📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀥𑀫𑁆𑀫𑀧𑀤-𑀅𑀝𑁆𑀞𑀓𑀣𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑁧.

𑀫𑀳𑀸𑀫𑁄𑀳𑀢𑀫𑁄𑀦𑀤𑁆𑀥𑁂 ¶ ¶ ¶ , 𑀮𑁄𑀓𑁂 𑀮𑁄𑀓𑀦𑁆𑀢𑀤𑀲𑁆𑀲𑀺𑀦𑀸;

𑀬𑁂𑀦 𑀲𑀤𑁆𑀥𑀫𑁆𑀫𑀧𑀚𑁆𑀚𑁄𑀢𑁄, 𑀚𑀸𑀮𑀺𑀢𑁄 𑀚𑀮𑀺𑀢𑀺𑀤𑁆𑀥𑀺𑀦𑀸.

𑁨.

𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄;

𑀲𑀤𑁆𑀥𑀫𑁆𑀫𑀜𑁆𑀘𑀲𑁆𑀲 𑀧𑀽𑀚𑁂𑀢𑁆𑀯𑀸, 𑀓𑀢𑁆𑀯𑀸 𑀲𑀗𑁆𑀖𑀲𑁆𑀲 𑀘𑀜𑁆𑀚𑀮𑀺𑀁.

𑁩.

𑀢𑀁 𑀢𑀁 𑀓𑀸𑀭𑀡𑀫𑀸𑀕𑀫𑁆𑀫, 𑀥𑀫𑁆𑀫𑀸𑀥𑀫𑁆𑀫𑁂𑀲𑀼 𑀓𑁄𑀯𑀺𑀤𑁄;

𑀲𑀫𑁆𑀧𑀢𑁆𑀢𑀲𑀤𑁆𑀥𑀫𑁆𑀫𑀧𑀤𑁄, 𑀲𑀢𑁆𑀣𑀸 𑀥𑀫𑁆𑀫𑀧𑀤𑀁 𑀲𑀼𑀪𑀁.

𑁪.

𑀤𑁂𑀲𑁂𑀲𑀺 ¶ 𑀓𑀭𑀼𑀡𑀸𑀯𑁂𑀕-𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄;

𑀬𑀁 𑀯𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀧𑀻𑀢𑀺𑀧𑀸𑀫𑁄𑀚𑁆𑀚𑀯𑀟𑁆𑀠𑀦𑀁.

𑁫.

𑀧𑀭𑀫𑁆𑀧𑀭𑀸𑀪𑀢𑀸 𑀢𑀲𑁆𑀲, 𑀦𑀺𑀧𑀼𑀡𑀸 𑀅𑀢𑁆𑀣𑀯𑀡𑁆𑀡𑀦𑀸;

𑀬𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑁆𑀳𑀺, 𑀤𑀻𑀧𑀪𑀸𑀲𑀸𑀬 𑀲𑀡𑁆𑀞𑀺𑀢𑀸.

𑁬.

𑀦 𑀲𑀸𑀥𑀬𑀢𑀺 𑀲𑁂𑀲𑀸𑀦𑀁, 𑀲𑀢𑁆𑀢𑀸𑀦𑀁 𑀳𑀺𑀢𑀲𑀫𑁆𑀧𑀤𑀁;

𑀅𑀧𑁆𑀧𑁂𑀯 𑀦𑀸𑀫 𑀲𑀸𑀥𑁂𑀬𑁆𑀬, 𑀲𑀩𑁆𑀩𑀮𑁄𑀓𑀲𑁆𑀲 𑀲𑀸 𑀳𑀺𑀢𑀁.

𑁭.

𑀇𑀢𑀺 𑀆𑀲𑀻𑀲𑀫𑀸𑀦𑁂𑀦, 𑀤𑀦𑁆𑀢𑁂𑀦 𑀲𑀫𑀘𑀸𑀭𑀺𑀦𑀸;

𑀓𑀼𑀫𑀸𑀭𑀓𑀲𑁆𑀲𑀧𑁂𑀦𑀸𑀳𑀁, 𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸.

𑁮.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦 ¶ , 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑀸𑀘𑀺𑀢𑁄;

𑀢𑀁 𑀪𑀸𑀲𑀁 𑀅𑀢𑀺𑀯𑀺𑀢𑁆𑀣𑀸𑀭-𑀕𑀢𑀜𑁆𑀘 𑀯𑀘𑀦𑀓𑁆𑀓𑀫𑀁.

𑁯.

𑀧𑀳𑀸𑀬𑀸𑀭𑁄𑀧𑀬𑀺𑀢𑁆𑀯𑀸𑀦 ¶ , 𑀢𑀦𑁆𑀢𑀺𑀪𑀸𑀲𑀁 𑀫𑀦𑁄𑀭𑀫𑀁;

𑀕𑀸𑀣𑀸𑀦𑀁 𑀩𑁆𑀬𑀜𑁆𑀚𑀦𑀧𑀤𑀁, 𑀬𑀁 𑀢𑀢𑁆𑀣 𑀦 𑀯𑀺𑀪𑀸𑀯𑀺𑀢𑀁.

𑁧𑁦.

𑀓𑁂𑀯𑀮𑀁 𑀢𑀁 𑀯𑀺𑀪𑀸𑀯𑁂𑀢𑁆𑀯𑀸, 𑀲𑁂𑀲𑀁 𑀢𑀫𑁂𑀯 𑀅𑀢𑁆𑀣𑀢𑁄;

𑀪𑀸𑀲𑀦𑁆𑀢𑀭𑁂𑀦 𑀪𑀸𑀲𑀺𑀲𑁆𑀲𑀁, 𑀆𑀯𑀳𑀦𑁆𑀢𑁄 𑀯𑀺𑀪𑀸𑀯𑀺𑀦𑀁;

𑀫𑀦𑀲𑁄 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀢𑁆𑀣𑀥𑀫𑁆𑀫𑀽𑀧𑀦𑀺𑀲𑁆𑀲𑀺𑀢𑀦𑁆𑀢𑀺.

𑁧. 𑀬𑀫𑀓𑀯𑀕𑁆𑀕𑁄

𑁧. 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀯𑀢𑁆𑀣𑀼

𑁧.

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 ¶ ¶ 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺. 𑁋

𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀓𑀢𑁆𑀣 𑀪𑀸𑀲𑀺𑀢𑀸𑀢𑀺? 𑀲𑀸𑀯𑀢𑁆𑀣𑀺𑀬𑀁. 𑀓𑀁 𑀆𑀭𑀩𑁆𑀪𑀸𑀢𑀺? 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀁.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀫𑀳𑀸𑀲𑀼𑀯𑀡𑁆𑀡𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀅𑀳𑁄𑀲𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀧𑀼𑀢𑁆𑀢𑀓𑁄. 𑀲𑁄 𑀏𑀓𑀤𑀺𑀯𑀲𑀁 𑀦𑁆𑀳𑀸𑀦𑀢𑀺𑀢𑁆𑀣𑀁 𑀦𑁆𑀳𑀢𑁆𑀯𑀸 𑀦𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑁆𑀧𑀦𑁆𑀦𑀧𑀢𑁆𑀢𑀲𑀸𑀔𑀁 𑀏𑀓𑀁 𑀯𑀦𑀧𑁆𑀧𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀳𑁂𑀲𑀓𑁆𑀔𑀸𑀬 𑀤𑁂𑀯𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀲𑁄𑀥𑀸𑀧𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀯𑀦𑀧𑁆𑀧𑀢𑀺𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀓𑀭𑀺𑀢𑁆𑀯𑀸 ‘‘𑀲𑀘𑁂 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀮𑀪𑁂𑀬𑁆𑀬𑀁, 𑀢𑀼𑀫𑁆𑀳𑀸𑀓𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣𑀲𑁆𑀲 𑀦 𑀘𑀺𑀭𑀲𑁆𑀲𑁂𑀯 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 ¶ 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲𑀸 𑀕𑀩𑁆𑀪𑀲𑁆𑀲 𑀧𑀭𑀺𑀳𑀸𑀭𑀫𑀤𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ¶ 𑀲𑁂𑀝𑁆𑀞𑀺 𑀅𑀢𑁆𑀢𑀦𑀸 𑀧𑀸𑀮𑀺𑀢𑀁 𑀯𑀦𑀧𑁆𑀧𑀢𑀺𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀢𑁆𑀢𑀸 𑀢𑀲𑁆𑀲 𑀧𑀸𑀮𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀅𑀜𑁆𑀜𑀫𑁆𑀧𑀺 𑀧𑀼𑀢𑁆𑀢𑀁 𑀮𑀪𑀺. 𑀢𑀲𑁆𑀲 𑀘𑀽𑀴𑀧𑀸𑀮𑁄𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀫𑀳𑀸𑀧𑀸𑀮𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑁂 𑀯𑀬𑀧𑁆𑀧𑀢𑁆𑀢𑁂 𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑀩𑁆𑀩𑀫𑁆𑀧𑀺 𑀯𑀺𑀪𑀯𑀁 𑀇𑀢𑀭𑁂𑀬𑁂𑀯 𑀯𑀺𑀘𑀸𑀭𑀺𑀁𑀲𑀼.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑁆𑀣𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦𑀸𑀕𑀦𑁆𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀫𑀳𑀸𑀲𑁂𑀝𑁆𑀞𑀺𑀦𑀸 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀭𑀺𑀢𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀢𑀺 𑀫𑀳𑀸𑀚𑀦𑀁 𑀲𑀕𑁆𑀕𑀫𑀕𑁆𑀕𑁂 𑀘 𑀫𑁄𑀓𑁆𑀔𑀫𑀕𑁆𑀕𑁂 𑀘 𑀧𑀢𑀺𑀝𑁆𑀞𑀸𑀧𑀬𑀫𑀸𑀦𑁄. 𑀢𑀣𑀸𑀕𑀢𑁄 𑀳𑀺 𑀫𑀸𑀢𑀺𑀧𑀓𑁆𑀔𑀢𑁄 𑀅𑀲𑀻𑀢𑀺𑀬𑀸, 𑀧𑀺𑀢𑀺𑀧𑀓𑁆𑀔𑀢𑁄 ¶ 𑀅𑀲𑀻𑀢𑀺𑀬𑀸𑀢𑀺 𑀤𑁆𑀯𑁂𑀅𑀲𑀻𑀢𑀺𑀜𑀸𑀢𑀺𑀓𑀼𑀮𑀲𑀳𑀲𑁆𑀲𑁂𑀳𑀺 𑀓𑀸𑀭𑀺𑀢𑁂 𑀦𑀺𑀕𑁆𑀭𑁄𑀥𑀫𑀳𑀸𑀯𑀺𑀳𑀸𑀭𑁂 𑀏𑀓𑀫𑁂𑀯 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺, 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀸𑀭𑀺𑀢𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀯𑀺𑀲𑀸𑀔𑀸𑀬 𑀲𑀢𑁆𑀢𑀯𑀻𑀲𑀢𑀺𑀓𑁄𑀝𑀺𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀓𑀸𑀭𑀺𑀢𑁂 𑀧𑀼𑀩𑁆𑀩𑀸𑀭𑀸𑀫𑁂 𑀙𑀩𑁆𑀩𑀲𑁆𑀲𑀸𑀦𑀻𑀢𑀺 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀕𑀼𑀡𑀫𑀳𑀢𑁆𑀢𑀢𑀁 𑀧𑀝𑀺𑀘𑁆𑀘 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 𑀯𑀺𑀲𑀸𑀔𑀸𑀧𑀺 𑀫𑀳𑀸𑀉𑀧𑀸𑀲𑀺𑀓𑀸 𑀦𑀺𑀩𑀤𑁆𑀥𑀁 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀯𑀸𑀭𑁂 𑀢𑀣𑀸𑀕𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀕𑀘𑁆𑀙𑀦𑁆𑀢𑀸 𑀘 ‘‘𑀤𑀳𑀭𑀲𑀸𑀫𑀡𑁂𑀭𑀸 𑀦𑁄 𑀳𑀢𑁆𑀣𑁂 𑀑𑀮𑁄𑀓𑁂𑀲𑁆𑀲𑀦𑁆𑀢𑀻’’𑀢𑀺 𑀢𑀼𑀘𑁆𑀙𑀳𑀢𑁆𑀣𑀸 𑀦 𑀕𑀢𑀧𑀼𑀩𑁆𑀩𑀸. 𑀧𑀼𑀭𑁂𑀪𑀢𑁆𑀢𑀁 𑀕𑀘𑁆𑀙𑀦𑁆𑀢𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀺 ¶ 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀕𑀘𑁆𑀙𑀦𑁆𑀢𑀸 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀅𑀝𑁆𑀞 𑀘 𑀧𑀸𑀦𑀸𑀦𑀺. 𑀦𑀺𑀯𑁂𑀲𑀦𑁂𑀲𑀼 𑀧𑀦 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀦𑀺𑀘𑁆𑀘𑀁 𑀧𑀜𑁆𑀜𑀢𑁆𑀢𑀸𑀲𑀦𑀸𑀦𑁂𑀯 𑀳𑁄𑀦𑁆𑀢𑀺. 𑀅𑀦𑁆𑀦𑀧𑀸𑀦𑀪𑁂𑀲𑀚𑁆𑀚𑁂𑀲𑀼 𑀬𑁄 𑀬𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀬𑀣𑀺𑀘𑁆𑀙𑀺𑀢𑀫𑁂𑀯 𑀲𑀫𑁆𑀧𑀚𑁆𑀚𑀢𑀺. 𑀢𑁂𑀲𑀼 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀏𑀓𑀤𑀺𑀯𑀲𑀫𑁆𑀧𑀺 𑀲𑀢𑁆𑀣𑀸 𑀧𑀜𑁆𑀳𑀁 𑀦 𑀧𑀼𑀘𑁆𑀙𑀺𑀢𑀧𑀼𑀩𑁆𑀩𑁄. 𑀲𑁄 𑀓𑀺𑀭 ‘‘𑀢𑀣𑀸𑀕𑀢𑁄 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑁄 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑁄, ‘𑀩𑀳𑀽𑀧𑀓𑀸𑀭𑁄 𑀫𑁂, 𑀕𑀳𑀧𑀢𑀻’𑀢𑀺 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀓𑀺𑀮𑀫𑁂𑀬𑁆𑀬𑀸’’𑀢𑀺 𑀲𑀢𑁆𑀣𑀭𑀺 𑀅𑀥𑀺𑀫𑀢𑁆𑀢𑀲𑀺𑀦𑁂𑀳𑁂𑀦 𑀧𑀜𑁆𑀳𑀁 𑀦 𑀧𑀼𑀘𑁆𑀙𑀢𑀺. 𑀲𑀢𑁆𑀣𑀸 𑀧𑀦 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀫𑀢𑁆𑀢𑁂𑀬𑁂𑀯 ‘‘𑀅𑀬𑀁 𑀲𑁂𑀝𑁆𑀞𑀺 𑀫𑀁 𑀅𑀭𑀓𑁆𑀔𑀺𑀢𑀩𑁆𑀩𑀝𑁆𑀞𑀸𑀦𑁂 𑀭𑀓𑁆𑀔𑀢𑀺. 𑀅𑀳𑀜𑁆𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀅𑀢𑁆𑀢𑀦𑁄 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀧𑀸𑀡𑀲𑀫𑀁 𑀧𑀼𑀢𑁆𑀢𑀤𑀸𑀭𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀧𑀭𑁂𑀲𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀫𑁂𑀯 𑀧𑀽𑀭𑁂𑀲𑀺𑀁. 𑀏𑀲 𑀫𑀁 𑀅𑀭𑀓𑁆𑀔𑀺𑀢𑀩𑁆𑀩𑀝𑁆𑀞𑀸𑀦𑁂 𑀭𑀓𑁆𑀔𑀢𑀻’’𑀢𑀺 𑀏𑀓𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑀺𑀬𑁂𑀯.

𑀢𑀤𑀸 ¶ 𑀲𑀸𑀯𑀢𑁆𑀣𑀺𑀬𑀁 𑀲𑀢𑁆𑀢 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀯𑀲𑀦𑁆𑀢𑀺. 𑀢𑁂𑀲𑀼 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀜𑁆𑀘𑀓𑁄𑀝𑀺𑀫𑀢𑁆𑀢𑀸 𑀫𑀦𑀼𑀲𑁆𑀲𑀸 𑀅𑀭𑀺𑀬𑀲𑀸𑀯𑀓𑀸 𑀚𑀸𑀢𑀸, 𑀤𑁆𑀯𑁂𑀓𑁄𑀝𑀺𑀫𑀢𑁆𑀢𑀸 𑀫𑀦𑀼𑀲𑁆𑀲𑀸 𑀧𑀼𑀣𑀼𑀚𑁆𑀚𑀦𑀸. 𑀢𑁂𑀲𑀼 𑀅𑀭𑀺𑀬𑀲𑀸𑀯𑀓𑀸𑀦𑀁 𑀤𑁆𑀯𑁂𑀬𑁂𑀯 𑀓𑀺𑀘𑁆𑀘𑀸𑀦𑀺 𑀅𑀳𑁂𑀲𑀼𑀁 𑁋 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑁂𑀦𑁆𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀯𑀢𑁆𑀣𑀪𑁂𑀲𑀚𑁆𑀚𑀧𑀸𑀦𑀓𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀧𑀸𑀮𑁄 𑀅𑀭𑀺𑀬𑀲𑀸𑀯𑀓𑁂 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁂 ¶ 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀳𑀸𑀚𑀦𑁄 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺.

𑀩𑀼𑀤𑁆𑀥𑀸 𑀘 𑀦𑀸𑀫 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀲𑀭𑀡𑀲𑀻𑀮𑀧𑀩𑁆𑀩𑀚𑁆𑀚𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀅𑀚𑁆𑀛𑀸𑀲𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁, 𑀲𑀻𑀮𑀓𑀣𑀁, 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁, 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀧𑀸𑀮𑁄 𑀓𑀼𑀝𑀼𑀫𑁆𑀩𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀁 𑀧𑀼𑀢𑁆𑀢𑀥𑀻𑀢𑀭𑁄 𑀯𑀸 𑀪𑀸𑀢𑀭𑁄 𑀯𑀸 𑀪𑁄𑀕𑀸 𑀯𑀸 𑀦𑀸𑀦𑀼𑀕𑀘𑁆𑀙𑀦𑁆𑀢𑀺, 𑀲𑀭𑀻𑀭𑀫𑁆𑀧𑀺 𑀅𑀢𑁆𑀢𑀦𑀸 ¶ 𑀲𑀤𑁆𑀥𑀺𑀁 𑀦 𑀕𑀘𑁆𑀙𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀲𑀢𑁆𑀣𑀸 𑁋 ‘‘𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀬𑀼𑀢𑁆𑀢𑀓𑁄 𑀜𑀸𑀢𑀻’’𑀢𑀺 𑀆𑀳. ‘‘𑀓𑀦𑀺𑀝𑁆𑀞𑀪𑀸𑀢𑀸 𑀫𑁂 𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀢𑀁 𑀆𑀧𑀼𑀘𑁆𑀙𑀸𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀓𑀦𑀺𑀝𑁆𑀞𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀢𑀸𑀢, 𑀬𑀁 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀅𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀥𑀦𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀲𑀩𑁆𑀩𑀁 𑀢𑀁 𑀢𑀯 𑀪𑀸𑀭𑁄, 𑀧𑀝𑀺𑀧𑀚𑁆𑀚𑀸𑀳𑀺 𑀦’’𑀦𑁆𑀢𑀺. ‘‘𑀢𑀼𑀫𑁆𑀳𑁂 𑀧𑀦 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀆𑀳. ‘‘𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀓𑀣𑁂𑀲𑀺 𑀪𑀸𑀢𑀺𑀓, 𑀢𑁆𑀯𑀁 𑀫𑁂 𑀫𑀸𑀢𑀭𑀺 𑀫𑀢𑀸𑀬 𑀫𑀸𑀢𑀸 𑀯𑀺𑀬, 𑀧𑀺𑀢𑀭𑀺 𑀫𑀢𑁂 𑀧𑀺𑀢𑀸 𑀯𑀺𑀬 𑀮𑀤𑁆𑀥𑁄, 𑀕𑁂𑀳𑁂 𑀢𑁂 𑀫𑀳𑀸𑀯𑀺𑀪𑀯𑁄, 𑀲𑀓𑁆𑀓𑀸 𑀕𑁂𑀳𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀳𑁂𑀯 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁 ¶ , 𑀫𑀸 𑀏𑀯𑀁 𑀓𑀭𑀺𑀢𑁆𑀣𑀸’’𑀢𑀺. ‘‘𑀢𑀸𑀢, 𑀅𑀳𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀖𑀭𑀸𑀯𑀸𑀲𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀲𑀢𑁆𑀣𑀸𑀭𑀸 𑀳𑀺 𑀅𑀢𑀺𑀲𑀡𑁆𑀳𑀲𑀼𑀔𑀼𑀫𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦 𑀲𑀓𑁆𑀓𑀸 𑀲𑁄 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀧𑀽𑀭𑁂𑀢𑀼𑀁 ¶ , 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀪𑀸𑀢𑀺𑀓, 𑀢𑀭𑀼𑀡𑀸𑀬𑁂𑀯 𑀢𑀸𑀯𑀢𑁆𑀣, 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀲𑁆𑀲𑀣𑀸’’𑀢𑀺. ‘‘𑀢𑀸𑀢, 𑀫𑀳𑀮𑁆𑀮𑀓𑀲𑁆𑀲 𑀳𑀺 𑀅𑀢𑁆𑀢𑀦𑁄 𑀳𑀢𑁆𑀣𑀧𑀸𑀤𑀸𑀧𑀺 𑀅𑀦𑀲𑁆𑀲𑀯𑀸 𑀳𑁄𑀦𑁆𑀢𑀺, 𑀦 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀜𑀸𑀢𑀓𑀸, 𑀲𑁆𑀯𑀸𑀳𑀁 𑀢𑀯 𑀓𑀣𑀁 𑀦 𑀓𑀭𑁄𑀫𑀺, 𑀲𑀫𑀡𑀧𑀝𑀺𑀧𑀢𑁆𑀢𑀺𑀁𑀬𑁂𑀯 𑀧𑀽𑀭𑁂𑀲𑁆𑀲𑀸𑀫𑀺’’.

‘‘𑀚𑀭𑀸𑀚𑀚𑁆𑀚𑀭𑀺𑀢𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀧𑀸𑀤𑀸 𑀅𑀦𑀲𑁆𑀲𑀯𑀸;

𑀬𑀲𑁆𑀲 𑀲𑁄 𑀯𑀺𑀳𑀢𑀢𑁆𑀣𑀸𑀫𑁄, 𑀓𑀣𑀁 𑀥𑀫𑁆𑀫𑀁 𑀘𑀭𑀺𑀲𑁆𑀲𑀢𑀺’’. 𑁋

𑀧𑀩𑁆𑀩𑀚𑀺𑀲𑁆𑀲𑀸𑀫𑁂𑀯𑀸𑀳𑀁, 𑀢𑀸𑀢𑀸𑀢𑀺 𑀢𑀲𑁆𑀲 𑀯𑀺𑀭𑀯𑀦𑁆𑀢𑀲𑁆𑀲𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀸𑀭𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀢𑀺 𑀥𑀼𑀭𑀸𑀦𑀻’’𑀢𑀺? ‘‘𑀕𑀦𑁆𑀣𑀥𑀼𑀭𑀁, 𑀯𑀺𑀧𑀲𑁆𑀲𑀦𑀸𑀥𑀼𑀭𑀦𑁆𑀢𑀺 𑀤𑁆𑀯𑁂𑀬𑁂𑀯 𑀥𑀼𑀭𑀸𑀦𑀺 𑀪𑀺𑀓𑁆𑀔𑀽’’𑀢𑀺. ‘‘𑀓𑀢𑀫𑀁 𑀧𑀦, 𑀪𑀦𑁆𑀢𑁂, 𑀕𑀦𑁆𑀣𑀥𑀼𑀭𑀁, 𑀓𑀢𑀫𑀁 𑀯𑀺𑀧𑀲𑁆𑀲𑀦𑀸𑀥𑀼𑀭’’𑀦𑁆𑀢𑀺? ‘‘𑀅𑀢𑁆𑀢𑀦𑁄 𑀧𑀜𑁆𑀜𑀸𑀦𑀼𑀭𑀽𑀧𑁂𑀦 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀦𑀺𑀓𑀸𑀬𑁂 𑀲𑀓𑀮𑀁 𑀯𑀸 𑀧𑀦 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲 𑀥𑀸𑀭𑀡𑀁, 𑀓𑀣𑀦𑀁, 𑀯𑀸𑀘𑀦𑀦𑁆𑀢𑀺 ¶ 𑀇𑀤𑀁 𑀕𑀦𑁆𑀣𑀥𑀼𑀭𑀁 𑀦𑀸𑀫, 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀦𑁄 𑀧𑀦 𑀧𑀦𑁆𑀢𑀲𑁂𑀦𑀸𑀲𑀦𑀸𑀪𑀺𑀭𑀢𑀲𑁆𑀲 𑀅𑀢𑁆𑀢𑀪𑀸𑀯𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀸𑀢𑀘𑁆𑀘𑀓𑀺𑀭𑀺𑀬𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀕𑁆𑀕𑀳𑀡𑀦𑁆𑀢𑀺 𑀇𑀤𑀁 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀦𑀸𑀫𑀸’’𑀢𑀺. ‘‘𑀪𑀦𑁆𑀢𑁂, 𑀅𑀳𑀁 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁄 𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀦 𑀧𑀽𑀭𑁂𑀲𑁆𑀲𑀸𑀫𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀫𑁂 𑀓𑀣𑁂𑀣𑀸’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀬𑀸𑀯 𑀅𑀭𑀳𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺.

𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳𑀕𑀸𑀫𑀺𑀦𑁄 𑀪𑀺𑀓𑁆𑀔𑀽 𑀧𑀭𑀺𑀬𑁂𑀲𑀦𑁆𑀢𑁄 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀮𑀪𑀺𑀢𑁆𑀯𑀸 𑀢𑁂𑀳𑀺 ¶ 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀳𑀦𑁆𑀢𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀢𑁆𑀯𑀸 𑀢𑀢𑁆𑀣 𑀲𑀧𑀭𑀺𑀯𑀸𑀭𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸𑀯 𑀧𑀲𑀦𑁆𑀦𑀘𑀺𑀢𑁆𑀢𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀼𑀳𑀺𑀁 𑀅𑀬𑁆𑀬𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁 𑀉𑀧𑀸𑀲𑀓𑀸’’𑀢𑀺 𑀯𑀼𑀢𑁆𑀢𑁂 𑀧𑀡𑁆𑀟𑀺𑀢𑀸 𑀫𑀦𑀼𑀲𑁆𑀲𑀸 ‘‘𑀯𑀲𑁆𑀲𑀸𑀯𑀸𑀲𑀁 𑀲𑁂𑀦𑀸𑀲𑀦𑀁 𑀧𑀭𑀺𑀬𑁂𑀲𑀦𑁆𑀢𑀺 𑀪𑀤𑀦𑁆𑀢𑀸’’𑀢𑀺 𑀜𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀘𑁂 𑀅𑀬𑁆𑀬𑀸 𑀇𑀫𑀁 𑀢𑁂𑀫𑀸𑀲𑀁 𑀇𑀥 𑀯𑀲𑁂𑀬𑁆𑀬𑀼𑀁, 𑀫𑀬𑀁 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀻𑀮𑀸𑀦𑀺 𑀕𑀡𑁆𑀳𑁂𑀬𑁆𑀬𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑁂𑀧𑀺 ‘‘𑀫𑀬𑀁 𑀇𑀫𑀸𑀦𑀺 𑀓𑀼𑀮𑀸𑀦𑀺 𑀦𑀺𑀲𑁆𑀲𑀸𑀬 𑀪𑀯𑀦𑀺𑀲𑁆𑀲𑀭𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀅𑀥𑀺𑀯𑀸𑀲𑁂𑀲𑀼𑀁.

𑀫𑀦𑀼𑀲𑁆𑀲𑀸 ¶ 𑀢𑁂𑀲𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀤𑀁𑀲𑀼. 𑀢𑁂 𑀦𑀺𑀩𑀤𑁆𑀥𑀁 𑀢𑀫𑁂𑀯 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀺. 𑀅𑀣 𑀦𑁂 𑀏𑀓𑁄 𑀯𑁂𑀚𑁆𑀚𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀩𑀳𑀽𑀦𑀁 𑀯𑀲𑀦𑀝𑁆𑀞𑀸𑀦𑁂 𑀅𑀨𑀸𑀲𑀼𑀓𑀫𑁆𑀧𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀣, 𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀸𑀭𑁂𑀲𑀺. 𑀣𑁂𑀭𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺, ‘‘𑀆𑀯𑀼𑀲𑁄 ¶ , 𑀇𑀫𑀁 𑀢𑁂𑀫𑀸𑀲𑀁 𑀓𑀢𑀺𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀯𑀻𑀢𑀺𑀦𑀸𑀫𑁂𑀲𑁆𑀲𑀣𑀸’’𑀢𑀺? ‘‘𑀘𑀢𑀽𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦𑁂𑀢𑀁, 𑀆𑀯𑀼𑀲𑁄, 𑀧𑀢𑀺𑀭𑀽𑀧𑀁, 𑀦𑀦𑀼 𑀅𑀧𑁆𑀧𑀫𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁’’? ‘‘𑀫𑀬𑀜𑁆𑀳𑀺 𑀥𑀭𑀫𑀸𑀦𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸, 𑀩𑀼𑀤𑁆𑀥𑀸 𑀘 𑀦𑀸𑀫 𑀦 𑀲𑀓𑁆𑀓𑀸 𑀧𑀫𑀸𑀤𑁂𑀦 𑀆𑀭𑀸𑀥𑁂𑀢𑀼𑀁, 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑁂𑀦 𑀢𑁂 𑀯𑁄 𑀆𑀭𑀸𑀥𑁂𑀢𑀩𑁆𑀩𑀸. 𑀧𑀫𑀢𑁆𑀢𑀲𑁆𑀲 𑀘 𑀦𑀸𑀫 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀲𑀓𑀕𑁂𑀳𑀲𑀤𑀺𑀲𑀸, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂’’𑀢𑀺? ‘‘𑀅𑀳𑀁 𑀢𑀻𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀺, 𑀧𑀺𑀝𑁆𑀞𑀺𑀁 𑀦 𑀧𑀲𑀸𑀭𑁂𑀲𑁆𑀲𑀸𑀫𑀺, 𑀆𑀯𑀼𑀲𑁄’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺.

𑀅𑀣 𑀣𑁂𑀭𑀲𑁆𑀲 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀦𑁆𑀢𑀲𑁆𑀲 𑀧𑀞𑀫𑀫𑀸𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀺𑀫𑀫𑀸𑀲𑁂 𑀲𑀫𑁆𑀧𑀢𑁆𑀢𑁂 𑀅𑀓𑁆𑀔𑀺𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀙𑀺𑀤𑁆𑀤𑀖𑀝𑀢𑁄 𑀉𑀤𑀓𑀥𑀸𑀭𑀸 𑀯𑀺𑀬 𑀅𑀓𑁆𑀔𑀻𑀳𑀺 𑀅𑀲𑁆𑀲𑀼𑀥𑀸𑀭𑀸 𑀧𑀕𑁆𑀖𑀭𑀦𑁆𑀢𑀺. 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. ‘‘𑀢𑁂𑀦 𑀳𑀺, 𑀆𑀯𑀼𑀲𑁄, 𑀕𑀡𑁆𑀳𑀣 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺. 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀅𑀓𑁆𑀔𑀻𑀳𑀺 𑀅𑀲𑁆𑀲𑀽𑀦𑀺 𑀧𑀕𑁆𑀖𑀭𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀓𑀺𑀫𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀅𑀓𑁆𑀔𑀻𑀦𑀺 𑀫𑁂, 𑀆𑀯𑀼𑀲𑁄, 𑀯𑀸𑀢𑀸 𑀯𑀺𑀚𑁆𑀛𑀦𑁆𑀢𑀻’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀯𑁂𑀚𑁆𑀚𑁂𑀦 𑀧𑀯𑀸𑀭𑀺𑀢𑀫𑁆𑀳𑀸, 𑀢𑀲𑁆𑀲 𑀓𑀣𑁂𑀫𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 ¶ 𑀢𑁂 𑀯𑁂𑀚𑁆𑀚𑀲𑁆𑀲 𑀓𑀣𑀬𑀺𑀁𑀲𑀼. 𑀲𑁄 𑀢𑁂𑀮𑀁 𑀧𑀘𑀺𑀢𑁆𑀯𑀸 𑀧𑁂𑀲𑁂𑀲𑀺. 𑀣𑁂𑀭𑁄 𑀦𑀸𑀲𑀸𑀬 𑀢𑁂𑀮𑀁 𑀆𑀲𑀺𑀜𑁆𑀘𑀦𑁆𑀢𑁄 𑀦𑀺𑀲𑀺𑀦𑁆𑀦𑀓𑁄𑀯 𑀆𑀲𑀺𑀜𑁆𑀘𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑀁 𑀧𑀸𑀯𑀺𑀲𑀺. 𑀯𑁂𑀚𑁆𑀚𑁄 𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀓𑀺𑀭 𑀅𑀓𑁆𑀔𑀻𑀦𑀺 𑀯𑀸𑀢𑁄 𑀯𑀺𑀚𑁆𑀛𑀢𑀻’’𑀢𑀺? ‘‘𑀆𑀫, 𑀉𑀧𑀸𑀲𑀓𑀸’’𑀢𑀺. ‘‘𑀪𑀦𑁆𑀢𑁂, 𑀫𑀬𑀸 𑀢𑁂𑀮𑀁 𑀧𑀘𑀺𑀢𑁆𑀯𑀸 𑀧𑁂𑀲𑀺𑀢𑀁, 𑀦𑀸𑀲𑀸𑀬 𑀯𑁄 𑀢𑁂𑀮𑀁 𑀆𑀲𑀺𑀢𑁆𑀢’’𑀦𑁆𑀢𑀺? ‘‘𑀆𑀫, 𑀉𑀧𑀸𑀲𑀓𑀸’’𑀢𑀺. ‘‘𑀇𑀤𑀸𑀦𑀺 ¶ 𑀓𑀻𑀤𑀺𑀲’’𑀦𑁆𑀢𑀺? ‘‘𑀭𑀼𑀚𑁆𑀚𑀢𑁂𑀯 𑀉𑀧𑀸𑀲𑀓𑀸’’𑀢𑀺. 𑀯𑁂𑀚𑁆𑀚𑁄 ‘‘𑀫𑀬𑀸 𑀏𑀓𑀯𑀸𑀭𑁂𑀦𑁂𑀯 𑀯𑀽𑀧𑀲𑀫𑀦𑀲𑀫𑀢𑁆𑀣𑀁 𑀢𑁂𑀮𑀁 𑀧𑀳𑀺𑀢𑀁, 𑀓𑀺𑀁 𑀦𑀼 𑀔𑁄 𑀭𑁄𑀕𑁄 𑀦 𑀯𑀽𑀧𑀲𑀦𑁆𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀺𑀲𑀻𑀤𑀺𑀢𑁆𑀯𑀸 𑀯𑁄 𑀢𑁂𑀮𑀁 𑀆𑀲𑀺𑀢𑁆𑀢𑀁, 𑀦𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺, 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺 𑀦 𑀓𑀣𑁂𑀲𑀺. 𑀲𑁄 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 ¶ 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺 𑀣𑁂𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀘𑀗𑁆𑀓𑀫𑀦𑀦𑀺𑀲𑀻𑀤𑀦𑀝𑁆𑀞𑀸𑀦𑀫𑁂𑀯 𑀤𑀺𑀲𑁆𑀯𑀸 𑀲𑀬𑀦𑀝𑁆𑀞𑀸𑀦𑀁 𑀅𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀦𑀺𑀲𑀺𑀦𑁆𑀦𑁂𑀳𑀺 𑀯𑁄 𑀆𑀲𑀺𑀢𑁆𑀢𑀁, 𑀦𑀺𑀧𑀦𑁆𑀦𑁂𑀳𑀻’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. ‘‘𑀫𑀸, 𑀪𑀦𑁆𑀢𑁂, 𑀏𑀯𑀁 𑀓𑀭𑀺𑀢𑁆𑀣, 𑀲𑀫𑀡𑀥𑀫𑁆𑀫𑁄 𑀦𑀸𑀫 𑀲𑀭𑀻𑀭𑀁 𑀬𑀸𑀧𑁂𑀦𑁆𑀢𑁂𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀦𑀺𑀧𑀚𑁆𑀚𑀺𑀢𑁆𑀯𑀸 𑀆𑀲𑀺𑀜𑁆𑀘𑀣𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. ‘‘𑀕𑀘𑁆𑀙 𑀢𑁆𑀯𑀁 𑀢𑀸𑀯𑀸𑀯𑀼𑀲𑁄, 𑀫𑀦𑁆𑀢𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀚𑁆𑀚𑀁 𑀉𑀬𑁆𑀬𑁄𑀚𑁂𑀲𑀺. 𑀣𑁂𑀭𑀲𑁆𑀲 𑀘 𑀢𑀢𑁆𑀣 𑀦𑁂𑀯 𑀜𑀸𑀢𑀻, 𑀦 𑀲𑀸𑀮𑁄𑀳𑀺𑀢𑀸 𑀅𑀢𑁆𑀣𑀺, 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀬𑁆𑀬? 𑀓𑀭𑀚𑀓𑀸𑀬𑁂𑀦 𑀧𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 ¶ ‘‘𑀯𑀤𑁂𑀳𑀺 𑀢𑀸𑀯, 𑀆𑀯𑀼𑀲𑁄 𑀧𑀸𑀮𑀺𑀢, 𑀢𑁆𑀯𑀁 𑀓𑀺𑀁 𑀅𑀓𑁆𑀔𑀻𑀦𑀺 𑀑𑀮𑁄𑀓𑁂𑀲𑁆𑀲𑀲𑀺, 𑀉𑀤𑀸𑀳𑀼 𑀩𑀼𑀤𑁆𑀥𑀲𑀸𑀲𑀦𑀁? 𑀅𑀦𑀫𑀢𑀕𑁆𑀕𑀲𑁆𑀫𑀺𑀜𑁆𑀳𑀺 𑀲𑀁𑀲𑀸𑀭𑀯𑀝𑁆𑀝𑁂 𑀢𑀯 𑀅𑀓𑁆𑀔𑀺𑀓𑀸𑀡𑀲𑁆𑀲 𑀕𑀡𑀦𑀸 𑀦𑀸𑀫 𑀦𑀢𑁆𑀣𑀺, 𑀅𑀦𑁂𑀓𑀸𑀦𑀺 𑀧𑀦 𑀩𑀼𑀤𑁆𑀥𑀲𑀢𑀸𑀦𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀅𑀢𑀻𑀢𑀸𑀦𑀺. 𑀢𑁂𑀲𑀼 𑀢𑁂 𑀏𑀓𑀩𑀼𑀤𑁆𑀥𑁄𑀧𑀺 𑀦 𑀧𑀭𑀺𑀘𑀺𑀡𑁆𑀡𑁄, 𑀇𑀤𑀸𑀦𑀺 𑀇𑀫𑀁 𑀅𑀦𑁆𑀢𑁄𑀯𑀲𑁆𑀲𑀁 𑀢𑀬𑁄 𑀫𑀸𑀲𑁂 𑀦 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀢𑁂𑀫𑀸𑀲𑀁 𑀦𑀺𑀩𑀤𑁆𑀥𑀯𑀻𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺. 𑀢𑀲𑁆𑀫𑀸 𑀢𑁂 𑀘𑀓𑁆𑀔𑀽𑀦𑀺 𑀦𑀲𑁆𑀲𑀦𑁆𑀢𑀼 𑀯𑀸 𑀪𑀺𑀚𑁆𑀚𑀦𑁆𑀢𑀼 𑀯𑀸, 𑀩𑀼𑀤𑁆𑀥𑀲𑀸𑀲𑀦𑀫𑁂𑀯 𑀥𑀸𑀭𑁂𑀳𑀺, 𑀫𑀸 𑀘𑀓𑁆𑀔𑀽𑀦𑀻’’𑀢𑀺 𑀪𑀽𑀢𑀓𑀸𑀬𑀁 𑀑𑀯𑀤𑀦𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀘𑀓𑁆𑀔𑀽𑀦𑀺 𑀳𑀸𑀬𑀦𑁆𑀢𑀼 𑀫𑀫𑀸𑀬𑀺𑀢𑀸𑀦𑀺,

𑀲𑁄𑀢𑀸𑀦𑀺 𑀳𑀸𑀬𑀦𑁆𑀢𑀼 𑀢𑀣𑁂𑀯 𑀓𑀸𑀬𑁄;

𑀲𑀩𑁆𑀩𑀫𑁆𑀧𑀺𑀤𑀁 𑀳𑀸𑀬𑀢𑀼 𑀤𑁂𑀳𑀦𑀺𑀲𑁆𑀲𑀺𑀢𑀁,

𑀓𑀺𑀁 𑀓𑀸𑀭𑀡𑀸 𑀧𑀸𑀮𑀺𑀢 𑀢𑁆𑀯𑀁 𑀧𑀫𑀚𑁆𑀚𑀲𑀺.

‘‘𑀘𑀓𑁆𑀔𑀽𑀦𑀺 𑀚𑀻𑀭𑀦𑁆𑀢𑀼 𑀫𑀫𑀸𑀬𑀺𑀢𑀸𑀦𑀺,

𑀲𑁄𑀢𑀸𑀦𑀺 𑀚𑀻𑀭𑀦𑁆𑀢𑀼 𑀢𑀣𑁂𑀯 𑀓𑀸𑀬𑁄;

𑀲𑀩𑁆𑀩𑀫𑁆𑀧𑀺𑀤𑀁 𑀚𑀻𑀭𑀢𑀼 𑀤𑁂𑀳𑀦𑀺𑀲𑁆𑀲𑀺𑀢𑀁,

𑀓𑀺𑀁 𑀓𑀸𑀭𑀡𑀸 𑀧𑀸𑀮𑀺𑀢 𑀢𑁆𑀯𑀁 𑀧𑀫𑀚𑁆𑀚𑀲𑀺.

‘‘𑀘𑀓𑁆𑀔𑀽𑀦𑀺 𑀪𑀺𑀚𑁆𑀚𑀦𑁆𑀢𑀼 𑀫𑀫𑀸𑀬𑀺𑀢𑀸𑀦𑀺,

𑀲𑁄𑀢𑀸𑀦𑀺 𑀪𑀺𑀚𑁆𑀚𑀦𑁆𑀢𑀼 𑀢𑀣𑁂𑀯 𑀓𑀸𑀬𑁄;

𑀲𑀩𑁆𑀩𑀫𑁆𑀧𑀺𑀤𑀁 ¶ 𑀪𑀺𑀚𑁆𑀚𑀢𑀼 𑀤𑁂𑀳𑀦𑀺𑀲𑁆𑀲𑀺𑀢𑀁,

𑀓𑀺𑀁 𑀓𑀸𑀭𑀡𑀸 𑀧𑀸𑀮𑀺𑀢 𑀢𑁆𑀯𑀁 𑀧𑀫𑀚𑁆𑀚𑀲𑀻’’𑀢𑀺.

𑀏𑀯𑀁 ¶ ¶ 𑀢𑀻𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑁄𑀯 𑀦𑀢𑁆𑀣𑀼𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀯𑁂𑀚𑁆𑀚𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀦𑀢𑁆𑀣𑀼𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀉𑀧𑀸𑀲𑀓𑀸’’𑀢𑀺. ‘‘𑀓𑀻𑀤𑀺𑀲𑀁, 𑀪𑀦𑁆𑀢𑁂’’𑀢𑀺? ‘‘𑀭𑀼𑀚𑁆𑀚𑀢𑁂𑀯 𑀉𑀧𑀸𑀲𑀓𑀸’’𑀢𑀺. ‘‘𑀦𑀺𑀲𑀻𑀤𑀺𑀢𑁆𑀯𑀸 𑀯𑁄, 𑀪𑀦𑁆𑀢𑁂, 𑀦𑀢𑁆𑀣𑀼𑀓𑀫𑁆𑀫𑀁 𑀓𑀢𑀁, 𑀦𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺. 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺, 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺. 𑀅𑀣 𑀦𑀁 𑀯𑁂𑀚𑁆𑀚𑁄, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀧𑁆𑀧𑀸𑀬𑀁 𑀦 𑀓𑀭𑁄𑀣, 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 ‘𑀅𑀲𑀼𑀓𑁂𑀦 𑀫𑁂 𑀢𑁂𑀮𑀁 𑀧𑀓𑁆𑀓’𑀦𑁆𑀢𑀺 𑀫𑀸 𑀯𑀤𑀺𑀢𑁆𑀣, 𑀅𑀳𑀫𑁆𑀧𑀺 ‘𑀫𑀬𑀸 𑀯𑁄 𑀢𑁂𑀮𑀁 𑀧𑀓𑁆𑀓’𑀦𑁆𑀢𑀺 𑀦 𑀯𑀓𑁆𑀔𑀸𑀫𑀻’’𑀢𑀺 𑀆𑀳. 𑀲𑁄 𑀯𑁂𑀚𑁆𑀚𑁂𑀦 𑀧𑀘𑁆𑀘𑀓𑁆𑀔𑀸𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑁆𑀯𑀁 𑀯𑁂𑀚𑁆𑀚𑁂𑀦𑀸𑀧𑀺 𑀧𑀘𑁆𑀘𑀓𑁆𑀔𑀸𑀢𑁄𑀲𑀺, 𑀇𑀭𑀺𑀬𑀸𑀧𑀣𑀁 𑀫𑀸 𑀯𑀺𑀲𑁆𑀲𑀚𑁆𑀚𑀺 𑀲𑀫𑀡𑀸𑀢𑀺.

‘‘𑀧𑀝𑀺𑀓𑁆𑀔𑀺𑀢𑁆𑀢𑁄 𑀢𑀺𑀓𑀺𑀘𑁆𑀙𑀸𑀬, 𑀯𑁂𑀚𑁆𑀚𑁂𑀦𑀸𑀧𑀺 𑀯𑀺𑀯𑀚𑁆𑀚𑀺𑀢𑁄;

𑀦𑀺𑀬𑀢𑁄 𑀫𑀘𑁆𑀘𑀼𑀭𑀸𑀚𑀲𑁆𑀲, 𑀓𑀺𑀁 𑀧𑀸𑀮𑀺𑀢 𑀧𑀫𑀚𑁆𑀚𑀲𑀻’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀅𑀣𑀲𑁆𑀲 𑀫𑀚𑁆𑀛𑀺𑀫𑀬𑀸𑀫𑁂 𑀅𑀢𑀺𑀓𑁆𑀓𑀦𑁆𑀢𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀅𑀓𑁆𑀔𑀻𑀦𑀺 𑀘𑁂𑀯 𑀓𑀺𑀮𑁂𑀲𑀸 𑀘 𑀪𑀺𑀚𑁆𑀚𑀺𑀁𑀲𑀼. 𑀲𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀆𑀕𑀦𑁆𑀢𑁆𑀯𑀸 ‘‘𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁄, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. ‘‘𑀓𑀸𑀮𑁄, 𑀆𑀯𑀼𑀲𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀣𑀸’’𑀢𑀺. ‘‘𑀓𑀺𑀁 𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂’’𑀢𑀺? ‘‘𑀅𑀓𑁆𑀔𑀻𑀦𑀺 𑀫𑁂, 𑀆𑀯𑀼𑀲𑁄, 𑀧𑀭𑀺𑀳𑀻𑀦𑀸𑀦𑀻’’𑀢𑀺. 𑀢𑁂 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑀦𑁂𑀢𑁆𑀢𑀸 𑀳𑀼𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀬𑀁 ¶ 𑀯𑁄 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀅𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀬𑀸𑀕𑀼𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀧𑀺𑀡𑁆𑀟𑀧𑀸𑀢𑀫𑀸𑀤𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑀫𑀸𑀦𑀸 𑀭𑁄𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀁 𑀯𑁄 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀢𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀬𑀸𑀕𑀼𑀪𑀢𑁆𑀢𑀁 𑀯𑀺𑀳𑀸𑀭𑀫𑁂𑀯 𑀧𑁂𑀲𑁂𑀦𑁆𑀢𑀺. 𑀣𑁂𑀭𑁄𑀧𑀺 𑀇𑀢𑀭𑁂 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀦𑀺𑀭𑀦𑁆𑀢𑀭𑀁 𑀑𑀯𑀤𑀢𑀺. 𑀢𑁂 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀉𑀧𑀓𑀝𑁆𑀞𑀸𑀬 𑀧𑀯𑀸𑀭𑀡𑀸𑀬 𑀲𑀩𑁆𑀩𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼 ¶ . 𑀢𑁂 𑀯𑀼𑀝𑁆𑀞𑀯𑀲𑁆𑀲𑀸 𑀘 𑀧𑀦 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀸 𑀳𑀼𑀢𑁆𑀯𑀸 𑀣𑁂𑀭𑀫𑀸𑀳𑀁𑀲𑀼, ‘‘𑀪𑀦𑁆𑀢𑁂, 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸’’𑀢𑀺 ¶ . 𑀣𑁂𑀭𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀤𑀼𑀩𑁆𑀩𑀮𑁄, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸 𑀅𑀝𑀯𑀻 𑀅𑀢𑁆𑀣𑀺, 𑀫𑀬𑀺 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁂 𑀲𑀩𑁆𑀩𑁂 𑀓𑀺𑀮𑀫𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀫𑁆𑀧𑀺 𑀮𑀪𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀇𑀫𑁂 𑀧𑀼𑀭𑁂𑀢𑀭𑀫𑁂𑀯 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑁂 𑀆𑀳 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀘𑁆𑀙𑀣𑀸’’𑀢𑀺. ‘‘𑀢𑀼𑀫𑁆𑀳𑁂 𑀧𑀦 𑀪𑀦𑁆𑀢𑁂’’𑀢𑀺? ‘‘𑀅𑀳𑀁 𑀤𑀼𑀩𑁆𑀩𑀮𑁄, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸 𑀅𑀝𑀯𑀻 𑀅𑀢𑁆𑀣𑀺, 𑀫𑀬𑀺 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁂 𑀲𑀩𑁆𑀩𑁂 𑀓𑀺𑀮𑀫𑀺𑀲𑁆𑀲𑀣, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀘𑁆𑀙𑀣𑀸’’𑀢𑀺. ‘‘𑀫𑀸, 𑀪𑀦𑁆𑀢𑁂, 𑀏𑀯𑀁 𑀓𑀭𑀺𑀢𑁆𑀣, 𑀫𑀬𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀫𑀸 𑀯𑁄, 𑀆𑀯𑀼𑀲𑁄, 𑀏𑀯𑀁 𑀭𑀼𑀘𑁆𑀘𑀺𑀢𑁆𑀣, 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀅𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀓𑀦𑀺𑀝𑁆𑀞𑁄 𑀧𑀦 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀫𑀫 𑀘𑀓𑁆𑀔𑀽𑀦𑀁 ¶ 𑀧𑀭𑀺𑀳𑀻𑀦𑀪𑀸𑀯𑀁 𑀆𑀭𑁄𑀘𑁂𑀬𑁆𑀬𑀸𑀣, 𑀲𑁄 𑀫𑀬𑁆𑀳𑀁 𑀲𑀦𑁆𑀢𑀺𑀓𑀁 𑀓𑀜𑁆𑀘𑀺𑀤𑁂𑀯 𑀧𑀳𑀺𑀡𑀺𑀲𑁆𑀲𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀫 𑀯𑀘𑀦𑁂𑀦 𑀤𑀲𑀩𑀮𑀜𑁆𑀘 𑀅𑀲𑀻𑀢𑀺𑀫𑀳𑀸𑀣𑁂𑀭𑁂 𑀘 𑀯𑀦𑁆𑀤𑀣𑀸’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀲𑀺.

𑀢𑁂 𑀣𑁂𑀭𑀁 𑀔𑀫𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑁂 𑀤𑀺𑀲𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀅𑀬𑁆𑀬𑀸𑀦𑀁 𑀕𑀫𑀦𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀻’’𑀢𑀺? ‘‘𑀆𑀫, 𑀉𑀧𑀸𑀲𑀓𑀸, 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸’’𑀢𑀺. 𑀢𑁂 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸 𑀢𑁂𑀲𑀁 𑀕𑀫𑀦𑀙𑀦𑁆𑀤𑀫𑁂𑀯 𑀜𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑁂𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘 𑀅𑀲𑀻𑀢𑀺𑀫𑀳𑀸𑀣𑁂𑀭𑁂 𑀘 𑀣𑁂𑀭𑀲𑁆𑀲 𑀯𑀘𑀦𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀬𑀢𑁆𑀣 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑁄 𑀯𑀲𑀢𑀺, 𑀢𑀁 𑀯𑀻𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀓𑀼𑀝𑀼𑀫𑁆𑀩𑀺𑀓𑁄 𑀢𑁂 𑀲𑀜𑁆𑀚𑀸𑀦𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀪𑀸𑀢𑀺𑀓𑀢𑁆𑀣𑁂𑀭𑁄 𑀫𑁂, 𑀪𑀦𑁆𑀢𑁂, 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑁄 𑀢𑀁 𑀲𑀼𑀢𑁆𑀯𑀸𑀯 𑀢𑁂𑀲𑀁 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀭𑁄𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀣𑁂𑀭𑁄 𑀇𑀢𑁄 𑀓𑀲𑁆𑀲𑀘𑀺 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀢𑀲𑁆𑀲 𑀕𑀢𑀓𑀸𑀮𑁂 𑀢𑁂𑀦 𑀲𑀤𑁆𑀥𑀺𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺. ‘‘𑀅𑀬𑀁 𑀫𑁂, 𑀪𑀦𑁆𑀢𑁂, 𑀪𑀸𑀕𑀺𑀦𑁂𑀬𑁆𑀬𑁄 𑀧𑀸𑀮𑀺𑀢𑁄 𑀦𑀸𑀫, 𑀏𑀢𑀁 𑀧𑁂𑀲𑁂𑀣𑀸’’𑀢𑀺. ‘‘𑀏𑀯𑀁 𑀧𑁂𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀫𑀕𑁆𑀕𑁂 𑀧𑀭𑀺𑀧𑀦𑁆𑀣𑁄 𑀅𑀢𑁆𑀣𑀺, 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀏𑀯𑀁 𑀓𑀢𑁆𑀯𑀸 𑀧𑁂𑀲𑁂𑀣, 𑀪𑀦𑁆𑀢𑁂’’𑀢𑀺. 𑀅𑀣 𑀦𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀳𑀺𑀡𑀺𑀁𑀲𑀼.

𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀕𑀸𑀫𑀁 𑀧𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀏𑀓𑀁 𑀫𑀳𑀮𑁆𑀮𑀓𑀁 𑀤𑀺𑀲𑁆𑀯𑀸, ‘‘𑀇𑀫𑀁 𑀕𑀸𑀫𑀁 𑀦𑀺𑀲𑁆𑀲𑀸𑀬 𑀓𑁄𑀘𑀺 𑀆𑀭𑀜𑁆𑀜𑀓𑁄 𑀯𑀺𑀳𑀸𑀭𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀦𑀸𑀫 𑀢𑀢𑁆𑀣 𑀯𑀲𑀢𑀻’’𑀢𑀺? ‘‘𑀧𑀸𑀮𑀺𑀢𑀢𑁆𑀣𑁂𑀭𑁄 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀫𑀕𑁆𑀕𑀁 𑀫𑁂 𑀆𑀘𑀺𑀓𑁆𑀔𑀣𑀸’’𑀢𑀺. ‘‘𑀓𑁄𑀲𑀺 𑀢𑁆𑀯𑀁, 𑀪𑀦𑁆𑀢𑁂’’𑀢𑀺? ‘‘𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄𑀫𑁆𑀳𑀻’’𑀢𑀺. 𑀅𑀣 ¶ 𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 ¶ 𑀦𑁂𑀲𑀺. 𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀣𑁂𑀭𑀁 𑀲𑀫𑁆𑀫𑀸 𑀧𑀝𑀺𑀚𑀕𑁆𑀕𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀸𑀢𑀼𑀮𑀓𑀼𑀝𑀼𑀫𑁆𑀩𑀺𑀓𑁄 𑀫𑁂 𑀢𑀼𑀫𑁆𑀳𑀸𑀓𑀁 ¶ 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀏𑀣, 𑀕𑀘𑁆𑀙𑀸𑀫𑀸’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀇𑀫𑀁 𑀫𑁂 𑀬𑀝𑁆𑀞𑀺𑀓𑁄𑀝𑀺𑀁 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀬𑀝𑁆𑀞𑀺𑀓𑁄𑀝𑀺𑀁 𑀕𑀳𑁂𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑁄𑀕𑀸𑀫𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀕𑀫𑀦𑀸𑀓𑀸𑀭𑁄 𑀯𑁄 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫, 𑀉𑀧𑀸𑀲𑀓𑀸, 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀦𑀸𑀦𑀧𑁆𑀧𑀓𑀸𑀭𑁂𑀦 𑀬𑀸𑀘𑀺𑀢𑁆𑀯𑀸 𑀅𑀮𑀪𑀦𑁆𑀢𑀸 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀉𑀧𑀟𑁆𑀠𑀧𑀣𑀁 𑀕𑀦𑁆𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀣𑁂𑀭𑀁 𑀬𑀝𑁆𑀞𑀺𑀓𑁄𑀝𑀺𑀬𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀝𑀯𑀺𑀬𑀁 𑀓𑀝𑁆𑀞𑀦𑀕𑀭𑀁 𑀦𑀸𑀫 𑀣𑁂𑀭𑁂𑀦 𑀉𑀧𑀦𑀺𑀲𑁆𑀲𑀸𑀬 𑀯𑀼𑀝𑁆𑀞𑀧𑀼𑀩𑁆𑀩𑀁 𑀕𑀸𑀫𑀁 𑀲𑀫𑁆𑀧𑀸𑀧𑀼𑀡𑀺, 𑀲𑁄 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑁂 𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀤𑀸𑀭𑀽𑀦𑀺 𑀉𑀤𑁆𑀥𑀭𑀦𑁆𑀢𑀺𑀬𑀸 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺. 𑀇𑀢𑁆𑀣𑀺𑀲𑀤𑁆𑀤𑁄 𑀯𑀺𑀬 𑀳𑀺 𑀅𑀜𑁆𑀜𑁄 𑀲𑀤𑁆𑀤𑁄 𑀧𑀼𑀭𑀺𑀲𑀸𑀦𑀁 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀲𑀤𑁆𑀤𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀲𑀤𑁆𑀤𑁄’’𑀢𑀺 (𑀅. 𑀦𑀺. 𑁧.𑁨).

𑀲𑀸𑀫𑀡𑁂𑀭𑁄 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀢𑀺𑀝𑁆𑀞𑀣 𑀢𑀸𑀯, 𑀪𑀦𑁆𑀢𑁂, 𑀓𑀺𑀘𑁆𑀘𑀁 𑀫𑁂 𑀅𑀢𑁆𑀣𑀻’’𑀢𑀺 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 ¶ 𑀕𑀢𑁄. 𑀲𑀸 𑀢𑀁 𑀤𑀺𑀲𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀻𑀮𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑁂𑀯 𑀏𑀓𑁄 𑀕𑀻𑀢𑀲𑀤𑁆𑀤𑁄 𑀲𑀼𑀬𑁆𑀬𑀺𑀢𑁆𑀣. 𑀲𑁄 𑀘 𑀔𑁄 𑀇𑀢𑁆𑀣𑀺𑀬𑀸 𑀲𑀤𑁆𑀤𑁄 𑀙𑀺𑀚𑁆𑀚𑀺, 𑀲𑀸𑀫𑀡𑁂𑀭𑁄𑀧𑀺 𑀘𑀺𑀭𑀸𑀬𑀢𑀺, 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀻𑀮𑀯𑀺𑀧𑀢𑁆𑀢𑀺𑀁 𑀧𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄𑀧𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀕𑀘𑁆𑀙𑀸𑀫, 𑀪𑀦𑁆𑀢𑁂’’𑀢𑀺 𑀆𑀳. 𑀅𑀣 𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀧𑀸𑀧𑁄𑀚𑀸𑀢𑁄𑀲𑀺 𑀲𑀸𑀫𑀡𑁂𑀭𑀸’’𑀢𑀺. 𑀲𑁄 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀣𑁂𑀭𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀼𑀝𑁆𑀞𑁄𑀧𑀺 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀢𑀸𑀤𑀺𑀲𑁂𑀦 𑀧𑀸𑀧𑁂𑀦 𑀫𑀫 𑀬𑀝𑁆𑀞𑀺𑀓𑁄𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺. 𑀲𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀕𑀺𑀳𑀺𑀦𑀺𑀬𑀸𑀫𑁂𑀦 𑀧𑀭𑀺𑀤𑀳𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀧𑀼𑀩𑁆𑀩𑁂 𑀲𑀸𑀫𑀡𑁂𑀭𑁄, 𑀇𑀤𑀸𑀦𑀺 𑀧𑀦𑀫𑁆𑀳𑀺 𑀕𑀺𑀳𑀻 𑀚𑀸𑀢𑁄, 𑀧𑀩𑁆𑀩𑀚𑀦𑁆𑀢𑁄𑀧𑀺 𑀘 𑀲𑁆𑀯𑀸𑀳𑀁 𑀦 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄, 𑀫𑀕𑁆𑀕𑀧𑀭𑀺𑀧𑀦𑁆𑀣𑀪𑀬𑁂𑀦 𑀧𑀩𑁆𑀩𑀚𑀺𑀢𑁄, 𑀏𑀣 𑀕𑀘𑁆𑀙𑀸𑀫𑀸’’𑀢𑀺 𑀆𑀳. ‘‘𑀆𑀯𑀼𑀲𑁄, 𑀕𑀺𑀳𑀺𑀧𑀸𑀧𑁄𑀧𑀺 𑀲𑀫𑀡𑀧𑀸𑀧𑁄𑀧𑀺 𑀧𑀸𑀧𑁄𑀬𑁂𑀯, 𑀢𑁆𑀯𑀁 𑀲𑀫𑀡𑀪𑀸𑀯𑁂 𑀞𑀢𑁆𑀯𑀸𑀧𑀺 𑀲𑀻𑀮𑀫𑀢𑁆𑀢𑀁 𑀧𑀽𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀕𑀺𑀳𑀻 𑀳𑀼𑀢𑁆𑀯𑀸 𑀓𑀺𑀁 ¶ 𑀦𑀸𑀫 𑀓𑀮𑁆𑀬𑀸𑀡𑀁 𑀓𑀭𑀺𑀲𑁆𑀲𑀲𑀺, 𑀢𑀸𑀤𑀺𑀲𑁂𑀦 𑀧𑀸𑀧𑁂𑀦 𑀫𑀫 𑀬𑀝𑁆𑀞𑀺𑀓𑁄𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀅𑀫𑀦𑀼𑀲𑁆𑀲𑀼𑀧𑀤𑁆𑀤𑀯𑁄 𑀫𑀕𑁆𑀕𑁄, 𑀢𑀼𑀫𑁆𑀳𑁂 𑀘 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀓𑀸, 𑀓𑀣𑀁 𑀇𑀥 𑀯𑀲𑀺𑀲𑁆𑀲𑀣𑀸’’𑀢𑀺? 𑀅𑀣 𑀦𑀁 𑀣𑁂𑀭𑁄, ‘‘𑀆𑀯𑀼𑀲𑁄, 𑀢𑁆𑀯𑀁 𑀫𑀸 𑀏𑀯𑀁 𑀘𑀺𑀦𑁆𑀢𑀬𑀺, 𑀇𑀥𑁂𑀯 𑀫𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀭𑀦𑁆𑀢𑀲𑁆𑀲𑀸𑀧𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑁆𑀢𑀲𑁆𑀲𑀸𑀧𑀺 𑀢𑀬𑀸 𑀲𑀤𑁆𑀥𑀺𑀁 𑀕𑀫𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀳𑀦𑁆𑀤𑀸𑀳𑀁 ¶ 𑀳𑀢𑀘𑀓𑁆𑀔𑀼𑀲𑁆𑀫𑀺, 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀸𑀕𑀢𑁄;

𑀲𑁂𑀬𑁆𑀬𑀫𑀸𑀦𑁄 𑀦 𑀕𑀘𑁆𑀙𑀸𑀫𑀺, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸.

‘‘𑀳𑀦𑁆𑀤𑀸𑀳𑀁 ¶ 𑀳𑀢𑀘𑀓𑁆𑀔𑀼𑀲𑁆𑀫𑀺, 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀸𑀕𑀢𑁄;

𑀫𑀭𑀺𑀲𑁆𑀲𑀸𑀫𑀺 𑀦𑁄 𑀕𑀫𑀺𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀲𑀁𑀯𑁂𑀕𑀚𑀸𑀢𑁄 ‘‘𑀪𑀸𑀭𑀺𑀬𑀁 𑀯𑀢 𑀫𑁂 𑀲𑀸𑀳𑀲𑀺𑀓𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄 𑀯𑀦𑀲𑀡𑁆𑀟𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀢𑀣𑀸 𑀧𑀓𑁆𑀓𑀦𑁆𑀢𑁄𑀯 𑀅𑀳𑁄𑀲𑀺. 𑀣𑁂𑀭𑀲𑁆𑀲𑀸𑀧𑀺 𑀲𑀻𑀮𑀢𑁂𑀚𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀬𑀸𑀫𑀁 𑀧𑀜𑁆𑀜𑀸𑀲𑀬𑁄𑀚𑀦𑀯𑀺𑀢𑁆𑀣𑀢𑀁 𑀧𑀦𑁆𑀦𑀭𑀲𑀬𑁄𑀚𑀦𑀩𑀳𑀮𑀁 𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑀁 𑀦𑀺𑀲𑀻𑀤𑀦𑀼𑀝𑁆𑀞𑀳𑀦𑀓𑀸𑀮𑁂𑀲𑀼 𑀑𑀦𑀫𑀦𑀼𑀦𑁆𑀦𑀫𑀦𑀧𑀓𑀢𑀺𑀓𑀁 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀣𑁂𑀭𑀁 𑀅𑀤𑁆𑀤𑀲. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀳𑀲𑁆𑀲𑀦𑁂𑀢𑁆𑀢𑁄 𑀤𑁂𑀯𑀺𑀦𑁆𑀤𑁄, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺;

𑀧𑀸𑀧𑀕𑀭𑀳𑀻 𑀅𑀬𑀁 𑀧𑀸𑀮𑁄, 𑀆𑀚𑀻𑀯𑀁 𑀧𑀭𑀺𑀲𑁄𑀥𑀬𑀺.

‘‘𑀲𑀳𑀲𑁆𑀲𑀦𑁂𑀢𑁆𑀢𑁄 𑀤𑁂𑀯𑀺𑀦𑁆𑀤𑁄, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺;

𑀥𑀫𑁆𑀫𑀕𑀭𑀼𑀓𑁄 𑀅𑀬𑀁 𑀧𑀸𑀮𑁄, 𑀦𑀺𑀲𑀺𑀦𑁆𑀦𑁄 𑀲𑀸𑀲𑀦𑁂 𑀭𑀢𑁄’’𑀢𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑀸𑀳𑀁 𑀏𑀯𑀭𑀽𑀧𑀲𑁆𑀲 𑀧𑀸𑀧𑀕𑀭𑀳𑀺𑀦𑁄 𑀥𑀫𑁆𑀫𑀕𑀭𑀼𑀓𑀲𑁆𑀲 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀼𑀤𑁆𑀥𑀸 𑀫𑁂 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬, 𑀕𑀫𑀺𑀲𑁆𑀲𑀸𑀫𑀺 𑀢𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺. 𑀢𑀢𑁄 𑁋

‘‘𑀲𑀳𑀲𑁆𑀲𑀦𑁂𑀢𑁆𑀢𑁄 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀲𑀺𑀭𑀺𑀦𑁆𑀥𑀭𑁄;

𑀢𑀗𑁆𑀔𑀡𑁂𑀦 𑀆𑀕𑀦𑁆𑀢𑁆𑀯𑀸𑀦, 𑀘𑀓𑁆𑀔𑀼𑀧𑀸𑀮𑀫𑀼𑀧𑀸𑀕𑀫𑀺’’. 𑁋

𑀉𑀧𑀕𑀦𑁆𑀢𑁆𑀯𑀸 ¶ 𑀘 𑀧𑀦 𑀣𑁂𑀭𑀲𑁆𑀲 𑀅𑀯𑀺𑀤𑀽𑀭𑁂 𑀧𑀤𑀲𑀤𑁆𑀤𑀫𑀓𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀓𑁄 𑀏𑀲𑁄’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀺𑀓𑁄’’𑀢𑀺. ‘‘𑀓𑀼𑀳𑀺𑀁 𑀬𑀸𑀲𑀺 𑀉𑀧𑀸𑀲𑀓𑀸’’𑀢𑀺 ¶ ? ‘‘𑀲𑀸𑀯𑀢𑁆𑀣𑀺𑀬𑀁, 𑀪𑀦𑁆𑀢𑁂’’𑀢𑀺. ‘‘𑀬𑀸𑀳𑀺, 𑀆𑀯𑀼𑀲𑁄’’𑀢𑀺. ‘‘𑀅𑀬𑁆𑀬𑁄 𑀧𑀦, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀅𑀳𑀫𑁆𑀧𑀺 𑀢𑀢𑁆𑀣𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀏𑀓𑀢𑁄𑀯 𑀕𑀘𑁆𑀙𑀸𑀫, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁, 𑀆𑀯𑀼𑀲𑁄, 𑀤𑀼𑀩𑁆𑀩𑀮𑁄, 𑀫𑀬𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀯 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀫𑀬𑁆𑀳𑀁 𑀅𑀘𑁆𑀘𑀸𑀬𑀺𑀓𑀁 𑀦𑀢𑁆𑀣𑀺, 𑀅𑀳𑀫𑁆𑀧𑀺 𑀅𑀬𑁆𑀬𑁂𑀦 ¶ 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀤𑀲𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀏𑀓𑀁 𑀮𑀪𑀺𑀲𑁆𑀲𑀸𑀫𑀺, 𑀏𑀓𑀢𑁄𑀯 𑀕𑀘𑁆𑀙𑀸𑀫, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 ‘‘𑀏𑀲𑁄 𑀲𑀧𑁆𑀧𑀼𑀭𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀺, 𑀬𑀝𑁆𑀞𑀺𑀓𑁄𑀝𑀺𑀁 𑀕𑀡𑁆𑀳 𑀉𑀧𑀸𑀲𑀓𑀸’’𑀢𑀺 𑀆𑀳. 𑀲𑀓𑁆𑀓𑁄 𑀢𑀣𑀸 𑀓𑀢𑁆𑀯𑀸 𑀧𑀣𑀯𑀺𑀁 𑀲𑀗𑁆𑀔𑀺𑀧𑀦𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑁂 𑀚𑁂𑀢𑀯𑀦𑀁 𑀲𑀫𑁆𑀧𑀸𑀧𑁂𑀲𑀺. 𑀣𑁂𑀭𑁄 𑀲𑀗𑁆𑀔𑀧𑀡𑀯𑀸𑀤𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀢𑁆𑀣𑁂𑀲𑁄 𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀯𑀢𑁆𑀣𑀺𑀬𑀁, 𑀪𑀦𑁆𑀢𑁂’’𑀢𑀺? ‘‘𑀧𑀼𑀩𑁆𑀩𑁂 𑀫𑀬𑀁 𑀕𑀫𑀦𑀓𑀸𑀮𑁂 𑀘𑀺𑀭𑁂𑀦 𑀕𑀫𑀺𑀫𑁆𑀳𑀸’’𑀢𑀺. ‘‘𑀅𑀳𑀁 𑀉𑀚𑀼𑀫𑀕𑁆𑀕𑀁 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 ‘‘𑀦𑀸𑀬𑀁 𑀫𑀦𑀼𑀲𑁆𑀲𑁄, 𑀤𑁂𑀯𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺.

‘‘𑀲𑀳𑀲𑁆𑀲𑀦𑁂𑀢𑁆𑀢𑁄 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀲𑀺𑀭𑀺𑀦𑁆𑀥𑀭𑁄;

𑀲𑀗𑁆𑀔𑀺𑀧𑀺𑀢𑁆𑀯𑀸𑀦 𑀢𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀁 𑀲𑀸𑀯𑀢𑁆𑀣𑀺𑀫𑀸𑀕𑀫𑀻’’𑀢𑀺.

𑀲𑁄 𑀣𑁂𑀭𑀁 𑀦𑁂𑀢𑁆𑀯𑀸 𑀣𑁂𑀭𑀲𑁆𑀲𑁂𑀯𑀢𑁆𑀣𑀸𑀬 𑀓𑀦𑀺𑀝𑁆𑀞𑀓𑀼𑀝𑀼𑀫𑁆𑀩𑀺𑀓𑁂𑀦 𑀓𑀸𑀭𑀺𑀢𑀁 ¶ 𑀧𑀡𑁆𑀡𑀲𑀸𑀮𑀁 𑀦𑁂𑀢𑁆𑀯𑀸 𑀨𑀮𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀺𑀬𑀲𑀳𑀸𑀬𑀓𑀯𑀡𑁆𑀡𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀲𑀫𑁆𑀫, 𑀘𑀽𑀴𑀧𑀸𑀮𑀸’’𑀢𑀺 𑀧𑀓𑁆𑀓𑁄𑀲𑀺. ‘‘𑀓𑀺𑀁, 𑀲𑀫𑁆𑀫𑀸’’𑀢𑀺? ‘‘𑀣𑁂𑀭𑀲𑁆𑀲𑀸𑀕𑀢𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀓𑀺𑀁 𑀧𑀦 𑀣𑁂𑀭𑁄 𑀆𑀕𑀢𑁄’’𑀢𑀺? ‘‘𑀆𑀫, 𑀲𑀫𑁆𑀫, 𑀇𑀤𑀸𑀦𑀺 𑀅𑀳𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀢𑀬𑀸 𑀓𑀸𑀭𑀺𑀢𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀓𑀁 𑀤𑀺𑀲𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀼𑀝𑀼𑀫𑁆𑀩𑀺𑀓𑁄𑀧𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑀦𑁆𑀢𑁄 𑀭𑁄𑀤𑀺𑀢𑁆𑀯𑀸 ‘‘𑀇𑀤𑀁 𑀤𑀺𑀲𑁆𑀯𑀸 𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑀺𑀢𑀼𑀁 𑀦𑀸𑀤𑀸𑀲𑀺’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑁆𑀯𑁂 𑀤𑀸𑀲𑀤𑀸𑀭𑀓𑁂 𑀪𑀼𑀚𑀺𑀲𑁆𑀲𑁂 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 ‘‘𑀅𑀦𑁆𑀢𑁄𑀕𑀸𑀫𑀢𑁄 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀣𑁂𑀭𑀁 𑀉𑀧𑀝𑁆𑀞𑀳𑀣𑀸’’𑀢𑀺 𑀧𑀝𑀺𑀬𑀸𑀤𑁂𑀲𑀺. 𑀲𑀸𑀫𑀡𑁂𑀭𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀧𑀝𑁆𑀞𑀳𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀤𑀺𑀲𑀸𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀚𑁂𑀢𑀯𑀦𑀁 𑀆𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀲𑀻𑀢𑀺𑀫𑀳𑀸𑀣𑁂𑀭𑁂 𑀘, 𑀯𑀦𑁆𑀤𑀺𑀢𑁆𑀯𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 ‘‘𑀇𑀤𑀫𑁆𑀧𑀺 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀬𑀁 ¶ 𑀢𑀤𑀪𑀺𑀫𑀼𑀔𑀸 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺. 𑀢𑁂 ‘‘𑀇𑀤𑀸𑀦𑀺 𑀅𑀢𑀺𑀲𑀸𑀬𑀦𑁆𑀳𑁄, 𑀫𑁂𑀖𑁄 𑀘 𑀉𑀝𑁆𑀞𑀺𑀢𑁄, 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀯𑀢𑁆𑀢𑀺𑀁𑀲𑀼. 𑀤𑁂𑀯𑁄 𑀧𑀞𑀫𑀬𑀸𑀫𑀁 𑀯𑀲𑁆𑀲𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀯𑀺𑀕𑀢𑁄. 𑀣𑁂𑀭𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀆𑀘𑀺𑀡𑁆𑀡𑀘𑀗𑁆𑀓𑀫𑀦𑁄, 𑀢𑀲𑁆𑀫𑀸 𑀧𑀘𑁆𑀙𑀺𑀫𑀬𑀸𑀫𑁂 𑀘𑀗𑁆𑀓𑀫𑀦𑀁 𑀑𑀢𑀭𑀺. 𑀢𑀤𑀸 𑀘 𑀧𑀦 𑀦𑀯𑀯𑀼𑀝𑁆𑀞𑀸𑀬 𑀪𑀽𑀫𑀺𑀬𑀸 𑀩𑀳𑀽 𑀇𑀦𑁆𑀤𑀕𑁄𑀧𑀓𑀸 ¶ 𑀉𑀝𑁆𑀞𑀳𑀺𑀁𑀲𑀼. 𑀢𑁂 𑀣𑁂𑀭𑁂 𑀘𑀗𑁆𑀓𑀫𑀦𑁆𑀢𑁂 𑀬𑁂𑀪𑀼𑀬𑁆𑀬𑁂𑀦 𑀯𑀺𑀧𑀚𑁆𑀚𑀺𑀁𑀲𑀼. 𑀅𑀦𑁆𑀢𑁂𑀯𑀸𑀲𑀺𑀓𑀸 𑀣𑁂𑀭𑀲𑁆𑀲 𑀘𑀗𑁆𑀓𑀫𑀦𑀝𑁆𑀞𑀸𑀦𑀁 𑀓𑀸𑀮𑀲𑁆𑀲𑁂𑀯 𑀦 𑀲𑀫𑁆𑀫𑀚𑁆𑀚𑀺𑀁𑀲𑀼. 𑀇𑀢𑀭𑁂 𑀪𑀺𑀓𑁆𑀔𑀽 ‘‘𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀘𑀗𑁆𑀓𑀫𑀦𑁂 𑀫𑀢𑀧𑀸𑀡𑀓𑁂 𑀤𑀺𑀲𑁆𑀯𑀸 ‘‘𑀓𑁄 𑀇𑀫𑀲𑁆𑀫𑀺𑀁 𑀘𑀗𑁆𑀓𑀫𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄, 𑀪𑀦𑁆𑀢𑁂’’𑀢𑀺. 𑀢𑁂 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀲𑀫𑀡𑀲𑁆𑀲 𑀓𑀫𑁆𑀫𑀁, 𑀲𑀘𑀓𑁆𑀔𑀼𑀓𑀓𑀸𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 ¶ 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀇𑀤𑀸𑀦𑀺 𑀘𑀓𑁆𑀔𑀼𑀯𑀺𑀓𑀮𑀓𑀸𑀮𑁂 ‘𑀘𑀗𑁆𑀓𑀫𑀸𑀫𑀻’𑀢𑀺 𑀏𑀢𑁆𑀢𑀓𑁂 𑀧𑀸𑀡𑀓𑁂 𑀫𑀸𑀭𑁂𑀲𑀺 ‘𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀅𑀦𑀢𑁆𑀣𑀁 𑀓𑀭𑁄𑀢𑀻’’𑀢𑀺.

𑀅𑀣 𑀔𑁄 𑀢𑁂 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁, ‘‘𑀪𑀦𑁆𑀢𑁂, 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑁄 ‘𑀘𑀗𑁆𑀓𑀫𑀸𑀫𑀻’𑀢𑀺 𑀩𑀳𑀽 𑀧𑀸𑀡𑀓𑁂 𑀫𑀸𑀭𑁂𑀲𑀻’’𑀢𑀺. ‘‘𑀓𑀺𑀁 𑀧𑀦 𑀲𑁄 𑀢𑀼𑀫𑁆𑀳𑁂𑀳𑀺 𑀫𑀸𑀭𑁂𑀦𑁆𑀢𑁄 𑀤𑀺𑀝𑁆𑀞𑁄’’𑀢𑀺? ‘‘𑀦 𑀤𑀺𑀝𑁆𑀞𑁄, 𑀪𑀦𑁆𑀢𑁂’’𑀢𑀺. ‘‘𑀬𑀣𑁂𑀯 𑀢𑀼𑀫𑁆𑀳𑁂 𑀢𑀁 𑀦 𑀧𑀲𑁆𑀲𑀣, 𑀢𑀣𑁂𑀯 𑀲𑁄𑀧𑀺 𑀢𑁂 𑀧𑀸𑀡𑁂 𑀦 𑀧𑀲𑁆𑀲𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀫𑀭𑀡𑀘𑁂𑀢𑀦𑀸 𑀦𑀸𑀫 𑀦𑀢𑁆𑀣𑀺, 𑀪𑀺𑀓𑁆𑀔𑀯𑁂’’𑀢𑀺. ‘‘𑀪𑀦𑁆𑀢𑁂, 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺 𑀓𑀲𑁆𑀫𑀸 𑀅𑀦𑁆𑀥𑁄 𑀚𑀸𑀢𑁄’’𑀢𑀺? ‘‘𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀯𑀲𑁂𑀦, 𑀪𑀺𑀓𑁆𑀔𑀯𑁂’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑁂𑀦 𑀓𑀢’’𑀦𑁆𑀢𑀺? 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀓𑀸𑀲𑀺𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀯𑁂𑀚𑁆𑀚𑁄 𑀕𑀸𑀫𑀦𑀺𑀕𑀫𑁂𑀲𑀼 𑀘𑀭𑀺𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀏𑀓𑀁 𑀘𑀓𑁆𑀔𑀼𑀤𑀼𑀩𑁆𑀩𑀮𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺? ‘‘𑀅𑀓𑁆𑀔𑀻𑀳𑀺 𑀦 𑀧𑀲𑁆𑀲𑀸𑀫𑀻’’𑀢𑀺. ‘‘𑀪𑁂𑀲𑀚𑁆𑀚𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀓𑀭𑁄𑀳𑀺, 𑀲𑀸𑀫𑀻’’𑀢𑀺. ‘‘𑀓𑀺𑀁 𑀫𑁂 𑀤𑀲𑁆𑀲𑀲𑀻’’𑀢𑀺? ‘‘𑀲𑀘𑁂 𑀫𑁂 𑀅𑀓𑁆𑀔𑀻𑀦𑀺 𑀧𑀸𑀓𑀢𑀺𑀓𑀸𑀦𑀺 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀅𑀳𑀁 𑀢𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑀥𑀻𑀢𑀸𑀳𑀺 𑀤𑀸𑀲𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀤𑀳𑀺, 𑀏𑀓𑀪𑁂𑀲𑀚𑁆𑀚𑁂𑀦𑁂𑀯 𑀅𑀓𑁆𑀔𑀻𑀦𑀺 𑀧𑀸𑀓𑀢𑀺𑀓𑀸𑀦𑀺 𑀅𑀳𑁂𑀲𑀼𑀁. 𑀲𑀸 ¶ 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀫𑁂𑀢𑀲𑁆𑀲 𑀲𑀧𑀼𑀢𑁆𑀢𑀥𑀻𑀢𑀸 𑀤𑀸𑀲𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀚𑀸𑀦𑀺𑀁, ‘‘𑀦 𑀔𑁄 𑀧𑀦 𑀫𑀁 𑀲𑀡𑁆𑀳𑁂𑀦 𑀲𑀫𑁆𑀫𑀸𑀘𑀸𑀭𑁂𑀦 𑀲𑀫𑀼𑀤𑀸𑀘𑀭𑀺𑀲𑁆𑀲𑀢𑀺, 𑀯𑀜𑁆𑀘𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑀸 𑀯𑁂𑀚𑁆𑀚𑁂𑀦𑀸𑀕𑀦𑁆𑀢𑁆𑀯𑀸 ‘‘𑀓𑀻𑀤𑀺𑀲𑀁, 𑀪𑀤𑁆𑀤𑁂’’𑀢𑀺 𑀧𑀼𑀝𑁆𑀞𑀸 ‘‘𑀧𑀼𑀩𑁆𑀩𑁂 𑀫𑁂 𑀅𑀓𑁆𑀔𑀻𑀦𑀺 𑀣𑁄𑀓𑀁 𑀭𑀼𑀚𑁆𑀚𑀺𑀁𑀲𑀼, 𑀇𑀤𑀸𑀦𑀺 𑀧𑀦 𑀅𑀢𑀺𑀭𑁂𑀓𑀢𑀭𑀁 𑀭𑀼𑀚𑁆𑀚𑀦𑁆𑀢𑀻’’𑀢𑀺 𑀆𑀳. 𑀯𑁂𑀚𑁆𑀚𑁄 ‘‘𑀅𑀬𑀁 𑀫𑀁 𑀯𑀜𑁆𑀘𑁂𑀢𑁆𑀯𑀸 𑀓𑀺𑀜𑁆𑀘𑀺 𑀅𑀤𑀸𑀢𑀼𑀓𑀸𑀫𑀸, 𑀦 𑀫𑁂 𑀏𑀢𑀸𑀬 𑀤𑀺𑀦𑁆𑀦𑀸𑀬 ¶ 𑀪𑀢𑀺𑀬𑀸 𑀅𑀢𑁆𑀣𑁄, 𑀇𑀤𑀸𑀦𑁂𑀯 𑀦𑀁 𑀅𑀦𑁆𑀥𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀸𑀬 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺. 𑀲𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀏𑀓𑀁 𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀤𑁆𑀤𑁂, 𑀇𑀫𑀁 𑀪𑁂𑀲𑀚𑁆𑀚𑀁 𑀅𑀜𑁆𑀚𑁂𑀳𑀻’’𑀢𑀺 𑀅𑀜𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀤𑁆𑀯𑁂 𑀅𑀓𑁆𑀔𑀻𑀦𑀺 𑀤𑀻𑀧𑀲𑀺𑀔𑀸 𑀯𑀺𑀬 𑀯𑀺𑀚𑁆𑀛𑀸𑀬𑀺𑀁𑀲𑀼. 𑀲𑁄 𑀯𑁂𑀚𑁆𑀚𑁄 𑀘𑀓𑁆𑀔𑀼𑀧𑀸𑀮𑁄 𑀅𑀳𑁄𑀲𑀺.

𑀪𑀺𑀓𑁆𑀔𑀯𑁂, 𑀢𑀤𑀸 𑀫𑀫 𑀧𑀼𑀢𑁆𑀢𑁂𑀦 𑀓𑀢𑀓𑀫𑁆𑀫𑀁 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺. 𑀧𑀸𑀧𑀓𑀫𑁆𑀫𑀜𑁆𑀳𑀺 𑀦𑀸𑀫𑁂𑀢𑀁 𑀥𑀼𑀭𑀁 𑀯𑀳𑀢𑁄 𑀩𑀮𑀺𑀩𑀤𑁆𑀤𑀲𑁆𑀲 𑀧𑀤𑀁 𑀘𑀓𑁆𑀓𑀁 𑀯𑀺𑀬 𑀅𑀦𑀼𑀕𑀘𑁆𑀙𑀢𑀻𑀢𑀺 𑀇𑀤𑀁 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑀺𑀢𑀫𑀢𑁆𑀢𑀺𑀓𑀁 𑀲𑀸𑀲𑀦𑀁 𑀭𑀸𑀚𑀫𑀼𑀤𑁆𑀤𑀸𑀬 𑀮𑀜𑁆𑀙𑀦𑁆𑀢𑁄 𑀯𑀺𑀬 𑀥𑀫𑁆𑀫𑀭𑀸𑀚𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧.

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 ¶ 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺.

𑀢𑀢𑁆𑀣 𑀫𑀦𑁄𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀘𑀢𑀼𑀪𑀽𑀫𑀺𑀓𑀘𑀺𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀧𑀤𑁂 𑀢𑀤𑀸 𑀢𑀲𑁆𑀲 𑀯𑁂𑀚𑁆𑀚𑀲𑁆𑀲 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀯𑀲𑁂𑀦 𑀦𑀺𑀬𑀫𑀺𑀬𑀫𑀸𑀦𑀁 𑀯𑀯𑀢𑁆𑀣𑀸𑀧𑀺𑀬𑀫𑀸𑀦𑀁 ¶ 𑀧𑀭𑀺𑀘𑁆𑀙𑀺𑀚𑁆𑀚𑀺𑀬𑀫𑀸𑀦𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀢𑁂𑀦 𑀧𑀞𑀫𑀕𑀸𑀫𑀺𑀦𑀸 𑀳𑀼𑀢𑁆𑀯𑀸 𑀲𑀫𑀦𑁆𑀦𑀸𑀕𑀢𑀸. 𑀥𑀫𑁆𑀫𑀸𑀢𑀺 𑀕𑀼𑀡𑀤𑁂𑀲𑀦𑀸𑀧𑀭𑀺𑀬𑀢𑁆𑀢𑀺𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀯𑀲𑁂𑀦 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀦𑀸𑀫. 𑀢𑁂𑀲𑀼 𑁋

‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺. (𑀣𑁂𑀭𑀕𑀸. 𑁩𑁦𑁪; 𑀚𑀸. 𑁧.𑁧𑁫.𑁩𑁮𑁬) 𑁋

𑀅𑀬𑀁 𑀕𑀼𑀡𑀥𑀫𑁆𑀫𑁄 𑀦𑀸𑀫. ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡’’𑀦𑁆𑀢𑀺 (𑀫. 𑀦𑀺. 𑁩.𑁪𑁨𑁦) 𑀅𑀬𑀁 𑀤𑁂𑀲𑀦𑀸𑀥𑀫𑁆𑀫𑁄 𑀦𑀸𑀫. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁯) 𑀅𑀬𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀦𑀸𑀫. ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺 (𑀥. 𑀲. 𑁧𑁨𑁧) 𑀅𑀬𑀁 𑀦𑀺𑀲𑁆𑀲𑀢𑁆𑀢𑀥𑀫𑁆𑀫𑁄 𑀦𑀸𑀫, 𑀦𑀺𑀚𑁆𑀚𑀻𑀯𑀥𑀫𑁆𑀫𑁄𑀢𑀺𑀧𑀺 𑀏𑀲𑁄 𑀏𑀯. 𑀢𑁂𑀲𑀼 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀅𑀢𑁆𑀣𑀢𑁄 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺. 𑀏𑀢𑁂 𑀳𑀺 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀦𑀸𑀫.

𑀓𑀣𑀁 ¶ 𑀧𑀦𑁂𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀦𑀸𑀫 𑀳𑁄𑀢𑀻𑀢𑀺? 𑀉𑀧𑁆𑀧𑀸𑀤𑀧𑀘𑁆𑀘𑀬𑀝𑁆𑀞𑁂𑀦. 𑀬𑀣𑀸 𑀳𑀺 𑀩𑀳𑀽𑀲𑀼 𑀏𑀓𑀢𑁄 𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁂𑀲𑀼 ‘‘𑀓𑁄 𑀏𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 𑀯𑀼𑀢𑁆𑀢𑁂 𑀬𑁄 𑀦𑁂𑀲𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀁 𑀦𑀺𑀲𑁆𑀲𑀸𑀬 𑀢𑁂 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀲𑁄 𑀤𑀢𑁆𑀢𑁄 𑀯𑀸 𑀫𑀺𑀢𑁆𑀢𑁄 𑀯𑀸 𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 ¶ 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀉𑀧𑁆𑀧𑀸𑀤𑀧𑀘𑁆𑀘𑀬𑀝𑁆𑀞𑁂𑀦 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀦 𑀳𑀺 𑀢𑁂 𑀫𑀦𑁂 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀫𑀦𑁄 𑀧𑀦 𑀏𑀓𑀘𑁆𑀘𑁂𑀲𑀼 𑀘𑁂𑀢𑀲𑀺𑀓𑁂𑀲𑀼 𑀅𑀦𑀼𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀅𑀥𑀺𑀧𑀢𑀺𑀯𑀲𑁂𑀦 𑀧𑀦 𑀫𑀦𑁄 𑀲𑁂𑀝𑁆𑀞𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀲𑁂𑀝𑁆𑀞𑁄. 𑀬𑀣𑀸 𑀳𑀺 𑀘𑁄𑀭𑀸𑀤𑀻𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀤𑀬𑁄 𑀅𑀥𑀺𑀧𑀢𑀺𑀦𑁄 𑀲𑁂𑀝𑁆𑀞𑀸. 𑀢𑀣𑀸 𑀢𑁂𑀲𑀫𑁆𑀧𑀺 𑀫𑀦𑁄 𑀅𑀥𑀺𑀧𑀢𑀺 𑀫𑀦𑁄𑀯 𑀲𑁂𑀝𑁆𑀞𑀸. 𑀬𑀣𑀸 𑀧𑀦 𑀤𑀸𑀭𑀼𑀆𑀤𑀻𑀳𑀺 ¶ 𑀦𑀺𑀧𑁆𑀨𑀦𑁆𑀦𑀸𑀦𑀺 𑀢𑀸𑀦𑀺 𑀢𑀸𑀦𑀺 𑀪𑀡𑁆𑀟𑀸𑀦𑀺 𑀤𑀸𑀭𑀼𑀫𑀬𑀸𑀤𑀻𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀣𑀸 𑀢𑁂𑀧𑀺 𑀫𑀦𑀢𑁄 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀫𑀦𑁄𑀫𑀬𑀸 𑀦𑀸𑀫.

𑀧𑀤𑀼𑀝𑁆𑀞𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑁂𑀳𑀺 𑀅𑀪𑀺𑀚𑁆𑀛𑀸𑀤𑀻𑀳𑀺 𑀤𑁄𑀲𑁂𑀳𑀺 𑀧𑀤𑀼𑀝𑁆𑀞𑁂𑀦. 𑀧𑀓𑀢𑀺𑀫𑀦𑁄 𑀳𑀺 𑀪𑀯𑀗𑁆𑀕𑀘𑀺𑀢𑁆𑀢𑀁, 𑀢𑀁 𑀅𑀧𑀤𑀼𑀝𑁆𑀞𑀁. 𑀬𑀣𑀸 𑀳𑀺 𑀧𑀲𑀦𑁆𑀦𑀁 𑀉𑀤𑀓𑀁 𑀆𑀕𑀦𑁆𑀢𑀼𑀓𑁂𑀳𑀺 𑀦𑀻𑀮𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀻𑀮𑁄𑀤𑀓𑀸𑀤𑀺𑀪𑁂𑀤𑀁 𑀳𑁄𑀢𑀺, 𑀦 𑀘 𑀦𑀯𑀁 𑀉𑀤𑀓𑀁, 𑀦𑀸𑀧𑀺 𑀧𑀼𑀭𑀺𑀫𑀁 𑀧𑀲𑀦𑁆𑀦𑀉𑀤𑀓𑀫𑁂𑀯, 𑀢𑀣𑀸 𑀢𑀫𑁆𑀧𑀺 𑀆𑀕𑀦𑁆𑀢𑀼𑀓𑁂𑀳𑀺 𑀅𑀪𑀺𑀚𑁆𑀛𑀸𑀤𑀻𑀳𑀺 𑀤𑁄𑀲𑁂𑀳𑀺 𑀧𑀤𑀼𑀝𑁆𑀞𑀁 𑀳𑁄𑀢𑀺, 𑀦 𑀘 𑀦𑀯𑀁 𑀘𑀺𑀢𑁆𑀢𑀁, 𑀦𑀸𑀧𑀺 𑀧𑀼𑀭𑀺𑀫𑀁 𑀪𑀯𑀗𑁆𑀕𑀘𑀺𑀢𑁆𑀢𑀫𑁂𑀯, 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 (𑀅. 𑀦𑀺. 𑁧.𑁪𑁯). 𑀏𑀯𑀁 𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸 𑀲𑁄 𑀪𑀸𑀲𑀫𑀸𑀦𑁄 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀫𑁂𑀯 𑀪𑀸𑀲𑀢𑀺, 𑀓𑀭𑁄𑀦𑁆𑀢𑁄 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀫𑁂𑀯 𑀓𑀭𑁄𑀢𑀺, 𑀅𑀪𑀸𑀲𑀦𑁆𑀢𑁄 𑀅𑀓𑀭𑁄𑀦𑁆𑀢𑁄 𑀢𑀸𑀬 𑀅𑀪𑀺𑀚𑁆𑀛𑀸𑀤𑀻𑀳𑀺 𑀧𑀤𑀼𑀝𑁆𑀞𑀫𑀸𑀦𑀲𑀢𑀸𑀬 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀧𑀽𑀭𑁂𑀢𑀺. 𑀏𑀯𑀫𑀲𑁆𑀲 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀻𑀢𑀺 ¶ 𑀢𑀢𑁄 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺, 𑀤𑀼𑀘𑁆𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼, 𑀫𑀦𑀼𑀲𑁆𑀲𑁂𑀲𑀼 𑀯𑀸 𑀢𑀫𑀢𑁆𑀢𑀪𑀸𑀯𑀁 𑀕𑀘𑁆𑀙𑀦𑁆𑀢𑀁 𑀓𑀸𑀬𑀯𑀢𑁆𑀣𑀼𑀓𑀫𑁆𑀧𑀺 𑀇𑀢𑀭𑀫𑁆𑀧𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀯𑀺𑀧𑀸𑀓𑀤𑀼𑀓𑁆𑀔𑀁 𑀅𑀦𑀼𑀕𑀘𑁆𑀙𑀢𑀺. 𑀬𑀣𑀸 𑀓𑀺𑀁? 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀦𑁆𑀢𑀺 𑀥𑀼𑀭𑁂 𑀬𑀼𑀢𑁆𑀢𑀲𑁆𑀲 𑀥𑀼𑀭𑀁 𑀯𑀳𑀢𑁄 𑀩𑀮𑀺𑀩𑀤𑁆𑀤𑀲𑁆𑀲 𑀧𑀤𑀁 𑀘𑀓𑁆𑀓𑀁 𑀯𑀺𑀬. 𑀬𑀣𑀸 𑀳𑀺 𑀲𑁄 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀤𑁆𑀯𑁂𑀧𑀺 𑀧𑀜𑁆𑀘𑀧𑀺 𑀤𑀲𑀧𑀺 𑀅𑀟𑁆𑀠𑀫𑀸𑀲𑀫𑁆𑀧𑀺 𑀫𑀸𑀲𑀫𑁆𑀧𑀺 𑀯𑀳𑀦𑁆𑀢𑁄 𑀘𑀓𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 ¶ , 𑀅𑀣 𑀔𑁆𑀯𑀲𑁆𑀲 𑀧𑀼𑀭𑀢𑁄 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀬𑀼𑀕𑀁 𑀕𑀻𑀯𑀁 𑀩𑀸𑀥𑀢𑀺, 𑀧𑀘𑁆𑀙𑀢𑁄 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀘𑀓𑁆𑀓𑀁 𑀊𑀭𑀼𑀫𑀁𑀲𑀁 𑀧𑀝𑀺𑀳𑀦𑀢𑀺. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀩𑀸𑀥𑀦𑁆𑀢𑀁 𑀘𑀓𑁆𑀓𑀁 𑀢𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑀁 𑀳𑁄𑀢𑀺; 𑀢𑀣𑁂𑀯 𑀫𑀦𑀲𑀸 𑀧𑀤𑀼𑀝𑁆𑀞𑁂𑀦 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀞𑀺𑀢𑀁 𑀧𑀼𑀕𑁆𑀕𑀮𑀁 𑀦𑀺𑀭𑀬𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀕𑀢𑀕𑀢𑀝𑁆𑀞𑀸𑀦𑁂 𑀤𑀼𑀘𑁆𑀘𑀭𑀺𑀢𑀫𑀽𑀮𑀓𑀁 𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀫𑀦𑀼𑀩𑀦𑁆𑀥𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀢𑀺𑀁𑀲𑀲𑀳𑀲𑁆𑀲𑀸 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀫𑁆𑀧𑀢𑁆𑀢𑀧𑀭𑀺𑀪𑀸𑀬𑀧𑀺 𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀲𑀨𑀮𑀸 𑀅𑀳𑁄𑀲𑀻𑀢𑀺.

𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀯𑀢𑁆𑀣𑀼 𑀧𑀞𑀫𑀁

𑁨. 𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀢𑁆𑀣𑀼

𑁨. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 ¶ 𑀥𑀫𑁆𑀫𑀸𑀢𑀺 𑀤𑀼𑀢𑀺𑀬𑀕𑀸𑀣𑀸𑀧𑀺 ¶ 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀫𑀝𑁆𑀞𑀓𑀼𑀡𑁆𑀟𑀮𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀢𑁂𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑀺𑀦𑁆𑀦𑀧𑀼𑀩𑁆𑀩𑀁, 𑀢𑁂𑀦 𑀢𑀁 ‘‘𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑁄’’𑀢𑁆𑀯𑁂𑀯 𑀲𑀜𑁆𑀚𑀸𑀦𑀺𑀁𑀲𑀼. 𑀢𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺 𑀧𑀺𑀬𑁄 𑀫𑀦𑀸𑀧𑁄. 𑀅𑀣𑀲𑁆𑀲 𑀧𑀺𑀮𑀦𑁆𑀥𑀦𑀁 𑀓𑀸𑀭𑁂𑀢𑀼𑀓𑀸𑀫𑁄 ‘‘𑀲𑀘𑁂 𑀲𑀼𑀯𑀡𑁆𑀡𑀓𑀸𑀭𑁂 𑀓𑀸𑀭𑁂𑀲𑁆𑀲𑀸𑀫𑀺, 𑀪𑀢𑁆𑀢𑀯𑁂𑀢𑀦𑀁 𑀤𑀸𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀲𑀼𑀯𑀡𑁆𑀡𑀁 𑀓𑁄𑀝𑁆𑀝𑁂𑀢𑁆𑀯𑀸 𑀫𑀝𑁆𑀞𑀸𑀦𑀺 𑀓𑀼𑀡𑁆𑀟𑀮𑀸𑀦𑀺 𑀓𑀢𑁆𑀯𑀸 𑀅𑀤𑀸𑀲𑀺. 𑀢𑁂𑀦𑀲𑁆𑀲 𑀧𑀼𑀢𑁆𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀧𑀡𑁆𑀟𑀼𑀭𑁄𑀕𑁄 𑀉𑀤𑀧𑀸𑀤𑀺. 𑀢𑀲𑁆𑀲 𑀫𑀸𑀢𑀸 𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑀲𑁆𑀲 𑀢𑁂 𑀭𑁄𑀕𑁄 𑀉𑀧𑁆𑀧𑀦𑁆𑀦𑁄, 𑀢𑀺𑀓𑀺𑀘𑁆𑀙𑀸𑀧𑁂𑀳𑀺 𑀦’’𑀦𑁆𑀢𑀺 𑀆𑀳. ‘‘𑀪𑁄𑀢𑀺 𑀲𑀘𑁂 𑀯𑁂𑀚𑁆𑀚𑀁 𑀆𑀦𑁂𑀲𑁆𑀲𑀸𑀫𑀺, 𑀪𑀢𑁆𑀢𑀯𑁂𑀢𑀦𑀁 𑀤𑀸𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺; 𑀓𑀺𑀁 𑀢𑁆𑀯𑀁 𑀫𑀫 𑀥𑀦𑀘𑁆𑀙𑁂𑀤𑀁 𑀦 𑀑𑀮𑁄𑀓𑁂𑀲𑁆𑀲𑀲𑀻’’𑀢𑀺? ‘‘𑀅𑀣 𑀦𑀁 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺? ‘‘𑀬𑀣𑀸 𑀫𑁂 𑀥𑀦𑀘𑁆𑀙𑁂𑀤𑁄 𑀦 𑀳𑁄𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑁂𑀚𑁆𑀚𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀲𑀼𑀓𑀭𑁄𑀕𑀲𑁆𑀲 𑀦𑀸𑀫 𑀢𑀼𑀫𑁆𑀳𑁂 𑀓𑀺𑀁 𑀪𑁂𑀲𑀚𑁆𑀚𑀁 𑀓𑀭𑁄𑀣𑀸’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑁂 𑀬𑀁 𑀯𑀸 𑀢𑀁 𑀯𑀸 𑀭𑀼𑀓𑁆𑀔𑀢𑀘𑀸𑀤𑀺𑀁 𑀆𑀘𑀺𑀓𑁆𑀔𑀦𑁆𑀢𑀺. 𑀲𑁄 𑀢𑀫𑀸𑀳𑀭𑀺𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀓𑀭𑁄𑀢𑀺. 𑀢𑀁 𑀓𑀭𑁄𑀦𑁆𑀢𑀲𑁆𑀲𑁂𑀯𑀲𑁆𑀲 𑀭𑁄𑀕𑁄 𑀩𑀮𑀯𑀸 𑀅𑀳𑁄𑀲𑀺, 𑀅𑀢𑁂𑀓𑀺𑀘𑁆𑀙𑀪𑀸𑀯𑀁 𑀉𑀧𑀸𑀕𑀫𑀺. 𑀩𑁆𑀭𑀸𑀳𑁆𑀫𑀡𑁄 ¶ 𑀢𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀁 𑀜𑀢𑁆𑀯𑀸 𑀏𑀓𑀁 𑀯𑁂𑀚𑁆𑀚𑀁 𑀧𑀓𑁆𑀓𑁄𑀲𑀺. 𑀲𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸𑀯 ‘‘𑀅𑀫𑁆𑀳𑀸𑀓𑀁 𑀏𑀓𑀁 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀅𑀜𑁆𑀜𑀁 𑀯𑁂𑀚𑁆𑀚𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀺𑀓𑀺𑀘𑁆𑀙𑀸𑀧𑁂𑀳𑀻’’𑀢𑀺 𑀢𑀁 ¶ 𑀧𑀳𑀸𑀬 𑀦𑀺𑀓𑁆𑀔𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀫𑀭𑀡𑀲𑀫𑀬𑀁 𑀜𑀢𑁆𑀯𑀸 ‘‘𑀇𑀫𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀸 𑀅𑀦𑁆𑀢𑁄𑀕𑁂𑀳𑁂 𑀲𑀸𑀧𑀢𑁂𑀬𑁆𑀬𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀩𑀳𑀺 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀩𑀳𑀺𑀆𑀴𑀺𑀦𑁆𑀤𑁂 𑀦𑀺𑀧𑀚𑁆𑀚𑀸𑀧𑁂𑀲𑀺.

𑀢𑀁 𑀤𑀺𑀯𑀲𑀁 𑀪𑀕𑀯𑀸 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸𑀦𑀁 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀸𑀦𑀁 𑀯𑁂𑀦𑁂𑀬𑁆𑀬𑀩𑀦𑁆𑀥𑀯𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺. 𑀫𑀝𑁆𑀞𑀓𑀼𑀡𑁆𑀟𑀮𑀻 𑀩𑀳𑀺𑀆𑀴𑀺𑀦𑁆𑀤𑁂 𑀦𑀺𑀧𑀦𑁆𑀦𑀸𑀓𑀸𑀭𑁂𑀦𑁂𑀯 𑀢𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺. 𑀲𑀢𑁆𑀣𑀸 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀦𑁆𑀢𑁄𑀕𑁂𑀳𑀸 𑀦𑀻𑀳𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑀬𑁆𑀳𑀁 𑀏𑀢𑁆𑀣 𑀕𑀢𑀧𑀘𑁆𑀘𑀬𑁂𑀦 𑀅𑀢𑁆𑀣𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀇𑀤𑀁 𑀅𑀤𑁆𑀤𑀲 𑁋 𑀅𑀬𑀁 𑀫𑀸𑀡𑀯𑁄 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀁 𑀛𑀸𑀧𑁂𑀢𑁆𑀯𑀸 𑀭𑁄𑀤𑀦𑁆𑀢𑁄 𑀆𑀴𑀸𑀳𑀦𑁂 𑀯𑀺𑀘𑀭𑀺𑀲𑁆𑀲𑀢𑀺. 𑀤𑁂𑀯𑀧𑀼𑀢𑁆𑀢𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀝𑁆𑀞𑀺𑀲𑀓𑀝𑀪𑀸𑀭𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀓𑀫𑁆𑀫𑁂𑀦 𑀫𑀬𑀸 𑀅𑀬𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀫𑀬𑀺 ¶ 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀥𑀦𑀘𑁆𑀙𑁂𑀤𑀪𑀬𑁂𑀦 𑀫𑀫 𑀪𑁂𑀲𑀚𑁆𑀚𑀫𑀓𑀢𑁆𑀯𑀸 𑀇𑀤𑀸𑀦𑀺 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀭𑁄𑀤𑀢𑀺, 𑀯𑀺𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑀁 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀭𑀺 𑀭𑁄𑀤𑀦𑁆𑀢𑁂 𑀫𑀝𑁆𑀞𑀓𑀼𑀡𑁆𑀟𑀮𑀺𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀲𑁆𑀲𑀸𑀯𑀺𑀤𑀽𑀭𑁂 ¶ 𑀦𑀺𑀧𑀚𑁆𑀚𑀺𑀢𑁆𑀯𑀸 𑀭𑁄𑀤𑀺𑀲𑁆𑀲𑀢𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀢𑀺. ‘‘𑀅𑀳𑀁 𑀢𑁂 𑀧𑀼𑀢𑁆𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻’’𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀢𑀺. ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄𑀲𑀻’’𑀢𑀺? ‘‘𑀢𑀸𑀯𑀲𑀺𑀁𑀲𑀪𑀯𑀦𑁂’’𑀢𑀺. ‘‘𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 𑀫𑀬𑀺 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀆𑀘𑀺𑀓𑁆𑀔𑀺𑀲𑁆𑀲𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀢𑀼𑀫𑁆𑀳𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀦𑀸𑀫 𑀅𑀢𑁆𑀣𑀻’’𑀢𑀺 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀅𑀣𑀲𑁆𑀲𑀸𑀳𑀁 ‘‘𑀏𑀢𑁆𑀢𑀓𑀸𑀦𑀺 𑀲𑀢𑀸𑀦𑀺 𑀯𑀸 𑀲𑀳𑀲𑁆𑀲𑀸𑀦𑀺 𑀯𑀸 𑀲𑀢𑀲𑀳𑀲𑁆𑀲𑀸𑀦𑀺 𑀯𑀸𑀢𑀺 𑀦 𑀲𑀓𑁆𑀓𑀸 𑀕𑀡𑀦𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀕𑀸𑀣𑀁 𑀪𑀸𑀲𑀺𑀲𑁆𑀲𑀸𑀫𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀫𑀝𑁆𑀞 𑀓𑀼𑀡𑁆𑀟𑀮𑀻 𑀲𑁄𑀢𑀸𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀺. 𑀢𑀣𑀸 𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑁄 𑀩𑁆𑀭𑀸𑀳𑁆𑀫𑀡𑁄. 𑀇𑀢𑀺 ¶ 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀢𑁄.

𑀢𑀲𑁆𑀫𑀺𑀁 𑀔𑀡𑁂 𑀫𑀝𑁆𑀞𑀓𑀼𑀡𑁆𑀟𑀮𑀻 𑀅𑀦𑁆𑀢𑁄𑀕𑁂𑀳𑀸𑀪𑀺𑀫𑀼𑀔𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀅𑀧𑀲𑁆𑀲𑀦𑀪𑀸𑀯𑀁 𑀜𑀢𑁆𑀯𑀸 𑀏𑀓𑀁 𑀭𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀸𑀡𑀯𑁄 ‘‘𑀓𑀺𑀁 𑀑𑀪𑀸𑀲𑁄 𑀦𑀸𑀫𑁂𑀲𑁄’’𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀺𑀧𑀦𑁆𑀦𑁄𑀯 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸, ‘‘𑀅𑀦𑁆𑀥𑀩𑀸𑀮𑀧𑀺𑀢𑀭𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑀁 𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀁 𑀯𑀸 𑀓𑀸𑀢𑀼𑀁 𑀤𑀸𑀦𑀁 𑀯𑀸 𑀤𑀸𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀦𑀸𑀮𑀢𑁆𑀣𑀁, 𑀇𑀤𑀸𑀦𑀺 𑀫𑁂 𑀳𑀢𑁆𑀣𑀸𑀧𑀺 𑀅𑀦𑀥𑀺𑀧𑀢𑁂𑀬𑁆𑀬𑀸, 𑀅𑀜𑁆𑀜𑀁 𑀓𑀢𑁆𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀫𑀦𑀫𑁂𑀯 𑀧𑀲𑀸𑀤𑁂𑀲𑀺. 𑀲𑀢𑁆𑀣𑀸 ‘‘𑀅𑀮𑀁 𑀏𑀢𑁆𑀢𑀓𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀇𑀫𑀲𑁆𑀲𑀸’’𑀢𑀺 𑀧𑀓𑁆𑀓𑀸𑀫𑀺. 𑀲𑁄 𑀢𑀣𑀸𑀕𑀢𑁂 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀦𑁆𑀢𑁂𑀬𑁂𑀯 ¶ 𑀧𑀲𑀦𑁆𑀦𑀫𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀤𑁂𑀯𑀮𑁄𑀓𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺𑀲𑁆𑀲 𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸 𑀆𑀴𑀸𑀳𑀦𑁂 𑀭𑁄𑀤𑀦𑀧𑀭𑀸𑀬𑀡𑁄 𑀅𑀳𑁄𑀲𑀺, 𑀤𑁂𑀯𑀲𑀺𑀓𑀁 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀭𑁄𑀤𑀢𑀺 𑁋 ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓, 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺. 𑀤𑁂𑀯𑀧𑀼𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀓𑁂𑀦 𑀫𑁂 𑀓𑀫𑁆𑀫𑁂𑀦 𑀮𑀤𑁆𑀥𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀢𑁆𑀣𑀭𑀺 𑀫𑀦𑁄𑀧𑀲𑀸𑀤𑁂𑀦𑀸’’𑀢𑀺 𑀜𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀫 𑀅𑀨𑀸𑀲𑀼𑀓𑀓𑀸𑀮𑁂 𑀪𑁂𑀲𑀚𑁆𑀚𑀫𑀓𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀭𑁄𑀤𑀢𑀺, 𑀯𑀺𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑀫𑁂𑀯 𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀝𑁆𑀞𑀓𑀼𑀡𑁆𑀟𑀮𑀺𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀲𑁆𑀲𑀸𑀯𑀺𑀤𑀽𑀭𑁂 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀭𑁄𑀤𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀢𑀸𑀯 𑀧𑀼𑀢𑁆𑀢𑀲𑁄𑀓𑁂𑀦 𑀭𑁄𑀤𑀸𑀫𑀺, 𑀏𑀲 𑀓𑀺𑀫𑀢𑁆𑀣𑀁 𑀭𑁄𑀤𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀮𑀗𑁆𑀓𑀢𑁄 ¶ 𑀫𑀝𑁆𑀞𑀓𑀼𑀡𑁆𑀟𑀮𑀻,

𑀫𑀸𑀮𑀥𑀸𑀭𑀻 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀲𑀺,

𑀯𑀦𑀫𑀚𑁆𑀛𑁂 𑀓𑀺𑀁 𑀤𑀼𑀓𑁆𑀔𑀺𑀢𑁄 𑀢𑀼𑀯’’𑀦𑁆𑀢𑀺. (𑀯𑀺. 𑀯. 𑁧𑁨𑁦𑁭; 𑀧𑁂. 𑀯. 𑁧𑁮𑁬);

𑀲𑁄 ¶ 𑀫𑀸𑀡𑀯𑁄 𑀆𑀳 𑁋

‘‘𑀲𑁄𑀯𑀡𑁆𑀡𑀫𑀬𑁄 𑀧𑀪𑀲𑁆𑀲𑀭𑁄,

𑀉𑀧𑁆𑀧𑀦𑁆𑀦𑁄 𑀭𑀣𑀧𑀜𑁆𑀚𑀭𑁄 𑀫𑀫;

𑀢𑀲𑁆𑀲 𑀘𑀓𑁆𑀓𑀬𑀼𑀕𑀁 𑀦 𑀯𑀺𑀦𑁆𑀤𑀸𑀫𑀺,

𑀢𑁂𑀦 𑀤𑀼𑀓𑁆𑀔𑁂𑀦 𑀚𑀳𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺. (𑀯. 𑁧𑁨𑁦𑁮; 𑀧𑁂. 𑀯. 𑁧𑁮𑁭);

𑀅𑀣 ¶ 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

‘‘𑀲𑁄𑀯𑀡𑁆𑀡𑀫𑀬𑀁 𑀫𑀡𑀺𑀫𑀬𑀁,

𑀮𑁄𑀳𑀺𑀢𑀓𑀫𑀬𑀁 𑀅𑀣 𑀭𑀽𑀧𑀺𑀬𑀫𑀬𑀁;

𑀆𑀘𑀺𑀓𑁆𑀔 𑀫𑁂 𑀪𑀤𑁆𑀤 𑀫𑀸𑀡𑀯,

𑀘𑀓𑁆𑀓𑀬𑀼𑀕𑀁 𑀧𑀝𑀺𑀧𑀸𑀤𑀬𑀸𑀫𑀺 𑀢𑁂’’𑀢𑀺. (𑀯𑀺. 𑀯. 𑁧𑁨𑁦𑁯; 𑀧𑁂. 𑀯. 𑁧𑁮𑁮);

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀫𑀓𑀢𑁆𑀯𑀸 𑀧𑀼𑀢𑁆𑀢𑀧𑀢𑀺𑀭𑀽𑀧𑀓𑀁 𑀫𑀁 𑀤𑀺𑀲𑁆𑀯𑀸 𑀭𑁄𑀤𑀦𑁆𑀢𑁄 ‘𑀲𑀼𑀯𑀡𑁆𑀡𑀸𑀤𑀺𑀫𑀬𑀁 𑀭𑀣𑀘𑀓𑁆𑀓𑀁 𑀓𑀭𑁄𑀫𑀻’𑀢𑀺 𑀯𑀤𑀢𑀺, 𑀳𑁄𑀢𑀼 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀻𑀯 𑀫𑀳𑀦𑁆𑀢𑀁 𑀫𑁂 𑀘𑀓𑁆𑀓𑀬𑀼𑀕𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀬𑀸𑀯 𑀫𑀳𑀦𑁆𑀢𑀁 𑀆𑀓𑀗𑁆𑀔𑀲𑀺, 𑀢𑀸𑀯 𑀫𑀳𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺 𑀫𑁂 𑀅𑀢𑁆𑀣𑁄, 𑀢𑁂 𑀫𑁂 𑀤𑁂𑀳𑀻’’𑀢𑀺 𑀬𑀸𑀘𑀦𑁆𑀢𑁄 𑀆𑀳 𑁋

‘‘𑀲𑁄 𑀫𑀸𑀡𑀯𑁄 𑀢𑀲𑁆𑀲 𑀧𑀸𑀯𑀤𑀺,

𑀘𑀦𑁆𑀤𑀲𑀽𑀭𑀺𑀬𑀸 𑀉𑀪𑀬𑁂𑀢𑁆𑀣 𑀤𑀺𑀲𑁆𑀲𑀭𑁂;

𑀲𑁄𑀯𑀡𑁆𑀡𑀫𑀬𑁄 ¶ 𑀭𑀣𑁄 𑀫𑀫,

𑀢𑁂𑀦 𑀘𑀓𑁆𑀓𑀬𑀼𑀕𑁂𑀦 𑀲𑁄𑀪𑀢𑀻’’𑀢𑀺. (𑀯𑀺. 𑀯. 𑁧𑁨𑁧𑁦; 𑀧𑁂. 𑀯. 𑁧𑁮𑁯);

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

‘‘𑀩𑀸𑀮𑁄 𑀔𑁄 𑀢𑁆𑀯𑀁 𑀅𑀲𑀺 𑀫𑀸𑀡𑀯,

𑀬𑁄 𑀢𑁆𑀯𑀁 𑀧𑀢𑁆𑀣𑀬𑀲𑁂 𑀅𑀧𑀢𑁆𑀣𑀺𑀬𑀁;

𑀫𑀜𑁆𑀜𑀸𑀫𑀺 𑀢𑀼𑀯𑀁 𑀫𑀭𑀺𑀲𑁆𑀲𑀲𑀺,

𑀦 𑀳𑀺 𑀢𑁆𑀯𑀁 𑀮𑀘𑁆𑀙𑀲𑀺 𑀘𑀦𑁆𑀤𑀲𑀽𑀭𑀺𑀬𑁂’’𑀢𑀺. (𑀯𑀺. 𑀯. 𑁧𑁨𑁧𑁧; 𑀧𑁂. 𑀯. 𑁧𑁯𑁦);

𑀅𑀣 ¶ 𑀦𑀁 𑀫𑀸𑀡𑀯𑁄 𑀆𑀳 𑁋

‘‘𑀓𑀺𑀁 𑀧𑀦 𑀧𑀜𑁆𑀜𑀸𑀬𑀫𑀸𑀦𑀲𑁆𑀲𑀢𑁆𑀣𑀸𑀬 𑀭𑁄𑀤𑀦𑁆𑀢𑁄 𑀩𑀸𑀮𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀧𑀜𑁆𑀜𑀸𑀬𑀫𑀸𑀦𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀯𑀸 𑁋

‘‘𑀕𑀫𑀦𑀸𑀕𑀫𑀦𑀫𑁆𑀧𑀺 ¶ 𑀤𑀺𑀲𑁆𑀲𑀢𑀺,

𑀯𑀡𑁆𑀡𑀥𑀸𑀢𑀼 𑀉𑀪𑀬𑀢𑁆𑀣 𑀯𑀻𑀣𑀺𑀬𑀸;

𑀧𑁂𑀢𑁄 𑀓𑀸𑀮𑀓𑀢𑁄 𑀦 𑀤𑀺𑀲𑁆𑀲𑀢𑀺,

𑀓𑁄 𑀦𑀺𑀥 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄’’𑀢𑀺. (𑀯𑀺. 𑀯. 𑁧𑁨𑁧𑁨; 𑀧𑁂. 𑀯. 𑁧𑁯𑁧);

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀬𑀼𑀢𑁆𑀢𑀁 𑀏𑀲 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋

‘‘𑀲𑀘𑁆𑀘𑀁 𑀔𑁄 𑀯𑀤𑁂𑀲𑀺 𑀫𑀸𑀡𑀯,

𑀅𑀳𑀫𑁂𑀯 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄;

𑀘𑀦𑁆𑀤𑀁 𑀯𑀺𑀬 𑀤𑀸𑀭𑀓𑁄 𑀭𑀼𑀤𑀁,

𑀧𑁂𑀢𑀁 𑀓𑀸𑀮𑀓𑀢𑀸𑀪𑀺𑀧𑀢𑁆𑀣𑀬𑀺’’𑀦𑁆𑀢𑀺. (𑀯𑀺. 𑀯. 𑁧𑁨𑁧𑁩; 𑀧𑁂. 𑀯. 𑁧𑁯𑁨) 𑁋

𑀯𑀢𑁆𑀯𑀸 ¶ 𑀢𑀲𑁆𑀲 𑀓𑀣𑀸𑀬 𑀦𑀺𑀲𑁆𑀲𑁄𑀓𑁄 𑀳𑀼𑀢𑁆𑀯𑀸 𑀫𑀸𑀡𑀯𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

‘‘𑀲𑁆𑀯𑀸𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯𑀸’’𑀢𑀺. (𑀯𑀺. 𑀯. 𑁧𑁨𑁧𑁪-𑁧𑁨𑁧𑁬; 𑀧𑁂. 𑀯. 𑁧𑁯𑁩-𑁧𑁯𑁫);

𑀅𑀣 ¶ 𑀦𑀁 ‘‘𑀓𑁄 𑀦𑀸𑀫 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀤𑁂𑀯𑀢𑀸𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺. (𑀯𑀺. 𑀯. 𑁧𑁨𑁧𑁭; 𑀧𑁂. 𑀯. 𑁧𑁯𑁬) 𑁋

𑀆𑀳. 𑀅𑀣𑀲𑁆𑀲 𑀫𑀸𑀡𑀯𑁄 𑁋

‘‘𑀬𑀜𑁆𑀘 𑀓𑀦𑁆𑀤𑀲𑀺 𑀬𑀜𑁆𑀘 𑀭𑁄𑀤𑀲𑀺,

𑀧𑀼𑀢𑁆𑀢𑀁 𑀆𑀴𑀸𑀳𑀦𑁂 𑀲𑀬𑀁 𑀤𑀳𑀺𑀢𑁆𑀯𑀸;

𑀲𑁆𑀯𑀸𑀳𑀁 𑀓𑀼𑀲𑀮𑀁 𑀓𑀭𑀺𑀢𑁆𑀯𑀸 𑀓𑀫𑁆𑀫𑀁,

𑀢𑀺𑀤𑀲𑀸𑀦𑀁 𑀲𑀳𑀩𑁆𑀬𑀢𑀁 𑀕𑀢𑁄’’𑀢𑀺. (𑀯𑀺. 𑀯. 𑁧𑁨𑁧𑁮; 𑀧𑁂. 𑀯. 𑁧𑁯𑁭) 𑁋

𑀆𑀘𑀺𑀓𑁆𑀔𑀺 ¶ . 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

‘‘𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀦𑀸𑀤𑁆𑀤𑀲𑀸𑀫,

𑀤𑀸𑀦𑀁 𑀤𑀤𑀦𑁆𑀢𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀉𑀧𑁄𑀲𑀣𑀓𑀫𑁆𑀫𑀁 ¶ 𑀯𑀸 𑀢𑀸𑀤𑀺𑀲𑀁,

𑀓𑁂𑀦 𑀓𑀫𑁆𑀫𑁂𑀦 𑀕𑀢𑁄𑀲𑀺 𑀤𑁂𑀯𑀮𑁄𑀓’’𑀦𑁆𑀢𑀺. (𑀯𑀺. 𑀯. 𑁧𑁨𑁧𑁯; 𑀧𑁂. 𑀯. 𑁧𑁯𑁮);

𑀫𑀸𑀡𑀯𑁄 𑀆𑀳 𑁋

‘‘𑀆𑀩𑀸𑀥𑀺𑀓𑁄𑀳𑀁 𑀤𑀼𑀓𑁆𑀔𑀺𑀢𑁄 𑀕𑀺𑀮𑀸𑀦𑁄,

𑀆𑀢𑀽𑀭𑀭𑀽𑀧𑁄𑀫𑁆𑀳𑀺 𑀲𑀓𑁂 𑀦𑀺𑀯𑁂𑀲𑀦𑁂;

𑀩𑀼𑀤𑁆𑀥𑀁 𑀯𑀺𑀕𑀢𑀭𑀚𑀁 𑀯𑀺𑀢𑀺𑀡𑁆𑀡𑀓𑀗𑁆𑀔𑀁,

𑀅𑀤𑁆𑀤𑀓𑁆𑀔𑀺𑀁 𑀲𑀼𑀕𑀢𑀁 𑀅𑀦𑁄𑀫𑀧𑀜𑁆𑀜𑀁.

‘‘𑀲𑁆𑀯𑀸𑀳𑀁 𑀫𑀼𑀤𑀺𑀢𑀥𑀦𑁄 𑀧𑀲𑀦𑁆𑀦𑀘𑀺𑀢𑁆𑀢𑁄,

𑀅𑀜𑁆𑀚𑀮𑀺𑀁 𑀅𑀓𑀭𑀺𑀁 𑀢𑀣𑀸𑀕𑀢𑀲𑁆𑀲;

𑀢𑀸𑀳𑀁 𑀓𑀼𑀲𑀮𑀁 𑀓𑀭𑀺𑀢𑁆𑀯𑀸𑀦 𑀓𑀫𑁆𑀫𑀁,

𑀢𑀺𑀤𑀲𑀸𑀦𑀁 𑀲𑀳𑀩𑁆𑀬𑀢𑀁 𑀕𑀢𑁄’’𑀢𑀺. (𑀯𑀺. 𑀯. 𑁧𑁨𑁨𑁦-𑁧𑁨𑁨𑁧; 𑀧𑁂. 𑀯. 𑁧𑁯𑁯-𑁨𑁦𑁦);

𑀢𑀲𑁆𑀫𑀺𑀁 ¶ 𑀓𑀣𑁂𑀦𑁆𑀢𑁂𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀧𑀭𑀺𑀧𑀽𑀭𑀺. 𑀲𑁄 𑀢𑀁 𑀧𑀻𑀢𑀺𑀁 𑀧𑀯𑁂𑀤𑁂𑀦𑁆𑀢𑁄 𑁋

‘‘𑀅𑀘𑁆𑀙𑀭𑀺𑀬𑀁 𑀯𑀢 𑀅𑀩𑁆𑀪𑀼𑀢𑀁 𑀯𑀢,

𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲 𑀅𑀬𑀫𑀻𑀤𑀺𑀲𑁄 𑀯𑀺𑀧𑀸𑀓𑁄;

𑀅𑀳𑀫𑁆𑀧𑀺 𑀧𑀫𑀼𑀤𑀺𑀢𑀫𑀦𑁄 𑀧𑀲𑀦𑁆𑀦𑀘𑀺𑀢𑁆𑀢𑁄,

𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀯𑀚𑀸𑀫𑀻’’𑀢𑀺. (𑀯𑀺. 𑀯. 𑁧𑁨𑁨𑁨; 𑀧𑁂. 𑀯. 𑁨𑁦𑁧) 𑁋

𑀆𑀳. 𑀅𑀣 𑀦𑀁 𑀫𑀸𑀡𑀯𑁄 𑁋

‘‘𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀯𑀚𑀸𑀳𑀺,

𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀢𑀣𑁂𑀯 ¶ 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀘,

𑀅𑀔𑀡𑁆𑀟𑀨𑀼𑀮𑁆𑀮𑀸𑀦𑀺 𑀲𑀫𑀸𑀤𑀺𑀬𑀲𑁆𑀲𑀼.

𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀲𑁆𑀲𑀼 𑀔𑀺𑀧𑁆𑀧𑀁,

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀅𑀫𑀚𑁆𑀚𑀧𑁄 𑀫𑀸 𑀘 𑀫𑀼𑀲𑀸 𑀪𑀡𑀸𑀳𑀺,

𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀳𑀺 𑀢𑀼𑀝𑁆𑀞𑁄’’𑀢𑀺. (𑀯𑀺. 𑀯. 𑁧𑁨𑁨𑁩-𑁧𑁨𑁨𑁪; 𑀧𑁂. 𑀯. 𑁨𑁦𑁨-𑁨𑁦𑁩) 𑁋

𑀆𑀳 ¶ . 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑁄𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑀼𑀬𑁆𑀳𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫.

‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀅𑀦𑀼𑀢𑁆𑀢𑀭𑀁;

𑀲𑀗𑁆𑀖𑀜𑁆𑀘 𑀦𑀭𑀤𑁂𑀯𑀲𑁆𑀲, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁,

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺,

𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄’’𑀢𑀺. (𑀯𑀺. 𑀯. 𑁧𑁨𑁨𑁫-𑁧𑁨𑁨𑁭; 𑀧𑁂. 𑀯. 𑁨𑁦𑁪-𑁨𑁦𑁬);

𑀅𑀣 ¶ 𑀦𑀁 𑀤𑁂𑀯𑀧𑀼𑀢𑁆𑀢𑁄, ‘‘𑀩𑁆𑀭𑀸𑀳𑁆𑀫𑀡, 𑀢𑁂 𑀕𑁂𑀳𑁂 𑀩𑀳𑀼𑀁 𑀥𑀦𑀁 𑀅𑀢𑁆𑀣𑀺, 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀸𑀦𑀁 𑀤𑁂𑀳𑀺, 𑀥𑀫𑁆𑀫𑀁 𑀲𑀼𑀡𑀸𑀳𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀪𑀤𑁆𑀤𑁂, 𑀅𑀳𑀁 𑀅𑀚𑁆𑀚 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑀓𑁆𑀓𑀸𑀭𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄, ‘‘𑀪𑁄 𑀕𑁄𑀢𑀫, 𑀅𑀥𑀺𑀯𑀸𑀲𑁂𑀳𑀺 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 ¶ 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺, 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂𑀦 𑀓𑀺𑀭 𑀢𑀣𑀸𑀕𑀢𑁂 𑀦𑀺𑀫𑀦𑁆𑀢𑀺𑀢𑁂 𑀤𑁆𑀯𑁂 𑀚𑀦𑀓𑀸𑀬𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 ‘‘𑀅𑀚𑁆𑀚 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑀸𑀬 𑀯𑀺𑀳𑁂𑀞𑀺𑀬𑀫𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 ‘‘𑀅𑀚𑁆𑀚 𑀩𑀼𑀤𑁆𑀥𑀯𑀺𑀲𑀬𑀁 𑀩𑀼𑀤𑁆𑀥𑀮𑀻𑀴𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀢𑀣𑀸𑀕𑀢𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀻𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀪𑁄 𑀕𑁄𑀢𑀫, 𑀢𑀼𑀫𑁆𑀳𑀸𑀓𑀁 𑀤𑀸𑀦𑀁 𑀅𑀤𑀢𑁆𑀯𑀸 𑀧𑀽𑀚𑀁 𑀅𑀓𑀢𑁆𑀯𑀸 𑀥𑀫𑁆𑀫𑀁 𑀅𑀲𑀼𑀢𑁆𑀯𑀸 𑀉𑀧𑁄𑀲𑀣𑀯𑀸𑀲𑀁 𑀅𑀯𑀲𑀺𑀢𑁆𑀯𑀸 𑀓𑁂𑀯𑀮𑀁 𑀫𑀦𑁄𑀧𑀲𑀸𑀤𑀫𑀢𑁆𑀢𑁂𑀦𑁂𑀯 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺? ‘‘𑀩𑁆𑀭𑀸𑀳𑁆𑀫𑀡, 𑀓𑀲𑁆𑀫𑀸 𑀫𑀁 𑀧𑀼𑀘𑁆𑀙𑀲𑀺, 𑀦𑀦𑀼 𑀢𑁂 𑀧𑀼𑀢𑁆𑀢𑁂𑀦 𑀫𑀝𑁆𑀞𑀓𑀼𑀡𑁆𑀟𑀮𑀺𑀦𑀸 𑀫𑀬𑀺 𑀫𑀦𑀁 𑀧𑀲𑀸𑀤𑁂𑀢𑁆𑀯𑀸 ¶ 𑀅𑀢𑁆𑀢𑀦𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁄 𑀓𑀣𑀺𑀢𑁄’’𑀢𑀺? ‘‘𑀓𑀤𑀸, 𑀪𑁄 𑀕𑁄𑀢𑀫𑀸’’𑀢𑀺? 𑀦𑀦𑀼 𑀢𑁆𑀯𑀁 𑀅𑀚𑁆𑀚 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀓𑀦𑁆𑀤𑀦𑁆𑀢𑁄 𑀅𑀯𑀺𑀤𑀽𑀭𑁂 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀁 𑀏𑀓𑀁 𑀫𑀸𑀡𑀯𑀁 𑀤𑀺𑀲𑁆𑀯𑀸 ‘‘𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻, 𑀫𑀸𑀮𑀥𑀸𑀭𑀻 ¶ 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄’’𑀢𑀺 𑀤𑁆𑀯𑀻𑀳𑀺 𑀚𑀦𑁂𑀳𑀺 𑀓𑀣𑀺𑀢𑀓𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀩𑁆𑀩𑀁 𑀫𑀝𑁆𑀞𑀓𑀼𑀡𑁆𑀟𑀮𑀺𑀯𑀢𑁆𑀣𑀼𑀁 𑀓𑀣𑁂𑀲𑀺. 𑀢𑁂𑀦𑁂𑀯𑁂𑀢𑀁 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁.

𑀢𑀁 𑀓𑀣𑁂𑀢𑁆𑀯𑀸 𑀘 𑀧𑀦 ‘‘𑀦 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀓𑀲𑀢𑀁 𑀯𑀸 𑀦 𑀤𑁆𑀯𑁂𑀲𑀢𑀁, 𑀅𑀣 𑀔𑁄 𑀫𑀬𑀺 𑀫𑀦𑀁 𑀧𑀲𑀸𑀤𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀕𑀡𑀦𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀅𑀣 𑀫𑀳𑀸𑀚𑀦𑁄 𑀦 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀺, 𑀅𑀣𑀲𑁆𑀲 𑀅𑀦𑀺𑀩𑁆𑀩𑁂𑀫𑀢𑀺𑀓𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 ‘‘𑀫𑀝𑁆𑀞𑀓𑀼𑀡𑁆𑀟𑀮𑀺𑀤𑁂𑀯𑀧𑀼𑀢𑁆𑀢𑁄 𑀯𑀺𑀫𑀸𑀦𑁂𑀦𑁂𑀯 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂𑀦𑁂𑀯 𑀤𑀺𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁆𑀯𑀁 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀝𑀺𑀮𑀪𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸;

𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. ‘‘𑀤𑁂𑀯𑀧𑀼𑀢𑁆𑀢𑁄 𑀅𑀬𑀁 𑀫𑁂, 𑀪𑀦𑁆𑀢𑁂, 𑀲𑀫𑁆𑀧𑀢𑁆𑀢𑀺 𑀢𑀼𑀫𑁆𑀳𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀮𑀤𑁆𑀥𑀸’’𑀢𑀺. ‘‘𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀮𑀤𑁆𑀥𑀸 𑀢𑁂’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀫𑀳𑀸𑀚𑀦𑁄 𑀤𑁂𑀯𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀸 𑀯𑀢, 𑀪𑁄, 𑀩𑀼𑀤𑁆𑀥𑀕𑀼𑀡𑀸, 𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫 𑀧𑀼𑀢𑁆𑀢𑁄 𑀅𑀜𑁆𑀜𑀁 ¶ 𑀓𑀺𑀜𑁆𑀘𑀺 𑀧𑀼𑀜𑁆𑀜𑀁 𑀅𑀓𑀢𑁆𑀯𑀸 𑀲𑀢𑁆𑀣𑀭𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀻’’𑀢𑀺 𑀢𑀼𑀝𑁆𑀞𑀺𑀁 𑀧𑀯𑁂𑀤𑁂𑀲𑀺.

𑀅𑀣 ¶ 𑀦𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀓𑀭𑀡𑁂 𑀫𑀦𑁄𑀯 𑀧𑀼𑀩𑁆𑀩𑀗𑁆𑀕𑀫𑁄, 𑀫𑀦𑁄𑀯 𑀲𑁂𑀝𑁆𑀞𑁄. 𑀧𑀲𑀦𑁆𑀦𑁂𑀦 𑀳𑀺 𑀫𑀦𑁂𑀦 𑀓𑀢𑀁 𑀓𑀫𑁆𑀫𑀁 𑀤𑁂𑀯𑀮𑁄𑀓𑀁 𑀫𑀦𑀼𑀲𑁆𑀲𑀮𑁄𑀓𑀁 𑀕𑀘𑁆𑀙𑀦𑁆𑀢𑀁 𑀧𑀼𑀕𑁆𑀕𑀮𑀁 𑀙𑀸𑀬𑀸𑀯 𑀦 𑀯𑀺𑀚𑀳𑀢𑀻𑀢𑀺 𑀇𑀤𑀁 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑀺𑀢𑀫𑀢𑁆𑀢𑀺𑀓𑀁 𑀲𑀸𑀲𑀦𑀁 𑀭𑀸𑀚𑀫𑀼𑀤𑁆𑀤𑀸𑀬 𑀮𑀜𑁆𑀙𑀦𑁆𑀢𑁄 𑀯𑀺𑀬 𑀥𑀫𑁆𑀫𑀭𑀸𑀚𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨. ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸.

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺.

𑀢𑀢𑁆𑀣 ¶ 𑀓𑀺𑀜𑁆𑀘𑀸𑀧𑀺 𑀫𑀦𑁄𑀢𑀺 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀘𑀢𑀼𑀪𑀽𑀫𑀺𑀓𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀧𑀤𑁂 𑀦𑀺𑀬𑀫𑀺𑀬𑀫𑀸𑀦𑀁 𑀯𑀯𑀢𑁆𑀣𑀸𑀧𑀺𑀬𑀫𑀸𑀦𑀁 𑀧𑀭𑀺𑀘𑁆𑀙𑀺𑀚𑁆𑀚𑀺𑀬𑀫𑀸𑀦𑀁 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀁 𑀮𑀩𑁆𑀪𑀢𑀺. 𑀯𑀢𑁆𑀣𑀼𑀯𑀲𑁂𑀦 𑀧𑀦𑀸𑀳𑀭𑀺𑀬𑀫𑀸𑀦𑀁 𑀢𑀢𑁄𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀢𑁂𑀦 𑀧𑀞𑀫𑀕𑀸𑀫𑀺𑀦𑀸 𑀳𑀼𑀢𑁆𑀯𑀸 𑀲𑀫𑀦𑁆𑀦𑀸𑀕𑀢𑀸. 𑀥𑀫𑁆𑀫𑀸𑀢𑀺 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀏𑀢𑁂 𑀳𑀺 𑀉𑀧𑁆𑀧𑀸𑀤𑀧𑀘𑁆𑀘𑀬𑀝𑁆𑀞𑁂𑀦 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀦𑀸𑀫. 𑀬𑀣𑀸 𑀳𑀺 𑀩𑀳𑀽𑀲𑀼 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀤𑀸𑀦𑀸𑀤𑀻𑀦𑀺 𑀯𑀸 𑀉𑀴𑀸𑀭𑀧𑀽𑀚𑀸𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀺 𑀯𑀸 𑀫𑀸𑀮𑀸𑀕𑀦𑁆𑀥𑀲𑀓𑁆𑀓𑀸𑀭𑀓𑀭𑀡𑀸𑀤𑀻𑀦𑀺 𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁂𑀲𑀼 ‘‘𑀓𑁄 𑀏𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 𑀯𑀼𑀢𑁆𑀢𑁂 𑀬𑁄 𑀢𑁂𑀲𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀁 𑀦𑀺𑀲𑁆𑀲𑀸𑀬 𑀢𑁂 𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀲𑁄 𑀢𑀺𑀲𑁆𑀲𑁄 𑀯𑀸 𑀨𑀼𑀲𑁆𑀲𑁄 𑀯𑀸 𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀉𑀧𑁆𑀧𑀸𑀤𑀧𑀘𑁆𑀘𑀬𑀝𑁆𑀞𑁂𑀦 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀏𑀢𑁂𑀲𑀦𑁆𑀢𑀺 ¶ 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀦 𑀳𑀺 𑀢𑁂 𑀫𑀦𑁂 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀫𑀦𑁄 𑀧𑀦 𑀏𑀓𑀘𑁆𑀘𑁂𑀲𑀼 𑀘𑁂𑀢𑀲𑀺𑀓𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀏𑀯𑀁 𑀅𑀥𑀺𑀧𑀢𑀺𑀯𑀲𑁂𑀦 𑀧𑀦 𑀫𑀦𑁄 𑀲𑁂𑀝𑁆𑀞𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀲𑁂𑀝𑁆𑀞𑀸. 𑀬𑀣𑀸 𑀳𑀺 𑀕𑀡𑀸𑀤𑀻𑀦𑀁 𑀅𑀥𑀺𑀧𑀢𑀺 𑀧𑀼𑀭𑀺𑀲𑁄 𑀕𑀡𑀲𑁂𑀝𑁆𑀞𑁄 𑀲𑁂𑀡𑀺𑀲𑁂𑀝𑁆𑀞𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀢𑁂𑀲𑀫𑁆𑀧𑀺 𑀫𑀦𑁄𑀯 𑀲𑁂𑀝𑁆𑀞𑁄. 𑀬𑀣𑀸 𑀧𑀦 𑀲𑀼𑀯𑀡𑁆𑀡𑀸𑀤𑀻𑀳𑀺 𑀦𑀺𑀧𑁆𑀨𑀸𑀤𑀺𑀢𑀸𑀦𑀺 𑀪𑀡𑁆𑀟𑀸𑀦𑀺 𑀲𑀼𑀯𑀡𑁆𑀡𑀫𑀬𑀸𑀤𑀻𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀣𑀸 𑀏𑀢𑁂𑀧𑀺 𑀫𑀦𑀢𑁄 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀫𑀦𑁄𑀫𑀬𑀸 𑀦𑀸𑀫.

