𑀅𑀝𑁆𑀞𑀓𑀣𑀸 > 𑀲𑀼𑀢𑁆𑀢𑀧𑀺𑀝𑀓 (𑀅𑀝𑁆𑀞𑀓𑀣𑀸) > 𑀔𑀼𑀤𑁆𑀤𑀓𑀦𑀺𑀓𑀸𑀬 (𑀅𑀝𑁆𑀞𑀓𑀣𑀸)

𑀯𑀺𑀧𑀲𑁆𑀲𑀺𑀤𑀲𑀩𑀮𑀲𑁆𑀲 𑀓𑀸𑀮𑀲𑁆𑀫𑀺𑀜𑁆𑀳𑀺 𑀫𑀳𑀸𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀅𑀳𑁄𑀲𑀺, 𑀅𑀬𑀁 𑀧𑀦 𑀏𑀢𑀭𑀳𑀺 𑀲𑀸𑀯𑀢𑁆𑀣𑀺𑀬𑀁 𑀘𑀽𑀴𑁂𑀓𑀲𑀸𑀝𑀓𑁄 𑀦𑀸𑀫. 𑀢𑀲𑁆𑀲 𑀳𑀺 𑀏𑀓𑁄 𑀦𑀺𑀯𑀸𑀲𑀦𑀲𑀸𑀝𑀓𑁄 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀺𑀬𑀸𑀧𑀺 𑀏𑀓𑁄. 𑀉𑀪𑀺𑀦𑁆𑀦𑀫𑁆𑀧𑀺 𑀏𑀓𑀫𑁂𑀯 𑀧𑀸𑀭𑀼𑀧𑀦𑀁, 𑀩𑀳𑀺 𑀕𑀫𑀦𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑀻 𑀯𑀸 𑀢𑀁 𑀧𑀸𑀭𑀼𑀧𑀢𑀺. 𑀅𑀣𑁂𑀓𑀤𑀺𑀯𑀲𑀁 ¶ 𑀯𑀺𑀳𑀸𑀭𑁂 𑀥𑀫𑁆𑀫𑀲𑁆𑀲𑀯𑀦𑁂 𑀖𑁄𑀲𑀺𑀢𑁂 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀪𑁄𑀢𑀺 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑀺𑀢𑀁, 𑀓𑀺𑀁 𑀤𑀺𑀯𑀸 𑀥𑀫𑁆𑀫𑀲𑁆𑀲𑀯𑀦𑀁 𑀕𑀫𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀭𑀢𑁆𑀢𑀺𑀁. 𑀧𑀸𑀭𑀼𑀧𑀦𑀲𑁆𑀲 𑀳𑀺 𑀅𑀪𑀸𑀯𑁂𑀦 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀏𑀓𑀢𑁄 𑀕𑀦𑁆𑀢𑀼’’𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀻, ‘‘𑀲𑀸𑀫𑀺, 𑀅𑀳𑀁 𑀤𑀺𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀝𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀤𑀺𑀯𑀲𑀪𑀸𑀕𑀁 𑀕𑁂𑀳𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄𑀯 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺. 𑀅𑀣𑀲𑁆𑀲 𑀲𑀭𑀻𑀭𑀁 𑀨𑀭𑀫𑀸𑀦𑀸 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀲𑀢𑁆𑀣𑀸𑀭𑀁 𑀧𑀽𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀲𑀘𑁂 𑀇𑀫𑀁 𑀲𑀸𑀝𑀓𑀁 ¶ 𑀤𑀲𑁆𑀲𑀸𑀫𑀺, 𑀦𑁂𑀯 𑀩𑁆𑀭𑀸𑀳𑁆𑀫𑀡𑀺𑀬𑀸, 𑀦 𑀫𑀬𑁆𑀳𑀁 𑀧𑀸𑀭𑀼𑀧𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀫𑀘𑁆𑀙𑁂𑀭𑀘𑀺𑀢𑁆𑀢𑀸𑀦𑀁 𑀲𑀳𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀧𑀼𑀦𑁂𑀓𑀁 𑀲𑀤𑁆𑀥𑀸𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀢𑀁 ¶ 𑀅𑀪𑀺𑀪𑀯𑀺𑀢𑁆𑀯𑀸 𑀧𑀼𑀦 𑀫𑀘𑁆𑀙𑁂𑀭𑀲𑀳𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀇𑀢𑀺𑀲𑁆𑀲 𑀩𑀮𑀯𑀫𑀘𑁆𑀙𑁂𑀭𑀁 𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀁 𑀯𑀺𑀬 𑀲𑀤𑁆𑀥𑀸𑀘𑀺𑀢𑁆𑀢𑀁 𑀧𑀝𑀺𑀩𑀸𑀳𑀢𑀺𑀬𑁂𑀯. 𑀢𑀲𑁆𑀲 ‘‘𑀤𑀲𑁆𑀲𑀸𑀫𑀺, 𑀦 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑁂𑀯 𑀧𑀞𑀫𑀬𑀸𑀫𑁄 𑀅𑀧𑀕𑀢𑁄, 𑀫𑀚𑁆𑀛𑀺𑀫𑀬𑀸𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀲𑁆𑀫𑀺𑀫𑁆𑀧𑀺 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀘𑁆𑀙𑀺𑀫𑀬𑀸𑀫𑁂 𑀲𑀫𑁆𑀧𑀢𑁆𑀢𑁂 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀲𑀤𑁆𑀥𑀸𑀘𑀺𑀢𑁆𑀢𑁂𑀦 𑀫𑀘𑁆𑀙𑁂𑀭𑀘𑀺𑀢𑁆𑀢𑁂𑀦 𑀘 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑁆𑀢𑀲𑁆𑀲𑁂𑀯 𑀤𑁆𑀯𑁂 𑀬𑀸𑀫𑀸 𑀯𑀻𑀢𑀺𑀯𑀢𑁆𑀢𑀸, 𑀇𑀤𑀁 𑀫𑀫 𑀏𑀢𑁆𑀢𑀓𑀁 𑀫𑀘𑁆𑀙𑁂𑀭𑀘𑀺𑀢𑁆𑀢𑀁 𑀯𑀟𑁆𑀠𑀫𑀸𑀦𑀁 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀤𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀫𑀘𑁆𑀙𑁂𑀭𑀲𑀳𑀲𑁆𑀲𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀤𑁆𑀥𑀸𑀘𑀺𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀲𑀸𑀝𑀓𑀁 𑀆𑀤𑀸𑀬 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑀫𑀓𑀸𑀲𑀺.

𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀧𑀼𑀘𑁆𑀙𑀣 𑀦𑀁, 𑀓𑀺𑀁 𑀓𑀺𑀭 𑀢𑁂𑀦 𑀚𑀺𑀢’’𑀦𑁆𑀢𑀺 𑀆𑀳. 𑀲𑁄 𑀭𑀸𑀚𑀧𑀼𑀭𑀺𑀲𑁂𑀳𑀺 𑀧𑀼𑀘𑁆𑀙𑀺𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀤𑀼𑀓𑁆𑀓𑀭𑀁 𑀓𑀢𑀁 𑀩𑁆𑀭𑀸𑀳𑁆𑀫𑀡𑁂𑀦, 𑀲𑀗𑁆𑀕𑀳𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀲𑀸𑀝𑀓𑀬𑀼𑀕𑀁 𑀤𑀸𑀧𑁂𑀲𑀺. 𑀲𑁄 𑀢𑀫𑁆𑀧𑀺 𑀢𑀣𑀸𑀕𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀧𑀼𑀦 𑀭𑀸𑀚𑀸 𑀤𑁆𑀯𑁂 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲𑀸𑀢𑀺 𑀤𑁆𑀯𑀺𑀕𑀼𑀡𑀁 𑀓𑀢𑁆𑀯𑀸 𑀤𑀸𑀧𑁂𑀲𑀺. 𑀲𑁄 𑀢𑀸𑀦𑀺𑀧𑀺 𑀢𑀣𑀸𑀕𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀅𑀣𑀲𑁆𑀲 𑀭𑀸𑀚𑀸 𑀤𑁆𑀯𑀢𑁆𑀢𑀺𑀁𑀲 𑀬𑀼𑀕𑀸𑀦𑀺 𑀤𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀢𑁆𑀢𑀦𑁄 𑀅𑀕𑁆𑀕𑀳𑁂𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀲𑀺𑀬𑁂𑀯𑀸’’𑀢𑀺 𑀯𑀸𑀤𑀫𑁄𑀘𑀦𑀢𑁆𑀣𑀁 𑀢𑀢𑁄 𑀏𑀓𑀁 𑀬𑀼𑀕𑀁 𑀅𑀢𑁆𑀢𑀦𑁄, 𑀏𑀓𑀁 𑀩𑁆𑀭𑀸𑀳𑁆𑀫𑀡𑀺𑀬𑀸𑀢𑀺 𑀤𑁆𑀯𑁂 𑀬𑀼𑀕𑀸𑀦𑀺 𑀕𑀳𑁂𑀢𑁆𑀯𑀸 𑀢𑀺𑀁𑀲 𑀬𑀼𑀕𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀭𑀸𑀚𑀸 𑀧𑀦 𑀢𑀲𑁆𑀫𑀺𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀤𑀤𑀦𑁆𑀢𑁂 𑀧𑀼𑀦 𑀤𑀸𑀢𑀼𑀓𑀸𑀫𑁄𑀬𑁂𑀯 𑀅𑀳𑁄𑀲𑀺. 𑀧𑀼𑀩𑁆𑀩𑁂 𑀫𑀳𑀸𑀏𑀓𑀲𑀸𑀝𑀓𑁄 𑀘𑀢𑀼𑀲𑀝𑁆𑀞𑀺𑀬𑀸 𑀲𑀸𑀝𑀓𑀬𑀼𑀕𑁂𑀲𑀼 𑀤𑁆𑀯𑁂 𑀅𑀕𑁆𑀕𑀳𑁂𑀲𑀺, 𑀅𑀬𑀁 𑀧𑀦 𑀤𑁆𑀯𑀢𑁆𑀢𑀺𑀁𑀲𑀸𑀬 ¶ 𑀮𑀤𑁆𑀥𑀓𑀸𑀮𑁂 𑀤𑁆𑀯𑁂 𑀅𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀤𑀼𑀓𑁆𑀓𑀭𑀁 𑀪𑀡𑁂 𑀩𑁆𑀭𑀸𑀳𑁆𑀫𑀡𑁂𑀦 𑀓𑀢𑀁, 𑀅𑀦𑁆𑀢𑁂𑀧𑀼𑀭𑁂 𑀫𑀫 𑀤𑁆𑀯𑁂 𑀓𑀫𑁆𑀩𑀮𑀸𑀦𑀺 𑀆𑀳𑀭𑀸𑀧𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀭𑀸𑀚𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀤𑁆𑀯𑁂 𑀓𑀫𑁆𑀩𑀮𑁂 𑀤𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀦 𑀇𑀫𑁂 𑀫𑀫 𑀲𑀭𑀻𑀭𑁂 𑀉𑀧𑀬𑁄𑀕𑀁 𑀅𑀭𑀳𑀦𑁆𑀢𑀺, 𑀩𑀼𑀤𑁆𑀥𑀲𑀸𑀲𑀦𑀲𑁆𑀲𑁂𑀯 𑀏𑀢𑁂 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀏𑀓𑀁 𑀓𑀫𑁆𑀩𑀮𑀁 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀲𑀢𑁆𑀣𑀼 𑀲𑀬𑀦𑀲𑁆𑀲 𑀉𑀧𑀭𑀺 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀩𑀦𑁆𑀥𑀺, 𑀏𑀓𑀁 𑀅𑀢𑁆𑀢𑀦𑁄 𑀖𑀭𑁂 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑀓𑀺𑀘𑁆𑀘𑀝𑁆𑀞𑀸𑀦𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀩𑀦𑁆𑀥𑀺. 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑁂 ¶ 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀓𑀫𑁆𑀩𑀮𑀁 𑀲𑀜𑁆𑀚𑀸𑀦𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁂𑀦 𑀧𑀽𑀚𑀸 𑀓𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀓𑀲𑀸𑀝𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀩𑁆𑀭𑀸𑀳𑁆𑀫𑀡𑁄 𑀫𑀫 ¶ 𑀧𑀲𑀸𑀤𑀝𑁆𑀞𑀸𑀦𑁂𑀬𑁂𑀯 𑀧𑀲𑀻𑀤𑀢𑀻’’𑀢𑀺 𑀯𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀳𑀢𑁆𑀣𑀻 𑀘𑀢𑁆𑀢𑀸𑀭𑁄 𑀅𑀲𑁆𑀲𑁂 𑀘𑀢𑁆𑀢𑀸𑀭𑀺 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀘𑀢𑀲𑁆𑀲𑁄 𑀇𑀢𑁆𑀣𑀺𑀬𑁄 𑀘𑀢𑀲𑁆𑀲𑁄 𑀤𑀸𑀲𑀺𑀬𑁄 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑁂 𑀘𑀢𑀼𑀭𑁄 𑀕𑀸𑀫𑀯𑀭𑁂’’𑀢𑀺 𑀏𑀯𑀁 𑀬𑀸𑀯 𑀲𑀩𑁆𑀩𑀲𑀢𑀸 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀲𑀩𑁆𑀩𑀘𑀢𑀼𑀓𑁆𑀓𑀁 𑀦𑀸𑀫 𑀅𑀲𑁆𑀲 𑀤𑀸𑀧𑁂𑀲𑀺.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀘𑀽𑀴𑁂𑀓𑀲𑀸𑀝𑀓𑀲𑁆𑀲 𑀓𑀫𑁆𑀫𑀁, 𑀢𑀁𑀫𑀼𑀳𑀼𑀢𑁆𑀢𑀫𑁂𑀯 𑀲𑀩𑁆𑀩𑀘𑀢𑀼𑀓𑁆𑀓𑀁 𑀮𑀪𑀺, 𑀇𑀤𑀸𑀦𑀺 𑀓𑀢𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀅𑀚𑁆𑀚𑀫𑁂𑀯 𑀯𑀺𑀧𑀸𑀓𑁄 𑀤𑀺𑀦𑁆𑀦𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀲𑀘𑀸𑀬𑀁 𑀏𑀓𑀲𑀸𑀝𑀓𑁄 𑀧𑀞𑀫𑀬𑀸𑀫𑁂 𑀫𑀬𑁆𑀳𑀁 𑀤𑀸𑀢𑀼𑀁 𑀅𑀲𑀓𑁆𑀔𑀺𑀲𑁆𑀲, 𑀲𑀩𑁆𑀩𑀲𑁄𑀴𑀲𑀓𑀁 𑀅𑀮𑀪𑀺𑀲𑁆𑀲. 𑀲𑀘𑁂 𑀫𑀚𑁆𑀛𑀺𑀫𑀬𑀸𑀫𑁂 𑀅𑀲𑀓𑁆𑀔𑀺𑀲𑁆𑀲, 𑀲𑀩𑁆𑀩𑀝𑁆𑀞𑀓𑀁 𑀅𑀮𑀪𑀺𑀲𑁆𑀲 ¶ . 𑀩𑀮𑀯𑀧𑀘𑁆𑀙𑀺𑀫𑀬𑀸𑀫𑁂 𑀤𑀺𑀦𑁆𑀦𑀢𑁆𑀢𑀸 𑀧𑀦𑁂𑀲 𑀲𑀩𑁆𑀩𑀘𑀢𑀼𑀓𑁆𑀓𑀁 𑀮𑀪𑀺. 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀳𑀺 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀅𑀳𑀸𑀧𑁂𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀓𑀸𑀢𑀩𑁆𑀩𑀁. 𑀤𑀦𑁆𑀥𑀁 𑀓𑀢𑀁 𑀓𑀼𑀲𑀮𑀜𑁆𑀳𑀺 𑀲𑀫𑁆𑀧𑀢𑁆𑀢𑀺𑀁 𑀤𑀤𑀫𑀸𑀦𑀁 𑀤𑀦𑁆𑀥𑀫𑁂𑀯 𑀤𑀤𑀸𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀦𑀦𑁆𑀢𑀭𑀫𑁂𑀯 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀪𑀺𑀢𑁆𑀣𑀭𑁂𑀣 𑀓𑀮𑁆𑀬𑀸𑀡𑁂, 𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂;

𑀤𑀦𑁆𑀥𑀜𑁆𑀳𑀺 𑀓𑀭𑁄𑀢𑁄 𑀧𑀼𑀜𑁆𑀜𑀁, 𑀧𑀸𑀧𑀲𑁆𑀫𑀺𑀁 𑀭𑀫𑀢𑀻 𑀫𑀦𑁄’’𑀢𑀺.

𑀢𑀢𑁆𑀣 𑀅𑀪𑀺𑀢𑁆𑀣𑀭𑁂𑀣𑀸𑀢𑀺 𑀢𑀼𑀭𑀺𑀢𑀢𑀼𑀭𑀺𑀢𑀁 𑀲𑀻𑀖𑀲𑀻𑀖𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀕𑀺𑀳𑀺𑀦𑀸 𑀯𑀸 𑀳𑀺 ‘‘𑀲𑀮𑀸𑀓𑀪𑀢𑁆𑀢𑀤𑀸𑀦𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀬𑀣𑀸 𑀅𑀜𑁆𑀜𑁂 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺, 𑀏𑀯𑀁 ‘‘𑀅𑀳𑀁 𑀧𑀼𑀭𑁂, 𑀅𑀳𑀁 𑀧𑀼𑀭𑁂’’𑀢𑀺 𑀢𑀼𑀭𑀺𑀢𑀢𑀼𑀭𑀺𑀢𑀫𑁂𑀯 𑀓𑀸𑀢𑀩𑁆𑀩𑀁. 𑀧𑀩𑁆𑀩𑀚𑀺𑀢𑁂𑀦 𑀯𑀸 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀦 𑀅𑀜𑁆𑀜𑀲𑁆𑀲 𑀑𑀓𑀸𑀲𑀁 𑀅𑀤𑀢𑁆𑀯𑀸 ‘‘𑀅𑀳𑀁 𑀧𑀼𑀭𑁂, 𑀅𑀳𑀁 𑀧𑀼𑀭𑁂’’𑀢𑀺 𑀢𑀼𑀭𑀺𑀢𑀢𑀼𑀭𑀺𑀢𑀫𑁂𑀯 𑀓𑀸𑀢𑀩𑁆𑀩𑀁. 𑀧𑀸𑀧𑀸 𑀘𑀺𑀢𑁆𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀧𑀸𑀧𑀓𑀫𑁆𑀫𑀢𑁄 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀯𑀸 𑀲𑀩𑁆𑀩𑀣𑀸𑀫𑁂𑀦 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂. 𑀤𑀦𑁆𑀥𑀜𑁆𑀳𑀺 𑀓𑀭𑁄𑀢𑁄𑀢𑀺 𑀬𑁄 𑀧𑀦 ‘‘𑀤𑀲𑁆𑀲𑀸𑀫𑀺, 𑀦 𑀤𑀲𑁆𑀲𑀸𑀫𑀺 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂, 𑀦𑁄’’𑀢𑀺 𑀏𑀯𑀁 𑀘𑀺𑀓𑁆𑀔𑀮𑁆𑀮𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀤𑀦𑁆𑀥𑀁 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀢𑀲𑁆𑀲 𑀏𑀓𑀲𑀸𑀝𑀓𑀲𑁆𑀲 𑀯𑀺𑀬 ¶ 𑀫𑀘𑁆𑀙𑁂𑀭𑀲𑀳𑀲𑁆𑀲𑀁 𑀧𑀸𑀧𑀁 𑀑𑀓𑀸𑀲𑀁 𑀮𑀪𑀢𑀺. 𑀅𑀣𑀲𑁆𑀲 𑀧𑀸𑀧𑀲𑁆𑀫𑀺𑀁 𑀭𑀫𑀢𑀻 𑀫𑀦𑁄, 𑀓𑀼𑀲𑀮𑀓𑀫𑁆𑀫𑀓𑀭𑀡𑀓𑀸𑀮𑁂𑀬𑁂𑀯 𑀳𑀺 𑀘𑀺𑀢𑁆𑀢𑀁 𑀓𑀼𑀲𑀮𑁂 𑀭𑀫𑀢𑀺, 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀸𑀧𑀦𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀘𑀽𑀴𑁂𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀞𑀫𑀁.

𑀧𑀸𑀧𑀜𑁆𑀘 ¶ 𑀧𑀼𑀭𑀺𑀲𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑁂𑀬𑁆𑀬𑀲𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀳𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀓𑀫𑁆𑀫𑁂 𑀲𑀫𑀸𑀤𑀧𑀺𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀬 𑀅𑀦𑀪𑀺𑀭𑀢𑀺𑀬𑀸 𑀢𑀁 𑀓𑀫𑁆𑀫𑀫𑀓𑀸𑀲𑀺 (𑀧𑀸𑀭𑀸. 𑁨𑁩𑁪). 𑀲𑀢𑁆𑀣𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀯𑀁 𑀓𑀺𑀭 𑀢𑁆𑀯𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀅𑀓𑀸𑀲𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀕𑀭𑀳𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀜𑁆𑀳𑀺 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑁂𑀧𑀺 𑀲𑀫𑁆𑀧𑀭𑀸𑀬𑁂𑀧𑀺 𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀓𑀫𑁂𑀯 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀸𑀧𑀜𑁆𑀘𑁂 𑀧𑀼𑀭𑀺𑀲𑁄 𑀓𑀬𑀺𑀭𑀸, 𑀦 𑀦𑀁 𑀓𑀬𑀺𑀭𑀸 𑀧𑀼𑀦𑀧𑁆𑀧𑀼𑀦𑀁;

𑀦 𑀢𑀫𑁆𑀳𑀺 𑀙𑀦𑁆𑀤𑀁 𑀓𑀬𑀺𑀭𑀸𑀣, 𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀧𑀼𑀭𑀺𑀲𑁄 𑀲𑀓𑀺𑀁 𑀧𑀸𑀧𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀢𑀗𑁆𑀔𑀡𑁂𑀬𑁂𑀯 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀇𑀤𑀁 𑀅𑀧𑁆𑀧𑀢𑀺𑀭𑀽𑀧𑀁 𑀑𑀴𑀸𑀭𑀺𑀓’’𑀦𑁆𑀢𑀺 𑀦 𑀦𑀁 𑀓𑀬𑀺𑀭𑀸 𑀧𑀼𑀦𑀧𑁆𑀧𑀼𑀦𑀁. 𑀬𑁄𑀧𑀺 𑀢𑀫𑁆𑀳𑀺 𑀙𑀦𑁆𑀤𑁄 ¶ 𑀯𑀸 𑀭𑀼𑀘𑀺 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀫𑁆𑀧𑀺 𑀯𑀺𑀦𑁄𑀤𑁂𑀢𑁆𑀯𑀸 𑀦 𑀓𑀬𑀺𑀭𑀸𑀣𑁂𑀯. 𑀓𑀺𑀁 𑀓𑀸𑀭𑀡𑀸? 𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄. 𑀧𑀸𑀧𑀲𑁆𑀲 𑀳𑀺 𑀉𑀘𑁆𑀘𑀬𑁄 𑀯𑀼𑀟𑁆𑀠𑀺 𑀇𑀥𑀮𑁄𑀓𑁂𑀧𑀺 𑀲𑀫𑁆𑀧𑀭𑀸𑀬𑁂𑀧𑀺 𑀤𑀼𑀓𑁆𑀔𑀫𑁂𑀯 𑀆𑀯𑀳𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑁂𑀬𑁆𑀬𑀲𑀓𑀢𑁆𑀣𑁂𑀭𑀯𑀢𑁆𑀣𑀼 𑀤𑀼𑀢𑀺𑀬𑀁.

𑀧𑀼𑀜𑁆𑀜𑀜𑁆𑀘𑁂𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀚𑀤𑁂𑀯𑀥𑀻𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁.

𑀆𑀬𑀲𑁆𑀫𑀸 ¶ 𑀳𑀺 𑀫𑀳𑀸𑀓𑀲𑁆𑀲𑀧𑁄 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀁 𑀯𑀺𑀳𑀭𑀦𑁆𑀢𑁄 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀯𑀼𑀝𑁆𑀞𑀸𑀬 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀪𑀺𑀓𑁆𑀔𑀸𑀘𑀸𑀭𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀲𑀸𑀮𑀺𑀔𑁂𑀢𑁆𑀢𑀧𑀸𑀮𑀺𑀓𑀁 𑀇𑀢𑁆𑀣𑀺𑀁 𑀲𑀸𑀮𑀺𑀲𑀻𑀲𑀸𑀦𑀺 𑀕𑀳𑁂𑀢𑁆𑀯𑀸 𑀮𑀸𑀚𑁂 𑀓𑀼𑀭𑀼𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀲𑀤𑁆𑀥𑀸 𑀦𑀼 𑀔𑁄, 𑀅𑀲𑁆𑀲𑀤𑁆𑀥𑀸’’𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀲𑀤𑁆𑀥𑀸’’𑀢𑀺 𑀜𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑀗𑁆𑀕𑀳𑀁 𑀓𑀸𑀢𑀼𑀁, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀯𑀺𑀲𑀸𑀭𑀤𑀸 𑀓𑀼𑀮𑀥𑀻𑀢𑀸 𑀫𑀫 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀢𑀺, 𑀓𑀢𑁆𑀯𑀸 𑀘 𑀧𑀦 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀲𑀸𑀮𑀺𑀔𑁂𑀢𑁆𑀢𑀲𑀫𑀻𑀧𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀓𑀼𑀮𑀥𑀻𑀢𑀸 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑀸 ‘‘𑀢𑀺𑀝𑁆𑀞𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀮𑀸𑀚𑁂 𑀆𑀤𑀸𑀬 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀪𑀸𑀕𑀺𑀦𑀻 𑀅𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀣𑁂𑀭𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑀸𑀧𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑀸 𑀤𑀺𑀦𑁆𑀦𑀤𑀸𑀦𑀁 𑀆𑀯𑀚𑁆𑀚𑀫𑀸𑀦𑀸 𑀦𑀺𑀯𑀢𑁆𑀢𑀺. 𑀢𑀸𑀬 𑀘 𑀧𑀦 𑀓𑁂𑀤𑀸𑀭𑀫𑀭𑀺𑀬𑀸𑀤𑀸𑀬 ¶ 𑀕𑀫𑀦𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀩𑀺𑀮𑁂 𑀖𑁄𑀭𑀯𑀺𑀲𑁄 𑀲𑀧𑁆𑀧𑁄 𑀦𑀺𑀧𑀚𑁆𑀚𑀺. 𑀲𑁄 𑀣𑁂𑀭𑀲𑁆𑀲 𑀓𑀸𑀲𑀸𑀬𑀧𑀝𑀺𑀘𑁆𑀙𑀦𑁆𑀦𑀁 𑀚𑀗𑁆𑀖𑀁 𑀟𑀁𑀲𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀭𑀸 𑀤𑀸𑀦𑀁 𑀆𑀯𑀚𑁆𑀚𑀫𑀸𑀦𑀸 𑀦𑀺𑀯𑀢𑁆𑀢𑀦𑁆𑀢𑀻 𑀢𑀁 𑀧𑀤𑁂𑀲𑀁 𑀧𑀸𑀧𑀼𑀡𑀺. 𑀲𑀧𑁆𑀧𑁄 𑀩𑀺𑀮𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀟𑀁𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀢𑁂𑀲𑀺. 𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑀸 𑀯𑀺𑀬 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀦 𑀢𑀺𑀕𑀸𑀯𑀼𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀏𑀓𑀁 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀧𑀼𑀩𑁆𑀩𑀓𑀫𑁆𑀫𑀧𑀓𑀸𑀲𑀦𑀢𑁆𑀣𑀸𑀬 𑀲𑀼𑀯𑀡𑁆𑀡𑀮𑀸𑀚𑀪𑀭𑀺𑀢𑁂𑀦 𑀑𑀮𑀫𑁆𑀩𑀓𑁂𑀦 𑀲𑀼𑀯𑀡𑁆𑀡𑀲𑀭𑀓𑁂𑀦 𑀧𑀝𑀺𑀫𑀡𑁆𑀟𑀺𑀢𑁂 𑀯𑀺𑀫𑀸𑀦𑀤𑁆𑀯𑀸𑀭𑁂 𑀞𑀺𑀢𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀓𑀢𑁆𑀯𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀉𑀧𑀥𑀸𑀭𑁂𑀦𑁆𑀢𑀻 ‘‘𑀅𑀬𑁆𑀬𑀲𑁆𑀲 𑀫𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀮𑀸𑀚𑀦𑀺𑀲𑁆𑀲𑀦𑁆𑀤𑁂𑀦 𑀲𑀸 𑀮𑀤𑁆𑀥𑀸’’𑀢𑀺 𑀅𑀜𑁆𑀜𑀸𑀲𑀺.

𑀲𑀸 𑀏𑀯𑀁 𑀧𑀭𑀺𑀢𑁆𑀢𑀓𑁂𑀦 𑀓𑀫𑁆𑀫𑁂𑀦 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀢𑁆𑀯𑀸 ‘‘𑀦 𑀤𑀸𑀦𑀺 𑀫𑀬𑀸 𑀧𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀬𑁆𑀬𑀲𑁆𑀲 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀣𑀸𑀯𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀢𑁄𑀯 𑀓𑀦𑀓𑀫𑀬𑀁 𑀲𑀫𑁆𑀫𑀚𑁆𑀚𑀦𑀺𑀜𑁆𑀘𑁂𑀯 𑀓𑀘𑀯𑀭𑀙𑀟𑁆𑀟𑀦𑀓𑀜𑁆𑀘 𑀧𑀘𑁆𑀙𑀺𑀁 ¶ 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀲𑀺. 𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀘𑀺 𑀤𑀳𑀭𑁂𑀦 𑀯𑀸 𑀲𑀸𑀫𑀡𑁂𑀭𑁂𑀦 𑀯𑀸 𑀯𑀢𑁆𑀢𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀲𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯 𑀅𑀓𑀸𑀲𑀺, 𑀣𑁂𑀭𑁄𑀧𑀺 𑀢𑀣𑁂𑀯 𑀲𑀮𑁆𑀮𑀓𑁆𑀔𑁂𑀲𑀺. 𑀢𑀢𑀺𑀬𑀤𑀺𑀯𑀲𑁂 𑀧𑀦 𑀣𑁂𑀭𑁄 𑀢𑀲𑁆𑀲𑀸 𑀲𑀫𑁆𑀫𑀚𑁆𑀚𑀦𑀺𑀲𑀤𑁆𑀤𑀁 ¶ 𑀲𑀼𑀢𑁆𑀯𑀸 𑀢𑀸𑀮𑀘𑁆𑀙𑀺𑀤𑁆𑀤𑀸𑀤𑀻𑀳𑀺 𑀘 𑀧𑀯𑀺𑀝𑁆𑀞𑀁 𑀲𑀭𑀻𑀭𑁄𑀪𑀸𑀲𑀁 𑀤𑀺𑀲𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀓𑁄 𑀏𑀲 𑀲𑀫𑁆𑀫𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀬𑀺𑀓𑀸 𑀮𑀸𑀚𑀤𑁂𑀯𑀥𑀻𑀢𑀸’’𑀢𑀺. ‘‘𑀦𑀦𑀼 𑀫𑀬𑁆𑀳𑀁 𑀏𑀯𑀁𑀦𑀸𑀫𑀺𑀓𑀸 𑀉𑀧𑀝𑁆𑀞𑀸𑀬𑀺𑀓𑀸 𑀦𑀸𑀫 𑀦𑀢𑁆𑀣𑀻’’𑀢𑀺. ‘‘𑀅𑀳𑀁, 𑀪𑀦𑁆𑀢𑁂, 𑀲𑀸𑀮𑀺𑀔𑁂𑀢𑁆𑀢𑀁 𑀭𑀓𑁆𑀔𑀫𑀸𑀦𑀸 𑀮𑀸𑀚𑁂 𑀤𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀦𑀺𑀯𑀢𑁆𑀢𑀦𑁆𑀢𑀻 𑀲𑀧𑁆𑀧𑁂𑀦 𑀤𑀝𑁆𑀞𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸, 𑀫𑀬𑀸 𑀅𑀬𑁆𑀬𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸, 𑀇𑀤𑀸𑀦𑀺𑀧𑀺 𑀢𑀼𑀫𑁆𑀳𑀸𑀓𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 ‘𑀲𑀫𑁆𑀧𑀢𑁆𑀢𑀺𑀁 𑀣𑀸𑀯𑀭𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑀸𑀫𑁆𑀳𑀺, 𑀪𑀦𑁆𑀢𑁂’’𑀢𑀺. ‘‘𑀳𑀺𑀬𑁆𑀬𑁄𑀧𑀺 𑀧𑀭𑁂𑀧𑀺 𑀢𑀬𑀸𑀯𑁂𑀢𑀁 ¶ 𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑀁, 𑀢𑀬𑀸𑀯 𑀧𑀸𑀦𑀻𑀬𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑀺𑀢’’𑀦𑁆𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀅𑀧𑁂𑀳𑀺 𑀤𑁂𑀯𑀥𑀻𑀢𑁂, 𑀢𑀬𑀸 𑀓𑀢𑀁 𑀯𑀢𑁆𑀢𑀁 𑀓𑀢𑀁𑀯 𑀳𑁄𑀢𑀼, 𑀇𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀞𑀸𑀦𑀁 𑀫𑀸 𑀆𑀕𑀫𑀻’’𑀢𑀺. ‘‘𑀪𑀦𑁆𑀢𑁂, 𑀫𑀸 𑀫𑀁 𑀦𑀸𑀲𑁂𑀣, 𑀢𑀼𑀫𑁆𑀳𑀸𑀓𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀫𑁂 𑀣𑀺𑀭𑀁 𑀓𑀸𑀢𑀼𑀁 𑀤𑁂𑀣𑀸’’𑀢𑀺. ‘‘𑀅𑀧𑁂𑀳𑀺 𑀤𑁂𑀯𑀥𑀻𑀢𑁂, 𑀫𑀸 𑀫𑀁 𑀅𑀦𑀸𑀕𑀢𑁂 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀳𑀺 𑀥𑀫𑁆𑀫𑀓𑀣𑀺𑀓𑁂𑀳𑀺 ‘𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀓𑀺𑀭 𑀏𑀓𑀸 𑀤𑁂𑀯𑀥𑀻𑀢𑀸 𑀆𑀕𑀦𑁆𑀢𑁆𑀯𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀲𑀻’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀓𑀭𑀺, 𑀇𑀢𑁄 𑀧𑀝𑁆𑀞𑀸𑀬 𑀇𑀥 𑀫𑀸 𑀆𑀕𑀫𑀺, 𑀧𑀝𑀺𑀓𑁆𑀓𑀫𑀸’’𑀢𑀺. 𑀲𑀸 ‘‘𑀫𑀸 𑀫𑀁, 𑀪𑀦𑁆𑀢𑁂, 𑀦𑀸𑀲𑁂𑀣𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯. 𑀣𑁂𑀭𑁄 ‘‘𑀦𑀸𑀬𑀁 𑀫𑀫 𑀯𑀘𑀦𑀁 𑀲𑀼𑀡𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀼𑀯𑀁 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀲𑀸 𑀢𑀢𑁆𑀣 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳, ‘‘𑀪𑀦𑁆𑀢𑁂, 𑀫𑀬𑀸 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀫𑀸 𑀦𑀸𑀲𑁂𑀣, 𑀣𑀸𑀯𑀭𑀁 𑀓𑀸𑀢𑀼𑀁 𑀤𑁂𑀣𑀸’’𑀢𑀺 𑀭𑁄𑀤𑀦𑁆𑀢𑀻 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺.

𑀲𑀢𑁆𑀣𑀸 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 ¶ 𑀢𑀲𑁆𑀲𑀸 𑀭𑁄𑀤𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀤𑁂𑀯𑀥𑀻𑀢𑀸𑀬 𑀲𑀫𑁆𑀫𑀼𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀤𑁂𑀯𑀥𑀻𑀢𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀓𑀲𑁆𑀲𑀧𑀲𑁆𑀲 𑀲𑀁𑀯𑀭𑀓𑀭𑀡𑀫𑁂𑀯 𑀪𑀸𑀭𑁄, 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀧𑀦 ‘𑀅𑀬𑀁 𑀦𑁄 𑀅𑀢𑁆𑀣𑁄’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀜𑁆𑀜𑀓𑀭𑀡𑀫𑁂𑀯 𑀪𑀸𑀭𑁄. 𑀧𑀼𑀜𑁆𑀜𑀓𑀭𑀡𑀜𑁆𑀳𑀺 𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀔𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀼𑀜𑁆𑀜𑀜𑁆𑀘𑁂 ¶ 𑀧𑀼𑀭𑀺𑀲𑁄 𑀓𑀬𑀺𑀭𑀸, 𑀓𑀬𑀺𑀭𑀸 𑀦𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀫𑁆𑀳𑀺 𑀙𑀦𑁆𑀤𑀁 𑀓𑀬𑀺𑀭𑀸𑀣, 𑀲𑀼𑀔𑁄 𑀧𑀼𑀜𑁆𑀜𑀲𑁆𑀲 𑀉𑀘𑁆𑀘𑀬𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀧𑀼𑀭𑀺𑀲𑁄 𑀧𑀼𑀜𑁆𑀜𑀁 𑀓𑀭𑁂𑀬𑁆𑀬, ‘‘𑀏𑀓𑀯𑀸𑀭𑀁 𑀫𑁂 𑀧𑀼𑀜𑁆𑀜𑀁 𑀓𑀢𑀁, 𑀅𑀮𑀁 𑀏𑀢𑁆𑀢𑀸𑀯𑀢𑀸’’𑀢𑀺 𑀅𑀦𑁄𑀭𑀫𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀣𑁂𑀯. 𑀢𑀲𑁆𑀲 𑀅𑀓𑀭𑀡𑀓𑁆𑀔𑀡𑁂𑀧𑀺 𑀢𑀫𑁆𑀳𑀺 𑀧𑀼𑀜𑁆𑀜𑁂 𑀙𑀦𑁆𑀤𑀁 𑀭𑀼𑀘𑀺𑀁 𑀉𑀲𑁆𑀲𑀸𑀳𑀁 𑀓𑀭𑁄𑀣𑁂𑀯. 𑀓𑀺𑀁 𑀓𑀸𑀭𑀡𑀸? 𑀲𑀼𑀔𑁄 𑀧𑀼𑀜𑁆𑀜𑀲𑁆𑀲 𑀉𑀘𑁆𑀘𑀬𑁄. 𑀧𑀼𑀜𑁆𑀜𑀲𑁆𑀲 𑀳𑀺 𑀉𑀘𑁆𑀘𑀬𑁄 𑀯𑀼𑀟𑁆𑀠𑀺 𑀇𑀥𑀮𑁄𑀓𑀧𑀭𑀮𑁄𑀓𑀲𑀼𑀔𑀸𑀯𑀳𑀦𑀢𑁄 𑀲𑀼𑀔𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀤𑁂𑀯𑀥𑀻𑀢𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀞𑀺𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀻𑀢𑀺.

𑀮𑀸𑀚𑀤𑁂𑀯𑀥𑀻𑀢𑀸𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀯𑀢𑁆𑀣𑀼

𑀧𑀸𑀧𑁄𑀧𑀺 ¶ 𑀧𑀲𑁆𑀲𑀢𑀻 𑀪𑀤𑁆𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ¶ 𑀳𑀺 𑀯𑀺𑀳𑀸𑀭𑀫𑁂𑀯 𑀉𑀤𑁆𑀤𑀺𑀲𑁆𑀲 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀓𑀺𑀭𑀺𑀢𑁆𑀯𑀸 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀤𑁂𑀯𑀲𑀺𑀓𑀁 𑀢𑀻𑀡𑀺 𑀫𑀳𑀸𑀉𑀧𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑁄 𑀘 ‘‘𑀓𑀺𑀁 𑀦𑀼 𑀔𑁄 𑀆𑀤𑀸𑀬 𑀆𑀕𑀢𑁄𑀢𑀺 𑀲𑀸𑀫𑀡𑁂𑀭𑀸 𑀯𑀸 𑀤𑀳𑀭𑀸 𑀯𑀸 𑀳𑀢𑁆𑀣𑀫𑁆𑀧𑀺 𑀫𑁂 𑀑𑀮𑁄𑀓𑁂𑀬𑁆𑀬𑀼’’𑀦𑁆𑀢𑀺 𑀢𑀼𑀘𑁆𑀙𑀳𑀢𑁆𑀣𑁄 𑀦𑀸𑀫 𑀦 𑀕𑀢𑀧𑀼𑀩𑁆𑀩𑁄. 𑀧𑀸𑀢𑁄𑀯 𑀕𑀘𑁆𑀙𑀦𑁆𑀢𑁄 𑀬𑀸𑀕𑀼𑀁 𑀕𑀸𑀳𑀸𑀧𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀓𑀢𑀧𑀸𑀢𑀭𑀸𑀲𑁄 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺. 𑀲𑀸𑀬𑀦𑁆𑀳𑀲𑀫𑀬𑁂 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀯𑀢𑁆𑀣𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀁 𑀦𑀺𑀘𑁆𑀘𑀓𑀸𑀮𑀫𑁂𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀢𑀺. 𑀅𑀧𑀭𑀪𑀸𑀕𑁂 𑀥𑀦𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺. 𑀯𑁄𑀳𑀸𑀭𑀽𑀧𑀚𑀻𑀯𑀺𑀦𑁄𑀧𑀺𑀲𑁆𑀲 𑀳𑀢𑁆𑀣𑀢𑁄 𑀅𑀝𑁆𑀞𑀸𑀭𑀲𑀓𑁄𑀝𑀺𑀥𑀦𑀁 𑀇𑀡𑀁 𑀕𑀡𑁆𑀳𑀺𑀁𑀲𑀼, 𑀓𑀼𑀮𑀲𑀦𑁆𑀢𑀓𑀸𑀧𑀺𑀲𑁆𑀲 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀺𑀬𑁄, 𑀦𑀤𑀻𑀢𑀻𑀭𑁂 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸 𑀉𑀤𑀓𑁂𑀦 𑀓𑀽𑀮𑁂 𑀪𑀺𑀦𑁆𑀦𑁂 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀺𑀁𑀲𑀼. 𑀏𑀯𑀫𑀲𑁆𑀲 𑀅𑀦𑀼𑀧𑀼𑀩𑁆𑀩𑁂𑀦 𑀥𑀦𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀲𑁄 𑀏𑀯𑀁𑀪𑀽𑀢𑁄𑀧𑀺 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺𑀬𑁂𑀯, 𑀧𑀡𑀻𑀢𑀁 𑀧𑀦 𑀓𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀸 ‘‘𑀤𑀻𑀬𑀢𑀺 𑀧𑀦 𑀢𑁂, 𑀕𑀳𑀧𑀢𑀺, 𑀓𑀼𑀮𑁂 𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀤𑀻𑀬𑀢𑀺, 𑀪𑀦𑁆𑀢𑁂, 𑀢𑀜𑁆𑀘 𑀔𑁄 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬’’𑀦𑁆𑀢𑀺 𑀆𑀳. 𑀅𑀣 𑀦𑀁 ¶ 𑀲𑀢𑁆𑀣𑀸, ‘‘𑀕𑀳𑀧𑀢𑀺, ‘𑀮𑀽𑀔𑀁 𑀤𑀸𑀦𑀁 𑀤𑁂𑀫𑀻’𑀢𑀺 𑀫𑀸 𑀘𑀺𑀦𑁆𑀢𑀬𑀺. 𑀘𑀺𑀢𑁆𑀢𑀲𑁆𑀫𑀺𑀜𑁆𑀳𑀺 𑀧𑀡𑀻𑀢𑁂 𑀩𑀼𑀤𑁆𑀥𑀸𑀤𑀻𑀦𑀁 𑀤𑀺𑀦𑁆𑀦𑀤𑀸𑀦𑀁 𑀮𑀽𑀔𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀺𑀘 𑀢𑁆𑀯𑀁 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀤𑀸𑀦𑀁 𑀤𑁂𑀲𑀺, 𑀅𑀳𑀁 𑀧𑀦 𑀯𑁂𑀮𑀸𑀫𑀓𑀸𑀮𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀫𑀳𑀸𑀤𑀸𑀦𑀁 ¶ 𑀧𑀯𑀢𑁆𑀢𑀬𑀫𑀸𑀦𑁄𑀧𑀺 𑀢𑀺𑀲𑀭𑀡𑀕𑀢𑀫𑁆𑀧𑀺 𑀓𑀜𑁆𑀘𑀺 𑀦𑀸𑀮𑀢𑁆𑀣𑀁, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀦𑀸𑀫 𑀏𑀯𑀁 𑀤𑀼𑀮𑁆𑀮𑀪𑀸. 𑀢𑀲𑁆𑀫𑀸 ‘𑀮𑀽𑀔𑀁 𑀫𑁂 𑀤𑀸𑀦’𑀦𑁆𑀢𑀺 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀯𑀢𑁆𑀯𑀸 𑀯𑁂𑀮𑀸𑀫𑀲𑀼𑀢𑁆𑀢𑀫𑀲𑁆𑀲 (𑀅. 𑀦𑀺. 𑁯.𑁨𑁦) 𑀓𑀣𑁂𑀲𑀺. 𑀅𑀣𑀲𑁆𑀲 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀢𑁆𑀣𑀭𑀺 𑀘𑁂𑀯 𑀲𑀢𑁆𑀣𑀼𑀲𑀸𑀯𑀓𑁂𑀲𑀼 𑀘 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂𑀲𑀼 𑀢𑁂𑀲𑀁 𑀢𑁂𑀚𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻, ‘‘𑀬𑀣𑀸 𑀇𑀫𑁂 𑀇𑀫𑀁 𑀕𑁂𑀳𑀁 𑀦 𑀧𑀯𑀺𑀲𑀦𑁆𑀢𑀺, 𑀢𑀣𑀸 𑀕𑀳𑀧𑀢𑀺𑀁 𑀧𑀭𑀺𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀯𑀢𑁆𑀢𑀼𑀓𑀸𑀫𑀸𑀧𑀺 𑀇𑀲𑁆𑀲𑀭𑀓𑀸𑀮𑁂 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀤𑀸𑀦𑀺 ‘‘𑀧𑀦𑀸𑀬𑀁 𑀤𑀼𑀕𑁆𑀕𑀢𑁄 𑀕𑀡𑁆𑀳𑀺𑀲𑁆𑀲𑀢𑀺 𑀫𑁂 𑀯𑀘𑀦’’𑀦𑁆𑀢𑀺 𑀭𑀢𑁆𑀢𑀺𑀪𑀸𑀕𑁂 𑀲𑁂𑀝𑁆𑀞𑀺𑀲𑁆𑀲 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀅𑀣 𑀲𑁂𑀝𑁆𑀞𑀺 𑀦𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀆𑀳. 𑀅𑀳𑀁 𑀢𑁂 𑀫𑀳𑀸𑀲𑁂𑀝𑁆𑀞𑀺 𑀘𑀢𑀼𑀢𑁆𑀣𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, 𑀢𑀼𑀬𑁆𑀳𑀁 𑀑𑀯𑀸𑀤𑀤𑀸𑀦𑀢𑁆𑀣𑀸𑀬 𑀆𑀕𑀢𑀸𑀢𑀺. 𑀢𑁂𑀦 𑀳𑀺 𑀑𑀯𑀤𑁂𑀳𑀻𑀢𑀺. 𑀫𑀳𑀸𑀲𑁂𑀝𑁆𑀞𑀺 𑀢𑀬𑀸 𑀧𑀘𑁆𑀙𑀺𑀫𑀓𑀸𑀮𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀲𑀦𑁂 𑀩𑀳𑀼𑀁 𑀥𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀁, 𑀇𑀤𑀸𑀦𑀺 𑀤𑀼𑀕𑁆𑀕𑀢𑁄 𑀳𑀼𑀢𑁆𑀯𑀸𑀧𑀺 𑀢𑀁 𑀦 𑀫𑀼𑀜𑁆𑀘𑀲𑀺𑀬𑁂𑀯, 𑀏𑀯𑀁 𑀯𑀢𑁆𑀢𑀫𑀸𑀦𑁄 𑀓𑀢𑀺𑀧𑀸𑀳𑁂𑀦𑁂𑀯 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀲𑁆𑀲𑀲𑀺 ¶ , 𑀓𑀺𑀁 𑀢𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦, 𑀅𑀢𑀺𑀧𑀭𑀺𑀘𑁆𑀘𑀸𑀕𑀢𑁄 𑀑𑀭𑀫𑀺𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀸𑀧𑁂𑀳𑀻𑀢𑀺. 𑀅𑀬𑀁 𑀫𑁂 𑀢𑀬𑀸 𑀤𑀺𑀦𑁆𑀦𑀑𑀯𑀸𑀤𑁄𑀢𑀺. 𑀆𑀫, 𑀲𑁂𑀝𑁆𑀞𑀻𑀢𑀺. 𑀕𑀘𑁆𑀙, 𑀦𑀸𑀳𑀁 𑀢𑀸𑀤𑀺𑀲𑀻𑀦𑀁 𑀲𑀢𑁂𑀦𑀧𑀺 𑀲𑀳𑀲𑁆𑀲𑁂𑀦𑀧𑀺 𑀲𑀢𑀲𑀳𑀲𑁆𑀲𑁂𑀦𑀧𑀺 ¶ 𑀲𑀓𑁆𑀓𑀸 𑀓𑀫𑁆𑀧𑁂𑀢𑀼𑀁, 𑀅𑀬𑀼𑀢𑁆𑀢𑀁 𑀢𑁂 𑀯𑀼𑀢𑁆𑀢𑀁, 𑀓𑀁 𑀢𑀬𑀸 𑀫𑀫 𑀕𑁂𑀳𑁂 𑀯𑀲𑀫𑀸𑀦𑀸𑀬, 𑀲𑀻𑀖𑀁 𑀲𑀻𑀖𑀁 𑀫𑁂 𑀖𑀭𑀸 𑀦𑀺𑀓𑁆𑀔𑀫𑀸𑀳𑀻𑀢𑀺. 𑀲𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑀸𑀭𑀓𑁂 𑀆𑀤𑀸𑀬 𑀦𑀺𑀓𑁆𑀔𑀫𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀧𑀦 𑀅𑀜𑁆𑀜𑀢𑁆𑀣 𑀯𑀲𑀦𑀝𑁆𑀞𑀸𑀦𑀁 𑀅𑀮𑀪𑀫𑀸𑀦𑀸 ‘‘𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀧𑀭𑀺𑀕𑁆𑀕𑀸𑀳𑀓𑀁 𑀤𑁂𑀯𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀸𑀧𑀭𑀸𑀥𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀳𑀺, 𑀫𑀁 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀤𑀸𑀧𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀅𑀬𑀼𑀢𑁆𑀢𑀁 𑀢𑀬𑀸 𑀯𑀼𑀢𑁆𑀢𑀁, 𑀦𑀸𑀳𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀉𑀲𑁆𑀲𑀳𑀸𑀫𑀻’’𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀺. 𑀲𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀅𑀳𑀁, 𑀤𑁂𑀯, 𑀯𑀲𑀦𑀝𑁆𑀞𑀸𑀦𑀁 𑀅𑀮𑀪𑀫𑀸𑀦𑀸 𑀤𑀸𑀭𑀓𑁂 ¶ 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀦𑀸𑀣𑀸 𑀯𑀺𑀘𑀭𑀸𑀫𑀺, 𑀯𑀲𑀦𑀝𑁆𑀞𑀸𑀦𑀁 𑀫𑁂 𑀤𑀸𑀧𑁂𑀳𑀻’’𑀢𑀺 𑀲𑀼𑀝𑁆𑀞𑀼𑀢𑀭𑀁 𑀬𑀸𑀘𑀺.

𑀅𑀣 𑀦𑀁 𑀲𑁄 ‘‘𑀅𑀳𑀫𑁆𑀧𑀺 𑀢𑀯 𑀓𑀸𑀭𑀡𑀸 𑀲𑁂𑀝𑁆𑀞𑀺𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀏𑀓𑀁 𑀧𑀦 𑀢𑁂 𑀉𑀧𑀸𑀬𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸𑀥𑀼, 𑀤𑁂𑀯, 𑀓𑀣𑁂𑀳𑀻𑀢𑀺. 𑀕𑀘𑁆𑀙, 𑀲𑁂𑀝𑁆𑀞𑀺𑀦𑁄 𑀆𑀬𑀼𑀢𑁆𑀢𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀳𑀢𑁆𑀣𑀢𑁄 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑁄𑀳𑀸𑀭𑀽𑀧𑀚𑀻𑀯𑀻𑀳𑀺 𑀕𑀳𑀺𑀢𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀥𑀦𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑁄𑀥𑁂𑀢𑁆𑀯𑀸 𑀢𑀼𑀘𑁆𑀙𑀕𑀩𑁆𑀪𑁂 𑀧𑀽𑀭𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 ¶ 𑀧𑀯𑀺𑀝𑁆𑀞𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀥𑀦𑀁 𑀅𑀢𑁆𑀣𑀺, 𑀅𑀜𑁆𑀜𑀫𑁆𑀧𑀺 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀅𑀲𑁆𑀲𑀸𑀫𑀺𑀓𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀥𑀦𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀲𑀁𑀳𑀭𑀺𑀢𑁆𑀯𑀸 𑀢𑀲𑁆𑀲 𑀢𑀼𑀘𑁆𑀙𑀕𑀩𑁆𑀪𑁂 𑀧𑀽𑀭𑁂𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀔𑀫𑀸𑀧𑁂𑀳𑀻𑀢𑀺. 𑀲𑀸 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀲𑀩𑁆𑀩𑀁 𑀓𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀲𑀺𑀭𑀺𑀕𑀩𑁆𑀪𑀁 𑀑𑀪𑀸𑀲𑀬𑀫𑀸𑀦𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑁂 𑀅𑀳𑀁 𑀢𑁂 𑀘𑀢𑀼𑀢𑁆𑀣𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀥𑀺𑀯𑀢𑁆𑀣𑀸 𑀅𑀦𑁆𑀥𑀩𑀸𑀮𑀤𑁂𑀯𑀢𑀸, 𑀫𑀬𑀸 𑀅𑀦𑁆𑀥𑀩𑀸𑀮𑀢𑀸𑀬 𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀣𑀺𑀢𑀁, 𑀢𑀁 𑀫𑁂 𑀔𑀫𑀣. 𑀲𑀓𑁆𑀓𑀲𑁆𑀲 𑀳𑀺 𑀫𑁂 𑀯𑀘𑀦𑁂𑀦 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀢𑀼𑀘𑁆𑀙𑀕𑀩𑁆𑀪𑀧𑀽𑀭𑀡𑀁 𑀤𑀡𑁆𑀟𑀓𑀫𑁆𑀫𑀁 𑀓𑀢𑀁, 𑀯𑀲𑀦𑀝𑁆𑀞𑀸𑀦𑀁 𑀅𑀮𑀪𑀫𑀸𑀦𑀸 𑀓𑀺𑀮𑀫𑀸𑀫𑀻𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑁂𑀯𑀢𑀸 ‘𑀤𑀡𑁆𑀟𑀓𑀫𑁆𑀫𑀜𑁆𑀘 𑀫𑁂 𑀓𑀢’𑀦𑁆𑀢𑀺 𑀯𑀤𑀢𑀺, 𑀅𑀢𑁆𑀢𑀦𑁄 𑀘 𑀤𑁄𑀲𑀁 𑀧𑀝𑀺𑀚𑀸𑀦𑀸𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀢𑀸𑀬 𑀓𑀢𑀓𑀫𑁆𑀫𑀁 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀤𑁂𑀯𑀢𑀸 𑀲𑀢𑁆𑀣𑀼 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀁 𑀫𑀬𑀸 𑀅𑀦𑁆𑀥𑀩𑀸𑀮𑀢𑀸𑀬 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀅𑀚𑀸𑀦𑀺𑀢𑁆𑀯𑀸 𑀧𑀸𑀧𑀓𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀫𑁂 𑀔𑀫𑀣𑀸’’𑀢𑀺 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀲𑀺. 𑀲𑀢𑁆𑀣𑀸 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀯𑀲𑁂𑀦 𑀲𑁂𑀝𑁆𑀞𑀺𑀜𑁆𑀘𑁂𑀯 𑀤𑁂𑀯𑀢𑀜𑁆𑀘 𑀑𑀯𑀤𑀦𑁆𑀢𑁄 ‘‘𑀇𑀥, 𑀕𑀳𑀧𑀢𑀺, 𑀧𑀸𑀧𑀧𑀼𑀕𑁆𑀕𑀮𑁄𑀧𑀺 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺, 𑀢𑀸𑀯 𑀪𑀤𑁆𑀭𑀫𑁆𑀧𑀺 𑀧𑀲𑁆𑀲𑀢𑀺. 𑀬𑀤𑀸 𑀧𑀦𑀲𑁆𑀲 𑀧𑀸𑀧𑀁 𑀧𑀘𑁆𑀘𑀢𑀺, 𑀢𑀤𑀸 𑀧𑀸𑀧𑀫𑁂𑀯 𑀧𑀲𑁆𑀲𑀢𑀺. 𑀪𑀤𑁆𑀭𑀧𑀼𑀕𑁆𑀕𑀮𑁄𑀧𑀺 𑀬𑀸𑀯 𑀪𑀤𑁆𑀭𑀁 𑀦 𑀧𑀘𑁆𑀘𑀢𑀺, 𑀢𑀸𑀯 𑀧𑀸𑀧𑀸𑀦𑀺 𑀧𑀲𑁆𑀲𑀢𑀺. 𑀬𑀤𑀸 𑀧𑀦𑀲𑁆𑀲 ¶ 𑀪𑀤𑁆𑀭𑀁 𑀧𑀘𑁆𑀘𑀢𑀺, 𑀢𑀤𑀸 𑀪𑀤𑁆𑀭𑀫𑁂𑀯 ¶ 𑀧𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀧𑀸𑀧𑁄𑀧𑀺 𑀧𑀲𑁆𑀲𑀢𑀻 𑀪𑀤𑁆𑀭𑀁, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀻 𑀧𑀸𑀧𑀁, 𑀅𑀣 𑀧𑀸𑀧𑁄 𑀧𑀸𑀧𑀸𑀦𑀺 𑀧𑀲𑁆𑀲𑀢𑀺.

‘‘𑀪𑀤𑁆𑀭𑁄𑀧𑀺 𑀧𑀲𑁆𑀲𑀢𑀻 𑀧𑀸𑀧𑀁, 𑀬𑀸𑀯 𑀪𑀤𑁆𑀭𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀻 𑀪𑀤𑁆𑀭𑀁, 𑀅𑀣 𑀪𑀤𑁆𑀭𑁄 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀧𑀸𑀧𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀦𑀸 𑀧𑀸𑀧𑀓𑀫𑁆𑀫𑁂𑀦 𑀬𑀼𑀢𑁆𑀢𑀧𑀼𑀕𑁆𑀕𑀮𑁄. 𑀲𑁄𑀧𑀺 𑀳𑀺 𑀧𑀼𑀭𑀺𑀫𑀲𑀼𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑀼𑀔𑀁 𑀅𑀦𑀼𑀪𑀯𑀫𑀸𑀦𑁄 𑀪𑀤𑁆𑀭𑀫𑁆𑀧𑀺 𑀧𑀲𑁆𑀲𑀢𑀺. 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀻𑀢𑀺 𑀬𑀸𑀯𑀲𑁆𑀲 𑀢𑀁 𑀧𑀸𑀧𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑁂 𑀯𑀸 𑀲𑀫𑁆𑀧𑀭𑀸𑀬𑁂 𑀯𑀸 𑀯𑀺𑀧𑀸𑀓𑀁 𑀦 𑀤𑁂𑀢𑀺. 𑀬𑀤𑀸 𑀧𑀦𑀲𑁆𑀲 𑀢𑀁 𑀤𑀺𑀝𑁆𑀞𑀥𑀫𑁆𑀫𑁂 𑀯𑀸 𑀲𑀫𑁆𑀧𑀭𑀸𑀬𑁂 𑀯𑀸 𑀯𑀺𑀧𑀸𑀓𑀁 𑀤𑁂𑀢𑀺, 𑀅𑀣 𑀤𑀺𑀝𑁆𑀞𑀥𑀫𑁆𑀫𑁂 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸, 𑀲𑀫𑁆𑀧𑀭𑀸𑀬𑁂 𑀘 𑀅𑀧𑀸𑀬𑀤𑀼𑀓𑁆𑀔𑀁 𑀅𑀦𑀼𑀪𑁄𑀦𑁆𑀢𑁄 𑀲𑁄 𑀧𑀸𑀧𑁄 𑀧𑀸𑀧𑀸𑀦𑀺𑀬𑁂𑀯 𑀧𑀲𑁆𑀲𑀢𑀺. 𑀤𑀼𑀢𑀺𑀬𑀕𑀸𑀣𑀸𑀬𑀧𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀦𑀸 𑀪𑀤𑁆𑀭𑀓𑀫𑁆𑀫𑁂𑀦 𑀬𑀼𑀢𑁆𑀢𑁄 𑀪𑀤𑁆𑀭𑁄. 𑀲𑁄𑀧𑀺 𑀳𑀺 𑀧𑀼𑀭𑀺𑀫𑀤𑀼𑀘𑁆𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑁄 𑀧𑀸𑀧𑀁 𑀧𑀲𑁆𑀲𑀢𑀺. 𑀬𑀸𑀯 𑀪𑀤𑁆𑀭𑀁 𑀦 𑀧𑀘𑁆𑀘𑀢𑀻𑀢𑀺 𑀬𑀸𑀯𑀲𑁆𑀲 𑀢𑀁 𑀪𑀤𑁆𑀭𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑁂 𑀯𑀸 𑀲𑀫𑁆𑀧𑀭𑀸𑀬𑁂 𑀯𑀸 𑀯𑀺𑀧𑀸𑀓𑀁 𑀦 𑀤𑁂𑀢𑀺. 𑀬𑀤𑀸 𑀧𑀦 𑀢𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀅𑀣 𑀤𑀺𑀝𑁆𑀞𑀥𑀫𑁆𑀫𑁂 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀲𑀼𑀔𑀁, 𑀲𑀫𑁆𑀧𑀭𑀸𑀬𑁂 𑀘 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀫𑀸𑀦𑁄 𑀲𑁄 𑀪𑀤𑁆𑀭𑁄 𑀪𑀤𑁆𑀭𑀸𑀦𑀺𑀬𑁂𑀯 𑀧𑀲𑁆𑀲𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀲𑀸 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀅𑀲𑀜𑁆𑀜𑀢𑀧𑀭𑀺𑀓𑁆𑀔𑀸𑀭𑀪𑀺𑀓𑁆𑀔𑀼𑀯𑀢𑁆𑀣𑀼

𑀫𑀸𑀯𑀫𑀜𑁆𑀜𑁂𑀣 𑀧𑀸𑀧𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀲𑀜𑁆𑀜𑀢𑀧𑀭𑀺𑀓𑁆𑀔𑀸𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀬𑀁 𑀓𑀺𑀜𑁆𑀘𑀺 𑀫𑀜𑁆𑀘𑀧𑀻𑀞𑀸𑀤𑀺𑀪𑁂𑀤𑀁 𑀧𑀭𑀺𑀓𑁆𑀔𑀸𑀭𑀁 𑀩𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀙𑀟𑁆𑀟𑁂𑀢𑀺. 𑀧𑀭𑀺𑀓𑁆𑀔𑀸𑀭𑁄 ¶ 𑀯𑀲𑁆𑀲𑁂𑀦𑀧𑀺 𑀆𑀢𑀧𑁂𑀦𑀧𑀺 𑀉𑀧𑀘𑀺𑀓𑀸𑀤𑀻𑀳𑀺𑀧𑀺 𑀯𑀺𑀦𑀲𑁆𑀲𑀢𑀺. 𑀲𑁄 𑀪𑀺𑀓𑁆𑀔𑀽𑀳𑀺 ‘‘𑀦𑀦𑀼, 𑀆𑀯𑀼𑀲𑁄, 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫 𑀧𑀝𑀺𑀲𑀸𑀫𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀧𑁆𑀧𑀓𑀁 𑀫𑀬𑀸 𑀓𑀢𑀁, 𑀆𑀯𑀼𑀲𑁄, 𑀏𑀢𑀁, 𑀦 𑀏𑀢𑀲𑁆𑀲 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀦 𑀧𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀓𑀺𑀭𑀺𑀬𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀏𑀯𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀲𑀢𑁆𑀣𑀸𑀭𑀸 𑀧𑀼𑀘𑁆𑀙𑀺𑀢𑁄𑀧𑀺 ‘‘𑀓𑀺𑀁 𑀏𑀢𑀁 𑀪𑀕𑀯𑀸 𑀅𑀧𑁆𑀧𑀓𑀁 𑀫𑀬𑀸 𑀓𑀢𑀁, 𑀦 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀦𑀸𑀲𑁆𑀲 𑀧𑀺𑀢𑁆𑀢’’𑀦𑁆𑀢𑀺 𑀢𑀣𑁂𑀯 𑀅𑀯𑀫𑀜𑁆𑀜𑀦𑁆𑀢𑁄 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀽𑀳𑀺 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀸𑀧𑀓𑀫𑁆𑀫𑀁 𑀦𑀸𑀫 ‘𑀅𑀧𑁆𑀧𑀓’𑀦𑁆𑀢𑀺 𑀦 𑀅𑀯𑀫𑀜𑁆𑀜𑀺𑀢𑀩𑁆𑀩𑀁. 𑀅𑀚𑁆𑀛𑁄𑀓𑀸𑀲𑁂 𑀞𑀧𑀺𑀢𑀜𑁆𑀳𑀺 𑀯𑀺𑀯𑀝𑀫𑀼𑀔𑀁 𑀪𑀸𑀚𑀦𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 ¶ 𑀓𑀺𑀜𑁆𑀘𑀸𑀧𑀺 𑀏𑀓𑀩𑀺𑀦𑁆𑀤𑀼𑀦𑀸 𑀦 𑀧𑀽𑀭𑀢𑀺, 𑀧𑀼𑀦𑀧𑁆𑀧𑀼𑀦𑀁 ¶ 𑀯𑀲𑁆𑀲𑀦𑁆𑀢𑁂 𑀧𑀦 𑀧𑀽𑀭𑀢𑁂𑀯, 𑀏𑀯𑀫𑁂𑀯𑀁 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀦𑁆𑀢𑀁 𑀧𑀸𑀧𑀭𑀸𑀲𑀺𑀁 𑀓𑀭𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀸𑀯𑀫𑀜𑁆𑀜𑁂𑀣 𑀧𑀸𑀧𑀲𑁆𑀲, 𑀦 𑀫𑀦𑁆𑀤𑀁 𑀆𑀕𑀫𑀺𑀲𑁆𑀲𑀢𑀺;

𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀉𑀤𑀓𑀼𑀫𑁆𑀪𑁄𑀧𑀺 𑀧𑀽𑀭𑀢𑀺;

𑀩𑀸𑀮𑁄 𑀧𑀽𑀭𑀢𑀺 𑀧𑀸𑀧𑀲𑁆𑀲, 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀆𑀘𑀺𑀦’’𑀦𑁆𑀢𑀺.

𑀢𑀢𑁆𑀣 𑀫𑀸𑀯𑀫𑀜𑁆𑀜𑁂𑀣𑀸𑀢𑀺 𑀦 𑀅𑀯𑀚𑀸𑀦𑁂𑀬𑁆𑀬. 𑀧𑀸𑀧𑀲𑁆𑀲𑀸𑀢𑀺 𑀧𑀸𑀧𑀁. 𑀦 𑀫𑀦𑁆𑀤𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀫𑁂 𑀧𑀸𑀧𑀓𑀁 𑀓𑀢𑀁, 𑀓𑀤𑀸 𑀏𑀢𑀁 𑀯𑀺𑀧𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀸𑀧𑀁 𑀦𑀸𑀯𑀚𑀸𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀉𑀤𑀓𑀼𑀫𑁆𑀪𑁄𑀧𑀻𑀢𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀓𑀼𑀮𑀸𑀮𑀪𑀸𑀚𑀦𑀁 𑀬𑀣𑀸 𑀢𑀁 𑀏𑀓𑁂𑀓𑀲𑁆𑀲𑀸𑀧𑀺 𑀉𑀤𑀓𑀩𑀺𑀦𑁆𑀤𑀼𑀦𑁄 𑀦𑀺𑀧𑀸𑀢𑁂𑀦 𑀅𑀦𑀼𑀧𑀼𑀩𑁆𑀩𑁂𑀦 𑀧𑀽𑀭𑀢𑀺, 𑀏𑀯𑀁 𑀩𑀸𑀮𑀧𑀼𑀕𑁆𑀕𑀮𑁄 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀸𑀧𑀁 𑀆𑀘𑀺𑀦𑀦𑁆𑀢𑁄 𑀓𑀭𑁄𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀧𑀸𑀧𑀲𑁆𑀲 𑀧𑀽𑀭𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸𑀧𑀺 ‘‘𑀅𑀚𑁆𑀛𑁄𑀓𑀸𑀲𑁂 𑀲𑁂𑀬𑁆𑀬𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀝𑀺𑀧𑀸𑀓𑀢𑀺𑀓𑀁 𑀅𑀓𑀭𑁄𑀦𑁆𑀢𑁄 𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀫𑀸𑀧𑀚𑁆𑀚𑀢𑀻’’𑀢𑀺 (𑀧𑀸𑀘𑀺. 𑁧𑁦𑁮-𑁧𑁧𑁦) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀻𑀢𑀺.

𑀅𑀲𑀜𑁆𑀜𑀢𑀧𑀭𑀺𑀓𑁆𑀔𑀸𑀭𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀩𑀺𑀴𑀸𑀮𑀧𑀸𑀤𑀓𑀲𑁂𑀝𑁆𑀞𑀺𑀯𑀢𑁆𑀣𑀼

𑀫𑀸𑀯𑀫𑀜𑁆𑀜𑁂𑀣 ¶ ¶ 𑀧𑀼𑀜𑁆𑀜𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀺𑀴𑀸𑀮𑀧𑀸𑀤𑀓𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀕𑁆𑀕𑀩𑀦𑁆𑀥𑀦𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳 𑁋

‘‘𑀉𑀧𑀸𑀲𑀓𑀸 𑀇𑀥𑁂𑀓𑀘𑁆𑀘𑁄 𑀅𑀢𑁆𑀢𑀦𑀸𑀯 𑀤𑀸𑀦𑀁 𑀤𑁂𑀢𑀺, 𑀧𑀭𑀁 𑀦 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀧𑀭𑀺𑀯𑀸𑀭𑀲𑀫𑁆𑀧𑀤𑀁. 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀤𑀸𑀦𑀁 𑀦 𑀤𑁂𑀢𑀺, 𑀧𑀭𑀁 𑀲𑀫𑀸𑀤𑀧𑁂𑀢𑀺. 𑀲𑁄 ¶ 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀭𑀺𑀯𑀸𑀭𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀪𑁄𑀕𑀲𑀫𑁆𑀧𑀤𑀁. 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀦 𑀤𑁂𑀢𑀺, 𑀧𑀭𑀜𑁆𑀘 𑀦 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀦𑁂𑀯 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦 𑀧𑀭𑀺𑀯𑀸𑀭𑀲𑀫𑁆𑀧𑀤𑀁, 𑀯𑀺𑀖𑀸𑀲𑀸𑀤𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀤𑁂𑀢𑀺, 𑀧𑀭𑀜𑁆𑀘 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀜𑁆𑀘𑁂𑀯 𑀮𑀪𑀢𑀺, 𑀧𑀭𑀺𑀯𑀸𑀭𑀲𑀫𑁆𑀧𑀤𑀜𑁆𑀘𑀸’’𑀢𑀺.

𑀅𑀣𑁂𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀫𑀺𑀤𑀁 𑀓𑀸𑀭𑀡𑀁, 𑀅𑀳𑀁 𑀤𑀸𑀦𑀺 𑀉𑀪𑀬𑀲𑀫𑁆𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀝𑁆𑀞𑀸𑀬 𑀕𑀫𑀦𑀓𑀸𑀮𑁂 𑀆𑀳 𑁋 ‘‘𑀪𑀦𑁆𑀢𑁂, 𑀲𑁆𑀯𑁂 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀓𑀺𑀢𑁆𑀢𑀓𑁂𑀳𑀺 𑀧𑀦 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄𑀢𑀺? 𑀲𑀩𑁆𑀩𑀪𑀺𑀓𑁆𑀔𑀽𑀳𑀺, 𑀪𑀦𑁆𑀢𑁂𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺 ¶ . 𑀲𑁄𑀧𑀺 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀫𑁆𑀫𑀢𑀸𑀢𑀸, 𑀫𑀬𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, 𑀬𑁄 𑀬𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀓𑁆𑀓𑁄𑀢𑀺, 𑀲𑁄 𑀢𑀢𑁆𑀢𑀓𑀸𑀦𑀁 𑀬𑀸𑀕𑀼𑀆𑀤𑀻𑀦𑀁 𑀅𑀢𑁆𑀣𑀸𑀬 𑀢𑀡𑁆𑀟𑀼𑀮𑀸𑀤𑀻𑀦𑀺 𑀤𑁂𑀢𑀼, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀘𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑁄 𑀯𑀺𑀘𑀭𑀺.

𑀅𑀣 𑀦𑀁 𑀏𑀓𑁄 𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀆𑀧𑀡𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀢𑁆𑀢𑀦𑁄 𑀧𑀳𑁄𑀦𑀓𑁂 𑀪𑀺𑀓𑁆𑀔𑀽 𑀅𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀦 𑀲𑀓𑀮𑀕𑀸𑀫𑀁 𑀲𑀫𑀸𑀤𑀧𑁂𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀢𑀬𑀸 𑀕𑀳𑀺𑀢𑀪𑀸𑀚𑀦𑀁 𑀆𑀳𑀭𑀸’’𑀢𑀺 𑀢𑀻𑀳𑀺 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑁆𑀯𑀸 𑀣𑁄𑀓𑁂 𑀢𑀡𑁆𑀟𑀼𑀮𑁂 𑀅𑀤𑀸𑀲𑀺, 𑀢𑀣𑀸 𑀫𑀼𑀕𑁆𑀕𑁂, 𑀢𑀣𑀸 𑀫𑀸𑀲𑁂𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀩𑀺𑀴𑀸𑀮𑀧𑀸𑀤𑀓𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄, 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀤𑁂𑀦𑁆𑀢𑁄𑀧𑀺 𑀓𑀭𑀡𑁆𑀟𑀁 𑀓𑀼𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀢𑁄 𑀓𑁄𑀡𑀁 𑀓𑀢𑁆𑀯𑀸 𑀩𑀺𑀦𑁆𑀤𑀼𑀁 𑀩𑀺𑀦𑁆𑀤𑀼𑀁 𑀧𑀕𑁆𑀖𑀭𑀸𑀬𑀦𑁆𑀢𑁄 𑀣𑁄𑀓𑀣𑁄𑀓𑀫𑁂𑀯 𑀅𑀤𑀸𑀲𑀺. 𑀉𑀧𑀸𑀲𑀓𑁄 𑀅𑀯𑀲𑁂𑀲𑁂𑀳𑀺 𑀤𑀺𑀦𑁆𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀇𑀫𑀺𑀦𑀸 𑀤𑀺𑀦𑁆𑀦𑀁 𑀯𑀺𑀲𑀼𑀁𑀬𑁂𑀯 𑀅𑀕𑁆𑀕𑀳𑁂𑀲𑀺. 𑀲𑁄 𑀲𑁂𑀝𑁆𑀞𑀺 𑀢𑀲𑁆𑀲 𑀓𑀺𑀭𑀺𑀬𑀁 ¶ 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀲 𑀫𑀬𑀸 𑀤𑀺𑀦𑁆𑀦𑀁 𑀯𑀺𑀲𑀼𑀁 𑀕𑀡𑁆𑀳𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀏𑀓𑀁 𑀘𑀽𑀴𑀼𑀧𑀝𑁆𑀞𑀸𑀓𑀁 𑀧𑀳𑀺𑀡𑀺 ‘‘𑀕𑀘𑁆𑀙, 𑀬𑀁 𑀏𑀲 𑀓𑀭𑁄𑀢𑀺, 𑀢𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 ‘‘𑀲𑁂𑀝𑁆𑀞𑀺𑀲𑁆𑀲 𑀫𑀳𑀧𑁆𑀨𑀮𑀁 𑀳𑁄𑀢𑀽’’𑀢𑀺 𑀬𑀸𑀕𑀼𑀪𑀢𑁆𑀢𑀧𑀽𑀯𑀸𑀦𑀁 𑀅𑀢𑁆𑀣𑀸𑀬 𑀏𑀓𑀁 𑀤𑁆𑀯𑁂 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀕𑁆𑀕𑀫𑀸𑀲𑁂𑀧𑀺 𑀢𑁂𑀮𑀨𑀸𑀡𑀺𑀢𑀸𑀤𑀺𑀩𑀺𑀦𑁆𑀤𑀽𑀦𑀺𑀧𑀺 𑀲𑀩𑁆𑀩𑀪𑀸𑀚𑀦𑁂𑀲𑀼 𑀧𑀓𑁆𑀔𑀺𑀧𑀺. 𑀘𑀽𑀴𑀼𑀧𑀝𑁆𑀞𑀸𑀓𑁄 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀺 ¶ . 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀫𑁂 𑀲𑁄 𑀧𑀭𑀺𑀲𑀫𑀚𑁆𑀛𑁂 𑀅𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀢𑀺, 𑀫𑀫 𑀦𑀸𑀫𑁂 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀦𑀁 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀸𑀲𑀦𑀦𑁆𑀢𑀭𑁂 𑀙𑀼𑀭𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀪𑀢𑁆𑀢𑀕𑁆𑀕𑁂 𑀅𑀝𑁆𑀞𑀸𑀲𑀺. 𑀲𑁄 𑀧𑀼𑀭𑀺𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 ¶ 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑀸 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀢𑁆𑀯𑀸 𑀇𑀫𑀁 𑀤𑀸𑀦𑀁 𑀤𑀺𑀦𑁆𑀦𑀁, 𑀢𑀢𑁆𑀣 𑀲𑀫𑀸𑀤𑀧𑀺𑀢𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑁂𑀦 𑀩𑀳𑀽𑀦𑀺𑀧𑀺 𑀣𑁄𑀓𑀸𑀦𑀺𑀧𑀺 𑀢𑀡𑁆𑀟𑀼𑀮𑀸𑀤𑀻𑀦𑀺 𑀅𑀤𑀁𑀲𑀼, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁄 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 ‘𑀅𑀲𑀼𑀓𑁂𑀦 𑀦𑀸𑀫 𑀅𑀘𑁆𑀙𑀭𑀸𑀬 𑀕𑀡𑁆𑀳𑀺𑀢𑁆𑀯𑀸 𑀢𑀡𑁆𑀟𑀼𑀮𑀸𑀤𑀻𑀦𑀺 𑀤𑀺𑀦𑁆𑀦𑀸𑀦𑀻𑀢𑀺 𑀫𑀫 𑀦𑀸𑀫𑁂 𑀕𑀳𑀺𑀢𑀫𑀢𑁆𑀢𑁂 𑀇𑀫𑀁 𑀫𑀸𑀭𑁂𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄, 𑀅𑀬𑀁 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁 𑀓𑀢𑁆𑀯𑀸 ‘𑀬𑁂𑀳𑀺𑀧𑀺 𑀦𑀸𑀴𑀺𑀆𑀤𑀻𑀳𑀺 𑀫𑀺𑀦𑀺𑀢𑁆𑀯𑀸 𑀤𑀺𑀦𑁆𑀦𑀁, 𑀬𑁂𑀳𑀺𑀧𑀺 𑀅𑀘𑁆𑀙𑀭𑀸𑀬 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀁, 𑀲𑀩𑁆𑀩𑁂𑀲𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’𑀢𑀺 𑀯𑀤𑀢𑀺. 𑀲𑀘𑀸𑀳𑀁 𑀏𑀯𑀭𑀽𑀧𑀁 𑀦 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀤𑁂𑀯𑀤𑀡𑁆𑀟𑁄 𑀫𑀫 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀔𑀫𑀸𑀳𑀺 𑀫𑁂, 𑀲𑀸𑀫𑀻’’𑀢𑀺 𑀆𑀳. ‘‘𑀓𑀺𑀁 𑀇𑀤’’𑀦𑁆𑀢𑀺 𑀘 𑀢𑁂𑀦 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀤𑀸𑀦𑀯𑁂𑀬𑁆𑀬𑀸𑀯𑀝𑀺𑀓𑀁 𑀧𑀼𑀘𑁆𑀙𑀺. 𑀲𑁄 𑀅𑀢𑀻𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀏𑀯𑀁 𑀓𑀺𑀭 𑀲𑁂𑀝𑁆𑀞𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂, ‘‘𑀉𑀧𑀸𑀲𑀓, 𑀧𑀼𑀜𑁆𑀜𑀁 𑀦𑀸𑀫 ‘𑀅𑀧𑁆𑀧𑀓’𑀦𑁆𑀢𑀺 𑀦 𑀅𑀯𑀫𑀜𑁆𑀜𑀺𑀢𑀩𑁆𑀩𑀁, 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 ¶ 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 ‘𑀅𑀧𑁆𑀧𑀓’𑀦𑁆𑀢𑀺 𑀦 𑀅𑀯𑀫𑀜𑁆𑀜𑀺𑀢𑀩𑁆𑀩𑀁. 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀳𑀺 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸 𑀯𑀺𑀯𑀝𑀪𑀸𑀚𑀦𑀁 𑀯𑀺𑀬 𑀉𑀤𑀓𑁂𑀦 𑀅𑀦𑀼𑀓𑁆𑀓𑀫𑁂𑀦 𑀧𑀼𑀜𑁆𑀜𑁂𑀦 𑀧𑀽𑀭𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀸𑀯𑀫𑀜𑁆𑀜𑁂𑀣 𑀧𑀼𑀜𑁆𑀜𑀲𑁆𑀲, 𑀦 𑀫𑀦𑁆𑀤𑀁 𑀆𑀕𑀫𑀺𑀲𑁆𑀲𑀢𑀺;

𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀉𑀤𑀓𑀼𑀫𑁆𑀪𑁄𑀧𑀺 𑀧𑀽𑀭𑀢𑀺;

𑀥𑀻𑀭𑁄 𑀧𑀽𑀭𑀢𑀺 𑀧𑀼𑀜𑁆𑀜𑀲𑁆𑀲, 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀆𑀘𑀺𑀦’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄 𑀧𑀼𑀜𑁆𑀜𑀁 𑀓𑀢𑁆𑀯𑀸 ‘‘𑀅𑀧𑁆𑀧𑀓𑀫𑀢𑁆𑀢𑀁 𑀫𑀬𑀸 𑀓𑀢𑀁, 𑀦 𑀫𑀦𑁆𑀤𑀁 𑀯𑀺𑀧𑀸𑀓𑀯𑀲𑁂𑀦 𑀆𑀕𑀫𑀺𑀲𑁆𑀲𑀢𑀺, 𑀏𑀯𑀁 𑀧𑀭𑀺𑀢𑁆𑀢𑀓𑀁 𑀓𑀫𑁆𑀫𑀁 𑀓𑀳𑀁 𑀫𑀁 𑀤𑀓𑁆𑀔𑀺𑀲𑁆𑀲𑀢𑀺, 𑀅𑀳𑀁 𑀯𑀸 𑀢𑀁 𑀓𑀳𑀁 𑀤𑀓𑁆𑀔𑀺𑀲𑁆𑀲𑀸𑀫𑀺, 𑀓𑀤𑀸 𑀏𑀢𑀁 𑀯𑀺𑀧𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀼𑀜𑁆𑀜𑀁 𑀫𑀸𑀯𑀫𑀜𑁆𑀜𑁂𑀣 𑀦 𑀅𑀯𑀚𑀸𑀦𑁂𑀬𑁆𑀬. 𑀬𑀣𑀸 𑀳𑀺 𑀦𑀺𑀭𑀦𑁆𑀢𑀭𑀁 𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑀁 𑀓𑀼𑀮𑀸𑀮𑀪𑀸𑀚𑀦𑀁 𑀧𑀽𑀭𑀢𑀺, 𑀏𑀯𑀁 𑀥𑀻𑀭𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀼𑀜𑁆𑀜𑀁 𑀆𑀘𑀺𑀦𑀦𑁆𑀢𑁄 𑀧𑀼𑀜𑁆𑀜𑀲𑁆𑀲 𑀧𑀽𑀭𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀲𑁄 𑀲𑁂𑀝𑁆𑀞𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀩𑀺𑀴𑀸𑀮𑀧𑀸𑀤𑀓𑀲𑁂𑀝𑁆𑀞𑀺𑀯𑀢𑁆𑀣𑀼 𑀙𑀝𑁆𑀞𑀁.

𑀯𑀸𑀡𑀺𑀚𑁄𑀯𑀸𑀢𑀺 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀥𑀦𑀯𑀸𑀡𑀺𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀓𑀺𑀭 𑀯𑀸𑀡𑀺𑀚𑀲𑁆𑀲 𑀕𑁂𑀳𑁂 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀑𑀢𑀸𑀭𑀁 𑀕𑀯𑁂𑀲𑀫𑀸𑀦𑀸 𑀑𑀢𑀸𑀭𑀁 𑀦 𑀮𑀪𑀺𑀁𑀲𑀼. 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀸𑀡𑀺𑀚𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀪𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀅𑀳𑀁 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀯𑀸𑀡𑀺𑀚𑁆𑀚𑀢𑁆𑀣𑀸𑀬 𑀕𑀘𑁆𑀙𑀸𑀫𑀺, 𑀬𑁂, 𑀅𑀬𑁆𑀬𑀸, 𑀢𑀁 𑀞𑀸𑀦𑀁 𑀕𑀦𑁆𑀢𑀼𑀓𑀸𑀫𑀸, 𑀢𑁂 𑀦𑀺𑀓𑁆𑀔𑀫𑀦𑁆𑀢𑀼, 𑀫𑀕𑁆𑀕𑁂 𑀪𑀺𑀓𑁆𑀔𑀸𑀬 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀢𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂𑀧𑀺 𑀘𑁄𑀭𑀸 ‘‘𑀲𑁄 𑀓𑀺𑀭 𑀯𑀸𑀡𑀺𑀚𑁄 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀕𑀦𑁆𑀢𑁆𑀯𑀸 𑀅𑀝𑀯𑀺𑀬𑀁 𑀅𑀝𑁆𑀞𑀁𑀲𑀼. 𑀯𑀸𑀡𑀺𑀚𑁄𑀧𑀺 𑀕𑀦𑁆𑀢𑁆𑀯𑀸 𑀅𑀝𑀯𑀺𑀫𑀼𑀔𑁂 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸𑀲𑀁 𑀓𑀢𑁆𑀯𑀸 𑀤𑁆𑀯𑁂 𑀢𑀬𑁄𑀧𑀺 𑀤𑀺𑀯𑀲𑁂 𑀕𑁄𑀡𑀲𑀓𑀝𑀸𑀤𑀻𑀦𑀺 𑀲𑀁𑀯𑀺𑀤𑀳𑀺, 𑀢𑁂𑀲𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀤𑁂𑀢𑀺𑀬𑁂𑀯. 𑀘𑁄𑀭𑀸 𑀢𑀲𑁆𑀫𑀺𑀁 𑀅𑀢𑀺𑀘𑀺𑀭𑀸𑀬𑀦𑁆𑀢𑁂 ‘‘𑀕𑀘𑁆𑀙, 𑀢𑀲𑁆𑀲 𑀦𑀺𑀓𑁆𑀔𑀫𑀦𑀤𑀺𑀯𑀲𑀁 𑀜𑀢𑁆𑀯𑀸 𑀏𑀳𑀻’’𑀢𑀺 𑀏𑀓𑀁 𑀧𑀼𑀭𑀺𑀲𑀁 𑀧𑀳𑀺𑀡𑀺𑀁𑀲𑀼. 𑀲𑁄 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀲𑀳𑀸𑀬𑀓𑀁 𑀧𑀼𑀘𑁆𑀙𑀺 𑁋 ‘‘𑀓𑀤𑀸 𑀯𑀸𑀡𑀺𑀚𑁄 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺. 𑀲𑁄 ‘‘𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀧𑀦 𑀧𑀼𑀘𑁆𑀙𑀲𑀻’’𑀢𑀺 𑀆𑀳. 𑀅𑀣𑀲𑁆𑀲 𑀲𑁄 ‘‘𑀫𑀬𑀁 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀏𑀢𑀲𑁆𑀲𑀢𑁆𑀣𑀸𑀬 𑀅𑀝𑀯𑀺𑀬𑀁 𑀞𑀺𑀢𑀸’’𑀢𑀺 𑀆𑀘𑀺𑀓𑁆𑀔𑀺. 𑀇𑀢𑀭𑁄 ‘‘𑀢𑁂𑀦 𑀳𑀺 𑀕𑀘𑁆𑀙, 𑀲𑀻𑀖𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸, ‘‘𑀓𑀺𑀁 ¶ 𑀦𑀼 𑀔𑁄 𑀘𑁄𑀭𑁂 𑀯𑀸𑀭𑁂𑀫𑀺, 𑀉𑀤𑀸𑀳𑀼 𑀯𑀸𑀡𑀺𑀚’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀓𑀺𑀁 𑀫𑁂 𑀘𑁄𑀭𑁂𑀳𑀺, 𑀯𑀸𑀡𑀺𑀚𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀚𑀻𑀯𑀦𑁆𑀢𑀺, 𑀯𑀸𑀡𑀺𑀚𑀲𑁆𑀲 𑀲𑀜𑁆𑀜𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀤𑀸 𑀕𑀫𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀢𑀺𑀬𑀤𑀺𑀯𑀲𑁂’’𑀢𑀺 𑀯𑀼𑀢𑁆𑀢𑁂 𑀫𑀬𑁆𑀳𑀁 𑀯𑀘𑀦𑀁 𑀓𑀭𑁄𑀣, 𑀅𑀝𑀯𑀺𑀬𑀁 𑀓𑀺𑀭 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀞𑀺𑀢𑀸, 𑀫𑀸 𑀢𑀸𑀯 𑀕𑀫𑀺𑀢𑁆𑀣𑀸𑀢𑀺. 𑀢𑁆𑀯𑀁 𑀓𑀣𑀁 𑀚𑀸𑀦𑀸𑀲𑀻𑀢𑀺? 𑀢𑁂𑀲𑀁 𑀅𑀦𑁆𑀢𑀭𑁂 𑀫𑀫 𑀲𑀳𑀸𑀬𑁄 𑀅𑀢𑁆𑀣𑀺, 𑀢𑀲𑁆𑀲 𑀫𑁂 𑀓𑀣𑀸𑀬 𑀜𑀸𑀢𑀦𑁆𑀢𑀺. ‘‘𑀢𑁂𑀦 𑀳𑀺 ‘𑀓𑀺𑀁 𑀫𑁂 𑀏𑀢𑁆𑀢𑁄 𑀕𑀢𑁂𑀦𑀸’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑁂𑀳𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀘𑀺𑀭𑀸𑀬𑀦𑁆𑀢𑁂 𑀧𑀼𑀦 𑀢𑁂𑀳𑀺 𑀘𑁄𑀭𑁂𑀳𑀺 𑀧𑁂𑀲𑀺𑀢𑁄 𑀧𑀼𑀭𑀺𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀲𑀳𑀸𑀬𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑁂𑀳𑀫𑁂𑀯 𑀓𑀺𑀭 𑀕𑀫𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀘𑁄𑀭𑀸𑀦𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀘𑁄𑀭𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀢𑀭𑀲𑁆𑀫𑀺𑀁 𑀫𑀕𑁆𑀕𑁂 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀺𑀁 𑀘𑀺𑀭𑀬𑀦𑁆𑀢𑁂 𑀧𑀼𑀦𑀧𑀺 𑀢𑁂 𑀘𑁄𑀭𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑀼𑀭𑀺𑀲𑀁 𑀧𑁂𑀲𑁂𑀲𑀼𑀁. 𑀲𑁄 𑀢𑁂𑀲𑀁 𑀢𑀢𑁆𑀣 𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦 𑀯𑀸𑀡𑀺𑀚𑀲𑁆𑀲 𑀆𑀭𑁄𑀘𑁂𑀲𑀺. 𑀯𑀸𑀡𑀺𑀚𑁄 ¶ ‘‘𑀇𑀥𑀸𑀧𑀺 𑀫𑁂 𑀯𑁂𑀓𑀮𑁆𑀮𑀁 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂 ¶ 𑀦𑁂𑀯 𑀏𑀢𑁆𑀢𑁄 𑀕𑀫𑀺𑀲𑁆𑀲𑀸𑀫𑀺, 𑀦 𑀇𑀢𑁄, 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀦𑀁 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀘𑁄𑀭𑀸 𑀓𑀺𑀭 𑀫𑀁 𑀯𑀺𑀮𑀼𑀫𑁆𑀧𑀺𑀢𑀼𑀓𑀸𑀫𑀸 𑀫𑀕𑁆𑀕𑁂 𑀞𑀺𑀢𑀸, ‘𑀧𑀼𑀦 𑀦𑀺𑀯𑀢𑁆𑀢𑀺𑀲𑁆𑀲𑀢𑀻’𑀢𑀺 𑀲𑀼𑀢𑁆𑀯𑀸 𑀇𑀢𑀭𑀲𑁆𑀫𑀺𑀁 𑀫𑀕𑁆𑀕𑁂 𑀞𑀺𑀢𑀸, 𑀅𑀳𑀁 𑀏𑀢𑁆𑀢𑁄 𑀯𑀸 𑀇𑀢𑁄 𑀯𑀸 𑀅𑀕𑀦𑁆𑀢𑁆𑀯𑀸 𑀣𑁄𑀓𑀁 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀺, 𑀪𑀤𑀦𑁆𑀢𑀸 𑀇𑀥𑁂𑀯 𑀯𑀲𑀺𑀢𑀼𑀓𑀸𑀫𑀸 𑀯𑀲𑀦𑁆𑀢𑀼, 𑀕𑀦𑁆𑀢𑀼𑀓𑀸𑀫𑀸 𑀅𑀢𑁆𑀢𑀦𑁄 𑀭𑀼𑀘𑀺𑀁 𑀓𑀭𑁄𑀦𑁆𑀢𑀽’’𑀢𑀺. 𑀪𑀺𑀓𑁆𑀔𑀽 ‘‘𑀏𑀯𑀁 𑀲𑀦𑁆𑀢𑁂 𑀫𑀬𑀁 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀯𑀸𑀡𑀺𑀚𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀥𑀦𑀯𑀸𑀡𑀺𑀚𑁂𑀦 𑀲𑀤𑁆𑀥𑀺𑀁 𑀦 𑀕𑀫𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂, 𑀫𑀳𑀸𑀥𑀦𑀯𑀸𑀡𑀺𑀚𑀲𑁆𑀲 𑀯𑀺𑀮𑀼𑀫𑁆𑀧𑀦𑀢𑁆𑀣𑀸𑀬 𑀤𑁆𑀯𑀻𑀲𑀼𑀧𑀺 𑀫𑀕𑁆𑀕𑁂𑀲𑀼 𑀘𑁄𑀭𑀸 𑀧𑀭𑀺𑀬𑀼𑀝𑁆𑀞𑀺𑀁𑀲𑀼, 𑀢𑁂𑀦 𑀲𑁄 𑀢𑀢𑁆𑀣𑁂𑀯 𑀞𑀺𑀢𑁄, 𑀫𑀬𑀁 𑀧𑀦 𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀢𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀳𑀸𑀥𑀦𑀯𑀸𑀡𑀺𑀚𑁄 𑀘𑁄𑀭𑀸𑀦𑀁 𑀅𑀢𑁆𑀣𑀺𑀢𑀸𑀬 𑀫𑀕𑁆𑀕𑀁 𑀧𑀭𑀺𑀯𑀚𑁆𑀚𑀢𑀺, 𑀚𑀻𑀯𑀺𑀢𑀼𑀓𑀸𑀫𑁄 𑀯𑀺𑀬 𑀧𑀼𑀭𑀺𑀲𑁄 𑀳𑀮𑀸𑀳𑀮𑀁 𑀯𑀺𑀲𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀪𑀺𑀓𑁆𑀔𑀼𑀦𑀸𑀧𑀺 ‘𑀢𑀬𑁄 𑀪𑀯𑀸 𑀘𑁄𑀭𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀫𑀕𑁆𑀕𑀲𑀤𑀺𑀲𑀸’𑀢𑀺 𑀜𑀢𑁆𑀯𑀸 𑀧𑀸𑀧𑀁 𑀧𑀭𑀺𑀯𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀯𑀸𑀡𑀺𑀚𑁄𑀯 𑀪𑀬𑀁 𑀫𑀕𑁆𑀕𑀁, 𑀅𑀧𑁆𑀧𑀲𑀢𑁆𑀣𑁄 𑀫𑀳𑀤𑁆𑀥𑀦𑁄;

𑀯𑀺𑀲𑀁 𑀚𑀻𑀯𑀺𑀢𑀼𑀓𑀸𑀫𑁄𑀯, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂’’𑀢𑀺.

𑀢𑀢𑁆𑀣 𑀪𑀬𑀦𑁆𑀢𑀺 𑀪𑀸𑀬𑀺𑀢𑀩𑁆𑀩𑀁, 𑀘𑁄𑀭𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀢𑁆𑀢𑀸 𑀲𑀧𑁆𑀧𑀝𑀺𑀪𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀫𑀳𑀸𑀥𑀦𑀯𑀸𑀡𑀺𑀚𑁄 ¶ 𑀅𑀧𑁆𑀧𑀲𑀢𑁆𑀣𑁄 𑀲𑀧𑁆𑀧𑀝𑀺𑀪𑀬𑀁 𑀫𑀕𑁆𑀕𑀁, 𑀬𑀣𑀸 𑀘 𑀚𑀻𑀯𑀺𑀢𑀼𑀓𑀸𑀫𑁄 𑀳𑀮𑀸𑀳𑀮𑀁 𑀯𑀺𑀲𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀏𑀯𑀁 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑀓𑀸𑀦𑀺𑀧𑀺 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀫𑀳𑀸𑀥𑀦𑀯𑀸𑀡𑀺𑀚𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀦𑁂𑀲𑀸𑀤𑀯𑀢𑁆𑀣𑀼

𑀧𑀸𑀡𑀺𑀫𑁆𑀳𑀺 𑀘𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀁 𑀦𑀸𑀫 𑀦𑁂𑀲𑀸𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀕𑀳𑁂 ¶ 𑀓𑀺𑀭 𑀏𑀓𑀸 𑀲𑁂𑀝𑁆𑀞𑀺𑀥𑀻𑀢𑀸 𑀯𑀬𑀧𑁆𑀧𑀢𑁆𑀢𑀸 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀲𑀺𑀭𑀺𑀕𑀩𑁆𑀪𑁂 𑀆𑀭𑀓𑁆𑀔𑀡𑀢𑁆𑀣𑀸𑀬 ¶ 𑀏𑀓𑀁 𑀧𑀭𑀺𑀘𑀸𑀭𑀺𑀓𑀁 𑀤𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀳𑀺 𑀯𑀸𑀲𑀺𑀬𑀫𑀸𑀦𑀸 𑀏𑀓𑀤𑀺𑀯𑀲𑀁 𑀲𑀸𑀬𑀦𑁆𑀳𑀲𑀫𑀬𑁂 𑀯𑀸𑀢𑀧𑀸𑀦𑁂𑀦 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀻 𑀧𑀜𑁆𑀘 𑀧𑀸𑀲𑀲𑀢𑀸𑀦𑀺 𑀧𑀜𑁆𑀘 𑀲𑀽𑀮𑀲𑀢𑀸𑀦𑀺 𑀆𑀤𑀸𑀬 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀚𑀻𑀯𑀫𑀸𑀦𑀁 𑀏𑀓𑀁 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀁 𑀦𑀸𑀫 𑀦𑁂𑀲𑀸𑀤𑀁 𑀧𑀜𑁆𑀘 𑀫𑀺𑀕𑀲𑀢𑀸𑀦𑀺 𑀯𑀥𑀺𑀢𑁆𑀯𑀸 𑀢𑁂𑀲𑀁 𑀫𑀁𑀲𑁂𑀦 𑀫𑀳𑀸𑀲𑀓𑀝𑀁 𑀧𑀽𑀭𑁂𑀢𑁆𑀯𑀸 𑀲𑀓𑀝𑀥𑀼𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀁𑀲𑀯𑀺𑀓𑁆𑀓𑀺𑀡𑀦𑀢𑁆𑀣𑀸𑀬 𑀦𑀕𑀭𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀧𑀭𑀺𑀘𑀸𑀭𑀺𑀓𑀸𑀬 𑀳𑀢𑁆𑀣𑁂 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 ‘‘𑀕𑀘𑁆𑀙, 𑀏𑀢𑀲𑁆𑀲 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀕𑀫𑀦𑀓𑀸𑀮𑀁 𑀜𑀢𑁆𑀯𑀸 𑀏𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀤𑀸 𑀕𑀫𑀺𑀲𑁆𑀲𑀲𑀻’’𑀢𑀺? 𑀲𑁄 ‘‘𑀅𑀚𑁆𑀚 𑀫𑀁𑀲𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀸𑀢𑁄𑀯 𑀅𑀲𑀼𑀓𑀤𑁆𑀯𑀸𑀭𑁂𑀦 𑀦𑀸𑀫 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀢𑁂𑀦 𑀓𑀣𑀺𑀢𑀓𑀣𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀅𑀢𑁆𑀢𑀦𑀸 𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢𑁆𑀣𑀸𑀪𑀭𑀡𑀚𑀸𑀢𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀸𑀢𑁄𑀯 𑀫𑀮𑀺𑀦𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀼𑀝𑀁 𑀆𑀤𑀸𑀬 𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀉𑀤𑀓𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑀻 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀲𑁄𑀧𑀺 𑀧𑀸𑀢𑁄𑀯 𑀲𑀓𑀝𑀁 𑀧𑀸𑀚𑁂𑀦𑁆𑀢𑁄 𑀦𑀺𑀓𑁆𑀔𑀫𑀺. 𑀲𑀸 𑀢𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀧𑀸𑀬𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀢𑀁 ‘𑀅𑀲𑀼𑀓𑀲𑁆𑀲 𑀦𑀸𑀫 𑀥𑀻𑀢𑀸’𑀢𑀺 𑀦 𑀚𑀸𑀦𑀸𑀫𑀺, 𑀫𑀸 𑀫𑀁 𑀅𑀦𑀼𑀩𑀦𑁆𑀥𑀺, 𑀅𑀫𑁆𑀫𑀸’’𑀢𑀺 𑀆𑀳. 𑀦 𑀫𑀁 𑀢𑁆𑀯𑀁 𑀧𑀓𑁆𑀓𑁄𑀲𑀲𑀺, 𑀅𑀳𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀓𑀝𑀁 𑀧𑀸𑀚𑁂𑀳𑀻𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀦𑀺𑀯𑀸𑀭𑁂𑀢𑀺𑀬𑁂𑀯. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀲𑀸𑀫𑀺, 𑀲𑀺𑀭𑀻 𑀦𑀸𑀫 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀻 𑀦𑀺𑀯𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀲𑁆𑀲𑀸 𑀦𑀺𑀲𑁆𑀲𑀁𑀲𑀬𑁂𑀦 𑀆𑀕𑀫𑀦𑀓𑀸𑀭𑀡𑀁 𑀜𑀢𑁆𑀯𑀸 𑀢𑀁 𑀲𑀓𑀝𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀬𑁂𑀲𑀸𑀧𑁂𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑀸 ‘‘𑀫𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀢𑀓𑀪𑀢𑁆𑀢𑀁 𑀓𑀭𑀺𑀁𑀲𑀼. 𑀲𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸 𑀢𑁂 𑀯𑀬𑀧𑁆𑀧𑀢𑁆𑀢𑁂 𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀁 𑀲𑀧𑀼𑀢𑁆𑀢𑀁 𑀲𑀲𑀼𑀡𑀺𑀲𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑁂𑀲𑀁 𑀧𑀦𑁆𑀦𑀭𑀲𑀦𑁆𑀦𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀲 𑀧𑀸𑀲𑀝𑁆𑀞𑀸𑀦𑀁 𑀅𑀕𑀫𑀸𑀲𑀺 ¶ . 𑀢𑀁 𑀤𑀺𑀯𑀲𑀁 𑀧𑀸𑀲𑁂 𑀩𑀤𑁆𑀥𑁄 𑀏𑀓𑀫𑀺𑀕𑁄𑀧𑀺 𑀦𑀸𑀳𑁄𑀲𑀺. 𑀲𑀢𑁆𑀣𑀸 ¶ 𑀢𑀲𑁆𑀲 𑀧𑀸𑀲𑀫𑀽𑀮𑁂 𑀧𑀤𑀯𑀮𑀜𑁆𑀚𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀭𑀢𑁄 𑀏𑀓𑀲𑁆𑀲 𑀕𑀼𑀫𑁆𑀩𑀲𑁆𑀲 𑀳𑁂𑀝𑁆𑀞𑀸 𑀙𑀸𑀬𑀸𑀬𑀁 𑀦𑀺𑀲𑀻𑀤𑀺. 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑁄 𑀧𑀸𑀢𑁄𑀯 𑀥𑀦𑀼𑀁 𑀆𑀤𑀸𑀬 𑀧𑀸𑀲𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀸𑀲𑁂 𑀑𑀮𑁄𑀓𑀬𑀫𑀸𑀦𑁄 𑀧𑀸𑀲𑁂 𑀩𑀤𑁆𑀥𑀁 𑀏𑀓𑀫𑁆𑀧𑀺 𑀫𑀺𑀕𑀁 𑀅𑀤𑀺𑀲𑁆𑀯𑀸 𑀲𑀢𑁆𑀣𑀼 𑀧𑀤𑀯𑀮𑀜𑁆𑀚𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀫𑀬𑁆𑀳𑀁 𑀩𑀤𑁆𑀥𑀫𑀺𑀕𑁂 𑀫𑁄𑀘𑁂𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺. 𑀲𑁄 𑀲𑀢𑁆𑀣𑀭𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀕𑀼𑀫𑁆𑀩𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸, ‘‘𑀇𑀫𑀺𑀦𑀸 𑀫𑀫 𑀫𑀺𑀕𑀸 𑀫𑁄𑀘𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀥𑀦𑀼𑀁 𑀆𑀓𑀟𑁆𑀠𑀺. 𑀲𑀢𑁆𑀣𑀸 𑀥𑀦𑀼𑀁 𑀆𑀓𑀟𑁆𑀠𑀺𑀢𑀼𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦𑀸𑀤𑀸𑀲𑀺. 𑀲𑁄 𑀲𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀫𑁆𑀧𑀺 𑀑𑀭𑁄𑀧𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀨𑀸𑀲𑀼𑀓𑀸𑀳𑀺 𑀪𑀺𑀚𑁆𑀚𑀦𑁆𑀢𑀻𑀳𑀺 ¶ 𑀯𑀺𑀬 𑀫𑀼𑀔𑀢𑁄 𑀔𑁂𑀴𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀓𑀺𑀮𑀦𑁆𑀢𑀭𑀽𑀧𑁄 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀧𑀼𑀢𑁆𑀢𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀧𑀺𑀢𑀸 𑀦𑁄 𑀘𑀺𑀭𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀧𑀺𑀢𑀼 𑀲𑀦𑁆𑀢𑀺𑀓’’𑀦𑁆𑀢𑀺 𑀫𑀸𑀢𑀭𑀸 𑀧𑁂𑀲𑀺𑀢𑀸 𑀥𑀦𑀽𑀦𑀺 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀢𑀣𑀸𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀦𑁄 𑀧𑀺𑀢𑀼 𑀧𑀘𑁆𑀘𑀸𑀫𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀢𑁆𑀢𑀧𑀺 𑀚𑀦𑀸 𑀥𑀦𑀽𑀦𑀺 𑀆𑀓𑀟𑁆𑀠𑀺𑀢𑁆𑀯𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀬𑀣𑀸 𑀦𑁂𑀲𑀁 𑀧𑀺𑀢𑀸 𑀞𑀺𑀢𑁄, 𑀢𑀣𑁂𑀯 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀫𑀸𑀢𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑀸𑀧𑀺 𑀘𑀺𑀭𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀢𑀳𑀺 𑀲𑀼𑀡𑀺𑀲𑀸𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀢𑁂 𑀢𑀣𑀸𑀞𑀺𑀢𑁂 𑀤𑀺𑀲𑁆𑀯𑀸 ‘‘𑀓𑀲𑁆𑀲 𑀦𑀼 𑀔𑁄 𑀇𑀫𑁂 𑀥𑀦𑀽𑀦𑀺 𑀆𑀓𑀟𑁆𑀠𑀺𑀢𑁆𑀯𑀸 𑀞𑀺𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑀻 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀩𑀸𑀳𑀸 𑀧𑀕𑁆𑀕𑀬𑁆𑀳 𑁋 ‘‘𑀫𑀸 𑀫𑁂 𑀧𑀺𑀢𑀭𑀁 𑀦𑀸𑀲𑁂𑀣, 𑀫𑀸 𑀫𑁂 𑀧𑀺𑀢𑀭𑀁 𑀦𑀸𑀲𑁂𑀣𑀸’’𑀢𑀺 𑀫𑀳𑀸𑀲𑀤𑁆𑀤𑀫𑀓𑀸𑀲𑀺. 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀝𑁆𑀞𑁄 𑀯𑀢𑀫𑁆𑀳𑀺, 𑀲𑀲𑀼𑀭𑁄 𑀓𑀺𑀭 𑀫𑁂 𑀏𑀲, 𑀅𑀳𑁄 𑀫𑀬𑀸 𑀪𑀸𑀭𑀺𑀬𑀁 ¶ 𑀓𑀫𑁆𑀫𑀁 𑀓𑀢’’𑀦𑁆𑀢𑀺. 𑀧𑀼𑀢𑁆𑀢𑀸𑀯𑀺𑀲𑁆𑀲 ‘‘𑀅𑀬𑁆𑀬𑀓𑁄 𑀓𑀺𑀭 𑀦𑁄 𑀏𑀲, 𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑁄 ‘‘𑀅𑀬𑀁 𑀲𑀲𑀼𑀭𑁄 𑀫𑁂’’𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑀺, 𑀧𑀼𑀢𑁆𑀢𑀸𑀧𑀺𑀲𑁆𑀲 ‘‘𑀅𑀬𑁆𑀬𑀓𑁄 𑀦𑁄’’𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑀼𑀁. 𑀅𑀣 𑀢𑁂 𑀦𑁂𑀲𑀁 𑀫𑀸𑀢𑀸 𑀲𑁂𑀝𑁆𑀞𑀺𑀥𑀻𑀢𑀸 ‘‘𑀔𑀺𑀧𑁆𑀧𑀁 𑀥𑀦𑀽𑀦𑀺 𑀙𑀟𑁆𑀟𑁂𑀢𑁆𑀯𑀸 𑀧𑀺𑀢𑀭𑀁 𑀫𑁂 𑀔𑀫𑀸𑀧𑁂𑀣𑀸’’𑀢𑀺 𑀆𑀳.

𑀲𑀢𑁆𑀣𑀸 𑀢𑁂𑀲𑀁 𑀫𑀼𑀤𑀼𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀥𑀦𑀼𑀁 𑀑𑀢𑀸𑀭𑁂𑀢𑀼𑀁 𑀅𑀤𑀸𑀲𑀺. 𑀢𑁂 𑀲𑀩𑁆𑀩𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀔𑀫𑀣 𑀦𑁄, 𑀪𑀦𑁆𑀢𑁂’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂𑀲𑀁 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑁄 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀳𑀺 𑀘𑁂𑀯 𑀲𑀼𑀡𑀺𑀲𑀸𑀳𑀺 𑀘 𑀅𑀢𑁆𑀢𑀧𑀜𑁆𑀘𑀤𑀲𑀫𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑀳𑀁 𑀕𑀫𑀺𑀢𑁆𑀣𑀸’’𑀢𑀺. 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 ¶ , 𑀆𑀦𑀦𑁆𑀤𑀸𑀢𑀺. 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀯𑁄, 𑀪𑀦𑁆𑀢𑁂, 𑀅𑀓𑀸𑀭𑀓𑁄 𑀓𑀢𑁄𑀢𑀺. 𑀆𑀫𑀸𑀦𑀦𑁆𑀤, 𑀲𑁄 𑀅𑀢𑁆𑀢𑀧𑀜𑁆𑀘𑀤𑀲𑀫𑁄 𑀅𑀘𑀮𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀸𑀬 𑀢𑀻𑀲𑀼 𑀭𑀢𑀦𑁂𑀲𑀼 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀅𑀓𑀸𑀭𑀓𑁄 𑀚𑀸𑀢𑁄𑀢𑀺. 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀦𑀦𑀼, 𑀪𑀦𑁆𑀢𑁂, 𑀪𑀭𑀺𑀬𑀸𑀧𑀺𑀲𑁆𑀲 𑀅𑀢𑁆𑀣𑀻’’𑀢𑀺. 𑀆𑀫, 𑀪𑀺𑀓𑁆𑀔𑀯𑁂, 𑀲𑀸 𑀓𑀼𑀮𑀕𑁂𑀳𑁂 𑀓𑀼𑀫𑀸𑀭𑀺𑀓𑀸 𑀳𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸𑀢𑀺. 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀲𑁆𑀲 𑀓𑀺𑀭 𑀪𑀭𑀺𑀬𑀸 𑀓𑀼𑀫𑀸𑀭𑀺𑀓𑀓𑀸𑀮𑁂 𑀏𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢 𑀧𑀼𑀢𑁆𑀢𑁂 𑀮𑀪𑀺, 𑀲𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀸𑀫𑀺𑀓𑁂𑀦 ‘𑀥𑀦𑀼𑀁 𑀆𑀳𑀭, 𑀲𑀭𑁂 𑀆𑀳𑀭, 𑀲𑀢𑁆𑀢𑀺𑀁 𑀆𑀳𑀭, 𑀲𑀽𑀮𑀁 𑀆𑀳𑀭, 𑀚𑀸𑀮𑀁 𑀆𑀳𑀭𑀸’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀢𑀸𑀦𑀺 𑀅𑀤𑀸𑀲𑀺. 𑀲𑁄𑀧𑀺 𑀢𑀸𑀬 𑀤𑀺𑀦𑁆𑀦𑀸𑀦𑀺 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀢𑀺, 𑀓𑀺𑀁 𑀦𑀼 𑀔𑁄 𑀲𑁄𑀢𑀸𑀧𑀦𑁆𑀦𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀻’’𑀢𑀺. 𑀲𑀢𑁆𑀣𑀸 ¶ 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀲𑁄𑀢𑀸𑀧𑀦𑁆𑀦𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀺, 𑀲𑀸 𑀧𑀦 ‘𑀲𑀸𑀫𑀺𑀓𑀲𑁆𑀲 𑀯𑀘𑀦𑀁 𑀓𑀭𑁄𑀫𑀻’𑀢𑀺 𑀢𑀣𑀸 𑀅𑀓𑀸𑀲𑀺. ‘𑀇𑀤𑀁 𑀕𑀳𑁂𑀢𑁆𑀯𑀸 𑀏𑀲 𑀕𑀦𑁆𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀢𑀽’𑀢𑀺 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀦𑀢𑁆𑀣𑀺. 𑀧𑀸𑀡𑀺𑀢𑀮𑀲𑁆𑀫𑀺𑀜𑁆𑀳𑀺 𑀯𑀡𑁂 𑀅𑀲𑀢𑀺 𑀯𑀺𑀲𑀁 𑀕𑀡𑁆𑀳𑀦𑁆𑀢𑀲𑁆𑀲 𑀢𑀁 𑀯𑀺𑀲𑀁 𑀅𑀦𑀼𑀟𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯𑀁 𑀅𑀓𑀼𑀲𑀮𑀘𑁂𑀢𑀦𑀸𑀬 𑀅𑀪𑀸𑀯𑁂𑀦 ¶ 𑀧𑀸𑀧𑀁 𑀅𑀓𑀭𑁄𑀦𑁆𑀢𑀲𑁆𑀲 𑀥𑀦𑀼𑀆𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑀤𑀢𑁄𑀧𑀺 𑀧𑀸𑀧𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀸𑀡𑀺𑀫𑁆𑀳𑀺 𑀘𑁂 𑀯𑀡𑁄 𑀦𑀸𑀲𑁆𑀲, 𑀳𑀭𑁂𑀬𑁆𑀬 𑀧𑀸𑀡𑀺𑀦𑀸 𑀯𑀺𑀲𑀁;

𑀦𑀸𑀩𑁆𑀩𑀡𑀁 𑀯𑀺𑀲𑀫𑀦𑁆𑀯𑁂𑀢𑀺, 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀼𑀩𑁆𑀩𑀢𑁄’’𑀢𑀺.

𑀢𑀢𑁆𑀣 𑀦𑀸𑀲𑁆𑀲𑀸𑀢𑀺 𑀦 𑀪𑀯𑁂𑀬𑁆𑀬. 𑀳𑀭𑁂𑀬𑁆𑀬𑀸𑀢𑀺 𑀳𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀸? 𑀬𑀲𑁆𑀫𑀸 𑀦𑀸𑀩𑁆𑀩𑀡𑀁 𑀯𑀺𑀲𑀫𑀦𑁆𑀯𑁂𑀢𑀺 𑀅𑀯𑀡𑀜𑁆𑀳𑀺 𑀧𑀸𑀡𑀺𑀁 𑀯𑀺𑀲𑀁 𑀅𑀦𑁆𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀥𑀦𑀼𑀆𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲𑀸𑀧𑀺 𑀅𑀓𑀼𑀲𑀮𑀘𑁂𑀢𑀦𑀸𑀬 𑀅𑀪𑀸𑀯𑁂𑀦 𑀧𑀸𑀧𑀁 𑀅𑀓𑀼𑀩𑁆𑀩𑀢𑁄 𑀧𑀸𑀧𑀁 𑀦𑀸𑀫 𑀦𑀢𑁆𑀣𑀺, 𑀅𑀯𑀡𑀁 𑀧𑀸𑀡𑀺𑀁 𑀯𑀺𑀲𑀁 𑀯𑀺𑀬 𑀦𑀸𑀲𑁆𑀲 𑀘𑀺𑀢𑁆𑀢𑀁 𑀧𑀸𑀧𑀁 𑀅𑀦𑀼𑀕𑀘𑁆𑀙𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀓𑁄 𑀦𑀼 𑀔𑁄 𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀲𑁆𑀲 𑀲𑀧𑀼𑀢𑁆𑀢𑀲𑁆𑀲 𑀲𑀲𑀼𑀡𑀺𑀲𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲𑀽𑀧𑀦𑀺𑀲𑁆𑀲𑀬𑁄, 𑀓𑁂𑀦 𑀓𑀸𑀭𑀡𑁂𑀦 𑀦𑁂𑀲𑀸𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂 ¶ , 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 ¶ 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑁂 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀥𑀸𑀢𑀼𑀘𑁂𑀢𑀺𑀬𑀁 𑀲𑀁𑀯𑀺𑀤𑀳𑀦𑁆𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀘𑁂𑀢𑀺𑀬𑀲𑁆𑀲 𑀫𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀉𑀤𑀓’’𑀦𑁆𑀢𑀺. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸 𑀫𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀢𑀺𑀮𑀢𑁂𑀮𑀁 𑀉𑀤𑀓’’𑀦𑁆𑀢𑀺. 𑀢𑁂 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸 𑀓𑁄𑀝𑁆𑀝𑁂𑀢𑁆𑀯𑀸 𑀢𑀺𑀮𑀢𑁂𑀮𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀇𑀝𑁆𑀞𑀓𑀸𑀬 𑀖𑀝𑁂𑀢𑁆𑀯𑀸 𑀲𑀼𑀯𑀡𑁆𑀡𑁂𑀦 𑀔𑀘𑀺𑀢𑁆𑀯𑀸 𑀅𑀦𑁆𑀢𑁄 𑀘𑀺𑀦𑀺𑀁𑀲𑀼, 𑀩𑀳𑀺𑀫𑀼𑀔𑁂 𑀧𑀦 𑀏𑀓𑀕𑁆𑀖𑀦𑀲𑀼𑀯𑀡𑁆𑀡𑀇𑀝𑁆𑀞𑀓𑀸𑀯 𑀅𑀳𑁂𑀲𑀼𑀁. 𑀏𑀓𑁂𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀅𑀳𑁄𑀲𑀺. 𑀢𑁂 𑀬𑀸𑀯 𑀥𑀸𑀢𑀼𑀦𑀺𑀥𑀸𑀦𑀸 𑀘𑁂𑀢𑀺𑀬𑁂 𑀦𑀺𑀝𑁆𑀞𑀺𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀥𑀸𑀢𑀼𑀦𑀺𑀥𑀸𑀦𑀓𑀸𑀮𑁂 𑀩𑀳𑀼𑀦𑀸 𑀥𑀦𑁂𑀦 𑀅𑀢𑁆𑀣𑁄, 𑀓𑀁 𑀦𑀼 𑀔𑁄 𑀚𑁂𑀝𑁆𑀞𑀓𑀁 𑀓𑀭𑁄𑀫𑀸’’𑀢𑀺.

𑀅𑀣𑁂𑀓𑁄 𑀕𑀸𑀫𑀯𑀸𑀲𑀺𑀓𑁄 𑀲𑁂𑀝𑁆𑀞𑀺 ‘‘𑀅𑀳𑀁 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀥𑀸𑀢𑀼𑀦𑀺𑀥𑀸𑀦𑁂 𑀏𑀓𑀁 𑀳𑀺𑀭𑀜𑁆𑀜𑀓𑁄𑀝𑀺𑀁 𑀧𑀓𑁆𑀔𑀺𑀧𑀺. 𑀢𑀁 𑀤𑀺𑀲𑁆𑀯𑀸 𑀭𑀝𑁆𑀞𑀯𑀸𑀲𑀺𑀦𑁄 ‘‘𑀅𑀬𑀁 𑀦𑀕𑀭𑀲𑁂𑀝𑁆𑀞𑀺 𑀥𑀦𑀫𑁂𑀯 𑀲𑀁𑀳𑀭𑀢𑀺, 𑀏𑀯𑀭𑀽𑀧𑁂 𑀘𑁂𑀢𑀺𑀬𑁂 𑀚𑁂𑀝𑁆𑀞𑀓𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀕𑀸𑀫𑀯𑀸𑀲𑀻 𑀧𑀦 𑀓𑁄𑀝𑀺𑀥𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀚𑁂𑀝𑁆𑀞𑀓𑁄 𑀚𑀸𑀢𑁄’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼. 𑀲𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀤𑁆𑀯𑁂 𑀓𑁄𑀝𑀺𑀬𑁄 𑀤𑀢𑁆𑀯𑀸 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑁂 𑀓𑁄𑀝𑀺𑀬𑁄 𑀅𑀤𑀸𑀲𑀺. 𑀇𑀢𑀭𑁄 ‘‘𑀅𑀳𑀫𑁂𑀯 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀲𑁆𑀲𑁄 𑀓𑁄𑀝𑀺𑀬𑁄 𑀅𑀤𑀸𑀲𑀺. 𑀏𑀯𑀁 𑀯𑀟𑁆𑀠𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀦𑀕𑀭𑀯𑀸𑀲𑀻 𑀅𑀝𑁆𑀞 𑀓𑁄𑀝𑀺𑀬𑁄 𑀅𑀤𑀸𑀲𑀺. 𑀕𑀸𑀫𑀯𑀸𑀲𑀺𑀦𑁄 𑀧𑀦 ¶ 𑀕𑁂𑀳𑁂 𑀦𑀯𑀓𑁄𑀝𑀺𑀥𑀦𑀫𑁂𑀯 𑀅𑀢𑁆𑀣𑀺, 𑀦𑀕𑀭𑀯𑀸𑀲𑀺𑀦𑁄 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁. 𑀢𑀲𑁆𑀫𑀸 𑀕𑀸𑀫𑀯𑀸𑀲𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀦𑀯 𑀓𑁄𑀝𑀺𑀬𑁄 𑀤𑀲𑁆𑀲𑀸𑀫𑀺, 𑀅𑀬𑀁 ‘𑀤𑀲 ¶ 𑀓𑁄𑀝𑀺𑀬𑁄 𑀤𑀲𑁆𑀲𑀸𑀫𑀻’𑀢𑀺 𑀯𑀓𑁆𑀔𑀢𑀺, 𑀅𑀣 𑀫𑁂 𑀦𑀺𑀤𑁆𑀥𑀦𑀪𑀸𑀯𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀏𑀢𑁆𑀢𑀓𑀜𑁆𑀘 𑀥𑀦𑀁 𑀤𑀲𑁆𑀲𑀸𑀫𑀺, 𑀲𑀧𑀼𑀢𑁆𑀢𑀤𑀸𑀭𑁄 𑀘 𑀘𑁂𑀢𑀺𑀬𑀲𑁆𑀲 𑀤𑀸𑀲𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢 𑀧𑀼𑀢𑁆𑀢𑁂 𑀲𑀢𑁆𑀢 𑀲𑀼𑀡𑀺𑀲𑀸𑀬𑁄 𑀪𑀭𑀺𑀬𑀜𑁆𑀘 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀘𑁂𑀢𑀺𑀬𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀭𑀝𑁆𑀞𑀯𑀸𑀲𑀺𑀦𑁄 ‘‘𑀥𑀦𑀁 𑀦𑀸𑀫 𑀲𑀓𑁆𑀓𑀸 𑀉𑀧𑁆𑀧𑀸𑀤𑁂𑀢𑀼𑀁, 𑀅𑀬𑀁 𑀧𑀦 𑀲𑀧𑀼𑀢𑁆𑀢𑀤𑀸𑀭𑁄 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑀺, 𑀅𑀬𑀫𑁂𑀯 𑀚𑁂𑀝𑁆𑀞𑀓𑁄 𑀳𑁄𑀢𑀽’’𑀢𑀺 𑀢𑀁 𑀚𑁂𑀝𑁆𑀞𑀓𑀁 𑀓𑀭𑀺𑀁𑀲𑀼. 𑀇𑀢𑀺 𑀢𑁂 𑀲𑁄𑀴𑀲𑀧𑀺 𑀚𑀦𑀸 𑀘𑁂𑀢𑀺𑀬𑀲𑁆𑀲 𑀤𑀸𑀲𑀸 𑀅𑀳𑁂𑀲𑀼𑀁. 𑀭𑀝𑁆𑀞𑀯𑀸𑀲𑀺𑀦𑁄 𑀧𑀦 𑀢𑁂 𑀪𑀼𑀚𑀺𑀲𑁆𑀲𑁂 𑀅𑀓𑀁𑀲𑀼. 𑀏𑀯𑀁 𑀲𑀦𑁆𑀢𑁂𑀧𑀺 𑀘𑁂𑀢𑀺𑀬𑀫𑁂𑀯 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀯𑀲𑀦𑁆𑀢𑁂𑀲𑀼 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀭𑀺𑀬𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀭𑀸𑀚𑀕𑀳𑁂 ¶ 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀓𑀼𑀫𑀸𑀭𑀺𑀓𑀸𑀯 𑀳𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀅𑀤𑀺𑀝𑁆𑀞𑀲𑀘𑁆𑀘𑀲𑁆𑀲 𑀧𑀦 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀪𑀸𑀭𑀺𑀬𑀸𑀢𑀺 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑁄 𑀕𑀦𑁆𑀢𑁆𑀯𑀸 𑀦𑁂𑀲𑀸𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀲𑁂𑀝𑁆𑀞𑀺𑀥𑀻𑀢𑀭𑀁 𑀧𑀼𑀩𑁆𑀩𑀲𑀺𑀦𑁂𑀳𑁄 𑀅𑀚𑁆𑀛𑁄𑀢𑁆𑀣𑀭𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀲𑀸 𑀧𑀼𑀩𑁆𑀩𑀲𑀺𑀦𑁂𑀳𑁂𑀦𑁂𑀯 𑀦𑁂𑀲𑀸𑀤𑀓𑀼𑀮𑀁 𑀅𑀕𑀫𑀸𑀲𑀺. 𑀧𑀼𑀢𑁆𑀢𑀸𑀧𑀺𑀲𑁆𑀲𑀸 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸 𑀏𑀯 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀁𑀲𑀼, 𑀲𑀼𑀡𑀺𑀲𑀸𑀬𑁄𑀧𑀺𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 ¶ 𑀢𑁂𑀲𑀁𑀬𑁂𑀯 𑀕𑁂𑀳𑀁 𑀅𑀕𑀫𑀁𑀲𑀼. 𑀏𑀯𑀁 𑀢𑁂 𑀲𑀩𑁆𑀩𑁂𑀧𑀺 𑀢𑀤𑀸 𑀘𑁂𑀢𑀺𑀬𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸𑀢𑀺.

𑀓𑀼𑀓𑁆𑀓𑀼𑀝𑀫𑀺𑀢𑁆𑀢𑀦𑁂𑀲𑀸𑀤𑀯𑀢𑁆𑀣𑀼 𑀅𑀝𑁆𑀞𑀫𑀁.

𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀁 𑀦𑀸𑀫 𑀲𑀼𑀦𑀔𑀮𑀼𑀤𑁆𑀤𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀥𑀦𑀼𑀁 𑀆𑀤𑀸𑀬 𑀲𑀼𑀦𑀔𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑀸𑀴𑀓𑀡𑁆𑀡𑀺 𑀫𑁂 𑀤𑀺𑀝𑁆𑀞𑁄, 𑀅𑀚𑁆𑀚 ¶ 𑀓𑀺𑀜𑁆𑀘𑀺 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀣𑁂𑀭𑁄𑀧𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀼𑀦 𑀯𑀺𑀳𑀸𑀭𑀁 𑀧𑀸𑀬𑀸𑀲𑀺. 𑀇𑀢𑀭𑁄𑀧𑀺 𑀅𑀭𑀜𑁆𑀜𑁂 𑀯𑀺𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀧𑀼𑀦 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚𑀸𑀳𑀁 𑀇𑀫𑀁 𑀓𑀸𑀴𑀓𑀡𑁆𑀡𑀺𑀁 𑀤𑀺𑀲𑁆𑀯𑀸 𑀅𑀭𑀜𑁆𑀜𑀁 𑀕𑀢𑁄 𑀓𑀺𑀜𑁆𑀘𑀺 𑀦 𑀮𑀪𑀺𑀁, 𑀇𑀤𑀸𑀦𑀺 𑀫𑁂 𑀧𑀼𑀦𑀧𑀺 𑀅𑀪𑀺𑀫𑀼𑀔𑁄 𑀚𑀸𑀢𑁄, 𑀲𑀼𑀦𑀔𑁂𑀳𑀺 𑀦𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀁 𑀤𑀢𑁆𑀯𑀸 𑀲𑀼𑀦𑀔𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀣𑁂𑀭𑁄𑀧𑀺 ‘‘𑀫𑀸 𑀏𑀯𑀁 𑀓𑀭𑀺 𑀉𑀧𑀸𑀲𑀓𑀸’’𑀢𑀺 𑀬𑀸𑀘𑀺. 𑀲𑁄 ‘‘𑀅𑀚𑁆𑀚𑀸𑀳𑀁 𑀢𑀯 𑀲𑀫𑁆𑀫𑀼𑀔𑀻𑀪𑀽𑀢𑀢𑁆𑀢𑀸 𑀓𑀺𑀜𑁆𑀘𑀺 𑀦𑀸𑀮𑀢𑁆𑀣𑀁, 𑀧𑀼𑀦𑀧𑀺 𑀫𑁂 𑀲𑀫𑁆𑀫𑀼𑀔𑀻𑀪𑀸𑀯𑀫𑀸𑀕𑀢𑁄𑀲𑀺, 𑀔𑀸𑀤𑀸𑀧𑁂𑀲𑁆𑀲𑀸𑀫𑁂𑀯 𑀢’’𑀦𑁆𑀢𑀺 𑀯𑀢𑁆𑀯𑀸 𑀲𑀼𑀦𑀔𑁂 𑀉𑀬𑁆𑀬𑁄𑀚𑁂𑀲𑀺. 𑀣𑁂𑀭𑁄 𑀯𑁂𑀕𑁂𑀦 𑀏𑀓𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀼𑀭𑀺𑀲𑀧𑁆𑀧𑀫𑀸𑀡𑁂 𑀞𑀸𑀦𑁂 𑀦𑀺𑀲𑀻𑀤𑀺. 𑀲𑀼𑀦𑀔𑀸 ¶ 𑀭𑀼𑀓𑁆𑀔𑀁 ¶ 𑀧𑀭𑀺𑀯𑀸𑀭𑁂𑀲𑀼𑀁. 𑀮𑀼𑀤𑁆𑀤𑀓𑁄 𑀕𑀦𑁆𑀢𑁆𑀯𑀸 ‘‘𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀢𑁄𑀧𑀺 𑀢𑁂 𑀫𑁄𑀓𑁆𑀔𑁄 𑀦𑀢𑁆𑀣𑀻’’𑀢𑀺 𑀢𑀁 𑀲𑀭𑀢𑀼𑀡𑁆𑀟𑁂𑀦 𑀧𑀸𑀤𑀢𑀮𑁂 𑀯𑀺𑀚𑁆𑀛𑀺. 𑀣𑁂𑀭𑁄 ‘‘𑀫𑀸 𑀏𑀯𑀁 𑀓𑀭𑁄𑀳𑀻’’𑀢𑀺 𑀢𑀁 𑀬𑀸𑀘𑀺𑀬𑁂𑀯. 𑀇𑀢𑀭𑁄 𑀢𑀲𑁆𑀲 𑀬𑀸𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀺𑀚𑁆𑀛𑀺𑀬𑁂𑀯. 𑀣𑁂𑀭𑁄 𑀏𑀓𑀲𑁆𑀫𑀺𑀁 𑀧𑀸𑀤𑀢𑀮𑁂 𑀯𑀺𑀚𑁆𑀛𑀺𑀬𑀫𑀸𑀦𑁂 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀢𑀺𑀬𑀁 𑀧𑀸𑀤𑀁 𑀑𑀮𑀫𑁆𑀩𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀚𑁆𑀛𑀺𑀬𑀫𑀸𑀦𑁂 𑀢𑀫𑁆𑀧𑀺 𑀉𑀓𑁆𑀔𑀺𑀧𑀢𑀺, 𑀏𑀯𑀫𑀲𑁆𑀲 𑀲𑁄 𑀬𑀸𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀯 𑀤𑁆𑀯𑁂𑀧𑀺 𑀧𑀸𑀤𑀢𑀮𑀸𑀦𑀺 𑀯𑀺𑀚𑁆𑀛𑀺𑀬𑁂𑀯. 𑀣𑁂𑀭𑀲𑁆𑀲 𑀲𑀭𑀻𑀭𑀁 𑀉𑀓𑁆𑀓𑀸𑀳𑀺 𑀆𑀤𑀺𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀲𑁄 𑀯𑁂𑀤𑀦𑀸𑀦𑀼𑀯𑀢𑁆𑀢𑀺𑀓𑁄 𑀳𑀼𑀢𑁆𑀯𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀧𑀸𑀭𑀼𑀢𑀘𑀻𑀯𑀭𑀁 𑀪𑀲𑁆𑀲𑀦𑁆𑀢𑀫𑁆𑀧𑀺 𑀦 𑀲𑀮𑁆𑀮𑀓𑁆𑀔𑁂𑀲𑀺. 𑀢𑀁 𑀧𑀢𑀫𑀸𑀦𑀁 𑀓𑁄𑀓𑀁 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀧𑀭𑀺𑀓𑁆𑀔𑀺𑀧𑀦𑁆𑀢𑀫𑁂𑀯 𑀧𑀢𑀺. 𑀲𑀼𑀦𑀔𑀸 ‘‘𑀣𑁂𑀭𑁄 𑀧𑀢𑀺𑀢𑁄’’𑀢𑀺 𑀲𑀜𑁆𑀜𑀸𑀬 𑀘𑀻𑀯𑀭𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀮𑀼𑀜𑁆𑀚𑀺𑀢𑁆𑀯𑀸 𑀔𑀸𑀤𑀦𑁆𑀢𑀸 𑀅𑀝𑁆𑀞𑀺𑀫𑀢𑁆𑀢𑀸𑀯𑀲𑁂𑀲𑀁 𑀓𑀭𑀺𑀁𑀲𑀼. 𑀲𑀼𑀦𑀔𑀸 𑀘𑀻𑀯𑀭𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀁𑀲𑀼.

