𑀦𑀲𑀼𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀭𑀺𑀢𑁆𑀢𑀢𑁆𑀣𑀸𑀬 𑀪𑀸𑀲𑀫𑀸𑀦𑁄 𑀪𑀕𑀯𑀢𑁄 𑀧𑀢𑁆𑀢𑁂𑀦 𑀉𑀤𑀓𑀫𑀸𑀤𑀸𑀬 𑀲𑀩𑁆𑀩𑀦𑀕𑀭𑀁 𑀅𑀩𑁆𑀪𑀼𑀓𑁆𑀓𑀺𑀭𑀦𑁆𑀢𑁄 𑀅𑀦𑀼𑀯𑀺𑀘𑀭𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀯𑀼𑀢𑁆𑀢𑀫𑀢𑁆𑀢𑁂 𑀏𑀯 𑀣𑁂𑀭𑁂𑀦 𑀬𑁂 𑀧𑀼𑀩𑁆𑀩𑁂 𑀅𑀧𑀮𑀸𑀢𑀸 𑀲𑀗𑁆𑀓𑀸𑀭𑀓𑀽𑀝𑀪𑀺𑀢𑁆𑀢𑀺𑀧𑁆𑀧𑀤𑁂𑀲𑀸𑀤𑀺𑀦𑀺𑀲𑁆𑀲𑀺𑀢𑀸 𑀅𑀫𑀦𑀼𑀲𑁆𑀲𑀸, 𑀢𑁂 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀧𑀮𑀸𑀬𑀺𑀁𑀲𑀼, 𑀤𑁆𑀯𑀸𑀭𑀸𑀦𑀺 𑀅𑀦𑁄𑀓𑀸𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀏𑀓𑀘𑁆𑀘𑁂 𑀤𑁆𑀯𑀸𑀭𑁂𑀲𑀼 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀢𑀸. 𑀅𑀫𑀦𑀼𑀲𑁆𑀲𑁂𑀲𑀼 𑀕𑀢𑀫𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀕𑀢𑁆𑀢𑁂𑀲𑀼 𑀭𑁄𑀕𑁄 𑀯𑀽𑀧𑀲𑀦𑁆𑀢𑁄. 𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀣𑁂𑀭𑀁 𑀧𑀽𑀚𑁂𑀲𑀼𑀁. 𑀫𑀳𑀸𑀚𑀦𑁄 𑀦𑀕𑀭𑀫𑀚𑁆𑀛𑁂 ¶ 𑀲𑀦𑁆𑀣𑀸𑀕𑀸𑀭𑀁 𑀲𑀩𑁆𑀩𑀕𑀦𑁆𑀥𑁂𑀳𑀺 𑀮𑀺𑀫𑁆𑀧𑀺𑀢𑁆𑀯𑀸 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀢𑁆𑀣 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀦𑁂𑀲𑀺.

𑀪𑀕𑀯𑀸 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀭𑀸𑀚𑀸𑀦𑁄 𑀫𑀦𑀼𑀲𑁆𑀲𑀸 𑀘 𑀧𑀢𑀺𑀭𑀽𑀧𑁂 𑀧𑀢𑀺𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀉𑀧𑀦𑀺𑀲𑀻𑀤𑀺 𑀅𑀜𑁆𑀜𑁂 𑀘 𑀤𑁂𑀯𑀸, 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀲𑀩𑁆𑀩𑀁 𑀯𑁂𑀲𑀸𑀮𑀺𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀭𑀓𑁆𑀔𑀁 𑀓𑀢𑁆𑀯𑀸 𑀯𑁂𑀲𑀸𑀮𑀺𑀦𑀕𑀭𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀢𑁆𑀣 𑀪𑀕𑀯𑀸 𑀲𑀩𑁆𑀩𑁂𑀲𑀁 𑀢𑀤𑁂𑀯 𑀭𑀢𑀦𑀲𑀼𑀢𑁆𑀢𑀁 𑀅𑀪𑀸𑀲𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀬𑀸 ‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂𑀢𑀁 𑀇𑀫𑀁 𑀦𑀬𑀁. 𑀧𑀓𑀸𑀲𑁂𑀢𑁆𑀯𑀸𑀦𑀸’’𑀢𑀺 𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀲𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀸 𑀳𑁄𑀢𑀺.

𑀬𑀸𑀦𑀻𑀥𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ¶ ‘‘𑀏𑀢𑀲𑁆𑀲 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀯𑀡𑁆𑀡𑀦𑀸 𑀆𑀭𑀩𑁆𑀪𑀢𑁂. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺 ‘‘𑀆𑀤𑀺𑀢𑁄 𑀧𑀜𑁆𑀘𑁂𑀯 𑀕𑀸𑀣𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀲𑁂𑀲𑀸 𑀧𑀭𑀺𑀢𑁆𑀢𑀓𑀭𑀡𑀲𑀫𑀬𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑀸’’𑀢𑀺. 𑀬𑀣𑀸 𑀯𑀸 𑀢𑀣𑀸 𑀯𑀸 𑀳𑁄𑀢𑀼, 𑀓𑀺𑀁 𑀦𑁄 𑀇𑀫𑀸𑀬 𑀧𑀭𑀺𑀓𑁆𑀔𑀸𑀬, 𑀲𑀩𑁆𑀩𑀣𑀸𑀧𑀺 𑀏𑀢𑀲𑁆𑀲 𑀭𑀢𑀦𑀲𑀼𑀢𑁆𑀢𑀲𑁆𑀲 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀬𑀸𑀦𑀻𑀥 𑀪𑀽𑀢𑀸𑀦𑀻𑀢𑀺 𑀧𑀞𑀫𑀕𑀸𑀣𑀸. 𑀢𑀢𑁆𑀣 𑀬𑀸𑀦𑀻𑀢𑀺 𑀬𑀸𑀤𑀺𑀲𑀸𑀦𑀺 𑀅𑀧𑁆𑀧𑁂𑀲𑀓𑁆𑀔𑀸𑀦𑀺 𑀯𑀸 𑀫𑀳𑁂𑀲𑀓𑁆𑀔𑀸𑀦𑀺 𑀯𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂, 𑀢𑀲𑁆𑀫𑀺𑀁 𑀔𑀡𑁂 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀪𑀽𑀢𑀸𑀦𑀻𑀢𑀺 𑀓𑀺𑀜𑁆𑀘𑀸𑀧𑀺 ¶ 𑀪𑀽𑀢𑀲𑀤𑁆𑀤𑁄 ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁬𑁯) 𑀯𑀺𑀚𑁆𑀚𑀫𑀸𑀦𑁂. ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂 ¶ , 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁪𑁦𑁧) 𑀔𑀦𑁆𑀥𑀧𑀜𑁆𑀘𑀓𑁂. ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀼, 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀘𑀢𑀼𑀩𑁆𑀩𑀺𑀥𑁂 𑀧𑀣𑀯𑀻𑀥𑀸𑀢𑁆𑀯𑀸𑀤𑀺𑀭𑀽𑀧𑁂. ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁧.𑁨.𑁧𑁯𑁦) 𑀔𑀻𑀡𑀸𑀲𑀯𑁂. ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁦) 𑀲𑀩𑁆𑀩𑀲𑀢𑁆𑀢𑁂. ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁯𑁦) 𑀭𑀼𑀓𑁆𑀔𑀸𑀤𑀺𑀓𑁂. ‘‘𑀪𑀽𑀢𑀁 𑀪𑀽𑀢𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩) 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀳𑁂𑀝𑁆𑀞𑀸 𑀲𑀢𑁆𑀢𑀦𑀺𑀓𑀸𑀬𑀁 𑀉𑀧𑀸𑀤𑀸𑀬 𑀯𑀢𑁆𑀢𑀢𑀺. 𑀇𑀥 𑀧𑀦 𑀅𑀯𑀺𑀲𑁂𑀲𑀢𑁄 𑀅𑀫𑀦𑀼𑀲𑁆𑀲𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀲𑀫𑀸𑀕𑀢𑀸𑀦𑀻𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀦𑀺. 𑀪𑀼𑀫𑁆𑀫𑀸𑀦𑀻𑀢𑀺 𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀯𑀸-𑀇𑀢𑀺 𑀯𑀺𑀓𑀧𑁆𑀧𑀦𑁂. 𑀢𑁂𑀦 𑀬𑀸𑀦𑀻𑀥 𑀪𑀼𑀫𑁆𑀫𑀸𑀦𑀺 𑀯𑀸 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻𑀢𑀺 𑀇𑀫𑀫𑁂𑀓𑀁 𑀯𑀺𑀓𑀧𑁆𑀧𑀁 𑀓𑀢𑁆𑀯𑀸 𑀧𑀼𑀦 𑀤𑀼𑀢𑀺𑀬𑀯𑀺𑀓𑀧𑁆𑀧𑀁 𑀓𑀸𑀢𑀼𑀁 ‘‘𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀆𑀳. 𑀅𑀦𑁆𑀢𑀮𑀺𑀓𑁆𑀔𑁂 𑀯𑀸 𑀬𑀸𑀦𑀺 𑀪𑀽𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀇𑀥 𑀲𑀫𑀸𑀕𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑀸𑀫𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀁, 𑀢𑀸𑀯 𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑀽𑀢𑀸𑀦𑀺 𑀆𑀓𑀸𑀲𑁂 𑀧𑀸𑀢𑀼𑀪𑀽𑀢𑀯𑀺𑀫𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀅𑀦𑁆𑀢𑀮𑀺𑀓𑁆𑀔𑁂 𑀪𑀽𑀢𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁄 𑀳𑁂𑀝𑁆𑀞𑀸 𑀲𑀺𑀦𑁂𑀭𑀼𑀢𑁄 𑀧𑀪𑀼𑀢𑀺 𑀬𑀸𑀯 𑀪𑀽𑀫𑀺𑀬𑀁 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀅𑀥𑀺𑀯𑀢𑁆𑀣𑀸𑀦𑀺 𑀧𑀣𑀯𑀺𑀬𑀜𑁆𑀘 𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑀽𑀢𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀪𑀽𑀫𑀺𑀬𑀁 𑀪𑀽𑀫𑀺𑀧𑀝𑀺𑀩𑀤𑁆𑀥𑁂𑀲𑀼 𑀘 𑀭𑀼𑀓𑁆𑀔𑀮𑀢𑀸𑀧𑀩𑁆𑀩𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀪𑀼𑀫𑁆𑀫𑀸𑀦𑀺 𑀪𑀽𑀢𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀁 ¶ 𑀪𑀕𑀯𑀸 𑀲𑀩𑁆𑀩𑀸𑀦𑁂𑀯 𑀅𑀫𑀦𑀼𑀲𑁆𑀲𑀪𑀽𑀢𑀸𑀦𑀺 ‘‘𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀼𑀦 𑀏𑀓𑁂𑀦 𑀧𑀤𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂𑀯 𑀪𑀽𑀢𑀸 𑀲𑀼𑀫𑀦𑀸 𑀪𑀯𑀦𑁆𑀢𑀽’’𑀢𑀺 𑀆𑀳. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀸. 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂, 𑀏𑀓𑀫𑁆𑀧𑀺 𑀅𑀦𑀧𑀦𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀽𑀢𑀸𑀢𑀺 𑀅𑀫𑀦𑀼𑀲𑁆𑀲𑀸. 𑀲𑀼𑀫𑀦𑀸 𑀪𑀯𑀦𑁆𑀢𑀽𑀢𑀺 𑀲𑀼𑀔𑀺𑀢𑀫𑀦𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀯𑀦𑁆𑀢𑀼. 𑀅𑀣𑁄𑀧𑀻𑀢𑀺 𑀓𑀺𑀘𑁆𑀘𑀦𑁆𑀢𑀭𑀲𑀦𑁆𑀦𑀺𑀬𑁄𑀚𑀦𑀢𑁆𑀣𑀁 𑀯𑀸𑀓𑁆𑀬𑁄𑀧𑀸𑀤𑀸𑀦𑁂 𑀦𑀺𑀧𑀸𑀢𑀤𑁆𑀯𑀬𑀁. 𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀼 𑀪𑀸𑀲𑀺𑀢𑀦𑁆𑀢𑀺 𑀅𑀝𑁆𑀞𑀺𑀁 ¶ 𑀓𑀢𑁆𑀯𑀸 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀯𑀳𑀁 𑀫𑀫 𑀤𑁂𑀲𑀦𑀁 𑀲𑀼𑀡𑀦𑁆𑀢𑀼.

𑀏𑀯𑀫𑁂𑀢𑁆𑀣 𑀪𑀕𑀯𑀸 ‘‘𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻’’𑀢𑀺 𑀅𑀦𑀺𑀬𑀫𑀺𑀢𑀯𑀘𑀦𑁂𑀦 𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 ‘‘𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀤𑁆𑀯𑀺𑀥𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀢𑀢𑁄 ‘‘𑀲𑀩𑁆𑀩𑁂𑀯 𑀪𑀽𑀢𑀸’’𑀢𑀺 𑀧𑀼𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀲𑀼𑀫𑀦𑀸 𑀪𑀯𑀦𑁆𑀢𑀽’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀆𑀲𑀬𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀼 𑀪𑀸𑀲𑀺𑀢’’𑀦𑁆𑀢𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀁, 𑀢𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀢𑁆𑀢𑀺𑀬𑀁 ¶ 𑀧𑀭𑀢𑁄𑀖𑁄𑀲𑀲𑀫𑁆𑀧𑀢𑁆𑀢𑀺𑀬𑀜𑁆𑀘, 𑀢𑀣𑀸 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀻𑀲𑀼 𑀲𑀫𑀸𑀥𑀺𑀧𑀜𑁆𑀜𑀸𑀳𑁂𑀢𑀼𑀲𑀫𑁆𑀧𑀢𑁆𑀢𑀻𑀲𑀼 𑀘 𑀦𑀺𑀬𑁄𑀚𑁂𑀦𑁆𑀢𑁄 𑀕𑀸𑀣𑀁 𑀲𑀫𑀸𑀧𑁂𑀲𑀺.

𑀢𑀲𑁆𑀫𑀸 𑀳𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁨. 𑀢𑀲𑁆𑀫𑀸 𑀳𑀺 𑀪𑀽𑀢𑀸𑀢𑀺 𑀤𑀼𑀢𑀺𑀬𑀕𑀸𑀣𑀸. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀪𑀽𑀢𑀸𑀢𑀺 𑀆𑀫𑀦𑁆𑀢𑀦𑀯𑀘𑀦𑀁. 𑀦𑀺𑀲𑀸𑀫𑁂𑀣𑀸𑀢𑀺 𑀲𑀼𑀡𑀸𑀣. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀤𑀺𑀩𑁆𑀩𑀝𑁆𑀞𑀸𑀦𑀸𑀦𑀺 𑀢𑀢𑁆𑀣 𑀉𑀧𑀪𑁄𑀕𑀧𑀭𑀺𑀪𑁄𑀕𑀲𑀫𑁆𑀧𑀤𑀜𑁆𑀘 𑀧𑀳𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀇𑀥 𑀲𑀫𑀸𑀕𑀢𑀸, 𑀦 𑀦𑀝𑀦𑀘𑁆𑀘𑀦𑀸𑀤𑀺𑀤𑀲𑁆𑀲𑀦𑀢𑁆𑀣𑀁, 𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂𑀢𑀺. 𑀅𑀣 𑀯𑀸 ‘‘𑀲𑀼𑀫𑀦𑀸 𑀪𑀯𑀦𑁆𑀢𑀼, 𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀽’’𑀢𑀺 𑀯𑀘𑀦𑁂𑀦 𑀢𑁂𑀲𑀁 𑀲𑀼𑀫𑀦𑀪𑀸𑀯𑀁 𑀲𑀓𑁆𑀓𑀘𑁆𑀘𑀁 𑀲𑁄𑀢𑀼𑀓𑀫𑁆𑀬𑀢𑀜𑁆𑀘 𑀤𑀺𑀲𑁆𑀯𑀸 𑀆𑀳 ‘‘𑀬𑀲𑁆𑀫𑀸 𑀢𑀼𑀫𑁆𑀳𑁂 𑀲𑀼𑀫𑀦𑀪𑀸𑀯𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀲𑀬𑀲𑀼𑀤𑁆𑀥𑀻𑀳𑀺 𑀲𑀓𑁆𑀓𑀘𑁆𑀘𑀁 𑀲𑁄𑀢𑀼𑀓𑀫𑁆𑀬𑀢𑀸𑀬 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀧𑀭𑀢𑁄𑀖𑁄𑀲𑀧𑀤𑀝𑁆𑀞𑀸𑀦𑀢𑁄 𑀧𑀬𑁄𑀕𑀲𑀼𑀤𑁆𑀥𑀻𑀳𑀺 𑀘 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂’’𑀢𑀺. 𑀅𑀣 𑀯𑀸 𑀬𑀁 ¶ 𑀧𑀼𑀭𑀺𑀫𑀕𑀸𑀣𑀸𑀬 𑀅𑀦𑁆𑀢𑁂 ‘‘𑀪𑀸𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀸𑀭𑀡𑀪𑀸𑀯𑁂𑀦 𑀅𑀧𑀤𑀺𑀲𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀫𑀫 𑀪𑀸𑀲𑀺𑀢𑀁 𑀦𑀸𑀫 𑀅𑀢𑀺𑀤𑀼𑀮𑁆𑀮𑀪𑀁 𑀅𑀝𑁆𑀞𑀓𑁆𑀔𑀡𑀧𑀭𑀺𑀯𑀚𑁆𑀚𑀺𑀢𑀲𑁆𑀲 𑀔𑀡𑀲𑁆𑀲 𑀤𑀼𑀮𑁆𑀮𑀪𑀢𑁆𑀢𑀸, 𑀅𑀦𑁂𑀓𑀸𑀦𑀺𑀲𑀁𑀲𑀜𑁆𑀘 𑀧𑀜𑁆𑀜𑀸𑀓𑀭𑀼𑀡𑀸𑀕𑀼𑀡𑁂𑀦 𑀧𑀯𑀢𑁆𑀢𑀢𑁆𑀢𑀸, 𑀢𑀜𑁆𑀘𑀸𑀳𑀁 𑀯𑀢𑁆𑀢𑀼𑀓𑀸𑀫𑁄 ‘𑀲𑀼𑀡𑀦𑁆𑀢𑀼 𑀪𑀸𑀲𑀺𑀢’𑀦𑁆𑀢𑀺 𑀅𑀯𑁄𑀘𑀁, 𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂’’𑀢𑀺. 𑀇𑀤𑀁 𑀇𑀫𑀺𑀦𑀸 𑀕𑀸𑀣𑀸𑀧𑀤𑁂𑀦 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑁂𑀢𑀁 𑀓𑀸𑀭𑀡𑀁 𑀦𑀺𑀭𑁄𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀲𑀺𑀢𑀦𑀺𑀲𑀸𑀫𑀦𑁂 𑀦𑀺𑀬𑁄𑀚𑁂𑀢𑁆𑀯𑀸 𑀦𑀺𑀲𑀸𑀫𑁂𑀢𑀩𑁆𑀩𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ¶ ‘‘𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀸𑀬𑀁 𑀢𑀻𑀳𑀺 𑀉𑀧𑀤𑁆𑀤𑀯𑁂𑀳𑀺 𑀉𑀧𑀤𑁆𑀤𑀼𑀢𑀸 𑀫𑀸𑀦𑀼𑀲𑀻 𑀧𑀚𑀸, 𑀢𑀲𑁆𑀲𑀸 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬 𑀫𑁂𑀢𑁆𑀢𑀁 𑀫𑀺𑀢𑁆𑀢𑀪𑀸𑀯𑀁 𑀳𑀺𑀢𑀚𑁆𑀛𑀸𑀲𑀬𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀣𑀸𑀢𑀺. 𑀓𑁂𑀘𑀺 𑀧𑀦 ‘‘𑀫𑀸𑀦𑀼𑀲𑀺𑀓𑀁 𑀧𑀚’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑀁 𑀪𑀼𑀫𑁆𑀫𑀢𑁆𑀣𑀸𑀲𑀫𑁆𑀪𑀯𑀸 𑀦 𑀬𑀼𑀚𑁆𑀚𑀢𑀺. 𑀬𑀫𑁆𑀧𑀺 𑀅𑀜𑁆𑀜𑁂 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺, 𑀲𑁄𑀧𑀺 𑀦 𑀬𑀼𑀚𑁆𑀚𑀢𑀺. 𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑁋 𑀦𑀸𑀳𑀁 𑀩𑀼𑀤𑁆𑀥𑁄𑀢𑀺 𑀇𑀲𑁆𑀲𑀭𑀺𑀬𑀩𑀮𑁂𑀦 𑀯𑀤𑀸𑀫𑀺, 𑀅𑀧𑀺 𑀢𑀼 𑀬𑀁 𑀢𑀼𑀫𑁆𑀳𑀸𑀓𑀜𑁆𑀘 𑀇𑀫𑀺𑀲𑁆𑀲𑀸 𑀘 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬 𑀳𑀺𑀢𑀢𑁆𑀣𑀁 𑀯𑀤𑀸𑀫𑀺 ‘‘𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬𑀸’’𑀢𑀺. 𑀏𑀢𑁆𑀣 𑀘 𑁋

‘‘𑀬𑁂 𑀲𑀢𑁆𑀢𑀲𑀡𑁆𑀟𑀁 𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸,

𑀭𑀸𑀚𑀺𑀲𑀬𑁄 𑀬𑀚𑀫𑀸𑀦𑀸𑀦𑀼𑀧𑀭𑀺𑀬𑀕𑀸;

𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀁,

𑀲𑀫𑁆𑀫𑀸𑀧𑀸𑀲𑀁 𑀯𑀸𑀚𑀧𑁂𑀬𑁆𑀬𑀁 𑀦𑀺𑀭𑀕𑁆𑀕𑀴𑀁.

‘‘𑀫𑁂𑀢𑁆𑀢𑀲𑁆𑀲 ¶ 𑀘𑀺𑀢𑁆𑀢𑀲𑁆𑀲 𑀲𑀼𑀪𑀸𑀯𑀺𑀢𑀲𑁆𑀲,

𑀓𑀮𑀫𑁆𑀧𑀺 𑀢𑁂 𑀦𑀸𑀦𑀼𑀪𑀯𑀦𑁆𑀢𑀺 𑀲𑁄𑀴𑀲𑀺𑀁;

𑀏𑀓𑀫𑁆𑀧𑀺 𑀘𑁂 𑀧𑀸𑀡𑀫𑀤𑀼𑀝𑁆𑀞𑀘𑀺𑀢𑁆𑀢𑁄,

𑀫𑁂𑀢𑁆𑀢𑀸𑀬𑀢𑀺 𑀓𑀼𑀲𑀮𑁄 𑀢𑁂𑀦 𑀳𑁄𑀢𑀺.

‘‘𑀲𑀩𑁆𑀩𑁂 𑀘 𑀧𑀸𑀡𑁂 𑀫𑀦𑀲𑀸𑀦𑀼𑀓𑀫𑁆𑀧𑀻, 𑀧𑀳𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺. (𑀇𑀢𑀺𑀯𑀼. 𑁨𑁭; 𑀅. 𑀦𑀺. 𑁮.𑁧) 𑁋

𑀏𑀯𑀫𑀸𑀤𑀻𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑀸𑀤𑀲𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀲𑁂𑀦 𑀬𑁂 𑀫𑁂𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁 𑀫𑁂𑀢𑁆𑀢𑀸 𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺. (𑀉𑀤𑀸. 𑁭𑁬; 𑀫𑀳𑀸𑀯. 𑁨𑁮𑁬) 𑁋

𑀏𑀯𑀫𑀸𑀤𑀻𑀦𑀁 ¶ 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀬𑁂𑀲𑀼 𑀓𑀬𑀺𑀭𑀢𑀺, 𑀢𑁂𑀲𑀫𑁆𑀧𑀺 𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀉𑀪𑀬𑁂𑀲𑀫𑁆𑀧𑀺 𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀉𑀧𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ¶ ‘‘𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀳𑀭𑀦𑁆𑀢𑀺 𑀬𑁂 𑀩𑀮𑀺𑀁, 𑀢𑀲𑁆𑀫𑀸 𑀳𑀺 𑀦𑁂 𑀭𑀓𑁆𑀔𑀣 𑀅𑀧𑁆𑀧𑀫𑀢𑁆𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀫𑀦𑀼𑀲𑁆𑀲𑀸 𑀘𑀺𑀢𑁆𑀢𑀓𑀫𑁆𑀫𑀓𑀝𑁆𑀞𑀓𑀫𑁆𑀫𑀸𑀤𑀻𑀳𑀺𑀧𑀺 𑀤𑁂𑀯𑀢𑀸 𑀓𑀢𑁆𑀯𑀸 𑀘𑁂𑀢𑀺𑀬𑀭𑀼𑀓𑁆𑀔𑀸𑀤𑀻𑀦𑀺 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁂𑀯𑀢𑀸 𑀉𑀤𑁆𑀤𑀺𑀲𑁆𑀲 𑀤𑀺𑀯𑀸 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀓𑀸𑀮𑀧𑀓𑁆𑀔𑀸𑀤𑀻𑀲𑀼 𑀘 𑀭𑀢𑁆𑀢𑀺𑀁 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀤𑀢𑁆𑀯𑀸 𑀆𑀭𑀓𑁆𑀔𑀤𑁂𑀯𑀢𑀸 𑀉𑀧𑀸𑀤𑀸𑀬 𑀬𑀸𑀯 𑀩𑁆𑀭𑀳𑁆𑀫𑀤𑁂𑀯𑀢𑀸𑀦𑀁 𑀧𑀢𑁆𑀢𑀺𑀤𑀸𑀦𑀦𑀺𑀬𑁆𑀬𑀸𑀢𑀦𑁂𑀦 𑀤𑀺𑀯𑀸 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀙𑀢𑁆𑀢𑀸𑀭𑁄𑀧𑀦𑀤𑀻𑀧𑀫𑀸𑀮𑀸𑀬 𑀲𑀩𑁆𑀩𑀭𑀢𑁆𑀢𑀺𑀓𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀧𑀢𑁆𑀢𑀺𑀤𑀸𑀦𑀦𑀺𑀬𑁆𑀬𑀸𑀢𑀦𑁂𑀦 𑀘 𑀭𑀢𑁆𑀢𑀺𑀁 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀢𑁂 𑀓𑀣𑀁 𑀦 𑀭𑀓𑁆𑀔𑀺𑀢𑀩𑁆𑀩𑀸? 𑀬𑀢𑁄 𑀏𑀯𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀭𑁄𑀦𑁆𑀢𑀺 𑀬𑁂 𑀩𑀮𑀺𑀁, 𑀢𑀲𑁆𑀫𑀸 𑀳𑀺 𑀦𑁂 𑀭𑀓𑁆𑀔𑀣; 𑀢𑀲𑁆𑀫𑀸 𑀩𑀮𑀺𑀓𑀫𑁆𑀫𑀓𑀭𑀡𑀸𑀧𑀺 𑀢𑁂 𑀫𑀦𑀼𑀲𑁆𑀲𑁂 𑀭𑀓𑁆𑀔𑀣 𑀕𑁄𑀧𑀬𑀣, 𑀅𑀳𑀺𑀢𑀁 𑀦𑁂𑀲𑀁 𑀅𑀧𑀦𑁂𑀣, 𑀳𑀺𑀢𑀁 𑀉𑀧𑀦𑁂𑀣 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀢𑀁 𑀓𑀢𑀜𑁆𑀜𑀼𑀪𑀸𑀯𑀁 𑀳𑀤𑀬𑁂 𑀓𑀢𑁆𑀯𑀸 𑀦𑀺𑀘𑁆𑀘𑀫𑀦𑀼𑀲𑁆𑀲𑀭𑀦𑁆𑀢𑀸𑀢𑀺.

𑀬𑀁𑀓𑀺𑀜𑁆𑀘𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁩. 𑀏𑀯𑀁 𑀤𑁂𑀯𑀢𑀸𑀲𑀼 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀉𑀧𑀤𑁆𑀤𑀯𑀯𑀽𑀧𑀲𑀫𑀦𑀢𑁆𑀣𑀁 𑀩𑀼𑀤𑁆𑀥𑀸𑀤𑀺𑀕𑀼𑀡𑀧𑁆𑀧𑀓𑀸𑀲𑀦𑁂𑀦 ¶ 𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 ‘‘𑀬𑀁𑀓𑀺𑀜𑁆𑀘𑀺 𑀯𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀺𑀢𑀼𑀫𑀸𑀭𑀤𑁆𑀥𑁄. 𑀢𑀢𑁆𑀣 𑀬𑀁𑀓𑀺𑀜𑁆𑀘𑀻𑀢𑀺 𑀅𑀦𑀺𑀬𑀫𑀺𑀢𑀯𑀲𑁂𑀦 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀢𑀺 𑀬𑀁𑀓𑀺𑀜𑁆𑀘𑀺 𑀢𑀢𑁆𑀣 𑀢𑀢𑁆𑀣 𑀯𑁄𑀳𑀸𑀭𑀽𑀧𑀕𑀁. 𑀯𑀺𑀢𑁆𑀢𑀦𑁆𑀢𑀺 𑀥𑀦𑀁. 𑀢𑀜𑁆𑀳𑀺 𑀯𑀺𑀢𑁆𑀢𑀺𑀁 𑀚𑀦𑁂𑀢𑀻𑀢𑀺 𑀯𑀺𑀢𑁆𑀢𑀁. 𑀇𑀥 𑀯𑀸𑀢𑀺 𑀫𑀦𑀼𑀲𑁆𑀲𑀮𑁄𑀓𑀁 𑀦𑀺𑀤𑁆𑀤𑀺𑀲𑀢𑀺. 𑀳𑀼𑀭𑀁 𑀯𑀸𑀢𑀺 𑀢𑀢𑁄 𑀧𑀭𑀁 𑀅𑀯𑀲𑁂𑀲𑀮𑁄𑀓𑀁, 𑀢𑁂𑀦 𑀘 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀲𑀩𑁆𑀩𑀮𑁄𑀓𑀕𑁆𑀕𑀳𑀡𑁂 𑀧𑀢𑁆𑀢𑁂 ‘‘𑀲𑀕𑁆𑀕𑁂𑀲𑀼 𑀯𑀸’’𑀢𑀺 𑀧𑀭𑀢𑁄 𑀯𑀼𑀢𑁆𑀢𑀢𑁆𑀢𑀸 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀘 𑀲𑀕𑁆𑀕𑁂 𑀘 𑀅𑀯𑀲𑁂𑀲𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀯𑁄𑀳𑀸𑀭𑀽𑀧𑀕𑀁 𑀅𑀮𑀗𑁆𑀓𑀸𑀭𑀧𑀭𑀺𑀪𑁄𑀕𑀽𑀧𑀕𑀜𑁆𑀘 𑀚𑀸𑀢𑀭𑀽𑀧𑀭𑀚𑀢𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀧𑀯𑀸𑀴𑀮𑁄𑀳𑀺𑀢𑀗𑁆𑀓𑀫𑀲𑀸𑀭𑀕𑀮𑁆𑀮𑀸𑀤𑀺𑀓𑀁, 𑀬𑀜𑁆𑀘 𑀫𑀼𑀢𑁆𑀢𑀸𑀫𑀡𑀺𑀯𑀸𑀮𑀼𑀓𑀢𑁆𑀣𑀢𑀸𑀬 𑀪𑀽𑀫𑀺𑀬𑀸 𑀭𑀢𑀦𑀫𑀬𑀯𑀺𑀫𑀸𑀦𑁂𑀲𑀼 𑀅𑀦𑁂𑀓𑀬𑁄𑀚𑀦𑀲𑀢𑀯𑀺𑀢𑁆𑀣𑀢𑁂𑀲𑀼 ¶ 𑀪𑀯𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀯𑀺𑀢𑁆𑀢𑀁, 𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀲𑀕𑁆𑀕𑁂𑀲𑀼 𑀯𑀸𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀤𑁂𑀯𑀮𑁄𑀓𑁂𑀲𑀼. 𑀢𑁂 ¶ 𑀳𑀺 𑀲𑁄𑀪𑀦𑁂𑀦 𑀓𑀫𑁆𑀫𑁂𑀦 𑀅𑀚𑀻𑀬𑀦𑁆𑀢𑀻𑀢𑀺 𑀲𑀕𑁆𑀕𑀸. 𑀲𑀼𑀝𑁆𑀞𑀼 𑀅𑀕𑁆𑀕𑀸𑀢𑀺𑀧𑀺 𑀲𑀕𑁆𑀕𑀸. 𑀬𑀦𑁆𑀢𑀺 𑀬𑀁 𑀲𑀲𑀸𑀫𑀺𑀓𑀁 𑀯𑀸 𑀅𑀲𑀸𑀫𑀺𑀓𑀁 𑀯𑀸. 𑀭𑀢𑀦𑀦𑁆𑀢𑀺 𑀭𑀢𑀺𑀁 𑀦𑀬𑀢𑀺 𑀯𑀳𑀢𑀺 𑀚𑀦𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀭𑀢𑀦𑀁. 𑀬𑀁𑀓𑀺𑀜𑁆𑀘𑀺 𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀁 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀜𑁆𑀘, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀧𑀡𑀻𑀢𑀦𑁆𑀢𑀺 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀅𑀢𑀧𑁆𑀧𑀓𑀁. 𑀏𑀯𑀁 𑀇𑀫𑀺𑀦𑀸 𑀕𑀸𑀣𑀸𑀧𑀤𑁂𑀦 𑀬𑀁 𑀲𑀕𑁆𑀕𑁂𑀲𑀼 𑀅𑀦𑁂𑀓𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀲𑀩𑁆𑀩𑀭𑀢𑀦𑀫𑀬𑀯𑀺𑀫𑀸𑀦𑀲𑀼𑀥𑀫𑁆𑀫𑀯𑁂𑀚𑀬𑀦𑁆𑀢𑀧𑁆𑀧𑀪𑀼𑀢𑀻𑀲𑀼 𑀲𑀲𑀸𑀫𑀺𑀓𑀁, 𑀬𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑀯𑀺𑀭𑀳𑁂𑀦 𑀅𑀧𑀸𑀬𑀫𑁂𑀯 𑀧𑀭𑀺𑀧𑀽𑀭𑁂𑀦𑁆𑀢𑁂𑀲𑀼 𑀲𑀢𑁆𑀢𑁂𑀲𑀼 𑀲𑀼𑀜𑁆𑀜𑀯𑀺𑀫𑀸𑀦𑀧𑁆𑀧𑀝𑀺𑀩𑀤𑁆𑀥𑀁 𑀅𑀲𑀸𑀫𑀺𑀓𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀧𑀣𑀯𑀺𑀫𑀳𑀸𑀲𑀫𑀼𑀤𑁆𑀤𑀳𑀺𑀫𑀯𑀦𑁆𑀢𑀸𑀤𑀺𑀦𑀺𑀲𑁆𑀲𑀺𑀢𑀫𑀲𑀸𑀫𑀺𑀓𑀁 𑀭𑀢𑀦𑀁, 𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺.

𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦𑀸𑀢𑀺 𑀦-𑀇𑀢𑀺 𑀧𑀝𑀺𑀲𑁂𑀥𑁂. 𑀦𑁄-𑀇𑀢𑀺 𑀅𑀯𑀥𑀸𑀭𑀡𑁂. 𑀲𑀫𑀦𑁆𑀢𑀺 𑀢𑀼𑀮𑁆𑀬𑀁. 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀢𑀺. 𑀢𑀣𑀸𑀕𑀢𑁂𑀦𑀸𑀢𑀺 𑀩𑀼𑀤𑁆𑀥𑁂𑀦. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀁 𑀏𑀢𑀁 𑀯𑀺𑀢𑁆𑀢𑀜𑁆𑀘 𑀭𑀢𑀦𑀜𑁆𑀘 𑀧𑀓𑀸𑀲𑀺𑀢𑀁, 𑀏𑀢𑁆𑀣 𑀏𑀓𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀤𑀺𑀲𑀁 𑀭𑀢𑀦𑀁 𑀦𑁂𑀯𑀢𑁆𑀣𑀺. 𑀬𑀫𑁆𑀧𑀺 𑀳𑀺 𑀢𑀁 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁 𑀫𑀡𑀺𑀭𑀢𑀦𑀜𑁆𑀘, 𑀬𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀫𑀳𑀸𑀚𑀦𑁄 𑀦 𑀅𑀜𑁆𑀜𑀢𑁆𑀣 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀢𑀺, 𑀦 𑀓𑁄𑀘𑀺 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀬𑀓𑁆𑀔𑀝𑁆𑀞𑀸𑀦𑀁 𑀯𑀸 𑀪𑀽𑀢𑀝𑁆𑀞𑀸𑀦𑀁 𑀯𑀸 𑀕𑀘𑁆𑀙𑀢𑀺, 𑀲𑀩𑁆𑀩𑁄𑀧𑀺 𑀚𑀦𑁄 𑀘𑀓𑁆𑀓𑀭𑀢𑀦𑀫𑀡𑀺𑀭𑀢𑀦𑀫𑁂𑀯 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀢𑀺 𑀧𑀽𑀚𑁂𑀢𑀺, 𑀢𑀁 𑀢𑀁 𑀯𑀭𑀁 𑀧𑀢𑁆𑀣𑁂𑀢𑀺, 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀜𑁆𑀘𑀲𑁆𑀲 𑀏𑀓𑀘𑁆𑀘𑀁 𑀲𑀫𑀺𑀚𑁆𑀛𑀢𑀺, 𑀢𑀫𑁆𑀧𑀺 𑀭𑀢𑀦𑀁 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 ¶ 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁂 ¶ 𑀳𑀺 𑀉𑀧𑁆𑀧𑀦𑁆𑀦𑁂 𑀬𑁂 𑀓𑁂𑀘𑀺 𑀫𑀳𑁂𑀲𑀓𑁆𑀔𑀸 𑀤𑁂𑀯𑀫𑀦𑀼𑀲𑁆𑀲𑀸 𑀦 𑀢𑁂 𑀅𑀜𑁆𑀜𑀢𑁆𑀭 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀦 𑀓𑀜𑁆𑀘𑀺 𑀅𑀜𑁆𑀜𑀁 𑀧𑀽𑀚𑁂𑀦𑁆𑀢𑀺. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀲𑀺𑀦𑁂𑀭𑀼𑀫𑀢𑁆𑀢𑁂𑀦 𑀭𑀢𑀦𑀤𑀸𑀫𑁂𑀦 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺, 𑀬𑀣𑀸𑀩𑀮𑀜𑁆𑀘 𑀅𑀜𑁆𑀜𑁂 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄. 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀧𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀲𑁄𑀓𑀫𑀳𑀸𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀻𑀓𑀸𑀭𑀸𑀦𑀁. 𑀅𑀧𑀺𑀘 𑀓𑀲𑁆𑀲𑀜𑁆𑀜𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀚𑀸𑀢𑀺𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀸𑀦𑀺 𑀧𑀝𑀺𑀫𑀸𑀘𑁂𑀢𑀺𑀬𑀸𑀤𑀻𑀦𑀺 𑀯𑀸 𑀉𑀤𑁆𑀤𑀺𑀲𑁆𑀲 𑀏𑀯𑀁 𑀘𑀺𑀢𑁆𑀢𑀻𑀓𑀸𑀭𑀕𑀭𑀼𑀓𑀸𑀭𑁄 𑀧𑀯𑀢𑁆𑀢𑀢𑀺 𑀬𑀣𑀸 𑀪𑀕𑀯𑀢𑁄. 𑀏𑀯𑀁𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 ¶ 𑀬𑀫𑁆𑀧𑀺 𑀢𑀁 𑀫𑀳𑀕𑁆𑀖𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀲𑀺𑀓𑀁 𑀯𑀢𑁆𑀣𑀁. 𑀬𑀣𑀸𑀳 𑁋 ‘‘𑀚𑀺𑀡𑁆𑀡𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀯𑀡𑁆𑀡𑀯𑀦𑁆𑀢𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀜𑁆𑀘 𑀫𑀳𑀕𑁆𑀖𑀜𑁆𑀘𑀸’’𑀢𑀺 (𑀅. 𑀦𑀺. 𑁩.𑁧𑁦𑁦), 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀫𑀳𑀕𑁆𑀖𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁄 𑀳𑀺 𑀬𑁂𑀲𑀁 𑀧𑀁𑀲𑀼𑀓𑀫𑁆𑀧𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁 𑀲𑁂𑀬𑁆𑀬𑀣𑀸𑀧𑀺 𑀅𑀲𑁄𑀓𑀭𑀜𑁆𑀜𑁄, 𑀇𑀤𑀫𑀲𑁆𑀲 𑀫𑀳𑀕𑁆𑀖𑀢𑀸𑀬. 𑀏𑀯𑀁 𑀫𑀳𑀕𑁆𑀖𑀢𑀸𑀯𑀘𑀦𑁂𑀦 𑀘𑁂𑀢𑁆𑀣 𑀤𑁄𑀲𑀸𑀪𑀸𑀯𑀲𑀸𑀥𑀓𑀁 𑀇𑀤𑀁 𑀲𑀼𑀢𑁆𑀢𑀧𑀤𑀁 𑀯𑁂𑀤𑀺𑀢𑀩𑁆𑀩𑀁 𑁋

‘‘𑀬𑁂𑀲𑀁 𑀔𑁄 𑀧𑀦 𑀲𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀇𑀤𑀫𑀲𑁆𑀲 𑀫𑀳𑀕𑁆𑀖𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀳𑀕𑁆𑀖𑀁, 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁩.𑁧𑁦𑁦).

𑀏𑀯𑀁 𑀫𑀳𑀕𑁆𑀖𑀝𑁆𑀞𑁂𑀦𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀅𑀢𑀼𑀮𑀝𑁆𑀞𑁂𑀦 ¶ 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀦𑀸𑀪𑀺 𑀲𑀢𑁆𑀢𑀭𑀢𑀦𑀫𑀬𑀲𑀳𑀲𑁆𑀲𑀸𑀭𑀁 𑀧𑀯𑀸𑀴𑀫𑀬𑀦𑁂𑀫𑀺 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀲𑀦𑁆𑀥𑀺, 𑀬𑀲𑁆𑀲 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀫𑀼𑀧𑀭𑀺 𑀏𑀓𑀁 𑀫𑀼𑀡𑁆𑀟𑀸𑀭𑀁 𑀳𑁄𑀢𑀺 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀲𑀤𑁆𑀤𑀓𑀭𑀡𑀢𑁆𑀣𑀁, 𑀬𑁂𑀦 𑀓𑀢𑁄 𑀲𑀤𑁆𑀤𑁄 𑀲𑀼𑀓𑀼𑀲𑀮𑀧𑁆𑀧𑀢𑀸𑀴𑀺𑀢𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀤𑁆𑀤𑁄 𑀯𑀺𑀬 𑀳𑁄𑀢𑀺, 𑀬𑀲𑁆𑀲 𑀦𑀸𑀪𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀲𑀻𑀳𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀅𑀩𑁆𑀪𑀦𑁆𑀢𑀭𑀁 𑀲𑀓𑀝𑀘𑀓𑁆𑀓𑀲𑁆𑀲𑁂𑀯 𑀲𑀼𑀲𑀺𑀭𑀁. 𑀢𑀲𑁆𑀲 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦𑀢𑁆𑀣𑀺, 𑀓𑀫𑁆𑀫𑀧𑀘𑁆𑀘𑀬𑁂𑀦 𑀉𑀢𑀼𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀬𑀁 𑀭𑀸𑀚𑀸 𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀢𑀤𑀳𑀼𑀧𑁄𑀲𑀣𑁂 𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀻𑀲𑀁𑀦𑁆𑀳𑀸𑀢𑁄 𑀉𑀧𑁄𑀲𑀣𑀺𑀓𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀲𑀻𑀮𑀸𑀦𑀺 𑀲𑁄𑀥𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑀁 ¶ 𑀯𑀺𑀬 𑀲𑀽𑀭𑀺𑀬𑀁 𑀯𑀺𑀬 𑀘 𑀉𑀝𑁆𑀞𑁂𑀦𑁆𑀢𑀁 𑀧𑀲𑁆𑀲𑀢𑀺, 𑀬𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀢𑁄 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀬𑁄𑀚𑀦𑀢𑁄 𑀯𑀡𑁆𑀡𑁄 𑀤𑀺𑀲𑁆𑀲𑀢𑀺, 𑀬𑀁 𑀫𑀳𑀸𑀚𑀦𑁂𑀦 ‘‘𑀤𑀼𑀢𑀺𑀬𑁄 𑀫𑀜𑁆𑀜𑁂 𑀘𑀦𑁆𑀤𑁄 𑀲𑀽𑀭𑀺𑀬𑁄 𑀯𑀸 𑀉𑀝𑁆𑀞𑀺𑀢𑁄’’𑀢𑀺 𑀅𑀢𑀺𑀯𑀺𑀬 𑀓𑁄𑀢𑀽𑀳𑀮𑀚𑀸𑀢𑁂𑀦 𑀤𑀺𑀲𑁆𑀲𑀫𑀸𑀦𑀁 𑀦𑀕𑀭𑀲𑁆𑀲 𑀉𑀧𑀭𑀺 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀲𑁆𑀲 𑀧𑀸𑀘𑀻𑀦𑀧𑀲𑁆𑀲𑁂 𑀦𑀸𑀢𑀺𑀉𑀘𑁆𑀘𑀁 𑀦𑀸𑀢𑀺𑀦𑀻𑀘𑀁 𑀳𑀼𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑀼𑀁, 𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺.

𑀢𑀤𑁂𑀯 ¶ 𑀅𑀦𑀼𑀩𑀦𑁆𑀥𑀫𑀸𑀦𑀁 𑀳𑀢𑁆𑀣𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀲𑁂𑀢𑁄 𑀭𑀢𑁆𑀢𑀧𑀸𑀤𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀉𑀧𑁄𑀲𑀣𑀓𑀼𑀮𑀸 𑀯𑀸 𑀙𑀤𑁆𑀤𑀦𑁆𑀢𑀓𑀼𑀮𑀸 𑀯𑀸 𑀆𑀕𑀘𑁆𑀙𑀢𑀺, 𑀉𑀧𑁄𑀲𑀣𑀓𑀼𑀮𑀸 𑀘 𑀆𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀚𑁂𑀝𑁆𑀞𑁄 𑀆𑀕𑀘𑁆𑀙𑀢𑀺, 𑀙𑀤𑁆𑀤𑀦𑁆𑀢𑀓𑀼𑀮𑀸 𑀲𑀩𑁆𑀩𑀓𑀦𑀺𑀝𑁆𑀞𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄 𑀤𑀫𑀣𑀽𑀧𑁂𑀢𑁄, 𑀲𑁄 𑀤𑁆𑀯𑀸𑀤𑀲𑀬𑁄𑀚𑀦𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀧𑀼𑀭𑁂𑀧𑀸𑀢𑀭𑀸𑀲𑀫𑁂𑀯 𑀲𑀓𑀁 𑀭𑀸𑀚𑀥𑀸𑀦𑀺𑀁 𑀆𑀕𑀘𑁆𑀙𑀢𑀺.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀅𑀲𑁆𑀲𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀲𑁂𑀢𑁄 𑀭𑀢𑁆𑀢𑀧𑀸𑀤𑁄 𑀓𑀸𑀴𑀲𑀻𑀲𑁄 𑀫𑀼𑀜𑁆𑀚𑀓𑁂𑀲𑁄 𑀯𑀮𑀸𑀳𑀓𑀲𑁆𑀲𑀭𑀸𑀚𑀓𑀼𑀮𑀸 𑀆𑀕𑀘𑁆𑀙𑀢𑀺. 𑀲𑁂𑀲𑀫𑁂𑀢𑁆𑀣 𑀳𑀢𑁆𑀣𑀺𑀭𑀢𑀦𑀲𑀤𑀺𑀲𑀫𑁂𑀯.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀫𑀡𑀺𑀭𑀢𑀦𑀁 ¶ 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀳𑁄𑀢𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀆𑀬𑀸𑀫𑀢𑁄 𑀘𑀓𑁆𑀓𑀦𑀸𑀪𑀺𑀲𑀤𑀺𑀲𑁄, 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀸 𑀆𑀕𑀘𑁆𑀙𑀢𑀺. 𑀲𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀧𑀺 𑀅𑀦𑁆𑀥𑀓𑀸𑀭𑁂 𑀭𑀜𑁆𑀜𑁄 𑀥𑀚𑀕𑁆𑀕𑀁 𑀕𑀢𑁄 𑀬𑁄𑀚𑀦𑀁 𑀑𑀪𑀸𑀲𑁂𑀢𑀺, 𑀬𑀲𑁆𑀲𑁄𑀪𑀸𑀲𑁂𑀦 𑀫𑀦𑀼𑀲𑁆𑀲𑀸 ‘‘𑀤𑀺𑀯𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀧𑀲𑁆𑀲𑀦𑁆𑀢𑀺.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀇𑀢𑁆𑀣𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀓𑀢𑀺𑀅𑀕𑁆𑀕𑀫𑀳𑁂𑀲𑀻 𑀯𑀸 𑀳𑁄𑀢𑀺, 𑀉𑀢𑁆𑀢𑀭𑀓𑀼𑀭𑀼𑀢𑁄 𑀯𑀸 𑀆𑀕𑀘𑁆𑀙𑀢𑀺 𑀫𑀤𑁆𑀤𑀭𑀸𑀚𑀓𑀼𑀮𑀢𑁄 𑀯𑀸, 𑀅𑀢𑀺𑀤𑀻𑀖𑀢𑀸𑀤𑀺𑀙𑀤𑁄𑀲𑀯𑀺𑀯𑀚𑁆𑀚𑀺𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁, 𑀬𑀲𑁆𑀲𑀸 𑀭𑀜𑁆𑀜𑁄 𑀲𑀻𑀢𑀓𑀸𑀮𑁂 𑀉𑀡𑁆𑀳𑀸𑀦𑀺 𑀕𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀡𑁆𑀳𑀓𑀸𑀮𑁂 𑀲𑀻𑀢𑀸𑀦𑀺, 𑀲𑀢𑀥𑀸 𑀨𑁄𑀝𑀺𑀢 𑀢𑀽𑀮𑀧𑀺𑀘𑀼𑀦𑁄 𑀯𑀺𑀬 𑀲𑀫𑁆𑀨𑀲𑁆𑀲𑁄 𑀳𑁄𑀢𑀺, 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄, 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀺𑀢𑀸𑀤𑀺𑀅𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑀸 𑀘 𑀳𑁄𑀢𑀺.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀕𑀳𑀧𑀢𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺 𑀭𑀜𑁆𑀜𑁄 𑀧𑀓𑀢𑀺𑀓𑀫𑁆𑀫𑀓𑀸𑀭𑁄 𑀲𑁂𑀝𑁆𑀞𑀺, 𑀬𑀲𑁆𑀲 𑀘𑀓𑁆𑀓𑀭𑀢𑀦𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀤𑀺𑀩𑁆𑀩𑀁 𑀘𑀓𑁆𑀔𑀼 𑀧𑀸𑀢𑀼𑀪𑀯𑀢𑀺, 𑀬𑁂𑀦 𑀲𑀫𑀦𑁆𑀢𑀢𑁄 𑀬𑁄𑀚𑀦𑀫𑀢𑁆𑀢𑁂 𑀦𑀺𑀥𑀺𑀁 𑀧𑀲𑁆𑀲𑀢𑀺 𑀅𑀲𑀸𑀫𑀺𑀓𑀫𑁆𑀧𑀺 𑀲𑀲𑀸𑀫𑀺𑀓𑀫𑁆𑀧𑀺, 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀁 𑀢𑁂 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀢𑀫𑁆𑀧𑀺 ¶ ¶ 𑀅𑀦𑀼𑀩𑀦𑁆𑀥𑀫𑀸𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺 𑀭𑀜𑁆𑀜𑁄 𑀧𑀓𑀢𑀺𑀚𑁂𑀝𑁆𑀞𑀧𑀼𑀢𑁆𑀢𑁄. 𑀘𑀓𑁆𑀓𑀭𑀢𑀦𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀅𑀢𑀺𑀭𑁂𑀓𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀧𑀭𑀺𑀚𑀸𑀦𑀺𑀢𑁆𑀯𑀸 𑀦𑀺𑀕𑁆𑀕𑀳𑀧𑀕𑁆𑀕𑀳𑀲𑀫𑀢𑁆𑀣𑁄 𑀳𑁄𑀢𑀺, 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀁 𑀢𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁, 𑀬𑀲𑁆𑀲 𑀦 𑀲𑀓𑁆𑀓𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀅𑀕𑁆𑀖𑁄 𑀓𑀸𑀢𑀼𑀁 ‘‘𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀅𑀕𑁆𑀖𑀢𑀺 𑀓𑁄𑀝𑀺𑀁 𑀯𑀸’’𑀢𑀺. 𑀢𑀢𑁆𑀣 𑀏𑀓𑀭𑀢𑀦𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 ¶ 𑀦𑀢𑁆𑀣𑀺. 𑀬𑀤𑀺 𑀳𑀺 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁄 𑀳𑀺 𑀦 𑀲𑀓𑁆𑀓𑀸 𑀲𑀻𑀮𑀢𑁄 𑀯𑀸 𑀲𑀫𑀸𑀥𑀺𑀢𑁄 𑀯𑀸 𑀧𑀜𑁆𑀜𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀢𑁄 𑀓𑁂𑀦𑀘𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 ‘‘𑀏𑀢𑁆𑀢𑀓𑀕𑀼𑀡𑁄 𑀯𑀸 𑀇𑀫𑀺𑀦𑀸 𑀲𑀫𑁄 𑀯𑀸 𑀲𑀧𑁆𑀧𑀝𑀺𑀪𑀸𑀕𑁄 𑀯𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁. 𑀏𑀯𑀁 𑀅𑀢𑀼𑀮𑀝𑁆𑀞𑁂𑀦𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦 𑀭𑀢𑀦𑀁, 𑀲𑁂𑀬𑁆𑀬𑀣𑀺𑀤𑀁 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺, 𑀘𑀓𑁆𑀓𑀸𑀤𑀻𑀦𑀺 𑀘 𑀢𑀲𑁆𑀲 𑀭𑀢𑀦𑀸𑀦𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁, 𑀓𑀼𑀢𑁄 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀭𑀢𑀦𑀢𑁆𑀢𑀁. 𑀢𑀸𑀦𑀺 𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀅𑀦𑁂𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀓𑀧𑁆𑀧𑁂 𑀢𑀣𑀸𑀕𑀢𑀲𑀼𑀜𑁆𑀜𑁄 𑀮𑁄𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀣𑀸𑀕𑀢𑁄𑀯 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀮𑁆𑀮𑀪𑀤𑀲𑁆𑀲𑀦𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑁋

‘‘𑀤𑁂𑀯𑀢𑀸, 𑀆𑀦𑀦𑁆𑀤, 𑀉𑀚𑁆𑀛𑀸𑀬𑀦𑁆𑀢𑀺 ‘𑀤𑀽𑀭𑀸 𑀘 𑀯𑀢𑀫𑁆𑀳 𑀆𑀕𑀢𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀚𑁆𑀚𑁂𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑁂𑀲𑀓𑁆𑀔𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀺𑀢𑁄 𑀑𑀯𑀸𑀭𑁂𑀦𑁆𑀢𑁄, 𑀦 𑀫𑀬𑀁 𑀮𑀪𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸’’’𑀢𑀺 (𑀤𑀻. 𑀦𑀺. 𑁨.𑁨𑁦𑁦).

𑀏𑀯𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀸𑀤𑀺 𑀢𑀜𑁆𑀳𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀥𑀦𑀸𑀦𑀫𑁆𑀧𑀺 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀯𑀭𑀢𑀮𑁂 ¶ 𑀯𑀲𑀦𑁆𑀢𑀸𑀦𑀫𑁆𑀧𑀺 𑀘𑀡𑁆𑀟𑀸𑀮𑀯𑁂𑀦𑀦𑁂𑀲𑀸𑀤𑀭𑀣𑀓𑀸𑀭𑀧𑀼𑀓𑁆𑀓𑀼𑀲𑀸𑀤𑀻𑀦𑀁 𑀦𑀻𑀘𑀓𑀼𑀮𑀺𑀓𑀸𑀦𑀁 𑀑𑀫𑀓𑀧𑀼𑀭𑀺𑀲𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀧𑀺 ¶ 𑀧𑀭𑀺𑀪𑁄𑀕𑀢𑁆𑀣𑀸𑀬 𑀦 𑀦𑀺𑀩𑁆𑀩𑀢𑁆𑀢𑀢𑀺. 𑀉𑀪𑀢𑁄 𑀲𑀼𑀚𑀸𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲𑁂𑀯 𑀧𑀭𑀺𑀧𑀽𑀭𑀺𑀢𑀤𑀲𑀯𑀺𑀥𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀦𑀺𑀩𑁆𑀩𑀢𑁆𑀢𑀦𑀢𑁄 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁𑀬𑁂𑀯 𑀳𑁄𑀢𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦 ¶ 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁄 𑀳𑀺 𑀮𑁄𑀓𑁂 𑀑𑀫𑀓𑀲𑀢𑁆𑀢𑀲𑀫𑁆𑀫𑀢𑀸𑀦𑀁 𑀅𑀦𑀼𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀯𑀺𑀧𑀭𑀻𑀢𑀤𑀲𑁆𑀲𑀦𑀸𑀦𑀁 𑀧𑀽𑀭𑀡𑀓𑀲𑁆𑀲𑀧𑀸𑀤𑀻𑀦𑀁 𑀙𑀦𑁆𑀦𑀁 𑀲𑀢𑁆𑀣𑀸𑀭𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀏𑀯𑀭𑀽𑀧𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀧𑀺 𑀅𑀧𑀭𑀺𑀪𑁄𑀕𑁄. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀧𑀦 𑀘𑀢𑀼𑀧𑁆𑀧𑀤𑀸𑀬𑀧𑀺 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀫𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸𑀦𑀁 𑀦𑀺𑀩𑁆𑀩𑁂𑀥𑀺𑀓𑀜𑀸𑀡𑀤𑀲𑁆𑀲𑀦𑀸𑀦𑀁 𑀩𑀸𑀳𑀺𑀬𑀤𑀸𑀭𑀼𑀘𑀻𑀭𑀺𑀬𑀧𑁆𑀧𑀪𑀼𑀢𑀻𑀦𑀁 𑀅𑀜𑁆𑀜𑁂𑀲𑀜𑁆𑀘 𑀫𑀳𑀸𑀓𑀼𑀮𑀧𑁆𑀧𑀲𑀼𑀢𑀸𑀦𑀁 𑀫𑀳𑀸𑀲𑀸𑀯𑀓𑀸𑀦𑀁 𑀧𑀭𑀺𑀪𑁄𑀕𑁄, 𑀢𑁂 𑀳𑀺 𑀢𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀸𑀤𑀻𑀦𑀺 𑀲𑀸𑀥𑁂𑀦𑁆𑀢𑀸 𑀢𑀣𑀸𑀕𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀯𑀁 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀬𑀫𑁆𑀧𑀺 𑀢𑀁 𑀅𑀯𑀺𑀲𑁂𑀲𑀢𑁄 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁. 𑀢𑀜𑁆𑀳𑀺 𑀤𑀺𑀲𑁆𑀯𑀸𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀯𑀫𑁆𑀧𑀺 𑀢𑀁 𑀭𑀜𑁆𑀜𑁄 𑀭𑀢𑀺𑀁 𑀚𑀦𑁂𑀢𑀺. 𑀧𑀼𑀦 𑀘𑀧𑀭𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀢𑀺 ‘‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺. 𑀢𑀢𑁄 𑀘𑀓𑁆𑀓𑀭𑀢𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀯𑀺𑀬 𑀢𑀽𑀭𑀺𑀬𑀁 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀭𑀦𑁆𑀢𑀁 𑀆𑀓𑀸𑀲𑁂𑀦 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀕𑀘𑁆𑀙𑀢𑀺 ¶ , 𑀅𑀦𑁆𑀯𑀤𑁂𑀯 𑀭𑀸𑀚𑀸, 𑀘𑀓𑁆𑀓𑀯𑀢𑁆𑀢𑀺 𑀘𑀓𑁆𑀓𑀸𑀦𑀼𑀪𑀸𑀯𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀸𑀢𑀺𑀉𑀘𑁆𑀘𑀁 𑀦𑀸𑀢𑀺𑀦𑀻𑀘𑀁 𑀉𑀘𑁆𑀘𑀭𑀼𑀓𑁆𑀔𑀸𑀦𑀁 𑀳𑁂𑀝𑁆𑀞𑀸𑀪𑀸𑀕𑁂𑀦, 𑀦𑀻𑀘𑀭𑀼𑀓𑁆𑀔𑀸𑀦𑀁 𑀉𑀧𑀭𑀺𑀪𑀸𑀕𑁂𑀦, 𑀭𑀼𑀓𑁆𑀔𑁂𑀲𑀼 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀳𑀢𑁆𑀣𑀢𑁄 𑀧𑀡𑁆𑀡𑀸𑀓𑀸𑀭𑀜𑁆𑀘 𑀕𑀡𑁆𑀳𑀦𑁆𑀢𑁄 ‘‘𑀏𑀳𑀺 𑀔𑁄, 𑀫𑀳𑀸𑀭𑀸𑀚𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁂𑀦 𑀆𑀕𑀢𑁂 𑀧𑀝𑀺𑀭𑀸𑀚𑀸𑀦𑁄 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑀸𑀲𑀦𑁆𑀢𑁄 𑀕𑀘𑁆𑀙𑀢𑀺. 𑀬𑀢𑁆𑀣 𑀧𑀦 𑀭𑀸𑀚𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀯𑀸 𑀤𑀺𑀯𑀸𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀘𑀓𑁆𑀓𑀭𑀢𑀦𑀁 𑀆𑀓𑀸𑀲𑀸 𑀑𑀭𑁄𑀳𑀺𑀢𑁆𑀯𑀸 𑀉𑀤𑀓𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑀓𑁆𑀔𑀫𑁂 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀧𑀼𑀦 𑀭𑀜𑁆𑀜𑁄 𑀕𑀫𑀦𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀤𑁆𑀤𑀁 𑀓𑀭𑁄𑀦𑁆𑀢𑀁 𑀕𑀘𑁆𑀙𑀢𑀺, 𑀢𑀁 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀧𑀺 𑀧𑀭𑀺𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺 ¶ . 𑀘𑀓𑁆𑀓𑀭𑀢𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀢𑀺, 𑀢𑀲𑁆𑀫𑀺𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑁂 𑀉𑀤𑀓𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀧𑀕𑀦𑁆𑀢𑁆𑀯𑀸 𑀪𑀺𑀢𑁆𑀢𑀻𑀓𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀫𑀳𑀸𑀚𑀦𑁄 𑀬𑀣𑀸𑀓𑀸𑀫𑀁 𑀲𑀢𑁆𑀢 𑀭𑀢𑀦𑀸𑀦𑀺 𑀕𑀡𑁆𑀳𑀸𑀢𑀺. 𑀧𑀼𑀦 𑀭𑀸𑀚𑀸 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀫 𑀭𑀚𑁆𑀚’’𑀦𑁆𑀢𑀺 𑀉𑀤𑀓𑁂𑀦 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀲𑁂𑀦𑀸 𑀧𑀼𑀭𑀢𑁄 𑀳𑁄𑀢𑀺, 𑀘𑀓𑁆𑀓𑀭𑀢𑀦𑀁 𑀧𑀘𑁆𑀙𑀢𑁄, 𑀭𑀸𑀚𑀸 𑀫𑀚𑁆𑀛𑁂. 𑀘𑀓𑁆𑀓𑀭𑀢𑀦𑁂𑀦 𑀑𑀲𑀓𑁆𑀓𑀺𑀢𑁄𑀲𑀓𑁆𑀓𑀺𑀢𑀝𑁆𑀞𑀸𑀦𑀁 𑀉𑀤𑀓𑀁 𑀧𑀭𑀺𑀧𑀽𑀭𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀼𑀢𑁆𑀢𑀭𑁂𑀧𑀺 𑀲𑀫𑀼𑀤𑁆𑀤𑁂 𑀕𑀘𑁆𑀙𑀢𑀺.