𑀧𑀲𑀦𑁆𑀦𑁂𑀦𑀸𑀢𑀺 𑀅𑀦𑀪𑀺𑀚𑁆𑀛𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀲𑀦𑁆𑀦𑁂𑀦. 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸𑀢𑀺 𑀏𑀯𑀭𑀽𑀧𑁂𑀦 𑀫𑀦𑁂𑀦 𑀪𑀸𑀲𑀦𑁆𑀢𑁄 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀫𑁂𑀯 𑀪𑀸𑀲𑀢𑀺, 𑀓𑀭𑁄𑀦𑁆𑀢𑁄 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀫𑁂𑀯 𑀓𑀭𑁄𑀢𑀺, 𑀅𑀪𑀸𑀲𑀦𑁆𑀢𑁄 𑀅𑀓𑀭𑁄𑀦𑁆𑀢𑁄 𑀢𑀸𑀬 𑀅𑀦𑀪𑀺𑀚𑁆𑀛𑀸𑀤𑀻𑀳𑀺 𑀧𑀲𑀦𑁆𑀦𑀫𑀸𑀦𑀲𑀢𑀸𑀬 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀧𑀽𑀭𑁂𑀢𑀺. 𑀏𑀯𑀫𑀲𑁆𑀲 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀢𑀢𑁄 𑀢𑀺𑀯𑀺𑀥𑀲𑀼𑀘𑀭𑀺𑀢𑀢𑁄 𑀦𑀁 𑀧𑀼𑀕𑁆𑀕𑀮𑀁 𑀲𑀼𑀔 𑀫𑀦𑁆𑀯𑁂𑀢𑀺. 𑀇𑀥 𑀢𑁂𑀪𑀽𑀫𑀺𑀓𑀫𑁆𑀧𑀺 ¶ 𑀓𑀼𑀲𑀮𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀢𑁂𑀪𑀽𑀫𑀺𑀓𑀲𑀼𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀲𑀼𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀁 𑀧𑀼𑀕𑁆𑀕𑀮𑀁, 𑀤𑀼𑀕𑁆𑀕𑀢𑀺𑀬𑀁 𑀯𑀸 𑀲𑀼𑀔𑀸𑀦𑀼𑀪𑀯𑀦𑀝𑁆𑀞𑀸𑀦𑁂 𑀞𑀺𑀢𑀁 𑀓𑀸𑀬𑀯𑀢𑁆𑀣𑀼𑀓𑀫𑁆𑀧𑀺 𑀇𑀢𑀭𑀯𑀢𑁆𑀣𑀼𑀓𑀫𑁆𑀧𑀺 𑀅𑀯𑀢𑁆𑀣𑀼𑀓𑀫𑁆𑀧𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀯𑀺𑀧𑀸𑀓𑀲𑀼𑀔𑀁 𑀅𑀦𑀼𑀕𑀘𑁆𑀙𑀢𑀺, 𑀦 𑀯𑀺𑀚𑀳𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀓𑀺𑀁? 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻𑀢𑀺 𑀬𑀣𑀸 𑀳𑀺 𑀙𑀸𑀬𑀸 𑀦𑀸𑀫 𑀲𑀭𑀻𑀭𑀧𑁆𑀧𑀝𑀺𑀩𑀤𑁆𑀥𑀸 𑀲𑀭𑀻𑀭𑁂 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀦𑁆𑀢𑁂 𑀢𑀺𑀝𑁆𑀞𑀢𑀺 ¶ , 𑀦𑀺𑀲𑀻𑀤𑀦𑁆𑀢𑁂 𑀦𑀺𑀲𑀻𑀤𑀢𑀺, 𑀦 𑀲𑀓𑁆𑀓𑁄𑀢𑀺, ‘‘𑀲𑀡𑁆𑀳𑁂𑀦 𑀯𑀸 𑀨𑀭𑀼𑀲𑁂𑀦 ¶ 𑀯𑀸 𑀦𑀺𑀯𑀢𑁆𑀢𑀸𑀳𑀻’’𑀢𑀺 𑀯𑀢𑁆𑀯𑀸 𑀯𑀸 𑀧𑁄𑀣𑁂𑀢𑁆𑀯𑀸 𑀯𑀸 𑀦𑀺𑀯𑀢𑁆𑀢𑀸𑀧𑁂𑀢𑀼𑀁. 𑀓𑀲𑁆𑀫𑀸? 𑀲𑀭𑀻𑀭𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸. 𑀏𑀯𑀫𑁂𑀯 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀓𑀼𑀲𑀮𑀫𑀽𑀮𑀺𑀓𑀁 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀕𑀢𑀕𑀢𑀝𑁆𑀞𑀸𑀦𑁂 𑀅𑀦𑀧𑀸𑀬𑀺𑀦𑀻 𑀙𑀸𑀬𑀸 𑀯𑀺𑀬 𑀳𑀼𑀢𑁆𑀯𑀸 𑀦 𑀯𑀺𑀚𑀳𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀫𑀝𑁆𑀞𑀓𑀼𑀡𑁆𑀟𑀮𑀺𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀢𑀣𑀸 𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑁄 𑀩𑁆𑀭𑀸𑀳𑁆𑀫𑀡𑁄. 𑀲𑁄 𑀢𑀸𑀯𑀫𑀳𑀦𑁆𑀢𑀁 𑀯𑀺𑀪𑀯𑀁 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀧𑁆𑀧𑀓𑀺𑀭𑀻𑀢𑀺.

𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀅𑀓𑁆𑀓𑁄𑀘𑁆𑀙𑀺 𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭𑀸𑀬𑀲𑁆𑀫𑀸 𑀢𑀺𑀲𑁆𑀲𑀢𑁆𑀣𑁂𑀭𑁄 𑀪𑀕𑀯𑀢𑁄 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀮𑀸𑀪𑀲𑀓𑁆𑀓𑀸𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀣𑀽𑀮𑀲𑀭𑀻𑀭𑁄 𑀆𑀓𑁄𑀝𑀺𑀢𑀧𑀘𑁆𑀘𑀸𑀓𑁄𑀝𑀺𑀢𑁂𑀳𑀺 𑀘𑀻𑀯𑀭𑁂𑀳𑀺 𑀦𑀺𑀯𑀸𑀲𑁂𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀯𑀺𑀳𑀸𑀭𑀫𑀚𑁆𑀛𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀢𑀺. 𑀢𑀣𑀸𑀕𑀢𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀸 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 ‘‘𑀏𑀓𑁄 𑀫𑀳𑀸𑀣𑁂𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀢𑁆𑀢𑀁 𑀆𑀧𑀼𑀘𑁆𑀙𑀦𑁆𑀢𑀺, 𑀧𑀸𑀤𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀆𑀧𑀼𑀘𑁆𑀙𑀦𑁆𑀢𑀺. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀦𑀁 𑀏𑀓𑁄 𑀤𑀳𑀭𑀪𑀺𑀓𑁆𑀔𑀼 ‘‘𑀓𑀢𑀺𑀯𑀲𑁆𑀲𑀸 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀲𑁆𑀲𑀁 𑀦𑀢𑁆𑀣𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑀸 𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀯𑀼𑀲𑁄, 𑀤𑀼𑀩𑁆𑀩𑀺𑀦𑀻𑀢, 𑀫𑀳𑀮𑁆𑀮𑀓 ¶ , 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀺, 𑀏𑀢𑁆𑀢𑀓𑁂 𑀫𑀳𑀸𑀣𑁂𑀭𑁂 𑀤𑀺𑀲𑁆𑀯𑀸 𑀲𑀸𑀫𑀻𑀘𑀺𑀓𑀫𑁆𑀫𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀲𑀺, 𑀯𑀢𑁆𑀢𑁂 𑀆𑀧𑀼𑀘𑁆𑀙𑀺𑀬𑀫𑀸𑀦𑁂 𑀢𑀼𑀡𑁆𑀳𑀻 𑀳𑁄𑀲𑀺, 𑀓𑀼𑀓𑁆𑀓𑀼𑀘𑁆𑀘𑀫𑀢𑁆𑀢𑀫𑁆𑀧𑀺 𑀢𑁂 𑀦𑀢𑁆𑀣𑀻’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀲𑁄 𑀔𑀢𑁆𑀢𑀺𑀬𑀫𑀸𑀦𑀁 𑀚𑀦𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀁 𑀧𑀦 ‘𑀓𑁄 𑀏𑀲𑁄’𑀢𑀺 𑀲𑀮𑁆𑀮𑀓𑁆𑀔𑁂𑀣, 𑀫𑀽𑀮𑀫𑁂𑀯 𑀯𑁄 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀼𑀤𑀦𑁆𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺 ¶ . 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀢𑁆𑀯𑀁 𑀢𑀺𑀲𑁆𑀲 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀫𑀸𑀦𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑁂𑀧𑀺 𑀪𑀺𑀓𑁆𑀔𑀽 ‘‘𑀏𑀲 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺 𑀆𑀮𑁄𑀴𑀁 𑀓𑀭𑁂𑀬𑁆𑀬𑀸’’𑀢𑀺 𑀢𑁂𑀦𑁂𑀯 ¶ 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑁄 𑀲𑀢𑁆𑀣𑀸𑀭𑀸 𑀧𑀼𑀘𑁆𑀙𑀺𑀢𑁄 ‘‘𑀇𑀫𑁂 𑀫𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀦𑁆𑀢𑀻’’𑀢𑀺 𑀆𑀳. ‘‘𑀓𑀳𑀁 𑀧𑀦 𑀢𑁆𑀯𑀁 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺? ‘‘𑀯𑀺𑀳𑀸𑀭𑀫𑀚𑁆𑀛𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁, 𑀪𑀦𑁆𑀢𑁂’’𑀢𑀺. ‘‘𑀇𑀫𑁂 𑀢𑁂 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀸 𑀤𑀺𑀝𑁆𑀞𑀸’’𑀢𑀺? ‘‘𑀆𑀫, 𑀤𑀺𑀝𑁆𑀞𑀸, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀉𑀝𑁆𑀞𑀸𑀬 𑀢𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢’’𑀦𑁆𑀢𑀺? ‘‘𑀦 𑀓𑀢𑀁, 𑀪𑀦𑁆𑀢𑁂’’𑀢𑀺. ‘‘𑀧𑀭𑀺𑀓𑁆𑀔𑀸𑀭𑀕𑁆𑀕𑀳𑀡𑀁 𑀆𑀧𑀼𑀘𑁆𑀙𑀺𑀢’’𑀦𑁆𑀢𑀺? ‘‘𑀦𑀸𑀧𑀼𑀘𑁆𑀙𑀺𑀢𑀁, 𑀪𑀦𑁆𑀢𑁂’’𑀢𑀺. ‘‘𑀯𑀢𑁆𑀢𑀁 𑀯𑀸 𑀧𑀸𑀦𑀻𑀬𑀁 𑀯𑀸 𑀆𑀧𑀼𑀘𑁆𑀙𑀺𑀢’’𑀦𑁆𑀢𑀺. ‘‘𑀦𑀸𑀧𑀼𑀘𑁆𑀙𑀺𑀢𑀁 𑀪𑀦𑁆𑀢𑁂’’𑀢𑀺? ‘‘𑀆𑀲𑀦𑀁 𑀦𑀻𑀳𑀭𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀸𑀤𑀲𑀫𑁆𑀩𑀸𑀳𑀦𑀁 𑀓𑀢’’𑀦𑁆𑀢𑀺? ‘‘𑀦 𑀓𑀢𑀁, 𑀪𑀦𑁆𑀢𑁂’’𑀢𑀺. ‘‘𑀢𑀺𑀲𑁆𑀲 𑀫𑀳𑀮𑁆𑀮𑀓𑀪𑀺𑀓𑁆𑀔𑀽𑀦𑀁 𑀲𑀩𑁆𑀩𑀁 𑀏𑀢𑀁 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀏𑀢𑀁 𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁂𑀦 𑀯𑀺𑀳𑀸𑀭𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀯𑁂𑀯 𑀤𑁄𑀲𑁄, 𑀏𑀢𑁂 𑀪𑀺𑀓𑁆𑀔𑀽 𑀔𑀫𑀸𑀧𑁂𑀳𑀻’’𑀢𑀺? ‘‘𑀏𑀢𑁂 𑀫𑀁, 𑀪𑀦𑁆𑀢𑁂, 𑀅𑀓𑁆𑀓𑁄𑀲𑀺𑀁𑀲𑀼 ¶ , 𑀦𑀸𑀳𑀁 𑀏𑀢𑁂 𑀔𑀫𑀸𑀧𑁂𑀫𑀻’’𑀢𑀺. ‘‘𑀢𑀺𑀲𑁆𑀲 𑀫𑀸 𑀏𑀯𑀁 𑀓𑀭𑀺, 𑀢𑀯𑁂𑀯 𑀤𑁄𑀲𑁄, 𑀔𑀫𑀸𑀧𑁂𑀳𑀺 𑀦𑁂’’𑀢𑀺? ‘‘𑀦 𑀔𑀫𑀸𑀧𑁂𑀫𑀺, 𑀪𑀦𑁆𑀢𑁂’’𑀢𑀺. 𑀅𑀣 𑀲𑀢𑁆𑀣𑀸 ‘‘𑀤𑀼𑀩𑁆𑀩𑀘𑁄 𑀏𑀲, 𑀪𑀦𑁆𑀢𑁂’’𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑀼𑀩𑁆𑀩𑀘𑁄 𑀏𑀲, 𑀧𑀼𑀩𑁆𑀩𑁂𑀧𑀺 𑀏𑀲 𑀤𑀼𑀩𑁆𑀩𑀘𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀸𑀯𑀲𑁆𑀲, 𑀪𑀦𑁆𑀢𑁂, 𑀤𑀼𑀩𑁆𑀩𑀘𑀪𑀸𑀯𑁄 𑀅𑀫𑁆𑀳𑁂𑀳𑀺 𑀜𑀸𑀢𑁄, 𑀅𑀢𑀻𑀢𑁂 𑀏𑀲 𑀓𑀺𑀁 𑀅𑀓𑀸𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀫𑀸𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀤𑁂𑀯𑀺𑀮𑁄 𑀦𑀸𑀫 𑀢𑀸𑀧𑀲𑁄 𑀅𑀝𑁆𑀞 𑀫𑀸𑀲𑁂 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀕𑀭𑀫𑀼𑀧𑀦𑀺𑀲𑁆𑀲𑀸𑀬 𑀯𑀲𑀺𑀢𑀼𑀓𑀸𑀫𑁄 𑀳𑀺𑀫𑀯𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀇𑀫𑀁 𑀦𑀕𑀭𑀁 𑀲𑀫𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀸 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺? ‘‘𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁, 𑀪𑀦𑁆𑀢𑁂’’𑀢𑀺. 𑀢𑀸𑀧𑀲𑁄 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀲𑀘𑁂 𑀢𑁂 𑀪𑀕𑁆𑀕𑀯 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀺𑀁 𑀲𑀸𑀮𑀸𑀬’’𑀦𑁆𑀢𑀺 𑀆𑀳. 𑀓𑀼𑀫𑁆𑀪𑀓𑀸𑀭𑁄 ‘‘𑀫𑀬𑁆𑀳𑀁 𑀭𑀢𑁆𑀢𑀺𑀁 𑀲𑀸𑀮𑀸𑀬𑀁 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀳𑀢𑀻 𑀲𑀸𑀮𑀸, 𑀬𑀣𑀸𑀲𑀼𑀔𑀁 𑀯𑀲𑀣, 𑀪𑀦𑁆𑀢𑁂’’𑀢𑀺 𑀲𑀸𑀮𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀢𑀲𑁆𑀫𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀧𑀭𑁄𑀧𑀺 𑀦𑀸𑀭𑀤𑁄 𑀦𑀸𑀫 𑀢𑀸𑀧𑀲𑁄 𑀳𑀺𑀫𑀯𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀁 𑀏𑀓𑀭𑀢𑁆𑀢𑀺𑀯𑀸𑀲𑀁 𑀬𑀸𑀘𑀺. 𑀓𑀼𑀫𑁆𑀪𑀓𑀸𑀭𑁄 ‘‘𑀧𑀞𑀫𑀁 𑀆𑀕𑀢𑁄 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀺𑀢𑀼𑀓𑀸𑀫𑁄 𑀪𑀯𑁂𑀬𑁆𑀬 𑀯𑀸 𑀦𑁄 𑀯𑀸, 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀘𑁂, 𑀪𑀦𑁆𑀢𑁂, 𑀧𑀞𑀫𑀁 𑀉𑀧𑀕𑀢𑁄 𑀭𑁄𑀘𑁂𑀲𑁆𑀲𑀢𑀺, 𑀢𑀲𑁆𑀲 𑀭𑀼𑀘𑀺𑀬𑀸 𑀯𑀲𑀣𑀸’’𑀢𑀺 𑀆𑀳. 𑀲𑁄 𑀢𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀘𑁂 𑀢𑁂, 𑀆𑀘𑀭𑀺𑀬 𑀅𑀕𑀭𑀼, 𑀫𑀬𑀜𑁆𑀘𑁂𑀢𑁆𑀣 𑀏𑀓𑀭𑀢𑁆𑀢𑀺𑀁 𑀯𑀲𑁂𑀬𑁆𑀬𑀸𑀫𑀸’’𑀢𑀺 𑀬𑀸𑀘𑀺. ‘‘𑀫𑀳𑀢𑀻 𑀲𑀸𑀮𑀸, 𑀧𑀯𑀺𑀲𑀺𑀢𑁆𑀯𑀸 ¶ 𑀏𑀓𑀫𑀦𑁆𑀢𑁂 𑀯𑀲𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑁂𑀢𑀭𑀁 𑀧𑀯𑀺𑀝𑁆𑀞𑀲𑁆𑀲 𑀤𑁂𑀯𑀺𑀮𑀲𑁆𑀲 𑀅𑀧𑀭𑀪𑀸𑀕𑁂 𑀦𑀺𑀲𑀻𑀤𑀺. 𑀉𑀪𑁄𑀧𑀺 𑀲𑀸𑀭𑀡𑀻𑀬𑀓𑀣𑀁 𑀓𑀣𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼.

𑀲𑀬𑀦𑀓𑀸𑀮𑁂 ¶ 𑀦𑀸𑀭𑀤𑁄 𑀤𑁂𑀯𑀺𑀮𑀲𑁆𑀲 𑀦𑀺𑀧𑀚𑁆𑀚𑀦𑀝𑁆𑀞𑀸𑀦𑀜𑁆𑀘 𑀤𑁆𑀯𑀸𑀭𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑁄 𑀧𑀦 𑀤𑁂𑀯𑀺𑀮𑁄 𑀦𑀺𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑁄 𑀦𑀺𑀧𑀚𑁆𑀚𑀦𑀝𑁆𑀞𑀸𑀦𑁂 𑀅𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑁆𑀯𑀸𑀭𑀫𑀚𑁆𑀛𑁂 𑀢𑀺𑀭𑀺𑀬𑀁 𑀦𑀺𑀧𑀚𑁆𑀚𑀺. 𑀦𑀸𑀭𑀤𑁄 𑀭𑀢𑁆𑀢𑀺𑀁 𑀦𑀺𑀓𑁆𑀔𑀫𑀦𑁆𑀢𑁄 𑀢𑀲𑁆𑀲 𑀚𑀝𑀸𑀲𑀼 𑀅𑀓𑁆𑀓𑀫𑀺. ‘‘𑀓𑁄 𑀫𑀁 𑀅𑀓𑁆𑀓𑀫𑀻’’𑀢𑀺 𑀘 𑀯𑀼𑀢𑁆𑀢𑁂, ‘‘𑀆𑀘𑀭𑀺𑀬, 𑀅𑀳’’𑀦𑁆𑀢𑀺 𑀆𑀳. ‘‘𑀓𑀽𑀝𑀚𑀝𑀺𑀮, 𑀅𑀭𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀫𑀫 𑀚𑀝𑀸𑀲𑀼 𑀅𑀓𑁆𑀓𑀫𑀲𑀻’’𑀢𑀺. ‘‘𑀆𑀘𑀭𑀺𑀬, 𑀢𑀼𑀫𑁆𑀳𑀸𑀓𑀁 𑀇𑀥 𑀦𑀺𑀧𑀦𑁆𑀦𑀪𑀸𑀯𑀁 𑀦 𑀚𑀸𑀦𑀸𑀫𑀺, 𑀔𑀫𑀣 𑀫𑁂’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀦𑁆𑀤𑀦𑁆𑀢𑀲𑁆𑀲𑁂𑀯 𑀩𑀳𑀺 𑀦𑀺𑀓𑁆𑀔𑀫𑀺. 𑀇𑀢𑀭𑁄 ‘‘𑀅𑀬𑀁 𑀧𑀯𑀺𑀲𑀦𑁆𑀢𑁄𑀧𑀺 𑀫𑀁 𑀅𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀸𑀤𑀝𑁆𑀞𑀸𑀦𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀦𑀸𑀭𑀤𑁄𑀧𑀺 𑀧𑀯𑀺𑀲𑀦𑁆𑀢𑁄 ‘‘𑀧𑀞𑀫𑀁𑀧𑀸𑀳𑀁 𑀆𑀘𑀭𑀺𑀬𑁂 𑀅𑀧𑀭𑀚𑁆𑀛𑀺𑀁, 𑀇𑀤𑀸𑀦𑀺𑀲𑁆𑀲 𑀧𑀸𑀤𑀧𑀲𑁆𑀲𑁂𑀦 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀕𑀻𑀯𑀸𑀬 𑀅𑀓𑁆𑀓𑀫𑀺. ‘‘𑀓𑁄 𑀏𑀲𑁄’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁, 𑀆𑀘𑀭𑀺𑀬𑀸’’𑀢𑀺 𑀯𑀢𑁆𑀯𑀸 ‘‘𑀓𑀽𑀝𑀚𑀝𑀺𑀮, 𑀧𑀞𑀫𑀁 𑀫𑀫 𑀚𑀝𑀸𑀲𑀼 𑀅𑀓𑁆𑀓𑀫𑀺𑀢𑁆𑀯𑀸 𑀇𑀤𑀸𑀦𑀺 𑀕𑀻𑀯𑀸𑀬 𑀅𑀓𑁆𑀓𑀫𑀲𑀺, 𑀅𑀪𑀺𑀲𑀧𑀺𑀲𑁆𑀲𑀸𑀫𑀺 𑀢’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀘𑀭𑀺𑀬, 𑀫𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀦𑀺𑀧𑀦𑁆𑀦𑀪𑀸𑀯𑀁 𑀦 𑀚𑀸𑀦𑀸𑀫𑀺, ‘𑀧𑀞𑀫𑀫𑁆𑀧𑀺 𑀫𑁂 𑀅𑀧𑀭𑀤𑁆𑀥𑀁, 𑀇𑀤𑀸𑀦𑀺 𑀧𑀸𑀤𑀧𑀲𑁆𑀲𑁂𑀦 ¶ 𑀧𑀯𑀺𑀲𑀺𑀲𑁆𑀲𑀸𑀫𑀻’𑀢𑀺 𑀧𑀯𑀺𑀝𑁆𑀞𑁄𑀫𑁆𑀳𑀺, 𑀔𑀫𑀣 𑀫𑁂’’𑀢𑀺 𑀆𑀳. ‘‘𑀓𑀽𑀝𑀚𑀝𑀺𑀮, 𑀅𑀪𑀺𑀲𑀧𑀺𑀲𑁆𑀲𑀸𑀫𑀺 𑀢’’𑀦𑁆𑀢𑀺. ‘‘𑀫𑀸 𑀏𑀯𑀁 𑀓𑀭𑀺𑀢𑁆𑀣 𑀆𑀘𑀭𑀺𑀬𑀸’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑁋

‘‘𑀲𑀳𑀲𑁆𑀲𑀭𑀁𑀲𑀻 𑀲𑀢𑀢𑁂𑀚𑁄, 𑀲𑀽𑀭𑀺𑀬𑁄 𑀢𑀫𑀯𑀺𑀦𑁄𑀤𑀦𑁄;

𑀧𑀸𑀢𑁄𑀤𑀬𑀦𑁆𑀢𑁂 𑀲𑀽𑀭𑀺𑀬𑁂, 𑀫𑀼𑀤𑁆𑀥𑀸 𑀢𑁂 𑀨𑀮𑀢𑀼 𑀲𑀢𑁆𑀢𑀥𑀸’’𑀢𑀺. 𑁋

𑀢𑀁 𑀅𑀪𑀺𑀲𑀧𑀺 𑀏𑀯. 𑀦𑀸𑀭𑀤𑁄, ‘‘𑀆𑀘𑀭𑀺𑀬, 𑀫𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀫𑀫 𑀯𑀤𑀦𑁆𑀢𑀲𑁆𑀲𑁂𑀯 𑀢𑀼𑀫𑁆𑀳𑁂 𑀅𑀪𑀺𑀲𑀧𑀣, 𑀬𑀲𑁆𑀲 𑀤𑁄𑀲𑁄 𑀅𑀢𑁆𑀣𑀺, 𑀢𑀲𑁆𑀲 𑀫𑀼𑀤𑁆𑀥𑀸 𑀨𑀮𑀢𑀼, 𑀫𑀸 𑀦𑀺𑀤𑁆𑀤𑁄𑀲𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑁋

‘‘𑀲𑀳𑀲𑁆𑀲𑀭𑀁𑀲𑀻 𑀲𑀢𑀢𑁂𑀚𑁄, 𑀲𑀽𑀭𑀺𑀬𑁄 𑀢𑀫𑀯𑀺𑀦𑁄𑀤𑀦𑁄;

𑀧𑀸𑀢𑁄𑀤𑀬𑀦𑁆𑀢𑁂 𑀲𑀽𑀭𑀺𑀬𑁂, 𑀫𑀼𑀤𑁆𑀥𑀸 𑀢𑁂 𑀨𑀮𑀢𑀼 𑀲𑀢𑁆𑀢𑀥𑀸’’𑀢𑀺. 𑁋

𑀅𑀪𑀺𑀲𑀧𑀺. 𑀲𑁄 𑀧𑀦 𑀫𑀳𑀸𑀦𑀼𑀪𑀸𑀯𑁄 𑀅𑀢𑀻𑀢𑁂 𑀘𑀢𑁆𑀢𑀸𑀮𑀻𑀲, 𑀅𑀦𑀸𑀕𑀢𑁂 𑀘𑀢𑁆𑀢𑀸𑀮𑀻𑀲𑀸𑀢𑀺 𑀅𑀲𑀻𑀢𑀺𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀢𑀺. 𑀢𑀲𑁆𑀫𑀸 ‘‘𑀓𑀲𑁆𑀲 𑀦𑀼 𑀔𑁄 𑀉𑀧𑀭𑀺 𑀅𑀪𑀺𑀲𑀧𑁄 𑀧𑀢𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀆𑀘𑀭𑀺𑀬𑀲𑁆𑀲𑀸’’𑀢𑀺 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀇𑀤𑁆𑀥𑀺𑀩𑀮𑁂𑀦 𑀅𑀭𑀼𑀡𑀼𑀕𑁆𑀕𑀫𑀦𑀁 𑀦𑀺𑀯𑀸𑀭𑁂𑀢𑀺.

𑀦𑀸𑀕𑀭𑀸 ¶ 𑀅𑀭𑀼𑀡𑁂 𑀅𑀦𑀼𑀕𑁆𑀕𑀘𑁆𑀙𑀦𑁆𑀢𑁂 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀢𑀬𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀭𑀼𑀡𑁄 𑀦 𑀉𑀝𑁆𑀞𑀳𑀢𑀺, 𑀅𑀭𑀼𑀡𑀁 𑀦𑁄 𑀉𑀝𑁆𑀞𑀸𑀧𑁂𑀳𑀻’’𑀢𑀺 𑀓𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀅𑀢𑁆𑀢𑀦𑁄 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀑𑀮𑁄𑀓𑁂𑀦𑁆𑀢𑁄 𑀓𑀺𑀜𑁆𑀘𑀺 𑀅𑀬𑀼𑀢𑁆𑀢𑀁 𑀅𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀯𑀺𑀯𑀸𑀤𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 ¶ 𑀧𑀭𑀺𑀲𑀗𑁆𑀓𑀫𑀸𑀦𑁄 ‘‘𑀓𑀘𑁆𑀘𑀺 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀩𑁆𑀩𑀚𑀺𑀢𑀸 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀳𑀺𑀬𑁆𑀬𑁄 𑀲𑀸𑀬𑀁 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁 𑀆𑀕𑀢𑀸 𑀅𑀢𑁆𑀣𑀺 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀢𑀁𑀔𑀡𑀜𑁆𑀜𑁂𑀯 𑀭𑀸𑀚𑀸 ¶ 𑀉𑀓𑁆𑀓𑀸𑀳𑀺 𑀥𑀸𑀭𑀺𑀬𑀫𑀸𑀦𑀸𑀳𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀸𑀭𑀤𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀆𑀳 𑁋

‘‘𑀓𑀫𑁆𑀫𑀦𑁆𑀢𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑀲𑁆𑀲 𑀦𑀸𑀭𑀤;

𑀓𑁂𑀦 𑀮𑁄𑀓𑁄 𑀢𑀫𑁄𑀪𑀽𑀢𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀦𑀸𑀭𑀤𑁄 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀳𑀁 𑀇𑀫𑀺𑀦𑀸 𑀅𑀪𑀺𑀲𑀧𑀺𑀢𑁄, 𑀅𑀣𑀸𑀳𑀁 ‘‘𑀫𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀬𑀲𑁆𑀲 𑀤𑁄𑀲𑁄 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀉𑀧𑀭𑀺 𑀅𑀪𑀺𑀲𑀧𑁄 𑀧𑀢𑀢𑀽’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀧𑀺𑀁. 𑀅𑀪𑀺𑀲𑀧𑀺𑀢𑁆𑀯𑀸 𑀘 𑀧𑀦 ‘‘𑀓𑀲𑁆𑀲 𑀦𑀼 𑀔𑁄 𑀉𑀧𑀭𑀺 𑀅𑀪𑀺𑀲𑀧𑁄 𑀧𑀢𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬 𑀆𑀘𑀭𑀺𑀬𑀲𑁆𑀲 𑀫𑀼𑀤𑁆𑀥𑀸 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀏𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀅𑀭𑀼𑀡𑀲𑁆𑀲 𑀉𑀕𑁆𑀕𑀫𑀦𑀁 𑀦 𑀤𑁂𑀫𑀻𑀢𑀺. ‘‘𑀓𑀣𑀁 𑀧𑀦 𑀅𑀲𑁆𑀲, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀬𑁄 𑀦 𑀪𑀯𑁂𑀬𑁆𑀬𑀸’’𑀢𑀺. ‘‘𑀲𑀘𑁂 𑀫𑀁 𑀔𑀫𑀸𑀧𑁂𑀬𑁆𑀬, 𑀦 𑀪𑀯𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺 𑀔𑀫𑀸𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀏𑀲𑁄, 𑀫𑀳𑀸𑀭𑀸𑀚, 𑀫𑀁 𑀚𑀝𑀸𑀲𑀼 𑀘 𑀕𑀻𑀯𑀸𑀬 𑀘 𑀅𑀓𑁆𑀓𑀫𑀺, 𑀦𑀸𑀳𑀁 𑀏𑀢𑀁 𑀓𑀽𑀝𑀚𑀝𑀺𑀮𑀁 𑀔𑀫𑀸𑀧𑁂𑀫𑀻’’𑀢𑀺. ‘‘𑀔𑀫𑀸𑀧𑁂𑀳𑀺, 𑀪𑀦𑁆𑀢𑁂, 𑀫𑀸 𑀏𑀯𑀁 𑀓𑀭𑀺𑀢𑁆𑀣𑀸’’𑀢𑀺. ‘‘𑀦 𑀔𑀫𑀸𑀧𑁂𑀫𑀻’’𑀢𑀺. ‘‘𑀫𑀼𑀤𑁆𑀥𑀸 𑀢𑁂 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀔𑀫𑀸𑀧𑁂𑀢𑀺𑀬𑁂𑀯. 𑀅𑀣 𑀦𑀁 𑀭𑀸𑀚𑀸 ‘‘𑀦 𑀢𑁆𑀯𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀫𑀸𑀧𑁂𑀲𑁆𑀲𑀲𑀻’’𑀢𑀺 𑀳𑀢𑁆𑀣𑀧𑀸𑀤𑀓𑀼𑀘𑁆𑀙𑀺𑀕𑀻𑀯𑀸𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀦𑀸𑀭𑀤𑀲𑁆𑀲 𑀧𑀸𑀤𑀫𑀽𑀮𑁂 𑀑𑀦𑀫𑀸𑀧𑁂𑀲𑀺. 𑀦𑀸𑀭𑀤𑁄𑀧𑀺 ‘‘𑀉𑀝𑁆𑀞𑁂𑀳𑀺, 𑀆𑀘𑀭𑀺𑀬, 𑀔𑀫𑀸𑀫𑀺 𑀢𑁂’’𑀢𑀺 𑀯𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀦𑀸𑀬𑀁 𑀬𑀣𑀸𑀫𑀦𑁂𑀦 𑀔𑀫𑀸𑀧𑁂𑀢𑀺, 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 ¶ 𑀏𑀓𑁄 𑀲𑀭𑁄 𑀅𑀢𑁆𑀣𑀺, 𑀢𑀢𑁆𑀣 𑀦𑀁 𑀲𑀻𑀲𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀓𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀧𑀸𑀧𑁂𑀳𑀻’’𑀢𑀺 𑀆𑀳. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀦𑀸𑀭𑀤𑁄 𑀤𑁂𑀯𑀺𑀮𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀫𑀬𑀸 𑀇𑀤𑁆𑀥𑀺𑀬𑀸 𑀯𑀺𑀲𑁆𑀲𑀝𑁆𑀞𑀸𑀬 𑀲𑀽𑀭𑀺𑀬𑀲𑀦𑁆𑀢𑀸𑀧𑁂 𑀉𑀝𑁆𑀞𑀳𑀦𑁆𑀢𑁂 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑁂𑀦 𑀞𑀸𑀦𑁂𑀦 𑀉𑀢𑁆𑀢𑀭𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳. ‘‘𑀢𑀲𑁆𑀲 𑀲𑀽𑀭𑀺𑀬𑀭𑀁𑀲𑀻𑀳𑀺 𑀲𑀁𑀨𑀼𑀝𑁆𑀞𑀫𑀢𑁆𑀢𑁄𑀯 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀨𑀮𑀺, 𑀲𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑁂𑀦 𑀞𑀸𑀦𑁂𑀦 𑀧𑀮𑀸𑀬𑀻’’𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀢𑀤𑀸, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀤𑁂𑀯𑀺𑀮𑁄 𑀢𑀺𑀲𑁆𑀲𑁄, 𑀦𑀸𑀭𑀤𑁄 𑀅𑀳𑀫𑁂𑀯𑀸𑀢𑀺 𑀏𑀯𑀁 𑀢𑀤𑀸𑀧𑁂𑀲 𑀤𑀼𑀩𑁆𑀩𑀘𑁄𑀬𑁂𑀯𑀸’’𑀢𑀺 ¶ 𑀯𑀢𑁆𑀯𑀸 𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀢𑀺𑀲𑁆𑀲, 𑀪𑀺𑀓𑁆𑀔𑀼𑀦𑁄 𑀦𑀸𑀫 ‘𑀅𑀲𑀼𑀓𑁂𑀦𑀸𑀳𑀁 𑀅𑀓𑁆𑀓𑀼𑀝𑁆𑀞𑁄, 𑀅𑀲𑀼𑀓𑁂𑀦 𑀧𑀳𑀝𑁄, 𑀅𑀲𑀼𑀓𑁂𑀦 𑀚𑀺𑀢𑁄, 𑀅𑀲𑀼𑀓𑁄 𑀔𑁄 𑀫𑁂 𑀪𑀡𑁆𑀟𑀁 𑀅𑀳𑀸𑀲𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀯𑁂𑀭𑀁 𑀦𑀸𑀫 𑀦 𑀯𑀽𑀧𑀲𑀫𑁆𑀫𑀢𑀺, 𑀏𑀯𑀁 𑀧𑀦 𑀅𑀦𑀼𑀧𑀦𑀬𑁆𑀳𑀦𑁆𑀢𑀲𑁆𑀲𑁂𑀯 𑀉𑀧𑀲𑀫𑁆𑀫𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩.

‘‘𑀅𑀓𑁆𑀓𑁄𑀘𑁆𑀙𑀺 ¶ 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

𑁪.

‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀻’’𑀢𑀺.

𑀢𑀢𑁆𑀣 𑀅𑀓𑁆𑀓𑁄𑀘𑁆𑀙𑀻𑀢𑀺 𑀅𑀓𑁆𑀓𑁄𑀲𑀺. 𑀅𑀯𑀥𑀻𑀢𑀺 𑀧𑀳𑀭𑀺. 𑀅𑀚𑀺𑀦𑀻𑀢𑀺 ¶ 𑀓𑀽𑀝𑀲𑀓𑁆𑀔𑀺𑀑𑀢𑀸𑀭𑀡𑁂𑀦 𑀯𑀸 𑀯𑀸𑀤𑀧𑀝𑀺𑀯𑀸𑀤𑁂𑀦 𑀯𑀸 𑀓𑀭𑀡𑀼𑀢𑁆𑀢𑀭𑀺𑀬𑀓𑀭𑀡𑁂𑀦 𑀯𑀸 𑀅𑀚𑁂𑀲𑀺. 𑀅𑀳𑀸𑀲𑀺 𑀫𑁂𑀢𑀺 𑀫𑀫 𑀲𑀦𑁆𑀢𑀓𑀁 𑀧𑀢𑁆𑀢𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀅𑀯𑀳𑀭𑀺. 𑀬𑁂 𑀘 𑀢𑀦𑁆𑀢𑀺 𑀬𑁂 𑀓𑁂𑀘𑀺 𑀤𑁂𑀯𑀢𑀸 𑀯𑀸 𑀫𑀦𑀼𑀲𑁆𑀲𑀸 𑀯𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀢𑀁 ‘‘𑀅𑀓𑁆𑀓𑁄𑀘𑁆𑀙𑀺 𑀫’’𑀦𑁆𑀢𑀺𑀆𑀤𑀺𑀯𑀢𑁆𑀣𑀼𑀓𑀁 𑀓𑁄𑀥𑀁 𑀲𑀓𑀝𑀥𑀼𑀭𑀁 𑀯𑀺𑀬 𑀦𑀤𑁆𑀥𑀺𑀦𑀸 𑀧𑀽𑀢𑀺𑀫𑀘𑁆𑀙𑀸𑀤𑀻𑀦𑀺 𑀯𑀺𑀬 𑀘 𑀓𑀼𑀲𑀸𑀤𑀻𑀳𑀺 𑀧𑀼𑀦𑀧𑁆𑀧𑀼𑀦𑀁 𑀯𑁂𑀞𑁂𑀢𑁆𑀯𑀸 𑀉𑀧𑀦𑀬𑁆𑀳𑀦𑁆𑀢𑀺, 𑀢𑁂𑀲𑀁 𑀲𑀓𑀺𑀁 𑀉𑀧𑁆𑀧𑀦𑁆𑀦𑀁 𑀯𑁂𑀭𑀁 𑀦 𑀲𑀫𑁆𑀫𑀢𑀻𑀢𑀺 𑀯𑀽𑀧𑀲𑀫𑁆𑀫𑀢𑀺. 𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀻𑀢𑀺 𑀅𑀲𑀢𑀺𑀬𑀸 𑀅𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀓𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀯𑀲𑁂𑀦 𑀯𑀸 𑀬𑁂 𑀢𑀁 𑀅𑀓𑁆𑀓𑁄𑀲𑀸𑀤𑀺𑀯𑀢𑁆𑀣𑀼𑀓𑀁 𑀓𑁄𑀥𑀁 𑀢𑀬𑀸𑀧𑀺 𑀓𑁄𑀘𑀺 𑀦𑀺𑀤𑁆𑀤𑁄𑀲𑁄 𑀧𑀼𑀭𑀺𑀫𑀪𑀯𑁂 𑀅𑀓𑁆𑀓𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀧𑀳𑀝𑁄 𑀪𑀯𑀺𑀲𑁆𑀲𑀢𑀺, 𑀓𑀽𑀝𑀲𑀓𑁆𑀔𑀺𑀁 𑀑𑀢𑀸𑀭𑁂𑀢𑁆𑀯𑀸 𑀚𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀓𑀲𑁆𑀲𑀘𑀺 𑀢𑁂 𑀧𑀲𑀬𑁆𑀳 𑀓𑀺𑀜𑁆𑀘𑀺 𑀅𑀘𑁆𑀙𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦𑀺𑀤𑁆𑀤𑁄𑀲𑁄 𑀳𑀼𑀢𑁆𑀯𑀸𑀧𑀺 𑀅𑀓𑁆𑀓𑁄𑀲𑀸𑀤𑀻𑀦𑀺 𑀧𑀸𑀧𑀼𑀡𑀸𑀲𑀻𑀢𑀺 𑀏𑀯𑀁 𑀦 𑀉𑀧𑀦𑀬𑁆𑀳𑀦𑁆𑀢𑀺. 𑀢𑁂𑀲𑀼 𑀧𑀫𑀸𑀤𑁂𑀦 𑀉𑀧𑁆𑀧𑀦𑁆𑀦𑀫𑁆𑀧𑀺 𑀯𑁂𑀭𑀁 𑀇𑀫𑀺𑀦𑀸 𑀅𑀦𑀼𑀧𑀦𑀬𑁆𑀳𑀦𑁂𑀦 𑀦𑀺𑀭𑀺𑀦𑁆𑀥𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀯𑀽𑀧𑀲𑀫𑁆𑀫𑀢𑀻𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 ¶ 𑀧𑀸𑀧𑀼𑀡𑀺𑀁𑀲𑀼. 𑀥𑀫𑁆𑀫𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺. 𑀤𑀼𑀩𑁆𑀩𑀘𑁄𑀧𑀺 𑀲𑀼𑀩𑁆𑀩𑀘𑁄𑀬𑁂𑀯 𑀚𑀸𑀢𑁄𑀢𑀺.

𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀓𑀸𑀴𑀬𑀓𑁆𑀔𑀺𑀦𑀻𑀯𑀢𑁆𑀣𑀼

𑀦 𑀳𑀺 𑀯𑁂𑀭𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀯𑀜𑁆𑀛𑀺𑀢𑁆𑀣𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 ¶ 𑀓𑀺𑀭 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑁄 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀔𑁂𑀢𑁆𑀢𑁂 𑀘 𑀖𑀭𑁂 𑀘 𑀲𑀩𑁆𑀩𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑀸𑀯 𑀓𑀭𑁄𑀦𑁆𑀢𑁄 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀓𑀼𑀫𑀸𑀭𑀺𑀓𑀁 𑀢𑁂, 𑀢𑀸𑀢, 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀅𑀫𑁆𑀫 ¶ , 𑀫𑀸 𑀏𑀯𑀁 𑀯𑀤𑁂𑀣, 𑀅𑀳𑀁 𑀬𑀸𑀯𑀚𑀻𑀯𑀁 𑀢𑀼𑀫𑁆𑀳𑁂 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀔𑁂𑀢𑁆𑀢𑁂 𑀘 𑀖𑀭𑁂 𑀘 𑀓𑀺𑀘𑁆𑀘𑀁 𑀢𑁆𑀯𑀫𑁂𑀯 𑀓𑀭𑁄𑀲𑀺, 𑀢𑁂𑀦 𑀫𑀬𑁆𑀳𑀁 𑀘𑀺𑀢𑁆𑀢𑀲𑀼𑀔𑀁 𑀦𑀸𑀫 𑀦 𑀳𑁄𑀢𑀺, 𑀆𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀸 𑀏𑀓𑀁 𑀓𑀼𑀮𑀁 𑀕𑀦𑁆𑀢𑀼𑀓𑀸𑀫𑀸 𑀕𑁂𑀳𑀸 𑀦𑀺𑀓𑁆𑀔𑀫𑀺. 𑀅𑀣 𑀦𑀁 𑀧𑀼𑀢𑁆𑀢𑁄 ‘‘𑀓𑀢𑀭𑀁 𑀓𑀼𑀮𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀓𑀼𑀮𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀕𑀫𑀦𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀁 𑀓𑀼𑀮𑀁 𑀆𑀘𑀺𑀓𑁆𑀔𑀺. 𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀺𑀓𑀁 𑀯𑀸𑀭𑁂𑀢𑁆𑀯𑀸 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁 𑀆𑀦𑁂𑀢𑁆𑀯𑀸 𑀢𑀲𑁆𑀲 𑀖𑀭𑁂 𑀅𑀓𑀸𑀲𑀺. 𑀲𑀸 𑀯𑀜𑁆𑀛𑀸 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸, 𑀧𑀼𑀢𑁆𑀢, 𑀢𑁆𑀯𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀓𑀼𑀫𑀸𑀭𑀺𑀓𑀁 𑀆𑀡𑀸𑀧𑁂𑀲𑀺, 𑀲𑀸 𑀇𑀤𑀸𑀦𑀺 𑀯𑀜𑁆𑀛𑀸 𑀚𑀸𑀢𑀸, 𑀅𑀧𑀼𑀢𑁆𑀢𑀓𑀜𑁆𑀘 𑀦𑀸𑀫 𑀓𑀼𑀮𑀁 𑀯𑀺𑀦𑀲𑁆𑀲𑀢𑀺 ¶ , 𑀧𑀯𑁂𑀡𑀻 𑀦 𑀖𑀝𑀻𑀬𑀢𑀺, 𑀢𑁂𑀦 𑀅𑀜𑁆𑀜𑀁 𑀢𑁂 𑀓𑀼𑀫𑀸𑀭𑀺𑀓𑀁 𑀆𑀦𑁂𑀫𑀻𑀢𑀺. 𑀢𑁂𑀦 ‘‘𑀅𑀮𑀁, 𑀅𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀲𑀺. 𑀯𑀜𑁆𑀛𑀺𑀢𑁆𑀣𑀻 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀼𑀢𑁆𑀢𑀸 𑀦𑀸𑀫 𑀫𑀸𑀢𑀸𑀧𑀺𑀢𑀽𑀦𑀁 𑀯𑀘𑀦𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀇𑀤𑀸𑀦𑀺 𑀅𑀜𑁆𑀜𑀁 𑀯𑀺𑀚𑀸𑀬𑀺𑀦𑀺𑀁 𑀇𑀢𑁆𑀣𑀺𑀁 𑀆𑀦𑁂𑀢𑁆𑀯𑀸 𑀫𑀁 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀺𑀲𑁆𑀲𑀢𑀺. 𑀬𑀁𑀦𑀽𑀦𑀸𑀳𑀁 𑀲𑀬𑀫𑁂𑀯 𑀏𑀓𑀁 𑀓𑀼𑀫𑀸𑀭𑀺𑀓𑀁 𑀆𑀦𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀢𑁆𑀣𑀸𑀬 𑀓𑀼𑀫𑀸𑀭𑀺𑀓𑀁 𑀯𑀸𑀭𑁂𑀢𑁆𑀯𑀸 ‘‘𑀓𑀺𑀁 𑀦𑀸𑀫𑁂𑀢𑀁, 𑀅𑀫𑁆𑀫, 𑀯𑀤𑁂𑀲𑀻’’𑀢𑀺 𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 ‘‘𑀅𑀳𑀁 𑀯𑀜𑁆𑀛𑀸, 𑀅𑀧𑀼𑀢𑁆𑀢𑀓𑀁 𑀦𑀸𑀫 𑀓𑀼𑀮𑀁 𑀯𑀺𑀦𑀲𑁆𑀲𑀢𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀥𑀻𑀢𑀸 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀮𑀪𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀲𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀲𑀸𑀫𑀺𑀓𑀲𑁆𑀲 𑀦𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀆𑀦𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀖𑀭𑁂 𑀅𑀓𑀸𑀲𑀺.

𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑀸𑀬𑀁 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀮𑀪𑀺𑀲𑁆𑀲𑀢𑀺, 𑀅𑀬𑀫𑁂𑀯 𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀤𑀸𑀭𑀓𑀁 𑀦 𑀮𑀪𑀢𑀺, 𑀢𑀣𑁂𑀯 𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀅𑀫𑁆𑀫, 𑀬𑀤𑀸 𑀢𑁂 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀢𑀺, 𑀅𑀣 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀕𑀩𑁆𑀪𑁂 𑀧𑀢𑀺𑀝𑁆𑀞𑀺𑀢𑁂 𑀢𑀲𑁆𑀲𑀸 𑀆𑀭𑁄𑀘𑁂𑀲𑀺. 𑀇𑀢𑀭𑀺𑀲𑁆𑀲𑀸 𑀧𑀦 𑀲𑀸 𑀲𑀬𑀫𑁂𑀯 𑀦𑀺𑀘𑁆𑀘𑀁 𑀬𑀸𑀕𑀼𑀪𑀢𑁆𑀢𑀁 𑀤𑁂𑀢𑀺, 𑀅𑀣𑀲𑁆𑀲𑀸 ¶ 𑀆𑀳𑀸𑀭𑁂𑀦𑁂𑀯 𑀲𑀤𑁆𑀥𑀺𑀁 𑀕𑀩𑁆𑀪𑀧𑀸𑀢𑀦𑀪𑁂𑀲𑀚𑁆𑀚𑀫𑀤𑀸𑀲𑀺, 𑀕𑀩𑁆𑀪𑁄 𑀧𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀕𑀩𑁆𑀪𑁂 𑀧𑀢𑀺𑀝𑁆𑀞𑀺𑀢𑁂 𑀆𑀭𑁄𑀘𑁂𑀲𑀺 ¶ , 𑀇𑀢𑀭𑀸 𑀤𑀼𑀢𑀺𑀬𑀫𑁆𑀧𑀺 𑀢𑀣𑁂𑀯 𑀧𑀸𑀢𑁂𑀲𑀺. 𑀅𑀣 𑀦𑀁 𑀧𑀝𑀺𑀯𑀺𑀲𑁆𑀲𑀓𑀺𑀢𑁆𑀣𑀺𑀬𑁄 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀘𑁆𑀘𑀺 𑀢𑁂 𑀲𑀧𑀢𑁆𑀢𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀻’’𑀢𑀺? 𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀦𑁆𑀥𑀩𑀸𑀮𑁂, 𑀓𑀲𑁆𑀫𑀸 𑀏𑀯𑀫𑀓𑀸𑀲𑀺, 𑀅𑀬𑀁 𑀢𑀯 𑀇𑀲𑁆𑀲𑀭𑀺𑀬𑀪𑀬𑁂𑀦 𑀕𑀩𑁆𑀪𑀲𑁆𑀲 𑀧𑀸𑀢𑀦𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀤𑁂𑀢𑀺, 𑀢𑁂𑀦 𑀢𑁂 𑀕𑀩𑁆𑀪𑁄 𑀧𑀢𑀢𑀺, 𑀫𑀸 𑀧𑀼𑀦 𑀏𑀯𑀫𑀓𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀸 𑀢𑀢𑀺𑀬𑀯𑀸𑀭𑁂 𑀦 𑀓𑀣𑁂𑀲𑀺. 𑀅𑀣 𑀲𑀸 𑀇𑀢𑀭𑀺𑀲𑁆𑀲𑀸 𑀉𑀤𑀭𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀫𑀬𑁆𑀳𑀁 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀦 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀁 𑀫𑀁 𑀆𑀦𑁂𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀤𑁆𑀯𑁂 𑀯𑀸𑀭𑁂 𑀕𑀩𑁆𑀪𑀁 𑀧𑀸𑀢𑁂𑀲𑀺, 𑀓𑀺𑀫𑀢𑁆𑀣𑀁 𑀢𑀼𑀬𑁆𑀳𑀁 𑀓𑀣𑁂𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑀝𑁆𑀞𑀸 𑀤𑀸𑀦𑀺𑀫𑁆𑀳𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲𑀸 𑀧𑀫𑀸𑀤𑀁 𑀑𑀮𑁄𑀓𑁂𑀦𑁆𑀢𑀻 𑀧𑀭𑀺𑀡𑀢𑁂 𑀕𑀩𑁆𑀪𑁂 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀕𑀩𑁆𑀪𑁄 𑀧𑀭𑀺𑀡𑀢𑀢𑁆𑀢𑀸 𑀧𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀭𑀺𑀬𑀁 𑀦𑀺𑀧𑀢𑀺, 𑀔𑀭𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺, 𑀚𑀻𑀯𑀺𑀢𑀲𑀁𑀲𑀬𑀁 𑀧𑀸𑀧𑀼𑀡𑀺. 𑀲𑀸 ‘‘𑀦𑀸𑀲𑀺𑀢𑀫𑁆𑀳𑀺 𑀢𑀬𑀸, 𑀢𑁆𑀯𑀫𑁂𑀯 𑀫𑀁 𑀆𑀦𑁂𑀢𑁆𑀯𑀸 𑀢𑁆𑀯𑀫𑁂𑀯 𑀢𑀬𑁄𑀧𑀺 𑀯𑀸𑀭𑁂 ¶ 𑀤𑀸𑀭𑀓𑁂 𑀦𑀸𑀲𑁂𑀲𑀺, 𑀇𑀤𑀸𑀦𑀺 𑀅𑀳𑀫𑁆𑀧𑀺 𑀦𑀲𑁆𑀲𑀸𑀫𑀺, 𑀇𑀢𑁄 𑀤𑀸𑀦𑀺 𑀘𑀼𑀢𑀸 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀢𑀯 𑀤𑀸𑀭𑀓𑁂 𑀔𑀸𑀤𑀺𑀢𑀼𑀁 𑀲𑀫𑀢𑁆𑀣𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 ¶ 𑀕𑁂𑀳𑁂 𑀫𑀚𑁆𑀚𑀸𑀭𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀭𑀫𑁆𑀧𑀺 𑀲𑀸𑀫𑀺𑀓𑁄 𑀕𑀳𑁂𑀢𑁆𑀯𑀸 ‘‘𑀢𑀬𑀸 𑀫𑁂 𑀓𑀼𑀮𑀽𑀧𑀘𑁆𑀙𑁂𑀤𑁄 𑀓𑀢𑁄’’𑀢𑀺 𑀓𑀧𑁆𑀧𑀭𑀚𑀡𑁆𑀡𑀼𑀓𑀸𑀤𑀻𑀳𑀺 𑀲𑀼𑀧𑁄𑀣𑀺𑀢𑀁 𑀧𑁄𑀣𑁂𑀲𑀺. 𑀲𑀸 𑀢𑁂𑀦𑁂𑀯𑀸𑀩𑀸𑀥𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀓𑀼𑀓𑁆𑀓𑀼𑀝𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸.

𑀓𑀼𑀓𑁆𑀓𑀼𑀝𑀻 𑀦 𑀘𑀺𑀭𑀲𑁆𑀲𑁂𑀯 𑀅𑀡𑁆𑀟𑀸𑀦𑀺 𑀯𑀺𑀚𑀸𑀬𑀺, 𑀫𑀚𑁆𑀚𑀸𑀭𑀻 𑀆𑀕𑀦𑁆𑀢𑁆𑀯𑀸 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀔𑀸𑀤𑀺. 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀔𑀸𑀤𑀺𑀬𑁂𑀯. 𑀓𑀼𑀓𑁆𑀓𑀼𑀝𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑀬𑁄 𑀯𑀸𑀭𑁂 𑀫𑀫 𑀅𑀡𑁆𑀟𑀸𑀦𑀺 𑀔𑀸𑀤𑀺𑀢𑁆𑀯𑀸 𑀇𑀤𑀸𑀦𑀺 𑀫𑀫𑁆𑀧𑀺 𑀔𑀸𑀤𑀺𑀢𑀼𑀓𑀸𑀫𑀸𑀲𑀻’’𑀢𑀺. ‘‘𑀇𑀢𑁄 𑀘𑀼𑀢𑀸 𑀲𑀧𑀼𑀢𑁆𑀢𑀓𑀁 𑀢𑀁 𑀔𑀸𑀤𑀺𑀢𑀼𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀅𑀭𑀜𑁆𑀜𑁂 𑀤𑀻𑀧𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀭𑀸 𑀫𑀺𑀕𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀯𑀺𑀚𑀸𑀢𑀓𑀸𑀮𑁂 𑀤𑀻𑀧𑀺𑀦𑀻 𑀆𑀕𑀦𑁆𑀢𑁆𑀯𑀸 𑀢𑀬𑁄 𑀯𑀸𑀭𑁂 𑀧𑀼𑀢𑁆𑀢𑀓𑁂 𑀔𑀸𑀤𑀺. 𑀫𑀺𑀕𑀻 𑀫𑀭𑀡𑀓𑀸𑀮𑁂 ‘‘𑀅𑀬𑀁 𑀫𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀢𑁆𑀢𑀓𑁂 𑀔𑀸𑀤𑀺𑀢𑁆𑀯𑀸 𑀇𑀤𑀸𑀦𑀺 𑀫𑀫𑁆𑀧𑀺 𑀔𑀸𑀤𑀺𑀲𑁆𑀲𑀢𑀺, 𑀇𑀢𑁄 𑀤𑀸𑀦𑀺 𑀘𑀼𑀢𑀸 𑀏𑀢𑀁 𑀲𑀧𑀼𑀢𑁆𑀢𑀓𑀁 𑀔𑀸𑀤𑀺𑀢𑀼𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀤𑀻𑀧𑀺𑀦𑀻𑀧𑀺 𑀢𑀣𑁂𑀯 𑀢𑀢𑁄 𑀘𑀼𑀢𑀸 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀤𑁆𑀯𑀸𑀭𑀕𑀸𑀫𑀓𑁂 𑀧𑀢𑀺𑀓𑀼𑀮𑀁 𑀅𑀕𑀫𑀸𑀲𑀺, 𑀅𑀧𑀭𑀪𑀸𑀕𑁂 𑀘 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀬𑀓𑁆𑀔𑀺𑀦𑀻𑀧𑀺 𑀢𑀲𑁆𑀲𑀸 𑀧𑀺𑀬𑀲𑀳𑀸𑀬𑀺𑀓𑀸𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀫𑁂 𑀲𑀳𑀸𑀬𑀺𑀓𑀸’’𑀢𑀺 ‘‘𑀅𑀦𑁆𑀢𑁄𑀕𑀩𑁆𑀪𑁂 𑀯𑀺𑀚𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀢𑁆𑀢𑀁 𑀦𑀼 𑀔𑁄 𑀯𑀺𑀚𑀸𑀢𑀸, 𑀉𑀤𑀸𑀳𑀼 𑀥𑀻𑀢𑀭𑀦𑁆𑀢𑀺 𑀧𑀲𑁆𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀻 𑀯𑀺𑀬 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 ¶ 𑀔𑀸𑀤𑀺𑀢𑁆𑀯𑀸 𑀕𑀢𑀸. 𑀧𑀼𑀦 𑀤𑀼𑀢𑀺𑀬𑀯𑀸𑀭𑁂𑀧𑀺 𑀢𑀣𑁂𑀯 𑀔𑀸𑀤𑀺. 𑀢𑀢𑀺𑀬𑀯𑀸𑀭𑁂 𑀇𑀢𑀭𑀸 𑀕𑀭𑀼𑀪𑀸𑀭𑀸 𑀳𑀼𑀢𑁆𑀯𑀸 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀸 𑀬𑀓𑁆𑀔𑀺𑀦𑀻 𑀫𑀫 𑀤𑁆𑀯𑁂 𑀧𑀼𑀢𑁆𑀢𑁂 𑀔𑀸𑀤𑀺𑀢𑁆𑀯𑀸 𑀕𑀢𑀸, 𑀇𑀤𑀸𑀦𑀺 ¶ 𑀫𑀫 𑀓𑀼𑀮𑀕𑁂𑀳𑀁 𑀕𑀦𑁆𑀢𑁆𑀯𑀸 𑀯𑀺𑀚𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀮𑀕𑁂𑀳𑀁 𑀕𑀦𑁆𑀢𑁆𑀯𑀸 𑀯𑀺𑀚𑀸𑀬𑀺.

𑀢𑀤𑀸 𑀲𑀸 𑀬𑀓𑁆𑀔𑀺𑀦𑀻 𑀉𑀤𑀓𑀯𑀸𑀭𑀁 𑀕𑀢𑀸 𑀳𑁄𑀢𑀺. 𑀯𑁂𑀲𑁆𑀲𑀯𑀡𑀲𑁆𑀲 𑀳𑀺 𑀬𑀓𑁆𑀔𑀺𑀦𑀺𑀬𑁄 𑀯𑀸𑀭𑁂𑀦 𑀅𑀦𑁄𑀢𑀢𑁆𑀢𑀤𑀳𑀢𑁄 𑀲𑀻𑀲𑀧𑀭𑀫𑁆𑀧𑀭𑀸𑀬 𑀉𑀤𑀓𑀫𑀸𑀳𑀭𑀦𑁆𑀢𑀺. 𑀢𑀸 𑀘𑀢𑀼𑀫𑀸𑀲𑀘𑁆𑀘𑀬𑁂𑀦𑀧𑀺 𑀧𑀜𑁆𑀘𑀫𑀸𑀲𑀘𑁆𑀘𑀬𑁂𑀦𑀧𑀺 𑀫𑀼𑀘𑁆𑀘𑀦𑁆𑀢𑀺. 𑀅𑀧𑀭𑀸 𑀬𑀓𑁆𑀔𑀺𑀦𑀺𑀬𑁄 𑀓𑀺𑀮𑀦𑁆𑀢𑀓𑀸𑀬𑀸 𑀚𑀻𑀯𑀺𑀢𑀓𑁆𑀔𑀬𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺. 𑀲𑀸 𑀧𑀦 𑀉𑀤𑀓𑀯𑀸𑀭𑀢𑁄 𑀫𑀼𑀢𑁆𑀢𑀫𑀢𑁆𑀢𑀸𑀯 𑀯𑁂𑀕𑁂𑀦 𑀢𑀁 𑀖𑀭𑀁 𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀫𑁂 𑀲𑀳𑀸𑀬𑀺𑀓𑀸’’𑀢𑀺 𑀧𑀼𑀘𑁆𑀙𑀺. ‘‘𑀓𑀼𑀳𑀺𑀁 𑀦𑀁 𑀧𑀲𑁆𑀲𑀺𑀲𑁆𑀲𑀲𑀺, 𑀢𑀲𑁆𑀲𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀚𑀸𑀢𑀚𑀸𑀢𑀤𑀸𑀭𑀓𑁂 𑀬𑀓𑁆𑀔𑀺𑀦𑀻 𑀆𑀕𑀦𑁆𑀢𑁆𑀯𑀸 𑀔𑀸𑀤𑀢𑀺, 𑀢𑀲𑁆𑀫𑀸 𑀓𑀼𑀮𑀕𑁂𑀳𑀁 𑀕𑀢𑀸’’𑀢𑀺. 𑀲𑀸 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀘𑁆𑀙𑀢𑀼, 𑀦 𑀫𑁂 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀯𑁂𑀭𑀯𑁂𑀕𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑀸 𑀦𑀕𑀭𑀸𑀪𑀺𑀫𑀼𑀔𑀻 𑀧𑀓𑁆𑀔𑀦𑁆𑀤𑀺. 𑀇𑀢𑀭𑀸𑀧𑀺 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀦𑀁 𑀤𑀸𑀭𑀓𑀁 𑀦𑁆𑀳𑀸𑀧𑁂𑀢𑁆𑀯𑀸 𑀦𑀸𑀫𑀁 𑀓𑀢𑁆𑀯𑀸, ‘‘𑀲𑀸𑀫𑀺, 𑀇𑀤𑀸𑀦𑀺 𑀲𑀓𑀖𑀭𑀁 𑀕𑀘𑁆𑀙𑀸𑀫𑀸’’𑀢𑀺 𑀧𑀼𑀢𑁆𑀢𑀫𑀸𑀤𑀸𑀬 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑀫𑀚𑁆𑀛𑁂 𑀕𑀢𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀻 𑀧𑀼𑀢𑁆𑀢𑀁 𑀲𑀸𑀫𑀺𑀓𑀲𑁆𑀲 𑀤𑀢𑁆𑀯𑀸 𑀯𑀺𑀳𑀸𑀭𑀧𑁄𑀓𑁆𑀔𑀭𑀡𑀺𑀬𑀸 𑀦𑁆𑀳𑀸𑀢𑁆𑀯𑀸 𑀲𑀸𑀫𑀺𑀓𑁂 𑀦𑁆𑀳𑀸𑀬𑀦𑁆𑀢𑁂 ¶ 𑀉𑀢𑁆𑀢𑀭𑀺𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀣𑀜𑁆𑀜𑀁 𑀧𑀸𑀬𑀫𑀸𑀦𑀸 𑀞𑀺𑀢𑀸 𑀬𑀓𑁆𑀔𑀺𑀦𑀺𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸, ‘‘𑀲𑀸𑀫𑀺, 𑀯𑁂𑀕𑁂𑀦 𑀏𑀳𑀺, 𑀅𑀬𑀁 𑀲𑀸 𑀬𑀓𑁆𑀔𑀺𑀦𑀻, 𑀯𑁂𑀕𑁂𑀦 𑀏𑀳𑀺, 𑀅𑀬𑀁 𑀲𑀸 𑀬𑀓𑁆𑀔𑀺𑀦𑀻’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀓𑀢𑁆𑀯𑀸 𑀬𑀸𑀯 𑀢𑀲𑁆𑀲 𑀆𑀕𑀫𑀦𑀁 ¶ 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑀸𑀪𑀺𑀫𑀼𑀔𑀻 𑀧𑀓𑁆𑀔𑀦𑁆𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑁆𑀣𑀸 𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀧𑀼𑀢𑁆𑀢𑀁 𑀢𑀣𑀸𑀕𑀢𑀲𑁆𑀲 𑀧𑀸𑀤𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀫𑀬𑀸 𑀏𑀲 𑀤𑀺𑀦𑁆𑀦𑁄, 𑀧𑀼𑀢𑁆𑀢𑀲𑁆𑀲 𑀫𑁂 𑀚𑀻𑀯𑀺𑀢𑀁 𑀤𑁂𑀣𑀸’’𑀢𑀺 𑀆𑀳. 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑁄 𑀲𑀼𑀫𑀦𑀤𑁂𑀯𑁄 𑀦𑀸𑀫 𑀬𑀓𑁆𑀔𑀺𑀦𑀺𑀬𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑀼𑀁 𑀦𑀸𑀤𑀸𑀲𑀺. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀆𑀦𑀦𑁆𑀤, 𑀢𑀁 𑀬𑀓𑁆𑀔𑀺𑀦𑀺𑀁 𑀧𑀓𑁆𑀓𑁄𑀲𑀸𑀳𑀻’’𑀢𑀺 𑀆𑀳. 𑀣𑁂𑀭𑁄 𑀧𑀓𑁆𑀓𑁄𑀲𑀺. 𑀇𑀢𑀭𑀸 ‘‘𑀅𑀬𑀁, 𑀪𑀦𑁆𑀢𑁂, 𑀆𑀕𑀘𑁆𑀙𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀏𑀢𑀼, 𑀫𑀸 𑀲𑀤𑁆𑀤𑀫𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑀁 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺, 𑀲𑀘𑁂 𑀢𑀼𑀫𑁆𑀳𑁂 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦𑀸𑀕𑀫𑀺𑀲𑁆𑀲𑀣, 𑀅𑀳𑀺𑀦𑀓𑀼𑀮𑀸𑀦𑀁 𑀯𑀺𑀬 𑀅𑀘𑁆𑀙𑀨𑀦𑁆𑀤𑀦𑀸𑀦𑀁 𑀯𑀺𑀬 𑀓𑀸𑀓𑁄𑀮𑀽𑀓𑀸𑀦𑀁 𑀯𑀺𑀬 𑀘 𑀓𑀧𑁆𑀧𑀝𑁆𑀞𑀺𑀢𑀺𑀓𑀁 𑀯𑁄 𑀯𑁂𑀭𑀁 𑀅𑀪𑀯𑀺𑀲𑁆𑀲 ¶ , 𑀓𑀲𑁆𑀫𑀸 𑀯𑁂𑀭𑀁 𑀧𑀝𑀺𑀯𑁂𑀭𑀁 𑀓𑀭𑁄𑀣. 𑀯𑁂𑀭𑀜𑁆𑀳𑀺 𑀅𑀯𑁂𑀭𑁂𑀦 𑀉𑀧𑀲𑀫𑁆𑀫𑀢𑀺, 𑀦𑁄 𑀯𑁂𑀭𑁂𑀦𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫.

‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄’’𑀢𑀺.

𑀢𑀢𑁆𑀣 𑀦 𑀳𑀺 𑀯𑁂𑀭𑁂𑀦𑀸𑀢𑀺 𑀬𑀣𑀸 𑀳𑀺 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀳𑀺 𑀅𑀲𑀼𑀘𑀻𑀳𑀺 𑀫𑀓𑁆𑀔𑀺𑀢𑀁 𑀞𑀸𑀦𑀁 𑀢𑁂𑀳𑁂𑀯 𑀅𑀲𑀼𑀘𑀻𑀳𑀺 𑀥𑁄𑀯𑀦𑁆𑀢𑀸 𑀲𑀼𑀤𑁆𑀥𑀁 ¶ 𑀦𑀺𑀕𑁆𑀕𑀦𑁆𑀥𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀣 𑀔𑁄 𑀢𑀁 𑀞𑀸𑀦𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀲𑀼𑀤𑁆𑀥𑀢𑀭𑀜𑁆𑀘𑁂𑀯 𑀤𑀼𑀕𑁆𑀕𑀦𑁆𑀥𑀢𑀭𑀜𑁆𑀘 𑀳𑁄𑀢𑀺; 𑀏𑀯𑀫𑁂𑀯 𑀅𑀓𑁆𑀓𑁄𑀲𑀦𑁆𑀢𑀁 𑀧𑀘𑁆𑀘𑀓𑁆𑀓𑁄𑀲𑀦𑁆𑀢𑁄 𑀧𑀳𑀭𑀦𑁆𑀢𑀁 𑀧𑀝𑀺𑀧𑀳𑀭𑀦𑁆𑀢𑁄 𑀯𑁂𑀭𑁂𑀦 𑀯𑁂𑀭𑀁 𑀯𑀽𑀧𑀲𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀯𑁂𑀭𑀫𑁂𑀯 𑀓𑀭𑁄𑀢𑀺. 𑀇𑀢𑀺 𑀯𑁂𑀭𑀸𑀦𑀺 𑀦𑀸𑀫 𑀯𑁂𑀭𑁂𑀦 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀦 𑀲𑀫𑁆𑀫𑀦𑁆𑀢𑀺, 𑀅𑀣 𑀔𑁄 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀻𑀢𑀺 𑀬𑀣𑀸 𑀧𑀦 𑀢𑀸𑀦𑀺 𑀔𑁂𑀴𑀸𑀤𑀻𑀦𑀺 𑀅𑀲𑀼𑀘𑀻𑀦𑀺 𑀯𑀺𑀧𑁆𑀧𑀲𑀦𑁆𑀦𑁂𑀦 𑀉𑀤𑀓𑁂𑀦 𑀥𑁄𑀯𑀺𑀬𑀫𑀸𑀦𑀸𑀦𑀺 𑀦𑀲𑁆𑀲𑀦𑁆𑀢𑀺, 𑀢𑀁 𑀞𑀸𑀦𑀁 𑀲𑀼𑀤𑁆𑀥𑀁 𑀳𑁄𑀢𑀺 𑀲𑀼𑀕𑀦𑁆𑀥𑀁; 𑀏𑀯𑀫𑁂𑀯 𑀅𑀯𑁂𑀭𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑁄𑀤𑀓𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑁂𑀭𑀸𑀦𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀏𑀲 𑀅𑀯𑁂𑀭𑁂𑀦 𑀯𑁂𑀭𑀽𑀧𑀲𑀫𑀦𑀲𑀗𑁆𑀔𑀸𑀢𑁄 𑀧𑁄𑀭𑀸𑀡𑀓𑁄 𑀥𑀫𑁆𑀫𑁄; 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸𑀦𑀁 𑀕𑀢𑀫𑀕𑁆𑀕𑁄𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀬𑀓𑁆𑀔𑀺𑀦𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀥𑀫𑁆𑀫𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀢𑀁 𑀇𑀢𑁆𑀣𑀺𑀁 𑀆𑀳 𑁋 ‘‘𑀏𑀢𑀺𑀲𑁆𑀲𑀸 𑀢𑀯 𑀧𑀼𑀢𑁆𑀢𑀁 𑀤𑁂𑀳𑀻’’𑀢𑀺. ‘‘𑀪𑀸𑀬𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀫𑀸 𑀪𑀸𑀬𑀺, 𑀦𑀢𑁆𑀣𑀺 𑀢𑁂 𑀏𑀢𑀁 𑀦𑀺𑀲𑁆𑀲𑀸𑀬 𑀧𑀭𑀺𑀧𑀦𑁆𑀣𑁄’’𑀢𑀺 𑀆𑀳. 𑀲𑀸 𑀢𑀲𑁆𑀲𑀸 𑀧𑀼𑀢𑁆𑀢𑀫𑀤𑀸𑀲𑀺. 𑀲𑀸 𑀢𑀁 𑀘𑀼𑀫𑁆𑀩𑀺𑀢𑁆𑀯𑀸 𑀆𑀮𑀺𑀗𑁆𑀕𑁂𑀢𑁆𑀯𑀸 𑀧𑀼𑀦 𑀫𑀸𑀢𑀼𑀬𑁂𑀯 𑀤𑀢𑁆𑀯𑀸 𑀭𑁄𑀤𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀅𑀳𑀁 𑀧𑀼𑀩𑁆𑀩𑁂 𑀬𑀣𑀸 𑀯𑀸 𑀢𑀣𑀸 𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻𑀧𑀺 𑀓𑀼𑀘𑁆𑀙𑀺𑀧𑀽𑀭𑀁 𑀦𑀸𑀮𑀢𑁆𑀣𑀁, 𑀇𑀤𑀸𑀦𑀺 𑀓𑀣𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀢𑀁 𑀇𑀢𑁆𑀣𑀺𑀫𑀸𑀳 𑁋 ‘‘𑀇𑀫𑀁 𑀦𑁂𑀢𑁆𑀯𑀸 ¶ 𑀅𑀢𑁆𑀢𑀦𑁄 𑀕𑁂𑀳𑁂 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀅𑀕𑁆𑀕𑀬𑀸𑀕𑀼𑀪𑀢𑁆𑀢𑁂𑀳𑀺 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺. 𑀲𑀸 𑀢𑀁 𑀦𑁂𑀢𑁆𑀯𑀸 𑀧𑀺𑀝𑁆𑀞𑀺𑀯𑀁𑀲𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀕𑁆𑀕𑀬𑀸𑀕𑀼𑀪𑀢𑁆𑀢𑁂𑀳𑀺 𑀧𑀝𑀺𑀚𑀕𑁆𑀕𑀺, 𑀢𑀲𑁆𑀲𑀸 𑀯𑀻𑀳𑀺𑀧𑀳𑀭𑀡𑀓𑀸𑀮𑁂 𑀫𑀼𑀲𑀮𑀕𑁆𑀕𑁂𑀦 𑀫𑀼𑀤𑁆𑀥𑀁 𑀧𑀳𑀭𑀦𑁆𑀢𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑀸 𑀲𑀳𑀸𑀬𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀜𑁆𑀜𑀢𑁆𑀣 𑀫𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀫𑀼𑀲𑀮𑀲𑀸𑀮𑀸𑀬 𑀉𑀤𑀓𑀘𑀸𑀝𑀺𑀬𑀁 𑀉𑀤𑁆𑀥𑀦𑁂 𑀦𑀺𑀩𑁆𑀩𑀓𑁄𑀲𑁂 𑀲𑀗𑁆𑀓𑀸𑀭𑀓𑀽𑀝𑁂 𑀕𑀸𑀫𑀤𑁆𑀯𑀸𑀭𑁂 𑀘𑀸𑀢𑀺 𑀏𑀢𑁂𑀲𑀼 𑀞𑀸𑀦𑁂𑀲𑀼 ¶ 𑀧𑀢𑀺𑀝𑁆𑀞𑀸𑀧𑀺𑀢𑀸𑀧𑀺 𑀇𑀥 𑀫𑁂 𑀫𑀼𑀲𑀮𑁂𑀦 𑀲𑀻𑀲𑀁 𑀪𑀺𑀦𑁆𑀤𑀦𑁆𑀢𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀇𑀥 𑀤𑀸𑀭𑀓𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀁 𑀑𑀢𑀸𑀭𑁂𑀦𑁆𑀢𑀺, 𑀇𑀥 𑀲𑀼𑀦𑀔𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀇𑀥 𑀤𑀸𑀭𑀓𑀸 𑀅𑀲𑀼𑀘𑀺𑀁 𑀓𑀭𑁄𑀦𑁆𑀢𑀺, 𑀇𑀥 𑀓𑀘𑀯𑀭𑀁 𑀙𑀟𑁆𑀟𑁂𑀦𑁆𑀢𑀺, 𑀇𑀥 𑀕𑀸𑀫𑀤𑀸𑀭𑀓𑀸 𑀮𑀓𑁆𑀔𑀬𑁄𑀕𑁆𑀕𑀁 𑀓𑀭𑁄𑀦𑁆𑀢𑀻𑀢𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀩𑀳𑀺𑀕𑀸𑀫𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀲𑁆𑀲𑀸 𑀅𑀕𑁆𑀕𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀳𑀭𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀲𑀸 𑀬𑀓𑁆𑀔𑀺𑀦𑀻 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑁂 𑀲𑀳𑀸𑀬𑀺𑀓𑀸 𑀇𑀤𑀸𑀦𑀺 𑀩𑀳𑀽𑀧𑀓𑀸𑀭𑀸, 𑀳𑀦𑁆𑀤𑀸𑀳𑀁 𑀓𑀺𑀜𑁆𑀘𑀺 𑀧𑀝𑀺𑀕𑀼𑀡𑀁 𑀓𑀭𑁄𑀫𑀻’’𑀢𑀺. 𑀲𑀸 ‘‘𑀇𑀫𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀲𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀣𑀮𑀝𑁆𑀞𑀸𑀦𑁂 𑀲𑀲𑁆𑀲𑀁 𑀓𑀭𑁄𑀳𑀺, 𑀇𑀫𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀦𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀲𑀲𑁆𑀲𑀁 𑀓𑀭𑁄𑀳𑀻’’𑀢𑀺 𑀲𑀳𑀸𑀬𑀺𑀓𑀸𑀬 𑀆𑀭𑁄𑀘𑁂𑀢𑀺. 𑀲𑁂𑀲𑀚𑀦𑁂𑀳𑀺 𑀓𑀢𑀲𑀲𑁆𑀲𑀁 𑀅𑀢𑀺𑀉𑀤𑀓𑁂𑀦 𑀯𑀸 𑀅𑀦𑁄𑀤𑀓𑁂𑀦 𑀯𑀸 𑀦𑀲𑁆𑀲𑀢𑀺, 𑀢𑀲𑁆𑀲𑀸 𑀅𑀢𑀺𑀯𑀺𑀬 𑀲𑀫𑁆𑀧𑀚𑁆𑀚𑀢𑀺. 𑀅𑀣 𑀦𑀁 𑀲𑁂𑀲𑀚𑀦𑀸, ‘‘𑀅𑀫𑁆𑀫, 𑀢𑀬𑀸 𑀓𑀢𑀲𑀲𑁆𑀲𑀁 𑀦𑁂𑀯 𑀅𑀘𑁆𑀘𑁄𑀤𑀓𑁂𑀦, 𑀦 𑀅𑀦𑀼𑀤𑀓𑁂𑀦 𑀦𑀲𑁆𑀲𑀢𑀺, 𑀲𑀼𑀩𑁆𑀩𑀼𑀝𑁆𑀞𑀺𑀤𑀼𑀩𑁆𑀩𑀼𑀝𑁆𑀞𑀺𑀪𑀸𑀯𑀁 𑀜𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀅𑀫𑁆𑀳𑀸𑀓𑀁 𑀲𑀳𑀸𑀬𑀺𑀓𑀸 𑀬𑀓𑁆𑀔𑀺𑀦𑀻 𑀲𑀼𑀩𑁆𑀩𑀼𑀝𑁆𑀞𑀺𑀤𑀼𑀩𑁆𑀩𑀼𑀝𑁆𑀞𑀺𑀪𑀸𑀯𑀁 ¶ 𑀆𑀘𑀺𑀓𑁆𑀔𑀢𑀺, 𑀫𑀬𑀁 𑀢𑀲𑁆𑀲𑀸 𑀯𑀘𑀦𑁂𑀦 𑀣𑀮𑁂𑀲𑀼 𑀦𑀺𑀦𑁆𑀦𑁂𑀲𑀼 𑀲𑀲𑁆𑀲𑀸𑀦𑀺 𑀓𑀭𑁄𑀫, 𑀢𑁂𑀦 𑀦𑁄 𑀲𑀫𑁆𑀧𑀚𑁆𑀚𑀢𑀺. 𑀓𑀺𑀁 𑀦 𑀧𑀲𑁆𑀲𑀣? 𑀦𑀺𑀩𑀤𑁆𑀥𑀁 𑀅𑀫𑁆𑀳𑀸𑀓𑀁 𑀕𑁂𑀳𑀢𑁄 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀳𑀭𑀺𑀬𑀫𑀸𑀦𑀸𑀦𑀺, 𑀢𑀸𑀦𑀺 𑀏𑀢𑀺𑀲𑁆𑀲𑀸 𑀳𑀭𑀻𑀬𑀦𑁆𑀢𑀺, 𑀢𑀼𑀫𑁆𑀳𑁂𑀧𑀺 𑀏𑀢𑀺𑀲𑁆𑀲𑀸 𑀅𑀕𑁆𑀕𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀳𑀭𑀣, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀓𑀫𑁆𑀫𑀦𑁆𑀢𑁂 𑀑𑀮𑁄𑀓𑁂𑀲𑁆𑀲𑀢𑀻’’𑀢𑀺. 𑀅𑀣𑀲𑁆𑀲𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀲𑀸𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀲𑀁 𑀓𑀫𑁆𑀫𑀦𑁆𑀢𑁂 𑀑𑀮𑁄𑀓𑁂𑀦𑁆𑀢𑀻 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑀸 𑀅𑀳𑁄𑀲𑀺 𑀫𑀳𑀸𑀧𑀭𑀺𑀯𑀸𑀭𑀸. 𑀲𑀸 𑀅𑀧𑀭𑀪𑀸𑀕𑁂 𑀅𑀝𑁆𑀞 𑀲𑀮𑀸𑀓𑀪𑀢𑁆𑀢𑀸𑀦𑀺 𑀧𑀝𑁆𑀞𑀧𑁂𑀲𑀺. 𑀢𑀸𑀦𑀺 𑀬𑀸𑀯𑀚𑁆𑀚𑀓𑀸𑀮𑀸 𑀤𑀻𑀬𑀦𑁆𑀢𑀺𑀬𑁂𑀯𑀸𑀢𑀺.

𑀓𑀸𑀴𑀬𑀓𑁆𑀔𑀺𑀦𑀻𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀓𑁄𑀲𑀫𑁆𑀩𑀓𑀯𑀢𑁆𑀣𑀼

𑀧𑀭𑁂 ¶ 𑀘 𑀦 𑀯𑀺𑀚𑀸𑀦𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀓𑁄𑀲𑀫𑁆𑀩𑀺𑀬𑀜𑁆𑀳𑀺 𑀖𑁄𑀲𑀺𑀢𑀸𑀭𑀸𑀫𑁂 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀯𑀸𑀭𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀺𑀳𑀭𑀺𑀁𑀲𑀼 𑀯𑀺𑀦𑀬𑀥𑀭𑁄 𑀘 𑀥𑀫𑁆𑀫𑀓𑀣𑀺𑀓𑁄 𑀘. 𑀢𑁂𑀲𑀼 𑀥𑀫𑁆𑀫𑀓𑀣𑀺𑀓𑁄 𑀏𑀓𑀤𑀺𑀯𑀲𑀁 ¶ 𑀲𑀭𑀻𑀭𑀯𑀮𑀜𑁆𑀚𑀁 𑀓𑀢𑁆𑀯𑀸 𑀉𑀤𑀓𑀓𑁄𑀝𑁆𑀞𑀓𑁂 𑀆𑀘𑀫𑀦𑀉𑀤𑀓𑀸𑀯𑀲𑁂𑀲𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀧𑀘𑁆𑀙𑀸 𑀯𑀺𑀦𑀬𑀥𑀭𑁄 𑀢𑀢𑁆𑀣 ¶ 𑀧𑀯𑀺𑀝𑁆𑀞𑁄 𑀢𑀁 𑀉𑀤𑀓𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀢𑀭𑀁 𑀧𑀼𑀘𑁆𑀙𑀺, ‘‘𑀆𑀯𑀼𑀲𑁄, 𑀢𑀬𑀸 𑀉𑀤𑀓𑀁 𑀞𑀧𑀺𑀢’’𑀦𑁆𑀢𑀺? ‘‘𑀆𑀫, 𑀆𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦𑁂𑀢𑁆𑀣 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀦 𑀚𑀸𑀦𑀸𑀫𑀻’’𑀢𑀺. ‘‘𑀳𑁄𑀢𑀺, 𑀆𑀯𑀼𑀲𑁄, 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺. ‘‘𑀢𑁂𑀦 𑀳𑀺 𑀧𑀝𑀺𑀓𑀭𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. ‘‘𑀲𑀘𑁂 𑀧𑀦 𑀢𑁂, 𑀆𑀯𑀼𑀲𑁄, 𑀅𑀲𑀜𑁆𑀘𑀺𑀘𑁆𑀘 𑀅𑀲𑁆𑀲𑀢𑀺𑀬𑀸 𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀻’’𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺. 𑀯𑀺𑀦𑀬𑀥𑀭𑁄𑀧𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑀸𑀦𑀁 ‘‘𑀅𑀬𑀁 𑀥𑀫𑁆𑀫𑀓𑀣𑀺𑀓𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀆𑀭𑁄𑀘𑁂𑀲𑀺. 𑀢𑁂 𑀢𑀲𑁆𑀲 𑀦𑀺𑀲𑁆𑀲𑀺𑀢𑀓𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀢𑀻’’𑀢𑀺 𑀆𑀳𑀁𑀲𑀼. 𑀢𑁂 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀏𑀯𑀫𑀸𑀳 𑁋 ‘‘𑀅𑀬𑀁 𑀯𑀺𑀦𑀬𑀥𑀭𑁄 𑀧𑀼𑀩𑁆𑀩𑁂 𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀆𑀧𑀢𑁆𑀢𑀻𑀢𑀺 𑀯𑀤𑀢𑀺, 𑀫𑀼𑀲𑀸𑀯𑀸𑀤𑀻 𑀏𑀲𑁄’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀫𑀼𑀲𑀸𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀢𑁂 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼. 𑀓𑀢𑁄 𑀯𑀺𑀦𑀬𑀥𑀭𑁄 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀫𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸 𑀉𑀧𑀝𑁆𑀞𑀸𑀓𑀸𑀧𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀅𑀳𑁂𑀲𑀼𑀁, 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀆𑀭𑀓𑁆𑀔𑀤𑁂𑀯𑀢𑀸𑀧𑀺 𑀢𑀸𑀲𑀁 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀧𑀻𑀢𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸 𑀤𑁆𑀯𑁂 𑀧𑀓𑁆𑀔𑀸 𑀅𑀳𑁂𑀲𑀼𑀁. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀓𑀦𑀺𑀝𑁆𑀞𑀪𑀸𑀯𑀦𑀸 𑀧𑀦 𑀏𑀓𑀦𑀺𑀦𑁆𑀦𑀸𑀤𑀁 𑀓𑁄𑀮𑀸𑀳𑀮𑀁 𑀅𑀕𑀫𑀸𑀲𑀺.

𑀅𑀣𑁂𑀓𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑀸𑀦𑀁 𑀯𑀺𑀦𑀬𑀥𑀭𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 ‘‘𑀥𑀫𑁆𑀫𑀺𑀓𑁂𑀦𑁂𑀯𑀸𑀬𑀁 𑀯𑀺𑀦𑀬𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄’’𑀢𑀺 𑀮𑀤𑁆𑀥𑀺𑀜𑁆𑀘, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀦𑀁 ¶ 𑀥𑀫𑁆𑀫𑀓𑀣𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀧𑀦 ‘‘𑀅𑀥𑀫𑁆𑀫𑀺𑀓𑁂𑀦𑁂𑀯 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄’’𑀢𑀺 𑀮𑀤𑁆𑀥𑀺𑀜𑁆𑀘, 𑀉𑀓𑁆𑀔𑁂𑀧𑀓𑁂𑀳𑀺 𑀯𑀸𑀭𑀺𑀬𑀫𑀸𑀦𑀸𑀦𑀫𑁆𑀧𑀺 𑀘 𑀢𑁂𑀲𑀁 𑀢𑀁 𑀅𑀦𑀼𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀡𑀪𑀸𑀯𑀜𑁆𑀘 𑀆𑀭𑁄𑀘𑁂𑀲𑀺 𑀪𑀕𑀯𑀸 ‘‘𑀲𑀫𑀕𑁆𑀕𑀸 𑀓𑀺𑀭 𑀳𑁄𑀦𑁆𑀢𑀽’’𑀢𑀺 𑀤𑁆𑀯𑁂 𑀯𑀸𑀭𑁂 𑀧𑁂𑀲𑁂𑀢𑁆𑀯𑀸 ‘‘𑀦 𑀇𑀘𑁆𑀙𑀦𑁆𑀢𑀺, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀪𑀯𑀺𑀢𑀼’’𑀦𑁆𑀢𑀺 𑀲𑀼𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 ‘‘𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀓𑁆𑀔𑁂𑀧𑀓𑀸𑀦𑀁 𑀉𑀓𑁆𑀔𑁂𑀧𑀦𑁂, 𑀇𑀢𑀭𑁂𑀲𑀜𑁆𑀘 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀆𑀤𑀻𑀦𑀯𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀢𑁂𑀲𑀁 𑀢𑀢𑁆𑀣𑁂𑀯 ¶ 𑀏𑀓𑀲𑀻𑀫𑀸𑀬𑀁 𑀉𑀧𑁄𑀲𑀣𑀸𑀤𑀻𑀦𑀺 ¶ 𑀅𑀦𑀼𑀚𑀸𑀦𑀺𑀢𑁆𑀯𑀸 𑀪𑀢𑁆𑀢𑀕𑁆𑀕𑀸𑀤𑀻𑀲𑀼 𑀪𑀡𑁆𑀟𑀦𑀚𑀸𑀢𑀸𑀦𑀁 ‘‘𑀆𑀲𑀦𑀦𑁆𑀢𑀭𑀺𑀓𑀸𑀬 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁪𑁫𑁬) 𑀪𑀢𑁆𑀢𑀕𑁆𑀕𑁂 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺𑀧𑀺 𑀪𑀡𑁆𑀟𑀦𑀚𑀸𑀢𑀸𑀯 𑀯𑀺𑀳𑀭𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀡𑁆𑀟𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸 𑀦𑀸𑀫𑁂𑀢𑁂 𑀅𑀦𑀢𑁆𑀣𑀓𑀸𑀭𑀓𑀸. 𑀓𑀮𑀳𑀁 𑀦𑀺𑀲𑁆𑀲𑀸𑀬 𑀳𑀺 𑀮𑀝𑀼𑀓𑀺𑀓𑀸𑀧𑀺 𑀲𑀓𑀼𑀡𑀺𑀓𑀸 𑀳𑀢𑁆𑀣𑀺𑀦𑀸𑀕𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀻’’𑀢𑀺 𑀮𑀝𑀼𑀓𑀺𑀓𑀚𑀸𑀢𑀓𑀁 (𑀚𑀸. 𑁧.𑁫.𑁩𑁯 𑀆𑀤𑀬𑁄) 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀸 𑀳𑁄𑀣, 𑀫𑀸 𑀯𑀺𑀯𑀤𑀣. 𑀯𑀺𑀯𑀸𑀤𑀁 𑀦𑀺𑀲𑁆𑀲𑀸𑀬 𑀳𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀯𑀝𑁆𑀝𑀓𑀸𑀧𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸’’𑀢𑀺 𑀯𑀝𑁆𑀝𑀓𑀚𑀸𑀢𑀓𑀁 (𑀚𑀸. 𑁧.𑁧.𑁧𑁧𑁮) 𑀓𑀣𑁂𑀲𑀺. 𑀏𑀯𑀫𑁆𑀧𑀺 𑀢𑁂𑀲𑀼 𑀪𑀕𑀯𑀢𑁄 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀥𑀫𑁆𑀫𑀯𑀸𑀤𑀺𑀦𑀸 𑀢𑀣𑀸𑀕𑀢𑀲𑁆𑀲 𑀯𑀺𑀳𑁂𑀲𑀁 𑀅𑀦𑀺𑀘𑁆𑀙𑀦𑁆𑀢𑁂𑀦 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂 𑀪𑀕𑀯𑀸, 𑀥𑀫𑁆𑀫𑀲𑀸𑀫𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂 𑀪𑀕𑀯𑀸, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 ¶ 𑀯𑀺𑀳𑀭𑀢𑀼, 𑀫𑀬𑀫𑁂𑀯 𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺 (𑀫𑀳𑀸𑀯. 𑁪𑁫𑁭; 𑀫. 𑀦𑀺. 𑁩.𑁨𑁩𑁬) 𑀯𑀼𑀢𑁆𑀢𑁂 𑀅𑀢𑀻𑀢𑀁 𑀆𑀳𑀭𑀺 𑁋

𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀓𑀸𑀲𑀺𑀭𑀸𑀚𑀸 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀭𑀚𑁆𑀚𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀯𑀲𑀦𑁆𑀢𑀲𑁆𑀲 𑀧𑀺𑀢𑀼𑀦𑁄 𑀫𑀸𑀭𑀺𑀢𑀪𑀸𑀯𑀜𑁆𑀘𑁂𑀯 𑀤𑀻𑀖𑀸𑀯𑀼𑀓𑀼𑀫𑀸𑀭𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑁂 𑀤𑀺𑀦𑁆𑀦𑁂 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀲𑀫𑀕𑁆𑀕𑀪𑀸𑀯𑀜𑁆𑀘 𑀓𑀣𑁂𑀢𑁆𑀯𑀸 ‘‘𑀢𑁂𑀲𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀆𑀤𑀺𑀦𑁆𑀦𑀤𑀡𑁆𑀟𑀸𑀦𑀁 𑀆𑀤𑀺𑀦𑁆𑀦𑀲𑀢𑁆𑀣𑀸𑀦𑀁 𑀏𑀯𑀭𑀽𑀧𑀁 𑀔𑀦𑁆𑀢𑀺𑀲𑁄𑀭𑀘𑁆𑀘𑀁 𑀪𑀯𑀺𑀲𑁆𑀲𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣, 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀔𑀫𑀸 𑀘 𑀪𑀯𑁂𑀬𑁆𑀬𑀸𑀣 𑀲𑁄𑀭𑀢𑀸 𑀘𑀸’’𑀢𑀺 𑀑𑀯𑀤𑀺𑀢𑁆𑀯𑀸𑀧𑀺 𑀦𑁂𑀯 𑀢𑁂 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀅𑀲𑀓𑁆𑀔𑀺. 𑀲𑁄 𑀢𑀸𑀬 𑀆𑀓𑀺𑀡𑁆𑀡𑀯𑀺𑀳𑀸𑀭𑀢𑀸𑀬 𑀉𑀓𑁆𑀓𑀡𑁆𑀞𑀺𑀢𑁄 ‘‘𑀅𑀳𑀁 𑀔𑁄 𑀇𑀤𑀸𑀦𑀺 𑀆𑀓𑀺𑀡𑁆𑀡𑁄 𑀤𑀼𑀓𑁆𑀔𑀁 𑀯𑀺𑀳𑀭𑀸𑀫𑀺, 𑀇𑀫𑁂 𑀘 𑀪𑀺𑀓𑁆𑀔𑀽 𑀫𑀫 𑀯𑀘𑀦𑀁 𑀦 𑀓𑀭𑁄𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀏𑀓𑀓𑁄𑀯 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀓𑀓𑁄𑀯 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀩𑀸𑀮𑀓𑀮𑁄𑀡𑀓𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀪𑀕𑀼𑀢𑁆𑀣𑁂𑀭𑀲𑁆𑀲 𑀏𑀓𑀘𑀸𑀭𑀺𑀓𑀯𑀢𑁆𑀢𑀁 𑀓𑀣𑁂𑀢𑁆𑀯𑀸 𑀧𑀸𑀘𑀺𑀦𑀯𑀁𑀲𑀫𑀺𑀕𑀤𑀸𑀬𑁂 𑀢𑀺𑀡𑁆𑀡𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀸𑀫𑀕𑁆𑀕𑀺𑀬𑀸𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀬𑁂𑀦 ¶ 𑀧𑀸𑀮𑀺𑀮𑁂𑀬𑁆𑀬𑀓𑀁 ¶ 𑀅𑀢𑁆𑀣𑀺, 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑀁 𑀉𑀧𑀦𑀺𑀲𑁆𑀲𑀸𑀬 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂 𑀧𑀸𑀮𑀺𑀮𑁂𑀬𑁆𑀬𑀓𑁂𑀦 𑀳𑀢𑁆𑀣𑀺𑀦𑀸 𑀉𑀧𑀝𑁆𑀞𑀺𑀬𑀫𑀸𑀦𑁄 𑀨𑀸𑀲𑀼𑀓𑀁 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺.

𑀓𑁄𑀲𑀫𑁆𑀩𑀺𑀯𑀸𑀲𑀺𑀦𑁄𑀧𑀺 𑀔𑁄 𑀉𑀧𑀸𑀲𑀓𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑀁 𑀕𑀢𑁄’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀅𑀫𑁆𑀳𑁂 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀯𑀸𑀬𑀫𑀺, 𑀫𑀬𑀁 𑀧𑀦 𑀦 𑀲𑀫𑀕𑁆𑀕𑀸 𑀅𑀳𑀼𑀫𑁆𑀳𑀸’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁 𑀲𑀸𑀫𑀕𑁆𑀕𑀺𑀁 𑀓𑀭𑁄𑀦𑁆𑀢𑁂 𑀲𑀫𑀕𑁆𑀕𑀸 𑀦𑀸𑀳𑀼𑀯𑀢𑁆𑀣𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀫𑀦𑀼𑀲𑁆𑀲𑀸 𑀇𑀫𑁂 ¶ 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁 𑀲𑀸𑀫𑀕𑁆𑀕𑀺𑀁 𑀓𑀭𑁄𑀦𑁆𑀢𑁂𑀧𑀺 𑀲𑀫𑀕𑁆𑀕𑀸 𑀦 𑀚𑀸𑀢𑀸, 𑀫𑀬𑀁 𑀇𑀫𑁂 𑀦𑀺𑀲𑁆𑀲𑀸𑀬 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀫𑁆𑀳𑀸, 𑀇𑀫𑁂𑀲𑀁 𑀦𑁂𑀯 𑀆𑀲𑀦𑀁 𑀤𑀲𑁆𑀲𑀸𑀫, 𑀦 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀲𑀸𑀫𑀻𑀘𑀺𑀫𑀢𑁆𑀢𑀫𑁆𑀧𑀺 𑀦 𑀓𑀭𑀺𑀁𑀲𑀼. 𑀢𑁂 𑀅𑀧𑁆𑀧𑀸𑀳𑀸𑀭𑀢𑀸𑀬 𑀲𑀼𑀲𑁆𑀲𑀫𑀸𑀦𑀸 𑀓𑀢𑀺𑀧𑀸𑀳𑁂𑀦𑁂𑀯 𑀉𑀚𑀼𑀓𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ‘‘𑀉𑀧𑀸𑀲𑀓𑀸 𑀫𑀬𑀁 𑀲𑀫𑀕𑁆𑀕𑀸 𑀚𑀸𑀢𑀸, 𑀢𑀼𑀫𑁆𑀳𑁂𑀧𑀺 𑀦𑁄 𑀧𑀼𑀭𑀺𑀫𑀲𑀤𑀺𑀲𑀸 𑀳𑁄𑀣𑀸’’𑀢𑀺 𑀆𑀳𑀁𑀲𑀼. ‘‘𑀔𑀫𑀸𑀧𑀺𑀢𑁄 𑀧𑀦 𑀯𑁄, 𑀪𑀦𑁆𑀢𑁂, 𑀲𑀢𑁆𑀣𑀸’’𑀢𑀺. ‘‘𑀦 𑀔𑀫𑀸𑀧𑀺𑀢𑁄, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀣, 𑀲𑀢𑁆𑀣𑀼 𑀔𑀫𑀸𑀧𑀺𑀢𑀓𑀸𑀮𑁂 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀼𑀭𑀺𑀫𑀲𑀤𑀺𑀲𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀅𑀦𑁆𑀢𑁄𑀯𑀲𑁆𑀲𑀪𑀸𑀯𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀤𑀼𑀓𑁆𑀔𑁂𑀦 𑀢𑀁 𑀅𑀦𑁆𑀢𑁄𑀯𑀲𑁆𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀲𑀢𑁆𑀣𑀸 𑀧𑀦 𑀢𑁂𑀦 𑀳𑀢𑁆𑀣𑀺𑀦𑀸 𑀉𑀧𑀝𑁆𑀞𑀺𑀬𑀫𑀸𑀦𑁄 𑀲𑀼𑀔𑀁 𑀯𑀲𑀺. 𑀲𑁄𑀧𑀺 𑀳𑀺 𑀳𑀢𑁆𑀣𑀺𑀦𑀸𑀕𑁄 𑀕𑀡𑀁 𑀧𑀳𑀸𑀬 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬𑁂𑀯 ¶ 𑀢𑀁 𑀯𑀦𑀲𑀡𑁆𑀟𑀁 𑀧𑀸𑀯𑀺𑀲𑀺.

𑀬𑀣𑀸𑀳 𑁋 ‘‘𑀅𑀳𑀁 𑀔𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀻𑀦𑀻𑀳𑀺 𑀳𑀢𑁆𑀣𑀺𑀓𑀮𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀸𑀫𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀸𑀫𑀺, 𑀑𑀕𑀸𑀳𑀸 𑀘𑀲𑁆𑀲 𑀫𑁂 𑀉𑀢𑁆𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀏𑀓𑁄𑀯 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁪𑁬𑁭; 𑀉𑀤𑀸. 𑁩𑁫). 𑀅𑀣 𑀔𑁄 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀸 𑀅𑀧𑀓𑁆𑀓𑀫𑁆𑀫 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑀁 𑀪𑀤𑁆𑀤𑀲𑀸𑀮𑀫𑀽𑀮𑀁, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀦 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 𑀪𑀤𑁆𑀤𑀲𑀸𑀮𑀫𑀽𑀮𑀁 𑀧𑀸𑀤𑁂𑀦𑁂𑀯 𑀧𑀳𑀭𑀦𑁆𑀢𑁄 𑀢𑀘𑁆𑀙𑁂𑀢𑁆𑀯𑀸 𑀲𑁄𑀡𑁆𑀟𑀸𑀬 𑀲𑀸𑀔𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄𑀡𑁆𑀟𑀸𑀬 ¶ 𑀖𑀝𑀁 𑀕𑀳𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀉𑀡𑁆𑀳𑁄𑀤𑀓𑁂𑀦 𑀅𑀢𑁆𑀣𑁂 𑀲𑀢𑀺 𑀉𑀡𑁆𑀳𑁄𑀤𑀓𑀁 𑀧𑀝𑀺𑀬𑀸𑀤𑁂𑀢𑀺. 𑀓𑀣𑀁? 𑀳𑀢𑁆𑀣𑁂𑀦 𑀓𑀝𑁆𑀞𑀸𑀦𑀺 𑀖𑀁𑀲𑀺𑀢𑁆𑀯𑀸 𑀅𑀕𑁆𑀕𑀺𑀁 𑀲𑀫𑁆𑀧𑀸𑀤𑁂𑀢𑀺, 𑀢𑀢𑁆𑀣 𑀤𑀸𑀭𑀽𑀦𑀺 𑀧𑀓𑁆𑀔𑀺𑀧𑀦𑁆𑀢𑁄 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀢𑀢𑁆𑀣 𑀧𑀸𑀲𑀸𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀤𑀸𑀭𑀼𑀤𑀡𑁆𑀟𑀓𑁂𑀦 𑀧𑀯𑀝𑁆𑀝𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀔𑀼𑀤𑁆𑀤𑀓𑀲𑁄𑀡𑁆𑀟𑀺𑀓𑀸𑀬 𑀔𑀺𑀧𑀢𑀺, 𑀢𑀢𑁄 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀉𑀤𑀓𑀲𑁆𑀲 𑀢𑀢𑁆𑀢𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀢𑀺. 𑀲𑀢𑁆𑀣𑀸 ‘‘𑀉𑀤𑀓𑀁 𑀢𑁂 𑀢𑀸𑀧𑀺𑀢𑀁 𑀧𑀸𑀮𑀺𑀮𑁂𑀬𑁆𑀬𑀓𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀢𑀺 ¶ . 𑀅𑀣𑀲𑁆𑀲 𑀦𑀸𑀦𑀸𑀯𑀺𑀥𑀸𑀦𑀺 𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀤𑁂𑀢𑀺. 𑀬𑀤𑀸 𑀧𑀦 𑀲𑀢𑁆𑀣𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀢𑀤𑀸 𑀲𑀢𑁆𑀣𑀼 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀢𑀺. 𑀲𑀢𑁆𑀣𑀸 𑀕𑀸𑀫𑀽𑀧𑀘𑀸𑀭𑀁 𑀧𑀢𑁆𑀯𑀸 ‘‘𑀧𑀸𑀮𑀺𑀮𑁂𑀬𑁆𑀬𑀓 𑀇𑀢𑁄 𑀧𑀝𑁆𑀞𑀸𑀬 𑀢𑀬𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀆𑀳𑀸𑀭 𑀫𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑁄𑀧𑀺 𑀬𑀸𑀯 𑀲𑀢𑁆𑀣𑀼 𑀦𑀺𑀓𑁆𑀔𑀫𑀦𑀸 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑁂 𑀑𑀢𑀸𑀭𑁂𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀸𑀔𑀸𑀬 𑀩𑀻𑀚𑀢𑀺, 𑀭𑀢𑁆𑀢𑀺𑀁 𑀯𑀸𑀴𑀫𑀺𑀕𑀧𑀭𑀺𑀧𑀦𑁆𑀣𑀦𑀺𑀯𑀸𑀭𑀡𑀢𑁆𑀣𑀁 𑀫𑀳𑀦𑁆𑀢𑀁 𑀤𑀡𑁆𑀟𑀁 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀦𑀲𑀡𑁆𑀟𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑁂𑀦 𑀯𑀺𑀘𑀭𑀢𑀺, 𑀢𑀢𑁄 ¶ 𑀧𑀝𑁆𑀞𑀸𑀬𑀬𑁂𑀯 𑀓𑀺𑀭 𑀲𑁄 𑀯𑀦𑀲𑀡𑁆𑀟𑁄 𑀧𑀸𑀮𑀺𑀮𑁂𑀬𑁆𑀬𑀓𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀦𑀸𑀫 𑀚𑀸𑀢𑁄. 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀫𑀼𑀔𑁄𑀤𑀓𑀤𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀢𑁂𑀦𑁂𑀯𑀽𑀧𑀸𑀬𑁂𑀦 𑀲𑀩𑁆𑀩𑀯𑀢𑁆𑀢𑀸𑀦𑀺 𑀓𑀭𑁄𑀢𑀺.

𑀅𑀣𑁂𑀓𑁄 𑀫𑀓𑁆𑀓𑀝𑁄 𑀢𑀁 𑀳𑀢𑁆𑀣𑀺𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀣𑀸𑀕𑀢𑀲𑁆𑀲 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁆𑀧𑀺 𑀓𑀺𑀜𑁆𑀘𑀺𑀤𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀘𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀦𑀺𑀫𑁆𑀫𑀓𑁆𑀔𑀺𑀓𑀁 𑀤𑀡𑁆𑀟𑀓𑀫𑀥𑀼𑀁 𑀤𑀺𑀲𑁆𑀯𑀸 𑀤𑀡𑁆𑀟𑀓𑀁 𑀪𑀜𑁆𑀚𑀺𑀢𑁆𑀯𑀸 𑀤𑀡𑁆𑀟𑀓𑁂𑀦𑁂𑀯 𑀲𑀤𑁆𑀥𑀺𑀁 𑀫𑀥𑀼𑀧𑀝𑀮𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀳𑀭𑀺𑀢𑁆𑀯𑀸 𑀓𑀤𑀮𑀺𑀧𑀢𑁆𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀅𑀤𑀸𑀲𑀺 ¶ . 𑀲𑀢𑁆𑀣𑀸 𑀕𑀡𑁆𑀳𑀺. 𑀫𑀓𑁆𑀓𑀝𑁄 ‘‘𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀧𑀭𑀺𑀪𑁄𑀕𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀡𑁆𑀟𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 𑀅𑀡𑁆𑀟𑀓𑀸𑀦𑀺 𑀤𑀺𑀲𑁆𑀯𑀸 𑀢𑀸𑀦𑀺 𑀲𑀡𑀺𑀓𑀁 𑀅𑀧𑀦𑁂𑀢𑁆𑀯𑀸 𑀧𑀼𑀦 𑀅𑀤𑀸𑀲𑀺. 𑀲𑀢𑁆𑀣𑀸 𑀧𑀭𑀺𑀪𑁄𑀕𑀫𑀓𑀸𑀲𑀺. 𑀲𑁄 𑀢𑀼𑀝𑁆𑀞𑀫𑀸𑀦𑀲𑁄 𑀢𑀁 𑀢𑀁 𑀲𑀸𑀔𑀁 𑀕𑀳𑁂𑀢𑁆𑀯𑀸 𑀦𑀘𑁆𑀘𑀦𑁆𑀢𑁄𑀯 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀕𑀳𑀺𑀢𑀲𑀸𑀔𑀸𑀧𑀺 𑀅𑀓𑁆𑀓𑀦𑁆𑀢𑀲𑀸𑀔𑀸𑀧𑀺 𑀪𑀺𑀚𑁆𑀚𑀺𑀁𑀲𑀼. 𑀲𑁄 𑀏𑀓𑀲𑁆𑀫𑀺𑀁 𑀔𑀸𑀡𑀼𑀫𑀢𑁆𑀣𑀓𑁂 𑀧𑀢𑀺𑀢𑁆𑀯𑀸 𑀦𑀺𑀯𑀺𑀝𑁆𑀞𑀕𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁂𑀦𑁂𑀯 𑀘𑀺𑀢𑁆𑀢𑁂𑀦 ¶ 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀓𑁆𑀓𑀝𑀤𑁂𑀯𑀧𑀼𑀢𑁆𑀢𑁄 𑀦𑀸𑀫 𑀅𑀳𑁄𑀲𑀺.

𑀢𑀣𑀸𑀕𑀢𑀲𑁆𑀲 𑀢𑀢𑁆𑀣 𑀳𑀢𑁆𑀣𑀺𑀦𑀸𑀕𑁂𑀦 𑀉𑀧𑀝𑁆𑀞𑀺𑀬𑀫𑀸𑀦𑀲𑁆𑀲 𑀯𑀲𑀦𑀪𑀸𑀯𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑀸𑀯𑀢𑁆𑀣𑀺𑀦𑀕𑀭𑀢𑁄 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀲𑀸𑀔𑀸 𑀘 𑀫𑀳𑀸𑀉𑀧𑀸𑀲𑀺𑀓𑀸’’𑀢𑀺𑀏𑀯𑀫𑀸𑀤𑀻𑀦𑀺 𑀫𑀳𑀸𑀓𑀼𑀮𑀸𑀦𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 ‘‘𑀲𑀢𑁆𑀣𑀸𑀭𑀁 𑀦𑁄, 𑀪𑀦𑁆𑀢𑁂, 𑀤𑀲𑁆𑀲𑁂𑀣𑀸’’𑀢𑀺. 𑀤𑀺𑀲𑀸𑀯𑀸𑀲𑀺𑀦𑁄𑀧𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀯𑀼𑀝𑁆𑀞𑀯𑀲𑁆𑀲𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀘𑀺𑀭𑀲𑁆𑀲𑀼𑀢𑀸 𑀦𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀻 𑀓𑀣𑀸, 𑀲𑀸𑀥𑀼 𑀫𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀺𑀁 𑀓𑀣𑀁 𑀲𑀯𑀦𑀸𑀬𑀸’’𑀢𑀺 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀢𑁂𑀫𑀸𑀲𑀁 𑀏𑀓𑀯𑀺𑀳𑀸𑀭𑀺𑀦𑁄 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀏𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 ¶ 𑀅𑀬𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀩𑀳𑀺 𑀞𑀧𑁂𑀢𑁆𑀯𑀸 𑀏𑀓𑀓𑁄𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺. 𑀧𑀸𑀮𑀺𑀮𑁂𑀬𑁆𑀬𑀓𑁄 𑀢𑀁 𑀤𑀺𑀲𑁆𑀯𑀸 𑀤𑀡𑁆𑀟𑀫𑀸𑀤𑀸𑀬 𑀧𑀓𑁆𑀔𑀦𑁆𑀤𑀺. 𑀲𑀢𑁆𑀣𑀸 𑀑𑀮𑁄𑀓𑁂𑀢𑁆𑀯𑀸 𑀅𑀧𑁂𑀳𑀺 ‘‘𑀅𑀧𑁂𑀳𑀺 𑀧𑀸𑀮𑀺𑀮𑁂𑀬𑁆𑀬𑀓, 𑀫𑀸 𑀦𑀺𑀯𑀸𑀭𑀬𑀺, 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄 𑀏𑀲𑁄’’𑀢𑀺 𑀆𑀳. 𑀲𑁄 𑀢𑀢𑁆𑀣𑁂𑀯 𑀤𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁 𑀆𑀧𑀼𑀘𑁆𑀙𑀺. 𑀣𑁂𑀭𑁄 𑀦𑀸𑀤𑀸𑀲𑀺. 𑀦𑀸𑀕𑁄 ‘‘𑀲𑀘𑁂 𑀉𑀕𑁆𑀕𑀳𑀺𑀢𑀯𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀼 𑀦𑀺𑀲𑀻𑀤𑀦𑀧𑀸𑀲𑀸𑀡𑀨𑀮𑀓𑁂 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦 𑀞𑀧𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀞𑀧𑁂𑀲𑀺. 𑀯𑀢𑁆𑀢𑀲𑀫𑁆𑀧𑀦𑁆𑀦𑀸 𑀳𑀺 𑀕𑀭𑀽𑀦𑀁 𑀆𑀲𑀦𑁂 𑀯𑀸 𑀲𑀬𑀦𑁂 𑀯𑀸 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦 𑀞𑀧𑁂𑀦𑁆𑀢𑀺.

𑀣𑁂𑀭𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀆𑀦𑀦𑁆𑀤, 𑀏𑀓𑁄𑀯 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀜𑁆𑀘𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀓𑀳𑀁 𑀧𑀦𑁂𑀢𑁂’’𑀢𑀺 𑀯𑀢𑁆𑀯𑀸 ¶ ‘‘𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀩𑀳𑀺 𑀞𑀧𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀓𑁆𑀓𑁄𑀲𑀸𑀳𑀺 𑀦𑁂’’𑀢𑀺 𑀆𑀳. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀢𑁂 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺, ‘‘𑀪𑀦𑁆𑀢𑁂 𑀪𑀕𑀯𑀸, 𑀳𑀺 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑁄 𑀘𑁂𑀯 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑁄 𑀘, 𑀢𑀼𑀫𑁆𑀳𑁂𑀳𑀺 𑀢𑁂𑀫𑀸𑀲𑀁 𑀏𑀓𑀓𑁂𑀳𑀺 𑀢𑀺𑀝𑁆𑀞𑀦𑁆𑀢𑁂𑀳𑀺 𑀦𑀺𑀲𑀻𑀤𑀦𑁆𑀢𑁂𑀳𑀺 𑀘 𑀤𑀼𑀓𑁆𑀓𑀭𑀁 𑀓𑀢𑀁, 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀸𑀭𑀓𑁄𑀧𑀺 𑀫𑀼𑀔𑁄𑀤𑀓𑀸𑀤𑀺𑀤𑀸𑀬𑀓𑁄𑀧𑀺 𑀦𑀸𑀳𑁄𑀲𑀺 𑀫𑀜𑁆𑀜𑁂’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀧𑀸𑀮𑀺𑀮𑁂𑀬𑁆𑀬𑀓𑀳𑀢𑁆𑀣𑀺𑀦𑀸 𑀫𑀫 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑀸𑀦𑀺. 𑀏𑀯𑀭𑀽𑀧𑀜𑁆𑀳𑀺 𑀲𑀳𑀸𑀬𑀁 𑀮𑀪𑀦𑁆𑀢𑁂𑀦 ¶ 𑀏𑀓𑀢𑁄𑀯 𑀯𑀲𑀺𑀢𑀼𑀁 𑀬𑀼𑀢𑁆𑀢𑀁, 𑀅𑀮𑀪𑀦𑁆𑀢𑀲𑁆𑀲 𑀏𑀓𑀘𑀸𑀭𑀺𑀓𑀪𑀸𑀯𑁄𑀯 ¶ 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀦𑀸𑀕𑀯𑀕𑁆𑀕𑁂 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺,

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬,

𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

‘‘𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄,

𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸,

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺. (𑀫𑀳𑀸𑀯. 𑁪𑁬𑁪; 𑀫. 𑀦𑀺. 𑁩.𑁨𑁩𑁭; 𑀥. 𑀧. 𑁩𑁨𑁮-𑁩𑁩𑁦; 𑀲𑀼. 𑀦𑀺. 𑁪𑁫-𑁪𑁬);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀳𑀺 𑀧𑁂𑀲𑀺𑀢𑀲𑀸𑀲𑀦𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀦𑀸𑀣𑀧𑀺𑀡𑁆𑀟𑀺𑀓𑀧𑁆𑀧𑀫𑀼𑀔𑀸 𑀢𑁂 𑀧𑀜𑁆𑀘 𑀅𑀭𑀺𑀬𑀲𑀸𑀯𑀓𑀓𑁄𑀝𑀺𑀬𑁄 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀕𑀡𑁆𑀳𑀸𑀳𑀺 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀦𑀸𑀕𑁄 𑀕𑀦𑁆𑀢𑁆𑀯𑀸 𑀕𑀢𑀫𑀕𑁆𑀕𑁂 𑀢𑀺𑀭𑀺𑀬𑀁 𑀅𑀝𑁆𑀞𑀸𑀲𑀺. ‘‘𑀓𑀺𑀁 𑀓𑀭𑁄𑀢𑀺, 𑀪𑀦𑁆𑀢𑁂, 𑀦𑀸𑀕𑁄’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀔𑁄 𑀧𑀦𑀸𑀬𑀁 ¶ 𑀫𑀬𑁆𑀳𑀁 𑀉𑀧𑀓𑀸𑀭𑀓𑁄, 𑀦𑀸𑀲𑁆𑀲 𑀘𑀺𑀢𑁆𑀢𑀁 𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀯𑀢𑁆𑀢𑀣, 𑀪𑀺𑀓𑁆𑀔𑀯𑁂’’𑀢𑀺 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 ¶ 𑀦𑀺𑀯𑀢𑁆𑀢𑀺. 𑀳𑀢𑁆𑀣𑀻𑀧𑀺 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀧𑀦𑀲𑀓𑀤𑀮𑀺𑀨𑀮𑀸𑀤𑀻𑀦𑀺 𑀦𑀸𑀦𑀸𑀨𑀮𑀸𑀦𑀺 𑀲𑀁𑀳𑀭𑀺𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽𑀦𑀁 𑀅𑀤𑀸𑀲𑀺. 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀲𑀩𑁆𑀩𑀸𑀦𑀺 𑀔𑁂𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀢𑁆𑀣𑀸 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀦𑀸𑀕𑁄 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀦𑁆𑀢𑀭𑁂𑀦 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀢𑀺𑀭𑀺𑀬𑀁 𑀅𑀝𑁆𑀞𑀸𑀲𑀺. ‘‘𑀓𑀺𑀁 𑀓𑀭𑁄𑀢𑀺, 𑀪𑀦𑁆𑀢𑁂, 𑀦𑀸𑀕𑁄’’𑀢𑀺? ‘‘𑀅𑀬𑀜𑁆𑀳𑀺 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀧𑁂𑀲𑁂𑀢𑁆𑀯𑀸 𑀫𑀁 𑀦𑀺𑀯𑀢𑁆𑀢𑁂𑀢𑀼𑀓𑀸𑀫𑁄’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀧𑀸𑀮𑀺𑀮𑁂𑀬𑁆𑀬𑀓, 𑀇𑀤𑀁 𑀧𑀦 ¶ 𑀫𑀫 𑀅𑀦𑀺𑀯𑀢𑁆𑀢𑀕𑀫𑀦𑀁, 𑀢𑀯 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀫𑀕𑁆𑀕𑀨𑀮𑀁 𑀯𑀸 𑀦𑀢𑁆𑀣𑀺, 𑀢𑀺𑀝𑁆𑀞 𑀢𑁆𑀯’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀦𑀸𑀕𑁄 𑀫𑀼𑀔𑁂 𑀲𑁄𑀡𑁆𑀟𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑁄𑀤𑀦𑁆𑀢𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀕𑀫𑀸𑀲𑀺. 𑀲𑁄 𑀳𑀺 𑀲𑀢𑁆𑀣𑀸𑀭𑀁 𑀦𑀺𑀯𑀢𑁆𑀢𑁂𑀢𑀼𑀁 𑀮𑀪𑀦𑁆𑀢𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀬𑀸𑀯𑀚𑀻𑀯𑀁 𑀧𑀝𑀺𑀚𑀕𑁆𑀕𑁂𑀬𑁆𑀬, 𑀲𑀢𑁆𑀣𑀸 𑀧𑀦 𑀢𑀁 𑀕𑀸𑀫𑀽𑀧𑀘𑀸𑀭𑀁 𑀧𑀢𑁆𑀯𑀸 ‘‘𑀧𑀸𑀮𑀺𑀮𑁂𑀬𑁆𑀬𑀓 𑀇𑀢𑁄 𑀧𑀝𑁆𑀞𑀸𑀬 𑀢𑀯 𑀅𑀪𑀽𑀫𑀺, 𑀫𑀦𑀼𑀲𑁆𑀲𑀸𑀯𑀸𑀲𑁄 𑀲𑀧𑀭𑀺𑀧𑀦𑁆𑀣𑁄, 𑀢𑀺𑀝𑁆𑀞 𑀢𑁆𑀯’’𑀦𑁆𑀢𑀺 𑀆𑀳. 𑀲𑁄 𑀭𑁄𑀤𑀫𑀸𑀦𑁄 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀲𑀢𑁆𑀣𑀭𑀺 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀦𑁆𑀢𑁂 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀸𑀤𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀅𑀘𑁆𑀙𑀭𑀸𑀲𑀳𑀲𑁆𑀲𑀫𑀚𑁆𑀛𑁂 𑀦𑀺𑀩𑁆𑀩𑀢𑁆𑀢𑀺, 𑀧𑀸𑀮𑀺𑀮𑁂𑀬𑁆𑀬𑀓𑀤𑁂𑀯𑀧𑀼𑀢𑁆𑀢𑁄𑀬𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀲𑀢𑁆𑀣𑀸𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 ¶ ‘‘𑀲𑀢𑁆𑀣𑀸 𑀓𑀺𑀭 𑀲𑀸𑀯𑀢𑁆𑀣𑀺𑀁 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀢𑀼𑀁 𑀢𑀢𑁆𑀣 𑀅𑀕𑀫𑀁𑀲𑀼. 𑀓𑁄𑀲𑀮𑀭𑀸𑀚𑀸 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀡𑁆𑀟𑀦𑀓𑀸𑀭𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑁂𑀲𑀁 𑀫𑀫 𑀯𑀺𑀚𑀺𑀢𑀁 𑀧𑀯𑀺𑀲𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀲𑀻𑀮𑀯𑀦𑁆𑀢𑀸 𑀏𑀢𑁂 𑀪𑀺𑀓𑁆𑀔𑀽, 𑀓𑁂𑀯𑀮𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑁂𑀦 𑀫𑀫 𑀯𑀘𑀦𑀁 𑀦 𑀕𑀡𑁆𑀳𑀺𑀁𑀲𑀼, 𑀇𑀤𑀸𑀦𑀺 𑀫𑀁 𑀔𑀫𑀸𑀧𑁂𑀢𑀼𑀁 𑀆𑀕𑀘𑁆𑀙𑀦𑁆𑀢𑀺, 𑀆𑀕𑀘𑁆𑀙𑀦𑁆𑀢𑀼 𑀫𑀳𑀸𑀭𑀸𑀚𑀸’’𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀢𑁂𑀲𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀅𑀦𑀼𑀧𑁆𑀧𑀢𑁆𑀢𑀸𑀦𑀁 𑀧𑀦 𑀢𑁂𑀲𑀁 𑀪𑀕𑀯𑀸 𑀏𑀓𑀫𑀦𑁆𑀢𑁂 𑀯𑀺𑀯𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀧𑁂𑀲𑀺. 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑁂𑀳𑀺 𑀲𑀤𑁆𑀥𑀺𑀁 𑀦𑁂𑀯 𑀏𑀓𑀢𑁄 𑀦𑀺𑀲𑀻𑀤𑀦𑁆𑀢𑀺, 𑀦 𑀢𑀺𑀝𑁆𑀞𑀦𑁆𑀢𑀺, 𑀆𑀕𑀢𑀸𑀕𑀢𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀢𑀫𑁂𑀢𑁂, 𑀪𑀦𑁆𑀢𑁂, 𑀪𑀡𑁆𑀟𑀦𑀓𑀸𑀭𑀓𑀸 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽’’𑀢𑀺? 𑀲𑀢𑁆𑀣𑀸 ‘‘𑀏𑀢𑁂’’𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀢𑁂 𑀓𑀺𑀭 𑀢𑁂, 𑀏𑀢𑁂 𑀓𑀺𑀭 𑀢𑁂’’𑀢𑀺 𑀆𑀕𑀢𑀸𑀕𑀢𑁂𑀳𑀺 𑀅𑀗𑁆𑀕𑀼𑀮𑀺𑀓𑀸 𑀤𑀲𑁆𑀲𑀺𑀬𑀫𑀸𑀦𑀸 𑀮𑀚𑁆𑀚𑀸𑀬 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀲𑀼𑀁. 𑀲𑀢𑁆𑀣𑀸 ‘‘𑀪𑀸𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀓𑀢𑀁, 𑀢𑀼𑀫𑁆𑀳𑁂 𑀳𑀺 𑀦𑀸𑀫 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀬𑀺 𑀲𑀸𑀫𑀕𑁆𑀕𑀺𑀁 𑀓𑀭𑁄𑀦𑁆𑀢𑁂 𑀫𑀫 𑀯𑀘𑀦𑀁 𑀦 𑀓𑀭𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀯𑀚𑁆𑀛𑀧𑁆𑀧𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀑𑀯𑀸𑀤𑀁 ¶ 𑀲𑀼𑀢𑁆𑀯𑀸 𑀢𑁂𑀲𑀼 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀬𑀫𑀸𑀦𑁂𑀲𑀼𑀧𑀺 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀘𑁆𑀙𑀸 𑀤𑁆𑀯𑀻𑀲𑀼 𑀭𑀝𑁆𑀞𑁂𑀲𑀼 𑀭𑀚𑁆𑀚𑀁 𑀓𑀸𑀭𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀧𑀼𑀦𑀤𑁂𑀯 ¶ 𑀓𑁄𑀲𑀫𑁆𑀩𑀺𑀓𑀚𑀸𑀢𑀓𑀁 (𑀚𑀸. 𑁧.𑁯.𑁧𑁦 𑀆𑀤𑀬𑁄) 𑀓𑀣𑁂𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀓𑀼𑀫𑀸𑀭𑁄 𑀫𑀸𑀢𑀸𑀧𑀺𑀢𑀽𑀲𑀼 ¶ 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀬𑀫𑀸𑀦𑁂𑀲𑀼𑀧𑀺 𑀢𑁂𑀲𑀁 𑀑𑀯𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀘𑁆𑀙𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀥𑀻𑀢𑀭𑀁 𑀮𑀪𑀺𑀢𑁆𑀯𑀸 𑀤𑁆𑀯𑀻𑀲𑀼 𑀓𑀸𑀲𑀺𑀓𑁄𑀲𑀮𑀭𑀝𑁆𑀞𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀫𑀫 𑀯𑀘𑀦𑀁 𑀅𑀓𑀭𑁄𑀦𑁆𑀢𑁂𑀳𑀺 𑀪𑀸𑀭𑀺𑀬𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬.

‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸’’𑀢𑀺.

𑀢𑀢𑁆𑀣 𑀧𑀭𑁂𑀢𑀺 𑀧𑀡𑁆𑀟𑀺𑀢𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂 𑀪𑀡𑁆𑀟𑀦𑀓𑀸𑀭𑀓𑀸 𑀧𑀭𑁂 𑀦𑀸𑀫. 𑀢𑁂 𑀢𑀢𑁆𑀣 𑀲𑀗𑁆𑀖𑀫𑀚𑁆𑀛𑁂 𑀓𑁄𑀮𑀸𑀳𑀮𑀁 𑀓𑀭𑁄𑀦𑁆𑀢𑀸 ‘‘𑀫𑀬𑀁 𑀬𑀫𑀸𑀫𑀲𑁂 𑀉𑀧𑀭𑀫𑀸𑀫 𑀯𑀺𑀦𑀲𑁆𑀲𑀸𑀫 𑀲𑀢𑀢𑀁 𑀲𑀫𑀺𑀢𑀁 𑀫𑀘𑁆𑀘𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀦 𑀯𑀺𑀚𑀸𑀦𑀦𑁆𑀢𑀺. 𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀻𑀢𑀺 𑀬𑁂 𑀢𑀢𑁆𑀣 𑀧𑀡𑁆𑀟𑀺𑀢𑀸 ‘‘𑀫𑀬𑀁 𑀫𑀘𑁆𑀘𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀺𑀚𑀸𑀦𑀦𑁆𑀢𑀺. 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸𑀢𑀺 𑀏𑀯𑀜𑁆𑀳𑀺 𑀢𑁂 𑀚𑀸𑀦𑀦𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑁂𑀥𑀕𑀸𑀦𑀁 𑀓𑀮𑀳𑀸𑀦𑀁 𑀯𑀽𑀧𑀲𑀫𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀅𑀣 𑀦𑁂𑀲𑀁 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂 𑀫𑁂𑀥𑀕𑀸 𑀲𑀫𑁆𑀫𑀦𑁆𑀢𑀻𑀢𑀺. 𑀅𑀣 𑀯𑀸 𑀧𑀭𑁂 𑀘𑀸𑀢𑀺 𑀧𑀼𑀩𑁆𑀩𑁂 𑀫𑀬𑀸 ‘‘𑀫𑀸, 𑀪𑀺𑀓𑁆𑀔𑀯𑁂, 𑀪𑀡𑁆𑀟𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀑𑀯𑀤𑀺𑀬𑀫𑀸𑀦𑀸𑀧𑀺 𑀫𑀫 𑀑𑀯𑀸𑀤𑀲𑁆𑀲 𑀅𑀧𑀝𑀺𑀕𑁆𑀕𑀳𑀡𑁂𑀦 𑀅𑀢𑀺𑀓𑁆𑀓𑀫𑀦𑁂𑀦 𑀅𑀫𑀸𑀫𑀓𑀸 ¶ 𑀧𑀭𑁂 𑀦𑀸𑀫. ‘‘𑀫𑀬𑀁 𑀙𑀦𑁆𑀤𑀸𑀤𑀺𑀯𑀲𑁂𑀦 𑀫𑀺𑀘𑁆𑀙𑀸𑀕𑀸𑀳𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣 𑀲𑀗𑁆𑀖𑀫𑀚𑁆𑀛𑁂 𑀬𑀫𑀸𑀫𑀲𑁂 𑀪𑀡𑁆𑀟𑀦𑀸𑀤𑀻𑀦𑀁 𑀯𑀼𑀤𑁆𑀥𑀺𑀬𑀸 𑀯𑀸𑀬𑀫𑀸𑀫𑀸’’𑀢𑀺 𑀦 𑀯𑀺𑀚𑀸𑀦𑀦𑁆𑀢𑀺. 𑀇𑀤𑀸𑀦𑀺 𑀧𑀦 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀸 𑀢𑀢𑁆𑀣 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀬𑁂 𑀘 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 ‘‘𑀧𑀼𑀩𑁆𑀩𑁂 𑀫𑀬𑀁 𑀙𑀦𑁆𑀤𑀸𑀤𑀺𑀯𑀲𑁂𑀦 𑀯𑀸𑀬𑀫𑀦𑁆𑀢𑀸 𑀅𑀬𑁄𑀦𑀺𑀲𑁄 𑀧𑀝𑀺𑀧𑀦𑁆𑀦𑀸’’𑀢𑀺 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀢𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑁂 𑀦𑀺𑀲𑁆𑀲𑀸𑀬 𑀇𑀫𑁂 𑀤𑀸𑀦𑀺 𑀓𑀮𑀳𑀲𑀗𑁆𑀔𑀸𑀢𑀸 𑀫𑁂𑀥𑀕𑀸 𑀲𑀫𑁆𑀫𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀓𑁄𑀲𑀫𑁆𑀩𑀓𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀫𑀳𑀸𑀓𑀸𑀴𑀢𑁆𑀣𑁂𑀭𑀯𑀢𑁆𑀣𑀼

𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑁂𑀢𑀩𑁆𑀬𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀲𑀺𑀁𑀲𑀧𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀓𑀸𑀴𑀫𑀳𑀸𑀓𑀸𑀴𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁂𑀢𑀩𑁆𑀬𑀦𑀕𑀭𑀯𑀸𑀲𑀺𑀦𑁄 ¶ 𑀳𑀺 𑀘𑀽𑀴𑀓𑀸𑀴𑁄, 𑀫𑀚𑁆𑀛𑀺𑀫𑀓𑀸𑀴𑁄, 𑀫𑀳𑀸𑀓𑀸𑀴𑁄𑀢𑀺 𑀢𑀬𑁄 𑀪𑀸𑀢𑀭𑁄 𑀓𑀼𑀝𑀼𑀫𑁆𑀩𑀺𑀓𑀸 ¶ . 𑀢𑁂𑀲𑀼 𑀚𑁂𑀝𑁆𑀞𑀓𑀦𑀺𑀝𑁆𑀞𑀸 𑀤𑀺𑀲𑀸𑀲𑀼 𑀯𑀺𑀘𑀭𑀺𑀢𑁆𑀯𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀡𑁆𑀟𑀁 𑀆𑀳𑀭𑀦𑁆𑀢𑀺, 𑀫𑀚𑁆𑀛𑀺𑀫𑀓𑀸𑀴𑁄 𑀆𑀪𑀢𑀁 𑀯𑀺𑀓𑁆𑀓𑀺𑀡𑀸𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀢𑁂 𑀉𑀪𑁄𑀧𑀺 𑀪𑀸𑀢𑀭𑁄 ¶ 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀦𑀸𑀦𑀸𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀸 𑀘 𑀚𑁂𑀢𑀯𑀦𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀓𑀝𑀸𑀦𑀺 𑀫𑁄𑀘𑀬𑀺𑀁𑀲𑀼. 𑀢𑁂𑀲𑀼 𑀫𑀳𑀸𑀓𑀸𑀴𑁄 𑀲𑀸𑀬𑀦𑁆𑀳𑀲𑀫𑀬𑁂 𑀫𑀸𑀮𑀸𑀕𑀦𑁆𑀥𑀸𑀤𑀺𑀳𑀢𑁆𑀣𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀅𑀭𑀺𑀬𑀲𑀸𑀯𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀼𑀳𑀺𑀁 𑀇𑀫𑁂 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀦𑀺𑀝𑁆𑀞𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀢𑀸𑀢, 𑀢𑁂𑀲𑀼 𑀲𑀓𑀝𑁂𑀲𑀼 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀅𑀳𑀁 𑀥𑀫𑁆𑀫𑀁 𑀲𑁄𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀸𑀤𑀺𑀯𑀲𑁂𑀦 (𑀫. 𑀦𑀺. 𑁧.𑁧𑁬𑁩 𑀆𑀤𑀬𑁄) 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀜𑁆𑀘 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀓𑀸𑀴𑁄 ‘‘𑀲𑀩𑁆𑀩𑀁 𑀓𑀺𑀭 𑀧𑀳𑀸𑀬 𑀕𑀦𑁆𑀢𑀩𑁆𑀩𑀁, 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀁 𑀦𑁂𑀯 𑀪𑁄𑀕𑀸, 𑀦 𑀜𑀸𑀢𑀓𑀸 𑀘 𑀅𑀦𑀼𑀕𑀘𑁆𑀙𑀦𑁆𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀚𑀦𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 ‘‘𑀦𑀢𑁆𑀣𑀺 𑀢𑁂 𑀓𑁄𑀘𑀺 𑀅𑀧𑀮𑁄𑀓𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂, ‘‘𑀓𑀦𑀺𑀝𑁆𑀞𑁄 𑀫𑁂, 𑀪𑀦𑁆𑀢𑁂, 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀳𑀺 ‘‘𑀅𑀧𑀮𑁄𑀓𑁂𑀳𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀓𑀦𑀺𑀝𑁆𑀞𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀇𑀫𑀁 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. ‘‘𑀢𑀼𑀫𑁆𑀳𑁂 ¶ 𑀧𑀦 𑀓𑀺𑀁 𑀓𑀭𑀺𑀲𑁆𑀲𑀣 𑀪𑀸𑀢𑀺𑀓𑀸’’𑀢𑀺? ‘‘𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀬𑀸𑀘𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀸𑀥𑀼, 𑀲𑀸𑀫𑀺, 𑀬𑀣𑀸 𑀅𑀚𑁆𑀛𑀸𑀲𑀬𑀁 𑀓𑀭𑁄𑀣𑀸’’𑀢𑀺 𑀆𑀳. 𑀫𑀳𑀸𑀓𑀸𑀴𑁄 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. ‘‘𑀅𑀳𑀁 𑀪𑀸𑀢𑀺𑀓𑀁 𑀕𑀳𑁂𑀢𑁆𑀯𑀸𑀯 𑀉𑀧𑁆𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀽𑀴𑀓𑀸𑀴𑁄𑀧𑀺 𑀧𑀩𑁆𑀩𑀚𑀺. 𑀅𑀧𑀭𑀪𑀸𑀕𑁂 𑀫𑀳𑀸𑀓𑀸𑀴𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀲𑀦𑁂 𑀥𑀼𑀭𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀤𑁆𑀯𑀻𑀲𑀼 𑀥𑀼𑀭𑁂𑀲𑀼 𑀓𑀣𑀺𑀢𑁂𑀲𑀼 ‘‘𑀅𑀳𑀁, 𑀪𑀦𑁆𑀢𑁂, 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀦 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑁄𑀲𑀸𑀦𑀺𑀓𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀬 𑀧𑀞𑀫𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀲𑀩𑁆𑀩𑁂𑀲𑀼 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁂𑀲𑀼 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀲𑀩𑁆𑀩𑁂𑀲𑀼 𑀅𑀦𑀼𑀝𑁆𑀞𑀺𑀢𑁂𑀲𑀼𑀬𑁂𑀯 𑀯𑀺𑀳𑀸𑀭𑀁 𑀆𑀕𑀘𑁆𑀙𑀢𑀺.