𑀅𑀣 𑀦𑁂𑀲𑀁 𑀣𑁂𑀭𑁄 𑀏𑀓𑀁 𑀲𑀼𑀓𑁆𑀔𑀤𑀡𑁆𑀟𑀓𑀁 𑀪𑀜𑁆𑀚𑀺𑀢𑁆𑀯𑀸 𑀔𑀺𑀧𑀺. 𑀲𑀼𑀦𑀔𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀺𑀓𑁄𑀯 𑀅𑀫𑁆𑀳𑁂𑀳𑀺 𑀔𑀸𑀤𑀺𑀢𑁄’’𑀢𑀺 𑀜𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀁𑀲𑀼. 𑀣𑁂𑀭𑁄 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀲𑀺 ‘‘𑀫𑀫 𑀘𑀻𑀯𑀭𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀲 𑀦𑀝𑁆𑀞𑁄, 𑀅𑀭𑁄𑀕𑀁 𑀦𑀼 𑀔𑁄 𑀫𑁂 𑀲𑀻𑀮’’𑀦𑁆𑀢𑀺. 𑀲𑁄 𑀭𑀼𑀓𑁆𑀔𑀸 𑀑𑀢𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀫𑀫 𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 ¶ 𑀲𑁄 𑀉𑀧𑀸𑀲𑀓𑁄 𑀦𑀝𑁆𑀞𑁄, 𑀓𑀘𑁆𑀘𑀺 𑀫𑁂 𑀅𑀭𑁄𑀕𑀁 𑀲𑀻𑀮𑀁, 𑀅𑀢𑁆𑀣𑀺 𑀫𑁂 𑀲𑀫𑀡𑀪𑀸𑀯𑁄’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀅𑀭𑁄𑀕𑀁 𑀢𑁂 𑀲𑀻𑀮𑀁, 𑀅𑀢𑁆𑀣𑀺 𑀢𑁂 𑀲𑀫𑀡𑀪𑀸𑀯𑁄, 𑀲𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀧𑀤𑀼𑀲𑁆𑀲𑀺𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀦 𑀓𑁂𑀯𑀮𑀜𑁆𑀘 𑀇𑀤𑀸𑀦𑁂𑀯, 𑀅𑀢𑀻𑀢𑁂𑀧𑀺 𑀅𑀧𑁆𑀧𑀤𑀼𑀝𑁆𑀞𑀸𑀦𑀁 𑀧𑀤𑀼𑀲𑁆𑀲𑀺𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀓𑀺𑀭𑁂𑀓𑁄 𑀯𑁂𑀚𑁆𑀚𑁄 𑀯𑁂𑀚𑁆𑀚𑀓𑀫𑁆𑀫𑀢𑁆𑀣𑀸𑀬 𑀕𑀸𑀫𑀁 𑀯𑀺𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀮𑀪𑀺𑀢𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀲𑀫𑁆𑀩𑀳𑀼𑀮𑁂 𑀓𑀼𑀫𑀸𑀭𑀓𑁂 𑀓𑀻𑀴𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀲𑀧𑁆𑀧𑁂𑀦 𑀟𑀁𑀲𑀸𑀧𑁂𑀢𑁆𑀯𑀸 𑀢𑀺𑀓𑀺𑀘𑁆𑀙𑀺𑀢𑁆𑀯𑀸 𑀆𑀳𑀸𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀩𑀺𑀮𑁂 𑀲𑀻𑀲𑀁 𑀦𑀺𑀳𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀁 𑀲𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀅𑀫𑁆𑀪𑁄, 𑀓𑀼𑀫𑀸𑀭𑀓𑀸 𑀏𑀲𑁄 𑀲𑀸𑀴𑀺𑀓𑀧𑁄𑀢𑀓𑁄, 𑀕𑀡𑁆𑀳𑀣 𑀦’’𑀦𑁆𑀢𑀺 𑀆𑀳. 𑀅𑀣𑁂𑀓𑁄 𑀓𑀼𑀫𑀸𑀭𑀓𑁄 ¶ 𑀲𑀧𑁆𑀧𑀁 𑀕𑀻𑀯𑀸𑀬𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀲𑀧𑁆𑀧𑀪𑀸𑀯𑀁 𑀜𑀢𑁆𑀯𑀸 𑀯𑀺𑀭𑀯𑀦𑁆𑀢𑁄 𑀅𑀯𑀺𑀤𑀽𑀭𑁂 𑀞𑀺𑀢𑀲𑁆𑀲 𑀯𑁂𑀚𑁆𑀚𑀲𑁆𑀲 𑀫𑀢𑁆𑀣𑀓𑁂 𑀔𑀺𑀧𑀺. 𑀲𑀧𑁆𑀧𑁄 𑀯𑁂𑀚𑁆𑀚𑀲𑁆𑀲 𑀔𑀦𑁆𑀥𑀝𑁆𑀞𑀺𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀴𑁆𑀳𑀁 𑀟𑀁𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺, 𑀏𑀯𑀫𑁂𑀲 𑀓𑁄𑀓𑁄 𑀲𑀼𑀦𑀔𑀮𑀼𑀤𑁆𑀤𑀓𑁄 𑀧𑀼𑀩𑁆𑀩𑁂𑀧𑀺 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀧𑀤𑀼𑀲𑁆𑀲𑀺𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑁄𑀬𑁂𑀯𑀸𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’𑀢𑀺.

𑀢𑀢𑁆𑀣 ¶ 𑀅𑀧𑁆𑀧𑀤𑀼𑀝𑁆𑀞𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀅𑀤𑀼𑀝𑁆𑀞𑀲𑁆𑀲. 𑀦𑀭𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀤𑀼𑀲𑁆𑀲𑀢𑀻𑀢𑀺 𑀅𑀧𑀭𑀚𑁆𑀛𑀢𑀺. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀦𑀺𑀭𑀧𑀭𑀸𑀥𑀲𑁆𑀲𑁂𑀯. 𑀧𑁄𑀲𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀅𑀧𑀭𑁂𑀦𑀸𑀓𑀸𑀭𑁂𑀦 𑀲𑀢𑁆𑀢𑀸𑀥𑀺𑀯𑀘𑀦𑀫𑁂𑀯. 𑀅𑀦𑀗𑁆𑀕𑀡𑀲𑁆𑀲𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀲𑁆𑀲. 𑀧𑀘𑁆𑀘𑁂𑀢𑀻𑀢𑀺 𑀧𑀢𑀺𑀏𑀢𑀺. 𑀧𑀝𑀺𑀯𑀸𑀢𑀦𑁆𑀢𑀺 𑀬𑀣𑀸 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀧𑀝𑀺𑀯𑀸𑀢𑁂 𑀞𑀺𑀢𑀁 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀔𑀺𑀢𑁆𑀢𑁄 𑀲𑀼𑀔𑀼𑀫𑁄 𑀭𑀚𑁄𑀢𑀺 𑀢𑀫𑁂𑀯 𑀧𑀼𑀭𑀺𑀲𑀁 𑀧𑀘𑁆𑀘𑁂𑀢𑀺, 𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀢𑀺, 𑀏𑀯𑀫𑁂𑀯 𑀬𑁄 𑀧𑀼𑀕𑁆𑀕𑀮𑁄 𑀅𑀧𑀤𑀼𑀝𑁆𑀞𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀸𑀡𑀺𑀧𑁆𑀧𑀳𑀭𑀸𑀤𑀻𑀦𑀺 𑀤𑀤𑀦𑁆𑀢𑁄 𑀧𑀤𑀼𑀲𑁆𑀲𑀢𑀺, 𑀢𑀫𑁂𑀯 𑀩𑀸𑀮𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂, 𑀲𑀫𑁆𑀧𑀭𑀸𑀬𑁂 𑀯𑀸 𑀦𑀺𑀭𑀬𑀸𑀤𑀻𑀲𑀼 𑀯𑀺𑀧𑀘𑁆𑀘𑀫𑀸𑀦𑀁 𑀢𑀁 𑀧𑀸𑀧𑀁 𑀯𑀺𑀧𑀸𑀓𑀤𑀼𑀓𑁆𑀔𑀯𑀲𑁂𑀦 𑀧𑀘𑁆𑀘𑁂𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀓𑁄𑀓𑀲𑀼𑀦𑀔𑀮𑀼𑀤𑁆𑀤𑀓𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀫𑀡𑀺𑀓𑀸𑀭𑀓𑀼𑀮𑀽𑀧𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀕𑀩𑁆𑀪𑀫𑁂𑀓𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀡𑀺𑀓𑀸𑀭𑀓𑀼𑀮𑀽𑀧𑀓𑀁 𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀣𑁂𑀭𑁄 𑀏𑀓𑀲𑁆𑀲 𑀫𑀡𑀺𑀓𑀸𑀭𑀲𑁆𑀲 𑀓𑀼𑀮𑁂 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀪𑀼𑀜𑁆𑀚𑀺. 𑀢𑀲𑁆𑀫𑀺𑀁 𑀓𑀼𑀮𑁂 𑀚𑀬𑀫𑁆𑀧𑀢𑀺𑀓𑀸 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀣𑁂𑀭𑀁 𑀧𑀝𑀺𑀚𑀕𑁆𑀕𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀫𑀡𑀺𑀓𑀸𑀭𑁄 𑀣𑁂𑀭𑀲𑁆𑀲 𑀧𑀼𑀭𑀢𑁄 𑀫𑀁𑀲𑀁 𑀙𑀺𑀦𑁆𑀤𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀏𑀓𑀁 𑀫𑀡𑀺𑀭𑀢𑀦𑀁 ‘‘𑀇𑀫𑀁 ¶ 𑀥𑁄𑀯𑀺𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀧𑀳𑀺𑀡𑀢𑀽’’𑀢𑀺 𑀧𑁂𑀲𑁂𑀲𑀺. 𑀫𑀡𑀺𑀓𑀸𑀭𑁄 𑀲𑀮𑁄𑀳𑀺𑀢𑁂𑀦𑁂𑀯 ¶ 𑀳𑀢𑁆𑀣𑁂𑀦 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑁂𑀴𑀸𑀬 𑀉𑀧𑀭𑀺 𑀞𑀧𑁂𑀢𑁆𑀯𑀸 ¶ 𑀳𑀢𑁆𑀣𑀥𑁄𑀯𑀦𑀢𑁆𑀣𑀁 𑀅𑀦𑁆𑀢𑁄 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀧𑀦 𑀕𑁂𑀳𑁂 𑀧𑁄𑀲𑀸𑀯𑀦𑀺𑀬𑀓𑁄𑀜𑁆𑀘𑀲𑀓𑀼𑀡𑁄 𑀅𑀢𑁆𑀣𑀺. 𑀲𑁄 𑀮𑁄𑀳𑀺𑀢𑀕𑀦𑁆𑀥𑁂𑀦 𑀫𑀁𑀲𑀲𑀜𑁆𑀜𑀸𑀬 𑀢𑀁 𑀫𑀡𑀺𑀁 𑀣𑁂𑀭𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀕𑀺𑀮𑀺. 𑀫𑀡𑀺𑀓𑀸𑀭𑁄 𑀆𑀕𑀦𑁆𑀢𑁆𑀯𑀸 𑀫𑀡𑀺𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀫𑀡𑀺 𑀓𑁂𑀦 𑀕𑀳𑀺𑀢𑁄’’𑀢𑀺 𑀪𑀭𑀺𑀬𑀜𑁆𑀘 𑀧𑀼𑀢𑁆𑀢𑀓𑁂 𑀘 𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀦 𑀕𑀡𑁆𑀳𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀣𑁂𑀭𑁂𑀦 𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺 𑁋 ‘‘𑀣𑁂𑀭𑁂𑀦 𑀫𑀡𑀺 𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀸, 𑀲𑀸𑀫𑀺, 𑀫𑀸 𑀏𑀯𑀁 𑀅𑀯𑀘, 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑀸 𑀣𑁂𑀭𑀲𑁆𑀲 𑀦 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀦 𑀲𑁄 𑀫𑀡𑀺𑀁 𑀕𑀡𑁆𑀳𑀸𑀢𑀻𑀢𑀺. 𑀫𑀡𑀺𑀓𑀸𑀭𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀡𑀺𑀭𑀢𑀦𑀁 𑀢𑀼𑀫𑁆𑀳𑁂𑀳𑀺 𑀕𑀳𑀺𑀢’’𑀦𑁆𑀢𑀺. 𑀦 𑀕𑀡𑁆𑀳𑀸𑀫𑀺, 𑀉𑀧𑀸𑀲𑀓𑀸𑀢𑀺. 𑀪𑀦𑁆𑀢𑁂, 𑀦 𑀇𑀥 𑀅𑀜𑁆𑀜𑁄 𑀅𑀢𑁆𑀣𑀺, 𑀢𑀼𑀫𑁆𑀳𑁂𑀳𑀺𑀬𑁂𑀯 𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀤𑁂𑀣 𑀫𑁂 𑀫𑀡𑀺𑀭𑀢𑀦𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂 𑀧𑀼𑀦 𑀪𑀭𑀺𑀬𑀁 𑀆𑀳 𑁋 ‘‘𑀣𑁂𑀭𑁂𑀦𑁂𑀯 𑀫𑀡𑀺 𑀕𑀳𑀺𑀢𑁄, 𑀧𑀻𑀴𑁂𑀢𑁆𑀯𑀸 𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀲𑀸, 𑀲𑀸𑀫𑀺, 𑀫𑀸 𑀦𑁄 𑀦𑀸𑀲𑀬𑀺, 𑀯𑀭𑀁 𑀅𑀫𑁆𑀳𑁂𑀳𑀺 𑀤𑀸𑀲𑀩𑁆𑀬𑀁 𑀉𑀧𑀕𑀦𑁆𑀢𑀼𑀁, 𑀦 𑀘 𑀣𑁂𑀭𑀁 𑀏𑀯𑀭𑀽𑀧𑀁 𑀯𑀢𑁆𑀢𑀼𑀦𑁆𑀢𑀺. 𑀲𑁄 ‘‘𑀲𑀩𑁆𑀩𑁂𑀯 𑀫𑀬𑀁 𑀤𑀸𑀲𑀢𑁆𑀢𑀁 𑀉𑀧𑀕𑀘𑁆𑀙𑀦𑁆𑀢𑀸 𑀫𑀡𑀺𑀫𑀽𑀮𑀁 𑀦 𑀅𑀕𑁆𑀖𑀸𑀫𑀸’’𑀢𑀺 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀤𑀡𑁆𑀟𑁂𑀦 ¶ 𑀖𑀝𑁆𑀝𑁂𑀲𑀺. 𑀣𑁂𑀭𑀲𑁆𑀲 𑀲𑀻𑀲𑀢𑁄 𑀘 𑀓𑀡𑁆𑀡𑀦𑀸𑀲𑀸𑀳𑀺 𑀘 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺, 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀅𑀳𑁂𑀲𑀼𑀁, 𑀲𑁄 𑀯𑁂𑀤𑀦𑀸𑀧𑀫𑀢𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺. 𑀓𑁄𑀜𑁆𑀘𑁄 𑀮𑁄𑀳𑀺𑀢𑀕𑀦𑁆𑀥𑁂𑀦𑀸 𑀕𑀦𑁆𑀢𑁆𑀯𑀸 𑀮𑁄𑀳𑀺𑀢𑀁 𑀧𑀺𑀯𑀺. 𑀅𑀣 𑀦𑀁 𑀫𑀡𑀺𑀓𑀸𑀭𑁄 𑀣𑁂𑀭𑁂 𑀉𑀧𑁆𑀧𑀦𑁆𑀦𑀓𑁄𑀥𑀯𑁂𑀕𑁂𑀦 ‘‘𑀢𑁆𑀯𑀁 𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀔𑀺𑀧𑀺. 𑀲𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀭𑀺𑀢𑁆𑀯𑀸 𑀉𑀢𑁆𑀢𑀸𑀦𑁄 𑀅𑀳𑁄𑀲𑀺.

𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸, 𑀉𑀧𑀸𑀲𑀓, 𑀲𑀻𑀲𑁂 𑀯𑁂𑀞𑀦𑀁 𑀢𑀸𑀯 𑀫𑁂 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀇𑀫𑀁 𑀓𑁄𑀜𑁆𑀘𑀁 𑀑𑀮𑁄𑀓𑁂𑀳𑀺 ‘‘𑀫𑀢𑁄 𑀯𑀸, 𑀦𑁄 𑀯𑀸’’𑀢𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀏𑀲𑁄 𑀯𑀺𑀬 𑀢𑁆𑀯𑀫𑁆𑀧𑀺 𑀫𑀭𑀺𑀲𑁆𑀲𑀲𑀻’’𑀢𑀺. 𑀉𑀧𑀸𑀲𑀓, 𑀇𑀫𑀺𑀦𑀸 𑀲𑁄 𑀫𑀡𑀺 𑀕𑀺𑀮𑀺𑀢𑁄, 𑀲𑀘𑁂 𑀅𑀬𑀁 𑀦 𑀅𑀫𑀭𑀺𑀲𑁆𑀲𑀸, 𑀦 𑀢𑁂 𑀅𑀳𑀁 𑀫𑀭𑀦𑁆𑀢𑁄𑀧𑀺 𑀫𑀡𑀺𑀁 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑁄 𑀢𑀲𑁆𑀲 𑀉𑀤𑀭𑀁 𑀨𑀸𑀮𑁂𑀢𑁆𑀯𑀸 𑀫𑀡𑀺𑀁 𑀤𑀺𑀲𑁆𑀯𑀸 𑀧𑀯𑁂𑀥𑁂𑀦𑁆𑀢𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀔𑀫𑀣, 𑀫𑁂, 𑀪𑀦𑁆𑀢𑁂, 𑀅𑀚𑀸𑀦𑀦𑁆𑀢𑁂𑀦 𑀫𑀬𑀸 𑀓𑀢’’𑀦𑁆𑀢𑀺 𑀆𑀳. 𑀉𑀧𑀸𑀲𑀓, 𑀦𑁂𑀯 𑀢𑀼𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀺, 𑀦 𑀫𑀬𑁆𑀳𑀁, 𑀯𑀝𑁆𑀝𑀲𑁆𑀲𑁂𑀯𑁂𑀲 𑀤𑁄𑀲𑁄, 𑀔𑀫𑀸𑀫𑀺 𑀢𑁂𑀢𑀺. 𑀪𑀦𑁆𑀢𑁂, 𑀲𑀘𑁂 𑀫𑁂 𑀔𑀫𑀣, 𑀧𑀓𑀢𑀺𑀦𑀺𑀬𑀸𑀫𑁂𑀦𑁂𑀯 𑀫𑁂 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸𑀢𑀺. ‘‘𑀉𑀧𑀸𑀲𑀓, 𑀦 𑀤𑀸𑀦𑀸𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀧𑀭𑁂𑀲𑀁 ¶ 𑀕𑁂𑀳𑀲𑁆𑀲 𑀅𑀦𑁆𑀢𑁄𑀙𑀤𑀦𑀁 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀅𑀦𑁆𑀢𑁄𑀕𑁂𑀳𑀧𑀯𑁂𑀲𑀦𑀲𑁆𑀲𑁂𑀯 𑀳𑀺 ¶ 𑀅𑀬𑀁 𑀤𑁄𑀲𑁄, 𑀇𑀢𑁄 𑀧𑀝𑁆𑀞𑀸𑀬 𑀧𑀸𑀤𑁂𑀲𑀼 𑀆𑀯𑀳𑀦𑁆𑀢𑁂𑀲𑀼 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄𑀯 𑀪𑀺𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀬 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀘𑁆𑀘𑀢𑀺 ¶ 𑀫𑀼𑀦𑀺𑀦𑁄 𑀪𑀢𑁆𑀢𑀁, 𑀣𑁄𑀓𑀁 𑀣𑁄𑀓𑀁 𑀓𑀼𑀮𑁂 𑀓𑀼𑀮𑁂;

𑀧𑀺𑀡𑁆𑀟𑀺𑀓𑀸𑀬 𑀘𑀭𑀺𑀲𑁆𑀲𑀸𑀫𑀺, 𑀅𑀢𑁆𑀣𑀺 𑀚𑀗𑁆𑀖𑀩𑀮𑀁 𑀫𑀫𑀸’’𑀢𑀺. (𑀣𑁂𑀭𑀕𑀸. 𑁨𑁪𑁮) 𑁋

𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀣𑁂𑀭𑁄 𑀢𑁂𑀦𑁂𑀯 𑀩𑁆𑀬𑀸𑀥𑀺𑀦𑀸 𑀦 𑀘𑀺𑀭𑀲𑁆𑀲𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀓𑁄𑀜𑁆𑀘𑁄 𑀫𑀡𑀺𑀓𑀸𑀭𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀫𑀡𑀺𑀓𑀸𑀭𑁄 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀫𑀡𑀺𑀓𑀸𑀭𑀲𑁆𑀲 𑀪𑀭𑀺𑀬𑀸 𑀣𑁂𑀭𑁂 𑀫𑀼𑀤𑀼𑀘𑀺𑀢𑁆𑀢𑀢𑀸𑀬 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀢𑁂𑀲𑀁 𑀅𑀪𑀺𑀲𑀫𑁆𑀧𑀭𑀸𑀬𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀓𑀘𑁆𑀘𑁂 𑀧𑀸𑀧𑀓𑀸𑀭𑀺𑀦𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀓𑀘𑁆𑀘𑁂 𑀓𑀢𑀓𑀮𑁆𑀬𑀸𑀡𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀦𑀸𑀲𑀯𑀸 𑀧𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀕𑀩𑁆𑀪𑀫𑁂𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀺𑀦𑁄;

𑀲𑀕𑁆𑀕𑀁 𑀲𑀼𑀕𑀢𑀺𑀦𑁄 𑀬𑀦𑁆𑀢𑀺, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸’’𑀢𑀺.

𑀢𑀢𑁆𑀣 𑀕𑀩𑁆𑀪𑀦𑁆𑀢𑀺 𑀇𑀥 𑀫𑀦𑀼𑀲𑁆𑀲𑀕𑀩𑁆𑀪𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀡𑀺𑀓𑀸𑀭𑀓𑀼𑀮𑀽𑀧𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑀫𑀁.

𑀦 ¶ 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀬𑁄 𑀚𑀦𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀭𑀺 𑀓𑀺𑀭 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀸 𑀏𑀓𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀕𑀸𑀫𑀯𑀸𑀲𑀺𑀦𑁄 𑀢𑁂 𑀲𑀫𑁆𑀧𑀢𑁆𑀢𑁂 𑀆𑀤𑀸𑀬 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀯𑁂𑀮𑀁 𑀆𑀕𑀫𑀬𑀫𑀸𑀦𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀪𑀢𑁆𑀢𑀁 ¶ 𑀧𑀘𑀺𑀢𑁆𑀯𑀸 𑀲𑀽𑀧𑀩𑁆𑀬𑀜𑁆𑀚𑀦𑀁 𑀥𑀽𑀧𑀬𑀫𑀸𑀦𑀸𑀬 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀪𑀸𑀚𑀦𑀢𑁄 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀙𑀤𑀦𑀁 𑀕𑀡𑁆𑀳𑀺. 𑀢𑀢𑁄 𑀏𑀓𑀁 𑀢𑀺𑀡𑀓𑀭𑀴𑀁 𑀉𑀝𑁆𑀞𑀳𑀺𑀢𑁆𑀯𑀸 𑀚𑀮𑀫𑀸𑀦𑀁 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀓𑀸𑀓𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀢𑀢𑁆𑀣 𑀕𑀻𑀯𑀁 𑀧𑀯𑁂𑀲𑁂𑀢𑁆𑀯𑀸 𑀢𑀺𑀡𑀯𑀮𑁆𑀮𑀺𑀯𑁂𑀞𑀺𑀢𑁄 𑀛𑀸𑀬𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀧𑀢𑀺 ¶ . 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀧𑀲𑁆𑀲𑀣𑀸𑀯𑀼𑀲𑁄, 𑀓𑀸𑀓𑁂𑀦 𑀧𑀢𑁆𑀢𑀁 𑀯𑀺𑀧𑁆𑀧𑀓𑀸𑀭𑀁, 𑀇𑀫𑀺𑀦𑀸 𑀓𑀢𑀓𑀫𑁆𑀫𑀁 𑀅𑀜𑁆𑀜𑀢𑁆𑀭 𑀲𑀢𑁆𑀣𑀸𑀭𑀸 𑀓𑁄 𑀚𑀸𑀦𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀫𑀲𑁆𑀲 𑀓𑀫𑁆𑀫𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀧𑀭𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀲𑀢𑁆𑀣𑀼 𑀤𑀲𑁆𑀲𑀦𑀢𑁆𑀣𑀸𑀬 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑀸𑀦𑀁 𑀦𑀸𑀯𑀸 𑀲𑀫𑀼𑀤𑁆𑀤𑁂 𑀦𑀺𑀘𑁆𑀘𑀮𑀸 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 ‘‘𑀓𑀸𑀴𑀓𑀡𑁆𑀡𑀺𑀦𑀸 𑀏𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀮𑀸𑀓𑀁 𑀯𑀺𑀘𑀸𑀭𑁂𑀲𑀼𑀁. 𑀦𑀸𑀯𑀺𑀓𑀲𑁆𑀲 𑀘 𑀪𑀭𑀺𑀬𑀸 𑀧𑀞𑀫𑀯𑀬𑁂 𑀞𑀺𑀢𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸, 𑀲𑀮𑀸𑀓𑀸 𑀢𑀲𑁆𑀲𑀸 𑀧𑀸𑀧𑀼𑀡𑀺. ‘‘𑀲𑀮𑀸𑀓𑀁 𑀧𑀼𑀦 𑀯𑀺𑀘𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀬𑀸𑀯𑀢𑀢𑀺𑀬𑀁 𑀯𑀺𑀘𑀸𑀭𑁂𑀲𑀼𑀁, 𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀲𑁆𑀲𑀸 ¶ 𑀏𑀯 𑀧𑀸𑀧𑀼𑀡𑀺. 𑀫𑀦𑀼𑀲𑁆𑀲𑀸 ‘‘𑀓𑀺𑀁, 𑀲𑀸𑀫𑀻’’𑀢𑀺 𑀦𑀸𑀯𑀺𑀓𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀲𑀼𑀁. 𑀦𑀸𑀯𑀺𑀓𑁄 ‘‘𑀦 𑀲𑀓𑁆𑀓𑀸 𑀏𑀓𑀺𑀲𑁆𑀲𑀸 𑀅𑀢𑁆𑀣𑀸𑀬 𑀫𑀳𑀸𑀚𑀦𑀁 𑀦𑀸𑀲𑁂𑀢𑀼𑀁, 𑀉𑀤𑀓𑁂 𑀦𑀁 𑀔𑀺𑀧𑀣𑀸’’𑀢𑀺 𑀆𑀳. 𑀲𑀸 𑀕𑀳𑁂𑀢𑁆𑀯𑀸 𑀉𑀤𑀓𑁂 𑀔𑀺𑀧𑀺𑀬𑀫𑀸𑀦𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀯𑀺𑀭𑀯𑀁 𑀅𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀦𑀸𑀯𑀺𑀓𑁄 𑀓𑁄 𑀅𑀢𑁆𑀣𑁄 𑀇𑀫𑀺𑀲𑁆𑀲𑀸 𑀆𑀪𑀭𑀡𑁂𑀳𑀺 𑀦𑀝𑁆𑀞𑁂𑀳𑀺, 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀙𑀟𑁆𑀟𑁂𑀣 𑀦𑀁, 𑀅𑀳𑀁 𑀧𑀦𑁂𑀢𑀁 𑀉𑀤𑀓𑀧𑀺𑀝𑁆𑀞𑁂 𑀧𑁆𑀮𑀯𑀫𑀸𑀦𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻 𑀢𑀲𑁆𑀫𑀸 𑀬𑀣𑀸 𑀦𑀁 𑀅𑀳𑀁 𑀦 𑀧𑀲𑁆𑀲𑀸𑀫𑀺, 𑀢𑀣𑀸 𑀏𑀓𑀁 𑀯𑀸𑀮𑀼𑀓𑀓𑀼𑀝𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀲𑀫𑀼𑀤𑁆𑀤𑁂 𑀔𑀺𑀧𑀣𑀸𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀢𑀫𑁆𑀧𑀺 𑀧𑀢𑀺𑀢𑀝𑁆𑀞𑀸𑀦𑁂𑀬𑁂𑀯 𑀫𑀘𑁆𑀙𑀓𑀘𑁆𑀙𑀧𑀸 𑀯𑀺𑀮𑀼𑀫𑁆𑀧𑀺𑀁𑀲𑀼. 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀓𑁄 𑀅𑀜𑁆𑀜𑁄 𑀏𑀢𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀁 𑀢𑀲𑁆𑀲𑀸 𑀓𑀫𑁆𑀫𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀧𑀢𑁆𑀯𑀸 𑀦𑀸𑀯𑀸𑀢𑁄 𑀑𑀭𑀼𑀬𑁆𑀳 𑀧𑀓𑁆𑀓𑀫𑀺𑀁𑀲𑀼.

𑀅𑀧𑀭𑁂𑀧𑀺 𑀲𑀢𑁆𑀢 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀲𑀸𑀬𑀁 𑀏𑀓𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀁𑀲𑀼. 𑀏𑀓𑀲𑁆𑀫𑀺𑀜𑁆𑀘 𑀮𑁂𑀡𑁂 𑀲𑀢𑁆𑀢 𑀫𑀜𑁆𑀘𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀢𑀤𑁂𑀯 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀦𑀺𑀧𑀦𑁆𑀦𑀸𑀦𑀁 𑀭𑀢𑁆𑀢𑀺𑀪𑀸𑀕𑁂 𑀓𑀽𑀝𑀸𑀕𑀸𑀭𑀫𑀢𑁆𑀢𑁄 𑀧𑀸𑀲𑀸𑀡𑁄 𑀧𑀯𑀝𑁆𑀝𑀫𑀸𑀦𑁄 𑀆𑀕𑀦𑁆𑀢𑁆𑀯𑀸 𑀮𑁂𑀡𑀤𑁆𑀯𑀸𑀭𑀁 𑀧𑀺𑀤𑀳𑀺. 𑀦𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 ‘‘𑀫𑀬𑀁 𑀇𑀫𑀁 𑀮𑁂𑀡𑀁 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀧𑀸𑀧𑀬𑀺𑀫𑁆𑀳𑀸, 𑀅𑀬𑀜𑁆𑀘 𑀫𑀳𑀸𑀧𑀸𑀲𑀸𑀡𑁄 𑀮𑁂𑀡𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑁄 𑀅𑀝𑁆𑀞𑀸𑀲𑀺, 𑀅𑀧𑀦𑁂𑀲𑁆𑀲𑀸𑀫 ¶ 𑀦’’𑀦𑁆𑀢𑀺 𑀲𑀫𑀦𑁆𑀢𑀸 𑀲𑀢𑁆𑀢𑀳𑀺 𑀕𑀸𑀫𑁂𑀳𑀺 ¶ 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑀸𑀧𑀺 𑀞𑀸𑀦𑀸 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀦𑁆𑀢𑁄 𑀧𑀯𑀺𑀝𑁆𑀞𑀪𑀺𑀓𑁆𑀔𑀽𑀧𑀺 𑀯𑀸𑀬𑀫𑀺𑀁𑀲𑀼𑀬𑁂𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀢𑁆𑀢𑀸𑀳𑀁 𑀧𑀸𑀲𑀸𑀡𑀁 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀆𑀕𑀦𑁆𑀢𑀼𑀓𑀸 𑀲𑀢𑁆𑀢𑀸𑀳𑀁 𑀙𑀸𑀢𑀚𑁆𑀛𑀢𑁆𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀁𑀲𑀼. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀲𑀸𑀡𑁄 𑀲𑀬𑀫𑁂𑀯 𑀧𑀯𑀝𑁆𑀝𑀺𑀢𑁆𑀯𑀸 𑀅𑀧𑀕𑀢𑁄. 𑀪𑀺𑀓𑁆𑀔𑀽 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀇𑀫𑀁 𑀧𑀸𑀧𑀁 𑀅𑀜𑁆𑀜𑀢𑁆𑀭 𑀲𑀢𑁆𑀣𑀸𑀭𑀸 𑀓𑁄 𑀚𑀸𑀦𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂 𑀧𑀼𑀭𑀺𑀫𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑀸𑀕𑀦𑁆𑀢𑁆𑀯𑀸 𑀲𑀩𑁆𑀩𑁂 𑀏𑀓𑀢𑁄𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀲𑀢𑁆𑀣𑀸𑀭𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀸𑀦𑀼𑀪𑀽𑀢𑀸𑀦𑀺 𑀓𑀸𑀭𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺𑀁𑀲𑀼.

𑀲𑀢𑁆𑀣𑀸𑀧𑀺 ¶ 𑀢𑁂𑀲𑀁 𑀧𑀝𑀺𑀧𑀸𑀝𑀺𑀬𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀲𑁄 𑀢𑀸𑀯 𑀓𑀸𑀓𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀫𑁂𑀯 𑀅𑀦𑀼𑀪𑁄𑀲𑀺. 𑀅𑀢𑀻𑀢𑀓𑀸𑀮𑁂 𑀳𑀺 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀓𑀲𑁆𑀲𑀓𑁄 𑀅𑀢𑁆𑀢𑀦𑁄 𑀕𑁄𑀡𑀁 𑀤𑀫𑁂𑀦𑁆𑀢𑁄 𑀤𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀳𑀺𑀲𑁆𑀲 𑀕𑁄𑀡𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀧𑁄𑀣𑁂𑀢𑁆𑀯𑀸 𑀉𑀝𑁆𑀞𑀸𑀧𑀺𑀢𑁄𑀧𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑀢𑀣𑁂𑀯 𑀦𑀺𑀧𑀚𑁆𑀚𑀺. 𑀲𑁄 𑀯𑀸𑀬𑀫𑀺𑀢𑁆𑀯𑀸 𑀢𑀁 𑀤𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑁄𑀥𑀸𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 ‘𑀇𑀢𑁄 ¶ 𑀤𑀸𑀦𑀺 𑀧𑀝𑁆𑀞𑀸𑀬 𑀲𑀼𑀔𑀁 𑀦𑀺𑀧𑀚𑁆𑀚𑀺𑀲𑁆𑀲𑀲𑀻’𑀢𑀺 𑀧𑀮𑀸𑀮𑀧𑀺𑀡𑁆𑀟𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀧𑀮𑀸𑀮𑁂𑀦 𑀢𑀲𑁆𑀲 𑀕𑀻𑀯𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀅𑀕𑁆𑀕𑀺𑀫𑀤𑀸𑀲𑀺, 𑀕𑁄𑀡𑁄 𑀢𑀢𑁆𑀣𑁂𑀯 𑀛𑀸𑀬𑀺𑀢𑁆𑀯𑀸 𑀫𑀢𑁄. 𑀢𑀤𑀸, 𑀪𑀺𑀓𑁆𑀔𑀯𑁂, 𑀢𑁂𑀦 𑀓𑀸𑀓𑁂𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁. 𑀲𑁄 𑀢𑀲𑁆𑀲 𑀯𑀺𑀧𑀸𑀓𑁂𑀦 𑀤𑀻𑀖𑀭𑀢𑁆𑀢𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀯𑀫𑁂𑀯 𑀆𑀓𑀸𑀲𑁂 𑀛𑀸𑀬𑀺𑀢𑁆𑀯𑀸𑀯 𑀫𑀢𑁄’’𑀢𑀺.

𑀲𑀸𑀧𑀺, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀻 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀫𑁂𑀯 𑀅𑀦𑀼𑀪𑁄𑀲𑀺. 𑀲𑀸 𑀳𑀺 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀏𑀓𑀲𑁆𑀲 𑀕𑀳𑀧𑀢𑀺𑀓𑀲𑁆𑀲 𑀪𑀭𑀺𑀬𑀸 𑀉𑀤𑀓𑀳𑀭𑀡𑀓𑁄𑀝𑁆𑀝𑀦𑀧𑀘𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀳𑀢𑁆𑀣𑁂𑀦𑁂𑀯 𑀅𑀓𑀸𑀲𑀺. 𑀢𑀲𑁆𑀲𑀸 𑀏𑀓𑁄 𑀲𑀼𑀦𑀔𑁄 𑀢𑀁 𑀕𑁂𑀳𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀼𑀭𑀼𑀫𑀸𑀦𑀁 𑀑𑀮𑁄𑀓𑁂𑀦𑁆𑀢𑁄𑀯 𑀦𑀺𑀲𑀻𑀤𑀢𑀺. 𑀔𑁂𑀢𑁆𑀢𑁂 𑀪𑀢𑁆𑀢𑀁 𑀳𑀭𑀦𑁆𑀢𑀺𑀬𑀸 𑀤𑀸𑀭𑀼𑀧𑀡𑁆𑀡𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀺𑀬𑀸 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀤𑀳𑀭𑀫𑀦𑀼𑀲𑁆𑀲𑀸 ‘‘𑀅𑀫𑁆𑀪𑁄 𑀦𑀺𑀓𑁆𑀔𑀦𑁆𑀢𑁄 𑀲𑀼𑀦𑀔𑀮𑀼𑀤𑁆𑀤𑀓𑁄, 𑀅𑀚𑁆𑀚 𑀫𑀬𑀁 𑀫𑀁𑀲𑁂𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀉𑀧𑁆𑀧𑀡𑁆𑀟𑁂𑀦𑁆𑀢𑀺. 𑀲𑀸 𑀢𑁂𑀲𑀁 𑀓𑀣𑀸𑀬 𑀫𑀗𑁆𑀓𑀼 𑀳𑀼𑀢𑁆𑀯𑀸 𑀲𑀼𑀦𑀔𑀁 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀧𑀮𑀸𑀧𑁂𑀢𑀺, 𑀲𑀼𑀦𑀔𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀅𑀦𑀼𑀩𑀦𑁆𑀥𑀢𑀺. 𑀲𑁄 𑀓𑀺𑀭𑀲𑁆𑀲𑀸 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀪𑀢𑁆𑀢𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑀺𑀦𑁂𑀳𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀚𑀸𑀬𑀸 𑀯𑀸 𑀧𑀢𑀺 𑀯𑀸 𑀅𑀪𑀽𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀅𑀯𑀺𑀤𑀽𑀭𑁂 𑀧𑀦 𑀅𑀢𑁆𑀢𑀪𑀸𑀯𑁂 𑀜𑀸𑀢𑀓𑁂𑀲𑀼 𑀅𑀥𑀺𑀫𑀢𑁆𑀢𑁄 𑀲𑀺𑀦𑁂𑀳𑁄 ¶ 𑀳𑁄𑀢𑀺, 𑀢𑀲𑁆𑀫𑀸 ¶ 𑀲𑁄 𑀲𑀼𑀦𑀔𑁄 𑀢𑀁 𑀯𑀺𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀸 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀔𑁂𑀢𑁆𑀢𑀁 𑀲𑀸𑀫𑀺𑀓𑀲𑁆𑀲 𑀬𑀸𑀕𑀼𑀁 𑀳𑀭𑀫𑀸𑀦𑀸 𑀭𑀚𑁆𑀚𑀼𑀁 𑀉𑀘𑁆𑀙𑀗𑁆𑀕𑁂 𑀞𑀧𑁂𑀢𑁆𑀯𑀸 𑀅𑀕𑀫𑀸𑀲𑀺, 𑀲𑀼𑀦𑀔𑁄 𑀢𑀸𑀬𑁂𑀯 𑀲𑀤𑁆𑀥𑀺𑀁 𑀕𑀢𑁄. 𑀲𑀸 𑀲𑀸𑀫𑀺𑀓𑀲𑁆𑀲 𑀬𑀸𑀕𑀼𑀁 𑀤𑀢𑁆𑀯𑀸 𑀢𑀼𑀘𑁆𑀙𑀓𑀼𑀝𑀁 𑀆𑀤𑀸𑀬 𑀏𑀓𑀁 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀼𑀝𑀁 𑀯𑀸𑀮𑀼𑀓𑀸𑀬 𑀧𑀽𑀭𑁂𑀢𑁆𑀯𑀸 𑀲𑀫𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑀲𑁆𑀲 𑀲𑀼𑀦𑀔𑀲𑁆𑀲 𑀲𑀤𑁆𑀤𑀫𑀓𑀸𑀲𑀺. 𑀲𑀼𑀦𑀔𑁄 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀅𑀚𑁆𑀚 𑀫𑀥𑀼𑀭𑀓𑀣𑀸 𑀮𑀤𑁆𑀥𑀸’’𑀢𑀺 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀦𑁆𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺. 𑀲𑀸 𑀢𑀁 𑀕𑀻𑀯𑀸𑀬𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀏𑀓𑀸𑀬 𑀭𑀚𑁆𑀚𑀼𑀓𑁄𑀝𑀺𑀬𑀸 𑀓𑀼𑀝𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀭𑀚𑁆𑀚𑀼𑀓𑁄𑀝𑀺𑀁 𑀲𑀼𑀦𑀔𑀲𑁆𑀲 𑀕𑀻𑀯𑀸𑀬𑀁 𑀩𑀦𑁆𑀥𑀺𑀢𑁆𑀯𑀸 𑀓𑀼𑀝𑀁 𑀉𑀤𑀓𑀸𑀪𑀺𑀫𑀼𑀔𑀁 𑀧𑀯𑀝𑁆𑀝𑁂𑀲𑀺. 𑀲𑀼𑀦𑀔𑁄 𑀓𑀼𑀝𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀉𑀤𑀓𑁂 𑀧𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀲𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀤𑀻𑀖𑀭𑀢𑁆𑀢𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀢𑁆𑀢𑀪𑀸𑀯𑀲𑀢𑁂 𑀯𑀸𑀮𑀼𑀓𑀓𑀼𑀝𑀁 𑀕𑀻𑀯𑀸𑀬𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀸 𑀓𑀸𑀮𑀫𑀓𑀸𑀲𑀻𑀢𑀺.

𑀢𑀼𑀫𑁆𑀳𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀫𑁂𑀯 𑀅𑀦𑀼𑀪𑀽𑀢𑀁. 𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀲𑀢𑁆𑀢 𑀕𑁄𑀧𑀸𑀮𑀓𑀤𑀸𑀭𑀓𑀸 𑀏𑀓𑀲𑁆𑀫𑀺𑀁 𑀅𑀝𑀯𑀺𑀧𑀤𑁂𑀲𑁂 𑀲𑀢𑁆𑀢𑀸𑀳𑀯𑀸𑀭𑁂𑀦 𑀕𑀸𑀯𑀺𑀬𑁄 𑀯𑀺𑀘𑀭𑀦𑁆𑀢𑀸 𑀏𑀓𑀤𑀺𑀯𑀲𑀁 𑀕𑀸𑀯𑀺𑀬𑁄 ¶ 𑀯𑀺𑀘𑀸𑀭𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸 𑀏𑀓𑀁 𑀫𑀳𑀸𑀕𑁄𑀥𑀁 𑀤𑀺𑀲𑁆𑀯𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀕𑁄𑀥𑀸 𑀧𑀮𑀸𑀬𑀺𑀢𑁆𑀯𑀸 𑀏𑀓𑀁 𑀯𑀫𑁆𑀫𑀺𑀓𑀁 𑀧𑀸𑀯𑀺𑀲𑀺. 𑀢𑀲𑁆𑀲 𑀧𑀦 𑀯𑀫𑁆𑀫𑀺𑀓𑀲𑁆𑀲 𑀲𑀢𑁆𑀢 𑀙𑀺𑀤𑁆𑀤𑀸𑀦𑀺, 𑀤𑀸𑀭𑀓𑀸 ‘‘𑀫𑀬𑀁 𑀤𑀸𑀦𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀲𑁆𑀯𑁂 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀏𑀓𑁂𑀓𑁄 𑀏𑀓𑁂𑀓𑀁 𑀲𑀸𑀔𑀪𑀗𑁆𑀕𑀫𑀼𑀝𑁆𑀞𑀺𑀁 𑀆𑀤𑀸𑀬 𑀲𑀢𑁆𑀢𑀧𑀺 𑀚𑀦𑀸 𑀲𑀢𑁆𑀢 𑀙𑀺𑀤𑁆𑀤𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼 ¶ . 𑀢𑁂 𑀧𑀼𑀦𑀤𑀺𑀯𑀲𑁂 𑀢𑀁 𑀕𑁄𑀥𑀁 𑀅𑀫𑀦𑀲𑀺𑀓𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀧𑀤𑁂𑀲𑁂 𑀕𑀸𑀯𑀺𑀬𑁄 𑀯𑀺𑀘𑀸𑀭𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀕𑀸𑀯𑀺𑀬𑁄 𑀆𑀤𑀸𑀬 𑀕𑀘𑁆𑀙𑀦𑁆𑀢𑀸 𑀢𑀁 𑀯𑀫𑁆𑀫𑀺𑀓𑀁 𑀤𑀺𑀲𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀓𑀸 𑀦𑀼 𑀔𑁄 𑀢𑀲𑁆𑀲𑀸 𑀕𑁄𑀥𑀸𑀬 𑀧𑀯𑀢𑁆𑀢𑀻’’𑀢𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀺𑀤𑀳𑀺𑀢𑀸𑀦𑀺 𑀙𑀺𑀤𑁆𑀤𑀸𑀦𑀺 𑀯𑀺𑀯𑀭𑀺𑀁𑀲𑀼. 𑀕𑁄𑀥𑀸 𑀚𑀻𑀯𑀺𑀢𑁂 𑀦𑀺𑀭𑀸𑀮𑀬𑀸 𑀳𑀼𑀢𑁆𑀯𑀸 𑀅𑀝𑁆𑀞𑀺𑀘𑀫𑁆𑀫𑀸𑀯𑀲𑁂𑀲𑀸 𑀧𑀯𑁂𑀥𑀫𑀸𑀦𑀸 𑀦𑀺𑀓𑁆𑀔𑀫𑀺. 𑀢𑁂 𑀢𑀁 𑀤𑀺𑀲𑁆𑀯𑀸 𑀅𑀦𑀼𑀓𑀫𑁆𑀧𑀁 𑀓𑀢𑁆𑀯𑀸 ‘‘𑀫𑀸 𑀦𑀁 𑀫𑀸𑀭𑁂𑀣, 𑀲𑀢𑁆𑀢𑀸𑀳𑀁 𑀙𑀺𑀦𑁆𑀦𑀪𑀢𑁆𑀢𑀸 𑀚𑀸𑀢𑀸’’𑀢𑀺 𑀢𑀲𑁆𑀲𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 ‘‘𑀲𑀼𑀔𑁂𑀦 𑀕𑀘𑁆𑀙𑀸𑀳𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑁂 𑀕𑁄𑀥𑀸𑀬 𑀅𑀫𑀸𑀭𑀺𑀢𑀢𑁆𑀢𑀸 𑀦𑀺𑀭𑀬𑁂 𑀢𑀸𑀯 𑀦 𑀧𑀘𑁆𑀘𑀺𑀁𑀲𑀼. 𑀢𑁂 𑀧𑀦 𑀲𑀢𑁆𑀢 𑀚𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀘𑀼𑀤𑁆𑀤𑀲𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀲𑀢𑁆𑀢 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀙𑀺𑀦𑁆𑀦𑀪𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀤𑀸, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀳𑀺 𑀲𑀢𑁆𑀢𑀳𑀺 𑀕𑁄𑀧𑀸𑀮𑀓𑁂𑀳𑀺 𑀳𑀼𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀓𑀢𑀦𑁆𑀢𑀺. 𑀏𑀯𑀁 𑀲𑀢𑁆𑀣𑀸 𑀢𑁂𑀳𑀺 𑀧𑀼𑀝𑁆𑀞𑀧𑀼𑀝𑁆𑀞𑀁 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺.

𑀅𑀣𑁂𑀓𑁄 ¶ 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲𑀧𑀺 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀲𑁆𑀲𑀸𑀧𑀺 𑀧𑀩𑁆𑀩𑀢𑀦𑁆𑀢𑀭𑀁 𑀧𑀯𑀺𑀝𑁆𑀞𑀲𑁆𑀲𑀸𑀧𑀺 𑀫𑁄𑀓𑁆𑀔𑁄 𑀦𑀢𑁆𑀣𑀻’’𑀢𑀺. 𑀲𑀢𑁆𑀣𑀸 ‘‘𑀏𑀯𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀆𑀓𑀸𑀲𑀸𑀤𑀻𑀲𑀼𑀧𑀺 𑀏𑀓𑀧𑀤𑁂𑀲𑁄𑀧𑀺 𑀦𑀢𑁆𑀣𑀺, 𑀬𑀢𑁆𑀣 𑀞𑀺𑀢𑁄 𑀧𑀸𑀧𑀓𑀫𑁆𑀫𑀢𑁄 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 ¶ 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀳𑀺 𑀓𑁄𑀘𑀺 ‘‘𑀇𑀫𑀺𑀦𑀸 𑀉𑀧𑀸𑀬𑁂𑀦 𑀧𑀸𑀧𑀓𑀫𑁆𑀫𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑀮𑀺𑀓𑁆𑀔𑁂 𑀯𑀸 𑀦𑀺𑀲𑀻𑀤𑁂𑀬𑁆𑀬, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑀁 𑀫𑀳𑀸𑀲𑀫𑀼𑀤𑁆𑀤𑀁 𑀯𑀸 𑀧𑀯𑀺𑀲𑁂𑀬𑁆𑀬, 𑀧𑀩𑁆𑀩𑀢𑀦𑁆𑀢𑀭𑁂 𑀯𑀸 𑀦𑀺𑀲𑀻𑀤𑁂𑀬𑁆𑀬, 𑀦𑁂𑀯 𑀧𑀸𑀧𑀓𑀫𑁆𑀫𑀢𑁄 𑀫𑀼𑀘𑁆𑀘𑁂𑀬𑁆𑀬. 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀚𑀕𑀢𑀺𑀧𑀤𑁂𑀲𑁂𑀲𑀼 𑀧𑀣𑀯𑀻𑀪𑀸𑀕𑁂𑀲𑀼 𑀦 𑀲𑁄 𑀯𑀸𑀮𑀕𑁆𑀕𑀫𑀢𑁆𑀢𑁄𑀧𑀺 𑀑𑀓𑀸𑀲𑁄 𑀅𑀢𑁆𑀣𑀺, 𑀬𑀢𑁆𑀣 𑀞𑀺𑀢𑁄 𑀧𑀸𑀧𑀓𑀫𑁆𑀫𑀢𑁄 𑀫𑀼𑀘𑁆𑀘𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼, 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑁧𑁨. 𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀬𑀯𑀢𑁆𑀣𑀼

𑀦 ¶ 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀼𑀧𑁆𑀧𑀩𑀼𑀤𑁆𑀥𑀁 𑀲𑀓𑁆𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 ‘‘𑀅𑀬𑀁 𑀫𑀫 𑀥𑀻𑀢𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀘, 𑀫𑀫 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀲𑁆𑀲 𑀯𑁂𑀭𑀺𑀝𑁆𑀞𑀸𑀦𑁂 𑀞𑀺𑀢𑁄 𑀘𑀸’’𑀢𑀺 ¶ 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀢𑁆𑀣𑀭𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀦 𑀤𑀸𑀦𑀺𑀲𑁆𑀲 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀫𑀦𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀭𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁂 𑀢𑀁 𑀞𑀸𑀦𑀁 𑀆𑀕𑀢𑁂 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁 ¶ . 𑀲𑁄 𑀆𑀳 𑁋 ‘‘𑀧𑀼𑀭𑀢𑁄 𑀕𑀘𑁆𑀙𑀸𑀢𑀺 𑀢𑀲𑁆𑀲 𑀯𑀤𑁂𑀣, 𑀦𑀸𑀬𑀁 𑀫𑀬𑀸 𑀫𑀳𑀮𑁆𑀮𑀓𑀢𑀭𑁄, 𑀦𑀸𑀲𑁆𑀲 𑀫𑀕𑁆𑀕𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀫𑀸𑀢𑀼𑀮𑀲𑁆𑀲 𑀲𑀦𑁆𑀢𑀺𑀓𑀸 𑀫𑀕𑁆𑀕𑀁 𑀅𑀮𑀪𑀺𑀢𑁆𑀯𑀸 𑀢𑀢𑁄 𑀦𑀺𑀯𑀢𑁆𑀢𑀺. 𑀲𑁄𑀧𑀺 𑀏𑀓𑀁 𑀘𑀭𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 ‘‘𑀕𑀘𑁆𑀙, 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀏𑀳𑀻’’𑀢𑀺. 𑀲𑀢𑁆𑀣𑀸𑀧𑀺 𑀦𑀺𑀯𑀢𑁆𑀢𑀦𑁆𑀢𑁄 𑀲𑀺𑀢𑀁 𑀓𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁄’’𑀢𑀺 𑀧𑀼𑀝𑁆𑀞𑁄 𑀆𑀳 𑁋 ‘‘𑀧𑀲𑁆𑀲𑀲𑀺, 𑀆𑀦𑀦𑁆𑀤, 𑀲𑀼𑀧𑁆𑀧𑀩𑀼𑀤𑁆𑀥’’𑀦𑁆𑀢𑀺. 𑀧𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀪𑀸𑀭𑀺𑀬𑀁 𑀢𑁂𑀦 𑀓𑀫𑁆𑀫𑀁 𑀓𑀢𑀁 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀕𑁆𑀕𑀁 𑀅𑀤𑁂𑀦𑁆𑀢𑁂𑀦, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻𑀢𑀺. 𑀘𑀭𑀧𑀼𑀭𑀺𑀲𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀫𑀫 𑀪𑀸𑀕𑀺𑀦𑁂𑀬𑁆𑀬𑁂𑀦 𑀦𑀺𑀯𑀢𑁆𑀢𑀦𑁆𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁄 𑀬𑀣𑀸𑀲𑀼𑀢𑀁 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦 𑀤𑀸𑀦𑀺 𑀫𑀫 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀓𑀣𑀸𑀬 𑀤𑁄𑀲𑁄 𑀅𑀢𑁆𑀣𑀺, 𑀅𑀤𑁆𑀥𑀸 𑀬𑀁 𑀲𑁄 𑀯𑀤𑀢𑀺, 𑀢𑀁 𑀢𑀣𑁂𑀯 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀁 𑀇𑀤𑀸𑀦𑀺 ¶ 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀲𑁄 𑀳𑀺 𑀫𑀁 ‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’𑀢𑀺 𑀅𑀦𑀺𑀬𑀫𑁂𑀦 𑀅𑀯𑀢𑁆𑀯𑀸 ‘𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’’’𑀢𑀺 𑀆𑀳. ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬𑀸𑀳𑀁 𑀢𑀁 𑀞𑀸𑀦𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀅𑀣 𑀦𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀣𑀯𑀺𑀁 𑀅𑀧𑀯𑀺𑀲𑀺𑀢𑁆𑀯𑀸 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀉𑀧𑀪𑁄𑀕𑀚𑀸𑀢𑀁 𑀲𑀩𑁆𑀩𑀁 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀲𑁄𑀧𑀸𑀦𑀁 𑀳𑀭𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀤𑁆𑀯𑁂 𑀤𑁆𑀯𑁂 𑀫𑀮𑁆𑀮𑁂 𑀞𑀧𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀧𑀫𑀸𑀤𑁂𑀦 𑀳𑁂𑀝𑁆𑀞𑀸 𑀑𑀭𑁄𑀳𑀺𑀢𑀼𑀓𑀸𑀫𑁄 𑀳𑁄𑀫𑀺, 𑀦𑀺𑀯𑀸𑀭𑁂𑀬𑁆𑀬𑀸𑀣 𑀫’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀢𑀫𑁂 𑀧𑀸𑀲𑀸𑀤𑀢𑀮𑁂 𑀲𑀺𑀭𑀺𑀕𑀩𑁆𑀪𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦 𑀓𑁂𑀯𑀮𑀁 𑀧𑀸𑀲𑀸𑀤𑀢𑀮𑁂 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂 𑀯𑀸 𑀦𑀺𑀲𑀻𑀤𑀢𑀼, 𑀦𑀸𑀯𑀸𑀬 𑀯𑀸 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀢𑀼, 𑀧𑀩𑁆𑀩𑀢𑀦𑁆𑀢𑀭𑀁 𑀯𑀸 𑀧𑀯𑀺𑀲𑀢𑀼, 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀤𑁆𑀯𑀺𑀥𑀸𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀸 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀲𑁄 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 ¶ 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑀁 𑀦𑀧𑁆𑀧𑀲𑀳𑁂𑀬𑁆𑀬 𑀫𑀘𑁆𑀘𑀽’’𑀢𑀺.

𑀢𑀢𑁆𑀣 ¶ 𑀬𑀢𑁆𑀣 𑀞𑀺𑀢𑀁 𑀦𑀧𑁆𑀧𑀲𑀳𑁂𑀬𑁆𑀬, 𑀫𑀘𑁆𑀘𑀽𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑀁 𑀫𑀭𑀡𑀁 𑀦𑀧𑁆𑀧𑀲𑀳𑁂𑀬𑁆𑀬 𑀦𑀸𑀪𑀺𑀪𑀯𑁂𑀬𑁆𑀬, 𑀓𑁂𑀲𑀕𑁆𑀕𑀫𑀢𑁆𑀢𑁄𑀧𑀺 ¶ 𑀧𑀣𑀯𑀺𑀧𑁆𑀧𑀤𑁂𑀲𑁄 𑀦𑀢𑁆𑀣𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀼 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑁆𑀲 𑀦𑀺𑀭𑀼𑀤𑁆𑀥𑀯𑁂𑀮𑀸𑀬 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀫𑀗𑁆𑀕𑀮𑀲𑁆𑀲𑁄 𑀉𑀤𑁆𑀤𑀸𑀫𑁄 𑀳𑀼𑀢𑁆𑀯𑀸 𑀢𑀁 𑀢𑀁 𑀪𑀺𑀢𑁆𑀢𑀺𑀁 𑀧𑀳𑀭𑀺. 𑀲𑁄 𑀉𑀧𑀭𑀺 𑀦𑀺𑀲𑀺𑀦𑁆𑀦𑁄𑀯𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀗𑁆𑀕𑀮𑀲𑁆𑀲𑁄 𑀉𑀤𑁆𑀤𑀸𑀫𑁄’’𑀢𑀺. 𑀲𑁄 𑀧𑀦𑀲𑁆𑀲𑁄 𑀲𑀼𑀧𑁆𑀧𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀯 𑀲𑀦𑁆𑀦𑀺𑀲𑀻𑀤𑀢𑀺. 𑀅𑀣 𑀦𑀁 𑀲𑁄 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸 𑀉𑀝𑁆𑀞𑀸𑀬 𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀅𑀳𑁄𑀲𑀺, 𑀤𑁆𑀯𑀸𑀭𑀸𑀦𑀺 𑀲𑀬𑀫𑁂𑀯 𑀯𑀺𑀯𑀝𑀸𑀦𑀺, 𑀲𑁄𑀧𑀸𑀦𑀁 𑀲𑀓𑀝𑁆𑀞𑀸𑀦𑁂𑀬𑁂𑀯 𑀞𑀺𑀢𑀁. 𑀤𑁆𑀯𑀸𑀭𑁂 𑀞𑀺𑀢𑀸 𑀫𑀮𑁆𑀮𑀸 𑀢𑀁 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀺𑀫𑀼𑀔𑀁 𑀔𑀺𑀧𑀺𑀁𑀲𑀼. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀢𑁆𑀢𑀲𑀼𑀧𑀺 𑀢𑀮𑁂𑀲𑀼 𑀤𑁆𑀯𑀸𑀭𑀸𑀦𑀺 𑀲𑀬𑀫𑁂𑀯 𑀯𑀺𑀯𑀝𑀸𑀦𑀺, 𑀲𑁄𑀧𑀸𑀦𑀸𑀦𑀺 𑀬𑀣𑀸𑀞𑀸𑀦𑁂 𑀞𑀺𑀢𑀸𑀦𑀺. 𑀢𑀢𑁆𑀣 𑀢𑀢𑁆𑀣 𑀫𑀮𑁆𑀮𑀸 𑀢𑀁 𑀕𑀻𑀯𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀺𑀫𑀼𑀔𑀁 𑀔𑀺𑀧𑀺𑀁𑀲𑀼. 𑀅𑀣 𑀦𑀁 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑁄𑀧𑀸𑀦𑀧𑀸𑀤𑀫𑀽𑀮𑀁 𑀲𑀫𑁆𑀧𑀢𑁆𑀢𑀫𑁂𑀯 𑀫𑀳𑀸𑀧𑀣𑀯𑀻 𑀯𑀺𑀯𑀭𑀫𑀸𑀦𑀸 𑀪𑀺𑀚𑁆𑀚𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺, 𑀲𑁄 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀻𑀢𑀺.

𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀬𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀧𑀸𑀧𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀙𑀩𑁆𑀩𑀕𑁆𑀕𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑀩𑁆𑀩𑁂 ¶ ¶ ¶ 𑀢𑀲𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂𑀳𑀺 𑀲𑁂𑀦𑀸𑀲𑀦𑁂 𑀧𑀝𑀺𑀚𑀕𑁆𑀕𑀺𑀢𑁂 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘‘𑀦𑀺𑀓𑁆𑀔𑀫𑀣, 𑀫𑀬𑀁 𑀫𑀳𑀮𑁆𑀮𑀓𑀢𑀭𑀸, 𑀅𑀫𑁆𑀳𑀸𑀓𑀁 𑀏𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 ‘‘𑀦 𑀫𑀬𑀁 𑀤𑀲𑁆𑀲𑀸𑀫, 𑀅𑀫𑁆𑀳𑁂𑀳𑀺 𑀧𑀞𑀫𑀁 𑀧𑀝𑀺𑀚𑀕𑁆𑀕𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀧𑀳𑀭𑀺𑀁𑀲𑀼. 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫𑀸’’𑀢𑀺 𑀆𑀭𑁄𑀘𑀺𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀏𑀯𑀁 𑀓𑀢𑁆𑀢𑀩𑁆𑀩𑀁, 𑀬𑁄 𑀓𑀭𑁄𑀢𑀺, 𑀲𑁄 𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀧𑀳𑀸𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁪𑁪𑁯 𑀆𑀤𑀬𑁄) 𑀧𑀜𑁆𑀜𑀸𑀧𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 ‘𑀬𑀣𑀸 𑀅𑀳𑀁, 𑀢𑀣𑁂𑀯 𑀅𑀜𑁆𑀜𑁂𑀧𑀺 𑀤𑀡𑁆𑀟𑀲𑁆𑀲 𑀢𑀲𑀦𑁆𑀢𑀺, 𑀫𑀘𑁆𑀘𑀼𑀦𑁄 𑀪𑀸𑀬𑀦𑁆𑀢𑀻’𑀢𑀺 𑀜𑀢𑁆𑀯𑀸 𑀧𑀭𑁄 𑀦 𑀧𑀳𑀭𑀺𑀢𑀩𑁆𑀩𑁄, 𑀦 𑀖𑀸𑀢𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂’’𑀢𑀺.

𑀢𑀢𑁆𑀣 ¶ 𑀲𑀩𑁆𑀩𑁂 𑀢𑀲𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀅𑀢𑁆𑀢𑀦𑀺 𑀤𑀡𑁆𑀟𑁂 𑀧𑀢𑀦𑁆𑀢𑁂 𑀢𑀲𑁆𑀲 𑀤𑀡𑁆𑀟𑀲𑁆𑀲 𑀢𑀲𑀦𑁆𑀢𑀺. 𑀫𑀘𑁆𑀘𑀼𑀦𑁄𑀢𑀺 𑀫𑀭𑀡𑀲𑁆𑀲𑀸𑀧𑀺 𑀪𑀸𑀬𑀦𑁆𑀢𑀺𑀬𑁂𑀯. 𑀇𑀫𑀺𑀲𑁆𑀲𑀸 𑀘 𑀤𑁂𑀲𑀦𑀸𑀬 𑀩𑁆𑀬𑀜𑁆𑀚𑀦𑀁 𑀦𑀺𑀭𑀯𑀲𑁂𑀲𑀁, 𑀅𑀢𑁆𑀣𑁄 𑀧𑀦 𑀲𑀸𑀯𑀲𑁂𑀲𑁄. 𑀬𑀣𑀸 𑀳𑀺 𑀭𑀜𑁆𑀜𑀸 ‘‘𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀪𑁂𑀭𑀺𑀬𑀸 𑀘𑀭𑀸𑀧𑀺𑀢𑀸𑀬𑀧𑀺 𑀭𑀸𑀚𑀫𑀳𑀸𑀫𑀢𑁆𑀢𑁂 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀏𑀯𑀫𑀺𑀥 ‘‘𑀲𑀩𑁆𑀩𑁂 𑀢𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑀢𑁆𑀣𑀸𑀚𑀸𑀦𑁂𑀬𑁆𑀬𑁄 𑀅𑀲𑁆𑀲𑀸𑀚𑀸𑀦𑁂𑀬𑁆𑀬𑁄 𑀉𑀲𑀪𑀸𑀚𑀸𑀦𑁂𑀬𑁆𑀬𑁄 𑀔𑀻𑀡𑀸𑀲𑀯𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀯 𑀢𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀲𑀼 𑀳𑀺 𑀔𑀻𑀡𑀸𑀲𑀯𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀢𑁆𑀢𑀸 𑀫𑀭𑀡𑀓𑀲𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀪𑀸𑀬𑀢𑀺, 𑀇𑀢𑀭𑁂 𑀢𑀬𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 ¶ 𑀩𑀮𑀯𑀢𑁆𑀢𑀸 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀸 𑀦 𑀪𑀸𑀬𑀦𑁆𑀢𑀻𑀢𑀺. 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂𑀢𑀺 𑀬𑀣𑀸 𑀅𑀳𑀁 ¶ , 𑀏𑀯𑀁 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸𑀢𑀺 𑀦𑁂𑀯 𑀧𑀭𑀁 𑀧𑀳𑀭𑁂𑀬𑁆𑀬 𑀦 𑀧𑀳𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀙𑀩𑁆𑀩𑀕𑁆𑀕𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀞𑀫𑀁.

𑁨. 𑀙𑀩𑁆𑀩𑀕𑁆𑀕𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑀩𑁆𑀩𑁂 𑀢𑀲𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂𑀬𑁂𑀯 ¶ 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀧𑀳𑀭𑀺𑀁𑀲𑀼. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀢𑁂𑀲𑀁 𑀢𑀮𑀲𑀢𑁆𑀢𑀺𑀓𑀁 𑀉𑀕𑁆𑀕𑀺𑀭𑀺𑀁𑀲𑀼. 𑀇𑀥𑀸𑀧𑀺 𑀲𑀢𑁆𑀣𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫𑀸’’𑀢𑀺 𑀆𑀭𑁄𑀘𑀺𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀏𑀯𑀁 𑀓𑀢𑁆𑀢𑀩𑁆𑀩𑀁, 𑀬𑁄 𑀓𑀭𑁄𑀢𑀺, 𑀲𑁄 𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁪𑁫𑁪 𑀆𑀤𑀬𑁄) 𑀧𑀜𑁆𑀜𑀸𑀧𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 ‘𑀬𑀣𑀸 𑀅𑀳𑀁, 𑀢𑀣𑁂𑀯 𑀅𑀜𑁆𑀜𑁂𑀧𑀺 𑀤𑀡𑁆𑀟𑀲𑁆𑀲 𑀢𑀲𑀦𑁆𑀢𑀺, 𑀬𑀣𑀸 𑀘 𑀫𑀬𑁆𑀳𑀁, 𑀢𑀣𑁂𑀯 𑀦𑁂𑀲𑀁 𑀚𑀻𑀯𑀺𑀢𑀁 𑀧𑀺𑀬’𑀦𑁆𑀢𑀺 𑀜𑀢𑁆𑀯𑀸 𑀧𑀭𑁄 𑀦 𑀧𑀳𑀭𑀺𑀢𑀩𑁆𑀩𑁄 𑀦 𑀖𑀸𑀝𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀁 𑀧𑀺𑀬𑀁;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂’’𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀁 𑀧𑀺𑀬𑀦𑁆𑀢𑀺 𑀔𑀻𑀡𑀸𑀲𑀯𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀧𑀺𑀬𑀁 𑀫𑀥𑀼𑀭𑀁, 𑀔𑀻𑀡𑀸𑀲𑀯𑁄 𑀧𑀦 𑀚𑀻𑀯𑀺𑀢𑁂 𑀯𑀸 𑀫𑀭𑀡𑁂 𑀯𑀸 𑀉𑀧𑁂𑀓𑁆𑀔𑀓𑁄𑀯 𑀳𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀙𑀩𑁆𑀩𑀕𑁆𑀕𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀼𑀢𑀺𑀬𑀁.

𑀲𑀼𑀔𑀓𑀸𑀫𑀸𑀦𑀺 ¶ ¶ 𑀪𑀽𑀢𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀓𑀼𑀫𑀸𑀭𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 ¶ 𑀲𑀫𑀬𑁂 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑁆𑀩𑀳𑀼𑀮𑁂 𑀓𑀼𑀫𑀸𑀭𑀓𑁂 𑀏𑀓𑀁 𑀖𑀭𑀲𑀧𑁆𑀧𑀚𑀸𑀢𑀺𑀓𑀁 𑀅𑀳𑀺𑀁 𑀤𑀡𑁆𑀟𑀓𑁂𑀦 𑀧𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀼𑀫𑀸𑀭𑀓𑀸 𑀓𑀺𑀁 𑀓𑀭𑁄𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀺𑀁, 𑀪𑀦𑁆𑀢𑁂, 𑀤𑀡𑁆𑀟𑀓𑁂𑀦 𑀧𑀳𑀭𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀓𑀸𑀭𑀡𑀸’’𑀢𑀺 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀟𑀁𑀲𑀦𑀪𑀬𑁂𑀦, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑁂 ‘𑀅𑀢𑁆𑀢𑀦𑁄 𑀲𑀼𑀔𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀇𑀫𑀁 𑀧𑀳𑀭𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀔𑀮𑀸𑀪𑀺𑀦𑁄 𑀦 𑀪𑀯𑀺𑀲𑁆𑀲𑀣. 𑀅𑀢𑁆𑀢𑀦𑁄 𑀲𑀼𑀔𑀁 𑀧𑀢𑁆𑀣𑁂𑀦𑁆𑀢𑁂𑀦 𑀳𑀺 𑀧𑀭𑀁 𑀧𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔𑀁.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀬𑁄 𑀤𑀡𑁆𑀟𑁂𑀦𑀸𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀤𑀡𑁆𑀟𑁂𑀦 𑀯𑀸 𑀮𑁂𑀟𑁆𑀟𑀼𑀆𑀤𑀻𑀳𑀺 𑀯𑀸 𑀯𑀺𑀳𑁂𑀞𑁂𑀢𑀺. 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔𑀦𑁆𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑁂 𑀫𑀦𑀼𑀲𑁆𑀲𑀲𑀼𑀔𑀁 𑀯𑀸 𑀤𑀺𑀩𑁆𑀩𑀲𑀼𑀔𑀁 𑀯𑀸 𑀧𑀭𑀫𑀢𑁆𑀣𑀪𑀽𑀢𑀁 𑀯𑀸 𑀦𑀺𑀩𑁆𑀩𑀸𑀦𑀲𑀼𑀔𑀁 𑀦 𑀮𑀪𑀢𑀺. 𑀤𑀼𑀢𑀺𑀬𑀕𑀸𑀣𑀸𑀬 𑀧𑁂𑀘𑁆𑀘 𑀲𑁄 𑀮𑀪𑀢𑁂𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀢𑀺𑀯𑀺𑀥𑀫𑁆𑀧𑀺 𑀲𑀼𑀔𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀓𑀼𑀫𑀸𑀭𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀓𑀼𑀫𑀸𑀭𑀓𑀯𑀢𑁆𑀣𑀼 𑀢𑀢𑀺𑀬𑀁.

𑀫𑀸𑀯𑁄𑀘 ¶ 𑀨𑀭𑀼𑀲𑀁 𑀓𑀜𑁆𑀘𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀡𑁆𑀟𑀥𑀸𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 ¶ ¶ 𑀓𑀺𑀭 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀓𑀁 𑀇𑀢𑁆𑀣𑀺𑀭𑀽𑀧𑀁 𑀣𑁂𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀭𑀢𑀺. 𑀢𑀁 𑀣𑁂𑀭𑁄 𑀦 𑀧𑀲𑁆𑀲𑀢𑀺, 𑀫𑀳𑀸𑀚𑀦𑁄 𑀧𑀦 𑀧𑀲𑁆𑀲𑀢𑀺. 𑀅𑀦𑁆𑀢𑁄𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑀢𑁄𑀧𑀺𑀲𑁆𑀲 𑀫𑀦𑀼𑀲𑁆𑀲𑀸 𑀏𑀓𑀁 𑀪𑀺𑀓𑁆𑀔𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼, 𑀅𑀬𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑀺𑀓𑀸𑀬𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀤𑀤𑀦𑁆𑀢𑀺.

𑀓𑀺𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺? 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀤𑁆𑀯𑁂 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀏𑀓𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑀤𑀺𑀲𑀸 𑀅𑀢𑀺𑀯𑀺𑀬 𑀲𑀫𑀕𑁆𑀕𑀸 𑀅𑀳𑁂𑀲𑀼𑀁. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀓𑀸𑀮𑁂 𑀘 𑀅𑀦𑀼𑀲𑀁𑀯𑀘𑁆𑀙𑀭𑀁 𑀯𑀸 𑀅𑀦𑀼𑀙𑀫𑀸𑀲𑀁 𑀯𑀸 𑀪𑀺𑀓𑁆𑀔𑀽 𑀉𑀧𑁄𑀲𑀣𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀧𑀺 ‘‘𑀉𑀧𑁄𑀲𑀣𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑁂 𑀏𑀓𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀤𑀺𑀲𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀅𑀢𑀺𑀯𑀺𑀬 𑀲𑀫𑀕𑁆𑀕𑀸, 𑀲𑀓𑁆𑀓𑀸 𑀦𑀼 𑀔𑁄 𑀇𑀫𑁂 𑀪𑀺𑀦𑁆𑀤𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀘𑀺𑀦𑁆𑀢𑀺𑀢𑀲𑀫𑀦𑀦𑁆𑀢𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀢𑁂𑀲𑀼 𑀏𑀓𑁂𑀦, ‘‘𑀆𑀯𑀼𑀲𑁄, 𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀳𑀺, 𑀲𑀭𑀻𑀭𑀓𑀺𑀘𑁆𑀘𑁂𑀦𑀫𑁆𑀳𑀺 𑀅𑀢𑁆𑀣𑀺𑀓𑁄’’𑀢𑀺 𑀯𑀼𑀢𑁆𑀢𑁂 𑀲𑀸 𑀤𑁂𑀯𑀢𑀸 𑀏𑀓𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀯𑀡𑁆𑀡𑀁 ¶ 𑀫𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀕𑀘𑁆𑀙𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀓𑀸𑀮𑁂 𑀏𑀓𑁂𑀦 𑀳𑀢𑁆𑀣𑁂𑀦 𑀓𑁂𑀲𑀓𑀮𑀸𑀧𑀁, 𑀏𑀓𑁂𑀦 𑀦𑀺𑀯𑀸𑀲𑀦𑀁 𑀲𑀡𑁆𑀞𑀸𑀧𑀬𑀫𑀸𑀦𑀸 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀦𑀺𑀓𑁆𑀔𑀫𑀺. 𑀲𑁄 𑀢𑀁 𑀦 𑀧𑀲𑁆𑀲𑀢𑀺, 𑀢𑀫𑀸𑀕𑀫𑀬𑀫𑀸𑀦𑁄 𑀧𑀦 𑀧𑀼𑀭𑀢𑁄 𑀞𑀺𑀢𑀪𑀺𑀓𑁆𑀔𑀼 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑁄 𑀢𑀁 𑀢𑀣𑀸 𑀓𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑀺. 𑀲𑀸 𑀢𑁂𑀦 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀇𑀢𑀭𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀆𑀳 𑁋 ‘‘𑀆𑀯𑀼𑀲𑁄, 𑀲𑀻𑀮𑀁 𑀢𑁂 𑀪𑀺𑀦𑁆𑀦’’𑀦𑁆𑀢𑀺. ‘‘𑀦𑀢𑁆𑀣𑀸𑀯𑀼𑀲𑁄, 𑀫𑀬𑁆𑀳𑀁 𑀏𑀯𑀭𑀽𑀧’’𑀦𑁆𑀢𑀺. 𑀇𑀤𑀸𑀦𑁂𑀯 𑀢𑁂 𑀫𑀬𑀸 𑀧𑀘𑁆𑀙𑀢𑁄 𑀦𑀺𑀓𑁆𑀔𑀫𑀫𑀸𑀦𑀸 𑀢𑀭𑀼𑀡𑀇𑀢𑁆𑀣𑀻 𑀇𑀤𑀁 𑀦𑀸𑀫 𑀓𑀭𑁄𑀦𑁆𑀢𑀻 𑀤𑀺𑀝𑁆𑀞𑀸, 𑀢𑁆𑀯𑀁 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀏𑀯𑀭𑀽𑀧’’𑀦𑁆𑀢𑀺 𑀓𑀺𑀁 𑀯𑀤𑁂𑀲𑀻𑀢𑀺. 𑀲𑁄 𑀅𑀲𑀦𑀺𑀬𑀸 𑀫𑀢𑁆𑀣𑀓𑁂 𑀅𑀯𑀢𑁆𑀣𑀝𑁄 𑀯𑀺𑀬 𑀫𑀸 𑀫𑀁, 𑀆𑀯𑀼𑀲𑁄, 𑀦𑀸𑀲𑁂𑀳𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀯𑀭𑀽𑀧𑀦𑁆𑀢𑀺. 𑀇𑀢𑀭𑁄 ‘‘𑀫𑀬𑀸 𑀲𑀸𑀫𑀁 𑀅𑀓𑁆𑀔𑀻𑀳𑀺 𑀤𑀺𑀝𑁆𑀞𑀁, 𑀓𑀺𑀁 𑀢𑀯 𑀲𑀤𑁆𑀤𑀳𑀺𑀲𑁆𑀲𑀸𑀫𑀻’’𑀢𑀺 𑀤𑀡𑁆𑀟𑀓𑁄 𑀯𑀺𑀬 𑀪𑀺𑀚𑁆𑀚𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀉𑀧𑁄𑀲𑀣𑀕𑁆𑀕𑁂𑀧𑀺 ‘‘𑀦𑀸𑀳𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀻𑀤𑀺. 𑀇𑀢𑀭𑁄 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀲𑀻𑀮𑁂 𑀅𑀡𑀼𑀫𑀢𑁆𑀢𑀫𑁆𑀧𑀺 𑀓𑀸𑀴𑀁 𑀦𑀢𑁆𑀣𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀓𑀣𑁂𑀲𑀺. 𑀲𑁄𑀧𑀺 ‘‘𑀫𑀬𑀸 𑀲𑀸𑀫𑀁 𑀤𑀺𑀝𑁆𑀞’’𑀦𑁆𑀢𑀺 𑀆𑀳. 𑀤𑁂𑀯𑀢𑀸 𑀢𑀁 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀪𑀸𑀭𑀺𑀬𑀁 𑀫𑀬𑀸 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀬𑁆𑀬𑀲𑁆𑀲 𑀲𑀻𑀮𑀪𑁂𑀤𑁄 𑀦𑀢𑁆𑀣𑀺, 𑀫𑀬𑀸 𑀧𑀦 𑀯𑀻𑀫𑀁𑀲𑀦𑀯𑀲𑁂𑀦𑁂𑀢𑀁 𑀓𑀢𑀁, 𑀓𑀭𑁄𑀣 𑀢𑁂𑀦 ¶ 𑀲𑀤𑁆𑀥𑀺𑀁 𑀉𑀧𑁄𑀲𑀣’’𑀦𑁆𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑀺𑀬𑀸 𑀲𑀤𑁆𑀤𑀳𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀓𑀸𑀲𑀺 ¶ , 𑀦 𑀧𑀦 𑀣𑁂𑀭𑁂 𑀧𑀼𑀩𑁆𑀩𑁂 𑀯𑀺𑀬 𑀫𑀼𑀤𑀼𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀤𑁂𑀯𑀢𑀸𑀬 𑀧𑀼𑀩𑁆𑀩𑀓𑀫𑁆𑀫𑀁.

𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀧𑀦 𑀢𑁂 𑀣𑁂𑀭𑀸 𑀬𑀣𑀸𑀲𑀼𑀔𑀁 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀤𑁂𑀯𑀢𑀸 𑀅𑀧𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀮𑀪𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀁 𑀇𑀢𑁆𑀣𑀺𑀭𑀽𑀧𑀁 ¶ 𑀢𑀣𑁂𑀯 𑀧𑀜𑁆𑀜𑀸𑀬𑀺. 𑀢𑁂𑀦𑁂𑀯𑀲𑁆𑀲 𑀓𑁄𑀡𑁆𑀟𑀥𑀸𑀦𑀢𑁆𑀣𑁂𑀭𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀢𑀣𑀸𑀯𑀺𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀳𑀁𑀲𑀼 𑁋 ‘‘𑀫𑀳𑀸𑀲𑁂𑀝𑁆𑀞𑀺, 𑀇𑀫𑀁 𑀤𑀼𑀲𑁆𑀲𑀻𑀮𑀁 𑀢𑀯 𑀯𑀺𑀳𑀸𑀭𑀸 𑀦𑀻𑀳𑀭. 𑀇𑀫𑀜𑁆𑀳𑀺 𑀦𑀺𑀲𑁆𑀲𑀸𑀬 𑀲𑁂𑀲𑀪𑀺𑀓𑁆𑀔𑀽𑀦𑀁 𑀅𑀬𑀲𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀢𑁆𑀣𑀸 𑀯𑀺𑀳𑀸𑀭𑁂 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺 𑀉𑀧𑀸𑀲𑀓𑀸𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀲𑀢𑁆𑀣𑀸𑀯 𑀚𑀸𑀦𑀺𑀲𑁆𑀲𑀢𑀻𑀢𑀺. 𑀪𑀺𑀓𑁆𑀔𑀽 𑀕𑀦𑁆𑀢𑁆𑀯𑀸 𑀯𑀺𑀲𑀸𑀔𑀸𑀬𑀧𑀺 𑀢𑀣𑁂𑀯 𑀓𑀣𑁂𑀲𑀼𑀁. 𑀲𑀸𑀧𑀺 𑀦𑁂𑀲𑀁 𑀢𑀣𑁂𑀯 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺.

𑀪𑀺𑀓𑁆𑀔𑀽𑀧𑀺 𑀢𑁂𑀳𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀯𑀘𑀦𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀫𑀳𑀸𑀭𑀸𑀚, 𑀓𑁄𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀏𑀓𑀁 𑀇𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀲𑀩𑁆𑀩𑁂𑀲𑀁 𑀅𑀬𑀲𑀁 𑀉𑀧𑁆𑀧𑀸𑀤𑁂𑀲𑀺, 𑀢𑀁 𑀢𑀼𑀫𑁆𑀳𑀸𑀓𑀁 𑀯𑀺𑀚𑀺𑀢𑀸 𑀦𑀻𑀳𑀭𑀣𑀸’’𑀢𑀺. ‘‘𑀓𑀳𑀁 𑀧𑀦 𑀲𑁄, 𑀪𑀦𑁆𑀢𑁂’’𑀢𑀺? ‘‘𑀯𑀺𑀳𑀸𑀭𑁂, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑀭𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀺𑀳𑀭𑀢𑀻’’𑀢𑀺? ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀅𑀳𑀁 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀲𑁂𑀦𑀸𑀲𑀦𑀁 𑀧𑀼𑀭𑀺𑀲𑁂𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀣𑁂𑀭𑁄 𑀫𑀳𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀢𑀫𑁆𑀧𑀺𑀲𑁆𑀲 𑀇𑀢𑁆𑀣𑀺𑀭𑀽𑀧𑀁 ¶ 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀺𑀢𑀁 𑀭𑀸𑀚𑀸 𑀅𑀤𑁆𑀤𑀲. 𑀣𑁂𑀭𑁄 𑀭𑀜𑁆𑀜𑁄 𑀆𑀕𑀫𑀦𑀁 𑀜𑀢𑁆𑀯𑀸 𑀯𑀺𑀳𑀸𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀣𑁂𑀭𑀁 𑀦 𑀯𑀦𑁆𑀤𑀺, 𑀢𑀫𑁆𑀧𑀺 𑀇𑀢𑁆𑀣𑀺𑀁 𑀦𑀸𑀤𑁆𑀤𑀲. 𑀲𑁄 𑀤𑁆𑀯𑀸𑀭𑀦𑁆𑀢𑀭𑁂𑀧𑀺 𑀳𑁂𑀝𑁆𑀞𑀸𑀫𑀜𑁆𑀘𑁂𑀧𑀺 𑀑𑀮𑁄𑀓𑁂𑀦𑁆𑀢𑁄 𑀅𑀤𑀺𑀲𑁆𑀯𑀸𑀯 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀁 𑀇𑀢𑁆𑀣𑀺𑀁 𑀅𑀤𑁆𑀤𑀲𑀁, 𑀓𑀳𑀁 𑀲𑀸’’𑀢𑀺? ‘‘𑀦 𑀧𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀇𑀤𑀸𑀦𑀺 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀺𑀢𑀸 𑀤𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀅𑀳𑀁 𑀦 𑀧𑀲𑁆𑀲𑀸𑀫𑀺’’𑀘𑁆𑀘𑁂𑀯𑀸𑀳. 𑀭𑀸𑀚𑀸 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀢𑁄 𑀢𑀸𑀯 𑀦𑀺𑀓𑁆𑀔𑀫𑀣𑀸’’𑀢𑀺 𑀆𑀳. 𑀣𑁂𑀭𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀫𑀼𑀔𑁂 𑀞𑀺𑀢𑁂 𑀧𑀼𑀦 𑀲𑀸 𑀣𑁂𑀭𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀧𑀼𑀦 𑀉𑀧𑀭𑀺𑀢𑀮𑀁 𑀅𑀪𑀺𑀭𑀼𑀳𑀺, 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀣𑁂𑀭𑁄 𑀦𑀺𑀲𑀻𑀤𑀺. 𑀧𑀼𑀦 𑀭𑀸𑀚𑀸 𑀢𑀁 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀑𑀮𑁄𑀓𑁂𑀦𑁆𑀢𑁄𑀧𑀺 𑀅𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀓𑀳𑀁 𑀲𑀸 𑀇𑀢𑁆𑀣𑀻’’𑀢𑀺 𑀧𑀼𑀦 𑀣𑁂𑀭𑀁 ¶ 𑀧𑀼𑀘𑁆𑀙𑀺. 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀫𑀳𑀸𑀭𑀸𑀚𑀸𑀢𑀺. ‘‘𑀓𑀺𑀁 𑀓𑀣𑁂𑀣, 𑀪𑀦𑁆𑀢𑁂, 𑀫𑀬𑀸 𑀇𑀤𑀸𑀦𑁂𑀯 𑀢𑀼𑀫𑁆𑀳𑀸𑀓𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀺𑀢𑀸 𑀤𑀺𑀝𑁆𑀞𑀸’’𑀢𑀺 𑀆𑀳. 𑀆𑀫, 𑀫𑀳𑀸𑀭𑀸𑀚, 𑀫𑀳𑀸𑀚𑀦𑁄𑀧𑀺 ‘‘𑀫𑁂 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀇𑀢𑁆𑀣𑀻 𑀯𑀺𑀘𑀭𑀢𑀻’’𑀢𑀺 𑀯𑀤𑀢𑀺, 𑀅𑀳𑀁 𑀧𑀦 𑀦 𑀧𑀲𑁆𑀲𑀸𑀫𑀻𑀢𑀺 ¶ . 𑀭𑀸𑀚𑀸 ‘‘𑀧𑀝𑀺𑀭𑀽𑀧𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦 𑀣𑁂𑀭𑀁, ‘‘𑀪𑀦𑁆𑀢𑁂, 𑀇𑀢𑁄 𑀢𑀸𑀯 𑀑𑀢𑀭𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂 𑀑𑀢𑀭𑀺𑀢𑁆𑀯𑀸 𑀧𑀫𑀼𑀔𑁂 𑀞𑀺𑀢𑁂 𑀧𑀼𑀦 𑀢𑀁 𑀢𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀺𑀢𑀁 𑀤𑀺𑀲𑁆𑀯𑀸 𑀉𑀧𑀭𑀺𑀢𑀮𑀁 𑀅𑀪𑀺𑀭𑀼𑀳𑀺. 𑀧𑀼𑀦 𑀦𑀸𑀤𑁆𑀤𑀲. 𑀲𑁄 𑀧𑀼𑀦 𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀦 𑀧𑀲𑁆𑀲𑀸𑀫𑀺’’𑀘𑁆𑀘𑁂𑀯 𑀯𑀼𑀢𑁆𑀢𑁂 ‘‘𑀧𑀝𑀺𑀭𑀽𑀧𑀓𑀫𑁂𑀯𑁂𑀢’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀏𑀯𑀭𑀽𑀧𑁂 𑀲𑀁𑀓𑀺𑀮𑁂𑀲𑁂 𑀢𑀼𑀫𑁆𑀳𑀸𑀓𑀁 𑀧𑀺𑀝𑁆𑀞𑀺𑀢𑁄 𑀯𑀺𑀘𑀭𑀦𑁆𑀢𑁂 𑀅𑀜𑁆𑀜𑁄 𑀓𑁄𑀘𑀺 𑀢𑀼𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀦 𑀤𑀲𑁆𑀲𑀢𑀺, 𑀦𑀺𑀩𑀤𑁆𑀥𑀁 𑀫𑀫 𑀕𑁂𑀳𑀁 𑀧𑀯𑀺𑀲𑀣, 𑀅𑀳𑀫𑁂𑀯 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀪𑀺𑀓𑁆𑀔𑀽 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀭𑀜𑁆𑀜𑁄 𑀧𑀸𑀧𑀓𑀺𑀭𑀺𑀬𑀁, ‘𑀏𑀢𑀁 𑀯𑀺𑀳𑀸𑀭𑀢𑁄 𑀦𑀻𑀳𑀭𑀸’𑀢𑀺 𑀯𑀼𑀢𑁆𑀢𑁂 𑀆𑀕𑀦𑁆𑀢𑁆𑀯𑀸 𑀘𑀢𑀽𑀳𑀺 ¶ 𑀧𑀘𑁆𑀘𑀬𑁂𑀳𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑀢𑁄’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼. 𑀢𑀫𑁆𑀧𑀺 𑀣𑁂𑀭𑀁 𑀆𑀳𑀁𑀲𑀼 𑁋 ‘‘𑀅𑀫𑁆𑀪𑁄, 𑀤𑀼𑀲𑁆𑀲𑀻𑀮, 𑀇𑀤𑀸𑀦𑀺𑀲𑀺 𑀭𑀸𑀚𑀓𑁄𑀡𑁆𑀟𑁄 𑀚𑀸𑀢𑁄’’𑀢𑀺. 𑀲𑁄𑀧𑀺 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀢𑀼𑀫𑁆𑀳𑁂 𑀤𑀼𑀲𑁆𑀲𑀻𑀮𑀸, 𑀢𑀼𑀫𑁆𑀳𑁂 𑀓𑁄𑀡𑁆𑀟𑀸, 𑀢𑀼𑀫𑁆𑀳𑁂 𑀇𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀣𑀸’’𑀢𑀺 𑀆𑀳. 𑀢𑁂 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀓𑁄𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑁄 𑀅𑀫𑁆𑀳𑁂 ‘𑀤𑀼𑀲𑁆𑀲𑀻𑀮𑀸’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀓𑁆𑀓𑁄𑀲𑀢𑀻’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀯𑀁 𑀯𑀤𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀫𑀬𑀸 𑀲𑀤𑁆𑀥𑀺𑀁 𑀓𑀣𑀺𑀢𑀓𑀸𑀭𑀡𑀸’’𑀢𑀺. ‘‘𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀓𑀲𑁆𑀫𑀸 𑀓𑀣𑁂𑀣𑀸’’𑀢𑀺. ‘‘𑀇𑀫𑀲𑁆𑀲 𑀧𑀘𑁆𑀙𑀢𑁄 𑀇𑀢𑁆𑀣𑀺𑀁 𑀯𑀺𑀘𑀭𑀦𑁆𑀢𑀺𑀁 𑀤𑀺𑀲𑁆𑀯𑀸, 𑀪𑀦𑁆𑀢𑁂’’𑀢𑀺. ‘‘𑀇𑀫𑁂 𑀓𑀺𑀭 𑀢𑀬𑀸 𑀲𑀤𑁆𑀥𑀺𑀁 𑀇𑀢𑁆𑀣𑀺𑀁 𑀯𑀺𑀘𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀯𑀤𑀦𑁆𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀓𑀣𑁂𑀲𑀺 ¶ , 𑀏𑀢𑁂 𑀢𑀸𑀯 𑀤𑀺𑀲𑁆𑀯𑀸 𑀓𑀣𑁂𑀦𑁆𑀢𑀺. 𑀢𑁆𑀯𑀁 𑀅𑀤𑀺𑀲𑁆𑀯𑀸𑀯 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀓𑀲𑁆𑀫𑀸 𑀓𑀣𑁂𑀲𑀺, 𑀦𑀦𑀼 𑀧𑀼𑀩𑁆𑀩𑁂 𑀢𑀯𑁂𑀯 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀚𑀸𑀢𑀁, 𑀇𑀤𑀸𑀦𑀺 𑀓𑀲𑁆𑀫𑀸 𑀧𑀼𑀦 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀲𑀻’’𑀢𑀺. 𑀪𑀺𑀓𑁆𑀔𑀽 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀅𑀣 𑀦𑁂𑀲𑀁 𑀲𑀢𑁆𑀣𑀸 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀇𑀤𑀁 𑀧𑀸𑀧𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀢𑁆𑀯𑀁 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀇𑀤𑀸𑀦𑀺 𑀢𑁂 𑀧𑀼𑀦 𑀢𑀣𑀸𑀭𑀽𑀧𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀕𑀳𑁂𑀢𑀼𑀁 𑀦 𑀬𑀼𑀢𑁆𑀢𑀁, 𑀫𑀸 𑀧𑀼𑀦 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀳𑀺, 𑀦𑀺𑀲𑁆𑀲𑀤𑁆𑀤𑁄 𑀫𑀼𑀔𑀯𑀝𑁆𑀝𑀺𑀬𑀁 𑀙𑀺𑀦𑁆𑀦𑀓𑀁𑀲𑀣𑀸𑀮𑀲𑀤𑀺𑀲𑁄 𑀳𑁄𑀳𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 ¶ 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀫𑀸𑀯𑁄𑀘 𑀨𑀭𑀼𑀲𑀁 𑀓𑀜𑁆𑀘𑀺, 𑀯𑀼𑀢𑁆𑀢𑀸 𑀧𑀝𑀺𑀯𑀤𑁂𑀬𑁆𑀬𑀼 𑀢𑀁;

𑀤𑀼𑀓𑁆𑀔𑀸 𑀳𑀺 𑀲𑀸𑀭𑀫𑁆𑀪𑀓𑀣𑀸, 𑀧𑀝𑀺𑀤𑀡𑁆𑀟𑀸 𑀨𑀼𑀲𑁂𑀬𑁆𑀬𑀼 𑀢𑀁.

‘‘𑀲𑀘𑁂 𑀦𑁂𑀭𑁂𑀲𑀺 𑀅𑀢𑁆𑀢𑀸𑀦𑀁, 𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸;

𑀏𑀲 𑀧𑀢𑁆𑀢𑁄𑀲𑀺 𑀦𑀺𑀩𑁆𑀩𑀸𑀦𑀁, 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀫𑀸𑀯𑁄𑀘 𑀨𑀭𑀼𑀲𑀁 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀏𑀓𑀧𑀼𑀕𑁆𑀕𑀮𑀫𑁆𑀧𑀺 𑀨𑀭𑀼𑀲𑀁 𑀫𑀸 𑀅𑀯𑀘. 𑀯𑀼𑀢𑁆𑀢𑀸𑀢𑀺 𑀢𑀬𑀸 𑀧𑀭𑁂 ‘‘𑀤𑀼𑀲𑁆𑀲𑀻𑀮𑀸’’𑀢𑀺 𑀯𑀼𑀢𑁆𑀢𑀸, 𑀢𑀫𑁆𑀧𑀺 𑀢𑀣𑁂𑀯 𑀧𑀝𑀺𑀯𑀤𑁂𑀬𑁆𑀬𑀼𑀁. 𑀲𑀸𑀭𑀫𑁆𑀪𑀓𑀣𑀸𑀢𑀺 𑀏𑀲𑀸 𑀓𑀭𑀡𑀼𑀢𑁆𑀢𑀭𑀸 𑀬𑀼𑀕𑀕𑁆𑀕𑀸𑀳𑀓𑀣𑀸 𑀦𑀸𑀫 𑀤𑀼𑀓𑁆𑀔𑀸. 𑀧𑀝𑀺𑀤𑀡𑁆𑀟𑀸𑀢𑀺 𑀓𑀸𑀬𑀤𑀡𑁆𑀟𑀸𑀤𑀻𑀳𑀺 ¶ 𑀧𑀭𑀁 𑀧𑀳𑀭𑀦𑁆𑀢𑀲𑁆𑀲 𑀢𑀸𑀤𑀺𑀲𑀸 𑀧𑀝𑀺𑀤𑀡𑁆𑀟𑀸 𑀘 𑀢𑀯 𑀫𑀢𑁆𑀣𑀓𑁂 𑀧𑀢𑁂𑀬𑁆𑀬𑀼𑀁. 𑀲𑀘𑁂 𑀦𑁂𑀭𑁂𑀲𑀻𑀢𑀺 𑀲𑀘𑁂 𑀅𑀢𑁆𑀢𑀸𑀦𑀁 𑀦𑀺𑀘𑁆𑀘𑀮𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺. 𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀮𑀫𑀢𑁆𑀢𑀁 𑀓𑀢𑁆𑀯𑀸 𑀞𑀧𑀺𑀢𑀓𑀁𑀲𑀣𑀸𑀮𑀁 𑀯𑀺𑀬. 𑀢𑀜𑁆𑀳𑀺 𑀳𑀢𑁆𑀣𑀧𑀸𑀤𑁂𑀳𑀺 𑀯𑀸 𑀤𑀡𑁆𑀟𑀓𑁂𑀦 𑀯𑀸 𑀧𑀳𑀝𑀫𑁆𑀧𑀺 𑀲𑀤𑁆𑀤𑀁 𑀦 𑀓𑀭𑁄𑀢𑀺, 𑀏𑀲 𑀧𑀢𑁆𑀢𑁄𑀲𑀻𑀢𑀺 𑀲𑀘𑁂 𑀏𑀯𑀭𑀽𑀧𑁄 𑀪𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀇𑀫𑀁 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑁄 𑀇𑀤𑀸𑀦𑀺 𑀅𑀧𑁆𑀧𑀢𑁆𑀢𑁄𑀧𑀺 𑀏𑀲𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀦𑀸𑀫. 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀻𑀢𑀺 𑀏𑀯𑀁 𑀲𑀦𑁆𑀢𑁂 𑀘 𑀧𑀦 ‘‘𑀢𑁆𑀯𑀁 𑀤𑀼𑀲𑁆𑀲𑀻𑀮𑁄, 𑀢𑀼𑀫𑁆𑀳𑁂 𑀤𑀼𑀲𑁆𑀲𑀻𑀮𑀸’’𑀢𑀺𑀏𑀯𑀫𑀸𑀤𑀺𑀓𑁄 𑀉𑀢𑁆𑀢𑀭𑀓𑀭𑀡𑀯𑀸𑀘𑀸𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄𑀧𑀺 𑀢𑁂 𑀦 𑀯𑀺𑀚𑁆𑀚𑀢𑀺, 𑀦 𑀪𑀯𑀺𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼, 𑀓𑁄𑀡𑁆𑀟𑀥𑀸𑀦𑀢𑁆𑀣𑁂𑀭𑁄𑀧𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀑𑀯𑀸𑀤𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀦 𑀘𑀺𑀭𑀲𑁆𑀲𑁂𑀯 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀻𑀢𑀺.

𑀓𑁄𑀡𑁆𑀟𑀥𑀸𑀦𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀉𑀧𑁄𑀲𑀣𑀺𑀓𑀇𑀢𑁆𑀣𑀻𑀦𑀁 𑀯𑀢𑁆𑀣𑀼

𑀬𑀣𑀸 𑀤𑀡𑁆𑀟𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀸𑀤𑀻𑀦𑀁 𑀉𑀧𑀸𑀲𑀺𑀓𑀸𑀦𑀁 𑀉𑀧𑁄𑀲𑀣𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 ¶ ¶ 𑀓𑀺𑀭 𑀏𑀓𑀲𑁆𑀫𑀺𑀁 𑀫𑀳𑀸𑀉𑀧𑁄𑀲𑀣𑀤𑀺𑀯𑀲𑁂 𑀧𑀜𑁆𑀘𑀲𑀢𑀫𑀢𑁆𑀢𑀸 𑀇𑀢𑁆𑀣𑀺𑀬𑁄 𑀉𑀧𑁄𑀲𑀣𑀺𑀓𑀸 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼. 𑀯𑀺𑀲𑀸𑀔𑀸 𑀢𑀸𑀲𑀼 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺, ‘‘𑀅𑀫𑁆𑀫𑀸, 𑀓𑀺𑀫𑀢𑁆𑀣𑀁 𑀉𑀧𑁄𑀲𑀣𑀺𑀓𑀸 𑀚𑀸𑀢𑀢𑁆𑀣𑀸’’𑀢𑀺. 𑀢𑀸𑀳𑀺 ‘‘𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 𑀫𑀚𑁆𑀛𑀺𑀫𑀺𑀢𑁆𑀣𑀺𑀬𑁄 𑀧𑀼𑀘𑁆𑀙𑀺, 𑀢𑀸𑀳𑀺 ‘‘𑀲𑀧𑀢𑁆𑀢𑀺𑀯𑀸𑀲𑀸 𑀫𑀼𑀘𑁆𑀘𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀢𑀭𑀼𑀡𑀺𑀢𑁆𑀣𑀺𑀬𑁄 𑀧𑀼𑀘𑁆𑀙𑀺, 𑀢𑀸𑀳𑀺 ‘‘𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀧𑀝𑀺𑀮𑀸𑀪𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀓𑀼𑀫𑀸𑀭𑀺𑀓𑀸𑀬𑁄 𑀧𑀼𑀘𑁆𑀙𑀺, 𑀢𑀸𑀳𑀺 ‘‘𑀢𑀭𑀼𑀡𑀪𑀸𑀯𑁂𑀬𑁂𑀯 𑀧𑀢𑀺𑀓𑀼𑀮𑀕𑀫𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀲𑀩𑁆𑀩𑀫𑁆𑀧𑀺 𑀢𑀸𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀸 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀯𑀺𑀲𑀸𑀔𑁂 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀚𑀸𑀢𑀺𑀆𑀤𑀬𑁄 𑀦𑀸𑀫 𑀤𑀡𑁆𑀟𑀳𑀢𑁆𑀣𑀓𑀕𑁄𑀧𑀸𑀮𑀓𑀲𑀤𑀺𑀲𑀸, 𑀚𑀸𑀢𑀺 𑀚𑀭𑀸𑀬 𑀲𑀦𑁆𑀢𑀺𑀓𑀁, 𑀚𑀭𑀸 𑀩𑁆𑀬𑀸𑀥𑀺𑀦𑁄 𑀲𑀦𑁆𑀢𑀺𑀓𑀁, 𑀩𑁆𑀬𑀸𑀥𑀺 𑀫𑀭𑀡𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀫𑀭𑀡𑀁 𑀓𑀼𑀞𑀸𑀭𑀺𑀬𑀸 𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀚𑀻𑀯𑀺𑀢𑀁 𑀙𑀺𑀦𑁆𑀤𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀯𑀝𑁆𑀝𑀫𑁂𑀯 𑀧𑀦 𑀧𑀢𑁆𑀣𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀣𑀸 𑀤𑀡𑁆𑀟𑁂𑀦 𑀕𑁄𑀧𑀸𑀮𑁄, 𑀕𑀸𑀯𑁄 𑀧𑀸𑀚𑁂𑀢𑀺 𑀕𑁄𑀘𑀭𑀁;

𑀏𑀯𑀁 𑀚𑀭𑀸 𑀘 𑀫𑀘𑁆𑀘𑀼 𑀘, 𑀆𑀬𑀼𑀁 𑀧𑀸𑀚𑁂𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑀢𑀢𑁆𑀣 𑀧𑀸𑀚𑁂𑀢𑀻𑀢𑀺 𑀙𑁂𑀓𑁄 𑀕𑁄𑀧𑀸𑀮𑁄 𑀓𑁂𑀤𑀸𑀭𑀦𑁆𑀢𑀭𑀁 𑀧𑀯𑀺𑀲𑀦𑁆𑀢𑀺𑀬𑁄 𑀕𑀸𑀯𑁄 𑀤𑀡𑁆𑀟𑁂𑀦 𑀦𑀺𑀯𑀸𑀭𑁂𑀢𑁆𑀯𑀸 𑀢𑁂𑀦𑁂𑀯 𑀧𑁄𑀣𑁂𑀦𑁆𑀢𑁄 𑀲𑀼𑀮𑀪𑀢𑀺𑀡𑁄𑀤𑀓𑀁 ¶ 𑀕𑁄𑀘𑀭𑀁 𑀦𑁂𑀢𑀺. 𑀆𑀬𑀼𑀁 𑀧𑀸𑀚𑁂𑀦𑁆𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀙𑀺𑀦𑁆𑀤𑀦𑁆𑀢𑀺 𑀔𑁂𑀧𑁂𑀦𑁆𑀢𑀺. 𑀕𑁄𑀧𑀸𑀮𑀓𑁄 𑀯𑀺𑀬 𑀳𑀺 𑀚𑀭𑀸 𑀘 𑀫𑀘𑁆𑀘𑀼 𑀘, 𑀕𑁄𑀕𑀡𑁄 𑀯𑀺𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀕𑁄𑀘𑀭𑀪𑀽𑀫𑀺 𑀯𑀺𑀬 𑀫𑀭𑀡𑀁. 𑀢𑀢𑁆𑀣 𑀚𑀸𑀢𑀺 𑀢𑀸𑀯 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀚𑀭𑀸𑀬 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺, 𑀚𑀭𑀸 𑀩𑁆𑀬𑀸𑀥𑀺𑀦𑁄 𑀲𑀦𑁆𑀢𑀺𑀓𑀁 ¶ , 𑀩𑁆𑀬𑀸𑀥𑀺 𑀫𑀭𑀡𑀲𑁆𑀲 𑀲𑀦𑁆𑀢𑀺𑀓𑀁. 𑀢𑀫𑁂𑀯 𑀫𑀭𑀡𑀁 𑀓𑀼𑀞𑀸𑀭𑀺𑀬𑀸 𑀙𑁂𑀤𑀁 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀇𑀤𑀫𑁂𑀢𑁆𑀣 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀉𑀧𑁄𑀲𑀣𑀺𑀓𑀇𑀢𑁆𑀣𑀻𑀦𑀁 𑀯𑀢𑁆𑀣𑀼 𑀧𑀜𑁆𑀘𑀫𑀁.

𑀅𑀣 ¶ 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀕𑀭𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀺𑀚𑁆𑀛𑀓𑀽𑀝𑀢𑁄 𑀑𑀢𑀭𑀦𑁆𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀺𑀓𑀁 𑀅𑀚𑀕𑀭𑀧𑁂𑀢𑀁 𑀦𑀸𑀫 𑀅𑀤𑁆𑀤𑀲. 𑀢𑀲𑁆𑀲 𑀲𑀻𑀲𑀢𑁄 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀬𑀦𑁆𑀢𑀁 𑀕𑀘𑁆𑀙𑀦𑁆𑀢𑀺, 𑀧𑀭𑀺𑀬𑀦𑁆𑀢𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀻𑀲𑀁 𑀕𑀘𑁆𑀙𑀦𑁆𑀢𑀺, 𑀉𑀪𑀬𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀚𑁆𑀛𑁂 𑀑𑀢𑀭𑀦𑁆𑀢𑀺. 𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀺𑀢𑀓𑀸𑀭𑀡𑀁 𑀧𑀼𑀝𑁆𑀞𑁄 ‘‘𑀅𑀓𑀸𑀮𑁄, 𑀆𑀯𑀼𑀲𑁄, 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 ¶ 𑀯𑀢𑁆𑀯𑀸 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑀓𑀸𑀮𑁂 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀆𑀳 𑁋 ‘‘𑀢𑀢𑁆𑀭𑀸𑀳𑀁, 𑀆𑀯𑀼𑀲𑁄, 𑀏𑀓𑀁 𑀧𑁂𑀢𑀁 𑀅𑀤𑁆𑀤𑀲𑀁, 𑀢𑀲𑁆𑀲 𑀏𑀯𑀭𑀽𑀧𑁄 𑀦𑀸𑀫 𑀅𑀢𑁆𑀢𑀪𑀸𑀯𑁄, 𑀅𑀳𑀁 𑀢𑀁 𑀤𑀺𑀲𑁆𑀯𑀸 ‘𑀦 𑀯𑀢 𑀫𑁂 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’𑀢𑀺 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺’’𑀦𑁆𑀢𑀺. 𑀲𑀢𑁆𑀣𑀸 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢, 𑀪𑀺𑀓𑁆𑀔𑀯𑁂, 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺𑀆𑀤𑀻𑀦𑀺 (𑀧𑀸𑀭𑀸. 𑁨𑁨𑁮; 𑀲𑀁. 𑀦𑀺. 𑁨.𑁨𑁦𑁨) 𑀯𑀤𑀦𑁆𑀢𑁄 𑀣𑁂𑀭𑀲𑁆𑀲 𑀓𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀫𑀬𑀸𑀧𑀺 𑀏𑀲𑁄, 𑀪𑀺𑀓𑁆𑀔𑀯𑁂, 𑀧𑁂𑀢𑁄 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀤𑀺𑀝𑁆𑀞𑁄, ‘𑀬𑁂 𑀘 𑀧𑀦 𑀫𑁂 𑀯𑀘𑀦𑀁 𑀦 𑀲𑀤𑁆𑀤𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀅𑀳𑀺𑀢𑀸𑀬 𑀅𑀲𑁆𑀲𑀸’𑀢𑀺 𑀦 𑀓𑀣𑁂𑀲𑀺𑀁, 𑀇𑀤𑀸𑀦𑀺 𑀫𑁄𑀕𑁆𑀕𑀮𑁆𑀮𑀸𑀦𑀁 𑀲𑀓𑁆𑀔𑀺𑀁 𑀮𑀪𑀺𑀢𑁆𑀯𑀸 𑀓𑀣𑁂𑀫𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺 𑁋

𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀲𑀼𑀫𑀗𑁆𑀕𑀮𑀲𑁂𑀝𑁆𑀞𑀺 𑀦𑀸𑀫 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀪𑀽𑀫𑀺𑀁 𑀲𑀦𑁆𑀣𑀭𑀺𑀢𑁆𑀯𑀸 𑀯𑀻𑀲𑀢𑀺𑀉𑀲𑀪𑀝𑁆𑀞𑀸𑀦𑁂 𑀢𑀢𑁆𑀢𑀓𑁂𑀦𑁂𑀯 𑀥𑀦𑁂𑀦 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀸𑀯𑀢𑁆𑀢𑀓𑁂𑀦𑁂𑀯 𑀯𑀺𑀳𑀸𑀭𑀫𑀳𑀁 𑀓𑀸𑀭𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑁂 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀓𑀸𑀲𑀸𑀯𑀁 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀮𑀮𑀫𑀓𑁆𑀔𑀺𑀢𑁂𑀳𑀺 𑀧𑀸𑀤𑁂𑀳𑀺 𑀦𑀺𑀧𑀦𑁆𑀦𑀁 𑀏𑀓𑀁 𑀘𑁄𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀮𑀮𑀫𑀓𑁆𑀔𑀺𑀢𑀧𑀸𑀤𑁄 𑀭𑀢𑁆𑀢𑀺𑀁 𑀯𑀺𑀘𑀭𑀺𑀢𑁆𑀯𑀸 𑀤𑀺𑀯𑀸 𑀦𑀺𑀧𑀦𑁆𑀦𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀘𑁄𑀭𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀲𑁂𑀝𑁆𑀞𑀺𑀁 𑀤𑀺𑀲𑁆𑀯𑀸 ¶ ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑀺 𑀢𑁂 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀔𑁂𑀢𑁆𑀢𑀁 𑀛𑀸𑀧𑁂𑀲𑀺, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀚𑁂 𑀕𑀼𑀦𑁆𑀦𑀁 𑀧𑀸𑀤𑁂 𑀙𑀺𑀦𑁆𑀤𑀺, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀕𑁂𑀳𑀁 𑀛𑀸𑀧𑁂𑀲𑀺, 𑀲𑁄 𑀏𑀢𑁆𑀢𑀓𑁂𑀦𑀸𑀧𑀺 𑀓𑁄𑀧𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀲 𑀘𑀽𑀴𑀽𑀧𑀝𑁆𑀞𑀸𑀓𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸 ‘‘𑀓𑀺𑀁 ¶ ¶ 𑀢𑁂 𑀲𑁂𑀝𑁆𑀞𑀺𑀦𑁄 𑀧𑀺𑀬’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀕𑀦𑁆𑀥𑀓𑀼𑀝𑀺𑀢𑁄 𑀅𑀜𑁆𑀜𑀁 𑀢𑀲𑁆𑀲 𑀧𑀺𑀬𑀢𑀭𑀁 𑀦𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸 ‘‘𑀳𑁄𑀢𑀼, 𑀕𑀦𑁆𑀥𑀓𑀼𑀝𑀺𑀁 𑀛𑀸𑀧𑁂𑀢𑁆𑀯𑀸 𑀓𑁄𑀧𑀁 𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀭𑀺 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀖𑀝𑁂 𑀪𑀺𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀅𑀕𑁆𑀕𑀺𑀁 𑀅𑀤𑀸𑀲𑀺. 𑀲𑁂𑀝𑁆𑀞𑀺 ‘‘𑀕𑀦𑁆𑀥𑀓𑀼𑀝𑀺 𑀓𑀺𑀭 𑀛𑀸𑀬𑀢𑀻’’𑀢𑀺 𑀲𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀛𑀸𑀫𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀛𑀸𑀫𑀁 𑀑𑀮𑁄𑀓𑁂𑀦𑁆𑀢𑁄 𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑁄𑀫𑀦𑀲𑁆𑀲𑀁 𑀅𑀓𑀢𑁆𑀯𑀸 𑀯𑀸𑀫𑀩𑀸𑀳𑀼𑀁 𑀲𑀫𑀜𑁆𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀫𑀳𑀸𑀅𑀧𑁆𑀨𑁄𑀝𑀦𑀁 𑀅𑀧𑁆𑀨𑁄𑀝𑁂𑀲𑀺. 𑀅𑀣 𑀦𑀁 𑀲𑀫𑀻𑀧𑁂 𑀞𑀺𑀢𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀲𑁆𑀫𑀸, 𑀲𑀸𑀫𑀺, 𑀏𑀢𑁆𑀢𑀓𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀢𑀕𑀦𑁆𑀥𑀓𑀼𑀝𑀺𑀬𑀸 𑀛𑀸𑀫𑀓𑀸𑀮𑁂 𑀅𑀧𑁆𑀨𑁄𑀝𑁂𑀲𑀻’’𑀢𑀺? 𑀲𑁄 𑀆𑀳 𑁋 ‘‘𑀏𑀢𑁆𑀢𑀓𑀁 𑀫𑁂, 𑀢𑀸𑀢𑀸, 𑀅𑀕𑁆𑀕𑀺𑀆𑀤𑀻𑀳𑀺 𑀅𑀲𑀸𑀥𑀸𑀭𑀡𑁂 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀥𑀦𑀁 𑀦𑀺𑀤𑀳𑀺𑀢𑀼𑀁 𑀮𑀤𑁆𑀥𑀁, ‘𑀧𑀼𑀦𑀧𑀺 𑀏𑀢𑁆𑀢𑀓𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀁 𑀓𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀅𑀧𑁆𑀨𑁄𑀝𑁂𑀲𑀺’’𑀦𑁆𑀢𑀺. 𑀲𑁄 𑀧𑀼𑀦 𑀢𑀢𑁆𑀢𑀓𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀲𑀢𑁆𑀣𑀼𑀦𑁄 𑀤𑀸𑀦𑀁 𑀅𑀤𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀘𑁄𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑀁 𑀅𑀫𑀸𑀭𑁂𑀢𑁆𑀯𑀸 𑀫𑀗𑁆𑀓𑀼𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀳𑁄𑀢𑀼, 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀦𑀺𑀯𑀸𑀲𑀦𑀦𑁆𑀢𑀭𑁂 𑀙𑀼𑀭𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀺𑀳𑀸𑀭𑁂 𑀯𑀺𑀘𑀭𑀦𑁆𑀢𑁄𑀧𑀺 𑀑𑀓𑀸𑀲𑀁 𑀦 𑀮𑀪𑀺. 𑀫𑀳𑀸𑀲𑁂𑀝𑁆𑀞𑀺𑀧𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀫 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 ¶ 𑀔𑁂𑀢𑁆𑀢𑀁 𑀛𑀸𑀧𑀺𑀢𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀚𑁂 𑀕𑀼𑀦𑁆𑀦𑀁 𑀧𑀸𑀤𑀸 𑀙𑀺𑀦𑁆𑀦𑀸, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀕𑁂𑀳𑀁 𑀛𑀸𑀧𑀺𑀢𑀁, 𑀇𑀤𑀸𑀦𑀺 𑀕𑀦𑁆𑀥𑀓𑀼𑀝𑀺𑀧𑀺 𑀢𑁂𑀦𑁂𑀯 𑀛𑀸𑀧𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀇𑀫𑀲𑁆𑀫𑀺𑀁 𑀤𑀸𑀦𑁂 𑀧𑀞𑀫𑀁 𑀧𑀢𑁆𑀢𑀺𑀁 𑀢𑀲𑁆𑀲 𑀤𑀫𑁆𑀫𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀘𑁄𑀭𑁄 ‘‘𑀪𑀸𑀭𑀺𑀬𑀁 𑀯𑀢 𑀫𑁂 𑀓𑀫𑁆𑀫𑀁 𑀓𑀢𑀁, 𑀏𑀯𑀁 𑀅𑀧𑀭𑀸𑀥𑀓𑀸𑀭𑀓𑁂 𑀫𑀬𑀺 𑀇𑀫𑀲𑁆𑀲 𑀓𑁄𑀧𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀫𑁆𑀧𑀺 𑀤𑀸𑀦𑁂 𑀫𑀬𑁆𑀳𑀫𑁂𑀯 𑀧𑀞𑀫𑀁 𑀧𑀢𑁆𑀢𑀺𑀁 𑀤𑁂𑀢𑀺, 𑀅𑀳𑀁 𑀇𑀫𑀲𑁆𑀫𑀺𑀁 𑀤𑀼𑀩𑁆𑀪𑀸𑀫𑀺, 𑀏𑀯𑀭𑀽𑀧𑀁 𑀫𑁂 𑀧𑀼𑀭𑀺𑀲𑀁 𑀅𑀔𑀫𑀸𑀧𑁂𑀦𑁆𑀢𑀲𑁆𑀲 𑀤𑁂𑀯𑀤𑀡𑁆𑀟𑁄𑀧𑀺 𑀫𑁂 𑀫𑀢𑁆𑀣𑀓𑁂 𑀧𑀢𑁂𑀬𑁆𑀬𑀸’’𑀢𑀺 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀔𑀫𑀸𑀳𑀺 𑀫𑁂, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀫𑀺, 𑀏𑀯𑀁 𑀅𑀬𑀼𑀢𑁆𑀢𑀓𑀁 𑀓𑀫𑁆𑀫𑀁 𑀫𑀬𑀸 𑀓𑀢𑀁, 𑀢𑀲𑁆𑀲 𑀫𑁂 𑀔𑀫𑀸𑀳𑀻’’𑀢𑀺 𑀆𑀳. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀢𑀬𑀸 𑀫𑁂 𑀇𑀤𑀜𑁆𑀘𑀺𑀤𑀜𑁆𑀘 𑀓𑀢’’𑀦𑁆𑀢𑀺 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀫𑀬𑀸 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀢𑁆𑀯𑀁 𑀫𑀬𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑀲𑁆𑀫𑀸 𑀫𑁂 𑀓𑀼𑀚𑁆𑀛𑀺𑀢𑁆𑀯𑀸 𑀏𑀯𑀫𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁂𑀦 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀲𑀸𑀭𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀓𑀸𑀭𑀡𑁂𑀦 𑀓𑁄𑀧𑁄 𑀉𑀧𑁆𑀧𑀸𑀤𑀺𑀢𑁄’’𑀢𑀺 𑀆𑀳. 𑀲𑁂𑀝𑁆𑀞𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀁 𑀲𑀭𑀺𑀢𑁆𑀯𑀸 ‘‘𑀆𑀫, 𑀢𑀸𑀢, 𑀯𑀼𑀢𑁆𑀢𑀁 𑀫𑀬𑀸 ¶ , 𑀢𑀁 𑀫𑁂 𑀔𑀫𑀸𑀳𑀻’’𑀢𑀺 𑀘𑁄𑀭𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀢𑀸𑀢, 𑀔𑀫𑀸𑀫𑀺 𑀢𑁂, 𑀕𑀘𑁆𑀙, 𑀢𑀸𑀢𑀸’’𑀢𑀺 𑀆𑀳. 𑀲𑀘𑁂 𑀫𑁂, 𑀲𑀸𑀫𑀺, 𑀔𑀫𑀲𑀺, 𑀲𑀧𑀼𑀢𑁆𑀢𑀤𑀸𑀭𑀁 𑀫𑀁 𑀕𑁂𑀳𑁂 𑀤𑀸𑀲𑀁 𑀓𑀭𑁄𑀳𑀻𑀢𑀺. 𑀢𑀸𑀢, 𑀢𑁆𑀯𑀁 𑀫𑀬𑀸 𑀏𑀢𑁆𑀢𑀓𑁂 𑀓𑀣𑀺𑀢𑁂 𑀏𑀯𑀭𑀽𑀧𑀁 𑀙𑁂𑀤𑀦𑀁 𑀅𑀓𑀸𑀲𑀺, 𑀕𑁂𑀳𑁂 ¶ 𑀯𑀲𑀦𑁆𑀢𑁂𑀦 𑀧𑀦 ¶ 𑀲𑀤𑁆𑀥𑀺𑀁 𑀦 𑀲𑀓𑁆𑀓𑀸 𑀓𑀺𑀜𑁆𑀘𑀺 𑀓𑀣𑁂𑀢𑀼𑀁, 𑀦 𑀫𑁂 𑀢𑀬𑀸 𑀕𑁂𑀳𑁂 𑀯𑀲𑀦𑁆𑀢𑁂𑀦 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀔𑀫𑀸𑀫𑀺 𑀢𑁂, 𑀕𑀘𑁆𑀙, 𑀢𑀸𑀢𑀸𑀢𑀺. 𑀘𑁄𑀭𑁄 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄 𑀤𑀻𑀖𑀭𑀢𑁆𑀢𑀁 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀤𑀸𑀦𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀘𑁆𑀘𑀢𑀻𑀢𑀺.