𑀏𑀯𑀁 𑀘𑀢𑀼𑀤𑁆𑀤𑀺𑀲𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀆𑀭𑁄𑀳𑀢𑀺. 𑀢𑀢𑁆𑀣 𑀞𑀺𑀢𑁄 𑀭𑀸𑀚𑀸 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀯𑀺𑀚𑀺𑀢𑀯𑀺𑀚𑀬𑁄 𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀝𑀺𑀫𑀡𑁆𑀟𑀺𑀢𑀁 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁 ¶ 𑀧𑀼𑀩𑁆𑀩𑀯𑀺𑀤𑁂𑀳𑀁, 𑀢𑀣𑀸 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁 𑀉𑀢𑁆𑀢𑀭𑀓𑀼𑀭𑀼𑀁, 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁𑀬𑁂𑀯 ¶ 𑀅𑀧𑀭𑀕𑁄𑀬𑀸𑀦𑀁, 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁 𑀚𑀫𑁆𑀩𑀼𑀤𑀻𑀧𑀜𑁆𑀘𑀸𑀢𑀺 𑀏𑀯𑀁 𑀘𑀢𑀼𑀫𑀳𑀸𑀤𑀻𑀧𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀝𑀺𑀫𑀡𑁆𑀟𑀺𑀢𑀁 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀲𑀼𑀨𑀼𑀮𑁆𑀮𑀧𑀼𑀡𑁆𑀟𑀭𑀻𑀓𑀯𑀦𑀁 𑀯𑀺𑀬 𑀑𑀮𑁄𑀓𑁂𑀢𑀺. 𑀏𑀯𑀁 𑀑𑀮𑁄𑀓𑀬𑀢𑁄 𑀘𑀲𑁆𑀲 𑀅𑀦𑀧𑁆𑀧𑀓𑀸 𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀢𑀁 𑀘𑀓𑁆𑀓𑀭𑀢𑀦𑀁 𑀭𑀜𑁆𑀜𑁄 𑀭𑀢𑀺𑀁 𑀚𑀦𑁂𑀢𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁, 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀏𑀢𑀁 𑀘𑀓𑁆𑀓𑀭𑀢𑀦𑀁? 𑀢𑀣𑀸𑀕𑀢𑁄 𑀳𑀺 𑀬𑀲𑁆𑀲𑀸 𑀤𑀺𑀩𑁆𑀩𑀸𑀬 𑀭𑀢𑀺𑀬𑀸 𑀘𑀓𑁆𑀓𑀭𑀢𑀦𑀸𑀤𑀻𑀳𑀺 𑀲𑀩𑁆𑀩𑁂𑀳𑀺𑀧𑀺 𑀚𑀦𑀺𑀢𑀸 𑀘𑀓𑁆𑀓𑀯𑀢𑁆𑀢𑀺𑀭𑀢𑀺 𑀲𑀗𑁆𑀔𑀫𑁆𑀧𑀺 𑀓𑀮𑀫𑁆𑀧𑀺 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺, 𑀢𑀢𑁄𑀧𑀺 𑀭𑀢𑀺𑀢𑁄 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀅𑀢𑁆𑀢𑀦𑁄 𑀑𑀯𑀸𑀤𑀧𑁆𑀧𑀝𑀺𑀓𑀭𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀫𑁆𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀞𑀫𑀚𑁆𑀛𑀸𑀦𑀭𑀢𑀺𑀁 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀭𑀢𑀺𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀭𑀢𑀺𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀭𑀢𑀺𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀭𑀢𑀺𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀭𑀢𑀺𑀁, 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀭𑀢𑀺𑀜𑁆𑀘 𑀚𑀦𑁂𑀢𑀺. 𑀏𑀯𑀁 𑀭𑀢𑀺𑀚𑀦𑀦𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀻𑀢𑀺.

𑀅𑀧𑀺𑀘 𑀭𑀢𑀦𑀁 𑀦𑀸𑀫𑁂𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑀫𑀯𑀺𑀜𑁆𑀜𑀸𑀡𑀓𑀜𑁆𑀘. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑀁 𑀘𑀓𑁆𑀓𑀭𑀢𑀦𑀁 𑀫𑀡𑀺𑀭𑀢𑀦𑀜𑁆𑀘, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀼𑀯𑀡𑁆𑀡𑀭𑀚𑀢𑀸𑀤𑀺, 𑀲𑀯𑀺𑀜𑁆𑀜𑀸𑀡𑀓𑀁 𑀳𑀢𑁆𑀣𑀺𑀭𑀢𑀦𑀸𑀤𑀺𑀧𑀭𑀺𑀡𑀸𑀬𑀓𑀭𑀢𑀦𑀧𑀭𑀺𑀬𑁄𑀲𑀸𑀦𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁. 𑀏𑀯𑀁 𑀤𑀼𑀯𑀺𑀥𑁂 𑀘𑁂𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 ¶ . 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀯𑀺𑀜𑁆𑀜𑀸𑀡𑀓𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀢𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀳𑀢𑁆𑀣𑀺𑀭𑀢𑀦𑀸𑀤𑀻𑀦𑀁 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀉𑀧𑀦𑀻𑀬𑀢𑀺.

𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁, 𑀫𑀦𑀼𑀲𑁆𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀫𑀦𑀼𑀲𑁆𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀲𑁆𑀲 𑀑𑀧𑀯𑀬𑁆𑀳𑀁 ¶ 𑀳𑁄𑀢𑀺. 𑀫𑀦𑀼𑀲𑁆𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀇𑀢𑁆𑀣𑀺𑀭𑀢𑀦𑀁, 𑀧𑀼𑀭𑀺𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀧𑀼𑀭𑀺𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀲𑁆𑀲 𑀧𑀭𑀺𑀘𑀸𑀭𑀺𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀧𑀼𑀭𑀺𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀕𑀸𑀭𑀺𑀓𑀭𑀢𑀦𑀁, 𑀅𑀦𑀕𑀸𑀭𑀺𑀓𑀭𑀢𑀦𑀜𑁆𑀘. 𑀢𑀢𑁆𑀣 𑀅𑀦𑀕𑀸𑀭𑀺𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀕𑀸𑀭𑀺𑀓𑀭𑀢𑀦𑁂𑀲𑀼 𑀅𑀕𑁆𑀕𑁄 𑀘𑀓𑁆𑀓𑀯𑀢𑁆𑀢𑀺𑀧𑀺 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀅𑀦𑀕𑀸𑀭𑀺𑀓𑀭𑀢𑀦𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀤𑀺𑀩𑁆𑀩𑀫𑀸𑀦𑀼𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺.

𑀏𑀯𑀁 𑀅𑀦𑀕𑀸𑀭𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀭𑀺𑀬𑀧𑀼𑀣𑀼𑀚𑁆𑀚𑀦𑀯𑀲𑁂𑀦. 𑀅𑀭𑀺𑀬𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑁂𑀔𑀸𑀲𑁂𑀔𑀯𑀲𑁂𑀦. 𑀅𑀲𑁂𑀔𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑀫𑀣𑀬𑀸𑀦𑀺𑀓𑀯𑀲𑁂𑀦. 𑀲𑀫𑀣𑀬𑀸𑀦𑀺𑀓𑀭𑀢𑀦𑀫𑁆𑀧𑀺 ¶ 𑀤𑀼𑀯𑀺𑀥𑀁 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀫𑀧𑁆𑀧𑀢𑁆𑀢𑀜𑁆𑀘. 𑀢𑀢𑁆𑀣 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀭𑀢𑀦𑀢𑁄𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀲𑀤𑀺𑀲𑀸𑀧𑀺 𑀳𑀺 𑀅𑀦𑁂𑀓𑀲𑀢𑀸 𑀲𑀸𑀯𑀓𑀸 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀁 𑀲𑀢𑀪𑀸𑀕𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀢𑁄𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀲𑀓𑀮𑀫𑁆𑀧𑀺 𑀳𑀺 𑀚𑀫𑁆𑀩𑀼𑀤𑀻𑀧𑀁 𑀧𑀽𑀭𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀧𑀮𑁆𑀮𑀗𑁆𑀓𑀁 𑀖𑀝𑁂𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀏𑀓𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀁 𑀦𑁂𑀯 𑀲𑀗𑁆𑀔𑀁 𑀦 𑀓𑀮𑀁 𑀦 𑀓𑀮𑀪𑀸𑀕𑀁 𑀉𑀧𑁂𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦). 𑀏𑀯𑀁 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀺 ¶ 𑀢𑀣𑀸𑀕𑀢𑁂𑀦𑀸’’𑀢𑀺.

𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀭𑀢𑀦𑀲𑁆𑀲 𑀅𑀜𑁆𑀜𑁂𑀳𑀺 𑀭𑀢𑀦𑁂𑀳𑀺 𑀅𑀲𑀫𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀉𑀧𑀤𑁆𑀤𑀯𑀯𑀽𑀧𑀲𑀫𑀢𑁆𑀣𑀁 𑀦𑁂𑀯 𑀚𑀸𑀢𑀺𑀁 𑀦 𑀕𑁄𑀢𑁆𑀢𑀁 𑀦 𑀓𑁄𑀮𑀧𑀼𑀢𑁆𑀢𑀺𑀬𑀁 𑀦 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀤𑀺𑀁 𑀦𑀺𑀲𑁆𑀲𑀸𑀬, 𑀅𑀧𑀺𑀘 𑀔𑁄 𑀅𑀯𑀻𑀘𑀺𑀫𑀼𑀧𑀸𑀤𑀸𑀬 𑀪𑀯𑀕𑁆𑀕𑀧𑀭𑀺𑀬𑀦𑁆𑀢𑁂 ¶ 𑀮𑁄𑀓𑁂 𑀲𑀻𑀮𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀳𑀺 𑀕𑀼𑀡𑁂𑀳𑀺 𑀩𑀼𑀤𑁆𑀥𑀭𑀢𑀦𑀲𑁆𑀲 𑀅𑀲𑀤𑀺𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀇𑀤𑀫𑁆𑀧𑀺 𑀇𑀥 𑀯𑀸 𑀳𑀼𑀭𑀁 𑀯𑀸 𑀲𑀕𑁆𑀕𑁂𑀲𑀼 𑀯𑀸 𑀬𑀁𑀓𑀺𑀜𑁆𑀘𑀺 𑀅𑀢𑁆𑀣𑀺 𑀯𑀺𑀢𑁆𑀢𑀁 𑀯𑀸 𑀭𑀢𑀦𑀁 𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀢𑁂𑀳𑀺 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀲𑀫𑀢𑁆𑀢𑀸 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁. 𑀬𑀤𑀺 𑀳𑀺 𑀏𑀢𑀁 𑀲𑀘𑁆𑀘𑀁, 𑀅𑀣 𑀏𑀢𑁂𑀦 𑀲𑀘𑁆𑀘𑁂𑀦 𑀇𑀫𑁂𑀲𑀁 𑀧𑀸𑀡𑀻𑀦𑀁 𑀲𑀼𑀯𑀢𑁆𑀣𑀺 𑀳𑁄𑀢𑀼, 𑀲𑁄𑀪𑀦𑀸𑀦𑀁 𑀅𑀢𑁆𑀣𑀺𑀢𑀸 𑀳𑁄𑀢𑀼 𑀅𑀭𑁄𑀕𑀢𑀸 𑀦𑀺𑀭𑀼𑀧𑀤𑁆𑀤𑀯𑀢𑀸𑀢𑀺. 𑀏𑀢𑁆𑀣 𑀘 𑀬𑀣𑀸 ‘‘𑀘𑀓𑁆𑀔𑀼 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁫) 𑀅𑀢𑁆𑀢𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑀺𑀬𑀪𑀸𑀯𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀣𑀸 𑀳𑀺 𑀘𑀓𑁆𑀔𑀼 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀅𑀧𑁆𑀧𑀝𑀺𑀲𑀺𑀤𑁆𑀥𑀫𑁂𑀯 𑀲𑀺𑀬𑀸. 𑀏𑀯𑀁 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀭𑀢𑀦𑀢𑁆𑀢𑀁 𑀧𑀡𑀻𑀢𑀁, 𑀭𑀢𑀦𑀪𑀸𑀯𑁄 𑀧𑀡𑀻𑀢𑁄𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀩𑀼𑀤𑁆𑀥𑁄 𑀦𑁂𑀯 𑀭𑀢𑀦𑀦𑁆𑀢𑀺 𑀲𑀺𑀚𑁆𑀛𑁂𑀬𑁆𑀬. 𑀦 𑀳𑀺 𑀬𑀢𑁆𑀣 𑀭𑀢𑀦𑀁 𑀅𑀢𑁆𑀣𑀺, 𑀢𑀁 𑀭𑀢𑀦𑀦𑁆𑀢𑀺 𑀦 𑀲𑀺𑀚𑁆𑀛𑀢𑀺. 𑀬𑀢𑁆𑀣 𑀧𑀦 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑀲𑀗𑁆𑀔𑀸𑀢𑀁 𑀬𑁂𑀦 𑀯𑀸 𑀢𑁂𑀦 𑀯𑀸 𑀯𑀺𑀥𑀺𑀦𑀸 𑀲𑀫𑁆𑀩𑀦𑁆𑀥𑀕𑀢𑀁 𑀭𑀢𑀦𑀁 𑀅𑀢𑁆𑀣𑀺, 𑀬𑀲𑁆𑀫𑀸 𑀢𑀁 𑀭𑀢𑀦𑀢𑁆𑀢𑀫𑀼𑀧𑀸𑀤𑀸𑀬 𑀭𑀢𑀦𑀦𑁆𑀢𑀺 𑀧𑀜𑁆𑀜𑀸𑀧𑀻𑀬𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀭𑀢𑀦𑀲𑁆𑀲 𑀅𑀢𑁆𑀣𑀺𑀢𑀸𑀬 𑀭𑀢𑀦𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀅𑀣 𑀯𑀸 𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀦𑁆𑀢𑀺 𑀇𑀫𑀺𑀦𑀸𑀧𑀺 𑀧𑀓𑀸𑀭𑁂𑀦 𑀩𑀼𑀤𑁆𑀥𑁄𑀯 𑀭𑀢𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀫𑀢𑁆𑀢𑀸𑀬 𑀘 𑀪𑀕𑀯𑀢𑀸 𑀇𑀫𑀸𑀬 𑀕𑀸𑀣𑀸𑀬 𑀭𑀸𑀚𑀓𑀼𑀮𑀲𑁆𑀲 𑀲𑁄𑀢𑁆𑀣𑀺 𑀚𑀸𑀢𑀸, 𑀪𑀬𑀁 𑀯𑀽𑀧𑀲𑀦𑁆𑀢𑀁. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀔𑀬𑀁 𑀯𑀺𑀭𑀸𑀕𑀦𑁆𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁪. 𑀏𑀯𑀁 ¶ ¶ 𑀩𑀼𑀤𑁆𑀥𑀕𑀼𑀡𑁂𑀦 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀔𑀬𑀁 𑀯𑀺𑀭𑀸𑀕’’𑀦𑁆𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀭𑀸𑀕𑀸𑀤𑀬𑁄 𑀔𑀻𑀡𑀸 𑀳𑁄𑀦𑁆𑀢𑀺 𑀧𑀭𑀺𑀓𑁆𑀔𑀻𑀡𑀸, 𑀬𑀲𑁆𑀫𑀸 𑀯𑀸 𑀢𑀁 𑀢𑁂𑀲𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀬𑀫𑀢𑁆𑀢𑀁, 𑀬𑀲𑁆𑀫𑀸 𑀘 𑀢𑀁 𑀭𑀸𑀕𑀸𑀤𑀺𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀫𑁆𑀧𑀬𑁄𑀕𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘, 𑀬𑀲𑁆𑀫𑀸 𑀯𑀸 𑀢𑀫𑁆𑀳𑀺 𑀲𑀘𑁆𑀙𑀺𑀓𑀢𑁂 𑀭𑀸𑀕𑀸𑀤𑀬𑁄 𑀅𑀘𑁆𑀘𑀦𑁆𑀢𑀁 𑀯𑀺𑀭𑀢𑁆𑀢𑀸 𑀳𑁄𑀦𑁆𑀢𑀺 𑀯𑀺𑀕𑀢𑀸 𑀯𑀺𑀤𑁆𑀥𑀲𑁆𑀢𑀸, 𑀢𑀲𑁆𑀫𑀸 𑀔𑀬𑀦𑁆𑀢𑀺 𑀘 𑀯𑀺𑀭𑀸𑀕𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦𑀲𑁆𑀲 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄, 𑀦 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀢𑀲𑁆𑀫𑀸 𑀢𑀁 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀻𑀢𑀺 𑀓𑀢𑁆𑀯𑀸 𑀅𑀫𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀢𑁆𑀢𑀫𑀢𑁆𑀣𑁂𑀦 𑀧𑀦 𑀅𑀢𑀧𑁆𑀧𑀓𑀝𑁆𑀞𑁂𑀦 𑀘 𑀧𑀡𑀻𑀢𑀦𑁆𑀢𑀺. 𑀬𑀤𑀚𑁆𑀛𑀕𑀸𑀢𑀺 𑀬𑀁 𑀅𑀚𑁆𑀛𑀕𑀸 𑀯𑀺𑀦𑁆𑀤𑀺 𑀧𑀝𑀺𑀮𑀪𑀺, 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀲𑀘𑁆𑀙𑀸𑀓𑀸𑀲𑀺. 𑀲𑀓𑁆𑀬𑀫𑀼𑀦𑀻𑀢𑀺 ¶ 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑀢𑁆𑀢𑀸 𑀲𑀓𑁆𑀬𑁄, 𑀫𑁄𑀦𑁂𑀬𑁆𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀦𑀺, 𑀲𑀓𑁆𑀬𑁄 𑀏𑀯 𑀫𑀼𑀦𑀺 𑀲𑀓𑁆𑀬𑀫𑀼𑀦𑀺. 𑀲𑀫𑀸𑀳𑀺𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁄. 𑀦 𑀢𑁂𑀦 𑀥𑀫𑁆𑀫𑁂𑀦 𑀲𑀫𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀢𑁂𑀦 𑀔𑀬𑀸𑀤𑀺𑀦𑀸𑀫𑀓𑁂𑀦 𑀲𑀓𑁆𑀬𑀫𑀼𑀦𑀺𑀦𑀸 𑀅𑀥𑀺𑀕𑀢𑁂𑀦 𑀥𑀫𑁆𑀫𑁂𑀦 𑀲𑀫𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀏𑀯𑀁 𑀪𑀕𑀯𑀸 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀅𑀲𑀫𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀉𑀧𑀤𑁆𑀤𑀯𑀯𑀽𑀧𑀲𑀫𑀢𑁆𑀣𑀁 𑀔𑀬𑀯𑀺𑀭𑀸𑀕𑀸𑀫𑀢𑀧𑀡𑀻𑀢𑀢𑀸𑀕𑀼𑀡𑁂𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀭𑀢𑀦𑀲𑁆𑀲 𑀅𑀲𑀤𑀺𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀥𑀫𑁆𑀫𑁂 𑀭𑀢𑀦𑀁 𑀧𑀡𑀻𑀢𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁫. 𑀏𑀯𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀕𑀼𑀡𑁂𑀦 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀫𑀕𑁆𑀕𑀥𑀫𑁆𑀫𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄’’𑀢𑀺. 𑀢𑀢𑁆𑀣 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑀼𑀤𑁆𑀥𑁄 ¶ , 𑀉𑀢𑁆𑀢𑀫𑁄 𑀧𑀲𑀁𑀲𑀦𑀻𑀬𑁄 𑀘𑀸𑀢𑀺 𑀲𑁂𑀝𑁆𑀞𑁄, 𑀩𑀼𑀤𑁆𑀥𑁄 𑀘 𑀲𑁄 𑀲𑁂𑀝𑁆𑀞𑁄 𑀘𑀸𑀢𑀺 𑀩𑀼𑀤𑁆𑀥𑀲𑁂𑀝𑁆𑀞𑁄, 𑀅𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀼𑀢𑀩𑀼𑀤𑁆𑀥𑀔𑁆𑀬𑁂𑀲𑀼 𑀯𑀸 𑀩𑀼𑀤𑁆𑀥𑁂𑀲𑀼 𑀲𑁂𑀝𑁆𑀞𑁄𑀢𑀺 𑀩𑀼𑀤𑁆𑀥𑀲𑁂𑀝𑁆𑀞𑁄. 𑀲𑁄 𑀩𑀼𑀤𑁆𑀥𑀲𑁂𑀝𑁆𑀞𑁄 𑀬𑀁 𑀧𑀭𑀺𑀯𑀡𑁆𑀡𑀬𑀻 ‘‘𑀅𑀝𑁆𑀞𑀗𑁆𑀕𑀺𑀓𑁄𑀯 𑀫𑀕𑁆𑀕𑀸𑀦𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸’’𑀢𑀺 (𑀫. 𑀦𑀺. 𑁨.𑁨𑁧𑁫) 𑀘 ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑀺𑀲𑁆𑀲𑀸𑀫𑀺 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 (𑀫. 𑀦𑀺. 𑁩.𑁧𑁩𑁬) 𑀘 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 ¶ 𑀧𑀲𑀁𑀲𑀺 𑀧𑀓𑀸𑀲𑀬𑀺. 𑀲𑀼𑀘𑀺𑀦𑁆𑀢𑀺 𑀓𑀺𑀮𑁂𑀲𑀫𑀮𑀲𑀫𑀼𑀘𑁆𑀙𑁂𑀤𑀓𑀭𑀡𑀢𑁄 𑀅𑀘𑁆𑀘𑀦𑁆𑀢𑀯𑁄𑀤𑀸𑀦𑀁. 𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀽𑀢𑀺 𑀬𑀜𑁆𑀘 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀁 𑀦𑀺𑀬𑀫𑁂𑀦𑁂𑀯 𑀨𑀮𑀧𑀤𑀸𑀦𑀢𑁄 ‘‘𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀻’’𑀢𑀺 𑀆𑀳𑀼. 𑀦 𑀳𑀺 𑀫𑀕𑁆𑀕𑀲𑀫𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀨𑀮𑀼𑀧𑁆𑀧𑀢𑁆𑀢𑀺𑀦𑀺𑀲𑁂𑀥𑀓𑁄 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀅𑀢𑁆𑀣𑀺. 𑀬𑀣𑀸𑀳 𑁋

‘‘𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀅𑀲𑁆𑀲, 𑀓𑀧𑁆𑀧𑀲𑁆𑀲 𑀘 𑀉𑀟𑁆𑀟𑀬𑁆𑀳𑀦𑀯𑁂𑀮𑀸 𑀅𑀲𑁆𑀲, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀉𑀟𑁆𑀟𑀬𑁆𑀳𑁂𑀬𑁆𑀬, 𑀬𑀸𑀯𑀸𑀬𑀁 𑀧𑀼𑀕𑁆𑀕𑀮𑁄 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀬𑀁 ¶ 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀞𑀺𑀢𑀓𑀧𑁆𑀧𑀻. 𑀲𑀩𑁆𑀩𑁂𑀧𑀺 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸 𑀞𑀺𑀢𑀓𑀧𑁆𑀧𑀺𑀦𑁄’’𑀢𑀺 (𑀧𑀼. 𑀧. 𑁧𑁭).

𑀲𑀫𑀸𑀥𑀺𑀦𑀸 𑀢𑁂𑀦 𑀲𑀫𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀦 𑀩𑀼𑀤𑁆𑀥𑀲𑁂𑀝𑁆𑀞𑀧𑀭𑀺𑀯𑀡𑁆𑀡𑀺𑀢𑁂𑀦 𑀲𑀼𑀘𑀺𑀦𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀦𑀸 𑀲𑀫𑁄 𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀯𑀸 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀯𑀸 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀢𑁂𑀲𑀁 𑀪𑀸𑀯𑀺𑀢𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀦𑁆𑀦𑀲𑁆𑀲𑀸𑀧𑀺 𑀧𑀼𑀦 𑀦𑀺𑀭𑀬𑀸𑀤𑀻𑀲𑀼𑀧𑀺 𑀉𑀧𑀧𑀢𑁆𑀢𑀺𑀲𑀫𑁆𑀪𑀯𑀢𑁄, 𑀇𑀫𑀲𑁆𑀲 𑀘 𑀅𑀭𑀳𑀢𑁆𑀢𑀲𑀫𑀸𑀥𑀺𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑀽𑀧𑀧𑀢𑁆𑀢𑀺𑀲𑀫𑀼𑀕𑁆𑀖𑀸𑀢𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 ¶ 𑀲𑀗𑁆𑀔𑀢𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀏𑀯𑀁 𑀪𑀕𑀯𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀲𑁆𑀲 𑀅𑀜𑁆𑀜𑁂𑀳𑀺 𑀲𑀫𑀸𑀥𑀻𑀳𑀺 𑀅𑀲𑀫𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑀕𑁆𑀕𑀥𑀫𑁆𑀫𑀭𑀢𑀦𑀲𑁆𑀲 𑀅𑀲𑀤𑀺𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀥𑀫𑁆𑀫𑁂…𑀧𑁂… 𑀳𑁄𑀢𑀽’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀬𑁂 𑀧𑀼𑀕𑁆𑀕𑀮𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁬. 𑀏𑀯𑀁 𑀫𑀕𑁆𑀕𑀥𑀫𑁆𑀫𑀕𑀼𑀡𑁂𑀦𑀸𑀧𑀺 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀗𑁆𑀖𑀕𑀼𑀡𑁂𑀦𑀸𑀧𑀺 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑁂 𑀧𑀼𑀕𑁆𑀕𑀮𑀸’’𑀢𑀺. 𑀢𑀢𑁆𑀣 𑀬𑁂𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀉𑀤𑁆𑀤𑁂𑀲𑁄. 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀸. 𑀅𑀝𑁆𑀞𑀸𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂 𑀳𑀺 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸𑀢𑀺 𑀅𑀝𑁆𑀞 𑀳𑁄𑀦𑁆𑀢𑀺. 𑀲𑀢𑀁 𑀧𑀲𑀢𑁆𑀣𑀸𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀲𑀢𑁆𑀣𑀸. 𑀓𑀲𑁆𑀫𑀸? 𑀲𑀳𑀚𑀸𑀢𑀲𑀻𑀮𑀸𑀤𑀺𑀕𑀼𑀡𑀬𑁄𑀕𑀸. 𑀢𑁂𑀲𑀜𑁆𑀳𑀺 𑀘𑀫𑁆𑀧𑀓𑀯𑀓𑀼𑀮𑀓𑀼𑀲𑀼𑀫𑀸𑀤𑀻𑀦𑀁 𑀲𑀳𑀚𑀸𑀢𑀯𑀡𑁆𑀡𑀕𑀦𑁆𑀥𑀸𑀤𑀬𑁄 𑀯𑀺𑀬 𑀲𑀳𑀚𑀸𑀢𑀸 𑀲𑀻𑀮𑀲𑀫𑀸𑀥𑀺𑀆𑀤𑀬𑁄 𑀕𑀼𑀡𑀸, 𑀢𑁂𑀦 𑀢𑁂 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀸𑀦𑀺 𑀯𑀺𑀬 𑀧𑀼𑀧𑁆𑀨𑀸𑀦𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 ¶ 𑀲𑀢𑀁 𑀧𑀺𑀬𑀸 𑀫𑀦𑀸𑀧𑀸 𑀧𑀲𑀁𑀲𑀦𑀻𑀬𑀸 𑀘 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀁 𑀧𑀲𑀢𑁆𑀣𑀸’’𑀢𑀺.

𑀅𑀣 𑀯𑀸 𑀬𑁂𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀉𑀤𑁆𑀤𑁂𑀲𑁄. 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀸. 𑀅𑀝𑁆𑀞𑀲𑀢𑀦𑁆𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂 𑀳𑀺 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸. 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀅𑀥𑀺𑀕𑀢𑀨𑀮𑀸 ¶ 𑀢𑀬𑁄 𑀲𑀓𑀤𑀸𑀕𑀸𑀫𑀺𑀦𑁄. 𑀢𑁂 𑀲𑀩𑁆𑀩𑁂𑀧𑀺 𑀘𑀢𑀼𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄, 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀅𑀯𑀺𑀳𑁂𑀲𑀼 𑀧𑀜𑁆𑀘. 𑀢𑀣𑀸 𑀅𑀢𑀧𑁆𑀧𑀲𑀼𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀼 ¶ . 𑀅𑀓𑀦𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀁𑀲𑁄𑀢𑀯𑀚𑁆𑀚𑀸 𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀯𑀻𑀲𑀢𑀺 𑀅𑀦𑀸𑀕𑀸𑀫𑀺𑀦𑁄. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀲𑀫𑀣𑀬𑀸𑀦𑀺𑀓𑁄𑀢𑀺 𑀤𑁆𑀯𑁂 𑀅𑀭𑀳𑀦𑁆𑀢𑁄. 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸𑀢𑀺 𑀘𑀢𑀼𑀧𑀜𑁆𑀜𑀸𑀲. 𑀢𑁂 𑀲𑀩𑁆𑀩𑁂𑀧𑀺 𑀲𑀤𑁆𑀥𑀸𑀥𑀼𑀭𑀧𑀜𑁆𑀜𑀸𑀥𑀼𑀭𑀸𑀦𑀁 𑀯𑀲𑁂𑀦 𑀤𑀺𑀕𑀼𑀡𑀸 𑀳𑀼𑀢𑁆𑀯𑀸 𑀅𑀝𑁆𑀞𑀲𑀢𑀁 𑀳𑁄𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀅𑀝𑁆𑀞 𑀯𑀸 𑀅𑀝𑁆𑀞𑀲𑀢𑀁 𑀯𑀸𑀢𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀧𑀼𑀕𑁆𑀕𑀮𑀸 𑀲𑀗𑁆𑀔𑁂𑀧𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀁, 𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀦𑁆𑀢𑀺 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀏𑀢𑁆𑀣 𑀢𑁂𑀢𑀺 𑀧𑀼𑀩𑁆𑀩𑁂 𑀅𑀦𑀺𑀬𑀫𑁂𑀢𑁆𑀯𑀸 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀬𑀫𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀬𑁂 𑀧𑀼𑀕𑁆𑀕𑀮𑀸 𑀯𑀺𑀢𑁆𑀣𑀸𑀭𑀯𑀲𑁂𑀦 𑀅𑀝𑁆𑀞 𑀯𑀸, 𑀅𑀝𑁆𑀞𑀲𑀢𑀁 𑀯𑀸, 𑀲𑀗𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑁂𑀧𑀺 𑀢𑁂 𑀤𑀓𑁆𑀔𑀺𑀡𑀁 𑀅𑀭𑀳𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸. 𑀤𑀓𑁆𑀔𑀺𑀡𑀸 𑀦𑀸𑀫 𑀓𑀫𑁆𑀫𑀜𑁆𑀘 𑀓𑀫𑁆𑀫𑀯𑀺𑀧𑀸𑀓𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀏𑀲 𑀫𑁂 𑀇𑀤𑀁 𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑀁 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑁄 𑀤𑁂𑀬𑁆𑀬𑀥𑀫𑁆𑀫𑁄, 𑀢𑀁 𑀅𑀭𑀳𑀦𑁆𑀢𑀺 𑀦𑀸𑀫 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑀸 𑀧𑀼𑀕𑁆𑀕𑀮𑀸, 𑀇𑀫𑁂 𑀘 𑀢𑀸𑀤𑀺𑀲𑀸, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 ‘‘𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸’’𑀢𑀺.

𑀲𑀼𑀕𑀢𑀲𑁆𑀲 𑀲𑀸𑀯𑀓𑀸𑀢𑀺 𑀪𑀕𑀯𑀸 𑀲𑁄𑀪𑀦𑁂𑀦 𑀕𑀫𑀦𑁂𑀦 𑀬𑀼𑀢𑁆𑀢𑀢𑁆𑀢𑀸, 𑀲𑁄𑀪𑀦𑀜𑁆𑀘 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀼𑀝𑁆𑀞𑀼 𑀘 𑀕𑀢𑀢𑁆𑀢𑀸, 𑀲𑀼𑀝𑁆𑀞𑀼 𑀏𑀯 𑀘 𑀕𑀤𑀢𑁆𑀢𑀸 𑀲𑀼𑀕𑀢𑁄, 𑀢𑀲𑁆𑀲 𑀲𑀼𑀕𑀢𑀲𑁆𑀲. 𑀲𑀩𑁆𑀩𑁂𑀧𑀺 𑀢𑁂 𑀯𑀘𑀦𑀁 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸. 𑀓𑀸𑀫𑀜𑁆𑀘 𑀅𑀜𑁆𑀜𑁂𑀧𑀺 𑀲𑀼𑀡𑀦𑁆𑀢𑀺, 𑀦 𑀧𑀦 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀇𑀫𑁂 𑀧𑀦 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀧𑀢𑁆𑀢𑀸, 𑀢𑀲𑁆𑀫𑀸 ‘‘𑀲𑀸𑀯𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀻𑀢𑀺 𑀏𑀢𑁂𑀲𑀼 𑀲𑀼𑀕𑀢𑀲𑀸𑀯𑀓𑁂𑀲𑀼 𑀅𑀧𑁆𑀧𑀓𑀸𑀦𑀺𑀧𑀺 𑀤𑀸𑀦𑀸𑀦𑀺 𑀤𑀺𑀦𑁆𑀦𑀸𑀦𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀪𑀸𑀯𑀁 𑀉𑀧𑀕𑀢𑀢𑁆𑀢𑀸 𑀫𑀳𑀧𑁆𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀬𑀸𑀯𑀢𑀸 ¶ , 𑀪𑀺𑀓𑁆𑀔𑀯𑁂 ¶ , 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄, 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄…𑀧𑁂… 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦).

𑀏𑀯𑀁 ¶ 𑀪𑀕𑀯𑀸 𑀲𑀩𑁆𑀩𑁂𑀲𑀫𑁆𑀧𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀸𑀦𑀁 𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀬𑁂 𑀲𑀼𑀧𑁆𑀧𑀬𑀼𑀢𑁆𑀢𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁭. 𑀏𑀯𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀸𑀦𑀁 𑀯𑀲𑁂𑀦 𑀲𑀗𑁆𑀖𑀕𑀼𑀡𑁂𑀦 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀏𑀓𑀘𑁆𑀘𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀫𑀦𑀼𑀪𑀯𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑁂 𑀲𑀼𑀧𑁆𑀧𑀬𑀼𑀢𑁆𑀢𑀸’’𑀢𑀺. 𑀢𑀢𑁆𑀣 𑀬𑁂𑀢𑀺 𑀅𑀦𑀺𑀬𑀫𑀺𑀢𑀼𑀤𑁆𑀤𑁂𑀲𑀯𑀘𑀦𑀁. 𑀲𑀼𑀧𑁆𑀧𑀬𑀼𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀧𑀬𑀼𑀢𑁆𑀢𑀸, 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀧𑀳𑀸𑀬 𑀲𑀼𑀤𑁆𑀥𑀸𑀚𑀻𑀯𑀺𑀢𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀢𑁆𑀢𑀸𑀦𑀁 𑀧𑀬𑀼𑀜𑁆𑀚𑀺𑀢𑀼𑀫𑀸𑀭𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀧𑁆𑀧𑀬𑀼𑀢𑁆𑀢𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀦𑁆𑀦𑀸𑀕𑀢𑀸, 𑀢𑁂𑀦 𑀢𑁂𑀲𑀁 𑀲𑀻𑀮𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀫𑀦𑀲𑀸 𑀤𑀴𑁆𑀳𑁂𑀦𑀸𑀢𑀺 𑀤𑀴𑁆𑀳𑁂𑀦 𑀫𑀦𑀲𑀸, 𑀣𑀺𑀭𑀲𑀫𑀸𑀥𑀺𑀬𑀼𑀢𑁆𑀢𑁂𑀦 𑀘𑁂𑀢𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀢𑁂𑀲𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀦𑀺𑀓𑁆𑀓𑀸𑀫𑀺𑀦𑁄𑀢𑀺 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀥𑀼𑀭𑁂𑀦 𑀯𑀻𑀭𑀺𑀬𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀓𑀢𑀦𑀺𑀓𑁆𑀓𑀫𑀦𑀸. 𑀢𑁂𑀦 𑀢𑁂𑀲𑀁 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀁 𑀧𑀜𑁆𑀜𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺.

𑀕𑁄𑀢𑀫𑀲𑀸𑀲𑀦𑀫𑁆𑀳𑀻𑀢𑀺 𑀕𑁄𑀢𑁆𑀢𑀢𑁄 𑀕𑁄𑀢𑀫𑀲𑁆𑀲 𑀢𑀣𑀸𑀕𑀢𑀲𑁆𑀲𑁂𑀯 𑀲𑀸𑀲𑀦𑀫𑁆𑀳𑀺. 𑀢𑁂𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀸𑀦𑀧𑁆𑀧𑀓𑀸𑀭𑀫𑁆𑀧𑀺 𑀅𑀫𑀭𑀢𑀧𑀁 𑀓𑀭𑁄𑀦𑁆𑀢𑀸𑀦𑀁 𑀲𑀼𑀧𑁆𑀧𑀬𑁄𑀕𑀸𑀤𑀺𑀕𑀼𑀡𑀸𑀪𑀸𑀯𑀢𑁄 𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀓𑀫𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀢𑀺 𑀧𑀼𑀩𑁆𑀩𑁂 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀤𑁆𑀤𑁂𑀲𑀯𑀘𑀦𑀁. 𑀧𑀢𑁆𑀢𑀺𑀧𑀢𑁆𑀢𑀸𑀢𑀺 𑀏𑀢𑁆𑀣 𑀧𑀢𑁆𑀢𑀩𑁆𑀩𑀸𑀢𑀺 𑀧𑀢𑁆𑀢𑀺, 𑀧𑀢𑁆𑀢𑀩𑁆𑀩𑀸 𑀦𑀸𑀫 𑀧𑀢𑁆𑀢𑀼𑀁 𑀅𑀭𑀳𑀸, 𑀬𑀁 𑀧𑀢𑁆𑀯𑀸 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀺𑀦𑁄 ¶ 𑀳𑁄𑀦𑁆𑀢𑀺, 𑀅𑀭𑀳𑀢𑁆𑀢𑀨𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀧𑀢𑁆𑀢𑀺𑀁 𑀧𑀢𑁆𑀢𑀸𑀢𑀺 𑀧𑀢𑁆𑀢𑀺𑀧𑀢𑁆𑀢𑀸. 𑀅𑀫𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀯𑀺𑀕𑀬𑁆𑀳𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀯𑀺𑀕𑀸𑀳𑀺𑀢𑁆𑀯𑀸. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀫𑀼𑀥𑀸𑀢𑀺 𑀅𑀩𑁆𑀬𑀬𑁂𑀦 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀩𑁆𑀬𑀬𑀁 𑀅𑀓𑀢𑁆𑀯𑀸. 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀤𑀭𑀣𑀁 𑀨𑀮𑀲𑀫𑀸𑀧𑀢𑁆𑀢𑀺𑀁. 𑀪𑀼𑀜𑁆𑀚𑀫𑀸𑀦𑀸𑀢𑀺 𑀅𑀦𑀼𑀪𑀯𑀫𑀸𑀦𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂 𑀇𑀫𑀲𑁆𑀫𑀺𑀁 𑀕𑁄𑀢𑀫𑀲𑀸𑀲𑀦𑀫𑁆𑀳𑀺 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀼𑀧𑁆𑀧𑀬𑀼𑀢𑁆𑀢𑀸, 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀫𑀦𑀲𑀸 𑀤𑀴𑁆𑀳𑁂𑀦, 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀢𑁆𑀢𑀸 𑀦𑀺𑀓𑁆𑀓𑀸𑀫𑀺𑀦𑁄 ¶ , 𑀢𑁂 𑀇𑀫𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀫𑀢𑀁 𑀯𑀺𑀕𑀬𑁆𑀳 𑀫𑀼𑀥𑀸 𑀮𑀤𑁆𑀥𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀦𑀺𑀩𑁆𑀩𑀼𑀢𑀺𑀁 𑀪𑀼𑀜𑁆𑀚𑀫𑀸𑀦𑀸 𑀧𑀢𑁆𑀢𑀺𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀏𑀯𑀁 ¶ 𑀪𑀕𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀫𑀦𑀼𑀪𑀯𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸𑀦𑀫𑁂𑀯 𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀬𑀣𑀺𑀦𑁆𑀤𑀔𑀻𑀮𑁄𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁮. 𑀏𑀯𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀩𑀳𑀼𑀚𑀦𑀧𑀘𑁆𑀘𑀓𑁆𑀔𑁂𑀦 𑀲𑁄𑀢𑀸𑀧𑀦𑁆𑀦𑀲𑁆𑀲𑁂𑀯 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑀣𑀺𑀦𑁆𑀤𑀔𑀻𑀮𑁄’’𑀢𑀺. 𑀢𑀢𑁆𑀣 𑀬𑀣𑀸𑀢𑀺 𑀉𑀧𑀫𑀸𑀯𑀘𑀦𑀁. 𑀇𑀦𑁆𑀤𑀔𑀻𑀮𑁄𑀢𑀺 𑀦𑀕𑀭𑀤𑁆𑀯𑀸𑀭𑀯𑀺𑀦𑀺𑀯𑀸𑀭𑀡𑀢𑁆𑀣𑀁 𑀉𑀫𑁆𑀫𑀸𑀭𑀩𑁆𑀪𑀦𑁆𑀢𑀭𑁂 𑀅𑀝𑁆𑀞 𑀯𑀸 𑀤𑀲 𑀯𑀸 𑀳𑀢𑁆𑀣𑁂 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀆𑀓𑁄𑀝𑀺𑀢𑀲𑁆𑀲 𑀲𑀸𑀭𑀤𑀸𑀭𑀼𑀫𑀬𑀣𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀣𑀯𑀺𑀦𑁆𑀢𑀺 𑀪𑀽𑀫𑀺𑀁. 𑀲𑀺𑀢𑁄𑀢𑀺 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑁆𑀲𑀺𑀢𑁄. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬. 𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀻𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑁂𑀳𑀺 𑀯𑀸𑀢𑁂𑀳𑀺. 𑀅𑀲𑀫𑁆𑀧𑀓𑀫𑁆𑀧𑀺𑀬𑁄𑀢𑀺 𑀓𑀫𑁆𑀧𑁂𑀢𑀼𑀁 𑀯𑀸 𑀘𑀸𑀮𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀢𑀣𑀽𑀧𑀫𑀦𑁆𑀢𑀺 𑀢𑀣𑀸𑀯𑀺𑀥𑀁. 𑀲𑀧𑁆𑀧𑀼𑀭𑀺𑀲𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀁. 𑀯𑀤𑀸𑀫𑀻𑀢𑀺 𑀪𑀡𑀸𑀫𑀺. 𑀬𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑁂𑀘𑁆𑀘 𑀧𑀲𑁆𑀲𑀢𑀻𑀢𑀺 𑀬𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀜𑁆𑀜𑀸𑀬 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀲𑁆𑀲𑀢𑀺. 𑀢𑀢𑁆𑀣 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀼𑀫𑀸𑀭𑀧𑀜𑁆𑀳𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀳𑀺 𑀇𑀦𑁆𑀤𑀔𑀻𑀮𑁄 ¶ 𑀕𑀫𑁆𑀪𑀻𑀭𑀦𑁂𑀫𑀢𑀸𑀬 𑀧𑀣𑀯𑀺𑀲𑁆𑀲𑀺𑀢𑁄 𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀲𑀺𑀬𑀸, 𑀇𑀫𑀫𑁆𑀧𑀺 𑀲𑀧𑁆𑀧𑀼𑀭𑀺𑀲𑀁 𑀢𑀣𑀽𑀧𑀫𑀫𑁂𑀯 𑀯𑀤𑀸𑀫𑀺, 𑀬𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑁂𑀘𑁆𑀘 𑀧𑀲𑁆𑀲𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑁄𑀧𑀺 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀘𑀢𑀽𑀳𑀺 𑀯𑀸𑀢𑁂𑀳𑀺 𑀲𑀩𑁆𑀩𑀢𑀺𑀢𑁆𑀣𑀺𑀬𑀯𑀸𑀤𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀳𑁄𑀢𑀺, 𑀢𑀫𑁆𑀳𑀸 𑀤𑀲𑁆𑀲𑀦𑀸 𑀓𑁂𑀦𑀘𑀺 𑀓𑀫𑁆𑀧𑁂𑀢𑀼𑀁 𑀯𑀸 𑀘𑀸𑀮𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑁄𑀔𑀻𑀮𑁄 𑀯𑀸 𑀇𑀦𑁆𑀤𑀔𑀻𑀮𑁄 𑀯𑀸 𑀕𑀫𑁆𑀪𑀻𑀭𑀦𑁂𑀫𑁄 𑀲𑀼𑀦𑀺𑀔𑀸𑀢𑁄 𑀅𑀘𑀮𑁄 𑀅𑀲𑀫𑁆𑀧𑀓𑀫𑁆𑀧𑀻, 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺, 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀘𑀸𑀮𑁂𑀬𑁆𑀬. 𑀧𑀘𑁆𑀙𑀺𑀫𑀸𑀬…𑀧𑁂… 𑀤𑀓𑁆𑀔𑀺𑀡𑀸𑀬, 𑀉𑀢𑁆𑀢𑀭𑀸𑀬𑀧𑀺 𑀘𑁂…𑀧𑁂… 𑀦 𑀲𑀫𑁆𑀧𑀘𑀸𑀮𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀕𑀫𑁆𑀪𑀻𑀭𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀦𑁂𑀫𑀲𑁆𑀲 ¶ , 𑀲𑀼𑀦𑀺𑀔𑀸𑀢𑀢𑁆𑀢𑀸 𑀇𑀦𑁆𑀤𑀔𑀻𑀮𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀘 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 ¶ 𑀩𑁆𑀭𑀸𑀳𑁆𑀫𑀡𑀸 𑀯𑀸 ‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺…𑀧𑁂… 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂 𑀦 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀺 ‘𑀅𑀬𑀁 𑀦𑀽𑀦 𑀪𑀯𑀁 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀻’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀤𑀺𑀝𑁆𑀞𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁯).

𑀏𑀯𑀁 𑀪𑀕𑀯𑀸 𑀩𑀳𑀼𑀚𑀦𑀧𑀘𑁆𑀘𑀓𑁆𑀔𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲𑁂𑀯 𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁯. 𑀏𑀯𑀁 𑀅𑀯𑀺𑀲𑁂𑀲𑀢𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀢𑁂 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺. 𑀬𑀣𑀸𑀳 𑁋

‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀲𑁄 𑀏𑀓𑀁𑀬𑁂𑀯 𑀪𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀏𑀓𑀩𑀻𑀚𑀻. 𑀢𑀣𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 ¶ 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄. 𑀢𑀣𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 (𑀧𑀼. 𑀧. 𑁩𑁧-𑁩𑁩).

𑀢𑁂𑀲𑀁 𑀲𑀩𑁆𑀩𑀓𑀦𑀺𑀝𑁆𑀞𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺. 𑀢𑀢𑁆𑀣 𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀏𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀪𑀸𑀯𑀬𑀦𑁆𑀢𑀻𑀢𑀺 𑀧𑀜𑁆𑀜𑀸𑀑𑀪𑀸𑀲𑁂𑀦 𑀲𑀘𑁆𑀘𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑀸𑀲𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀦𑁆𑀢𑀺. 𑀕𑀫𑁆𑀪𑀻𑀭𑀧𑀜𑁆𑀜𑁂𑀦𑀸𑀢𑀺 𑀅𑀧𑁆𑀧𑀫𑁂𑀬𑁆𑀬𑀧𑀜𑁆𑀜𑀢𑀸𑀬 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀜𑀸𑀡𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀧𑁆𑀧𑀢𑀺𑀝𑁆𑀞𑀧𑀜𑁆𑀜𑁂𑀦, 𑀲𑀩𑁆𑀩𑀜𑁆𑀜𑀼𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀤𑁂𑀲𑀺𑀢𑀸𑀦𑀻𑀢𑀺 𑀲𑀫𑀸𑀲𑀩𑁆𑀬𑀸𑀲𑀲𑀸𑀓𑀮𑁆𑀬𑀯𑁂𑀓𑀮𑁆𑀬𑀸𑀤𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀦𑀬𑁂𑀳𑀺 𑀲𑀼𑀝𑁆𑀞𑀼 𑀤𑁂𑀲𑀺𑀢𑀸𑀦𑀺. 𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 ¶ 𑀪𑀼𑀲𑀁 𑀧𑀫𑀢𑁆𑀢𑀸𑀢𑀺 𑀢𑁂 𑀯𑀺𑀪𑀸𑀯𑀺𑀢𑀅𑀭𑀺𑀬𑀲𑀘𑁆𑀘𑀸 𑀧𑀼𑀕𑁆𑀕𑀮𑀸 𑀓𑀺𑀜𑁆𑀘𑀸𑀧𑀺 𑀤𑁂𑀯𑀭𑀚𑁆𑀚𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀸𑀤𑀺𑀧𑁆𑀧𑀫𑀸𑀤𑀝𑁆𑀞𑀸𑀦𑀁 𑀆𑀕𑀫𑁆𑀫 𑀪𑀼𑀲𑀁 𑀧𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀢𑁂𑀲𑀁 𑀦𑀺𑀭𑀼𑀤𑁆𑀥𑀢𑁆𑀢𑀸 𑀅𑀢𑁆𑀣𑀗𑁆𑀕𑀢𑀢𑁆𑀢𑀸 𑀦 𑀅𑀝𑁆𑀞𑀫𑀁 𑀪𑀯𑀁 𑀆𑀤𑀺𑀬𑀦𑁆𑀢𑀺, 𑀲𑀢𑁆𑀢𑀫𑀪𑀯𑁂 𑀏𑀯 𑀧𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀺.

𑀏𑀯𑀁 ¶ 𑀪𑀕𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀲𑀳𑀸𑀯𑀲𑁆𑀲𑀸𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁦. 𑀏𑀯𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲 𑀅𑀝𑁆𑀞𑀫𑀁 𑀪𑀯𑀁 𑀅𑀦𑀸𑀤𑀺𑀬𑀦𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀢𑁄𑀧𑀺 𑀅𑀜𑁆𑀜𑁂𑀳𑀺 𑀅𑀧𑁆𑀧𑀳𑀻𑀦𑀪𑀯𑀸𑀤𑀸𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀺𑀝𑁆𑀞𑁂𑀦 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀲𑀳𑀸𑀯𑀲𑁆𑀲𑀸’’𑀢𑀺 ¶ . 𑀢𑀢𑁆𑀣 𑀲𑀳𑀸𑀯𑀸𑀢𑀺 𑀲𑀤𑁆𑀥𑀺𑀁𑀬𑁂𑀯. 𑀅𑀲𑁆𑀲𑀸𑀢𑀺 ‘‘𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀲𑁆𑀲. 𑀤𑀲𑁆𑀲𑀦𑀲𑀫𑁆𑀧𑀤𑀸𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀢𑁆𑀢𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑀫𑁆𑀧𑀤𑀸𑀬 𑀲𑀩𑁆𑀩𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀢𑁆𑀢𑀦𑀺 𑀧𑀸𑀢𑀼𑀪𑀸𑀯𑁄 𑀤𑀲𑁆𑀲𑀦𑀲𑀫𑁆𑀧𑀤𑀸, 𑀢𑀸𑀬 𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀲𑀳 𑀏𑀯. 𑀢𑀬𑀲𑁆𑀲𑀼 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀻𑀢𑀺 𑀏𑀢𑁆𑀣 𑀅𑀲𑁆𑀲𑀼-𑀇𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄 ‘‘𑀇𑀤𑀁 𑀲𑀼 𑀫𑁂, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀯𑀺𑀓𑀝𑀪𑁄𑀚𑀦𑀲𑁆𑀫𑀺𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁬) 𑀯𑀺𑀬. 𑀬𑀢𑁄 𑀲𑀳𑀸𑀯𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀢𑀬𑁄 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀺 𑀧𑀳𑀻𑀦𑀸 𑀳𑁄𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀇𑀤𑀸𑀦𑀺 𑀚𑀳𑀺𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀻 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺. 𑀢𑀢𑁆𑀣 𑀲𑀢𑀺 𑀓𑀸𑀬𑁂 𑀯𑀺𑀚𑁆𑀚𑀫𑀸𑀦𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀸𑀔𑁆𑀬𑁂 𑀓𑀸𑀬𑁂 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀢𑀻 𑀯𑀸 𑀢𑀢𑁆𑀣 𑀓𑀸𑀬𑁂 𑀤𑀺𑀝𑁆𑀞𑀻𑀢𑀺𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀓𑀸𑀬𑁂 𑀯𑀺𑀚𑁆𑀚𑀫𑀸𑀦𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀲𑀢𑀺𑀬𑁂𑀯 𑀯𑀸 𑀓𑀸𑀬𑁂 𑀤𑀺𑀝𑁆𑀞𑀻𑀢𑀺𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀓𑀸𑀬𑁂 𑀯𑀺𑀚𑁆𑀚𑀫𑀸𑀦𑁂 ¶ 𑀭𑀽𑀧𑀸𑀤𑀺𑀲𑀗𑁆𑀔𑀸𑀢𑁄 𑀅𑀢𑁆𑀢𑀸𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀘 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑁂𑀯 𑀳𑁄𑀦𑁆𑀢𑀺. 𑀲𑀸 𑀳𑀺 𑀦𑁂𑀲𑀁 𑀫𑀽𑀮𑀁. 𑀲𑀩𑁆𑀩𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑀢𑁄 𑀧𑀜𑁆𑀜𑀸‘‘𑀘𑀺𑀓𑀺𑀘𑁆𑀙𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀜𑁆𑀜𑀸𑀘𑀺𑀓𑀺𑀘𑁆𑀙𑀺𑀢𑀁 𑀇𑀢𑁄 𑀯𑀺𑀕𑀢𑀁, 𑀢𑀢𑁄 𑀯𑀸 𑀧𑀜𑁆𑀜𑀸𑀘𑀺𑀓𑀺𑀘𑁆𑀙𑀺𑀢𑀸 𑀇𑀤𑀁 𑀯𑀺𑀕𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀺𑀢𑀁. ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁦𑁮; 𑀯𑀺𑀪. 𑁯𑁧𑁫) 𑀦𑀬𑁂𑀦 𑀯𑀼𑀢𑁆𑀢𑀸𑀬 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀯𑀺𑀫𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀲𑀸 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀸𑀦𑀺𑀧𑀺 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀜𑁆𑀳𑀺 𑀦𑁂𑀲𑀁 𑀫𑀽𑀮𑀁. ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 ¶ 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀲. 𑁧𑁨𑁨𑁨; 𑀯𑀺𑀪. 𑁯𑁩𑁮) 𑀆𑀕𑀢𑀁 𑀕𑁄𑀲𑀻𑀮𑀓𑀼𑀓𑁆𑀓𑀼𑀭𑀲𑀻𑀮𑀸𑀤𑀺𑀓𑀁 𑀲𑀻𑀮𑀁 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀸𑀤𑀺𑀓𑀜𑁆𑀘 𑀯𑀢𑀁 𑀲𑀻𑀮𑀩𑁆𑀩𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀦𑀕𑁆𑀕𑀺𑀬𑀫𑀼𑀡𑁆𑀟𑀺𑀓𑀸𑀤𑀺𑀅𑀫𑀭𑀢𑀧𑀁 𑀧𑀳𑀻𑀦𑀁 𑀳𑁄𑀢𑀺. 𑀢𑀜𑁆𑀳𑀺 𑀢𑀲𑁆𑀲 𑀫𑀽𑀮𑀁, 𑀢𑁂𑀦𑁂𑀯 𑀲𑀩𑁆𑀩𑀸𑀯𑀲𑀸𑀦𑁂 𑀯𑀼𑀢𑁆𑀢𑀁 ‘‘𑀬𑀤𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺. 𑀤𑀼𑀓𑁆𑀔𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀘𑁂𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 ¶ 𑀲𑀫𑀼𑀤𑀬𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀯𑀺𑀘𑀺𑀓𑀺𑀘𑁆𑀙𑀺𑀢𑀁, 𑀫𑀕𑁆𑀕𑀤𑀲𑁆𑀲𑀦𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀲𑀻𑀮𑀩𑁆𑀩𑀢𑀁 𑀧𑀳𑀻𑀬𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁.

𑀘𑀢𑀽𑀳𑀧𑀸𑀬𑁂𑀳𑀻𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁧. 𑀏𑀯𑀫𑀲𑁆𑀲 𑀓𑀺𑀮𑁂𑀲𑀯𑀝𑁆𑀝𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀓𑀺𑀮𑁂𑀲𑀯𑀝𑁆𑀝𑁂 𑀲𑀢𑀺 𑀬𑁂𑀦 𑀯𑀺𑀧𑀸𑀓𑀯𑀝𑁆𑀝𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀧𑁆𑀧𑀳𑀸𑀦𑀸 𑀢𑀲𑁆𑀲𑀸𑀧𑀺 𑀧𑀳𑀸𑀦𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀘𑀢𑀽𑀳𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀦𑀸𑀫 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀅𑀲𑀼𑀭𑀓𑀸𑀬𑀸. 𑀢𑁂𑀳𑀺 𑀏𑀲 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀦𑁆𑀢𑁄𑀧𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀫𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀫𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀫𑀽𑀮𑀪𑀽𑀢𑀁 𑀓𑀫𑁆𑀫𑀯𑀝𑁆𑀝𑀁, 𑀢𑀲𑁆𑀲𑀸𑀧𑀺 𑀧𑀳𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀘𑁆𑀘𑀸𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩 𑀓𑀸𑀢𑀼’’𑀦𑁆𑀢𑀺. 𑀢𑀢𑁆𑀣 𑀅𑀪𑀺𑀞𑀸𑀦𑀸𑀦𑀻𑀢𑀺 𑀑𑀴𑀸𑀭𑀺𑀓𑀝𑁆𑀞𑀸𑀦𑀸𑀦𑀺, 𑀢𑀸𑀦𑀺 𑀏𑀲 𑀙 𑀅𑀪𑀩𑁆𑀩𑁄 𑀓𑀸𑀢𑀼𑀁. 𑀢𑀸𑀦𑀺 𑀘 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧.𑁨𑁭𑁧; 𑀫. 𑀦𑀺. 𑁩.𑁧𑁨𑁮; 𑀯𑀺𑀪. 𑁮𑁦𑁯) 𑀦𑀬𑁂𑀦 𑀏𑀓𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀸𑀦𑀺 𑀫𑀸𑀢𑀼𑀖𑀸𑀢𑀧𑀺𑀢𑀼𑀖𑀸𑀢𑀅𑀭𑀳𑀦𑁆𑀢𑀖𑀸𑀢𑀮𑁄𑀳𑀺𑀢𑀼𑀧𑁆𑀧𑀸𑀤𑀲𑀗𑁆𑀖𑀪𑁂𑀤𑀅𑀜𑁆𑀜𑀲𑀢𑁆𑀣𑀸𑀭𑀼𑀤𑁆𑀤𑁂𑀲𑀓𑀫𑁆𑀫𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀢𑀺, 𑀅𑀧𑀺𑀘 ¶ 𑀔𑁄 𑀧𑀦 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀯𑀺𑀕𑀭𑀳𑀡𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀅𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀏𑀯𑀁𑀫𑀳𑀸𑀲𑀸𑀯𑀚𑁆𑀚𑀸𑀦𑀺 𑀅𑀪𑀺𑀞𑀸𑀦𑀸𑀦𑀺𑀧𑀺 𑀓𑀭𑁄𑀢𑀺, 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀧𑀦 𑀅𑀪𑀩𑁆𑀩𑁄 𑀢𑀸𑀦𑀺 𑀓𑀸𑀢𑀼𑀦𑁆𑀢𑀺. 𑀅𑀪𑀩𑁆𑀩𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀪𑀯𑀦𑁆𑀢𑀭𑁂𑀧𑀺 𑀅𑀓𑀭𑀡𑀤𑀲𑁆𑀲𑀦𑀢𑁆𑀣𑀁. 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀏𑀲 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀧𑀺 𑀥𑀫𑁆𑀫𑀢𑀸𑀬 𑀏𑀯 𑀏𑀢𑀸𑀦𑀺 𑀯𑀸 𑀙 𑀧𑀓𑀢𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 ¶ 𑀯𑀸 𑀧𑀜𑁆𑀘 𑀯𑁂𑀭𑀸𑀦𑀺 𑀅𑀜𑁆𑀜𑀲𑀢𑁆𑀣𑀸𑀭𑀼𑀤𑁆𑀤𑁂𑀲𑁂𑀦 𑀲𑀳 𑀙 𑀞𑀸𑀦𑀸𑀦𑀺 𑀦 𑀓𑀭𑁄𑀢𑀺, 𑀬𑀸𑀦𑀺 𑀲𑀦𑁆𑀥𑀸𑀬 𑀏𑀓𑀘𑁆𑀘𑁂 ‘‘𑀙 𑀙𑀸𑀪𑀺𑀞𑀸𑀦𑀸𑀦𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀫𑀢𑀫𑀘𑁆𑀙𑀕𑁆𑀕𑀸𑀳𑀸𑀤𑀬𑁄 𑀘𑁂𑀢𑁆𑀣 𑀅𑀭𑀺𑀬𑀲𑀸𑀯𑀓𑀕𑀸𑀫𑀤𑀸𑀭𑀓𑀸𑀦𑀁 𑀦𑀺𑀤𑀲𑁆𑀲𑀦𑀁.

𑀏𑀯𑀁 𑀪𑀕𑀯𑀸 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀢𑁄𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀜𑁆𑀜𑁂𑀳𑀺 𑀅𑀧𑁆𑀧𑀳𑀻𑀦𑀪𑀯𑀸𑀤𑀸𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀺𑀝𑁆𑀞𑀕𑀼𑀡𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀓𑀺𑀜𑁆𑀘𑀸𑀧𑀺 𑀲𑁄𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁨. 𑀏𑀯𑀁 ¶ 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀢𑁄𑀧𑀺 𑀅𑀜𑁆𑀜𑁂𑀳𑀺 𑀅𑀧𑁆𑀧𑀳𑀻𑀦𑀪𑀯𑀸𑀤𑀸𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀺𑀝𑁆𑀞𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀦 𑀓𑁂𑀯𑀮𑀁 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀙 𑀅𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩𑁄 𑀓𑀸𑀢𑀼𑀁, 𑀓𑀺𑀦𑁆𑀢𑀼 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀸𑀬𑀧𑀺 𑀅𑀪𑀩𑁆𑀩𑁄𑀢𑀺 𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀧𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀓𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀸𑀪𑀸𑀯𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀓𑀫𑁆𑀫 𑀓𑀭𑁄𑀢𑀺 𑀧𑀸𑀧𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀓𑀺𑀜𑁆𑀘𑀸𑀧𑀺 𑀲𑀢𑀺𑀲𑀫𑁆𑀫𑁄𑀲𑁂𑀦 𑀧𑀫𑀸𑀤𑀯𑀺𑀳𑀸𑀭𑀁 𑀆𑀕𑀫𑁆𑀫 𑀬𑀁 𑀢𑀁 𑀪𑀕𑀯𑀢𑀸 𑀮𑁄𑀓𑀯𑀚𑁆𑀚𑀁 𑀲𑀜𑁆𑀘𑀺𑀘𑁆𑀘𑀸𑀢𑀺𑀓𑁆𑀓𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀘𑀽𑀴𑀯. 𑁩𑁮𑁫; 𑀉𑀤𑀸. 𑁪𑁫) 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀼𑀝𑀺𑀓𑀸𑀭𑀲𑀳𑀲𑁂𑀬𑁆𑀬𑀸𑀤𑀺𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀧𑁆𑀧𑀢𑀺𑀓𑀼𑀝𑁆𑀞𑀁 𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀤𑀲𑁄𑀥𑀫𑁆𑀫𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀥𑀫𑁆𑀫𑀤𑁂𑀲𑀦𑀲𑀫𑁆𑀨𑀧𑁆𑀧𑀮𑀸𑀧𑀨𑀭𑀼𑀲𑀯𑀘𑀦𑀸𑀤𑀺𑀁 𑀯𑀸 𑀯𑀸𑀘𑀸𑀬 ¶ , 𑀉𑀤 𑀘𑁂𑀢𑀲𑀸 𑀯𑀸 𑀓𑀢𑁆𑀣𑀘𑀺 𑀮𑁄𑀪𑀤𑁄𑀲𑀼𑀧𑁆𑀧𑀸𑀤𑀦𑀁 𑀚𑀸𑀢𑀭𑀽𑀧𑀸𑀤𑀺𑀲𑀸𑀤𑀺𑀬𑀦𑀁 𑀘𑀻𑀯𑀭𑀸𑀤𑀺𑀧𑀭𑀺𑀪𑁄𑀕𑁂𑀲𑀼 𑀅𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀁 𑀯𑀸 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀪𑀩𑁆𑀩𑁄 𑀲𑁄 𑀢𑀲𑁆𑀲 ¶ 𑀧𑀝𑀺𑀘𑁆𑀙𑀤𑀸𑀬 𑀦 𑀲𑁄 𑀢𑀁 ‘‘𑀇𑀤𑀁 𑀅𑀓𑀧𑁆𑀧𑀺𑀬𑀫𑀓𑀭𑀡𑀻𑀬’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀁𑀔𑀡𑀁 𑀏𑀯 𑀧𑀦 𑀲𑀢𑁆𑀣𑀭𑀺 𑀯𑀸 𑀯𑀺𑀜𑁆𑀜𑀽𑀲𑀼 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀓𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, ‘‘𑀦 𑀧𑀼𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀁𑀯𑀭𑀺𑀢𑀩𑁆𑀩𑀁 𑀯𑀸 𑀲𑀁𑀯𑀭𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀪𑀩𑁆𑀩𑀢𑀸 𑀤𑀺𑀝𑁆𑀞𑀧𑀤𑀲𑁆𑀲 𑀯𑀼𑀢𑁆𑀢𑀸, 𑀏𑀯𑀭𑀽𑀧𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀸𑀬 𑀤𑀺𑀝𑁆𑀞𑀦𑀺𑀩𑁆𑀩𑀸𑀦𑀧𑀤𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀪𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀓𑀣𑀁?