𑀅𑀣𑁂𑀓𑀸 ¶ 𑀲𑀼𑀲𑀸𑀦𑀕𑁄𑀧𑀺𑀓𑀸 𑀓𑀸𑀮𑀻 𑀦𑀸𑀫 𑀙𑀯𑀟𑀸𑀳𑀺𑀓𑀸 𑀣𑁂𑀭𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀜𑁆𑀘 𑀤𑀺𑀲𑁆𑀯𑀸 ‘‘𑀓𑁄 𑀦𑀼 𑀔𑁄 𑀇𑀥𑀸𑀕𑀘𑁆𑀙𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀏𑀓𑀤𑀺𑀯𑀲𑀁 𑀲𑀼𑀲𑀸𑀦𑀓𑀼𑀝𑀺𑀓𑀸𑀬𑀫𑁂𑀯 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀭𑁄 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀮𑀻𑀬𑀫𑀸𑀦𑀸 𑀫𑀚𑁆𑀛𑀺𑀫𑀬𑀸𑀫𑁂 𑀣𑁂𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀅𑀬𑁆𑀬𑁄, 𑀦𑁄, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀳𑀭𑀢𑀻’’𑀢𑀺 𑀆𑀳. ‘‘𑀆𑀫, 𑀉𑀧𑀸𑀲𑀺𑀓𑁂’’𑀢𑀺. ‘‘𑀪𑀦𑁆𑀢𑁂, 𑀲𑀼𑀲𑀸𑀦𑁂 𑀯𑀺𑀳𑀭𑀦𑁆𑀢𑁂𑀳𑀺 ¶ 𑀦𑀸𑀫 𑀯𑀢𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀣𑁂𑀭𑁄 ‘‘𑀓𑀺𑀁 𑀧𑀦 𑀫𑀬𑀁 𑀢𑀬𑀸 𑀓𑀣𑀺𑀢𑀯𑀢𑁆𑀢𑁂 𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀅𑀯𑀢𑁆𑀯𑀸 ‘‘𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀉𑀧𑀸𑀲𑀺𑀓𑁂’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀲𑁄𑀲𑀸𑀦𑀺𑀓𑁂𑀳𑀺 𑀦𑀸𑀫 ¶ 𑀲𑀼𑀲𑀸𑀦𑁂 𑀯𑀲𑀦𑀪𑀸𑀯𑁄 𑀲𑀼𑀲𑀸𑀦𑀕𑁄𑀧𑀓𑀸𑀦𑀜𑁆𑀘 𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑀲𑁆𑀲 𑀘 𑀕𑀸𑀫𑀪𑁄𑀚𑀓𑀲𑁆𑀲 𑀘 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀣𑁂𑀭𑁄 𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀢𑀓𑀫𑁆𑀫𑀸 𑀘𑁄𑀭𑀸 𑀥𑀦𑀲𑀸𑀫𑀺𑀓𑁂𑀳𑀺 𑀧𑀤𑀸𑀦𑀼𑀧𑀤𑀁 𑀅𑀦𑀼𑀩𑀤𑁆𑀥𑀸 𑀲𑀼𑀲𑀸𑀦𑁂 𑀪𑀡𑁆𑀟𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑀺, 𑀅𑀣 𑀫𑀦𑀼𑀲𑁆𑀲𑀸 𑀲𑁄𑀲𑀸𑀦𑀺𑀓𑀸𑀦𑀁 𑀧𑀭𑀺𑀧𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁 𑀧𑀦 𑀓𑀣𑀺𑀢𑁂 ‘𑀫𑀬𑀁 𑀇𑀫𑀲𑁆𑀲 𑀪𑀤𑁆𑀤𑀦𑁆𑀢𑀲𑁆𑀲 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀏𑀢𑁆𑀣 𑀯𑀲𑀦𑀪𑀸𑀯𑀁 𑀚𑀸𑀦𑀸𑀫, 𑀅𑀘𑁄𑀭𑁄 𑀏𑀲𑁄’𑀢𑀺 𑀉𑀧𑀤𑁆𑀤𑀯𑀁 𑀦𑀺𑀯𑀸𑀭𑁂𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁂𑀲𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺.

‘‘𑀣𑁂𑀭𑁄 𑀅𑀜𑁆𑀜𑀁 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀪𑀦𑁆𑀢𑁂, 𑀲𑀼𑀲𑀸𑀦𑁂 𑀯𑀲𑀦𑁆𑀢𑁂𑀦 𑀦𑀸𑀫 𑀅𑀬𑁆𑀬𑁂𑀦 𑀫𑀘𑁆𑀙𑀫𑀁𑀲𑀢𑀺𑀮𑀧𑀺𑀝𑁆𑀞𑀢𑁂𑀮𑀕𑀼𑀴𑀸𑀤𑀻𑀦𑀺 𑀯𑀚𑁆𑀚𑁂𑀢𑀩𑁆𑀩𑀸𑀦𑀺, 𑀤𑀺𑀯𑀸 𑀦 𑀦𑀺𑀤𑁆𑀤𑀸𑀬𑀺𑀢𑀩𑁆𑀩𑀁, 𑀓𑀼𑀲𑀻𑀢𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀲𑀞𑁂𑀦 𑀅𑀫𑀸𑀬𑀸𑀯𑀺𑀦𑀸 𑀳𑀼𑀢𑁆𑀯𑀸 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀸𑀬𑀁 𑀲𑀩𑁆𑀩𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀺𑀳𑀸𑀭𑀢𑁄 𑀆𑀕𑀦𑁆𑀢𑀩𑁆𑀩𑀁, 𑀧𑀘𑁆𑀘𑀽𑀲𑀓𑀸𑀮𑁂 𑀲𑀩𑁆𑀩𑁂𑀲𑀼 𑀅𑀦𑀼𑀝𑁆𑀞𑀺𑀢𑁂𑀲𑀼𑀬𑁂𑀯 𑀯𑀺𑀳𑀸𑀭𑀁 𑀕𑀦𑁆𑀢𑀩𑁆𑀩𑀁. 𑀲𑀘𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀘𑁂 𑀫𑀢𑀲𑀭𑀻𑀭𑀁 𑀆𑀦𑁂𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺, 𑀅𑀳𑀁 𑀓𑀫𑁆𑀩𑀮𑀓𑀽𑀝𑀸𑀕𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀺. 𑀦𑁄 𑀘𑁂 𑀲𑀓𑁆𑀔𑀺𑀲𑁆𑀲𑀢𑀺, 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀲𑀗𑁆𑀓𑀼𑀦𑀸 𑀆𑀓𑀟𑁆𑀠𑀺𑀢𑁆𑀯𑀸 𑀩𑀳𑀺 ¶ 𑀔𑀺𑀧𑀺𑀢𑁆𑀯𑀸 𑀨𑀭𑀲𑀼𑀦𑀸 𑀓𑁄𑀝𑁆𑀝𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀣𑁂𑀭𑁄 ‘‘𑀲𑀸𑀥𑀼 𑀪𑀤𑁆𑀤𑁂, 𑀏𑀓𑀁 𑀧𑀦 𑀭𑀽𑀧𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀘𑁆𑀘𑀲𑁆𑀲𑁄𑀲𑀺. 𑀣𑁂𑀭𑁄 𑀬𑀣𑀸𑀚𑁆𑀛𑀸𑀲𑀬𑁂𑀦 𑀲𑀼𑀲𑀸𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀘𑀽𑀴𑀓𑀸𑀴𑀢𑁆𑀣𑁂𑀭𑁄 ¶ 𑀧𑀦 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀖𑀭𑀸𑀯𑀸𑀲𑀁 𑀘𑀺𑀦𑁆𑀢𑁂𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀅𑀦𑀼𑀲𑁆𑀲𑀭𑀢𑀺. ‘‘𑀪𑀸𑀢𑀺𑀓𑁄 𑀫𑁂 𑀅𑀢𑀺𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑀺.

𑀅𑀣𑁂𑀓𑀸 𑀓𑀼𑀮𑀥𑀻𑀢𑀸 𑀢𑀁𑀫𑀼𑀳𑀼𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀦 𑀩𑁆𑀬𑀸𑀥𑀺𑀦𑀸 𑀲𑀸𑀬𑀦𑁆𑀳𑀲𑀫𑀬𑁂 𑀅𑀫𑀺𑀮𑀸𑀢𑀸 𑀅𑀓𑀺𑀮𑀦𑁆𑀢𑀸 𑀓𑀸𑀮𑀫𑀓𑀸𑀲𑀺. 𑀢𑀫𑁂𑀦𑀁 𑀜𑀸𑀢𑀓𑀸𑀤𑀬𑁄 𑀤𑀸𑀭𑀼𑀢𑁂𑀮𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀸𑀬𑀁 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀲𑀼𑀲𑀸𑀦𑀕𑁄𑀧𑀺𑀓𑀸𑀬 ‘‘𑀇𑀫𑀁 𑀛𑀸𑀧𑁂𑀳𑀻’’𑀢𑀺 𑀪𑀢𑀺𑀁 𑀤𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑀸 𑀢𑀲𑁆𑀲𑀸 𑀧𑀸𑀭𑀼𑀢𑀯𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀢𑀁𑀫𑀼𑀳𑀼𑀢𑁆𑀢𑀫𑀢𑀁 𑀧𑀻𑀡𑀺𑀢𑀧𑀻𑀡𑀺𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀤𑀺𑀲𑁆𑀯𑀸, ‘‘𑀇𑀫𑀁 𑀅𑀬𑁆𑀬𑀲𑁆𑀲 𑀤𑀲𑁆𑀲𑁂𑀢𑀼𑀁 𑀧𑀢𑀺𑀭𑀽𑀧𑀁 𑀆𑀭𑀫𑁆𑀫𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀦𑀸𑀫 𑀆𑀭𑀫𑁆𑀫𑀡𑀁 𑀅𑀢𑁆𑀣𑀺, 𑀑𑀮𑁄𑀓𑁂𑀣 𑀅𑀬𑁆𑀬𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀧𑀸𑀭𑀼𑀧𑀦𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀧𑀸𑀤𑀢𑀮𑀢𑁄 𑀬𑀸𑀯 𑀓𑁂𑀲𑀕𑁆𑀕𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑀺𑀧𑀻𑀡𑀺𑀢𑀫𑁂𑀢𑀁 ¶ 𑀭𑀽𑀧𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀅𑀕𑁆𑀕𑀺𑀫𑁆𑀳𑀺 𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀚𑀸𑀮𑀸𑀳𑀺 𑀕𑀳𑀺𑀢𑀫𑀢𑁆𑀢𑀓𑀸𑀮𑁂 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀸 𑀢𑀣𑀸 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀚𑀸𑀮𑀸𑀬 𑀧𑀳𑀝𑀧𑀳𑀝𑀝𑁆𑀞𑀸𑀦𑀁 𑀓𑀩𑀭𑀕𑀸𑀯𑀺𑀬𑀸 𑀯𑀺𑀬 𑀲𑀭𑀻𑀭𑀯𑀡𑁆𑀡𑀁 𑀅𑀳𑁄𑀲𑀺, 𑀧𑀸𑀤𑀸 𑀦𑀫𑀺𑀢𑁆𑀯𑀸 𑀑𑀮𑀫𑁆𑀩𑀺𑀁𑀲𑀼, 𑀳𑀢𑁆𑀣𑀸 𑀧𑀝𑀺𑀓𑀼𑀝𑀺𑀁𑀲𑀼, 𑀊𑀭𑀼𑀦𑀮𑀸𑀝𑀁 𑀦𑀺𑀘𑁆𑀘𑀫𑁆𑀫𑀁 𑀅𑀳𑁄𑀲𑀺 ¶ . 𑀣𑁂𑀭𑁄 ‘‘𑀇𑀤𑀁 𑀲𑀭𑀻𑀭𑀁 𑀇𑀤𑀸𑀦𑁂𑀯 𑀑𑀮𑁄𑀓𑁂𑀦𑁆𑀢𑀸𑀦𑀁 𑀅𑀧𑀭𑀺𑀬𑀦𑁆𑀢𑀓𑀭𑀁 𑀳𑀼𑀢𑁆𑀯𑀸 𑀇𑀤𑀸𑀦𑁂𑀯 𑀔𑀬𑀁 𑀧𑀢𑁆𑀢𑀁 𑀯𑀬𑀁 𑀧𑀢𑁆𑀢’’𑀦𑁆𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀔𑀬𑀯𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑁋

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺. (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬; 𑁨.𑁧𑁪𑁩; 𑀚𑀸. 𑁧.𑁧.𑁯𑁫) 𑁋

𑀕𑀸𑀣𑀁 𑀯𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀢𑀲𑁆𑀫𑀺𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀲𑁂𑀢𑀩𑁆𑀬𑀁 𑀕𑀦𑁆𑀢𑁆𑀯𑀸 𑀲𑀺𑀁𑀲𑀧𑀸𑀯𑀦𑀁 𑀧𑀸𑀯𑀺𑀲𑀺. 𑀘𑀽𑀴𑀓𑀸𑀴𑀲𑁆𑀲 𑀪𑀭𑀺𑀬𑀸𑀬𑁄 ‘‘𑀲𑀢𑁆𑀣𑀸 𑀓𑀺𑀭 𑀅𑀦𑀼𑀧𑁆𑀧𑀢𑁆𑀢𑁄 𑀲𑀺𑀁𑀲𑀧𑀸𑀯𑀦’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀫𑀺𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀧𑁂𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀸𑀧𑁂𑀲𑀼𑀁. 𑀩𑀼𑀤𑁆𑀥𑀸𑀦𑀁 𑀧𑀦 𑀅𑀧𑀭𑀺𑀘𑀺𑀡𑁆𑀡𑀝𑁆𑀞𑀸𑀦𑁂 𑀆𑀲𑀦𑀧𑀜𑁆𑀜𑀢𑁆𑀢𑀺𑀁 𑀆𑀘𑀺𑀓𑁆𑀔𑀦𑁆𑀢𑁂𑀦 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀞𑀫𑀢𑀭𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀫𑀚𑁆𑀛𑀺𑀫𑀝𑁆𑀞𑀸𑀦𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀲𑁆𑀲 𑀤𑀓𑁆𑀔𑀺𑀡𑀢𑁄 ¶ 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀯𑀸𑀫𑀢𑁄 ¶ 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲, 𑀢𑀢𑁄 𑀧𑀝𑁆𑀞𑀸𑀬 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀫𑀳𑀸𑀓𑀸𑀴𑀢𑁆𑀣𑁂𑀭𑁄 𑀘𑀻𑀯𑀭𑀧𑀸𑀭𑀼𑀧𑀦𑀝𑁆𑀞𑀸𑀦𑁂 𑀞𑀢𑁆𑀯𑀸, ‘‘𑀘𑀽𑀴𑀓𑀸𑀴, 𑀢𑁆𑀯𑀁 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀆𑀲𑀦𑀧𑀜𑁆𑀜𑀢𑁆𑀢𑀺𑀁 𑀆𑀘𑀺𑀓𑁆𑀔𑀸’’𑀢𑀺 𑀘𑀽𑀴𑀓𑀸𑀴𑀁 𑀧𑁂𑀲𑁂𑀲𑀺. 𑀢𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑁂𑀳𑀚𑀦𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀸 𑀦𑀻𑀘𑀸𑀲𑀦𑀸𑀦𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀓𑁄𑀝𑀺𑀬𑀁 𑀅𑀢𑁆𑀣𑀭𑀦𑁆𑀢𑀺, 𑀉𑀘𑁆𑀘𑀸𑀲𑀦𑀸𑀦𑀺 𑀲𑀗𑁆𑀖𑀦𑀯𑀓𑀲𑁆𑀲 𑀓𑁄𑀝𑀺𑀬𑀁. 𑀇𑀢𑀭𑁄 ‘‘𑀫𑀸 𑀏𑀯𑀁 𑀓𑀭𑁄𑀣, 𑀦𑀻𑀘𑀸𑀲𑀦𑀸𑀦𑀺 𑀉𑀧𑀭𑀺 𑀫𑀸 𑀧𑀜𑁆𑀜𑀸𑀧𑁂𑀣, 𑀉𑀘𑁆𑀘𑀸𑀲𑀦𑀸𑀦𑀺 𑀉𑀧𑀭𑀺 𑀧𑀜𑁆𑀜𑀸𑀧𑁂𑀣, 𑀦𑀻𑀘𑀸𑀲𑀦𑀸𑀦𑀺 𑀳𑁂𑀝𑁆𑀞𑀸’’𑀢𑀺 𑀆𑀳. 𑀇𑀢𑁆𑀣𑀺𑀬𑁄 𑀢𑀲𑁆𑀲 𑀯𑀘𑀦𑀁 𑀅𑀲𑀼𑀡𑀦𑁆𑀢𑀺𑀬𑁄 𑀯𑀺𑀬 ‘‘𑀢𑁆𑀯𑀁 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀺, 𑀓𑀺𑀁 𑀢𑀯 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁆𑀯𑀁 𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀓𑁂𑀦 𑀧𑀩𑁆𑀩𑀚𑀺𑀢𑁄𑀲𑀺, 𑀓𑀲𑁆𑀫𑀸 𑀇𑀥𑀸𑀕𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀲𑀻𑀲𑁂 𑀘 𑀫𑀸𑀮𑀸𑀘𑀼𑀫𑁆𑀩𑀼𑀝𑀓𑀁 𑀞𑀧𑁂𑀢𑁆𑀯𑀸, ‘‘𑀕𑀘𑁆𑀙 𑀲𑀢𑁆𑀣𑀸𑀭𑀁 𑀆𑀦𑁂𑀳𑀺, 𑀫𑀬𑀁 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀧𑀳𑀺𑀡𑀺𑀁𑀲𑀼. 𑀦 𑀘𑀺𑀭𑀁 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀯𑀲𑁆𑀲𑀺𑀓𑁄𑀯 𑀉𑀧𑁆𑀧𑀩𑁆𑀩𑀚𑀺𑀢𑀢𑁆𑀢𑀸 𑀮𑀚𑁆𑀚𑀺𑀢𑀼𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀲𑁄 𑀢𑁂𑀦 𑀆𑀓𑀧𑁆𑀧𑁂𑀦 𑀦𑀺𑀭𑀸𑀲𑀗𑁆𑀓𑁄𑀯 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀆𑀕𑀢𑁄. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀦 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀫𑀳𑀸𑀓𑀸𑀴𑀲𑁆𑀲 𑀪𑀭𑀺𑀬𑀸𑀬𑁄 ‘‘𑀇𑀫𑀸𑀳𑀺 𑀅𑀢𑁆𑀢𑀦𑁄 𑀲𑀸𑀫𑀺𑀓𑁄 𑀕𑀳𑀺𑀢𑁄, 𑀫𑀬𑀫𑁆𑀧𑀺 𑀅𑀫𑁆𑀳𑀸𑀓𑀁 𑀲𑀸𑀫𑀺𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑀤𑀸 𑀧𑀦 𑀆𑀲𑀦𑀧𑀜𑁆𑀜𑀸𑀧𑀦𑀢𑁆𑀣𑀁 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀅𑀕𑀫𑀸𑀲𑀺. 𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀘𑀽𑀴𑀓𑀸𑀴𑀲𑁆𑀲 𑀧𑀦 𑀤𑁆𑀯𑁂 𑀪𑀭𑀺𑀬𑀸𑀬𑁄, 𑀫𑀚𑁆𑀛𑀺𑀫𑀓𑀸𑀴𑀲𑁆𑀲 ¶ 𑀘𑀢𑀲𑁆𑀲𑁄, 𑀫𑀳𑀸𑀓𑀸𑀴𑀲𑁆𑀲 𑀧𑀦 𑀅𑀝𑁆𑀞. 𑀪𑀺𑀓𑁆𑀔𑀽𑀧𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑀸 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀁𑀲𑀼, 𑀩𑀳𑀺 𑀕𑀦𑁆𑀢𑀼𑀓𑀸𑀫𑀸 𑀉𑀝𑁆𑀞𑀸𑀬 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀧𑀦 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑀺. 𑀢𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀸 𑀇𑀢𑁆𑀣𑀺𑀬𑁄, ‘‘𑀪𑀦𑁆𑀢𑁂, 𑀫𑀳𑀸𑀓𑀸𑀴𑁄 𑀅𑀫𑁆𑀳𑀸𑀓𑀁 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀘𑁆𑀙𑀣𑀸’’𑀢𑀺 𑀯𑀤𑀺𑀁𑀲𑀼. 𑀲𑀢𑁆𑀣𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀧𑀼𑀭𑀢𑁄 𑀅𑀕𑀫𑀸𑀲𑀺. 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀓𑀺𑀁 𑀦𑀸𑀫𑁂𑀢𑀁 𑀲𑀢𑁆𑀣𑀸𑀭𑀸 𑀓𑀢𑀁, 𑀜𑀢𑁆𑀯𑀸 𑀦𑀼 𑀔𑁄 𑀓𑀢𑀁, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸. 𑀳𑀺𑀬𑁆𑀬𑁄 𑀘𑀽𑀴𑀓𑀸𑀴𑀲𑁆𑀲 𑀧𑀼𑀭𑀢𑁄 𑀕𑀢𑀢𑁆𑀢𑀸 𑀧𑀩𑁆𑀩𑀚𑁆𑀚𑀦𑁆𑀢𑀭𑀸𑀬𑁄 𑀚𑀸𑀢𑁄, 𑀅𑀚𑁆𑀚 𑀅𑀜𑁆𑀜𑀲𑁆𑀲 𑀧𑀼𑀭𑀢𑁄 𑀕𑀢𑀢𑁆𑀢𑀸 𑀅𑀦𑁆𑀢𑀭𑀸𑀬𑁄 𑀦𑀸𑀳𑁄𑀲𑀺. 𑀇𑀤𑀸𑀦𑀺 𑀫𑀳𑀸𑀓𑀸𑀴𑀁 𑀞𑀧𑁂𑀢𑁆𑀯𑀸 𑀆𑀕𑀢𑁄, 𑀲𑀻𑀮𑀯𑀸 𑀔𑁄 𑀧𑀦 𑀪𑀺𑀓𑁆𑀔𑀼 𑀆𑀘𑀸𑀭𑀲𑀫𑁆𑀧𑀦𑁆𑀦𑁄, 𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀢𑀲𑁆𑀲 𑀧𑀩𑁆𑀩𑀚𑁆𑀚𑀦𑁆𑀢𑀭𑀸𑀬’’𑀦𑁆𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 ‘‘𑀓𑀺𑀁 𑀓𑀣𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺 ¶ . 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀘𑀽𑀴𑀓𑀸𑀴𑀁 𑀯𑀺𑀬 𑀫𑀳𑀸𑀓𑀸𑀴𑀁 𑀲𑀮𑁆𑀮𑀓𑁆𑀔𑁂𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’. 𑀢𑀲𑁆𑀲 𑀳𑀺 𑀤𑁆𑀯𑁂 𑀧𑀚𑀸𑀧𑀢𑀺𑀬𑁄, 𑀇𑀫𑀲𑁆𑀲 𑀅𑀝𑁆𑀞. ‘‘𑀅𑀝𑁆𑀞𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑀺𑀢𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀪𑀦𑁆𑀢𑁂’’𑀢𑀺? 𑀲𑀢𑁆𑀣𑀸 ‘‘𑀫𑀸, 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀯𑀘𑀼𑀢𑁆𑀣, 𑀘𑀽𑀴𑀓𑀸𑀴𑁄 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀲𑀼𑀪𑀸𑀭𑀫𑁆𑀫𑀡𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀧𑀧𑀸𑀢𑁂 𑀞𑀺𑀢𑁄 𑀤𑀼𑀩𑁆𑀩𑀮𑀭𑀼𑀓𑁆𑀔𑀲𑀤𑀺𑀲𑁄. 𑀫𑀬𑁆𑀳𑀁 𑀧𑀦 𑀧𑀼𑀢𑁆𑀢𑁄 𑀫𑀳𑀸𑀓𑀸𑀴𑁄 ¶ 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀖𑀦𑀲𑁂𑀮𑀧𑀩𑁆𑀩𑀢𑁄 𑀯𑀺𑀬 𑀅𑀘𑀮𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁭.

‘‘𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺 𑀘𑀸𑀫𑀢𑁆𑀢𑀜𑁆𑀜𑀼𑀁, 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁;

𑀢𑀁 𑀯𑁂 𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀭𑀼𑀓𑁆𑀔𑀁𑀯 𑀤𑀼𑀩𑁆𑀩𑀮𑀁.

𑁮.

‘‘𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺 𑀘 𑀫𑀢𑁆𑀢𑀜𑁆𑀜𑀼𑀁, 𑀲𑀤𑁆𑀥𑀁 𑀆𑀭𑀤𑁆𑀥𑀯𑀻𑀭𑀺𑀬𑀁;

𑀢𑀁 𑀯𑁂 𑀦𑀧𑁆𑀧𑀲𑀳𑀢𑀻 𑀫𑀸𑀭𑁄, 𑀯𑀸𑀢𑁄 𑀲𑁂𑀮𑀁𑀯 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀦𑁆𑀢𑀺 𑀲𑀼𑀢𑀁 𑀅𑀦𑀼𑀧𑀲𑁆𑀲𑀦𑁆𑀢𑀁, 𑀇𑀝𑁆𑀞𑀸𑀭𑀫𑁆𑀫𑀡𑁂 𑀫𑀸𑀦𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀼𑀕𑁆𑀕𑀮𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀁 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑁄 ‘‘𑀦𑀔𑀸 𑀲𑁄𑀪𑀦𑀸’’𑀢𑀺 𑀕𑀡𑁆𑀳𑀸𑀢𑀺, ‘‘𑀅𑀗𑁆𑀕𑀼𑀮𑀺𑀬𑁄 𑀲𑁄𑀪𑀦𑀸’’𑀢𑀺 𑀕𑀡𑁆𑀳𑀸𑀢𑀺, ‘‘𑀳𑀢𑁆𑀣𑀧𑀸𑀤𑀸, 𑀚𑀗𑁆𑀖𑀸, 𑀊𑀭𑀼, 𑀓𑀝𑀺, 𑀉𑀤𑀭𑀁, 𑀣𑀦𑀸, 𑀕𑀻𑀯𑀸, 𑀑𑀝𑁆𑀞𑀸, 𑀤𑀦𑁆𑀢𑀸, 𑀫𑀼𑀔𑀁, 𑀦𑀸𑀲𑀸, 𑀅𑀓𑁆𑀔𑀻𑀦𑀺, 𑀓𑀡𑁆𑀡𑀸, 𑀪𑀫𑀼𑀓𑀸, 𑀦𑀮𑀸𑀝𑀁, 𑀓𑁂𑀲𑀸, 𑀲𑁄𑀪𑀦𑀸’’𑀢𑀺 𑀕𑀡𑁆𑀳𑀸𑀢𑀺, ‘‘𑀓𑁂𑀲𑀸, 𑀮𑁄𑀫𑀸, 𑀦𑀔𑀸, 𑀤𑀦𑁆𑀢𑀸, 𑀢𑀘𑁄, 𑀲𑁄𑀪𑀦𑀸’’𑀢𑀺 ¶ 𑀕𑀡𑁆𑀳𑀸𑀢𑀺, 𑀯𑀡𑁆𑀡𑁄 𑀲𑀼𑀪𑁄, 𑀲𑀡𑁆𑀞𑀸𑀦𑀁 𑀲𑀼𑀪𑀦𑁆𑀢𑀺, 𑀅𑀬𑀁 𑀲𑀼𑀪𑀸𑀦𑀼𑀧𑀲𑁆𑀲𑀻 𑀦𑀸𑀫. 𑀏𑀯𑀁 𑀢𑀁 𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁. 𑀇𑀦𑁆𑀤𑁆𑀭𑀺𑀬𑁂𑀲𑀽𑀢𑀺 ¶ 𑀘𑀓𑁆𑀔𑀸𑀤𑀻𑀲𑀼 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀅𑀲𑀁𑀯𑀼𑀢𑀦𑁆𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀅𑀭𑀓𑁆𑀔𑀦𑁆𑀢𑀁. 𑀧𑀭𑀺𑀬𑁂𑀲𑀦𑀫𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀸 𑀧𑀭𑀺𑀪𑁄𑀕𑀫𑀢𑁆𑀢𑀸𑀢𑀺 𑀇𑀫𑀺𑀲𑁆𑀲𑀸 𑀫𑀢𑁆𑀢𑀸𑀬 𑀅𑀚𑀸𑀦𑀦𑀢𑁄 𑀪𑁄𑀚𑀦𑀫𑁆𑀳𑀺 𑀘𑀸𑀫𑀢𑁆𑀢𑀜𑁆𑀜𑀼𑀁. 𑀅𑀧𑀺𑀘 𑀧𑀘𑁆𑀘𑀯𑁂𑀓𑁆𑀔𑀡𑀫𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑀸𑀢𑀺 𑀇𑀫𑀺𑀲𑁆𑀲𑀸𑀧𑀺 𑀫𑀢𑁆𑀢𑀸𑀬 𑀅𑀚𑀸𑀦𑀦𑀢𑁄 𑀅𑀫𑀢𑁆𑀢𑀜𑁆𑀜𑀼𑀁, 𑀇𑀤𑀁 𑀪𑁄𑀚𑀦𑀁 𑀥𑀫𑁆𑀫𑀺𑀓𑀁, 𑀇𑀤𑀁 𑀅𑀥𑀫𑁆𑀫𑀺𑀓𑀦𑁆𑀢𑀺𑀧𑀺 𑀅𑀚𑀸𑀦𑀦𑁆𑀢𑀁. 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀲𑀺𑀢𑀸𑀬 𑀓𑀼𑀲𑀻𑀢𑀁. 𑀳𑀻𑀦𑀯𑀻𑀭𑀺𑀬𑀦𑁆𑀢𑀺 𑀦𑀺𑀩𑁆𑀩𑀻𑀭𑀺𑀬𑀁 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀯𑀻𑀭𑀺𑀬𑀓𑀭𑀡𑀭𑀳𑀺𑀢𑀁. 𑀧𑀲𑀳𑀢𑀻𑀢𑀺 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀯𑀸𑀢𑁄 𑀭𑀼𑀓𑁆𑀔𑀁𑀯 𑀤𑀼𑀩𑁆𑀩𑀮𑀦𑁆𑀢𑀺 𑀩𑀮𑀯𑀯𑀸𑀢𑁄 𑀙𑀺𑀦𑁆𑀦𑀧𑀧𑀸𑀢𑁂 𑀚𑀸𑀢𑀁 𑀤𑀼𑀩𑁆𑀩𑀮𑀭𑀼𑀓𑁆𑀔𑀁 𑀯𑀺𑀬. 𑀬𑀣𑀸 𑀳𑀺 𑀲𑁄 𑀯𑀸𑀢𑁄 𑀢𑀲𑁆𑀲 𑀤𑀼𑀩𑁆𑀩𑀮𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀦𑀺𑀧𑀺 𑀧𑀸𑀢𑁂𑀢𑀺, 𑀔𑀼𑀤𑁆𑀤𑀓𑀲𑀸𑀔𑀸𑀧𑀺 𑀪𑀜𑁆𑀚𑀢𑀺, 𑀫𑀳𑀸𑀲𑀸𑀔𑀸𑀧𑀺 ¶ 𑀪𑀜𑁆𑀚𑀢𑀺, 𑀲𑀫𑀽𑀮𑀓𑀫𑁆𑀧𑀺 𑀢𑀁 𑀭𑀼𑀓𑁆𑀔𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀤𑁆𑀥𑀁𑀫𑀽𑀮𑀁 𑀅𑀥𑁄𑀲𑀸𑀔𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀅𑀦𑁆𑀢𑁄 𑀉𑀧𑁆𑀧𑀦𑁆𑀦𑁄 𑀓𑀺𑀮𑁂𑀲𑀫𑀸𑀭𑁄 𑀧𑀲𑀳𑀢𑀺, 𑀩𑀮𑀯𑀯𑀸𑀢𑁄 𑀤𑀼𑀩𑁆𑀩𑀮𑀭𑀼𑀓𑁆𑀔𑀲𑁆𑀲 ¶ 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀧𑀸𑀢𑀦𑀁 𑀯𑀺𑀬 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀆𑀧𑀚𑁆𑀚𑀦𑀫𑁆𑀧𑀺 𑀓𑀭𑁄𑀢𑀺, 𑀔𑀼𑀤𑁆𑀤𑀓𑀲𑀸𑀔𑀸𑀪𑀜𑁆𑀚𑀦𑀁 𑀯𑀺𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀤𑀺𑀆𑀧𑀢𑁆𑀢𑀺𑀆𑀧𑀚𑁆𑀚𑀦𑀫𑁆𑀧𑀺 𑀓𑀭𑁄𑀢𑀺, 𑀫𑀳𑀸𑀲𑀸𑀔𑀸𑀪𑀜𑁆𑀚𑀦𑀁 𑀯𑀺𑀬 𑀢𑁂𑀭𑀲𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀆𑀧𑀚𑁆𑀚𑀦𑀫𑁆𑀧𑀺 𑀓𑀭𑁄𑀢𑀺, 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀤𑁆𑀥𑀁, 𑀫𑀽𑀮𑀓𑀁 𑀳𑁂𑀝𑁆𑀞𑀸𑀲𑀸𑀔𑀁 𑀓𑀢𑁆𑀯𑀸 𑀧𑀸𑀢𑀦𑀁 𑀯𑀺𑀬 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀆𑀧𑀚𑁆𑀚𑀦𑀫𑁆𑀧𑀺 𑀓𑀭𑁄𑀢𑀺, 𑀲𑁆𑀯𑀸𑀓𑁆𑀔𑀸𑀢𑀲𑀸𑀲𑀦𑀸 𑀦𑀻𑀳𑀭𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀕𑀺𑀳𑀺𑀪𑀸𑀯𑀁 𑀧𑀸𑀧𑁂𑀢𑀻𑀢𑀺 𑀏𑀯𑀁 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀓𑀺𑀮𑁂𑀲𑀫𑀸𑀭𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁆𑀢𑀺 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀅𑀜𑁆𑀜𑀢𑀭𑀁 𑀅𑀲𑀼𑀪𑀁 𑀧𑀲𑁆𑀲𑀦𑁆𑀢𑀁 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑁂 𑀬𑀼𑀢𑁆𑀢𑀁 𑀓𑁂𑀲𑁂 𑀅𑀲𑀼𑀪𑀢𑁄 𑀧𑀲𑁆𑀲𑀦𑁆𑀢𑀁 𑀮𑁄𑀫𑁂 𑀦𑀔𑁂 𑀤𑀦𑁆𑀢𑁂 𑀢𑀘𑀁 𑀯𑀡𑁆𑀡𑀁 𑀲𑀡𑁆𑀞𑀸𑀦𑀁 𑀅𑀲𑀼𑀪𑀢𑁄 𑀧𑀲𑁆𑀲𑀦𑁆𑀢𑀁. 𑀇𑀦𑁆𑀤𑁆𑀭𑀺𑀬𑁂𑀲𑀽𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀲𑀼𑀲𑀁𑀯𑀼𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀭𑀳𑀺𑀢𑀁 𑀧𑀺𑀳𑀺𑀢𑀤𑁆𑀯𑀸𑀭𑀁. 𑀅𑀫𑀢𑁆𑀢𑀜𑁆𑀜𑀼𑀢𑀸𑀧𑀝𑀺𑀓𑁆𑀔𑁂𑀧𑁂𑀦 𑀪𑁄𑀚𑀦𑀫𑁆𑀳𑀺 𑀘 𑀫𑀢𑁆𑀢𑀜𑁆𑀜𑀼𑀁. 𑀲𑀤𑁆𑀥𑀦𑁆𑀢𑀺 𑀓𑀫𑁆𑀫𑀲𑁆𑀲 𑀘𑁂𑀯 𑀨𑀮𑀲𑁆𑀲 𑀘 𑀲𑀤𑁆𑀤𑀳𑀦𑀮𑀓𑁆𑀔𑀡𑀸𑀬 𑀮𑁄𑀓𑀺𑀓𑀸𑀬 𑀲𑀤𑁆𑀥𑀸𑀬 𑀘𑁂𑀯 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀗𑁆𑀔𑀸𑀢𑀸𑀬 𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀸𑀬 𑀘 𑀲𑀫𑀦𑁆𑀦𑀸𑀕𑀢𑀁. 𑀆𑀭𑀤𑁆𑀥𑀯𑀻𑀭𑀺𑀬𑀦𑁆𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀁. 𑀢𑀁 𑀯𑁂𑀢𑀺 𑀏𑀯𑀭𑀽𑀧𑀁 𑀢𑀁 𑀧𑀼𑀕𑁆𑀕𑀮𑀁 𑀬𑀣𑀸 𑀤𑀼𑀩𑁆𑀩𑀮𑀯𑀸𑀢𑁄 𑀲𑀡𑀺𑀓𑀁 𑀧𑀳𑀭𑀦𑁆𑀢𑁄 𑀏𑀓𑀕𑁆𑀖𑀦𑀁 𑀲𑁂𑀮𑀁 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 ¶ 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀤𑀼𑀩𑁆𑀩𑀮𑀓𑀺𑀮𑁂𑀲𑀫𑀸𑀭𑁄 𑀦𑀧𑁆𑀧𑀲𑀳𑀢𑀺, 𑀔𑁄𑀪𑁂𑀢𑀼𑀁 𑀯𑀸 𑀘𑀸𑀮𑁂𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄.

𑀢𑀸𑀧𑀺 𑀔𑁄 𑀢𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄 𑀣𑁂𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀢𑁆𑀯𑀁 𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀇𑀤𑀸𑀦𑀺 𑀕𑀺𑀳𑀻 𑀪𑀯𑀺𑀲𑁆𑀲𑀲𑀺 𑀦 𑀪𑀯𑀺𑀲𑁆𑀲𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀓𑀸𑀲𑀸𑀯𑀁 𑀦𑀻𑀳𑀭𑀺𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀣𑁂𑀭𑁄 𑀢𑀸𑀲𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀸 𑀯𑀼𑀝𑁆𑀞𑀸𑀬 𑀇𑀤𑁆𑀥𑀺𑀬𑀸 𑀉𑀧𑁆𑀧𑀢𑁆𑀢𑀺𑀢𑁆𑀯𑀸 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀲𑀢𑁆𑀣𑀭𑀺 𑀕𑀸𑀣𑀸 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁂𑀬𑁂𑀯 𑀲𑀢𑁆𑀣𑀼 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀫𑀳𑀸𑀓𑀸𑀴𑀢𑁆𑀣𑁂𑀭𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀤𑁂𑀯𑀤𑀢𑁆𑀢𑀯𑀢𑁆𑀣𑀼

𑀅𑀦𑀺𑀓𑁆𑀓𑀲𑀸𑀯𑁄𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀕𑀳𑁂 𑀤𑁂𑀯𑀤𑀢𑁆𑀢𑀲𑁆𑀲 𑀓𑀸𑀲𑀸𑀯𑀮𑀸𑀪𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀜𑁆𑀘𑀲𑀢𑁂 𑀧𑀜𑁆𑀘𑀲𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀆𑀤𑀸𑀬 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀚𑁂𑀢𑀯𑀦𑀢𑁄 𑀭𑀸𑀚𑀕𑀳𑀁 𑀅𑀕𑀫𑀁𑀲𑀼. 𑀭𑀸𑀚𑀕𑀳𑀯𑀸𑀲𑀺𑀦𑁄 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀩𑀳𑀽𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑀼𑀓𑀤𑀸𑀦𑀁 𑀅𑀤𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ¶ ‘‘𑀉𑀧𑀸𑀲𑀓𑀸 𑀏𑀓𑁄 𑀲𑀬𑀁 𑀤𑀸𑀦𑀁 𑀤𑁂𑀢𑀺, 𑀧𑀭𑀁 𑀦 𑀲𑀫𑀸𑀤𑀧𑁂𑀢𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀧𑀭𑀺𑀯𑀸𑀭𑀲𑀫𑁆𑀧𑀤𑀁. 𑀏𑀓𑁄 𑀲𑀬𑀁 𑀦 𑀤𑁂𑀢𑀺, 𑀧𑀭𑀁 𑀲𑀫𑀸𑀤𑀧𑁂𑀢𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀭𑀺𑀯𑀸𑀭𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀪𑁄𑀕𑀲𑀫𑁆𑀧𑀤𑀁. 𑀏𑀓𑁄 𑀲𑀬𑀫𑁆𑀧𑀺 𑀦 𑀤𑁂𑀢𑀺, 𑀧𑀭𑀫𑁆𑀧𑀺 𑀦 𑀲𑀫𑀸𑀤𑀧𑁂𑀢𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀓𑀜𑁆𑀚𑀺𑀓𑀫𑀢𑁆𑀢𑀫𑁆𑀧𑀺 𑀓𑀼𑀘𑁆𑀙𑀺𑀧𑀽𑀭𑀁 𑀦 𑀮𑀪𑀢𑀺, 𑀅𑀦𑀸𑀣𑁄 𑀳𑁄𑀢𑀺 𑀦𑀺𑀧𑁆𑀧𑀘𑁆𑀘𑀬𑁄. 𑀏𑀓𑁄 𑀲𑀬𑀫𑁆𑀧𑀺 𑀤𑁂𑀢𑀺, 𑀧𑀭𑀫𑁆𑀧𑀺 𑀲𑀫𑀸𑀤𑀧𑁂𑀢𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀢𑁆𑀢𑀪𑀸𑀯𑀲𑀢𑁂𑀧𑀺 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑁂𑀧𑀺 𑀅𑀢𑁆𑀢𑀪𑀸𑀯𑀲𑀢𑀲𑀳𑀲𑁆𑀲𑁂𑀧𑀺 𑀪𑁄𑀕𑀲𑀫𑁆𑀧𑀤𑀜𑁆𑀘𑁂𑀯 𑀧𑀭𑀺𑀯𑀸𑀭𑀲𑀫𑁆𑀧𑀤𑀜𑁆𑀘 𑀮𑀪𑀢𑀻’’𑀢𑀺 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀫𑁂𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀸 𑀯𑀢 𑀪𑁄, 𑀅𑀩𑁆𑀪𑀼𑀢𑀸 𑀯𑀢 𑀪𑁄 𑀥𑀫𑁆𑀫𑀤𑁂𑀲𑀦𑀸, 𑀲𑀼𑀓𑀸𑀭𑀡𑀁 𑀓𑀣𑀺𑀢𑀁, 𑀫𑀬𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀧𑁆𑀨𑀸𑀤𑀓𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀣𑁂𑀭𑀁 𑀦𑀺𑀫𑀦𑁆𑀢𑁂𑀲𑀺. ‘‘𑀓𑀺𑀢𑁆𑀢𑀓𑁂𑀳𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄 𑀉𑀧𑀸𑀲𑀓𑀸’’𑀢𑀺. ‘‘𑀓𑀺𑀢𑁆𑀢𑀓𑀸 𑀧𑀦 𑀯𑁄, 𑀪𑀦𑁆𑀢𑁂, 𑀧𑀭𑀺𑀯𑀸𑀭𑀸’’𑀢𑀺? ‘‘𑀲𑀳𑀲𑁆𑀲𑀫𑀢𑁆𑀢𑀸 𑀉𑀧𑀸𑀲𑀓𑀸’’𑀢𑀺. ‘‘𑀲𑀩𑁆𑀩𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀲𑁆𑀯𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺. ‘‘𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺’’. 𑀉𑀧𑀸𑀲𑀓𑁄 𑀦𑀕𑀭𑀯𑀻𑀣𑀺𑀬𑀁 𑀘𑀭𑀦𑁆𑀢𑁄 𑁋 ‘‘𑀅𑀫𑁆𑀫𑀸, 𑀢𑀸𑀢𑀸, 𑀫𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀦𑀺𑀫𑀦𑁆𑀢𑀺𑀢𑀁, 𑀢𑀼𑀫𑁆𑀳𑁂 𑀓𑀺𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣, 𑀢𑀼𑀫𑁆𑀳𑁂 𑀓𑀺𑀢𑁆𑀢𑀓𑀸𑀦’’𑀦𑁆𑀢𑀺 𑀲𑀫𑀸𑀤𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀳𑁄𑀦𑀓𑀦𑀺𑀬𑀸𑀫𑁂𑀦 ¶ 𑁋 ‘‘𑀫𑀬𑀁 𑀤𑀲𑀦𑁆𑀦𑀁 𑀤𑀲𑁆𑀲𑀸𑀫, 𑀫𑀬𑀁 𑀯𑀻𑀲𑀢𑀺𑀬𑀸, 𑀫𑀬𑀁 𑀲𑀢𑀲𑁆𑀲𑀸’’𑀢𑀺 𑀆𑀳𑀁𑀲𑀼. 𑀉𑀧𑀸𑀲𑀓𑁄 𑁋 ‘‘𑀢𑁂𑀦 𑀳𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀸𑀕𑀫𑀁 𑀓𑀢𑁆𑀯𑀸 𑀏𑀓𑀢𑁄𑀯 𑀧𑀭𑀺𑀯𑀺𑀲𑀺𑀲𑁆𑀲𑀸𑀫 ¶ , 𑀲𑀩𑁆𑀩𑁂 𑀢𑀺𑀮𑀢𑀡𑁆𑀟𑀼𑀮𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀲𑀫𑀸𑀳𑀭𑀣𑀸’’𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀸𑀳𑀭𑀸𑀧𑁂𑀲𑀺.

𑀅𑀣𑀲𑁆𑀲 ¶ 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀕𑀦𑁆𑀥𑀓𑀸𑀲𑀸𑀯𑀯𑀢𑁆𑀣𑀁 𑀤𑀢𑁆𑀯𑀸 𑁋 ‘‘𑀲𑀘𑁂 𑀢𑁂 𑀤𑀸𑀦𑀯𑀢𑁆𑀢𑀁 𑀦𑀧𑁆𑀧𑀳𑁄𑀢𑀺, 𑀇𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀬𑀁 𑀊𑀦𑀁, 𑀢𑀁 𑀧𑀽𑀭𑁂𑀬𑁆𑀬𑀸𑀲𑀺. 𑀲𑀘𑁂 𑀧𑀳𑁄𑀢𑀺, 𑀬𑀲𑁆𑀲𑀺𑀘𑁆𑀙𑀲𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀢𑀤𑀸 𑀢𑀲𑁆𑀲 𑀲𑀩𑁆𑀩𑀁 𑀤𑀸𑀦𑀯𑀢𑁆𑀢𑀁 𑀧𑀳𑁄𑀲𑀺, 𑀓𑀺𑀜𑁆𑀘𑀺 𑀊𑀦𑀁 𑀦𑀸𑀫 𑀦𑀸𑀳𑁄𑀲𑀺. 𑀲𑁄 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀇𑀤𑀁, 𑀅𑀬𑁆𑀬𑀸, 𑀓𑀸𑀲𑀸𑀯𑀁 𑀏𑀓𑁂𑀦 𑀓𑀼𑀝𑀼𑀫𑁆𑀩𑀺𑀓𑁂𑀦 𑀏𑀯𑀁 𑀦𑀸𑀫 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀅𑀢𑀺𑀭𑁂𑀓𑀁 𑀚𑀸𑀢𑀁, 𑀓𑀲𑁆𑀲 𑀦𑀁 𑀤𑁂𑀫𑀸’’𑀢𑀺. 𑀏𑀓𑀘𑁆𑀘𑁂 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸’’𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑁂 ‘‘𑀣𑁂𑀭𑁄 𑀲𑀲𑁆𑀲𑀧𑀸𑀓𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀕𑀫𑀦𑀲𑀻𑀮𑁄, 𑀤𑁂𑀯𑀤𑀢𑁆𑀢𑁄 𑀅𑀫𑁆𑀳𑀸𑀓𑀁 𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀲𑀳𑀸𑀬𑁄 𑀉𑀤𑀓𑀫𑀡𑀺𑀓𑁄 𑀯𑀺𑀬 𑀦𑀺𑀘𑁆𑀘𑀁 𑀧𑀢𑀺𑀝𑁆𑀞𑀺𑀢𑁄, 𑀢𑀲𑁆𑀲 𑀢𑀁 𑀤𑁂𑀫𑀸’’𑀢𑀺 𑀆𑀳𑀁𑀲𑀼. 𑀲𑀫𑁆𑀩𑀳𑀼𑀮𑀺𑀓𑀸𑀬 𑀓𑀣𑀸𑀬𑀧𑀺 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀸𑀭𑁄 𑀩𑀳𑀼𑀢𑀭𑀸 𑀅𑀳𑁂𑀲𑀼𑀁, 𑀅𑀣 𑀦𑀁 𑀤𑁂𑀯𑀤𑀢𑁆𑀢𑀲𑁆𑀲 𑀅𑀤𑀁𑀲𑀼. 𑀲𑁄 𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀘𑀭𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀦𑀬𑀺𑀤𑀁 𑀤𑁂𑀯𑀤𑀢𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁. 𑀤𑁂𑀯𑀤𑀢𑁆𑀢𑁄 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀘𑀭𑀢𑀻’’𑀢𑀺 𑀯𑀤𑀺𑀁𑀲𑀼. 𑀅𑀣𑁂𑀓𑁄 ¶ 𑀤𑀺𑀲𑀸𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀭𑀸𑀚𑀕𑀳𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀢𑁆𑀣𑀸𑀭𑀸 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀺𑀢𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯𑁂𑀲𑁄 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑀢𑁆𑀣𑀁 𑀥𑀸𑀭𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀥𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀳𑀢𑁆𑀣𑀺𑀫𑀸𑀭𑀓𑁄 𑀳𑀢𑁆𑀣𑀺𑀁 𑀫𑀸𑀭𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀤𑀦𑁆𑀢𑁂 𑀘 𑀦𑀔𑁂 𑀘 𑀅𑀦𑁆𑀢𑀸𑀦𑀺 𑀘 𑀖𑀦𑀫𑀁𑀲𑀜𑁆𑀘 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀅𑀭𑀜𑁆𑀜𑁂 𑀅𑀦𑁂𑀓𑀲𑀳𑀲𑁆𑀲𑀸 𑀳𑀢𑁆𑀣𑀺𑀦𑁄 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀕𑀘𑁆𑀙𑀫𑀸𑀦𑀸 𑀕𑀫𑀦𑀸𑀕𑀫𑀦𑀓𑀸𑀮𑁂 𑀚𑀡𑁆𑀡𑀼𑀓𑁂𑀳𑀺 𑀦𑀺𑀧𑀢𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀳𑀢𑁆𑀣𑀺𑀫𑀸𑀭𑀓𑁄 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀅𑀳𑀁 𑀇𑀫𑁂 𑀓𑀺𑀘𑁆𑀙𑁂𑀦 𑀫𑀸𑀭𑁂𑀫𑀺, 𑀇𑀫𑁂 𑀘 𑀕𑀫𑀦𑀸𑀕𑀫𑀦𑀓𑀸𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀯𑀦𑁆𑀤𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀤𑀺𑀲𑁆𑀯𑀸 𑀯𑀦𑁆𑀤𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑁋 ‘‘𑀓𑀸𑀲𑀸𑀯’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, ‘‘𑀫𑀬𑀸𑀧𑀺 𑀇𑀤𑀸𑀦𑀺 𑀓𑀸𑀲𑀸𑀯𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀚𑀸𑀢𑀲𑁆𑀲𑀭𑀁 𑀑𑀭𑀼𑀬𑁆𑀳 𑀦𑁆𑀳𑀸𑀬𑀦𑁆𑀢𑀲𑁆𑀲 𑀢𑀻𑀭𑁂 𑀞𑀧𑀺𑀢𑁂𑀲𑀼 𑀓𑀸𑀲𑀸𑀯𑁂𑀲𑀼 𑀘𑀻𑀯𑀭𑀁 𑀣𑁂𑀦𑁂𑀢𑁆𑀯𑀸 ¶ 𑀢𑁂𑀲𑀁 𑀳𑀢𑁆𑀣𑀻𑀦𑀁 𑀕𑀫𑀦𑀸𑀕𑀫𑀦𑀫𑀕𑁆𑀕𑁂 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀳𑀢𑁆𑀣𑀺𑀦𑁄 𑀢𑀁 𑀤𑀺𑀲𑁆𑀯𑀸 𑁋 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁄’’𑀢𑀺 𑀲𑀜𑁆𑀜𑀸𑀬 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀲𑁄 𑀢𑁂𑀲𑀁 𑀲𑀩𑁆𑀩𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀁 𑀲𑀢𑁆𑀢𑀺𑀬𑀸 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀤𑀦𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑁂𑀲𑀁 𑀪𑀽𑀫𑀺𑀬𑀁 ¶ 𑀦𑀺𑀔𑀡𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 ¶ 𑀳𑀢𑁆𑀣𑀺𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀚𑁂𑀝𑁆𑀞𑀓𑁄 𑀬𑀽𑀣𑀧𑀢𑀺 𑀅𑀳𑁄𑀲𑀺. 𑀢𑀤𑀸𑀧𑀺 𑀲𑁄 𑀢𑀣𑁂𑀯 𑀓𑀭𑁄𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀧𑀭𑀺𑀳𑀸𑀦𑀺𑀁 𑀜𑀢𑁆𑀯𑀸, ‘‘𑀓𑀼𑀳𑀺𑀁 𑀇𑀫𑁂 𑀳𑀢𑁆𑀣𑀻 𑀕𑀢𑀸, 𑀫𑀦𑁆𑀤𑀸 𑀚𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀦 𑀚𑀸𑀦𑀸𑀫, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀸 𑀫𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀭𑀺𑀧𑀦𑁆𑀣𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸, ‘‘𑀏𑀓𑀲𑁆𑀫𑀺𑀁 𑀞𑀸𑀦𑁂 𑀓𑀸𑀲𑀸𑀯𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑀸 𑀧𑀭𑀺𑀧𑀦𑁆𑀣𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀭𑀺𑀲𑀗𑁆𑀓𑀺𑀢𑁆𑀯𑀸, ‘‘𑀢𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀩𑁆𑀩𑁂 𑀳𑀢𑁆𑀣𑀻 𑀧𑀼𑀭𑀢𑁄 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀧𑀘𑁆𑀙𑀢𑁄 𑀯𑀺𑀮𑀫𑁆𑀩𑀫𑀸𑀦𑁄 𑀆𑀕𑀘𑁆𑀙𑀢𑀺. 𑀲𑁄 𑀲𑁂𑀲𑀳𑀢𑁆𑀣𑀻𑀲𑀼 𑀯𑀦𑁆𑀤𑀺𑀢𑁆𑀯𑀸 𑀕𑀢𑁂𑀲𑀼 𑀫𑀳𑀸𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀘𑀻𑀯𑀭𑀁 𑀲𑀁𑀳𑀭𑀺𑀢𑁆𑀯𑀸 𑀲𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑀺. 𑀫𑀳𑀸𑀧𑀼𑀭𑀺𑀲𑁄 𑀲𑀢𑀺𑀁 𑀉𑀧𑁆𑀧𑀝𑁆𑀞𑀧𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀘𑁆𑀙𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀢𑀺𑀁 𑀯𑀺𑀯𑀚𑁆𑀚𑁂𑀲𑀺. 𑀅𑀣 𑀦𑀁 ‘‘𑀇𑀫𑀺𑀦𑀸 𑀇𑀫𑁂 𑀳𑀢𑁆𑀣𑀻 𑀦𑀸𑀲𑀺𑀢𑀸’’𑀢𑀺 𑀕𑀡𑁆𑀳𑀺𑀢𑀼𑀁 𑀧𑀓𑁆𑀔𑀦𑁆𑀤𑀺. 𑀇𑀢𑀭𑁄 𑀏𑀓𑀁 𑀭𑀼𑀓𑁆𑀔𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀮𑀻𑀬𑀺. 𑀅𑀣 ‘‘𑀦𑀁 𑀭𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀲𑁄𑀡𑁆𑀟𑀸𑀬 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑁄𑀣𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑀁 𑀓𑀸𑀲𑀸𑀯𑀁 𑀤𑀺𑀲𑁆𑀯𑀸 𑁋 ‘‘𑀲𑀘𑀸𑀳𑀁 𑀇𑀫𑀲𑁆𑀫𑀺𑀁 𑀤𑀼𑀩𑁆𑀪𑀺𑀲𑁆𑀲𑀸𑀫𑀺, 𑀅𑀦𑁂𑀓𑀲𑀳𑀲𑁆𑀲𑁂𑀲𑀼 𑀫𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑁂𑀲𑀼 𑀮𑀚𑁆𑀚𑀸 𑀦𑀸𑀫 𑀪𑀺𑀦𑁆𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑁋 ‘‘𑀢𑀬𑀸 𑀫𑁂 𑀏𑀢𑁆𑀢𑀓𑀸 𑀜𑀸𑀢𑀓𑀸 𑀦𑀸𑀲𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀲𑀸𑀫𑀻’’𑀢𑀺. ‘‘𑀓𑀲𑁆𑀫𑀸 𑀏𑀯𑀁 𑀪𑀸𑀭𑀺𑀬𑀓𑀫𑁆𑀫𑀫𑀓𑀸𑀲𑀺, 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑀻𑀢𑀭𑀸𑀕𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀯𑀢𑁆𑀣𑀁 𑀧𑀭𑀺𑀤𑀳𑀺𑀢𑁆𑀯𑀸 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀪𑀸𑀭𑀺𑀬𑀁 𑀢𑀬𑀸 𑀓𑀢’’𑀦𑁆𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀦𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀅𑀦𑀺𑀓𑁆𑀓𑀲𑀸𑀯𑁄 ¶ 𑀓𑀸𑀲𑀸𑀯𑀁…𑀧𑁂… 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀻’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑁋 ‘‘𑀅𑀬𑀼𑀢𑁆𑀢𑀁 𑀢𑁂 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀢𑀤𑀸 𑀳𑀢𑁆𑀣𑀺𑀫𑀸𑀭𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀦𑀺𑀕𑁆𑀕𑀸𑀳𑀓𑁄 𑀳𑀢𑁆𑀣𑀺𑀦𑀸𑀕𑁄 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸, ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑀢𑁆𑀣𑀁 𑀥𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁯.

‘‘𑀅𑀦𑀺𑀓𑁆𑀓𑀲𑀸𑀯𑁄 ¶ 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺;

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁦.

‘‘𑀬𑁄 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀻’’𑀢𑀺.

𑀙𑀤𑁆𑀤𑀦𑁆𑀢𑀚𑀸𑀢𑀓𑁂𑀦𑀸𑀧𑀺 (𑀚𑀸. 𑁧.𑁧𑁬.𑁧𑁨𑁨-𑁧𑁨𑁩) 𑀘 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄.

𑀢𑀢𑁆𑀣 ¶ 𑀅𑀦𑀺𑀓𑁆𑀓𑀲𑀸𑀯𑁄𑀢𑀺 𑀭𑀸𑀕𑀸𑀤𑀻𑀳𑀺 𑀓𑀲𑀸𑀯𑁂𑀳𑀺 𑀲𑀓𑀲𑀸𑀯𑁄. 𑀧𑀭𑀺𑀤𑀳𑀺𑀲𑁆𑀲𑀢𑀻𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀅𑀢𑁆𑀣𑀭𑀡𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺. 𑀧𑀭𑀺𑀥𑀲𑁆𑀲𑀢𑀻𑀢𑀺𑀧𑀺 𑀧𑀸𑀞𑁄. 𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀧𑀓𑁆𑀔𑀺𑀓𑁂𑀦 𑀯𑀘𑀻𑀲𑀘𑁆𑀘𑁂𑀦 𑀘 𑀅𑀧𑁂𑀢𑁄, 𑀯𑀺𑀬𑀼𑀢𑁆𑀢𑁄 𑀧𑀭𑀺𑀘𑁆𑀘𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀦 𑀲𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀓𑀸𑀲𑀸𑀯𑀁 𑀧𑀭𑀺𑀤𑀳𑀺𑀢𑀼𑀁 𑀦𑀸𑀭𑀳𑀢𑀺. 𑀯𑀦𑁆𑀢𑀓𑀲𑀸𑀯𑀲𑁆𑀲𑀸𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀯𑀦𑁆𑀢𑀓𑀲𑀸𑀯𑁄 𑀙𑀟𑁆𑀟𑀺𑀢𑀓𑀲𑀸𑀯𑁄 𑀧𑀳𑀻𑀦𑀓𑀲𑀸𑀯𑁄 𑀅𑀲𑁆𑀲. 𑀲𑀻𑀮𑁂𑀲𑀽𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼. 𑀲𑀼𑀲𑀫𑀸𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄 𑀲𑀼𑀝𑁆𑀞𑀺𑀢𑁄. 𑀉𑀧𑁂𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀘𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘 𑀲𑀘𑁆𑀘𑁂𑀦 𑀉𑀧𑀕𑀢𑁄. 𑀲 𑀯𑁂𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀢𑀁 𑀕𑀦𑁆𑀥𑀓𑀸𑀲𑀸𑀯𑀯𑀢𑁆𑀣𑀁 𑀅𑀭𑀳𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀲𑁄 𑀤𑀺𑀲𑀸𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀤𑁂𑀯𑀤𑀢𑁆𑀢𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀅𑀲𑀸𑀭𑁂 𑀲𑀸𑀭𑀫𑀢𑀺𑀦𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀕𑁆𑀕𑀲𑀸𑀯𑀓𑁂𑀳𑀺 𑀦𑀺𑀯𑁂𑀤𑀺𑀢𑀁 𑀲𑀜𑁆𑀘𑀬𑀲𑁆𑀲 𑀅𑀦𑀸𑀕𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀫𑁆𑀳𑀸𑀓𑀜𑁆𑀳𑀺 𑀲𑀢𑁆𑀣𑀸 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀅𑀫𑀭𑀯𑀢𑀺𑀬𑀸 𑀦𑀸𑀫 𑀦𑀕𑀭𑁂 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀳𑀼𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 ¶ 𑀅𑀘𑁆𑀘𑀬𑁂𑀦 𑀅𑀦𑁂𑀓𑀓𑁄𑀝𑀺𑀲𑀗𑁆𑀔𑁆𑀬𑀁 𑀥𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀲𑀼𑀤𑀲𑁆𑀲𑀦𑀯𑀺𑀳𑀸𑀭𑀢𑁄 𑀭𑀫𑁆𑀫𑀯𑀢𑀻𑀦𑀕𑀭𑀁 𑀧𑀯𑀺𑀲𑀦𑀢𑁆𑀣𑀸𑀬 𑀫𑀕𑁆𑀕𑀁 𑀲𑁄𑀥𑀬𑀫𑀸𑀦𑀁 𑀚𑀦𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀏𑀓𑀁 𑀧𑀤𑁂𑀲𑀁 𑀕𑀳𑁂𑀢𑁆𑀯𑀸 𑀫𑀕𑁆𑀕𑀁 𑀲𑁄𑀥𑁂𑀢𑀺. 𑀢𑀲𑁆𑀫𑀺𑀁 𑀅𑀲𑁄𑀥𑀺𑀢𑁂𑀬𑁂𑀯 𑀆𑀕𑀢𑀲𑁆𑀲 𑀲𑀢𑁆𑀣𑀼𑀦𑁄 𑀅𑀢𑁆𑀢𑀸𑀦𑀁 𑀲𑁂𑀢𑀼𑀁 𑀓𑀢𑁆𑀯𑀸 𑀓𑀮𑀮𑁂 𑀅𑀚𑀺𑀦𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀲𑀲𑀸𑀯𑀓𑀲𑀗𑁆𑀖𑁄 𑀓𑀮𑀮𑀁 𑀅𑀦𑀓𑁆𑀓𑀫𑀺𑀢𑁆𑀯𑀸 𑀫𑀁 𑀅𑀓𑁆𑀓𑀫𑀦𑁆𑀢𑁄 𑀕𑀘𑁆𑀙𑀢𑀽’’𑀢𑀺 𑀦𑀺𑀧𑀦𑁆𑀦𑁄. 𑀲𑀢𑁆𑀣𑀸𑀭𑀸 𑀢𑀁 𑀤𑀺𑀲𑁆𑀯𑀸𑀯 ‘‘𑀩𑀼𑀤𑁆𑀥𑀗𑁆𑀓𑀼𑀭𑁄 𑀏𑀲, 𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 ¶ 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀧𑀭𑀺𑀬𑁄𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀢𑁄. 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀅𑀧𑀭𑀪𑀸𑀕𑁂 ‘‘𑀓𑁄𑀡𑁆𑀟𑀜𑁆𑀜𑁄 𑀫𑀗𑁆𑀕𑀮𑁄 𑀲𑀼𑀫𑀦𑁄 𑀭𑁂𑀯𑀢𑁄 𑀲𑁄𑀪𑀺𑀢𑁄 𑀅𑀦𑁄𑀫𑀤𑀲𑁆𑀲𑀻 𑀧𑀤𑀼𑀫𑁄 𑀦𑀸𑀭𑀤𑁄 𑀧𑀤𑀼𑀫𑀼𑀢𑁆𑀢𑀭𑁄 𑀲𑀼𑀫𑁂𑀥𑁄 𑀲𑀼𑀚𑀸𑀢𑁄 𑀧𑀺𑀬𑀤𑀲𑁆𑀲𑀻 𑀅𑀢𑁆𑀣𑀤𑀲𑁆𑀲𑀻 𑀥𑀫𑁆𑀫𑀤𑀲𑁆𑀲𑀻 𑀲𑀺𑀤𑁆𑀥𑀢𑁆𑀣𑁄 𑀢𑀺𑀲𑁆𑀲𑁄 𑀨𑀼𑀲𑁆𑀲𑁄 𑀯𑀺𑀧𑀲𑁆𑀲𑀻 𑀲𑀺𑀔𑀻 𑀯𑁂𑀲𑁆𑀲𑀪𑀽 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄’’𑀢𑀺 𑀮𑁄𑀓𑀁 𑀑𑀪𑀸𑀲𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀇𑀫𑁂𑀲𑀫𑁆𑀧𑀺 𑀢𑁂𑀯𑀻𑀲𑀢𑀺𑀬𑀸 ¶ 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄, ‘‘𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’’𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀺𑀢𑁄 𑀧𑀣𑀯𑀺𑀓𑀫𑁆𑀧𑀦𑀸𑀦𑀺 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑀲 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋

‘‘𑀓𑀸𑀮𑁄 𑀤𑁂𑀯 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁭) 𑁋

𑀯𑀼𑀢𑁆𑀢𑁂 𑁋

‘‘𑀓𑀸𑀮𑀁 𑀤𑁂𑀲𑀜𑁆𑀘 𑀤𑀻𑀧𑀜𑁆𑀘, 𑀓𑀼𑀮𑀁 𑀫𑀸𑀢𑀭𑀫𑁂𑀯 𑀘;

𑀇𑀫𑁂 𑀧𑀜𑁆𑀘 𑀯𑀺𑀮𑁄𑀓𑁂𑀢𑁆𑀯𑀸, 𑀉𑀧𑁆𑀧𑀚𑁆𑀚𑀢𑀺 𑀫𑀳𑀸𑀬𑀲𑁄’’𑀢𑀺. 𑁋

𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀓𑁆𑀬𑀭𑀸𑀚𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀯𑀺𑀚𑀸𑀬𑀺. 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀢𑁆𑀣 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀳𑀭𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀪𑀤𑁆𑀭𑀬𑁄𑀩𑁆𑀩𑀦𑀁 𑀧𑀢𑁆𑀯𑀸 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀤𑁂𑀯𑀮𑁄𑀓𑀲𑀺𑀭𑀺𑀁 ¶ 𑀯𑀺𑀬 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀦𑁆𑀢𑁄 𑀉𑀬𑁆𑀬𑀸𑀦𑀓𑀻𑀴𑀸𑀬 𑀕𑀫𑀦𑀲𑀫𑀬𑁂 𑀅𑀦𑀼𑀓𑁆𑀓𑀫𑁂𑀦 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀲𑀗𑁆𑀔𑀸𑀢𑁂 𑀢𑀬𑁄 ¶ 𑀤𑁂𑀯𑀤𑀽𑀢𑁂 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸, ‘‘𑀲𑀸𑀥𑀼 𑀧𑀩𑁆𑀩𑀚𑁆𑀚𑀸’’𑀢𑀺 𑀧𑀩𑁆𑀩𑀚𑁆𑀚𑀸𑀬 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀻𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀓𑀧𑁆𑀧𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂𑀦 𑀯𑀺𑀲𑁆𑀲𑀓𑀫𑁆𑀫𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀚𑀸𑀢𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀁 𑀜𑀢𑁆𑀯𑀸, ‘‘𑀬𑀸𑀯 𑀇𑀤𑀁 𑀩𑀦𑁆𑀥𑀦𑀁 𑀦 𑀯𑀟𑁆𑀠𑀢𑀺, 𑀢𑀸𑀯𑀤𑁂𑀯 𑀦𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀬𑀁 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑁋

‘‘𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀫𑀸𑀢𑀸, 𑀦𑀺𑀩𑁆𑀩𑀼𑀢𑁄 𑀦𑀽𑀦 𑀲𑁄 𑀧𑀺𑀢𑀸;

𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀦𑀸𑀭𑀻, 𑀬𑀲𑁆𑀲𑀸𑀬𑀁 𑀈𑀤𑀺𑀲𑁄 𑀧𑀢𑀻’’𑀢𑀺. 𑁋

𑀓𑀺𑀲𑀸𑀕𑁄𑀢𑀫𑀺𑀬𑀸 𑀦𑀸𑀫 𑀧𑀺𑀢𑀼𑀘𑁆𑀙𑀸𑀥𑀻𑀢𑀸𑀬 𑀪𑀸𑀲𑀺𑀢𑀁 𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸, ‘‘𑀅𑀳𑀁 𑀇𑀫𑀸𑀬 𑀦𑀺𑀩𑁆𑀩𑀼𑀢𑀧𑀤𑀁 𑀲𑀸𑀯𑀺𑀢𑁄’’𑀢𑀺 𑀫𑀼𑀢𑁆𑀢𑀸𑀳𑀸𑀭𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀢𑀲𑁆𑀲𑀸 𑀧𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 𑀦𑀺𑀤𑁆𑀤𑁄𑀧𑀕𑀢𑀸𑀦𑀁 𑀦𑀸𑀝𑀓𑀺𑀢𑁆𑀣𑀻𑀦𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀺𑀦𑁆𑀦𑀳𑀤𑀬𑁄 𑀙𑀦𑁆𑀦𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀡𑁆𑀟𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑀁 𑀆𑀭𑀼𑀬𑁆𑀳 𑀙𑀦𑁆𑀦𑀲𑀳𑀸𑀬𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀧𑀩𑁆𑀪𑀸𑀭𑁂 𑀦𑀺𑀲𑀺𑀦𑁆𑀦𑁄 𑀫𑀕𑀥𑀭𑀜𑁆𑀜𑀸 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑀁 𑀆𑀕𑀫𑀦𑀢𑁆𑀣𑀸𑀬 𑀢𑁂𑀦 𑀕𑀳𑀺𑀢𑀧𑀝𑀺𑀜𑁆𑀜𑁄 𑀆𑀴𑀸𑀭𑀜𑁆𑀘 𑀉𑀤𑀓𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀅𑀥𑀺𑀕𑀢𑀯𑀺𑀲𑁂𑀲𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 ¶ 𑀧𑀸𑀢𑁄𑀯 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀧𑀸𑀬𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀯𑀸𑀳𑁂𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀫𑀳𑀸𑀯𑀦𑀲𑀡𑁆𑀟𑁂 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀢𑁆𑀢𑀺𑀬𑁂𑀦 𑀤𑀺𑀦𑁆𑀦𑀁 𑀢𑀺𑀡𑀁 𑀕𑀳𑁂𑀢𑁆𑀯𑀸 𑀓𑀸𑀴𑁂𑀦 𑀦𑀸𑀕𑀭𑀸𑀚𑁂𑀦 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 ‘‘𑀦 𑀢𑀸𑀯𑀺𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀅𑀦𑀼𑀧𑀸𑀤𑀸𑀬 ¶ 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀦 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀫𑀺𑀢𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀘𑀼𑀢𑀽𑀧𑀧𑀸𑀢𑀜𑀸𑀡𑀁 𑀧𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀲𑀩𑁆𑀩𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀫𑀸𑀦𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀫𑀳𑀸𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑁂𑀦 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀥𑀫𑁆𑀫𑀤𑁂𑀲𑀦𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸, ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀓𑀢𑀪𑀸𑀯𑀁 𑀜𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀽𑀧𑀓𑀸𑀭𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀓𑀸𑀲𑀺𑀧𑀼𑀭𑀁 ¶ 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀤𑀺𑀯𑀲𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀢𑁂 𑀅𑀦𑀦𑀼𑀘𑁆𑀙𑀯𑀺𑀓𑁂𑀦 𑀲𑀫𑀼𑀤𑀸𑀘𑀸𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑁂 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀸𑀬𑁂𑀦𑁆𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀧𑀜𑁆𑀘𑀫𑀺𑀬𑀁 𑀧𑀓𑁆𑀔𑀲𑁆𑀲 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀬𑀲𑀓𑀼𑀮𑀧𑀼𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀁 𑀭𑀢𑁆𑀢𑀺𑀪𑀸𑀕𑁂 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀏𑀳𑀺 𑀬𑀲𑀸’’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀭𑀢𑁆𑀢𑀺𑀪𑀸𑀕𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀅𑀧𑀭𑁂𑀧𑀺 𑀢𑀲𑁆𑀲 𑀲𑀳𑀸𑀬𑀓𑁂 𑀘𑀢𑀼𑀧𑀡𑁆𑀡𑀸𑀲 𑀚𑀦𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺.

𑀏𑀯𑀁 𑀮𑁄𑀓𑁂 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑁂𑀲𑀼 𑀚𑀸𑀢𑁂𑀲𑀼 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸, ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓’’𑀦𑁆𑀢𑀺 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀤𑀺𑀲𑀸𑀲𑀼 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀉𑀭𑀼𑀯𑁂𑀮𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲 𑀚𑀦𑁂 𑀪𑀤𑁆𑀤𑀯𑀕𑁆𑀕𑀺𑀬𑀓𑀼𑀫𑀸𑀭𑁂 𑀯𑀺𑀦𑁂𑀲𑀺. 𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀲𑁄𑀢𑀸𑀧𑀦𑁆𑀦𑁄 𑀲𑀩𑁆𑀩𑀼𑀢𑁆𑀢𑀫𑁄 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦𑁂𑀯 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑀺𑀲𑀸𑀲𑀼 𑀧𑁂𑀲𑁂𑀢𑁆𑀯𑀸 𑀲𑀬𑀁 ¶ 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 ¶ 𑀲𑀳𑀲𑁆𑀲𑀚𑀝𑀺𑀮𑀧𑀭𑀺𑀯𑀸𑀭𑁂 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 𑀯𑀺𑀦𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦𑁂𑀯 𑀧𑀩𑁆𑀩𑀸𑀚𑁂𑀢𑁆𑀯𑀸 𑀕𑀬𑀸𑀲𑀻𑀲𑁂 ¶ 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 (𑀫𑀳𑀸𑀯. 𑁫𑁪; 𑀲𑀁. 𑀦𑀺. 𑁪.𑁨𑁮) 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 ‘‘𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀤𑀺𑀦𑁆𑀦𑀁 𑀧𑀝𑀺𑀜𑁆𑀜𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀦𑀕𑀭𑀽𑀧𑀘𑀸𑀭𑁂 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸, ‘‘𑀲𑀢𑁆𑀣𑀸 𑀓𑀺𑀭 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀦𑀳𑀼𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑀲𑁆𑀲 𑀭𑀜𑁆𑀜𑁄 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀭𑀸𑀚𑀸𑀦𑀁 𑀏𑀓𑀸𑀤𑀲𑀳𑀺 𑀦𑀳𑀼𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀓𑀦𑀳𑀼𑀢𑀁 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀫𑀸𑀡𑀯𑀓𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀭𑀸𑀚𑀕𑀳𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑁂𑀴𑀼𑀯𑀦𑀸𑀭𑀸𑀫𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀣 𑀦𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀳𑀺 𑀩𑀼𑀤𑁆𑀥𑁂 𑀭𑀸𑀚𑀕𑀳𑀢𑁄 𑀅𑀯𑀺𑀤𑀽𑀭𑁂 𑀉𑀧𑀢𑀺𑀲𑁆𑀲𑀕𑀸𑀫𑁄 𑀓𑁄𑀮𑀺𑀢𑀕𑀸𑀫𑁄𑀢𑀺 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀉𑀧𑀢𑀺𑀲𑁆𑀲𑀕𑀸𑀫𑁂 𑀲𑀸𑀭𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀤𑀺𑀯𑀲𑁂𑀬𑁂𑀯 𑀓𑁄𑀮𑀺𑀢𑀕𑀸𑀫𑁂 𑀫𑁄𑀕𑁆𑀕𑀮𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸𑀧𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀢𑀸𑀦𑀺 𑀓𑀺𑀭 𑀤𑁆𑀯𑁂𑀧𑀺 𑀓𑀼𑀮𑀸𑀦𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀆𑀩𑀤𑁆𑀥𑀧𑀝𑀺𑀩𑀤𑁆𑀥𑀲𑀳𑀸𑀬𑀓𑀸𑀦𑁂𑀯 𑀅𑀳𑁂𑀲𑀼𑀁, 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀤𑀺𑀯𑀲𑀫𑁂𑀯 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀁𑀲𑀼. 𑀢𑀸 𑀉𑀪𑁄𑀧𑀺 𑀤𑀲𑀫𑀸𑀲𑀘𑁆𑀘𑁂𑀬𑁂𑀦 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀁𑀲𑀼. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀲𑀸𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀧𑀢𑀺𑀲𑁆𑀲𑀕𑀸𑀫𑀓𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀉𑀧𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼 ¶ , 𑀇𑀢𑀭𑀲𑁆𑀲 𑀓𑁄𑀮𑀺𑀢𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀓𑁄𑀮𑀺𑀢𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀧𑀸𑀭𑀁 𑀅𑀕𑀫𑀁𑀲𑀼. 𑀉𑀧𑀢𑀺𑀲𑁆𑀲𑀫𑀸𑀡𑀯𑀲𑁆𑀲 𑀓𑀻𑀴𑀦𑀢𑁆𑀣𑀸𑀬 𑀦𑀤𑀺𑀁 𑀯𑀸 𑀉𑀬𑁆𑀬𑀸𑀦𑀁 𑀯𑀸 𑀕𑀫𑀦𑀓𑀸𑀮𑁂 𑀧𑀜𑁆𑀘 𑀲𑀼𑀯𑀡𑁆𑀡𑀲𑀺𑀯𑀺𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑀸𑀦𑀺 𑀳𑁄𑀦𑁆𑀢𑀺, 𑀓𑁄𑀮𑀺𑀢𑀫𑀸𑀡𑀯𑀲𑁆𑀲 𑀧𑀜𑁆𑀘 𑀆𑀚𑀜𑁆𑀜𑀬𑀼𑀢𑁆𑀢𑀭𑀣𑀲𑀢𑀸𑀦𑀺. 𑀤𑁆𑀯𑁂𑀧𑀺 𑀚𑀦𑀸 𑀧𑀜𑁆𑀘𑀧𑀜𑁆𑀘𑀫𑀸𑀡𑀯𑀓𑀲𑀢𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺. 𑀭𑀸𑀚𑀕𑀳𑁂 𑀘 𑀅𑀦𑀼𑀲𑀁𑀯𑀘𑁆𑀙𑀭𑀁 𑀕𑀺𑀭𑀕𑁆𑀕𑀲𑀫𑀚𑁆𑀚𑁄 𑀦𑀸𑀫 𑀅𑀳𑁄𑀲𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀝𑁆𑀞𑀸𑀦𑁂𑀬𑁂𑀯 𑀫𑀜𑁆𑀘𑀁 𑀩𑀦𑁆𑀥𑀦𑁆𑀢𑀺. 𑀤𑁆𑀯𑁂𑀧𑀺 𑀏𑀓𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀚𑁆𑀚𑀁 𑀧𑀲𑁆𑀲𑀦𑁆𑀢𑀸 𑀳𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀳𑀲𑀦𑁆𑀢𑀺, 𑀲𑀁𑀯𑁂𑀕𑀝𑁆𑀞𑀸𑀦𑁂 𑀲𑀁𑀯𑁂𑀚𑁂𑀦𑁆𑀢𑀺, 𑀤𑀸𑀬𑀁 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀬𑀁 𑀤𑁂𑀦𑁆𑀢𑀺. 𑀢𑁂𑀲𑀁 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀏𑀓𑀤𑀺𑀯𑀲𑀁 𑀲𑀫𑀚𑁆𑀚𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀜𑀸𑀡𑀲𑁆𑀲 𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀯𑀺𑀬 𑀳𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀳𑀸𑀲𑁄 𑀯𑀸 𑀲𑀁𑀯𑁂𑀕𑀝𑁆𑀞𑀸𑀦𑁂 𑀲𑀁𑀯𑁂𑀕𑁄 𑀯𑀸 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀦𑀁 𑀯𑀸 𑀦𑀸𑀳𑁄𑀲𑀺 ¶ . 𑀤𑁆𑀯𑁂𑀧𑀺 𑀧𑀦 𑀚𑀦𑀸 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀓𑀺𑀫𑁂𑀢𑁆𑀣 𑀑𑀮𑁄𑀓𑁂𑀢𑀩𑁆𑀩𑀁 𑀅𑀢𑁆𑀣𑀺, 𑀲𑀩𑁆𑀩𑁂𑀧𑀺𑀫𑁂 𑀅𑀧𑁆𑀧𑀢𑁆𑀢𑁂 𑀯𑀲𑁆𑀲𑀲𑀢𑁂 𑀅𑀧𑁆𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀅𑀫𑁆𑀳𑁂𑀳𑀺 𑀧𑀦 𑀏𑀓𑀁 𑀫𑁄𑀓𑁆𑀔𑀥𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑀁 𑀆𑀳 𑁋 ‘‘𑀲𑀫𑁆𑀫 𑀉𑀧𑀢𑀺𑀲𑁆𑀲, 𑀦 𑀢𑁆𑀯𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀯𑀺𑀬 𑀳𑀝𑁆𑀞𑀧𑀳𑀝𑁆𑀞𑁄, 𑀇𑀤𑀸𑀦𑀺 𑀅𑀦𑀢𑁆𑀢𑀫𑀦𑀥𑀸𑀢𑀼𑀓𑁄𑀲𑀺, 𑀓𑀺𑀁 𑀢𑁂 𑀲𑀮𑁆𑀮𑀓𑁆𑀔𑀺𑀢’’𑀦𑁆𑀢𑀺? ‘‘𑀲𑀫𑁆𑀫 𑀓𑁄𑀮𑀺𑀢, 𑀏𑀢𑁂𑀲𑀁 𑀯𑁄𑀮𑁄𑀓𑀦𑁂 𑀲𑀸𑀭𑁄 𑀦𑀢𑁆𑀣𑀺 ¶ ¶ , 𑀦𑀺𑀭𑀢𑁆𑀣𑀓𑀫𑁂𑀢𑀁, 𑀅𑀢𑁆𑀢𑀦𑁄 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀘𑀺𑀦𑁆𑀢𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀺. 𑀢𑁆𑀯𑀁 𑀧𑀦 𑀓𑀲𑁆𑀫𑀸 𑀅𑀦𑀢𑁆𑀢𑀫𑀦𑁄𑀲𑀻𑀢𑀺? 𑀲𑁄𑀧𑀺 𑀢𑀣𑁂𑀯 𑀆𑀳. 𑀅𑀣𑀲𑁆𑀲 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀚𑁆𑀛𑀸𑀲𑀬𑀢𑀁 𑀜𑀢𑁆𑀯𑀸 𑀉𑀧𑀢𑀺𑀲𑁆𑀲𑁄 𑀆𑀳 𑁋 ‘‘𑀅𑀫𑁆𑀳𑀸𑀓𑀁 𑀉𑀪𑀺𑀦𑁆𑀦𑀫𑁆𑀧𑀺 𑀲𑀼𑀘𑀺𑀦𑁆𑀢𑀺𑀓𑀁, 𑀫𑁄𑀓𑁆𑀔𑀥𑀫𑁆𑀫𑀁 𑀧𑀦 𑀕𑀯𑁂𑀲𑀦𑁆𑀢𑁂𑀳𑀺 𑀏𑀓𑀸 𑀧𑀩𑁆𑀩𑀚𑁆𑀚𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀸𑀫𑀸’’𑀢𑀺?

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀜𑁆𑀘𑀬𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀭𑀸𑀚𑀕𑀳𑁂 𑀧𑀝𑀺𑀯𑀲𑀢𑀺 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁. 𑀢𑁂 ‘‘𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀧𑀜𑁆𑀘𑀫𑀸𑀡𑀯𑀓𑀲𑀢𑀸𑀦𑀺 ‘‘𑀲𑀺𑀯𑀺𑀓𑀸𑀬𑁄 𑀘 𑀭𑀣𑁂 𑀘 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀏𑀓𑀸𑀬 𑀲𑀺𑀯𑀺𑀓𑀸𑀬 𑀏𑀓𑁂𑀦 𑀭𑀣𑁂𑀦 𑀕𑀦𑁆𑀢𑁆𑀯𑀸 𑀲𑀜𑁆𑀘𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀜𑁆𑀘𑀬𑁄 𑀅𑀢𑀺𑀭𑁂𑀓𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀢𑁂 𑀓𑀢𑀺𑀧𑀸𑀳𑁂𑀦𑁂𑀯 𑀲𑀩𑁆𑀩𑀁 𑀲𑀜𑁆𑀘𑀬𑀲𑁆𑀲 𑀲𑀫𑀬𑀁 𑀧𑀭𑀺𑀫𑀤𑁆𑀤𑀺𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑀼𑀫𑁆𑀳𑀸𑀓𑀁 𑀚𑀸𑀦𑀦𑀲𑀫𑀬𑁄 𑀏𑀢𑁆𑀢𑀓𑁄𑀯, 𑀉𑀤𑀸𑀳𑀼 𑀉𑀢𑁆𑀢𑀭𑀺𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀏𑀢𑁆𑀢𑀓𑁄𑀯 𑀲𑀩𑁆𑀩𑀁 𑀢𑀼𑀫𑁆𑀳𑁂𑀳𑀺 𑀜𑀸𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀯𑀁 𑀲𑀢𑀺 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀺𑀭𑀢𑁆𑀣𑀓𑁄, 𑀫𑀬𑀁 𑀬𑀁 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀢𑀼𑀁 𑀦𑀺𑀓𑁆𑀔𑀦𑁆𑀢𑀸, 𑀲𑁄 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑀸, 𑀫𑀳𑀸 𑀔𑁄 𑀧𑀦 𑀚𑀫𑁆𑀩𑀼𑀤𑀻𑀧𑁄, 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘𑀭𑀦𑁆𑀢𑀸 𑀅𑀤𑁆𑀥𑀸 𑀫𑁄𑀓𑁆𑀔𑀥𑀫𑁆𑀫𑀤𑁂𑀲𑀓𑀁 𑀓𑀜𑁆𑀘𑀺 𑀆𑀘𑀭𑀺𑀬𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬, ‘‘𑀬𑀢𑁆𑀣 𑀬𑀢𑁆𑀣 𑀧𑀡𑁆𑀟𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀓𑀘𑁆𑀙𑀁 𑀓𑀭𑁄𑀦𑁆𑀢𑀺. 𑀢𑁂𑀳𑀺 𑀧𑀼𑀝𑁆𑀞𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀓𑀣𑁂𑀢𑀼𑀁 ¶ 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑁂 𑀧𑀦 𑀢𑁂𑀲𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀏𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀆𑀕𑀦𑁆𑀢𑁆𑀯𑀸, ‘‘𑀲𑀫𑁆𑀫 𑀓𑁄𑀮𑀺𑀢, 𑀅𑀫𑁆𑀳𑁂𑀲𑀼 𑀬𑁄 𑀧𑀞𑀫𑀁 𑀅𑀫𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀽’’𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼𑀁.

𑀏𑀯𑀁 𑀢𑁂𑀲𑀼 𑀓𑀢𑀺𑀓𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑁂𑀲𑀼 𑀲𑀢𑁆𑀣𑀸 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀯𑁂𑀴𑀼𑀯𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀺. 𑀢𑀤𑀸 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 ¶ 𑀩𑀳𑀼𑀚𑀦𑀳𑀺𑀢𑀸𑀬𑀸’’𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑀧𑀓𑀸𑀲𑀦𑀢𑁆𑀣𑀁 𑀉𑀬𑁆𑀬𑁄𑀚𑀺𑀢𑀸𑀦𑀁 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀸𑀚𑀕𑀳𑀁 𑀆𑀕𑀢𑁄, 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑀢𑀺𑀲𑁆𑀲𑀧𑀭𑀺𑀩𑁆𑀩𑀸𑀚𑀓𑁄𑀧𑀺 𑀧𑀸𑀢𑁄𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀏𑀯𑀭𑀽𑀧𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀬𑁂𑀯, 𑀬𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀢𑀭𑁄, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬𑀁 𑁋 ‘𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀮𑁄 𑀔𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 ¶ 𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀁, 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕’’𑀦𑁆𑀢𑀺. 𑀲𑁄 𑀣𑁂𑀭𑀁 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀁 𑀅𑀜𑁆𑀜𑀢𑀭𑀁 𑀑𑀓𑀸𑀲𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀦𑀺𑀲𑀻𑀤𑀺𑀢𑀼𑀓𑀸𑀫𑀢𑀜𑁆𑀘𑀲𑁆𑀲 𑀜𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀧𑀭𑀺𑀩𑁆𑀩𑀸𑀚𑀓𑀧𑀻𑀞𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺, 𑀲𑁄 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂𑀧𑀺𑀲𑁆𑀲 𑀅𑀢𑁆𑀢𑀦𑁄 𑀓𑀼𑀡𑁆𑀟𑀺𑀓𑀸𑀬 𑀉𑀤𑀓𑀁 𑀅𑀤𑀸𑀲𑀺.

𑀏𑀯𑀁 𑀆𑀘𑀭𑀺𑀬𑀯𑀢𑁆𑀢𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀧𑀦 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄, 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀭𑀺𑀩𑁆𑀩𑀸𑀚𑀓𑀸 𑀦𑀸𑀫 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸, 𑀇𑀫𑀲𑁆𑀲 𑀲𑀸𑀲𑀦𑀲𑁆𑀲 𑀕𑀫𑁆𑀪𑀻𑀭𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀢𑁆𑀢𑀦𑁄 𑀦𑀯𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀯𑁄 𑀅𑀘𑀺𑀭𑀧𑀩𑁆𑀩𑀚𑀺𑀢𑁄, 𑀅𑀥𑀼𑀦𑀸𑀕𑀢𑁄 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀦 𑀢𑀸𑀯𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀺 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀦𑁆𑀢𑀺. 𑀧𑀭𑀺𑀩𑁆𑀩𑀸𑀚𑀓𑁄 𑁋 ‘‘𑀅𑀳𑀁 𑀉𑀧𑀢𑀺𑀲𑁆𑀲𑁄 𑀦𑀸𑀫, 𑀢𑁆𑀯𑀁 𑀬𑀣𑀸𑀲𑀢𑁆𑀢𑀺𑀬𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀯𑀤, 𑀏𑀢𑀁 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀫𑀬𑁆𑀳𑀁 𑀪𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋

‘‘𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀪𑀸𑀲𑀲𑁆𑀲𑀼, 𑀅𑀢𑁆𑀣𑀁𑀬𑁂𑀯 𑀫𑁂 𑀩𑁆𑀭𑀽𑀳𑀺;

𑀅𑀢𑁆𑀣𑁂𑀦𑁂𑀯 𑀫𑁂 𑀅𑀢𑁆𑀣𑁄, 𑀓𑀺𑀁 𑀓𑀸𑀳𑀲𑀺 𑀩𑁆𑀬𑀜𑁆𑀚𑀦𑀁 𑀩𑀳𑀼’’𑀦𑁆𑀢𑀺. (𑀫𑀳𑀸𑀯. 𑁬𑁦);

𑀏𑀯𑀁 ¶ 𑀯𑀼𑀢𑁆𑀢𑁂 𑀣𑁂𑀭𑁄 𑁋 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭 𑁧.𑁧.𑁨𑁮𑁬) 𑀕𑀸𑀣𑀫𑀸𑀳. 𑀧𑀭𑀺𑀩𑁆𑀩𑀸𑀚𑀓𑁄 𑀧𑀞𑀫𑀧𑀤𑀤𑁆𑀯𑀬𑀫𑁂𑀯 𑀲𑀼𑀢𑁆𑀯𑀸 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀇𑀢𑀭𑀁 𑀧𑀤𑀤𑁆𑀯𑀬𑀁 ¶ 𑀲𑁄𑀢𑀸𑀧𑀦𑁆𑀦𑀓𑀸𑀮𑁂 𑀦𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀭𑀺𑀯𑀺𑀲𑁂𑀲𑁂 𑀅𑀧𑁆𑀧𑀯𑀢𑁆𑀢𑀦𑁆𑀢𑁂 ‘‘𑀪𑀯𑀺𑀲𑁆𑀲𑀢𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀫𑀸 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑀬𑀺𑀢𑁆𑀣, 𑀏𑀢𑁆𑀢𑀓𑀫𑁂𑀯 𑀳𑁄𑀢𑀼, 𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀯𑀲𑀢𑀻’’𑀢𑀺? ‘‘𑀯𑁂𑀴𑀼𑀯𑀦𑁂, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀬𑀸𑀣, 𑀫𑀬𑁆𑀳𑀁 𑀏𑀓𑁄 𑀲𑀳𑀸𑀬𑀓𑁄 𑀅𑀢𑁆𑀣𑀺, 𑀅𑀫𑁆𑀳𑁂𑀳𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀓𑀢𑀺𑀓𑀸 𑀓𑀢𑀸 ‘𑀅𑀫𑁆𑀳𑁂𑀲𑀼 𑀬𑁄 𑀅𑀫𑀢𑀁 𑀧𑀞𑀫𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀽’𑀢𑀺. 𑀅𑀳𑀁 𑀢𑀁 𑀧𑀝𑀺𑀜𑁆𑀜𑀁 𑀫𑁄𑀘𑁂𑀢𑁆𑀯𑀸 𑀲𑀳𑀸𑀬𑀓𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀕𑀢𑀫𑀕𑁆𑀕𑁂𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀻𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺’’.

𑀅𑀣 𑀔𑁄 𑀓𑁄𑀮𑀺𑀢𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀅𑀚𑁆𑀚 𑀫𑀬𑁆𑀳𑀁 𑀲𑀳𑀸𑀬𑀓𑀲𑁆𑀲 ¶ 𑀫𑀼𑀔𑀯𑀡𑁆𑀡𑁄 𑀦 𑀅𑀜𑁆𑀜𑀤𑀺𑀯𑀲𑁂𑀲𑀼 𑀯𑀺𑀬, 𑀅𑀤𑁆𑀥𑀸 𑀢𑁂𑀦 𑀅𑀫𑀢𑀁 𑀅𑀥𑀺𑀕𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀫𑀢𑀸𑀥𑀺𑀕𑀫𑀁 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 ‘‘𑀆𑀫𑀸𑀯𑀼𑀲𑁄, 𑀅𑀫𑀢𑀁 𑀅𑀥𑀺𑀕𑀢’’𑀦𑁆𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀮𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀆𑀳 𑁋 ‘‘𑀓𑀼𑀳𑀺𑀁 𑀓𑀺𑀭, 𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀯𑀲𑀢𑀻’’𑀢𑀺? ‘‘𑀯𑁂𑀴𑀼𑀯𑀦𑁂 𑀓𑀺𑀭, 𑀲𑀫𑁆𑀫, 𑀏𑀯𑀁 𑀦𑁄 𑀆𑀘𑀭𑀺𑀬𑁂𑀦 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑀓𑀣𑀺𑀢’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫, 𑀆𑀬𑀸𑀫, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘 𑀦𑀸𑀫𑁂𑀲 𑀲𑀤𑀸𑀧𑀺 𑀆𑀘𑀭𑀺𑀬𑀧𑀽𑀚𑀓𑁄𑀯, 𑀢𑀲𑁆𑀫𑀸 𑀲𑀳𑀸𑀬𑀁 𑀏𑀯𑀫𑀸𑀳 𑁋 ‘‘𑀲𑀫𑁆𑀫, 𑀅𑀫𑁆𑀳𑁂𑀳𑀺 𑀅𑀥𑀺𑀕𑀢𑀁 𑀅𑀫𑀢𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀲𑀜𑁆𑀘𑀬𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀧𑀺 𑀓𑀣𑁂𑀲𑁆𑀲𑀸𑀫, 𑀩𑀼𑀚𑁆𑀛𑀫𑀸𑀦𑁄 ¶ 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀫𑁆𑀳𑀸𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀲𑀢𑁆𑀣𑀼, 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀤𑁆𑀯𑁂𑀧𑀺 𑀚𑀦𑀸 𑀲𑀜𑁆𑀘𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼.

𑀲𑀜𑁆𑀘𑀬𑁄 𑀢𑁂 𑀤𑀺𑀲𑁆𑀯𑀸𑀯 𑁋 ‘‘𑀓𑀺𑀁, 𑀢𑀸𑀢𑀸, 𑀓𑁄𑀘𑀺 𑀯𑁄 𑀅𑀫𑀢𑀫𑀕𑁆𑀕𑀤𑁂𑀲𑀓𑁄 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀆𑀘𑀭𑀺𑀬, 𑀮𑀤𑁆𑀥𑁄, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀥𑀫𑁆𑀫𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑀗𑁆𑀖𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑀼𑀫𑁆𑀳𑁂 𑀢𑀼𑀘𑁆𑀙𑁂 𑀅𑀲𑀸𑀭𑁂 𑀯𑀺𑀘𑀭𑀣, 𑀢𑀲𑁆𑀫𑀸 𑀏𑀣, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀦𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 ¶ . ‘‘𑀓𑀺𑀁 𑀓𑀸𑀭𑀡𑀸𑀳𑀺’’? ‘‘𑀅𑀳𑀁 𑀫𑀳𑀸𑀚𑀦𑀲𑁆𑀲 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀯𑀺𑀘𑀭𑀺𑀁, 𑀯𑀺𑀘𑀭𑀦𑁆𑀢𑀲𑁆𑀲 𑀫𑁂 𑀅𑀦𑁆𑀢𑁂𑀯𑀸𑀲𑀺𑀓𑀯𑀸𑀲𑁄 𑀘𑀸𑀝𑀺𑀬𑀸 𑀉𑀤𑀜𑁆𑀘𑀦𑀪𑀸𑀯𑀧𑁆𑀧𑀢𑁆𑀢𑀺 𑀯𑀺𑀬 𑀳𑁄𑀢𑀺, 𑀦 𑀲𑀓𑁆𑀔𑀺𑀲𑁆𑀲𑀸𑀫𑀳𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑀸𑀲𑀁 𑀯𑀲𑀺𑀢𑀼’’𑀦𑁆𑀢𑀺. ‘‘𑀫𑀸 𑀏𑀯𑀁 𑀓𑀭𑀺𑀢𑁆𑀣, 𑀆𑀘𑀭𑀺𑀬𑀸’’𑀢𑀺. ‘‘𑀳𑁄𑀢𑀼, 𑀢𑀸𑀢𑀸, 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀦𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀆𑀘𑀭𑀺𑀬, 𑀮𑁄𑀓𑁂 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀚𑀦𑁄 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁄 𑀕𑀦𑁆𑀢𑁆𑀯𑀸 𑀢𑀫𑁂𑀯 𑀧𑀽𑀚𑁂𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀢𑀢𑁆𑀣𑁂𑀯 𑀕𑀫𑀺𑀲𑁆𑀲𑀸𑀫. ‘‘𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀸𑀢𑀸, 𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀤𑀦𑁆𑀥𑀸 𑀩𑀳𑀽, 𑀉𑀤𑀸𑀳𑀼 𑀧𑀡𑁆𑀟𑀺𑀢𑀸’’𑀢𑀺. ‘‘𑀤𑀦𑁆𑀥𑀸, 𑀆𑀘𑀭𑀺𑀬, 𑀩𑀳𑀽, 𑀧𑀡𑁆𑀟𑀺𑀢𑀸 𑀘 𑀦𑀸𑀫 𑀓𑀢𑀺𑀧𑀬𑀸 𑀏𑀯 𑀳𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢𑀸, 𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀤𑀦𑁆𑀥𑀸 𑀤𑀦𑁆𑀥𑀲𑁆𑀲 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀦𑁆𑀢𑀺 ¶ , 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀢𑁂 ‘‘𑀧𑀜𑁆𑀜𑀸𑀬𑀺𑀲𑁆𑀲𑀣 𑀢𑀼𑀫𑁆𑀳𑁂, 𑀆𑀘𑀭𑀺𑀬𑀸’’𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀲𑀜𑁆𑀘𑀬𑀲𑁆𑀲 𑀧𑀭𑀺𑀲𑀸 𑀪𑀺𑀚𑁆𑀚𑀺, 𑀢𑀲𑁆𑀫𑀺𑀁 𑀔𑀡𑁂 𑀆𑀭𑀸𑀫𑁄 𑀢𑀼𑀘𑁆𑀙𑁄 𑀅𑀳𑁄𑀲𑀺. 𑀲𑁄 𑀢𑀼𑀘𑁆𑀙𑀁 𑀆𑀭𑀸𑀫𑀁 𑀤𑀺𑀲𑁆𑀯𑀸 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀙𑀟𑁆𑀟𑁂𑀲𑀺. 𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀧𑀜𑁆𑀘𑀲𑀼 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀲𑀼 𑀲𑀜𑁆𑀘𑀬𑀲𑁆𑀲 𑀅𑀟𑁆𑀠𑀢𑁂𑀬𑁆𑀬𑀲𑀢𑀸𑀦𑀺 𑀦𑀺𑀯𑀢𑁆𑀢𑀺𑀁𑀲𑀼, 𑀅𑀣 𑀔𑁄 𑀢𑁂 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀅𑀟𑁆𑀠𑀢𑁂𑀬𑁆𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑀁 𑀅𑀕𑀫𑀁𑀲𑀼.

𑀲𑀢𑁆𑀣𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀢𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀢𑁂, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀳𑀸𑀬𑀓𑀸 𑀆𑀕𑀘𑁆𑀙𑀦𑁆𑀢𑀺 𑀓𑁄𑀮𑀺𑀢𑁄 𑀘 𑀉𑀧𑀢𑀺𑀲𑁆𑀲𑁄 𑀘, 𑀏𑀢𑀁 𑀫𑁂 𑀲𑀸𑀯𑀓𑀬𑀼𑀕𑀁 𑀪𑀯𑀺𑀲𑁆𑀲𑀢𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕’’𑀦𑁆𑀢𑀺. 𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀦𑀺𑀲𑀻𑀤𑀺𑀢𑁆𑀯𑀸 𑀘 𑀧𑀦 ¶ 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀩𑁆𑀩𑁂𑀧𑀺 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁.

𑀅𑀣 𑀦𑁂𑀲𑀁 𑀧𑀭𑀺𑀲𑀸𑀬 𑀘𑀭𑀺𑀢𑀯𑀲𑁂𑀦 𑀲𑀢𑁆𑀣𑀸 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀺. 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀅𑀯𑀲𑁂𑀲𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀦 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀁 𑀦 𑀦𑀺𑀝𑁆𑀞𑀸𑀲𑀺. 𑀓𑀺𑀁 𑀓𑀸𑀭𑀡𑀸? 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀳𑀦𑁆𑀢𑀢𑀸𑀬. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 ¶ ¶ 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀕𑀥𑀭𑀝𑁆𑀞𑁂 𑀓𑀮𑁆𑀮𑀯𑀸𑀮𑀕𑀸𑀫𑀓𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀣𑀺𑀦𑀫𑀺𑀤𑁆𑀥𑁂 𑀑𑀓𑁆𑀓𑀫𑀦𑁆𑀢𑁂 𑀲𑀢𑁆𑀣𑀸𑀭𑀸 𑀲𑀁𑀯𑁂𑀚𑀺𑀢𑁄 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑀣𑀸𑀕𑀢𑁂𑀦 𑀤𑀺𑀦𑁆𑀦𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀡𑀦𑁆𑀢𑁄𑀯 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀅𑀟𑁆𑀠𑀫𑀸𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀢𑀫𑁂𑀯 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀲𑀽𑀓𑀭𑀔𑀢𑀮𑁂𑀡𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀭𑀲𑁆𑀲 𑀯𑀟𑁆𑀠𑀺𑀢𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀯𑀺𑀬 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀦𑀦𑀼 𑀘𑀸𑀬𑀲𑁆𑀫𑀸 𑀫𑀳𑀸𑀧𑀜𑁆𑀜𑁄, 𑀅𑀣 𑀓𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁄 𑀘𑀺𑀭𑀢𑀭𑁂𑀦 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀧𑀸𑀧𑀼𑀡𑀻𑀢𑀺? 𑀧𑀭𑀺𑀓𑀫𑁆𑀫𑀫𑀳𑀦𑁆𑀢𑀢𑀸𑀬. 𑀬𑀣𑀸 𑀳𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀦𑁆𑀢𑀼𑀓𑀸𑀫𑀸 𑀔𑀺𑀧𑁆𑀧𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀭𑀸𑀚𑀽𑀦𑀁 𑀧𑀦 𑀳𑀢𑁆𑀣𑀺𑀯𑀸𑀳𑀦𑀓𑀧𑁆𑀧𑀦𑀸𑀤𑀺𑀁 𑀫𑀳𑀦𑁆𑀢𑀁 𑀧𑀭𑀺𑀓𑀫𑁆𑀫𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀁 𑀤𑀺𑀯𑀲𑀜𑁆𑀜𑁂𑀯 𑀧𑀦 𑀲𑀢𑁆𑀣𑀸 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀯𑁂𑀴𑀼𑀯𑀦𑁂 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀁 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 𑁋 ‘‘𑀲𑀢𑁆𑀣𑀸 𑀫𑀼𑀔𑁄𑀮𑁄𑀓𑀦𑁂𑀦 𑀪𑀺𑀓𑁆𑀔𑀁 𑀤𑁂𑀢𑀺, 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀤𑀤𑀦𑁆𑀢𑁂𑀦 𑀦𑀸𑀫 𑀧𑀞𑀫𑀁 𑀧𑀩𑁆𑀩𑀚𑀺𑀢𑀸𑀦𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀢𑁂 𑀅𑀦𑁄𑀮𑁄𑀓𑁂𑀦𑁆𑀢𑁂𑀦 𑀬𑀲𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀧𑀡𑁆𑀡𑀸𑀲𑀪𑀺𑀓𑁆𑀔𑀽𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀢𑁂 𑀅𑀦𑁄𑀮𑁄𑀓𑁂𑀦𑁆𑀢𑁂𑀦 𑀪𑀤𑁆𑀤𑀯𑀕𑁆𑀕𑀺𑀬𑀸𑀦𑀁 ¶ 𑀢𑀺𑀁𑀲𑀚𑀦𑀸𑀦𑀁, 𑀏𑀢𑁂 𑀅𑀦𑁄𑀮𑁄𑀓𑁂𑀦𑁆𑀢𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀻𑀦𑀁 𑀢𑁂𑀪𑀸𑀢𑀺𑀓𑀸𑀦𑀁, 𑀏𑀢𑁂 𑀧𑀦 𑀏𑀢𑁆𑀢𑀓𑁂 𑀫𑀳𑀸𑀣𑁂𑀭𑁂 𑀧𑀳𑀸𑀬 𑀲𑀩𑁆𑀩𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀤𑀤𑀦𑁆𑀢𑁂𑀦 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀺𑀦𑁆𑀦’’𑀦𑁆𑀢𑀺. 𑀲𑀢𑁆𑀣𑀸, ‘‘𑀓𑀺𑀁 𑀓𑀣𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀤𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀁 𑀤𑁂𑀫𑀺, 𑀏𑀢𑁂𑀲𑀁 𑀧𑀦 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀫𑁂𑀯 𑀤𑁂𑀫𑀺. 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑁄 𑀳𑀺 𑀏𑀓𑀲𑁆𑀫𑀺𑀁 𑀲𑀲𑁆𑀲𑁂 𑀦𑀯 𑀯𑀸𑀭𑁂 𑀅𑀕𑁆𑀕𑀲𑀲𑁆𑀲𑀤𑀸𑀦𑀁 𑀤𑀤𑀦𑁆𑀢𑁄 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀦𑀸𑀤𑀸𑀲𑀺, 𑀅𑀕𑁆𑀕𑀥𑀫𑁆𑀫𑀁 𑀧𑀦 𑀅𑀭𑀳𑀢𑁆𑀢𑀁 𑀲𑀩𑁆𑀩𑀧𑀞𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀧𑀢𑁆𑀣𑁂𑀢𑁆𑀯𑀸 𑀅𑀤𑀸𑀲𑀻’’𑀢𑀺. ‘‘𑀓𑀤𑀸 𑀧𑀦 𑀪𑀕𑀯𑀸’’𑀢𑀺? ‘‘𑀲𑀼𑀡𑀺𑀲𑁆𑀲𑀣, 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺, 𑀪𑀕𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀪𑀺𑀓𑁆𑀔𑀯𑁂 ¶ , 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀤𑀸 𑀫𑀳𑀸𑀓𑀸𑀴𑁄 𑀘𑀽𑀴𑀓𑀸𑀴𑁄𑀢𑀺 𑀤𑁆𑀯𑁂𑀪𑀸𑀢𑀺𑀓𑀸 𑀓𑀼𑀝𑀼𑀫𑁆𑀩𑀺𑀓𑀸 𑀫𑀳𑀦𑁆𑀢𑀁 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 ¶ 𑀯𑀧𑀸𑀧𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀘𑀽𑀴𑀓𑀸𑀴𑁄 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀔𑀸𑀤𑀺, 𑀢𑀁 𑀅𑀢𑀺𑀫𑀥𑀼𑀭𑀁 𑀅𑀳𑁄𑀲𑀺. 𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀲𑀸𑀮𑀺𑀕𑀩𑁆𑀪𑀤𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀸𑀢𑀺𑀓, 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀧𑀘𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑁂𑀫𑀸’’𑀢𑀺 𑀆𑀳. ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢, 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀤𑀸𑀦𑀁 𑀦𑀸𑀫 𑀦𑁂𑀯 𑀅𑀢𑀻𑀢𑁂 𑀪𑀽𑀢𑀧𑀼𑀩𑁆𑀩𑀁, 𑀦 𑀅𑀦𑀸𑀕𑀢𑁂𑀧𑀺 𑀪𑀯𑀺𑀲𑁆𑀲𑀢𑀺, 𑀫𑀸 𑀲𑀲𑁆𑀲𑀁 𑀦𑀸𑀲𑀬𑀻’’𑀢𑀺; 𑀯𑀼𑀢𑁆𑀢𑁄𑀧𑀺 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯 ¶ . 𑀅𑀣 𑀦𑀁 𑀪𑀸𑀢𑀸, ‘‘𑀢𑁂𑀦 𑀳𑀺 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀫𑀫 𑀓𑁄𑀝𑁆𑀞𑀸𑀲𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀔𑁂𑀢𑁆𑀢𑁂 𑀬𑀁 𑀇𑀘𑁆𑀙𑀲𑀺, 𑀢𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀔𑁂𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀩𑀳𑀽 𑀫𑀦𑀼𑀲𑁆𑀲𑁂 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑁆𑀯𑀸 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀦𑀺𑀭𑀼𑀤𑀓𑁂𑀦 𑀔𑀻𑀭𑁂𑀦 𑀧𑀘𑀸𑀧𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀫𑀫 𑀅𑀕𑁆𑀕𑀤𑀸𑀦𑀁 𑀅𑀕𑁆𑀕𑀥𑀫𑁆𑀫𑀲𑁆𑀲 𑀲𑀩𑁆𑀩𑀧𑀞𑀫𑀁 𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀢𑀽’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀫𑀓𑀸𑀲𑀺.

𑀲𑁄 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀲𑀓𑀮𑀓𑁆𑀔𑁂𑀢𑁆𑀢𑀁 𑀓𑀡𑁆𑀡𑀺𑀓𑀩𑀤𑁆𑀥𑁂𑀳𑀺 𑀯𑀺𑀬 𑀲𑀸𑀮𑀺𑀲𑀻𑀲𑁂𑀳𑀺 𑀲𑀜𑁆𑀙𑀦𑁆𑀦𑀁 𑀤𑀺𑀲𑁆𑀯𑀸 𑀧𑀜𑁆𑀘𑀯𑀺𑀥𑀧𑀻𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸, ‘‘𑀮𑀸𑀪𑀸 𑀯𑀢 𑀫𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀣𑀼𑀓𑀓𑀸𑀮𑁂 𑀧𑀼𑀣𑀼𑀓𑀕𑁆𑀕𑀁 𑀦𑀸𑀫 𑀅𑀤𑀸𑀲𑀺, 𑀕𑀸𑀫𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀅𑀕𑁆𑀕𑀲𑀲𑁆𑀲𑀤𑀸𑀦𑀁 𑀦𑀸𑀫 𑀅𑀤𑀸𑀲𑀺, 𑀮𑀸𑀬𑀦𑁂 𑀮𑀸𑀬𑀦𑀕𑁆𑀕𑀁, 𑀯𑁂𑀡𑀺𑀓𑀭𑀡𑁂 𑀯𑁂𑀡𑀕𑁆𑀕𑀁, 𑀓𑀮𑀸𑀧𑀸𑀤𑀻𑀲𑀼 𑀓𑀮𑀸𑀧𑀕𑁆𑀕𑀁, 𑀔𑀮𑀕𑁆𑀕𑀁, 𑀔𑀮𑀪𑀡𑁆𑀟𑀕𑁆𑀕𑀁, 𑀓𑁄𑀝𑁆𑀞𑀕𑁆𑀕𑀦𑁆𑀢𑀺. 𑀏𑀯𑀁 𑀏𑀓𑀲𑀲𑁆𑀲𑁂 𑀦𑀯 𑀯𑀸𑀭𑁂 𑀅𑀕𑁆𑀕𑀤𑀸𑀦𑀁 𑀅𑀤𑀸𑀲𑀺. 𑀢𑀲𑁆𑀲 𑀲𑀩𑁆𑀩𑀯𑀸𑀭𑁂𑀲𑀼 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑀺, 𑀲𑀲𑁆𑀲𑀁 𑀅𑀢𑀺𑀭𑁂𑀓𑀁 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀺. 𑀥𑀫𑁆𑀫𑁄 𑀳𑀺 𑀦𑀸𑀫𑁂𑀲 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀭𑀓𑁆𑀔𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀥𑀫𑁆𑀫𑁄 ¶ 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁,

𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂,

𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨) 𑁋

‘‘𑀏𑀯𑀫𑁂𑀲 ¶ 𑀯𑀺𑀧𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀅𑀕𑁆𑀕𑀥𑀫𑁆𑀫𑀁 𑀧𑀞𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀧𑀢𑁆𑀣𑁂𑀦𑁆𑀢𑁄 𑀦𑀯 𑀯𑀸𑀭𑁂 𑀅𑀕𑁆𑀕𑀤𑀸𑀦𑀸𑀦𑀺 𑀅𑀤𑀸𑀲𑀺. 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀧𑀦 𑀳𑀁𑀲𑀯𑀢𑀻𑀦𑀕𑀭𑁂 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀓𑀸𑀮𑁂𑀧𑀺 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀕𑁆𑀕𑀥𑀫𑁆𑀫𑀲𑁆𑀲 𑀧𑀞𑀫𑀁 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀫𑁂𑀯 ¶ 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀇𑀢𑀺 𑀇𑀫𑀺𑀦𑀸 𑀧𑀢𑁆𑀣𑀺𑀢𑀫𑁂𑀯 𑀫𑀬𑀸 𑀤𑀺𑀦𑁆𑀦𑀁, 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑁂𑀫𑀻’’𑀢𑀺.

‘‘𑀬𑀲𑀓𑀼𑀮𑀧𑀼𑀢𑁆𑀢𑀧𑁆𑀧𑀫𑀼𑀔𑀸 𑀧𑀜𑁆𑀘𑀧𑀜𑁆𑀜𑀸𑀲 𑀚𑀦𑀸 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀁𑀲𑀼, 𑀪𑀦𑁆𑀢𑁂’’𑀢𑀺? ‘‘𑀏𑀢𑁂𑀧𑀺 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀸 𑀩𑀳𑀼𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀯𑀕𑁆𑀕𑀩𑀦𑁆𑀥𑀦𑁂𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀅𑀦𑀸𑀣𑀫𑀢𑀲𑀭𑀻𑀭𑀸𑀦𑀺 𑀧𑀝𑀺𑀚𑀕𑁆𑀕𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑁂 𑀏𑀓𑀤𑀺𑀯𑀲𑀁 𑀲𑀕𑀩𑁆𑀪𑀁 𑀇𑀢𑁆𑀣𑀺𑀁 𑀓𑀸𑀮𑀓𑀢𑀁 𑀤𑀺𑀲𑁆𑀯𑀸, ‘𑀛𑀸𑀧𑁂𑀲𑁆𑀲𑀸𑀫𑀸’𑀢𑀺 𑀲𑀼𑀲𑀸𑀦𑀁 𑀳𑀭𑀺𑀁𑀲𑀼. 𑀢𑁂𑀲𑀼 𑀧𑀜𑁆𑀘 𑀚𑀦𑁂 ‘𑀢𑀼𑀫𑁆𑀳𑁂 𑀛𑀸𑀧𑁂𑀣𑀸’𑀢𑀺 𑀲𑀼𑀲𑀸𑀦𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀕𑀸𑀫𑀁 𑀧𑀯𑀺𑀝𑁆𑀞𑀸. 𑀬𑀲𑀤𑀸𑀭𑀓𑁄 𑀢𑀁 𑀫𑀢𑀲𑀭𑀻𑀭𑀁 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀛𑀸𑀧𑁂𑀦𑁆𑀢𑁄 𑀅𑀲𑀼𑀪𑀲𑀜𑁆𑀜𑀁 𑀧𑀝𑀺𑀮𑀪𑀺, 𑀇𑀢𑀭𑁂𑀲𑀫𑁆𑀧𑀺 𑀘𑀢𑀼𑀦𑁆𑀦𑀁 𑀚𑀦𑀸𑀦𑀁 𑁋 ‘𑀧𑀲𑁆𑀲𑀣, 𑀪𑁄, 𑀇𑀫𑀁 𑀲𑀭𑀻𑀭𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀤𑁆𑀥𑀁𑀲𑀺𑀢𑀘𑀫𑁆𑀫𑀁, 𑀓𑀩𑀭𑀕𑁄𑀭𑀽𑀧𑀁 𑀯𑀺𑀬 𑀅𑀲𑀼𑀘𑀺𑀁 𑀤𑀼𑀕𑁆𑀕𑀦𑁆𑀥𑀁 𑀧𑀝𑀺𑀓𑀽𑀮’𑀦𑁆𑀢𑀺 ¶ 𑀤𑀲𑁆𑀲𑁂𑀲𑀺. 𑀢𑁂𑀧𑀺 𑀢𑀢𑁆𑀣 𑀅𑀲𑀼𑀪𑀲𑀜𑁆𑀜𑀁 𑀧𑀝𑀺𑀮𑀪𑀺𑀁𑀲𑀼. 𑀢𑁂 𑀧𑀜𑁆𑀘𑀧𑀺 𑀚𑀦𑀸 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀲𑁂𑀲𑀲𑀳𑀸𑀬𑀓𑀸𑀦𑀁 𑀓𑀣𑀬𑀺𑀁𑀲𑀼. 𑀬𑀲𑁄 𑀧𑀦 𑀤𑀸𑀭𑀓𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀪𑀭𑀺𑀬𑀸𑀬 𑀘 𑀓𑀣𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀲𑀼𑀪𑀁 𑀪𑀸𑀯𑀬𑀺𑀁𑀲𑀼. 𑀇𑀤𑀫𑁂𑀢𑁂𑀲𑀁 𑀧𑀼𑀩𑁆𑀩𑀓𑀫𑁆𑀫𑀁. 𑀢𑁂𑀦𑁂𑀯 𑀬𑀲𑀲𑁆𑀲 𑀇𑀢𑁆𑀣𑀸𑀕𑀸𑀭𑁂 𑀲𑀼𑀲𑀸𑀦𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀺, 𑀢𑀸𑀬 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑁂𑀲𑀫𑁆𑀧𑀺 𑀯𑀺𑀲𑁂𑀲𑀸𑀥𑀺𑀕𑀫𑁄 𑀦𑀺𑀩𑁆𑀩𑀢𑁆𑀢𑀺. 𑀏𑀯𑀁 𑀇𑀫𑁂𑀧𑀺 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀫𑁂𑀯 𑀮𑀪𑀺𑀁𑀲𑀼. 𑀦𑀸𑀳𑀁 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀫𑁆𑀫𑀻’’𑀢𑀺.

‘‘𑀪𑀤𑁆𑀤𑀯𑀕𑁆𑀕𑀺𑀬𑀲𑀳𑀸𑀬𑀓𑀸 𑀧𑀦 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀁𑀲𑀼, 𑀪𑀦𑁆𑀢𑁂’’𑀢𑀺? ‘‘𑀏𑀢𑁂𑀧𑀺 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀺𑀁𑀲 𑀥𑀼𑀢𑁆𑀢𑀸 𑀳𑀼𑀢𑁆𑀯𑀸 𑀢𑀼𑀡𑁆𑀟𑀺𑀮𑁄𑀯𑀸𑀤𑀁 𑀲𑀼𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼. 𑀏𑀯𑀁 𑀇𑀫𑁂𑀧𑀺 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀫𑁂𑀯 𑀮𑀪𑀺𑀁𑀲𑀼. 𑀦𑀸𑀳𑀁 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀫𑁆𑀫𑀻’’𑀢𑀺.

‘‘𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 𑀧𑀦 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀁𑀲𑀼, 𑀪𑀦𑁆𑀢𑁂’’𑀢𑀺? ‘‘𑀢𑁂𑀧𑀺 𑀅𑀭𑀳𑀢𑁆𑀢𑀫𑁂𑀯 𑀧𑀢𑁆𑀣𑁂𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀁𑀲𑀼. 𑀇𑀢𑁄 𑀳𑀺 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑁂 𑀢𑀺𑀲𑁆𑀲𑁄 ¶ 𑀨𑀼𑀲𑁆𑀲𑁄𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀨𑀼𑀲𑁆𑀲𑀩𑀼𑀤𑁆𑀥𑀲𑁆𑀲 𑀫𑀳𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀧𑀦 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁂 𑀭𑀜𑁆𑀜𑁄 𑀓𑀦𑀺𑀝𑁆𑀞𑀧𑀼𑀢𑁆𑀢𑁄 𑀧𑀞𑀫𑀅𑀕𑁆𑀕𑀲𑀸𑀯𑀓𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑁄 𑀅𑀳𑁄𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘𑀚𑁂𑀝𑁆𑀞𑀧𑀼𑀢𑁆𑀢𑁄 𑀫𑁂 𑀩𑀼𑀤𑁆𑀥𑁄, 𑀓𑀦𑀺𑀝𑁆𑀞𑀧𑀼𑀢𑁆𑀢𑁄 𑀧𑀞𑀫𑀅𑀕𑁆𑀕𑀲𑀸𑀯𑀓𑁄, 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑁄’𑀢𑀺 𑀢𑁂 𑀑𑀮𑁄𑀓𑁂𑀢𑁆𑀯𑀸, ‘𑀫𑀫𑁂𑀯 𑀩𑀼𑀤𑁆𑀥𑁄, 𑀫𑀫𑁂𑀯 𑀥𑀫𑁆𑀫𑁄, 𑀫𑀫𑁂𑀯 𑀲𑀗𑁆𑀖𑁄, 𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ¶ , ‘𑀪𑀦𑁆𑀢𑁂, 𑀇𑀤𑀸𑀦𑀺 𑀫𑁂 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀲𑁆𑀲 𑀆𑀬𑀼𑀦𑁄 𑀓𑁄𑀝𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑀓𑀸𑀮𑁄 𑀯𑀺𑀬 𑀅𑀜𑁆𑀜𑁂𑀲𑀁 𑀕𑁂𑀳𑀤𑁆𑀯𑀸𑀭𑀁 𑀅𑀕𑀦𑁆𑀢𑁆𑀯𑀸 𑀬𑀸𑀯𑀸𑀳𑀁 𑀚𑀻𑀯𑀸𑀫𑀺, 𑀢𑀸𑀯 𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀅𑀥𑀺𑀯𑀸𑀲𑁂𑀣𑀸’𑀢𑀺 ¶ 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀦𑀺𑀩𑀤𑁆𑀥𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀓𑀭𑁄𑀢𑀺. 𑀭𑀜𑁆𑀜𑁄 𑀧𑀦 𑀅𑀧𑀭𑁂𑀧𑀺 𑀢𑀢𑁄 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀚𑁂𑀝𑁆𑀞𑀲𑁆𑀲 𑀧𑀜𑁆𑀘 𑀬𑁄𑀥𑀲𑀢𑀸𑀦𑀺 𑀧𑀭𑀺𑀯𑀸𑀭𑀸𑀦𑀺, 𑀫𑀚𑁆𑀛𑀺𑀫𑀲𑁆𑀲 𑀢𑀻𑀡𑀺, 𑀓𑀦𑀺𑀝𑁆𑀞𑀲𑁆𑀲 𑀤𑁆𑀯𑁂. 𑀢𑁂 ‘𑀫𑀬𑀫𑁆𑀧𑀺 𑀪𑀸𑀢𑀺𑀓𑀁 𑀪𑁄𑀚𑁂𑀲𑁆𑀲𑀸𑀫𑀸’𑀢𑀺 𑀧𑀺𑀢𑀭𑀁 𑀑𑀓𑀸𑀲𑀁 𑀬𑀸𑀘𑀺𑀢𑁆𑀯𑀸 𑀅𑀮𑀪𑀫𑀸𑀦𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑁆𑀢𑀸𑀧𑀺 𑀅𑀮𑀪𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀢𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀸𑀬 𑀧𑁂𑀲𑀺𑀢𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀆𑀕𑀫𑀺𑀁𑀲𑀼. 𑀅𑀣 𑀦𑁂 𑀧𑀺𑀢𑀸 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸, ‘𑀯𑀭𑀁 𑀯𑁄, 𑀢𑀸𑀢𑀸, 𑀤𑀫𑁆𑀫𑀻’𑀢𑀺 𑀆𑀳.

‘‘𑀢𑁂 ‘𑀲𑀸𑀥𑀼 𑀤𑁂𑀯𑀸’𑀢𑀺 𑀯𑀭𑀁 𑀕𑀳𑀺𑀢𑀓𑀁 𑀓𑀢𑁆𑀯𑀸 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀺𑀢𑀭𑀸 ‘𑀕𑀡𑁆𑀳𑀣, 𑀢𑀸𑀢𑀸, 𑀯𑀭’𑀦𑁆𑀢𑀺 𑀯𑀼𑀢𑁆𑀢𑀸, ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀅𑀢𑁆𑀣𑁄 𑀦𑀢𑁆𑀣𑀺, 𑀇𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀪𑀸𑀢𑀺𑀓𑀁 𑀪𑁄𑀚𑁂𑀲𑁆𑀲𑀸𑀫, 𑀇𑀫𑀁 𑀦𑁄 𑀯𑀭𑀁 𑀤𑁂𑀳𑀻’’𑀢𑀺 𑀆𑀳𑀁𑀲𑀼. ‘𑀦 𑀤𑁂𑀫𑀺, 𑀢𑀸𑀢𑀸’𑀢𑀺. ‘𑀦𑀺𑀘𑁆𑀘𑀓𑀸𑀮𑀁 𑀅𑀤𑁂𑀦𑁆𑀢𑁄 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀤𑁂𑀣, 𑀤𑁂𑀯𑀸’𑀢𑀺. ‘𑀦 𑀤𑁂𑀫𑀺, 𑀢𑀸𑀢𑀸’𑀢𑀺. ‘𑀢𑁂𑀦 𑀳𑀺 𑀙 𑀧𑀜𑁆𑀘 𑀘𑀢𑁆𑀢𑀸𑀭𑀺 𑀢𑀻𑀡𑀺 𑀤𑁆𑀯𑁂 𑀏𑀓𑀁 𑀲𑀁𑀯𑀘𑁆𑀙𑀭𑀁 𑀤𑁂𑀣, 𑀤𑁂𑀯𑀸’𑀢𑀺. ‘𑀦 𑀤𑁂𑀫𑀺, 𑀢𑀸𑀢𑀸’𑀢𑀺. ‘𑀢𑁂𑀦 𑀳𑀺, 𑀤𑁂𑀯, 𑀲𑀢𑁆𑀢 𑀫𑀸𑀲𑁂 𑀤𑁂𑀣𑀸’𑀢𑀺. ‘𑀙 𑀫𑀸𑀲𑁂 𑀧𑀜𑁆𑀘 𑀫𑀸𑀲𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀢𑀬𑁄 𑀫𑀸𑀲𑁂 𑀤𑁂𑀣, 𑀤𑁂𑀯𑀸’𑀢𑀺. ‘𑀦 𑀤𑁂𑀫𑀺, 𑀢𑀸𑀢𑀸’𑀢𑀺. ‘𑀳𑁄𑀢𑀼, 𑀤𑁂𑀯, 𑀏𑀓𑁂𑀓𑀲𑁆𑀲 𑀦𑁄 𑀏𑀓𑁂𑀓𑀁 𑀫𑀸𑀲𑀁 𑀓𑀢𑁆𑀯𑀸 𑀢𑀬𑁄 𑀫𑀸𑀲𑁂 𑀤𑁂𑀣𑀸’𑀢𑀺. ‘𑀲𑀸𑀥𑀼, 𑀢𑀸𑀢𑀸, 𑀢𑁂𑀦 𑀳𑀺 𑀢𑀬𑁄 𑀫𑀸𑀲𑁂 𑀪𑁄𑀚𑁂𑀣𑀸’𑀢𑀺 𑀆𑀳. 𑀢𑁂 𑀢𑀼𑀝𑁆𑀞𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀢𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀏𑀓𑁄𑀯 𑀓𑁄𑀝𑁆𑀞𑀸𑀕𑀸𑀭𑀺𑀓𑁄, 𑀏𑀓𑁄𑀯 𑀆𑀬𑀼𑀢𑁆𑀢𑀓𑁄, 𑀢𑀲𑁆𑀲 𑀤𑁆𑀯𑀸𑀤𑀲𑀦𑀳𑀼𑀢𑀸 𑀧𑀼𑀭𑀺𑀲𑀧𑀭𑀺𑀯𑀸𑀭𑀸. 𑀢𑁂 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ¶ , ‘𑀫𑀬𑀁 𑀇𑀫𑀁 𑀢𑁂𑀫𑀸𑀲𑀁 𑀤𑀲 𑀲𑀻𑀮𑀸𑀦𑀺 𑀕𑀳𑁂𑀢𑁆𑀯𑀸 𑀤𑁆𑀯𑁂 𑀓𑀸𑀲𑀸𑀯𑀸𑀦𑀺 ¶ 𑀦𑀺𑀯𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀳𑀯𑀸𑀲𑀁 𑀯𑀲𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀏𑀢𑁆𑀢𑀓𑀁 𑀦𑀸𑀫 𑀤𑀸𑀦𑀯𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑁄𑀥𑀲𑀳𑀲𑁆𑀲𑀲𑁆𑀲 𑀘 𑀲𑀩𑁆𑀩𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀯𑀢𑁆𑀢𑁂𑀬𑁆𑀬𑀸𑀣. 𑀫𑀬𑀜𑁆𑀳𑀺 𑀇𑀢𑁄 𑀧𑀝𑁆𑀞𑀸𑀬 𑀦 𑀓𑀺𑀜𑁆𑀘𑀺 𑀯𑀓𑁆𑀔𑀸𑀫𑀸’𑀢𑀺 𑀯𑀤𑀺𑀁𑀲𑀼.

‘‘𑀢𑁂 𑀢𑀬𑁄𑀧𑀺 𑀚𑀦𑀸 𑀧𑀭𑀺𑀯𑀸𑀭𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀸𑀬 𑀓𑀸𑀲𑀸𑀬𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀯𑀲𑀺𑀁𑀲𑀼. 𑀓𑁄𑀝𑁆𑀞𑀸𑀕𑀸𑀭𑀺𑀓𑁄 𑀘 𑀆𑀬𑀼𑀢𑁆𑀢𑀓𑁄 𑀘 𑀏𑀓𑀢𑁄 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀪𑀸𑀢𑀺𑀓𑀸𑀦𑀁 𑀓𑁄𑀝𑁆𑀞𑀸𑀕𑀸𑀭𑁂𑀳𑀺 𑀯𑀸𑀭𑁂𑀦 𑀯𑀸𑀭𑁂𑀦 𑀤𑀸𑀦𑀯𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀺, 𑀓𑀫𑁆𑀫𑀓𑀸𑀭𑀸𑀦𑀁 𑀧𑀦 𑀧𑀼𑀢𑁆𑀢𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀭𑁄𑀤𑀦𑁆𑀢𑀺. 𑀢𑁂 𑀢𑁂𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀦𑀸𑀕𑀢𑁂𑀬𑁂𑀯 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁 𑀦 𑀪𑀽𑀢𑀧𑀼𑀩𑁆𑀩𑀁. 𑀢𑁂 ‘𑀅𑀧𑀭𑀪𑀸𑀕𑁂 𑀤𑀸𑀭𑀓𑀸𑀦𑀁 𑀤𑁂𑀫𑀸’𑀢𑀺 𑀅𑀢𑁆𑀢𑀦𑀸𑀧𑀺 𑀕𑀳𑁂𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀫𑀦𑀼𑀜𑁆𑀜𑀁 𑀆𑀳𑀸𑀭𑀁 𑀤𑀺𑀲𑁆𑀯𑀸 𑀅𑀥𑀺𑀯𑀸𑀲𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑁂 𑀧𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸 𑀅𑀳𑁂𑀲𑀼𑀁. 𑀢𑁂 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀯𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀪𑀸𑀢𑀺𑀓𑀸 𑀧𑀦 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑀮𑁄𑀓𑀸 𑀫𑀦𑀼𑀲𑁆𑀲𑀮𑁄𑀓𑀁, 𑀫𑀦𑀼𑀲𑁆𑀲𑀮𑁄𑀓𑀸 𑀤𑁂𑀯𑀮𑁄𑀓𑀁 𑀲𑀁𑀲𑀭𑀦𑁆𑀢𑀸 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑁂 𑀔𑁂𑀧𑁂𑀲𑀼𑀁. ‘𑀏𑀯𑀁 ¶ 𑀢𑁂 𑀢𑀬𑁄 𑀪𑀸𑀢𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀸 𑀢𑀤𑀸 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑀺𑀁𑀲𑀼. 𑀢𑁂 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀫𑁂𑀯 𑀮𑀪𑀺𑀁𑀲𑀼. 𑀦𑀸𑀳𑀁 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀫𑁆𑀫𑀻’’’𑀢𑀺.

𑀢𑀤𑀸 𑀧𑀦 ¶ 𑀢𑁂𑀲𑀁 𑀆𑀬𑀼𑀢𑁆𑀢𑀓𑁄 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸 𑀅𑀳𑁄𑀲𑀺, 𑀓𑁄𑀝𑁆𑀞𑀸𑀕𑀸𑀭𑀺𑀓𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄. 𑀢𑀬𑁄 𑀭𑀸𑀚𑀓𑀼𑀫𑀸𑀭𑀸 𑀢𑀬𑁄 𑀚𑀝𑀺𑀮𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀓𑀫𑁆𑀫𑀓𑀸𑀭𑀸 𑀢𑀤𑀸 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀲𑀁𑀲𑀭𑀦𑁆𑀢𑀸 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑀺 𑀩𑀼𑀤𑁆𑀥𑀦𑁆𑀢𑀭𑀸𑀦𑀺 𑀧𑁂𑀢𑀮𑁄𑀓𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀁 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀁 𑀓𑀓𑀼𑀲𑀦𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀆𑀳𑀸𑀭𑀁 𑀮𑀪𑀦𑀓𑀸𑀮𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀫𑀫 𑀢𑀸𑀯 𑀓𑀸𑀮𑁂 𑀦 𑀮𑀪𑀺𑀲𑁆𑀲𑀣, 𑀫𑀫 𑀧𑀘𑁆𑀙𑀢𑁄 𑀫𑀳𑀸𑀧𑀣𑀯𑀺𑀬𑀸 𑀬𑁄𑀚𑀦𑀫𑀢𑁆𑀢𑀁 𑀅𑀪𑀺𑀭𑀼𑀴𑁆𑀳𑀸𑀬 𑀓𑁄𑀡𑀸𑀕𑀫𑀦𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀧𑀼𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀢𑀢𑁆𑀢𑀓𑀁 𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄𑀧𑀺 ‘‘𑀫𑀫 𑀓𑀸𑀮𑁂 𑀦 𑀮𑀪𑀺𑀲𑁆𑀲𑀣, 𑀫𑀫 𑀧𑀘𑁆𑀙𑀢𑁄 𑀫𑀳𑀸𑀧𑀣𑀯𑀺𑀬𑀸 𑀬𑁄𑀚𑀦𑀫𑀢𑁆𑀢𑀁 𑀅𑀪𑀺𑀭𑀼𑀴𑁆𑀳𑀸𑀬 𑀓𑀲𑁆𑀲𑀧𑁄 𑀦𑀸𑀫 ¶ 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀧𑀼𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀢𑀢𑁆𑀢𑀓𑀁 𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄𑀧𑀺 ‘‘𑀫𑀫 𑀓𑀸𑀮𑁂 𑀦 𑀮𑀪𑀺𑀲𑁆𑀲𑀣, 𑀫𑀫 𑀧𑀦 𑀧𑀘𑁆𑀙𑀢𑁄 𑀫𑀳𑀸𑀧𑀣𑀯𑀺𑀬𑀸 𑀬𑁄𑀚𑀦𑀫𑀢𑁆𑀢𑀁 𑀅𑀪𑀺𑀭𑀼𑀴𑁆𑀳𑀸𑀬 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀢𑀼𑀫𑁆𑀳𑀸𑀓𑀁 𑀜𑀸𑀢𑀓𑁄 𑀩𑀺𑀫𑁆𑀩𑀺𑀲𑀸𑀭𑁄 𑀦𑀸𑀫 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀲𑀢𑁆𑀣𑀼 𑀤𑀸𑀦𑀁 𑀤𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀧𑀸𑀧𑁂𑀲𑁆𑀲𑀢𑀺, 𑀢𑀤𑀸 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳. 𑀢𑁂𑀲𑀁 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑁆𑀯𑁂𑀤𑀺𑀯𑀲𑀲𑀤𑀺𑀲𑀁 𑀅𑀳𑁄𑀲𑀺. 𑀢𑁂 𑀢𑀣𑀸𑀕𑀢𑁂 𑀉𑀧𑁆𑀧𑀦𑁆𑀦𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑀸 𑀧𑀞𑀫𑀤𑀺𑀯𑀲𑀁 𑀤𑀸𑀦𑁂 𑀤𑀺𑀦𑁆𑀦𑁂 𑀧𑀢𑁆𑀢𑀺𑀁 𑀅𑀮𑀪𑀺𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀪𑁂𑀭𑀯𑀲𑀤𑁆𑀤𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑀬𑀺𑀁𑀲𑀼. 𑀲𑁄 𑀧𑀼𑀦𑀤𑀺𑀯𑀲𑁂 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 ¶ 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.

𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚, 𑀇𑀢𑁄 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀨𑀼𑀲𑁆𑀲𑀩𑀼𑀤𑁆𑀥𑀓𑀸𑀮𑁂 𑀏𑀢𑁂 𑀢𑀯 𑀜𑀸𑀢𑀓𑀸, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀯𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀁𑀲𑀭𑀦𑁆𑀢𑀸 𑀓𑀓𑀼𑀲𑀦𑁆𑀥𑀸𑀤𑀬𑁄 𑀩𑀼𑀤𑁆𑀥𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 𑀇𑀤𑀜𑁆𑀘𑀺𑀤𑀜𑁆𑀘 𑀯𑀼𑀢𑁆𑀢𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀯 𑀤𑀸𑀦𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀳𑀺𑀬𑁆𑀬𑁄 𑀢𑀬𑀸 𑀤𑀸𑀦𑁂 𑀤𑀺𑀦𑁆𑀦𑁂 𑀧𑀢𑁆𑀢𑀺𑀁 𑀅𑀮𑀪𑀫𑀸𑀦𑀸 𑀏𑀯𑀫𑀓𑀁𑀲𑀽’’𑀢𑀺 𑀆𑀳. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀇𑀤𑀸𑀦𑀺𑀧𑀺 𑀤𑀺𑀦𑁆𑀦𑁂 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀢𑁄 𑀢𑁂𑀲𑀁 𑀧𑁂𑀢𑀸𑀦𑀁 𑀤𑀺𑀩𑁆𑀩𑀅𑀦𑁆𑀦𑀧𑀸𑀦𑀁 𑀲𑀫𑁆𑀧𑀚𑁆𑀚𑀢𑀽’’𑀢𑀺 𑀧𑀢𑁆𑀢𑀺𑀁 𑀅𑀤𑀸𑀲𑀺, 𑀢𑁂𑀲𑀁 𑀢𑀣𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀧𑀼𑀦𑀤𑀺𑀯𑀲𑁂 𑀦𑀕𑁆𑀕𑀸 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀅𑀚𑁆𑀚, 𑀪𑀦𑁆𑀢𑁂, 𑀦𑀕𑁆𑀕𑀸 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀼’’𑀦𑁆𑀢𑀺 𑀆𑀭𑁄𑀘𑁂𑀲𑀺. ‘‘𑀯𑀢𑁆𑀣𑀸𑀦𑀺 𑀢𑁂 𑀦 𑀤𑀺𑀦𑁆𑀦𑀸𑀦𑀺, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸𑀧𑀺 𑀧𑀼𑀦𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀤𑀸𑀦𑀁 𑀤𑀢𑁆𑀯𑀸, ‘‘𑀇𑀢𑁄 𑀢𑁂𑀲𑀁 𑀧𑁂𑀢𑀸𑀦𑀁 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀳𑁄𑀦𑁆𑀢𑀽’’𑀢𑀺 𑀧𑀸𑀧𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀢𑁂𑀲𑀁 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑁂 𑀧𑁂𑀢𑀢𑁆𑀢𑀪𑀸𑀯𑀁 ¶ 𑀯𑀺𑀚𑀳𑀺𑀢𑁆𑀯𑀸 𑀤𑀺𑀩𑁆𑀩𑀢𑁆𑀢𑀪𑀸𑀯𑁂 𑀲𑀡𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀔𑀼. 𑀧𑀸. 𑁭.𑁧; 𑀧𑁂. 𑀯. 𑁧𑁪) 𑀢𑀺𑀭𑁄𑀓𑀼𑀝𑁆𑀝𑀸𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀇𑀢𑀺 𑀲𑀢𑁆𑀣𑀸 𑀢𑁂𑀪𑀸𑀢𑀺𑀓𑀚𑀝𑀺𑀮𑀸𑀦𑀁 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀇𑀫𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺.