𑀏𑀯𑀁 𑀲𑀢𑁆𑀣𑀸 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀩𑀸𑀮𑀸 𑀦𑀸𑀫 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀦 𑀩𑀼𑀚𑁆𑀛𑀦𑁆𑀢𑀺, 𑀧𑀘𑁆𑀙𑀸 𑀧𑀦 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑁂𑀳𑀺 𑀟𑀬𑁆𑀳𑀫𑀸𑀦𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀤𑀸𑀯𑀕𑁆𑀕𑀺𑀲𑀤𑀺𑀲𑀸𑀯 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀣 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀓𑀭𑀁 𑀩𑀸𑀮𑁄 𑀦 𑀩𑀼𑀚𑁆𑀛𑀢𑀺;

𑀲𑁂𑀳𑀺 𑀓𑀫𑁆𑀫𑁂𑀳𑀺 𑀤𑀼𑀫𑁆𑀫𑁂𑀥𑁄, 𑀅𑀕𑁆𑀕𑀺𑀟𑀟𑁆𑀠𑁄𑀯 𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀅𑀣 𑀧𑀸𑀧𑀸𑀦𑀻𑀢𑀺 𑀦 𑀓𑁂𑀯𑀮𑀁 𑀩𑀸𑀮𑁄 𑀓𑁄𑀥𑀯𑀲𑁂𑀦 𑀧𑀸𑀧𑀸𑀦𑀺 𑀓𑀭𑁄𑀢𑀺, 𑀓𑀭𑁄𑀦𑁆𑀢𑁄𑀧𑀺 𑀧𑀦 𑀦 𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀘 ‘‘𑀧𑀸𑀧𑀁 𑀓𑀭𑁄𑀫𑀻’’𑀢𑀺 𑀅𑀩𑀼𑀚𑁆𑀛𑀦𑀓𑁄 𑀦𑀸𑀫 𑀦𑀢𑁆𑀣𑀺. ‘‘𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀏𑀯𑀭𑀽𑀧𑁄 𑀦𑀸𑀫 𑀯𑀺𑀧𑀸𑀓𑁄’’𑀢𑀺 𑀅𑀚𑀸𑀦𑀦𑀢𑀸𑀬 ‘‘𑀦 𑀩𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀳𑀻𑀢𑀺 𑀲𑁄 𑀢𑁂𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀳𑀺 𑀓𑀫𑁆𑀫𑁂𑀳𑀺 𑀤𑀼𑀫𑁆𑀫𑁂𑀥𑁄 𑀦𑀺𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀕𑁆𑀕𑀺𑀟𑀟𑁆𑀠𑁄𑀯 𑀢𑀧𑁆𑀧𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑁭. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀯𑀢𑁆𑀣𑀼

𑀬𑁄 ¶ 𑀤𑀡𑁆𑀟𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀢𑀺𑀢𑁆𑀣𑀺𑀬𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑁂𑀲𑀼𑀁 𑁋 ‘‘𑀚𑀸𑀦𑀸𑀣𑀸𑀯𑀼𑀲𑁄, ‘𑀓𑁂𑀦 𑀓𑀸𑀭𑀡𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’𑀢𑀺 ¶ . 𑀫𑀬𑀁 𑀦 𑀚𑀸𑀦𑀸𑀫, 𑀢𑀼𑀫𑁆𑀳𑁂 𑀧𑀦 𑀚𑀸𑀦𑀸𑀣𑀸𑀢𑀺. 𑀆𑀫, 𑀚𑀸𑀦𑀸𑀫, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀏𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄. 𑀲𑁄 𑀳𑀺 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑁂𑀯𑀢𑀸𑀳𑀺 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀢𑀺 ‘𑀇𑀤𑀁 𑀦𑀸𑀫 𑀓𑀢𑁆𑀯𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 ¶ 𑀮𑀪𑀦𑁆𑀢𑀻’𑀢𑀺. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀦𑀫𑁆𑀧𑀺 𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀢𑀺 ‘𑀇𑀤𑀁 𑀦𑀸𑀫 𑀓𑀢𑁆𑀯𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻’𑀢𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀦𑁆𑀢𑀺, 𑀲𑀘𑁂 𑀢𑀁 𑀫𑀸𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫, 𑀲𑁄 𑀮𑀸𑀪𑀲𑀓𑁆𑀓𑀸𑀭𑁄 𑀅𑀫𑁆𑀳𑀸𑀓𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀢𑁂 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 ‘‘𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀢𑀁 𑀫𑀸𑀭𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀲𑀫𑀸𑀤𑀧𑁂𑀢𑁆𑀯𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀧𑀼𑀭𑀺𑀲𑀖𑀸𑀢𑀓𑀫𑁆𑀫𑀁 𑀓𑀢𑁆𑀯𑀸 𑀘𑀭𑀦𑁆𑀢𑁂 𑀘𑁄𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦𑀸𑀫 𑀓𑀸𑀴𑀲𑀺𑀮𑀸𑀬𑀁 𑀯𑀲𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀫𑀸𑀭𑁂𑀣𑀸’’𑀢𑀺 𑀢𑁂𑀲𑀁 𑀓𑀳𑀸𑀧𑀡𑁂 𑀅𑀤𑀁𑀲𑀼. 𑀘𑁄𑀭𑀸 𑀥𑀦𑀮𑁄𑀪𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀣𑁂𑀭𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀭𑀺𑀯𑀸𑀭𑁂𑀲𑀼𑀁. 𑀣𑁂𑀭𑁄 𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀜𑁆𑀘𑀺𑀓𑀘𑁆𑀙𑀺𑀤𑁆𑀤𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂 𑀘𑁄𑀭𑀸 𑀢𑀁 𑀤𑀺𑀯𑀲𑀁 𑀣𑁂𑀭𑀁 𑀅𑀤𑀺𑀲𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀕𑀦𑁆𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀣𑁂𑀭𑁄 ¶ 𑀜𑀢𑁆𑀯𑀸 𑀓𑀡𑁆𑀡𑀺𑀓𑀸𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀏𑀯𑀁 𑀢𑁂 𑀧𑀞𑀫𑀫𑀸𑀲𑁂𑀧𑀺 𑀫𑀚𑁆𑀛𑀺𑀫𑀫𑀸𑀲𑁂𑀧𑀺 𑀣𑁂𑀭𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀧𑀘𑁆𑀙𑀺𑀫𑀫𑀸𑀲𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀣𑁂𑀭𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀆𑀓𑀟𑁆𑀠𑀦𑀪𑀸𑀯𑀁 𑀜𑀢𑁆𑀯𑀸 𑀦 𑀅𑀧𑀕𑀘𑁆𑀙𑀺. 𑀘𑁄𑀭𑀸 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀕𑀳𑁂𑀢𑁆𑀯𑀸 𑀢𑀡𑁆𑀟𑀼𑀮𑀓𑀡𑀫𑀢𑁆𑀢𑀸𑀦𑀺𑀲𑁆𑀲 𑀅𑀝𑁆𑀞𑀻𑀦𑀺 𑀓𑀭𑁄𑀦𑁆𑀢𑀸 𑀪𑀺𑀦𑁆𑀤𑀺𑀁𑀲𑀼. 𑀅𑀣 𑀦𑀁 ‘‘𑀫𑀢𑁄’’𑀢𑀺 𑀲𑀜𑁆𑀜𑀸𑀬 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑀧𑀺𑀝𑁆𑀞𑁂 𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀣𑁂𑀭𑁄 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀪𑀸𑀯𑀁 𑀛𑀸𑀦𑀯𑁂𑀞𑀦𑁂𑀦 𑀯𑁂𑀞𑁂𑀢𑁆𑀯𑀸 𑀣𑀺𑀭𑀁 𑀓𑀢𑁆𑀯𑀸 𑀆𑀓𑀸𑀲𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀢𑁆𑀣 𑀕𑀦𑁆𑀢𑁆𑀯𑀸’’𑀢𑀺? ‘‘𑀓𑀸𑀴𑀲𑀺𑀮𑀸𑀧𑀤𑁂𑀲𑀁, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦, 𑀫𑀬𑁆𑀳𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀬𑀸𑀳𑀺. 𑀢𑀸𑀤𑀺𑀲𑀲𑁆𑀲 𑀳𑀺 𑀫𑁂 𑀲𑀸𑀯𑀓𑀲𑁆𑀲 𑀇𑀤𑀸𑀦𑀺 𑀤𑀲𑁆𑀲𑀦𑀁 𑀦𑀢𑁆𑀣𑀻𑀢𑀺. 𑀲𑁄 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀸 𑀇𑀤𑁆𑀥𑀺𑀬𑁄 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀓𑀸𑀴𑀲𑀺𑀮𑀸𑀝𑀯𑀺𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. ‘‘𑀣𑁂𑀭𑀁 𑀓𑀺𑀭 𑀘𑁄𑀭𑀸 𑀫𑀸𑀭𑁂𑀲𑀼’’𑀦𑁆𑀢𑀺 𑀅𑀬𑀫𑁆𑀧𑀺 𑀓𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀢𑁆𑀣𑀭𑀺. 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀘𑁄𑀭𑁂 𑀧𑀭𑀺𑀬𑁂𑀲𑀦𑀢𑁆𑀣𑀸𑀬 𑀘𑀭𑀧𑀼𑀭𑀺𑀲𑁂 𑀧𑀬𑁄𑀚𑁂𑀲𑀺. 𑀢𑁂𑀲𑀼𑀧𑀺 𑀘𑁄𑀭𑁂𑀲𑀼 𑀲𑀼𑀭𑀸𑀧𑀸𑀦𑁂 𑀲𑀼𑀭𑀁 𑀧𑀺𑀯𑀦𑁆𑀢𑁂𑀲𑀼 𑀏𑀓𑁄 𑀏𑀓𑀲𑁆𑀲 𑀧𑀺𑀝𑁆𑀞𑀺𑀁 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀲𑁄 𑀢𑀁 𑀲𑀦𑁆𑀢𑁂𑀚𑁆𑀚𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀤𑀼𑀩𑁆𑀩𑀺𑀦𑀻𑀢, 𑀢𑁆𑀯𑀁 𑀓𑀲𑁆𑀫𑀸 𑀫𑁂 𑀧𑀺𑀝𑁆𑀞𑀺𑀁 𑀧𑀸𑀢𑁂𑀲𑀻’’𑀢𑀺 ¶ 𑀆𑀳. 𑀓𑀺𑀁 𑀧𑀦 𑀳𑀭𑁂 𑀤𑀼𑀝𑁆𑀞𑀘𑁄𑀭, 𑀢𑀬𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀞𑀫𑀁 𑀧𑀳𑀝𑁄𑀢𑀺? 𑀓𑀺𑀁 𑀧𑀦 𑀫𑀬𑀸 𑀧𑀳𑀝𑀪𑀸𑀯𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀻𑀢𑀺? 𑀇𑀢𑀺 𑀦𑁂𑀲𑀁 ‘‘𑀫𑀬𑀸 𑀧𑀳𑀝𑁄, 𑀫𑀬𑀸 𑀧𑀳𑀝𑁄’’𑀢𑀺 𑀯𑀤𑀦𑁆𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀢𑁂 𑀘𑀭𑀧𑀼𑀭𑀺𑀲𑀸 𑀢𑁂 𑀲𑀩𑁆𑀩𑁂 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀘𑁄𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂𑀳𑀺 𑀣𑁂𑀭𑁄 𑀫𑀸𑀭𑀺𑀢𑁄’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑁂𑀦 𑀢𑀼𑀫𑁆𑀳𑁂 𑀉𑀬𑁆𑀬𑁄𑀚𑀺𑀢𑀸’’𑀢𑀺? ‘‘𑀦𑀕𑁆𑀕𑀲𑀫𑀡𑀓𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀧𑀜𑁆𑀘𑀲𑀢𑁂 𑀦𑀕𑁆𑀕𑀲𑀫𑀡𑀓𑁂 𑀕𑀸𑀳𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑁂𑀳𑀺 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀗𑁆𑀕𑀡𑁂 𑀦𑀸𑀪𑀺𑀧𑁆𑀧𑀫𑀸𑀡𑁂𑀲𑀼 𑀆𑀯𑀸𑀝𑁂𑀲𑀼 𑀦𑀺𑀔𑀡𑀸𑀧𑁂𑀢𑁆𑀯𑀸 𑀧𑀮𑀸𑀮𑁂𑀳𑀺 𑀧𑀝𑀺𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀸𑀧𑁂𑀲𑀺 ¶ . 𑀅𑀣 𑀦𑁂𑀲𑀁 𑀛𑀸𑀫𑀪𑀸𑀯𑀁 𑀜𑀢𑁆𑀯𑀸 𑀅𑀬𑀦𑀗𑁆𑀕𑀮𑁂𑀳𑀺 𑀓𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑁂 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀸𑀭𑀸𑀧𑁂𑀲𑀺.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀅𑀦𑀦𑀼𑀭𑀽𑀧𑀫𑁂𑀯 𑀫𑀭𑀡𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀇𑀫𑀲𑁆𑀲𑁂𑀯 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀦𑀼𑀭𑀽𑀧𑀁 𑀫𑀭𑀡𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂 𑀧𑀦 𑀢𑁂𑀦 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀫𑁂𑀯 𑀫𑀭𑀡𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀧𑀦𑀲𑁆𑀲, 𑀪𑀦𑁆𑀢𑁂, 𑀧𑀼𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀧𑀼𑀝𑁆𑀞𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺 𑁋

𑀅𑀢𑀻𑀢𑁂 ¶ 𑀓𑀺𑀭 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀬𑀫𑁂𑀯 𑀓𑁄𑀝𑁆𑀝𑀦𑀧𑀘𑀦𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀦𑀁, ‘‘𑀢𑀸𑀢, 𑀢𑁆𑀯𑀁 𑀏𑀓𑀓𑁄𑀯 𑀕𑁂𑀳𑁂 𑀘 𑀅𑀭𑀜𑁆𑀜𑁂 𑀘 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀺𑀮𑀫𑀲𑀺, 𑀏𑀓𑀁 𑀢𑁂 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸, ‘‘𑀅𑀫𑁆𑀫𑀢𑀸𑀢𑀸, 𑀦 𑀫𑀬𑁆𑀳𑀁 𑀏𑀯𑀭𑀽𑀧𑀸𑀬𑀢𑁆𑀣𑁄, 𑀅𑀳𑀁 𑀬𑀸𑀯 𑀢𑀼𑀫𑁆𑀳𑁂 𑀚𑀻𑀯𑀣, 𑀢𑀸𑀯 𑀯𑁄 𑀲𑀳𑀢𑁆𑀣𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀬𑀸𑀘𑀺𑀢𑁆𑀯𑀸 𑀓𑀼𑀫𑀸𑀭𑀺𑀓𑀁 𑀆𑀦𑀬𑀺𑀁𑀲𑀼. 𑀲𑀸 𑀓𑀢𑀺𑀧𑀸𑀳𑀫𑁂𑀯 𑀢𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀙𑀸 𑀢𑁂𑀲𑀁 𑀤𑀲𑁆𑀲𑀦𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑀻 ‘‘𑀦 𑀲𑀓𑁆𑀓𑀸 𑀢𑀯 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀺𑀢𑀼’’𑀦𑁆𑀢𑀺 𑀉𑀚𑁆𑀛𑀸𑀬𑀺𑀢𑁆𑀯𑀸 𑀢𑀲𑁆𑀫𑀺𑀁 ¶ 𑀅𑀢𑁆𑀢𑀦𑁄 𑀓𑀣𑀁 𑀅𑀕𑁆𑀕𑀡𑁆𑀳𑀦𑁆𑀢𑁂 𑀢𑀲𑁆𑀲 𑀩𑀳𑀺𑀕𑀢𑀓𑀸𑀮𑁂 𑀫𑀓𑀘𑀺𑀯𑀸𑀓𑀔𑀡𑁆𑀟𑀸𑀦𑀺 𑀘 𑀬𑀸𑀕𑀼𑀨𑁂𑀡𑀜𑁆𑀘 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀆𑀓𑀺𑀭𑀺𑀢𑁆𑀯𑀸 𑀢𑁂𑀦𑀸𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀝𑁆𑀞𑀸 𑀆𑀳 𑁋 ‘‘𑀇𑀫𑁂𑀲𑀁 𑀅𑀦𑁆𑀥𑀫𑀳𑀮𑁆𑀮𑀓𑀸𑀦𑀁 𑀏𑀢𑀁 𑀓𑀫𑁆𑀫𑀁, 𑀲𑀩𑁆𑀩𑀁 𑀕𑁂𑀳𑀁 𑀓𑀺𑀮𑀺𑀝𑁆𑀞𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀦 𑀲𑀓𑁆𑀓𑀸 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀺𑀢𑀼’’𑀦𑁆𑀢𑀺. 𑀏𑀯𑀁 𑀢𑀸𑀬 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑀬𑀫𑀸𑀦𑀸𑀬 𑀏𑀯𑀭𑀽𑀧𑁄𑀧𑀺 𑀧𑀽𑀭𑀺𑀢𑀧𑀸𑀭𑀫𑀻 𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺. 𑀲𑁄 ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑀺 𑀦𑁂𑀲𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀢𑁂 𑀪𑁄𑀚𑁂𑀢𑁆𑀯𑀸, ‘‘𑀅𑀫𑁆𑀫𑀢𑀸𑀢𑀸, 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀢𑀼𑀫𑁆𑀳𑀸𑀓𑀁 ¶ 𑀜𑀸𑀢𑀓𑀸 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀬𑀸𑀦𑀓𑀁 𑀆𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀝𑀯𑀺𑀫𑀚𑁆𑀛𑀁 𑀧𑀢𑁆𑀢𑀓𑀸𑀮𑁂, ‘‘𑀢𑀸𑀢, 𑀭𑀲𑁆𑀫𑀺𑀬𑁄 𑀕𑀡𑁆𑀳𑀸𑀣, 𑀕𑀸𑀯𑁄 𑀧𑀢𑁄𑀤𑀲𑀜𑁆𑀜𑀸𑀬 𑀕𑀫𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑁄𑀭𑀸 𑀯𑀲𑀦𑁆𑀢𑀺, 𑀅𑀳𑀁 𑀑𑀢𑀭𑀸𑀫𑀻’’𑀢𑀺 𑀧𑀺𑀢𑀼 𑀳𑀢𑁆𑀣𑁂 𑀭𑀲𑁆𑀫𑀺𑀬𑁄 𑀤𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀲𑀤𑁆𑀤𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑁄𑀭𑀸𑀦𑀁 𑀉𑀝𑁆𑀞𑀺𑀢𑀲𑀤𑁆𑀤𑀫𑀓𑀸𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀘𑁄𑀭𑀸 𑀉𑀝𑁆𑀞𑀺𑀢𑀸’’𑀢𑀺 𑀲𑀜𑁆𑀜𑀸𑀬, ‘‘𑀢𑀸𑀢, 𑀫𑀬𑀁 𑀫𑀳𑀮𑁆𑀮𑀓𑀸, 𑀢𑁆𑀯𑀁 𑀅𑀢𑁆𑀢𑀸𑀦𑀫𑁂𑀯 𑀭𑀓𑁆𑀔𑀸𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀢𑀣𑀸𑀯𑀺𑀭𑀯𑀦𑁆𑀢𑁂𑀧𑀺 𑀘𑁄𑀭𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀓𑁄𑀝𑁆𑀝𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀅𑀝𑀯𑀺𑀬𑀁 𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺.

𑀲𑀢𑁆𑀣𑀸 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀦𑁂𑀓𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 ¶ 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀢𑁆𑀢𑀪𑀸𑀯𑀲𑀢𑁂 𑀏𑀯𑀫𑁂𑀯 𑀓𑁄𑀝𑁆𑀝𑁂𑀢𑁆𑀯𑀸 𑀲𑀁𑀘𑀼𑀡𑁆𑀡𑀺𑀢𑁄 𑀫𑀭𑀡𑀁 𑀧𑀢𑁆𑀢𑁄. 𑀏𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀭𑀽𑀧𑀫𑁂𑀯 𑀫𑀭𑀡𑀁 𑀮𑀤𑁆𑀥𑀁, 𑀧𑀜𑁆𑀘𑀳𑀺 𑀘𑁄𑀭𑀲𑀢𑁂𑀳𑀺 𑀲𑀤𑁆𑀥𑀺𑀁 𑀮𑀪𑀺𑀁𑀲𑀼. 𑀅𑀧𑁆𑀧𑀤𑀼𑀝𑁆𑀞𑁂𑀲𑀼 𑀳𑀺 𑀧𑀤𑀼𑀲𑁆𑀲𑀦𑁆𑀢𑁄 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀬𑁄 ¶ 𑀤𑀡𑁆𑀟𑁂𑀦 𑀅𑀤𑀡𑁆𑀟𑁂𑀲𑀼, 𑀅𑀧𑁆𑀧𑀤𑀼𑀝𑁆𑀞𑁂𑀲𑀼 𑀤𑀼𑀲𑁆𑀲𑀢𑀺;

𑀤𑀲𑀦𑁆𑀦𑀫𑀜𑁆𑀜𑀢𑀭𑀁 𑀞𑀸𑀦𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀕𑀘𑁆𑀙𑀢𑀺.

‘‘𑀯𑁂𑀤𑀦𑀁 𑀨𑀭𑀼𑀲𑀁 𑀚𑀸𑀦𑀺𑀁, 𑀲𑀭𑀻𑀭𑀲𑁆𑀲 𑀯 𑀪𑁂𑀤𑀦𑀁;

𑀕𑀭𑀼𑀓𑀁 𑀯𑀸𑀧𑀺 𑀆𑀩𑀸𑀥𑀁, 𑀘𑀺𑀢𑁆𑀢𑀓𑁆𑀔𑁂𑀧𑀁 𑀯 𑀧𑀸𑀧𑀼𑀡𑁂.

‘‘𑀭𑀸𑀚𑀢𑁄 ¶ 𑀯𑀸 𑀉𑀧𑀲𑀕𑁆𑀕𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀯 𑀤𑀸𑀭𑀼𑀡𑀁;

𑀧𑀭𑀺𑀓𑁆𑀔𑀬𑀁 𑀯 𑀜𑀸𑀢𑀻𑀦𑀁, 𑀪𑁄𑀕𑀸𑀦𑀁 𑀯 𑀧𑀪𑀗𑁆𑀕𑀼𑀭𑀁.

‘‘𑀅𑀣 𑀯𑀸𑀲𑁆𑀲 𑀅𑀕𑀸𑀭𑀸𑀦𑀺, 𑀅𑀕𑁆𑀕𑀺 𑀟𑀳𑀢𑀺 𑀧𑀸𑀯𑀓𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀅𑀤𑀡𑁆𑀟𑁂𑀲𑀽𑀢𑀺 𑀓𑀸𑀬𑀤𑀡𑁆𑀟𑀸𑀤𑀺𑀭𑀳𑀺𑀢𑁂𑀲𑀼 𑀔𑀻𑀡𑀸𑀲𑀯𑁂𑀲𑀼. 𑀅𑀧𑁆𑀧𑀤𑀼𑀝𑁆𑀞𑁂𑀲𑀽𑀢𑀺 𑀧𑀭𑁂𑀲𑀼 𑀯𑀸 𑀅𑀢𑁆𑀢𑀦𑀺 𑀯𑀸 𑀦𑀺𑀭𑀧𑀭𑀸𑀥𑁂𑀲𑀼. 𑀤𑀲𑀦𑁆𑀦𑀫𑀜𑁆𑀜𑀢𑀭𑀁 𑀞𑀸𑀦𑀦𑁆𑀢𑀺 𑀤𑀲𑀲𑀼 𑀤𑀼𑀓𑁆𑀔𑀓𑀸𑀭𑀡𑁂𑀲𑀼 𑀅𑀜𑁆𑀜𑀢𑀭𑀁 𑀓𑀸𑀭𑀡𑀁. 𑀯𑁂𑀤𑀦𑀦𑁆𑀢𑀺 𑀲𑀻𑀲𑀭𑁄𑀕𑀸𑀤𑀺𑀪𑁂𑀤𑀁 𑀨𑀭𑀼𑀲𑀁 𑀯𑁂𑀤𑀦𑀁. 𑀚𑀸𑀦𑀺𑀦𑁆𑀢𑀺 𑀓𑀺𑀘𑁆𑀙𑀸𑀥𑀺𑀕𑀢𑀲𑁆𑀲 𑀥𑀦𑀲𑁆𑀲 𑀚𑀸𑀦𑀺𑀁. 𑀪𑁂𑀤𑀦𑀦𑁆𑀢𑀺 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀓𑀁 𑀲𑀭𑀻𑀭𑀪𑁂𑀤𑀦𑀁. 𑀕𑀭𑀼𑀓𑀦𑁆𑀢𑀺 𑀧𑀓𑁆𑀔𑀳𑀢𑀏𑀓𑀘𑀓𑁆𑀔𑀼𑀓𑀧𑀻𑀞𑀲𑀧𑁆𑀧𑀺𑀓𑀼𑀡𑀻𑀪𑀸𑀯𑀓𑀼𑀝𑁆𑀞𑀭𑁄𑀕𑀸𑀤𑀺𑀪𑁂𑀤𑀁 𑀕𑀭𑀼𑀓𑀸𑀩𑀸𑀥𑀁 𑀯𑀸. 𑀘𑀺𑀢𑁆𑀢𑀓𑁆𑀔𑁂𑀧𑀦𑁆𑀢𑀺 𑀉𑀫𑁆𑀫𑀸𑀤𑀁. 𑀉𑀧𑀲𑀕𑁆𑀕𑀦𑁆𑀢𑀺 𑀬𑀲𑀯𑀺𑀮𑁄𑀧𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀺𑀅𑀘𑁆𑀙𑀺𑀦𑁆𑀤𑀦𑀸𑀤𑀺𑀓𑀁 𑀭𑀸𑀚𑀢𑁄 𑀉𑀧𑀲𑀕𑁆𑀕𑀁 𑀯𑀸. 𑀅𑀩𑁆𑀪𑀓𑁆𑀔𑀸𑀦𑀦𑁆𑀢𑀺 ¶ 𑀅𑀤𑀺𑀝𑁆𑀞𑀅𑀲𑀼𑀢𑀅𑀘𑀺𑀦𑁆𑀢𑀺𑀢𑀧𑀼𑀩𑁆𑀩𑀁 ‘‘𑀇𑀤𑀁 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀓𑀫𑁆𑀫𑀁, 𑀇𑀤𑀁 𑀯𑀸 𑀭𑀸𑀚𑀸𑀧𑀭𑀸𑀥𑀺𑀢𑀓𑀫𑁆𑀫𑀁 𑀢𑀬𑀸 𑀓𑀢’’𑀦𑁆𑀢𑀺 𑀏𑀯𑀭𑀽𑀧𑀁 𑀤𑀸𑀭𑀼𑀡𑀁 𑀅𑀩𑁆𑀪𑀓𑁆𑀔𑀸𑀦𑀁 𑀯𑀸. 𑀧𑀭𑀺𑀓𑁆𑀔𑀬𑀁 𑀯 𑀜𑀸𑀢𑀻𑀦𑀦𑁆𑀢𑀺 𑀅𑀢𑁆𑀢𑀦𑁄 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀸𑀦𑀁 𑀜𑀸𑀢𑀻𑀦𑀁 𑀧𑀭𑀺𑀓𑁆𑀔𑀬𑀁 𑀯𑀸. 𑀧𑀪𑀗𑁆𑀕𑀼𑀭𑀦𑁆𑀢𑀺 𑀧𑀪𑀗𑁆𑀕𑀼𑀪𑀸𑀯𑀁 𑀧𑀽𑀢𑀺𑀪𑀸𑀯𑀁. 𑀬𑀁 𑀳𑀺𑀲𑁆𑀲 𑀕𑁂𑀳𑁂 𑀥𑀜𑁆𑀜𑀁, 𑀢𑀁 𑀧𑀽𑀢𑀺𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀲𑀼𑀯𑀡𑁆𑀡𑀁 𑀅𑀗𑁆𑀕𑀸𑀭𑀪𑀸𑀯𑀁, 𑀫𑀼𑀢𑁆𑀢𑀸 𑀓𑀧𑁆𑀧𑀸𑀲𑀝𑁆𑀞𑀺𑀪𑀸𑀯𑀁, 𑀓𑀳𑀸𑀧𑀡𑀁 𑀓𑀧𑀸𑀮𑀔𑀡𑁆𑀟𑀸𑀤𑀺𑀪𑀸𑀯𑀁, 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸 𑀓𑀸𑀡𑀓𑀼𑀡𑀸𑀤𑀺𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀺 𑀟𑀳𑀢𑀻𑀢𑀺 𑀏𑀓𑀲𑀁𑀯𑀘𑁆𑀙𑀭𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀅𑀜𑁆𑀜𑀲𑁆𑀫𑀺𑀁 𑀟𑀸𑀳𑀓𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀲𑀦𑀺𑀅𑀕𑁆𑀕𑀺 𑀯𑀸 𑀧𑀢𑀺𑀢𑁆𑀯𑀸 𑀟𑀳𑀢𑀺, 𑀅𑀢𑁆𑀢𑀦𑁄𑀯 𑀥𑀫𑁆𑀫𑀢𑀸𑀬 𑀉𑀝𑁆𑀞𑀺𑀢𑁄 𑀧𑀸𑀯𑀓𑁄 𑀯𑀸 𑀟𑀳𑀢𑀺𑀬𑁂𑀯. 𑀦𑀺𑀭𑀬𑀦𑁆𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑁂𑀲𑀁 ¶ 𑀤𑀲𑀦𑁆𑀦𑀁 𑀞𑀸𑀦𑀸𑀦𑀁 𑀅𑀜𑁆𑀜𑀢𑀭𑀁 𑀧𑀢𑁆𑀯𑀸𑀧𑀺 𑀏𑀓𑀁𑀲𑁂𑀦 𑀲𑀫𑁆𑀧𑀭𑀸𑀬𑁂 𑀧𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀩𑀳𑀼𑀪𑀡𑁆𑀟𑀺𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀦 ¶ 𑀦𑀕𑁆𑀕𑀘𑀭𑀺𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀳𑀼𑀪𑀡𑁆𑀟𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀯𑀸𑀲𑀻 ¶ 𑀓𑀺𑀭𑁂𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀪𑀭𑀺𑀬𑀸𑀬 𑀓𑀸𑀮𑀓𑀢𑀸𑀬 𑀧𑀩𑁆𑀩𑀚𑀺. 𑀲𑁄 𑀧𑀩𑁆𑀩𑀚𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀜𑁆𑀘 𑀅𑀕𑁆𑀕𑀺𑀲𑀸𑀮𑀜𑁆𑀘 𑀪𑀡𑁆𑀟𑀕𑀩𑁆𑀪𑀜𑁆𑀘 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀫𑁆𑀧𑀺 𑀪𑀡𑁆𑀟𑀕𑀩𑁆𑀪𑀁 𑀲𑀧𑁆𑀧𑀺𑀫𑀥𑀼𑀢𑁂𑀮𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀧𑀩𑁆𑀩𑀚𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀤𑀸𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀓𑀁 𑀆𑀳𑀸𑀭𑀁 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀩𑀳𑀼𑀪𑀡𑁆𑀟𑁄 𑀘 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀘 𑀅𑀳𑁄𑀲𑀺. 𑀭𑀢𑁆𑀢𑀺𑀁 𑀅𑀜𑁆𑀜𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀳𑁄𑀢𑀺, 𑀤𑀺𑀯𑀸 𑀅𑀜𑁆𑀜𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀳𑁄𑀢𑀺, 𑀤𑀺𑀯𑀸 𑀅𑀜𑁆𑀜𑀁 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀲𑀢𑀺. 𑀢𑀲𑁆𑀲𑁂𑀓𑀤𑀺𑀯𑀲𑀁 𑀘𑀻𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀼𑀓𑁆𑀔𑀸𑀧𑁂𑀦𑁆𑀢𑀲𑁆𑀲 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀪𑀺𑀓𑁆𑀔𑀽 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀲𑁆𑀲𑀺𑀫𑀸𑀦𑀺, 𑀆𑀯𑀼𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀬𑁆𑀳’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀯𑀼𑀲𑁄, 𑀪𑀕𑀯𑀢𑀸 𑀢𑀺𑀘𑀻𑀯𑀭𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀢𑁆𑀯𑀜𑁆𑀘 𑀧𑀦 𑀏𑀯𑀁 𑀅𑀧𑁆𑀧𑀺𑀘𑁆𑀙𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀁 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀚𑀸𑀢𑁄’’𑀢𑀺 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀪𑀦𑁆𑀢𑁂 ¶ , 𑀅𑀬𑀁 𑀪𑀺𑀓𑁆𑀔𑀼 𑀅𑀢𑀺𑀩𑀳𑀼𑀪𑀡𑁆𑀟𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀁 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀆𑀳 𑁋 ‘‘𑀓𑀲𑁆𑀫𑀸 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀬𑀸 𑀅𑀧𑁆𑀧𑀺𑀘𑁆𑀙𑀢𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀏𑀯𑀁 𑀩𑀳𑀼𑀪𑀡𑁆𑀟𑁄 𑀚𑀸𑀢𑁄’’𑀢𑀺. 𑀲𑁄 𑀢𑀸𑀯𑀢𑁆𑀢𑀓𑁂𑀦𑁂𑀯 𑀓𑀼𑀧𑀺𑀢𑁄 ‘‘𑀇𑀫𑀺𑀦𑀸 𑀤𑀸𑀦𑀺 𑀦𑀻𑀳𑀸𑀭𑁂𑀦 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀭𑀼𑀧𑀦𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑁄 𑀦𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀳𑀺𑀭𑁄𑀢𑁆𑀢𑀧𑁆𑀧𑀕𑀯𑁂𑀲𑀓𑁄 𑀤𑀓𑀭𑀓𑁆𑀔𑀲𑀓𑀸𑀮𑁂𑀧𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀕𑀯𑁂𑀲𑀫𑀸𑀦𑁄 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀺𑀳𑀸𑀲𑀺, 𑀓𑀲𑁆𑀫𑀸 𑀇𑀤𑀸𑀦𑀺 𑀏𑀯𑀁 𑀕𑀭𑀼𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀧𑀸𑀭𑀼𑀧𑀦𑀁 𑀙𑀟𑁆𑀟𑁂𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀞𑀺𑀢𑁄𑀲𑀻𑀢𑀺. 𑀲𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼. 𑀪𑀕𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀲𑀺 𑁋

𑀅𑀢𑀻𑀢𑁂 ¶ 𑀓𑀺𑀭 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀫𑀳𑀺𑀁𑀲𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀘𑀦𑁆𑀤𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺. 𑀢𑁂𑀲𑀁 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬 𑀭𑀸𑀚𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸𑀧𑀺 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀲𑀽𑀭𑀺𑀬𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑁄 ‘‘𑀧𑀼𑀢𑁆𑀢𑀲𑁆𑀲 𑀢𑁂 𑀯𑀭𑀁 𑀤𑀫𑁆𑀫𑀻’’𑀢𑀺 𑀆𑀳. 𑀲𑀸𑀧𑀺 𑀔𑁄, ‘‘𑀤𑁂𑀯, 𑀇𑀘𑁆𑀙𑀺𑀢𑀓𑀸𑀮𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 ¶ 𑀭𑀸𑀚𑀸𑀦𑀁 𑀆𑀳 𑁋 ‘‘𑀤𑁂𑀯𑁂𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀚𑀸𑀢𑀓𑀸𑀮𑁂 𑀯𑀭𑁄 𑀤𑀺𑀦𑁆𑀦𑁄, 𑀇𑀤𑀸𑀦𑀺 𑀫𑁂 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀤𑁂𑀳𑀻’’𑀢𑀺 ¶ . 𑀭𑀸𑀚𑀸 ‘‘𑀫𑀫 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀯𑀺𑀬 𑀚𑀮𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀦 𑀲𑀓𑁆𑀓𑀸 𑀢𑀲𑁆𑀲 𑀭𑀚𑁆𑀚𑀁 𑀤𑀸𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀢𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀫𑀸𑀦𑀫𑁂𑀯 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀧𑀼𑀢𑁆𑀢𑀸𑀦𑀁 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢𑀸, 𑀅𑀳𑀁 𑀲𑀽𑀭𑀺𑀬𑀓𑀼𑀫𑀸𑀭𑀲𑁆𑀲 𑀚𑀸𑀢𑀓𑀸𑀮𑁂 𑀯𑀭𑀁 𑀅𑀤𑀸𑀲𑀺𑀁, 𑀇𑀤𑀸𑀦𑀺𑀲𑁆𑀲 𑀫𑀸𑀢𑀸 𑀭𑀚𑁆𑀚𑀁 𑀬𑀸𑀘𑀢𑀺, 𑀅𑀳𑀁 𑀢𑀲𑁆𑀲 𑀦 𑀤𑀸𑀢𑀼𑀓𑀸𑀫𑁄, 𑀢𑀲𑁆𑀲 𑀫𑀸𑀢𑀸 𑀢𑀼𑀫𑁆𑀳𑀸𑀓𑀁 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬, 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀅𑀭𑀜𑁆𑀜𑁂 𑀯𑀲𑀺𑀢𑁆𑀯𑀸 𑀫𑀫𑀘𑁆𑀘𑀬𑁂𑀦𑀸𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀦𑁆𑀢𑁂 𑀭𑀸𑀚𑀗𑁆𑀕𑀡𑁂 𑀓𑀻𑀴𑀫𑀸𑀦𑁄 𑀲𑀽𑀭𑀺𑀬𑀓𑀼𑀫𑀸𑀭𑁄 𑀤𑀺𑀲𑁆𑀯𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺. 𑀢𑁂𑀲𑀁 𑀳𑀺𑀫𑀯𑀦𑁆𑀢𑀁 𑀧𑀯𑀺𑀝𑁆𑀞𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀽𑀭𑀺𑀬𑀓𑀼𑀫𑀸𑀭𑀁 𑀆𑀳 𑁋 ‘‘𑀢𑀸𑀢, 𑀏𑀢𑀁 𑀲𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀅𑀫𑁆𑀳𑀸𑀓𑀫𑁆𑀧𑀺 𑀧𑀤𑀼𑀫𑀺𑀦𑀺𑀧𑀡𑁆𑀡𑁂𑀳𑀺 𑀉𑀤𑀓𑀁 𑀆𑀳𑀭𑀸’’𑀢𑀺. 𑀲𑁄 𑀧𑀦 𑀲𑀭𑁄 𑀯𑁂𑀲𑁆𑀲𑀯𑀡𑁆𑀡𑀲𑁆𑀲 𑀲𑀦𑁆𑀢𑀺𑀓𑀸 𑀏𑀓𑁂𑀦 𑀤𑀓𑀭𑀓𑁆𑀔𑀲𑁂𑀦 𑀮𑀤𑁆𑀥𑁄 𑀳𑁄𑀢𑀺. 𑀯𑁂𑀲𑁆𑀲𑀯𑀡𑁆𑀡𑁄 𑀘 𑀢𑀁 𑀆𑀳 𑁋 ‘‘𑀞𑀧𑁂𑀢𑁆𑀯𑀸 𑀤𑁂𑀯𑀥𑀫𑁆𑀫𑀚𑀸𑀦𑀦𑀓𑁂 𑀬𑁂 𑀘 𑀅𑀜𑁆𑀜𑁂 𑀇𑀫𑀁 𑀲𑀭𑀁 𑀑𑀢𑀭𑀦𑁆𑀢𑀺, 𑀢𑁂 𑀔𑀸𑀤𑀺𑀢𑀼𑀁 𑀮𑀪𑀲𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀢𑀁 𑀲𑀭𑀁 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀤𑁂𑀯𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑁂 𑀔𑀸𑀤𑀢𑀺, 𑀲𑀽𑀭𑀺𑀬𑀓𑀼𑀫𑀸𑀭𑁄𑀧𑀺 ¶ 𑀢𑀁 𑀲𑀭𑀁 𑀅𑀯𑀻𑀫𑀁𑀲𑀺𑀢𑁆𑀯𑀸𑀯 𑀑𑀢𑀭𑀺, 𑀢𑁂𑀦 𑀘 ‘‘𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀤𑁂𑀯𑀥𑀫𑁆𑀫𑀸 𑀦𑀸𑀫 𑀘𑀦𑁆𑀤𑀺𑀫𑀲𑀽𑀭𑀺𑀬𑀸’’𑀢𑀺 𑀆𑀳. 𑀅𑀣 𑀦𑀁 ‘‘𑀢𑁆𑀯𑀁 𑀤𑁂𑀯𑀥𑀫𑁆𑀫𑁂 𑀦 𑀚𑀸𑀦𑀸𑀲𑀻’’𑀢𑀺 𑀉𑀤𑀓𑀁 𑀧𑀯𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑁂 𑀞𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀘𑀺𑀭𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀘𑀦𑁆𑀤𑀓𑀼𑀫𑀸𑀭𑀁 𑀧𑁂𑀲𑁂𑀲𑀺. 𑀲𑁄𑀧𑀺 𑀢𑁂𑀦 ‘‘𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀤𑁂𑀯𑀥𑀫𑁆𑀫𑀸 𑀦𑀸𑀫 𑀘𑀢𑀲𑁆𑀲𑁄 𑀤𑀺𑀲𑀸’’𑀢𑀺 𑀆𑀳. 𑀤𑀓𑀭𑀓𑁆𑀔𑀲𑁄 𑀢𑀫𑁆𑀧𑀺 𑀉𑀤𑀓𑀁 𑀧𑀯𑁂𑀲𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀫𑁆𑀧𑀺 𑀘𑀺𑀭𑀸𑀬𑀦𑁆𑀢𑁂 ‘‘𑀅𑀦𑁆𑀢𑀭𑀸𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀬𑀁 𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀑𑀢𑀭𑀡𑀧𑀤𑀁𑀬𑁂𑀯 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀭𑁄 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑁄’’𑀢𑀺 𑀜𑀢𑁆𑀯𑀸 𑀔𑀕𑁆𑀕𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀓𑁆𑀔𑀲𑁄 𑀢𑀁 𑀅𑀦𑁄𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑀯𑀦𑀓𑀫𑁆𑀫𑀺𑀓𑀧𑀼𑀭𑀺𑀲𑀯𑁂𑀲𑁂𑀦𑀸𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀪𑁄 𑀧𑀼𑀭𑀺𑀲, 𑀢𑁆𑀯𑀁 𑀫𑀕𑁆𑀕𑀓𑀺𑀮𑀦𑁆𑀢𑁄, 𑀓𑀲𑁆𑀫𑀸 𑀇𑀫𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀪𑀺𑀲𑀫𑀼𑀮𑀸𑀮𑀁 𑀔𑀸𑀤𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀮𑀦𑁆𑀥𑀺𑀢𑁆𑀯𑀸 𑀦 𑀕𑀘𑁆𑀙𑀲𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀏𑀲 𑀲𑁄 𑀬𑀓𑁆𑀔𑁄’’𑀢𑀺 𑀜𑀢𑁆𑀯𑀸 ‘‘𑀢𑀬𑀸 𑀫𑁂 𑀪𑀸𑀢𑀭𑁄 𑀕𑀳𑀺𑀢𑀸’’𑀢𑀺 𑀆𑀳. 𑀆𑀫, 𑀫𑀬𑀸 𑀕𑀳𑀺𑀢𑀸𑀢𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀅𑀳𑀁 𑀇𑀫𑀁 𑀲𑀭𑀁 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀮𑀪𑀸𑀫𑀻𑀢𑀺 ¶ . 𑀓𑀺𑀁 𑀧𑀦 𑀲𑀩𑁆𑀩𑁂𑀯 𑀮𑀪𑀲𑀻𑀢𑀺? 𑀤𑁂𑀯𑀥𑀫𑁆𑀫𑀚𑀸𑀦𑀦𑀓𑁂 ¶ 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀮𑀪𑀸𑀫𑀻𑀢𑀺. 𑀅𑀢𑁆𑀣𑀺 𑀧𑀦 𑀢𑁂 𑀤𑁂𑀯𑀥𑀫𑁆𑀫𑁂𑀳𑀺 𑀅𑀢𑁆𑀣𑁄𑀢𑀺? 𑀆𑀫, 𑀅𑀢𑁆𑀣𑀻𑀢𑀺. 𑀅𑀳𑀁 𑀓𑀣𑁂𑀲𑁆𑀲𑀸𑀫𑀻𑀢𑀺. 𑀢𑁂𑀦 𑀳𑀺 𑀓𑀣𑁂𑀳𑀻𑀢𑀺. 𑀦 𑀲𑀓𑁆𑀓𑀸 𑀓𑀺𑀮𑀺𑀝𑁆𑀞𑁂𑀦 𑀕𑀢𑁆𑀢𑁂𑀦 𑀓𑀣𑁂𑀢𑀼𑀦𑁆𑀢𑀺. 𑀬𑀓𑁆𑀔𑁄 𑀩𑁄𑀥𑀺𑀲𑀢𑁆𑀢𑀁 ¶ 𑀦𑁆𑀳𑀸𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀬𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑀫𑀚𑁆𑀛𑁂 𑀧𑀮𑁆𑀮𑀗𑁆𑀓𑀁 𑀆𑀭𑁄𑀧𑁂𑀢𑁆𑀯𑀸 𑀲𑀬𑀫𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸, 𑀲𑀼𑀓𑁆𑀓𑀥𑀫𑁆𑀫𑀲𑀫𑀸𑀳𑀺𑀢𑀸;

𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀤𑁂𑀯𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺. (𑀚𑀸. 𑁧.𑁧.𑁬);

𑀬𑀓𑁆𑀔𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀧𑀡𑁆𑀟𑀺𑀢, 𑀅𑀳𑀁 𑀢𑁂 𑀧𑀲𑀦𑁆𑀦𑁄, 𑀏𑀓𑀁 𑀪𑀸𑀢𑀭𑀁 𑀤𑀫𑁆𑀫𑀺, 𑀓𑀢𑀭𑀁 𑀆𑀦𑁂𑀫𑀻’’𑀢𑀺? ‘‘𑀓𑀦𑀺𑀝𑁆𑀞𑀁 𑀆𑀦𑁂𑀳𑀻’’𑀢𑀺. 𑀧𑀡𑁆𑀟𑀺𑀢, 𑀢𑁆𑀯𑀁 𑀓𑁂𑀯𑀮𑀁 𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀺𑀬𑁂𑀯, 𑀦 𑀧𑀦 𑀢𑁂𑀲𑀼 𑀯𑀢𑁆𑀢𑀲𑀻𑀢𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀬𑀲𑁆𑀫𑀸 𑀚𑁂𑀝𑁆𑀞𑀁 𑀞𑀧𑁂𑀢𑁆𑀯𑀸 𑀓𑀦𑀺𑀝𑁆𑀞𑀁 𑀆𑀳𑀭𑀸𑀧𑁂𑀦𑁆𑀢𑁄 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀁 𑀦 𑀓𑀭𑁄𑀲𑀻𑀢𑀺, 𑀤𑁂𑀯𑀥𑀫𑁆𑀫𑁂 𑀘𑀸𑀳𑀁 𑀬𑀓𑁆𑀔 𑀚𑀸𑀦𑀸𑀫𑀺, 𑀢𑁂𑀲𑀼 𑀘 𑀯𑀢𑁆𑀢𑀸𑀫𑀺. 𑀫𑀬𑀜𑁆𑀳𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀸. 𑀏𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀏𑀢𑀲𑁆𑀲 𑀫𑀸𑀢𑀸 𑀭𑀚𑁆𑀚𑀁 𑀬𑀸𑀘𑀺, 𑀅𑀫𑁆𑀳𑀸𑀓𑀁 𑀧𑀦 𑀧𑀺𑀢𑀸 𑀢𑀁 𑀯𑀭𑀁 𑀅𑀤𑀢𑁆𑀯𑀸 𑀅𑀫𑁆𑀳𑀸𑀓𑀁 𑀅𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀅𑀭𑀜𑁆𑀜𑁂 𑀯𑀸𑀲𑀁 𑀅𑀦𑀼𑀚𑀸𑀦𑀺, 𑀲𑁄 𑀓𑀼𑀫𑀸𑀭𑁄 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑁄. ‘‘𑀢𑀁 𑀅𑀭𑀜𑁆𑀜𑁂 𑀏𑀓𑁄 𑀬𑀓𑁆𑀔𑁄 𑀔𑀸𑀤𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀓𑁄𑀘𑀺 𑀲𑀤𑁆𑀤𑀳𑀺𑀲𑁆𑀲𑀢𑀺. 𑀢𑁂𑀦𑀸𑀳𑀁 𑀕𑀭𑀳𑀪𑀬𑀪𑀻𑀢𑁄 𑀢𑀫𑁂𑀯𑀸𑀳𑀭𑀸𑀧𑁂𑀫𑀻𑀢𑀺. 𑀬𑀓𑁆𑀔𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 ‘‘𑀲𑀸𑀥𑀼 𑀧𑀡𑁆𑀟𑀺𑀢, 𑀢𑁆𑀯𑀫𑁂𑀯 𑀤𑁂𑀯𑀥𑀫𑁆𑀫𑁂 𑀚𑀸𑀦𑀸𑀲𑀺, 𑀤𑁂𑀯𑀥𑀫𑁆𑀫𑁂𑀲𑀼 𑀘 𑀯𑀢𑁆𑀢𑀲𑀻’’𑀢𑀺 𑀤𑁆𑀯𑁂 𑀪𑀸𑀢𑀭𑁄 𑀆𑀦𑁂𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀬𑀓𑁆𑀔𑀪𑀸𑀯𑁂 𑀆𑀤𑀻𑀦𑀯𑀁 𑀓𑀣𑁂𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀢𑁂𑀦 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁄 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀲𑀺𑀢𑁆𑀯𑀸 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀬𑀓𑁆𑀔𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 ¶ 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀉𑀧𑀭𑀚𑁆𑀚𑀁, 𑀲𑀽𑀭𑀺𑀬𑀓𑀼𑀫𑀸𑀭𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀢𑁆𑀯𑀸 𑀬𑀓𑁆𑀔𑀲𑁆𑀲 𑀭𑀫𑀡𑀻𑀬𑁂 𑀞𑀸𑀦𑁂 𑀆𑀬𑀢𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀬𑀣𑀸 𑀲𑁄 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀢𑀣𑀸 𑀅𑀓𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀭𑀓𑁆𑀔𑀲𑁄 𑀩𑀳𑀼𑀪𑀡𑁆𑀟𑀺𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑀽𑀭𑀺𑀬𑀓𑀼𑀫𑀸𑀭𑁄 𑀆𑀦𑀦𑁆𑀤𑁄, 𑀘𑀦𑁆𑀤𑀓𑀼𑀫𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀳𑀺𑀁𑀲𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯𑀸’’𑀢𑀺. 𑀏𑀯𑀁 𑀲𑀢𑁆𑀣𑀸 𑀚𑀸𑀢𑀓𑀁 𑀓𑀣𑁂𑀢𑁆𑀯𑀸 ‘‘𑀏𑀯𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀼𑀩𑁆𑀩𑁂 𑀤𑁂𑀯𑀥𑀫𑁆𑀫𑁂 𑀕𑀯𑁂𑀲𑀫𑀸𑀦𑁄 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀯𑀺𑀘𑀭𑀺𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀞𑀢𑁆𑀯𑀸 𑀫𑀫 𑀧𑀼𑀭𑀢𑁄 ‘𑀅𑀧𑁆𑀧𑀺𑀘𑁆𑀙𑁄𑀫𑁆𑀳𑀻’𑀢𑀺 𑀯𑀤𑀦𑁆𑀢𑁄 𑀅𑀬𑀼𑀢𑁆𑀢𑀁 𑀅𑀓𑀸𑀲𑀺. 𑀦 𑀳𑀺 𑀲𑀸𑀝𑀓𑀧𑀝𑀺𑀓𑁆𑀔𑁂𑀧𑀸𑀤𑀺𑀫𑀢𑁆𑀢𑁂𑀦 𑀲𑀫𑀡𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 ¶ 𑀦𑀕𑁆𑀕𑀘𑀭𑀺𑀬𑀸 𑀦 𑀚𑀝𑀸 𑀦 𑀧𑀗𑁆𑀓𑀸, 𑀦𑀸𑀦𑀸𑀲𑀓𑀸 𑀣𑀡𑁆𑀟𑀺𑀮𑀲𑀸𑀬𑀺𑀓𑀸 𑀯𑀸;

𑀭𑀚𑁄𑀚𑀮𑁆𑀮𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀁, 𑀲𑁄𑀥𑁂𑀦𑁆𑀢𑀺 𑀫𑀘𑁆𑀘𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔’’𑀦𑁆𑀢𑀺.

𑀢𑀢𑁆𑀣 𑀦𑀸𑀦𑀸𑀲𑀓𑀸𑀢𑀺 𑀦 𑀅𑀦𑀲𑀓𑀸, 𑀪𑀢𑁆𑀢𑀧𑀝𑀺𑀓𑁆𑀔𑁂𑀧𑀓𑀸𑀢𑀺 𑀅𑀢𑁆𑀣𑁄. 𑀣𑀡𑁆𑀟𑀺𑀮𑀲𑀸𑀬𑀺𑀓𑀸𑀢𑀺 𑀪𑀽𑀫𑀺𑀲𑀬𑀦𑀸. 𑀭𑀚𑁄𑀚𑀮𑁆𑀮𑀦𑁆𑀢𑀺 𑀓𑀤𑁆𑀤𑀫𑀮𑁂𑀧𑀦𑀸𑀓𑀸𑀭𑁂𑀦 𑀲𑀭𑀻𑀭𑁂 𑀲𑀦𑁆𑀦𑀺𑀳𑀺𑀢𑀭𑀚𑁄 ¶ . 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀦𑁆𑀢𑀺 𑀉𑀓𑁆𑀓𑀼𑀝𑀺𑀓𑀪𑀸𑀯𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀳𑀺 𑀫𑀘𑁆𑀘𑁄 ‘‘𑀏𑀯𑀁 𑀅𑀳𑀁 𑀮𑁄𑀓𑀦𑀺𑀲𑁆𑀲𑀭𑀡𑀲𑀗𑁆𑀔𑀸𑀢𑀁 𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀇𑀫𑁂𑀲𑀼 𑀦𑀕𑁆𑀕𑀘𑀭𑀺𑀬𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬, 𑀲𑁄 𑀓𑁂𑀯𑀮𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀜𑁆𑀘𑁂𑀯 𑀯𑀟𑁆𑀠𑁂𑀬𑁆𑀬, 𑀓𑀺𑀮𑀫𑀣𑀲𑁆𑀲 𑀘 𑀪𑀸𑀕𑀻 𑀅𑀲𑁆𑀲. 𑀦 𑀳𑀺 𑀏𑀢𑀸𑀦𑀺 𑀲𑀼𑀲𑀫𑀸𑀤𑀺𑀦𑁆𑀦𑀸𑀦𑀺𑀧𑀺 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀓𑀗𑁆𑀔𑀸𑀬 𑀅𑀯𑀺𑀢𑀺𑀡𑁆𑀡𑀪𑀸𑀯𑁂𑀦 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑀁 𑀫𑀘𑁆𑀘𑀁 𑀲𑁄𑀥𑁂𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀩𑀳𑀼𑀪𑀡𑁆𑀟𑀺𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀅𑀝𑁆𑀞𑀫𑀁.

𑀅𑀮𑀗𑁆𑀓𑀢𑁄 𑀘𑁂𑀧𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀳𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀭𑀜𑁆𑀜𑁄 𑀧𑀲𑁂𑀦𑀤𑀺𑀓𑁄𑀲𑀮𑀲𑁆𑀲 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄. 𑀅𑀣𑀲𑁆𑀲 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀭𑀚𑁆𑀚𑀁 𑀤𑀢𑁆𑀯𑀸 𑀏𑀓𑀁 ¶ 𑀦𑀘𑁆𑀘𑀕𑀻𑀢𑀓𑀼𑀲𑀮𑀁 𑀇𑀢𑁆𑀣𑀺𑀁 𑀅𑀤𑀸𑀲𑀺. 𑀲𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀼𑀭𑀸𑀫𑀤𑀫𑀢𑁆𑀢𑁄 𑀳𑀼𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑁆𑀳𑀸𑀦𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀤𑁆𑀯𑀸𑀭𑀦𑁆𑀢𑀭𑁂 𑀤𑀺𑀲𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄𑀯 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀢𑁆𑀣𑀸 𑀲𑀺𑀢𑀁 𑀓𑀢𑁆𑀯𑀸 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀺𑀢𑀧𑀸𑀢𑀼𑀓𑀭𑀡𑁂 𑀳𑁂𑀢𑀽’’𑀢𑀺 ¶ 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀲𑀺𑀢𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋 ‘‘𑀧𑀲𑁆𑀲𑀸𑀦𑀦𑁆𑀤, 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀁, 𑀅𑀚𑁆𑀚 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄𑀯 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀢𑀢𑀸𑀮𑀫𑀢𑁆𑀢𑁂 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺. 𑀫𑀳𑀸𑀚𑀦𑁄 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀲𑁆𑀲 𑀲𑀢𑁆𑀣𑀼 𑀯𑀘𑀦𑀁 𑀅𑀲𑁆𑀲𑁄𑀲𑀺. 𑀢𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀧𑀲𑁆𑀲𑀣 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀺𑀭𑀺𑀬𑀁, 𑀫𑀼𑀔𑀧𑁆𑀧𑀢𑁆𑀢𑀫𑁂𑀯 𑀪𑀸𑀲𑀢𑀺, 𑀅𑀚𑁆𑀚 𑀓𑀺𑀭 𑀏𑀲 𑀏𑀯𑀁 𑀲𑀼𑀭𑀸𑀫𑀤𑀫𑀢𑁆𑀢𑁄 𑀬𑀣𑀸𑀮𑀗𑁆𑀓𑀢𑁄𑀯 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀢𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 ¶ 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸, 𑀅𑀚𑁆𑀚 𑀩𑀼𑀤𑁆𑀥𑀮𑀻𑀴𑀜𑁆𑀘𑁂𑀯 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀮𑀻𑀴𑀜𑁆𑀘 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺.

𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄𑀧𑀺 𑀦𑁆𑀳𑀸𑀦𑀢𑀺𑀢𑁆𑀣𑁂 𑀤𑀺𑀯𑀲𑀪𑀸𑀕𑀁 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀆𑀧𑀸𑀦𑀪𑀽𑀫𑀺𑀬𑀁 𑀦𑀺𑀲𑀻𑀤𑀺. 𑀲𑀸𑀧𑀺 𑀇𑀢𑁆𑀣𑀻 𑀭𑀗𑁆𑀕𑀫𑀚𑁆𑀛𑀁 𑀑𑀢𑀭𑀺𑀢𑁆𑀯𑀸 𑀦𑀘𑁆𑀘𑀕𑀻𑀢𑀁 𑀤𑀲𑁆𑀲𑁂𑀢𑀼𑀁 𑀆𑀭𑀪𑀺. 𑀢𑀲𑁆𑀲𑀸 𑀲𑀭𑀻𑀭𑀮𑀻𑀴𑀸𑀬 𑀤𑀲𑁆𑀲𑀦𑀢𑁆𑀣𑀁 𑀲𑀢𑁆𑀢𑀸𑀳𑀁 𑀅𑀧𑁆𑀧𑀸𑀳𑀸𑀭𑀢𑀸𑀬 𑀢𑀁 𑀤𑀺𑀯𑀲𑀁 𑀦𑀘𑁆𑀘𑀕𑀻𑀢𑀁 𑀤𑀲𑁆𑀲𑀬𑀫𑀸𑀦𑀸𑀬 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀲𑀢𑁆𑀣𑀓𑀯𑀸𑀢𑀸 𑀲𑀫𑀼𑀝𑁆𑀞𑀸𑀬 𑀳𑀤𑀬𑀫𑀁𑀲𑀁 𑀓𑀦𑁆𑀢𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀲𑀸 𑀢𑀗𑁆𑀔𑀡𑀜𑁆𑀜𑁂𑀯 𑀫𑀼𑀔𑁂𑀦 𑀘𑁂𑀯 𑀅𑀓𑁆𑀔𑀻𑀳𑀺 𑀘 𑀯𑀺𑀯𑀝𑁂𑀳𑀺 𑀓𑀸𑀮𑀫𑀓𑀸𑀲𑀺. 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 ‘‘𑀉𑀧𑀥𑀸𑀭𑁂𑀣 𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀦𑀺𑀭𑀼𑀤𑁆𑀥𑀸, 𑀲𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 ¶ 𑀩𑀮𑀯𑀲𑁄𑀓𑁂𑀦 𑀅𑀪𑀺𑀪𑀽𑀢𑁄 𑀢𑀗𑁆𑀔𑀡𑀜𑁆𑀜𑁂𑀯𑀲𑁆𑀲 𑀲𑀢𑁆𑀢𑀸𑀳𑀁 𑀧𑀻𑀢𑀲𑀼𑀭𑀸 𑀢𑀢𑁆𑀢𑀓𑀧𑀸𑀮𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀲𑁄 ‘‘𑀦 𑀫𑁂 𑀇𑀫𑀁 𑀲𑁄𑀓𑀁 𑀅𑀜𑁆𑀜𑁂 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦𑀸’’𑀢𑀺 𑀩𑀮𑀓𑀸𑀬𑀧𑀭𑀺𑀯𑀼𑀢𑁄 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, ‘𑀏𑀯𑀭𑀽𑀧𑁄 𑀫𑁂 𑀲𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀫𑁂 𑀢𑀼𑀫𑁆𑀳𑁂 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’𑀢𑀺 𑀆𑀕𑀢𑁄𑀫𑁆𑀳𑀺, 𑀧𑀝𑀺𑀲𑀭𑀡𑀁 𑀫𑁂 𑀳𑁄𑀣𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀲𑁄𑀓𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀺. 𑀇𑀫𑀺𑀲𑁆𑀲𑀸 𑀳𑀺 𑀇𑀢𑁆𑀣𑀺𑀬𑀸 𑀇𑀫𑀺𑀦𑀸𑀯 𑀆𑀓𑀸𑀭𑁂𑀦 𑀫𑀢𑀓𑀸𑀮𑁂 ¶ 𑀢𑀯 𑀭𑁄𑀤𑀦𑁆𑀢𑀲𑁆𑀲 𑀧𑀕𑁆𑀖𑀭𑀺𑀢𑀅𑀲𑁆𑀲𑀽𑀦𑀺 𑀘𑀢𑀼𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀸𑀦𑀁 𑀉𑀤𑀓𑀢𑁄 𑀅𑀢𑀺𑀭𑁂𑀓𑀢𑀭𑀸𑀦𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺. (𑀲𑀼. 𑀦𑀺. 𑁯𑁫𑁫, 𑁧𑁧𑁦𑁫; 𑀘𑀽𑀴𑀦𑀺. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁮);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀦𑀁 𑀫𑁂 𑀅𑀦𑀼𑀚𑀸𑀦𑀸𑀣𑀸’’𑀢𑀺. 𑀲𑀢𑁆𑀣𑀸 𑀢𑁂𑀦 𑀓𑀢𑀓𑀫𑁆𑀫𑀁 𑀚𑀸𑀦𑀦𑁆𑀢𑁄𑀧𑀺 ‘‘𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀑𑀓𑀸𑀲𑀁 𑀦 𑀮𑀪𑀺𑀲𑁆𑀲𑀦𑁆𑀢𑀺, ‘𑀩𑀼𑀤𑁆𑀥𑀮𑀻𑀴𑀜𑁆𑀘𑁂𑀯 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀮𑀻𑀴𑀜𑁆𑀘 𑀧𑀲𑁆𑀲𑀺𑀲𑁆𑀲𑀸𑀫𑀸’𑀢𑀺 𑀲𑀦𑁆𑀦𑀺𑀧𑀢𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀇𑀫𑀺𑀦𑀸 𑀓𑀢𑀓𑀫𑁆𑀫𑀁 𑀲𑀼𑀢𑁆𑀯𑀸 𑀧𑀼𑀜𑁆𑀜𑁂𑀲𑀼 𑀆𑀤𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 ¶ 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀢𑀬𑀸 𑀓𑀢𑀓𑀫𑁆𑀫𑀁 𑀫𑀬𑁆𑀳𑀁 𑀓𑀣𑁂𑀳𑀺, 𑀓𑀣𑁂𑀦𑁆𑀢𑁄 𑀘 𑀪𑀽𑀫𑀺𑀬𑀁 𑀞𑀺𑀢𑁄 𑀅𑀓𑀣𑁂𑀢𑁆𑀯𑀸 𑀲𑀢𑁆𑀢𑀢𑀸𑀮𑀫𑀢𑁆𑀢𑁂 𑀆𑀓𑀸𑀲𑁂 𑀞𑀺𑀢𑁄 𑀓𑀣𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀢𑀸𑀮𑀧𑁆𑀧𑀫𑀸𑀡𑀁 𑀉𑀕𑁆𑀕𑀫𑁆𑀫 𑀑𑀭𑁄𑀳𑀺𑀢𑁆𑀯𑀸 𑀧𑀼𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀘𑁆𑀙𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑀼𑀡𑀸𑀣 𑀫𑁂, 𑀪𑀦𑁆𑀢𑁂, 𑀧𑀼𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀆𑀳 𑁋

𑀇𑀢𑁄 ¶ 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀅𑀳𑀁 𑀩𑀦𑁆𑀥𑀼𑀫𑀢𑀺𑀦𑀕𑀭𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺𑀁 𑁋 ‘‘𑀓𑀺𑀁 𑀦𑀼 𑀔𑁄 𑀧𑀭𑁂𑀲𑀁 𑀙𑁂𑀤𑀁 𑀯𑀸 𑀧𑀻𑀴𑀁 𑀯𑀸 𑀅𑀓𑀭𑀡𑀓𑀫𑁆𑀫’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀥𑀫𑁆𑀫𑀖𑁄𑀲𑀓𑀓𑀫𑁆𑀫𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀢𑁆𑀯𑀸 ‘‘𑀧𑀼𑀜𑁆𑀜𑀸𑀦𑀺 𑀓𑀭𑁄𑀣, 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀣, 𑀤𑀸𑀦𑀁 𑀤𑁂𑀣, 𑀥𑀫𑁆𑀫𑀁 𑀲𑀼𑀡𑀸𑀣, 𑀩𑀼𑀤𑁆𑀥𑀭𑀢𑀦𑀸𑀤𑀻𑀳𑀺 𑀲𑀤𑀺𑀲𑀁 𑀅𑀜𑁆𑀜𑀁 𑀦𑀸𑀫 𑀦𑀢𑁆𑀣𑀺, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑁄 𑀯𑀺𑀘𑀭𑀸𑀫𑀺. 𑀢𑀲𑁆𑀲 𑀫𑀬𑁆𑀳𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑀺𑀢𑀸 𑀩𑀦𑁆𑀥𑀼𑀫𑀢𑀺𑀫𑀳𑀸𑀭𑀸𑀚𑀸 𑀫𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀤𑁂𑀯, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀧𑀓𑀸𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀲𑀫𑀸𑀤𑀧𑁂𑀦𑁆𑀢𑁄 𑀯𑀺𑀘𑀭𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀓𑀢𑁆𑀣 𑀦𑀺𑀲𑀺𑀦𑁆𑀦𑁄 𑀯𑀺𑀘𑀭𑀲𑀻’’𑀢𑀺 𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀤𑀲𑀸𑀯, 𑀤𑁂𑀯𑀸’’𑀢𑀺 ¶ 𑀫𑀬𑀸 𑀯𑀼𑀢𑁆𑀢𑁂, ‘‘𑀢𑀸𑀢, 𑀦 𑀢𑁆𑀯𑀁 𑀏𑀯𑀁 𑀯𑀺𑀘𑀭𑀺𑀢𑀼𑀁 𑀅𑀭𑀳𑀲𑀺, 𑀇𑀫𑀁 𑀧𑀼𑀧𑁆𑀨𑀤𑀸𑀫𑀁 𑀧𑀺𑀮𑀦𑁆𑀥𑀺𑀢𑁆𑀯𑀸 𑀅𑀲𑁆𑀲𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀯 𑀯𑀺𑀘𑀭𑀸’’𑀢𑀺 𑀫𑀬𑁆𑀳𑀁 𑀫𑀼𑀢𑁆𑀢𑀸𑀤𑀸𑀫𑀲𑀤𑀺𑀲𑀁 𑀧𑀼𑀧𑁆𑀨𑀤𑀸𑀫𑀁 𑀤𑀢𑁆𑀯𑀸 𑀤𑀦𑁆𑀢𑀁 𑀅𑀲𑁆𑀲𑀁 𑀅𑀤𑀸𑀲𑀺. 𑀅𑀣 𑀫𑀁 𑀭𑀜𑁆𑀜𑀸 𑀤𑀺𑀦𑁆𑀦𑀧𑀭𑀺𑀳𑀸𑀭𑁂𑀦 𑀢𑀣𑁂𑀯 𑀉𑀕𑁆𑀖𑁄𑀲𑁂𑀢𑁆𑀯𑀸 ¶ 𑀯𑀺𑀘𑀭𑀦𑁆𑀢𑀁 𑀧𑀼𑀦 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀤𑁂𑀯, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂, ‘‘𑀢𑀸𑀢, 𑀅𑀲𑁆𑀲𑁄𑀧𑀺 𑀢𑁂 𑀦𑀸𑀦𑀼𑀘𑁆𑀙𑀯𑀺𑀓𑁄, 𑀇𑀥 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀘𑀭𑀸’’𑀢𑀺 𑀘𑀢𑀼𑀲𑀺𑀦𑁆𑀥𑀯𑀬𑀼𑀢𑁆𑀢𑀭𑀣𑀁 𑀅𑀤𑀸𑀲𑀺. 𑀢𑀢𑀺𑀬𑀯𑀸𑀭𑁂𑀧𑀺 𑀫𑁂 𑀭𑀸𑀚𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀤𑁂𑀯, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂, ‘‘𑀢𑀸𑀢, 𑀭𑀣𑁄𑀧𑀺 𑀢𑁂 𑀦𑀸𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀫𑀬𑁆𑀳𑀁 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀸𑀧𑀲𑀸𑀥𑀦𑀜𑁆𑀘 𑀤𑀢𑁆𑀯𑀸 𑀏𑀓𑀜𑁆𑀘 𑀳𑀢𑁆𑀣𑀺𑀁 𑀅𑀤𑀸𑀲𑀺. 𑀲𑁆𑀯𑀸𑀳𑀁 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄 𑀅𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀖𑁄𑀲𑀓𑀓𑀫𑁆𑀫𑀁 𑀅𑀓𑀸𑀲𑀺𑀁, 𑀢𑀲𑁆𑀲 𑀫𑁂 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺. 𑀇𑀤𑀁 𑀫𑀬𑀸 𑀓𑀢𑀓𑀫𑁆𑀫𑀦𑁆𑀢𑀺.

𑀏𑀯𑀁 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄𑀯 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀭𑀻𑀭𑁂 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀫𑀁𑀲𑀮𑁄𑀳𑀺𑀢𑀁 𑀛𑀸𑀧𑁂𑀲𑀺, 𑀲𑀼𑀫𑀦𑀧𑀼𑀧𑁆𑀨𑀸𑀦𑀺 𑀯𑀺𑀬 𑀥𑀸𑀢𑀼𑀬𑁄 𑀅𑀯𑀲𑀺𑀲𑁆𑀲𑀺𑀁𑀲𑀼. 𑀲𑀢𑁆𑀣𑀸 𑀲𑀼𑀤𑁆𑀥𑀯𑀢𑁆𑀣𑀁 𑀧𑀲𑀸𑀭𑁂𑀲𑀺, 𑀥𑀸𑀢𑀼𑀬𑁄 ¶ 𑀢𑀢𑁆𑀣 𑀧𑀢𑀺𑀁𑀲𑀼. 𑀢𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑀼𑀫𑀳𑀸𑀧𑀣𑁂 𑀣𑀽𑀧𑀁 𑀓𑀸𑀭𑁂𑀲𑀺 ‘‘𑀫𑀳𑀸𑀚𑀦𑁄 𑀯𑀦𑁆𑀤𑀺𑀢𑁆𑀯𑀸 𑀧𑀼𑀜𑁆𑀜𑀪𑀸𑀕𑀻 𑀪𑀯𑀺𑀲𑁆𑀲𑀢𑀻’’𑀢𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑀕𑀸𑀣𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄𑀬𑁂𑀯 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑀺𑀁 𑀦𑀼 𑀔𑁄 𑀏𑀢𑀁 ‘𑀲𑀫𑀡𑁄’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀁 ‘𑀲𑀫𑀡𑁄’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, ‘𑀩𑁆𑀭𑀸𑀳𑁆𑀫𑀡𑁄’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑀅𑀮𑀗𑁆𑀓𑀢𑁄 𑀘𑁂𑀧𑀺 𑀲𑀫𑀁 𑀘𑀭𑁂𑀬𑁆𑀬,

𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻;

𑀲𑀩𑁆𑀩𑁂𑀲𑀼 ¶ 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀲𑀫𑀡𑁄 𑀲 𑀪𑀺𑀓𑁆𑀔𑀽’’𑀢𑀺.

𑀢𑀢𑁆𑀣 𑀅𑀮𑀗𑁆𑀓𑀢𑁄𑀢𑀺 𑀯𑀢𑁆𑀣𑀸𑀪𑀭𑀡𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄. 𑀢𑀲𑁆𑀲𑀢𑁆𑀣𑁄 𑁋 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀅𑀮𑀗𑁆𑀓𑀢𑁄 𑀘𑁂𑀧𑀺 𑀧𑀼𑀕𑁆𑀕𑀮𑁄 𑀓𑀸𑀬𑀸𑀤𑀻𑀳𑀺 𑀲𑀫𑀁 𑀘𑀭𑁂𑀬𑁆𑀬, 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦 𑀤𑀦𑁆𑀢𑁄 𑀘𑀢𑀼𑀫𑀕𑁆𑀕𑀦𑀺𑀬𑀫𑁂𑀦 𑀦𑀺𑀬𑀢𑁄 𑀲𑁂𑀝𑁆𑀞𑀘𑀭𑀺𑀬𑀸𑀬 ¶ 𑀩𑁆𑀭𑀳𑁆𑀫𑀘𑀸𑀭𑀻 𑀓𑀸𑀬𑀤𑀡𑁆𑀟𑀸𑀤𑀻𑀦𑀁 𑀑𑀭𑁄𑀧𑀺𑀢𑀢𑀸𑀬 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁. 𑀲𑁄 𑀏𑀯𑀭𑀽𑀧𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 ¶ 𑀩𑁆𑀭𑀸𑀳𑁆𑀫𑀡𑁄𑀢𑀺𑀧𑀺 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺𑀧𑀺 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀪𑀺𑀓𑁆𑀔𑀽𑀢𑀺𑀧𑀺 𑀯𑀢𑁆𑀢𑀩𑁆𑀩𑁄𑀬𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀧𑀺𑀮𑁄𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀳𑀺𑀭𑀻𑀦𑀺𑀲𑁂𑀥𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀺𑀮𑁄𑀢𑀺𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀏𑀓𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀦𑀺𑀯𑀢𑁆𑀣𑀁 𑀓𑀧𑀸𑀮𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀢𑁂 𑀏𑀯𑀁 𑀯𑀺𑀘𑀭𑀺𑀢𑁆𑀯𑀸 𑀚𑀻𑀯𑀦𑀢𑁄 𑀧𑀩𑁆𑀩𑀚𑁆𑀚𑀸 𑀦 𑀉𑀢𑁆𑀢𑀭𑀺𑀢𑀭𑀸’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁄 𑀫𑀁 𑀧𑀩𑁆𑀩𑀸𑀚𑁂𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀲𑀳𑀢𑁆𑀣𑀸 𑀦𑁆𑀳𑀸𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀜𑁆𑀘 𑀧𑀦 𑀦𑀺𑀯𑀢𑁆𑀣𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀲𑁆𑀲𑀸𑀯𑀦𑀓𑀭𑀡𑀫𑀢𑁆𑀢𑀫𑁆𑀧𑀺 𑀕𑀬𑁆𑀳𑀽𑀧𑀕𑀁 𑀓𑀜𑁆𑀘𑀺 𑀧𑀤𑁂𑀲𑀁 𑀅𑀤𑀺𑀲𑁆𑀯𑀸 𑀓𑀧𑀸𑀮𑁂𑀦 𑀲𑀤𑁆𑀥𑀺𑀁 𑀏𑀓𑀺𑀲𑁆𑀲𑀸 𑀭𑀼𑀓𑁆𑀔𑀲𑀸𑀔𑀸𑀬 𑀞𑀧𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀮𑀸𑀪𑀲𑀓𑁆𑀓𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀫𑀳𑀕𑁆𑀖𑀸𑀦𑀺 𑀘𑀻𑀯𑀭𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀣𑀽𑀮𑀲𑀭𑀻𑀭𑁄 𑀳𑀼𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀓𑀺𑀁 𑀫𑁂 𑀚𑀦𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀘𑀭𑀡𑁂𑀦, 𑀅𑀢𑁆𑀢𑀦𑁄 𑀧𑀺𑀮𑁄𑀢𑀺𑀓𑀫𑁂𑀯 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀺𑀮𑁄𑀢𑀺𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀺𑀭𑀺𑀓 ¶ 𑀦𑀺𑀮𑁆𑀮𑀚𑁆𑀚 𑀏𑀯𑀭𑀽𑀧𑀸𑀦𑀁 𑀯𑀢𑁆𑀣𑀸𑀦𑀁 𑀅𑀘𑁆𑀙𑀸𑀤𑀦𑀝𑁆𑀞𑀸𑀦𑀁 𑀧𑀳𑀸𑀬 𑀇𑀫𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀧𑀸𑀮𑀳𑀢𑁆𑀣𑁄 𑀪𑀺𑀓𑁆𑀔𑀸𑀬 𑀘𑀭𑀺𑀢𑀼𑀁 𑀕𑀘𑁆𑀙𑀲𑀻’’𑀢𑀺 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺, 𑀑𑀯𑀤𑀦𑁆𑀢𑀲𑁆𑀲𑁂𑀯 𑀧𑀦𑀲𑁆𑀲 𑀘𑀺𑀢𑁆𑀢𑀁 𑀲𑀦𑁆𑀦𑀺𑀲𑀻𑀤𑀺. 𑀲𑁄 𑀢𑀁 𑀧𑀺𑀮𑁄𑀢𑀺𑀓𑀁 𑀢𑀢𑁆𑀣𑁂𑀯 𑀧𑀝𑀺𑀲𑀸𑀫𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀕𑀢𑁄. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀦𑀧𑀺 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀢𑀣𑁂𑀯 𑀯𑀢𑁆𑀯𑀸 𑀦𑀺𑀯𑀢𑁆𑀢𑀺, 𑀧𑀼𑀦𑀧𑀺 𑀢𑀣𑁂𑀯𑀸𑀢𑀺. 𑀢𑀁 𑀏𑀯𑀁 𑀅𑀧𑀭𑀸𑀧𑀭𑀁 𑀯𑀺𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 ¶ ‘‘𑀓𑀳𑀁 ¶ , 𑀆𑀯𑀼𑀲𑁄, 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀲𑁄 ‘‘𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀏𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀅𑀢𑁆𑀢𑀦𑁄 𑀧𑀺𑀮𑁄𑀢𑀺𑀓𑀔𑀡𑁆𑀟𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀓𑀺𑀁, 𑀆𑀯𑀼𑀲𑁄, 𑀦 𑀤𑀸𑀦𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀲𑀺, 𑀦𑀦𑀼 𑀅𑀬𑀁 𑀢𑁂 𑀯𑀺𑀘𑀭𑀡𑀫𑀕𑁆𑀕𑁄’’𑀢𑀺. 𑀆𑀯𑀼𑀲𑁄, 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁂 𑀲𑀢𑀺 𑀕𑀢𑁄𑀫𑁆𑀳𑀺, 𑀇𑀤𑀸𑀦𑀺 𑀧𑀦 𑀫𑁂 𑀙𑀺𑀦𑁆𑀦𑁄 𑀲𑀁𑀲𑀕𑁆𑀕𑁄, 𑀢𑁂𑀦𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀘𑁆𑀙𑀸𑀫𑀻𑀢𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀧𑀺𑀮𑁄𑀢𑀺𑀓𑀢𑁆𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺. 𑀓𑀺𑀫𑀸𑀳, 𑀪𑀺𑀓𑁆𑀔𑀯𑁂𑀢𑀺? 𑀇𑀤𑀁 𑀦𑀸𑀫, 𑀪𑀦𑁆𑀢𑁂𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀲𑀁𑀲𑀕𑁆𑀕𑁂 𑀲𑀢𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄, 𑀇𑀤𑀸𑀦𑀺 𑀧𑀦𑀲𑁆𑀲 𑀲𑀁𑀲𑀕𑁆𑀕𑁄 𑀙𑀺𑀦𑁆𑀦𑁄, 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀳𑀺𑀭𑀻𑀦𑀺𑀲𑁂𑀥𑁄 𑀧𑀼𑀭𑀺𑀲𑁄, 𑀓𑁄𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀚𑁆𑀚𑀢𑀺;

𑀬𑁄 𑀦𑀺𑀤𑁆𑀤𑀁 𑀅𑀧𑀩𑁄𑀥𑁂𑀢𑀺, 𑀅𑀲𑁆𑀲𑁄 𑀪𑀤𑁆𑀭𑁄 𑀓𑀲𑀸𑀫𑀺𑀯.

‘‘𑀅𑀲𑁆𑀲𑁄 ¶ 𑀬𑀣𑀸 𑀪𑀤𑁆𑀭𑁄 𑀓𑀲𑀸𑀦𑀺𑀯𑀺𑀝𑁆𑀞𑁄,

𑀲𑀤𑁆𑀥𑀸𑀬 𑀲𑀻𑀮𑁂𑀦 𑀘 𑀯𑀻𑀭𑀺𑀬𑁂𑀦 𑀘,

𑀲𑀫𑀸𑀥𑀺𑀦𑀸 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑁂𑀦 𑀘;

𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑀸 𑀧𑀢𑀺𑀲𑁆𑀲𑀢𑀸,

𑀚𑀳𑀺𑀲𑁆𑀲𑀣 𑀤𑀼𑀓𑁆𑀔𑀫𑀺𑀤𑀁 𑀅𑀦𑀧𑁆𑀧𑀓’’𑀦𑁆𑀢𑀺.

𑀢𑀢𑁆𑀣 𑀅𑀦𑁆𑀢𑁄 𑀉𑀧𑁆𑀧𑀦𑁆𑀦𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀳𑀺𑀭𑀺𑀬𑀸 𑀦𑀺𑀲𑁂𑀥𑁂𑀢𑀻𑀢𑀺 𑀳𑀺𑀭𑀻𑀦𑀺𑀲𑁂𑀥𑁄. 𑀓𑁄𑀘𑀺 𑀮𑁄𑀓𑀲𑁆𑀫𑀺𑀦𑁆𑀢𑀺 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄, 𑀓𑁄𑀘𑀺𑀤𑁂𑀯 𑀮𑁄𑀓𑀲𑁆𑀫𑀺𑀁 𑀯𑀺𑀚𑁆𑀚𑀢𑀺. 𑀬𑁄 𑀦𑀺𑀤𑁆𑀤𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀁 𑀦𑀺𑀤𑁆𑀤𑀁 𑀅𑀧𑀳𑀭𑀦𑁆𑀢𑁄 𑀩𑀼𑀚𑁆𑀛𑀢𑀻𑀢𑀺 𑀅𑀧𑀩𑁄𑀥𑁂𑀢𑀺. 𑀓𑀲𑀸𑀫𑀺𑀯𑀸𑀢𑀺 𑀬𑀣𑀸 𑀪𑀤𑁆𑀭𑁄 𑀅𑀲𑁆𑀲𑁄 𑀅𑀢𑁆𑀢𑀦𑀺 𑀧𑀢𑀫𑀸𑀦𑀁 𑀓𑀲𑀁 𑀅𑀧𑀳𑀭𑀢𑀺, 𑀅𑀢𑁆𑀢𑀦𑀺 𑀧𑀢𑀺𑀢𑀼𑀁 𑀦 𑀤𑁂𑀢𑀺. 𑀬𑁄 𑀏𑀯𑀁 𑀦𑀺𑀤𑁆𑀤𑀁 𑀅𑀧𑀩𑁄𑀥𑁂𑀢𑀺, 𑀲𑁄 𑀤𑀼𑀮𑁆𑀮𑀪𑁄𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀪𑀺𑀓𑁆𑀔𑀯𑁂, 𑀬𑀣𑀸 𑀪𑀤𑁆𑀭𑁄 𑀅𑀲𑁆𑀲𑁄 𑀧𑀫𑀸𑀤𑀫𑀸𑀕𑀫𑁆𑀫 𑀓𑀲𑀸𑀬 𑀦𑀺𑀯𑀺𑀝𑁆𑀞𑁄, 𑀅𑀳𑀫𑁆𑀧𑀺 𑀦𑀸𑀫 𑀓𑀲𑀸𑀬 𑀧𑀳𑀝𑁄’’𑀢𑀺 𑀅𑀧𑀭𑀪𑀸𑀕𑁂 𑀆𑀢𑀧𑁆𑀧𑀁 𑀓𑀭𑁄𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀆𑀢𑀸𑀧𑀺𑀦𑁄 𑀲𑀁𑀯𑁂𑀕𑀺𑀦𑁄 𑀪𑀯𑀣 ¶ , 𑀏𑀯𑀁𑀪𑀽𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀤𑀼𑀯𑀺𑀥𑀸𑀬 𑀲𑀤𑁆𑀥𑀸𑀬 𑀘 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀘 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀺𑀦𑀸 𑀘 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑀮𑀓𑁆𑀔𑀡𑁂𑀦 ¶ 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀢𑀺𑀲𑁆𑀲𑀦𑁆𑀦𑀁 𑀯𑀸 𑀅𑀝𑁆𑀞𑀦𑁆𑀦𑀁 𑀯𑀸 𑀯𑀺𑀚𑁆𑀚𑀸𑀦𑀁, 𑀧𑀜𑁆𑀘𑀤𑀲𑀦𑁆𑀦𑀜𑁆𑀘 𑀘𑀭𑀡𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑀸 ¶ . 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀧𑀢𑀺𑀲𑁆𑀲𑀢𑀸 𑀳𑀼𑀢𑁆𑀯𑀸 𑀇𑀤𑀁 𑀅𑀦𑀧𑁆𑀧𑀓𑀁 𑀯𑀝𑁆𑀝𑀤𑀼𑀓𑁆𑀔𑀁 𑀧𑀚𑀳𑀺𑀲𑁆𑀲𑀣𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀺𑀮𑁄𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑀫𑀁.

𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀔𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀕𑀦𑁆𑀥𑀓𑀼𑀫𑀸𑀭𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀭𑀸𑀚𑀸 𑀢𑀲𑁆𑀲 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀢𑀲𑁆𑀲𑁂𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀕𑀦𑁆𑀥𑀲𑁂𑀝𑁆𑀞𑀻𑀢𑀺 𑀧𑀜𑁆𑀜𑀸𑀬𑀺. 𑀅𑀣𑀲𑁆𑀲 𑀪𑀡𑁆𑀟𑀸𑀕𑀸𑀭𑀺𑀓𑁄 𑀥𑀦𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸, ‘‘𑀲𑀸𑀫𑀺, 𑀇𑀤𑀁 𑀢𑁂 𑀏𑀢𑁆𑀢𑀓𑀁 𑀧𑀺𑀢𑀼 𑀥𑀦𑀁, 𑀏𑀢𑁆𑀢𑀓𑀁 𑀧𑀺𑀢𑀸𑀫𑀳𑀸𑀤𑀻𑀦’’𑀦𑁆𑀢𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀥𑀦𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 𑀆𑀳 𑁋 ‘‘𑀓𑀺𑀁 𑀧𑀦 𑀢𑁂 𑀇𑀫𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀁𑀲𑀽’’𑀢𑀺. ‘‘𑀲𑀸𑀫𑀺, 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀢𑀸 𑀦𑀸𑀫 𑀦𑀢𑁆𑀣𑀺. 𑀅𑀢𑁆𑀢𑀦𑀸 𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑀫𑁂𑀯 𑀳𑀺 𑀆𑀤𑀸𑀬 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑁂 𑀩𑀸𑀮𑀢𑀸𑀬 𑀥𑀦𑀁 𑀲𑀡𑁆𑀞𑀸𑀧𑁂𑀢𑁆𑀯𑀸 𑀧𑀳𑀸𑀬 𑀕𑀢𑀸, 𑀅𑀳𑀁 𑀧𑀦𑁂𑀢𑀁 𑀕𑀳𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀺, 𑀧𑀽𑀚𑀁 ¶ 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀤𑀁 𑀲𑀩𑁆𑀩𑀁 𑀔𑀸𑀤𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀨𑀮𑀺𑀓𑀫𑀬𑀁 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀓𑀸𑀭𑁂𑀲𑀺, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀨𑀮𑀺𑀓𑀫𑀬𑀫𑁂𑀯 𑀦𑁆𑀳𑀸𑀦𑀨𑀮𑀓𑀁, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑀁, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀪𑁄𑀚𑀦𑀧𑀸𑀢𑀺𑀁, 𑀲𑀢𑀲𑀳𑀲𑁆𑀲𑀫𑁂𑀯 𑀤𑀢𑁆𑀯𑀸 𑀪𑁄𑀚𑀦𑀝𑁆𑀞𑀸𑀦𑁂 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀲𑀺, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀪𑁄𑀚𑀦𑀧𑀸𑀢𑀺𑀬𑀸 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀁 𑀓𑀸𑀭𑁂𑀲𑀺, 𑀲𑀢𑀲𑀳𑀲𑁆𑀲𑁂𑀦𑁂𑀯 𑀕𑁂𑀳𑁂 ¶ 𑀲𑀻𑀳𑀧𑀜𑁆𑀚𑀭𑀁 𑀲𑀡𑁆𑀞𑀸𑀧𑁂𑀲𑀺, 𑀅𑀢𑁆𑀢𑀦𑁄 𑀧𑀸𑀢𑀭𑀸𑀲𑀢𑁆𑀣𑀸𑀬 𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀲𑀸𑀬𑀫𑀸𑀲𑀢𑁆𑀣𑀸𑀬𑀧𑀺 𑀲𑀳𑀲𑁆𑀲𑀫𑁂𑀯. 𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀦 𑀪𑁄𑀚𑀦𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁 𑀤𑀸𑀧𑁂𑀲𑀺, 𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑀤𑀺𑀯𑀲𑁂 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀕𑀦𑁆𑀥𑀲𑁂𑀝𑁆𑀞𑀺𑀲𑁆𑀲 𑀓𑀺𑀭 𑀪𑀢𑁆𑀢𑀪𑀼𑀜𑁆𑀚𑀦𑀸𑀓𑀸𑀭𑀁 𑀑𑀮𑁄𑀓𑁂𑀦𑁆𑀢𑀽’’𑀢𑀺.

𑀫𑀳𑀸𑀚𑀦𑁄 ¶ 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀩𑀦𑁆𑀥𑀺𑀢𑁆𑀯𑀸 𑀲𑀦𑁆𑀦𑀺𑀧𑀢𑀺. 𑀲𑁄𑀧𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀦𑁆𑀳𑀸𑀦𑀓𑁄𑀝𑁆𑀞𑀓𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀨𑀮𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀢𑁆𑀯𑀸 𑀢𑀁 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂 𑀢𑀁 𑀧𑀸𑀢𑀺𑀁 𑀞𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀪𑁄𑀚𑀦𑀁 𑀯𑀟𑁆𑀠𑁂𑀲𑀼𑀁. 𑀲𑁄 𑀦𑀸𑀝𑀓𑀧𑀭𑀺𑀯𑀼𑀢𑁄 𑀏𑀯𑀭𑀽𑀧𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺. 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀓𑁄 𑀕𑀸𑀫𑀺𑀓𑀫𑀦𑀼𑀲𑁆𑀲𑁄 𑀅𑀢𑁆𑀢𑀦𑁄 𑀧𑀭𑀺𑀩𑁆𑀩𑀬𑀸𑀳𑀭𑀡𑀢𑁆𑀣𑀁 𑀤𑀸𑀭𑀼𑀆𑀤𑀻𑀦𑀺 𑀬𑀸𑀦𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀲𑀳𑀸𑀬𑀓𑀲𑁆𑀲 𑀕𑁂𑀳𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀢𑀤𑀸 𑀧𑀦 𑀧𑀼𑀡𑁆𑀡𑀫𑀤𑀺𑀯𑀲𑁄 ¶ 𑀳𑁄𑀢𑀺. ‘‘𑀕𑀦𑁆𑀥𑀲𑁂𑀝𑁆𑀞𑀺𑀦𑁄 𑀪𑀼𑀜𑁆𑀚𑀦𑀮𑀻𑀴𑀁 𑀑𑀮𑁄𑀓𑁂𑀦𑁆𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀅𑀣 𑀦𑀁 𑀲𑀳𑀸𑀬𑀓𑁄 𑀆𑀳 𑁋 ‘‘𑀲𑀫𑁆𑀫, 𑀕𑀦𑁆𑀥𑀲𑁂𑀝𑁆𑀞𑀺𑀦𑁄 𑀢𑁂 𑀪𑀼𑀜𑁆𑀚𑀦𑀮𑀻𑀴𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺. ‘‘𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀲𑀫𑁆𑀫𑀸’’𑀢𑀺. ‘‘𑀢𑁂𑀦 𑀳𑀺 𑀏𑀳𑀺, 𑀕𑀘𑁆𑀙𑀸𑀫, 𑀅𑀬𑀁 𑀦𑀕𑀭𑁂 𑀪𑁂𑀭𑀻 𑀘𑀭𑀢𑀺, 𑀏𑀢𑀲𑁆𑀲 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀸𑀫𑀸’’𑀢𑀺 𑀦𑀕𑀭𑀯𑀸𑀲𑀻 𑀚𑀦𑀧𑀤𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀲𑁆𑀲𑀢𑀺. 𑀕𑀸𑀫𑀯𑀸𑀲𑀻 𑀪𑀢𑁆𑀢𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀯 𑀦𑀕𑀭𑀯𑀸𑀲𑀺𑀁 𑀆𑀳 𑁋 ‘‘𑀫𑀬𑁆𑀳𑀁 𑀏𑀢𑀸𑀬 𑀧𑀸𑀢𑀺𑀬𑀸 𑀪𑀢𑁆𑀢𑀧𑀺𑀡𑁆𑀟𑁂 𑀧𑀺𑀧𑀸𑀲𑀸 𑀚𑀸𑀢𑀸’’𑀢𑀺. 𑀲𑀫𑁆𑀫, 𑀫𑀸 𑀏𑀢𑀁 𑀧𑀢𑁆𑀣𑀬𑀺, 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀲𑀫𑁆𑀫, 𑀅𑀮𑀪𑀦𑁆𑀢𑁄 𑀦 𑀚𑀻𑀯𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀢𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 ‘‘𑀧𑀡𑀫𑀸𑀫𑀺 𑀢𑁂, 𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑁂 𑀅𑀳𑀁, 𑀲𑀸𑀫𑀻𑀢𑀺. ‘‘𑀓𑀺𑀫𑁂𑀢’’𑀦𑁆𑀢𑀺. ‘‘𑀅𑀬𑀁 𑀏𑀓𑁄 𑀕𑀸𑀫𑀯𑀸𑀲𑀻 𑀢𑀼𑀫𑁆𑀳𑀸𑀓𑀁 𑀧𑀸𑀢𑀺𑀬𑀁 𑀪𑀢𑁆𑀢𑀧𑀺𑀡𑁆𑀟𑁂 𑀧𑀺𑀧𑀸𑀲𑀁 𑀉𑀧𑀸𑀤𑁂𑀲𑀺, 𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀤𑀸𑀧𑁂𑀣𑀸’’𑀢𑀺. ‘‘𑀦 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺. ‘‘𑀓𑀺𑀁, 𑀲𑀫𑁆𑀫, 𑀲𑀼𑀢𑀁 𑀢𑁂’’𑀢𑀺? ‘‘𑀲𑀼𑀢𑀁 𑀫𑁂, 𑀅𑀧𑀺𑀘 𑀮𑀪𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀼𑀦𑀧𑀺 𑀯𑀺𑀭𑀯𑀺 𑁋 ‘‘𑀅𑀬𑀁 𑀓𑀺𑀭, 𑀲𑀸𑀫𑀺, 𑀅𑀮𑀪𑀦𑁆𑀢𑁄 𑀫𑀭𑀺𑀲𑁆𑀲𑀢𑀺, 𑀚𑀻𑀯𑀺𑀢𑀫𑀲𑁆𑀲 𑀤𑁂𑀣𑀸’’𑀢𑀺. 𑀅𑀫𑁆𑀪𑁄 𑀪𑀢𑁆𑀢𑀧𑀺𑀡𑁆𑀟𑁄 𑀦𑀸𑀫 𑀲𑀢𑀫𑁆𑀧𑀺 𑀅𑀕𑁆𑀖𑀢𑀺, 𑀲𑀢𑀤𑁆𑀯𑀬𑀫𑁆𑀧𑀺 𑀅𑀕𑁆𑀖𑀢𑀺. 𑀬𑁄 𑀬𑁄 𑀬𑀸𑀘𑀢𑀺, 𑀢𑀲𑁆𑀲 𑀢𑀲𑁆𑀲 𑀤𑀤𑀫𑀸𑀦𑁄 𑀅𑀳𑀁 ¶ 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺? 𑀲𑀸𑀫𑀺, 𑀅𑀬𑀁 𑀅𑀮𑀪𑀦𑁆𑀢𑁄 𑀫𑀭𑀺𑀲𑁆𑀲𑀢𑀺, 𑀚𑀻𑀯𑀺𑀢𑀫𑀲𑁆𑀲 𑀤𑁂𑀣𑀸𑀢𑀺. 𑀦 𑀲𑀓𑁆𑀓𑀸𑀯 𑀫𑀼𑀥𑀸 𑀮𑀤𑁆𑀥𑀼𑀁, 𑀬𑀤𑀺 𑀧𑀦 ¶ 𑀅𑀮𑀪𑀦𑁆𑀢𑁄 𑀦 𑀚𑀻𑀯𑀢𑀺, 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀫𑀫 𑀕𑁂𑀳𑁂 𑀪𑀢𑀺𑀁 𑀓𑀭𑁄𑀢𑀼, 𑀏𑀯𑀫𑀲𑁆𑀲 𑀪𑀢𑁆𑀢𑀧𑀸𑀢𑀺𑀁 𑀤𑀸𑀧𑁂𑀲𑁆𑀲𑀸𑀫𑀻𑀢𑀺. 𑀕𑀸𑀫𑀯𑀸𑀲𑀻 𑀢𑀁 𑀲𑀼𑀢𑁆𑀯𑀸 ‘‘𑀏𑀯𑀁 𑀳𑁄𑀢𑀼, 𑀲𑀫𑁆𑀫𑀸’’𑀢𑀺 𑀲𑀳𑀸𑀬𑀓𑀁 𑀯𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 ‘‘𑀪𑀢𑁆𑀢𑀧𑀸𑀢𑀺𑀅𑀢𑁆𑀣𑀸𑀬 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀁 𑀧𑀸𑀯𑀺𑀲𑀺. 𑀲𑁄 𑀪𑀢𑀺𑀁 𑀓𑀭𑁄𑀦𑁆𑀢𑁄 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀓𑁆𑀓𑀘𑁆𑀘𑀁 𑀅𑀓𑀸𑀲𑀺. 𑀕𑁂𑀳𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀲𑀩𑁆𑀩𑀸𑀦𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀺 𑀓𑀢𑀸𑀦𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. ‘‘𑀪𑀢𑁆𑀢𑀪𑀢𑀺𑀓𑁄’’𑀢𑀺 𑀘 𑀯𑀼𑀢𑁆𑀢𑁂 𑀲𑀓𑀮𑀦𑀕𑀭𑁂𑀧𑀺 𑀧𑀜𑁆𑀜𑀸𑀬𑀺. 𑀅𑀣𑀲𑁆𑀲 𑀤𑀺𑀯𑀲𑁂 𑀧𑀭𑀺𑀧𑀼𑀡𑁆𑀡𑁂 𑀪𑀢𑁆𑀢𑀯𑁂𑀬𑁆𑀬𑀸𑀯𑀝𑀺𑀓𑁄 ‘‘𑀪𑀢𑁆𑀢𑀪𑀢𑀺𑀓𑀲𑁆𑀲, 𑀲𑀸𑀫𑀺, 𑀤𑀺𑀯𑀲𑁄 𑀧𑀼𑀡𑁆𑀡𑁄, 𑀤𑀼𑀓𑁆𑀓𑀭𑀁 𑀢𑁂𑀦 𑀓𑀢𑀁 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀭𑁄𑀦𑁆𑀢𑁂𑀦, 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀦 𑀓𑁄𑀧𑀺𑀢𑀧𑀼𑀩𑁆𑀩’’𑀦𑁆𑀢𑀺 𑀆𑀳.

𑀅𑀣𑀲𑁆𑀲 𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀲𑀸𑀬𑀧𑀸𑀢𑀭𑀸𑀲𑀢𑁆𑀣𑀸𑀬 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺, 𑀢𑀲𑁆𑀲 𑀧𑀸𑀢𑀭𑀸𑀲𑀢𑁆𑀣𑀸𑀬 𑀲𑀳𑀲𑁆𑀲𑀦𑁆𑀢𑀺 𑀢𑀻𑀡𑀺 ¶ 𑀲𑀳𑀲𑁆𑀲𑀸𑀦𑀺 𑀤𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀅𑀚𑁆𑀚 𑀫𑀬𑁆𑀳𑀁 𑀓𑀢𑁆𑀢𑀩𑁆𑀩𑀁 𑀧𑀭𑀺𑀳𑀸𑀭𑀁 𑀢𑀲𑁆𑀲𑁂𑀯 𑀓𑀭𑁄𑀣𑀸’’𑀢𑀺. 𑀯𑀢𑁆𑀯𑀸 𑀘 𑀧𑀦 𑀞𑀧𑁂𑀢𑁆𑀯𑀸 𑀏𑀓𑀁 𑀘𑀺𑀦𑁆𑀢𑀸𑀫𑀡𑀺𑀁 𑀦𑀸𑀫 𑀧𑀺𑀬𑀪𑀭𑀺𑀬𑀁 𑀅𑀯𑀲𑁂𑀲𑀚𑀦𑀫𑁆𑀧𑀺 ‘‘𑀅𑀚𑁆𑀚 𑀢𑀫𑁂𑀯 𑀧𑀭𑀺𑀯𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀲𑁂𑀝𑁆𑀞𑀺𑀦𑁄 𑀦𑁆𑀳𑀸𑀦𑁄𑀤𑀓𑁂𑀦 𑀢𑀲𑁆𑀲𑁂𑀯 𑀓𑁄𑀝𑁆𑀞𑀓𑁂 𑀢𑀲𑁆𑀫𑀺𑀁 𑀨𑀮𑀓𑁂 𑀦𑀺𑀲𑀺𑀦𑁆𑀦𑁄 𑀦𑁆𑀳𑀢𑁆𑀯𑀸 𑀢𑀲𑁆𑀲𑁂𑀯 𑀦𑀺𑀯𑀸𑀲𑀦𑀲𑀸𑀝𑀓𑁂 ¶ 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀲𑁂𑀝𑁆𑀞𑀺𑀧𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀪𑀢𑁆𑀢𑀪𑀢𑀺𑀓𑁄 𑀕𑀦𑁆𑀥𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀢𑁆𑀯𑀸 𑀧𑀸𑀢𑀺𑀁 𑀮𑀪𑀺, 𑀢𑀲𑁆𑀲 𑀪𑀼𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑀽’’𑀢𑀺. 𑀫𑀳𑀸𑀚𑀦𑁄 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀲𑁆𑀲𑀢𑀺, 𑀕𑀸𑀫𑀯𑀸𑀲𑀺𑀲𑁆𑀲 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁 𑀓𑀫𑁆𑀧𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. 𑀦𑀸𑀝𑀓𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀲𑀼𑀁, 𑀢𑀲𑁆𑀲 𑀧𑀼𑀭𑀢𑁄 𑀪𑀢𑁆𑀢𑀧𑀸𑀢𑀺𑀁 𑀯𑀟𑁆𑀠𑁂𑀢𑁆𑀯𑀸 𑀞𑀧𑀬𑀺𑀁𑀲𑀼. 𑀅𑀣𑀲𑁆𑀲 𑀳𑀢𑁆𑀣𑀥𑁄𑀯𑀦𑀯𑁂𑀮𑀸𑀬 𑀕𑀦𑁆𑀥𑀫𑀸𑀤𑀦𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀢𑁆𑀣 𑀦𑀼 𑀔𑁄 𑀅𑀚𑁆𑀚 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀕𑀘𑁆𑀙𑀸𑀫𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀪𑀢𑁆𑀢𑀪𑀢𑀺𑀓𑀁 𑀅𑀤𑁆𑀤𑀲. 𑀅𑀣 𑀲𑁄 ‘‘𑀅𑀬𑀁 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀢𑁆𑀯𑀸 𑀪𑀢𑁆𑀢𑀧𑀸𑀢𑀺𑀁 𑀮𑀪𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀲𑁆𑀲 𑀲𑀤𑁆𑀥𑀸, 𑀦𑀢𑁆𑀣𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀅𑀢𑁆𑀣𑀻’’𑀢𑀺 𑀜𑀢𑁆𑀯𑀸 ‘‘𑀲𑀤𑁆𑀥𑀸𑀧𑀺 𑀏𑀓𑀘𑁆𑀘𑁂 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀺 𑀘𑁂𑀯 𑀫𑀫 𑀘 𑀲𑀗𑁆𑀕𑀳𑀓𑀭𑀡𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀲𑁆𑀲𑀢𑀻’’𑀢𑀺 ¶ 𑀜𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀺𑀲𑀦𑁆𑀢𑀭𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀺𑀢𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺.

𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀅𑀤𑀺𑀦𑁆𑀦𑀪𑀸𑀯𑁂𑀦 𑀏𑀓𑀺𑀲𑁆𑀲𑀸 𑀪𑀢𑁆𑀢𑀧𑀸𑀢𑀺𑀬𑀸 𑀅𑀢𑁆𑀣𑀸𑀬 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀧𑀭𑀕𑁂𑀳𑁂 𑀪𑀢𑀺𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀫𑁂 𑀇𑀤𑀁 𑀪𑀢𑁆𑀢𑀁 𑀏𑀓𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀭𑀓𑁆𑀔𑁂𑀬𑁆𑀬, 𑀲𑀘𑁂 𑀧𑀦 𑀦𑀁 𑀅𑀬𑁆𑀬𑀲𑁆𑀲 𑀤𑀲𑁆𑀲𑀸𑀫𑀺, 𑀅𑀦𑁂𑀓𑀸𑀦𑀺𑀧𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀭𑀓𑁆𑀔𑀺𑀲𑁆𑀲𑀢𑀺 ¶ , 𑀅𑀬𑁆𑀬𑀲𑁆𑀲𑁂𑀯 𑀦𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀧𑀸𑀢𑀺𑀢𑁄 𑀏𑀓𑀧𑀺𑀡𑁆𑀟𑀫𑁆𑀧𑀺 𑀫𑀼𑀔𑁂 𑀅𑀝𑁆𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀬𑀫𑁂𑀯 𑀧𑀸𑀢𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀸𑀢𑀺𑀁 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀁 𑀯𑀸𑀫𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀢𑀲𑁆𑀲 𑀧𑀢𑁆𑀢𑁂 𑀪𑀢𑁆𑀢𑀁 𑀆𑀓𑀺𑀭𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀢𑁆𑀢𑀲𑁆𑀲 𑀉𑀧𑀟𑁆𑀠𑀲𑁂𑀲𑀓𑀸𑀮𑁂 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀧𑀺𑀤𑀳𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑁄𑀯 𑀧𑀝𑀺𑀯𑀺𑀲𑁄 𑀦 𑀲𑀓𑁆𑀓𑀸 𑀤𑁆𑀯𑀺𑀥𑀸 𑀓𑀸𑀢𑀼𑀁, 𑀫𑀸 𑀫𑀁 𑀇𑀥𑀮𑁄𑀓𑁂𑀦 𑀲𑀗𑁆𑀕𑀡𑁆𑀳𑀣, 𑀧𑀭𑀮𑁄𑀓𑁂𑀦 𑀲𑀗𑁆𑀕𑀳𑀫𑁂𑀯 𑀓𑀭𑁄𑀣, 𑀲𑀸𑀯𑀲𑁂𑀲𑀁 𑀅𑀓𑀢𑁆𑀯𑀸 𑀦𑀺𑀭𑀯𑀲𑁂𑀲𑀫𑁂𑀯 𑀤𑀲𑁆𑀲𑀸𑀫𑀻’’𑀢𑀺. 𑀅𑀢𑁆𑀢𑀦𑁄 𑀳𑀺 𑀣𑁄𑀓𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀤𑀺𑀦𑁆𑀦𑀁 𑀦𑀺𑀭𑀯𑀲𑁂𑀲𑀤𑀸𑀦𑀁 𑀦𑀸𑀫, 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀲𑁄 𑀢𑀣𑀸 𑀓𑀭𑁄𑀦𑁆𑀢𑁄 𑀲𑀩𑁆𑀩𑀁 𑀤𑀢𑁆𑀯𑀸 𑀧𑀼𑀦 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑀁 𑀪𑀢𑁆𑀢𑀧𑀸𑀢𑀺𑀁 𑀦𑀺𑀲𑁆𑀲𑀸𑀬 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀫𑁂 𑀧𑀭𑀕𑁂𑀳𑁂 𑀪𑀢𑀺𑀁 𑀓𑀭𑁄𑀦𑁆𑀢𑁂𑀦 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁, 𑀇𑀤𑀸𑀦𑀺 𑀫𑁂 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀔𑀫𑁂𑀯 𑀳𑁄𑀢𑀼, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲𑁂𑀯 𑀪𑀸𑀕𑀻 𑀅𑀲𑁆𑀲’’𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀏𑀯𑀁 𑀳𑁄𑀢𑀼, 𑀘𑀺𑀦𑁆𑀢𑀸𑀫𑀡𑀺 𑀯𑀺𑀬 𑀢𑁂 𑀲𑀩𑁆𑀩𑀓𑀸𑀫𑀤𑀤𑁄 𑀫𑀦𑁄𑀲𑀗𑁆𑀓𑀧𑁆𑀧𑀸 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀧𑀽𑀭𑁂𑀦𑁆𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋

‘‘𑀇𑀘𑁆𑀙𑀺𑀢𑀁 ¶ 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀲𑀩𑁆𑀩𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸.

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀓𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀫𑀡𑀺 𑀚𑁄𑀢𑀺𑀭𑀲𑁄 𑀬𑀣𑀸’’𑀢𑀺. 𑁋

𑀯𑀢𑁆𑀯𑀸 ¶ ‘‘𑀅𑀬𑀁 𑀫𑀳𑀸𑀚𑀦𑁄 𑀬𑀸𑀯 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀕𑀫𑀦𑀸 𑀫𑀁 𑀧𑀲𑁆𑀲𑀦𑁆𑀢𑁄 𑀢𑀺𑀝𑁆𑀞𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀁 𑀅𑀕𑀫𑀸𑀲𑀺.

𑀫𑀳𑀸𑀚𑀦𑁄𑀧𑀺 ¶ 𑀦𑀁 𑀧𑀲𑁆𑀲𑀦𑁆𑀢𑁄𑀯 𑀅𑀝𑁆𑀞𑀸𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀅𑀤𑀸𑀲𑀺. 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀡𑁆𑀳𑀺𑀁𑀲𑀼. ‘‘𑀅𑀧𑁆𑀧𑁄 𑀧𑀺𑀡𑁆𑀟𑀧𑀸𑀢𑁄 𑀓𑀣𑀁 𑀧𑀳𑁄𑀲𑀻’’𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀘𑀢𑁆𑀢𑀸𑀭𑀺 𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 (𑀅. 𑀦𑀺. 𑁪.𑁭𑁭) 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀭𑀸𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑀺𑀲𑀬𑁄𑀢𑀺. 𑀫𑀳𑀸𑀚𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺, 𑀅𑀲𑀦𑀺𑀲𑀢𑀦𑀺𑀧𑀸𑀓𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀦𑁆𑀥𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀢𑁆𑀢𑀪𑀢𑀺𑀓𑁄 𑀫𑀬𑀸 𑀤𑀺𑀦𑁆𑀦𑀲𑀫𑁆𑀧𑀢𑁆𑀢𑀺𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺 𑀫𑀜𑁆𑀜𑁂, 𑀢𑁂𑀦𑀸𑀬𑀁 𑀫𑀳𑀸𑀚𑀦𑁄 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 𑀲𑀦𑁆𑀦𑀺𑀧𑀢𑀺𑀢𑁄 𑀦𑀤𑀢𑀻’’𑀢𑀺. 𑀲𑁄 𑀢𑀧𑁆𑀧𑀯𑀢𑁆𑀢𑀺𑀚𑀸𑀦𑀦𑀢𑁆𑀣𑀁 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 ‘‘𑀲𑀫𑁆𑀧𑀢𑁆𑀢𑀺𑀥𑀸𑀭𑀓𑀸 𑀦𑀸𑀫, 𑀲𑀸𑀫𑀺, 𑀏𑀯𑀁 𑀳𑁄𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑁂𑀝𑁆𑀞𑀺 𑀢𑀁 𑀲𑀼𑀢𑁆𑀯𑀸𑀯 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀳𑀼𑀢𑁆𑀯𑀸 ‘‘𑀅𑀳𑁄 𑀤𑀼𑀓𑁆𑀓𑀭𑀁 𑀢𑁂𑀦 𑀓𑀢𑀁, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀭𑀽𑀧𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑁄 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀳𑀦𑁆𑀤, 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀢𑀯 𑀤𑀸𑀦𑁂 𑀫𑀬𑁆𑀳𑀫𑁆𑀧𑀺 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑁂𑀝𑁆𑀞𑀺𑀧𑀺𑀲𑁆𑀲 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀲𑀺.

𑀘𑀢𑀲𑁆𑀲𑁄 𑀳𑀺 𑀲𑀫𑁆𑀧𑀤𑀸 𑀦𑀸𑀫 𑁋 𑀯𑀢𑁆𑀣𑀼𑀲𑀫𑁆𑀧𑀤𑀸, 𑀧𑀘𑁆𑀘𑀬𑀲𑀫𑁆𑀧𑀤𑀸, 𑀘𑁂𑀢𑀦𑀸𑀲𑀫𑁆𑀧𑀤𑀸, 𑀕𑀼𑀡𑀸𑀢𑀺𑀭𑁂𑀓𑀲𑀫𑁆𑀧𑀤𑀸𑀢𑀺. 𑀢𑀢𑁆𑀣 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀭𑀳𑁄 ¶ 𑀅𑀭𑀳𑀸 𑀯𑀸 𑀅𑀦𑀸𑀕𑀸𑀫𑀻 𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑁄 𑀯𑀢𑁆𑀣𑀼𑀲𑀫𑁆𑀧𑀤𑀸 𑀦𑀸𑀫. 𑀧𑀘𑁆𑀘𑀬𑀸𑀦𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀢𑁆𑀢𑀺 𑀧𑀘𑁆𑀘𑀬𑀲𑀫𑁆𑀧𑀤𑀸 𑀦𑀸𑀫. 𑀤𑀸𑀦𑀢𑁄 𑀧𑀼𑀩𑁆𑀩𑁂 𑀤𑀸𑀦𑀓𑀸𑀮𑁂 𑀧𑀘𑁆𑀙𑀸 𑀪𑀸𑀕𑁂𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀘𑁂𑀢𑀦𑀸𑀬 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁄 𑀘𑁂𑀢𑀦𑀸𑀲𑀫𑁆𑀧𑀤𑀸 𑀦𑀸𑀫. 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀪𑀸𑀯𑁄 𑀕𑀼𑀡𑀸𑀢𑀺𑀭𑁂𑀓𑀲𑀫𑁆𑀧𑀤𑀸 𑀦𑀸𑀫𑀸𑀢𑀺. 𑀇𑀫𑀲𑁆𑀲 𑀘 𑀔𑀻𑀡𑀸𑀲𑀯𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀤𑀓𑁆𑀔𑀺𑀡𑁂𑀬𑁆𑀬𑀸, 𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀪𑀸𑀯𑁂𑀦 𑀧𑀘𑁆𑀘𑀬𑁄 𑀥𑀫𑁆𑀫𑀢𑁄 𑀉𑀧𑁆𑀧𑀦𑁆𑀦𑁄, 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀭𑀺𑀲𑀼𑀤𑁆𑀥𑀸 𑀘𑁂𑀢𑀦𑀸, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀼𑀡𑀸𑀢𑀺𑀭𑁂𑀓𑁄𑀢𑀺 𑀘𑀢𑀲𑁆𑀲𑁄𑀧𑀺 ¶ 𑀲𑀫𑁆𑀧𑀤𑀸 𑀦𑀺𑀧𑁆𑀨𑀦𑁆𑀦𑀸. 𑀏𑀢𑀸𑀲𑀁 𑀆𑀦𑀼𑀪𑀸𑀯𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺𑀓𑀸 𑀲𑀫𑁆𑀧𑀢𑁆𑀢𑀺𑀁 𑀮𑀪𑀺. 𑀅𑀧𑀭𑀪𑀸𑀕𑁂 ¶ 𑀘 𑀭𑀸𑀚𑀸𑀧𑀺 𑀇𑀫𑀺𑀦𑀸 𑀓𑀢𑀓𑀫𑁆𑀫𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀤𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀪𑀢𑁆𑀢𑀪𑀢𑀺𑀓𑀲𑁂𑀝𑁆𑀞𑀻𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀕𑀦𑁆𑀥𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀏𑀓𑀢𑁄 𑀔𑀸𑀤𑀦𑁆𑀢𑁄 𑀧𑀺𑀯𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀽𑀧𑀝𑁆𑀞𑀸𑀓𑀓𑀼𑀮𑁂 ¶ 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀫𑀸𑀢𑀸 𑀮𑀤𑁆𑀥𑀕𑀩𑁆𑀪𑀧𑀭𑀺𑀳𑀸𑀭𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 ‘‘𑀅𑀳𑁄 𑀯𑀢𑀸𑀳𑀁 𑀧𑀜𑁆𑀘𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀢𑀭𑀲𑀪𑁄𑀚𑀦𑀁 𑀤𑀢𑁆𑀯𑀸 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀯𑀡𑁆𑀡𑀲𑀭𑀓𑀁 𑀆𑀤𑀸𑀬 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀘𑁆𑀙𑀺𑀝𑁆𑀞𑀸𑀯𑀲𑁂𑀲𑀓𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺 𑀤𑁄𑀳𑀴𑀺𑀦𑀻 𑀳𑀼𑀢𑁆𑀯𑀸 𑀢𑀣𑁂𑀯 𑀓𑀢𑁆𑀯𑀸 𑀤𑁄𑀳𑀴𑀁 𑀧𑀝𑀺𑀯𑀺𑀦𑁄𑀤𑁂𑀲𑀺. 𑀲𑀸 𑀲𑁂𑀲𑀫𑀗𑁆𑀕𑀮𑁂𑀲𑀼𑀧𑀺 𑀢𑀣𑀸𑀭𑀽𑀧𑀫𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀧𑀼𑀢𑁆𑀢𑀲𑁆𑀲 𑀫𑁂, 𑀪𑀦𑁆𑀢𑁂, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀣𑀸’’𑀢𑀺 𑀣𑁂𑀭𑀁 𑀆𑀳. 𑀣𑁂𑀭𑁄 ‘‘𑀓𑀺𑀫𑀲𑁆𑀲 𑀦𑀸𑀫’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀧𑀼𑀢𑁆𑀢𑀲𑁆𑀲 𑀫𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑀲𑁆𑀲𑀘𑀺 𑀤𑀼𑀓𑁆𑀔𑀁 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑀁, 𑀢𑁂𑀦𑁂𑀯𑀲𑁆𑀲 𑀲𑀼𑀔𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑀤𑁂𑀯𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀤𑀸𑀲𑀺.

𑀢𑀤𑀸 𑀏𑀯𑀜𑁆𑀘𑀲𑁆𑀲 𑀫𑀸𑀢𑀼 ‘‘𑀦𑀸𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀲𑀸 𑀢𑀲𑁆𑀲 𑀓𑀡𑁆𑀡𑀯𑀺𑀚𑁆𑀛𑀦𑀫𑀗𑁆𑀕𑀮𑀸𑀤𑀻𑀲𑀼𑀧𑀺 𑀢𑀣𑁂𑀯 𑀤𑀸𑀦𑀁 𑀅𑀤𑀸𑀲𑀺. 𑀓𑀼𑀫𑀸𑀭𑁄𑀧𑀺 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 ‘‘𑀇𑀘𑁆𑀙𑀸𑀫𑀳𑀁, 𑀅𑀫𑁆𑀫, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 𑀆𑀳. 𑀲𑀸 ‘‘𑀲𑀸𑀥𑀼, 𑀢𑀸𑀢, 𑀦𑀸𑀳𑀁 𑀢𑀯 𑀅𑀚𑁆𑀛𑀸𑀲𑀬𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀼𑀢𑁆𑀢𑁄 𑀫𑁂 𑀧𑀩𑁆𑀩𑀚𑀺𑀢𑀼𑀁 𑀇𑀘𑁆𑀙𑀢𑀺, 𑀇𑀫𑀸𑀳𑀁 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀜𑀸𑀢𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀕𑀺𑀳𑀺𑀓𑀸𑀮𑁂 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀅𑀚𑁆𑀚𑁂𑀯 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀣𑁂𑀭𑁄𑀧𑀺 𑀢𑀁, ‘‘𑀢𑀸𑀢, 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀤𑀼𑀓𑁆𑀓𑀭𑀸 ¶ , 𑀲𑀓𑁆𑀔𑀺𑀲𑁆𑀲𑀲𑀺 𑀅𑀪𑀺𑀭𑀫𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀭𑀺𑀲𑁆𑀲𑀸𑀫𑀺 𑀯𑁄, 𑀪𑀦𑁆𑀢𑁂, 𑀑𑀯𑀸𑀤’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀫𑀸𑀢𑀸𑀧𑀺𑀢𑀭𑁄𑀧𑀺𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑀭𑀲𑀪𑁄𑀚𑀦𑀁 𑀤𑀢𑁆𑀯𑀸 𑀲𑀸𑀬𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀁𑀲𑀼. 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀕𑀸𑀫𑀁 𑀧𑀯𑀺𑀝𑁆𑀞𑁂 𑀯𑀺𑀳𑀸𑀭𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀸𑀫𑀡𑁂𑀭𑀁 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 ¶ 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀫𑀡𑁂𑀭𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀸𑀢𑀺𑀓𑀸𑀤𑀻𑀦𑀺 𑀤𑀺𑀲𑁆𑀯𑀸 𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑁄 𑀯𑀺𑀬 𑀧𑀼𑀘𑁆𑀙𑀺. 𑀣𑁂𑀭𑁄𑀧𑀺 𑀢𑀲𑁆𑀲 𑀢𑀣𑁂𑀯 𑀩𑁆𑀬𑀸𑀓𑀸𑀲𑀺. 𑀲𑀸𑀫𑀡𑁂𑀭𑁄 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀲𑀼𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣, 𑀅𑀳𑀁 𑀦𑀺𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀪𑀺𑀦𑁆𑀤𑀺𑀢𑁆𑀯𑀸, ‘‘𑀲𑀸𑀫𑀡𑁂𑀭, 𑀤𑁂𑀳𑀺 𑀫𑀫 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 ¶ 𑀧𑀢𑁆𑀢𑀘𑀻𑀯𑀭𑁂 𑀕𑀳𑀺𑀢𑁂 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀆𑀳𑀸𑀭𑀁 𑀆𑀳𑀭𑀫𑀸𑀦𑁄 𑀲𑀢𑀭𑀲𑀪𑁄𑀚𑀦𑀁 𑀆𑀳𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀓𑀼𑀢𑁄 𑀢𑀁 𑀮𑀪𑀺𑀲𑁆𑀲𑀸𑀫𑀻𑀢𑀺? 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂𑀦 𑀅𑀮𑀪𑀦𑁆𑀢𑁄 𑀫𑀫 𑀧𑀼𑀜𑁆𑀜𑁂𑀦 𑀮𑀪𑀺𑀲𑁆𑀲𑀣, 𑀪𑀦𑁆𑀢𑁂𑀢𑀺. 𑀅𑀣𑀲𑁆𑀲 𑀣𑁂𑀭𑁄 𑀓𑀼𑀜𑁆𑀘𑀺𑀓𑀁 𑀤𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑁄𑀧𑀺 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀕𑀩𑁆𑀪𑀁 𑀯𑀺𑀯𑀭𑀺𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀅𑀢𑁆𑀢𑀦𑁄 𑀓𑀸𑀬𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀲𑁆𑀲 𑀕𑀼𑀡𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 ‘‘𑀲𑀼𑀔𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀯𑀺𑀳𑀸𑀭𑀲𑁆𑀲𑀽𑀧𑀯𑀦𑁂 𑀤𑀼𑀲𑁆𑀲𑀤𑁆𑀤𑀓𑁂 ¶ 𑀲𑀓𑀼𑀡𑁂 𑀧𑀮𑀸𑀧𑁂𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀲𑀸𑀫𑀦𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 ‘‘𑀅𑀢𑁆𑀢𑀦𑁄 𑀯𑀺𑀫𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑁂𑀧𑀺 𑀢𑀣𑀸 𑀓𑀭𑀺𑀁𑀲𑀼. 𑀲𑀬𑀫𑁆𑀧𑀺 𑀆𑀯𑀺𑀜𑁆𑀙𑀦𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺. 𑀯𑀺𑀳𑀸𑀭𑁄 𑀲𑀦𑁆𑀦𑀺𑀲𑀺𑀦𑁆𑀦𑁄 𑀦𑀺𑀭𑀯𑁄 𑀅𑀳𑁄𑀲𑀺. 𑀲𑀸𑀫𑀡𑁂𑀭𑁄 𑀏𑀓𑀕𑁆𑀕𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀺. 𑀣𑁂𑀭𑁄 ‘‘𑀲𑀸𑀫𑀡𑁂𑀭𑁂𑀦 ‘𑀲𑀢𑀭𑀲𑀪𑁄𑀚𑀦𑀁 𑀆𑀳𑀭𑁂𑀬𑁆𑀬𑀸𑀣𑀸’𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀲 𑀦𑀼 𑀔𑁄 𑀖𑀭𑁂 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑀁 𑀉𑀧𑀝𑁆𑀞𑀸𑀓𑀢𑀼𑀮𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀸𑀥𑀼 𑀯𑁄 𑀓𑀢𑀁 𑀅𑀚𑁆𑀚 𑀇𑀥𑀸𑀕𑀘𑁆𑀙𑀦𑁆𑀢𑁂𑀳𑀻’’𑀢𑀺 𑀢𑁂𑀳𑀺 𑀢𑀼𑀝𑁆𑀞𑀫𑀸𑀦𑀲𑁂𑀳𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀬𑀸𑀯 𑀪𑀢𑁆𑀢𑀓𑀸𑀮𑀁 𑀥𑀫𑁆𑀫𑀓𑀣𑀁 𑀬𑀸𑀘𑀺𑀢𑁄 𑀢𑁂𑀲𑀁 𑀲𑀸𑀭𑀡𑀻𑀬𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀅𑀣𑀲𑁆𑀲 𑀲𑀢𑀭𑀲𑀪𑁄𑀚𑀦𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀕𑀦𑁆𑀢𑀼𑀓𑀸𑀫𑀁 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀪𑀼𑀜𑁆𑀚𑀣, 𑀪𑀦𑁆𑀢𑁂, 𑀅𑀧𑀭𑀫𑁆𑀧𑀺 𑀢𑁂 𑀤𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀁 𑀪𑁄𑀚𑁂𑀢𑁆𑀯𑀸 𑀧𑀼𑀦 𑀧𑀢𑁆𑀢𑀧𑀽𑀭𑀁 𑀅𑀤𑀁𑀲𑀼. 𑀣𑁂𑀭𑁄 𑀢𑀁 𑀆𑀤𑀸𑀬 ‘‘𑀲𑀸𑀫𑀡𑁂𑀭𑁄 𑀫𑁂 𑀙𑀸𑀢𑁄’’𑀢𑀺 𑀢𑀼𑀭𑀺𑀢𑀢𑀼𑀭𑀺𑀢𑁄 ¶ 𑀯𑀺𑀳𑀸𑀭𑀁 𑀧𑀸𑀬𑀸𑀲𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀆𑀯𑀚𑁆𑀚𑁂𑀲𑀺 𑁋 ‘‘𑀅𑀚𑁆𑀚 𑀲𑀼𑀔𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀦𑀺𑀧𑁆𑀨𑀦𑁆𑀦𑀁 𑀦𑀼 𑀔𑁄 𑀢𑀲𑁆𑀲 𑀓𑀺𑀘𑁆𑀘’’𑀦𑁆𑀢𑀺. 𑀲𑁄 𑀢𑀺𑀡𑁆𑀡𑀁𑀬𑁂𑀯 𑀫𑀕𑁆𑀕𑀨𑀮𑀸𑀦𑀁 𑀧𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀉𑀢𑁆𑀢𑀭𑀺𑀧𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀓𑁆𑀔𑀺𑀲𑁆𑀲𑀢𑀸𑀬𑀁 𑀅𑀚𑁆𑀚 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 ¶ , 𑀲𑀸𑀭𑀺𑀧𑀼𑀢𑁆𑀢𑁄 𑀧𑀦 ‘𑀲𑀸𑀫𑀡𑁂𑀭𑁄 𑀫𑁂 𑀙𑀸𑀢𑁄’𑀢𑀺 𑀯𑁂𑀕𑁂𑀦 𑀪𑀢𑁆𑀢𑀁 𑀆𑀤𑀸𑀬 𑀦𑀺𑀓𑁆𑀔𑀫𑀢𑀺, 𑀲𑀘𑁂 𑀇𑀫𑀲𑁆𑀫𑀺𑀁 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀢𑁂 𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀫𑀬𑀸 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺.

𑀣𑁂𑀭𑁄𑀧𑀺 𑀪𑀢𑁆𑀢𑀁 𑀆𑀳𑀭𑀺. 𑀅𑀣 𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀲𑀸𑀫𑀡𑁂𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀲𑀸𑀭𑀺𑀧𑀼𑀢𑁆𑀢, 𑀲𑀸𑀫𑀡𑁂𑀭𑀲𑁆𑀲 ¶ 𑀢𑁂 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀲𑀸𑀫𑀡𑁂𑀭𑁄𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀯𑀢𑁆𑀢𑀁 𑀓𑀢𑁆𑀯𑀸 ‘‘𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀣𑁂𑀭𑀲𑁆𑀲 𑀪𑀢𑁆𑀢𑁂𑀦 𑀅𑀦𑀢𑁆𑀣𑀺𑀓𑀪𑀸𑀯𑀁 𑀜𑀢𑁆𑀯𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀼𑀫𑀸𑀭𑁄 𑀢𑀗𑁆𑀔𑀡𑀜𑁆𑀜𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀦𑀻𑀘𑀸𑀲𑀦𑀝𑁆𑀞𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀧𑀺 𑀯𑀺𑀫𑀸𑀦𑀸𑀦𑀺 𑀫𑀼𑀜𑁆𑀘𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀆𑀯𑀺𑀜𑁆𑀙𑀦𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀺𑀬𑁄 𑀦𑀪𑀫𑀚𑁆𑀛𑀁 𑀅𑀢𑀺𑀓𑁆𑀓𑀦𑁆𑀢𑁄𑀬𑁂𑀯 𑀧𑀜𑁆𑀜𑀸𑀬𑀺. 𑀪𑀺𑀓𑁆𑀔𑀽 ‘‘𑀲𑀸𑀬𑀦𑁆𑀳𑁄 𑀧𑀜𑁆𑀜𑀸𑀬𑀢𑀺, 𑀲𑀸𑀫𑀡𑁂𑀭𑁂𑀦 𑀘 𑀇𑀤𑀸𑀦𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑀁, 𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁄 𑀩𑀮𑀯𑀸 𑀚𑀸𑀢𑁄, 𑀲𑀸𑀬𑀦𑁆𑀳𑁄 𑀫𑀦𑁆𑀤𑁄’’𑀢𑀺 𑀯𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁄 𑀩𑀮𑀯𑀸 𑀚𑀸𑀢𑁄, 𑀲𑀸𑀬𑀦𑁆𑀳𑁄 𑀫𑀦𑁆𑀤𑁄, 𑀲𑀸𑀫𑀡𑁂𑀭𑁂𑀦 ¶ 𑀘 𑀇𑀤𑀸𑀦𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑀁, 𑀅𑀣 𑀘 𑀧𑀦 𑀲𑀽𑀭𑀺𑀬𑁄 𑀦𑀪𑀫𑀚𑁆𑀛𑀁 𑀅𑀢𑀺𑀓𑁆𑀓𑀦𑁆𑀢𑁄𑀬𑁂𑀯 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀏𑀯𑀫𑁂𑀯𑀁 𑀳𑁄𑀢𑀺 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑁂. 𑀅𑀚𑁆𑀚 𑀳𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀲𑀸𑀫𑀦𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀫𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀲𑀓𑁆𑀓𑁄 𑀆𑀯𑀺𑀜𑁆𑀙𑀦𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺, 𑀅𑀳𑀫𑁆𑀧𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁, 𑀅𑀚𑁆𑀚 𑀲𑀼𑀔𑀲𑀸𑀫𑀡𑁂𑀭𑁄 𑀫𑀸𑀢𑀺𑀓𑀸𑀬 𑀉𑀤𑀓𑀁 𑀳𑀭𑀦𑁆𑀢𑁂, 𑀉𑀲𑀼𑀓𑀸𑀭𑁂 𑀉𑀲𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑁂 ¶ , 𑀢𑀘𑁆𑀙𑀓𑁂 𑀘𑀓𑁆𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀤𑀫𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀲𑀼𑀩𑁆𑀩𑀢𑀸’’𑀢𑀺.

𑀢𑀢𑁆𑀣 𑀲𑀼𑀩𑁆𑀩𑀢𑀸𑀢𑀺 𑀲𑀼𑀯𑀤𑀸, 𑀲𑀼𑀔𑁂𑀦 𑀑𑀯𑀤𑀺𑀢𑀩𑁆𑀩𑀸 𑀅𑀦𑀼𑀲𑀸𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀼𑀔𑀲𑀸𑀫𑀡𑁂𑀭𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.

𑀤𑀡𑁆𑀟𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀯𑀺𑀲𑀸𑀔𑀸𑀬 𑀲𑀳𑀸𑀬𑀺𑀓𑀸𑀦𑀁 𑀯𑀢𑁆𑀣𑀼

𑀓𑁄 ¶ ¶ ¶ 𑀦𑀼 𑀳𑀸𑀲𑁄 𑀓𑀺𑀫𑀸𑀦𑀦𑁆𑀤𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀸𑀬 𑀲𑀳𑀸𑀬𑀺𑀓𑀸𑀬𑁄 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀲𑀢𑀸 𑀓𑀼𑀮𑀧𑀼𑀢𑁆𑀢𑀸 ‘‘𑀏𑀯𑀁 𑀇𑀫𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀺𑀬𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬𑁄 𑀯𑀺𑀲𑀸𑀔𑀁 𑀫𑀳𑀸𑀉𑀧𑀸𑀲𑀺𑀓𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀼𑀁. 𑀢𑀸 𑀉𑀬𑁆𑀬𑀸𑀦𑀁 𑀯𑀸 𑀯𑀺𑀳𑀸𑀭𑀁 𑀯𑀸 𑀕𑀘𑁆𑀙𑀦𑁆𑀢𑀺𑀬𑁄 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀺. 𑀢𑀸 𑀏𑀓𑀲𑁆𑀫𑀺𑀁 𑀓𑀸𑀮𑁂 ‘‘𑀲𑀢𑁆𑀢𑀸𑀳𑀁 𑀲𑀼𑀭𑀸𑀙𑀡𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀙𑀡𑁂 𑀲𑀗𑁆𑀖𑀼𑀝𑁆𑀞𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀸𑀫𑀺𑀓𑀸𑀦𑀁 𑀲𑀼𑀭𑀁 𑀧𑀝𑀺𑀬𑀸𑀤𑁂𑀲𑀼𑀁. 𑀢𑁂 𑀲𑀢𑁆𑀢𑀸𑀳𑀁 𑀲𑀼𑀭𑀸𑀙𑀡𑀁 𑀓𑀻𑀴𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀓𑀫𑁆𑀫𑀦𑁆𑀢𑀪𑁂𑀭𑀺𑀬𑀸 𑀦𑀺𑀓𑁆𑀔𑀦𑁆𑀢𑀸𑀬 𑀓𑀫𑁆𑀫𑀦𑁆𑀢𑁂 𑀅𑀕𑀫𑀁𑀲𑀼. 𑀢𑀸𑀧𑀺 𑀇𑀢𑁆𑀣𑀺𑀬𑁄 ‘‘𑀫𑀬𑀁 𑀲𑀸𑀫𑀺𑀓𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀭𑀁 𑀧𑀸𑀢𑀼𑀁 𑀦 𑀮𑀪𑀺𑀫𑁆𑀳𑀸, 𑀅𑀯𑀲𑁂𑀲𑀸 𑀲𑀼𑀭𑀸 𑀘 𑀅𑀢𑁆𑀣𑀺, 𑀇𑀤𑀁 𑀬𑀣𑀸 𑀢𑁂 𑀦 𑀚𑀸𑀦𑀦𑁆𑀢𑀺, 𑀢𑀣𑀸 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀲𑀸𑀔𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀇𑀘𑁆𑀙𑀸𑀫, 𑀅𑀬𑁆𑀬𑁂, 𑀉𑀬𑁆𑀬𑀸𑀦𑀁 𑀤𑀝𑁆𑀞𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀼, 𑀅𑀫𑁆𑀫𑀸, 𑀢𑁂𑀦 𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀦𑀺𑀓𑁆𑀔𑀫𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀸𑀓𑀸𑀭𑁂𑀦 ¶ 𑀲𑀼𑀭𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀯𑀺𑀲𑀸𑀔𑀸𑀧𑀺 ‘‘𑀅𑀬𑀼𑀢𑁆𑀢𑀁 𑀇𑀫𑀸𑀳𑀺 𑀓𑀢𑀁, 𑀇𑀤𑀸𑀦𑀺 𑀫𑀁 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀺𑀓𑀸 𑀯𑀺𑀲𑀸𑀔𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀯𑀺𑀘𑀭𑀢𑀻’𑀢𑀺 𑀢𑀺𑀢𑁆𑀣𑀺𑀬𑀸𑀧𑀺 𑀕𑀭𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸 𑀇𑀢𑁆𑀣𑀺𑀬𑁄 𑀆𑀳 𑁋 ‘‘𑀅𑀫𑁆𑀫𑀸 𑀅𑀬𑀼𑀢𑁆𑀢𑀁 𑀯𑁄 𑀓𑀢𑀁, 𑀫𑀫𑀧𑀺 𑀅𑀬𑀲𑁄 𑀉𑀧𑁆𑀧𑀸𑀤𑀺𑀢𑁄, 𑀲𑀸𑀫𑀺𑀓𑀸𑀧𑀺 𑀯𑁄 𑀓𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺. 𑀕𑀺𑀮𑀸𑀦𑀸𑀮𑀬𑀁 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀅𑀬𑁆𑀬𑁂𑀢𑀺. 𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀣 𑀲𑀓𑁂𑀦 𑀓𑀫𑁆𑀫𑁂𑀦𑀸𑀢𑀺. 𑀢𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑀸𑀮𑀬𑀁 𑀓𑀭𑀺𑀁𑀲𑀼. 𑀅𑀣 𑀢𑀸𑀲𑀁 𑀲𑀸𑀫𑀺𑀓𑀸 ‘‘𑀇𑀢𑁆𑀣𑀦𑁆𑀦𑀸𑀫𑀸 𑀘 𑀇𑀢𑁆𑀣𑀦𑁆𑀦𑀸𑀫𑀸 𑀘 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀺𑀮𑀸𑀦𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀤𑁆𑀥𑀸 𑀏𑀢𑀸𑀳𑀺 𑀅𑀯𑀲𑁂𑀲𑀲𑀼𑀭𑀸 𑀧𑀻𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀸 𑀧𑁄𑀣𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀼𑀁. 𑀢𑀸 𑀅𑀧𑀭𑀲𑁆𑀫𑀺𑀫𑁆𑀧𑀺 𑀙𑀡𑀯𑀸𑀭𑁂 𑀢𑀣𑁂𑀯 𑀲𑀼𑀭𑀁 𑀧𑀺𑀯𑀺𑀢𑀼𑀓𑀸𑀫𑀸 𑀯𑀺𑀲𑀸𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀅𑀬𑁆𑀬𑁂, 𑀉𑀬𑁆𑀬𑀸𑀦𑀁 𑀦𑁄 𑀦𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀧𑀼𑀩𑁆𑀩𑁂𑀧𑀺 𑀫𑁂 𑀢𑀼𑀫𑁆𑀳𑁂𑀳𑀺 𑀅𑀬𑀲𑁄 𑀉𑀧𑁆𑀧𑀸𑀤𑀺𑀢𑁄, 𑀕𑀘𑁆𑀙𑀣, 𑀦 𑀯𑁄 𑀅𑀳𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀢𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀸 ‘‘𑀇𑀤𑀸𑀦𑀺 𑀏𑀯𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀧𑀼𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼, ‘‘𑀅𑀬𑁆𑀬𑁂 ¶ , 𑀩𑀼𑀤𑁆𑀥𑀧𑀽𑀚𑀁 𑀓𑀸𑀢𑀼𑀓𑀸𑀫𑀸𑀫𑁆𑀳𑀸, 𑀯𑀺𑀳𑀸𑀭𑀁 𑀦𑁄 𑀦𑁂𑀳𑀻’’𑀢𑀺. 𑀇𑀤𑀸𑀦𑀺 𑀅𑀫𑁆𑀫𑀸 𑀬𑀼𑀚𑁆𑀚𑀢𑀺, 𑀕𑀘𑁆𑀙𑀣, 𑀧𑀭𑀺𑀯𑀘𑁆𑀙𑀁 𑀓𑀭𑁄𑀣𑀸𑀢𑀺. 𑀢𑀸 𑀘𑀗𑁆𑀓𑁄𑀝𑀓𑁂𑀳𑀺 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀲𑀼𑀭𑀸𑀧𑀼𑀡𑁆𑀡𑁂 𑀫𑀼𑀝𑁆𑀞𑀺𑀯𑀸𑀭𑀓𑁂 ¶ 𑀳𑀢𑁆𑀣𑁂𑀳𑀺 𑀑𑀮𑀫𑁆𑀩𑁂𑀢𑁆𑀯𑀸 𑀫𑀳𑀸𑀧𑀝𑁂 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀲𑀸𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀧𑀯𑀺𑀲𑀫𑀸𑀦𑀸 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀫𑀼𑀝𑁆𑀞𑀺𑀯𑀸𑀭𑀓𑁂𑀳𑁂𑀯 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀯𑀸𑀭𑀓𑁂 𑀙𑀟𑁆𑀟𑁂𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀲𑀢𑁆𑀣𑀼 𑀧𑀼𑀭𑀢𑁄 𑀦𑀺𑀲𑀻𑀤𑀺𑀁𑀲𑀼 ¶ .