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀳𑀭𑁄 𑀓𑀼𑀫𑀸𑀭𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀅𑀗𑁆𑀕𑀸𑀭𑀁 𑀅𑀓𑁆𑀓𑀫𑀺𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀧𑀝𑀺𑀲𑀁𑀳𑀭𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀢𑀸 𑀏𑀲𑀸 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀓𑀺𑀜𑁆𑀘𑀸𑀧𑀺 𑀢𑀣𑀸𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀬𑀣𑀸𑀭𑀽𑀧𑀸𑀬 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀲𑀢𑁆𑀣𑀭𑀺 𑀯𑀸 𑀯𑀺𑀜𑁆𑀜𑀽𑀲𑀼 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀤𑁂𑀲𑁂𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺, 𑀤𑁂𑀲𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀉𑀢𑁆𑀢𑀸𑀦𑀻𑀓𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁪𑁯𑁬).

𑀏𑀯𑀁 𑀪𑀕𑀯𑀸 𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀧𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀓𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀸𑀪𑀸𑀯𑀕𑀼𑀡𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀯𑀦𑀧𑁆𑀧𑀕𑀼𑀫𑁆𑀩𑁂𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁩. 𑀏𑀯𑀁 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀢𑁂𑀦 𑀢𑁂𑀦 𑀕𑀼𑀡𑀧𑁆𑀧𑀓𑀸𑀭𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁆𑀯𑀸𑀬𑀁 𑀪𑀕𑀯𑀢𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀤𑀻𑀧𑁂𑀦𑁆𑀢𑁂𑀦 𑀇𑀥 𑀲𑀗𑁆𑀔𑁂𑀧𑁂𑀦 𑀅𑀜𑁆𑀜𑀢𑁆𑀭 𑀘 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀧𑀼𑀦 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣𑀸 𑀨𑀼𑀲𑁆𑀲𑀺𑀢𑀕𑁆𑀕𑁂’’𑀢𑀺. 𑀢𑀢𑁆𑀣 𑀆𑀲𑀦𑁆𑀦𑀲𑀦𑁆𑀦𑀺𑀯𑁂𑀲𑀯𑀯𑀢𑁆𑀣𑀺𑀢𑀸𑀦𑀁 𑀭𑀼𑀓𑁆𑀔𑀸𑀦𑀁 𑀲𑀫𑀽𑀳𑁄 ¶ 𑀯𑀦𑀁, 𑀫𑀽𑀮𑀲𑀸𑀭𑀨𑁂𑀕𑁆𑀕𑀼𑀢𑀘𑀲𑀸𑀔𑀸𑀧𑀮𑀸𑀲𑁂𑀳𑀺 𑀧𑀯𑀼𑀤𑁆𑀥𑁄 𑀕𑀼𑀫𑁆𑀩𑁄 𑀧𑀕𑀼𑀫𑁆𑀩𑁄, 𑀯𑀦𑀲𑁆𑀲, 𑀯𑀦𑁂 𑀯𑀸 𑀧𑀕𑀼𑀫𑁆𑀩𑁄 𑀯𑀦𑀧𑁆𑀧𑀕𑀼𑀫𑁆𑀩𑁄. 𑀲𑁆𑀯𑀸𑀬𑀁 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂’’𑀢𑀺 𑀯𑀼𑀢𑁆𑀢𑁄, 𑀏𑀯𑀫𑁆𑀧𑀺 𑀳𑀺 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺 ‘‘𑀅𑀢𑁆𑀣𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 ¶ , 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂, 𑀲𑀼𑀔𑁂 𑀤𑀼𑀓𑁆𑀔𑁂 𑀚𑀻𑀯𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁭𑁪; 𑀫. 𑀦𑀺. 𑁨.𑁨𑁨𑁮) 𑀯𑀺𑀬. 𑀬𑀣𑀸𑀢𑀺 𑀉𑀧𑀫𑀸𑀯𑀘𑀦𑀁. 𑀨𑀼𑀲𑁆𑀲𑀺𑀢𑀸𑀦𑀺 𑀅𑀕𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀨𑀼𑀲𑁆𑀲𑀺𑀢𑀕𑁆𑀕𑁄, 𑀲𑀩𑁆𑀩𑀲𑀸𑀔𑀸𑀧𑀲𑀸𑀔𑀸𑀲𑀼 𑀲𑀜𑁆𑀚𑀸𑀢𑀧𑀼𑀧𑁆𑀨𑁄𑀢𑀺 𑀅𑀢𑁆𑀣𑁄. 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀨𑀼𑀲𑁆𑀲𑀺𑀢𑀕𑁆𑀕𑁂’’𑀢𑀺 𑀯𑀼𑀢𑁆𑀢𑁄. 𑀕𑀺𑀫𑁆𑀳𑀸𑀦𑀫𑀸𑀲𑁂 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂𑀢𑀺 𑀬𑁂 𑀘𑀢𑁆𑀢𑀸𑀭𑁄 𑀕𑀺𑀫𑁆𑀳𑀸𑀦𑀁 𑀫𑀸𑀲𑀸, 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀕𑀺𑀫𑁆𑀳𑀫𑀸𑀲𑀸𑀦𑀁 𑀏𑀓𑀲𑁆𑀫𑀺𑀁 𑀫𑀸𑀲𑁂. 𑀓𑀢𑀭𑀲𑁆𑀫𑀺𑀁 𑀫𑀸𑀲𑁂 𑀇𑀢𑀺 𑀘𑁂? 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂, 𑀘𑀺𑀢𑁆𑀭𑀫𑀸𑀲𑁂𑀢𑀺 𑀅𑀢𑁆𑀣𑁄. 𑀲𑁄 𑀳𑀺 ‘‘𑀧𑀞𑀫𑀕𑀺𑀫𑁆𑀳𑁄’’𑀢𑀺 𑀘 ‘‘𑀩𑀸𑀮𑀯𑀲𑀦𑁆𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀢𑁄 𑀧𑀭𑀁 𑀧𑀤𑀢𑁆𑀣𑀢𑁄 𑀧𑀸𑀓𑀝𑀫𑁂𑀯.

𑀅𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄 𑁋 𑀬𑀣𑀸 𑀧𑀞𑀫𑀕𑀺𑀫𑁆𑀳𑀦𑀸𑀫𑀓𑁂 𑀩𑀸𑀮𑀯𑀲𑀦𑁆𑀢𑁂 𑀦𑀸𑀦𑀸𑀯𑀺𑀥𑀭𑀼𑀓𑁆𑀔𑀕𑀳𑀦𑁂 𑀯𑀦𑁂 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀲𑀸𑀔𑁄 𑀢𑀭𑀼𑀡𑀭𑀼𑀓𑁆𑀔𑀕𑀘𑁆𑀙𑀧𑀭𑀺𑀬𑀸𑀬𑀦𑀸𑀫𑁄 𑀧𑀕𑀼𑀫𑁆𑀩𑁄 𑀅𑀢𑀺𑀯𑀺𑀬 𑀲𑀲𑁆𑀲𑀺𑀭𑀺𑀓𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑀦𑁆𑀥𑀸𑀬𑀢𑀦𑀸𑀤𑀻𑀳𑀺 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀳𑀺 𑀲𑀻𑀮𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀢𑁆𑀣𑀧𑁆𑀧𑀪𑁂𑀤𑀧𑀼𑀧𑁆𑀨𑁂𑀳𑀺 𑀅𑀢𑀺𑀯𑀺𑀬 𑀲𑀲𑁆𑀲𑀺𑀭𑀺𑀓𑀢𑁆𑀢𑀸 𑀢𑀣𑀽𑀧𑀫𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀤𑀻𑀧𑀦𑀢𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀭𑀁 𑀦𑁂𑀯 𑀮𑀸𑀪𑀳𑁂𑀢𑀼 𑀦 𑀲𑀓𑁆𑀓𑀸𑀭𑀸𑀤𑀺𑀳𑁂𑀢𑀼, 𑀓𑁂𑀯𑀮𑀦𑁆𑀢𑀼 𑀫𑀳𑀸𑀓𑀭𑀼𑀡𑀸𑀬 𑀅𑀩𑁆𑀪𑀼𑀲𑁆𑀲𑀸𑀳𑀺𑀢𑀳𑀤𑀬𑁄 𑀲𑀢𑁆𑀢𑀸𑀦𑀁 𑀧𑀭𑀫𑀳𑀺𑀢𑀸𑀬 𑀅𑀤𑁂𑀲𑀬𑀻𑀢𑀺. 𑀧𑀭𑀫𑀁 𑀳𑀺𑀢𑀸𑀬𑀸𑀢𑀺 𑀏𑀢𑁆𑀣 𑀘 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀅𑀦𑀼𑀦𑀸𑀲𑀺𑀓𑁄. 𑀅𑀬𑀁 𑀧𑀦𑀢𑁆𑀣𑁄 𑁋 𑀧𑀭𑀫𑀳𑀺𑀢𑀸𑀬 𑀦𑀺𑀩𑁆𑀩𑀸𑀦𑀸𑀬 𑀅𑀤𑁂𑀲𑀬𑀻𑀢𑀺.

𑀏𑀯𑀁 𑀪𑀕𑀯𑀸 𑀇𑀫𑀁 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀯𑀦𑀧𑁆𑀧𑀕𑀼𑀫𑁆𑀩𑀲𑀤𑀺𑀲𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀧𑀓𑀸𑀭𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑀁 ¶ 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁 ¶ . 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀯𑀭𑁄 𑀯𑀭𑀜𑁆𑀜𑀽𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁪. 𑀏𑀯𑀁 𑀪𑀕𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀯𑀭𑁄 𑀯𑀭𑀜𑁆𑀜𑀽’’𑀢𑀺. 𑀢𑀢𑁆𑀣 𑀯𑀭𑁄𑀢𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀇𑀘𑁆𑀙𑀺𑀢𑁄 ‘‘𑀅𑀳𑁄 𑀯𑀢 𑀫𑀬𑀫𑁆𑀧𑀺 𑀏𑀯𑀭𑀽𑀧𑀸 𑀅𑀲𑁆𑀲𑀸𑀫𑀸’’𑀢𑀺, 𑀯𑀭𑀕𑀼𑀡𑀬𑁄𑀕𑀢𑁄 𑀯𑀸 𑀯𑀭𑁄 𑀉𑀢𑁆𑀢𑀫𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀯𑀭𑀜𑁆𑀜𑀽𑀢𑀺 ¶ 𑀦𑀺𑀩𑁆𑀩𑀸𑀦𑀜𑁆𑀜𑀽. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀉𑀢𑁆𑀢𑀫𑀝𑁆𑀞𑁂𑀦 𑀯𑀭𑀁, 𑀢𑀜𑁆𑀘𑁂𑀲 𑀩𑁄𑀥𑀺𑀫𑀽𑀮𑁂 𑀲𑀬𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀸𑀲𑀺. 𑀯𑀭𑀤𑁄𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀪𑀤𑁆𑀤𑀯𑀕𑁆𑀕𑀺𑀬𑀚𑀝𑀺𑀮𑀸𑀤𑀻𑀦𑀁 𑀅𑀜𑁆𑀜𑁂𑀲𑀜𑁆𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀯𑀭𑀥𑀫𑁆𑀫𑀤𑀸𑀬𑀻𑀢𑀺 𑀅𑀢𑁆𑀣𑁄. 𑀯𑀭𑀸𑀳𑀭𑁄𑀢𑀺 𑀯𑀭𑀲𑁆𑀲 𑀫𑀕𑁆𑀕𑀲𑁆𑀲 𑀆𑀳𑀝𑀢𑁆𑀢𑀸 𑀯𑀭𑀸𑀳𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀪𑀕𑀯𑀸 𑀤𑀻𑀧𑀗𑁆𑀓𑀭𑀢𑁄 𑀧𑀪𑀼𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢𑀁 𑀧𑀼𑀭𑀸𑀡𑀫𑀕𑁆𑀕𑀯𑀭𑀫𑀸𑀳𑀭𑀺, 𑀢𑁂𑀦 ‘‘𑀯𑀭𑀸𑀳𑀭𑁄’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑁂𑀦 𑀯𑀭𑁄, 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀭𑀜𑁆𑀜𑀽, 𑀲𑀢𑁆𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀤𑀸𑀦𑁂𑀦 𑀯𑀭𑀤𑁄, 𑀉𑀢𑁆𑀢𑀫𑀧𑀝𑀺𑀧𑀤𑀸𑀳𑀭𑀡𑁂𑀦 𑀯𑀭𑀸𑀳𑀭𑁄. 𑀏𑀢𑁂𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀅𑀥𑀺𑀓𑀲𑁆𑀲 𑀓𑀲𑁆𑀲𑀘𑀺 𑀕𑀼𑀡𑀲𑁆𑀲 𑀅𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑁄.

𑀅𑀧𑀭𑁄 𑀦𑀬𑁄 𑁋 𑀯𑀭𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀜𑁆𑀜𑀽 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀤𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀸𑀳𑀭𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀁 𑀫𑀕𑁆𑀕𑀲𑀘𑁆𑀘𑀫𑀸𑀳𑀭𑀻𑀢𑀺. 𑀢𑀣𑀸 𑀯𑀭𑁄 𑀧𑀼𑀜𑁆𑀜𑀼𑀲𑁆𑀲𑀬𑁂𑀦, 𑀯𑀭𑀜𑁆𑀜𑀽 𑀧𑀜𑁆𑀜𑀼𑀲𑁆𑀲𑀬𑁂𑀦, 𑀯𑀭𑀤𑁄 𑀩𑀼𑀤𑁆𑀥𑀪𑀸𑀯𑀢𑁆𑀣𑀺𑀓𑀸𑀦𑀁 𑀢𑀤𑀼𑀧𑀸𑀬𑀲𑀫𑁆𑀧𑀤𑀸𑀦𑁂𑀦, 𑀯𑀭𑀸𑀳𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀯𑀢𑁆𑀣𑀺𑀓𑀸𑀦𑀁 𑀢𑀤𑀼𑀧𑀸𑀬𑀸𑀳𑀭𑀡𑁂𑀦, 𑀅𑀦𑀼𑀢𑁆𑀢𑀭𑁄 𑀢𑀢𑁆𑀣 𑀢𑀢𑁆𑀣 𑀅𑀲𑀤𑀺𑀲𑀢𑀸𑀬, 𑀅𑀢𑁆𑀢𑀦𑀸 𑀯𑀸 𑀅𑀦𑀸𑀘𑀭𑀺𑀬𑀓𑁄 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀆𑀘𑀭𑀺𑀬𑀪𑀸𑀯𑁂𑀦, 𑀥𑀫𑁆𑀫𑀯𑀭𑀁 𑀅𑀤𑁂𑀲𑀬𑀺 𑀲𑀸𑀯𑀓𑀪𑀸𑀯𑀢𑁆𑀣𑀺𑀓𑀸𑀦𑀁 𑀢𑀤𑀢𑁆𑀣𑀸𑀬 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀯𑀭𑀲𑁆𑀲 𑀤𑁂𑀲𑀦𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀏𑀯𑀁 𑀪𑀕𑀯𑀸 𑀦𑀯𑀯𑀺𑀥𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀦 𑀅𑀢𑁆𑀢𑀦𑁄 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 ¶ 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀬𑀁 𑀯𑀭𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀏𑀲 𑀅𑀜𑁆𑀜𑀸𑀲𑀺, 𑀬𑀜𑁆𑀘 𑀅𑀤𑀸𑀲𑀺, 𑀬𑀜𑁆𑀘 𑀆𑀳𑀭𑀺, 𑀬𑀜𑁆𑀘 𑀤𑁂𑀲𑁂𑀲𑀺, 𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀔𑀻𑀡𑀦𑁆𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧𑁫. 𑀏𑀯𑀁 ¶ 𑀪𑀕𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀜𑁆𑀘 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀜𑁆𑀘 𑀦𑀺𑀲𑁆𑀲𑀸𑀬 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁, 𑀲𑀼𑀢𑀸𑀦𑀼𑀲𑀸𑀭𑁂𑀦 ¶ 𑀘 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦𑀯𑀧𑁆𑀧𑀓𑀸𑀭𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀫𑀺𑀁𑀲𑀼, 𑀢𑁂𑀲𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀕𑀼𑀡𑀁 𑀦𑀺𑀲𑁆𑀲𑀸𑀬 𑀧𑀼𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀔𑀻𑀡𑀁 𑀧𑀼𑀭𑀸𑀡’’𑀦𑁆𑀢𑀺. 𑀢𑀢𑁆𑀣 𑀔𑀻𑀡𑀦𑁆𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀁. 𑀧𑀼𑀭𑀸𑀡𑀦𑁆𑀢𑀺 𑀧𑀼𑀭𑀸𑀢𑀦𑀁. 𑀦𑀯𑀦𑁆𑀢𑀺 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁. 𑀦𑀢𑁆𑀣𑀺 𑀲𑀫𑁆𑀪𑀯𑀦𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀸𑀢𑀼𑀪𑀸𑀯𑀁. 𑀯𑀺𑀭𑀢𑁆𑀢𑀘𑀺𑀢𑁆𑀢𑀸𑀢𑀺 𑀯𑀻𑀢𑀭𑀸𑀕𑀘𑀺𑀢𑁆𑀢𑀸. 𑀆𑀬𑀢𑀺𑀓𑁂 𑀪𑀯𑀲𑁆𑀫𑀺𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀧𑀼𑀦𑀩𑁆𑀪𑀯𑁂. 𑀢𑁂𑀢𑀺 𑀬𑁂𑀲𑀁 𑀔𑀻𑀡𑀁 𑀧𑀼𑀭𑀸𑀡𑀁 𑀦𑀯𑀁 𑀦𑀢𑁆𑀣𑀺 𑀲𑀫𑁆𑀪𑀯𑀁, 𑀬𑁂 𑀘 𑀆𑀬𑀢𑀺𑀓𑁂 𑀪𑀯𑀲𑁆𑀫𑀺𑀁 𑀯𑀺𑀭𑀢𑁆𑀢𑀘𑀺𑀢𑁆𑀢𑀸, 𑀢𑁂 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽. 𑀔𑀻𑀡𑀩𑀻𑀚𑀸𑀢𑀺 𑀉𑀘𑁆𑀙𑀺𑀦𑁆𑀦𑀩𑀻𑀚𑀸. 𑀅𑀯𑀺𑀭𑀽𑀴𑁆𑀳𑀺𑀙𑀦𑁆𑀤𑀸𑀢𑀺 𑀯𑀺𑀭𑀽𑀴𑁆𑀳𑀺𑀙𑀦𑁆𑀤𑀯𑀺𑀭𑀳𑀺𑀢𑀸. 𑀦𑀺𑀩𑁆𑀩𑀦𑁆𑀢𑀻𑀢𑀺 𑀯𑀺𑀚𑁆𑀛𑀸𑀬𑀦𑁆𑀢𑀺. 𑀥𑀻𑀭𑀸𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀸. 𑀬𑀣𑀸𑀬𑀁 𑀧𑀤𑀻𑀧𑁄𑀢𑀺 𑀅𑀬𑀁 𑀧𑀤𑀻𑀧𑁄 𑀯𑀺𑀬.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀫𑁆𑀧𑀺 𑀧𑀼𑀭𑀸𑀡𑀁 𑀅𑀢𑀻𑀢𑀓𑀸𑀮𑀺𑀓𑀁 𑀓𑀫𑁆𑀫𑀁 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀆𑀳𑀭𑀡𑀲𑀫𑀢𑁆𑀣𑀢𑀸𑀬 𑀅𑀔𑀻𑀡𑀁𑀬𑁂𑀯 𑀳𑁄𑀢𑀺, 𑀢𑀁 𑀧𑀼𑀭𑀸𑀡𑀁 𑀓𑀫𑁆𑀫𑀁 𑀬𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀲𑁄𑀲𑀺𑀢𑀢𑁆𑀢𑀸 𑀅𑀕𑁆𑀕𑀺𑀦𑀸 𑀤𑀟𑁆𑀠𑀩𑀻𑀚𑀫𑀺𑀯 𑀆𑀬𑀢𑀺𑀁 𑀯𑀺𑀧𑀸𑀓𑀤𑀸𑀦𑀸𑀲𑀫𑀢𑁆𑀣𑀢𑀸𑀬 𑀔𑀻𑀡𑀁. 𑀬𑀜𑁆𑀘 𑀦𑁂𑀲𑀁 𑀩𑀼𑀤𑁆𑀥𑀧𑀽𑀚𑀸𑀤𑀺𑀯𑀲𑁂𑀦 𑀇𑀤𑀸𑀦𑀺 𑀧𑀯𑀢𑁆𑀢𑀫𑀸𑀦𑀁 𑀓𑀫𑁆𑀫𑀁 𑀦𑀯𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀢𑀡𑁆𑀳𑀸𑀧𑀳𑀸𑀦𑁂𑀦𑁂𑀯 𑀙𑀺𑀦𑁆𑀦𑀫𑀽𑀮𑀧𑀸𑀤𑀧𑀧𑀼𑀧𑁆𑀨𑀫𑀺𑀯 𑀆𑀬𑀢𑀺𑀁 𑀨𑀮𑀤𑀸𑀦𑀸𑀲𑀫𑀢𑁆𑀣𑀢𑀸𑀬 𑀬𑁂𑀲𑀁 𑀦𑀢𑁆𑀣𑀺 𑀲𑀫𑁆𑀪𑀯𑀁, 𑀬𑁂 𑀘 𑀢𑀡𑁆𑀳𑀸𑀧𑀳𑀸𑀦𑁂𑀦𑁂𑀯 𑀆𑀬𑀢𑀺𑀓𑁂 𑀪𑀯𑀲𑁆𑀫𑀺𑀁 𑀯𑀺𑀭𑀢𑁆𑀢𑀘𑀺𑀢𑁆𑀢𑀸, 𑀢𑁂 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽 ‘‘𑀓𑀫𑁆𑀫𑀁 ¶ 𑀔𑁂𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀩𑀻𑀚’’𑀦𑁆𑀢𑀺 (𑀅. 𑀦𑀺. 𑁩.𑁭𑁭) 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀓𑀫𑁆𑀫𑀓𑁆𑀔𑀬𑁂𑀦𑁂𑀯 𑀔𑀻𑀡𑀢𑁆𑀢𑀸 𑀔𑀻𑀡𑀩𑀻𑀚𑀸. 𑀬𑁄𑀧𑀺 𑀧𑀼𑀩𑁆𑀩𑁂 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀢𑀸𑀬 𑀯𑀺𑀭𑀽𑀴𑁆𑀳𑀺𑀬𑀸 𑀙𑀦𑁆𑀤𑁄 𑀅𑀳𑁄𑀲𑀺. 𑀢𑀲𑁆𑀲𑀧𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦𑁂𑀯 𑀧𑀳𑀻𑀦𑀢𑁆𑀢𑀸 𑀧𑀼𑀩𑁆𑀩𑁂 𑀯𑀺𑀬 𑀘𑀼𑀢𑀺𑀓𑀸𑀮𑁂 𑀅𑀲𑀫𑁆𑀪𑀯𑁂𑀦 𑀅𑀯𑀺𑀭𑀽𑀴𑁆𑀳𑀺𑀙𑀦𑁆𑀤𑀸 𑀥𑀺𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀥𑀻𑀭𑀸 𑀘𑀭𑀺𑀫𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀬𑀣𑀸𑀬𑀁 𑀧𑀤𑀻𑀧𑁄 𑀦𑀺𑀩𑁆𑀩𑀼𑀢𑁄, 𑀏𑀯𑀁 𑀦𑀺𑀩𑁆𑀩𑀦𑁆𑀢𑀺, 𑀧𑀼𑀦 ‘‘𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸’’𑀢𑀺 𑀏𑀯𑀫𑀸𑀤𑀺𑀁 𑀧𑀜𑁆𑀜𑀢𑁆𑀢𑀺𑀧𑀣𑀁 𑀅𑀘𑁆𑀘𑁂𑀦𑁆𑀢𑀻𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀦𑀕𑀭𑀤𑁂𑀯𑀢𑀸𑀦𑀁 𑀧𑀽𑀚𑀦𑀢𑁆𑀣𑀸𑀬 𑀚𑀸𑀮𑀺𑀢𑁂𑀲𑀼 𑀧𑀤𑀻𑀧𑁂𑀲𑀼 𑀏𑀓𑁄 𑀧𑀤𑀻𑀧𑁄 𑀯𑀺𑀚𑁆𑀛𑀸𑀬𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀬𑀁 𑀧𑀤𑀻𑀧𑁄’’𑀢𑀺.

𑀏𑀯𑀁 𑀪𑀕𑀯𑀸 𑀬𑁂 𑀢𑀁 𑀧𑀼𑀭𑀺𑀫𑀸𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀯𑀼𑀢𑁆𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁, 𑀲𑀼𑀢𑀸𑀦𑀼𑀲𑀸𑀭𑁂𑀦 𑀘 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦𑀯𑀧𑁆𑀧𑀓𑀸𑀭𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀫𑀺𑀁𑀲𑀼, 𑀢𑁂𑀲𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀦𑁆𑀢𑁄 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 ¶ 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 ¶ 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀦𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀲𑀗𑁆𑀖𑁂 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀓𑀼𑀮𑀲𑁆𑀲 𑀲𑁄𑀢𑁆𑀣𑀺 𑀅𑀳𑁄𑀲𑀺, 𑀲𑀩𑁆𑀩𑀽𑀧𑀤𑁆𑀤𑀯𑀸 𑀯𑀽𑀧𑀲𑀫𑀺𑀁𑀲𑀼, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀬𑀸𑀦𑀻𑀥𑀸𑀢𑀺𑀕𑀸𑀣𑀸𑀢𑁆𑀢𑀬𑀯𑀡𑁆𑀡𑀦𑀸

𑁧𑁬. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀪𑀕𑀯𑀢𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀫𑀸𑀦𑁂𑀦 𑀦𑀸𑀕𑀭𑀲𑁆𑀲 𑀲𑁄𑀢𑁆𑀣𑀺 𑀓𑀢𑀸, 𑀫𑀬𑀸𑀧𑀺 𑀦𑀸𑀕𑀭𑀲𑁆𑀲 𑀲𑁄𑀢𑁆𑀣𑀺𑀢𑁆𑀣𑀁 𑀭𑀢𑀦𑀢𑁆𑀢𑀬𑀕𑀼𑀡𑀁 𑀦𑀺𑀲𑁆𑀲𑀸𑀬 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑀲𑀸𑀦𑁂 𑀕𑀸𑀣𑀸𑀢𑁆𑀢𑀬𑀁 𑀅𑀪𑀸𑀲𑀺 ‘‘𑀬𑀸𑀦𑀻𑀥 𑀪𑀽𑀢𑀸𑀦𑀻’’𑀢𑀺 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑁄 𑀬𑀣𑀸 𑀮𑁄𑀓𑀳𑀺𑀢𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁂𑀳𑀺 𑀆𑀕𑀦𑁆𑀢𑀩𑁆𑀩𑀁 ¶ , 𑀢𑀣𑀸 𑀆𑀕𑀢𑀢𑁄 𑀬𑀣𑀸 𑀘 𑀢𑁂𑀳𑀺 𑀕𑀦𑁆𑀢𑀩𑁆𑀩𑀁, 𑀢𑀣𑀸 𑀕𑀢𑀢𑁄 𑀬𑀣𑀸 𑀘 𑀢𑁂𑀳𑀺 𑀆𑀚𑀸𑀦𑀺𑀢𑀩𑁆𑀩𑀁, 𑀢𑀣𑀸 𑀆𑀚𑀸𑀦𑀦𑀢𑁄, 𑀬𑀣𑀸 𑀘 𑀚𑀸𑀦𑀺𑀢𑀩𑁆𑀩𑀁, 𑀢𑀣𑀸 𑀚𑀸𑀦𑀦𑀢𑁄, 𑀬𑀜𑁆𑀘 𑀢𑀣𑁂𑀯 𑀳𑁄𑀢𑀺, 𑀢𑀲𑁆𑀲 𑀕𑀤𑀦𑀢𑁄 𑀘 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀲𑁄 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀼𑀧𑁆𑀨𑀕𑀦𑁆𑀥𑀸𑀤𑀺𑀦𑀸 𑀩𑀳𑀺 𑀦𑀺𑀩𑁆𑀩𑀢𑁆𑀢𑁂𑀦 𑀉𑀧𑀓𑀸𑀭𑀓𑁂𑀦, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀸𑀤𑀺𑀦𑀸 𑀘 𑀅𑀢𑁆𑀢𑀦𑀺 𑀦𑀺𑀩𑁆𑀩𑀢𑁆𑀢𑁂𑀦 𑀅𑀢𑀺𑀯𑀺𑀬 𑀧𑀽𑀚𑀺𑀢𑁄, 𑀢𑀲𑁆𑀫𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀩𑁆𑀩𑀁 𑀤𑁂𑀯𑀧𑀭𑀺𑀲𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀆𑀳 ‘‘𑀢𑀣𑀸𑀕𑀢𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁, 𑀩𑀼𑀤𑁆𑀥𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺.

𑁧𑁭. 𑀬𑀲𑁆𑀫𑀸 𑀧𑀦 𑀥𑀫𑁆𑀫𑁂 𑀫𑀕𑁆𑀕𑀥𑀫𑁆𑀫𑁄 𑀬𑀣𑀸 𑀬𑀼𑀕𑀦𑀤𑁆𑀥𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀕𑀦𑁆𑀢𑀩𑁆𑀩𑀁 𑀓𑀺𑀮𑁂𑀲𑀧𑀓𑁆𑀔𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁂𑀦, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀦𑀺𑀩𑁆𑀩𑀸𑀦𑀥𑀫𑁆𑀫𑁄𑀧𑀺 𑀬𑀣𑀸 𑀕𑀢𑁄 𑀧𑀜𑁆𑀜𑀸𑀬 𑀧𑀝𑀺𑀯𑀺𑀤𑁆𑀥𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀝𑀺𑀯𑀺𑀖𑀸𑀢𑀸𑀬 𑀲𑀫𑁆𑀧𑀚𑁆𑀚𑀢𑀺, 𑀩𑀼𑀤𑁆𑀥𑀸𑀤𑀻𑀳𑀺 𑀢𑀣𑀸 𑀅𑀯𑀕𑀢𑁄, 𑀢𑀲𑁆𑀫𑀸 ‘‘𑀢𑀣𑀸𑀕𑀢𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀲𑀗𑁆𑀖𑁄𑀧𑀺 𑀬𑀣𑀸 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁂𑀳𑀺 𑀕𑀦𑁆𑀢𑀩𑁆𑀩𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦, 𑀢𑀣𑀸 𑀕𑀢𑁄𑀢𑀺 ‘‘𑀢𑀣𑀸𑀕𑀢𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀅𑀯𑀲𑁂𑀲𑀕𑀸𑀣𑀸𑀤𑁆𑀯𑀬𑁂𑀧𑀺 𑀢𑀣𑀸𑀕𑀢𑀁 𑀥𑀫𑁆𑀫𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀼, 𑀢𑀣𑀸𑀕𑀢𑀁 𑀲𑀗𑁆𑀖𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀏𑀯𑀁 ¶ 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀁 𑀕𑀸𑀣𑀸𑀢𑁆𑀢𑀬𑀁 𑀪𑀸𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑁂𑀯𑀧𑀼𑀭𑀫𑁂𑀯 𑀕𑀢𑁄 𑀲𑀤𑁆𑀥𑀺𑀁 𑀤𑁂𑀯𑀧𑀭𑀺𑀲𑀸𑀬. 𑀪𑀕𑀯𑀸 𑀧𑀦 𑀢𑀤𑁂𑀯 𑀭𑀢𑀦𑀲𑀼𑀢𑁆𑀢𑀁 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀤𑁂𑀲𑁂𑀲𑀺, 𑀧𑀼𑀦 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀏𑀯𑀁 𑀬𑀸𑀯 𑀲𑀢𑁆𑀢𑀫𑀤𑀺𑀯𑀲𑀁 𑀤𑁂𑀲𑁂𑀲𑀺, 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀣𑁂𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀅𑀟𑁆𑀠𑀫𑀸𑀲𑀫𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀺𑀢𑁆𑀯𑀸 𑀭𑀸𑀚𑀽𑀦𑀁 ‘‘𑀕𑀘𑁆𑀙𑀸𑀫𑀸’’𑀢𑀺 𑀧𑀝𑀺𑀯𑁂𑀤𑁂𑀲𑀺. 𑀢𑀢𑁄 𑀭𑀸𑀚𑀸𑀦𑁄 𑀤𑀺𑀕𑀼𑀡𑁂𑀦 𑀲𑀓𑁆𑀓𑀸𑀭𑁂𑀦 ¶ 𑀧𑀼𑀦 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀪𑀕𑀯𑀦𑁆𑀢𑀁 ¶ 𑀕𑀗𑁆𑀕𑀸𑀢𑀻𑀭𑀁 𑀦𑀬𑀺𑀁𑀲𑀼. 𑀕𑀗𑁆𑀕𑀸𑀬 𑀦𑀺𑀩𑁆𑀩𑀢𑁆𑀢𑀸 𑀦𑀸𑀕𑀭𑀸𑀚𑀸𑀦𑁄 𑀘𑀺𑀦𑁆𑀢𑁂𑀲𑀼𑀁 ‘‘𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀫𑀬𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑀸 𑀦𑀸𑀯𑀸𑀬𑁄 𑀫𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑁂 𑀏𑀯 𑀧𑀮𑁆𑀮𑀗𑁆𑀓𑁂 𑀧𑀜𑁆𑀜𑀧𑁂𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀉𑀤𑀓𑀁 𑀓𑀭𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀭𑀢𑀦𑀦𑀸𑀯𑀫𑀸𑀭𑀽𑀴𑁆𑀳𑁄, 𑀧𑀜𑁆𑀘 𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀧𑀜𑁆𑀘𑀲𑀢𑀁 𑀦𑀸𑀯𑀸𑀬𑁄 𑀅𑀪𑀺𑀭𑀽𑀴𑁆𑀳𑀸. 𑀦𑀸𑀕𑀭𑀸𑀚𑀸𑀦𑁄 𑀪𑀕𑀯𑀦𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀲𑀼𑀁. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀸𑀕𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀤𑀺𑀩𑁆𑀩𑁂𑀳𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀳𑀺 𑀫𑀳𑀸𑀤𑀸𑀦𑀁 𑀅𑀓𑀁𑀲𑀼, 𑀪𑀕𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺.

𑀪𑀽𑀫𑀝𑁆𑀞𑀸 𑀤𑁂𑀯𑀸 ‘‘𑀫𑀦𑀼𑀲𑁆𑀲𑀸 𑀘 𑀦𑀸𑀕𑀸 𑀘 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀫𑀬𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀦𑀧𑁆𑀧𑀕𑀼𑀫𑁆𑀩𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀻𑀲𑀼 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀓𑁆𑀔𑀺𑀧𑀺𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀪𑀯𑀦𑀁, 𑀢𑀸𑀯 𑀫𑀳𑀸𑀲𑀓𑁆𑀓𑀸𑀭𑀯𑀺𑀲𑁂𑀲𑁄 𑀦𑀺𑀩𑁆𑀩𑀢𑁆𑀢𑀺. 𑀩𑀺𑀫𑁆𑀩𑀺𑀲𑀸𑀭𑁄𑀧𑀺 𑀮𑀺𑀘𑁆𑀙𑀯𑀻𑀳𑀺 𑀆𑀕𑀢𑀓𑀸𑀮𑁂 𑀓𑀢𑀲𑀓𑁆𑀓𑀸𑀭𑀢𑁄 𑀤𑀺𑀕𑀼𑀡𑀫𑀓𑀸𑀲𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀘𑀳𑀺 𑀤𑀺𑀯𑀲𑁂𑀳𑀺 𑀪𑀕𑀯𑀦𑁆𑀢𑀁 𑀭𑀸𑀚𑀕𑀳𑀁 𑀆𑀦𑁂𑀲𑀺.

𑀭𑀸𑀚𑀕𑀳𑀫𑀦𑀼𑀧𑁆𑀧𑀢𑁆𑀢𑁂 𑀪𑀕𑀯𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀬𑀫𑀦𑁆𑀢𑀭𑀓𑀣𑀸 𑀉𑀤𑀧𑀸𑀤𑀺 ‘‘𑀅𑀳𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀦𑀼𑀪𑀸𑀯𑁄, 𑀬𑀁 𑀉𑀤𑁆𑀤𑀺𑀲𑁆𑀲 𑀕𑀗𑁆𑀕𑀸𑀬 𑀑𑀭𑀢𑁄 𑀘 𑀧𑀸𑀭𑀢𑁄 𑀘 𑀅𑀝𑁆𑀞𑀬𑁄𑀚𑀦𑁄 𑀪𑀽𑀫𑀺𑀪𑀸𑀕𑁄 𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀲𑀫𑀁 𑀓𑀢𑁆𑀯𑀸 𑀯𑀸𑀮𑀼𑀓𑀸𑀬 𑀑𑀓𑀺𑀭𑀺𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀬𑁄𑀚𑀦𑀧𑁆𑀧𑀫𑀸𑀡𑀁 𑀕𑀗𑁆𑀕𑀸𑀬 𑀉𑀤𑀓𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀁, 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀁, 𑀢𑀸𑀯 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀲𑁆𑀲𑀺𑀢𑀸𑀦𑀻’’𑀢𑀺. 𑀪𑀕𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀕𑀦𑁆𑀢𑁆𑀯𑀸 𑀫𑀡𑁆𑀟𑀮𑀫𑀸𑀴𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 ¶ 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺. 𑀪𑀺𑀓𑁆𑀔𑀽 𑀲𑀩𑁆𑀩𑀁 ¶ 𑀆𑀭𑁄𑀘𑁂𑀲𑀼𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀁 𑀧𑀽𑀚𑀸𑀯𑀺𑀲𑁂𑀲𑁄 𑀫𑀬𑁆𑀳𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀦 𑀦𑀸𑀕𑀤𑁂𑀯𑀩𑁆𑀭𑀳𑁆𑀫𑀸𑀦𑀼𑀪𑀸𑀯𑁂𑀦, 𑀅𑀧𑀺𑀘 𑀔𑁄 𑀧𑀼𑀩𑁆𑀩𑁂 𑀅𑀧𑁆𑀧𑀫𑀢𑁆𑀢𑀓𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀪𑀺𑀓𑁆𑀔𑀽 𑀆𑀳𑀁𑀲𑀼 ‘‘𑀦 𑀫𑀬𑀁, 𑀪𑀦𑁆𑀢𑁂, 𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀧𑀭𑀺𑀘𑁆𑀘𑀸𑀕𑀁 𑀚𑀸𑀦𑀸𑀫, 𑀲𑀸𑀥𑀼 𑀦𑁄 𑀪𑀕𑀯𑀸 𑀢𑀣𑀸 𑀓𑀣𑁂𑀢𑀼, 𑀬𑀣𑀸 𑀫𑀬𑀁 𑀢𑀁 𑀚𑀸𑀦𑁂𑀬𑁆𑀬𑀸𑀫𑀸’’𑀢𑀺.

𑀪𑀕𑀯𑀸 𑀆𑀳 𑁋 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀢𑀓𑁆𑀓𑀲𑀺𑀮𑀸𑀬𑀁 𑀲𑀗𑁆𑀔𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀼𑀲𑀻𑀫𑁄 𑀦𑀸𑀫 𑀫𑀸𑀡𑀯𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀬𑁂𑀦. 𑀲𑁄 𑀏𑀓𑀤𑀺𑀯𑀲𑀁 𑀧𑀺𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀢𑀁 𑀧𑀺𑀢𑀸 𑀆𑀳 ‘‘𑀓𑀺𑀁, 𑀢𑀸𑀢, 𑀲𑀼𑀲𑀻𑀫𑀸’’𑀢𑀺? 𑀲𑁄 𑀆𑀳 ‘‘𑀇𑀘𑁆𑀙𑀸𑀫𑀳𑀁, 𑀢𑀸𑀢, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 ¶ , 𑀢𑀸𑀢, 𑀲𑀼𑀲𑀻𑀫, 𑀅𑀲𑀼𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀫𑀫 𑀲𑀳𑀸𑀬𑀓𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀓𑀳𑀸𑀧𑀡𑀲𑀳𑀲𑁆𑀲𑀁 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀧𑀘𑀸𑀭𑀬𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦𑀺𑀯𑁂𑀤𑁂𑀲𑀺. 𑀆𑀘𑀭𑀺𑀬𑁄 ‘‘𑀫𑀫 𑀲𑀳𑀸𑀬𑀓𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀫𑀸𑀡𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀸𑀳𑀼𑀦𑁂𑀬𑁆𑀬𑀯𑀢𑁆𑀢𑀫𑀓𑀸𑀲𑀺. 𑀲𑁄 𑀅𑀤𑁆𑀥𑀸𑀦𑀓𑀺𑀮𑀫𑀣𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀆𑀘𑀭𑀺𑀬𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼𑀁 𑀑𑀓𑀸𑀲𑀁 𑀬𑀸𑀘𑀺. 𑀆𑀘𑀭𑀺𑀬𑁄 𑀑𑀓𑀸𑀲𑀁 𑀓𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀲𑀺.

𑀲𑁄 𑀮𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄, 𑀩𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄, 𑀕𑀳𑀺𑀢𑀕𑀳𑀺𑀢𑀜𑁆𑀘 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀫𑀺𑀯 𑀅𑀯𑀺𑀦𑀲𑁆𑀲𑀫𑀸𑀦𑀁 𑀥𑀸𑀭𑁂𑀦𑁆𑀢𑁄, 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀁 𑀲𑀺𑀧𑁆𑀧𑀁 𑀓𑀢𑀺𑀧𑀬𑀫𑀸𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀧𑁂𑀲𑀺. 𑀲𑁄 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀆𑀤𑀺𑀫𑀚𑁆𑀛𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀧𑀭𑀺𑀬𑁄𑀲𑀸𑀦𑀁. 𑀅𑀣 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ‘‘𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 ¶ 𑀆𑀤𑀺𑀫𑀚𑁆𑀛𑀫𑁂𑀯 𑀧𑀲𑁆𑀲𑀸𑀫𑀺, 𑀦𑁄 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀆𑀘𑀭𑀺𑀬𑁄 𑀆𑀳 ‘‘𑀅𑀳𑀫𑁆𑀧𑀺, 𑀢𑀸𑀢, 𑀏𑀯𑀫𑁂𑀯𑀸’’𑀢𑀺. 𑀅𑀣 𑀓𑁄, 𑀆𑀘𑀭𑀺𑀬, 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀻𑀢𑀺? 𑀇𑀲𑀺𑀧𑀢𑀦𑁂, 𑀢𑀸𑀢, 𑀇𑀲𑀬𑁄 𑀅𑀢𑁆𑀣𑀺, 𑀢𑁂 𑀚𑀸𑀦𑁂𑀬𑁆𑀬𑀼𑀦𑁆𑀢𑀺. 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀸𑀫𑀺, 𑀆𑀘𑀭𑀺𑀬𑀸𑀢𑀺? 𑀧𑀼𑀘𑁆𑀙, 𑀢𑀸𑀢, 𑀬𑀣𑀸𑀲𑀼𑀔𑀦𑁆𑀢𑀺. 𑀲𑁄 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀅𑀧𑀺, 𑀪𑀦𑁆𑀢𑁂, 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀣𑀸’’𑀢𑀺? 𑀆𑀫, 𑀆𑀯𑀼𑀲𑁄, 𑀚𑀸𑀦𑀸𑀫𑀸𑀢𑀺. 𑀢𑀁 𑀫𑀫𑁆𑀧𑀺 𑀲𑀺𑀓𑁆𑀔𑀸𑀧𑁂𑀣𑀸𑀢𑀺. 𑀢𑁂𑀦 𑀳𑀸𑀯𑀼𑀲𑁄, 𑀧𑀩𑁆𑀩𑀚𑀸𑀳𑀺, 𑀦 𑀲𑀓𑁆𑀓𑀸 𑀅𑀧𑀩𑁆𑀩𑀚𑀺𑀢𑁂𑀦 𑀲𑀺𑀓𑁆𑀔𑀸𑀧𑁂𑀢𑀼𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣 𑀯𑀸 𑀫𑀁, 𑀬𑀁 𑀯𑀸 𑀇𑀘𑁆𑀙𑀣, 𑀢𑀁 𑀓𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀁 ¶ 𑀚𑀸𑀦𑀸𑀧𑁂𑀣𑀸𑀢𑀺. 𑀢𑁂 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑀸 ‘‘𑀏𑀯𑀁 𑀢𑁂 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀲𑁄 𑀢𑀢𑁆𑀣 𑀲𑀺𑀓𑁆𑀔𑀦𑁆𑀢𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀦 𑀘𑀺𑀭𑁂𑀦𑁂𑀯 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀲𑀓𑀮𑀩𑀸𑀭𑀸𑀡𑀲𑀺𑀬𑀁 ‘‘𑀲𑀼𑀲𑀻𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀲𑀫𑁆𑀧𑀦𑁆𑀦𑀧𑀭𑀺𑀯𑀸𑀭𑁄. 𑀲𑁄 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦 𑀘𑀺𑀭𑁂𑀦𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀫𑀳𑀸𑀚𑀦𑀓𑀸𑀬𑁄 𑀘 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀣𑀽𑀧𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀅𑀣 𑀔𑁄 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀧𑀼𑀢𑁆𑀢𑁄 𑀫𑁂 𑀘𑀺𑀭𑀕𑀢𑁄, 𑀦 𑀘𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀫𑀻’’𑀢𑀺 𑀧𑀼𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀢𑀓𑁆𑀓𑀲𑀺𑀮𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀩𑀳𑀽𑀲𑀼 𑀏𑀓𑁄𑀧𑀺 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀲𑀼𑀲𑀻𑀫𑁄 𑀦𑀸𑀫 𑀫𑀸𑀡𑀯𑁄 𑀇𑀥 𑀆𑀕𑀢𑁄 𑀅𑀢𑁆𑀣𑀺, 𑀅𑀧𑀺 𑀦𑀼 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀣𑀸’’𑀢𑀺? 𑀢𑁂 ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀚𑀸𑀦𑀸𑀫, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀳𑀼𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 ¶ 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀬𑀫𑀲𑁆𑀲 𑀣𑀽𑀧𑁄 𑀧𑀢𑀺𑀝𑁆𑀞𑀸𑀧𑀺𑀢𑁄’’𑀢𑀺 𑀆𑀳𑀁𑀲𑀼. 𑀲𑁄 𑀪𑀽𑀫𑀺𑀁 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀘 𑀧𑀭𑀺𑀤𑁂𑀯𑀺𑀢𑁆𑀯𑀸 𑀘 ¶ 𑀢𑀁 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀢𑀺𑀡𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑁂𑀦 𑀯𑀸𑀮𑀼𑀓𑀁 𑀆𑀦𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀘𑁂𑀢𑀺𑀬𑀗𑁆𑀕𑀡𑁂 𑀑𑀓𑀺𑀭𑀺𑀢𑁆𑀯𑀸 𑀓𑀫𑀡𑁆𑀟𑀮𑀼𑀢𑁄 𑀉𑀤𑀓𑁂𑀦 𑀲𑀫𑀦𑁆𑀢𑀢𑁄 𑀪𑀽𑀫𑀺𑀁 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑁂𑀦 𑀧𑀝𑀸𑀓𑀁 𑀆𑀭𑁄𑀧𑁂𑀢𑁆𑀯𑀸 𑀣𑀽𑀧𑀲𑁆𑀲 𑀉𑀧𑀭𑀺 𑀅𑀢𑁆𑀢𑀦𑁄 𑀙𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀏𑀯𑀁 𑀅𑀢𑀻𑀢𑀁 𑀤𑁂𑀲𑁂𑀢𑁆𑀯𑀸 𑀚𑀸𑀢𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀅𑀦𑀼𑀲𑀦𑁆𑀥𑁂𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. ‘‘𑀲𑀺𑀬𑀸 𑀔𑁄 𑀧𑀦 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀫𑀲𑁆𑀲 ‘𑀅𑀜𑁆𑀜𑁄 𑀦𑀽𑀦 𑀢𑁂𑀦 𑀲𑀫𑀬𑁂𑀦 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀻’𑀢𑀺, 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁, 𑀫𑀬𑀸 𑀲𑀼𑀲𑀻𑀫𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀗𑁆𑀕𑀡𑁂 𑀢𑀺𑀡𑀸𑀦𑀺 𑀉𑀤𑁆𑀥𑀝𑀸𑀦𑀺, 𑀢𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑀁 𑀯𑀺𑀕𑀢𑀔𑀸𑀡𑀼𑀓𑀡𑁆𑀝𑀓𑀁 𑀓𑀢𑁆𑀯𑀸 𑀲𑀫𑀁 𑀲𑀼𑀤𑁆𑀥𑀫𑀓𑀁𑀲𑀼. 𑀫𑀬𑀸 𑀢𑀢𑁆𑀣 𑀯𑀸𑀮𑀼𑀓𑀸 𑀑𑀓𑀺𑀡𑁆𑀡𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑁂 𑀯𑀸𑀮𑀼𑀓𑀁 𑀑𑀓𑀺𑀭𑀺𑀁𑀲𑀼. 𑀫𑀬𑀸 𑀢𑀢𑁆𑀣 𑀯𑀦𑀓𑀼𑀲𑀼𑀫𑁂𑀳𑀺 𑀧𑀽𑀚𑀸 𑀓𑀢𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀦𑀯𑀬𑁄𑀚𑀦𑁂 𑀫𑀕𑁆𑀕𑁂 𑀣𑀮𑁂 𑀘 𑀉𑀤𑀓𑁂 𑀘 𑀦𑀸𑀦𑀸𑀧𑀼𑀧𑁆𑀨𑁂𑀳𑀺 ¶ 𑀧𑀼𑀧𑁆𑀨𑀲𑀦𑁆𑀣𑀭𑀫𑀓𑀁𑀲𑀼. 𑀫𑀬𑀸 𑀢𑀢𑁆𑀣 𑀓𑀫𑀡𑁆𑀟𑀮𑀼𑀤𑀓𑁂𑀦 𑀪𑀽𑀫𑀺 𑀧𑀭𑀺𑀧𑁆𑀨𑁄𑀲𑀺𑀢𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀯𑁂𑀲𑀸𑀮𑀺𑀬𑀁 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀬𑀸 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀧𑀝𑀸𑀓𑀸 𑀆𑀭𑁄𑀧𑀺𑀢𑀸, 𑀙𑀢𑁆𑀢𑀜𑁆𑀘 𑀩𑀤𑁆𑀥𑀁, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀧𑀝𑀸𑀓𑀸 𑀘 𑀆𑀭𑁄𑀧𑀺𑀢𑀸, 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀘 𑀉𑀲𑁆𑀲𑀺𑀢𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀫𑀬𑁆𑀳𑀁 𑀧𑀽𑀚𑀸𑀯𑀺𑀲𑁂𑀲𑁄 𑀦𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄 ¶ , 𑀦 𑀦𑀸𑀕𑀤𑁂𑀯𑀩𑁆𑀭𑀳𑁆𑀫𑀸𑀦𑀼𑀪𑀸𑀯𑁂𑀦, 𑀅𑀧𑀺𑀘 𑀔𑁄 𑀅𑀧𑁆𑀧𑀫𑀢𑁆𑀢𑀓𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀥𑀫𑁆𑀫𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀇𑀫𑀁 𑀕𑀸𑀣𑀫𑀪𑀸𑀲𑀺 𑁋

‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸, 𑀧𑀲𑁆𑀲𑁂 𑀘𑁂 𑀯𑀺𑀧𑀼𑀮𑀁 𑀲𑀼𑀔𑀁;

𑀘𑀚𑁂 𑀫𑀢𑁆𑀢𑀸𑀲𑀼𑀔𑀁 𑀥𑀻𑀭𑁄, 𑀲𑀫𑁆𑀧𑀲𑁆𑀲𑀁 𑀯𑀺𑀧𑀼𑀮𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁨𑁯𑁦);

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀺𑀭𑁄𑀓𑀼𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁

𑀇𑀤𑀸𑀦𑀺 ¶ ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀭𑀢𑀦𑀲𑀼𑀢𑁆𑀢𑀸𑀦𑀦𑁆𑀢𑀭𑀁 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀢𑀺𑀭𑁄𑀓𑀼𑀝𑁆𑀝𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁 𑀯𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀢𑀢𑁆𑀣 𑀇𑀤𑀜𑁆𑀳𑀺 𑀢𑀺𑀭𑁄𑀓𑀼𑀝𑁆𑀝𑀁 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀪𑀕𑀯𑀢𑀸 𑀅𑀯𑀼𑀢𑁆𑀢𑀫𑁆𑀧𑀺 𑀬𑀸𑀬𑀁 𑀇𑀢𑁄 𑀧𑀼𑀩𑁆𑀩𑁂 𑀦𑀸𑀦𑀧𑁆𑀧𑀓𑀸𑀭𑁂𑀦 𑀓𑀼𑀲𑀮𑀓𑀫𑁆𑀫𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀢𑁆𑀣 𑀧𑀫𑀸𑀤𑀁 𑀆𑀧𑀚𑁆𑀚𑀫𑀸𑀦𑁄 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀳𑀺 𑀯𑀺𑀲𑀺𑀝𑁆𑀞𑀢𑀭𑁂𑀧𑀺 𑀞𑀸𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀬𑀲𑁆𑀫𑀸 𑀏𑀯𑀭𑀽𑀧𑁂𑀲𑀼 𑀧𑁂𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦 𑀏𑀢𑁆𑀣 𑀧𑀫𑀸𑀤𑁄 𑀓𑀭𑀡𑀻𑀬𑁄𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀬𑁂𑀳𑀺 𑀘 𑀪𑀽𑀢𑁂𑀳𑀺 𑀉𑀧𑀤𑁆𑀤𑀼𑀢𑀸𑀬 𑀯𑁂𑀲𑀸𑀮𑀺𑀬𑀸 𑀉𑀧𑀤𑁆𑀤𑀯𑀯𑀽𑀧𑀲𑀫𑀦𑀢𑁆𑀣𑀁 𑀭𑀢𑀦𑀲𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀢𑁂𑀲𑀼 𑀏𑀓𑀘𑁆𑀘𑀸𑀦𑀺 𑀏𑀯𑀭𑀽𑀧𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀸 𑀯𑀼𑀢𑁆𑀢𑀦𑁆𑀢𑀺.

𑀇𑀤𑀫𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀼𑀫𑁄𑀤𑀦𑀸𑀓𑀣𑀸

𑀬𑀲𑁆𑀫𑀸 ¶ 𑀧𑀦𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑁋

‘‘𑀬𑁂𑀦 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀢𑀺𑀭𑁄𑀓𑀼𑀝𑁆𑀝𑀁 𑀧𑀓𑀸𑀲𑀺𑀢𑀁;

𑀧𑀓𑀸𑀲𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀓𑀬𑀺𑀭𑀫𑀸𑀦𑀸 𑀬𑀣𑀸𑀓𑁆𑀓𑀫𑀁;

𑀲𑀼𑀓𑀢𑀸 𑀳𑁄𑀢𑀺 𑀢𑀲𑁆𑀫𑀸𑀳𑀁, 𑀓𑀭𑀺𑀲𑁆𑀲𑀸𑀫𑀺 𑀢𑀣𑁂𑀯 𑀢𑀁’’.

𑀓𑁂𑀦 𑀧𑀦𑁂𑀢𑀁 𑀧𑀓𑀸𑀲𑀺𑀢𑀁, 𑀓𑀢𑁆𑀣 𑀓𑀤𑀸 𑀓𑀲𑁆𑀫𑀸 𑀘𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀪𑀕𑀯𑀢𑀸 𑀧𑀓𑀸𑀲𑀺𑀢𑀁, 𑀢𑀁 𑀔𑁄 𑀧𑀦 𑀭𑀸𑀚𑀕𑀳𑁂 𑀤𑀼𑀢𑀺𑀬𑀤𑀺𑀯𑀲𑁂 ¶ 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀦𑀼𑀫𑁄𑀤𑀦𑀢𑁆𑀣𑀁. 𑀇𑀫𑀲𑁆𑀲 𑀘𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀅𑀬𑀫𑁂𑀢𑁆𑀣 𑀯𑀺𑀢𑁆𑀣𑀸𑀭𑀓𑀣𑀸 𑀓𑀣𑁂𑀢𑀩𑁆𑀩𑀸 𑁋

𑀇𑀢𑁄 ¶ 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀓𑀸𑀲𑀺 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸. 𑀢𑀲𑁆𑀲 𑀲𑀺𑀭𑀺𑀫𑀸 𑀦𑀸𑀫 𑀤𑁂𑀯𑀻, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀨𑀼𑀲𑁆𑀲𑁄 𑀦𑀸𑀫 𑀩𑁄𑀥𑀺𑀲𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀚𑀬𑀲𑁂𑀦𑁄 𑀭𑀸𑀚𑀸 ‘‘𑀫𑀫 𑀧𑀼𑀢𑁆𑀢𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄, 𑀫𑀬𑁆𑀳𑀫𑁂𑀯 𑀩𑀼𑀤𑁆𑀥𑁄, 𑀫𑀬𑁆𑀳𑀁 𑀥𑀫𑁆𑀫𑁄, 𑀫𑀬𑁆𑀳𑀁 𑀲𑀗𑁆𑀖𑁄’’𑀢𑀺 𑀫𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀩𑁆𑀩𑀓𑀸𑀮𑀁 𑀲𑀬𑀫𑁂𑀯 𑀉𑀧𑀝𑁆𑀞𑀳𑀢𑀺, 𑀦 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀤𑁂𑀢𑀺.

𑀪𑀕𑀯𑀢𑁄 𑀓𑀦𑀺𑀝𑁆𑀞𑀪𑀸𑀢𑀭𑁄 𑀯𑁂𑀫𑀸𑀢𑀺𑀓𑀸 𑀢𑀬𑁄 𑀪𑀸𑀢𑀭𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀘𑁂𑀓𑀲𑁆𑀲𑁂𑀯𑀢𑁆𑀣𑀸𑀬, 𑀅𑀫𑁆𑀳𑀸𑀓𑀜𑁆𑀘 𑀧𑀺𑀢𑀸 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀦 𑀤𑁂𑀢𑀺, 𑀓𑀣𑀁 𑀦𑀼 𑀫𑀬𑀁 𑀮𑀪𑁂𑀬𑁆𑀬𑀸𑀫 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼’’𑀦𑁆𑀢𑀺. 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀳𑀦𑁆𑀤 𑀫𑀬𑀁 𑀓𑀺𑀜𑁆𑀘𑀺 𑀉𑀧𑀸𑀬𑀁 𑀓𑀭𑁄𑀫𑀸’’𑀢𑀺. 𑀢𑁂 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀺𑀬 𑀓𑀸𑀭𑀸𑀧𑁂𑀲𑀼𑀁. 𑀢𑀢𑁄 𑀭𑀸𑀚𑀸 ‘‘𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀬𑁄𑀧𑀺 𑀧𑀼𑀢𑁆𑀢𑁂 𑀧𑀘𑁆𑀘𑀦𑁆𑀢𑀯𑀽𑀧𑀲𑀫𑀦𑀢𑁆𑀣𑀁 𑀧𑁂𑀲𑁂𑀲𑀺. 𑀢𑁂 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑀸, 𑀭𑀸𑀚𑀸 𑀢𑀼𑀝𑁆𑀞𑁄 𑀯𑀭𑀁 𑀅𑀤𑀸𑀲𑀺 ‘‘𑀬𑀁 𑀇𑀘𑁆𑀙𑀣, 𑀢𑀁 𑀕𑀡𑁆𑀳𑀣𑀸’’𑀢𑀺. 𑀢𑁂 ‘‘𑀫𑀬𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼𑀁 𑀇𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀏𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀢𑁂 ‘‘𑀫𑀬𑀁 𑀅𑀜𑁆𑀜𑁂𑀦 𑀅𑀦𑀢𑁆𑀣𑀺𑀓𑀸’’𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀢𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀬𑀸𑀘𑀺𑀁𑀲𑀼, 𑀭𑀸𑀚𑀸 𑀦 𑀅𑀤𑀸𑀲𑀺. 𑀏𑀯𑀁 𑀙, 𑀧𑀜𑁆𑀘, 𑀘𑀢𑁆𑀢𑀸𑀭𑀺, 𑀢𑀻𑀡𑀺, 𑀤𑁆𑀯𑁂, 𑀏𑀓𑀁, 𑀲𑀢𑁆𑀢 𑀫𑀸𑀲𑀸𑀦𑀺, 𑀙, 𑀧𑀜𑁆𑀘, 𑀘𑀢𑁆𑀢𑀸𑀭𑀻𑀢𑀺 𑀬𑀸𑀯 𑀢𑁂𑀫𑀸𑀲𑀁 𑀬𑀸𑀘𑀺𑀁𑀲𑀼. 𑀭𑀸𑀚𑀸 ‘‘𑀕𑀡𑁆𑀳𑀣𑀸’’𑀢𑀺 𑀅𑀤𑀸𑀲𑀺.

𑀢𑁂 𑀯𑀭𑀁 𑀮𑀪𑀺𑀢𑁆𑀯𑀸 𑀧𑀭𑀫𑀢𑀼𑀝𑁆𑀞𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀇𑀘𑁆𑀙𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀉𑀧𑀝𑁆𑀞𑀸𑀢𑀼𑀁, 𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂 ¶ , 𑀪𑀕𑀯𑀸 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀸𑀯𑀸𑀲’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀢𑀢𑁄 𑀢𑁂 𑀅𑀢𑁆𑀢𑀦𑁄 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑀲𑁆𑀲 ¶ 𑀮𑁂𑀔𑀁 𑀧𑁂𑀲𑁂𑀲𑀼𑀁 ‘‘𑀇𑀫𑀁 𑀢𑁂𑀫𑀸𑀲𑀁 𑀅𑀫𑁆𑀳𑁂𑀳𑀺 𑀪𑀕𑀯𑀸 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀺𑀳𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀲𑀫𑁆𑀪𑀸𑀭𑀁 𑀓𑀭𑁄𑀳𑀻’’𑀢𑀺. 𑀲𑁄 𑀢𑀁 𑀲𑀩𑁆𑀩𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀝𑀺𑀦𑀺𑀯𑁂𑀤𑁂𑀲𑀺. 𑀢𑁂 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑀸 𑀳𑀼𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑁂𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀳𑀺 𑀪𑀕𑀯𑀦𑁆𑀢𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀫𑀸𑀦𑀸 𑀚𑀦𑀧𑀤𑀁 𑀦𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀯𑀲𑀸𑀧𑁂𑀲𑀼𑀁.