𑀅𑀕𑁆𑀕𑀲𑀸𑀯𑀓𑀸 𑀧𑀦, ‘‘𑀪𑀦𑁆𑀢𑁂, 𑀓𑀺𑀁 𑀓𑀭𑀺𑀁𑀲𑀽’’𑀢𑀺? ‘‘𑀅𑀕𑁆𑀕𑀲𑀸𑀯𑀓𑀪𑀸𑀯𑀸𑀬 𑀧𑀢𑁆𑀣𑀦𑀁 𑀓𑀭𑀺𑀁𑀲𑀼’’. 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀳𑀺 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀫𑀢𑁆𑀣𑀓𑁂 𑀲𑀸𑀭𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀲𑀭𑀤𑀫𑀸𑀡𑀯𑁄 ¶ 𑀦𑀸𑀫 𑀅𑀳𑁄𑀲𑀺. 𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 ¶ 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀓𑁄 𑀦𑀸𑀫 𑀅𑀳𑁄𑀲𑀺. 𑀢𑁂 𑀉𑀪𑁄𑀧𑀺 𑀲𑀳𑀧𑀁𑀲𑀼𑀓𑀻𑀴𑀓𑀸 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀲𑀭𑀤𑀫𑀸𑀡𑀯𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀓𑀼𑀲𑀮𑀦𑁆𑀢𑀓𑀁 𑀫𑀳𑀸𑀥𑀦𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀥𑀮𑁄𑀓𑀢𑁆𑀢𑀪𑀸𑀯𑀫𑁂𑀯 𑀚𑀸𑀦𑀸𑀫𑀺, 𑀦𑁄 𑀧𑀭𑀮𑁄𑀓𑀢𑁆𑀢𑀪𑀸𑀯𑀁. 𑀚𑀸𑀢𑀲𑀢𑁆𑀢𑀸𑀦𑀜𑁆𑀘 𑀫𑀭𑀡𑀁 𑀦𑀸𑀫 𑀥𑀼𑀯𑀁, 𑀫𑀬𑀸 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑁄𑀓𑁆𑀔𑀥𑀫𑁆𑀫𑀕𑀯𑁂𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀳𑀸𑀬𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀲𑀫𑁆𑀫 𑀲𑀺𑀭𑀺𑀯𑀟𑁆𑀠𑀦, 𑀅𑀳𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? ‘‘𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀲𑀫𑁆𑀫, 𑀢𑁆𑀯𑀁𑀬𑁂𑀯 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀲𑀳𑀸𑀬𑁂 𑀯𑀸 𑀜𑀸𑀢𑀺𑀫𑀺𑀢𑁆𑀢𑁂 𑀯𑀸 𑀕𑀳𑁂𑀢𑁆𑀯𑀸 𑀕𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑀸 𑀓𑀢𑀁 𑀅𑀢𑁆𑀢𑀦𑁄𑀯 𑀳𑁄𑀢𑀻’’𑀢𑀺. 𑀢𑀢𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀲𑁆𑀲 𑀏𑀓𑁄 𑀤𑁆𑀯𑁂 𑀢𑀬𑁄𑀢𑀺 𑀏𑀯𑀁 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀚𑀝𑀺𑀮𑀸 𑀅𑀳𑁂𑀲𑀼𑀁. 𑀲𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸, 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀢𑁂𑀧𑀺 𑀲𑀩𑁆𑀩𑁂 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀼𑀁.

𑀢𑁂𑀦 𑀲𑀫𑀬𑁂𑀦 𑀅𑀦𑁄𑀫𑀤𑀲𑁆𑀲𑀻 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀦𑀕𑀭𑀁 𑀘𑀦𑁆𑀤𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀬𑀲𑀯𑀸 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀬𑀲𑁄𑀥𑀭𑀸 𑀦𑀸𑀫 𑀤𑁂𑀯𑀻, 𑀩𑁄𑀥𑀺 𑀅𑀚𑁆𑀚𑀼𑀦𑀭𑀼𑀓𑁆𑀔𑁄, 𑀦𑀺𑀲𑀪𑁄 𑀘 𑀅𑀦𑁄𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀼𑀦𑁆𑀤𑀭𑀸 𑀘 𑀲𑀼𑀫𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸 𑀅𑀳𑁂𑀲𑀼𑀁. 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀜𑁆𑀜𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 ¶ , 𑀲𑀭𑀻𑀭𑀧𑁆𑀧𑀪𑀸 𑀤𑁆𑀯𑀸𑀤𑀲𑀬𑁄𑀚𑀦𑀁 𑀨𑀭𑀺, 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀭𑀤𑀢𑀸𑀧𑀲𑀁 𑀤𑀺𑀲𑁆𑀯𑀸, ‘‘𑀅𑀚𑁆𑀚 𑀫𑀬𑁆𑀳𑀁 𑀲𑀭𑀤𑀢𑀸𑀧𑀲𑀲𑁆𑀲𑀁 𑀲𑀦𑁆𑀢𑀺𑀓𑀁 𑀕𑀢𑀧𑀘𑁆𑀘𑀬𑁂𑀦 𑀥𑀫𑁆𑀫𑀤𑁂𑀲𑀦𑀸 𑀘 𑀫𑀳𑀢𑀻 𑀪𑀯𑀺𑀲𑁆𑀲𑀢𑀺, 𑀲𑁄 𑀘 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀲𑁆𑀲𑀢𑀺, 𑀢𑀲𑁆𑀲 𑀲𑀳𑀸𑀬𑀓𑁄 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀓𑁄 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑀁, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 ¶ 𑀘𑀲𑁆𑀲 𑀧𑀭𑀺𑀯𑀸𑀭𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀜𑁆𑀜𑀁 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀏𑀓𑀘𑀭𑁄 𑀳𑀼𑀢𑁆𑀯𑀸 𑀲𑀭𑀤𑀢𑀸𑀧𑀲𑀲𑁆𑀲 ¶ 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂𑀲𑀼 ‘‘𑀩𑀼𑀤𑁆𑀥𑀪𑀸𑀯𑀁 𑀫𑁂 𑀚𑀸𑀦𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑀭𑀤𑀢𑀸𑀧𑀲𑀲𑁆𑀲 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀭𑀤𑀢𑀸𑀧𑀲𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘𑁂𑀯 𑀲𑀭𑀻𑀭𑀦𑀺𑀧𑁆𑀨𑀢𑁆𑀢𑀺𑀜𑁆𑀘𑀲𑁆𑀲 𑀤𑀺𑀲𑁆𑀯𑀸 𑀮𑀓𑁆𑀔𑀡𑀫𑀦𑁆𑀢𑁂 𑀲𑀫𑁆𑀫𑀲𑀺𑀢𑁆𑀯𑀸 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀩𑁆𑀩𑀚𑀦𑁆𑀢𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀳𑁄𑀢𑀺. 𑀅𑀬𑀁 𑀧𑀼𑀭𑀺𑀲𑁄 𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄’’𑀢𑀺 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀕𑁆𑀕𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀅𑀕𑁆𑀕𑀸𑀲𑀦𑁂. 𑀲𑀭𑀤𑀢𑀸𑀧𑀲𑁄𑀧𑀺 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀚𑀝𑀺𑀮𑀸 𑀧𑀡𑀻𑀢𑀧𑀡𑀻𑀢𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀨𑀮𑀸𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀸 𑀩𑀼𑀤𑁆𑀥𑀸𑀦𑀜𑁆𑀘𑁂𑀯 𑀆𑀘𑀭𑀺𑀬𑀲𑁆𑀲 𑀘 𑀦𑀺𑀲𑀺𑀦𑁆𑀦𑀸𑀲𑀦𑀁 𑀑𑀮𑁄𑀓𑁂𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀆𑀘𑀭𑀺𑀬 ¶ , 𑀫𑀬𑀁 ‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀦𑀢𑁆𑀣𑀻’𑀢𑀺 𑀯𑀺𑀘𑀭𑀸𑀫, 𑀅𑀬𑀁 𑀧𑀦 𑀧𑀼𑀭𑀺𑀲𑁄 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀫𑀜𑁆𑀜𑁂’’𑀢𑀺? ‘‘𑀢𑀸𑀢𑀸, 𑀓𑀺𑀁 𑀯𑀤𑁂𑀣, 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀁 𑀲𑀫𑀁 𑀓𑀸𑀢𑀼𑀁 𑀇𑀘𑁆𑀙𑀣, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀫𑀫𑀁 𑀉𑀧𑀫𑀁 𑀫𑀸 𑀓𑀭𑀺𑀢𑁆𑀣 𑀧𑀼𑀢𑁆𑀢𑀓𑀸’’𑀢𑀺. 𑀅𑀣 𑀢𑁂 𑀢𑀸𑀧𑀲𑀸, ‘‘𑀲𑀘𑀸𑀬𑀁 𑀇𑀢𑁆𑀢𑀭𑀲𑀢𑁆𑀢𑁄 𑀅𑀪𑀯𑀺𑀲𑁆𑀲, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀦 𑀏𑀯𑀭𑀽𑀧𑀁 𑀉𑀧𑀫𑀁 𑀆𑀳𑀭𑀺𑀲𑁆𑀲, 𑀬𑀸𑀯 𑀫𑀳𑀸 𑀯𑀢𑀸𑀬𑀁 𑀧𑀼𑀭𑀺𑀲𑁄’’𑀢𑀺 𑀲𑀩𑁆𑀩𑁂𑀯 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀲𑀺𑀭𑀲𑀸 𑀯𑀦𑁆𑀤𑀺𑀁𑀲𑀼. 𑀅𑀣 𑀦𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁄 𑀤𑁂𑀬𑁆𑀬𑀥𑀫𑁆𑀫𑁄 𑀦𑀢𑁆𑀣𑀺, 𑀲𑀢𑁆𑀣𑀸 𑀘 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀇𑀥𑀸𑀕𑀢𑁄, 𑀫𑀬𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀬𑀁 𑀬𑀁 𑀧𑀡𑀻𑀢𑀁 𑀨𑀮𑀸𑀨𑀮𑀁, 𑀢𑀁 𑀢𑀁 𑀆𑀳𑀭𑀣𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀲𑀬𑀁 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸𑀭𑀸 𑀨𑀮𑀸𑀨𑀮𑁂 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀢𑀸𑀧𑀲𑁄 𑀉𑀤𑀓𑀫𑁆𑀧𑀺 𑀲𑀬𑀫𑁂𑀯 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀭𑀺 𑀲𑀩𑁆𑀩𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀸𑀭𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼.

𑀢𑀢𑁄 ¶ 𑀲𑀭𑀤𑀢𑀸𑀧𑀲𑁄 ¶ 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀩𑀼𑀤𑁆𑀥𑀸𑀦𑀁 𑀦𑀺𑀲𑀺𑀦𑁆𑀦𑀸𑀲𑀦𑀫𑁆𑀧𑀺 𑀦𑀻𑀘𑀁, 𑀲𑀫𑀡𑀲𑀢𑀲𑀳𑀲𑁆𑀲𑀸𑀦𑀫𑁆𑀧𑀺 𑀆𑀲𑀦𑀁 𑀦𑀢𑁆𑀣𑀺, 𑀅𑀚𑁆𑀚 𑀢𑀼𑀫𑁆𑀳𑁂𑀳𑀺 𑀉𑀴𑀸𑀭𑀁 𑀩𑀼𑀤𑁆𑀥𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀧𑀩𑁆𑀩𑀢𑀧𑀸𑀤𑀢𑁄 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀣𑀸’’𑀢𑀺. 𑀓𑀣𑀦𑀓𑀸𑀮𑁄 𑀧𑀧𑀜𑁆𑀘𑁄 𑀯𑀺𑀬 𑀳𑁄𑀢𑀺, 𑀇𑀤𑁆𑀥𑀺𑀫𑀢𑁄 ¶ 𑀧𑀦 𑀇𑀤𑁆𑀥𑀺𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀢𑀺 𑀫𑀼𑀳𑀼𑀢𑁆𑀢𑀫𑀢𑁆𑀢𑁂𑀦𑁂𑀯 𑀢𑁂 𑀢𑀸𑀧𑀲𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀉𑀪𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀢𑀺𑀕𑀸𑀯𑀼𑀢𑀁, 𑀲𑁂𑀲𑀪𑀺𑀓𑁆𑀔𑀽𑀦𑀁 𑀅𑀟𑁆𑀠𑀬𑁄𑀚𑀦𑀺𑀓𑀸𑀤𑀺𑀪𑁂𑀤𑀁, 𑀲𑀗𑁆𑀖𑀦𑀯𑀓𑀲𑁆𑀲 𑀉𑀲𑀪𑀫𑀢𑁆𑀢𑀁 𑀅𑀳𑁄𑀲𑀺. ‘‘𑀓𑀣𑀁 𑀏𑀓𑀲𑁆𑀫𑀺𑀁 𑀅𑀲𑁆𑀲𑀫𑀧𑀤𑁂 𑀢𑀸𑀯 𑀫𑀳𑀦𑁆𑀢𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀻’’𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀇𑀤𑁆𑀥𑀺𑀯𑀺𑀲𑀬𑁄 𑀳𑁂𑀲. 𑀏𑀯𑀁 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀲𑀭𑀤𑀢𑀸𑀧𑀲𑁄 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀇𑀫𑀁 𑀧𑀼𑀧𑁆𑀨𑀸𑀲𑀦𑀁 𑀅𑀪𑀺𑀭𑀼𑀳𑀣𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦𑀸𑀦𑀸𑀧𑀼𑀧𑁆𑀨𑀜𑁆𑀘 𑀕𑀦𑁆𑀥𑀜𑁆𑀘, 𑀲𑀫𑁆𑀧𑀸𑀤𑁂𑀢𑁆𑀯𑀸𑀦 𑀏𑀓𑀢𑁄;

𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀇𑀤𑀁 𑀫𑁂 𑀆𑀲𑀦𑀁 𑀯𑀻𑀭, 𑀧𑀜𑁆𑀜𑀢𑁆𑀢𑀁 𑀢𑀯𑀦𑀼𑀘𑁆𑀙𑀯𑀺𑀁;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀦𑀺𑀲𑀻𑀤 𑀧𑀼𑀧𑁆𑀨𑀫𑀸𑀲𑀦𑁂.

‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑀼𑀤𑁆𑀥𑁄, 𑀦𑀺𑀲𑀻𑀤𑀺 𑀧𑀼𑀧𑁆𑀨𑀫𑀸𑀲𑀦𑁂;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀳𑀸𑀲𑀬𑀺𑀢𑁆𑀯𑀸 𑀲𑀤𑁂𑀯𑀓𑁂’’𑀢𑀺.

𑀏𑀯𑀁 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀭𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑁂𑀲𑀪𑀺𑀓𑁆𑀔𑀽 𑀘 ¶ 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀭𑀤𑀢𑀸𑀧𑀲𑁄 𑀫𑀳𑀦𑁆𑀢𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀢𑁆𑀣𑀓𑁂 𑀥𑀸𑀭𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 ‘‘𑀚𑀝𑀺𑀮𑀸𑀦𑀁 𑀅𑀬𑀁 𑀲𑀓𑁆𑀓𑀸𑀭𑁄 𑀫𑀳𑀧𑁆𑀨𑀮𑁄 𑀳𑁄𑀢𑀽’’𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀧𑀺 𑀲𑁂𑀲𑀪𑀺𑀓𑁆𑀔𑀽𑀧𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁𑀲𑀼. 𑀢𑀣𑀸𑀕𑀢𑁂 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀦𑀫𑀽𑀮𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀓𑀸𑀮𑁂 𑀩𑀼𑀤𑁆𑀥𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀺. 𑀲𑀭𑀤𑀢𑀸𑀧𑀲𑁄 𑀧𑀦 𑀪𑀺𑀓𑁆𑀔𑀸𑀘𑀸𑀭𑀫𑁆𑀧𑀺 𑀅𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄𑀯 𑀲𑀢𑁆𑀢𑀸𑀳𑀁 𑀧𑀻𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀬 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀁 𑀧𑀞𑀫𑀅𑀕𑁆𑀕𑀲𑀸𑀯𑀓𑀁 𑀦𑀺𑀲𑀪𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀦𑀺𑀲𑀪, 𑀲𑀓𑁆𑀓𑀸𑀭𑀓𑀸𑀭𑀓𑀸𑀦𑀁 ¶ 𑀢𑀸𑀧𑀲𑀸𑀦𑀁 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀣𑁂𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀧𑀝𑀺𑀮𑀤𑁆𑀥𑀫𑀳𑀸𑀮𑀸𑀪𑁄 𑀫𑀳𑀸𑀬𑁄𑀥𑁄 𑀯𑀺𑀬 𑀢𑀼𑀝𑁆𑀞𑀫𑀸𑀦𑀲𑁄 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀞𑀢𑁆𑀯𑀸 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀆𑀭𑀪𑀺. 𑀢𑀲𑁆𑀲 𑀤𑁂𑀲𑀦𑀸𑀯𑀲𑀸𑀦𑁂 𑀤𑀼𑀢𑀺𑀬𑀲𑀸𑀯𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀫𑁆𑀧𑀺 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀤𑁂𑀲𑁂𑀳𑀻’’𑀢𑀺. 𑀅𑀦𑁄𑀫𑀢𑁆𑀣𑁂𑀭𑁄 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀤𑁂𑀲𑀦𑀸𑀬 𑀏𑀓𑀲𑁆𑀲𑀸𑀧𑀺 𑀅𑀪𑀺𑀲𑀫𑀬𑁄 𑀦𑀸𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀅𑀧𑀭𑀺𑀫𑀸𑀡𑁂 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑁆𑀯𑀸 𑀲𑀭𑀤𑀢𑀸𑀧𑀲𑀁 𑀲𑀩𑁆𑀩𑁂𑀧𑀺 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼 ¶ , 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂𑀲𑀁 𑀢𑀸𑀯𑀤𑁂𑀯 𑀓𑁂𑀲𑀫𑀲𑁆𑀲𑀽𑀦𑀺 𑀅𑀦𑁆𑀢𑀭𑀥𑀸𑀬𑀺𑀁𑀲𑀼, 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀸 𑀓𑀸𑀬𑁂 𑀧𑀝𑀺𑀫𑀼𑀓𑁆𑀓𑀸𑀯 𑀅𑀳𑁂𑀲𑀼𑀁.

𑀲𑀭𑀤𑀢𑀸𑀧𑀲𑁄 ‘‘𑀓𑀲𑁆𑀫𑀸 𑀅𑀭𑀳𑀢𑁆𑀢𑀁 𑀦 𑀧𑀢𑁆𑀢𑁄’’𑀢𑀺? 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑁆𑀢𑀸. 𑀲𑁄 𑀓𑀺𑀭 𑀩𑀼𑀤𑁆𑀥𑀸𑀦𑀁 𑀤𑀼𑀢𑀺𑀬𑀸𑀲𑀦𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀢𑁄 𑀅𑀕𑁆𑀕𑀲𑀸𑀯𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑁄𑀢𑀼𑀁 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬, ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀇𑀫𑀺𑀦𑀸 𑀲𑀸𑀯𑀓𑁂𑀦 𑀧𑀝𑀺𑀮𑀤𑁆𑀥𑀥𑀼𑀭𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀲𑁄 𑀢𑁂𑀦 𑀧𑀭𑀺𑀯𑀺𑀢𑀓𑁆𑀓𑁂𑀦 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀣𑀸𑀕𑀢𑀁 𑀧𑀦 𑀯𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀦𑀦𑁆𑀢𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀓𑁄 𑀦𑀸𑀫 𑀳𑁄𑀢𑀻’’𑀢𑀺? ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀧𑀯𑀢𑁆𑀢𑁂𑀦𑁆𑀢𑁄 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀓𑁄𑀝𑀺𑀧𑁆𑀧𑀢𑁆𑀢𑁄 𑀲𑁄𑀴𑀲 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄 𑀫𑀬𑁆𑀳𑀁 𑀲𑀸𑀲𑀦𑁂 𑀅𑀕𑁆𑀕𑀲𑀸𑀯𑀓𑁄 𑀦𑀺𑀲𑀪𑁄 𑀦𑀸𑀫 𑀏𑀲𑁄’’𑀢𑀺. ‘‘𑀪𑀦𑁆𑀢𑁂, 𑀬𑁆𑀯𑀸𑀬𑀁 𑀫𑀬𑀸 𑀲𑀢𑁆𑀢𑀸𑀳𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁂𑀦 𑀲𑀓𑁆𑀓𑀸𑀭𑁄 𑀓𑀢𑁄, 𑀅𑀳𑀁 𑀇𑀫𑀲𑁆𑀲 𑀨𑀮𑁂𑀦 𑀅𑀜𑁆𑀜𑀁 𑀲𑀓𑁆𑀓𑀢𑁆𑀢𑀁 𑀯𑀸 𑀩𑁆𑀭𑀳𑁆𑀫𑀢𑁆𑀢𑀁 𑀯𑀸 𑀦 𑀧𑀢𑁆𑀣𑁂𑀫𑀺, 𑀅𑀦𑀸𑀕𑀢𑁂 𑀧𑀦 𑀅𑀬𑀁 𑀦𑀺𑀲𑀪𑀢𑁆𑀣𑁂𑀭𑁄 𑀯𑀺𑀬 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺𑀦𑁆𑀢𑀺. 𑀲𑀢𑁆𑀣𑀸 ‘‘𑀲𑀫𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀢𑁆𑀣𑀦𑀸’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀺𑀚𑁆𑀛𑀦𑀪𑀸𑀯𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸𑀦 𑀲𑀭𑀤𑀢𑀸𑀧𑀲𑀁 𑀆𑀳 𑁋 ‘‘𑀦 𑀢𑁂 𑀅𑀬𑀁 𑀧𑀢𑁆𑀣𑀦𑀸 𑀫𑁄𑀖𑀸 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀧𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀫𑀸𑀢𑀸 𑀫𑀳𑀸𑀫𑀸𑀬𑀸 ¶ 𑀦𑀸𑀫 𑀤𑁂𑀯𑀻 𑀪𑀯𑀺𑀲𑁆𑀲𑀢𑀺, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀫𑀳𑀸𑀭𑀸𑀚𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄 𑀦𑀸𑀫, 𑀉𑀧𑀝𑁆𑀞𑀸𑀓𑁄 𑀆𑀦𑀦𑁆𑀤𑁄 𑀦𑀸𑀫, 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀸𑀫, 𑀢𑁆𑀯𑀁 𑀧𑀦𑀲𑁆𑀲 𑀧𑀞𑀫𑀅𑀕𑁆𑀕𑀲𑀸𑀯𑀓𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 ¶ . 𑀏𑀯𑀁 𑀢𑀸𑀧𑀲𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺.

𑀲𑀭𑀤𑀢𑀸𑀧𑀲𑁄𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀢𑁆𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀳𑀸𑀬𑀓𑀲𑁆𑀲 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺, ‘‘𑀪𑀦𑁆𑀢𑁂, 𑀫𑀫 𑀲𑀳𑀸𑀬𑀓𑀲𑁆𑀲 𑀯𑀤𑁂𑀣, 𑀲𑀳𑀸𑀬𑀓𑁂𑀦 𑀢𑁂 𑀲𑀭𑀤𑀢𑀸𑀧𑀲𑁂𑀦 𑀅𑀦𑁄𑀫𑀤𑀲𑁆𑀲𑀻𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀞𑀫𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀢𑁆𑀯𑀁 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀳𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀣𑁂𑀭𑁂𑀳𑀺 𑀧𑀼𑀭𑁂𑀢𑀭𑀫𑁂𑀯 𑀏𑀓𑀧𑀲𑁆𑀲𑁂𑀦 𑀕𑀦𑁆𑀢𑁆𑀯𑀸 𑀲𑀺𑀭𑀺𑀯𑀟𑁆𑀠𑀦𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑀺𑀭𑀺𑀯𑀟𑁆𑀠𑀦𑁄 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀅𑀬𑁆𑀬𑁄 𑀆𑀕𑀢𑁄’’𑀢𑀺 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀦𑀻𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑁄, ‘‘𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀲𑀸 𑀧𑀦 𑀯𑁄, 𑀪𑀦𑁆𑀢𑁂, 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀅𑀲𑁆𑀲𑀫𑀁 𑀅𑀦𑁄𑀫𑀤𑀲𑁆𑀲𑀻 𑀩𑀼𑀤𑁆𑀥𑁄 𑀆𑀕𑀢𑁄, 𑀫𑀬𑀁 𑀢𑀲𑁆𑀲 𑀅𑀢𑁆𑀢𑀦𑁄 𑀩𑀮𑁂𑀦 𑀲𑀓𑁆𑀓𑀸𑀭𑀁 𑀅𑀓𑀭𑀺𑀫𑁆𑀳𑀸, 𑀲𑀢𑁆𑀣𑀸 𑀲𑀩𑁆𑀩𑁂𑀲𑀁 ¶ 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑁆𑀯𑀸 𑀫𑀁 𑀲𑁂𑀲𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀅𑀳𑀁 𑀲𑀢𑁆𑀣𑀼 𑀧𑀞𑀫𑀅𑀕𑁆𑀕𑀲𑀸𑀯𑀓𑀁 𑀦𑀺𑀲𑀪𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀦𑀸𑀫 𑀲𑀸𑀲𑀦𑁂 𑀧𑀞𑀫𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀲𑀺𑀁, 𑀢𑁆𑀯𑀫𑁆𑀧𑀺 𑀢𑀲𑁆𑀲 𑀲𑀸𑀲𑀦𑁂 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀳𑀻’’𑀢𑀺. ‘‘𑀫𑀬𑁆𑀳𑀁 𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀘𑀬𑁄 𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀓𑀣𑀦𑀁 𑀫𑀬𑁆𑀳𑀁 𑀪𑀸𑀭𑁄 𑀳𑁄𑀢𑀼, 𑀢𑁆𑀯𑀁 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀲𑀚𑁆𑀚𑁂𑀳𑀻’’𑀢𑀺.

𑀲𑀺𑀭𑀺𑀯𑀟𑁆𑀠𑀦𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀭𑀸𑀚𑀫𑀸𑀦𑁂𑀦 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 ¶ 𑀮𑀸𑀚𑀧𑀜𑁆𑀘𑀫𑀸𑀦𑀺𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀸𑀧𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀘𑁆𑀙𑀤𑀦𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑁂𑀲𑀪𑀺𑀓𑁆𑀔𑀽𑀦𑀫𑁆𑀧𑀺 𑀆𑀲𑀦𑀸𑀦𑀺 𑀧𑀝𑀺𑀬𑀸𑀤𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀲𑀭𑀤𑀢𑀸𑀧𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑀸𑀧𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀲𑀺𑀭𑀺𑀯𑀟𑁆𑀠𑀦𑁄𑀧𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀡𑁆𑀟𑀧𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 ¶ 𑀤𑀢𑁆𑀯𑀸 𑀧𑀡𑀻𑀢𑁂𑀦 𑀪𑁄𑀚𑀦𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀫𑀳𑀸𑀭𑀳𑁂𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀸𑀬𑀁 𑀆𑀭𑀩𑁆𑀪𑁄 𑀅𑀧𑁆𑀧𑀫𑀢𑁆𑀢𑀓𑀝𑁆𑀞𑀸𑀦𑀢𑁆𑀣𑀸𑀬, 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢𑀸𑀳𑀁 𑀅𑀦𑀼𑀓𑀫𑁆𑀧𑀁 𑀓𑀭𑁄𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄 𑀆𑀳 𑁋 ‘‘𑀪𑀦𑁆𑀢𑁂, 𑀫𑀫 𑀲𑀳𑀸𑀬𑁄 𑀲𑀭𑀤𑀢𑀸𑀧𑀲𑁄 𑀬𑀲𑁆𑀲 𑀲𑀢𑁆𑀣𑀼𑀲𑁆𑀲 𑀧𑀞𑀫𑀅𑀕𑁆𑀕𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑁂𑀲𑀺, 𑀅𑀳𑀫𑁆𑀧𑀺 ‘‘𑀢𑀲𑁆𑀲𑁂𑀯 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑁂𑀫𑀻𑀢𑀺.

𑀲𑀢𑁆𑀣𑀸 𑀅𑀦𑀸𑀕𑀢𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀸𑀲𑀺 𑁋 ‘‘𑀢𑁆𑀯𑀁 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑁄 𑀪𑀯𑀺𑀲𑁆𑀲𑀲𑀻’’𑀢𑀺. 𑀩𑀼𑀤𑁆𑀥𑀸𑀦𑀁 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀲𑀺𑀭𑀺𑀯𑀟𑁆𑀠𑀦𑁄 𑀳𑀝𑁆𑀞𑀧𑀳𑀝𑁆𑀞𑁄 𑀅𑀳𑁄𑀲𑀺. 𑀲𑀢𑁆𑀣𑀸𑀧𑀺 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀯𑀺𑀳𑀸𑀭𑀫𑁂𑀯 𑀕𑀢𑁄. ‘‘𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁂𑀳𑀺 𑀢𑀤𑀸 𑀧𑀢𑁆𑀣𑀺𑀢𑀧𑀢𑁆𑀣𑀦𑀸. 𑀢𑁂 𑀬𑀣𑀸𑀧𑀢𑁆𑀣𑀺𑀢𑀫𑁂𑀯 𑀮𑀪𑀺𑀁𑀲𑀼. 𑀦𑀸𑀳𑀁 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑁂𑀫𑀻’’𑀢𑀺.

𑀏𑀯𑀁 ¶ 𑀯𑀼𑀢𑁆𑀢𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀁 𑀅𑀕𑀸𑀭𑀺𑀬𑀪𑀽𑀢𑀸 𑀲𑀫𑀸𑀦𑀸 𑀕𑀺𑀭𑀕𑁆𑀕𑀲𑀫𑀚𑁆𑀚𑀁 𑀤𑀲𑁆𑀲𑀦𑀸𑀬 𑀕𑀢𑀸’’𑀢𑀺 𑀬𑀸𑀯 𑀅𑀲𑁆𑀲𑀚𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑀝𑀺𑀯𑁂𑀥𑀸 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸, ‘‘𑀢𑁂 𑀫𑀬𑀁, 𑀪𑀦𑁆𑀢𑁂, 𑀆𑀘𑀭𑀺𑀬𑀲𑁆𑀲 𑀲𑀜𑁆𑀘𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀢𑀼𑀫𑁆𑀳𑀸𑀓𑀁 𑀧𑀸𑀤𑀫𑀽𑀮𑁂 𑀆𑀦𑁂𑀢𑀼𑀓𑀸𑀫𑀸 𑀢𑀲𑁆𑀲 𑀮𑀤𑁆𑀥𑀺𑀬𑀸 𑀦𑀺𑀲𑁆𑀲𑀸𑀭𑀪𑀸𑀯𑀁 𑀓𑀣𑁂𑀢𑁆𑀯𑀸 𑀇𑀥𑀸𑀕𑀫𑀦𑁂 𑀆𑀦𑀺𑀲𑀁𑀲𑀁 𑀓𑀣𑀬𑀺𑀫𑁆𑀳𑀸. 𑀲𑁄 𑀇𑀤𑀸𑀦𑀺 𑀫𑀬𑁆𑀳𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑀸𑀲𑁄 𑀦𑀸𑀫 𑀘𑀸𑀝𑀺𑀬𑀸 𑀉𑀤𑀜𑁆𑀘𑀦𑀪𑀸𑀯𑀧𑁆𑀧𑀢𑁆𑀢𑀺𑀲𑀤𑀺𑀲𑁄, 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 ¶ 𑀅𑀦𑁆𑀢𑁂𑀯𑀸𑀲𑀺𑀯𑀸𑀲𑀁 𑀯𑀲𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸, ‘‘𑀆𑀘𑀭𑀺𑀬, 𑀇𑀤𑀸𑀦𑀺 𑀫𑀳𑀸𑀚𑀦𑁄 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁄 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀫𑁂𑀯 𑀧𑀽𑀚𑁂𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀓𑀣𑀁 𑀪𑀯𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀧𑀦 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸 𑀩𑀳𑀽, 𑀉𑀤𑀸𑀳𑀼 𑀤𑀦𑁆𑀥𑀸’’𑀢𑀺? ‘‘𑀤𑀦𑁆𑀥𑀸’’𑀢𑀺 𑀓𑀣𑀺𑀢𑁂 ‘‘𑀢𑁂𑀦 𑀳𑀺 𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀤𑀦𑁆𑀥𑀸 𑀤𑀦𑁆𑀥𑀲𑁆𑀲 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀯𑀢𑁆𑀯𑀸 ‘‘𑀆𑀕𑀦𑁆𑀢𑀼𑀁 𑀦 𑀇𑀘𑁆𑀙𑀺, 𑀪𑀦𑁆𑀢𑁂’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀲𑀜𑁆𑀘𑀬𑁄 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀸𑀬 𑀅𑀲𑀸𑀭𑀁 𑀲𑀸𑀭𑁄𑀢𑀺, 𑀲𑀸𑀭𑀜𑁆𑀘 𑀅𑀲𑀸𑀭𑁄𑀢𑀺 𑀕𑀡𑁆𑀳𑀺. 𑀢𑀼𑀫𑁆𑀳𑁂 𑀧𑀦 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀢𑀸𑀬 𑀲𑀸𑀭𑀜𑁆𑀘 𑀲𑀸𑀭𑀢𑁄, 𑀅𑀲𑀸𑀭𑀜𑁆𑀘 𑀅𑀲𑀸𑀭𑀢𑁄 𑀜𑀢𑁆𑀯𑀸 𑀅𑀲𑀸𑀭𑀁 𑀧𑀳𑀸𑀬 𑀲𑀸𑀭𑀫𑁂𑀯 𑀕𑀡𑁆𑀳𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧.

‘‘𑀅𑀲𑀸𑀭𑁂 ¶ 𑀲𑀸𑀭𑀫𑀢𑀺𑀦𑁄, 𑀲𑀸𑀭𑁂 𑀘𑀸𑀲𑀸𑀭𑀤𑀲𑁆𑀲𑀺𑀦𑁄;

𑀢𑁂 𑀲𑀸𑀭𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀸.

𑁧𑁨.

‘‘𑀲𑀸𑀭𑀜𑁆𑀘 ¶ 𑀲𑀸𑀭𑀢𑁄 𑀜𑀢𑁆𑀯𑀸, 𑀅𑀲𑀸𑀭𑀜𑁆𑀘 𑀅𑀲𑀸𑀭𑀢𑁄;

𑀢𑁂 𑀲𑀸𑀭𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀸’’𑀢𑀺.

𑀢𑀢𑁆𑀣 𑀅𑀲𑀸𑀭𑁂 𑀲𑀸𑀭𑀫𑀢𑀺𑀦𑁄𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀥𑀫𑁆𑀫𑀤𑁂𑀲𑀦𑀸𑀢𑀺 𑀅𑀬𑀁 𑀅𑀲𑀸𑀭𑁄 𑀦𑀸𑀫, 𑀢𑀲𑁆𑀫𑀺𑀁 𑀲𑀸𑀭𑀤𑀺𑀝𑁆𑀞𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀸𑀭𑁂 𑀘𑀸𑀲𑀸𑀭𑀤𑀲𑁆𑀲𑀺𑀦𑁄𑀢𑀺 𑀤𑀲𑀯𑀢𑁆𑀣𑀼𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀥𑀫𑁆𑀫𑀤𑁂𑀲𑀦𑀸𑀢𑀺 𑀅𑀬𑀁 𑀲𑀸𑀭𑁄 𑀦𑀸𑀫, 𑀢𑀲𑁆𑀫𑀺𑀁 ‘‘𑀦𑀸𑀬𑀁 𑀲𑀸𑀭𑁄’’𑀢𑀺 𑀅𑀲𑀸𑀭𑀤𑀲𑁆𑀲𑀺𑀦𑁄. 𑀢𑁂 𑀲𑀸𑀭𑀦𑁆𑀢𑀺 𑀢𑁂 𑀧𑀦 𑀢𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀸 𑀳𑀼𑀢𑁆𑀯𑀸 𑀲𑀻𑀮𑀲𑀸𑀭𑀁, 𑀲𑀫𑀸𑀥𑀺𑀲𑀸𑀭𑀁, 𑀧𑀜𑁆𑀜𑀸𑀲𑀸𑀭𑀁, 𑀯𑀺𑀫𑀼𑀢𑁆𑀢𑀺𑀲𑀸𑀭𑀁, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀸𑀭𑀁, ‘‘𑀧𑀭𑀫𑀢𑁆𑀣𑀲𑀸𑀭𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑀸𑀥𑀺𑀕𑀘𑁆𑀙’’𑀦𑁆𑀢𑀺. 𑀲𑀸𑀭𑀜𑁆𑀘𑀸𑀢𑀺 𑀢𑀫𑁂𑀯 𑀲𑀻𑀮𑀲𑀸𑀭𑀸𑀤𑀺𑀲𑀸𑀭𑀁 ‘‘𑀲𑀸𑀭𑁄 𑀦𑀸𑀫𑀸𑀬’’𑀦𑁆𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀜𑁆𑀘 𑀅𑀲𑀸𑀭𑀁 ‘‘𑀅𑀲𑀸𑀭𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸. 𑀢𑁂 𑀲𑀸𑀭𑀦𑁆𑀢𑀺 𑀢𑁂 𑀧𑀡𑁆𑀟𑀺𑀢𑀸 𑀏𑀯𑀁 𑀲𑀫𑁆𑀫𑀸𑀤𑀲𑁆𑀲𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀸 𑀳𑀼𑀢𑁆𑀯𑀸 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀸𑀭𑀁 𑀅𑀥𑀺𑀕𑀘𑁆𑀙𑀦𑁆𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑀬𑀣𑀸 ¶ ¶ 𑀅𑀕𑀸𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸 𑀳𑀺 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑁋 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀣𑀸’’𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀸𑀦𑀁 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀸𑀦𑀁 𑀤𑀲𑀦𑁆𑀦𑀁 𑀤𑀽𑀢𑀸𑀦𑀁 𑀲𑀩𑁆𑀩𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂𑀦 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁂𑀦 𑀕𑀫𑀦𑀓𑀸𑀮𑀁 𑀜𑀢𑁆𑀯𑀸 𑀫𑀕𑁆𑀕𑀯𑀡𑁆𑀡𑀁 𑀯𑀡𑁆𑀡𑁂𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 ¶ 𑀓𑀧𑀺𑀮𑀧𑀼𑀭𑀁 𑀦𑀻𑀢𑁄 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄, ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀕𑀸𑀣𑀸𑀬 𑀧𑀺𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, ‘‘𑀥𑀫𑁆𑀫𑀜𑁆𑀘𑀭𑁂’’𑀢𑀺 (𑀥. 𑀧. 𑁧𑁬𑁯) 𑀕𑀸𑀣𑀸𑀬 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀭𑀸𑀚𑀸𑀦𑀜𑁆𑀘 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀧𑀦 𑀭𑀸𑀳𑀼𑀮𑀫𑀸𑀢𑀼𑀕𑀼𑀡𑀓𑀣𑀁 𑀦𑀺𑀲𑁆𑀲𑀸𑀬 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀢𑀢𑁄 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀕𑁂𑀳𑀧𑁆𑀧𑀯𑁂𑀲𑀦𑀯𑀺𑀯𑀸𑀳𑀫𑀗𑁆𑀕𑀮𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀦𑁆𑀢𑁄 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀦 𑀕𑀡𑁆𑀳𑀺. 𑀲𑁄𑀧𑀺 𑀢𑀣𑀸𑀕𑀢𑀕𑀸𑀭𑀯𑁂𑀦 ‘‘𑀧𑀢𑁆𑀢𑀁 𑀯𑁄, 𑀪𑀦𑁆𑀢𑁂, 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁄𑀧𑀸𑀦𑀲𑀻𑀲𑁂 𑀧𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑀸𑀧𑀺 𑀦 ¶ 𑀕𑀡𑁆𑀳𑀺. 𑀇𑀢𑀭𑁄 ‘‘𑀭𑀸𑀚𑀗𑁆𑀕𑀡𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑀸𑀧𑀺 𑀦 𑀕𑀡𑁆𑀳𑀺. 𑀓𑀼𑀫𑀸𑀭𑁄 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀭𑀼𑀘𑀺𑀬𑀸 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀼𑀕𑀸𑀭𑀯𑁂𑀦 ‘‘𑀧𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀇𑀥 𑀕𑀡𑁆𑀳𑀺𑀲𑁆𑀲𑀢𑀺, 𑀏𑀢𑁆𑀣 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀕𑀘𑁆𑀙𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀢𑀁 𑀤𑀺𑀲𑁆𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀆𑀘𑀺𑀓𑁆𑀔𑀺𑀁𑀲𑀼 𑁋 ‘‘𑀅𑀬𑁆𑀬𑁂, 𑀪𑀕𑀯𑀸 𑀦𑀦𑁆𑀤𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀢𑀼𑀫𑁆𑀳𑁂𑀳𑀺 𑀢𑀁 𑀯𑀺𑀦𑀸 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑀸 𑀉𑀤𑀓𑀩𑀺𑀦𑁆𑀤𑀽𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑁂𑀯 𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸, ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀢𑀁 𑀢𑀲𑁆𑀲𑀸 𑀯𑀘𑀦𑀁 𑀢𑀲𑁆𑀲 𑀳𑀤𑀬𑁂 𑀢𑀺𑀭𑀺𑀬𑀁 𑀧𑀢𑀺𑀢𑁆𑀯𑀸 𑀯𑀺𑀬 𑀞𑀺𑀢𑀁. 𑀲𑀢𑁆𑀣𑀸𑀧𑀺𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀅𑀕𑁆𑀕𑀡𑁆𑀳𑀺𑀢𑁆𑀯𑀸𑀯 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸, ‘‘𑀧𑀩𑁆𑀩𑀚𑀺𑀲𑁆𑀲𑀲𑀺 𑀦𑀦𑁆𑀤𑀸’’𑀢𑀺𑀆𑀳. 𑀲𑁄 𑀩𑀼𑀤𑁆𑀥𑀕𑀸𑀭𑀯𑁂𑀦 ‘‘𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸, ‘‘𑀆𑀫, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀺.

𑀲𑀢𑁆𑀢𑀫𑁂 ¶ 𑀤𑀺𑀯𑀲𑁂 𑀭𑀸𑀳𑀼𑀮𑀫𑀸𑀢𑀸 𑀓𑀼𑀫𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀧𑀲𑁆𑀲, 𑀢𑀸𑀢, 𑀏𑀢𑀁 𑀯𑀻𑀲𑀢𑀺𑀲𑀳𑀲𑁆𑀲𑀲𑀫𑀡𑀧𑀭𑀺𑀯𑀼𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀩𑁆𑀭𑀳𑁆𑀫𑀭𑀽𑀧𑀺𑀯𑀡𑁆𑀡𑀁 𑀲𑀫𑀡𑀁, 𑀅𑀬𑀁 𑀢𑁂 𑀧𑀺𑀢𑀸, 𑀏𑀢𑀲𑁆𑀲 𑀫𑀳𑀦𑁆𑀢𑀸 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀅𑀳𑁂𑀲𑀼𑀁. 𑀢𑁆𑀬𑀸𑀲𑁆𑀲 𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀦 𑀧𑀲𑁆𑀲𑀸𑀫, 𑀕𑀘𑁆𑀙 𑀦𑀁 𑀤𑀸𑀬𑀚𑁆𑀚𑀁 𑀬𑀸𑀘𑀲𑁆𑀲𑀼 𑁋 ‘𑀅𑀳𑀁 ¶ , 𑀢𑀸𑀢, 𑀓𑀼𑀫𑀸𑀭𑁄, 𑀅𑀪𑀺𑀲𑁂𑀓𑀁 𑀧𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀸𑀫𑀺, 𑀥𑀦𑁂𑀦 𑀫𑁂 𑀅𑀢𑁆𑀣𑁄, 𑀥𑀦𑀁 𑀫𑁂 𑀤𑁂𑀳𑀺. 𑀲𑀸𑀫𑀺𑀓𑁄 𑀳𑀺 𑀧𑀼𑀢𑁆𑀢𑁄 𑀧𑀺𑀢𑀼𑀲𑀦𑁆𑀢𑀓𑀲𑁆𑀲𑀸’’’𑀢𑀺. 𑀓𑀼𑀫𑀸𑀭𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸𑀯 𑀧𑀺𑀢𑀼𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀝𑁆𑀞𑀘𑀺𑀢𑁆𑀢𑁄 ‘‘𑀲𑀼𑀔𑀸 𑀢𑁂, 𑀲𑀫𑀡, 𑀙𑀸𑀬𑀸’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 ¶ 𑀩𑀳𑀼𑀁 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀯𑀤𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀓𑀼𑀫𑀸𑀭𑁄𑀧𑀺 ‘‘𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀺, 𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀻’’𑀢𑀺 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺. 𑀪𑀕𑀯𑀸𑀧𑀺 𑀓𑀼𑀫𑀸𑀭𑀁 𑀦 𑀦𑀺𑀯𑀢𑁆𑀢𑀸𑀧𑁂𑀲𑀺. 𑀧𑀭𑀺𑀚𑀦𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀺 𑀲𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀆𑀭𑀸𑀫𑀫𑁂𑀯 𑀅𑀕𑀫𑀸𑀲𑀺.

𑀢𑀢𑁄 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁 𑀅𑀬𑀁 𑀧𑀺𑀢𑀼𑀲𑀦𑁆𑀢𑀓𑀁 𑀥𑀦𑀁 𑀇𑀘𑁆𑀙𑀢𑀺, 𑀢𑀁 𑀯𑀝𑁆𑀝𑀸𑀦𑀼𑀕𑀢𑀁 𑀲𑀯𑀺𑀖𑀸𑀢𑀁, 𑀳𑀦𑁆𑀤𑀲𑁆𑀲 𑀩𑁄𑀥𑀺𑀢𑀮𑁂 𑀧𑀝𑀺𑀮𑀤𑁆𑀥𑀁 𑀲𑀢𑁆𑀢𑀯𑀺𑀥𑀁 𑀅𑀭𑀺𑀬𑀥𑀦𑀁 𑀤𑁂𑀫𑀺, 𑀮𑁄𑀓𑀼𑀢𑁆𑀢𑀭𑀤𑀸𑀬𑀚𑁆𑀚𑀲𑁆𑀲 𑀦𑀁 𑀲𑀸𑀫𑀺𑀓𑀁 𑀓𑀭𑁄𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀣𑁂𑀭𑁄 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀧𑀩𑁆𑀩𑀚𑀺𑀢𑁂 𑀘 𑀧𑀦 𑀓𑀼𑀫𑀸𑀭𑁂 𑀭𑀜𑁆𑀜𑁄 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀺. 𑀢𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀢𑁆𑀯𑀸, ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸, 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀭𑀁 𑀬𑀸𑀘𑀺. 𑀪𑀕𑀯𑀸 𑀢𑀲𑁆𑀲 𑀢𑀁 𑀯𑀭𑀁 𑀤𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀭𑀸𑀚𑀦𑀺𑀯𑁂𑀲𑀦𑁂 𑀓𑀢𑀧𑀸𑀢𑀭𑀸𑀲𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂𑀦 𑀭𑀜𑁆𑀜𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀓𑀸𑀮𑁂 𑀏𑀓𑀸 𑀤𑁂𑀯𑀢𑀸 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘𑀧𑀼𑀢𑁆𑀢𑁄 𑀢𑁂 𑀓𑀸𑀮𑀓𑀢𑁄’𑀢𑀺 𑀆𑀳. 𑀅𑀳𑀁 𑀢𑀲𑁆𑀲𑀸 𑀯𑀘𑀦𑀁 𑀅𑀲𑀤𑁆𑀤𑀳𑀦𑁆𑀢𑁄 ‘𑀦 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀻’𑀢𑀺 𑀧𑀝𑀺𑀓𑁆𑀔𑀺𑀧𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀇𑀤𑀸𑀦𑀺 𑀓𑀺𑀁 𑀲𑀤𑁆𑀤𑀳𑀺𑀲𑁆𑀲𑀣, 𑀧𑀼𑀩𑁆𑀩𑁂𑀧𑀺 𑀅𑀝𑁆𑀞𑀺𑀓𑀸𑀦𑀺 𑀤𑀲𑁆𑀲𑁂𑀢𑁆𑀯𑀸, ‘𑀧𑀼𑀢𑁆𑀢𑁄 𑀢𑁂 𑀫𑀢𑁄’𑀢𑀺 𑀯𑀼𑀢𑁆𑀢𑁂 𑀦 𑀲𑀤𑁆𑀤𑀳𑀺𑀢𑁆𑀯𑀸’’𑀢𑀺 𑀇𑀫𑀺𑀲𑁆𑀲𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀓𑀣𑁂𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀇𑀢𑀺 𑀪𑀕𑀯𑀸 𑀧𑀺𑀢𑀭𑀁 𑀢𑀻𑀲𑀼 𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 ¶ 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀫𑀦𑀢𑁆𑀣𑀸𑀬 𑀕𑀳𑀺𑀢𑀧𑀝𑀺𑀜𑁆𑀜𑁄 𑀦𑀺𑀝𑁆𑀞𑀺𑀢𑁂 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀏𑀯𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀦𑀪𑀺𑀭𑀢𑁄 𑀅𑀳𑀁, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀦 ¶ 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺. 𑀪𑀕𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀦𑀦𑁆𑀤, 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀆𑀭𑁄𑀘𑁂𑀲𑀺 ¶ 𑁋 ‘𑀅𑀦𑀪𑀺𑀭𑀢𑁄, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀦𑀦𑁆𑀤, 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀺, 𑀦 𑀲𑀓𑁆𑀓𑁄𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀲𑀻’’𑀢𑀺? ‘‘𑀲𑀸𑀓𑀺𑀬𑀸𑀦𑀻 𑀫𑀁, 𑀪𑀦𑁆𑀢𑁂, 𑀚𑀦𑀧𑀤𑀓𑀮𑁆𑀬𑀸𑀡𑀻 𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’𑀢𑀺, 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀇𑀤𑁆𑀥𑀺𑀩𑀮𑁂𑀦 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀁 𑀆𑀦𑁂𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀛𑀸𑀫𑀓𑁆𑀔𑁂𑀢𑁆𑀢𑁂 𑀛𑀸𑀫𑀔𑀸𑀡𑀼𑀓𑁂 𑀦𑀺𑀲𑀺𑀦𑁆𑀦𑀁 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀦𑀗𑁆𑀕𑀼𑀝𑁆𑀞𑀁 𑀏𑀓𑀁 𑀧𑀮𑀼𑀝𑁆𑀞𑀫𑀓𑁆𑀓𑀝𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀸𑀦𑀺 𑀓𑀓𑀼𑀝𑀧𑀸𑀤𑀸𑀦𑀺 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀤𑀲𑁆𑀲𑁂𑀲𑀺. 𑀓𑀓𑀼𑀝𑀧𑀸𑀤𑀸𑀦𑀻𑀢𑀺 ¶ 𑀭𑀢𑁆𑀢𑀯𑀡𑁆𑀡𑀢𑀸𑀬 𑀧𑀸𑀭𑁂𑀯𑀢𑀧𑀸𑀤𑀲𑀤𑀺𑀲𑀧𑀸𑀤𑀸𑀦𑀺. 𑀤𑀲𑁆𑀲𑁂𑀢𑁆𑀯𑀸 𑀘 𑀧𑀦𑀸𑀳 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀦𑁆𑀤, 𑀓𑀢𑀫𑀸 𑀦𑀼 𑀔𑁄 𑀅𑀪𑀺𑀭𑀽𑀧𑀢𑀭𑀸 𑀯𑀸 𑀤𑀲𑁆𑀲𑀦𑀻𑀬𑀢𑀭𑀸 𑀯𑀸 𑀧𑀸𑀲𑀸𑀤𑀺𑀓𑀢𑀭𑀸 𑀯𑀸 𑀲𑀸𑀓𑀺𑀬𑀸𑀦𑀻 𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀻, 𑀇𑀫𑀸𑀦𑀺 𑀯𑀸 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀓𑀓𑀼𑀝𑀧𑀸𑀤𑀸𑀦𑀻’’𑀢𑀺? 𑀢𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀦𑁆𑀢𑁂, 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀦𑀗𑁆𑀕𑀼𑀝𑁆𑀞𑀸 𑀧𑀮𑀼𑀝𑁆𑀞𑀫𑀓𑁆𑀓𑀝𑀻, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀲𑀸𑀓𑀺𑀬𑀸𑀦𑀻 𑀚𑀦𑀧𑀤𑀓𑀮𑁆𑀬𑀸𑀡𑀻, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀉𑀧𑀦𑀺𑀥𑀸𑀬 𑀲𑀗𑁆𑀔𑁆𑀬𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺. 𑀅𑀣 𑀔𑁄 𑀇𑀫𑀸𑀦𑁂𑀯 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀅𑀪𑀺𑀭𑀽𑀧𑀢𑀭𑀸𑀦𑀺 𑀘𑁂𑀯 𑀤𑀲𑁆𑀲𑀦𑀻𑀬𑀢𑀭𑀸𑀦𑀺 𑀘 𑀧𑀸𑀲𑀸𑀤𑀺𑀓𑀢𑀭𑀸𑀦𑀺 𑀘𑀸’’𑀢𑀺. ‘‘𑀅𑀪𑀺𑀭𑀫, 𑀦𑀦𑁆𑀤, 𑀅𑀪𑀺𑀭𑀫, 𑀦𑀦𑁆𑀤, 𑀅𑀳𑀁 𑀢𑁂 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦’’𑀦𑁆𑀢𑀺. ‘‘𑀲𑀘𑁂 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦𑀁, 𑀅𑀪𑀺𑀭𑀫𑀺𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂’’𑀢𑀺.

𑀅𑀣 ¶ 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂𑀬𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽, ‘‘𑀆𑀬𑀲𑁆𑀫𑀸 𑀓𑀺𑀭 𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀢𑀸 𑀫𑀸𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀪𑀕𑀯𑀸 𑀓𑀺𑀭𑀲𑁆𑀲 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀪𑀢𑀓𑀯𑀸𑀤𑁂𑀦 𑀘 𑀉𑀧𑀓𑁆𑀓𑀺𑀢𑀓𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺, ‘‘𑀪𑀢𑀓𑁄 𑀓𑀺𑀭𑀸𑀬𑀲𑁆𑀫𑀸 𑀦𑀦𑁆𑀤𑁄, 𑀉𑀧𑀓𑁆𑀓𑀺𑀢𑀓𑁄 𑀓𑀺𑀭𑀸𑀬𑀲𑁆𑀫𑀸 𑀦𑀦𑁆𑀤𑁄, 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀪𑀕𑀯𑀸 𑀓𑀺𑀭𑀲𑁆𑀲 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀲𑀳𑀸𑀬𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 ¶ 𑀪𑀢𑀓𑀯𑀸𑀤𑁂𑀦 𑀘 𑀉𑀧𑀓𑁆𑀓𑀺𑀢𑀓𑀯𑀸𑀤𑁂𑀦 𑀘 𑀅𑀝𑁆𑀝𑀺𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 ¶ 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺, ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀔𑁄 𑀧𑀦𑀸𑀬𑀲𑁆𑀫𑀸 𑀦𑀦𑁆𑀤𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑀅𑀣𑁂𑀓𑀸 𑀤𑁂𑀯𑀢𑀸 𑀭𑀢𑁆𑀢𑀺𑀪𑀸𑀕𑁂 𑀲𑀓𑀮𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀭𑁄𑀘𑁂𑀲𑀺 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀢𑀸 𑀫𑀸𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 ‘‘𑀦𑀦𑁆𑀤𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀲𑁄𑀧𑀸𑀬𑀲𑁆𑀫𑀸 𑀦𑀦𑁆𑀤𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦𑀁, 𑀫𑀼𑀜𑁆𑀘𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. ‘‘𑀫𑀬𑀸𑀧𑀺 𑀔𑁄 𑀢𑁂, 𑀦𑀦𑁆𑀤, 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 ‘𑀦𑀦𑁆𑀤𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 ¶ 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺. 𑀤𑁂𑀯𑀢𑀸𑀧𑀺 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀦𑀦𑁆𑀤𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺. 𑀬𑀤𑁂𑀯 𑀔𑁄 𑀢𑁂, 𑀦𑀦𑁆𑀤, 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 ¶ 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀣𑀸𑀳𑀁 𑀫𑀼𑀢𑁆𑀢𑁄 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀲𑁆𑀲 𑀦𑀺𑀢𑁆𑀢𑀺𑀡𑁆𑀡𑁄 𑀧𑀗𑁆𑀓𑁄, 𑀫𑀤𑁆𑀤𑀺𑀢𑁄 𑀓𑀸𑀫𑀓𑀡𑁆𑀝𑀓𑁄;

𑀫𑁄𑀳𑀓𑁆𑀔𑀬𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀼𑀔𑀤𑀼𑀓𑁆𑀔𑁂𑀲𑀼 𑀦 𑀯𑁂𑀥𑀢𑀻 𑀲 𑀪𑀺𑀓𑁆𑀔𑀽’’𑀢𑀺. (𑀉𑀤𑀸. 𑁨𑁨);

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀆𑀯𑀼𑀲𑁄 𑀦𑀦𑁆𑀤, 𑀧𑀼𑀩𑁆𑀩𑁂 𑀢𑁆𑀯𑀁 ‘𑀉𑀓𑁆𑀓𑀡𑁆𑀞𑀺𑀢𑁄𑀫𑀻’𑀢𑀺 𑀯𑀤𑁂𑀲𑀺, 𑀇𑀤𑀸𑀦𑀺 𑀢𑁂 𑀓𑀣’’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀕𑀺𑀳𑀺𑀪𑀸𑀯𑀸𑀬 𑀆𑀮𑀬𑁄’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑁋 ‘‘𑀅𑀪𑀽𑀢𑀁 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀓𑀣𑁂𑀢𑀺, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀅𑀢𑀻𑀢𑀤𑀺𑀯𑀲𑁂𑀲𑀼 ‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘𑀦𑀢𑁆𑀣𑀺 𑀫𑁂 𑀕𑀺𑀳𑀺𑀪𑀸𑀯𑀸𑀬 𑀆𑀮𑀬𑁄’𑀢𑀺 𑀓𑀣𑁂𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀪𑀺𑀓𑁆𑀔𑀯𑁂, 𑀅𑀢𑀻𑀢𑀤𑀺𑀯𑀲𑁂𑀲𑀼 𑀦𑀦𑁆𑀤𑀲𑁆𑀲 𑀅𑀢𑁆𑀢𑀪𑀸𑀯𑁄 𑀤𑀼𑀘𑁆𑀙𑀦𑁆𑀦𑀕𑁂𑀳𑀲𑀤𑀺𑀲𑁄 𑀅𑀳𑁄𑀲𑀺, 𑀇𑀤𑀸𑀦𑀺 𑀲𑀼𑀘𑁆𑀙𑀦𑁆𑀦𑀕𑁂𑀳𑀲𑀤𑀺𑀲𑁄 𑀚𑀸𑀢𑁄. 𑀅𑀬𑀜𑁆𑀳𑀺 𑀤𑀺𑀩𑁆𑀩𑀘𑁆𑀙𑀭𑀸𑀦𑀁 ¶ 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 ¶ 𑀯𑀸𑀬𑀫𑀦𑁆𑀢𑁄 𑀢𑀁 𑀓𑀺𑀘𑁆𑀘𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩.

‘‘𑀬𑀣𑀸 𑀅𑀕𑀸𑀭𑀁 𑀤𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀲𑀫𑀢𑀺𑀯𑀺𑀚𑁆𑀛𑀢𑀺.

𑁧𑁪.

‘‘𑀬𑀣𑀸 𑀅𑀕𑀸𑀭𑀁 𑀲𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀦 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀦 𑀲𑀫𑀢𑀺𑀯𑀺𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀅𑀕𑀸𑀭𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑁂𑀳𑀁. 𑀤𑀼𑀘𑁆𑀙𑀦𑁆𑀦𑀦𑁆𑀢𑀺 𑀯𑀺𑀭𑀴𑀘𑁆𑀙𑀦𑁆𑀦𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁. 𑀲𑀫𑀢𑀺𑀯𑀺𑀚𑁆𑀛𑀢𑀻𑀢𑀺 𑀯𑀲𑁆𑀲𑀯𑀼𑀝𑁆𑀞𑀺 𑀯𑀺𑀦𑀺𑀯𑀺𑀚𑁆𑀛𑀢𑀺. 𑀅𑀪𑀸𑀯𑀺𑀢𑀦𑁆𑀢𑀺 𑀢𑀁 𑀅𑀕𑀸𑀭𑀁 𑀯𑀼𑀝𑁆𑀞𑀺 𑀯𑀺𑀬 𑀪𑀸𑀯𑀦𑀸𑀬 𑀭𑀳𑀺𑀢𑀢𑁆𑀢𑀸 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀭𑀸𑀕𑁄 𑀲𑀫𑀢𑀺 𑀯𑀺𑀚𑁆𑀛𑀢𑀺. 𑀦 𑀓𑁂𑀯𑀮𑀁 𑀭𑀸𑀕𑁄𑀯, 𑀤𑁄𑀲𑀫𑁄𑀳𑀫𑀸𑀦𑀸𑀤𑀬𑁄 𑀲𑀩𑁆𑀩𑀓𑀺𑀮𑁂𑀲𑀸 𑀢𑀣𑀸𑀭𑀽𑀧𑀁 𑀘𑀺𑀢𑁆𑀢𑀁 𑀅𑀢𑀺𑀯𑀺𑀬 𑀯𑀺𑀚𑁆𑀛𑀦𑁆𑀢𑀺𑀬𑁂𑀯. 𑀲𑀼𑀪𑀸𑀯𑀺𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀳𑀺 𑀲𑀼𑀪𑀸𑀯𑀺𑀢𑀁. 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀲𑀼𑀘𑁆𑀙𑀦𑁆𑀦𑀁 𑀕𑁂𑀳𑀁 𑀯𑀼𑀝𑁆𑀞𑀺 𑀯𑀺𑀬 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀅𑀢𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀫𑀳𑀸𑀚𑀦𑀲𑁆𑀲 𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺.

𑀅𑀣 𑀔𑁄 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸, 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀡𑁆𑀞𑀺𑀢𑁄 𑀦𑀸𑀫𑀸𑀬𑀲𑁆𑀫𑀸 𑀦𑀦𑁆𑀤𑁄 ¶ 𑀲𑀢𑁆𑀣𑀸𑀭𑀸 𑀤𑁂𑀯𑀘𑁆𑀙𑀭𑀸 𑀆𑀫𑀺𑀲𑀁 𑀓𑀢𑁆𑀯𑀸 𑀯𑀺𑀦𑀻𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 ¶ , 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀫𑀸𑀢𑀼𑀕𑀸𑀫𑁂𑀦 𑀧𑀮𑁄𑀪𑁂𑀢𑁆𑀯𑀸 𑀯𑀺𑀦𑀻𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀯𑀸𑀲𑀻 𑀓𑀧𑁆𑀧𑀝𑁄 𑀦𑀸𑀫 𑀯𑀸𑀡𑀺𑀚𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀓𑁄 𑀕𑀤𑁆𑀭𑀪𑁄 𑀓𑀼𑀫𑁆𑀪𑀪𑀸𑀭𑀁 𑀯𑀳𑀢𑀺, 𑀏𑀓𑀤𑀺𑀯𑀲𑁂𑀦 𑀲𑀢𑁆𑀢 𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀺. 𑀲𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀕𑀤𑁆𑀭𑀪𑀪𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀬𑀸𑀯 𑀪𑀡𑁆𑀟𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁, 𑀢𑀸𑀯 𑀕𑀤𑁆𑀭𑀪𑀁 𑀘𑀭𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀣𑀲𑁆𑀲 𑀲𑁄 𑀕𑀤𑁆𑀭𑀪𑁄 𑀧𑀭𑀺𑀔𑀸𑀧𑀺𑀝𑁆𑀞𑁂 𑀘𑀭𑀫𑀸𑀦𑁄 𑀏𑀓𑀁 𑀕𑀤𑁆𑀭𑀪𑀺𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀲𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀻 𑀆𑀳 𑁋 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀢𑁄’’𑀢𑀺. ‘‘𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺? ‘‘𑀯𑀸𑀡𑀺𑀚𑁆𑀚𑀓𑀫𑁆𑀫𑁂𑀦𑀸’’𑀢𑀺. ‘‘𑀓𑀺𑀢𑁆𑀢𑀓𑀁 𑀪𑀸𑀭𑀁 𑀯𑀳𑀲𑀻’’𑀢𑀺 ¶ ? ‘‘𑀓𑀼𑀫𑁆𑀪𑀪𑀸𑀭’’𑀦𑁆𑀢𑀺? ‘‘𑀏𑀢𑁆𑀢𑀓𑀁 𑀪𑀸𑀭𑀁 𑀯𑀳𑀦𑁆𑀢𑁄 𑀓𑀢𑀺 𑀬𑁄𑀚𑀦𑀸𑀦𑀺 𑀕𑀘𑁆𑀙𑀲𑀻’’𑀢𑀺? ‘‘𑀲𑀢𑁆𑀢 𑀬𑁄𑀚𑀦𑀸𑀦𑀻’’𑀢𑀺. ‘‘𑀕𑀢𑀕𑀢𑀝𑁆𑀞𑀸𑀦𑁂 𑀢𑁂 𑀓𑀸𑀘𑀺 𑀧𑀸𑀤𑀧𑀭𑀺𑀓𑀫𑁆𑀫𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀓𑀭𑀸 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀫𑀳𑀸𑀤𑀼𑀓𑁆𑀔𑀁 𑀦𑀸𑀫 𑀅𑀦𑀼𑀪𑁄𑀲𑀻’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀭𑀓𑀸 𑀦𑀸𑀫 𑀦𑀢𑁆𑀣𑀺, 𑀓𑀸𑀫𑀲𑀁𑀬𑁄𑀚𑀦𑀖𑀝𑁆𑀝𑀦𑀢𑁆𑀣𑀸𑀬 𑀧𑀦 𑀏𑀯𑀭𑀽𑀧𑀁 𑀓𑀣𑀁 𑀓𑀣𑁂𑀲𑀺’’? 𑀲𑁄 𑀢𑀲𑁆𑀲𑀸 𑀓𑀣𑀸𑀬 𑀉𑀓𑁆𑀓𑀡𑁆𑀞𑀺. 𑀓𑀧𑁆𑀧𑀝𑁄𑀧𑀺 𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑁋 ‘‘𑀏𑀳𑀺, 𑀢𑀸𑀢, 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 ¶ 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸, ‘‘𑀅𑀦𑀺𑀘𑁆𑀙𑀦𑁆𑀢𑀁 𑀧𑀭𑀺𑀪𑀸𑀲𑁂𑀢𑁆𑀯𑀸 𑀦𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

‘‘𑀧𑀢𑁄𑀤𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀲𑀸𑀴𑀲𑀗𑁆𑀕𑀼𑀮𑀺𑀓𑀡𑁆𑀝𑀓𑀁;

𑀲𑀜𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀺 𑀢𑁂 𑀓𑀸𑀬𑀁, 𑀏𑀯𑀁 𑀚𑀸𑀦𑀸𑀳𑀺 𑀕𑀤𑁆𑀭𑀪𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀕𑀤𑁆𑀭𑀪𑁄 ‘‘𑀏𑀯𑀁 𑀲𑀦𑁆𑀢𑁂 𑀅𑀳𑀫𑁆𑀧𑀺 𑀢𑁂 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀢𑁄𑀤𑀁 𑀫𑁂 𑀓𑀭𑀺𑀲𑁆𑀲𑀲𑀺, 𑀲𑁄𑀴𑀲𑀗𑁆𑀕𑀼𑀮𑀺𑀓𑀡𑁆𑀝𑀓𑀁;

𑀧𑀼𑀭𑀢𑁄 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀦, 𑀉𑀤𑁆𑀥𑀭𑀺𑀢𑁆𑀯𑀸𑀦 𑀧𑀘𑁆𑀙𑀢𑁄;

𑀤𑀦𑁆𑀢𑀁 𑀢𑁂 𑀧𑀸𑀢𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑀧𑁆𑀧𑀝𑀸’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀯𑀸𑀡𑀺𑀚𑁄 𑁋 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀏𑀲 𑀏𑀯𑀁 𑀯𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀕𑀤𑁆𑀭𑀪𑀺𑀁 𑀤𑀺𑀲𑁆𑀯𑀸, ‘‘𑀇𑀫𑀸𑀬𑁂𑀲 𑀏𑀯𑀁 𑀲𑀺𑀓𑁆𑀔𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺, ‘𑀏𑀯𑀭𑀽𑀧𑀺𑀁 𑀦𑀸𑀫 𑀢𑁂 𑀕𑀤𑁆𑀭𑀪𑀺𑀁 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀫𑀸𑀢𑀼𑀕𑀸𑀫𑁂𑀦 𑀦𑀁 𑀧𑀮𑁄𑀪𑁂𑀢𑁆𑀯𑀸 𑀦𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀼𑀧𑁆𑀧𑀤𑀺𑀁 𑀲𑀗𑁆𑀔𑀫𑀼𑀔𑀺𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀪𑀭𑀺𑀬𑀁 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀕𑀤𑁆𑀭𑀪𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀕𑀤𑁆𑀭𑀪𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀼𑀧𑁆𑀧𑀤𑀺𑀁 𑀲𑀗𑁆𑀔𑀫𑀼𑀔𑀺𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀪𑀭𑀺𑀬𑀁 𑀫𑁂 𑀆𑀦𑀬𑀺𑀲𑁆𑀲𑀲𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑀧𑁆𑀧𑀝;

𑀓𑀧𑁆𑀧𑀝 𑀪𑀺𑀬𑁆𑀬𑁄 𑀕𑀫𑀺𑀲𑁆𑀲𑀸𑀫𑀺, 𑀬𑁄𑀚𑀦𑀸𑀦𑀺 𑀘𑀢𑀼𑀤𑁆𑀤𑀲𑀸’’𑀢𑀺.

𑀅𑀣 ¶ ¶ 𑀦𑀁 𑀓𑀧𑁆𑀧𑀝𑁄, ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀕𑀳𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀦𑀁 𑀆𑀳 𑁋 ‘‘𑀦𑀦𑀼 𑀫𑀁 𑀢𑀼𑀫𑁆𑀳𑁂 ‘𑀪𑀭𑀺𑀬𑀁 𑀢𑁂 𑀆𑀦𑀬𑀺𑀲𑁆𑀲𑀸𑀫𑀻’𑀢𑀺 𑀅𑀯𑁄𑀘𑀼𑀢𑁆𑀣𑀸’’𑀢𑀺? ‘‘𑀆𑀫, 𑀯𑀼𑀢𑁆𑀢𑀁, 𑀦𑀸𑀳𑀁 𑀅𑀢𑁆𑀢𑀦𑁄 𑀓𑀣𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀪𑀭𑀺𑀬𑀁 𑀢𑁂 𑀆𑀦𑁂𑀲𑁆𑀲𑀸𑀫𑀺, 𑀯𑁂𑀢𑀦𑀁 𑀧𑀦 𑀢𑀼𑀬𑁆𑀳𑀁 𑀏𑀓𑀓𑀲𑁆𑀲𑁂𑀯 𑀤𑀲𑁆𑀲𑀸𑀫𑀺, 𑀢𑀼𑀬𑁆𑀳𑀁 𑀯𑁂𑀢𑀦𑀁 𑀤𑀼𑀢𑀺𑀬𑀲𑁆𑀲 𑀧𑀳𑁄𑀢𑀼 𑀯𑀸 𑀫𑀸 𑀯𑀸, 𑀢𑁆𑀯𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀺. 𑀉𑀪𑀺𑀦𑁆𑀦𑀁 𑀧𑀦 𑀯𑁄 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑀸 𑀯𑀺𑀚𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀳𑀺𑀧𑀺 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀢𑀼𑀬𑁆𑀳𑀁 𑀢𑀁 𑀧𑀳𑁄𑀢𑀼 𑀯𑀸 𑀫𑀸 𑀯𑀸, 𑀢𑁆𑀯𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀻’’𑀢𑀺. 𑀕𑀤𑁆𑀭𑀪𑁄 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀦𑀧𑁂𑀓𑁆𑀔𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀢𑀤𑀸, 𑀪𑀺𑀓𑁆𑀔𑀯𑁂, 𑀕𑀤𑁆𑀭𑀪𑀻 𑀚𑀦𑀧𑀤𑀓𑀮𑁆𑀬𑀸𑀡𑀻 𑀅𑀳𑁄𑀲𑀺, 𑀕𑀤𑁆𑀭𑀪𑁄 𑀦𑀦𑁆𑀤𑁄, 𑀯𑀸𑀡𑀺𑀚𑁄 𑀅𑀳𑀫𑁂𑀯. 𑀏𑀯𑀁 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀫𑀸𑀢𑀼𑀕𑀸𑀫𑁂𑀦 𑀧𑀮𑁄𑀪𑁂𑀢𑁆𑀯𑀸 𑀯𑀺𑀦𑀻𑀢𑁄’’𑀢𑀺 𑀚𑀸𑀢𑀓𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀘𑀼𑀦𑁆𑀤𑀲𑀽𑀓𑀭𑀺𑀓𑀯𑀢𑁆𑀣𑀼

𑀇𑀥 𑀲𑁄𑀘𑁂𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀼𑀦𑁆𑀤𑀲𑀽𑀓𑀭𑀺𑀓𑀁 𑀦𑀸𑀫 𑀧𑀼𑀭𑀺𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 ¶ 𑀓𑀺𑀭 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀲𑀽𑀓𑀭𑁂 𑀯𑀥𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 𑀘 𑀯𑀺𑀓𑁆𑀓𑀺𑀡𑀦𑁆𑀢𑁄 𑀘 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀙𑀸𑀢𑀓𑀸𑀮𑁂 𑀲𑀓𑀝𑁂𑀦 𑀯𑀻𑀳𑀺𑀁 𑀆𑀤𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀏𑀓𑀦𑀸𑀴𑀺𑀤𑁆𑀯𑁂𑀦𑀸𑀴𑀺𑀫𑀢𑁆𑀢𑁂𑀦 𑀕𑀸𑀫𑀲𑀽𑀓𑀭𑀧𑁄𑀢𑀓𑁂 ¶ 𑀓𑀺𑀡𑀺𑀢𑁆𑀯𑀸 𑀲𑀓𑀝𑀁 𑀧𑀽𑀭𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀘𑁆𑀙𑀸𑀦𑀺𑀯𑁂𑀲𑀦𑁂 𑀯𑀚𑀁 𑀯𑀺𑀬 𑀏𑀓𑀁 𑀞𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑁂𑀲𑀁 𑀦𑀺𑀯𑀸𑀧𑀁 𑀭𑁄𑀧𑁂𑀢𑁆𑀯𑀸, 𑀢𑁂𑀲𑀼 𑀦𑀸𑀦𑀸𑀕𑀘𑁆𑀙𑁂 𑀘 𑀲𑀭𑀻𑀭𑀫𑀮𑀜𑁆𑀘 𑀔𑀸𑀤𑀺𑀢𑁆𑀯𑀸 𑀯𑀟𑁆𑀠𑀺𑀢𑁂𑀲𑀼 𑀬𑀁 𑀬𑀁 𑀫𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀢𑀁 𑀆𑀴𑀸𑀦𑁂 𑀦𑀺𑀘𑁆𑀘𑀮𑀁 𑀩𑀦𑁆𑀥𑀺𑀢𑁆𑀯𑀸 𑀲𑀭𑀻𑀭𑀫𑀁𑀲𑀲𑁆𑀲 𑀉𑀤𑁆𑀥𑀼𑀫𑀸𑀬𑀺𑀢𑁆𑀯𑀸 𑀩𑀳𑀮𑀪𑀸𑀯𑀢𑁆𑀣𑀁 𑀘𑀢𑀼𑀭𑀲𑁆𑀲𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸, ‘‘𑀩𑀳𑀮𑀫𑀁𑀲𑁄 𑀚𑀸𑀢𑁄’’𑀢𑀺 𑀜𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑀭𑁂 𑀤𑀡𑁆𑀟𑀓𑀁 𑀤𑀢𑁆𑀯𑀸 𑀮𑁄𑀳𑀣𑀸𑀮𑀺𑀬𑀸 𑀧𑀓𑁆𑀓𑀼𑀣𑀺𑀢𑀁 𑀉𑀡𑁆𑀳𑁄𑀤𑀓𑀁 𑀫𑀼𑀔𑁂 𑀆𑀲𑀺𑀜𑁆𑀘𑀢𑀺. 𑀢𑀁 𑀓𑀼𑀘𑁆𑀙𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀓𑁆𑀓𑀼𑀣𑀺𑀢𑀁 𑀓𑀭𑀻𑀲𑀁 𑀆𑀤𑀸𑀬 𑀅𑀥𑁄𑀪𑀸𑀕𑁂𑀦 𑀦𑀺𑀓𑁆𑀔𑀫𑀢𑀺, 𑀬𑀸𑀯 𑀣𑁄𑀓𑀫𑁆𑀧𑀺 𑀓𑀭𑀻𑀲𑀁 𑀅𑀢𑁆𑀣𑀺, 𑀢𑀸𑀯 𑀆𑀯𑀺𑀮𑀁 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀺, 𑀲𑀼𑀤𑁆𑀥𑁂 𑀉𑀤𑀭𑁂 𑀅𑀘𑁆𑀙𑀁 𑀅𑀦𑀸𑀯𑀺𑀮𑀁 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀺. 𑀅𑀣𑀲𑁆𑀲 𑀅𑀯𑀲𑁂𑀲𑀁 𑀉𑀤𑀓𑀁 𑀧𑀺𑀝𑁆𑀞𑀺𑀬𑀁 𑀆𑀲𑀺𑀜𑁆𑀘𑀢𑀺. 𑀢𑀁 𑀓𑀸𑀴𑀘𑀫𑁆𑀫𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀢𑁄 𑀢𑀺𑀡𑀼𑀓𑁆𑀓𑀸𑀬 𑀮𑁄𑀫𑀸𑀦𑀺 𑀛𑀸𑀧𑁂𑀢𑁆𑀯𑀸 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀢𑀺. 𑀧𑀕𑁆𑀖𑀭𑀡𑀢𑀁 𑀮𑁄𑀳𑀺𑀢𑀁 𑀪𑀸𑀚𑀦𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀫𑀁𑀲𑀁 𑀮𑁄𑀳𑀺𑀢𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀔𑀸𑀤𑀺𑀢𑁆𑀯𑀸 𑀲𑁂𑀲𑀁 𑀯𑀺𑀓𑁆𑀓𑀺𑀡𑀸𑀢𑀺. 𑀢𑀲𑁆𑀲 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 ¶ . 𑀢𑀣𑀸𑀕𑀢𑁂 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑁂 𑀏𑀓𑀤𑀺𑀯𑀲𑀫𑁆𑀧𑀺 𑀧𑀼𑀧𑁆𑀨𑀫𑀼𑀝𑁆𑀞𑀺𑀫𑀢𑁆𑀢𑁂𑀦 𑀧𑀽𑀚𑀸 𑀯𑀸 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀺𑀓𑁆𑀔𑀤𑀸𑀦𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀧𑀼𑀜𑁆𑀜𑀁 𑀦𑀸𑀫 𑀦𑀸𑀳𑁄𑀲𑀺. 𑀅𑀣𑀲𑁆𑀲 𑀲𑀭𑀻𑀭𑁂 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺, 𑀚𑀻𑀯𑀦𑁆𑀢𑀲𑁆𑀲𑁂𑀯 ¶ 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑀦𑁆𑀢𑀸𑀧𑁄 𑀉𑀧𑀝𑁆𑀞𑀳𑀺. 𑀅𑀯𑀻𑀘𑀺𑀲𑀦𑁆𑀢𑀸𑀧𑁄 𑀦𑀸𑀫 𑀬𑁄𑀚𑀦𑀲𑀢𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀓𑁆𑀔𑀻𑀦𑀁 𑀪𑀺𑀚𑁆𑀚𑀦𑀲𑀫𑀢𑁆𑀣𑁄 𑀧𑀭𑀺𑀴𑀸𑀳𑁄 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸’’𑀢𑀺. (𑀫. 𑀦𑀺. 𑁩.𑁨𑁬𑁭; 𑀅. 𑀦𑀺. 𑁩.𑁩𑁬);

𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀧𑀦𑀲𑁆𑀲 𑀧𑀸𑀓𑀢𑀺𑀓𑀕𑁆𑀕𑀺𑀲𑀦𑁆𑀢𑀸𑀧𑀢𑁄 𑀅𑀥𑀺𑀫𑀢𑁆𑀢𑀢𑀸𑀬 𑀅𑀬𑀁 𑀉𑀧𑀫𑀸 𑀯𑀼𑀢𑁆𑀢𑀸 𑁋 ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀽𑀝𑀸𑀕𑀸𑀭𑀫𑀢𑁆𑀢𑁄 𑀧𑀸𑀲𑀸𑀡𑁄𑀧𑀺 𑀦𑁂𑀭𑀬𑀺𑀓𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑁄 𑀔𑀡𑁂𑀦 𑀯𑀺𑀮𑀬𑀁 𑀕𑀘𑁆𑀙𑀢𑀺, 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸 𑀧𑀦𑁂𑀢𑁆𑀣 𑀓𑀫𑁆𑀫𑀩𑀮𑁂𑀦 ¶ 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀸 𑀯𑀺𑀬 𑀦 𑀯𑀺𑀮𑀻𑀬𑀦𑁆𑀢𑀻’’𑀢𑀺 (𑀫𑀺. 𑀧. 𑁨.𑁪.𑁬). 𑀢𑀲𑁆𑀲 𑀢𑀲𑁆𑀫𑀺𑀁 𑀲𑀦𑁆𑀢𑀸𑀧𑁂 𑀉𑀧𑀝𑁆𑀞𑀺𑀢𑁂 𑀓𑀫𑁆𑀫𑀲𑀭𑀺𑀓𑁆𑀔𑀓𑁄 𑀆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀕𑁂𑀳𑀫𑀚𑁆𑀛𑁂𑀬𑁂𑀯 𑀲𑀽𑀓𑀭𑀭𑀯𑀁 𑀭𑀯𑀺𑀢𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀯𑀺𑀘𑀭𑀦𑁆𑀢𑁄 𑀧𑀼𑀭𑀢𑁆𑀣𑀺𑀫𑀯𑀢𑁆𑀣𑀼𑀫𑁆𑀧𑀺 𑀧𑀘𑁆𑀙𑀺𑀫𑀯𑀢𑁆𑀣𑀼𑀫𑁆𑀧𑀺 𑀕𑀘𑁆𑀙𑀢𑀺. 𑀅𑀣𑀲𑁆𑀲 𑀕𑁂𑀳𑀫𑀸𑀦𑀼𑀲𑀓𑀸 𑀢𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀫𑀼𑀔𑀁 𑀧𑀺𑀤𑀳𑀦𑁆𑀢𑀺. 𑀓𑀫𑁆𑀫𑀯𑀺𑀧𑀸𑀓𑁄 𑀦𑀸𑀫 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀁. 𑀲𑁄 𑀯𑀺𑀭𑀯𑀦𑁆𑀢𑁄𑀯 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀢𑀺. 𑀲𑀫𑀦𑁆𑀢𑀸 𑀲𑀢𑁆𑀢𑀲𑀼 𑀖𑀭𑁂𑀲𑀼 𑀫𑀦𑀼𑀲𑁆𑀲𑀸 𑀦𑀺𑀤𑁆𑀤𑀁 𑀦 𑀮𑀪𑀦𑁆𑀢𑀺. 𑀫𑀭𑀡𑀪𑀬𑁂𑀦 𑀢𑀚𑁆𑀚𑀺𑀢𑀲𑁆𑀲 𑀧𑀦 𑀩𑀳𑀺𑀦𑀺𑀓𑁆𑀔𑀫𑀦𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀩𑁆𑀩𑁄 𑀕𑁂𑀳𑀚𑀦𑁄 𑀬𑀣𑀸 𑀅𑀦𑁆𑀢𑁄𑀞𑀺𑀢𑁄 𑀩𑀳𑀺 𑀯𑀺𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀕𑁂𑀳𑀤𑁆𑀯𑀸𑀭𑀸𑀦𑀺 𑀣𑀓𑁂𑀢𑁆𑀯𑀸 𑀩𑀳𑀺𑀕𑁂𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑁄 𑀅𑀘𑁆𑀙𑀢𑀺. 𑀇𑀢𑀭𑁄 𑀅𑀦𑁆𑀢𑁄𑀕𑁂𑀳𑁂𑀬𑁂𑀯 𑀦𑀺𑀭𑀬𑀲𑀦𑁆𑀢𑀸𑀧𑁂𑀦 𑀯𑀺𑀭𑀯𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀢𑀺. 𑀏𑀯𑀁 𑀲𑀢𑁆𑀢𑀤𑀺𑀯𑀲𑀸𑀦𑀺 𑀯𑀺𑀘𑀭𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀤𑁂𑀯𑀤𑀽𑀢𑀲𑀼𑀢𑁆𑀢𑁂𑀦 (𑀫. 𑀦𑀺. 𑁩.𑁨𑁬𑁧 𑀆𑀤𑀬𑁄; 𑀅. 𑀦𑀺. 𑁩.𑁩𑁬) 𑀯𑀡𑁆𑀡𑁂𑀢𑀩𑁆𑀩𑁄𑀢𑀺.

𑀪𑀺𑀓𑁆𑀔𑀽 𑀢𑀲𑁆𑀲 𑀖𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀸 ¶ 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀲𑀽𑀓𑀭𑀲𑀤𑁆𑀤𑁄’’𑀢𑀺 𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀘𑀼𑀦𑁆𑀤𑀲𑀽𑀓𑀭𑀺𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀲𑀽𑀓𑀭𑀸𑀦𑀁 𑀫𑀸𑀭𑀺𑀬𑀫𑀸𑀦𑀸𑀦𑀁 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄, 𑀕𑁂𑀳𑁂 𑀓𑀸𑀘𑀺 𑀫𑀗𑁆𑀕𑀮𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂. 𑀏𑀢𑁆𑀢𑀓𑁂 𑀦𑀸𑀫, 𑀪𑀦𑁆𑀢𑁂, 𑀲𑀽𑀓𑀭𑁂 𑀫𑀸𑀭𑁂𑀦𑁆𑀢𑀲𑁆𑀲 𑀏𑀓𑀫𑁆𑀧𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀯𑀸 𑀓𑀸𑀭𑀼𑀜𑁆𑀜𑀁 𑀯𑀸 𑀦𑀢𑁆𑀣𑀺, 𑀦 𑀯𑀢 𑀦𑁄 𑀏𑀯𑀭𑀽𑀧𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀢𑁆𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. 𑀲𑀢𑁆𑀣𑀸 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑁄 𑀇𑀫𑁂 𑀲𑀢𑁆𑀢𑀤𑀺𑀯𑀲𑁂 𑀲𑀽𑀓𑀭𑁂 𑀫𑀸𑀭𑁂𑀢𑀺, 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀧𑀦𑀲𑁆𑀲 𑀯𑀺𑀧𑀸𑀓𑀁 𑀉𑀤𑀧𑀸𑀤𑀺, 𑀚𑀻𑀯𑀦𑁆𑀢𑀲𑁆𑀲𑁂𑀯 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑀦𑁆𑀢𑀸𑀧𑁄 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑁂𑀦 𑀲𑀦𑁆𑀢𑀸𑀧𑁂𑀦 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀽𑀓𑀭𑀭𑀯𑀁 ¶ 𑀭𑀯𑀦𑁆𑀢𑁄 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀯𑀺𑀘𑀭𑀺𑀢𑁆𑀯𑀸 𑀅𑀚𑁆𑀚 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀥 𑀮𑁄𑀓𑁂 𑀏𑀯𑀁 𑀲𑁄𑀘𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀲𑁄𑀘𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀺𑀓𑁆𑀔𑀯𑁂, 𑀧𑀫𑀢𑁆𑀢𑀸 𑀦𑀸𑀫 𑀕𑀳𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼 𑀧𑀩𑁆𑀩𑀚𑀺𑀢𑀸 𑀯𑀸, 𑀉𑀪𑀬𑀢𑁆𑀣 𑀲𑁄𑀘𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁫.

‘‘𑀇𑀥 𑀲𑁄𑀘𑀢𑀺 𑀧𑁂𑀘𑁆𑀘 𑀲𑁄𑀘𑀢𑀺,

𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀲𑁄𑀘𑀢𑀺;

𑀲𑁄 𑀲𑁄𑀘𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺;

𑀤𑀺𑀲𑁆𑀯𑀸 𑀓𑀫𑁆𑀫𑀓𑀺𑀮𑀺𑀝𑁆𑀞𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 ¶ 𑀧𑀸𑀧𑀓𑀸𑀭𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀓𑀢𑀁 𑀧𑀸𑀧’’𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀫𑀭𑀡𑀲𑀫𑀬𑁂 𑀇𑀥 𑀲𑁄𑀘𑀢𑀺, 𑀇𑀤𑀫𑀲𑁆𑀲 𑀓𑀫𑁆𑀫𑀲𑁄𑀘𑀦𑀁. 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑁄 𑀧𑀦 𑀧𑁂𑀘𑁆𑀘 𑀲𑁄𑀘𑀢𑀺. 𑀇𑀤𑀫𑀲𑁆𑀲 𑀧𑀭𑀮𑁄𑀓𑁂 𑀯𑀺𑀧𑀸𑀓𑀲𑁄𑀘𑀦𑀁. 𑀏𑀯𑀁 𑀲𑁄 𑀉𑀪𑀬𑀢𑁆𑀣 𑀲𑁄𑀘𑀢𑀺𑀬𑁂𑀯. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀚𑀻𑀯𑀫𑀸𑀦𑁄𑀬𑁂𑀯 𑀲𑁄 𑀘𑀼𑀦𑁆𑀤𑀲𑀽𑀓𑀭𑀺𑀓𑁄𑀧𑀺 𑀲𑁄𑀘𑀢𑀺. 𑀤𑀺𑀲𑁆𑀯𑀸 𑀓𑀫𑁆𑀫𑀓𑀺𑀮𑀺𑀝𑁆𑀞𑀦𑁆𑀢𑀺 ¶ 𑀅𑀢𑁆𑀢𑀦𑁄 𑀓𑀺𑀮𑀺𑀝𑁆𑀞𑀓𑀫𑁆𑀫𑀁 𑀧𑀲𑁆𑀲𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀯𑀺𑀮𑀧𑀦𑁆𑀢𑁄 𑀯𑀺𑀳𑀜𑁆𑀜𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀘𑀼𑀦𑁆𑀤𑀲𑀽𑀓𑀭𑀺𑀓𑀯𑀢𑁆𑀣𑀼 𑀤𑀲𑀫𑀁.

𑁧𑁧. 𑀥𑀫𑁆𑀫𑀺𑀓𑀉𑀧𑀸𑀲𑀓𑀯𑀢𑁆𑀣𑀼

𑀇𑀥 𑀫𑁄𑀤𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀺𑀓𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀲𑀢𑀸 𑀥𑀫𑁆𑀫𑀺𑀓𑀉𑀧𑀸𑀲𑀓𑀸 𑀦𑀸𑀫 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀧𑀜𑁆𑀘 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑀸. 𑀬𑁄 𑀢𑁂𑀲𑀁 𑀚𑁂𑀝𑁆𑀞𑀓𑁄, 𑀢𑀲𑁆𑀲 𑀲𑀢𑁆𑀢 𑀧𑀼𑀢𑁆𑀢𑀸 𑀲𑀢𑁆𑀢 𑀥𑀻𑀢𑀭𑁄. 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀏𑀓𑁂𑀓𑀸 𑀲𑀮𑀸𑀓𑀬𑀸𑀕𑀼 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀉𑀧𑁄𑀲𑀣𑀺𑀓𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀅𑀳𑁄𑀲𑀺. 𑀢𑁂𑀧𑀺 𑀲𑀩𑁆𑀩𑁂𑀯 𑀅𑀦𑀼𑀚𑀸𑀢𑀧𑀼𑀢𑁆𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀇𑀢𑀺 𑀘𑀼𑀤𑁆𑀤𑀲𑀦𑁆𑀦𑀁 𑀧𑀼𑀢𑁆𑀢𑀸𑀦𑀁 𑀪𑀭𑀺𑀬𑀸𑀬 𑀉𑀧𑀸𑀲𑀓𑀲𑁆𑀲𑀸𑀢𑀺 𑀲𑁄𑀴𑀲 𑀲𑀮𑀸𑀓𑀬𑀸𑀕𑀼𑀆𑀤𑀻𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀇𑀢𑀺 𑀲𑁄 𑀲𑀧𑀼𑀢𑁆𑀢𑀤𑀸𑀭𑁄 𑀲𑀻𑀮𑀯𑀸 ¶ 𑀓𑀮𑁆𑀬𑀸𑀡𑀥𑀫𑁆𑀫𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺, 𑀆𑀬𑀼𑀲𑀗𑁆𑀔𑀸𑀭𑁄 𑀧𑀭𑀺𑀳𑀸𑀬𑀺. 𑀲𑁄 𑀥𑀫𑁆𑀫𑀁 ¶ 𑀲𑁄𑀢𑀼𑀓𑀸𑀫𑁄 ‘‘𑀅𑀝𑁆𑀞 𑀯𑀸 𑀫𑁂 𑀲𑁄𑀴𑀲 𑀯𑀸 𑀪𑀺𑀓𑁆𑀔𑀽 𑀧𑁂𑀲𑁂𑀣𑀸’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. 𑀲𑀢𑁆𑀣𑀸 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀜𑁆𑀘𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀸. ‘‘𑀪𑀦𑁆𑀢𑁂, 𑀅𑀬𑁆𑀬𑀸𑀦𑀁 𑀫𑁂 𑀤𑀲𑁆𑀲𑀦𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀺, 𑀤𑀼𑀩𑁆𑀩𑀮𑁄𑀫𑁆𑀳𑀺, 𑀏𑀓𑀁 𑀫𑁂 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀢𑀭𑀁 𑀲𑀼𑀢𑁆𑀢𑀁 𑀲𑁄𑀢𑀼𑀓𑀸𑀫𑁄 𑀉𑀧𑀸𑀲𑀓𑀸’’𑀢𑀺? ‘‘𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀁 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 ¶ (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬) 𑀲𑀼𑀢𑁆𑀢𑀦𑁆𑀢𑀁 𑀧𑀝𑁆𑀞𑀧𑁂𑀲𑀼𑀁. 𑀢𑀲𑁆𑀫𑀺𑀁 𑀔𑀡𑁂 𑀙𑀳𑀺 𑀤𑁂𑀯𑀮𑁄𑀓𑁂𑀳𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀲𑀳𑀲𑁆𑀲𑀲𑀺𑀦𑁆𑀥𑀯𑀬𑀼𑀢𑁆𑀢𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀸 𑀙 𑀭𑀣𑀸 𑀆𑀕𑀫𑀺𑀁𑀲𑀼. 𑀢𑁂𑀲𑀼 𑀞𑀺𑀢𑀸 𑀤𑁂𑀯𑀢𑀸 ‘‘𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑀁 𑀦𑁂𑀲𑁆𑀲𑀸𑀫, 𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑀁 𑀦𑁂𑀲𑁆𑀲𑀸𑀫, 𑀅𑀫𑁆𑀪𑁄 𑀫𑀢𑁆𑀢𑀺𑀓𑀪𑀸𑀚𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀚𑀦𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑁂 𑀅𑀪𑀺𑀭𑀫𑀺𑀢𑀼𑀁 𑀇𑀥 𑀦𑀺𑀩𑁆𑀩𑀢𑁆𑀢𑀸𑀳𑀺, 𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑁂 𑀅𑀪𑀺𑀭𑀫𑀺𑀢𑀼𑀁 𑀇𑀥 𑀦𑀺𑀩𑁆𑀩𑀢𑁆𑀢𑀸𑀳𑀻’’𑀢𑀺 𑀯𑀤𑀺𑀁𑀲𑀼. 𑀉𑀧𑀸𑀲𑀓𑁄 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀭𑀸𑀬𑀁 𑀅𑀦𑀺𑀘𑁆𑀙𑀦𑁆𑀢𑁄 𑁋 ‘‘𑀆𑀕𑀫𑁂𑀣 𑀆𑀕𑀫𑁂𑀣𑀸’’𑀢𑀺 𑀆𑀳. 𑀪𑀺𑀓𑁆𑀔𑀽 ‘‘𑀅𑀫𑁆𑀳𑁂 𑀯𑀸𑀭𑁂𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀸 𑀧𑀼𑀩𑁆𑀩𑁂 𑀥𑀫𑁆𑀫𑀲𑁆𑀲𑀯𑀦𑁂𑀦 𑀅𑀢𑀺𑀢𑁆𑀢𑁄 𑀅𑀳𑁄𑀲𑀺, 𑀇𑀤𑀸𑀦𑀺 𑀧𑀦 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀸𑀭𑁂𑀢𑁆𑀯𑀸 𑀲𑀬𑀫𑁂𑀯 𑀯𑀸𑀭𑁂𑀢𑀺, 𑀫𑀭𑀡𑀲𑁆𑀲 𑀅𑀪𑀸𑀬𑀦𑀓𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀺𑀭𑀯𑀺𑀁𑀲𑀼. 𑀪𑀺𑀓𑁆𑀔𑀽 ‘‘𑀇𑀤𑀸𑀦𑀺 𑀅𑀦𑁄𑀓𑀸𑀲𑁄’’𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀉𑀧𑀸𑀲𑀓𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑁂 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸 𑀓𑀦𑁆𑀤𑀣𑀸’’𑀢𑀺? ‘‘𑀢𑀸𑀢, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸 𑀲𑀬𑀫𑁂𑀯 𑀯𑀸𑀭𑀬𑀺𑀢𑁆𑀣, 𑀅𑀣 𑀫𑀬𑀁 ‘𑀫𑀭𑀡𑀲𑁆𑀲 𑀅𑀪𑀸𑀬𑀦𑀓𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻’𑀢𑀺 𑀓𑀦𑁆𑀤𑀺𑀫𑁆𑀳𑀸’’𑀢𑀺 ¶ . ‘‘𑀅𑀬𑁆𑀬𑀸 𑀧𑀦 𑀓𑀼𑀳𑀺’’𑀦𑁆𑀢𑀺? ‘‘‘𑀅𑀦𑁄𑀓𑀸𑀲𑁄’𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀦𑁆𑀢𑀸, 𑀢𑀸𑀢𑀸’’𑀢𑀺. ‘‘𑀦𑀸𑀳𑀁, 𑀅𑀬𑁆𑀬𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀣 𑀓𑁂𑀦 𑀲𑀤𑁆𑀥𑀺𑀁 𑀓𑀣𑁂𑀣𑀸’’𑀢𑀺. ‘‘𑀙𑀳𑀺 𑀤𑁂𑀯𑀮𑁄𑀓𑁂𑀳𑀺 𑀤𑁂𑀯𑀢𑀸 𑀙 𑀭𑀣𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀤𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘𑀅𑀫𑁆𑀳𑀸𑀳𑀺 𑀤𑁂𑀯𑀮𑁄𑀓𑁂 𑀅𑀪𑀺𑀭𑀫, 𑀅𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑁂 𑀅𑀪𑀺𑀭𑀫𑀸’𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀸𑀳𑀺 𑀲𑀤𑁆𑀥𑀺𑀁 𑀓𑀣𑁂𑀫𑀻’’𑀢𑀺. ‘‘𑀓𑀼𑀳𑀺𑀁, 𑀢𑀸𑀢, 𑀭𑀣𑀸, 𑀦 𑀫𑀬𑀁 𑀧𑀲𑁆𑀲𑀸𑀫𑀸’’𑀢𑀺? ‘‘𑀅𑀢𑁆𑀣𑀺 𑀧𑀦 𑀫𑀬𑁆𑀳𑀁 𑀕𑀦𑁆𑀣𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀻’’𑀢𑀺? ‘‘𑀅𑀢𑁆𑀣𑀺, 𑀢𑀸𑀢𑀸’’𑀢𑀺. ‘‘𑀓𑀢𑀭𑁄 𑀤𑁂𑀯𑀮𑁄𑀓𑁄 𑀭𑀫𑀡𑀻𑀬𑁄’’𑀢𑀺? ‘‘𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑀼𑀤𑁆𑀥𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀯𑀲𑀺𑀢𑀝𑁆𑀞𑀸𑀦𑀁 𑀢𑀼𑀲𑀺𑀢𑀪𑀯𑀦𑀁 𑀭𑀫𑀡𑀻𑀬𑀁, 𑀢𑀸𑀢𑀸’’𑀢𑀺. ‘‘𑀢𑁂𑀦 𑀳𑀺 ‘𑀢𑀼𑀲𑀺𑀢𑀪𑀯𑀦𑀢𑁄 𑀆𑀕𑀢𑀭𑀣𑁂 𑀮𑀕𑁆𑀕𑀢𑀽’𑀢𑀺 𑀧𑀼𑀧𑁆𑀨𑀤𑀸𑀫𑀁 𑀔𑀺𑀧𑀣𑀸’’𑀢𑀺. 𑀢𑁂 𑀔𑀺𑀧𑀺𑀁𑀲𑀼. 𑀢𑀁 𑀭𑀣𑀥𑀼𑀭𑁂 𑀮𑀕𑁆𑀕𑀺𑀢𑁆𑀯𑀸 𑀆𑀓𑀸𑀲𑁂 𑀑𑀮𑀫𑁆𑀩𑀺. 𑀫𑀳𑀸𑀚𑀦𑁄 𑀢𑀤𑁂𑀯 𑀧𑀲𑁆𑀲𑀢𑀺, 𑀭𑀣𑀁 𑀦 𑀧𑀲𑁆𑀲𑀢𑀺. 𑀉𑀧𑀸𑀲𑀓𑁄 ‘‘𑀧𑀲𑁆𑀲𑀣𑁂𑀢𑀁 𑀧𑀼𑀧𑁆𑀨𑀤𑀸𑀫’’𑀦𑁆𑀢𑀺 𑀯𑀢𑁆𑀯𑀸, ‘‘𑀆𑀫, 𑀧𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑁋 ‘‘𑀏𑀢𑀁 𑀢𑀼𑀲𑀺𑀢𑀪𑀯𑀦𑀢𑁄 𑀆𑀕𑀢𑀭𑀣𑁂 𑀑𑀮𑀫𑁆𑀩𑀢𑀺, 𑀅𑀳𑀁 𑀢𑀼𑀲𑀺𑀢𑀪𑀯𑀦𑀁 𑀕𑀘𑁆𑀙𑀸𑀫𑀺 ¶ , 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀫 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀫𑀬𑀸 𑀓𑀢𑀦𑀺𑀬𑀸𑀫𑁂𑀦𑁂𑀯 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀭𑀣𑁂 𑀧𑀢𑀺𑀝𑁆𑀞𑀸𑀲𑀺.

𑀢𑀸𑀯𑀤𑁂𑀯𑀲𑁆𑀲 ¶ 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀲𑀝𑁆𑀞𑀺𑀲𑀓𑀝𑀪𑀸𑀭𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀁 𑀧𑀭𑀺𑀯𑀸𑀭𑁂𑀲𑀺, 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀅𑀦𑀼𑀧𑁆𑀧𑀢𑁆𑀢𑁂 𑀲𑀢𑁆𑀣𑀸 𑀧𑀼𑀘𑁆𑀙𑀺 𑁋 ‘‘𑀲𑀼𑀢𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 𑀥𑀫𑁆𑀫𑀤𑁂𑀲𑀦𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀬𑁂𑀯 𑀧𑀦 ‘𑀆𑀕𑀫𑁂𑀣𑀸’𑀢𑀺 𑀯𑀸𑀭𑁂𑀲𑀺. 𑀅𑀣𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀓𑀦𑁆𑀤𑀺𑀁𑀲𑀼 ¶ . 𑀫𑀬𑀁 ‘𑀇𑀤𑀸𑀦𑀺 𑀅𑀦𑁄𑀓𑀸𑀲𑁄’𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀦𑀺𑀓𑁆𑀔𑀦𑁆𑀢𑀸’’𑀢𑀺. ‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑀺, 𑀙𑀳𑀺 𑀤𑁂𑀯𑀮𑁄𑀓𑁂𑀳𑀺 𑀤𑁂𑀯𑀢𑀸 𑀙 𑀭𑀣𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀢𑀁 𑀉𑀧𑀸𑀲𑀓𑀁 𑀧𑀓𑁆𑀓𑁄𑀲𑀺𑀁𑀲𑀼. 𑀲𑁄 𑀥𑀫𑁆𑀫𑀤𑁂𑀲𑀦𑀸𑀬 𑀅𑀦𑁆𑀢𑀭𑀸𑀬𑀁 𑀅𑀦𑀺𑀘𑁆𑀙𑀦𑁆𑀢𑁄 𑀢𑀸𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀁, 𑀪𑀺𑀓𑁆𑀔𑀯𑁂’’𑀢𑀺. ‘‘𑀇𑀤𑀸𑀦𑀺 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺? ‘‘𑀢𑀼𑀲𑀺𑀢𑀪𑀯𑀦𑁂, 𑀪𑀺𑀓𑁆𑀔𑀯𑁂’’𑀢𑀺. ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀇𑀥 𑀜𑀸𑀢𑀺𑀫𑀚𑁆𑀛𑁂 𑀫𑁄𑀤𑀫𑀸𑀦𑁄 𑀯𑀺𑀘𑀭𑀺𑀢𑁆𑀯𑀸 𑀇𑀤𑀸𑀦𑁂𑀯 𑀕𑀦𑁆𑀢𑁆𑀯𑀸 𑀧𑀼𑀦 𑀫𑁄𑀤𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀆𑀫, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀸 𑀳𑀺 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀲𑀩𑁆𑀩𑀢𑁆𑀣 𑀫𑁄𑀤𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁬.

‘‘𑀇𑀥 𑀫𑁄𑀤𑀢𑀺 𑀧𑁂𑀘𑁆𑀘 𑀫𑁄𑀤𑀢𑀺,

𑀓𑀢𑀧𑀼𑀜𑁆𑀜𑁄 𑀉𑀪𑀬𑀢𑁆𑀣 𑀫𑁄𑀤𑀢𑀺;

𑀲𑁄 𑀫𑁄𑀤𑀢𑀺 𑀲𑁄 𑀧𑀫𑁄𑀤𑀢𑀺,

𑀤𑀺𑀲𑁆𑀯𑀸 𑀓𑀫𑁆𑀫𑀯𑀺𑀲𑀼𑀤𑁆𑀥𑀺𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀓𑀢𑀧𑀼𑀜𑁆𑀜𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄 ‘‘𑀅𑀓𑀢𑀁 𑀯𑀢 𑀫𑁂 𑀧𑀸𑀧𑀁, 𑀓𑀢𑀁 𑀫𑁂 𑀓𑀮𑁆𑀬𑀸𑀡’’𑀦𑁆𑀢𑀺 𑀇𑀥 𑀓𑀫𑁆𑀫𑀫𑁄𑀤𑀦𑁂𑀦, 𑀧𑁂𑀘𑁆𑀘 𑀯𑀺𑀧𑀸𑀓𑀫𑁄𑀤𑀦𑁂𑀦 𑀫𑁄𑀤𑀢𑀺. 𑀏𑀯𑀁 𑀉𑀪𑀬𑀢𑁆𑀣 𑀫𑁄𑀤𑀢𑀺 𑀦𑀸𑀫. 𑀓𑀫𑁆𑀫𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀥𑀫𑁆𑀫𑀺𑀓𑀉𑀧𑀸𑀲𑀓𑁄𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑀯𑀺𑀲𑀼𑀤𑁆𑀥𑀺𑀁 𑀧𑀼𑀜𑁆𑀜𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀓𑀸𑀮𑀓𑀺𑀭𑀺𑀬𑀢𑁄 𑀧𑀼𑀩𑁆𑀩𑁂 𑀇𑀥𑀮𑁄𑀓𑁂𑀧𑀺 𑀫𑁄𑀤𑀢𑀺, 𑀓𑀸𑀮𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀧𑀭𑀮𑁄𑀓𑁂𑀧𑀺 𑀅𑀢𑀺𑀫𑁄𑀤𑀢𑀺𑀬𑁂𑀯𑀸𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀥𑀫𑁆𑀫𑀺𑀓𑀉𑀧𑀸𑀲𑀓𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.

𑁧𑁨. 𑀤𑁂𑀯𑀤𑀢𑁆𑀢𑀯𑀢𑁆𑀣𑀼

𑀇𑀥 ¶ ¶ ¶ 𑀢𑀧𑁆𑀧𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀤𑁂𑀯𑀤𑀢𑁆𑀢𑀲𑁆𑀲 𑀯𑀢𑁆𑀣𑀼 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀣𑀯𑀺𑀧𑁆𑀧𑀯𑁂𑀲𑀦𑀸 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸𑀦𑀺 𑀲𑀩𑁆𑀩𑀸𑀦𑀺 𑀚𑀸𑀢𑀓𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑀺𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀲𑀢𑁆𑀣𑀭𑀺 𑀅𑀦𑀼𑀧𑀺𑀬𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁄 𑀅𑀢𑁆𑀣𑀺. 𑀢𑀁 𑀦𑀺𑀲𑁆𑀲𑀸𑀬 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁂𑀬𑁂𑀯 𑀢𑀣𑀸𑀕𑀢𑀲𑁆𑀲 𑀮𑀓𑁆𑀔𑀡𑀧𑀝𑀺𑀕𑁆𑀕𑀳𑀡𑀤𑀺𑀯𑀲𑁂𑀬𑁂𑀯 𑀅𑀲𑀻𑀢𑀺𑀲𑀳𑀲𑁆𑀲𑁂𑀳𑀺 𑀜𑀸𑀢𑀺𑀓𑀼𑀮𑁂𑀳𑀺 ‘‘𑀭𑀸𑀚𑀸 𑀯𑀸 𑀳𑁄𑀢𑀼, 𑀩𑀼𑀤𑁆𑀥𑁄 𑀯𑀸, 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀯 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺 𑀅𑀲𑀻𑀢𑀺𑀲𑀳𑀲𑁆𑀲𑀧𑀼𑀢𑁆𑀢𑀸 𑀧𑀝𑀺𑀜𑁆𑀜𑀸𑀢𑀸. 𑀢𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀧𑀩𑁆𑀩𑀚𑀺𑀢𑁂𑀲𑀼 𑀪𑀤𑁆𑀤𑀺𑀬𑀁 𑀦𑀸𑀫 𑀭𑀸𑀚𑀸𑀦𑀁, 𑀅𑀦𑀼𑀭𑀼𑀤𑁆𑀥𑀁, 𑀆𑀦𑀦𑁆𑀤𑀁, 𑀪𑀕𑀼𑀁, 𑀓𑀺𑀫𑀺𑀮𑀁, 𑀤𑁂𑀯𑀤𑀢𑁆𑀢𑀦𑁆𑀢𑀺 𑀇𑀫𑁂 𑀙 𑀲𑀓𑁆𑀬𑁂 𑀅𑀧𑀩𑁆𑀩𑀚𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀫𑀬𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑁂𑀫, 𑀇𑀫𑁂 𑀙 𑀲𑀓𑁆𑀬𑀸 𑀦 𑀜𑀸𑀢𑀓𑀸 𑀫𑀜𑁆𑀜𑁂, 𑀓𑀲𑁆𑀫𑀸 𑀦 𑀧𑀩𑁆𑀩𑀚𑀦𑁆𑀢𑀻’’𑀢𑀺? 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀬𑁄 𑀅𑀦𑀼𑀭𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀦𑀢𑁆𑀣𑀺, 𑀢𑁆𑀯𑀁 𑀯𑀸 𑀧𑀩𑁆𑀩𑀚, 𑀅𑀳𑀁 𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 𑀧𑀦 𑀲𑀼𑀔𑀼𑀫𑀸𑀮𑁄 𑀳𑁄𑀢𑀺 𑀲𑀫𑁆𑀧𑀦𑁆𑀦𑀪𑁄𑀕𑁄, ‘‘𑀦𑀢𑁆𑀣𑀻’’𑀢𑀺 𑀯𑀘𑀦𑀫𑁆𑀧𑀺 𑀢𑁂𑀦 𑀦 𑀲𑀼𑀢𑀧𑀼𑀩𑁆𑀩𑀁. 𑀏𑀓𑀤𑀺𑀯𑀲𑀜𑁆𑀳𑀺 𑀢𑁂𑀲𑀼 𑀙𑀲𑀼 𑀔𑀢𑁆𑀢𑀺𑀬𑁂𑀲𑀼 𑀕𑀼𑀴𑀓𑀻𑀴𑀁 𑀓𑀻𑀴𑀦𑁆𑀢𑁂𑀲𑀼 𑀅𑀦𑀼𑀭𑀼𑀤𑁆𑀥𑁄 𑀧𑀽𑀯𑁂𑀦 𑀧𑀭𑀸𑀚𑀺𑀢𑁄 𑀧𑀽𑀯𑀢𑁆𑀣𑀸𑀬 𑀧𑀳𑀺𑀡𑀺, 𑀅𑀣𑀲𑁆𑀲 𑀫𑀸𑀢𑀸 𑀧𑀽𑀯𑁂 𑀲𑀚𑁆𑀚𑁂𑀢𑁆𑀯𑀸 𑀧𑀳𑀺𑀡𑀺 ¶ . 𑀢𑁂 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀓𑀻𑀴𑀺𑀁𑀲𑀼. 𑀧𑀼𑀦𑀧𑁆𑀧𑀼𑀦𑀁 𑀢𑀲𑁆𑀲𑁂𑀯 𑀧𑀭𑀸𑀚𑀬𑁄 𑀳𑁄𑀢𑀺. 𑀫𑀸𑀢𑀸 𑀧𑀦𑀲𑁆𑀲 𑀧𑀳𑀺𑀢𑁂 𑀧𑀳𑀺𑀢𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀽𑀯𑁂 𑀧𑀳𑀺𑀡𑀺𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀧𑀽𑀯𑀸 𑀦𑀢𑁆𑀣𑀻’’𑀢𑀺 𑀧𑀳𑀺𑀡𑀺. 𑀲𑁄 ‘‘𑀦𑀢𑁆𑀣𑀻’’𑀢𑀺 𑀯𑀘𑀦𑀲𑁆𑀲 𑀅𑀲𑀼𑀓𑀧𑀼𑀩𑁆𑀩𑀢𑁆𑀢𑀸 ‘‘𑀏𑀲𑀸𑀧𑁂𑀓𑀸 𑀧𑀽𑀯𑀯𑀺𑀓𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀦𑀢𑁆𑀣𑀺𑀧𑀽𑀯𑀁 𑀫𑁂 𑀆𑀳𑀭𑀣𑀸’’𑀢𑀺 𑀧𑁂𑀲𑁂𑀲𑀺. 𑀫𑀸𑀢𑀸 𑀧𑀦𑀲𑁆𑀲 ‘‘𑀦𑀢𑁆𑀣𑀺𑀧𑀽𑀯𑀁 𑀓𑀺𑀭, 𑀅𑀬𑁆𑀬𑁂, 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂, ‘‘𑀫𑀫 𑀧𑀼𑀢𑁆𑀢𑁂𑀦 ‘𑀦𑀢𑁆𑀣𑀻’𑀢𑀺 𑀧𑀤𑀁 𑀦 𑀲𑀼𑀢𑀧𑀼𑀩𑁆𑀩𑀁, 𑀇𑀫𑀺𑀦𑀸 𑀧𑀦 𑀉𑀧𑀸𑀬𑁂𑀦 𑀦𑀁 𑀏𑀢𑀫𑀢𑁆𑀣𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀼𑀘𑁆𑀙𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀅𑀜𑁆𑀜𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀧𑁂𑀲𑁂𑀲𑀺. 𑀦𑀕𑀭𑀧𑀭𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀦𑀼𑀭𑀼𑀤𑁆𑀥𑀲𑀓𑁆𑀬𑁂𑀦 𑀅𑀦𑁆𑀦𑀪𑀸𑀭𑀓𑀸𑀮𑁂 𑀅𑀢𑁆𑀢𑀦𑁄 𑀪𑀸𑀕𑀪𑀢𑁆𑀢𑀁 𑀉𑀧𑀭𑀺𑀝𑁆𑀞𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸 ‘‘‘𑀦𑀢𑁆𑀣𑀻’𑀢𑀺 𑀫𑁂 𑀯𑀘𑀦𑀲𑁆𑀲 𑀲𑀯𑀦𑀁 𑀫𑀸 𑀳𑁄𑀢𑀼, 𑀪𑁄𑀚𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀚𑀸𑀦𑀦𑀁 𑀫𑀸 ‘𑀳𑁄𑀢𑀽’𑀢𑀺 𑀧𑀢𑁆𑀣𑀦𑀸 𑀓𑀢𑀸, 𑀲𑀘𑀸𑀬𑀁 𑀢𑀼𑀘𑁆𑀙𑀧𑀸𑀢𑀺𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀤𑁂𑀯𑀲𑀫𑀸𑀕𑀫𑀁 𑀧𑀯𑀺𑀲𑀺𑀢𑀼𑀁 𑀦 𑀮𑀪𑀺𑀲𑁆𑀲𑀸𑀫, 𑀲𑀻𑀲𑀫𑁆𑀧𑀺 𑀦𑁄 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬𑀸’’𑀢𑀺. 𑀅𑀣 ¶ 𑀦𑀁 𑀧𑀸𑀢𑀺𑀁 𑀤𑀺𑀩𑁆𑀩𑀧𑀽𑀯𑁂𑀳𑀺 𑀧𑀼𑀡𑁆𑀡𑀁 𑀅𑀓𑀁𑀲𑀼. 𑀓𑀲𑁆𑀲𑀸 𑀕𑀼𑀴𑀫𑀡𑁆𑀟𑀮𑁂 𑀞𑀧𑁂𑀢𑁆𑀯𑀸 𑀉𑀕𑁆𑀖𑀸𑀝𑀺𑀢𑀫𑀢𑁆𑀢𑀸𑀬 𑀧𑀽𑀯𑀕𑀦𑁆𑀥𑁄 𑀲𑀓𑀮𑀦𑀕𑀭𑁂 𑀙𑀸𑀤𑁂𑀢𑁆𑀯𑀸 𑀞𑀺𑀢𑁄. 𑀧𑀽𑀯𑀔𑀡𑁆𑀟𑀁 𑀫𑀼𑀔𑁂 𑀞𑀧𑀺𑀢𑀫𑀢𑁆𑀢𑀫𑁂𑀯 𑀲𑀢𑁆𑀢𑀭𑀲𑀳𑀭𑀡𑀻𑀲𑀳𑀲𑁆𑀲𑀸𑀦𑀺 𑀅𑀦𑀼𑀨𑀭𑀺.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀳𑀁 𑀫𑀸𑀢𑀼 𑀧𑀺𑀬𑁄, 𑀏𑀢𑁆𑀢𑀓𑀁 𑀫𑁂 𑀓𑀸𑀮𑀁 𑀇𑀫𑀁 𑀦𑀢𑁆𑀣𑀺𑀧𑀽𑀯𑀁 ¶ 𑀦𑀸𑀫 𑀦 𑀧𑀘𑀺, 𑀇𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀧𑀽𑀯𑀁 𑀦𑀸𑀫 𑀦 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺, 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸𑀯 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫 ¶ , 𑀢𑀼𑀫𑁆𑀳𑀸𑀓𑀁 𑀅𑀳𑀁 𑀧𑀺𑀬𑁄, 𑀅𑀧𑁆𑀧𑀺𑀬𑁄’’𑀢𑀺? ‘‘𑀢𑀸𑀢, 𑀏𑀓𑀓𑁆𑀔𑀺𑀦𑁄 𑀅𑀓𑁆𑀔𑀺 𑀯𑀺𑀬 𑀘 𑀳𑀤𑀬𑀁 𑀯𑀺𑀬 𑀘 𑀅𑀢𑀺𑀯𑀺𑀬 𑀧𑀺𑀬𑁄 𑀫𑁂 𑀅𑀳𑁄𑀲𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑁆𑀳𑀁 𑀦𑀢𑁆𑀣𑀺 𑀧𑀽𑀯𑀁 𑀦 𑀧𑀘𑀺𑀢𑁆𑀣, 𑀅𑀫𑁆𑀫𑀸’’𑀢𑀺? 𑀲𑀸 𑀘𑀽𑀴𑀽𑀧𑀝𑁆𑀞𑀸𑀓𑀁 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀧𑀸𑀢𑀺𑀬𑀁, 𑀢𑀸𑀢𑀸’’𑀢𑀺? ‘‘𑀧𑀭𑀺𑀧𑀼𑀡𑁆𑀡𑀸, 𑀅𑀬𑁆𑀬𑁂, 𑀧𑀸𑀢𑀺 𑀧𑀽𑀯𑁂𑀳𑀺, 𑀏𑀯𑀭𑀽𑀧𑀸 𑀧𑀽𑀯𑀸 𑀦𑀸𑀫 𑀫𑁂 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺 𑀆𑀭𑁄𑀘𑁂𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀧𑀼𑀜𑁆𑀜𑀯𑀸 𑀓𑀢𑀸𑀪𑀺𑀦𑀻𑀳𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀢𑀸𑀳𑀺 𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀧𑀽𑀯𑀸 𑀧𑀳𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀅𑀣 𑀦𑀁 𑀧𑀼𑀢𑁆𑀢𑁄, 𑀅𑀫𑁆𑀫, 𑀇𑀢𑁄 𑀧𑀝𑁆𑀞𑀸𑀬𑀸𑀳𑀁 𑀅𑀜𑁆𑀜𑀁 𑀧𑀽𑀯𑀁 𑀦𑀸𑀫 𑀦 𑀔𑀸𑀤𑀺𑀲𑁆𑀲𑀸𑀫𑀺, 𑀦𑀢𑁆𑀣𑀺𑀧𑀽𑀯𑀫𑁂𑀯 𑀧𑀘𑁂𑀬𑁆𑀬𑀸𑀲𑀻’’𑀢𑀺. 𑀲𑀸𑀧𑀺𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 ‘‘𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑀼𑀘𑁆𑀙𑀧𑀸𑀢𑀺𑀫𑁂𑀯 𑀅𑀜𑁆𑀜𑀸𑀬 𑀧𑀸𑀢𑀺𑀬𑀸 𑀧𑀝𑀺𑀓𑀼𑀘𑁆𑀙𑀺𑀢𑁆𑀯𑀸 𑀧𑁂𑀲𑁂𑀲𑀺. 𑀬𑀸𑀯 𑀅𑀕𑀸𑀭𑀫𑀚𑁆𑀛𑁂 𑀯𑀲𑀺, 𑀢𑀸𑀯𑀲𑁆𑀲 𑀤𑁂𑀯𑀢𑀸𑀯 𑀧𑀽𑀯𑁂 𑀧𑀳𑀺𑀡𑀺𑀁𑀲𑀼.

𑀲𑁄 𑀏𑀢𑁆𑀢𑀓𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀧𑀩𑁆𑀩𑀚𑁆𑀚𑀁 𑀦𑀸𑀫 𑀓𑀺𑀁 𑀚𑀸𑀦𑀺𑀲𑁆𑀲𑀢𑀺? 𑀢𑀲𑁆𑀫𑀸 ‘‘𑀓𑀸 𑀏𑀲𑀸 𑀧𑀩𑁆𑀩𑀚𑁆𑀚𑀸 𑀦𑀸𑀫𑀸’’𑀢𑀺 𑀪𑀸𑀢𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀑𑀳𑀸𑀭𑀺𑀢𑀓𑁂𑀲𑀫𑀲𑁆𑀲𑀼𑀦𑀸 𑀓𑀸𑀲𑀸𑀬𑀦𑀺𑀯𑀢𑁆𑀣𑁂𑀦 𑀓𑀝𑁆𑀞𑀢𑁆𑀣𑀭𑀓𑁂 𑀯𑀸 𑀩𑀺𑀤𑀮𑀫𑀜𑁆𑀘𑀓𑁂 𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦 𑀯𑀺𑀳𑀭𑀺𑀢𑀩𑁆𑀩𑀁. 𑀏𑀲𑀸 𑀧𑀩𑁆𑀩𑀚𑁆𑀚𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀸𑀢𑀺𑀓, 𑀅𑀳𑀁 𑀲𑀼𑀔𑀼𑀫𑀸𑀮𑁄. 𑀦𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀺 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 ¶ 𑀆𑀳. ‘‘𑀢𑁂𑀦 𑀳𑀺, 𑀢𑀸𑀢, 𑀓𑀫𑁆𑀫𑀦𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲. 𑀦 𑀳𑀺 𑀲𑀓𑁆𑀓𑀸 𑀅𑀫𑁆𑀳𑁂𑀲𑀼 𑀏𑀓𑁂𑀦 𑀅𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺. 𑀅𑀣 𑀦𑀁 ‘‘𑀓𑁄 𑀏𑀲 𑀓𑀫𑁆𑀫𑀦𑁆𑀢𑁄 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀢𑁆𑀢𑀼𑀝𑁆𑀞𑀸𑀦𑀝𑁆𑀞𑀸𑀦𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀓𑀼𑀮𑀧𑀼𑀢𑁆𑀢𑁄 𑀓𑀫𑁆𑀫𑀦𑁆𑀢𑀁 𑀦𑀸𑀫 𑀓𑀺𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀏𑀓𑀤𑀺𑀯𑀲𑀜𑁆𑀳𑀺 𑀢𑀺𑀡𑁆𑀡𑀁 𑀔𑀢𑁆𑀢𑀺𑀬𑀸𑀦𑀁 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀪𑀢𑁆𑀢𑀁 𑀦𑀸𑀫 𑀓𑀼𑀳𑀺𑀁 𑀉𑀝𑁆𑀞𑀳𑀢𑀻’’𑀢𑀺? 𑀓𑀺𑀫𑀺𑀮𑁄 𑀆𑀳 𑁋 ‘‘𑀓𑁄𑀝𑁆𑀞𑁂 𑀉𑀝𑁆𑀞𑀳𑀢𑀻’’𑀢𑀺. 𑀅𑀣 𑀦𑀁 𑀪𑀤𑁆𑀤𑀺𑀬𑁄 ‘‘𑀢𑁆𑀯𑀁 𑀪𑀢𑁆𑀢𑀲𑁆𑀲 𑀉𑀝𑁆𑀞𑀸𑀦𑀝𑁆𑀞𑀸𑀦𑀁 𑀦 𑀚𑀸𑀦𑀸𑀲𑀺, 𑀪𑀢𑁆𑀢𑀁 𑀦𑀸𑀫 𑀉𑀓𑁆𑀔𑀮𑀺𑀬𑀁 𑀉𑀝𑁆𑀞𑀳𑀢𑀻’’𑀢𑀺 𑀆𑀳. 𑀅𑀦𑀼𑀭𑀼𑀤𑁆𑀥𑁄 ‘‘𑀢𑀼𑀫𑁆𑀳𑁂 𑀤𑁆𑀯𑁂𑀧𑀺 𑀦 𑀚𑀸𑀦𑀸𑀣, 𑀪𑀢𑁆𑀢𑀁 𑀦𑀸𑀫 𑀭𑀢𑀦𑀫𑀓𑀼𑀴𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀉𑀝𑁆𑀞𑀳𑀢𑀻’’𑀢𑀺 𑀆𑀳.

𑀢𑁂𑀲𑀼 ¶ 𑀓𑀺𑀭 𑀏𑀓𑀤𑀺𑀯𑀲𑀁 𑀓𑀺𑀫𑀺𑀮𑁄 𑀓𑁄𑀝𑁆𑀞𑀢𑁄 𑀯𑀻𑀳𑀻 𑀑𑀢𑀸𑀭𑀺𑀬𑀫𑀸𑀦𑁂 𑀤𑀺𑀲𑁆𑀯𑀸, ‘‘𑀏𑀢𑁂 𑀓𑁄𑀝𑁆𑀞𑁂𑀬𑁂𑀯 𑀚𑀸𑀢𑀸’’𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺. 𑀪𑀤𑁆𑀤𑀺𑀬𑁄 𑀏𑀓𑀤𑀺𑀯𑀲𑀁 𑀉𑀓𑁆𑀔𑀮𑀺𑀢𑁄 𑀪𑀢𑁆𑀢𑀁 𑀯𑀟𑁆𑀠𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀉𑀓𑁆𑀔𑀮𑀺𑀬𑀜𑁆𑀜𑁂𑀯 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺. 𑀅𑀦𑀼𑀭𑀼𑀤𑁆𑀥𑁂𑀦 𑀧𑀦 𑀦𑁂𑀯 𑀯𑀻𑀳𑀻 𑀓𑁄𑀝𑁆𑀝𑁂𑀦𑁆𑀢𑀸, 𑀦 𑀪𑀢𑁆𑀢𑀁 𑀧𑀘𑀦𑁆𑀢𑀸, 𑀦 𑀯𑀟𑁆𑀠𑁂𑀦𑁆𑀢𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀯𑀟𑁆𑀠𑁂𑀢𑁆𑀯𑀸 𑀧𑀦 𑀧𑀼𑀭𑀢𑁄 𑀞𑀧𑀺𑀢𑀫𑁂𑀯 𑀧𑀲𑁆𑀲𑀢𑀺. 𑀲𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑀓𑀸𑀮𑁂 ‘‘𑀪𑀢𑁆𑀢𑀁 𑀧𑀸𑀢𑀺𑀬𑀁 𑀉𑀝𑁆𑀞𑀳𑀢𑀻’’𑀢𑀺 𑀲𑀜𑁆𑀜𑀫𑀓𑀸𑀲𑀺. 𑀏𑀯𑀁 𑀢𑀬𑁄𑀧𑀺 𑀢𑁂 𑀪𑀢𑁆𑀢𑀼𑀝𑁆𑀞𑀸𑀦𑀝𑁆𑀞𑀸𑀦𑀁 𑀦 𑀚𑀸𑀦𑀦𑁆𑀢𑀺. 𑀢𑁂𑀦𑀸𑀬𑀁 ‘‘𑀓𑁄 𑀏𑀲 𑀓𑀫𑁆𑀫𑀦𑁆𑀢𑁄 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀧𑀞𑀫𑀁 𑀔𑁂𑀢𑁆𑀢𑀁 𑀓𑀲𑀸𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀓𑀁 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀲𑀼𑀢𑁆𑀯𑀸, ‘‘𑀓𑀤𑀸 𑀓𑀫𑁆𑀫𑀦𑁆𑀢𑀸𑀦𑀁 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀓𑀤𑀸 𑀫𑀬𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀪𑁄𑀕𑁂 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀓𑀫𑁆𑀫𑀦𑁆𑀢𑀸𑀦𑀁 𑀅𑀧𑀭𑀺𑀬𑀦𑁆𑀢𑀢𑀸𑀬 𑀅𑀓𑁆𑀔𑀸𑀢𑀸𑀬 ‘‘𑀢𑁂𑀦 𑀳𑀺 𑀢𑁆𑀯𑀜𑁆𑀜𑁂𑀯 𑀖𑀭𑀸𑀯𑀸𑀲𑀁 𑀯𑀲, 𑀦 𑀫𑀬𑁆𑀳𑀁 𑀏𑀢𑁂𑀦𑀢𑁆𑀣𑁄’’𑀢𑀺 𑀫𑀸𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ ¶ , ‘‘𑀅𑀦𑀼𑀚𑀸𑀦𑀸𑀳𑀺 𑀫𑀁, 𑀅𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, ‘‘𑀲𑀘𑁂 𑀢𑁂 𑀲𑀳𑀸𑀬𑀓𑁄 𑀪𑀤𑁆𑀤𑀺𑀬𑀭𑀸𑀚𑀸 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀚𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀫𑀫 𑀔𑁄, 𑀲𑀫𑁆𑀫, 𑀧𑀩𑁆𑀩𑀚𑁆𑀚𑀸 𑀢𑀯 𑀧𑀝𑀺𑀩𑀤𑁆𑀥𑀸’’𑀢𑀺 𑀯𑀢𑁆𑀯𑀸 𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺.

𑀢𑀢𑁄 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀅𑀦𑀼𑀭𑀼𑀤𑁆𑀥𑁄 𑀆𑀦𑀦𑁆𑀤𑁄 𑀪𑀕𑀼 𑀓𑀺𑀫𑀺𑀮𑁄 𑀤𑁂𑀯𑀤𑀢𑁆𑀢𑁄𑀢𑀺 𑀇𑀫𑁂 𑀙 𑀔𑀢𑁆𑀢𑀺𑀬𑀸 𑀉𑀧𑀸𑀮𑀺𑀓𑀧𑁆𑀧𑀓𑀲𑀢𑁆𑀢𑀫𑀸 𑀤𑁂𑀯𑀸 𑀯𑀺𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀲𑀢𑁆𑀢𑀸𑀳𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀭𑀯𑀺𑀲𑀬𑀁 𑀧𑀢𑁆𑀯𑀸 𑀭𑀸𑀚𑀸𑀡𑀸𑀬 𑀲𑁂𑀦𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀭𑀯𑀺𑀲𑀬𑀁 𑀑𑀓𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀙 𑀔𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸, ‘‘𑀳𑀦𑁆𑀤 𑀪𑀡𑁂, 𑀉𑀧𑀸𑀮𑀺, 𑀦𑀺𑀯𑀢𑁆𑀢𑀲𑁆𑀲𑀼, 𑀅𑀮𑀁 𑀢𑁂 𑀏𑀢𑁆𑀢𑀓𑀁 𑀚𑀻𑀯𑀺𑀓𑀸𑀬𑀸’’𑀢𑀺 𑀢𑀲𑁆𑀲 𑀅𑀤𑀁𑀲𑀼. 𑀲𑁄 𑀢𑁂𑀲𑀁 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀢𑁂𑀲𑀁 𑀆𑀡𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀝𑁆𑀞𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀢𑁂𑀲𑀁 𑀤𑁆𑀯𑀺𑀥𑀸 𑀚𑀸𑀢𑀓𑀸𑀮𑁂, 𑀯𑀦𑀁 𑀆𑀭𑁄𑀤𑀦𑀧𑁆𑀧𑀢𑁆𑀢𑀁 𑀯𑀺𑀬 𑀧𑀣𑀯𑀻𑀓𑀫𑁆𑀧𑀫𑀸𑀦𑀸𑀓𑀸𑀭𑀧𑁆𑀧𑀢𑁆𑀢𑀸 𑀯𑀺𑀬 𑀅𑀳𑁄𑀲𑀺. 𑀉𑀧𑀸𑀮𑀺 𑀓𑀧𑁆𑀧𑀓𑁄𑀧𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀘𑀡𑁆𑀟𑀸 𑀔𑁄 𑀲𑀸𑀓𑀺𑀬𑀸, ‘𑀇𑀫𑀺𑀦𑀸 𑀓𑀼𑀫𑀸𑀭𑀸 𑀦𑀺𑀧𑁆𑀧𑀸𑀢𑀺𑀢𑀸’𑀢𑀺 𑀖𑀸𑀢𑁂𑀬𑁆𑀬𑀼𑀫𑁆𑀧𑀺 𑀫𑀁. 𑀇𑀫𑁂 𑀳𑀺 𑀦𑀸𑀫 𑀲𑀓𑁆𑀬𑀓𑀼𑀫𑀸𑀭𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀇𑀫𑀸𑀦𑀺 𑀅𑀦𑀕𑁆𑀖𑀸𑀦𑀺 𑀆𑀪𑀭𑀡𑀸𑀦𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀦𑁆𑀢𑀺, 𑀓𑀺𑀫𑀗𑁆𑀕𑀁 ¶ ¶ 𑀧𑀦𑀸𑀳’’𑀦𑁆𑀢𑀺 𑀪𑀡𑁆𑀟𑀺𑀓𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀢𑀸𑀦𑀺 𑀆𑀪𑀭𑀡𑀸𑀦𑀺 𑀭𑀼𑀓𑁆𑀔𑁂 𑀮𑀕𑁆𑀕𑁂𑀢𑁆𑀯𑀸 ‘‘𑀅𑀢𑁆𑀣𑀺𑀓𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺 ‘‘𑀓𑀲𑁆𑀫𑀸 𑀦𑀺𑀯𑀢𑁆𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀢𑁂 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀫𑀬𑀁, 𑀪𑀦𑁆𑀢𑁂, 𑀲𑀸𑀓𑀺𑀬𑀸 𑀦𑀸𑀫 𑀫𑀸𑀦𑀦𑀺𑀲𑁆𑀲𑀺𑀢𑀸, 𑀅𑀬𑀁 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀸𑀭𑀓𑁄, 𑀇𑀫𑀁 𑀧𑀞𑀫𑀢𑀭𑀁 𑀧𑀩𑁆𑀩𑀸𑀚𑁂𑀣, 𑀫𑀬𑀫𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫, 𑀏𑀯𑀁 𑀦𑁄 𑀫𑀸𑀦𑁄 𑀦𑀺𑀫𑁆𑀫𑀸𑀦𑀸𑀬𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀧𑀞𑀫𑀢𑀭𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀼 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀢𑁂𑀦𑁂𑀯 𑀅𑀦𑁆𑀢𑀭𑀯𑀲𑁆𑀲𑁂𑀦 𑀢𑁂𑀯𑀺𑀚𑁆𑀚𑁄 𑀅𑀳𑁄𑀲𑀺. 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀫𑀳𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀁 (𑀅. 𑀦𑀺. 𑁮.𑁩𑁦) 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀪𑀕𑀼𑀢𑁆𑀣𑁂𑀭𑁄 𑀘 𑀓𑀺𑀫𑀺𑀮𑀢𑁆𑀣𑁂𑀭𑁄 𑀘 𑀅𑀧𑀭𑀪𑀸𑀕𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀤𑁂𑀯𑀤𑀢𑁆𑀢𑁄 𑀧𑁄𑀣𑀼𑀚𑁆𑀚𑀦𑀺𑀓𑀁 𑀇𑀤𑁆𑀥𑀺𑀁 𑀧𑀢𑁆𑀢𑁄.