𑀯𑀺𑀲𑀸𑀔𑀸 ‘‘𑀇𑀫𑀸𑀲𑀁, 𑀪𑀦𑁆𑀢𑁂, 𑀥𑀫𑁆𑀫𑀁 𑀓𑀣𑁂𑀣𑀸’’𑀢𑀺 𑀆𑀳. 𑀢𑀸𑀧𑀺 𑀫𑀤𑀯𑁂𑀕𑁂𑀦 𑀓𑀫𑁆𑀧𑀫𑀸𑀦𑀲𑀭𑀻𑀭𑀸 ‘‘𑀇𑀘𑁆𑀘𑀸𑀫, 𑀕𑀸𑀬𑀸𑀫𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀼𑀁. 𑀅𑀣𑁂𑀓𑀸 𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 ‘‘𑀇𑀫𑀸𑀲𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀼𑀭𑀢𑁄 𑀯𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀲𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺. 𑀢𑀸𑀲𑀼 𑀏𑀓𑀘𑁆𑀘𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑀺𑀢𑀼𑀁, 𑀏𑀓𑀘𑁆𑀘𑀸 𑀦𑀘𑁆𑀘𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀲𑀢𑁆𑀣𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀦 𑀇𑀤𑀸𑀦𑀺 𑀫𑀸𑀭𑀓𑀸𑀬𑀺𑀓𑀸𑀦𑀁 𑀑𑀢𑀸𑀭𑀁 𑀮𑀪𑀺𑀢𑀼𑀁 𑀤𑀲𑁆𑀲𑀸𑀫𑀺. 𑀦 𑀳𑀺 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀫𑀸𑀭𑀓𑀸𑀬𑀺𑀓𑀸𑀦𑀁 𑀑𑀢𑀸𑀭𑀮𑀸𑀪𑀢𑁆𑀣𑀸𑀬 𑀧𑀽𑀭𑀺𑀢𑀸’’𑀢𑀺 𑀢𑀸 𑀲𑀁𑀯𑁂𑀚𑁂𑀢𑀼𑀁 𑀪𑀫𑀼𑀓𑀮𑁄𑀫𑀢𑁄 𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀸𑀯𑀤𑁂𑀯 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀅𑀳𑁄𑀲𑀺. 𑀢𑀸 𑀪𑀻𑀢𑀸 𑀅𑀳𑁂𑀲𑀼𑀁 𑀫𑀭𑀡𑀪𑀬𑀢𑀚𑁆𑀚𑀺𑀢𑀸. 𑀢𑁂𑀦 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀲𑀼𑀭𑀸 𑀚𑀻𑀭𑀺. 𑀲𑀢𑁆𑀣𑀸 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑁂 𑀅𑀦𑁆𑀢𑀭𑀳𑀺𑀢𑁄 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀉𑀡𑁆𑀡𑀸𑀮𑁄𑀫𑀢𑁄 𑀭𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀗𑁆𑀔𑀡𑀁𑀬𑁂𑀯 𑀘𑀦𑁆𑀤𑀲𑀳𑀲𑁆𑀲𑀼𑀕𑁆𑀕𑀫𑀦𑀁 𑀯𑀺𑀬 𑀅𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀢𑀸 𑀇𑀢𑁆𑀣𑀺𑀬𑁄 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀫𑀸𑀦𑀸𑀳𑀺 𑀧𑀫𑀢𑁆𑀢𑀸𑀳𑀺 𑀆𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀼𑀫𑁆𑀳𑀸𑀓𑀜𑁆𑀳𑀺 𑀧𑀫𑀸𑀤𑁂𑀦𑁂𑀯 𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀑𑀢𑀸𑀭𑀁 𑀮𑀪𑀺𑀢𑁆𑀯𑀸 𑀢𑀼𑀫𑁆𑀳𑁂 𑀳𑀲𑀸𑀤𑀻𑀦𑀁 𑀅𑀓𑀭𑀡𑀝𑁆𑀞𑀸𑀦𑁂 𑀳𑀲𑀸𑀤𑀻𑀦𑀺 𑀓𑀸𑀭𑀸𑀧𑁂𑀲𑀺, 𑀇𑀤𑀸𑀦𑀺 𑀢𑀼𑀫𑁆𑀳𑁂𑀳𑀺 𑀭𑀸𑀕𑀸𑀤𑀻𑀦𑀁 ¶ 𑀅𑀕𑁆𑀕𑀻𑀦𑀁 𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑁄 𑀦𑀼 𑀳𑀸𑀲𑁄 𑀓𑀺𑀫𑀸𑀦𑀦𑁆𑀤𑁄, 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑁂 𑀲𑀢𑀺;

𑀅𑀦𑁆𑀥𑀓𑀸𑀭𑁂𑀦 𑀑𑀦𑀤𑁆𑀥𑀸, 𑀧𑀤𑀻𑀧𑀁 𑀦 𑀕𑀯𑁂𑀲𑀣𑀸’’𑀢𑀺.

𑀢𑀢𑁆𑀣 𑀆𑀦𑀦𑁆𑀤𑁄𑀢𑀺 𑀢𑀼𑀝𑁆𑀞𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀭𑀸𑀕𑀸𑀤𑀻𑀳𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑁂 𑀲𑀢𑀺 𑀓𑁄 𑀦𑀼 𑀢𑀼𑀫𑁆𑀳𑀸𑀓𑀁 𑀳𑀸𑀲𑁄 𑀯𑀸 ¶ 𑀢𑀼𑀝𑁆𑀞𑀺 𑀯𑀸? 𑀦𑀦𑀼 𑀏𑀲 𑀅𑀓𑀢𑁆𑀢𑀩𑁆𑀩𑀭𑀽𑀧𑁄𑀬𑁂𑀯. 𑀅𑀝𑁆𑀞𑀯𑀢𑁆𑀣𑀼𑀓𑁂𑀦 𑀳𑀺 𑀅𑀯𑀺𑀚𑁆𑀚𑀸𑀦𑁆𑀥𑀓𑀸𑀭𑁂𑀦 𑀑𑀦𑀤𑁆𑀥𑀸 𑀢𑀼𑀫𑁆𑀳𑁂 𑀢𑀲𑁆𑀲𑁂𑀯 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀦𑀢𑁆𑀣𑀸𑀬 𑀓𑀺𑀁 𑀓𑀸𑀭𑀡𑀸 𑀜𑀸𑀡𑀧𑁆𑀧𑀤𑀻𑀧𑀁 𑀦 𑀕𑀯𑁂𑀲𑀣 𑀦 𑀓𑀭𑁄𑀣𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀢𑀸 𑀇𑀢𑁆𑀣𑀺𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀲𑀢𑁆𑀣𑀸 𑀢𑀸𑀲𑀁 𑀅𑀘𑀮𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀺𑀦𑁂𑀭𑀼𑀫𑀢𑁆𑀣𑀓𑀸 𑀑𑀢𑀭𑀺𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀯𑀺𑀲𑀸𑀔𑀸 𑀆𑀳 𑁋 ‘‘𑀪𑀦𑁆𑀢𑁂, 𑀲𑀼𑀭𑀸 𑀦𑀸𑀫𑁂𑀲𑀸 𑀧𑀸𑀧𑀺𑀓𑀸. 𑀏𑀯𑀭𑀽𑀧𑀸 𑀳𑀺 𑀦𑀸𑀫 𑀇𑀫𑀸 ¶ 𑀇𑀢𑁆𑀣𑀺𑀬𑁄 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑀫𑀢𑁆𑀢𑀫𑁆𑀧𑀺 𑀲𑀡𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑁄 𑀉𑀝𑁆𑀞𑀸𑀬 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑀦𑀕𑀻𑀢𑀦𑀘𑁆𑀘𑀸𑀤𑀻𑀦𑀺 𑀆𑀭𑀪𑀺𑀁𑀲𑀽’’𑀢𑀺. 𑀲𑀢𑁆𑀣𑀸 ‘‘𑀆𑀫, 𑀯𑀺𑀲𑀸𑀔𑁂, 𑀧𑀸𑀧𑀺𑀓𑀸 𑀏𑀯 𑀏𑀲𑀸 𑀲𑀼𑀭𑀸 𑀦𑀸𑀫. 𑀏𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀅𑀦𑁂𑀓𑁂 𑀲𑀢𑁆𑀢𑀸 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 ‘‘𑀓𑀤𑀸 𑀧𑀦𑁂𑀲𑀸, 𑀪𑀦𑁆𑀢𑁂, 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑀼𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀓𑀼𑀫𑁆𑀪𑀚𑀸𑀢𑀓𑀁 (𑀚𑀸. 𑁧.𑁧𑁬.𑁩𑁩 𑀆𑀤𑀬𑁄) 𑀓𑀣𑁂𑀲𑀻𑀢𑀺.

𑀯𑀺𑀲𑀸𑀔𑀸𑀬 𑀲𑀳𑀸𑀬𑀺𑀓𑀸𑀦𑀁 𑀯𑀢𑁆𑀣𑀼 𑀧𑀞𑀫𑀁.

𑀧𑀲𑁆𑀲 ¶ 𑀘𑀺𑀢𑁆𑀢𑀓𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀺𑀭𑀺𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀭𑀸𑀚𑀕𑀳𑁂 𑀅𑀪𑀺𑀭𑀽𑀧𑀸 𑀕𑀡𑀺𑀓𑀸. 𑀏𑀓𑀲𑁆𑀫𑀺𑀁 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀲𑀼𑀫𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀸𑀬 𑀧𑀼𑀡𑁆𑀡𑀓𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸𑀬 𑀉𑀢𑁆𑀢𑀭𑀸𑀬 𑀦𑀸𑀫 𑀉𑀧𑀸𑀲𑀺𑀓𑀸𑀬 𑀅𑀧𑀭𑀚𑁆𑀛𑀺𑀢𑁆𑀯𑀸 𑀢𑀁 𑀧𑀲𑀸𑀤𑁂𑀢𑀼𑀓𑀸𑀫𑀸 𑀢𑀲𑁆𑀲𑀸 𑀕𑁂𑀳𑁂 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀤𑀲𑀩𑀮𑀲𑁆𑀲 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑁋

‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦’’𑀦𑁆𑀢𑀺. (𑀚𑀸. 𑁧.𑁨.𑁨; 𑀥. 𑀧. 𑁨𑁨𑁩) 𑁋

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 ¶ 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦 𑀓𑁄𑀥𑀯𑀕𑁆𑀕𑁂 𑀅𑀦𑀼𑀫𑁄𑀤𑀦𑀕𑀸𑀣𑀸𑀯𑀡𑁆𑀡𑀦𑀸𑀬𑀫𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸 𑀧𑀦 𑀲𑀺𑀭𑀺𑀫𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀗𑁆𑀖𑀲𑁆𑀲 𑀅𑀝𑁆𑀞𑀓𑀪𑀢𑁆𑀢𑀁 𑀦𑀺𑀩𑀤𑁆𑀥𑀁 𑀤𑀸𑀧𑁂𑀲𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀅𑀝𑁆𑀞 𑀪𑀺𑀓𑁆𑀔𑀽 𑀕𑁂𑀳𑀁 𑀕𑀘𑁆𑀙𑀦𑁆𑀢𑀺. ‘‘𑀲𑀧𑁆𑀧𑀺𑀁 𑀕𑀡𑁆𑀳𑀣, 𑀔𑀻𑀭𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑁂𑀲𑀁 𑀧𑀢𑁆𑀢𑁂 𑀧𑀽𑀭𑁂𑀢𑀺. 𑀏𑀓𑁂𑀦 𑀮𑀤𑁆𑀥𑀁 𑀢𑀺𑀡𑁆𑀡𑀫𑁆𑀧𑀺 𑀘𑀢𑀼𑀦𑁆𑀦𑀫𑁆𑀧𑀺 𑀧𑀳𑁄𑀢𑀺. 𑀤𑁂𑀯𑀲𑀺𑀓𑀁 𑀲𑁄𑀴𑀲𑀓𑀳𑀸𑀧𑀡𑀧𑀭𑀺𑀩𑁆𑀩𑀬𑁂𑀦 𑀧𑀺𑀡𑁆𑀟𑀧𑀸𑀢𑁄 𑀤𑀻𑀬𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀕𑁂𑀳𑁂 𑀅𑀝𑁆𑀞𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀺𑀬𑁄𑀚𑀦𑀫𑀢𑁆𑀣𑀓𑁂 𑀏𑀓𑀁 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀸𑀬𑀁 𑀣𑁂𑀭𑀼𑀧𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀆𑀯𑀼𑀲𑁄, 𑀓𑀳𑀁 𑀪𑀺𑀓𑁆𑀔𑀁 ¶ 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺. 𑀲𑀺𑀭𑀺𑀫𑀸𑀬 𑀅𑀝𑁆𑀞𑀓𑀪𑀢𑁆𑀢𑀁 𑀫𑁂 𑀪𑀼𑀢𑁆𑀢𑀦𑁆𑀢𑀺. 𑀫𑀦𑀸𑀧𑀁 𑀓𑀢𑁆𑀯𑀸 𑀤𑁂𑀢𑀺, 𑀆𑀯𑀼𑀲𑁄𑀢𑀺. ‘‘𑀦 𑀲𑀓𑁆𑀓𑀸 𑀢𑀲𑁆𑀲𑀸 𑀪𑀢𑁆𑀢𑀁 𑀯𑀡𑁆𑀡𑁂𑀢𑀼𑀁, 𑀅𑀢𑀺𑀯𑀺𑀬 𑀧𑀡𑀻𑀢𑀁 𑀓𑀢𑁆𑀯𑀸 𑀤𑁂𑀢𑀺, 𑀏𑀓𑁂𑀦 ¶ 𑀮𑀤𑁆𑀥𑀁 𑀢𑀺𑀡𑁆𑀡𑀫𑁆𑀧𑀺 𑀘𑀢𑀼𑀦𑁆𑀦𑀫𑁆𑀧𑀺 𑀧𑀳𑁄𑀢𑀺, 𑀢𑀲𑁆𑀲𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀢𑁄𑀧𑀺 𑀤𑀲𑁆𑀲𑀦𑀫𑁂𑀯 𑀉𑀢𑁆𑀢𑀭𑀺𑀢𑀭𑀁. 𑀲𑀸 𑀳𑀺 𑀇𑀢𑁆𑀣𑀻 𑀏𑀯𑀭𑀽𑀧𑀸 𑀘 𑀏𑀯𑀭𑀽𑀧𑀸 𑀘𑀸’’𑀢𑀺 𑀢𑀲𑁆𑀲𑀸 𑀕𑀼𑀡𑁂 𑀯𑀡𑁆𑀡𑁂𑀲𑀺.

𑀅𑀣𑁂𑀓𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀅𑀤𑀲𑁆𑀲𑀦𑁂𑀦𑁂𑀯 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀫𑀬𑀸 𑀕𑀦𑁆𑀢𑁆𑀯𑀸 𑀢𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑀁 𑀓𑀣𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀞𑀺𑀢𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁆𑀯𑁂, 𑀆𑀯𑀼𑀲𑁄, 𑀢𑀲𑁆𑀫𑀺𑀁 𑀕𑁂𑀳𑁂 𑀢𑁆𑀯𑀁 𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀅𑀝𑁆𑀞𑀓𑀪𑀢𑁆𑀢𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀲𑀼𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀦𑁆𑀢𑁄𑀧𑀺 𑀧𑀸𑀢𑁄𑀯 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀲𑀮𑀸𑀓𑀕𑁆𑀕𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁄 𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀕𑁂𑀳𑁂 𑀅𑀝𑁆𑀞𑀓𑀪𑀢𑁆𑀢𑀁 𑀮𑀪𑀺. 𑀬𑁄 𑀧𑀦 𑀪𑀺𑀓𑁆𑀔𑀼 𑀳𑀺𑀬𑁆𑀬𑁄 𑀪𑀼𑀜𑁆𑀚𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀢𑀲𑁆𑀲 𑀕𑀢𑀯𑁂𑀮𑀸𑀬𑀫𑁂𑀯 𑀅𑀲𑁆𑀲𑀸 𑀲𑀭𑀻𑀭𑁂 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀫𑀸 𑀲𑀸 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲𑀸 𑀤𑀸𑀲𑀺𑀬𑁄 𑀅𑀝𑁆𑀞𑀓𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀆𑀕𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀳𑀢𑁆𑀣𑀸 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑀼𑀁 𑀯𑀸 𑀧𑀭𑀺𑀯𑀺𑀲𑀺𑀢𑀼𑀁 𑀯𑀸 𑀅𑀲𑀓𑁆𑀓𑁄𑀦𑁆𑀢𑀻 𑀤𑀸𑀲𑀺𑀬𑁄 𑀆𑀡𑀸𑀧𑁂𑀲𑀺 𑁋 ‘‘𑀅𑀫𑁆𑀫𑀸 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸, 𑀅𑀬𑁆𑀬𑁂, 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀔𑀚𑁆𑀚𑀓𑀁 𑀤𑀢𑁆𑀯𑀸 𑀪𑀢𑁆𑀢𑀯𑁂𑀮𑀸𑀬 ¶ 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑁂𑀣𑀸’’𑀢𑀺. 𑀢𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀪𑀺𑀓𑁆𑀔𑀽 𑀧𑀯𑁂𑀲𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀔𑀚𑁆𑀚𑀓𑀁 𑀤𑀢𑁆𑀯𑀸 𑀪𑀢𑁆𑀢𑀯𑁂𑀮𑀸𑀬 𑀪𑀢𑁆𑀢𑀲𑁆𑀲 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑀬𑀺𑀁𑀲𑀼. 𑀲𑀸 ‘‘𑀫𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑁂𑀣, 𑀅𑀬𑁆𑀬𑁂, 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀦𑀻𑀢𑀸 𑀯𑁂𑀥𑀫𑀸𑀦𑁂𑀦 𑀲𑀭𑀻𑀭𑁂𑀦 𑀪𑀺𑀓𑁆𑀔𑀽 𑀯𑀦𑁆𑀤𑀺. 𑀲𑁄 𑀪𑀺𑀓𑁆𑀔𑀼 𑀢𑀁 𑀑𑀮𑁄𑀓𑁂𑀢𑁆𑀯𑀸 ¶ 𑀘𑀺𑀦𑁆𑀢𑁂𑀲𑀺 𑁋 ‘‘𑀕𑀺𑀮𑀸𑀦𑀸𑀬 𑀢𑀸𑀯 𑀏𑀯𑀭𑀽𑀧𑀸 𑀅𑀬𑀁 𑀏𑀢𑀺𑀲𑁆𑀲𑀸 𑀭𑀽𑀧𑀲𑁄𑀪𑀸, 𑀅𑀭𑁄𑀕𑀓𑀸𑀮𑁂 𑀧𑀦 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸𑀬 𑀇𑀫𑀺𑀲𑁆𑀲𑀸 𑀓𑀻𑀤𑀺𑀲𑀻 𑀭𑀽𑀧𑀲𑀫𑁆𑀧𑀢𑁆𑀢𑀻’’𑀢𑀺. 𑀅𑀣𑀲𑁆𑀲 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀦𑁆𑀦𑀺𑀘𑀺𑀢𑁄 𑀓𑀺𑀮𑁂𑀲𑁄 𑀲𑀫𑀼𑀤𑀸𑀘𑀭𑀺, 𑀲𑁄 𑀅𑀜𑁆𑀜𑀸𑀡𑀻 𑀳𑀼𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀢𑁆𑀢𑀫𑀸𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀧𑀺𑀥𑀸𑀬 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀘𑀻𑀯𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀅𑀣 𑀦𑀁 𑀏𑀓𑁄 𑀲𑀳𑀸𑀬𑀓𑁄 𑀪𑀺𑀓𑁆𑀔𑀼 𑀬𑀸𑀘𑀦𑁆𑀢𑁄𑀧𑀺 𑀪𑁄𑀚𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀙𑀺𑀦𑁆𑀦𑀪𑀢𑁆𑀢𑁄 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀫𑁂𑀯 𑀲𑀸𑀬𑀦𑁆𑀳𑀲𑀫𑀬𑁂 𑀲𑀺𑀭𑀺𑀫𑀸 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀪𑀦𑁆𑀢𑁂, 𑀚𑀻𑀯𑀓𑀲𑁆𑀲 𑀓𑀦𑀺𑀝𑁆𑀞𑀪𑀕𑀺𑀦𑀻, 𑀲𑀺𑀭𑀺𑀫𑀸, 𑀓𑀸𑀮𑀫𑀓𑀸𑀲𑀻’’𑀢𑀺. 𑀲𑀢𑁆𑀣𑀸 𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀲𑀺𑀭𑀺𑀫𑀸𑀬 𑀛𑀸𑀧𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀆𑀫𑀓𑀲𑀼𑀲𑀸𑀦𑁂 𑀢𑀁 𑀬𑀣𑀸 𑀓𑀸𑀓𑀲𑀼𑀦𑀔𑀸𑀤𑀬𑁄 𑀦 𑀔𑀸𑀤𑀦𑁆𑀢𑀺, 𑀢𑀣𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀭𑀓𑁆𑀔𑀸𑀧𑁂𑀣𑀸’’𑀢𑀺. 𑀭𑀸𑀚𑀸𑀧𑀺 𑀢𑀣𑀸 𑀅𑀓𑀸𑀲𑀺. 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀬𑀺, 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀼𑀴𑀯𑀸 𑀧𑀕𑁆𑀖𑀭𑀺𑀁𑀲𑀼 ¶ , 𑀲𑀓𑀮𑀲𑀭𑀻𑀭𑀁 𑀪𑀺𑀦𑁆𑀦𑀁 𑀲𑀸𑀮𑀺𑀪𑀢𑁆𑀢𑀘𑀸𑀝𑀺 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀞𑀧𑁂𑀢𑁆𑀯𑀸 𑀕𑁂𑀳𑀭𑀓𑁆𑀔𑀓𑁂 𑀤𑀸𑀭𑀓𑁂 𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀅𑀝𑁆𑀞 𑀓𑀳𑀸𑀧𑀡𑀸𑀦𑀺 𑀤𑀡𑁆𑀟𑁄’’𑀢𑀺. 𑀲𑀢𑁆𑀣𑀼 𑀲𑀦𑁆𑀢𑀺 𑀓𑀜𑁆𑀘 𑀧𑁂𑀲𑁂𑀲𑀺 𑁋 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀆𑀕𑀘𑁆𑀙𑀢𑀽’’𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀲𑁄𑀧𑀺 𑀤𑀳𑀭𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 ¶ 𑀤𑀺𑀯𑀲𑁂 𑀓𑀲𑁆𑀲𑀘𑀺 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀙𑀺𑀦𑁆𑀦𑀪𑀢𑁆𑀢𑁄𑀯 𑀦𑀺𑀧𑀚𑁆𑀚𑀺. 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀽𑀢𑀺𑀓𑀁 𑀚𑀸𑀢𑀁, 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀳𑀺. 𑀅𑀣 𑀦𑀁 𑀲𑁄 𑀲𑀳𑀸𑀬𑀓𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀙𑀸𑀢𑀚𑁆𑀛𑀢𑁆𑀢𑁄𑀧𑀺 ‘‘𑀲𑀺𑀭𑀺𑀫𑀸’’𑀢𑀺 𑀯𑀼𑀢𑁆𑀢𑀧𑀤𑁂𑀬𑁂𑀯 𑀲𑀳𑀲𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀓𑀺𑀁 𑀪𑀡𑀲𑀻’’𑀢𑀺 𑀆𑀳. ‘‘𑀲𑀢𑁆𑀣𑀸 𑀲𑀺𑀭𑀺𑀫𑀁 𑀤𑀝𑁆𑀞𑀼𑀁 𑀕𑀘𑁆𑀙𑀢𑀺, 𑀢𑁆𑀯𑀫𑁆𑀧𑀺 𑀕𑀫𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀏𑀓𑀧𑀲𑁆𑀲𑁂 𑀅𑀝𑁆𑀞𑀸𑀲𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀧𑀺 𑀭𑀸𑀚𑀧𑀭𑀺𑀲𑀸𑀧𑀺 𑀉𑀧𑀸𑀲𑀓𑀧𑀭𑀺𑀲𑀸𑀧𑀺 𑀉𑀧𑀸𑀲𑀺𑀓𑀸𑀧𑀭𑀺𑀲𑀸𑀧𑀺 𑀏𑀓𑁂𑀓𑀧𑀲𑁆𑀲𑁂 𑀅𑀝𑁆𑀞𑀁𑀲𑀼 ¶ .

𑀲𑀢𑁆𑀣𑀸 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀸 𑀏𑀲𑀸, 𑀫𑀳𑀸𑀭𑀸𑀚𑁄’’𑀢𑀺. 𑀪𑀦𑁆𑀢𑁂, 𑀚𑀻𑀯𑀓𑀲𑁆𑀲 𑀪𑀕𑀺𑀦𑀻, 𑀲𑀺𑀭𑀺𑀫𑀸, 𑀦𑀸𑀫𑀸𑀢𑀺. 𑀲𑀺𑀭𑀺𑀫𑀸, 𑀏𑀲𑀸𑀢𑀺. 𑀆𑀫, 𑀪𑀦𑁆𑀢𑁂𑀢𑀺. 𑀢𑁂𑀦 ¶ 𑀳𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀳𑀺 ‘‘𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀺𑀭𑀺𑀫𑀁 𑀕𑀡𑁆𑀳𑀦𑁆𑀢𑀽’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀏𑀓𑁄𑀧𑀺 ‘𑀳’𑀦𑁆𑀢𑀺 𑀯𑀸 ‘𑀳𑀼’𑀦𑁆𑀢𑀺 𑀯𑀸 𑀯𑀤𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 𑁋 ‘‘𑀦 𑀕𑀡𑁆𑀳𑀦𑁆𑀢𑀺, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀅𑀕𑁆𑀖𑀁 𑀑𑀳𑀸𑀭𑁂𑀳𑀻𑀢𑀺. 𑀭𑀸𑀚𑀸 ‘‘𑀧𑀜𑁆𑀘𑀲𑀢𑀸𑀦𑀺 𑀤𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀓𑀜𑁆𑀘𑀺 𑀕𑀡𑁆𑀳𑀦𑀓𑀁 𑀅𑀤𑀺𑀲𑁆𑀯𑀸 ‘‘𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀲𑀢𑀸𑀦𑀺, 𑀤𑁆𑀯𑁂 𑀲𑀢𑀸𑀦𑀺, 𑀲𑀢𑀁, 𑀧𑀡𑁆𑀡𑀸𑀲𑀁, 𑀧𑀜𑁆𑀘𑀯𑀻𑀲𑀢𑀺 𑀓𑀳𑀸𑀧𑀡𑁂, 𑀤𑀲 𑀓𑀳𑀸𑀧𑀡𑁂, 𑀧𑀜𑁆𑀘 𑀓𑀳𑀸𑀧𑀡𑁂, 𑀏𑀓𑀁 𑀓𑀳𑀸𑀧𑀡𑀁 𑀅𑀟𑁆𑀠𑀁, 𑀧𑀸𑀤𑀁, 𑀫𑀸𑀲𑀓𑀁, 𑀓𑀸𑀓𑀡𑀺𑀓𑀁 𑀤𑀢𑁆𑀯𑀸 𑀲𑀺𑀭𑀺𑀫𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀓𑁄𑀘𑀺 𑀢𑀁 𑀦 𑀇𑀘𑁆𑀙𑀺. ‘‘𑀫𑀼𑀥𑀸𑀧𑀺 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. ‘𑀳’𑀦𑁆𑀢𑀺 𑀯𑀸 ‘𑀳𑀼’𑀦𑁆𑀢𑀺 𑀯𑀸 𑀯𑀤𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀭𑀸𑀚𑀸 ‘‘𑀫𑀼𑀥𑀸𑀧𑀺, 𑀪𑀦𑁆𑀢𑁂, 𑀕𑀡𑁆𑀳𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀫𑀳𑀸𑀚𑀦𑀲𑁆𑀲 𑀧𑀺𑀬𑀁 𑀫𑀸𑀢𑀼𑀕𑀸𑀫𑀁, 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀩𑁆𑀩𑁂 𑀏𑀓𑀤𑀺𑀯𑀲𑀁 𑀮𑀪𑀺𑀁𑀲𑀼, 𑀇𑀤𑀸𑀦𑀺 𑀫𑀼𑀥𑀸 𑀕𑀡𑁆𑀳𑀦𑁆𑀢𑁄𑀧𑀺 𑀦𑀢𑁆𑀣𑀺, 𑀏𑀯𑀭𑀽𑀧𑀁 𑀦𑀸𑀫 ¶ 𑀭𑀽𑀧𑀁 𑀔𑀬𑀯𑀬𑀧𑁆𑀧𑀢𑁆𑀢𑀁, 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀆𑀢𑀼𑀭𑀁 𑀅𑀢𑁆𑀢𑀪𑀸𑀯’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀻’’𑀢𑀺.

𑀢𑀢𑁆𑀣 𑀘𑀺𑀢𑁆𑀢𑀓𑀢𑀦𑁆𑀢𑀺 𑀓𑀢𑀘𑀺𑀢𑁆𑀢𑀁, 𑀯𑀢𑁆𑀣𑀸𑀪𑀭𑀡𑀫𑀸𑀮𑀸𑀮𑀢𑁆𑀢𑀓𑀸𑀤𑀻𑀳𑀺 𑀯𑀺𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀩𑀺𑀫𑁆𑀩𑀦𑁆𑀢𑀺 𑀤𑀻𑀖𑀸𑀤𑀺𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀤𑀻𑀖𑀸𑀤𑀻𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀲𑀡𑁆𑀞𑀺𑀢𑀁 𑀅𑀢𑁆𑀢𑀪𑀸𑀯𑀁. 𑀅𑀭𑀼𑀓𑀸𑀬𑀦𑁆𑀢𑀺 𑀦𑀯𑀦𑁆𑀦𑀁 𑀯𑀡𑀫𑀼𑀔𑀸𑀦𑀁 𑀯𑀲𑁂𑀦 𑀅𑀭𑀼𑀪𑀽𑀢𑀁 𑀓𑀸𑀬𑀁. 𑀲𑀫𑀼𑀲𑁆𑀲𑀺𑀢𑀦𑁆𑀢𑀺 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀲𑀫𑀼𑀲𑁆𑀲𑀺𑀢𑀁. 𑀆𑀢𑀼𑀭𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀇𑀭𑀺𑀬𑀸𑀧𑀣𑀸𑀤𑀻𑀳𑀺 𑀧𑀭𑀺𑀳𑀭𑀺𑀢𑀩𑁆𑀩𑀢𑀸𑀬 𑀦𑀺𑀘𑁆𑀘𑀕𑀺𑀮𑀸𑀦𑀁. 𑀩𑀳𑀼𑀲𑀗𑁆𑀓𑀧𑁆𑀧𑀦𑁆𑀢𑀺 𑀫𑀳𑀸𑀚𑀦𑁂𑀦 𑀩𑀳𑀼𑀥𑀸 𑀲𑀗𑁆𑀓𑀧𑁆𑀧𑀺𑀢𑀁. 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀻𑀢𑀺 𑀬𑀲𑁆𑀲 𑀥𑀼𑀯𑀪𑀸𑀯𑁄 𑀯𑀸 𑀞𑀺𑀢𑀺𑀪𑀸𑀯𑁄 𑀯𑀸 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦 𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀫𑁂𑀯𑁂𑀢𑀁, 𑀇𑀫𑀁 𑀧𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀲𑁄𑀧𑀺 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀧𑀭𑀺𑀚𑀺𑀡𑁆𑀡𑀫𑀺𑀤𑀦𑁆𑀢𑀺 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀢𑁆𑀢𑀭𑀸𑀣𑁂𑀭𑀺𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀣𑁂𑀭𑀻 𑀓𑀺𑀭 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑀧𑀸𑀢𑁂𑀦 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀲𑀩𑁆𑀩𑀁 𑀤𑀢𑁆𑀯𑀸 𑀦𑀺𑀭𑀸𑀳𑀸𑀭𑀸 𑀅𑀳𑁄𑀲𑀺. 𑀏𑀯𑀁 𑀤𑀼𑀢𑀺𑀬𑁂𑀧𑀺 𑀢𑀢𑀺𑀬𑁂𑀧𑀺 𑀤𑀺𑀯𑀲𑁂 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀪𑀢𑁆𑀢𑀁 𑀤𑀢𑁆𑀯𑀸 𑀦𑀺𑀭𑀸𑀳𑀸𑀭𑀸 𑀅𑀳𑁄𑀲𑀺, 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀧𑀦 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀻 𑀏𑀓𑀲𑁆𑀫𑀺𑀁 𑀲𑀫𑁆𑀩𑀸𑀥𑀝𑁆𑀞𑀸𑀦𑁂 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑀻 𑀑𑀮𑀫𑁆𑀩𑀦𑁆𑀢𑀁 𑀅𑀢𑁆𑀢𑀦𑁄 𑀘𑀻𑀯𑀭𑀓𑀡𑁆𑀡𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀕𑀺𑀦𑀺, 𑀧𑀭𑀺𑀚𑀺𑀡𑁆𑀡𑁄 𑀢𑁂 𑀅𑀢𑁆𑀢𑀪𑀸𑀯𑁄 𑀦 𑀘𑀺𑀭𑀲𑁆𑀲𑁂𑀯 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀭𑀺𑀚𑀺𑀡𑁆𑀡𑀫𑀺𑀤𑀁 𑀭𑀽𑀧𑀁, 𑀭𑁄𑀕𑀦𑀻𑀴𑀁 𑀧𑀪𑀗𑁆𑀕𑀼𑀭𑀁;

𑀪𑀺𑀚𑁆𑀚𑀢𑀺 𑀧𑀽𑀢𑀺𑀲𑀦𑁆𑀤𑁂𑀳𑁄, 𑀫𑀭𑀡𑀦𑁆𑀢𑀜𑁆𑀳𑀺 𑀚𑀻𑀯𑀺𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀕𑀺𑀦𑀺 𑀇𑀤𑀁 𑀢𑀯 𑀲𑀭𑀻𑀭𑀲𑀗𑁆𑀔𑀸𑀢𑀁 𑀭𑀽𑀧𑀁 𑀫𑀳𑀮𑁆𑀮𑀓𑀪𑀸𑀯𑁂𑀦 𑀧𑀭𑀺𑀚𑀺𑀡𑁆𑀡𑀁, 𑀢𑀜𑁆𑀘 𑀔𑁄 𑀲𑀩𑁆𑀩𑀭𑁄𑀕𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀭𑁄𑀕𑀦𑀻𑀴𑀁, 𑀬𑀣𑀸 𑀔𑁄 𑀧𑀦 𑀢𑀭𑀼𑀡𑁄𑀧𑀺 𑀲𑀺𑀗𑁆𑀕𑀸𑀮𑁄 ‘‘𑀚𑀭𑀲𑀺𑀗𑁆𑀕𑀸𑀮𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀭𑀼𑀡𑀸𑀧𑀺 𑀕𑀴𑁄𑀘𑀻𑀮𑀢𑀸 ‘‘𑀧𑀽𑀢𑀺𑀮𑀢𑀸’’𑀢𑀺 ¶ 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀤𑀳𑀼𑀚𑀸𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀫𑁆𑀧𑀺 𑀲𑀫𑀸𑀦𑀁 𑀦𑀺𑀘𑁆𑀘𑀁 𑀧𑀕𑁆𑀖𑀭𑀡𑀝𑁆𑀞𑁂𑀦 𑀧𑀽𑀢𑀺𑀢𑀸𑀬 𑀧𑀪𑀗𑁆𑀕𑀼𑀭𑀁, 𑀲𑁄 𑀏𑀲 𑀧𑀽𑀢𑀺𑀓𑁄 𑀲𑀫𑀸𑀦𑁄 𑀢𑀯 𑀤𑁂𑀳𑁄 𑀪𑀺𑀚𑁆𑀚𑀢𑀺, 𑀦 𑀘𑀺𑀭𑀲𑁆𑀲𑁂𑀯 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀁 𑀓𑀸𑀭𑀡𑀸? 𑀫𑀭𑀡𑀦𑁆𑀢𑀜𑁆𑀳𑀺 𑀚𑀻𑀯𑀺𑀢𑀁 𑀬𑀲𑁆𑀫𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀫𑀭𑀡𑀧𑀭𑀺𑀬𑁄𑀲𑀸𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀸 𑀣𑁂𑀭𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀉𑀢𑁆𑀢𑀭𑀸𑀣𑁂𑀭𑀻𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀲𑀫𑁆𑀩𑀳𑀼𑀮𑀅𑀥𑀺𑀫𑀸𑀦𑀺𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀬𑀸𑀦𑀺𑀫𑀸𑀦𑀻𑀢𑀺 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀅𑀥𑀺𑀫𑀸𑀦𑀺𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀧𑀜𑁆𑀘𑀲𑀢𑀸 𑀓𑀺𑀭 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀤𑀸𑀘𑀸𑀭𑁂𑀦 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀦𑁄 𑀦𑀺𑀧𑁆𑀨𑀦𑁆𑀦𑀁, 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀆𑀕𑀫𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀧𑀢𑁆𑀢𑀓𑀸𑀮𑁂𑀬𑁂𑀯 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀦𑀦𑁆𑀤, 𑀏𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀬𑀸 𑀤𑀺𑀝𑁆𑀞𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀆𑀫𑀓𑀲𑀼𑀲𑀸𑀦𑀁 ¶ 𑀕𑀦𑁆𑀢𑁆𑀯𑀸 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀧𑀲𑁆𑀲𑀦𑁆𑀢𑀽’’𑀢𑀺. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀆𑀫𑀓𑀲𑀼𑀲𑀸𑀦𑁂𑀦𑀸’’𑀢𑀺 𑀅𑀯𑀢𑁆𑀯𑀸𑀯 ‘‘𑀤𑀻𑀖𑀤𑀲𑁆𑀲𑀺𑀦𑀸 𑀩𑀼𑀤𑁆𑀥𑁂𑀦 𑀓𑀸𑀭𑀡𑀁 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀓𑀼𑀡𑀧𑀸𑀦𑀺 𑀧𑀲𑁆𑀲𑀦𑁆𑀢𑀸 𑀏𑀓𑀸𑀳𑀤𑁆𑀯𑀻𑀳𑀧𑀢𑀺𑀢𑁂𑀲𑀼 𑀓𑀼𑀡𑀧𑁂𑀲𑀼 𑀆𑀖𑀸𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀁 𑀔𑀡𑀁 𑀧𑀢𑀺𑀢𑁂𑀲𑀼 𑀅𑀮𑁆𑀮𑀲𑀭𑀻𑀭𑁂𑀲𑀼 𑀭𑀸𑀕𑀁 𑀉𑀧𑁆𑀧𑀸𑀤𑀬𑀺𑀁𑀲𑀼, 𑀢𑀲𑁆𑀫𑀺𑀁 𑀔𑀡𑁂 𑀅𑀢𑁆𑀢𑀦𑁄 𑀲𑀓𑀺𑀮𑁂𑀲𑀪𑀸𑀯𑀁 𑀚𑀸𑀦𑀺𑀁𑀲𑀼. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑁂 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀦𑀧𑁆𑀧𑀢𑀺𑀭𑀽𑀧𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀏𑀯𑀭𑀽𑀧𑀁 𑀅𑀝𑁆𑀞𑀺𑀲𑀗𑁆𑀖𑀸𑀢𑀁 𑀤𑀺𑀲𑁆𑀯𑀸 𑀭𑀸𑀕𑀭𑀢𑀺𑀁 𑀉𑀧𑁆𑀧𑀸𑀤𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀸𑀦𑀺𑀫𑀸𑀦𑀺 𑀅𑀧𑀢𑁆𑀣𑀸𑀦𑀺, 𑀅𑀮𑀸𑀩𑀽𑀦𑁂𑀯 𑀲𑀸𑀭𑀤𑁂;

𑀓𑀸𑀧𑁄𑀢𑀓𑀸𑀦𑀺 𑀅𑀝𑁆𑀞𑀻𑀦𑀺, 𑀢𑀸𑀦𑀺 𑀤𑀺𑀲𑁆𑀯𑀸𑀦 𑀓𑀸 𑀭𑀢𑀻’’𑀢𑀺.

𑀢𑀢𑁆𑀣 𑀅𑀧𑀢𑁆𑀣𑀸𑀦𑀻𑀢𑀺 𑀙𑀟𑁆𑀟𑀺𑀢𑀸𑀦𑀺. 𑀲𑀸𑀭𑀤𑁂𑀢𑀺 𑀲𑀭𑀤𑀓𑀸𑀮𑁂 𑀯𑀸𑀢𑀸𑀢𑀧𑀧𑀳𑀢𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑀅𑀮𑀸𑀩𑀽𑀦𑀺 𑀯𑀺𑀬. 𑀓𑀸𑀧𑁄𑀢𑀓𑀸𑀦𑀻𑀢𑀺 𑀓𑀧𑁄𑀢𑀓𑀯𑀡𑁆𑀡𑀸𑀦𑀺. 𑀢𑀸𑀦𑀺 𑀤𑀺𑀲𑁆𑀯𑀸𑀦𑀸𑀢𑀺 𑀢𑀸𑀦𑀺 𑀏𑀯𑀭𑀽𑀧𑀸𑀦𑀺 𑀅𑀝𑁆𑀞𑀻𑀦𑀺 𑀤𑀺𑀲𑁆𑀯𑀸 𑀢𑀼𑀫𑁆𑀳𑀸𑀓𑀁 𑀓𑀸 𑀭𑀢𑀺, 𑀦𑀦𑀼 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀸𑀫𑀭𑀢𑀺𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀬𑀣𑀸𑀞𑀺𑀢𑀸𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀅𑀥𑀺𑀫𑀸𑀦𑀺𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀚𑀦𑀧𑀤𑀓𑀮𑁆𑀬𑀸𑀡𑀻 𑀭𑀽𑀧𑀦𑀦𑁆𑀤𑀸𑀣𑁂𑀭𑀻𑀯𑀢𑁆𑀣𑀼

𑀅𑀝𑁆𑀞𑀻𑀦𑀁 ¶ ¶ ¶ 𑀦𑀕𑀭𑀁 𑀓𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀭𑀽𑀧𑀦𑀦𑁆𑀤𑀸𑀣𑁂𑀭𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀚𑁂𑀝𑁆𑀞𑀪𑀸𑀢𑀺𑀓𑁄 𑀭𑀚𑁆𑀚𑀲𑀺𑀭𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄 𑀚𑀸𑀢𑁄, 𑀧𑀼𑀢𑁆𑀢𑁄𑀧𑀺𑀲𑁆𑀲 𑀭𑀸𑀳𑀼𑀮𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁄, 𑀪𑀢𑁆𑀢𑀸𑀧𑀺 𑀫𑁂 𑀧𑀩𑁆𑀩𑀚𑀺𑀢𑁄, 𑀫𑀸𑀢𑀸𑀧𑀺 𑀫𑁂 𑀧𑀩𑁆𑀩𑀚𑀺𑀢𑀸, 𑀅𑀳𑀫𑁆𑀧𑀺 𑀏𑀢𑁆𑀢𑀓𑁂 𑀜𑀸𑀢𑀺𑀚𑀦𑁂 𑀧𑀩𑁆𑀩𑀚𑀺𑀢𑁂 𑀕𑁂𑀳𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀲𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺 𑀜𑀸𑀢𑀺𑀲𑀺𑀦𑁂𑀳𑁂𑀦𑁂𑀯, 𑀦𑁄 𑀲𑀤𑁆𑀥𑀸𑀬, 𑀅𑀪𑀺𑀭𑀽𑀧𑀢𑀸𑀬 𑀧𑀦 𑀭𑀽𑀧𑀦𑀦𑁆𑀤𑀸𑀢𑀺 𑀧𑀜𑁆𑀜𑀸𑀬𑀺. ‘‘𑀲𑀢𑁆𑀣𑀸 𑀓𑀺𑀭 ‘𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀯𑀤𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀸 𑀏𑀯𑀁 𑀤𑀲𑁆𑀲𑀦𑀻𑀬𑁂 𑀧𑀸𑀲𑀸𑀤𑀺𑀓𑁂 𑀫𑀫𑀧𑀺 𑀭𑀽𑀧𑁂 𑀤𑁄𑀲𑀁 𑀓𑀣𑁂𑀬𑁆𑀬𑀸𑀢𑀺 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦 𑀕𑀘𑁆𑀙𑀢𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀧𑀸𑀢𑁄𑀯 𑀤𑀸𑀦𑀁 𑀤𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀲𑀸𑀬𑀦𑁆𑀳𑀲𑀫𑀬𑁂 𑀚𑁂𑀢𑀯𑀦𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀧𑀺 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬 𑀉𑀧𑁆𑀧𑀦𑁆𑀦𑀘𑁆𑀙𑀦𑁆𑀤𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑁄𑀯 𑀧𑀯𑀺𑀲𑀢𑀺.

𑀘𑀢𑀼𑀧𑁆𑀧𑀫𑀸𑀡𑀺𑀓𑁂 𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀧𑁆𑀧𑀓𑀸𑀯 𑀢𑁂 𑀲𑀢𑁆𑀢𑀸, 𑀬𑁂𑀲𑀁 𑀢𑀣𑀸𑀕𑀢𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀲𑀸𑀤𑁄 𑀦 𑀉𑀧𑁆𑀧𑀚𑁆𑀚𑀢𑀺. 𑀭𑀽𑀧𑀧𑁆𑀧𑀫𑀸𑀡𑀺𑀓𑀸𑀧𑀺 𑀳𑀺 𑀢𑀣𑀸𑀕𑀢𑀲𑁆𑀲 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀧𑀲𑀻𑀤𑀦𑁆𑀢𑀺, 𑀖𑁄𑀲𑀧𑁆𑀧𑀫𑀸𑀡𑀺𑀓𑀸𑀧𑀺 ¶ 𑀅𑀦𑁂𑀓𑀸𑀦𑀺 𑀚𑀸𑀢𑀺𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀲𑀢𑁆𑀣𑀼 𑀕𑀼𑀡𑀖𑁄𑀲𑀜𑁆𑀘𑁂𑀯 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸𑀖𑁄𑀲𑀜𑁆𑀘 𑀲𑀼𑀢𑁆𑀯𑀸 𑀧𑀲𑀻𑀤𑀦𑁆𑀢𑀺, 𑀮𑀽𑀔𑀧𑁆𑀧𑀫𑀸𑀡𑀺𑀓𑀸𑀧𑀺𑀲𑁆𑀲 𑀘𑀻𑀯𑀭𑀸𑀤𑀺𑀮𑀽𑀔𑀢𑀁 𑀧𑀝𑀺𑀘𑁆𑀘 𑀧𑀲𑀻𑀤𑀦𑁆𑀢𑀺, 𑀥𑀫𑁆𑀫𑀧𑁆𑀧𑀫𑀸𑀡𑀺𑀓𑀸𑀧𑀺 ‘‘𑀏𑀯𑀭𑀽𑀧𑀁 𑀤𑀲𑀩𑀮𑀲𑁆𑀲 𑀲𑀻𑀮𑀁, 𑀏𑀯𑀭𑀽𑀧𑁄 𑀲𑀫𑀸𑀥𑀺, 𑀏𑀯𑀭𑀽𑀧𑀸 𑀧𑀜𑁆𑀜𑀸, 𑀪𑀕𑀯𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺 𑀧𑀲𑀻𑀤𑀦𑁆𑀢𑀺. 𑀢𑁂𑀲𑀁 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀸𑀦𑀁 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺. 𑀭𑀽𑀧𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑁂𑀯 𑀉𑀧𑀸𑀲𑀺𑀓𑀸𑀦𑀜𑁆𑀘 𑀲𑀦𑁆𑀢𑀺𑀓𑀸 𑀢𑀣𑀸𑀕𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀯𑀺𑀬 𑀫𑁂 𑀪𑀸𑀢𑀺𑀓𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑀺𑀬𑁂𑀯. 𑀏𑀓𑀤𑀺𑀯𑀲𑀫𑁆𑀧𑀺 𑀫𑁂 𑀭𑀽𑀧𑁂 𑀤𑁄𑀲𑀁 𑀓𑀣𑁂𑀦𑁆𑀢𑁄 𑀓𑀺𑀢𑁆𑀢𑀓𑀁 𑀓𑀣𑁂𑀲𑁆𑀲𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸𑀯 𑀢𑀣𑀸𑀕𑀢𑀁 𑀧𑀲𑁆𑀲𑀺𑀢𑁆𑀯𑀸 𑀥𑀫𑁆𑀫𑀫𑀲𑁆𑀲 𑀲𑀼𑀡𑀺𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑀸 ‘‘𑀅𑀳𑀫𑁆𑀧𑀺 𑀅𑀚𑁆𑀚 𑀥𑀫𑁆𑀫𑀲𑁆𑀲𑀯𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 ¶ 𑀆𑀭𑁄𑀘𑁂𑀲𑀺.

𑀪𑀺𑀓𑁆𑀔𑀼𑀦𑀺𑀬𑁄 ¶ ‘‘𑀘𑀺𑀭𑀲𑁆𑀲𑀁 𑀯𑀢 𑀭𑀽𑀧𑀦𑀦𑁆𑀤𑀸𑀬 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑀼𑀓𑀸𑀫𑀢𑀸 𑀉𑀧𑁆𑀧𑀦𑁆𑀦𑀸, 𑀅𑀚𑁆𑀚 𑀲𑀢𑁆𑀣𑀸 ¶ 𑀇𑀫𑀁 𑀦𑀺𑀲𑁆𑀲𑀸𑀬 𑀯𑀺𑀘𑀺𑀢𑁆𑀭𑀥𑀫𑁆𑀫𑀤𑁂𑀲𑀦𑀁 𑀦𑀸𑀦𑀸𑀦𑀬𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀢𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀅𑀳𑀁 𑀅𑀢𑁆𑀢𑀸𑀦𑀁 𑀦𑁂𑀯 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 ‘‘𑀅𑀚𑁆𑀚 𑀭𑀽𑀧𑀦𑀦𑁆𑀤𑀸 𑀫𑀬𑁆𑀳𑀁 𑀉𑀧𑀝𑁆𑀞𑀸𑀦𑀁 𑀆𑀕𑀫𑀺𑀲𑁆𑀲𑀢𑀺, 𑀓𑀻𑀤𑀺𑀲𑀻 𑀦𑀼 𑀔𑁄 𑀢𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀭𑀽𑀧𑀕𑀭𑀼𑀓𑀸 𑀏𑀲𑀸 𑀅𑀢𑁆𑀢𑀪𑀸𑀯𑁂 𑀩𑀮𑀯𑀲𑀺𑀦𑁂𑀳𑀸, 𑀓𑀡𑁆𑀝𑀓𑁂𑀦 𑀓𑀡𑁆𑀝𑀓𑀼𑀤𑁆𑀥𑀭𑀡𑀁 𑀯𑀺𑀬 𑀭𑀽𑀧𑁂𑀦𑁂𑀯𑀲𑁆𑀲𑀸 𑀭𑀽𑀧𑀫𑀤𑀦𑀺𑀫𑁆𑀫𑀤𑀦𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀲𑁆𑀲𑀸 𑀯𑀺𑀳𑀸𑀭𑀁 𑀧𑀯𑀺𑀲𑀦𑀲𑀫𑀬𑁂 𑀏𑀓𑀁 𑀧𑀦 𑀅𑀪𑀺𑀭𑀽𑀧𑀁 𑀇𑀢𑁆𑀣𑀺𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀁 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀩𑀻𑀚𑀬𑀫𑀸𑀦𑀁 𑀇𑀤𑁆𑀥𑀺𑀩𑀮𑁂𑀦 𑀅𑀪𑀺𑀦𑀺𑀫𑁆𑀫𑀺𑀦𑀺. 𑀢𑀁 𑀔𑁄 𑀧𑀦 𑀇𑀢𑁆𑀣𑀺𑀁 𑀲𑀢𑁆𑀣𑀸 𑀘𑁂𑀯 𑀧𑀲𑁆𑀲𑀢𑀺 𑀭𑀽𑀧𑀦𑀦𑁆𑀤𑀸 𑀘. 𑀲𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀸 𑀧𑀸𑀤𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀑𑀮𑁄𑀓𑁂𑀦𑁆𑀢𑀻 𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀁 𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑀼𑀚𑁆𑀚𑀮𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀢𑁆𑀣𑀼 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀻 𑀲𑀫𑀻𑀧𑁂 𑀞𑀺𑀢𑀁 𑀇𑀢𑁆𑀣𑀺𑀭𑀽𑀧𑀁 𑀅𑀤𑁆𑀤𑀲 ¶ . 𑀲𑀸 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀦𑁆𑀢𑀻 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑀺𑀬𑀸 𑀧𑀼𑀭𑀢𑁄 𑀓𑀸𑀓𑀻𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀅𑀯𑀫𑀜𑁆𑀜𑀺. 𑀇𑀤𑁆𑀥𑀺𑀫𑀬𑀭𑀽𑀧𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬𑁂𑀯 𑀳𑀺 𑀢𑀲𑁆𑀲𑀸 𑀅𑀓𑁆𑀔𑀻𑀦𑀺 𑀪𑀫𑀺𑀁𑀲𑀼. 𑀲𑀸 ‘‘𑀅𑀳𑁄 𑀇𑀫𑀺𑀲𑁆𑀲𑀸 𑀓𑁂𑀲𑀸 𑀲𑁄𑀪𑀦𑀸, 𑀅𑀳𑁄 𑀦𑀮𑀸𑀝𑀁 𑀲𑁄𑀪𑀦’’𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀸𑀭𑀻𑀭𑀧𑁆𑀧𑀤𑁂𑀲𑀸𑀦𑀁 𑀭𑀽𑀧𑀲𑀺𑀭𑀺𑀬𑀸 𑀲𑀫𑀸𑀓𑀟𑁆𑀠𑀺𑀢𑀘𑀺𑀢𑁆𑀢𑀸 𑀢𑀲𑁆𑀫𑀺𑀁 𑀭𑀽𑀧𑁂 𑀩𑀮𑀯𑀲𑀺𑀦𑁂𑀳𑀸 𑀅𑀳𑁄𑀲𑀺.

𑀲𑀢𑁆𑀣𑀸 𑀢𑀲𑁆𑀲𑀸 𑀢𑀢𑁆𑀣 𑀅𑀪𑀺𑀭𑀢𑀺𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀯 𑀢𑀁 𑀭𑀽𑀧𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀭𑀽𑀧𑀦𑀦𑁆𑀤𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀦 𑀯𑀢𑀺𑀤𑀁 𑀭𑀽𑀧𑀁 𑀧𑀼𑀭𑀺𑀫𑀲𑀤𑀺𑀲’’𑀦𑁆𑀢𑀺 𑀣𑁄𑀓𑀁 𑀯𑀺𑀭𑀢𑁆𑀢𑀘𑀺𑀢𑁆𑀢𑀸 𑀅𑀳𑁄𑀲𑀺. 𑀲𑀢𑁆𑀣𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀓𑀺𑀁 𑀯𑀺𑀚𑀸𑀢𑀯𑀡𑁆𑀡𑀁 𑀫𑀚𑁆𑀛𑀺𑀫𑀺𑀢𑁆𑀣𑀺𑀯𑀡𑁆𑀡𑀁 𑀚𑀭𑀸𑀚𑀺𑀡𑁆𑀡𑀫𑀳𑀮𑁆𑀮𑀺𑀓𑀺𑀢𑁆𑀣𑀺𑀯𑀡𑁆𑀡𑀜𑁆𑀘 𑀤𑀲𑁆𑀲𑁂𑀲𑀺. 𑀲𑀸𑀧𑀺 𑀅𑀦𑀼𑀧𑀼𑀩𑁆𑀩𑁂𑀦𑁂𑀯 ‘‘𑀇𑀤𑀫𑁆𑀧𑀺 𑀅𑀦𑁆𑀢𑀭𑀳𑀺𑀢𑀁, 𑀇𑀤𑀫𑁆𑀧𑀺 𑀅𑀦𑁆𑀢𑀭𑀳𑀺𑀢’’𑀦𑁆𑀢𑀺 𑀚𑀭𑀸𑀚𑀺𑀡𑁆𑀡𑀓𑀸𑀮𑁂 𑀢𑀁 𑀯𑀺𑀭𑀚𑁆𑀚𑀫𑀸𑀦𑀸 𑀔𑀡𑁆𑀟𑀤𑀦𑁆𑀢𑀺𑀁 𑀧𑀮𑀺𑀢𑀲𑀺𑀭𑀁 𑀑𑀪𑀕𑁆𑀕𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀤𑀡𑁆𑀟𑀧𑀭𑀸𑀬𑀡𑀁 𑀧𑀯𑁂𑀥𑀫𑀸𑀦𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀯𑀺𑀭𑀚𑁆𑀚𑀺. 𑀅𑀣 𑀲𑀢𑁆𑀣𑀸 𑀢𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑀸 𑀢𑀗𑁆𑀔𑀡𑀜𑁆𑀜𑁂𑀯 𑀤𑀡𑁆𑀟𑀜𑁆𑀘 𑀢𑀸𑀮𑀯𑀡𑁆𑀝𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀫𑀳𑀸𑀯𑀺𑀭𑀯𑀁 ¶ 𑀯𑀺𑀭𑀯𑀫𑀸𑀦𑀸 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀦𑀺𑀫𑀼𑀕𑁆𑀕𑀸 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀺. 𑀭𑀽𑀧𑀦𑀦𑁆𑀤𑀸 𑀢𑀫𑁆𑀧𑀺 ¶ 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀯𑀺𑀭𑀚𑁆𑀚𑀺. 𑀲𑀢𑁆𑀣𑀸𑀧𑀺 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀫𑀭𑀡𑀁 𑀤𑀲𑁆𑀲𑁂𑀲𑀺. 𑀲𑀸 𑀢𑀗𑁆𑀔𑀡𑀁𑀬𑁂𑀯 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑀁 𑀆𑀧𑀚𑁆𑀚𑀺, 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀼𑀩𑁆𑀩𑀯𑀝𑁆𑀝𑀺𑀬𑁄 𑀘𑁂𑀯 𑀧𑀼𑀴𑀯𑀸 𑀘 𑀧𑀕𑁆𑀖𑀭𑀺𑀁𑀲𑀼, 𑀓𑀸𑀓𑀸𑀤𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀯𑀺𑀮𑀼𑀫𑁆𑀧𑀺𑀁𑀲𑀼. 𑀭𑀽𑀧𑀦𑀦𑁆𑀤𑀸𑀧𑀺 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀇𑀢𑁆𑀣𑀻 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀚𑀭𑀁 𑀧𑀢𑁆𑀢𑀸, 𑀩𑁆𑀬𑀸𑀥𑀺𑀁 𑀧𑀢𑁆𑀢𑀸, 𑀫𑀭𑀡𑀁 𑀧𑀢𑁆𑀢𑀸, 𑀇𑀫𑀲𑁆𑀲𑀸𑀧𑀺 𑀫𑁂 𑀅𑀢𑁆𑀢𑀪𑀸𑀯𑀲𑁆𑀲 𑀏𑀯𑀫𑁂𑀯 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀆𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀪𑀸𑀯𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀺. 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀢𑁆𑀢𑀸 𑀏𑀯 𑀧𑀦 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀤𑀺𑀝𑁆𑀞𑁄𑀬𑁂𑀯 𑀳𑁄𑀢𑀺. 𑀅𑀣𑀲𑁆𑀲𑀸 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀸 𑀕𑁂𑀳𑀸 𑀯𑀺𑀬 𑀕𑀻𑀯𑀸𑀬 𑀩𑀤𑁆𑀥𑀓𑀼𑀡𑀧𑀁 𑀯𑀺𑀬 𑀘 ¶ 𑀉𑀧𑀝𑁆𑀞𑀳𑀺𑀁𑀲𑀼, 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀺. 𑀲𑀢𑁆𑀣𑀸 𑀢𑀸𑀬 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀸𑀢𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀩𑀳𑀺𑀤𑁆𑀥𑀸 𑀧𑀘𑁆𑀘𑀬𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲𑀸 𑀲𑀧𑁆𑀧𑀸𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 𑁋

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀧𑀢𑁆𑀣𑀺𑀢𑀁.

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀥𑀸𑀢𑀼𑀢𑁄 𑀲𑀼𑀜𑁆𑀜𑀢𑁄 𑀧𑀲𑁆𑀲, 𑀫𑀸 𑀮𑁄𑀓𑀁 𑀧𑀼𑀦𑀭𑀸𑀕𑀫𑀺;

𑀪𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻’’𑀢𑀺. 𑁋

𑀇𑀢𑁆𑀣𑀁 ¶ 𑀲𑀼𑀤𑀁 𑀪𑀕𑀯𑀸 𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺. 𑀦𑀦𑁆𑀤𑀸 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲𑀸 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀨𑀮𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀢𑁆𑀣𑀸𑀬 𑀲𑀼𑀜𑁆𑀜𑀢𑀸𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀼𑀁, ‘‘𑀦𑀦𑁆𑀤𑁂, 𑀫𑀸 ‘𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀲𑀸𑀭𑁄 𑀅𑀢𑁆𑀣𑀻’𑀢𑀺 𑀲𑀜𑁆𑀜𑀁 𑀓𑀭𑀺. 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀳𑀺 𑀏𑀢𑁆𑀣 𑀲𑀸𑀭𑁄 𑀦𑀢𑁆𑀣𑀺, 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀓𑀢𑀁 𑀅𑀝𑁆𑀞𑀺𑀦𑀕𑀭𑀫𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀝𑁆𑀞𑀻𑀦𑀁 𑀦𑀕𑀭𑀁 𑀓𑀢𑀁, 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑀁;

𑀬𑀢𑁆𑀣 𑀚𑀭𑀸 𑀘 𑀫𑀘𑁆𑀘𑀼 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀑𑀳𑀺𑀢𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑁂𑀯 𑀳𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀤𑀻𑀦𑀁 𑀑𑀤𑀳𑀦𑀢𑁆𑀣𑀸𑀬 𑀓𑀝𑁆𑀞𑀸𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀯𑀮𑁆𑀮𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀦𑀕𑀭𑀲𑀗𑁆𑀔𑀸𑀢𑀁 𑀩𑀳𑀺𑀤𑁆𑀥𑀸 𑀕𑁂𑀳𑀁 ¶ 𑀓𑀭𑁄𑀦𑁆𑀢𑀺, 𑀏𑀯𑀫𑀺𑀤𑀁 𑀅𑀚𑁆𑀛𑀢𑁆𑀢𑀺𑀓𑀫𑁆𑀧𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀦𑁆𑀳𑀸𑀭𑀼𑀯𑀺𑀦𑀤𑁆𑀥𑀁 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑀁 𑀢𑀘𑀧𑀝𑀺𑀘𑁆𑀙𑀦𑁆𑀦𑀁 𑀚𑀻𑀭𑀡𑀮𑀓𑁆𑀔𑀡𑀸𑀬 𑀚𑀭𑀸𑀬 𑀫𑀭𑀡𑀮𑀓𑁆𑀔𑀡𑀲𑁆𑀲 𑀫𑀘𑁆𑀘𑀼𑀦𑁄 𑀆𑀭𑁄𑀳𑀲𑀫𑁆𑀧𑀤𑀸𑀤𑀻𑀦𑀺 𑀧𑀝𑀺𑀘𑁆𑀘 𑀫𑀜𑁆𑀜𑀦𑀮𑀓𑁆𑀔𑀡𑀲𑁆𑀲 𑀫𑀸𑀦𑀲𑁆𑀲 𑀲𑀼𑀓𑀢𑀓𑀸𑀭𑀡𑀯𑀺𑀦𑀸𑀲𑀦𑀮𑀓𑁆𑀔𑀡𑀲𑁆𑀲 𑀫𑀓𑁆𑀔𑀲𑁆𑀲 𑀘 𑀑𑀤𑀳𑀦𑀢𑁆𑀣𑀸𑀬 ¶ 𑀦𑀕𑀭𑀁 𑀓𑀢𑀁. 𑀏𑀯𑀭𑀽𑀧𑁄 𑀏𑀯 𑀳𑀺 𑀏𑀢𑁆𑀣 𑀓𑀸𑀬𑀺𑀓𑀘𑁂𑀢𑀲𑀺𑀓𑁄 𑀆𑀩𑀸𑀥𑁄 𑀑𑀳𑀺𑀢𑁄, 𑀇𑀢𑁄 𑀉𑀤𑁆𑀥𑀁 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀦𑀢𑁆𑀣𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀸 𑀣𑁂𑀭𑀻 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀚𑀦𑀧𑀤𑀓𑀮𑁆𑀬𑀸𑀡𑀻 𑀭𑀽𑀧𑀦𑀦𑁆𑀤𑀸𑀣𑁂𑀭𑀻𑀯𑀢𑁆𑀣𑀼 𑀧𑀜𑁆𑀘𑀫𑀁.

𑀚𑀻𑀭𑀦𑁆𑀢𑀺 ¶ 𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀧𑀯𑀺𑀝𑁆𑀞𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀑𑀦𑀢𑀲𑀭𑀻𑀭𑀸 𑀚𑀗𑁆𑀖𑀁 𑀥𑁄𑀯𑀺𑀢𑀼𑀁 𑀆𑀭𑀪𑀺. 𑀢𑀸𑀬 𑀘 𑀲𑀤𑁆𑀥𑀺𑀁𑀬𑁂𑀯 𑀧𑀯𑀺𑀝𑁆𑀞𑁄 𑀏𑀓𑁄 𑀯𑀮𑁆𑀮𑀪𑀲𑀼𑀦𑀔𑁄 𑀅𑀢𑁆𑀣𑀺. 𑀲𑁄 𑀢𑀁 𑀢𑀣𑀸 𑀑𑀦𑀢𑀁 𑀤𑀺𑀲𑁆𑀯𑀸 𑀅𑀲𑀤𑁆𑀥𑀫𑁆𑀫𑀲𑀦𑁆𑀣𑀯𑀁 𑀓𑀸𑀢𑀼𑀁 𑀆𑀭𑀪𑀺. 𑀲𑀸 𑀨𑀲𑁆𑀲𑀁 𑀲𑀸𑀤𑀺𑀬𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀭𑀸𑀚𑀸𑀧𑀺 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀢𑀢𑁄 𑀆𑀕𑀢𑀓𑀸𑀮𑁂 ‘‘𑀦𑀲𑁆𑀲, 𑀯𑀲𑀮𑀺, 𑀓𑀲𑁆𑀫𑀸 𑀏𑀯𑀭𑀽𑀧𑀫𑀓𑀸𑀲𑀻’’𑀢𑀺 𑀆𑀳. 𑀓𑀺𑀁 𑀫𑀬𑀸 𑀓𑀢𑀁, 𑀤𑁂𑀯𑀸𑀢𑀺. 𑀲𑀼𑀦𑀔𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑁄𑀢𑀺. 𑀦𑀢𑁆𑀣𑁂𑀢𑀁, 𑀤𑁂𑀯𑀸𑀢𑀺. 𑀫𑀬𑀸 𑀲𑀸𑀫𑀁 𑀤𑀺𑀝𑁆𑀞𑀁, 𑀦𑀸𑀳𑀁 𑀢𑀯 𑀲𑀤𑁆𑀤𑀳𑀺𑀲𑁆𑀲𑀸𑀫𑀺, 𑀦𑀲𑁆𑀲, 𑀯𑀲𑀮𑀻𑀢𑀺. ‘‘𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀇𑀫𑀁 𑀓𑁄𑀝𑁆𑀞𑀓𑀁 𑀧𑀯𑀺𑀝𑁆𑀞𑁄 𑀇𑀫𑀺𑀦𑀸 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑀲𑁆𑀲 𑀏𑀓𑁄𑀯 𑀤𑁆𑀯𑀺𑀥𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀅𑀪𑀽𑀢𑀁 𑀓𑀣𑁂𑀲𑀺. 𑀤𑁂𑀯, 𑀲𑀘𑁂 𑀫𑁂 𑀲𑀤𑁆𑀤𑀳𑀲𑀺, 𑀏𑀢𑀁 𑀓𑁄𑀝𑁆𑀞𑀓𑀁 𑀧𑀯𑀺𑀲, 𑀅𑀳𑀁 𑀢𑀁 𑀇𑀫𑀺𑀦𑀸 𑀯𑀸𑀢𑀧𑀸𑀦𑁂𑀦 ¶ 𑀑𑀮𑁄𑀓𑁂𑀲𑁆𑀲𑀸𑀫𑀻𑀢𑀺. 𑀭𑀸𑀚𑀸 𑀫𑀽𑀴𑁆𑀳𑀥𑀸𑀢𑀼𑀓𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀓𑁄𑀝𑁆𑀞𑀓𑀁 𑀧𑀸𑀯𑀺𑀲𑀺. 𑀲𑀸𑀧𑀺 𑀔𑁄 𑀤𑁂𑀯𑀻 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 ‘‘𑀅𑀦𑁆𑀥𑀩𑀸𑀮, 𑀫𑀳𑀸𑀭𑀸𑀚, 𑀓𑀺𑀁 𑀦𑀸𑀫𑁂𑀢𑀁, 𑀅𑀚𑀺𑀓𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀭𑁄𑀲𑀻’’𑀢𑀺 𑀆𑀳. ‘‘𑀦𑀸𑀳𑀁, 𑀪𑀤𑁆𑀤𑁂, 𑀏𑀯𑀭𑀽𑀧𑀁 𑀓𑀭𑁄𑀫𑀻’’𑀢𑀺 𑀘 𑀯𑀼𑀢𑁆𑀢𑁂𑀧𑀺 ‘‘𑀫𑀬𑀸 𑀲𑀸𑀫𑀁 𑀤𑀺𑀝𑁆𑀞𑀁, 𑀦𑀸𑀳𑀁 𑀢𑀯 𑀲𑀤𑁆𑀤𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀤𑁆𑀥𑀸 𑀇𑀫𑀁 𑀓𑁄𑀝𑁆𑀞𑀓𑀁 𑀧𑀯𑀺𑀝𑁆𑀞𑁄 𑀏𑀓𑁄𑀯 𑀤𑁆𑀯𑀺𑀥𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀲𑀤𑁆𑀤𑀳𑀺. 𑀫𑀮𑁆𑀮𑀺𑀓𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀅𑀦𑁆𑀥𑀩𑀸𑀮𑀢𑀸𑀬 𑀫𑀬𑀸 𑀯𑀜𑁆𑀘𑀺𑀢𑁄, 𑀧𑀸𑀧𑀁 𑀫𑁂 𑀓𑀢𑀁, 𑀅𑀬𑀜𑁆𑀘 𑀫𑁂 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀺𑀢𑁄, 𑀇𑀤𑀁 𑀫𑁂 𑀓𑀫𑁆𑀫𑀁 𑀲𑀢𑁆𑀣𑀸𑀧𑀺 𑀚𑀸𑀦𑀺𑀲𑁆𑀲𑀢𑀺, 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀧𑀺 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸𑀧𑀺 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀅𑀳𑁄 𑀯𑀢 𑀫𑁂 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺. 𑀅𑀬𑀁 𑀓𑀺𑀭 𑀭𑀜𑁆𑀜𑁄 𑀅𑀲𑀤𑀺𑀲𑀤𑀸𑀦𑁂 𑀲𑀳𑀸𑀬𑀺𑀓𑀸 𑀅𑀳𑁄𑀲𑀺. 𑀢𑀢𑁆𑀣 𑀘 𑀏𑀓𑀤𑀺𑀯𑀲𑀁 𑀓𑀢𑀧𑀭𑀺𑀘𑁆𑀘𑀸𑀕𑁄 𑀥𑀦𑀲𑁆𑀲 𑀘𑀼𑀤𑁆𑀤𑀲𑀓𑁄𑀝𑀺𑀅𑀕𑁆𑀖𑀦𑀓𑁄 𑀅𑀳𑁄𑀲𑀺. 𑀢𑀣𑀸𑀕𑀢𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑁄 𑀆𑀥𑀸𑀭𑀓𑁄 𑀧𑀸𑀤𑀧𑀻𑀞𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀦𑀕𑁆𑀖𑀸𑀦𑁂𑀯 𑀅𑀳𑁂𑀲𑀼𑀁. 𑀲𑀸 𑀫𑀭𑀡𑀓𑀸𑀮𑁂 𑀏𑀯𑀭𑀽𑀧𑀁 𑀫𑀳𑀸𑀧𑀭𑀺𑀘𑁆𑀘𑀸𑀕𑀁 𑀦𑀸𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀤𑁂𑀯 𑀧𑀸𑀧𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀭𑀜𑁆𑀜𑁄 𑀧𑀦 𑀲𑀸 𑀅𑀢𑀺𑀯𑀺𑀬 𑀧𑀺𑀬𑀸 𑀅𑀳𑁄𑀲𑀺. 𑀲𑁄 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑁄 𑀢𑀲𑁆𑀲𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀫𑀲𑁆𑀲𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀬𑀣𑀸 𑀲𑁄 𑀆𑀕𑀢𑀓𑀸𑀭𑀡𑀁 𑀦 𑀲𑀭𑀢𑀺, 𑀢𑀣𑀸 𑀅𑀓𑀸𑀲𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀥𑀫𑁆𑀫𑀓𑀣𑀁 ¶ 𑀲𑀼𑀢𑁆𑀯𑀸 𑀕𑁂𑀳𑀁 𑀧𑀯𑀺𑀝𑁆𑀞𑀓𑀸𑀮𑁂 𑀲𑀭𑀺𑀢𑁆𑀯𑀸 ‘‘𑀅𑀳𑀁 𑀪𑀡𑁂 𑀫𑀮𑁆𑀮𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀫𑀼𑀝𑁆𑀞𑁄, 𑀲𑁆𑀯𑁂 𑀧𑀼𑀦 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂𑀧𑀺 𑀅𑀕𑀫𑀸𑀲𑀺. 𑀲𑀢𑁆𑀣𑀸𑀧𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀬𑀣𑀸 𑀲𑁄 𑀦 𑀲𑀭𑀢𑀺 ¶ , 𑀢𑀣𑀸 𑀅𑀓𑀸𑀲𑀺. 𑀲𑀸𑀧𑀺 𑀲𑀢𑁆𑀢𑀸𑀳𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀢𑁄 𑀘𑀼𑀢𑀸 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀓𑀲𑁆𑀫𑀸 𑀧𑀦𑀲𑁆𑀲 𑀲𑀢𑁆𑀣𑀸 𑀅𑀲𑀭𑀡𑀪𑀸𑀯𑀁 𑀅𑀓𑀸𑀲𑀻𑀢𑀺? 𑀲𑀸 𑀓𑀺𑀭 𑀢𑀲𑁆𑀲 𑀅𑀢𑀺𑀯𑀺𑀬 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀲𑀘𑁂 𑀏𑀯𑀭𑀽𑀧𑀸 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸, 𑀤𑀸𑀦𑀁 𑀤𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀕𑁂𑀳𑁂 𑀧𑀯𑀢𑁆𑀢𑀁 𑀦𑀺𑀘𑁆𑀘𑀪𑀢𑁆𑀢𑀁 𑀳𑀭𑀸𑀧𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑁂𑀦𑀲𑁆𑀲 𑀲𑀢𑁆𑀣𑀸 𑀲𑀢𑁆𑀢𑀸𑀳𑀁 𑀅𑀲𑀭𑀡𑀪𑀸𑀯𑀁 𑀓𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀲𑀬𑀫𑁂𑀯 𑀭𑀸𑀚𑀓𑀼𑀮𑀤𑁆𑀯𑀸𑀭𑀁 𑀅𑀕𑀫𑀸𑀲𑀺.

𑀭𑀸𑀚𑀸 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑀼𑀁 𑀆𑀭𑀪𑀺. 𑀲𑀢𑁆𑀣𑀸 𑀧𑀦 𑀭𑀣𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑀼𑀁 𑀆𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑁂𑀦 𑀧𑀝𑀺𑀫𑀸𑀦𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀯 𑀅𑀳𑀁, 𑀪𑀦𑁆𑀢𑁂, 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑁆𑀯𑀸 𑀧𑀫𑀼𑀝𑁆𑀞𑁄, 𑀓𑀢𑁆𑀣 𑀦𑀼 𑀔𑁄 𑀲𑀸, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀸𑀢𑀺. 𑀢𑀼𑀲𑀺𑀢𑀪𑀯𑀦𑁂, 𑀫𑀳𑀸𑀭𑀸𑀚𑀸𑀢𑀺, 𑀪𑀦𑁆𑀢𑁂, 𑀢𑀸𑀬 𑀢𑀼𑀲𑀺𑀢𑀪𑀯𑀦𑁂 𑀅𑀦𑀺𑀩𑁆𑀩𑀢𑁆𑀢𑀦𑁆𑀢𑀺𑀬𑀸 𑀓𑁄 𑀅𑀜𑁆𑀜𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 ¶ , 𑀪𑀦𑁆𑀢𑁂, 𑀦𑀢𑁆𑀣𑀺 𑀢𑀸𑀬 𑀲𑀤𑀺𑀲𑀸 𑀇𑀢𑁆𑀣𑀻. 𑀢𑀲𑁆𑀲𑀸 𑀳𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 ‘‘𑀲𑁆𑀯𑁂 𑀢𑀣𑀸𑀕𑀢𑀲𑁆𑀲 ¶ 𑀇𑀤𑀁 𑀤𑀲𑁆𑀲𑀸𑀫𑀺, 𑀇𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀸𑀦𑀲𑀁𑀯𑀺𑀥𑀸𑀦𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀺𑀘𑁆𑀘𑀫𑁂𑀯 𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑀲𑁆𑀲𑀸 𑀧𑀭𑀮𑁄𑀓𑀁 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀭𑀻𑀭𑀁 𑀫𑁂 𑀦 𑀯𑀳𑀢𑀻𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑀸 𑀘𑀺𑀦𑁆𑀢𑀬𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀲𑀁 𑀥𑀼𑀯𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀬𑀁, 𑀫𑀳𑀸𑀭𑀸𑀚, 𑀭𑀣𑁄 𑀓𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀧𑀺𑀢𑀸𑀫𑀳𑀲𑁆𑀲 𑀫𑁂, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀅𑀬𑀁 𑀓𑀲𑁆𑀲𑀸’’𑀢𑀺? ‘‘𑀧𑀺𑀢𑀼 𑀫𑁂, 𑀪𑀦𑁆𑀢𑁂’’𑀢𑀺. ‘‘𑀅𑀬𑀁 𑀧𑀦 𑀭𑀣𑁄 𑀓𑀲𑁆𑀲𑀸’’𑀢𑀺? ‘‘𑀫𑀫, 𑀪𑀦𑁆𑀢𑁂’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚, 𑀢𑀯 𑀧𑀺𑀢𑀸𑀫𑀳𑀲𑁆𑀲 𑀭𑀣𑁄 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀯 𑀧𑀺𑀢𑀼 𑀭𑀣𑀁 𑀦 𑀧𑀸𑀧𑀼𑀡𑀺, 𑀢𑀯 𑀧𑀺𑀢𑀼 𑀭𑀣𑁄 𑀢𑀯 𑀭𑀣𑀁 𑀦 𑀧𑀸𑀧𑀼𑀡𑀺, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀓𑀝𑁆𑀞𑀓𑀮𑀺𑀗𑁆𑀕𑀭𑀲𑁆𑀲𑀸𑀧𑀺 𑀚𑀭𑀸 𑀆𑀕𑀘𑁆𑀙𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀢𑁆𑀢𑀪𑀸𑀯𑀲𑁆𑀲. 𑀫𑀳𑀸𑀭𑀸𑀚, 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲𑁂𑀯 𑀳𑀺 𑀚𑀭𑀸 𑀦𑀢𑁆𑀣𑀺, 𑀲𑀢𑁆𑀢𑀸 𑀧𑀦 𑀅𑀚𑀻𑀭𑀓𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸,

𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;

𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺,

𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺.

𑀢𑀢𑁆𑀣 𑀯𑁂𑀢𑀺 𑀦𑀺𑀧𑀸𑀢𑁄. 𑀲𑀼𑀘𑀺𑀢𑁆𑀢𑀸𑀢𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀅𑀧𑀭𑁂𑀳𑀺 𑀘 𑀭𑀣𑀸𑀮𑀗𑁆𑀓𑀸𑀭𑁂𑀳𑀺 𑀲𑀼𑀝𑁆𑀞𑀼 𑀘𑀺𑀢𑁆𑀢𑀺𑀢𑀸 𑀭𑀸𑀚𑀽𑀦𑀁 𑀭𑀣𑀸𑀧𑀺 𑀚𑀻𑀭𑀦𑁆𑀢𑀺. 𑀲𑀭𑀻𑀭𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀭𑀣𑀸 𑀏𑀯, 𑀇𑀤𑀁 𑀲𑀼𑀧𑁆𑀧𑀝𑀺𑀚𑀕𑁆𑀕𑀺𑀢𑀁 ¶ 𑀲𑀭𑀻𑀭𑀫𑁆𑀧𑀺 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑀺 ¶ 𑀧𑀸𑀧𑀼𑀡𑀦𑁆𑀢𑀁 𑀚𑀭𑀁 𑀉𑀧𑁂𑀢𑀺. 𑀲𑀢𑀜𑁆𑀘𑀸𑀢𑀺 𑀩𑀼𑀤𑁆𑀥𑀸𑀤𑀻𑀦𑀁 𑀧𑀦 𑀲𑀦𑁆𑀢𑀸𑀦𑀁 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀘 𑀓𑀺𑀜𑁆𑀘𑀺 𑀉𑀧𑀖𑀸𑀢𑀁 𑀦 𑀉𑀧𑁂𑀢𑀻𑀢𑀺 𑀦 𑀚𑀭𑀁 𑀉𑀧𑁂𑀢𑀺 𑀦𑀸𑀫. 𑀧𑀯𑁂𑀤𑀬𑀦𑁆𑀢𑀻𑀢𑀺 𑀏𑀯𑀁 𑀲𑀦𑁆𑀢𑁄 𑀩𑀼𑀤𑁆𑀥𑀸𑀤𑀬𑁄 𑀲𑀩𑁆𑀪𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀮𑁆𑀮𑀺𑀓𑀸𑀤𑁂𑀯𑀻𑀯𑀢𑁆𑀣𑀼 𑀙𑀝𑁆𑀞𑀁.

𑀅𑀧𑁆𑀧𑀲𑁆𑀲𑀼𑀢𑀸𑀬𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 ¶ 𑀓𑀺𑀭 𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀸𑀦𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀔𑀼. 𑀧𑀸. 𑁭.𑁧; 𑀧𑁂. 𑀯. 𑁧𑁪) 𑀦𑀬𑁂𑀦 𑀅𑀯𑀫𑀗𑁆𑀕𑀮𑀁 𑀓𑀣𑁂𑀢𑀺, 𑀅𑀯𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀸𑀦𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀼 𑀓𑀣𑁂𑀢𑀩𑁆𑀩𑁂𑀲𑀼 ‘‘𑀤𑀸𑀦𑀜𑁆𑀘 𑀥𑀫𑁆𑀫𑀘𑀭𑀺𑀬𑀸 𑀘𑀸’’𑀢𑀺𑀆𑀤𑀺𑀦𑀸 (𑀔𑀼. 𑀧𑀸. 𑁫.𑁭; 𑀲𑀼. 𑀦𑀺. 𑁨𑁬𑁬) 𑀦𑀬𑁂𑀦 𑀫𑀗𑁆𑀕𑀮𑀕𑀸𑀣𑀸 𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀯𑀺𑀢𑁆𑀢𑀁 𑀇𑀥 𑀯𑀸 𑀳𑀼𑀭𑀁 𑀯𑀸’’𑀢𑀺 𑀭𑀢𑀦𑀲𑀼𑀢𑁆𑀢𑀁 (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑀯𑀸 𑀓𑀣𑁂𑀢𑀺. 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 ‘‘𑀅𑀜𑁆𑀜𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀓𑀣𑁂𑀦𑁆𑀢𑁄𑀧𑀺 ‘‘𑀅𑀜𑁆𑀜𑀁 𑀓𑀣𑁂𑀫𑀻’’𑀢𑀺 𑀦 𑀚𑀸𑀦𑀸𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀮𑀸𑀴𑀼𑀤𑀸𑀬𑀺𑀲𑁆𑀲 𑀫𑀗𑁆𑀕𑀮𑀸𑀫𑀗𑁆𑀕𑀮𑀝𑁆𑀞𑀸𑀦𑁂𑀲𑀼 𑀕𑀫𑀦𑁂𑀦, 𑀅𑀜𑁆𑀜𑀲𑁆𑀫𑀺𑀁 𑀓𑀣𑁂𑀢𑀩𑁆𑀩𑁂 𑀅𑀜𑁆𑀜𑀫𑁂𑀯 ¶ 𑀓𑀣𑁂𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀏𑀯𑀁 𑀓𑀣𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀜𑁆𑀜𑀲𑁆𑀫𑀺𑀁 𑀓𑀣𑁂𑀢𑀩𑁆𑀩𑁂 𑀅𑀜𑁆𑀜𑀫𑁂𑀯 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀅𑀕𑁆𑀕𑀺𑀤𑀢𑁆𑀢𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀲𑁄𑀫𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺. 𑀲𑁄 𑀭𑀜𑁆𑀜𑀸 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀓𑀲𑀺𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺. 𑀢𑀲𑁆𑀲 𑀤𑁆𑀯𑁂𑀬𑁂𑀯 𑀕𑁄𑀡𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁄 𑀫𑀢𑁄. 𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀲𑁄𑀫𑀤𑀢𑁆𑀢, 𑀭𑀸𑀚𑀸𑀦𑀁 𑀫𑁂 𑀬𑀸𑀘𑀺𑀢𑁆𑀯𑀸 𑀏𑀓𑀁 𑀕𑁄𑀡𑀁 𑀆𑀳𑀭𑀸’’𑀢𑀺. 𑀲𑁄𑀫𑀤𑀢𑁆𑀢𑁄 ‘‘𑀲𑀘𑀸𑀳𑀁 𑀭𑀸𑀚𑀸𑀦𑀁 𑀬𑀸𑀘𑀺𑀲𑁆𑀲𑀸𑀫𑀺, 𑀮𑀳𑀼𑀪𑀸𑀯𑁄 𑀫𑁂 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀬𑁂𑀯, 𑀢𑀸𑀢, 𑀭𑀸𑀚𑀸𑀦𑀁 𑀬𑀸𑀘𑀣𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺, 𑀢𑀸𑀢, 𑀫𑀁 𑀕𑀳𑁂𑀢𑁆𑀯𑀸 𑀬𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀤𑀦𑁆𑀥𑀧𑀜𑁆𑀜𑁄 𑀅𑀪𑀺𑀓𑁆𑀓𑀫𑀸𑀤𑀺𑀯𑀘𑀦𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀫𑁂𑀯 𑀯𑀤𑀢𑀺, 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀧𑀦 𑀦𑀁 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀆𑀤𑀸𑀬 𑀩𑀻𑀭𑀡𑀢𑁆𑀣𑀫𑁆𑀪𑀓𑀁 𑀦𑀸𑀫 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀢𑀺𑀡𑀓𑀮𑀸𑀧𑁂 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀬𑀁 ¶ 𑀭𑀸𑀚𑀸, 𑀅𑀬𑀁 𑀉𑀧𑀭𑀸𑀚𑀸, 𑀅𑀬𑀁 𑀲𑁂𑀦𑀸𑀧𑀢𑀻’’𑀢𑀺 𑀦𑀸𑀫𑀸𑀦𑀺 𑀓𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀧𑀺𑀢𑀼 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀦𑀸𑀫 𑀭𑀸𑀚𑀸 𑀯𑀢𑁆𑀢𑀩𑁆𑀩𑁄, 𑀏𑀯𑀁 𑀦𑀸𑀫 𑀉𑀧𑀭𑀸𑀚𑀸, 𑀭𑀸𑀚𑀸𑀦𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀚𑀬𑀢𑀼 𑀪𑀯𑀁, 𑀫𑀳𑀸𑀭𑀸𑀚𑀸’𑀢𑀺 𑀯𑀢𑁆𑀯𑀸 𑀏𑀯𑀁 𑀞𑀢𑁆𑀯𑀸 𑀇𑀫𑀁 ¶ 𑀕𑀸𑀣𑀁 𑀯𑀢𑁆𑀯𑀸 𑀕𑁄𑀡𑀁 𑀬𑀸𑀘𑁂𑀬𑁆𑀬𑀸𑀣𑀸’’𑀢𑀺 𑀕𑀸𑀣𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺 𑁋

‘‘𑀤𑁆𑀯𑁂 𑀫𑁂 𑀕𑁄𑀡𑀸 𑀫𑀳𑀸𑀭𑀸𑀚, 𑀬𑁂𑀳𑀺 𑀔𑁂𑀢𑁆𑀢𑀁 𑀓𑀲𑀸𑀫𑀲𑁂;

𑀢𑁂𑀲𑀼 𑀏𑀓𑁄 𑀫𑀢𑁄 𑀤𑁂𑀯, 𑀤𑀼𑀢𑀺𑀬𑀁 𑀤𑁂𑀳𑀺 𑀔𑀢𑁆𑀢𑀺𑀬𑀸’’𑀢𑀺.

𑀲𑁄 𑀳𑀺 𑀲𑀁𑀯𑀘𑁆𑀙𑀭𑀫𑀢𑁆𑀢𑁂𑀦 𑀢𑀁 𑀕𑀸𑀣𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀧𑀕𑀼𑀡𑀪𑀸𑀯𑀁 𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 ‘‘𑀢𑁂𑀦 𑀳𑀺, 𑀢𑀸𑀢, 𑀓𑀜𑁆𑀘𑀺𑀤𑁂𑀯 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀘𑁆𑀙𑀣, 𑀅𑀳𑀁 ¶ 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀲𑁄𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀺𑀢𑀓𑀸𑀮𑁂 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑁄 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀢𑀼𑀝𑁆𑀞𑀘𑀺𑀢𑁆𑀢𑁂𑀦 𑀓𑀢𑀧𑀝𑀺𑀲𑀫𑁆𑀫𑁄𑀤𑀦𑁄, ‘‘𑀢𑀸𑀢, 𑀘𑀺𑀭𑀲𑁆𑀲𑀁 𑀯𑀢 𑀆𑀕𑀢𑀢𑁆𑀣, 𑀇𑀤𑀫𑀸𑀲𑀦𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀤𑀣, 𑀬𑁂𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀤𑁆𑀯𑁂 𑀫𑁂 𑀕𑁄𑀡𑀸 𑀫𑀳𑀸𑀭𑀸𑀚, 𑀬𑁂𑀳𑀺 𑀔𑁂𑀢𑁆𑀢𑀁 𑀓𑀲𑀸𑀫𑀲𑁂;

𑀢𑁂𑀲𑀼 𑀏𑀓𑁄 𑀫𑀢𑁄 𑀤𑁂𑀯, 𑀤𑀼𑀢𑀺𑀬𑀁 𑀕𑀡𑁆𑀳 𑀔𑀢𑁆𑀢𑀺𑀬𑀸’’𑀢𑀺.

𑀭𑀜𑁆𑀜𑀸 ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢, 𑀧𑀼𑀦 𑀯𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀫𑁂𑀯 𑀕𑀸𑀣𑀁 𑀆𑀳. 𑀭𑀸𑀚𑀸 𑀢𑁂𑀦 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀣𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀺𑀢𑀁 𑀓𑀢𑁆𑀯𑀸, ‘‘𑀲𑁄𑀫𑀤𑀢𑁆𑀢, 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀩𑀳𑀽 𑀫𑀜𑁆𑀜𑁂 𑀕𑁄𑀡𑀸’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦𑀸 𑀩𑀳𑀽 𑀪𑀯𑀺𑀲𑁆𑀲𑀦𑁆𑀢𑀺, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑁄𑀴𑀲 𑀕𑁄𑀡𑁂 𑀅𑀮𑀗𑁆𑀓𑀸𑀭𑀪𑀡𑁆𑀟𑀓𑀁 𑀦𑀺𑀯𑀸𑀲𑀕𑀸𑀫𑀜𑁆𑀘𑀲𑁆𑀲 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀩𑁆𑀭𑀸𑀳𑁆𑀫𑀡𑀁 𑀉𑀬𑁆𑀬𑁄𑀚𑁂𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀮𑀸𑀴𑀼𑀤𑀸𑀬𑀻, 𑀲𑁄𑀫𑀤𑀢𑁆𑀢𑁄 𑀧𑀦 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 ¶ 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀅𑀢𑁆𑀢𑀦𑁄 𑀅𑀧𑁆𑀧𑀲𑁆𑀲𑀼𑀢𑀢𑀸𑀬 𑀅𑀜𑁆𑀜𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀫𑁂𑀯 𑀯𑀤𑀢𑀺. 𑀅𑀧𑁆𑀧𑀲𑁆𑀲𑀼𑀢𑀧𑀼𑀭𑀺𑀲𑁄 𑀳𑀺 𑀩𑀮𑀺𑀩𑀤𑁆𑀤𑀲𑀤𑀺𑀲𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀺;

𑀫𑀁𑀲𑀸𑀦𑀺 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀧𑀜𑁆𑀜𑀸 𑀢𑀲𑁆𑀲 𑀦 𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 ¶ 𑀅𑀧𑁆𑀧𑀲𑁆𑀲𑀼𑀢𑀸𑀬𑀦𑁆𑀢𑀺 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀧𑀡𑁆𑀡𑀸𑀲𑀓𑀸𑀦𑀁. 𑀅𑀣 𑀯𑀸 𑀧𑀦 𑀯𑀕𑁆𑀕𑀸𑀦𑀁 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀼𑀢𑁆𑀢𑀦𑁆𑀢𑀸𑀦𑀁 𑀯𑀸𑀧𑀺 𑀅𑀪𑀸𑀯𑁂𑀦 𑀅𑀧𑁆𑀧𑀲𑁆𑀲𑀼𑀢𑁄 𑀅𑀬𑀁. 𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀉𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑁄𑀯. 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀻𑀢𑀺 𑀬𑀣𑀸 𑀳𑀺 𑀩𑀮𑀺𑀩𑀤𑁆𑀤𑁄 𑀚𑀻𑀭𑀫𑀸𑀦𑁄 𑀯𑀟𑁆𑀠𑀫𑀸𑀦𑁄 𑀦𑁂𑀯 𑀫𑀸𑀢𑀼, 𑀦 𑀧𑀺𑀢𑀼, 𑀦 𑀲𑁂𑀲𑀜𑀸𑀢𑀓𑀸𑀦𑀁 𑀅𑀢𑁆𑀣𑀸𑀬 𑀯𑀟𑁆𑀠𑀢𑀺, 𑀅𑀣 𑀔𑁄 𑀦𑀺𑀭𑀢𑁆𑀣𑀓𑀫𑁂𑀯 𑀚𑀻𑀭𑀢𑀺, 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀦 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀭𑁄𑀢𑀺, 𑀦 𑀆𑀘𑀭𑀺𑀬𑀯𑀢𑁆𑀢𑀁, 𑀦 𑀆𑀕𑀦𑁆𑀢𑀼𑀓𑀯𑀢𑁆𑀢𑀸𑀤𑀻𑀦𑀺, 𑀦 𑀪𑀸𑀯𑀦𑀸𑀭𑀸𑀫𑀢𑀁 𑀅𑀦𑀼𑀬𑀼𑀜𑁆𑀚𑀢𑀺, 𑀦𑀺𑀭𑀢𑁆𑀣𑀓𑀫𑁂𑀯 𑀚𑀻𑀭𑀢𑀺, 𑀫𑀁𑀲𑀸𑀦𑀺 𑀢𑀲𑁆𑀲 𑀯𑀟𑁆𑀠𑀦𑁆𑀢𑀻𑀢𑀺 𑀬𑀣𑀸 𑀩𑀮𑀺𑀩𑀤𑁆𑀤𑀲𑁆𑀲 ‘‘𑀬𑀼𑀕𑀦𑀗𑁆𑀕𑀮𑀸𑀤𑀻𑀦𑀺 𑀯𑀳𑀺𑀢𑀼𑀁 𑀅𑀲𑀫𑀢𑁆𑀣𑁄 𑀏𑀲𑁄’’𑀢𑀺 𑀅𑀭𑀜𑁆𑀜𑁂 𑀯𑀺𑀲𑁆𑀲𑀝𑁆𑀞𑀲𑁆𑀲 𑀢𑀢𑁆𑀣𑁂𑀯 𑀯𑀺𑀘𑀭𑀦𑁆𑀢𑀲𑁆𑀲 ¶ 𑀔𑀸𑀤𑀦𑁆𑀢𑀲𑁆𑀲 𑀧𑀺𑀯𑀦𑁆𑀢𑀲𑁆𑀲 𑀫𑀁𑀲𑀸𑀦𑀺 𑀯𑀟𑁆𑀠𑀦𑁆𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲𑀸𑀧𑀺 𑀉𑀧𑀚𑁆𑀛𑀸𑀬𑀸𑀤𑀻𑀳𑀺 𑀯𑀺𑀲𑁆𑀲𑀝𑁆𑀞𑀲𑁆𑀲 𑀲𑀗𑁆𑀖𑀁 𑀦𑀺𑀲𑁆𑀲𑀸𑀬 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀉𑀤𑁆𑀥𑀯𑀺𑀭𑁂𑀘𑀦𑀸𑀤𑀻𑀦𑀺 𑀓𑀢𑁆𑀯𑀸 𑀓𑀸𑀬𑀁 𑀧𑁄𑀲𑁂𑀦𑁆𑀢𑀲𑁆𑀲 ¶ 𑀫𑀁𑀲𑀸𑀦𑀺 𑀯𑀟𑁆𑀠𑀦𑁆𑀢𑀺, 𑀣𑀽𑀮𑀲𑀭𑀻𑀭𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀧𑀜𑁆𑀜𑀸 𑀢𑀲𑁆𑀲𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀦𑀲𑁆𑀲 𑀧𑀜𑁆𑀜𑀸 𑀏𑀓𑀗𑁆𑀕𑀼𑀮𑀫𑀢𑁆𑀢𑀸𑀧𑀺 𑀦 𑀯𑀟𑁆𑀠𑀢𑀺, 𑀅𑀭𑀜𑁆𑀜𑁂 𑀧𑀦 𑀕𑀘𑁆𑀙𑀮𑀢𑀸𑀤𑀻𑀦𑀺 𑀯𑀺𑀬 𑀙 𑀤𑁆𑀯𑀸𑀭𑀸𑀦𑀺 𑀦𑀺𑀲𑁆𑀲𑀸𑀬 𑀢𑀡𑁆𑀳𑀸 𑀘𑁂𑀯 𑀦𑀯𑀯𑀺𑀥𑀫𑀸𑀦𑁄 𑀘 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀫𑀳𑀸𑀚𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀻𑀢𑀺.

𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀉𑀤𑀸𑀦𑀯𑀲𑁂𑀦 𑀉𑀤𑀸𑀦𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀓𑀣𑁂𑀲𑀺.

𑀲𑁄 𑀳𑀺 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀘𑁆𑀙𑀸𑀤𑀓𑀁 𑀢𑀫𑀁 𑀧𑀤𑀸𑀮𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀢𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀲𑀫𑁆𑀫𑀲𑀦𑁆𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀦𑁂𑀓𑁂𑀳𑀺 𑀩𑀼𑀤𑁆𑀥𑀲𑀢𑀲𑀳𑀲𑁆𑀲𑁂𑀳𑀺 𑀅𑀯𑀺𑀚𑀳𑀺𑀢𑀁 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 ¶ ¶ 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺.

𑀢𑀢𑁆𑀣 𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄𑀢𑀺 𑀅𑀳𑀁 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀕𑁂𑀳𑀲𑁆𑀲 𑀓𑀸𑀭𑀓𑀁 𑀢𑀡𑁆𑀳𑀸𑀯𑀟𑁆𑀠𑀓𑀺𑀁 𑀕𑀯𑁂𑀲𑀦𑁆𑀢𑁄 𑀬𑁂𑀦 𑀜𑀸𑀡𑁂𑀦 𑀲𑀓𑁆𑀓𑀸 𑀢𑀁 𑀤𑀝𑁆𑀞𑀼𑀁 ¶ , 𑀢𑀲𑁆𑀲 𑀩𑁄𑀥𑀺𑀜𑀸𑀡𑀲𑁆𑀲𑀢𑁆𑀣𑀸𑀬 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀢𑀁 𑀇𑀫𑀁 𑀲𑀁𑀲𑀸𑀭𑀯𑀝𑁆𑀝𑀁 𑀅𑀦𑀺𑀩𑁆𑀩𑀺𑀲𑀁 𑀢𑀁 𑀜𑀸𑀡𑀁 𑀅𑀯𑀺𑀦𑁆𑀤𑀦𑁆𑀢𑁄 𑀅𑀮𑀪𑀦𑁆𑀢𑁄𑀬𑁂𑀯 𑀲𑀦𑁆𑀥𑀸𑀯𑀺𑀲𑁆𑀲𑀁 𑀲𑀁𑀲𑀭𑀺𑀁, 𑀅𑀧𑀭𑀸𑀧𑀭𑀁 𑀅𑀦𑀼𑀯𑀺𑀘𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀇𑀤𑀁 𑀕𑀳𑀓𑀸𑀭𑀓𑀕𑀯𑁂𑀲𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀫𑀺𑀲𑁆𑀲𑀺𑀢𑀸𑀬 𑀚𑀸𑀢𑀺 𑀦𑀸𑀫𑁂𑀲𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀕𑀦𑁆𑀢𑀼𑀁 𑀤𑀼𑀓𑁆𑀔𑀸, 𑀦 𑀘 𑀲𑀸 𑀢𑀲𑁆𑀫𑀺𑀁 𑀅𑀤𑀺𑀝𑁆𑀞𑁂 𑀦𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀁 𑀕𑀯𑁂𑀲𑀦𑁆𑀢𑁄 𑀲𑀦𑁆𑀥𑀸𑀯𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑁄𑀲𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁂𑀦 𑀫𑀬𑀸 𑀇𑀤𑀸𑀦𑀺 𑀤𑀺𑀝𑁆𑀞𑁄𑀲𑀺. 𑀧𑀼𑀦 𑀕𑁂𑀳𑀦𑁆𑀢𑀺 𑀧𑀼𑀦 𑀇𑀫𑀲𑁆𑀫𑀺𑀁 𑀲𑀁𑀲𑀸𑀭𑀯𑀝𑁆𑀝𑁂 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀫𑀫 𑀕𑁂𑀳𑀁 𑀦 𑀓𑀸𑀳𑀲𑀺. 𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸𑀢𑀺 𑀢𑀯 𑀲𑀩𑁆𑀩𑀸 𑀅𑀯𑀲𑁂𑀲𑀸 𑀓𑀺𑀮𑁂𑀲𑀨𑀸𑀲𑀼𑀓𑀸 𑀫𑀬𑀸 𑀪𑀕𑁆𑀕𑀸. 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀦𑁆𑀢𑀺 𑀇𑀫𑀲𑁆𑀲 𑀢𑀬𑀸 𑀓𑀢𑀲𑁆𑀲 𑀅𑀢𑁆𑀢𑀪𑀸𑀯𑀕𑁂𑀳𑀲𑁆𑀲 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 ¶ 𑀓𑀡𑁆𑀡𑀺𑀓𑀫𑀡𑁆𑀟𑀮𑀫𑁆𑀧𑀺 𑀫𑀬𑀸 𑀯𑀺𑀤𑁆𑀥𑀁𑀲𑀺𑀢𑀁. 𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀇𑀤𑀸𑀦𑀺 𑀫𑀫 𑀘𑀺𑀢𑁆𑀢𑀁 𑀯𑀺𑀲𑀗𑁆𑀔𑀸𑀭𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀢𑀁 𑀅𑀦𑀼𑀧𑀯𑀺𑀝𑁆𑀞𑀁. 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸𑀢𑀺 𑀢𑀡𑁆𑀳𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀅𑀥𑀺𑀕𑀢𑁄𑀲𑁆𑀫𑀻𑀢𑀺.

𑁯. 𑀫𑀳𑀸𑀥𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼

𑀅𑀘𑀭𑀺𑀢𑁆𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀥𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀫𑁆𑀳𑀸𑀓𑀁 𑀓𑀼𑀮𑁂 𑀫𑀳𑀸𑀪𑁄𑀕𑀓𑁆𑀔𑀦𑁆𑀥𑁄, 𑀧𑀼𑀢𑁆𑀢𑀲𑁆𑀲 𑀦𑁄 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀁 𑀓𑀭𑀺𑀲𑁆𑀲𑀸𑀫, 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺. 𑀢𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀫𑀢𑁆𑀢𑀫𑁂𑀯 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀜𑁆𑀜𑀲𑁆𑀫𑀺𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀓𑀼𑀮𑁂 𑀏𑀓𑀸 𑀥𑀻𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸𑀧𑀺 𑀫𑀸𑀢𑀸𑀧𑀺𑀢𑀭𑁄 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀫𑀢𑁆𑀢𑀫𑁂𑀯 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀢𑁂𑀲𑀁 𑀯𑀬𑀧𑁆𑀧𑀢𑁆𑀢𑀸𑀦𑀁 𑀆𑀯𑀸𑀳𑀯𑀺𑀯𑀸𑀳𑁄 𑀅𑀳𑁄𑀲𑀺. 𑀅𑀣 𑀦𑁂𑀲𑀁 𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀤𑁆𑀯𑁂𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀏𑀓𑀲𑁆𑀫𑀺𑀁𑀬𑁂𑀯 ¶ 𑀕𑁂𑀳𑁂 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀭𑀜𑁆𑀜𑁄 ¶ 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀅𑀣 𑀢𑀲𑁆𑀫𑀺𑀁 𑀦𑀕𑀭𑁂 𑀥𑀼𑀢𑁆𑀢𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑀸𑀬𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀼𑀭𑀸𑀲𑁄𑀡𑁆𑀟𑁄 𑀪𑀯𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀺, 𑀉𑀕𑁆𑀕𑀡𑁆𑀳𑀸𑀧𑁂𑀫 𑀦𑀁 𑀲𑀼𑀭𑀸𑀲𑁄𑀡𑁆𑀟𑀪𑀸𑀯’’𑀦𑁆𑀢𑀺. 𑀢𑁂 𑀲𑀼𑀭𑀁 𑀆𑀤𑀸𑀬 𑀔𑀚𑁆𑀚𑀓𑀫𑀁𑀲𑁂 𑀘𑁂𑀯 𑀮𑁄𑀡𑀲𑀓𑁆𑀔𑀭𑀸 ¶ 𑀘 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 𑀫𑀽𑀮𑀓𑀦𑁆𑀤𑁂 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀭𑀸𑀚𑀓𑀼𑀮𑀢𑁄 𑀆𑀕𑀘𑁆𑀙𑀦𑁆𑀢𑀲𑁆𑀲 𑀫𑀕𑁆𑀕𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀮𑁄𑀡𑀲𑀓𑁆𑀔𑀭𑀁 𑀫𑀼𑀔𑁂 𑀔𑀺𑀧𑀺𑀢𑁆𑀯𑀸 𑀫𑀽𑀮𑀓𑀦𑁆𑀤𑀁 𑀟𑀁𑀲𑀺𑀢𑁆𑀯𑀸 ‘‘𑀯𑀲𑁆𑀲𑀲𑀢𑀁 𑀚𑀻𑀯 𑀲𑀸𑀫𑀺, 𑀲𑁂𑀝𑁆𑀞𑀺𑀧𑀼𑀢𑁆𑀢, 𑀢𑀁 𑀦𑀺𑀲𑁆𑀲𑀸𑀬 𑀫𑀬𑀁 𑀔𑀸𑀤𑀦𑀧𑀺𑀯𑀦𑀲𑀫𑀢𑁆𑀣𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀁 𑀘𑀽𑀴𑀽𑀧𑀝𑁆𑀞𑀸𑀓𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀏𑀢𑁂 𑀧𑀺𑀯𑀦𑁆𑀢𑀻’’𑀢𑀺. 𑀏𑀓𑀁 𑀧𑀸𑀦𑀓𑀁, 𑀲𑀸𑀫𑀻𑀢𑀺. 𑀫𑀦𑀸𑀧𑀚𑀸𑀢𑀺𑀓𑀁 𑀏𑀢𑀦𑁆𑀢𑀺. 𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀚𑀻𑀯𑀮𑁄𑀓𑁂 𑀇𑀫𑀺𑀦𑀸 𑀲𑀤𑀺𑀲𑀁 𑀧𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀲𑁄 ‘‘𑀏𑀯𑀁 𑀲𑀦𑁆𑀢𑁂 𑀫𑀬𑀸𑀧𑀺 𑀧𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀣𑁄𑀓𑀁 𑀣𑁄𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀯𑀢𑀺. 𑀅𑀣𑀲𑁆𑀲 𑀦𑀘𑀺𑀭𑀲𑁆𑀲𑁂𑀯 𑀢𑁂 𑀥𑀼𑀢𑁆𑀢𑀸 𑀧𑀺𑀯𑀦𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀭𑀺𑀯𑀸𑀭𑁄 𑀫𑀳𑀸 𑀅𑀳𑁄𑀲𑀺. 𑀲𑁄 𑀲𑀢𑁂𑀦𑀧𑀺 𑀲𑀢𑀤𑁆𑀯𑀬𑁂𑀦𑀧𑀺 𑀲𑀼𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀯𑀦𑁆𑀢𑁄 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 𑀓𑀳𑀸𑀧𑀡𑀭𑀸𑀲𑀺𑀁 𑀞𑀧𑁂𑀢𑁆𑀯𑀸 𑀲𑀼𑀭𑀁 𑀧𑀺𑀯𑀦𑁆𑀢𑁄 ‘‘𑀇𑀫𑀺𑀦𑀸 𑀫𑀸𑀮𑀸 𑀆𑀳𑀭𑀣, 𑀇𑀫𑀺𑀦𑀸 𑀕𑀦𑁆𑀥𑁂, 𑀅𑀬𑀁 𑀚𑀦𑁄 𑀚𑀼𑀢𑁂 𑀙𑁂𑀓𑁄, 𑀅𑀬𑀁 𑀦𑀘𑁆𑀘𑁂, 𑀅𑀬𑀁 𑀕𑀻𑀢𑁂, 𑀅𑀬𑀁 𑀯𑀸𑀤𑀺𑀢𑁂. 𑀇𑀫𑀲𑁆𑀲 𑀲𑀳𑀲𑁆𑀲𑀁 𑀤𑁂𑀣, 𑀇𑀫𑀲𑁆𑀲 𑀤𑁆𑀯𑁂 𑀲𑀳𑀲𑁆𑀲𑀸𑀦𑀻’’𑀢𑀺 𑀏𑀯𑀁 𑀯𑀺𑀓𑀺𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀔𑁂𑀧𑁂𑀢𑁆𑀯𑀸 ‘‘𑀔𑀻𑀡𑀁 𑀢𑁂, 𑀲𑀸𑀫𑀺, 𑀥𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀪𑀭𑀺𑀬𑀸𑀬 𑀫𑁂 𑀲𑀦𑁆𑀢𑀓𑀁 𑀦𑀢𑁆𑀣𑀻𑀢𑀺. 𑀅𑀢𑁆𑀣𑀺, 𑀲𑀸𑀫𑀻𑀢𑀺 ¶ . 𑀢𑁂𑀦 𑀳𑀺 𑀢𑀁 𑀆𑀳𑀭𑀣𑀸𑀢𑀺. 𑀢𑀫𑁆𑀧𑀺 𑀢𑀣𑁂𑀯 𑀔𑁂𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀔𑁂𑀢𑁆𑀢𑀆𑀭𑀸𑀫𑀼𑀬𑁆𑀬𑀸𑀦𑀬𑁄𑀕𑁆𑀕𑀸𑀤𑀺𑀓𑀫𑁆𑀧𑀺 𑀅𑀦𑁆𑀢𑀫𑀲𑁄 𑀪𑀸𑀚𑀦𑀪𑀡𑁆𑀟𑀓𑀫𑁆𑀧𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀦𑀺𑀲𑀻𑀤𑀦𑀫𑁆𑀧𑀺 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀔𑀸𑀤𑀺. 𑀅𑀣 𑀦𑀁 𑀫𑀳𑀮𑁆𑀮𑀓𑀓𑀸𑀮𑁂 𑀬𑁂𑀳𑀺𑀲𑁆𑀲 𑀓𑀼𑀮𑀲𑀦𑁆𑀢𑀓𑀁 𑀕𑁂𑀳𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑀁, 𑀢𑁂 𑀢𑀁 𑀕𑁂𑀳𑀸 𑀦𑀻𑀳𑀭𑀺𑀁𑀲𑀼. 𑀲𑁄 𑀪𑀭𑀺𑀬𑀁 𑀆𑀤𑀸𑀬 𑀧𑀭𑀚𑀦𑀲𑁆𑀲 𑀕𑁂𑀳𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀓𑀧𑀸𑀮𑀔𑀡𑁆𑀟𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀚𑀦𑀲𑁆𑀲 𑀉𑀘𑁆𑀙𑀺𑀝𑁆𑀞𑀓𑀁 𑀪𑀼𑀜𑁆𑀚𑀺𑀢𑀼𑀁 𑀆𑀭𑀪𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀆𑀲𑀦𑀲𑀸𑀮𑀸𑀬 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀤𑀺𑀬𑁆𑀬𑀫𑀸𑀦𑀁 𑀉𑀘𑁆𑀙𑀺𑀝𑁆𑀞𑀓𑀪𑁄𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀅𑀣 𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀲𑀺𑀢𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 ‘‘𑀧𑀲𑁆𑀲𑀸𑀦𑀦𑁆𑀤, 𑀇𑀫𑀁 𑀫𑀳𑀸𑀥𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀤𑁆𑀯𑁂𑀅𑀲𑀻𑀢𑀺𑀓𑁄𑀝𑀺𑀥𑀦𑀁 ¶ 𑀔𑁂𑀧𑁂𑀢𑁆𑀯𑀸 𑀪𑀭𑀺𑀬𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀁. 𑀲𑀘𑁂 𑀳𑀺 𑀅𑀬𑀁 𑀧𑀞𑀫𑀯𑀬𑁂 𑀪𑁄𑀕𑁂 𑀅𑀔𑁂𑀧𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲, 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀕𑁆𑀕𑀲𑁂𑀝𑁆𑀞𑀺 𑀅𑀪𑀯𑀺𑀲𑁆𑀲. 𑀲𑀘𑁂 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲, 𑀪𑀭𑀺𑀬𑀸𑀧𑀺𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲. 𑀲𑀘𑁂 𑀫𑀚𑁆𑀛𑀺𑀫𑀯𑀬𑁂 𑀪𑁄𑀕𑁂 𑀅𑀔𑁂𑀧𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲, 𑀤𑀼𑀢𑀺𑀬𑀲𑁂𑀝𑁆𑀞𑀺 𑀅𑀪𑀯𑀺𑀲𑁆𑀲, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄 𑀅𑀦𑀸𑀕𑀸𑀫𑀻 𑀅𑀪𑀯𑀺𑀲𑁆𑀲. 𑀪𑀭𑀺𑀬𑀸𑀧𑀺𑀲𑁆𑀲 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲. 𑀲𑀘𑁂 𑀧𑀘𑁆𑀙𑀺𑀫𑀯𑀬𑁂 𑀪𑁄𑀕𑁂 𑀅𑀔𑁂𑀧𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲, 𑀢𑀢𑀺𑀬𑀲𑁂𑀝𑁆𑀞𑀺 𑀅𑀪𑀯𑀺𑀲𑁆𑀲, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄𑀧𑀺 ¶ 𑀲𑀓𑀤𑀸𑀕𑀸𑀫𑀻 𑀅𑀪𑀯𑀺𑀲𑁆𑀲 ¶ , 𑀪𑀭𑀺𑀬𑀸𑀧𑀺𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲. 𑀇𑀤𑀸𑀦𑀺 𑀧𑀦𑁂𑀲 𑀕𑀺𑀳𑀺𑀪𑁄𑀕𑀢𑁄𑀧𑀺 𑀧𑀭𑀺𑀳𑀻𑀦𑁄 𑀲𑀸𑀫𑀜𑁆𑀜𑀢𑁄𑀧𑀺. 𑀧𑀭𑀺𑀳𑀸𑀬𑀺𑀢𑁆𑀯𑀸 𑀘 𑀧𑀦 𑀲𑀼𑀓𑁆𑀔𑀧𑀮𑁆𑀮𑀮𑁂 𑀓𑁄𑀜𑁆𑀘𑀲𑀓𑀼𑀡𑁄 𑀯𑀺𑀬 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀮𑀤𑁆𑀥𑀸 𑀬𑁄𑀩𑁆𑀩𑀦𑁂 𑀥𑀦𑀁;

𑀚𑀺𑀡𑁆𑀡𑀓𑁄𑀜𑁆𑀘𑀸𑀯 𑀛𑀸𑀬𑀦𑁆𑀢𑀺, 𑀔𑀻𑀡𑀫𑀘𑁆𑀙𑁂𑀯 𑀧𑀮𑁆𑀮𑀮𑁂.

‘‘𑀅𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀮𑀤𑁆𑀥𑀸 𑀬𑁄𑀩𑁆𑀩𑀦𑁂 𑀥𑀦𑀁;

𑀲𑁂𑀦𑁆𑀢𑀺 𑀘𑀸𑀧𑀸𑀢𑀺𑀔𑀻𑀡𑀸𑀯, 𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦’’𑀦𑁆𑀢𑀺.

𑀢𑀢𑁆𑀣 𑀅𑀘𑀭𑀺𑀢𑁆𑀯𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀅𑀯𑀲𑀺𑀢𑁆𑀯𑀸. 𑀬𑁄𑀩𑁆𑀩𑀦𑁂𑀢𑀺 𑀅𑀦𑀼𑀧𑁆𑀧𑀦𑁆𑀦𑁂 𑀯𑀸 𑀪𑁄𑀕𑁂 𑀉𑀧𑁆𑀧𑀸𑀤𑁂𑀢𑀼𑀁 𑀉𑀧𑁆𑀧𑀦𑁆𑀦𑁂 𑀯𑀸 𑀪𑁄𑀕𑁂 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑁂 𑀥𑀦𑀫𑁆𑀧𑀺 𑀅𑀮𑀪𑀺𑀢𑁆𑀯𑀸. 𑀔𑀻𑀡𑀫𑀘𑁆𑀙𑁂𑀢𑀺 𑀢𑁂 𑀏𑀯𑀭𑀽𑀧𑀸 𑀩𑀸𑀮𑀸 𑀉𑀤𑀓𑀲𑁆𑀲 𑀅𑀪𑀸𑀯𑀸 𑀔𑀻𑀡𑀫𑀘𑁆𑀙𑁂 𑀧𑀮𑁆𑀮𑀮𑁂 𑀧𑀭𑀺𑀓𑁆𑀔𑀻𑀡𑀧𑀢𑁆𑀢𑀸 𑀚𑀺𑀡𑁆𑀡𑀓𑁄𑀜𑁆𑀘𑀸 𑀯𑀺𑀬 𑀅𑀯𑀛𑀸𑀬𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀮𑁆𑀮𑀮𑁂 𑀉𑀤𑀓𑀲𑁆𑀲 𑀅𑀪𑀸𑀯𑁄 𑀯𑀺𑀬 𑀳𑀺 𑀇𑀫𑁂𑀲𑀁 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑁄, 𑀫𑀘𑁆𑀙𑀸𑀦𑀁 𑀔𑀻𑀡𑀪𑀸𑀯𑁄 𑀯𑀺𑀬 𑀇𑀫𑁂𑀲𑀁 𑀪𑁄𑀕𑀸𑀦𑀁 𑀅𑀪𑀸𑀯𑁄, 𑀔𑀻𑀡𑀧𑀢𑁆𑀢𑀸𑀦𑀁 𑀓𑁄𑀜𑁆𑀘𑀸𑀦𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀫𑀦𑀸𑀪𑀸𑀯𑁄 𑀯𑀺𑀬 𑀇𑀫𑁂𑀲𑀁 𑀇𑀤𑀸𑀦𑀺 𑀚𑀮𑀣𑀮𑀧𑀣𑀸𑀤𑀻𑀳𑀺 𑀪𑁄𑀕𑁂 𑀲𑀡𑁆𑀞𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁄. 𑀢𑀲𑁆𑀫𑀸 𑀢𑁂 𑀔𑀻𑀡𑀧𑀢𑁆𑀢𑀸 𑀓𑁄𑀜𑁆𑀘𑀸 𑀯𑀺𑀬 𑀏𑀢𑁆𑀣𑁂𑀯 𑀩𑀚𑁆𑀛𑀺𑀢𑁆𑀯𑀸 𑀅𑀯𑀛𑀸𑀬𑀦𑁆𑀢𑀻𑀢𑀺. 𑀘𑀸𑀧𑀸𑀢𑀺𑀔𑀻𑀡𑀸𑀯𑀸𑀢𑀺 𑀘𑀸𑀧𑀢𑁄 𑀅𑀢𑀺𑀔𑀻𑀡𑀸, 𑀘𑀸𑀧𑀸 𑀯𑀺𑀦𑀺𑀫𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀘𑀸𑀧𑀸 𑀯𑀺𑀦𑀺𑀫𑀼𑀢𑁆𑀢𑀸 𑀲𑀭𑀸 𑀬𑀣𑀸𑀯𑁂𑀕𑀁 𑀕𑀦𑁆𑀢𑁆𑀯𑀸 𑀧𑀢𑀺𑀢𑀸, 𑀢𑀁 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑁂 ¶ 𑀅𑀲𑀢𑀺 𑀢𑀢𑁆𑀣𑁂𑀯 𑀉𑀧𑀘𑀺𑀓𑀸𑀦𑀁 𑀪𑀢𑁆𑀢𑀁 𑀳𑁄𑀦𑁆𑀢𑀺, 𑀏𑀯𑀁 𑀇𑀫𑁂𑀧𑀺 𑀢𑀬𑁄 ¶ 𑀯𑀬𑁂 𑀅𑀢𑀺𑀓𑁆𑀓𑀦𑁆𑀢𑀸 𑀇𑀤𑀸𑀦𑀺 𑀅𑀢𑁆𑀢𑀸𑀦𑀁 𑀉𑀤𑁆𑀥𑀭𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀫𑀭𑀡𑀁 𑀉𑀧𑀕𑀫𑀺𑀲𑁆𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁂𑀦𑁆𑀢𑀺 𑀘𑀸𑀧𑀸𑀢𑀺𑀔𑀻𑀡𑀸𑀯𑀸’’𑀢𑀺. 𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦𑀦𑁆𑀢𑀺 ‘‘𑀇𑀢𑀺 𑀅𑀫𑁆𑀳𑁂𑀳𑀺 𑀔𑀸𑀤𑀺𑀢𑀁 𑀇𑀢𑀺 𑀧𑀻𑀢’’𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀔𑀸𑀤𑀺𑀢𑀧𑀺𑀯𑀺𑀢𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀤𑀻𑀦𑀺 𑀅𑀦𑀼𑀢𑁆𑀣𑀼𑀦𑀦𑁆𑀢𑀸 𑀲𑁄𑀘𑀦𑁆𑀢𑀸 𑀅𑀦𑀼𑀲𑁄𑀘𑀦𑁆𑀢𑀸 𑀲𑁂𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀥𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼 𑀦𑀯𑀫𑀁.

𑀚𑀭𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑁆𑀢𑀸𑀦𑀜𑁆𑀘𑁂𑀢𑀺 ¶ ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀪𑁂𑀲𑀓𑀴𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀧𑀣𑀯𑀻𑀢𑀮𑁂 𑀅𑀜𑁆𑀜𑁂𑀳𑀺 𑀧𑀸𑀲𑀸𑀤𑁂𑀳𑀺 𑀅𑀲𑀤𑀺𑀲𑀭𑀽𑀧𑀁 𑀆𑀓𑀸𑀲𑁂 𑀉𑀧𑁆𑀧𑀢𑀫𑀸𑀦𑀁 𑀯𑀺𑀬 𑀓𑁄𑀓𑀦𑀼𑀤𑀁 𑀦𑀸𑀫 𑀧𑀸𑀲𑀸𑀤𑀁 𑀓𑀸𑀭𑁂𑀢𑁆𑀯𑀸 𑀯𑀟𑁆𑀠𑀓𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀢𑀬𑀸 𑀅𑀜𑁆𑀜𑀢𑁆𑀣𑀸𑀧𑀺 𑀏𑀯𑀭𑀽𑀧𑁄 𑀧𑀸𑀲𑀸𑀤𑁄 𑀓𑀢𑀧𑀼𑀩𑁆𑀩𑁄, 𑀉𑀤𑀸𑀳𑀼 𑀧𑀞𑀫𑀲𑀺𑀧𑁆𑀧𑀫𑁂𑀯 𑀢𑁂 𑀇𑀤’’𑀦𑁆𑀢𑀺. ‘‘𑀧𑀞𑀫𑀲𑀺𑀧𑁆𑀧𑀫𑁂𑀯, 𑀤𑁂𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀬𑀁 𑀅𑀜𑁆𑀜𑀲𑁆𑀲𑀧𑀺 𑀏𑀯𑀭𑀽𑀧𑀁 𑀧𑀸𑀲𑀸𑀤𑀁 𑀓𑀭𑀺𑀲𑁆𑀲𑀢𑀺, 𑀅𑀬𑀁 𑀧𑀸𑀲𑀸𑀤𑁄 𑀅𑀦𑀘𑁆𑀙𑀭𑀺𑀬𑁄 𑀪𑀯𑀺𑀲𑁆𑀲𑀢𑀺. 𑀇𑀫𑀁 𑀫𑀬𑀸 𑀫𑀸𑀭𑁂𑀢𑀼𑀁 𑀯𑀸 𑀳𑀢𑁆𑀣𑀧𑀸𑀤𑁂 𑀯𑀸𑀲𑁆𑀲 𑀙𑀺𑀦𑁆𑀤𑀺𑀢𑀼𑀁 𑀅𑀓𑁆𑀔𑀻𑀦𑀺 𑀯𑀸 𑀉𑀧𑁆𑀧𑀸𑀝𑁂𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀅𑀜𑁆𑀜𑀲𑁆𑀲 𑀧𑀸𑀲𑀸𑀤𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀧𑀺𑀬𑀲𑀳𑀸𑀬𑀓𑀲𑁆𑀲 𑀲𑀜𑁆𑀚𑀻𑀯𑀓𑀧𑀼𑀢𑁆𑀢𑀲𑁆𑀲 𑀦𑀸𑀫 𑀫𑀸𑀡𑀯𑀓𑀲𑁆𑀲 𑀓𑀣𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀏𑀲 𑀯𑀟𑁆𑀠𑀓𑀺𑀁 𑀦𑀸𑀲𑁂𑀲𑁆𑀲𑀢𑀺, 𑀅𑀦𑀕𑁆𑀖𑁄 𑀲𑀺𑀧𑁆𑀧𑀻, 𑀲𑁄 𑀫𑀬𑀺 𑀧𑀲𑁆𑀲𑀦𑁆𑀢𑁂 𑀫𑀸 𑀦𑀲𑁆𑀲𑀢𑀼, 𑀲𑀜𑁆𑀜𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀸𑀲𑀸𑀤𑁂 𑀢𑁂 𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁, 𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀓𑀼𑀫𑀸𑀭𑁄 𑀢𑀁 𑀦𑀸𑀲𑁂𑀢𑀼𑀓𑀸𑀫𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺 𑀆𑀳 ¶ . 𑀯𑀟𑁆𑀠𑀓𑀻𑀧𑀺 ‘‘𑀪𑀤𑁆𑀤𑀓𑀁 𑀢𑁂, 𑀲𑀸𑀫𑀺, 𑀓𑀢𑀁 𑀫𑀫 𑀆𑀭𑁄𑀘𑁂𑀦𑁆𑀢𑁂𑀦, 𑀅𑀳𑀫𑁂𑀢𑁆𑀣 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀺𑀁, 𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀧𑀸𑀲𑀸𑀤𑁂 𑀓𑀫𑁆𑀫𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀭𑀸𑀚𑀓𑀼𑀫𑀸𑀭𑁂𑀦 𑀧𑀼𑀝𑁆𑀞𑁄 ‘‘𑀦 𑀢𑀸𑀯, 𑀤𑁂𑀯, 𑀦𑀺𑀝𑁆𑀞𑀺𑀢𑀁, 𑀩𑀳𑀼 𑀅𑀯𑀲𑀺𑀝𑁆𑀞’’𑀦𑁆𑀢𑀺 𑀆𑀳. 𑀓𑀺𑀁 𑀓𑀫𑁆𑀫𑀁 𑀦𑀸𑀫 𑀅𑀯𑀲𑀺𑀝𑁆𑀞𑀦𑁆𑀢𑀺? 𑀧𑀘𑁆𑀙𑀸, 𑀤𑁂𑀯, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀤𑀸𑀭𑀽𑀦𑀺 𑀢𑀸𑀯 𑀆𑀳𑀭𑀸𑀧𑁂𑀣𑀸𑀢𑀺. 𑀓𑀺𑀁 𑀤𑀸𑀭𑀽𑀦𑀺 𑀦𑀸𑀫𑀸𑀢𑀺? 𑀦𑀺𑀲𑁆𑀲𑀸𑀭𑀸𑀦𑀺 𑀲𑀼𑀓𑁆𑀔𑀤𑀸𑀭𑀽𑀦𑀺, 𑀤𑁂𑀯𑀸𑀢𑀺. 𑀲𑁄 𑀆𑀳𑀭𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀦𑀁 𑀆𑀳 𑁋 ‘‘𑀤𑁂𑀯, 𑀢𑁂 𑀇𑀢𑁄 𑀧𑀝𑁆𑀞𑀸𑀬 𑀫𑀫 𑀲𑀦𑁆𑀢𑀺𑀓𑀁 𑀦𑀸𑀕𑀦𑁆𑀢𑀩𑁆𑀩𑀁. 𑀓𑀺𑀁 𑀓𑀸𑀭𑀡𑀸? 𑀲𑀼𑀔𑀼𑀫𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀲𑁆𑀲 𑀫𑁂 𑀓𑀫𑁆𑀫𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀆𑀳𑀸𑀭𑀯𑁂𑀮𑀸𑀬𑀁 𑀧𑀦 𑀫𑁂 𑀪𑀭𑀺𑀬𑀸𑀯 𑀆𑀳𑀸𑀭𑀁 𑀆𑀳𑀭𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀓𑀼𑀫𑀸𑀭𑁄𑀧𑀺 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀲𑁄𑀧𑀺 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀸𑀦𑀺 𑀤𑀸𑀭𑀽𑀦𑀺 𑀢𑀘𑁆𑀙𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀲𑁆𑀲 𑀅𑀦𑁆𑀢𑁄 𑀦𑀺𑀲𑀻𑀤𑀦𑀬𑁄𑀕𑁆𑀕𑀁 𑀕𑀭𑀼𑀴𑀲𑀓𑀼𑀡𑀁 𑀓𑀢𑁆𑀯𑀸 𑀆𑀳𑀸𑀭𑀯𑁂𑀮𑀸𑀬 𑀧𑀦 𑀪𑀭𑀺𑀬𑀁 𑀆𑀳 𑁋 ‘‘𑀕𑁂𑀳𑁂 𑀯𑀺𑀚𑁆𑀚𑀫𑀸𑀦𑀓𑀁 𑀲𑀩𑁆𑀩𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 ¶ 𑀕𑀡𑁆𑀳𑀸𑀳𑀻’’𑀢𑀺. 𑀭𑀸𑀚𑀓𑀼𑀫𑀸𑀭𑁄𑀧𑀺 𑀯𑀟𑁆𑀠𑀓𑀺𑀲𑁆𑀲 𑀅𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀕𑁂𑀳𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀯𑀟𑁆𑀠𑀓𑀻𑀧𑀺 ¶ 𑀲𑀓𑀼𑀡𑀲𑁆𑀲 𑀦𑀺𑀝𑁆𑀞𑀺𑀢𑀓𑀸𑀮𑁂 ‘‘𑀅𑀚𑁆𑀚 𑀲𑀩𑁆𑀩𑁂𑀧𑀺 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀪𑀭𑀺𑀬𑀁 𑀯𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀧𑀼𑀢𑁆𑀢𑀤𑀸𑀭𑀁 𑀲𑀓𑀼𑀡𑀲𑁆𑀲 𑀓𑀼𑀘𑁆𑀙𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀸𑀢𑀧𑀸𑀦𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺. 𑀲𑁄 𑀢𑁂𑀲𑀁, ‘‘𑀤𑁂𑀯, 𑀯𑀟𑁆𑀠𑀓𑀻 𑀧𑀮𑀸𑀬𑀢𑀻’’𑀢𑀺 𑀓𑀦𑁆𑀤𑀦𑁆𑀢𑀸𑀦𑀁𑀬𑁂𑀯 𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀑𑀢𑀭𑀺𑀢𑁆𑀯𑀸 𑀏𑀓𑀁 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 𑀦𑀸𑀫 𑀚𑀸𑀢𑁄.