𑀢𑁂𑀲𑀁 𑀪𑀡𑁆𑀟𑀸𑀕𑀸𑀭𑀺𑀓𑁄 𑀏𑀓𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀲𑀧𑀚𑀸𑀧𑀢𑀺𑀓𑁄 𑀲𑀤𑁆𑀥𑁄 𑀅𑀳𑁄𑀲𑀺 𑀧𑀲𑀦𑁆𑀦𑁄. 𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀦𑀯𑀢𑁆𑀢𑀁 𑀲𑀓𑁆𑀓𑀘𑁆𑀘𑀁 𑀅𑀤𑀸𑀲𑀺. 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀚𑀸𑀦𑀧𑀤𑁂𑀳𑀺 𑀏𑀓𑀸𑀤𑀲𑀫𑀢𑁆𑀢𑁂𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀓𑁆𑀓𑀘𑁆𑀘𑀫𑁂𑀯 𑀤𑀸𑀦𑀁 𑀧𑀯𑀢𑁆𑀢𑀸𑀧𑁂𑀲𑀺. 𑀢𑀢𑁆𑀣 𑀓𑁂𑀘𑀺 𑀚𑀸𑀦𑀧𑀤𑀸 𑀧𑀝𑀺𑀳𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀤𑁂𑀬𑁆𑀬𑀥𑀫𑁆𑀫𑁂 𑀅𑀢𑁆𑀢𑀦𑀸 𑀔𑀸𑀤𑀺𑀁𑀲𑀼, 𑀪𑀢𑁆𑀢𑀲𑀸𑀮𑀜𑁆𑀘 𑀅𑀕𑁆𑀕𑀺𑀦𑀸 𑀤𑀳𑀺𑀁𑀲𑀼. 𑀧𑀯𑀸𑀭𑀺𑀢𑁂 𑀭𑀸𑀚𑀧𑀼𑀢𑁆𑀢𑀸 𑀪𑀕𑀯𑀢𑁄 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 ¶ 𑀧𑀺𑀢𑀼𑀦𑁄 𑀲𑀓𑀸𑀲𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀯 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀭𑀸𑀚𑀸 𑀘 𑀭𑀸𑀚𑀧𑀼𑀢𑁆𑀢𑀸 𑀘 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀘 𑀪𑀡𑁆𑀟𑀸𑀕𑀸𑀭𑀺𑀓𑁄 𑀘 𑀅𑀦𑀼𑀧𑀼𑀩𑁆𑀩𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀕𑁆𑀕𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀧𑀝𑀺𑀳𑀢𑀘𑀺𑀢𑁆𑀢𑀚𑀦𑀸 𑀦𑀺𑀭𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀏𑀯𑀁 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀕𑀡𑀸𑀦𑀁 𑀲𑀕𑁆𑀕𑀢𑁄 𑀲𑀕𑁆𑀕𑀁, 𑀦𑀺𑀭𑀬𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑀸 𑀯𑀻𑀢𑀺𑀯𑀢𑁆𑀢𑀸.

𑀅𑀣 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀓𑀲𑁆𑀲𑀧𑀩𑀼𑀤𑁆𑀥𑀲𑁆𑀲 𑀓𑀸𑀮𑁂 𑀢𑁂 𑀧𑀝𑀺𑀳𑀢𑀘𑀺𑀢𑁆𑀢𑀚𑀦𑀸 𑀧𑁂𑀢𑁂𑀲𑀼 𑀉𑀧𑁆𑀧𑀦𑁆𑀦𑀸. 𑀢𑀤𑀸 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀧𑁂𑀢𑀸𑀦𑀁 𑀅𑀢𑁆𑀣𑀸𑀬 𑀤𑀸𑀦𑀁 𑀤𑀢𑁆𑀯𑀸 𑀉𑀤𑁆𑀤𑀺𑀲𑀦𑁆𑀢𑀺 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺. 𑀢𑁂 𑀲𑀫𑁆𑀧𑀢𑁆𑀢𑀺𑀁 𑀮𑀪𑀦𑁆𑀢𑀺. 𑀅𑀣 𑀇𑀫𑁂𑀧𑀺 𑀧𑁂𑀢𑀸 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀦𑁆𑀢𑀁 𑀓𑀲𑁆𑀲𑀧𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀫𑀬𑀫𑁆𑀧𑀺 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺? 𑀪𑀕𑀯𑀸 𑀆𑀳 𑁋 ‘‘𑀇𑀤𑀸𑀦𑀺 𑀦 𑀮𑀪𑀣 ¶ , 𑀅𑀧𑀺𑀘 𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀺𑀫𑁆𑀩𑀺𑀲𑀸𑀭𑁄 𑀦𑀸𑀫 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀢𑀼𑀫𑁆𑀳𑀸𑀓𑀁 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀜𑀸𑀢𑀺 𑀅𑀳𑁄𑀲𑀺, 𑀲𑁄 𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀢𑀤𑀸 𑀮𑀪𑀺𑀲𑁆𑀲𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀢𑁂𑀲𑀁 𑀧𑁂𑀢𑀸𑀦𑀁 𑀢𑀁 𑀯𑀘𑀦𑀁 ‘‘𑀲𑁆𑀯𑁂 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺.

𑀅𑀣 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀯𑀻𑀢𑀺𑀯𑀢𑁆𑀢𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀧𑀺 𑀢𑀬𑁄 𑀭𑀸𑀚𑀧𑀼𑀢𑁆𑀢𑀸 𑀢𑁂𑀳𑀺 𑀅𑀟𑁆𑀠𑀢𑁂𑀬𑁆𑀬𑁂𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 ¶ 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀕𑀬𑀸𑀲𑀻𑀲𑁂 𑀢𑀬𑁄 𑀚𑀝𑀺𑀮𑀸 𑀅𑀳𑁂𑀲𑀼𑀁, 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄, 𑀭𑀸𑀚𑀸 𑀅𑀳𑁄𑀲𑀺 𑀩𑀺𑀫𑁆𑀩𑀺𑀲𑀸𑀭𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀕𑀳𑀧𑀢𑀺 𑀯𑀺𑀲𑀸𑀔𑁄 𑀦𑀸𑀫 𑀫𑀳𑀸𑀲𑁂𑀝𑁆𑀞𑀺 𑀅𑀳𑁄𑀲𑀺, 𑀢𑀲𑁆𑀲 𑀧𑀚𑀸𑀧𑀢𑀺 𑀥𑀫𑁆𑀫𑀤𑀺𑀦𑁆𑀦𑀸 𑀦𑀸𑀫 𑀲𑁂𑀝𑁆𑀞𑀺𑀥𑀻𑀢𑀸 𑀅𑀳𑁄𑀲𑀺. 𑀏𑀯𑀁 𑀲𑀩𑁆𑀩𑀸𑀧𑀺 𑀅𑀯𑀲𑁂𑀲𑀸 𑀧𑀭𑀺𑀲𑀸 𑀭𑀜𑁆𑀜𑁄 𑀏𑀯 𑀧𑀭𑀺𑀯𑀸𑀭𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸.

𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀆𑀕𑀫𑁆𑀫 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑀧𑀭𑀺𑀯𑀸𑀭𑁂 𑀢𑀬𑁄 𑀚𑀝𑀺𑀮𑁂 𑀯𑀺𑀦𑁂𑀢𑁆𑀯𑀸 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀘 𑀢𑀤𑀳𑀼𑀧𑀲𑀗𑁆𑀓𑀫𑀦𑁆𑀢𑀁𑀬𑁂𑀯 𑀭𑀸𑀚𑀸𑀦𑀁 𑀩𑀺𑀫𑁆𑀩𑀺𑀲𑀸𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺 𑀏𑀓𑀸𑀤𑀲𑀦𑀯𑀼𑀢𑁂𑀳𑀺 𑀫𑀸𑀕𑀥𑀓𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀲𑀤𑁆𑀥𑀺𑀁. 𑀅𑀣 𑀭𑀜𑁆𑀜𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑀺𑀢𑁄 𑀪𑀕𑀯𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁂𑀦 𑁋

‘‘𑀤𑀦𑁆𑀢𑁄 𑀤𑀦𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸’’𑀢𑀺. (𑀫𑀳𑀸𑀯. 𑁫𑁮) 𑁋

𑀏𑀯𑀫𑀸𑀤𑀻𑀳𑀺 ¶ 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺𑀬𑀫𑀸𑀦𑁄 𑀭𑀸𑀚𑀕𑀳𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀫𑀳𑀸𑀤𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂 𑀧𑁂𑀢𑀸 ‘‘𑀇𑀤𑀸𑀦𑀺 𑀭𑀸𑀚𑀸 ¶ 𑀅𑀫𑁆𑀳𑀸𑀓𑀁 𑀤𑀸𑀦𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀉𑀤𑁆𑀤𑀺𑀲𑀺𑀲𑁆𑀲𑀢𑀻’’𑀢𑀺 𑀆𑀲𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀭𑀸𑀚𑀸 𑀤𑀸𑀦𑀁 𑀤𑀢𑁆𑀯𑀸 ‘‘𑀓𑀢𑁆𑀣 𑀦𑀼 𑀔𑁄 𑀪𑀕𑀯𑀸 𑀯𑀺𑀳𑀭𑁂𑀬𑁆𑀬𑀸’’𑀢𑀺 𑀪𑀕𑀯𑀢𑁄 𑀯𑀺𑀳𑀸𑀭𑀝𑁆𑀞𑀸𑀦𑀫𑁂𑀯 𑀘𑀺𑀦𑁆𑀢𑁂𑀲𑀺, 𑀦 𑀢𑀁 𑀤𑀸𑀦𑀁 𑀓𑀲𑁆𑀲𑀘𑀺 𑀉𑀤𑁆𑀤𑀺𑀲𑀺. 𑀧𑁂𑀢𑀸 𑀙𑀺𑀦𑁆𑀦𑀸𑀲𑀸 𑀳𑀼𑀢𑁆𑀯𑀸 𑀭𑀢𑁆𑀢𑀺𑀁 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀅𑀢𑀺𑀯𑀺𑀬 𑀪𑀺𑀁𑀲𑀦𑀓𑀁 𑀯𑀺𑀲𑁆𑀲𑀭𑀫𑀓𑀁𑀲𑀼. 𑀭𑀸𑀚𑀸 𑀪𑀬𑀲𑀁𑀯𑁂𑀕𑀲𑀦𑁆𑀢𑀸𑀲𑀫𑀸𑀧𑀚𑁆𑀚𑀺, 𑀢𑀢𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀏𑀯𑀭𑀽𑀧𑀁 𑀲𑀤𑁆𑀤𑀫𑀲𑁆𑀲𑁄𑀲𑀺𑀁, 𑀓𑀺𑀁 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀪𑀯𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀸 𑀆𑀳 𑁋 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀦 𑀢𑁂 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀺𑀘 𑀔𑁄 𑀢𑁂 𑀧𑀼𑀭𑀸𑀡𑀜𑀸𑀢𑀓𑀸 𑀧𑁂𑀢𑁂𑀲𑀼 𑀉𑀧𑁆𑀧𑀦𑁆𑀦𑀸 𑀲𑀦𑁆𑀢𑀺, 𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀫𑁂𑀯 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 ‘𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀅𑀫𑁆𑀳𑀸𑀓𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀻’𑀢𑀺 ¶ , 𑀦 𑀢𑁂𑀲𑀁 𑀢𑁆𑀯𑀁 𑀳𑀺𑀬𑁆𑀬𑁄 𑀉𑀤𑁆𑀤𑀺𑀲𑀺, 𑀢𑁂 𑀙𑀺𑀦𑁆𑀦𑀸𑀲𑀸 𑀢𑀣𑀸𑀭𑀽𑀧𑀁 𑀯𑀺𑀲𑁆𑀲𑀭𑀫𑀓𑀁𑀲𑀽’’𑀢𑀺.

𑀲𑁄 𑀆𑀳 ‘‘𑀇𑀤𑀸𑀦𑀺 𑀧𑀦, 𑀪𑀦𑁆𑀢𑁂, 𑀤𑀺𑀦𑁆𑀦𑁂 𑀮𑀪𑁂𑀬𑁆𑀬𑀼’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀫𑁂, 𑀪𑀦𑁆𑀢𑁂, 𑀅𑀥𑀺𑀯𑀸𑀲𑁂𑀢𑀼 𑀪𑀕𑀯𑀸 𑀅𑀚𑁆𑀚𑀢𑀦𑀸𑀬 𑀤𑀸𑀦𑀁, 𑀢𑁂𑀲𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺? 𑀪𑀕𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀭𑀸𑀚𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀪𑀕𑀯𑀸 𑀭𑀸𑀚𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀢𑁂𑀧𑀺 𑀔𑁄 𑀧𑁂𑀢𑀸 ‘‘𑀅𑀧𑀺 𑀦𑀸𑀫 𑀅𑀚𑁆𑀚 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀼 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀢𑀣𑀸 𑀅𑀓𑀸𑀲𑀺, 𑀬𑀣𑀸 𑀢𑁂 𑀲𑀩𑁆𑀩𑁂𑀯 𑀭𑀜𑁆𑀜𑁄 𑀧𑀸𑀓𑀝𑀸 𑀅𑀳𑁂𑀲𑀼𑀁. 𑀭𑀸𑀚𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑁂𑀦𑁆𑀢𑁄 ‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀉𑀤𑁆𑀤𑀺𑀲𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀢𑁂𑀲𑀁 𑀧𑁂𑀢𑀸𑀦𑀁 𑀧𑀤𑀼𑀫𑀲𑀜𑁆𑀙𑀦𑁆𑀦𑀸 𑀧𑁄𑀓𑁆𑀔𑀭𑀡𑀺𑀬𑁄 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀓𑀺𑀮𑀫𑀣𑀧𑀺𑀧𑀸𑀲𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀳𑁂𑀲𑀼𑀁. 𑀭𑀸𑀚𑀸 𑀬𑀸𑀕𑀼𑀔𑀚𑁆𑀚𑀓𑀪𑁄𑀚𑀦𑀸𑀦𑀺 𑀤𑀢𑁆𑀯𑀸 𑀉𑀤𑁆𑀤𑀺𑀲𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀢𑁂𑀲𑀁 𑀤𑀺𑀩𑁆𑀩𑀬𑀸𑀕𑀼𑀔𑀚𑁆𑀚𑀓𑀪𑁄𑀚𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀢𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀻𑀡𑀺𑀦𑁆𑀤𑁆𑀭𑀺𑀬𑀸 𑀅𑀳𑁂𑀲𑀼𑀁. 𑀅𑀣 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀤𑀢𑁆𑀯𑀸 𑀉𑀤𑁆𑀤𑀺𑀲𑀺. 𑀢𑁂𑀲𑀁 ¶ 𑀤𑀺𑀩𑁆𑀩𑀯𑀢𑁆𑀣𑀤𑀺𑀩𑁆𑀩𑀬𑀸𑀦𑀤𑀺𑀩𑁆𑀩𑀧𑀸𑀲𑀸𑀤𑀤𑀺𑀩𑁆𑀩𑀧𑀘𑁆𑀘𑀢𑁆𑀣𑀭𑀡𑀤𑀺𑀩𑁆𑀩𑀲𑁂𑀬𑁆𑀬𑀸𑀤𑀺𑀅𑀮𑀗𑁆𑀓𑀸𑀭𑀯𑀺𑀥𑀬𑁄 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀸𑀧𑀺 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺 𑀬𑀣𑀸 𑀲𑀩𑁆𑀩𑀸𑀯 𑀧𑀸𑀓𑀝𑀸 𑀳𑁄𑀢𑀺, 𑀢𑀣𑀸 𑀪𑀕𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀭𑀸𑀚𑀸 𑀅𑀢𑀺𑀯𑀺𑀬 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑀢𑁄 𑀪𑀕𑀯𑀸 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀦𑀼𑀫𑁄𑀤𑀦𑀢𑁆𑀣𑀁 ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀏𑀢𑁆𑀢𑀸𑀯𑀢𑀸 𑀘 ‘‘𑀬𑁂𑀦 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀢𑀺𑀭𑁄𑀓𑀼𑀝𑁆𑀝𑀁 𑀧𑀓𑀸𑀲𑀺𑀢𑀁, 𑀧𑀓𑀸𑀲𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩’’𑀦𑁆𑀢𑀺 𑀅𑀬𑀁 𑀫𑀸𑀢𑀺𑀓𑀸 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀯𑀺𑀪𑀢𑁆𑀢𑀸 𑀳𑁄𑀢𑀺.

𑀧𑀞𑀫𑀕𑀸𑀣𑀸𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ¶ 𑀇𑀫𑀲𑁆𑀲 𑀢𑀺𑀭𑁄𑀓𑀼𑀝𑁆𑀝𑀲𑁆𑀲 𑀬𑀣𑀸𑀓𑁆𑀓𑀫𑀁 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀢𑀺𑀭𑁄𑀓𑀼𑀝𑁆𑀝𑀸𑀢𑀺 𑀓𑀼𑀝𑁆𑀝𑀸𑀦𑀁 𑀧𑀭𑀪𑀸𑀕𑀸 𑀯𑀼𑀘𑁆𑀘𑀦𑁆𑀢𑀺. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀦𑀺𑀲𑀚𑁆𑀚𑀸𑀤𑀺𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀞𑀸𑀦𑀓𑀧𑁆𑀧𑀦𑀯𑀘𑀦𑀫𑁂𑀢𑀁. 𑀢𑁂𑀦 𑀬𑀣𑀸 𑀧𑀸𑀓𑀸𑀭𑀧𑀭𑀪𑀸𑀕𑀁 𑀧𑀩𑁆𑀩𑀢𑀧𑀭𑀪𑀸𑀕𑀜𑁆𑀘 𑀕𑀘𑁆𑀙𑀦𑁆𑀢𑀁 ‘‘𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀓𑀼𑀝𑁆𑀝𑀲𑁆𑀲 𑀧𑀭𑀪𑀸𑀕𑁂𑀲𑀼 𑀢𑀺𑀝𑁆𑀞𑀦𑁆𑀢𑁂 ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 ¶ 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀆𑀳. 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀘𑀸𑀢𑀺 𑀏𑀢𑁆𑀣 𑀲𑀦𑁆𑀥𑀺𑀬𑁄𑀢𑀺 𑀘𑀢𑀼𑀓𑁆𑀓𑁄𑀡𑀭𑀘𑁆𑀙𑀸 𑀯𑀼𑀘𑁆𑀘𑀦𑁆𑀢𑀺 𑀖𑀭𑀲𑀦𑁆𑀥𑀺𑀪𑀺𑀢𑁆𑀢𑀺𑀲𑀦𑁆𑀥𑀺𑀆𑀮𑁄𑀓𑀲𑀦𑁆𑀥𑀺𑀬𑁄 𑀘𑀸𑀧𑀺. 𑀲𑀺𑀗𑁆𑀖𑀸𑀝𑀓𑀸𑀢𑀺 𑀢𑀺𑀓𑁄𑀡𑀭𑀘𑁆𑀙𑀸 𑀯𑀼𑀘𑁆𑀘𑀦𑁆𑀢𑀺, 𑀢𑀤𑁂𑀓𑀚𑁆𑀛𑀁 𑀓𑀢𑁆𑀯𑀸 𑀧𑀼𑀭𑀺𑀫𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀝𑁂𑀦𑁆𑀢𑁄 ‘‘𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀘𑀸’’𑀢𑀺 𑀆𑀳. 𑀤𑁆𑀯𑀸𑀭𑀩𑀸𑀳𑀸𑀲𑀼 𑀢𑀺𑀝𑁆𑀞𑀦𑁆𑀢𑀻𑀢𑀺 𑀦𑀕𑀭𑀤𑁆𑀯𑀸𑀭𑀖𑀭𑀤𑁆𑀯𑀸𑀭𑀸𑀦𑀁 𑀩𑀸𑀳𑀸 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀆𑀕𑀦𑁆𑀢𑁆𑀯𑀸𑀦 𑀲𑀓𑀁 𑀖𑀭𑀦𑁆𑀢𑀺 𑀏𑀢𑁆𑀣 𑀲𑀓𑀁 𑀖𑀭𑀁 𑀦𑀸𑀫 𑀧𑀼𑀩𑁆𑀩𑀜𑀸𑀢𑀺𑀖𑀭𑀫𑁆𑀧𑀺 𑀅𑀢𑁆𑀢𑀦𑀸 𑀲𑀸𑀫𑀺𑀓𑀪𑀸𑀯𑁂𑀦 𑀅𑀚𑁆𑀛𑀸𑀯𑀼𑀢𑁆𑀣𑀧𑀼𑀩𑁆𑀩𑀖𑀭𑀫𑁆𑀧𑀺. 𑀢𑀤𑀼𑀪𑀬𑀫𑁆𑀧𑀺 𑀬𑀲𑁆𑀫𑀸 𑀢𑁂 𑀲𑀓𑀖𑀭𑀲𑀜𑁆𑀜𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀕𑀦𑁆𑀢𑁆𑀯𑀸𑀦 𑀲𑀓𑀁 𑀖𑀭’’𑀦𑁆𑀢𑀺 𑀆𑀳.

𑀤𑀼𑀢𑀺𑀬𑀕𑀸𑀣𑀸𑀯𑀡𑁆𑀡𑀦𑀸

𑁨. 𑀏𑀯𑀁 𑀪𑀕𑀯𑀸 𑀧𑀼𑀩𑁆𑀩𑁂 𑀅𑀦𑀚𑁆𑀛𑀸𑀯𑀼𑀢𑁆𑀣𑀧𑀼𑀩𑁆𑀩𑀫𑁆𑀧𑀺 𑀧𑀼𑀩𑁆𑀩𑀜𑀸𑀢𑀺𑀖𑀭𑀁 𑀩𑀺𑀫𑁆𑀩𑀺𑀲𑀸𑀭𑀦𑀺𑀯𑁂𑀲𑀦𑀁 𑀲𑀓𑀖𑀭𑀲𑀜𑁆𑀜𑀸𑀬 𑀆𑀕𑀦𑁆𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑀤𑁆𑀯𑀸𑀭𑀩𑀸𑀳𑀸𑀲𑀼 𑀞𑀺𑀢𑁂 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀨𑀮𑀁 𑀅𑀦𑀼𑀪𑀯𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀤𑀻𑀖𑀫𑀲𑁆𑀲𑀼𑀓𑁂𑀲𑀯𑀺𑀓𑀸𑀭𑀥𑀭𑁂 ¶ 𑀅𑀦𑁆𑀥𑀓𑀸𑀭𑀫𑀼𑀔𑁂 𑀲𑀺𑀣𑀺𑀮𑀩𑀦𑁆𑀥𑀦𑀯𑀺𑀮𑀫𑁆𑀩𑀫𑀸𑀦𑀓𑀺𑀲𑀨𑀭𑀼𑀲𑀓𑀸𑀴𑀓𑀗𑁆𑀕𑀧𑀘𑁆𑀘𑀗𑁆𑀕𑁂 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀯𑀦𑀤𑀸𑀳𑀤𑀟𑁆𑀠𑀢𑀸𑀮𑀭𑀼𑀓𑁆𑀔𑀲𑀤𑀺𑀲𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀭𑀡𑀺𑀦𑀺𑀫𑁆𑀫𑀣𑀦𑁂𑀦 𑀉𑀤𑀭𑀢𑁄 𑀉𑀝𑁆𑀞𑀸𑀬 𑀫𑀼𑀔𑀢𑁄 𑀯𑀺𑀦𑀺𑀘𑁆𑀙𑀭𑀦𑁆𑀢𑀸𑀬 𑀅𑀕𑁆𑀕𑀺𑀚𑀸𑀮𑀸𑀬 𑀧𑀭𑀺𑀟𑀬𑁆𑀳𑀫𑀸𑀦𑀲𑀭𑀻𑀭𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀲𑀽𑀘𑀺𑀙𑀺𑀤𑁆𑀤𑀸𑀡𑀼𑀫𑀢𑁆𑀢𑀓𑀡𑁆𑀞𑀩𑀺𑀮𑀢𑀸𑀬 𑀧𑀩𑁆𑀩𑀢𑀸𑀓𑀸𑀭𑀓𑀼𑀘𑁆𑀙𑀺𑀢𑀸𑀬 𑀘 𑀮𑀤𑁆𑀥𑀫𑁆𑀧𑀺 𑀧𑀸𑀦𑀪𑁄𑀚𑀦𑀁 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀔𑀼𑀧𑁆𑀧𑀺𑀧𑀸𑀲𑀸𑀧𑀭𑁂𑀢𑁂 𑀅𑀜𑁆𑀜𑀁 𑀭𑀲𑀫𑀯𑀺𑀦𑁆𑀤𑀫𑀸𑀦𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀜𑁆𑀜𑁂𑀲𑀁 𑀯𑀸 𑀲𑀢𑁆𑀢𑀸𑀦𑀁 𑀧𑀪𑀺𑀦𑁆𑀦𑀕𑀡𑁆𑀟𑀧𑀺𑀴𑀓𑀫𑀼𑀔𑀸 𑀧𑀕𑁆𑀖𑀭𑀺𑀢𑀭𑀼𑀥𑀺𑀭𑀧𑀼𑀩𑁆𑀩𑀮𑀲𑀺𑀓𑀸𑀤𑀺𑀁 𑀮𑀤𑁆𑀥𑀸 𑀅𑀫𑀢𑀫𑀺𑀯 𑀲𑀸𑀬𑀫𑀸𑀦𑁂 𑀅𑀢𑀺𑀯𑀺𑀬 𑀤𑀼𑀤𑁆𑀤𑀲𑀺𑀓𑀯𑀺𑀭𑀽𑀧𑀪𑀬𑀸𑀦𑀓𑀲𑀭𑀻𑀭𑁂 𑀩𑀳𑀽 𑀧𑁂𑀢𑁂 𑀭𑀜𑁆𑀜𑁄 𑀦𑀺𑀤𑀲𑁆𑀲𑁂𑀦𑁆𑀢𑁄 𑁋

‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀺, 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀘;

𑀤𑁆𑀯𑀸𑀭𑀩𑀸𑀳𑀸𑀲𑀼 𑀢𑀺𑀝𑁆𑀞𑀦𑁆𑀢𑀺, 𑀆𑀕𑀦𑁆𑀢𑁆𑀯𑀸𑀦 𑀲𑀓𑀁 𑀖𑀭’’𑀦𑁆𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀢𑁂𑀳𑀺 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀸𑀭𑀼𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀻’’𑀢𑀺 𑀤𑀼𑀢𑀺𑀬𑀕𑀸𑀣𑀫𑀸𑀳.

𑀢𑀢𑁆𑀣 ¶ 𑀧𑀳𑀽𑀢𑁂𑀢𑀺 𑀅𑀦𑀧𑁆𑀧𑀓𑁂 𑀩𑀳𑀼𑀫𑁆𑀳𑀺, 𑀬𑀸𑀯𑀤𑀢𑁆𑀣𑀺𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪-𑀓𑀸𑀭𑀲𑁆𑀲 𑀳𑀺 𑀳-𑀓𑀸𑀭𑁄 𑀮𑀩𑁆𑀪𑀢𑀺 ‘‘𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮) 𑀯𑀺𑀬. 𑀓𑁂𑀘𑀺 𑀧𑀦 ‘‘𑀩𑀳𑀽𑀢𑁂’’ 𑀇𑀢𑀺 𑀘 ‘‘𑀩𑀳𑀽𑀓𑁂’’ 𑀇𑀢𑀺 𑀘 𑀧𑀞𑀦𑁆𑀢𑀺. 𑀧𑀫𑀸𑀤𑀧𑀸𑀞𑀸 𑀏𑀢𑁂 ¶ . 𑀅𑀦𑁆𑀦𑁂 𑀘 𑀧𑀸𑀦𑀫𑁆𑀳𑀺 𑀘 𑀅𑀦𑁆𑀦𑀧𑀸𑀦𑀫𑁆𑀳𑀺. 𑀔𑀚𑁆𑀚𑁂 𑀘 𑀪𑁄𑀚𑁆𑀚𑁂 𑀘 𑀔𑀚𑁆𑀚𑀪𑁄𑀚𑁆𑀚𑁂, 𑀏𑀢𑁂𑀦 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀆𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀉𑀧𑀝𑁆𑀞𑀺𑀢𑁂𑀢𑀺 𑀉𑀧𑀕𑀫𑁆𑀫 𑀞𑀺𑀢𑁂, 𑀲𑀚𑁆𑀚𑀺𑀢𑁂 𑀧𑀝𑀺𑀬𑀢𑁆𑀢𑁂 𑀲𑀫𑁄𑀳𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑁂𑀲𑀁 𑀓𑁄𑀘𑀺 𑀲𑀭𑀢𑀺, 𑀲𑀢𑁆𑀢𑀸𑀦𑀦𑁆𑀢𑀺 𑀢𑁂𑀲𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀓𑁄𑀘𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀧𑀼𑀢𑁆𑀢𑁄 𑀯𑀸 𑀦 𑀲𑀭𑀢𑀺. 𑀓𑀺𑀁 𑀓𑀸𑀭𑀡𑀸? 𑀓𑀫𑁆𑀫𑀧𑀘𑁆𑀘𑀬𑀸, 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀅𑀤𑀸𑀦𑀤𑀸𑀦𑀧𑁆𑀧𑀝𑀺𑀲𑁂𑀥𑀦𑀸𑀤𑀺𑀪𑁂𑀤𑀲𑁆𑀲 𑀓𑀤𑀭𑀺𑀬𑀓𑀫𑁆𑀫𑀲𑁆𑀲 ¶ 𑀧𑀘𑁆𑀘𑀬𑀸. 𑀢𑀜𑁆𑀳𑀺 𑀢𑁂𑀲𑀁 𑀓𑀫𑁆𑀫𑀁 𑀜𑀸𑀢𑀻𑀦𑀁 𑀲𑀭𑀺𑀢𑀼𑀁 𑀦 𑀤𑁂𑀢𑀺.

𑀢𑀢𑀺𑀬𑀕𑀸𑀣𑀸𑀯𑀡𑁆𑀡𑀦𑀸

𑁩. 𑀏𑀯𑀁 𑀪𑀕𑀯𑀸 𑀅𑀦𑀧𑁆𑀧𑀓𑁂𑀧𑀺 𑀅𑀦𑁆𑀦𑀧𑀸𑀦𑀸𑀤𑀺𑀫𑁆𑀳𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 ‘‘𑀅𑀧𑀺 𑀦𑀸𑀫 𑀅𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀺𑀜𑁆𑀘𑀺 𑀤𑀤𑁂𑀬𑁆𑀬𑀼’’𑀦𑁆𑀢𑀺 𑀜𑀸𑀢𑀻 𑀧𑀘𑁆𑀘𑀸𑀲𑀻𑀲𑀦𑁆𑀢𑀸𑀦𑀁 𑀯𑀺𑀘𑀭𑀢𑀁 𑀢𑁂𑀲𑀁 𑀧𑁂𑀢𑀸𑀦𑀁 𑀢𑁂𑀳𑀺 𑀓𑀢𑀲𑁆𑀲 𑀅𑀢𑀺𑀓𑀝𑀼𑀓𑀯𑀺𑀧𑀸𑀓𑀓𑀭𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁂𑀦 𑀓𑀲𑁆𑀲𑀘𑀺 𑀜𑀸𑀢𑀺𑀦𑁄 𑀅𑀦𑀼𑀲𑁆𑀲𑀭𑀡𑀫𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀔𑀚𑁆𑀚𑀪𑁄𑀚𑁆𑀚𑁂 𑀉𑀧𑀝𑁆𑀞𑀺𑀢𑁂;

𑀦 𑀢𑁂𑀲𑀁 𑀓𑁄𑀘𑀺 𑀲𑀭𑀢𑀺, 𑀲𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸’’𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀭𑀜𑁆𑀜𑁄 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑁂 𑀜𑀸𑀢𑀓𑁂 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀤𑀸𑀦𑀁 𑀧𑀲𑀁𑀲𑀦𑁆𑀢𑁄 ‘‘𑀏𑀯𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦’’𑀦𑁆𑀢𑀺 𑀢𑀢𑀺𑀬𑀕𑀸𑀣𑀫𑀸𑀳.

𑀢𑀢𑁆𑀣 𑀏𑀯𑀦𑁆𑀢𑀺 𑀉𑀧𑀫𑀸𑀯𑀘𑀦𑀁. 𑀢𑀲𑁆𑀲 𑀤𑁆𑀯𑀺𑀥𑀸 𑀲𑀫𑁆𑀩𑀦𑁆𑀥𑁄 𑁋 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸 𑀅𑀲𑀭𑀦𑁆𑀢𑁂𑀧𑀺 𑀓𑀺𑀲𑁆𑀫𑀺𑀜𑁆𑀘𑀺 𑀤𑀤𑀦𑁆𑀢𑀺, 𑀜𑀸𑀢𑀻𑀦𑀁, 𑀬𑁂 𑀏𑀯𑀁 𑀅𑀦𑀼𑀓𑀫𑁆𑀧𑀓𑀸 𑀳𑁄𑀦𑁆𑀢𑀻𑀢𑀺 𑀘 𑀬𑀣𑀸 𑀢𑀬𑀸, 𑀫𑀳𑀸𑀭𑀸𑀚, 𑀤𑀺𑀦𑁆𑀦𑀁, 𑀏𑀯𑀁 𑀲𑀼𑀘𑀺𑀁 𑀧𑀡𑀻𑀢𑀁 𑀓𑀸𑀮𑁂𑀦 𑀓𑀧𑁆𑀧𑀺𑀬𑀁 𑀧𑀸𑀦𑀪𑁄𑀚𑀦𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸𑀢𑀺 𑀘. 𑀤𑀤𑀦𑁆𑀢𑀻𑀢𑀺 𑀤𑁂𑀦𑁆𑀢𑀺 𑀉𑀤𑁆𑀤𑀺𑀲𑀦𑁆𑀢𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀜𑀸𑀢𑀻𑀦𑀦𑁆𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀫𑁆𑀩𑀦𑁆𑀥𑀸𑀦𑀁. 𑀬𑁂𑀢𑀺 𑀬𑁂 𑀓𑁂𑀘𑀺 𑀧𑀼𑀢𑁆𑀢𑀸 𑀯𑀸 𑀥𑀻𑀢𑀭𑁄 𑀯𑀸 𑀪𑀸𑀢𑀭𑁄 𑀯𑀸 𑀳𑁄𑀦𑁆𑀢𑀻𑀢𑀺 𑀪𑀯𑀦𑁆𑀢𑀺. 𑀅𑀦𑀼𑀓𑀫𑁆𑀧𑀓𑀸𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄. 𑀲𑀼𑀘𑀺𑀦𑁆𑀢𑀺 𑀯𑀺𑀫𑀮𑀁 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁 𑀥𑀫𑁆𑀫𑀺𑀓𑀁 𑀥𑀫𑁆𑀫𑀮𑀤𑁆𑀥𑀁. 𑀧𑀡𑀻𑀢𑀦𑁆𑀢𑀺 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁. 𑀓𑀸𑀮𑁂𑀦𑀸𑀢𑀺 𑀜𑀸𑀢𑀺𑀧𑁂𑀢𑀸𑀦𑀁 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀼 𑀆𑀕𑀦𑁆𑀢𑁆𑀯𑀸 𑀞𑀺𑀢𑀓𑀸𑀮𑁂𑀦. 𑀓𑀧𑁆𑀧𑀺𑀬𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀁 𑀧𑀢𑀺𑀭𑀽𑀧𑀁 𑀅𑀭𑀺𑀬𑀸𑀦𑀁 𑀧𑀭𑀺𑀪𑁄𑀕𑀸𑀭𑀳𑀁. 𑀧𑀸𑀦𑀪𑁄𑀚𑀦𑀦𑁆𑀢𑀺 𑀧𑀸𑀦𑀜𑁆𑀘 𑀪𑁄𑀚𑀦𑀜𑁆𑀘. 𑀇𑀥 𑀧𑀸𑀦𑀪𑁄𑀚𑀦𑀫𑀼𑀔𑁂𑀦 𑀲𑀩𑁆𑀩𑁄𑀧𑀺 𑀤𑁂𑀬𑁆𑀬𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄.

𑀘𑀢𑀼𑀢𑁆𑀣𑀕𑀸𑀣𑀸𑀧𑀼𑀩𑁆𑀩𑀤𑁆𑀥𑀯𑀡𑁆𑀡𑀦𑀸

𑁪. 𑀏𑀯𑀁 ¶ ¶ 𑀪𑀕𑀯𑀸 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀧𑁂𑀢𑀪𑀽𑀢𑀸𑀦𑀁 𑀜𑀸𑀢𑀻𑀦𑀁 𑀅𑀦𑀼𑀓𑀫𑁆𑀧𑀸𑀬 𑀤𑀺𑀦𑁆𑀦𑀁 𑀧𑀸𑀦𑀪𑁄𑀚𑀦𑀁 𑀧𑀲𑀁𑀲𑀦𑁆𑀢𑁄 𑁋

‘‘𑀏𑀯𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀲𑀼𑀘𑀺𑀁 𑀧𑀡𑀻𑀢𑀁 𑀓𑀸𑀮𑁂𑀦, 𑀓𑀧𑁆𑀧𑀺𑀬𑀁 𑀧𑀸𑀦𑀪𑁄𑀚𑀦’’𑀦𑁆𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀬𑁂𑀦 𑀧𑀓𑀸𑀭𑁂𑀦 𑀤𑀺𑀦𑁆𑀦𑀁 𑀢𑁂𑀲𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀘𑀢𑀼𑀢𑁆𑀣𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑀫𑀸𑀳 𑀢𑀁 𑀢𑀢𑀺𑀬𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑁋

‘‘𑀏𑀯𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸 ¶ ;

𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’𑀢𑀺.

𑀢𑁂𑀦 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽𑀢𑀺 𑀏𑀯𑀁 𑀤𑀤𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸’’𑀢𑀺 𑀏𑀢𑁆𑀣 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁𑀲𑀤𑁆𑀤𑁂𑀦 𑀤𑀸𑀢𑀩𑁆𑀩𑀸𑀓𑀸𑀭𑀦𑀺𑀤𑀲𑁆𑀲𑀦𑀁 𑀓𑀢𑀁 𑀳𑁄𑀢𑀺.

𑀢𑀢𑁆𑀣 𑀇𑀤𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀯𑁄𑀢𑀺 ‘‘𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸’’𑀢𑀺 𑀘 (𑀫. 𑀦𑀺. 𑁧.𑁩𑁨𑁬; 𑀫𑀳𑀸𑀯. 𑁪𑁬𑁬), ‘‘𑀬𑁂𑀳𑀺 𑀯𑁄 𑀅𑀭𑀺𑀬𑀸’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀓𑁂𑀯𑀮𑀁 𑀦𑀺𑀧𑀸𑀢𑀫𑀢𑁆𑀢𑀁, 𑀦 𑀲𑀸𑀫𑀺𑀯𑀘𑀦𑀁. 𑀜𑀸𑀢𑀻𑀦𑀁 𑀳𑁄𑀢𑀽𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀸𑀦𑀁 𑀜𑀸𑀢𑀓𑀸𑀦𑀁 𑀳𑁄𑀢𑀼. 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄𑀢𑀺 𑀢𑁂 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸 𑀜𑀸𑀢𑀬𑁄 𑀇𑀤𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽𑀢𑀺.

𑀘𑀢𑀼𑀢𑁆𑀣𑀕𑀸𑀣𑀸𑀧𑀭𑀤𑁆𑀥𑀧𑀜𑁆𑀘𑀫𑀕𑀸𑀣𑀸𑀧𑀼𑀩𑁆𑀩𑀤𑁆𑀥𑀯𑀡𑁆𑀡𑀦𑀸

𑁪-𑁫. 𑀏𑀯𑀁 𑀪𑀕𑀯𑀸 𑀬𑁂𑀦 𑀧𑀓𑀸𑀭𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸𑀦𑀁 𑀜𑀸𑀢𑀻𑀦𑀁 𑀤𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀬𑀲𑁆𑀫𑀸 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀅𑀜𑁆𑀜𑁂𑀦 𑀓𑀢𑀁 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀨𑀮𑀤𑀁 𑀳𑁄𑀢𑀺, 𑀓𑁂𑀯𑀮𑀦𑁆𑀢𑀼 𑀢𑀣𑀸 𑀉𑀤𑁆𑀤𑀺𑀲𑁆𑀲 𑀤𑀺𑀬𑁆𑀬𑀫𑀸𑀦𑀁 𑀢𑀁 𑀯𑀢𑁆𑀣𑀼 𑀜𑀸𑀢𑀻𑀦𑀁 𑀓𑀼𑀲𑀮𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸 𑀢𑁂𑀲𑀁 𑀢𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀢𑀗𑁆𑀔𑀡𑁂 𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀓𑀼𑀲𑀮𑀓𑀫𑁆𑀫𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀘 𑀢𑀢𑁆𑀣𑀸’’𑀢𑀺 𑀘𑀢𑀼𑀢𑁆𑀣𑀕𑀸𑀣𑀸𑀬 𑀧𑀘𑁆𑀙𑀺𑀫𑀤𑁆𑀥𑀁 ‘‘𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀻’’𑀢𑀺 𑀧𑀜𑁆𑀘𑀫𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑀜𑁆𑀘 𑀆𑀳.

𑀢𑁂𑀲𑀁 ¶ ¶ 𑀅𑀢𑁆𑀣𑁄 𑁋 𑀢𑁂 𑀜𑀸𑀢𑀺𑀧𑁂𑀢𑀸 𑀬𑀢𑁆𑀣 𑀢𑀁 𑀤𑀸𑀦𑀁 𑀤𑀻𑀬𑀢𑀺, 𑀢𑀢𑁆𑀣 𑀲𑀫𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀲𑀫𑁄𑀥𑀸𑀬 𑀯𑀸 𑀏𑀓𑀚𑁆𑀛𑀁 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀫𑁆𑀫𑀸 𑀆𑀕𑀢𑀸 𑀲𑀫𑀸𑀕𑀢𑀸 ‘‘𑀇𑀫𑁂 𑀦𑁄 𑀜𑀸𑀢𑀬𑁄 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀤𑀸𑀦𑀁 𑀉𑀤𑁆𑀤𑀺𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑀤𑀢𑁆𑀣𑀁 𑀲𑀫𑁆𑀫𑀸 𑀆𑀕𑀢𑀸 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀻𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀺. 𑀲𑀓𑁆𑀓𑀘𑁆𑀘𑀁 𑀅𑀦𑀼𑀫𑁄𑀤𑀭𑁂𑀢𑀺 𑀅𑀪𑀺𑀲𑀤𑁆𑀤𑀳𑀦𑁆𑀢𑀸 𑀓𑀫𑁆𑀫𑀨𑀮𑀁 𑀅𑀯𑀺𑀚𑀳𑀦𑁆𑀢𑀸 𑀘𑀺𑀢𑁆𑀢𑀻𑀓𑀸𑀭𑀁 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀇𑀤𑀁 𑀦𑁄 𑀤𑀸𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀽’’𑀢𑀺 𑀫𑁄𑀤𑀦𑁆𑀢𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑁄𑀦𑁆𑀢𑀻𑀢𑀺.

𑀧𑀜𑁆𑀘𑀫𑀕𑀸𑀣𑀸𑀧𑀭𑀤𑁆𑀥𑀙𑀝𑁆𑀞𑀕𑀸𑀣𑀸𑀧𑀼𑀩𑁆𑀩𑀤𑁆𑀥𑀯𑀡𑁆𑀡𑀦𑀸

𑁫-𑁬. 𑀏𑀯𑀁 ¶ 𑀪𑀕𑀯𑀸 𑀬𑀣𑀸 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸𑀦𑀁 𑀢𑀗𑁆𑀔𑀡𑁂 𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀓𑀼𑀲𑀮𑀁 𑀓𑀫𑁆𑀫𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀢𑁂 𑀘 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀜𑀸𑀢𑀺𑀧𑁂𑀢𑀸 𑀲𑀫𑀸𑀕𑀢𑀸;

𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀲𑀓𑁆𑀓𑀘𑁆𑀘𑀁 𑀅𑀦𑀼𑀫𑁄𑀤𑀭𑁂’’𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀜𑀸𑀢𑀓𑁂 𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀓𑀼𑀲𑀮𑀓𑀫𑁆𑀫𑀨𑀮𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀢𑁂𑀲𑀁 𑀜𑀸𑀢𑀻 𑀆𑀭𑀩𑁆𑀪 𑀣𑁄𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀭𑀁 𑀚𑀻𑀯𑀦𑁆𑀢𑀽’’𑀢𑀺 𑀧𑀜𑁆𑀘𑀫𑀕𑀸𑀣𑀸𑀬 𑀧𑀘𑁆𑀙𑀺𑀫𑀤𑁆𑀥𑀁 ‘‘𑀅𑀫𑁆𑀳𑀸𑀓𑀜𑁆𑀘 𑀓𑀢𑀸 𑀧𑀽𑀚𑀸’’𑀢𑀺 𑀙𑀝𑁆𑀞𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑀜𑁆𑀘 𑀆𑀳.

𑀢𑁂𑀲𑀁 𑀅𑀢𑁆𑀣𑁄 𑁋 𑀘𑀺𑀭𑀁 𑀚𑀻𑀯𑀦𑁆𑀢𑀽𑀢𑀺 𑀘𑀺𑀭𑀚𑀻𑀯𑀺𑀦𑁄 𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀼. 𑀦𑁄 𑀜𑀸𑀢𑀻𑀢𑀺 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸. 𑀬𑁂𑀲𑀁 𑀳𑁂𑀢𑀽𑀢𑀺 𑀬𑁂 𑀦𑀺𑀲𑁆𑀲𑀸𑀬 𑀬𑁂𑀲𑀁 𑀓𑀸𑀭𑀡𑀸. 𑀮𑀪𑀸𑀫𑀲𑁂𑀢𑀺 𑀮𑀪𑀸𑀫. 𑀅𑀢𑁆𑀢𑀦𑀸 𑀢𑀗𑁆𑀔𑀡𑀁 𑀧𑀝𑀺𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀅𑀧𑀤𑀺𑀲𑀦𑁆𑀢𑀸 𑀪𑀡𑀦𑁆𑀢𑀺. 𑀧𑁂𑀢𑀸𑀦𑀜𑁆𑀳𑀺 𑀅𑀢𑁆𑀢𑀦𑁄 𑀅𑀦𑀼𑀫𑁄𑀤𑀦𑁂𑀦, 𑀤𑀸𑀬𑀓𑀸𑀦𑀁 𑀉𑀤𑁆𑀤𑁂𑀲𑁂𑀦, 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀤𑀸𑀬 𑀘𑀸𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀤𑀓𑁆𑀔𑀺𑀡𑀸 𑀲𑀫𑀺𑀚𑁆𑀛𑀢𑀺, 𑀢𑀗𑁆𑀔𑀡𑁂 𑀨𑀮𑀦𑀺𑀩𑁆𑀩𑀢𑁆𑀢𑀺𑀓𑀸 𑀳𑁄𑀢𑀺. 𑀢𑀢𑁆𑀣 𑀤𑀸𑀬𑀓𑀸 𑀯𑀺𑀲𑁂𑀲𑀳𑁂𑀢𑀼. 𑀢𑁂𑀦𑀸𑀳𑀁𑀲𑀼 ‘‘𑀬𑁂𑀲𑀁 𑀳𑁂𑀢𑀼 𑀮𑀪𑀸𑀫𑀲𑁂’’𑀢𑀺. 𑀅𑀫𑁆𑀳𑀸𑀓𑀜𑁆𑀘 𑀓𑀢𑀸 𑀧𑀽𑀚𑀸𑀢𑀺 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀏𑀯𑀁 𑀇𑀫𑀁 𑀤𑀸𑀦𑀁 𑀉𑀤𑁆𑀤𑀺𑀲𑀦𑁆𑀢𑁂𑀳𑀺 𑀅𑀫𑁆𑀳𑀸𑀓𑀜𑁆𑀘 𑀧𑀽𑀚𑀸 𑀓𑀢𑀸. 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸𑀢𑀺 𑀬𑀫𑁆𑀳𑀺 𑀲𑀦𑁆𑀢𑀸𑀦𑁂 𑀧𑀭𑀺𑀘𑁆𑀘𑀸𑀕𑀫𑀬𑀁 𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀢𑀢𑁆𑀣𑁂𑀯 𑀨𑀮𑀤𑀸𑀦𑀢𑁄 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸𑀢𑀺.

𑀏𑀢𑁆𑀣𑀸𑀳 ¶ 𑁋 ‘‘𑀓𑀺𑀁 𑀧𑀦 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸 𑀏𑀯 𑀜𑀸𑀢𑀬𑁄 𑀮𑀪𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀮𑀪𑀦𑁆𑀢𑀻’’𑀢𑀺 ¶ ? 𑀯𑀼𑀘𑁆𑀘𑀢𑁂 𑁋 𑀪𑀕𑀯𑀢𑀸 𑀏𑀯𑁂𑀢𑀁 𑀩𑁆𑀬𑀸𑀓𑀢𑀁 𑀚𑀸𑀡𑀼𑀲𑁆𑀲𑁄𑀡𑀺𑀦𑀸 𑀩𑁆𑀭𑀸𑀳𑁆𑀫𑀡𑁂𑀦 𑀧𑀼𑀝𑁆𑀞𑁂𑀦, 𑀓𑀺𑀫𑁂𑀢𑁆𑀣 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀫𑀬𑀫𑀲𑁆𑀲𑀼, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀤𑀸𑀦𑀸𑀦𑀺 𑀤𑁂𑀫, 𑀲𑀤𑁆𑀥𑀸𑀦𑀺 𑀓𑀭𑁄𑀫 ‘𑀇𑀤𑀁 𑀤𑀸𑀦𑀁 𑀧𑁂𑀢𑀸𑀦𑀁 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀉𑀧𑀓𑀧𑁆𑀧𑀢𑀼, 𑀇𑀤𑀁 𑀤𑀸𑀦𑀁 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’𑀢𑀺, 𑀓𑀘𑁆𑀘𑀺 𑀢𑀁, 𑀪𑁄 𑀕𑁄𑀢𑀫, 𑀤𑀸𑀦𑀁 𑀧𑁂𑀢𑀸𑀦𑀁 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀉𑀧𑀓𑀧𑁆𑀧𑀢𑀺, 𑀓𑀘𑁆𑀘𑀺 𑀢𑁂 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺. 𑀞𑀸𑀦𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀉𑀧𑀓𑀧𑁆𑀧𑀢𑀺, 𑀦𑁄 𑀅𑀝𑁆𑀞𑀸𑀦𑁂𑀢𑀺.

‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀞𑀸𑀦𑀁, 𑀓𑀢𑀫𑀁 𑀅𑀝𑁆𑀞𑀸𑀦𑀦𑁆𑀢𑀺? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 ¶ 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀦𑁂𑀭𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀦 𑀉𑀧𑀓𑀧𑁆𑀧𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀦 𑀉𑀧𑀓𑀧𑁆𑀧𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺…𑀧𑁂… 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀤𑁂𑀯𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀦 𑀉𑀧𑀓𑀧𑁆𑀧𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀧𑁂𑀢𑁆𑀢𑀺𑀯𑁂𑀲𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀢𑁂𑀦 ¶ 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀬𑀁 𑀯𑀸 𑀧𑀦𑀲𑁆𑀲 𑀇𑀢𑁄 𑀅𑀦𑀼𑀧𑀯𑁂𑀘𑁆𑀙𑀦𑁆𑀢𑀺 ¶ 𑀫𑀺𑀢𑁆𑀢𑀸𑀫𑀘𑁆𑀘𑀸 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀯𑀸, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀉𑀧𑀓𑀧𑁆𑀧𑀢𑀻𑀢𑀺.

‘‘𑀲𑀘𑁂 𑀧𑀦, 𑀪𑁄 𑀕𑁄𑀢𑀫, 𑀲𑁄 𑀧𑁂𑀢𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑁄 𑀢𑀁 𑀞𑀸𑀦𑀁 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺, 𑀓𑁄 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀢𑀻𑀢𑀺? 𑀅𑀜𑁆𑀜𑁂𑀧𑀺𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀢𑀁 𑀞𑀸𑀦𑀁 𑀉𑀧𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺.

‘‘𑀲𑀘𑁂 𑀧𑀦, 𑀪𑁄 𑀕𑁄𑀢𑀫, 𑀲𑁄 𑀘𑁂𑀯 𑀧𑁂𑀢𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑁄 𑀢𑀁 𑀞𑀸𑀦𑀁 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺, 𑀅𑀜𑁆𑀜𑁂𑀧𑀺𑀲𑁆𑀲 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀢𑀁 𑀞𑀸𑀦𑀁 𑀅𑀦𑀼𑀧𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀓𑁄 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀢𑀻𑀢𑀺? 𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁 𑀩𑁆𑀭𑀸𑀳𑁆𑀫𑀡 𑀅𑀦𑀯𑀓𑀸𑀲𑁄, 𑀬𑀁 𑀢𑀁 𑀞𑀸𑀦𑀁 𑀯𑀺𑀯𑀺𑀢𑁆𑀢𑀁 𑀅𑀲𑁆𑀲 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀬𑀤𑀺𑀤𑀁 𑀧𑁂𑀢𑁂𑀳𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺. 𑀅𑀧𑀺𑀘 𑀩𑁆𑀭𑀸𑀳𑁆𑀫𑀡 𑀤𑀸𑀬𑀓𑁄𑀧𑀺 𑀅𑀦𑀺𑀧𑁆𑀨𑀮𑁄’’𑀢𑀺 (𑀅. 𑀦𑀺. 𑁧𑁦.𑁧𑁭𑁭).

𑀙𑀝𑁆𑀞𑀕𑀸𑀣𑀸𑀧𑀭𑀤𑁆𑀥𑀲𑀢𑁆𑀢𑀫𑀕𑀸𑀣𑀸𑀯𑀡𑁆𑀡𑀦𑀸

𑁬-𑁭. 𑀏𑀯𑀁 ¶ 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸𑀦𑀁 𑀧𑀼𑀩𑁆𑀩𑀜𑀸𑀢𑀻𑀦𑀁 𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀣𑁄𑀫𑁂𑀦𑁆𑀢𑁄 ‘‘𑀏𑀢𑁂 𑀢𑁂, 𑀫𑀳𑀸𑀭𑀸𑀚, 𑀜𑀸𑀢𑀻 𑀇𑀫𑀸𑀬 𑀤𑀸𑀦𑀲𑀫𑁆𑀧𑀤𑀸𑀬 𑀅𑀢𑁆𑀢𑀫𑀦𑀸 𑀏𑀯𑀁 𑀣𑁄𑀫𑁂𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀘𑀺𑀭𑀁 𑀚𑀻𑀯𑀦𑁆𑀢𑀼 𑀦𑁄 𑀜𑀸𑀢𑀻, 𑀬𑁂𑀲𑀁 𑀳𑁂𑀢𑀼 𑀮𑀪𑀸𑀫𑀲𑁂;

𑀅𑀫𑁆𑀳𑀸𑀓𑀜𑁆𑀘 𑀓𑀢𑀸 𑀧𑀽𑀚𑀸, 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸’’𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀢𑁂𑀲𑀁 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸𑀦𑀁 𑀅𑀜𑁆𑀜𑀲𑁆𑀲 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀦𑁄 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀅𑀪𑀸𑀯𑀁 𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑀦𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀺 𑀢𑀢𑁆𑀣 𑀓𑀲𑀻 𑀅𑀢𑁆𑀣𑀻’’𑀢𑀺 𑀙𑀝𑁆𑀞𑀕𑀸𑀣𑀸𑀬 𑀧𑀘𑁆𑀙𑀺𑀫𑀤𑁆𑀥𑀁 ‘‘𑀯𑀡𑀺𑀚𑁆𑀚𑀸 𑀢𑀸𑀤𑀺𑀲𑀻’’𑀢𑀺 𑀇𑀫𑀁 𑀲𑀢𑁆𑀢𑀫𑀕𑀸𑀣𑀜𑁆𑀘 𑀆𑀳.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀦 𑀳𑀺, 𑀫𑀳𑀸𑀭𑀸𑀚, 𑀢𑀢𑁆𑀣 𑀧𑁂𑀢𑁆𑀢𑀺𑀯𑀺𑀲𑀬𑁂 𑀓𑀲𑀺 𑀅𑀢𑁆𑀣𑀺, 𑀬𑀁 𑀦𑀺𑀲𑁆𑀲𑀸𑀬 𑀢𑁂 𑀧𑁂𑀢𑀸 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑁂𑀬𑁆𑀬𑀼𑀁. 𑀕𑁄𑀭𑀓𑁆𑀔𑁂𑀢𑁆𑀣 𑀦 𑀯𑀺𑀚𑁆𑀚𑀢𑀻𑀢𑀺 𑀦 𑀓𑁂𑀯𑀮𑀁 𑀓𑀲𑀺 𑀏𑀯, 𑀕𑁄𑀭𑀓𑁆𑀔𑀸𑀧𑀺 𑀏𑀢𑁆𑀣 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦 𑀯𑀺𑀚𑁆𑀚𑀢𑀺, 𑀬𑀁 ¶ 𑀦𑀺𑀲𑁆𑀲𑀸𑀬 𑀢𑁂 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑁂𑀬𑁆𑀬𑀼𑀁. 𑀯𑀡𑀺𑀚𑁆𑀚𑀸 𑀢𑀸𑀤𑀺𑀲𑀻 𑀦𑀢𑁆𑀣𑀻𑀢𑀺 𑀯𑀸𑀡𑀺𑀚𑁆𑀚𑀸𑀧𑀺 𑀢𑀸𑀤𑀺𑀲𑀻 𑀦𑀢𑁆𑀣𑀺, 𑀬𑀸 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼 𑀪𑀯𑁂𑀬𑁆𑀬. 𑀳𑀺𑀭𑀜𑁆𑀜𑁂𑀦 𑀓𑀬𑀸𑀓𑀬𑀦𑁆𑀢𑀺 ¶ 𑀳𑀺𑀭𑀜𑁆𑀜𑁂𑀦 𑀓𑀬𑀯𑀺𑀓𑁆𑀓𑀬𑀫𑁆𑀧𑀺 𑀢𑀢𑁆𑀣 𑀢𑀸𑀤𑀺𑀲𑀁 𑀦𑀢𑁆𑀣𑀺, 𑀬𑀁 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼 𑀪𑀯𑁂𑀬𑁆𑀬. 𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀕𑀢𑀸 𑀢𑀳𑀺𑀦𑁆𑀢𑀺 𑀓𑁂𑀯𑀮𑀁 𑀧𑀦 𑀇𑀢𑁄 𑀜𑀸𑀢𑀻𑀳𑀺 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀯𑀸 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀅𑀢𑁆𑀢𑀪𑀸𑀯𑀁 𑀕𑀫𑁂𑀦𑁆𑀢𑀺. 𑀧𑁂𑀢𑀸𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸 𑀲𑀢𑁆𑀢𑀸. 𑀓𑀸𑀮𑀕𑀢𑀸𑀢𑀺 𑀅𑀢𑁆𑀢𑀦𑁄 𑀫𑀭𑀡𑀓𑀸𑀮𑁂𑀦 𑀕𑀢𑀸, ‘‘𑀓𑀸𑀮𑀓𑀢𑀸’’𑀢𑀺 𑀯𑀸 𑀧𑀸𑀞𑁄, 𑀓𑀢𑀓𑀸𑀮𑀸 𑀓𑀢𑀫𑀭𑀡𑀸𑀢𑀺 𑀅𑀢𑁆𑀣𑁄. 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑁂𑀢𑁆𑀢𑀺𑀯𑀺𑀲𑀬𑁂.

𑀅𑀝𑁆𑀞𑀫𑀦𑀯𑀫𑀕𑀸𑀣𑀸𑀤𑁆𑀯𑀬𑀯𑀡𑁆𑀡𑀦𑀸

𑁮-𑁯. 𑀏𑀯𑀁 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀕𑀢𑀸 𑀢𑀳𑀺’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀉𑀧𑀫𑀸𑀳𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀉𑀦𑁆𑀦𑀫𑁂 𑀉𑀤𑀓𑀁 𑀯𑀼𑀝𑁆𑀞’’𑀦𑁆𑀢𑀺 𑀇𑀤𑀁 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀉𑀦𑁆𑀦𑀢𑁂 𑀣𑀮𑁂 𑀉𑀲𑁆𑀲𑀸𑀤𑁂 𑀪𑀽𑀫𑀺𑀪𑀸𑀕𑁂 𑀫𑁂𑀖𑁂𑀳𑀺 𑀅𑀪𑀺𑀯𑀼𑀝𑁆𑀞𑀁 𑀉𑀤𑀓𑀁 𑀦𑀺𑀦𑁆𑀦𑀁 𑀧𑀯𑀢𑁆𑀢𑀢𑀺, 𑀬𑁄 𑀬𑁄 𑀪𑀽𑀫𑀺𑀪𑀸𑀕𑁄 𑀦𑀺𑀦𑁆𑀦𑁄 𑀑𑀡𑀢𑁄, 𑀢𑀁 𑀢𑀁 𑀧𑀯𑀢𑁆𑀢𑀢𑀺 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀺, 𑀏𑀯𑀫𑁂𑀯 ¶ 𑀇𑀢𑁄 𑀤𑀺𑀦𑁆𑀦𑀁 𑀤𑀸𑀦𑀁 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀸𑀢𑀼𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀦𑁆𑀦𑀫𑀺𑀯 𑀳𑀺 𑀉𑀤𑀓𑀧𑁆𑀧𑀯𑀢𑁆𑀢𑀺𑀬𑀸 𑀞𑀸𑀦𑀁 𑀧𑁂𑀢𑀮𑁄𑀓𑁄 𑀤𑀸𑀦𑀼𑀧𑀓𑀧𑁆𑀧𑀦𑀸𑀬. 𑀬𑀣𑀸𑀳 𑁋 ‘‘𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀉𑀧𑀓𑀧𑁆𑀧𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁭𑁭). 𑀬𑀣𑀸 𑀘 𑀓𑀦𑁆𑀤𑀭𑀧𑀤𑀭𑀲𑀸𑀔𑀸𑀧𑀲𑀸𑀔𑀓𑀼𑀲𑁄𑀩𑁆𑀪𑀫𑀳𑀸𑀲𑁄𑀩𑁆𑀪𑀲𑀦𑁆𑀦𑀺𑀧𑀸𑀢𑁂𑀳𑀺 𑀯𑀸𑀭𑀺𑀯𑀳𑀸 𑀫𑀳𑀸𑀦𑀚𑁆𑀚𑁄 𑀧𑀽𑀭𑀸 𑀳𑀼𑀢𑁆𑀯𑀸 𑀲𑀸𑀕𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀏𑀯𑀫𑁆𑀧𑀺 𑀇𑀢𑁄 𑀤𑀺𑀦𑁆𑀦𑀤𑀸𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀻𑀢𑀺.

𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁦. 𑀏𑀯𑀁 𑀪𑀕𑀯𑀸 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀕𑀢𑀸 𑀢𑀳𑀺’’𑀦𑁆𑀢𑀺 𑀇𑀫𑀁 𑀅𑀢𑁆𑀣𑀁 𑀉𑀧𑀫𑀸𑀳𑀺 𑀧𑀓𑀸𑀲𑁂𑀢𑁆𑀯𑀸 𑀧𑀼𑀦 𑀬𑀲𑁆𑀫𑀸 𑀢𑁂 𑀧𑁂𑀢𑀸 ‘‘𑀇𑀢𑁄 𑀓𑀺𑀜𑁆𑀘𑀺 𑀮𑀘𑁆𑀙𑀸𑀫𑀸’’𑀢𑀺 𑀆𑀲𑀸𑀪𑀺𑀪𑀽𑀢𑀸 𑀜𑀸𑀢𑀺𑀖𑀭𑀁 𑀆𑀕𑀦𑁆𑀢𑁆𑀯𑀸𑀧𑀺 ‘‘𑀇𑀤𑀁 𑀦𑀸𑀫 𑀦𑁄 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀼𑀁 𑀅𑀲𑀫𑀢𑁆𑀣𑀸, 𑀢𑀲𑁆𑀫𑀸 𑀢𑁂𑀲𑀁 𑀇𑀫𑀸𑀦𑀺 𑀅𑀦𑀼𑀲𑁆𑀲𑀭𑀡𑀯𑀢𑁆𑀣𑀽𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑁄 ¶ 𑀓𑀼𑀮𑀧𑀼𑀢𑁆𑀢𑁄 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀸𑀲𑀺 𑀫𑁂’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 ‘‘𑀇𑀤𑀁 𑀦𑀸𑀫 𑀫𑁂 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀅𑀤𑀸𑀲𑀻’’𑀢𑀺 𑀘, ‘‘𑀇𑀤𑀁 𑀦𑀸𑀫 𑀫𑁂 𑀓𑀺𑀘𑁆𑀘𑀁 𑀅𑀢𑁆𑀢𑀦𑀸 𑀉𑀬𑁆𑀬𑁄𑀕𑀫𑀸𑀧𑀚𑁆𑀚𑀦𑁆𑀢𑁄 𑀅𑀓𑀸𑀲𑀻’’𑀢𑀺 𑀘, ‘‘𑀅𑀫𑀼 𑀫𑁂 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀲𑀫𑁆𑀩𑀦𑁆𑀥𑀢𑁆𑀢𑀸 𑀜𑀸𑀢𑀻’’𑀢𑀺 𑀘 𑀲𑀺𑀦𑁂𑀳𑀯𑀲𑁂𑀦 𑀢𑀸𑀡𑀲𑀫𑀢𑁆𑀣𑀢𑀸𑀬 ‘‘𑀫𑀺𑀢𑁆𑀢𑀸’’𑀢𑀺 𑀘, ‘‘𑀅𑀲𑀼𑀓𑁄 𑀫𑁂 𑀲𑀳 𑀧𑀁𑀲𑀼𑀓𑀻𑀴𑀓𑁄 𑀲𑀔𑀸’’𑀢𑀺 ¶ 𑀘 𑀏𑀯𑀁 𑀲𑀩𑁆𑀩𑀫𑀦𑀼𑀲𑁆𑀲𑀭𑀦𑁆𑀢𑁄 𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸, 𑀤𑀸𑀦𑀁 𑀦𑀺𑀬𑁆𑀬𑀸𑀢𑁂𑀬𑁆𑀬𑀸𑀢𑀺. 𑀅𑀧𑀭𑁄 𑀧𑀸𑀞𑁄 ‘‘𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀸 𑀤𑀚𑁆𑀚𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀤𑀸𑀢𑀩𑁆𑀩𑀸𑀢𑀺 𑀤𑀚𑁆𑀚𑀸. 𑀓𑀸 𑀲𑀸? 𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀸, 𑀢𑁂𑀦𑁂𑀯 ‘‘𑀅𑀤𑀸𑀲𑀺 𑀫𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀁 𑀅𑀦𑀼𑀲𑁆𑀲𑀭𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀭𑀡𑀯𑀘𑀦𑀧𑁆𑀧𑀲𑀗𑁆𑀕𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀓𑀸𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁧. 𑀏𑀯𑀁 𑀪𑀕𑀯𑀸 𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀸𑀦𑀺𑀬𑁆𑀬𑀸𑀢𑀦𑁂 𑀓𑀸𑀭𑀡𑀪𑀽𑀢𑀸𑀦𑀺 𑀅𑀦𑀼𑀲𑁆𑀲𑀭𑀡𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀅𑀤𑀸𑀲𑀺 𑀫𑁂 𑀅𑀓𑀸𑀲𑀺 𑀫𑁂, 𑀜𑀸𑀢𑀺𑀫𑀺𑀢𑁆𑀢𑀸 𑀲𑀔𑀸 𑀘 𑀫𑁂;

𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭’’𑀦𑁆𑀢𑀺. 𑁋

𑀯𑀢𑁆𑀯𑀸 ¶ 𑀧𑀼𑀦 𑀬𑁂 𑀜𑀸𑀢𑀺𑀫𑀭𑀡𑁂𑀦 𑀭𑀼𑀡𑁆𑀡𑀲𑁄𑀓𑀸𑀤𑀺𑀧𑀭𑀸 𑀏𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀦 𑀢𑁂𑀲𑀁 𑀅𑀢𑁆𑀣𑀸𑀬 𑀓𑀺𑀜𑁆𑀘𑀺 𑀤𑁂𑀦𑁆𑀢𑀺, 𑀢𑁂𑀲𑀁 𑀢𑀁 𑀭𑀼𑀡𑁆𑀡𑀲𑁄𑀓𑀸𑀤𑀺 𑀓𑁂𑀯𑀮𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀫𑁂𑀯 𑀳𑁄𑀢𑀺, 𑀦 𑀧𑁂𑀢𑀸𑀦𑀁 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀺 𑀭𑀼𑀡𑁆𑀡𑀁 𑀯𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀭𑀼𑀡𑁆𑀡𑀦𑁆𑀢𑀺 𑀭𑁄𑀤𑀦𑀸 𑀭𑁄𑀤𑀺𑀢𑀢𑁆𑀢𑀁 𑀅𑀲𑁆𑀲𑀼𑀧𑀸𑀢𑀦𑀁, 𑀏𑀢𑁂𑀦 𑀓𑀸𑀬𑀧𑀭𑀺𑀲𑁆𑀲𑀫𑀁 𑀤𑀲𑁆𑀲𑁂𑀢𑀺. 𑀲𑁄𑀓𑁄𑀢𑀺 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁, 𑀏𑀢𑁂𑀦 𑀘𑀺𑀢𑁆𑀢𑀧𑀭𑀺𑀲𑁆𑀲𑀫𑀁 𑀤𑀲𑁆𑀲𑁂𑀢𑀺. 𑀬𑀸 𑀘𑀜𑁆𑀜𑀸𑀢𑀺 𑀬𑀸 𑀘 𑀭𑀼𑀡𑁆𑀡𑀲𑁄𑀓𑁂𑀳𑀺 𑀅𑀜𑁆𑀜𑀸. 𑀧𑀭𑀺𑀤𑁂𑀯𑀦𑀸𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀨𑀼𑀝𑁆𑀞𑀲𑁆𑀲 𑀮𑀸𑀮𑀧𑁆𑀧𑀦𑀸, ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓 𑀧𑀺𑀬 𑀫𑀦𑀸𑀧𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀕𑀼𑀡𑀲𑀁𑀯𑀡𑁆𑀡𑀦𑀸, 𑀏𑀢𑁂𑀦 𑀯𑀘𑀻𑀧𑀭𑀺𑀲𑁆𑀲𑀫𑀁 𑀤𑀲𑁆𑀲𑁂𑀢𑀺.

𑀤𑁆𑀯𑀸𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁨. 𑀏𑀯𑀁 ¶ 𑀪𑀕𑀯𑀸 ‘‘𑀭𑀼𑀡𑁆𑀡𑀁 𑀯𑀸 𑀲𑁄𑀓𑁄 𑀯𑀸 𑀬𑀸 𑀘𑀜𑁆𑀜𑀸 𑀧𑀭𑀺𑀤𑁂𑀯𑀦𑀸, 𑀲𑀩𑁆𑀩𑀫𑁆𑀧𑀺 𑀢𑀁 𑀧𑁂𑀢𑀸𑀦𑀁 𑀅𑀢𑁆𑀣𑀸𑀬 𑀦 𑀳𑁄𑀢𑀺, 𑀓𑁂𑀯𑀮𑀦𑁆𑀢𑀼 𑀅𑀢𑁆𑀢𑀸𑀦𑀁 𑀧𑀭𑀺𑀢𑀸𑀧𑀦𑀫𑀢𑁆𑀢𑀫𑁂𑀯, 𑀏𑀯𑀁 𑀢𑀺𑀝𑁆𑀞𑀦𑁆𑀢𑀺 𑀜𑀸𑀢𑀬𑁄’’𑀢𑀺 𑀭𑀼𑀡𑁆𑀡𑀸𑀤𑀻𑀦𑀁 𑀦𑀺𑀭𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀫𑀸𑀕𑀥𑀭𑀸𑀚𑁂𑀦 𑀬𑀸 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀢𑀲𑁆𑀲𑀸 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀜𑁆𑀘 𑀔𑁄 𑀤𑀓𑁆𑀔𑀺𑀡𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀅𑀬𑀜𑁆𑀘 𑀔𑁄, 𑀫𑀳𑀸𑀭𑀸𑀚, 𑀤𑀓𑁆𑀔𑀺𑀡𑀸 𑀢𑀬𑀸 𑀅𑀚𑁆𑀚 𑀅𑀢𑁆𑀢𑀦𑁄 𑀜𑀸𑀢𑀺𑀕𑀡𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀸 ¶ , 𑀲𑀸 𑀬𑀲𑁆𑀫𑀸 𑀲𑀗𑁆𑀖𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀢𑀲𑁆𑀫𑀸 𑀲𑀗𑁆𑀖𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀅𑀲𑁆𑀲 𑀧𑁂𑀢𑀚𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀉𑀧𑀓𑀧𑁆𑀧𑀢𑀺 𑀲𑀫𑁆𑀧𑀚𑁆𑀚𑀢𑀺 𑀨𑀮𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀓𑀧𑁆𑀧𑀢𑀻𑀢𑀺 𑀘 𑀞𑀸𑀦𑀲𑁄 𑀉𑀧𑀓𑀧𑁆𑀧𑀢𑀺, 𑀢𑀁𑀔𑀡𑀁𑀬𑁂𑀯 𑀉𑀧𑀓𑀧𑁆𑀧𑀢𑀺, 𑀦 𑀘𑀺𑀭𑁂𑀦. 𑀬𑀣𑀸 𑀳𑀺 𑀢𑀁𑀔𑀡𑀜𑁆𑀜𑁂𑀯 𑀧𑀝𑀺𑀪𑀦𑁆𑀢𑀁 ‘‘𑀞𑀸𑀦𑀲𑁄𑀯𑁂𑀢𑀁 𑀢𑀣𑀸𑀕𑀢𑀁 𑀧𑀝𑀺𑀪𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀢𑀁𑀔𑀡𑀁𑀬𑁂𑀯 𑀉𑀧𑀓𑀧𑁆𑀧𑀦𑁆𑀢𑀸 ‘‘𑀞𑀸𑀦𑀲𑁄 𑀉𑀧𑀓𑀧𑁆𑀧𑀢𑀻’’𑀢𑀺 𑀯𑀼𑀢𑁆𑀢𑀸. 𑀬𑀁 𑀯𑀸 𑀢𑀁 ‘‘𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀉𑀧𑀓𑀧𑁆𑀧𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁭𑁭) 𑀯𑀼𑀢𑁆𑀢𑀁, 𑀢𑀢𑁆𑀣 𑀔𑀼𑀧𑁆𑀧𑀺𑀧𑀸𑀲𑀺𑀓𑀯𑀦𑁆𑀢𑀸𑀲𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀞𑀸𑀦𑁂 𑀉𑀧𑀓𑀧𑁆𑀧𑀢𑀻𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀓𑀳𑀸𑀧𑀡𑀁 𑀤𑁂𑀦𑁆𑀢𑁄 ‘‘𑀓𑀳𑀸𑀧𑀡𑀲𑁄 𑀤𑁂𑀢𑀻’’𑀢𑀺 ¶ 𑀮𑁄𑀓𑁂 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀉𑀧𑀓𑀧𑁆𑀧𑀢𑀻𑀢𑀺 𑀧𑀸𑀢𑀼𑀪𑀯𑀢𑀺, 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑁂𑀭𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁩. 𑀏𑀯𑀁 𑀪𑀕𑀯𑀸 𑀭𑀜𑁆𑀜𑀸 𑀤𑀺𑀦𑁆𑀦𑀸𑀬 𑀤𑀓𑁆𑀔𑀺𑀡𑀸𑀬 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀅𑀬𑀜𑁆𑀘 𑀔𑁄 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀲𑀗𑁆𑀖𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬𑀲𑁆𑀲, 𑀞𑀸𑀦𑀲𑁄 𑀉𑀧𑀓𑀧𑁆𑀧𑀢𑀻’’𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀬𑀲𑁆𑀫𑀸 𑀇𑀫𑀁 𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑁂𑀦 𑀜𑀸𑀢𑀻𑀦𑀁 𑀜𑀸𑀢𑀻𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀜𑀸𑀢𑀺𑀥𑀫𑁆𑀫𑁄 𑀦𑀺𑀤𑀲𑁆𑀲𑀺𑀢𑁄, 𑀩𑀳𑀼𑀚𑀦𑀲𑁆𑀲 𑀧𑀸𑀓𑀝𑀻𑀓𑀢𑁄, 𑀦𑀺𑀤𑀲𑁆𑀲𑀦𑀁 𑀯𑀸 𑀓𑀢𑁄, 𑀢𑀼𑀫𑁆𑀳𑁂𑀳𑀺𑀧𑀺 𑀜𑀸𑀢𑀻𑀦𑀁 𑀏𑀯𑀫𑁂𑀯 𑀜𑀸𑀢𑀻𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀜𑀸𑀢𑀺𑀥𑀫𑁆𑀫𑁄 𑀧𑀭𑀺𑀧𑀽𑀭𑁂𑀢𑀩𑁆𑀩𑁄, 𑀦 𑀦𑀺𑀭𑀢𑁆𑀣𑀓𑁂𑀳𑀺 𑀭𑀼𑀡𑁆𑀡𑀸𑀤𑀻𑀳𑀺 𑀅𑀢𑁆𑀢𑀸 𑀧𑀭𑀺𑀢𑀸𑀧𑁂𑀢𑀩𑁆𑀩𑁄𑀢𑀺 𑀘 𑀧𑁂𑀢𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀫𑁂𑀦𑁆𑀢𑁂𑀦 𑀧𑁂𑀢𑀸𑀦𑀁 𑀧𑀽𑀚𑀸 𑀓𑀢𑀸 𑀉𑀴𑀸𑀭𑀸, 𑀩𑀼𑀤𑁆𑀥𑀧𑁆𑀧𑀫𑀼𑀔𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑁆𑀦𑀧𑀸𑀦𑀸𑀤𑀻𑀳𑀺 𑀲𑀦𑁆𑀢𑀧𑁆𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀽𑀦𑀁 𑀩𑀮𑀁 𑀅𑀦𑀼𑀧𑀤𑀺𑀦𑁆𑀦𑀁, 𑀅𑀦𑀼𑀓𑀫𑁆𑀧𑀸𑀤𑀺𑀕𑀼𑀡𑀧𑀭𑀺𑀯𑀸𑀭𑀜𑁆𑀘 𑀘𑀸𑀕𑀘𑁂𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦 𑀅𑀦𑀧𑁆𑀧𑀓𑀁 𑀧𑀼𑀜𑁆𑀜𑀁 ¶ 𑀧𑀲𑀼𑀢𑀁, 𑀢𑀲𑁆𑀫𑀸 𑀪𑀕𑀯𑀸 𑀇𑀫𑁂𑀳𑀺 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀺 𑀭𑀸𑀚𑀸𑀦𑀁 𑀲𑀫𑁆𑀧𑀳𑀁𑀲𑁂𑀦𑁆𑀢𑁄 𑁋

‘‘𑀲𑁄 𑀜𑀸𑀢𑀺𑀥𑀫𑁆𑀫𑁄 𑀘 𑀅𑀬𑀁 𑀦𑀺𑀤𑀲𑁆𑀲𑀺𑀢𑁄,

𑀧𑁂𑀢𑀸𑀦 𑀧𑀽𑀚𑀸 𑀘 𑀓𑀢𑀸 𑀉𑀴𑀸𑀭𑀸;

𑀩𑀮𑀜𑁆𑀘 𑀪𑀺𑀓𑁆𑀔𑀽𑀦𑀫𑀦𑀼𑀧𑁆𑀧𑀤𑀺𑀦𑁆𑀦𑀁,

𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀤𑁂𑀲𑀦𑀁 𑀧𑀭𑀺𑀬𑁄𑀲𑀸𑀧𑁂𑀢𑀺.

𑀅𑀣 ¶ 𑀯𑀸 ‘‘𑀲𑁄 𑀜𑀸𑀢𑀺𑀥𑀫𑁆𑀫𑁄 𑀘 𑀅𑀬𑀁 𑀦𑀺𑀤𑀲𑁆𑀲𑀺𑀢𑁄’’𑀢𑀺 𑀇𑀫𑀺𑀦𑀸 𑀕𑀸𑀣𑀸𑀧𑀤𑁂𑀦 𑀪𑀕𑀯𑀸 𑀭𑀸𑀚𑀸𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺. 𑀜𑀸𑀢𑀺𑀥𑀫𑁆𑀫𑀦𑀺𑀤𑀲𑁆𑀲𑀦𑀫𑁂𑀯 𑀳𑀺 𑀏𑀢𑁆𑀣 𑀲𑀦𑁆𑀤𑀲𑁆𑀲𑀦𑀁 𑀧𑁂𑀢𑀸𑀦 𑀧𑀽𑀚𑀸 𑀘 𑀓𑀢𑀸 𑀉𑀴𑀸𑀭𑀸𑀢𑀺 𑀇𑀫𑀺𑀦𑀸 𑀲𑀫𑀸𑀤𑀧𑁂𑀢𑀺. 𑀉𑀴𑀸𑀭𑀸𑀢𑀺 𑀧𑀲𑀁𑀲𑀦𑀫𑁂𑀯 𑀳𑀺 𑀏𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀧𑀽𑀚𑀸𑀓𑀭𑀡𑁂 𑀲𑀫𑀸𑀤𑀧𑀦𑀁. 𑀩𑀮𑀜𑁆𑀘 𑀪𑀺𑀓𑁆𑀔𑀽𑀦𑀫𑀦𑀼𑀧𑁆𑀧𑀤𑀺𑀦𑁆𑀦𑀦𑁆𑀢𑀺 𑀇𑀫𑀺𑀦𑀸 𑀲𑀫𑀼𑀢𑁆𑀢𑁂𑀚𑁂𑀢𑀺. 𑀩𑀮𑀸𑀦𑀼𑀧𑁆𑀧𑀤𑀸𑀦𑀫𑁂𑀯 𑀳𑀺 𑀏𑀢𑁆𑀣 𑀏𑀯𑀁 𑀤𑀸𑀦𑀁, 𑀩𑀮𑀸𑀦𑀼𑀧𑁆𑀧𑀤𑀸𑀦𑀢𑀸𑀢𑀺 𑀢𑀲𑁆𑀲 𑀉𑀲𑁆𑀲𑀸𑀳𑀯𑀟𑁆𑀠𑀦𑁂𑀦 𑀲𑀫𑀼𑀢𑁆𑀢𑁂𑀚𑀦𑀁. 𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀧𑀳𑀁𑀲𑁂𑀢𑀺. 𑀧𑀼𑀜𑁆𑀜𑀧𑁆𑀧𑀲𑀼𑀢𑀓𑀺𑀢𑁆𑀢𑀦𑀫𑁂𑀯 𑀳𑀺 𑀏𑀢𑁆𑀣 𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀕𑀼𑀡𑀲𑀁𑀯𑀡𑁆𑀡𑀦𑀪𑀸𑀯𑁂𑀦 𑀲𑀫𑁆𑀧𑀳𑀁𑀲𑀦𑀚𑀦𑀦𑀢𑁄 ¶ 𑀲𑀫𑁆𑀧𑀳𑀁𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀢𑁆𑀢𑀺𑀆𑀤𑀻𑀦𑀯𑀲𑀁𑀯𑀡𑁆𑀡𑀦𑁂𑀦 𑀲𑀁𑀯𑀺𑀕𑁆𑀕𑀸𑀦𑀁 𑀬𑁄𑀦𑀺𑀲𑁄 𑀧𑀤𑀳𑀢𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀤𑀫𑁂𑀯 𑀢𑀺𑀭𑁄𑀓𑀼𑀝𑁆𑀝𑀁 𑀤𑁂𑀲𑁂𑀲𑀺, 𑀏𑀯𑀁 𑀬𑀸𑀯 𑀲𑀢𑁆𑀢𑀫𑀤𑀺𑀯𑀲𑀸 𑀢𑀸𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀢𑀺𑀭𑁄𑀓𑀼𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀺𑀥𑀺𑀓𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀓𑁆𑀔𑁂𑀧𑀓𑀸𑀭𑀡𑀁

𑀇𑀤𑀸𑀦𑀺 ¶ 𑀬𑀤𑀺𑀤𑀁 𑀢𑀺𑀭𑁄𑀓𑀼𑀝𑁆𑀝𑀸𑀦𑀦𑁆𑀢𑀭𑀁 ‘‘𑀦𑀺𑀥𑀺𑀁 𑀦𑀺𑀥𑁂𑀢𑀺 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀦𑀺𑀥𑀺𑀓𑀡𑁆𑀟𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑁋

‘‘𑀪𑀸𑀲𑀺𑀢𑁆𑀯𑀸 ¶ 𑀦𑀺𑀥𑀺𑀓𑀡𑁆𑀟𑀲𑁆𑀲, 𑀇𑀥 𑀦𑀺𑀓𑁆𑀔𑁂𑀧𑀓𑀸𑀭𑀡𑀁;

𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀜𑁆𑀘 𑀤𑀻𑀧𑁂𑀢𑁆𑀯𑀸, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁’’.

𑀢𑀢𑁆𑀣 𑀇𑀥 𑀦𑀺𑀓𑁆𑀔𑁂𑀧𑀓𑀸𑀭𑀡𑀁 𑀢𑀸𑀯𑀲𑁆𑀲 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀦𑀺𑀥𑀺𑀓𑀡𑁆𑀟𑀁 𑀪𑀕𑀯𑀢𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀬𑀲𑁆𑀫𑀸 𑀅𑀦𑀼𑀫𑁄𑀤𑀦𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀢𑀺𑀭𑁄𑀓𑀼𑀝𑁆𑀝𑀲𑁆𑀲 𑀫𑀺𑀣𑀼𑀦𑀪𑀽𑀢𑀁, 𑀢𑀲𑁆𑀫𑀸 𑀇𑀥 𑀦𑀺𑀓𑁆𑀔𑀺𑀢𑁆𑀢𑀁. 𑀢𑀺𑀭𑁄𑀓𑀼𑀝𑁆𑀝𑁂𑀦 𑀯𑀸 𑀧𑀼𑀜𑁆𑀜𑀯𑀺𑀭𑀳𑀺𑀢𑀸𑀦𑀁 𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 𑀓𑀢𑀧𑀼𑀜𑁆𑀜𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀇𑀤𑀁 𑀇𑀥 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀓𑀸𑀭𑀡𑀁.

𑀲𑀼𑀢𑁆𑀢𑀝𑁆𑀞𑀼𑀧𑁆𑀧𑀢𑁆𑀢𑀺

𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀧𑀦𑀲𑁆𑀲 𑁋 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄. 𑀲𑁄 𑀘 𑀲𑀤𑁆𑀥𑁄 𑀳𑁄𑀢𑀺 𑀧𑀲𑀦𑁆𑀦𑁄, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀲𑁄 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀸 𑀥𑀦𑀢𑁆𑀣𑀺𑀓𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 ‘‘𑀕𑀘𑁆𑀙, 𑀪𑀡𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀦𑁂𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀳 ‘‘𑀭𑀸𑀚𑀸 𑀢𑀁 𑀕𑀳𑀧𑀢𑀺 𑀆𑀫𑀦𑁆𑀢𑁂𑀢𑀻’’𑀢𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 ¶ 𑀘𑁂𑀢𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀦𑁆𑀢𑁄 𑀆𑀳 ‘‘𑀕𑀘𑁆𑀙, 𑀪𑁄 𑀧𑀼𑀭𑀺𑀲, 𑀧𑀘𑁆𑀙𑀸 𑀆𑀕𑀫𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀢𑀸𑀯𑀫𑁆𑀳𑀺 𑀦𑀺𑀥𑀺𑀁 𑀦𑀺𑀥𑁂𑀦𑁆𑀢𑁄 𑀞𑀺𑀢𑁄’’𑀢𑀺. 𑀅𑀣 𑀪𑀕𑀯𑀸 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀢𑀫𑁂𑀯 𑀧𑀼𑀜𑁆𑀜𑀲𑀫𑁆𑀧𑀤𑀁 𑀧𑀭𑀫𑀢𑁆𑀣𑀢𑁄 𑀦𑀺𑀥𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀅𑀦𑀼𑀫𑁄𑀤𑀦𑀢𑁆𑀣𑀁 ‘‘𑀦𑀺𑀥𑀺𑀁 𑀦𑀺𑀥𑁂𑀢𑀺 𑀧𑀼𑀭𑀺𑀲𑁄’’𑀢𑀺 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀅𑀬𑀫𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺.

𑀏𑀯𑀫𑀲𑁆𑀲 ¶ 𑁋

‘‘𑀪𑀸𑀲𑀺𑀢𑁆𑀯𑀸 𑀦𑀺𑀥𑀺𑀓𑀡𑁆𑀟𑀲𑁆𑀲, 𑀇𑀥 𑀦𑀺𑀓𑁆𑀔𑁂𑀧𑀓𑀸𑀭𑀡𑀁;

𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀜𑁆𑀘 𑀤𑀻𑀧𑁂𑀢𑁆𑀯𑀸, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁’’.

𑀧𑀞𑀫𑀕𑀸𑀣𑀸𑀯𑀡𑁆𑀡𑀦𑀸

𑁧. 𑀢𑀢𑁆𑀣 𑀦𑀺𑀥𑀺𑀁 𑀦𑀺𑀥𑁂𑀢𑀺 𑀧𑀼𑀭𑀺𑀲𑁄𑀢𑀺 𑀦𑀺𑀥𑀻𑀬𑀢𑀻𑀢𑀺 𑀦𑀺𑀥𑀺, 𑀞𑀧𑀻𑀬𑀢𑀺 𑀭𑀓𑁆𑀔𑀻𑀬𑀢𑀺 𑀕𑁄𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀘𑀢𑀼𑀩𑁆𑀩𑀺𑀥𑁄 𑀣𑀸𑀯𑀭𑁄, 𑀚𑀗𑁆𑀕𑀫𑁄, 𑀅𑀗𑁆𑀕𑀲𑀫𑁄, 𑀅𑀦𑀼𑀕𑀸𑀫𑀺𑀓𑁄𑀢𑀺. 𑀢𑀢𑁆𑀣 𑀣𑀸𑀯𑀭𑁄 𑀦𑀸𑀫 𑀪𑀽𑀫𑀺𑀕𑀢𑀁 𑀯𑀸 𑀯𑁂𑀳𑀸𑀲𑀝𑁆𑀞𑀁 𑀯𑀸 𑀳𑀺𑀭𑀜𑁆𑀜𑀁 𑀯𑀸 ¶ 𑀲𑀼𑀯𑀡𑁆𑀡𑀁 𑀯𑀸 𑀔𑁂𑀢𑁆𑀢𑀁 𑀯𑀸 𑀯𑀢𑁆𑀣𑀼 𑀯𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀇𑀭𑀺𑀬𑀸𑀧𑀣𑀯𑀺𑀭𑀳𑀺𑀢𑀁, 𑀅𑀬𑀁 𑀣𑀸𑀯𑀭𑁄 𑀦𑀺𑀥𑀺. 𑀚𑀗𑁆𑀕𑀫𑁄 𑀦𑀸𑀫 𑀤𑀸𑀲𑀺𑀤𑀸𑀲𑀁 𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀁 𑀅𑀚𑁂𑀴𑀓𑀁 𑀓𑀼𑀓𑁆𑀓𑀼𑀝𑀲𑀽𑀓𑀭𑀁 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀇𑀭𑀺𑀬𑀸𑀧𑀣𑀧𑀝𑀺𑀲𑀁𑀬𑀼𑀢𑁆𑀢𑀁. 𑀅𑀬𑀁 𑀚𑀗𑁆𑀕𑀫𑁄 𑀦𑀺𑀥𑀺 𑀅𑀗𑁆𑀕𑀲𑀫𑁄 𑀦𑀸𑀫 𑀓𑀫𑁆𑀫𑀸𑀬𑀢𑀦𑀁, 𑀲𑀺𑀧𑁆𑀧𑀸𑀬𑀢𑀦𑀁, 𑀯𑀺𑀚𑁆𑀚𑀸𑀝𑁆𑀞𑀸𑀦𑀁, 𑀩𑀸𑀳𑀼𑀲𑀘𑁆𑀘𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀲𑀺𑀓𑁆𑀔𑀺𑀢𑁆𑀯𑀸 𑀕𑀳𑀺𑀢𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀫𑀺𑀯 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀩𑀤𑁆𑀥𑀁, 𑀅𑀬𑀁 𑀅𑀗𑁆𑀕𑀲𑀫𑁄 𑀦𑀺𑀥𑀺. 𑀅𑀦𑀼𑀕𑀸𑀫𑀺𑀓𑁄 𑀦𑀸𑀫 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀲𑀻𑀮𑀫𑀬𑀁 𑀪𑀸𑀯𑀦𑀸𑀫𑀬𑀁 𑀥𑀫𑁆𑀫𑀲𑁆𑀲𑀯𑀦𑀫𑀬𑀁 𑀥𑀫𑁆𑀫𑀤𑁂𑀲𑀦𑀸𑀫𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀧𑀼𑀜𑁆𑀜𑀁 𑀢𑀢𑁆𑀣 𑀢𑀢𑁆𑀣 𑀅𑀦𑀼𑀕𑀦𑁆𑀢𑁆𑀯𑀸 𑀯𑀺𑀬 𑀇𑀝𑁆𑀞𑀨𑀮𑀫𑀦𑀼𑀧𑁆𑀧𑀤𑁂𑀢𑀺, 𑀅𑀬𑀁 𑀅𑀦𑀼𑀕𑀸𑀫𑀺𑀓𑁄 𑀦𑀺𑀥𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀣𑀸𑀯𑀭𑁄 𑀅𑀥𑀺𑀧𑁆𑀧𑁂𑀢𑁄.

𑀦𑀺𑀥𑁂𑀢𑀻𑀢𑀺 𑀞𑀧𑁂𑀢𑀺 𑀧𑀝𑀺𑀲𑀸𑀫𑁂𑀢𑀺 𑀕𑁄𑀧𑁂𑀢𑀺. 𑀧𑀼𑀭𑀺𑀲𑁄𑀢𑀺 𑀫𑀦𑀼𑀲𑁆𑀲𑁄. 𑀓𑀸𑀫𑀜𑁆𑀘 𑀧𑀼𑀭𑀺𑀲𑁄𑀧𑀺 𑀇𑀢𑁆𑀣𑀻𑀧𑀺 𑀧𑀡𑁆𑀟𑀓𑁄𑀧𑀺 𑀦𑀺𑀥𑀺𑀁 𑀦𑀺𑀥𑁂𑀢𑀺, 𑀇𑀥 𑀧𑀦 𑀧𑀼𑀭𑀺𑀲𑀲𑀻𑀲𑁂𑀦 𑀤𑁂𑀲𑀦𑀸 𑀓𑀢𑀸, 𑀅𑀢𑁆𑀣𑀢𑁄 𑀧𑀦 𑀢𑁂𑀲𑀫𑁆𑀧𑀺 𑀇𑀥 𑀲𑀫𑁄𑀥𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂𑀢𑀺 𑀑𑀕𑀸𑀳𑁂𑀢𑀩𑁆𑀩𑀝𑁆𑀞𑁂𑀦 𑀕𑀫𑁆𑀪𑀻𑀭𑀁, 𑀉𑀤𑀓𑀲𑁆𑀲 𑀅𑀦𑁆𑀢𑀺𑀓𑀪𑀸𑀯𑁂𑀦 𑀑𑀤𑀓𑀦𑁆𑀢𑀺𑀓𑀁. 𑀅𑀢𑁆𑀣𑀺 𑀕𑀫𑁆𑀪𑀻𑀭𑀁 𑀦 𑀑𑀤𑀓𑀦𑁆𑀢𑀺𑀓𑀁 𑀚𑀗𑁆𑀕𑀮𑁂 𑀪𑀽𑀫𑀺𑀪𑀸𑀕𑁂 𑀲𑀢𑀺𑀓𑀧𑁄𑀭𑀺𑀲𑁄 𑀆𑀯𑀸𑀝𑁄 𑀯𑀺𑀬, 𑀅𑀢𑁆𑀣𑀺 𑀑𑀤𑀓𑀦𑁆𑀢𑀺𑀓𑀁 𑀦 𑀕𑀫𑁆𑀪𑀻𑀭𑀁 𑀦𑀺𑀦𑁆𑀦𑁂 𑀧𑀮𑁆𑀮𑀮𑁂 𑀏𑀓𑀤𑁆𑀯𑀺𑀯𑀺𑀤𑀢𑁆𑀣𑀺𑀓𑁄 𑀆𑀯𑀸𑀝𑁄 𑀯𑀺𑀬, 𑀅𑀢𑁆𑀣𑀺 𑀕𑀫𑁆𑀪𑀻𑀭𑀜𑁆𑀘𑁂𑀯 𑀑𑀤𑀓𑀦𑁆𑀢𑀺𑀓𑀜𑁆𑀘 ¶ 𑀚𑀗𑁆𑀕𑀮𑁂 𑀪𑀽𑀫𑀺𑀪𑀸𑀕𑁂 𑀬𑀸𑀯 𑀇𑀤𑀸𑀦𑀺 𑀉𑀤𑀓𑀁 𑀆𑀕𑀫𑀺𑀲𑁆𑀲𑀢𑀻𑀢𑀺, 𑀢𑀸𑀯 𑀔𑀢𑁄 𑀆𑀯𑀸𑀝𑁄 𑀯𑀺𑀬. 𑀢𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂’’𑀢𑀺. 𑀅𑀢𑁆𑀣𑁂 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂𑀢𑀺 𑀅𑀢𑁆𑀣𑀸 𑀅𑀦𑀧𑁂𑀢𑀦𑁆𑀢𑀺 𑀅𑀢𑁆𑀣𑀁, 𑀅𑀢𑁆𑀣𑀸𑀯𑀳𑀁 𑀳𑀺𑀢𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀢𑀩𑁆𑀩𑀦𑁆𑀢𑀺 𑀓𑀺𑀘𑁆𑀘𑀁, 𑀓𑀺𑀜𑁆𑀘𑀺𑀤𑁂𑀯 𑀓𑀭𑀡𑀻𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑁆𑀧𑀦𑁆𑀦𑀁 𑀏𑀯 𑀲𑀫𑀼𑀧𑁆𑀧𑀦𑁆𑀦𑀁, 𑀓𑀢𑁆𑀢𑀩𑁆𑀩𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂. 𑀅𑀢𑁆𑀣𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀥𑀸𑀦𑀧𑁆𑀧𑀬𑁄𑀚𑀦𑀦𑀺𑀤𑀲𑁆𑀲𑀦𑀫𑁂𑀢𑀁. 𑀏𑀢𑀤𑀢𑁆𑀣𑀜𑁆𑀳𑀺 𑀲𑁄 𑀦𑀺𑀥𑁂𑀢𑀺 ‘‘𑀅𑀢𑁆𑀣𑀸𑀯𑀳𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑀸𑀬 𑀫𑁂 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀫𑁂 𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀬𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑁂𑀯 𑀳𑀺 𑀢𑀲𑁆𑀲 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 ¶ 𑀦𑀺𑀥𑀸𑀦𑀧𑁆𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀢𑁆𑀣𑀸𑀧𑀕𑀫𑀸𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 𑁋

𑁨. ‘‘𑀭𑀸𑀚𑀢𑁄 ¶ 𑀯𑀸 𑀤𑀼𑀭𑀼𑀢𑁆𑀢𑀲𑁆𑀲, 𑀘𑁄𑀭𑀢𑁄 𑀧𑀻𑀴𑀺𑀢𑀲𑁆𑀲 𑀯𑀸.

𑀇𑀡𑀲𑁆𑀲 𑀯𑀸 𑀧𑀫𑁄𑀓𑁆𑀔𑀸𑀬, 𑀤𑀼𑀩𑁆𑀪𑀺𑀓𑁆𑀔𑁂 𑀆𑀧𑀤𑀸𑀲𑀼 𑀯𑀸’’𑀢𑀺.

𑀢𑀲𑁆𑀲𑀢𑁆𑀣𑁄 ‘‘𑀅𑀢𑁆𑀣𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀘 ‘‘𑀇𑀡𑀲𑁆𑀲 𑀯𑀸 𑀧𑀫𑁄𑀓𑁆𑀔𑀸𑀬𑀸’’𑀢𑀺 𑀘 𑀏𑀢𑁆𑀣 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀪𑀯𑀺𑀲𑁆𑀲𑀢𑀺𑀧𑀫𑁄𑀓𑁆𑀔𑀸𑀬-𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀦 𑀓𑁂𑀯𑀮𑀁 𑀅𑀢𑁆𑀣𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯 𑀧𑀼𑀭𑀺𑀲𑁄 𑀦𑀺𑀥𑀺𑀁 𑀦𑀺𑀥𑁂𑀢𑀺, 𑀓𑀺𑀦𑁆𑀢𑀼 ‘‘𑀅𑀬𑀁 𑀘𑁄𑀭𑁄’’𑀢𑀺 𑀯𑀸 ‘‘𑀧𑀸𑀭𑀤𑀸𑀭𑀺𑀓𑁄’’𑀢𑀺 𑀯𑀸 ‘‘𑀲𑀼𑀗𑁆𑀓𑀖𑀸𑀢𑀓𑁄’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀤𑀼𑀭𑀼𑀢𑁆𑀢𑀲𑁆𑀲 𑀫𑁂 𑀲𑀢𑁄 𑀭𑀸𑀚𑀢𑁄 𑀯𑀸 𑀧𑀫𑁄𑀓𑁆𑀔𑀸𑀬 𑀪𑀯𑀺𑀲𑁆𑀲𑀢𑀺, 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀳𑀺 𑀥𑀦𑀳𑀭𑀡𑁂𑀦 𑀯𑀸, ‘‘𑀏𑀢𑁆𑀢𑀓𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀤𑁂𑀳𑀻’’𑀢𑀺 𑀚𑀻𑀯𑀕𑁆𑀕𑀸𑀳𑁂𑀦 𑀯𑀸 𑀘𑁄𑀭𑁂𑀳𑀺 𑀫𑁂 𑀧𑀻𑀴𑀺𑀢𑀲𑁆𑀲 𑀲𑀢𑁄 𑀘𑁄𑀭𑀢𑁄 𑀯𑀸 𑀧𑀫𑁄𑀓𑁆𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑀦𑁆𑀢𑀺 𑀫𑁂 𑀇𑀡𑀸𑀬𑀺𑀓𑀸, 𑀢𑁂 𑀫𑀁 ‘‘𑀇𑀡𑀁 𑀤𑁂𑀳𑀻’’𑀢𑀺 𑀘𑁄𑀤𑁂𑀲𑁆𑀲𑀦𑁆𑀢𑀺, 𑀢𑁂𑀳𑀺 𑀫𑁂 𑀘𑁄𑀤𑀺𑀬𑀫𑀸𑀦𑀲𑁆𑀲 𑀇𑀡𑀲𑁆𑀲 𑀯𑀸 𑀧𑀫𑁄𑀓𑁆𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀳𑁄𑀢𑀺 𑀲𑁄 𑀲𑀫𑀬𑁄, 𑀬𑀁 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺 𑀤𑀼𑀲𑁆𑀲𑀲𑁆𑀲𑀁 𑀤𑀼𑀮𑁆𑀮𑀪𑀧𑀺𑀡𑁆𑀟𑀁, 𑀢𑀢𑁆𑀣 𑀦 𑀲𑀼𑀓𑀭𑀁 𑀅𑀧𑁆𑀧𑀥𑀦𑁂𑀦 𑀬𑀸𑀧𑁂𑀢𑀼𑀁, 𑀢𑀣𑀸𑀯𑀺𑀥𑁂 𑀆𑀕𑀢𑁂 𑀤𑀼𑀩𑁆𑀪𑀺𑀓𑁆𑀔𑁂 𑀯𑀸 𑀫𑁂 𑀪𑀯𑀺𑀲𑁆𑀲𑀢𑀺 ¶ . 𑀬𑀣𑀸𑀭𑀽𑀧𑀸 𑀆𑀧𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀅𑀧𑁆𑀧𑀺𑀬𑀤𑀸𑀬𑀸𑀤𑀢𑁄 𑀯𑀸, 𑀢𑀣𑀸𑀭𑀽𑀧𑀸𑀲𑀼 𑀯𑀸 𑀉𑀧𑁆𑀧𑀦𑁆𑀦𑀸𑀲𑀼 𑀆𑀧𑀤𑀸𑀲𑀼 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺𑀧𑀺 𑀧𑀼𑀭𑀺𑀲𑁄 𑀦𑀺𑀥𑀺𑀁 𑀦𑀺𑀥𑁂𑀢𑀻𑀢𑀺.

𑀏𑀯𑀁 𑀅𑀢𑁆𑀣𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑀁 𑀅𑀦𑀢𑁆𑀣𑀸𑀧𑀕𑀫𑀸𑀥𑀺𑀧𑁆𑀧𑀸𑀬𑀜𑁆𑀘𑀸𑀢𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀤𑀼𑀯𑀺𑀥𑀁 𑀦𑀺𑀥𑀸𑀦𑀧𑁆𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀤𑀼𑀯𑀺𑀥𑀁 𑀧𑀬𑁄𑀚𑀦𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 𑁋

‘‘𑀏𑀢𑀤𑀢𑁆𑀣𑀸𑀬 𑀮𑁄𑀓𑀲𑁆𑀫𑀺𑀁, 𑀦𑀺𑀥𑀺 𑀦𑀸𑀫 𑀦𑀺𑀥𑀻𑀬𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 ‘‘𑀅𑀢𑁆𑀣𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀘 ‘‘𑀭𑀸𑀚𑀢𑁄 𑀯𑀸 𑀤𑀼𑀭𑀼𑀢𑁆𑀢𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀘 𑀅𑀢𑁆𑀣𑀸𑀥𑀺𑀕𑀫𑁄 𑀅𑀦𑀢𑁆𑀣𑀸𑀧𑀕𑀫𑁄 𑀘 𑀤𑀲𑁆𑀲𑀺𑀢𑁄. 𑀏𑀢𑀤𑀢𑁆𑀣𑀸𑀬 𑀏𑀢𑁂𑀲𑀁 𑀦𑀺𑀧𑁆𑀨𑀸𑀤𑀦𑀢𑁆𑀣𑀸𑀬 𑀇𑀫𑀲𑁆𑀫𑀺𑀁 ¶ 𑀑𑀓𑀸𑀲𑀮𑁄𑀓𑁂 𑀬𑁄 𑀓𑁄𑀘𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀪𑁂𑀤𑁄 𑀦𑀺𑀥𑀺 𑀦𑀸𑀫 𑀦𑀺𑀥𑀻𑀬𑀢𑀺 𑀞𑀧𑀻𑀬𑀢𑀺 𑀧𑀝𑀺𑀲𑀸𑀫𑀻𑀬𑀢𑀻𑀢𑀺.

𑀢𑀢𑀺𑀬𑀕𑀸𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀏𑀯𑀁 𑀦𑀺𑀳𑀺𑀢𑁄𑀧𑀺 𑀲𑁄 𑀦𑀺𑀥𑀺 𑀧𑀼𑀜𑁆𑀜𑀯𑀢𑀁𑀬𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀓𑁄 𑀳𑁄𑀢𑀺, 𑀦 𑀅𑀜𑁆𑀜𑁂𑀲𑀁, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀆𑀳 𑁋

𑁩. ‘‘𑀢𑀸𑀯𑀲𑁆𑀲𑀼𑀦𑀺𑀳𑀺𑀢𑁄 𑀲𑀦𑁆𑀢𑁄, 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂.

𑀦 𑀲𑀩𑁆𑀩𑁄 𑀲𑀩𑁆𑀩𑀤𑀸 𑀏𑀯, 𑀢𑀲𑁆𑀲 𑀢𑀁 𑀉𑀧𑀓𑀧𑁆𑀧𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀦𑀺𑀥𑀺 𑀢𑀸𑀯 𑀲𑀼𑀦𑀺𑀳𑀺𑀢𑁄 𑀲𑀦𑁆𑀢𑁄, 𑀢𑀸𑀯 𑀲𑀼𑀝𑁆𑀞𑀼 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑁄 𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀯 𑀲𑀼𑀝𑁆𑀞𑀽𑀢𑀺? 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂, 𑀬𑀸𑀯 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂 𑀦𑀺𑀳𑀺𑀢𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀢𑀸𑀯 𑀲𑀼𑀝𑁆𑀞𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀲𑀩𑁆𑀩𑁄 𑀲𑀩𑁆𑀩𑀤𑀸 𑀏𑀯, 𑀢𑀲𑁆𑀲 𑀢𑀁 𑀉𑀧𑀓𑀧𑁆𑀧𑀢𑀻𑀢𑀺 𑀬𑁂𑀦 𑀧𑀼𑀭𑀺𑀲𑁂𑀦 𑀦𑀺𑀳𑀺𑀢𑁄, 𑀢𑀲𑁆𑀲 𑀲𑀩𑁆𑀩𑁄𑀧𑀺 𑀲𑀩𑁆𑀩𑀓𑀸𑀮𑀁 𑀦 𑀉𑀧𑀓𑀧𑁆𑀧𑀢𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀬𑀣𑀸𑀯𑀼𑀢𑁆𑀢𑀓𑀺𑀘𑁆𑀘𑀓𑀭𑀡𑀲𑀫𑀢𑁆𑀣𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀦𑁆𑀢𑀼 𑀓𑁄𑀘𑀺𑀤𑁂𑀯 𑀓𑀤𑀸𑀘𑀺𑀤𑁂𑀯 𑀉𑀧𑀓𑀧𑁆𑀧𑀢𑀺, 𑀦𑁂𑀯 𑀯𑀸 𑀉𑀧𑀓𑀧𑁆𑀧𑀢𑀻𑀢𑀺. 𑀏𑀢𑁆𑀣 𑀘 𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄 ‘‘𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁧𑁮-𑁧𑁯; 𑁩.𑁧𑁫𑁪) 𑀯𑀺𑀬. 𑀮𑀺𑀗𑁆𑀕𑀪𑁂𑀤𑀁 𑀯𑀸 𑀓𑀢𑁆𑀯𑀸 ‘‘𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀳𑀺 𑀯𑀼𑀘𑁆𑀘𑀫𑀸𑀦𑁂 𑀲𑁄 𑀅𑀢𑁆𑀣𑁄 𑀲𑀼𑀔𑀁 𑀩𑀼𑀚𑁆𑀛𑀢𑀻𑀢𑀺.

𑀘𑀢𑀼𑀢𑁆𑀣𑀧𑀜𑁆𑀘𑀫𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 ¶ ‘‘𑀦 𑀲𑀩𑁆𑀩𑁄 𑀲𑀩𑁆𑀩𑀤𑀸 𑀏𑀯, 𑀢𑀲𑁆𑀲 𑀢𑀁 𑀉𑀧𑀓𑀧𑁆𑀧𑀢𑀻’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀦 𑀉𑀧𑀓𑀧𑁆𑀧𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁪. ‘‘𑀦𑀺𑀥𑀺 𑀯𑀸 𑀞𑀸𑀦𑀸 𑀘𑀯𑀢𑀺, 𑀲𑀜𑁆𑀜𑀸 𑀯𑀸𑀲𑁆𑀲 𑀯𑀺𑀫𑀼𑀬𑁆𑀳𑀢𑀺.

𑀦𑀸𑀕𑀸 𑀯𑀸 𑀅𑀧𑀦𑀸𑀫𑁂𑀦𑁆𑀢𑀺, 𑀬𑀲𑁆𑀫𑀸 𑀯𑀸𑀧𑀺 𑀳𑀭𑀦𑁆𑀢𑀺 𑀦𑀁.

𑁫. ‘‘𑀅𑀧𑁆𑀧𑀺𑀬𑀸 𑀯𑀸𑀧𑀺 𑀤𑀸𑀬𑀸𑀤𑀸, 𑀉𑀤𑁆𑀥𑀭𑀦𑁆𑀢𑀺 𑀅𑀧𑀲𑁆𑀲𑀢𑁄’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑀲𑁆𑀫𑀺𑀁 𑀞𑀸𑀦𑁂 𑀲𑀼𑀦𑀺𑀳𑀺𑀢𑁄 𑀳𑁄𑀢𑀺 𑀦𑀺𑀥𑀺, 𑀲𑁄 𑀯𑀸 𑀦𑀺𑀥𑀺 𑀢𑀫𑁆𑀳𑀸 𑀞𑀸𑀦𑀸 𑀘𑀯𑀢𑀺 𑀅𑀧𑁂𑀢𑀺 𑀯𑀺𑀕𑀘𑁆𑀙𑀢𑀺, 𑀅𑀘𑁂𑀢𑀦𑁄𑀧𑀺 𑀲𑀫𑀸𑀦𑁄 𑀧𑀼𑀜𑁆𑀜𑀓𑁆𑀔𑀬𑀯𑀲𑁂𑀦 𑀅𑀜𑁆𑀜𑀁 𑀞𑀸𑀦𑀁 𑀕𑀘𑁆𑀙𑀢𑀺. 𑀲𑀜𑁆𑀜𑀸 𑀯𑀸 𑀅𑀲𑁆𑀲 𑀯𑀺𑀫𑀼𑀬𑁆𑀳𑀢𑀺, 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀳𑀺𑀢𑁄 𑀦𑀺𑀥𑀺, 𑀢𑀁 𑀦 𑀚𑀸𑀦𑀸𑀢𑀺, 𑀅𑀲𑁆𑀲 𑀧𑀼𑀜𑁆𑀜𑀓𑁆𑀔𑀬𑀘𑁄𑀤𑀺𑀢𑀸 𑀦𑀸𑀕𑀸 𑀯𑀸 𑀢𑀁 𑀦𑀺𑀥𑀺𑀁 𑀅𑀧𑀦𑀸𑀫𑁂𑀦𑁆𑀢𑀺 𑀅𑀜𑁆𑀜𑀁 𑀞𑀸𑀦𑀁 𑀕𑀫𑁂𑀦𑁆𑀢𑀺. 𑀬𑀓𑁆𑀔𑀸 𑀯𑀸𑀧𑀺 𑀳𑀭𑀦𑁆𑀢𑀺 𑀬𑁂𑀦𑀺𑀘𑁆𑀙𑀓𑀁 𑀆𑀤𑀸𑀬 ¶ 𑀕𑀘𑁆𑀙𑀦𑁆𑀢𑀺. 𑀅𑀧𑀲𑁆𑀲𑀢𑁄 𑀯𑀸 𑀅𑀲𑁆𑀲 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀢𑀁 𑀦𑀺𑀥𑀺𑀁 𑀉𑀤𑁆𑀥𑀭𑀦𑁆𑀢𑀺. 𑀏𑀯𑀫𑀲𑁆𑀲 𑀏𑀢𑁂𑀳𑀺 𑀞𑀸𑀦𑀸 𑀘𑀯𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑁄 𑀦𑀺𑀥𑀺 𑀦 𑀉𑀧𑀓𑀧𑁆𑀧𑀢𑀻𑀢𑀺.

𑀏𑀯𑀁 𑀞𑀸𑀦𑀸 𑀘𑀯𑀦𑀸𑀤𑀻𑀦𑀺 𑀮𑁄𑀓𑀲𑀫𑁆𑀫𑀢𑀸𑀦𑀺 𑀅𑀦𑀼𑀧𑀓𑀧𑁆𑀧𑀦𑀓𑀸𑀭𑀡𑀸𑀦𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀁 𑀏𑀢𑁂𑀲𑀫𑁆𑀧𑀺 𑀓𑀸𑀭𑀡𑀸𑀦𑀁 𑀫𑀽𑀮𑀪𑀽𑀢𑀁 𑀏𑀓𑀜𑁆𑀜𑁂𑀯 𑀧𑀼𑀜𑁆𑀜𑀓𑁆𑀔𑀬𑀲𑀜𑁆𑀜𑀺𑀢𑀁 𑀓𑀸𑀭𑀡𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

‘‘𑀬𑀤𑀸 𑀧𑀼𑀜𑁆𑀜𑀓𑁆𑀔𑀬𑁄 𑀳𑁄𑀢𑀺, 𑀲𑀩𑁆𑀩𑀫𑁂𑀢𑀁 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀲𑀫𑀬𑁂 𑀪𑁄𑀕𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀲𑁆𑀲 𑀧𑀼𑀜𑁆𑀜𑀲𑁆𑀲 𑀔𑀬𑁄 𑀳𑁄𑀢𑀺, 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀲𑀁𑀯𑀢𑁆𑀢𑀦𑀺𑀓𑀫𑀧𑀼𑀜𑁆𑀜𑀫𑁄𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀅𑀣 𑀬𑀁 𑀦𑀺𑀥𑀺𑀁 𑀦𑀺𑀥𑁂𑀦𑁆𑀢𑁂𑀦 𑀦𑀺𑀳𑀺𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀥𑀦𑀚𑀸𑀢𑀁, 𑀲𑀩𑁆𑀩𑀫𑁂𑀢𑀁 𑀯𑀺𑀦𑀲𑁆𑀲𑀢𑀻𑀢𑀺.

𑀙𑀝𑁆𑀞𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 𑀪𑀕𑀯𑀸 𑀢𑁂𑀦 𑀢𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀦𑀺𑀳𑀺𑀢𑀫𑁆𑀧𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀅𑀦𑀼𑀧𑀓𑀧𑁆𑀧𑀦𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀦𑀲𑁆𑀲𑀦𑀥𑀫𑁆𑀫𑀁 𑀮𑁄𑀓𑀲𑀫𑁆𑀫𑀢𑀁 𑀦𑀺𑀥𑀺𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀧𑀼𑀜𑁆𑀜𑀲𑀫𑁆𑀧𑀤𑀁 𑀧𑀭𑀫𑀢𑁆𑀣𑀢𑁄 𑀦𑀺𑀥𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀅𑀦𑀼𑀫𑁄𑀤𑀦𑀢𑁆𑀣𑀫𑀺𑀤𑀁 𑀦𑀺𑀥𑀺𑀓𑀡𑁆𑀟𑀫𑀸𑀭𑀤𑁆𑀥𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁬. ‘‘𑀬𑀲𑁆𑀲 𑀤𑀸𑀦𑁂𑀦 𑀲𑀻𑀮𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘.

𑀦𑀺𑀥𑀻 𑀲𑀼𑀦𑀺𑀳𑀺𑀢𑁄 𑀳𑁄𑀢𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸’’𑀢𑀺.

𑀢𑀢𑁆𑀣 ¶ 𑀤𑀸𑀦𑀦𑁆𑀢𑀺 ‘‘𑀤𑀸𑀦𑀜𑁆𑀘 𑀥𑀫𑁆𑀫𑀘𑀭𑀺𑀬𑀸 𑀘𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀲𑀻𑀮𑀦𑁆𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀧𑀜𑁆𑀘𑀗𑁆𑀕𑀤𑀲𑀗𑁆𑀕𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺 𑀯𑀸 𑀲𑀩𑁆𑀩𑀫𑁆𑀧𑀺 𑀲𑀻𑀮𑀁 𑀇𑀥 𑀲𑀻𑀮𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀲𑀁𑀬𑀫𑁄𑀢𑀺 𑀲𑀁𑀬𑀫𑀦𑀁 𑀲𑀁𑀬𑀫𑁄, 𑀘𑁂𑀢𑀲𑁄 𑀦𑀸𑀦𑀸𑀭𑀫𑁆𑀫𑀡𑀕𑀢𑀺𑀦𑀺𑀯𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑁂𑀦 𑀲𑀁𑀬𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 ‘‘𑀳𑀢𑁆𑀣𑀲𑀁𑀬𑀢𑁄, 𑀧𑀸𑀤𑀲𑀁𑀬𑀢𑁄, 𑀯𑀸𑀘𑀸𑀲𑀁𑀬𑀢𑁄, 𑀲𑀁𑀬𑀢𑀼𑀢𑁆𑀢𑀫𑁄’’𑀢𑀺 𑀏𑀢𑁆𑀣 𑀲𑀁𑀬𑀢𑀼𑀢𑁆𑀢𑀫𑁄𑀢𑀺 𑀯𑀼𑀢𑁆𑀢𑁄. 𑀅𑀧𑀭𑁂 𑀆𑀳𑀼 ‘‘𑀲𑀁𑀬𑀫𑀦𑀁 𑀲𑀁𑀬𑀫𑁄, 𑀲𑀁𑀯𑀭𑀡𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀤𑀫𑁄𑀢𑀺 𑀤𑀫𑀦𑀁, 𑀓𑀺𑀮𑁂𑀲𑀽𑀧𑀲𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀜𑁆𑀜𑀸 𑀳𑀺 𑀓𑀢𑁆𑀣𑀘𑀺 𑀧𑀜𑁆𑀜𑀸𑀢𑁆𑀯𑁂𑀯 ¶ 𑀯𑀼𑀘𑁆𑀘𑀢𑀺 ‘‘𑀲𑀼𑀲𑁆𑀲𑀽𑀲𑀸 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁮). 𑀓𑀢𑁆𑀣𑀘𑀺 𑀥𑀫𑁆𑀫𑁄𑀢𑀺 ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄’’𑀢𑀺 𑀏𑀯𑀫𑀸𑀤𑀻𑀲𑀼. 𑀓𑀢𑁆𑀣𑀘𑀺 𑀤𑀫𑁄𑀢𑀺 ‘‘𑀬𑀤𑀺 𑀲𑀘𑁆𑀘𑀸 𑀤𑀫𑀸 𑀘𑀸𑀕𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼.

𑀏𑀯𑀁 𑀤𑀸𑀦𑀸𑀤𑀻𑀦𑀺 𑀜𑀢𑁆𑀯𑀸 𑀇𑀤𑀸𑀦𑀺 𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀲𑁆𑀲 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀤𑀸𑀦𑁂𑀦 𑀲𑀻𑀮𑁂𑀦 𑀲𑀁𑀬𑀫𑁂𑀦 𑀤𑀫𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀬𑀣𑀸 𑀳𑀺𑀭𑀜𑁆𑀜𑁂𑀦 𑀲𑀼𑀯𑀡𑁆𑀡𑁂𑀦 𑀫𑀼𑀢𑁆𑀢𑀸𑀬 𑀫𑀡𑀺𑀦𑀸 𑀯𑀸 𑀥𑀦𑀫𑀬𑁄 𑀦𑀺𑀥𑀺 𑀢𑁂𑀲𑀁 𑀲𑀼𑀯𑀡𑁆𑀡𑀸𑀤𑀻𑀦𑀁 𑀏𑀓𑀢𑁆𑀣 𑀧𑀓𑁆𑀔𑀺𑀧𑀦𑁂𑀦 𑀦𑀺𑀥𑀻𑀬𑀢𑀺, 𑀏𑀯𑀁 𑀧𑀼𑀜𑁆𑀜𑀫𑀬𑁄 𑀦𑀺𑀥𑀺 𑀢𑁂𑀲𑀁 𑀤𑀸𑀦𑀸𑀤𑀻𑀦𑀁 𑀏𑀓𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀘𑁂𑀢𑀺𑀬𑀸𑀤𑀺𑀫𑁆𑀳𑀺 𑀯𑀸 𑀯𑀢𑁆𑀣𑀼𑀫𑁆𑀳𑀺 𑀲𑀼𑀝𑁆𑀞𑀼 𑀓𑀭𑀡𑁂𑀦 𑀲𑀼𑀦𑀺𑀳𑀺𑀢𑁄 𑀳𑁄𑀢𑀻𑀢𑀺.

𑀲𑀢𑁆𑀢𑀫𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 𑀪𑀕𑀯𑀸 ‘‘𑀬𑀲𑁆𑀲 𑀤𑀸𑀦𑁂𑀦𑀸’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀼𑀜𑁆𑀜𑀲𑀫𑁆𑀧𑀤𑀸𑀬 𑀧𑀭𑀫𑀢𑁆𑀣𑀢𑁄 𑀦𑀺𑀥𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀢𑁆𑀣 𑀦𑀺𑀳𑀺𑀢𑁄, 𑀲𑁄 𑀦𑀺𑀥𑀺 𑀲𑀼𑀦𑀺𑀳𑀺𑀢𑁄 𑀳𑁄𑀢𑀺, 𑀢𑀁 𑀯𑀢𑁆𑀣𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁭. ‘‘𑀘𑁂𑀢𑀺𑀬𑀫𑁆𑀳𑀺 𑀘 𑀲𑀗𑁆𑀖𑁂 𑀯𑀸, 𑀧𑀼𑀕𑁆𑀕𑀮𑁂 𑀅𑀢𑀺𑀣𑀻𑀲𑀼 𑀯𑀸.

𑀫𑀸𑀢𑀭𑀺 𑀧𑀺𑀢𑀭𑀺 𑀘𑀸𑀧𑀺, 𑀅𑀣𑁄 𑀚𑁂𑀝𑁆𑀞𑀫𑁆𑀳𑀺 𑀪𑀸𑀢𑀭𑀻’’𑀢𑀺.

𑀢𑀢𑁆𑀣 𑀘𑀬𑀺𑀢𑀩𑁆𑀩𑀦𑁆𑀢𑀺 𑀘𑁂𑀢𑀺𑀬𑀁, 𑀧𑀽𑀚𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀘𑀺𑀢𑀢𑁆𑀢𑀸 𑀯𑀸 𑀘𑁂𑀢𑀺𑀬𑀁. 𑀢𑀁 𑀧𑀦𑁂𑀢𑀁 𑀘𑁂𑀢𑀺𑀬𑀁 𑀢𑀺𑀯𑀺𑀥𑀁 𑀳𑁄𑀢𑀺 𑀧𑀭𑀺𑀪𑁄𑀕𑀘𑁂𑀢𑀺𑀬𑀁 ¶ , 𑀉𑀤𑁆𑀤𑀺𑀲𑁆𑀲𑀓𑀘𑁂𑀢𑀺𑀬𑀁, 𑀥𑀸𑀢𑀼𑀓𑀘𑁂𑀢𑀺𑀬𑀦𑁆𑀢𑀺. 𑀢𑀢𑁆𑀣 𑀩𑁄𑀥𑀺𑀭𑀼𑀓𑁆𑀔𑁄 𑀧𑀭𑀺𑀪𑁄𑀕𑀘𑁂𑀢𑀺𑀬𑀁, 𑀩𑀼𑀤𑁆𑀥𑀧𑀝𑀺𑀫𑀸 𑀉𑀤𑁆𑀤𑀺𑀲𑁆𑀲𑀓𑀘𑁂𑀢𑀺𑀬𑀁, 𑀥𑀸𑀢𑀼𑀕𑀩𑁆𑀪𑀣𑀽𑀧𑀸 𑀲𑀥𑀸𑀢𑀼𑀓𑀸 𑀥𑀸𑀢𑀼𑀓𑀘𑁂𑀢𑀺𑀬𑀁. 𑀲𑀗𑁆𑀖𑁄𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀧𑀼𑀕𑁆𑀕𑀮𑁄𑀢𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀬𑁄 𑀓𑁄𑀘𑀺. 𑀦𑀢𑁆𑀣𑀺 𑀅𑀲𑁆𑀲 𑀢𑀺𑀣𑀺, 𑀬𑀫𑁆𑀳𑀺 𑀯𑀸 𑀢𑀫𑁆𑀳𑀺 𑀤𑀺𑀯𑀲𑁂 𑀆𑀕𑀘𑁆𑀙𑀢𑀻𑀢𑀺 𑀅𑀢𑀺𑀣𑀺. 𑀢𑀗𑁆𑀔𑀡𑁂 𑀆𑀕𑀢𑀧𑀸𑀳𑀼𑀦𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀘𑁂𑀢𑀺𑀬𑀸𑀤𑀻𑀦𑀺 𑀜𑀢𑁆𑀯𑀸 𑀇𑀤𑀸𑀦𑀺 𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀲𑁄 𑀦𑀺𑀥𑀺 ‘‘𑀲𑀼𑀦𑀺𑀳𑀺𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀇𑀫𑁂𑀲𑀼 𑀯𑀢𑁆𑀣𑀽𑀲𑀼 𑀲𑀼𑀦𑀺𑀳𑀺𑀢𑁄 𑀳𑁄𑀢𑀺. 𑀓𑀲𑁆𑀫𑀸? 𑀤𑀻𑀖𑀭𑀢𑁆𑀢𑀁 ¶ 𑀇𑀝𑁆𑀞𑀨𑀮𑀸𑀦𑀼𑀧𑁆𑀧𑀤𑀸𑀦𑀲𑀫𑀢𑁆𑀣𑀢𑀸𑀬. 𑀢𑀣𑀸 𑀳𑀺 𑀅𑀧𑁆𑀧𑀓𑀫𑁆𑀧𑀺 𑀘𑁂𑀢𑀺𑀬𑀫𑁆𑀳𑀺 𑀤𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀇𑀝𑁆𑀞𑀨𑀮𑀮𑀸𑀪𑀺𑀦𑁄 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀏𑀓𑀧𑀼𑀧𑁆𑀨𑀁 ¶ 𑀬𑀚𑀺𑀢𑁆𑀯𑀸𑀦, 𑀅𑀲𑀻𑀢𑀺𑀓𑀧𑁆𑀧𑀓𑁄𑀝𑀺𑀬𑁄;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀤𑀸𑀦𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺 𑀘.

‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸, 𑀧𑀲𑁆𑀲𑁂 𑀘𑁂 𑀯𑀺𑀧𑀼𑀮𑀁 𑀲𑀼𑀔’’𑀦𑁆𑀢𑀺 𑀘. (𑀥. 𑀧. 𑁨𑁯𑁦);

𑀏𑀯𑀁 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀸𑀤𑀺𑀯𑀢𑁆𑀣𑀽𑀲𑀼𑀧𑀺 𑀤𑀸𑀦𑀨𑀮𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀘𑁂𑀢𑀺𑀬𑀸𑀤𑀻𑀲𑀼 𑀤𑀸𑀦𑀲𑁆𑀲 𑀧𑀯𑀢𑁆𑀢𑀺 𑀨𑀮𑀯𑀺𑀪𑀽𑀢𑀺 𑀘 𑀤𑀲𑁆𑀲𑀺𑀢𑀸, 𑀏𑀯𑀁 𑀬𑀣𑀸𑀬𑁄𑀕𑀁 𑀲𑀩𑁆𑀩𑀢𑁆𑀣 𑀢𑀁 𑀢𑀁 𑀆𑀭𑀪𑀺𑀢𑁆𑀯𑀸 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀲𑀻𑀮𑀲𑁆𑀲, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀲𑀁𑀬𑀫𑀲𑁆𑀲, 𑀢𑀩𑁆𑀩𑀢𑁆𑀣𑀼𑀓𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀤𑀫𑀲𑁆𑀲 𑀘 𑀧𑀯𑀢𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀨𑀮𑀯𑀺𑀪𑀽𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸.

𑀅𑀝𑁆𑀞𑀫𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 𑀪𑀕𑀯𑀸 𑀤𑀸𑀦𑀸𑀤𑀻𑀳𑀺 𑀦𑀺𑀥𑀻𑀬𑀫𑀸𑀦𑀲𑁆𑀲 𑀧𑀼𑀜𑁆𑀜𑀫𑀬𑀦𑀺𑀥𑀺𑀦𑁄 𑀘𑁂𑀢𑀺𑀬𑀸𑀤𑀺𑀪𑁂𑀤𑀁 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀢𑁂𑀲𑀼 𑀯𑀢𑁆𑀣𑀽𑀲𑀼 𑀲𑀼𑀦𑀺𑀳𑀺𑀢𑀲𑁆𑀲 𑀢𑀲𑁆𑀲 𑀦𑀺𑀥𑀺𑀦𑁄 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂 𑀦𑀺𑀳𑀺𑀢𑀦𑀺𑀥𑀺𑀢𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁮. ‘‘𑀏𑀲𑁄 ¶ 𑀦𑀺𑀥𑀺 𑀲𑀼𑀦𑀺𑀳𑀺𑀢𑁄, 𑀅𑀚𑁂𑀬𑁆𑀬𑁄 𑀅𑀦𑀼𑀕𑀸𑀫𑀺𑀓𑁄.

𑀧𑀳𑀸𑀬 𑀕𑀫𑀦𑀻𑀬𑁂𑀲𑀼, 𑀏𑀢𑀁 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀧𑀼𑀩𑁆𑀩𑀧𑀤𑁂𑀦 𑀢𑀁 𑀤𑀸𑀦𑀸𑀤𑀻𑀳𑀺 𑀲𑀼𑀦𑀺𑀳𑀺𑀢𑀦𑀺𑀥𑀺𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀏𑀲𑁄 𑀦𑀺𑀥𑀺 𑀲𑀼𑀦𑀺𑀳𑀺𑀢𑁄’’𑀢𑀺. 𑀅𑀚𑁂𑀬𑁆𑀬𑁄𑀢𑀺 𑀧𑀭𑁂𑀳𑀺 𑀚𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀅𑀘𑁆𑀘𑁂𑀬𑁆𑀬𑁄𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀅𑀘𑁆𑀘𑀺𑀢𑀩𑁆𑀩𑁄 𑀅𑀘𑁆𑀘𑀦𑀸𑀭𑀳𑁄 𑀳𑀺𑀢𑀲𑀼𑀔𑀢𑁆𑀣𑀺𑀓𑁂𑀦 𑀉𑀧𑀘𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀫𑀺𑀜𑁆𑀘 𑀧𑀸𑀞𑁂 𑀏𑀲𑁄 𑀦𑀺𑀥𑀺 𑀅𑀘𑁆𑀘𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀧𑀼𑀦 ‘‘𑀓𑀲𑁆𑀫𑀸’’𑀢𑀺 𑀅𑀦𑀼𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀲𑁆𑀫𑀸 𑀲𑀼𑀦𑀺𑀳𑀺𑀢𑁄 𑀅𑀦𑀼𑀕𑀸𑀫𑀺𑀓𑁄’’𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀢𑀭𑀣𑀸 𑀳𑀺 𑀲𑀼𑀦𑀺𑀳𑀺𑀢𑀲𑁆𑀲 𑀅𑀘𑁆𑀘𑁂𑀬𑁆𑀬𑀢𑁆𑀢𑀁 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀦 𑀘 𑀲𑀼𑀦𑀺𑀳𑀺𑀢𑁄 𑀅𑀘𑁆𑀘𑀦𑀻𑀬𑁄. 𑀅𑀘𑁆𑀘𑀺𑀢𑁄 𑀏𑀯 𑀳𑀺 𑀲𑁄𑀢𑀺. 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀦𑀼𑀕𑀸𑀫𑀺𑀓𑁄, 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀫𑁆𑀧𑀺 𑀢𑀢𑁆𑀣 𑀢𑀢𑁆𑀣 𑀨𑀮𑀤𑀸𑀦𑁂𑀦 𑀦 𑀯𑀺𑀚𑀳𑀢𑀻𑀢𑀺 𑀅𑀢𑁆𑀣𑁄.

𑀧𑀳𑀸𑀬 ¶ 𑀕𑀫𑀦𑀻𑀬𑁂𑀲𑀼 𑀏𑀢𑀁 𑀆𑀤𑀸𑀬 𑀕𑀘𑁆𑀙𑀢𑀻𑀢𑀺 𑀫𑀭𑀡𑀓𑀸𑀮𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀲𑀩𑁆𑀩𑀪𑁄𑀕𑁂𑀲𑀼 𑀧𑀳𑀸𑀬 𑀕𑀫𑀦𑀻𑀬𑁂𑀲𑀼 𑀏𑀢𑀁 𑀦𑀺𑀥𑀺𑀁 𑀆𑀤𑀸𑀬 𑀧𑀭𑀮𑁄𑀓𑀁 𑀕𑀘𑁆𑀙𑀢𑀻𑀢𑀺 𑀅𑀬𑀁 𑀓𑀺𑀭 𑀏𑀢𑀲𑁆𑀲 𑀅𑀢𑁆𑀣𑁄. 𑀲𑁄 𑀧𑀦 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀪𑁄𑀕𑀸𑀦𑀁 ¶ 𑀅𑀕𑀫𑀦𑀻𑀬𑀢𑁄. 𑀧𑀳𑀸𑀢𑀩𑁆𑀩𑀸 𑀏𑀯 𑀳𑀺 𑀢𑁂 𑀢𑁂 𑀪𑁄𑀕𑀸, 𑀦 𑀕𑀫𑀦𑀻𑀬𑀸, 𑀕𑀫𑀦𑀻𑀬𑀸 𑀧𑀦 𑀢𑁂 𑀢𑁂 𑀕𑀢𑀺𑀯𑀺𑀲𑁂𑀲𑀸. 𑀬𑀢𑁄 𑀬𑀤𑀺 𑀏𑀲 𑀅𑀢𑁆𑀣𑁄 𑀲𑀺𑀬𑀸, 𑀧𑀳𑀸𑀬 𑀪𑁄𑀕𑁂 𑀕𑀫𑀦𑀻𑀬𑁂𑀲𑀼 𑀕𑀢𑀺𑀯𑀺𑀲𑁂𑀲𑁂𑀲𑀼 𑀇𑀢𑀺 𑀯𑀤𑁂𑀬𑁆𑀬. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 ‘‘𑀦𑀺𑀥𑀺 𑀯𑀸 𑀞𑀸𑀦𑀸 𑀘𑀯𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀓𑀸𑀭𑁂𑀦 𑀧𑀳𑀸𑀬 𑀫𑀘𑁆𑀘𑀁 𑀪𑁄𑀕𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀏𑀢𑀁 𑀆𑀤𑀸𑀬 𑀕𑀘𑁆𑀙𑀢𑀻𑀢𑀺. 𑀏𑀲𑁄 𑀳𑀺 𑀅𑀦𑀼𑀕𑀸𑀫𑀺𑀓𑀢𑁆𑀢𑀸 𑀢𑀁 𑀦𑀧𑁆𑀧𑀚𑀳𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 ‘‘𑀕𑀫𑀦𑀻𑀬𑁂𑀲𑀽𑀢𑀺 𑀏𑀢𑁆𑀣 𑀕𑀦𑁆𑀢𑀩𑁆𑀩𑁂𑀲𑀽𑀢𑀺 𑀅𑀢𑁆𑀣𑁄, 𑀦 𑀕𑀘𑁆𑀙𑀦𑁆𑀢𑁂𑀲𑀽’’𑀢𑀺. 𑀢𑀁 𑀦 𑀏𑀓𑀁𑀲𑀢𑁄 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀳𑀺 ‘‘𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 (𑀤𑀻. 𑀦𑀺. 𑁨.𑁧𑁪𑁧) 𑀏𑀢𑁆𑀣 𑀦𑀺𑀬𑁆𑀬𑀦𑁆𑀢𑀸𑀢𑀺 𑀅𑀢𑁆𑀣𑁄, 𑀦 𑀦𑀺𑀬𑁆𑀬𑀸𑀢𑀩𑁆𑀩𑀸𑀢𑀺, 𑀏𑀯𑀫𑀺𑀥𑀸𑀧𑀺 𑀕𑀘𑁆𑀙𑀦𑁆𑀢𑁂𑀲𑀽𑀢𑀺 𑀅𑀢𑁆𑀣𑁄, 𑀦 𑀕𑀦𑁆𑀢𑀩𑁆𑀩𑁂𑀲𑀽𑀢𑀺.

𑀅𑀣 𑀯𑀸 𑀬𑀲𑁆𑀫𑀸 𑀏𑀲 𑀫𑀭𑀡𑀓𑀸𑀮𑁂 𑀓𑀲𑁆𑀲𑀘𑀺 𑀤𑀸𑀢𑀼𑀓𑀸𑀫𑁄 𑀪𑁄𑀕𑁂 𑀆𑀫𑀲𑀺𑀢𑀼𑀫𑁆𑀧𑀺 𑀦 𑀮𑀪𑀢𑀺, 𑀢𑀲𑁆𑀫𑀸 𑀢𑁂𑀦 𑀢𑁂 𑀪𑁄𑀕𑀸 𑀧𑀼𑀩𑁆𑀩𑀁 𑀓𑀸𑀬𑁂𑀦 ¶ 𑀧𑀳𑀸𑀢𑀩𑁆𑀩𑀸, 𑀧𑀘𑁆𑀙𑀸 𑀯𑀺𑀳𑀢𑀸𑀲𑁂𑀦 𑀘𑁂𑀢𑀲𑀸 𑀕𑀦𑁆𑀢𑀩𑁆𑀩𑀸, 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀧𑀼𑀩𑁆𑀩𑀁 𑀓𑀸𑀬𑁂𑀦 𑀧𑀳𑀸𑀬 𑀧𑀘𑁆𑀙𑀸 𑀘𑁂𑀢𑀲𑀸 𑀕𑀫𑀦𑀻𑀬𑁂𑀲𑀼 𑀪𑁄𑀕𑁂𑀲𑀽𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀘𑀦𑀁, 𑀧𑀳𑀸𑀬 𑀕𑀫𑀦𑀻𑀬𑁂𑀲𑀼 𑀪𑁄𑀕𑁂𑀲𑀼 𑀏𑀓𑀫𑁂𑀯𑁂𑀢𑀁 𑀧𑀼𑀜𑁆𑀜𑀦𑀺𑀥𑀺𑀯𑀺𑀪𑀯𑀁 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀢𑀻𑀢𑀺. 𑀧𑀘𑁆𑀙𑀺𑀫𑁂 𑀅𑀢𑁆𑀣𑁂 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀯𑀘𑀦𑀁. 𑀪𑁄𑀕𑀸𑀦𑀜𑁆𑀳𑀺 𑀕𑀫𑀦𑀻𑀬𑀪𑀸𑀯𑁂𑀦 𑀏𑀢𑀲𑁆𑀲 𑀦𑀺𑀥𑀺𑀲𑁆𑀲 𑀆𑀤𑀸𑀬 𑀕𑀫𑀦𑀻𑀬𑀪𑀸𑀯𑁄 𑀮𑀓𑁆𑀔𑀻𑀬𑀢𑀻𑀢𑀺.

𑀦𑀯𑀫𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 𑀪𑀕𑀯𑀸 𑀇𑀫𑀲𑁆𑀲 𑀧𑀼𑀜𑁆𑀜𑀦𑀺𑀥𑀺𑀦𑁄 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂 𑀦𑀺𑀳𑀺𑀢𑀦𑀺𑀥𑀺𑀢𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀪𑀡𑁆𑀟𑀕𑀼𑀡𑀲𑀁𑀯𑀡𑁆𑀡𑀦𑁂𑀦 𑀓𑀬𑀚𑀦𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀉𑀴𑀸𑀭𑀪𑀡𑁆𑀟𑀯𑀸𑀡𑀺𑀚𑁄 𑀯𑀺𑀬 𑀅𑀢𑁆𑀢𑀦𑀸 𑀤𑁂𑀲𑀺𑀢𑀧𑀼𑀜𑁆𑀜𑀦𑀺𑀥𑀺𑀕𑀼𑀡𑀲𑀁𑀯𑀡𑁆𑀡𑀦𑁂𑀦 𑀢𑀲𑁆𑀫𑀺𑀁 𑀧𑀼𑀜𑁆𑀜𑀦𑀺𑀥𑀺𑀫𑁆𑀳𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀆𑀳 𑁋

𑁯. ‘‘𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲𑀁, 𑀅𑀘𑁄𑀭𑀸𑀳𑀭𑀡𑁄 𑀦𑀺𑀥𑀺.

𑀓𑀬𑀺𑀭𑀸𑀣 𑀥𑀻𑀭𑁄 𑀧𑀼𑀜𑁆𑀜𑀸𑀦𑀺, 𑀬𑁄 𑀦𑀺𑀥𑀺 𑀅𑀦𑀼𑀕𑀸𑀫𑀺𑀓𑁄’’𑀢𑀺.

𑀢𑀢𑁆𑀣 ¶ 𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲𑀦𑁆𑀢𑀺 𑀅𑀲𑀸𑀥𑀸𑀭𑀡𑁄 𑀅𑀜𑁆𑀜𑁂𑀲𑀁, 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 ¶ 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀦 𑀘𑁄𑀭𑁂𑀳𑀺 𑀆𑀳𑀭𑀡𑁄 𑀅𑀘𑁄𑀭𑀸𑀳𑀭𑀡𑁄, 𑀘𑁄𑀭𑁂𑀳𑀺 𑀆𑀤𑀸𑀢𑀩𑁆𑀩𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀥𑀸𑀢𑀩𑁆𑀩𑁄𑀢𑀺 𑀦𑀺𑀥𑀺. 𑀏𑀯𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀼𑀜𑁆𑀜𑀦𑀺𑀥𑀺𑀕𑀼𑀡𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀢𑀢𑁄 𑀤𑁆𑀯𑀻𑀳𑀺 𑀢𑀢𑁆𑀣 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺 ‘‘𑀓𑀬𑀺𑀭𑀸𑀣 𑀥𑀻𑀭𑁄 𑀧𑀼𑀜𑁆𑀜𑀸𑀦𑀺, 𑀬𑁄 𑀦𑀺𑀥𑀺 𑀅𑀦𑀼𑀕𑀸𑀫𑀺𑀓𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀧𑀼𑀜𑁆𑀜𑀸𑀦𑀺 𑀦𑀸𑀫 𑀅𑀲𑀸𑀥𑀸𑀭𑀡𑁄 𑀅𑀜𑁆𑀜𑁂𑀲𑀁, 𑀅𑀘𑁄𑀭𑀸𑀳𑀭𑀡𑁄 𑀘 𑀦𑀺𑀥𑀺 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀅𑀲𑀸𑀥𑀸𑀭𑀡𑁄 𑀅𑀘𑁄𑀭𑀸𑀳𑀭𑀡𑁄 𑀘 𑀦𑀺𑀥𑀺, 𑀅𑀣 𑀔𑁄 𑀧𑀦 ‘‘𑀏𑀲𑁄 𑀦𑀺𑀥𑀺 𑀲𑀼𑀦𑀺𑀳𑀺𑀢𑁄, 𑀅𑀚𑁂𑀬𑁆𑀬𑁄 𑀅𑀦𑀼𑀕𑀸𑀫𑀺𑀓𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄 𑀬𑁄 𑀦𑀺𑀥𑀺 𑀅𑀦𑀼𑀕𑀸𑀫𑀺𑀓𑁄. 𑀲𑁄 𑀘 𑀬𑀲𑁆𑀫𑀸 𑀧𑀼𑀜𑁆𑀜𑀸𑀦𑀺𑀬𑁂𑀯, 𑀢𑀲𑁆𑀫𑀸 𑀓𑀬𑀺𑀭𑀸𑀣 𑀓𑀭𑁂𑀬𑁆𑀬 𑀥𑀻𑀭𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀥𑀺𑀢𑀺𑀲𑀫𑁆𑀧𑀦𑁆𑀦𑁄 𑀘 𑀧𑀼𑀕𑁆𑀕𑀮𑁄 𑀧𑀼𑀜𑁆𑀜𑀸𑀦𑀻𑀢𑀺.

𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑀏𑀯𑀁 𑀪𑀕𑀯𑀸 𑀕𑀼𑀡𑀲𑀁𑀯𑀡𑁆𑀡𑀦𑁂𑀦 𑀧𑀼𑀜𑁆𑀜𑀦𑀺𑀥𑀺𑀫𑁆𑀳𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀉𑀲𑁆𑀲𑀳𑀺𑀢𑁆𑀯𑀸 𑀧𑀼𑀜𑁆𑀜𑀦𑀺𑀥𑀺𑀓𑀺𑀭𑀺𑀬𑀸𑀬 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑁂𑀲𑀁 𑀲𑁄 𑀬𑀁 𑀨𑀮𑀁 𑀤𑁂𑀢𑀺, 𑀢𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁧𑁦.

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀻’’𑀢𑀺.

𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀧𑀢𑁆𑀣𑀦𑀸𑀬 𑀧𑀝𑀺𑀩𑀦𑁆𑀥𑀺𑀢𑀲𑁆𑀲 𑀲𑀩𑁆𑀩𑀓𑀸𑀫𑀤𑀤𑀢𑁆𑀢𑀁, 𑀦 𑀯𑀺𑀦𑀸 𑀧𑀢𑁆𑀣𑀦𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂 𑀕𑀳𑀧𑀢𑀬𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻’’ (𑀫. 𑀦𑀺. 𑁧.𑁪𑁪𑁨).

𑀏𑀯𑀁 ‘‘𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻’’𑀢𑀺 (𑀫. 𑀦𑀺. 𑁧.𑁪𑁪𑁨).

𑀢𑀣𑀸 ¶ 𑀘𑀸𑀳 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀲𑀻𑀮𑁂𑀦, 𑀲𑀼𑀢𑁂𑀦, 𑀘𑀸𑀕𑁂𑀦, 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘𑀅𑀳𑁄 𑀯𑀢𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀦𑀁 ¶ 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀢𑀁 𑀘𑀺𑀢𑁆𑀢𑀁 𑀧𑀤𑀳𑀢𑀺, 𑀢𑀁 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺, 𑀢𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀢𑀲𑁆𑀲 𑀢𑁂 𑀲𑀗𑁆𑀔𑀸𑀭𑀸 𑀘 𑀯𑀺𑀳𑀸𑀭𑀸 𑀘 𑀏𑀯𑀁 𑀪𑀸𑀯𑀺𑀢𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁧𑁬𑁧) 𑀏𑀯𑀫𑀸𑀤𑀺.

𑀢𑀲𑁆𑀫𑀸 𑀢𑀁 𑀢𑀣𑀸 𑀢𑀣𑀸 𑀆𑀓𑀗𑁆𑀔𑀧𑀭𑀺𑀬𑀸𑀬𑀁 𑀘𑀺𑀢𑁆𑀢𑀧𑀤𑀳𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑀦𑀸𑀧𑀭𑀺𑀓𑁆𑀔𑀸𑀭𑀁 𑀧𑀢𑁆𑀣𑀦𑀁 𑀢𑀲𑁆𑀲 𑀲𑀩𑁆𑀩𑀓𑀸𑀫𑀤𑀤𑀢𑁆𑀢𑁂 𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

‘‘𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺.

𑀏𑀓𑀸𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁧. 𑀇𑀤𑀸𑀦𑀺 𑀬𑀁 𑀢𑀁 𑀲𑀩𑁆𑀩𑀁 𑀏𑀢𑁂𑀦 𑀮𑀩𑁆𑀪𑀢𑀺, 𑀢𑀁 𑀑𑀥𑀺𑀲𑁄 𑀑𑀥𑀺𑀲𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀯𑀡𑁆𑀡𑀢𑀸 𑀲𑀼𑀲𑀭𑀢𑀸’’𑀢𑀺 𑀏𑀯𑀫𑀸𑀤𑀺𑀕𑀸𑀣𑀸𑀬𑁄 𑀆𑀳.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀲𑀼𑀯𑀡𑁆𑀡𑀢𑀸 𑀦𑀸𑀫 𑀲𑀼𑀦𑁆𑀤𑀭𑀘𑁆𑀙𑀯𑀺𑀯𑀡𑁆𑀡𑀢𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀢𑀸, 𑀲𑀸𑀧𑀺 𑀏𑀢𑁂𑀦 𑀧𑀼𑀜𑁆𑀜𑀦𑀺𑀥𑀺𑀦𑀸 𑀮𑀩𑁆𑀪𑀢𑀺. 𑀬𑀣𑀸𑀳 𑁋

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁…𑀧𑁂… 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀅𑀓𑁆𑀓𑁄𑀥𑀦𑁄 𑀅𑀳𑁄𑀲𑀺 𑀅𑀦𑀼𑀧𑀸𑀬𑀸𑀲𑀩𑀳𑀼𑀮𑁄, 𑀩𑀳𑀼𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀦𑀸𑀪𑀺𑀲𑀚𑁆𑀚𑀺 ¶ 𑀦 𑀓𑀼𑀧𑁆𑀧𑀺 𑀦 𑀩𑁆𑀬𑀸𑀧𑀚𑁆𑀚𑀺 𑀦 𑀧𑀢𑀺𑀢𑁆𑀣𑀻𑀬𑀺, 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑁆𑀯𑀸𑀓𑀸𑀲𑀺, 𑀤𑀸𑀢𑀸 𑀘 𑀅𑀳𑁄𑀲𑀺 𑀲𑀼𑀔𑀼𑀫𑀸𑀦𑀁 𑀫𑀼𑀤𑀼𑀓𑀸𑀦𑀁 𑀅𑀢𑁆𑀣𑀭𑀡𑀸𑀦𑀁 𑀧𑀸𑀯𑀼𑀭𑀡𑀸𑀦𑀁 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓…𑀧𑁂… 𑀓𑁄𑀲𑁂𑀬𑁆𑀬…𑀧𑁂… 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸…𑀧𑁂… 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺. 𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑁄𑀢𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁮).

𑀲𑀼𑀲𑀭𑀢𑀸 𑀦𑀸𑀫 𑀩𑁆𑀭𑀳𑁆𑀫𑀲𑁆𑀲𑀭𑀢𑀸 𑀓𑀭𑀯𑀻𑀓𑀪𑀸𑀡𑀺𑀢𑀸, 𑀲𑀸𑀧𑀺 𑀏𑀢𑁂𑀦 𑀮𑀩𑁆𑀪𑀢𑀺. 𑀬𑀣𑀸𑀳 𑁋

‘‘𑀬𑀫𑁆𑀧𑀺 ¶ , 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁…𑀧𑁂… 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺, 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸…𑀧𑁂… 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸…𑀧𑁂… 𑀇𑀢𑁆𑀣𑀢𑁆𑀢𑀁 ¶ 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀧𑀳𑀼𑀢𑀚𑀺𑀯𑁆𑀳𑁄 𑀘 𑀳𑁄𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁄 𑀘 𑀓𑀭𑀯𑀻𑀓𑀪𑀸𑀡𑀻’’𑀢𑀺 (𑀤𑀻. 𑀦𑀺. 𑁩.𑁨𑁩𑁬).

𑀲𑀼𑀲𑀡𑁆𑀞𑀸𑀦𑀸𑀢𑀺 𑀲𑀼𑀝𑁆𑀞𑀼 𑀲𑀡𑁆𑀞𑀸𑀦𑀢𑀸, 𑀲𑀫𑀘𑀺𑀢𑀯𑀝𑁆𑀝𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀫𑀘𑀺𑀢𑀯𑀝𑁆𑀝𑀺𑀢𑀪𑀸𑀯𑁂𑀦 𑀲𑀦𑁆𑀦𑀺𑀯𑁂𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀧𑀺 𑀏𑀢𑁂𑀦 𑀮𑀩𑁆𑀪𑀢𑀺. 𑀬𑀣𑀸𑀳 𑁋

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁…𑀧𑁂… 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀩𑀳𑀼𑀚𑀦𑀲𑁆𑀲 𑀅𑀢𑁆𑀣𑀓𑀸𑀫𑁄 𑀅𑀳𑁄𑀲𑀺 𑀳𑀺𑀢𑀓𑀸𑀫𑁄 𑀨𑀸𑀲𑀼𑀓𑀸𑀫𑁄 𑀬𑁄𑀕𑀓𑁆𑀔𑁂𑀫𑀓𑀸𑀫𑁄 ‘𑀓𑀺𑀦𑁆𑀢𑀺 𑀫𑁂 𑀲𑀤𑁆𑀥𑀸𑀬 𑀯𑀟𑁆𑀠𑁂𑀬𑁆𑀬𑀼𑀁, 𑀲𑀻𑀮𑁂𑀦 𑀲𑀼𑀢𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬 𑀥𑀦𑀥𑀜𑁆𑀜𑁂𑀦 𑀔𑁂𑀢𑁆𑀢𑀯𑀢𑁆𑀣𑀼𑀦𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀳𑀺 𑀧𑀼𑀢𑁆𑀢𑀤𑀸𑀭𑁂𑀳𑀺 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀳𑀺 𑀜𑀸𑀢𑀻𑀳𑀺 𑀫𑀺𑀢𑁆𑀢𑁂𑀳𑀺 𑀩𑀦𑁆𑀥𑀯𑁂𑀳𑀺 𑀯𑀟𑁆𑀠𑁂𑀬𑁆𑀬𑀼’𑀦𑁆𑀢𑀺, 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲…𑀧𑁂… 𑀲𑀫𑀸𑀦𑁄 𑀇𑀫𑀸𑀦𑀺 𑀢𑀻𑀡𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺, 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄 𑀘 𑀳𑁄𑀢𑀺 𑀘𑀺𑀢𑀦𑁆𑀢𑀭𑀁𑀲𑁄 𑀘 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 ¶ 𑀘𑀸’’𑀢𑀺 (𑀤𑀻. 𑀦𑀺. 𑁩.𑁨𑁨𑁪) 𑀏𑀯𑀫𑀸𑀤𑀺.

𑀇𑀫𑀺𑀦𑀸 𑀦𑀬𑁂𑀦 𑀇𑀢𑁄 𑀧𑀭𑁂𑀲𑀫𑁆𑀧𑀺 𑀇𑀫𑀺𑀦𑀸 𑀧𑀼𑀜𑁆𑀜𑀦𑀺𑀥𑀺𑀦𑀸 𑀧𑀝𑀺𑀮𑀸𑀪𑀲𑀸𑀥𑀓𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀢𑀢𑁄 𑀢𑀢𑁄 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀦𑀺. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀢𑀼 𑀲𑀁𑀔𑀺𑀢𑁆𑀢𑀁, 𑀇𑀤𑀸𑀦𑀺 𑀅𑀯𑀲𑁂𑀲𑀧𑀤𑀸𑀦𑀁 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺.

𑀲𑀼𑀭𑀽𑀧𑀢𑀸𑀢𑀺 𑀏𑀢𑁆𑀣 𑀲𑀓𑀮𑀲𑀭𑀻𑀭𑀁 𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 ‘‘𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁬) 𑀯𑀺𑀬, 𑀢𑀲𑁆𑀲 𑀭𑀽𑀧𑀲𑁆𑀲 𑀲𑀼𑀦𑁆𑀤𑀭𑀢𑀸 𑀲𑀼𑀭𑀽𑀧𑀢𑀸 𑀦𑀸𑀢𑀺𑀤𑀻𑀖𑀢𑀸 𑀦𑀸𑀢𑀺𑀭𑀲𑁆𑀲𑀢𑀸 𑀦𑀸𑀢𑀺𑀓𑀺𑀲𑀢𑀸 𑀦𑀸𑀢𑀺𑀣𑀽𑀮𑀢𑀸 𑀦𑀸𑀢𑀺𑀓𑀸𑀴𑀢𑀸 𑀦𑀘𑁆𑀘𑁄𑀤𑀸𑀢𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀥𑀺𑀧𑀘𑁆𑀘𑀦𑁆𑀢𑀺 𑀅𑀥𑀺𑀧𑀢𑀺𑀪𑀸𑀯𑁄, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀺𑀪𑀸𑀯𑁂𑀦 𑀲𑀸𑀫𑀺𑀓𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀸𑀭𑁄𑀢𑀺 𑀅𑀕𑀸𑀭𑀺𑀓𑀸𑀦𑀁 𑀲𑀚𑀦𑀧𑀭𑀺𑀚𑀦𑀲𑀫𑁆𑀧𑀢𑁆𑀢𑀺, 𑀅𑀦𑀕𑀸𑀭𑀺𑀓𑀸𑀦𑀁 𑀧𑀭𑀺𑀲𑀲𑀫𑁆𑀧𑀢𑁆𑀢𑀺, 𑀆𑀥𑀺𑀧𑀘𑁆𑀘𑀜𑁆𑀘 ¶ 𑀧𑀭𑀺𑀯𑀸𑀭𑁄 𑀘 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑁄. 𑀏𑀢𑁆𑀣 𑀘 𑀲𑀼𑀯𑀡𑁆𑀡𑀢𑀸𑀤𑀻𑀳𑀺 𑀲𑀭𑀻𑀭𑀲𑀫𑁆𑀧𑀢𑁆𑀢𑀺, 𑀆𑀥𑀺𑀧𑀘𑁆𑀘𑁂𑀦 𑀪𑁄𑀕𑀲𑀫𑁆𑀧𑀢𑁆𑀢𑀺, 𑀧𑀭𑀺𑀯𑀸𑀭𑁂𑀦 𑀲𑀚𑀦𑀧𑀭𑀺𑀚𑀦𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺 𑀬𑀁 𑀢𑀁 ‘‘𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀇𑀤𑀫𑁆𑀧𑀺 𑀢𑀸𑀯 𑀧𑀞𑀫𑀁 𑀑𑀥𑀺𑀲𑁄 𑀯𑀼𑀢𑁆𑀢𑀲𑀼𑀯𑀡𑁆𑀡𑀢𑀸𑀤𑀺 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀤𑁆𑀯𑀸𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁨. 𑀏𑀯𑀫𑀺𑀫𑀸𑀬 ¶ 𑀕𑀸𑀣𑀸𑀬 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑀪𑀺𑀢𑀩𑁆𑀩𑀁 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀢𑁄 𑀑𑀭𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀼𑀪𑀬𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀤𑁂𑀲𑀭𑀚𑁆𑀚’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀧𑀤𑁂𑀲𑀭𑀚𑁆𑀚𑀦𑁆𑀢𑀺 𑀏𑀓𑀤𑀻𑀧𑀫𑁆𑀧𑀺 𑀲𑀓𑀮𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀧𑀣𑀯𑀺𑀬𑀸 𑀏𑀓𑀫𑁂𑀓𑀲𑁆𑀫𑀺𑀁 𑀧𑀤𑁂𑀲𑁂 𑀭𑀚𑁆𑀚𑀁. 𑀇𑀲𑁆𑀲𑀭𑀪𑀸𑀯𑁄 𑀇𑀲𑁆𑀲𑀭𑀺𑀬𑀁, 𑀇𑀫𑀺𑀦𑀸 𑀤𑀻𑀧𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀤𑀲𑁆𑀲𑁂𑀢𑀺. 𑀘𑀓𑁆𑀓𑀯𑀢𑁆𑀢𑀺𑀲𑀼𑀔𑀁 𑀧𑀺𑀬𑀦𑁆𑀢𑀺 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀘𑀓𑁆𑀓𑀯𑀢𑁆𑀢𑀺𑀲𑀼𑀔𑀁. 𑀇𑀫𑀺𑀦𑀸 𑀘𑀸𑀢𑀼𑀭𑀦𑁆𑀢𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀤𑀲𑁆𑀲𑁂𑀢𑀺. 𑀤𑁂𑀯𑁂𑀲𑀼 𑀭𑀚𑁆𑀚𑀁 𑀤𑁂𑀯𑀭𑀚𑁆𑀚𑀁, 𑀏𑀢𑁂𑀦 𑀫𑀦𑁆𑀥𑀸𑀢𑀸𑀤𑀻𑀦𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀤𑁂𑀯𑀭𑀚𑁆𑀚𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀅𑀧𑀺 𑀤𑀺𑀩𑁆𑀩𑁂𑀲𑀽𑀢𑀺 𑀇𑀫𑀺𑀦𑀸 𑀬𑁂 𑀢𑁂 𑀤𑀺𑀯𑀺 𑀪𑀯𑀢𑁆𑀢𑀸 ‘‘𑀤𑀺𑀩𑁆𑀩𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀼 𑀤𑀺𑀩𑁆𑀩𑁂𑀲𑀼 𑀓𑀸𑀬𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀤𑁂𑀯𑀭𑀚𑁆𑀚𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺 𑀬𑀁 𑀢𑀁 ‘‘𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺 ¶ 𑀯𑀼𑀢𑁆𑀢𑀁, 𑀢𑀢𑁆𑀣 𑀇𑀤𑀫𑁆𑀧𑀺 𑀤𑀼𑀢𑀺𑀬𑀁 𑀑𑀥𑀺𑀲𑁄 𑀧𑀤𑁂𑀲𑀭𑀚𑁆𑀚𑀸𑀤𑀺 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑁂𑀭𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁩. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑀪𑀺𑀢𑀩𑁆𑀩𑀁 𑀤𑁂𑀯𑀫𑀦𑀼𑀲𑁆𑀲𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀯𑀼𑀢𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀲𑀫𑀸𑀲𑀢𑁄 𑀧𑀼𑀭𑀓𑁆𑀔𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀦𑀼𑀲𑁆𑀲𑀺𑀓𑀸 𑀘 𑀲𑀫𑁆𑀧𑀢𑁆𑀢𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀲𑁆𑀲𑀸𑀬𑀁 𑀧𑀤𑀯𑀡𑁆𑀡𑀦𑀸 𑁋 𑀫𑀦𑀼𑀲𑁆𑀲𑀸𑀦𑀁 𑀅𑀬𑀦𑁆𑀢𑀺 𑀫𑀸𑀦𑀼𑀲𑁆𑀲𑀻, 𑀫𑀸𑀦𑀼𑀲𑁆𑀲𑀻 𑀏𑀯 𑀫𑀸𑀦𑀼𑀲𑁆𑀲𑀺𑀓𑀸. 𑀲𑀫𑁆𑀧𑀚𑁆𑀚𑀦𑀁 𑀲𑀫𑁆𑀧𑀢𑁆𑀢𑀺. 𑀤𑁂𑀯𑀸𑀦𑀁 𑀮𑁄𑀓𑁄 𑀤𑁂𑀯𑀮𑁄𑀓𑁄. 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂. 𑀬𑀸𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁, 𑀭𑀫𑀦𑁆𑀢𑀺 𑀏𑀢𑀸𑀬 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀦𑁆𑀦𑀸𑀬 𑀩𑀳𑀺𑀤𑁆𑀥𑀸 𑀯𑀸 𑀉𑀧𑀓𑀭𑀡𑀪𑀽𑀢𑀸𑀬𑀸𑀢𑀺 𑀭𑀢𑀺, 𑀲𑀼𑀔𑀲𑁆𑀲 𑀲𑀼𑀔𑀯𑀢𑁆𑀣𑀼𑀦𑁄 𑀘𑁂𑀢𑀁 ¶ 𑀅𑀥𑀺𑀯𑀘𑀦𑀁. 𑀬𑀸𑀢𑀺 𑀅𑀦𑀺𑀬𑀢𑀯𑀘𑀦𑀁 𑀘𑀲𑀤𑁆𑀤𑁄 𑀧𑀼𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀲𑀳 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁𑀬𑁂𑀯 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺.

𑀅𑀬𑀁 𑀧𑀦 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑀸 𑀏𑀲𑀸 ‘‘𑀲𑀼𑀯𑀡𑁆𑀡𑀢𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀫𑀸𑀦𑀼𑀲𑁆𑀲𑀺𑀓𑀸 𑀘 𑀲𑀫𑁆𑀧𑀢𑁆𑀢𑀺 𑀤𑁂𑀯𑀮𑁄𑀓𑁂 𑀘 𑀬𑀸 𑀭𑀢𑀺 𑀯𑀼𑀢𑁆𑀢𑀸, 𑀲𑀸 𑀘 𑀲𑀩𑁆𑀩𑀸, 𑀬𑀸 𑀘𑀸𑀬𑀫𑀧𑀭𑀸 𑀲𑀤𑁆𑀥𑀸𑀦𑀼𑀲𑀸𑀭𑀺𑀪𑀸𑀯𑀸𑀤𑀺𑀯𑀲𑁂𑀦 𑀧𑀢𑁆𑀢𑀩𑁆𑀩𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺, 𑀲𑀸 𑀘𑀸𑀢𑀺 𑀇𑀤𑀁 𑀢𑀢𑀺𑀬𑀫𑁆𑀧𑀺 𑀑𑀥𑀺𑀲𑁄 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺.

𑀅𑀣 ¶ 𑀯𑀸 𑀬𑀸 𑀧𑀼𑀩𑁆𑀩𑁂 𑀲𑀼𑀯𑀡𑁆𑀡𑀢𑀸𑀤𑀻𑀳𑀺 𑀅𑀯𑀼𑀢𑁆𑀢𑀸 ‘‘𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀏𑀯𑀫𑀸𑀤𑀺𑀦𑀸 (𑀅. 𑀦𑀺. 𑁯.𑁨𑁧) 𑀦𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀸𑀤𑀺𑀪𑁂𑀤𑀸 𑀘 𑀫𑀸𑀦𑀼𑀲𑁆𑀲𑀺𑀓𑀸 𑀲𑀫𑁆𑀧𑀢𑁆𑀢𑀺, 𑀅𑀧𑀭𑀸 𑀤𑁂𑀯𑀮𑁄𑀓𑁂 𑀘 𑀬𑀸 𑀛𑀸𑀦𑀸𑀤𑀺𑀭𑀢𑀺, 𑀬𑀸 𑀘 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺 𑀘𑀸𑀢𑀺 𑀇𑀤𑀫𑁆𑀧𑀺 𑀢𑀢𑀺𑀬𑀁 𑀑𑀥𑀺𑀲𑁄 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺. 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀘𑀼𑀤𑁆𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁪. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑀪𑀺𑀢𑀩𑁆𑀩𑀁 𑀲𑀤𑁆𑀥𑀸𑀦𑀼𑀲𑀸𑀭𑀻𑀪𑀸𑀯𑀸𑀤𑀺𑀯𑀲𑁂𑀦 𑀧𑀢𑁆𑀢𑀩𑁆𑀩𑀁 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀯𑀺𑀚𑁆𑀚𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀯𑀲𑁂𑀦𑀧𑀺 𑀧𑀢𑁆𑀢𑀩𑁆𑀩𑀁 𑀢𑀫𑁂𑀯 𑀢𑀲𑁆𑀲 𑀉𑀧𑀸𑀬𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀢𑁆𑀢𑀲𑀫𑁆𑀧𑀤𑀫𑀸𑀕𑀫𑁆𑀫𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀲𑁆𑀲𑀸𑀬𑀁 𑀧𑀤𑀯𑀡𑁆𑀡𑀦𑀸 𑁋 𑀲𑀫𑁆𑀧𑀚𑁆𑀚𑀢𑀺 𑀏𑀢𑀸𑀬 𑀕𑀼𑀡𑀯𑀺𑀪𑀽𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀲𑀫𑁆𑀧𑀤𑀸, 𑀫𑀺𑀢𑁆𑀢𑁄 𑀏𑀯 𑀲𑀫𑁆𑀧𑀤𑀸 𑀫𑀺𑀢𑁆𑀢𑀲𑀫𑁆𑀧𑀤𑀸, 𑀢𑀁 𑀫𑀺𑀢𑁆𑀢𑀲𑀫𑁆𑀧𑀤𑀁 ¶ . 𑀆𑀕𑀫𑁆𑀫𑀸𑀢𑀺 𑀦𑀺𑀲𑁆𑀲𑀸𑀬. 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦. 𑀧𑀬𑀼𑀜𑁆𑀚𑀢𑁄𑀢𑀺 𑀬𑁄𑀕𑀸𑀦𑀼𑀝𑁆𑀞𑀸𑀦𑀁 𑀓𑀭𑁄𑀢𑁄. 𑀯𑀺𑀚𑀸𑀦𑀸𑀢𑀺 𑀏𑀢𑀸𑀬𑀸𑀢𑀺 𑀯𑀺𑀚𑁆𑀚𑀸, 𑀯𑀺𑀫𑀼𑀘𑁆𑀘𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑁄, 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀯𑀲𑀻𑀪𑀸𑀯𑁄.

𑀅𑀬𑀁 𑀧𑀦 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑁆𑀯𑀸𑀬𑀁 𑀫𑀺𑀢𑁆𑀢𑀲𑀫𑁆𑀧𑀤𑀫𑀸𑀕𑀫𑁆𑀫 𑀲𑀢𑁆𑀣𑀸𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀦𑀺𑀲𑁆𑀲𑀸𑀬 𑀢𑀢𑁄 𑀑𑀯𑀸𑀤𑀜𑁆𑀘 𑀅𑀦𑀼𑀲𑀸𑀲𑀦𑀺𑀜𑁆𑀘 𑀕𑀳𑁂𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀬𑁄𑀦𑀺𑀲𑁄 𑀧𑀬𑀼𑀜𑁆𑀚𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀲𑀼 𑀢𑀻𑀲𑀼 𑀯𑀺𑀚𑁆𑀚𑀸𑀲𑀼 ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀫𑀼𑀢𑁆𑀢𑀺? 𑀘𑀺𑀢𑁆𑀢𑀲𑁆𑀲 𑀘 𑀅𑀥𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑀸’’𑀢𑀺 (𑀥. 𑀲. 𑁧𑁩𑁮𑁧) 𑀏𑀯𑀁 𑀆𑀕𑀢𑀸𑀬 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀸𑀦𑀪𑁂𑀤𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀘 𑀢𑀣𑀸 𑀢𑀣𑀸 𑀅𑀤𑀦𑁆𑀥𑀸𑀬𑀺𑀢𑀢𑁆𑀢𑁂𑀦 ¶ 𑀯𑀲𑀻𑀪𑀸𑀯𑁄, 𑀇𑀤𑀫𑁆𑀧𑀺 𑀘𑀢𑀼𑀢𑁆𑀣𑀁 𑀑𑀥𑀺𑀲𑁄 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺.

𑀧𑀦𑁆𑀦𑀭𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁫. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀧𑀼𑀩𑁆𑀩𑁂 𑀓𑀣𑀺𑀢𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀯𑀲𑀻𑀪𑀸𑀯𑀪𑀸𑀕𑀺𑀬𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑀪𑀺𑀢𑀩𑁆𑀩𑀁 𑀢𑁂𑀯𑀺𑀚𑁆𑀚𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀯𑀲𑁂𑀦𑀧𑀺 𑀧𑀢𑁆𑀢𑀩𑁆𑀩𑀁 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸 𑀢𑁂𑀯𑀺𑀚𑁆𑀚𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀧𑀺 𑀲𑀩𑁆𑀩𑁂 𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀕𑀼𑀡𑀯𑀺𑀪𑀽𑀢𑀺𑀁 𑀮𑀪𑀦𑁆𑀢𑀺, 𑀇𑀫𑀸𑀬 𑀧𑀼𑀜𑁆𑀜𑀲𑀫𑁆𑀧𑀤𑀸𑀬 𑀘 𑀢𑀲𑁆𑀲𑀸 𑀕𑀼𑀡𑀯𑀺𑀪𑀽𑀢𑀺𑀬𑀸 𑀧𑀤𑀝𑁆𑀞𑀸𑀦𑀯𑀲𑁂𑀦 ¶ 𑀢𑀣𑀸 𑀢𑀣𑀸 𑀲𑀸𑀧𑀺 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀫𑁄𑀓𑁆𑀔𑀸 𑀘𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

‘‘𑀬𑀢𑁄 𑀲𑀫𑁆𑀫𑀸 𑀓𑀢𑁂𑀦 𑀬𑀸 𑀘𑀸𑀬𑀁 𑀥𑀫𑁆𑀫𑀢𑁆𑀣𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑁂𑀲𑀼 𑀧𑀪𑁂𑀤𑀕𑀢𑀸 𑀧𑀜𑁆𑀜𑀸 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀯𑀼𑀘𑁆𑀘𑀢𑀺, 𑀬𑁂 𑀘𑀺𑀫𑁂 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁧𑁨𑁯; 𑁩.𑁩𑁩𑁯) 𑀦𑀬𑁂𑀦 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀬𑀸 𑀘𑀸𑀬𑀁 𑀪𑀕𑀯𑀢𑁄 𑀲𑀸𑀯𑀓𑁂𑀳𑀺 𑀧𑀢𑁆𑀢𑀩𑁆𑀩𑀸 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀲𑀸𑀥𑀺𑀓𑀸 𑀲𑀸𑀯𑀓𑀧𑀸𑀭𑀫𑀻, 𑀬𑀸 𑀘 𑀲𑀬𑀫𑁆𑀪𑀼𑀪𑀸𑀯𑀲𑀸𑀥𑀺𑀓𑀸 𑀧𑀘𑁆𑀘𑁂𑀓𑀩𑁄𑀥𑀺, 𑀬𑀸 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀲𑀸𑀥𑀺𑀓𑀸 𑀩𑀼𑀤𑁆𑀥𑀪𑀽𑀫𑀺, 𑀇𑀤𑀫𑁆𑀧𑀺 𑀧𑀜𑁆𑀘𑀫𑀁 𑀑𑀥𑀺𑀲𑁄 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑁄𑀴𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁬. 𑀏𑀯𑀁 𑀪𑀕𑀯𑀸 𑀬𑀁 𑀢𑀁 ‘‘𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀸𑀳𑀺 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀑𑀥𑀺𑀲𑁄 𑀑𑀥𑀺𑀲𑁄 𑀤𑀲𑁆𑀲𑁂𑀢𑁆𑀯𑀸 ¶ 𑀇𑀤𑀸𑀦𑀺 𑀲𑀩𑁆𑀩𑀫𑁂𑀯𑀺𑀤𑀁 𑀲𑀩𑁆𑀩𑀓𑀸𑀫𑀤𑀤𑀦𑀺𑀥𑀺𑀲𑀜𑁆𑀜𑀺𑀢𑀁 𑀧𑀼𑀜𑁆𑀜𑀲𑀫𑁆𑀧𑀤𑀁 𑀧𑀲𑀁𑀲𑀦𑁆𑀢𑁄 ‘‘𑀏𑀯𑀁 𑀫𑀳𑀢𑁆𑀣𑀺𑀓𑀸 𑀏𑀲𑀸’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑀢𑀲𑁆𑀲𑀸𑀬𑀁 𑀧𑀤𑀯𑀡𑁆𑀡𑀦𑀸 𑁋 𑀏𑀯𑀦𑁆𑀢𑀺 𑀅𑀢𑀻𑀢𑀢𑁆𑀣𑀦𑀺𑀤𑀲𑁆𑀲𑀦𑀁. 𑀫𑀳𑀦𑁆𑀢𑁄 𑀅𑀢𑁆𑀣𑁄 𑀅𑀲𑁆𑀲𑀸𑀢𑀺 𑀫𑀳𑀢𑁆𑀣𑀺𑀓𑀸, 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀫𑀳𑀺𑀤𑁆𑀥𑀺𑀓𑀸𑀢𑀺𑀧𑀺 𑀧𑀸𑀞𑁄. 𑀏𑀲𑀸𑀢𑀺 𑀉𑀤𑁆𑀤𑁂𑀲𑀯𑀘𑀦𑀁, 𑀢𑁂𑀦 ‘‘𑀬𑀲𑁆𑀲 𑀤𑀸𑀦𑁂𑀦 𑀲𑀻𑀮𑁂𑀦𑀸’’𑀢𑀺 𑀇𑀢𑁄 𑀧𑀪𑀼𑀢𑀺 𑀬𑀸𑀯 ‘‘𑀓𑀬𑀺𑀭𑀸𑀣 𑀥𑀻𑀭𑁄 𑀧𑀼𑀜𑁆𑀜𑀸𑀦𑀻’’𑀢𑀺 𑀯𑀼𑀢𑁆𑀢𑀁 𑀧𑀼𑀜𑁆𑀜𑀲𑀫𑁆𑀧𑀤𑀁 𑀉𑀤𑁆𑀤𑀺𑀲𑀢𑀺. 𑀬𑀤𑀺𑀤𑀦𑁆𑀢𑀺 𑀅𑀪𑀺𑀫𑀼𑀔𑀓𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀏𑀲𑀸𑀢𑀺 𑀉𑀤𑁆𑀤𑀺𑀝𑁆𑀞𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 𑀬𑀸 𑀏𑀲𑀸𑀢𑀺 𑀅𑀪𑀺𑀫𑀼𑀔𑀁 𑀓𑀭𑁄𑀢𑀺. 𑀧𑀼𑀜𑁆𑀜𑀸𑀦𑀁 𑀲𑀫𑁆𑀧𑀤𑀸 𑀧𑀼𑀜𑁆𑀜𑀲𑀫𑁆𑀧𑀤𑀸 ¶ . 𑀢𑀲𑁆𑀫𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀥𑀻𑀭𑀸𑀢𑀺 𑀥𑀺𑀢𑀺𑀫𑀦𑁆𑀢𑁄. 𑀧𑀲𑀁𑀲𑀦𑁆𑀢𑀻𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀧𑀡𑁆𑀟𑀺𑀢𑀸𑀢𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸. 𑀓𑀢𑀧𑀼𑀜𑁆𑀜𑀢𑀦𑁆𑀢𑀺 𑀓𑀢𑀧𑀼𑀜𑁆𑀜𑀪𑀸𑀯𑀁.

𑀅𑀬𑀁 𑀧𑀦 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀇𑀢𑀺 𑀪𑀕𑀯𑀸 𑀲𑀼𑀯𑀡𑁆𑀡𑀢𑀸𑀤𑀺𑀁 𑀩𑀼𑀤𑁆𑀥𑀪𑀽𑀫𑀺𑀧𑀭𑀺𑀬𑁄𑀲𑀸𑀦𑀁 𑀧𑀼𑀜𑁆𑀜𑀲𑀫𑁆𑀧𑀤𑀸𑀦𑀼𑀪𑀸𑀯𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀫𑀢𑁆𑀣𑀁 𑀯𑀡𑁆𑀡𑀬𑀺𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑁂𑀦𑁂𑀯𑀢𑁆𑀣𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀼𑀜𑁆𑀜𑀲𑀫𑁆𑀧𑀤𑀸𑀬 𑀫𑀳𑀢𑁆𑀣𑀺𑀓𑀢𑁆𑀢𑀁 𑀣𑀼𑀦𑀦𑁆𑀢𑁄 𑀆𑀳 𑁋 𑀏𑀯𑀁 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀆𑀯𑀳𑀦𑁂𑀦 𑀫𑀳𑀢𑁆𑀣𑀺𑀓𑀸 𑀏𑀲𑀸, 𑀬𑀤𑀺𑀤𑀁 𑀫𑀬𑀸 ‘‘𑀬𑀲𑁆𑀲 𑀤𑀸𑀦𑁂𑀦 𑀲𑀻𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀺𑀢𑀸 𑀧𑀼𑀜𑁆𑀜𑀲𑀫𑁆𑀧𑀤𑀸, 𑀢𑀲𑁆𑀫𑀸 𑀫𑀸𑀤𑀺𑀲𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀓𑀺𑀮𑀸𑀲𑀼𑀢𑀸𑀬 𑀬𑀣𑀸𑀪𑀽𑀢𑀕𑀼𑀡𑁂𑀦 𑀘 𑀥𑀻𑀭𑀸 𑀧𑀡𑁆𑀟𑀺𑀢𑀸 ‘‘𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲𑀁, 𑀅𑀘𑁄𑀭𑀸𑀳𑀭𑀡𑁄 𑀦𑀺𑀥𑀻’’𑀢𑀺𑀆𑀤𑀻𑀳𑀺 𑀇𑀥 𑀯𑀼𑀢𑁆𑀢𑁂𑀳𑀺 ¶ 𑀘, 𑀅𑀯𑀼𑀢𑁆𑀢𑁂𑀳𑀺 𑀘 ‘‘𑀫𑀸, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀦𑀁 𑀪𑀸𑀬𑀺𑀢𑁆𑀣, 𑀲𑀼𑀔𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀯𑀘𑀦𑀁, 𑀬𑀤𑀺𑀤𑀁 𑀧𑀼𑀜𑁆𑀜𑀸𑀦𑀻’’𑀢𑀺𑀆𑀤𑀻𑀳𑀺 (𑀅. 𑀦𑀺. 𑁭.𑁬𑁨; 𑀇𑀢𑀺𑀯𑀼. 𑁨𑁨; 𑀦𑁂𑀢𑁆𑀢𑀺. 𑁧𑁨𑁧) 𑀯𑀘𑀦𑁂𑀳𑀺 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀓𑀢𑀧𑀼𑀜𑁆𑀜𑀢𑀁 𑀧𑀲𑀁𑀲𑀦𑁆𑀢𑀺, 𑀦 𑀧𑀓𑁆𑀔𑀧𑀸𑀢𑁂𑀦𑀸𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀉𑀧𑀸𑀲𑀓𑁄 𑀩𑀳𑀼𑀚𑀦𑁂𑀦 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀭𑀜𑁆𑀜𑁄 𑀘 𑀧𑀲𑁂𑀦𑀤𑀺𑀓𑁄𑀲𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺, 𑀭𑀸𑀚𑀸 𑀅𑀢𑀺𑀯𑀺𑀬 𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 ‘‘𑀲𑀸𑀥𑀼, 𑀕𑀳𑀧𑀢𑀺, 𑀲𑀸𑀥𑀼 𑀔𑁄 𑀢𑁆𑀯𑀁 ¶ , 𑀕𑀳𑀧𑀢𑀺, 𑀫𑀸𑀤𑀺𑀲𑁂𑀳𑀺𑀧𑀺 𑀅𑀦𑀸𑀳𑀭𑀡𑀻𑀬𑀁 𑀦𑀺𑀥𑀺𑀁 𑀦𑀺𑀥𑁂𑀲𑀻’’𑀢𑀺 𑀲𑀁𑀭𑀸𑀥𑁂𑀢𑁆𑀯𑀸 𑀫𑀳𑀢𑀺𑀁 𑀧𑀽𑀚𑀫𑀓𑀸𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀦𑀺𑀥𑀺𑀓𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁

𑀇𑀤𑀸𑀦𑀺 ¶ 𑀦𑀺𑀥𑀺𑀓𑀡𑁆𑀟𑀸𑀦𑀦𑁆𑀢𑀭𑀁 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀫𑁂𑀢𑁆𑀢𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁 𑀯𑀢𑁆𑀯𑀸 𑀢𑀢𑁄 𑀧𑀭𑀁 𑁋

‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂𑀢𑁂𑀲 𑀤𑀻𑀧𑀦𑀸;

𑀦𑀺𑀤𑀸𑀦𑀁 𑀲𑁄𑀥𑀬𑀺𑀢𑁆𑀯𑀸𑀲𑁆𑀲, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁’’.

𑀢𑀢𑁆𑀣 ¶ 𑀬𑀲𑁆𑀫𑀸 𑀦𑀺𑀥𑀺𑀓𑀡𑁆𑀟𑁂𑀦 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀲𑀫𑁆𑀧𑀤𑀸 𑀯𑀼𑀢𑁆𑀢𑀸, 𑀲𑀸 𑀘 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀓𑀢𑀸𑀬 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀬𑀸𑀯 𑀩𑀼𑀤𑁆𑀥𑀪𑀽𑀫𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀧𑀼𑀜𑁆𑀜𑀲𑀫𑁆𑀧𑀤𑀸𑀬 𑀉𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑀁, 𑀬𑀲𑁆𑀫𑀸 𑀯𑀸 𑀲𑀭𑀡𑁂𑀳𑀺 𑀲𑀸𑀲𑀦𑁂 𑀑𑀢𑀭𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂𑀦 𑀭𑀸𑀕𑀧𑁆𑀧𑀳𑀸𑀦𑀲𑀫𑀢𑁆𑀣𑀁, 𑀓𑀼𑀫𑀸𑀭𑀧𑀜𑁆𑀳𑁂𑀦 𑀫𑁄𑀳𑀧𑁆𑀧𑀳𑀸𑀦𑀲𑀫𑀢𑁆𑀣𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸, 𑀫𑀗𑁆𑀕𑀮𑀲𑀼𑀢𑁆𑀢𑁂𑀦 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀫𑀗𑁆𑀕𑀮𑀪𑀸𑀯𑁄 𑀅𑀢𑁆𑀢𑀭𑀓𑁆𑀔𑀸 𑀘, 𑀭𑀢𑀦𑀲𑀼𑀢𑁆𑀢𑁂𑀦 𑀢𑀲𑁆𑀲𑀸𑀦𑀼𑀭𑀽𑀧𑀸 𑀧𑀭𑀭𑀓𑁆𑀔𑀸, 𑀢𑀺𑀭𑁄𑀓𑀼𑀝𑁆𑀝𑁂𑀦 𑀭𑀢𑁆𑀢𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑀪𑀽𑀢𑁂𑀲𑀼 𑀏𑀓𑀘𑁆𑀘𑀪𑀽𑀢𑀤𑀲𑁆𑀲𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀚𑁆𑀚𑀦𑁆𑀢𑀸𑀦𑀁 𑀯𑀺𑀧𑀢𑁆𑀢𑀺 𑀘, 𑀦𑀺𑀥𑀺𑀓𑀡𑁆𑀟𑁂𑀦 𑀢𑀺𑀭𑁄𑀓𑀼𑀝𑁆𑀝𑁂 𑀯𑀼𑀢𑁆𑀢𑀯𑀺𑀧𑀢𑁆𑀢𑀺𑀧𑀝𑀺𑀧𑀓𑁆𑀔𑀪𑀽𑀢𑀸 𑀲𑀫𑁆𑀧𑀢𑁆𑀢𑀺 𑀘 𑀤𑀲𑁆𑀲𑀺𑀢𑀸, 𑀤𑁄𑀲𑀧𑁆𑀧𑀳𑀸𑀦𑀲𑀫𑀢𑁆𑀣𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀲𑁆𑀲𑀺𑀢𑀫𑁂𑀯, 𑀢𑀲𑁆𑀫𑀸 𑀢𑀁 𑀤𑁄𑀲𑀧𑁆𑀧𑀳𑀸𑀦𑀲𑀫𑀢𑁆𑀣𑀁 𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀫𑁂𑀢𑁆𑀢𑀲𑀼𑀢𑁆𑀢𑀁 𑀇𑀥 𑀦𑀺𑀓𑁆𑀔𑀺𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀼𑀧𑀭𑀺𑀧𑀽𑀭𑁄 𑀳𑁄𑀢𑀺 𑀔𑀼𑀤𑁆𑀤𑀓𑀧𑀸𑀞𑁄𑀢𑀺 𑀇𑀤𑀫𑀲𑁆𑀲 𑀇𑀥 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁.

𑀦𑀺𑀤𑀸𑀦𑀲𑁄𑀥𑀦𑀁

𑀇𑀤𑀸𑀦𑀺 𑀬𑀸𑀬𑀁 𑁋

‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂𑀢𑁂𑀲 𑀤𑀻𑀧𑀦𑀸;

𑀦𑀺𑀤𑀸𑀦𑀁 𑀲𑁄𑀥𑀬𑀺𑀢𑁆𑀯𑀸𑀲𑁆𑀲, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺. 𑁋

𑀫𑀸𑀢𑀺𑀓𑀸 ¶ 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀢𑁆𑀣 𑀇𑀤𑀁 ¶ 𑀫𑁂𑀢𑁆𑀢𑀲𑀼𑀢𑁆𑀢𑀁 𑀪𑀕𑀯𑀢𑀸𑀯 𑀯𑀼𑀢𑁆𑀢𑀁, 𑀦 𑀲𑀸𑀯𑀓𑀸𑀤𑀻𑀳𑀺, 𑀢𑀜𑁆𑀘 𑀧𑀦 𑀬𑀤𑀸 𑀳𑀺𑀫𑀯𑀦𑁆𑀢𑀧𑀲𑁆𑀲𑀢𑁄 𑀤𑁂𑀯𑀢𑀸𑀳𑀺 𑀉𑀩𑁆𑀩𑀸𑀴𑁆𑀳𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸, 𑀢𑀤𑀸 𑀲𑀸𑀯𑀢𑁆𑀣𑀺𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀢𑁆𑀢𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀸𑀬 𑀘 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀢𑀸𑀯 𑀲𑀗𑁆𑀔𑁂𑀧𑀢𑁄 𑀏𑀢𑁂𑀲𑀁 𑀧𑀤𑀸𑀦𑀁 𑀤𑀻𑀧𑀦𑀸 𑀦𑀺𑀤𑀸𑀦𑀲𑁄𑀥𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬, 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀕𑀘𑀭𑀺𑀢𑀸𑀦𑀁 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑀁 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀤𑁄𑀲𑀘𑀭𑀺𑀢𑀸𑀦𑀁 𑀘𑀢𑀼𑀩𑁆𑀩𑀺𑀥𑀁 𑀫𑁂𑀢𑁆𑀢𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀁, 𑀫𑁄𑀳𑀘𑀭𑀺𑀢𑀸𑀦𑀁 𑀫𑀭𑀡𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺, 𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺, 𑀲𑀤𑁆𑀥𑀸𑀘𑀭𑀺𑀢𑀸𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺, 𑀩𑀼𑀤𑁆𑀥𑀺𑀘𑀭𑀺𑀢𑀸𑀦𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀸𑀤𑀻𑀦𑀻𑀢𑀺 ¶ 𑀇𑀫𑀺𑀦𑀸 𑀦𑀬𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀧𑁆𑀧𑀪𑁂𑀤𑀘𑀭𑀺𑀢𑀸𑀦𑀼𑀓𑀽𑀮𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀓𑀣𑁂𑀢𑀺.