𑀅𑀧𑀭𑀪𑀸𑀕𑁂 𑀲𑀢𑁆𑀣𑀭𑀺 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀦𑁆𑀢𑁂 𑀲𑀲𑀸𑀯𑀓𑀲𑀗𑁆𑀖𑀲𑁆𑀲 𑀢𑀣𑀸𑀕𑀢𑀲𑁆𑀲 𑀫𑀳𑀦𑁆𑀢𑁄 𑀮𑀸𑀪𑀲𑀓𑁆𑀓𑀸𑀭𑁄 𑀦𑀺𑀩𑁆𑀩𑀢𑁆𑀢𑀺. 𑀯𑀢𑁆𑀣𑀪𑁂𑀲𑀚𑁆𑀚𑀸𑀤𑀺𑀳𑀢𑁆𑀣𑀸 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀓𑀼𑀳𑀺𑀁 𑀲𑀢𑁆𑀣𑀸, 𑀓𑀼𑀳𑀺𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀪𑀤𑁆𑀤𑀺𑀬𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀪𑀕𑀼𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀓𑀺𑀫𑀺𑀮𑀢𑁆𑀣𑁂𑀭𑁄’’𑀢𑀺 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 ¶ 𑀑𑀮𑁄𑀓𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. ‘‘𑀤𑁂𑀯𑀤𑀢𑁆𑀢𑀢𑁆𑀣𑁂𑀭𑁄 𑀓𑀼𑀳𑀺𑀁 𑀦𑀺𑀲𑀺𑀦𑁆𑀦𑁄 𑀯𑀸, 𑀞𑀺𑀢𑁄 𑀯𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀫𑁆𑀧𑀺 𑀏𑀢𑁂𑀳𑀺 𑀲𑀤𑁆𑀥𑀺𑀜𑁆𑀜𑁂𑀯 𑀧𑀩𑁆𑀩𑀚𑀺𑀢𑁄, 𑀏𑀢𑁂𑀧𑀺 𑀔𑀢𑁆𑀢𑀺𑀬𑀧𑀩𑁆𑀩𑀚𑀺𑀢𑀸, 𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑀧𑀩𑁆𑀩𑀚𑀺𑀢𑁄, 𑀮𑀸𑀪𑀲𑀓𑁆𑀓𑀸𑀭𑀳𑀢𑁆𑀣𑀸 ¶ 𑀫𑀦𑀼𑀲𑁆𑀲𑀸 𑀏𑀢𑁂𑀬𑁂𑀯 𑀧𑀭𑀺𑀬𑁂𑀲𑀦𑁆𑀢𑀺, 𑀫𑀫 𑀦𑀸𑀫𑀁 𑀕𑀳𑁂𑀢𑀸𑀧𑀺 𑀦𑀢𑁆𑀣𑀺. 𑀓𑁂𑀦 𑀦𑀼 𑀔𑁄 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀁 𑀧𑀲𑀸𑀤𑁂𑀢𑁆𑀯𑀸 𑀫𑀫 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬’’𑀦𑁆𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀏𑀓𑀸𑀤𑀲𑀳𑀺 𑀦𑀳𑀼𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀦 𑀲𑀓𑁆𑀓𑀸 𑀏𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀯𑀺𑀢𑀼𑀁, 𑀓𑁄𑀲𑀮𑀭𑀜𑁆𑀜𑀸𑀧𑀺 𑀲𑀤𑁆𑀥𑀺𑀁 𑀦 𑀲𑀓𑁆𑀓𑀸 𑀪𑀯𑀺𑀢𑀼𑀁. 𑀅𑀬𑀁 𑀔𑁄 𑀧𑀦 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀓𑀲𑁆𑀲𑀘𑀺 𑀕𑀼𑀡𑀤𑁄𑀲𑁂 𑀦 𑀚𑀸𑀦𑀸𑀢𑀺, 𑀏𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀓𑁄𑀲𑀫𑁆𑀩𑀺𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑁂 𑀘𑀢𑀽𑀲𑀼 𑀳𑀢𑁆𑀣𑀧𑀸𑀤𑁂𑀲𑀼 𑀏𑀓𑀁 𑀕𑀻𑀯𑀸𑀬 𑀧𑀺𑀮𑀦𑁆𑀥𑀺𑀢𑁆𑀯𑀸 ¶ 𑀏𑀓𑀁 𑀲𑀻𑀲𑁂 𑀘𑀼𑀫𑁆𑀩𑀝𑀓𑀁 𑀓𑀢𑁆𑀯𑀸 𑀏𑀓𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀇𑀫𑀸𑀬 𑀅𑀳𑀺𑀫𑁂𑀔𑀮𑀸𑀬 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀉𑀘𑁆𑀙𑀗𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀦 𑀪𑀻𑀢𑁂𑀦 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀤𑁂𑀯𑀤𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀪𑀬𑀯𑀺𑀦𑁄𑀤𑀦𑀢𑁆𑀣𑀁 𑀢𑀁 𑀅𑀢𑁆𑀢𑀪𑀸𑀯𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀧𑀼𑀭𑀢𑁄 𑀞𑀢𑁆𑀯𑀸 𑀢𑀁 𑀧𑀲𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁄 𑀮𑀸𑀪𑀲𑀓𑁆𑀓𑀸𑀭𑀸𑀪𑀺𑀪𑀽𑀢𑁄 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀧𑀓𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀇𑀤𑁆𑀥𑀺𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑁂𑀴𑀼𑀯𑀦𑀯𑀺𑀳𑀸𑀭𑁂 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑁋 ‘‘𑀪𑀕𑀯𑀸, 𑀪𑀦𑁆𑀢𑁂, 𑀏𑀢𑀭𑀳𑀺 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄 𑀫𑀳𑀮𑁆𑀮𑀓𑁄, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀜𑁆𑀚𑀢𑀼, 𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀺, 𑀦𑀺𑀬𑁆𑀬𑀸𑀤𑁂𑀣 𑀫𑁂 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺 ¶ 𑀯𑀢𑁆𑀯𑀸 𑀲𑀢𑁆𑀣𑀸𑀭𑀸 𑀔𑁂𑀴𑀸𑀲𑀓𑀯𑀸𑀤𑁂𑀦 𑀅𑀧𑀲𑀸𑀤𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑁄 𑀅𑀦𑀢𑁆𑀢𑀫𑀦𑁄 𑀇𑀫𑀁 𑀧𑀞𑀫𑀁 𑀢𑀣𑀸𑀕𑀢𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣𑀲𑁆𑀲 𑀪𑀕𑀯𑀸 𑀭𑀸𑀚𑀕𑀳𑁂 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀸𑀭𑁂𑀲𑀺. 𑀲𑁄 ‘‘𑀧𑀭𑀺𑀘𑁆𑀘𑀢𑁆𑀢𑁄 𑀤𑀸𑀦𑀺 𑀅𑀳𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦, 𑀇𑀤𑀸𑀦𑀺𑀲𑁆𑀲 𑀅𑀦𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀚𑀸𑀢𑀲𑀢𑁆𑀢𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀧𑀼𑀩𑁆𑀩𑁂 𑀔𑁄, 𑀓𑀼𑀫𑀸𑀭, 𑀫𑀦𑀼𑀲𑁆𑀲𑀸 𑀤𑀻𑀖𑀸𑀬𑀼𑀓𑀸, 𑀏𑀢𑀭𑀳𑀺 𑀅𑀧𑁆𑀧𑀸𑀬𑀼𑀓𑀸. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀢𑁆𑀯𑀁 𑀓𑀼𑀫𑀸𑀭𑁄𑀯 𑀲𑀫𑀸𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸𑀲𑀺, 𑀢𑁂𑀦 𑀳𑀺 𑀢𑁆𑀯𑀁, 𑀓𑀼𑀫𑀸𑀭, 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸 𑀭𑀸𑀚𑀸 𑀳𑁄𑀳𑀺, 𑀅𑀳𑀁 𑀪𑀕𑀯𑀦𑁆𑀢𑀁 𑀳𑀦𑁆𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂 𑀢𑀣𑀸𑀕𑀢𑀲𑁆𑀲 𑀯𑀥𑀸𑀬 𑀧𑀼𑀭𑀺𑀲𑁂 𑀧𑀬𑁄𑀚𑁂𑀢𑁆𑀯𑀸 𑀢𑁂𑀲𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀦𑀺𑀯𑀢𑁆𑀢𑁂𑀲𑀼 𑀲𑀬𑀁 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸, ‘‘𑀅𑀳𑀫𑁂𑀯 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀺𑀮𑀁 𑀧𑀯𑀺𑀚𑁆𑀛𑀺𑀢𑁆𑀯𑀸 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀺𑀦𑀸𑀧𑀺 𑀉𑀧𑀸𑀬𑁂𑀦 𑀫𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦 𑀦𑀸𑀴𑀸𑀕𑀺𑀭𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀆𑀕𑀘𑁆𑀙𑀦𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀲𑀢𑁆𑀣𑀼 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀦𑀸𑀕𑀁 𑀤𑀫𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀉𑀧𑀸𑀲𑀓𑁂𑀳𑀺 𑀅𑀪𑀺𑀳𑀝𑀁 𑀫𑀳𑀸𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁 ¶ 𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑀸𑀢𑀸𑀦𑀁 𑀭𑀸𑀚𑀕𑀳𑀯𑀸𑀲𑀻𑀦𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁂 𑀚𑀸𑀢𑁂 ‘‘𑀅𑀳𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀳𑀸𑀕𑀼𑀡𑁄, 𑀢𑀣𑀸𑀭𑀽𑀧𑁂 𑀦𑀸𑀫 𑀳𑀢𑁆𑀣𑀺𑀦𑀸𑀕𑁂 𑀆𑀕𑀘𑁆𑀙𑀦𑁆𑀢𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 ¶ ¶ 𑀲𑀢𑁆𑀣𑀼 𑀧𑀼𑀭𑀢𑁄𑀯 𑀅𑀝𑁆𑀞𑀸𑀲𑀻’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀫𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀘𑀽𑀴𑀳𑀁𑀲 (𑀚𑀸. 𑁧.𑁧𑁫.𑁧𑁩𑁩 𑀆𑀤𑀬𑁄; 𑁨.𑁨𑁧.𑁧 𑀆𑀤𑀬𑁄) 𑁋 𑀫𑀳𑀸𑀳𑀁𑀲 (𑀚𑀸. 𑁨.𑁨𑁧.𑁮𑁯 𑀆𑀤𑀬𑁄) 𑁋 𑀓𑀓𑁆𑀓𑀝𑀓𑀚𑀸𑀢𑀓𑀸𑀦𑀺 (𑀚𑀸. 𑁧.𑁩.𑁪𑁯 𑀆𑀤𑀬𑁄) 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑀲𑁆𑀲𑀸𑀧𑀺 𑀓𑀫𑁆𑀫𑀁 𑀦𑁂𑀯 𑀧𑀸𑀓𑀝𑀁, 𑀢𑀣𑀸 𑀭𑀜𑁆𑀜𑁄 𑀫𑀸𑀭𑀸𑀧𑀺𑀢𑀢𑁆𑀢𑀸, 𑀦 𑀯𑀥𑀓𑀸𑀦𑀁 𑀧𑀬𑁄𑀚𑀺𑀢𑀢𑁆𑀢𑀸 𑀦 𑀲𑀺𑀮𑀸𑀬 𑀧𑀯𑀺𑀤𑁆𑀥𑀢𑁆𑀢𑀸 𑀧𑀸𑀓𑀝𑀁 𑀅𑀳𑁄𑀲𑀺, 𑀬𑀣𑀸 𑀦𑀸𑀴𑀸𑀕𑀺𑀭𑀺𑀳𑀢𑁆𑀣𑀺𑀦𑁄 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸. 𑀢𑀤𑀸 𑀳𑀺 𑀫𑀳𑀸𑀚𑀦𑁄 ‘‘𑀭𑀸𑀚𑀸𑀧𑀺 𑀤𑁂𑀯𑀤𑀢𑁆𑀢𑁂𑀦𑁂𑀯 𑀫𑀸𑀭𑀸𑀧𑀺𑀢𑁄, 𑀯𑀥𑀓𑁄𑀧𑀺 𑀧𑀬𑁄𑀚𑀺𑀢𑁄, 𑀲𑀺𑀮𑀸𑀧𑀺 𑀅𑀧𑀯𑀺𑀤𑁆𑀥𑀸. 𑀇𑀤𑀸𑀦𑀺 𑀧𑀦 𑀢𑁂𑀦 𑀦𑀸𑀴𑀸𑀕𑀺𑀭𑀺 𑀯𑀺𑀲𑁆𑀲𑀚𑁆𑀚𑀸𑀧𑀺𑀢𑁄, 𑀏𑀯𑀭𑀽𑀧𑀁 𑀦𑀸𑀫 𑀧𑀸𑀧𑀓𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀯𑀺𑀘𑀭𑀢𑀻’’𑀢𑀺 𑀓𑁄𑀮𑀸𑀳𑀮𑀫𑀓𑀸𑀲𑀺.

𑀭𑀸𑀚𑀸 𑀫𑀳𑀸𑀚𑀦𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀧𑀜𑁆𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀦𑀻𑀳𑀭𑀸𑀧𑁂𑀢𑁆𑀯𑀸 𑀦 𑀧𑀼𑀦 𑀢𑀲𑁆𑀲𑀽𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺, 𑀦𑀸𑀕𑀭𑀸𑀧𑀺𑀲𑁆𑀲 𑀓𑀼𑀮𑀁 𑀉𑀧𑀕𑀢𑀲𑁆𑀲 𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀦 𑀅𑀤𑀁𑀲𑀼. 𑀲𑁄 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑁄 𑀓𑁄𑀳𑀜𑁆𑀜𑁂𑀦 𑀚𑀻𑀯𑀺𑀢𑀼𑀓𑀸𑀫𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀺𑀢𑁆𑀯𑀸 𑀪𑀕𑀯𑀢𑁄 ‘‘𑀅𑀮𑀁, 𑀤𑁂𑀯𑀤𑀢𑁆𑀢, 𑀬𑁄 𑀇𑀘𑁆𑀙𑀢𑀺, 𑀲𑁄 𑀆𑀭𑀜𑁆𑀜𑀓𑁄 𑀳𑁄𑀢𑀽’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀓𑀲𑁆𑀲𑀸𑀯𑀼𑀲𑁄, 𑀯𑀘𑀦𑀁 𑀲𑁄𑀪𑀦𑀁, 𑀓𑀺𑀁 𑀢𑀣𑀸𑀕𑀢𑀲𑁆𑀲 𑀉𑀤𑀸𑀳𑀼 𑀫𑀫, 𑀅𑀳𑀜𑁆𑀳𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀏𑀯𑀁 𑀯𑀤𑀸𑀫𑀺, ‘‘𑀲𑀸𑀥𑀼, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀬𑀸𑀯𑀚𑀻𑀯𑀁 𑀆𑀭𑀜𑁆𑀜𑀓𑀸 𑀅𑀲𑁆𑀲𑀼, 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀧𑀁𑀲𑀼𑀓𑀽𑀮𑀺𑀓𑀸, 𑀭𑀼𑀓𑁆𑀔𑀫𑀽𑀮𑀺𑀓𑀸, 𑀫𑀘𑁆𑀙𑀫𑀁𑀲𑀁 𑀦 𑀔𑀸𑀤𑁂𑀬𑁆𑀬𑀼’’𑀦𑁆𑀢𑀺. ‘‘𑀬𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀯𑀘𑀦𑀁 ¶ 𑀲𑀼𑀢𑁆𑀯𑀸 𑀏𑀓𑀘𑁆𑀘𑁂 𑀦𑀯𑀓𑀧𑀩𑁆𑀩𑀚𑀺𑀢𑀸 𑀫𑀦𑁆𑀤𑀩𑀼𑀤𑁆𑀥𑀺𑀦𑁄 ‘‘𑀓𑀮𑁆𑀬𑀸𑀡𑀁 𑀤𑁂𑀯𑀤𑀢𑁆𑀢𑁄 𑀆𑀳, 𑀏𑀢𑁂𑀦 𑀲𑀤𑁆𑀥𑀺𑀁 𑀯𑀺𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀅𑀳𑁂𑀲𑀼𑀁. 𑀇𑀢𑀺 𑀲𑁄 𑀧𑀜𑁆𑀘𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀢𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺 𑀮𑀽𑀔𑀧𑁆𑀧𑀲𑀦𑁆𑀦𑀁 𑀚𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀺. 𑀲𑁄 𑀪𑀕𑀯𑀢𑀸, ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀤𑁂𑀯𑀤𑀢𑁆𑀢, 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀲𑀺 𑀘𑀓𑁆𑀓𑀪𑁂𑀤𑀸𑀬𑀸’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺 𑀯𑀢𑁆𑀯𑀸, ‘‘𑀕𑀭𑀼𑀓𑁄 𑀔𑁄, 𑀤𑁂𑀯𑀤𑀢𑁆𑀢, 𑀲𑀗𑁆𑀖𑀪𑁂𑀤𑁄’’𑀢𑀺𑀆𑀤𑀻𑀳𑀺 𑀑𑀯𑀤𑀺𑀢𑁄𑀧𑀺 𑀲𑀢𑁆𑀣𑀼 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀸𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸, 𑀅𑀜𑁆𑀜𑀢𑁆𑀭, 𑀪𑀺𑀓𑁆𑀔𑀼𑀲𑀗𑁆𑀖𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀣𑁂𑀭𑁄 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀢𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 𑀉𑀧𑁆𑀧𑀦𑁆𑀦𑀥𑀫𑁆𑀫𑀲𑀁𑀯𑁂𑀕𑁄 𑀳𑀼𑀢𑁆𑀯𑀸, ‘‘𑀤𑁂𑀯𑀤𑀢𑁆𑀢𑁄 ¶ 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀦𑀢𑁆𑀣𑀦𑀺𑀲𑁆𑀲𑀺𑀢𑀁 𑀅𑀢𑁆𑀢𑀦𑁄 𑀅𑀯𑀻𑀘𑀺𑀫𑁆𑀳𑀺 𑀧𑀘𑁆𑀘𑀦𑀓𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀯𑀺𑀢𑀓𑁆𑀓𑁂𑀢𑁆𑀯𑀸 𑁋

‘‘𑀲𑀼𑀓𑀭𑀸𑀦𑀺 ¶ 𑀅𑀲𑀸𑀥𑀽𑀦𑀺, 𑀅𑀢𑁆𑀢𑀦𑁄 𑀅𑀳𑀺𑀢𑀸𑀦𑀺 𑀘;

𑀬𑀁 𑀯𑁂 𑀳𑀺𑀢𑀜𑁆𑀘 𑀲𑀸𑀥𑀼𑀜𑁆𑀘, 𑀢𑀁 𑀯𑁂 𑀧𑀭𑀫𑀤𑀼𑀓𑁆𑀓𑀭’’𑀦𑁆𑀢𑀺. (𑀥. 𑀧. 𑁧𑁬𑁩) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀼, 𑀲𑀸𑀥𑀼 𑀧𑀸𑀧𑁂𑀦 𑀤𑀼𑀓𑁆𑀓𑀭𑀁;

𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀁, 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭’’𑀦𑁆𑀢𑀺. (𑀉𑀤𑀸. 𑁪𑁮; 𑀘𑀽𑀴𑀯. 𑁩𑁪𑁩);

𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀉𑀧𑁄𑀲𑀣𑀤𑀺𑀯𑀲𑁂 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸, ‘‘𑀬𑀲𑁆𑀲𑀺𑀫𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀔𑀫𑀦𑁆𑀢𑀺 ¶ , 𑀲𑁄 𑀲𑀮𑀸𑀓𑀁 𑀕𑀡𑁆𑀳𑀢𑀽’’𑀢𑀺 𑀯𑀢𑁆𑀯𑀸 𑀧𑀜𑁆𑀘𑀲𑀢𑁂𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑁂𑀳𑀺 𑀦𑀯𑀓𑁂𑀳𑀺 𑀅𑀧𑁆𑀧𑀓𑀢𑀜𑁆𑀜𑀽𑀳𑀺 𑀲𑀮𑀸𑀓𑀸𑀬 𑀕𑀳𑀺𑀢𑀸𑀬 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀕𑀬𑀸𑀲𑀻𑀲𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀢𑀢𑁆𑀣 𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀦𑀬𑀦𑀢𑁆𑀣𑀸𑀬 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀧𑁂𑀲𑁂𑀲𑀺. 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀘𑁂𑀯 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀘 𑀅𑀦𑀼𑀲𑀸𑀲𑀦𑁆𑀢𑀸 𑀢𑁂 𑀅𑀫𑀢𑀁 𑀧𑀸𑀬𑁂𑀢𑁆𑀯𑀸 𑀆𑀤𑀸𑀬 𑀆𑀓𑀸𑀲𑁂𑀦 𑀆𑀕𑀫𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄𑀧𑀺 𑀔𑁄 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀦𑀻𑀢𑀸 𑀢𑁂 𑀪𑀺𑀓𑁆𑀔𑀽 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺, 𑀦𑀦𑀼 𑀢𑁆𑀯𑀁 𑀫𑀬𑀸 𑀯𑀼𑀢𑁆𑀢𑁄 ‘𑀫𑀸, 𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀯𑀺𑀲𑁆𑀲𑀸𑀲𑀻’𑀢𑀺. 𑀧𑀸𑀧𑀺𑀘𑁆𑀙𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺 𑀯𑀢𑁆𑀯𑀸 𑀚𑀡𑁆𑀡𑀼𑀓𑁂𑀦 𑀳𑀤𑀬𑀫𑀚𑁆𑀛𑁂 𑀧𑀳𑀭𑀺, 𑀢𑀲𑁆𑀲 𑀢𑀢𑁆𑀣𑁂𑀯 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀆𑀬𑀲𑁆𑀫𑀦𑁆𑀢𑀁 𑀧𑀦 𑀲𑀸𑀭𑀺𑀧𑀼𑀢𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀆𑀓𑀸𑀲𑁂𑀦 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀕𑀫𑀦𑀓𑀸𑀮𑁂 𑀅𑀢𑁆𑀢𑀤𑀼𑀢𑀺𑀬𑁄 𑀕𑀢𑁄, 𑀇𑀤𑀸𑀦𑀺 𑀫𑀳𑀸𑀧𑀭𑀺𑀯𑀸𑀭𑁄 𑀆𑀕𑀘𑁆𑀙𑀦𑁆𑀢𑁄 𑀲𑁄𑀪𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑀸𑀭𑀺𑀧𑀼𑀢𑁆𑀢𑁄 𑀲𑁄𑀪𑀢𑀺, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀲𑁄𑀪𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑁋

‘‘𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄, 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀦𑀁;

𑀮𑀓𑁆𑀔𑀡𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀜𑀸𑀢𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀅𑀣 𑀧𑀲𑁆𑀲𑀲𑀺𑀫𑀁 𑀓𑀸𑀴𑀁, 𑀲𑀼𑀯𑀺𑀳𑀻𑀦𑀁𑀯 𑀜𑀸𑀢𑀺𑀪𑀻’’𑀢𑀺. (𑀚𑀸. 𑁧.𑁧.𑁧𑁧) 𑁋

𑀇𑀤𑀁 ¶ ¶ 𑀚𑀸𑀢𑀓𑀁 𑀓𑀣𑁂𑀲𑀺. 𑀧𑀼𑀦 𑀪𑀺𑀓𑁆𑀔𑀽𑀳𑀺, ‘‘𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀓𑀺𑀭 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀦𑀼𑀓𑀺𑀭𑀺𑀬𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀦 ¶ , 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀫 𑀅𑀦𑀼𑀓𑀺𑀭𑀺𑀬𑀁 𑀓𑀸𑀢𑀼𑀁 𑀯𑀸𑀬𑀫𑀺, 𑀦 𑀧𑀦 𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑁋

‘‘𑀅𑀧𑀺 𑀯𑀻𑀭𑀓 𑀧𑀲𑁆𑀲𑁂𑀲𑀺, 𑀲𑀓𑀼𑀡𑀁 𑀫𑀜𑁆𑀚𑀼𑀪𑀸𑀡𑀓𑀁;

𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲𑀁, 𑀧𑀢𑀺𑀁 𑀫𑀬𑁆𑀳𑀁 𑀲𑀯𑀺𑀝𑁆𑀞𑀓𑀁.

‘‘𑀉𑀤𑀓𑀣𑀮𑀘𑀭𑀲𑁆𑀲 𑀧𑀓𑁆𑀔𑀺𑀦𑁄,

𑀦𑀺𑀘𑁆𑀘𑀁 𑀆𑀫𑀓𑀫𑀘𑁆𑀙𑀪𑁄𑀚𑀺𑀦𑁄;

𑀢𑀲𑁆𑀲𑀸𑀦𑀼𑀓𑀭𑀁 𑀲𑀯𑀺𑀝𑁆𑀞𑀓𑁄,

𑀲𑁂𑀯𑀸𑀮𑁂 𑀧𑀮𑀺𑀕𑀼𑀡𑁆𑀞𑀺𑀢𑁄 𑀫𑀢𑁄’’𑀢𑀺. (𑀚𑀸. 𑁧.𑁨.𑁧𑁦𑁭-𑁧𑁦𑁮) 𑁋

𑀆𑀤𑀺𑀦𑀸 𑀚𑀸𑀢𑀓𑀁 𑀯𑀢𑁆𑀯𑀸 𑀅𑀧𑀭𑀸𑀧𑀭𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀢𑀣𑀸𑀦𑀼𑀭𑀽𑀧𑀫𑁂𑀯 𑀓𑀣𑀁 𑀆𑀭𑀩𑁆𑀪 𑁋

‘‘𑀅𑀘𑀸𑀭𑀺 𑀯𑀢𑀸𑀬𑀁 𑀯𑀺𑀢𑀼𑀤𑀁 𑀯𑀦𑀸𑀦𑀺,

𑀓𑀝𑁆𑀞𑀗𑁆𑀕𑀭𑀼𑀓𑁆𑀔𑁂𑀲𑀼 𑀅𑀲𑀸𑀭𑀓𑁂𑀲𑀼;

𑀅𑀣𑀸𑀲𑀤𑀸 𑀔𑀤𑀺𑀭𑀁 𑀚𑀸𑀢𑀲𑀸𑀭𑀁,

𑀬𑀢𑁆𑀣𑀩𑁆𑀪𑀺𑀤𑀸 𑀕𑀭𑀼𑀴𑁄 𑀉𑀢𑁆𑀢𑀫𑀗𑁆𑀕’’𑀦𑁆𑀢𑀺. (𑀚𑀸. 𑁧.𑁨.𑁧𑁨𑁦);

‘‘𑀮𑀲𑀻 ¶ 𑀘 𑀢𑁂 𑀦𑀺𑀧𑁆𑀨𑀮𑀺𑀓𑀸, 𑀫𑀢𑁆𑀣𑀓𑁄 𑀘 𑀧𑀤𑀸𑀮𑀺𑀢𑁄;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀅𑀚𑁆𑀚 𑀔𑁄 𑀢𑁆𑀯𑀁 𑀯𑀺𑀭𑁄𑀘𑀲𑀻’’𑀢𑀺. (𑀚𑀸. 𑁧.𑁧.𑁧𑁪𑁩) 𑁋

𑀏𑀯𑀫𑀸𑀤𑀻𑀦𑀺 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀧𑀼𑀦 ‘‘𑀅𑀓𑀢𑀜𑁆𑀜𑀽 𑀤𑁂𑀯𑀤𑀢𑁆𑀢𑁄’’𑀢𑀺 𑀓𑀣𑀁 𑀆𑀭𑀩𑁆𑀪 𑁋

‘‘𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀁, 𑀬𑀁 𑀩𑀮𑀁 𑀅𑀳𑀼𑀯𑀫𑁆𑀳𑀲𑁂;

𑀫𑀺𑀕𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀅𑀧𑀺 𑀓𑀺𑀜𑁆𑀘𑀺 𑀮𑀪𑀸𑀫𑀲𑁂.

‘‘𑀫𑀫 𑀮𑁄𑀳𑀺𑀢𑀪𑀓𑁆𑀔𑀲𑁆𑀲, 𑀦𑀺𑀘𑁆𑀘𑀁 𑀮𑀼𑀤𑁆𑀤𑀸𑀦𑀺 𑀓𑀼𑀩𑁆𑀩𑀢𑁄;

𑀤𑀦𑁆𑀢𑀦𑁆𑀢𑀭𑀕𑀢𑁄 𑀲𑀦𑁆𑀢𑁄, 𑀢𑀁 𑀩𑀳𑀼𑀁 𑀬𑀫𑁆𑀧𑀺 𑀚𑀻𑀯𑀲𑀻’’𑀢𑀺. (𑀚𑀸. 𑁧.𑁪.𑁨𑁯-𑁩𑁦) 𑁋

𑀆𑀤𑀻𑀦𑀺 ¶ 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀧𑀼𑀦 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀫𑀲𑁆𑀲 𑀆𑀭𑀩𑁆𑀪 𑁋

‘‘𑀜𑀸𑀢𑀫𑁂𑀢𑀁 𑀓𑀼𑀭𑀼𑀗𑁆𑀕𑀲𑁆𑀲, 𑀬𑀁 𑀢𑁆𑀯𑀁 𑀲𑁂𑀧𑀡𑁆𑀡𑀺 𑀲𑀺𑀬𑁆𑀬𑀲𑀺;

𑀅𑀜𑁆𑀜𑀁 𑀲𑁂𑀧𑀡𑁆𑀡𑀺 𑀕𑀘𑁆𑀙𑀸𑀫𑀺, 𑀦 𑀫𑁂 𑀢𑁂 𑀭𑀼𑀘𑁆𑀘𑀢𑁂 𑀨𑀮’’𑀦𑁆𑀢𑀺. (𑀚𑀸. 𑁧.𑁧.𑁨𑁧) 𑁋

𑀆𑀤𑀻𑀦𑀺 ¶ 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀧𑀼𑀦𑀤𑀺𑀯𑀲𑁂 ‘‘𑀉𑀪𑀢𑁄 𑀧𑀭𑀺𑀳𑀻𑀦𑁄 𑀤𑁂𑀯𑀤𑀢𑁆𑀢𑁄 𑀮𑀸𑀪𑀲𑀓𑁆𑀓𑀸𑀭𑀢𑁄 𑀘 𑀲𑀸𑀫𑀜𑁆𑀜𑀢𑁄 𑀘𑀸’’𑀢𑀺 𑀓𑀣𑀸𑀲𑀼 𑀧𑀯𑀢𑁆𑀢𑀫𑀸𑀦𑀸𑀲𑀼 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀧𑀭𑀺𑀳𑀻𑀦𑁄, 𑀧𑀼𑀩𑁆𑀩𑁂𑀧𑁂𑀲 𑀧𑀭𑀺𑀳𑀻𑀦𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑁋

‘‘𑀅𑀓𑁆𑀔𑀻 ¶ 𑀪𑀺𑀦𑁆𑀦𑀸 𑀧𑀝𑁄 𑀦𑀝𑁆𑀞𑁄, 𑀲𑀔𑀺𑀕𑁂𑀳𑁂 𑀘 𑀪𑀡𑁆𑀟𑀦𑀁;

𑀉𑀪𑀢𑁄 𑀧𑀤𑀼𑀝𑁆𑀞𑀸 𑀓𑀫𑁆𑀫𑀦𑁆𑀢𑀸, 𑀉𑀤𑀓𑀫𑁆𑀳𑀺 𑀣𑀮𑀫𑁆𑀳𑀺 𑀘𑀸’’𑀢𑀺. (𑀚𑀸. 𑁧.𑁧.𑁧𑁩𑁯) 𑁋

𑀆𑀤𑀻𑀦𑀺 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀏𑀯𑀁 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁄𑀯 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀩𑀳𑀽𑀦𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀭𑀸𑀚𑀕𑀳𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀤𑁂𑀯𑀤𑀢𑁆𑀢𑁄𑀧𑀺 𑀔𑁄 𑀦𑀯 𑀫𑀸𑀲𑁂 𑀕𑀺𑀮𑀸𑀦𑁄 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀆𑀳 𑁋 ‘‘𑀅𑀳𑀁 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑁄, 𑀢𑀁 𑀫𑁂 𑀤𑀲𑁆𑀲𑁂𑀣𑀸’’𑀢𑀺. ‘‘𑀢𑁆𑀯𑀁 𑀲𑀫𑀢𑁆𑀣𑀓𑀸𑀮𑁂 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀯𑁂𑀭𑀻 𑀳𑀼𑀢𑁆𑀯𑀸 𑀅𑀘𑀭𑀺, 𑀦 𑀫𑀬𑀁 𑀢𑀢𑁆𑀣 𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀫𑀸 𑀫𑀁 𑀦𑀸𑀲𑁂𑀣, 𑀫𑀬𑀸 𑀲𑀢𑁆𑀣𑀭𑀺 𑀆𑀖𑀸𑀢𑁄 𑀓𑀢𑁄, 𑀲𑀢𑁆𑀣𑀼 𑀧𑀦 𑀫𑀬𑀺 𑀓𑁂𑀲𑀕𑁆𑀕𑀫𑀢𑁆𑀢𑁄𑀧𑀺 𑀆𑀖𑀸𑀢𑁄 𑀦𑀢𑁆𑀣𑀺’’. 𑀲𑁄 𑀳𑀺 𑀪𑀕𑀯𑀸 𑁋

‘‘𑀯𑀥𑀓𑁂 𑀤𑁂𑀯𑀤𑀢𑁆𑀢𑀫𑁆𑀳𑀺, 𑀘𑁄𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑀓𑁂;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘, 𑀲𑀩𑁆𑀩𑀢𑁆𑀣 𑀲𑀫𑀫𑀸𑀦𑀲𑁄’’𑀢𑀺. (𑀅𑀧. 𑀣𑁂𑀭 𑁧.𑁧.𑁫𑁮𑁫; 𑀫𑀺. 𑀧. 𑁬.𑁬.𑁫) 𑁋

‘‘𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀅𑀣 𑀦𑀁 𑀢𑁂 𑀫𑀜𑁆𑀘𑀓𑁂𑀦𑀸𑀤𑀸𑀬 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀲𑁆𑀲 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀓𑀺𑀭 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀘𑁆𑀙𑀢𑀻’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀲𑁄 𑀢𑁂𑀦𑀢𑁆𑀢𑀪𑀸𑀯𑁂𑀦 𑀫𑀁 𑀧𑀲𑁆𑀲𑀺𑀢𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺. 𑀤𑁂𑀯𑀤𑀢𑁆𑀢𑁄 𑀓𑀺𑀭 𑀧𑀜𑁆𑀘𑀦𑁆𑀦𑀁 𑀯𑀢𑁆𑀣𑀽𑀦𑀁 𑀆𑀬𑀸𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀩𑀼𑀤𑁆𑀥𑀁 𑀤𑀝𑁆𑀞𑀼𑀁 𑀦 𑀮𑀪𑀢𑀺, 𑀅𑀬𑀁 ¶ 𑀥𑀫𑁆𑀫𑀢𑀸. ‘‘𑀅𑀲𑀼𑀓𑀝𑁆𑀞𑀸𑀦𑀜𑁆𑀘 𑀅𑀲𑀼𑀓𑀝𑁆𑀞𑀸𑀦𑀜𑁆𑀘 𑀆𑀕𑀢𑁄, 𑀪𑀦𑁆𑀢𑁂’’𑀢𑀺. ‘‘𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀭𑁄𑀢𑀼, 𑀦 𑀲𑁄 𑀫𑀁 𑀧𑀲𑁆𑀲𑀺𑀢𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺. ‘‘𑀪𑀦𑁆𑀢𑁂, 𑀇𑀢𑁄 𑀬𑁄𑀚𑀦𑀫𑀢𑁆𑀢𑀁 𑀆𑀕𑀢𑁄, 𑀅𑀟𑁆𑀠𑀬𑁄𑀚𑀦𑀁, 𑀕𑀸𑀯𑀼𑀢𑀁, 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀻𑀲𑀫𑀻𑀧𑀁 𑀆𑀕𑀢𑁄, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂𑀧𑀺 𑀅𑀦𑁆𑀢𑁄𑀚𑁂𑀢𑀯𑀦𑀁 𑀧𑀯𑀺𑀲𑀢𑀺, 𑀦𑁂𑀯 𑀫𑀁 𑀧𑀲𑁆𑀲𑀺𑀢𑀼𑀁 ¶ 𑀮𑀪𑀺𑀲𑁆𑀲𑀢𑀻’’𑀢𑀺. 𑀤𑁂𑀯𑀤𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀻𑀢𑀻𑀭𑁂 𑀫𑀜𑁆𑀘𑀁 𑀑𑀢𑀸𑀭𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀦𑁆𑀳𑀸𑀬𑀺𑀢𑀼𑀁 𑀑𑀢𑀭𑀺𑀁𑀲𑀼. 𑀤𑁂𑀯𑀤𑀢𑁆𑀢𑁄𑀧𑀺 𑀔𑁄 𑀫𑀜𑁆𑀘𑀢𑁄 𑀯𑀼𑀝𑁆𑀞𑀸𑀬 𑀉𑀪𑁄 𑀧𑀸𑀤𑁂 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀧𑀸𑀤𑀸 𑀧𑀣𑀯𑀺𑀁 𑀧𑀯𑀺𑀲𑀺𑀁𑀲𑀼 ¶ . 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀬𑀸𑀯 𑀕𑁄𑀧𑁆𑀨𑀓𑀸, 𑀬𑀸𑀯 𑀚𑀡𑁆𑀡𑀼𑀓𑀸, 𑀬𑀸𑀯 𑀓𑀝𑀺𑀢𑁄, 𑀬𑀸𑀯 𑀣𑀦𑀢𑁄, 𑀬𑀸𑀯 𑀕𑀻𑀯𑀢𑁄 𑀧𑀯𑀺𑀲𑀺𑀢𑁆𑀯𑀸 𑀳𑀦𑀼𑀓𑀝𑁆𑀞𑀺𑀓𑀲𑁆𑀲 𑀪𑀽𑀫𑀺𑀬𑀁 𑀧𑀯𑀺𑀝𑁆𑀞𑀓𑀸𑀮𑁂 𑁋

‘‘𑀇𑀫𑁂𑀳𑀺 𑀅𑀝𑁆𑀞𑀻𑀳𑀺 𑀢𑀫𑀕𑁆𑀕𑀧𑀼𑀕𑁆𑀕𑀮𑀁,

𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀤𑀫𑁆𑀫𑀲𑀸𑀭𑀣𑀺𑀁;

𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁,

𑀧𑀸𑀡𑁂𑀳𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀫𑀻’’𑀢𑀺. (𑀫𑀺. 𑀧. 𑁪.𑁧.𑁩) 𑁋

𑀇𑀫𑀁 𑀕𑀸𑀣𑀫𑀸𑀳. 𑀇𑀤𑀁 𑀓𑀺𑀭 𑀞𑀸𑀦𑀁 𑀤𑀺𑀲𑁆𑀯𑀸 𑀢𑀣𑀸𑀕𑀢𑁄 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑀘𑁂 𑀳𑀺 𑀦 𑀲𑁄 𑀧𑀩𑁆𑀩𑀚𑀺𑀲𑁆𑀲, 𑀕𑀺𑀳𑀻 𑀳𑀼𑀢𑁆𑀯𑀸 𑀓𑀫𑁆𑀫𑀜𑁆𑀘 𑀪𑀸𑀭𑀺𑀬𑀁 𑀅𑀓𑀭𑀺𑀲𑁆𑀲, 𑀆𑀬𑀢𑀺𑀁 𑀪𑀯𑀦𑀺𑀲𑁆𑀲𑀭𑀡𑀧𑀘𑁆𑀘𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲, 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀫𑁆𑀫𑀁 𑀪𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀆𑀬𑀢𑀺𑀁 𑀪𑀯𑀦𑀺𑀲𑁆𑀲𑀭𑀡𑀧𑀘𑁆𑀘𑀬𑀁 𑀓𑀸𑀢𑀼𑀁 ¶ 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀢𑀁 𑀲𑀢𑁆𑀣𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀳𑀺 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀅𑀝𑁆𑀞𑀺𑀲𑁆𑀲𑀭𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀘𑁆𑀘𑀮𑁂 𑀩𑀼𑀤𑁆𑀥𑁂 𑀅𑀧𑀭𑀚𑁆𑀛𑀪𑀸𑀯𑁂𑀦 𑀧𑀦 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀧𑀘𑁆𑀘𑀢𑀽𑀢𑀺 𑀬𑁄𑀚𑀦𑀲𑀢𑀺𑀓𑁂 𑀅𑀦𑁆𑀢𑁄 𑀅𑀯𑀻𑀘𑀺𑀫𑁆𑀳𑀺 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀫𑁂𑀯𑀲𑁆𑀲 𑀲𑀭𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀻𑀲𑀁 𑀬𑀸𑀯 𑀓𑀡𑁆𑀡𑀲𑀓𑁆𑀔𑀮𑀺𑀢𑁄 𑀉𑀧𑀭𑀺 𑀅𑀬𑀓𑀧𑀮𑁆𑀮𑀁 𑀧𑀸𑀯𑀺𑀲𑀺, 𑀧𑀸𑀤𑀸 𑀬𑀸𑀯 𑀕𑁄𑀧𑁆𑀨𑀓𑀸 𑀳𑁂𑀝𑁆𑀞𑀸 𑀅𑀬𑀧𑀣𑀯𑀺𑀬𑀁 𑀧𑀯𑀺𑀝𑁆𑀞𑀸, 𑀫𑀳𑀸𑀢𑀸𑀮𑀓𑁆𑀔𑀦𑁆𑀥𑀧𑀭𑀺𑀫𑀸𑀡𑀁 𑀅𑀬𑀲𑀽𑀮𑀁 𑀧𑀘𑁆𑀙𑀺𑀫𑀪𑀺𑀢𑁆𑀢𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀫𑀚𑁆𑀛𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀺𑀫𑀪𑀺𑀢𑁆𑀢𑀺𑀁 𑀧𑀸𑀯𑀺𑀲𑀺, 𑀅𑀧𑀭𑀁 𑀤𑀓𑁆𑀔𑀺𑀡𑀪𑀺𑀢𑁆𑀢𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸𑀫𑀧𑀲𑁆𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀢𑁆𑀢𑀭𑀪𑀺𑀢𑁆𑀢𑀺𑀁 𑀧𑀸𑀯𑀺𑀲𑀺, 𑀅𑀧𑀭𑀁 𑀉𑀧𑀭𑀺 𑀓𑀧𑀮𑁆𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀢𑁆𑀣𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀥𑁄𑀪𑀸𑀕𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀬𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀏𑀯𑀁 𑀲𑁄 𑀢𑀢𑁆𑀣 𑀦𑀺𑀘𑁆𑀘𑀮𑁄𑀯 𑀧𑀘𑁆𑀘𑀺.

𑀪𑀺𑀓𑁆𑀔𑀽 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀤𑁂𑀯𑀤𑀢𑁆𑀢𑁄 𑀆𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀅𑀮𑀪𑀺𑀢𑁆𑀯𑀸𑀯 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺, 𑀧𑀼𑀩𑁆𑀩𑁂𑀧𑀺 𑀧𑀯𑀺𑀝𑁆𑀞𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀭𑀸𑀚𑀓𑀸𑀮𑁂 𑀫𑀕𑁆𑀕𑀫𑀽𑀴𑁆𑀳𑀁 𑀧𑀼𑀭𑀺𑀲𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀔𑁂𑀫𑀦𑁆𑀢𑀁 𑀧𑀸𑀧𑀺𑀢𑀲𑁆𑀲 𑀧𑀼𑀦 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀕𑀝𑁆𑀞𑀸𑀦𑁂 𑀫𑀚𑁆𑀛𑀺𑀫𑀝𑁆𑀞𑀸𑀦𑁂 ¶ 𑀫𑀽𑀮𑁂𑀳𑀺 𑀏𑀯𑀁 𑀤𑀦𑁆𑀢𑁂 𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀓𑁆𑀔𑀼𑀧𑀣𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀢𑀲𑁆𑀲 𑀧𑀣𑀯𑀺𑀁 𑀧𑀯𑀺𑀝𑁆𑀞𑀪𑀸𑀯𑀁 𑀤𑀻𑀧𑁂𑀢𑀼𑀁 𑁋

‘‘𑀅𑀓𑀢𑀜𑁆𑀜𑀼𑀲𑁆𑀲 ¶ ¶ 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀯𑀺𑀯𑀭𑀤𑀲𑁆𑀲𑀺𑀦𑁄;

𑀲𑀩𑁆𑀩𑀁 𑀘𑁂 𑀧𑀣𑀯𑀺𑀁 𑀤𑀚𑁆𑀚𑀸, 𑀦𑁂𑀯 𑀦𑀁 𑀅𑀪𑀺𑀭𑀸𑀥𑀬𑁂’’𑀢𑀺. (𑀚𑀸. 𑁧.𑁧.𑁭𑁨; 𑁧.𑁯.𑁧𑁦𑁭) 𑁋

𑀇𑀤𑀁 𑀚𑀸𑀢𑀓𑀁 𑀓𑀣𑁂𑀢𑁆𑀯𑀸 𑀧𑀼𑀦𑀧𑀺 𑀢𑀣𑁂𑀯 𑀓𑀣𑀸𑀬 𑀲𑀫𑀼𑀝𑁆𑀞𑀺𑀢𑀸𑀬 𑀔𑀦𑁆𑀢𑀺𑀯𑀸𑀤𑀺𑀪𑀽𑀢𑁂 𑀅𑀢𑁆𑀢𑀦𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 𑀓𑀮𑀸𑀩𑀼𑀭𑀸𑀚𑀪𑀽𑀢𑀲𑁆𑀲 𑀢𑀲𑁆𑀲 𑀧𑀣𑀯𑀺𑀁 𑀧𑀯𑀺𑀝𑁆𑀞𑀪𑀸𑀯𑀁 𑀤𑀻𑀧𑁂𑀢𑀼𑀁 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓𑀜𑁆𑀘 (𑀚𑀸. 𑁧.𑁪.𑁪𑁯 𑀆𑀤𑀬𑁄), 𑀘𑀽𑀴𑀥𑀫𑁆𑀫𑀧𑀸𑀮𑀪𑀽𑀢𑁂 𑀅𑀢𑁆𑀢𑀦𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 𑀫𑀳𑀸𑀧𑀢𑀸𑀧𑀭𑀸𑀚𑀪𑀽𑀢𑀲𑁆𑀲 𑀢𑀲𑁆𑀲 𑀧𑀣𑀯𑀺𑀁 𑀧𑀯𑀺𑀝𑁆𑀞𑀪𑀸𑀯𑀁 𑀤𑀻𑀧𑁂𑀢𑀼𑀁 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀜𑁆𑀘 (𑀚𑀸. 𑁧.𑁫.𑁪𑁪 𑀆𑀤𑀬𑁄) 𑀓𑀣𑁂𑀲𑀺.

𑀧𑀣𑀯𑀺𑀁 𑀧𑀯𑀺𑀝𑁆𑀞𑁂 𑀧𑀦 𑀤𑁂𑀯𑀤𑀢𑁆𑀢𑁂 𑀫𑀳𑀸𑀚𑀦𑁄 𑀳𑀝𑁆𑀞𑀢𑀼𑀝𑁆𑀞𑁄 𑀥𑀚𑀧𑀝𑀸𑀓𑀓𑀤𑀮𑀺𑀬𑁄 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀞𑀧𑁂𑀢𑁆𑀯𑀸 ‘‘𑀮𑀸𑀪𑀸 𑀯𑀢 𑀦𑁄’’𑀢𑀺 𑀫𑀳𑀦𑁆𑀢𑀁 𑀙𑀡𑀁 𑀅𑀦𑀼𑀪𑁄𑀢𑀺. 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁂 𑀫𑀢𑁂 𑀫𑀳𑀸𑀚𑀦𑁄 𑀢𑀼𑀲𑁆𑀲𑀢𑀺, 𑀧𑀼𑀩𑁆𑀩𑁂𑀧𑀺 𑀢𑀼𑀲𑁆𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀚𑀦𑀲𑁆𑀲 𑀅𑀧𑁆𑀧𑀺𑀬𑁂 𑀘𑀡𑁆𑀟𑁂 𑀨𑀭𑀼𑀲𑁂 𑀩𑀸𑀭𑀸𑀡𑀲𑀺𑀬𑀁 𑀧𑀺𑀗𑁆𑀕𑀮𑀭𑀜𑁆𑀜𑁂 𑀦𑀸𑀫 𑀫𑀢𑁂 𑀫𑀳𑀸𑀚𑀦𑀲𑁆𑀲 𑀢𑀼𑀝𑁆𑀞𑀪𑀸𑀯𑀁 𑀤𑀻𑀧𑁂𑀢𑀼𑀁 𑁋

‘‘𑀲𑀩𑁆𑀩𑁄 𑀚𑀦𑁄 𑀳𑀺𑀁𑀲𑀺𑀢𑁄 𑀧𑀺𑀗𑁆𑀕𑀮𑁂𑀦,

𑀢𑀲𑁆𑀫𑀺𑀁 𑀫𑀢𑁂 𑀧𑀘𑁆𑀘𑀬𑀸 𑀯𑁂𑀤𑀬𑀦𑁆𑀢𑀺;

𑀧𑀺𑀬𑁄 𑀦𑀼 𑀢𑁂 𑀆𑀲𑀺 𑀅𑀓𑀡𑁆𑀳𑀦𑁂𑀢𑁆𑀢𑁄,

𑀓𑀲𑁆𑀫𑀸 𑀢𑀼𑀯𑀁 𑀭𑁄𑀤𑀲𑀺 𑀤𑁆𑀯𑀸𑀭𑀧𑀸𑀮.

‘‘𑀦 ¶ 𑀫𑁂 𑀧𑀺𑀬𑁄 𑀆𑀲𑀺 𑀅𑀓𑀡𑁆𑀳𑀦𑁂𑀢𑁆𑀢𑁄,

𑀪𑀸𑀬𑀸𑀫𑀺 𑀧𑀘𑁆𑀘𑀸𑀕𑀫𑀦𑀸𑀬 𑀢𑀲𑁆𑀲;

𑀇𑀢𑁄 𑀕𑀢𑁄 𑀳𑀺𑀁𑀲𑁂𑀬𑁆𑀬 𑀫𑀘𑁆𑀘𑀼𑀭𑀸𑀚𑀁,

𑀲𑁄 𑀳𑀺𑀁𑀲𑀺𑀢𑁄 𑀆𑀦𑁂𑀬𑁆𑀬 𑀧𑀼𑀦 𑀇𑀥𑀸’’𑀢𑀺. (𑀚𑀸. 𑁧.𑁨.𑁧𑁭𑁯-𑁧𑁮𑁦) 𑁋

𑀇𑀤𑀁 𑀧𑀺𑀗𑁆𑀕𑀮𑀚𑀸𑀢𑀓𑀁 𑀓𑀣𑁂𑀲𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺? ‘‘𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂, 𑀪𑀺𑀓𑁆𑀔𑀯𑁂’’𑀢𑀺. ‘‘𑀪𑀦𑁆𑀢𑁂, 𑀇𑀥 𑀢𑀧𑁆𑀧𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀢𑀧𑁆𑀧𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀆𑀫, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑀸 𑀯𑀸 𑀳𑁄𑀦𑁆𑀢𑀼 𑀕𑀳𑀝𑁆𑀞𑀸 𑀯𑀸, 𑀧𑀫𑀸𑀤𑀯𑀺𑀳𑀸𑀭𑀺𑀦𑁄 𑀉𑀪𑀬𑀢𑁆𑀣 𑀢𑀧𑁆𑀧𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁭.

‘‘𑀇𑀥 ¶ ¶ 𑀢𑀧𑁆𑀧𑀢𑀺 𑀧𑁂𑀘𑁆𑀘 𑀢𑀧𑁆𑀧𑀢𑀺, 𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀢𑀧𑁆𑀧𑀢𑀺;

𑀧𑀸𑀧𑀁 𑀫𑁂 𑀓𑀢𑀦𑁆𑀢𑀺 𑀢𑀧𑁆𑀧𑀢𑀺, 𑀪𑀺𑀬𑁆𑀬𑁄 𑀢𑀧𑁆𑀧𑀢𑀺 𑀤𑀼𑀕𑁆𑀕𑀢𑀺𑀁 𑀕𑀢𑁄’’𑀢𑀺.

𑀢𑀢𑁆𑀣 𑀇𑀥 𑀢𑀧𑁆𑀧𑀢𑀻𑀢𑀺 𑀇𑀥 𑀓𑀫𑁆𑀫𑀢𑀧𑁆𑀧𑀦𑁂𑀦 𑀤𑁄𑀫𑀦𑀲𑁆𑀲𑀫𑀢𑁆𑀢𑁂𑀦 𑀢𑀧𑁆𑀧𑀢𑀺. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑁂 𑀧𑀦 𑀯𑀺𑀧𑀸𑀓𑀢𑀧𑁆𑀧𑀦𑁂𑀦 𑀅𑀢𑀺𑀤𑀸𑀭𑀼𑀡𑁂𑀦 𑀅𑀧𑀸𑀬𑀤𑀼𑀓𑁆𑀔𑁂𑀦 𑀢𑀧𑁆𑀧𑀢𑀺. 𑀧𑀸𑀧𑀓𑀸𑀭𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀧𑀸𑀧𑀲𑁆𑀲 𑀓𑀢𑁆𑀢𑀸. 𑀉𑀪𑀬𑀢𑁆𑀣𑀸𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀢𑀧𑁆𑀧𑀦𑁂𑀦 𑀉𑀪𑀬𑀢𑁆𑀣 𑀢𑀧𑁆𑀧𑀢𑀺 𑀦𑀸𑀫. 𑀧𑀸𑀧𑀁 𑀫𑁂𑀢𑀺 𑀲𑁄 𑀳𑀺 𑀓𑀫𑁆𑀫𑀢𑀧𑁆𑀧𑀦𑁂𑀦 𑀓𑀧𑁆𑀧𑀦𑁆𑀢𑁄 ‘‘𑀧𑀸𑀧𑀁 𑀫𑁂 𑀓𑀢’’𑀦𑁆𑀢𑀺 𑀢𑀧𑁆𑀧𑀢𑀺. 𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀢𑀧𑁆𑀧𑀦𑀁, 𑀯𑀺𑀧𑀸𑀓𑀢𑀧𑁆𑀧𑀦𑁂𑀦 𑀧𑀦 𑀢𑀧𑁆𑀧𑀦𑁆𑀢𑁄 𑀪𑀺𑀬𑁆𑀬𑁄 𑀢𑀧𑁆𑀧𑀢𑀺 𑀤𑀼𑀕𑁆𑀕𑀢𑀺𑀁 𑀕𑀢𑁄 𑀅𑀢𑀺𑀨𑀭𑀼𑀲𑁂𑀦 𑀢𑀧𑁆𑀧𑀦𑁂𑀦 𑀅𑀢𑀺𑀯𑀺𑀬 𑀢𑀧𑁆𑀧𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀤𑁂𑀯𑀤𑀢𑁆𑀢𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑁧𑁩. 𑀲𑀼𑀫𑀦𑀸𑀤𑁂𑀯𑀻𑀯𑀢𑁆𑀣𑀼

𑀇𑀥 ¶ 𑀦𑀦𑁆𑀤𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀫𑀦𑀸𑀤𑁂𑀯𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀤𑁂𑀯𑀲𑀺𑀓𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑁂 𑀤𑁆𑀯𑁂 𑀪𑀺𑀓𑁆𑀔𑀽𑀲𑀳𑀲𑁆𑀲𑀸𑀦𑀺 𑀪𑀼𑀜𑁆𑀚𑀦𑁆𑀢𑀺, 𑀢𑀣𑀸 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬. 𑀲𑀸𑀯𑀢𑁆𑀣𑀺𑀬𑀁 𑀬𑁄 𑀬𑁄 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀲𑁄 𑀲𑁄 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸𑀯 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? ‘‘𑀢𑀼𑀫𑁆𑀳𑀸𑀓𑀁 𑀤𑀸𑀦𑀕𑁆𑀕𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀸 𑀯𑀺𑀲𑀸𑀔𑀸 𑀯𑀸 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀦𑀸𑀕𑀢𑀸’’𑀢𑀺 𑀯𑀼𑀢𑁆𑀢𑁂 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀢𑀤𑀸𑀦𑀫𑁆𑀧𑀺 ‘‘𑀓𑀺𑀁 𑀤𑀸𑀦𑀁 𑀦𑀸𑀫𑁂𑀢’’𑀦𑁆𑀢𑀺 𑀕𑀭𑀳𑀦𑁆𑀢𑀺. 𑀉𑀪𑁄𑀧𑀺 𑀳𑀺 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀭𑀼𑀘𑀺𑀜𑁆𑀘 𑀅𑀦𑀼𑀘𑁆𑀙𑀯𑀺𑀓𑀓𑀺𑀘𑁆𑀘𑀸𑀦𑀺 𑀘 𑀅𑀢𑀺𑀯𑀺𑀬 𑀚𑀸𑀦𑀦𑁆𑀢𑀺, 𑀢𑁂𑀲𑀼 𑀯𑀺𑀘𑀸𑀭𑁂𑀦𑁆𑀢𑁂𑀲𑀼 𑀪𑀺𑀓𑁆𑀔𑀽 𑀘𑀺𑀢𑁆𑀢𑀭𑀽𑀧𑀁 𑀪𑀼𑀜𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂 𑀤𑀸𑀦𑀁 𑀤𑀸𑀢𑀼𑀓𑀸𑀫𑀸 𑀢𑁂 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺. 𑀇𑀢𑀺 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑁂 𑀪𑀺𑀓𑁆𑀔𑀽 𑀧𑀭𑀺𑀯𑀺𑀲𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀢𑀢𑁄 𑀯𑀺𑀲𑀸𑀔𑀸, ‘‘𑀓𑁄 𑀦𑀼 𑀔𑁄 𑀫𑀫 𑀞𑀸𑀦𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑀻 𑀧𑀼𑀢𑁆𑀢𑀲𑁆𑀲 𑀥𑀻𑀢𑀭𑀁 𑀤𑀺𑀲𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀢𑀲𑁆𑀲𑀸 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 𑀫𑀳𑀸𑀲𑀼𑀪𑀤𑁆𑀤𑀁 𑀦𑀸𑀫 𑀚𑁂𑀝𑁆𑀞𑀥𑀻𑀢𑀭𑀁 𑀞𑀧𑁂𑀲𑀺. 𑀲𑀸 𑀪𑀺𑀓𑁆𑀔𑀽𑀦𑀁 ¶ 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀻 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀢𑁄 𑀘𑀽𑀴𑀲𑀼𑀪𑀤𑁆𑀤𑀁 𑀞𑀧𑁂𑀲𑀺. 𑀲𑀸𑀧𑀺 𑀢𑀣𑁂𑀯 𑀓𑀭𑁄𑀦𑁆𑀢𑀻 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑀁 𑀕𑀢𑀸. 𑀅𑀣 𑀲𑀼𑀫𑀦𑀤𑁂𑀯𑀺𑀁 𑀦𑀸𑀫 𑀓𑀦𑀺𑀝𑁆𑀞𑀥𑀻𑀢𑀭𑀁 𑀞𑀧𑁂𑀲𑀺. 𑀲𑀸 𑀧𑀦 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀓𑀼𑀫𑀸𑀭𑀺𑀓𑀸𑀯 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑁂𑀦 ¶ 𑀅𑀨𑀸𑀲𑀼𑀓𑁂𑀦 𑀆𑀢𑀼𑀭𑀸 𑀆𑀳𑀸𑀭𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 ¶ 𑀧𑀺𑀢𑀭𑀁 𑀤𑀝𑁆𑀞𑀼𑀓𑀸𑀫𑀸 𑀳𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀏𑀓𑀲𑁆𑀫𑀺𑀁 𑀤𑀸𑀦𑀕𑁆𑀕𑁂 𑀢𑀲𑁆𑀲𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀅𑀫𑁆𑀫 𑀲𑀼𑀫𑀦𑁂’’𑀢𑀺 𑀆𑀳. 𑀲𑀸𑀧𑀺 𑀦𑀁 𑀆𑀳 𑁋 ‘‘𑀓𑀺𑀁, 𑀢𑀸𑀢 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’’𑀢𑀺? ‘‘𑀯𑀺𑀮𑀧𑀲𑀺 𑀅𑀫𑁆𑀫𑀸’’𑀢𑀺? ‘‘𑀦 𑀯𑀺𑀮𑀧𑀸𑀫𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’’𑀢𑀺. ‘‘𑀪𑀸𑀬𑀲𑀺, 𑀅𑀫𑁆𑀫𑀸’’𑀢𑀺? ‘‘𑀦 𑀪𑀸𑀬𑀸𑀫𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’’𑀢𑀺. 𑀏𑀢𑁆𑀢𑀓𑀁 𑀯𑀢𑁆𑀯𑀸𑀬𑁂𑀯 𑀧𑀦 𑀲𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀲𑁄𑀢𑀸𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 𑀲𑁂𑀝𑁆𑀞𑀺𑀥𑀻𑀢𑀭𑀺 𑀉𑀧𑁆𑀧𑀦𑁆𑀦𑀲𑁄𑀓𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀥𑀻𑀢𑀼 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀭𑁄𑀤𑀦𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀕𑀳𑀧𑀢𑀺, 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀫𑀸𑀦𑁄 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀥𑀻𑀢𑀸 𑀫𑁂, 𑀪𑀦𑁆𑀢𑁂, 𑀲𑀼𑀫𑀦𑀤𑁂𑀯𑀻 𑀓𑀸𑀮𑀓𑀢𑀸’’𑀢𑀺 𑀆𑀳. ‘‘𑀅𑀣 𑀓𑀲𑁆𑀫𑀸 𑀲𑁄𑀘𑀲𑀺, 𑀦𑀦𑀼 𑀲𑀩𑁆𑀩𑁂𑀲𑀁 𑀏𑀓𑀁𑀲𑀺𑀓𑀁 𑀫𑀭𑀡’’𑀦𑁆𑀢𑀺? ‘‘𑀚𑀸𑀦𑀸𑀫𑁂𑀢𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑀸 𑀦𑀸𑀫 𑀫𑁂 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸 𑀥𑀻𑀢𑀸, 𑀲𑀸 𑀫𑀭𑀡𑀓𑀸𑀮𑁂 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀺𑀮𑀧𑀫𑀸𑀦𑀸 𑀫𑀢𑀸, 𑀢𑁂𑀦 𑀫𑁂 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑀸𑀬 𑀓𑀣𑀺𑀢𑀁 𑀫𑀳𑀸𑀲𑁂𑀝𑁆𑀞𑀻’’𑀢𑀺? ‘‘𑀅𑀳𑀁 𑀢𑀁, 𑀪𑀦𑁆𑀢𑁂, ‘𑀅𑀫𑁆𑀫, 𑀲𑀼𑀫𑀦𑁂’𑀢𑀺 𑀆𑀫𑀦𑁆𑀢𑁂𑀲𑀺𑀁. 𑀅𑀣 𑀫𑀁 𑀆𑀳 𑁋 ‘𑀓𑀺𑀁, 𑀢𑀸𑀢, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’𑀢𑀺? ‘𑀯𑀺𑀮𑀧𑀲𑀺, 𑀅𑀫𑁆𑀫𑀸’𑀢𑀺? ‘𑀦 𑀯𑀺𑀮𑀧𑀸𑀫𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’𑀢𑀺. ‘𑀪𑀸𑀬𑀲𑀺, 𑀅𑀫𑁆𑀫𑀸’𑀢𑀺? ‘𑀦 𑀪𑀸𑀬𑀸𑀫𑀺 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’𑀢𑀺. 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀓𑀸𑀮𑀫𑀓𑀸𑀲𑀻’’𑀢𑀺. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 ‘‘𑀦 𑀢𑁂 𑀫𑀳𑀸𑀲𑁂𑀝𑁆𑀞𑀺 𑀥𑀻𑀢𑀸 𑀯𑀺𑀮𑀧𑀢𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀪𑀦𑁆𑀢𑁂 𑀏𑀯𑀫𑀸𑀳𑀸’’𑀢𑀺? ‘‘𑀓𑀦𑀺𑀝𑁆𑀞𑀢𑁆𑀢𑀸𑀬𑁂𑀯 ¶ . 𑀥𑀻𑀢𑀸 𑀳𑀺 𑀢𑁂, 𑀕𑀳𑀧𑀢𑀺, 𑀫𑀕𑁆𑀕𑀨𑀮𑁂𑀳𑀺 𑀢𑀬𑀸 𑀫𑀳𑀮𑁆𑀮𑀺𑀓𑀸. 𑀢𑁆𑀯𑀜𑁆𑀳𑀺 𑀲𑁄𑀢𑀸𑀧𑀦𑁆𑀦𑁄, 𑀥𑀻𑀢𑀸 𑀧𑀦 𑀢𑁂 𑀲𑀓𑀤𑀸𑀕𑀸𑀫𑀺𑀦𑀻. 𑀲𑀸 𑀫𑀕𑁆𑀕𑀨𑀮𑁂𑀳𑀺 𑀢𑀬𑀸 𑀫𑀳𑀮𑁆𑀮𑀺𑀓𑀢𑁆𑀢𑀸 𑀢𑀁 𑀏𑀯𑀫𑀸𑀳𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺? ‘‘𑀏𑀯𑀁, 𑀕𑀳𑀧𑀢𑀻’’𑀢𑀺. ‘‘𑀇𑀤𑀸𑀦𑀺 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸, 𑀪𑀦𑁆𑀢𑁂’’𑀢𑀺? ‘‘𑀢𑀼𑀲𑀺𑀢𑀪𑀯𑀦𑁂, 𑀕𑀳𑀧𑀢𑀻’’𑀢𑀺. ‘‘𑀪𑀦𑁆𑀢𑁂, 𑀫𑀫 𑀥𑀻𑀢𑀸 𑀇𑀥 𑀜𑀸𑀢𑀓𑀸𑀦𑀁 𑀅𑀦𑁆𑀢𑀭𑁂 𑀦𑀦𑁆𑀤𑀫𑀸𑀦𑀸 𑀯𑀺𑀘𑀭𑀺𑀢𑁆𑀯𑀸 𑀇𑀢𑁄 𑀕𑀦𑁆𑀢𑁆𑀯𑀸𑀧𑀺 𑀦𑀦𑁆𑀤𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀆𑀫, 𑀕𑀳𑀧𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀦𑀸𑀫 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀇𑀥 𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀦𑀦𑁆𑀤𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁮.

‘‘𑀇𑀥 ¶ 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀺, 𑀓𑀢𑀧𑀼𑀜𑁆𑀜𑁄 𑀉𑀪𑀬𑀢𑁆𑀣 𑀦𑀦𑁆𑀤𑀢𑀺;

𑀧𑀼𑀜𑁆𑀜𑀁 𑀫𑁂 𑀓𑀢𑀦𑁆𑀢𑀺 𑀦𑀦𑁆𑀤𑀢𑀺, 𑀪𑀺𑀬𑁆𑀬𑁄 𑀦𑀦𑁆𑀤𑀢𑀺 𑀲𑀼𑀕𑁆𑀕𑀢𑀺𑀁 𑀕𑀢𑁄’’𑀢𑀺.

𑀢𑀢𑁆𑀣 𑀇𑀥𑀸𑀢𑀺 𑀇𑀥 𑀮𑁄𑀓𑁂 𑀓𑀫𑁆𑀫𑀦𑀦𑁆𑀤𑀦𑁂𑀦 𑀦𑀦𑁆𑀤𑀢𑀺. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑁂 𑀯𑀺𑀧𑀸𑀓𑀦𑀦𑁆𑀤𑀦𑁂𑀦 𑀦𑀦𑁆𑀤𑀢𑀺. 𑀓𑀢𑀧𑀼𑀜𑁆𑀜𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀧𑀼𑀜𑁆𑀜𑀲𑁆𑀲 𑀓𑀢𑁆𑀢𑀸. 𑀉𑀪𑀬𑀢𑁆𑀣𑀸𑀢𑀺 𑀇𑀥 ‘‘𑀓𑀢𑀁 𑀫𑁂 𑀓𑀼𑀲𑀮𑀁, 𑀅𑀓𑀢𑀁 𑀫𑁂 𑀧𑀸𑀧’’𑀦𑁆𑀢𑀺 𑀦𑀦𑁆𑀤𑀢𑀺, 𑀧𑀭𑀢𑁆𑀣 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑁄 𑀦𑀦𑁆𑀤𑀢𑀺. 𑀧𑀼𑀜𑁆𑀜𑀁 𑀫𑁂𑀢𑀺 𑀇𑀥 𑀦𑀦𑁆𑀤𑀦𑁆𑀢𑁄 𑀧𑀦 ‘‘𑀧𑀼𑀜𑁆𑀜𑀁 𑀫𑁂 𑀓𑀢’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀦𑀦𑁆𑀤𑀦𑀁 𑀉𑀧𑀸𑀤𑀸𑀬 𑀦𑀦𑁆𑀤𑀢𑀺. 𑀪𑀺𑀬𑁆𑀬𑁄𑀢𑀺 𑀯𑀺𑀧𑀸𑀓𑀦𑀦𑁆𑀤𑀦𑁂𑀦 𑀧𑀦 𑀲𑀼𑀕𑀢𑀺𑀁 𑀕𑀢𑁄 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀼𑀲𑀺𑀢𑀧𑀼𑀭𑁂 𑀅𑀢𑀺𑀯𑀺𑀬 𑀦𑀦𑁆𑀤𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ ¶ 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀲𑀼𑀫𑀦𑀸𑀤𑁂𑀯𑀻𑀯𑀢𑁆𑀣𑀼 𑀢𑁂𑀭𑀲𑀫𑀁.

𑁧𑁪. 𑀤𑁆𑀯𑁂𑀲𑀳𑀸𑀬𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀩𑀳𑀼𑀫𑁆𑀧𑀺 𑀘𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀲𑀳𑀸𑀬𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀳𑀺 𑀤𑁆𑀯𑁂 𑀓𑀼𑀮𑀧𑀼𑀢𑁆𑀢𑀸 𑀲𑀳𑀸𑀬𑀓𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀲𑀦𑁂 𑀥𑀼𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀥𑀼𑀭𑀜𑁆𑀘 𑀕𑀦𑁆𑀣𑀥𑀼𑀭𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀲𑀼𑀢𑁆𑀯𑀸 𑀏𑀓𑁄 𑀢𑀸𑀯 ‘‘𑀅𑀳𑀁, 𑀪𑀦𑁆𑀢𑁂, 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁄 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀢𑀼𑀁, 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀦 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀯 𑀅𑀭𑀳𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀓𑀣𑀸𑀧𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀢𑀭𑁄 𑀧𑀦 ‘‘𑀅𑀳𑀁 𑀕𑀦𑁆𑀣𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀓𑁆𑀓𑀫𑁂𑀦 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀕𑀢𑀕𑀢𑀝𑁆𑀞𑀸𑀦𑁂 𑀥𑀫𑁆𑀫𑀁 𑀓𑀣𑁂𑀢𑀺, 𑀲𑀭𑀪𑀜𑁆𑀜𑀁 𑀪𑀡𑀢𑀺, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀳𑀸𑀕𑀡𑀸𑀦𑀁 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 ¶ 𑀇𑀢𑀭𑀲𑁆𑀲 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸’’𑀢𑀺 ¶ 𑀯𑀤𑀦𑁆𑀢𑀺. 𑀣𑁂𑀭𑁄 ‘‘𑀕𑀘𑁆𑀙𑀣, 𑀆𑀯𑀼𑀲𑁄, 𑀫𑀫 𑀯𑀘𑀦𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀲𑀻𑀢𑀺 𑀫𑀳𑀸𑀣𑁂𑀭𑁂 𑀯𑀦𑁆𑀤𑀣, 𑀲𑀳𑀸𑀬𑀓𑀢𑁆𑀣𑁂𑀭𑀫𑁆𑀧𑀺 𑀫𑁂 ‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀢𑀼𑀫𑁆𑀳𑁂 𑀯𑀦𑁆𑀤𑀢𑀻’𑀢𑀺 𑀯𑀤𑀣𑀸’’𑀢𑀺 𑀧𑁂𑀲𑁂𑀢𑀺. 𑀢𑁂 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘𑁂𑀯 𑀅𑀲𑀻𑀢𑀺 𑀫𑀳𑀸𑀣𑁂𑀭𑁂 𑀘 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀣𑀺𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀢𑀼𑀫𑁆𑀳𑁂 𑀯𑀦𑁆𑀤𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀢𑀭𑁂𑀦 𑀘 ‘‘𑀓𑁄 𑀦𑀸𑀫 𑀲𑁄’’𑀢𑀺 𑀯𑀼𑀢𑁆𑀢𑁂, ‘‘𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑀓𑀪𑀺𑀓𑁆𑀔𑀼, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀣𑁂𑀭𑁂 𑀧𑀼𑀦𑀧𑁆𑀧𑀼𑀦𑀁 𑀲𑀸𑀲𑀦𑀁 𑀧𑀳𑀺𑀡𑀦𑁆𑀢𑁂 𑀲𑁄 𑀪𑀺𑀓𑁆𑀔𑀼 𑀣𑁄𑀓𑀁 𑀓𑀸𑀮𑀁 𑀲𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀢𑀼𑀫𑁆𑀳𑁂 𑀯𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀓𑁄 𑀏𑀲𑁄’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑀓𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂𑀳𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀁, 𑀓𑀺𑀁 𑀤𑀻𑀖𑀦𑀺𑀓𑀸𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀦𑀺𑀓𑀸𑀬𑁄, 𑀓𑀺𑀁 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀓𑀁 𑀧𑀺𑀝𑀓’’𑀦𑁆𑀢𑀺 𑀯𑀢𑁆𑀯𑀸 ‘‘𑀘𑀢𑀼𑀧𑁆𑀧𑀤𑀺𑀓𑀫𑁆𑀧𑀺 𑀕𑀸𑀣𑀁 𑀦 𑀚𑀸𑀦𑀸𑀢𑀺, 𑀧𑀁𑀲𑀼𑀓𑀽𑀮𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀓𑀸𑀮𑁂𑀬𑁂𑀯 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀩𑀳𑀽 𑀯𑀢 𑀅𑀦𑁆𑀢𑁂𑀯𑀸𑀲𑀺𑀓𑁂 𑀮𑀪𑀺, 𑀢𑀲𑁆𑀲 𑀆𑀕𑀢𑀓𑀸𑀮𑁂 𑀫𑀬𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀅𑀣 𑀅𑀧𑀭𑀪𑀸𑀕𑁂 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀆𑀕𑀢𑁄. 𑀲𑀳𑀸𑀬𑀓𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀢𑁆𑀢𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 ¶ 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘𑁂𑀯 𑀅𑀲𑀻𑀢𑀺 𑀫𑀳𑀸𑀣𑁂𑀭𑁂 𑀘 𑀯𑀦𑁆𑀤𑀺𑀢𑁆𑀯𑀸 𑀲𑀳𑀸𑀬𑀓𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀘𑁆𑀘𑀸𑀕𑀫𑀺. 𑀅𑀣𑀲𑁆𑀲 𑀲𑁄 𑀯𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀲𑀫𑀧𑁆𑀧𑀫𑀸𑀡𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸, ‘‘𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 ‘‘𑀏𑀲 𑀏𑀯𑀭𑀽𑀧𑀁 𑀫𑀫 𑀧𑀼𑀢𑁆𑀢𑀁 𑀯𑀺𑀳𑁂𑀞𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’’𑀢𑀺 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀯𑀺𑀬 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀢𑀢𑁆𑀣 𑀢𑀢𑁆𑀣 𑀦𑀺𑀲𑀻𑀤𑀦𑁆𑀢𑀸 𑀳𑀺 𑀪𑀺𑀓𑁆𑀔𑀽 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑁆𑀢𑀺. 𑀢𑁂𑀦 ¶ 𑀲𑀢𑁆𑀣𑀸 𑀧𑀓𑀢𑀺𑀧𑀜𑁆𑀜𑀢𑁆𑀢𑁂𑀬𑁂𑀯 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀧𑀦 𑀕𑀦𑁆𑀣𑀺𑀓𑀪𑀺𑀓𑁆𑀔𑀼𑀁 𑀧𑀞𑀫𑀚𑁆𑀛𑀸𑀦𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀓𑀣𑀺𑀢𑁂 𑀤𑀼𑀢𑀺𑀬𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀝𑁆𑀞𑀲𑀼𑀧𑀺 𑀲𑀫𑀸𑀧𑀢𑁆𑀢𑀻𑀲𑀼 𑀭𑀽𑀧𑀸𑀭𑀽𑀧𑁂𑀲𑀼 𑀘 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀕𑀦𑁆𑀣𑀺𑀓𑀢𑁆𑀣𑁂𑀭𑁄 𑀏𑀓𑀫𑁆𑀧𑀺 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀭𑁄 𑀢𑀁 𑀲𑀩𑁆𑀩𑀁 𑀓𑀣𑁂𑀲𑀺. 𑀅𑀣 𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀕𑀦𑁆𑀣𑀺𑀓𑀢𑁆𑀣𑁂𑀭𑁄 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀓𑀣𑁂𑀲𑀺. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀽’’𑀢𑀺 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀲𑁂𑀲𑀫𑀕𑁆𑀕𑁂𑀲𑀼𑀧𑀺 𑀧𑀝𑀺𑀧𑀸𑀝𑀺𑀬𑀸 ¶ 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀕𑀦𑁆𑀣𑀺𑀓𑁄 𑀏𑀓𑀫𑁆𑀧𑀺 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀔𑀻𑀡𑀸𑀲𑀯𑁄 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀓𑀣𑁂𑀲𑀺. 𑀲𑀢𑁆𑀣𑀸 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀩𑁆𑀩𑀸 𑀤𑁂𑀯𑀢𑀸 𑀘𑁂𑀯 𑀦𑀸𑀕𑀲𑀼𑀧𑀡𑁆𑀡𑀸 𑀘 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀢𑀁 𑀲𑀸𑀥𑀼𑀓𑀸𑀭𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄 𑀘 𑀲𑀢𑁆𑀣𑀸𑀭𑀁 𑀉𑀚𑁆𑀛𑀸𑀬𑀺𑀁𑀲𑀼 𑁋 ‘‘𑀓𑀺𑀁 𑀦𑀸𑀫𑁂𑀢𑀁 𑀲𑀢𑁆𑀣𑀸𑀭𑀸 𑀓𑀢𑀁, 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀲𑁆𑀲 𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺, 𑀅𑀫𑁆𑀳𑀸𑀓𑀁 𑀧𑀦𑀸𑀘𑀭𑀺𑀬𑀲𑁆𑀲 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀭𑀲𑁆𑀲 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀸𑀫𑁄𑀓𑁆𑀔𑀲𑁆𑀲 𑀧𑀲𑀁𑀲𑀸𑀫𑀢𑁆𑀢𑀫𑁆𑀧𑀺 𑀦 𑀓𑀭𑀻’’𑀢𑀺. 𑀅𑀣 𑀦𑁂 𑀲𑀢𑁆𑀣𑀸 ‘‘𑀓𑀺𑀁 𑀦𑀸𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀆𑀭𑁄𑀘𑀺𑀢𑁂, ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀫𑀫 𑀲𑀸𑀲𑀦𑁂 𑀪𑀢𑀺𑀬𑀸 𑀕𑀸𑀯𑁄 𑀭𑀓𑁆𑀔𑀡𑀲𑀤𑀺𑀲𑁄, 𑀫𑀬𑁆𑀳𑀁 𑀧𑀦 𑀧𑀼𑀢𑁆𑀢𑁄 𑀬𑀣𑀸𑀭𑀼𑀘𑀺𑀬𑀸 𑀧𑀜𑁆𑀘 𑀕𑁄𑀭𑀲𑁂 𑀧𑀭𑀺𑀪𑀼𑀜𑁆𑀚𑀦𑀓𑀲𑀸𑀫𑀺𑀲𑀤𑀺𑀲𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁯.

‘‘𑀩𑀳𑀼𑀫𑁆𑀧𑀺 ¶ 𑀘𑁂 𑀲𑀁𑀳𑀺𑀢 𑀪𑀸𑀲𑀫𑀸𑀦𑁄,

𑀦 𑀢𑀓𑁆𑀓𑀭𑁄 𑀳𑁄𑀢𑀺 𑀦𑀭𑁄 𑀧𑀫𑀢𑁆𑀢𑁄;

𑀕𑁄𑀧𑁄𑀯 𑀕𑀸𑀯𑁄 𑀕𑀡𑀬𑀁 𑀧𑀭𑁂𑀲𑀁,

𑀦 𑀪𑀸𑀕𑀯𑀸 𑀲𑀸𑀫𑀜𑁆𑀜𑀲𑁆𑀲 𑀳𑁄𑀢𑀺.

𑁨𑁦.

‘‘𑀅𑀧𑁆𑀧𑀫𑁆𑀧𑀺 𑀘𑁂 𑀲𑀁𑀳𑀺𑀢 𑀪𑀸𑀲𑀫𑀸𑀦𑁄,

𑀥𑀫𑁆𑀫𑀲𑁆𑀲 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁,

𑀲𑀫𑁆𑀫𑀧𑁆𑀧𑀚𑀸𑀦𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄.

‘‘𑀅𑀦𑀼𑀧𑀸𑀤𑀺𑀬𑀸𑀦𑁄 ¶ 𑀇𑀥 𑀯𑀸 𑀳𑀼𑀭𑀁 𑀯𑀸,

𑀲 𑀪𑀸𑀕𑀯𑀸 𑀲𑀸𑀫𑀜𑁆𑀜𑀲𑁆𑀲 𑀳𑁄𑀢𑀻’’𑀢𑀺.

𑀢𑀢𑁆𑀣 𑀲𑀁𑀳𑀺𑀢𑀦𑁆𑀢𑀺 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀁 𑀆𑀘𑀭𑀺𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀳𑀼𑀫𑁆𑀧𑀺 𑀧𑀭𑁂𑀲𑀁 𑀪𑀸𑀲𑀫𑀸𑀦𑁄 𑀯𑀸𑀘𑁂𑀦𑁆𑀢𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑀁 𑀓𑀸𑀭𑀓𑁂𑀦 𑀧𑀼𑀕𑁆𑀕𑀮𑁂𑀦 𑀓𑀢𑁆𑀢𑀩𑁆𑀩𑀁, 𑀢𑀓𑁆𑀓𑀭𑁄 𑀦 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀲𑁆𑀲 𑀧𑀓𑁆𑀔𑀧𑀳𑀭𑀡𑀫𑀢𑁆𑀢𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀦𑀧𑁆𑀧𑀯𑀢𑁆𑀢𑁂𑀢𑀺. 𑀏𑀲𑁄 𑀬𑀣𑀸 𑀦𑀸𑀫 𑀤𑀺𑀯𑀲𑀁 𑀪𑀢𑀺𑀬𑀸 𑀕𑀸𑀯𑁄 𑀭𑀓𑁆𑀔𑀦𑁆𑀢𑁄 𑀕𑁄𑀧𑁄 𑀧𑀸𑀢𑁄𑀯 𑀦𑀺𑀭𑀯𑀲𑁂𑀲𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀸𑀬𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀺𑀯𑀲𑀪𑀢𑀺𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀬𑀣𑀸𑀭𑀼𑀘𑀺𑀬𑀸 𑀧𑀦 𑀧𑀜𑁆𑀘 𑀕𑁄𑀭𑀲𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 ¶ 𑀦 𑀮𑀪𑀢𑀺, 𑀏𑀯𑀫𑁂𑀯 𑀓𑁂𑀯𑀮𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑀦𑁆𑀢𑀺𑀓𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑀫𑀢𑁆𑀢𑀲𑁆𑀲 𑀪𑀸𑀕𑀻 𑀳𑁄𑀢𑀺, 𑀲𑀸𑀫𑀜𑁆𑀜𑀲𑁆𑀲 𑀧𑀦 𑀪𑀸𑀕𑀻 𑀦 𑀳𑁄𑀢𑀺. 𑀬𑀣𑀸 𑀧𑀦 𑀕𑁄𑀧𑀸𑀮𑀓𑁂𑀦 𑀦𑀺𑀬𑁆𑀬𑀸𑀤𑀺𑀢𑀸𑀦𑀁 ¶ 𑀕𑀼𑀦𑁆𑀦𑀁 𑀕𑁄𑀭𑀲𑀁 𑀲𑀸𑀫𑀺𑀓𑀸𑀯 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑀣𑀸 𑀢𑁂𑀦 𑀓𑀣𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀓𑀸𑀭𑀓𑀧𑀼𑀕𑁆𑀕𑀮𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀓𑁂𑀘𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀓𑁂𑀘𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀕𑁄𑀡𑀲𑀸𑀫𑀺𑀓𑀸 𑀕𑁄𑀭𑀲𑀲𑁆𑀲𑁂𑀯 𑀲𑀸𑀫𑀜𑁆𑀜𑀲𑁆𑀲 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺.

𑀇𑀢𑀺 𑀲𑀢𑁆𑀣𑀸 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲 𑀧𑀫𑀸𑀤𑀯𑀺𑀳𑀸𑀭𑀺𑀦𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀧𑀫𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑁂𑀦 𑀧𑀞𑀫𑀁 𑀕𑀸𑀣𑀁 𑀓𑀣𑁂𑀲𑀺, 𑀦 𑀤𑀼𑀲𑁆𑀲𑀻𑀮𑀲𑁆𑀲. 𑀤𑀼𑀢𑀺𑀬𑀕𑀸𑀣𑀸 𑀧𑀦 𑀅𑀧𑁆𑀧𑀲𑁆𑀲𑀼𑀢𑀲𑁆𑀲𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀭𑀓𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀓𑀣𑀺𑀢𑀸.

𑀢𑀢𑁆𑀣 𑀅𑀧𑁆𑀧𑀫𑁆𑀧𑀻 𑀘𑁂𑀢𑀺 𑀣𑁄𑀓𑀁 𑀏𑀓𑀯𑀕𑁆𑀕𑀤𑁆𑀯𑀺𑀯𑀕𑁆𑀕𑀫𑀢𑁆𑀢𑀫𑁆𑀧𑀺. 𑀥𑀫𑁆𑀫𑀲𑁆𑀲 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀁 𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀥𑀼𑀢𑀗𑁆𑀕𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀘𑀭𑀦𑁆𑀢𑁄 𑀅𑀦𑀼𑀥𑀫𑁆𑀫𑀘𑀸𑀭𑀻 𑀳𑁄𑀢𑀺. 𑀲𑁄 ‘‘𑀅𑀚𑁆𑀚 𑀅𑀚𑁆𑀚𑁂𑀯𑀸’’𑀢𑀺 𑀧𑀝𑀺𑀯𑁂𑀥𑀁 𑀆𑀓𑀗𑁆𑀔𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀇𑀫𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀧𑀭𑀺𑀚𑀸𑀦𑀺𑀢𑀩𑁆𑀩𑁂 𑀥𑀫𑁆𑀫𑁂 𑀧𑀭𑀺𑀚𑀸𑀦𑀦𑁆𑀢𑁄 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄, 𑀅𑀦𑀼𑀧𑀸𑀤𑀺𑀬𑀸𑀦𑁄 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀥𑀮𑁄𑀓𑀧𑀭𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀯𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸 𑀯𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀦𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄 𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀯𑀲𑁂𑀦 𑀆𑀕𑀢𑀲𑁆𑀲 𑀨𑀮𑀲𑀸𑀫𑀜𑁆𑀜𑀲𑁆𑀲 ¶ 𑀘𑁂𑀯 𑀧𑀜𑁆𑀘𑀅𑀲𑁂𑀓𑁆𑀔𑀥𑀫𑁆𑀫𑀓𑁆𑀔𑀦𑁆𑀥𑀲𑁆𑀲 𑀘 𑀪𑀸𑀕𑀯𑀸 𑀳𑁄𑀢𑀻𑀢𑀺 𑀭𑀢𑀦𑀓𑀽𑀝𑁂𑀦 𑀯𑀺𑀬 𑀅𑀕𑀸𑀭𑀲𑁆𑀲 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀤𑁆𑀯𑁂𑀲𑀳𑀸𑀬𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀘𑀼𑀤𑁆𑀤𑀲𑀫𑀁.

𑀬𑀫𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀅𑀧𑁆𑀧𑀫𑀸𑀤𑀯𑀕𑁆𑀕𑁄

𑁧. 𑀲𑀸𑀫𑀸𑀯𑀢𑀻𑀯𑀢𑁆𑀣𑀼

𑀅𑀧𑁆𑀧𑀫𑀸𑀤𑁄 ¶ ¶ ¶ 𑀅𑀫𑀢𑀧𑀤𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀁 𑀉𑀧𑀦𑀺𑀲𑁆𑀲𑀸𑀬 𑀖𑁄𑀲𑀺𑀢𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀺𑀲𑀢𑀸𑀦𑀁, 𑀫𑀸𑀕𑀡𑁆𑀟𑀺𑀬𑀧𑁆𑀧𑀫𑀼𑀔𑀸𑀦𑀜𑁆𑀘 𑀏𑀢𑀺𑀲𑁆𑀲𑀸 𑀧𑀜𑁆𑀘𑀦𑁆𑀦𑀁 𑀜𑀸𑀢𑀺𑀲𑀢𑀸𑀦𑀁 𑀫𑀭𑀡𑀩𑁆𑀬𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑁂 𑀅𑀮𑁆𑀮𑀓𑀧𑁆𑀧𑀭𑀸𑀚𑀸 𑀦𑀸𑀫, 𑀯𑁂𑀞𑀤𑀻𑀧𑀓𑀭𑀝𑁆𑀞𑁂 𑀯𑁂𑀞𑀤𑀻𑀧𑀓𑀭𑀸𑀚𑀸 𑀦𑀸𑀫𑀸𑀢𑀺 𑀇𑀫𑁂 𑀤𑁆𑀯𑁂 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀏𑀓𑀸𑀘𑀭𑀺𑀬𑀓𑀼𑀮𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀆𑀬𑀸𑀫𑁂𑀦 𑀤𑀲𑀤𑀲𑀬𑁄𑀚𑀦𑀺𑀓𑁂 𑀭𑀝𑁆𑀞𑁂 𑀭𑀸𑀚𑀸𑀦𑁄 𑀅𑀳𑁂𑀲𑀼𑀁. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀕𑀦𑁆𑀢𑁆𑀯𑀸 𑀏𑀓𑀢𑁄 𑀢𑀺𑀝𑁆𑀞𑀦𑁆𑀢𑀸 𑀦𑀺𑀲𑀻𑀤𑀦𑁆𑀢𑀸 𑀦𑀺𑀧𑀚𑁆𑀚𑀦𑁆𑀢𑀸 𑀫𑀳𑀸𑀚𑀦𑀁 𑀚𑀸𑀬𑀫𑀸𑀦𑀜𑁆𑀘 𑀚𑀻𑀬𑀫𑀸𑀦𑀜𑁆𑀘 𑀫𑀻𑀬𑀫𑀸𑀦𑀜𑁆𑀘 𑀤𑀺𑀲𑁆𑀯𑀸 ‘‘𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀦𑁆𑀢𑀫𑀲𑁄 ¶ 𑀅𑀢𑁆𑀢𑀦𑁄 𑀲𑀭𑀻𑀭𑀫𑁆𑀧𑀺 𑀦𑀸𑀦𑀼𑀕𑀘𑁆𑀙𑀢𑀺, 𑀲𑀩𑁆𑀩𑀁 𑀧𑀳𑀸𑀬 𑀕𑀦𑁆𑀢𑀩𑁆𑀩𑀁, 𑀓𑀺𑀁 𑀦𑁄 𑀖𑀭𑀸𑀯𑀸𑀲𑁂𑀦, 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀭𑀚𑁆𑀚𑀸𑀦𑀺 𑀧𑀼𑀢𑁆𑀢𑀤𑀸𑀭𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀯𑀲𑀦𑁆𑀢𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀫𑀬𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀦 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸. 𑀢𑁂 𑀫𑀬𑀁 𑀏𑀓𑀝𑁆𑀞𑀸𑀦𑁂 𑀯𑀲𑀦𑁆𑀢𑀸 𑀅𑀧𑀩𑁆𑀩𑀚𑀺𑀢𑀲𑀤𑀺𑀲𑀸𑀬𑁂𑀯 𑀳𑁄𑀫, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀲𑀺𑀲𑁆𑀲𑀸𑀫. 𑀢𑁆𑀯𑀁 𑀏𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀯𑀲, 𑀅𑀳𑀁 𑀇𑀫𑀲𑁆𑀫𑀺𑀁 𑀧𑀩𑁆𑀩𑀢𑁂 𑀯𑀲𑀺𑀲𑁆𑀲𑀸𑀫𑀺. 𑀅𑀦𑁆𑀯𑀟𑁆𑀠𑀫𑀸𑀲𑀁 𑀧𑀦 𑀉𑀧𑁄𑀲𑀣𑀤𑀺𑀯𑀲𑁂 𑀏𑀓𑀢𑁄 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀏𑀯𑀫𑁆𑀧𑀺 𑀦𑁄 𑀕𑀡𑀲𑀗𑁆𑀕𑀡𑀺𑀓𑀸𑀯 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀧𑀦 𑀢𑀯 𑀧𑀩𑁆𑀩𑀢𑁂 𑀅𑀕𑁆𑀕𑀺𑀁 𑀚𑀸𑀮𑁂𑀬𑁆𑀬𑀸𑀲𑀺, 𑀅𑀳𑀁 𑀫𑀫 𑀧𑀩𑁆𑀩𑀢𑁂 𑀅𑀕𑁆𑀕𑀺𑀁 𑀚𑀸𑀮𑁂𑀲𑁆𑀲𑀸𑀫𑀺, 𑀢𑀸𑀬 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼.

𑀅𑀣 𑀅𑀧𑀭𑀪𑀸𑀕𑁂 𑀯𑁂𑀞𑀤𑀻𑀧𑀓𑀢𑀸𑀧𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀫𑀳𑁂𑀲𑀓𑁆𑀔𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁄 𑀅𑀟𑁆𑀠𑀫𑀸𑀲𑁂 𑀲𑀫𑁆𑀧𑀢𑁆𑀢𑁂 𑀅𑀕𑁆𑀕𑀺𑀁 𑀅𑀤𑀺𑀲𑁆𑀯𑀸𑀯 𑀇𑀢𑀭𑁄 ‘‘𑀲𑀳𑀸𑀬𑀓𑁄 𑀫𑁂 𑀓𑀸𑀮𑀓𑀢𑁄’’𑀢𑀺 𑀅𑀜𑁆𑀜𑀸𑀲𑀺. 𑀇𑀢𑀭𑁄𑀧𑀺 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀅𑀢𑁆𑀢𑀦𑁄 𑀤𑁂𑀯𑀲𑀺𑀭𑀺𑀁 𑀑𑀮𑁄𑀓𑁂𑀢𑁆𑀯𑀸 𑀓𑀫𑁆𑀫𑀁 𑀉𑀧𑀥𑀸𑀭𑁂𑀦𑁆𑀢𑁄 𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀢𑀧𑀘𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀕𑀦𑁆𑀢𑁆𑀯𑀸 𑀫𑀫 𑀲𑀳𑀸𑀬𑀓𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 ¶ 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀕𑁆𑀕𑀺𑀓𑀧𑀼𑀭𑀺𑀲𑁄 𑀯𑀺𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑁄 ¶ 𑀆𑀳 𑁋 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺? ‘‘𑀫𑀕𑁆𑀕𑀺𑀓𑀧𑀼𑀭𑀺𑀲𑁄 ¶ 𑀅𑀳𑀁, 𑀪𑀦𑁆𑀢𑁂, 𑀤𑀽𑀭𑀢𑁄𑀯 𑀆𑀕𑀢𑁄𑀫𑁆𑀳𑀺. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀓𑁄𑀯 𑀯𑀲𑀢𑀺, 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺 𑀫𑁂 𑀏𑀓𑁄 𑀲𑀳𑀸𑀬𑀓𑁄’’𑀢𑀺. ‘‘𑀓𑀼𑀳𑀺𑀁 𑀲𑁄’’𑀢𑀺? ‘‘𑀏𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀯𑀲𑀢𑀺, 𑀉𑀧𑁄𑀲𑀣𑀤𑀺𑀯𑀲𑁂 𑀧𑀦 𑀅𑀕𑁆𑀕𑀺𑀁 𑀦 𑀚𑀸𑀮𑁂𑀢𑀺, 𑀫𑀢𑁄 𑀦𑀽𑀦 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀅𑀳𑀁 𑀲𑁄, 𑀪𑀦𑁆𑀢𑁂’’𑀢𑀺. ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄𑀲𑀻’’𑀢𑀺? ‘‘𑀤𑁂𑀯𑀮𑁄𑀓𑁂 𑀫𑀳𑁂𑀲𑀓𑁆𑀔𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀺, 𑀪𑀦𑁆𑀢𑁂, ‘𑀅𑀬𑁆𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’𑀢𑀺 𑀧𑀼𑀦 𑀆𑀕𑀢𑁄𑀫𑁆𑀳𑀺. 𑀅𑀧𑀺 𑀦𑀼 𑀔𑁄 𑀅𑀬𑁆𑀬𑀸𑀦𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀓𑁄𑀘𑀺 𑀉𑀧𑀤𑁆𑀤𑀯𑁄 𑀅𑀢𑁆𑀣𑀻’’𑀢𑀺? ‘‘𑀆𑀫, 𑀆𑀯𑀼𑀲𑁄, 𑀳𑀢𑁆𑀣𑀻 𑀦𑀺𑀲𑁆𑀲𑀸𑀬 𑀓𑀺𑀮𑀫𑀸𑀫𑀻’’𑀢𑀺. ‘‘𑀓𑀺𑀁 𑀯𑁄, 𑀪𑀦𑁆𑀢𑁂, 𑀳𑀢𑁆𑀣𑀻 𑀓𑀭𑁄𑀦𑁆𑀢𑀻’’𑀢𑀺? ‘‘𑀲𑀫𑁆𑀫𑀚𑁆𑀚𑀦𑀝𑁆𑀞𑀸𑀦𑁂 𑀮𑀡𑁆𑀟𑀁 𑀧𑀸𑀢𑁂𑀦𑁆𑀢𑀺, 𑀧𑀸𑀤𑁂𑀳𑀺 𑀪𑀽𑀫𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀁𑀲𑀼𑀁 𑀉𑀤𑁆𑀥𑀭𑀦𑁆𑀢𑀺, 𑀲𑁆𑀯𑀸𑀳𑀁 𑀮𑀡𑁆𑀟𑀁 𑀙𑀟𑁆𑀟𑁂𑀦𑁆𑀢𑁄 𑀧𑀁𑀲𑀼𑀁 𑀲𑀫𑀁 𑀓𑀭𑁄𑀦𑁆𑀢𑁄 𑀓𑀺𑀮𑀫𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁂𑀲𑀁 𑀅𑀦𑀸𑀕𑀫𑀦𑀁 𑀇𑀘𑁆𑀙𑀣𑀸’’𑀢𑀺? ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺 𑀢𑁂𑀲𑀁 𑀅𑀦𑀸𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀧𑀲𑀲𑁆𑀲 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀜𑁆𑀘𑁂𑀯 𑀳𑀢𑁆𑀣𑀺𑀓𑀦𑁆𑀢𑀫𑀦𑁆𑀢𑀜𑁆𑀘 𑀅𑀤𑀸𑀲𑀺. 𑀤𑀤𑀦𑁆𑀢𑁄 𑀘 𑀧𑀦 𑀯𑀻𑀡𑀸𑀬 𑀢𑀺𑀲𑁆𑀲𑁄 𑀢𑀦𑁆𑀢𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀢𑀬𑁄 𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀫𑀦𑁆𑀢𑁂 𑀯𑀼𑀢𑁆𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀳𑀢𑁆𑀣𑀻 𑀧𑀮𑀸𑀬𑀦𑁆𑀢𑀺, 𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀫𑀦𑁆𑀢𑁂 𑀯𑀼𑀢𑁆𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀘𑁆𑀙𑀢𑁄 𑀑𑀮𑁄𑀓𑁂𑀦𑁆𑀢𑀸 𑀑𑀮𑁄𑀓𑁂𑀦𑁆𑀢𑀸 𑀧𑀮𑀸𑀬𑀦𑁆𑀢𑀺, 𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀫𑀦𑁆𑀢𑁂 𑀯𑀼𑀢𑁆𑀢𑁂 𑀳𑀢𑁆𑀣𑀺𑀬𑀽𑀣𑀧𑀢𑀺 𑀧𑀺𑀝𑁆𑀞𑀺𑀁 𑀉𑀧𑀦𑀸𑀫𑁂𑀦𑁆𑀢𑁄 𑀆𑀕𑀘𑁆𑀙𑀢𑀻’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀬𑀁 𑀯𑁄 𑀭𑀼𑀘𑁆𑀘𑀢𑀺, 𑀢𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 ¶ 𑀯𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀸𑀧𑀲𑁄 𑀧𑀮𑀸𑀬𑀦𑀫𑀦𑁆𑀢𑀁 𑀯𑀢𑁆𑀯𑀸 𑀧𑀮𑀸𑀬𑀦𑀢𑀦𑁆𑀢𑀺𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀻 𑀧𑀮𑀸𑀧𑁂𑀢𑁆𑀯𑀸 𑀯𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀓𑁄𑀲𑀫𑁆𑀩𑀺𑀬𑀁 𑀧𑀽𑀭𑀦𑁆𑀢𑀧𑁆𑀧𑁄 𑀦𑀸𑀫 𑀭𑀸𑀚𑀸 𑀳𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀕𑀩𑁆𑀪𑀺𑀦𑀺𑀬𑀸 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀩𑀸𑀮𑀲𑀽𑀭𑀺𑀬𑀢𑀧𑀁 𑀢𑀧𑁆𑀧𑀫𑀸𑀦𑁄 𑀅𑀩𑁆𑀪𑁄𑀓𑀸𑀲𑀢𑀮𑁂 𑀦𑀺𑀲𑀻𑀤𑀺. 𑀤𑁂𑀯𑀻 𑀭𑀜𑁆𑀜𑁄 𑀧𑀸𑀭𑀼𑀧𑀦𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀭𑀢𑁆𑀢𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀫𑀼𑀮𑁆𑀮𑀧𑀫𑀸𑀦𑀸 𑀭𑀜𑁆𑀜𑁄 𑀅𑀗𑁆𑀕𑀼𑀮𑀺𑀢𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀭𑀸𑀚𑀫𑀼𑀤𑁆𑀤𑀺𑀓𑀁 𑀦𑀻𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀗𑁆𑀕𑀼𑀮𑀺𑀬𑀁 𑀧𑀺𑀮𑀦𑁆𑀥𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀤𑀽𑀭𑀢𑁄 𑀭𑀢𑁆𑀢𑀓𑀫𑁆𑀩𑀮𑀧𑀸𑀭𑀼𑀧𑀦𑀁 𑀤𑁂𑀯𑀺𑀁 𑀤𑀺𑀲𑁆𑀯𑀸 ‘‘𑀫𑀁𑀲𑀧𑁂𑀲𑀻’’𑀢𑀺 𑀲𑀜𑁆𑀜𑀸𑀬 𑀧𑀓𑁆𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀑𑀢𑀭𑀺. 𑀭𑀸𑀚𑀸 ¶ 𑀢𑀲𑁆𑀲 𑀑𑀢𑀭𑀡𑀲𑀤𑁆𑀤𑁂𑀦 𑀪𑀻𑀢𑁄 𑀉𑀝𑁆𑀞𑀸𑀬 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀤𑁂𑀯𑀻 𑀕𑀭𑀼𑀕𑀩𑁆𑀪𑀢𑀸𑀬 𑀘𑁂𑀯 𑀪𑀻𑀭𑀼𑀓𑀚𑀸𑀢𑀺𑀓𑀢𑀸𑀬 𑀘 𑀯𑁂𑀕𑁂𑀦 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀲𑁄 𑀲𑀓𑀼𑀡𑁄 𑀅𑀚𑁆𑀛𑀧𑁆𑀧𑀢𑁆𑀢𑁄 𑀦𑀔𑀧𑀜𑁆𑀚𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑁂 𑀓𑀺𑀭 𑀲𑀓𑀼𑀡𑀸 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀦𑁆𑀢𑀺. 𑀢𑀲𑁆𑀫𑀸 𑀆𑀓𑀸𑀲𑁂𑀦 𑀦𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀦𑁆𑀢𑀺. 𑀲𑀸𑀧𑀺 𑀢𑁂𑀦 𑀦𑀻𑀬𑀫𑀸𑀦𑀸 𑀫𑀭𑀡𑀪𑀬𑀪𑀻𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀯𑀺𑀭𑀯𑀺𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀲𑀤𑁆𑀤𑁄 𑀦𑀸𑀫 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀉𑀩𑁆𑀩𑁂𑀚𑀦𑀻𑀬𑁄, 𑀢𑀁 𑀲𑀼𑀢𑁆𑀯𑀸 𑀫𑀁 𑀙𑀟𑁆𑀟𑁂𑀲𑁆𑀲𑀢𑀺. 𑀏𑀯𑀁 𑀲𑀦𑁆𑀢𑁂 ¶ 𑀲𑀳 𑀕𑀩𑁆𑀪𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀺, 𑀬𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀁 𑀔𑀸𑀤𑀺𑀢𑀼𑀁 𑀆𑀭𑀪𑀺𑀲𑁆𑀲𑀢𑀺, 𑀢𑀢𑁆𑀭 𑀦𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀢𑀸𑀬 𑀅𑀥𑀺𑀯𑀸𑀲𑁂𑀲𑀺.

𑀢𑀤𑀸 𑀘 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀣𑁄𑀓𑀁 𑀯𑀟𑁆𑀠𑀺𑀢𑁆𑀯𑀸 𑀫𑀡𑁆𑀟𑀧𑀸𑀓𑀸𑀭𑁂𑀦 ¶ 𑀞𑀺𑀢𑁄 𑀏𑀓𑁄 𑀫𑀳𑀸𑀦𑀺𑀕𑁆𑀭𑁄𑀥𑁄 𑀳𑁄𑀢𑀺. 𑀲𑁄 𑀲𑀓𑀼𑀡𑁄 𑀫𑀺𑀕𑀭𑀽𑀧𑀸𑀤𑀻𑀦𑀺 𑀢𑀢𑁆𑀣 𑀦𑁂𑀢𑁆𑀯𑀸 𑀔𑀸𑀤𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀦𑁂𑀢𑁆𑀯𑀸 𑀯𑀺𑀝𑀧𑀩𑁆𑀪𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀲𑀺. 𑀆𑀕𑀢𑀫𑀕𑁆𑀕𑁄𑀮𑁄𑀓𑀦𑀁 𑀓𑀺𑀭 𑀢𑁂𑀲𑀁 𑀥𑀫𑁆𑀫𑀢𑀸. 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀯𑀻, ‘‘𑀇𑀤𑀸𑀦𑀺 𑀇𑀫𑀁 𑀧𑀮𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀡𑀺𑀲𑀤𑁆𑀤𑀜𑁆𑀘𑁂𑀯 𑀫𑀼𑀔𑀲𑀤𑁆𑀤𑀜𑁆𑀘 𑀓𑀢𑁆𑀯𑀸 𑀢𑀁 𑀧𑀮𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀓𑀸𑀮𑁂 𑀕𑀩𑁆𑀪𑁂 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀲𑀩𑁆𑀩𑀤𑀺𑀲𑀸𑀲𑀼 𑀕𑀚𑁆𑀚𑀦𑁆𑀢𑁄 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺. 𑀲𑀼𑀔𑁂𑀥𑀺𑀢𑀸𑀬 𑀭𑀸𑀚𑀫𑀳𑁂𑀲𑀺𑀬𑀸 ‘‘𑀫𑀸 𑀪𑀸𑀬𑀺, 𑀅𑀬𑁆𑀬𑁂’’𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀫𑀸𑀦𑀸𑀬 𑀤𑀼𑀓𑁆𑀔𑀧𑀭𑁂𑀢𑀸𑀬 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸 𑀦𑀸𑀫 𑀦𑀸𑀳𑁄𑀲𑀺. 𑀯𑀺𑀪𑀸𑀢𑀸𑀬 𑀧𑀦 𑀭𑀢𑁆𑀢𑀺𑀬𑀸 𑀯𑀮𑀸𑀳𑀓𑀯𑀺𑀕𑀫𑁄 𑀘 𑀅𑀭𑀼𑀡𑀼𑀕𑁆𑀕𑀫𑀦𑀜𑁆𑀘 𑀢𑀲𑁆𑀲𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀜𑁆𑀘 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺. 𑀲𑀸 𑀫𑁂𑀖𑀉𑀢𑀼𑀜𑁆𑀘 𑀧𑀩𑁆𑀩𑀢𑀉𑀢𑀼𑀜𑁆𑀘 𑀅𑀭𑀼𑀡𑀉𑀢𑀼𑀜𑁆𑀘 𑀕𑀳𑁂𑀢𑁆𑀯𑀸 𑀚𑀸𑀢𑀢𑁆𑀢𑀸 𑀧𑀼𑀢𑁆𑀢𑀲𑁆𑀲 𑀉𑀢𑁂𑀦𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺.

𑀅𑀮𑁆𑀮𑀓𑀧𑁆𑀧𑀢𑀸𑀧𑀲𑀲𑁆𑀲𑀧𑀺 𑀔𑁄 𑀢𑀢𑁄 𑀅𑀯𑀺𑀤𑀽𑀭𑁂 𑀯𑀲𑀦𑀝𑁆𑀞𑀸𑀦𑀁 𑀳𑁄𑀢𑀺. 𑀲𑁄 𑀧𑀓𑀢𑀺𑀬𑀸𑀯 𑀯𑀲𑁆𑀲𑀤𑀺𑀯𑀲𑁂 𑀲𑀻𑀢𑀪𑀬𑁂𑀦 𑀨𑀮𑀸𑀨𑀮𑀢𑁆𑀣𑀸𑀬 𑀯𑀦𑀁 𑀦 𑀧𑀯𑀺𑀲𑀢𑀺, 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀓𑀼𑀡𑁂𑀳𑀺 𑀔𑀸𑀤𑀺𑀢𑀫𑀁𑀲𑀸𑀦𑀁 𑀅𑀝𑁆𑀞𑀺𑀁 𑀆𑀳𑀭𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀭𑀲𑀁 𑀓𑀢𑁆𑀯𑀸 𑀧𑀺𑀯𑀢𑀺. 𑀢𑀲𑁆𑀫𑀸 𑀢𑀁 𑀤𑀺𑀯𑀲𑀁 ‘‘𑀅𑀝𑁆𑀞𑀺𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀺𑀁 𑀧𑀭𑀺𑀬𑁂𑀲𑁂𑀦𑁆𑀢𑁄 ¶ 𑀉𑀧𑀭𑀺 𑀤𑀸𑀭𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 𑀤𑁂𑀯𑀺𑀁 𑀤𑀺𑀲𑁆𑀯𑀸 ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 ‘‘𑀫𑀸𑀦𑀼𑀲𑀺𑀢𑁆𑀣𑀺𑀫𑁆𑀳𑀻’’𑀢𑀺. ‘‘𑀓𑀣𑀁 𑀆𑀕𑀢𑀸𑀲𑀻’’𑀢𑀺? ‘‘𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁂𑀦𑀸𑀦𑀻𑀢𑀸𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀑𑀢𑀭𑀸𑀳𑀻’’𑀢𑀺 𑀆𑀳 ¶ . ‘‘𑀚𑀸𑀢𑀺𑀲𑀫𑁆𑀪𑁂𑀤𑀢𑁄 𑀪𑀸𑀬𑀸𑀫𑀺, 𑀅𑀬𑁆𑀬𑀸’’𑀢𑀺. ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺? ‘‘𑀔𑀢𑁆𑀢𑀺𑀬𑀸𑀫𑁆𑀳𑀻’’𑀢𑀺. ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄𑀬𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀔𑀢𑁆𑀢𑀺𑀬𑀫𑀸𑀬𑀁 𑀓𑀣𑁂𑀳𑀻’’𑀢𑀺. 𑀲𑁄 𑀔𑀢𑁆𑀢𑀺𑀬𑀫𑀸𑀬𑀁 𑀓𑀣𑁂𑀲𑀺. ‘‘𑀢𑁂𑀦 𑀳𑀺 𑀆𑀭𑀼𑀬𑁆𑀳 𑀧𑀼𑀢𑁆𑀢𑀁 𑀫𑁂 𑀑𑀢𑀸𑀭𑁂𑀳𑀻’’𑀢𑀺. 𑀲𑁄 𑀏𑀓𑁂𑀦 𑀧𑀲𑁆𑀲𑁂𑀦 𑀅𑀪𑀺𑀭𑀼𑀳𑀦𑀫𑀕𑁆𑀕𑀁 𑀓𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀸𑀭𑀓𑀁 𑀕𑀡𑁆𑀳𑀺. ‘‘𑀫𑀸 𑀫𑀁 𑀳𑀢𑁆𑀣𑁂𑀦 𑀙𑀼𑀧𑀻’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀅𑀙𑀼𑀧𑀺𑀢𑁆𑀯𑀸𑀯 𑀤𑀸𑀭𑀓𑀁 𑀑𑀢𑀸𑀭𑁂𑀲𑀺. 𑀤𑁂𑀯𑀻𑀧𑀺 𑀑𑀢𑀭𑀺. 𑀅𑀣 𑀦𑀁 𑀅𑀲𑁆𑀲𑀫𑀧𑀤𑀁 𑀦𑁂𑀢𑁆𑀯𑀸 𑀲𑀻𑀮𑀪𑁂𑀤𑀁 𑀅𑀓𑀢𑁆𑀯𑀸𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀚𑀕𑁆𑀕𑀺, 𑀦𑀺𑀫𑁆𑀫𑀓𑁆𑀔𑀺𑀓𑀫𑀥𑀼𑀁 𑀆𑀳𑀭𑀺𑀢𑁆𑀯𑀸 𑀲𑀬𑀁𑀚𑀸𑀢𑀲𑀸𑀮𑀺𑀁 𑀆𑀳𑀭𑀺𑀢𑁆𑀯𑀸 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀅𑀤𑀸𑀲𑀺. 𑀏𑀯𑀁 𑀢𑀲𑁆𑀫𑀺𑀁 𑀧𑀝𑀺𑀚𑀕𑁆𑀕𑀦𑁆𑀢𑁂 𑀲𑀸 𑀅𑀧𑀭𑀪𑀸𑀕𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀦𑁂𑀯 𑀆𑀕𑀢𑀫𑀕𑁆𑀕𑀁 𑀚𑀸𑀦𑀸𑀫𑀺, 𑀦 𑀕𑀫𑀦𑀫𑀕𑁆𑀕𑀁 𑀚𑀸𑀦𑀸𑀫𑀺, 𑀇𑀫𑀺𑀦𑀸𑀧𑀺 𑀫𑁂 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺. 𑀲𑀘𑁂 𑀧𑀦𑀸𑀬𑀁 𑀅𑀫𑁆𑀳𑁂 𑀧𑀳𑀸𑀬 𑀓𑀢𑁆𑀣𑀘𑀺 𑀕𑀫𑀺𑀲𑁆𑀲𑀢𑀺, 𑀉𑀪𑁄𑀧𑀺 𑀇𑀥𑁂𑀯 𑀫𑀭𑀡𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀇𑀫𑀲𑁆𑀲 𑀲𑀻𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀣𑀸 𑀫𑀁 ¶ 𑀦 𑀫𑀼𑀜𑁆𑀘𑀢𑀺, 𑀢𑀣𑀸 𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀦𑀁 𑀤𑀼𑀦𑁆𑀦𑀺𑀯𑀢𑁆𑀣𑀤𑀼𑀧𑁆𑀧𑀸𑀭𑀼𑀢𑀤𑀲𑁆𑀲𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂𑀧𑀺 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀢𑀸𑀧𑀲𑁄 𑀦𑀓𑁆𑀔𑀢𑁆𑀢𑀬𑁄𑀕𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀧𑀽𑀭𑀦𑁆𑀢𑀧𑁆𑀧𑀲𑁆𑀲 𑀦𑀓𑁆𑀔𑀢𑁆𑀢𑀫𑀺𑀮𑀸𑀬𑀦𑀁 𑀤𑀺𑀲𑁆𑀯𑀸 ‘‘𑀪𑀤𑁆𑀤𑁂 𑀓𑁄𑀲𑀫𑁆𑀩𑀺𑀬𑀁 𑀧𑀽𑀭𑀦𑁆𑀢𑀧𑁆𑀧𑀭𑀸𑀚𑀸 ¶ 𑀫𑀢𑁄’’𑀢𑀺 𑀆𑀳. ‘‘𑀓𑀲𑁆𑀫𑀸, 𑀅𑀬𑁆𑀬, 𑀏𑀯𑀁 𑀯𑀤𑁂𑀲𑀺? 𑀓𑀺𑀁 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀆𑀖𑀸𑀢𑁄 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀺, 𑀪𑀤𑁆𑀤𑁂, 𑀦𑀓𑁆𑀔𑀢𑁆𑀢𑀫𑀺𑀮𑀸𑀬𑀦𑀫𑀲𑁆𑀲 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀸𑀫𑀻’’𑀢𑀺, 𑀲𑀸 𑀧𑀭𑁄𑀤𑀺. 𑀅𑀣 𑀦𑀁 ‘‘𑀓𑀲𑁆𑀫𑀸 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀸𑀬 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀸𑀫𑀺𑀓𑀪𑀸𑀯𑁂 𑀅𑀓𑁆𑀔𑀸𑀢𑁂 𑀆𑀳 𑁋 ‘‘𑀫𑀸, 𑀪𑀤𑁆𑀤𑁂, 𑀭𑁄𑀤𑀺, 𑀚𑀸𑀢𑀲𑁆𑀲 𑀦𑀸𑀫 𑀦𑀺𑀬𑀢𑁄 𑀫𑀘𑁆𑀘𑀽’’𑀢𑀺. ‘‘𑀚𑀸𑀦𑀸𑀫𑀺, 𑀅𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀣 𑀓𑀲𑁆𑀫𑀸 𑀭𑁄𑀤𑀲𑀻’’𑀢𑀺? ‘‘𑀧𑀼𑀢𑁆𑀢𑁄 𑀫𑁂 𑀓𑀼𑀮𑀲𑀦𑁆𑀢𑀓𑀲𑁆𑀲 𑀭𑀚𑁆𑀚𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄, ‘𑀲𑀘𑁂 𑀢𑀢𑁆𑀭 𑀅𑀪𑀯𑀺𑀲𑁆𑀲, 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺𑀲𑁆𑀲. 𑀇𑀤𑀸𑀦𑀺 𑀫𑀳𑀸𑀚𑀸𑀦𑀺𑀓𑁄 𑀯𑀢 𑀚𑀸𑀢𑁄’𑀢𑀺 𑀲𑁄𑀓𑁂𑀦 𑀭𑁄𑀤𑀸𑀫𑀺, 𑀅𑀬𑁆𑀬𑀸’’𑀢𑀺. ‘‘𑀳𑁄𑀢𑀼, 𑀪𑀤𑁆𑀤𑁂, 𑀫𑀸 𑀘𑀺𑀦𑁆𑀢𑀬𑀺, 𑀲𑀘𑀲𑁆𑀲 𑀭𑀚𑁆𑀚𑀁 𑀧𑀢𑁆𑀣𑁂𑀲𑀺, 𑀅𑀳𑀫𑀲𑁆𑀲 𑀭𑀚𑁆𑀚𑀮𑀪𑀦𑀸𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀜𑁆𑀘𑁂𑀯 𑀳𑀢𑁆𑀣𑀺𑀓𑀦𑁆𑀢𑀫𑀦𑁆𑀢𑁂 𑀘 𑀅𑀤𑀸𑀲𑀺. 𑀢𑀤𑀸 𑀅𑀦𑁂𑀓𑀸𑀦𑀺 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀆𑀕𑀦𑁆𑀢𑁆𑀯𑀸 𑀯𑀝𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀦𑁆𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀳𑀢𑁆𑀣𑀻𑀲𑀼 𑀅𑀦𑀸𑀕𑀢𑁂𑀲𑀼𑀬𑁂𑀯 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑁂𑀲𑀼 𑀆𑀕𑀢𑁂𑀲𑀼 𑀇𑀫𑀁 𑀫𑀦𑁆𑀢𑀁 𑀯𑀢𑁆𑀯𑀸 𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭, 𑀲𑀩𑁆𑀩𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀧𑀮𑀸𑀬𑀺𑀲𑁆𑀲𑀦𑁆𑀢𑀺, 𑀅𑀣 𑀑𑀢𑀭𑀺𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀤𑀼𑀢𑀺𑀬𑀤𑀺𑀯𑀲𑁂 𑀆𑀳 𑁋 ‘‘𑀅𑀚𑁆𑀚 𑀇𑀫𑀁 𑀫𑀦𑁆𑀢𑀁 𑀯𑀢𑁆𑀯𑀸 𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭𑁂𑀬𑁆𑀬𑀸𑀲𑀺 ¶ , 𑀲𑀩𑁆𑀩𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸 𑀧𑀮𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀤𑀸𑀧𑀺 𑀢𑀣𑀸 𑀓𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀺 ¶ . 𑀅𑀣 𑀦𑀁 𑀢𑀢𑀺𑀬𑀤𑀺𑀯𑀲𑁂 𑀆𑀳 𑁋 ‘‘𑀅𑀚𑁆𑀚 𑀇𑀫𑀁 𑀫𑀦𑁆𑀢𑀁 𑀯𑀢𑁆𑀯𑀸 𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭𑁂𑀬𑁆𑀬𑀸𑀲𑀺, 𑀬𑀽𑀣𑀧𑀢𑀺 𑀧𑀺𑀝𑁆𑀞𑀺𑀁 𑀉𑀧𑀦𑀸𑀫𑁂𑀦𑁆𑀢𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑀤𑀸𑀧𑀺 𑀢𑀣𑀸 𑀓𑀢𑁆𑀯𑀸 𑀆𑀭𑁄𑀘𑁂𑀲𑀺.

𑀅𑀣𑀲𑁆𑀲 𑀫𑀸𑀢𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀪𑀤𑁆𑀤𑁂, 𑀧𑀼𑀢𑁆𑀢𑀲𑁆𑀲 𑀢𑁂 𑀲𑀸𑀲𑀦𑀁 𑀯𑀤𑁂𑀳𑀺, 𑀏𑀢𑁆𑀢𑁄𑀯 𑀕𑀦𑁆𑀢𑁆𑀯𑀸 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑀸 𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀓𑁄𑀲𑀫𑁆𑀩𑀺𑀬𑀁 𑀧𑀽𑀭𑀦𑁆𑀢𑀧𑁆𑀧𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀫𑀁 𑀲𑀕𑀩𑁆𑀪𑀁 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁄 𑀆𑀦𑁂𑀲𑀻’’𑀢𑀺 𑀯𑀢𑁆𑀯𑀸 𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀦𑀸𑀫𑀸𑀦𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀅𑀲𑀤𑁆𑀤𑀳𑀦𑁆𑀢𑀸𑀦𑀁 𑀇𑀫𑀁 𑀧𑀺𑀢𑀼 𑀧𑀸𑀭𑀼𑀧𑀦𑀓𑀫𑁆𑀩𑀮𑀜𑁆𑀘𑁂𑀯 𑀧𑀺𑀮𑀦𑁆𑀥𑀦𑀫𑀼𑀤𑁆𑀤𑀺𑀓𑀜𑁆𑀘 𑀤𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀓𑀼𑀫𑀸𑀭𑁄 𑀢𑀸𑀧𑀲𑀁 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀻’’𑀢𑀺 𑀆𑀳. ‘‘𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀺𑀫𑀲𑀸𑀔𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀁 𑀫𑀦𑁆𑀢𑀁 𑀯𑀢𑁆𑀯𑀸 𑀇𑀫𑀁 𑀢𑀦𑁆𑀢𑀺𑀁 𑀧𑀳𑀭, 𑀚𑁂𑀝𑁆𑀞𑀓𑀳𑀢𑁆𑀣𑀻 𑀢𑁂 𑀧𑀺𑀝𑁆𑀞𑀺𑀁 𑀉𑀧𑀦𑀸𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀆𑀕𑀢𑀲𑁆𑀲 𑀳𑀢𑁆𑀣𑀺𑀦𑁄 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀡𑁆𑀡𑁂 𑀫𑀦𑁆𑀢𑀬𑀺 𑁋 ‘‘𑀅𑀳𑀁 𑀓𑁄𑀲𑀫𑁆𑀩𑀺𑀬𑀁 𑀧𑀽𑀭𑀦𑁆𑀢𑀧𑁆𑀧𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀧𑁂𑀢𑁆𑀢𑀺𑀓𑀁 𑀫𑁂 𑀭𑀚𑁆𑀚𑀁 𑀕𑀡𑁆𑀳𑀺𑀢𑁆𑀯𑀸 𑀤𑁂𑀳𑀺 𑀲𑀸𑀫𑀻’’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀅𑀦𑁂𑀓𑀸𑀦𑀺 ¶ 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀳𑀢𑁆𑀣𑀺𑀭𑀯𑀁 𑀭𑀯𑀺, 𑀅𑀦𑁂𑀓𑀸𑀦𑀺 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀧𑀼𑀦 ‘‘𑀚𑀺𑀡𑁆𑀡𑀸 𑀳𑀢𑁆𑀣𑀻 𑀧𑀝𑀺𑀓𑁆𑀓𑀫𑀦𑁆𑀢𑀽’’𑀢𑀺 𑀳𑀢𑁆𑀣𑀺𑀭𑀯𑀁 𑀭𑀯𑀺, 𑀚𑀺𑀡𑁆𑀡𑀸 𑀳𑀢𑁆𑀣𑀻 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀧𑀼𑀦 ‘‘𑀅𑀢𑀺𑀢𑀭𑀼𑀡𑀸 𑀳𑀢𑁆𑀣𑀻 𑀦𑀺𑀯𑀢𑁆𑀢𑀦𑁆𑀢𑀽’’𑀢𑀺 𑀳𑀢𑁆𑀣𑀺𑀭𑀯𑀁 𑀭𑀯𑀺, 𑀢𑁂𑀧𑀺 𑀦𑀺𑀯𑀢𑁆𑀢𑀺𑀁𑀲𑀼. 𑀲𑁄 𑀅𑀦𑁂𑀓𑁂𑀳𑀺 𑀬𑀽𑀣𑀳𑀢𑁆𑀣𑀺𑀲𑀳𑀲𑁆𑀲𑁂𑀳𑁂𑀯 𑀧𑀭𑀺𑀯𑀼𑀢𑁄 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀢𑁆𑀯𑀸 ‘‘𑀅𑀳𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀲𑀫𑁆𑀧𑀢𑁆𑀢𑀺𑀁 ¶ 𑀧𑀢𑁆𑀣𑀬𑀫𑀸𑀦𑀸 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀆𑀳. ‘‘𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ‘𑀬𑀼𑀤𑁆𑀥𑀁 𑀯𑀸 𑀫𑁂 𑀤𑁂𑀢𑀼, 𑀭𑀚𑁆𑀚𑀁 𑀯𑀸’’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀦𑀸𑀕𑀭𑀸 𑀆𑀳𑀁𑀲𑀼 𑁋 ‘‘𑀫𑀬𑀁 𑀤𑁆𑀯𑁂𑀧𑀺 𑀦 𑀤𑀲𑁆𑀲𑀸𑀫. 𑀅𑀫𑁆𑀳𑀸𑀓𑀜𑁆𑀳𑀺 𑀤𑁂𑀯𑀻 𑀕𑀭𑀼𑀕𑀩𑁆𑀪𑀸 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁂𑀦 𑀦𑀻𑀢𑀸, 𑀢𑀲𑁆𑀲𑀸 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀫𑀬𑀁 𑀦 𑀚𑀸𑀦𑀸𑀫. 𑀬𑀸𑀯 𑀢𑀲𑁆𑀲𑀸 𑀧𑀯𑀢𑁆𑀢𑀺𑀁 𑀦 𑀲𑀼𑀡𑀸𑀫. 𑀢𑀸𑀯 𑀦𑁂𑀯 𑀬𑀼𑀤𑁆𑀥𑀁 𑀤𑀲𑁆𑀲𑀸𑀫, 𑀦 𑀭𑀚𑁆𑀚’’𑀦𑁆𑀢𑀺. 𑀢𑀤𑀸 𑀓𑀺𑀭 𑀢𑀁 𑀧𑀯𑁂𑀡𑀺𑀭𑀚𑁆𑀚𑀁 𑀅𑀳𑁄𑀲𑀺. 𑀢𑀢𑁄 𑀓𑀼𑀫𑀸𑀭𑁄 ‘‘𑀅𑀳𑀁 𑀢𑀲𑁆𑀲𑀸 𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀦𑀸𑀫𑀸𑀦𑀺 𑀓𑀣𑁂𑀢𑁆𑀯𑀸 𑀢𑀣𑀸𑀧𑀺 𑀅𑀲𑀤𑁆𑀤𑀳𑀦𑁆𑀢𑀸𑀦𑀁 𑀓𑀫𑁆𑀩𑀮𑀜𑁆𑀘 𑀫𑀼𑀤𑁆𑀤𑀺𑀓𑀜𑁆𑀘 𑀤𑀲𑁆𑀲𑁂𑀲𑀺. 𑀢𑁂 𑀓𑀫𑁆𑀩𑀮𑀜𑁆𑀘 𑀫𑀼𑀤𑁆𑀤𑀺𑀓𑀜𑁆𑀘 𑀲𑀜𑁆𑀚𑀸𑀦𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀅𑀬𑀁 𑀢𑀸𑀯 𑀉𑀢𑁂𑀦𑀲𑁆𑀲 𑀉𑀧𑁆𑀧𑀢𑁆𑀢𑀺.

𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑁂 ¶ 𑀧𑀦 𑀤𑀼𑀩𑁆𑀪𑀺𑀓𑁆𑀔𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑁄 𑀓𑁄𑀢𑀼𑀳𑀮𑀺𑀓𑁄 𑀦𑀸𑀫 𑀫𑀦𑀼𑀲𑁆𑀲𑁄 𑀓𑀸𑀧𑀺𑀁 𑀦𑀸𑀫 𑀢𑀭𑀼𑀡𑀧𑀼𑀢𑁆𑀢𑀜𑁆𑀘 𑀓𑀸𑀴𑀺𑀁 𑀦𑀸𑀫 𑀪𑀭𑀺𑀬𑀜𑁆𑀘 𑀆𑀤𑀸𑀬 ‘‘𑀓𑁄𑀲𑀫𑁆𑀩𑀺𑀁 𑀕𑀦𑁆𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. ‘‘𑀅𑀳𑀺𑀯𑀸𑀢𑀭𑁄𑀕𑁂𑀦 𑀫𑀳𑀸𑀚𑀦𑁂 𑀫𑀭𑀦𑁆𑀢𑁂 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀻’’𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀢𑁂 𑀕𑀘𑁆𑀙𑀦𑁆𑀢𑀸 𑀧𑀸𑀣𑁂𑀬𑁆𑀬𑁂 𑀧𑀭𑀺𑀓𑁆𑀔𑀻𑀡𑁂 𑀔𑀼𑀤𑀸𑀪𑀺𑀪𑀽𑀢𑀸 𑀤𑀸𑀭𑀓𑀁 𑀯𑀳𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀣 𑀲𑀸𑀫𑀺𑀓𑁄 𑀧𑀚𑀸𑀧𑀢𑀺𑀁 𑀆𑀳 𑁋 ‘‘𑀪𑀤𑁆𑀤𑁂, 𑀫𑀬𑀁 𑀚𑀻𑀯𑀦𑁆𑀢𑀸 𑀧𑀼𑀦 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫, 𑀙𑀟𑁆𑀟𑁂𑀢𑁆𑀯𑀸 𑀦𑀁 𑀕𑀘𑁆𑀙𑀸𑀫𑀸’’𑀢𑀺. 𑀫𑀸𑀢𑀼 𑀳𑀤𑀬𑀁 𑀦𑀸𑀫 𑀫𑀼𑀤𑀼𑀓𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀸 𑀆𑀳 𑁋 ‘‘𑀦𑀸𑀳𑀁 𑀚𑀻𑀯𑀦𑁆𑀢𑀫𑁂𑀯 𑀧𑀼𑀢𑁆𑀢𑀁 𑀙𑀟𑁆𑀟𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀣 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀯𑀸𑀭𑁂𑀦 𑀦𑀁 𑀯𑀳𑀸𑀫𑀸’’𑀢𑀺. 𑀫𑀸𑀢𑀸 𑀅𑀢𑁆𑀢𑀦𑁄 𑀯𑀸𑀭𑁂 𑀧𑀼𑀧𑁆𑀨𑀤𑀸𑀫𑀁 𑀯𑀺𑀬 𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ¶ 𑀅𑀗𑁆𑀓𑁂𑀦 𑀯𑀳𑀺𑀢𑁆𑀯𑀸 𑀧𑀺𑀢𑀼𑀦𑁄 𑀤𑁂𑀢𑀺. 𑀢𑀲𑁆𑀲 𑀢𑀁 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 𑀙𑀸𑀢𑀓𑀢𑁄𑀧𑀺 𑀩𑀮𑀯𑀢𑀭𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀆𑀳 𑁋 ‘‘𑀪𑀤𑁆𑀤𑁂, 𑀫𑀬𑀁 𑀚𑀻𑀯𑀦𑁆𑀢𑀸 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫, 𑀙𑀟𑁆𑀟𑁂𑀫 𑀦’’𑀦𑁆𑀢𑀺. 𑀲𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀯𑀘𑀦𑀁 𑀦𑀸𑀤𑀸𑀲𑀺. 𑀤𑀸𑀭𑀓𑁄 𑀯𑀸𑀭𑁂𑀦 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑁄 𑀓𑀺𑀮𑀦𑁆𑀢𑁄 𑀧𑀺𑀢𑀼 𑀳𑀢𑁆𑀣𑁂 𑀦𑀺𑀤𑁆𑀤𑀸𑀬𑀺. 𑀲𑁄 𑀢𑀲𑁆𑀲 𑀦𑀺𑀤𑁆𑀤𑀸𑀬𑀦𑀪𑀸𑀯𑀁 𑀜𑀢𑁆𑀯𑀸 𑀫𑀸𑀢𑀭𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀏𑀓𑀲𑁆𑀲 𑀕𑀘𑁆𑀙𑀲𑁆𑀲 𑀳𑁂𑀝𑁆𑀞𑀸 𑀧𑀡𑁆𑀡𑀲𑀦𑁆𑀣𑀭𑁂 𑀢𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀸𑀬𑀸𑀲𑀺. 𑀫𑀸𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 𑀧𑀼𑀢𑁆𑀢𑀁 𑀅𑀤𑀺𑀲𑁆𑀯𑀸, ‘‘𑀲𑀸𑀫𑀺, 𑀓𑀼𑀳𑀺𑀁 𑀫𑁂 𑀧𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀏𑀓𑀲𑁆𑀲 𑀫𑁂 𑀕𑀘𑁆𑀙𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀚𑁆𑀚𑀸𑀧𑀺𑀢𑁄’’𑀢𑀺. ‘‘𑀲𑀸𑀫𑀺, 𑀫𑀸 𑀫𑀁 𑀦𑀸𑀲𑀬𑀺, 𑀧𑀼𑀢𑁆𑀢𑀁 𑀯𑀺𑀦𑀸 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀆𑀦𑁂𑀳𑀺 𑀫𑁂 𑀧𑀼𑀢𑁆𑀢’’𑀦𑁆𑀢𑀺 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀤𑁂𑀯𑀺. 𑀅𑀣 𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀦𑁂𑀲𑀺. 𑀧𑀼𑀢𑁆𑀢𑁄𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀢𑁄 𑀳𑁄𑀢𑀺. 𑀇𑀢𑀺 𑀲𑁄 𑀏𑀢𑁆𑀢𑀓𑁂 𑀞𑀸𑀦𑁂 𑀧𑀼𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀪𑀯𑀦𑁆𑀢𑀭𑁂 𑀲𑀢𑁆𑀢 𑀯𑀸𑀭𑁂 𑀙𑀟𑁆𑀟𑀺𑀢𑁄. ‘‘𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀅𑀧𑁆𑀧𑀓’’𑀦𑁆𑀢𑀺 𑀦 𑀅𑀯𑀫𑀜𑁆𑀜𑀺𑀢𑀩𑁆𑀩𑀁.

𑀢𑁂 ¶ 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀕𑁄𑀧𑀸𑀮𑀓𑀼𑀮𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀁 𑀤𑀺𑀯𑀲𑀜𑁆𑀘 𑀕𑁄𑀧𑀸𑀮𑀓𑀲𑁆𑀲 𑀥𑁂𑀦𑀼𑀫𑀗𑁆𑀕𑀮𑀁 𑀳𑁄𑀢𑀺. 𑀕𑁄𑀧𑀸𑀮𑀓𑀲𑁆𑀲 𑀕𑁂𑀳𑁂 𑀦𑀺𑀩𑀤𑁆𑀥𑀁 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀼𑀜𑁆𑀚𑀢𑀺. 𑀲𑁄 𑀢𑀁 𑀪𑁄𑀚𑁂𑀢𑁆𑀯𑀸 𑀫𑀗𑁆𑀕𑀮𑀫𑀓𑀸𑀲𑀺. 𑀩𑀳𑀼 𑀧𑀸𑀬𑀸𑀲𑁄 𑀧𑀝𑀺𑀬𑀢𑁆𑀢𑁄 𑀳𑁄𑀢𑀺. 𑀕𑁄𑀧𑀸𑀮𑀓𑁄 𑀢𑁂 𑀆𑀕𑀢𑁂 𑀤𑀺𑀲𑁆𑀯𑀸, ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀫𑀼𑀤𑀼𑀚𑀸𑀢𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀓𑀢𑁆𑀯𑀸 𑀩𑀳𑀼𑀓𑁂𑀦 𑀲𑀧𑁆𑀧𑀺𑀦𑀸 𑀧𑀸𑀬𑀸𑀲𑀁 𑀤𑀸𑀧𑁂𑀲𑀺. 𑀪𑀭𑀺𑀬𑀸 ‘‘𑀲𑀸𑀫𑀺, 𑀢𑀬𑀺 𑀚𑀻𑀯𑀦𑁆𑀢𑁂 𑀅𑀳𑀫𑁆𑀧𑀺 𑀚𑀻𑀯𑀸𑀫𑀺 𑀦𑀸𑀫, 𑀤𑀻𑀖𑀭𑀢𑁆𑀢𑀁 𑀊𑀦𑁄𑀤𑀭𑁄𑀲𑀺, 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀸𑀳𑀻’’𑀢𑀺 𑀲𑀧𑁆𑀧𑀺𑀜𑁆𑀘 𑀤𑀥𑀺𑀜𑁆𑀘 𑀢𑀤𑀪𑀺𑀫𑀼𑀔𑀜𑁆𑀜𑁂𑀯 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀫𑀦𑁆𑀤𑀲𑀧𑁆𑀧𑀺𑀦𑀸 ¶ 𑀣𑁄𑀓𑀫𑁂𑀯 𑀪𑀼𑀜𑁆𑀚𑀺. 𑀇𑀢𑀭𑁄 𑀩𑀳𑀼𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀢𑀝𑁆𑀞𑀤𑀺𑀯𑀲𑁂 𑀙𑀸𑀢𑀢𑀸𑀬 𑀆𑀳𑀸𑀭𑀢𑀡𑁆𑀳𑀁 𑀙𑀺𑀦𑁆𑀤𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀕𑁄𑀧𑀸𑀮𑀓𑁄 𑀢𑁂𑀲𑀁 𑀧𑀸𑀬𑀸𑀲𑀁 𑀤𑀸𑀧𑁂𑀢𑁆𑀯𑀸 𑀲𑀬𑀁 ¶ 𑀪𑀼𑀜𑁆𑀚𑀺𑀢𑀼𑀁 𑀆𑀭𑀪𑀺. 𑀓𑁄𑀢𑀼𑀳𑀮𑀺𑀓𑁄 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸𑀧𑀻𑀞𑁂 𑀦𑀺𑀧𑀦𑁆𑀦𑀸𑀬 𑀲𑀼𑀦𑀔𑀺𑀬𑀸 𑀕𑁄𑀧𑀸𑀮𑀓𑁂𑀦 𑀯𑀟𑁆𑀠𑁂𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀧𑀸𑀬𑀸𑀲𑀧𑀺𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀧𑀼𑀜𑁆𑀜𑀸 𑀯𑀢𑀸𑀬𑀁 𑀲𑀼𑀦𑀔𑀻, 𑀦𑀺𑀩𑀤𑁆𑀥𑀁 𑀏𑀯𑀭𑀽𑀧𑀁 𑀪𑁄𑀚𑀦𑀁 𑀮𑀪𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀢𑀁 𑀧𑀸𑀬𑀸𑀲𑀁 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲𑀸 𑀲𑀼𑀦𑀔𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺.

𑀅𑀣𑀲𑁆𑀲 𑀪𑀭𑀺𑀬𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀪𑀢𑀺𑀁 𑀓𑀢𑁆𑀯𑀸 𑀢𑀡𑁆𑀟𑀼𑀮𑀦𑀸𑀴𑀺𑀁 𑀮𑀪𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, ‘‘𑀤𑀸𑀲𑀲𑁆𑀲 𑀯𑁄 𑀧𑀸𑀧𑀼𑀡𑀸𑀢𑀽’’𑀢𑀺 𑀯𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀇𑀥𑁂𑀯 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀩𑀤𑁆𑀥𑀁, 𑀅𑀬𑁆𑀬𑁄, 𑀇𑀥𑀸𑀕𑀘𑁆𑀙𑀢𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀤𑁂𑀯𑀲𑀺𑀓𑀁 𑀯𑀦𑁆𑀤𑀦𑁆𑀢𑀻 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀻 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀻 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀢𑁆𑀣𑁂𑀯 𑀪𑀢𑀺𑀁 𑀓𑀭𑁄𑀦𑁆𑀢𑀻 𑀯𑀲𑀺. 𑀲𑀸𑀧𑀺 𑀲𑀼𑀦𑀔𑀻 𑀙𑀝𑁆𑀞𑁂 𑀯𑀸 𑀲𑀢𑁆𑀢𑀫𑁂 𑀯𑀸 𑀫𑀸𑀲𑁂 𑀏𑀓𑀫𑁂𑀯 𑀓𑀼𑀓𑁆𑀓𑀼𑀭𑀁 𑀯𑀺𑀚𑀸𑀬𑀺. 𑀕𑁄𑀧𑀸𑀮𑀓𑁄 𑀢𑀲𑁆𑀲 𑀏𑀓𑀥𑁂𑀦𑀼𑀬𑀸 𑀔𑀻𑀭𑀁 𑀤𑀸𑀧𑁂𑀲𑀺. 𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀯𑀟𑁆𑀠𑀺. 𑀅𑀣𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀼𑀜𑁆𑀚𑀦𑁆𑀢𑁄 𑀦𑀺𑀩𑀤𑁆𑀥𑀁 𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀤𑁂𑀢𑀺. 𑀲𑁄 𑀪𑀢𑁆𑀢𑀧𑀺𑀡𑁆𑀟𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑀫𑀓𑀸𑀲𑀺. 𑀕𑁄𑀧𑀸𑀮𑀓𑁄𑀧𑀺 𑀦𑀺𑀩𑀤𑁆𑀥𑀁 𑀤𑁆𑀯𑁂 𑀯𑀸𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲𑀼𑀧𑀝𑁆𑀞𑀸𑀦𑀁 𑀬𑀸𑀢𑀺. 𑀕𑀘𑁆𑀙𑀦𑁆𑀢𑁄𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸𑀴𑀫𑀺𑀕𑀝𑁆𑀞𑀸𑀦𑁂 𑀤𑀡𑁆𑀟𑁂𑀦 𑀕𑀘𑁆𑀙𑁂 𑀘 𑀪𑀽𑀫𑀺𑀜𑁆𑀘 𑀧𑀳𑀭𑀺𑀢𑁆𑀯𑀸 ‘‘𑀲𑀼𑀲𑀽’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀯𑀸𑀴𑀫𑀺𑀕𑁂 𑀧𑀮𑀸𑀧𑁂𑀢𑀺. 𑀲𑀼𑀦𑀔𑁄𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀆𑀳 𑁋 ‘‘𑀪𑀦𑁆𑀢𑁂, 𑀬𑀤𑀸 𑀫𑁂 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀇𑀫𑀁 𑀲𑀼𑀦𑀔𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀦𑁄𑀓𑀸𑀲𑀤𑀺𑀯𑀲𑁂, ‘‘𑀕𑀘𑁆𑀙, 𑀢𑀸𑀢, 𑀅𑀬𑁆𑀬𑀁 𑀆𑀦𑁂𑀳𑀻’’𑀢𑀺 𑀲𑀼𑀦𑀔𑀁 𑀧𑁂𑀲𑁂𑀲𑀺. 𑀲𑁄 𑀏𑀓𑀯𑀘𑀦𑁂𑀦𑁂𑀯 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀕𑀘𑁆𑀙𑀧𑁄𑀣𑀦𑀪𑀽𑀫𑀺𑀧𑁄𑀣𑀦𑀝𑁆𑀞𑀸𑀦𑁂 𑀢𑀺𑀓𑁆𑀔𑀢𑁆𑀢𑀼𑀁 𑀪𑀼𑀲𑁆𑀲𑀺𑀢𑁆𑀯𑀸 𑀢𑁂𑀦 𑀲𑀤𑁆𑀤𑁂𑀦 𑀯𑀸𑀴𑀫𑀺𑀕𑀸𑀦𑀁 𑀧𑀮𑀸𑀢𑀪𑀸𑀯𑀁 𑀜𑀢𑁆𑀯𑀸 ¶ 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀢𑀺𑀓𑁆𑀔𑀢𑁆𑀢𑀼𑀁 𑀪𑀼𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀧𑀚𑁆𑀚𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁂 𑀪𑀼𑀲𑁆𑀲𑀦𑁆𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺. 𑀅𑀦𑁆𑀢𑀭𑀦𑁆𑀢𑀭𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ¶ 𑀢𑀁 𑀯𑀻𑀫𑀁𑀲𑀦𑁆𑀢𑁄 𑀅𑀜𑁆𑀜𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺. 𑀅𑀣𑀲𑁆𑀲 𑀧𑀼𑀭𑀢𑁄 ¶ 𑀢𑀺𑀭𑀺𑀬𑀁 𑀞𑀢𑁆𑀯𑀸 𑀪𑀼𑀲𑁆𑀲𑀺𑀢𑁆𑀯𑀸 𑀇𑀢𑀭𑀫𑀕𑁆𑀕𑀫𑁂𑀯 𑀦𑀁 𑀆𑀭𑁄𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀅𑀜𑁆𑀜𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑁂𑀦 𑀧𑀼𑀭𑀢𑁄 𑀢𑀺𑀭𑀺𑀬𑀁 𑀞𑀢𑁆𑀯𑀸 𑀯𑀸𑀭𑀺𑀬𑀫𑀸𑀦𑁄𑀧𑀺 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀼𑀦𑀔𑀁 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀸𑀬𑀸𑀲𑀺. 𑀲𑀼𑀦𑀔𑁄 𑀢𑀲𑁆𑀲 𑀅𑀦𑀺𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀦𑀺𑀯𑀸𑀲𑀦𑀓𑀡𑁆𑀡𑁂 𑀟𑀁𑀲𑀺𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀇𑀢𑀭𑀫𑀕𑁆𑀕𑀫𑁂𑀯 𑀦𑀁 𑀆𑀭𑁄𑀧𑁂𑀲𑀺. 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀩𑀮𑀯𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀲𑀺.