𑀭𑀸𑀚𑀓𑀼𑀫𑀸𑀭𑁄𑀧𑀺 ¶ ‘‘𑀧𑀸𑀲𑀸𑀤𑀫𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀸𑀲𑀸𑀤𑁂 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀺 𑀧𑀭𑀺𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀧𑀞𑀫𑀉𑀫𑁆𑀫𑀸𑀭𑀢𑁄 𑀧𑀝𑁆𑀞𑀸𑀬 𑀘𑁂𑀮𑀧𑀝𑀺𑀓𑀁 𑀧𑀢𑁆𑀣𑀭𑀺. 𑀲𑁄 𑀓𑀺𑀭 𑀅𑀧𑀼𑀢𑁆𑀢𑀓𑁄, 𑀢𑀲𑁆𑀫𑀸 ‘‘𑀲𑀘𑀸𑀳𑀁 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀮𑀘𑁆𑀙𑀸𑀫𑀺, 𑀲𑀢𑁆𑀣𑀸 𑀇𑀫𑀁 𑀅𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀢𑁆𑀣𑀭𑀺. 𑀲𑁄 𑀲𑀢𑁆𑀣𑀭𑀺 𑀆𑀕𑀢𑁂 𑀲𑀢𑁆𑀣𑀸𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀧𑀯𑀺𑀲𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀲𑀢𑁆𑀣𑀸 𑀦 𑀧𑀸𑀯𑀺𑀲𑀺, 𑀲𑁄 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺. 𑀲𑀢𑁆𑀣𑀸 𑀅𑀧𑀯𑀺𑀲𑀺𑀢𑁆𑀯𑀸𑀯 𑀆𑀦𑀦𑁆𑀤𑀢𑁆𑀣𑁂𑀭𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄 𑀑𑀮𑁄𑀓𑀺𑀢𑀲𑀜𑁆𑀜𑀸𑀬𑁂𑀯 𑀯𑀢𑁆𑀣𑀸𑀦𑀁 𑀅𑀦𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀢𑀁 ‘‘𑀲𑀁𑀳𑀭𑀢𑀼, 𑀭𑀸𑀚𑀓𑀼𑀫𑀸𑀭, 𑀤𑀼𑀲𑁆𑀲𑀸𑀦𑀺, 𑀦 𑀪𑀕𑀯𑀸 𑀘𑁂𑀮𑀧𑀝𑀺𑀓𑀁 𑀅𑀓𑁆𑀓𑀫𑀺𑀲𑁆𑀲𑀢𑀺, 𑀧𑀘𑁆𑀙𑀺𑀫𑀚𑀦𑀢𑀁 𑀢𑀣𑀸𑀕𑀢𑁄 𑀑𑀮𑁄𑀓𑁂𑀢𑀻’’𑀢𑀺 𑀤𑀼𑀲𑁆𑀲𑀸𑀦𑀺 𑀲𑀁𑀳𑀭𑀸𑀧𑁂𑀲𑀺. 𑀲𑁄 𑀤𑀼𑀲𑁆𑀲𑀸𑀦𑀺 𑀲𑀁𑀳𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑁂𑀦 𑀲𑀫𑁆𑀫𑀸𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀉𑀧𑀓𑀸𑀭𑀓𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀭𑀡𑀁 𑀕𑀢𑁄, 𑀓𑀼𑀘𑁆𑀙𑀺𑀕𑀢𑁄 𑀘 𑀓𑀺𑀭𑀫𑁆𑀳𑀺 𑀏𑀓𑀯𑀸𑀭𑀁 𑀲𑀭𑀡𑀁 𑀕𑀢𑁄, 𑀤𑀼𑀢𑀺𑀬𑀁 𑀢𑀭𑀼𑀡𑀤𑀸𑀭𑀓𑀓𑀸𑀮𑁂, 𑀢𑀢𑀺𑀬𑀁 𑀯𑀺𑀜𑁆𑀜𑀼𑀪𑀸𑀯𑀁 𑀧𑀢𑁆𑀢𑀓𑀸𑀮𑁂. 𑀢𑀲𑁆𑀲 𑀫𑁂 𑀓𑀲𑁆𑀫𑀸 𑀘𑁂𑀮𑀧𑀝𑀺𑀓𑀁 𑀦 𑀅𑀓𑁆𑀓𑀫𑀺𑀢𑁆𑀣𑀸’’𑀢𑀺? ‘‘𑀓𑀺𑀁 𑀧𑀦 𑀢𑁆𑀯𑀁, 𑀓𑀼𑀫𑀸𑀭, 𑀘𑀺𑀦𑁆𑀢𑁂𑀢𑁆𑀯𑀸 𑀘𑁂𑀮𑀸𑀦𑀺 𑀅𑀢𑁆𑀣𑀭𑀻’’𑀢𑀺? ‘‘𑀲𑀘𑁂 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀮𑀘𑁆𑀙𑀸𑀫𑀺, 𑀲𑀢𑁆𑀣𑀸 𑀫𑁂 𑀘𑁂𑀮𑀧𑀝𑀺𑀓𑀁 𑀅𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀇𑀤𑀁 𑀘𑀺𑀦𑁆𑀢𑁂𑀢𑁆𑀯𑀸, 𑀪𑀦𑁆𑀢𑁂𑀢𑀺. 𑀢𑁂𑀦𑁂𑀯𑀸𑀳𑀁 𑀢𑀁 𑀦 𑀅𑀓𑁆𑀓𑀫𑀺𑀦𑁆𑀢𑀺. ‘‘𑀓𑀺𑀁 𑀧𑀦𑀸𑀳𑀁, 𑀪𑀦𑁆𑀢𑁂, 𑀧𑀼𑀢𑁆𑀢𑀁 ¶ 𑀯𑀸 𑀥𑀻𑀢𑀭𑀁 𑀯𑀸 𑀦𑁂𑀯 𑀮𑀘𑁆𑀙𑀸𑀫𑀻’’𑀢𑀺? ‘‘𑀆𑀫, 𑀓𑀼𑀫𑀸𑀭𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀧𑀼𑀭𑀺𑀫𑀓𑀅𑀢𑁆𑀢𑀪𑀸𑀯𑁂 𑀚𑀸𑀬𑀸𑀬 𑀲𑀤𑁆𑀥𑀺𑀁 𑀧𑀫𑀸𑀤𑀁 𑀆𑀧𑀦𑁆𑀦𑀢𑁆𑀢𑀸’’𑀢𑀺. ‘‘𑀓𑀲𑁆𑀫𑀺𑀁 𑀓𑀸𑀮𑁂, 𑀪𑀦𑁆𑀢𑁂’’𑀢𑀺? 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺 𑁋

𑀅𑀢𑀻𑀢𑁂 𑀓𑀺𑀭 𑀅𑀦𑁂𑀓𑀲𑀢𑀸 𑀫𑀦𑀼𑀲𑁆𑀲𑀸 𑀫𑀳𑀢𑀺𑀬𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀦𑀸𑀯𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀪𑀺𑀚𑁆𑀚𑀺. 𑀤𑁆𑀯𑁂 𑀚𑀬𑀫𑁆𑀧𑀢𑀺𑀓𑀸 𑀏𑀓𑀁 𑀨𑀮𑀓𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀤𑀻𑀧𑀓𑀁 𑀧𑀯𑀺𑀲𑀺𑀁𑀲𑀼, 𑀲𑁂𑀲𑀸 𑀲𑀩𑁆𑀩𑁂 𑀢𑀢𑁆𑀣𑁂𑀯 𑀫𑀭𑀺𑀁𑀲𑀼. 𑀢𑀲𑁆𑀫𑀺𑀁 𑀔𑁄 𑀧𑀦 𑀤𑀻𑀧𑀓𑁂 ¶ 𑀫𑀳𑀸𑀲𑀓𑀼𑀡𑀲𑀗𑁆𑀖𑁄 𑀯𑀲𑀢𑀺. 𑀢𑁂 𑀅𑀜𑁆𑀜𑀁 𑀔𑀸𑀤𑀺𑀢𑀩𑁆𑀩𑀓𑀁 𑀅𑀤𑀺𑀲𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑀸 𑀲𑀓𑀼𑀡𑀅𑀡𑁆𑀟𑀸𑀦𑀺 𑀅𑀗𑁆𑀕𑀸𑀭𑁂𑀲𑀼 𑀧𑀘𑀺𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀢𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀲𑀓𑀼𑀡𑀘𑁆𑀙𑀸𑀧𑁂 𑀕𑀳𑁂𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀏𑀯𑀁 𑀧𑀞𑀫𑀯𑀬𑁂𑀧𑀺 𑀫𑀚𑁆𑀛𑀺𑀫𑀯𑀬𑁂𑀧𑀺 𑀧𑀘𑁆𑀙𑀺𑀫𑀯𑀬𑁂𑀧𑀺 𑀔𑀸𑀤𑀺𑀁𑀲𑀼𑀬𑁂𑀯. 𑀏𑀓𑀲𑁆𑀫𑀺𑀫𑁆𑀧𑀺 𑀯𑀬𑁂 𑀅𑀧𑁆𑀧𑀫𑀸𑀤𑀁 𑀦𑀸𑀧𑀚𑁆𑀚𑀺𑀁𑀲𑀼, 𑀏𑀓𑁄𑀧𑀺 𑀘 𑀦𑁂𑀲𑀁 𑀅𑀧𑁆𑀧𑀫𑀸𑀤𑀁 𑀦𑀸𑀧𑀚𑁆𑀚𑀺.

𑀲𑀢𑁆𑀣𑀸 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀘𑁂 𑀳𑀺 𑀢𑁆𑀯𑀁, 𑀓𑀼𑀫𑀸𑀭, 𑀢𑀤𑀸 𑀏𑀓𑀲𑁆𑀫𑀺𑀫𑁆𑀧𑀺 𑀯𑀬𑁂 𑀪𑀭𑀺𑀬𑀸𑀬 ¶ 𑀲𑀤𑁆𑀥𑀺𑀁 𑀅𑀧𑁆𑀧𑀫𑀸𑀤𑀁 𑀆𑀧𑀚𑁆𑀚𑀺𑀲𑁆𑀲, 𑀏𑀓𑀲𑁆𑀫𑀺𑀫𑁆𑀧𑀺 𑀯𑀬𑁂 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑀘𑁂 𑀧𑀦 𑀯𑁄 𑀏𑀓𑁄𑀧𑀺 𑀅𑀧𑁆𑀧𑀫𑀢𑁆𑀢𑁄 𑀅𑀪𑀯𑀺𑀲𑁆𑀲, 𑀢𑀁 𑀧𑀝𑀺𑀘𑁆𑀘 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲. 𑀓𑀼𑀫𑀸𑀭, 𑀅𑀢𑁆𑀢𑀸𑀦𑀜𑁆𑀳𑀺 𑀧𑀺𑀬𑀁 𑀫𑀜𑁆𑀜𑀫𑀸𑀦𑁂𑀦 𑀢𑀻𑀲𑀼𑀧𑀺 𑀯𑀬𑁂𑀲𑀼 𑀅𑀧𑁆𑀧𑀫𑀢𑁆𑀢𑁂𑀦 𑀅𑀢𑁆𑀢𑀸 𑀭𑀓𑁆𑀔𑀺𑀢𑀩𑁆𑀩𑁄, 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀏𑀓𑀯𑀬𑁂𑀧𑀺 𑀭𑀓𑁆𑀔𑀺𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀸𑀦𑀜𑁆𑀘𑁂 𑀧𑀺𑀬𑀁 𑀚𑀜𑁆𑀜𑀸, 𑀭𑀓𑁆𑀔𑁂𑀬𑁆𑀬 𑀦𑀁 𑀲𑀼𑀭𑀓𑁆𑀔𑀺𑀢𑀁;

𑀢𑀺𑀡𑁆𑀡𑀁 𑀅𑀜𑁆𑀜𑀢𑀭𑀁 𑀬𑀸𑀫𑀁, 𑀧𑀝𑀺𑀚𑀕𑁆𑀕𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 ¶ 𑀬𑀸𑀫𑀦𑁆𑀢𑀺 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀥𑀫𑁆𑀫𑀺𑀲𑁆𑀲𑀭𑀢𑀸𑀬 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀘 𑀇𑀥 𑀢𑀺𑀡𑁆𑀡𑀁 𑀯𑀬𑀸𑀦𑀁 𑀅𑀜𑁆𑀜𑀢𑀭𑀁 𑀯𑀬𑀁 𑀬𑀸𑀫𑀦𑁆𑀢𑀺 𑀓𑀢𑁆𑀯𑀸 𑀤𑁂𑀲𑁂𑀲𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂 𑀅𑀢𑁆𑀢𑀸𑀦𑀁 𑀧𑀺𑀬𑀁 𑀚𑀸𑀦𑁂𑀬𑁆𑀬, 𑀭𑀓𑁆𑀔𑁂𑀬𑁆𑀬 𑀦𑀁 𑀲𑀼𑀭𑀓𑁆𑀔𑀺𑀢𑀦𑁆𑀢𑀺 𑀬𑀣𑀸 𑀲𑁄 𑀲𑀼𑀭𑀓𑁆𑀔𑀺𑀢𑁄 𑀳𑁄𑀢𑀺, 𑀏𑀯𑀁 𑀦𑀁 𑀭𑀓𑁆𑀔𑁂𑀬𑁆𑀬. 𑀢𑀢𑁆𑀣 𑀲𑀘𑁂 𑀕𑀻𑀳𑀻 𑀲𑀫𑀸𑀦𑁄 ‘‘𑀅𑀢𑁆𑀢𑀸𑀦𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀭𑀺𑀧𑀸𑀲𑀸𑀤𑀢𑀮𑁂 𑀲𑀼𑀲𑀁𑀯𑀼𑀢𑀁 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑁆𑀧𑀦𑁆𑀦𑀸𑀭𑀓𑁆𑀔𑁄 𑀳𑀼𑀢𑁆𑀯𑀸 𑀯𑀲𑀦𑁆𑀢𑁄𑀧𑀺, 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸 𑀲𑀼𑀲𑀁𑀯𑀼𑀢𑁂 𑀧𑀺𑀳𑀺𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑁂 𑀮𑁂𑀡𑁂 𑀯𑀺𑀳𑀭𑀦𑁆𑀢𑁄𑀧𑀺 𑀅𑀢𑁆𑀢𑀸𑀦𑀁 𑀦 𑀭𑀓𑁆𑀔𑀢𑀺𑀬𑁂𑀯. 𑀕𑀺𑀳𑀻 𑀧𑀦 𑀲𑀫𑀸𑀦𑁄 𑀬𑀣𑀸𑀩𑀮𑀁 𑀤𑀸𑀦𑀲𑀻𑀮𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄, 𑀧𑀩𑁆𑀩𑀚𑀺𑀢𑁄 𑀯𑀸 𑀧𑀦 𑀯𑀢𑁆𑀢𑀧𑀝𑀺𑀯𑀢𑁆𑀢𑀧𑀭𑀺𑀬𑀢𑁆𑀢𑀺𑀫𑀦𑀲𑀺𑀓𑀸𑀭𑁂𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺 𑀦𑀸𑀫. 𑀏𑀯𑀁 𑀢𑀻𑀲𑀼 𑀯𑀬𑁂𑀲𑀼 𑀅𑀲𑀓𑁆𑀓𑁄𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀫𑁆𑀧𑀺 𑀯𑀬𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀅𑀢𑁆𑀢𑀸𑀦𑀁 𑀧𑀝𑀺𑀚𑀕𑁆𑀕𑀢𑀺𑀬𑁂𑀯. 𑀲𑀘𑁂 𑀳𑀺 𑀕𑀺𑀳𑀺𑀪𑀽𑀢𑁄 𑀧𑀞𑀫𑀯𑀬𑁂 𑀔𑀺𑀟𑁆𑀟𑀸𑀧𑀲𑀼𑀢𑀢𑀸𑀬 𑀓𑀼𑀲𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀚𑁆𑀛𑀺𑀫𑀯𑀬𑁂 𑀅𑀧𑁆𑀧𑀫𑀢𑁆𑀢𑁂𑀦 𑀳𑀼𑀢𑁆𑀯𑀸 𑀓𑀼𑀲𑀮𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀫𑀚𑁆𑀛𑀺𑀫𑀯𑀬𑁂 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑁄 𑀓𑀼𑀲𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀓𑀸𑀢𑀩𑁆𑀩𑀫𑁂𑀯. 𑀏𑀯𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀅𑀢𑁆𑀢𑀸 𑀧𑀝𑀺𑀚𑀕𑁆𑀕𑀺𑀢𑁄𑀯 𑀳𑁄𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑀲𑁆𑀲 𑀧𑀦 𑀅𑀢𑁆𑀢𑀸 𑀧𑀺𑀬𑁄 𑀦𑀸𑀫 𑀦 𑀳𑁄𑀢𑀺, 𑀅𑀧𑀸𑀬𑀧𑀭𑀸𑀬𑀡𑀫𑁂𑀯 𑀦𑀁 𑀓𑀭𑁄𑀢𑀺. 𑀲𑀘𑁂 𑀧𑀦 ¶ 𑀧𑀩𑁆𑀩𑀚𑀺𑀢𑁄 𑀧𑀞𑀫𑀯𑀬𑁂 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀥𑀸𑀭𑁂𑀦𑁆𑀢𑁄 𑀯𑀸𑀘𑁂𑀦𑁆𑀢𑁄 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑁄 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀫𑀚𑁆𑀛𑀺𑀫𑀯𑀬𑁂 𑀅𑀧𑁆𑀧𑀫𑀢𑁆𑀢𑁂𑀦 𑀲𑀫𑀡𑀥𑀫𑁆𑀫𑁄 ¶ 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀞𑀫𑀯𑀬𑁂 𑀉𑀕𑁆𑀕𑀳𑀺𑀢𑀧𑀭𑀺𑀬𑀢𑁆𑀢𑀺𑀬𑀸 𑀅𑀝𑁆𑀞𑀓𑀣𑀁 𑀯𑀺𑀦𑀺𑀘𑁆𑀙𑀬𑀁 𑀓𑀸𑀭𑀡𑀸𑀓𑀸𑀭𑀡𑀜𑁆𑀘 𑀧𑀼𑀘𑁆𑀙𑀦𑁆𑀢𑁄 𑀫𑀚𑁆𑀛𑀺𑀫𑀯𑀬𑁂 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀅𑀧𑁆𑀧𑀫𑀢𑁆𑀢𑁂𑀦 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄𑀬𑁂𑀯. 𑀏𑀯𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀅𑀢𑁆𑀢𑀸 𑀧𑀝𑀺𑀚𑀕𑁆𑀕𑀺𑀢𑁄𑀯 𑀳𑁄𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑀲𑁆𑀲 𑀧𑀦 𑀅𑀢𑁆𑀢𑀸 𑀧𑀺𑀬𑁄 𑀦𑀸𑀫 𑀦 𑀳𑁄𑀢𑀺, 𑀧𑀘𑁆𑀙𑀸𑀦𑀼𑀢𑀸𑀧𑁂𑀦𑁂𑀯 𑀦𑀁 𑀢𑀸𑀧𑁂𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀯𑀢𑁆𑀣𑀼 𑀧𑀞𑀫𑀁.

𑁨. 𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀅𑀢𑁆𑀢𑀸𑀦𑀫𑁂𑀯 ¶ 𑀧𑀞𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀣𑁂𑀭𑁄 𑀥𑀫𑁆𑀫𑀓𑀣𑀁 𑀓𑀣𑁂𑀢𑀼𑀁 𑀙𑁂𑀓𑁄. 𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀩𑀳𑀽 𑀪𑀺𑀓𑁆𑀔𑀼 𑀢𑀁 𑀢𑀺𑀘𑀻𑀯𑀭𑁂𑀳𑀺 𑀧𑀽𑀚𑁂𑀢𑁆𑀯𑀸 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼. 𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀧𑀭𑀺𑀓𑁆𑀔𑀸𑀭𑁂 𑀲𑁄𑀬𑁂𑀯 𑀕𑀡𑁆𑀳𑀺. 𑀲𑁄 𑀏𑀓𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂 𑀉𑀧𑀓𑀝𑁆𑀞𑁂 𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑀳𑀭𑀲𑀸𑀫𑀡𑁂𑀭𑀸 𑀥𑀫𑁆𑀫𑀓𑀣𑀺𑀓𑀧𑁂𑀫𑁂𑀦, ‘‘𑀪𑀦𑁆𑀢𑁂, 𑀇𑀥 𑀯𑀲𑁆𑀲𑀁 𑀉𑀧𑁂𑀣𑀸’’𑀢𑀺 𑀯𑀤𑀺𑀁𑀲𑀼. ‘‘𑀇𑀥 𑀓𑀺𑀢𑁆𑀢𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀩𑁆𑀪𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀏𑀓𑁂𑀓𑁄 𑀲𑀸𑀝𑀓𑁄’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀉𑀧𑀸𑀳𑀦𑀸 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺 ¶ . 𑀤𑀼𑀢𑀺𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀥 𑀓𑀺𑀁 𑀮𑀩𑁆𑀪𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑁆𑀯𑁂 𑀲𑀸𑀝𑀓𑀸’’𑀢𑀺 𑀯𑀼𑀢𑁆𑀢𑁂 𑀓𑀢𑁆𑀢𑀭𑀬𑀝𑁆𑀞𑀺𑀁 𑀞𑀧𑁂𑀲𑀺. 𑀢𑀢𑀺𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀥 𑀓𑀺𑀁 𑀮𑀩𑁆𑀪𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀬𑁄 𑀲𑀸𑀝𑀓𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀉𑀤𑀓𑀢𑀼𑀫𑁆𑀩𑀁 𑀞𑀧𑁂𑀲𑀺. 𑀘𑀢𑀼𑀢𑁆𑀣𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀥 𑀓𑀺𑀁 𑀮𑀩𑁆𑀪𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀲𑀸𑀝𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀕𑀳𑀝𑁆𑀞𑀸𑀦𑀜𑁆𑀘𑁂𑀯 𑀪𑀺𑀓𑁆𑀔𑀽𑀦𑀜𑁆𑀘 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑁂 𑀦𑀁 𑀩𑀳𑀽𑀳𑀺 𑀯𑀢𑁆𑀣𑁂𑀳𑀺 𑀘𑁂𑀯 𑀘𑀻𑀯𑀭𑁂𑀳𑀺 𑀘 𑀧𑀽𑀚𑁂𑀲𑀼𑀁. 𑀲𑁄 𑀯𑀼𑀝𑁆𑀞𑀯𑀲𑁆𑀲𑁄 𑀇𑀢𑀭𑁂𑀲𑀼𑀧𑀺 𑀯𑀺𑀳𑀸𑀭𑁂𑀲𑀼 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 ‘‘𑀫𑀬𑀸 𑀧𑀭𑀺𑀓𑁆𑀔𑀸𑀭𑀲𑁆𑀲 𑀞𑀧𑀺𑀢𑀢𑁆𑀢𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀤𑁆𑀥𑀩𑁆𑀩𑀁, 𑀢𑀁 𑀫𑁂 𑀧𑀳𑀺𑀡𑀦𑁆𑀢𑀽’’𑀢𑀺 𑀲𑀩𑁆𑀩𑀁 𑀆𑀳𑀭𑀸𑀧𑁂𑀢𑁆𑀯𑀸 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀧𑀸𑀬𑀸𑀲𑀺.

𑀅𑀣𑁂𑀓𑀲𑁆𑀫𑀺𑀁 ¶ 𑀯𑀺𑀳𑀸𑀭𑁂 𑀤𑁆𑀯𑁂 𑀤𑀳𑀭𑀪𑀺𑀓𑁆𑀔𑀽 𑀤𑁆𑀯𑁂 𑀲𑀸𑀝𑀓𑁂 𑀏𑀓𑀜𑁆𑀘 𑀓𑀫𑁆𑀩𑀮𑀁 𑀮𑀪𑀺𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀲𑀸𑀝𑀓𑀸 𑀳𑁄𑀦𑁆𑀢𑀼, 𑀫𑀬𑁆𑀳𑀁 𑀓𑀫𑁆𑀩𑀮𑁄’’𑀢𑀺 𑀪𑀸𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀕𑁆𑀕𑀲𑀫𑀻𑀧𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀯𑀤𑀦𑁆𑀢𑀺. 𑀢𑁂 𑀢𑀁 𑀣𑁂𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀦𑁄 𑀪𑀸𑀚𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀤𑀺𑀁𑀲𑀼. 𑀢𑀼𑀫𑁆𑀳𑁂𑀬𑁂𑀯 𑀪𑀸𑀚𑁂𑀣𑀸𑀢𑀺. 𑀦 𑀲𑀓𑁆𑀓𑁄𑀫, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀬𑁂𑀯 𑀦𑁄 𑀪𑀸𑀚𑁂𑀢𑁆𑀯𑀸 𑀤𑁂𑀣𑀸𑀢𑀺. 𑀢𑁂𑀦 𑀳𑀺 𑀫𑀫 𑀯𑀘𑀦𑁂 𑀞𑀲𑁆𑀲𑀣𑀸𑀢𑀺. 𑀆𑀫, 𑀞𑀲𑁆𑀲𑀸𑀫𑀸𑀢𑀺. ‘‘𑀢𑁂𑀦 𑀳𑀺 𑀲𑀸𑀥𑀽’’𑀢𑀺 𑀢𑁂𑀲𑀁 𑀤𑁆𑀯𑁂 𑀲𑀸𑀝𑀓𑁂 𑀤𑀢𑁆𑀯𑀸 ‘‘𑀅𑀬𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀧𑀸𑀭𑀼𑀧𑀦𑀸𑀭𑀳𑁄’’𑀢𑀺 𑀫𑀳𑀕𑁆𑀖𑀁 𑀓𑀫𑁆𑀩𑀮𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀤𑀳𑀭𑀪𑀺𑀓𑁆𑀔𑀽 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 ¶ 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑀲𑁆𑀫𑀺𑀁 𑀅𑀦𑀼𑀢𑀻𑀭𑀘𑀸𑀭𑀻 𑀘 𑀕𑀫𑁆𑀪𑀻𑀭𑀘𑀸𑀭𑀻 𑀘𑀸𑀢𑀺 𑀤𑁆𑀯𑁂 𑀉𑀤𑁆𑀤𑀸 𑀫𑀳𑀦𑁆𑀢𑀁 𑀭𑁄𑀳𑀺𑀢𑀫𑀘𑁆𑀙𑀁 𑀮𑀪𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀻𑀲𑀁 𑀳𑁄𑀢𑀼, 𑀢𑀯 𑀦𑀗𑁆𑀕𑀼𑀝𑁆𑀞’’𑀦𑁆𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸 𑀪𑀸𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑀁 𑀲𑀺𑀗𑁆𑀕𑀸𑀮𑀁 𑀤𑀺𑀲𑁆𑀯𑀸 𑀆𑀳𑀁𑀲𑀼 𑁋 ‘‘𑀫𑀸𑀢𑀼𑀮, 𑀇𑀫𑀁 𑀦𑁄 𑀪𑀸𑀚𑁂𑀢𑁆𑀯𑀸 𑀤𑁂𑀳𑀻’’𑀢𑀺. 𑀅𑀳𑀁 𑀭𑀜𑁆𑀜𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀢𑀢𑁆𑀣 𑀘𑀺𑀭𑀁 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀚𑀗𑁆𑀖𑀯𑀺𑀳𑀸𑀭𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀺, 𑀇𑀤𑀸𑀦𑀺 𑀫𑁂 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺. 𑀫𑀸𑀢𑀼𑀮, 𑀫𑀸 𑀏𑀯𑀁 𑀓𑀭𑁄𑀣, 𑀪𑀸𑀚𑁂𑀢𑁆𑀯𑀸 𑀏𑀯 𑀦𑁄 𑀤𑁂𑀣𑀸𑀢𑀺. 𑀫𑀫 𑀯𑀘𑀦𑁂 𑀞𑀲𑁆𑀲𑀣𑀸𑀢𑀺. 𑀞𑀲𑁆𑀲𑀸𑀫, 𑀫𑀸𑀢𑀼𑀮𑀸𑀢𑀺. ‘‘𑀢𑁂𑀦 𑀳𑀺 𑀲𑀸𑀥𑀽’’𑀢𑀺 𑀲𑁄 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀅𑀓𑀸𑀲𑀺, 𑀦𑀗𑁆𑀕𑀼𑀝𑁆𑀞𑀁 𑀏𑀓𑀫𑀦𑁆𑀢𑁂. 𑀓𑀢𑁆𑀯𑀸 𑀘 𑀧𑀦, ‘‘𑀢𑀸𑀢𑀸, 𑀬𑁂𑀦 𑀯𑁄 𑀅𑀦𑀼𑀢𑀻𑀭𑁂 𑀘𑀭𑀺𑀢𑀁, 𑀲𑁄 𑀦𑀗𑁆𑀕𑀼𑀝𑁆𑀞𑀁 𑀕𑀡𑁆𑀳𑀸𑀢𑀼. 𑀬𑁂𑀦 𑀕𑀫𑁆𑀪𑀻𑀭𑁂 𑀘𑀭𑀺𑀢𑀁, 𑀢𑀲𑁆𑀲 𑀲𑀻𑀲𑀁 𑀳𑁄𑀢𑀼. 𑀅𑀬𑀁 𑀧𑀦 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄 𑀫𑀫 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑁂 𑀞𑀺𑀢𑀲𑁆𑀲 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑁂 𑀲𑀜𑁆𑀜𑀸𑀧𑁂𑀦𑁆𑀢𑁄 𑁋

‘‘𑀅𑀦𑀼𑀢𑀻𑀭𑀘𑀸𑀭𑀺 𑀦𑀗𑁆𑀕𑀼𑀝𑁆𑀞𑀁, 𑀲𑀻𑀲𑀁 𑀕𑀫𑁆𑀪𑀻𑀭𑀘𑀸𑀭𑀺𑀦𑁄;

𑀅𑀘𑁆𑀘𑀸𑀬𑀁 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄, 𑀥𑀫𑁆𑀫𑀝𑁆𑀞𑀲𑁆𑀲 𑀪𑀯𑀺𑀲𑁆𑀲𑀢𑀻’’𑀢𑀺. (𑀚𑀸. 𑁧.𑁭.𑁩𑁩) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀫𑀚𑁆𑀛𑀺𑀫𑀔𑀡𑁆𑀟𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀢𑁂𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀫𑁂𑀲 𑀅𑀢𑀻𑀢𑁂𑀧𑀺 𑀢𑀼𑀫𑁆𑀳𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀦𑀦𑁆𑀤𑀁 𑀕𑀭𑀳𑀦𑁆𑀢𑁄, ‘‘𑀪𑀺𑀓𑁆𑀔𑀯𑁂 ¶ , 𑀧𑀭𑀁 𑀑𑀯𑀤𑀦𑁆𑀢𑁂𑀦 𑀦𑀸𑀫 𑀧𑀞𑀫𑀫𑁂𑀯 𑀅𑀢𑁆𑀢𑀸 𑀧𑀢𑀺𑀭𑀽𑀧𑁂 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀸𑀦𑀫𑁂𑀯 𑀧𑀞𑀫𑀁, 𑀧𑀢𑀺𑀭𑀽𑀧𑁂 𑀦𑀺𑀯𑁂𑀲𑀬𑁂;

𑀅𑀣𑀜𑁆𑀜𑀫𑀦𑀼𑀲𑀸𑀲𑁂𑀬𑁆𑀬, 𑀦 𑀓𑀺𑀮𑀺𑀲𑁆𑀲𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 ¶ 𑀧𑀢𑀺𑀭𑀽𑀧𑁂 𑀦𑀺𑀯𑁂𑀲𑀬𑁂𑀢𑀺 𑀅𑀦𑀼𑀘𑁆𑀙𑀯𑀺𑀓𑁂 𑀕𑀼𑀡𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑁂𑀳𑀺 𑀯𑀸 𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀸𑀤𑀻𑀳𑀺 𑀯𑀸 𑀧𑀭𑀁 𑀅𑀦𑀼𑀲𑀸𑀲𑀺𑀢𑀼𑀓𑀸𑀫𑁄, 𑀲𑁄 𑀅𑀢𑁆𑀢𑀸𑀦𑀫𑁂𑀯 𑀧𑀞𑀫𑀁 𑀢𑀲𑁆𑀫𑀺𑀁 𑀕𑀼𑀡𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬. 𑀏𑀯𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀣𑀜𑁆𑀜𑀁 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀦𑀼𑀲𑀸𑀲𑁂𑀬𑁆𑀬. 𑀅𑀢𑁆𑀢𑀸𑀦𑀜𑁆𑀳𑀺 𑀢𑀢𑁆𑀣 𑀅𑀦𑀺𑀯𑁂𑀲𑁂𑀢𑁆𑀯𑀸 𑀓𑁂𑀯𑀮𑀁 𑀧𑀭𑀫𑁂𑀯 𑀅𑀦𑀼𑀲𑀸𑀲𑀫𑀸𑀦𑁄 𑀧𑀭𑀢𑁄 𑀦𑀺𑀦𑁆𑀤𑀁 𑀮𑀪𑀺𑀢𑁆𑀯𑀸 𑀓𑀺𑀮𑀺𑀲𑁆𑀲𑀢𑀺 𑀦𑀸𑀫, 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀦𑀺𑀯𑁂𑀲𑁂𑀢𑁆𑀯𑀸 𑀅𑀦𑀼𑀲𑀸𑀲𑀫𑀸𑀦𑁄 𑀧𑀭𑀢𑁄 𑀧𑀲𑀁𑀲𑀁 𑀮𑀪𑀢𑀺, 𑀢𑀲𑁆𑀫𑀸 𑀦 𑀓𑀺𑀮𑀺𑀲𑁆𑀲𑀢𑀺 𑀦𑀸𑀫. 𑀏𑀯𑀁 𑀓𑀭𑁄𑀦𑁆𑀢𑁄 𑀧𑀡𑁆𑀟𑀺𑀢𑁄 𑀦 𑀓𑀺𑀮𑀺𑀲𑁆𑀲𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀧𑀥𑀸𑀦𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀅𑀢𑁆𑀢𑀸𑀦𑀜𑁆𑀘𑁂𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀥𑀸𑀦𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀅𑀭𑀜𑁆𑀜𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸, ‘‘𑀆𑀯𑀼𑀲𑁄, 𑀥𑀭𑀫𑀸𑀦𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀯𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑀺𑀢𑀁, 𑀅𑀧𑁆𑀧𑀫𑀢𑁆𑀢𑀸𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀲𑀬𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀼𑀧𑀢𑀺. 𑀢𑁂 𑀪𑀺𑀓𑁆𑀔𑀽 𑀧𑀞𑀫𑀬𑀸𑀫𑁂 𑀘𑀗𑁆𑀓𑀫𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑀺. 𑀲𑁄 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀤𑁆𑀥𑀓𑀸𑀮𑁂 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀢𑀼𑀫𑁆𑀳𑁂 ‘𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀲𑁆𑀲𑀸𑀫𑀸’𑀢𑀺 𑀆𑀕𑀢𑀸, 𑀲𑀻𑀖𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀲𑀬𑀁 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀲𑀼𑀧𑀢𑀺. 𑀇𑀢𑀭𑁂 𑀫𑀚𑁆𑀛𑀺𑀫𑀬𑀸𑀫𑁂 𑀩𑀳𑀺 𑀘𑀗𑁆𑀓𑀫𑀺𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑀺. 𑀲𑁄 𑀧𑀼𑀦𑀧𑀺 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂 𑀯𑀺𑀳𑀸𑀭𑀸 𑀦𑀻𑀳𑀭𑀺𑀢𑁆𑀯𑀸 𑀲𑀬𑀁 𑀧𑀼𑀦 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀲𑀼𑀧𑀢𑀺. 𑀢𑀲𑁆𑀫𑀺𑀁 𑀦𑀺𑀘𑁆𑀘𑀓𑀸𑀮𑀁 𑀏𑀯𑀁 𑀓𑀭𑁄𑀦𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀲𑀚𑁆𑀛𑀸𑀬𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 ¶ 𑀯𑀸 𑀫𑀦𑀲𑀺𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀘𑀺𑀢𑁆𑀢𑀁 𑀅𑀜𑁆𑀜𑀣𑀢𑁆𑀢𑀁 𑀅𑀕𑀫𑀸𑀲𑀺. 𑀢𑁂 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀢𑀺𑀯𑀺𑀬 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀦𑀝𑁆𑀞𑀫𑁆𑀳𑀸, 𑀆𑀯𑀼𑀲𑁄, 𑀆𑀘𑀭𑀺𑀬𑁄 𑀦𑁄 𑀢𑀼𑀘𑁆𑀙𑀭𑀯𑀁 𑀭𑀯𑀢𑀻’’𑀢𑀺 𑀯𑀤𑀺𑀁𑀲𑀼. 𑀢𑁂𑀲𑀁 𑀅𑀢𑀺𑀯𑀺𑀬 𑀦𑀺𑀤𑁆𑀤𑀸𑀬 𑀓𑀺𑀮𑀫𑀦𑁆𑀢𑀸𑀦𑀁 𑀏𑀓𑀪𑀺𑀓𑁆𑀔𑀼𑀧𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑁂 𑀯𑀼𑀝𑁆𑀞𑀯𑀲𑁆𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑀸𑀬𑀫𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑁋

‘‘𑀅𑀫𑀸𑀢𑀸𑀧𑀺𑀢𑀭𑀲𑀁𑀯𑀟𑁆𑀠𑁄, 𑀅𑀦𑀸𑀘𑁂𑀭𑀓𑀼𑀮𑁂 𑀯𑀲𑀁;

𑀦𑀸𑀬𑀁 𑀓𑀸𑀮𑀁 𑀅𑀓𑀸𑀮𑀁 𑀯𑀸, 𑀅𑀪𑀺𑀚𑀸𑀦𑀸𑀢𑀺 𑀓𑀼𑀓𑁆𑀓𑀼𑀝𑁄’’𑀢𑀺. (𑀚𑀸. 𑁧.𑁧.𑁧𑁧𑁯) 𑁋

𑀇𑀫𑀁 𑀅𑀓𑀸𑀮𑀭𑀸𑀯𑀺𑀓𑀼𑀓𑁆𑀓𑀼𑀝𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺. ‘‘𑀢𑀤𑀸 𑀳𑀺 𑀲𑁄 𑀓𑀼𑀓𑁆𑀓𑀼𑀝𑁄 𑀅𑀬𑀁 𑀧𑀥𑀸𑀦𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀇𑀫𑁂 𑀧𑀜𑁆𑀘 𑀲𑀢𑀸 𑀪𑀺𑀓𑁆𑀔𑀽 𑀢𑁂 𑀫𑀸𑀡𑀯𑀸 𑀅𑀳𑁂𑀲𑀼𑀁, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑀫𑁂𑀯𑀸’’𑀢𑀺 𑀲𑀢𑁆𑀣𑀸 𑀇𑀫𑀁 𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀧𑀭𑀁 𑀑𑀯𑀤𑀦𑁆𑀢𑁂𑀦 𑀦𑀸𑀫 𑀅𑀢𑁆𑀢𑀸 𑀲𑀼𑀤𑀦𑁆𑀢𑁄 𑀓𑀸𑀢𑀩𑁆𑀩𑁄. 𑀏𑀯𑀁 𑀑𑀯𑀤𑀦𑁆𑀢𑁄 𑀳𑀺 ¶ 𑀲𑀼𑀤𑀦𑁆𑀢𑁄 𑀳𑀼𑀢𑁆𑀯𑀸 𑀤𑀫𑁂𑀢𑀺 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀸𑀦𑀜𑁆𑀘𑁂 ¶ 𑀢𑀣𑀸 𑀓𑀬𑀺𑀭𑀸, 𑀬𑀣𑀸𑀜𑁆𑀜𑀫𑀦𑀼𑀲𑀸𑀲𑀢𑀺;

𑀲𑀼𑀤𑀦𑁆𑀢𑁄 𑀯𑀢 𑀤𑀫𑁂𑀣, 𑀅𑀢𑁆𑀢𑀸 𑀳𑀺 𑀓𑀺𑀭 𑀤𑀼𑀤𑁆𑀤𑀫𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀳𑀺 𑀪𑀺𑀓𑁆𑀔𑀼 ‘‘𑀧𑀞𑀫𑀬𑀸𑀫𑀸𑀤𑀻𑀲𑀼 𑀘𑀗𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀁 𑀑𑀯𑀤𑀢𑀺, 𑀲𑀬𑀁 𑀘𑀗𑁆𑀓𑀫𑀦𑀸𑀤𑀻𑀦𑀺 𑀅𑀥𑀺𑀝𑁆𑀞𑀳𑀦𑁆𑀢𑁄 𑀅𑀢𑁆𑀢𑀸𑀦𑀜𑁆𑀘𑁂 𑀢𑀣𑀸 𑀓𑀬𑀺𑀭𑀸, 𑀬𑀣𑀸𑀜𑁆𑀜𑀫𑀦𑀼𑀲𑀸𑀲𑀢𑀺, 𑀏𑀯𑀁 𑀲𑀦𑁆𑀢𑁂 𑀲𑀼𑀤𑀦𑁆𑀢𑁄 𑀯𑀢 𑀤𑀫𑁂𑀣𑀸𑀢𑀺 𑀬𑁂𑀦 𑀕𑀼𑀡𑁂𑀦 𑀧𑀭𑀁 𑀅𑀦𑀼𑀲𑀸𑀲𑀢𑀺, 𑀢𑁂𑀦 𑀅𑀢𑁆𑀢𑀦𑀸 𑀲𑀼𑀤𑀦𑁆𑀢𑁄 𑀳𑀼𑀢𑁆𑀯𑀸 𑀤𑀫𑁂𑀬𑁆𑀬. 𑀅𑀢𑁆𑀢𑀸 𑀳𑀺 𑀓𑀺𑀭 𑀤𑀼𑀤𑁆𑀤𑀫𑁄𑀢𑀺 𑀅𑀬𑀜𑁆𑀳𑀺 𑀅𑀢𑁆𑀢𑀸 𑀦𑀸𑀫 𑀤𑀼𑀤𑁆𑀤𑀫𑁄. 𑀢𑀲𑁆𑀫𑀸 𑀬𑀣𑀸 𑀲𑁄 𑀲𑀼𑀤𑀦𑁆𑀢𑁄 𑀳𑁄𑀢𑀺, 𑀢𑀣𑀸 𑀤𑀫𑁂𑀢𑀩𑁆𑀩𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘 𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀥𑀸𑀦𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀓𑀼𑀫𑀸𑀭𑀓𑀲𑁆𑀲𑀧𑀫𑀸𑀢𑀼𑀣𑁂𑀭𑀻𑀯𑀢𑁆𑀣𑀼

𑀅𑀢𑁆𑀢𑀸 ¶ 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀫𑀸𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀭𑀸𑀚𑀕𑀳𑀦𑀕𑀭𑁂 𑀲𑁂𑀝𑁆𑀞𑀺𑀥𑀻𑀢𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀫𑀸𑀦𑀸𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 ¶ 𑀧𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑀺𑀤𑁂𑀯𑀢𑀸 𑀳𑀼𑀢𑁆𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀅𑀣𑀲𑁆𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸𑀯 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀲𑁄 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀅𑀚𑀸𑀦𑀦𑁆𑀢𑁄 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀅𑀧𑀭𑁂𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀢𑀲𑁆𑀲𑀸 𑀕𑀩𑁆𑀪𑀺𑀦𑀺𑀪𑀸𑀯𑀁 𑀜𑀢𑁆𑀯𑀸 𑀢𑀸𑀳𑀺 ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑀸 𑀦𑀸𑀳𑀁, 𑀅𑀬𑁆𑀬𑁂, 𑀚𑀸𑀦𑀸𑀫𑀺 ‘‘𑀓𑀺𑀫𑁂𑀢𑀁’’, 𑀲𑀻𑀮𑀁 𑀯𑀢 𑀫𑁂 𑀅𑀭𑁄𑀕𑀫𑁂𑀯𑀸𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀤𑁂𑀯𑀤𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀪𑀺𑀓𑁆𑀔𑀼𑀦𑀻 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸, 𑀇𑀫𑀺𑀲𑁆𑀲𑀸 𑀫𑀬𑀁 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀚𑀸𑀦𑀸𑀫, 𑀓𑀸𑀮𑀁 𑀦 𑀚𑀸𑀦𑀸𑀫, 𑀓𑀺𑀁 𑀤𑀸𑀦𑀺 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀤𑁂𑀯𑀤𑀢𑁆𑀢𑁄 ‘‘𑀫𑀸 𑀫𑀬𑁆𑀳𑀁 𑀑𑀯𑀸𑀤𑀓𑀸𑀭𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀬𑀲𑁄 𑀉𑀧𑁆𑀧𑀚𑁆𑀚𑀢𑀽’’𑀢𑀺 𑀏𑀢𑁆𑀢𑀓𑀫𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀉𑀧𑁆𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑀸 𑀤𑀳𑀭𑀸 𑀫𑀸 𑀫𑀁, 𑀅𑀬𑁆𑀬𑁂, 𑀦𑀸𑀲𑁂𑀣, 𑀦𑀸𑀳𑀁 𑀤𑁂𑀯𑀤𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸, 𑀏𑀣, 𑀫𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀚𑁂𑀢𑀯𑀦𑀁 𑀦𑁂𑀣𑀸𑀢𑀺. 𑀢𑀸 𑀢𑀁 𑀆𑀤𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 ¶ 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑀲𑁆𑀲𑀸 𑀕𑀺𑀳𑀺𑀓𑀸𑀮𑁂 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀧𑀭𑀯𑀸𑀤𑀫𑁄𑀘𑀦𑀢𑁆𑀣𑀁 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀓𑁄𑀲𑀮𑀁 𑀫𑀳𑀸𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀯𑀺𑀲𑀸𑀔𑀸𑀉𑀧𑀸𑀲𑀺𑀓𑀁 𑀅𑀜𑁆𑀜𑀸𑀦𑀺 𑀘 𑀫𑀳𑀸𑀓𑀼𑀮𑀸𑀦𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀇𑀫𑀺𑀲𑁆𑀲𑀸 𑀤𑀳𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀓𑀫𑁆𑀫𑀁 𑀧𑀭𑀺𑀲𑁄𑀥𑁂𑀳𑀻’’𑀢𑀺. 𑀣𑁂𑀭𑁄 𑀭𑀜𑁆𑀜𑁄 𑀧𑀼𑀭𑀢𑁄 𑀯𑀺𑀲𑀸𑀔𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑀸 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀢𑀲𑁆𑀲𑀸 𑀳𑀢𑁆𑀣𑀧𑀸𑀤𑀦𑀸𑀪𑀺𑀉𑀤𑀭𑀧𑀭𑀺𑀬𑁄𑀲𑀸𑀦𑀸𑀦𑀺 ¶ 𑀑𑀮𑁄𑀓𑁂𑀢𑁆𑀯𑀸 𑀫𑀸𑀲𑀤𑀺𑀯𑀲𑁂 𑀲𑀫𑀸𑀦𑁂𑀢𑁆𑀯𑀸 ‘‘𑀕𑀺𑀳𑀺𑀪𑀸𑀯𑁂 𑀇𑀫𑀸𑀬 𑀕𑀩𑁆𑀪𑁄 𑀮𑀤𑁆𑀥𑁄’’𑀢𑀺 𑀜𑀢𑁆𑀯𑀸 𑀣𑁂𑀭𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲𑀸 𑀣𑁂𑀭𑁄 𑀧𑀭𑀺𑀲𑀫𑀚𑁆𑀛𑁂 𑀧𑀭𑀺𑀲𑀼𑀤𑁆𑀥𑀪𑀸𑀯𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀧𑀢𑁆𑀣𑀺𑀢𑀧𑀢𑁆𑀣𑀦𑀁 𑀫𑀳𑀸𑀦𑀼𑀪𑀸𑀯𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀭𑀸𑀚𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄 𑀤𑀸𑀭𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀤𑁂𑀯, 𑀏𑀓𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀲𑁂𑀲 𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑁂 𑀢𑀁 𑀓𑀼𑀫𑀸𑀭𑀁 𑀅𑀢𑁆𑀢𑀦𑁄 𑀖𑀭𑀁 𑀦𑁂𑀢𑁆𑀯𑀸 𑀥𑀸𑀢𑀻𑀦𑀁 𑀅𑀤𑀸𑀲𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 𑀓𑀲𑁆𑀲𑀧𑁄𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀺𑀢𑀢𑁆𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 𑀓𑀻𑀴𑀸𑀫𑀡𑁆𑀟𑀮𑁂 𑀤𑀸𑀭𑀓𑁂 𑀧𑀳𑀭𑀺𑀢𑁆𑀯𑀸 ‘‘𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑁂𑀦𑀫𑁆𑀳𑀸 𑀧𑀳𑀝𑀸’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀤𑁂𑀯, 𑀫𑀁 ‘𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑁄’𑀢𑀺 𑀯𑀤𑀦𑁆𑀢𑀺, 𑀫𑀸𑀢𑀭𑀁 𑀫𑁂 𑀆𑀘𑀺𑀓𑁆𑀔𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑀸 𑀥𑀸𑀢𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑀸 𑀢𑁂 𑀫𑀸𑀢𑀭𑁄’’𑀢𑀺 𑀯𑀼𑀢𑁆𑀢𑁂 ‘‘𑀦 𑀏𑀢𑁆𑀢𑀺𑀓𑀸 𑀫𑁂 𑀫𑀸𑀢𑀭𑁄, 𑀏𑀓𑀸𑀬 𑀫𑁂 𑀫𑀸𑀢𑀭𑀸 𑀪𑀯𑀺𑀢𑀩𑁆𑀩𑀁, 𑀢𑀁 𑀫𑁂 𑀆𑀘𑀺𑀓𑁆𑀔𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀦 𑀲𑀓𑁆𑀓𑀸 𑀇𑀫𑀁 𑀯𑀜𑁆𑀘𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀢𑀸𑀢, 𑀢𑀯 𑀫𑀸𑀢𑀸 𑀪𑀺𑀓𑁆𑀔𑀼𑀦𑀻, 𑀢𑁆𑀯𑀁 𑀫𑀬𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀸 𑀆𑀦𑀻𑀢𑁄𑀢𑀺. 𑀲𑁄 𑀢𑀸𑀯𑀢𑀓𑁂𑀦𑁂𑀯 𑀲𑀫𑀼𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀳𑀼𑀢𑁆𑀯𑀸, ‘‘𑀢𑀸𑀢, 𑀧𑀩𑁆𑀩𑀸𑀚𑁂𑀣 𑀫’’𑀦𑁆𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀁 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁄𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀬𑀫𑀺𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀧𑀼𑀦 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁂𑀲𑁂𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀥𑀯𑀦𑁂 𑀯𑀺𑀳𑀸𑀲𑀺.

𑀅𑀣 𑀦𑀁 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀏𑀓𑀢𑁄 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀧𑀦𑁆𑀦𑀭𑀲 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸 ¶ ‘‘𑀇𑀫𑁂 𑀧𑀜𑁆𑀳𑁂 𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀜𑁆𑀜𑁄 𑀩𑁆𑀬𑀸𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀕𑀘𑁆𑀙, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀇𑀫𑁂𑀲𑀁 𑀅𑀢𑁆𑀣𑀁 𑀉𑀕𑁆𑀕𑀡𑁆𑀳𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀦 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀫𑀸𑀢𑀼𑀪𑀺𑀓𑁆𑀔𑀼𑀦𑀺𑀬𑀸 𑀅𑀓𑁆𑀔𑀻𑀳𑀺 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀺𑀁𑀲𑀼. 𑀲𑀸 𑀧𑀼𑀢𑁆𑀢𑀯𑀺𑀬𑁄𑀕𑀤𑀼𑀓𑁆𑀔𑀺𑀢𑀸 𑀅𑀲𑁆𑀲𑀼𑀢𑀺𑀦𑁆𑀢𑁂𑀦𑁂𑀯 𑀫𑀼𑀔𑁂𑀦 𑀪𑀺𑀓𑁆𑀔𑀸𑀬 𑀘𑀭𑀫𑀸𑀦𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀣𑁂𑀭𑀁 𑀤𑀺𑀲𑁆𑀯𑀸𑀯, ‘‘𑀧𑀼𑀢𑁆𑀢 ¶ , 𑀧𑀼𑀢𑁆𑀢𑀸’’𑀢𑀺 𑀯𑀺𑀭𑀯𑀦𑁆𑀢𑀻 𑀢𑀁 𑀕𑀡𑁆𑀳𑀺𑀢𑀼𑀁 𑀉𑀧𑀥𑀸𑀯𑀫𑀸𑀦𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺. 𑀲𑀸 𑀣𑀦𑁂𑀳𑀺 𑀔𑀻𑀭𑀁 𑀫𑀼𑀜𑁆𑀘𑀦𑁆𑀢𑁂𑀳𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀮𑁆𑀮𑀘𑀻𑀯𑀭𑀸 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀕𑀡𑁆𑀳𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀬𑀁 𑀫𑀫 𑀲𑀦𑁆𑀢𑀺𑀓𑀸 𑀫𑀥𑀼𑀭𑀯𑀘𑀦𑀁 𑀮𑀪𑀺𑀲𑁆𑀲𑀢𑀺, 𑀯𑀺𑀦𑀲𑁆𑀲𑀺𑀲𑁆𑀲𑀢𑀺. 𑀣𑀤𑁆𑀥𑀫𑁂𑀯 𑀓𑀢𑁆𑀯𑀸 𑀇𑀫𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀓𑀺𑀁 𑀓𑀭𑁄𑀦𑁆𑀢𑀻 𑀯𑀺𑀘𑀭𑀲𑀺, 𑀲𑀺𑀦𑁂𑀳𑀫𑀢𑁆𑀢𑀫𑁆𑀧𑀺 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺. 𑀲𑀸 ‘‘𑀅𑀳𑁄 𑀓𑀓𑁆𑀔𑀴𑀸 𑀣𑁂𑀭𑀲𑁆𑀲 ¶ 𑀓𑀣𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑀺 𑀢𑁂𑀦 𑀢𑀣𑁂𑀯 𑀯𑀼𑀢𑁆𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑀲𑁆𑀲 𑀓𑀸𑀭𑀡𑀸 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀬𑀁 𑀧𑀦𑁂𑀯𑀁 𑀣𑀤𑁆𑀥𑀳𑀤𑀬𑁄, 𑀓𑀺𑀁 𑀫𑁂 𑀇𑀫𑀺𑀦𑀸’’𑀢𑀺 𑀧𑀼𑀢𑁆𑀢𑀲𑀺𑀦𑁂𑀳𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁𑀤𑀺𑀯𑀲𑀫𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁂𑀦 𑀏𑀯𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀓𑀼𑀫𑀸𑀭𑀓𑀲𑁆𑀲𑀧𑁄 𑀘 𑀣𑁂𑀭𑀻 𑀘 𑀦𑀸𑀲𑀺𑀢𑀸, 𑀲𑀢𑁆𑀣𑀸 𑀧𑀦 𑀢𑁂𑀲𑀁 𑀧𑀢𑀺𑀝𑁆𑀞𑀸 𑀚𑀸𑀢𑁄, 𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀮𑁄𑀓𑀸𑀦𑀼𑀓𑀫𑁆𑀧𑀓𑀸’’𑀢𑀺 ¶ . 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀅𑀳𑀁 𑀇𑀫𑁂𑀲𑀁 𑀧𑀘𑁆𑀘𑀬𑁄 𑀧𑀢𑀺𑀝𑁆𑀞𑀸 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀦𑁂𑀲𑀁 𑀅𑀳𑀁 𑀧𑀢𑀺𑀝𑁆𑀞𑀸 𑀅𑀳𑁄𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑁋

‘‘𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂;

𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀲𑀸𑀔𑀲𑁆𑀫𑀺 𑀚𑀻𑀯𑀺𑀢’’𑀦𑁆𑀢𑀺. (𑀚𑀸. 𑁧.𑁧.𑁧𑁨; 𑁧.𑁧𑁦.𑁮𑁧) 𑁋

𑀇𑀫𑀁 𑀦𑀺𑀕𑁆𑀭𑁄𑀥𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 ‘‘𑀢𑀤𑀸 𑀲𑀸𑀔𑀫𑀺𑀕𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀭𑀺𑀲𑀸𑀧𑀺𑀲𑁆𑀲 𑀤𑁂𑀯𑀤𑀢𑁆𑀢𑀧𑀭𑀺𑀲𑀸, 𑀯𑀸𑀭𑀧𑁆𑀧𑀢𑁆𑀢𑀸 𑀫𑀺𑀕𑀥𑁂𑀦𑀼 𑀣𑁂𑀭𑀻 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀕𑀩𑁆𑀪𑀺𑀦𑀻𑀫𑀺𑀕𑀺𑀬𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀢𑁄 𑀦𑀺𑀕𑁆𑀭𑁄𑀥𑀫𑀺𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀙𑀺𑀦𑁆𑀤𑀺𑀢𑁆𑀯𑀸 𑀣𑁂𑀭𑀺𑀬𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀓𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄, ‘‘𑀪𑀺𑀓𑁆𑀔𑀯𑁂, 𑀬𑀲𑁆𑀫𑀸 𑀧𑀭𑀲𑁆𑀲 𑀅𑀢𑁆𑀢𑀦𑀺 𑀞𑀺𑀢𑁂𑀦 𑀲𑀕𑁆𑀕𑀧𑀭𑀸𑀬𑀡𑁂𑀦 𑀯𑀸 𑀫𑀕𑁆𑀕𑀧𑀭𑀸𑀬𑀡𑁂𑀦 𑀯𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀦𑀸𑀣𑁄, 𑀧𑀭𑁄 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄, 𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸;

𑀅𑀢𑁆𑀢𑀦𑀸 𑀳𑀺 𑀲𑀼𑀤𑀦𑁆𑀢𑁂𑀦, 𑀦𑀸𑀣𑀁 𑀮𑀪𑀢𑀺 𑀤𑀼𑀮𑁆𑀮𑀪’’𑀦𑁆𑀢𑀺.

𑀢𑀢𑁆𑀣 𑀦𑀸𑀣𑁄𑀢𑀺 𑀧𑀢𑀺𑀝𑁆𑀞𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀢𑁆𑀢𑀦𑀺 𑀞𑀺𑀢𑁂𑀦 𑀅𑀢𑁆𑀢𑀲𑀫𑁆𑀧𑀦𑁆𑀦𑁂𑀦 𑀓𑀼𑀲𑀮𑀁 𑀓𑀢𑁆𑀯𑀸 ¶ 𑀲𑀕𑁆𑀕𑀁 𑀯𑀸 𑀧𑀸𑀧𑀼𑀡𑀺𑀢𑀼𑀁, 𑀫𑀕𑁆𑀕𑀁 𑀯𑀸 𑀪𑀸𑀯𑁂𑀢𑀼𑀁, 𑀨𑀮𑀁 𑀯𑀸 𑀲𑀘𑁆𑀙𑀺𑀓𑀸𑀢𑀼𑀁 𑀲𑀓𑁆𑀓𑀸 ¶ . 𑀢𑀲𑁆𑀫𑀸 𑀳𑀺 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀧𑀭𑁄 𑀓𑁄 𑀦𑀸𑀫 𑀓𑀲𑁆𑀲 𑀧𑀢𑀺𑀝𑁆𑀞𑀸 𑀲𑀺𑀬𑀸. 𑀅𑀢𑁆𑀢𑀦𑀸 𑀏𑀯 𑀳𑀺 𑀲𑀼𑀤𑀦𑁆𑀢𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑁂𑀦 ¶ 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑀁 𑀤𑀼𑀮𑁆𑀮𑀪𑀁 𑀦𑀸𑀣𑀁 𑀮𑀪𑀢𑀺. 𑀅𑀭𑀳𑀢𑁆𑀢𑀜𑁆𑀳𑀺 𑀲𑀦𑁆𑀥𑀸𑀬 𑀇𑀥 ‘‘𑀦𑀸𑀣𑀁 𑀮𑀪𑀢𑀺 𑀤𑀼𑀮𑁆𑀮𑀪’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑀼𑀫𑀸𑀭𑀓𑀲𑁆𑀲𑀧𑀫𑀸𑀢𑀼𑀣𑁂𑀭𑀻𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑀅𑀢𑁆𑀢𑀦𑀸 𑀳𑀺 𑀓𑀢𑀁 𑀧𑀸𑀧𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀳𑀸𑀓𑀸𑀮𑀁 𑀦𑀸𑀫 𑀲𑁄𑀢𑀸𑀧𑀦𑁆𑀦𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀫𑀸𑀲𑀲𑁆𑀲 𑀅𑀝𑁆𑀞𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑁂 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀓𑀣𑀁 𑀲𑀼𑀡𑀸𑀢𑀺. 𑀅𑀣 𑀭𑀢𑁆𑀢𑀺𑀁 𑀘𑁄𑀭𑀸 𑀏𑀓𑀲𑁆𑀫𑀺𑀁 𑀕𑁂𑀳𑁂 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀮𑁄𑀳𑀪𑀸𑀚𑀦𑀲𑀤𑁆𑀤𑁂𑀦 𑀧𑀩𑀼𑀤𑁆𑀥𑁂𑀳𑀺 𑀲𑀸𑀫𑀺𑀓𑁂𑀳𑀺 𑀅𑀦𑀼𑀩𑀤𑁆𑀥𑀸 𑀕𑀳𑀺𑀢𑀪𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀲𑀸𑀫𑀺𑀓𑀸𑀧𑀺 𑀢𑁂 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯, 𑀢𑁂 𑀤𑀺𑀲𑀸 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀏𑀓𑁄 𑀧𑀦 𑀯𑀺𑀳𑀸𑀭𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀫𑀳𑀸𑀓𑀸𑀮𑀲𑁆𑀲 𑀭𑀢𑁆𑀢𑀺𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀸𑀢𑁄𑀯 𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀫𑀼𑀔𑀁 𑀥𑁄𑀯𑀦𑁆𑀢𑀲𑁆𑀲 𑀧𑀼𑀭𑀢𑁄 𑀪𑀡𑁆𑀟𑀺𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀘𑁄𑀭𑁂 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀆𑀕𑀢𑀫𑀦𑀼𑀲𑁆𑀲𑀸 𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀦𑁄 𑀕𑁂𑀳𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀳𑀭𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀯𑀺𑀬 𑀯𑀺𑀘𑀭𑀲𑀻’’𑀢𑀺 ¶ 𑀢𑀁 𑀕𑀳𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀺𑀁𑀲𑀼. 𑀅𑀣 𑀦𑀁 𑀧𑀸𑀢𑁄𑀯 𑀧𑀸𑀦𑀻𑀬𑀖𑀝𑀁 𑀆𑀤𑀸𑀬 𑀕𑀢𑀸 𑀤𑀳𑀭𑀲𑀸𑀫𑀡𑁂𑀭𑀸 𑀤𑀺𑀲𑁆𑀯𑀸 ‘‘𑀯𑀺𑀳𑀸𑀭𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀬𑀺𑀢𑀉𑀧𑀸𑀲𑀓𑁄 𑀅𑀬𑀼𑀢𑁆𑀢𑀁 𑀫𑀭𑀡𑀁 𑀮𑀪𑀢𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀸𑀮𑁂𑀦 𑀅𑀧𑁆𑀧𑀢𑀺𑀭𑀽𑀧𑀁 𑀫𑀭𑀡𑀁 𑀮𑀤𑁆𑀥𑀁, 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀧𑀦 𑀢𑁂𑀦 𑀬𑀼𑀢𑁆𑀢𑀫𑁂𑀯 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀲𑀺 𑁋

𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀯𑀺𑀚𑀺𑀢𑁂 𑀏𑀓𑀲𑁆𑀲 𑀧𑀘𑁆𑀘𑀦𑁆𑀢𑀕𑀸𑀫𑀲𑁆𑀲 𑀅𑀝𑀯𑀺𑀫𑀼𑀔𑁂 𑀘𑁄𑀭𑀸 𑀧𑀳𑀭𑀦𑁆𑀢𑀺. 𑀭𑀸𑀚𑀸 𑀅𑀝𑀯𑀺𑀫𑀼𑀔𑁂 𑀏𑀓𑀁 𑀭𑀸𑀚𑀪𑀝𑀁 𑀞𑀧𑁂𑀲𑀺, 𑀲𑁄 𑀪𑀢𑀺𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀑𑀭𑀢𑁄 𑀧𑀸𑀭𑀁 𑀦𑁂𑀢𑀺, 𑀧𑀸𑀭𑀢𑁄 𑀑𑀭𑀁 𑀆𑀦𑁂𑀢𑀺. 𑀅𑀣𑁂𑀓𑁄 𑀫𑀦𑀼𑀲𑁆𑀲𑁄 𑀅𑀪𑀺𑀭𑀽𑀧𑀁 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀘𑀽𑀴𑀬𑀸𑀦𑀓𑀁 𑀆𑀭𑁄𑀧𑁂𑀢𑁆𑀯𑀸 ¶ 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀪𑀝𑁄 𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸𑀯 𑀲𑀜𑁆𑀚𑀸𑀢𑀲𑀺𑀦𑁂𑀳𑁄 𑀢𑁂𑀦 ‘‘𑀅𑀝𑀯𑀺𑀁 𑀦𑁄 ¶ , 𑀲𑀸𑀫𑀺, 𑀅𑀢𑀺𑀓𑁆𑀓𑀸𑀫𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀇𑀤𑀸𑀦𑀺 𑀯𑀺𑀓𑀸𑀮𑁄, 𑀧𑀸𑀢𑁄𑀯 𑀅𑀢𑀺𑀓𑁆𑀓𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 𑀲𑀓𑀸𑀮𑁄, 𑀲𑀸𑀫𑀺, 𑀇𑀤𑀸𑀦𑁂𑀯 𑀦𑁄 𑀦𑁂𑀳𑀻𑀢𑀺. 𑀦𑀺𑀯𑀢𑁆𑀢, 𑀪𑁄, 𑀅𑀫𑁆𑀳𑀸𑀓𑀁𑀬𑁂𑀯 𑀕𑁂𑀳𑁂 𑀆𑀳𑀸𑀭𑁄 𑀘 𑀦𑀺𑀯𑀸𑀲𑁄 𑀘 𑀪𑀯𑀺𑀲𑁆𑀲𑀢𑀻𑀢𑀺. 𑀲𑁄 𑀦𑁂𑀯 𑀦𑀺𑀯𑀢𑁆𑀢𑀺𑀢𑀼𑀁 𑀇𑀘𑁆𑀙𑀺. 𑀇𑀢𑀭𑁄 𑀧𑀼𑀭𑀺𑀲𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀬𑀸𑀦𑀓𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀯𑀸𑀲𑀁 𑀤𑀢𑁆𑀯𑀸 𑀆𑀳𑀸𑀭𑀁 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀢𑀲𑁆𑀲 𑀧𑀦 𑀕𑁂𑀳𑁂 𑀏𑀓𑀁 𑀫𑀡𑀺𑀭𑀢𑀦𑀁 𑀅𑀢𑁆𑀣𑀺. 𑀲𑁄 𑀢𑀁 𑀢𑀲𑁆𑀲 𑀬𑀸𑀦𑀓𑀦𑁆𑀢𑀭𑁂 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀘𑁄𑀭𑀸𑀦𑀁 𑀧𑀯𑀺𑀝𑁆𑀞𑀲𑀤𑁆𑀤𑀁 𑀓𑀸𑀭𑁂𑀲𑀺. 𑀅𑀣𑀲𑁆𑀲 𑀧𑀼𑀭𑀺𑀲𑀸 ‘‘𑀫𑀡𑀺𑀭𑀢𑀦𑀁, 𑀲𑀸𑀫𑀺, 𑀘𑁄𑀭𑁂𑀳𑀺 𑀳𑀝’’𑀦𑁆𑀢𑀺 𑀆𑀭𑁄𑀘𑁂𑀲𑀼𑀁. 𑀲𑁄 𑀕𑀸𑀫𑀤𑁆𑀯𑀸𑀭𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 ‘‘𑀅𑀦𑁆𑀢𑁄𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀯𑀺𑀘𑀺𑀦𑀣𑀸’’𑀢𑀺 𑀆𑀳. 𑀇𑀢𑀭𑁄𑀧𑀺 𑀧𑀸𑀢𑁄𑀯 𑀬𑀸𑀦𑀓𑀁 𑀬𑁄𑀚𑁂𑀢𑁆𑀯𑀸 ¶ 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀬𑀸𑀦𑀓𑀁 𑀲𑁄𑀥𑁂𑀦𑁆𑀢𑀸 𑀅𑀢𑁆𑀢𑀦𑀸 𑀞𑀧𑀺𑀢𑀁 𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 ‘‘𑀢𑁆𑀯𑀁 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀲𑀻’’𑀢𑀺 𑀧𑁄𑀣𑁂𑀢𑁆𑀯𑀸 ‘‘𑀕𑀳𑀺𑀢𑁄 𑀦𑁄, 𑀲𑀸𑀫𑀺, 𑀘𑁄𑀭𑁄’’𑀢𑀺 𑀕𑀸𑀫𑀪𑁄𑀚𑀓𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀲𑁄 ‘‘𑀪𑀢𑀓𑀲𑁆𑀲 𑀯𑀢 𑀫𑁂 𑀕𑁂𑀳𑁂 𑀦𑀺𑀯𑀸𑀲𑀁 𑀤𑀢𑁆𑀯𑀸 𑀪𑀢𑁆𑀢𑀁 𑀤𑀺𑀦𑁆𑀦𑀁, 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀕𑀡𑁆𑀳𑀣 𑀦𑀁 𑀧𑀸𑀧𑀧𑀼𑀭𑀺𑀲’’𑀦𑁆𑀢𑀺 𑀧𑁄𑀣𑀸𑀧𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀙𑀟𑁆𑀟𑀸𑀧𑁂𑀲𑀺. 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁. 𑀲𑁄 𑀢𑀢𑁄 𑀘𑀼𑀢𑁄 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀤𑀻𑀖𑀭𑀢𑁆𑀢𑀁 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀢𑁆𑀢𑀪𑀸𑀯𑀲𑀢𑁂 𑀢𑀣𑁂𑀯 𑀧𑁄𑀣𑀺𑀢𑁄 𑀫𑀭𑀡𑀁 𑀧𑀸𑀧𑀼𑀡𑀺.

𑀏𑀯𑀁 𑀲𑀢𑁆𑀣𑀸 𑀫𑀳𑀸𑀓𑀸𑀮𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀏𑀯𑀁 𑀇𑀫𑁂 𑀲𑀢𑁆𑀢𑁂 𑀅𑀢𑁆𑀢𑀦𑀸 𑀓𑀢𑀧𑀸𑀧𑀓𑀫𑁆𑀫𑀫𑁂𑀯 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀪𑀺𑀫𑀢𑁆𑀣𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀦𑀸 𑀳𑀺 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀚𑀁 𑀅𑀢𑁆𑀢𑀲𑀫𑁆𑀪𑀯𑀁;

𑀅𑀪𑀺𑀫𑀢𑁆𑀣𑀢𑀺 𑀤𑀼𑀫𑁆𑀫𑁂𑀥𑀁, 𑀯𑀚𑀺𑀭𑀁𑀯𑀲𑁆𑀫𑀫𑀬𑀁 𑀫𑀡𑀺’’𑀦𑁆𑀢𑀺.

𑀢𑀢𑁆𑀣 𑀯𑀚𑀺𑀭𑀁𑀯𑀲𑁆𑀫𑀫𑀬𑀁 𑀫𑀡𑀺𑀦𑁆𑀢𑀺 𑀯𑀚𑀺𑀭𑀁𑀯 𑀅𑀲𑁆𑀫𑀫𑀬𑀁 𑀫𑀡𑀺𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀸𑀲𑀸𑀡𑀫𑀬𑀁 𑀧𑀸𑀲𑀸𑀡𑀲𑀫𑁆𑀪𑀯𑀁 𑀯𑀚𑀺𑀭𑀁 𑀢𑀫𑁂𑀯 𑀅𑀲𑁆𑀫𑀫𑀬𑀁 𑀫𑀡𑀺𑀁 𑀅𑀢𑁆𑀢𑀦𑁄 𑀉𑀝𑁆𑀞𑀸𑀦𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀧𑀸𑀲𑀸𑀡𑀫𑀡𑀺𑀁 𑀔𑀸𑀤𑀺𑀢𑁆𑀯𑀸 𑀙𑀺𑀤𑁆𑀤𑀁 𑀙𑀺𑀤𑁆𑀤𑀁 𑀔𑀡𑁆𑀟𑀁 𑀔𑀡𑁆𑀟𑀁 𑀓𑀢𑁆𑀯𑀸 𑀅𑀧𑀭𑀺𑀪𑁄𑀕𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀅𑀢𑁆𑀢𑀦𑀸 𑀓𑀢𑀁 𑀅𑀢𑁆𑀢𑀦𑀺 𑀚𑀸𑀢𑀁 𑀅𑀢𑁆𑀢𑀲𑀫𑁆𑀪𑀯𑀁 ¶ ¶ 𑀧𑀸𑀧𑀁 𑀤𑀼𑀫𑁆𑀫𑁂𑀥𑀁 𑀦𑀺𑀧𑁆𑀧𑀜𑁆𑀜𑀁 𑀧𑀼𑀕𑁆𑀕𑀮𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀪𑀺𑀫𑀢𑁆𑀣𑀢𑀺 𑀓𑀦𑁆𑀢𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀓𑀸𑀮𑀉𑀧𑀸𑀲𑀓𑀯𑀢𑁆𑀣𑀼 𑀧𑀜𑁆𑀘𑀫𑀁.

𑀬𑀲𑁆𑀲 ¶ 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀤𑀼𑀲𑁆𑀲𑀻𑀮𑁆𑀬𑀓𑀸𑀭𑀡𑁂𑀦 𑀯𑀟𑁆𑀠𑀺𑀢𑀸𑀬 𑀢𑀡𑁆𑀳𑀸𑀬 𑀅𑀚𑀸𑀢𑀲𑀢𑁆𑀢𑀼𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀚𑀸𑀢𑀲𑀢𑁆𑀢𑀼𑀁 𑀧𑀺𑀢𑀼𑀯𑀥𑁂 𑀲𑀫𑀸𑀤𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀢𑀣𑀸𑀕𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀯𑀢𑁆𑀯𑀸 𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁧.𑁨.𑁧𑁧𑁧-𑁨) 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁 𑀦𑀸𑀫 𑀤𑀼𑀲𑁆𑀲𑀻𑀮𑁆𑀬𑀓𑀸𑀭𑀡𑀸 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸 𑀫𑀸𑀮𑀼𑀯𑀸 𑀯𑀺𑀬 𑀲𑀸𑀮𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀲𑀫𑁆𑀪𑀜𑁆𑀚𑀫𑀸𑀦𑀸 𑀦𑀺𑀭𑀬𑀸𑀤𑀻𑀲𑀼 𑀧𑀓𑁆𑀔𑀺𑀧𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀸𑀫𑀸𑀳 𑁋

‘‘𑀬𑀲𑁆𑀲 ¶ 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁆𑀬𑀁, 𑀫𑀸𑀮𑀼𑀯𑀸 𑀲𑀸𑀮𑀫𑀺𑀯𑁄𑀢𑁆𑀣𑀢𑀁;

𑀓𑀭𑁄𑀢𑀺 𑀲𑁄 𑀢𑀣𑀢𑁆𑀢𑀸𑀦𑀁, 𑀬𑀣𑀸 𑀦𑀁 𑀇𑀘𑁆𑀙𑀢𑀻 𑀤𑀺𑀲𑁄’’𑀢𑀺.

𑀢𑀢𑁆𑀣 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀏𑀓𑀦𑁆𑀢𑀤𑀼𑀲𑁆𑀲𑀻𑀮𑀪𑀸𑀯𑁄. 𑀕𑀺𑀳𑀻 𑀯𑀸 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀓𑀭𑁄𑀦𑁆𑀢𑁄, 𑀧𑀩𑁆𑀩𑀚𑀺𑀢𑁄 𑀯𑀸 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁄 𑀦𑀸𑀫. 𑀇𑀥 𑀧𑀦 𑀬𑁄 𑀤𑁆𑀯𑀻𑀲𑀼 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀤𑀼𑀲𑁆𑀲𑀻𑀮𑁄, 𑀏𑀢𑀲𑁆𑀲 𑀕𑀢𑀺𑀬𑀸 𑀆𑀕𑀢𑀁 𑀤𑀼𑀲𑁆𑀲𑀻𑀮𑀪𑀸𑀯𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀼𑀲𑁆𑀲𑀻𑀮𑀪𑀸𑀯𑁄𑀢𑀺 𑀘𑁂𑀢𑁆𑀣 𑀤𑀼𑀲𑁆𑀲𑀻𑀮𑀲𑁆𑀲 𑀙 ¶ 𑀤𑁆𑀯𑀸𑀭𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀮𑀼𑀯𑀸 𑀲𑀸𑀮𑀫𑀺𑀯𑁄𑀢𑁆𑀣𑀢𑀦𑁆𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀁 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀬𑀣𑀸 𑀦𑀸𑀫 𑀫𑀸𑀮𑀼𑀯𑀸 𑀲𑀸𑀮𑀁 𑀑𑀢𑁆𑀣𑀭𑀦𑁆𑀢𑀻 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀢𑁆𑀢𑁂𑀳𑀺 𑀉𑀤𑀓𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀜𑁆𑀚𑀦𑀯𑀲𑁂𑀦 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀭𑀺𑀬𑁄𑀦𑀦𑁆𑀥𑀢𑀺, 𑀏𑀯𑀁 𑀅𑀢𑁆𑀢𑀪𑀸𑀯𑀁 𑀑𑀢𑁆𑀣𑀢𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁. 𑀲𑁄 𑀫𑀸𑀮𑀼𑀯𑀸𑀬 𑀲𑀫𑁆𑀪𑀜𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑀺𑀬𑀫𑀸𑀦𑁄 𑀭𑀼𑀓𑁆𑀔𑁄 𑀯𑀺𑀬 𑀢𑀸𑀬 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀲𑀫𑁆𑀪𑀜𑁆𑀚𑀺𑀢𑁆𑀯𑀸 𑀅𑀧𑀸𑀬𑁂𑀲𑀼 𑀧𑀸𑀢𑀺𑀬𑀫𑀸𑀦𑁄, 𑀬𑀣𑀸 𑀦𑀁 𑀅𑀦𑀢𑁆𑀣𑀓𑀸𑀫𑁄 𑀤𑀺𑀲𑁄 𑀇𑀘𑁆𑀙𑀢𑀺, 𑀢𑀣𑀸 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑁭. 𑀲𑀗𑁆𑀖𑀪𑁂𑀤𑀧𑀭𑀺𑀲𑀓𑁆𑀓𑀦𑀯𑀢𑁆𑀣𑀼

𑀲𑀼𑀓𑀭𑀸𑀦𑀻𑀢𑀺 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀗𑁆𑀖𑀪𑁂𑀤𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀺𑀲𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀅𑀤𑁆𑀤𑀲𑀸 𑀔𑁄 𑀫𑀁, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁. 𑀤𑀺𑀲𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀸𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀲𑀗𑁆𑀖𑀓𑀫𑁆𑀫𑀜𑁆𑀘𑀸’𑀢𑀺. 𑀅𑀚𑁆𑀚 𑀪𑀕𑀯𑀸 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀉𑀧𑁄𑀲𑀣𑀜𑁆𑀘 𑀓𑀭𑀺𑀲𑁆𑀲𑀢𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀢𑁆𑀣𑀸 𑁋

‘‘𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀼, 𑀲𑀸𑀥𑀼 𑀧𑀸𑀧𑁂𑀦 𑀤𑀼𑀓𑁆𑀓𑀭𑀁;

𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀁, 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭’’𑀦𑁆𑀢𑀺. (𑀉𑀤𑀸. 𑁪𑁮) 𑁋

𑀇𑀫𑀁 ¶ 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸, ‘‘𑀆𑀦𑀦𑁆𑀤, 𑀅𑀢𑁆𑀢𑀦𑁄 𑀅𑀳𑀺𑀢𑀓𑀫𑁆𑀫𑀁 𑀦𑀸𑀫 𑀲𑀼𑀓𑀭𑀁, 𑀳𑀺𑀢𑀓𑀫𑁆𑀫𑀫𑁂𑀯 𑀤𑀼𑀓𑁆𑀓𑀭’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀼𑀓𑀭𑀸𑀦𑀺 𑀅𑀲𑀸𑀥𑀽𑀦𑀺, 𑀅𑀢𑁆𑀢𑀦𑁄 𑀅𑀳𑀺𑀢𑀸𑀦𑀺 𑀘;

𑀬𑀁 𑀯𑁂 𑀳𑀺𑀢𑀜𑁆𑀘 𑀲𑀸𑀥𑀼𑀜𑁆𑀘, 𑀢𑀁 𑀯𑁂 𑀧𑀭𑀫𑀤𑀼𑀓𑁆𑀓𑀭’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀸𑀦𑀺 𑀓𑀫𑁆𑀫𑀸𑀦𑀺 𑀅𑀲𑀸𑀥𑀽𑀦𑀺 𑀲𑀸𑀯𑀚𑁆𑀚𑀸𑀦𑀺 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀓𑀢𑁆𑀢𑀸𑀬𑁂𑀯 𑀅𑀢𑁆𑀢𑀦𑁄 𑀅𑀳𑀺𑀢𑀸𑀦𑀺 𑀘 𑀳𑁄𑀦𑁆𑀢𑀺, 𑀢𑀸𑀦𑀺 𑀲𑀼𑀓𑀭𑀸𑀦𑀺 ¶ . 𑀬𑀁 𑀧𑀦 𑀲𑀼𑀕𑀢𑀺𑀲𑀁𑀯𑀢𑁆𑀢𑀦𑀺𑀓𑀢𑁆𑀢𑀸 𑀅𑀢𑁆𑀢𑀦𑁄 𑀳𑀺𑀢𑀜𑁆𑀘 𑀅𑀦𑀯𑀚𑁆𑀚𑀢𑁆𑀣𑁂𑀦 𑀲𑀸𑀥𑀼𑀜𑁆𑀘 𑀲𑀼𑀕𑀢𑀺𑀲𑀁𑀯𑀢𑁆𑀢𑀦𑀺𑀓𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀜𑁆𑀘 𑀓𑀫𑁆𑀫𑀁, 𑀢𑀁 𑀧𑀸𑀘𑀻𑀦𑀦𑀺𑀦𑁆𑀦𑀸𑀬 𑀕𑀗𑁆𑀕𑀸𑀬 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀘𑁆𑀙𑀸𑀫𑀼𑀔𑀓𑀭𑀡𑀁 𑀯𑀺𑀬 𑀅𑀢𑀺𑀤𑀼𑀓𑁆𑀓𑀭𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀗𑁆𑀖𑀪𑁂𑀤𑀧𑀭𑀺𑀲𑀓𑁆𑀓𑀦𑀯𑀢𑁆𑀣𑀼 𑀲𑀢𑁆𑀢𑀫𑀁.

𑀬𑁄 ¶ 𑀲𑀸𑀲𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀸 𑀇𑀢𑁆𑀣𑀻 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀢𑀁 𑀣𑁂𑀭𑀁 𑀉𑀧𑀝𑁆𑀞𑀳𑀺. 𑀢𑀲𑁆𑀲𑀸 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑁂 𑀫𑀦𑀼𑀲𑁆𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸, 𑀅𑀳𑁄 𑀥𑀫𑁆𑀫𑀤𑁂𑀲𑀦𑀸 𑀫𑀥𑀼𑀭𑀸’’𑀢𑀺 𑀧𑀲𑀁𑀲𑀦𑁆𑀢𑀺. 𑀲𑀸 𑀇𑀢𑁆𑀣𑀻 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀫𑁆𑀧𑀺 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑁄𑀢𑀼𑀓𑀸𑀫𑀸’’𑀢𑀺 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 ‘‘𑀢𑀢𑁆𑀣 𑀫𑀸 𑀕𑀫𑀻’’𑀢𑀺 𑀢𑀁 𑀦𑀺𑀯𑀸𑀭𑁂𑀲𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀧𑀼𑀦𑀤𑀺𑀯𑀲𑁂𑀧𑀻𑀢𑀺 𑀬𑀸𑀯𑀢𑀢𑀺𑀬𑀁 𑀢𑁂𑀦 𑀦𑀺𑀯𑀸𑀭𑀺𑀬𑀫𑀸𑀦𑀸𑀧𑀺 𑀲𑁄𑀢𑀼𑀓𑀸𑀫𑀸𑀯 𑀅𑀳𑁄𑀲𑀺. 𑀓𑀲𑁆𑀫𑀸 𑀲𑁄 𑀧𑀦𑁂𑀢𑀁 𑀦𑀺𑀯𑀸𑀭𑁂𑀲𑀻𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀫𑀬𑀺 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸, ‘‘𑀅𑀫𑁆𑀫, 𑀲𑀸𑀥𑀼𑀓𑀁 𑀅𑀬𑁆𑀬𑀁 𑀧𑀭𑀺𑀯𑀺𑀲𑁂𑀬𑁆𑀬𑀸𑀲𑀻’’𑀢𑀺 𑀥𑀻𑀢𑀭𑀁 𑀆𑀡𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀥𑀻𑀢𑀸𑀧𑀺𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀕𑀢𑀓𑀸𑀮𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 ‘‘𑀓𑀼𑀳𑀺𑀁 𑀫𑀳𑀸𑀉𑀧𑀸𑀲𑀺𑀓𑀸’’𑀢𑀺 𑀯𑀼𑀢𑁆𑀢𑀸 ‘‘𑀥𑀫𑁆𑀫𑀲𑁆𑀲𑀯𑀦𑀸𑀬 ¶ 𑀯𑀺𑀳𑀸𑀭𑀁 𑀕𑀢𑀸’’𑀢𑀺 𑀆𑀳. 𑀲𑁄 𑀢𑀁 ¶ 𑀲𑀼𑀢𑁆𑀯𑀸𑀯 𑀓𑀼𑀘𑁆𑀙𑀺𑀬𑀁 𑀉𑀝𑁆𑀞𑀺𑀢𑁂𑀦 𑀟𑀸𑀳𑁂𑀦 𑀲𑀦𑁆𑀢𑀧𑁆𑀧𑀫𑀸𑀦𑁄 ‘‘𑀇𑀤𑀸𑀦𑀺 𑀲𑀸 𑀫𑀬𑀺 𑀪𑀺𑀦𑁆𑀦𑀸’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀫𑀸𑀦𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳, ‘‘𑀪𑀦𑁆𑀢𑁂, 𑀅𑀬𑀁 𑀇𑀢𑁆𑀣𑀻 𑀤𑀦𑁆𑀥𑀸 𑀲𑀼𑀔𑀼𑀫𑀁 𑀥𑀫𑁆𑀫𑀓𑀣𑀁 𑀦 𑀚𑀸𑀦𑀸𑀢𑀺, 𑀇𑀫𑀺𑀲𑁆𑀲𑀸 𑀔𑀦𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀔𑀼𑀫𑀁 𑀥𑀫𑁆𑀫𑀓𑀣𑀁 𑀅𑀓𑀣𑁂𑀢𑁆𑀯𑀸 𑀤𑀸𑀦𑀓𑀣𑀁 𑀯𑀸 𑀲𑀻𑀮𑀓𑀣𑀁 𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 ‘‘𑀢𑁆𑀯𑀁 𑀤𑀼𑀧𑁆𑀧𑀜𑁆𑀜𑁄 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀧𑀝𑀺𑀓𑁆𑀓𑁄𑀲𑀲𑀺. 𑀅𑀢𑁆𑀢𑀖𑀸𑀢𑀸𑀬𑁂𑀯 𑀯𑀸𑀬𑀫𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁄 𑀲𑀸𑀲𑀦𑀁 𑀅𑀭𑀳𑀢𑀁, 𑀅𑀭𑀺𑀬𑀸𑀦𑀁 𑀥𑀫𑁆𑀫𑀚𑀻𑀯𑀺𑀦𑀁;

𑀧𑀝𑀺𑀓𑁆𑀓𑁄𑀲𑀢𑀺 𑀤𑀼𑀫𑁆𑀫𑁂𑀥𑁄, 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀸𑀧𑀺𑀓𑀁;

𑀨𑀮𑀸𑀦𑀺 𑀓𑀝𑁆𑀞𑀓𑀲𑁆𑀲𑁂𑀯, 𑀅𑀢𑁆𑀢𑀖𑀸𑀢𑀸𑀬 𑀨𑀮𑁆𑀮𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀤𑀼𑀫𑁆𑀫𑁂𑀥𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀳𑀸𑀦𑀺𑀪𑀬𑁂𑀦 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 ‘‘𑀥𑀫𑁆𑀫𑀁 𑀯𑀸 𑀲𑁄𑀲𑁆𑀲𑀸𑀫, 𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑁂 𑀧𑀝𑀺𑀓𑁆𑀓𑁄𑀲𑀦𑁆𑀢𑁄 𑀅𑀭𑀳𑀢𑀁 𑀅𑀭𑀺𑀬𑀸𑀦𑀁 𑀥𑀫𑁆𑀫𑀚𑀻𑀯𑀺𑀦𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀧𑀝𑀺𑀓𑁆𑀓𑁄𑀲𑀢𑀺, 𑀢𑀲𑁆𑀲 𑀢𑀁 𑀧𑀝𑀺𑀓𑁆𑀓𑁄𑀲𑀦𑀁 𑀲𑀸 𑀘 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀯𑁂𑀴𑀼𑀲𑀗𑁆𑀔𑀸𑀢𑀲𑁆𑀲 𑀓𑀝𑁆𑀞𑀓𑀲𑁆𑀲 𑀨𑀮𑀸𑀦𑀺 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸 𑀓𑀝𑁆𑀞𑀓𑁄 𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀖𑀸𑀢𑀸𑀬 𑀨𑀮𑁆𑀮𑀢𑀺, 𑀅𑀢𑁆𑀢𑀦𑁄 𑀖𑀸𑀢𑀢𑁆𑀣𑀫𑁂𑀯 𑀨𑀮𑀢𑀺, 𑀏𑀯𑀁 𑀲𑁄𑀧𑀺 𑀅𑀢𑁆𑀢𑀖𑀸𑀢𑀸𑀬 𑀨𑀮𑁆𑀮𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀨𑀮𑀁 ¶ 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺. (𑀘𑀽𑀴𑀯. 𑁩𑁩𑁫; 𑀅. 𑀦𑀺. 𑁪.𑁬𑁮);

𑀤𑁂𑀲𑀦𑀸𑀯𑀲𑀸𑀦𑁂 𑀉𑀧𑀸𑀲𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀢𑁆𑀢𑀦𑀸 ¶ ¶ 𑀳𑀺 𑀓𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀓𑀸𑀮𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀫𑀳𑀸𑀓𑀸𑀮𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀫𑀗𑁆𑀕𑀘𑁄𑀭𑀸 𑀲𑀸𑀫𑀺𑀓𑁂𑀳𑀺 𑀅𑀦𑀼𑀩𑀤𑁆𑀥𑀸 𑀭𑀢𑁆𑀢𑀺𑀁 𑀯𑀺𑀳𑀸𑀭𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀸𑀢𑁄𑀯 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀼𑀭𑀢𑁄 𑀪𑀡𑁆𑀟𑀺𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀭𑀢𑁆𑀢𑀺𑀁 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀯𑀺𑀬 𑀘𑀭𑀢𑀺, 𑀕𑀡𑁆𑀳𑀣 𑀦’’𑀦𑁆𑀢𑀺 𑀢𑀁 𑀧𑁄𑀣𑀬𑀺𑀁𑀲𑀼. 𑀓𑀼𑀫𑁆𑀪𑀤𑀸𑀲𑀺𑀬𑁄 𑀉𑀤𑀓𑀢𑀺𑀢𑁆𑀣𑀁 𑀕𑀘𑁆𑀙𑀫𑀸𑀦𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀧𑁂𑀣, 𑀲𑀸𑀫𑀺, 𑀦𑀸𑀬𑀁 𑀏𑀯𑀭𑀽𑀧𑀁 𑀓𑀭𑁄𑀢𑀻’’𑀢𑀺 𑀢𑀁 𑀫𑁄𑀘𑁂𑀲𑀼𑀁. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀫𑁆𑀳𑀺 𑀫𑀦𑀼𑀲𑁆𑀲𑁂𑀳𑀺 𑀦𑀸𑀲𑀺𑀢𑁄, 𑀓𑀼𑀫𑁆𑀪𑀤𑀸𑀲𑀺𑀬𑁄 𑀫𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀘𑀽𑀴𑀓𑀸𑀮𑀉𑀧𑀸𑀲𑀓𑁄 𑀓𑀼𑀫𑁆𑀪𑀤𑀸𑀲𑀺𑀬𑁄 𑀘𑁂𑀯 𑀦𑀺𑀲𑁆𑀲𑀸𑀬, 𑀅𑀢𑁆𑀢𑀦𑁄 𑀘 𑀅𑀓𑀭𑀡𑀪𑀸𑀯𑁂𑀦 𑀚𑀻𑀯𑀺𑀢𑀁 𑀮𑀪𑀺. 𑀇𑀫𑁂 𑀳𑀺 𑀦𑀸𑀫 𑀲𑀢𑁆𑀢𑀸 𑀅𑀢𑁆𑀢𑀦𑀸 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀸𑀤𑀻𑀲𑀼 𑀅𑀢𑁆𑀢𑀦𑀸𑀯 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀓𑀼𑀲𑀮𑀁 𑀓𑀢𑁆𑀯𑀸 𑀧𑀦 𑀲𑀼𑀕𑀢𑀺𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀦𑀸 𑀳𑀺 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸 𑀲𑀁𑀓𑀺𑀮𑀺𑀲𑁆𑀲𑀢𑀺;

𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺;

𑀲𑀼𑀤𑁆𑀥𑀻 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁, 𑀦𑀸𑀜𑁆𑀜𑁄 𑀅𑀜𑁆𑀜𑀁 𑀯𑀺𑀲𑁄𑀥𑀬𑁂’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑁂𑀦 𑀅𑀢𑁆𑀢𑀦𑀸 𑀅𑀓𑀼𑀲𑀮𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀲𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 ¶ 𑀅𑀢𑁆𑀢𑀦𑀸𑀯 𑀲𑀁𑀓𑀺𑀮𑀺𑀲𑁆𑀲𑀢𑀺. 𑀬𑁂𑀦 𑀧𑀦 𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀲𑁄 𑀲𑀼𑀕𑀢𑀺𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺. 𑀓𑀼𑀲𑀮𑀓𑀫𑁆𑀫𑀲𑀗𑁆𑀔𑀸𑀢𑀸 𑀲𑀼𑀤𑁆𑀥𑀺 𑀅𑀓𑀼𑀲𑀮𑀓𑀫𑁆𑀫𑀲𑀗𑁆𑀔𑀸𑀢𑀸 𑀘 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁 𑀓𑀸𑀭𑀓𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑀺𑀬𑁂𑀯 𑀯𑀺𑀧𑀘𑁆𑀘𑀢𑀺. 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀜𑁆𑀜𑀁 𑀧𑀼𑀕𑁆𑀕𑀮𑀁 𑀦 𑀯𑀺𑀲𑁄𑀥𑀬𑁂 𑀦𑁂𑀯 𑀯𑀺𑀲𑁄𑀥𑁂𑀢𑀺, 𑀦 𑀓𑀺𑀮𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀘𑀽𑀴𑀓𑀸𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀘𑀽𑀴𑀓𑀸𑀮𑀉𑀧𑀸𑀲𑀓𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀅𑀢𑁆𑀢𑀤𑀢𑁆𑀣𑀢𑁆𑀣𑁂𑀭𑀯𑀢𑁆𑀣𑀼

𑀅𑀢𑁆𑀢𑀤𑀢𑁆𑀣𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀤𑀢𑁆𑀣𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸𑀭𑀸 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂, ‘‘𑀪𑀺𑀓𑁆𑀔𑀯𑁂, 𑀅𑀳𑀁 𑀇𑀢𑁄 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀸 𑀲𑀢𑁆𑀢𑀲𑀢𑀸 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀯𑀺𑀚𑀳𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀅𑀢𑁆𑀢𑀤𑀢𑁆𑀣𑀢𑁆𑀣𑁂𑀭𑁄 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀓𑀺𑀭 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀅𑀯𑀻𑀢𑀭𑀸𑀕𑁄, 𑀲𑀢𑁆𑀣𑀭𑀺 𑀥𑀭𑀫𑀸𑀦𑁂𑀬𑁂𑀯 𑀅𑀭𑀳𑀢𑁆𑀢𑀢𑁆𑀣𑀸𑀬 𑀯𑀸𑀬𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀦 𑀕𑀘𑁆𑀙𑀢𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀓𑀲𑁆𑀫𑀸, 𑀆𑀯𑀼𑀲𑁄, 𑀢𑁆𑀯𑀁 𑀦𑁂𑀯 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀲𑀺, 𑀦 𑀓𑀺𑀜𑁆𑀘𑀺 𑀫𑀦𑁆𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀏𑀯𑀁 𑀦𑀸𑀫 𑀓𑀭𑁄𑀢𑀻’’𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀲𑁄 𑀲𑀢𑁆𑀣𑀸𑀭𑀸𑀧𑀺 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑁂 𑀓𑀺𑀭, 𑀪𑀦𑁆𑀢𑁂, 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 ¶ 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀣, 𑀅𑀳𑀁 𑀢𑀼𑀫𑁆𑀳𑁂𑀲𑀼 𑀥𑀭𑀦𑁆𑀢𑁂𑀲𑀼𑀬𑁂𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀸𑀬𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀢𑁂𑀦 𑀅𑀢𑁆𑀢𑀤𑀢𑁆𑀣𑁂𑀦 𑀯𑀺𑀬 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀦 𑀳𑀺 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀸 𑀫𑀁 𑀧𑀽𑀚𑁂𑀦𑁆𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀧𑀦 𑀫𑀁 𑀧𑀽𑀚𑁂𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑁂𑀦𑀧𑀺 𑀅𑀢𑁆𑀢𑀤𑀢𑁆𑀣𑀲𑀤𑀺𑀲𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑁂𑀦, 𑀩𑀳𑀼𑀦𑀸𑀧𑀺 𑀦 𑀳𑀸𑀧𑀬𑁂;

𑀅𑀢𑁆𑀢𑀤𑀢𑁆𑀣𑀫𑀪𑀺𑀜𑁆𑀜𑀸𑀬, 𑀲𑀤𑀢𑁆𑀣𑀧𑀲𑀼𑀢𑁄 𑀲𑀺𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀕𑀺𑀳𑀺𑀪𑀽𑀢𑀸 𑀢𑀸𑀯 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀲𑀳𑀲𑁆𑀲𑀫𑀢𑁆𑀢𑁂𑀦𑀸𑀧𑀺 𑀧𑀭𑀲𑁆𑀲 𑀅𑀢𑁆𑀣𑁂𑀦 ¶ 𑀦 𑀳𑀸𑀧𑀬𑁂. 𑀓𑀸𑀓𑀡𑀺𑀓𑀫𑀢𑁆𑀢𑁂𑀦𑀸𑀧𑀺 𑀳𑀺𑀲𑁆𑀲 𑀅𑀢𑁆𑀢𑀤𑀢𑁆𑀣𑁄𑀯 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀦𑀺𑀧𑁆𑀨𑀸𑀤𑁂𑀬𑁆𑀬, 𑀦 𑀧𑀭𑀢𑁆𑀣𑁄. 𑀇𑀤𑀁 ¶ 𑀧𑀦 𑀏𑀯𑀁 𑀅𑀓𑀣𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀓𑀣𑀺𑀢𑀁, 𑀢𑀲𑁆𑀫𑀸 ‘‘𑀅𑀢𑁆𑀢𑀤𑀢𑁆𑀣𑀁 𑀦 𑀳𑀸𑀧𑁂𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀁 𑀘𑁂𑀢𑀺𑀬𑀧𑀝𑀺𑀲𑀗𑁆𑀔𑀭𑀡𑀸𑀤𑀺𑀓𑀺𑀘𑁆𑀘𑀁 𑀯𑀸 𑀉𑀧𑀚𑁆𑀛𑀸𑀬𑀸𑀤𑀺𑀯𑀢𑁆𑀢𑀁 𑀯𑀸 𑀦 𑀳𑀸𑀧𑁂𑀢𑀩𑁆𑀩𑀁. 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀜𑁆𑀳𑀺 𑀧𑀽𑀭𑁂𑀦𑁆𑀢𑁄𑀬𑁂𑀯 𑀅𑀭𑀺𑀬𑀨𑀮𑀸𑀤𑀻𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀅𑀢𑁆𑀢𑀤𑀢𑁆𑀣𑁄𑀯. 𑀬𑁄 𑀧𑀦 𑀅𑀘𑁆𑀘𑀸𑀭𑀤𑁆𑀥𑀯𑀺𑀧𑀲𑁆𑀲𑀓𑁄 ‘‘𑀅𑀚𑁆𑀚 𑀯𑀸 𑀲𑀼𑀯𑁂 𑀯𑀸’’𑀢𑀺 𑀧𑀝𑀺𑀯𑁂𑀥𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀘𑀭𑀢𑀺, 𑀢𑁂𑀦 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺𑀧𑀺 𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑀫𑁂𑀯 𑀓𑀸𑀢𑀩𑁆𑀩𑀁. 𑀏𑀯𑀭𑀽𑀧𑀜𑁆𑀳𑀺 𑀅𑀢𑁆𑀢𑀤𑀢𑁆𑀣𑀫𑀪𑀺𑀜𑁆𑀜𑀸𑀬 ‘‘𑀅𑀬𑀁 𑀫𑁂 𑀅𑀢𑁆𑀢𑀦𑁄 𑀅𑀢𑁆𑀣𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ¶ , 𑀲𑀤𑀢𑁆𑀣𑀧𑀲𑀼𑀢𑁄 𑀲𑀺𑀬𑀸𑀢𑀺 𑀢𑀲𑁆𑀫𑀺𑀁 𑀲𑀓𑁂 𑀅𑀢𑁆𑀣𑁂 𑀉𑀬𑁆𑀬𑀼𑀢𑁆𑀢𑀧𑀬𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀣𑁂𑀭𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀢𑁆𑀢𑀤𑀢𑁆𑀣𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑀫𑀁.

𑀅𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀳𑀻𑀦𑀁 ¶ ¶ ¶ 𑀥𑀫𑁆𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀤𑀳𑀭𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀜𑁆𑀜𑀢𑀭𑁄 𑀓𑀺𑀭 𑀣𑁂𑀭𑁄 𑀤𑀳𑀭𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀸𑀢𑁄𑀯 𑀯𑀺𑀲𑀸𑀔𑀸𑀬 𑀕𑁂𑀳𑀁 𑀅𑀕𑀫𑀸𑀲𑀺. 𑀯𑀺𑀲𑀸𑀔𑀸𑀬 𑀕𑁂𑀳𑁂 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀯𑀬𑀸𑀕𑀼 𑀦𑀺𑀘𑁆𑀘𑀧𑀜𑁆𑀜𑀢𑁆𑀢𑀸 𑀳𑁄𑀢𑀺. 𑀣𑁂𑀭𑁄 𑀢𑀢𑁆𑀣 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀤𑀳𑀭𑀪𑀺𑀓𑁆𑀔𑀼𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀁 𑀅𑀜𑁆𑀜𑀁 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀯𑀺𑀲𑀸𑀔𑀸𑀬 𑀧𑀼𑀢𑁆𑀢𑀲𑁆𑀲 𑀥𑀻𑀢𑀸 𑀅𑀬𑁆𑀬𑀺𑀓𑀸𑀬 𑀞𑀸𑀦𑁂 𑀞𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀢𑀺. 𑀲𑀸 𑀢𑀲𑁆𑀲 𑀤𑀳𑀭𑀲𑁆𑀲 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀦𑁆𑀢𑀻 𑀘𑀸𑀝𑀺𑀬𑀁 𑀅𑀢𑁆𑀢𑀦𑁄 𑀫𑀼𑀔𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀳𑀲𑀺, 𑀤𑀳𑀭𑁄𑀧𑀺 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀳𑀲𑀺. 𑀲𑀸 𑀢𑀁 𑀳𑀲𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀙𑀺𑀦𑁆𑀦𑀲𑀻𑀲𑁄 𑀳𑀲𑀢𑀻’’𑀢𑀺 𑀆𑀳. 𑀅𑀣 𑀦𑀁 𑀤𑀳𑀭𑁄 ‘‘𑀢𑁆𑀯𑀁 𑀙𑀺𑀦𑁆𑀦𑀲𑀻𑀲𑀸, 𑀫𑀸𑀢𑀸𑀧𑀺𑀢𑀭𑁄𑀧𑀺 𑀢𑁂 𑀙𑀺𑀦𑁆𑀦𑀲𑀻𑀲𑀸’’𑀢𑀺 𑀅𑀓𑁆𑀓𑁄𑀲𑀺. 𑀲𑀸 𑀭𑁄𑀤𑀫𑀸𑀦𑀸 𑀫𑀳𑀸𑀦𑀲𑁂 𑀅𑀬𑁆𑀬𑀺𑀓𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀇𑀤𑀁, 𑀅𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀸 𑀤𑀳𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀸 𑀓𑀼𑀚𑁆𑀛𑀺, 𑀦 𑀏𑀢𑀁 𑀙𑀺𑀦𑁆𑀦𑀓𑁂𑀲𑀦𑀔𑀲𑁆𑀲 𑀙𑀺𑀦𑁆𑀦𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀲𑁆𑀲 ¶ 𑀫𑀚𑁆𑀛𑁂 𑀙𑀺𑀦𑁆𑀦𑀓𑀧𑀸𑀮𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀲𑁆𑀲 𑀅𑀬𑁆𑀬𑀲𑁆𑀲 𑀅𑀕𑀭𑀼𑀓’’𑀦𑁆𑀢𑀺 𑀆𑀳. 𑀤𑀳𑀭𑁄 𑀆𑀫, 𑀉𑀧𑀸𑀲𑀺𑀓𑁂, 𑀢𑁆𑀯𑀁 𑀫𑀫 𑀙𑀺𑀦𑁆𑀦𑀓𑁂𑀲𑀸𑀤𑀺𑀪𑀸𑀯𑀁 𑀚𑀸𑀦𑀸𑀲𑀺, 𑀇𑀫𑀺𑀲𑁆𑀲𑀸 𑀫𑀁 ‘‘𑀙𑀺𑀦𑁆𑀦𑀲𑀻𑀲𑁄’’𑀢𑀺 𑀓𑀢𑁆𑀯𑀸 𑀅𑀓𑁆𑀓𑁄𑀲𑀺𑀢𑀼𑀁 𑀯𑀝𑁆𑀝𑀺𑀲𑁆𑀲𑀢𑀻𑀢𑀺. 𑀯𑀺𑀲𑀸𑀔𑀸 𑀦𑁂𑀯 𑀤𑀳𑀭𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀔𑀺, 𑀦𑀧𑀺 𑀤𑀸𑀭𑀺𑀓𑀁. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀫𑀺𑀤𑀁 𑀉𑀧𑀸𑀲𑀺𑀓𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀤𑀳𑀭𑀁 𑀑𑀯𑀤𑀦𑁆𑀢𑁄 𑀆𑀳 𑁋 ‘‘𑀅𑀧𑁂𑀳𑀺, 𑀆𑀯𑀼𑀲𑁄, 𑀦𑀸𑀬𑀁 𑀙𑀺𑀦𑁆𑀦𑀓𑁂𑀲𑀦𑀔𑀯𑀢𑁆𑀣𑀲𑁆𑀲 𑀫𑀚𑁆𑀛𑁂 𑀙𑀺𑀦𑁆𑀦𑀓𑀧𑀸𑀮𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀲𑁆𑀲 𑀅𑀓𑁆𑀓𑁄𑀲𑁄, 𑀢𑀼𑀡𑁆𑀳𑀻 𑀳𑁄𑀳𑀻’’𑀢𑀺. 𑀆𑀫, 𑀪𑀦𑁆𑀢𑁂, 𑀓𑀺𑀁 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀬𑀺𑀓𑀁 𑀅𑀢𑀚𑁆𑀚𑁂𑀢𑁆𑀯𑀸 𑀫𑀁 𑀢𑀚𑁆𑀚𑁂𑀣, 𑀫𑀁 ‘‘𑀙𑀺𑀦𑁆𑀦𑀲𑀻𑀲𑁄’’𑀢𑀺 𑀅𑀓𑁆𑀓𑁄𑀲𑀺𑀢𑀼𑀁 𑀯𑀝𑁆𑀝𑀺𑀲𑁆𑀲𑀢𑀻𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺. 𑀯𑀺𑀲𑀸𑀔𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀤𑀳𑀭𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀫𑀬𑀸 𑀇𑀫𑀁 𑀤𑀳𑀭𑀁 𑀅𑀦𑀼𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀲𑀸𑀔𑀁 𑀆𑀳 𑁋 ‘‘𑀓𑀺𑀁 𑀧𑀦 𑀯𑀺𑀲𑀸𑀔𑁂 𑀢𑀯 𑀤𑀸𑀭𑀺𑀓𑀸𑀬 𑀙𑀺𑀦𑁆𑀦𑀓𑁂𑀲𑀸𑀤𑀺𑀫𑀢𑁆𑀢𑀓𑁂𑀦𑁂𑀯 𑀫𑀫 𑀲𑀸𑀯𑀓𑁂 ¶ 𑀙𑀺𑀦𑁆𑀦𑀲𑀻𑀲𑁂 𑀓𑀢𑁆𑀯𑀸 𑀅𑀓𑁆𑀓𑁄𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺? 𑀤𑀳𑀭𑁄 𑀢𑀸𑀯𑀤𑁂𑀯 𑀉𑀝𑁆𑀞𑀸𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ¶ , ‘‘𑀪𑀦𑁆𑀢𑁂, 𑀏𑀢𑀁 𑀧𑀜𑁆𑀳𑀁 𑀢𑀼𑀫𑁆𑀳𑁂𑀯 𑀲𑀼𑀝𑁆𑀞𑀼 𑀚𑀸𑀦𑀸𑀣, 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀘 𑀉𑀧𑀸𑀲𑀺𑀓𑀸 𑀘 𑀲𑀼𑀝𑁆𑀞𑀼 𑀦 𑀚𑀸𑀦𑀦𑁆𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 𑀤𑀳𑀭𑀲𑁆𑀲 𑀅𑀢𑁆𑀢𑀦𑁄 𑀅𑀦𑀼𑀓𑀼𑀮𑀪𑀸𑀯𑀁 𑀜𑀢𑁆𑀯𑀸 ‘‘𑀓𑀸𑀫𑀕𑀼𑀡𑀁 𑀆𑀭𑀩𑁆𑀪 𑀳𑀲𑀦𑀪𑀸𑀯𑁄 𑀦𑀸𑀫 𑀳𑀻𑀦𑁄 𑀥𑀫𑁆𑀫𑁄, 𑀳𑀻𑀦𑀜𑁆𑀘 𑀦𑀸𑀫 𑀥𑀫𑁆𑀫𑀁 𑀲𑁂𑀯𑀺𑀢𑀼𑀁 𑀧𑀫𑀸𑀤𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀳𑀻𑀦𑀁 ¶ 𑀥𑀫𑁆𑀫𑀁 𑀦 𑀲𑁂𑀯𑁂𑀬𑁆𑀬, 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑁂𑀬𑁆𑀬, 𑀦 𑀲𑀺𑀬𑀸 𑀮𑁄𑀓𑀯𑀟𑁆𑀠𑀦𑁄’’𑀢𑀺.

𑀢𑀢𑁆𑀣 𑀳𑀻𑀦𑀁 𑀥𑀫𑁆𑀫𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀁 𑀥𑀫𑁆𑀫𑀁. 𑀲𑁄 𑀳𑀺 𑀳𑀻𑀦𑁄 𑀥𑀫𑁆𑀫𑁄 𑀦 𑀅𑀦𑁆𑀢𑀫𑀲𑁄 𑀑𑀝𑁆𑀞𑀕𑁄𑀡𑀸𑀤𑀻𑀳𑀺𑀧𑀺 𑀧𑀝𑀺𑀲𑁂𑀯𑀺𑀢𑀩𑁆𑀩𑁄. 𑀳𑀻𑀦𑁂𑀲𑀼 𑀘 𑀦𑀺𑀭𑀬𑀸𑀤𑀻𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀻𑀢𑀺 𑀳𑀻𑀦𑁄 𑀦𑀸𑀫, 𑀢𑀁 𑀦 𑀲𑁂𑀯𑁂𑀬𑁆𑀬. 𑀧𑀫𑀸𑀤𑁂𑀦𑀸𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀧𑀫𑀸𑀤𑁂𑀦𑀸𑀧𑀺 𑀦 𑀲𑀁𑀯𑀲𑁂. 𑀦 𑀲𑁂𑀯𑁂𑀬𑁆𑀬𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑁆𑀧𑀺 𑀦 𑀕𑀡𑁆𑀳𑁂𑀬𑁆𑀬. 𑀮𑁄𑀓𑀯𑀟𑁆𑀠𑀦𑁄𑀢𑀺 𑀬𑁄 𑀳𑀺 𑀏𑀯𑀁 𑀓𑀭𑁄𑀢𑀺, 𑀲𑁄 𑀮𑁄𑀓𑀯𑀟𑁆𑀠𑀦𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀅𑀓𑀭𑀡𑁂𑀦 𑀦 𑀲𑀺𑀬𑀸 𑀮𑁄𑀓𑀯𑀟𑁆𑀠𑀦𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀤𑀳𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀉𑀢𑁆𑀢𑀺𑀝𑁆𑀞𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀧𑀺𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀜𑀸𑀢𑀻𑀳𑀺 𑀓𑀢𑀧𑀘𑁆𑀘𑀼𑀕𑁆𑀕𑀫𑀦𑁄 𑀦𑀺𑀕𑁆𑀭𑁄𑀥𑀸𑀭𑀸𑀫𑀁 𑀧𑀢𑁆𑀯𑀸 𑀜𑀸𑀢𑀻𑀦𑀁 𑀫𑀸𑀦𑀪𑀺𑀦𑁆𑀤𑀦𑀢𑁆𑀣𑀸𑀬 𑀆𑀓𑀸𑀲𑁂 𑀭𑀢𑀦𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀘𑀗𑁆𑀓𑀫𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀜𑀸𑀢𑀻 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀦𑁆𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀢𑀁 𑀆𑀭𑀩𑁆𑀪 𑀫𑀳𑀸𑀚𑀦𑁂𑀦 𑀓𑀣𑀸𑀬 ¶ 𑀲𑀫𑀼𑀝𑁆𑀞𑀸𑀧𑀺𑀢𑀸𑀬 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀫𑀬𑁆𑀳𑀁 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺𑀬𑁂𑀯𑀸’’𑀢𑀺 ¶ 𑀯𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀲𑀺. 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁂𑀲𑀼 𑀜𑀸𑀢𑀻𑀲𑀼 𑀏𑀓𑁄𑀧𑀺 𑀲𑀢𑁆𑀣𑀸𑀭𑀁 𑀦 𑀦𑀺𑀫𑀦𑁆𑀢𑁂𑀲𑀺. 𑀭𑀸𑀚𑀸𑀧𑀺 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀫𑀫 𑀕𑁂𑀳𑀁 𑀅𑀦𑀸𑀕𑀦𑁆𑀢𑁆𑀯𑀸 𑀓𑀳𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀦𑀺𑀫𑀦𑁆𑀢𑁂𑀢𑁆𑀯𑀸𑀯 𑀅𑀕𑀫𑀸𑀲𑀺. 𑀕𑀦𑁆𑀢𑁆𑀯𑀸 𑀘 𑀧𑀦 𑀕𑁂𑀳𑁂 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀬𑀸𑀕𑀼𑀆𑀤𑀻𑀦𑀺 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀺 ¶ 𑀧𑀜𑁆𑀜𑀸𑀧𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀅𑀢𑀻𑀢𑀩𑀼𑀤𑁆𑀥𑀸 𑀧𑀺𑀢𑀼 𑀦𑀕𑀭𑀁 𑀧𑀢𑁆𑀯𑀸 𑀉𑀚𑀼𑀓𑀫𑁂𑀯 𑀜𑀸𑀢𑀺𑀓𑀼𑀮𑀁 𑀧𑀯𑀺𑀲𑀺𑀁𑀲𑀼, 𑀉𑀤𑀸𑀳𑀼 𑀧𑀝𑀺𑀧𑀸𑀝𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀺𑀁𑀲𑀽’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀧𑀝𑀺𑀧𑀸𑀝𑀺𑀬𑀸 𑀘𑀭𑀺𑀁𑀲𑀽’’𑀢𑀺 𑀤𑀺𑀲𑁆𑀯𑀸 𑀧𑀞𑀫𑀕𑁂𑀳𑀢𑁄 𑀧𑀝𑁆𑀞𑀸𑀬 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀸𑀬𑀸𑀲𑀺. 𑀭𑀸𑀳𑀼𑀮𑀫𑀸𑀢𑀸 𑀧𑀸𑀲𑀸𑀤𑀢𑀮𑁂 𑀦𑀺𑀲𑀺𑀦𑁆𑀦𑀸𑀯 𑀤𑀺𑀲𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀸𑀝𑀓𑀁 𑀲𑀡𑁆𑀞𑀸𑀧𑁂𑀦𑁆𑀢𑁄 𑀯𑁂𑀕𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀧𑀼𑀢𑁆𑀢, 𑀓𑀲𑁆𑀫𑀸 𑀫𑀁 𑀦𑀸𑀲𑁂𑀲𑀺, 𑀅𑀢𑀺𑀯𑀺𑀬 𑀢𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦 𑀮𑀚𑁆𑀚𑀸 𑀉𑀧𑁆𑀧𑀸𑀤𑀺𑀢𑀸, 𑀬𑀼𑀢𑁆𑀢𑀁 𑀦𑀸𑀫 𑀯𑁄 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀤𑀻𑀳𑀺 𑀯𑀺𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁, 𑀓𑀺𑀁 𑀫𑀁 𑀮𑀚𑁆𑀚𑀸𑀧𑁂𑀲𑀻’’𑀢𑀺? ‘‘𑀦𑀸𑀳𑀁 𑀢𑀁, 𑀫𑀳𑀸𑀭𑀸𑀚, 𑀮𑀚𑁆𑀚𑀸𑀧𑁂𑀫𑀺, 𑀅𑀢𑁆𑀢𑀦𑁄 𑀧𑀦 𑀓𑀼𑀮𑀯𑀁𑀲𑀁 𑀅𑀦𑀼𑀯𑀢𑁆𑀢𑀸𑀫𑀻’’𑀢𑀺. ‘‘𑀓𑀺𑀁 𑀧𑀦, 𑀢𑀸𑀢, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀦𑀯𑀁𑀲𑁄 𑀫𑀫 𑀯𑀁𑀲𑁄’’𑀢𑀺? ‘‘𑀦𑁂𑀲𑁄, 𑀫𑀳𑀸𑀭𑀸𑀚, 𑀢𑀯 𑀯𑀁𑀲𑁄, 𑀫𑀫 𑀧𑀦𑁂𑀲𑁄 𑀯𑀁𑀲𑁄. 𑀅𑀦𑁂𑀓𑀸𑀦𑀺 𑀳𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸𑀯 𑀚𑀻𑀯𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀥𑀫𑁆𑀫𑀁 𑀲𑀼𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

‘‘𑀥𑀫𑁆𑀫𑀁 𑀘𑀭𑁂 𑀲𑀼𑀘𑀭𑀺𑀢𑀁, 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘𑀸’’𑀢𑀺.

𑀢𑀢𑁆𑀣 ¶ 𑀉𑀢𑁆𑀢𑀺𑀝𑁆𑀞𑁂𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀭𑁂𑀲𑀁 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀕𑀳𑁂𑀢𑀩𑁆𑀩𑀧𑀺𑀡𑁆𑀟𑁂. 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀜𑁆𑀳𑀺 𑀳𑀸𑀧𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀧𑀭𑀺𑀬𑁂𑀲𑀦𑁆𑀢𑁄 𑀉𑀢𑁆𑀢𑀺𑀝𑁆𑀞𑁂 𑀧𑀫𑀚𑁆𑀚𑀢𑀺 𑀦𑀸𑀫, 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀦 𑀦 𑀧𑀫𑀚𑁆𑀚𑀢𑀺 𑀦𑀸𑀫. 𑀏𑀯𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬. 𑀥𑀫𑁆𑀫𑀦𑁆𑀢𑀺 𑀅𑀦𑁂𑀲𑀦𑀁 𑀧𑀳𑀸𑀬 ¶ 𑀲𑀧𑀤𑀸𑀦𑀁 𑀘𑀭𑀦𑁆𑀢𑁄 𑀢𑀫𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀥𑀫𑁆𑀫𑀁 𑀲𑀼𑀘𑀭𑀺𑀢𑀁 𑀘𑀭𑁂. 𑀲𑀼𑀔𑀁 𑀲𑁂𑀢𑀻𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀏𑀯𑀁 𑀧𑀦𑁂𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀥𑀫𑁆𑀫𑀁 𑀘𑀭𑀦𑁆𑀢𑁄 𑀥𑀫𑁆𑀫𑀘𑀸𑀭𑀻 𑀇𑀥 𑀮𑁄𑀓𑁂 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀲𑀼𑀔𑀁 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀯𑁂𑀲𑀺𑀬𑀸𑀤𑀺𑀪𑁂𑀤𑁂 𑀅𑀕𑁄𑀘𑀭𑁂 𑀘𑀭𑀦𑁆𑀢𑁄 𑀪𑀺𑀓𑁆𑀔𑀸𑀘𑀭𑀺𑀬𑀥𑀫𑁆𑀫𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺 𑀦𑀸𑀫. 𑀏𑀯𑀁 𑀅𑀘𑀭𑀺𑀢𑁆𑀯𑀸 𑀥𑀫𑁆𑀫𑀁 𑀘𑀭𑁂 𑀲𑀼𑀘𑀭𑀺𑀢𑀁, 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀭𑀸𑀚𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑁩. 𑀧𑀜𑁆𑀘𑀲𑀢𑀯𑀺𑀧𑀲𑁆𑀲𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀬𑀣𑀸 ¶ 𑀧𑀼𑀩𑁆𑀩𑀼𑀴𑀓𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀯𑀺𑀧𑀲𑁆𑀲𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀅𑀧𑁆𑀧𑀯𑀺𑀲𑁂𑀲𑀸 ‘‘𑀯𑀺𑀲𑁂𑀲𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀭𑀻𑀘𑀺𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑀸𑀯 𑀆𑀕𑀫𑀺𑀁𑀲𑀼 ¶ . 𑀢𑁂𑀲𑀁 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀓𑁆𑀔𑀡𑁂𑀬𑁂𑀯 𑀤𑁂𑀯𑁄 𑀯𑀲𑁆𑀲𑀺. 𑀢𑁂 𑀢𑀢𑁆𑀣 𑀢𑀢𑁆𑀣 𑀧𑀫𑀼𑀔𑁂𑀲𑀼 𑀞𑀢𑁆𑀯𑀸 𑀥𑀸𑀭𑀸𑀯𑁂𑀕𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑁂 𑀧𑀼𑀩𑁆𑀩𑀴𑀓𑁂 𑀤𑀺𑀲𑁆𑀯𑀸 ‘‘𑀅𑀬𑀫𑁆𑀧𑀺 𑀅𑀢𑁆𑀢𑀪𑀸𑀯𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑀢𑁆𑀣𑁂𑀦 𑀧𑀼𑀩𑁆𑀩𑀼𑀴𑀓𑀲𑀤𑀺𑀲𑁄𑀬𑁂𑀯𑀸’’𑀢𑀺 𑀆𑀭𑀫𑁆𑀫𑀡𑀁 𑀕𑀡𑁆𑀳𑀺𑀁𑀲𑀼. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑁂 𑀪𑀺𑀓𑁆𑀔𑀽 𑀑𑀮𑁄𑀓𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀯𑀺𑀬 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀣𑀸 𑀧𑀼𑀩𑁆𑀩𑀼𑀴𑀓𑀁 𑀧𑀲𑁆𑀲𑁂, 𑀬𑀣𑀸 𑀧𑀲𑁆𑀲𑁂 𑀫𑀭𑀻𑀘𑀺𑀓𑀁;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀫𑀭𑀻𑀘𑀺𑀓𑀦𑁆𑀢𑀺 𑀫𑀬𑀽𑀔𑀁. 𑀢𑁂 𑀳𑀺 𑀤𑀽𑀭𑀢𑁄𑀯 𑀕𑁂𑀳𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀺𑀢𑀸𑀧𑀺 𑀉𑀧𑀕𑀘𑁆𑀙𑀦𑁆𑀢𑀸𑀦𑀁 𑀅𑀕𑀬𑁆𑀳𑀽𑀧𑀕𑀸 𑀭𑀺𑀢𑁆𑀢𑀓𑀸 𑀢𑀼𑀘𑁆𑀙𑀓𑀸𑀯. 𑀢𑀲𑁆𑀫𑀸 𑀬𑀣𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 ¶ 𑀪𑀺𑀚𑁆𑀚𑀦𑀢𑁆𑀣𑁂𑀦 𑀧𑀼𑀩𑁆𑀩𑀼𑀴𑀓𑀁 𑀭𑀺𑀢𑁆𑀢𑀢𑀼𑀘𑁆𑀙𑀸𑀤𑀺𑀪𑀸𑀯𑁂𑀦𑁂𑀯 𑀧𑀲𑁆𑀲𑁂𑀬𑁆𑀬, 𑀏𑀯𑀁 𑀔𑀦𑁆𑀥𑀸𑀤𑀺𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀜𑁆𑀘𑀲𑀢𑀯𑀺𑀧𑀲𑁆𑀲𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀢𑀢𑀺𑀬𑀁.

𑀏𑀣 𑀧𑀲𑁆𑀲𑀣𑀺𑀫𑀁 𑀮𑁄𑀓𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀪𑀬𑀭𑀸𑀚𑀓𑀼𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀓𑀺𑀭 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑀲𑁆𑀲 𑀧𑀺𑀢𑀸 𑀩𑀺𑀫𑁆𑀩𑀺𑀲𑀸𑀭𑁄 𑀢𑀼𑀲𑁆𑀲𑀺𑀢𑁆𑀯𑀸 𑀏𑀓𑀁 𑀦𑀘𑁆𑀘𑀕𑀻𑀢𑀓𑀼𑀲𑀮𑀁 ¶ 𑀦𑀸𑀝𑀓𑀺𑀢𑁆𑀣𑀺𑀁 𑀤𑀢𑁆𑀯𑀸 ¶ 𑀲𑀢𑁆𑀢𑀸𑀳𑀁 𑀭𑀚𑁆𑀚𑀫𑀤𑀸𑀲𑀺. 𑀲𑁄 𑀲𑀢𑁆𑀢𑀸𑀳𑀁 𑀕𑁂𑀳𑀸 𑀩𑀳𑀺 𑀅𑀦𑀺𑀓𑁆𑀔𑀦𑁆𑀢𑁄𑀯 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀦𑀤𑀻𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑀯𑀺𑀬 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀦𑀘𑁆𑀘𑀕𑀻𑀢𑀁 𑀧𑀲𑁆𑀲𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀸𑀧𑀺 𑀢𑀗𑁆𑀔𑀡𑀜𑁆𑀜𑁂𑀯 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀲𑁆𑀲 𑀦𑀸𑀝𑀓𑀺𑀢𑁆𑀣𑀻 𑀯𑀺𑀬 𑀲𑀢𑁆𑀣𑀓𑀯𑀸𑀢𑀸𑀦𑀁 𑀯𑀲𑁂𑀦 𑀓𑀸𑀮𑀫𑀓𑀸𑀲𑀺. 𑀓𑀼𑀫𑀸𑀭𑁄 𑀢𑀲𑁆𑀲𑀸 𑀓𑀸𑀮𑀓𑀺𑀭𑀺𑀬𑀸𑀬 𑀉𑀧𑁆𑀧𑀦𑁆𑀦𑀲𑁄𑀓𑁄 ‘‘𑀦 𑀫𑁂 𑀇𑀫𑀁 𑀲𑁄𑀓𑀁 𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀜𑁆𑀜𑁄 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑁄𑀓𑀁 𑀫𑁂 𑀦𑀺𑀩𑁆𑀩𑀸𑀧𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀢𑀬𑀸 𑀳𑀺, 𑀓𑀼𑀫𑀸𑀭, 𑀇𑀫𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀏𑀯𑀫𑁂𑀯 𑀫𑀢𑀓𑀸𑀮𑁂 𑀭𑁄𑀤𑀦𑁆𑀢𑁂𑀦 𑀧𑀯𑀢𑁆𑀢𑀺𑀢𑀸𑀦𑀁 𑀅𑀲𑁆𑀲𑀽𑀦𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀫𑀸𑀡𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑀸𑀬 𑀤𑁂𑀲𑀦𑀸𑀬 𑀲𑁄𑀓𑀲𑁆𑀲 𑀢𑀦𑀼𑀪𑀸𑀯𑀁 𑀜𑀢𑁆𑀯𑀸, ‘‘𑀓𑀼𑀫𑀸𑀭, 𑀫𑀸 𑀲𑁄𑀘𑀺, 𑀩𑀸𑀮𑀚𑀦𑀸𑀦𑀁 𑀲𑀁𑀲𑀻𑀤𑀦𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀣 𑀧𑀲𑁆𑀲𑀣𑀺𑀫𑀁 𑀮𑁄𑀓𑀁, 𑀘𑀺𑀢𑁆𑀢𑀁 𑀭𑀸𑀚𑀭𑀣𑀽𑀧𑀫𑀁;

𑀬𑀢𑁆𑀣 𑀩𑀸𑀮𑀸 𑀯𑀺𑀲𑀻𑀤𑀦𑁆𑀢𑀺, 𑀦𑀢𑁆𑀣𑀺 𑀲𑀗𑁆𑀕𑁄 𑀯𑀺𑀚𑀸𑀦𑀢’’𑀦𑁆𑀢𑀺.