𑀅𑀣 𑀔𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀜𑁆𑀘 𑀕𑁄𑀘𑀭𑀕𑀸𑀫𑀜𑁆𑀘 𑀧𑀭𑀺𑀬𑁂𑀲𑀫𑀸𑀦𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀕𑀦𑁆𑀢𑁆𑀯𑀸 𑀧𑀘𑁆𑀘𑀦𑁆𑀢𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀦𑀻𑀮𑀓𑀸𑀘𑀫𑀡𑀺𑀲𑀦𑁆𑀦𑀺𑀪𑀲𑀺𑀮𑀸𑀢𑀮𑀁 𑀲𑀻𑀢𑀮𑀖𑀦𑀘𑁆𑀙𑀸𑀬𑀦𑀻𑀮𑀯𑀦𑀲𑀡𑁆𑀟𑀫𑀡𑁆𑀟𑀺𑀢𑀁 𑀫𑀼𑀢𑁆𑀢𑀸𑀚𑀸𑀮𑀭𑀚𑀢𑀧𑀝𑁆𑀝𑀲𑀤𑀺𑀲𑀯𑀸𑀮𑀼𑀓𑀸𑀓𑀺𑀡𑁆𑀡𑀪𑀽𑀫𑀺𑀪𑀸𑀕𑀁 𑀲𑀼𑀘𑀺𑀲𑀸𑀢𑀲𑀻𑀢𑀮𑀚𑀮𑀸𑀲𑀬𑀧𑀭𑀺𑀯𑀸𑀭𑀺𑀢𑀁 𑀧𑀩𑁆𑀩𑀢𑀫𑀤𑁆𑀤𑀲𑀁𑀲𑀼. 𑀅𑀣 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣𑁂𑀓𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀕𑀸𑀫𑁄 𑀖𑀦𑀦𑀺𑀯𑁂𑀲𑀦𑀲𑀦𑁆𑀦𑀺𑀯𑀺𑀝𑁆𑀞𑀓𑀼𑀮𑀲𑀳𑀲𑁆𑀲𑀬𑀼𑀢𑁆𑀢𑁄, 𑀫𑀦𑀼𑀲𑁆𑀲𑀸 𑀘𑁂𑀢𑁆𑀣 ¶ 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀢𑁂 𑀧𑀘𑁆𑀘𑀦𑁆𑀢𑁂 𑀧𑀩𑁆𑀩𑀚𑀺𑀢𑀤𑀲𑁆𑀲𑀦𑀲𑁆𑀲 𑀤𑀼𑀮𑁆𑀮𑀪𑀢𑀸𑀬 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀏𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀢𑁂𑀫𑀸𑀲𑀁 𑀯𑀲𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀧𑀜𑁆𑀘 𑀧𑀥𑀸𑀦𑀓𑀼𑀝𑀺𑀲𑀢𑀸𑀦𑀺 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀫𑀜𑁆𑀘𑀧𑀻𑀞𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀖𑀝𑀸𑀤𑀻𑀦𑀺 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀧𑀝𑀺𑀬𑀸𑀤𑁂𑀲𑀼𑀁.

𑀪𑀺𑀓𑁆𑀔𑀽 𑀤𑀼𑀢𑀺𑀬𑀤𑀺𑀯𑀲𑁂 𑀅𑀜𑁆𑀜𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣𑀧𑀺 𑀫𑀦𑀼𑀲𑁆𑀲𑀸 𑀢𑀣𑁂𑀯 𑀉𑀧𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺𑀁𑀲𑀼. 𑀪𑀺𑀓𑁆𑀔𑀽 ‘‘𑀅𑀲𑀢𑀺 𑀅𑀦𑁆𑀢𑀭𑀸𑀬𑁂’’𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀦𑁆𑀤𑀺𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑀸 𑀬𑀸𑀫𑀖𑀡𑁆𑀟𑀺𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀻𑀮𑀯𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑁂𑀚𑁂𑀦 𑀯𑀺𑀳𑀢𑀢𑁂𑀚𑀸 𑀭𑀼𑀓𑁆𑀔𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑀸 𑀑𑀭𑀼𑀬𑁆𑀳 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀯𑀺𑀘𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 ¶ 𑀦𑀸𑀫 𑀭𑀸𑀚𑀽𑀳𑀺 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀯𑀸 𑀕𑀸𑀫𑀓𑀸𑀯𑀸𑀲𑀁 𑀕𑀢𑁂𑀳𑀺 𑀕𑀸𑀫𑀯𑀸𑀲𑀻𑀦𑀁 𑀖𑀭𑁂𑀲𑀼 𑀑𑀓𑀸𑀲𑁂 𑀕𑀳𑀺𑀢𑁂 𑀖𑀭𑀫𑀦𑀼𑀲𑁆𑀲𑀓𑀸 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀯𑀲𑀦𑁆𑀢𑀸 ‘‘𑀓𑀤𑀸 𑀦𑀼 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀤𑀽𑀭𑀢𑁄𑀯 𑀑𑀮𑁄𑀓𑁂𑀦𑁆𑀢𑀺, 𑀏𑀯𑀫𑁂𑀯 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺𑀬𑁄 𑀤𑀽𑀭𑀢𑁄𑀯 𑀑𑀮𑁄𑀓𑁂𑀦𑁆𑀢𑀺 ‘‘𑀓𑀤𑀸 𑀦𑀼 𑀪𑀤𑀦𑁆𑀢𑀸 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 ‘‘𑀧𑀞𑀫𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀅𑀯𑀲𑁆𑀲𑀁 𑀢𑁂𑀫𑀸𑀲𑀁 𑀯𑀲𑀺𑀲𑁆𑀲𑀦𑁆𑀢𑀺, 𑀫𑀬𑀁 𑀧𑀦 𑀢𑀸𑀯 𑀘𑀺𑀭𑀁 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀑𑀓𑁆𑀓𑀫𑁆𑀫 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫, 𑀳𑀦𑁆𑀤 𑀫𑀬𑀁 𑀪𑀺𑀓𑁆𑀔𑀽𑀦𑀁 𑀪𑀬𑀸𑀦𑀓𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀫𑀸’’𑀢𑀺. 𑀢𑀸 𑀭𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀲𑀫𑀡𑀥𑀫𑁆𑀫𑀓𑀭𑀡𑀯𑁂𑀮𑀸𑀬 𑀪𑀺𑀁𑀲𑀦𑀓𑀸𑀦𑀺 𑀬𑀓𑁆𑀔𑀭𑀽𑀧𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀼𑀭𑀢𑁄 ¶ 𑀧𑀼𑀭𑀢𑁄 𑀢𑀺𑀝𑁆𑀞𑀦𑁆𑀢𑀺, 𑀪𑁂𑀭𑀯𑀲𑀤𑁆𑀤𑀜𑁆𑀘 𑀓𑀭𑁄𑀦𑁆𑀢𑀺. 𑀪𑀺𑀓𑁆𑀔𑀽𑀦𑀁 𑀢𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑀜𑁆𑀘 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀳𑀤𑀬𑀁 𑀨𑀦𑁆𑀤𑀺, 𑀤𑀼𑀩𑁆𑀩𑀡𑁆𑀡𑀸 ¶ 𑀘 𑀅𑀳𑁂𑀲𑀼𑀁 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸. 𑀢𑁂𑀦 𑀢𑁂 𑀪𑀺𑀓𑁆𑀔𑀽 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑁂𑀲𑀁 𑀅𑀦𑁂𑀓𑀕𑁆𑀕𑀘𑀺𑀢𑁆𑀢𑀸𑀦𑀁 𑀪𑀬𑁂𑀦 𑀘 𑀧𑀼𑀦𑀧𑁆𑀧𑀼𑀦𑀁 𑀲𑀁𑀯𑀺𑀕𑁆𑀕𑀸𑀦𑀁 𑀲𑀢𑀺 𑀲𑀫𑁆𑀫𑀼𑀲𑁆𑀲𑀺, 𑀢𑀢𑁄 𑀢𑁂𑀲𑀁 𑀫𑀼𑀝𑁆𑀞𑀲𑀢𑀻𑀦𑀁 𑀤𑀼𑀕𑁆𑀕𑀦𑁆𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀬𑁄𑀚𑁂𑀲𑀼𑀁, 𑀢𑁂𑀲𑀁 𑀢𑁂𑀦 𑀤𑀼𑀕𑁆𑀕𑀦𑁆𑀥𑁂𑀦 𑀦𑀺𑀫𑁆𑀫𑀣𑀺𑀬𑀫𑀸𑀦𑀫𑀺𑀯 𑀫𑀢𑁆𑀣𑀮𑀼𑀗𑁆𑀕𑀁 𑀅𑀳𑁄𑀲𑀺, 𑀕𑀸𑀴𑁆𑀳𑀸 𑀲𑀻𑀲𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀦 𑀘 𑀢𑀁 𑀧𑀯𑀢𑁆𑀢𑀺𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑁄𑀘𑁂𑀲𑀼𑀁.

𑀅𑀣𑁂𑀓𑀤𑀺𑀯𑀲𑀁 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀓𑀸𑀮𑁂 𑀲𑀩𑁆𑀩𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 ‘‘𑀢𑀼𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀇𑀫𑀁 𑀯𑀦𑀲𑀡𑁆𑀟𑀁 𑀧𑀯𑀺𑀝𑁆𑀞𑀸𑀦𑀁 𑀓𑀢𑀺𑀧𑀸𑀳𑀁 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀅𑀳𑁄𑀲𑀺 𑀧𑀭𑀺𑀬𑁄𑀤𑀸𑀢𑁄, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀏𑀢𑀭𑀳𑀺 𑀧𑀦𑀢𑁆𑀣 𑀓𑀺𑀲𑀸 𑀤𑀼𑀩𑁆𑀩𑀡𑁆𑀡𑀸 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀓𑀺𑀁 𑀯𑁄 𑀇𑀥 𑀅𑀲𑀧𑁆𑀧𑀸𑀬’’𑀦𑁆𑀢𑀺. 𑀢𑀢𑁄 𑀏𑀓𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀁 𑀈𑀤𑀺𑀲𑀜𑁆𑀘 𑀈𑀤𑀺𑀲𑀜𑁆𑀘 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀲𑁆𑀲𑀸𑀫𑀺 𑀘 𑀲𑀼𑀡𑀸𑀫𑀺 𑀘, 𑀈𑀤𑀺𑀲𑀜𑁆𑀘 𑀕𑀦𑁆𑀥𑀁 𑀖𑀸𑀬𑀸𑀫𑀺, 𑀢𑁂𑀦 𑀫𑁂 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀻’’𑀢𑀺, 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀩𑁆𑀩𑁂𑀯 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑀗𑁆𑀖𑀢𑁆𑀣𑁂𑀭𑁄 𑀆𑀳 𑁋 ‘‘𑀪𑀕𑀯𑀢𑀸, 𑀆𑀯𑀼𑀲𑁄, 𑀤𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀧𑀜𑁆𑀜𑀢𑁆𑀢𑀸, 𑀅𑀫𑁆𑀳𑀸𑀓𑀜𑁆𑀘 𑀇𑀤𑀁 𑀲𑁂𑀦𑀸𑀲𑀦𑀁 𑀅𑀲𑀧𑁆𑀧𑀸𑀬𑀁, 𑀆𑀬𑀸𑀫𑀸𑀯𑀼𑀲𑁄, 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀸𑀫𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀩𑁆𑀩𑁂𑀯 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀼𑀧𑀮𑀺𑀢𑁆𑀢𑀢𑁆𑀢𑀸 𑀓𑀼𑀮𑁂𑀲𑀼 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀏𑀯 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀺𑀁𑀲𑀼.

𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀸 𑀘𑀭𑀺𑀢𑀩𑁆𑀩𑀸𑀢𑀺 𑀫𑀬𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀺𑀲𑁆𑀲 𑀢𑀼𑀫𑁆𑀳𑁂 ¶ 𑀘𑀸𑀭𑀺𑀓𑀁 𑀘𑀭𑀣𑀸’’𑀢𑀺. 𑀢𑁂 𑀪𑀕𑀯𑀢𑁄 𑀲𑀩𑁆𑀩𑀫𑀸𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀦𑁆𑀢𑀫𑀲𑁄 𑀘𑀢𑀼𑀧𑀸𑀤𑀧𑀻𑀞𑀓𑀝𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀢𑁂𑀲𑀁 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀦𑀸𑀤𑁆𑀤𑀲. 𑀅𑀣 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀅𑀜𑁆𑀜𑀁 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀢𑀼𑀫𑁆𑀳𑁂 𑀯𑀺𑀳𑀭𑀦𑁆𑀢𑀸 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀣, 𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀫𑁂𑀯 ¶ 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀣, 𑀲𑀘𑁂 𑀧𑀦 𑀤𑁂𑀯𑀢𑀸𑀳𑀺 𑀅𑀪𑀬𑀁 𑀇𑀘𑁆𑀙𑀣, 𑀇𑀫𑀁 𑀧𑀭𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀣. 𑀏𑀢𑀜𑁆𑀳𑀺 𑀯𑁄 𑀧𑀭𑀺𑀢𑁆𑀢𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀅𑀧𑀭𑁂 ¶ 𑀧𑀦𑀸𑀳𑀼 𑁋 ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀫𑁂𑀯 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀣𑀸’’𑀢𑀺 𑀇𑀤𑀜𑁆𑀘 𑀯𑀢𑁆𑀯𑀸 𑀪𑀕𑀯𑀸 𑀆𑀳 𑁋 ‘‘𑀅𑀧𑀺𑀘 𑀔𑁄 𑀆𑀭𑀜𑁆𑀜𑀓𑁂𑀦 𑀧𑀭𑀺𑀳𑀭𑀡𑀁 𑀜𑀸𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀸𑀬𑀁 𑀧𑀸𑀢𑀁 𑀓𑀭𑀡𑀯𑀲𑁂𑀦 𑀤𑁆𑀯𑁂 𑀫𑁂𑀢𑁆𑀢𑀸 𑀤𑁆𑀯𑁂 𑀧𑀭𑀺𑀢𑁆𑀢𑀸 𑀤𑁆𑀯𑁂 𑀅𑀲𑀼𑀪𑀸 𑀤𑁆𑀯𑁂 𑀫𑀭𑀡𑀲𑁆𑀲𑀢𑀻 𑀅𑀝𑁆𑀞𑀫𑀳𑀸𑀲𑀁𑀯𑁂𑀕𑀯𑀢𑁆𑀣𑀼𑀲𑀫𑀸𑀯𑀚𑁆𑀚𑀦𑀜𑁆𑀘, 𑀅𑀝𑁆𑀞 𑀫𑀳𑀸𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁 𑀘𑀢𑁆𑀢𑀸𑀭𑀺 𑀅𑀧𑀸𑀬𑀤𑀼𑀓𑁆𑀔𑀸𑀦𑀻𑀢𑀺, 𑀅𑀣 𑀯𑀸 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔’’𑀦𑁆𑀢𑀺. 𑀏𑀯𑀁 𑀪𑀕𑀯𑀸 𑀧𑀭𑀺𑀳𑀭𑀡𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀢𑁆𑀣𑀜𑁆𑀘 𑀧𑀭𑀺𑀢𑁆𑀢𑀢𑁆𑀣𑀜𑁆𑀘 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀢𑁆𑀣𑀜𑁆𑀘 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀻𑀢𑀺. 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄𑀧𑀺 ‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀤𑀻𑀧𑀦𑀸 𑀦𑀺𑀤𑀸𑀦𑀲𑁄𑀥𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 𑀘 𑀬𑀸 𑀲𑀸 ‘‘𑀬𑁂𑀦 𑀯𑀼𑀢𑁆𑀢𑀁 𑀬𑀤𑀸 𑀬𑀢𑁆𑀣, 𑀬𑀲𑁆𑀫𑀸 𑀘𑁂𑀢𑁂𑀲 𑀤𑀻𑀧𑀦𑀸. 𑀦𑀺𑀤𑀸𑀦𑀁 𑀲𑁄𑀥𑀬𑀺𑀢𑁆𑀯𑀸’’𑀢𑀺 𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀲𑀸 ¶ 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀸 𑀳𑁄𑀢𑀺.

𑀧𑀞𑀫𑀕𑀸𑀣𑀸𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ‘‘𑀅𑀲𑁆𑀲 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀯𑀁 𑀓𑀢𑀦𑀺𑀤𑀸𑀦𑀲𑁄𑀥𑀦𑀲𑁆𑀲 𑀅𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀆𑀭𑀩𑁆𑀪𑀢𑁂. 𑀢𑀢𑁆𑀣 𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀇𑀫𑀺𑀲𑁆𑀲𑀸 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀬𑀁 𑀧𑀤𑀯𑀡𑁆𑀡𑀦𑀸 𑁋 𑀓𑀭𑀡𑀻𑀬𑀦𑁆𑀢𑀺 𑀓𑀸𑀢𑀩𑁆𑀩𑀁, 𑀓𑀭𑀡𑀸𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄𑀢𑀺 𑀧𑀝𑀺𑀧𑀤𑀸, 𑀬𑀁 𑀯𑀸 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀳𑀺𑀢𑀁, 𑀢𑀁 𑀲𑀩𑁆𑀩𑀁 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺, 𑀅𑀭𑀡𑀻𑀬𑀢𑁄 𑀦𑀸𑀫 𑀉𑀧𑀕𑀦𑁆𑀢𑀩𑁆𑀩𑀢𑁄. 𑀅𑀢𑁆𑀣𑁂 𑀓𑀼𑀲𑀮𑁂𑀦 𑀅𑀢𑁆𑀣𑀓𑀼𑀲𑀮𑁂𑀦 𑀅𑀢𑁆𑀣𑀙𑁂𑀓𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀘𑁆𑀘𑀢𑁆𑀢𑀁. 𑀦𑁆𑀢𑀺 𑀦𑀺𑀬𑀫𑀺𑀢𑀉𑀧𑀬𑁄𑀕𑀁, 𑀉𑀪𑀬𑀫𑁆𑀧𑀺 𑀯𑀸 𑀬𑀁 𑀢𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀲𑀦𑁆𑀢𑀁 𑀧𑀤𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀢𑀢𑁆𑀣 𑀮𑀓𑁆𑀔𑀡𑀢𑁄 𑀲𑀦𑁆𑀢𑀁, 𑀧𑀢𑁆𑀢𑀩𑁆𑀩𑀢𑁄 𑀧𑀤𑀁, 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸. 𑀲𑀓𑁆𑀓𑁄𑀢𑀻𑀢𑀺 𑀲𑀓𑁆𑀓𑁄, 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀚𑀽𑀢𑀺 𑀅𑀚𑁆𑀚𑀯𑀬𑀼𑀢𑁆𑀢𑁄. 𑀲𑀼𑀝𑁆𑀞𑀼 𑀉𑀚𑀽𑀢𑀺 𑀲𑀼𑀳𑀼𑀚𑀼. 𑀲𑀼𑀔𑀁 𑀯𑀘𑁄 𑀢𑀲𑁆𑀫𑀺𑀦𑁆𑀢𑀺 𑀲𑀼𑀯𑀘𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀫𑀼𑀤𑀽𑀢𑀺 𑀫𑀤𑁆𑀤𑀯𑀬𑀼𑀢𑁆𑀢𑁄. 𑀦 𑀅𑀢𑀺𑀫𑀸𑀦𑀻𑀢𑀺 𑀅𑀦𑀢𑀺𑀫𑀸𑀦𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦, 𑀬𑀦𑁆𑀢𑀁 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀏𑀢𑁆𑀣 𑀢𑀸𑀯 ¶ 𑀅𑀢𑁆𑀣𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀅𑀓𑀭𑀡𑀻𑀬𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 ¶ 𑀲𑀺𑀓𑁆𑀔𑀢𑁆𑀢𑀬𑀁 𑀓𑀭𑀡𑀻𑀬𑀁. 𑀲𑀻𑀮𑀯𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀺 𑀅𑀓𑀭𑀡𑀻𑀬𑀁. 𑀢𑀣𑀸 𑀅𑀢𑁆𑀣𑀺 𑀅𑀢𑁆𑀣𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀦𑀢𑁆𑀣𑀓𑀼𑀲𑀮𑁄. 𑀢𑀢𑁆𑀣 𑀬𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀧𑀬𑁄𑀚𑁂𑀢𑀺, 𑀔𑀡𑁆𑀟𑀲𑀻𑀮𑁄 𑀳𑁄𑀢𑀺, 𑀏𑀓𑀯𑀻𑀲𑀢𑀺𑀯𑀺𑀥𑀁 𑀅𑀦𑁂𑀲𑀦𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀯𑁂𑀴𑀼𑀤𑀸𑀦𑀁 𑀧𑀢𑁆𑀢𑀤𑀸𑀦𑀁 𑀧𑀼𑀧𑁆𑀨𑀤𑀸𑀦𑀁 𑀨𑀮𑀤𑀸𑀦𑀁 𑀤𑀦𑁆𑀢𑀓𑀝𑁆𑀞𑀤𑀸𑀦𑀁 𑀫𑀼𑀔𑁄𑀤𑀓𑀤𑀸𑀦𑀁 𑀲𑀺𑀦𑀸𑀦𑀤𑀸𑀦𑀁 𑀘𑀼𑀡𑁆𑀡𑀤𑀸𑀦𑀁 𑀫𑀢𑁆𑀢𑀺𑀓𑀸𑀤𑀸𑀦𑀁 𑀘𑀸𑀝𑀼𑀓𑀫𑁆𑀬𑀢𑀁 𑀫𑀼𑀕𑁆𑀕𑀲𑀽𑀧𑁆𑀬𑀢𑀁 𑀧𑀸𑀭𑀺𑀪𑀝𑀬𑀢𑀁 𑀚𑀗𑁆𑀖𑀧𑁂𑀲𑀦𑀺𑀓𑀁 𑀯𑁂𑀚𑁆𑀚𑀓𑀫𑁆𑀫𑀁 𑀤𑀽𑀢𑀓𑀫𑁆𑀫𑀁 𑀧𑀳𑀺𑀡𑀕𑀫𑀦𑀁 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀁 ¶ 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑀁 𑀯𑀢𑁆𑀣𑀼𑀯𑀺𑀚𑁆𑀚𑀁 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀁 𑀅𑀗𑁆𑀕𑀯𑀺𑀚𑁆𑀚𑀦𑁆𑀢𑀺. 𑀙𑀩𑁆𑀩𑀺𑀥𑁂 𑀘 𑀅𑀕𑁄𑀘𑀭𑁂 𑀘𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀯𑁂𑀲𑀺𑀬𑀸𑀕𑁄𑀘𑀭𑁂 𑀯𑀺𑀥𑀯𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀧𑀡𑁆𑀟𑀓𑀪𑀺𑀓𑁆𑀔𑀼𑀦𑀻𑀧𑀸𑀦𑀸𑀕𑀸𑀭𑀕𑁄𑀘𑀭𑁂𑀢𑀺. 𑀲𑀁𑀲𑀝𑁆𑀞𑁄 𑀘 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀺𑀲𑀁𑀲𑀕𑁆𑀕𑁂𑀦, 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑀤𑁆𑀥𑀸𑀦𑀺 𑀅𑀧𑁆𑀧𑀲𑀦𑁆𑀦𑀸𑀦𑀺 𑀅𑀦𑁄𑀧𑀸𑀦𑀪𑀽𑀢𑀸𑀦𑀺 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀺 𑀅𑀦𑀢𑁆𑀣𑀓𑀸𑀫𑀸𑀦𑀺 𑀅𑀳𑀺𑀢𑀅𑀨𑀸𑀲𑀼𑀓𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺 𑀪𑀺𑀓𑁆𑀔𑀽𑀦𑀁…𑀧𑁂… 𑀉𑀧𑀸𑀲𑀺𑀓𑀸𑀦𑀁, 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀬𑀁 𑀅𑀦𑀢𑁆𑀣𑀓𑀼𑀲𑀮𑁄.

𑀬𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀧𑀬𑁄𑀚𑁂𑀢𑀺, 𑀅𑀦𑁂𑀲𑀦𑀁 𑀧𑀳𑀸𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀸𑀢𑀼𑀓𑀸𑀫𑁄 𑀲𑀤𑁆𑀥𑀸𑀲𑀻𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀲𑀢𑀺𑀲𑀻𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀯𑀻𑀭𑀺𑀬𑀲𑀻𑀲𑁂𑀦 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁, 𑀧𑀜𑁆𑀜𑀸𑀲𑀻𑀲𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁 𑀧𑀽𑀭𑁂𑀢𑀺. 𑀅𑀬𑀁 𑀅𑀢𑁆𑀣𑀓𑀼𑀲𑀮𑁄.

𑀬𑁄 𑀯𑀸 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑁄𑀥𑀦𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁, 𑀙𑀤𑁆𑀯𑀸𑀭𑁂 𑀖𑀝𑁆𑀝𑀺𑀢𑀸𑀭𑀫𑁆𑀫𑀡𑁂𑀲𑀼 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀇𑀦𑁆𑀤𑁆𑀭𑀺𑀲𑀁𑀯𑀭𑀁, 𑀅𑀦𑁂𑀲𑀦𑀧𑀭𑀺𑀯𑀚𑁆𑀚𑀦𑀯𑀲𑁂𑀦 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀯𑀡𑁆𑀡𑀺𑀢𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑁂𑀦 𑀘 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁, 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁, 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑁂 𑀲𑀸𑀢𑁆𑀣𑀓𑀢𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑁄𑀥𑁂𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁄.

𑀬𑁄 𑀯𑀸 𑀬𑀣𑀸 𑀊𑀲𑁄𑀤𑀓𑀁 𑀧𑀝𑀺𑀘𑁆𑀘 𑀲𑀁𑀓𑀺𑀮𑀺𑀝𑁆𑀞𑀁 𑀯𑀢𑁆𑀣𑀁 𑀧𑀭𑀺𑀬𑁄𑀤𑀸𑀧𑀬𑀢𑀺, 𑀙𑀸𑀭𑀺𑀓𑀁 𑀧𑀝𑀺𑀘𑁆𑀘 𑀆𑀤𑀸𑀲𑁄, 𑀉𑀓𑁆𑀓𑀸𑀫𑀼𑀔𑀁 𑀧𑀝𑀺𑀘𑁆𑀘 𑀚𑀸𑀢𑀭𑀽𑀧𑀁, 𑀢𑀣𑀸 𑀜𑀸𑀡𑀁 𑀧𑀝𑀺𑀘𑁆𑀘 𑀲𑀻𑀮𑀁 𑀯𑁄𑀤𑀸𑀬𑀢𑀻𑀢𑀺 𑀜𑀢𑁆𑀯𑀸 𑀜𑀸𑀡𑁄𑀤𑀓𑁂𑀦 𑀥𑁄𑀯𑀦𑁆𑀢𑁄 𑀲𑀻𑀮𑀁 𑀧𑀭𑀺𑀬𑁄𑀤𑀸𑀧𑁂𑀢𑀺. 𑀬𑀣𑀸 𑀘 𑀓𑀺𑀓𑀻 𑀲𑀓𑀼𑀡𑀺𑀓𑀸 𑀅𑀡𑁆𑀟𑀁, 𑀘𑀫𑀭𑀻 𑀫𑀺𑀕𑁄 𑀯𑀸𑀮𑀥𑀺𑀁, 𑀏𑀓𑀧𑀼𑀢𑁆𑀢𑀺𑀓𑀸 𑀦𑀸𑀭𑀻 ¶ 𑀧𑀺𑀬𑀁 𑀏𑀓𑀧𑀼𑀢𑁆𑀢𑀓𑀁, 𑀏𑀓𑀦𑀬𑀦𑁄 𑀧𑀼𑀭𑀺𑀲𑁄 𑀢𑀁 𑀏𑀓𑀦𑀬𑀦𑀜𑁆𑀘 𑀭𑀓𑁆𑀔𑀢𑀺, 𑀢𑀣𑀸 𑀅𑀢𑀺𑀯𑀺𑀬 𑀅𑀧𑁆𑀧𑀫𑀢𑁆𑀢𑁄 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑀁 𑀭𑀓𑁆𑀔𑀢𑀺, 𑀲𑀸𑀬𑀁 ¶ 𑀧𑀸𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀦 𑀧𑀲𑁆𑀲𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁄.

𑀬𑁄 ¶ 𑀯𑀸 𑀧𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑁂 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀧𑀝𑀺𑀧𑀤𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀢𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁄.

𑀬𑁄 𑀯𑀸 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀅𑀢𑁆𑀣𑀓𑀼𑀲𑀮𑀸𑀦𑀁 𑀅𑀕𑁆𑀕𑁄. 𑀢𑀢𑁆𑀣 𑀬𑁂 𑀇𑀫𑁂 𑀬𑀸𑀯 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑁂 𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑁂𑀦 𑀬𑀸𑀯 𑀯𑀸 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀧𑀝𑀺𑀧𑀤𑀸𑀬𑀧𑀕𑁆𑀕𑀳𑀡𑁂𑀦 𑀯𑀡𑁆𑀡𑀺𑀢𑀸 𑀅𑀢𑁆𑀣𑀓𑀼𑀲𑀮𑀸, 𑀢𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀢𑁆𑀣𑀓𑀼𑀲𑀮𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀯𑀺𑀥𑀸 𑀘 𑀢𑁂 𑀪𑀺𑀓𑁆𑀔𑀽. 𑀢𑁂𑀦 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 ‘‘𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸’’𑀢𑀺 𑀆𑀳.

𑀢𑀢𑁄 ‘‘𑀓𑀺𑀁 𑀓𑀭𑀡𑀻𑀬’’𑀦𑁆𑀢𑀺 𑀢𑁂𑀲𑀁 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁 𑀆𑀳 ‘‘𑀬𑀦𑁆𑀢𑀁 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸’’𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀢𑀁 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑀁 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀧𑀤𑀁 𑀧𑀝𑀺𑀯𑁂𑀥𑀯𑀲𑁂𑀦 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑁂𑀦 𑀬𑀁 𑀓𑀭𑀡𑀻𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀦𑁆𑀢𑀺 𑀇𑀫𑀲𑁆𑀲 𑀕𑀸𑀣𑀸𑀧𑀤𑀲𑁆𑀲 𑀆𑀤𑀺𑀢𑁄 𑀯𑀼𑀢𑁆𑀢𑀫𑁂𑀯 𑀓𑀭𑀡𑀻𑀬𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀅𑀦𑀼𑀯𑀢𑁆𑀢𑀢𑀺, 𑀢𑀁 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀸𑀯𑀲𑁂𑀲𑀧𑀸𑀞𑁄 𑀅𑀢𑁆𑀣𑁄, 𑀢𑀲𑁆𑀫𑀸 𑀯𑀺𑀳𑀭𑀺𑀢𑀼𑀓𑀸𑀫𑁂𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀯𑀸 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀮𑁄𑀓𑀺𑀬𑀧𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀧𑀤𑀁 ‘‘𑀲𑀦𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀢𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁂𑀦 𑀬𑀦𑁆𑀢𑀁 𑀓𑀭𑀡𑀻𑀬𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀅𑀦𑀼𑀯𑀢𑁆𑀢𑀢𑀺, 𑀢𑀁 𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 ‘‘𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀆𑀳 ‘‘𑀬𑀦𑁆𑀢𑀁 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸’’𑀢𑀺. 𑀢𑀲𑁆𑀲𑁂𑀯𑀁 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀮𑁄𑀓𑀺𑀬𑀧𑀜𑁆𑀜𑀸𑀬 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀬𑀁 𑀓𑀭𑀡𑀻𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀓𑀭𑀡𑀻𑀬𑀁, 𑀓𑀭𑀡𑀸𑀭𑀳𑀫𑁂𑀯 𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀺𑀁 𑀧𑀦 𑀢𑀦𑁆𑀢𑀺 ¶ ? 𑀓𑀺𑀫𑀜𑁆𑀜𑀁 𑀲𑀺𑀬𑀸 𑀅𑀜𑁆𑀜𑀢𑁆𑀭 𑀢𑀤𑀥𑀺𑀕𑀫𑀼𑀧𑀸𑀬𑀢𑁄, 𑀓𑀸𑀫𑀜𑁆𑀘𑁂𑀢𑀁 𑀓𑀭𑀡𑀸𑀭𑀳𑀝𑁆𑀞𑁂𑀦 𑀲𑀺𑀓𑁆𑀔𑀢𑁆𑀢𑀬𑀤𑀻𑀧𑀓𑁂𑀦 𑀆𑀤𑀺𑀧𑀤𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 𑀅𑀯𑁄𑀘𑀼𑀫𑁆𑀳𑀸 ‘‘𑀅𑀢𑁆𑀣𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀅𑀓𑀭𑀡𑀻𑀬𑀁. 𑀢𑀢𑁆𑀣 ¶ 𑀲𑀗𑁆𑀔𑁂𑀧𑀢𑁄 𑀲𑀺𑀓𑁆𑀔𑀢𑁆𑀢𑀬𑀁 𑀓𑀭𑀡𑀻𑀬’’𑀦𑁆𑀢𑀺. 𑀅𑀢𑀺𑀲𑀗𑁆𑀔𑁂𑀧𑁂𑀦 𑀤𑁂𑀲𑀺𑀢𑀢𑁆𑀢𑀸 𑀧𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑁂𑀳𑀺𑀘𑀺 𑀯𑀺𑀜𑁆𑀜𑀸𑀢𑀁, 𑀓𑁂𑀳𑀺𑀘𑀺 𑀦 𑀯𑀺𑀜𑁆𑀜𑀸𑀢𑀁. 𑀢𑀢𑁄 𑀬𑁂𑀳𑀺 𑀦 𑀯𑀺𑀜𑁆𑀜𑀸𑀢𑀁, 𑀢𑁂𑀲𑀁 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀬𑀁 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀸𑀢𑀩𑁆𑀩𑀁, 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀲𑀓𑁆𑀓𑁄 𑀉𑀚𑀽 𑀘 𑀲𑀼𑀳𑀼𑀚𑀽 𑀘, 𑀲𑀼𑀯𑀘𑁄 𑀘𑀲𑁆𑀲 𑀫𑀼𑀤𑀼 𑀅𑀦𑀢𑀺𑀫𑀸𑀦𑀻’’𑀢𑀺 𑀇𑀫𑀁 𑀢𑀸𑀯 𑀉𑀧𑀟𑁆𑀠𑀕𑀸𑀣𑀫𑀸𑀳.

𑀓𑀺𑀁 ¶ 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑁄, 𑀮𑁄𑀓𑀺𑀬𑀧𑀜𑁆𑀜𑀸𑀬 𑀯𑀸 𑀢𑀁 𑀅𑀪𑀺𑀲𑀫𑁂𑀘𑁆𑀘 𑀢𑀤𑀥𑀺𑀕𑀫𑀸𑀬 𑀧𑀝𑀺𑀧𑀚𑁆𑀚𑀫𑀸𑀦𑁄 𑀆𑀭𑀜𑁆𑀜𑀓𑁄 𑀪𑀺𑀓𑁆𑀔𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀧𑀥𑀸𑀦𑀺𑀬𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀸𑀬 𑀧𑀝𑀺𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄 𑀅𑀲𑁆𑀲, 𑀢𑀣𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀯𑀢𑁆𑀢𑀲𑀫𑀸𑀤𑀸𑀦𑀸𑀤𑀻𑀲𑀼 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀲𑀗𑁆𑀔𑀭𑀡𑀸𑀤𑀻𑀲𑀼 𑀘 𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀺𑀁 𑀓𑀭𑀡𑀻𑀬𑀸𑀦𑀺, 𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀏𑀯𑀭𑀽𑀧𑁂𑀲𑀼 𑀲𑀓𑁆𑀓𑁄 𑀅𑀲𑁆𑀲 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑀢𑁆𑀣𑁄. 𑀲𑀓𑁆𑀓𑁄 𑀳𑁄𑀦𑁆𑀢𑁄𑀧𑀺 𑀘 𑀢𑀢𑀺𑀬𑀧𑀥𑀸𑀦𑀺𑀬𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀉𑀚𑀼 𑀅𑀲𑁆𑀲. 𑀉𑀚𑀼 𑀳𑁄𑀦𑁆𑀢𑁄𑀧𑀺 𑀘 𑀲𑀓𑀺𑀁 𑀉𑀚𑀼𑀪𑀸𑀯𑁂𑀦 𑀤𑀳𑀭𑀓𑀸𑀮𑁂 𑀯𑀸 𑀉𑀚𑀼𑀪𑀸𑀯𑁂𑀦 𑀲𑀦𑁆𑀢𑁄𑀲𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀦𑀧𑁆𑀧𑀼𑀦𑀁 𑀅𑀲𑀺𑀣𑀺𑀮𑀓𑀭𑀡𑁂𑀦 𑀲𑀼𑀝𑁆𑀞𑀼𑀢𑀭𑀁 𑀉𑀚𑀼 𑀅𑀲𑁆𑀲. 𑀅𑀲𑀞𑀢𑀸𑀬 𑀯𑀸 𑀉𑀚𑀼, 𑀅𑀫𑀸𑀬𑀸𑀯𑀺𑀢𑀸𑀬 𑀲𑀼𑀳𑀼𑀚𑀼. 𑀓𑀸𑀬𑀯𑀘𑀻𑀯𑀗𑁆𑀓𑀧𑁆𑀧𑀳𑀸𑀦𑁂𑀦 𑀯𑀸 𑀉𑀚𑀼, 𑀫𑀦𑁄𑀯𑀗𑁆𑀓𑀧𑁆𑀧𑀳𑀸𑀦𑁂𑀦 𑀲𑀼𑀳𑀼𑀚𑀼. 𑀅𑀲𑀦𑁆𑀢𑀕𑀼𑀡𑀲𑁆𑀲 𑀯𑀸 𑀅𑀦𑀸𑀯𑀺𑀓𑀭𑀡𑁂𑀦 𑀉𑀚𑀼, 𑀅𑀲𑀦𑁆𑀢𑀕𑀼𑀡𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀮𑀸𑀪𑀲𑁆𑀲 𑀅𑀦𑀥𑀺𑀯𑀸𑀲𑀦𑁂𑀦 𑀲𑀼𑀳𑀼𑀚𑀼. 𑀏𑀯𑀁 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀳𑀺 𑀧𑀼𑀭𑀺𑀫𑀤𑁆𑀯𑀬𑀢𑀢𑀺𑀬𑀲𑀺𑀓𑁆𑀔𑀸𑀳𑀺 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀻𑀳𑀺 𑀘 𑀉𑀚𑀼 𑀘 𑀲𑀼𑀳𑀼𑀚𑀼 𑀘 𑀅𑀲𑁆𑀲.

𑀦 𑀓𑁂𑀯𑀮𑀜𑁆𑀘 𑀉𑀚𑀼 𑀘 𑀲𑀼𑀳𑀼𑀚𑀼 𑀘, 𑀅𑀧𑀺𑀘 𑀧𑀦 𑀲𑀼𑀯𑀘𑁄 𑀘 𑀅𑀲𑁆𑀲. 𑀬𑁄 𑀳𑀺 𑀧𑀼𑀕𑁆𑀕𑀮𑁄 ‘‘𑀇𑀤𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀁 𑀢𑁂 𑀲𑀼𑀢𑀁, 𑀓𑁄 𑀫𑁂 𑀲𑀼𑀢𑁆𑀯𑀸 𑀯𑀤𑀲𑀺, 𑀓𑀺𑀁 𑀉𑀧𑀚𑁆𑀛𑀸𑀬𑁄 𑀆𑀘𑀭𑀺𑀬𑁄 𑀲𑀦𑁆𑀤𑀺𑀝𑁆𑀞𑁄 𑀲𑀫𑁆𑀪𑀢𑁆𑀢𑁄 𑀯𑀸’’𑀢𑀺 𑀯𑀤𑁂𑀢𑀺, 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀸 𑀢𑀁 𑀯𑀺𑀳𑁂𑀲𑁂𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀸 𑀦 𑀢𑀣𑀸 𑀓𑀭𑁄𑀢𑀺, 𑀲𑁄 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀤𑀽𑀭𑁂 𑀳𑁄𑀢𑀺. 𑀬𑁄 𑀧𑀦 𑀑𑀯𑀤𑀺𑀬𑀫𑀸𑀦𑁄 ‘‘𑀲𑀸𑀥𑀼, 𑀪𑀦𑁆𑀢𑁂 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀯𑀚𑁆𑀚𑀁 𑀦𑀸𑀫 ¶ 𑀤𑀼𑀤𑁆𑀤𑀲𑀁 𑀳𑁄𑀢𑀺, 𑀧𑀼𑀦𑀧𑀺 𑀫𑀁 𑀏𑀯𑀭𑀽𑀧𑀁 𑀤𑀺𑀲𑁆𑀯𑀸 𑀯𑀤𑁂𑀬𑁆𑀬𑀸𑀣 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀘𑀺𑀭𑀲𑁆𑀲𑀁 𑀫𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀑𑀯𑀸𑀤𑁄 𑀮𑀤𑁆𑀥𑁄’’𑀢𑀺 𑀯𑀤𑀢𑀺, 𑀬𑀣𑀸𑀦𑀼𑀲𑀺𑀝𑁆𑀞𑀜𑁆𑀘 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀅𑀯𑀺𑀤𑀽𑀭𑁂 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀧𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀭𑁄𑀦𑁆𑀢𑁄 𑀲𑀼𑀯𑀘𑁄 𑀘 𑀅𑀲𑁆𑀲.

𑀬𑀣𑀸 ¶ 𑀘 𑀲𑀼𑀯𑀘𑁄, 𑀏𑀯𑀁 𑀫𑀼𑀤𑀼 𑀅𑀲𑁆𑀲. 𑀫𑀼𑀤𑀽𑀢𑀺 𑀕𑀳𑀝𑁆𑀞𑁂𑀳𑀺 𑀤𑀽𑀢𑀕𑀫𑀦𑀧𑀳𑀺𑀡𑀕𑀫𑀦𑀸𑀤𑀻𑀲𑀼 𑀦𑀺𑀬𑀼𑀚𑁆𑀚𑀫𑀸𑀦𑁄 𑀢𑀢𑁆𑀣 𑀫𑀼𑀤𑀼𑀪𑀸𑀯𑀁 𑀅𑀓𑀢𑁆𑀯𑀸 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀓𑀮𑀩𑁆𑀭𑀳𑁆𑀫𑀘𑀭𑀺𑀬𑁂 𑀘 𑀫𑀼𑀤𑀼 𑀅𑀲𑁆𑀲 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑀼𑀯𑀡𑁆𑀡𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀺𑀬𑁄𑀕𑀓𑁆𑀔𑀫𑁄. 𑀅𑀣 𑀯𑀸 𑀫𑀼𑀤𑀽𑀢𑀺 𑀅𑀪𑀸𑀓𑀼𑀝𑀺𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀲𑀼𑀔𑀲𑀫𑁆𑀪𑀸𑀲𑁄 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺 𑀲𑀼𑀢𑀺𑀢𑁆𑀣𑀁 𑀯𑀺𑀬 𑀲𑀼𑀔𑀸𑀯𑀕𑀸𑀳𑁄 𑀅𑀲𑁆𑀲. 𑀦 𑀓𑁂𑀯𑀮𑀜𑁆𑀘 𑀫𑀼𑀤𑀼, 𑀅𑀧𑀺𑀘 𑀧𑀦 𑀅𑀦𑀢𑀺𑀫𑀸𑀦𑀻 𑀅𑀲𑁆𑀲, 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀳𑀺 𑀅𑀢𑀺𑀫𑀸𑀦𑀯𑀢𑁆𑀣𑀽𑀳𑀺 𑀧𑀭𑁂 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺.

𑀤𑀼𑀢𑀺𑀬𑀕𑀸𑀣𑀸𑀯𑀡𑁆𑀡𑀦𑀸

𑁨. 𑀏𑀯𑀁 ¶ 𑀪𑀕𑀯𑀸 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀢𑀤𑀥𑀺𑀕𑀫𑀸𑀬 𑀯𑀸 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀘𑁆𑀘𑀁 𑀓𑀭𑀡𑀻𑀬𑀁 𑀯𑀢𑁆𑀯𑀸 𑀧𑀼𑀦 𑀢𑀢𑀼𑀢𑁆𑀢𑀭𑀺𑀧𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀲𑀦𑁆𑀢𑀼𑀲𑁆𑀲𑀓𑁄 𑀘𑀸’’𑀢𑀺 𑀤𑀼𑀢𑀺𑀬𑀕𑀸𑀣𑀫𑀸𑀳.

𑀢𑀢𑁆𑀣 ‘‘𑀲𑀦𑁆𑀢𑀼𑀝𑁆𑀞𑀻 𑀘 𑀓𑀢𑀜𑁆𑀜𑀼𑀢𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀦 𑀤𑁆𑀯𑀸𑀤𑀲𑀯𑀺𑀥𑁂𑀦 𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀲𑁆𑀲𑀢𑀻𑀢𑀺 𑀲𑀦𑁆𑀢𑀼𑀲𑁆𑀲𑀓𑁄. 𑀅𑀣 𑀯𑀸 𑀢𑀼𑀲𑁆𑀲𑀢𑀻𑀢𑀺 𑀢𑀼𑀲𑁆𑀲𑀓𑁄, 𑀲𑀓𑁂𑀦 𑀢𑀼𑀲𑁆𑀲𑀓𑁄, 𑀲𑀦𑁆𑀢𑁂𑀦 𑀢𑀼𑀲𑁆𑀲𑀓𑁄, 𑀲𑀫𑁂𑀦 𑀢𑀼𑀲𑁆𑀲𑀓𑁄𑀢𑀺 𑀲𑀦𑁆𑀢𑀼𑀲𑁆𑀲𑀓𑁄. 𑀢𑀢𑁆𑀣 𑀲𑀓𑀁 𑀦𑀸𑀫 ‘‘𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀏𑀯𑀁 𑀉𑀧𑀲𑀫𑁆𑀧𑀤𑀫𑀡𑁆𑀟𑀮𑁂 𑀉𑀤𑁆𑀤𑀺𑀝𑁆𑀞𑀁 𑀅𑀢𑁆𑀢𑀦𑀸 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀘𑀢𑀼𑀧𑀘𑁆𑀘𑀬𑀚𑀸𑀢𑀁, 𑀢𑁂𑀦 𑀲𑀼𑀦𑁆𑀤𑀭𑁂𑀦 𑀯𑀸 𑀅𑀲𑀼𑀦𑁆𑀤𑀭𑁂𑀦 𑀯𑀸 𑀲𑀓𑁆𑀓𑀘𑁆𑀘𑀁 𑀯𑀸 𑀅𑀲𑀓𑁆𑀓𑀘𑁆𑀘𑀁 𑀯𑀸 𑀤𑀺𑀦𑁆𑀦𑁂𑀦 𑀧𑀝𑀺𑀕𑁆𑀕𑀳𑀡𑀓𑀸𑀮𑁂 𑀧𑀭𑀺𑀪𑁄𑀕𑀓𑀸𑀮𑁂 𑀘 𑀯𑀺𑀓𑀸𑀭𑀁 𑀅𑀤𑀲𑁆𑀲𑁂𑀢𑁆𑀯𑀸 𑀬𑀸𑀧𑁂𑀦𑁆𑀢𑁄 ‘‘𑀲𑀓𑁂𑀦 𑀢𑀼𑀲𑁆𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀦𑁆𑀢𑀁 𑀦𑀸𑀫 𑀬𑀁 𑀮𑀤𑁆𑀥𑀁 𑀳𑁄𑀢𑀺 𑀅𑀢𑁆𑀢𑀦𑁄 ‘𑀯𑀺𑀚𑁆𑀚𑀫𑀸𑀦𑀁 ¶ , 𑀢𑁂𑀦 𑀲𑀦𑁆𑀢𑁂𑀦𑁂𑀯 𑀢𑀼𑀲𑁆𑀲𑀦𑁆𑀢𑁄 𑀢𑀢𑁄 𑀧𑀭𑀁 𑀦 𑀧𑀢𑁆𑀣𑁂𑀦𑁆𑀢𑁄 𑀅𑀢𑁆𑀭𑀺𑀘𑁆𑀙𑀢𑀁 𑀧𑀚𑀳𑀦𑁆𑀢𑁄 ‘‘𑀲𑀦𑁆𑀢𑁂𑀦 𑀢𑀼𑀲𑁆𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀁 𑀦𑀸𑀫 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀦𑀼𑀦𑀬𑀧𑀝𑀺𑀖𑀧𑁆𑀧𑀳𑀸𑀦𑀁, 𑀢𑁂𑀦 𑀲𑀫𑁂𑀦 𑀲𑀩𑁆𑀩𑀸𑀭𑀫𑁆𑀫𑀡𑁂𑀲𑀼 𑀢𑀼𑀲𑁆𑀲𑀦𑁆𑀢𑁄 ‘‘𑀲𑀫𑁂𑀦 𑀢𑀼𑀲𑁆𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀔𑁂𑀦 𑀪𑀭𑀻𑀬𑀢𑀻𑀢𑀺 𑀲𑀼𑀪𑀭𑁄, 𑀲𑀼𑀧𑁄𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀫𑀦𑀼𑀲𑁆𑀲𑁂𑀳𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀤𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑁂𑀧𑀺 𑀤𑀼𑀫𑁆𑀫𑀼𑀔𑀪𑀸𑀯𑀁 𑀅𑀦𑀢𑁆𑀢𑀫𑀦𑀪𑀸𑀯𑀫𑁂𑀯 𑀘 𑀤𑀲𑁆𑀲𑁂𑀢𑀺, 𑀢𑁂𑀲𑀁 𑀯𑀸 𑀲𑀫𑁆𑀫𑀼𑀔𑀸𑀯 𑀢𑀁 𑀧𑀺𑀡𑁆𑀟𑀧𑀸𑀢𑀁 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦’’𑀦𑁆𑀢𑀺 𑀅𑀧𑀲𑀸𑀤𑁂𑀦𑁆𑀢𑁄 𑀲𑀸𑀫𑀡𑁂𑀭𑀕𑀳𑀝𑁆𑀞𑀸𑀤𑀻𑀦𑀁 𑀤𑁂𑀢𑀺, 𑀏𑀲 𑀤𑀼𑀩𑁆𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀤𑀽𑀭𑀢𑁄𑀯 𑀧𑀭𑀺𑀯𑀚𑁆𑀚𑁂𑀦𑁆𑀢𑀺 ‘‘𑀤𑀼𑀩𑁆𑀪𑀭𑁄 𑀪𑀺𑀓𑁆𑀔𑀼 𑀦 𑀲𑀓𑁆𑀓𑀸 𑀧𑁄𑀲𑁂𑀢𑀼’’𑀦𑁆𑀢𑀺 ¶ . 𑀬𑁄 𑀧𑀦 𑀬𑀁 𑀓𑀺𑀜𑁆𑀘𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀮𑀪𑀺𑀢𑁆𑀯𑀸 𑀅𑀢𑁆𑀢𑀫𑀦𑁄 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑁄 𑀳𑀼𑀢𑁆𑀯𑀸 𑀬𑀸𑀧𑁂𑀢𑀺, 𑀏𑀲 𑀲𑀼𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑀸 𑀳𑁄𑀦𑁆𑀢𑀺, ‘‘𑀅𑀫𑁆𑀳𑀸𑀓𑀁 𑀪𑀤𑀦𑁆𑀢𑁄 𑀲𑀼𑀪𑀭𑁄, 𑀣𑁄𑀓𑀣𑁄𑀓𑁂𑀦𑀸𑀧𑀺 𑀢𑀼𑀲𑁆𑀲𑀢𑀺, 𑀫𑀬𑀫𑁂𑀯 𑀦𑀁 𑀧𑁄𑀲𑁂𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀧𑁄𑀲𑁂𑀦𑁆𑀢𑀺. 𑀏𑀯𑀭𑀽𑀧𑁄 𑀇𑀥 𑀲𑀼𑀪𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀅𑀧𑁆𑀧𑀁 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀅𑀧𑁆𑀧𑀓𑀺𑀘𑁆𑀘𑁄, 𑀦 𑀓𑀫𑁆𑀫𑀸𑀭𑀸𑀫𑀢𑀸𑀪𑀲𑁆𑀲𑀸𑀭𑀸𑀫𑀢𑀸𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀤𑀺𑀅𑀦𑁂𑀓𑀓𑀺𑀘𑁆𑀘𑀩𑁆𑀬𑀸𑀯𑀝𑁄, 𑀅𑀣 𑀯𑀸 𑀲𑀓𑀮𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀲𑀗𑁆𑀖𑀧𑀭𑀺𑀪𑁄𑀕𑀲𑀸𑀫𑀡𑁂𑀭𑀆𑀭𑀸𑀫𑀺𑀓𑀯𑁄𑀲𑀸𑀲𑀦𑀸𑀤𑀺𑀓𑀺𑀘𑁆𑀘𑀯𑀺𑀭𑀳𑀺𑀢𑁄, 𑀅𑀢𑁆𑀢𑀦𑁄 𑀓𑁂𑀲𑀦𑀔𑀘𑁆𑀙𑁂𑀤𑀦𑀧𑀢𑁆𑀢𑀘𑀻𑀯𑀭𑀓𑀫𑁆𑀫𑀸𑀤𑀺𑀁 𑀓𑀢𑁆𑀯𑀸 𑀲𑀫𑀡𑀥𑀫𑁆𑀫𑀓𑀺𑀘𑁆𑀘𑀧𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀮𑁆𑀮𑀳𑀼𑀓𑀸 ¶ 𑀯𑀼𑀢𑁆𑀢𑀺 𑀅𑀲𑁆𑀲𑀸𑀢𑀺 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺. 𑀬𑀣𑀸 𑀏𑀓𑀘𑁆𑀘𑁄 𑀩𑀳𑀼𑀪𑀡𑁆𑀟𑁄 𑀪𑀺𑀓𑁆𑀔𑀼 𑀤𑀺𑀲𑀸𑀧𑀓𑁆𑀓𑀫𑀦𑀓𑀸𑀮𑁂 𑀩𑀳𑀼𑀁 𑀧𑀢𑁆𑀢𑀘𑀻𑀯𑀭𑀧𑀘𑁆𑀘𑀢𑁆𑀣𑀭𑀡𑀢𑁂𑀮𑀕𑀼𑀴𑀸𑀤𑀺𑀁 𑀫𑀳𑀸𑀚𑀦𑁂𑀦 𑀲𑀻𑀲𑀪𑀸𑀭𑀓𑀝𑀺𑀪𑀸𑀭𑀸𑀤𑀻𑀳𑀺 𑀉𑀩𑁆𑀩𑀳𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀏𑀯𑀁 𑀅𑀳𑀼𑀢𑁆𑀯𑀸 𑀬𑁄 𑀅𑀧𑁆𑀧𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀧𑀢𑁆𑀢𑀘𑀻𑀯𑀭𑀸𑀤𑀺𑀅𑀝𑁆𑀞𑀲𑀫𑀡𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀫𑁂𑀯 𑀧𑀭𑀺𑀳𑀭𑀢𑀺, 𑀤𑀺𑀲𑀸𑀧𑀓𑁆𑀓𑀫𑀦𑀓𑀸𑀮𑁂 𑀧𑀓𑁆𑀔𑀻 𑀲𑀓𑀼𑀡𑁄 𑀯𑀺𑀬 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺 ¶ , 𑀏𑀯𑀭𑀽𑀧𑁄 𑀇𑀥 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀲𑁆𑀲𑀸𑀢𑀺 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄, 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀲𑀼 𑀭𑀸𑀕𑀸𑀤𑀺𑀯𑀲𑁂𑀦 𑀅𑀦𑀼𑀤𑁆𑀥𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀧𑀓𑁄𑀢𑀺 𑀯𑀺𑀜𑁆𑀜𑀽 𑀯𑀺𑀪𑀸𑀯𑀻 𑀧𑀜𑁆𑀜𑀯𑀸, 𑀲𑀻𑀮𑀸𑀦𑀼𑀭𑀓𑁆𑀔𑀡𑀧𑀜𑁆𑀜𑀸𑀬 𑀘𑀻𑀯𑀭𑀸𑀤𑀺𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀆𑀯𑀸𑀲𑀸𑀤𑀺𑀲𑀢𑁆𑀢𑀲𑀧𑁆𑀧𑀸𑀬𑀧𑀭𑀺𑀚𑀸𑀦𑀦𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦 𑀧𑀕𑀩𑁆𑀪𑁄𑀢𑀺 𑀅𑀧𑁆𑀧𑀕𑀩𑁆𑀪𑁄, 𑀅𑀝𑁆𑀞𑀝𑁆𑀞𑀸𑀦𑁂𑀦 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦 𑀘𑀢𑀼𑀝𑁆𑀞𑀸𑀦𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑁂𑀦 𑀅𑀦𑁂𑀓𑁂𑀦 𑀞𑀸𑀦𑁂𑀦 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦 𑀘 𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀝𑁆𑀞𑀸𑀦𑀁 𑀓𑀸𑀬𑀧𑀸𑀕𑀩𑁆𑀪𑀺𑀬𑀁 (𑀫𑀳𑀸𑀦𑀺. 𑁮𑁭) 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀪𑁄𑀚𑀦𑀲𑀸𑀮𑀸𑀚𑀦𑁆𑀢𑀸𑀖𑀭𑀦𑁆𑀳𑀸𑀦𑀢𑀺𑀢𑁆𑀣𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀦𑁂𑀲𑀼 𑀓𑀸𑀬𑁂𑀦 𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀫𑀚𑁆𑀛𑁂 𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀦𑀺𑀲𑀻𑀤𑀢𑀺 𑀧𑀸𑀤𑁂 𑀧𑀸𑀤𑀫𑁄𑀤𑀳𑀺𑀢𑁆𑀯𑀸 𑀯𑀸𑀢𑀺 𑀏𑀯𑀫𑀸𑀤𑀺. 𑀢𑀣𑀸 𑀕𑀡𑀫𑀚𑁆𑀛𑁂 𑀘𑀢𑀼𑀧𑀭𑀺𑀲𑀲𑀦𑁆𑀦𑀺𑀧𑀸𑀢𑁂, 𑀢𑀣𑀸 𑀯𑀼𑀟𑁆𑀠𑀢𑀭𑁂 𑀧𑀼𑀕𑁆𑀕𑀮𑁂. 𑀪𑁄𑀚𑀦𑀲𑀸𑀮𑀸𑀬𑀁 𑀧𑀦 𑀯𑀼𑀟𑁆𑀠𑀸𑀦𑀁 𑀆𑀲𑀦𑀁 ¶ 𑀦 𑀤𑁂𑀢𑀺, 𑀦𑀯𑀸𑀦𑀁 𑀆𑀲𑀦𑀁 𑀧𑀝𑀺𑀩𑀸𑀳𑀢𑀺. 𑀢𑀣𑀸 𑀚𑀦𑁆𑀢𑀸𑀖𑀭𑁂, 𑀯𑀼𑀟𑁆𑀠𑁂 𑀘𑁂𑀢𑁆𑀣 𑀅𑀦𑀸𑀧𑀼𑀘𑁆𑀙𑀸 𑀅𑀕𑁆𑀕𑀺𑀚𑀸𑀮𑀦𑀸𑀤𑀻𑀦𑀺 𑀓𑀭𑁄𑀢𑀺. 𑀦𑁆𑀳𑀸𑀦𑀢𑀺𑀢𑁆𑀣𑁂 𑀘 𑀬𑀤𑀺𑀤𑀁 ‘‘𑀤𑀳𑀭𑁄 𑀯𑀼𑀟𑁆𑀠𑁄𑀢𑀺 𑀧𑀫𑀸𑀡𑀁 𑀅𑀓𑀢𑁆𑀯𑀸 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀦𑁆𑀳𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀦𑀸𑀤𑀺𑀬𑀦𑁆𑀢𑁄 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀯𑀼𑀟𑁆𑀠𑁂 𑀘 𑀦𑀯𑁂 𑀘 𑀩𑀸𑀥𑁂𑀢𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂 𑀧𑀦 𑀅𑀕𑁆𑀕𑀸𑀲𑀦𑀅𑀕𑁆𑀕𑁄𑀤𑀓𑀅𑀕𑁆𑀕𑀧𑀺𑀡𑁆𑀟𑀢𑁆𑀣𑀁 𑀯𑀼𑀟𑁆𑀠𑀸𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀬𑀸𑀢𑀺, 𑀩𑀸𑀳𑀸𑀬 𑀩𑀸𑀳𑀁 𑀧𑀳𑀭𑀦𑁆𑀢𑁄. 𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀦𑁂 𑀯𑀼𑀟𑁆𑀠𑀸𑀦𑀁 𑀧𑀞𑀫𑀢𑀭𑀁 𑀧𑀯𑀺𑀲𑀢𑀺, 𑀤𑀳𑀭𑁂𑀳𑀺 𑀓𑀸𑀬𑀓𑀻𑀴𑀦𑀁 𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀺.

𑀘𑀢𑀼𑀝𑁆𑀞𑀸𑀦𑀁 𑀯𑀘𑀻𑀧𑀸𑀕𑀩𑁆𑀪𑀺𑀬𑀁 (𑀫𑀳𑀸𑀦𑀺. 𑁮𑁭) 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀅𑀦𑁆𑀢𑀭𑀖𑀭𑁂𑀲𑀼 𑀅𑀧𑁆𑀧𑀢𑀺𑀭𑀽𑀧𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀫𑀚𑁆𑀛𑁂 𑀅𑀦𑀸𑀧𑀼𑀘𑁆𑀙𑀸 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀣𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀡𑁂 ¶ 𑀯𑀼𑀟𑁆𑀠𑀢𑀭𑁂 𑀧𑀼𑀕𑁆𑀕𑀮𑁂 𑀘, 𑀢𑀢𑁆𑀣 𑀫𑀦𑀼𑀲𑁆𑀲𑁂𑀳𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀼𑀟𑁆𑀠𑀢𑀭𑀁 𑀅𑀦𑀸𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀦𑁆𑀢𑀭𑀖𑀭𑁂 𑀧𑀦 ‘‘𑀇𑀢𑁆𑀣𑀦𑁆𑀦𑀸𑀫𑁂 𑀓𑀺𑀁 𑀅𑀢𑁆𑀣𑀺, 𑀓𑀺𑀁 𑀬𑀸𑀕𑀼 𑀉𑀤𑀸𑀳𑀼 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸, 𑀓𑀺𑀁 𑀫𑁂 𑀤𑀲𑁆𑀲𑀲𑀺, 𑀓𑀺𑀁 𑀅𑀚𑁆𑀚 𑀔𑀸𑀤𑀺𑀲𑁆𑀲𑀸𑀫𑀺, 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀓𑀺𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀁 𑀪𑀸𑀲𑀢𑀺.

𑀅𑀦𑁂𑀓𑀝𑁆𑀞𑀸𑀦𑀁 ¶ 𑀫𑀦𑁄𑀧𑀸𑀕𑀩𑁆𑀪𑀺𑀬𑀁 (𑀫𑀳𑀸𑀦𑀺. 𑁮𑁭) 𑀦𑀸𑀫 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑀸𑀬𑀯𑀸𑀘𑀸𑀳𑀺 𑀅𑀚𑁆𑀛𑀸𑀘𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀫𑀦𑀲𑀸 𑀏𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀅𑀧𑁆𑀧𑀢𑀺𑀭𑀽𑀧𑀯𑀺𑀢𑀓𑁆𑀓𑀦𑀁.