𑀢𑀢𑁄 𑀅𑀧𑀭𑀪𑀸𑀕𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑀻𑀯𑀭𑀁 𑀚𑀻𑀭𑀺. 𑀅𑀣𑀲𑁆𑀲 𑀕𑁄𑀧𑀸𑀮𑀓𑁄 𑀘𑀻𑀯𑀭𑀯𑀢𑁆𑀣𑀸𑀦𑀺 𑀅𑀤𑀸𑀲𑀺. 𑀢𑀫𑁂𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋 ‘‘𑀆𑀯𑀼𑀲𑁄, 𑀘𑀻𑀯𑀭𑀁 𑀦𑀸𑀫 𑀏𑀓𑀓𑁂𑀦 𑀓𑀸𑀢𑀼𑀁 𑀤𑀼𑀓𑁆𑀓𑀭𑀁, 𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀇𑀥𑁂𑀯, 𑀪𑀦𑁆𑀢𑁂, 𑀓𑀭𑁄𑀣𑀸’’𑀢𑀺. ‘‘𑀦 𑀲𑀓𑁆𑀓𑀸, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀸 𑀘𑀺𑀭𑀁 𑀩𑀳𑀺 𑀯𑀲𑀺𑀢𑁆𑀣𑀸’’𑀢𑀺. 𑀲𑀼𑀦𑀔𑁄 𑀢𑁂𑀲𑀁 𑀓𑀣𑀁 𑀲𑀼𑀡𑀦𑁆𑀢𑁄𑀯 𑀅𑀝𑁆𑀞𑀸𑀲𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 ‘‘𑀢𑀺𑀝𑁆𑀞, 𑀉𑀧𑀸𑀲𑀓𑀸’’𑀢𑀺 𑀕𑁄𑀧𑀸𑀮𑀓𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀲𑀼𑀦𑀔𑀲𑁆𑀲 𑀢𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 ¶ 𑀤𑀺𑀲𑁆𑀯𑀸 𑀪𑀼𑀓𑁆𑀓𑀭𑀺𑀢𑁆𑀯𑀸 𑀞𑀺𑀢𑀲𑁆𑀲 𑀢𑀲𑁆𑀫𑀺𑀁 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀦𑁆𑀢𑁂 𑀳𑀤𑀬𑀁 𑀨𑀮𑀺𑀢𑁆𑀯𑀸 𑀫𑀢𑁄. 𑀢𑀺𑀭𑀘𑁆𑀙𑀸𑀦𑀸 𑀓𑀺𑀭 𑀦𑀸𑀫𑁂𑀢𑁂 𑀉𑀚𑀼𑀚𑀸𑀢𑀺𑀓𑀸 𑀳𑁄𑀦𑁆𑀢𑀺 𑀅𑀓𑀼𑀝𑀺𑀮𑀸. 𑀫𑀦𑀼𑀲𑁆𑀲𑀸 𑀧𑀦 𑀅𑀜𑁆𑀜𑀁 𑀳𑀤𑀬𑁂𑀦 𑀘𑀺𑀦𑁆𑀢𑁂𑀦𑁆𑀢𑀺, 𑀅𑀜𑁆𑀜𑀁 𑀫𑀼𑀔𑁂𑀦 𑀓𑀣𑁂𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀕𑀳𑀦𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀤𑀺𑀤𑀁 𑀫𑀦𑀼𑀲𑁆𑀲𑀸, 𑀉𑀢𑁆𑀢𑀸𑀦𑀓𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀬𑀤𑀺𑀤𑀁 𑀧𑀲𑀯𑁄’’𑀢𑀺 (𑀫. 𑀦𑀺. 𑁨.𑁩).

𑀇𑀢𑀺 𑀲𑁄 𑀢𑀸𑀬 𑀉𑀚𑀼𑀘𑀺𑀢𑁆𑀢𑀢𑀸𑀬 𑀅𑀓𑀼𑀝𑀺𑀮𑀢𑀸𑀬 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀲𑀺. 𑀢𑀲𑁆𑀲 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑀬𑀦𑁆𑀢𑀲𑁆𑀲 𑀲𑀤𑁆𑀤𑁄 𑀲𑁄𑀴𑀲𑀬𑁄𑀚𑀦𑀝𑁆𑀞𑀸𑀦𑀁 𑀨𑀭𑀢𑀺, 𑀧𑀓𑀢𑀺𑀓𑀣𑀸𑀲𑀤𑁆𑀤𑁄 𑀧𑀦 𑀲𑀓𑀮𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀤𑁂𑀯𑀦𑀕𑀭𑀁 𑀙𑀸𑀤𑁂𑀢𑀺. 𑀢𑁂𑀦𑁂𑀯𑀲𑁆𑀲 ‘‘𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺. ‘‘𑀓𑀺𑀲𑁆𑀲 𑀧𑀦𑁂𑀲 𑀦𑀺𑀲𑁆𑀲𑀦𑁆𑀤𑁄’’𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑁂𑀫𑁂𑀦 𑀪𑀼𑀓𑁆𑀓𑀭𑀡𑀲𑁆𑀲 𑀦𑀺𑀲𑁆𑀲𑀦𑁆𑀤𑁄. 𑀲𑁄 𑀢𑀢𑁆𑀣 𑀦 𑀘𑀺𑀭𑀁 𑀞𑀢𑁆𑀯𑀸 𑀘𑀯𑀺. 𑀤𑁂𑀯𑀮𑁄𑀓𑀢𑁄 𑀳𑀺 𑀤𑁂𑀯𑀧𑀼𑀢𑁆𑀢𑀸 𑀆𑀬𑀼𑀓𑁆𑀔𑀬𑁂𑀦 𑀧𑀼𑀜𑁆𑀜𑀓𑁆𑀔𑀬𑁂𑀦 𑀆𑀳𑀸𑀭𑀓𑁆𑀔𑀬𑁂𑀦 𑀓𑁄𑀧𑁂𑀦𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀘𑀯𑀦𑁆𑀢𑀺.

𑀢𑀢𑁆𑀣 𑀬𑁂𑀦 𑀩𑀳𑀼𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀲𑁄 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀉𑀧𑀭𑀽𑀧𑀭𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀏𑀯𑀁 𑀆𑀬𑀼𑀓𑁆𑀔𑀬𑁂𑀦 𑀘𑀯𑀢𑀺 𑀦𑀸𑀫. 𑀬𑁂𑀦 𑀧𑀭𑀺𑀢𑁆𑀢𑀁 𑀧𑀼𑀜𑁆𑀜𑀁 𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀭𑀸𑀚𑀓𑁄𑀝𑁆𑀞𑀸𑀕𑀸𑀭𑁂 𑀧𑀓𑁆𑀔𑀺𑀢𑁆𑀢𑀁 𑀢𑀺𑀘𑀢𑀼𑀦𑀸𑀴𑀺𑀫𑀢𑁆𑀢𑀁 𑀥𑀜𑁆𑀜𑀁 𑀯𑀺𑀬 𑀅𑀦𑁆𑀢𑀭𑀸𑀯 𑀢𑀁 𑀧𑀼𑀜𑁆𑀜𑀁𑀔𑀻𑀬𑀢𑀺, 𑀅𑀦𑁆𑀢𑀭𑀸𑀯 𑀓𑀸𑀮𑀁 𑀓𑀭𑁄𑀢𑀺 ¶ . 𑀏𑀯𑀁 𑀧𑀼𑀜𑁆𑀜𑀓𑁆𑀔𑀬𑁂𑀦 𑀘𑀯𑀢𑀺 𑀦𑀸𑀫. 𑀅𑀧𑀭𑁄𑀧𑀺 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀲𑀢𑀺𑀲𑀫𑁆𑀫𑁄𑀲𑁂𑀦 𑀆𑀳𑀸𑀭𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀺𑀮𑀦𑁆𑀢𑀓𑀸𑀬𑁄 𑀓𑀸𑀮𑀁 𑀓𑀭𑁄𑀢𑀺. 𑀏𑀯𑀁 𑀆𑀳𑀸𑀭𑀓𑁆𑀔𑀬𑁂𑀦 𑀘𑀯𑀢𑀺 𑀦𑀸𑀫. 𑀅𑀧𑀭𑁄𑀧𑀺 𑀧𑀭𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀅𑀲𑀳𑀦𑁆𑀢𑁄 ¶ 𑀓𑀼𑀚𑁆𑀛𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀺. 𑀏𑀯𑀁 𑀓𑁄𑀧𑁂𑀦 𑀘𑀯𑀢𑀺 𑀦𑀸𑀫.

𑀅𑀬𑀁 ¶ 𑀧𑀦 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀫𑀼𑀝𑁆𑀞𑀲𑁆𑀲𑀢𑀺 𑀳𑀼𑀢𑁆𑀯𑀸 𑀆𑀳𑀸𑀭𑀓𑁆𑀔𑀬𑁂𑀦 𑀘𑀯𑀺, 𑀘𑀯𑀺𑀢𑁆𑀯𑀸 𑀘 𑀧𑀦 𑀓𑁄𑀲𑀫𑁆𑀩𑀺𑀬𑀁 𑀦𑀕𑀭𑀲𑁄𑀪𑀺𑀦𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸𑀧𑀺 𑀚𑀸𑀢𑀤𑀺𑀯𑀲𑁂 ‘‘𑀓𑀺𑀁 𑀏𑀢’’𑀦𑁆𑀢𑀺 𑀤𑀸𑀲𑀺𑀁 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀧𑀼𑀢𑁆𑀢𑁄, 𑀅𑀬𑁆𑀬𑁂’’𑀢𑀺 𑀯𑀼𑀢𑁆𑀢𑁂 𑁋 ‘‘𑀳𑀦𑁆𑀤, 𑀚𑁂, 𑀇𑀫𑀁 𑀤𑀸𑀭𑀓𑀁 𑀓𑀢𑁆𑀢𑀭𑀲𑀼𑀧𑁆𑀧𑁂 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀳𑀻’’𑀢𑀺 𑀙𑀟𑁆𑀟𑀸𑀧𑁂𑀲𑀺. 𑀦𑀕𑀭𑀲𑁄𑀪𑀺𑀦𑀺𑀬𑁄 𑀳𑀺 𑀥𑀻𑀢𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑀺, 𑀦 𑀧𑀼𑀢𑁆𑀢𑀁. 𑀥𑀻𑀢𑀭𑀸 𑀳𑀺 𑀢𑀸𑀲𑀁 𑀧𑀯𑁂𑀡𑀻 𑀖𑀝𑀻𑀬𑀢𑀺. 𑀤𑀸𑀭𑀓𑀁 𑀓𑀸𑀓𑀸𑀧𑀺 𑀲𑀼𑀦𑀔𑀸𑀧𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑀧𑁆𑀧𑀪𑀯𑀲𑁆𑀲 𑀪𑀼𑀓𑁆𑀓𑀭𑀡𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀏𑀓𑁄𑀧𑀺 𑀉𑀧𑀕𑀦𑁆𑀢𑀼𑀁 𑀦 𑀯𑀺𑀲𑀳𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀫𑀦𑀼𑀲𑁆𑀲𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄 𑀢𑀁 𑀓𑀸𑀓𑀲𑀼𑀦𑀔𑀲𑀦𑁆𑀦𑀺𑀧𑀸𑀢𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀕𑁂𑀳𑀁 𑀦𑁂𑀲𑀺. 𑀢𑀤𑀸 𑀓𑁄𑀲𑀫𑁆𑀩𑀓𑀲𑁂𑀝𑁆𑀞𑀺 𑀭𑀸𑀚𑀓𑀼𑀮𑀁 𑀕𑀘𑁆𑀙𑀦𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑀢𑁄 𑀆𑀕𑀘𑁆𑀙𑀦𑁆𑀢𑀁 𑀧𑀼𑀭𑁄𑀳𑀺𑀢𑀁 𑀤𑀺𑀲𑁆𑀯𑀸, ‘‘𑀓𑀺𑀁, 𑀆𑀘𑀭𑀺𑀬, 𑀅𑀚𑁆𑀚 𑀢𑁂 𑀢𑀺𑀣𑀺𑀓𑀭𑀡𑀦𑀓𑁆𑀔𑀢𑁆𑀢𑀬𑁄𑀕𑁄 𑀑𑀮𑁄𑀓𑀺𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀲𑁂𑀝𑁆𑀞𑀺, 𑀅𑀫𑁆𑀳𑀸𑀓𑀁 𑀓𑀺𑀁 𑀅𑀜𑁆𑀜𑀁 𑀓𑀺𑀘𑁆𑀘𑀦𑁆𑀢𑀺? 𑀚𑀦𑀧𑀤𑀲𑁆𑀲 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀅𑀜𑁆𑀜𑀁 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀦𑀕𑀭𑁂 𑀅𑀚𑁆𑀚 𑀚𑀸𑀢𑀤𑀸𑀭𑀓𑁄 𑀚𑁂𑀝𑁆𑀞𑀓𑀲𑁂𑀝𑁆𑀞𑀺 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀤𑀸 𑀲𑁂𑀝𑁆𑀞𑀺𑀦𑁄 𑀪𑀭𑀺𑀬𑀸 𑀕𑀭𑀼𑀕𑀩𑁆𑀪𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀲𑀻𑀖𑀁 𑀕𑁂𑀳𑀁 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙 𑀪𑀡𑁂, 𑀚𑀸𑀦𑀸𑀳𑀺 𑀦𑀁 𑀯𑀺𑀚𑀸𑀢𑀸 𑀯𑀸, 𑀦𑁄 𑀯𑀸’’𑀢𑀺. ‘‘𑀦 𑀯𑀺𑀚𑀸𑀬𑀢𑀻’’𑀢𑀺 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀯 𑀯𑁂𑀕𑁂𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀓𑀸𑀴𑀺𑀁 𑀦𑀸𑀫 𑀤𑀸𑀲𑀺𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸, ‘‘𑀕𑀘𑁆𑀙 ¶ 𑀚𑁂, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀉𑀧𑀥𑀸𑀭𑁂𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀚𑁆𑀚 𑀚𑀸𑀢𑀤𑀸𑀭𑀓𑀁 𑀕𑀡𑁆𑀳𑀺𑀢𑁆𑀯𑀸 𑀏𑀳𑀻’’𑀢𑀺. 𑀲𑀸 𑀉𑀧𑀥𑀸𑀭𑁂𑀦𑁆𑀢𑀻 𑀢𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀤𑀸𑀭𑀓𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀤𑀸𑀭𑀓𑁄 𑀓𑀤𑀸 𑀚𑀸𑀢𑁄’’𑀢𑀺 𑀕𑀳𑀧𑀢𑀸𑀦𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀚𑁆𑀚 𑀚𑀸𑀢𑁄’’𑀢𑀺 𑀯𑀼𑀢𑁆𑀢𑁂, ‘‘𑀇𑀫𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀏𑀓𑀓𑀳𑀸𑀧𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀫𑀽𑀮𑀁 𑀯𑀟𑁆𑀠𑁂𑀦𑁆𑀢𑀻 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀁 𑀆𑀦𑁂𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀤𑀲𑁆𑀲𑁂𑀲𑀺. 𑀲𑁂𑀝𑁆𑀞𑀺 ‘‘𑀲𑀘𑁂 𑀫𑁂 𑀥𑀻𑀢𑀸 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀢𑀸𑀬 𑀦𑀁 𑀲𑀤𑁆𑀥𑀺𑀁 𑀦𑀺𑀯𑁂𑀲𑁂𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀲𑁆𑀲 𑀲𑀸𑀫𑀺𑀓𑀁 𑀓𑀭𑀺𑀲𑁆𑀲𑀸𑀫𑀺. 𑀲𑀘𑁂 𑀫𑁂 𑀧𑀼𑀢𑁆𑀢𑁄 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀕𑁂𑀳𑁂 𑀓𑀸𑀭𑁂𑀲𑀺.

𑀅𑀣𑀲𑁆𑀲 ¶ 𑀪𑀭𑀺𑀬𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁂𑀝𑁆𑀞𑀺 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀫𑀫 𑀧𑀼𑀢𑁆𑀢𑁄𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀢𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀴𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀕𑀘𑁆𑀙, 𑀚𑁂, 𑀯𑀚𑀢𑁄 𑀕𑀼𑀦𑁆𑀦𑀁 𑀦𑀺𑀓𑁆𑀔𑀫𑀦𑀯𑁂𑀮𑀸𑀬 𑀯𑀚𑀤𑁆𑀯𑀸𑀭𑀫𑀚𑁆𑀛𑁂 𑀇𑀫𑀁 𑀢𑀺𑀭𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀳𑀺, 𑀕𑀸𑀯𑀺𑀬𑁄 𑀦𑀁 𑀫𑀤𑁆𑀤𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀦𑁆𑀢𑀺, 𑀫𑀤𑁆𑀤𑀺𑀢𑀸𑀫𑀤𑁆𑀤𑀺𑀢𑀪𑀸𑀯𑀁 𑀧𑀦𑀲𑁆𑀲 𑀜𑀢𑁆𑀯𑀸 𑀏𑀳𑀻’’𑀢𑀺 𑀆𑀳. 𑀲𑀸 𑀕𑀦𑁆𑀢𑁆𑀯𑀸 𑀕𑁄𑀧𑀸𑀮𑀓𑁂𑀦 𑀯𑀚𑀤𑁆𑀯𑀸𑀭𑁂 𑀯𑀺𑀯𑀝𑀫𑀢𑁆𑀢𑁂𑀬𑁂𑀯 𑀢𑀁 𑀢𑀣𑀸 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀕𑁄𑀕𑀡𑀚𑁂𑀝𑁆𑀞𑀓𑁄 𑀉𑀲𑀪𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀧𑀘𑁆𑀙𑀸 𑀦𑀺𑀓𑁆𑀔𑀫𑀦𑁆𑀢𑁄𑀧𑀺 𑀢𑀁 𑀤𑀺𑀯𑀲𑀁 𑀲𑀩𑁆𑀩𑀧𑀞𑀫𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀭𑀓𑀁 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀅𑀦𑁆𑀢𑀭𑁂 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀦𑁂𑀓𑀲𑀢𑀕𑀸𑀯𑀺𑀬𑁄 𑀉𑀲𑀪𑀲𑁆𑀲 𑀤𑁆𑀯𑁂 𑀧𑀲𑁆𑀲𑀸𑀦𑀺 𑀖𑀁𑀲𑀦𑁆𑀢𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀕𑁄𑀧𑀸𑀮𑀓𑁄𑀧𑀺 ‘‘𑀅𑀬𑀁 𑀉𑀲𑀪𑁄 𑀧𑀼𑀩𑁆𑀩𑁂 𑀲𑀩𑁆𑀩𑀧𑀘𑁆𑀙𑀸 𑀦𑀺𑀓𑁆𑀔𑀫𑀢𑀺, 𑀅𑀚𑁆𑀚 𑀧𑀦 𑀲𑀩𑁆𑀩𑀧𑀞𑀫𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀯𑀚𑀤𑁆𑀯𑀸𑀭𑀫𑀚𑁆𑀛𑁂 𑀦𑀺𑀘𑁆𑀘𑀮𑁄𑀯 𑀞𑀺𑀢𑁄, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸, ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀕𑁂𑀳𑀁 𑀦𑁂𑀲𑀺.

𑀓𑀸𑀴𑀻 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀦𑀸 𑀧𑀼𑀘𑁆𑀙𑀺𑀢𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀕𑀘𑁆𑀙, 𑀦𑀁 𑀧𑀼𑀦 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀅𑀤𑀸𑀲𑀺. 𑀅𑀣 ¶ 𑀦𑀁 𑀆𑀳 𑁋 ‘‘𑀅𑀫𑁆𑀫, 𑀓𑀸𑀴𑀺 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀘𑁆𑀘𑀽𑀲𑀓𑀸𑀮𑁂 𑀉𑀝𑁆𑀞𑀸𑀬 𑀯𑀸𑀡𑀺𑀚𑁆𑀚𑀸𑀬 𑀕𑀘𑁆𑀙𑀦𑁆𑀢𑀺, 𑀢𑁆𑀯𑀁 𑀇𑀫𑀁 𑀦𑁂𑀢𑁆𑀯𑀸 𑀘𑀓𑁆𑀓𑀫𑀕𑁆𑀕𑁂 𑀦𑀺𑀧𑀚𑁆𑀚𑀸𑀧𑁂𑀳𑀺, 𑀕𑁄𑀡𑀸 𑀯𑀸 𑀦𑀁 𑀫𑀤𑁆𑀤𑀺𑀲𑁆𑀲𑀦𑁆𑀢𑀺, 𑀘𑀓𑁆𑀓𑀸 𑀯𑀸 𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀧𑀯𑀢𑁆𑀢𑀺𑀁 𑀘𑀲𑁆𑀲 𑀜𑀢𑁆𑀯𑀸𑀯 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀢𑀁 𑀦𑁂𑀢𑁆𑀯𑀸 𑀘𑀓𑁆𑀓𑀫𑀕𑁆𑀕𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀢𑀤𑀸 𑀲𑀸𑀓𑀝𑀺𑀓𑀚𑁂𑀝𑁆𑀞𑀓𑁄 𑀧𑀼𑀭𑀢𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀕𑁄𑀡𑀸 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀥𑀼𑀭𑀁 𑀙𑀟𑁆𑀟𑁂𑀲𑀼𑀁, 𑀧𑀼𑀦𑀧𑁆𑀧𑀼𑀦𑀁 𑀆𑀭𑁄𑀧𑁂𑀢𑁆𑀯𑀸 𑀧𑀸𑀚𑀺𑀬𑀫𑀸𑀦𑀸𑀧𑀺 𑀧𑀼𑀭𑀢𑁄 𑀦 𑀕𑀘𑁆𑀙𑀺𑀁𑀲𑀼. 𑀏𑀯𑀁 𑀢𑀲𑁆𑀲 𑀢𑁂𑀳𑀺 𑀲𑀤𑁆𑀥𑀺𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯 𑀅𑀭𑀼𑀡𑀁 𑀉𑀝𑁆𑀞𑀳𑀺. 𑀲𑁄 ‘‘𑀓𑀺𑀁 𑀦𑀸𑀫𑁂𑀢𑀁 𑀕𑁄𑀡𑀸 𑀓𑀭𑀺𑀁𑀲𑀽’’𑀢𑀺 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀤𑀸𑀭𑀓𑀁 𑀤𑀺𑀲𑁆𑀯𑀸, ‘‘𑀪𑀸𑀭𑀺𑀬𑀁 𑀯𑀢 𑀫𑁂 𑀓𑀫𑁆𑀫’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀢𑀁 𑀕𑁂𑀳𑀁 𑀦𑁂𑀲𑀺.

𑀓𑀸𑀴𑀻 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀦𑀸 𑀧𑀼𑀘𑁆𑀙𑀺𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀕𑀘𑁆𑀙, 𑀦𑀁 𑀧𑀼𑀦 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀇𑀤𑀸𑀦𑀺 𑀦𑀁 𑀆𑀫𑀓𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀭𑁂 𑀦𑀺𑀧𑀚𑁆𑀚𑀸𑀧𑁂𑀳𑀺, 𑀢𑀢𑁆𑀣 𑀲𑀼𑀦𑀔𑀸𑀤𑀻𑀳𑀺 𑀯𑀸 𑀔𑀸𑀤𑀺𑀢𑁄, 𑀅𑀫𑀦𑀼𑀲𑁆𑀲𑁂𑀳𑀺 𑀯𑀸 𑀧𑀳𑀝𑁄 𑀫𑀭𑀺𑀲𑁆𑀲𑀢𑀺, 𑀫𑀸𑀢𑀸𑀫𑀢𑀪𑀸𑀯𑀜𑁆𑀘𑀲𑁆𑀲 𑀚𑀸𑀦𑀺𑀢𑁆𑀯𑀸𑀯 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀢𑀁 𑀦𑁂𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀢𑀁 𑀲𑀼𑀦𑀔𑁄 𑀯𑀸 𑀓𑀸𑀓𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀉𑀧𑀲𑀗𑁆𑀓𑀫𑀺𑀢𑀼𑀁 ¶ 𑀦𑀸𑀲𑀓𑁆𑀔𑀺. ‘‘𑀦𑀦𑀼 𑀘𑀲𑁆𑀲 𑀦𑁂𑀯 𑀫𑀸𑀢𑀸 𑀦 𑀧𑀺𑀢𑀸 𑀦 𑀪𑀸𑀢𑀺𑀓𑀸𑀤𑀻𑀲𑀼 𑀓𑁄𑀘𑀺 𑀭𑀓𑁆𑀔𑀺𑀢𑀸 𑀦𑀸𑀫 𑀅𑀢𑁆𑀣𑀺, 𑀓𑁄 𑀢𑀁 𑀭𑀓𑁆𑀔𑀢𑀻’’𑀢𑀺? 𑀲𑀼𑀦𑀔𑀓𑀸𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑁂𑀦 𑀧𑀯𑀢𑁆𑀢𑀺𑀢𑀪𑀼𑀓𑁆𑀓𑀭𑀡𑀫𑀢𑁆𑀢𑀫𑁂𑀯 𑀢𑀁 𑀭𑀓𑁆𑀔𑀢𑀺. 𑀅𑀣𑁂𑀓𑁄 𑀅𑀚𑀧𑀸𑀮𑀓𑁄 𑀅𑀦𑁂𑀓𑀲𑀳𑀲𑁆𑀲𑀸 𑀅𑀚𑀸 𑀕𑁄𑀘𑀭𑀁 𑀦𑁂𑀦𑁆𑀢𑁄 𑀲𑀼𑀲𑀸𑀦𑀧𑀲𑁆𑀲𑁂𑀦 𑀕𑀘𑁆𑀙𑀢𑀺. 𑀏𑀓𑀸 𑀅𑀚𑀸 𑀧𑀡𑁆𑀡𑀸𑀦𑀺 𑀔𑀸𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀭𑀁 𑀧𑀯𑀺𑀝𑁆𑀞𑀸 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀞𑀢𑁆𑀯𑀸 𑀤𑀸𑀭𑀓𑀲𑁆𑀲 𑀣𑀦𑀁 𑀅𑀤𑀸𑀲𑀺, 𑀅𑀚𑀧𑀸𑀮𑀓𑁂𑀦 ‘‘𑀳𑁂 𑀳𑁂’’𑀢𑀺 𑀲𑀤𑁆𑀤𑁂 𑀓𑀢𑁂𑀧𑀺 𑀦 𑀦𑀺𑀓𑁆𑀔𑀫𑀺. 𑀲𑁄 ‘‘𑀬𑀝𑁆𑀞𑀺𑀬𑀸 𑀦𑀁 𑀧𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀭𑀁 𑀧𑀯𑀺𑀝𑁆𑀞𑁄 𑀚𑀡𑁆𑀡𑀼𑀓𑁂𑀳𑀺 ¶ 𑀞𑀢𑁆𑀯𑀸 𑀤𑀸𑀭𑀓𑀁 𑀔𑀻𑀭𑀁 𑀧𑀸𑀬𑀦𑁆𑀢𑀺𑀁 𑀅𑀚𑀺𑀁 𑀤𑀺𑀲𑁆𑀯𑀸 𑀤𑀸𑀭𑀓𑁂 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸, ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀆𑀤𑀸𑀬 𑀧𑀓𑁆𑀓𑀸𑀫𑀺.

𑀓𑀸𑀴𑀻 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀦𑀸 𑀧𑀼𑀘𑁆𑀙𑀺𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀕𑀘𑁆𑀙, 𑀢𑀁 𑀧𑀼𑀦 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 𑀆𑀳 𑁋 ‘‘𑀅𑀫𑁆𑀫 𑀓𑀸𑀴𑀺, 𑀇𑀫𑀁 𑀆𑀤𑀸𑀬 𑀘𑁄𑀭𑀧𑀧𑀸𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀧𑀸𑀢𑁂 𑀔𑀺𑀧, 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀧𑀝𑀺𑀳𑀜𑁆𑀜𑀫𑀸𑀦𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑁄 𑀳𑀼𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀲𑁆𑀲𑀢𑀺, 𑀫𑀢𑀸𑀫𑀢𑀪𑀸𑀯𑀜𑁆𑀘𑀲𑁆𑀲 𑀜𑀢𑁆𑀯𑀸𑀯 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 ¶ 𑀞𑀢𑁆𑀯𑀸 𑀔𑀺𑀧𑀺. 𑀢𑀁 𑀔𑁄 𑀧𑀦 𑀧𑀩𑁆𑀩𑀢𑀓𑀼𑀘𑁆𑀙𑀺𑀁 𑀦𑀺𑀲𑁆𑀲𑀸𑀬 𑀫𑀳𑀸𑀯𑁂𑀴𑀼𑀕𑀼𑀫𑁆𑀩𑁄 𑀧𑀩𑁆𑀩𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑀟𑁆𑀠𑀺, 𑀢𑀲𑁆𑀲 𑀫𑀢𑁆𑀣𑀓𑀁 𑀖𑀦𑀚𑀸𑀢𑁄 𑀚𑀺𑀜𑁆𑀚𑀼𑀓𑀕𑀼𑀫𑁆𑀩𑁄 𑀅𑀯𑀢𑁆𑀣𑀭𑀺. 𑀤𑀸𑀭𑀓𑁄 𑀧𑀢𑀦𑁆𑀢𑁄 𑀓𑁄𑀚𑀯𑀓𑁂 𑀯𑀺𑀬 𑀢𑀲𑁆𑀫𑀺𑀁 𑀧𑀢𑀺. 𑀢𑀁 𑀤𑀺𑀯𑀲𑀜𑁆𑀘 𑀦𑀴𑀓𑀸𑀭𑀚𑁂𑀝𑁆𑀞𑀓𑀲𑁆𑀲 𑀯𑁂𑀴𑀼𑀩𑀮𑀺 𑀧𑀢𑁆𑀢𑁄 𑀳𑁄𑀢𑀺. 𑀲𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀢𑀁 𑀯𑁂𑀴𑀼𑀕𑀼𑀫𑁆𑀩𑀁 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀢𑀲𑁆𑀫𑀺𑀁 𑀘𑀮𑀦𑁆𑀢𑁂 𑀤𑀸𑀭𑀓𑁄 𑀲𑀤𑁆𑀤𑀫𑀓𑀸𑀲𑀺. 𑀲𑁄 ‘‘𑀤𑀸𑀭𑀓𑀲𑀤𑁆𑀤𑁄 𑀯𑀺𑀬𑀸’’𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸, ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀆𑀤𑀸𑀬 𑀕𑀢𑁄.

𑀓𑀸𑀴𑀻 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀧𑀼𑀘𑁆𑀙𑀺𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀕𑀘𑁆𑀙, 𑀦𑀁 𑀧𑀼𑀦 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀢𑀣𑀸 𑀅𑀓𑀸𑀲𑀺. 𑀲𑁂𑀝𑁆𑀞𑀺𑀦𑁄 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑀲𑁆𑀲𑁂𑀯 𑀤𑀸𑀭𑀓𑁄 𑀯𑀟𑁆𑀠𑀺𑀢𑁄 ‘‘𑀖𑁄𑀲𑀓𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀲𑁂𑀝𑁆𑀞𑀺𑀦𑁄 𑀅𑀓𑁆𑀔𑀺𑀫𑁆𑀳𑀺 𑀓𑀡𑁆𑀝𑀓𑁄 𑀯𑀺𑀬 𑀔𑀸𑀬𑀺, 𑀉𑀚𑀼𑀓𑀁 𑀢𑀁 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀯𑀺𑀲𑀢𑀺. 𑀅𑀣𑀲𑁆𑀲 𑀫𑀸𑀭𑀡𑀽𑀧𑀸𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀳𑀸𑀬𑀓𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑀤𑀸 𑀢𑁆𑀯𑀁 𑀆𑀯𑀸𑀧𑀁 𑀆𑀮𑀺𑀫𑁆𑀧𑁂𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋 ‘‘𑀲𑁆𑀯𑁂’’𑀢𑀺 𑀯𑀼𑀢𑁆𑀢𑁂, ‘‘𑀢𑁂𑀦 ¶ 𑀳𑀺 𑀇𑀤𑀁 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀫𑀫 𑀏𑀓𑀁 ¶ 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀆𑀳. ‘‘𑀓𑀺𑀁, 𑀲𑀸𑀫𑀻’’𑀢𑀺? ‘‘𑀏𑀓𑁄 𑀫𑁂 𑀅𑀯𑀚𑀸𑀢𑀧𑀼𑀢𑁆𑀢𑁄 𑀅𑀢𑁆𑀣𑀺, 𑀢𑀁 𑀢𑀯 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀕𑀩𑁆𑀪𑀁 𑀧𑀯𑁂𑀲𑁂𑀢𑁆𑀯𑀸 𑀢𑀺𑀔𑀺𑀡𑀸𑀬 𑀯𑀸𑀲𑀺𑀬𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀯𑀸𑀧𑁂 𑀧𑀘𑁂𑀬𑁆𑀬𑀸𑀲𑀺, 𑀇𑀤𑀁 𑀢𑁂 𑀲𑀳𑀲𑁆𑀲𑀁 𑀲𑀘𑁆𑀘𑀓𑀸𑀭𑀲𑀤𑀺𑀲𑀁. 𑀉𑀢𑁆𑀢𑀭𑀺𑀁 𑀧𑀦 𑀢𑁂 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀘𑁆𑀙𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀓𑀼𑀫𑁆𑀪𑀓𑀸𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁂𑀝𑁆𑀞𑀺 𑀧𑀼𑀦𑀤𑀺𑀯𑀲𑁂 𑀖𑁄𑀲𑀓𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀳𑀺𑀬𑁆𑀬𑁄 𑀫𑀬𑀸 𑀓𑀼𑀫𑁆𑀪𑀓𑀸𑀭𑁄 𑀏𑀓𑀁 𑀓𑀫𑁆𑀫𑀁 𑀆𑀡𑀢𑁆𑀢𑁄, 𑀏𑀳𑀺, 𑀢𑁆𑀯𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀯𑀤𑁂𑀳𑀺 𑁋 ‘𑀳𑀺𑀬𑁆𑀬𑁄 𑀓𑀺𑀭 𑀫𑁂 𑀧𑀺𑀢𑀭𑀸 𑀆𑀡𑀢𑁆𑀢𑀁 𑀓𑀫𑁆𑀫𑀁 𑀦𑀺𑀧𑁆𑀨𑀸𑀤𑁂𑀳𑀻’’’𑀢𑀺 𑀧𑀳𑀺𑀡𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀅𑀕𑀫𑀸𑀲𑀺. 𑀢𑀁 𑀢𑀢𑁆𑀣 𑀕𑀘𑁆𑀙𑀦𑁆𑀢𑀁 𑀇𑀢𑀭𑁄 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀕𑀼𑀴𑀁 𑀓𑀻𑀴𑀦𑁆𑀢𑁄 𑀤𑀺𑀲𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺 𑀪𑀸𑀢𑀺𑀓𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀺𑀢𑀼 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺. 𑀇𑀫𑁂 𑀫𑀁 𑀤𑀸𑀭𑀓𑀸 𑀩𑀳𑀼𑀁 𑀮𑀓𑁆𑀔𑀁 𑀚𑀺𑀦𑀺𑀁𑀲𑀼, 𑀢𑀁 𑀫𑁂 𑀧𑀝𑀺𑀚𑀺𑀦𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀳. ‘‘𑀅𑀳𑀁 𑀧𑀺𑀢𑀼 𑀪𑀸𑀬𑀸𑀫𑀻’’𑀢𑀺. ‘‘𑀫𑀸 𑀪𑀸𑀬𑀺, 𑀪𑀸𑀢𑀺𑀓, 𑀅𑀳𑀁 𑀢𑀁 𑀲𑀸𑀲𑀦𑀁 𑀳𑀭𑀺𑀲𑁆𑀲𑀸𑀫𑀺. 𑀩𑀳𑀽𑀳𑀺 𑀚𑀺𑀢𑁄, 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀫𑁂 𑀮𑀓𑁆𑀔𑀁 𑀧𑀝𑀺𑀚𑀺𑀦𑀸’’𑀢𑀺.

𑀖𑁄𑀲𑀓𑁄 𑀓𑀺𑀭 𑀕𑀼𑀴𑀓𑀻𑀴𑀸𑀬 𑀙𑁂𑀓𑁄, 𑀢𑁂𑀦 𑀦𑀁 𑀏𑀯𑀁 𑀦𑀺𑀩𑀦𑁆𑀥𑀺. 𑀲𑁄𑀧𑀺 𑀢𑀁 ‘‘𑀢𑁂𑀦 𑀳𑀺 𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀁 𑀯𑀤𑁂𑀳𑀺 𑁋 ‘𑀧𑀺𑀢𑀭𑀸 𑀓𑀺𑀭 𑀫𑁂 𑀳𑀺𑀬𑁆𑀬𑁄 𑀏𑀓𑀁 𑀓𑀫𑁆𑀫𑀁 𑀆𑀡𑀢𑁆𑀢𑀁, 𑀢𑀁 𑀦𑀺𑀧𑁆𑀨𑀸𑀤𑁂𑀳𑀻’’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀯𑀘. 𑀅𑀣 𑀦𑀁 𑀓𑀼𑀫𑁆𑀪𑀓𑀸𑀭𑁄 𑀲𑁂𑀝𑁆𑀞𑀺𑀦𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀫𑀸𑀭𑁂𑀢𑁆𑀯𑀸 𑀆𑀯𑀸𑀧𑁂 𑀔𑀺𑀧𑀺. 𑀖𑁄𑀲𑀓𑁄𑀧𑀺 𑀤𑀺𑀯𑀲𑀪𑀸𑀕𑀁 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀕𑁂𑀳𑀁 𑀕𑀦𑁆𑀢𑁆𑀯𑀸 ¶ ¶ ‘‘𑀓𑀺𑀁, 𑀢𑀸𑀢, 𑀦 𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀅𑀕𑀢𑀓𑀸𑀭𑀡𑀜𑁆𑀘 𑀓𑀦𑀺𑀝𑁆𑀞𑀲𑁆𑀲 𑀕𑀢𑀓𑀸𑀭𑀡𑀜𑁆𑀘 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 ‘‘𑀅𑀳𑀁 𑀥𑀻’’𑀢𑀺 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑁂 𑀧𑀓𑁆𑀓𑀼𑀣𑀺𑀢𑀮𑁄𑀳𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸, ‘‘𑀅𑀫𑁆𑀪𑁄, 𑀓𑀼𑀫𑁆𑀪𑀓𑀸𑀭, 𑀫𑀸 𑀫𑀁 𑀦𑀸𑀲𑀬𑀺, 𑀫𑀸 𑀫𑀁 𑀦𑀸𑀲𑀬𑀻’’𑀢𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀓𑀼𑀫𑁆𑀪𑀓𑀸𑀭𑁄 𑀢𑀁 𑀢𑀣𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀲𑀸𑀫𑀺, 𑀫𑀸 𑀲𑀤𑁆𑀤𑀁 𑀓𑀭𑀺, 𑀓𑀫𑁆𑀫𑀁 𑀢𑁂 𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺 𑀆𑀳. 𑀲𑁄 𑀧𑀩𑁆𑀩𑀢𑁂𑀦 𑀯𑀺𑀬 𑀫𑀳𑀦𑁆𑀢𑁂𑀦 𑀲𑁄𑀓𑁂𑀦 𑀅𑀯𑀢𑁆𑀣𑀝𑁄 𑀳𑀼𑀢𑁆𑀯𑀸 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀲𑀺. 𑀬𑀣𑀸 𑀢𑀁 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀧𑀤𑀼𑀲𑁆𑀲𑀫𑀸𑀦𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁄 ¶ 𑀤𑀡𑁆𑀟𑁂𑀦 𑀅𑀤𑀡𑁆𑀟𑁂𑀲𑀼, 𑀅𑀧𑁆𑀧𑀤𑀼𑀝𑁆𑀞𑁂𑀲𑀼 𑀤𑀼𑀲𑁆𑀲𑀢𑀺;

𑀤𑀲𑀦𑁆𑀦𑀫𑀜𑁆𑀜𑀢𑀭𑀁 𑀞𑀸𑀦𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀕𑀘𑁆𑀙𑀢𑀺.

‘‘𑀯𑁂𑀤𑀦𑀁 𑀨𑀭𑀼𑀲𑀁 𑀚𑀸𑀦𑀺𑀁, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁;

𑀕𑀭𑀼𑀓𑀁 𑀯𑀸𑀧𑀺 𑀆𑀩𑀸𑀥𑀁, 𑀘𑀺𑀢𑁆𑀢𑀓𑁆𑀔𑁂𑀧𑀜𑁆𑀘 𑀧𑀸𑀧𑀼𑀡𑁂.

‘‘𑀭𑀸𑀚𑀢𑁄 𑀯𑀸 𑀉𑀧𑀲𑀕𑁆𑀕𑀁, 𑀅𑀩𑁆𑀪𑀓𑁆𑀔𑀸𑀦𑀜𑁆𑀘 𑀤𑀸𑀭𑀼𑀡𑀁;

𑀧𑀭𑀺𑀓𑁆𑀔𑀬𑀜𑁆𑀘 𑀜𑀸𑀢𑀻𑀦𑀁, 𑀪𑁄𑀕𑀸𑀦𑀜𑁆𑀘 𑀧𑀪𑀗𑁆𑀕𑀼𑀭𑀁.

‘‘𑀅𑀣 𑀯𑀸𑀲𑁆𑀲 𑀅𑀕𑀸𑀭𑀸𑀦𑀺, 𑀅𑀕𑁆𑀕𑀺 𑀟𑀳𑀢𑀺 𑀧𑀸𑀯𑀓𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺. (𑀥. 𑀧. 𑁧𑁩𑁭-𑁧𑁪𑁦);

𑀏𑀯𑀁 ¶ 𑀲𑀦𑁆𑀢𑁂𑀧𑀺 𑀧𑀼𑀦 𑀦𑀁 𑀲𑁂𑀝𑁆𑀞𑀺 𑀉𑀚𑀼𑀓𑀁 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀓𑀺𑀦𑁆𑀢𑀺 𑀦𑀁 𑀫𑀸𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, ‘‘𑀫𑀫 𑀕𑀸𑀫𑀲𑀢𑁂 𑀆𑀬𑀼𑀢𑁆𑀢𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀸𑀬𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀫𑁂 𑀅𑀯𑀚𑀸𑀢𑀧𑀼𑀢𑁆𑀢𑁄, 𑀇𑀫𑀁 𑀫𑀸𑀭𑁂𑀢𑁆𑀯𑀸 𑀯𑀘𑁆𑀘𑀓𑀽𑀧𑁂 𑀔𑀺𑀧𑀢𑀼, 𑀏𑀯𑀁 𑀓𑀢𑁂 𑀅𑀳𑀁 𑀫𑀸𑀢𑀼𑀮𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸, ‘‘𑀢𑀸𑀢 𑀖𑁄𑀲𑀓, 𑀅𑀫𑁆𑀳𑀸𑀓𑀁 𑀕𑀸𑀫𑀲𑀢𑁂 𑀆𑀬𑀼𑀢𑁆𑀢𑀓𑁄 𑀅𑀢𑁆𑀣𑀺, 𑀇𑀫𑀁 𑀧𑀡𑁆𑀡𑀁 𑀳𑀭𑀺𑀢𑁆𑀯𑀸 𑀢𑀲𑁆𑀲 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀡𑁆𑀡𑀁 𑀢𑀲𑁆𑀲 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺. 𑀲𑁄 𑀧𑀦 𑀅𑀓𑁆𑀔𑀭𑀲𑀫𑀬𑀁 𑀦 𑀚𑀸𑀦𑀸𑀢𑀺. 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀦𑀁 𑀫𑀸𑀭𑀸𑀧𑁂𑀦𑁆𑀢𑁄𑀯 𑀲𑁂𑀝𑁆𑀞𑀺 𑀫𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀓𑀺𑀁 𑀅𑀓𑁆𑀔𑀭𑀲𑀫𑀬𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀢𑀺? 𑀇𑀢𑀺 𑀲𑁄 𑀅𑀢𑁆𑀢𑀦𑁄 𑀫𑀸𑀭𑀸𑀧𑀦𑀧𑀡𑁆𑀡𑀫𑁂𑀯 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀆𑀳 𑁋 ‘‘𑀧𑀸𑀣𑁂𑀬𑁆𑀬𑀁 𑀫𑁂, 𑀢𑀸𑀢, 𑀦𑀢𑁆𑀣𑀻’’𑀢𑀺. ‘‘𑀧𑀸𑀣𑁂𑀬𑁆𑀬𑁂𑀦 𑀢𑁂 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 ‘𑀅𑀲𑀼𑀓𑀕𑀸𑀫𑁂 𑀦𑀸𑀫 𑀫𑀫𑀲𑀳𑀸𑀬𑀓𑁄 𑀲𑁂𑀝𑁆𑀞𑀺 𑀅𑀢𑁆𑀣𑀺, 𑀢𑀲𑁆𑀲 𑀖𑀭𑁂 𑀧𑀸𑀢𑀭𑀸𑀲𑀁 𑀓𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀸𑀳𑀻’’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀢𑀁 𑀕𑀸𑀫𑀁 𑀧𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀖𑀭𑀁 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀚𑀸𑀬𑀁 𑀧𑀲𑁆𑀲𑀺. ‘‘𑀢𑁆𑀯𑀁 𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁂, ‘‘𑀅𑀦𑁆𑀢𑁄𑀦𑀕𑀭𑀢𑁄’’𑀢𑀺 𑀆𑀳. ‘‘𑀓𑀲𑁆𑀲 𑀧𑀼𑀢𑁆𑀢𑁄𑀲𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑀓𑀲𑁂𑀝𑁆𑀞𑀺𑀦𑁄, 𑀅𑀫𑁆𑀫𑀸’’𑀢𑀺. ‘‘𑀢𑁆𑀯𑀁𑀲𑀺 𑀖𑁄𑀲𑀓𑁄 𑀦𑀸𑀫𑀸’’𑀢𑀺? ‘‘𑀆𑀫, 𑀅𑀫𑁆𑀫𑀸’’𑀢𑀺. 𑀢𑀲𑁆𑀲𑀸 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀢𑀲𑁆𑀫𑀺𑀁 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁂𑀝𑁆𑀞𑀺𑀦𑁄 𑀧𑀦𑁂𑀓𑀸 𑀥𑀻𑀢𑀸 𑀅𑀢𑁆𑀣𑀺 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸, 𑀢𑀁 𑀭𑀓𑁆𑀔𑀺𑀢𑀼𑀁 𑀏𑀓𑀫𑁂𑀯 𑀧𑁂𑀲𑀦𑀓𑀸𑀭𑀺𑀓𑀁 𑀤𑀸𑀲𑀺𑀁 𑀤𑀢𑁆𑀯𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀲𑀺𑀭𑀺𑀕𑀩𑁆𑀪𑁂 𑀯𑀲𑀸𑀧𑁂𑀦𑁆𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀢𑀲𑁆𑀫𑀺𑀁 ¶ 𑀔𑀡𑁂 𑀢𑀁 𑀤𑀸𑀲𑀺𑀁 𑀅𑀦𑁆𑀢𑀭𑀸𑀧𑀡𑀁 𑀧𑁂𑀲𑁂𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺𑀚𑀸𑀬𑀸 𑀤𑀺𑀲𑁆𑀯𑀸, ‘‘𑀓𑀼𑀳𑀺𑀁 𑀕𑀘𑁆𑀙𑀲𑀻’’𑀢𑀺 ¶ 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀅𑀬𑁆𑀬𑀥𑀻𑀢𑀸𑀬 𑀧𑁂𑀲𑀦𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁄 𑀢𑀸𑀯 𑀏𑀳𑀺, 𑀢𑀺𑀝𑁆𑀞𑀢𑀼 𑀧𑁂𑀲𑀦𑀁, 𑀧𑀼𑀢𑁆𑀢𑀲𑁆𑀲 𑀫𑁂 𑀧𑀻𑀞𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑀁 𑀫𑀓𑁆𑀔𑀺𑀢𑁆𑀯𑀸 𑀲𑀬𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀤𑁂𑀳𑀺, 𑀧𑀘𑁆𑀙𑀸 𑀧𑁂𑀲𑀦𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑀸 𑀢𑀣𑀸 𑀅𑀓𑀸𑀲𑀺.

𑀅𑀣 𑀦𑀁 𑀘𑀺𑀭𑁂𑀦𑀸𑀕𑀢𑀁 𑀲𑁂𑀝𑁆𑀞𑀺𑀥𑀻𑀢𑀸 𑀲𑀦𑁆𑀢𑀚𑁆𑀚𑁂𑀲𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀫𑀸 𑀫𑁂 𑀓𑀼𑀚𑁆𑀛𑀺, 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀖𑁄𑀲𑀓𑁄 𑀆𑀕𑀢𑁄, 𑀢𑀲𑁆𑀲 𑀇𑀤𑀜𑁆𑀘𑀺𑀤𑀜𑁆𑀘 𑀓𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀕𑀢𑀸𑀫𑁆𑀳𑀻’’𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸𑀬 ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀖𑁄𑀲𑀓𑁄’’𑀢𑀺 𑀦𑀸𑀫𑀁 𑀲𑀼𑀢𑁆𑀯𑀸𑀯 𑀧𑁂𑀫𑀁 𑀙𑀯𑀺𑀬𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀞𑀺𑀢𑀁. 𑀓𑁄𑀢𑀼𑀳𑀮𑀓𑀸𑀮𑀲𑁆𑀫𑀺𑀜𑁆𑀳𑀺 𑀲𑀸 𑀢𑀲𑁆𑀲 𑀧𑀚𑀸𑀧𑀢𑀻 𑀳𑀼𑀢𑁆𑀯𑀸 𑀦𑀸𑀴𑀺𑀓𑁄𑀤𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀺, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸. 𑀇𑀢𑀺 𑀢𑀁 𑀲𑁄 𑀧𑀼𑀩𑁆𑀩𑀲𑀺𑀦𑁂𑀳𑁄 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀡𑁆𑀳𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀅𑀣 𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀼𑀳𑀺𑀁 𑀲𑁄, 𑀅𑀫𑁆𑀫𑀸’’𑀢𑀺? ‘‘𑀲𑀬𑀦𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬𑀢𑀻’’𑀢𑀺. ‘‘𑀅𑀢𑁆𑀣𑀺 𑀧𑀦𑀲𑁆𑀲 𑀳𑀢𑁆𑀣𑁂 𑀓𑀺𑀜𑁆𑀘𑀻’’𑀢𑀺? ‘‘𑀤𑀼𑀲𑁆𑀲𑀦𑁆𑀢𑁂 𑀧𑀡𑁆𑀡𑀁 𑀅𑀢𑁆𑀣𑀻’’𑀢𑀺. 𑀲𑀸 ‘‘𑀓𑀺𑀁 𑀧𑀡𑁆𑀡𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀢𑀲𑁆𑀫𑀺𑀁 𑀦𑀺𑀤𑁆𑀤𑀸𑀬𑀦𑁆𑀢𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀜𑁆𑀜𑀯𑀺𑀳𑀺𑀢𑀢𑀸𑀬 𑀅𑀧𑀲𑁆𑀲𑀦𑁆𑀢𑀸𑀦𑀁 𑀑𑀢𑀭𑀺𑀢𑁆𑀯𑀸 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀡𑁆𑀡𑀁 𑀫𑁄𑀘𑁂𑀢𑁆𑀯𑀸 𑀆𑀤𑀸𑀬 𑀅𑀢𑁆𑀢𑀦𑁄 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀅𑀓𑁆𑀔𑀭𑀲𑀫𑀬𑁂 𑀓𑀼𑀲𑀮𑀢𑀸𑀬 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸, ‘‘𑀅𑀳𑁄 𑀯𑀢 𑀩𑀸𑀮𑁄, 𑀅𑀢𑁆𑀢𑀦𑁄 𑀫𑀭𑀡𑀧𑀡𑁆𑀡𑀁 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 ¶ 𑀯𑀺𑀘𑀭𑀢𑀺, 𑀲𑀘𑁂 𑀫𑀬𑀸 𑀦 𑀤𑀺𑀝𑁆𑀞𑀁 𑀅𑀲𑁆𑀲, 𑀦𑀢𑁆𑀣𑀺𑀲𑁆𑀲 𑀚𑀻𑀯𑀺𑀢’’𑀦𑁆𑀢𑀺 𑀢𑀁 𑀧𑀡𑁆𑀡𑀁 𑀨𑀸𑀮𑁂𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀯𑀘𑀦𑁂𑀦 𑀅𑀧𑀭𑀁 𑀧𑀡𑁆𑀡𑀁 𑀮𑀺𑀔𑀺 𑁋 ‘‘𑀅𑀬𑀁 𑀫𑀫 𑀧𑀼𑀢𑁆𑀢𑁄 𑀖𑁄𑀲𑀓𑁄 𑀦𑀸𑀫, 𑀕𑀸𑀫𑀲𑀢𑀢𑁄 𑀧𑀡𑁆𑀡𑀸𑀓𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀇𑀫𑀲𑁆𑀲 𑀚𑀦𑀧𑀤𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀸𑀫𑀲𑁆𑀲 𑀫𑀚𑁆𑀛𑁂 𑀤𑁆𑀯𑀺𑀪𑀽𑀫𑀓𑀁 𑀕𑁂𑀳𑀁 𑀓𑀸𑀭𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁂𑀦 𑀘𑁂𑀯 𑀧𑀼𑀭𑀺𑀲𑀕𑀼𑀢𑁆𑀢𑀺𑀬𑀸 𑀘 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀁 𑀓𑀭𑁄𑀢𑀼, 𑀫𑀬𑁆𑀳𑀜𑁆𑀘 ‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀬𑀸 𑀓𑀢’𑀦𑁆𑀢𑀺 𑀲𑀸𑀲𑀦𑀁 𑀧𑁂𑀲𑁂𑀢𑀼, 𑀏𑀯𑀁 𑀓𑀢𑁂 𑀅𑀳𑀁 ¶ 𑀫𑀸𑀢𑀼𑀮𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺, 𑀮𑀺𑀔𑀺𑀢𑁆𑀯𑀸 𑀘 𑀧𑀦 𑀲𑀗𑁆𑀖𑀭𑀺𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀤𑀼𑀲𑁆𑀲𑀦𑁆𑀢𑁂𑀬𑁂𑀯𑀲𑁆𑀲 𑀩𑀦𑁆𑀥𑀺.

𑀲𑁄 ¶ 𑀤𑀺𑀯𑀲𑀪𑀸𑀕𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀉𑀝𑁆𑀞𑀸𑀬 𑀪𑀼𑀜𑁆𑀚𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀆𑀬𑀼𑀢𑁆𑀢𑀓𑀁 𑀕𑀸𑀫𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀁𑀬𑁂𑀯 𑀧𑀲𑁆𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸, ‘‘𑀓𑀺𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀺𑀢𑀭𑀸 𑀫𑁂 𑀢𑀼𑀫𑁆𑀳𑀸𑀓𑀁 𑀧𑀡𑁆𑀡𑀁 𑀧𑁂𑀲𑀺𑀢’’𑀦𑁆𑀢𑀺. ‘‘𑀓𑀺𑀁 𑀧𑀡𑁆𑀡𑀁, 𑀢𑀸𑀢, 𑀆𑀳𑀭𑀸’’𑀢𑀺 𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 𑀯𑀸𑀘𑁂𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀧𑀲𑁆𑀲𑀣, 𑀪𑁄, 𑀫𑀫 𑀲𑀸𑀫𑀺𑀦𑁄 𑀫𑀬𑀺 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀫𑁂 𑀫𑀗𑁆𑀕𑀮𑀁 𑀓𑀭𑁄𑀢𑀽’’𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. ‘‘𑀲𑀻𑀖𑀁 𑀤𑀸𑀭𑀼𑀆𑀤𑀻𑀦𑀺 𑀆𑀳𑀭𑀣𑀸’’𑀢𑀺 𑀕𑀳𑀧𑀢𑀺𑀓𑁂 𑀯𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀯𑀼𑀢𑁆𑀢𑀧𑀓𑀸𑀭𑀁 𑀕𑁂𑀳𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀸𑀫𑀲𑀢𑀢𑁄 𑀧𑀡𑁆𑀡𑀸𑀓𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀚𑀦𑀧𑀤𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺𑀓𑀸 𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀬𑀸 𑀓𑀢’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 ‘‘𑀬𑀁 𑀓𑀸𑀭𑁂𑀫𑀺, 𑀢𑀁 𑀦 𑀳𑁄𑀢𑀺; 𑀬𑀁 𑀦 𑀓𑀸𑀭𑁂𑀫𑀺, 𑀢𑀤𑁂𑀯 𑀳𑁄𑀢𑀻’’𑀢𑀺 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀧𑀼𑀢𑁆𑀢𑀲𑁄𑀓𑁂𑀦 𑀲𑀤𑁆𑀥𑀺𑀁 𑀲𑁄 𑀲𑁄𑀓𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀼𑀘𑁆𑀙𑀺𑀟𑀸𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑀺𑀲𑀸𑀭𑀁 𑀚𑀦𑁂𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸𑀧𑀺 ‘‘𑀲𑀘𑁂 𑀓𑁄𑀘𑀺 𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺𑀓𑀸 𑀆𑀕𑀘𑁆𑀙𑀢𑀺, 𑀫𑀫 𑀅𑀓𑀣𑁂𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀢𑀭𑀁 𑀫𑀸 𑀓𑀣𑀬𑀺𑀢𑁆𑀣𑀸’’𑀢𑀺 ¶ 𑀚𑀦𑁂 𑀆𑀡𑀸𑀧𑁂𑀲𑀺. 𑀲𑁂𑀝𑁆𑀞𑀺𑀧𑀺 𑀔𑁄 ‘‘𑀤𑀸𑀦𑀺 𑀢𑀁 𑀤𑀼𑀝𑁆𑀞𑀧𑀼𑀢𑁆𑀢𑀁 𑀫𑀫 𑀲𑀸𑀧𑀢𑁂𑀬𑁆𑀬𑀲𑁆𑀲 𑀲𑀸𑀫𑀺𑀓𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀆𑀬𑀼𑀢𑁆𑀢𑀓𑀁 𑀆𑀳 𑁋 ‘‘𑀫𑀸𑀢𑀼𑀮, 𑀧𑀼𑀢𑁆𑀢𑀁 𑀫𑁂 𑀤𑀝𑁆𑀞𑀼𑀓𑀸𑀫𑁄𑀫𑁆𑀳𑀺, 𑀏𑀓𑀁 𑀧𑀸𑀤𑀫𑀽𑀮𑀺𑀓𑀁 𑀧𑁂𑀲𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀧𑀡𑁆𑀡𑀁 𑀤𑀢𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸𑀧𑀺 𑀢𑀲𑁆𑀲 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀓𑀺𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀲𑁂𑀝𑁆𑀞𑀺 𑀕𑀺𑀮𑀸𑀦𑁄, 𑀧𑀼𑀢𑁆𑀢𑀁 𑀧𑀲𑁆𑀲𑀺𑀢𑀼𑀁 𑀧𑀓𑁆𑀓𑁄𑀲𑀸𑀧𑁂𑀲𑀺, 𑀅𑀬𑁆𑀬𑁂’’𑀢𑀺. ‘‘𑀓𑀺𑀁, 𑀢𑀸𑀢, 𑀩𑀮𑀯𑀸, 𑀤𑀼𑀩𑁆𑀩𑀮𑁄’’𑀢𑀺? ‘‘𑀩𑀮𑀯𑀸 𑀢𑀸𑀯, 𑀆𑀳𑀸𑀭𑀁 𑀪𑀼𑀜𑁆𑀚𑀢𑀺𑀬𑁂𑀯, 𑀅𑀬𑁆𑀬𑁂’’𑀢𑀺. 𑀲𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀢𑀲𑁆𑀲 𑀦𑀺𑀯𑁂𑀲𑀦𑀜𑁆𑀘 𑀧𑀭𑀺𑀩𑁆𑀩𑀬𑀜𑁆𑀘 𑀤𑀸𑀧𑁂𑀢𑁆𑀯𑀸 ‘‘𑀫𑀬𑀸 𑀧𑁂𑀲𑀺𑀢𑀓𑀸𑀮𑁂 𑀕𑀫𑀺𑀲𑁆𑀲𑀲𑀺, 𑀅𑀘𑁆𑀙𑀲𑁆𑀲𑀼 𑀢𑀸𑀯𑀸’’𑀢𑀺 𑀆𑀳. 𑀲𑁂𑀝𑁆𑀞𑀺 𑀧𑀼𑀦 𑀆𑀬𑀼𑀢𑁆𑀢𑀓𑀁 𑀅𑀯𑀘, ‘‘𑀓𑀺𑀁, 𑀫𑀸𑀢𑀼𑀮, 𑀦 𑀢𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀢’’𑀦𑁆𑀢𑀺? ‘‘𑀧𑀳𑀺𑀢𑀁, 𑀲𑀸𑀫𑀺, 𑀕𑀢𑀧𑀼𑀭𑀺𑀲𑁄 𑀦 𑀢𑀸𑀯 𑀏𑀢𑀻’’𑀢𑀺. ‘‘𑀢𑁂𑀦 𑀳𑀺 𑀧𑀼𑀦 𑀅𑀧𑀭𑀁 𑀧𑁂𑀲𑁂𑀳𑀻’’𑀢𑀺. 𑀲𑁄 𑀧𑁂𑀲𑁂𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀢𑀲𑁆𑀫𑀺𑀫𑁆𑀧𑀺 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺. 𑀅𑀣 𑀲𑁂𑀝𑁆𑀞𑀺𑀦𑁄 𑀭𑁄𑀕𑁄 𑀩𑀮𑀯𑀸 𑀚𑀸𑀢𑁄, 𑀏𑀓𑀁 𑀪𑀸𑀚𑀦𑀁 𑀧𑀯𑀺𑀲𑀢𑀺, 𑀏𑀓𑀁 𑀦𑀺𑀓𑁆𑀔𑀫𑀢𑀺. 𑀧𑀼𑀦 𑀲𑁂𑀝𑁆𑀞𑀺 𑀆𑀬𑀼𑀢𑁆𑀢𑀓𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀫𑀸𑀢𑀼𑀮, 𑀦 𑀢𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀢’’𑀦𑁆𑀢𑀺? ‘‘𑀧𑀳𑀺𑀢𑀁, 𑀲𑀸𑀫𑀺, 𑀕𑀢𑀧𑀼𑀭𑀺𑀲𑁄 𑀦 𑀢𑀸𑀯 ¶ 𑀏𑀢𑀻’’𑀢𑀺. ‘‘𑀢𑁂𑀦 𑀳𑀺 𑀧𑀼𑀦 𑀅𑀧𑀭𑀁 𑀧𑁂𑀲𑁂𑀳𑀻’’𑀢𑀺. 𑀲𑁄 𑀧𑁂𑀲𑁂𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀢𑀢𑀺𑀬𑀯𑀸𑀭𑁂 𑀆𑀕𑀢𑀫𑁆𑀧𑀺 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀲𑁄 ‘‘𑀩𑀸𑀴𑁆𑀳𑀕𑀺𑀮𑀸𑀦𑁄, 𑀅𑀬𑁆𑀬𑁂, 𑀲𑁂𑀝𑁆𑀞𑀺 𑀆𑀳𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀘𑁆𑀘𑀼𑀧𑀭𑀸𑀬𑀡𑁄 𑀚𑀸𑀢𑁄, 𑀏𑀓𑀁 𑀪𑀸𑀚𑀦𑀁 𑀦𑀺𑀓𑁆𑀔𑀫𑀢𑀺 ¶ , 𑀏𑀓𑀁 𑀧𑀯𑀺𑀲𑀢𑀻’’𑀢𑀺 𑀆𑀳. 𑀲𑁂𑀝𑁆𑀞𑀺𑀥𑀻𑀢𑀸 ‘‘𑀇𑀤𑀸𑀦𑀺 𑀕𑀦𑁆𑀢𑀼𑀁 𑀓𑀸𑀮𑁄’’𑀢𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 ‘‘𑀧𑀺𑀢𑀸 𑀢𑁂 𑀓𑀺𑀭 𑀕𑀺𑀮𑀸𑀦𑁄’’𑀢𑀺 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀺𑀁 𑀯𑀤𑁂𑀲𑀺 𑀪𑀤𑁆𑀤𑁂’’𑀢𑀺 𑀯𑀼𑀢𑁆𑀢𑁂 ‘‘𑀅𑀨𑀸𑀲𑀼𑀓𑀫𑀲𑁆𑀲, 𑀲𑀸𑀫𑀻’’𑀢𑀺 𑀆𑀳. ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺. 𑀲𑀸𑀫𑀺? ‘‘𑀕𑀸𑀫𑀲𑀢𑀢𑁄 𑀯𑀼𑀝𑁆𑀞𑀸𑀦𑀓𑀧𑀡𑁆𑀡𑀸𑀓𑀸𑀭𑀁 ¶ 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀓𑀝𑁂𑀳𑀺 𑀆𑀤𑀸𑀬 𑀧𑀓𑁆𑀓𑀸𑀫𑀺.

𑀅𑀣 𑀦𑀁 𑀲𑀸 ‘‘𑀧𑀺𑀢𑀸 𑀢𑁂 𑀤𑀼𑀩𑁆𑀩𑀮𑁄, 𑀏𑀢𑁆𑀢𑀓𑀁 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀏𑀢𑀁 𑀦𑀺𑀯𑀢𑁆𑀢𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀓𑀼𑀮𑀕𑁂𑀳𑀁 𑀧𑁂𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀆𑀳 𑁋 ‘‘𑀲𑀸𑀫𑀺, 𑀢𑁆𑀯𑀁 𑀅𑀢𑁆𑀢𑀦𑁄 𑀧𑀺𑀢𑀼 𑀧𑀸𑀤𑀧𑀲𑁆𑀲𑁂 𑀢𑀺𑀝𑁆𑀞𑁂𑀬𑁆𑀬𑀸𑀲𑀺, 𑀅𑀳𑀁 𑀉𑀲𑁆𑀲𑀻𑀲𑀓𑀧𑀲𑁆𑀲𑁂 𑀞𑀲𑁆𑀲𑀸𑀫𑀻’’𑀢𑀺. 𑀕𑁂𑀳𑀁 𑀧𑀯𑀺𑀲𑀫𑀸𑀦𑀸𑀬𑁂𑀯 𑀘 ‘‘𑀕𑁂𑀳𑀲𑁆𑀲 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀆𑀭𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀅𑀢𑁆𑀢𑀦𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺. 𑀧𑀯𑀺𑀝𑁆𑀞𑀓𑀸𑀮𑁂 𑀧𑀦 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀧𑀺𑀢𑀼 𑀧𑀸𑀤𑀧𑀲𑁆𑀲𑁂 𑀅𑀝𑁆𑀞𑀸𑀲𑀺, 𑀇𑀢𑀭𑀸 𑀉𑀲𑁆𑀲𑀻𑀲𑀓𑀧𑀲𑁆𑀲𑁂.

𑀢𑀲𑁆𑀫𑀺𑀁 𑀔𑀡𑁂 𑀲𑁂𑀝𑁆𑀞𑀺 𑀉𑀢𑁆𑀢𑀸𑀦𑀓𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀆𑀬𑀼𑀢𑁆𑀢𑀓𑁄 𑀧𑀦 𑀢𑀲𑁆𑀲 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀧𑀼𑀢𑁆𑀢𑁄 𑀢𑁂, 𑀲𑀸𑀫𑀺, 𑀆𑀕𑀢𑁄’’𑀢𑀺 𑀆𑀳. ‘‘𑀓𑀼𑀳𑀺𑀁 𑀲𑁄’’𑀢𑀺? ‘‘𑀏𑀲 𑀧𑀸𑀤𑀫𑀽𑀮𑁂 𑀞𑀺𑀢𑁄’’𑀢𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀆𑀬𑀓𑀫𑁆𑀫𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀫𑀫 𑀕𑁂𑀳𑁂 𑀓𑀺𑀢𑁆𑀢𑀓𑀁 𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀥𑀦𑀲𑁆𑀲𑁂𑀯 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀬𑁄, 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑀸𑀦𑀁 𑀧𑀦 𑀯𑀦𑀕𑀸𑀫𑀓𑁆𑀔𑁂𑀢𑁆𑀢𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀬𑀸𑀦𑀯𑀸𑀳𑀦𑀸𑀦𑀜𑁆𑀘 𑀅𑀬𑀜𑁆𑀘 𑀅𑀬𑀜𑁆𑀘 𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀯𑀼𑀢𑁆𑀢𑁂, ‘‘𑀅𑀳𑀁 𑀏𑀢𑁆𑀢𑀓𑀁 𑀥𑀦𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀖𑁄𑀲𑀓𑀲𑁆𑀲 𑀦 𑀤𑁂𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀤𑁂𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸 ‘‘𑀅𑀬𑀁 𑀧𑀼𑀦 𑀓𑀣𑁂𑀦𑁆𑀢𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀣𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁄𑀓𑀸𑀢𑀼𑀭𑀸 𑀯𑀺𑀬 𑀓𑁂𑀲𑁂 𑀯𑀺𑀓𑀺𑀭𑀺𑀢𑁆𑀯𑀸 𑀭𑁄𑀤𑀫𑀸𑀦𑀸 ‘‘𑀓𑀺𑀁 𑀦𑀸𑀫𑁂𑀢𑀁, 𑀢𑀸𑀢, 𑀯𑀤𑁂𑀣, 𑀇𑀤𑀫𑁆𑀧𑀺 𑀦𑀸𑀫 𑀯𑁄 𑀯𑀘𑀦𑀁 𑀲𑀼𑀡𑁄𑀫, 𑀅𑀮𑀓𑁆𑀔𑀺𑀓𑀸 𑀯𑀢𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀫𑀢𑁆𑀣𑀓𑁂𑀦 𑀦𑀁 𑀉𑀭𑀫𑀚𑁆𑀛𑁂 𑀧𑀳𑀭𑀦𑁆𑀢𑀻 𑀧𑀢𑀺𑀢𑁆𑀯𑀸 𑀬𑀣𑀸 𑀧𑀼𑀦 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸𑀲𑁆𑀲 𑀉𑀭𑀫𑀚𑁆𑀛𑁂 𑀫𑀢𑁆𑀣𑀓𑁂𑀦 𑀖𑀁𑀲𑁂𑀦𑁆𑀢𑀻 𑀆𑀭𑁄𑀤𑀦𑀁 𑀤𑀲𑁆𑀲𑁂𑀲𑀺. 𑀲𑁂𑀝𑁆𑀞𑀺 𑀢𑀁𑀔𑀡𑀜𑁆𑀜𑁂𑀯 𑀓𑀸𑀮𑀫𑀓𑀸𑀲𑀺. ‘‘𑀲𑁂𑀝𑁆𑀞𑀺 𑀫𑀢𑁄’’𑀢𑀺 𑀕𑀦𑁆𑀢𑁆𑀯𑀸 ¶ ¶ 𑀉𑀢𑁂𑀦𑀲𑁆𑀲 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑀸𑀧𑁂𑀢𑁆𑀯𑀸, ‘‘𑀅𑀢𑁆𑀣𑀺 𑀧𑀦𑀲𑁆𑀲 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀖𑁄𑀲𑀓𑁄 𑀦𑀸𑀫 𑀢𑀲𑁆𑀲 𑀧𑀼𑀢𑁆𑀢𑁄, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸𑀯 𑀫𑀢𑁄, 𑀤𑁂𑀯𑀸’’𑀢𑀺.

𑀭𑀸𑀚𑀸 𑀅𑀧𑀭𑀪𑀸𑀕𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀤𑀺𑀯𑀲𑁂 𑀤𑁂𑀯𑁄 𑀯𑀲𑁆𑀲𑀺. 𑀭𑀸𑀚𑀗𑁆𑀕𑀡𑁂 𑀢𑀢𑁆𑀣 𑀢𑀢𑁆𑀣 𑀉𑀤𑀓𑀁 𑀲𑀡𑁆𑀞𑀸𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀬𑀸𑀲𑀺. 𑀭𑀸𑀚𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀭𑀸𑀚𑀗𑁆𑀕𑀡𑁂 𑀉𑀤𑀓𑀁 𑀮𑀗𑁆𑀖𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 ‘‘𑀢𑁆𑀯𑀁 𑀖𑁄𑀲𑀓𑁄 𑀦𑀸𑀫, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀺𑀢𑀸 𑀫𑁂 ¶ 𑀫𑀢𑁄𑀢𑀺 𑀫𑀸 𑀲𑁄𑀘𑀺, 𑀢𑀯 𑀧𑁂𑀢𑁆𑀢𑀺𑀓𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀢𑀼𑀬𑁆𑀳𑀫𑁂𑀯 𑀤𑀲𑁆𑀲𑀸𑀫𑀻’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑀸𑀢𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀭𑀸𑀚𑀸 𑀕𑀘𑁆𑀙𑀦𑁆𑀢𑀜𑁆𑀘 𑀦𑀁 𑀑𑀮𑁄𑀓𑁂𑀦𑁆𑀢𑁄𑀯 𑀅𑀝𑁆𑀞𑀸𑀲𑀺. 𑀲𑁄 𑀆𑀕𑀫𑀦𑀓𑀸𑀮𑁂 𑀮𑀗𑁆𑀖𑀺𑀢𑀁 𑀉𑀤𑀓𑀁 𑀕𑀫𑀦𑀓𑀸𑀮𑁂 𑀑𑀢𑀭𑀺𑀢𑁆𑀯𑀸 𑀲𑀡𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀭𑀸𑀚𑀸 𑀢𑀢𑁄𑀯 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀓𑀺𑀁 𑀦𑀼 𑀔𑁄, 𑀢𑀸𑀢, 𑀢𑁆𑀯𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀉𑀤𑀓𑀁 𑀮𑀗𑁆𑀖𑀺𑀢𑁆𑀯𑀸 𑀆𑀕𑀫𑁆𑀫 𑀕𑀘𑁆𑀙𑀦𑁆𑀢𑁄 𑀑𑀢𑀭𑀺𑀢𑁆𑀯𑀸 𑀲𑀡𑀺𑀓𑀁 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯, 𑀅𑀳𑀁 𑀢𑀲𑁆𑀫𑀺𑀁 𑀔𑀡𑁂 𑀓𑀼𑀫𑀸𑀭𑀓𑁄, 𑀓𑀻𑀴𑀦𑀓𑀸𑀮𑁄 𑀦𑀸𑀫, 𑀲𑁄 𑀇𑀤𑀸𑀦𑀺 𑀧𑀦 𑀫𑁂 𑀤𑁂𑀯𑁂𑀦 𑀞𑀸𑀦𑀦𑁆𑀢𑀭𑀁 𑀧𑀝𑀺𑀲𑁆𑀲𑀼𑀢𑀁. 𑀢𑀲𑁆𑀫𑀸 𑀬𑀣𑀸 𑀧𑀼𑀭𑁂 𑀅𑀘𑀭𑀺𑀢𑁆𑀯𑀸 𑀇𑀤𑀸𑀦𑀺 𑀲𑀦𑁆𑀦𑀺𑀲𑀺𑀦𑁆𑀦𑁂𑀦 𑀳𑀼𑀢𑁆𑀯𑀸 𑀘𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀥𑀺𑀢𑀺𑀫𑀸𑀬𑀁 𑀧𑀼𑀭𑀺𑀲𑁄, 𑀇𑀤𑀸𑀦𑁂𑀯𑀲𑁆𑀲 𑀞𑀸𑀦𑀦𑁆𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀭𑀸 𑀪𑀼𑀢𑁆𑀢𑀁 𑀪𑁄𑀕𑀁 𑀤𑀢𑁆𑀯𑀸 𑀲𑀩𑁆𑀩𑀲𑀢𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺.

𑀲𑁄 𑀭𑀣𑁂 𑀞𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁 𑀓𑀫𑁆𑀧𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀓𑀸𑀴𑀺𑀤𑀸𑀲𑀺𑀬𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸 ¶ ‘‘𑀅𑀫𑁆𑀫 𑀓𑀸𑀴𑀺, 𑀧𑀼𑀢𑁆𑀢𑀲𑁆𑀲 𑀢𑁂 𑀏𑀢𑁆𑀢𑀺𑀓𑀸 𑀲𑀫𑁆𑀧𑀢𑁆𑀢𑀺 𑀫𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸’’𑀢𑀺 𑀆𑀳. ‘‘𑀓𑀺𑀁 𑀓𑀸𑀭𑀡𑀸, 𑀅𑀫𑁆𑀫𑀸’’𑀢𑀺? ‘‘𑀅𑀬𑀜𑁆𑀳𑀺 𑀅𑀢𑁆𑀢𑀦𑁄 𑀫𑀭𑀡𑀧𑀡𑁆𑀡𑀁 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀖𑀭𑀁 𑀆𑀕𑀢𑁄, 𑀅𑀣𑀲𑁆𑀲 𑀫𑀬𑀸 𑀢𑀁 𑀧𑀡𑁆𑀡𑀁 𑀨𑀸𑀮𑁂𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀫𑀗𑁆𑀕𑀮𑀓𑀭𑀡𑀢𑁆𑀣𑀸𑀬 𑀅𑀜𑁆𑀜𑀁 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀢𑁆𑀣 𑀆𑀭𑀓𑁆𑀔𑁄 𑀓𑀢𑁄’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀏𑀢𑁆𑀢𑀓𑀁 𑀧𑀲𑁆𑀲𑀲𑀺, 𑀇𑀫𑀁 𑀧𑀦 𑀲𑁂𑀝𑁆𑀞𑀺 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀭𑁂𑀢𑀼𑀓𑀸𑀫𑁄 𑀫𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀓𑁂𑀯𑀮𑀁 𑀇𑀫𑀁 𑀦𑀺𑀲𑁆𑀲𑀸𑀬 𑀩𑀳𑀼𑀁 𑀥𑀦𑀁 𑀔𑀻𑀬𑀻’’𑀢𑀺. ‘‘𑀅𑀫𑁆𑀫, 𑀅𑀢𑀺𑀪𑀸𑀭𑀺𑀬𑀁 𑀯𑀢 𑀲𑁂𑀝𑁆𑀞𑀺𑀦𑀸 𑀓𑀢’’𑀦𑁆𑀢𑀺. 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀦𑁆𑀢𑀁 𑀧𑀦 𑀦𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀏𑀢𑁆𑀢𑀺𑀓𑀸 𑀲𑀫𑁆𑀧𑀢𑁆𑀢𑀺 𑀫𑀁 𑀦𑀺𑀲𑁆𑀲𑀸𑀬 ¶ 𑀉𑀧𑁆𑀧𑀦𑁆𑀦𑀸’’𑀢𑀺 𑀳𑀲𑀺𑀢𑀁 𑀅𑀓𑀸𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑀺𑀲𑁆𑀯𑀸, ‘‘𑀓𑀺𑀁 𑀓𑀸𑀭𑀡𑀸 𑀳𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀏𑀓𑀁 𑀓𑀸𑀭𑀡𑀁 𑀦𑀺𑀲𑁆𑀲𑀸𑀬𑀸’’𑀢𑀺. ‘‘𑀓𑀣𑁂𑀳𑀺 𑀦’’𑀦𑁆𑀢𑀺? ‘‘𑀲𑀸 𑀦 𑀓𑀣𑁂𑀲𑀺’’. 𑀲𑁄 ‘‘𑀲𑀘𑁂 𑀦 𑀓𑀣𑁂𑀲𑁆𑀲𑀲𑀺, 𑀤𑁆𑀯𑀺𑀥𑀸 𑀢𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀅𑀲𑀺𑀁 𑀦𑀺𑀓𑁆𑀓𑀟𑁆𑀠𑀺. 𑀲𑀸 ‘‘𑀅𑀬𑀁 𑀏𑀢𑁆𑀢𑀺𑀓𑀸 𑀲𑀫𑁆𑀧𑀢𑁆𑀢𑀺 𑀢𑀬𑀸 𑀫𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀳𑀲𑀺𑀢’’𑀦𑁆𑀢𑀺 𑀆𑀳. ‘‘𑀬𑀤𑀺 𑀫𑀫 𑀧𑀺𑀢𑀭𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀫𑀬𑁆𑀳𑀁 𑀦𑀺𑀬𑁆𑀬𑀸𑀤𑀺𑀢𑀁, 𑀢𑁆𑀯𑀁 𑀏𑀢𑁆𑀣 𑀓𑀺𑀁 𑀳𑁄𑀲𑀻’’𑀢𑀺? 𑀲𑁄 𑀓𑀺𑀭 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀢𑁂𑀦𑀲𑁆𑀲𑀸 𑀯𑀘𑀦𑀁 𑀦 𑀲𑀤𑁆𑀤𑀳𑀺. 𑀅𑀣𑀲𑁆𑀲 𑀲𑀸 ‘‘𑀢𑀼𑀫𑁆𑀳𑀸𑀓𑀁 𑀧𑀺𑀢𑀭𑀸 𑀫𑀭𑀡𑀧𑀡𑁆𑀡𑀁 𑀤𑀢𑁆𑀯𑀸 𑀧𑁂𑀲𑀺𑀢𑀸, 𑀢𑀼𑀫𑁆𑀳𑁂 𑀫𑀬𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀢𑁆𑀯𑀸 𑀭𑀓𑁆𑀔𑀺𑀢𑀸’’𑀢𑀺 𑀲𑀩𑁆𑀩𑀁 𑀓𑀣𑁂𑀲𑀺. ‘‘𑀢𑁆𑀯𑀁 𑀅𑀪𑀽𑀢𑀁 𑀓𑀣𑁂𑀲𑀻’’𑀢𑀺 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀫𑀸𑀢𑀭𑀁 𑀓𑀸𑀴𑀺𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. ‘‘𑀆𑀫, 𑀢𑀸𑀢, 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀁 𑀫𑀸𑀭𑁂𑀢𑀼𑀓𑀸𑀫𑁄 𑀫𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀦𑀺𑀲𑁆𑀲𑀸𑀬 𑀩𑀳𑀼𑀁 𑀥𑀦𑀁 𑀔𑀻𑀬𑀺, 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀢𑁆𑀯𑀁 𑀫𑀭𑀡𑀢𑁄 𑀫𑀼𑀢𑁆𑀢𑁄, 𑀇𑀤𑀸𑀦𑀺 𑀪𑁄𑀕𑀕𑀸𑀫𑀢𑁄 𑀆𑀕𑀫𑁆𑀫 ¶ 𑀲𑀩𑁆𑀩𑀲𑀢𑁂𑀦 𑀲𑀤𑁆𑀥𑀺𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀢𑁆𑀢𑁄’’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀪𑀸𑀭𑀺𑀬𑀁 𑀯𑀢 𑀓𑀫𑁆𑀫𑀁, 𑀏𑀯𑀭𑀽𑀧𑀸 𑀔𑁄 𑀧𑀦 𑀫𑀭𑀡𑀸 𑀫𑀼𑀢𑁆𑀢𑀲𑁆𑀲 𑀫𑀫 𑀧𑀫𑀸𑀤𑀚𑀻𑀯𑀺𑀢𑀁 𑀚𑀻𑀯𑀺𑀢𑀼𑀁 𑀅𑀬𑀼𑀢𑁆𑀢𑀁, 𑀅𑀧𑁆𑀧𑀫𑀢𑁆𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 ¶ 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀤𑁆𑀥𑀺𑀓𑀓𑀧𑀡𑀸𑀤𑀻𑀦𑀁 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀫𑀺𑀢𑁆𑀢𑁄 𑀦𑀸𑀫𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑁄 𑀤𑀸𑀦𑀩𑁆𑀬𑀸𑀯𑀝𑁄 𑀅𑀳𑁄𑀲𑀺. 𑀅𑀬𑀁 𑀖𑁄𑀲𑀓𑀲𑁂𑀝𑁆𑀞𑀺𑀦𑁄 𑀉𑀧𑁆𑀧𑀢𑁆𑀢𑀺.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀪𑀤𑁆𑀤𑀯𑀢𑀻𑀦𑀕𑀭𑁂 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺 𑀦𑀸𑀫 𑀖𑁄𑀲𑀓𑀲𑁂𑀝𑁆𑀞𑀺𑀦𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀲𑀳𑀸𑀬𑀓𑁄 𑀅𑀳𑁄𑀲𑀺. 𑀪𑀤𑁆𑀤𑀯𑀢𑀻𑀦𑀕𑀭𑀢𑁄 𑀆𑀕𑀢𑀸𑀦𑀁 𑀯𑀸𑀡𑀺𑀚𑀸𑀦𑀁 𑀲𑀦𑁆𑀢𑀺𑀓𑁂 𑀖𑁄𑀲𑀓𑀲𑁂𑀝𑁆𑀞𑀺 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺𑀦𑁄 𑀲𑀫𑁆𑀧𑀢𑁆𑀢𑀺𑀜𑁆𑀘 𑀯𑀬𑀧𑁆𑀧𑀤𑁂𑀲𑀜𑁆𑀘 𑀲𑀼𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀳𑀸𑀬𑀓𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺. 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺𑀧𑀺 𑀓𑁄𑀲𑀫𑁆𑀩𑀺𑀢𑁄 𑀆𑀕𑀢𑀸𑀦𑀁 𑀯𑀸𑀡𑀺𑀚𑀸𑀦𑀁 𑀲𑀦𑁆𑀢𑀺𑀓𑁂 𑀖𑁄𑀲𑀓𑀲𑁂𑀝𑁆𑀞𑀺𑀦𑁄 𑀲𑀫𑁆𑀧𑀢𑁆𑀢𑀺𑀜𑁆𑀘 𑀯𑀬𑀧𑁆𑀧𑀤𑁂𑀲𑀜𑁆𑀘 𑀲𑀼𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀳𑀸𑀬𑀓𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺. 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀤𑀺𑀝𑁆𑀞𑀧𑀼𑀩𑁆𑀩𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀯𑀲𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀅𑀳𑀺𑀯𑀸𑀢𑀭𑁄𑀕𑁄 𑀧𑀢𑀺𑀢𑁄. 𑀢𑀲𑁆𑀫𑀺𑀁 𑀧𑀢𑀺𑀢𑁂 𑀧𑀞𑀫𑀁 𑀫𑀓𑁆𑀔𑀺𑀓𑀸 𑀫𑀭𑀦𑁆𑀢𑀺, 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦𑁂𑀯 𑀓𑀻𑀝𑀸 𑀫𑀽𑀲𑀺𑀓𑀸 𑀓𑀼𑀓𑁆𑀓𑀼𑀝𑀸 𑀲𑀽𑀓𑀭𑀸 𑀕𑀸𑀯𑁄 𑀤𑀸𑀲𑀻 𑀤𑀸𑀲𑀸 𑀲𑀩𑁆𑀩𑀧𑀘𑁆𑀙𑀸 𑀖𑀭𑀫𑀸𑀦𑀼𑀲𑀓𑀸𑀧𑀺 𑀫𑀭𑀦𑁆𑀢𑀺. 𑀢𑁂𑀲𑀼 𑀬𑁂 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺, 𑀢𑁂 𑀚𑀻𑀯𑀺𑀢𑀁 𑀮𑀪𑀦𑁆𑀢𑀺, 𑀢𑀤𑀸 𑀧𑀦 𑀲𑁂𑀝𑁆𑀞𑀺 𑀘 𑀪𑀭𑀺𑀬𑀸 𑀘 𑀥𑀻𑀢𑀸 𑀘𑀲𑁆𑀲 𑀢𑀣𑀸 𑀧𑀮𑀸𑀬𑀺𑀢𑁆𑀯𑀸 ¶ 𑀖𑁄𑀲𑀓𑀲𑁂𑀝𑁆𑀞𑀺𑀁 𑀧𑀲𑁆𑀲𑀺𑀢𑀼𑀁 𑀧𑀢𑁆𑀣𑁂𑀦𑁆𑀢𑀸 𑀓𑁄𑀲𑀫𑁆𑀩𑀺𑀫𑀕𑁆𑀕𑀁 ¶ 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀔𑀻𑀡𑀧𑀸𑀣𑁂𑀬𑁆𑀬𑀸 𑀯𑀸𑀢𑀸𑀢𑀧𑁂𑀦 𑀘𑁂𑀯 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀘 𑀓𑀺𑀮𑀦𑁆𑀢𑀲𑀭𑀻𑀭𑀸 𑀓𑀺𑀘𑁆𑀙𑁂𑀦 𑀓𑁄𑀲𑀫𑁆𑀩𑀺𑀁 𑀧𑀢𑁆𑀯𑀸 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀦𑁆𑀳𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀏𑀓𑀁 𑀲𑀸𑀮𑀁 𑀧𑀯𑀺𑀲𑀺𑀁𑀲𑀼.

𑀢𑀢𑁄 𑀲𑁂𑀝𑁆𑀞𑀺 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑀸 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀲𑀳𑀸𑀬𑀓𑁄 𑀓𑀺𑀭 𑀫𑁂 𑀅𑀤𑁆𑀥𑀺𑀓𑀓𑀧𑀡𑀸𑀤𑀻𑀦𑀁 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀤𑀸𑀧𑁂𑀲𑀺. 𑀢𑀢𑁆𑀣 𑀥𑀻𑀢𑀭𑀁 𑀧𑁂𑀲𑁂𑀢𑁆𑀯𑀸 𑀆𑀳𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀸𑀳𑀁 𑀤𑁆𑀯𑀻𑀳𑀁 𑀇𑀥𑁂𑀯 𑀲𑀭𑀻𑀭𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀳𑀸𑀬𑀓𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀲𑀸 ‘‘𑀲𑀸𑀥𑀼, 𑀲𑀸𑀫𑀻’’𑀢𑀺. 𑀢𑁂 𑀲𑀸𑀮𑀸𑀬𑀫𑁂𑀯 𑀯𑀲𑀺𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀓𑀧𑀡𑀤𑁆𑀥𑀺𑀓𑀸𑀤𑀻𑀲𑀼 𑀆𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁂𑀲𑀼 𑀫𑀸𑀢𑀸𑀧𑀺𑀢𑀭𑁄, ‘‘𑀅𑀫𑁆𑀫, 𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀆𑀳𑀸𑀭𑀁 𑀆𑀳𑀭𑀸’’𑀢𑀺 𑀥𑀻𑀢𑀭𑀁 𑀧𑁂𑀲𑀬𑀺𑀁𑀲𑀼. 𑀫𑀳𑀸𑀪𑁄𑀕𑀓𑀼𑀮𑀲𑁆𑀲 𑀥𑀻𑀢𑀸 𑀯𑀺𑀧𑀢𑁆𑀢𑀺𑀬𑀸 𑀅𑀘𑁆𑀙𑀺𑀦𑁆𑀦𑀮𑀚𑁆𑀚𑀺𑀢𑀸𑀬 𑀅𑀮𑀚𑁆𑀚𑀫𑀸𑀦𑀸 𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀓𑀧𑀡𑀚𑀦𑁂𑀦 𑀲𑀤𑁆𑀥𑀺𑀁 𑀆𑀳𑀸𑀭𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 ‘‘𑀓𑀢𑀺 𑀧𑀝𑀺𑀯𑀻𑀲𑁂 𑀕𑀡𑁆𑀳𑀺𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺 𑀧𑀼𑀝𑁆𑀞𑀸 𑀘 𑀧𑀦 ‘‘𑀢𑀬𑁄’’𑀢𑀺 𑀆𑀳. 𑀅𑀣𑀲𑁆𑀲𑀸 𑀢𑀬𑁄 𑀧𑀝𑀺𑀯𑀻𑀲𑁂 𑀅𑀤𑀸𑀲𑀺. 𑀢𑀸𑀬 𑀪𑀢𑁆𑀢𑁂 𑀆𑀳𑀝𑁂 𑀢𑀬𑁄𑀧𑀺 𑀏𑀓𑀢𑁄 𑀪𑀼𑀜𑁆𑀚𑀺𑀢𑀼𑀁 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀫𑀸𑀢𑀸𑀥𑀻𑀢𑀭𑁄 𑀲𑁂𑀝𑁆𑀞𑀺𑀁 𑀆𑀳𑀁𑀲𑀼 𑁋 ‘‘𑀲𑀸𑀫𑀺, 𑀯𑀺𑀧𑀢𑁆𑀢𑀺 𑀦𑀸𑀫 𑀫𑀳𑀸𑀓𑀼𑀮𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀫𑀸 𑀅𑀫𑁆𑀳𑁂 𑀑𑀮𑁄𑀓𑁂𑀢𑁆𑀯𑀸 𑀪𑀼𑀜𑁆𑀚, 𑀫𑀸 𑀘𑀺𑀦𑁆𑀢𑀬𑀻’’𑀢𑀺. 𑀇𑀢𑀺 𑀦𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀬𑀸𑀘𑀺𑀢𑁆𑀯𑀸 𑀪𑁄𑀚𑁂𑀲𑀼𑀁. 𑀲𑁄 𑀪𑀼𑀜𑁆𑀚𑀺𑀢𑁆𑀯𑀸 𑀆𑀳𑀸𑀭𑀁 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀓𑀸𑀮𑀫𑀓𑀸𑀲𑀺. 𑀫𑀸𑀢𑀸𑀥𑀻𑀢𑀭𑁄 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀭𑁄𑀤𑀺𑀁𑀲𑀼. 𑀓𑀼𑀫𑀸𑀭𑀺𑀓𑀸 𑀧𑀼𑀦𑀤𑀺𑀯𑀲𑁂 𑀭𑁄𑀤𑀫𑀸𑀦𑀸 𑀆𑀳𑀸𑀭𑀢𑁆𑀣𑀸𑀬 𑀕𑀦𑁆𑀢𑁆𑀯𑀸, ‘‘𑀓𑀢𑀺 ¶ 𑀧𑀝𑀺𑀯𑀻𑀲𑁂 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺 ¶ 𑀯𑀼𑀢𑁆𑀢𑀸, ‘‘𑀤𑁆𑀯𑁂’’𑀢𑀺 𑀯𑀢𑁆𑀯𑀸 𑀆𑀳𑀸𑀭𑀁 𑀆𑀳𑀭𑀺𑀢𑁆𑀯𑀸 𑀫𑀸𑀢𑀭𑀁 𑀬𑀸𑀘𑀺𑀢𑁆𑀯𑀸 𑀪𑁄𑀚𑁂𑀲𑀺. 𑀲𑀸𑀧𑀺 𑀢𑀸𑀬 𑀬𑀸𑀘𑀺𑀬𑀫𑀸𑀦𑀸 𑀪𑀼𑀜𑁆𑀚𑀺𑀢𑁆𑀯𑀸 𑀆𑀳𑀸𑀭𑀁 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀁 𑀤𑀺𑀯𑀲𑀫𑁂𑀯 𑀓𑀸𑀮𑀫𑀓𑀸𑀲𑀺. 𑀓𑀼𑀫𑀸𑀭𑀺𑀓𑀸 𑀏𑀓𑀺𑀓𑀸𑀯 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀢𑀸𑀬 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀅𑀢𑀺𑀯𑀺𑀬 𑀲𑀜𑁆𑀚𑀸𑀢𑀙𑀸𑀢𑀓𑀤𑀼𑀓𑁆𑀔𑀸 𑀧𑀼𑀦𑀤𑀺𑀯𑀲𑁂 𑀬𑀸𑀘𑀓𑁂𑀳𑀺 𑀲𑀤𑁆𑀥𑀺𑀁 𑀭𑁄𑀤𑀦𑁆𑀢𑀻 𑀆𑀳𑀸𑀭𑀢𑁆𑀣𑀸𑀬 𑀕𑀦𑁆𑀢𑁆𑀯𑀸, ‘‘𑀓𑀢𑀺 𑀧𑀝𑀺𑀯𑀻𑀲𑁂 𑀕𑀡𑁆𑀳𑀺𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸 ‘‘𑀏𑀓’’𑀦𑁆𑀢𑀺 𑀆𑀳. 𑀫𑀺𑀢𑁆𑀢𑀓𑀼𑀝𑀼𑀫𑁆𑀩𑀺𑀓𑁄 𑀢𑀁 𑀢𑀬𑁄 𑀤𑀺𑀯𑀲𑁂 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀺𑀁 𑀲𑀜𑁆𑀚𑀸𑀦𑀸𑀢𑀺, 𑀢𑁂𑀦 𑀢𑀁 ‘‘𑀅𑀧𑁂𑀳𑀺 𑀦𑀲𑁆𑀲, 𑀯𑀲𑀮𑀺, 𑀅𑀚𑁆𑀚 𑀢𑀯 𑀓𑀼𑀘𑁆𑀙𑀺𑀧𑁆𑀧𑀫𑀸𑀡𑀁 𑀅𑀜𑁆𑀜𑀸𑀲𑀻’’𑀢𑀺 𑀆𑀳. 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸 𑀓𑀼𑀮𑀥𑀻𑀢𑀸 ¶ 𑀧𑀘𑁆𑀘𑁄𑀭𑀲𑁆𑀫𑀺𑀁 𑀲𑀢𑁆𑀢𑀺𑀧𑀳𑀸𑀭𑀁 𑀯𑀺𑀬 𑀯𑀡𑁂 𑀔𑀸𑀭𑁄𑀤𑀓𑀲𑁂𑀘𑀦𑀓𑀁 𑀯𑀺𑀬 𑀘 𑀧𑀢𑁆𑀯𑀸 ‘‘𑀓𑀺𑀁, 𑀲𑀸𑀫𑀻’’𑀢𑀺 𑀆𑀳. ‘‘𑀢𑀬𑀸 𑀧𑀼𑀭𑁂 𑀢𑀬𑁄 𑀓𑁄𑀝𑁆𑀞𑀸𑀲𑀸 𑀕𑀳𑀺𑀢𑀸, 𑀳𑀺𑀬𑁆𑀬𑁄 𑀤𑁆𑀯𑁂, 𑀅𑀚𑁆𑀚 𑀏𑀓𑀁 𑀕𑀡𑁆𑀳𑀸𑀲𑀺. 𑀅𑀚𑁆𑀚 𑀢𑁂 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀧𑁆𑀧𑀫𑀸𑀡𑀁 𑀜𑀸𑀢’’𑀦𑁆𑀢𑀺. ‘‘𑀫𑀸 𑀫𑀁, 𑀲𑀸𑀫𑀺, ‘𑀅𑀢𑁆𑀢𑀦𑁄𑀯 𑀅𑀢𑁆𑀣𑀸𑀬 𑀕𑀡𑁆𑀳𑀻’𑀢𑀺 𑀫𑀜𑁆𑀜𑀺𑀢𑁆𑀣𑀸’’𑀢𑀺. ‘‘𑀅𑀣 𑀓𑀲𑁆𑀫𑀸 𑀏𑀯𑀁 𑀕𑀡𑁆𑀳𑀻’’𑀢𑀺? ‘‘𑀧𑀼𑀭𑁂 𑀢𑀬𑁄 𑀚𑀦𑀸 𑀅𑀳𑀼𑀫𑁆𑀳, 𑀲𑀸𑀫𑀺, 𑀳𑀺𑀬𑁆𑀬𑁄 𑀤𑁆𑀯𑁂, 𑀅𑀚𑁆𑀚 𑀏𑀓𑀺𑀓𑀸𑀯 𑀚𑀸𑀢𑀸𑀫𑁆𑀳𑀻’’𑀢𑀺. 𑀲𑁄 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀸𑀬 𑀓𑀣𑀺𑀢𑀁 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀜𑁆𑀚𑀸𑀢𑀩𑀮𑀯𑀤𑁄𑀫𑀦𑀲𑁆𑀲𑁄 𑀳𑀼𑀢𑁆𑀯𑀸, ‘‘𑀅𑀫𑁆𑀫, 𑀏𑀯𑀁 𑀲𑀦𑁆𑀢𑁂 𑀫𑀸 𑀘𑀺𑀦𑁆𑀢𑀬𑀺, 𑀢𑁆𑀯𑀁 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀅𑀚𑁆𑀚𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀫 𑀥𑀻𑀢𑀸𑀬𑁂𑀯 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀚𑁂𑀝𑁆𑀞𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑀸 𑀤𑀸𑀦𑀕𑁆𑀕𑁂 𑀉𑀘𑁆𑀘𑀸𑀲𑀤𑁆𑀤𑀁 𑀫𑀳𑀸𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀢𑀸𑀢, 𑀓𑀲𑁆𑀫𑀸 𑀏𑀢𑀁 𑀚𑀦𑀁 𑀦𑀺𑀲𑁆𑀲𑀤𑁆𑀤𑀁 𑀓𑀢𑁆𑀯𑀸 𑀤𑀸𑀦𑀁 𑀦 𑀤𑁂𑀣𑀸’’𑀢𑀺 𑀆𑀳. ‘‘𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀅𑀫𑁆𑀫𑀸’’𑀢𑀺. ‘‘𑀲𑀓𑁆𑀓𑀸, 𑀢𑀸𑀢𑀸’’𑀢𑀺. ‘‘𑀓𑀣𑀁 𑀲𑀓𑁆𑀓𑀸, 𑀅𑀫𑁆𑀫𑀸’’𑀢𑀺? ‘‘𑀢𑀸𑀢 𑀤𑀸𑀦𑀕𑁆𑀕𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀏𑀓𑁂𑀓𑀲𑁆𑀲𑁂𑀯 𑀧𑀯𑁂𑀲𑀦𑀧𑁆𑀧𑀫𑀸𑀡𑁂𑀦 𑀤𑁆𑀯𑁂 𑀤𑁆𑀯𑀸𑀭𑀸𑀦𑀺 𑀬𑁄𑀚𑁂𑀢𑁆𑀯𑀸, ‘𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀏𑀓𑁂𑀦 𑀦𑀺𑀓𑁆𑀔𑀫𑀣𑀸’𑀢𑀺 𑀯𑀤𑁂𑀣, 𑀏𑀯𑀁 𑀦𑀺𑀲𑁆𑀲𑀤𑁆𑀤𑀸 𑀳𑀼𑀢𑁆𑀯𑀸𑀯 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸, ‘‘𑀪𑀤𑁆𑀤𑀓𑁄𑀯, 𑀅𑀫𑁆𑀫, 𑀉𑀧𑀸𑀬𑁄’’𑀢𑀺 𑀢𑀣𑀸 𑀓𑀸𑀭𑁂𑀲𑀺. 𑀲𑀸𑀧𑀺 𑀧𑀼𑀩𑁆𑀩𑁂 𑀲𑀸𑀫𑀸 𑀦𑀸𑀫. 𑀯𑀢𑀺𑀬𑀸 𑀧𑀦 𑀓𑀸𑀭𑀺𑀢𑀢𑁆𑀢𑀸 𑀲𑀸𑀫𑀸𑀯𑀢𑀻 𑀦𑀸𑀫 𑀚𑀸𑀢𑀸. 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀕𑁆𑀕𑁂 𑀓𑁄𑀮𑀸𑀳𑀮𑀁 𑀧𑀘𑁆𑀙𑀺𑀦𑁆𑀤𑀻. 𑀖𑁄𑀲𑀓𑀲𑁂𑀝𑁆𑀞𑀺 𑀧𑀼𑀩𑁆𑀩𑁂 𑀢𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑁄 ‘‘𑀫𑀬𑁆𑀳𑀁 𑀤𑀸𑀦𑀕𑁆𑀕𑁂 𑀲𑀤𑁆𑀤𑁄’’𑀢𑀺 𑀢𑀼𑀲𑁆𑀲𑀢𑀺. 𑀤𑁆𑀯𑀻𑀳𑀢𑀻𑀳𑀁 𑀧𑀦 𑀲𑀤𑁆𑀤𑀁 𑀅𑀲𑀼𑀡𑀦𑁆𑀢𑁄 𑀫𑀺𑀢𑁆𑀢𑀓𑀼𑀝𑀼𑀫𑁆𑀩𑀺𑀓𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀧𑀼𑀘𑁆𑀙𑀺 𑁋 ‘‘𑀤𑀺𑀬𑁆𑀬𑀢𑀺 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦’’𑀦𑁆𑀢𑀺? ‘‘𑀆𑀫, 𑀲𑀸𑀫𑀻’’𑀢𑀺. ‘‘𑀅𑀣 𑀓𑀺𑀁 𑀤𑁆𑀯𑀻𑀳𑀢𑀻𑀳𑀁 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀻’’𑀢𑀺? ‘‘𑀬𑀣𑀸 𑀦𑀺𑀲𑁆𑀲𑀤𑁆𑀤𑀸 𑀳𑀼𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀢𑀣𑀸 𑀫𑁂 𑀉𑀧𑀸𑀬𑁄 𑀓𑀢𑁄’’𑀢𑀺. ‘‘𑀅𑀣 𑀧𑀼𑀩𑁆𑀩𑁂𑀯 𑀓𑀲𑁆𑀫𑀸 𑀦𑀸𑀓𑀸𑀲𑀻’’𑀢𑀺? ‘‘𑀅𑀚𑀸𑀦𑀦𑀢𑀸𑀬, 𑀲𑀸𑀫𑀻’’𑀢𑀺. ‘‘𑀇𑀤𑀸𑀦𑀺 𑀓𑀣𑀁 𑀢𑁂 𑀜𑀸𑀢𑁄’’𑀢𑀺? ‘‘𑀥𑀻𑀢𑀭𑀸 𑀫𑁂 𑀅𑀓𑁆𑀔𑀸𑀢𑁄, 𑀲𑀸𑀫𑀻’’𑀢𑀺. 𑀫𑀬𑁆𑀳𑀁 𑀅𑀯𑀺𑀤𑀺𑀢𑀸 ‘‘𑀢𑀯 𑀥𑀻𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺. 𑀲𑁄 𑀅𑀳𑀺𑀯𑀸𑀢𑀭𑁄𑀕𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺𑀦𑁄 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀲𑁆𑀲𑀸 𑀅𑀢𑁆𑀢𑀦𑁄 𑀚𑁂𑀝𑁆𑀞𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀏𑀯𑀁 𑀲𑀦𑁆𑀢𑁂 𑀫𑀫 𑀓𑀲𑁆𑀫𑀸 𑀦 𑀓𑀣𑁂𑀲𑀺, 𑀫𑀫 𑀲𑀳𑀸𑀬𑀓𑀲𑁆𑀲 ¶ 𑀥𑀻𑀢𑀸 𑀫𑀫 𑀥𑀻𑀢𑀸 𑀦𑀸𑀫𑀸’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀲𑀻’’𑀢𑀺? ‘‘𑀆𑀫, 𑀢𑀸𑀢𑀸’’𑀢𑀺. ‘‘𑀢𑁂𑀦 𑀳𑀺 𑀫𑀸 𑀘𑀺𑀦𑁆𑀢𑀬𑀺, 𑀢𑁆𑀯𑀁 𑀫𑀫 ¶ 𑀥𑀻𑀢𑀸𑀲𑀻’’𑀢𑀺 𑀢𑀁 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀧𑀭𑀺𑀯𑀸𑀭𑀢𑁆𑀣𑀸𑀬 𑀢𑀲𑁆𑀲𑀸 𑀧𑀜𑁆𑀘 𑀇𑀢𑁆𑀣𑀺𑀲𑀢𑀸𑀦𑀺 𑀤𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀚𑁂𑀝𑁆𑀞𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀦𑀕𑀭𑁂 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀦𑀓𑁆𑀔𑀢𑁆𑀢𑁂 𑀩𑀳𑀺 𑀅𑀦𑀺𑀓𑁆𑀔𑀫𑀦𑀓𑀸 𑀓𑀼𑀮𑀥𑀻𑀢𑀭𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀧𑀤𑀲𑀸𑀯 ¶ 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺. 𑀢𑀲𑁆𑀫𑀸 𑀢𑀁 𑀤𑀺𑀯𑀲𑀁 𑀲𑀸𑀫𑀸𑀯𑀢𑀻𑀧𑀺 𑀧𑀜𑁆𑀘𑀳𑀺 𑀇𑀢𑁆𑀣𑀺𑀲𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀭𑀸𑀚𑀗𑁆𑀕𑀡𑁂𑀦𑁂𑀯 𑀦𑁆𑀳𑀸𑀬𑀺𑀢𑀼𑀁 𑀅𑀕𑀫𑀸𑀲𑀺. 𑀉𑀢𑁂𑀦𑁄 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲𑀺𑀫𑀸 𑀦𑀸𑀝𑀓𑀺𑀢𑁆𑀣𑀺𑀬𑁄’’𑀢𑀺 𑀧𑀼𑀘𑁆𑀙𑀺. ‘‘𑀦 𑀓𑀲𑁆𑀲𑀘𑀺 𑀦𑀸𑀝𑀓𑀺𑀢𑁆𑀣𑀺𑀬𑁄, 𑀤𑁂𑀯𑀸’’𑀢𑀺. ‘‘𑀅𑀣 𑀓𑀲𑁆𑀲 𑀥𑀻𑀢𑀭𑁄’’𑀢𑀺? ‘‘𑀖𑁄𑀲𑀓𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀤𑁂𑀯, 𑀲𑀸𑀫𑀸𑀯𑀢𑀻 𑀦𑀸𑀫𑁂𑀲𑀸’’𑀢𑀺. 𑀲𑁄 𑀤𑀺𑀲𑁆𑀯𑀸𑀯 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 𑀲𑁂𑀝𑁆𑀞𑀺𑀦𑁄 𑀲𑀸𑀲𑀦𑀁 𑀧𑀸𑀳𑁂𑀲𑀺 𑁋 ‘‘𑀥𑀻𑀢𑀭𑀁 𑀓𑀺𑀭 𑀫𑁂 𑀧𑁂𑀲𑁂𑀢𑀽’’𑀢𑀺. ‘‘𑀦 𑀧𑁂𑀲𑁂𑀫𑀺, 𑀤𑁂𑀯𑀸’’𑀢𑀺. ‘‘𑀫𑀸 𑀓𑀺𑀭 𑀏𑀯𑀁 𑀓𑀭𑁄𑀢𑀼, 𑀧𑁂𑀲𑁂𑀢𑀼𑀬𑁂𑀯𑀸’’𑀢𑀺. ‘‘𑀫𑀬𑀁 𑀕𑀳𑀧𑀢𑀺𑀓𑀸 𑀦𑀸𑀫 𑀓𑀼𑀫𑀸𑀭𑀺𑀓𑀸𑀦𑀁 𑀧𑁄𑀣𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀓𑀟𑁆𑀠𑀦𑀪𑀬𑁂𑀦 𑀦 𑀤𑁂𑀫, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 𑀕𑁂𑀳𑀁 𑀮𑀜𑁆𑀙𑀸𑀧𑁂𑀢𑁆𑀯𑀸 𑀲𑁂𑀝𑁆𑀞𑀺𑀜𑁆𑀘 𑀪𑀭𑀺𑀬𑀜𑁆𑀘 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀩𑀳𑀺 𑀓𑀸𑀭𑀸𑀧𑁂𑀲𑀺. 𑀲𑀸𑀫𑀸𑀯𑀢𑀻, 𑀦𑁆𑀳𑀸𑀬𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀑𑀓𑀸𑀲𑀁 𑀅𑀮𑀪𑀦𑁆𑀢𑀻, ‘‘𑀓𑀺𑀁 𑀏𑀢𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀫𑁆𑀫, 𑀭𑀸𑀚𑀸 𑀢𑀯 𑀓𑀸𑀭𑀡𑀸 𑀧𑀳𑀺𑀡𑀺. 𑀅𑀣 ‘𑀦 𑀫𑀬𑀁 𑀤𑀲𑁆𑀲𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀖𑀭𑀁 𑀮𑀜𑁆𑀙𑀸𑀧𑁂𑀢𑁆𑀯𑀸 𑀅𑀫𑁆𑀳𑁂 𑀩𑀳𑀺 𑀓𑀸𑀭𑀸𑀧𑁂𑀲𑀻’’𑀢𑀺. ‘‘𑀢𑀸𑀢, 𑀪𑀸𑀭𑀺𑀬𑀁 𑀯𑁄 𑀓𑀫𑁆𑀫𑀁 𑀓𑀢𑀁, 𑀭𑀜𑁆𑀜𑀸 𑀦𑀸𑀫 𑀧𑀳𑀺𑀢𑁂 ‘𑀦, 𑀤𑁂𑀫𑀸’𑀢𑀺 𑀅𑀯𑀢𑁆𑀯𑀸 ‘𑀲𑀘𑁂 𑀫𑁂 𑀥𑀻𑀢𑀭𑀁 𑀲𑀧𑀭𑀺𑀯𑀸𑀭𑀁 𑀕𑀡𑁆𑀳𑀣, 𑀤𑁂𑀫𑀸’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀸𑀢𑀸’’𑀢𑀺. ‘‘𑀲𑀸𑀥𑀼, 𑀅𑀫𑁆𑀫, 𑀢𑀯 𑀭𑀼𑀘𑀺𑀬𑀸 𑀲𑀢𑀺 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀢𑀣𑀸 𑀲𑀸𑀲𑀦𑀁 𑀧𑀸𑀳𑁂𑀲𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀲𑀧𑀭𑀺𑀯𑀸𑀭𑀁 𑀆𑀦𑁂𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁂𑀲𑀸 𑀢𑀲𑁆𑀲𑀸𑀬𑁂𑀯 𑀧𑀭𑀺𑀯𑀸𑀭𑀺𑀢𑁆𑀣𑀺𑀬𑁄 𑀅𑀳𑁂𑀲𑀼𑀁. 𑀅𑀬𑀁 𑀲𑀸𑀫𑀸𑀯𑀢𑀺𑀬𑀸 𑀉𑀧𑁆𑀧𑀢𑁆𑀢𑀺.

𑀉𑀢𑁂𑀦𑀲𑁆𑀲 𑀧𑀦 𑀅𑀧𑀭𑀸𑀧𑀺 𑀯𑀸𑀲𑀼𑀮𑀤𑀢𑁆𑀢𑀸 𑀦𑀸𑀫 𑀤𑁂𑀯𑀻 𑀅𑀳𑁄𑀲𑀺 ¶ 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀥𑀻𑀢𑀸. 𑀉𑀚𑁆𑀚𑁂𑀦𑀺𑀬𑀜𑁆𑀳𑀺 𑀘𑀡𑁆𑀟𑀧𑀚𑁆𑀚𑁄𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀢𑁄 𑀆𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑀲𑁆𑀲𑀧𑀺 𑀓𑀲𑁆𑀲𑀘𑀺 𑀏𑀯𑀭𑀽𑀧𑀸 𑀲𑀫𑁆𑀧𑀢𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 ‘‘𑀓𑀺𑀁 𑀲𑀫𑁆𑀧𑀢𑁆𑀢𑀺 𑀦𑀸𑀫𑁂𑀲𑀸, 𑀓𑁄𑀲𑀫𑁆𑀩𑀺𑀬𑀁 𑀉𑀢𑁂𑀦𑀲𑁆𑀲 𑀭𑀜𑁆𑀜𑁄 𑀅𑀢𑀺𑀫𑀳𑀢𑀻 𑀲𑀫𑁆𑀧𑀢𑀻’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀆𑀳 𑁋 ‘‘𑀢𑁂𑀦 𑀳𑀺 𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺? ‘‘𑀦 𑀲𑀓𑁆𑀓𑀸 𑀲𑁄 𑀕𑀳𑁂𑀢𑀼’’𑀦𑁆𑀢𑀺. ‘‘𑀓𑀺𑀜𑁆𑀘𑀺 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀬𑁂𑀯𑀸’’𑀢𑀺? ‘‘𑀦 𑀲𑀓𑁆𑀓𑀸 𑀤𑁂𑀯𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀲𑁄 𑀳𑀢𑁆𑀣𑀺𑀓𑀦𑁆𑀢𑀁 𑀦𑀸𑀫 𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀫𑀦𑁆𑀢𑀁 ¶ 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀦𑀸𑀕𑁂 𑀧𑀮𑀸𑀧𑁂𑀢𑀺𑀧𑀺 𑀕𑀡𑁆𑀳𑀸𑀢𑀺𑀧𑀺. 𑀳𑀢𑁆𑀣𑀺𑀯𑀸𑀳𑀦𑀲𑀫𑁆𑀧𑀦𑁆𑀦𑁄 𑀢𑁂𑀦 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀻’’𑀢𑀺. ‘‘𑀦 𑀲𑀓𑁆𑀓𑀸 𑀫𑀬𑀸 𑀲𑁄 𑀕𑀳𑁂𑀢𑀼’’𑀦𑁆𑀢𑀺. ‘‘𑀲𑀘𑁂 𑀢𑁂, 𑀤𑁂𑀯, 𑀏𑀓𑀦𑁆𑀢𑁂𑀦 𑀅𑀬𑀁 𑀦𑀺𑀘𑁆𑀙𑀬𑁄, 𑀢𑁂𑀦 𑀳𑀺 𑀤𑀸𑀭𑀼𑀳𑀢𑁆𑀣𑀺𑀁 𑀓𑀸𑀭𑁂𑀢𑁆𑀯𑀸 ¶ 𑀢𑀲𑁆𑀲𑀸𑀲𑀦𑁆𑀦𑀝𑁆𑀞𑀸𑀦𑀁 𑀧𑁂𑀲𑁂𑀳𑀺. 𑀲𑁄 𑀳𑀢𑁆𑀣𑀺𑀯𑀸𑀳𑀦𑀁 𑀯𑀸 𑀅𑀲𑁆𑀲𑀯𑀸𑀳𑀦𑀁 𑀯𑀸 𑀲𑀼𑀢𑁆𑀯𑀸 𑀤𑀽𑀭𑀫𑁆𑀧𑀺 𑀕𑀘𑁆𑀙𑀢𑀺. 𑀢𑀢𑁆𑀣 𑀦𑀁 𑀆𑀕𑀢𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺.

𑀭𑀸𑀚𑀸 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀤𑀸𑀭𑀼𑀫𑀬𑀁 𑀬𑀦𑁆𑀢𑀳𑀢𑁆𑀣𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀩𑀳𑀺 𑀧𑀺𑀮𑁄𑀢𑀺𑀓𑀸𑀳𑀺 𑀯𑁂𑀞𑁂𑀢𑁆𑀯𑀸 𑀓𑀢𑀘𑀺𑀢𑁆𑀢𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀯𑀺𑀚𑀺𑀢𑁂 𑀆𑀲𑀦𑁆𑀦𑀝𑁆𑀞𑀸𑀦𑁂 𑀏𑀓𑀲𑁆𑀫𑀺𑀁 𑀲𑀭𑀢𑀻𑀭𑁂 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀳𑀢𑁆𑀣𑀺𑀦𑁄 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀲𑀝𑁆𑀞𑀺 𑀧𑀼𑀭𑀺𑀲𑀸 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀦𑁆𑀢𑀺, 𑀳𑀢𑁆𑀣𑀺𑀮𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀙𑀟𑁆𑀟𑁂𑀲𑀼𑀁. 𑀏𑀓𑁄 𑀯𑀦𑀘𑀭𑀓𑁄 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀤𑁂𑀯, 𑀫𑀬𑀸 𑀲𑀩𑁆𑀩𑀲𑁂𑀢𑁄 𑀓𑁂𑀮𑀸𑀲𑀓𑀽𑀝𑀧𑀝𑀺𑀪𑀸𑀕𑁄 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀅𑀦𑀼𑀘𑁆𑀙𑀯𑀺𑀓𑁄 𑀯𑀭𑀯𑀸𑀭𑀡𑁄 𑀤𑀺𑀝𑁆𑀞𑁄’’𑀢𑀺. 𑀉𑀢𑁂𑀦𑁄 𑀢𑀫𑁂𑀯 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀳𑀢𑁆𑀣𑀺𑀁 𑀅𑀪𑀺𑀭𑀼𑀬𑁆𑀳 𑀲𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 ¶ 𑀘𑀭𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀆𑀕𑀦𑁆𑀢𑁆𑀯𑀸 𑀫𑀚𑁆𑀛𑁂 𑀢𑀼𑀘𑁆𑀙𑀁 𑀓𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀩𑀮𑀓𑀸𑀬𑀁 𑀧𑀬𑁄𑀚𑁂𑀲𑀺. 𑀉𑀢𑁂𑀦𑁄 𑀢𑀲𑁆𑀲𑀸𑀕𑀫𑀦𑀁 𑀅𑀚𑀸𑀦𑀦𑁆𑀢𑁄 𑀳𑀢𑁆𑀣𑀺𑀁 𑀅𑀦𑀼𑀩𑀦𑁆𑀥𑀺. 𑀅𑀦𑁆𑀢𑁄 𑀞𑀺𑀢𑀫𑀦𑀼𑀲𑁆𑀲𑀸 𑀯𑁂𑀕𑁂𑀦 𑀧𑀮𑀸𑀧𑁂𑀲𑀼𑀁. 𑀓𑀝𑁆𑀞𑀳𑀢𑁆𑀣𑀻 𑀭𑀜𑁆𑀜𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀻𑀡𑀁 𑀯𑀸𑀤𑁂𑀦𑁆𑀢𑀲𑁆𑀲 𑀢𑀦𑁆𑀢𑀺𑀲𑀤𑁆𑀤𑀁 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀧𑀮𑀸𑀬𑀢𑀺𑀬𑁂𑀯. 𑀭𑀸𑀚𑀸 𑀳𑀢𑁆𑀣𑀺𑀦𑀸𑀕𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑁆𑀲𑀁 𑀆𑀭𑀼𑀬𑁆𑀳 𑀅𑀦𑀼𑀩𑀦𑁆𑀥𑀺. 𑀢𑀲𑁆𑀫𑀺𑀁 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀦𑁆𑀢𑁂 𑀩𑀮𑀓𑀸𑀬𑁄 𑀑𑀳𑀻𑀬𑀺. 𑀭𑀸𑀚𑀸 𑀏𑀓𑀓𑁄𑀯 𑀅𑀳𑁄𑀲𑀺. 𑀅𑀣 𑀦𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀬𑀼𑀢𑁆𑀢𑀸 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀧𑀼𑀭𑀺𑀲𑀸 𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀅𑀤𑀁𑀲𑀼. 𑀅𑀣𑀲𑁆𑀲 𑀩𑀮𑀓𑀸𑀬𑁄 𑀅𑀫𑀺𑀢𑁆𑀢𑀯𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀩𑀳𑀺𑀦𑀕𑀭𑁂𑀯 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑁆𑀯𑀸 𑀅𑀘𑁆𑀙𑀺.

𑀘𑀡𑁆𑀟𑀧𑀚𑁆𑀚𑁄𑀢𑁄𑀧𑀺 𑀉𑀢𑁂𑀦𑀁 𑀚𑀻𑀯𑀕𑁆𑀕𑀸𑀳𑀫𑁂𑀯 𑀕𑀸𑀳𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑁄𑀭𑀕𑁂𑀳𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀢𑀬𑁄 𑀤𑀺𑀯𑀲𑁂 𑀚𑀬𑀧𑀸𑀦𑀁 𑀧𑀺𑀯𑀺. 𑀉𑀢𑁂𑀦𑁄 𑀢𑀢𑀺𑀬𑀤𑀺𑀯𑀲𑁂 𑀆𑀭𑀓𑁆𑀔𑀓𑁂 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀯𑁄, 𑀢𑀸𑀢, 𑀭𑀸𑀚𑀸’’𑀢𑀺? ‘‘‘𑀧𑀘𑁆𑀘𑀸𑀫𑀺𑀢𑁆𑀢𑁄 𑀫𑁂 𑀕𑀳𑀺𑀢𑁄’𑀢𑀺 𑀚𑀬𑀧𑀸𑀦𑀁 𑀧𑀺𑀯𑀢𑀻’’𑀢𑀺. ‘‘𑀓𑀸 𑀦𑀸𑀫𑁂𑀲𑀸 𑀫𑀸𑀢𑀼𑀕𑀸𑀫𑀲𑁆𑀲 𑀯𑀺𑀬 𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑁄 𑀓𑀺𑀭𑀺𑀬𑀸, 𑀦𑀦𑀼 𑀧𑀝𑀺𑀭𑀸𑀚𑀽𑀦𑀁 𑀕𑀳𑁂𑀢𑁆𑀯𑀸 ¶ 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀸 𑀫𑀸𑀭𑁂𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀅𑀫𑁆𑀳𑁂 𑀤𑀼𑀓𑁆𑀔𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀚𑀬𑀧𑀸𑀦𑀁 𑀓𑀺𑀭 𑀧𑀺𑀯𑀢𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀆𑀕𑀦𑁆𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀏𑀯𑀁 𑀯𑀤𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺, 𑀏𑀯𑀭𑀽𑀧𑁄 𑀓𑀺𑀭 𑀢𑁂 𑀫𑀦𑁆𑀢𑁄 𑀅𑀢𑁆𑀣𑀺, 𑀢𑀁 𑀫𑀬𑁆𑀳𑀁 𑀤𑀲𑁆𑀲𑀲𑀻’’𑀢𑀺. ‘‘𑀲𑀸𑀥𑀼 𑀤𑀲𑁆𑀲𑀸𑀫𑀺, 𑀕𑀳𑀡𑀲𑀫𑀬𑁂 𑀫𑀁 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀕𑀡𑁆𑀳𑀸𑀳𑀺. 𑀓𑀺𑀁 𑀧𑀦 𑀢𑁆𑀯𑀁 𑀯𑀦𑁆𑀤𑀺𑀲𑁆𑀲𑀲𑀻’’𑀢𑀺? ‘‘𑀓𑁆𑀬𑀸𑀳𑀁 𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀦 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺? ‘‘𑀅𑀳𑀫𑁆𑀧𑀺 𑀢𑁂 𑀦 𑀤𑀲𑁆𑀲𑀸𑀫𑀻’’𑀢𑀺 ¶ . ‘‘𑀏𑀯𑀁 𑀲𑀦𑁆𑀢𑁂 𑀭𑀸𑀚𑀸𑀡𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀭𑁄𑀳𑀺, 𑀲𑀭𑀻𑀭𑀲𑁆𑀲 𑀫𑁂 𑀇𑀲𑁆𑀲𑀭𑁄, 𑀦 𑀧𑀦 𑀘𑀺𑀢𑁆𑀢𑀲𑁆𑀲𑀸’’𑀢𑀺. 𑀭𑀸𑀚𑀸 𑀢𑀲𑁆𑀲 𑀲𑀽𑀭𑀕𑀚𑁆𑀚𑀺𑀢𑀁 𑀲𑀼𑀢𑁆𑀯𑀸, ‘‘𑀓𑀣𑀁 𑀦𑀼 𑀔𑁄 𑀇𑀫𑀁 𑀫𑀦𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀇𑀫𑀁 𑀫𑀦𑁆𑀢𑀁 𑀅𑀜𑁆𑀜𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀫𑀫 𑀥𑀻𑀢𑀭𑀁 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 ¶ 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀅𑀳𑀁 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀅𑀜𑁆𑀜𑀲𑁆𑀲 𑀯𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀤𑀲𑁆𑀲𑀲𑀻’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀅𑀫𑁆𑀳𑀸𑀓𑀁 𑀖𑀭𑁂 𑀏𑀓𑀸 𑀔𑀼𑀚𑁆𑀚𑀸 𑀅𑀢𑁆𑀣𑀺 𑀢𑀲𑁆𑀲𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 𑀢𑁆𑀯𑀁 𑀩𑀳𑀺𑀲𑀸𑀡𑀺𑀬𑀁 𑀞𑀺𑀢𑁄𑀯 𑀫𑀦𑁆𑀢𑀁 𑀯𑀸𑀘𑁂𑀳𑀻’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀔𑀼𑀚𑁆𑀚𑀸 𑀯𑀸 𑀳𑁄𑀢𑀼 𑀧𑀻𑀞𑀲𑀧𑁆𑀧𑀺 𑀯𑀸, 𑀯𑀦𑁆𑀤𑀦𑁆𑀢𑀺𑀬𑀸 𑀤𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀥𑀻𑀢𑀭𑀁 𑀯𑀸𑀲𑀼𑀮𑀤𑀢𑁆𑀢𑀁 𑀆𑀳 𑁋 ‘‘𑀅𑀫𑁆𑀫, 𑀏𑀓𑁄 𑀲𑀗𑁆𑀔𑀓𑀼𑀝𑁆𑀞𑀻 𑀅𑀦𑀕𑁆𑀖𑀫𑀦𑁆𑀢𑀁 𑀚𑀸𑀦𑀸𑀢𑀺, 𑀢𑀁 𑀅𑀜𑁆𑀜𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀢𑁆𑀯𑀁 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀫𑀦𑁆𑀢𑀁 𑀕𑀡𑁆𑀳, 𑀲𑁄 𑀩𑀳𑀺𑀲𑀸𑀡𑀺𑀬𑀁 𑀞𑀢𑁆𑀯𑀸 𑀢𑀼𑀬𑁆𑀳𑀁 𑀯𑀸𑀘𑁂𑀲𑁆𑀲𑀢𑀺. 𑀢𑀯 𑀲𑀦𑁆𑀢𑀺𑀓𑀸 𑀅𑀳𑀁 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺.

𑀏𑀯𑀁 𑀲𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀣𑀯𑀓𑀭𑀡𑀪𑀬𑁂𑀦 𑀥𑀻𑀢𑀭𑀁 𑀔𑀼𑀚𑁆𑀚𑀁, 𑀇𑀢𑀭𑀁 𑀲𑀗𑁆𑀔𑀓𑀼𑀝𑁆𑀞𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀲𑁄 𑀢𑀲𑁆𑀲𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 𑀩𑀳𑀺 𑀞𑀺𑀢𑁄 𑀫𑀦𑁆𑀢𑀁 𑀯𑀸𑀘𑁂𑀲𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀫𑀦𑁆𑀢𑀧𑀤𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀁 ‘‘𑀅𑀭𑁂 𑀔𑀼𑀚𑁆𑀚𑁂 𑀅𑀢𑀺𑀩𑀳𑀮𑁄𑀝𑁆𑀞𑀓𑀧𑁄𑀮𑀁 𑀢𑁂 𑀫𑀼𑀔𑀁, 𑀏𑀯𑀁 𑀦𑀸𑀫 𑀯𑀤𑁂𑀳𑀻’’𑀢𑀺 𑀆𑀳. ‘‘𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑀅𑀭𑁂 𑀤𑀼𑀝𑁆𑀞𑀲𑀗𑁆𑀔𑀓𑀼𑀝𑁆𑀞𑀺 ¶ 𑀓𑀺𑀁 𑀯𑀤𑁂𑀲𑀺, 𑀓𑀺𑀁 𑀫𑀸𑀤𑀺𑀲𑀸 𑀔𑀼𑀚𑁆𑀚𑀸 𑀦𑀸𑀫 𑀳𑁄𑀢𑀻’’𑀢𑀺? 𑀲𑀸𑀡𑀺𑀓𑀡𑁆𑀡𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀭𑀜𑁆𑀜𑁄 𑀥𑀻𑀢𑀸 𑀯𑀸𑀲𑀼𑀮𑀤𑀢𑁆𑀢𑀸 𑀦𑀸𑀫𑀸𑀳’’𑀦𑁆𑀢𑀺 𑀆𑀳. ‘‘𑀧𑀺𑀢𑀸 𑀢𑁂 𑀢𑀁 𑀫𑀬𑁆𑀳𑀁 𑀓𑀣𑁂𑀦𑁆𑀢𑁄 ‘𑀔𑀼𑀚𑁆𑀚𑀸’𑀢𑀺 𑀓𑀣𑁂𑀲𑀻’’𑀢𑀺. ‘‘𑀫𑀬𑁆𑀳𑀫𑁆𑀧𑀺 𑀓𑀣𑁂𑀦𑁆𑀢𑁄 𑀢𑀁 𑀲𑀗𑁆𑀔𑀓𑀼𑀝𑁆𑀞𑀺𑀁 𑀓𑀢𑁆𑀯𑀸 𑀓𑀣𑁂𑀲𑀻’’𑀢𑀺. 𑀢𑁂 𑀉𑀪𑁄𑀧𑀺 ‘‘𑀢𑁂𑀦 𑀳𑀺 𑀅𑀫𑁆𑀳𑀸𑀓𑀁 𑀲𑀦𑁆𑀣𑀯𑀓𑀭𑀡𑀪𑀬𑁂𑀦 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑁆𑀢𑁄𑀲𑀸𑀡𑀺𑀬𑀜𑁆𑀜𑁂𑀯 𑀲𑀦𑁆𑀣𑀯𑀁 𑀓𑀭𑀺𑀁𑀲𑀼.

𑀢𑀢𑁄 𑀧𑀝𑁆𑀞𑀸𑀬 𑀫𑀦𑁆𑀢𑀕𑁆𑀕𑀳𑀡𑀁 𑀯𑀸 𑀲𑀺𑀧𑁆𑀧𑀕𑁆𑀕𑀳𑀡𑀁 𑀯𑀸 𑀦𑀢𑁆𑀣𑀺. 𑀭𑀸𑀚𑀸𑀧𑀺 𑀥𑀻𑀢𑀭𑀁 𑀦𑀺𑀘𑁆𑀘𑀁 𑀧𑀼𑀘𑁆𑀙𑀢𑀺 𑁋 ‘‘𑀲𑀺𑀧𑁆𑀧𑀁 𑀕𑀡𑁆𑀳𑀲𑀺, 𑀅𑀫𑁆𑀫𑀸’’𑀢𑀺? ‘‘𑀕𑀡𑁆𑀳𑀸𑀫𑀺, 𑀢𑀸𑀢𑀸’’𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀉𑀢𑁂𑀦𑁄 ¶ 𑀆𑀳 𑁋 ‘‘𑀪𑀤𑁆𑀤𑁂, 𑀲𑀸𑀫𑀺𑀓𑁂𑀦 𑀓𑀢𑁆𑀢𑀩𑁆𑀩𑀁 𑀦𑀸𑀫 𑀦𑁂𑀯 𑀫𑀸𑀢𑀸𑀧𑀺𑀢𑀭𑁄 𑀦 𑀪𑀸𑀢𑀼𑀪𑀕𑀺𑀦𑀺𑀬𑁄 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀲𑀘𑁂 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀤𑀲𑁆𑀲𑀲𑀺, 𑀧𑀜𑁆𑀘 𑀢𑁂 𑀇𑀢𑁆𑀣𑀺𑀲𑀢𑀸𑀦𑀺 𑀧𑀭𑀺𑀯𑀸𑀭𑀁 𑀤𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀇𑀫𑀲𑁆𑀫𑀺𑀁 𑀯𑀘𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣, 𑀤𑀲𑁆𑀲𑀸𑀫𑀺 𑀯𑁄 𑀚𑀻𑀯𑀺𑀢’’𑀦𑁆𑀢𑀺. ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀪𑀤𑁆𑀤𑁂’’𑀢𑀺. 𑀲𑀸 ‘‘𑀲𑀸𑀥𑀼, 𑀲𑀸𑀫𑀻’’𑀢𑀺 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑁄 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀦𑀺𑀝𑁆𑀞𑀺𑀢𑀁 𑀲𑀺𑀧𑁆𑀧’’𑀦𑁆𑀢𑀺? ‘‘𑀦 𑀢𑀸𑀯 𑀦𑀺𑀝𑁆𑀞𑀺𑀢𑀁, 𑀢𑀸𑀢, 𑀲𑀺𑀧𑁆𑀧’’𑀦𑁆𑀢𑀺. 𑀅𑀣 𑀦𑀁 𑀲𑁄 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀅𑀫𑁆𑀫𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀏𑀓𑀁 𑀤𑁆𑀯𑀸𑀭𑀜𑁆𑀘 𑀏𑀓𑀁 𑀯𑀸𑀳𑀦𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀸𑀢𑀸’’𑀢𑀺. ‘‘𑀇𑀤𑀁 𑀓𑀺𑀁, 𑀅𑀫𑁆𑀫𑀸’’𑀢𑀺? ‘‘𑀢𑀸𑀢, 𑀭𑀢𑁆𑀢𑀺𑀁 𑀓𑀺𑀭 𑀢𑀸𑀭𑀓𑀲𑀜𑁆𑀜𑀸𑀬 𑀫𑀦𑁆𑀢𑀲𑁆𑀲 𑀉𑀧𑀘𑀸𑀭𑀢𑁆𑀣𑀸𑀬 𑀏𑀓𑀁 𑀑𑀲𑀥𑀁 𑀕𑀳𑁂𑀢𑀩𑁆𑀩𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀯𑁂𑀮𑀸𑀬 ¶ 𑀯𑀸 𑀅𑀯𑁂𑀮𑀸𑀬 𑀯𑀸 𑀦𑀺𑀓𑁆𑀔𑀫𑀦𑀓𑀸𑀮𑁂 𑀏𑀓𑀁 𑀤𑁆𑀯𑀸𑀭𑀜𑁆𑀘𑁂𑀯 𑀏𑀓𑀁 𑀯𑀸𑀳𑀦𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀁 𑀏𑀓𑀁 𑀤𑁆𑀯𑀸𑀭𑀁 𑀳𑀢𑁆𑀣𑀕𑀢𑀁 𑀓𑀭𑀺𑀁𑀲𑀼. 𑀭𑀜𑁆𑀜𑁄 𑀧𑀦 𑀧𑀜𑁆𑀘 𑀯𑀸𑀳𑀦𑀸𑀦𑀺 𑀅𑀳𑁂𑀲𑀼𑀁. 𑀪𑀤𑁆𑀤𑀯𑀢𑀻 𑀦𑀸𑀫 𑀓𑀭𑁂𑀡𑀼𑀓𑀸 ¶ 𑀏𑀓𑀤𑀺𑀯𑀲𑀁 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀺, 𑀓𑀸𑀓𑁄 𑀦𑀸𑀫 𑀤𑀸𑀲𑁄 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀺, 𑀘𑁂𑀮𑀓𑀝𑁆𑀞𑀺 𑀘 𑀫𑀼𑀜𑁆𑀘𑀓𑁂𑀲𑀻 𑀘𑀸𑀢𑀺 𑀤𑁆𑀯𑁂 𑀅𑀲𑁆𑀲𑀸 𑀬𑁄𑀚𑀦𑀲𑀢𑀁 𑀕𑀘𑁆𑀙𑀦𑁆𑀢𑀺, 𑀦𑀸𑀴𑀸𑀕𑀺𑀭𑀺 𑀳𑀢𑁆𑀣𑀻 𑀯𑀻𑀲𑀢𑀺 𑀬𑁄𑀚𑀦𑀲𑀢𑀦𑁆𑀢𑀺.

𑀲𑁄 𑀓𑀺𑀭 𑀭𑀸𑀚𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀏𑀓𑀲𑁆𑀲 𑀇𑀲𑁆𑀲𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀇𑀲𑁆𑀲𑀭𑁂 𑀩𑀳𑀺𑀦𑀕𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀲𑀓𑀮𑀦𑀕𑀭𑀯𑀸𑀲𑀻𑀦𑀁 𑀫𑀸𑀭𑁂𑀦 𑀆𑀯𑀝𑁆𑀝𑀺𑀢𑀢𑁆𑀢𑀸 𑀏𑀓𑀁 𑀪𑀺𑀓𑁆𑀔𑀸𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀫𑀺. 𑀅𑀣 𑀦𑀁 𑀦𑀕𑀭𑀤𑁆𑀯𑀸𑀭𑀁 𑀧𑀢𑁆𑀢𑀓𑀸𑀮𑁂 𑀫𑀸𑀭𑁄 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀅𑀧𑀺, 𑀪𑀦𑁆𑀢𑁂, 𑀯𑁄 𑀓𑀺𑀜𑁆𑀘𑀺 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀧𑀦 𑀫𑁂 𑀢𑁆𑀯𑀁 𑀅𑀮𑀪𑀦𑀸𑀓𑀸𑀭𑀁 𑀓𑀭𑀻’’𑀢𑀺? ‘‘𑀢𑁂𑀦 𑀳𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀧𑀯𑀺𑀲𑀣, 𑀇𑀤𑀸𑀦𑀺 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀸𑀳𑀁 𑀧𑀼𑀦 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺. 𑀲𑀘𑁂 𑀳𑀺 𑀦𑀺𑀯𑀢𑁆𑀢𑁂𑀬𑁆𑀬, 𑀧𑀼𑀦 𑀲𑁄 𑀲𑀓𑀮𑀦𑀕𑀭𑀯𑀸𑀲𑀻𑀦𑀁 𑀲𑀭𑀻𑀭𑁂 𑀅𑀥𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑀦𑀓𑁂𑀴𑀺𑀁 𑀓𑀭𑁂𑀬𑁆𑀬. 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁂 𑀫𑀸𑀭𑁄 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀅𑀣 𑀲𑁄 𑀇𑀲𑁆𑀲𑀭𑁄 𑀬𑀣𑀸𑀥𑁄𑀢𑁂𑀦𑁂𑀯 𑀧𑀢𑁆𑀢𑁂𑀦 ¶ 𑀆𑀕𑀘𑁆𑀙𑀦𑁆𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀅𑀧𑀺, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀫𑁆𑀳𑀸𑀯𑀼𑀲𑁄’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑁆𑀬𑁄, 𑀫𑀬𑀸 𑀧𑀼𑀘𑁆𑀙𑀺𑀢𑀁 𑀅𑀓𑀣𑁂𑀢𑁆𑀯𑀸 𑀅𑀜𑁆𑀜𑀁 𑀯𑀤𑀢𑀺, 𑀦 𑀓𑀺𑀜𑁆𑀘𑀺 𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣𑀲𑁆𑀲 𑀧𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀢𑀼𑀘𑁆𑀙𑀁 𑀤𑀺𑀲𑁆𑀯𑀸 𑀕𑁂𑀳𑁂 𑀪𑀢𑁆𑀢𑀲𑁆𑀲 ¶ 𑀦𑀺𑀝𑁆𑀞𑀺𑀢𑀸𑀦𑀺𑀝𑁆𑀞𑀺𑀢𑀪𑀸𑀯𑀁 𑀅𑀚𑀸𑀦𑀦𑀢𑀸𑀬 𑀲𑀽𑀭𑁄 𑀳𑀼𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 ‘‘𑀣𑁄𑀓𑀁, 𑀪𑀦𑁆𑀢𑁂, 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀯𑀢𑁆𑀯𑀸 𑀯𑁂𑀕𑁂𑀦 𑀖𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀁 𑀉𑀧𑀝𑁆𑀞𑀸𑀓𑀁 𑀆𑀳 𑁋 ‘‘𑀢𑀸𑀢, 𑀅𑀜𑁆𑀜𑁄 𑀢𑀬𑀸 𑀲𑀫𑁆𑀧𑀦𑁆𑀦𑀯𑁂𑀕𑀢𑀭𑁄 𑀦𑀸𑀫 𑀦𑀢𑁆𑀣𑀺, 𑀲𑀻𑀖𑁂𑀦 𑀚𑀯𑁂𑀦 𑀪𑀤𑀦𑁆𑀢𑀁 𑀧𑀢𑁆𑀯𑀸 ‘𑀧𑀢𑁆𑀢𑀁 𑀫𑁂, 𑀪𑀦𑁆𑀢𑁂, 𑀤𑁂𑀣𑀸’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑁂𑀕𑁂𑀦 𑀏𑀳𑀻’’𑀢𑀺. 𑀲𑁄 𑀏𑀓𑀯𑀘𑀦𑁂𑀦𑁂𑀯 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺. 𑀇𑀲𑁆𑀲𑀭𑁄𑀧𑀺 𑀅𑀢𑁆𑀢𑀦𑁄 𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 ‘‘𑀇𑀫𑀁 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀅𑀬𑁆𑀬𑀲𑁆𑀲 𑀲𑀫𑁆𑀧𑀸𑀤𑁂𑀳𑀺, 𑀅𑀳𑀁 𑀢𑁂 𑀇𑀢𑁄 𑀧𑀢𑁆𑀢𑀺𑀁 𑀤𑀫𑁆𑀫𑀻’’𑀢𑀺 𑀆𑀳.