𑀢𑀢𑁆𑀣 𑀢𑁂 𑀧𑀲𑁆𑀲𑀣𑀸𑀢𑀺 𑀭𑀸𑀚𑀓𑀼𑀫𑀸𑀭𑀫𑁂𑀯 𑀲𑀦𑁆𑀥𑀸𑀬𑀸𑀳. 𑀇𑀫𑀁 𑀮𑁄𑀓𑀦𑁆𑀢𑀺 𑀇𑀫𑀁 𑀔𑀦𑁆𑀥𑀮𑁄𑀓𑀸𑀤𑀺𑀲𑀗𑁆𑀔𑀸𑀢𑀁 𑀅𑀢𑁆𑀢𑀪𑀸𑀯𑀁. 𑀘𑀺𑀢𑁆𑀢𑀦𑁆𑀢𑀺 𑀲𑀢𑁆𑀢𑀭𑀢𑀦𑀸𑀤𑀺𑀯𑀺𑀘𑀺𑀢𑁆𑀢𑀁 𑀭𑀸𑀚𑀭𑀣𑀁 𑀯𑀺𑀬 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀘𑀺𑀢𑁆𑀢𑀺𑀢𑀁. 𑀬𑀢𑁆𑀣 𑀩𑀸𑀮𑀸𑀢𑀺 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀩𑀸𑀮𑀸 𑀏𑀯𑀁 ¶ 𑀯𑀺𑀲𑀻𑀤𑀦𑁆𑀢𑀺. 𑀯𑀺𑀚𑀸𑀦𑀢𑀦𑁆𑀢𑀺 𑀯𑀺𑀚𑀸𑀦𑀦𑁆𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀏𑀢𑁆𑀣 𑀭𑀸𑀕𑀲𑀗𑁆𑀕𑀸𑀤𑀻𑀲𑀼 𑀏𑀓𑁄𑀧𑀺 𑀲𑀗𑁆𑀕𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀭𑀸𑀚𑀓𑀼𑀫𑀸𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀪𑀬𑀭𑀸𑀚𑀓𑀼𑀫𑀸𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑀬𑁄 ¶ 𑀘 𑀧𑀼𑀩𑁆𑀩𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀫𑀚𑁆𑀚𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀧𑀸𑀢𑁄 𑀯𑀸 𑀲𑀸𑀬𑀁 𑀯𑀸𑀢𑀺 𑀯𑁂𑀮𑀁 𑀧𑀫𑀸𑀡𑀁 𑀅𑀓𑀢𑁆𑀯𑀸 𑀅𑀪𑀺𑀓𑁆𑀔𑀡𑀁 𑀲𑀫𑁆𑀫𑀚𑁆𑀚𑀦𑁆𑀢𑁄𑀯 𑀯𑀺𑀘𑀭𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀬𑀁 𑀫𑀳𑀸𑀓𑀼𑀲𑀻𑀢𑁄 𑀚𑀦𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀓𑀺𑀁 𑀦𑀸𑀫𑁂𑀢𑀲𑁆𑀲 𑀲𑀫𑁆𑀫𑀚𑁆𑀚𑀦𑀺𑀁 ¶ 𑀕𑀳𑁂𑀢𑁆𑀯𑀸 𑀏𑀓𑀁 𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. 𑀣𑁂𑀭𑁄 ‘‘𑀑𑀯𑀸𑀤𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀳𑀸𑀯𑀼𑀲𑁄𑀢𑀺. 𑀓𑀺𑀁, 𑀪𑀦𑁆𑀢𑁂𑀢𑀺? 𑀕𑀘𑁆𑀙 𑀦𑁆𑀳𑀢𑁆𑀯𑀸 𑀏𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀑𑀯𑀤𑀦𑁆𑀢𑁄 𑀆𑀳 𑁋 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀦 𑀲𑀩𑁆𑀩𑀓𑀸𑀮𑀁 𑀲𑀫𑁆𑀫𑀚𑁆𑀚𑀦𑁆𑀢𑁂𑀦 𑀯𑀺𑀘𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀸𑀢𑁄 𑀏𑀯 𑀧𑀦 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑁂𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 𑀅𑀢𑁆𑀢𑀪𑀸𑀯𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑁂 𑀉𑀝𑁆𑀞𑀸𑀬 𑀲𑀫𑁆𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀘𑁆𑀘𑀓𑀸𑀮𑀁 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀦𑀸𑀫 𑀑𑀓𑀸𑀲𑁄 𑀓𑀸𑀢𑀩𑁆𑀩𑁄’’𑀢𑀺. 𑀲𑁄 𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀢𑀁 𑀞𑀸𑀦𑀁 𑀉𑀓𑁆𑀮𑀸𑀧𑀁 𑀅𑀳𑁄𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀲𑀫𑁆𑀫𑀚𑁆𑀚𑀦𑀢𑁆𑀣𑁂𑀭, 𑀢𑀁 𑀢𑀁 𑀞𑀸𑀦𑀁 𑀉𑀓𑁆𑀮𑀸𑀧𑀁 𑀓𑀲𑁆𑀫𑀸 𑀦 𑀲𑀫𑁆𑀫𑀚𑁆𑀚𑀲𑀻’’𑀢𑀺? ‘‘𑀪𑀦𑁆𑀢𑁂, 𑀫𑀬𑀸 𑀧𑀫𑀸𑀤𑀓𑀸𑀮𑁂 𑀏𑀯𑀁 𑀓𑀢𑀁, 𑀇𑀤𑀸𑀦𑀸𑀫𑁆𑀳𑀺 𑀅𑀧𑁆𑀧𑀫𑀢𑁆𑀢𑁄’’𑀢𑀺. 𑀪𑀺𑀓𑁆𑀔𑀽 ‘‘𑀅𑀬𑀁 𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀧𑀼𑀩𑁆𑀩𑁂 𑀧𑀫𑀸𑀤𑀓𑀸𑀮𑁂 𑀲𑀫𑁆𑀫𑀚𑁆𑀚𑀦𑁆𑀢𑁄 𑀯𑀺𑀘𑀭𑀺, 𑀇𑀤𑀸𑀦𑀺 𑀧𑀦 𑀫𑀕𑁆𑀕𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀦 𑀲𑀫𑁆𑀫𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁄 ¶ ¶ 𑀘 𑀧𑀼𑀩𑁆𑀩𑁂 𑀧𑀫𑀚𑁆𑀚𑀺𑀢𑁆𑀯𑀸, 𑀧𑀘𑁆𑀙𑀸 𑀲𑁄 𑀦𑀧𑁆𑀧𑀫𑀚𑁆𑀚𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑁂 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑁂𑀦 𑀯𑀸 𑀲𑀚𑁆𑀛𑀸𑀬𑀸𑀤𑀻𑀳𑀺 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀫𑀕𑁆𑀕𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀦𑀧𑁆𑀧𑀫𑀚𑁆𑀚𑀢𑀺, 𑀲𑁄 𑀅𑀩𑁆𑀪𑀸𑀤𑀻𑀳𑀺 𑀫𑀼𑀢𑁆𑀢𑁄 𑀘𑀦𑁆𑀤𑁄𑀯 𑀑𑀓𑀸𑀲𑀮𑁄𑀓𑀁 𑀫𑀕𑁆𑀕𑀜𑀸𑀡𑁂𑀦 𑀇𑀫𑀁 𑀔𑀦𑁆𑀥𑀸𑀤𑀺𑀮𑁄𑀓𑀁 𑀑𑀪𑀸𑀲𑁂𑀢𑀺, 𑀏𑀓𑀸𑀮𑁄𑀓𑀁 𑀓𑀭𑁄𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀫𑁆𑀫𑀚𑁆𑀚𑀦𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀯𑀢𑁆𑀣𑀼

𑀬𑀲𑁆𑀲 𑀧𑀸𑀧𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀦𑁆𑀢𑀯𑀲𑁂𑀦𑁂𑀯 (𑀫. 𑀦𑀺. 𑁨.𑁩𑁪𑁭 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁.

𑀣𑁂𑀭𑁄 ¶ 𑀧𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀗𑁆𑀕𑀼𑀮𑀺𑀫𑀸𑀮𑁄 𑀭𑀳𑁄𑀕𑀢𑁄 𑀧𑀝𑀺𑀲𑀮𑁆𑀮𑀻𑀦𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁄 𑀘 𑀧𑀼𑀩𑁆𑀩𑁂 𑀧𑀫𑀚𑁆𑀚𑀺𑀢𑁆𑀯𑀸, 𑀧𑀘𑁆𑀙𑀸 𑀲𑁄 𑀦𑀧𑁆𑀧𑀫𑀚𑁆𑀚𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀪𑀺𑀓𑁆𑀔𑀽 ‘‘𑀓𑀳𑀁 𑀦𑀼 𑀔𑁄, 𑀆𑀯𑀼𑀲𑁄, 𑀣𑁂𑀭𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁? 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 ¶ 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀓𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀘, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄’’𑀢𑀺. ‘‘𑀪𑀦𑁆𑀢𑁂, 𑀏𑀢𑁆𑀢𑀓𑁂 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺? ‘‘𑀆𑀫, 𑀪𑀺𑀓𑁆𑀔𑀯𑁂, 𑀲𑁄 𑀧𑀼𑀩𑁆𑀩𑁂 𑀏𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀏𑀢𑁆𑀢𑀓𑀁 𑀧𑀸𑀧𑀫𑀓𑀸𑀲𑀺, 𑀧𑀘𑁆𑀙𑀸 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀅𑀳𑁄𑀲𑀺. 𑀢𑁂𑀦𑀲𑁆𑀲 𑀢𑀁 𑀧𑀸𑀧𑀓𑀫𑁆𑀫𑀁 𑀓𑀼𑀲𑀮𑁂𑀦 𑀧𑀺𑀳𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀲𑁆𑀲 ¶ 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀓𑀼𑀲𑀮𑁂𑀦 𑀧𑀺𑀥𑀻𑀬𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺.

𑀢𑀢𑁆𑀣 𑀓𑀼𑀲𑀮𑁂𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀯𑀢𑁆𑀣𑀼 𑀙𑀝𑁆𑀞𑀁.

𑀅𑀦𑁆𑀥𑀪𑀽𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑁂𑀲𑀓𑀸𑀭𑀥𑀻𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀆𑀴𑀯𑀺𑀯𑀸𑀲𑀺𑀦𑁄 𑀲𑀢𑁆𑀣𑀭𑀺 𑀆𑀴𑀯𑀺𑀁 𑀲𑀫𑁆𑀧𑀢𑁆𑀢𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀤𑁆𑀥𑀼𑀯𑀁 𑀫𑁂 𑀚𑀻𑀯𑀺𑀢𑀁, 𑀥𑀼𑀯𑀁 𑀫𑁂 𑀫𑀭𑀡𑀁, 𑀅𑀯𑀲𑁆𑀲𑀁 𑀫𑀬𑀸 𑀫𑀭𑀺𑀢𑀩𑁆𑀩𑀫𑁂𑀯 ¶ , 𑀫𑀭𑀡𑀧𑀭𑀺𑀬𑁄𑀲𑀸𑀦𑀁 𑀫𑁂 𑀚𑀻𑀯𑀺𑀢𑀁, 𑀚𑀻𑀯𑀺𑀢𑀫𑁂𑀯 𑀅𑀦𑀺𑀬𑀢𑀁, 𑀫𑀭𑀡𑀁 𑀦𑀺𑀬𑀢𑀦𑁆𑀢𑀺 ¶ 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀣. 𑀬𑁂𑀲𑀜𑁆𑀳𑀺 𑀫𑀭𑀡𑀲𑁆𑀲𑀢𑀺 𑀅𑀪𑀸𑀯𑀺𑀢𑀸, 𑀢𑁂 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀆𑀲𑀻𑀯𑀺𑀲𑀁 𑀤𑀺𑀲𑁆𑀯𑀸 𑀪𑀻𑀢𑀅𑀤𑀡𑁆𑀟𑀧𑀼𑀭𑀺𑀲𑁄 𑀯𑀺𑀬 𑀲𑀦𑁆𑀢𑀸𑀲𑀧𑁆𑀧𑀢𑁆𑀢𑀸 𑀪𑁂𑀭𑀯𑀭𑀯𑀁 𑀭𑀯𑀦𑁆𑀢𑀸 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀬𑁂𑀲𑀁 𑀧𑀦 𑀫𑀭𑀡𑀲𑁆𑀲𑀢𑀺 𑀪𑀸𑀯𑀺𑀢𑀸, 𑀢𑁂 𑀤𑀽𑀭𑀢𑁄𑀯 𑀆𑀲𑀻𑀯𑀺𑀲𑀁 𑀤𑀺𑀲𑁆𑀯𑀸 𑀤𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀦 𑀲𑀦𑁆𑀢𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀭𑀡𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀆𑀳. 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀯𑀲𑁂𑀲𑀚𑀦𑀸 𑀲𑀓𑀺𑀘𑁆𑀘𑀧𑁆𑀧𑀲𑀼𑀢𑀸𑀯 𑀅𑀳𑁂𑀲𑀼𑀁. 𑀏𑀓𑀸 𑀧𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀧𑁂𑀲𑀓𑀸𑀭𑀥𑀻𑀢𑀸 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀓𑀣𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸, 𑀫𑀬𑀸 𑀧𑀦 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀭𑀡𑀲𑁆𑀲𑀢𑀺𑀫𑁂𑀯 𑀪𑀸𑀯𑁂𑀲𑀺. 𑀲𑀢𑁆𑀣𑀸𑀧𑀺 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀲𑀸𑀧𑀺 𑀓𑀼𑀫𑀸𑀭𑀺𑀓𑀸 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀲𑀺𑀬𑁂𑀯.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀓𑀼𑀫𑀸𑀭𑀺𑀓𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀇𑀫𑀸𑀬 𑀓𑀼𑀫𑀸𑀭𑀺𑀓𑀸𑀬 𑀫𑀫 𑀥𑀫𑁆𑀫𑀤𑁂𑀲𑀦𑀸𑀬 𑀲𑀼𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀫𑀭𑀡𑀲𑁆𑀲𑀢𑀺 𑀪𑀸𑀯𑀺𑀢𑀸, 𑀇𑀤𑀸𑀦𑀸𑀳𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺𑀬𑀸 ¶ 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀪𑀸𑀲𑀺𑀲𑁆𑀲𑀸𑀫𑀺. 𑀲𑀸 𑀕𑀸𑀣𑀸𑀯𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀕𑁆𑀕𑀸𑀴𑀯𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀆𑀴𑀯𑀺𑀯𑀸𑀲𑀺𑀦𑁄 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑀤𑀸 𑀲𑀸𑀧𑀺 𑀓𑀼𑀫𑀸𑀭𑀺𑀓𑀸 𑀲𑀢𑁆𑀣𑀼 𑀆𑀕𑀫𑀦𑀁 𑀲𑀼𑀢𑁆𑀯𑀸 ‘‘𑀆𑀕𑀢𑁄 𑀓𑀺𑀭 𑀫𑀬𑁆𑀳𑀁 𑀧𑀺𑀢𑀸, 𑀲𑀸𑀫𑀺, 𑀆𑀘𑀭𑀺𑀬𑁄 𑀧𑀼𑀡𑁆𑀡𑀘𑀦𑁆𑀤𑀫𑀼𑀔𑁄 𑀫𑀳𑀸𑀕𑁄𑀢𑀫𑀩𑀼𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀇𑀢𑁄 𑀫𑁂 𑀢𑀺𑀡𑁆𑀡𑀁 𑀲𑀁𑀯𑀘𑁆𑀙𑀭𑀸𑀦𑀁 𑀫𑀢𑁆𑀣𑀓𑁂 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀢𑁆𑀣𑀸 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀇𑀤𑀸𑀦𑀺𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 ¶ 𑀲𑀭𑀻𑀭𑀁 𑀤𑀝𑁆𑀞𑀼𑀁 𑀫𑀥𑀼𑀭𑁄𑀚𑀜𑁆𑀘 𑀯𑀭𑀥𑀫𑁆𑀫𑀁 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀧𑀺𑀢𑀸 𑀧𑀦𑀲𑁆𑀲𑀸 𑀲𑀸𑀮𑀁 𑀕𑀘𑁆𑀙𑀦𑁆𑀢𑁄 𑀆𑀳 𑁋 ‘‘𑀅𑀫𑁆𑀫, 𑀧𑀭𑀲𑀦𑁆𑀢𑀓𑁄 𑀫𑁂 𑀲𑀸𑀝𑀓𑁄 𑀆𑀭𑁄𑀧𑀺𑀢𑁄, 𑀢𑀲𑁆𑀲 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀅𑀦𑀺𑀝𑁆𑀞𑀺𑀢𑀁, 𑀢𑀁 𑀅𑀚𑁆𑀚 𑀦𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀺, 𑀲𑀻𑀖𑀁 𑀫𑁂 𑀢𑀲𑀭𑀁 𑀯𑀝𑁆𑀝𑁂𑀢𑁆𑀯𑀸 𑀆𑀳𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀢𑁆𑀣𑀼 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸, 𑀧𑀺𑀢𑀸 𑀘 𑀫𑀁 𑀏𑀯𑀁 𑀆𑀳. 𑀓𑀺𑀁 𑀦𑀼 𑀔𑁄 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀸𑀫𑀺, 𑀉𑀤𑀸𑀳𑀼 𑀧𑀺𑀢𑀼 𑀢𑀲𑀭𑀁 𑀯𑀝𑁆𑀝𑁂𑀢𑁆𑀯𑀸 𑀳𑀭𑀸𑀫𑀻’’𑀢𑀺? 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 ‘‘𑀧𑀺𑀢𑀸 𑀫𑀁 𑀢𑀲𑀭𑁂 𑀅𑀦𑀸𑀳𑀭𑀺𑀬𑀫𑀸𑀦𑁂 𑀧𑁄𑀣𑁂𑀬𑁆𑀬𑀧𑀺 𑀧𑀳𑀭𑁂𑀬𑁆𑀬𑀧𑀺, 𑀢𑀲𑁆𑀫𑀸 𑀢𑀲𑀭𑀁 𑀯𑀝𑁆𑀝𑁂𑀢𑁆𑀯𑀸 𑀢𑀲𑁆𑀲 𑀤𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀧𑀻𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑀭𑀁 𑀯𑀝𑁆𑀝𑁂𑀲𑀺.

𑀆𑀴𑀯𑀺𑀯𑀸𑀲𑀺𑀦𑁄𑀧𑀺 𑀲𑀢𑁆𑀣𑀸𑀭𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 ‘‘𑀬𑀫𑀳𑀁 𑀓𑀼𑀮𑀥𑀻𑀢𑀭𑀁 𑀦𑀺𑀲𑁆𑀲𑀸𑀬 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀆𑀕𑀢𑁄, 𑀲𑀸 𑀅𑀚𑁆𑀚𑀸𑀧𑀺 𑀑𑀓𑀸𑀲𑀁 𑀦 𑀮𑀪𑀢𑀺. 𑀢𑀸𑀬 ¶ 𑀑𑀓𑀸𑀲𑁂 𑀮𑀤𑁆𑀥𑁂 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀡𑁆𑀳𑀻𑀪𑀽𑀢𑁄 𑀅𑀳𑁄𑀲𑀺. 𑀏𑀯𑀁 𑀢𑀼𑀡𑁆𑀳𑀻𑀪𑀽𑀢𑀫𑁆𑀧𑀺 𑀲𑀢𑁆𑀣𑀸𑀭𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁄𑀘𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀢𑀺. 𑀲𑀸𑀧𑀺 𑀔𑁄 𑀓𑀼𑀫𑀸𑀭𑀺𑀓𑀸 𑀢𑀲𑀭𑀁 𑀯𑀝𑁆𑀝𑁂𑀢𑁆𑀯𑀸 𑀧𑀘𑁆𑀙𑀺𑀬𑀁 𑀞𑀧𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀫𑀸𑀦𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 𑀲𑀢𑁆𑀣𑀸𑀭𑀁 𑀑𑀮𑁄𑀓𑀬𑀫𑀸𑀦𑀸𑀯 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸𑀧𑀺 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀑𑀮𑁄𑀓𑁂𑀲𑀺. 𑀲𑀸 𑀑𑀮𑁄𑀓𑀺𑀢𑀸𑀓𑀸𑀭𑁂𑀦𑁂𑀯 𑀅𑀜𑁆𑀜𑀸𑀲𑀺 𑁋 ‘‘𑀲𑀢𑁆𑀣𑀸 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸𑀯 𑀫𑀁 𑀑𑀮𑁄𑀓𑁂𑀦𑁆𑀢𑁄 𑀫𑀫𑀸𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀫𑀦𑀫𑁂𑀯 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺. 𑀲𑀸 𑀢𑀲𑀭𑀧𑀘𑁆𑀙𑀺𑀁 𑀞𑀧𑁂𑀢𑁆𑀯𑀸 𑀲𑀢𑁆𑀣𑀼 ¶ 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀓𑀲𑁆𑀫𑀸 𑀧𑀦 𑀦𑀁 𑀲𑀢𑁆𑀣𑀸 𑀑𑀮𑁄𑀓𑁂𑀲𑀻𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀏𑀲𑀸 𑀏𑀢𑁆𑀢𑁄𑀯 𑀕𑀘𑁆𑀙𑀫𑀸𑀦𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 ¶ 𑀓𑀢𑁆𑀯𑀸 𑀅𑀦𑀺𑀬𑀢𑀕𑀢𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀫𑀸𑀦𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀦𑀺𑀬𑀢𑀕𑀢𑀺𑀓𑀸 𑀳𑀼𑀢𑁆𑀯𑀸 𑀢𑀼𑀲𑀺𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲𑀸 𑀓𑀺𑀭 𑀢𑀁 𑀤𑀺𑀯𑀲𑀁 𑀫𑀭𑀡𑀢𑁄 𑀫𑀼𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀸 𑀑𑀮𑁄𑀓𑀺𑀢𑀲𑀜𑁆𑀜𑀸𑀡𑁂𑀦𑁂𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀻𑀦𑀁 𑀅𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀣𑀸𑀭𑀽𑀧𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀁 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀓𑁆𑀔𑀡𑁂𑀬𑁂𑀯 𑀢𑀁 𑀆𑀳 𑁋 ‘‘𑀓𑀼𑀫𑀸𑀭𑀺𑀓𑁂, 𑀓𑀼𑀢𑁄 𑀆𑀕𑀘𑁆𑀙𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀢𑁆𑀣 𑀕𑀫𑀺𑀲𑁆𑀲𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀦 𑀚𑀸𑀦𑀸𑀲𑀻’’𑀢𑀺? ‘‘𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. 𑀇𑀢𑀺 𑀦𑀁 𑀲𑀢𑁆𑀣𑀸 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀫𑀳𑀸𑀚𑀦𑁄 𑀉𑀚𑁆𑀛𑀸𑀬𑀺 𑁋 ‘‘𑀅𑀫𑁆𑀪𑁄, 𑀧𑀲𑁆𑀲𑀣, 𑀅𑀬𑀁 𑀧𑁂𑀲𑀓𑀸𑀭𑀥𑀻𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀓𑀣𑁂𑀲𑀺, 𑀦𑀦𑀼 𑀦𑀸𑀫 𑀇𑀫𑀸𑀬 ‘𑀓𑀼𑀢𑁄 𑀆𑀕𑀘𑁆𑀙𑀲𑀻’𑀢𑀺 𑀯𑀼𑀢𑁆𑀢𑁂 ‘𑀧𑁂𑀲𑀓𑀸𑀭𑀕𑁂𑀳𑀢𑁄’𑀢𑀺 𑀯𑀢𑁆𑀢𑀩𑁆𑀩𑀁. ‘𑀓𑀳𑀁 𑀕𑀘𑁆𑀙𑀲𑀻’𑀢𑀺 𑀯𑀼𑀢𑁆𑀢𑁂 ‘𑀧𑁂𑀲𑀓𑀸𑀭𑀲𑀸𑀮’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺.

𑀲𑀢𑁆𑀣𑀸 𑀫𑀳𑀸𑀚𑀦𑀁 𑀦𑀺𑀲𑁆𑀲𑀤𑁆𑀤𑀁 𑀓𑀢𑁆𑀯𑀸, ‘‘𑀓𑀼𑀫𑀸𑀭𑀺𑀓𑁂, 𑀢𑁆𑀯𑀁 𑀓𑀼𑀢𑁄 𑀆𑀕𑀘𑁆𑀙𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀦 𑀚𑀸𑀦𑀸𑀫𑀻𑀢𑀺 𑀯𑀤𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀫 𑀧𑁂𑀲𑀓𑀸𑀭𑀕𑁂𑀳𑀢𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀣, ‘‘𑀓𑀼𑀢𑁄 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑀧𑀦 ‘‘𑀓𑀼𑀢𑁄 𑀆𑀕𑀦𑁆𑀢𑁆𑀯𑀸 𑀇𑀥 𑀦𑀺𑀩𑁆𑀩𑀢𑁆𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀣. 𑀅𑀳𑀁 𑀧𑀦 𑀦 𑀚𑀸𑀦𑀸𑀫𑀺 ‘‘𑀓𑀼𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀇𑀥 𑀦𑀺𑀩𑁆𑀩𑀢𑁆𑀢𑀸𑀫𑁆𑀳𑀻’’𑀢𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀓𑀼𑀫𑀸𑀭𑀺𑀓𑁂, 𑀫𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑁄𑀯 𑀢𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺 𑀧𑀞𑀫𑀁 𑀲𑀸𑀥𑀼𑀓𑀸𑀭𑀁 ¶ 𑀤𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀧𑀼𑀘𑁆𑀙𑀺 𑁋 ‘‘𑀓𑀢𑁆𑀣 𑀕𑀫𑀺𑀲𑁆𑀲𑀲𑀻𑀢𑀺 𑀧𑀼𑀦 𑀧𑀼𑀝𑁆𑀞𑀸 𑀓𑀲𑁆𑀫𑀸 ‘𑀦 𑀚𑀸𑀦𑀸𑀫𑀻’𑀢𑀺 𑀯𑀤𑁂𑀲𑀻’’𑀢𑀺? 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀁 𑀢𑀲𑀭𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀧𑁂𑀲𑀓𑀸𑀭𑀲𑀸𑀮𑀁 𑀕𑀘𑁆𑀙𑀦𑁆𑀢𑀺𑀁 𑀚𑀸𑀦𑀸𑀣, ‘‘𑀇𑀢𑁄 𑀕𑀦𑁆𑀢𑁆𑀯𑀸 𑀓𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀣. 𑀅𑀳𑀜𑁆𑀘 𑀇𑀢𑁄 𑀘𑀼𑀢𑀸 𑀦 𑀚𑀸𑀦𑀸𑀫𑀺 ‘‘𑀓𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 ‘‘𑀫𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑁄𑀬𑁂𑀯 𑀢𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺 𑀤𑀼𑀢𑀺𑀬𑀁 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀧𑀼𑀘𑁆𑀙𑀺 𑁋 ‘‘𑀅𑀣 𑀓𑀲𑁆𑀫𑀸 ‘𑀦 𑀚𑀸𑀦𑀸𑀲𑀻’𑀢𑀺 𑀧𑀼𑀝𑁆𑀞𑀸 ‘𑀚𑀸𑀦𑀸𑀫𑀻’𑀢𑀺 𑀯𑀤𑁂𑀲𑀻’’𑀢𑀺? ‘‘𑀫𑀭𑀡𑀪𑀸𑀯𑀁 𑀚𑀸𑀦𑀸𑀫𑀺, 𑀪𑀦𑁆𑀢𑁂, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀻’’𑀢𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 ‘‘𑀫𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑁄𑀬𑁂𑀯 𑀢𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺 𑀢𑀢𑀺𑀬𑀁 ¶ 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀧𑀼𑀘𑁆𑀙𑀺 𑁋 ‘‘𑀅𑀣 𑀓𑀲𑁆𑀫𑀸 ‘𑀚𑀸𑀦𑀸𑀲𑀻’𑀢𑀺 𑀧𑀼𑀝𑁆𑀞𑀸 ‘𑀦 𑀚𑀸𑀦𑀸𑀫𑀻’𑀢𑀺 𑀯𑀤𑁂𑀲𑀻’’𑀢𑀺. 𑀫𑀫 𑀫𑀭𑀡𑀪𑀸𑀯𑀫𑁂𑀯 𑀅𑀳𑀁 𑀚𑀸𑀦𑀸𑀫𑀺, 𑀪𑀦𑁆𑀢𑁂, ‘‘𑀭𑀢𑁆𑀢𑀺𑀦𑁆𑀤𑀺𑀯𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀧𑀦 𑀅𑀲𑀼𑀓𑀓𑀸𑀮𑁂 𑀦𑀸𑀫 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀦 ¶ 𑀚𑀸𑀦𑀸𑀫𑀺, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀻𑀢𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 ‘‘𑀫𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑁄𑀬𑁂𑀯 𑀢𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺 𑀘𑀢𑀼𑀢𑁆𑀣𑀁 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀧𑀭𑀺𑀲𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀢𑀼𑀫𑁆𑀳𑁂 𑀇𑀫𑀸𑀬 𑀓𑀣𑀺𑀢𑀁 𑀦 𑀚𑀸𑀦𑀸𑀣, 𑀓𑁂𑀯𑀮𑀁 𑀉𑀚𑁆𑀛𑀸𑀬𑀣𑁂𑀯. 𑀬𑁂𑀲𑀜𑁆𑀳𑀺 𑀧𑀜𑁆𑀜𑀸𑀘𑀓𑁆𑀔𑀼 𑀦𑀢𑁆𑀣𑀺, 𑀢𑁂 𑀅𑀦𑁆𑀥𑀸 𑀏𑀯 ¶ . 𑀬𑁂𑀲𑀁 𑀧𑀜𑁆𑀜𑀸𑀘𑀓𑁆𑀔𑀼 𑀅𑀢𑁆𑀣𑀺, 𑀢𑁂 𑀏𑀯 𑀘𑀓𑁆𑀔𑀼𑀫𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀦𑁆𑀥𑀪𑀽𑀢𑁄 𑀅𑀬𑀁 𑀮𑁄𑀓𑁄, 𑀢𑀦𑀼𑀓𑁂𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀲𑀓𑀼𑀡𑁄 𑀚𑀸𑀮𑀫𑀼𑀢𑁆𑀢𑁄𑀯, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀅𑀦𑁆𑀥𑀪𑀽𑀢𑁄 𑀅𑀬𑀁 𑀮𑁄𑀓𑁄𑀢𑀺 𑀅𑀬𑀁 𑀮𑁄𑀓𑀺𑀬𑀫𑀳𑀸𑀚𑀦𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑁂𑀦 𑀅𑀦𑁆𑀥𑀪𑀽𑀢𑁄. 𑀢𑀦𑀼𑀓𑁂𑀢𑁆𑀣𑀸𑀢𑀺 𑀢𑀦𑀼𑀓𑁄 𑀏𑀢𑁆𑀣, 𑀦 𑀩𑀳𑀼 𑀚𑀦𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀢𑀺. 𑀚𑀸𑀮𑀫𑀼𑀢𑁆𑀢𑁄𑀯𑀸𑀢𑀺 𑀬𑀣𑀸 𑀙𑁂𑀓𑁂𑀦 𑀲𑀸𑀓𑀼𑀡𑀺𑀓𑁂𑀦 𑀚𑀸𑀮𑁂𑀦 𑀑𑀢𑁆𑀣𑀭𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑁂𑀲𑀼 𑀯𑀝𑁆𑀝𑀓𑁂𑀲𑀼 𑀓𑁄𑀘𑀺𑀤𑁂𑀯 𑀚𑀸𑀮𑀢𑁄 𑀫𑀼𑀘𑁆𑀘𑀢𑀺. 𑀲𑁂𑀲𑀸 𑀅𑀦𑁆𑀢𑁄𑀚𑀸𑀮𑀫𑁂𑀯 𑀧𑀯𑀺𑀲𑀦𑁆𑀢𑀺. 𑀢𑀣𑀸 𑀫𑀭𑀡𑀚𑀸𑀮𑁂𑀦 𑀑𑀢𑁆𑀣𑀝𑁂𑀲𑀼 𑀲𑀢𑁆𑀢𑁂𑀲𑀼 𑀩𑀳𑀽 𑀅𑀧𑀸𑀬𑀕𑀸𑀫𑀺𑀦𑁄 𑀳𑁄𑀦𑁆𑀢𑀺, 𑀅𑀧𑁆𑀧𑁄 𑀓𑁄𑀘𑀺𑀤𑁂𑀯 𑀲𑀢𑁆𑀢𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀺, 𑀲𑀼𑀕𑀢𑀺𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀯𑀸 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀼𑀫𑀸𑀭𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀸𑀧𑀺 𑀢𑀲𑀭𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀲𑁄𑀧𑀺 𑀦𑀺𑀲𑀺𑀦𑁆𑀦𑀓𑁄𑀯 𑀦𑀺𑀤𑁆𑀤𑀸𑀬𑀺. 𑀢𑀲𑁆𑀲𑀸 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀢𑀲𑀭𑀧𑀘𑁆𑀙𑀺𑀁 𑀉𑀧𑀦𑀸𑀫𑁂𑀦𑁆𑀢𑀺𑀬𑀸 𑀢𑀲𑀭𑀧𑀘𑁆𑀙𑀺 𑀯𑁂𑀫𑀓𑁄𑀝𑀺𑀬𑀁 𑀧𑀝𑀺𑀳𑀜𑁆𑀜𑀺𑀢𑁆𑀯𑀸 𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀧𑀢𑀺. 𑀲𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀕𑀳𑀺𑀢𑀦𑀺𑀫𑀺𑀢𑁆𑀢𑁂𑀦𑁂𑀯 𑀯𑁂𑀫𑀓𑁄𑀝𑀺𑀁 𑀆𑀓𑀟𑁆𑀠𑀺. 𑀯𑁂𑀫𑀓𑁄𑀝𑀺 𑀕𑀦𑁆𑀢𑁆𑀯𑀸 𑀢𑀁 ¶ 𑀓𑀼𑀫𑀸𑀭𑀺𑀓𑀁 𑀉𑀭𑁂 𑀧𑀳𑀭𑀺, 𑀲𑀸 𑀢𑀢𑁆𑀣𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲𑀸 𑀧𑀺𑀢𑀸 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀲𑀓𑀮𑀲𑀭𑀻𑀭𑁂𑀦 𑀮𑁄𑀳𑀺𑀢𑀫𑀓𑁆𑀔𑀺𑀢𑁂𑀦 𑀧𑀢𑀺𑀢𑁆𑀯𑀸 𑀫𑀢𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀫𑀳𑀸𑀲𑁄𑀓𑁄 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀦 𑀫𑀫 𑀲𑁄𑀓𑀁 𑀅𑀜𑁆𑀜𑁄 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀭𑁄𑀤𑀦𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑁄𑀓𑀁 𑀫𑁂 𑀦𑀺𑀩𑁆𑀩𑀸𑀧𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀫𑀸 𑀲𑁄𑀘𑀺, 𑀉𑀧𑀸𑀲𑀓. 𑀅𑀦𑀫𑀢𑀕𑁆𑀕𑀲𑁆𑀫𑀺𑀜𑁆𑀳𑀺 𑀲𑀁𑀲𑀸𑀭𑁂 𑀢𑀯 𑀏𑀯𑀫𑁂𑀯 𑀥𑀻𑀢𑀼 𑀫𑀭𑀡𑀓𑀸𑀮𑁂 𑀧𑀕𑁆𑀖𑀭𑀺𑀢𑀅𑀲𑁆𑀲𑀼 𑀘𑀢𑀼𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀸𑀦𑀁 𑀉𑀤𑀓𑀢𑁄 𑀅𑀢𑀺𑀭𑁂𑀓𑀢𑀭’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀫𑀢𑀕𑁆𑀕𑀓𑀣𑀁 ¶ 𑀓𑀣𑁂𑀲𑀺 ¶ . 𑀲𑁄 𑀢𑀦𑀼𑀪𑀽𑀢𑀲𑁄𑀓𑁄 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑀧𑁂𑀲𑀓𑀸𑀭𑀥𑀻𑀢𑀸𑀯𑀢𑁆𑀣𑀼 𑀲𑀢𑁆𑀢𑀫𑀁.

𑀳𑀁𑀲𑀸𑀤𑀺𑀘𑁆𑀘𑀧𑀣𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀁𑀲 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀢𑀺𑀁𑀲𑀫𑀢𑁆𑀢𑀸 𑀤𑀺𑀲𑀸𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼 𑀯𑀢𑁆𑀢𑀓𑀭𑀡𑀯𑁂𑀮𑀸𑀬 𑀆𑀕𑀦𑁆𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀲𑀢𑁆𑀣𑀸𑀭𑀸 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑁂 𑀓𑀢𑁂 𑀯𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 ¶ 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀢𑁂𑀲𑀁 𑀲𑀸𑀭𑀡𑀻𑀬𑀥𑀫𑁆𑀫𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀲𑀩𑁆𑀩𑁂𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂𑀦 𑀅𑀕𑀫𑀺𑀁𑀲𑀼. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑁂𑀲𑀼 𑀘𑀺𑀭𑀸𑀬𑀦𑁆𑀢𑁂𑀲𑀼 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀸𑀦𑁂𑀯 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀆𑀕𑀢𑀸, 𑀢𑁂 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀕𑀢𑀸, 𑀆𑀦𑀦𑁆𑀤𑀸’’𑀢𑀺. ‘‘𑀓𑀢𑀭𑁂𑀦 𑀫𑀕𑁆𑀕𑁂𑀦, 𑀪𑀦𑁆𑀢𑁂’’𑀢𑀺? ‘‘𑀆𑀓𑀸𑀲𑁂𑀦𑀸𑀦𑀦𑁆𑀤𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀸’’𑀢𑀺? ‘‘𑀆𑀫𑀸𑀦𑀦𑁆𑀤, 𑀫𑀫 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸’’𑀢𑀺. 𑀢𑀲𑁆𑀫𑀺𑀁 𑀧𑀦 𑀔𑀡𑁂 𑀆𑀓𑀸𑀲𑁂𑀦 𑀳𑀁𑀲𑀸 𑀆𑀕𑀫𑀺𑀁𑀲𑀼. 𑀲𑀢𑁆𑀣𑀸 ‘‘𑀬𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸, 𑀲𑁄 𑀳𑀁𑀲𑀸 𑀯𑀺𑀬 𑀆𑀓𑀸𑀲𑁂𑀦 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀳𑀁𑀲𑀸𑀤𑀺𑀘𑁆𑀘𑀧𑀣𑁂 𑀬𑀦𑁆𑀢𑀺, 𑀆𑀓𑀸𑀲𑁂 𑀬𑀦𑁆𑀢𑀺 𑀇𑀤𑁆𑀥𑀺𑀬𑀸;

𑀦𑀻𑀬𑀦𑁆𑀢𑀺 𑀥𑀻𑀭𑀸 𑀮𑁄𑀓𑀫𑁆𑀳𑀸, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀇𑀫𑁂 𑀳𑀁𑀲𑀸 𑀆𑀤𑀺𑀘𑁆𑀘𑀧𑀣𑁂 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑀺. 𑀬𑁂𑀲𑀁 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸, 𑀢𑁂𑀧𑀺 𑀆𑀓𑀸𑀲𑁂 𑀬𑀦𑁆𑀢𑀺 𑀇𑀤𑁆𑀥𑀺𑀬𑀸. 𑀥𑀻𑀭𑀸 𑀧𑀡𑁆𑀟𑀺𑀢𑀸 𑀲𑀯𑀸𑀳𑀺𑀦𑀺𑀁 𑀫𑀸𑀭𑀁 𑀚𑁂𑀢𑁆𑀯𑀸 𑀇𑀫𑀫𑁆𑀳𑀸 𑀯𑀝𑁆𑀝𑀮𑁄𑀓𑀸 𑀦𑀻𑀬𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀢𑀺𑀁𑀲𑀪𑀺𑀓𑁆𑀔𑀼𑀯𑀢𑁆𑀣𑀼 𑀅𑀝𑁆𑀞𑀫𑀁.

𑀏𑀓𑀁 ¶ ¶ ¶ 𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀺𑀜𑁆𑀘𑀫𑀸𑀡𑀯𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀤𑀲𑀩𑀮𑀲𑁆𑀲 𑀧𑀼𑀣𑀼𑀪𑀽𑀢𑁂𑀲𑀼 𑀲𑀸𑀯𑀓𑁂𑀲𑀼 𑀅𑀧𑁆𑀧𑀫𑀸𑀡𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁂𑀲𑀼 𑀧𑀢𑁆𑀣𑀝𑁂 𑀕𑀼𑀡𑀲𑀫𑀼𑀤𑀬𑁂 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀺. 𑀢𑀺𑀢𑁆𑀣𑀺𑀬𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀲𑀤𑀺𑀲𑀸 𑀅𑀳𑁂𑀲𑀼𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑀸. 𑀢𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄𑀯 𑀩𑀼𑀤𑁆𑀥𑁄, 𑀫𑀬𑀫𑁆𑀧𑀺 𑀩𑀼𑀤𑁆𑀥𑀸, 𑀓𑀺𑀁 𑀢𑀲𑁆𑀲𑁂𑀯 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀫𑁂𑀯, 𑀅𑀫𑁆𑀳𑀸𑀓𑀫𑁆𑀧𑀺 𑀤𑁂𑀣 𑀲𑀓𑁆𑀓𑀭𑁄𑀣𑀸’’𑀢𑀺 𑀏𑀯𑀁 𑀫𑀦𑀼𑀲𑁆𑀲𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀸𑀧𑀺 𑀮𑀸𑀪𑀲𑀓𑁆𑀓𑀸𑀭𑀁 𑀅𑀮𑀪𑀺𑀢𑁆𑀯𑀸 𑀭𑀳𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀬𑁆𑀬𑀸𑀫𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼.

𑀢𑀤𑀸 𑀲𑀸𑀯𑀢𑁆𑀣𑀺𑀬𑀁 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀦𑀸𑀫𑁂𑀓𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀤𑁂𑀯𑀘𑁆𑀙𑀭𑀸 𑀯𑀺𑀬. 𑀅𑀲𑁆𑀲𑀸 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺. 𑀅𑀣𑁂𑀓𑁄 𑀔𑀭𑀫𑀦𑁆𑀢𑀻 𑀏𑀯𑀫𑀸𑀳 𑁋 ‘‘𑀘𑀺𑀜𑁆𑀘𑀫𑀸𑀡𑀯𑀺𑀓𑀁 𑀧𑀝𑀺𑀘𑁆𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀲𑁆𑀲𑀸𑀫𑀸’’𑀢𑀺. 𑀢𑁂 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀲𑀸 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀢𑀺𑀢𑁆𑀣𑀺𑀬𑀸 𑀢𑀸𑀬 𑀲𑀤𑁆𑀥𑀺𑀁 𑀦 𑀓𑀣𑁂𑀲𑀼𑀁. 𑀲𑀸 ‘‘𑀓𑁄 𑀦𑀼 𑀔𑁄 𑀫𑁂 𑀤𑁄𑀲𑁄’’𑀢𑀺 𑀬𑀸𑀯𑀢𑀢𑀺𑀬𑀁 ‘‘𑀯𑀦𑁆𑀤𑀸𑀫𑀺, 𑀅𑀬𑁆𑀬𑀸’’𑀢𑀺 𑀯𑀢𑁆𑀯𑀸, ‘‘𑀅𑀬𑁆𑀬𑀸, 𑀓𑁄 𑀦𑀼 𑀔𑁄 𑀫𑁂 𑀤𑁄𑀲𑁄, 𑀓𑀺𑀁 𑀫𑀬𑀸 𑀲𑀤𑁆𑀥𑀺𑀁 𑀦 𑀓𑀣𑁂𑀣𑀸’’𑀢𑀺 𑀆𑀳. ‘‘𑀪𑀕𑀺𑀦𑀺, 𑀲𑀫𑀡𑀁 𑀕𑁄𑀢𑀫𑀁 𑀅𑀫𑁆𑀳𑁂 𑀯𑀺𑀳𑁂𑀞𑀬𑀦𑁆𑀢𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑁂 ¶ 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀦 𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀅𑀬𑁆𑀬𑀸, 𑀓𑀺𑀁 𑀧𑀦𑁂𑀢𑁆𑀣 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺. ‘‘𑀲𑀘𑁂 𑀢𑁆𑀯𑀁, 𑀪𑀕𑀺𑀦𑀺, 𑀅𑀫𑁆𑀳𑀸𑀓𑀁 𑀲𑀼𑀔𑀫𑀺𑀘𑁆𑀙𑀲𑀺, 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀳𑀻’’𑀢𑀺.

𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑀸, 𑀫𑀬𑁆𑀳𑀁𑀯𑁂𑀲𑁄 𑀪𑀸𑀭𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀢𑁆𑀯𑀸 𑀇𑀢𑁆𑀣𑀺𑀫𑀸𑀬𑀸𑀲𑀼 𑀓𑀼𑀲𑀮𑀢𑀸𑀬 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀯𑀢𑁆𑀣𑀺𑀯𑀸𑀲𑀻𑀦𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀦𑀲𑀫𑀬𑁂 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀁 𑀧𑀝𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. ‘‘𑀇𑀫𑀸𑀬 𑀯𑁂𑀮𑀸𑀬 𑀓𑀼𑀳𑀺𑀁 𑀕𑀘𑁆𑀙𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀫𑀫 𑀕𑀫𑀦𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀢𑁆𑀯𑀸 𑀚𑁂𑀢𑀯𑀦𑀲𑀫𑀻𑀧𑁂 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 ‘‘𑀅𑀕𑁆𑀕𑀯𑀦𑁆𑀤𑀦𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑁂 𑀉𑀧𑀸𑀲𑀓𑀚𑀦𑁂 ¶ 𑀚𑁂𑀢𑀯𑀦𑀲𑁆𑀲 𑀅𑀦𑁆𑀢𑁄𑀯𑀼𑀝𑁆𑀞𑀸 𑀯𑀺𑀬 𑀳𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀢𑀺. ‘‘𑀓𑀼𑀳𑀺𑀁 𑀯𑀼𑀝𑁆𑀞𑀸𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀫𑀫 𑀯𑀼𑀝𑁆𑀞𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀢𑁆𑀯𑀸 𑀫𑀸𑀲𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀧𑀼𑀘𑁆𑀙𑀺𑀬𑀫𑀸𑀦𑀸 𑀚𑁂𑀢𑀯𑀦𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀸 𑀯𑀼𑀝𑁆𑀞𑀸𑀫𑁆𑀳𑀻𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 ¶ ‘‘𑀲𑀘𑁆𑀘𑀁 𑀦𑀼 𑀔𑁄 𑀏𑀢𑀁, 𑀦𑁄’’𑀢𑀺 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂𑀫𑀸𑀲𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀺𑀮𑁄𑀢𑀺𑀓𑀸𑀳𑀺 𑀉𑀤𑀭𑀁 𑀯𑁂𑀞𑁂𑀢𑁆𑀯𑀸 𑀕𑀩𑁆𑀪𑀺𑀦𑀺𑀯𑀡𑁆𑀡𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀭𑀺 𑀭𑀢𑁆𑀢𑀧𑀝𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀲𑀫𑀡𑀁 𑀕𑁄𑀢𑀫𑀁 𑀧𑀝𑀺𑀘𑁆𑀘 𑀕𑀩𑁆𑀪𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀅𑀦𑁆𑀥𑀩𑀸𑀮𑁂 𑀲𑀤𑁆𑀤𑀳𑀸𑀧𑁂𑀢𑁆𑀯𑀸 𑀅𑀝𑁆𑀞𑀦𑀯𑀫𑀸𑀲𑀘𑁆𑀘𑀬𑁂𑀦 𑀉𑀤𑀭𑁂 𑀤𑀸𑀭𑀼𑀫𑀡𑁆𑀟𑀮𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀧𑀭𑀺 𑀧𑀝𑀁 𑀧𑀸𑀭𑀼𑀧𑀺𑀢𑁆𑀯𑀸 ¶ 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑁄 𑀕𑁄𑀳𑀦𑀼𑀓𑁂𑀦 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀉𑀲𑁆𑀲𑀤𑁂 𑀤𑀲𑁆𑀲𑁂𑀢𑁆𑀯𑀸 𑀓𑀺𑀮𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀳𑀼𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀣𑀸𑀕𑀢𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸, ‘‘𑀫𑀳𑀸𑀲𑀫𑀡, 𑀫𑀳𑀸𑀚𑀦𑀲𑁆𑀲 𑀢𑀸𑀯 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀫𑀥𑀼𑀭𑁄 𑀢𑁂 𑀲𑀤𑁆𑀤𑁄, 𑀲𑀫𑁆𑀨𑀼𑀲𑀺𑀢𑀁 𑀤𑀦𑁆𑀢𑀸𑀯𑀭𑀡𑀁. 𑀅𑀳𑀁 𑀧𑀦 𑀢𑀁 𑀧𑀝𑀺𑀘𑁆𑀘 𑀕𑀩𑁆𑀪𑀁 𑀮𑀪𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀚𑀸𑀢𑀸, 𑀦𑁂𑀯 𑀫𑁂 𑀲𑀽𑀢𑀺𑀖𑀭𑀁 𑀚𑀸𑀦𑀸𑀲𑀺, 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀲𑀬𑀁 𑀅𑀓𑀭𑁄𑀦𑁆𑀢𑁄 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺 𑀅𑀜𑁆𑀜𑀢𑀭𑀁 𑀓𑁄𑀲𑀮𑀭𑀸𑀚𑀸𑀦𑀁 𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀯𑀸 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀯𑀸 ‘𑀇𑀫𑀺𑀲𑁆𑀲𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀬 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀭𑁄𑀳𑀻’𑀢𑀺 𑀦 𑀯𑀤𑁂𑀲𑀺, 𑀅𑀪𑀺𑀭𑀫𑀺𑀢𑀼𑀁𑀬𑁂𑀯 𑀚𑀸𑀦𑀸𑀲𑀺, 𑀕𑀩𑁆𑀪𑀧𑀭𑀺𑀳𑀸𑀭𑀁 𑀦 𑀚𑀸𑀦𑀸𑀲𑀻’’𑀢𑀺 𑀕𑀽𑀣𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀤𑀽𑀲𑁂𑀢𑀼𑀁 𑀯𑀸𑀬𑀫𑀦𑁆𑀢𑀻 𑀯𑀺𑀬 𑀧𑀭𑀺𑀲𑀫𑀚𑁆𑀛𑁂 𑀢𑀣𑀸𑀕𑀢𑀁 𑀅𑀓𑁆𑀓𑁄𑀲𑀺. 𑀢𑀣𑀸𑀕𑀢𑁄 𑀥𑀫𑁆𑀫𑀓𑀣𑀁 𑀞𑀧𑁂𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀅𑀪𑀺𑀦𑀤𑀦𑁆𑀢𑁄, ‘‘𑀪𑀕𑀺𑀦𑀺, 𑀢𑀬𑀸 𑀓𑀣𑀺𑀢𑀲𑁆𑀲 𑀢𑀣𑀪𑀸𑀯𑀁 𑀯𑀸 𑀯𑀺𑀢𑀣𑀪𑀸𑀯𑀁 𑀯𑀸 𑀅𑀳𑀫𑁂𑀯 𑀘 𑀢𑁆𑀯𑀜𑁆𑀘 𑀚𑀸𑀦𑀸𑀫𑀸’’𑀢𑀺 𑀆𑀳. ‘‘𑀆𑀫, 𑀫𑀳𑀸𑀲𑀫𑀡, 𑀢𑀬𑀸 𑀘 𑀫𑀬𑀸 𑀘 𑀜𑀸𑀢𑀪𑀸𑀯𑁂𑀦𑁂𑀢𑀁 𑀚𑀸𑀢’’𑀦𑁆𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑀫𑀸𑀦𑁄 ‘‘𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀢𑀣𑀸𑀕𑀢𑀁 𑀅𑀪𑀽𑀢𑁂𑀦 𑀅𑀓𑁆𑀓𑁄𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀇𑀤𑀁 𑀯𑀢𑁆𑀣𑀼𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀘𑀢𑀽𑀳𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀫𑀺. 𑀤𑁂𑀯𑀧𑀼𑀢𑁆𑀢𑀸 𑀫𑀽𑀲𑀺𑀓𑀧𑁄𑀢𑀓𑀸 𑀳𑀼𑀢𑁆𑀯𑀸 𑀤𑀸𑀭𑀼𑀫𑀡𑁆𑀟𑀮𑀺𑀓𑀲𑁆𑀲 𑀩𑀦𑁆𑀥𑀦𑀭𑀚𑁆𑀚𑀼𑀓𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀙𑀺𑀦𑁆𑀤𑀺𑀁𑀲𑀼, 𑀧𑀸𑀭𑀼𑀢𑀧𑀝𑀁 𑀯𑀸𑀢𑁄 𑀉𑀓𑁆𑀔𑀺𑀧𑀺, 𑀤𑀸𑀭𑀼𑀫𑀡𑁆𑀟𑀮𑀺𑀓𑀁 𑀧𑀢𑀫𑀸𑀦𑀁 𑀢𑀲𑁆𑀲𑀸 𑀧𑀸𑀤𑀧𑀺𑀝𑁆𑀞𑀺𑀬𑀁 𑀧𑀢𑀺 ¶ , 𑀉𑀪𑁄 𑀅𑀕𑁆𑀕𑀧𑀸𑀤𑀸 𑀙𑀺𑀚𑁆𑀚𑀺𑀁𑀲𑀼. 𑀫𑀦𑀼𑀲𑁆𑀲𑀸 ‘‘𑀥𑀻 𑀓𑀸𑀴𑀓𑀡𑁆𑀡𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀓𑁆𑀓𑁄𑀲𑀻’’𑀢𑀺 𑀲𑀻𑀲𑁂 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀺𑀳𑀢𑁆𑀢𑀸 𑀚𑁂𑀢𑀯𑀦𑀸 𑀦𑀻𑀳𑀭𑀺𑀁𑀲𑀼. 𑀅𑀣𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀘𑀓𑁆𑀔𑀼𑀧𑀣𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑁂 𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 ¶ 𑀯𑀺𑀯𑀭𑀫𑀤𑀸𑀲𑀺, 𑀅𑀯𑀻𑀘𑀺𑀢𑁄 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺. 𑀲𑀸 𑀓𑀼𑀮𑀤𑀢𑁆𑀢𑀺𑀬𑀁 𑀓𑀫𑁆𑀩𑀮𑀁 𑀧𑀸𑀭𑀼𑀧𑀫𑀸𑀦𑀸 𑀯𑀺𑀬 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺, 𑀤𑀲𑀩𑀮𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀯𑀟𑁆𑀠𑀺. 𑀧𑀼𑀦𑀤𑀺𑀯𑀲𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀏𑀯𑀁 𑀉𑀴𑀸𑀭𑀕𑀼𑀡𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀽𑀢𑁂𑀦 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀏𑀲𑀸 𑀫𑀁 𑀅𑀪𑀽𑀢𑁂𑀦 𑀅𑀓𑁆𑀓𑁄𑀲𑀺𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑁋

‘‘𑀦𑀸𑀤𑀝𑁆𑀞𑀸 𑀧𑀭𑀢𑁄 𑀤𑁄𑀲𑀁, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀇𑀲𑁆𑀲𑀭𑁄 𑀧𑀡𑀬𑁂 𑀤𑀡𑁆𑀟𑀁, 𑀲𑀸𑀫𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬𑀸’’𑀢𑀺. 𑁋

𑀇𑀫𑀁 ¶ 𑀤𑁆𑀯𑀸𑀤𑀲𑀦𑀺𑀧𑀸𑀢𑁂 𑀫𑀳𑀸𑀧𑀤𑀼𑀫𑀚𑀸𑀢𑀓𑀁 (𑀚𑀸. 𑁧.𑁧𑁨.𑁧𑁦𑁬) 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺 𑁋

𑀢𑀤𑀸 𑀓𑀺𑀭𑁂𑀲𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼 𑀲𑀧𑀢𑁆𑀢𑀻 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀲𑀤𑁆𑀥𑀫𑁆𑀫𑁂𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀫𑀦𑀁 𑀅𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑀺 𑀯𑀺𑀧𑁆𑀧𑀓𑀸𑀭𑀁 𑀓𑀢𑁆𑀯𑀸 𑀕𑀺𑀮𑀸𑀦𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀯 𑀧𑀼𑀢𑁆𑀢𑁄 𑀫𑀁 𑀅𑀦𑀺𑀘𑁆𑀙𑀦𑁆𑀢𑀺𑀁 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀲𑀻’’𑀢𑀺 ¶ 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀓𑀼𑀤𑁆𑀥𑁄 𑀫𑀳𑀸𑀲𑀢𑁆𑀢𑀁 𑀘𑁄𑀭𑀧𑀧𑀸𑀢𑁂 𑀔𑀺𑀧𑀺. 𑀅𑀣 𑀦𑀁 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀸𑀕𑀭𑀸𑀚𑀲𑁆𑀲 𑀨𑀡𑀕𑀩𑁆𑀪𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀦𑀸𑀕𑀭𑀸𑀚𑀸 𑀢𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀉𑀧𑀟𑁆𑀠𑀭𑀚𑁆𑀚𑁂𑀦 𑀲𑀫𑁆𑀫𑀸𑀦𑁂𑀲𑀺. 𑀲𑁄 𑀢𑀢𑁆𑀣 𑀲𑀁𑀯𑀘𑁆𑀙𑀭𑀁 𑀯𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀅𑀣 𑀦𑀁 𑀏𑀓𑁄 𑀯𑀦𑀘𑀭𑀓𑁄 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀦 ‘‘𑀫𑀬𑁆𑀳𑀁 𑀭𑀚𑁆𑀚𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑁆𑀯𑀁 𑀧𑀦 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺 𑀑𑀯𑀤𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀭𑁄𑀤𑀺𑀢𑁆𑀯𑀸 𑀦𑀕𑀭𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀅𑀳𑀁 𑀓𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑁂𑀦 𑀧𑀼𑀢𑁆𑀢𑁂𑀦 𑀯𑀺𑀬𑁄𑀕𑀁 𑀧𑀢𑁆𑀢𑁄’’𑀢𑀺? ‘‘𑀅𑀕𑁆𑀕𑀫𑀳𑁂𑀲𑀺𑀁 𑀦𑀺𑀲𑁆𑀲𑀸𑀬, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀁 𑀉𑀤𑁆𑀥𑀁𑀧𑀸𑀤𑀁 𑀕𑀳𑁂𑀢𑁆𑀯𑀸 𑀘𑁄𑀭𑀧𑀧𑀸𑀢𑁂 𑀔𑀺𑀧𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄 𑀲𑀢𑁆𑀣𑀸 𑀅𑀳𑁄𑀲𑀺, 𑀫𑀸𑀢𑀼 𑀲𑀧𑀢𑁆𑀢𑀻 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀢𑀺.

𑀲𑀢𑁆𑀣𑀸 ¶ 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀏𑀓𑀁 𑀥𑀫𑁆𑀫𑀜𑁆𑀳𑀺 𑀲𑀘𑁆𑀘𑀯𑀘𑀦𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑀸𑀦𑀁 𑀯𑀺𑀲𑁆𑀲𑀝𑁆𑀞𑀧𑀭𑀮𑁄𑀓𑀸𑀦𑀁 𑀅𑀓𑀢𑁆𑀢𑀩𑁆𑀩𑀧𑀸𑀧𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲, 𑀫𑀼𑀲𑀸𑀯𑀸𑀤𑀺𑀲𑁆𑀲 𑀚𑀦𑁆𑀢𑀼𑀦𑁄;

𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀲𑁆𑀲, 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀸𑀭𑀺𑀬’’𑀦𑁆𑀢𑀺.

𑀢𑀢𑁆𑀣 𑀏𑀓𑀁 𑀥𑀫𑁆𑀫𑀦𑁆𑀢𑀺 𑀲𑀘𑁆𑀘𑀁. 𑀫𑀼𑀲𑀸𑀯𑀸𑀤𑀺𑀲𑁆𑀲𑀸𑀢𑀺 𑀬𑀲𑁆𑀲 𑀤𑀲𑀲𑀼 𑀯𑀘𑀦𑁂𑀲𑀼 𑀏𑀓𑀫𑁆𑀧𑀺 𑀲𑀘𑁆𑀘𑀁 𑀦𑀢𑁆𑀣𑀺, 𑀏𑀯𑀭𑀽𑀧𑀲𑁆𑀲 𑀫𑀼𑀲𑀸𑀯𑀸𑀤𑀺𑀦𑁄 ¶ . 𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀲𑁆𑀲𑀸𑀢𑀺 𑀯𑀺𑀲𑁆𑀲𑀝𑁆𑀞𑀧𑀭𑀮𑁄𑀓𑀲𑁆𑀲. 𑀏𑀯𑀭𑀽𑀧𑁄 𑀳𑀺 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀅𑀯𑀲𑀸𑀦𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀦 𑀧𑀲𑁆𑀲𑀢𑀺. 𑀦𑀢𑁆𑀣𑀺 𑀧𑀸𑀧𑀦𑁆𑀢𑀺 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀇𑀤𑀁 𑀦𑀸𑀫 𑀧𑀸𑀧𑀁 𑀅𑀓𑀢𑁆𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀯𑀢𑁆𑀣𑀼 𑀦𑀯𑀫𑀁.

𑀦 ¶ 𑀯𑁂 𑀓𑀤𑀭𑀺𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀲𑀤𑀺𑀲𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀚𑁂𑀢𑀯𑀦𑀁 𑀧𑀸𑀯𑀺𑀲𑀺. 𑀭𑀸𑀚𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑀼𑀓𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀤𑀸𑀦𑀁 𑀫𑁂 𑀧𑀲𑁆𑀲𑀦𑁆𑀢𑀽’’𑀢𑀺 𑀦𑀸𑀕𑀭𑁂 𑀧𑀓𑁆𑀓𑁄𑀲𑀺. 𑀦𑀸𑀕𑀭𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀤𑀸𑀦𑀁 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀫𑁆𑀧𑀺 𑀤𑀸𑀦𑀁, 𑀤𑁂𑀯𑁄, 𑀧𑀲𑁆𑀲𑀢𑀽’’𑀢𑀺 𑀭𑀜𑁆𑀜𑁄 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀤𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀫𑁂𑀳𑀺 𑀫𑀫 𑀤𑀸𑀦𑀢𑁄 𑀉𑀢𑁆𑀢𑀭𑀺𑀢𑀭𑀁 𑀓𑀢𑀁, 𑀧𑀼𑀦 𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂𑀧𑀺 𑀤𑀸𑀦𑀁 𑀲𑀚𑁆𑀚𑁂𑀲𑀺. 𑀦𑀸𑀕𑀭𑀸𑀧𑀺 𑀢𑀁 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀚𑁆𑀚𑀬𑀺𑀁𑀲𑀼. 𑀏𑀯𑀁 𑀦𑁂𑀯 𑀭𑀸𑀚𑀸 𑀦𑀸𑀕𑀭𑁂 𑀧𑀭𑀸𑀚𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 ¶ 𑀦𑀸𑀕𑀭𑀸 𑀭𑀸𑀚𑀸𑀦𑀁. 𑀅𑀣 𑀙𑀝𑁆𑀞𑁂 𑀯𑀸𑀭𑁂 𑀦𑀸𑀕𑀭𑀸 𑀲𑀢𑀕𑀼𑀡𑀁 𑀲𑀳𑀲𑁆𑀲𑀕𑀼𑀡𑀁 𑀯𑀟𑁆𑀠𑁂𑀢𑁆𑀯𑀸 𑀬𑀣𑀸 𑀦 𑀲𑀓𑁆𑀓𑀸 𑀳𑁄𑀢𑀺 ‘‘𑀇𑀤𑀁 𑀦𑀸𑀫 𑀇𑀫𑁂𑀲𑀁 𑀤𑀸𑀦𑁂 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀼𑀁, 𑀏𑀯𑀁 𑀤𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀳𑀁 𑀇𑀫𑁂𑀲𑀁 𑀤𑀸𑀦𑀢𑁄 𑀉𑀢𑁆𑀢𑀭𑀺𑀢𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’’𑀢𑀺 𑀉𑀧𑀸𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀫𑀮𑁆𑀮𑀺𑀓𑀸 ¶ 𑀤𑁂𑀯𑀻 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀓𑀲𑁆𑀫𑀸, 𑀫𑀳𑀸𑀭𑀸𑀚, 𑀏𑀯𑀁 𑀦𑀺𑀧𑀦𑁆𑀦𑁄𑀲𑀺, 𑀓𑁂𑀦 𑀢𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀺𑀮𑀦𑁆𑀢𑀸𑀦𑀺 𑀯𑀺𑀬𑀸’’𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀆𑀳 𑁋 ‘‘𑀦 𑀤𑀸𑀦𑀺 𑀢𑁆𑀯𑀁, 𑀤𑁂𑀯𑀺, 𑀚𑀸𑀦𑀸𑀲𑀻’’𑀢𑀺. ‘‘𑀦 𑀚𑀸𑀦𑀸𑀫𑀺, 𑀤𑁂𑀯𑀸’’𑀢𑀺. 𑀲𑁄 𑀢𑀲𑁆𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.

𑀅𑀣 𑀦𑀁 𑀫𑀮𑁆𑀮𑀺𑀓𑀸 𑀆𑀳 𑁋 ‘‘𑀤𑁂𑀯, 𑀫𑀸 𑀘𑀺𑀦𑁆𑀢𑀬𑀺, 𑀓𑀳𑀁 𑀢𑀬𑀸 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 𑀦𑀸𑀕𑀭𑁂𑀳𑀺 𑀧𑀭𑀸𑀚𑀺𑀬𑀫𑀸𑀦𑁄 𑀤𑀺𑀝𑁆𑀞𑀧𑀼𑀩𑁆𑀩𑁄 𑀯𑀸 𑀲𑀼𑀢𑀧𑀼𑀩𑁆𑀩𑁄 𑀯𑀸, 𑀅𑀳𑀁 𑀢𑁂 𑀤𑀸𑀦𑀁 𑀲𑀁𑀯𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺. 𑀇𑀢𑀺𑀲𑁆𑀲 𑀅𑀲𑀤𑀺𑀲𑀤𑀸𑀦𑀁 𑀲𑀁𑀯𑀺𑀤𑀳𑀺𑀢𑀼𑀓𑀸𑀫𑀢𑀸𑀬 𑀏𑀯𑀁 𑀯𑀢𑁆𑀯𑀸, 𑀫𑀳𑀸𑀭𑀸𑀚, 𑀲𑀸𑀮𑀓𑀮𑁆𑀬𑀸𑀡𑀺𑀧𑀤𑀭𑁂𑀳𑀺 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀦𑁆𑀢𑁄 𑀆𑀯𑀝𑁆𑀝𑁂 𑀦𑀺𑀲𑀻𑀤𑀦𑀫𑀡𑁆𑀟𑀧𑀁 𑀓𑀸𑀭𑁂𑀳𑀺, 𑀲𑁂𑀲𑀸 𑀩𑀳𑀺𑀆𑀯𑀝𑁆𑀝𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀧𑀜𑁆𑀘 𑀲𑁂𑀢𑀘𑁆𑀙𑀢𑁆𑀢𑀲𑀢𑀸𑀦𑀺 𑀓𑀸𑀭𑁂𑀳𑀺, 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀸 𑀳𑀢𑁆𑀣𑀻 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀫𑀢𑁆𑀣𑀓𑁂 𑀥𑀸𑀭𑀬𑀫𑀸𑀦𑀸 𑀞𑀲𑁆𑀲𑀦𑁆𑀢𑀺. 𑀅𑀝𑁆𑀞 𑀯𑀸 𑀤𑀲 𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀦𑀸𑀯𑀸𑀬𑁄 𑀓𑀸𑀭𑁂𑀳𑀺, 𑀢𑀸 𑀫𑀡𑁆𑀟𑀧𑀫𑀚𑁆𑀛𑁂 𑀪𑀯𑀺𑀲𑁆𑀲𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀏𑀓𑁂𑀓𑀸 𑀔𑀢𑁆𑀢𑀺𑀬𑀥𑀻𑀢𑀸 𑀦𑀺𑀲𑀻𑀤𑀺𑀢𑁆𑀯𑀸 𑀕𑀦𑁆𑀥𑁂 𑀧𑀺𑀲𑀺𑀲𑁆𑀲𑀢𑀺, 𑀏𑀓𑁂𑀓𑀸 𑀔𑀢𑁆𑀢𑀺𑀬𑀥𑀻𑀢𑀸 𑀩𑀻𑀚𑀦𑀁 𑀆𑀤𑀸𑀬 𑀤𑁆𑀯𑁂 𑀤𑁆𑀯𑁂 𑀪𑀺𑀓𑁆𑀔𑀽 𑀩𑀻𑀚𑀫𑀸𑀦𑀸 𑀞𑀲𑁆𑀲𑀢𑀺, 𑀲𑁂𑀲𑀸 𑀔𑀢𑁆𑀢𑀺𑀬𑀥𑀻𑀢𑀭𑁄 𑀧𑀺𑀲𑁂 𑀧𑀺𑀲𑁂 𑀕𑀦𑁆𑀥𑁂 𑀳𑀭𑀺𑀢𑁆𑀯𑀸 ¶ 𑀲𑀼𑀯𑀡𑁆𑀡𑀦𑀸𑀯𑀸𑀲𑀼 𑀧𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀢𑀸𑀲𑀼 𑀏𑀓𑀘𑁆𑀘𑀸 𑀔𑀢𑁆𑀢𑀺𑀬𑀥𑀻𑀢𑀭𑁄 𑀦𑀻𑀮𑀼𑀧𑁆𑀧𑀮𑀓𑀮𑀸𑀧𑁂 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀦𑀸𑀯𑀸𑀲𑀼 𑀧𑀓𑁆𑀔𑀺𑀢𑁆𑀢𑀕𑀦𑁆𑀥𑁂 𑀆𑀮𑁄𑀴𑁂𑀢𑁆𑀯𑀸 𑀯𑀸𑀲𑀁 𑀕𑀸𑀳𑀸𑀧𑁂𑀲𑁆𑀲𑀦𑁆𑀢𑀺. 𑀦𑀸𑀕𑀭𑀸𑀦𑀜𑁆𑀳𑀺𑀦𑁂𑀯 𑀔𑀢𑁆𑀢𑀺𑀬𑀥𑀻𑀢𑀭𑁄 𑀅𑀢𑁆𑀣𑀺, 𑀦 𑀲𑁂𑀢𑀘𑁆𑀙𑀢𑁆𑀢𑀸𑀦𑀺, 𑀦 𑀳𑀢𑁆𑀣𑀺𑀦𑁄 𑀘. 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀦𑀸𑀕𑀭𑀸 ¶ 𑀧𑀭𑀸𑀚𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀓𑀭𑁄𑀳𑀺, 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 ‘‘𑀲𑀸𑀥𑀼, 𑀤𑁂𑀯𑀺, 𑀓𑀮𑁆𑀬𑀸𑀡𑀁 𑀢𑁂 𑀓𑀣𑀺𑀢’’𑀦𑁆𑀢𑀺 𑀢𑀸𑀬 𑀓𑀣𑀺𑀢𑀦𑀺𑀬𑀸𑀫𑁂𑀦 𑀲𑀩𑁆𑀩𑀁 𑀓𑀸𑀭𑁂𑀲𑀺. 𑀏𑀓𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀏𑀓𑁄 𑀳𑀢𑁆𑀣𑀺 𑀦𑀧𑁆𑀧𑀳𑁄𑀲𑀺. 𑀅𑀣 𑀭𑀸𑀚𑀸 𑀫𑀮𑁆𑀮𑀺𑀓𑀁 𑀆𑀳 𑁋 ‘‘𑀪𑀤𑁆𑀤𑁂, 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁄 𑀳𑀢𑁆𑀣𑀺 𑀦𑀧𑁆𑀧𑀳𑁄𑀢𑀺, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁, 𑀤𑁂𑀯, 𑀧𑀜𑁆𑀘 𑀳𑀢𑁆𑀣𑀺𑀲𑀢𑀸𑀦𑀺 𑀦𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀤𑁂𑀯𑀺, 𑀅𑀯𑀲𑁂𑀲𑀸 𑀤𑀼𑀝𑁆𑀞𑀳𑀢𑁆𑀣𑀺𑀦𑁄, 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸𑀯 𑀯𑁂𑀭𑀫𑁆𑀪𑀯𑀸𑀢𑀸 𑀯𑀺𑀬 𑀘𑀡𑁆𑀟𑀸 𑀳𑁄𑀦𑁆𑀢𑀻’’𑀢𑀺. ‘‘𑀤𑁂𑀯, 𑀅𑀳𑀁 𑀏𑀓𑀲𑁆𑀲 𑀤𑀼𑀝𑁆𑀞𑀳𑀢𑁆𑀣𑀺𑀧𑁄𑀢𑀓𑀲𑁆𑀲 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀦𑀝𑁆𑀞𑀸𑀦𑀁 𑀚𑀸𑀦𑀸𑀫𑀻’’𑀢𑀺. ‘‘𑀓𑀢𑁆𑀣 𑀦𑀁 𑀞𑀧𑁂𑀲𑁆𑀲𑀸𑀫𑀸’’𑀢𑀺? ‘‘𑀅𑀬𑁆𑀬𑀲𑁆𑀲 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀳𑀢𑁆𑀣𑀺𑀧𑁄𑀢𑀓𑁄 𑀯𑀸𑀮𑀥𑀺𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀧𑀸𑀢𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦𑀺𑀫𑀺𑀮𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄 ‘‘𑀏𑀯𑀭𑀽𑀧𑀲𑁆𑀲 𑀦𑀸𑀫 𑀘𑀡𑁆𑀟𑀳𑀢𑁆𑀣𑀺𑀦𑁄 𑀅𑀬𑀫𑀸𑀓𑀸𑀭𑁄’’𑀢𑀺 𑀳𑀢𑁆𑀣𑀺𑀫𑁂𑀯 𑀑𑀮𑁄𑀓𑁂𑀲𑀺.

𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀁 𑀇𑀫𑀲𑁆𑀫𑀺𑀁 𑀤𑀸𑀦𑀕𑁆𑀕𑁂 𑀓𑀧𑁆𑀧𑀺𑀬𑀪𑀡𑁆𑀟𑀁 𑀯𑀸 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀯𑀸, 𑀲𑀩𑁆𑀩𑀁 𑀢𑀁 𑀢𑀼𑀫𑁆𑀳𑀸𑀓𑀫𑁂𑀯 𑀤𑀫𑁆𑀫𑀻’’𑀢𑀺 𑀆𑀳 ¶ . 𑀢𑀲𑁆𑀫𑀺𑀁 ¶ 𑀧𑀦 𑀤𑀸𑀦𑁂 𑀏𑀓𑀤𑀺𑀯𑀲𑁂𑀦𑁂𑀯 𑀧𑀭𑀺𑀘𑁆𑀘𑀢𑁆𑀢𑀁 𑀘𑀼𑀤𑁆𑀤𑀲𑀓𑁄𑀝𑀺𑀥𑀦𑀁 𑀳𑁄𑀢𑀺. 𑀲𑀢𑁆𑀣𑀼 𑀧𑀦 𑀲𑁂𑀢𑀘𑁆𑀙𑀢𑁆𑀢𑀁 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑁄 𑀆𑀥𑀸𑀭𑀓𑁄 𑀧𑀸𑀤𑀧𑀻𑀞𑀺𑀓𑀸𑀢𑀺 𑀘𑀢𑁆𑀢𑀸𑀭𑀺 𑀅𑀦𑀕𑁆𑀖𑀸𑀦𑁂𑀯. 𑀧𑀼𑀦 𑀏𑀯𑀭𑀽𑀧𑀁 𑀓𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀤𑀸𑀦𑀁 𑀦𑀸𑀫 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀳𑁄𑀲𑀺, 𑀢𑁂𑀦𑁂𑀯 𑀢𑀁 ‘‘𑀅𑀲𑀤𑀺𑀲𑀤𑀸𑀦’’𑀦𑁆𑀢𑀺 𑀧𑀜𑁆𑀜𑀸𑀬𑀺. 𑀢𑀁 𑀓𑀺𑀭 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀏𑀓𑀯𑀸𑀭𑀁 𑀳𑁄𑀢𑀺𑀬𑁂𑀯, 𑀲𑀩𑁆𑀩𑁂𑀲𑀁 𑀧𑀦 𑀇𑀢𑁆𑀣𑀻𑀬𑁂𑀯 𑀲𑀁𑀯𑀺𑀤𑀳𑀢𑀺. 𑀭𑀜𑁆𑀜𑁄 𑀧𑀦 𑀓𑀸𑀴𑁄 𑀘 𑀚𑀼𑀡𑁆𑀳𑁄 𑀘𑀸𑀢𑀺 𑀤𑁆𑀯𑁂 𑀅𑀫𑀘𑁆𑀘𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀓𑀸𑀴𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀭𑀸𑀚𑀓𑀼𑀮𑀲𑁆𑀲 𑀧𑀭𑀺𑀳𑀸𑀦𑀺, 𑀏𑀓𑀤𑀺𑀯𑀲𑁂𑀦𑁂𑀯 𑀘𑀼𑀤𑁆𑀤𑀲𑀓𑁄𑀝𑀺𑀥𑀦𑀁 𑀔𑀬𑀁 𑀕𑀘𑁆𑀙𑀢𑀺, 𑀇𑀫𑁂 𑀇𑀫𑀁 𑀤𑀸𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀸𑀬𑀺𑀲𑁆𑀲𑀦𑁆𑀢𑀺, 𑀅𑀳𑁄 𑀦𑀝𑁆𑀞𑀁 𑀭𑀸𑀚𑀓𑀼𑀮’’𑀦𑁆𑀢𑀺. 𑀚𑀼𑀡𑁆𑀳𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀭𑀜𑁆𑀜𑁄 𑀤𑀸𑀦𑀁 𑀲𑀼𑀤𑀺𑀦𑁆𑀦𑀁. 𑀦 𑀳𑀺 𑀲𑀓𑁆𑀓𑀸 𑀭𑀸𑀚𑀪𑀸𑀯𑁂 𑀅𑀝𑁆𑀞𑀺𑀢𑁂𑀦 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀸𑀢𑀼𑀁, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀢𑁆𑀢𑀺𑀁 𑀅𑀤𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑀁 𑀧𑀦𑀺𑀤𑀁 𑀤𑀸𑀦𑀁 𑀅𑀦𑀼𑀫𑁄𑀤𑀸𑀫𑀻’’𑀢𑀺.

𑀲𑀢𑁆𑀣𑀼 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀧𑀢𑁆𑀢𑀁 𑀕𑀡𑁆𑀳𑀺. 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀜𑁆𑀜𑀸 𑀫𑀳𑁄𑀖𑀁 𑀧𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀫𑀳𑀸𑀤𑀸𑀦𑀁 𑀤𑀺𑀦𑁆𑀦𑀁, 𑀅𑀲𑀓𑁆𑀔𑀺 𑀦𑀼 𑀔𑁄 𑀫𑀳𑀸𑀚𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁, 𑀉𑀤𑀸𑀳𑀼 𑀦𑁄’’𑀢𑀺. 𑀲𑁄 𑀢𑁂𑀲𑀁 𑀅𑀫𑀘𑁆𑀘𑀸𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 ‘‘𑀲𑀘𑁂 𑀭𑀜𑁆𑀜𑁄 𑀤𑀸𑀦𑀸𑀦𑀼𑀘𑁆𑀙𑀯𑀺𑀓𑀁 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀸𑀴𑀲𑁆𑀲 𑀫𑀼𑀤𑁆𑀥𑀸 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀺, 𑀚𑀼𑀡𑁆𑀳𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀓𑀸𑀴𑁂 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀢𑁆𑀯𑀸 𑀞𑀺𑀢𑀲𑁆𑀲 𑀭𑀜𑁆𑀜𑁄 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀫𑁂𑀯 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀢𑁄. 𑀪𑀺𑀓𑁆𑀔𑀽 ¶ 𑀅𑀗𑁆𑀕𑀼𑀮𑀺𑀫𑀸𑀮𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀦 𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀝𑁆𑀞𑀳𑀢𑁆𑀣𑀺𑀁 𑀙𑀢𑁆𑀢𑀁 𑀥𑀸𑀭𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 𑀪𑀸𑀬𑀻’’𑀢𑀺? ‘‘𑀦 𑀪𑀸𑀬𑀺𑀁, 𑀆𑀯𑀼𑀲𑁄’’𑀢𑀺. 𑀢𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀅𑀗𑁆𑀕𑀼𑀮𑀺𑀫𑀸𑀮𑁄, 𑀪𑀦𑁆𑀢𑁂, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀲𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂 ¶ , 𑀅𑀗𑁆𑀕𑀼𑀮𑀺𑀫𑀸𑀮𑁄 𑀪𑀸𑀬𑀢𑀺. 𑀔𑀻𑀡𑀸𑀲𑀯𑀉𑀲𑀪𑀸𑀦𑀜𑁆𑀳𑀺 𑀅𑀦𑁆𑀢𑀭𑁂 𑀚𑁂𑀝𑁆𑀞𑀓𑀉𑀲𑀪𑀸 𑀫𑀫 𑀧𑀼𑀢𑁆𑀢𑀲𑀤𑀺𑀲𑀸 𑀪𑀺𑀓𑁆𑀔𑀽 𑀦 𑀪𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀅𑀦𑁂𑀚𑀁 𑀦𑁆𑀳𑀸𑀢𑀓𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁨𑁨; 𑀲𑀼. 𑀦𑀺. 𑁬𑁫𑁧);

𑀭𑀸𑀚𑀸𑀧𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 ‘‘𑀏𑀯𑀭𑀽𑀧𑀸𑀬 𑀦𑀸𑀫 𑀧𑀭𑀺𑀲𑀸𑀬 𑀤𑀸𑀦𑀁 𑀤𑀢𑁆𑀯𑀸 𑀞𑀺𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑀁 𑀅𑀦𑀼𑀫𑁄𑀤𑀦𑀁 𑀅𑀓𑀢𑁆𑀯𑀸 𑀕𑀸𑀣𑀫𑁂𑀯 𑀯𑀢𑁆𑀯𑀸 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀕𑀢𑁄. 𑀫𑀬𑀸 𑀲𑀢𑁆𑀣𑀼 𑀅𑀦𑀼𑀘𑁆𑀙𑀯𑀺𑀓𑀁 𑀤𑀸𑀦𑀁 𑀅𑀓𑀢𑁆𑀯𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀢𑀁 𑀪𑀯𑀺𑀲𑁆𑀲𑀢𑀺 ¶ , 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀤𑀢𑁆𑀯𑀸 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀯𑀸 𑀤𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀸 𑀫𑁂 𑀓𑀼𑀧𑀺𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀅𑀲𑀤𑀺𑀲𑀤𑀸𑀦𑀁 𑀦𑀸𑀫, 𑀤𑀸𑀦𑀸𑀦𑀼𑀭𑀽𑀧𑀁 𑀅𑀦𑀼𑀫𑁄𑀤𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀸𑀦𑀁 𑀦 𑀤𑀺𑀦𑁆𑀦𑀁, 𑀉𑀤𑀸𑀳𑀼 𑀤𑀸𑀦𑀸𑀦𑀼𑀭𑀽𑀧𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀤𑀢𑁆𑀯𑀸 𑀅𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑀺𑀦𑁆𑀦’’𑀦𑁆𑀢𑀺. ‘‘𑀓𑀺𑀫𑁂𑀢𑀁 ¶ , 𑀫𑀳𑀸𑀭𑀸𑀚𑀸’’𑀢𑀺? ‘‘𑀦 𑀫𑁂 𑀢𑀼𑀫𑁆𑀳𑁂𑀳𑀺 𑀤𑀸𑀦𑀸𑀦𑀼𑀘𑁆𑀙𑀯𑀺𑀓𑀸 𑀅𑀦𑀼𑀫𑁄𑀤𑀦𑀸 𑀓𑀢𑀸’’𑀢𑀺? ‘‘𑀫𑀳𑀸𑀭𑀸𑀚, 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀢𑁂 𑀤𑀸𑀦𑀁 𑀤𑀺𑀦𑁆𑀦𑀁. 𑀏𑀢𑀜𑁆𑀳𑀺 𑀅𑀲𑀤𑀺𑀲𑀤𑀸𑀦𑀁 𑀦𑀸𑀫, 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀏𑀓𑀯𑀸𑀭𑀫𑁂𑀯 𑀲𑀓𑁆𑀓𑀸 𑀤𑀸𑀢𑀼𑀁, 𑀧𑀼𑀦 𑀏𑀯𑀭𑀽𑀧𑀁 𑀦𑀸𑀫 𑀤𑀸𑀦𑀁 𑀤𑀼𑀤𑁆𑀤𑀤’’𑀦𑁆𑀢𑀺. ‘‘𑀅𑀣 𑀓𑀲𑁆𑀫𑀸, 𑀪𑀦𑁆𑀢𑁂, 𑀫𑁂 𑀤𑀸𑀦𑀸𑀦𑀼𑀭𑀽𑀧𑀁 𑀅𑀦𑀼𑀫𑁄𑀤𑀦𑀁 𑀦 𑀓𑀭𑀺𑀢𑁆𑀣𑀸’’𑀢𑀺? ‘‘𑀧𑀭𑀺𑀲𑀸𑀬 𑀅𑀲𑀼𑀤𑁆𑀥𑀢𑁆𑀢𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀧𑀭𑀺𑀲𑀸𑀬 𑀤𑁄𑀲𑁄’’𑀢𑀺? 𑀅𑀣𑀲𑁆𑀲 𑀲𑀢𑁆𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀫𑀘𑁆𑀘𑀸𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀆𑀭𑁄𑀘𑁂𑀢𑁆𑀯𑀸 𑀓𑀸𑀴𑁂 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀅𑀦𑀼𑀫𑁄𑀤𑀦𑀸𑀬 𑀅𑀓𑀢𑀪𑀸𑀯𑀁 𑀆𑀘𑀺𑀓𑁆𑀔𑀺. 𑀭𑀸𑀚𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀓𑀸𑀴, 𑀏𑀯𑀁 𑀘𑀺𑀦𑁆𑀢𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑀯 𑀲𑀦𑁆𑀢𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀫𑀬𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑁂𑀦𑁆𑀢𑁂 𑀢𑀼𑀬𑁆𑀳𑀁 𑀓𑀸 𑀧𑀻𑀴𑀸. 𑀕𑀘𑁆𑀙, 𑀪𑁄, 𑀬𑀁 𑀢𑁂 𑀫𑀬𑀸 𑀤𑀺𑀦𑁆𑀦𑀁, 𑀢𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀼, 𑀭𑀝𑁆𑀞𑀢𑁄 𑀧𑀦 𑀫𑁂 𑀦𑀺𑀓𑁆𑀔𑀫𑀸’’𑀢𑀺 𑀢𑀁 𑀭𑀝𑁆𑀞𑀸 𑀦𑀻𑀳𑀭𑀺𑀢𑁆𑀯𑀸 𑀚𑀼𑀡𑁆𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁂 𑀏𑀯𑀁 𑀘𑀺𑀦𑁆𑀢𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀥𑀼, 𑀫𑀸𑀢𑀼𑀮, 𑀧𑀲𑀦𑁆𑀦𑁄𑀲𑁆𑀫𑀺, 𑀢𑁆𑀯𑀁 𑀫𑀫 𑀧𑀭𑀺𑀚𑀦𑀁 𑀕𑀳𑁂𑀢𑁆𑀯𑀸 𑀫𑀬𑀸 𑀤𑀺𑀦𑁆𑀦𑀦𑀺𑀬𑀸𑀫𑁂𑀦𑁂𑀯 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀸𑀦𑀁 𑀤𑁂𑀳𑀻’’𑀢𑀺 𑀲𑀢𑁆𑀢𑀸𑀳𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀧𑀲𑁆𑀲𑀣, 𑀪𑀦𑁆𑀢𑁂, 𑀩𑀸𑀮𑀲𑁆𑀲 𑀓𑀭𑀡𑀁, 𑀫𑀬𑀸 𑀏𑀯𑀁 𑀤𑀺𑀦𑁆𑀦𑀤𑀸𑀦𑁂 𑀧𑀳𑀸𑀭𑀫𑀤𑀸𑀲𑀻’’𑀢𑀺. 𑀲𑀢𑁆𑀣𑀸 ‘‘𑀆𑀫, 𑀫𑀳𑀸𑀭𑀸𑀚, 𑀩𑀸𑀮𑀸 𑀦𑀸𑀫 𑀧𑀭𑀲𑁆𑀲 𑀤𑀸𑀦𑀁 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀤𑀼𑀕𑁆𑀕𑀢𑀺𑀧𑀭𑀸𑀬𑀡𑀸 𑀳𑁄𑀦𑁆𑀢𑀺, 𑀥𑀻𑀭𑀸 𑀧𑀦 𑀧𑀭𑁂𑀲𑀫𑁆𑀧𑀺 𑀤𑀸𑀦𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀏𑀯 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 ¶ 𑀯𑁂 𑀓𑀤𑀭𑀺𑀬𑀸 𑀤𑁂𑀯𑀮𑁄𑀓𑀁 𑀯𑀚𑀦𑁆𑀢𑀺, 𑀩𑀸𑀮𑀸 𑀳𑀯𑁂 𑀦𑀧𑁆𑀧𑀲𑀁𑀲𑀦𑁆𑀢𑀺 𑀤𑀸𑀦𑀁;

𑀥𑀻𑀭𑁄 𑀘 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄, 𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺.

𑀢𑀢𑁆𑀣 ¶ 𑀓𑀤𑀭𑀺𑀬𑀸𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀦𑁄. 𑀩𑀸𑀮𑀸𑀢𑀺 𑀇𑀥𑀮𑁄𑀓𑀧𑀭𑀮𑁄𑀓𑀁 𑀅𑀚𑀸𑀦𑀦𑀓𑀸. 𑀥𑀻𑀭𑁄𑀢𑀺 𑀧𑀡𑁆𑀟𑀺𑀢𑁄. 𑀲𑀼𑀔𑀻 𑀧𑀭𑀢𑁆𑀣𑀸𑀢𑀺 𑀢𑁂𑀦𑁂𑀯 𑀲𑁄 𑀤𑀸𑀦𑀸𑀦𑀼𑀫𑁄𑀤𑀦𑀧𑀼𑀜𑁆𑀜𑁂𑀦 𑀧𑀭𑀮𑁄𑀓𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀲𑀼𑀔𑀻 𑀳𑁄𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀚𑀼𑀡𑁆𑀳𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺, 𑀚𑀼𑀡𑁆𑀳𑁄𑀧𑀺 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀭𑀜𑁆𑀜𑀸 𑀤𑀺𑀦𑁆𑀦𑀦𑀺𑀬𑀸𑀫𑁂𑀦𑁂𑀯 𑀤𑀸𑀦𑀁 𑀅𑀤𑀸𑀲𑀻𑀢𑀺.

𑁧𑁧. 𑀅𑀦𑀸𑀣𑀧𑀺𑀡𑁆𑀟𑀓𑀧𑀼𑀢𑁆𑀢𑀓𑀸𑀮𑀯𑀢𑁆𑀣𑀼

𑀧𑀣𑀩𑁆𑀬𑀸 𑀏𑀓𑀭𑀚𑁆𑀚𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀮𑀁 𑀦𑀸𑀫 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀢𑀣𑀸𑀯𑀺𑀥𑀲𑁆𑀲 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀲𑁆𑀲 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁, 𑀦 𑀕𑁂𑀳𑀁 𑀆𑀕𑀢𑀓𑀸𑀮𑁂 𑀤𑀝𑁆𑀞𑀼𑀁, 𑀦 𑀥𑀫𑁆𑀫𑀁 𑀲𑁄𑀢𑀼𑀁, 𑀦 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀢𑀼𑀁 𑀇𑀘𑁆𑀙𑀢𑀺. 𑀧𑀺𑀢𑀭𑀸 ‘‘𑀫𑀸 𑀏𑀯𑀁, 𑀢𑀸𑀢, 𑀓𑀭𑀻’’𑀢𑀺 𑀯𑀼𑀢𑁆𑀢𑁄𑀧𑀺 𑀢𑀲𑁆𑀲 𑀯𑀘𑀦𑀁 𑀦 𑀲𑀼𑀡𑀸𑀢𑀺. 𑀅𑀣𑀲𑁆𑀲 𑀧𑀺𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀏𑀯𑀭𑀽𑀧𑀁 𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀅𑀯𑀻𑀘𑀺𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀢𑀺, 𑀦 𑀔𑁄 𑀧𑀦𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑀬𑀺 𑀧𑀲𑁆𑀲𑀦𑁆𑀢𑁂 𑀫𑀫 𑀧𑀼𑀢𑁆𑀢𑁄 𑀦𑀺𑀭𑀬𑀁 𑀕𑀘𑁆𑀙𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀔𑁄 𑀧𑀦 𑀮𑁄𑀓𑁂 𑀥𑀦𑀤𑀸𑀦𑁂𑀦 𑀅𑀪𑀺𑀚𑁆𑀚𑀦𑀓𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀥𑀦𑁂𑀦 𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀢𑀸𑀢, 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀳𑀺, 𑀓𑀳𑀸𑀧𑀡𑀲𑀢𑀁 𑀢𑁂 ¶ 𑀤𑀲𑁆𑀲𑀸𑀫𑀻’’𑀢𑀺. 𑀤𑀲𑁆𑀲𑀣, 𑀢𑀸𑀢𑀸𑀢𑀺. 𑀤𑀲𑁆𑀲𑀸𑀫𑀺, 𑀧𑀼𑀢𑁆𑀢𑀸𑀢𑀺. 𑀲𑁄 𑀬𑀸𑀯𑀢𑀢𑀺𑀬𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀥𑀫𑁆𑀫𑀲𑁆𑀲𑀯𑀦𑁂𑀦 𑀧𑀦𑀲𑁆𑀲 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑁂 𑀲𑀬𑀺𑀢𑁆𑀯𑀸 𑀧𑀸𑀢𑁄𑀯 𑀕𑁂𑀳𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸 ‘‘𑀧𑀼𑀢𑁆𑀢𑁄 𑀫𑁂 𑀉𑀧𑁄𑀲𑀣𑀺𑀓𑁄 𑀅𑀳𑁄𑀲𑀺, 𑀲𑀻𑀖𑀫𑀲𑁆𑀲 𑀬𑀸𑀕𑀼𑀆𑀤𑀻𑀦𑀺 𑀆𑀳𑀭𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀧𑁂𑀲𑀺. 𑀲𑁄 ‘‘𑀓𑀳𑀸𑀧𑀡𑁂 𑀅𑀕𑁆𑀕𑀳𑁂𑀢𑁆𑀯𑀸 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀝𑀸𑀳𑀝𑀁 𑀧𑀝𑀺𑀓𑁆𑀔𑀺𑀧𑀺. 𑀅𑀣𑀲𑁆𑀲 𑀧𑀺𑀢𑀸 𑀧𑀻𑀴𑀁 𑀅𑀲𑀳𑀦𑁆𑀢𑁄 𑀓𑀳𑀸𑀧𑀡𑀪𑀡𑁆𑀟𑀁 𑀤𑀸𑀧𑁂𑀲𑀺. 𑀲𑁄 𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀯 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺.

𑀅𑀣 ¶ 𑀦𑀁 𑀧𑀼𑀦𑀤𑀺𑀯𑀲𑁂 𑀲𑁂𑀝𑁆𑀞𑀺, ‘‘𑀢𑀸𑀢, 𑀓𑀳𑀸𑀧𑀡𑀲𑀳𑀲𑁆𑀲𑀁 𑀢𑁂 𑀤𑀲𑁆𑀲𑀸𑀫𑀺, 𑀲𑀢𑁆𑀣𑀼 𑀧𑀼𑀭𑀢𑁄 𑀞𑀢𑁆𑀯𑀸 𑀏𑀓𑀁 𑀥𑀫𑁆𑀫𑀧𑀤𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀧𑁂𑀲𑁂𑀲𑀺. 𑀲𑁄𑀧𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀞𑀢𑁆𑀯𑀸𑀯 𑀏𑀓𑀫𑁂𑀯 𑀧𑀤𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀲𑀮𑁆𑀮𑀓𑁆𑀔𑀡𑀸𑀓𑀸𑀭𑀁 𑀅𑀓𑀸𑀲𑀺. 𑀲𑁄 𑀢𑀁 𑀧𑀤𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀧𑀭𑀺𑀧𑀤𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀞𑀢𑁆𑀯𑀸 𑀅𑀲𑁆𑀲𑁄𑀲𑀺𑀬𑁂𑀯 ¶ . 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀼𑀡𑀦𑁆𑀢𑁄𑀯 𑀓𑀺𑀭 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀢𑀺 𑀦𑀸𑀫. 𑀏𑀯𑀜𑁆𑀘 𑀓𑀺𑀭 𑀲𑀼𑀡𑀦𑁆𑀢𑀸𑀦𑀁 𑀥𑀫𑁆𑀫𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀬𑁄 𑀤𑁂𑀢𑀺. 𑀲𑁄𑀧𑀺 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀼𑀡𑀸𑀢𑀺, 𑀲𑀢𑁆𑀣𑀸𑀧𑀺𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀸𑀓𑀸𑀭𑀁 𑀓𑀭𑁄𑀢𑀺. 𑀲𑁄 ‘‘𑀉𑀧𑀭𑀺𑀧𑀤𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀞𑀢𑁆𑀯𑀸 𑀲𑀼𑀡𑀦𑁆𑀢𑁄𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀲𑁄 𑀧𑀼𑀦𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁𑀬𑁂𑀯 𑀲𑀸𑀯𑀢𑁆𑀣𑀺𑀁 𑀧𑀸𑀯𑀺𑀲𑀺. 𑀫𑀳𑀸𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 ¶ 𑀫𑀫 𑀧𑀼𑀢𑁆𑀢𑀲𑁆𑀲 𑀆𑀓𑀸𑀭𑁄 𑀭𑀼𑀘𑁆𑀘𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲𑀧𑀺 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑁄 𑀯𑀢 𑀫𑁂 𑀧𑀺𑀢𑀸 𑀅𑀚𑁆𑀚 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀳𑀸𑀧𑀡𑁂 𑀦 𑀤𑀤𑁂𑀬𑁆𑀬, 𑀓𑀳𑀸𑀧𑀡𑀓𑀸𑀭𑀡𑀸 𑀫𑀬𑁆𑀳𑀁 𑀉𑀧𑁄𑀲𑀣𑀺𑀓𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀬𑁆𑀬𑀸’’𑀢𑀺. 𑀲𑀢𑁆𑀣𑀸 𑀧𑀦𑀲𑁆𑀲 𑀳𑀺𑀬𑁆𑀬𑁄𑀯 𑀓𑀳𑀸𑀧𑀡𑀲𑁆𑀲 𑀓𑀸𑀭𑀡𑀸 𑀉𑀧𑁄𑀲𑀣𑀺𑀓𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀫𑀳𑀸𑀲𑁂𑀝𑁆𑀞𑀺, 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀬𑀸𑀕𑀼𑀁 𑀤𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲𑀧𑀺 𑀤𑀸𑀧𑁂𑀲𑀺. 𑀲𑁄 𑀦𑀺𑀲𑀻𑀤𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄𑀯 𑀬𑀸𑀕𑀼𑀁 𑀧𑀺𑀯𑀺, 𑀔𑀸𑀤𑀦𑀻𑀬𑀁 𑀔𑀸𑀤𑀺, 𑀪𑀢𑁆𑀢𑀁 𑀪𑀼𑀜𑁆𑀚𑀺. 𑀫𑀳𑀸𑀲𑁂𑀝𑁆𑀞𑀺 𑀲𑀢𑁆𑀣𑀼 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀧𑀼𑀢𑁆𑀢𑀲𑁆𑀲 𑀧𑀼𑀭𑀢𑁄 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀞𑀧𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀫𑀬𑀸 𑀢𑁂 ‘𑀲𑀳𑀲𑁆𑀲𑀁 𑀤𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑀁 𑀲𑀫𑀸𑀤𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀳𑀺𑀢𑁄. 𑀇𑀤𑀁 𑀢𑁂 𑀲𑀳𑀲𑁆𑀲’’𑀦𑁆𑀢𑀺 𑀆𑀳. 𑀲𑁄 𑀲𑀢𑁆𑀣𑀼 𑀧𑀼𑀭𑀢𑁄 𑀓𑀳𑀸𑀧𑀡𑁂 𑀤𑀺𑀬𑁆𑀬𑀫𑀸𑀦𑁂 𑀤𑀺𑀲𑁆𑀯𑀸 𑀮𑀚𑁆𑀚𑀦𑁆𑀢𑁄 ‘‘𑀅𑀮𑀁 𑀫𑁂 𑀓𑀳𑀸𑀧𑀡𑁂𑀳𑀻’’𑀢𑀺 𑀯𑀢𑁆𑀯𑀸, ‘‘𑀕𑀡𑁆𑀳, 𑀢𑀸𑀢𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀦 𑀕𑀡𑁆𑀳𑀺. 𑀅𑀣𑀲𑁆𑀲 𑀧𑀺𑀢𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀫𑁂 𑀧𑀼𑀢𑁆𑀢𑀲𑁆𑀲 𑀆𑀓𑀸𑀭𑁄 𑀭𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑀺𑀁, 𑀫𑀳𑀸𑀲𑁂𑀝𑁆𑀞𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑀸 𑀏𑀲 𑀧𑀼𑀭𑀺𑀫𑀤𑀺𑀯𑀲𑁂 ‘𑀓𑀳𑀸𑀧𑀡𑀲𑀢𑀁 𑀢𑁂 𑀤𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀯𑀺𑀳𑀸𑀭𑀁 𑀧𑁂𑀲𑀺𑀢𑁄. 𑀧𑀼𑀦𑀤𑀺𑀯𑀲𑁂 𑀓𑀳𑀸𑀧𑀡𑁂 𑀅𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀇𑀘𑁆𑀙𑀺, 𑀅𑀚𑁆𑀚 𑀧𑀦 𑀤𑀺𑀬𑁆𑀬𑀫𑀸𑀦𑁂𑀧𑀺 𑀓𑀳𑀸𑀧𑀡𑁂 𑀦 𑀇𑀘𑁆𑀙𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀆𑀫, 𑀫𑀳𑀸𑀲𑁂𑀝𑁆𑀞𑀺, 𑀅𑀚𑁆𑀚 𑀢𑀯 𑀧𑀼𑀢𑁆𑀢𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀢𑁄𑀧𑀺 𑀤𑁂𑀯𑀮𑁄𑀓𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀻𑀳𑀺𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁂𑀯 𑀯𑀭’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀣𑀩𑁆𑀬𑀸 𑀏𑀓𑀭𑀚𑁆𑀚𑁂𑀦, 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸;

𑀲𑀩𑁆𑀩𑀮𑁄𑀓𑀸𑀥𑀺𑀧𑀘𑁆𑀘𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀭’’𑀦𑁆𑀢𑀺.

𑀢𑀢𑁆𑀣 𑀧𑀣𑀩𑁆𑀬𑀸 𑀏𑀓𑀭𑀚𑁆𑀚𑁂𑀦𑀸𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑁂𑀦. 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸𑀢𑀺 𑀙𑀩𑁆𑀩𑀻𑀲𑀢𑀺𑀯𑀺𑀥𑀲𑁆𑀲 𑀲𑀕𑁆𑀕𑀲𑁆𑀲 ¶ 𑀅𑀥𑀺𑀕𑀫𑀦𑁂𑀦. 𑀲𑀩𑁆𑀩𑀮𑁄𑀓𑀸𑀥𑀺𑀧𑀘𑁆𑀘𑁂𑀦𑀸𑀢𑀺 𑀦 𑀏𑀓𑀲𑁆𑀫𑀺𑀁 𑀏𑀢𑁆𑀢𑀓𑁂 ¶ 𑀮𑁄𑀓𑁂 𑀦𑀸𑀕𑀲𑀼𑀧𑀡𑁆𑀡𑀯𑁂𑀫𑀸𑀦𑀺𑀓𑀧𑁂𑀢𑁂𑀳𑀺 𑀲𑀤𑁆𑀥𑀺𑀁, 𑀲𑀩𑁆𑀩𑀲𑁆𑀫𑀺𑀁 𑀮𑁄𑀓𑁂 𑀆𑀥𑀺𑀧𑀘𑁆𑀘𑁂𑀦. 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀭𑀦𑁆𑀢𑀺 𑀬𑀲𑁆𑀫𑀸 𑀏𑀢𑁆𑀢𑀓𑁂 𑀞𑀸𑀦𑁂 ¶ 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸𑀧𑀺 𑀦𑀺𑀭𑀬𑀸𑀤𑀻𑀳𑀺 𑀅𑀫𑀼𑀢𑁆𑀢𑁄𑀯 𑀳𑁄𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀧𑀦 𑀧𑀺𑀳𑀺𑀢𑀸𑀧𑀸𑀬𑀤𑁆𑀯𑀸𑀭𑁄 𑀳𑀼𑀢𑁆𑀯𑀸 𑀲𑀩𑁆𑀩𑀤𑀼𑀩𑁆𑀩𑀮𑁄𑀧𑀺 𑀅𑀝𑁆𑀞𑀫𑁂 𑀪𑀯𑁂 𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁂𑀯 𑀯𑀭𑀁 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀦𑀸𑀣𑀧𑀺𑀡𑁆𑀟𑀓𑀧𑀼𑀢𑁆𑀢𑀓𑀸𑀮𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.

𑀮𑁄𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀲𑁆𑀲 ¶ ¶ ¶ 𑀚𑀺𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀩𑁄𑀥𑀺𑀫𑀡𑁆𑀟𑁂 𑀯𑀺𑀳𑀭𑀦𑁆𑀢𑁄 𑀫𑀸𑀭𑀥𑀻𑀢𑀭𑁄 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀁 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀓𑀼𑀭𑀼𑀭𑀝𑁆𑀞𑁂 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀣𑁂𑀲𑀺.

𑀓𑀼𑀭𑀼𑀭𑀝𑁆𑀞𑁂 𑀓𑀺𑀭 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀫𑀸𑀕𑀡𑁆𑀟𑀺𑀬𑀸𑀬𑁂𑀯 𑀦𑀸𑀫 𑀅𑀳𑁄𑀲𑀺 𑀉𑀢𑁆𑀢𑀫𑀭𑀽𑀧𑀥𑀭𑀸. 𑀢𑀁 𑀧𑀢𑁆𑀣𑀬𑀫𑀸𑀦𑀸 𑀅𑀦𑁂𑀓𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀘𑁂𑀯 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀘 ‘‘𑀥𑀻𑀢𑀭𑀁 𑀦𑁄 𑀤𑁂𑀢𑀽’’𑀢𑀺 𑀫𑀸𑀕𑀡𑁆𑀟𑀺𑀬𑀲𑁆𑀲 𑀧𑀳𑀺𑀡𑀺𑀁𑀲𑀼. 𑀲𑁄𑀧𑀺 ‘‘𑀦 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀲𑀩𑁆𑀩𑁂 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀺𑀬𑀸 𑀘 𑀢𑀺𑀡𑁆𑀡𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀩𑀳𑀺𑀕𑀸𑀫𑁂 𑀦𑀺𑀩𑀤𑁆𑀥𑀁 𑀅𑀕𑁆𑀕𑀺𑀁 𑀧𑀭𑀺𑀘𑀭𑀢𑀺. 𑀲𑀢𑁆𑀣𑀸 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀣𑀼 𑀭𑀽𑀧𑀲𑀺𑀭𑀺𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀫𑀺𑀦𑀸 𑀲𑀤𑀺𑀲𑁄 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀁 𑀫𑀬𑁆𑀳𑀁 ¶ 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑁄, 𑀇𑀫𑀲𑁆𑀲 𑀫𑁂 𑀥𑀻𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀲𑀫𑀡, 𑀫𑀫 𑀏𑀓𑀸 𑀥𑀻𑀢𑀸 𑀅𑀢𑁆𑀣𑀺, 𑀅𑀳𑀁 𑀢𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀁 𑀧𑀼𑀭𑀺𑀲𑀁 𑀅𑀧𑀲𑁆𑀲𑀦𑁆𑀢𑁄 𑀢𑀁 𑀦 𑀓𑀲𑁆𑀲𑀘𑀺 𑀅𑀤𑀸𑀲𑀺𑀁, 𑀢𑁆𑀯𑀁 𑀧𑀦𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑁄, 𑀅𑀳𑀁 𑀢𑁂 𑀥𑀻𑀢𑀭𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀢𑁆𑀯𑀸 𑀤𑀸𑀢𑀼𑀓𑀸𑀫𑁄, 𑀬𑀸𑀯 𑀦𑀁 𑀆𑀦𑁂𑀫𑀺, 𑀢𑀸𑀯 𑀇𑀥𑁂𑀯 𑀢𑀺𑀝𑁆𑀞𑀸𑀳𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀦𑁂𑀯 𑀅𑀪𑀺𑀦𑀦𑁆𑀤𑀺, 𑀦 𑀧𑀝𑀺𑀓𑁆𑀓𑁄𑀲𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀪𑁄𑀢𑀺, 𑀅𑀚𑁆𑀚 𑀫𑁂 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀭𑀺𑀲𑁄 𑀤𑀺𑀝𑁆𑀞𑁄, 𑀢𑀲𑁆𑀲 𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀥𑀻𑀢𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀆𑀤𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀤𑁆𑀥𑀺𑀁 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀓𑀼𑀢𑀽𑀳𑀮𑀚𑀸𑀢𑁄 𑀦𑀺𑀓𑁆𑀔𑀫𑀺. 𑀲𑀢𑁆𑀣𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀅𑀝𑁆𑀞𑀢𑁆𑀯𑀸 𑀢𑀢𑁆𑀣 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀩𑀼𑀤𑁆𑀥𑀸𑀦𑀁 𑀓𑀺𑀭 𑀧𑀤𑀘𑁂𑀢𑀺𑀬𑀁 ‘‘𑀇𑀤𑀁 𑀅𑀲𑀼𑀓𑁄 𑀦𑀸𑀫 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀬𑁂𑀯 𑀧𑀜𑁆𑀜𑀸𑀬𑀢𑀺, 𑀲𑁂𑀲𑀝𑁆𑀞𑀸𑀦𑁂 𑀢𑀁 𑀧𑀲𑁆𑀲𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 ¶ 𑀕𑀘𑁆𑀙𑀫𑀸𑀦𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 ‘‘𑀓𑀳𑀁 𑀲𑁄’’𑀢𑀺 𑀧𑀼𑀝𑁆𑀞𑁄 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀺𑀝𑁆𑀞𑀸𑀳𑀻𑀢𑀺 𑀢𑀁 𑀅𑀯𑀘’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 ‘‘𑀇𑀤𑀫𑀲𑁆𑀲 𑀧𑀤’’𑀦𑁆𑀢𑀺 𑀤𑀲𑁆𑀲𑁂𑀲𑀺. 𑀲𑀸 𑀮𑀓𑁆𑀔𑀡𑀫𑀦𑁆𑀢𑀓𑀼𑀲𑀮𑀢𑀸𑀬 ¶ ‘‘𑀦 𑀇𑀤𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀫𑀪𑁄𑀕𑀺𑀦𑁄 𑀧𑀤’’𑀦𑁆𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀦, ‘‘𑀪𑁄𑀢𑀺, 𑀢𑁆𑀯𑀁 𑀉𑀤𑀓𑀧𑀸𑀢𑀺𑀫𑁆𑀳𑀺 𑀲𑀼𑀲𑀼𑀫𑀸𑀭𑀁 𑀧𑀲𑁆𑀲𑀲𑀺, 𑀫𑀬𑀸 𑀲𑁄 𑀲𑀫𑀡𑁄 𑀤𑀺𑀝𑁆𑀞𑁄 ‘𑀥𑀻𑀢𑀭𑀁 𑀢𑁂 𑀤𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁄, 𑀢𑁂𑀦𑀸𑀧𑀺 𑀅𑀥𑀺𑀯𑀸𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀜𑁆𑀘𑀸𑀧𑀺 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺, 𑀇𑀤𑀁 𑀧𑀦 𑀦𑀺𑀓𑁆𑀓𑀺𑀮𑁂𑀲𑀲𑁆𑀲𑁂𑀯 𑀧𑀤’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀭𑀢𑁆𑀢𑀲𑁆𑀲 ¶ 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂,

𑀤𑀼𑀝𑁆𑀞𑀲𑁆𑀲 𑀳𑁄𑀢𑀺 𑀲𑀳𑀲𑀸𑀦𑀼𑀧𑀻𑀴𑀺𑀢𑀁;

𑀫𑀽𑀴𑁆𑀳𑀲𑁆𑀲 𑀳𑁄𑀢𑀺 𑀅𑀯𑀓𑀟𑁆𑀠𑀺𑀢𑀁 𑀧𑀤𑀁,

𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁪𑁫; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧; 𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀻𑀯𑀢𑁆𑀣𑀼);

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄, ‘‘𑀪𑁄𑀢𑀺, 𑀫𑀸 𑀯𑀺𑀭𑀯𑀺, 𑀢𑀼𑀡𑁆𑀳𑀻𑀪𑀽𑀢𑀸𑀯 𑀏𑀳𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑁄 𑀧𑀼𑀭𑀺𑀲𑁄’’𑀢𑀺 𑀢𑀲𑁆𑀲𑀸 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀲𑀫𑀡, 𑀥𑀻𑀢𑀭𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀦 𑀫𑁂 𑀢𑀯 𑀥𑀻𑀢𑀸𑀬 𑀅𑀢𑁆𑀣𑁄’’𑀢𑀺 𑀅𑀯𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀏𑀓𑀁 𑀢𑁂 𑀓𑀸𑀭𑀡𑀁 𑀓𑀣𑁂𑀲𑁆𑀲𑀸𑀫𑀺, 𑀲𑀼𑀡𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑁂𑀳𑀺, 𑀪𑁄 𑀲𑀫𑀡, 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀫𑀳𑀸𑀲𑀢𑁆𑀢𑁄 𑀭𑀚𑁆𑀚𑀲𑀺𑀭𑀺𑀁 𑀧𑀳𑀸𑀬 𑀓𑀡𑁆𑀝𑀓𑀁 𑀆𑀭𑀼𑀬𑁆𑀳 𑀙𑀦𑁆𑀦𑀲𑀳𑀸𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑁂 𑀞𑀺𑀢𑁂𑀦 𑀫𑀸𑀭𑁂𑀦 ‘‘𑀲𑀺𑀤𑁆𑀥𑀢𑁆𑀣, 𑀦𑀺𑀯𑀢𑁆𑀢, 𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀅𑀳𑀫𑁂𑀢𑀁, 𑀫𑀸𑀭, 𑀚𑀸𑀦𑀸𑀫𑀺, 𑀦 𑀫𑁂 𑀢𑁂𑀦𑀢𑁆𑀣𑁄’’𑀢𑀺 𑀆𑀳. 𑀅𑀣 𑀓𑀺𑀫𑀢𑁆𑀣𑀸𑀬 𑀦𑀺𑀓𑁆𑀔𑀫𑀲𑀻𑀢𑀺? 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁆𑀣𑀸𑀬𑀸𑀢𑀺. ‘‘𑀢𑁂𑀦 𑀳𑀺 𑀲𑀘𑁂 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀏𑀓𑀫𑁆𑀧𑀺 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀚𑀸𑀦𑀺𑀲𑁆𑀲𑀸𑀫𑀺 𑀢𑁂 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀆𑀳. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀑𑀢𑀸𑀭𑀸𑀧𑁂𑀓𑁆𑀔𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑀳𑀸𑀲𑀢𑁆𑀢𑀁 𑀅𑀦𑀼𑀩𑀦𑁆𑀥𑀺.

𑀲𑀢𑁆𑀣𑀸𑀧𑀺 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀁 𑀦𑀺𑀲𑁆𑀲𑀸𑀬 𑀩𑁄𑀥𑀺𑀫𑀽𑀮𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀬𑀫𑀸𑀦𑁄 𑀧𑀜𑁆𑀘𑀫𑀲𑀢𑁆𑀢𑀸𑀳𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀸𑀭𑁄 ‘‘𑀅𑀳𑀁 ¶ 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀑𑀢𑀸𑀭𑀸𑀧𑁂𑀓𑁆𑀔𑁄𑀧𑀺 ¶ 𑀇𑀫𑀲𑁆𑀲 𑀓𑀺𑀜𑁆𑀘𑀺 𑀔𑀮𑀺𑀢𑀁 𑀦𑀸𑀤𑁆𑀤𑀲𑀁, 𑀅𑀢𑀺𑀓𑁆𑀓𑀦𑁆𑀢𑁄 𑀇𑀤𑀸𑀦𑀺 𑀏𑀲 𑀫𑀫 𑀯𑀺𑀲𑀬’’𑀦𑁆𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀫𑀳𑀸𑀫𑀕𑁆𑀕𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀢𑀡𑁆𑀳𑀸 𑀅𑀭𑀢𑀻 𑀭𑀕𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀥𑀻𑀢𑀭𑁄 ‘‘𑀧𑀺𑀢𑀸 𑀦𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀦𑀼 𑀔𑁄 𑀏𑀢𑀭𑀳𑀻’’𑀢𑀺 𑀑𑀮𑁄𑀓𑀬𑀫𑀸𑀦𑀸 𑀢𑀁 𑀢𑀣𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀲𑁆𑀫𑀸 ¶ , 𑀢𑀸𑀢, 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑀸𑀲𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀢𑀸 𑀆𑀳𑀁𑀲𑀼 𑁋 ‘‘𑀢𑀸𑀢, 𑀫𑀸 𑀘𑀺𑀦𑁆𑀢𑀬𑀺, 𑀫𑀬𑀁 𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀆𑀦𑁂𑀲𑁆𑀲𑀸𑀫𑀸’’𑀢𑀺. ‘‘𑀦 𑀲𑀓𑁆𑀓𑀸 𑀅𑀫𑁆𑀫𑀸, 𑀏𑀲 𑀓𑁂𑀦𑀘𑀺 𑀯𑀲𑁂 𑀓𑀸𑀢𑀼𑀦𑁆𑀢𑀺. ‘‘𑀢𑀸𑀢, 𑀫𑀬𑀁 𑀇𑀢𑁆𑀣𑀺𑀬𑁄 𑀦𑀸𑀫 𑀇𑀤𑀸𑀦𑁂𑀯 𑀦𑀁 𑀭𑀸𑀕𑀧𑀸𑀲𑀸𑀤𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀦𑁂𑀯 𑀢𑀸𑀲𑀁 𑀯𑀘𑀦𑀁 𑀫𑀦𑀲𑀸𑀓𑀸𑀲𑀺, 𑀦 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀲𑀺.

𑀧𑀼𑀦 𑀫𑀸𑀭𑀥𑀻𑀢𑀭𑁄 ‘‘𑀉𑀘𑁆𑀘𑀸𑀯𑀘𑀸 𑀔𑁄 𑀧𑀼𑀭𑀺𑀲𑀸𑀦𑀁 𑀅𑀥𑀺𑀧𑁆𑀧𑀸𑀬𑀸, 𑀓𑁂𑀲𑀜𑁆𑀘𑀺 𑀓𑀼𑀫𑀸𑀭𑀺𑀓𑀸𑀲𑀼 𑀧𑁂𑀫𑀁 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀧𑀞𑀫𑀯𑀬𑁂 𑀞𑀺𑀢𑀸𑀲𑀼, 𑀓𑁂𑀲𑀜𑁆𑀘𑀺 𑀫𑀚𑁆𑀛𑀺𑀫𑀯𑀬𑁂 𑀞𑀺𑀢𑀸𑀲𑀼, 𑀓𑁂𑀲𑀜𑁆𑀘𑀺 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀸𑀲𑀼, 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀢𑀁 𑀧𑀮𑁄𑀪𑁂𑀲𑁆𑀲𑀸𑀫𑀸’’𑀢𑀺 𑀏𑀓𑁂𑀓𑀸 𑀓𑀼𑀫𑀸𑀭𑀺𑀓𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀢𑀁 𑀲𑀢𑀁 𑀅𑀢𑁆𑀢𑀪𑀸𑀯𑁂 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀺𑀬𑁄, 𑀅𑀯𑀺𑀚𑀸𑀢𑀸, 𑀲𑀓𑀺𑀁 𑀯𑀺𑀚𑀸𑀢𑀸, 𑀤𑀼𑀯𑀺𑀚𑀸𑀢𑀸, 𑀫𑀚𑁆𑀛𑀺𑀫𑀺𑀢𑁆𑀣𑀺𑀬𑁄, 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀘 𑀳𑀼𑀢𑁆𑀯𑀸 𑀙𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺 𑀆𑀳𑀁𑀲𑀼. 𑀢𑀫𑁆𑀧𑀺 𑀪𑀕𑀯𑀸 𑀦 𑀫𑀦𑀲𑀸𑀓𑀸𑀲𑀺 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺. 𑀅𑀣 𑀲𑀢𑁆𑀣𑀸 ¶ 𑀏𑀢𑁆𑀢𑀓𑁂𑀦𑀧𑀺 𑀢𑀸 𑀅𑀦𑀼𑀕𑀘𑁆𑀙𑀦𑁆𑀢𑀺𑀬𑁄 ‘‘𑀅𑀧𑁂𑀣, 𑀓𑀺𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀸𑀬𑀫𑀣, 𑀏𑀯𑀭𑀽𑀧𑀁 𑀦𑀸𑀫 𑀯𑀻𑀢𑀭𑀸𑀕𑀸𑀦𑀁 𑀧𑀼𑀭𑀢𑁄 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀭𑀸𑀕𑀸𑀤𑀬𑁄 𑀧𑀳𑀻𑀦𑀸. 𑀓𑁂𑀦 𑀢𑀁 𑀓𑀸𑀭𑀡𑁂𑀦 𑀅𑀢𑁆𑀢𑀦𑁄 𑀯𑀲𑀁 𑀦𑁂𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑀚𑀺𑀢𑀁 𑀬𑀲𑁆𑀲 𑀦𑁄𑀬𑀸𑀢𑀺 𑀓𑁄𑀘𑀺 𑀮𑁄𑀓𑁂;

‘‘𑀬𑀲𑁆𑀲 ¶ 𑀚𑀸𑀮𑀺𑀦𑀻 𑀯𑀺𑀲𑀢𑁆𑀢𑀺𑀓𑀸,

𑀢𑀡𑁆𑀳𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀦𑁂𑀢𑀯𑁂;

𑀅𑀧𑀤𑀁 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣𑀸’’𑀢𑀺.

𑀢𑀢𑁆𑀣 𑀬𑀲𑁆𑀲 𑀚𑀺𑀢𑀁 𑀦𑀸𑀯𑀚𑀻𑀬𑀢𑀻𑀢𑀺 𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀚𑀺𑀢𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀚𑀸𑀢𑀁 𑀧𑀼𑀦 𑀅𑀲𑀫𑀼𑀤𑀸𑀘𑀭𑀡𑀢𑁄 𑀦𑀸𑀯𑀚𑀻𑀬𑀢𑀺, 𑀤𑀼𑀚𑁆𑀚𑀺𑀢𑀁 𑀦𑀸𑀫 𑀦 𑀳𑁄𑀢𑀺. 𑀦𑁄𑀬𑀸𑀢𑀻𑀢𑀺 𑀦 𑀉𑀬𑁆𑀬𑀸𑀢𑀺, 𑀬𑀲𑁆𑀲 𑀚𑀺𑀢𑀁 𑀓𑀺𑀮𑁂𑀲𑀚𑀸𑀢𑀁 𑀭𑀸𑀕𑀸𑀤𑀻𑀲𑀼 𑀓𑁄𑀘𑀺 𑀏𑀓𑁄 𑀓𑀺𑀮𑁂𑀲𑁄𑀧𑀺 𑀮𑁄𑀓𑁂 𑀧𑀘𑁆𑀙𑀢𑁄 𑀯𑀢𑁆𑀢𑀻 𑀦𑀸𑀫 ¶ 𑀦 𑀳𑁄𑀢𑀺, 𑀦𑀸𑀦𑀼𑀩𑀦𑁆𑀥𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀕𑁄𑀘𑀭𑀦𑁆𑀢𑀺 𑀅𑀦𑀦𑁆𑀢𑀸𑀭𑀫𑁆𑀫𑀡𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀲𑁂𑀦 𑀅𑀧𑀭𑀺𑀬𑀦𑁆𑀢 𑀕𑁄𑀘𑀭𑀁. 𑀓𑁂𑀦 𑀧𑀤𑁂𑀦𑀸𑀢𑀺 𑀬𑀲𑁆𑀲 𑀳𑀺 𑀭𑀸𑀕𑀧𑀤𑀸𑀤𑀻𑀲𑀼 𑀏𑀓𑀧𑀤𑀫𑁆𑀧𑀺 𑀅𑀢𑁆𑀣𑀺, 𑀢𑀁 𑀢𑀼𑀫𑁆𑀳𑁂 𑀢𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣. 𑀩𑀼𑀤𑁆𑀥𑀲𑁆𑀲 𑀧𑀦 𑀏𑀓𑀧𑀤𑀫𑁆𑀧𑀺 ¶ 𑀦𑀢𑁆𑀣𑀺, 𑀢𑀁 𑀅𑀧𑀤𑀁 𑀩𑀼𑀤𑁆𑀥𑀁 𑀢𑀼𑀫𑁆𑀳𑁂 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣.

𑀤𑀼𑀢𑀺𑀬𑀕𑀸𑀣𑀸𑀬 𑀢𑀡𑁆𑀳𑀸 𑀦𑀸𑀫𑁂𑀲𑀸 𑀲𑀁𑀲𑀺𑀩𑁆𑀩𑀺𑀢𑀧𑀭𑀺𑀬𑁄𑀦𑀦𑁆𑀥𑀦𑀝𑁆𑀞𑁂𑀦 𑀚𑀸𑀮𑀫𑀲𑁆𑀲𑀸 𑀅𑀢𑁆𑀣𑀻𑀢𑀺𑀧𑀺 𑀚𑀸𑀮𑀓𑀸𑀭𑀺𑀓𑀸𑀢𑀺𑀧𑀺 𑀚𑀸𑀮𑀽𑀧𑀫𑀸𑀢𑀺𑀧𑀺 𑀚𑀸𑀮𑀺𑀦𑀻. 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀺𑀲𑀢𑁆𑀢𑀢𑀸𑀬 𑀯𑀺𑀲𑀢𑁆𑀢𑀫𑀦𑀢𑀸𑀬 𑀯𑀺𑀲𑀸𑀳𑀭𑀢𑀸𑀬 𑀯𑀺𑀲𑀧𑀼𑀧𑁆𑀨𑀢𑀸𑀬 𑀯𑀺𑀲𑀨𑀮𑀢𑀸𑀬 𑀯𑀺𑀲𑀧𑀭𑀺𑀪𑁄𑀕𑀢𑀸𑀬 𑀯𑀺𑀲𑀢𑁆𑀢𑀺𑀓𑀸. 𑀲𑀸 𑀏𑀯𑀭𑀽𑀧𑀸 𑀢𑀡𑁆𑀳𑀸 𑀬𑀲𑁆𑀲 𑀓𑀼𑀳𑀺𑀜𑁆𑀘𑀺 𑀪𑀯𑁂 𑀦𑁂𑀢𑀼𑀁 𑀦𑀢𑁆𑀣𑀺, 𑀢𑀁 𑀢𑀼𑀫𑁆𑀳𑁂 𑀅𑀧𑀤𑀁 𑀩𑀼𑀤𑁆𑀥𑀁 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀫𑀸𑀭𑀥𑀻𑀢𑀭𑁄𑀧𑀺 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀫𑀸𑀕𑀡𑁆𑀟𑀺𑀬, 𑀅𑀳𑀁 𑀧𑀼𑀩𑁆𑀩𑁂 𑀇𑀫𑀸 𑀢𑀺𑀲𑁆𑀲𑁄 𑀫𑀸𑀭𑀥𑀻𑀢𑀭𑁄 𑀅𑀤𑁆𑀤𑀲𑀁 𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑁂𑀦 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀲𑀤𑀺𑀲𑁂𑀦 𑀅𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀢𑀤𑀸𑀧𑀺 𑀫𑁂𑀣𑀼𑀦𑀲𑁆𑀫𑀺𑀁 𑀙𑀦𑁆𑀤𑁄 𑀦𑀸𑀳𑁄𑀲𑀺𑀬𑁂𑀯. 𑀢𑀯 𑀥𑀻𑀢𑀼 𑀲𑀭𑀻𑀭𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀼𑀡𑀧𑀧𑀭𑀺𑀧𑀽𑀭𑀁 𑀩𑀳𑀺𑀯𑀺𑀘𑀺𑀢𑁆𑀢𑁄 𑀯𑀺𑀬 𑀅𑀲𑀼𑀘𑀺𑀖𑀝𑁄. 𑀲𑀘𑁂 𑀳𑀺 𑀫𑀫 𑀧𑀸𑀤𑁄 𑀅𑀲𑀼𑀘𑀺𑀫𑀓𑁆𑀔𑀺𑀢𑁄 𑀪𑀯𑁂𑀬𑁆𑀬, 𑀅𑀬𑀜𑁆𑀘 𑀉𑀫𑁆𑀫𑀸𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑁂𑀬𑁆𑀬, 𑀢𑀣𑀸𑀧𑀺𑀲𑁆𑀲𑀸 𑀲𑀭𑀻𑀭𑁂 𑀅𑀳𑀁 𑀧𑀸𑀤𑁂 𑀦 𑀨𑀼𑀲𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀤𑀺𑀲𑁆𑀯𑀸𑀦 ¶ ¶ 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘,

𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁,

𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’’𑀢𑀺. (𑀲𑀼. 𑀦𑀺. 𑁮𑁪𑁧; 𑀫𑀳𑀸𑀦𑀺. 𑁭𑁦);

𑀤𑁂𑀲𑀦𑀸𑀯𑀲𑀸𑀦𑁂 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀬𑁂 ¶ 𑀛𑀸𑀦𑀧𑀲𑀼𑀢𑀸 𑀥𑀻𑀭𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀩𑀳𑀽 𑀤𑁂𑀯𑀫𑀦𑀼𑀲𑁆𑀲𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀸 𑀧𑀦 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀸.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 𑀧𑀭𑀺𑀲𑁆𑀲𑀬𑀫𑁄𑀘𑀦𑀢𑁆𑀣𑀜𑁆𑀘𑁂𑀯 𑀧𑀫𑀸𑀤𑁂𑀦 𑀕𑀮𑀺𑀢𑀸𑀦𑀁 𑀆𑀪𑀭𑀡𑀸𑀤𑀻𑀦𑀁 𑀭𑀓𑁆𑀔𑀡𑀢𑁆𑀣𑀜𑁆𑀘 𑀚𑀸𑀮𑀓𑀭𑀡𑁆𑀟𑀓𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀗𑁆𑀕𑀸𑀬 𑀉𑀤𑀓𑀓𑀻𑀴𑀁 𑀓𑀻𑀴𑀺. 𑀅𑀣𑁂𑀓𑁄 𑀭𑀢𑁆𑀢𑀘𑀦𑁆𑀤𑀦𑀭𑀼𑀓𑁆𑀔𑁄 𑀕𑀗𑁆𑀕𑀸𑀬 𑀉𑀧𑀭𑀺𑀢𑀻𑀭𑁂 𑀚𑀸𑀢𑁄 𑀕𑀗𑁆𑀕𑁄𑀤𑀓𑁂𑀦 𑀥𑁄𑀢𑀫𑀽𑀮𑁄 𑀧𑀢𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀲𑀸𑀡𑁂𑀲𑀼 𑀲𑀁𑀪𑀚𑁆𑀚𑀫𑀸𑀦𑁄 𑀯𑀺𑀧𑁆𑀧𑀓𑀺𑀭𑀺. 𑀢𑀢𑁄 𑀏𑀓𑀸 𑀖𑀝𑀧𑁆𑀧𑀫𑀸𑀡𑀸 𑀖𑀝𑀺𑀓𑀸 𑀧𑀸𑀲𑀸𑀡𑁂𑀳𑀺 𑀖𑀁𑀲𑀺𑀬𑀫𑀸𑀦𑀸 𑀉𑀤𑀓𑀊𑀫𑀻𑀳𑀺 𑀧𑁄𑀣𑀺𑀬𑀫𑀸𑀦𑀸 𑀫𑀝𑁆𑀞𑀸 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀬𑁆𑀳𑀫𑀸𑀦𑀸 𑀲𑁂𑀯𑀸𑀮𑀧𑀭𑀺𑀬𑁄𑀦𑀤𑁆𑀥𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀚𑀸𑀮𑁂 𑀮𑀕𑁆𑀕𑀺. 𑀲𑁂𑀝𑁆𑀞𑀺 ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀭𑀼𑀓𑁆𑀔𑀖𑀝𑀺𑀓𑀸’’𑀢𑀺 𑀲𑀼𑀢𑁆𑀯𑀸 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀉𑀧𑀥𑀸𑀭𑀡𑀢𑁆𑀣𑀁 𑀯𑀸𑀲𑀺𑀓𑀡𑁆𑀡𑁂𑀦 𑀢𑀘𑁆𑀙𑀸𑀧𑁂𑀲𑀺. 𑀢𑀸𑀯𑀤𑁂𑀯 𑀅𑀮𑀢𑁆𑀢𑀓𑀯𑀡𑁆𑀡𑀁 𑀭𑀢𑁆𑀢𑀘𑀦𑁆𑀤𑀦𑀁 ¶ 𑀧𑀜𑁆𑀜𑀸𑀬𑀺. 𑀲𑁂𑀝𑁆𑀞𑀺 𑀧𑀦 𑀦𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀚𑁆𑀛𑀢𑁆𑀢𑀥𑀸𑀢𑀼𑀓𑁄. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀕𑁂𑀳𑁂 𑀭𑀢𑁆𑀢𑀘𑀦𑁆𑀤𑀦𑀁 𑀩𑀳𑀼, 𑀓𑀺𑀁 𑀦𑀼 𑀔𑁄 𑀇𑀫𑀺𑀦𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 ‘𑀫𑀬𑀁 𑀅𑀭𑀳𑀦𑁆𑀢𑁄 𑀫𑀬𑀁 𑀅𑀭𑀳𑀦𑁆𑀢𑁄’𑀢𑀺 𑀯𑀢𑁆𑀢𑀸𑀭𑁄 𑀩𑀳𑀽, 𑀅𑀳𑀁 𑀏𑀓𑀁 𑀅𑀭𑀳𑀦𑁆𑀢𑀫𑁆𑀧𑀺 𑀦 𑀧𑀲𑁆𑀲𑀸𑀫𑀺. 𑀕𑁂𑀳𑁂 𑀪𑀫𑀁 𑀬𑁄𑀚𑁂𑀢𑁆𑀯𑀸 𑀧𑀢𑁆𑀢𑀁 𑀮𑀺𑀔𑀸𑀧𑁂𑀢𑁆𑀯𑀸 𑀲𑀺𑀓𑁆𑀓𑀸𑀬 𑀞𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀲𑀝𑁆𑀞𑀺𑀳𑀢𑁆𑀣𑀫𑀢𑁆𑀢𑁂 𑀆𑀓𑀸𑀲𑁂 𑀑𑀮𑀫𑁆𑀩𑀸𑀧𑁂𑀢𑁆𑀯𑀸 ‘𑀲𑀘𑁂 𑀅𑀭𑀳𑀸 𑀅𑀢𑁆𑀣𑀺, 𑀇𑀫𑀁 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀽’𑀢𑀺 𑀯𑀓𑁆𑀔𑀸𑀫𑀺. 𑀬𑁄 𑀢𑀁 𑀕𑀳𑁂𑀲𑁆𑀲𑀢𑀺, 𑀢𑀁 𑀲𑀧𑀼𑀢𑁆𑀢𑀤𑀸𑀭𑁄 𑀲𑀭𑀡𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀢𑁆𑀢𑀁 𑀮𑀺𑀔𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀉𑀲𑁆𑀲𑀸𑀧𑁂𑀢𑁆𑀯𑀸 ‘‘𑀬𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀭𑀳𑀸, 𑀲𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀇𑀫𑀁 𑀧𑀢𑁆𑀢𑀁 𑀕𑀡𑁆𑀳𑀸𑀢𑀽’’𑀢𑀺 𑀆𑀳.