𑀓𑀼𑀮𑁂𑀲𑁆𑀯𑀦𑀦𑀼𑀕𑀺𑀤𑁆𑀥𑁄𑀢𑀺 𑀬𑀸𑀦𑀺 𑀢𑀸𑀦𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺, 𑀢𑁂𑀲𑀼 𑀧𑀘𑁆𑀘𑀬𑀢𑀡𑁆𑀳𑀸𑀬 𑀯𑀸 𑀅𑀦𑀦𑀼𑀮𑁄𑀫𑀺𑀓𑀕𑀺𑀳𑀺𑀲𑀁𑀲𑀕𑁆𑀕𑀯𑀲𑁂𑀦 𑀯𑀸 𑀅𑀦𑀦𑀼𑀕𑀺𑀤𑁆𑀥𑁄, 𑀦 𑀲𑀳𑀲𑁄𑀓𑀻, 𑀦 𑀲𑀳𑀦𑀦𑁆𑀤𑀻, 𑀦 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀦 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀦 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑀸 𑀉𑀬𑁆𑀬𑁄𑀕𑀫𑀸𑀧𑀚𑁆𑀚𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀲𑁆𑀲𑀸𑀬 𑀘 𑀕𑀸𑀣𑀸𑀬 𑀬𑀁 ‘‘𑀲𑀼𑀯𑀘𑁄 𑀘𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀅𑀲𑁆𑀲𑀸𑀢𑀺 𑀯𑀘𑀦𑀁, 𑀢𑀁 𑀲𑀩𑁆𑀩𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀼𑀲𑁆𑀲𑀓𑁄 𑀘 𑀅𑀲𑁆𑀲, 𑀲𑀼𑀪𑀭𑁄 𑀘 𑀅𑀲𑁆𑀲𑀸𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁.

𑀢𑀢𑀺𑀬𑀕𑀸𑀣𑀸𑀯𑀡𑁆𑀡𑀦𑀸

𑁩. 𑀏𑀯𑀁 𑀪𑀕𑀯𑀸 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀢𑀤𑀥𑀺𑀕𑀫𑀸𑀬 𑀯𑀸 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀤𑀼𑀢𑁆𑀢𑀭𑀺𑀧𑀺 𑀓𑀭𑀡𑀻𑀬𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀇𑀤𑀸𑀦𑀺 𑀅𑀓𑀭𑀡𑀻𑀬𑀫𑁆𑀧𑀺 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑁄 ‘‘𑀦 𑀘 𑀔𑀼𑀤𑁆𑀤𑀫𑀸𑀘𑀭𑁂 𑀓𑀺𑀜𑁆𑀘𑀺, 𑀬𑁂𑀦 𑀯𑀺𑀜𑁆𑀜𑀽 𑀧𑀭𑁂 𑀉𑀧𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀁 𑀉𑀧𑀟𑁆𑀠𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 ¶ 𑁋 𑀏𑀯𑀫𑀺𑀫𑀁 𑀓𑀭𑀡𑀻𑀬𑀁 𑀓𑀭𑁄𑀦𑁆𑀢𑁄 𑀬𑀁 𑀢𑀁 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀔𑀼𑀤𑁆𑀤𑀁 𑀮𑀸𑀫𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦 𑀘 𑀔𑀼𑀤𑁆𑀤𑀁 𑀲𑀫𑀸𑀘𑀭𑁂, 𑀅𑀲𑀫𑀸𑀘𑀭𑀦𑁆𑀢𑁄 𑀘 𑀦 𑀓𑁂𑀯𑀮𑀁 𑀑𑀴𑀸𑀭𑀺𑀓𑀁, 𑀓𑀺𑀦𑁆𑀢𑀼 𑀓𑀺𑀜𑁆𑀘𑀺 𑀦 𑀲𑀫𑀸𑀘𑀭𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀡𑀼𑀫𑀢𑁆𑀢𑀓𑀫𑁆𑀧𑀺 𑀦 𑀲𑀫𑀸𑀘𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁄 𑀢𑀲𑁆𑀲 𑀲𑀫𑀸𑀘𑀸𑀭𑁂 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯𑀸𑀤𑀻𑀦𑀯𑀁 𑀤𑀲𑁆𑀲𑁂𑀢𑀺 ‘‘𑀬𑁂𑀦 𑀯𑀺𑀜𑁆𑀜𑀽 𑀧𑀭𑁂 𑀉𑀧𑀯𑀤𑁂𑀬𑁆𑀬𑀼’’𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀯𑀺𑀜𑁆𑀜𑀽 𑀧𑀭𑁂 𑀅𑀧𑁆𑀧𑀫𑀸𑀡𑀁. 𑀢𑁂 𑀳𑀺 𑀅𑀦𑀯𑀚𑁆𑀚𑀁 𑀯𑀸 𑀲𑀸𑀯𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀅𑀧𑁆𑀧𑀲𑀸𑀯𑀚𑁆𑀚𑀁 𑀯𑀸 𑀫𑀳𑀸𑀲𑀸𑀯𑀚𑁆𑀚𑀁. 𑀯𑀺𑀜𑁆𑀜𑀽 𑀏𑀯 𑀧𑀦 𑀧𑀫𑀸𑀡𑀁. 𑀢𑁂 𑀳𑀺 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 ¶ 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀢𑀲𑁆𑀫𑀸 ‘‘𑀯𑀺𑀜𑁆𑀜𑀽 𑀧𑀭𑁂’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀪𑀕𑀯𑀸 𑀇𑀫𑀸𑀳𑀺 𑀅𑀟𑁆𑀠𑀢𑁂𑀬𑁆𑀬𑀸𑀳𑀺 𑀕𑀸𑀣𑀸𑀳𑀺 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀢𑀤𑀥𑀺𑀕𑀫𑀸𑀬 𑀯𑀸 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑀲𑁆𑀲, 𑀆𑀭𑀜𑁆𑀜𑀓𑀲𑀻𑀲𑁂𑀦 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑀸𑀦𑀁 𑀓𑀭𑀡𑀻𑀬𑀸𑀓𑀭𑀡𑀻𑀬𑀪𑁂𑀤𑀁 𑀓𑀫𑁆𑀫𑀝𑁆𑀞𑀸𑀦𑀽𑀧𑀘𑀸𑀭𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀲𑁆𑀲 𑀤𑁂𑀯𑀢𑀸𑀪𑀬𑀲𑁆𑀲 𑀧𑀝𑀺𑀖𑀸𑀢𑀸𑀬 𑀧𑀭𑀺𑀢𑁆𑀢𑀢𑁆𑀣𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀜𑁆𑀘 ‘‘𑀲𑀼𑀔𑀺𑀦𑁄𑀯 𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀢𑁆𑀢𑀓𑀣𑀁 𑀓𑀣𑁂𑀢𑀼𑀫𑀸𑀭𑀤𑁆𑀥𑁄.

𑀢𑀢𑁆𑀣 ¶ 𑀲𑀼𑀔𑀺𑀦𑁄𑀢𑀺 𑀲𑀼𑀔𑀲𑀫𑁆𑀧𑀦𑁆𑀦𑀸. 𑀔𑁂𑀫𑀺𑀦𑁄𑀢𑀺 𑀔𑁂𑀫𑀯𑀦𑁆𑀢𑁄, 𑀅𑀪𑀬𑀸 𑀦𑀺𑀭𑀼𑀧𑀤𑁆𑀤𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀸. 𑀲𑀢𑁆𑀢𑀸𑀢𑀺 𑀧𑀸𑀡𑀺𑀦𑁄. 𑀲𑀼𑀔𑀺𑀢𑀢𑁆𑀢𑀸𑀢𑀺 𑀲𑀼𑀔𑀺𑀢𑀘𑀺𑀢𑁆𑀢𑀸. 𑀏𑀢𑁆𑀣 𑀘 𑀓𑀸𑀬𑀺𑀓𑁂𑀦 𑀲𑀼𑀔𑁂𑀦 𑀲𑀼𑀔𑀺𑀦𑁄, 𑀫𑀸𑀦𑀲𑁂𑀦 𑀲𑀼𑀔𑀺𑀢𑀢𑁆𑀢𑀸, 𑀢𑀤𑀼𑀪𑀬𑁂𑀦𑀸𑀧𑀺 𑀲𑀩𑁆𑀩𑀪𑀬𑀼𑀧𑀤𑁆𑀤𑀯𑀯𑀺𑀕𑀫𑁂𑀦 𑀯𑀸 𑀔𑁂𑀫𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸 𑀧𑀦 𑀏𑀯𑀁 𑀯𑀼𑀢𑁆𑀢𑀁? 𑀫𑁂𑀢𑁆𑀢𑀸𑀪𑀸𑀯𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁. 𑀏𑀯𑀜𑁆𑀳𑀺 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽’’𑀢𑀺 𑀯𑀸, ‘‘𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺 𑀯𑀸, ‘‘𑀲𑀼𑀔𑀺𑀢𑀢𑁆𑀢𑀸 𑀳𑁄𑀦𑁆𑀢𑀽’’𑀢𑀺 𑀯𑀸.

𑀘𑀢𑀼𑀢𑁆𑀣𑀕𑀸𑀣𑀸𑀯𑀡𑁆𑀡𑀦𑀸

𑁪. 𑀏𑀯𑀁 𑀬𑀸𑀯 𑀉𑀧𑀘𑀸𑀭𑀢𑁄 𑀅𑀧𑁆𑀧𑀦𑀸𑀓𑁄𑀝𑀺, 𑀢𑀸𑀯 𑀲𑀗𑁆𑀔𑁂𑀧𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀓𑁂𑀘𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀅𑀣 𑀯𑀸 𑀬𑀲𑁆𑀫𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀦 𑀆𑀤𑀺𑀓𑁂𑀦𑁂𑀯 𑀏𑀓𑀢𑁆𑀢𑁂 𑀲𑀡𑁆𑀞𑀸𑀢𑀺 𑀆𑀭𑀫𑁆𑀫𑀡𑀧𑁆𑀧𑀪𑁂𑀤𑀁 𑀧𑀦 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀓𑀫𑁂𑀦 ¶ 𑀲𑀡𑁆𑀞𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀲𑀣𑀸𑀯𑀭𑀸𑀤𑀺𑀤𑀼𑀓𑀢𑀺𑀓𑀧𑁆𑀧𑀪𑁂𑀤𑁂 𑀆𑀭𑀫𑁆𑀫𑀡𑁂 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀡𑁆𑀞𑀸𑀦𑀢𑁆𑀣𑀫𑁆𑀧𑀺 ‘‘𑀬𑁂 𑀓𑁂𑀘𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀅𑀣 𑀯𑀸 𑀬𑀲𑁆𑀫𑀸 𑀬𑀲𑁆𑀲 𑀬𑀁 𑀆𑀭𑀫𑁆𑀫𑀡𑀁 𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀲𑁆𑀲 𑀢𑀢𑁆𑀣 𑀘𑀺𑀢𑁆𑀢𑀁 𑀲𑀼𑀔𑀁 ¶ 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀬𑀲𑁆𑀲 𑀬𑀁 𑀯𑀺𑀪𑀽𑀢𑀁 𑀆𑀭𑀫𑁆𑀫𑀡𑀁, 𑀢𑀲𑁆𑀲 𑀢𑀢𑁆𑀣 𑀘𑀺𑀢𑁆𑀢𑀁 𑀲𑀡𑁆𑀞𑀸𑀧𑁂𑀢𑀼𑀓𑀸𑀫𑁄 𑀢𑀲𑀣𑀸𑀯𑀭𑀸𑀤𑀺𑀤𑀼𑀓𑀢𑀺𑀓𑀸𑀭𑀫𑁆𑀫𑀡𑀪𑁂𑀤𑀤𑀻𑀧𑀓𑀁 ‘‘𑀬𑁂 𑀓𑁂𑀘𑀻’’𑀢𑀺 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀏𑀢𑁆𑀣 𑀳𑀺 𑀢𑀲𑀣𑀸𑀯𑀭𑀤𑀼𑀓𑀁 𑀤𑀺𑀝𑁆𑀞𑀸𑀤𑀺𑀝𑁆𑀞𑀤𑀼𑀓𑀁 𑀤𑀽𑀭𑀲𑀦𑁆𑀢𑀺𑀓𑀤𑀼𑀓𑀁 𑀪𑀽𑀢𑀲𑀫𑁆𑀪𑀯𑁂𑀲𑀺𑀤𑀼𑀓𑀦𑁆𑀢𑀺 𑀘𑀢𑁆𑀢𑀸𑀭𑁄 𑀤𑀼𑀓𑁂, 𑀤𑀻𑀖𑀸𑀤𑀻𑀳𑀺 𑀘 𑀙𑀳𑀺 𑀧𑀤𑁂𑀳𑀺 𑀫𑀚𑁆𑀛𑀺𑀫𑀧𑀤𑀲𑁆𑀲 𑀢𑀻𑀲𑀼 𑀅𑀡𑀼𑀓𑀧𑀤𑀲𑁆𑀲 𑀘 𑀤𑁆𑀯𑀻𑀲𑀼 𑀢𑀺𑀓𑁂𑀲𑀼 𑀅𑀢𑁆𑀣𑀲𑀫𑁆𑀪𑀯𑀢𑁄 𑀤𑀻𑀖𑀭𑀲𑁆𑀲𑀫𑀚𑁆𑀛𑀺𑀫𑀢𑀺𑀓𑀁 𑀫𑀳𑀦𑁆𑀢𑀸𑀡𑀼𑀓𑀫𑀚𑁆𑀛𑀺𑀫𑀢𑀺𑀓𑀁 𑀣𑀽𑀮𑀸𑀡𑀼𑀓𑀫𑀚𑁆𑀛𑀺𑀫𑀢𑀺𑀓𑀦𑁆𑀢𑀺 𑀢𑀬𑁄 𑀢𑀺𑀓𑁂 𑀘 𑀤𑀻𑀧𑁂𑀢𑀺. 𑀢𑀢𑁆𑀣 𑀬𑁂 𑀓𑁂𑀘𑀻𑀢𑀺 𑀅𑀦𑀯𑀲𑁂𑀲𑀯𑀘𑀦𑀁. 𑀧𑀸𑀡𑀸 𑀏𑀯 𑀪𑀽𑀢𑀸 𑀧𑀸𑀡𑀪𑀽𑀢𑀸. 𑀅𑀣 𑀯𑀸 𑀧𑀸𑀡𑀦𑁆𑀢𑀻𑀢𑀺 𑀧𑀸𑀡𑀸, 𑀏𑀢𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑁆𑀧𑀝𑀺𑀩𑀤𑁆𑀥𑁂 𑀧𑀜𑁆𑀘𑀯𑁄𑀓𑀸𑀭𑀲𑀢𑁆𑀢𑁂 𑀕𑀡𑁆𑀳𑀸𑀢𑀺. 𑀪𑀯𑀦𑁆𑀢𑀻𑀢𑀺 𑀪𑀽𑀢𑀸, 𑀏𑀢𑁂𑀦 𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑀲𑀢𑁆𑀢𑁂 𑀕𑀡𑁆𑀳𑀸𑀢𑀺. 𑀅𑀢𑁆𑀣𑀻𑀢𑀺 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺.

𑀏𑀯𑀁 ‘‘𑀬𑁂 𑀓𑁂𑀘𑀺 𑀧𑀸𑀡𑀪𑀽𑀢𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀤𑀼𑀓𑀢𑀺𑀓𑁂𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑁂 𑀲𑀩𑁆𑀩𑀲𑀢𑁆𑀢𑁂 𑀏𑀓𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑁂𑀧𑀺 𑀢𑁂 𑀢𑀲𑀸 𑀯𑀸 𑀣𑀸𑀯𑀭𑀸 𑀯 𑀦𑀯𑀲𑁂𑀲𑀸𑀢𑀺 𑀇𑀫𑀺𑀦𑀸 𑀤𑀼𑀓𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀢𑀲𑀦𑁆𑀢𑀻𑀢𑀺 𑀢𑀲𑀸, 𑀲𑀢𑀡𑁆𑀳𑀸𑀦𑀁 𑀲𑀪𑀬𑀸𑀦𑀜𑁆𑀘𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀣𑀸𑀯𑀭𑀸, 𑀧𑀳𑀻𑀦𑀢𑀡𑁆𑀳𑀸𑀪𑀬𑀸𑀦𑀁 𑀅𑀭𑀳𑀢𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀢𑁂𑀲𑀁 𑀅𑀯𑀲𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀸, 𑀲𑀩𑁆𑀩𑁂𑀧𑀻𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀬𑀜𑁆𑀘 𑀤𑀼𑀢𑀺𑀬𑀕𑀸𑀣𑀸𑀬 𑀅𑀦𑁆𑀢𑁂 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀤𑀼𑀓𑀢𑀺𑀓𑁂𑀳𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀬𑁂 𑀓𑁂𑀘𑀺 𑀧𑀸𑀡𑀪𑀽𑀢𑀢𑁆𑀣𑀺 𑀢𑀲𑀸 𑀯𑀸 𑀣𑀸𑀯𑀭𑀸 𑀯𑀸 𑀅𑀦𑀯𑀲𑁂𑀲𑀸, 𑀇𑀫𑁂𑀧𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀪𑀯𑀦𑁆𑀢𑀼 𑀲𑀼𑀔𑀺𑀢𑀢𑁆𑀢𑀸. 𑀏𑀯𑀁 𑀬𑀸𑀯 𑀪𑀽𑀢𑀸 𑀯𑀸 𑀲𑀫𑁆𑀪𑀯𑁂𑀲𑀻 𑀯𑀸, 𑀇𑀫𑁂𑀧𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀪𑀯𑀦𑁆𑀢𑀼 𑀲𑀼𑀔𑀺𑀢𑀢𑁆𑀢𑀸’’𑀢𑀺.

𑀇𑀤𑀸𑀦𑀺 𑀤𑀻𑀖𑀭𑀲𑁆𑀲𑀫𑀚𑁆𑀛𑀺𑀫𑀸𑀤𑀺𑀢𑀺𑀓𑀢𑁆𑀢𑀬𑀤𑀻𑀧𑀓𑁂𑀲𑀼 𑀤𑀻𑀖𑀸 𑀯𑀸𑀢𑀺𑀆𑀤𑀻𑀲𑀼 𑀙𑀲𑀼 𑀧𑀤𑁂𑀲𑀼 𑀤𑀻𑀖𑀸𑀢𑀺 𑀤𑀻𑀖𑀢𑁆𑀢𑀪𑀸𑀯𑀸 𑀦𑀸𑀕𑀫𑀘𑁆𑀙𑀕𑁄𑀥𑀸𑀤𑀬𑁄. 𑀅𑀦𑁂𑀓𑀩𑁆𑀬𑀸𑀫𑀲𑀢𑀧𑁆𑀧𑀫𑀸𑀡𑀸𑀧𑀺 𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀦𑀸𑀕𑀸𑀦𑀁 𑀅𑀢𑁆𑀢𑀪𑀸𑀯𑀸 𑀅𑀦𑁂𑀓𑀬𑁄𑀚𑀦𑀧𑁆𑀧𑀫𑀸𑀡𑀸 𑀘 𑀫𑀘𑁆𑀙𑀕𑁄𑀥𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑀸 𑀳𑁄𑀦𑁆𑀢𑀺. 𑀫𑀳𑀦𑁆𑀢𑀸𑀢𑀺 𑀫𑀳𑀦𑁆𑀢𑀢𑁆𑀢𑀪𑀸𑀯𑀸 𑀚𑀮𑁂 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄, 𑀣𑀮𑁂 ¶ 𑀳𑀢𑁆𑀣𑀺𑀦𑀸𑀕𑀸𑀤𑀬𑁄, 𑀅𑀫𑀦𑀼𑀲𑁆𑀲𑁂𑀲𑀼 𑀤𑀸𑀦𑀯𑀸𑀤𑀬𑁄 ¶ . 𑀆𑀳 𑀘 ‘‘𑀭𑀸𑀳𑀼𑀕𑁆𑀕𑀁 𑀅𑀢𑁆𑀢𑀪𑀸𑀯𑀻𑀦’’𑀦𑁆𑀢𑀺 (𑀅. 𑀦𑀺. 𑁪.𑁧𑁫). 𑀢𑀲𑁆𑀲 𑀳𑀺 𑀅𑀢𑁆𑀢𑀪𑀸𑀯𑁄 𑀉𑀩𑁆𑀩𑁂𑀥𑁂𑀦 𑀘𑀢𑁆𑀢𑀸𑀭𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀬𑁄𑀚𑀦𑀲𑀢𑀸𑀦𑀺, 𑀩𑀸𑀳𑀽 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑀸, 𑀧𑀜𑁆𑀜𑀸𑀲𑀬𑁄𑀚𑀦𑀁 𑀪𑀫𑀼𑀓𑀦𑁆𑀢𑀭𑀁, 𑀢𑀣𑀸 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸, 𑀳𑀢𑁆𑀣𑀢𑀮𑀸𑀦𑀺 𑀤𑁆𑀯𑁂 𑀬𑁄𑀚𑀦𑀲𑀢𑀸𑀦𑀻𑀢𑀺. 𑀫𑀚𑁆𑀛𑀺𑀫𑀸𑀢𑀺 𑀅𑀲𑁆𑀲𑀕𑁄𑀡𑀫𑀳𑀺𑀁𑀲𑀲𑀽𑀓𑀭𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑀸. 𑀭𑀲𑁆𑀲𑀓𑀸𑀢𑀺 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼 𑀯𑀸𑀫𑀦𑀸𑀤𑀬𑁄 𑀤𑀻𑀖𑀫𑀚𑁆𑀛𑀺𑀫𑁂𑀳𑀺 𑀑𑀫𑀓𑀧𑁆𑀧𑀫𑀸𑀡𑀸 𑀲𑀢𑁆𑀢𑀸. 𑀅𑀡𑀼𑀓𑀸𑀢𑀺 𑀫𑀁𑀲𑀘𑀓𑁆𑀔𑀼𑀲𑁆𑀲 𑀅𑀕𑁄𑀘𑀭𑀸 𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀲𑀬𑀸 𑀉𑀤𑀓𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀸 𑀲𑀼𑀔𑀼𑀫𑀢𑁆𑀢𑀪𑀸𑀯𑀸 𑀲𑀢𑁆𑀢𑀸 𑀊𑀓𑀸𑀤𑀬𑁄 𑀯𑀸. 𑀅𑀧𑀺𑀘 𑀬𑁂 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼 𑀫𑀳𑀦𑁆𑀢𑀫𑀚𑁆𑀛𑀺𑀫𑁂𑀳𑀺 𑀣𑀽𑀮𑀫𑀚𑁆𑀛𑀺𑀫𑁂𑀳𑀺 𑀘 𑀑𑀫𑀓𑀧𑁆𑀧𑀫𑀸𑀡𑀸 𑀲𑀢𑁆𑀢𑀸, 𑀢𑁂 𑀅𑀡𑀼𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀣𑀽𑀮𑀸𑀢𑀺 𑀧𑀭𑀺𑀫𑀡𑁆𑀟𑀮𑀢𑁆𑀢𑀪𑀸𑀯𑀸 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀸𑀤𑀬𑁄 𑀲𑀢𑁆𑀢𑀸.

𑀧𑀜𑁆𑀘𑀫𑀕𑀸𑀣𑀸𑀯𑀡𑁆𑀡𑀦𑀸

𑁫. 𑀏𑀯𑀁 𑀢𑀻𑀳𑀺 𑀢𑀺𑀓𑁂𑀳𑀺 𑀅𑀦𑀯𑀲𑁂𑀲𑀢𑁄 𑀲𑀢𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀤𑀺𑀝𑁆𑀞𑀸 𑀯𑀸 𑀬𑁂 𑀯 𑀅𑀤𑀺𑀝𑁆𑀞𑀸’’𑀢𑀺𑀆𑀤𑀻𑀳𑀺 𑀢𑀻𑀳𑀺 𑀤𑀼𑀓𑁂𑀳𑀺𑀧𑀺 𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀤𑀺𑀝𑁆𑀞𑀸𑀢𑀺 𑀬𑁂 𑀅𑀢𑁆𑀢𑀦𑁄 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀫𑀸𑀕𑀢𑀯𑀲𑁂𑀦 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀅𑀤𑀺𑀝𑁆𑀞𑀸𑀢𑀺 𑀬𑁂 𑀧𑀭𑀲𑀫𑀼𑀤𑁆𑀤𑀧𑀭𑀲𑁂𑀮𑀧𑀭𑀘𑀓𑁆𑀓𑀯𑀸𑀴𑀸𑀤𑀻𑀲𑀼 𑀞𑀺𑀢𑀸. ‘‘𑀬𑁂 𑀯𑀸 𑀤𑀽𑀭𑁂 𑀯𑀲𑀦𑁆𑀢𑀺 𑀅𑀯𑀺𑀤𑀽𑀭𑁂’’𑀢𑀺 𑀇𑀫𑀺𑀦𑀸 𑀧𑀦 𑀤𑀼𑀓𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑁆𑀲 𑀤𑀽𑀭𑁂 𑀘 𑀅𑀯𑀺𑀤𑀽𑀭𑁂 𑀘 𑀯𑀲𑀦𑁆𑀢𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀺, 𑀢𑁂 𑀅𑀧𑀤𑀤𑁆𑀯𑀺𑀧𑀤𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀢𑀦𑁄 𑀳𑀺 𑀓𑀸𑀬𑁂 𑀯𑀲𑀦𑁆𑀢𑀸 𑀲𑀢𑁆𑀢𑀸 𑀅𑀯𑀺𑀤𑀽𑀭𑁂, 𑀩𑀳𑀺𑀓𑀸𑀬𑁂 𑀯𑀲𑀦𑁆𑀢𑀸 𑀲𑀢𑁆𑀢𑀸 𑀤𑀽𑀭𑁂. 𑀢𑀣𑀸 𑀅𑀦𑁆𑀢𑁄𑀉𑀧𑀘𑀸𑀭𑁂 𑀯𑀲𑀦𑁆𑀢𑀸 𑀅𑀯𑀺𑀤𑀽𑀭𑁂, 𑀩𑀳𑀺𑀉𑀧𑀘𑀸𑀭𑁂 𑀯𑀲𑀦𑁆𑀢𑀸 𑀤𑀽𑀭𑁂. 𑀅𑀢𑁆𑀢𑀦𑁄 𑀯𑀺𑀳𑀸𑀭𑁂 𑀕𑀸𑀫𑁂 𑀚𑀦𑀧𑀤𑁂 𑀤𑀻𑀧𑁂 𑀘𑀓𑁆𑀓𑀯𑀸𑀴𑁂 𑀯𑀲𑀦𑁆𑀢𑀸 𑀅𑀯𑀺𑀤𑀽𑀭𑁂, 𑀧𑀭𑀘𑀓𑁆𑀓𑀯𑀸𑀴𑁂 𑀯𑀲𑀦𑁆𑀢𑀸 𑀤𑀽𑀭𑁂 𑀯𑀲𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀪𑀽𑀢𑀸𑀢𑀺 𑀚𑀸𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸. 𑀬𑁂 𑀪𑀽𑀢𑀸 𑀏𑀯, 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 ¶ 𑀔𑀻𑀡𑀸𑀲𑀯𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀪𑀯𑀫𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀻. 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀆𑀬𑀢𑀺𑀫𑁆𑀧𑀺 ¶ 𑀲𑀫𑁆𑀪𑀯𑀁 𑀏𑀲𑀦𑁆𑀢𑀸𑀦𑀁 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀣 𑀯𑀸 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫 ¶ . 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀪𑀼𑀢𑀺 𑀪𑀽𑀢𑀸 𑀦𑀸𑀫. 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀢𑀢𑁄 𑀧𑀭𑀁 𑀪𑀽𑀢𑀸𑀢𑀺.

𑀙𑀝𑁆𑀞𑀕𑀸𑀣𑀸𑀯𑀡𑁆𑀡𑀦𑀸

𑁬. 𑀏𑀯𑀁 𑀪𑀕𑀯𑀸 ‘‘𑀲𑀼𑀔𑀺𑀦𑁄 𑀯𑀸’’𑀢𑀺𑀆𑀤𑀻𑀳𑀺 𑀅𑀟𑁆𑀠𑀢𑁂𑀬𑁆𑀬𑀸𑀳𑀺 𑀕𑀸𑀣𑀸𑀳𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀳𑀺𑀢𑀲𑀼𑀔𑀸𑀕𑀫𑀧𑀢𑁆𑀣𑀦𑀸𑀯𑀲𑁂𑀦 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀳𑀺𑀢𑀤𑀼𑀓𑁆𑀔𑀸𑀦𑀸𑀕𑀫𑀧𑀢𑁆𑀣𑀦𑀸𑀯𑀲𑁂𑀦𑀸𑀧𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀧𑀭𑁄 𑀧𑀭𑀁 𑀦𑀺𑀓𑀼𑀩𑁆𑀩𑁂𑀣𑀸’’𑀢𑀺. 𑀏𑀲 𑀧𑁄𑀭𑀸𑀡𑁄 𑀧𑀸𑀞𑁄, 𑀇𑀤𑀸𑀦𑀺 𑀧𑀦 ‘‘𑀧𑀭𑀁 𑀳𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀅𑀬𑀁 𑀦 𑀲𑁄𑀪𑀦𑁄.

𑀢𑀢𑁆𑀣 𑀧𑀭𑁄𑀢𑀺 𑀧𑀭𑀚𑀦𑁄. 𑀧𑀭𑀦𑁆𑀢𑀺 𑀧𑀭𑀚𑀦𑀁. 𑀦 𑀦𑀺𑀓𑀼𑀩𑁆𑀩𑁂𑀣𑀸𑀢𑀺 𑀦 𑀯𑀜𑁆𑀘𑁂𑀬𑁆𑀬. 𑀦𑀸𑀢𑀺𑀫𑀜𑁆𑀜𑁂𑀣𑀸𑀢𑀺 𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑁂𑀬𑁆𑀬. 𑀓𑀢𑁆𑀣𑀘𑀻𑀢𑀺 𑀓𑀢𑁆𑀣𑀘𑀺 𑀑𑀓𑀸𑀲𑁂, 𑀕𑀸𑀫𑁂 𑀯𑀸 𑀕𑀸𑀫𑀔𑁂𑀢𑁆𑀢𑁂 𑀯𑀸 𑀜𑀸𑀢𑀺𑀫𑀚𑁆𑀛𑁂 𑀯𑀸 𑀧𑀽𑀕𑀫𑀚𑁆𑀛𑁂 𑀯𑀸𑀢𑀺𑀆𑀤𑀺. 𑀦𑀦𑁆𑀢𑀺 𑀏𑀢𑀁. 𑀓𑀜𑁆𑀘𑀻𑀢𑀺 𑀬𑀁 𑀓𑀜𑁆𑀘𑀺 𑀔𑀢𑁆𑀢𑀺𑀬𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀕𑀳𑀝𑁆𑀞𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀲𑀼𑀔𑀺𑀢𑀁 𑀯𑀸 𑀤𑀼𑀓𑁆𑀔𑀺𑀢𑀁 𑀯𑀸𑀢𑀺𑀆𑀤𑀺. 𑀩𑁆𑀬𑀸𑀭𑁄𑀲𑀦𑀸 𑀧𑀝𑀺𑀖𑀲𑀜𑁆𑀜𑀸𑀢𑀺 𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀳𑀺 𑀩𑁆𑀬𑀸𑀭𑁄𑀲𑀦𑀸𑀬 𑀘 𑀫𑀦𑁄𑀯𑀺𑀓𑀸𑀭𑁂𑀦 𑀧𑀝𑀺𑀖𑀲𑀜𑁆𑀜𑀸𑀬 𑀘. ‘‘𑀩𑁆𑀬𑀸𑀭𑁄𑀲𑀦𑀸𑀬 𑀧𑀝𑀺𑀖𑀲𑀜𑁆𑀜𑀸𑀬𑀸’’𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀩𑁆𑀬𑀸𑀭𑁄𑀲𑀦𑀸 𑀧𑀝𑀺𑀖𑀲𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 ‘‘𑀲𑀫𑁆𑀫𑀤𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸’’𑀢𑀺, 𑀬𑀣𑀸 𑀘 ‘‘𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀬 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸𑀬 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸’’𑀢𑀺. 𑀦𑀸𑀜𑁆𑀜𑀫𑀜𑁆𑀜𑀲𑁆𑀲 𑀤𑀼𑀓𑁆𑀔𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑀼𑀓𑁆𑀔𑀁 𑀦 𑀇𑀘𑁆𑀙𑁂𑀬𑁆𑀬 ¶ . 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀦 𑀓𑁂𑀯𑀮𑀁 ‘‘𑀲𑀼𑀔𑀺𑀦𑁄 𑀯𑀸 𑀔𑁂𑀫𑀺𑀦𑁄 𑀯𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀫𑀦𑀲𑀺𑀓𑀸𑀭𑀯𑀲𑁂𑀦𑁂𑀯 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬, 𑀓𑀺𑀦𑁆𑀢𑀼 ‘‘𑀅𑀳𑁄𑀯𑀢 𑀬𑁄 𑀓𑁄𑀘𑀺 𑀧𑀭𑀧𑀼𑀕𑁆𑀕𑀮𑁄 𑀬𑀁 𑀓𑀜𑁆𑀘𑀺 𑀧𑀭𑀧𑀼𑀕𑁆𑀕𑀮𑀁 𑀯𑀜𑁆𑀘𑀦𑀸𑀤𑀻𑀳𑀺 𑀦𑀺𑀓𑀢𑀻𑀳𑀺 𑀦 𑀦𑀺𑀓𑀼𑀩𑁆𑀩𑁂𑀣, 𑀚𑀸𑀢𑀺𑀆𑀤𑀻𑀳𑀺 𑀘 𑀦𑀯𑀳𑀺 𑀫𑀸𑀦𑀯𑀢𑁆𑀣𑀽𑀳𑀺 𑀓𑀢𑁆𑀣𑀘𑀺 𑀧𑀤𑁂𑀲𑁂 𑀓𑀜𑁆𑀘𑀺 𑀧𑀭𑀧𑀼𑀕𑁆𑀕𑀮𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘 𑀩𑁆𑀬𑀸𑀭𑁄𑀲𑀦𑀸𑀬 𑀯𑀸 𑀧𑀝𑀺𑀖𑀲𑀜𑁆𑀜𑀸𑀬 𑀯𑀸 𑀤𑀼𑀓𑁆𑀔𑀁 𑀦 𑀇𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀯𑀫𑁆𑀧𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀪𑀸𑀯𑁂𑀬𑁆𑀬𑀸𑀢𑀺.

𑀲𑀢𑁆𑀢𑀫𑀕𑀸𑀣𑀸𑀯𑀡𑁆𑀡𑀦𑀸

𑁭. 𑀏𑀯𑀁 ¶ ¶ 𑀅𑀳𑀺𑀢𑀤𑀼𑀓𑁆𑀔𑀸𑀦𑀸𑀕𑀫𑀧𑀢𑁆𑀣𑀦𑀸𑀯𑀲𑁂𑀦 𑀅𑀢𑁆𑀣𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀢𑀸 𑀬𑀣𑀸 𑀦𑀺𑀬𑀁𑀧𑀼𑀢𑁆𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀫𑀸𑀢𑀸 𑀦𑀺𑀬𑀁 𑀧𑀼𑀢𑁆𑀢𑀁 𑀅𑀢𑁆𑀢𑀦𑀺 𑀚𑀸𑀢𑀁 𑀑𑀭𑀲𑀁 𑀧𑀼𑀢𑁆𑀢𑀁, 𑀢𑀜𑁆𑀘 𑀏𑀓𑀧𑀼𑀢𑁆𑀢𑀫𑁂𑀯 𑀆𑀬𑀼𑀲𑀸 𑀅𑀦𑀼𑀭𑀓𑁆𑀔𑁂, 𑀢𑀲𑁆𑀲 𑀤𑀼𑀓𑁆𑀔𑀸𑀕𑀫𑀧𑁆𑀧𑀝𑀺𑀩𑀸𑀳𑀦𑀢𑁆𑀣𑀁 𑀅𑀢𑁆𑀢𑀦𑁄 𑀆𑀬𑀼𑀫𑁆𑀧𑀺 𑀘𑀚𑀺𑀢𑁆𑀯𑀸 𑀢𑀁 𑀅𑀦𑀼𑀭𑀓𑁆𑀔𑁂, 𑀏𑀯𑀫𑁆𑀧𑀺 𑀲𑀩𑁆𑀩𑀪𑀽𑀢𑁂𑀲𑀼 𑀇𑀤𑀁 𑀫𑁂𑀢𑁆𑀢𑀸𑀔𑁆𑀬𑀁 𑀫𑀸𑀦𑀲𑀁 𑀪𑀸𑀯𑀬𑁂, 𑀧𑀼𑀦𑀧𑁆𑀧𑀼𑀦𑀁 𑀚𑀦𑀬𑁂 𑀯𑀟𑁆𑀠𑀬𑁂, 𑀢𑀜𑁆𑀘 𑀅𑀧𑀭𑀺𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀏𑀓𑀲𑁆𑀫𑀺𑀁 𑀯𑀸 𑀲𑀢𑁆𑀢𑁂 𑀅𑀦𑀯𑀲𑁂𑀲𑀨𑀭𑀡𑀯𑀲𑁂𑀦 𑀅𑀧𑀭𑀺𑀫𑀸𑀡𑀁 𑀪𑀸𑀯𑀬𑁂𑀢𑀺.

𑀅𑀝𑁆𑀞𑀫𑀕𑀸𑀣𑀸𑀯𑀡𑁆𑀡𑀦𑀸

𑁮. 𑀏𑀯𑀁 𑀲𑀩𑁆𑀩𑀸𑀓𑀸𑀭𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀯𑀟𑁆𑀠𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑁂𑀢𑁆𑀢𑀜𑁆𑀘 𑀲𑀩𑁆𑀩𑀮𑁄𑀓𑀲𑁆𑀫𑀻’’𑀢𑀺.

𑀢𑀢𑁆𑀣 𑀫𑀺𑀚𑁆𑀚𑀢𑀺 𑀢𑀸𑀬𑀢𑀺 𑀘𑀸𑀢𑀺 𑀫𑀺𑀢𑁆𑀢𑁄, 𑀳𑀺𑀢𑀚𑁆𑀛𑀸𑀲𑀬𑀢𑀸𑀬 𑀲𑀺𑀦𑀺𑀬𑁆𑀳𑀢𑀺, 𑀅𑀳𑀺𑀢𑀸𑀕𑀫𑀢𑁄 𑀭𑀓𑁆𑀔𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀁. 𑀲𑀩𑁆𑀩𑀮𑁄𑀓𑀲𑁆𑀫𑀻𑀢𑀺 𑀅𑀦𑀯𑀲𑁂𑀲𑁂 𑀲𑀢𑁆𑀢𑀮𑁄𑀓𑁂. 𑀫𑀦𑀲𑀺 𑀪𑀯𑀦𑁆𑀢𑀺 𑀫𑀸𑀦𑀲𑀁. 𑀢𑀜𑁆𑀳𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀪𑀸𑀯𑀬𑁂𑀢𑀺 𑀯𑀟𑁆𑀠𑀬𑁂. 𑀦 𑀅𑀲𑁆𑀲 𑀧𑀭𑀺𑀫𑀸𑀡𑀦𑁆𑀢𑀺 𑀅𑀧𑀭𑀺𑀫𑀸𑀡𑀁, 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺, 𑀢𑁂𑀦 𑀅𑀭𑀽𑀧𑀪𑀯𑀁 𑀕𑀡𑁆𑀳𑀸𑀢𑀺. 𑀅𑀥𑁄𑀢𑀺 𑀳𑁂𑀝𑁆𑀞𑀸, 𑀢𑁂𑀦 𑀓𑀸𑀫𑀪𑀯𑀁 𑀕𑀡𑁆𑀳𑀸𑀢𑀺. 𑀢𑀺𑀭𑀺𑀬𑀦𑁆𑀢𑀺 𑀯𑁂𑀫𑀚𑁆𑀛𑀁, 𑀢𑁂𑀦 𑀭𑀽𑀧𑀪𑀯𑀁 𑀕𑀡𑁆𑀳𑀸𑀢𑀺. 𑀅𑀲𑀫𑁆𑀩𑀸𑀥𑀦𑁆𑀢𑀺 𑀲𑀫𑁆𑀩𑀸𑀥𑀯𑀺𑀭𑀳𑀺𑀢𑀁, 𑀪𑀺𑀦𑁆𑀦𑀲𑀻𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀫𑀸 𑀦𑀸𑀫 𑀧𑀘𑁆𑀘𑀢𑁆𑀣𑀺𑀓𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀯𑁂𑀭𑀦𑁆𑀢𑀺 𑀯𑁂𑀭𑀯𑀺𑀭𑀳𑀺𑀢𑀁 ¶ , 𑀅𑀦𑁆𑀢𑀭𑀦𑁆𑀢𑀭𑀸𑀧𑀺 𑀯𑁂𑀭𑀘𑁂𑀢𑀦𑀸𑀧𑀸𑀢𑀼𑀪𑀸𑀯𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀧𑀢𑁆𑀢𑀦𑁆𑀢𑀺 𑀯𑀺𑀕𑀢𑀧𑀘𑁆𑀘𑀢𑁆𑀣𑀺𑀓𑀁. 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀳𑀺 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀦𑀸𑀲𑁆𑀲 𑀓𑁄𑀘𑀺 𑀧𑀘𑁆𑀘𑀢𑁆𑀣𑀺𑀓𑁄 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀫𑀸𑀦𑀲𑀁 𑀯𑀺𑀕𑀢𑀧𑀘𑁆𑀘𑀢𑁆𑀣𑀺𑀓𑀢𑁆𑀢𑀸 𑀅𑀲𑀧𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀸𑀬𑀯𑀘𑀦𑀜𑁆𑀳𑀺 𑀏𑀢𑀁, 𑀬𑀤𑀺𑀤𑀁 𑀧𑀘𑁆𑀘𑀢𑁆𑀣𑀺𑀓𑁄 𑀲𑀧𑀢𑁆𑀢𑁄𑀢𑀺. 𑀅𑀬𑀁 𑀅𑀦𑀼𑀧𑀤𑀢𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀬𑀁 ¶ 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀣𑀤𑀻𑀧𑀦𑀸 𑁋 𑀬𑀤𑀺𑀤𑀁 ‘‘𑀏𑀯𑀫𑁆𑀧𑀺 𑀲𑀩𑁆𑀩𑀪𑀽𑀢𑁂𑀲𑀼 𑀫𑀸𑀦𑀲𑀁 𑀪𑀸𑀯𑀬𑁂 𑀅𑀧𑀭𑀺𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘𑁂𑀢𑀁 𑀅𑀧𑀭𑀺𑀫𑀸𑀡𑀁 𑀫𑁂𑀢𑁆𑀢𑀁 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑀲𑁆𑀫𑀺𑀁 𑀪𑀸𑀯𑀬𑁂 𑀯𑀟𑁆𑀠𑀬𑁂, 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀕𑀫𑀬𑁂 𑀧𑀸𑀧𑀬𑁂. 𑀓𑀣𑀁? 𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀜𑁆𑀘, 𑀉𑀤𑁆𑀥𑀁 𑀬𑀸𑀯 𑀪𑀯𑀕𑁆𑀕𑀸, 𑀅𑀥𑁄 ¶ 𑀬𑀸𑀯 𑀅𑀯𑀻𑀘𑀺𑀢𑁄, 𑀢𑀺𑀭𑀺𑀬𑀁 𑀬𑀸𑀯 𑀅𑀯𑀲𑁂𑀲𑀤𑀺𑀲𑀸. 𑀉𑀤𑁆𑀥𑀁 𑀯𑀸 𑀆𑀭𑀼𑀧𑁆𑀧𑀁, 𑀅𑀥𑁄 𑀓𑀸𑀫𑀥𑀸𑀢𑀼𑀁, 𑀢𑀺𑀭𑀺𑀬𑀁 𑀭𑀽𑀧𑀥𑀸𑀢𑀼𑀁 𑀅𑀦𑀯𑀲𑁂𑀲𑀁 𑀨𑀭𑀦𑁆𑀢𑁄. 𑀏𑀯𑀁 𑀪𑀸𑀯𑁂𑀦𑁆𑀢𑁄𑀧𑀺 𑀘 𑀢𑀁 𑀬𑀣𑀸 𑀅𑀲𑀫𑁆𑀩𑀸𑀥𑀁 𑀅𑀯𑁂𑀭𑀁 𑀅𑀲𑀧𑀢𑁆𑀢𑀜𑁆𑀘 𑀳𑁄𑀢𑀺, 𑀢𑀣𑀸 𑀲𑀫𑁆𑀩𑀸𑀥𑀯𑁂𑀭𑀲𑀧𑀢𑁆𑀢𑀸𑀦𑀁 𑀅𑀪𑀸𑀯𑀁 𑀓𑀭𑁄𑀦𑁆𑀢𑁄 𑀪𑀸𑀯𑀬𑁂. 𑀬𑀁 𑀯𑀸 𑀢𑀁 𑀪𑀸𑀯𑀦𑀸𑀲𑀫𑁆𑀧𑀤𑀁 𑀧𑀢𑁆𑀢𑀁 𑀲𑀩𑁆𑀩𑀢𑁆𑀣 𑀑𑀓𑀸𑀲𑀮𑁄𑀓𑀯𑀲𑁂𑀦 𑀅𑀲𑀫𑁆𑀩𑀸𑀥𑀁, 𑀅𑀢𑁆𑀢𑀦𑁄 𑀧𑀭𑁂𑀲𑀼 𑀆𑀖𑀸𑀢𑀧𑁆𑀧𑀝𑀺𑀯𑀺𑀦𑀬𑀦𑁂𑀦 𑀅𑀯𑁂𑀭𑀁, 𑀅𑀢𑁆𑀢𑀦𑀺 𑀘 𑀧𑀭𑁂𑀲𑀁 𑀆𑀖𑀸𑀢𑀯𑀺𑀦𑀬𑀦𑁂𑀦 𑀅𑀲𑀧𑀢𑁆𑀢𑀁 𑀳𑁄𑀢𑀺. 𑀢𑀁 𑀅𑀲𑀫𑁆𑀩𑀸𑀥𑀫𑀯𑁂𑀭𑀫𑀲𑀧𑀢𑁆𑀢𑀁 𑀅𑀧𑀭𑀺𑀫𑀸𑀡𑀁 𑀫𑁂𑀢𑁆𑀢𑀁 𑀫𑀸𑀦𑀲𑀁 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀢𑀺 𑀢𑀺𑀯𑀺𑀥𑀧𑀭𑀺𑀘𑁆𑀙𑁂𑀤𑁂 𑀲𑀩𑁆𑀩𑀮𑁄𑀓𑀲𑁆𑀫𑀺𑀁 𑀪𑀸𑀯𑀬𑁂 𑀯𑀟𑁆𑀠𑀬𑁂𑀢𑀺.

𑀦𑀯𑀫𑀕𑀸𑀣𑀸𑀯𑀡𑁆𑀡𑀦𑀸

𑁯. 𑀏𑀯𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀟𑁆𑀠𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀇𑀭𑀺𑀬𑀸𑀧𑀣𑀦𑀺𑀬𑀫𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀝𑁆𑀞𑀁 𑀘𑀭𑀁…𑀧𑁂… 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀏𑀯𑀫𑁂𑀢𑀁 𑀫𑁂𑀢𑁆𑀢𑀁 𑀫𑀸𑀦𑀲𑀁 𑀪𑀸𑀯𑁂𑀦𑁆𑀢𑁄 𑀲𑁄 ‘‘𑀦𑀺𑀲𑀻𑀤𑀢𑀺 ¶ 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀇𑀭𑀺𑀬𑀸𑀧𑀣𑀦𑀺𑀬𑀫𑀁 𑀅𑀓𑀢𑁆𑀯𑀸 𑀬𑀣𑀸𑀲𑀼𑀔𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀩𑀸𑀥𑀦𑀯𑀺𑀦𑁄𑀤𑀦𑀁 𑀓𑀭𑁄𑀦𑁆𑀢𑁄 𑀢𑀺𑀝𑁆𑀞𑀁 𑀯𑀸 𑀘𑀭𑀁 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀲𑀬𑀸𑀦𑁄 𑀯𑀸 𑀬𑀸𑀯𑀢𑀸 𑀯𑀺𑀕𑀢𑀫𑀺𑀤𑁆𑀥𑁄 𑀅𑀲𑁆𑀲, 𑀅𑀣 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬.

𑀅𑀣 𑀯𑀸 𑀏𑀯𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀟𑁆𑀠𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀲𑀻𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀝𑁆𑀞𑀁 𑀘𑀭’’𑀦𑁆𑀢𑀺. 𑀯𑀲𑀺𑀧𑁆𑀧𑀢𑁆𑀢𑁄 𑀳𑀺 𑀢𑀺𑀝𑁆𑀞𑀁 𑀯𑀸 𑀘𑀭𑀁 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀲𑀬𑀸𑀦𑁄 𑀯𑀸 𑀬𑀸𑀯𑀢𑀸 𑀇𑀭𑀺𑀬𑀸𑀧𑀣𑁂𑀦 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑀢𑀺𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀣 𑀯𑀸 𑀢𑀺𑀝𑁆𑀞𑀁 𑀯𑀸 𑀘𑀭𑀁 𑀯𑀸…𑀧𑁂… 𑀲𑀬𑀸𑀦𑁄 𑀯𑀸𑀢𑀺 𑀦 𑀢𑀲𑁆𑀲 𑀞𑀸𑀦𑀸𑀤𑀻𑀦𑀺 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀳𑁄𑀦𑁆𑀢𑀺, 𑀅𑀧𑀺𑀘 𑀔𑁄 𑀬𑀸𑀯𑀢𑀸 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑀢𑀺𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀸𑀯𑀢𑀸 𑀯𑀺𑀕𑀢𑀫𑀺𑀤𑁆𑀥𑁄 𑀳𑀼𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀢𑀢𑁆𑀣 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀺𑀝𑁆𑀞𑀁 𑀘𑀭𑀁 𑀦𑀺𑀲𑀺𑀦𑁆𑀦𑁄 𑀯, 𑀲𑀬𑀸𑀦𑁄 𑀬𑀸𑀯𑀢𑀸𑀲𑁆𑀲 𑀯𑀺𑀢𑀫𑀺𑀤𑁆𑀥𑁄. 𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀢𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 ¶ 𑁋 𑀬𑀁 𑀢𑀁 ‘‘𑀫𑁂𑀢𑁆𑀢𑀜𑁆𑀘 𑀲𑀩𑁆𑀩𑀮𑁄𑀓𑀲𑁆𑀫𑀺, 𑀫𑀸𑀦𑀲𑀁 𑀪𑀸𑀯𑀬𑁂’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀣𑀸 𑀪𑀸𑀯𑁂𑀬𑁆𑀬, 𑀬𑀣𑀸 𑀞𑀸𑀦𑀸𑀤𑀻𑀲𑀼 𑀬𑀸𑀯𑀢𑀸 𑀇𑀭𑀺𑀬𑀸𑀧𑀣𑁂𑀦 𑀞𑀸𑀦𑀸𑀤𑀻𑀦𑀺 𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀬𑀸𑀯𑀢𑀸 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑀢𑀺𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀅𑀲𑁆𑀲, 𑀢𑀸𑀯𑀢𑀸 𑀯𑀺𑀕𑀢𑀫𑀺𑀤𑁆𑀥𑁄𑀯 𑀳𑀼𑀢𑁆𑀯𑀸 𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺.

𑀏𑀯𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀲𑀻𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀢𑀲𑁆𑀫𑀺𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑁂 𑀦𑀺𑀬𑁄𑀚𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀯𑀺𑀳𑀸𑀭𑀁 𑀣𑀼𑀦𑀦𑁆𑀢𑁄 𑀆𑀳 ‘‘𑀩𑁆𑀭𑀳𑁆𑀫𑀫𑁂𑀢𑀁 𑀯𑀺𑀳𑀸𑀭𑀫𑀺𑀥𑀫𑀸𑀳𑀽’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑁆𑀯𑀸𑀬𑀁 ‘‘𑀲𑀼𑀔𑀺𑀦𑁄 𑀯𑀸 𑀔𑁂𑀫𑀺𑀦𑁄 𑀯𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺 𑀓𑀢𑁆𑀯𑀸 𑀬𑀸𑀯 ‘‘𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀯𑀡𑁆𑀡𑀺𑀢𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑁄. 𑀏𑀢𑀁 𑀘𑀢𑀽𑀲𑀼 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀲𑀼 𑀦𑀺𑀤𑁆𑀤𑁄𑀲𑀢𑁆𑀢𑀸 𑀅𑀢𑁆𑀢𑀦𑁄𑀧𑀺 𑀧𑀭𑁂𑀲𑀫𑁆𑀧𑀺 𑀅𑀢𑁆𑀣𑀓𑀭𑀢𑁆𑀢𑀸 𑀘 𑀇𑀥 𑀅𑀭𑀺𑀬𑀲𑁆𑀲 𑀥𑀫𑁆𑀫𑀯𑀺𑀦𑀬𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀸𑀳𑀼 ¶ 𑀲𑁂𑀝𑁆𑀞𑀯𑀺𑀳𑀸𑀭𑀫𑀸𑀳𑀽𑀢𑀺, 𑀬𑀢𑁄 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀢𑀺𑀝𑁆𑀞𑀁 𑀘𑀭𑀁 𑀦𑀺𑀲𑀺𑀦𑁆𑀦𑁄 𑀯𑀸 𑀲𑀬𑀸𑀦𑁄 𑀯𑀸 𑀬𑀸𑀯𑀢𑀸𑀲𑁆𑀲 𑀯𑀺𑀕𑀢𑀫𑀺𑀤𑁆𑀥𑁄, 𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺.

𑀤𑀲𑀫𑀕𑀸𑀣𑀸𑀯𑀡𑁆𑀡𑀦𑀸

𑁧𑁦. 𑀏𑀯𑀁 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀫𑁂𑀢𑁆𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀆𑀲𑀦𑁆𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀺𑀕𑀳𑀦𑀦𑀺𑀲𑁂𑀥𑀦𑀫𑀼𑀔𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀤𑁂𑀯 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀺𑀜𑁆𑀘 𑀅𑀦𑀼𑀧𑀕𑁆𑀕𑀫𑁆𑀫𑀸’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 ‘‘𑀩𑁆𑀭𑀳𑁆𑀫𑀫𑁂𑀢𑀁 𑀯𑀺𑀳𑀸𑀭𑀫𑀺𑀥𑀫𑀸𑀳𑀽’’𑀢𑀺 𑀲𑀁𑀯𑀡𑁆𑀡𑀺𑀢𑁄 𑀫𑁂𑀢𑁆𑀢𑀸𑀛𑀸𑀦𑀯𑀺𑀳𑀸𑀭𑁄, 𑀢𑀢𑁄 𑀯𑀼𑀝𑁆𑀞𑀸𑀬 𑀬𑁂 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀬𑁄 𑀥𑀫𑁆𑀫𑀸, 𑀢𑁂 𑀢𑁂𑀲𑀜𑁆𑀘 𑀯𑀢𑁆𑀣𑀸𑀤𑀺𑀅𑀦𑀼𑀲𑀸𑀭𑁂𑀦 𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 ‘‘𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀽𑀧𑀮𑀩𑁆𑀪𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁭𑁧; 𑀫𑀳𑀸𑀦𑀺. 𑁧𑁮𑁬) 𑀏𑀯𑀁 𑀤𑀺𑀝𑁆𑀞𑀺𑀜𑁆𑀘 𑀅𑀦𑀼𑀧𑀕𑁆𑀕𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦 𑀲𑀻𑀮𑀯𑀸 𑀳𑀼𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀲𑀻𑀮𑀲𑀫𑁆𑀧𑀬𑀼𑀢𑁆𑀢𑁂𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀜𑁆𑀜𑀺𑀢𑁂𑀦 𑀤𑀲𑁆𑀲𑀦𑁂𑀦 𑀲𑀫𑁆𑀧𑀦𑁆𑀦𑁄, 𑀢𑀢𑁄 𑀧𑀭𑀁 𑀬𑁄𑀧𑀸𑀬𑀁 𑀯𑀢𑁆𑀣𑀼𑀓𑀸𑀫𑁂𑀲𑀼 𑀕𑁂𑀥𑁄 𑀓𑀺𑀮𑁂𑀲𑀓𑀸𑀫𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀢𑀫𑁆𑀧𑀺 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀳𑀺 𑀢𑀦𑀼𑀪𑀸𑀯𑁂𑀦 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑁂𑀦 ¶ 𑀘 𑀓𑀸𑀫𑁂𑀲𑀼 𑀕𑁂𑀥𑀁 𑀯𑀺𑀦𑁂𑀬𑁆𑀬 𑀯𑀺𑀦𑀬𑀺𑀢𑁆𑀯𑀸 𑀯𑀽𑀧𑀲𑀫𑁂𑀢𑁆𑀯𑀸 𑀦 𑀳𑀺 𑀚𑀸𑀢𑀼 𑀕𑀩𑁆𑀪𑀲𑁂𑀬𑁆𑀬𑀁 𑀧𑀼𑀦 𑀭𑁂𑀢𑀺 𑀏𑀓𑀁𑀲𑁂𑀦𑁂𑀯 𑀧𑀼𑀦 𑀕𑀩𑁆𑀪𑀲𑁂𑀬𑁆𑀬𑀁 𑀦 𑀏𑀢𑀺. 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀤𑁂𑀲𑀦𑀁 𑀲𑀫𑀸𑀧𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀭𑀣, 𑀇𑀫𑀜𑁆𑀘 𑀲𑀼𑀢𑁆𑀢𑀁 𑀫𑀸𑀲𑀲𑁆𑀲 𑀅𑀝𑁆𑀞𑀲𑀼 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂𑀲𑀼 𑀖𑀡𑁆𑀟𑀺𑀁 𑀆𑀓𑁄𑀝𑁂𑀢𑁆𑀯𑀸 𑀉𑀲𑁆𑀲𑀸𑀭𑁂𑀣, 𑀥𑀫𑁆𑀫𑀓𑀣𑀁 𑀓𑀭𑁄𑀣 𑀲𑀸𑀓𑀘𑁆𑀙𑀣 𑀅𑀦𑀼𑀫𑁄𑀤𑀣, 𑀇𑀤𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀆𑀲𑁂𑀯𑀣 𑀪𑀸𑀯𑁂𑀣 ¶ 𑀩𑀳𑀼𑀮𑀻𑀓𑀭𑁄𑀣, 𑀢𑁂𑀧𑀺 𑀯𑁄 𑀅𑀫𑀦𑀼𑀲𑁆𑀲𑀸 𑀢𑀁 𑀪𑁂𑀭𑀯𑀸𑀭𑀫𑁆𑀫𑀡𑀁 𑀦 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀤𑁂𑀯𑀢𑀸𑀬𑁄 𑀘 ‘‘𑀪𑀤𑀦𑁆𑀢𑀸 𑀅𑀫𑁆𑀳𑀸𑀓𑀁 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸’’𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀲𑁂𑀦𑀸𑀲𑀦𑀁 𑀲𑀫𑁆𑀫𑀚𑁆𑀚𑀦𑁆𑀢𑀺, 𑀉𑀡𑁆𑀳𑁄𑀤𑀓𑀁 𑀧𑀝𑀺𑀬𑀸𑀤𑁂𑀦𑁆𑀢𑀺 ¶ , 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀧𑀸𑀤𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀦𑁆𑀢𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀢𑀫𑁂𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀢𑀫𑁂𑀯 𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀩𑁆𑀩𑁂 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀢𑁂𑀫𑀸𑀲𑁂 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀼𑀦𑁆𑀢𑀺.

𑀏𑀯𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁂𑀦 𑀢𑀣𑀸𑀕𑀢𑁂𑀦,

𑀥𑀫𑁆𑀫𑀺𑀲𑁆𑀲𑀭𑁂𑀦 𑀓𑀣𑀺𑀢𑀁 𑀓𑀭𑀡𑀻𑀬𑀫𑀢𑁆𑀣𑀁;

𑀓𑀢𑁆𑀯𑀸𑀦𑀼𑀪𑀼𑀬𑁆𑀬 𑀧𑀭𑀫𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁,

𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀦𑁆𑀢𑀺 𑀲𑀫𑀢𑁆𑀢𑀧𑀜𑁆𑀜𑀸.

𑀢𑀲𑁆𑀫𑀸 𑀳𑀺 𑀢𑀁 𑀅𑀫𑀢𑀫𑀩𑁆𑀪𑀼𑀢𑀫𑀭𑀺𑀬𑀓𑀦𑁆𑀢𑀁,

𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑁄;

𑀯𑀺𑀜𑁆𑀜𑀽 𑀚𑀦𑁄 𑀯𑀺𑀫𑀮𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸-

𑀪𑁂𑀤𑀁 𑀓𑀭𑁂𑀬𑁆𑀬 𑀲𑀢𑀢𑀁 𑀓𑀭𑀡𑀻𑀬𑀫𑀢𑁆𑀣𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞-𑀅𑀝𑁆𑀞𑀓𑀣𑀸𑀬

𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 ¶ 𑀘 𑀬𑀁 𑀯𑀼𑀢𑁆𑀢𑀁 𑁋

‘‘𑀉𑀢𑁆𑀢𑀫𑀁 𑀯𑀦𑁆𑀤𑀦𑁂𑀬𑁆𑀬𑀸𑀦𑀁, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁;

𑀔𑀼𑀤𑁆𑀤𑀓𑀸𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀓𑁂𑀲𑀜𑁆𑀘𑀺 𑀅𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺.

𑀢𑀢𑁆𑀣 𑀲𑀭𑀡𑀲𑀺𑀓𑁆𑀔𑀸𑀧𑀤𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀼𑀫𑀸𑀭𑀧𑀜𑁆𑀳𑀫𑀗𑁆𑀕𑀮𑀲𑀼𑀢𑁆𑀢𑀭𑀢𑀦𑀲𑀼𑀢𑁆𑀢𑀢𑀺𑀭𑁄𑀓𑀼𑀝𑁆𑀝𑀦𑀺𑀥𑀺𑀓𑀡𑁆𑀟𑀫𑁂𑀢𑁆𑀢𑀲𑀼𑀢𑁆𑀢𑀯𑀲𑁂𑀦 𑀦𑀯𑀧𑁆𑀧𑀪𑁂𑀤𑀲𑁆𑀲 𑀔𑀼𑀤𑁆𑀤𑀓𑀧𑀸𑀞𑀲𑁆𑀲 𑀢𑀸𑀯 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸 𑀳𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀇𑀫𑀁 ¶ ¶ 𑀔𑀼𑀤𑁆𑀤𑀓𑀧𑀸𑀞𑀲𑁆𑀲, 𑀓𑀭𑁄𑀦𑁆𑀢𑁂𑀦𑀢𑁆𑀣𑀯𑀡𑁆𑀡𑀦𑀁;

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦, 𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀫𑀬𑀸.

𑀢𑀲𑁆𑀲𑀸𑀦𑀼𑀪𑀸𑀯𑀢𑁄 𑀔𑀺𑀧𑁆𑀧𑀁, 𑀥𑀫𑁆𑀫𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂;

𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁, 𑀧𑀸𑀧𑀼𑀡𑀸𑀢𑀼 𑀅𑀬𑀁 𑀚𑀦𑁄’’𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀕𑀼𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀙𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦𑀙𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸 𑀦𑀸𑀫 𑀔𑀼𑀤𑁆𑀤𑀓𑀧𑀸𑀞𑀯𑀡𑁆𑀡𑀦𑀸 𑁋

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀲𑀻𑀮𑀸𑀤𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀔𑀼𑀤𑁆𑀤𑀓𑀧𑀸𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.