𑀲𑁄𑀧𑀺 𑀢𑀁 𑀕𑀳𑁂𑀢𑁆𑀯𑀸 𑀚𑀯𑁂𑀦 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀁 𑀤𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, ‘𑀯𑁂𑀮𑀸 𑀉𑀧𑀓𑀝𑁆𑀞𑀸’𑀢𑀺 𑀅𑀳𑀁 𑀅𑀢𑀺𑀲𑀻𑀖𑁂𑀦 𑀚𑀯𑁂𑀦 𑀆𑀕𑀢𑁄 𑀘 𑀕𑀢𑁄 𑀘, 𑀏𑀢𑀲𑁆𑀲 𑀫𑁂 𑀚𑀯𑀲𑁆𑀲 𑀨𑀮𑁂𑀦 𑀬𑁄𑀚𑀦𑀸𑀦𑀁 𑀧𑀡𑁆𑀡𑀸𑀲𑀲𑀝𑁆𑀞𑀺𑀲𑀢𑀯𑀻𑀲𑀲𑀢𑀕𑀫𑀦𑀲𑀫𑀢𑁆𑀣𑀸𑀦𑀺 𑀧𑀜𑁆𑀘 𑀯𑀸𑀳𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀼, 𑀆𑀕𑀘𑁆𑀙𑀦𑁆𑀢𑀲𑁆𑀲 𑀘 𑀫𑁂 𑀕𑀘𑁆𑀙𑀦𑁆𑀢𑀲𑁆𑀲 𑀘 𑀲𑀭𑀻𑀭𑀁 𑀲𑀽𑀭𑀺𑀬𑀢𑁂𑀚𑁂𑀦 𑀢𑀢𑁆𑀣𑀁, 𑀢𑀲𑁆𑀲 𑀫𑁂 𑀨𑀮𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀆𑀡𑀸 𑀲𑀽𑀭𑀺𑀬𑀢𑁂𑀚𑀲𑀤𑀺𑀲𑀸 𑀳𑁄𑀢𑀼, 𑀇𑀫𑀲𑁆𑀫𑀺𑀁 𑀫𑁂 𑀧𑀺𑀡𑁆𑀟𑀧𑀸𑀢𑁂 𑀲𑀸𑀫𑀺𑀦𑀸 𑀧𑀢𑁆𑀢𑀺 𑀤𑀺𑀦𑁆𑀦𑀸, 𑀢𑀲𑁆𑀲𑀸 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 ¶ 𑀪𑀸𑀕𑀻 𑀳𑁄𑀫𑀻’’𑀢𑀺 𑀆𑀳. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑁋

‘‘𑀇𑀘𑁆𑀙𑀺𑀢𑀁 ¶ 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀲𑀩𑁆𑀩𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸. (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀓𑀣𑀸; 𑀅. 𑀦𑀺. 𑀅𑀝𑁆𑀞. 𑁧.𑁧. 𑁧𑁯𑁨);

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀫𑀡𑀺𑀚𑁄𑀢𑀺𑀭𑀲𑁄 𑀬𑀣𑀸’’𑀢𑀺. 𑁋

𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀓𑀺𑀭 𑀇𑀥𑀸𑀯 𑀤𑁆𑀯𑁂 𑀕𑀸𑀣𑀸 𑀅𑀦𑀼𑀫𑁄𑀤𑀦𑀕𑀸𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁆𑀣 𑀚𑁄𑀢𑀺𑀭𑀲𑁄𑀢𑀺 𑀲𑀩𑁆𑀩𑀓𑀸𑀫𑀤𑀤𑀁 𑀫𑀡𑀺𑀭𑀢𑀦𑀁 𑀯𑀼𑀘𑁆𑀘𑀢𑀺. 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀘𑀭𑀺𑀢𑀁. 𑀲𑁄 𑀏𑀢𑀭𑀳𑀺 𑀘𑀡𑁆𑀟𑀧𑀚𑁆𑀚𑁄𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀫𑀸𑀦𑀺 𑀧𑀜𑁆𑀘 𑀯𑀸𑀳𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀓𑀻𑀴𑀸𑀬 𑀦𑀺𑀓𑁆𑀔𑀫𑀺. 𑀉𑀢𑁂𑀦𑁄 ‘‘𑀅𑀚𑁆𑀚 𑀧𑀮𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀫𑀳𑀦𑁆𑀢𑀸𑀫𑀳𑀦𑁆𑀢𑁂 𑀘𑀫𑁆𑀫𑀧𑀲𑀺𑀩𑁆𑀩𑀓𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑁂𑀢𑁆𑀯𑀸 𑀓𑀭𑁂𑀡𑀼𑀓𑀸𑀧𑀺𑀝𑁆𑀞𑁂 𑀞𑀧𑁂𑀢𑁆𑀯𑀸 𑀯𑀸𑀲𑀼𑀮𑀤𑀢𑁆𑀢𑀁 𑀆𑀤𑀸𑀬 𑀧𑀮𑀸𑀬𑀺. 𑀅𑀦𑁆𑀢𑁂𑀧𑀼𑀭𑀧𑀸𑀮𑀓𑀸 𑀧𑀮𑀸𑀬𑀦𑁆𑀢𑀁 𑀢𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀻𑀖𑀁 𑀕𑀘𑁆𑀙𑀣𑀸’’𑀢𑀺 𑀩𑀮𑀁 𑀧𑀳𑀺𑀡𑀺. 𑀉𑀢𑁂𑀦𑁄 ¶ 𑀩𑀮𑀲𑁆𑀲 𑀧𑀓𑁆𑀔𑀦𑁆𑀤𑀪𑀸𑀯𑀁 𑀜𑀢𑁆𑀯𑀸 𑀓𑀳𑀸𑀧𑀡𑀧𑀲𑀺𑀩𑁆𑀩𑀓𑀁 𑀫𑁄𑀘𑁂𑀢𑁆𑀯𑀸 𑀧𑀸𑀢𑁂𑀲𑀺, 𑀫𑀦𑀼𑀲𑁆𑀲𑀸 𑀓𑀳𑀸𑀧𑀡𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀧𑀼𑀦 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀇𑀢𑀭𑁄 𑀲𑀼𑀯𑀡𑁆𑀡𑀧𑀲𑀺𑀩𑁆𑀩𑀓𑀁 𑀫𑁄𑀘𑁂𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀦𑁂𑀲𑀁 𑀲𑀼𑀯𑀡𑁆𑀡𑀮𑁄𑀪𑁂𑀦 𑀧𑀧𑀜𑁆𑀘𑁂𑀦𑁆𑀢𑀸𑀦𑀜𑁆𑀜𑁂𑀯 ¶ 𑀩𑀳𑀺 𑀦𑀺𑀯𑀼𑀝𑁆𑀞𑀁 𑀅𑀢𑁆𑀢𑀦𑁄 𑀔𑀦𑁆𑀥𑀸𑀯𑀸𑀭𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀅𑀢𑁆𑀢𑀦𑁄 𑀩𑀮𑀓𑀸𑀬𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀲𑀺. 𑀲𑁄 𑀧𑀢𑁆𑀯𑀸𑀯 𑀯𑀸𑀲𑀼𑀮𑀤𑀢𑁆𑀢𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺. 𑀅𑀬𑀁 𑀯𑀸𑀲𑀼𑀮𑀤𑀢𑁆𑀢𑀸𑀬 𑀉𑀧𑁆𑀧𑀢𑁆𑀢𑀺.

𑀅𑀧𑀭𑀸 𑀧𑀦 𑀫𑀸𑀕𑀡𑁆𑀟𑀺𑀬𑀸 𑀦𑀸𑀫 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀮𑀪𑀺. 𑀲𑀸 𑀓𑀺𑀭 𑀓𑀼𑀭𑀼𑀭𑀝𑁆𑀞𑁂 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸. 𑀫𑀸𑀢𑀸𑀧𑀺𑀲𑁆𑀲𑀸 𑀫𑀸𑀕𑀡𑁆𑀟𑀺𑀬𑀸𑀬𑁂𑀯 𑀦𑀸𑀫𑀁. 𑀘𑀽𑀴𑀧𑀺𑀢𑀸𑀧𑀺𑀲𑁆𑀲𑀸 𑀫𑀸𑀕𑀡𑁆𑀟𑀺𑀬𑁄𑀯, 𑀲𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸. 𑀧𑀺𑀢𑀸 𑀧𑀦𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀁 𑀲𑀸𑀫𑀺𑀓𑀁 𑀅𑀮𑀪𑀦𑁆𑀢𑁄 𑀫𑀳𑀦𑁆𑀢𑁂𑀳𑀺 𑀫𑀳𑀦𑁆𑀢𑁂𑀳𑀺 𑀓𑀼𑀮𑁂𑀳𑀺 𑀬𑀸𑀘𑀺𑀢𑁄𑀧𑀺 ‘‘𑀦 𑀫𑀬𑁆𑀳𑀁 𑀥𑀻𑀢𑀼 𑀢𑀼𑀫𑁆𑀳𑁂 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀧𑀚𑀸𑀧𑀢𑀺𑀓𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀲𑁆𑀲 𑀩𑀳𑀺𑀦𑀺𑀕𑀫𑁂 𑀅𑀕𑁆𑀕𑀺𑀧𑀭𑀺𑀘𑀭𑀡𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑁄 𑀢𑀣𑀸𑀕𑀢𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀫𑀺𑀦𑀸 𑀧𑀼𑀭𑀺𑀲𑁂𑀦 𑀲𑀤𑀺𑀲𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀁 𑀫𑀬𑁆𑀳𑀁 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑁄, 𑀇𑀫𑀲𑁆𑀲 𑀧𑁄𑀲𑀸𑀧𑀦𑀢𑁆𑀣𑀸𑀬 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀲𑀫𑀡, 𑀏𑀓𑀸 𑀫𑁂 𑀥𑀻𑀢𑀸 𑀅𑀢𑁆𑀣𑀺, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀁 𑀧𑀼𑀭𑀺𑀲𑀁 𑀦 𑀧𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀢𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀸, 𑀲𑀸 𑀘 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀅𑀦𑀼𑀘𑁆𑀙𑀯𑀺𑀓𑀸. 𑀢𑀼𑀫𑁆𑀳𑀸𑀓𑀜𑁆𑀳𑀺 ¶ 𑀧𑀸𑀤𑀧𑀭𑀺𑀘𑀸𑀭𑀺𑀓𑀸, 𑀢𑀲𑁆𑀲𑀸 𑀘 𑀪𑀢𑁆𑀢𑀸 ¶ 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀁 𑀯𑁄 𑀅𑀳𑀁 𑀤𑀲𑁆𑀲𑀸𑀫𑀺, 𑀬𑀸𑀯 𑀫𑀫𑀸𑀕𑀫𑀦𑀸 𑀇𑀥𑁂𑀯 𑀢𑀺𑀝𑁆𑀞𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀯𑁂𑀕𑁂𑀦 𑀖𑀭𑀁 𑀕𑀦𑁆𑀢𑁆𑀯𑀸, ‘‘𑀪𑁄𑀢𑀺, 𑀪𑁄𑀢𑀺 𑀥𑀻𑀢𑀼 𑀫𑁂 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀭𑀺𑀲𑁄 𑀤𑀺𑀝𑁆𑀞𑁄, 𑀲𑀻𑀖𑀁 𑀲𑀻𑀖𑀁 𑀦𑀁 𑀅𑀮𑀗𑁆𑀓𑀭𑁄𑀳𑀻’’𑀢𑀺 𑀢𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑀸𑀬𑀸𑀲𑀺. 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺. 𑀅𑀬𑀁 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑁆𑀳𑀁 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑁄 𑀦𑀢𑁆𑀣𑀻’’𑀢𑀺 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 ‘‘𑀅𑀚𑁆𑀚 𑀫𑁂 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑁄 𑀤𑀺𑀝𑁆𑀞𑁄’’𑀢𑀺 𑀓𑀺𑀭 𑀯𑀤𑁂𑀢𑀺, ‘‘𑀓𑀻𑀤𑀺𑀲𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄, 𑀧𑀲𑁆𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀫𑀳𑀸𑀚𑀦𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺.

𑀢𑀲𑁆𑀫𑀺𑀁 ¶ 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂 𑀲𑀢𑁆𑀣𑀸 𑀢𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀅𑀝𑁆𑀞𑀢𑁆𑀯𑀸 𑀢𑀢𑁆𑀣 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀤𑀘𑁂𑀢𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀬𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀅𑀜𑁆𑀜𑀢𑁆𑀣. 𑀬𑁂𑀲𑀜𑁆𑀘𑀢𑁆𑀣𑀸𑀬 𑀅𑀥𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀢𑁂𑀬𑁂𑀯 𑀦𑀁 𑀧𑀲𑁆𑀲𑀦𑁆𑀢𑀺. 𑀢𑁂𑀲𑀁 𑀧𑀦 𑀅𑀤𑀲𑁆𑀲𑀦𑀓𑀭𑀡𑀢𑁆𑀣𑀁 𑀳𑀢𑁆𑀣𑀺𑀆𑀤𑀬𑁄 𑀯𑀸 𑀅𑀓𑁆𑀓𑀫𑀦𑁆𑀢𑀼, 𑀫𑀳𑀸𑀫𑁂𑀖𑁄 𑀯𑀸 𑀧𑀯𑀲𑁆𑀲𑀢𑀼, 𑀯𑁂𑀭𑀫𑁆𑀪𑀯𑀸𑀢𑀸 𑀯𑀸 𑀧𑀳𑀭𑀦𑁆𑀢𑀼, 𑀦 𑀢𑀁 𑀓𑁄𑀘𑀺 𑀫𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀣 𑀩𑁆𑀭𑀸𑀳𑁆𑀫𑀡𑀻 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀓𑀼𑀳𑀺𑀁 𑀲𑁄 𑀧𑀼𑀭𑀺𑀲𑁄’’𑀢𑀺. ‘‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀺𑀝𑁆𑀞𑀸𑀳𑀻’𑀢𑀺 𑀦𑀁 𑀅𑀯𑀘𑀁, 𑀓𑀼𑀳𑀺𑀁 𑀦𑀼 𑀔𑁄 𑀲𑁄 𑀕𑀢𑁄’’𑀢𑀺 𑀇𑀢𑁄 𑀘𑀺𑀢𑁄 𑀑𑀮𑁄𑀓𑁂𑀦𑁆𑀢𑁄 𑀧𑀤𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀬𑀫𑀲𑁆𑀲 𑀧𑀤𑀯𑀮𑀜𑁆𑀚𑁄’’𑀢𑀺 ¶ 𑀆𑀳. 𑀩𑁆𑀭𑀸𑀳𑁆𑀫𑀡𑀻 𑀲𑀮𑀓𑁆𑀔𑀡𑀫𑀦𑁆𑀢𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀕𑀼𑀡𑀢𑀸𑀬 𑀮𑀓𑁆𑀔𑀡𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀤𑀮𑀓𑁆𑀔𑀡𑀁 𑀉𑀧𑀥𑀸𑀭𑁂𑀢𑁆𑀯𑀸, ‘‘𑀦𑀬𑀺𑀤𑀁, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀘𑀓𑀸𑀫𑀕𑀼𑀡𑀲𑁂𑀯𑀺𑀦𑁄 𑀧𑀤’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀭𑀢𑁆𑀢𑀲𑁆𑀲 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂,

𑀤𑀼𑀝𑁆𑀞𑀲𑁆𑀲 𑀳𑁄𑀢𑀺 𑀲𑀳𑀲𑀸𑀦𑀼𑀧𑀻𑀴𑀺𑀢𑀁;

𑀫𑀽𑀴𑁆𑀳𑀲𑁆𑀲 𑀳𑁄𑀢𑀺 𑀅𑀯𑀓𑀟𑁆𑀠𑀺𑀢𑀁 𑀧𑀤𑀁,

𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧; 𑀯𑀺𑀲𑀼𑀤𑁆𑀥𑀺. 𑁧.𑁪𑁫);

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘‘𑀪𑁄𑀢𑀺 𑀢𑁆𑀯𑀁 𑀉𑀤𑀓𑀧𑀸𑀢𑀺𑀬𑀁 𑀓𑀼𑀫𑁆𑀪𑀻𑀮𑀁, 𑀕𑁂𑀳𑀫𑀚𑁆𑀛𑁂 𑀘 𑀧𑀦 𑀘𑁄𑀭𑀁 𑀯𑀺𑀬 𑀫𑀦𑁆𑀢𑁂 𑀧𑀲𑁆𑀲𑀦𑀲𑀻𑀮𑀸, 𑀢𑀼𑀡𑁆𑀳𑀻 𑀳𑁄𑀳𑀻’’𑀢𑀺. 𑀩𑁆𑀭𑀸𑀳𑁆𑀫𑀡, 𑀬𑀁 𑀇𑀘𑁆𑀙𑀲𑀺, 𑀢𑀁 𑀯𑀤𑁂𑀳𑀺, 𑀦𑀬𑀺𑀤𑀁 𑀧𑀜𑁆𑀘𑀓𑀸𑀫𑀕𑀼𑀡𑀲𑁂𑀯𑀺𑀦𑁄 𑀧𑀤𑀦𑁆𑀢𑀺. 𑀢𑀢𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀲𑁄 𑀧𑀼𑀭𑀺𑀲𑁄’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀕𑀦𑁆𑀢𑁆𑀯𑀸, ‘‘𑀲𑀫𑀡, 𑀥𑀻𑀢𑀭𑀁 𑀫𑁂 𑀢𑀯 𑀧𑁄𑀲𑀸𑀧𑀦𑀢𑁆𑀣𑀸𑀬 𑀤𑁂𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀥𑀻𑀢𑀭𑀸 𑀢𑁂 𑀫𑀬𑁆𑀳𑀁 𑀅𑀢𑁆𑀣𑁄 𑀅𑀢𑁆𑀣𑀺 𑀯𑀸 𑀦𑀢𑁆𑀣𑀺 𑀯𑀸’’𑀢𑀺 𑀅𑀯𑀢𑁆𑀯𑀸𑀯, ‘‘𑀩𑁆𑀭𑀸𑀳𑁆𑀫𑀡, 𑀏𑀓𑀁 𑀢𑁂 𑀓𑀸𑀭𑀡𑀁 𑀓𑀣𑁂𑀫𑀻’’𑀢𑀺 𑀯𑀢𑁆𑀯𑀸, ‘‘𑀓𑀣𑁂𑀳𑀺 𑀲𑀫𑀡𑀸’’𑀢𑀺 𑀯𑀼𑀢𑁆𑀢𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑀸 ¶ 𑀫𑀸𑀭𑁂𑀦 𑀅𑀦𑀼𑀩𑀤𑁆𑀥𑀪𑀸𑀯𑀁 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀘 𑀧𑀦 ‘‘𑀅𑀢𑀻𑀢𑁄 𑀤𑀸𑀦𑀺 𑀫𑁂 𑀏𑀲 𑀯𑀺𑀲𑀬’’𑀦𑁆𑀢𑀺 𑀢𑀲𑁆𑀲 𑀲𑁄𑀓𑀸𑀢𑀼𑀭𑀲𑁆𑀲 𑀲𑁄𑀓𑀯𑀽𑀧𑀲𑀫𑀦𑀢𑁆𑀣𑀁 𑀆𑀕𑀢𑀸𑀳𑀺 𑀫𑀸𑀭𑀥𑀻𑀢𑀸𑀳𑀺 𑀓𑀼𑀫𑀸𑀭𑀺𑀓𑀯𑀡𑁆𑀡𑀸𑀤𑀺𑀯𑀲𑁂𑀦 ¶ 𑀧𑀬𑁄𑀚𑀺𑀢𑀁 𑀧𑀮𑁄𑀪𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀢𑀤𑀸𑀧𑀺 𑀫𑀬𑁆𑀳𑀁 𑀙𑀦𑁆𑀤𑁄 𑀦𑀸𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑁋

‘‘𑀤𑀺𑀲𑁆𑀯𑀸𑀦 ¶ 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘,

𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁,

𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’’𑀢𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧; 𑀲𑀼. 𑀦𑀺. 𑁮𑁪𑁧) 𑁋

𑀇𑀫𑀁 𑀕𑀸𑀣𑀫𑀸𑀳. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀫𑀸𑀕𑀡𑁆𑀟𑀺𑀬𑀸𑀧𑀺 𑀔𑁄 ‘‘𑀲𑀘𑀲𑁆𑀲 𑀫𑀬𑀸 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀦𑀢𑁆𑀣𑀺𑀓𑀪𑀸𑀯𑁄𑀯 𑀯𑀢𑁆𑀢𑀩𑁆𑀩𑁄, 𑀅𑀬𑀁 𑀧𑀦 𑀫𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁 𑀓𑀭𑁄𑀢𑀺, 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂𑀢𑀺, 𑀳𑁄𑀢𑀼, 𑀅𑀢𑁆𑀢𑀦𑁄 𑀚𑀸𑀢𑀺𑀓𑀼𑀮𑀧𑀤𑁂𑀲𑀪𑁄𑀕𑀬𑀲𑀯𑀬𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀢𑀣𑀸𑀭𑀽𑀧𑀁 𑀪𑀢𑁆𑀢𑀸𑀭𑀁 𑀮𑀪𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀭𑀺 𑀆𑀖𑀸𑀢𑀁 𑀩𑀦𑁆𑀥𑀺. ‘‘𑀓𑀺𑀁 𑀧𑀦 𑀲𑀢𑁆𑀣𑀸 𑀢𑀸𑀬 𑀅𑀢𑁆𑀢𑀦𑀺 𑀆𑀖𑀸𑀢𑀼𑀧𑁆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀦𑁄’’𑀢𑀺? ‘‘𑀚𑀸𑀦𑀸𑀢𑀺𑀬𑁂𑀯. 𑀚𑀸𑀦𑀦𑁆𑀢𑁄 𑀓𑀲𑁆𑀫𑀸 𑀕𑀸𑀣𑀫𑀸𑀳𑀸’’𑀢𑀺? 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦. 𑀩𑀼𑀤𑁆𑀥𑀸 𑀳𑀺 𑀆𑀖𑀸𑀢𑀁 𑀅𑀕𑀡𑁂𑀢𑁆𑀯𑀸 𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀭𑀳𑀸𑀦𑀁 𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺𑀬𑁂𑀯. 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀦𑁂𑀢𑁆𑀯𑀸 𑀘𑀽𑀴𑀫𑀸𑀕𑀡𑁆𑀟𑀺𑀬𑀁 𑀓𑀦𑀺𑀝𑁆𑀞𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀘𑀽𑀴𑀫𑀸𑀕𑀡𑁆𑀟𑀺𑀬𑁄𑀧𑀺 ¶ 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀥𑀻𑀢𑀸 𑀑𑀫𑀓𑀲𑀢𑁆𑀢𑀲𑁆𑀲 𑀦 𑀅𑀦𑀼𑀘𑁆𑀙𑀯𑀺𑀓𑀸, 𑀏𑀓𑀲𑁆𑀲 𑀭𑀜𑁆𑀜𑁄𑀯 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺. 𑀢𑀁 𑀆𑀤𑀸𑀬 𑀓𑁄𑀲𑀫𑁆𑀩𑀺𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸, ‘‘𑀇𑀫𑀁 𑀇𑀢𑁆𑀣𑀺𑀭𑀢𑀦𑀁 𑀤𑁂𑀯𑀲𑁆𑀲 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀉𑀢𑁂𑀦𑀲𑁆𑀲 𑀭𑀜𑁆𑀜𑁄 𑀅𑀤𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 𑀉𑀧𑁆𑀧𑀦𑁆𑀦𑀩𑀮𑀯𑀲𑀺𑀦𑁂𑀳𑁄 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀧𑀜𑁆𑀘𑀲𑀢𑀫𑀸𑀢𑀼𑀕𑀸𑀫𑀧𑀭𑀺𑀯𑀸𑀭𑀁 𑀤𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀅𑀬𑀁 𑀫𑀸𑀕𑀡𑁆𑀟𑀺𑀬𑀸𑀬 𑀉𑀧𑁆𑀧𑀢𑁆𑀢𑀺.

𑀏𑀯𑀫𑀲𑁆𑀲 𑀤𑀺𑀬𑀟𑁆𑀠𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀯𑀸𑀭𑀸 𑀢𑀺𑀲𑁆𑀲𑁄 𑀅𑀕𑁆𑀕𑀫𑀳𑁂𑀲𑀺𑀬𑁄 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀖𑁄𑀲𑀓𑀲𑁂𑀝𑁆𑀞𑀺 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀻𑀢𑀺 𑀓𑁄𑀲𑀫𑁆𑀩𑀺𑀬𑀁 𑀢𑀬𑁄 𑀲𑁂𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀢𑁂 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀧𑀜𑁆𑀘𑀲𑀢𑀢𑀸𑀧𑀲𑁂 𑀳𑀺𑀫𑀯𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀦𑀕𑀭𑁂 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀲𑀸𑀧𑁂𑀢𑁆𑀯𑀸 𑀧𑀼𑀦 𑀯𑀲𑁆𑀲𑀸𑀭𑀢𑁆𑀢𑁂 𑀆𑀕𑀫𑀦𑀢𑁆𑀣𑀸𑀬 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁. 𑀢𑀸𑀧𑀲𑀸𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞 𑀫𑀸𑀲𑁂 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀢𑁂𑀲𑀁 𑀲𑀦𑁆𑀢𑀺𑀓𑁂 ¶ 𑀯𑀲𑀺𑀁𑀲𑀼. 𑀢𑁂 𑀅𑀧𑀭𑀪𑀸𑀕𑁂 𑀳𑀺𑀫𑀯𑀦𑁆𑀢𑀢𑁄 𑀆𑀕𑀘𑁆𑀙𑀦𑁆𑀢𑀸 ¶ 𑀅𑀭𑀜𑁆𑀜𑀸𑀬𑀢𑀦𑁂 𑀏𑀓𑀁 𑀫𑀳𑀸𑀦𑀺𑀕𑁆𑀭𑁄𑀥𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀼 𑀚𑁂𑀝𑁆𑀞𑀓𑀢𑀸𑀧𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀑𑀭𑀫𑀢𑁆𑀢𑀺𑀓𑀸 𑀦 𑀪𑀯𑀺𑀲𑁆𑀲𑀢𑀺, 𑀫𑀳𑁂𑀲𑀓𑁆𑀔𑁂𑀦𑁂𑀯𑁂𑀢𑁆𑀣 𑀤𑁂𑀯𑀭𑀸𑀚𑁂𑀦 𑀪𑀯𑀺𑀢𑀩𑁆𑀩𑀁 ¶ , 𑀲𑀸𑀥𑀼 𑀯𑀢 𑀲𑀘𑀸𑀬𑀁 𑀇𑀲𑀺𑀕𑀡𑀲𑁆𑀲 𑀧𑀸𑀦𑀻𑀬𑀁 𑀤𑀤𑁂𑀬𑁆𑀬𑀸’’𑀢𑀺. 𑀲𑁄𑀧𑀺 𑀧𑀸𑀦𑀻𑀬𑀁 𑀅𑀤𑀸𑀲𑀺. 𑀢𑀸𑀧𑀲𑁄 𑀦𑁆𑀳𑀸𑀦𑁄𑀤𑀓𑀁 𑀘𑀺𑀦𑁆𑀢𑁂𑀲𑀺, 𑀢𑀫𑁆𑀧𑀺 𑀅𑀤𑀸𑀲𑀺. 𑀢𑀢𑁄 𑀪𑁄𑀚𑀦𑀁 𑀘𑀺𑀦𑁆𑀢𑁂𑀲𑀺, 𑀢𑀫𑁆𑀧𑀺 𑀅𑀤𑀸𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀤𑁂𑀯𑀭𑀸𑀚𑀸 𑀅𑀫𑁆𑀳𑁂𑀳𑀺 𑀘𑀺𑀦𑁆𑀢𑀺𑀢𑀁 𑀘𑀺𑀦𑁆𑀢𑀺𑀢𑀁 𑀲𑀩𑁆𑀩𑀁 𑀤𑁂𑀢𑀺, 𑀅𑀳𑁄 𑀯𑀢 𑀦𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’’𑀢𑀺. 𑀲𑁄 𑀭𑀼𑀓𑁆𑀔𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀅𑀣 𑀦𑀁 𑀢𑀸𑀧𑀲𑀸, ‘‘𑀤𑁂𑀯𑀭𑀸𑀚, 𑀫𑀳𑀢𑀻 𑀢𑁂 𑀲𑀫𑁆𑀧𑀢𑁆𑀢𑀺, 𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀅𑀬𑀁 𑀢𑁂 𑀮𑀤𑁆𑀥𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀫𑀸 𑀧𑀼𑀘𑁆𑀙𑀣, 𑀅𑀬𑁆𑀬𑀸’’𑀢𑀺. ‘‘𑀆𑀘𑀺𑀓𑁆𑀔, 𑀤𑁂𑀯𑀭𑀸𑀚𑀸’’𑀢𑀺. 𑀲𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀧𑀭𑀺𑀢𑁆𑀢𑀓𑀢𑁆𑀢𑀸 𑀮𑀚𑁆𑀚𑀫𑀸𑀦𑁄 𑀓𑀣𑁂𑀢𑀼𑀁 𑀦 𑀯𑀺𑀲𑀳𑀺. 𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀧𑀦 ‘‘𑀢𑁂𑀦 𑀳𑀺 𑀲𑀼𑀡𑀸𑀣𑀸’’𑀢𑀺 𑀯𑀢𑁆𑀯𑀸 𑀓𑀣𑁂𑀲𑀺.

𑀲𑁄 𑀓𑀺𑀭𑁂𑀓𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀪𑀢𑀺𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀪𑀢𑀺𑀓𑀫𑁆𑀫𑀁 𑀮𑀪𑀺𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀳𑀸𑀭𑀢𑁄 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀲𑁆𑀲 𑀪𑀢𑀺𑀓𑀲𑁆𑀲 𑀅𑀚𑁆𑀚𑀼𑀧𑁄𑀲𑀣𑀤𑀺𑀯𑀲𑀪𑀸𑀯𑁄 𑀓𑁂𑀦𑀘𑀺 𑀓𑀣𑀺𑀢𑁄’’𑀢𑀺? ‘‘𑀦 𑀓𑀣𑀺𑀢𑁄, 𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀲𑀸𑀬𑀫𑀸𑀲𑀁 𑀧𑀘𑀣𑀸’’𑀢𑀺. 𑀅𑀣𑀲𑁆𑀲 𑀧𑀢𑁆𑀣𑁄𑀤𑀦𑀁 𑀧𑀘𑀺𑀁𑀲𑀼. 𑀲𑁄 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀪𑀢𑁆𑀢𑁂 𑀯𑀟𑁆𑀠𑁂𑀢𑁆𑀯𑀸 𑀤𑀺𑀦𑁆𑀦𑁂 ‘‘𑀙𑀸𑀢𑁄𑀫𑁆𑀳𑀻’’𑀢𑀺 𑀲𑀳𑀲𑀸 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀫𑀲𑁆𑀫𑀺𑀁 𑀕𑁂𑀳𑁂 ‘𑀪𑀢𑁆𑀢𑀁 𑀤𑁂𑀣, 𑀲𑀽𑀧𑀁 𑀤𑁂𑀣, 𑀩𑁆𑀬𑀜𑁆𑀚𑀦𑀁 𑀤𑁂𑀣𑀸’𑀢𑀺 𑀫𑀳𑀸𑀓𑁄𑀮𑀸𑀳𑀮𑀁 𑀅𑀳𑁄𑀲𑀺, 𑀅𑀚𑁆𑀚 𑀢𑁂 𑀲𑀩𑁆𑀩𑁂 𑀦𑀺𑀲𑁆𑀲𑀤𑁆𑀤𑀸 𑀦𑀺𑀧𑀚𑁆𑀚𑀺𑀁𑀲𑀼, 𑀫𑀬𑁆𑀳𑀫𑁂𑀯 𑀏𑀓𑀲𑁆𑀲𑀸𑀳𑀸𑀭𑀁 𑀯𑀟𑁆𑀠𑀬𑀺𑀁𑀲𑀼, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀅𑀯𑀲𑁂𑀲𑀸 𑀪𑀼𑀜𑁆𑀚𑀺𑀁𑀲𑀼, 𑀦 𑀪𑀼𑀜𑁆𑀚𑀺𑀁𑀲𑀽’’𑀢𑀺? ‘‘𑀦 𑀪𑀼𑀜𑁆𑀚𑀺𑀁𑀲𑀼, 𑀢𑀸𑀢𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀲𑀸𑀬𑀫𑀸𑀲𑀁 ¶ 𑀦 𑀪𑀼𑀜𑁆𑀚𑀦𑁆𑀢𑀺, 𑀲𑀩𑁆𑀩𑁂𑀯 𑀉𑀧𑁄𑀲𑀣𑀺𑀓𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀫𑀲𑁄 𑀣𑀦𑀧𑀸𑀬𑀺𑀦𑁄𑀧𑀺 𑀤𑀸𑀭𑀓𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑀸𑀧𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀁 𑀫𑀼𑀔𑁂 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺 𑀉𑀧𑁄𑀲𑀣𑀺𑀓𑁂 𑀓𑀸𑀭𑁂𑀢𑀺. 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑁂 𑀚𑀸𑀮𑀦𑁆𑀢𑁂 𑀔𑀼𑀤𑁆𑀤𑀓𑀫𑀳𑀮𑁆𑀮𑀓𑀤𑀸𑀭𑀓𑀸 𑀲𑀬𑀦𑀕𑀢𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀢𑀼𑀬𑁆𑀳𑀁 𑀧𑀦 𑀉𑀧𑁄𑀲𑀣𑀤𑀺𑀯𑀲𑀪𑀸𑀯𑀁 𑀓𑀣𑁂𑀢𑀼𑀁 𑀲𑀢𑀺𑀁 𑀦 𑀓𑀭𑀺𑀫𑁆𑀳𑀸. 𑀢𑀲𑁆𑀫𑀸 𑀢𑀯𑁂𑀯 𑀪𑀢𑁆𑀢𑀁 𑀧𑀓𑁆𑀓𑀁, 𑀦𑀁 𑀪𑀼𑀜𑁆𑀚𑀲𑁆𑀲𑀽𑀢𑀺. 𑀲𑀘𑁂 𑀇𑀤𑀸𑀦𑀺 𑀉𑀧𑁄𑀲𑀣𑀺𑀓𑁂𑀦 ¶ 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀳𑀫𑁆𑀧𑀺 𑀪𑀯𑁂𑀬𑁆𑀬𑀦𑁆𑀢𑀺. ‘‘𑀇𑀤𑀁 𑀲𑁂𑀝𑁆𑀞𑀺 𑀚𑀸𑀦𑀸𑀢𑀻’’𑀢𑀺. ‘‘𑀢𑁂𑀦 𑀳𑀺 𑀦𑀁 𑀧𑀼𑀘𑁆𑀙𑀣𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀏𑀯𑀫𑀸𑀳 𑁋 ‘‘𑀇𑀤𑀸𑀦𑀺 𑀧𑀦 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀳𑀦𑁆𑀢𑁄 𑀉𑀧𑀟𑁆𑀠𑀁 𑀉𑀧𑁄𑀲𑀣𑀓𑀫𑁆𑀫𑀁 𑀮𑀪𑀺𑀲𑁆𑀲𑀢𑀻’’𑀢𑀺. 𑀇𑀢𑀭𑁄 𑀢𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺.

𑀢𑀲𑁆𑀲 𑀲𑀓𑀮𑀤𑀺𑀯𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀙𑀸𑀢𑀲𑁆𑀲 𑀲𑀭𑀻𑀭𑁂 𑀯𑀸𑀢𑀸 𑀓𑀼𑀧𑁆𑀧𑀺𑀁𑀲𑀼. 𑀲𑁄 𑀬𑁄𑀢𑁆𑀢𑁂𑀦 𑀉𑀭𑀁 𑀩𑀦𑁆𑀥𑀺𑀢𑁆𑀯𑀸 𑀬𑁄𑀢𑁆𑀢𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀢𑀺. 𑀲𑁂𑀝𑁆𑀞𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀉𑀓𑁆𑀓𑀸𑀳𑀺 𑀥𑀸𑀭𑀺𑀬𑀫𑀸𑀦𑀸𑀳𑀺 𑀘𑀢𑀼𑀫𑀥𑀼𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 ¶ 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀯𑀸𑀢𑀸 𑀫𑁂 𑀓𑀼𑀧𑁆𑀧𑀺𑀢𑀸’’𑀢𑀺. ‘‘𑀢𑁂𑀦 𑀳𑀺 𑀉𑀝𑁆𑀞𑀸𑀬 𑀇𑀤𑀁 𑀪𑁂𑀲𑀚𑁆𑀚𑀁 𑀔𑀸𑀤𑀸𑀳𑀻’’𑀢𑀺. ‘‘𑀢𑀼𑀫𑁆𑀳𑁂𑀧𑀺 𑀔𑀸𑀤𑀣, 𑀲𑀸𑀫𑀻’’𑀢𑀺. ‘‘𑀅𑀫𑁆𑀳𑀸𑀓𑀁 𑀅𑀨𑀸𑀲𑀼𑀓𑀁 𑀦𑀢𑁆𑀣𑀺, 𑀢𑁆𑀯𑀁 𑀔𑀸𑀤𑀸𑀳𑀻’’𑀢𑀺. ‘‘𑀲𑀸𑀫𑀺, 𑀅𑀳𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 ¶ 𑀲𑀓𑀮𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀉𑀧𑀟𑁆𑀠𑀓𑀫𑁆𑀫𑀫𑁆𑀧𑀺 𑀫𑁂 𑀯𑀺𑀓𑀮𑀁 𑀫𑀸 𑀅𑀳𑁄𑀲𑀻’’𑀢𑀺 𑀦 𑀇𑀘𑁆𑀙𑀺. ‘‘𑀫𑀸 𑀏𑀯𑀁 𑀓𑀭𑀺, 𑀢𑀸𑀢𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀅𑀦𑀺𑀘𑁆𑀙𑀺𑀢𑁆𑀯𑀸 𑀅𑀭𑀼𑀡𑁂 𑀉𑀝𑁆𑀞𑀳𑀦𑁆𑀢𑁂 𑀫𑀺𑀮𑀸𑀢𑀫𑀸𑀮𑀸 𑀯𑀺𑀬 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀸 𑀇𑀫𑀫𑀢𑁆𑀣𑀁 𑀓𑀣𑁂𑀢𑁆𑀯𑀸 ‘‘𑀲𑁄 𑀲𑁂𑀝𑁆𑀞𑀺 𑀩𑀼𑀤𑁆𑀥𑀫𑀸𑀫𑀓𑁄, 𑀥𑀫𑁆𑀫𑀫𑀸𑀫𑀓𑁄, 𑀲𑀗𑁆𑀖𑀫𑀸𑀫𑀓𑁄, 𑀢𑀁 𑀦𑀺𑀲𑁆𑀲𑀸𑀬 𑀓𑀢𑀲𑁆𑀲 𑀉𑀧𑀟𑁆𑀠𑀼𑀧𑁄𑀲𑀣𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦𑁂𑀲𑀸 𑀲𑀫𑁆𑀧𑀢𑁆𑀢𑀺 𑀫𑀬𑀸 𑀮𑀤𑁆𑀥𑀸’’𑀢𑀺 𑀆𑀳.

‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀧𑀜𑁆𑀘𑀲𑀢𑀸 𑀢𑀸𑀧𑀲𑀸 𑀉𑀝𑁆𑀞𑀸𑀬 𑀤𑁂𑀯𑀢𑀸𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀩𑀼𑀤𑁆𑀥𑁄𑀢𑀺 𑀯𑀤𑁂𑀲𑀺, 𑀩𑀼𑀤𑁆𑀥𑁄𑀢𑀺 𑀯𑀤𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀺, 𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸 ‘‘𑀖𑁄𑀲𑁄𑀧𑀺 𑀔𑁄 𑀏𑀲𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 ‘‘𑀤𑁂𑀯𑀢𑁂 𑀅𑀦𑁂𑀓𑁂𑀲𑀼 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀅𑀲𑀼𑀢𑀧𑀼𑀩𑁆𑀩𑀁 𑀲𑀤𑁆𑀤𑀁 𑀢𑀬𑀸 𑀲𑀼𑀡𑀸𑀧𑀺𑀢𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀅𑀣 𑀅𑀦𑁆𑀢𑁂𑀯𑀸𑀲𑀺𑀦𑁄 𑀆𑀘𑀭𑀺𑀬𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁂𑀦 𑀳𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺. ‘‘𑀢𑀸𑀢𑀸, 𑀢𑀬𑁄 𑀲𑁂𑀝𑁆𑀞𑀺𑀦𑁄 𑀅𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑀸, 𑀲𑁆𑀯𑁂 𑀢𑁂𑀲𑀁 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀁 𑀕𑀡𑁆𑀳𑀺𑀢𑁆𑀯𑀸 𑀢𑁂𑀲𑀫𑁆𑀧𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫, 𑀅𑀥𑀺𑀯𑀸𑀲𑁂𑀣, 𑀢𑀸𑀢𑀸’’𑀢𑀺. 𑀢𑁂 𑀅𑀥𑀺𑀯𑀸𑀲𑀬𑀺𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀲𑁂𑀝𑁆𑀞𑀺𑀦𑁄 𑀬𑀸𑀕𑀼𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀅𑀚𑁆𑀚 𑀦𑁄 𑀅𑀬𑁆𑀬𑀸𑀦𑀁 𑀆𑀕𑀫𑀦𑀤𑀺𑀯𑀲𑁄’’𑀢𑀺 𑀜𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑁂 𑀆𑀤𑀸𑀬 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀢𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀫𑀳𑀸𑀲𑁂𑀝𑁆𑀞𑀺𑀦𑁄 ‘‘𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. ‘‘𑀦𑀦𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀘𑀢𑁆𑀢𑀸𑀭𑁄 ¶ 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀅𑀫𑁆𑀳𑀸𑀓𑀁 𑀕𑀳𑀺𑀢𑀸𑀯 𑀧𑀝𑀺𑀜𑁆𑀜𑀸, 𑀇𑀤𑀸𑀦𑀺 𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺? ‘‘𑀮𑁄𑀓𑁂 ¶ 𑀓𑀺𑀭 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄, 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄, 𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀧𑀦 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀦𑁆𑀢𑀺𑀓𑀁 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀅𑀜𑁆𑀜𑁂𑀲𑀫𑁆𑀧𑀺 𑀅𑀯𑀸𑀭𑀺𑀢𑀁, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀆𑀕𑀫𑁂𑀣, 𑀫𑀬𑀫𑁆𑀧𑀺 𑀕𑀫𑀦𑀧𑀭𑀺𑀯𑀘𑁆𑀙𑀁 𑀓𑀢𑁆𑀯𑀸 𑀕𑀘𑁆𑀙𑀸𑀫𑀸’’𑀢𑀺. ‘‘𑀢𑀼𑀫𑁆𑀳𑁂𑀲𑀼 𑀧𑀭𑀺𑀯𑀘𑁆𑀙𑀁 𑀓𑀭𑁄𑀦𑁆𑀢𑁂𑀲𑀼 𑀅𑀫𑁆𑀳𑀸𑀓𑀁 𑀧𑀧𑀜𑁆𑀘𑁄 𑀳𑁄𑀢𑀺, 𑀫𑀬𑀁 𑀧𑀼𑀭𑀢𑁄 𑀕𑀘𑁆𑀙𑀸𑀫, 𑀢𑀼𑀫𑁆𑀳𑁂 𑀧𑀘𑁆𑀙𑀸 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀢𑁂 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂𑀲𑀁 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑀲𑀫𑀦𑀦𑁆𑀢𑀭𑀁𑀬𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀏𑀳𑀺𑀪𑀺𑀓𑁆𑀔𑀽 𑀅𑀳𑁂𑀲𑀼𑀁.

𑀢𑁂𑀧𑀺 𑀔𑁄 𑀢𑀬𑁄 𑀲𑁂𑀝𑁆𑀞𑀺𑀦𑁄 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀢𑁆𑀢𑀘𑁆𑀙𑀸𑀤𑀦𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀤𑀸𑀦𑀽𑀧𑀓𑀭𑀡𑀸𑀦𑀺 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 ¶ 𑀧𑀢𑀺𑀝𑁆𑀞𑀸𑀬 𑀅𑀤𑁆𑀥𑀫𑀸𑀲𑀫𑀢𑁆𑀢𑀫𑁆𑀧𑀺 𑀤𑀸𑀦𑀁 𑀤𑀤𑀫𑀸𑀦𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀁 𑀆𑀕𑀫𑀦𑀢𑁆𑀣𑀸𑀬 𑀲𑀢𑁆𑀣𑀸𑀭𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀧𑀝𑀺𑀜𑁆𑀜𑀁 𑀤𑀤𑀦𑁆𑀢𑁂𑀦 ¶ ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄 𑀕𑀳𑀧𑀢𑀬𑁄 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀅𑀜𑁆𑀜𑀸𑀢𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀧𑀳𑀺𑀢𑀲𑀸𑀲𑀦𑁂𑀦 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀓𑁄𑀲𑀫𑁆𑀩𑀺𑀁 𑀕𑀦𑁆𑀢𑁆𑀯𑀸 𑀖𑁄𑀲𑀓𑀲𑁂𑀝𑁆𑀞𑀺 𑀖𑁄𑀲𑀺𑀢𑀸𑀭𑀸𑀫𑀁, 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺 𑀓𑀼𑀓𑁆𑀓𑀼𑀝𑀸𑀭𑀸𑀫𑀁, 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺 𑀧𑀸𑀯𑀸𑀭𑀺𑀓𑀸𑀭𑀸𑀫𑀦𑁆𑀢𑀺 𑀢𑀬𑁄 𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀆𑀕𑀫𑀦𑀢𑁆𑀣𑀸𑀬 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑁂 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀧𑀝𑀺𑀚𑀕𑁆𑀕𑀦𑁆𑀢𑀺. 𑀲𑀢𑁆𑀣𑀸 𑀤𑁂𑀯𑀲𑀺𑀓𑀁 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀢𑀺. 𑀬𑀲𑁆𑀲 𑀯𑀺𑀳𑀸𑀭𑁂 𑀯𑀼𑀝𑁆𑀞𑁄 𑀳𑁄𑀢𑀺, 𑀢𑀲𑁆𑀲𑁂𑀯 𑀖𑀭𑀤𑁆𑀯𑀸𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀢𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀲𑁂𑀝𑁆𑀞𑀻𑀦𑀁 𑀉𑀧𑀝𑁆𑀞𑀸𑀓𑁄 𑀲𑀼𑀫𑀦𑁄 𑀦𑀸𑀫 𑀫𑀸𑀮𑀸𑀓𑀸𑀭𑁄 𑀅𑀳𑁄𑀲𑀺. 𑀲𑁄 𑀢𑁂 𑀲𑁂𑀝𑁆𑀞𑀺𑀦𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀉𑀧𑀓𑀸𑀭𑀓𑁄, 𑀲𑀢𑁆𑀣𑀸𑀭𑀁 𑀪𑁄𑀚𑁂𑀢𑀼𑀓𑀸𑀫𑁄𑀫𑁆𑀳𑀺, 𑀫𑀬𑁆𑀳𑀫𑁆𑀧𑀺 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑁂𑀣𑀸’’𑀢𑀺. ‘‘𑀢𑁂𑀦 𑀳𑀺 𑀪𑀡𑁂 𑀲𑁆𑀯𑁂 𑀪𑁄𑀚𑁂𑀳𑀻’’𑀢𑀺. ‘‘𑀲𑀸𑀥𑀼, 𑀲𑀸𑀫𑀻’’𑀢𑀺 𑀲𑁄 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀧𑀝𑀺𑀬𑀸𑀤𑁂𑀲𑀺.

𑀢𑀤𑀸 ¶ 𑀭𑀸𑀚𑀸 𑀲𑀸𑀫𑀸𑀯𑀢𑀺𑀬𑀸 𑀤𑁂𑀯𑀲𑀺𑀓𑀁 𑀧𑀼𑀧𑁆𑀨𑀫𑀽𑀮𑁂 𑀅𑀝𑁆𑀞 𑀓𑀳𑀸𑀧𑀡𑁂 𑀤𑁂𑀢𑀺. 𑀢𑀲𑁆𑀲𑀸 𑀔𑀼𑀚𑁆𑀚𑀼𑀢𑁆𑀢𑀭𑀸 𑀦𑀸𑀫 𑀤𑀸𑀲𑀻 𑀲𑀼𑀫𑀦𑀫𑀸𑀮𑀸𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀺𑀩𑀤𑁆𑀥𑀁 𑀧𑀼𑀧𑁆𑀨𑀸𑀦𑀺 𑀕𑀡𑁆𑀳𑀸𑀢𑀺. 𑀅𑀣 𑀦𑀁 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀆𑀕𑀢𑀁 𑀫𑀸𑀮𑀸𑀓𑀸𑀭𑁄 𑀆𑀳 𑁋 ‘‘𑀫𑀬𑀸 𑀲𑀢𑁆𑀣𑀸 𑀦𑀺𑀫𑀦𑁆𑀢𑀺𑀢𑁄, 𑀅𑀚𑁆𑀚 𑀧𑀼𑀧𑁆𑀨𑁂𑀳𑀺 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑁆𑀲𑀸𑀫𑀺, 𑀢𑀺𑀝𑁆𑀞 𑀢𑀸𑀯, 𑀢𑁆𑀯𑀁 𑀧𑀭𑀺𑀯𑁂𑀲𑀦𑀸𑀬 𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀲𑀻’’𑀢𑀺 ¶ . 𑀲𑀸 ‘‘𑀲𑀸𑀥𑀽’’𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀲𑀼𑀫𑀦𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀓𑀭𑀡𑀢𑁆𑀣𑀸𑀬 𑀧𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀔𑀼𑀚𑁆𑀚𑀼𑀢𑁆𑀢𑀭𑀸𑀧𑀺 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀘𑀢𑁆𑀢𑀸𑀭𑁄 𑀓𑀳𑀸𑀧𑀡𑁂 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 𑀘𑀢𑀽𑀳𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀤𑀺𑀯𑀲𑀁 𑀅𑀝𑁆𑀞𑀳𑀺𑀧𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀢𑀸. 𑀅𑀣 𑀦𑀁 𑀲𑀸𑀫𑀸𑀯𑀢𑀻 𑀆𑀳 𑁋 ‘‘𑀓𑀺𑀁 𑀦𑀼 𑀔𑁄, 𑀅𑀫𑁆𑀫, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀭𑀜𑁆𑀜𑀸 𑀤𑁆𑀯𑀺𑀕𑀼𑀡𑀁 𑀧𑀼𑀧𑁆𑀨𑀫𑀽𑀮𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀦𑁄, 𑀅𑀬𑁆𑀬𑁂’’𑀢𑀺. ‘‘𑀅𑀣 𑀓𑀲𑁆𑀫𑀸 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀻’’𑀢𑀺? ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀅𑀳𑀁 𑀘𑀢𑁆𑀢𑀸𑀭𑁄 𑀓𑀳𑀸𑀧𑀡𑁂 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 𑀘𑀢𑀽𑀳𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀫𑀻’’𑀢𑀺. ‘‘𑀅𑀚𑁆𑀚 𑀓𑀲𑁆𑀫𑀸 𑀦 𑀕𑀡𑁆𑀳𑀻’’𑀢𑀺? ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑁆𑀲 𑀅𑀥𑀺𑀕𑀢𑀢𑁆𑀢𑀸’’𑀢𑀺. 𑀅𑀣 𑀦𑀁 ‘‘𑀅𑀭𑁂, 𑀤𑀼𑀝𑁆𑀞𑀤𑀸𑀲𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀬𑀸 𑀕𑀳𑀺𑀢𑀓𑀳𑀸𑀧𑀡𑁂 𑀫𑁂 𑀤𑁂𑀳𑀻’’𑀢𑀺 𑀅𑀢𑀚𑁆𑀚𑁂𑀢𑁆𑀯𑀸, ‘‘𑀅𑀫𑁆𑀫, 𑀢𑀬𑀸 𑀧𑀺𑀯𑀺𑀢𑀁 𑀅𑀫𑀢𑀁 𑀅𑀫𑁆𑀳𑁂𑀧𑀺 𑀧𑀸𑀬𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀫𑀁 𑀦𑁆𑀳𑀸𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀸𑀧𑁂𑀢𑁆𑀯𑀸 𑀤𑁆𑀯𑁂 𑀫𑀝𑁆𑀞𑀲𑀸𑀝𑀓𑁂 𑀤𑀸𑀧𑁂𑀲𑀺. 𑀲𑀸 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀏𑀓𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀁 𑀩𑀻𑀚𑀦𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀢𑁆𑀭𑀩𑀻𑀚𑀦𑀺𑀁 𑀆𑀤𑀸𑀬 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑀢𑀸𑀦𑀺 𑀆𑀫𑀦𑁆𑀢𑁂𑀢𑁆𑀯𑀸 𑀢𑀸𑀲𑀁 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀲𑁆𑀲𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀸 𑀲𑀩𑁆𑀩𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀸 ¶ 𑀲𑀩𑁆𑀩𑀸𑀧𑀺 𑀔𑀼𑀚𑁆𑀚𑀼𑀢𑁆𑀢𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀅𑀫𑁆𑀫 ¶ , 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀢𑁆𑀯𑀁 𑀓𑀺𑀮𑀺𑀝𑁆𑀞𑀓𑀫𑁆𑀫𑀁 𑀫𑀸 𑀓𑀭𑀺, 𑀅𑀫𑁆𑀳𑀸𑀓𑀁 𑀫𑀸𑀢𑀼𑀝𑁆𑀞𑀸𑀦𑁂 𑀘 𑀆𑀘𑀭𑀺𑀬𑀝𑁆𑀞𑀸𑀦𑁂 𑀘 𑀞𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀓𑀣𑁂𑀳𑀻’’𑀢𑀺 𑀯𑀤𑀺𑀁𑀲𑀼. 𑀲𑀸 𑀢𑀣𑀸 𑀓𑀭𑁄𑀦𑁆𑀢𑀻 𑀅𑀧𑀭𑀪𑀸𑀕𑁂 𑀢𑀺𑀧𑀺𑀝𑀓𑀥𑀭𑀸 𑀚𑀸𑀢𑀸. 𑀅𑀣 𑀦𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸’’𑀢𑀺 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀢𑀸𑀧𑀺 𑀔𑁄 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀢𑀁 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀫, 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀸𑀫𑁆𑀳𑀸, 𑀢𑀁 𑀦𑁄 𑀤𑀲𑁆𑀲𑁂𑀳𑀺, 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 ¶ 𑀢𑀁 𑀧𑀽𑀚𑁂𑀲𑁆𑀲𑀸𑀫𑀸’’𑀢𑀺. ‘‘𑀅𑀬𑁆𑀬𑁂, 𑀭𑀸𑀚𑀓𑀼𑀮𑀁 𑀦𑀸𑀫 𑀪𑀸𑀭𑀺𑀬𑀁, 𑀢𑀼𑀫𑁆𑀳𑁂 𑀕𑀳𑁂𑀢𑁆𑀯𑀸 𑀩𑀳𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸’’𑀢𑀺. ‘‘𑀅𑀫𑁆𑀫, 𑀦𑁄 𑀫𑀸 𑀦𑀸𑀲𑁂𑀳𑀺, 𑀤𑀲𑁆𑀲𑁂𑀳𑁂𑀯 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑀼𑀫𑁆𑀳𑀸𑀓𑀁 𑀯𑀲𑀦𑀕𑀩𑁆𑀪𑀸𑀦𑀁 𑀪𑀺𑀢𑁆𑀢𑀻𑀲𑀼 𑀬𑀢𑁆𑀢𑀓𑁂𑀦 𑀑𑀮𑁄𑀓𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑀢𑁆𑀢𑀓𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀢𑀺𑀡𑁆𑀡𑀁 𑀲𑁂𑀝𑁆𑀞𑀻𑀦𑀁 𑀖𑀭𑀤𑁆𑀯𑀸𑀭𑀁 𑀕𑀘𑁆𑀙𑀦𑁆𑀢𑀁 𑀢𑀼𑀫𑁆𑀳𑁂 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀞𑀢𑁆𑀯𑀸 𑀑𑀮𑁄𑀓𑁂𑀣 𑀘𑁂𑀯, 𑀳𑀢𑁆𑀣𑁂 𑀘 𑀧𑀲𑀸𑀭𑁂𑀢𑁆𑀯𑀸 𑀯𑀦𑁆𑀤𑀣, 𑀧𑀽𑀚𑁂𑀣 𑀘𑀸’’𑀢𑀺. 𑀢𑀸 𑀢𑀣𑀸 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀕𑀘𑁆𑀙𑀦𑁆𑀢𑀜𑁆𑀘 𑀆𑀕𑀘𑁆𑀙𑀦𑁆𑀢𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀯𑀦𑁆𑀤𑀺𑀁𑀲𑀼 𑀘𑁂𑀯 𑀧𑀽𑀚𑁂𑀲𑀼𑀜𑁆𑀘.

𑀅𑀣𑁂𑀓𑀤𑀺𑀯𑀲𑀁 𑀫𑀸𑀕𑀡𑁆𑀟𑀺𑀬𑀸 𑀅𑀢𑁆𑀢𑀦𑁄 𑀧𑀸𑀲𑀸𑀤𑀢𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀗𑁆𑀓𑀫𑀫𑀸𑀦𑀸 𑀢𑀸𑀲𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑁂𑀲𑀼 𑀙𑀺𑀤𑁆𑀤𑀁 𑀤𑀺𑀲𑁆𑀯𑀸, ‘‘𑀇𑀤𑀁 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀢𑀸𑀳𑀺 𑀢𑀲𑁆𑀲𑀸 𑀲𑀢𑁆𑀣𑀭𑀺 𑀆𑀖𑀸𑀢𑀩𑀤𑁆𑀥𑀪𑀸𑀯𑀁 𑀅𑀚𑀸𑀦𑀦𑁆𑀢𑀻𑀳𑀺 ‘‘𑀲𑀢𑁆𑀣𑀸 ¶ 𑀇𑀫𑀁 𑀦𑀕𑀭𑀁 𑀆𑀕𑀢𑁄, 𑀫𑀬𑀁 𑀏𑀢𑁆𑀣 𑀞𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀸𑀫 𑀘𑁂𑀯 𑀧𑀽𑀚𑁂𑀫 𑀘𑀸’’𑀢𑀺 𑀯𑀼𑀢𑁆𑀢𑁂, ‘‘𑀆𑀕𑀢𑁄 𑀦𑀸𑀫 𑀇𑀫𑀁 𑀦𑀕𑀭𑀁 𑀲𑀫𑀡𑁄 𑀕𑁄𑀢𑀫𑁄, 𑀇𑀤𑀸𑀦𑀺𑀲𑁆𑀲 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀇𑀫𑀸𑀧𑀺 𑀢𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸, 𑀇𑀫𑀸𑀲𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀫𑀳𑀸𑀭𑀸𑀚, 𑀲𑀸𑀫𑀸𑀯𑀢𑀺𑀫𑀺𑀲𑁆𑀲𑀺𑀓𑀸𑀦𑀁 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀅𑀢𑁆𑀣𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀢𑁂 𑀚𑀻𑀯𑀺𑀢𑀁 𑀫𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. 𑀭𑀸𑀚𑀸 ‘‘𑀦 𑀢𑀸 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀲𑀤𑁆𑀤𑀳𑀺. 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑁂𑀧𑀺 𑀦 𑀲𑀤𑁆𑀤𑀳𑀺 𑀏𑀯. 𑀅𑀣 𑀦𑀁 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂𑀧𑀺 𑀅𑀲𑀤𑁆𑀤𑀳𑀦𑁆𑀢𑀁 ‘‘𑀲𑀘𑁂 𑀫𑁂 𑀦 𑀲𑀤𑁆𑀤𑀳𑀲𑀺, 𑀢𑀸𑀲𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀉𑀧𑀘𑀸𑀭𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀕𑀩𑁆𑀪𑁂𑀲𑀼 𑀙𑀺𑀤𑁆𑀤𑀁 𑀤𑀺𑀲𑁆𑀯𑀸, ‘‘𑀇𑀤𑀁 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀆𑀭𑁄𑀘𑀺𑀢𑁂 𑀢𑀸𑀲𑀁 𑀅𑀓𑀼𑀚𑁆𑀛𑀺𑀢𑁆𑀯𑀸, 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀙𑀺𑀤𑁆𑀤𑀸𑀦𑀺 𑀧𑀺𑀤𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀕𑀩𑁆𑀪𑁂𑀲𑀼 𑀉𑀤𑁆𑀥𑀘𑁆𑀙𑀺𑀤𑁆𑀤𑀓𑀯𑀸𑀢𑀧𑀸𑀦𑀸𑀦𑀺 𑀓𑀸𑀭𑁂𑀲𑀺. 𑀉𑀤𑁆𑀥𑀘𑁆𑀙𑀺𑀤𑁆𑀤𑀓𑀯𑀸𑀢𑀧𑀸𑀦𑀸𑀦𑀺 𑀓𑀺𑀭 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀦𑁆𑀦𑀸𑀦𑀺. 𑀫𑀸𑀕𑀡𑁆𑀟𑀺𑀬𑀸 𑀢𑀸𑀲𑀁 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸, ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑁂𑀯 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀸𑀕𑀭𑀸𑀦𑀁 𑀮𑀜𑁆𑀚𑀁 𑀤𑀢𑁆𑀯𑀸, ‘‘𑀲𑀫𑀡𑀁 𑀕𑁄𑀢𑀫𑀁 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀳𑀺 𑀅𑀓𑁆𑀓𑁄𑀲𑁂𑀢𑁆𑀯𑀸 𑀧𑀭𑀺𑀪𑀸𑀲𑁂𑀢𑁆𑀯𑀸 𑀧𑀮𑀸𑀧𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀧𑁆𑀧𑀲𑀦𑁆𑀦𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀁 𑀲𑀢𑁆𑀣𑀸𑀭𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 ¶ , ‘‘𑀘𑁄𑀭𑁄𑀲𑀺 ¶ , 𑀩𑀸𑀮𑁄𑀲𑀺, 𑀫𑀽𑀴𑁆𑀳𑁄𑀲𑀺, 𑀑𑀝𑁆𑀞𑁄𑀲𑀺, 𑀕𑁄𑀡𑁄𑀲𑀺, 𑀕𑀤𑁆𑀭𑀪𑁄𑀲𑀺, 𑀦𑁂𑀭𑀬𑀺𑀓𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀲𑀼𑀕𑀢𑀺, 𑀤𑀼𑀕𑁆𑀕𑀢𑀺𑀬𑁂𑀯 𑀢𑀼𑀬𑁆𑀳𑀁 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀪𑀦𑁆𑀢𑁂, 𑀇𑀫𑁂 𑀦𑀸𑀕𑀭𑀸 𑀅𑀫𑁆𑀳𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺, 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. ‘‘𑀓𑀼𑀳𑀺𑀁, 𑀆𑀦𑀦𑁆𑀤𑁄𑀢𑀺’’? ‘‘𑀅𑀜𑁆𑀜𑀁 𑀦𑀕𑀭𑀁, 𑀪𑀦𑁆𑀢𑁂’’𑀢𑀺. ‘‘𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀧𑀼𑀦 𑀓𑀢𑁆𑀣 𑀕𑀫𑀺𑀲𑁆𑀲𑀸𑀫, 𑀆𑀦𑀦𑁆𑀤𑁄’’𑀢𑀺? ‘‘𑀢𑀢𑁄𑀧𑀺 𑀅𑀜𑁆𑀜𑀁 𑀦𑀕𑀭𑀁, 𑀪𑀦𑁆𑀢𑁂’’𑀢𑀺. ‘‘𑀢𑀢𑁆𑀣𑀸𑀧𑀺 𑀫𑀦𑀼𑀲𑁆𑀲𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀓𑀼𑀳𑀺𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺? ‘‘𑀢𑀢𑁄𑀧𑀺 𑀅𑀜𑁆𑀜𑀁 𑀦𑀕𑀭𑀁, 𑀪𑀦𑁆𑀢𑁂’’𑀢𑀺. ‘‘𑀆𑀦𑀦𑁆𑀤, 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀢𑁆𑀣 𑀅𑀥𑀺𑀓𑀭𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣𑁂𑀯 𑀢𑀲𑁆𑀫𑀺𑀁 𑀯𑀽𑀧𑀲𑀦𑁆𑀢𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀓𑁂 𑀧𑀦 𑀢𑁂, 𑀆𑀦𑀦𑁆𑀤, 𑀅𑀓𑁆𑀓𑁄𑀲𑀦𑁆𑀢𑀻’’𑀢𑀺? ‘‘𑀪𑀦𑁆𑀢𑁂, 𑀤𑀸𑀲𑀓𑀫𑁆𑀫𑀓𑀭𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀅𑀓𑁆𑀓𑁄𑀲𑀦𑁆𑀢𑀻’’𑀢𑀺. ‘‘𑀅𑀳𑀁, 𑀆𑀦𑀦𑁆𑀤, 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑀳𑀢𑁆𑀣𑀺𑀲𑀤𑀺𑀲𑁄, 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑀳𑀢𑁆𑀣𑀺𑀦𑁄 𑀳𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑁂 𑀲𑀭𑁂 𑀲𑀳𑀺𑀢𑀼𑀁 𑀪𑀸𑀭𑁄, 𑀢𑀣𑁂𑀯 𑀩𑀳𑀽𑀳𑀺 𑀤𑀼𑀲𑁆𑀲𑀻𑀮𑁂𑀳𑀺 𑀓𑀣𑀺𑀢𑀓𑀣𑀸𑀦𑀁 𑀲𑀳𑀦𑀁 𑀦𑀸𑀫 𑀫𑀬𑁆𑀳𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀦𑀸𑀕𑀯𑀕𑁆𑀕𑁂 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀳𑀁 𑀦𑀸𑀕𑁄𑀯 𑀲𑀗𑁆𑀕𑀸𑀫𑁂, 𑀘𑀸𑀧𑀢𑁄 𑀧𑀢𑀺𑀢𑀁 𑀲𑀭𑀁;

𑀅𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀺𑀲𑁆𑀲𑀁, 𑀤𑀼𑀲𑁆𑀲𑀻𑀮𑁄 𑀳𑀺 𑀩𑀳𑀼𑀚𑁆𑀚𑀦𑁄.

‘‘𑀤𑀦𑁆𑀢𑀁 ¶ 𑀦𑀬𑀦𑁆𑀢𑀺 𑀲𑀫𑀺𑀢𑀺𑀁, 𑀤𑀦𑁆𑀢𑀁 𑀭𑀸𑀚𑀸𑀪𑀺𑀭𑀽𑀳𑀢𑀺;

𑀤𑀦𑁆𑀢𑁄 𑀲𑁂𑀝𑁆𑀞𑁄 𑀫𑀦𑀼𑀲𑁆𑀲𑁂𑀲𑀼, 𑀬𑁄𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀢𑀺.

‘‘𑀯𑀭𑀫𑀲𑁆𑀲𑀢𑀭𑀸 𑀤𑀦𑁆𑀢𑀸, 𑀆𑀚𑀸𑀦𑀻𑀬𑀸 𑀘 𑀲𑀺𑀦𑁆𑀥𑀯𑀸;

𑀓𑀼𑀜𑁆𑀚𑀭𑀸 𑀘 𑀫𑀳𑀸𑀦𑀸𑀕𑀸, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭’’𑀦𑁆𑀢𑀺. (𑀥. 𑀧. 𑁩𑁨𑁦-𑁩𑁨𑁨);

𑀥𑀫𑁆𑀫𑀓𑀣𑀸 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺. 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀸 𑀘𑀺𑀦𑁆𑀢𑀬𑀺, 𑀆𑀦𑀦𑁆𑀤, 𑀏𑀢𑁂 𑀲𑀢𑁆𑀢𑀸𑀳𑀫𑀢𑁆𑀢𑀫𑁂𑀯 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺, 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀸𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀁 𑀲𑀢𑁆𑀢𑀸𑀳𑀢𑁄 𑀉𑀢𑁆𑀢𑀭𑀺 𑀦 𑀕𑀘𑁆𑀙𑀢𑀺. 𑀫𑀸𑀕𑀡𑁆𑀟𑀺𑀬𑀸 𑀲𑀢𑁆𑀣𑀸𑀭𑀁 𑀅𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻, ‘‘𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀇𑀫𑀸 𑀏𑀢𑀲𑁆𑀲 𑀉𑀧𑀢𑁆𑀣𑀫𑁆𑀪𑀪𑀽𑀢𑀸, 𑀏𑀢𑀸𑀲𑀫𑁆𑀧𑀺 𑀩𑁆𑀬𑀲𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀁 𑀭𑀜𑁆𑀜𑁄 𑀲𑀼𑀭𑀸𑀧𑀸𑀦𑀝𑁆𑀞𑀸𑀦𑁂 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀻 𑀘𑀽𑀴𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀅𑀢𑁆𑀣𑁄 𑀫𑁂 𑀓𑀺𑀭 𑀓𑀼𑀓𑁆𑀓𑀼𑀝𑁂𑀳𑀺 ¶ , 𑀅𑀝𑁆𑀞 𑀫𑀢𑀓𑀼𑀓𑁆𑀓𑀼𑀝𑁂, 𑀅𑀝𑁆𑀞 𑀲𑀚𑀻𑀯𑀓𑀼𑀓𑁆𑀓𑀼𑀝𑁂 𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀼, 𑀆𑀕𑀦𑁆𑀢𑁆𑀯𑀸 𑀘 𑀲𑁄𑀧𑀸𑀦𑀫𑀢𑁆𑀣𑀓𑁂 𑀞𑀢𑁆𑀯𑀸 𑀆𑀕𑀢𑀪𑀸𑀯𑀁 𑀦𑀺𑀯𑁂𑀤𑁂𑀢𑁆𑀯𑀸 ‘𑀧𑀯𑀺𑀲𑀢𑀽’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀧𑀯𑀺𑀲𑀺𑀢𑁆𑀯𑀸 𑀧𑀞𑀫𑀁 𑀅𑀝𑁆𑀞 𑀲𑀚𑀻𑀯𑀓𑀼𑀓𑁆𑀓𑀼𑀝𑁂 𑀧𑀳𑀺𑀡𑀢𑀼, ‘𑀧𑀘𑁆𑀙𑀸 𑀇𑀢𑀭𑁂’’’𑀢𑀺. 𑀘𑀽𑀴𑀸𑀧𑀝𑁆𑀞𑀸𑀓𑀲𑁆𑀲 𑀘 ‘‘𑀫𑀫 𑀯𑀘𑀦𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀮𑀜𑁆𑀚𑀁 𑀅𑀤𑀸𑀲𑀺. 𑀫𑀸𑀕𑀡𑁆𑀟𑀺𑀬𑁄 𑀆𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀦𑀺𑀯𑁂𑀤𑀸𑀧𑁂𑀢𑁆𑀯𑀸, ‘‘𑀧𑀯𑀺𑀲𑀢𑀽’’𑀢𑀺 𑀯𑀼𑀢𑁆𑀢𑁂, ‘‘𑀭𑀜𑁆𑀜𑁄 𑀆𑀧𑀸𑀦𑀪𑀽𑀫𑀺𑀁 𑀦 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀇𑀢𑀭𑀸 𑀘𑀽𑀴𑀼𑀧𑀝𑁆𑀞𑀸𑀓𑀁 ¶ 𑀧𑀳𑀺𑀡𑀺 ¶ 𑁋 ‘‘𑀕𑀘𑁆𑀙, 𑀢𑀸𑀢, 𑀫𑀫 𑀘𑀽𑀴𑀧𑀺𑀢𑀼 𑀲𑀦𑁆𑀢𑀺𑀓’’𑀦𑁆𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑁂 𑀅𑀝𑁆𑀞 𑀲𑀚𑀻𑀯𑀓𑀼𑀓𑁆𑀓𑀼𑀝𑁂 𑀆𑀦𑁂𑀢𑁆𑀯𑀸, ‘‘𑀤𑁂𑀯, 𑀧𑀼𑀭𑁄𑀳𑀺𑀢𑁂𑀦 𑀧𑀡𑁆𑀡𑀸𑀓𑀸𑀭𑁄 𑀧𑀳𑀺𑀢𑁄’’𑀢𑀺 𑀆𑀳. 𑀭𑀸𑀚𑀸 ‘‘𑀪𑀤𑁆𑀤𑀓𑁄 𑀯𑀢 𑀦𑁄 𑀉𑀢𑁆𑀢𑀭𑀺𑀪𑀗𑁆𑀕𑁄 𑀉𑀧𑁆𑀧𑀦𑁆𑀦𑁄, 𑀓𑁄 𑀦𑀼 𑀔𑁄 𑀧𑀘𑁂𑀬𑁆𑀬𑀸’’𑀢𑀺 𑀆𑀳. 𑀫𑀸𑀕𑀡𑁆𑀟𑀺𑀬𑀸, ‘‘𑀫𑀳𑀸𑀭𑀸𑀚, 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀦𑀺𑀓𑁆𑀓𑀫𑁆𑀫𑀺𑀓𑀸 𑀯𑀺𑀘𑀭𑀦𑁆𑀢𑀺, 𑀢𑀸𑀲𑀁 𑀧𑁂𑀲𑁂𑀳𑀺, 𑀢𑀸 𑀧𑀘𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀕𑀘𑁆𑀙, 𑀢𑀸𑀲𑀁 𑀤𑀢𑁆𑀯𑀸 𑀅𑀜𑁆𑀜𑀲𑁆𑀲 𑀓𑀺𑀭 𑀳𑀢𑁆𑀣𑁂 𑀅𑀤𑀢𑁆𑀯𑀸 𑀲𑀬𑀫𑁂𑀯 𑀫𑀸𑀭𑁂𑀢𑁆𑀯𑀸 𑀧𑀘𑀦𑁆𑀢𑀽’’𑀢𑀺 𑀧𑁂𑀲𑁂𑀲𑀺. 𑀘𑀽𑀴𑀼𑀧𑀝𑁆𑀞𑀸𑀓𑁄 ‘‘𑀲𑀸𑀥𑀼 𑀤𑁂𑀯𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀣𑀸 𑀯𑀢𑁆𑀯𑀸 𑀢𑀸𑀳𑀺 ‘‘𑀫𑀬𑀁 𑀧𑀸𑀡𑀸𑀢𑀺𑀧𑀸𑀢𑀁 𑀦 𑀓𑀭𑁄𑀫𑀸’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀫𑀸𑀕𑀡𑁆𑀟𑀺𑀬𑀸 ‘‘𑀤𑀺𑀝𑁆𑀞𑀁 𑀢𑁂, 𑀫𑀳𑀸𑀭𑀸𑀚, 𑀇𑀤𑀸𑀦𑀺 𑀢𑀸𑀲𑀁 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀓𑀭𑀡𑀁 𑀯𑀸 𑀅𑀓𑀭𑀡𑀁 𑀯𑀸 𑀚𑀸𑀦𑀺𑀲𑁆𑀲𑀲𑀺, ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀘𑀺𑀢𑁆𑀯𑀸 𑀧𑁂𑀲𑁂𑀦𑁆𑀢𑀽’𑀢𑀺 𑀯𑀤𑁂𑀳𑀺 𑀤𑁂𑀯𑀸’’𑀢𑀺 𑀆𑀳. 𑀭𑀸𑀚𑀸 𑀢𑀣𑀸 𑀯𑀢𑁆𑀯𑀸 𑀧𑁂𑀲𑁂𑀲𑀺. 𑀇𑀢𑀭𑁄 𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑁂 𑀓𑀼𑀓𑁆𑀓𑀼𑀝𑁂 𑀧𑀼𑀭𑁄𑀳𑀺𑀢𑀲𑁆𑀲 𑀤𑀢𑁆𑀯𑀸 𑀫𑀢𑀓𑀼𑀓𑁆𑀓𑀼𑀝𑁂 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀇𑀫𑁂 𑀓𑀺𑀭 𑀓𑀼𑀓𑁆𑀓𑀼𑀝𑁂 𑀧𑀘𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑀳𑀺𑀡𑀣𑀸’’𑀢𑀺 𑀆𑀳. 𑀢𑀸, ‘‘𑀲𑀸𑀫𑀺, 𑀆𑀳𑀭, 𑀇𑀤𑀁 𑀦𑀸𑀫 𑀅𑀫𑁆𑀳𑀸𑀓𑀁 𑀓𑀺𑀘𑁆𑀘’’𑀦𑁆𑀢𑀺 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀁𑀲𑀼. 𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀢𑀸𑀢𑀸’’𑀢𑀺 𑀧𑀼𑀝𑁆𑀞𑁄, ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀘𑀺𑀢𑁆𑀯𑀸 𑀧𑁂𑀲𑁂𑀣𑀸𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀝𑀺𑀫𑀕𑁆𑀕𑀁 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀁𑀲𑀽’’𑀢𑀺 𑀆𑀘𑀺𑀓𑁆𑀔𑀺. 𑀫𑀸𑀕𑀡𑁆𑀟𑀺𑀬𑀸 ‘‘𑀧𑀲𑁆𑀲, 𑀫𑀳𑀸𑀭𑀸𑀚, 𑀦 𑀢𑀸 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀓𑀭𑁄𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀢𑀸𑀲𑀁 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑁂 𑀦 𑀲𑀤𑁆𑀤𑀳𑀲𑀻’’𑀢𑀺 𑀆𑀳. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸𑀧𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 ¶ 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺. 𑀫𑀸𑀕𑀡𑁆𑀟𑀺𑀬𑀸 ‘‘𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀢𑀤𑀸 𑀧𑀦 𑀭𑀸𑀚𑀸 ‘‘𑀲𑀸𑀫𑀸𑀯𑀢𑀺𑀬𑀸 𑀯𑀸𑀲𑀼𑀮𑀤𑀢𑁆𑀢𑀸𑀬 𑀫𑀸𑀕𑀡𑁆𑀟𑀺𑀬𑀸𑀬 𑀘𑀸’’𑀢𑀺 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀏𑀢𑀸𑀲𑀁 𑀧𑀸𑀲𑀸𑀤𑀢𑀮𑁂 𑀯𑀸𑀭𑁂𑀦 𑀯𑀸𑀭𑁂𑀦 𑀲𑀢𑁆𑀢𑀸𑀳𑀁 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑀺 ¶ . 𑀅𑀣 𑀦𑀁 ‘‘𑀲𑁆𑀯𑁂 𑀯𑀸 𑀧𑀭𑀲𑀼𑀯𑁂 𑀯𑀸 𑀲𑀸𑀫𑀸𑀯𑀢𑀺𑀬𑀸 𑀧𑀸𑀲𑀸𑀤𑀢𑀮𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀫𑀸𑀕𑀡𑁆𑀟𑀺𑀬𑀸 𑀘𑀽𑀴𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 𑁋 ‘‘𑀅𑀕𑀤𑁂𑀦 𑀓𑀺𑀭 𑀤𑀸𑀞𑀸 𑀥𑁄𑀯𑀺𑀢𑁆𑀯𑀸 𑀏𑀓𑀁 𑀲𑀧𑁆𑀧𑀁 𑀧𑁂𑀲𑁂𑀢𑀽’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀧𑁂𑀲𑁂𑀲𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀕𑀫𑀦𑀝𑁆𑀞𑀸𑀦𑀁 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀁 𑀆𑀤𑀸𑀬𑀬𑁂𑀯 𑀕𑀘𑁆𑀙𑀢𑀺, 𑀢𑀲𑁆𑀲𑀸 𑀧𑁄𑀓𑁆𑀔𑀭𑁂 𑀏𑀓𑀁 𑀙𑀺𑀤𑁆𑀤𑀁 𑀅𑀢𑁆𑀣𑀺. 𑀫𑀸𑀕𑀡𑁆𑀟𑀺𑀬𑀸 𑀢𑁂𑀦 𑀙𑀺𑀤𑁆𑀤𑁂𑀦 𑀲𑀧𑁆𑀧𑀁 𑀧𑀯𑁂𑀲𑁂𑀢𑁆𑀯𑀸 𑀙𑀺𑀤𑁆𑀤𑀁 𑀫𑀸𑀮𑀸𑀕𑀼𑀴𑁂𑀦 𑀣𑀓𑁂𑀲𑀺. 𑀲𑀧𑁆𑀧𑁄 𑀤𑁆𑀯𑀻𑀳𑀢𑀻𑀳𑀁 𑀅𑀦𑁆𑀢𑁄𑀯𑀻𑀡𑀸𑀬𑀫𑁂𑀯 𑀅𑀳𑁄𑀲𑀺. 𑀫𑀸𑀕𑀡𑁆𑀟𑀺𑀬𑀸 𑀭𑀜𑁆𑀜𑁄 𑀕𑀫𑀦𑀤𑀺𑀯𑀲𑁂 ‘‘𑀅𑀚𑁆𑀚 𑀓𑀢𑀭𑀺𑀲𑁆𑀲𑀺𑀢𑁆𑀣𑀺𑀬𑀸 𑀧𑀸𑀲𑀸𑀤𑀁 𑀕𑀫𑀺𑀲𑁆𑀲𑀲𑀺 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀸𑀫𑀸𑀯𑀢𑀺𑀬𑀸’’𑀢𑀺 𑀯𑀼𑀢𑁆𑀢𑁂, ‘‘𑀅𑀚𑁆𑀚 𑀫𑀬𑀸, 𑀫𑀳𑀸𑀭𑀸𑀚, 𑀅𑀫𑀦𑀸𑀧𑁄 𑀲𑀼𑀧𑀺𑀦𑁄 𑀤𑀺𑀝𑁆𑀞𑁄. 𑀦 𑀲𑀓𑁆𑀓𑀸 𑀢𑀢𑁆𑀣 𑀕𑀦𑁆𑀢𑀼𑀁, 𑀤𑁂𑀯𑀸’’𑀢𑀺? ‘‘𑀕𑀘𑁆𑀙𑀸𑀫𑁂𑀯𑀸’’𑀢𑀺. 𑀲𑀸 𑀬𑀸𑀯 𑀢𑀢𑀺𑀬𑀁 𑀯𑀸𑀭𑁂𑀢𑁆𑀯𑀸, ‘‘𑀏𑀯𑀁 𑀲𑀦𑁆𑀢𑁂 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀦𑀺𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀅𑀦𑀺𑀯𑀢𑁆𑀢𑀺𑀢𑁆𑀯𑀸, ‘‘𑀦 𑀚𑀸𑀦𑀸𑀫𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀺 𑀤𑁂𑀯𑀸’’𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺.

𑀭𑀸𑀚𑀸 𑀲𑀸𑀫𑀸𑀯𑀢𑀺𑀫𑀺𑀲𑁆𑀲𑀺𑀓𑀸𑀳𑀺 𑀤𑀺𑀦𑁆𑀦𑀸𑀦𑀺 𑀯𑀢𑁆𑀣𑀧𑀼𑀧𑁆𑀨𑀕𑀦𑁆𑀥𑀸𑀪𑀭𑀡𑀸𑀦𑀺 𑀥𑀸𑀭𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀡𑀁 ¶ 𑀉𑀲𑁆𑀲𑀻𑀲𑀓𑁂 𑀞𑀧𑁂𑀢𑁆𑀯𑀸 𑀲𑀬𑀦𑁂 𑀦𑀺𑀧𑀚𑁆𑀚𑀺. 𑀫𑀸𑀕𑀡𑁆𑀟𑀺𑀬𑀸 𑀅𑀧𑀭𑀸𑀧𑀭𑀁 𑀯𑀺𑀘𑀭𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸 𑀯𑀻𑀡𑀸𑀙𑀺𑀤𑁆𑀤𑀢𑁄 𑀧𑀼𑀧𑁆𑀨𑀕𑀼𑀴𑀁 𑀅𑀧𑀦𑁂𑀲𑀺. 𑀲𑀧𑁆𑀧𑁄 𑀤𑁆𑀯𑀻𑀳𑀢𑀻𑀳𑀁 𑀦𑀺𑀭𑀸𑀳𑀸𑀭𑁄 𑀢𑁂𑀦 𑀙𑀺𑀤𑁆𑀤𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀲𑁆𑀲𑀲𑀦𑁆𑀢𑁄 𑀨𑀡𑀁 𑀓𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀺 ¶ . 𑀫𑀸𑀕𑀡𑁆𑀟𑀺𑀬𑀸 𑀢𑀁 𑀤𑀺𑀲𑁆𑀯𑀸, ‘‘𑀥𑀻 𑀥𑀻, 𑀤𑁂𑀯, 𑀲𑀧𑁆𑀧𑁄’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀭𑀸𑀚𑀸𑀦𑀜𑁆𑀘 𑀢𑀸 𑀘 𑀅𑀓𑁆𑀓𑁄𑀲𑀦𑁆𑀢𑀻, ‘‘𑀅𑀬𑀁 𑀅𑀦𑁆𑀥𑀩𑀸𑀮𑀭𑀸𑀚𑀸 𑀅𑀮𑀓𑁆𑀔𑀺𑀓𑁄 𑀫𑀬𑁆𑀳𑀁 𑀯𑀘𑀦𑀁 𑀦 𑀲𑀼𑀡𑀸𑀢𑀺, 𑀇𑀫𑀸𑀧𑀺 𑀦𑀺𑀲𑁆𑀲𑀺𑀭𑀻𑀓𑀸 𑀤𑀼𑀩𑁆𑀩𑀺𑀦𑀻𑀢𑀸, 𑀓𑀺𑀁 𑀦𑀸𑀫 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀦 𑀮𑀪𑀦𑁆𑀢𑀺, 𑀓𑀺𑀁 𑀦𑀼 𑀢𑀼𑀫𑁆𑀳𑁂 𑀇𑀫𑀲𑁆𑀫𑀺𑀁 𑀫𑀢𑁂𑀬𑁂𑀯 𑀲𑀼𑀔𑀁 𑀚𑀻𑀯𑀺𑀲𑁆𑀲𑀣, 𑀚𑀻𑀯𑀦𑁆𑀢𑁂 𑀤𑀼𑀓𑁆𑀔𑀁 𑀚𑀻𑀯𑀣, ‘𑀅𑀚𑁆𑀚 𑀫𑀬𑀸 𑀧𑀸𑀧𑀲𑀼𑀧𑀺𑀦𑁄 𑀤𑀺𑀝𑁆𑀞𑁄, 𑀲𑀸𑀫𑀸𑀯𑀢𑀺𑀬𑀸 𑀧𑀸𑀲𑀸𑀤𑀁 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺 𑀯𑀸𑀭𑁂𑀦𑁆𑀢𑀺𑀬𑀸𑀧𑀺 𑀫𑁂 𑀯𑀘𑀦𑀁 𑀦 𑀲𑀼𑀡𑀲𑀺, 𑀤𑁂𑀯𑀸’’𑀢𑀺 𑀆𑀳. 𑀭𑀸𑀚𑀸 𑀲𑀧𑁆𑀧𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀇𑀫𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑁄 𑀧𑀸𑀧𑀸, 𑀅𑀳𑀁 𑀇𑀫𑀸𑀲𑀁 𑀧𑀸𑀧𑀪𑀸𑀯𑀁 𑀆𑀘𑀺𑀓𑁆𑀔𑀦𑁆𑀢𑀺𑀬𑀸𑀧𑀺 𑀇𑀫𑀺𑀲𑁆𑀲𑀸 𑀯𑀘𑀦𑀁 𑀦 𑀲𑀤𑁆𑀤𑀳𑀺𑀁, 𑀧𑀞𑀫𑀁 𑀅𑀢𑁆𑀢𑀦𑁄 𑀕𑀩𑁆𑀪𑁂𑀲𑀼 𑀙𑀺𑀤𑁆𑀤𑀸𑀦𑀺 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀧𑀼𑀦 𑀫𑀬𑀸 𑀧𑁂𑀲𑀺𑀢𑁂 𑀓𑀼𑀓𑁆𑀓𑀼𑀝𑁂 𑀧𑀝𑀺𑀧𑀳𑀺𑀡𑀺𑀁𑀲𑀼, 𑀅𑀚𑁆𑀚 𑀲𑀬𑀦𑁂 𑀲𑀧𑁆𑀧𑀁 𑀯𑀺𑀲𑁆𑀲𑀚𑁆𑀚𑀺𑀁𑀲𑀽’’𑀢𑀺 𑀓𑁄𑀥𑁂𑀦 𑀲𑀫𑁆𑀧𑀚𑁆𑀚𑀮𑀺𑀢𑁄 𑀯𑀺𑀬 𑀅𑀳𑁄𑀲𑀺.

𑀲𑀸𑀫𑀸𑀯𑀢𑀻𑀧𑀺 ¶ 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀺𑀲𑀢𑀸𑀦𑀁 𑀑𑀯𑀸𑀤𑀁 𑀅𑀤𑀸𑀲𑀺 𑁋 ‘‘𑀅𑀫𑁆𑀫𑀸, 𑀅𑀫𑁆𑀳𑀸𑀓𑀁 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀦𑀭𑀺𑀦𑁆𑀤𑁂 𑀘 𑀤𑁂𑀯𑀺𑀬𑀸 𑀘 𑀅𑀢𑁆𑀢𑀦𑀺 𑀘 𑀲𑀫𑀫𑁂𑀯 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀣, 𑀫𑀸 𑀓𑀲𑁆𑀲𑀘𑀺 𑀓𑁄𑀧𑀁 𑀓𑀭𑀺𑀢𑁆𑀣𑀸’’𑀢𑀺. 𑀭𑀸𑀚𑀸 𑀲𑀳𑀲𑁆𑀲𑀣𑀸𑀫𑀁 𑀲𑀺𑀗𑁆𑀕𑀥𑀦𑀼𑀁 𑀆𑀤𑀸𑀬 𑀚𑀺𑀬𑀁 𑀧𑁄𑀣𑁂𑀢𑁆𑀯𑀸 𑀯𑀺𑀲𑀧𑀻𑀢𑀁 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀸𑀫𑀸𑀯𑀢𑀺𑀁 𑀥𑀼𑀭𑁂 𑀓𑀢𑁆𑀯𑀸 𑀲𑀩𑁆𑀩𑀸 ¶ 𑀢𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑀸𑀧𑁂𑀢𑁆𑀯𑀸 𑀲𑀸𑀫𑀸𑀯𑀢𑀺𑀬𑀸 𑀉𑀭𑁂 𑀲𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀢𑀲𑁆𑀲𑀸 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑁄𑀯 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀳𑀤𑀬𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀔𑀺𑀢𑁆𑀢𑁄 𑀲𑀭𑁄 𑀲𑀺𑀮𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀆𑀓𑀸𑀲𑁂 𑀧𑀝𑀺𑀳𑀦𑀦𑀓𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀅𑀣 𑀘 𑀧𑀦𑁂𑀲 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀫 𑀳𑀤𑀬𑀸𑀪𑀺𑀫𑀼𑀔𑁄 𑀚𑀸𑀢𑁄, 𑀅𑀬𑀜𑁆𑀳𑀺 𑀦𑀸𑀫 𑀦𑀺𑀲𑁆𑀲𑀢𑁆𑀢𑁄 𑀦𑀺𑀚𑁆𑀚𑀻𑀯𑁄 𑀲𑀭𑁄𑀧𑀺 𑀏𑀢𑀺𑀲𑁆𑀲𑀸 𑀕𑀼𑀡𑀁 𑀚𑀸𑀦𑀸𑀢𑀺, 𑀅𑀳𑀁 𑀫𑀦𑀼𑀲𑁆𑀲𑀪𑀽𑀢𑁄𑀧𑀺 𑀦 𑀚𑀸𑀦𑀸𑀫𑀻’’𑀢𑀺, 𑀲𑁄 𑀥𑀦𑀼𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀸𑀫𑀸𑀯𑀢𑀺𑀬𑀸 𑀧𑀸𑀤𑀫𑀽𑀮𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀫𑁆𑀫𑀼𑀬𑁆𑀳𑀸𑀫𑀺 𑀧𑀫𑀼𑀬𑁆𑀳𑀸𑀫𑀺, 𑀲𑀩𑁆𑀩𑀸 𑀫𑀼𑀬𑁆𑀳𑀦𑁆𑀢𑀺 𑀫𑁂 𑀤𑀺𑀲𑀸;

𑀲𑀸𑀫𑀸𑀯𑀢𑀺 𑀫𑀁 𑀢𑀸𑀬𑀲𑁆𑀲𑀼, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯𑀸’’𑀢𑀺.

𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀲𑀸𑀥𑀼, 𑀤𑁂𑀯, 𑀫𑀁 𑀲𑀭𑀡𑀁 𑀕𑀘𑁆𑀙𑀸’’𑀢𑀺 𑀅𑀯𑀢𑁆𑀯𑀸, ‘‘𑀬𑀫𑀳𑀁, 𑀫𑀳𑀸𑀭𑀸𑀚, 𑀲𑀭𑀡𑀁 𑀕𑀢𑀸, 𑀢𑀫𑁂𑀯 𑀢𑁆𑀯𑀫𑁆𑀧𑀺 𑀲𑀭𑀡𑀁 𑀕𑀘𑁆𑀙𑀸𑀳𑀻’’𑀢𑀺 𑀇𑀤𑀁 𑀯𑀢𑁆𑀯𑀸 𑀲𑀸𑀫𑀸𑀯𑀢𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀺𑀓𑀸 𑁋

‘‘𑀫𑀸 ¶ 𑀫𑀁 𑀢𑁆𑀯𑀁 𑀲𑀭𑀡𑀁 𑀕𑀘𑁆𑀙, 𑀬𑀫𑀳𑀁 𑀲𑀭𑀡𑀁 𑀕𑀢𑀸;

𑀏𑀲 𑀩𑀼𑀤𑁆𑀥𑁄 𑀫𑀳𑀸𑀭𑀸𑀚, 𑀏𑀲 𑀩𑀼𑀤𑁆𑀥𑁄 𑀅𑀦𑀼𑀢𑁆𑀢𑀭𑁄;

𑀲𑀭𑀡𑀁 𑀕𑀘𑁆𑀙 𑀢𑀁 𑀩𑀼𑀤𑁆𑀥𑀁, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯𑀸’’𑀢𑀺. 𑁋

𑀆𑀳 ¶ . 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀇𑀤𑀸𑀦𑀸𑀳𑀁 𑀅𑀢𑀺𑀭𑁂𑀓𑀢𑀭𑀁 𑀪𑀸𑀬𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀲 𑀪𑀺𑀬𑁆𑀬𑁄 𑀧𑀫𑀼𑀬𑁆𑀳𑀸𑀫𑀺, 𑀲𑀩𑁆𑀩𑀸 𑀫𑀼𑀬𑁆𑀳𑀦𑁆𑀢𑀺 𑀫𑁂 𑀤𑀺𑀲𑀸;

𑀲𑀸𑀫𑀸𑀯𑀢𑀺 𑀫𑀁 𑀢𑀸𑀬𑀲𑁆𑀲𑀼, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯𑀸’’𑀢𑀺.

𑀅𑀣 𑀦𑀁 𑀲𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, ‘‘𑀢𑁂𑀦 𑀳𑀺 𑀢𑁆𑀯𑀜𑁆𑀘 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀢𑁆𑀣𑀸𑀭𑀜𑁆𑀘 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀯𑀭𑀜𑁆𑀘 𑀢𑁂 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀯𑀭𑁄 𑀕𑀳𑀺𑀢𑁄 𑀳𑁄𑀢𑀼, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 ¶ 𑀲𑀸𑀫𑀸𑀯𑀢𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀉𑀝𑁆𑀞𑁂𑀳𑀺, 𑀯𑀭𑀁 𑀕𑀡𑁆𑀳𑀸’’𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀳𑀺𑀭𑀜𑁆𑀜𑀸𑀤𑀻𑀳𑀺 𑀅𑀢𑁆𑀣𑁄 𑀦𑀢𑁆𑀣𑀺, 𑀇𑀫𑀁 𑀧𑀦 𑀫𑁂 𑀯𑀭𑀁 𑀤𑁂𑀳𑀺, 𑀢𑀣𑀸 𑀓𑀭𑁄𑀳𑀺, 𑀬𑀣𑀸 𑀲𑀢𑁆𑀣𑀸 𑀦𑀺𑀩𑀤𑁆𑀥𑀁 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀇𑀥𑀸𑀕𑀘𑁆𑀙𑀢𑀺, 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀁 𑀇𑀥𑀸𑀕𑀘𑁆𑀙𑀣, 𑀲𑀸𑀫𑀸𑀯𑀢𑀺𑀫𑀺𑀲𑁆𑀲𑀺𑀓𑀸 ‘𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’𑀢𑀺 𑀯𑀤𑀦𑁆𑀢𑀻’’𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑀤𑁆𑀥𑀁 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀫𑀳𑀸𑀚𑀦𑁄 𑀲𑀢𑁆𑀣𑀸𑀭𑀁 𑀆𑀕𑀫𑀦𑀢𑁆𑀣𑀸𑀬 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀣𑀸’’𑀢𑀺. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀡𑀸𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀦𑀺𑀩𑀤𑁆𑀥𑀁 𑀭𑀸𑀚𑀓𑀼𑀮𑀁 𑀕𑀘𑁆𑀙𑀢𑀺. 𑀢𑀸𑀧𑀺 𑀤𑁂𑀯𑀺𑀬𑁄 𑀦𑀺𑀩𑀤𑁆𑀥𑀁 𑀣𑁂𑀭𑀁 𑀲𑀧𑀭𑀺𑀯𑀸𑀭𑀁 𑀪𑁄𑀚𑁂𑀦𑁆𑀢𑀺, 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀢𑀸 𑀏𑀓𑀤𑀺𑀯𑀲𑀁 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀻𑀤𑀺𑀢𑁆𑀯𑀸, 𑀧𑀜𑁆𑀘𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑁂𑀳𑀺 𑀥𑀫𑁆𑀫𑀧𑀽𑀚𑀁 𑀅𑀓𑀁𑀲𑀼 ¶ . 𑀏𑀓𑁂𑀓𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 𑀧𑀜𑁆𑀘 𑀲𑀢𑀸𑀦𑀺 𑀧𑀜𑁆𑀘 𑀲𑀢𑀸𑀦𑀺 𑀅𑀕𑁆𑀖𑀢𑀺.

𑀢𑀸 𑀏𑀓𑀯𑀢𑁆𑀣𑀸 𑀤𑀺𑀲𑁆𑀯𑀸 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀓𑀼𑀳𑀺𑀁 𑀯𑁄 𑀉𑀢𑁆𑀢𑀭𑀸𑀲𑀗𑁆𑀕𑁄’’𑀢𑀺. ‘‘𑀅𑀬𑁆𑀬𑀲𑁆𑀲 𑀦𑁄 𑀤𑀺𑀦𑁆𑀦𑀸’’𑀢𑀺. ‘‘𑀢𑁂𑀦 𑀲𑀩𑁆𑀩𑁂 𑀕𑀳𑀺𑀢𑀸’’𑀢𑀺? ‘‘𑀆𑀫, 𑀕𑀳𑀺𑀢𑀸’’𑀢𑀺. 𑀭𑀸𑀚𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀸𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑀸𑀦𑀁 𑀤𑀺𑀦𑁆𑀦𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀸𑀳𑀺 𑀤𑀺𑀦𑁆𑀦𑀪𑀸𑀯𑀜𑁆𑀘 𑀣𑁂𑀭𑁂𑀦 𑀕𑀳𑀺𑀢𑀪𑀸𑀯𑀜𑁆𑀘 𑀲𑀼𑀢𑁆𑀯𑀸, ‘‘𑀦𑀦𑀼, 𑀪𑀦𑁆𑀢𑁂, 𑀅𑀢𑀺𑀩𑀳𑀽𑀦𑀺 𑀯𑀢𑁆𑀣𑀸𑀦𑀺, 𑀏𑀢𑁆𑀢𑀓𑁂𑀳𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀫𑁆𑀳𑀸𑀓𑀁 𑀧𑀳𑁄𑀦𑀓𑀸𑀦𑀺 𑀯𑀢𑁆𑀣𑀸𑀦𑀺 𑀕𑀡𑁆𑀳𑀺𑀢𑁆𑀯𑀸 𑀲𑁂𑀲𑀸𑀦𑀺 𑀚𑀺𑀡𑁆𑀡𑀘𑀻𑀯𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂 𑀅𑀢𑁆𑀢𑀦𑁄 𑀚𑀺𑀡𑁆𑀡𑀘𑀻𑀯𑀭𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀚𑀺𑀡𑁆𑀡𑀢𑀭𑀘𑀻𑀯𑀭𑀺𑀓𑀸𑀦𑀁 𑀤𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂 ¶ 𑀅𑀢𑁆𑀢𑀦𑁄 𑀚𑀺𑀡𑁆𑀡𑀢𑀭𑀘𑀻𑀯𑀭𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀧𑀼𑀭𑀸𑀡𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀪𑀽𑀫𑀢𑁆𑀣𑀭𑀡𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀧𑀼𑀭𑀸𑀡𑀪𑀽𑀫𑀢𑁆𑀣𑀭𑀡𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀧𑀸𑀤𑀧𑀼𑀜𑁆𑀙𑀦𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀧𑀼𑀭𑀸𑀡𑀧𑀸𑀤𑀧𑀼𑀜𑁆𑀙𑀦𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀫𑀤𑁆𑀤𑀺𑀢𑁆𑀯𑀸 𑀪𑀺𑀢𑁆𑀢𑀺𑀁 𑀮𑀺𑀫𑁆𑀧𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀪𑀦𑁆𑀢𑁂, 𑀏𑀢𑁆𑀢𑀓𑀸𑀦𑀺 𑀓𑀢𑁆𑀯𑀸𑀧𑀺 𑀅𑀬𑁆𑀬𑀸𑀦𑀁 𑀤𑀺𑀦𑁆𑀦𑀸𑀦𑀺 𑀦 𑀦𑀲𑁆𑀲𑀦𑁆𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀧𑀲𑀦𑁆𑀦𑁄 𑀅𑀧𑀭𑀸𑀦𑀺𑀧𑀺 𑀧𑀜𑁆𑀘 𑀯𑀢𑁆𑀣𑀲𑀢𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑀸𑀧𑁂𑀲𑀺. 𑀣𑁂𑀭𑁄 𑀓𑀺𑀭 𑀧𑀜𑁆𑀘𑀲𑀢𑀕𑁆𑀖𑀦𑀓𑀸𑀦𑁂𑀯 𑀯𑀢𑁆𑀣𑀸𑀦𑀺 𑀧𑀜𑁆𑀘𑀲𑀢𑀪𑀸𑀕𑁂𑀦 ¶ 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 𑀧𑀜𑁆𑀘𑀲𑀢𑀓𑁆𑀔𑀢𑁆𑀢𑀼𑀁 𑀮𑀪𑀺, 𑀲𑀳𑀲𑁆𑀲𑀕𑁆𑀖𑀦𑀓𑀸𑀦𑀺 𑀲𑀳𑀲𑁆𑀲𑀪𑀸𑀕𑁂𑀦 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 ¶ 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀮𑀪𑀺, 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀸𑀦𑀺 𑀲𑀢𑀲𑀳𑀲𑁆𑀲𑀪𑀸𑀕𑁂𑀦 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀮𑀪𑀺. 𑀏𑀓𑀁 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀲𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀮𑀤𑁆𑀥𑀸𑀦𑀁 𑀧𑀦 𑀕𑀡𑀦𑀸 𑀦𑀸𑀫 𑀦𑀢𑁆𑀣𑀺. 𑀢𑀣𑀸𑀕𑀢𑁂 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑁂 𑀣𑁂𑀭𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀯𑀺𑀘𑀭𑀺𑀢𑁆𑀯𑀸 𑀲𑀩𑁆𑀩𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑁂𑀯 𑀧𑀢𑁆𑀢𑀘𑀻𑀯𑀭𑀸𑀦𑀺 𑀅𑀤𑀸𑀲𑀺.

𑀢𑀤𑀸 𑀫𑀸𑀕𑀡𑁆𑀟𑀺𑀬𑀸𑀧𑀺 ‘‘𑀬𑀫𑀳𑀁 𑀓𑀭𑁄𑀫𑀺. 𑀢𑀁 𑀢𑀣𑀸 𑀅𑀳𑀼𑀢𑁆𑀯𑀸 𑀅𑀜𑁆𑀜𑀣𑀸𑀯 𑀳𑁄𑀢𑀺, 𑀇𑀤𑀸𑀦𑀺 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀭𑀜𑁆𑀜𑁂 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑁂 𑀘𑀽𑀴𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 𑁋 ‘‘𑀲𑀸𑀫𑀸𑀯𑀢𑀺𑀬𑀸 𑀧𑀸𑀲𑀸𑀤𑀁 𑀕𑀦𑁆𑀢𑁆𑀯𑀸, 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀘 𑀢𑁂𑀮𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀘 𑀯𑀺𑀯𑀭𑀸𑀧𑁂𑀢𑁆𑀯𑀸, 𑀤𑀼𑀲𑁆𑀲𑀸𑀦𑀺 𑀢𑁂𑀮𑀘𑀸𑀝𑀻𑀲𑀼 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀣𑀫𑁆𑀪𑁂 𑀯𑁂𑀞𑁂𑀢𑁆𑀯𑀸 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀩𑀳𑀺 𑀬𑀦𑁆𑀢𑀓𑀁 𑀤𑀢𑁆𑀯𑀸 𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀕𑁂𑀳𑁂 𑀅𑀕𑁆𑀕𑀺𑀁 𑀤𑀤𑀫𑀸𑀦𑁄 𑀑𑀢𑀭𑀺𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺. 𑀲𑁄 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀓𑁄𑀝𑁆𑀞𑀸𑀕𑀸𑀭𑀸𑀦𑀺 ¶ 𑀯𑀺𑀯𑀭𑀺𑀢𑁆𑀯𑀸 𑀯𑀢𑁆𑀣𑀸𑀦𑀺 𑀢𑁂𑀮𑀘𑀸𑀝𑀻𑀲𑀼 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀣𑀫𑁆𑀪𑁂 𑀯𑁂𑀞𑁂𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸 𑀇𑀢𑁆𑀣𑀺𑀬𑁄 ‘‘𑀓𑀺𑀁 𑀏𑀢𑀁 𑀘𑀽𑀴𑀧𑀺𑀢𑀸’’𑀢𑀺 𑀯𑀤𑀦𑁆𑀢𑀺𑀬𑁄 𑀉𑀧𑀲𑀗𑁆𑀓𑀫𑀺𑀁𑀲𑀼. ‘‘𑀅𑀫𑁆𑀫𑀸, 𑀭𑀸𑀚𑀸 𑀤𑀴𑁆𑀳𑀺𑀓𑀫𑁆𑀫𑀢𑁆𑀣𑀸𑀬 𑀇𑀫𑁂 𑀣𑀫𑁆𑀪𑁂 𑀢𑁂𑀮𑀧𑀺𑀮𑁄𑀢𑀺𑀓𑀸𑀳𑀺 𑀯𑁂𑀞𑀸𑀧𑁂𑀢𑀺, 𑀭𑀸𑀚𑀕𑁂𑀳𑁂 𑀦𑀸𑀫 𑀲𑀼𑀬𑀼𑀢𑁆𑀢𑀁 𑀤𑀼𑀬𑀼𑀢𑁆𑀢𑀁 𑀤𑀼𑀚𑁆𑀚𑀸𑀦𑀁, 𑀫𑀸 𑀫𑁂 𑀲𑀦𑁆𑀢𑀺𑀓𑁂 𑀳𑁄𑀣, 𑀅𑀫𑁆𑀫𑀸’’𑀢𑀺 𑀏𑀯𑀁 𑀯𑀢𑁆𑀯𑀸 𑀢𑀸 𑀆𑀕𑀢𑀸 𑀕𑀩𑁆𑀪𑁂 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀩𑀳𑀺 𑀬𑀦𑁆𑀢𑀓𑀁 𑀤𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀕𑁆𑀕𑀺𑀁 𑀤𑁂𑀦𑁆𑀢𑁄 𑀑𑀢𑀭𑀺. 𑀲𑀸𑀫𑀸𑀯𑀢𑀻 𑀢𑀸𑀲𑀁 𑀑𑀯𑀸𑀤𑀁 𑀅𑀤𑀸𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀻𑀦𑀁 𑀏𑀯𑀫𑁂𑀯 𑀅𑀕𑁆𑀕𑀺𑀦𑀸 𑀛𑀸𑀬𑀫𑀸𑀦𑀸𑀦𑀁 𑀅𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀩𑀼𑀤𑁆𑀥𑀜𑀸𑀡𑁂𑀦𑀧𑀺 𑀦 𑀲𑀼𑀓𑀭𑁄, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺. 𑀢𑀸 𑀕𑁂𑀳𑁂 𑀛𑀸𑀬𑀦𑁆𑀢𑁂 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀺𑀬𑁄 𑀓𑀸𑀘𑀺 𑀤𑀼𑀢𑀺𑀬𑀨𑀮𑀁, 𑀓𑀸𑀘𑀺 𑀢𑀢𑀺𑀬𑀨𑀮𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀥, 𑀪𑀦𑁆𑀢𑁂, 𑀭𑀜𑁆𑀜𑁄 𑀉𑀢𑁂𑀦𑀲𑁆𑀲 𑀉𑀬𑁆𑀬𑀸𑀦𑀕𑀢𑀲𑁆𑀲 𑀅𑀦𑁆𑀢𑁂𑀧𑀼𑀭𑀁 𑀤𑀟𑁆𑀠𑀁, 𑀧𑀜𑁆𑀘 𑀘 𑀇𑀢𑁆𑀣𑀺𑀲𑀢𑀸𑀦𑀺 𑀓𑀸𑀮𑀓𑀢𑀸𑀦𑀺 ¶ 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸𑀦𑀺. 𑀢𑀸𑀲𑀁, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸𑀦𑀁 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’𑀢𑀺? 𑀲𑀦𑁆𑀢𑁂𑀢𑁆𑀣, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀬𑁄 𑀲𑁄𑀢𑀸𑀧𑀦𑁆𑀦𑀸 ¶ , 𑀲𑀦𑁆𑀢𑀺 𑀲𑀓𑀤𑀸𑀕𑀸𑀫𑀺𑀬𑁄, 𑀲𑀦𑁆𑀢𑀺 𑀅𑀦𑀸𑀕𑀸𑀫𑀺𑀬𑁄, 𑀲𑀩𑁆𑀩𑀸 𑀢𑀸, 𑀪𑀺𑀓𑁆𑀔𑀯𑁂 ¶ , 𑀉𑀧𑀸𑀲𑀺𑀓𑀸𑀬𑁄 𑀅𑀦𑀺𑀧𑁆𑀨𑀮𑀸 𑀓𑀸𑀮𑀓𑀢𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄, 𑀪𑀩𑁆𑀩𑀭𑀽𑀧𑁄𑀯 𑀤𑀺𑀲𑁆𑀲𑀢𑀺;

𑀉𑀧𑀥𑀻𑀩𑀦𑁆𑀥𑀦𑁄 𑀩𑀸𑀮𑁄, 𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑁄;

𑀲𑀲𑁆𑀲𑀢𑁄𑀭𑀺𑀯 𑀔𑀸𑀬𑀢𑀺, 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦’’𑀦𑁆𑀢𑀺. (𑀉𑀤𑀸. 𑁭𑁦);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀫 𑀯𑀝𑁆𑀝𑁂 𑀯𑀺𑀘𑀭𑀦𑁆𑀢𑀸 𑀦𑀺𑀘𑁆𑀘𑀓𑀸𑀮𑀁 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀦 𑀓𑀭𑁄𑀦𑁆𑀢𑀺, 𑀧𑀫𑀸𑀤𑀺𑀦𑁄 𑀳𑀼𑀢𑁆𑀯𑀸 𑀧𑀸𑀧𑀓𑀫𑁆𑀫𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀯𑀝𑁆𑀝𑁂 𑀯𑀺𑀘𑀭𑀦𑁆𑀢𑀸 𑀲𑀼𑀔𑀫𑁆𑀧𑀺 𑀤𑀼𑀓𑁆𑀔𑀫𑁆𑀧𑀺 𑀅𑀦𑀼𑀪𑀯𑀦𑁆𑀢𑀻’’𑀢𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀭𑀸𑀚𑀸 ‘‘𑀲𑀸𑀫𑀸𑀯𑀢𑀺𑀬𑀸 𑀕𑁂𑀳𑀁 𑀓𑀺𑀭 𑀛𑀸𑀬𑀢𑀻’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦𑀸𑀕𑀘𑁆𑀙𑀦𑁆𑀢𑁄𑀧𑀺 𑀅𑀤𑀟𑁆𑀠𑁂 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀆𑀕𑀦𑁆𑀢𑁆𑀯𑀸 𑀧𑀦 𑀕𑁂𑀳𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀉𑀧𑁆𑀧𑀦𑁆𑀦𑀩𑀮𑀯𑀤𑁄𑀫𑀦𑀲𑁆𑀲𑁄 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀫𑀸𑀯𑀢𑀺𑀬𑀸 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄, ‘‘𑀓𑀲𑁆𑀲 𑀦𑀼 𑀔𑁄 𑀇𑀤𑀁 𑀓𑀫𑁆𑀫’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀫𑀸𑀕𑀡𑁆𑀟𑀺𑀬𑀸𑀬 𑀓𑀸𑀭𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸, ‘‘𑀢𑀸𑀲𑁂𑀢𑁆𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑀸 𑀦 𑀓𑀣𑁂𑀲𑁆𑀲𑀢𑀺, 𑀲𑀡𑀺𑀓𑀁 𑀉𑀧𑀸𑀬𑁂𑀦 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑁂 ¶ 𑀆𑀳 𑁋 ‘‘𑀅𑀫𑁆𑀪𑁄, 𑀅𑀳𑀁 𑀇𑀢𑁄 𑀧𑀼𑀩𑁆𑀩𑁂 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄𑀯 𑀳𑁄𑀫𑀺, 𑀲𑀸𑀫𑀸𑀯𑀢𑀻 𑀫𑁂 𑀦𑀺𑀘𑁆𑀘𑀁 𑀑𑀢𑀸𑀭𑀫𑁂𑀯 𑀕𑀯𑁂𑀲𑀢𑀺, 𑀇𑀤𑀸𑀦𑀺 𑀧𑀦 𑀫𑁂 𑀘𑀺𑀢𑁆𑀢𑀁 𑀦𑀺𑀩𑁆𑀩𑀼𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀔𑁂𑀦 𑀘 𑀯𑀲𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺, 𑀢𑁂 ‘‘𑀓𑁂𑀦 𑀦𑀼 𑀔𑁄, 𑀤𑁂𑀯, 𑀇𑀤𑀁 𑀓𑀢’’𑀦𑁆𑀢𑀺 𑀆𑀳𑀁𑀲𑀼. ‘‘𑀫𑀬𑀺 𑀲𑀺𑀦𑁂𑀳𑁂𑀦 𑀓𑁂𑀦𑀘𑀺 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀫𑀸𑀕𑀡𑁆𑀟𑀺𑀬𑀸𑀧𑀺 𑀲𑀫𑀻𑀧𑁂 𑀞𑀺𑀢𑀸 𑀢𑀁 𑀲𑀼𑀢𑁆𑀯𑀸, ‘‘𑀦𑀸𑀜𑁆𑀜𑁄 𑀓𑁄𑀘𑀺 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀫𑀬𑀸 𑀓𑀢𑀁, 𑀤𑁂𑀯, 𑀅𑀳𑀁 𑀘𑀽𑀴𑀧𑀺𑀢𑀭𑀁 𑀆𑀡𑀸𑀧𑁂𑀢𑁆𑀯𑀸 𑀓𑀸𑀭𑁂𑀲𑀺’’𑀦𑁆𑀢𑀺 𑀆𑀳. ‘‘𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀫𑀬𑀺 𑀲𑀺𑀦𑁂𑀳𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀧𑀲𑀦𑁆𑀦𑁄𑀲𑁆𑀫𑀺, 𑀯𑀭𑀁 𑀢𑁂 𑀤𑀫𑁆𑀫𑀺, 𑀅𑀢𑁆𑀢𑀦𑁄 𑀜𑀸𑀢𑀺𑀕𑀡𑀁 𑀧𑀓𑁆𑀓𑁄𑀲𑀸𑀧𑁂𑀳𑀻’’𑀢𑀺. 𑀲𑀸 𑀜𑀸𑀢𑀓𑀸𑀦𑀁 𑀲𑀸𑀲𑀦𑀁 𑀧𑀳𑀺𑀡𑀺 𑁋 ‘‘𑀭𑀸𑀚𑀸 𑀫𑁂 𑀧𑀲𑀦𑁆𑀦𑁄 𑀯𑀭𑀁 𑀤𑁂𑀢𑀺, 𑀲𑀻𑀖𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺. 𑀭𑀸𑀚𑀸 𑀆𑀕𑀢𑀸𑀕𑀢𑀸𑀦𑀁 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀅𑀜𑁆𑀜𑀸𑀢𑀓𑀸𑀧𑀺 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀫𑀬𑀁 𑀫𑀸𑀕𑀡𑁆𑀟𑀺𑀬𑀸𑀬 𑀜𑀸𑀢𑀓𑀸’’𑀢𑀺 𑀆𑀕𑀘𑁆𑀙𑀺𑀁𑀲𑀼. 𑀭𑀸𑀚𑀸 𑀢𑁂 𑀲𑀩𑁆𑀩𑁂 𑀕𑀸𑀳𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀦𑀸𑀪𑀺𑀧𑁆𑀧𑀫𑀸𑀡𑁂 𑀆𑀯𑀸𑀝𑁂 𑀔𑀡𑀸𑀧𑁂𑀢𑁆𑀯𑀸 𑀢𑁂 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀁𑀲𑀽𑀳𑀺 𑀧𑀽𑀭𑁂𑀢𑁆𑀯𑀸 𑀉𑀧𑀭𑀺 𑀧𑀮𑀸𑀮𑁂 𑀯𑀺𑀓𑀺𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀸𑀧𑁂𑀲𑀺. 𑀘𑀫𑁆𑀫𑀲𑁆𑀲 𑀤𑀟𑁆𑀠𑀓𑀸𑀮𑁂 𑀅𑀬𑀦𑀗𑁆𑀕𑀮𑁂𑀦 ¶ 𑀓𑀲𑀸𑀧𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀁 𑀳𑀻𑀭𑀸𑀳𑀻𑀭𑀁 𑀓𑀸𑀭𑁂𑀲𑀺. 𑀫𑀸𑀕𑀡𑁆𑀟𑀺𑀬𑀸𑀬 ¶ 𑀲𑀭𑀻𑀭𑀢𑁄𑀧𑀺 𑀢𑀺𑀔𑀺𑀡𑁂𑀦 ¶ 𑀲𑀢𑁆𑀣𑁂𑀦 𑀖𑀦𑀖𑀦𑀝𑁆𑀞𑀸𑀦𑁂𑀲𑀼 𑀫𑀁𑀲𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑁂𑀮𑀓𑀧𑀸𑀮𑀁 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀧𑀽𑀯𑁂 𑀯𑀺𑀬 𑀧𑀘𑀸𑀧𑁂𑀢𑁆𑀯𑀸 𑀢𑀫𑁂𑀯 𑀔𑀸𑀤𑀸𑀧𑁂𑀲𑀺.

𑀥𑀫𑁆𑀫𑀲𑀪𑀸𑀬𑀫𑁆𑀧𑀺 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑀢, 𑀆𑀯𑀼𑀲𑁄, 𑀏𑀯𑀭𑀽𑀧𑀸𑀬 𑀲𑀤𑁆𑀥𑀸𑀬 𑀧𑀲𑀦𑁆𑀦𑀸𑀬 𑀉𑀧𑀸𑀲𑀺𑀓𑀸𑀬 𑀏𑀯𑀭𑀽𑀧𑀁 𑀫𑀭𑀡’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸𑀦𑀁 𑀇𑀢𑁆𑀣𑀻𑀦𑀁 𑀏𑀢𑀁 𑀅𑀬𑀼𑀢𑁆𑀢𑀁 𑀲𑀫𑁆𑀧𑀢𑁆𑀢𑀁. 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀧𑀦 𑀬𑀼𑀢𑁆𑀢𑀫𑁂𑀯 𑀏𑀢𑀸𑀳𑀺 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸, ‘‘𑀓𑀺𑀁, 𑀪𑀦𑁆𑀢𑁂, 𑀏𑀢𑀸𑀳𑀺 𑀧𑀼𑀩𑁆𑀩𑁂 𑀓𑀢𑀁, 𑀢𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀭𑀸𑀚𑀕𑁂𑀳𑁂 𑀦𑀺𑀩𑀤𑁆𑀥𑀁 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀼𑀜𑁆𑀚𑀦𑁆𑀢𑀺. 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀢𑁂 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀲𑀼 𑀲𑀢𑁆𑀢 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑀦𑁆𑀢𑀺, 𑀏𑀓𑁄 𑀦𑀤𑀻𑀢𑀻𑀭𑁂 𑀏𑀓𑀁 𑀢𑀺𑀡𑀕𑀳𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀕𑀢𑁂𑀲𑀼 𑀢𑀸 𑀇𑀢𑁆𑀣𑀺𑀬𑁄 𑀆𑀤𑀸𑀬 𑀦𑀤𑀺𑀬𑀁 𑀉𑀤𑀓𑀓𑀻𑀴𑀁 ¶ 𑀓𑀻𑀴𑀺𑀢𑀼𑀁 𑀕𑀢𑁄. 𑀢𑀢𑁆𑀣 𑀢𑀸 𑀇𑀢𑁆𑀣𑀺𑀬𑁄 𑀤𑀺𑀯𑀲𑀪𑀸𑀕𑀁 𑀉𑀤𑀓𑁂 𑀓𑀻𑀴𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀲𑀻𑀢𑀧𑀻𑀴𑀺𑀢𑀸 𑀅𑀕𑁆𑀕𑀺𑀁 𑀯𑀺𑀲𑀺𑀩𑁆𑀩𑁂𑀢𑀼𑀓𑀸𑀫𑀸 ‘‘𑀅𑀫𑁆𑀳𑀸𑀓𑀁 𑀅𑀕𑁆𑀕𑀺𑀓𑀭𑀡𑀝𑁆𑀞𑀸𑀦𑀁 𑀑𑀮𑁄𑀓𑁂𑀣𑀸’’𑀢𑀺 𑀅𑀧𑀭𑀸𑀧𑀭𑀁 𑀯𑀺𑀘𑀭𑀦𑁆𑀢𑀺𑀬𑁄 𑀢𑀁 𑀢𑀺𑀡𑀕𑀳𑀦𑀁 𑀤𑀺𑀲𑁆𑀯𑀸, ‘‘𑀢𑀺𑀡𑀭𑀸𑀲𑀻’’𑀢𑀺 𑀲𑀜𑁆𑀜𑀸𑀬 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀅𑀕𑁆𑀕𑀺𑀁 𑀅𑀤𑀁𑀲𑀼. 𑀢𑀺𑀡𑁂𑀲𑀼 𑀛𑀸𑀬𑀺𑀢𑁆𑀯𑀸 𑀧𑀢𑀦𑁆𑀢𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸, ‘‘𑀦𑀝𑁆𑀞𑀸𑀫𑁆𑀳𑀸, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀛𑀸𑀬𑀢𑀺, 𑀭𑀸𑀚𑀸 𑀜𑀢𑁆𑀯𑀸 𑀅𑀫𑁆𑀳𑁂 𑀦𑀸𑀲𑁂𑀲𑁆𑀲𑀢𑀺, 𑀲𑀼𑀤𑀟𑁆𑀠𑀁 𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸 𑀢𑀸 𑀇𑀢𑁆𑀣𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀤𑀸𑀭𑀼𑀭𑀸𑀲𑀺𑀁 𑀓𑀭𑀺𑀁𑀲𑀼. 𑀫𑀳𑀸𑀤𑀸𑀭𑀼𑀭𑀸𑀲𑀺 𑀅𑀳𑁄𑀲𑀺. 𑀅𑀣 𑀦𑀁 𑀆𑀮𑀺𑀫𑁆𑀧𑁂𑀢𑁆𑀯𑀸, ‘‘𑀇𑀤𑀸𑀦𑀺 𑀛𑀸𑀬𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀢𑀸 𑀧𑀞𑀫𑀁 𑀅𑀲𑀜𑁆𑀘𑁂𑀢𑀦𑀺𑀓𑀸 𑀳𑀼𑀢𑁆𑀯𑀸 𑀓𑀫𑁆𑀫𑀼𑀦𑀸 𑀦 𑀩𑀚𑁆𑀛𑀺𑀁𑀲𑀼, 𑀇𑀤𑀸𑀦𑀺 𑀧𑀘𑁆𑀙𑀸 𑀲𑀜𑁆𑀘𑁂𑀢𑀦𑀸𑀬 𑀓𑀫𑁆𑀫𑀼𑀦𑀸 𑀩𑀚𑁆𑀛𑀺𑀁𑀲𑀼. 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀲𑀓𑀝𑀲𑀳𑀲𑁆𑀲𑁂𑀳𑀺 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀆𑀮𑀺𑀫𑁆𑀧𑁂𑀦𑁆𑀢𑀸𑀧𑀺 𑀉𑀲𑁆𑀫𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀝𑁆𑀞𑀸𑀬 𑀬𑀣𑀸𑀲𑀼𑀔𑀁 𑀅𑀕𑀫𑀸𑀲𑀺. 𑀢𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀢𑁆𑀢𑀪𑀸𑀯𑀲𑀢𑁂 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀕𑁂𑀳𑁂 𑀛𑀸𑀬𑀫𑀸𑀦𑁂 𑀛𑀸𑀬𑀺𑀁𑀲𑀼. 𑀇𑀤𑀁 𑀏𑀢𑀸𑀲𑀁 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺.

𑀏𑀯𑀁 ¶ 𑀯𑀼𑀢𑁆𑀢𑁂 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀧𑀝𑀺𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀔𑀼𑀚𑁆𑀚𑀼𑀢𑁆𑀢𑀭𑀸 𑀧𑀦, 𑀪𑀦𑁆𑀢𑁂, 𑀓𑁂𑀦 𑀓𑀫𑁆𑀫𑁂𑀦 𑀔𑀼𑀚𑁆𑀚𑀸 𑀚𑀸𑀢𑀸, 𑀓𑁂𑀦 𑀓𑀫𑁆𑀫𑁂𑀦 𑀫𑀳𑀸𑀧𑀜𑁆𑀜𑀸, 𑀓𑁂𑀦 𑀓𑀫𑁆𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀅𑀥𑀺𑀕𑀢𑀸, 𑀓𑁂𑀦 𑀓𑀫𑁆𑀫𑁂𑀦 𑀧𑀭𑁂𑀲𑀁 𑀧𑁂𑀲𑀦𑀓𑀸𑀭𑀺𑀢𑀸 ¶ 𑀚𑀸𑀢𑀸’’𑀢𑀺? 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀭𑀡𑀓𑀸𑀮𑁂 𑀲𑁆𑀯𑁂𑀯 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀣𑁄𑀓𑀁 𑀔𑀼𑀚𑁆𑀚𑀥𑀸𑀢𑀼𑀓𑁄 𑀅𑀳𑁄𑀲𑀺. 𑀅𑀣𑁂𑀓𑀸 𑀉𑀧𑀝𑁆𑀞𑀸𑀬𑀺𑀓𑀸 𑀇𑀢𑁆𑀣𑀻 𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀯𑀡𑁆𑀡𑀲𑀭𑀡𑀁 𑀕𑀳𑁂𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀏𑀯𑀜𑁆𑀘 𑀏𑀯𑀜𑁆𑀘 𑀯𑀺𑀘𑀭𑀢𑀻’’𑀢𑀺 𑀔𑀼𑀚𑁆𑀚𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀯𑀺𑀘𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀔𑀼𑀚𑁆𑀚𑀸 𑀚𑀸𑀢𑀸. 𑀢𑁂 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀞𑀫𑀤𑀺𑀯𑀲𑁂 𑀭𑀸𑀚𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀢𑁂 𑀕𑀸𑀳𑀸𑀧𑁂𑀢𑁆𑀯𑀸 𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀉𑀡𑁆𑀳𑀧𑀸𑀬𑀸𑀲𑀲𑁆𑀲 𑀧𑀽𑀭𑁂 𑀧𑀢𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀲𑀸 𑀇𑀢𑁆𑀣𑀻 𑀢𑁂 𑀢𑀣𑀸 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀺 𑀅𑀝𑁆𑀞 𑀤𑀦𑁆𑀢𑀯𑀮𑀬𑀸𑀦𑀺 𑀤𑀢𑁆𑀯𑀸, ‘‘𑀇𑀥 𑀞𑀧𑁂𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀆𑀳. 𑀢𑁂𑀲𑀼 𑀢𑀣𑀸 𑀓𑀢𑁆𑀯𑀸 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑁂𑀲𑀼 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸, ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑁂𑀳𑀺 𑀅𑀢𑁆𑀣𑁄. 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀏𑀢𑀸𑀦𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀺, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 𑀕𑀳𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀁𑀲𑀼. 𑀅𑀚𑁆𑀚𑀢𑀦𑀸𑀧𑀺 𑀢𑀸𑀦𑀺 𑀯𑀮𑀬𑀸𑀦𑀺 𑀅𑀭𑁄𑀕𑀸𑀦𑁂𑀯. 𑀲𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀤𑀸𑀦𑀺 𑀢𑀺𑀧𑀺𑀝𑀓𑀥𑀭𑀸 𑀫𑀳𑀸𑀧𑀜𑁆𑀜𑀸 𑀚𑀸𑀢𑀸. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀓𑀢𑀉𑀧𑀝𑁆𑀞𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀧𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸. 𑀇𑀤𑀫𑀲𑁆𑀲𑀸 𑀩𑀼𑀤𑁆𑀥𑀦𑁆𑀢𑀭𑁂 𑀧𑀼𑀩𑁆𑀩𑀓𑀫𑁆𑀫𑀁.

𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀦 𑀏𑀓𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀆𑀤𑀸𑀲𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑁄𑀦𑁆𑀢𑀻 𑀦𑀺𑀲𑀻𑀤𑀺. 𑀅𑀣𑀲𑁆𑀲𑀸 𑀯𑀺𑀲𑁆𑀲𑀸𑀲𑀺𑀓𑀸 𑀏𑀓𑀸 𑀔𑀻𑀡𑀸𑀲𑀯𑀸 ¶ 𑀪𑀺𑀓𑁆𑀔𑀼𑀦𑀻 𑀢𑀁 𑀤𑀝𑁆𑀞𑀼𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀳𑀺 𑀔𑀻𑀡𑀸𑀲𑀯𑀸𑀧𑀺 𑀲𑀸𑀬𑀦𑁆𑀳𑀲𑀫𑀬𑁂 𑀉𑀧𑀝𑁆𑀞𑀸𑀓𑀓𑀼𑀮𑀸𑀦𑀺 𑀤𑀝𑁆𑀞𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀔𑀡𑁂 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀦𑁆𑀢𑀺𑀓𑁂 𑀓𑀸𑀘𑀺 𑀧𑁂𑀲𑀦𑀓𑀸𑀭𑀺𑀓𑀸 𑀦𑀢𑁆𑀣𑀺, 𑀲𑀸 ‘‘𑀯𑀦𑁆𑀤𑀸𑀫𑀺, 𑀅𑀬𑁆𑀬𑁂, 𑀏𑀢𑀁 𑀢𑀸𑀯 𑀫𑁂 𑀧𑀲𑀸𑀥𑀦𑀧𑁂𑀴𑀓𑀁 𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀆𑀳. 𑀣𑁂𑀭𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀲𑁆𑀲𑀸 𑀇𑀫𑀁 𑀕𑀡𑁆𑀳𑀺𑀢𑁆𑀯𑀸 𑀦 𑀤𑀲𑁆𑀲𑀸𑀫𑀺, 𑀫𑀬𑀺 𑀆𑀖𑀸𑀢𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀤𑀲𑁆𑀲𑀸𑀫𑀺, 𑀧𑀭𑀲𑁆𑀲 𑀧𑁂𑀲𑀦𑀓𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺. 𑀦𑀺𑀭𑀬𑀲𑀦𑁆𑀢𑀸𑀧𑀢𑁄 𑀔𑁄 𑀧𑀦 𑀧𑀭𑀲𑁆𑀲 𑀧𑁂𑀲𑀦𑀪𑀸𑀯𑁄𑀯 𑀲𑁂𑀬𑁆𑀬𑁄’’𑀢𑀺. ‘‘𑀲𑀸 𑀅𑀦𑀼𑀤𑀬𑀁 𑀧𑀝𑀺𑀘𑁆𑀘 𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀅𑀤𑀸𑀲𑀺. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀧𑀭𑁂𑀲𑀁 𑀧𑁂𑀲𑀦𑀓𑀸𑀭𑀺𑀓𑀸 𑀚𑀸𑀢𑀸’’𑀢𑀺.

𑀅𑀣 ¶ 𑀧𑀼𑀦𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀕𑁂𑀳𑁂 𑀅𑀕𑁆𑀕𑀺𑀦𑀸 𑀛𑀸𑀬𑀺𑀁𑀲𑀼, 𑀫𑀸𑀕𑀡𑁆𑀟𑀺𑀬𑀸𑀬 𑀜𑀸𑀢𑀓𑀸 𑀉𑀧𑀭𑀺 𑀧𑀮𑀸𑀮𑀕𑁆𑀕𑀺𑀁 𑀤𑀢𑁆𑀯𑀸 𑀅𑀬𑀦𑀗𑁆𑀕𑀮𑁂𑀳𑀺 𑀪𑀺𑀦𑁆𑀦𑀸, 𑀫𑀸𑀕𑀡𑁆𑀟𑀺𑀬𑀸 𑀧𑀓𑁆𑀓𑀼𑀣𑀺𑀢𑀢𑁂𑀮𑁂 𑀧𑀓𑁆𑀓𑀸, 𑀓𑁂 𑀦𑀼 𑀔𑁄 𑀏𑀢𑁆𑀣 𑀚𑀻𑀯𑀦𑁆𑀢𑀺 𑀦𑀸𑀫, 𑀓𑁂 𑀫𑀢𑀸 𑀦𑀸𑀫𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀧𑀫𑀢𑁆𑀢𑀸, 𑀢𑁂 𑀯𑀲𑁆𑀲𑀲𑀢𑀁 𑀚𑀻𑀯𑀦𑁆𑀢𑀸𑀧𑀺 𑀫𑀢𑀸𑀬𑁂𑀯 𑀦𑀸𑀫. 𑀬𑁂 𑀅𑀧𑁆𑀧𑀫𑀢𑁆𑀢𑀸, 𑀢𑁂 𑀫𑀢𑀸𑀧𑀺 𑀚𑀻𑀯𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀫𑀸𑀕𑀡𑁆𑀟𑀺𑀬𑀸 𑀚𑀻𑀯𑀦𑁆𑀢𑀻𑀧𑀺 𑀫𑀢𑀸𑀬𑁂𑀯 𑀦𑀸𑀫, 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀫𑀢𑀸𑀧𑀺 𑀚𑀻𑀯𑀦𑁆𑀢𑀺𑀬𑁂𑀯 𑀦𑀸𑀫. 𑀦 𑀳𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀸 𑀫𑀭𑀦𑁆𑀢𑀺 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁧.

‘‘𑀅𑀧𑁆𑀧𑀫𑀸𑀤𑁄 ¶ ¶ 𑀅𑀫𑀢𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸.

𑁨𑁨.

‘‘𑀏𑀯𑀁 𑀯𑀺𑀲𑁂𑀲𑀢𑁄 𑀜𑀢𑁆𑀯𑀸, 𑀅𑀧𑁆𑀧𑀫𑀸𑀤𑀫𑁆𑀳𑀺 𑀧𑀡𑁆𑀟𑀺𑀢𑀸;

𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀦𑁆𑀢𑀺, 𑀅𑀭𑀺𑀬𑀸𑀦𑀁 𑀕𑁄𑀘𑀭𑁂 𑀭𑀢𑀸.

𑁨𑁩.

‘‘𑀢𑁂 𑀛𑀸𑀬𑀺𑀦𑁄 𑀲𑀸𑀢𑀢𑀺𑀓𑀸, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸;

𑀨𑀼𑀲𑀦𑁆𑀢𑀺 𑀥𑀻𑀭𑀸 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺.

𑀢𑀢𑁆𑀣 𑀅𑀧𑁆𑀧𑀫𑀸𑀤𑁄𑀢𑀺 𑀧𑀤𑀁 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀤𑀻𑀧𑁂𑀢𑀺, 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑀓𑀮𑀫𑁆𑀧𑀺 𑀳𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀓𑀣𑀺𑀬𑀫𑀸𑀦𑀁 𑀅𑀧𑁆𑀧𑀫𑀸𑀤𑀧𑀤𑀫𑁂𑀯 𑀑𑀢𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀗𑁆𑀕𑀮𑀸𑀦𑀁 𑀧𑀸𑀡𑀸𑀦𑀁 𑀧𑀤𑀚𑀸𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀳𑀢𑁆𑀣𑀺𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸, 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁪𑁦).

𑀲𑁄 𑀧𑀦𑁂𑀲 𑀅𑀢𑁆𑀣𑀢𑁄 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄 𑀦𑀸𑀫. 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀘𑁂𑀢𑀁 𑀦𑀸𑀫𑀁. 𑀅𑀫𑀢𑀧𑀤𑀦𑁆𑀢𑀺 𑀅𑀫𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀅𑀚𑀸𑀢𑀢𑁆𑀢𑀸 𑀦𑀼 𑀚𑀻𑀬𑀢𑀺 𑀦 𑀫𑀻𑀬𑀢𑀺, 𑀢𑀲𑁆𑀫𑀸 𑀅𑀫𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀚𑁆𑀚𑀦𑁆𑀢𑀺 𑀇𑀫𑀺𑀦𑀸𑀢𑀺 𑀧𑀤𑀁, 𑀅𑀫𑀢𑀁 ¶ 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀫𑀢𑀲𑁆𑀲 𑀧𑀤𑀁 𑀅𑀫𑀢𑀧𑀤𑀁, 𑀅𑀫𑀢𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀫𑀸𑀤𑁄𑀢𑀺 𑀧𑀫𑀚𑁆𑀚𑀦𑀪𑀸𑀯𑁄, 𑀫𑀼𑀝𑁆𑀞𑀲𑁆𑀲𑀢𑀺𑀲𑀗𑁆𑀔𑀸𑀢𑀲𑁆𑀲 𑀲𑀢𑀺𑀬𑀸 𑀯𑁄𑀲𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀫𑀘𑁆𑀘𑀼𑀦𑁄𑀢𑀺 ¶ 𑀫𑀭𑀡𑀲𑁆𑀲. 𑀧𑀤𑀦𑁆𑀢𑀺 𑀉𑀧𑀸𑀬𑁄 𑀫𑀕𑁆𑀕𑁄. 𑀧𑀫𑀢𑁆𑀢𑁄 𑀳𑀺 𑀚𑀸𑀢𑀺𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀚𑀸𑀢𑁄 𑀚𑀻𑀬𑀢𑀺 𑀘𑁂𑀯 𑀫𑀻𑀬𑀢𑀺 𑀘𑀸𑀢𑀺 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁 𑀦𑀸𑀫 𑀳𑁄𑀢𑀺, 𑀫𑀭𑀡𑀁 𑀉𑀧𑁂𑀢𑀺. 𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀻𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸 𑀳𑀺 𑀅𑀧𑁆𑀧𑀫𑀢𑁆𑀢𑀸 𑀦 𑀫𑀭𑀦𑁆𑀢𑀺. 𑀅𑀚𑀭𑀸 𑀅𑀫𑀭𑀸 𑀳𑁄𑀦𑁆𑀢𑀻𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀦 𑀳𑀺 𑀓𑁄𑀘𑀺 𑀲𑀢𑁆𑀢𑁄 𑀅𑀚𑀭𑁄 𑀅𑀫𑀭𑁄 𑀦𑀸𑀫 𑀅𑀢𑁆𑀣𑀺, 𑀧𑀫𑀢𑁆𑀢𑀲𑁆𑀲 𑀧𑀦 𑀯𑀝𑁆𑀝𑀁 𑀦𑀸𑀫 𑀅𑀧𑀭𑀺𑀘𑁆𑀙𑀺𑀦𑁆𑀦𑀁, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀲𑁆𑀫𑀸 𑀧𑀫𑀢𑁆𑀢𑀸 𑀚𑀸𑀢𑀺𑀆𑀤𑀻𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑁆𑀢𑀸 𑀚𑀻𑀯𑀦𑁆𑀢𑀸𑀧𑀺 𑀫𑀢𑀸𑀬𑁂𑀯 𑀦𑀸𑀫. 𑀅𑀧𑁆𑀧𑀫𑀢𑁆𑀢𑀸 𑀧𑀦 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀯𑀟𑁆𑀠𑁂𑀢𑁆𑀯𑀸 𑀔𑀺𑀧𑁆𑀧𑀁 𑀫𑀕𑁆𑀕𑀨𑀮𑀸𑀦𑀺 𑀲𑀘𑁆𑀙𑀺𑀓𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀅𑀢𑁆𑀢𑀪𑀸𑀯𑁂𑀲𑀼 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀚𑀻𑀯𑀦𑁆𑀢𑀸𑀧𑀺 𑀫𑀢𑀸𑀧𑀺 𑀦 𑀫𑀻𑀬𑀦𑁆𑀢𑀺𑀬𑁂𑀯 𑀦𑀸𑀫. 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸𑀢𑀺 𑀬𑁂 𑀧𑀦 𑀲𑀢𑁆𑀢𑀸 𑀧𑀫𑀢𑁆𑀢𑀸, 𑀢𑁂 𑀧𑀫𑀸𑀤𑀫𑀭𑀡𑁂𑀦 𑀫𑀢𑀢𑁆𑀢𑀸, 𑀬𑀣𑀸 𑀳𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑁂𑀦 𑀫𑀢𑀸 𑀤𑀸𑀭𑀼𑀓𑁆𑀔𑀦𑁆𑀥𑀲𑀤𑀺𑀲𑀸 𑀅𑀧𑀕𑀢𑀯𑀺𑀜𑁆𑀜𑀸𑀡𑀸 ¶ , 𑀢𑀣𑁂𑀯 𑀳𑁄𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀳𑀺 𑀫𑀢𑀸𑀦𑀁 𑀯𑀺𑀬 𑀕𑀳𑀝𑁆𑀞𑀸𑀦𑀁 𑀢𑀸𑀯 ‘‘𑀤𑀸𑀦𑀁 𑀤𑀲𑁆𑀲𑀸𑀫, 𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 ‘‘𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀧𑀽𑀭𑁂𑀲𑁆𑀲𑀸𑀫, 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀸𑀫, 𑀪𑀸𑀯𑀦𑀁 𑀯𑀟𑁆𑀠𑁂𑀲𑁆𑀲𑀸𑀫𑀸’’𑀢𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀫𑀢𑁂𑀦 𑀢𑁂 𑀓𑀺𑀁 𑀦𑀸𑀦𑀸𑀓𑀭𑀡𑀸𑀯 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸’’𑀢𑀺.