𑀙 ¶ 𑀲𑀢𑁆𑀣𑀸𑀭𑁄 ‘‘𑀅𑀫𑁆𑀳𑀸𑀓𑀁 𑀏𑀲 𑀅𑀦𑀼𑀘𑁆𑀙𑀯𑀺𑀓𑁄, 𑀅𑀫𑁆𑀳𑀸𑀓𑀫𑁂𑀯 𑀦𑀁 𑀤𑁂𑀳𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀆𑀳. 𑀅𑀣 𑀙𑀝𑁆𑀞𑁂 𑀤𑀺𑀯𑀲𑁂 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙𑀣, 𑀲𑁂𑀝𑁆𑀞𑀺𑀁 𑀏𑀯𑀁 𑀯𑀤𑁂𑀣 𑁋 ‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲𑁂𑀯 𑀅𑀦𑀼𑀘𑁆𑀙𑀯𑀺𑀓𑁄𑀬𑀁, 𑀫𑀸 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀓𑀸𑀭𑀡𑀸 𑀆𑀓𑀸𑀲𑁂𑀦𑀸𑀕𑀫𑀦𑀁 𑀓𑀭𑀺, 𑀤𑁂𑀳𑀺 𑀓𑀺𑀭 𑀫𑁂 𑀢𑀁 𑀧𑀢𑁆𑀢’’’𑀦𑁆𑀢𑀺 ¶ . 𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀢𑀣𑀸 𑀯𑀤𑀺𑀁𑀲𑀼. 𑀲𑁂𑀝𑁆𑀞𑀺 ‘‘𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄𑀯 𑀕𑀡𑁆𑀳𑀸𑀢𑀽’’𑀢𑀺 𑀆𑀳. 𑀦𑀸𑀝𑀧𑀼𑀢𑁆𑀢𑁄 𑀲𑀬𑀁 𑀕𑀦𑁆𑀢𑀼𑀓𑀸𑀫𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀅𑀳𑀁 𑀏𑀓𑀁 𑀳𑀢𑁆𑀣𑀜𑁆𑀘 𑀧𑀸𑀤𑀜𑁆𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑀼𑀓𑀸𑀫𑁄 𑀯𑀺𑀬 𑀪𑀯𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀁, ‘𑀆𑀘𑀭𑀺𑀬, 𑀓𑀺𑀁 𑀓𑀭𑁄𑀣, 𑀤𑀸𑀭𑀼𑀫𑀬𑀧𑀢𑁆𑀢𑀲𑁆𑀲 𑀓𑀸𑀭𑀡𑀸 𑀧𑀝𑀺𑀘𑁆𑀙𑀦𑁆𑀦𑀁 𑀅𑀭𑀳𑀢𑁆𑀢𑀕𑀼𑀡𑀁 𑀫𑀳𑀸𑀚𑀦𑀲𑁆𑀲 𑀫𑀸 𑀤𑀲𑁆𑀲𑀬𑀺𑀢𑁆𑀣𑀸’𑀢𑀺 𑀯𑀢𑁆𑀯𑀸 𑀫𑀁 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀪𑀽𑀫𑀺𑀬𑀁 𑀧𑀸𑀢𑁂𑀬𑁆𑀬𑀸𑀣𑀸’’𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀆𑀳, ‘‘𑀫𑀳𑀸𑀲𑁂𑀝𑁆𑀞𑀺, 𑀫𑀬𑁆𑀳𑀁 𑀅𑀬𑀁 𑀧𑀢𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑁄, 𑀅𑀜𑁆𑀜𑁂𑀲𑀁 𑀦𑀸𑀦𑀼𑀘𑁆𑀙𑀯𑀺𑀓𑁄, 𑀫𑀸 𑀢𑁂 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀓𑀸𑀭𑀡𑀸 𑀫𑀫 𑀆𑀓𑀸𑀲𑁂 𑀉𑀧𑁆𑀧𑀢𑀦𑀁 ¶ 𑀭𑀼𑀘𑁆𑀘𑀺, 𑀤𑁂𑀳𑀺 𑀫𑁂 𑀧𑀢𑁆𑀢’’𑀦𑁆𑀢𑀺. 𑀪𑀦𑁆𑀢𑁂, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸𑀯 𑀕𑀡𑁆𑀳𑀣𑀸𑀢𑀺. 𑀢𑀢𑁄 𑀦𑀸𑀝𑀧𑀼𑀢𑁆𑀢𑁄 ‘‘𑀢𑁂𑀦 𑀳𑀺 𑀅𑀧𑁂𑀣 𑀅𑀧𑁂𑀣𑀸’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀅𑀧𑀦𑁂𑀢𑁆𑀯𑀸 ‘‘𑀆𑀓𑀸𑀲𑁂 𑀉𑀧𑁆𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀳𑀢𑁆𑀣𑀜𑁆𑀘 𑀧𑀸𑀤𑀜𑁆𑀘 𑀉𑀓𑁆𑀔𑀺𑀧𑀺. 𑀅𑀣 𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸, ‘‘𑀆𑀘𑀭𑀺𑀬, 𑀓𑀺𑀁 𑀦𑀸𑀫𑁂𑀢𑀁 𑀓𑀭𑁄𑀣, 𑀙𑀯𑀲𑁆𑀲 𑀮𑀸𑀫𑀓𑀲𑁆𑀲 𑀤𑀸𑀭𑀼𑀫𑀬𑀧𑀢𑁆𑀢𑀲𑁆𑀲 𑀓𑀸𑀭𑀡𑀸 𑀧𑀝𑀺𑀘𑁆𑀙𑀦𑁆𑀦𑀕𑀼𑀡𑁂𑀦 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑀺𑀢𑁂𑀦 𑀓𑁄 𑀅𑀢𑁆𑀣𑁄’’𑀢𑀺 𑀢𑀁 𑀳𑀢𑁆𑀣𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀼𑀁. 𑀲𑁄 𑀲𑁂𑀝𑁆𑀞𑀺𑀁 𑀆𑀳 𑁋 ‘‘𑀇𑀫𑁂, 𑀫𑀳𑀸𑀲𑁂𑀝𑁆𑀞𑀺, 𑀉𑀧𑁆𑀧𑀢𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀤𑁂𑀳𑀺 𑀫𑁂 𑀧𑀢𑁆𑀢’’𑀦𑁆𑀢𑀺. 𑀉𑀧𑁆𑀧𑀢𑀺𑀢𑁆𑀯𑀸 𑀕𑀡𑁆𑀳𑀣, 𑀪𑀦𑁆𑀢𑁂𑀢𑀺. 𑀏𑀯𑀁 𑀢𑀺𑀢𑁆𑀣𑀺𑀬𑀸 𑀙 𑀤𑀺𑀯𑀲𑀸𑀦𑀺 𑀯𑀸𑀬𑀫𑀺𑀢𑁆𑀯𑀸𑀧𑀺 𑀢𑀁 𑀧𑀢𑁆𑀢𑀁 𑀦 𑀮𑀪𑀺𑀁𑀲𑀼𑀬𑁂𑀯.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀘 𑀆𑀬𑀲𑁆𑀫𑀢𑁄 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀲𑁆𑀲 𑀘 ‘‘𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀞𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀦𑀓𑀸𑀮𑁂 ¶ 𑀥𑀼𑀢𑁆𑀢𑀓𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀫𑁆𑀪𑁄 𑀧𑀼𑀩𑁆𑀩𑁂 𑀙 𑀲𑀢𑁆𑀣𑀸𑀭𑁄 𑀮𑁄𑀓𑁂 ‘𑀫𑀬𑀁 𑀅𑀭𑀳𑀦𑁆𑀢𑀫𑁆𑀳𑀸’𑀢𑀺 𑀯𑀺𑀘𑀭𑀺𑀁𑀲𑀼., 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀧𑀦 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀧𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 ‘𑀲𑀘𑁂 𑀅𑀭𑀳𑀸 𑀅𑀢𑁆𑀣𑀺, 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀽’𑀢𑀺 𑀯𑀤𑀦𑁆𑀢𑀲𑁆𑀲, 𑀏𑀓𑁄𑀧𑀺 ‘𑀅𑀳𑀁 𑀅𑀭𑀳𑀸’𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀦𑁆𑀢𑁄 𑀦𑀢𑁆𑀣𑀺. 𑀅𑀚𑁆𑀚 𑀦𑁄 𑀮𑁄𑀓𑁂 𑀅𑀭𑀳𑀦𑁆𑀢𑀸𑀦𑀁 𑀦𑀢𑁆𑀣𑀺𑀪𑀸𑀯𑁄 𑀜𑀸𑀢𑁄’’𑀢𑀺. 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀸 ¶ 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀦𑁆𑀢𑀁 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀁 𑀆𑀳 𑁋 ‘‘𑀲𑀼𑀢𑀁 𑀢𑁂, 𑀆𑀯𑀼𑀲𑁄 𑀪𑀸𑀭𑀤𑁆𑀯𑀸𑀚, 𑀇𑀫𑁂𑀲𑀁 𑀯𑀘𑀦𑀁, 𑀇𑀫𑁂 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀯𑀺𑀬 𑀯𑀤𑀦𑁆𑀢𑀺. 𑀢𑁆𑀯𑀜𑁆𑀘 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀕𑀘𑁆𑀙 𑀢𑀁 𑀧𑀢𑁆𑀢𑀁 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. 𑀆𑀯𑀼𑀲𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦, 𑀢𑁆𑀯𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄, 𑀢𑁆𑀯𑀁 𑀏𑀢𑀁 𑀕𑀡𑁆𑀳𑀸𑀳𑀺, 𑀢𑀬𑀺 𑀧𑀦 𑀅𑀕𑁆𑀕𑀡𑁆𑀳𑀦𑁆𑀢𑁂 𑀅𑀳𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺. ‘‘𑀕𑀡𑁆𑀳𑀸𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀢𑀺𑀕𑀸𑀯𑀼𑀢𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀧𑀸𑀤𑀦𑁆𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀢𑀼𑀮𑀧𑀺𑀘𑀼 𑀯𑀺𑀬 𑀆𑀓𑀸𑀲𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀦𑀕𑀭𑀲𑁆𑀲 𑀉𑀧𑀭𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀦𑀼𑀧𑀭𑀺𑀬𑀸𑀬𑀺. 𑀲𑁄 𑀢𑀺𑀕𑀸𑀯𑀼𑀢𑀧𑀫𑀸𑀡𑀲𑁆𑀲 𑀦𑀕𑀭𑀲𑁆𑀲 𑀧𑀺𑀥𑀸𑀦𑀁 𑀯𑀺𑀬 𑀧𑀜𑁆𑀜𑀸𑀬𑀺. 𑀦𑀕𑀭𑀯𑀸𑀲𑀺𑀦𑁄 ‘‘𑀧𑀸𑀲𑀸𑀡𑁄 𑀦𑁄 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀻’’𑀢𑀺 𑀪𑀻𑀢𑀸 𑀲𑀼𑀧𑁆𑀧𑀸𑀤𑀻𑀦𑀺 𑀫𑀢𑁆𑀣𑀓𑁂 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀮𑀻𑀬𑀺𑀁𑀲𑀼 ¶ . 𑀲𑀢𑁆𑀢𑀫𑁂 𑀯𑀸𑀭𑁂 𑀣𑁂𑀭𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀚𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚, 𑀢𑀯 𑀧𑀸𑀲𑀸𑀡𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀕𑀡𑁆𑀳, 𑀫𑀸 𑀦𑁄 𑀲𑀩𑁆𑀩𑁂 𑀦𑀸𑀲𑀬𑀻’’𑀢𑀺. 𑀣𑁂𑀭𑁄 𑀧𑀸𑀲𑀸𑀡𑀁 𑀧𑀸𑀤𑀦𑁆𑀢𑁂𑀦 𑀔𑀺𑀧𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀲𑀺. 𑀣𑁂𑀭𑁄 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑁂𑀝𑁆𑀞𑀺 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀑𑀢𑀭𑀣 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀺𑀡𑁆𑀡𑀁 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀢𑀁 𑀑𑀢𑀸𑀭𑀸𑀧𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀧𑀼𑀡𑁆𑀡𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀬𑁂 𑀅𑀭𑀜𑁆𑀜𑀕𑀢𑀸 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀸 𑀯𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀤𑁆𑀤𑀲𑀁𑀲𑀼. 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀫𑁆𑀧𑀺 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀳𑀻’’𑀢𑀺 𑀣𑁂𑀭𑀁 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑁄 𑀢𑁂𑀲𑀁 𑀢𑁂𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀦𑁆𑀦𑀸𑀤𑁂𑀦𑁆𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀆𑀦𑀦𑁆𑀤, 𑀓𑀲𑁆𑀲𑁂𑀲𑁄 𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁂𑀦 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀘𑀦𑁆𑀤𑀦𑀧𑀢𑁆𑀢𑁄 𑀕𑀳𑀺𑀢𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀏𑀲𑁄 𑀲𑀤𑁆𑀤𑁄’’𑀢𑀺 𑀲𑀼𑀢𑁆𑀯𑀸 𑀪𑀸𑀭𑀤𑁆𑀯𑀸𑀚𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀏𑀯𑀁 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂, ‘‘𑀓𑀲𑁆𑀫𑀸 𑀢𑁂, 𑀪𑀸𑀭𑀤𑁆𑀯𑀸𑀚, 𑀏𑀯𑀁 𑀓𑀢’’𑀦𑁆𑀢𑀺 𑀣𑁂𑀭𑀁 𑀕𑀭𑀳𑀺𑀢𑁆𑀯𑀸 𑀢𑀁 𑀧𑀢𑁆𑀢𑀁 𑀔𑀡𑁆𑀟𑀸𑀔𑀡𑁆𑀟𑀁 𑀪𑁂𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀜𑁆𑀚𑀦𑀧𑀺𑀲𑀦𑀢𑁆𑀣𑀸𑀬 𑀤𑀸𑀧𑁂𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀅𑀓𑀭𑀡𑀢𑁆𑀣𑀸𑀬 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 (𑀘𑀽𑀴𑀯. 𑁨𑁫𑁨) 𑀧𑀜𑁆𑀜𑀸𑀧𑁂𑀲𑀺.

𑀢𑀺𑀢𑁆𑀣𑀺𑀬𑀸 ¶ ¶ ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀢𑀁 𑀧𑀢𑁆𑀢𑀁 𑀪𑁂𑀤𑀸𑀧𑁂𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀅𑀓𑀭𑀡𑀢𑁆𑀣𑀸𑀬 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀻’’𑀢𑀺 𑀲𑀼𑀢𑁆𑀯𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀺, 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀢𑀁 𑀭𑀓𑁆𑀔𑀺𑀲𑁆𑀲𑀢𑁂𑀯. 𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀑𑀓𑀸𑀲𑁄 𑀮𑀤𑁆𑀥𑁄’’𑀢𑀺 𑀦𑀕𑀭𑀯𑀻𑀣𑀻𑀲𑀼 𑀆𑀭𑁄𑀘𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀼 ‘‘𑀫𑀬𑀁 𑀅𑀢𑁆𑀢𑀦𑁄 𑀕𑀼𑀡𑀁 𑀭𑀓𑁆𑀔𑀦𑁆𑀢𑀸 𑀧𑀼𑀩𑁆𑀩𑁂 𑀤𑀸𑀭𑀼𑀫𑀬𑀧𑀢𑁆𑀢𑀲𑁆𑀲 𑀓𑀸𑀭𑀡𑀸 𑀅𑀢𑁆𑀢𑀦𑁄 𑀕𑀼𑀡𑀁 𑀫𑀳𑀸𑀚𑀦𑀲𑁆𑀲 𑀦 𑀤𑀲𑁆𑀲𑀬𑀺𑀫𑁆𑀳𑀸, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀧𑀢𑁆𑀢𑀓𑀫𑀢𑁆𑀢𑀲𑁆𑀲 𑀓𑀸𑀭𑀡𑀸 𑀅𑀢𑁆𑀢𑀦𑁄 𑀕𑀼𑀡𑀁 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀢𑀸𑀬 𑀧𑀢𑁆𑀢𑀁 𑀪𑁂𑀤𑀸𑀧𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺, 𑀇𑀤𑀸𑀦𑀺 𑀫𑀬𑀁 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀓𑀺𑀭, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀅𑀓𑀭𑀡𑀢𑁆𑀣𑀸𑀬 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀇𑀤𑀸𑀦𑀺 𑀢𑀺𑀢𑁆𑀣𑀺𑀬𑀸 ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀓𑀺𑀁 𑀇𑀤𑀸𑀦𑀺 𑀓𑀭𑀺𑀲𑁆𑀲𑀣𑀸𑀢𑀺? ‘‘𑀢𑁂𑀲𑀼 𑀓𑀭𑁄𑀦𑁆𑀢𑁂𑀲𑀼 𑀓𑀭𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. 𑀦𑀦𑀼 𑀢𑀼𑀫𑁆𑀳𑁂𑀳𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺. 𑀦𑀸𑀳𑀁, 𑀫𑀳𑀸𑀭𑀸𑀚, 𑀅𑀢𑁆𑀢𑀦𑁄 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺𑀁, 𑀢𑀁 𑀫𑀫𑁂𑀯 𑀲𑀸𑀯𑀓𑀸𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺. 𑀢𑀼𑀫𑁆𑀳𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀦𑀸𑀫 𑀳𑁄𑀢𑀺, 𑀪𑀦𑁆𑀢𑁂𑀢𑀺. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀫𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀸𑀫𑀺, ‘‘𑀅𑀢𑁆𑀣𑀺 𑀧𑀦 𑀢𑁂, 𑀫𑀳𑀸𑀭𑀸𑀚, 𑀯𑀺𑀚𑀺𑀢𑁂 𑀉𑀬𑁆𑀬𑀸𑀦’’𑀦𑁆𑀢𑀺. ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂 𑀢𑁂, 𑀫𑀳𑀸𑀭𑀸𑀚, 𑀉𑀬𑁆𑀬𑀸𑀦𑁂 𑀫𑀳𑀸𑀚𑀦𑁄 𑀅𑀫𑁆𑀩𑀸𑀤𑀻𑀦𑀺 𑀔𑀸𑀤𑁂𑀬𑁆𑀬, 𑀓𑀺𑀫𑀲𑁆𑀲 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀤𑀡𑁆𑀟𑁄, 𑀪𑀦𑁆𑀢𑁂’’𑀢𑀺. ‘‘𑀢𑁆𑀯𑀁 𑀧𑀦 𑀔𑀸𑀤𑀺𑀢𑀼𑀁 𑀮𑀪𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀫𑀬𑁆𑀳𑀁 𑀤𑀡𑁆𑀟𑁄 𑀦𑀢𑁆𑀣𑀺, 𑀅𑀳𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀔𑀸𑀤𑀺𑀢𑀼𑀁 𑀮𑀪𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀬𑀣𑀸 𑀢𑀯 ¶ 𑀢𑀺𑀬𑁄𑀚𑀦𑀲𑀢𑀺𑀓𑁂 𑀭𑀚𑁆𑀚𑁂 𑀆𑀡𑀸 𑀧𑀯𑀢𑁆𑀢𑀢𑀺, 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀅𑀫𑁆𑀩𑀸𑀤𑀻𑀦𑀺 𑀔𑀸𑀤𑀦𑁆𑀢𑀲𑁆𑀲 𑀤𑀡𑁆𑀟𑁄 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀁 𑀅𑀢𑁆𑀣𑀺, 𑀏𑀯𑀁 𑀫𑀫𑀧𑀺 𑀘𑀓𑁆𑀓𑀯𑀸𑀴𑀓𑁄𑀝𑀺𑀲𑀢𑀲𑀳𑀲𑁆𑀲𑁂 𑀆𑀡𑀸 𑀧𑀯𑀢𑁆𑀢𑀢𑀺, 𑀅𑀢𑁆𑀢𑀦𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑀺𑀓𑁆𑀓𑀫𑁄 𑀦𑀸𑀫 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀁 𑀧𑀦 𑀅𑀢𑁆𑀣𑀺, 𑀓𑀭𑀺𑀲𑁆𑀲𑀸𑀫𑀳𑀁 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺. 𑀢𑀺𑀢𑁆𑀣𑀺𑀬𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀫𑁆𑀳𑀸 𑀦𑀝𑁆𑀞𑀸, 𑀲𑀫𑀡𑁂𑀦 𑀓𑀺𑀭 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁𑀬𑁂𑀯 ¶ 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀦 𑀅𑀢𑁆𑀢𑀦𑁄. 𑀲𑀬𑀫𑁂𑀯 𑀓𑀺𑀭 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀢𑀼𑀓𑀸𑀫𑁄, 𑀓𑀺𑀁 𑀦𑀼 𑀔𑁄 𑀓𑀭𑁄𑀫𑀸’’𑀢𑀺 𑀫𑀦𑁆𑀢𑀬𑀺𑀁𑀲𑀼.

𑀭𑀸𑀚𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑀤𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀣𑀸’’𑀢𑀺. ‘‘𑀇𑀢𑁄 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑁆𑀣 𑀓𑀭𑀺𑀲𑁆𑀲𑀣, 𑀪𑀦𑁆𑀢𑁂’’𑀢𑀺 ¶ ? ‘‘𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀲𑁆𑀫𑀸 𑀧𑀦 𑀲𑀢𑁆𑀣𑀸 𑀏𑀯𑀁 𑀤𑀽𑀭𑀝𑁆𑀞𑀸𑀦𑀁 𑀅𑀧𑀤𑀺𑀲𑀻’’𑀢𑀺? ‘‘𑀬𑀲𑁆𑀫𑀸 𑀢𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀫𑀳𑀸𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀝𑁆𑀞𑀸𑀦𑀁, 𑀅𑀧𑀺𑀘 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀸𑀢𑀦𑀢𑁆𑀣𑀸𑀬𑀧𑀺 𑀤𑀽𑀭𑀝𑁆𑀞𑀸𑀦𑀫𑁂𑀯 𑀅𑀧𑀤𑀺𑀲𑀻’’𑀢𑀺. 𑀢𑀺𑀢𑁆𑀣𑀺𑀬𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀢𑁄 𑀓𑀺𑀭 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀸𑀯𑀢𑁆𑀣𑀺𑀬𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀢𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀅𑀦𑀼𑀩𑀦𑁆𑀥𑀺𑀲𑁆𑀲𑀸𑀫, 𑀫𑀳𑀸𑀚𑀦𑁄 𑀅𑀫𑁆𑀳𑁂 𑀤𑀺𑀲𑁆𑀯𑀸 ‘𑀓𑀺𑀁 𑀇𑀤’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀅𑀣𑀲𑁆𑀲 𑀯𑀓𑁆𑀔𑀸𑀫 ‘𑀫𑀬𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀯𑀤𑀺𑀫𑁆𑀳𑀸. 𑀲𑁄 𑀧𑀮𑀸𑀬𑀢𑀺, 𑀫𑀬𑀫𑀲𑁆𑀲 𑀧𑀮𑀸𑀬𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑀼𑀩𑀦𑁆𑀥𑀸𑀫𑀸’’𑀢𑀺. 𑀲𑀢𑁆𑀣𑀸 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑀺𑀢𑁆𑀣𑀺𑀬𑀸𑀧𑀺𑀲𑁆𑀲 𑀧𑀘𑁆𑀙𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀝𑁆𑀞𑀸𑀦𑁂 𑀯𑀲𑀦𑁆𑀢𑀺. 𑀯𑀲𑀺𑀢𑀝𑁆𑀞𑀸𑀦𑁂 𑀧𑀼𑀦𑀤𑀺𑀯𑀲𑁂 𑀧𑀸𑀢𑀭𑀸𑀲𑀁 𑀓𑀭𑁄𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑁂𑀳𑀺 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀸 𑀳𑁂𑀝𑁆𑀞𑀸 𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦𑁂𑀯 𑀆𑀭𑁄𑀘𑁂𑀲𑀼𑀁 ¶ . 𑀫𑀳𑀸𑀚𑀦𑁄𑀧𑀺 ‘‘𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀩𑀦𑁆𑀥𑀺.

𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀸𑀧𑀼𑀡𑀺. 𑀢𑀺𑀢𑁆𑀣𑀺𑀬𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀲𑀫𑀸𑀤𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀔𑀤𑀺𑀭𑀣𑀫𑁆𑀪𑁂𑀳𑀺 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑁂𑀳𑀺 𑀙𑀸𑀤𑀸𑀧𑁂𑀢𑁆𑀯𑀸 ‘‘𑀇𑀥 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀻𑀤𑀺𑀁𑀲𑀼. 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀺𑀢𑁆𑀣𑀺𑀬𑁂𑀳𑀺 𑀫𑀡𑁆𑀟𑀧𑁄 𑀓𑀸𑀭𑀺𑀢𑁄, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀫𑀡𑁆𑀟𑀧𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀮𑀁, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀫𑀬𑁆𑀳𑀁 𑀫𑀡𑁆𑀟𑀧𑀓𑀸𑀭𑀓𑁄’’𑀢𑀺. ‘‘𑀪𑀦𑁆𑀢𑁂, 𑀫𑀁 𑀞𑀧𑁂𑀢𑁆𑀯𑀸 𑀓𑁄 𑀅𑀜𑁆𑀜𑁄 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺? ‘‘𑀲𑀓𑁆𑀓𑁄, 𑀤𑁂𑀯𑀭𑀸𑀚𑀸’’𑀢𑀺. ‘‘𑀓𑀳𑀁 𑀧𑀦, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂, 𑀫𑀳𑀸𑀭𑀸𑀚𑀸’’𑀢𑀺. 𑀢𑀺𑀢𑁆𑀣𑀺𑀬𑀸 ‘‘𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀺𑀭 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀞𑀸𑀦𑁂 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀫𑁆𑀧𑀺 𑀅𑀫𑁆𑀩𑀧𑁄𑀢𑀓𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀅𑀭𑀜𑁆𑀜𑁂 𑀔𑀺𑀧𑀸𑀧𑁂𑀲𑀼𑀁.

𑀲𑀢𑁆𑀣𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀦𑁆𑀢𑁄𑀦𑀕𑀭𑀁 𑀧𑀸𑀯𑀺𑀲𑀺. 𑀭𑀜𑁆𑀜𑁄𑀧𑀺 𑀉𑀬𑁆𑀬𑀸𑀦𑀧𑀸𑀮𑁄 𑀓𑀡𑁆𑀟𑁄 𑀦𑀸𑀫 𑀏𑀓𑀁 𑀧𑀺𑀗𑁆𑀕𑀮𑀓𑀺𑀧𑀺𑀮𑁆𑀮𑀺𑀓𑁂𑀳𑀺 𑀓𑀢𑀧𑀢𑁆𑀢𑀧𑀼𑀝𑀲𑁆𑀲 𑀅𑀦𑁆𑀢𑀭𑁂 𑀫𑀳𑀦𑁆𑀢𑀁 𑀅𑀫𑁆𑀩𑀧𑀓𑁆𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀕𑀦𑁆𑀥𑀭𑀲𑀮𑁄𑀪𑁂𑀦 𑀲𑀫𑁆𑀧𑀢𑀦𑁆𑀢𑁂 𑀯𑀸𑀬𑀲𑁂 𑀧𑀮𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀔𑀸𑀤𑀦𑀢𑁆𑀣𑀸𑀬 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀇𑀫𑀁 𑀅𑀫𑁆𑀩𑀁 𑀔𑀸𑀤𑀺𑀢𑁆𑀯𑀸 𑀫𑀬𑁆𑀳𑀁 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀓𑀳𑀸𑀧𑀡𑁂 𑀤𑀤𑁂𑀬𑁆𑀬, 𑀢𑀁 𑀫𑁂 𑀏𑀓𑀢𑁆𑀢𑀪𑀸𑀯𑁂𑀧𑀺 ¶ 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀦𑀸𑀮𑀁. 𑀲𑀘𑁂 𑀧𑀦𑀸𑀳𑀁 𑀲𑀢𑁆𑀣𑀼 𑀇𑀫𑀁 ¶ 𑀤𑀲𑁆𑀲𑀸𑀫𑀺, 𑀅𑀯𑀲𑁆𑀲𑀁 𑀢𑀁 𑀫𑁂 𑀤𑀻𑀖𑀓𑀸𑀮𑀁 𑀳𑀺𑀢𑀸𑀯𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀁 𑀅𑀫𑁆𑀩𑀧𑀓𑁆𑀓𑀁 𑀲𑀢𑁆𑀣𑀼 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀑𑀮𑁄𑀓𑁂𑀲𑀺 ¶ . 𑀅𑀣𑀲𑁆𑀲 𑀣𑁂𑀭𑁄 𑀘𑀢𑀼𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑀢𑁆𑀣𑀸 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀣𑁂𑀭𑁄 𑀘𑀻𑀯𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀣𑁂𑀭𑁄 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀁 𑀫𑀤𑁆𑀤𑀺𑀢𑁆𑀯𑀸 𑀧𑀸𑀦𑀓𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀲𑀢𑁆𑀣𑀸 𑀅𑀫𑁆𑀩𑀧𑀸𑀦𑀓𑀁 𑀧𑀺𑀯𑀺𑀢𑁆𑀯𑀸 𑀓𑀡𑁆𑀟𑀁 𑀆𑀳 𑁋 ‘‘𑀇𑀫𑀁 𑀅𑀫𑁆𑀩𑀝𑁆𑀞𑀺𑀁 𑀇𑀥𑁂𑀯 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀭𑁄𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀉𑀧𑀭𑀺 𑀳𑀢𑁆𑀣𑀁 𑀥𑁄𑀯𑀺. 𑀳𑀢𑁆𑀣𑁂 𑀥𑁄𑀯𑀺𑀢𑀫𑀢𑁆𑀢𑁂𑀬𑁂𑀯 𑀦𑀗𑁆𑀕𑀮𑀲𑀻𑀲𑀫𑀢𑁆𑀢𑀓𑁆𑀔𑀦𑁆𑀥𑁄 𑀳𑀼𑀢𑁆𑀯𑀸 𑀉𑀩𑁆𑀩𑁂𑀥𑁂𑀦 𑀧𑀡𑁆𑀡𑀸𑀲𑀳𑀢𑁆𑀣𑁄 𑀅𑀫𑁆𑀩𑀭𑀼𑀓𑁆𑀔𑁄 𑀉𑀝𑁆𑀞𑀳𑀺. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀏𑀓𑁂𑀓𑀸, 𑀉𑀤𑁆𑀥𑀁 𑀏𑀓𑀸𑀢𑀺 𑀧𑀜𑁆𑀘 𑀫𑀳𑀸𑀲𑀸𑀔𑀸 𑀧𑀡𑁆𑀡𑀸𑀲𑀳𑀢𑁆𑀣𑀸 𑀅𑀳𑁂𑀲𑀼𑀁. 𑀲𑁄 𑀢𑀸𑀯𑀤𑁂𑀯 𑀧𑀼𑀧𑁆𑀨𑀨𑀮𑀲𑀜𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀧𑀓𑁆𑀓𑀅𑀫𑁆𑀩𑀧𑀺𑀡𑁆𑀟𑀺𑀥𑀭𑁄 𑀅𑀳𑁄𑀲𑀺. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸 𑀪𑀺𑀓𑁆𑀔𑀽 𑀅𑀫𑁆𑀩𑀧𑀓𑁆𑀓𑀸𑀦𑀺 𑀔𑀸𑀤𑀦𑁆𑀢𑀸 𑀏𑀯 𑀆𑀕𑀫𑀺𑀁𑀲𑀼. 𑀭𑀸𑀚𑀸 ‘‘𑀏𑀯𑀭𑀽𑀧𑁄 𑀓𑀺𑀭 𑀅𑀫𑁆𑀩𑀭𑀼𑀓𑁆𑀔𑁄 𑀉𑀝𑁆𑀞𑀺𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀫𑀸 𑀦𑀁 𑀓𑁄𑀘𑀺 𑀙𑀺𑀦𑁆𑀤𑀻’’𑀢𑀺 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀲𑁄 𑀧𑀦 𑀓𑀡𑁆𑀟𑁂𑀦 𑀭𑁄𑀧𑀺𑀢𑀢𑁆𑀢𑀸 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺. 𑀥𑀼𑀢𑁆𑀢𑀓𑀸𑀧𑀺 𑀅𑀫𑁆𑀩𑀧𑀓𑁆𑀓𑀸𑀦𑀺 𑀔𑀸𑀤𑀺𑀢𑁆𑀯𑀸 ‘‘𑀳𑀭𑁂 𑀤𑀼𑀝𑁆𑀞𑀢𑀺𑀢𑁆𑀣𑀺𑀬𑀸 ‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀢𑀼𑀫𑁆𑀳𑁂𑀳𑀺 𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀢𑀤𑀳𑀼𑀚𑀸𑀢𑀸𑀧𑀺 𑀅𑀫𑁆𑀩𑀧𑁄𑀢𑀓𑀸 ¶ 𑀉𑀧𑁆𑀧𑀸𑀝𑀸𑀧𑀺𑀢𑀸, 𑀓𑀡𑁆𑀟𑀫𑁆𑀩𑁄 𑀦𑀸𑀫 𑀅𑀬’’𑀦𑁆𑀢𑀺 𑀯𑀢𑁆𑀯𑀸 𑀢𑁂 𑀉𑀘𑁆𑀙𑀺𑀝𑁆𑀞𑀅𑀫𑁆𑀩𑀝𑁆𑀞𑀻𑀳𑀺 𑀧𑀳𑀭𑀺𑀁𑀲𑀼.

𑀲𑀓𑁆𑀓𑁄 𑀯𑀸𑀢𑀯𑀮𑀸𑀳𑀓𑀁 𑀤𑁂𑀯𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 ‘‘𑀢𑀺𑀢𑁆𑀣𑀺𑀬𑀸𑀦𑀁 𑀫𑀡𑁆𑀟𑀧𑀁 𑀯𑀸𑀢𑁂𑀳𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀔𑀺𑀧𑀸𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀽𑀭𑀺𑀬𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 ‘‘𑀲𑀽𑀭𑀺𑀬𑀫𑀡𑁆𑀟𑀮𑀁 𑀦𑀺𑀓𑀟𑁆𑀠𑀦𑁆𑀢𑁄 𑀢𑀸𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀧𑀼𑀦 𑀯𑀸𑀢𑀯𑀮𑀸𑀳𑀓𑀁 𑀆𑀡𑀸𑀧𑁂𑀲𑀺 ‘‘𑀯𑀸𑀢𑀫𑀡𑁆𑀟𑀮𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀬𑀸𑀳𑀻’’𑀢𑀺. 𑀲𑁄 𑀢𑀣𑀸 𑀓𑀭𑁄𑀦𑁆𑀢𑁄 𑀢𑀺𑀢𑁆𑀣𑀺𑀬𑀸𑀦𑀁 𑀧𑀕𑁆𑀖𑀭𑀺𑀢𑀲𑁂𑀤𑀲𑀭𑀻𑀭𑁂 𑀭𑀚𑁄𑀯𑀝𑁆𑀝𑀺𑀬𑀸 𑀑𑀓𑀺𑀭𑀺. 𑀢𑁂 𑀢𑀫𑁆𑀩𑀫𑀢𑁆𑀢𑀺𑀓𑀲𑀤𑀺𑀲𑀸 𑀅𑀳𑁂𑀲𑀼𑀁. 𑀯𑀲𑁆𑀲𑀯𑀮𑀸𑀳𑀓𑀫𑁆𑀧𑀺 𑀆𑀡𑀸𑀧𑁂𑀲𑀺 ‘‘𑀫𑀳𑀦𑁆𑀢𑀸𑀦𑀺 𑀩𑀺𑀦𑁆𑀤𑀽𑀦𑀺 𑀧𑀸𑀢𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑁂𑀲𑀁 𑀓𑀸𑀬𑁄 𑀓𑀩𑀭𑀕𑀸𑀯𑀺𑀲𑀤𑀺𑀲𑁄 𑀅𑀳𑁄𑀲𑀺. 𑀢𑁂 𑀦𑀺𑀕𑀡𑁆𑀞𑀸 𑀮𑀚𑁆𑀚𑀫𑀸𑀦𑀸 𑀳𑀼𑀢𑁆𑀯𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀏𑀯𑀁 𑀧𑀮𑀸𑀬𑀦𑁆𑀢𑁂𑀲𑀼 𑀧𑀼𑀭𑀸𑀡𑀓𑀲𑁆𑀲𑀧𑀲𑁆𑀲 𑀉𑀧𑀝𑁆𑀞𑀸𑀓𑁄 𑀏𑀓𑁄 𑀓𑀲𑁆𑀲𑀓𑁄 ‘‘𑀇𑀤𑀸𑀦𑀺 𑀫𑁂 𑀅𑀬𑁆𑀬𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀯𑁂𑀮𑀸, 𑀕𑀦𑁆𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑁄𑀡𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀸𑀢𑁄𑀯 𑀆𑀪𑀢𑀁 𑀬𑀸𑀕𑀼𑀓𑀼𑀝𑀜𑁆𑀘𑁂𑀯 𑀬𑁄𑀢𑁆𑀢𑀓𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀼𑀭𑀸𑀡𑀁 𑀢𑀣𑀸 𑀧𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸, 𑀪𑀦𑁆𑀢𑁂 ¶ , 𑀅𑀚𑁆𑀚 ‘𑀅𑀬𑁆𑀬𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’𑀢𑀺 𑀆𑀕𑀘𑁆𑀙𑀸𑀫𑀺, 𑀢𑀼𑀫𑁆𑀳𑁂 𑀓𑀳𑀁 𑀕𑀘𑁆𑀙𑀣𑀸’’𑀢𑀺. 𑀓𑀺𑀁 𑀢𑁂 𑀧𑀸𑀝𑀺𑀳𑀸𑀭𑀺𑀬𑁂𑀦, 𑀇𑀫𑀁 𑀓𑀼𑀝𑀜𑁆𑀘 ¶ 𑀬𑁄𑀢𑁆𑀢𑀜𑁆𑀘 𑀤𑁂𑀳𑀻𑀢𑀺. 𑀲𑁄 𑀢𑁂𑀦 𑀤𑀺𑀦𑁆𑀦𑀁 𑀓𑀼𑀝𑀜𑁆𑀘 𑀬𑁄𑀢𑁆𑀢𑀜𑁆𑀘 𑀆𑀤𑀸𑀬 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀓𑀼𑀝𑀁 𑀬𑁄𑀢𑁆𑀢𑁂𑀦 𑀅𑀢𑁆𑀢𑀦𑁄 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀮𑀚𑁆𑀚𑀦𑁆𑀢𑁄 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸 𑀭𑀳𑀤𑁂 𑀧𑀢𑀺𑀢𑁆𑀯𑀸 𑀉𑀤𑀓𑀧𑀼𑀩𑁆𑀩𑀼𑀴𑁂 𑀉𑀝𑁆𑀞𑀸𑀧𑁂𑀦𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺.

𑀲𑀓𑁆𑀓𑁄 ¶ 𑀆𑀓𑀸𑀲𑁂 𑀭𑀢𑀦𑀘𑀗𑁆𑀓𑀫𑀁 𑀫𑀸𑀧𑁂𑀲𑀺. 𑀢𑀲𑁆𑀲 𑀏𑀓𑀸 𑀓𑁄𑀝𑀺 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀳𑁄𑀲𑀺, 𑀏𑀓𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁. 𑀲𑀢𑁆𑀣𑀸 𑀲𑀦𑁆𑀦𑀺𑀧𑀢𑀺𑀢𑀸𑀬 𑀙𑀢𑁆𑀢𑀺𑀁𑀲𑀬𑁄𑀚𑀦𑀺𑀓𑀸𑀬 𑀧𑀭𑀺𑀲𑀸𑀬 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 ‘‘𑀇𑀤𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀯𑁂𑀮𑀸’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀖𑀭𑀡𑀻 𑀦𑀸𑀫 𑀇𑀤𑁆𑀥𑀺𑀫𑀦𑁆𑀢𑀻 𑀏𑀓𑀸 𑀅𑀦𑀸𑀕𑀸𑀫𑀺𑀉𑀧𑀸𑀲𑀺𑀓𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀸𑀤𑀺𑀲𑀸𑀬 𑀥𑀻𑀢𑀭𑀺 𑀯𑀺𑀚𑁆𑀚𑀫𑀸𑀦𑀸𑀬 𑀢𑀼𑀫𑁆𑀳𑀸𑀓𑀁 𑀓𑀺𑀮𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀳𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀓𑀣𑀁 𑀢𑁆𑀯𑀁 𑀓𑀭𑀺𑀲𑁆𑀲𑀲𑀺, 𑀖𑀭𑀡𑀻’’𑀢𑀺? ‘‘𑀪𑀦𑁆𑀢𑁂, 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀫𑀳𑀸𑀧𑀣𑀯𑀺𑀁 𑀉𑀤𑀓𑀁 𑀓𑀢𑁆𑀯𑀸 𑀉𑀤𑀓𑀲𑀓𑀼𑀡𑀺𑀓𑀸 𑀯𑀺𑀬 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀢𑀣𑀸 𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀢𑀣𑀸 𑀫𑀚𑁆𑀛𑁂’’. 𑀫𑀳𑀸𑀚𑀦𑁄 𑀫𑀁 𑀤𑀺𑀲𑁆𑀯𑀸 ‘‘𑀓𑀸 𑀏𑀲𑀸’’𑀢𑀺 𑀯𑀼𑀢𑁆𑀢𑁂 𑀯𑀓𑁆𑀔𑀢𑀺 ‘‘𑀖𑀭𑀡𑀻 𑀦𑀸𑀫𑁂𑀲𑀸, 𑀅𑀬𑀁 𑀢𑀸𑀯 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀆𑀦𑀼𑀪𑀸𑀯𑁄, 𑀩𑀼𑀤𑁆𑀥𑀸𑀦𑀼𑀪𑀸𑀯𑁄 𑀧𑀦 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 ¶ . 𑀏𑀯𑀁 𑀢𑀺𑀢𑁆𑀣𑀺𑀬𑀸 𑀢𑀼𑀫𑁆𑀳𑁂 𑀅𑀤𑀺𑀲𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀻𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀚𑀸𑀦𑀸𑀫𑀺 𑀢𑁂 𑀖𑀭𑀡𑀻 𑀏𑀯𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑀁, 𑀦 𑀧𑀦𑀸𑀬𑀁 𑀢𑀯𑀢𑁆𑀣𑀸𑀬 𑀩𑀤𑁆𑀥𑁄 𑀫𑀸𑀮𑀸𑀧𑀼𑀝𑁄’’𑀢𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀲𑀸 ‘‘𑀦 𑀫𑁂 𑀲𑀢𑁆𑀣𑀸 𑀅𑀦𑀼𑀚𑀸𑀦𑀸𑀢𑀺, 𑀅𑀤𑁆𑀥𑀸 𑀫𑀬𑀸 𑀉𑀢𑁆𑀢𑀭𑀺𑀢𑀭𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑁄 𑀅𑀢𑁆𑀣𑀻’’𑀢𑀺 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸𑀧𑀺 ‘‘𑀏𑀯𑀫𑁂𑀯 𑀢𑁂𑀲𑀁 𑀕𑀼𑀡𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀙𑀢𑁆𑀢𑀺𑀁𑀲𑀬𑁄𑀚𑀦𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀅𑀧𑀭𑁂𑀧𑀺 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀓𑀣𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀣𑀸’’𑀢𑀺. 𑀢𑁂 ‘‘𑀏𑀯𑀜𑁆𑀘 𑀏𑀯𑀜𑁆𑀘 𑀓𑀭𑀺𑀲𑁆𑀲𑀸𑀫, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀼 𑀧𑀼𑀭𑀢𑁄 𑀞𑀺𑀢𑀸𑀯 𑀲𑀻𑀳𑀦𑀸𑀤𑀁 𑀦𑀤𑀺𑀁𑀲𑀼. 𑀢𑁂𑀲𑀼 𑀓𑀺𑀭 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀫𑀸𑀤𑀺𑀲𑁂 𑀅𑀦𑀸𑀕𑀸𑀫𑀺𑀉𑀧𑀸𑀲𑀓𑁂 𑀧𑀼𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂 𑀲𑀢𑁆𑀣𑀼 𑀓𑀺𑀮𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀇𑀫𑀺𑀲𑁆𑀲𑀸 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀫𑀳𑀸𑀫𑁂𑀖𑀕𑀚𑁆𑀚𑀺𑀢𑀲𑀤𑀺𑀲𑁂𑀦 𑀲𑀤𑁆𑀤𑁂𑀦 𑀩𑁆𑀭𑀳𑁆𑀫𑀅𑀧𑁆𑀨𑁄𑀝𑀦𑀁 𑀦𑀸𑀫 𑀅𑀧𑁆𑀨𑁄𑀝𑁂𑀲𑁆𑀲𑀸𑀫𑀻’’𑀢𑀺. 𑀫𑀳𑀸𑀚𑀦𑁄 ‘‘𑀓𑀺𑀁 𑀦𑀸𑀫𑁂𑀲𑁄 𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 ¶ 𑀩𑁆𑀭𑀳𑁆𑀫𑀅𑀧𑁆𑀨𑁄𑀝𑀦𑀲𑀤𑁆𑀤𑁄 𑀦𑀸𑀫𑀸’’𑀢𑀺 𑀯𑀓𑁆𑀔𑀢𑀺. 𑀢𑀺𑀢𑁆𑀣𑀺𑀬𑀸 ‘‘𑀕𑀳𑀧𑀢𑀺𑀓𑀲𑁆𑀲 𑀓𑀺𑀭 𑀢𑀸𑀯 𑀏𑀲𑁄 𑀆𑀦𑀼𑀪𑀸𑀯𑁄, 𑀩𑀼𑀤𑁆𑀥𑀸𑀦𑀼𑀪𑀸𑀯𑁄 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀼𑀫𑁆𑀳𑁂 𑀅𑀤𑀺𑀲𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀻𑀢𑀺. 𑀲𑀢𑁆𑀣𑀸 ‘‘𑀚𑀸𑀦𑀸𑀫𑀺 𑀢𑁂 𑀆𑀦𑀼𑀪𑀸𑀯’’𑀦𑁆𑀢𑀺 𑀢𑀲𑁆𑀲𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁 𑀦𑀸𑀦𑀼𑀚𑀸𑀦𑀺.

𑀅𑀣𑁂𑀓𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑀲𑀢𑁆𑀢𑀯𑀲𑁆𑀲𑀺𑀓𑀸 ¶ 𑀘𑀻𑀭𑀲𑀸𑀫𑀡𑁂𑀭𑀻 𑀓𑀺𑀭 𑀦𑀸𑀫 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀓𑀣𑀁 𑀓𑀭𑀺𑀲𑁆𑀲𑀲𑀺 𑀘𑀻𑀭𑁂’’𑀢𑀺? ‘‘𑀪𑀦𑁆𑀢𑁂, 𑀲𑀺𑀦𑁂𑀭𑀼𑀜𑁆𑀘 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀜𑁆𑀘 𑀳𑀺𑀫𑀯𑀦𑁆𑀢𑀜𑁆𑀘 𑀆𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀅𑀳𑀁 𑀳𑀁𑀲𑀲𑀓𑀼𑀡𑀻 𑀯𑀺𑀬 𑀢𑀢𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀲𑀚𑁆𑀚𑀫𑀸𑀦𑀸 𑀕𑀫𑀺𑀲𑁆𑀲𑀸𑀫𑀺, 𑀫𑀳𑀸𑀚𑀦𑁄 𑀫𑀁 𑀤𑀺𑀲𑁆𑀯𑀸 ‘𑀓𑀸 𑀏𑀲𑀸’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘𑀘𑀻𑀭𑀲𑀸𑀫𑀡𑁂𑀭𑀻’𑀢𑀺 𑀯𑀓𑁆𑀔𑀢𑀺. 𑀢𑀺𑀢𑁆𑀣𑀺𑀬𑀸 ‘𑀲𑀢𑁆𑀢𑀯𑀲𑁆𑀲𑀺𑀓𑀸𑀬 𑀢𑀸𑀯 𑀲𑀸𑀫𑀡𑁂𑀭𑀺𑀬𑀸 ¶ 𑀅𑀬𑀫𑀸𑀦𑀼𑀪𑀸𑀯𑁄, 𑀩𑀼𑀤𑁆𑀥𑀸𑀦𑀼𑀪𑀸𑀯𑁄 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀢𑀼𑀫𑁆𑀳𑁂 𑀅𑀤𑀺𑀲𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀢𑁄 𑀧𑀭𑀁 𑀏𑀯𑀭𑀽𑀧𑀸𑀦𑀺 𑀯𑀘𑀦𑀸𑀦𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀲𑁆𑀲𑀸𑀧𑀺 𑀪𑀕𑀯𑀸 ‘‘𑀚𑀸𑀦𑀸𑀫𑀺 𑀢𑁂 𑀆𑀦𑀼𑀪𑀸𑀯’’𑀦𑁆𑀢𑀺 𑀯𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁 𑀦𑀸𑀦𑀼𑀚𑀸𑀦𑀺. 𑀅𑀣𑁂𑀓𑁄 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄 𑀔𑀻𑀡𑀸𑀲𑀯𑁄 𑀘𑀼𑀦𑁆𑀤𑀲𑀸𑀫𑀡𑁂𑀭𑁄 𑀦𑀸𑀫 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀪𑀕𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀝𑁆𑀞𑁄 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀚𑀫𑁆𑀩𑀼𑀤𑀻𑀧𑀲𑁆𑀲 𑀥𑀚𑀪𑀽𑀢𑀁 𑀫𑀳𑀸𑀚𑀫𑁆𑀩𑀼𑀭𑀼𑀓𑁆𑀔𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀫𑀳𑀸𑀚𑀫𑁆𑀩𑀼𑀧𑁂𑀲𑀺𑀬𑁄 𑀆𑀳𑀭𑀺𑀢𑁆𑀯𑀸 𑀇𑀫𑀁 𑀧𑀭𑀺𑀲𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀺, 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑀼𑀲𑀼𑀫𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀢𑀼𑀫𑁆𑀳𑁂 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 ‘‘𑀚𑀸𑀦𑀸𑀫𑀺 𑀢𑁂 𑀆𑀦𑀼𑀪𑀸𑀯’’𑀦𑁆𑀢𑀺 𑀢𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀺.

𑀅𑀣 𑀉𑀧𑁆𑀧𑀮𑀯𑀡𑁆𑀡𑀸 𑀣𑁂𑀭𑀻 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀝𑁆𑀞𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀧𑀭𑀺𑀲𑀁 𑀤𑀲𑁆𑀲𑁂𑀢𑁆𑀯𑀸 𑀆𑀯𑀝𑁆𑀝𑀢𑁄 𑀙𑀢𑁆𑀢𑀺𑀁𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀼𑀫𑁆𑀳𑁂 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 ¶ . 𑀲𑀢𑁆𑀣𑀸 ‘‘𑀚𑀸𑀦𑀸𑀫𑀺 𑀢𑁂 𑀆𑀦𑀼𑀪𑀸𑀯’’𑀦𑁆𑀢𑀺 𑀢𑀲𑁆𑀲𑀸𑀧𑀺 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀝𑁆𑀞𑁄 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸𑀦𑀁 𑀤𑀦𑁆𑀢𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀫𑀸𑀲𑀲𑀸𑀲𑀧𑀩𑀻𑀚𑀁 𑀯𑀺𑀬 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀇𑀫𑀁 𑀫𑀳𑀸𑀧𑀣𑀯𑀺𑀁 𑀓𑀝𑀲𑀸𑀭𑀓𑀁 𑀯𑀺𑀬 𑀲𑀁𑀯𑁂𑀮𑁆𑀮𑀺𑀢𑁆𑀯𑀸 𑀅𑀗𑁆𑀕𑀼𑀮𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀫𑀳𑀸𑀧𑀣𑀯𑀺𑀁 𑀓𑀼𑀮𑀸𑀮𑀘𑀓𑁆𑀓𑀁 𑀯𑀺𑀬 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀳𑀸𑀚𑀦𑀁 𑀧𑀣𑀯𑁄𑀚𑀁 ¶ 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀯𑀸𑀫𑀳𑀢𑁆𑀣𑁂 𑀧𑀣𑀯𑀺𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑁂 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀅𑀜𑁆𑀜𑀲𑁆𑀫𑀺𑀁 𑀤𑀻𑀧𑁂 𑀞𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀲𑀺𑀦𑁂𑀭𑀼𑀁 𑀙𑀢𑁆𑀢𑀤𑀡𑁆𑀟𑀁 𑀯𑀺𑀬 𑀓𑀢𑁆𑀯𑀸 𑀫𑀳𑀸𑀧𑀣𑀯𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀞𑀧𑁂𑀢𑁆𑀯𑀸 𑀙𑀢𑁆𑀢𑀳𑀢𑁆𑀣𑁄 𑀪𑀺𑀓𑁆𑀔𑀼 𑀯𑀺𑀬 𑀏𑀓𑀳𑀢𑁆𑀣𑁂𑀦𑀸𑀤𑀸𑀬 𑀆𑀓𑀸𑀲𑁂 𑀘𑀗𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 ‘‘𑀚𑀸𑀦𑀸𑀫𑀺 𑀢𑁂 𑀆𑀦𑀼𑀪𑀸𑀯’’𑀦𑁆𑀢𑀺 𑀢𑀲𑁆𑀲𑀧𑀺 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁 𑀦𑀸𑀦𑀼𑀚𑀸𑀦𑀺. 𑀲𑁄 ‘‘𑀚𑀸𑀦𑀸𑀢𑀺 𑀫𑀜𑁆𑀜𑁂 𑀲𑀢𑁆𑀣𑀸 𑀫𑀬𑀸 𑀉𑀢𑁆𑀢𑀭𑀺𑀢𑀭𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣’’𑀦𑁆𑀢𑀺 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀦𑀸𑀬𑀁 𑀫𑁄𑀕𑁆𑀕𑀮𑁆𑀮𑀸𑀦𑀁 𑀢𑀯𑀢𑁆𑀣𑀸𑀬 𑀩𑀤𑁆𑀥𑁄 𑀩𑀸𑀮𑀸𑀧𑀼𑀝𑁄. 𑀅𑀳𑀜𑁆𑀳𑀺 𑀅𑀲𑀫𑀥𑀼𑀭𑁄, 𑀫𑀫 𑀥𑀼𑀭𑀁 𑀅𑀜𑁆𑀜𑁄 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀦𑀘𑁆𑀙𑀭𑀺𑀬𑀫𑁂𑀢𑀁, 𑀬𑀁 𑀇𑀤𑀸𑀦𑀺 𑀫𑀫 𑀥𑀼𑀭𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀪𑀯𑁂𑀬𑁆𑀬. 𑀅𑀳𑁂𑀢𑀼𑀓𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑁂𑀧𑀺 𑀫𑀫 𑀥𑀼𑀭𑀁 𑀅𑀜𑁆𑀜𑁄 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀓𑀤𑀸 ¶ 𑀧𑀦, 𑀪𑀦𑁆𑀢𑁂’’𑀢𑀺 𑀣𑁂𑀭𑁂𑀦 𑀧𑀼𑀝𑁆𑀞𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀬𑀢𑁄 ¶ 𑀬𑀢𑁄 𑀕𑀭𑀼 𑀥𑀼𑀭𑀁, 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻;

𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀺, 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭’’𑀦𑁆𑀢𑀺. 𑁋

𑀇𑀤𑀁 𑀓𑀡𑁆𑀳𑀉𑀲𑀪𑀚𑀸𑀢𑀓𑀁 (𑀚𑀸. 𑁧.𑁧.𑁨𑁯) 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀧𑀼𑀦 𑀢𑀫𑁂𑀯 𑀯𑀢𑁆𑀣𑀼𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬, 𑀦𑀸𑀫𑀦𑀼𑀜𑁆𑀜𑀁 𑀓𑀼𑀤𑀸𑀘𑀦𑀁;

𑀫𑀦𑀼𑀜𑁆𑀜𑀁 𑀪𑀸𑀲𑀫𑀸𑀦𑀲𑁆𑀲, 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀺;

𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀺, 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀽’’𑀢𑀺. 𑁋

𑀇𑀤𑀁 𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺. 𑀓𑀣𑁂𑀢𑁆𑀯𑀸 𑀘 𑀧𑀦 𑀲𑀢𑁆𑀣𑀸 𑀭𑀢𑀦𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀺, 𑀧𑀼𑀭𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀧𑀭𑀺𑀲𑀸 𑀅𑀳𑁄𑀲𑀺 𑀢𑀣𑀸 𑀧𑀘𑁆𑀙𑀢𑁄 𑀘 𑀉𑀢𑁆𑀢𑀭𑀢𑁄 𑀘 𑀤𑀓𑁆𑀔𑀺𑀡𑀢𑁄 𑀘. 𑀉𑀚𑀼𑀓𑀁 𑀧𑀦 𑀘𑀢𑀼𑀯𑀻𑀲𑀢𑀺𑀬𑁄𑀚𑀦𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀪𑀕𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺.

𑀢𑀁 𑀧𑀸𑀴𑀺𑀢𑁄 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 (𑀧𑀝𑀺. 𑀫. 𑁧.𑁧𑁧𑁬) 𑁋 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀜𑀸𑀡𑀁? 𑀇𑀥𑀁 𑀢𑀣𑀸𑀕𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀺 𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀺, 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 ¶ 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺 ¶ . 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄, 𑀧𑀘𑁆𑀙𑀺𑀫𑀓𑀸𑀬𑀢𑁄; 𑀧𑀘𑁆𑀙𑀺𑀫𑀓𑀸𑀬𑀢𑁄, 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄; 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄, 𑀯𑀸𑀫𑀅𑀓𑁆𑀔𑀺𑀢𑁄; 𑀯𑀸𑀫𑀅𑀓𑁆𑀔𑀺𑀢𑁄, 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄; 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄, 𑀯𑀸𑀫𑀓𑀡𑁆𑀡𑀲𑁄𑀢𑀢𑁄; 𑀯𑀸𑀫𑀓𑀡𑁆𑀡𑀲𑁄𑀢𑀢𑁄, 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄; 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄, 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄; 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄, 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄; 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄, 𑀯𑀸𑀫𑀅𑀁𑀲𑀓𑀽𑀝𑀢𑁄; 𑀯𑀸𑀫𑀅𑀁𑀲𑀓𑀽𑀝𑀢𑁄, 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄; 𑀤𑀓𑁆𑀔𑀺𑀡𑀳𑀢𑁆𑀣𑀢𑁄, 𑀯𑀸𑀫𑀳𑀢𑁆𑀣𑀢𑁄; 𑀯𑀸𑀫𑀳𑀢𑁆𑀣𑀢𑁄, 𑀤𑀓𑁆𑀔𑀺𑀡𑀳𑀢𑁆𑀣𑀢𑁄; 𑀤𑀓𑁆𑀔𑀺𑀡𑀧𑀲𑁆𑀲𑀢𑁄, 𑀯𑀸𑀫𑀧𑀲𑁆𑀲𑀢𑁄; 𑀯𑀸𑀫𑀧𑀲𑁆𑀲𑀢𑁄, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄; 𑀤𑀓𑁆𑀔𑀺𑀡𑀧𑀸𑀤𑀢𑁄, 𑀯𑀸𑀫𑀧𑀸𑀤𑀢𑁄; 𑀯𑀸𑀫𑀧𑀸𑀤𑀢𑁄, 𑀤𑀓𑁆𑀔𑀺𑀡𑀧𑀸𑀤𑀢𑁄; 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺, 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺; 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺, 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺; 𑀏𑀓𑁂𑀓𑀮𑁄𑀫𑀓𑀽𑀧𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀏𑀓𑁂𑀓𑀮𑁄𑀫𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀏𑀓𑁂𑀓𑀮𑁄𑀫𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀏𑀓𑁂𑀓𑀮𑁄𑀫𑀓𑀽𑀧𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀦𑀻𑀮𑀸𑀦𑀁 𑀧𑀻𑀢𑀓𑀸𑀦𑀁 𑀮𑁄𑀳𑀺𑀢𑀓𑀸𑀦𑀁 𑀑𑀤𑀸𑀢𑀸𑀦𑀁 𑀫𑀜𑁆𑀚𑁂𑀝𑁆𑀞𑀸𑀦𑀁 𑀧𑀪𑀲𑁆𑀲𑀭𑀸𑀦𑀁. 𑀪𑀕𑀯𑀸 𑀘𑀗𑁆𑀓𑀫𑀢𑀺, 𑀩𑀼𑀤𑁆𑀥𑀦𑀺𑀫𑁆𑀫𑀺𑀢𑁄 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺…𑀧𑁂… 𑀦𑀺𑀫𑁆𑀫𑀺𑀢𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸. 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀜𑀸𑀡𑀦𑁆𑀢𑀺.

𑀇𑀤𑀁 ¶ 𑀧𑀦 𑀧𑀸𑀝𑀺𑀳𑀸𑀭𑀺𑀬𑀁 𑀪𑀕𑀯𑀸 𑀢𑀲𑁆𑀫𑀺𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑁆𑀯𑀸 𑀅𑀓𑀸𑀲𑀺. 𑀢𑀲𑁆𑀲 𑀢𑁂𑀚𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀆𑀧𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 ¶ 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀦 𑀧𑀦 𑀉𑀤𑀓𑀥𑀸𑀭𑀸𑀬 𑀧𑀯𑀢𑁆𑀢𑀦𑀝𑁆𑀞𑀸𑀦𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑁆𑀲 𑀧𑀯𑀢𑁆𑀢𑀦𑀝𑁆𑀞𑀸𑀦𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀧𑀭𑀺𑀫𑀓𑀸𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀦𑁂𑀢𑁆𑀣 𑀉𑀤𑀓𑀥𑀸𑀭𑀸𑀬 𑀅𑀲𑀫𑁆𑀫𑀺𑀲𑁆𑀲𑁄 𑀅𑀳𑁄𑀲𑀺, 𑀢𑀣𑀸 𑀉𑀤𑀓𑀥𑀸𑀭𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀦. 𑀉𑀪𑀬𑀫𑁆𑀧𑀺 𑀓𑀺𑀭 𑀘𑁂𑀢𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀢𑀢𑀺. ‘‘𑀙𑀦𑁆𑀦𑀁 𑀯𑀡𑁆𑀡𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸 𑀧𑀦𑀲𑁆𑀲 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀖𑀝𑁂𑀳𑀺 𑀆𑀲𑀺𑀜𑁆𑀘𑀫𑀸𑀦𑀁 𑀯𑀺𑀮𑀻𑀦𑀲𑀼𑀯𑀡𑁆𑀡𑀁 𑀯𑀺𑀬 𑀬𑀦𑁆𑀢𑀦𑀸𑀮𑀺𑀓𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸 𑀯𑀺𑀬 𑀘 𑀏𑀓𑀘𑀓𑁆𑀓𑀯𑀸𑀴𑀕𑀩𑁆𑀪𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀆𑀳𑀘𑁆𑀘 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 ¶ 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀫𑁂𑀯 𑀕𑀡𑁆𑀳𑀺𑀁𑀲𑀼. 𑀏𑀓𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀯𑀗𑁆𑀓𑀕𑁄𑀧𑀸𑀦𑀲𑀺𑀓𑀁 𑀯𑀺𑀬 𑀩𑁄𑀥𑀺𑀖𑀭𑀁 𑀅𑀳𑁄𑀲𑀺 𑀏𑀓𑀸𑀮𑁄𑀓𑀁.

𑀢𑀁𑀤𑀺𑀯𑀲𑀁 𑀲𑀢𑁆𑀣𑀸 𑀘𑀗𑁆𑀓𑀫𑀺𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀘 𑀚𑀦𑀁 𑀦𑀺𑀭𑀲𑁆𑀲𑀸𑀲𑀁 𑀅𑀓𑀢𑁆𑀯𑀸 𑀢𑀲𑁆𑀲 𑀅𑀲𑁆𑀲𑀸𑀲𑀯𑀸𑀭𑀁 𑀤𑁂𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀢𑀲𑁆𑀲 𑀲𑀸𑀥𑀼𑀓𑀸𑀭𑀧𑀯𑀢𑁆𑀢𑀦𑀓𑀸𑀮𑁂 𑀲𑀢𑁆𑀣𑀸 𑀢𑀸𑀯𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀘𑀺𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑁂𑀓𑀲𑁆𑀲 𑀲𑁄𑀴𑀲𑀦𑁆𑀦𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀸𑀘𑀸𑀭𑀁 𑀅𑀜𑁆𑀜𑀸𑀲𑀺. 𑀏𑀯𑀁 𑀮𑀳𑀼𑀓𑀧𑀭𑀺𑀯𑀢𑁆𑀢𑀁 𑀩𑀼𑀤𑁆𑀥𑀸𑀦𑀁 𑀘𑀺𑀢𑁆𑀢𑀁 ¶ . 𑀬𑁄 𑀬𑁄 𑀬𑀲𑁆𑀫𑀺𑀜𑁆𑀘 𑀥𑀫𑁆𑀫𑁂 𑀬𑀲𑁆𑀫𑀺𑀜𑁆𑀘 𑀧𑀸𑀝𑀺𑀳𑀻𑀭𑁂 𑀧𑀲𑀦𑁆𑀦𑁄, 𑀢𑀲𑁆𑀲 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦𑁂𑀯 𑀥𑀫𑁆𑀫𑀜𑁆𑀘 𑀓𑀣𑁂𑀲𑀺, 𑀧𑀸𑀝𑀺𑀳𑀻𑀭𑀜𑁆𑀘 𑀅𑀓𑀸𑀲𑀺. 𑀏𑀯𑀁 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀧𑀸𑀝𑀺𑀳𑀻𑀭𑁂 𑀘 𑀓𑀭𑀺𑀬𑀫𑀸𑀦𑁂 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀅𑀢𑁆𑀢𑀦𑁄 𑀫𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑀺. 𑀢𑁂𑀦 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀲𑀢𑁆𑀣𑀸 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀢𑁆𑀣𑀸𑀭𑀸 𑀧𑀼𑀘𑁆𑀙𑀺𑀢𑀁 𑀲𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀪𑀕𑀯𑀢𑁄 𑀘𑀗𑁆𑀓𑀫𑀦𑀓𑀸𑀮𑁂 𑀦𑀺𑀫𑁆𑀫𑀺𑀢𑁄 𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀧𑁆𑀧𑁂𑀲𑀺, 𑀦𑀺𑀫𑁆𑀫𑀺𑀢𑀲𑁆𑀲 𑀘𑀗𑁆𑀓𑀫𑀦𑀓𑀸𑀮𑁂 𑀪𑀕𑀯𑀸 𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀧𑁆𑀧𑁂𑀲𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀲𑀢𑁆𑀣𑀼 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀯𑀻𑀲𑀢𑀺𑀬𑀸 𑀧𑀸𑀡𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀧𑀸𑀝𑀺𑀳𑀻𑀭𑀁 𑀓𑀭𑁄𑀦𑁆𑀢𑁄𑀯 ‘‘𑀓𑀢𑁆𑀣 𑀦𑀼 𑀔𑁄 𑀅𑀢𑀻𑀢𑀩𑀼𑀤𑁆𑀥𑀸 𑀇𑀤𑀁 𑀧𑀸𑀝𑀺𑀳𑀻𑀭𑀁 𑀓𑀢𑁆𑀯𑀸 𑀯𑀲𑁆𑀲𑀁 𑀉𑀧𑁂𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀢𑀸𑀯𑀢𑀺𑀁𑀲𑀪𑀯𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀸𑀢𑀼 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑀤𑀓𑁆𑀔𑀺𑀡𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀞𑀧𑁂𑀲𑀺. 𑀏𑀯𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀝𑁆𑀞𑀸𑀦𑁂 𑀢𑀬𑁄 𑀧𑀤𑀯𑀸𑀭𑀸 𑀅𑀳𑁂𑀲𑀼𑀁, 𑀤𑁆𑀯𑁂 𑀧𑀸𑀤𑀙𑀺𑀤𑁆𑀤𑀸𑀦𑀺. 𑀲𑀢𑁆𑀣𑀸 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀅𑀓𑁆𑀓𑀫𑀻𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀢𑀲𑁆𑀲 𑀳𑀺 𑀧𑀸𑀤𑀼𑀓𑁆𑀔𑀺𑀧𑀦𑀓𑀸𑀮𑁂𑀬𑁂𑀯 𑀧𑀩𑁆𑀩𑀢𑀸 𑀧𑀸𑀤𑀫𑀽𑀮𑀁 ¶ 𑀆𑀕𑀦𑁆𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀲𑀢𑁆𑀣𑀸𑀭𑀸 𑀅𑀓𑁆𑀓𑀫𑀦𑀓𑀸𑀮𑁂 𑀢𑁂 𑀧𑀩𑁆𑀩𑀢𑀸 𑀉𑀝𑁆𑀞𑀸𑀬 𑀲𑀓𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀁𑀲𑀼. 𑀲𑀓𑁆𑀓𑁄 𑀲𑀢𑁆𑀣𑀸𑀭𑀁 ¶ 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬 𑀫𑀜𑁆𑀜𑁂 𑀲𑀢𑁆𑀣𑀸 𑀇𑀫𑀁 𑀯𑀲𑁆𑀲𑀸𑀯𑀸𑀲𑀁 𑀉𑀧𑁂𑀲𑁆𑀲𑀢𑀺, 𑀩𑀳𑀽𑀦𑀜𑁆𑀘 𑀤𑁂𑀯𑀢𑀸𑀦𑀁 𑀉𑀧𑀓𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀭𑀺 𑀧𑀦𑁂𑀢𑁆𑀣 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑁂 𑀅𑀜𑁆𑀜𑀸 𑀤𑁂𑀯𑀢𑀸 𑀳𑀢𑁆𑀣𑀫𑁆𑀧𑀺 𑀞𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀔𑁄 ¶ 𑀧𑀦 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸 𑀤𑀻𑀖𑀢𑁄 𑀲𑀝𑁆𑀞𑀺𑀬𑁄𑀚𑀦𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀡𑁆𑀡𑀸𑀲𑀬𑁄𑀚𑀦𑀸, 𑀧𑀼𑀣𑀼𑀮𑀢𑁄 𑀧𑀦𑁆𑀦𑀭𑀲𑀬𑁄𑀚𑀦𑀸, 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂𑀧𑀺 𑀢𑀼𑀘𑁆𑀙𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀗𑁆𑀖𑀸𑀝𑀺𑀁 𑀲𑀺𑀮𑀸𑀲𑀦𑀁 𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑀁 𑀔𑀺𑀧𑀺. 𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀘𑀻𑀯𑀭𑀁 𑀢𑀸𑀯 𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑀁 𑀔𑀺𑀧𑀺, 𑀲𑀬𑀁 𑀧𑀦 𑀧𑀭𑀺𑀢𑁆𑀢𑀓𑁂 𑀞𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀦𑀻𑀘𑀧𑀻𑀞𑀓𑀁 𑀫𑀳𑀸𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀁 𑀅𑀦𑁆𑀢𑁄𑀘𑀻𑀯𑀭𑀪𑁄𑀕𑁂𑀬𑁂𑀯 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀫𑀳𑀸𑀚𑀦𑁄𑀧𑀺 𑀢𑀁𑀔𑀡𑀜𑁆𑀜𑁂𑀯 𑀲𑀢𑁆𑀣𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀦𑀸𑀤𑁆𑀤𑀲, 𑀘𑀦𑁆𑀤𑀲𑁆𑀲 𑀅𑀢𑁆𑀣𑀗𑁆𑀕𑀫𑀺𑀢𑀓𑀸𑀮𑁄 𑀯𑀺𑀬 𑀲𑀽𑀭𑀺𑀬𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀺𑀢𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑁋

‘‘𑀕𑀢𑁄 𑀦𑀼 𑀘𑀺𑀢𑁆𑀢𑀓𑀽𑀝𑀁 𑀯𑀸, 𑀓𑁂𑀮𑀸𑀲𑀁 𑀯𑀸 𑀬𑀼𑀕𑀦𑁆𑀥𑀭𑀁;

𑀦 𑀦𑁄 𑀤𑀓𑁆𑀔𑁂𑀫𑀼 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪’’𑀦𑁆𑀢𑀺. 𑁋

𑀇𑀫𑀁 ¶ 𑀕𑀸𑀣𑀁 𑀯𑀤𑀦𑁆𑀢𑁄 𑀧𑀭𑀺𑀤𑁂𑀯𑀺. 𑀅𑀧𑀭𑁂 ‘‘𑀲𑀢𑁆𑀣𑀸 𑀦𑀸𑀫 𑀧𑀯𑀺𑀯𑁂𑀓𑀭𑀢𑁄, 𑀲𑁄 ‘𑀏𑀯𑀭𑀽𑀧𑀸𑀬 𑀫𑁂 𑀧𑀭𑀺𑀲𑀸𑀬 𑀏𑀯𑀭𑀽𑀧𑀁 𑀧𑀸𑀝𑀺𑀳𑀻𑀭𑀁 𑀓𑀢’𑀦𑁆𑀢𑀺 𑀮𑀚𑁆𑀚𑀸𑀬 𑀅𑀜𑁆𑀜𑀁 𑀭𑀝𑁆𑀞𑀁 𑀯𑀸 𑀚𑀦𑀧𑀤𑀁 𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀤𑀸𑀦𑀺 𑀢𑀁 𑀤𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀤𑁂𑀯𑀦𑁆𑀢𑀸 𑀇𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

‘‘𑀧𑀯𑀺𑀯𑁂𑀓𑀭𑀢𑁄 𑀥𑀻𑀭𑁄, 𑀦𑀺𑀫𑀁 𑀮𑁄𑀓𑀁 𑀧𑀼𑀦𑁂𑀳𑀺𑀢𑀺;

𑀦 𑀦𑁄 𑀤𑀓𑁆𑀔𑁂𑀫𑀼 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪’’𑀦𑁆𑀢𑀺.

𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀸’’𑀢𑀺? 𑀲𑁄 𑀲𑀬𑀁 𑀚𑀸𑀦𑀦𑁆𑀢𑁄𑀧𑀺 ‘‘𑀧𑀭𑁂𑀲𑀫𑁆𑀧𑀺 𑀕𑀼𑀡𑀸 𑀧𑀸𑀓𑀝𑀸 𑀳𑁄𑀦𑁆𑀢𑀽’’𑀢𑀺 𑀅𑀚𑁆𑀛𑀸𑀲𑀬𑁂𑀦 ‘‘𑀅𑀦𑀼𑀭𑀼𑀤𑁆𑀥𑀁 𑀧𑀼𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 𑀣𑁂𑀭𑀁 𑀢𑀣𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀸’’𑀢𑀺? 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀸𑀢𑀼 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀢𑀼𑀁 𑀕𑀢𑁄𑀢𑀺. ‘‘𑀓𑀤𑀸 𑀆𑀕𑀫𑀺𑀲𑁆𑀲𑀢𑀺, 𑀪𑀦𑁆𑀢𑁂’’𑀢𑀺? ‘‘𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀤𑀺𑀯𑀲𑁂’’𑀢𑀺. 𑀢𑁂 ‘‘𑀲𑀢𑁆𑀣𑀸𑀭𑀁 𑀅𑀤𑀺𑀲𑁆𑀯𑀸 𑀦 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣𑁂𑀯 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀁𑀲𑀼. 𑀆𑀓𑀸𑀲𑀫𑁂𑀯 𑀓𑀺𑀭 𑀦𑁂𑀲𑀁 𑀙𑀤𑀦𑀁 𑀅𑀳𑁄𑀲𑀺. 𑀢𑀸𑀬 𑀘 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀲𑀭𑀻𑀭𑀦𑀺𑀖𑀁𑀲𑁄 𑀦𑀸𑀫 𑀦 𑀧𑀜𑁆𑀜𑀸𑀬𑀺, 𑀧𑀣𑀯𑀻 𑀯𑀺𑀯𑀭𑀁 𑀅𑀤𑀸𑀲𑀺, 𑀲𑀩𑁆𑀩𑀢𑁆𑀣 𑀧𑀭𑀺𑀲𑀼𑀤𑁆𑀥𑀫𑁂𑀯 𑀪𑀽𑀫𑀺𑀢𑀮𑀁 𑀅𑀳𑁄𑀲𑀺.

𑀲𑀢𑁆𑀣𑀸 𑀧𑀞𑀫𑀫𑁂𑀯 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀅𑀯𑁄𑀘 𑁋 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀢𑁆𑀯𑀁 𑀏𑀢𑀺𑀲𑁆𑀲𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸𑀲𑀺, 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀆𑀳𑀸𑀭𑀁 𑀤𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 ¶ 𑀢𑀁 𑀢𑁂𑀫𑀸𑀲𑀁 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀯 𑀢𑀲𑁆𑀲𑀸 ¶ 𑀧𑀭𑀺𑀲𑀸𑀬 𑀬𑀸𑀧𑀦𑀁 𑀬𑀸𑀕𑀼𑀪𑀢𑁆𑀢𑀁 ¶ 𑀔𑀸𑀤𑀦𑀻𑀬𑀁 𑀢𑀫𑁆𑀩𑀼𑀮𑀢𑁂𑀮𑀕𑀦𑁆𑀥𑀫𑀸𑀮𑀸𑀧𑀺𑀮𑀦𑁆𑀥𑀦𑀸𑀦𑀺 𑀘 𑀅𑀤𑀸𑀲𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑀸𑀕𑀢𑁂𑀳𑀺 𑀧𑀼𑀝𑁆𑀞𑀧𑀜𑁆𑀳𑁂 𑀘 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀢𑁆𑀣𑀸𑀭𑀫𑁆𑀧𑀺 𑀫𑀸𑀢𑀼 𑀅𑀪𑀺𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀉𑀧𑀕𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀸𑀯𑀢𑀺𑀁𑀲𑁂 𑀬𑀤𑀸 𑀩𑀼𑀤𑁆𑀥𑁄, 𑀲𑀺𑀮𑀸𑀬𑀁 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑀫𑁆𑀳𑀺, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

‘‘𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀦 𑀤𑁂𑀯𑀢𑀸;

𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀯𑀲𑀦𑁆𑀢𑀁 𑀦𑀸𑀕𑀫𑀼𑀤𑁆𑀥𑀦𑀺.

‘‘𑀦 𑀓𑁄𑀘𑀺 𑀤𑁂𑀯𑁄 𑀯𑀡𑁆𑀡𑁂𑀦, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀭𑁄𑀘𑀢𑀺;

𑀲𑀩𑁆𑀩𑁂 𑀤𑁂𑀯𑁂 𑀅𑀢𑀺𑀓𑁆𑀓𑀫𑁆𑀫, 𑀲𑀫𑁆𑀩𑀼𑀤𑁆𑀥𑁄𑀯 𑀯𑀺𑀭𑁄𑀘𑀢𑀻’’𑀢𑀺. (𑀧𑁂. 𑀯. 𑁩𑁧𑁭-𑁩𑁧𑁯);

𑀏𑀯𑀁 𑀲𑀩𑁆𑀩𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀅𑀪𑀺𑀪𑀯𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦𑀲𑁆𑀲 𑀫𑀸𑀢𑀸 𑀢𑀼𑀲𑀺𑀢𑀯𑀺𑀫𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀻𑀤𑀺. 𑀇𑀦𑁆𑀤𑀓𑁄𑀧𑀺 𑀤𑁂𑀯𑀧𑀼𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑁂𑀬𑁂𑀯 𑀦𑀺𑀲𑀻𑀤𑀺, 𑀅𑀗𑁆𑀓𑀼𑀭𑁄 𑀯𑀸𑀫𑀧𑀲𑁆𑀲𑁂 𑀦𑀺𑀲𑀻𑀤𑀺. 𑀲𑁄 𑀫𑀳𑁂𑀲𑀓𑁆𑀔𑀸𑀲𑀼 𑀤𑁂𑀯𑀢𑀸𑀲𑀼 𑀲𑀦𑁆𑀦𑀺𑀧𑀢𑀦𑁆𑀢𑀻𑀲𑀼 𑀅𑀧𑀕𑀦𑁆𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀞𑀸𑀦𑁂 𑀑𑀓𑀸𑀲𑀁 𑀮𑀪𑀺, 𑀇𑀦𑁆𑀤𑀓𑁄 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂 𑀉𑀪𑁄𑀧𑀺 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀤𑀺𑀦𑁆𑀦𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀁 𑀜𑀸𑀧𑁂𑀢𑀼𑀓𑀸𑀫𑁄 𑀏𑀯𑀫𑀸𑀳 𑁋 ‘‘𑀅𑀗𑁆𑀓𑀼𑀭, 𑀢𑀬𑀸 𑀤𑀻𑀖𑀫𑀦𑁆𑀢𑀭𑁂 𑀤𑀲𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀉𑀤𑁆𑀥𑀦𑀧𑀦𑁆𑀢𑀺𑀁 𑀓𑀢𑁆𑀯𑀸 𑀫𑀳𑀸𑀤𑀸𑀦𑀁 ¶ 𑀤𑀺𑀦𑁆𑀦𑀁, 𑀇𑀤𑀸𑀦𑀺 𑀫𑀫 𑀲𑀫𑀸𑀕𑀫𑀁 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀞𑀸𑀦𑁂 𑀑𑀓𑀸𑀲𑀁 𑀮𑀪𑀺, 𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺? 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀑𑀮𑁄𑀓𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀅𑀗𑁆𑀓𑀼𑀭𑀜𑁆𑀘𑀸𑀧𑀺 𑀇𑀦𑁆𑀤𑀓𑀁;

𑀤𑀓𑁆𑀔𑀺𑀡𑁂𑀬𑁆𑀬𑀁 𑀲𑀫𑁆𑀪𑀸𑀯𑁂𑀦𑁆𑀢𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀫𑀳𑀸𑀤𑀸𑀦𑀁 ¶ 𑀢𑀬𑀸 𑀤𑀺𑀦𑁆𑀦𑀁, 𑀅𑀗𑁆𑀓𑀼𑀭 𑀤𑀻𑀖𑀫𑀦𑁆𑀢𑀭𑁂;

𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄𑀲𑀺, 𑀆𑀕𑀘𑁆𑀙 𑀫𑀫 𑀲𑀦𑁆𑀢𑀺𑀓𑁂’’𑀢𑀺. (𑀧𑁂. 𑀯. 𑁩𑁨𑁧-𑁩𑁨𑁨);

𑀲𑁄 𑀲𑀤𑁆𑀥𑁄 𑀧𑀣𑀯𑀻𑀢𑀮𑀁 𑀧𑀸𑀧𑀼𑀡𑀺. 𑀲𑀩𑁆𑀩𑀸𑀧𑀺 𑀦𑀁 𑀲𑀸 𑀧𑀭𑀺𑀲𑀸 𑀅𑀲𑁆𑀲𑁄𑀲𑀺. 𑀏𑀯𑀁 𑀯𑀼𑀢𑁆𑀢𑁂 𑁋

‘‘𑀘𑁄𑀤𑀺𑀢𑁄 ¶ 𑀪𑀸𑀯𑀺𑀢𑀢𑁆𑀢𑁂𑀦, 𑀅𑀗𑁆𑀓𑀼𑀭𑁄 𑀏𑀢𑀫𑀩𑁆𑀭𑀯𑀺;

𑀓𑀺𑀁 𑀫𑀬𑁆𑀳𑀁 𑀢𑁂𑀦 𑀤𑀸𑀦𑁂𑀦, 𑀤𑀓𑁆𑀔𑀺𑀡𑁂𑀬𑁆𑀬𑁂𑀦 𑀲𑀼𑀜𑁆𑀜𑀢𑀁.

‘‘𑀅𑀬𑀁 𑀲𑁄 𑀇𑀦𑁆𑀤𑀓𑁄 𑀬𑀓𑁆𑀔𑁄, 𑀤𑀚𑁆𑀚𑀸 𑀤𑀸𑀦𑀁 𑀧𑀭𑀺𑀢𑁆𑀢𑀓𑀁;

𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀺, 𑀘𑀦𑁆𑀤𑁄 𑀢𑀸𑀭𑀸𑀕𑀡𑁂 𑀬𑀣𑀸’’𑀢𑀺. (𑀧𑁂. 𑀯. 𑁩𑁨𑁩-𑁩𑁨𑁪);

𑀢𑀢𑁆𑀣 𑀤𑀚𑁆𑀚𑀸𑀢𑀺 𑀤𑀢𑁆𑀯𑀸. 𑀏𑀯𑀁 𑀯𑀼𑀢𑁆𑀢𑁂 𑀲𑀢𑁆𑀣𑀸 𑀇𑀦𑁆𑀤𑀓𑀁 𑀆𑀳 𑁋 ‘‘𑀇𑀦𑁆𑀤𑀓, 𑀢𑁆𑀯𑀁 𑀫𑀫 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑁄, 𑀓𑀲𑁆𑀫𑀸 𑀅𑀦𑀧𑀕𑀦𑁆𑀢𑁆𑀯𑀸𑀯 𑀦𑀺𑀲𑀻𑀤𑀲𑀻’’𑀢𑀺? 𑀲𑁄 ‘‘𑀅𑀳𑀁, 𑀪𑀦𑁆𑀢𑁂, 𑀲𑀼𑀔𑁂𑀢𑁆𑀢𑁂 𑀅𑀧𑁆𑀧𑀓𑀩𑀻𑀚𑀁 𑀯𑀧𑀦𑀓𑀲𑁆𑀲𑀓𑁄 𑀯𑀺𑀬 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀤𑀁 𑀅𑀮𑀢𑁆𑀣’’𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀪𑀸𑀯𑁂𑀦𑁆𑀢𑁄 𑀆𑀳 𑁋

‘‘𑀉𑀚𑁆𑀚𑀗𑁆𑀕𑀮𑁂 𑀬𑀣𑀸 𑀔𑁂𑀢𑁆𑀢𑁂, 𑀩𑀻𑀚𑀁 𑀩𑀳𑀼𑀫𑁆𑀧𑀺 𑀭𑁄𑀧𑀺𑀢𑀁;

𑀦 𑀨𑀮𑀁 𑀯𑀺𑀧𑀼𑀮𑀁 𑀳𑁄𑀢𑀺, 𑀦𑀧𑀺 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

‘‘𑀢𑀣𑁂𑀯 𑀤𑀸𑀦𑀁 𑀩𑀳𑀼𑀓𑀁, 𑀤𑀼𑀲𑁆𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀁;

𑀦 𑀨𑀮𑀁 𑀯𑀺𑀧𑀼𑀮𑀁 𑀳𑁄𑀢𑀺, 𑀦𑀧𑀺 𑀢𑁄𑀲𑁂𑀢𑀺 𑀤𑀸𑀬𑀓𑀁.

‘‘𑀬𑀣𑀸𑀧𑀺 ¶ 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸 𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

‘‘𑀢𑀣𑁂𑀯 𑀲𑀻𑀮𑀯𑀦𑁆𑀢𑁂𑀲𑀼, 𑀕𑀼𑀡𑀯𑀦𑁆𑀢𑁂𑀲𑀼 𑀢𑀸𑀤𑀺𑀲𑀼;

𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀓𑀸𑀭𑀁, 𑀧𑀼𑀜𑁆𑀜𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺. (𑀧𑁂. 𑀯. 𑁩𑁨𑁫-𑁩𑁨𑁮);

𑀓𑀺𑀁 𑀧𑀦𑁂𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺? 𑀲𑁄 𑀓𑀺𑀭 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁄𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀅𑀢𑁆𑀢𑀦𑁄 𑀆𑀪𑀢𑀁 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀸𑀧𑁂𑀲𑀺. 𑀢𑀤𑀸 𑀢𑀲𑁆𑀲 𑀧𑀼𑀜𑁆𑀜𑀁 𑀅𑀗𑁆𑀓𑀼𑀭𑁂𑀦 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀉𑀤𑁆𑀥𑀦𑀧𑀦𑁆𑀢𑀺𑀁 𑀓𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀢𑁄 𑀫𑀳𑀧𑁆𑀨𑀮𑀢𑀭𑀁 𑀚𑀸𑀢𑀁. 𑀢𑀲𑁆𑀫𑀸 𑀏𑀯𑀫𑀸𑀳.

𑀏𑀯𑀁 𑀯𑀼𑀢𑁆𑀢𑁂 𑀲𑀢𑁆𑀣𑀸, ‘‘𑀅𑀗𑁆𑀓𑀼𑀭, 𑀤𑀸𑀦𑀁 𑀦𑀸𑀫 𑀯𑀺𑀘𑁂𑀬𑁆𑀬 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀢𑀁 𑀲𑀼𑀔𑁂𑀢𑁆𑀢𑁂𑀲𑀼 𑀯𑀼𑀢𑁆𑀢𑀩𑀻𑀚𑀁 𑀯𑀺𑀬 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀢𑁆𑀯𑀁 𑀧𑀦 𑀦 𑀢𑀣𑀸 𑀅𑀓𑀸𑀲𑀺, 𑀢𑁂𑀦 𑀢𑁂 𑀤𑀸𑀦𑀁 𑀫𑀳𑀧𑁆𑀨𑀮𑀁 𑀦 𑀚𑀸𑀢’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑁋

‘‘𑀯𑀺𑀘𑁂𑀬𑁆𑀬 ¶ ¶ 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁…𑀧𑁂….

‘‘𑀯𑀺𑀘𑁂𑀬𑁆𑀬 𑀤𑀸𑀦𑀁 𑀲𑀼𑀕𑀢𑀧𑁆𑀧𑀲𑀢𑁆𑀣𑀁,

𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀇𑀥 𑀚𑀻𑀯𑀮𑁄𑀓𑁂;

𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺,

𑀩𑀻𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀬𑀣𑀸 𑀲𑀼𑀔𑁂𑀢𑁆𑀢𑁂’’𑀢𑀺. (𑀧𑁂. 𑀯. 𑁩𑁨𑁯-𑁩𑁩𑁦) 𑁋

𑀯𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀭𑀸𑀕𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀭𑀸𑀕𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀤𑁄𑀲𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀤𑁄𑀲𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀫𑁄𑀳𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀫𑁄𑀳𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

‘‘𑀢𑀺𑀡𑀤𑁄𑀲𑀸𑀦𑀺 ¶ 𑀔𑁂𑀢𑁆𑀢𑀸𑀦𑀺, 𑀇𑀘𑁆𑀙𑀸𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀺𑀕𑀢𑀺𑀘𑁆𑀙𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀅𑀗𑁆𑀓𑀼𑀭𑁄 𑀘 𑀇𑀦𑁆𑀤𑀓𑁄 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀣 𑀲𑀢𑁆𑀣𑀸 𑀤𑁂𑀯𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀫𑀸𑀢𑀭𑀁 𑀆𑀭𑀩𑁆𑀪 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀝𑁆𑀞𑀧𑁂𑀲𑀺. 𑀏𑀯𑀁 𑀢𑀬𑁄 𑀫𑀸𑀲𑁂 𑀦𑀺𑀭𑀦𑁆𑀢𑀭𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀧𑀦 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 ‘‘𑀬𑀸𑀯 𑀫𑀫𑀸𑀕𑀫𑀦𑀸 𑀏𑀢𑁆𑀢𑀓𑀁 𑀦𑀸𑀫 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀫𑀳𑀸𑀲𑀸𑀮𑀫𑀸𑀴𑀓𑁂 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀯𑀢𑁆𑀢𑀁 𑀓𑀭𑁄𑀢𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂, ‘‘𑀲𑀸𑀭𑀺𑀧𑀼𑀢𑁆𑀢 ¶ , 𑀅𑀚𑁆𑀚 𑀫𑀬𑀸 𑀏𑀢𑁆𑀢𑀓𑁄 𑀦𑀸𑀫 𑀥𑀫𑁆𑀫𑁄 𑀪𑀸𑀲𑀺𑀢𑁄, 𑀢𑁆𑀯𑀁 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀸𑀘𑁂𑀳𑀻’’𑀢𑀺 𑀣𑁂𑀭𑀲𑁆𑀲 𑀓𑀣𑁂𑀲𑀺. 𑀬𑀫𑀓𑀧𑀸𑀝𑀺𑀳𑀻𑀭𑁂 𑀓𑀺𑀭 𑀧𑀲𑀻𑀤𑀺𑀢𑁆𑀯𑀸 𑀧𑀜𑁆𑀘𑀲𑀢𑀸 𑀓𑀼𑀮𑀧𑀼𑀢𑁆𑀢𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 ¶ 𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀲𑀦𑁆𑀥𑀸𑀬 𑀣𑁂𑀭𑀁 ¶ 𑀏𑀯𑀫𑀸𑀳. 𑀯𑀢𑁆𑀯𑀸 𑀘 𑀧𑀦 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀲𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀣𑁂𑀭𑁄𑀧𑀺 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀲𑀢𑁆𑀣𑀭𑀺 𑀤𑁂𑀯𑀮𑁄𑀓𑁂 𑀯𑀺𑀳𑀭𑀦𑁆𑀢𑁂𑀬𑁂𑀯 𑀲𑀢𑁆𑀢𑀧𑀓𑀭𑀡𑀺𑀓𑀸 𑀅𑀳𑁂𑀲𑀼𑀁.

𑀢𑁂 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀔𑀼𑀤𑁆𑀤𑀓𑀯𑀕𑁆𑀕𑀼𑀮𑀺𑀬𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀩𑁆𑀪𑀸𑀭𑁂 𑀑𑀮𑀫𑁆𑀩𑀦𑁆𑀢𑀸 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀘𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀼𑀁. 𑀢𑁂 ‘‘𑀇𑀫𑁂 𑀔𑀦𑁆𑀥𑀸 𑀦𑀸𑀫, 𑀇𑀫𑀸 𑀥𑀸𑀢𑀼𑀬𑁄 𑀦𑀸𑀫𑀸’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀲𑀭𑁂 𑀦𑀺𑀫𑀺𑀢𑁆𑀢𑀕𑀳𑀡𑀫𑀢𑁆𑀢𑁂𑀦𑁂𑀯 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸, 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀖𑀭𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀬𑀫𑀓𑀧𑀸𑀝𑀺𑀳𑀻𑀭𑁂 𑀉𑀧𑁆𑀧𑀦𑁆𑀦𑀧𑀲𑀸𑀤𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀲𑀢𑁆𑀢𑀧𑀓𑀭𑀡𑀺𑀓𑀸 𑀅𑀳𑁂𑀲𑀼𑀁. 𑀲𑀢𑁆𑀣𑀸𑀧𑀺 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀢𑀁 𑀢𑁂𑀫𑀸𑀲𑀁 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀫𑀳𑀸𑀫𑀸𑀬𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀲𑀸𑀧𑀺 ¶ 𑀔𑁄 𑀙𑀢𑁆𑀢𑀺𑀁𑀲𑀬𑁄𑀚𑀦𑀧𑀭𑀺𑀫𑀡𑁆𑀟𑀮𑀸 𑀧𑀭𑀺𑀲𑀸 ‘‘𑀇𑀤𑀸𑀦𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀳𑀸𑀧𑀯𑀸𑀭𑀡𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂 𑀲𑀢𑁆𑀣𑀼, 𑀑𑀭𑁄𑀳𑀡𑀤𑀺𑀯𑀲𑀁 𑀲𑀜𑁆𑀜𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀳𑀺 𑀫𑀬𑀁 𑀲𑀢𑁆𑀣𑀸𑀭𑀁 𑀅𑀤𑀺𑀲𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀧𑀣𑀯𑀺𑀬𑀁 𑀦𑀺𑀫𑀼𑀕𑁆𑀕𑁄 𑀲𑀺𑀦𑁂𑀭𑀼𑀧𑀸𑀤𑀁 𑀕𑀦𑁆𑀢𑁆𑀯𑀸 ‘‘𑀫𑀁 𑀅𑀪𑀺𑀭𑀼𑀳𑀦𑁆𑀢𑀁 𑀧𑀭𑀺𑀲𑀸 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀫𑀡𑀺𑀭𑀢𑀦𑁂𑀦 𑀆𑀯𑀼𑀢𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀼𑀢𑁆𑀢𑀁 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑁄𑀯 𑀲𑀺𑀦𑁂𑀭𑀼𑀫𑀚𑁆𑀛𑁂𑀦 𑀅𑀪𑀺𑀭𑀼𑀳𑀺. 𑀫𑀦𑀼𑀲𑁆𑀲𑀸𑀧𑀺 𑀦𑀁 ‘‘𑀏𑀓𑀬𑁄𑀚𑀦𑀁 𑀅𑀪𑀺𑀭𑀼𑀴𑁆𑀳𑁄, 𑀤𑁆𑀯𑀺𑀬𑁄𑀚𑀦𑀁 𑀅𑀪𑀺𑀭𑀼𑀴𑁆𑀳𑁄’’𑀢𑀺 𑀑𑀮𑁄𑀓𑀬𑀺𑀁𑀲𑀼. 𑀣𑁂𑀭𑁄𑀧𑀺 𑀲𑀢𑁆𑀣𑀼 𑀧𑀸𑀤𑁂 𑀲𑀻𑀲𑁂𑀦 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀧𑀭𑀺𑀲𑀸 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸𑀯 𑀕𑀦𑁆𑀢𑀼𑀓𑀸𑀫𑀸, 𑀓𑀤𑀸 𑀑𑀭𑁄𑀳𑀺𑀲𑁆𑀲𑀣𑀸’’𑀢𑀺. ‘‘𑀓𑀳𑀁 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀚𑁂𑀝𑁆𑀞𑀪𑀸𑀢𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺. ‘‘𑀪𑀦𑁆𑀢𑁂, 𑀲𑀗𑁆𑀓𑀲𑁆𑀲𑀦𑀕𑀭𑁂 𑀯𑀲𑁆𑀲𑀁 𑀉𑀧𑀕𑀢𑁄’’𑀢𑀺. 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀳𑀁 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀳𑀸𑀧𑀯𑀸𑀭𑀡𑀸𑀬 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀑𑀢𑀭𑀺𑀲𑁆𑀲𑀸𑀫𑀺, 𑀫𑀁 𑀤𑀝𑁆𑀞𑀼𑀓𑀸𑀫𑀸 𑀢𑀢𑁆𑀣 𑀆𑀕𑀘𑁆𑀙𑀦𑁆𑀢𑀼, 𑀲𑀸𑀯𑀢𑁆𑀣𑀺𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑀁 𑀢𑀺𑀁𑀲𑀬𑁄𑀚𑀦𑀸𑀦𑀺, 𑀏𑀢𑁆𑀢𑀓𑁂 𑀫𑀕𑁆𑀕𑁂 𑀓𑀲𑁆𑀲𑀘𑀺 𑀧𑀸𑀣𑁂𑀬𑁆𑀬𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀉𑀧𑁄𑀲𑀣𑀺𑀓𑀸 𑀳𑀼𑀢𑁆𑀯𑀸 𑀥𑀼𑀭𑀯𑀺𑀳𑀸𑀭𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 ¶ 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀆𑀕𑀘𑁆𑀙𑁂𑀬𑁆𑀬𑀸𑀣𑀸𑀢𑀺 𑀢𑁂𑀲𑀁 𑀆𑀭𑁄𑀘𑁂𑀬𑁆𑀬𑀸𑀲𑀻𑀢𑀺. 𑀣𑁂𑀭𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀕𑀦𑁆𑀢𑁆𑀯𑀸 𑀢𑀣𑀸 𑀆𑀭𑁄𑀘𑁂𑀲𑀺.

𑀲𑀢𑁆𑀣𑀸 ¶ 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀧𑀣𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 ¶ . 𑀲𑀓𑁆𑀓𑁄 𑀲𑀼𑀯𑀡𑁆𑀡𑀫𑀬𑀁 𑀫𑀡𑀺𑀫𑀬𑀁 𑀭𑀚𑀢𑀫𑀬𑀦𑁆𑀢𑀺 𑀢𑀻𑀡𑀺 𑀲𑁄𑀧𑀸𑀦𑀸𑀦𑀺 𑀫𑀸𑀧𑁂𑀲𑀺. 𑀢𑁂𑀲𑀁 𑀧𑀸𑀤𑀸 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀻𑀲𑀸𑀦𑀺 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺. 𑀢𑁂𑀲𑀼 𑀤𑀓𑁆𑀔𑀺𑀡𑀧𑀲𑁆𑀲𑁂 𑀲𑀼𑀯𑀡𑁆𑀡𑀫𑀬𑀁 𑀲𑁄𑀧𑀸𑀦𑀁 𑀤𑁂𑀯𑀢𑀸𑀦𑀁 𑀅𑀳𑁄𑀲𑀺, 𑀯𑀸𑀫𑀧𑀲𑁆𑀲𑁂 𑀭𑀚𑀢𑀫𑀬𑀁 𑀲𑁄𑀧𑀸𑀦𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀅𑀳𑁄𑀲𑀺, 𑀫𑀚𑁆𑀛𑁂 𑀫𑀡𑀺𑀫𑀬𑀁 𑀲𑁄𑀧𑀸𑀦𑀁 𑀢𑀣𑀸𑀕𑀢𑀲𑁆𑀲 𑀅𑀳𑁄𑀲𑀺. 𑀲𑀢𑁆𑀣𑀸𑀧𑀺 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀤𑁂𑀯𑁄𑀭𑁄𑀳𑀡𑀲𑀫𑀬𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀉𑀤𑁆𑀥𑀁 𑀑𑀮𑁄𑀓𑁂𑀲𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀗𑁆𑀕𑀡𑀸 𑀅𑀳𑁂𑀲𑀼𑀁. 𑀅𑀥𑁄 𑀑𑀮𑁄𑀓𑁂𑀲𑀺, 𑀬𑀸𑀯 𑀅𑀯𑀻𑀘𑀺𑀢𑁄 𑀏𑀓𑀗𑁆𑀕𑀡𑀁 𑀅𑀳𑁄𑀲𑀺. 𑀤𑀺𑀲𑀸𑀯𑀺𑀤𑀺𑀲𑀸 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀢𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀤𑁂𑀯𑀸 𑀫𑀦𑀼𑀲𑁆𑀲𑁂 𑀧𑀲𑁆𑀲𑀺𑀁𑀲𑀼, 𑀫𑀦𑀼𑀲𑁆𑀲𑀸𑀧𑀺 𑀤𑁂𑀯𑁂 𑀧𑀲𑁆𑀲𑀺𑀁𑀲𑀼, 𑀲𑀩𑁆𑀩𑁂 𑀲𑀫𑁆𑀫𑀼𑀔𑀸𑀯 𑀧𑀲𑁆𑀲𑀺𑀁𑀲𑀼.

𑀪𑀕𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀤𑀺𑀯𑀲𑀁 𑀩𑀼𑀤𑁆𑀥𑀲𑀺𑀭𑀺𑀁 𑀑𑀮𑁄𑀓𑁂𑀢𑁆𑀯𑀸 𑀙𑀢𑁆𑀢𑀺𑀁𑀲𑀬𑁄𑀚𑀦 𑀧𑀭𑀺𑀫𑀡𑁆𑀟𑀮𑀸𑀬 𑀧𑀭𑀺𑀲𑀸𑀬 𑀏𑀓𑁄𑀧𑀺 𑀩𑀼𑀤𑁆𑀥𑀪𑀸𑀯𑀁 𑀅𑀧𑀢𑁆𑀣𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀲𑀼𑀯𑀡𑁆𑀡𑀲𑁄𑀧𑀸𑀦𑁂𑀦 𑀤𑁂𑀯𑀸 𑀑𑀢𑀭𑀺𑀁𑀲𑀼, 𑀭𑀚𑀢𑀲𑁄𑀧𑀸𑀦𑁂𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀑𑀢𑀭𑀺𑀁𑀲𑀼, 𑀫𑀡𑀺𑀲𑁄𑀧𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀑𑀢𑀭𑀺. 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀤𑀓𑁆𑀔𑀺𑀡𑀧𑀲𑁆𑀲𑁂 𑀞𑀢𑁆𑀯𑀸 𑀲𑀢𑁆𑀣𑀼 𑀕𑀦𑁆𑀥𑀩𑁆𑀩𑀫𑀥𑀼𑀭𑀤𑀺𑀩𑁆𑀩𑀯𑀻𑀡𑀸𑀬 𑀲𑀤𑁆𑀤𑁂𑀦 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀑𑀢𑀭𑀺, 𑀫𑀸𑀢𑀮𑀺, 𑀲𑀗𑁆𑀕𑀸𑀳𑀓𑁄 𑀯𑀸𑀫𑀧𑀲𑁆𑀲𑁂 ¶ 𑀞𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀸𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀧𑀽𑀚𑀁 𑀓𑀢𑁆𑀯𑀸 𑀑𑀢𑀭𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺, 𑀲𑀼𑀬𑀸𑀫𑁄 𑀯𑀸𑀮𑀩𑀻𑀚𑀦𑀺𑀁 𑀥𑀸𑀭𑁂𑀲𑀺. 𑀲𑀢𑁆𑀣𑀸 𑀇𑀫𑀺𑀦𑀸 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀑𑀢𑀭𑀺𑀢𑁆𑀯𑀸 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀧𑀢𑀺𑀝𑁆𑀞𑀳𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀢𑀣𑀸𑀭𑀽𑀧𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀑𑀢𑀭𑀦𑁆𑀢𑁄 𑀲𑀢𑁆𑀣𑀸 𑀇𑀢𑁄 𑀧𑀼𑀩𑁆𑀩𑁂 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑀲𑁆𑀫𑀸 𑁋

‘‘𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂, 𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀺;

𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸, 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄’’𑀢𑀺. (𑀲𑀼. 𑀦𑀺. 𑁯𑁬𑁧; 𑀫𑀳𑀸𑀦𑀺. 𑁧𑁯𑁦) 𑁋

𑀆𑀤𑀻𑀳𑀺 ¶ 𑀅𑀢𑁆𑀢𑀦𑁄 𑀢𑀼𑀝𑁆𑀞𑀺𑀁 𑀧𑀓𑀸𑀲𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀲𑀩𑁆𑀩𑁂𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀧𑀺𑀳𑀬𑀦𑁆𑀢𑀺, 𑀧𑀢𑁆𑀣𑁂𑀦𑁆𑀢𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸, ‘‘𑀲𑀸𑀭𑀺𑀧𑀼𑀢𑁆𑀢, 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀩𑀼𑀤𑁆𑀥𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑀸 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁂 𑀛𑀸𑀦𑀧𑀲𑀼𑀢𑀸 𑀥𑀻𑀭𑀸, 𑀦𑁂𑀓𑁆𑀔𑀫𑁆𑀫𑀽𑀧𑀲𑀫𑁂 𑀭𑀢𑀸;

𑀤𑁂𑀯𑀸𑀧𑀺 𑀢𑁂𑀲𑀁 𑀧𑀺𑀳𑀬𑀦𑁆𑀢𑀺, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀢𑀻𑀫𑀢’’𑀦𑁆𑀢𑀺.

𑀢𑀢𑁆𑀣 𑀬𑁂 𑀛𑀸𑀦𑀧𑀲𑀼𑀢𑀸𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂𑀳𑀺 ¶ 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸. 𑀦𑁂𑀓𑁆𑀔𑀫𑁆𑀫𑀽𑀧𑀲𑀫𑁂 𑀭𑀢𑀸𑀢𑀺 ¶ 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀸, 𑀓𑀺𑀮𑁂𑀲𑀯𑀽𑀧𑀲𑀫𑀦𑀺𑀩𑁆𑀩𑀸𑀦𑀭𑀢𑀺𑀁 𑀧𑀦 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑁂𑀯𑀸𑀧𑀻𑀢𑀺 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀢𑁂𑀲𑀁 𑀧𑀺𑀳𑀬𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀲𑀢𑀻𑀫𑀢𑀦𑁆𑀢𑀺 𑀏𑀯𑀭𑀽𑀧𑀕𑀼𑀡𑀸𑀦𑀁 𑀢𑁂𑀲𑀁 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀦𑀁 𑀲𑀫𑁆𑀩𑀼𑀤𑁆𑀥𑀸𑀦𑀁. ‘‘𑀅𑀳𑁄 𑀯𑀢 𑀫𑀬𑀁 𑀩𑀼𑀤𑁆𑀥𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀩𑀼𑀤𑁆𑀥𑀪𑀸𑀯𑀁 𑀇𑀘𑁆𑀙𑀫𑀸𑀦𑀸 𑀧𑀺𑀳𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑀺𑀁𑀲𑀫𑀢𑁆𑀢𑀸𑀦𑀁 𑀧𑀸𑀡𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀓𑀺𑀭 𑀅𑀯𑀺𑀚𑀳𑀺𑀢𑀫𑁂𑀯 𑀬𑀫𑀓𑀧𑀸𑀝𑀺𑀳𑀻𑀭𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀑𑀢𑀭𑀡𑀁. 𑀢𑀢𑁆𑀣 𑀧𑀦 𑀤𑀓𑁆𑀔𑀺𑀡𑀧𑀸𑀤𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀘𑀮𑀘𑁂𑀢𑀺𑀬𑀝𑁆𑀞𑀸𑀦𑀁 𑀦𑀸𑀫 𑀳𑁄𑀢𑀺. 𑀲𑀢𑁆𑀣𑀸 𑀢𑀢𑁆𑀣 𑀞𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀧𑀼𑀣𑀼𑀚𑁆𑀚𑀦𑀸 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀯𑀺𑀲𑀬𑁂 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀣𑀸 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀯𑀺𑀲𑀬𑁂 𑀲𑁄𑀢𑀸𑀧𑀦𑁆𑀦𑀸𑀤𑀬𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀯𑀺𑀲𑀬𑁂 𑀲𑁂𑀲𑀫𑀳𑀸𑀲𑀸𑀯𑀓𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀲𑀬𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀩𑀼𑀤𑁆𑀥𑀯𑀺𑀲𑀬𑁂 ¶ 𑀘 𑀲𑀸𑀭𑀺𑀧𑀼𑀢𑁆𑀢𑁄𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀬𑁂𑀯. 𑀲𑁄 𑀧𑀸𑀘𑀻𑀦𑀤𑀺𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀤𑀺𑀲𑀸 𑀑𑀮𑁄𑀓𑁂𑀲𑀺, 𑀲𑀩𑁆𑀩𑀢𑁆𑀣 𑀏𑀓𑀗𑁆𑀕𑀡𑀫𑁂𑀯 𑀅𑀳𑁄𑀲𑀺. 𑀅𑀝𑁆𑀞𑀲𑀼 𑀤𑀺𑀲𑀸𑀲𑀼 𑀤𑁂𑀯𑀫𑀦𑀼𑀲𑁆𑀲𑀸 𑀉𑀤𑁆𑀥𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀳𑁂𑀝𑁆𑀞𑀸 𑀪𑀽𑀫𑀝𑁆𑀞𑀸 𑀘 𑀬𑀓𑁆𑀔𑀦𑀸𑀕𑀲𑀼𑀧𑀡𑁆𑀡𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀥 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀢𑀸 𑀦𑀢𑁆𑀣𑀺, 𑀏𑀢𑁆𑀣𑁂𑀯 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑁄 𑀓𑀺𑀮𑀫𑀢𑀺. 𑀓𑀺𑀜𑁆𑀘𑀸𑀧𑀺 𑀳𑁂𑀲 𑁋

‘‘𑀬𑁂 ¶ 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺. (𑀲𑀼. 𑀦𑀺. 𑁧𑁦𑁪𑁪; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭) 𑁋

𑀇𑀫𑀁 𑀩𑀼𑀤𑁆𑀥𑀯𑀺𑀲𑀬𑁂 𑀧𑀼𑀝𑁆𑀞𑀧𑀜𑁆𑀳𑀁 𑀲𑀼𑀢𑁆𑀯𑀸 ‘𑀲𑀢𑁆𑀣𑀸 𑀫𑀁 𑀲𑁂𑀔𑀸𑀲𑁂𑀔𑀸𑀦𑀁 𑀆𑀕𑀫𑀦𑀧𑀝𑀺𑀧𑀤𑀁 𑀧𑀼𑀘𑁆𑀙𑀢𑀻’𑀢𑀺 𑀧𑀜𑁆𑀳𑁂 𑀦𑀺𑀓𑁆𑀓𑀗𑁆𑀔𑁄, 𑀔𑀦𑁆𑀥𑀸𑀤𑀻𑀲𑀼 𑀧𑀦 𑀓𑀢𑀭𑁂𑀦 𑀦𑀼 𑀔𑁄 𑀫𑀼𑀔𑁂𑀦 𑀇𑀫𑀁 𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄 ‘𑀅𑀳𑀁 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀫𑀫 𑀅𑀚𑁆𑀛𑀸𑀲𑀬𑁂 𑀓𑀗𑁆𑀔𑀢𑀺, 𑀲𑁄 𑀫𑀬𑀸 𑀦𑀬𑁂 𑀅𑀤𑀺𑀦𑁆𑀦𑁂 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀦𑀬𑀫𑀲𑁆𑀲 𑀤𑀲𑁆𑀲𑀸𑀫𑀻𑀢𑀺 𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀽𑀢𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺 𑀆𑀳. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀫 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀓𑀣𑁂𑀦𑁆𑀢𑁄 𑀔𑀦𑁆𑀥𑀯𑀲𑁂𑀦 ¶ 𑀓𑀣𑁂𑀲𑁆𑀲𑀢𑀻’’𑀢𑀺. 𑀣𑁂𑀭𑀲𑁆𑀲 𑀲𑀳 𑀦𑀬𑀤𑀸𑀦𑁂𑀦 𑀲𑁄 𑀧𑀜𑁆𑀳𑁄 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀦𑀬𑀲𑀢𑀲𑀳𑀲𑁆𑀲𑁂𑀦 ¶ 𑀉𑀧𑀝𑁆𑀞𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀢𑀁 𑀧𑀜𑁆𑀳𑀁 𑀓𑀣𑁂𑀲𑀺. 𑀞𑀧𑁂𑀢𑁆𑀯𑀸 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀜𑁆𑀜𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑁂𑀯 𑀓𑀺𑀭 𑀣𑁂𑀭𑁄 𑀲𑀢𑁆𑀣𑀼 𑀧𑀼𑀭𑀢𑁄 𑀞𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀲𑀓𑀮𑀓𑀧𑁆𑀧𑀫𑁆𑀧𑀺 𑀤𑁂𑀯𑁂 𑀯𑀼𑀝𑁆𑀞𑁂 ‘𑀏𑀢𑁆𑀢𑀓𑀸𑀦𑀺 𑀩𑀺𑀦𑁆𑀤𑀽𑀦𑀺 𑀫𑀳𑀸𑀲𑀫𑀼𑀤𑁆𑀤𑁂 𑀧𑀢𑀺𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀪𑀽𑀫𑀺𑀬𑀁, 𑀏𑀢𑁆𑀢𑀓𑀸𑀦𑀺 𑀧𑀩𑁆𑀩𑀢𑁂’𑀢𑀺 𑀕𑀡𑁂𑀢𑁆𑀯𑀸 𑀮𑁂𑀔𑀁 𑀆𑀭𑁄𑀧𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺. 𑀲𑀢𑁆𑀣𑀸𑀧𑀺 𑀦𑀁 ‘‘𑀚𑀸𑀦𑀸𑀫𑀺, 𑀲𑀸𑀭𑀺𑀧𑀼𑀢𑁆𑀢, 𑀕𑀡𑁂𑀢𑀼𑀁 𑀲𑀫𑀢𑁆𑀣𑀪𑀸𑀯’’𑀦𑁆𑀢𑀺 𑀆𑀳. 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀧𑀜𑁆𑀜𑀸𑀬 𑀉𑀧𑀫𑀸 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑁂𑀯𑀸𑀳 𑁋

‘‘𑀕𑀗𑁆𑀕𑀸𑀬 𑀯𑀸𑀮𑀼𑀓𑀸 𑀔𑀻𑀬𑁂, 𑀉𑀤𑀓𑀁 𑀔𑀻𑀬𑁂 𑀫𑀳𑀡𑁆𑀡𑀯𑁂;

𑀫𑀳𑀺𑀬𑀸 𑀫𑀢𑁆𑀢𑀺𑀓𑀸 𑀔𑀻𑀬𑁂, 𑀦 𑀔𑀻𑀬𑁂 𑀫𑀫 𑀩𑀼𑀤𑁆𑀥𑀺𑀬𑀸’’𑀢𑀺.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀳𑀺, 𑀪𑀦𑁆𑀢𑁂, 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀮𑁄𑀓𑀦𑀸𑀣, 𑀫𑀬𑀸 𑀏𑀓𑀲𑁆𑀫𑀺𑀁 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀏𑀓𑀁 𑀯𑀸 𑀯𑀸𑀮𑀼𑀓𑀁 𑀏𑀓𑀁 𑀯𑀸 𑀉𑀤𑀓𑀩𑀺𑀦𑁆𑀤𑀼𑀁 𑀏𑀓𑀁 𑀯𑀸 𑀧𑀁𑀲𑀼𑀔𑀡𑁆𑀟𑀁 𑀅𑀔𑀺𑀧𑀺𑀢𑁆𑀯𑀸 𑀧𑀜𑁆𑀳𑀸𑀦𑀁 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦𑀯𑀸 𑀲𑀢𑀲𑀳𑀲𑁆𑀲𑁂𑀦 𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑁂 𑀕𑀗𑁆𑀕𑀸𑀬 𑀯𑀸𑀮𑀼𑀓𑀸𑀤𑀻𑀲𑀼 𑀏𑀓𑁂𑀓𑀁 𑀏𑀓𑀫𑀦𑁆𑀢𑁂 𑀔𑀺𑀧𑁂𑀬𑁆𑀬, 𑀔𑀺𑀧𑁆𑀧𑀢𑀭𑀁 𑀕𑀗𑁆𑀕𑀸𑀤𑀻𑀲𑀼 𑀯𑀸𑀮𑀼𑀓𑀸𑀤𑀬𑁄 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯 𑀫𑀫 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺. 𑀏𑀯𑀁 𑀫𑀳𑀸𑀧𑀜𑁆𑀜𑁄𑀧𑀺 𑀳𑀺 𑀪𑀺𑀓𑁆𑀔𑀼 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀲𑁆𑀲 ¶ 𑀅𑀦𑁆𑀢𑀁 𑀯𑀸 𑀓𑁄𑀝𑀺𑀁 𑀯𑀸 𑀅𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸𑀯 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀬𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀩𑁆𑀩𑁄𑀧𑀺 𑀚𑀦𑁄 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺, 𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀏𑀓𑀓𑁄𑀯 𑀓𑀣𑁂𑀲𑀻’’𑀢𑀺. 𑀲𑀢𑁆𑀣𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀦 𑀇𑀤𑀸𑀦𑁂𑀯 𑀲𑀸𑀭𑀺𑀧𑀼𑀢𑁆𑀢𑁄 𑀬𑀁 𑀧𑀜𑁆𑀳𑀁 𑀫𑀳𑀸𑀚𑀦𑁄 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦𑀸𑀲𑀓𑁆𑀔𑀺 ¶ , 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀅𑀦𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑀼𑀁 𑁋

‘‘𑀧𑀭𑁄𑀲𑀳𑀲𑁆𑀲𑀫𑁆𑀧𑀺 𑀲𑀫𑀸𑀕𑀢𑀸𑀦𑀁,

𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄,

𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺. (𑀚𑀸. 𑁧.𑁧.𑁯𑁯) 𑁋

𑀇𑀫𑀁 𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀻𑀢𑀺.

𑀓𑀺𑀘𑁆𑀙𑁄 ¶ 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀩𑀸𑀭𑀸𑀡𑀲𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀲𑀢𑁆𑀢𑀲𑀺𑀭𑀻𑀲𑀓𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀭𑀦𑁆𑀢𑁄 𑀏𑀭𑀓𑀧𑀢𑁆𑀢𑀁 𑀦𑀸𑀫 𑀦𑀸𑀕𑀭𑀸𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀓𑀲𑁆𑀲𑀧𑀩𑀼𑀤𑁆𑀥𑀲𑀸𑀲𑀦𑁂 𑀤𑀳𑀭𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀕𑀗𑁆𑀕𑀸𑀬 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑁄 ¶ 𑀏𑀓𑀲𑁆𑀫𑀺𑀁 𑀏𑀭𑀓𑀕𑀼𑀫𑁆𑀩𑁂 𑀏𑀭𑀓𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀸𑀯𑀸𑀬 𑀯𑁂𑀕𑀲𑀸 𑀕𑀘𑁆𑀙𑀫𑀸𑀦𑀸𑀬𑀧𑀺 𑀦 𑀫𑀼𑀜𑁆𑀘𑀺, 𑀏𑀭𑀓𑀧𑀢𑁆𑀢𑀁 𑀙𑀺𑀚𑁆𑀚𑀺𑀢𑁆𑀯𑀸 𑀕𑀢𑀁. 𑀲𑁄 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀏𑀢’’𑀦𑁆𑀢𑀺 𑀆𑀧𑀢𑁆𑀢𑀺𑀁 𑀅𑀤𑁂𑀲𑁂𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀭𑀜𑁆𑀜𑁂 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸𑀧𑀺 𑀫𑀭𑀡𑀓𑀸𑀮𑁂 𑀏𑀭𑀓𑀧𑀢𑁆𑀢𑁂𑀦 𑀕𑀻𑀯𑀸𑀬 𑀕𑀳𑀺𑀢𑁄 𑀯𑀺𑀬 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀼𑀓𑀸𑀫𑁄𑀧𑀺 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀅𑀧𑀲𑁆𑀲𑀫𑀸𑀦𑁄 ‘‘𑀅𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀯𑀺𑀧𑁆𑀧𑀝𑀺𑀲𑀸𑀭𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀏𑀓𑀭𑀼𑀓𑁆𑀔𑀤𑁄𑀡𑀺𑀓𑀦𑀸𑀯𑀧𑁆𑀧𑀫𑀸𑀡𑁄 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀭𑀓𑀧𑀢𑁆𑀢𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀳𑁂𑀢𑀼𑀓𑀬𑁄𑀦𑀺𑀬𑀁 𑀫𑀡𑁆𑀟𑀽𑀓𑀪𑀓𑁆𑀔𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀫𑁆𑀳𑀻’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀏𑀓𑀁 𑀥𑀻𑀢𑀭𑀁 𑀮𑀪𑀺𑀢𑁆𑀯𑀸 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀉𑀤𑀓𑀧𑀺𑀝𑁆𑀞𑁂 𑀫𑀳𑀦𑁆𑀢𑀁 𑀨𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀥𑀻𑀢𑀭𑀁 𑀢𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀦𑀘𑁆𑀘𑀸𑀧𑁂𑀢𑁆𑀯𑀸 𑀕𑀸𑀬𑀸𑀧𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀤𑁆𑀥𑀸 𑀅𑀳𑀁 𑀇𑀥 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺. 𑀬𑁄 𑀫𑁂 𑀕𑀻𑀢𑀲𑁆𑀲 𑀧𑀝𑀺𑀕𑀻𑀢𑀁 𑀆𑀳𑀭𑀢𑀺 ¶ , 𑀢𑀲𑁆𑀲 𑀫𑀳𑀦𑁆𑀢𑁂𑀦 𑀦𑀸𑀕𑀪𑀯𑀦𑁂𑀦 𑀲𑀤𑁆𑀥𑀺𑀁 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻𑀢𑀺 𑀅𑀦𑁆𑀯𑀟𑁆𑀠𑀫𑀸𑀲𑀁 𑀉𑀧𑁄𑀲𑀣𑀤𑀺𑀯𑀲𑁂 𑀢𑀁 𑀥𑀻𑀢𑀭𑀁 𑀨𑀡𑁂 𑀞𑀧𑁂𑀲𑀺. 𑀲𑀸 𑀢𑀢𑁆𑀣 𑀞𑀺𑀢𑀸 𑀦𑀘𑁆𑀘𑀦𑁆𑀢𑀻 𑁋

‘‘𑀓𑀺𑀁𑀲𑀼 𑀅𑀥𑀺𑀧𑁆𑀧𑀢𑀻 𑀭𑀸𑀚𑀸, 𑀓𑀺𑀁𑀲𑀼 𑀭𑀸𑀚𑀸 𑀭𑀚𑁆𑀚𑀺𑀲𑁆𑀲𑀭𑁄;

𑀓𑀣𑀁𑀲𑀼 𑀯𑀺𑀭𑀚𑁄 𑀳𑁄𑀢𑀺, 𑀓𑀣𑀁 𑀩𑀸𑀮𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 ‘‘𑀦𑀸𑀕𑀫𑀸𑀡𑀯𑀺𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦 𑀧𑀝𑀺𑀕𑀻𑀢𑀁 𑀓𑀢𑁆𑀯𑀸 𑀕𑀸𑀬𑀦𑁆𑀢𑀺. 𑀲𑀸 𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀲𑁆𑀲𑀸 𑀅𑀦𑁆𑀯𑀟𑁆𑀠𑀫𑀸𑀲𑀁 𑀨𑀡𑁂 𑀞𑀢𑁆𑀯𑀸 𑀏𑀯𑀁 𑀕𑀸𑀬𑀦𑁆𑀢𑀺𑀬𑀸𑀯 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀯𑀻𑀢𑀺𑀯𑀢𑁆𑀢𑀁. 𑀅𑀣 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀏𑀭𑀓𑀧𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀢𑁆𑀢𑀭𑀫𑀸𑀡𑀯𑀁 𑀦𑀸𑀫 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀚𑁆𑀚 𑀏𑀭𑀓𑀧𑀢𑁆𑀢𑀲𑁆𑀲 𑀥𑀻𑀢𑀭𑀁 𑀨𑀡𑁂 𑀞𑀧𑁂𑀢𑁆𑀯𑀸 𑀦𑀘𑁆𑀘𑀸𑀧𑀦𑀤𑀺𑀯𑀲𑁄, 𑀅𑀬𑀁 𑀉𑀢𑁆𑀢𑀭𑀫𑀸𑀡𑀯𑁄 𑀫𑀬𑀸 𑀤𑀺𑀦𑁆𑀦𑀁 𑀧𑀝𑀺𑀕𑀻𑀢𑀁 𑀕𑀡𑁆𑀳𑀦𑁆𑀢𑁄𑀯 ¶ 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀢𑀁 𑀆𑀤𑀸𑀬 𑀦𑀸𑀕𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀜𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀺, 𑀅𑀳𑀁 𑀢𑀲𑁆𑀫𑀺𑀁 𑀆𑀕𑀢𑁂 𑀫𑀳𑀸𑀲𑀫𑀸𑀕𑀫𑁂 𑀕𑀸𑀣𑀁 𑀓𑀣𑁂𑀲𑁆𑀲𑀸𑀫𑀺, 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀲𑀢𑁆𑀢 𑀲𑀺𑀭𑀻𑀲𑀓𑀭𑀼𑀓𑁆𑀔𑀸 𑀅𑀢𑁆𑀣𑀺, 𑀢𑁂𑀲𑀼 𑀏𑀓𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀕𑀻𑀢𑀧𑀝𑀺𑀕𑀻𑀢𑀁 𑀆𑀤𑀸𑀬 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀕𑀘𑁆𑀙𑀦𑁆𑀢𑀁 𑀉𑀢𑁆𑀢𑀭𑀫𑀸𑀡𑀯𑀁 𑀤𑀺𑀲𑁆𑀯𑀸 ‘‘𑀏𑀳𑀺, 𑀉𑀢𑁆𑀢𑀭𑀸’’𑀢𑀺 𑀆𑀳. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀇𑀢𑁄 𑀢𑀸𑀯 𑀏𑀳𑀻’’𑀢𑀺. 𑀅𑀣 𑀦𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀆𑀳 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺? ‘‘𑀏𑀭𑀓𑀧𑀢𑁆𑀢𑀲𑁆𑀲 𑀥𑀻𑀢𑀼 𑀕𑀸𑀬𑀦𑀝𑁆𑀞𑀸𑀦’’𑀦𑁆𑀢𑀺. ‘‘𑀚𑀸𑀦𑀸𑀲𑀺 𑀧𑀦 𑀕𑀻𑀢𑀧𑀝𑀺𑀕𑀻𑀢’’𑀦𑁆𑀢𑀺? ‘‘𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀯𑀤𑁂𑀳𑀺 𑀢𑀸𑀯 𑀦’’𑀦𑁆𑀢𑀺? 𑀅𑀣 𑀦𑀁 𑀅𑀢𑁆𑀢𑀦𑁄 𑀚𑀸𑀦𑀦𑀦𑀺𑀬𑀸𑀫𑁂𑀦𑁂𑀯 𑀯𑀤𑀦𑁆𑀢𑀁 ‘‘𑀦 𑀉𑀢𑁆𑀢𑀭𑀁 𑀏𑀢𑀁 𑀧𑀝𑀺𑀕𑀻𑀢𑀁, 𑀅𑀳𑀁 𑀢𑁂 𑀧𑀝𑀺𑀕𑀻𑀢𑀁 𑀤𑀲𑁆𑀲𑀸𑀫𑀺, 𑀆𑀤𑀸𑀬 ¶ 𑀦𑀁 𑀕𑀫𑀺𑀲𑁆𑀲𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸, 𑀉𑀢𑁆𑀢𑀭, 𑀢𑁆𑀯𑀁 𑀦𑀸𑀕𑀫𑀸𑀡𑀯𑀺𑀓𑀸𑀬 𑀕𑀻𑀢𑀓𑀸𑀮𑁂 𑁋

‘‘𑀙𑀤𑁆𑀯𑀸𑀭𑀸𑀥𑀺𑀧𑁆𑀧𑀢𑀻 𑀭𑀸𑀚𑀸, 𑀭𑀚𑁆𑀚𑀫𑀸𑀦𑁄 𑀭𑀚𑁆𑀚𑀺𑀲𑁆𑀲𑀭𑁄;

𑀅𑀭𑀚𑁆𑀚𑀁 𑀯𑀺𑀭𑀚𑁄 𑀳𑁄𑀢𑀺, 𑀭𑀚𑁆𑀚𑀁 𑀩𑀸𑀮𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀇𑀫𑀁 𑀧𑀝𑀺𑀕𑀻𑀢𑀁 𑀕𑀸𑀬𑁂𑀬𑁆𑀬𑀸𑀲𑀻𑀢𑀺 𑀆𑀳.

𑀫𑀸𑀡𑀯𑀺𑀓𑀸𑀬 ¶ 𑀕𑀻𑀢𑀲𑁆𑀲 𑀅𑀢𑁆𑀣𑁄 𑁋 𑀓𑀺𑀁𑀲𑀼 𑀅𑀥𑀺𑀧𑁆𑀧𑀢𑀻 𑀭𑀸𑀚𑀸𑀢𑀺 𑀓𑀺𑀁 𑀅𑀥𑀺𑀧𑁆𑀧𑀢𑀺 𑀭𑀸𑀚𑀸 𑀦𑀸𑀫 𑀳𑁄𑀢𑀺? 𑀓𑀺𑀁𑀲𑀼 𑀭𑀸𑀚𑀸 𑀭𑀚𑁆𑀚𑀺𑀲𑁆𑀲𑀭𑁄𑀢𑀺 𑀓𑀣𑀁 𑀧𑀦 𑀭𑀸𑀚𑀸 𑀭𑀚𑁆𑀚𑀺𑀲𑁆𑀲𑀭𑁄 𑀦𑀸𑀫 𑀳𑁄𑀢𑀺? 𑀓𑀣𑀁𑀲𑀼 𑀯𑀺𑀭𑀚𑁄 𑀳𑁄𑀢𑀻𑀢𑀺 𑀓𑀣𑀁 𑀦𑀼 𑀔𑁄 𑀲𑁄 𑀭𑀸𑀚𑀸 𑀯𑀺𑀭𑀚𑁄 𑀦𑀸𑀫 𑀳𑁄𑀢𑀻𑀢𑀺?