𑀏𑀯𑀁 𑀯𑀺𑀲𑁂𑀲𑀢𑁄 𑀜𑀢𑁆𑀯𑀸𑀢𑀺 𑀧𑀫𑀢𑁆𑀢𑀲𑁆𑀲 𑀯𑀝𑁆𑀝𑀢𑁄 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀺, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀯𑀁 ¶ 𑀯𑀺𑀲𑁂𑀲𑀢𑁄𑀯 𑀚𑀸𑀦𑀺𑀢𑁆𑀯𑀸. 𑀓𑁂 𑀧𑀦𑁂𑀢𑀁 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀻𑀢𑀺? 𑀅𑀧𑁆𑀧𑀫𑀸𑀤𑀫𑁆𑀳𑀺 𑀧𑀡𑁆𑀟𑀺𑀢𑀸𑀢𑀺 𑀬𑁂 𑀧𑀡𑁆𑀟𑀺𑀢𑀸 𑀫𑁂𑀥𑀸𑀯𑀺𑀦𑁄 𑀲𑀧𑁆𑀧𑀜𑁆𑀜𑀸 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑁂 𑀞𑀢𑁆𑀯𑀸 𑀅𑀧𑁆𑀧𑀫𑀸𑀤𑀁 𑀯𑀟𑁆𑀠𑁂𑀦𑁆𑀢𑀺, 𑀢𑁂 𑀏𑀯𑀁 𑀯𑀺𑀲𑁂𑀲𑀓𑀸𑀭𑀡𑀁 𑀚𑀸𑀦𑀦𑁆𑀢𑀺. 𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀦𑁆𑀢𑀻𑀢𑀺 𑀢𑁂 𑀏𑀯𑀁 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀦𑁆𑀢𑀺, 𑀧𑀳𑀁𑀲𑀺𑀢𑀫𑀼𑀔𑀸 𑀢𑀼𑀝𑁆𑀞𑀧𑀳𑀝𑁆𑀞𑀸 𑀳𑁄𑀦𑁆𑀢𑀺. 𑀅𑀭𑀺𑀬𑀸𑀦𑀁 𑀕𑁄𑀘𑀭𑁂 𑀭𑀢𑀸𑀢𑀺 𑀢𑁂 𑀏𑀯𑀁 𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀦𑁆𑀢𑀸 𑀢𑀁 𑀅𑀧𑁆𑀧𑀫𑀸𑀤𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀸𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀕𑁄𑀘𑀭𑀲𑀗𑁆𑀔𑀸𑀢𑁂 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀘 𑀭𑀢𑀸 𑀦𑀺𑀭𑀢𑀸, 𑀅𑀪𑀺𑀭𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑁂 ¶ 𑀛𑀸𑀬𑀺𑀦𑁄𑀢𑀺 𑀢𑁂 𑀅𑀧𑁆𑀧𑀫𑀢𑁆𑀢𑀸 𑀧𑀡𑁆𑀟𑀺𑀢𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘𑀸𑀢𑀺 𑀤𑀼𑀯𑀺𑀥𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀺𑀦𑁄. 𑀲𑀸𑀢𑀢𑀺𑀓𑀸𑀢𑀺 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀲𑀢𑀢𑀁 𑀧𑀯𑀢𑁆𑀢𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀸. 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸𑀢𑀺 𑀬𑀁 𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁, 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀭𑀽𑀧𑁂𑀦 𑀯𑀻𑀭𑀺𑀬𑁂𑀦 𑀅𑀦𑁆𑀢𑀭𑀸 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑁂𑀦 𑀤𑀴𑁆𑀳𑀧𑀭𑀓𑁆𑀓𑀫𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀨𑀼𑀲𑀦𑁆𑀢𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀨𑀼𑀲𑀦𑀸 𑀜𑀸𑀡𑀨𑀼𑀲𑀦𑀸 𑀘, 𑀯𑀺𑀧𑀸𑀓𑀨𑀼𑀲𑀦𑀸 𑀘. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀜𑀸𑀡𑀨𑀼𑀲𑀦𑀸 𑀦𑀸𑀫, 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀯𑀺𑀧𑀸𑀓𑀨𑀼𑀲𑀦𑀸 𑀦𑀸𑀫. 𑀢𑁂𑀲𑀼 𑀇𑀥 𑀯𑀺𑀧𑀸𑀓𑀨𑀼𑀲𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀅𑀭𑀺𑀬𑀨𑀮𑁂𑀦 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 ¶ 𑀥𑀻𑀭𑀸 𑀧𑀡𑁆𑀟𑀺𑀢𑀸 𑀢𑀸𑀬 𑀯𑀺𑀧𑀸𑀓𑀨𑀼𑀲𑀦𑀸𑀬 𑀨𑀼𑀲𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺. 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀬𑁂 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀫𑀳𑀸𑀚𑀦𑀁 𑀯𑀝𑁆𑀝𑁂 𑀑𑀲𑀻𑀤𑀸𑀧𑁂𑀦𑁆𑀢𑀺, 𑀢𑁂𑀳𑀺 𑀔𑁂𑀫𑀁 𑀦𑀺𑀩𑁆𑀪𑀬𑀁 𑀲𑀩𑁆𑀩𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀲𑁂𑀝𑁆𑀞𑀢𑁆𑀢𑀸 𑀅𑀦𑀼𑀢𑁆𑀢𑀭𑀦𑁆𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀲𑀸𑀫𑀸𑀯𑀢𑀻𑀯𑀢𑁆𑀣𑀼 𑀧𑀞𑀫𑀁.

𑁨. 𑀓𑀼𑀫𑁆𑀪𑀖𑁄𑀲𑀓𑀲𑁂𑀝𑁆𑀞𑀺𑀯𑀢𑁆𑀣𑀼

𑀉𑀝𑁆𑀞𑀸𑀦𑀯𑀢𑁄𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀫𑁆𑀪𑀖𑁄𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀭𑀸𑀚𑀕𑀳𑀦𑀕𑀭𑀲𑁆𑀫𑀺𑀜𑁆𑀳𑀺 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀅𑀳𑀺𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺, 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀫𑀓𑁆𑀔𑀺𑀓𑀸 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀕𑀸𑀯𑀸 𑀧𑀞𑀫𑀁 𑀢𑀺𑀭𑀘𑁆𑀙𑀸𑀦𑀕𑀢𑀸 𑀫𑀭𑀦𑁆𑀢𑀺, 𑀢𑀢𑁄 𑀤𑀸𑀲𑀓𑀫𑁆𑀫𑀓𑀭𑁄, 𑀲𑀩𑁆𑀩𑀧𑀘𑁆𑀙𑀸 𑀕𑁂𑀳𑀲𑀸𑀫𑀺𑀓𑀸, 𑀢𑀲𑁆𑀫𑀸 𑀲𑁄 𑀭𑁄𑀕𑁄 𑀲𑀩𑁆𑀩𑀧𑀘𑁆𑀙𑀸 𑀲𑁂𑀝𑁆𑀞𑀺𑀜𑁆𑀘 𑀚𑀸𑀬𑀜𑁆𑀘 𑀕𑀡𑁆𑀳𑀺. 𑀢𑁂 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀧𑀼𑀢𑁆𑀢𑀁 𑀲𑀦𑁆𑀢𑀺𑀓𑁂 𑀞𑀺𑀢𑀁 𑀑𑀮𑁄𑀓𑁂𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀢𑀁 𑀆𑀳𑀁𑀲𑀼 𑁋 ‘‘𑀢𑀸𑀢, 𑀇𑀫𑀲𑁆𑀫𑀺𑀁 𑀓𑀺𑀭 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀸𑀯 𑀚𑀻𑀯𑀺𑀢𑀁 𑀮𑀪𑀦𑁆𑀢𑀺, 𑀢𑁆𑀯𑀁 𑀅𑀫𑁆𑀳𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀚𑀻𑀯𑀦𑁆𑀢𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀘𑀢𑁆𑀢𑀸𑀮𑀻𑀲 𑀥𑀦𑀓𑁄𑀝𑀺𑀬𑁄 ¶ 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸, 𑀢𑀸 𑀉𑀤𑁆𑀥𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ¶ 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀼𑀤𑀫𑀸𑀦𑁄 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀫𑀭𑀡𑀪𑀬𑀪𑀻𑀢𑁄 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀢𑀕𑀳𑀦𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀼𑀯𑀲𑀦𑀝𑁆𑀞𑀸𑀦𑀁 𑀧𑀘𑁆𑀘𑀸𑀕𑀜𑁆𑀙𑀺.

𑀅𑀣 𑀦𑀁 𑀤𑀳𑀭𑀓𑀸𑀮𑁂 𑀕𑀦𑁆𑀢𑁆𑀯𑀸 𑀧𑀭𑀽𑀴𑁆𑀳𑀓𑁂𑀲𑀫𑀲𑁆𑀲𑀼𑀓𑀸𑀮𑁂 𑀆𑀕𑀢𑀢𑁆𑀢𑀸 𑀦 𑀓𑁄𑀘𑀺 𑀲𑀜𑁆𑀚𑀸𑀦𑀺. 𑀲𑁄 𑀫𑀸𑀢𑀸𑀧𑀺𑀢𑀽𑀳𑀺 𑀤𑀺𑀦𑁆𑀦𑀲𑀜𑁆𑀜𑀸𑀯𑀲𑁂𑀦 𑀥𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀥𑀦𑀲𑁆𑀲 𑀅𑀭𑁄𑀕𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀁 𑀦 𑀓𑁄𑀘𑀺 𑀲𑀜𑁆𑀚𑀸𑀦𑀸𑀢𑀺, 𑀲𑀘𑀸𑀳𑀁 𑀥𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀮𑀜𑁆𑀚𑀺𑀲𑁆𑀲𑀸𑀫𑀺, ‘𑀏𑀓𑁂𑀦 𑀤𑀼𑀕𑁆𑀕𑀢𑁂𑀦 𑀦𑀺𑀥𑀺 𑀉𑀤𑁆𑀥𑀝𑁄’𑀢𑀺 𑀫𑀁 𑀕𑀳𑁂𑀢𑁆𑀯𑀸 𑀯𑀺𑀳𑁂𑀞𑁂𑀬𑁆𑀬𑀼𑀁, 𑀬𑀁𑀦𑀽𑀦𑀸𑀳𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑁂𑀬𑁆𑀬’’𑀦𑁆𑀢𑀺. 𑀅𑀣𑁂𑀓𑀁 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸, ‘‘𑀅𑀢𑁆𑀣𑀺 𑀓𑁄𑀘𑀺 𑀪𑀢𑀓𑁂𑀦 𑀅𑀢𑁆𑀣𑀺𑀓𑁄’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀪𑀢𑀓𑀯𑀻𑀣𑀺𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀪𑀢𑀓𑀸 𑀤𑀺𑀲𑁆𑀯𑀸, ‘‘𑀲𑀘𑁂 𑀅𑀫𑁆𑀳𑀸𑀓𑀁 𑀏𑀓𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺, 𑀪𑀢𑁆𑀢𑀯𑁂𑀢𑀦𑀁 𑀢𑁂 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀓𑀺𑀁 𑀓𑀫𑁆𑀫𑀁 𑀦𑀸𑀫𑀸’’𑀢𑀺? ‘‘𑀧𑀩𑁄𑀥𑀦𑀘𑁄𑀤𑀦𑀓𑀫𑁆𑀫𑀁. 𑀲𑀘𑁂 𑀉𑀲𑁆𑀲𑀳𑀲𑀺, 𑀧𑀸𑀢𑁄𑀯 𑀉𑀝𑁆𑀞𑀸𑀬 ‘𑀢𑀸𑀢𑀸, 𑀉𑀝𑁆𑀞𑀳𑀣, 𑀲𑀓𑀝𑀸𑀦𑀺 𑀲𑀦𑁆𑀦𑀬𑁆𑀳𑀣, 𑀕𑁄𑀡𑁂 𑀬𑁄𑀚𑁂𑀣, 𑀳𑀢𑁆𑀣𑀺𑀅𑀲𑁆𑀲𑀸𑀦𑀁 𑀢𑀺𑀡𑀢𑁆𑀣𑀸𑀬 𑀕𑀫𑀦𑀯𑁂𑀮𑀸; 𑀅𑀫𑁆𑀫𑀸, 𑀢𑀼𑀫𑁆𑀳𑁂𑀧𑀺 𑀉𑀝𑁆𑀞𑀳𑀣, 𑀬𑀸𑀕𑀼𑀁 𑀧𑀘𑀣, 𑀪𑀢𑁆𑀢𑀁 𑀧𑀘𑀣𑀸’𑀢𑀺 𑀯𑀺𑀘𑀭𑀺𑀢𑁆𑀯𑀸 𑀆𑀭𑁄𑀘𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣𑀲𑁆𑀲 𑀯𑀲𑀦𑀢𑁆𑀣𑀸𑀬 𑀏𑀓𑀁 𑀖𑀭𑀁 𑀅𑀤𑀁𑀲𑀼. 𑀲𑁄 𑀤𑁂𑀯𑀲𑀺𑀓𑀁 𑀢𑀁 𑀓𑀫𑁆𑀫𑀁 𑀅𑀓𑀸𑀲𑀺.

𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀲𑀤𑁆𑀤𑀫𑀲𑁆𑀲𑁄𑀲𑀺. 𑀲𑁄 𑀧𑀦 𑀲𑀩𑁆𑀩𑀭𑀯𑀜𑁆𑀜𑀽 𑀅𑀳𑁄𑀲𑀺. 𑀢𑀲𑁆𑀫𑀸 ‘‘𑀫𑀳𑀸𑀥𑀦𑀲𑁆𑀲 𑀧𑀼𑀭𑀺𑀲𑀲𑁆𑀲𑁂𑀲 𑀲𑀤𑁆𑀤𑁄’’𑀢𑀺 𑀆𑀳. 𑀅𑀣𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸 𑀏𑀓𑀸 𑀧𑀭𑀺𑀘𑀸𑀭𑀺𑀓𑀸 ‘‘𑀭𑀸𑀚𑀸 𑀬𑀁 𑀯𑀸 ¶ 𑀢𑀁 𑀯𑀸 𑀦 𑀓𑀣𑁂𑀲𑁆𑀲𑀢𑀺, 𑀇𑀤𑀁 𑀫𑀬𑀸 𑀜𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀕𑀘𑁆𑀙, 𑀢𑀸𑀢, 𑀏𑀢𑀁 𑀚𑀸𑀦𑀸𑀳𑀻’’𑀢𑀺 𑀏𑀓𑀁 𑀧𑀼𑀭𑀺𑀲𑀁 𑀧𑀳𑀺𑀡𑀺. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸, ‘‘𑀏𑀓𑁄 𑀪𑀢𑀓𑀸𑀦𑀁 𑀪𑀢𑀺𑀓𑀸𑀭𑀓𑁄 𑀓𑀧𑀡𑀫𑀦𑀼𑀲𑁆𑀲𑁄 𑀏𑀲𑁄’’𑀢𑀺 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀢𑀺𑀬𑀤𑀺𑀯𑀲𑁂𑀧𑀺 𑀢𑀁 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀣𑁂𑀯 𑀆𑀳. 𑀲𑀸𑀧𑀺 𑀧𑀭𑀺𑀘𑀸𑀭𑀺𑀓𑀸 ¶ 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑁂𑀲𑁂𑀢𑁆𑀯𑀸, ‘‘𑀓𑀧𑀡𑀫𑀦𑀼𑀲𑁆𑀲𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 ‘𑀓𑀧𑀡𑀫𑀦𑀼𑀲𑁆𑀲𑁄 𑀏𑀲𑁄’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀦 𑀲𑀤𑁆𑀤𑀳𑀢𑀺, 𑀧𑀼𑀦𑀧𑁆𑀧𑀼𑀦𑀁 ‘𑀫𑀳𑀸𑀥𑀦𑀲𑁆𑀲 𑀧𑀼𑀭𑀺𑀲𑀲𑁆𑀲𑁂𑀲 𑀲𑀤𑁆𑀤𑁄’𑀢𑀺 𑀯𑀤𑀢𑀺, 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑁂𑀦, 𑀬𑀣𑀸𑀲𑀪𑀸𑀯𑀢𑁄 𑀏𑀢𑀁 𑀜𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 𑀭𑀸𑀚𑀸𑀦𑀁 𑀆𑀳, ‘‘𑀤𑁂𑀯 ¶ , 𑀅𑀳𑀁 𑀲𑀳𑀲𑁆𑀲𑀁 𑀮𑀪𑀫𑀸𑀦𑀸 𑀥𑀻𑀢𑀭𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀏𑀢𑀁 𑀥𑀦𑀁 𑀭𑀸𑀚𑀓𑀼𑀮𑀁 𑀧𑀯𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀢𑀲𑁆𑀲𑀸 𑀲𑀳𑀲𑁆𑀲𑀁 𑀤𑀸𑀧𑁂𑀲𑀺.

𑀲𑀸 𑀢𑀁 𑀕𑀳𑁂𑀢𑁆𑀯𑀸 𑀥𑀻𑀢𑀭𑀁 𑀏𑀓𑀁 𑀫𑀮𑀺𑀦𑀥𑀸𑀢𑀼𑀓𑀁 𑀯𑀢𑁆𑀣𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀭𑀸𑀚𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀦𑁆𑀦𑀸 𑀯𑀺𑀬 𑀪𑀢𑀓𑀯𑀻𑀣𑀺𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀫𑁆𑀫, 𑀫𑀬𑀁 𑀫𑀕𑁆𑀕𑀧𑀝𑀺𑀧𑀦𑁆𑀦𑀸, 𑀏𑀓𑀸𑀳𑀤𑁆𑀯𑀻𑀳𑀁 𑀇𑀥 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀅𑀫𑁆𑀫, 𑀩𑀳𑀽𑀦𑀺 𑀖𑀭𑀫𑀸𑀦𑀼𑀲𑀓𑀸𑀦𑀺, 𑀦 𑀲𑀓𑁆𑀓𑀸 𑀇𑀥 𑀯𑀲𑀺𑀢𑀼𑀁, 𑀏𑀢𑀁 𑀓𑀼𑀫𑁆𑀪𑀖𑁄𑀲𑀓𑀲𑁆𑀲 𑀕𑁂𑀳𑀁 𑀢𑀼𑀘𑁆𑀙𑀁, 𑀢𑀢𑁆𑀣 𑀕𑀘𑁆𑀙𑀣𑀸’’𑀢𑀺. 𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸, ‘‘𑀲𑀸𑀫𑀺, 𑀫𑀬𑀁 𑀫𑀕𑁆𑀕𑀧𑀝𑀺𑀧𑀦𑁆𑀦𑀓𑀸, 𑀏𑀓𑀸𑀳𑀤𑁆𑀯𑀻𑀳𑀁 𑀇𑀥 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺, ‘‘𑀲𑀸𑀫𑀺, 𑀅𑀚𑁆𑀚𑁂𑀓𑀤𑀺𑀯𑀲𑀫𑀢𑁆𑀢𑀁 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀇𑀘𑁆𑀙𑀺. 𑀲𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀲𑁆𑀲 𑀅𑀭𑀜𑁆𑀜𑀕𑀫𑀦𑀯𑁂𑀮𑀸𑀬, ‘‘𑀲𑀸𑀫𑀺, 𑀢𑀯 𑀦𑀺𑀯𑀸𑀧𑀁 𑀤𑀢𑁆𑀯𑀸 𑀬𑀸𑀳𑀺 ¶ , 𑀆𑀳𑀸𑀭𑀁 𑀢𑁂 𑀧𑀘𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, ‘‘𑀅𑀮𑀁, 𑀅𑀫𑁆𑀫, 𑀅𑀳𑀫𑁂𑀯 𑀧𑀘𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑀦𑁆𑀥𑀺𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑁂 𑀕𑀳𑀺𑀢𑀫𑀢𑁆𑀢𑀓𑁂𑀬𑁂𑀯 𑀓𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 𑀪𑀸𑀚𑀦𑀸𑀦𑀺 𑀘𑁂𑀯 𑀧𑀭𑀺𑀲𑀼𑀤𑁆𑀥𑀢𑀡𑁆𑀟𑀼𑀮𑀸𑀤𑀻𑀦𑀺 𑀘 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀓𑀼𑀮𑁂 𑀧𑀘𑀦𑀦𑀺𑀬𑀸𑀫𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀁 𑀑𑀤𑀦𑀁, 𑀲𑀸𑀥𑀼𑀭𑀲𑀸𑀦𑀺 𑀘 𑀤𑁆𑀯𑁂 𑀢𑀻𑀡𑀺 𑀲𑀽𑀧𑀩𑁆𑀬𑀜𑁆𑀚𑀦𑀸𑀦𑀺 𑀧𑀘𑀺𑀢𑁆𑀯𑀸 𑀢𑀲𑁆𑀲 𑀅𑀭𑀜𑁆𑀜𑀢𑁄 𑀆𑀕𑀢𑀲𑁆𑀲 𑀅𑀤𑀸𑀲𑀺. 𑀅𑀣 𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀤𑀼𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑀁 𑀜𑀢𑁆𑀯𑀸, ‘‘𑀲𑀸𑀫𑀺, 𑀓𑀺𑀮𑀦𑁆𑀢𑀫𑁆𑀳, 𑀏𑀓𑀸𑀳𑀤𑁆𑀯𑀻𑀳𑀁 𑀇𑀥𑁂𑀯 𑀳𑁄𑀫𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀅𑀣𑀲𑁆𑀲 𑀲𑀸𑀬𑀫𑁆𑀧𑀺 𑀧𑀼𑀦𑀤𑀺𑀯𑀲𑁂𑀧𑀺 𑀫𑀥𑀼𑀭𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀫𑀼𑀤𑀼𑀘𑀺𑀢𑁆𑀢𑀢𑀁 𑀢𑀲𑁆𑀲 𑀜𑀢𑁆𑀯𑀸 ‘‘𑀲𑀸𑀫𑀺, 𑀓𑀢𑀺𑀧𑀸𑀳𑀁 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁆𑀣 𑀯𑀲𑀫𑀸𑀦𑀸 𑀢𑀺𑀔𑀺𑀡𑁂𑀦 𑀲𑀢𑁆𑀣𑁂𑀦 𑀢𑀲𑁆𑀲 𑀫𑀜𑁆𑀘𑀯𑀸𑀡𑀁 𑀳𑁂𑀝𑁆𑀞𑀸𑀅𑀝𑀦𑀺𑀬𑀁 𑀢𑀳𑀁 𑀢𑀳𑀁 𑀙𑀺𑀦𑁆𑀤𑀺. 𑀫𑀜𑁆𑀘𑁄 𑀢𑀲𑁆𑀫𑀺𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑀢𑁆𑀢𑁂𑀬𑁂𑀯 𑀳𑁂𑀝𑁆𑀞𑀸 𑀑𑀮𑀫𑁆𑀩𑀺. 𑀲𑁄 ‘‘𑀓𑀲𑁆𑀫𑀸 𑀅𑀬𑀁 𑀫𑀜𑁆𑀘𑁄 𑀏𑀯𑀁 𑀙𑀺𑀚𑁆𑀚𑀺𑀢𑁆𑀯𑀸 𑀕𑀢𑁄’’𑀢𑀺 𑀆𑀳. ‘‘𑀲𑀸𑀫𑀺, 𑀤𑀳𑀭𑀤𑀸𑀭𑀓𑁂 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀏𑀢𑁆𑀣𑁂𑀯 𑀲𑀦𑁆𑀦𑀺𑀧𑀢𑀦𑁆𑀢𑀻’’𑀢𑀺. ‘‘𑀅𑀫𑁆𑀫, 𑀇𑀤𑀁 𑀫𑁂 𑀤𑀼𑀓𑁆𑀔𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀚𑀸𑀢𑀁. 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀓𑀢𑁆𑀣𑀘𑀺 𑀕𑀘𑁆𑀙𑀦𑁆𑀢𑁄 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺. ‘‘𑀓𑀺𑀁 𑀓𑀭𑁄𑀫𑀺, 𑀢𑀸𑀢, 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. 𑀲𑀸 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀢𑁂𑀦 𑀉𑀚𑁆𑀛𑀸𑀬𑀺𑀢𑁆𑀯𑀸 𑀔𑀻𑀬𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀧𑀼𑀦 𑀏𑀓𑀁 𑀤𑁆𑀯𑁂 𑀭𑀚𑁆𑀚𑀼𑀓𑁂 𑀞𑀧𑁂𑀢𑁆𑀯𑀸 𑀲𑁂𑀲𑁂 𑀙𑀺𑀦𑁆𑀤𑀺. 𑀢𑀁 𑀤𑀺𑀯𑀲𑀁 ¶ 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀫𑀢𑁆𑀢𑁂𑀬𑁂𑀯 𑀲𑀩𑁆𑀩𑀁 𑀯𑀸𑀡𑀁 𑀪𑀽𑀫𑀺𑀬𑀁 𑀧𑀢𑀺, 𑀲𑀻𑀲𑀁 𑀚𑀡𑁆𑀡𑀼𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀅𑀳𑁄𑀲𑀺, 𑀲𑁄 𑀉𑀝𑁆𑀞𑀸𑀬, ‘‘𑀓𑀺𑀁 𑀓𑀭𑁄𑀫𑀺, 𑀇𑀤𑀸𑀦𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀸𑀫𑀺 ¶ , 𑀦𑀺𑀧𑀚𑁆𑀚𑀦𑀫𑀜𑁆𑀘𑀲𑁆𑀲𑀧𑀺 𑀢𑀼𑀫𑁆𑀳𑁂𑀳𑀺 𑀅𑀲𑀸𑀫𑀺𑀓𑁄 ¶ 𑀯𑀺𑀬 𑀓𑀢𑁄𑀫𑁆𑀳𑀻’’𑀢𑀺 𑀆𑀳. ‘‘𑀢𑀸𑀢, 𑀓𑀺𑀁 𑀓𑀭𑁄𑀫𑀺, 𑀧𑀝𑀺𑀯𑀺𑀲𑁆𑀲𑀓𑀤𑀸𑀭𑀓𑁂 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀳𑁄𑀢𑀼, 𑀫𑀸 𑀘𑀺𑀦𑁆𑀢𑀬𑀺, 𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀥𑀻𑀢𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀅𑀫𑁆𑀫, 𑀢𑀯 𑀪𑀸𑀢𑀺𑀓𑀲𑁆𑀲 𑀦𑀺𑀧𑀚𑁆𑀚𑀦𑁄𑀓𑀸𑀲𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑀸 𑀏𑀓𑀧𑀲𑁆𑀲𑁂 𑀲𑀬𑀺𑀢𑁆𑀯𑀸 ‘‘𑀇𑀥𑀸𑀕𑀘𑁆𑀙, 𑀲𑀸𑀫𑀻’’𑀢𑀺 𑀆𑀳. 𑀇𑀢𑀭𑁄𑀧𑀺 𑀦𑀁 ‘‘𑀕𑀘𑁆𑀙, 𑀢𑀸𑀢, 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀸’’𑀢𑀺 𑀯𑀤𑁂𑀲𑀺. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀲𑀦𑁆𑀣𑀯𑀁 𑀅𑀓𑀸𑀲𑀺, 𑀓𑀼𑀫𑀸𑀭𑀺𑀓𑀸 𑀧𑀭𑁄𑀤𑀺. 𑀅𑀣 𑀦𑀁 𑀫𑀸𑀢𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀅𑀫𑁆𑀫, 𑀭𑁄𑀤𑀲𑀻’’𑀢𑀺? ‘‘𑀅𑀫𑁆𑀫, 𑀇𑀤𑀁 𑀦𑀸𑀫 𑀚𑀸𑀢’’𑀦𑁆𑀢𑀺. ‘‘𑀳𑁄𑀢𑀼, 𑀅𑀫𑁆𑀫, 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀬𑀸𑀧𑀺 𑀏𑀓𑀁 𑀪𑀢𑁆𑀢𑀸𑀭𑀁 𑀇𑀫𑀺𑀦𑀸𑀧𑁂𑀓𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀁 𑀚𑀸𑀫𑀸𑀢𑀭𑀁 𑀅𑀓𑀸𑀲𑀺. 𑀢𑁂 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼.

𑀲𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀪𑀢𑀓𑀯𑀻𑀣𑀺𑀬𑀁 𑀙𑀡𑀁 𑀓𑀭𑁄𑀦𑁆𑀢𑀼. 𑀬𑀲𑁆𑀲 𑀧𑀦 𑀖𑀭𑁂 𑀙𑀡𑁄 𑀦 𑀓𑀭𑀻𑀬𑀢𑀺, 𑀢𑀲𑁆𑀲 𑀏𑀢𑁆𑀢𑀓𑁄 𑀦𑀸𑀫 𑀤𑀡𑁆𑀟𑁄𑀢𑀺 𑀖𑁄𑀲𑀦𑀁 𑀓𑀸𑀭𑁂𑀢𑀽’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀅𑀣 𑀦𑀁 𑀲𑀲𑁆𑀲𑀼 𑀆𑀳 𑁋 ‘‘𑀢𑀸𑀢, 𑀪𑀢𑀓𑀯𑀻𑀣𑀺𑀬𑀁 𑀭𑀸𑀚𑀸𑀡𑀸𑀬 𑀙𑀡𑁄 𑀓𑀢𑁆𑀢𑀩𑁆𑀩𑁄 𑀚𑀸𑀢𑁄, 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀅𑀫𑁆𑀫, 𑀅𑀳𑀁 𑀪𑀢𑀺𑀁 𑀓𑀭𑁄𑀦𑁆𑀢𑁄𑀧𑀺 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀢𑀸𑀢, 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑀸 𑀦𑀸𑀫 𑀇𑀡𑀫𑁆𑀧𑀺 𑀕𑀡𑁆𑀳𑀦𑁆𑀢𑀺, 𑀭𑀜𑁆𑀜𑁄 ¶ 𑀆𑀡𑀸 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀸. 𑀇𑀡𑀢𑁄 𑀦𑀸𑀫 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀫𑀼𑀘𑁆𑀘𑀺𑀢𑀼𑀁 𑀲𑀓𑁆𑀓𑀸, 𑀕𑀘𑁆𑀙, 𑀓𑀼𑀢𑁄𑀘𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑀳𑀸𑀧𑀡𑁂 𑀆𑀳𑀭𑀸’’𑀢𑀺 𑀆𑀳. 𑀲𑁄 𑀉𑀚𑁆𑀛𑀸𑀬𑀦𑁆𑀢𑁄 𑀔𑀻𑀬𑀦𑁆𑀢𑁄 𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀓𑀳𑀸𑀧𑀡𑀁 𑀆𑀳𑀭𑀺. 𑀲𑀸 𑀢𑀁 𑀓𑀳𑀸𑀧𑀡𑀁 𑀭𑀜𑁆𑀜𑁄 𑀧𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀳𑀸𑀧𑀡𑁂𑀦 𑀙𑀡𑀁 𑀓𑀢𑁆𑀯𑀸 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀢𑀣𑁂𑀯 𑀲𑀸𑀲𑀦𑀁 𑀧𑀳𑀺𑀡𑀺. 𑀧𑀼𑀦 𑀭𑀸𑀚𑀸 𑀢𑀣𑁂𑀯 ‘‘𑀙𑀡𑀁 𑀓𑀭𑁄𑀦𑁆𑀢𑀼, 𑀅𑀓𑀭𑁄𑀦𑁆𑀢𑀸𑀦𑀁 𑀏𑀢𑁆𑀢𑀓𑁄 𑀤𑀡𑁆𑀟𑁄’’𑀢𑀺 𑀆𑀡𑀸𑀧𑁂𑀲𑀺. 𑀧𑀼𑀦𑀧𑀺 𑀲𑁄 𑀢𑀸𑀬 𑀢𑀣𑁂𑀯 𑀯𑀢𑁆𑀯𑀸 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀕𑀦𑁆𑀢𑁆𑀯𑀸 𑀢𑀬𑁄 𑀓𑀳𑀸𑀧𑀡𑁂 𑀆𑀳𑀭𑀺. 𑀲𑀸 𑀢𑁂𑀧𑀺 𑀓𑀳𑀸𑀧𑀡𑁂 𑀭𑀜𑁆𑀜𑁄 𑀧𑁂𑀲𑁂𑀢𑁆𑀯𑀸 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀢𑀣𑁂𑀯 𑀲𑀸𑀲𑀦𑀁 𑀧𑀳𑀺𑀡𑀺 𑁋 ‘‘𑀇𑀤𑀸𑀦𑀺 𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀇𑀫𑀁 𑀧𑀓𑁆𑀓𑁄𑀲𑀸𑀧𑁂𑀢𑀽’’𑀢𑀺. 𑀭𑀸𑀚𑀸 𑀧𑁂𑀲𑁂𑀲𑀺. 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸, ‘‘𑀓𑀼𑀫𑁆𑀪𑀖𑁄𑀲𑀓𑁄 𑀦𑀸𑀫 𑀓𑀢𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀬𑁂𑀲𑀦𑁆𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀳𑀺, 𑀪𑁄 𑀭𑀸𑀚𑀸, 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 𑀪𑀻𑀢𑁄 ‘‘𑀦 𑀫𑀁 𑀭𑀸𑀚𑀸 𑀚𑀸𑀦𑀸𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀺. 𑀅𑀣 𑀦𑀁 𑀩𑀮𑀓𑁆𑀓𑀸𑀭𑁂𑀦 𑀳𑀢𑁆𑀣𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 ¶ 𑀆𑀓𑀟𑁆𑀠𑀺𑀁𑀲𑀼. 𑀲𑀸 𑀇𑀢𑁆𑀣𑀻 𑀢𑁂 𑀤𑀺𑀲𑁆𑀯𑀸, ‘‘𑀅𑀭𑁂, 𑀤𑀼𑀩𑁆𑀩𑀺𑀦𑀻𑀢𑀸, 𑀢𑀼𑀫𑁆𑀳𑁂 𑀫𑀫 𑀚𑀸𑀫𑀸𑀢𑀭𑀁 𑀳𑀢𑁆𑀣𑀸𑀤𑀻𑀲𑀼 𑀕𑀳𑁂𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀢𑀚𑁆𑀚𑁂𑀢𑁆𑀯𑀸, ‘‘𑀏𑀳𑀺, 𑀢𑀸𑀢, 𑀫𑀸 𑀪𑀸𑀬𑀺, 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀢𑀯 𑀳𑀢𑁆𑀣𑀸𑀤𑀺𑀕𑀸𑀳𑀓𑀸𑀦𑀁 𑀳𑀢𑁆𑀣𑁂𑀬𑁂𑀯 𑀙𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀥𑀻𑀢𑀭𑀁 𑀆𑀤𑀸𑀬 𑀧𑀼𑀭𑀢𑁄 𑀳𑀼𑀢𑁆𑀯𑀸 𑀭𑀸𑀚𑀕𑁂𑀳𑀁 𑀧𑀢𑁆𑀯𑀸 𑀯𑁂𑀲𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀇𑀢𑀭𑀫𑁆𑀧𑀺 𑀧𑀭𑀺𑀓𑀟𑁆𑀠𑀺𑀢𑁆𑀯𑀸 𑀆𑀦𑀬𑀺𑀁𑀲𑀼𑀬𑁂𑀯.

𑀅𑀣 𑀦𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀭𑀸𑀚𑀸 𑀆𑀳 𑁋 ‘‘𑀢𑁆𑀯𑀁 𑀓𑀼𑀫𑁆𑀪𑀖𑁄𑀲𑀓𑁄 𑀦𑀸𑀫𑀸’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺 ¶ . ‘‘𑀓𑀺𑀁 𑀓𑀸𑀭𑀡𑀸 𑀫𑀳𑀸𑀥𑀦𑀁 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀲𑀻’’𑀢𑀺 ¶ ? ‘‘𑀓𑀼𑀢𑁄 𑀫𑁂, 𑀤𑁂𑀯, 𑀥𑀦𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑀲𑁆𑀲𑀸’’𑀢𑀺? ‘‘𑀫𑀸 𑀏𑀯𑀁 𑀓𑀭𑀺, 𑀓𑀺𑀁 𑀅𑀫𑁆𑀳𑁂 𑀯𑀜𑁆𑀘𑁂𑀲𑀻’’𑀢𑀺? ‘‘𑀦 𑀯𑀜𑁆𑀘𑁂𑀫𑀺, 𑀤𑁂𑀯, 𑀦𑀢𑁆𑀣𑀺 𑀫𑁂 𑀥𑀦’’𑀦𑁆𑀢𑀺. 𑀅𑀣𑀲𑁆𑀲 𑀭𑀸𑀚𑀸 𑀢𑁂 𑀓𑀳𑀸𑀧𑀡𑁂 𑀤𑀲𑁆𑀲𑁂𑀢𑁆𑀯𑀸, ‘‘𑀇𑀫𑁂 𑀓𑀲𑁆𑀲 𑀓𑀳𑀸𑀧𑀡𑀸’’𑀢𑀺 𑀆𑀳. 𑀲𑁄 𑀲𑀜𑁆𑀚𑀸𑀦𑀺𑀢𑁆𑀯𑀸, ‘‘𑀅𑀳𑁄 𑀩𑀸𑀮𑁄𑀫𑁆𑀳𑀺, 𑀓𑀣𑀁 𑀦𑀼 𑀔𑁄 𑀇𑀫𑁂 𑀭𑀜𑁆𑀜𑁄 𑀳𑀢𑁆𑀣𑀁 𑀧𑀢𑁆𑀢𑀸’’𑀢𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀢𑀸 𑀤𑁆𑀯𑁂𑀧𑀺 𑀧𑀝𑀺𑀫𑀡𑁆𑀟𑀺𑀢𑀧𑀲𑀸𑀥𑀦𑀸 𑀕𑀩𑁆𑀪𑀤𑁆𑀯𑀸𑀭𑀫𑀽𑀮𑁂 𑀞𑀺𑀢𑀸 𑀤𑀺𑀲𑁆𑀯𑀸, ‘‘𑀪𑀸𑀭𑀺𑀬𑀁 𑀯𑀢𑀺𑀤𑀁 𑀓𑀫𑁆𑀫𑀁, 𑀇𑀫𑀸𑀳𑀺 𑀭𑀜𑁆𑀜𑀸 𑀧𑀬𑁄𑀚𑀺𑀢𑀸𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀯𑀤𑁂𑀳𑀺, 𑀪𑁄, 𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀻’’𑀢𑀺 𑀆𑀳. ‘‘𑀦𑀺𑀲𑁆𑀲𑀬𑁄 𑀫𑁂 𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀫𑀸𑀤𑀺𑀲𑁄 𑀦𑀺𑀲𑁆𑀲𑀬𑁄 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. ‘‘𑀓𑀮𑁆𑀬𑀸𑀡𑀁, 𑀤𑁂𑀯, 𑀲𑀘𑁂 𑀫𑁂 𑀤𑁂𑀯𑁄 𑀅𑀯𑀲𑁆𑀲𑀬𑁄 𑀳𑁄𑀢𑀻’’𑀢𑀺. ‘‘𑀳𑁄𑀫𑀺, 𑀪𑁄, 𑀓𑀺𑀢𑁆𑀢𑀓𑀁 𑀢𑁂 𑀥𑀦’’𑀦𑁆𑀢𑀺? ‘‘𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀬𑁄, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀓𑀝𑀸𑀦𑀺 𑀤𑁂𑀯𑀸’’𑀢𑀺? 𑀭𑀸𑀚𑀸 𑀅𑀦𑁂𑀓𑀲𑀢𑀸𑀦𑀺 𑀲𑀓𑀝𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀧𑀳𑀺𑀡𑀺𑀢𑁆𑀯𑀸 𑀢𑀁 𑀥𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸, ‘‘𑀅𑀢𑁆𑀣𑀺 𑀓𑀲𑁆𑀲𑀘𑀺 𑀇𑀫𑀲𑁆𑀫𑀺𑀁 𑀦𑀕𑀭𑁂 ‘‘𑀏𑀢𑁆𑀢𑀓𑀁 𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀧𑀦𑀲𑁆𑀲 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀓𑁆𑀓𑀸𑀭𑀁, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀢𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀥𑀻𑀢𑀭𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀲𑁆𑀲𑀣𑀺𑀫𑀁 𑀧𑀼𑀭𑀺𑀲𑀁, 𑀏𑀯𑀭𑀽𑀧𑁄 𑀥𑀺𑀢𑀺𑀫𑀸 𑀦𑀸𑀫 𑀦𑀢𑁆𑀣𑀺, 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑁄 𑀳𑁄𑀦𑁆𑀢𑁄𑀧𑀺 𑀉𑀧𑁆𑀧𑀺𑀮𑀸𑀯𑀺𑀢𑀸𑀓𑀸𑀭𑀁 𑀯𑀸 𑀅𑀲𑁆𑀫𑀺𑀫𑀸𑀦𑀫𑀢𑁆𑀢𑀁 𑀯𑀸 𑀦 𑀓𑀭𑁄𑀢𑀺, 𑀓𑀧𑀡𑁄 𑀯𑀺𑀬 𑀧𑀺𑀮𑁄𑀢𑀺𑀓𑀁 ¶ 𑀦𑀺𑀯𑀸𑀲𑁂𑀢𑁆𑀯𑀸 𑀪𑀢𑀓𑀯𑀻𑀣𑀺𑀬𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑁄 𑀫𑀬𑀸 𑀇𑀫𑀺𑀦𑀸 𑀦𑀸𑀫 𑀉𑀧𑀸𑀬𑁂𑀦 𑀜𑀸𑀢𑁄. 𑀚𑀸𑀦𑀺𑀢𑁆𑀯𑀸 𑀘 𑀧𑀦 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀥𑀦𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀢𑀁 𑀥𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 ¶ 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀥𑀻𑀢𑀸 𑀘𑀲𑁆𑀲 𑀫𑀬𑀸 𑀤𑀺𑀦𑁆𑀦𑀸. 𑀪𑀦𑁆𑀢𑁂, 𑀫𑀬𑀸 𑀘 𑀏𑀯𑀭𑀽𑀧𑁄 𑀥𑀺𑀢𑀺𑀫𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺 𑀆𑀳.

𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀏𑀯𑀁 𑀚𑀻𑀯𑀦𑁆𑀢𑀲𑁆𑀲 𑀚𑀻𑀯𑀺𑀓𑀁 𑀥𑀫𑁆𑀫𑀺𑀓𑀚𑀻𑀯𑀺𑀓𑀁 𑀦𑀸𑀫, 𑀫𑀳𑀸𑀭𑀸𑀚, 𑀘𑁄𑀭𑀺𑀓𑀸𑀤𑀺𑀓𑀫𑁆𑀫𑀁 𑀧𑀦 𑀇𑀥𑀮𑁄𑀓𑁂 𑀘𑁂𑀯 𑀧𑀻𑀴𑁂𑀢𑀺 𑀳𑀺𑀁𑀲𑁂𑀢𑀺, 𑀧𑀭𑀮𑁄𑀓𑁂 𑀘, 𑀢𑀢𑁄𑀦𑀺𑀤𑀸𑀦𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺. 𑀧𑀼𑀭𑀺𑀲𑀲𑁆𑀲 𑀳𑀺 𑀥𑀦𑀧𑀸𑀭𑀺𑀚𑀼𑀜𑁆𑀜𑀓𑀸𑀮𑁂 𑀓𑀲𑀺𑀁 𑀯𑀸 𑀪𑀢𑀺𑀁 𑀯𑀸 𑀓𑀢𑁆𑀯𑀸 𑀚𑀻𑀯𑀺𑀓𑀫𑁂𑀯 𑀥𑀫𑁆𑀫𑀺𑀓𑀚𑀻𑀯𑀺𑀓𑀁 𑀦𑀸𑀫. 𑀏𑀯𑀭𑀽𑀧𑀲𑁆𑀲 𑀳𑀺 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀓𑀸𑀬𑀯𑀸𑀘𑀸𑀳𑀺 𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀲𑁆𑀲 𑀧𑀜𑁆𑀜𑀸𑀬 𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀓𑀸𑀬𑀸𑀤𑀻𑀳𑀺 𑀲𑀜𑁆𑀜𑀢𑀲𑁆𑀲 𑀥𑀫𑁆𑀫𑀚𑀻𑀯𑀺𑀓𑀁 𑀚𑀻𑀯𑀦𑁆𑀢𑀲𑁆𑀲 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂 𑀞𑀺𑀢𑀲𑁆𑀲 𑀇𑀲𑁆𑀲𑀭𑀺𑀬𑀁 𑀯𑀟𑁆𑀠𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁪.

‘‘𑀉𑀝𑁆𑀞𑀸𑀦𑀯𑀢𑁄 𑀲𑀢𑀻𑀫𑀢𑁄,

𑀲𑀼𑀘𑀺𑀓𑀫𑁆𑀫𑀲𑁆𑀲 𑀦𑀺𑀲𑀫𑁆𑀫𑀓𑀸𑀭𑀺𑀦𑁄;

𑀲𑀜𑁆𑀜𑀢𑀲𑁆𑀲 ¶ 𑀥𑀫𑁆𑀫𑀚𑀻𑀯𑀺𑀦𑁄,

𑀅𑀧𑁆𑀧𑀫𑀢𑁆𑀢𑀲𑁆𑀲 𑀬𑀲𑁄𑀪𑀺𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 𑀉𑀝𑁆𑀞𑀸𑀦𑀯𑀢𑁄𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀯𑀦𑁆𑀢𑀲𑁆𑀲. 𑀲𑀢𑀺𑀫𑀢𑁄𑀢𑀺 𑀲𑀢𑀺𑀲𑀫𑁆𑀧𑀦𑁆𑀦𑀲𑁆𑀲. 𑀲𑀼𑀘𑀺𑀓𑀫𑁆𑀫𑀲𑁆𑀲𑀸𑀢𑀺 𑀦𑀺𑀤𑁆𑀤𑁄𑀲𑁂𑀳𑀺 𑀦𑀺𑀭𑀧𑀭𑀸𑀥𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀦𑀺𑀲𑀫𑁆𑀫𑀓𑀸𑀭𑀺𑀦𑁄𑀢𑀺 𑀏𑀯𑀜𑁆𑀘𑁂 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀇𑀫𑀲𑁆𑀫𑀺𑀁 𑀓𑀫𑁆𑀫𑁂 𑀏𑀯𑀁 𑀓𑀢𑁂 𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀯𑀸 𑀏𑀯𑀁 𑀦𑀺𑀤𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑁄𑀕𑀢𑀺𑀓𑀺𑀘𑁆𑀙𑀦𑀁 ¶ 𑀯𑀺𑀬 𑀲𑀩𑁆𑀩𑀓𑀫𑁆𑀫𑀸𑀦𑀺 𑀦𑀺𑀲𑀸𑀫𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲. 𑀲𑀜𑁆𑀜𑀢𑀲𑁆𑀲𑀸𑀢𑀺 𑀓𑀸𑀬𑀸𑀤𑀻𑀳𑀺 𑀲𑀜𑁆𑀜𑀢𑀲𑁆𑀲 𑀦𑀺𑀘𑁆𑀙𑀺𑀤𑁆𑀤𑀲𑁆𑀲. 𑀥𑀫𑁆𑀫𑀚𑀻𑀯𑀺𑀦𑁄𑀢𑀺 𑀅𑀕𑀸𑀭𑀺𑀓𑀲𑁆𑀲 𑀢𑀼𑀮𑀸𑀓𑀽𑀝𑀸𑀤𑀻𑀦𑀺 𑀯𑀚𑁆𑀚𑁂𑀢𑁆𑀯𑀸 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺, 𑀅𑀦𑀕𑀸𑀭𑀺𑀓𑀲𑁆𑀲 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀸𑀤𑀻𑀦𑀺 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲. 𑀅𑀧𑁆𑀧𑀫𑀢𑁆𑀢𑀲𑁆𑀲𑀸𑀢𑀺 𑀅𑀯𑀺𑀧𑁆𑀧𑀯𑀼𑀢𑁆𑀣𑀲𑀢𑀺𑀦𑁄. 𑀬𑀲𑁄𑀪𑀺𑀯𑀟𑁆𑀠𑀢𑀻𑀢𑀺 𑀇𑀲𑁆𑀲𑀭𑀺𑀬𑀪𑁄𑀕𑀲𑀫𑁆𑀧𑀦𑁆𑀦𑀲𑀗𑁆𑀔𑀸𑀢𑁄 𑀘𑁂𑀯 𑀓𑀺𑀢𑁆𑀢𑀺𑀯𑀡𑁆𑀡𑀪𑀡𑀦𑀲𑀗𑁆𑀔𑀸𑀢𑁄 𑀘 𑀬𑀲𑁄 𑀅𑀪𑀺𑀯𑀟𑁆𑀠𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀓𑀼𑀫𑁆𑀪𑀖𑁄𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀓𑀼𑀫𑁆𑀪𑀖𑁄𑀲𑀓𑀲𑁂𑀝𑁆𑀞𑀺𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼

𑀉𑀝𑁆𑀞𑀸𑀦𑁂𑀦𑀧𑁆𑀧𑀫𑀸𑀤𑁂𑀦𑀸𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀕𑀳𑁂 𑀓𑀺𑀭 𑀥𑀦𑀲𑁂𑀝𑁆𑀞𑀺𑀓𑀼𑀮𑀲𑁆𑀲 𑀥𑀻𑀢𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀳𑀺 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀅𑀢𑀺𑀯𑀺𑀬 𑀭𑀓𑁆𑀔𑀺𑀬𑀫𑀸𑀦𑀸 𑀬𑁄𑀩𑁆𑀩𑀦𑀫𑀤𑀫𑀢𑁆𑀢𑀢𑀸𑀬 𑀧𑀼𑀭𑀺𑀲𑀮𑁄𑀮𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀤𑀸𑀲𑁂𑀦𑁂𑀯 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸, ‘‘𑀅𑀜𑁆𑀜𑁂𑀧𑀺 𑀫𑁂 𑀇𑀤𑀁 𑀓𑀫𑁆𑀫𑀁 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀪𑀻𑀢𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀳𑁂𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀲𑀓𑁆𑀓𑀸 𑀯𑀲𑀺𑀢𑀼𑀁. 𑀲𑀘𑁂 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀇𑀫𑀁 𑀤𑁄𑀲𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀫𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸, ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀅𑀜𑁆𑀜𑁂𑀳𑀺 𑀅𑀚𑀸𑀦𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀉𑀪𑁄𑀧𑀺 𑀅𑀕𑀫𑀁𑀲𑀼. 𑀢𑁂𑀲𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀢𑀲𑁆𑀲𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀕𑀩𑁆𑀪𑀧𑀭𑀺𑀧𑀸𑀓𑀁 𑀆𑀕𑀫𑁆𑀫 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺, ‘‘𑀕𑀩𑁆𑀪𑁄 𑀫𑁂 𑀧𑀭𑀺𑀧𑀸𑀓𑀁 𑀕𑀢𑁄, 𑀜𑀸𑀢𑀺𑀩𑀦𑁆𑀥𑀼𑀯𑀺𑀭𑀳𑀺𑀢𑁂 ¶ 𑀞𑀸𑀦𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀦𑀸𑀫 𑀉𑀪𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀤𑀼𑀓𑁆𑀔𑀸𑀯𑀳𑀁, 𑀓𑀼𑀮𑀕𑁂𑀳𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺. 𑀲𑁄 ‘‘𑀲𑀘𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀻’’𑀢𑀺 𑀪𑀬𑁂𑀦 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀤𑀺𑀯𑀲𑁂 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑀸𑀮𑁄 𑀅𑀢𑁆𑀢𑀦𑁄 𑀤𑁄𑀲𑀫𑀳𑀦𑁆𑀢𑀢𑀸𑀬 𑀕𑀦𑁆𑀢𑀼𑀁 𑀦 𑀉𑀲𑁆𑀲𑀳𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀏𑀓𑀦𑁆𑀢𑀳𑀺𑀢𑀸𑀯, 𑀅𑀬𑀁 𑀕𑀘𑁆𑀙𑀢𑀼 𑀯𑀸, 𑀫𑀸 𑀯𑀸, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀲𑁆𑀫𑀺𑀁 𑀕𑁂𑀳𑀸 𑀦𑀺𑀓𑁆𑀔𑀦𑁆𑀢𑁂 𑀕𑁂𑀳𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀕𑀢𑀪𑀸𑀯𑀁 𑀅𑀦𑀦𑁆𑀢𑀭𑀕𑁂𑀳𑀯𑀸𑀲𑀻𑀦𑀁 𑀆𑀭𑁄𑀘𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀲𑁄𑀧𑀺 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀲𑀸 𑀓𑀼𑀮𑀖𑀭𑀁 𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀲𑀸𑀧𑀺 𑀢𑀢𑁆𑀣𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑁄 ‘‘𑀓𑀺𑀁 𑀇𑀤𑀁, 𑀪𑀤𑁆𑀤𑁂’’𑀢𑀺 ¶ 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀫𑁂 𑀏𑀓𑁄 𑀧𑀼𑀢𑁆𑀢𑁄 𑀚𑀸𑀢𑁄’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀓𑀼𑀮𑀖𑀭𑀁 𑀕𑀘𑁆𑀙𑁂𑀬𑁆𑀬𑀸𑀫, 𑀢𑀁 𑀓𑀫𑁆𑀫𑀁 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀦𑀺𑀧𑁆𑀨𑀦𑁆𑀦𑀁, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀤𑁆𑀯𑁂𑀧𑀺 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑀲𑁆𑀲 𑀘 𑀤𑀸𑀭𑀓𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲𑀸 𑀦𑀘𑀺𑀭𑀲𑁆𑀲𑁂𑀯 𑀅𑀧𑀭𑁄𑀧𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀩𑁆𑀩𑀁 ¶ 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀲𑁆𑀲𑀧𑀺 𑀤𑀸𑀭𑀓𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀞𑀫𑀚𑀸𑀢𑀲𑁆𑀲 𑀫𑀳𑀸𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀘𑀽𑀴𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀢𑁂𑀲𑀁 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀫𑀳𑀸𑀧𑀦𑁆𑀣𑀓𑀤𑀸𑀭𑀓𑁄 𑀅𑀜𑁆𑀜𑁂 𑀤𑀸𑀭𑀓𑁂 ‘‘𑀘𑀽𑀴𑀧𑀺𑀢𑀸 𑀫𑀳𑀸𑀧𑀺𑀢𑀸𑀢𑀺, 𑀅𑀬𑁆𑀬𑀓𑁄 𑀅𑀬𑁆𑀬𑀺𑀓𑀸’’𑀢𑀺 𑀘 𑀯𑀤𑀦𑁆𑀢𑁂 𑀲𑀼𑀢𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀅𑀜𑁆𑀜𑁂 𑀤𑀸𑀭𑀓𑀸 ‘𑀅𑀬𑁆𑀬𑀓𑁄 𑀅𑀬𑁆𑀬𑀺𑀓𑀸’𑀢𑀺𑀧𑀺, ‘𑀫𑀳𑀸𑀧𑀺𑀢𑀸 𑀘𑀽𑀴𑀧𑀺𑀢𑀸’𑀢𑀺𑀧𑀺 𑀯𑀤𑀦𑁆𑀢𑀺, 𑀓𑀘𑁆𑀘𑀺 𑀅𑀫𑁆𑀳𑀸𑀓𑀜𑁆𑀜𑁂𑀯 𑀜𑀸𑀢𑀓𑀸 𑀦𑀢𑁆𑀣𑀻’’𑀢𑀺? ‘‘𑀆𑀫, 𑀢𑀸𑀢, 𑀅𑀫𑁆𑀳𑀸𑀓𑀁 𑀏𑀢𑁆𑀣 𑀜𑀸𑀢𑀓𑀸 𑀦𑀢𑁆𑀣𑀺. 𑀭𑀸𑀚𑀕𑀳𑀦𑀕𑀭𑁂 𑀧𑀦 𑀯𑁄 𑀥𑀦𑀲𑁂𑀝𑁆𑀞𑀺 𑀦𑀸𑀫 𑀅𑀬𑁆𑀬𑀓𑁄, 𑀢𑀢𑁆𑀣 𑀅𑀫𑁆𑀳𑀸𑀓𑀁 𑀩𑀳𑀽 𑀜𑀸𑀢𑀓𑀸’’𑀢𑀺. ‘‘𑀓𑀲𑁆𑀫𑀸 𑀢𑀢𑁆𑀣 𑀦 𑀕𑀘𑁆𑀙𑀣, 𑀅𑀫𑁆𑀫𑀸’’𑀢𑀺? 𑀲𑀸 𑀅𑀢𑁆𑀢𑀦𑁄 𑀅𑀕𑀫𑀦𑀓𑀸𑀭𑀡𑀁 𑀧𑀼𑀢𑁆𑀢𑀲𑁆𑀲 𑀅𑀓𑀣𑁂𑀢𑁆𑀯𑀸 𑀧𑀼𑀢𑁆𑀢𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂𑀲𑀼 𑀲𑀸𑀫𑀺𑀓𑀁 𑀆𑀳 𑁋 ‘‘𑀇𑀫𑁂 𑀤𑀸𑀭𑀓𑀸 ¶ 𑀫𑀁 𑀅𑀢𑀺𑀯𑀺𑀬 𑀓𑀺𑀮𑀫𑁂𑀦𑁆𑀢𑀺, 𑀓𑀺𑀁 𑀦𑁄 𑀫𑀸𑀢𑀸𑀧𑀺𑀢𑀭𑁄 𑀤𑀺𑀲𑁆𑀯𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀏𑀳𑀺, 𑀤𑀸𑀭𑀓𑀸𑀦𑀁 𑀅𑀬𑁆𑀬𑀓𑀓𑀼𑀮𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺? ‘‘𑀅𑀳𑀁 𑀲𑀫𑁆𑀫𑀼𑀔𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑁂 𑀧𑀦 𑀦𑀬𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀤𑀸𑀭𑀓𑀸𑀦𑀁 𑀅𑀬𑁆𑀬𑀓𑀓𑀼𑀮𑀫𑁂𑀯 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺. 𑀤𑁆𑀯𑁂𑀧𑀺 𑀚𑀦𑀸 𑀤𑀸𑀭𑀓𑁂 𑀆𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀧𑀯𑀺𑀲𑀺𑀢𑁆𑀯𑀸 𑀤𑀸𑀭𑀓𑀫𑀸𑀢𑀸 𑀤𑁆𑀯𑁂 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑀸𑀧𑁂𑀲𑀺. 𑀢𑁂 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸, ‘‘𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀸𑀦𑀁 𑀦 𑀧𑀼𑀢𑁆𑀢𑁄 𑀦 𑀥𑀻𑀢𑀸 𑀪𑀽𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀢𑁂 𑀅𑀫𑁆𑀳𑀸𑀓𑀁 𑀫𑀳𑀸𑀧𑀭𑀸𑀥𑀺𑀓𑀸, 𑀦 𑀲𑀓𑁆𑀓𑀸 𑀢𑁂𑀳𑀺 𑀅𑀫𑁆𑀳𑀸𑀓𑀁 𑀘𑀓𑁆𑀔𑀼𑀧𑀣𑁂 𑀞𑀸𑀢𑀼𑀁, 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀕𑀳𑁂𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑀸 𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀚𑀻𑀯𑀦𑁆𑀢𑀼, 𑀤𑀸𑀭𑀓𑁂 𑀧𑀦 𑀇𑀥 𑀧𑁂𑀲𑁂𑀦𑁆𑀢𑀽’’𑀢𑀺 𑀥𑀦𑀁 𑀤𑀢𑁆𑀯𑀸 𑀤𑀽𑀢𑀁 𑀧𑀸𑀳𑁂𑀲𑀼𑀁.

𑀢𑁂𑀳𑀺 ¶ 𑀧𑁂𑀲𑀺𑀢𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀤𑀸𑀭𑀓𑁂 𑀆𑀕𑀢𑀤𑀽𑀢𑀸𑀦𑀜𑁆𑀜𑁂𑀯 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀳𑀺𑀡𑀺𑀁𑀲𑀼. 𑀤𑀸𑀭𑀓𑀸 𑀅𑀬𑁆𑀬𑀓𑀓𑀼𑀮𑁂 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀘𑀽𑀴𑀧𑀦𑁆𑀣𑀓𑁄 𑀅𑀢𑀺𑀤𑀳𑀭𑁄, 𑀫𑀳𑀸𑀧𑀦𑁆𑀣𑀓𑁄 𑀧𑀦 𑀅𑀬𑁆𑀬𑀓𑁂𑀦 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀦𑀺𑀘𑁆𑀘𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺. 𑀲𑁄 𑀅𑀬𑁆𑀬𑀓𑀁 𑀆𑀳 𑁋 ‘‘𑀲𑀘𑁂 𑀫𑀁 𑀅𑀦𑀼𑀚𑀸𑀦𑁂𑀬𑁆𑀬𑀸𑀣, 𑀅𑀳𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺 ¶ . ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢, 𑀲𑀓𑀮𑀲𑁆𑀲 𑀮𑁄𑀓𑀲𑁆𑀲𑀧𑀺 𑀫𑁂 𑀧𑀩𑁆𑀩𑀚𑁆𑀚𑀸𑀢𑁄 𑀢𑀯 𑀧𑀩𑁆𑀩𑀚𑁆𑀚𑀸 𑀪𑀤𑁆𑀤𑀺𑀓𑀸. 𑀲𑀘𑁂 𑀲𑀓𑁆𑀓𑁄𑀲𑀺 𑀧𑀩𑁆𑀩𑀚𑀸𑀳𑀻’’𑀢𑀺. 𑀢𑀁 ¶ 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀓𑀺𑀁, 𑀕𑀳𑀧𑀢𑀺, 𑀤𑀸𑀭𑀓𑁄 𑀢𑁂 𑀮𑀤𑁆𑀥𑁄’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂, 𑀅𑀬𑀁 𑀫𑁂 𑀦𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀓𑀸𑀫𑁄’’𑀢𑀺 𑀆𑀳. 𑀲𑀢𑁆𑀣𑀸 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀧𑀸𑀢𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 ‘‘𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑁆𑀓𑀸 𑀦𑀼 𑀔𑁄 𑀇𑀤𑀁 𑀲𑀼𑀔𑀁 𑀘𑀽𑀴𑀧𑀦𑁆𑀣𑀓𑀲𑁆𑀲 𑀤𑀸𑀢𑀼’’𑀦𑁆𑀢𑀺! 𑀢𑀢𑁄 𑀅𑀬𑁆𑀬𑀓𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀲𑁂𑀝𑁆𑀞𑀺, 𑀲𑀘𑁂 𑀅𑀦𑀼𑀚𑀸𑀦𑁂𑀬𑁆𑀬𑀸𑀣, 𑀅𑀳𑀁 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀬𑁆𑀬’’𑀦𑁆𑀢𑀺. ‘‘𑀧𑀩𑁆𑀩𑀸𑀚𑁂𑀣, 𑀪𑀦𑁆𑀢𑁂’’𑀢𑀺. 𑀲𑁂𑀝𑁆𑀞𑀺 𑀓𑀺𑀭 𑀲𑀸𑀲𑀦𑁂 𑀘 𑀲𑀼𑀧𑁆𑀧𑀲𑀦𑁆𑀦𑁄, ‘‘𑀓𑀢𑀭𑀥𑀻𑀢𑀸𑀬 𑀯𑁄 𑀏𑀢𑁂 𑀧𑀼𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 𑀘 ‘‘𑀧𑀮𑀸𑀢𑀥𑀻𑀢𑀸𑀬𑀸’’𑀢𑀺 𑀯𑀢𑁆𑀢𑀼𑀁 𑀮𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀼𑀔𑁂𑀦𑁂𑀯 𑀢𑁂𑀲𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 ¶ 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀅𑀳𑁄𑀲𑀺.

‘‘𑀧𑀤𑁆𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁,

𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁,

𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁨𑁩; 𑀅. 𑀦𑀺. 𑁫.𑁧𑁯𑁫) 𑁋

𑀇𑀫𑀁 𑀏𑀓𑀁 𑀕𑀸𑀣𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀜𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀦𑁆𑀥𑀪𑀺𑀓𑁆𑀔𑀼𑀦𑁄 𑀉𑀤𑁆𑀤𑁂𑀲𑀕𑁆𑀕𑀳𑀡𑀓𑀸𑀮𑁂 𑀧𑀭𑀺𑀳𑀸𑀲𑀓𑁂𑀴𑀺𑀁 𑀅𑀓𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀧𑀭𑀺𑀳𑀸𑀲𑁂𑀦 𑀮𑀚𑁆𑀚𑀺𑀢𑁄 𑀦𑁂𑀯 𑀉𑀤𑁆𑀤𑁂𑀲𑀁 𑀕𑀡𑁆𑀳𑀺, 𑀦 𑀲𑀚𑁆𑀛𑀸𑀬𑀫𑀓𑀸𑀲𑀺. 𑀢𑁂𑀦 𑀓𑀫𑁆𑀫𑁂𑀦 𑀅𑀬𑀁 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀚𑀸𑀢𑁄, 𑀕𑀳𑀺𑀢𑀕𑀳𑀺𑀢𑀁 𑀧𑀤𑀁 𑀉𑀧𑀭𑀽𑀧𑀭𑀺𑀧𑀤𑀁 𑀕𑀡𑁆𑀳𑀦𑁆𑀢𑀲𑁆𑀲 𑀦𑀲𑁆𑀲𑀢𑀺. 𑀢𑀲𑁆𑀲 𑀇𑀫𑀫𑁂𑀯 𑀕𑀸𑀣𑀁 𑀉𑀕𑁆𑀕𑀳𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀅𑀣 𑀦𑀁 𑀫𑀳𑀸𑀧𑀦𑁆𑀣𑀓𑁄, ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀪𑀩𑁆𑀩𑁄, 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀫𑁆𑀧𑀺 𑀕𑀡𑁆𑀳𑀺𑀢𑀼𑀁 ¶ 𑀦 𑀲𑀓𑁆𑀓𑁄𑀲𑀺, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀦 𑀓𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀲𑀺, 𑀦𑀺𑀓𑁆𑀔𑀫 𑀇𑀢𑁄’’𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺. 𑀘𑀽𑀴𑀧𑀦𑁆𑀣𑀓𑁄 𑀩𑀼𑀤𑁆𑀥𑀲𑀸𑀲𑀦𑁂 𑀲𑀺𑀦𑁂𑀳𑁂𑀦 𑀕𑀺𑀳𑀺𑀪𑀸𑀯𑀁 𑀦 𑀧𑀢𑁆𑀣𑁂𑀢𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀫𑀳𑀸𑀧𑀦𑁆𑀣𑀓𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀅𑀳𑁄𑀲𑀺. 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀅𑀫𑁆𑀩𑀯𑀦𑀁 ¶ 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀧𑀦𑁆𑀣𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀓𑀺𑀢𑁆𑀢𑀓𑀸 ¶ , 𑀪𑀦𑁆𑀢𑁂, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺. ‘‘𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻’’𑀢𑀺. ‘‘𑀲𑁆𑀯𑁂, 𑀪𑀦𑁆𑀢𑁂, 𑀩𑀼𑀤𑁆𑀥𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀅𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. ‘‘𑀉𑀧𑀸𑀲𑀓, 𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀤𑀦𑁆𑀥𑁄 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑁄, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀦𑀺𑀫𑀦𑁆𑀢𑀦𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺 𑀣𑁂𑀭𑁄 𑀆𑀳. 𑀢𑀁 𑀲𑀼𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀣𑁂𑀭𑁄 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀫𑀦𑁆𑀢𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀫𑀁 𑀩𑀸𑀳𑀺𑀭𑀁 𑀓𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀫𑀬𑁆𑀳𑀁 𑀪𑀸𑀢𑀺𑀓𑀲𑁆𑀲 𑀫𑀬𑀺 𑀘𑀺𑀢𑁆𑀢𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸 𑀲𑀸𑀲𑀦𑁂𑀦, 𑀕𑀺𑀳𑀻 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺? 𑀲𑁄 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀯𑀺𑀩𑁆𑀪𑀫𑀺𑀢𑀼𑀁 𑀧𑀸𑀬𑀸𑀲𑀺.

𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀘𑀗𑁆𑀓𑀫𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀘𑀽𑀴𑀧𑀦𑁆𑀣𑀓𑁄 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀼𑀳𑀺𑀁 𑀧𑀦 𑀢𑁆𑀯𑀁, 𑀘𑀽𑀴𑀧𑀦𑁆𑀣𑀓, 𑀇𑀫𑀸𑀬 𑀯𑁂𑀮𑀸𑀬 𑀕𑀘𑁆𑀙𑀲𑀻’’𑀢𑀺 𑀆𑀳. ‘‘𑀪𑀸𑀢𑀸 𑀫𑀁, 𑀪𑀦𑁆𑀢𑁂, 𑀦𑀺𑀓𑁆𑀓𑀟𑁆𑀠𑀢𑀺, 𑀢𑁂𑀦𑀸𑀳𑀁 𑀯𑀺𑀩𑁆𑀪𑀫𑀺𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺. ‘‘𑀘𑀽𑀴𑀧𑀦𑁆𑀣𑀓, 𑀢𑀯 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀫𑀫 𑀲𑀦𑁆𑀢𑀓𑀸, 𑀪𑀸𑀢𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑁄 𑀓𑀲𑁆𑀫𑀸 𑀫𑀫 𑀲𑀦𑁆𑀢𑀺𑀓𑀁 𑀦𑀸𑀕𑀜𑁆𑀙𑀺, 𑀏𑀳𑀺, 𑀓𑀺𑀁 𑀢𑁂 𑀕𑀺𑀳𑀺𑀪𑀸𑀯𑁂𑀦, 𑀫𑀫 𑀲𑀦𑁆𑀢𑀺𑀓𑁂 𑀪𑀯𑀺𑀲𑁆𑀲𑀲𑀻’’𑀢𑀺 𑀘𑀓𑁆𑀓𑀗𑁆𑀓𑀺𑀢𑀢𑀮𑁂𑀦 𑀧𑀸𑀡𑀺𑀦𑀸 𑀢𑀁 𑀲𑀺𑀭𑀲𑀺 𑀧𑀭𑀸𑀫𑀲𑀺𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, ‘‘𑀘𑀽𑀴𑀧𑀦𑁆𑀣𑀓, 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀇𑀫𑀁 𑀧𑀺𑀮𑁄𑀢𑀺𑀓𑀁 ‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑁄 𑀇𑀥𑁂𑀯 𑀳𑁄𑀳𑀻’’𑀢𑀺 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀢𑀁 𑀧𑀭𑀺𑀲𑀼𑀤𑁆𑀥𑀁 ¶ 𑀧𑀺𑀮𑁄𑀢𑀺𑀓𑀁 𑀤𑀢𑁆𑀯𑀸 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀻𑀯𑀓𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀘𑀽𑀴𑀧𑀦𑁆𑀣𑀓𑁄𑀧𑀺 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀧𑀺𑀮𑁄𑀢𑀺𑀓𑀁 ‘‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’’𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀲 𑀢𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀓𑀺𑀮𑀺𑀝𑁆𑀞𑀁 𑀅𑀳𑁄𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀁, 𑀇𑀫𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀼𑀭𑀺𑀫𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀏𑀯𑀁 𑀓𑀺𑀮𑀺𑀝𑁆𑀞𑀁 𑀚𑀸𑀢𑀁, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑀺. 𑀲𑀢𑁆𑀣𑀸 ‘‘𑀘𑀽𑀴𑀧𑀦𑁆𑀣𑀓𑀲𑁆𑀲 𑀘𑀺𑀢𑁆𑀢𑀁 𑀯𑀺𑀧𑀲𑁆𑀲𑀦𑀁 𑀆𑀭𑀼𑀴𑁆𑀳’’𑀦𑁆𑀢𑀺 𑀜𑀢𑁆𑀯𑀸, ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀫𑁂𑀯 𑀲𑀁𑀓𑀺𑀮𑀺𑀝𑁆𑀞𑀁 ‘𑀭𑀚𑀁 𑀭𑀚’𑀦𑁆𑀢𑀺 ¶ 𑀫𑀸 𑀲𑀜𑁆𑀜𑀁 𑀓𑀭𑀺, 𑀅𑀩𑁆𑀪𑀦𑁆𑀢𑀭𑁂 𑀧𑀦 𑀢𑁂 𑀭𑀸𑀕𑀭𑀚𑀸𑀤𑀬𑁄 𑀅𑀢𑁆𑀣𑀺, 𑀢𑁂 𑀳𑀭𑀸𑀳𑀻’’𑀢𑀺 ¶ 𑀯𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑁆𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀫𑁄𑀳𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂’’𑀢𑀺. (𑀫𑀳𑀸𑀦𑀺. 𑁨𑁦𑁯);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀘𑀽𑀴𑀧𑀦𑁆𑀣𑀓𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺𑀬𑁂𑀯𑀲𑁆𑀲 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀆𑀕𑀫𑀺𑀁𑀲𑀼.

𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀭𑀸𑀚𑀸 𑀳𑀼𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀦𑀮𑀸𑀝𑀢𑁄 𑀲𑁂𑀤𑁂 𑀫𑀼𑀘𑁆𑀘𑀦𑁆𑀢𑁂 𑀧𑀭𑀺𑀲𑀼𑀤𑁆𑀥𑁂𑀦 𑀲𑀸𑀝𑀓𑁂𑀦 𑀦𑀮𑀸𑀝𑀦𑁆𑀢𑀁 𑀧𑀼𑀜𑁆𑀙𑀺, 𑀲𑀸𑀝𑀓𑁄 𑀓𑀺𑀮𑀺𑀝𑁆𑀞𑁄 𑀅𑀳𑁄𑀲𑀺. 𑀲𑁄 ‘‘𑀇𑀫𑀁 𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑁄 𑀧𑀭𑀺𑀲𑀼𑀤𑁆𑀥𑁄 𑀲𑀸𑀝𑀓𑁄 𑀧𑀓𑀢𑀺𑀁 𑀚𑀳𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑁂 𑀓𑀸𑀭𑀡𑁂𑀦𑀲𑁆𑀲 𑀭𑀚𑁄𑀳𑀭𑀡𑀫𑁂𑀯 𑀧𑀘𑁆𑀘𑀬𑁄 𑀚𑀸𑀢𑁄.

𑀚𑀻𑀯𑀓𑁄𑀧𑀺 𑀔𑁄 𑀓𑁄𑀫𑀸𑀭𑀪𑀘𑁆𑀘𑁄 𑀤𑀲𑀩𑀮𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 ‘‘𑀦𑀦𑀼, 𑀚𑀻𑀯𑀓, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀅𑀢𑁆𑀣𑀻’’𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀫𑀳𑀸𑀧𑀦𑁆𑀣𑀓𑁄 ‘‘𑀦𑀦𑀼, 𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀢𑁆𑀣𑀺, 𑀚𑀻𑀯𑀓𑀸’’𑀢𑀺 𑀆𑀳. 𑀚𑀻𑀯𑀓𑁄 ‘‘𑀢𑁂𑀦 𑀳𑀺 𑀪𑀡𑁂 𑀕𑀘𑁆𑀙, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀢𑁆𑀯𑀜𑁆𑀜𑁂𑀯 𑀚𑀸𑀦𑀸𑀳𑀻’’𑀢𑀺 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀁 ¶ 𑀔𑀡𑁂 𑀘𑀽𑀴𑀧𑀦𑁆𑀣𑀓𑁄 ‘‘𑀫𑀬𑁆𑀳𑀁 𑀪𑀸𑀢𑀺𑀓𑁄 ‘𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’𑀢𑀺 𑀪𑀡𑀢𑀺 ¶ , 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀫𑀲𑁆𑀲 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀓𑀮𑀁 𑀅𑀫𑁆𑀩𑀯𑀦𑀁 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀧𑀽𑀭𑁂𑀲𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀭𑀚𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀅𑀲𑀤𑀺𑀲𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀫𑀸𑀧𑁂𑀲𑀺. 𑀲𑁄 𑀧𑀼𑀭𑀺𑀲𑁄 𑀯𑀺𑀳𑀸𑀭𑁂 𑀩𑀳𑀽 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸, ‘‘𑀅𑀬𑁆𑀬, 𑀲𑀓𑀮𑀁 𑀅𑀫𑁆𑀩𑀯𑀦𑀁 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀚𑀻𑀯𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀣𑁂𑀭𑁄𑀧𑀺 𑀔𑁄 𑀢𑀢𑁆𑀣𑁂𑀯 𑁋

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑀢𑁆𑀢𑀸𑀦𑀁 ¶ , 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀦𑁆𑀣𑀓𑁄;

𑀦𑀺𑀲𑀻𑀤𑀫𑁆𑀩𑀯𑀦𑁂 𑀭𑀫𑁆𑀫𑁂, 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸’’𑀢𑀺.

𑀅𑀣 𑀲𑀢𑁆𑀣𑀸 𑀢𑀁 𑀧𑀼𑀭𑀺𑀲𑀁 𑀆𑀳 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘𑀲𑀢𑁆𑀣𑀸 𑀘𑀽𑀴𑀧𑀦𑁆𑀣𑀓𑀁 𑀦𑀸𑀫 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀤𑁂𑀳𑀻’’𑀢𑀺. 𑀢𑁂𑀦 𑀕𑀦𑁆𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑁂, ‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄, 𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀫𑀼𑀔𑀲𑀳𑀲𑁆𑀲𑀁 𑀉𑀝𑁆𑀞𑀳𑀺. 𑀲𑁄 𑀧𑀼𑀭𑀺𑀲𑁄 𑀧𑀼𑀦 𑀕𑀦𑁆𑀢𑁆𑀯𑀸, ‘‘𑀲𑀩𑁆𑀩𑁂𑀧𑀺 𑀓𑀺𑀭, 𑀪𑀦𑁆𑀢𑁂, 𑀘𑀽𑀴𑀧𑀦𑁆𑀣𑀓𑀸𑀬𑁂𑀯 𑀦𑀸𑀫𑀸’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀕𑀦𑁆𑀢𑁆𑀯𑀸 𑀬𑁄 ‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’𑀢𑀺 𑀧𑀞𑀫𑀁 𑀯𑀤𑀢𑀺, 𑀢𑀁 𑀳𑀢𑁆𑀣𑁂 𑀕𑀡𑁆𑀳, 𑀅𑀯𑀲𑁂𑀲𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀸𑀯𑀤𑁂𑀯 𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀣𑁂𑀭𑁄𑀧𑀺 𑀢𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀚𑀻𑀯𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀚𑀻𑀯𑀓, 𑀘𑀽𑀴𑀧𑀦𑁆𑀣𑀓𑀲𑁆𑀲 𑀧𑀢𑁆𑀢𑀁 𑀕𑀡𑁆𑀳𑀸𑀳𑀺, 𑀅𑀬𑀁 𑀢𑁂 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀚𑀻𑀯𑀓𑁄 𑀢𑀣𑀸 𑀅𑀓𑀸𑀲𑀺. 𑀣𑁂𑀭𑁄 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀢𑀭𑀼𑀡𑀲𑀻𑀳𑁄 𑀯𑀺𑀬 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀲𑀗𑁆𑀔𑁄𑀪𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀯𑀸𑀲𑀺𑀢𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀉𑀧𑀕𑀢𑁄. 𑀅𑀣 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀇𑀢𑁄 𑀘𑀺𑀢𑁄 𑀘 𑀲𑀫𑁄𑀲𑀭𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀆𑀭𑀪𑀺𑀁𑀲𑀼, ‘‘𑀆𑀯𑀼𑀲𑁄, 𑀫𑀳𑀸𑀧𑀦𑁆𑀣𑀓𑁄 𑀘𑀽𑀴𑀧𑀦𑁆𑀣𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀚𑀸𑀦𑀦𑁆𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, ‘𑀤𑀦𑁆𑀥𑁄 𑀅𑀬’𑀦𑁆𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀥𑀫𑁆𑀫𑀭𑀸𑀚𑀢𑀸𑀬 𑀏𑀓𑀲𑁆𑀫𑀺𑀁𑀬𑁂𑀯𑀲𑁆𑀲 𑀅𑀦𑁆𑀢𑀭𑀪𑀢𑁆𑀢𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺𑀬𑁂𑀯 𑀆𑀕𑀢𑀸𑀦𑀺, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀩𑀮𑀁 𑀦𑀸𑀫 𑀫𑀳𑀦𑁆𑀢’’𑀦𑁆𑀢𑀺.

𑀅𑀣 ¶ 𑀪𑀕𑀯𑀸 𑀥𑀫𑁆𑀫𑀲𑀪𑀸𑀬𑀁 𑀇𑀫𑀁 𑀓𑀣𑀸𑀧𑀯𑀢𑁆𑀢𑀺𑀁 𑀜𑀢𑁆𑀯𑀸, ‘‘𑀅𑀚𑁆𑀚 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑀼𑀤𑁆𑀥𑀲𑁂𑀬𑁆𑀬𑀸𑀬 𑀉𑀝𑁆𑀞𑀸𑀬 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀁 𑀯𑀺𑀬 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀫𑀢𑁆𑀢𑀯𑀭𑀯𑀸𑀭𑀡𑀲𑀻𑀳𑀯𑀺𑀚𑀫𑁆𑀪𑀺𑀢𑀯𑀺𑀮𑀸𑀲𑁂𑀦 ¶ 𑀅𑀦𑀦𑁆𑀢𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀮𑀫𑀸𑀴𑀫𑀚𑁆𑀛𑁂 𑀲𑀼𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀁 𑀅𑀪𑀺𑀭𑀼𑀬𑁆𑀳 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀡𑁆𑀡𑀯𑀓𑀼𑀘𑁆𑀙𑀺𑀁 𑀔𑁄𑀪𑀬𑀫𑀸𑀦𑁄 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀆𑀲𑀦𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀦 𑀆𑀕𑀢𑀫𑀢𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀢𑁆𑀣𑀸 𑀫𑀼𑀤𑀼𑀓𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 ¶ 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀬𑀁 𑀧𑀭𑀺𑀲𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀏𑀓𑀲𑁆𑀲𑀧𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁄 𑀯𑀸 𑀔𑀺𑀧𑀺𑀢𑀲𑀤𑁆𑀤𑁄 𑀯𑀸 𑀦𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀇𑀫𑁂 𑀩𑀼𑀤𑁆𑀥𑀕𑀸𑀭𑀯𑁂𑀦 𑀲𑀕𑀸𑀭𑀯𑀸, 𑀩𑀼𑀤𑁆𑀥𑀢𑁂𑀚𑁂𑀦 𑀢𑀚𑁆𑀚𑀺𑀢𑀸. 𑀫𑀬𑀺 𑀆𑀬𑀼𑀓𑀧𑁆𑀧𑀫𑁆𑀧𑀺 𑀅𑀓𑀣𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀧𑀞𑀫𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀦 𑀓𑀣𑁂𑀲𑁆𑀲𑀦𑁆𑀢𑀺. 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀯𑀢𑁆𑀢𑀁 𑀦𑀸𑀫 𑀫𑀬𑀸𑀯 𑀚𑀸𑀦𑀺𑀢𑀩𑁆𑀩𑀁, 𑀅𑀳𑀫𑁂𑀯 𑀧𑀞𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀫𑀥𑀼𑀭𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀘𑀽𑀴𑀧𑀦𑁆𑀣𑀓𑁄 𑀇𑀤𑀸𑀦𑁂𑀯 𑀤𑀦𑁆𑀥𑁄, 𑀧𑀼𑀩𑁆𑀩𑁂𑀧𑀺 𑀤𑀦𑁆𑀥𑁄𑀬𑁂𑀯. 𑀦 𑀓𑁂𑀯𑀮𑀜𑁆𑀘𑀲𑁆𑀲𑀸𑀳𑀁 𑀇𑀤𑀸𑀦𑁂𑀯 𑀅𑀯𑀲𑁆𑀲𑀬𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀅𑀯𑀲𑁆𑀲𑀬𑁄 𑀅𑀳𑁄𑀲𑀺𑀫𑁂𑀯. 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀇𑀫𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀓𑀼𑀝𑀼𑀫𑁆𑀩𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀲𑁄𑀢𑀼𑀓𑀸𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

‘‘𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀦𑀕𑀭𑀯𑀸𑀲𑀻 𑀏𑀓𑁄 𑀫𑀸𑀡𑀯𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀫𑀸𑀡𑀯𑀓𑀲𑀢𑀸𑀦𑀁 𑀅𑀦𑁆𑀢𑀭𑁂 𑀅𑀢𑀺𑀯𑀺𑀬 𑀆𑀘𑀭𑀺𑀬𑀲𑁆𑀲 𑀉𑀧𑀓𑀸𑀭𑀓𑁄 𑀅𑀳𑁄𑀲𑀺, 𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀤𑀦𑁆𑀥𑀢𑀸𑀬 𑀧𑀦 𑀓𑀺𑀜𑁆𑀘𑀺 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄’’𑀢𑀺. 𑀆𑀘𑀭𑀺𑀬𑁄 ‘‘𑀅𑀬𑀁 𑀫𑀫 𑀩𑀳𑀽𑀧𑀓𑀸𑀭𑁄, 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑀸𑀬𑀫𑀦𑁆𑀢𑁄𑀧𑀺 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑁂𑀢𑀼𑀁 ¶ 𑀦 𑀲𑀓𑁆𑀓𑁄𑀢𑀺. 𑀲𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀏𑀓𑀕𑀸𑀣𑀫𑁆𑀧𑀺 𑀉𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺. 𑀆𑀘𑀭𑀺𑀬𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀬𑁆𑀳𑀁 𑀉𑀧𑀓𑀸𑀭𑀓𑁄, 𑀧𑀡𑁆𑀟𑀺𑀢𑀪𑀸𑀯𑀫𑀲𑁆𑀲 𑀧𑀘𑁆𑀘𑀸𑀲𑀻𑀲𑀸𑀫𑀺, 𑀦 𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀫𑀺 ¶ , 𑀅𑀯𑀲𑁆𑀲𑀁 𑀫𑀬𑀸 𑀇𑀫𑀲𑁆𑀲 𑀧𑀘𑁆𑀘𑀼𑀧𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀏𑀓𑀫𑀲𑁆𑀲 𑀫𑀦𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀲𑁄 𑀢𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 ‘‘𑀖𑀝𑁆𑀝𑁂𑀲𑀺 𑀖𑀝𑁆𑀝𑁂𑀲𑀺, 𑀓𑀺𑀁 𑀓𑀸𑀭𑀡𑀸 𑀖𑀝𑁆𑀝𑁂𑀲𑀺? 𑀅𑀳𑀫𑁆𑀧𑀺 𑀢𑀁 𑀚𑀸𑀦𑀸𑀫𑀺 𑀚𑀸𑀦𑀸𑀫𑀻’’𑀢𑀺 𑀇𑀫𑀁 𑀫𑀦𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸, ‘‘𑀧𑀜𑁆𑀜𑀸𑀬𑀢𑀺 𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑀦𑁆𑀥𑁂𑀦 𑀦𑀸𑀫 𑀯𑀸𑀬𑀸𑀫𑀁 𑀓𑀢𑁆𑀯𑀸 𑀧𑀕𑀼𑀡𑀁 𑀓𑀢𑀁 𑀲𑀺𑀧𑁆𑀧𑀁 𑀦 𑀧𑀮𑀸𑀬𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀕𑁆𑀕𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸, ‘‘𑀕𑀘𑁆𑀙, 𑀇𑀫𑀁 𑀫𑀦𑁆𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀲𑀺, 𑀅𑀧𑀮𑀸𑀬𑀦𑀢𑁆𑀣𑀸𑀬 𑀧𑀦𑀲𑁆𑀲 𑀦𑀺𑀘𑁆𑀘𑀁 𑀲𑀚𑁆𑀛𑀸𑀬𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀩𑀸𑀭𑀸𑀡𑀲𑀺𑀬𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 ‘‘𑀧𑀼𑀢𑁆𑀢𑁄 𑀫𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁆𑀯𑀸 𑀆𑀕𑀢𑁄’’𑀢𑀺 𑀫𑀳𑀸𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀸𑀲𑀺.

𑀢𑀤𑀸 ¶ 𑀩𑀸𑀭𑀸𑀡𑀲𑀺𑀭𑀸𑀚𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀓𑁄𑀘𑀺 𑀤𑁄𑀲𑁄’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀤𑀺𑀲𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀚𑁆𑀚𑀁 𑀦𑀸𑀫 𑀅𑀢𑁆𑀢𑀦𑁄 𑀦 𑀧𑀜𑁆𑀜𑀸𑀬𑀢𑀺, 𑀧𑀭𑁂𑀲𑀁 𑀧𑀜𑁆𑀜𑀸𑀬𑀢𑀺, 𑀦𑀸𑀕𑀭𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀬𑀁 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸, ‘‘𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑀦𑀼𑀲𑁆𑀲𑀸𑀦𑀁 𑀓𑀣𑀸𑀲𑀮𑁆𑀮𑀸𑀧𑁄 𑀦𑀸𑀫 𑀦𑀸𑀦𑀧𑁆𑀧𑀓𑀸𑀭𑀓𑁄 𑀳𑁄𑀢𑀺, ‘𑀲𑀘𑀸𑀳𑀁 𑀅𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀫𑀺, 𑀧𑀸𑀧𑁂𑀦 𑀅𑀥𑀫𑁆𑀫𑀺𑀓𑁂𑀦 𑀭𑀜𑁆𑀜𑀸 𑀤𑀡𑁆𑀟𑀩𑀮𑀺𑀆𑀤𑀻𑀳𑀺 𑀳𑀢𑀫𑁆𑀳𑀸’𑀢𑀺 𑀯𑀓𑁆𑀔𑀦𑁆𑀢𑀺. ‘𑀲𑀘𑁂 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀫𑀺, 𑀤𑀻𑀖𑀸𑀬𑀼𑀓𑁄 𑀳𑁄𑀢𑀼 𑀦𑁄 𑀭𑀸𑀚𑀸’𑀢𑀺𑀆𑀤𑀻𑀦𑀺 ¶ 𑀯𑀢𑁆𑀯𑀸 𑀫𑀫 𑀕𑀼𑀡𑀁 𑀓𑀣𑁂𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀢𑁂𑀲𑀁 𑀕𑁂𑀳𑀸𑀦𑀁 𑀪𑀺𑀢𑁆𑀢𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑀺𑀘𑀭𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀉𑀫𑀗𑁆𑀕𑀘𑁄𑀭𑀸 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀉𑀫𑀗𑁆𑀕𑀁 𑀪𑀺𑀦𑁆𑀤𑀦𑁆𑀢𑀺 𑀏𑀓𑀉𑀫𑀗𑁆𑀕𑁂𑀦𑁂𑀯 𑀤𑁆𑀯𑁂 𑀕𑁂𑀳𑀸𑀦𑀺 𑀧𑀯𑀺𑀲𑀦𑀢𑁆𑀣𑀸𑀬. 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 𑀕𑁂𑀳𑀘𑁆𑀙𑀸𑀬𑀸𑀬 𑀅𑀝𑁆𑀞𑀸𑀲𑀺. 𑀢𑁂𑀲𑀁 𑀉𑀫𑀗𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀡𑁆𑀟𑀓𑀁 𑀑𑀮𑁄𑀓𑀺𑀢𑀓𑀸𑀮𑁂 𑀫𑀸𑀡𑀯𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀫𑀦𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 ‘‘𑀖𑀝𑁆𑀝𑁂𑀲𑀺 𑀖𑀝𑁆𑀝𑁂𑀲𑀺, 𑀓𑀺𑀁 𑀓𑀸𑀭𑀡𑀸 𑀖𑀝𑁆𑀝𑁂𑀲𑀺? 𑀅𑀳𑀫𑁆𑀧𑀺 𑀢𑀁 𑀚𑀸𑀦𑀸𑀫𑀺 𑀚𑀸𑀦𑀸𑀫𑀻’’𑀢𑀺 𑀆𑀳. 𑀢𑁂 𑀢𑀁 𑀲𑀼𑀢𑁆𑀯𑀸, ‘‘𑀇𑀫𑀺𑀦𑀸 𑀓𑀺𑀭𑀫𑁆𑀳𑀸 𑀜𑀸𑀢𑀸, 𑀇𑀤𑀸𑀦𑀺 𑀦𑁄 𑀦𑀸𑀲𑁂𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸 𑀪𑀻𑀢𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀭𑀸𑀚𑀸 𑀢𑁂 𑀧𑀮𑀸𑀬𑀦𑁆𑀢𑁂 𑀤𑀺𑀲𑁆𑀯𑀸 𑀇𑀢𑀭𑀲𑁆𑀲 𑀘 𑀫𑀦𑁆𑀢𑀲𑀚𑁆𑀛𑀸𑀬𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀕𑁂𑀳𑀜𑁆𑀜𑁂𑀯 𑀯𑀯𑀢𑁆𑀣𑀧𑁂𑀢𑁆𑀯𑀸 𑀦𑀸𑀕𑀭𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀲𑁄 𑀯𑀺𑀪𑀸𑀢𑀸𑀬 𑀧𑀦 𑀭𑀢𑁆𑀢𑀺𑀬𑀸 𑀧𑀸𑀢𑁄𑀯𑁂𑀓𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙 𑀪𑀡𑁂, 𑀅𑀲𑀼𑀓𑀯𑀻𑀣𑀺𑀬𑀁 𑀦𑀸𑀫 𑀬𑀲𑁆𑀫𑀺𑀁 𑀕𑁂𑀳𑁂 𑀉𑀫𑀗𑁆𑀕𑁄 𑀪𑀺𑀦𑁆𑀦𑁄, 𑀢𑀢𑁆𑀣 𑀢𑀓𑁆𑀓𑀲𑀺𑀮𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀫𑀸𑀡𑀯𑁄 𑀅𑀢𑁆𑀣𑀺, 𑀢𑀁 𑀆𑀦𑁂𑀳𑀻’’𑀢𑀺. 𑀲𑁄 ¶ 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀯𑀢𑁆𑀯𑀸 𑀫𑀸𑀡𑀯𑀁 𑀆𑀦𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀢𑁆𑀯𑀁, 𑀢𑀸𑀢, 𑀢𑀓𑁆𑀓𑀲𑀺𑀮𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀫𑀸𑀡𑀯𑁄’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀢𑀁 𑀲𑀺𑀧𑁆𑀧𑀁 𑀤𑁂𑀳𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀲𑀫𑀸𑀦𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. 𑀭𑀸𑀚𑀸𑀧𑀺 𑀢𑀣𑀸 𑀓𑀢𑁆𑀯𑀸 𑀫𑀦𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀢𑁂 ¶ 𑀆𑀘𑀭𑀺𑀬𑀪𑀸𑀕𑁄’’𑀢𑀺 𑀲𑀳𑀲𑁆𑀲𑀁 𑀅𑀤𑀸𑀲𑀺.

𑀢𑀤𑀸 𑀲𑁂𑀦𑀸𑀧𑀢𑀺 𑀭𑀜𑁆𑀜𑁄 𑀓𑀧𑁆𑀧𑀓𑀁 𑀆𑀳 𑁋 ‘‘𑀓𑀤𑀸 𑀭𑀜𑁆𑀜𑁄 𑀫𑀲𑁆𑀲𑀼𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀲𑁆𑀯𑁂 𑀯𑀸 𑀧𑀭𑀲𑀼𑀯𑁂 𑀯𑀸’’𑀢𑀺. 𑀲𑁄 𑀢𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀓𑀺𑀘𑁆𑀘𑀁 𑀫𑁂 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸, ‘‘𑀓𑀺𑀁, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀭𑀜𑁆𑀜𑁄 𑀫𑀲𑁆𑀲𑀼𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀔𑀼𑀭𑀁 𑀅𑀢𑀺𑀯𑀺𑀬 𑀧𑀳𑀁𑀲𑀺𑀢𑁆𑀯𑀸 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤, 𑀢𑁆𑀯𑀁 𑀲𑁂𑀦𑀸𑀧𑀢𑀺 𑀪𑀯𑀺𑀲𑁆𑀲𑀲𑀺, 𑀅𑀳𑀁 𑀭𑀸𑀚𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑁄 𑀫𑀲𑁆𑀲𑀼𑀓𑀫𑁆𑀫𑀓𑀭𑀡𑀤𑀺𑀯𑀲𑁂 𑀕𑀦𑁆𑀥𑁄𑀤𑀓𑁂𑀦 𑀫𑀲𑁆𑀲𑀼𑀁 𑀢𑁂𑀫𑁂𑀢𑁆𑀯𑀸 𑀔𑀼𑀭𑀁 𑀧𑀳𑀁𑀲𑀺𑀢𑁆𑀯𑀸 𑀦𑀮𑀸𑀝𑀦𑁆𑀢𑁂 𑀕𑀳𑁂𑀢𑁆𑀯𑀸, ‘‘𑀔𑀼𑀭𑁄 𑀣𑁄𑀓𑀁 𑀓𑀼𑀡𑁆𑀞𑀥𑀸𑀭𑁄, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀦 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀔𑀼𑀭𑀁 𑀧𑀳𑀁𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀫𑀦𑁆𑀢𑀁 𑀲𑀭𑀺𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 ‘‘𑀖𑀝𑁆𑀝𑁂𑀲𑀺 𑀖𑀝𑁆𑀝𑁂𑀲𑀺, 𑀓𑀺𑀁 𑀓𑀸𑀭𑀡𑀸 ¶ 𑀖𑀝𑁆𑀝𑁂𑀲𑀺? 𑀅𑀳𑀫𑁆𑀧𑀺 𑀢𑀁 𑀚𑀸𑀦𑀸𑀫𑀺 𑀚𑀸𑀦𑀸𑀫𑀻’’𑀢𑀺 𑀆𑀳. 𑀦𑁆𑀳𑀸𑀧𑀺𑀢𑀲𑁆𑀲 𑀦𑀮𑀸𑀝𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀲𑁄 ‘‘𑀚𑀸𑀦𑀸𑀢𑀺 𑀫𑀫 𑀓𑀸𑀭𑀡𑀁 𑀭𑀸𑀚𑀸’’𑀢𑀺 𑀪𑀻𑀢𑁄 𑀔𑀼𑀭𑀁 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀭𑀸𑀚𑀸𑀦𑁄 𑀦𑀸𑀫 𑀙𑁂𑀓𑀸 𑀳𑁄𑀦𑁆𑀢𑀺, 𑀢𑁂𑀦 𑀢𑀁 𑀏𑀯𑀫𑀸𑀳 𑁋 ‘‘𑀅𑀭𑁂, 𑀤𑀼𑀝𑁆𑀞, 𑀦𑁆𑀳𑀸𑀧𑀺𑀢, ‘𑀦 𑀫𑀁 𑀭𑀸𑀚𑀸 𑀚𑀸𑀦𑀸𑀢𑀻’𑀢𑀺 𑀲𑀜𑁆𑀜𑀁 𑀓𑀭𑁄𑀲𑀻’’𑀢𑀺. ‘‘𑀅𑀪𑀬𑀁 𑀫𑁂 𑀤𑁂𑀳𑀺, 𑀤𑁂𑀯𑀸’’𑀢𑀺. ‘‘𑀳𑁄𑀢𑀼, 𑀫𑀸 𑀪𑀸𑀬𑀺, 𑀓𑀣𑁂𑀳𑀻’’𑀢𑀺. 𑀲𑁂𑀦𑀸𑀧𑀢𑀺 𑀫𑁂, 𑀤𑁂𑀯, 𑀲𑀳𑀲𑁆𑀲𑀁 𑀤𑀢𑁆𑀯𑀸, ‘‘𑀭𑀜𑁆𑀜𑁄 𑀫𑀲𑁆𑀲𑀼𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤, 𑀅𑀳𑀁 𑀭𑀸𑀚𑀸 𑀳𑀼𑀢𑁆𑀯𑀸 𑀢𑀁 𑀲𑁂𑀦𑀸𑀧𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀸𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀆𑀘𑀭𑀺𑀬𑀁 𑀫𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁂𑀦𑀸𑀧𑀢𑀺𑀁 ¶ 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀫𑁆𑀪𑁄, 𑀲𑁂𑀦𑀸𑀧𑀢𑀺, 𑀓𑀺𑀁 𑀦𑀸𑀫 𑀢𑀬𑀸 𑀫𑀫 𑀲𑀦𑁆𑀢𑀺𑀓𑀸 𑀦 𑀮𑀤𑁆𑀥𑀁, 𑀇𑀤𑀸𑀦𑀺 𑀢𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀫𑀺, 𑀫𑀫 𑀭𑀝𑁆𑀞𑀸 𑀦𑀺𑀓𑁆𑀔𑀫𑀸𑀳𑀻’’𑀢𑀺 𑀢𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀘𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀢𑁆𑀯𑀸 𑀢𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. ‘‘𑀲𑁄 𑀢𑀤𑀸 𑀘𑀽𑀴𑀧𑀦𑁆𑀣𑀓𑁄 𑀅𑀳𑁄𑀲𑀺, 𑀲𑀢𑁆𑀣𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄’’𑀢𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸, ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀺 𑀘𑀽𑀴𑀧𑀦𑁆𑀣𑀓𑁄 𑀤𑀦𑁆𑀥𑁄𑀬𑁂𑀯 𑀅𑀳𑁄𑀲𑀺, 𑀢𑀤𑀸𑀧𑀺𑀲𑁆𑀲𑀸𑀳𑀁 𑀅𑀯𑀲𑁆𑀲𑀬𑁄 𑀳𑀼𑀢𑁆𑀯𑀸 𑀢𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑁂 ¶ 𑀧𑀢𑀺𑀝𑁆𑀞𑀸𑀧𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀏𑀓𑀤𑀺𑀯𑀲𑀁 ‘‘𑀅𑀳𑁄 𑀲𑀢𑁆𑀣𑀸 𑀘𑀽𑀴𑀧𑀦𑁆𑀣𑀓𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄’’𑀢𑀺 𑀓𑀣𑀸𑀬 𑀲𑀫𑀼𑀝𑁆𑀞𑀺𑀢𑀸𑀬 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑁂 𑀅𑀢𑀻𑀢𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑁋

‘‘𑀅𑀧𑁆𑀧𑀓𑁂𑀦𑀸𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪) 𑁋

𑀕𑀸𑀣𑀁 𑀯𑀢𑁆𑀯𑀸, ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑀸𑀳𑀁 𑀇𑀫𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀅𑀯𑀲𑁆𑀲𑀬𑁄 𑀅𑀳𑁄𑀲𑀺𑀫𑁂𑀯. 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀇𑀫𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀓𑀼𑀝𑀼𑀫𑁆𑀩𑀲𑁆𑀲. 𑀢𑀤𑀸 𑀳𑀺 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑁄 𑀘𑀽𑀴𑀧𑀦𑁆𑀣𑀓𑁄 𑀅𑀳𑁄𑀲𑀺, 𑀘𑀽𑀴𑀲𑁂𑀝𑁆𑀞𑀺 𑀧𑀦 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀦𑀓𑁆𑀔𑀢𑁆𑀢𑀓𑁄𑀯𑀺𑀤𑁄 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺.

𑀧𑀼𑀦𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀘𑀽𑀴𑀧𑀦𑁆𑀣𑀓𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀘𑀢𑀼𑀧𑁆𑀧𑀤𑀁 𑀕𑀸𑀣𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀯𑀻𑀭𑀺𑀬𑀁 𑀅𑀦𑁄𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 ¶ , 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀲𑀦𑁂 𑀆𑀭𑀤𑁆𑀥𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀲𑀸𑀫𑀺𑀓𑁄 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫.

‘‘𑀉𑀝𑁆𑀞𑀸𑀦𑁂𑀦𑀧𑁆𑀧𑀫𑀸𑀤𑁂𑀦 ¶ , 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀤𑀻𑀧𑀁 𑀓𑀬𑀺𑀭𑀸𑀣 𑀫𑁂𑀥𑀸𑀯𑀻, 𑀬𑀁 𑀑𑀖𑁄 𑀦𑀸𑀪𑀺𑀓𑀻𑀭𑀢𑀻’’𑀢𑀺.

𑀢𑀢𑁆𑀣 𑀤𑀻𑀧𑀁 𑀓𑀬𑀺𑀭𑀸𑀣𑀸𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀦 𑀉𑀝𑁆𑀞𑀸𑀦𑁂𑀦, 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀅𑀧𑁆𑀧𑀫𑀸𑀤𑁂𑀦, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑀗𑁆𑀔𑀸𑀢𑁂𑀦 𑀲𑀁𑀬𑀫𑁂𑀦, 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀫𑁂𑀥𑀸𑀯𑀻 𑀇𑀫𑀲𑁆𑀫𑀺𑀁 𑀅𑀢𑀺𑀯𑀺𑀬 𑀤𑀼𑀮𑁆𑀮𑀪𑀧𑀢𑀺𑀝𑁆𑀞𑀢𑀸𑀬 𑀅𑀢𑀺𑀕𑀫𑁆𑀪𑀻𑀭𑁂 𑀲𑀁𑀲𑀸𑀭𑀲𑀸𑀕𑀭𑁂 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁 𑀤𑀻𑀧𑀁 𑀓𑀬𑀺𑀭𑀸𑀣 𑀓𑀭𑁂𑀬𑁆𑀬, 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑀁? 𑀬𑀁 𑀑𑀖𑁄 𑀦𑀸𑀪𑀺𑀓𑀻𑀭𑀢𑀻𑀢𑀺 𑀬𑀁 𑀘𑀢𑀼𑀩𑁆𑀩𑀺𑀥𑁄𑀧𑀺 𑀓𑀺𑀮𑁂𑀲𑁄𑀖𑁄 𑀅𑀪𑀺𑀓𑀺𑀭𑀺𑀢𑀼𑀁 𑀯𑀺𑀤𑁆𑀥𑀁𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀅𑀭𑀳𑀢𑁆𑀢𑀁 𑀑𑀖𑁂𑀦 𑀅𑀪𑀺𑀓𑀺𑀭𑀺𑀢𑀼𑀦𑁆𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀏𑀯𑀁 𑀤𑁂𑀲𑀦𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀩𑀸𑀮𑀦𑀓𑁆𑀔𑀢𑁆𑀢𑀲𑀗𑁆𑀖𑀼𑀝𑁆𑀞𑀯𑀢𑁆𑀣𑀼

𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀻𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀸𑀮𑀦𑀓𑁆𑀔𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀸𑀯𑀢𑁆𑀣𑀺𑀬𑀁 𑀩𑀸𑀮𑀦𑀓𑁆𑀔𑀢𑁆𑀢𑀁 𑀦𑀸𑀫 𑀲𑀗𑁆𑀖𑀼𑀝𑁆𑀞𑀁. 𑀢𑀲𑁆𑀫𑀺𑀁 𑀦𑀓𑁆𑀔𑀢𑁆𑀢𑁂 𑀩𑀸𑀮𑀸 𑀤𑀼𑀫𑁆𑀫𑁂𑀥𑀺𑀦𑁄 𑀚𑀦𑀸 𑀙𑀸𑀭𑀺𑀓𑀸𑀬 𑀘𑁂𑀯 𑀕𑁄𑀫𑀬𑁂𑀦 𑀘 𑀲𑀭𑀻𑀭𑀁 𑀫𑀓𑁆𑀔𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀲𑀩𑁆𑀪𑀁 𑀪𑀡𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀓𑀺𑀜𑁆𑀘𑀺 𑀜𑀸𑀢𑀺 𑀲𑀼𑀳𑀚𑁆𑀚𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀤𑀺𑀲𑁆𑀯𑀸 𑀮𑀚𑁆𑀚𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀤𑁆𑀯𑀸𑀭𑁂 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀅𑀲𑀩𑁆𑀪𑀁 𑀪𑀡𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀢𑁂𑀲𑀁 𑀅𑀲𑀩𑁆𑀪𑀁 𑀲𑁄𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀬𑀣𑀸𑀩𑀮𑀁 𑀅𑀟𑁆𑀠𑀁 𑀯𑀸 𑀧𑀸𑀤𑀁 𑀯𑀸 𑀓𑀳𑀸𑀧𑀡𑀁 𑀯𑀸 𑀧𑁂𑀲𑁂𑀦𑁆𑀢𑀺. 𑀢𑁂 𑀢𑁂𑀲𑀁 𑀤𑁆𑀯𑀸𑀭𑁂 𑀮𑀤𑁆𑀥𑀁 𑀮𑀤𑁆𑀥𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀢𑀤𑀸 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀧𑀜𑁆𑀘 𑀓𑁄𑀝𑀺𑀫𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑀸 𑀯𑀲𑀦𑁆𑀢𑀺, 𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀲𑀸𑀲𑀦𑀁 𑀧𑁂𑀲𑀬𑀺𑀁𑀲𑀼 𑁋 ‘‘𑀪𑀕𑀯𑀸, 𑀪𑀦𑁆𑀢𑁂, 𑀲𑀢𑁆𑀢𑀸𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀦𑀕𑀭𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀳𑁄𑀢𑀽’’𑀢𑀺. 𑀢𑀜𑁆𑀘 𑀧𑀦 𑀲𑀢𑁆𑀢𑀸𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑁂𑀬𑁂𑀯 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀳𑀺𑀡𑀺𑀁𑀲𑀼, 𑀲𑀬𑀫𑁆𑀧𑀺 𑀕𑁂𑀳𑀸 𑀦 𑀦𑀺𑀓𑁆𑀔𑀫𑀺𑀁𑀲𑀼. 𑀢𑁂 𑀦𑀓𑁆𑀔𑀢𑁆𑀢𑁂 𑀧𑀦 𑀧𑀭𑀺𑀬𑁄𑀲𑀺𑀢𑁂 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸, ‘‘𑀪𑀦𑁆𑀢𑁂, 𑀅𑀢𑀺𑀤𑀼𑀓𑁆𑀔𑁂𑀦 𑀦𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀩𑀸𑀮𑀸𑀦𑀁 𑀅𑀲𑀩𑁆𑀪𑀸𑀦𑀺 𑀲𑀼𑀡𑀦𑁆𑀢𑀸𑀦𑀁 ¶ 𑀓𑀡𑁆𑀡𑀸 𑀪𑀺𑀚𑁆𑀚𑀦𑀸𑀓𑀸𑀭𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺, 𑀓𑁄𑀘𑀺 𑀓𑀲𑁆𑀲𑀘𑀺 ¶ 𑀦 𑀮𑀚𑁆𑀚𑀢𑀺, 𑀢𑁂𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀦𑀸𑀤𑀫𑁆𑀳, 𑀫𑀬𑀫𑁆𑀧𑀺 𑀕𑁂𑀳𑀢𑁄 𑀦 𑀦𑀺𑀓𑁆𑀔𑀫𑀺𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀩𑀸𑀮𑀸𑀦𑀁 𑀤𑀼𑀫𑁆𑀫𑁂𑀥𑀸𑀦𑀁 𑀓𑀺𑀭𑀺𑀬𑀸 𑀦𑀸𑀫 𑀏𑀯𑀭𑀽𑀧𑀸 𑀳𑁄𑀢𑀺, 𑀫𑁂𑀥𑀸𑀯𑀺𑀦𑁄 𑀧𑀦 𑀥𑀦𑀲𑀸𑀭𑀁 𑀯𑀺𑀬 𑀅𑀧𑁆𑀧𑀫𑀸𑀤𑀁 𑀭𑀓𑁆𑀔𑀺𑀢𑁆𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬.

‘‘𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀩𑀸𑀮𑀸 𑀤𑀼𑀫𑁆𑀫𑁂𑀥𑀺𑀦𑁄 𑀚𑀦𑀸;

𑀅𑀧𑁆𑀧𑀫𑀸𑀤𑀜𑁆𑀘 𑀫𑁂𑀥𑀸𑀯𑀻, 𑀥𑀦𑀁 𑀲𑁂𑀝𑁆𑀞𑀁𑀯 𑀭𑀓𑁆𑀔𑀢𑀺.

𑁨𑁭.

‘‘𑀫𑀸 ¶ 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑁂𑀣, 𑀫𑀸 𑀓𑀸𑀫𑀭𑀢𑀺𑀲𑀦𑁆𑀣𑀯𑀁;

𑀅𑀧𑁆𑀧𑀫𑀢𑁆𑀢𑁄 𑀳𑀺 𑀛𑀸𑀬𑀦𑁆𑀢𑁄, 𑀧𑀧𑁆𑀧𑁄𑀢𑀺 𑀯𑀺𑀧𑀼𑀮𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀩𑀸𑀮𑀸𑀢𑀺 𑀩𑀸𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀁 𑀅𑀚𑀸𑀦𑀦𑁆𑀢𑀸. 𑀤𑀼𑀫𑁆𑀫𑁂𑀥𑀺𑀦𑁄𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀢𑁂 𑀧𑀫𑀸𑀤𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀧𑀫𑀸𑀤𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀺, 𑀧𑀫𑀸𑀤𑁂𑀦 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀫𑁂𑀥𑀸𑀯𑀻𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀦 𑀧𑀡𑁆𑀟𑀺𑀢𑁄 𑀓𑀼𑀮𑀯𑀁𑀲𑀸𑀕𑀢𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀲𑀢𑁆𑀢𑀭𑀢𑀦𑀥𑀦𑀁 𑀯𑀺𑀬 𑀅𑀧𑁆𑀧𑀫𑀸𑀤𑀁 𑀭𑀓𑁆𑀔𑀢𑀺. 𑀬𑀣𑀸 𑀳𑀺 𑀉𑀢𑁆𑀢𑀫𑀁 𑀥𑀦𑀁 𑀦𑀺𑀲𑁆𑀲𑀸𑀬 ‘‘𑀓𑀸𑀫𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑁆𑀲𑀸𑀫, 𑀧𑀭𑀮𑁄𑀓𑀕𑀫𑀦𑀫𑀕𑁆𑀕𑀁 𑀲𑁄𑀥𑁂𑀲𑁆𑀲𑀸𑀫𑀸’’𑀢𑀺 𑀥𑀦𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀸 𑀢𑀁 𑀭𑀓𑁆𑀔𑀦𑁆𑀢𑀺, 𑀏𑀯𑀁 𑀧𑀡𑁆𑀟𑀺𑀢𑁄𑀧𑀺 𑀅𑀧𑁆𑀧𑀫𑀢𑁆𑀢𑁄 ‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 ¶ 𑀧𑀝𑀺𑀮𑀪𑀺𑀲𑁆𑀲𑀸𑀫𑀺, 𑀫𑀕𑁆𑀕𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀙 𑀅𑀪𑀺𑀜𑁆𑀜𑀸 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀧𑁆𑀧𑀫𑀸𑀤𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑁄 𑀥𑀦𑀁 𑀲𑁂𑀝𑁆𑀞𑀁𑀯 𑀅𑀧𑁆𑀧𑀫𑀸𑀤𑀁 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀫𑀸 𑀧𑀫𑀸𑀤𑀦𑁆𑀢𑀺 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀫𑀸 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑁂𑀣 𑀫𑀸 𑀧𑀫𑀸𑀤𑁂𑀦 𑀓𑀸𑀮𑀁 𑀯𑀻𑀢𑀺𑀦𑀸𑀫𑀬𑀺𑀢𑁆𑀣. 𑀫𑀸 𑀓𑀸𑀫𑀭𑀢𑀺𑀲𑀦𑁆𑀣𑀯𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀭𑀢𑀺𑀲𑀗𑁆𑀔𑀸𑀢𑀁 𑀢𑀡𑁆𑀳𑀸𑀲𑀦𑁆𑀣𑀯𑀫𑁆𑀧𑀺 𑀫𑀸 𑀅𑀦𑀼𑀬𑀼𑀜𑁆𑀚𑁂𑀣 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣 𑀫𑀸 𑀧𑀝𑀺𑀮𑀪𑀺𑀢𑁆𑀣. 𑀅𑀧𑁆𑀧𑀫𑀢𑁆𑀢𑁄 𑀳𑀻𑀢𑀺 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀳𑀺 𑀅𑀧𑁆𑀧𑀫𑀢𑁆𑀢𑁄 𑀛𑀸𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 𑀯𑀺𑀧𑀼𑀮𑀁 𑀉𑀴𑀸𑀭𑀁 𑀦𑀺𑀩𑁆𑀩𑀸𑀦𑀲𑀼𑀔𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀩𑀸𑀮𑀦𑀓𑁆𑀔𑀢𑁆𑀢𑀲𑀗𑁆𑀖𑀼𑀝𑁆𑀞𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑀧𑀫𑀸𑀤𑀁 ¶ 𑀅𑀧𑁆𑀧𑀫𑀸𑀤𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀣𑁂𑀭𑁄 𑀧𑀺𑀧𑁆𑀨𑀮𑀺𑀕𑀼𑀳𑀸𑀬𑀁 𑀯𑀺𑀳𑀭𑀦𑁆𑀢𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀧𑀫𑀢𑁆𑀢𑁂 𑀘 𑀅𑀧𑁆𑀧𑀫𑀢𑁆𑀢𑁂 𑀘 𑀉𑀤𑀓𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀲𑀼 𑀘𑀯𑀦𑀓𑁂 𑀉𑀧𑀧𑀚𑁆𑀚𑀦𑀓𑁂 𑀘 𑀲𑀢𑁆𑀢𑁂 ¶ 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑀓𑁄𑀯 ¶ ‘‘𑀓𑁂𑀦 𑀦𑀼 𑀔𑁄 𑀯𑀺𑀳𑀸𑀭𑁂𑀦 𑀅𑀚𑁆𑀚 𑀫𑀫 𑀧𑀼𑀢𑁆𑀢𑁄 𑀓𑀲𑁆𑀲𑀧𑁄 𑀯𑀺𑀳𑀭𑀢𑀻’’𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀳𑀭𑀢𑀻’’𑀢𑀺 𑀜𑀢𑁆𑀯𑀸 ‘‘𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑁄 𑀦𑀸𑀫 𑀩𑀼𑀤𑁆𑀥𑀜𑀸𑀡𑁂𑀦𑀧𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑁄, 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀚𑀸𑀦𑀸𑀧𑁂𑀢𑁆𑀯𑀸 𑀘𑀯𑀦𑀲𑀢𑁆𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑁂 𑀚𑀸𑀦𑀺𑀢𑀼𑀁 𑀢𑀯 𑀅𑀯𑀺𑀲𑀬𑁄, 𑀓𑀲𑁆𑀲𑀧, 𑀅𑀧𑁆𑀧𑀫𑀢𑁆𑀢𑀓𑁄 𑀢𑀯 𑀯𑀺𑀲𑀬𑁄, 𑀲𑀩𑁆𑀩𑀲𑁄 𑀧𑀦 𑀘𑀯𑀦𑁆𑀢𑁂 𑀘 𑀉𑀧𑀧𑀚𑁆𑀚𑀦𑁆𑀢𑁂 𑀘 𑀚𑀸𑀦𑀺𑀢𑀼𑀁 𑀧𑀲𑁆𑀲𑀺𑀢𑀼𑀁 𑀩𑀼𑀤𑁆𑀥𑀸𑀦𑀫𑁂𑀯 𑀯𑀺𑀲𑀬𑁄’’𑀢𑀺 𑀯𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮.

‘‘𑀧𑀫𑀸𑀤𑀁 𑀅𑀧𑁆𑀧𑀫𑀸𑀤𑁂𑀦, 𑀬𑀤𑀸 𑀦𑀼𑀤𑀢𑀺 𑀧𑀡𑁆𑀟𑀺𑀢𑁄;

𑀧𑀜𑁆𑀜𑀸𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀅𑀲𑁄𑀓𑁄 𑀲𑁄𑀓𑀺𑀦𑀺𑀁 𑀧𑀚𑀁;

𑀧𑀩𑁆𑀩𑀢𑀝𑁆𑀞𑁄𑀯 𑀪𑀽𑀫𑀝𑁆𑀞𑁂, 𑀥𑀻𑀭𑁄 𑀩𑀸𑀮𑁂 𑀅𑀯𑁂𑀓𑁆𑀔𑀢𑀻’’𑀢𑀺.

𑀢𑀢𑁆𑀣 𑀦𑀼𑀤𑀢𑀻𑀢𑀺 𑀬𑀣𑀸 𑀦𑀸𑀫 𑀧𑁄𑀓𑁆𑀔𑀭𑀡𑀺𑀁 𑀧𑀯𑀺𑀲𑀦𑁆𑀢𑀁 𑀦𑀯𑁄𑀤𑀓𑀁 𑀧𑀼𑀭𑀸𑀡𑁄𑀤𑀓𑀁 𑀔𑁄𑀪𑁂𑀢𑁆𑀯𑀸 𑀢𑀲𑁆𑀲𑁄𑀓𑀸𑀲𑀁 𑀅𑀤𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀫𑀢𑁆𑀣𑀓𑀫𑀢𑁆𑀣𑀓𑁂𑀦 𑀧𑀮𑀸𑀬𑀦𑁆𑀢𑀁 𑀦𑀼𑀤𑀢𑀺 𑀦𑀻𑀳𑀭𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀩𑁆𑀭𑀽𑀳𑁂𑀦𑁆𑀢𑁄 𑀧𑀫𑀸𑀤𑀲𑁆𑀲𑁄𑀓𑀸𑀲𑀁 𑀅𑀤𑀢𑁆𑀯𑀸 𑀬𑀤𑀸 𑀅𑀧𑁆𑀧𑀫𑀸𑀤𑀯𑁂𑀕𑁂𑀦 𑀢𑀁 𑀦𑀼𑀤𑀢𑀺 𑀦𑀻𑀳𑀭𑀢𑀺, 𑀅𑀣 𑀲𑁄 𑀧𑀦𑀼𑀦𑁆𑀦𑀧𑀫𑀸𑀤𑁄 𑀅𑀘𑁆𑀘𑀼𑀕𑁆𑀕𑀢𑀢𑁆𑀣𑁂𑀦 𑀧𑀭𑀺𑀲𑀼𑀤𑁆𑀥𑀁 𑀤𑀺𑀩𑁆𑀩𑀘𑀓𑁆𑀔𑀼𑀲𑀗𑁆𑀔𑀸𑀢𑀁 𑀧𑀜𑁆𑀜𑀸𑀧𑀸𑀲𑀸𑀤𑀁 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁄 𑀢𑀸𑀬 𑀧𑀝𑀺𑀧𑀤𑀸𑀬 𑀦𑀺𑀲𑁆𑀲𑁂𑀡𑀺𑀬𑀸 𑀧𑀸𑀲𑀸𑀤𑀁 𑀯𑀺𑀬 𑀆𑀭𑀼𑀬𑁆𑀳 𑀧𑀳𑀻𑀦𑀲𑁄𑀓𑀲𑀮𑁆𑀮𑀢𑀸𑀬 𑀅𑀲𑁄𑀓𑁄, 𑀅𑀧𑁆𑀧𑀳𑀻𑀦𑀲𑁄𑀓𑀲𑀮𑁆𑀮𑀢𑀸𑀬 𑀲𑁄𑀓𑀺𑀦𑀺𑀁 𑀧𑀚𑀁 𑀲𑀢𑁆𑀢𑀦𑀺𑀓𑀸𑀬𑀁 𑀘𑀯𑀫𑀸𑀦𑀜𑁆𑀘𑁂𑀯 𑀉𑀧𑀧𑀚𑁆𑀚𑀫𑀸𑀦𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀅𑀯𑁂𑀓𑁆𑀔𑀢𑀺 𑀧𑀲𑁆𑀲𑀢𑀺. 𑀬𑀣𑀸 𑀓𑀺𑀁? 𑀧𑀩𑁆𑀩𑀢𑀝𑁆𑀞𑁄𑀯 ¶ 𑀪𑀽𑀫𑀝𑁆𑀞𑁂𑀢𑀺 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀺𑀢𑁄 𑀪𑀽𑀫𑀺𑀬𑀁 𑀞𑀺𑀢𑁂, 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸 𑀧𑀦 𑀞𑀺𑀢𑁄 𑀧𑀸𑀲𑀸𑀤𑀧𑀭𑀺𑀯𑁂𑀡𑁂 𑀞𑀺𑀢𑁂 𑀅𑀓𑀺𑀘𑁆𑀙𑁂𑀦 𑀅𑀯𑁂𑀓𑁆𑀔𑀢𑀺, 𑀢𑀣𑀸 𑀲𑁄𑀧𑀺 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀫𑀳𑀸𑀔𑀻𑀡𑀸𑀲𑀯𑁄 𑀅𑀲𑀫𑀼𑀘𑁆𑀙𑀺𑀦𑁆𑀦𑀯𑀝𑁆𑀝𑀩𑀻𑀚𑁂 𑀩𑀸𑀮𑁂 𑀘𑀯𑀦𑁆𑀢𑁂 𑀘 𑀉𑀧𑀧𑀚𑁆𑀚𑀦𑁆𑀢𑁂 𑀘 𑀅𑀓𑀺𑀘𑁆𑀙𑁂𑀦 𑀅𑀯𑁂𑀓𑁆𑀔𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀲𑀘𑁆𑀙𑀺𑀓𑀭𑀺𑀁𑀲𑀽𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀫𑀢𑁆𑀢𑀸𑀧𑀫𑀢𑁆𑀢𑀤𑁆𑀯𑁂𑀲𑀳𑀸𑀬𑀓𑀯𑀢𑁆𑀣𑀼

𑀅𑀧𑁆𑀧𑀫𑀢𑁆𑀢𑁄 ¶ 𑀧𑀫𑀢𑁆𑀢𑁂𑀲𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀲𑀳𑀸𑀬𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀆𑀭𑀜𑁆𑀜𑀓𑀯𑀺𑀳𑀸𑀭𑀁 𑀧𑀯𑀺𑀲𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀓𑀺𑀭 𑀓𑀸𑀮𑀲𑁆𑀲𑁂𑀯 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀲𑀚𑁆𑀚𑁂𑀢𑁆𑀯𑀸 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀬𑀸𑀫𑀁 𑀯𑀺𑀲𑀺𑀩𑁆𑀩𑀫𑀸𑀦𑁄 𑀦𑀺𑀲𑀻𑀤𑀢𑀺. 𑀏𑀓𑁄 𑀅𑀧𑁆𑀧𑀫𑀢𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀇𑀢𑀭𑀁 𑀑𑀯𑀤𑀢𑀺, ‘‘𑀆𑀯𑀼𑀲𑁄, 𑀫𑀸 𑀏𑀯𑀁 𑀓𑀭𑀺, 𑀧𑀫𑀢𑁆𑀢𑀲𑁆𑀲 𑀳𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀲𑀓𑀖𑀭𑀲𑀤𑀺𑀲𑀸. 𑀩𑀼𑀤𑁆𑀥𑀸 𑀦𑀸𑀫 𑀲𑀸𑀞𑁂𑀬𑁆𑀬𑁂𑀦 𑀆𑀭𑀸𑀥𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀲𑁄 𑀢𑀲𑁆𑀲𑁄𑀯𑀸𑀤𑀁 𑀦 𑀲𑀼𑀡𑀸𑀢𑀺. 𑀇𑀢𑀭𑁄 ‘‘𑀦𑀸𑀬𑀁 𑀯𑀘𑀦𑀓𑁆𑀔𑀫𑁄’’𑀢𑀺 𑀢𑀁 𑀅𑀯𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄𑀯 𑀲𑀫𑀡𑀥𑀫𑁆𑀫𑀫𑀓𑀸𑀲𑀺. 𑀅𑀮𑀲𑀢𑁆𑀣𑁂𑀭𑁄𑀧𑀺 ¶ 𑀧𑀞𑀫𑀬𑀸𑀫𑁂 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀇𑀢𑀭𑀲𑁆𑀲 𑀘𑀗𑁆𑀓𑀫𑀺𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀝𑁆𑀞𑀓𑀸𑀮𑁂 𑀧𑀯𑀺𑀲𑀺𑀢𑁆𑀯𑀸, ‘‘𑀫𑀳𑀸𑀓𑀼𑀲𑀻𑀢, 𑀢𑁆𑀯𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀬𑀦𑀢𑁆𑀣𑀸𑀬 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄𑀲𑀺, 𑀓𑀺𑀁 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀼𑀧𑀢𑀺. 𑀇𑀢𑀭𑁄𑀧𑀺 𑀫𑀚𑁆𑀛𑀺𑀫𑀬𑀸𑀫𑁂 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀘𑁆𑀘𑀼𑀝𑁆𑀞𑀸𑀬 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀲𑁄 𑀏𑀯𑀁 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀢𑀭𑁄 𑀧𑀫𑀸𑀤𑁂𑀦𑁂𑀯 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀢𑁂 𑀯𑀼𑀝𑁆𑀞𑀯𑀲𑁆𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸, ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀢𑁆𑀣, 𑀓𑀘𑁆𑀘𑀺 𑀯𑁄 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀧𑀞𑀫𑀁 𑀧𑀫𑀢𑁆𑀢𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀓𑀼𑀢𑁄, 𑀪𑀦𑁆𑀢𑁂, 𑀏𑀢𑀲𑁆𑀲 𑀅𑀧𑁆𑀧𑀫𑀸𑀤𑁄, 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀻’’𑀢𑀺. ‘‘𑀢𑁆𑀯𑀁 𑀧𑀦 𑀪𑀺𑀓𑁆𑀔𑀽’’𑀢𑀺. ‘‘𑀅𑀳𑀁, 𑀪𑀦𑁆𑀢𑁂, 𑀓𑀸𑀮𑀲𑁆𑀲𑁂𑀯 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀲𑀚𑁆𑀚𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀯𑀺𑀲𑀺𑀩𑁆𑀩𑁂𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑀺𑀤𑁆𑀤𑀸𑀬𑀦𑁆𑀢𑁄𑀯 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀺’’𑀦𑁆𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁆𑀯𑀁 𑀧𑀫𑀢𑁆𑀢𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘𑀅𑀧𑁆𑀧𑀫𑀢𑁆𑀢𑁄𑀫𑁆𑀳𑀻’𑀢𑀺 𑀯𑀤𑀲𑀺, 𑀅𑀧𑁆𑀧𑀫𑀢𑁆𑀢𑀁 𑀧𑀦 𑀧𑀫𑀢𑁆𑀢𑀁 𑀓𑀭𑁄𑀲𑀻’’𑀢𑀺 𑀆𑀳. 𑀧𑀼𑀦 𑀧𑀫𑀸𑀤𑁂 𑀤𑁄𑀲𑁂, 𑀅𑀧𑁆𑀧𑀫𑀸𑀤𑁂 𑀆𑀦𑀺𑀲𑀁𑀲𑁂 𑀧𑀓𑀸𑀲𑁂𑀢𑀼𑀁, ‘‘𑀢𑁆𑀯𑀁 𑀫𑀫 𑀧𑀼𑀢𑁆𑀢𑀲𑁆𑀲 ¶ 𑀲𑀦𑁆𑀢𑀺𑀓𑁂 𑀚𑀯𑀘𑁆𑀙𑀺𑀦𑁆𑀦𑁄 𑀤𑀼𑀩𑁆𑀩𑀮𑀲𑁆𑀲𑁄 𑀯𑀺𑀬, 𑀏𑀲 𑀧𑀦 𑀢𑀯 𑀲𑀦𑁆𑀢𑀺𑀓𑁂 𑀲𑀻𑀖𑀚𑀯𑀲𑁆𑀲𑁄 𑀯𑀺𑀬𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀅𑀧𑁆𑀧𑀫𑀢𑁆𑀢𑁄 ¶ ¶ 𑀧𑀫𑀢𑁆𑀢𑁂𑀲𑀼, 𑀲𑀼𑀢𑁆𑀢𑁂𑀲𑀼 𑀩𑀳𑀼𑀚𑀸𑀕𑀭𑁄;

𑀅𑀩𑀮𑀲𑁆𑀲𑀁𑀯 𑀲𑀻𑀖𑀲𑁆𑀲𑁄, 𑀳𑀺𑀢𑁆𑀯𑀸 𑀬𑀸𑀢𑀺 𑀲𑀼𑀫𑁂𑀥𑀲𑁄’’𑀢𑀺.

𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑀸𑀬 𑀅𑀧𑁆𑀧𑀫𑀸𑀤𑀲𑀫𑁆𑀧𑀦𑁆𑀦𑁂 𑀔𑀻𑀡𑀸𑀲𑀯𑁄. 𑀧𑀫𑀢𑁆𑀢𑁂𑀲𑀽𑀢𑀺 𑀲𑀢𑀺𑀯𑁄𑀲𑀕𑁆𑀕𑁂 𑀞𑀺𑀢𑁂𑀲𑀼 𑀲𑀢𑁆𑀢𑁂𑀲𑀼. 𑀲𑀼𑀢𑁆𑀢𑁂𑀲𑀽𑀢𑀺 𑀲𑀢𑀺𑀚𑀸𑀕𑀭𑀺𑀬𑀸𑀪𑀸𑀯𑁂𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀦𑀺𑀤𑁆𑀤𑀸𑀬𑀦𑁆𑀢𑁂𑀲𑀼. 𑀩𑀳𑀼𑀚𑀸𑀕𑀭𑁄𑀢𑀺 𑀫𑀳𑀦𑁆𑀢𑁂 𑀲𑀢𑀺𑀯𑁂𑀧𑀼𑀮𑁆𑀮𑁂 𑀚𑀸𑀕𑀭𑀺𑀬𑁂 𑀞𑀺𑀢𑁄. 𑀅𑀩𑀮𑀲𑁆𑀲𑀁𑀯𑀸𑀢𑀺 𑀓𑀼𑀡𑁆𑀞𑀧𑀸𑀤𑀁 𑀙𑀺𑀦𑁆𑀦𑀚𑀯𑀁 𑀤𑀼𑀩𑁆𑀩𑀮𑀲𑁆𑀲𑀁 𑀲𑀻𑀖𑀚𑀯𑁄 𑀲𑀺𑀦𑁆𑀥𑀯𑀸𑀚𑀸𑀦𑀻𑀬𑁄 𑀯𑀺𑀬. 𑀲𑀼𑀫𑁂𑀥𑀲𑁄𑀢𑀺 𑀉𑀢𑁆𑀢𑀫𑀧𑀜𑁆𑀜𑁄. 𑀢𑀣𑀸𑀭𑀽𑀧𑀁 𑀧𑀼𑀕𑁆𑀕𑀮𑀁 𑀆𑀕𑀫𑁂𑀦𑀧𑀺 𑀅𑀥𑀺𑀕𑀫𑁂𑀦𑀧𑀺 𑀳𑀺𑀢𑁆𑀯𑀸 𑀬𑀸𑀢𑀺. 𑀫𑀦𑁆𑀤𑀧𑀜𑁆𑀜𑀲𑁆𑀫𑀺𑀜𑁆𑀳𑀺 𑀏𑀓𑀁 𑀲𑀼𑀢𑁆𑀢𑀁 𑀕𑀳𑁂𑀢𑀼𑀁 𑀯𑀸𑀬𑀫𑀦𑁆𑀢𑁂𑀬𑁂𑀯 𑀲𑀼𑀫𑁂𑀥𑀲𑁄 𑀏𑀓𑀁 𑀯𑀕𑁆𑀕𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀢𑀸𑀯 𑀆𑀕𑀫𑁂𑀦 𑀳𑀺𑀢𑁆𑀯𑀸 𑀬𑀸𑀢𑀺. 𑀫𑀦𑁆𑀤𑀧𑀜𑁆𑀜𑁂 𑀧𑀦 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀓𑀸𑀢𑀼𑀁 𑀯𑀸𑀬𑀫𑀦𑁆𑀢𑁂𑀬𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑁂𑀬𑁂𑀯 𑀘 𑀲𑀼𑀫𑁂𑀥𑀲𑁄 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀭𑁂𑀦 𑀓𑀢𑀁 𑀭𑀢𑁆𑀢𑀺𑀝𑁆𑀞𑀸𑀦𑀁 𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀳𑀢𑁆𑀣𑀕𑀢𑁂 ¶ 𑀓𑀭𑁄𑀢𑀺, 𑀏𑀯𑀁 𑀅𑀥𑀺𑀕𑀫𑁂𑀦𑀧𑀺 𑀳𑀺𑀢𑁆𑀯𑀸 𑀬𑀸𑀢𑀺. 𑀯𑀝𑁆𑀝𑁂 𑀧𑀦 𑀦𑀁 𑀳𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀯𑀝𑁆𑀝𑀢𑁄 𑀦𑀺𑀲𑁆𑀲𑀭𑀦𑁆𑀢𑁄 𑀬𑀸𑀢𑀺𑀬𑁂𑀯𑀸𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀫𑀢𑁆𑀢𑀸𑀧𑀫𑀢𑁆𑀢𑀤𑁆𑀯𑁂𑀲𑀳𑀸𑀬𑀓𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀫𑀖𑀯𑀢𑁆𑀣𑀼

𑀅𑀧𑁆𑀧𑀫𑀸𑀤𑁂𑀦 𑀫𑀖𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀯𑁂𑀲𑀸𑀮𑀺𑀬𑀜𑁆𑀳𑀺 𑀫𑀳𑀸𑀮𑀺 𑀦𑀸𑀫 𑀮𑀺𑀘𑁆𑀙𑀯𑀻 𑀯𑀲𑀢𑀺, 𑀲𑁄 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀁 (𑀤𑀻. 𑀦𑀺. 𑁨.𑁩𑁪𑁪 𑀆𑀤𑀬𑁄) 𑀲𑀼𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀫𑀳𑀢𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, ‘𑀤𑀺𑀲𑁆𑀯𑀸 𑀦𑀼 𑀔𑁄 𑀓𑀣𑁂𑀲𑀺, 𑀉𑀤𑀸𑀳𑀼 𑀅𑀤𑀺𑀲𑁆𑀯𑀸. 𑀚𑀸𑀦𑀸𑀢𑀺 𑀦𑀼 𑀔𑁄 𑀲𑀓𑁆𑀓𑀁, 𑀉𑀤𑀸𑀳𑀼 𑀦𑁄’𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣 𑀔𑁄, 𑀫𑀳𑀸𑀮𑀺, 𑀮𑀺𑀘𑁆𑀙𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀫𑀳𑀸𑀮𑀺, 𑀮𑀺𑀘𑁆𑀙𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀝𑁆𑀞𑁄 ¶ 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺? ‘‘𑀤𑀺𑀝𑁆𑀞𑁄 𑀔𑁄 𑀫𑁂 ¶ , 𑀫𑀳𑀸𑀮𑀺, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺. ‘‘𑀲𑁄 𑀳𑀺 𑀦𑀼𑀦, 𑀪𑀦𑁆𑀢𑁂, 𑀲𑀓𑁆𑀓𑀧𑀢𑀺𑀭𑀽𑀧𑀓𑁄 𑀪𑀯𑀺𑀲𑁆𑀲𑀢𑀺 ¶ . 𑀤𑀼𑀤𑁆𑀤𑀲𑁄 𑀳𑀺, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺. ‘‘𑀲𑀓𑁆𑀓𑀜𑁆𑀘 𑀔𑁆𑀯𑀸𑀳𑀁, 𑀫𑀳𑀸𑀮𑀺, 𑀧𑀚𑀸𑀦𑀸𑀫𑀺 𑀲𑀓𑁆𑀓𑀓𑀭𑀡𑁂 𑀘 𑀥𑀫𑁆𑀫𑁂, 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸, 𑀢𑀜𑁆𑀘 𑀧𑀚𑀸𑀦𑀸𑀫𑀺’’.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀫𑀖𑀯𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀼𑀭𑁂 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀲𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀆𑀯𑀲𑀣𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀯𑀸𑀲𑀯𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀳𑀲𑁆𑀲𑀫𑁆𑀧𑀺 𑀅𑀢𑁆𑀣𑀁 𑀫𑀼𑀳𑀼𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀲𑀳𑀲𑁆𑀲𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀚𑀸 𑀦𑀸𑀫 𑀅𑀲𑀼𑀭𑀓𑀜𑁆𑀜𑀸, 𑀧𑀚𑀸𑀧𑀢𑀺, 𑀢𑀲𑁆𑀫𑀸 ‘‘𑀲𑀼𑀚𑀫𑁆𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑁄, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 ‘‘𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑀲𑁆𑀲, 𑀫𑀳𑀸𑀮𑀺, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 ¶ 𑀅𑀚𑁆𑀛𑀕𑀸. 𑀓𑀢𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺? 𑀬𑀸𑀯𑀚𑀻𑀯𑀁 𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻 𑀅𑀲𑁆𑀲𑀁, 𑀬𑀸𑀯𑀚𑀻𑀯𑀁 𑀲𑀡𑁆𑀳𑀯𑀸𑀘𑁄 𑀅𑀲𑁆𑀲