𑀧𑀝𑀺𑀕𑀻𑀢𑀲𑁆𑀲 𑀧𑀦 𑀅𑀢𑁆𑀣𑁄 𑁋 𑀙𑀤𑁆𑀯𑀸𑀭𑀸𑀥𑀺𑀧𑁆𑀧𑀢𑀻 𑀭𑀸𑀚𑀸𑀢𑀺 𑀬𑁄 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀥𑀺𑀧𑁆𑀧𑀢𑀺, 𑀏𑀓𑀤𑁆𑀯𑀸𑀭𑁂𑀧𑀺 𑀭𑀽𑀧𑀸𑀤𑀻𑀳𑀺 𑀅𑀦𑀪𑀺𑀪𑀽𑀢𑁄, 𑀅𑀬𑀁 𑀭𑀸𑀚𑀸 𑀦𑀸𑀫. 𑀭𑀚𑁆𑀚𑀫𑀸𑀦𑁄 𑀭𑀚𑁆𑀚𑀺𑀲𑁆𑀲𑀭𑁄𑀢𑀺 𑀬𑁄 𑀧𑀦 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀭𑀚𑁆𑀚𑀢𑀺, 𑀲𑁄 𑀭𑀚𑁆𑀚𑀫𑀸𑀦𑁄 𑀭𑀚𑁆𑀚𑀺𑀲𑁆𑀲𑀭𑁄 𑀦𑀸𑀫. 𑀅𑀭𑀚𑁆𑀚𑀦𑁆𑀢𑀺 𑀅𑀭𑀚𑁆𑀚𑀫𑀸𑀦𑁄 𑀧𑀦 𑀯𑀺𑀭𑀚𑁄 𑀦𑀸𑀫 𑀳𑁄𑀢𑀺. 𑀭𑀚𑁆𑀚𑀦𑁆𑀢𑀺 𑀭𑀚𑁆𑀚𑀫𑀸𑀦𑁄 𑀩𑀸𑀮𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀏𑀯𑀫𑀲𑁆𑀲 𑀲𑀢𑁆𑀣𑀸 𑀧𑀝𑀺𑀕𑀻𑀢𑀁 𑀤𑀢𑁆𑀯𑀸, 𑀉𑀢𑁆𑀢𑀭, 𑀢𑀬𑀸 𑀇𑀫𑀲𑁆𑀫𑀺𑀁 𑀕𑀻𑀢𑁂 𑀕𑀸𑀬𑀺𑀢𑁂 𑀇𑀫𑀲𑁆𑀲 𑀕𑀻𑀢𑀲𑁆𑀲 𑀇𑀫𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀢𑀺 𑁋

‘‘𑀓𑁂𑀦𑀲𑁆𑀲𑀼 ¶ 𑀯𑀼𑀬𑁆𑀳𑀢𑀺 𑀩𑀸𑀮𑁄, 𑀓𑀣𑀁 𑀦𑀼𑀤𑀢𑀺 𑀧𑀡𑁆𑀟𑀺𑀢𑁄;

𑀬𑁄𑀕𑀓𑁆𑀔𑁂𑀫𑀻 𑀓𑀣𑀁 𑀳𑁄𑀢𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀅𑀣𑀲𑁆𑀲 𑀢𑁆𑀯𑀁 𑀇𑀤𑀁 𑀧𑀝𑀺𑀕𑀻𑀢𑀁 𑀕𑀸𑀬𑁂𑀬𑁆𑀬𑀸𑀲𑀺 𑁋

‘‘𑀑𑀖𑁂𑀦 𑀯𑀼𑀬𑁆𑀳𑀢𑀺 𑀩𑀸𑀮𑁄, 𑀬𑁄𑀕𑀸 𑀦𑀼𑀤𑀢𑀺 𑀧𑀡𑁆𑀟𑀺𑀢𑁄;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑁄, 𑀬𑁄𑀕𑀓𑁆𑀔𑁂𑀫𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 ‘‘𑀓𑀸𑀫𑁄𑀖𑀸𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑁂𑀦 𑀑𑀖𑁂𑀦 𑀩𑀸𑀮𑁄 𑀯𑀼𑀬𑁆𑀳𑀢𑀺, 𑀢𑀁 𑀑𑀖𑀁 𑀧𑀡𑁆𑀟𑀺𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑁂𑀦 𑀬𑁄𑀕𑁂𑀦 ¶ 𑀦𑀼𑀤𑀢𑀺. 𑀲𑁄 𑀲𑀩𑁆𑀩𑁂𑀳𑀺 𑀓𑀸𑀫𑀬𑁄𑀕𑀸𑀤𑀻𑀳𑀺 𑀯𑀺𑀲𑀁𑀬𑀼𑀢𑁆𑀢𑁄 𑀬𑁄𑀕𑀓𑁆𑀔𑁂𑀫𑀻 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺.

𑀉𑀢𑁆𑀢𑀭𑁄 𑀇𑀫𑀁 𑀧𑀝𑀺𑀕𑀻𑀢𑀁 𑀕𑀡𑁆𑀳𑀦𑁆𑀢𑁄𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀢𑀁 𑀕𑀸𑀣𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸, ‘‘𑀅𑀫𑁆𑀪𑁄, 𑀫𑀬𑀸 𑀕𑀻𑀢𑀧𑀝𑀺𑀕𑀻𑀢𑀁 𑀆𑀳𑀝𑀁, 𑀑𑀓𑀸𑀲𑀁 𑀫𑁂 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀞𑀺𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀚𑀡𑁆𑀡𑀼𑀦𑀸 𑀅𑀓𑁆𑀓𑀫𑀦𑁆𑀢𑁄 𑀅𑀕𑀫𑀸𑀲𑀺. 𑀦𑀸𑀕𑀫𑀸𑀡𑀯𑀺𑀓𑀸 𑀧𑀺𑀢𑀼 𑀨𑀡𑁂 𑀞𑀢𑁆𑀯𑀸 𑀦𑀘𑁆𑀘𑀫𑀸𑀦𑀸 ‘‘𑀓𑀺𑀁𑀲𑀼 𑀅𑀥𑀺𑀧𑁆𑀧𑀢𑀻 𑀭𑀸𑀚𑀸’’𑀢𑀺 𑀕𑀻𑀢𑀁 𑀕𑀸𑀬𑀢𑀺? 𑀉𑀢𑁆𑀢𑀭𑁄 ‘‘𑀙𑀤𑁆𑀯𑀸𑀭𑀸𑀥𑀺𑀧𑁆𑀧𑀢𑀻 𑀭𑀸𑀚𑀸’’𑀢𑀺 𑀧𑀝𑀺𑀕𑀻𑀢𑀁 𑀕𑀸𑀬𑀺. 𑀧𑀼𑀦 𑀦𑀸𑀕𑀫𑀸𑀡𑀯𑀺𑀓𑀸 ‘‘𑀓𑁂𑀦𑀲𑁆𑀲𑀼 𑀯𑀼𑀬𑁆𑀳𑀢𑀻’’𑀢𑀺 𑀢𑀲𑁆𑀲 𑀕𑀻𑀢𑀁 𑀕𑀸𑀬𑀢𑀺? 𑀅𑀣𑀲𑁆𑀲𑀸 𑀧𑀝𑀺𑀕𑀻𑀢𑀁 𑀕𑀸𑀬𑀦𑁆𑀢𑁄 𑀉𑀢𑁆𑀢𑀭𑁄 ‘‘𑀑𑀖𑁂𑀦 𑀯𑀼𑀬𑁆𑀳𑀢𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀦𑀸𑀕𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸𑀯 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀬𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀏𑀯𑀭𑀽𑀧𑀁 𑀧𑀤𑀁 𑀦𑀸𑀫 𑀦 𑀲𑀼𑀢𑀧𑀼𑀩𑁆𑀩𑀁, 𑀉𑀧𑁆𑀧𑀦𑁆𑀦𑁄 𑀯𑀢, 𑀪𑁄, 𑀮𑁄𑀓𑁂 ¶ 𑀩𑀼𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀦𑀗𑁆𑀕𑀼𑀝𑁆𑀞𑁂𑀦 𑀉𑀤𑀓𑀁 𑀧𑀳𑀭𑀺, 𑀫𑀳𑀸𑀯𑀻𑀘𑀺𑀬𑁄 𑀉𑀝𑁆𑀞𑀳𑀺𑀁𑀲𑀼, 𑀉𑀪𑁄 𑀢𑀻𑀭𑀸𑀦𑀺 𑀪𑀺𑀚𑁆𑀚𑀺𑀁𑀲𑀼. 𑀇𑀢𑁄 𑀘𑀺𑀢𑁄 𑀘 𑀉𑀲𑀪𑀫𑀢𑁆𑀢𑁂 𑀞𑀸𑀦𑁂 𑀫𑀦𑀼𑀲𑁆𑀲𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀁𑀲𑀼. 𑀲𑁄 𑀏𑀢𑁆𑀢𑀓𑀁 𑀫𑀳𑀸𑀚𑀦𑀁 𑀨𑀡𑁂 𑀞𑀧𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀲𑁄 𑀉𑀢𑁆𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀳𑀁, 𑀲𑀸𑀫𑀺, 𑀲𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄, 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 ‘‘𑀏𑀳𑀺, 𑀲𑀸𑀫𑀺, 𑀕𑀘𑁆𑀙𑀸𑀫𑀸’’𑀢𑀺 𑀉𑀢𑁆𑀢𑀭𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀕𑀢𑁄. 𑀦𑀸𑀕𑀭𑀸𑀚𑀸 𑀕𑀦𑁆𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀻𑀦𑀁 𑀅𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁 𑀇𑀤𑀁, 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 ¶ 𑀅𑀓𑀸𑀲𑀺𑀁, 𑀲𑁄𑀧𑀺 𑀫𑀁 𑀲𑀫𑀡𑀥𑀫𑁆𑀫𑁄 𑀦𑀺𑀤𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀧𑁆𑀧𑀫𑀢𑁆𑀢𑀓𑀁 𑀏𑀭𑀓𑀧𑀢𑁆𑀢𑀙𑀺𑀦𑁆𑀤𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀉𑀭𑁂𑀦 𑀧𑀭𑀺𑀲𑀓𑁆𑀓𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀺, 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑁂𑀯 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑀸𑀫𑀺, 𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀦 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀤𑀲𑁆𑀲𑀦’’𑀦𑁆𑀢𑀺 𑀲𑀢𑁆𑀣𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀢𑁆𑀢𑀁 𑀦𑀸𑀫 𑀤𑀼𑀮𑁆𑀮𑀪𑀫𑁂𑀯, 𑀢𑀣𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 ¶ , 𑀢𑀣𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀇𑀤𑀁 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀮𑀩𑁆𑀪𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀺𑀘𑁆𑀙𑁄 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄, 𑀓𑀺𑀘𑁆𑀙𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁;

𑀓𑀺𑀘𑁆𑀙𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀓𑀺𑀘𑁆𑀙𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀦𑁆𑀢𑁂𑀦 𑀳𑀺 𑀯𑀸𑀬𑀸𑀫𑁂𑀦 𑀫𑀳𑀦𑁆𑀢𑁂𑀦 𑀓𑀼𑀲𑀮𑁂𑀦 𑀮𑀤𑁆𑀥𑀢𑁆𑀢𑀸 𑀫𑀦𑀼𑀲𑁆𑀲𑀢𑁆𑀢𑀧𑀝𑀺𑀮𑀸𑀪𑁄 𑀦𑀸𑀫 𑀓𑀺𑀘𑁆𑀙𑁄 𑀤𑀼𑀮𑁆𑀮𑀪𑁄. 𑀦𑀺𑀭𑀦𑁆𑀢𑀭𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀖𑀝𑀦𑀢𑁄𑀧𑀺 𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀢𑀸𑀬𑀧𑀺 𑀫𑀘𑁆𑀘𑀸𑀦𑀁 𑀚𑀻𑀯𑀺𑀢𑀁 𑀓𑀺𑀘𑁆𑀙𑀁. 𑀅𑀦𑁂𑀓𑁂𑀲𑀼𑀧𑀺 𑀓𑀧𑁆𑀧𑁂𑀲𑀼 𑀥𑀫𑁆𑀫𑀤𑁂𑀲𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀼𑀮𑁆𑀮𑀪𑀢𑀸𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀺 𑀓𑀺𑀘𑁆𑀙𑀁. 𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦 𑀅𑀪𑀺𑀦𑀻𑀳𑀸𑀭𑀲𑁆𑀲 𑀲𑀫𑀺𑀚𑁆𑀛𑀦𑀢𑁄 𑀲𑀫𑀺𑀤𑁆𑀥𑀸𑀪𑀺𑀦𑀻𑀳𑀸𑀭𑀲𑁆𑀲 𑀘 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑁂𑀳𑀺 𑀤𑀼𑀮𑁆𑀮𑀪𑀼𑀧𑁆𑀧𑀸𑀤𑀢𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄𑀧𑀺 𑀓𑀺𑀘𑁆𑀙𑁄𑀬𑁂𑀯, 𑀅𑀢𑀺𑀯𑀺𑀬 𑀤𑀼𑀮𑁆𑀮𑀪𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀦𑀸𑀕𑀭𑀸𑀚𑀸𑀧𑀺 𑀢𑀁𑀤𑀺𑀯𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀮𑀪𑁂𑀬𑁆𑀬, 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦 𑀦𑀸𑀮𑀢𑁆𑀣. 𑀲𑁄 𑀬𑁂𑀲𑀼 𑀧𑀝𑀺𑀲𑀦𑁆𑀥𑀺𑀕𑀳𑀡𑀢𑀘𑀚𑀳𑀦𑀯𑀺𑀲𑁆𑀲𑀝𑁆𑀞𑀦𑀺𑀤𑁆𑀤𑁄𑀓𑁆𑀓𑀫𑀦𑀲𑀚𑀸𑀢𑀺𑀬𑀸𑀫𑁂𑀣𑀼𑀦𑀲𑁂𑀯𑀦𑀘𑀼𑀢𑀺𑀲𑀗𑁆𑀔𑀸𑀢𑁂𑀲𑀼 ¶ 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀦𑀸𑀕𑀲𑀭𑀻𑀭𑀫𑁂𑀯 ¶ 𑀕𑀳𑁂𑀢𑁆𑀯𑀸 𑀓𑀺𑀮𑀫𑀦𑁆𑀢𑀺, 𑀢𑁂𑀲𑀼 𑀅𑀓𑀺𑀮𑀫𑀦𑀪𑀸𑀯𑀁 𑀧𑀢𑁆𑀯𑀸 𑀫𑀸𑀡𑀯𑀭𑀽𑀧𑁂𑀦𑁂𑀯 𑀯𑀺𑀘𑀭𑀺𑀢𑀼𑀁 𑀮𑀪𑀢𑀻𑀢𑀺.

𑀏𑀭𑀓𑀧𑀢𑁆𑀢𑀦𑀸𑀕𑀭𑀸𑀚𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀆𑀦𑀦𑁆𑀤𑀢𑁆𑀣𑁂𑀭𑀧𑀜𑁆𑀳𑀯𑀢𑁆𑀣𑀼

𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀜𑁆𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀣𑁂𑀭𑁄 𑀓𑀺𑀭 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸𑀭𑀸 𑀲𑀢𑁆𑀢𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀩𑁄𑀥𑀺 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀕𑁆𑀕𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀕𑁆𑀕𑀲𑀸𑀯𑀓𑀉𑀧𑀝𑁆𑀞𑀸𑀓𑁄𑀢𑀺 𑀇𑀤𑀁 𑀲𑀩𑁆𑀩𑀁 𑀓𑀣𑀺𑀢𑀁, 𑀉𑀧𑁄𑀲𑀣𑁄 𑀧𑀦 𑀅𑀓𑀣𑀺𑀢𑁄, 𑀓𑀺𑀁 𑀦𑀼 𑀔𑁄 𑀢𑁂𑀲𑀫𑁆𑀧𑀺 𑀅𑀬𑀫𑁂𑀯 𑀉𑀧𑁄𑀲𑀣𑁄, 𑀅𑀜𑁆𑀜𑁄’’𑀢𑀺? 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀓𑀸𑀮𑀪𑁂𑀤𑁄𑀯 𑀅𑀳𑁄𑀲𑀺, 𑀦 𑀓𑀣𑀸𑀪𑁂𑀤𑁄. 𑀯𑀺𑀧𑀲𑁆𑀲𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀲𑀢𑁆𑀢𑀫𑁂 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀏𑀓𑀤𑀺𑀯𑀲𑀁 𑀤𑀺𑀦𑁆𑀦𑁄𑀯𑀸𑀤𑁄𑀬𑁂𑀯 ¶ 𑀳𑀺𑀲𑁆𑀲 𑀲𑀢𑁆𑀢𑀦𑁆𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀮𑀁 𑀳𑁄𑀢𑀺. 𑀲𑀺𑀔𑀻 𑀘𑁂𑀯 𑀯𑁂𑀲𑁆𑀲𑀪𑀽 𑀘 𑀙𑀝𑁆𑀞𑁂 𑀙𑀝𑁆𑀞𑁂 𑀲𑀁𑀯𑀘𑁆𑀙𑀭𑁂 𑀉𑀧𑁄𑀲𑀣𑀁 𑀓𑀭𑀺𑀁𑀲𑀼, 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀘 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂. 𑀓𑀲𑁆𑀲𑀧𑀤𑀲𑀩𑀮𑁄 𑀙𑀝𑁆𑀞𑁂 𑀙𑀝𑁆𑀞𑁂 𑀫𑀸𑀲𑁂 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀏𑀓𑀤𑀺𑀯𑀲𑀁 𑀤𑀺𑀦𑁆𑀦𑁄𑀯𑀸𑀤𑁄 𑀏𑀯 𑀳𑀺𑀲𑁆𑀲 𑀙𑀦𑁆𑀦𑀁 𑀫𑀸𑀲𑀸𑀦𑀁 𑀅𑀮𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀢𑁂𑀲𑀁 𑀇𑀫𑀁 𑀓𑀸𑀮𑀪𑁂𑀤𑀁 ¶ 𑀆𑀭𑁄𑀘𑁂𑀢𑁆𑀯𑀸 ‘‘𑀑𑀯𑀸𑀤𑀕𑀸𑀣𑀸 𑀧𑀦 𑀦𑁂𑀲𑀁 𑀇𑀫𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂𑀲𑀁 𑀏𑀓𑀫𑁂𑀯 𑀉𑀧𑁄𑀲𑀣𑀁 𑀆𑀯𑀺 𑀓𑀭𑁄𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸,

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻,

𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘‘𑀅𑀦𑀽𑀧𑀯𑀸𑀤𑁄 ¶ 𑀅𑀦𑀽𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀲𑀩𑁆𑀩𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲. 𑀉𑀧𑀲𑀫𑁆𑀧𑀤𑀸𑀢𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀓𑀼𑀲𑀮𑀲𑁆𑀲 𑀉𑀧𑁆𑀧𑀸𑀤𑀦𑀜𑁆𑀘𑁂𑀯 𑀉𑀧𑁆𑀧𑀸𑀤𑀺𑀢𑀲𑁆𑀲 𑀘 𑀪𑀸𑀯𑀦𑀸. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀦𑁆𑀢𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑁄𑀤𑀸𑀧𑀦𑀁. 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀬𑀫𑀦𑀼𑀲𑀺𑀝𑁆𑀞𑀺.

𑀔𑀦𑁆𑀢𑀻𑀢𑀺 𑀬𑀸 𑀏𑀲𑀸 𑀢𑀺𑀢𑀺𑀓𑁆𑀔𑀸𑀲𑀗𑁆𑀔𑀸𑀢𑀸 𑀔𑀦𑁆𑀢𑀻 𑀦𑀸𑀫, 𑀇𑀤𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀭𑀫𑀁 𑀉𑀢𑁆𑀢𑀫𑀁 𑀢𑀧𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸𑀢𑀺 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘𑀸𑀢𑀺 𑀇𑀫𑁂 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀸𑀦𑀁 𑀉𑀢𑁆𑀢𑀫𑀦𑁆𑀢𑀻 𑀯𑀤𑀦𑁆𑀢𑀺. 𑀦 𑀳𑀺 𑀧𑀩𑁆𑀩𑀚𑀺𑀢𑁄𑀢𑀺 𑀧𑀸𑀡𑀺𑀆𑀤𑀻𑀳𑀺 𑀧𑀭𑀁 𑀅𑀧𑀳𑀦𑀦𑁆𑀢𑁄 𑀯𑀺𑀳𑁂𑀞𑁂𑀦𑁆𑀢𑁄 𑀧𑀭𑀽𑀧𑀖𑀸𑀢𑀻 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀦 𑀲𑀫𑀡𑁄𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄 𑀲𑀫𑀡𑁄𑀧𑀺 𑀦 𑀳𑁄𑀢𑀺𑀬𑁂𑀯 ¶ .

𑀅𑀦𑀽𑀧𑀯𑀸𑀤𑁄𑀢𑀺 𑀅𑀦𑀽𑀧𑀯𑀸𑀤𑀦𑀜𑁆𑀘𑁂𑀯 𑀅𑀦𑀽𑀧𑀯𑀸𑀤𑀸𑀧𑀦𑀜𑁆𑀘. 𑀅𑀦𑀽𑀧𑀖𑀸𑀢𑁄𑀢𑀺 𑀅𑀦𑀽𑀧𑀖𑀸𑀢𑀦𑀜𑁆𑀘𑁂𑀯 𑀅𑀦𑀽𑀧𑀖𑀸𑀢𑀸𑀧𑀦𑀜𑁆𑀘 ¶ . 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀚𑁂𑀝𑁆𑀞𑀓𑀲𑀻𑀮𑁂. 𑀲𑀁𑀯𑀭𑁄𑀢𑀺 𑀧𑀺𑀤𑀳𑀦𑀁. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀫𑀢𑁆𑀢𑀜𑁆𑀜𑀼𑀪𑀸𑀯𑁄 𑀧𑀫𑀸𑀡𑀚𑀸𑀦𑀦𑀁. 𑀧𑀦𑁆𑀢𑀦𑁆𑀢𑀺 𑀯𑀺𑀯𑀺𑀢𑁆𑀢𑀁. 𑀅𑀥𑀺𑀘𑀺𑀢𑁆𑀢𑁂𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂 𑀅𑀥𑀺𑀘𑀺𑀢𑁆𑀢𑁂. 𑀆𑀬𑁄𑀕𑁄𑀢𑀺 𑀧𑀬𑁄𑀕𑀓𑀭𑀡𑀁. 𑀏𑀢𑀦𑁆𑀢𑀺 𑀏𑀢𑀁 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁. 𑀏𑀢𑁆𑀣 𑀳𑀺 𑀅𑀦𑀽𑀧𑀯𑀸𑀤𑁂𑀦 𑀯𑀸𑀘𑀲𑀺𑀓𑀁 𑀲𑀻𑀮𑀁 𑀓𑀣𑀺𑀢𑀁, 𑀅𑀦𑀽𑀧𑀖𑀸𑀢𑁂𑀦 𑀓𑀸𑀬𑀺𑀓𑀲𑀻𑀮𑀁, ‘‘𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄’’𑀢𑀺 𑀲𑀻𑀮𑀁 𑀓𑀣𑀺𑀢𑀁, 𑀅𑀦𑀽𑀧𑀖𑀸𑀢𑁂𑀦 𑀓𑀸𑀬𑀺𑀓𑀲𑀻𑀮𑀁, ‘‘𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄’’𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀜𑁆𑀘, 𑀫𑀢𑁆𑀢𑀜𑁆𑀜𑀼𑀢𑀸𑀬 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀘𑁂𑀯 𑀧𑀘𑁆𑀘𑀬𑀲𑀦𑁆𑀦𑀺𑀲𑀺𑀢𑀲𑀻𑀮𑀜𑁆𑀘, 𑀧𑀦𑁆𑀢𑀲𑁂𑀦𑀸𑀲𑀦𑁂𑀦 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁, 𑀅𑀥𑀺𑀘𑀺𑀢𑁆𑀢𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀓𑀣𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀧𑀜𑁆𑀳𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑀦 ¶ 𑀓𑀳𑀸𑀧𑀡𑀯𑀲𑁆𑀲𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀪𑀺𑀭𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 ‘‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀦𑁆𑀢𑁆𑀯𑀸 𑀉𑀤𑁆𑀤𑁂𑀲𑀁 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀉𑀧𑀚𑁆𑀛𑀸𑀬𑁂𑀦 𑀧𑁂𑀲𑀺𑀢𑁄 𑀢𑀢𑁆𑀣 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀼𑀦𑁄 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀼𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑀼𑀁 𑀲𑀫𑀢𑁆𑀣𑀁 𑀓𑀜𑁆𑀘𑀺 ¶ 𑀅𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀲𑁄𑀓𑁂𑀦 𑀯𑀺𑀧𑁆𑀧𑀮𑀧𑀦𑁆𑀢𑁄𑀬𑁂𑀯 𑀆𑀲𑀦𑁆𑀦𑀫𑀭𑀡𑁄 𑀳𑀼𑀢𑁆𑀯𑀸 ‘‘𑀇𑀤𑀁 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀫𑀽𑀮𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀓𑀳𑀸𑀧𑀡𑀲𑀢𑀁 𑀓𑀦𑀺𑀝𑁆𑀞𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀤𑀳𑀭𑀲𑁆𑀲 𑀆𑀕𑀢𑀓𑀸𑀮𑁂 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀧𑀯𑀝𑁆𑀝𑁂𑀦𑁆𑀢𑁄 𑀭𑁄𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀺𑀢𑀸 𑀢𑁂 𑀯𑀺𑀧𑁆𑀧𑀮𑀧𑀦𑁆𑀢𑁄𑀯 𑀓𑀸𑀮𑀓𑀢𑁄, 𑀫𑀬𑁆𑀳𑀁 𑀧𑀦 𑀢𑁂𑀦 𑀓𑀳𑀸𑀧𑀡𑀲𑀢𑀁 𑀳𑀢𑁆𑀣𑁂 𑀞𑀧𑀺𑀢𑀁, 𑀢𑁂𑀦 𑀓𑀺𑀁 𑀓𑀭𑁄𑀫𑀻’’𑀢𑀺 𑀆𑀳. 𑀤𑀳𑀭𑁄 ‘‘𑀦 𑀫𑁂 𑀓𑀳𑀸𑀧𑀡𑁂𑀳𑀺 𑀅𑀢𑁆𑀣𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑁂 𑀧𑀭𑀓𑀼𑀮𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀢𑁂𑀦, 𑀲𑀓𑁆𑀓𑀸 𑀢𑀁 𑀓𑀳𑀸𑀧𑀡𑀲𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀼𑀁, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀯𑀺𑀲𑁆𑀲𑀝𑁆𑀞𑀲𑀚𑁆𑀛𑀸𑀬𑀦𑀓𑀫𑁆𑀫𑀝𑁆𑀞𑀸𑀦𑁄 𑀧𑀡𑁆𑀟𑀼𑀭𑁄𑀕𑀻 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 𑀤𑀳𑀭𑀲𑀸𑀫𑀡𑁂𑀭𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀅𑀣 𑀦𑀁 𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀲𑀢𑁆𑀣𑀼 𑀤𑀲𑁆𑀲𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀏𑀯𑀫𑀓𑀸𑀲𑀺, 𑀅𑀢𑁆𑀣𑀺 𑀧𑀦 𑀢𑁂 ¶ 𑀓𑁄𑀘𑀺 𑀚𑀻𑀯𑀺𑀢𑀧𑀘𑁆𑀘𑀬𑁄’’𑀢𑀺 𑀆𑀳. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀢𑁂 𑀅𑀢𑁆𑀣𑀻’’𑀢𑀺? ‘‘𑀓𑀳𑀸𑀧𑀡𑀲𑀢𑀁, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺 𑀓𑀢𑁆𑀣𑀘𑀺 𑀢𑀸𑀯 𑀲𑀓𑁆𑀔𑀭𑀸 𑀆𑀳𑀭, 𑀕𑀡𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫 ‘‘𑀲𑀓𑁆𑀓𑀸 𑀯𑀸 𑀢𑀸𑀯𑀢𑁆𑀢𑀓𑁂𑀦 𑀚𑀻𑀯𑀺𑀢𑀼𑀁, 𑀦𑁄 𑀯𑀸’’𑀢𑀺. 𑀲𑁄 𑀲𑀓𑁆𑀔𑀭𑀸 𑀆𑀳𑀭𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀧𑀭𑀺𑀪𑁄𑀕𑀢𑁆𑀣𑀸𑀬 𑀢𑀸𑀯 𑀧𑀡𑁆𑀡𑀸𑀲𑀁 𑀞𑀧𑁂𑀳𑀺, 𑀤𑁆𑀯𑀺𑀦𑁆𑀦𑀁 𑀕𑁄𑀡𑀸𑀦𑀁 𑀅𑀢𑁆𑀣𑀸𑀬 𑀘𑀢𑀼𑀯𑀻𑀲𑀢𑀺, 𑀏𑀢𑁆𑀢𑀓𑀁 𑀦𑀸𑀫 𑀩𑀻𑀚𑀢𑁆𑀣𑀸𑀬, 𑀬𑀼𑀕𑀦𑀗𑁆𑀕𑀮𑀢𑁆𑀣𑀸𑀬, 𑀓𑀼𑀤𑁆𑀤𑀸𑀮𑀯𑀸𑀲𑀺𑀨𑀭𑀲𑀼𑀅𑀢𑁆𑀣𑀸𑀬𑀸’’𑀢𑀺 𑀏𑀯𑀁 𑀕𑀡𑀺𑀬𑀫𑀸𑀦𑁂 𑀢𑀁 𑀓𑀳𑀸𑀧𑀡𑀲𑀢𑀁 𑀦𑀧𑁆𑀧𑀳𑁄𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀢𑀯 𑀓𑀳𑀸𑀧𑀡𑀸 𑀅𑀧𑁆𑀧𑀓𑀸, 𑀓𑀣𑀁 𑀏𑀢𑁂 𑀦𑀺𑀲𑁆𑀲𑀸𑀬 𑀢𑀡𑁆𑀳𑀁 𑀧𑀽𑀭𑁂𑀲𑁆𑀲𑀲𑀺, 𑀅𑀢𑀻𑀢𑁂 𑀓𑀺𑀭 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀅𑀧𑁆𑀨𑁄𑀝𑀺𑀢𑀫𑀢𑁆𑀢𑁂𑀦 ¶ 𑀤𑁆𑀯𑀸𑀤𑀲𑀬𑁄𑀚𑀦𑀝𑁆𑀞𑀸𑀦𑁂 𑀓𑀝𑀺𑀧𑁆𑀧𑀫𑀸𑀡𑁂𑀦 𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀬𑀸𑀯 𑀙𑀢𑁆𑀢𑀺𑀁𑀲 𑀲𑀓𑁆𑀓𑀸 𑀘𑀯𑀦𑁆𑀢𑀺, 𑀏𑀢𑁆𑀢𑀓𑀁 𑀓𑀸𑀮𑀁 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸𑀧𑀺 𑀫𑀭𑀡𑀓𑀸𑀮𑁂 ¶ 𑀢𑀡𑁆𑀳𑀁 𑀅𑀧𑀽𑀭𑁂𑀢𑁆𑀯𑀸𑀯 𑀓𑀸𑀮𑀫𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀫𑀦𑁆𑀥𑀸𑀢𑀼𑀚𑀸𑀢𑀓𑀁 (𑀚𑀸. 𑁧.𑁩.𑁨𑁨) 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑁋

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀲𑀩𑁆𑀩𑁂𑀯 𑀤𑀸𑀲𑀸 𑀫𑀦𑁆𑀥𑀸𑀢𑀼, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸’’𑀢𑀺. 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀦𑀦𑁆𑀢𑀭𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀦 𑀓𑀳𑀸𑀧𑀡𑀯𑀲𑁆𑀲𑁂𑀦, 𑀢𑀺𑀢𑁆𑀢𑀺 𑀓𑀸𑀫𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄.

‘‘𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀺;

𑀢𑀡𑁆𑀳𑀓𑁆𑀔𑀬𑀭𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀓𑀳𑀸𑀧𑀡𑀯𑀲𑁆𑀲𑁂𑀦𑀸𑀢𑀺 𑀬𑀁 𑀲𑁄 𑀅𑀧𑁆𑀨𑁄𑀝𑁂𑀢𑁆𑀯𑀸 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀺, 𑀢𑀁 𑀇𑀥 𑀓𑀳𑀸𑀧𑀡𑀯𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀧𑀺 𑀳𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀤𑀼𑀧𑁆𑀧𑀽𑀭𑀸 𑀏𑀲𑀸 𑀢𑀡𑁆𑀳𑀸. 𑀅𑀧𑁆𑀧𑀲𑁆𑀲𑀸𑀤𑀸𑀢𑀺 𑀲𑀼𑀧𑀺𑀦𑀲𑀤𑀺𑀲𑀢𑀸𑀬 𑀧𑀭𑀺𑀢𑁆𑀢𑀲𑀼𑀔𑀸. 𑀤𑀼𑀔𑀸𑀢𑀺 𑀤𑀼𑀓𑁆𑀔𑀓𑁆𑀔𑀦𑁆𑀥𑀸𑀤𑀻𑀲𑀼 𑀆𑀕𑀢𑀤𑀼𑀓𑁆𑀔𑀯𑀲𑁂𑀦 𑀧𑀦 𑀩𑀳𑀼𑀤𑀼𑀓𑁆𑀔𑀸𑀯. 𑀇𑀢𑀺 𑀯𑀺𑀜𑁆𑀜𑀸𑀬𑀸𑀢𑀺 𑀏𑀯𑀫𑁂𑀢𑁂 𑀓𑀸𑀫𑁂 𑀚𑀸𑀦𑀺𑀢𑁆𑀯𑀸. 𑀅𑀧𑀺 𑀤𑀺𑀩𑁆𑀩𑁂𑀲𑀽𑀢𑀺 𑀲𑀘𑁂 𑀳𑀺 𑀤𑁂𑀯𑀸𑀦𑀁 𑀉𑀧𑀓𑀧𑁆𑀧𑀦𑀓𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑁂𑀬𑁆𑀬𑀸𑀧𑀺 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 ¶ 𑀯𑀺𑀬 𑀏𑀯𑀫𑁆𑀧𑀺 𑀢𑁂𑀲𑀼 𑀓𑀸𑀫𑁂𑀲𑀼 𑀭𑀢𑀺𑀁 𑀦 𑀯𑀺𑀦𑁆𑀤𑀢𑀺𑀬𑁂𑀯. 𑀢𑀡𑁆𑀳𑀓𑁆𑀔𑀬𑀭𑀢𑁄𑀢𑀺 𑀅𑀭𑀳𑀢𑁆𑀢𑁂 𑀘𑁂𑀯 𑀦𑀺𑀩𑁆𑀩𑀸𑀦𑁂 𑀘 𑀅𑀪𑀺𑀭𑀢𑁄 𑀳𑁄𑀢𑀺, 𑀢𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀯𑀦𑁂𑀦 𑀚𑀸𑀢𑁄 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀦𑀪𑀺𑀭𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀅𑀕𑁆𑀕𑀺𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀩𑀳𑀼𑀁 𑀯𑁂 𑀲𑀭𑀡𑀁 𑀬𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀸𑀮𑀺𑀓𑀭𑀸𑀲𑀺𑀫𑁆𑀳𑀺 𑀦𑀺𑀲𑀺𑀦𑁆𑀦𑀁 𑀅𑀕𑁆𑀕𑀺𑀤𑀢𑁆𑀢𑀁 𑀦𑀸𑀫 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 ¶ 𑀓𑀺𑀭 𑀫𑀳𑀸𑀓𑁄𑀲𑀮𑀲𑁆𑀲 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀅𑀣 𑀦𑀁 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 ‘‘𑀧𑀺𑀢𑀼 𑀫𑁂 𑀧𑀼𑀭𑁄𑀳𑀺𑀢𑁄’’𑀢𑀺 𑀕𑀸𑀭𑀯𑁂𑀦 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀓𑀸𑀮𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀢𑀺, ‘‘𑀆𑀘𑀭𑀺𑀬, 𑀇𑀥 𑀦𑀺𑀲𑀻𑀤𑀣𑀸’’𑀢𑀺 𑀲𑀫𑀸𑀦𑀸𑀲𑀦𑀁 𑀤𑀸𑀧𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀬𑀺 𑀅𑀢𑀺𑀯𑀺𑀬 𑀕𑀸𑀭𑀯𑀁 𑀓𑀭𑁄𑀢𑀺, 𑀦 𑀔𑁄 𑀧𑀦 𑀭𑀸𑀚𑀽𑀦𑀁 𑀦𑀺𑀘𑁆𑀘𑀓𑀸𑀮𑀫𑁂𑀯 𑀲𑀓𑁆𑀓𑀸 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁. 𑀲𑀫𑀸𑀦𑀯𑀬𑁂𑀦𑁂𑀯 𑀳𑀺 𑀲𑀤𑁆𑀥𑀺𑀁 𑀭𑀚𑁆𑀚𑀲𑀼𑀔𑀁 𑀦𑀸𑀫 𑀲𑀼𑀔𑀁 𑀳𑁄𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀫𑀳𑀮𑁆𑀮𑀓𑁄, 𑀧𑀩𑁆𑀩𑀚𑀺𑀢𑀼𑀁 𑀫𑁂 𑀬𑀼𑀢𑁆𑀢’’𑀦𑁆𑀢𑀺. 𑀲𑁄 𑀭𑀸𑀚𑀸𑀦𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑁂𑀦 𑀲𑀩𑁆𑀩𑀁 𑀅𑀢𑁆𑀢𑀦𑁄 ¶ 𑀥𑀦𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀁 𑀦𑀺𑀲𑁆𑀲𑀸𑀬 𑀤𑀲 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀗𑁆𑀕𑀫𑀕𑀥𑀸𑀦𑀜𑁆𑀘 𑀓𑀼𑀭𑀼𑀭𑀝𑁆𑀞𑀲𑁆𑀲 𑀘 𑀅𑀦𑁆𑀢𑀭𑁂 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀇𑀫𑀁 𑀑𑀯𑀸𑀤𑀁 𑀤𑁂𑀢𑀺, ‘‘𑀢𑀸𑀢𑀸, 𑀬𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀦𑀤𑀺𑀢𑁄 𑀏𑀓𑁂𑀓𑀁 𑀯𑀸𑀮𑀼𑀓𑀧𑀼𑀝𑀁 𑀉𑀤𑁆𑀥𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀑𑀓𑀺𑀭𑀢𑀽’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁂 𑀢𑀣𑀸 𑀓𑀭𑀺𑀁𑀲𑀼. 𑀅𑀧𑀭𑁂𑀦 𑀲𑀫𑀬𑁂𑀦 𑀫𑀳𑀸𑀯𑀸𑀮𑀼𑀓𑀭𑀸𑀲𑀺 𑀅𑀳𑁄𑀲𑀺, 𑀢𑀁 𑀅𑀳𑀺𑀙𑀢𑁆𑀢𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀧𑀝𑀺𑀕𑁆𑀕𑀳𑁂𑀲𑀺. 𑀅𑀗𑁆𑀕𑀫𑀕𑀥𑀯𑀸𑀲𑀺𑀦𑁄 𑀘𑁂𑀯 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀦𑁄 𑀘 𑀫𑀸𑀲𑁂 𑀫𑀸𑀲𑁂 𑀢𑁂𑀲𑀁 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀺𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀺. 𑀅𑀣 𑀦𑁂𑀲𑀁 𑀅𑀕𑁆𑀕𑀺𑀤𑀢𑁆𑀢𑁄 𑀇𑀫𑀁 𑀑𑀯𑀸𑀤𑀁 𑀅𑀤𑀸𑀲𑀺 𑁋 ‘‘𑀧𑀩𑁆𑀩𑀢𑀁 𑀲𑀭𑀡𑀁 𑀬𑀸𑀣, 𑀯𑀦𑀁 𑀲𑀭𑀡𑀁 𑀬𑀸𑀣, 𑀆𑀭𑀸𑀫𑀁 𑀲𑀭𑀡𑀁 𑀬𑀸𑀣, 𑀭𑀼𑀓𑁆𑀔𑀁 𑀲𑀭𑀡𑀁 𑀬𑀸𑀣, 𑀏𑀯𑀁 𑀲𑀩𑁆𑀩𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀣𑀸’’𑀢𑀺. 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀧𑀺 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀕𑁆𑀕𑀺𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑀁 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀇𑀫𑁂 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸’’𑀢𑀺 𑀜𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀳 𑁋 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀓𑀺𑀁 𑀧𑀲𑁆𑀲𑀲𑀺 𑀅𑀕𑁆𑀕𑀺𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑀁 𑀫𑀳𑀸𑀚𑀦𑀁 ¶ 𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑀸𑀧𑁂𑀦𑁆𑀢𑀁, 𑀕𑀘𑁆𑀙 𑀢𑁂𑀲𑀁 𑀑𑀯𑀸𑀤𑀁 𑀤𑁂𑀳𑀻’’𑀢𑀺. 𑀪𑀦𑁆𑀢𑁂, 𑀩𑀳𑀽 𑀏𑀢𑁂, 𑀏𑀓𑀓𑀲𑁆𑀲 𑀫𑀬𑁆𑀳𑀁 𑀅𑀯𑀺𑀲𑀬𑁆𑀳𑀸. 𑀲𑀘𑁂 ¶ 𑀢𑀼𑀫𑁆𑀳𑁂𑀧𑀺 𑀆𑀕𑀫𑀺𑀲𑁆𑀲𑀣, 𑀯𑀺𑀲𑀬𑁆𑀳𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺. 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀳𑀫𑁆𑀧𑀺 𑀆𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀧𑀼𑀭𑀢𑁄 𑀬𑀸𑀳𑀻𑀢𑀺. 𑀣𑁂𑀭𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁂 𑀩𑀮𑀯𑀦𑁆𑀢𑁄 𑀘𑁂𑀯 𑀩𑀳𑀽 𑀘. 𑀲𑀘𑁂 𑀲𑀩𑁆𑀩𑁂𑀲𑀁 𑀲𑀫𑀸𑀕𑀫𑀝𑁆𑀞𑀸𑀦𑁂 𑀓𑀺𑀜𑁆𑀘𑀺 ¶ 𑀓𑀣𑁂𑀲𑁆𑀲𑀸𑀫𑀺, 𑀲𑀩𑁆𑀩𑁂𑀧𑀺 𑀯𑀕𑁆𑀕𑀯𑀕𑁆𑀕𑁂𑀦 𑀉𑀝𑁆𑀞𑀳𑁂𑀬𑁆𑀬𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀣𑀽𑀮𑀨𑀼𑀲𑀺𑀢𑀓𑀁 𑀤𑁂𑀯𑀁 𑀯𑀼𑀝𑁆𑀞𑀸𑀧𑁂𑀲𑀺. 𑀢𑁂 𑀣𑀽𑀮𑀨𑀼𑀲𑀺𑀢𑀓𑁂𑀲𑀼 𑀧𑀢𑀦𑁆𑀢𑁂𑀲𑀼 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀁𑀲𑀼. 𑀣𑁂𑀭𑁄 𑀅𑀕𑁆𑀕𑀺𑀤𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀅𑀕𑁆𑀕𑀺𑀤𑀢𑁆𑀢𑀸’’𑀢𑀺 𑀆𑀳. 𑀲𑁄 𑀣𑁂𑀭𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀦𑀸𑀫𑁂𑀦 𑀆𑀮𑀧𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀓𑁄 𑀦𑀼 𑀔𑁄 𑀫𑀁 𑀦𑀸𑀫𑁂𑀦 𑀆𑀮𑀧𑀢𑀻’’𑀢𑀺 𑀫𑀸𑀦𑀣𑀤𑁆𑀥𑀢𑀸𑀬 ‘‘𑀓𑁄 𑀏𑀲𑁄’’𑀢𑀺 𑀆𑀳. ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀓𑀺𑀁 𑀯𑀤𑁂𑀲𑀻’’𑀢𑀺? ‘‘𑀅𑀚𑁆𑀚 𑀫𑁂 𑀏𑀓𑀭𑀢𑁆𑀢𑀺𑀁 𑀇𑀥 𑀯𑀲𑀦𑀝𑁆𑀞𑀸𑀦𑀁 𑀢𑁆𑀯𑀁 𑀆𑀘𑀺𑀓𑁆𑀔𑀸𑀳𑀻’’𑀢𑀺. ‘‘𑀇𑀥 𑀯𑀲𑀦𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀏𑀓𑀲𑁆𑀲 𑀏𑀓𑀸𑀯 𑀧𑀡𑁆𑀡𑀲𑀸𑀮𑀸’’𑀢𑀺. ‘‘𑀅𑀕𑁆𑀕𑀺𑀤𑀢𑁆𑀢, 𑀫𑀦𑀼𑀲𑁆𑀲𑀸 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁, 𑀕𑀸𑀯𑁄 𑀕𑀼𑀦𑁆𑀦𑀁, 𑀧𑀩𑁆𑀩𑀚𑀺𑀢𑀸 𑀧𑀩𑁆𑀩𑀚𑀺𑀢𑀸𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺, 𑀫𑀸 𑀏𑀯𑀁 𑀓𑀭𑀺, 𑀤𑁂𑀳𑀺 𑀫𑁂 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄’’𑀢𑀺? ‘‘𑀆𑀫, 𑀧𑀩𑁆𑀩𑀚𑀺𑀢𑁄𑀫𑁆𑀳𑀻’’𑀢𑀺. ‘‘𑀲𑀘𑁂 𑀧𑀩𑁆𑀩𑀚𑀺𑀢𑁄, 𑀓𑀳𑀁 𑀢𑁂 𑀔𑀸𑀭𑀺𑀪𑀡𑁆𑀟𑀁, 𑀓𑁄 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁄’’𑀢𑀺. ‘‘𑀅𑀢𑁆𑀣𑀺 𑀫𑁂 𑀧𑀭𑀺𑀓𑁆𑀔𑀸𑀭𑁄, 𑀯𑀺𑀲𑀼𑀁 𑀧𑀦 𑀦𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼𑀁 𑀤𑀼𑀓𑁆𑀔𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑁂𑀦𑁂𑀯 𑀦𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀸𑀫𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀲𑁄 ‘‘𑀢𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀲𑀻’’𑀢𑀺 𑀣𑁂𑀭𑀲𑁆𑀲 𑀓𑀼𑀚𑁆𑀛𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀅𑀫𑁆𑀳𑁂, 𑀅𑀕𑁆𑀕𑀺𑀤𑀢𑁆𑀢, 𑀫𑀸 𑀓𑀼𑀚𑁆𑀛𑀺, 𑀯𑀲𑀦𑀝𑁆𑀞𑀸𑀦𑀁 𑀫𑁂 𑀆𑀘𑀺𑀓𑁆𑀔𑀸𑀳𑀻’’𑀢𑀺. 𑀦𑀢𑁆𑀣𑀺 𑀏𑀢𑁆𑀣 𑀯𑀲𑀦𑀝𑁆𑀞𑀸𑀦𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀯𑀸𑀮𑀼𑀓𑀭𑀸𑀲𑀺𑀫𑁆𑀳𑀺 𑀓𑁄 𑀯𑀲𑀢𑀻𑀢𑀺. 𑀏𑀓𑁄, 𑀦𑀸𑀕𑀭𑀸𑀚𑀸𑀢𑀺. 𑀏𑀢𑀁 𑀫𑁂 𑀤𑁂𑀳𑀻𑀢𑀺. 𑀦 𑀲𑀓𑁆𑀓𑀸 𑀤𑀸𑀢𑀼𑀁, 𑀪𑀸𑀭𑀺𑀬𑀁 ¶ 𑀏𑀢𑀲𑁆𑀲 𑀓𑀫𑁆𑀫𑀦𑁆𑀢𑀺. 𑀳𑁄𑀢𑀼, 𑀤𑁂𑀳𑀺 𑀫𑁂𑀢𑀺. 𑀢𑁂𑀦 𑀳𑀺 𑀢𑁆𑀯𑀁 𑀏𑀯 𑀚𑀸𑀦𑀸𑀳𑀻𑀢𑀺.

𑀣𑁂𑀭𑁄 𑀯𑀸𑀮𑀼𑀓𑀭𑀸𑀲𑀺𑀅𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀦𑀸𑀕𑀭𑀸𑀚𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀇𑀢𑁄 𑀆𑀕𑀘𑁆𑀙𑀢𑀺, 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂 𑀫𑀫 𑀅𑀢𑁆𑀣𑀺𑀪𑀸𑀯𑀁, 𑀥𑀽𑀫𑀸𑀬𑀺𑀢𑁆𑀯𑀸 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀥𑀽𑀫𑀸𑀬𑀺. 𑀣𑁂𑀭𑁄 ‘‘𑀅𑀬𑀁 𑀦𑀸𑀕𑀭𑀸𑀚𑀸 ‘𑀅𑀳𑀫𑁂𑀯 𑀥𑀽𑀫𑀸𑀬𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀅𑀜𑁆𑀜𑁂 𑀦 𑀲𑀓𑁆𑀓𑁄𑀦𑁆𑀢𑀻’𑀢𑀺 𑀫𑀜𑁆𑀜𑁂 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺 𑀲𑀬𑀫𑁆𑀧𑀺 𑀥𑀽𑀫𑀸𑀬𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀭𑀻𑀭𑀢𑁄 𑀉𑀕𑁆𑀕𑀢𑀸 𑀥𑀽𑀫𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀉𑀪𑁄𑀧𑀺 𑀥𑀽𑀫𑀸 𑀣𑁂𑀭𑀁 𑀅𑀩𑀸𑀥𑁂𑀢𑁆𑀯𑀸 𑀦𑀸𑀕𑀭𑀸𑀚𑀸𑀦𑀫𑁂𑀯 𑀩𑀸𑀥𑁂𑀦𑁆𑀢𑀺. 𑀦𑀸𑀕𑀭𑀸𑀚𑀸 𑀥𑀽𑀫𑀯𑁂𑀕𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀚𑁆𑀚𑀮𑀺. 𑀣𑁂𑀭𑁄𑀧𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀧𑀚𑁆𑀚𑀮𑀺. 𑀅𑀕𑁆𑀕𑀺𑀚𑀸𑀮𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀉𑀪𑁄𑀧𑀺 𑀣𑁂𑀭𑀁 𑀅𑀩𑀸𑀥𑁂𑀢𑁆𑀯𑀸 𑀦𑀸𑀕𑀭𑀸𑀚𑀸𑀦𑀫𑁂𑀯 𑀩𑀸𑀥𑀬𑀺𑀁𑀲𑀼. 𑀅𑀣𑀲𑁆𑀲 𑀲𑀓𑀮𑀲𑀭𑀻𑀭𑀁 𑀉𑀓𑁆𑀓𑀸𑀳𑀺 𑀧𑀤𑀺𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀇𑀲𑀺𑀕𑀡𑁄 𑀑𑀮𑁄𑀓𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀕𑀭𑀸𑀚𑀸, 𑀲𑀫𑀡𑀁 𑀛𑀸𑀧𑁂𑀢𑀺, 𑀪𑀤𑁆𑀤𑀓𑁄 𑀯𑀢 𑀲𑀫𑀡𑁄 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀦𑀝𑁆𑀞𑁄’’𑀢𑀺. 𑀣𑁂𑀭𑁄 𑀦𑀸𑀕𑀭𑀸𑀚𑀸𑀦𑀁 ¶ 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀯𑀸𑀮𑀼𑀓𑀭𑀸𑀲𑀺𑀫𑁆𑀳𑀺 𑀦𑀺𑀲𑀻𑀤𑀺. 𑀦𑀸𑀕𑀭𑀸𑀚𑀸 𑀯𑀸𑀮𑀼𑀓𑀭𑀸𑀲𑀺𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀽𑀝𑀸𑀕𑀸𑀭𑀓𑀼𑀘𑁆𑀙𑀺𑀧𑀫𑀸𑀡𑀁 𑀨𑀡𑀁 𑀫𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀉𑀧𑀭𑀺 𑀥𑀸𑀭𑁂𑀲𑀺.

𑀇𑀲𑀺𑀕𑀡𑀸 ¶ 𑀧𑀸𑀢𑁄𑀯 ‘‘𑀲𑀫𑀡𑀲𑁆𑀲 𑀫𑀢𑀪𑀸𑀯𑀁 𑀯𑀸 𑀅𑀫𑀢𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀸𑀮𑀼𑀓𑀭𑀸𑀲𑀺𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀪𑀺𑀢𑁆𑀣𑀯𑀦𑁆𑀢𑀸 𑀆𑀳𑀁𑀲𑀼 𑁋 ‘‘𑀲𑀫𑀡, 𑀓𑀘𑁆𑀘𑀺 𑀦𑀸𑀕𑀭𑀸𑀚𑁂𑀦 𑀦 𑀩𑀸𑀥𑀺𑀢𑁄’’𑀢𑀺. ‘‘𑀓𑀺𑀁 𑀦 𑀧𑀲𑁆𑀲𑀣 𑀫𑀫 𑀉𑀧𑀭𑀺𑀨𑀡𑀁 𑀥𑀸𑀭𑁂𑀢𑁆𑀯𑀸 𑀞𑀺𑀢’’𑀦𑁆𑀢𑀺? 𑀢𑁂 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀲𑀫𑀡𑀲𑁆𑀲 𑀏𑀯𑀭𑀽𑀧𑁄 ¶ 𑀦𑀸𑀫 𑀦𑀸𑀕𑀭𑀸𑀚𑀸 𑀤𑀫𑀺𑀢𑁄’’𑀢𑀺 𑀣𑁂𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀆𑀕𑀢𑁄. 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀯𑀦𑁆𑀤𑀺. 𑀅𑀣 𑀦𑀁 𑀇𑀲𑀬𑁄 𑀆𑀳𑀁𑀲𑀼 𑁋 ‘‘𑀅𑀬𑀫𑁆𑀧𑀺 𑀢𑀬𑀸 𑀫𑀳𑀦𑁆𑀢𑀢𑀭𑁄’’𑀢𑀺. 𑀏𑀲𑁄 𑀪𑀕𑀯𑀸 𑀲𑀢𑁆𑀣𑀸, 𑀅𑀳𑀁 𑀇𑀫𑀲𑁆𑀲 𑀲𑀸𑀯𑀓𑁄𑀢𑀺. 𑀲𑀢𑁆𑀣𑀸 𑀯𑀸𑀮𑀼𑀓𑀭𑀸𑀲𑀺𑀫𑀢𑁆𑀣𑀓𑁂 𑀦𑀺𑀲𑀻𑀤𑀺, 𑀇𑀲𑀺𑀕𑀡𑁄 ‘‘𑀅𑀬𑀁 𑀢𑀸𑀯 𑀲𑀸𑀯𑀓𑀲𑁆𑀲 𑀆𑀦𑀼𑀪𑀸𑀯𑁄, 𑀇𑀫𑀲𑁆𑀲 𑀧𑀦 𑀆𑀦𑀼𑀪𑀸𑀯𑁄 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀢𑁆𑀣𑀸𑀭𑀁 𑀅𑀪𑀺𑀢𑁆𑀣𑀯𑀺. 𑀲𑀢𑁆𑀣𑀸 𑀅𑀕𑁆𑀕𑀺𑀤𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀅𑀕𑁆𑀕𑀺𑀤𑀢𑁆𑀢, 𑀢𑁆𑀯𑀁 𑀢𑀯 𑀲𑀸𑀯𑀓𑀸𑀦𑀜𑁆𑀘 𑀉𑀧𑀝𑁆𑀞𑀸𑀓𑀸𑀦𑀜𑁆𑀘 𑀑𑀯𑀸𑀤𑀁 𑀤𑀤𑀫𑀸𑀦𑁄 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀤𑁂𑀲𑀻’’𑀢𑀺. ‘‘𑀏𑀢𑀁 𑀧𑀩𑁆𑀩𑀢𑀁 𑀲𑀭𑀡𑀁 𑀕𑀘𑁆𑀙𑀣, 𑀯𑀦𑀁 𑀆𑀭𑀸𑀫𑀁 𑀭𑀼𑀓𑁆𑀔𑀁 𑀲𑀭𑀡𑀁 𑀕𑀘𑁆𑀙𑀣. 𑀏𑀢𑀸𑀦𑀺 𑀳𑀺 𑀲𑀭𑀡𑀁 𑀕𑀢𑁄 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀢𑁂𑀲𑀁 𑀑𑀯𑀸𑀤𑀁 𑀤𑀫𑁆𑀫𑀻𑀢𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀅𑀕𑁆𑀕𑀺𑀤𑀢𑁆𑀢, 𑀏𑀢𑀸𑀦𑀺 𑀲𑀭𑀡𑀁 𑀕𑀢𑁄 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺, 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀧𑀦 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀩𑀳𑀼𑀁 𑀯𑁂 𑀲𑀭𑀡𑀁 𑀬𑀦𑁆𑀢𑀺, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘;

𑀆𑀭𑀸𑀫𑀭𑀼𑀓𑁆𑀔𑀘𑁂𑀢𑁆𑀬𑀸𑀦𑀺, 𑀫𑀦𑀼𑀲𑁆𑀲𑀸 𑀪𑀬𑀢𑀚𑁆𑀚𑀺𑀢𑀸.

‘‘𑀦𑁂𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀦𑁂𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀦𑁂𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

‘‘𑀏𑀢𑀁 ¶ ¶ 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀩𑀳𑀼𑀦𑁆𑀢𑀺 𑀩𑀳𑀼. 𑀧𑀩𑁆𑀩𑀢𑀸𑀦𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀇𑀲𑀺𑀕𑀺𑀮𑀺𑀯𑁂𑀧𑀼𑀮𑁆𑀮𑀯𑁂𑀪𑀸𑀭𑀸𑀤𑀺𑀓𑁂 𑀧𑀩𑁆𑀩𑀢𑁂 𑀘 𑀫𑀳𑀸𑀯𑀦𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀸𑀤𑀻𑀦𑀺 ¶ 𑀯𑀦𑀸𑀦𑀺 𑀘 𑀯𑁂𑀴𑀼𑀯𑀦𑀚𑀻𑀯𑀓𑀫𑁆𑀩𑀯𑀦𑀸𑀤𑀬𑁄 𑀆𑀭𑀸𑀫𑁂 𑀘 𑀉𑀤𑁂𑀦𑀘𑁂𑀢𑀺𑀬𑀕𑁄𑀢𑀫𑀘𑁂𑀢𑀺𑀬𑀸𑀤𑀻𑀦𑀺 𑀭𑀼𑀓𑁆𑀔𑀘𑁂𑀢𑁆𑀬𑀸𑀦𑀺 𑀘 𑀢𑁂 𑀢𑁂 𑀫𑀦𑀼𑀲𑁆𑀲𑀸 𑀢𑁂𑀦 𑀢𑁂𑀦 𑀪𑀬𑁂𑀦 𑀢𑀚𑁆𑀚𑀺𑀢𑀸 𑀪𑀬𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀧𑀼𑀢𑁆𑀢𑀮𑀸𑀪𑀸𑀤𑀻𑀦𑀺 𑀯𑀸 𑀧𑀢𑁆𑀣𑀬𑀫𑀸𑀦𑀸 𑀲𑀭𑀡𑀁 𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀢𑀁 𑀲𑀭𑀡𑀦𑁆𑀢𑀺 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀲𑀭𑀡𑀁 𑀦𑁂𑀯 𑀔𑁂𑀫𑀁 𑀦 𑀉𑀢𑁆𑀢𑀫𑀁, 𑀦 𑀘 𑀏𑀢𑀁 𑀧𑀝𑀺𑀘𑁆𑀘 𑀚𑀸𑀢𑀺𑀆𑀤𑀺𑀥𑀫𑁆𑀫𑁂𑀲𑀼 𑀲𑀢𑁆𑀢𑁂𑀲𑀼 𑀏𑀓𑁄𑀧𑀺 𑀚𑀸𑀢𑀺𑀆𑀤𑀺𑀢𑁄 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀬𑁄 𑀘𑀸𑀢𑀺 𑀇𑀤𑀁 𑀅𑀔𑁂𑀫𑀁 𑀅𑀦𑀼𑀢𑁆𑀢𑀫𑀁 𑀲𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀔𑁂𑀫𑀁 𑀉𑀢𑁆𑀢𑀫𑀁 𑀲𑀭𑀡𑀁 𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀘 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀓𑀁 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀲𑁆𑀲𑀸𑀬 𑀲𑁂𑀝𑁆𑀞𑀯𑀲𑁂𑀦 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄, 𑀢𑀲𑁆𑀲𑀧𑀺 𑀢𑀁 𑀲𑀭𑀡𑀕𑀫𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀯𑀦𑁆𑀤𑀦𑀸𑀤𑀻𑀳𑀺 𑀓𑀼𑀧𑁆𑀧𑀢𑀺 𑀘𑀮𑀢𑀺. 𑀢𑀲𑁆𑀲 𑀧𑀦 𑀅𑀘𑀮𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀫𑀕𑁆𑀕𑁂𑀦 𑀆𑀕𑀢𑀲𑀭𑀡𑀫𑁂𑀯 𑀧𑀓𑀸𑀲𑀦𑁆𑀢𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀆𑀳. 𑀬𑁄 𑀳𑀺 𑀏𑀢𑁂𑀲𑀁 𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀏𑀢𑀸𑀦𑀺 𑀲𑀭𑀡𑀁 ¶ 𑀕𑀢𑁄, 𑀏𑀢𑀲𑁆𑀲 𑀏𑀢𑀁 𑀲𑀭𑀡𑀁 𑀔𑁂𑀫𑀜𑁆𑀘 𑀉𑀢𑁆𑀢𑀫𑀜𑁆𑀘, 𑀲𑁄 𑀘 𑀧𑀼𑀕𑁆𑀕𑀮𑁄 𑀏𑀢𑀁 𑀲𑀭𑀡𑀁 𑀧𑀝𑀺𑀘𑁆𑀘 𑀲𑀓𑀮𑀲𑁆𑀫𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀢𑁂 𑀇𑀲𑀬𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀘𑀻𑀯𑀭𑀕𑀩𑁆𑀪𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀆𑀳. 𑀢𑁂 𑀢𑀗𑁆𑀔𑀡𑁂𑀬𑁂𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀲𑁄 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀅𑀗𑁆𑀕𑀫𑀕𑀥𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦𑀁 𑀲𑀓𑁆𑀓𑀸𑀭𑀁 𑀆𑀤𑀸𑀬 𑀆𑀕𑀫𑀦𑀤𑀺𑀯𑀲𑁄 𑀅𑀳𑁄𑀲𑀺. 𑀢𑁂 𑀲𑀓𑁆𑀓𑀸𑀭𑀁 𑀆𑀤𑀸𑀬 𑀆𑀕𑀢𑀸 𑀲𑀩𑁆𑀩𑁂𑀧𑀺 𑀢𑁂 𑀇𑀲𑀬𑁄 𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀅𑀕𑁆𑀕𑀺𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑁄 𑀫𑀳𑀸, 𑀉𑀤𑀸𑀳𑀼 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀆𑀕𑀢𑀢𑁆𑀢𑀸 ‘‘𑀅𑀕𑁆𑀕𑀺𑀤𑀢𑁆𑀢𑁄𑀯 𑀫𑀳𑀸’’𑀢𑀺 𑀫𑀜𑁆𑀜𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀕𑁆𑀕𑀺𑀤𑀢𑁆𑀢, 𑀧𑀭𑀺𑀲𑀸𑀬 𑀓𑀗𑁆𑀔𑀁 𑀙𑀺𑀦𑁆𑀤𑀸’’𑀢𑀺 𑀆𑀳. 𑀲𑁄 ‘‘𑀅𑀳𑀫𑁆𑀧𑀺 𑀏𑀢𑁆𑀢𑀓𑀫𑁂𑀯 ¶ 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀇𑀤𑁆𑀥𑀺𑀩𑀮𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀭𑀼𑀬𑁆𑀳 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀯𑀢𑁆𑀯𑀸 𑀲𑀸𑀯𑀓𑀢𑁆𑀢𑀁 𑀧𑀓𑀸𑀲𑁂𑀲𑀻𑀢𑀺.

𑀅𑀕𑁆𑀕𑀺𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀆𑀦𑀦𑁆𑀤𑀢𑁆𑀣𑁂𑀭𑀧𑀜𑁆𑀳𑀯𑀢𑁆𑀣𑀼

𑀤𑀼𑀮𑁆𑀮𑀪𑁄𑀢𑀺 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀜𑁆𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀣𑁂𑀭𑁄 𑀳𑀺 𑀏𑀓𑀤𑀺𑀯𑀲𑀁 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀳𑀢𑁆𑀣𑀸𑀚𑀸𑀦𑀻𑀬𑁄 ¶ 𑀙𑀤𑁆𑀤𑀦𑁆𑀢𑀓𑀼𑀮𑁂 𑀯𑀸 𑀉𑀧𑁄𑀲𑀣𑀓𑀼𑀮𑁂 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀲𑁆𑀲𑀸𑀚𑀸𑀦𑀻𑀬𑁄 𑀲𑀺𑀦𑁆𑀥𑀯𑀓𑀼𑀮𑁂 𑀯𑀸 𑀯𑀮𑀸𑀳𑀓𑀲𑁆𑀲𑀭𑀸𑀚𑀓𑀼𑀮𑁂 𑀯𑀸, 𑀉𑀲𑀪𑁄 𑀕𑁄𑀆𑀚𑀦𑀻𑀬𑁄 𑀤𑀓𑁆𑀔𑀺𑀡𑀧𑀣𑁂𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁂𑀦 𑀲𑀢𑁆𑀣𑀸𑀭𑀸 𑀳𑀢𑁆𑀣𑀺𑀆𑀚𑀸𑀦𑀻𑀬𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀢𑀸𑀦𑀺, 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀧𑀦 𑀓𑀳𑀁 𑀦𑀼 𑀔𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸, ‘‘𑀆𑀦𑀦𑁆𑀤, 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀦𑀸𑀫 𑀲𑀩𑁆𑀩𑀢𑁆𑀣 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀚𑀼𑀓𑀢𑁄 𑀧𑀦 𑀢𑀺𑀬𑁄𑀚𑀦𑀲𑀢𑀸𑀬𑀸𑀫𑁂 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀲𑀢𑁂 𑀆𑀯𑀝𑁆𑀝𑀢𑁄 𑀦𑀯𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑁂 𑀫𑀚𑁆𑀛𑀺𑀫𑀧𑀤𑁂𑀲𑀝𑁆𑀞𑀸𑀦𑁂 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑁄 𑀘 𑀧𑀦 𑀦 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸𑀦𑀁 𑀧𑀦 𑀅𑀜𑁆𑀜𑀢𑀭𑀲𑁆𑀫𑀺𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀤𑀼𑀮𑁆𑀮𑀪𑁄 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀦 𑀲𑁄 𑀲𑀩𑁆𑀩𑀢𑁆𑀣 𑀚𑀸𑀬𑀢𑀺;

𑀬𑀢𑁆𑀣 𑀲𑁄 𑀚𑀸𑀬𑀢𑀻 𑀥𑀻𑀭𑁄, 𑀢𑀁 𑀓𑀼𑀮𑀁 𑀲𑀼𑀔𑀫𑁂𑀥𑀢𑀻’’𑀢𑀺.

𑀢𑀢𑁆𑀣 𑀤𑀼𑀮𑁆𑀮𑀪𑁄𑀢𑀺 𑀧𑀼𑀭𑀺𑀲𑀸𑀚𑀜𑁆𑀜𑁄 𑀳𑀺 𑀤𑀼𑀮𑁆𑀮𑀪𑁄, 𑀦 𑀳𑀢𑁆𑀣𑀺𑀆𑀚𑀸𑀦𑀻𑀬𑀸𑀤𑀬𑁄 𑀯𑀺𑀬 𑀲𑀼𑀮𑀪𑁄, 𑀲𑁄 𑀲𑀩𑁆𑀩𑀢𑁆𑀣 𑀧𑀘𑁆𑀘𑀦𑁆𑀢𑀤𑁂𑀲𑁂 𑀯𑀸 𑀦𑀻𑀘𑀓𑀼𑀮𑁂 𑀯𑀸 𑀦 𑀚𑀸𑀬𑀢𑀺, 𑀫𑀚𑁆𑀛𑀺𑀫𑀤𑁂𑀲𑁂𑀧𑀺 𑀫𑀳𑀸𑀚𑀦𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀺𑀲𑀓𑁆𑀓𑀸𑀭𑀓𑀭𑀡𑀝𑁆𑀞𑀸𑀦𑁂 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀢𑀺. 𑀏𑀯𑀁 𑀚𑀸𑀬𑀫𑀸𑀦𑁄 𑀬𑀢𑁆𑀣 𑀲𑁄 𑀚𑀸𑀬𑀢𑀺 𑀥𑀻𑀭𑁄 𑀉𑀢𑁆𑀢𑀫𑀧𑀜𑁆𑀜𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ , 𑀢𑀁 𑀓𑀼𑀮𑀁 𑀲𑀼𑀔𑀫𑁂𑀥𑀢𑀻𑀢𑀺 𑀲𑀼𑀔𑀧𑁆𑀧𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀧𑀜𑁆𑀳𑀯𑀢𑁆𑀣𑀼 𑀲𑀢𑁆𑀢𑀫𑀁.

𑀲𑀼𑀔𑁄 ¶ ¶ 𑀩𑀼𑀤𑁆𑀥𑀸𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀦𑀺𑀲𑀺𑀦𑁆𑀦𑀸, ‘‘𑀆𑀯𑀼𑀲𑁄, 𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀼𑀔’’𑀦𑁆𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁? 𑀢𑀢𑁆𑀣 𑀓𑁂𑀘𑀺 ‘‘𑀭𑀚𑁆𑀚𑀲𑀼𑀔𑀲𑀤𑀺𑀲𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳𑀁𑀲𑀼. 𑀓𑁂𑀘𑀺 𑀓𑀸𑀫𑀲𑀼𑀔𑀲𑀤𑀺𑀲𑀁, 𑀓𑁂𑀘𑀺 ‘‘𑀲𑀸𑀮𑀺𑀫𑀁𑀲𑀪𑁄𑀚𑀦𑀸𑀤𑀺𑀲𑀤𑀺𑀲𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀓𑀣𑁂𑀣? 𑀇𑀤𑀜𑁆𑀳𑀺 𑀲𑀩𑁆𑀩𑀫𑁆𑀧𑀺 𑀲𑀼𑀔𑀁 𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀥𑀫𑁆𑀫𑀲𑁆𑀲𑀯𑀦𑀁, 𑀲𑀗𑁆𑀖𑀲𑀸𑀫𑀕𑁆𑀕𑀻, 𑀲𑀫𑁆𑀫𑁄𑀤𑀫𑀸𑀦𑀪𑀸𑀯𑁄𑀢𑀺 𑀇𑀤𑀫𑁂𑀯 𑀲𑀼𑀔’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄, 𑀲𑀼𑀔𑀸 𑀲𑀤𑁆𑀥𑀫𑁆𑀫𑀤𑁂𑀲𑀦𑀸;

𑀲𑀼𑀔𑀸 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻, 𑀲𑀫𑀕𑁆𑀕𑀸𑀦𑀁 𑀢𑀧𑁄 𑀲𑀼𑀔𑁄’’𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄𑀢𑀺 𑀬𑀲𑁆𑀫𑀸 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀫𑀳𑀸𑀚𑀦𑀁 𑀭𑀸𑀕𑀓𑀦𑁆𑀢𑀸𑀭𑀸𑀤𑀻𑀳𑀺 𑀢𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 𑀲𑀼𑀔𑁄 𑀉𑀢𑁆𑀢𑀫𑁄. 𑀬𑀲𑁆𑀫𑀸 ¶ 𑀲𑀤𑁆𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀚𑀸𑀢𑀺𑀆𑀤𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀆𑀤𑀻𑀳𑀺 𑀫𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀲𑀤𑁆𑀥𑀫𑁆𑀫𑀤𑁂𑀲𑀦𑀸 𑀲𑀼𑀔𑀸. 𑀲𑀸𑀫𑀕𑁆𑀕𑀻𑀢𑀺 𑀲𑀫𑀘𑀺𑀢𑁆𑀢𑀢𑀸, 𑀲𑀸𑀧𑀺 𑀲𑀼𑀔𑀸 𑀏𑀯. 𑀲𑀫𑀕𑁆𑀕𑀸𑀦𑀁 𑀧𑀦 𑀏𑀓𑀘𑀺𑀢𑁆𑀢𑀸𑀦𑀁 𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀯𑀸 𑀉𑀕𑁆𑀕𑀡𑁆𑀳𑀺𑀢𑀼𑀁 𑀥𑀼𑀢𑀗𑁆𑀕𑀸𑀦𑀺 𑀯𑀸 𑀧𑀭𑀺𑀳𑀭𑀺𑀢𑀼𑀁 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀸𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀲𑀫𑀕𑁆𑀕𑀸𑀦𑀁 𑀢𑀧𑁄 𑀲𑀼𑀔𑁄𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑁆𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀲𑀗𑁆𑀖𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁧𑁩𑁬).

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀼𑀯𑀡𑁆𑀡𑀘𑁂𑀢𑀺𑀬𑀯𑀢𑁆𑀣𑀼

𑀧𑀽𑀚𑀸𑀭𑀳𑁂𑀢𑀺 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀣𑀸𑀕𑀢𑁄 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑁄𑀤𑁂𑀬𑁆𑀬𑀕𑀸𑀫𑀲𑁆𑀲 𑀲𑀫𑀻𑀧𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀅𑀜𑁆𑀜𑀢𑀭𑀁 𑀤𑁂𑀯𑀝𑁆𑀞𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀢𑁆𑀭 𑀦𑀺𑀲𑀺𑀦𑁆𑀦𑁄 𑀲𑀼𑀕𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑁂𑀲𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀓𑀲𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀲𑀺 ¶ . 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀆𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀅𑀦𑀪𑀺𑀯𑀦𑁆𑀤𑀺𑀢𑁆𑀯𑀸 𑀢𑀫𑁂𑀯 𑀤𑁂𑀯𑀝𑁆𑀞𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀼𑀕𑀢𑁄𑀧𑀺 ‘‘𑀇𑀫𑀁 𑀧𑀤𑁂𑀲𑀁 𑀓𑀺𑀦𑁆𑀢𑀺 𑀫𑀜𑁆𑀜𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀆𑀳. 𑀅𑀫𑁆𑀳𑀸𑀓𑀁 𑀧𑀯𑁂𑀡𑀺𑀬𑀸 𑀆𑀕𑀢𑀘𑁂𑀢𑀺𑀬𑀝𑁆𑀞𑀸𑀦𑀦𑁆𑀢𑀺 𑀯𑀦𑁆𑀤𑀸𑀫𑀺, 𑀪𑁄 𑀕𑁄𑀢𑀫𑀸𑀢𑀺. ‘‘𑀇𑀫𑀁 𑀞𑀸𑀦𑀁 𑀯𑀦𑁆𑀤𑀦𑁆𑀢𑁂𑀦 𑀢𑀬𑀸 𑀲𑀸𑀥𑀼 𑀓𑀢𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀲𑀼𑀕𑀢𑁄 𑀢𑀁 𑀲𑀫𑁆𑀧𑀳𑀁𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀪𑀕𑀯𑀸 𑀏𑀯𑀁 𑀲𑀫𑁆𑀧𑀳𑀁𑀲𑁂𑀲𑀻’’𑀢𑀺 𑀲𑀁𑀲𑀬𑀁 𑀲𑀜𑁆𑀚𑀦𑁂𑀲𑀼𑀁. 𑀢𑀢𑁄 𑀢𑀣𑀸𑀕𑀢𑁄 𑀢𑁂𑀲𑀁 𑀲𑀁𑀲𑀬𑀫𑀧𑀦𑁂𑀢𑀼𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀖𑀝𑀺𑀓𑀸𑀭𑀲𑀼𑀢𑁆𑀢𑀦𑁆𑀢𑀁 (𑀫. 𑀦𑀺. 𑁨.𑁨𑁮𑁨 𑀆𑀤𑀬𑁄) 𑀯𑀢𑁆𑀯𑀸 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀬𑁄𑀚𑀦𑀼𑀩𑁆𑀩𑁂𑀥𑀁 𑀓𑀦𑀓𑀘𑁂𑀢𑀺𑀬𑀁 𑀅𑀧𑀭𑀜𑁆𑀘 𑀓𑀦𑀓𑀘𑁂𑀢𑀺𑀬𑀁 𑀆𑀓𑀸𑀲𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀳𑀸𑀚𑀦𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀏𑀯𑀁𑀯𑀺𑀥𑀸𑀦𑀁 𑀧𑀽𑀚𑀸𑀭𑀳𑀸𑀦𑀁 𑀧𑀽𑀚𑀸 𑀬𑀼𑀢𑁆𑀢𑀢𑀭𑀸𑀯𑀸’’𑀢𑀺 𑀯𑀢𑁆𑀯𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁨𑁦𑁬) 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀩𑀼𑀤𑁆𑀥𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀣𑀽𑀧𑀸𑀭𑀳𑁂 𑀧𑀓𑀸𑀲𑁂𑀢𑁆𑀯𑀸 𑀲𑀭𑀻𑀭𑀘𑁂𑀢𑀺𑀬𑀁 𑀉𑀤𑁆𑀤𑀺𑀲𑁆𑀲𑀘𑁂𑀢𑀺𑀬𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀦𑁆𑀢𑀺 𑀢𑀻𑀡𑀺 𑀘𑁂𑀢𑀺𑀬𑀸𑀦𑀺 𑀯𑀺𑀲𑁂𑀲𑀢𑁄 𑀧𑀭𑀺𑀤𑀻𑀧𑁂𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺 𑀘 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

‘‘𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀅𑀧. 𑀣𑁂𑀭 𑁧.𑁧𑁦.𑁧-𑁨);

𑀢𑀢𑁆𑀣 𑀧𑀽𑀚𑀺𑀢𑀼𑀁 𑀅𑀭𑀳𑀸 𑀧𑀽𑀚𑀸𑀭𑀳𑀸, 𑀧𑀽𑀚𑀺𑀢𑀼𑀁 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄𑀢𑀺 𑀅𑀪𑀺𑀯𑀸𑀤𑀦𑀸𑀤𑀻𑀳𑀺 𑀘 𑀘𑀢𑀽𑀳𑀺 𑀘 𑀧𑀘𑁆𑀘𑀬𑁂𑀳𑀺 ¶ 𑀧𑀽𑀚𑁂𑀦𑁆𑀢𑀲𑁆𑀲. 𑀧𑀽𑀚𑀸𑀭𑀳𑁂 𑀤𑀲𑁆𑀲𑁂𑀢𑀺 𑀩𑀼𑀤𑁆𑀥𑁂𑀢𑀺𑀆𑀤𑀺𑀦𑀸. 𑀩𑀼𑀤𑁆𑀥𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂. 𑀬𑀤𑀻𑀢𑀺 𑀬𑀤𑀺 𑀯𑀸, 𑀅𑀣 𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀢𑀺 𑀓𑀣𑀺𑀢𑀁 𑀳𑁄𑀢𑀺, 𑀲𑀸𑀯𑀓𑁂 𑀘. 𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂𑀢𑀺 𑀲𑀫𑀢𑀺𑀓𑁆𑀓𑀦𑁆𑀢𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀧𑀧𑀜𑁆𑀘𑁂. 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂𑀢𑀺 ¶ 𑀅𑀢𑀺𑀓𑁆𑀓𑀦𑁆𑀢𑀲𑁄𑀓𑀧𑀭𑀺𑀤𑁆𑀤𑀯𑁂 ¶ , 𑀇𑀫𑁂 𑀤𑁆𑀯𑁂 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀳𑀺 𑀧𑀽𑀚𑀸𑀭𑀳𑀢𑁆𑀢𑀁 𑀤𑀲𑁆𑀲𑀺𑀢𑀁.

𑀢𑁂𑀢𑀺 𑀩𑀼𑀤𑁆𑀥𑀸𑀤𑀬𑁄. 𑀢𑀸𑀤𑀺𑀲𑁂𑀢𑀺 𑀯𑀼𑀢𑁆𑀢𑀕𑀳𑀡𑀯𑀲𑁂𑀦. 𑀦𑀺𑀩𑁆𑀩𑀼𑀢𑁂𑀢𑀺 𑀭𑀸𑀕𑀸𑀤𑀺𑀦𑀺𑀩𑁆𑀩𑀼𑀢𑀺𑀬𑀸. 𑀦𑀢𑁆𑀣𑀺 𑀓𑀼𑀢𑁄𑀘𑀺 𑀪𑀯𑀢𑁄 𑀯𑀸 𑀆𑀭𑀫𑁆𑀫𑀡𑀢𑁄 𑀯𑀸 𑀏𑀢𑁂𑀲𑀁 𑀪𑀬𑀦𑁆𑀢𑀺 𑀅𑀓𑀼𑀢𑁄𑀪𑀬𑀸, 𑀢𑁂 𑀅𑀓𑀼𑀢𑁄𑀪𑀬𑁂. 𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀦𑁆𑀢𑀺 𑀧𑀼𑀜𑁆𑀜𑀁 𑀕𑀡𑁂𑀢𑀼𑀁 𑀦 𑀲𑀓𑁆𑀓𑀸. 𑀓𑀣𑀦𑁆𑀢𑀺 𑀘𑁂? 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻𑀢𑀺 𑀇𑀫𑀁 𑀏𑀢𑁆𑀢𑀓𑀁, 𑀇𑀫𑀁 𑀏𑀢𑁆𑀢𑀓𑀦𑁆𑀢𑀺 𑀓𑁂𑀦𑀘𑀻𑀢𑀺 𑀅𑀧𑀺𑀲𑀤𑁆𑀤𑁄 𑀇𑀥 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄, 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀫𑀸𑀦𑁂𑀦 𑀯𑀸. 𑀢𑀢𑁆𑀣 𑀧𑀼𑀕𑁆𑀕𑀮𑁂𑀦𑀸𑀢𑀺 𑀢𑁂𑀦 𑀩𑁆𑀭𑀳𑁆𑀫𑀸𑀤𑀺𑀦𑀸. 𑀫𑀸𑀦𑁂𑀦𑀸𑀢𑀺 𑀢𑀺𑀯𑀺𑀥𑁂𑀦 𑀫𑀸𑀦𑁂𑀦 𑀢𑀻𑀭𑀡𑁂𑀦 𑀥𑀸𑀭𑀡𑁂𑀦 𑀧𑀽𑀭𑀡𑁂𑀦 𑀯𑀸. 𑀢𑀻𑀭𑀡𑀁 𑀦𑀸𑀫 𑀇𑀤𑀁 𑀏𑀢𑁆𑀢𑀓𑀦𑁆𑀢𑀺 𑀦𑀬𑀢𑁄 𑀢𑀻𑀭𑀡𑀁. 𑀥𑀸𑀭𑀡𑀦𑁆𑀢𑀺 𑀢𑀼𑀮𑀸𑀬 𑀥𑀸𑀭𑀡𑀁. 𑀧𑀽𑀭𑀡𑀁 𑀦𑀸𑀫 𑀅𑀟𑁆𑀠𑀧𑀲𑀢𑀧𑀢𑁆𑀣𑀦𑀸𑀴𑀺𑀓𑀸𑀤𑀺𑀯𑀲𑁂𑀦 𑀧𑀽𑀭𑀡𑀁. 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀇𑀫𑁂𑀳𑀺 𑀢𑀻𑀳𑀺 𑀫𑀸𑀦𑁂𑀳𑀺 𑀩𑀼𑀤𑁆𑀥𑀸𑀤𑀺𑀓𑁂 𑀧𑀽𑀚𑀬𑀢𑁄 𑀧𑀼𑀜𑁆𑀜𑀁 𑀯𑀺𑀧𑀸𑀓𑀯𑀲𑁂𑀦 𑀕𑀡𑁂𑀢𑀼𑀁 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀭𑀳𑀺𑀢𑀢𑁄𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀽𑀚𑀬𑀢𑁄 𑀓𑀺𑀁 𑀤𑀸𑀦𑀁 𑀧𑀞𑀫𑀁 𑀥𑀭𑀫𑀸𑀦𑁂 𑀩𑀼𑀤𑁆𑀥𑀸𑀤𑀻 𑀧𑀽𑀚𑀬𑀢𑁄 𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀧𑀼𑀦 𑀢𑁂 𑀢𑀸𑀤𑀺𑀲𑁂 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀦𑀺𑀫𑀺𑀢𑁆𑀢𑁂𑀦 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁂𑀧𑀺 𑀧𑀽𑀚𑀬𑀢𑁄 𑀦 𑀲𑀓𑁆𑀓𑀸 𑀲𑀗𑁆𑀔𑀸𑀢𑀼𑀦𑁆𑀢𑀺 𑀪𑁂𑀤𑀸 𑀬𑀼𑀚𑁆𑀚𑀦𑁆𑀢𑀺. 𑀢𑁂𑀦 𑀳𑀺 𑀯𑀺𑀫𑀸𑀦𑀯𑀢𑁆𑀣𑀼𑀫𑁆𑀳𑀺 𑁋

‘‘𑀢𑀺𑀝𑁆𑀞𑀦𑁆𑀢𑁂 ¶ 𑀦𑀺𑀩𑁆𑀩𑀼𑀢𑁂 𑀘𑀸𑀧𑀺, 𑀲𑀫𑁂 𑀘𑀺𑀢𑁆𑀢𑁂 𑀲𑀫𑀁 𑀨𑀮𑀁;

𑀘𑁂𑀢𑁄𑀧𑀡𑀺𑀥𑀺𑀳𑁂𑀢𑀼 𑀳𑀺, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺. (𑀯𑀺. 𑀯. 𑁮𑁦𑁬);

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀻𑀢𑀺. 𑀬𑁄𑀚𑀦𑀺𑀓𑀁 𑀓𑀦𑀓𑀘𑁂𑀢𑀺𑀬𑀁 𑀲𑀢𑁆𑀢𑀸𑀳𑀫𑀸𑀓𑀸𑀲𑁂𑀯 𑀅𑀝𑁆𑀞𑀸𑀲𑀺, 𑀫𑀳𑀦𑁆𑀢𑁂𑀦 𑀲𑀫𑀸𑀕𑀫𑁄 𑀘𑀸𑀳𑁄𑀲𑀺, 𑀲𑀢𑁆𑀢𑀸𑀳𑀁 𑀘𑁂𑀢𑀺𑀬𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀽𑀚𑁂𑀲𑀼𑀁. 𑀢𑀢𑁄 𑀪𑀺𑀦𑁆𑀦𑀮𑀤𑁆𑀥𑀺𑀓𑀸𑀦𑀁 𑀮𑀤𑁆𑀥𑀺𑀪𑁂𑀤𑁄 𑀚𑀸𑀢𑁄, 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑀁 𑀘𑁂𑀢𑀺𑀬𑀁 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑀁, 𑀢𑀢𑁆𑀣𑁂𑀯 𑀢𑀁𑀔𑀡𑁂 𑀫𑀳𑀦𑁆𑀢𑀁 𑀧𑀸𑀲𑀸𑀡𑀘𑁂𑀢𑀺𑀬𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀼𑀯𑀡𑁆𑀡𑀘𑁂𑀢𑀺𑀬𑀯𑀢𑁆𑀣𑀼 𑀦𑀯𑀫𑀁.

𑀩𑀼𑀤𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀜𑀸𑀆𑀢𑀺𑀓𑀮𑀳𑀯𑀽𑀧𑀲𑀫𑀦𑀯𑀢𑁆𑀣𑀼

𑀲𑀼𑀲𑀼𑀔𑀁 ¶ ¶ ¶ 𑀯𑀢𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀦𑁆𑀢𑁄 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀜𑀸𑀢𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀓𑀺𑀬𑀓𑁄𑀮𑀺𑀬𑀸 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀘 𑀓𑁄𑀮𑀺𑀬𑀦𑀕𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀭𑁄𑀳𑀺𑀡𑀺𑀁 𑀦𑀸𑀫 𑀦𑀤𑀺𑀁 𑀏𑀓𑁂𑀦𑁂𑀯 𑀆𑀯𑀭𑀡𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀺. 𑀅𑀣 𑀚𑁂𑀝𑁆𑀞𑀫𑀽𑀮𑀫𑀸𑀲𑁂 𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀉𑀪𑀬𑀦𑀕𑀭𑀯𑀸𑀲𑀺𑀓𑀸𑀦𑀫𑁆𑀧𑀺 𑀓𑀫𑁆𑀫𑀓𑀸𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀇𑀤𑀁 𑀉𑀤𑀓𑀁 𑀉𑀪𑀬𑀢𑁄 𑀳𑀭𑀺𑀬𑀫𑀸𑀦𑀁 𑀦𑁂𑀯 𑀢𑀼𑀫𑁆𑀳𑀸𑀓𑀁, 𑀦 𑀅𑀫𑁆𑀳𑀸𑀓𑀁 𑀧𑀳𑁄𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀲𑁆𑀲𑀁 𑀏𑀓𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀇𑀢𑀭𑁂𑀧𑀺 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀲𑀼 𑀓𑁄𑀝𑁆𑀞𑀓𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀫𑀬𑀁 𑀭𑀢𑁆𑀢𑀲𑀼𑀯𑀡𑁆𑀡𑀦𑀻𑀮𑀫𑀡𑀺𑀓𑀸𑀴𑀓𑀳𑀸𑀧𑀡𑁂 𑀘 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀺𑀳𑀢𑁆𑀣𑀸 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑁂 𑀯𑀺𑀘𑀭𑀺𑀢𑀼𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀲𑁆𑀲𑀁 𑀏𑀓𑀉𑀤𑀓𑁂𑀦𑁂𑀯 ¶ 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀦 𑀫𑀬𑀁 𑀤𑀲𑁆𑀲𑀸𑀫𑀸𑀢𑀺. 𑀫𑀬𑀫𑁆𑀧𑀺 𑀦 𑀤𑀲𑁆𑀲𑀸𑀫𑀸𑀢𑀺 𑀏𑀯𑀁 𑀓𑀣𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑁄 𑀉𑀝𑁆𑀞𑀸𑀬 𑀏𑀓𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀭𑀸𑀚𑀓𑀼𑀮𑀸𑀦𑀁 𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼.

𑀓𑁄𑀮𑀺𑀬𑀓𑀫𑁆𑀫𑀓𑀸𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘𑁂𑀯 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀸𑀓𑀺𑀬𑀓𑀫𑁆𑀫𑀓𑀸𑀭𑀸𑀧𑀺 𑀯𑀤𑀦𑁆𑀢𑀺 ‘‘𑀢𑀼𑀫𑁆𑀳𑁂 𑀇𑀤𑀸𑀦𑀺 𑀓𑀼𑀝𑁆𑀞𑀺𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀅𑀦𑀸𑀣𑀸 𑀦𑀺𑀕𑁆𑀕𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸 𑀯𑀺𑀬 𑀓𑁄𑀮𑀭𑀼𑀓𑁆𑀔𑁂 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀸𑀦𑀁 𑀅𑀫𑀘𑁆𑀘𑀸𑀦𑀁 𑀓𑀣𑀬𑀺𑀁𑀲𑀼, 𑀅𑀫𑀘𑁆𑀘𑀸 𑀭𑀸𑀚𑀓𑀼𑀮𑀸𑀦𑀁 𑀓𑀣𑁂𑀲𑀼𑀁. 𑀢𑀢𑁄 𑀲𑀸𑀓𑀺𑀬𑀸 ‘‘𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀓𑀸𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀮𑀺𑀬𑀸𑀧𑀺 ‘‘𑀓𑁄𑀮𑀭𑀼𑀓𑁆𑀔𑀯𑀸𑀲𑀻𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀲𑀢𑁆𑀣𑀸𑀧𑀺 ¶ ¶ 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀢𑀓𑁂 𑀤𑀺𑀲𑁆𑀯𑀸 ‘‘𑀫𑀬𑀺 𑀅𑀕𑀘𑁆𑀙𑀦𑁆𑀢𑁂 𑀇𑀫𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀓𑁄𑀯 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀭𑁄𑀳𑀺𑀡𑀺𑀦𑀤𑀺𑀬𑀸 𑀫𑀚𑁆𑀛𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀜𑀸𑀢𑀓𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 ¶ 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀯𑀦𑁆𑀤𑀺𑀁𑀲𑀼. 𑀅𑀣 𑀦𑁂 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁 𑀓𑀮𑀳𑁄 𑀦𑀸𑀫𑁂𑀲, 𑀫𑀳𑀸𑀭𑀸𑀚𑀸’’𑀢𑀺? ‘‘𑀦 𑀚𑀸𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀤𑀸𑀦𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀢𑁂 ‘‘𑀉𑀧𑀭𑀸𑀚𑀸 𑀚𑀸𑀦𑀺𑀲𑁆𑀲𑀢𑀺, 𑀲𑁂𑀦𑀸𑀧𑀢𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀬𑀸𑀯 𑀤𑀸𑀲𑀓𑀫𑁆𑀫𑀓𑀭𑁂 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀉𑀤𑀓𑀓𑀮𑀳𑁄’’𑀢𑀺 𑀆𑀳𑀁𑀲𑀼. ‘‘𑀉𑀤𑀓𑀁 𑀓𑀺𑀁 𑀅𑀕𑁆𑀖𑀢𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀧𑁆𑀧𑀕𑁆𑀖𑀁, 𑀪𑀦𑁆𑀢𑁂’’𑀢𑀺. ‘‘𑀔𑀢𑁆𑀢𑀺𑀬𑀸 𑀓𑀺𑀁 𑀅𑀕𑁆𑀖𑀦𑁆𑀢𑀺 𑀫𑀳𑀸𑀭𑀸𑀚𑀸’’𑀢𑀺? ‘‘𑀔𑀢𑁆𑀢𑀺𑀬𑀸 𑀦𑀸𑀫 𑀅𑀦𑀕𑁆𑀖𑀸, 𑀪𑀦𑁆𑀢𑁂’’𑀢𑀺. ‘‘𑀅𑀬𑀼𑀢𑁆𑀢𑀁 𑀢𑀼𑀫𑁆𑀳𑀸𑀓𑀁 𑀅𑀧𑁆𑀧𑀫𑀢𑁆𑀢𑀢𑀁 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀅𑀦𑀕𑁆𑀖𑁂 𑀔𑀢𑁆𑀢𑀺𑀬𑁂 𑀦𑀸𑀲𑁂𑀢𑀼’’𑀦𑁆𑀢𑀺. 𑀢𑁂 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀢𑁂 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀫𑀳𑀸𑀭𑀸𑀚𑀸 𑀏𑀯𑀭𑀽𑀧𑀁 𑀓𑀭𑁄𑀣, 𑀫𑀬𑀺 𑀅𑀲𑀦𑁆𑀢𑁂 𑀅𑀚𑁆𑀚 𑀮𑁄𑀳𑀺𑀢𑀦𑀤𑀻 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀅𑀬𑀼𑀢𑁆𑀢𑀁 𑀯𑁄 𑀓𑀢𑀁, 𑀢𑀼𑀫𑁆𑀳𑁂 𑀧𑀜𑁆𑀘𑀳𑀺 𑀯𑁂𑀭𑁂𑀳𑀺 𑀲𑀯𑁂𑀭𑀸 𑀯𑀺𑀳𑀭𑀣, 𑀅𑀳𑀁 𑀅𑀯𑁂𑀭𑁄 𑀯𑀺𑀳𑀭𑀸𑀫𑀺. 𑀢𑀼𑀫𑁆𑀳𑁂 𑀓𑀺𑀮𑁂𑀲𑀸𑀢𑀼𑀭𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣, 𑀅𑀳𑀁 𑀅𑀦𑀸𑀢𑀼𑀭𑁄. 𑀢𑀼𑀫𑁆𑀳𑁂 𑀓𑀸𑀫𑀕𑀼𑀡𑀧𑀭𑀺𑀬𑁂𑀲𑀦𑀼𑀲𑁆𑀲𑀼𑀓𑁆𑀓𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣, 𑀅𑀳𑀁 𑀅𑀦𑀼𑀲𑁆𑀲𑀼𑀓𑁆𑀓𑁄 𑀯𑀺𑀳𑀭𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀯𑁂𑀭𑀺𑀦𑁂𑀲𑀼 𑀅𑀯𑁂𑀭𑀺𑀦𑁄,

𑀯𑁂𑀭𑀺𑀦𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀯𑁂𑀭𑀺𑀦𑁄.

‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀆𑀢𑀼𑀭𑁂𑀲𑀼 𑀅𑀦𑀸𑀢𑀼𑀭𑀸;

𑀆𑀢𑀼𑀭𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀦𑀸𑀢𑀼𑀭𑀸.

‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀉𑀲𑁆𑀲𑀼𑀓𑁂𑀲𑀼 𑀅𑀦𑀼𑀲𑁆𑀲𑀼𑀓𑀸;

𑀉𑀲𑁆𑀲𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀦𑀼𑀲𑁆𑀲𑀼𑀓𑀸’’𑀢𑀺.

𑀢𑀢𑁆𑀣 ¶ 𑀲𑀼𑀲𑀼𑀔𑀦𑁆𑀢𑀺 𑀲𑀼𑀝𑁆𑀞𑀼 𑀲𑀼𑀔𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀕𑀺𑀳𑀺𑀦𑁄 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦, 𑀧𑀩𑁆𑀩𑀚𑀺𑀢𑀸 𑀯𑀸 𑀧𑀦 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀼𑀔𑁂𑀦 𑀚𑀻𑀯𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀫𑀬𑀫𑁂𑀯 𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀬𑁂 𑀫𑀬𑀁 𑀧𑀜𑁆𑀘𑀳𑀺 𑀯𑁂𑀭𑀻𑀳𑀺 𑀯𑁂𑀭𑀺𑀦𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀅𑀯𑁂𑀭𑀺𑀦𑁄, 𑀓𑀺𑀮𑁂𑀲𑀸𑀢𑀼𑀭𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀅𑀦𑀸𑀢𑀼𑀭𑀸, 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀬𑁂𑀲𑀦𑁂 𑀉𑀲𑁆𑀲𑀼𑀓𑁂𑀲𑀼 𑀢𑀸𑀬 𑀧𑀭𑀺𑀬𑁂𑀲𑀦𑀸𑀬 𑀅𑀪𑀸𑀯𑁂𑀦 𑀅𑀦𑀼𑀲𑁆𑀲𑀼𑀓𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀜𑀸𑀢𑀺𑀓𑀮𑀳𑀯𑀽𑀧𑀲𑀫𑀦𑀯𑀢𑁆𑀣𑀼 𑀧𑀞𑀫𑀁.

𑀲𑀼𑀲𑀼𑀔𑀁 ¶ ¶ 𑀯𑀢 𑀚𑀻𑀯𑀸𑀫𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀜𑁆𑀘𑀲𑀸𑀮𑀸𑀬 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀧𑀜𑁆𑀘𑀲𑀢𑀸𑀦𑀁 𑀓𑀼𑀫𑀸𑀭𑀺𑀓𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀢𑀸𑀧𑀺 𑀓𑀼𑀫𑀸𑀭𑀺𑀓𑀸𑀬𑁄 𑀏𑀓𑀲𑁆𑀫𑀺𑀁 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀕𑀸𑀫𑀸𑀪𑀺𑀫𑀼𑀔𑀺𑀬𑁄 𑀧𑀸𑀬𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀢𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀅𑀣 𑀫𑀸𑀭𑁄 𑀲𑀓𑀮𑀕𑀸𑀫𑀯𑀸𑀲𑀻𑀦𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 ¶ 𑀬𑀣𑀸 𑀲𑀢𑁆𑀣𑀸 𑀓𑀝𑀘𑁆𑀙𑀼𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀮𑀪𑀢𑀺, 𑀏𑀯𑀁 𑀓𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀫𑀦𑁆𑀢𑀁 𑀲𑀢𑁆𑀣𑀸𑀭𑀁 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀳 𑁋 ‘‘𑀅𑀧𑀺, 𑀲𑀫𑀡, 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀣𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀧𑀸𑀧𑀺𑀫, 𑀢𑀣𑀸 𑀅𑀓𑀸𑀲𑀺, 𑀬𑀣𑀸𑀳𑀁 𑀧𑀺𑀡𑁆𑀟𑀁 𑀦 𑀮𑀪𑁂𑀬𑁆𑀬’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀧𑀼𑀦 𑀧𑀯𑀺𑀲𑀣𑀸’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀘𑁂 𑀧𑀼𑀦 𑀧𑀯𑀺𑀲𑀢𑀺, 𑀲𑀩𑁆𑀩𑁂𑀲𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀇𑀫𑀲𑁆𑀲 𑀧𑀼𑀭𑀢𑁄 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑁆𑀲𑀓𑁂𑀴𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀫𑀸𑀭𑁄𑀧𑀺 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑀁 𑀅𑀮𑀪𑀫𑀸𑀦𑀸 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑀢𑁆𑀣𑀸’’𑀢𑀺. 𑀲𑀢𑁆𑀣𑀸 ‘‘𑀅𑀚𑁆𑀚 𑀫𑀬𑀁, 𑀧𑀸𑀧𑀺𑀫, 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸𑀧𑀺 𑀆𑀪𑀲𑁆𑀲𑀭𑀮𑁄𑀓𑁂 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀯𑀺𑀬 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀬𑁂𑀲𑀁 𑀦𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀧𑀻𑀢𑀺𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫, 𑀤𑁂𑀯𑀸 𑀆𑀪𑀲𑁆𑀲𑀭𑀸 𑀬𑀣𑀸’’𑀢𑀺.

𑀢𑀢𑁆𑀣 𑀬𑁂𑀲𑀁 𑀦𑁄𑀢𑀺 𑀬𑁂𑀲𑀁 𑀅𑀫𑁆𑀳𑀸𑀓𑀁 𑀧𑀮𑀺𑀩𑀼𑀚𑁆𑀛𑀦𑀢𑁆𑀣𑁂𑀦 𑀭𑀸𑀕𑀸𑀤𑀻𑀲𑀼 𑀓𑀺𑀜𑁆𑀘𑀦𑁂𑀲𑀼 𑀏𑀓𑀫𑁆𑀧𑀺 𑀓𑀺𑀜𑁆𑀘𑀦𑀁 𑀦𑀢𑁆𑀣𑀺. 𑀧𑀻𑀢𑀺𑀪𑀓𑁆𑀔𑀸𑀢𑀺 𑀬𑀣𑀸 𑀆𑀪𑀲𑁆𑀲𑀭𑀸 𑀤𑁂𑀯𑀸 𑀧𑀻𑀢𑀺𑀪𑀓𑁆𑀔𑀸 𑀳𑀼𑀢𑁆𑀯𑀸 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀏𑀯𑀁 𑀫𑀬𑀫𑁆𑀧𑀺, 𑀧𑀸𑀧𑀺𑀫, 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀧𑀻𑀢𑀺𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 ¶ 𑀧𑀜𑁆𑀘𑀲𑀢𑀸𑀧𑀺 𑀓𑀼𑀫𑀸𑀭𑀺𑀓𑀸𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑁩. 𑀓𑁄𑀲𑀮𑀭𑀜𑁆𑀜𑁄 𑀧𑀭𑀸𑀚𑀬𑀯𑀢𑁆𑀣𑀼

𑀚𑀬𑀁 ¶ ¶ 𑀯𑁂𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀧𑀭𑀸𑀚𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀓𑀸𑀲𑀺𑀓𑀕𑀸𑀫𑀁 𑀦𑀺𑀲𑁆𑀲𑀸𑀬 𑀪𑀸𑀕𑀺𑀦𑁂𑀬𑁆𑀬𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑁆𑀢𑁄 𑀢𑁂𑀦 𑀢𑀬𑁄 𑀯𑀸𑀭𑁂 𑀧𑀭𑀸𑀚𑀺𑀢𑁄 𑀢𑀢𑀺𑀬𑀯𑀸𑀭𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀔𑀻𑀭𑀫𑀼𑀔𑀫𑁆𑀧𑀺 𑀤𑀸𑀭𑀓𑀁 𑀧𑀭𑀸𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’’𑀢𑀺. 𑀲𑁄 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀲𑀸 𑀧𑀯𑀢𑁆𑀢𑀺 𑀲𑀓𑀮𑀦𑀕𑀭𑀁 𑀧𑀢𑁆𑀣𑀭𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀭𑀸𑀚𑀸 𑀓𑀺𑀭 𑀓𑀸𑀲𑀺𑀓𑀕𑀸𑀫𑀓𑀁 𑀦𑀺𑀲𑁆𑀲𑀸𑀬 𑀢𑀬𑁄 𑀯𑀸𑀭𑁂 𑀧𑀭𑀸𑀚𑀺𑀢𑁄, 𑀲𑁄 𑀇𑀤𑀸𑀦𑀺 𑀧𑀭𑀸𑀚𑀺𑀢𑁆𑀯𑀸 𑀆𑀕𑀢𑁄 ‘𑀔𑀻𑀭𑀫𑀼𑀔𑀫𑁆𑀧𑀺 𑀤𑀸𑀭𑀓𑀁 𑀧𑀭𑀸𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’𑀢𑀺 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀦𑁆𑀦𑁄’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀚𑀺𑀦𑀦𑁆𑀢𑁄𑀧𑀺 𑀯𑁂𑀭𑀁 𑀧𑀲𑀯𑀢𑀺, 𑀧𑀭𑀸𑀚𑀺𑀢𑁄 𑀧𑀦 𑀤𑀼𑀓𑁆𑀔𑀁 𑀲𑁂𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀤𑀼𑀓𑁆𑀔𑀁 𑀲𑁂𑀢𑀺 𑀧𑀭𑀸𑀚𑀺𑀢𑁄;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬’’𑀦𑁆𑀢𑀺.

𑀢𑀢𑁆𑀣 𑀚𑀬𑀦𑁆𑀢𑀺 𑀧𑀭𑀁 𑀚𑀺𑀦𑀦𑁆𑀢𑁄 𑀯𑁂𑀭𑀁 𑀧𑀝𑀺𑀮𑀪𑀢𑀺. 𑀧𑀭𑀸𑀚𑀺𑀢𑁄𑀢𑀺 𑀧𑀭𑁂𑀦 𑀧𑀭𑀸𑀚𑀺𑀢𑁄 ‘‘𑀓𑀤𑀸 𑀦𑀼 𑀔𑁄 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀤𑀝𑁆𑀞𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀓𑁆𑀔𑀁 𑀲𑁂𑀢𑀺 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 ¶ 𑀤𑀼𑀓𑁆𑀔𑀫𑁂𑀯 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀲𑀦𑁆𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀉𑀧𑀲𑀦𑁆𑀢𑀭𑀸𑀕𑀸𑀤𑀺𑀓𑀺𑀮𑁂𑀲𑁄 𑀔𑀻𑀡𑀸𑀲𑀯𑁄 𑀚𑀬𑀜𑁆𑀘 𑀧𑀭𑀸𑀚𑀬𑀜𑁆𑀘 𑀳𑀺𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀫𑁂𑀯 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑁄𑀲𑀮𑀭𑀜𑁆𑀜𑁄 𑀧𑀭𑀸𑀚𑀬𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀜𑁆𑀜𑀢𑀭𑀓𑀼𑀮𑀤𑀸𑀭𑀺𑀓𑀸𑀯𑀢𑁆𑀣𑀼

𑀦𑀢𑁆𑀣𑀺 𑀭𑀸𑀕𑀲𑀫𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀮𑀤𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲𑀸 ¶ ¶ 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀆𑀯𑀸𑀳𑀁 𑀓𑀢𑁆𑀯𑀸 𑀫𑀗𑁆𑀕𑀮𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀸𑀧𑀺 𑀔𑁄 𑀯𑀥𑀼𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀤𑀓𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀻 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀢𑀺. 𑀲𑀸𑀫𑀺𑀓𑁄𑀧𑀺𑀲𑁆𑀲𑀸 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀭𑀸𑀕𑀯𑀲𑁂𑀦 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀦𑁆𑀢𑁄 𑀓𑀺𑀮𑁂𑀲𑁄 𑀲𑀫𑀼𑀤𑀸𑀘𑀭𑀺. 𑀲𑁄 𑀅𑀜𑁆𑀜𑀸𑀡𑀸𑀪𑀺𑀪𑀽𑀢𑁄 𑀦𑁂𑀯 𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺, 𑀦 𑀅𑀲𑀻𑀢𑀺 𑀫𑀳𑀸𑀣𑁂𑀭𑁂. 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀢𑀁 𑀯𑀥𑀼𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀘𑀺𑀢𑁆𑀢𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀬𑀣𑀸 𑀢𑀁 𑀇𑀢𑁆𑀣𑀺𑀁 𑀦 𑀧𑀲𑁆𑀲𑀢𑀺, 𑀏𑀯𑀫𑀓𑀸𑀲𑀺. 𑀲𑁄 𑀅𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑀓𑀸𑀮𑁂 ‘‘𑀓𑀼𑀫𑀸𑀭𑀓, 𑀦 𑀳𑀺 𑀭𑀸𑀕𑀕𑁆𑀕𑀺𑀦𑀸 𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫 ¶ , 𑀤𑁄𑀲𑀓𑀮𑀺𑀦𑀸 𑀲𑀤𑀺𑀲𑁄 𑀓𑀮𑀺 𑀦𑀸𑀫, 𑀔𑀦𑁆𑀥𑀧𑀭𑀺𑀳𑀭𑀡𑀤𑀼𑀓𑁆𑀔𑁂𑀦 𑀲𑀤𑀺𑀲𑀁 𑀤𑀼𑀓𑁆𑀔𑀁 𑀦𑀸𑀫 𑀅𑀢𑁆𑀣𑀺, 𑀦𑀺𑀩𑁆𑀩𑀸𑀦𑀲𑀼𑀔𑀲𑀤𑀺𑀲𑀁 𑀲𑀼𑀔𑀫𑁆𑀧𑀺 𑀦𑀢𑁆𑀣𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀺, 𑀦𑀢𑁆𑀣𑀺 𑀤𑁄𑀲𑀲𑀫𑁄 𑀓𑀮𑀺;

𑀦𑀢𑁆𑀣𑀺 𑀔𑀦𑁆𑀥𑀲𑀫𑀸 𑀤𑀼𑀓𑁆𑀔𑀸, 𑀦𑀢𑁆𑀣𑀺 𑀲𑀦𑁆𑀢𑀺𑀧𑀭𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀦𑀢𑁆𑀣𑀺 𑀭𑀸𑀕𑀲𑀫𑁄𑀢𑀺 𑀥𑀽𑀫𑀁 𑀯𑀸 𑀚𑀸𑀮𑀁 𑀯𑀸 𑀅𑀗𑁆𑀕𑀸𑀭𑀁 𑀯𑀸 𑀅𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑁄𑀬𑁂𑀯 𑀛𑀸𑀧𑁂𑀢𑁆𑀯𑀸 𑀪𑀲𑁆𑀫𑀫𑀼𑀝𑁆𑀞𑀺𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀭𑀸𑀕𑁂𑀦 𑀲𑀫𑁄 𑀅𑀜𑁆𑀜𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀺. 𑀓𑀮𑀻𑀢𑀺 𑀤𑁄𑀲𑁂𑀦 𑀲𑀫𑁄 𑀅𑀧𑀭𑀸𑀥𑁄𑀧𑀺 𑀦𑀢𑁆𑀣𑀺. 𑀔𑀦𑁆𑀥𑀲𑀫𑀸𑀢𑀺 𑀔𑀦𑁆𑀥𑁂𑀳𑀺 𑀲𑀫𑀸. 𑀬𑀣𑀸 𑀧𑀭𑀺𑀳𑀭𑀺𑀬𑀫𑀸𑀦𑀸 𑀔𑀦𑁆𑀥𑀸 𑀤𑀼𑀓𑁆𑀔𑀸, 𑀏𑀯𑀁 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺. 𑀲𑀦𑁆𑀢𑀺𑀧𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀢𑁄 𑀉𑀢𑁆𑀢𑀭𑀺𑀁 𑀅𑀜𑁆𑀜𑀁 𑀲𑀼𑀔𑀫𑁆𑀧𑀺 𑀦𑀢𑁆𑀣𑀺. 𑀅𑀜𑁆𑀜𑀜𑁆𑀳𑀺 𑀲𑀼𑀔𑀁 𑀲𑀼𑀔𑀫𑁂𑀯, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀼𑀫𑀸𑀭𑀺𑀓𑀸 𑀘 𑀓𑀼𑀫𑀸𑀭𑀓𑁄 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀤𑀲𑁆𑀲𑀦𑀸𑀓𑀸𑀭𑀁 𑀅𑀓𑀸𑀲𑀻𑀢𑀺.

𑀅𑀜𑁆𑀜𑀢𑀭𑀓𑀼𑀮𑀤𑀸𑀭𑀺𑀓𑀸𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑀚𑀺𑀖𑀘𑁆𑀙𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀆𑀴𑀯𑀺𑀬𑀁 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 ¶ 𑀤𑀺𑀯𑀲𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 ¶ 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 ¶ 𑀆𑀴𑀯𑀺𑀬𑀁 𑀏𑀓𑀁 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸 𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀆𑀴𑀯𑀺𑀁 𑀅𑀕𑀫𑀸𑀲𑀺. 𑀆𑀴𑀯𑀺𑀯𑀸𑀲𑀺𑀦𑁄 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀲𑁄𑀧𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 ‘‘𑀲𑀢𑁆𑀣𑀸 𑀓𑀺𑀭 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀫𑀦𑀁 𑀅𑀓𑀸𑀲𑀺. 𑀢𑀁𑀤𑀺𑀯𑀲𑀫𑁂𑀯 𑀘𑀲𑁆𑀲 𑀏𑀓𑁄 𑀕𑁄𑀡𑁄 𑀧𑀮𑀸𑀬𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀕𑁄𑀡𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀉𑀤𑀸𑀳𑀼 𑀥𑀫𑁆𑀫𑀁 𑀲𑀼𑀡𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑁄𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀧𑀸𑀢𑁄𑀯 𑀕𑁂𑀳𑀸 𑀦𑀺𑀓𑁆𑀔𑀫𑀺. 𑀆𑀴𑀯𑀺𑀯𑀸𑀲𑀺𑀦𑁄𑀧𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀧𑀢𑁆𑀢𑀁 𑀕𑀡𑁆𑀳𑀺𑀁𑀲𑀼. 𑀲𑀢𑁆𑀣𑀸 ‘‘𑀬𑀁 𑀦𑀺𑀲𑁆𑀲𑀸𑀬 𑀅𑀳𑀁 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀆𑀕𑀢𑁄, 𑀲𑁄 𑀕𑁄𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀢𑀲𑁆𑀫𑀺𑀁 𑀆𑀕𑀢𑁂𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀲𑁄𑀧𑀺 𑀫𑀦𑀼𑀲𑁆𑀲𑁄 𑀤𑀺𑀯𑀸 𑀕𑁄𑀡𑀁 𑀤𑀺𑀲𑁆𑀯𑀸 𑀕𑁄𑀕𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀘𑁂𑀧𑀺 𑀅𑀜𑁆𑀜𑀁 𑀦𑀢𑁆𑀣𑀺, 𑀲𑀢𑁆𑀣𑀼 𑀯𑀦𑁆𑀤𑀦𑀫𑀢𑁆𑀢𑀫𑁆𑀧𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄𑀧𑀺 𑀕𑁂𑀳𑀁 𑀕𑀫𑀦𑀸𑀬 𑀫𑀦𑀁 𑀅𑀓𑀢𑁆𑀯𑀸 𑀯𑁂𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀞𑀺𑀢𑀓𑀸𑀮𑁂 𑀤𑀸𑀦𑀯𑁂𑀬𑁆𑀬𑀸𑀯𑀝𑀺𑀓𑀁 𑀆𑀳 𑁋 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀢𑀺𑀭𑀺𑀢𑁆𑀢𑀪𑀢𑁆𑀢’’𑀦𑁆𑀢𑀺? ‘‘𑀪𑀦𑁆𑀢𑁂, 𑀲𑀩𑁆𑀩𑀁 𑀅𑀢𑁆𑀣𑀻’’𑀢𑀺. 𑀢𑁂𑀦 𑀳𑀺 ‘‘𑀇𑀫𑀁 𑀧𑀭𑀺𑀯𑀺𑀲𑀸𑀳𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺. 𑀲𑁄 𑀪𑀼𑀢𑁆𑀢𑀪𑀢𑁆𑀢𑁄 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑀺. 𑀞𑀧𑁂𑀢𑁆𑀯𑀸 𑀓𑀺𑀭 𑀇𑀫𑀁 𑀞𑀸𑀦𑀁 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀜𑁆𑀜𑀢𑁆𑀣 𑀕𑀢𑀸𑀕𑀢𑀲𑁆𑀲 ¶ 𑀪𑀢𑁆𑀢𑀯𑀺𑀘𑀸𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀧𑀲𑁆𑀲𑀤𑁆𑀥𑀤𑀭𑀣𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑁄 𑀤𑁂𑀲𑀦𑀸𑀯𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸𑀧𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀫𑀳𑀸𑀚𑀦𑁄 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸𑀬𑁂𑀯 𑀉𑀚𑁆𑀛𑀸𑀬𑀺𑀁𑀲𑀼 𑁋 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀲𑀢𑁆𑀣𑀼 𑀓𑀫𑁆𑀫𑀁, 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀏𑀯𑀭𑀽𑀧𑀁 𑀦𑀢𑁆𑀣𑀺, 𑀅𑀚𑁆𑀚 𑀧𑀦𑁂𑀓𑀁 𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸𑀯 𑀬𑀸𑀕𑀼𑀆𑀤𑀻𑀦𑀺 𑀯𑀺𑀘𑀸𑀭𑁂𑀢𑁆𑀯𑀸 𑀤𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀓𑁄𑀯 ‘‘𑀓𑀺𑀁 𑀓𑀣𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀅𑀳𑀁 𑀢𑀺𑀁𑀲𑀬𑁄𑀚𑀦𑀁 𑀓𑀦𑁆𑀢𑀸𑀭𑀁 𑀆𑀕𑀘𑁆𑀙𑀦𑁆𑀢𑁄 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀆𑀕𑀢𑁄, 𑀲𑁄 𑀅𑀢𑀺𑀯𑀺𑀬 𑀚𑀺𑀖𑀘𑁆𑀙𑀺𑀢𑁄, 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀕𑁄𑀡𑀁 𑀧𑀭𑀺𑀬𑁂𑀲𑀦𑁆𑀢𑁄 ¶ 𑀅𑀭𑀜𑁆𑀜𑁂 𑀯𑀺𑀘𑀭𑀺. ‘𑀚𑀺𑀖𑀘𑁆𑀙𑀤𑀼𑀓𑁆𑀔𑁂𑀦 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂𑀧𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀁 𑀅𑀓𑀸𑀲𑀺𑀁, 𑀚𑀺𑀖𑀘𑁆𑀙𑀸𑀭𑁄𑀕𑀲𑀤𑀺𑀲𑁄 𑀭𑁄𑀕𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀚𑀺𑀖𑀘𑁆𑀙𑀸𑀧𑀭𑀫𑀸 𑀭𑁄𑀕𑀸, 𑀲𑀗𑁆𑀔𑀸𑀭𑀧𑀭𑀫𑀸 𑀤𑀼𑀔𑀸;

𑀏𑀢𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀁, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 ¶ 𑀚𑀺𑀖𑀘𑁆𑀙𑀸𑀧𑀭𑀫𑀸 𑀭𑁄𑀕𑀸𑀢𑀺 𑀬𑀲𑁆𑀫𑀸 𑀅𑀜𑁆𑀜𑁄 𑀭𑁄𑀕𑁄 𑀲𑀓𑀺𑀁 𑀢𑀺𑀓𑀺𑀘𑁆𑀙𑀺𑀢𑁄 𑀯𑀺𑀦𑀲𑁆𑀲𑀢𑀺 𑀯𑀸 𑀢𑀤𑀗𑁆𑀕𑀯𑀲𑁂𑀦 𑀯𑀸 𑀧𑀳𑀻𑀬𑀢𑀺 ¶ , 𑀚𑀺𑀖𑀘𑁆𑀙𑀸 𑀧𑀦 𑀦𑀺𑀘𑁆𑀘𑀓𑀸𑀮𑀁 𑀢𑀺𑀓𑀺𑀘𑁆𑀙𑀺𑀢𑀩𑁆𑀩𑀸𑀬𑁂𑀯𑀸𑀢𑀺 𑀲𑁂𑀲𑀭𑁄𑀕𑀸𑀦𑀁 𑀅𑀬𑀁 𑀧𑀭𑀫𑀸 𑀦𑀸𑀫. 𑀲𑀗𑁆𑀔𑀸𑀭𑀸𑀢𑀺 𑀧𑀜𑁆𑀘 𑀔𑀦𑁆𑀥𑀸. 𑀏𑀢𑀁 𑀜𑀢𑁆𑀯𑀸𑀢𑀺 𑀚𑀺𑀖𑀘𑁆𑀙𑀸𑀲𑀫𑁄 𑀭𑁄𑀕𑁄 𑀦𑀢𑁆𑀣𑀺, 𑀔𑀦𑁆𑀥𑀧𑀭𑀺𑀳𑀭𑀡𑀲𑀫𑀁 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀢𑀫𑀢𑁆𑀣𑀁 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀧𑀡𑁆𑀟𑀺𑀢𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺 𑀓𑀭𑁄𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔𑀦𑁆𑀢𑀺 𑀢𑀜𑁆𑀳𑀺 𑀲𑀩𑁆𑀩𑀲𑀼𑀔𑀸𑀦𑀁 𑀧𑀭𑀫𑀁 𑀉𑀢𑁆𑀢𑀫𑀁 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀓𑁄𑀲𑀮𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀭𑀸𑀚𑀸 𑀢𑀡𑁆𑀟𑀼𑀮𑀤𑁄𑀡𑀲𑁆𑀲 𑀑𑀤𑀦𑀁 𑀢𑀤𑀼𑀧𑀺𑀬𑁂𑀦 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀪𑀼𑀜𑁆𑀚𑀢𑀺. 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀪𑀢𑁆𑀢𑀲𑀫𑁆𑀫𑀤𑀁 𑀅𑀯𑀺𑀦𑁄𑀤𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀦𑀺𑀤𑁆𑀤𑀸𑀬 𑀅𑀪𑀺𑀪𑀽𑀬𑀫𑀸𑀦𑁄𑀧𑀺 𑀉𑀚𑀼𑀓𑀁 𑀦𑀺𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀯𑀺𑀲𑁆𑀲𑀫𑀺𑀢𑁆𑀯𑀸𑀯 𑀆𑀕𑀢𑁄𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑁂 𑀫𑀳𑀸𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚 ¶ , 𑀅𑀢𑀺𑀩𑀳𑀼𑀪𑁄𑀚𑀦𑀁 𑀏𑀯𑀁 𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀺𑀤𑁆𑀥𑀻 ¶ 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘,

𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄,

𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺. (𑀥. 𑀧. 𑁩𑁨𑁫); 𑁋

𑀇𑀫𑀸𑀬 𑀕𑀸𑀣𑀸𑀬 𑀑𑀯𑀤𑀺𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀦𑀸𑀫 𑀫𑀢𑁆𑀢𑀸𑀬 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀢𑁆𑀢𑀪𑁄𑀚𑀺𑀦𑁄 𑀳𑀺 𑀲𑀼𑀔𑀁 𑀳𑁄𑀢𑀻’’𑀢𑀺 𑀉𑀢𑁆𑀢𑀭𑀺 𑀑𑀯𑀤𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀧𑀸𑀮𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁨𑁪);

𑀭𑀸𑀚𑀸 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀫𑀻𑀧𑁂 𑀞𑀺𑀢𑀁 𑀧𑀦 𑀪𑀸𑀕𑀺𑀦𑁂𑀬𑁆𑀬𑀁, 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀫𑀸𑀡𑀯𑀁 ‘‘𑀇𑀫𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳, 𑀢𑀸𑀢𑀸’’𑀢𑀺 𑀆𑀳. 𑀲𑁄 𑀢𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀭𑀜𑁆𑀜𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀑𑀲𑀸𑀦𑀧𑀺𑀡𑁆𑀟𑀓𑀸𑀮𑁂 𑀇𑀫𑀁 𑀕𑀸𑀣𑀁 𑀯𑀤𑁂𑀬𑁆𑀬𑀸𑀲𑀺, 𑀭𑀸𑀚𑀸 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀁 𑀧𑀺𑀡𑁆𑀟𑀁 𑀙𑀟𑁆𑀟𑁂𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀲𑀺𑀢𑁆𑀣𑀕𑀡𑀦𑀸𑀬 𑀭𑀜𑁆𑀜𑁄 𑀪𑀢𑁆𑀢𑀧𑀘𑀦𑀓𑀸𑀮𑁂 𑀢𑀢𑁆𑀢𑀓𑁂 𑀢𑀡𑁆𑀟𑀼𑀮𑁂 𑀳𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀸𑀬𑀫𑁆𑀧𑀺 𑀧𑀸𑀢𑁄𑀧𑀺 𑀭𑀜𑁆𑀜𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀑𑀲𑀸𑀦𑀧𑀺𑀡𑁆𑀟𑀓𑀸𑀮𑁂 𑀢𑀁 𑀕𑀸𑀣𑀁 𑀉𑀤𑀸𑀳𑀭𑀺𑀢𑁆𑀯𑀸 𑀢𑁂𑀦 𑀙𑀟𑁆𑀟𑀺𑀢𑀧𑀺𑀡𑁆𑀟𑁂 𑀲𑀺𑀢𑁆𑀣𑀕𑀡𑀦𑀸𑀬 𑀢𑀡𑁆𑀟𑀼𑀮𑁂 𑀳𑀸𑀧𑁂𑀲𑀺. 𑀭𑀸𑀚𑀸𑀧𑀺 𑀢𑀲𑁆𑀲 𑀕𑀸𑀣𑀁 𑀲𑀼𑀢𑁆𑀯𑀸 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀤𑀸𑀧𑁂𑀲𑀺 ¶ . 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 𑀲𑀡𑁆𑀞𑀳𑀺𑀢𑁆𑀯𑀸 𑀲𑀼𑀔𑀧𑁆𑀧𑀢𑁆𑀢𑁄 𑀢𑀦𑀼𑀲𑀭𑀻𑀭𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀫𑁂 𑀲𑀼𑀔𑀁 𑀚𑀸𑀢𑀁, 𑀫𑀺𑀕𑀫𑁆𑀧𑀺 𑀅𑀲𑁆𑀲𑀫𑁆𑀧𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑀲𑀫𑀢𑁆𑀣𑁄 𑀚𑀸𑀢𑁄𑀫𑁆𑀳𑀺. 𑀧𑀼𑀩𑁆𑀩𑁂 𑀫𑁂 𑀪𑀸𑀕𑀺𑀦𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀫𑁂𑀯 𑀳𑁄𑀢𑀺, 𑀇𑀤𑀸𑀦𑀺 𑀯𑀚𑀻𑀭𑀓𑀼𑀫𑀸𑀭𑀺𑀁 𑀦𑀸𑀫 𑀥𑀻𑀢𑀭𑀁 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀢𑁆𑀯𑀸 𑀲𑁄 𑀕𑀸𑀫𑁄 𑀢𑀲𑁆𑀲𑀸𑀬𑁂𑀯 𑀦𑁆𑀳𑀸𑀦𑀘𑀼𑀡𑁆𑀡𑀫𑀽𑀮𑀁 𑀓𑀢𑁆𑀯𑀸 𑀤𑀺𑀦𑁆𑀦𑁄, 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀕𑁆𑀕𑀳𑁄 𑀯𑀽𑀧𑀲𑀦𑁆𑀢𑁄, 𑀇𑀫𑀺𑀦𑀸𑀧𑀺 𑀫𑁂 𑀓𑀸𑀭𑀡𑁂𑀦 𑀲𑀼𑀔𑀫𑁂𑀯 𑀚𑀸𑀢𑀁. 𑀓𑀼𑀮𑀲𑀦𑁆𑀢𑀓𑀁 𑀭𑀸𑀚𑀫𑀡𑀺𑀭𑀢𑀦𑀁 𑀦𑁄 𑀕𑁂𑀳𑁂 𑀧𑀼𑀭𑀺𑀫𑀤𑀺𑀯𑀲𑁂 ¶ 𑀦𑀝𑁆𑀞𑀁, 𑀢𑀫𑁆𑀧𑀺 𑀇𑀤𑀸𑀦𑀺 𑀳𑀢𑁆𑀣𑀧𑀢𑁆𑀢𑀁 𑀆𑀕𑀢𑀁, 𑀇𑀫𑀺𑀦𑀸𑀧𑀺 𑀫𑁂 𑀓𑀸𑀭𑀡𑁂𑀦 𑀲𑀼𑀔𑀫𑁂𑀯 𑀚𑀸𑀢𑀁. 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀇𑀘𑁆𑀙𑀦𑁆𑀢𑁂𑀦 𑀜𑀸𑀢𑀺𑀥𑀻𑀢𑀸𑀧𑀺 𑀦𑁄 𑀕𑁂𑀳𑁂 𑀓𑀢𑀸, 𑀇𑀫𑀺𑀦𑀸𑀧𑀺 𑀫𑁂 𑀓𑀸𑀭𑀡𑁂𑀦 𑀲𑀼𑀔𑀫𑁂𑀯 𑀚𑀸𑀢’’𑀦𑁆𑀢𑀺. 𑀲𑀢𑁆𑀣𑀸 ‘‘𑀆𑀭𑁄𑀕𑁆𑀬𑀁 𑀦𑀸𑀫, 𑀫𑀳𑀸𑀭𑀸𑀚, 𑀧𑀭𑀫𑁄 𑀮𑀸𑀪𑁄, 𑀬𑀣𑀸𑀮𑀤𑁆𑀥𑁂𑀦 𑀲𑀦𑁆𑀢𑀼𑀝𑁆𑀞𑀪𑀸𑀯𑀲𑀤𑀺𑀲𑀫𑁆𑀧𑀺 𑀥𑀦𑀁, 𑀯𑀺𑀲𑁆𑀲𑀸𑀲𑀲𑀤𑀺𑀲𑁄 𑀘 𑀧𑀭𑀫𑀸 𑀜𑀸𑀢𑀺, 𑀦𑀺𑀩𑁆𑀩𑀸𑀦𑀲𑀤𑀺𑀲𑀜𑁆𑀘 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸, 𑀲𑀦𑁆𑀢𑀼𑀝𑁆𑀞𑀺𑀧𑀭𑀫𑀁 𑀥𑀦𑀁;

𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀺, 𑀦𑀺𑀩𑁆𑀩𑀸𑀦𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 ¶ 𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸𑀢𑀺 𑀅𑀭𑁄𑀕𑀪𑀸𑀯𑀧𑀭𑀫𑀸 𑀮𑀸𑀪𑀸. 𑀭𑁄𑀕𑀺𑀦𑁄 𑀳𑀺 𑀯𑀺𑀚𑁆𑀚𑀫𑀸𑀦𑀸𑀧𑀺 𑀮𑀸𑀪𑀸 𑀅𑀮𑀸𑀪𑀸𑀬𑁂𑀯, 𑀢𑀲𑁆𑀫𑀸 𑀅𑀭𑁄𑀕𑀲𑁆𑀲 𑀲𑀩𑁆𑀩𑀮𑀸𑀪𑀸 𑀆𑀕𑀢𑀸𑀯 𑀳𑁄𑀦𑁆𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸’’𑀢𑀺. 𑀲𑀦𑁆𑀢𑀼𑀝𑁆𑀞𑀺𑀧𑀭𑀫𑀁 𑀥𑀦𑀦𑁆𑀢𑀺 𑀕𑀺𑀳𑀺𑀦𑁄 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀬𑀁 𑀅𑀢𑁆𑀢𑀦𑀸 𑀮𑀤𑁆𑀥𑀁 ¶ 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀢𑁂𑀦𑁂𑀯 𑀢𑀼𑀲𑁆𑀲𑀦𑀪𑀸𑀯𑁄 𑀲𑀦𑁆𑀢𑀼𑀝𑁆𑀞𑀻 𑀦𑀸𑀫 𑀲𑁂𑀲𑀥𑀦𑁂𑀳𑀺 𑀧𑀭𑀫𑀁 𑀥𑀦𑀁. 𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀻𑀢𑀺 𑀫𑀸𑀢𑀸 𑀯𑀸 𑀳𑁄𑀢𑀼 𑀧𑀺𑀢𑀸 𑀯𑀸, 𑀬𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀺, 𑀲𑁄 𑀅𑀜𑁆𑀜𑀸𑀢𑀓𑁄𑀯. 𑀬𑁂𑀦 𑀅𑀜𑁆𑀜𑀸𑀢𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀯