📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀥𑀫𑁆𑀫𑀧𑀤𑀧𑀸𑀴𑀺

𑁧. 𑀬𑀫𑀓𑀯𑀕𑁆𑀕𑁄

𑁧.

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 ¶ ¶ ¶ ¶ 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀁.

𑁨.

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻 [𑀅𑀦𑀼𑀧𑀸𑀬𑀺𑀦𑀻 (𑀓.)].

𑁩.

𑀅𑀓𑁆𑀓𑁄𑀘𑁆𑀙𑀺 ¶ 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 [𑀅𑀚𑀺𑀦𑀻 (?)] 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

𑁪.

𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

𑁫.

𑀦 ¶ ¶ 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑁬.

𑀧𑀭𑁂 ¶ 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁭.

𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺 𑀘𑀸𑀫𑀢𑁆𑀢𑀜𑁆𑀜𑀼𑀁, 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁;

𑀢𑀁 𑀯𑁂 𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀭𑀼𑀓𑁆𑀔𑀁𑀯 𑀤𑀼𑀩𑁆𑀩𑀮𑀁.

𑁮.

𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺 𑀘 𑀫𑀢𑁆𑀢𑀜𑁆𑀜𑀼𑀁, 𑀲𑀤𑁆𑀥𑀁 𑀆𑀭𑀤𑁆𑀥𑀯𑀻𑀭𑀺𑀬𑀁;

𑀢𑀁 𑀯𑁂 𑀦𑀧𑁆𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀲𑁂𑀮𑀁𑀯 𑀧𑀩𑁆𑀩𑀢𑀁.

𑁯.

𑀅𑀦𑀺𑀓𑁆𑀓𑀲𑀸𑀯𑁄 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺;

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁦.

𑀬𑁄 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁧.

𑀅𑀲𑀸𑀭𑁂 𑀲𑀸𑀭𑀫𑀢𑀺𑀦𑁄, 𑀲𑀸𑀭𑁂 𑀘𑀸𑀲𑀸𑀭𑀤𑀲𑁆𑀲𑀺𑀦𑁄;

𑀢𑁂 𑀲𑀸𑀭𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀸.

𑁧𑁨.

𑀲𑀸𑀭𑀜𑁆𑀘 ¶ 𑀲𑀸𑀭𑀢𑁄 𑀜𑀢𑁆𑀯𑀸, 𑀅𑀲𑀸𑀭𑀜𑁆𑀘 𑀅𑀲𑀸𑀭𑀢𑁄;

𑀢𑁂 𑀲𑀸𑀭𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀸.

𑁧𑁩.

𑀬𑀣𑀸 𑀅𑀕𑀸𑀭𑀁 𑀤𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀲𑀫𑀢𑀺𑀯𑀺𑀚𑁆𑀛𑀢𑀺.

𑁧𑁪.

𑀬𑀣𑀸 ¶ ¶ 𑀅𑀕𑀸𑀭𑀁 𑀲𑀼𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀦 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀦 𑀲𑀫𑀢𑀺𑀯𑀺𑀚𑁆𑀛𑀢𑀺.

𑁧𑁫.

𑀇𑀥 ¶ 𑀲𑁄𑀘𑀢𑀺 𑀧𑁂𑀘𑁆𑀘 𑀲𑁄𑀘𑀢𑀺, 𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀲𑁄𑀘𑀢𑀺;

𑀲𑁄 𑀲𑁄𑀘𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺, 𑀤𑀺𑀲𑁆𑀯𑀸 𑀓𑀫𑁆𑀫𑀓𑀺𑀮𑀺𑀝𑁆𑀞𑀫𑀢𑁆𑀢𑀦𑁄.

𑁧𑁬.

𑀇𑀥 𑀫𑁄𑀤𑀢𑀺 𑀧𑁂𑀘𑁆𑀘 𑀫𑁄𑀤𑀢𑀺, 𑀓𑀢𑀧𑀼𑀜𑁆𑀜𑁄 𑀉𑀪𑀬𑀢𑁆𑀣 𑀫𑁄𑀤𑀢𑀺;

𑀲𑁄 𑀫𑁄𑀤𑀢𑀺 𑀲𑁄 𑀧𑀫𑁄𑀤𑀢𑀺, 𑀤𑀺𑀲𑁆𑀯𑀸 𑀓𑀫𑁆𑀫𑀯𑀺𑀲𑀼𑀤𑁆𑀥𑀺𑀫𑀢𑁆𑀢𑀦𑁄.

𑁧𑁭.

𑀇𑀥 𑀢𑀧𑁆𑀧𑀢𑀺 𑀧𑁂𑀘𑁆𑀘 𑀢𑀧𑁆𑀧𑀢𑀺, 𑀧𑀸𑀧𑀓𑀸𑀭𑀻 [𑀧𑀸𑀧𑀓𑀸𑀭𑀺 (?)] 𑀉𑀪𑀬𑀢𑁆𑀣 𑀢𑀧𑁆𑀧𑀢𑀺;

‘‘𑀧𑀸𑀧𑀁 𑀫𑁂 𑀓𑀢’’𑀦𑁆𑀢𑀺 𑀢𑀧𑁆𑀧𑀢𑀺, 𑀪𑀺𑀬𑁆𑀬𑁄 [𑀪𑀻𑀬𑁄 (𑀲𑀻.)] 𑀢𑀧𑁆𑀧𑀢𑀺 𑀤𑀼𑀕𑁆𑀕𑀢𑀺𑀁 𑀕𑀢𑁄.

𑁧𑁮.

𑀇𑀥 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀺, 𑀓𑀢𑀧𑀼𑀜𑁆𑀜𑁄 𑀉𑀪𑀬𑀢𑁆𑀣 𑀦𑀦𑁆𑀤𑀢𑀺;

‘‘𑀧𑀼𑀜𑁆𑀜𑀁 𑀫𑁂 𑀓𑀢’’𑀦𑁆𑀢𑀺 𑀦𑀦𑁆𑀤𑀢𑀺, 𑀪𑀺𑀬𑁆𑀬𑁄 𑀦𑀦𑁆𑀤𑀢𑀺 𑀲𑀼𑀕𑁆𑀕𑀢𑀺𑀁 𑀕𑀢𑁄.

𑁧𑁯.

𑀩𑀳𑀼𑀫𑁆𑀧𑀺 𑀘𑁂 𑀲𑀁𑀳𑀺𑀢 [𑀲𑀳𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀸𑀲𑀫𑀸𑀦𑁄, 𑀦 𑀢𑀓𑁆𑀓𑀭𑁄 𑀳𑁄𑀢𑀺 𑀦𑀭𑁄 𑀧𑀫𑀢𑁆𑀢𑁄;

𑀕𑁄𑀧𑁄𑀯 ¶ 𑀕𑀸𑀯𑁄 𑀕𑀡𑀬𑀁 𑀧𑀭𑁂𑀲𑀁, 𑀦 𑀪𑀸𑀕𑀯𑀸 𑀲𑀸𑀫𑀜𑁆𑀜𑀲𑁆𑀲 𑀳𑁄𑀢𑀺.

𑁨𑁦.

𑀅𑀧𑁆𑀧𑀫𑁆𑀧𑀺 𑀘𑁂 𑀲𑀁𑀳𑀺𑀢 𑀪𑀸𑀲𑀫𑀸𑀦𑁄, 𑀥𑀫𑁆𑀫𑀲𑁆𑀲 𑀳𑁄𑀢𑀺 [𑀳𑁄𑀢𑀻 (𑀲𑀻. 𑀧𑀻.)] 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀲𑀫𑁆𑀫𑀧𑁆𑀧𑀚𑀸𑀦𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄;

𑀅𑀦𑀼𑀧𑀸𑀤𑀺𑀬𑀸𑀦𑁄 𑀇𑀥 𑀯𑀸 𑀳𑀼𑀭𑀁 𑀯𑀸, 𑀲 𑀪𑀸𑀕𑀯𑀸 𑀲𑀸𑀫𑀜𑁆𑀜𑀲𑁆𑀲 𑀳𑁄𑀢𑀺.

𑀬𑀫𑀓𑀯𑀕𑁆𑀕𑁄 𑀧𑀞𑀫𑁄 𑀦𑀺𑀝𑁆𑀞𑀺𑀢𑁄.

𑁨. 𑀅𑀧𑁆𑀧𑀫𑀸𑀤𑀯𑀕𑁆𑀕𑁄

𑁨𑁧.

𑀅𑀧𑁆𑀧𑀫𑀸𑀤𑁄 ¶ ¶ ¶ 𑀅𑀫𑀢𑀧𑀤𑀁 [𑀅𑀫𑀢𑀁 𑀧𑀤𑀁 (𑀓.)], 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸.

𑁨𑁨.

𑀏𑀯𑀁 [𑀏𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀲𑁂𑀲𑀢𑁄 𑀜𑀢𑁆𑀯𑀸, 𑀅𑀧𑁆𑀧𑀫𑀸𑀤𑀫𑁆𑀳𑀺 𑀧𑀡𑁆𑀟𑀺𑀢𑀸;

𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀦𑁆𑀢𑀺, 𑀅𑀭𑀺𑀬𑀸𑀦𑀁 𑀕𑁄𑀘𑀭𑁂 𑀭𑀢𑀸.

𑁨𑁩.

𑀢𑁂 𑀛𑀸𑀬𑀺𑀦𑁄 𑀲𑀸𑀢𑀢𑀺𑀓𑀸, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸;

𑀨𑀼𑀲𑀦𑁆𑀢𑀺 𑀥𑀻𑀭𑀸 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁.

𑁨𑁪.

𑀉𑀝𑁆𑀞𑀸𑀦𑀯𑀢𑁄 𑀲𑀢𑀻𑀫𑀢𑁄 [𑀲𑀢𑀺𑀫𑀢𑁄 (𑀲𑀻. 𑀲𑁆𑀬𑀸. 𑀓.)], 𑀲𑀼𑀘𑀺𑀓𑀫𑁆𑀫𑀲𑁆𑀲 𑀦𑀺𑀲𑀫𑁆𑀫𑀓𑀸𑀭𑀺𑀦𑁄;

𑀲𑀜𑁆𑀜𑀢𑀲𑁆𑀲 𑀥𑀫𑁆𑀫𑀚𑀻𑀯𑀺𑀦𑁄, 𑀅𑀧𑁆𑀧𑀫𑀢𑁆𑀢𑀲𑁆𑀲 [𑀅𑀧𑀫𑀢𑁆𑀢𑀲𑁆𑀲 (?)] 𑀬𑀲𑁄𑀪𑀺𑀯𑀟𑁆𑀠𑀢𑀺.

𑁨𑁫.

𑀉𑀝𑁆𑀞𑀸𑀦𑁂𑀦𑀧𑁆𑀧𑀫𑀸𑀤𑁂𑀦 ¶ , 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀤𑀻𑀧𑀁 𑀓𑀬𑀺𑀭𑀸𑀣 𑀫𑁂𑀥𑀸𑀯𑀻, 𑀬𑀁 𑀑𑀖𑁄 𑀦𑀸𑀪𑀺𑀓𑀻𑀭𑀢𑀺.

𑁨𑁬.

𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀩𑀸𑀮𑀸 𑀤𑀼𑀫𑁆𑀫𑁂𑀥𑀺𑀦𑁄 𑀚𑀦𑀸;

𑀅𑀧𑁆𑀧𑀫𑀸𑀤𑀜𑁆𑀘 𑀫𑁂𑀥𑀸𑀯𑀻, 𑀥𑀦𑀁 𑀲𑁂𑀝𑁆𑀞𑀁𑀯 𑀭𑀓𑁆𑀔𑀢𑀺.

𑁨𑁭.

𑀫𑀸 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑁂𑀣, 𑀫𑀸 𑀓𑀸𑀫𑀭𑀢𑀺𑀲𑀦𑁆𑀣𑀯𑀁 [𑀲𑀦𑁆𑀥𑀯𑀁 (𑀓)];

𑀅𑀧𑁆𑀧𑀫𑀢𑁆𑀢𑁄 𑀳𑀺 𑀛𑀸𑀬𑀦𑁆𑀢𑁄, 𑀧𑀧𑁆𑀧𑁄𑀢𑀺 𑀯𑀺𑀧𑀼𑀮𑀁 𑀲𑀼𑀔𑀁.

𑁨𑁮.

𑀧𑀫𑀸𑀤𑀁 𑀅𑀧𑁆𑀧𑀫𑀸𑀤𑁂𑀦, 𑀬𑀤𑀸 𑀦𑀼𑀤𑀢𑀺 𑀧𑀡𑁆𑀟𑀺𑀢𑁄;

𑀧𑀜𑁆𑀜𑀸𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀅𑀲𑁄𑀓𑁄 𑀲𑁄𑀓𑀺𑀦𑀺𑀁 𑀧𑀚𑀁;

𑀧𑀩𑁆𑀩𑀢𑀝𑁆𑀞𑁄𑀯 𑀪𑀽𑀫𑀝𑁆𑀞𑁂 [𑀪𑀼𑀫𑁆𑀫𑀝𑁆𑀞𑁂 (𑀲𑀻. 𑀲𑁆𑀬𑀸.)], 𑀥𑀻𑀭𑁄 𑀩𑀸𑀮𑁂 𑀅𑀯𑁂𑀓𑁆𑀔𑀢𑀺.

𑁨𑁯.

𑀅𑀧𑁆𑀧𑀫𑀢𑁆𑀢𑁄 ¶ ¶ 𑀧𑀫𑀢𑁆𑀢𑁂𑀲𑀼, 𑀲𑀼𑀢𑁆𑀢𑁂𑀲𑀼 𑀩𑀳𑀼𑀚𑀸𑀕𑀭𑁄;

𑀅𑀩𑀮𑀲𑁆𑀲𑀁𑀯 ¶ 𑀲𑀻𑀖𑀲𑁆𑀲𑁄, 𑀳𑀺𑀢𑁆𑀯𑀸 𑀬𑀸𑀢𑀺 𑀲𑀼𑀫𑁂𑀥𑀲𑁄.

𑁩𑁦.

𑀅𑀧𑁆𑀧𑀫𑀸𑀤𑁂𑀦 𑀫𑀖𑀯𑀸, 𑀤𑁂𑀯𑀸𑀦𑀁 𑀲𑁂𑀝𑁆𑀞𑀢𑀁 𑀕𑀢𑁄;

𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀧𑀫𑀸𑀤𑁄 𑀕𑀭𑀳𑀺𑀢𑁄 𑀲𑀤𑀸.

𑁩𑁧.

𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸;

𑀲𑀁𑀬𑁄𑀚𑀦𑀁 𑀅𑀡𑀼𑀁 𑀣𑀽𑀮𑀁, 𑀟𑀳𑀁 𑀅𑀕𑁆𑀕𑀻𑀯 𑀕𑀘𑁆𑀙𑀢𑀺.

𑁩𑁨.

𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸;

𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂.

𑀅𑀧𑁆𑀧𑀫𑀸𑀤𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑁩. 𑀘𑀺𑀢𑁆𑀢𑀯𑀕𑁆𑀕𑁄

𑁩𑁩.

𑀨𑀦𑁆𑀤𑀦𑀁 ¶ 𑀘𑀧𑀮𑀁 𑀘𑀺𑀢𑁆𑀢𑀁, 𑀤𑀽𑀭𑀓𑁆𑀔𑀁 [𑀤𑀼𑀭𑀓𑁆𑀔𑀁 (𑀲𑀩𑁆𑀩𑀢𑁆𑀣)] 𑀤𑀼𑀦𑁆𑀦𑀺𑀯𑀸𑀭𑀬𑀁;

𑀉𑀚𑀼𑀁 𑀓𑀭𑁄𑀢𑀺 𑀫𑁂𑀥𑀸𑀯𑀻, 𑀉𑀲𑀼𑀓𑀸𑀭𑁄𑀯 𑀢𑁂𑀚𑀦𑀁.

𑁩𑁪.

𑀯𑀸𑀭𑀺𑀚𑁄𑀯 𑀣𑀮𑁂 𑀔𑀺𑀢𑁆𑀢𑁄, 𑀑𑀓𑀫𑁄𑀓𑀢𑀉𑀩𑁆𑀪𑀢𑁄;

𑀧𑀭𑀺𑀨𑀦𑁆𑀤𑀢𑀺𑀤𑀁 𑀘𑀺𑀢𑁆𑀢𑀁, 𑀫𑀸𑀭𑀥𑁂𑀬𑁆𑀬𑀁 𑀧𑀳𑀸𑀢𑀯𑁂.

𑁩𑁫.

𑀤𑀼𑀦𑁆𑀦𑀺𑀕𑁆𑀕𑀳𑀲𑁆𑀲 𑀮𑀳𑀼𑀦𑁄, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑁄;

𑀘𑀺𑀢𑁆𑀢𑀲𑁆𑀲 𑀤𑀫𑀣𑁄 𑀲𑀸𑀥𑀼, 𑀘𑀺𑀢𑁆𑀢𑀁 𑀤𑀦𑁆𑀢𑀁 𑀲𑀼𑀔𑀸𑀯𑀳𑀁.

𑁩𑁬.

𑀲𑀼𑀤𑀼𑀤𑁆𑀤𑀲𑀁 ¶ ¶ 𑀲𑀼𑀦𑀺𑀧𑀼𑀡𑀁, 𑀬𑀢𑁆𑀣𑀓𑀸𑀫𑀦𑀺𑀧𑀸𑀢𑀺𑀦𑀁;

𑀘𑀺𑀢𑁆𑀢𑀁 𑀭𑀓𑁆𑀔𑁂𑀣 𑀫𑁂𑀥𑀸𑀯𑀻, 𑀘𑀺𑀢𑁆𑀢𑀁 𑀕𑀼𑀢𑁆𑀢𑀁 𑀲𑀼𑀔𑀸𑀯𑀳𑀁.

𑁩𑁭.

𑀤𑀽𑀭𑀗𑁆𑀕𑀫𑀁 𑀏𑀓𑀘𑀭𑀁 [𑀏𑀓𑀘𑀸𑀭𑀁 (𑀓.)], 𑀅𑀲𑀭𑀻𑀭𑀁 𑀕𑀼𑀳𑀸𑀲𑀬𑀁;

𑀬𑁂 ¶ 𑀘𑀺𑀢𑁆𑀢𑀁 𑀲𑀁𑀬𑀫𑁂𑀲𑁆𑀲𑀦𑁆𑀢𑀺, 𑀫𑁄𑀓𑁆𑀔𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀸.

𑁩𑁮.

𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑁄;

𑀧𑀭𑀺𑀧𑁆𑀮𑀯𑀧𑀲𑀸𑀤𑀲𑁆𑀲, 𑀧𑀜𑁆𑀜𑀸 𑀦 𑀧𑀭𑀺𑀧𑀽𑀭𑀢𑀺.

𑁩𑁯.

𑀅𑀦𑀯𑀲𑁆𑀲𑀼𑀢𑀘𑀺𑀢𑁆𑀢𑀲𑁆𑀲, 𑀅𑀦𑀦𑁆𑀯𑀸𑀳𑀢𑀘𑁂𑀢𑀲𑁄;

𑀧𑀼𑀜𑁆𑀜𑀧𑀸𑀧𑀧𑀳𑀻𑀦𑀲𑁆𑀲, 𑀦𑀢𑁆𑀣𑀺 𑀚𑀸𑀕𑀭𑀢𑁄 𑀪𑀬𑀁.

𑁪𑁦.

𑀓𑀼𑀫𑁆𑀪𑀽𑀧𑀫𑀁 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸, 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀞𑀧𑁂𑀢𑁆𑀯𑀸;

𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦, 𑀚𑀺𑀢𑀜𑁆𑀘 𑀭𑀓𑁆𑀔𑁂 𑀅𑀦𑀺𑀯𑁂𑀲𑀦𑁄 𑀲𑀺𑀬𑀸.

𑁪𑁧.

𑀅𑀘𑀺𑀭𑀁 ¶ 𑀯𑀢𑀬𑀁 𑀓𑀸𑀬𑁄, 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺;

𑀙𑀼𑀤𑁆𑀥𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑁄, 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭𑀁.

𑁪𑁨.

𑀤𑀺𑀲𑁄 𑀤𑀺𑀲𑀁 𑀬𑀁 𑀢𑀁 𑀓𑀬𑀺𑀭𑀸, 𑀯𑁂𑀭𑀻 𑀯𑀸 𑀧𑀦 𑀯𑁂𑀭𑀺𑀦𑀁;

𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀸𑀧𑀺𑀬𑁄 [𑀧𑀸𑀧𑀺𑀬𑀁 (?)] 𑀦𑀁 𑀢𑀢𑁄 𑀓𑀭𑁂.

𑁪𑁩.

𑀦 𑀢𑀁 𑀫𑀸𑀢𑀸 𑀧𑀺𑀢𑀸 𑀓𑀬𑀺𑀭𑀸, 𑀅𑀜𑁆𑀜𑁂 𑀯𑀸𑀧𑀺 𑀘 𑀜𑀸𑀢𑀓𑀸;

𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂.

𑀘𑀺𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑁪. 𑀧𑀼𑀧𑁆𑀨𑀯𑀕𑁆𑀕𑁄

𑁪𑁪.

𑀓𑁄 ¶ ¶ ¶ 𑀇𑀫𑀁 [𑀓𑁄𑀫𑀁 (𑀓.)] 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀺 [𑀯𑀺𑀚𑁂𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀬𑀫𑀮𑁄𑀓𑀜𑁆𑀘 𑀇𑀫𑀁 𑀲𑀤𑁂𑀯𑀓𑀁;

𑀓𑁄 𑀥𑀫𑁆𑀫𑀧𑀤𑀁 𑀲𑀼𑀤𑁂𑀲𑀺𑀢𑀁, 𑀓𑀼𑀲𑀮𑁄 𑀧𑀼𑀧𑁆𑀨𑀫𑀺𑀯 𑀧𑀘𑁂𑀲𑁆𑀲𑀢𑀺 [𑀧𑀼𑀧𑁆𑀨𑀫𑀺𑀯𑀧𑁆𑀧𑀘𑁂𑀲𑁆𑀲𑀢𑀺 (𑀓.)].

𑁪𑁫.

𑀲𑁂𑀔𑁄 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀺, 𑀬𑀫𑀮𑁄𑀓𑀜𑁆𑀘 𑀇𑀫𑀁 𑀲𑀤𑁂𑀯𑀓𑀁;

𑀲𑁂𑀔𑁄 𑀥𑀫𑁆𑀫𑀧𑀤𑀁 𑀲𑀼𑀤𑁂𑀲𑀺𑀢𑀁, 𑀓𑀼𑀲𑀮𑁄 𑀧𑀼𑀧𑁆𑀨𑀫𑀺𑀯 𑀧𑀘𑁂𑀲𑁆𑀲𑀢𑀺.

𑁪𑁬.

𑀨𑁂𑀡𑀽𑀧𑀫𑀁 ¶ 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸, 𑀫𑀭𑀻𑀘𑀺𑀥𑀫𑁆𑀫𑀁 𑀅𑀪𑀺𑀲𑀫𑁆𑀩𑀼𑀥𑀸𑀦𑁄;

𑀙𑁂𑀢𑁆𑀯𑀸𑀦 𑀫𑀸𑀭𑀲𑁆𑀲 𑀧𑀧𑀼𑀧𑁆𑀨𑀓𑀸𑀦𑀺 [𑀲𑀧𑀼𑀧𑁆𑀨𑀓𑀸𑀦𑀺 (𑀝𑀻𑀓𑀸)], 𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂.

𑁪𑁭.

𑀧𑀼𑀧𑁆𑀨𑀸𑀦𑀺 𑀳𑁂𑀯 𑀧𑀘𑀺𑀦𑀦𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 [𑀩𑁆𑀬𑀸𑀲𑀢𑁆𑀢𑀫𑀸𑀦𑀲𑀁 (𑀓.)] 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀺.

𑁪𑁮.

𑀧𑀼𑀧𑁆𑀨𑀸𑀦𑀺 𑀳𑁂𑀯 𑀧𑀘𑀺𑀦𑀦𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀅𑀢𑀺𑀢𑁆𑀢𑀜𑁆𑀜𑁂𑀯 𑀓𑀸𑀫𑁂𑀲𑀼, 𑀅𑀦𑁆𑀢𑀓𑁄 𑀓𑀼𑀭𑀼𑀢𑁂 𑀯𑀲𑀁.

𑁪𑁯.

𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀁, 𑀯𑀡𑁆𑀡𑀕𑀦𑁆𑀥𑀫𑀳𑁂𑀞𑀬𑀁 [𑀯𑀡𑁆𑀡𑀕𑀦𑁆𑀥𑀫𑀧𑁄𑀞𑀬𑀁 (𑀓.)];

𑀧𑀮𑁂𑀢𑀺 𑀭𑀲𑀫𑀸𑀤𑀸𑀬, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂.

𑁫𑁦.

𑀦 𑀧𑀭𑁂𑀲𑀁 𑀯𑀺𑀮𑁄𑀫𑀸𑀦𑀺, 𑀦 𑀧𑀭𑁂𑀲𑀁 𑀓𑀢𑀸𑀓𑀢𑀁;

𑀅𑀢𑁆𑀢𑀦𑁄𑀯 𑀅𑀯𑁂𑀓𑁆𑀔𑁂𑀬𑁆𑀬, 𑀓𑀢𑀸𑀦𑀺 𑀅𑀓𑀢𑀸𑀦𑀺 𑀘.

𑁫𑁧.

𑀬𑀣𑀸𑀧𑀺 ¶ ¶ 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀅𑀕𑀦𑁆𑀥𑀓𑀁;

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀅𑀨𑀮𑀸 𑀳𑁄𑀢𑀺 𑀅𑀓𑀼𑀩𑁆𑀩𑀢𑁄.

𑁫𑁨.

𑀬𑀣𑀸𑀧𑀺 ¶ 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀲𑀼𑀕𑀦𑁆𑀥𑀓𑀁 [𑀲𑀕𑀦𑁆𑀥𑀓𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀲𑀨𑀮𑀸 𑀳𑁄𑀢𑀺 𑀓𑀼𑀩𑁆𑀩𑀢𑁄 [𑀲𑀓𑀼𑀩𑁆𑀩𑀢𑁄 (𑀲𑀻. 𑀧𑀻.), 𑀧𑀓𑀼𑀩𑁆𑀩𑀢𑁄 (𑀲𑀻. 𑀅𑀝𑁆𑀞.), 𑀲𑀼𑀓𑀼𑀩𑁆𑀩𑀢𑁄 (𑀲𑁆𑀬𑀸. 𑀓𑀁.)].

𑁫𑁩.

𑀬𑀣𑀸𑀧𑀺 ¶ 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸, 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽;

𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁.

𑁫𑁪.

𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺, 𑀦 𑀘𑀦𑁆𑀤𑀦𑀁 𑀢𑀕𑀭𑀫𑀮𑁆𑀮𑀺𑀓𑀸 [𑀢𑀕𑀭𑀫𑀮𑁆𑀮𑀺𑀓𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺, 𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀺.

𑁫𑁫.

𑀘𑀦𑁆𑀤𑀦𑀁 𑀢𑀕𑀭𑀁 𑀯𑀸𑀧𑀺, 𑀉𑀧𑁆𑀧𑀮𑀁 𑀅𑀣 𑀯𑀲𑁆𑀲𑀺𑀓𑀻;

𑀏𑀢𑁂𑀲𑀁 𑀕𑀦𑁆𑀥𑀚𑀸𑀢𑀸𑀦𑀁, 𑀲𑀻𑀮𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄.

𑁫𑁬.

𑀅𑀧𑁆𑀧𑀫𑀢𑁆𑀢𑁄 𑀅𑀬𑀁 𑀕𑀦𑁆𑀥𑁄, 𑀬𑁆𑀯𑀸𑀬𑀁 𑀢𑀕𑀭𑀘𑀦𑁆𑀤𑀦𑀁 [𑀬𑀸𑀬𑀁 𑀢𑀕𑀭𑀘𑀦𑁆𑀤𑀦𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀬𑁄 𑀘 𑀲𑀻𑀮𑀯𑀢𑀁 𑀕𑀦𑁆𑀥𑁄, 𑀯𑀸𑀢𑀺 𑀤𑁂𑀯𑁂𑀲𑀼 𑀉𑀢𑁆𑀢𑀫𑁄.

𑁫𑁭.

𑀢𑁂𑀲𑀁 𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀁;

𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀫𑀸𑀭𑁄 𑀫𑀕𑁆𑀕𑀁 𑀦 𑀯𑀺𑀦𑁆𑀤𑀢𑀺.

𑁫𑁮.

𑀬𑀣𑀸 𑀲𑀗𑁆𑀓𑀸𑀭𑀞𑀸𑀦𑀲𑁆𑀫𑀺𑀁 [𑀲𑀗𑁆𑀓𑀸𑀭𑀥𑀸𑀦𑀲𑁆𑀫𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀉𑀚𑁆𑀛𑀺𑀢𑀲𑁆𑀫𑀺𑀁 𑀫𑀳𑀸𑀧𑀣𑁂;

𑀧𑀤𑀼𑀫𑀁 𑀢𑀢𑁆𑀣 𑀚𑀸𑀬𑁂𑀣, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

𑁫𑁯.

𑀏𑀯𑀁 ¶ 𑀲𑀗𑁆𑀓𑀸𑀭𑀪𑀽𑀢𑁂𑀲𑀼, 𑀅𑀦𑁆𑀥𑀪𑀽𑀢𑁂 [𑀅𑀦𑁆𑀥𑀻𑀪𑀽𑀢𑁂 (𑀓.)] 𑀧𑀼𑀣𑀼𑀚𑁆𑀚𑀦𑁂;

𑀅𑀢𑀺𑀭𑁄𑀘𑀢𑀺 𑀧𑀜𑁆𑀜𑀸𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄.

𑀧𑀼𑀧𑁆𑀨𑀯𑀕𑁆𑀕𑁄 𑀘𑀢𑀼𑀢𑁆𑀣𑁄 𑀦𑀺𑀝𑁆𑀞𑀺𑀢𑁄.

𑁫. 𑀩𑀸𑀮𑀯𑀕𑁆𑀕𑁄

𑁬𑁦.

𑀤𑀻𑀖𑀸 ¶ ¶ ¶ 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦𑀁 𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑀁.

𑁬𑁧.

𑀘𑀭𑀜𑁆𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀲𑁂𑀬𑁆𑀬𑀁 𑀲𑀤𑀺𑀲𑀫𑀢𑁆𑀢𑀦𑁄;

𑀏𑀓𑀘𑀭𑀺𑀬𑀁 [𑀏𑀓𑀘𑀭𑀺𑀬𑀁 (𑀓.)] 𑀤𑀴𑁆𑀳𑀁 𑀓𑀬𑀺𑀭𑀸, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸.

𑁬𑁨.

𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀫𑁆𑀫𑀢𑁆𑀣𑀺 [𑀧𑀼𑀢𑁆𑀢𑀫𑀢𑁆𑀣𑀺 𑀥𑀦𑀫𑀢𑁆𑀣𑀺 (𑀓.)], 𑀇𑀢𑀺 𑀩𑀸𑀮𑁄 𑀯𑀺𑀳𑀜𑁆𑀜𑀢𑀺;

𑀅𑀢𑁆𑀢𑀸 𑀳𑀺 [𑀅𑀢𑁆𑀢𑀸𑀧𑀺 (?)] 𑀅𑀢𑁆𑀢𑀦𑁄 𑀦𑀢𑁆𑀣𑀺, 𑀓𑀼𑀢𑁄 𑀧𑀼𑀢𑁆𑀢𑀸 𑀓𑀼𑀢𑁄 𑀥𑀦𑀁.

𑁬𑁩.

𑀬𑁄 𑀩𑀸𑀮𑁄 𑀫𑀜𑁆𑀜𑀢𑀺 𑀩𑀸𑀮𑁆𑀬𑀁, 𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄;

𑀩𑀸𑀮𑁄 𑀘 𑀧𑀡𑁆𑀟𑀺𑀢𑀫𑀸𑀦𑀻, 𑀲 𑀯𑁂 ‘‘𑀩𑀸𑀮𑁄’’𑀢𑀺 𑀯𑀼𑀘𑁆𑀘𑀢𑀺.

𑁬𑁪.

𑀬𑀸𑀯𑀚𑀻𑀯𑀫𑁆𑀧𑀺 𑀘𑁂 𑀩𑀸𑀮𑁄, 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀦 𑀲𑁄 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀤𑀩𑁆𑀩𑀻 𑀲𑀽𑀧𑀭𑀲𑀁 𑀬𑀣𑀸.

𑁬𑁫.

𑀫𑀼𑀳𑀼𑀢𑁆𑀢𑀫𑀧𑀺 ¶ 𑀘𑁂 𑀯𑀺𑀜𑁆𑀜𑀽, 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀔𑀺𑀧𑁆𑀧𑀁 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀚𑀺𑀯𑁆𑀳𑀸 𑀲𑀽𑀧𑀭𑀲𑀁 𑀬𑀣𑀸.

𑁬𑁬.

𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮𑀁.

𑁬𑁭.

𑀦 ¶ 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺.

𑁬𑁮.

𑀢𑀜𑁆𑀘 ¶ 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀧𑀢𑀻𑀢𑁄 𑀲𑀼𑀫𑀦𑁄, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺.

𑁬𑁯.

𑀫𑀥𑀼𑀯𑀸 ¶ [𑀫𑀥𑀼𑀁 𑀯𑀸 (𑀤𑀻. 𑀦𑀺. 𑀝𑀻𑀓𑀸 𑁧)] 𑀫𑀜𑁆𑀜𑀢𑀺 𑀩𑀸𑀮𑁄, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀧𑀸𑀧𑀁, 𑀩𑀸𑀮𑁄 [𑀅𑀣 𑀩𑀸𑀮𑁄 (𑀲𑀻. 𑀲𑁆𑀬𑀸.) 𑀅𑀣 (?)] 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁭𑁦.

𑀫𑀸𑀲𑁂 𑀫𑀸𑀲𑁂 𑀓𑀼𑀲𑀕𑁆𑀕𑁂𑀦, 𑀩𑀸𑀮𑁄 𑀪𑀼𑀜𑁆𑀚𑁂𑀬𑁆𑀬 𑀪𑁄𑀚𑀦𑀁;

𑀦 𑀲𑁄 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 [𑀲𑀗𑁆𑀔𑀢𑀥𑀫𑁆𑀫𑀸𑀦𑀁 (𑀲𑀻. 𑀧𑀻. 𑀓.)], 𑀓𑀮𑀁 𑀅𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁭𑁧.

𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀲𑀚𑁆𑀚𑀼 𑀔𑀻𑀭𑀁𑀯 𑀫𑀼𑀘𑁆𑀘𑀢𑀺;

𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 [𑀪𑀲𑁆𑀫𑀸𑀙𑀦𑁆𑀦𑁄𑀯 (𑀲𑀻. 𑀧𑀻. 𑀓.)] 𑀧𑀸𑀯𑀓𑁄.

𑁭𑁨.

𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬, 𑀜𑀢𑁆𑀢𑀁 [𑀜𑀸𑀢𑀁 (?)] 𑀩𑀸𑀮𑀲𑁆𑀲 𑀚𑀸𑀬𑀢𑀺;

𑀳𑀦𑁆𑀢𑀺 𑀩𑀸𑀮𑀲𑁆𑀲 𑀲𑀼𑀓𑁆𑀓𑀁𑀲𑀁, 𑀫𑀼𑀤𑁆𑀥𑀫𑀲𑁆𑀲 𑀯𑀺𑀧𑀸𑀢𑀬𑀁.

𑁭𑁩.

𑀅𑀲𑀦𑁆𑀢𑀁 ¶ 𑀪𑀸𑀯𑀦𑀫𑀺𑀘𑁆𑀙𑁂𑀬𑁆𑀬 [𑀅𑀲𑀦𑁆𑀢𑀁 𑀪𑀸𑀯𑀫𑀺𑀘𑁆𑀙𑁂𑀬𑁆𑀬 (𑀲𑁆𑀬𑀸.), 𑀅𑀲𑀦𑁆𑀢𑀪𑀸𑀯𑀦𑀫𑀺𑀘𑁆𑀙𑁂𑀬𑁆𑀬 (𑀓.)], 𑀧𑀼𑀭𑁂𑀓𑁆𑀔𑀸𑀭𑀜𑁆𑀘 𑀪𑀺𑀓𑁆𑀔𑀼𑀲𑀼;

𑀆𑀯𑀸𑀲𑁂𑀲𑀼 𑀘 𑀇𑀲𑁆𑀲𑀭𑀺𑀬𑀁, 𑀧𑀽𑀚𑀸 𑀧𑀭𑀓𑀼𑀮𑁂𑀲𑀼 𑀘.

𑁭𑁪.

𑀫𑀫𑁂𑀯 ¶ 𑀓𑀢 𑀫𑀜𑁆𑀜𑀦𑁆𑀢𑀼, 𑀕𑀺𑀳𑀻𑀧𑀩𑁆𑀩𑀚𑀺𑀢𑀸 𑀉𑀪𑁄;

𑀫𑀫𑁂𑀯𑀸𑀢𑀺𑀯𑀲𑀸 𑀅𑀲𑁆𑀲𑀼, 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀓𑀺𑀲𑁆𑀫𑀺𑀘𑀺;

𑀇𑀢𑀺 𑀩𑀸𑀮𑀲𑁆𑀲 𑀲𑀗𑁆𑀓𑀧𑁆𑀧𑁄, 𑀇𑀘𑁆𑀙𑀸 𑀫𑀸𑀦𑁄 𑀘 𑀯𑀟𑁆𑀠𑀢𑀺.

𑁭𑁫.

𑀅𑀜𑁆𑀜𑀸 𑀳𑀺 𑀮𑀸𑀪𑀽𑀧𑀦𑀺𑀲𑀸, 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻;

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀲𑀓𑁆𑀓𑀸𑀭𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑁂.

𑀩𑀸𑀮𑀯𑀕𑁆𑀕𑁄 𑀧𑀜𑁆𑀘𑀫𑁄 𑀦𑀺𑀝𑁆𑀞𑀺𑀢𑁄.

𑁬. 𑀧𑀡𑁆𑀟𑀺𑀢𑀯𑀕𑁆𑀕𑁄

𑁭𑁬.

𑀦𑀺𑀥𑀻𑀦𑀁𑀯 ¶ ¶ 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂;

𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

𑁭𑁭.

𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬, 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺, 𑀅𑀲𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑁄.

𑁭𑁮.

𑀦 𑀪𑀚𑁂 𑀧𑀸𑀧𑀓𑁂 𑀫𑀺𑀢𑁆𑀢𑁂, 𑀦 𑀪𑀚𑁂 𑀧𑀼𑀭𑀺𑀲𑀸𑀥𑀫𑁂;

𑀪𑀚𑁂𑀣 𑀫𑀺𑀢𑁆𑀢𑁂 𑀓𑀮𑁆𑀬𑀸𑀡𑁂, 𑀪𑀚𑁂𑀣 𑀧𑀼𑀭𑀺𑀲𑀼𑀢𑁆𑀢𑀫𑁂.

𑁭𑁯.

𑀥𑀫𑁆𑀫𑀧𑀻𑀢𑀺 ¶ 𑀲𑀼𑀔𑀁 𑀲𑁂𑀢𑀺, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑁂, 𑀲𑀤𑀸 𑀭𑀫𑀢𑀺 𑀧𑀡𑁆𑀟𑀺𑀢𑁄.

𑁮𑁦.

𑀉𑀤𑀓𑀜𑁆𑀳𑀺 ¶ 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 [𑀤𑀫𑀬𑀦𑁆𑀢𑀺 (𑀓.)] 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁮𑁧.

𑀲𑁂𑀮𑁄 𑀬𑀣𑀸 𑀏𑀓𑀖𑀦𑁄 [𑀏𑀓𑀕𑁆𑀖𑀦𑁄 (𑀓.)], 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼, 𑀦 𑀲𑀫𑀺𑀜𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁮𑁨.

𑀬𑀣𑀸𑀧𑀺 𑀭𑀳𑀤𑁄 𑀕𑀫𑁆𑀪𑀻𑀭𑁄, 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄;

𑀏𑀯𑀁 𑀥𑀫𑁆𑀫𑀸𑀦𑀺 𑀲𑀼𑀢𑁆𑀯𑀸𑀦, 𑀯𑀺𑀧𑁆𑀧𑀲𑀻𑀤𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁮𑁩.

𑀲𑀩𑁆𑀩𑀢𑁆𑀣 𑀯𑁂 𑀲𑀧𑁆𑀧𑀼𑀭𑀺𑀲𑀸 𑀘𑀚𑀦𑁆𑀢𑀺, 𑀦 ¶ 𑀓𑀸𑀫𑀓𑀸𑀫𑀸 𑀮𑀧𑀬𑀦𑁆𑀢𑀺 𑀲𑀦𑁆𑀢𑁄;

𑀲𑀼𑀔𑁂𑀦 𑀨𑀼𑀝𑁆𑀞𑀸 𑀅𑀣 𑀯𑀸 𑀤𑀼𑀔𑁂𑀦, 𑀦 𑀉𑀘𑁆𑀘𑀸𑀯𑀘𑀁 [𑀦𑁄𑀘𑁆𑀘𑀸𑀯𑀘𑀁 (𑀲𑀻. 𑀅𑀝𑁆𑀞.)] 𑀧𑀡𑁆𑀟𑀺𑀢𑀸 𑀤𑀲𑁆𑀲𑀬𑀦𑁆𑀢𑀺.

𑁮𑁪.

𑀦 ¶ 𑀅𑀢𑁆𑀢𑀳𑁂𑀢𑀼 𑀦 𑀧𑀭𑀲𑁆𑀲 𑀳𑁂𑀢𑀼, 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂 𑀦 𑀥𑀦𑀁 𑀦 𑀭𑀝𑁆𑀞𑀁;

𑀦 𑀇𑀘𑁆𑀙𑁂𑀬𑁆𑀬 [𑀦𑀬𑀺𑀘𑁆𑀙𑁂 (𑀧𑀻.), 𑀦𑀺𑀘𑁆𑀙𑁂 (?)] 𑀅𑀥𑀫𑁆𑀫𑁂𑀦 𑀲𑀫𑀺𑀤𑁆𑀥𑀺𑀫𑀢𑁆𑀢𑀦𑁄, 𑀲 𑀲𑀻𑀮𑀯𑀸 𑀧𑀜𑁆𑀜𑀯𑀸 𑀥𑀫𑁆𑀫𑀺𑀓𑁄 𑀲𑀺𑀬𑀸.

𑁮𑁫.

𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

𑁮𑁬.

𑀬𑁂 ¶ 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁.

𑁮𑁭.

𑀓𑀡𑁆𑀳𑀁 ¶ 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬, 𑀲𑀼𑀓𑁆𑀓𑀁 𑀪𑀸𑀯𑁂𑀣 𑀧𑀡𑁆𑀟𑀺𑀢𑁄;

𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫, 𑀯𑀺𑀯𑁂𑀓𑁂 𑀬𑀢𑁆𑀣 𑀤𑀽𑀭𑀫𑀁.

𑁮𑁮.

𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬, 𑀳𑀺𑀢𑁆𑀯𑀸 𑀓𑀸𑀫𑁂 𑀅𑀓𑀺𑀜𑁆𑀘𑀦𑁄;

𑀧𑀭𑀺𑀬𑁄𑀤𑀧𑁂𑀬𑁆𑀬 [𑀧𑀭𑀺𑀬𑁄𑀤𑀸𑀧𑁂𑀬𑁆𑀬 (?)] 𑀅𑀢𑁆𑀢𑀸𑀦𑀁, 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀺 𑀧𑀡𑁆𑀟𑀺𑀢𑁄.

𑁮𑁯.

𑀬𑁂𑀲𑀁 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀼, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁;

𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀅𑀦𑀼𑀧𑀸𑀤𑀸𑀬 𑀬𑁂 𑀭𑀢𑀸;

𑀔𑀻𑀡𑀸𑀲𑀯𑀸 𑀚𑀼𑀢𑀺𑀫𑀦𑁆𑀢𑁄, 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸.

𑀧𑀡𑁆𑀟𑀺𑀢𑀯𑀕𑁆𑀕𑁄 𑀙𑀝𑁆𑀞𑁄 𑀦𑀺𑀝𑁆𑀞𑀺𑀢𑁄.

𑁭. 𑀅𑀭𑀳𑀦𑁆𑀢𑀯𑀕𑁆𑀕𑁄

𑁯𑁦.

𑀕𑀢𑀤𑁆𑀥𑀺𑀦𑁄 ¶ 𑀯𑀺𑀲𑁄𑀓𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀲𑀩𑁆𑀩𑀥𑀺;

𑀲𑀩𑁆𑀩𑀕𑀦𑁆𑀣𑀧𑁆𑀧𑀳𑀻𑀦𑀲𑁆𑀲, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀺.

𑁯𑁧.

𑀉𑀬𑁆𑀬𑀼𑀜𑁆𑀚𑀦𑁆𑀢𑀺 ¶ 𑀲𑀢𑀻𑀫𑀦𑁆𑀢𑁄, 𑀦 𑀦𑀺𑀓𑁂𑀢𑁂 𑀭𑀫𑀦𑁆𑀢𑀺 𑀢𑁂;

𑀳𑀁𑀲𑀸𑀯 𑀧𑀮𑁆𑀮𑀮𑀁 𑀳𑀺𑀢𑁆𑀯𑀸, 𑀑𑀓𑀫𑁄𑀓𑀁 𑀚𑀳𑀦𑁆𑀢𑀺 𑀢𑁂.

𑁯𑁨.

𑀬𑁂𑀲𑀁 ¶ 𑀲𑀦𑁆𑀦𑀺𑀘𑀬𑁄 𑀦𑀢𑁆𑀣𑀺, 𑀬𑁂 𑀧𑀭𑀺𑀜𑁆𑀜𑀸𑀢𑀪𑁄𑀚𑀦𑀸;

𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀘, 𑀯𑀺𑀫𑁄𑀓𑁆𑀔𑁄 𑀬𑁂𑀲𑀁 𑀕𑁄𑀘𑀭𑁄;

𑀆𑀓𑀸𑀲𑁂 𑀯 𑀲𑀓𑀼𑀦𑁆𑀢𑀸𑀦𑀁 [𑀲𑀓𑀼𑀡𑀸𑀦𑀁 (𑀓.)], 𑀕𑀢𑀺 𑀢𑁂𑀲𑀁 𑀤𑀼𑀭𑀦𑁆𑀦𑀬𑀸.

𑁯𑁩.

𑀬𑀲𑁆𑀲𑀸𑀲𑀯𑀸 ¶ 𑀧𑀭𑀺𑀓𑁆𑀔𑀻𑀡𑀸, 𑀆𑀳𑀸𑀭𑁂 𑀘 𑀅𑀦𑀺𑀲𑁆𑀲𑀺𑀢𑁄;

𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀘, 𑀯𑀺𑀫𑁄𑀓𑁆𑀔𑁄 𑀬𑀲𑁆𑀲 𑀕𑁄𑀘𑀭𑁄;

𑀆𑀓𑀸𑀲𑁂 𑀯 𑀲𑀓𑀼𑀦𑁆𑀢𑀸𑀦𑀁, 𑀧𑀤𑀁 𑀢𑀲𑁆𑀲 𑀤𑀼𑀭𑀦𑁆𑀦𑀬𑀁.

𑁯𑁪.

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺 [𑀲𑀫𑀣𑀁 𑀕𑀢𑀸𑀦𑀺 (𑀲𑀻. 𑀧𑀻.)], 𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄.

𑁯𑁫.

𑀧𑀣𑀯𑀺𑀲𑀫𑁄 𑀦𑁄 𑀯𑀺𑀭𑀼𑀚𑁆𑀛𑀢𑀺, 𑀇𑀦𑁆𑀤𑀔𑀺𑀮𑀼𑀧𑀫𑁄 [𑀇𑀦𑁆𑀤𑀔𑀻𑀮𑀽𑀧𑀫𑁄 (𑀲𑀻. 𑀲𑁆𑀬𑀸. 𑀓.)] 𑀢𑀸𑀤𑀺 𑀲𑀼𑀩𑁆𑀩𑀢𑁄;

𑀭𑀳𑀤𑁄𑀯 𑀅𑀧𑁂𑀢𑀓𑀤𑁆𑀤𑀫𑁄, 𑀲𑀁𑀲𑀸𑀭𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄.

𑁯𑁬.

𑀲𑀦𑁆𑀢𑀁 ¶ 𑀢𑀲𑁆𑀲 𑀫𑀦𑀁 𑀳𑁄𑀢𑀺, 𑀲𑀦𑁆𑀢𑀸 𑀯𑀸𑀘𑀸 𑀘 𑀓𑀫𑁆𑀫 𑀘;

𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁯𑁭.

𑀅𑀲𑁆𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘, 𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄, 𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄.

𑁯𑁮.

𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁.

𑁯𑁯.

𑀭𑀫𑀡𑀻𑀬𑀸𑀦𑀺 ¶ ¶ 𑀅𑀭𑀜𑁆𑀜𑀸𑀦𑀺, 𑀬𑀢𑁆𑀣 𑀦 𑀭𑀫𑀢𑀻 𑀚𑀦𑁄;

𑀯𑀻𑀢𑀭𑀸𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁂 𑀓𑀸𑀫𑀕𑀯𑁂𑀲𑀺𑀦𑁄.

𑀅𑀭𑀳𑀦𑁆𑀢𑀯𑀕𑁆𑀕𑁄 𑀲𑀢𑁆𑀢𑀫𑁄 𑀦𑀺𑀝𑁆𑀞𑀺𑀢𑁄.

𑁮. 𑀲𑀳𑀲𑁆𑀲𑀯𑀕𑁆𑀕𑁄

𑁧𑁦𑁦.

𑀲𑀳𑀲𑁆𑀲𑀫𑀧𑀺 ¶ 𑀘𑁂 𑀯𑀸𑀘𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀅𑀢𑁆𑀣𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺.

𑁧𑁦𑁧.

𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺.

𑁧𑁦𑁨.

𑀬𑁄 𑀘 𑀕𑀸𑀣𑀸 𑀲𑀢𑀁 𑀪𑀸𑀲𑁂, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸 [𑀅𑀦𑀢𑁆𑀣𑀧𑀤𑀲𑀜𑁆𑀳𑀺𑀢𑀁 (𑀓.) 𑀯𑀺𑀲𑁂𑀲𑀦𑀁 𑀳𑁂𑀢𑀁 𑀕𑀸𑀣𑀸𑀢𑀺𑀧𑀤𑀲𑁆𑀲];

𑀏𑀓𑀁 𑀥𑀫𑁆𑀫𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺.

𑁧𑁦𑁩.

𑀬𑁄 𑀲𑀳𑀲𑁆𑀲𑀁 𑀲𑀳𑀲𑁆𑀲𑁂𑀦, 𑀲𑀗𑁆𑀕𑀸𑀫𑁂 𑀫𑀸𑀦𑀼𑀲𑁂 𑀚𑀺𑀦𑁂;

𑀏𑀓𑀜𑁆𑀘 𑀚𑁂𑀬𑁆𑀬𑀫𑀢𑁆𑀢𑀸𑀦𑀁 [𑀅𑀢𑁆𑀢𑀸𑀦𑀁 (𑀲𑀻. 𑀧𑀻.)], 𑀲 𑀯𑁂 𑀲𑀗𑁆𑀕𑀸𑀫𑀚𑀼𑀢𑁆𑀢𑀫𑁄.

𑁧𑁦𑁪.

𑀅𑀢𑁆𑀢𑀸 ¶ 𑀳𑀯𑁂 𑀚𑀺𑀢𑀁 𑀲𑁂𑀬𑁆𑀬𑁄, 𑀬𑀸 𑀘𑀸𑀬𑀁 𑀇𑀢𑀭𑀸 𑀧𑀚𑀸;

𑀅𑀢𑁆𑀢𑀤𑀦𑁆𑀢𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀜𑁆𑀜𑀢𑀘𑀸𑀭𑀺𑀦𑁄.

𑁧𑁦𑁫.

𑀦𑁂𑀯 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦 𑀫𑀸𑀭𑁄 𑀲𑀳 𑀩𑁆𑀭𑀳𑁆𑀫𑀼𑀦𑀸;

𑀚𑀺𑀢𑀁 𑀅𑀧𑀚𑀺𑀢𑀁 𑀓𑀬𑀺𑀭𑀸, 𑀢𑀣𑀸𑀭𑀽𑀧𑀲𑁆𑀲 𑀚𑀦𑁆𑀢𑀼𑀦𑁄.

𑁧𑁦𑁬.

𑀫𑀸𑀲𑁂 ¶ ¶ 𑀫𑀸𑀲𑁂 𑀲𑀳𑀲𑁆𑀲𑁂𑀦, 𑀬𑁄 𑀬𑀚𑁂𑀣 𑀲𑀢𑀁 𑀲𑀫𑀁;

𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀽𑀚𑀬𑁂;

𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀯𑀲𑁆𑀲𑀲𑀢𑀁 𑀳𑀼𑀢𑀁.

𑁧𑁦𑁭.

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀦𑁆𑀢𑀼, 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂 𑀯𑀦𑁂;

𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀽𑀚𑀬𑁂;

𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀯𑀲𑁆𑀲𑀲𑀢𑀁 𑀳𑀼𑀢𑀁.

𑁧𑁦𑁮.

𑀬𑀁 ¶ 𑀓𑀺𑀜𑁆𑀘𑀺 𑀬𑀺𑀝𑁆𑀞𑀁 𑀯 𑀳𑀼𑀢𑀁 𑀯 [𑀬𑀺𑀝𑁆𑀞𑀜𑁆𑀘 𑀳𑀼𑀢𑀜𑁆𑀘 (𑀓.)] 𑀮𑁄𑀓𑁂, 𑀲𑀁𑀯𑀘𑁆𑀙𑀭𑀁 𑀬𑀚𑁂𑀣 𑀧𑀼𑀜𑁆𑀜𑀧𑁂𑀓𑁆𑀔𑁄;

𑀲𑀩𑁆𑀩𑀫𑁆𑀧𑀺 𑀢𑀁 𑀦 𑀘𑀢𑀼𑀪𑀸𑀕𑀫𑁂𑀢𑀺, 𑀅𑀪𑀺𑀯𑀸𑀤𑀦𑀸 𑀉𑀚𑁆𑀚𑀼𑀕𑀢𑁂𑀲𑀼 𑀲𑁂𑀬𑁆𑀬𑁄.

𑁧𑁦𑁯.

𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄 [𑀯𑀤𑁆𑀥𑀸𑀧𑀘𑀸𑀬𑀺𑀦𑁄 (𑀲𑀻. 𑀧𑀻.)];

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮𑀁.

𑁧𑁧𑁦.

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀤𑀼𑀲𑁆𑀲𑀻𑀮𑁄 𑀅𑀲𑀫𑀸𑀳𑀺𑀢𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀲𑀻𑀮𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄.

𑁧𑁧𑁧.

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀤𑀼𑀧𑁆𑀧𑀜𑁆𑀜𑁄 𑀅𑀲𑀫𑀸𑀳𑀺𑀢𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀜𑁆𑀜𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄.

𑁧𑁧𑁨.

𑀬𑁄 ¶ 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀯𑀻𑀭𑀺𑀬𑀫𑀸𑀭𑀪𑀢𑁄 𑀤𑀴𑁆𑀳𑀁.

𑁧𑁧𑁩.

𑀬𑁄 ¶ 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀁.

𑁧𑁧𑁪.

𑀬𑁄 ¶ 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀅𑀫𑀢𑀁 𑀧𑀤𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀅𑀫𑀢𑀁 𑀧𑀤𑀁.

𑁧𑁧𑁫.

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀥𑀫𑁆𑀫𑀫𑀼𑀢𑁆𑀢𑀫𑀁.

𑀲𑀳𑀲𑁆𑀲𑀯𑀕𑁆𑀕𑁄 𑀅𑀝𑁆𑀞𑀫𑁄 𑀦𑀺𑀝𑁆𑀞𑀺𑀢𑁄.

𑁯. 𑀧𑀸𑀧𑀯𑀕𑁆𑀕𑁄

𑁧𑁧𑁬.

𑀅𑀪𑀺𑀢𑁆𑀣𑀭𑁂𑀣 ¶ 𑀓𑀮𑁆𑀬𑀸𑀡𑁂, 𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂;

𑀤𑀦𑁆𑀥𑀜𑁆𑀳𑀺 𑀓𑀭𑁄𑀢𑁄 𑀧𑀼𑀜𑁆𑀜𑀁, 𑀧𑀸𑀧𑀲𑁆𑀫𑀺𑀁 𑀭𑀫𑀢𑀻 𑀫𑀦𑁄.

𑁧𑁧𑁭.

𑀧𑀸𑀧𑀜𑁆𑀘𑁂 𑀧𑀼𑀭𑀺𑀲𑁄 𑀓𑀬𑀺𑀭𑀸, 𑀦 𑀦𑀁 [𑀦 𑀢𑀁 (𑀲𑀻. 𑀧𑀻.)] 𑀓𑀬𑀺𑀭𑀸 𑀧𑀼𑀦𑀧𑁆𑀧𑀼𑀦𑀁;

𑀦 𑀢𑀫𑁆𑀳𑀺 𑀙𑀦𑁆𑀤𑀁 𑀓𑀬𑀺𑀭𑀸𑀣, 𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄.

𑁧𑁧𑁮.

𑀧𑀼𑀜𑁆𑀜𑀜𑁆𑀘𑁂 𑀧𑀼𑀭𑀺𑀲𑁄 𑀓𑀬𑀺𑀭𑀸, 𑀓𑀬𑀺𑀭𑀸 𑀦𑀁 [𑀓𑀬𑀺𑀭𑀸𑀣𑁂𑀢𑀁 (𑀲𑀻. 𑀲𑁆𑀬𑀸.), 𑀓𑀬𑀺𑀭𑀸𑀣𑁂𑀦𑀁 (𑀧𑀻.)] 𑀧𑀼𑀦𑀧𑁆𑀧𑀼𑀦𑀁;

𑀢𑀫𑁆𑀳𑀺 𑀙𑀦𑁆𑀤𑀁 𑀓𑀬𑀺𑀭𑀸𑀣, 𑀲𑀼𑀔𑁄 𑀧𑀼𑀜𑁆𑀜𑀲𑁆𑀲 𑀉𑀘𑁆𑀘𑀬𑁄.

𑁧𑁧𑁯.

𑀧𑀸𑀧𑁄𑀧𑀺 ¶ 𑀧𑀲𑁆𑀲𑀢𑀺 𑀪𑀤𑁆𑀭𑀁, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀧𑀸𑀧𑀁, 𑀅𑀣 𑀧𑀸𑀧𑁄 𑀧𑀸𑀧𑀸𑀦𑀺 [𑀅𑀣 𑀧𑀸𑀧𑀸𑀦𑀺 (?)] 𑀧𑀲𑁆𑀲𑀢𑀺.

𑁧𑁨𑁦.

𑀪𑀤𑁆𑀭𑁄𑀧𑀺 ¶ ¶ 𑀧𑀲𑁆𑀲𑀢𑀺 𑀧𑀸𑀧𑀁, 𑀬𑀸𑀯 𑀪𑀤𑁆𑀭𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀪𑀤𑁆𑀭𑀁, 𑀅𑀣 𑀪𑀤𑁆𑀭𑁄 𑀪𑀤𑁆𑀭𑀸𑀦𑀺 [𑀅𑀣 𑀪𑀤𑁆𑀭𑀸𑀦𑀺 (?)] 𑀧𑀲𑁆𑀲𑀢𑀺.

𑁧𑁨𑁧.

𑀫𑀸𑀯𑀫𑀜𑁆𑀜𑁂𑀣 [𑀫𑀸𑀧𑁆𑀧𑀫𑀜𑁆𑀜𑁂𑀣 (𑀲𑀻. 𑀲𑁆𑀬𑀸. 𑀧𑀻.)] 𑀧𑀸𑀧𑀲𑁆𑀲, 𑀦 𑀫𑀦𑁆𑀢𑀁 [𑀦 𑀫𑀁 𑀢𑀁 (𑀲𑀻. 𑀧𑀻.), 𑀦 𑀫𑀢𑁆𑀢𑀁 (𑀲𑁆𑀬𑀸.)] 𑀆𑀕𑀫𑀺𑀲𑁆𑀲𑀢𑀺;

𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀉𑀤𑀓𑀼𑀫𑁆𑀪𑁄𑀧𑀺 𑀧𑀽𑀭𑀢𑀺;

𑀩𑀸𑀮𑁄 𑀧𑀽𑀭𑀢𑀺 [𑀧𑀽𑀭𑀢𑀺 𑀩𑀸𑀮𑁄 (𑀲𑀻. 𑀓.), 𑀆𑀧𑀽𑀭𑀢𑀺 𑀩𑀸𑀮𑁄 (𑀲𑁆𑀬𑀸.)] 𑀧𑀸𑀧𑀲𑁆𑀲, 𑀣𑁄𑀓𑀁 𑀣𑁄𑀓𑀫𑁆𑀧𑀺 [𑀣𑁄𑀓 𑀣𑁄𑀓𑀫𑁆𑀧𑀺 (𑀲𑀻. 𑀧𑀻.)] 𑀆𑀘𑀺𑀦𑀁.

𑁧𑁨𑁨.

𑀫𑀸𑀯𑀫𑀜𑁆𑀜𑁂𑀣 𑀧𑀼𑀜𑁆𑀜𑀲𑁆𑀲, 𑀦 𑀫𑀦𑁆𑀢𑀁 𑀆𑀕𑀫𑀺𑀲𑁆𑀲𑀢𑀺;

𑀉𑀤𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀉𑀤𑀓𑀼𑀫𑁆𑀪𑁄𑀧𑀺 𑀧𑀽𑀭𑀢𑀺;

𑀥𑀻𑀭𑁄 𑀧𑀽𑀭𑀢𑀺 𑀧𑀼𑀜𑁆𑀜𑀲𑁆𑀲, 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀆𑀘𑀺𑀦𑀁.

𑁧𑁨𑁩.

𑀯𑀸𑀡𑀺𑀚𑁄𑀯 𑀪𑀬𑀁 𑀫𑀕𑁆𑀕𑀁, 𑀅𑀧𑁆𑀧𑀲𑀢𑁆𑀣𑁄 𑀫𑀳𑀤𑁆𑀥𑀦𑁄;

𑀯𑀺𑀲𑀁 𑀚𑀻𑀯𑀺𑀢𑀼𑀓𑀸𑀫𑁄𑀯, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂.

𑁧𑁨𑁪.

𑀧𑀸𑀡𑀺𑀫𑁆𑀳𑀺 ¶ 𑀘𑁂 𑀯𑀡𑁄 𑀦𑀸𑀲𑁆𑀲, 𑀳𑀭𑁂𑀬𑁆𑀬 𑀧𑀸𑀡𑀺𑀦𑀸 𑀯𑀺𑀲𑀁;

𑀦𑀸𑀩𑁆𑀩𑀡𑀁 𑀯𑀺𑀲𑀫𑀦𑁆𑀯𑁂𑀢𑀺, 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀼𑀩𑁆𑀩𑀢𑁄.

𑁧𑁨𑁫.

𑀬𑁄 ¶ 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄.

𑁧𑁨𑁬.

𑀕𑀩𑁆𑀪𑀫𑁂𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀺𑀦𑁄;

𑀲𑀕𑁆𑀕𑀁 𑀲𑀼𑀕𑀢𑀺𑀦𑁄 𑀬𑀦𑁆𑀢𑀺, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸.

𑁧𑁨𑁭.

𑀦 ¶ 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲 [𑀧𑀯𑀺𑀲𑀁 (𑀲𑁆𑀬𑀸.)];

𑀦 ¶ 𑀯𑀺𑀚𑁆𑀚𑀢𑀻 [𑀦 𑀯𑀺𑀚𑁆𑀚𑀢𑀺 (𑀓. 𑀲𑀻. 𑀧𑀻. 𑀓.)] 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑁄 [𑀬𑀢𑁆𑀭𑀝𑁆𑀞𑀺𑀢𑁄 (𑀲𑁆𑀬𑀸.)] 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸.

𑁧𑁨𑁮.

𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑀁 [𑀬𑀢𑁆𑀭𑀝𑁆𑀞𑀺𑀢𑀁 (𑀲𑁆𑀬𑀸.)] 𑀦𑀧𑁆𑀧𑀲𑀳𑁂𑀬𑁆𑀬 𑀫𑀘𑁆𑀘𑀼.

𑀧𑀸𑀧𑀯𑀕𑁆𑀕𑁄 𑀦𑀯𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁦. 𑀤𑀡𑁆𑀟𑀯𑀕𑁆𑀕𑁄

𑁧𑁨𑁯.

𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂.

𑁧𑁩𑁦.

𑀲𑀩𑁆𑀩𑁂 ¶ 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀁 𑀧𑀺𑀬𑀁;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂.

𑁧𑁩𑁧.

𑀲𑀼𑀔𑀓𑀸𑀫𑀸𑀦𑀺 ¶ 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔𑀁.

𑁧𑁩𑁨.

𑀲𑀼𑀔𑀓𑀸𑀫𑀸𑀦𑀺 ¶ 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀮𑀪𑀢𑁂 𑀲𑀼𑀔𑀁.

𑁧𑁩𑁩.

𑀫𑀸𑀯𑁄𑀘 𑀨𑀭𑀼𑀲𑀁 𑀓𑀜𑁆𑀘𑀺, 𑀯𑀼𑀢𑁆𑀢𑀸 𑀧𑀝𑀺𑀯𑀤𑁂𑀬𑁆𑀬𑀼 𑀢𑀁 [𑀧𑀝𑀺𑀯𑀤𑁂𑀬𑁆𑀬𑀼𑀁 𑀢𑀁 (𑀓.)];

𑀤𑀼𑀓𑁆𑀔𑀸 𑀳𑀺 𑀲𑀸𑀭𑀫𑁆𑀪𑀓𑀣𑀸, 𑀧𑀝𑀺𑀤𑀡𑁆𑀟𑀸 𑀨𑀼𑀲𑁂𑀬𑁆𑀬𑀼 𑀢𑀁 [𑀨𑀼𑀲𑁂𑀬𑁆𑀬𑀼𑀁 𑀢𑀁 (𑀓.)].

𑁧𑁩𑁪.

𑀲𑀘𑁂 ¶ 𑀦𑁂𑀭𑁂𑀲𑀺 𑀅𑀢𑁆𑀢𑀸𑀦𑀁, 𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸;

𑀏𑀲 𑀧𑀢𑁆𑀢𑁄𑀲𑀺 𑀦𑀺𑀩𑁆𑀩𑀸𑀦𑀁, 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀺.

𑁧𑁩𑁫.

𑀬𑀣𑀸 𑀤𑀡𑁆𑀟𑁂𑀦 𑀕𑁄𑀧𑀸𑀮𑁄, 𑀕𑀸𑀯𑁄 𑀧𑀸𑀚𑁂𑀢𑀺 𑀕𑁄𑀘𑀭𑀁;

𑀏𑀯𑀁 𑀚𑀭𑀸 𑀘 𑀫𑀘𑁆𑀘𑀼 𑀘, 𑀆𑀬𑀼𑀁 𑀧𑀸𑀚𑁂𑀦𑁆𑀢𑀺 𑀧𑀸𑀡𑀺𑀦𑀁.

𑁧𑁩𑁬.

𑀅𑀣 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀓𑀭𑀁 𑀩𑀸𑀮𑁄 𑀦 𑀩𑀼𑀚𑁆𑀛𑀢𑀺;

𑀲𑁂𑀳𑀺 𑀓𑀫𑁆𑀫𑁂𑀳𑀺 𑀤𑀼𑀫𑁆𑀫𑁂𑀥𑁄, 𑀅𑀕𑁆𑀕𑀺𑀤𑀟𑁆𑀠𑁄𑀯 𑀢𑀧𑁆𑀧𑀢𑀺.

𑁧𑁩𑁭.

𑀬𑁄 𑀤𑀡𑁆𑀟𑁂𑀦 𑀅𑀤𑀡𑁆𑀟𑁂𑀲𑀼, 𑀅𑀧𑁆𑀧𑀤𑀼𑀝𑁆𑀞𑁂𑀲𑀼 𑀤𑀼𑀲𑁆𑀲𑀢𑀺;

𑀤𑀲𑀦𑁆𑀦𑀫𑀜𑁆𑀜𑀢𑀭𑀁 𑀞𑀸𑀦𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀕𑀘𑁆𑀙𑀢𑀺.

𑁧𑁩𑁮.

𑀯𑁂𑀤𑀦𑀁 ¶ 𑀨𑀭𑀼𑀲𑀁 𑀚𑀸𑀦𑀺𑀁, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁 [𑀲𑀭𑀻𑀭𑀲𑁆𑀲 𑀧𑀪𑁂𑀤𑀦𑀁 (𑀲𑁆𑀬𑀸.)];

𑀕𑀭𑀼𑀓𑀁 𑀯𑀸𑀧𑀺 𑀆𑀩𑀸𑀥𑀁, 𑀘𑀺𑀢𑁆𑀢𑀓𑁆𑀔𑁂𑀧𑀜𑁆𑀘 [𑀘𑀺𑀢𑁆𑀢𑀓𑁆𑀔𑁂𑀧𑀁 𑀯 (𑀲𑀻. 𑀲𑁆𑀬𑀸. 𑀧𑀻.)] 𑀧𑀸𑀧𑀼𑀡𑁂.

𑁧𑁩𑁯.

𑀭𑀸𑀚𑀢𑁄 𑀯𑀸 𑀉𑀧𑀲𑀕𑁆𑀕𑀁 [𑀉𑀧𑀲𑁆𑀲𑀕𑁆𑀕𑀁 (𑀲𑀻. 𑀧𑀻.)], 𑀅𑀩𑁆𑀪𑀓𑁆𑀔𑀸𑀦𑀜𑁆𑀘 [𑀅𑀩𑁆𑀪𑀓𑁆𑀔𑀸𑀦𑀁 𑀯 (𑀲𑀻. 𑀧𑀻.)] 𑀤𑀸𑀭𑀼𑀡𑀁;

𑀧𑀭𑀺𑀓𑁆𑀔𑀬𑀜𑁆𑀘 [𑀧𑀭𑀺𑀓𑁆𑀔𑀬𑀁 𑀯 (𑀲𑀻. 𑀲𑁆𑀬𑀸. 𑀧𑀻.)] 𑀜𑀸𑀢𑀻𑀦𑀁, 𑀪𑁄𑀕𑀸𑀦𑀜𑁆𑀘 [𑀪𑁄𑀕𑀸𑀦𑀁 𑀯 (𑀲𑀻. 𑀲𑁆𑀬𑀸. 𑀧𑀻.)] 𑀧𑀪𑀗𑁆𑀕𑀼𑀭𑀁 [𑀧𑀪𑀗𑁆𑀕𑀼𑀦𑀁 (𑀓.)].

𑁧𑁪𑁦.

𑀅𑀣 𑀯𑀸𑀲𑁆𑀲 𑀅𑀕𑀸𑀭𑀸𑀦𑀺, 𑀅𑀕𑁆𑀕𑀺 𑀟𑀳𑀢𑀺 [𑀟𑀬𑁆𑀳𑀢𑀺 (𑀓.)] 𑀧𑀸𑀯𑀓𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺 [𑀲𑁄 𑀉𑀧𑀧𑀚𑁆𑀚𑀢𑀺 (𑀲𑀻. 𑀲𑁆𑀬𑀸.)].

𑁧𑁪𑁧.

𑀦 ¶ ¶ 𑀦𑀕𑁆𑀕𑀘𑀭𑀺𑀬𑀸 𑀦 𑀚𑀝𑀸 𑀦 𑀧𑀗𑁆𑀓𑀸, 𑀦𑀸𑀦𑀸𑀲𑀓𑀸 𑀣𑀡𑁆𑀟𑀺𑀮𑀲𑀸𑀬𑀺𑀓𑀸 𑀯𑀸;

𑀭𑀚𑁄𑀚𑀮𑁆𑀮𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀁, 𑀲𑁄𑀥𑁂𑀦𑁆𑀢𑀺 𑀫𑀘𑁆𑀘𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑀁.

𑁧𑁪𑁨.

𑀅𑀮𑀗𑁆𑀓𑀢𑁄 𑀘𑁂𑀧𑀺 𑀲𑀫𑀁 𑀘𑀭𑁂𑀬𑁆𑀬, 𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻;

𑀲𑀩𑁆𑀩𑁂𑀲𑀼 ¶ 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀲𑀫𑀡𑁄 𑀲 𑀪𑀺𑀓𑁆𑀔𑀼.

𑁧𑁪𑁩.

𑀳𑀺𑀭𑀻𑀦𑀺𑀲𑁂𑀥𑁄 𑀧𑀼𑀭𑀺𑀲𑁄, 𑀓𑁄𑀘𑀺 𑀮𑁄𑀓𑀲𑁆𑀫𑀺 𑀯𑀺𑀚𑁆𑀚𑀢𑀺;

𑀬𑁄 𑀦𑀺𑀤𑁆𑀤𑀁 [𑀦𑀺𑀦𑁆𑀤𑀁 (𑀲𑀻. 𑀧𑀻.) 𑀲𑀁. 𑀦𑀺. 𑁧.𑁧𑁮] 𑀅𑀧𑀩𑁄𑀥𑁂𑀢𑀺 [𑀅𑀧𑀩𑁄𑀥𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀅𑀲𑁆𑀲𑁄 𑀪𑀤𑁆𑀭𑁄 𑀓𑀲𑀸𑀫𑀺𑀯.

𑁧𑁪𑁪.

𑀅𑀲𑁆𑀲𑁄 ¶ 𑀬𑀣𑀸 𑀪𑀤𑁆𑀭𑁄 𑀓𑀲𑀸𑀦𑀺𑀯𑀺𑀝𑁆𑀞𑁄, 𑀆𑀢𑀸𑀧𑀺𑀦𑁄 𑀲𑀁𑀯𑁂𑀕𑀺𑀦𑁄 𑀪𑀯𑀸𑀣;

𑀲𑀤𑁆𑀥𑀸𑀬 𑀲𑀻𑀮𑁂𑀦 𑀘 𑀯𑀻𑀭𑀺𑀬𑁂𑀦 𑀘, 𑀲𑀫𑀸𑀥𑀺𑀦𑀸 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑁂𑀦 𑀘;

𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑀸 𑀧𑀢𑀺𑀲𑁆𑀲𑀢𑀸, 𑀚𑀳𑀺𑀲𑁆𑀲𑀣 [𑀧𑀳𑀲𑁆𑀲𑀣 (𑀲𑀻. 𑀲𑁆𑀬𑀸. 𑀧𑀻.)] 𑀤𑀼𑀓𑁆𑀔𑀫𑀺𑀤𑀁 𑀅𑀦𑀧𑁆𑀧𑀓𑀁.

𑁧𑁪𑁫.

𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀲𑀼𑀩𑁆𑀩𑀢𑀸.

𑀤𑀡𑁆𑀟𑀯𑀕𑁆𑀕𑁄 𑀤𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁧. 𑀚𑀭𑀸𑀯𑀕𑁆𑀕𑁄

𑁧𑁪𑁬.

𑀓𑁄 ¶ ¶ 𑀦𑀼 𑀳𑀸𑀲𑁄 [𑀓𑀺𑀦𑁆𑀦𑀼 𑀳𑀸𑀲𑁄 (𑀓.)] 𑀓𑀺𑀫𑀸𑀦𑀦𑁆𑀤𑁄, 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑁂 𑀲𑀢𑀺;

𑀅𑀦𑁆𑀥𑀓𑀸𑀭𑁂𑀦 𑀑𑀦𑀤𑁆𑀥𑀸, 𑀧𑀤𑀻𑀧𑀁 𑀦 𑀕𑀯𑁂𑀲𑀣.

𑁧𑁪𑁭.

𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

𑁧𑁪𑁮.

𑀧𑀭𑀺𑀚𑀺𑀡𑁆𑀡𑀫𑀺𑀤𑀁 ¶ 𑀭𑀽𑀧𑀁, 𑀭𑁄𑀕𑀦𑀻𑀴𑀁 [𑀭𑁄𑀕𑀦𑀺𑀟𑁆𑀠𑀁 (𑀲𑀻. 𑀧𑀻.), 𑀭𑁄𑀕𑀦𑀺𑀤𑁆𑀥𑀁 (𑀲𑁆𑀬𑀸.)] 𑀧𑀪𑀗𑁆𑀕𑀼𑀭𑀁;

𑀪𑀺𑀚𑁆𑀚𑀢𑀺 𑀧𑀽𑀢𑀺𑀲𑀦𑁆𑀤𑁂𑀳𑁄, 𑀫𑀭𑀡𑀦𑁆𑀢𑀜𑁆𑀳𑀺 𑀚𑀻𑀯𑀺𑀢𑀁.

𑁧𑁪𑁯.

𑀬𑀸𑀦𑀺𑀫𑀸𑀦𑀺 ¶ 𑀅𑀧𑀢𑁆𑀣𑀸𑀦𑀺 [𑀬𑀸𑀦𑀺𑀫𑀸𑀦𑀺 𑀅𑀧𑀢𑁆𑀣𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.), 𑀬𑀸𑀦𑀺𑀫𑀸𑀦𑀺’𑀧𑀯𑀺𑀤𑁆𑀥𑀸𑀦𑀺 (?)], 𑀅𑀮𑀸𑀩𑀽𑀦𑁂𑀯 [𑀅𑀮𑀸𑀧𑀽𑀦𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑀸𑀭𑀤𑁂;

𑀓𑀸𑀧𑁄𑀢𑀓𑀸𑀦𑀺 𑀅𑀝𑁆𑀞𑀻𑀦𑀺, 𑀢𑀸𑀦𑀺 𑀤𑀺𑀲𑁆𑀯𑀸𑀦 𑀓𑀸 𑀭𑀢𑀺.

𑁧𑁫𑁦.

𑀅𑀝𑁆𑀞𑀻𑀦𑀁 𑀦𑀕𑀭𑀁 𑀓𑀢𑀁, 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑀁;

𑀬𑀢𑁆𑀣 𑀚𑀭𑀸 𑀘 𑀫𑀘𑁆𑀘𑀼 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀑𑀳𑀺𑀢𑁄.

𑁧𑁫𑁧.

𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸, 𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;

𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺, 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺.

𑁧𑁫𑁨.

𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀩𑀮𑀺𑀩𑀤𑁆𑀥𑁄𑀯 [𑀩𑀮𑀺𑀯𑀤𑁆𑀤𑁄𑀯 (𑀲𑀻. 𑀲𑁆𑀬𑀸. 𑀧𑀻.)] 𑀚𑀻𑀭𑀢𑀺;

𑀫𑀁𑀲𑀸𑀦𑀺 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀧𑀜𑁆𑀜𑀸 𑀢𑀲𑁆𑀲 𑀦 𑀯𑀟𑁆𑀠𑀢𑀺.

𑁧𑁫𑁩.

𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁 ¶ , 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 [𑀕𑀳𑀓𑀸𑀭𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁧𑁫𑁪.

𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 ¶ 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸.

𑁧𑁫𑁫.

𑀅𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀮𑀤𑁆𑀥𑀸 𑀬𑁄𑀩𑁆𑀩𑀦𑁂 𑀥𑀦𑀁;

𑀚𑀺𑀡𑁆𑀡𑀓𑁄𑀜𑁆𑀘𑀸𑀯 𑀛𑀸𑀬𑀦𑁆𑀢𑀺, 𑀔𑀻𑀡𑀫𑀘𑁆𑀙𑁂𑀯 𑀧𑀮𑁆𑀮𑀮𑁂.

𑁧𑁫𑁬.

𑀅𑀘𑀭𑀺𑀢𑁆𑀯𑀸 ¶ 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀮𑀤𑁆𑀥𑀸 𑀬𑁄𑀩𑁆𑀩𑀦𑁂 𑀥𑀦𑀁;

𑀲𑁂𑀦𑁆𑀢𑀺 𑀘𑀸𑀧𑀸𑀢𑀺𑀔𑀻𑀡𑀸𑀯, 𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦𑀁.

𑀚𑀭𑀸𑀯𑀕𑁆𑀕𑁄 𑀏𑀓𑀸𑀤𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁨. 𑀅𑀢𑁆𑀢𑀯𑀕𑁆𑀕𑁄

𑁧𑁫𑁭.

𑀅𑀢𑁆𑀢𑀸𑀦𑀜𑁆𑀘𑁂 ¶ 𑀧𑀺𑀬𑀁 𑀚𑀜𑁆𑀜𑀸, 𑀭𑀓𑁆𑀔𑁂𑀬𑁆𑀬 𑀦𑀁 𑀲𑀼𑀭𑀓𑁆𑀔𑀺𑀢𑀁;

𑀢𑀺𑀡𑁆𑀡𑀁 𑀅𑀜𑁆𑀜𑀢𑀭𑀁 𑀬𑀸𑀫𑀁, 𑀧𑀝𑀺𑀚𑀕𑁆𑀕𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁧𑁫𑁮.

𑀅𑀢𑁆𑀢𑀸𑀦𑀫𑁂𑀯 𑀧𑀞𑀫𑀁, 𑀧𑀢𑀺𑀭𑀽𑀧𑁂 𑀦𑀺𑀯𑁂𑀲𑀬𑁂;

𑀅𑀣𑀜𑁆𑀜𑀫𑀦𑀼𑀲𑀸𑀲𑁂𑀬𑁆𑀬, 𑀦 𑀓𑀺𑀮𑀺𑀲𑁆𑀲𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁧𑁫𑁯.

𑀅𑀢𑁆𑀢𑀸𑀦𑀁 ¶ 𑀘𑁂 𑀢𑀣𑀸 𑀓𑀬𑀺𑀭𑀸, 𑀬𑀣𑀸𑀜𑁆𑀜𑀫𑀦𑀼𑀲𑀸𑀲𑀢𑀺;

𑀲𑀼𑀤𑀦𑁆𑀢𑁄 𑀯𑀢 𑀤𑀫𑁂𑀣, 𑀅𑀢𑁆𑀢𑀸 𑀳𑀺 𑀓𑀺𑀭 𑀤𑀼𑀤𑁆𑀤𑀫𑁄.

𑁧𑁬𑁦.

𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄, 𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸;

𑀅𑀢𑁆𑀢𑀦𑀸 𑀳𑀺 𑀲𑀼𑀤𑀦𑁆𑀢𑁂𑀦, 𑀦𑀸𑀣𑀁 𑀮𑀪𑀢𑀺 𑀤𑀼𑀮𑁆𑀮𑀪𑀁.

𑁧𑁬𑁧.

𑀅𑀢𑁆𑀢𑀦𑀸 𑀳𑀺 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀚𑀁 𑀅𑀢𑁆𑀢𑀲𑀫𑁆𑀪𑀯𑀁;

𑀅𑀪𑀺𑀫𑀢𑁆𑀣𑀢𑀺 [𑀅𑀪𑀺𑀫𑀦𑁆𑀢𑀢𑀺 (𑀲𑀻. 𑀧𑀻.)] 𑀤𑀼𑀫𑁆𑀫𑁂𑀥𑀁, 𑀯𑀚𑀺𑀭𑀁 𑀯𑀲𑁆𑀫𑀫𑀬𑀁 [𑀯𑀚𑀺𑀭𑀁𑀯’𑀫𑁆𑀳𑀫𑀬𑀁 (𑀲𑁆𑀬𑀸. 𑀓.)] 𑀫𑀡𑀺𑀁.

𑁧𑁬𑁨.

𑀬𑀲𑁆𑀲 ¶ 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁆𑀬𑀁, 𑀫𑀸𑀮𑀼𑀯𑀸 𑀲𑀸𑀮𑀫𑀺𑀯𑁄𑀢𑁆𑀣𑀢𑀁;

𑀓𑀭𑁄𑀢𑀺 𑀲𑁄 𑀢𑀣𑀢𑁆𑀢𑀸𑀦𑀁, 𑀬𑀣𑀸 𑀦𑀁 𑀇𑀘𑁆𑀙𑀢𑀻 𑀤𑀺𑀲𑁄.

𑁧𑁬𑁩.

𑀲𑀼𑀓𑀭𑀸𑀦𑀺 ¶ 𑀅𑀲𑀸𑀥𑀽𑀦𑀺, 𑀅𑀢𑁆𑀢𑀦𑁄 𑀅𑀳𑀺𑀢𑀸𑀦𑀺 𑀘;

𑀬𑀁 𑀯𑁂 𑀳𑀺𑀢𑀜𑁆𑀘 𑀲𑀸𑀥𑀼𑀜𑁆𑀘, 𑀢𑀁 𑀯𑁂 𑀧𑀭𑀫𑀤𑀼𑀓𑁆𑀓𑀭𑀁.

𑁧𑁬𑁪.

𑀬𑁄 𑀲𑀸𑀲𑀦𑀁 𑀅𑀭𑀳𑀢𑀁, 𑀅𑀭𑀺𑀬𑀸𑀦𑀁 𑀥𑀫𑁆𑀫𑀚𑀻𑀯𑀺𑀦𑀁;

𑀧𑀝𑀺𑀓𑁆𑀓𑁄𑀲𑀢𑀺 𑀤𑀼𑀫𑁆𑀫𑁂𑀥𑁄, 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀸𑀧𑀺𑀓𑀁;

𑀨𑀮𑀸𑀦𑀺 𑀓𑀝𑁆𑀞𑀓𑀲𑁆𑀲𑁂𑀯, 𑀅𑀢𑁆𑀢𑀖𑀸𑀢𑀸𑀬 [𑀅𑀢𑁆𑀢𑀖𑀜𑁆𑀜𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀨𑀮𑁆𑀮𑀢𑀺.

𑁧𑁬𑁫.

𑀅𑀢𑁆𑀢𑀦𑀸 ¶ 𑀳𑀺 [𑀅𑀢𑁆𑀢𑀦𑀸𑀯 (𑀲𑀻. 𑀲𑁆𑀬𑀸. 𑀧𑀻.)] 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸 𑀲𑀁𑀓𑀺𑀮𑀺𑀲𑁆𑀲𑀢𑀺;

𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺;

𑀲𑀼𑀤𑁆𑀥𑀻 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁, 𑀦𑀸𑀜𑁆𑀜𑁄 𑀅𑀜𑁆𑀜𑀁 [𑀦𑀸𑀜𑁆𑀜𑀫𑀜𑁆𑀜𑁄(𑀲𑀻.)] 𑀯𑀺𑀲𑁄𑀥𑀬𑁂.

𑁧𑁬𑁬.

𑀅𑀢𑁆𑀢𑀤𑀢𑁆𑀣𑀁 ¶ 𑀧𑀭𑀢𑁆𑀣𑁂𑀦, 𑀩𑀳𑀼𑀦𑀸𑀧𑀺 𑀦 𑀳𑀸𑀧𑀬𑁂;

𑀅𑀢𑁆𑀢𑀤𑀢𑁆𑀣𑀫𑀪𑀺𑀜𑁆𑀜𑀸𑀬, 𑀲𑀤𑀢𑁆𑀣𑀧𑀲𑀼𑀢𑁄 𑀲𑀺𑀬𑀸.

𑀅𑀢𑁆𑀢𑀯𑀕𑁆𑀕𑁄 𑀤𑁆𑀯𑀸𑀤𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁩. 𑀮𑁄𑀓𑀯𑀕𑁆𑀕𑁄

𑁧𑁬𑁭.

𑀳𑀻𑀦𑀁 𑀥𑀫𑁆𑀫𑀁 𑀦 𑀲𑁂𑀯𑁂𑀬𑁆𑀬, 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑁂𑀬𑁆𑀬, 𑀦 𑀲𑀺𑀬𑀸 𑀮𑁄𑀓𑀯𑀟𑁆𑀠𑀦𑁄.

𑁧𑁬𑁮.

𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀥𑀫𑁆𑀫𑀁 𑀲𑀼𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁧𑁬𑁯.

𑀥𑀫𑁆𑀫𑀁 ¶ ¶ 𑀘𑀭𑁂 𑀲𑀼𑀘𑀭𑀺𑀢𑀁, 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁧𑁭𑁦.

𑀬𑀣𑀸 𑀧𑀼𑀩𑁆𑀩𑀼𑀴𑀓𑀁 [𑀧𑀼𑀩𑁆𑀩𑀼𑀴𑀓𑀁 (𑀲𑀻. 𑀧𑀻.)] 𑀧𑀲𑁆𑀲𑁂, 𑀬𑀣𑀸 𑀧𑀲𑁆𑀲𑁂 𑀫𑀭𑀻𑀘𑀺𑀓𑀁;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺.

𑁧𑁭𑁧.

𑀏𑀣 𑀧𑀲𑁆𑀲𑀣𑀺𑀫𑀁 𑀮𑁄𑀓𑀁, 𑀘𑀺𑀢𑁆𑀢𑀁 𑀭𑀸𑀚𑀭𑀣𑀽𑀧𑀫𑀁;

𑀬𑀢𑁆𑀣 𑀩𑀸𑀮𑀸 𑀯𑀺𑀲𑀻𑀤𑀦𑁆𑀢𑀺, 𑀦𑀢𑁆𑀣𑀺 𑀲𑀗𑁆𑀕𑁄 𑀯𑀺𑀚𑀸𑀦𑀢𑀁.

𑁧𑁭𑁨.

𑀬𑁄 ¶ ¶ 𑀘 𑀧𑀼𑀩𑁆𑀩𑁂 𑀧𑀫𑀚𑁆𑀚𑀺𑀢𑁆𑀯𑀸, 𑀧𑀘𑁆𑀙𑀸 𑀲𑁄 𑀦𑀧𑁆𑀧𑀫𑀚𑁆𑀚𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑁧𑁭𑁩.

𑀬𑀲𑁆𑀲 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀓𑀼𑀲𑀮𑁂𑀦 𑀧𑀺𑀥𑀻𑀬𑀢𑀺 [𑀧𑀺𑀢𑀻𑀬𑀢𑀺 (𑀲𑀻. 𑀲𑁆𑀬𑀸. 𑀧𑀻.)];

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑁧𑁭𑁪.

𑀅𑀦𑁆𑀥𑀪𑀽𑀢𑁄 [𑀅𑀦𑁆𑀥𑀻𑀪𑀽𑀢𑁄 (𑀓.)] 𑀅𑀬𑀁 𑀮𑁄𑀓𑁄, 𑀢𑀦𑀼𑀓𑁂𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀲𑀓𑀼𑀡𑁄 𑀚𑀸𑀮𑀫𑀼𑀢𑁆𑀢𑁄𑀯, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀺.

𑁧𑁭𑁫.

𑀳𑀁𑀲𑀸𑀤𑀺𑀘𑁆𑀘𑀧𑀣𑁂 𑀬𑀦𑁆𑀢𑀺, 𑀆𑀓𑀸𑀲𑁂 𑀬𑀦𑁆𑀢𑀺 𑀇𑀤𑁆𑀥𑀺𑀬𑀸;

𑀦𑀻𑀬𑀦𑁆𑀢𑀺 𑀥𑀻𑀭𑀸 𑀮𑁄𑀓𑀫𑁆𑀳𑀸, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀁 [𑀲𑀯𑀸𑀳𑀦𑀁 (𑀲𑁆𑀬𑀸. 𑀓.)].

𑁧𑁭𑁬.

𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲, 𑀫𑀼𑀲𑀸𑀯𑀸𑀤𑀺𑀲𑁆𑀲 𑀚𑀦𑁆𑀢𑀼𑀦𑁄;

𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀲𑁆𑀲, 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀸𑀭𑀺𑀬𑀁.

𑁧𑁭𑁭.

𑀦 ¶ 𑀯𑁂 𑀓𑀤𑀭𑀺𑀬𑀸 𑀤𑁂𑀯𑀮𑁄𑀓𑀁 𑀯𑀚𑀦𑁆𑀢𑀺, 𑀩𑀸𑀮𑀸 𑀳𑀯𑁂 𑀦𑀧𑁆𑀧𑀲𑀁𑀲𑀦𑁆𑀢𑀺 𑀤𑀸𑀦𑀁;

𑀥𑀻𑀭𑁄 𑀘 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄, 𑀢𑁂𑀦𑁂𑀯 ¶ 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣.

𑁧𑁭𑁮.

𑀧𑀣𑀩𑁆𑀬𑀸 𑀏𑀓𑀭𑀚𑁆𑀚𑁂𑀦, 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸;

𑀲𑀩𑁆𑀩𑀮𑁄𑀓𑀸𑀥𑀺𑀧𑀘𑁆𑀘𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀭𑀁.

𑀮𑁄𑀓𑀯𑀕𑁆𑀕𑁄 𑀢𑁂𑀭𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁪. 𑀩𑀼𑀤𑁆𑀥𑀯𑀕𑁆𑀕𑁄

𑁧𑁭𑁯.

𑀬𑀲𑁆𑀲 ¶ ¶ 𑀚𑀺𑀢𑀁 𑀦𑀸𑀯𑀚𑀻𑀬𑀢𑀺, 𑀚𑀺𑀢𑀁 𑀬𑀲𑁆𑀲 [𑀚𑀺𑀢𑀫𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.), 𑀚𑀺𑀢𑀁 𑀫𑀲𑁆𑀲 (𑀓.)] 𑀦𑁄 𑀬𑀸𑀢𑀺 𑀓𑁄𑀘𑀺 𑀮𑁄𑀓𑁂;

𑀢𑀁 𑀩𑀼𑀤𑁆𑀥𑀫𑀦𑀦𑁆𑀢𑀕𑁄𑀘𑀭𑀁, 𑀅𑀧𑀤𑀁 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣.

𑁧𑁮𑁦.

𑀬𑀲𑁆𑀲 𑀚𑀸𑀮𑀺𑀦𑀻 𑀯𑀺𑀲𑀢𑁆𑀢𑀺𑀓𑀸, 𑀢𑀡𑁆𑀳𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀦𑁂𑀢𑀯𑁂;

𑀢𑀁 𑀩𑀼𑀤𑁆𑀥𑀫𑀦𑀦𑁆𑀢𑀕𑁄𑀘𑀭𑀁, 𑀅𑀧𑀤𑀁 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣.

𑁧𑁮𑁧.

𑀬𑁂 𑀛𑀸𑀦𑀧𑀲𑀼𑀢𑀸 𑀥𑀻𑀭𑀸, 𑀦𑁂𑀓𑁆𑀔𑀫𑁆𑀫𑀽𑀧𑀲𑀫𑁂 𑀭𑀢𑀸;

𑀤𑁂𑀯𑀸𑀧𑀺 𑀢𑁂𑀲𑀁 𑀧𑀺𑀳𑀬𑀦𑁆𑀢𑀺, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀢𑀻𑀫𑀢𑀁.

𑁧𑁮𑁨.

𑀓𑀺𑀘𑁆𑀙𑁄 ¶ 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄, 𑀓𑀺𑀘𑁆𑀙𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁;

𑀓𑀺𑀘𑁆𑀙𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀓𑀺𑀘𑁆𑀙𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄.

𑁧𑁮𑁩.

𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸 [𑀓𑀼𑀲𑀮𑀲𑁆𑀲𑀽𑀧𑀲𑀫𑁆𑀧𑀤𑀸 (𑀲𑁆𑀬𑀸.)];

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁 ¶ [𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁 (?)], 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

𑁧𑁮𑁪.

𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸, 𑀦𑀺𑀩𑁆𑀩𑀸𑀦𑀁 [𑀦𑀺𑀩𑁆𑀩𑀸𑀡𑀁 (𑀓. 𑀲𑀻. 𑀧𑀻.)] 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻, 𑀦 [𑀅𑀬𑀁 𑀦𑀓𑀸𑀭𑁄 𑀲𑀻. 𑀲𑁆𑀬𑀸. 𑀧𑀻. 𑀧𑀸𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺] 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

𑁧𑁮𑁫.

𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄 [𑀅𑀦𑀼𑀧𑀯𑀸𑀤𑁄 𑀅𑀦𑀼𑀧𑀖𑀸𑀢𑁄 (𑀲𑁆𑀬𑀸. 𑀓.)], 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

𑁧𑁮𑁬.

𑀦 ¶ 𑀓𑀳𑀸𑀧𑀡𑀯𑀲𑁆𑀲𑁂𑀦, 𑀢𑀺𑀢𑁆𑀢𑀺 𑀓𑀸𑀫𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄.

𑁧𑁮𑁭.

𑀅𑀧𑀺 ¶ 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀺;

𑀢𑀡𑁆𑀳𑀓𑁆𑀔𑀬𑀭𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄.

𑁧𑁮𑁮.

𑀩𑀳𑀼𑀁 𑀯𑁂 𑀲𑀭𑀡𑀁 𑀬𑀦𑁆𑀢𑀺, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘;

𑀆𑀭𑀸𑀫𑀭𑀼𑀓𑁆𑀔𑀘𑁂𑀢𑁆𑀬𑀸𑀦𑀺, 𑀫𑀦𑀼𑀲𑁆𑀲𑀸 𑀪𑀬𑀢𑀚𑁆𑀚𑀺𑀢𑀸.

𑁧𑁮𑁯.

𑀦𑁂𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀦𑁂𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀦𑁂𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

𑁧𑁯𑁦.

𑀬𑁄 ¶ 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

𑁧𑁯𑁧.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁧𑁯𑁨.

𑀏𑀢𑀁 ¶ 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

𑁧𑁯𑁩.

𑀤𑀼𑀮𑁆𑀮𑀪𑁄 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀦 𑀲𑁄 𑀲𑀩𑁆𑀩𑀢𑁆𑀣 𑀚𑀸𑀬𑀢𑀺;

𑀬𑀢𑁆𑀣 𑀲𑁄 𑀚𑀸𑀬𑀢𑀺 𑀥𑀻𑀭𑁄, 𑀢𑀁 𑀓𑀼𑀮𑀁 𑀲𑀼𑀔𑀫𑁂𑀥𑀢𑀺.

𑁧𑁯𑁪.

𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄, 𑀲𑀼𑀔𑀸 𑀲𑀤𑁆𑀥𑀫𑁆𑀫𑀤𑁂𑀲𑀦𑀸;

𑀲𑀼𑀔𑀸 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻, 𑀲𑀫𑀕𑁆𑀕𑀸𑀦𑀁 𑀢𑀧𑁄 𑀲𑀼𑀔𑁄.

𑁧𑁯𑁫.

𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺 𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

𑁧𑁯𑁬.

𑀢𑁂 ¶ ¶ 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀺.

𑀩𑀼𑀤𑁆𑀥𑀯𑀕𑁆𑀕𑁄 𑀘𑀼𑀤𑁆𑀤𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁫. 𑀲𑀼𑀔𑀯𑀕𑁆𑀕𑁄

𑁧𑁯𑁭.

𑀲𑀼𑀲𑀼𑀔𑀁 ¶ 𑀯𑀢 𑀚𑀻𑀯𑀸𑀫, 𑀯𑁂𑀭𑀺𑀦𑁂𑀲𑀼 𑀅𑀯𑁂𑀭𑀺𑀦𑁄;

𑀯𑁂𑀭𑀺𑀦𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀯𑁂𑀭𑀺𑀦𑁄.

𑁧𑁯𑁮.

𑀲𑀼𑀲𑀼𑀔𑀁 ¶ 𑀯𑀢 𑀚𑀻𑀯𑀸𑀫, 𑀆𑀢𑀼𑀭𑁂𑀲𑀼 𑀅𑀦𑀸𑀢𑀼𑀭𑀸;

𑀆𑀢𑀼𑀭𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀦𑀸𑀢𑀼𑀭𑀸.

𑁧𑁯𑁯.

𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀉𑀲𑁆𑀲𑀼𑀓𑁂𑀲𑀼 𑀅𑀦𑀼𑀲𑁆𑀲𑀼𑀓𑀸;

𑀉𑀲𑁆𑀲𑀼𑀓𑁂𑀲𑀼 ¶ 𑀫𑀦𑀲𑁆𑀲𑁂𑀲𑀼, 𑀯𑀺𑀳𑀭𑀸𑀫 𑀅𑀦𑀼𑀲𑁆𑀲𑀼𑀓𑀸.

𑁨𑁦𑁦.

𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀬𑁂𑀲𑀁 𑀦𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀧𑀻𑀢𑀺𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫, 𑀤𑁂𑀯𑀸 𑀆𑀪𑀲𑁆𑀲𑀭𑀸 𑀬𑀣𑀸.

𑁨𑁦𑁧.

𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀤𑀼𑀓𑁆𑀔𑀁 𑀲𑁂𑀢𑀺 𑀧𑀭𑀸𑀚𑀺𑀢𑁄;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁨𑁦𑁨.

𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀺, 𑀦𑀢𑁆𑀣𑀺 𑀤𑁄𑀲𑀲𑀫𑁄 𑀓𑀮𑀺;

𑀦𑀢𑁆𑀣𑀺 𑀔𑀦𑁆𑀥𑀲𑀫𑀸 [𑀔𑀦𑁆𑀥𑀸𑀤𑀺𑀲𑀸 (𑀲𑀻. 𑀲𑁆𑀬𑀸. 𑀧𑀻. 𑀭𑀽𑀧𑀲𑀺𑀤𑁆𑀥𑀺𑀬𑀸 𑀲𑀫𑁂𑀢𑀺)] 𑀤𑀼𑀓𑁆𑀔𑀸, 𑀦𑀢𑁆𑀣𑀺 𑀲𑀦𑁆𑀢𑀺𑀧𑀭𑀁 𑀲𑀼𑀔𑀁.

𑁨𑁦𑁩.

𑀚𑀺𑀖𑀘𑁆𑀙𑀸𑀧𑀭𑀫𑀸 ¶ 𑀭𑁄𑀕𑀸, 𑀲𑀗𑁆𑀔𑀸𑀭𑀧𑀭𑀫𑀸 [𑀲𑀗𑁆𑀓𑀸𑀭𑀸 𑀧𑀭𑀫𑀸 (𑀩𑀳𑀽𑀲𑀼)] 𑀤𑀼𑀔𑀸;

𑀏𑀢𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀁, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔𑀁.

𑁨𑁦𑁪.

𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸, 𑀲𑀦𑁆𑀢𑀼𑀝𑁆𑀞𑀺𑀧𑀭𑀫𑀁 𑀥𑀦𑀁;

𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀺 [𑀯𑀺𑀲𑁆𑀲𑀸𑀲𑀧𑀭𑀫𑁄 𑀜𑀸𑀢𑀺 (𑀓. 𑀲𑀻.), 𑀯𑀺𑀲𑁆𑀲𑀸𑀲𑀧𑀭𑀫𑀸 𑀜𑀸𑀢𑀻 (𑀲𑀻. 𑀅𑀝𑁆𑀞.), 𑀯𑀺𑀲𑁆𑀲𑀸𑀲𑀸 𑀧𑀭𑀫𑀸 𑀜𑀸𑀢𑀺 (𑀓.)], 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 [𑀦𑀺𑀩𑁆𑀩𑀸𑀡𑀧𑀭𑀫𑀁 (𑀓. 𑀲𑀻.)] 𑀲𑀼𑀔𑀁.

𑁨𑁦𑁫.

𑀧𑀯𑀺𑀯𑁂𑀓𑀭𑀲𑀁 ¶ 𑀧𑀺𑀢𑁆𑀯𑀸 [𑀧𑀻𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀭𑀲𑀁 𑀉𑀧𑀲𑀫𑀲𑁆𑀲 𑀘;

𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄, 𑀥𑀫𑁆𑀫𑀧𑀻𑀢𑀺𑀭𑀲𑀁 𑀧𑀺𑀯𑀁.

𑁨𑁦𑁬.

𑀲𑀸𑀳𑀼 ¶ 𑀤𑀲𑁆𑀲𑀦𑀫𑀭𑀺𑀬𑀸𑀦𑀁, 𑀲𑀦𑁆𑀦𑀺𑀯𑀸𑀲𑁄 𑀲𑀤𑀸 𑀲𑀼𑀔𑁄;

𑀅𑀤𑀲𑁆𑀲𑀦𑁂𑀦 𑀩𑀸𑀮𑀸𑀦𑀁, 𑀦𑀺𑀘𑁆𑀘𑀫𑁂𑀯 𑀲𑀼𑀔𑀻 𑀲𑀺𑀬𑀸.

𑁨𑁦𑁭.

𑀩𑀸𑀮𑀲𑀗𑁆𑀕𑀢𑀘𑀸𑀭𑀻 [𑀩𑀸𑀮𑀲𑀗𑁆𑀕𑀢𑀺𑀘𑀸𑀭𑀻 (𑀓.)] 𑀳𑀺, 𑀤𑀻𑀖𑀫𑀤𑁆𑀥𑀸𑀦 𑀲𑁄𑀘𑀢𑀺;

𑀤𑀼𑀓𑁆𑀔𑁄 𑀩𑀸𑀮𑁂𑀳𑀺 𑀲𑀁𑀯𑀸𑀲𑁄, 𑀅𑀫𑀺𑀢𑁆𑀢𑁂𑀦𑁂𑀯 𑀲𑀩𑁆𑀩𑀤𑀸;

𑀥𑀻𑀭𑁄 𑀘 𑀲𑀼𑀔𑀲𑀁𑀯𑀸𑀲𑁄, 𑀜𑀸𑀢𑀻𑀦𑀁𑀯 𑀲𑀫𑀸𑀕𑀫𑁄.

𑁨𑁦𑁮.

𑀢𑀲𑁆𑀫𑀸 𑀳𑀺 𑁋

𑀥𑀻𑀭𑀜𑁆𑀘 𑀧𑀜𑁆𑀜𑀜𑁆𑀘 𑀩𑀳𑀼𑀲𑁆𑀲𑀼𑀢𑀜𑁆𑀘, 𑀥𑁄𑀭𑀬𑁆𑀳𑀲𑀻𑀮𑀁 ¶ 𑀯𑀢𑀯𑀦𑁆𑀢𑀫𑀭𑀺𑀬𑀁;

𑀢𑀁 𑀢𑀸𑀤𑀺𑀲𑀁 𑀲𑀧𑁆𑀧𑀼𑀭𑀺𑀲𑀁 𑀲𑀼𑀫𑁂𑀥𑀁, 𑀪𑀚𑁂𑀣 𑀦𑀓𑁆𑀔𑀢𑁆𑀢𑀧𑀣𑀁𑀯 𑀘𑀦𑁆𑀤𑀺𑀫𑀸 [𑀢𑀲𑁆𑀫𑀸 𑀳𑀺 𑀥𑀻𑀭𑀁 𑀧𑀜𑁆𑀜𑀜𑁆𑀘, 𑀩𑀳𑀼𑀲𑁆𑀲𑀼𑀢𑀜𑁆𑀘 𑀥𑁄𑀭𑀬𑁆𑀳𑀁; 𑀲𑀻𑀮𑀁 𑀥𑀼𑀢𑀯𑀢𑀫𑀭𑀺𑀬𑀁, 𑀢𑀁 𑀢𑀸𑀤𑀺𑀲𑀁 𑀲𑀧𑁆𑀧𑀼𑀭𑀺𑀲𑀁; 𑀲𑀼𑀫𑁂𑀥𑀁 𑀪𑀚𑁂𑀣 𑀦𑀓𑁆𑀔𑀢𑁆𑀢𑀧𑀣𑀁𑀯 𑀘𑀦𑁆𑀤𑀺𑀫𑀸; (𑀓.)].

𑀲𑀼𑀔𑀯𑀕𑁆𑀕𑁄 𑀧𑀦𑁆𑀦𑀭𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁬. 𑀧𑀺𑀬𑀯𑀕𑁆𑀕𑁄

𑁨𑁦𑁯.

𑀅𑀬𑁄𑀕𑁂 ¶ 𑀬𑀼𑀜𑁆𑀚𑀫𑀢𑁆𑀢𑀸𑀦𑀁, 𑀬𑁄𑀕𑀲𑁆𑀫𑀺𑀜𑁆𑀘 𑀅𑀬𑁄𑀚𑀬𑀁;

𑀅𑀢𑁆𑀣𑀁 𑀳𑀺𑀢𑁆𑀯𑀸 𑀧𑀺𑀬𑀕𑁆𑀕𑀸𑀳𑀻, 𑀧𑀺𑀳𑁂𑀢𑀢𑁆𑀢𑀸𑀦𑀼𑀬𑁄𑀕𑀺𑀦𑀁.

𑁨𑁧𑁦.

𑀫𑀸 ¶ 𑀧𑀺𑀬𑁂𑀳𑀺 𑀲𑀫𑀸𑀕𑀜𑁆𑀙𑀺, 𑀅𑀧𑁆𑀧𑀺𑀬𑁂𑀳𑀺 𑀓𑀼𑀤𑀸𑀘𑀦𑀁;

𑀧𑀺𑀬𑀸𑀦𑀁 𑀅𑀤𑀲𑁆𑀲𑀦𑀁 𑀤𑀼𑀓𑁆𑀔𑀁, 𑀅𑀧𑁆𑀧𑀺𑀬𑀸𑀦𑀜𑁆𑀘 𑀤𑀲𑁆𑀲𑀦𑀁.

𑁨𑁧𑁧.

𑀢𑀲𑁆𑀫𑀸 𑀧𑀺𑀬𑀁 𑀦 𑀓𑀬𑀺𑀭𑀸𑀣, 𑀧𑀺𑀬𑀸𑀧𑀸𑀬𑁄 𑀳𑀺 𑀧𑀸𑀧𑀓𑁄;

𑀕𑀦𑁆𑀣𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀲𑀁 𑀦𑀢𑁆𑀣𑀺 𑀧𑀺𑀬𑀸𑀧𑁆𑀧𑀺𑀬𑀁.

𑁨𑁧𑁨.

𑀧𑀺𑀬𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀧𑀺𑀬𑀢𑁄 𑀚𑀸𑀬𑀢𑀻 [𑀚𑀸𑀬𑀢𑁂 (𑀓.)] 𑀪𑀬𑀁;

𑀧𑀺𑀬𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁨𑁧𑁩.

𑀧𑁂𑀫𑀢𑁄 ¶ 𑀚𑀸𑀬𑀢𑀻 𑀲𑁄𑀓𑁄, 𑀧𑁂𑀫𑀢𑁄 𑀚𑀸𑀬𑀢𑀻 𑀪𑀬𑀁;

𑀧𑁂𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁨𑁧𑁪.

𑀭𑀢𑀺𑀬𑀸 𑀚𑀸𑀬𑀢𑀻 𑀲𑁄𑀓𑁄, 𑀭𑀢𑀺𑀬𑀸 𑀚𑀸𑀬𑀢𑀻 𑀪𑀬𑀁;

𑀭𑀢𑀺𑀬𑀸 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁨𑁧𑁫.

𑀓𑀸𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀓𑀸𑀫𑀢𑁄 𑀚𑀸𑀬𑀢𑀻 𑀪𑀬𑀁;

𑀓𑀸𑀫𑀢𑁄 ¶ 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁨𑁧𑁬.

𑀢𑀡𑁆𑀳𑀸𑀬 𑀚𑀸𑀬𑀢𑀻 [𑀚𑀸𑀬𑀢𑁂 (𑀓.)] 𑀲𑁄𑀓𑁄, 𑀢𑀡𑁆𑀳𑀸𑀬 𑀚𑀸𑀬𑀢𑀻 𑀪𑀬𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁨𑁧𑁭.

𑀲𑀻𑀮𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁 ¶ , 𑀥𑀫𑁆𑀫𑀝𑁆𑀞𑀁 𑀲𑀘𑁆𑀘𑀯𑁂𑀤𑀺𑀦𑀁;

𑀅𑀢𑁆𑀢𑀦𑁄 𑀓𑀫𑁆𑀫 𑀓𑀼𑀩𑁆𑀩𑀸𑀦𑀁, 𑀢𑀁 𑀚𑀦𑁄 𑀓𑀼𑀭𑀼𑀢𑁂 𑀧𑀺𑀬𑀁.

𑁨𑁧𑁮.

𑀙𑀦𑁆𑀤𑀚𑀸𑀢𑁄 𑀅𑀦𑀓𑁆𑀔𑀸𑀢𑁂, 𑀫𑀦𑀲𑀸 𑀘 𑀨𑀼𑀝𑁄 𑀲𑀺𑀬𑀸;

𑀓𑀸𑀫𑁂𑀲𑀼 𑀘 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 [𑀅𑀧𑁆𑀧𑀝𑀺𑀩𑀦𑁆𑀥𑀘𑀺𑀢𑁆𑀢𑁄 (𑀓.)], 𑀉𑀤𑁆𑀥𑀁𑀲𑁄𑀢𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁧𑁯.

𑀘𑀺𑀭𑀧𑁆𑀧𑀯𑀸𑀲𑀺𑀁 𑀧𑀼𑀭𑀺𑀲𑀁, 𑀤𑀽𑀭𑀢𑁄 𑀲𑁄𑀢𑁆𑀣𑀺𑀫𑀸𑀕𑀢𑀁;

𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢𑀁.

𑁨𑁨𑁦.

𑀢𑀣𑁂𑀯 ¶ 𑀓𑀢𑀧𑀼𑀜𑁆𑀜𑀫𑁆𑀧𑀺, 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀕𑀢𑀁;

𑀧𑀼𑀜𑁆𑀜𑀸𑀦𑀺 𑀧𑀝𑀺𑀕𑀡𑁆𑀳𑀦𑁆𑀢𑀺, 𑀧𑀺𑀬𑀁 𑀜𑀸𑀢𑀻𑀯 𑀆𑀕𑀢𑀁.

𑀧𑀺𑀬𑀯𑀕𑁆𑀕𑁄 𑀲𑁄𑀴𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁭. 𑀓𑁄𑀥𑀯𑀕𑁆𑀕𑁄

𑁨𑁨𑁧.

𑀓𑁄𑀥𑀁 ¶ 𑀚𑀳𑁂 𑀯𑀺𑀧𑁆𑀧𑀚𑀳𑁂𑀬𑁆𑀬 𑀫𑀸𑀦𑀁, 𑀲𑀁𑀬𑁄𑀚𑀦𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑁂𑀬𑁆𑀬;

𑀢𑀁 𑀦𑀸𑀫𑀭𑀽𑀧𑀲𑁆𑀫𑀺𑀫𑀲𑀚𑁆𑀚𑀫𑀸𑀦𑀁, 𑀅𑀓𑀺𑀜𑁆𑀘𑀦𑀁 𑀦𑀸𑀦𑀼𑀧𑀢𑀦𑁆𑀢𑀺 𑀤𑀼𑀓𑁆𑀔𑀸.

𑁨𑁨𑁨.

𑀬𑁄 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁, 𑀭𑀣𑀁 𑀪𑀦𑁆𑀢𑀁𑀯 𑀯𑀸𑀭𑀬𑁂 [𑀥𑀸𑀭𑀬𑁂 (𑀲𑀻. 𑀲𑁆𑀬𑀸. 𑀧𑀻.)];

𑀢𑀫𑀳𑀁 ¶ 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀭𑀲𑁆𑀫𑀺𑀕𑁆𑀕𑀸𑀳𑁄 𑀇𑀢𑀭𑁄 𑀚𑀦𑁄.

𑁨𑁨𑁩.

𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦𑀁.

𑁨𑁨𑁪.

𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬, 𑀤𑀚𑁆𑀚𑀸 𑀅𑀧𑁆𑀧𑀫𑁆𑀧𑀺 [𑀤𑀚𑁆𑀚𑀸’𑀧𑁆𑀧𑀲𑁆𑀫𑀺𑀫𑁆𑀧𑀺 (𑀲𑀻. 𑀧𑀻.), 𑀤𑀚𑁆𑀚𑀸 𑀅𑀧𑁆𑀧𑀲𑁆𑀫𑀺 (𑀲𑁆𑀬𑀸. 𑀓.)] 𑀬𑀸𑀘𑀺𑀢𑁄;

𑀏𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺, 𑀕𑀘𑁆𑀙𑁂 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂.

𑁨𑁨𑁫.

𑀅𑀳𑀺𑀁𑀲𑀓𑀸 ¶ ¶ 𑀬𑁂 𑀫𑀼𑀦𑀬𑁄 [𑀅𑀳𑀺𑀁𑀲𑀓𑀸𑀬𑀸 𑀫𑀼𑀦𑀬𑁄 (𑀓.)], 𑀦𑀺𑀘𑁆𑀘𑀁 𑀓𑀸𑀬𑁂𑀦 𑀲𑀁𑀯𑀼𑀢𑀸;

𑀢𑁂 𑀬𑀦𑁆𑀢𑀺 𑀅𑀘𑁆𑀘𑀼𑀢𑀁 𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂.

𑁨𑁨𑁬.

𑀲𑀤𑀸 𑀚𑀸𑀕𑀭𑀫𑀸𑀦𑀸𑀦𑀁, 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀁;

𑀦𑀺𑀩𑁆𑀩𑀸𑀦𑀁 𑀅𑀥𑀺𑀫𑀼𑀢𑁆𑀢𑀸𑀦𑀁, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀆𑀲𑀯𑀸.

𑁨𑁨𑁭.

𑀧𑁄𑀭𑀸𑀡𑀫𑁂𑀢𑀁 ¶ 𑀅𑀢𑀼𑀮, 𑀦𑁂𑀢𑀁 𑀅𑀚𑁆𑀚𑀢𑀦𑀸𑀫𑀺𑀯;

𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀻𑀦𑀁, 𑀦𑀺𑀦𑁆𑀤𑀦𑁆𑀢𑀺 𑀩𑀳𑀼𑀪𑀸𑀡𑀺𑀦𑀁;

𑀫𑀺𑀢𑀪𑀸𑀡𑀺𑀫𑁆𑀧𑀺 𑀦𑀺𑀦𑁆𑀤𑀦𑁆𑀢𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀺𑀦𑁆𑀤𑀺𑀢𑁄.

𑁨𑁨𑁮.

𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺, 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺;

𑀏𑀓𑀦𑁆𑀢𑀁 𑀦𑀺𑀦𑁆𑀤𑀺𑀢𑁄 𑀧𑁄𑀲𑁄, 𑀏𑀓𑀦𑁆𑀢𑀁 𑀯𑀸 𑀧𑀲𑀁𑀲𑀺𑀢𑁄.

𑁨𑁨𑁯.

𑀬𑀁 𑀘𑁂 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺, 𑀅𑀦𑀼𑀯𑀺𑀘𑁆𑀘 𑀲𑀼𑀯𑁂 𑀲𑀼𑀯𑁂;

𑀅𑀘𑁆𑀙𑀺𑀤𑁆𑀤𑀯𑀼𑀢𑁆𑀢𑀺𑀁 [𑀅𑀘𑁆𑀙𑀺𑀦𑁆𑀦𑀯𑀼𑀢𑁆𑀢𑀺𑀁 (𑀓.)] 𑀫𑁂𑀥𑀸𑀯𑀺𑀁, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑀁.

𑁨𑁩𑁦.

𑀦𑀺𑀓𑁆𑀔𑀁 [𑀦𑁂𑀓𑁆𑀔𑀁 (𑀲𑀻. 𑀲𑁆𑀬𑀸. 𑀧𑀻.)] 𑀚𑀫𑁆𑀩𑁄𑀦𑀤𑀲𑁆𑀲𑁂𑀯, 𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀺;

𑀤𑁂𑀯𑀸𑀧𑀺 𑀦𑀁 𑀧𑀲𑀁𑀲𑀦𑁆𑀢𑀺, 𑀩𑁆𑀭𑀳𑁆𑀫𑀼𑀦𑀸𑀧𑀺 𑀧𑀲𑀁𑀲𑀺𑀢𑁄.

𑁨𑁩𑁧.

𑀓𑀸𑀬𑀧𑁆𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀲𑀺𑀬𑀸;

𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑁂.

𑁨𑁩𑁨.

𑀯𑀘𑀻𑀧𑀓𑁄𑀧𑀁 ¶ 𑀭𑀓𑁆𑀔𑁂𑀬𑁆𑀬, 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀲𑀺𑀬𑀸;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑁂.

𑁨𑁩𑁩.

𑀫𑀦𑁄𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀫𑀦𑀲𑀸 𑀲𑀁𑀯𑀼𑀢𑁄 𑀲𑀺𑀬𑀸;

𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑁂.

𑁨𑁩𑁪.

𑀓𑀸𑀬𑁂𑀦 ¶ 𑀲𑀁𑀯𑀼𑀢𑀸 𑀥𑀻𑀭𑀸, 𑀅𑀣𑁄 𑀯𑀸𑀘𑀸𑀬 𑀲𑀁𑀯𑀼𑀢𑀸;

𑀫𑀦𑀲𑀸 𑀲𑀁𑀯𑀼𑀢𑀸 𑀥𑀻𑀭𑀸, 𑀢𑁂 𑀯𑁂 𑀲𑀼𑀧𑀭𑀺𑀲𑀁𑀯𑀼𑀢𑀸.

𑀓𑁄𑀥𑀯𑀕𑁆𑀕𑁄 𑀲𑀢𑁆𑀢𑀭𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁮. 𑀫𑀮𑀯𑀕𑁆𑀕𑁄

𑁨𑁩𑁫.

𑀧𑀡𑁆𑀟𑀼𑀧𑀮𑀸𑀲𑁄𑀯 ¶ 𑀤𑀸𑀦𑀺𑀲𑀺, 𑀬𑀫𑀧𑀼𑀭𑀺𑀲𑀸𑀧𑀺 𑀘 𑀢𑁂 [𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀧𑀝𑁆𑀞𑀺𑀢𑀸;

𑀉𑀬𑁆𑀬𑁄𑀕𑀫𑀼𑀔𑁂 𑀘 𑀢𑀺𑀝𑁆𑀞𑀲𑀺, 𑀧𑀸𑀣𑁂𑀬𑁆𑀬𑀫𑁆𑀧𑀺 𑀘 𑀢𑁂 𑀦 𑀯𑀺𑀚𑁆𑀚𑀢𑀺.

𑁨𑁩𑁬.

𑀲𑁄 ¶ 𑀓𑀭𑁄𑀳𑀺 𑀤𑀻𑀧𑀫𑀢𑁆𑀢𑀦𑁄, 𑀔𑀺𑀧𑁆𑀧𑀁 𑀯𑀸𑀬𑀫 𑀧𑀡𑁆𑀟𑀺𑀢𑁄 𑀪𑀯;

𑀦𑀺𑀤𑁆𑀥𑀦𑁆𑀢𑀫𑀮𑁄 𑀅𑀦𑀗𑁆𑀕𑀡𑁄, 𑀤𑀺𑀩𑁆𑀩𑀁 𑀅𑀭𑀺𑀬𑀪𑀽𑀫𑀺𑀁 𑀉𑀧𑁂𑀳𑀺𑀲𑀺 [𑀤𑀺𑀩𑁆𑀩𑀁 𑀅𑀭𑀺𑀬𑀪𑀽𑀫𑀺𑀫𑁂𑀳𑀺𑀲𑀺 (𑀲𑀻. 𑀲𑁆𑀬𑀸. 𑀧𑀻.), 𑀤𑀺𑀩𑁆𑀩𑀫𑀭𑀺𑀬𑀪𑀽𑀫𑀺𑀁 𑀉𑀧𑁂𑀳𑀺𑀲𑀺 (?)].

𑁨𑁩𑁭.

𑀉𑀧𑀦𑀻𑀢𑀯𑀬𑁄 𑀘 𑀤𑀸𑀦𑀺𑀲𑀺, 𑀲𑀫𑁆𑀧𑀬𑀸𑀢𑁄𑀲𑀺 ¶ 𑀬𑀫𑀲𑁆𑀲 𑀲𑀦𑁆𑀢𑀺𑀓𑁂;

𑀯𑀸𑀲𑁄 [𑀯𑀸𑀲𑁄𑀧𑀺 𑀘 (𑀩𑀳𑀽𑀲𑀼)] 𑀢𑁂 𑀦𑀢𑁆𑀣𑀺 𑀅𑀦𑁆𑀢𑀭𑀸, 𑀧𑀸𑀣𑁂𑀬𑁆𑀬𑀫𑁆𑀧𑀺 𑀘 𑀢𑁂 𑀦 𑀯𑀺𑀚𑁆𑀚𑀢𑀺.

𑁨𑁩𑁮.

𑀲𑁄 𑀓𑀭𑁄𑀳𑀺 𑀤𑀻𑀧𑀫𑀢𑁆𑀢𑀦𑁄, 𑀔𑀺𑀧𑁆𑀧𑀁 𑀯𑀸𑀬𑀫 𑀧𑀡𑁆𑀟𑀺𑀢𑁄 𑀪𑀯;

𑀦𑀺𑀤𑁆𑀥𑀦𑁆𑀢𑀫𑀮𑁄 𑀅𑀦𑀗𑁆𑀕𑀡𑁄, 𑀦 𑀧𑀼𑀦𑀁 𑀚𑀸𑀢𑀺𑀚𑀭𑀁 [𑀦 𑀧𑀼𑀦 𑀚𑀸𑀢𑀺𑀚𑀭𑀁 (𑀲𑀻. 𑀲𑁆𑀬𑀸.), 𑀦 𑀧𑀼𑀦 𑀚𑀸𑀢𑀺𑀚𑁆𑀚𑀭𑀁 (𑀓.)] 𑀉𑀧𑁂𑀳𑀺𑀲𑀺.

𑁨𑁩𑁯.

𑀅𑀦𑀼𑀧𑀼𑀩𑁆𑀩𑁂𑀦 𑀫𑁂𑀥𑀸𑀯𑀻, 𑀣𑁄𑀓𑀁 𑀣𑁄𑀓𑀁 𑀔𑀡𑁂 𑀔𑀡𑁂;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄.

𑁨𑁪𑁦.

𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁 [𑀲𑀫𑀼𑀝𑁆𑀞𑀸𑀬 (𑀓.)], 𑀢𑀢𑀼𑀝𑁆𑀞𑀸𑀬 [𑀢𑀤𑀼𑀝𑁆𑀞𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀢𑀫𑁂𑀯 𑀔𑀸𑀤𑀢𑀺;

𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁, 𑀲𑀸𑀦𑀺 𑀓𑀫𑁆𑀫𑀸𑀦𑀺 [𑀲𑀓𑀓𑀫𑁆𑀫𑀸𑀦𑀺 (𑀲𑀻. 𑀧𑀻.)] 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁨𑁪𑁧.

𑀅𑀲𑀚𑁆𑀛𑀸𑀬𑀫𑀮𑀸 ¶ ¶ 𑀫𑀦𑁆𑀢𑀸, 𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸;

𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚𑀁, 𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮𑀁.

𑁨𑁪𑁨.

𑀫𑀮𑀺𑀢𑁆𑀣𑀺𑀬𑀸 𑀤𑀼𑀘𑁆𑀘𑀭𑀺𑀢𑀁, 𑀫𑀘𑁆𑀙𑁂𑀭𑀁 𑀤𑀤𑀢𑁄 𑀫𑀮𑀁;

𑀫𑀮𑀸 𑀯𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁨𑁪𑁩.

𑀢𑀢𑁄 𑀫𑀮𑀸 𑀫𑀮𑀢𑀭𑀁, 𑀅𑀯𑀺𑀚𑁆𑀚𑀸 𑀧𑀭𑀫𑀁 𑀫𑀮𑀁;

𑀏𑀢𑀁 𑀫𑀮𑀁 𑀧𑀳𑀦𑁆𑀢𑁆𑀯𑀸𑀦, 𑀦𑀺𑀫𑁆𑀫𑀮𑀸 𑀳𑁄𑀣 𑀪𑀺𑀓𑁆𑀔𑀯𑁄.

𑁨𑁪𑁪.

𑀲𑀼𑀚𑀻𑀯𑀁 ¶ 𑀅𑀳𑀺𑀭𑀺𑀓𑁂𑀦, 𑀓𑀸𑀓𑀲𑀽𑀭𑁂𑀦 𑀥𑀁𑀲𑀺𑀦𑀸;

𑀧𑀓𑁆𑀔𑀦𑁆𑀤𑀺𑀦𑀸 𑀧𑀕𑀩𑁆𑀪𑁂𑀦, 𑀲𑀁𑀓𑀺𑀮𑀺𑀝𑁆𑀞𑁂𑀦 𑀚𑀻𑀯𑀺𑀢𑀁.

𑁨𑁪𑁫.

𑀳𑀺𑀭𑀻𑀫𑀢𑀸 ¶ 𑀘 𑀤𑀼𑀚𑁆𑀚𑀻𑀯𑀁, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑀸;

𑀅𑀮𑀻𑀦𑁂𑀦𑀸𑀧𑁆𑀧𑀕𑀩𑁆𑀪𑁂𑀦, 𑀲𑀼𑀤𑁆𑀥𑀸𑀚𑀻𑀯𑁂𑀦 𑀧𑀲𑁆𑀲𑀢𑀸.

𑁨𑁪𑁬.

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀫𑀸𑀤𑀺𑀬𑀢𑀺, 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀺.

𑁨𑁪𑁭.

𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀺;

𑀇𑀥𑁂𑀯𑀫𑁂𑀲𑁄 𑀮𑁄𑀓𑀲𑁆𑀫𑀺𑀁, 𑀫𑀽𑀮𑀁 𑀔𑀡𑀢𑀺 𑀅𑀢𑁆𑀢𑀦𑁄.

𑁨𑁪𑁮.

𑀏𑀯𑀁 𑀪𑁄 𑀧𑀼𑀭𑀺𑀲 𑀚𑀸𑀦𑀸𑀳𑀺, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀫𑀸 𑀢𑀁 𑀮𑁄𑀪𑁄 𑀅𑀥𑀫𑁆𑀫𑁄 𑀘, 𑀘𑀺𑀭𑀁 𑀤𑀼𑀓𑁆𑀔𑀸𑀬 𑀭𑀦𑁆𑀥𑀬𑀼𑀁.

𑁨𑁪𑁯.

𑀤𑀤𑀸𑀢𑀺 𑀯𑁂 𑀬𑀣𑀸𑀲𑀤𑁆𑀥𑀁, 𑀬𑀣𑀸𑀧𑀲𑀸𑀤𑀦𑀁 [𑀬𑀢𑁆𑀣 𑀧𑀲𑀸𑀤𑀦𑀁 (𑀓𑀢𑁆𑀣𑀘𑀺)] 𑀚𑀦𑁄;

𑀢𑀢𑁆𑀣 𑀬𑁄 𑀫𑀗𑁆𑀓𑀼 𑀪𑀯𑀢𑀺 [𑀢𑀢𑁆𑀣 𑀘𑁂 𑀫𑀁𑀓𑀼 𑀬𑁄 𑀳𑁄𑀢𑀺 (𑀲𑀻.), 𑀢𑀢𑁆𑀣 𑀬𑁄 𑀫𑀗𑁆𑀓𑀼𑀢𑁄 𑀳𑁄𑀢𑀺 (𑀲𑁆𑀬𑀸.)], 𑀧𑀭𑁂𑀲𑀁 𑀧𑀸𑀦𑀪𑁄𑀚𑀦𑁂;

𑀦 𑀲𑁄 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀫𑀸𑀥𑀺𑀫𑀥𑀺𑀕𑀘𑁆𑀙𑀢𑀺.

𑁨𑁫𑁦.

𑀬𑀲𑁆𑀲 ¶ ¶ 𑀘𑁂𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀁, 𑀫𑀽𑀮𑀖𑀘𑁆𑀘𑀁 [𑀫𑀽𑀮𑀖𑀘𑁆𑀙𑀁 (𑀓.)] 𑀲𑀫𑀽𑀳𑀢𑀁;

𑀲 𑀯𑁂 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀫𑀸𑀥𑀺𑀫𑀥𑀺𑀕𑀘𑁆𑀙𑀢𑀺.

𑁨𑁫𑁧.

𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀺, 𑀦𑀢𑁆𑀣𑀺 𑀤𑁄𑀲𑀲𑀫𑁄 𑀕𑀳𑁄;

𑀦𑀢𑁆𑀣𑀺 𑀫𑁄𑀳𑀲𑀫𑀁 𑀚𑀸𑀮𑀁, 𑀦𑀢𑁆𑀣𑀺 𑀢𑀡𑁆𑀳𑀸𑀲𑀫𑀸 𑀦𑀤𑀻.

𑁨𑁫𑁨.

𑀲𑀼𑀤𑀲𑁆𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁;

𑀧𑀭𑁂𑀲𑀁 𑀳𑀺 𑀲𑁄 𑀯𑀚𑁆𑀚𑀸𑀦𑀺, 𑀑𑀧𑀼𑀦𑀸𑀢𑀺 [𑀑𑀨𑀼𑀦𑀸𑀢𑀺 (𑀓.)] 𑀬𑀣𑀸 𑀪𑀼𑀲𑀁;

𑀅𑀢𑁆𑀢𑀦𑁄 𑀧𑀦 𑀙𑀸𑀤𑁂𑀢𑀺, 𑀓𑀮𑀺𑀁𑀯 𑀓𑀺𑀢𑀯𑀸 𑀲𑀞𑁄.

𑁨𑁫𑁩.

𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀺𑀲𑁆𑀲 ¶ , ¶ 𑀦𑀺𑀘𑁆𑀘𑀁 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄;

𑀆𑀲𑀯𑀸 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸.

𑁨𑁫𑁪.

𑀆𑀓𑀸𑀲𑁂𑀯 𑀧𑀤𑀁 𑀦𑀢𑁆𑀣𑀺, 𑀲𑀫𑀡𑁄 𑀦𑀢𑁆𑀣𑀺 𑀩𑀸𑀳𑀺𑀭𑁂;

𑀧𑀧𑀜𑁆𑀘𑀸𑀪𑀺𑀭𑀢𑀸 𑀧𑀚𑀸, 𑀦𑀺𑀧𑁆𑀧𑀧𑀜𑁆𑀘𑀸 𑀢𑀣𑀸𑀕𑀢𑀸.

𑁨𑁫𑁫.

𑀆𑀓𑀸𑀲𑁂𑀯 𑀧𑀤𑀁 𑀦𑀢𑁆𑀣𑀺, 𑀲𑀫𑀡𑁄 𑀦𑀢𑁆𑀣𑀺 𑀩𑀸𑀳𑀺𑀭𑁂;

𑀲𑀗𑁆𑀔𑀸𑀭𑀸 𑀲𑀲𑁆𑀲𑀢𑀸 𑀦𑀢𑁆𑀣𑀺, 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀫𑀺𑀜𑁆𑀚𑀺𑀢𑀁.

𑀫𑀮𑀯𑀕𑁆𑀕𑁄 𑀅𑀝𑁆𑀞𑀸𑀭𑀲𑀫𑁄 𑀦𑀺𑀝𑁆𑀞𑀺𑀢𑁄.

𑁧𑁯. 𑀥𑀫𑁆𑀫𑀝𑁆𑀞𑀯𑀕𑁆𑀕𑁄

𑁨𑁫𑁬.

𑀦 ¶ 𑀢𑁂𑀦 𑀳𑁄𑀢𑀺 𑀥𑀫𑁆𑀫𑀝𑁆𑀞𑁄, 𑀬𑁂𑀦𑀢𑁆𑀣𑀁 𑀲𑀸𑀳𑀲𑀸 [𑀲𑀳𑀲𑀸 (𑀲𑀻. 𑀲𑁆𑀬𑀸. 𑀓.)] 𑀦𑀬𑁂;

𑀬𑁄 𑀘 𑀅𑀢𑁆𑀣𑀁 𑀅𑀦𑀢𑁆𑀣𑀜𑁆𑀘, 𑀉𑀪𑁄 𑀦𑀺𑀘𑁆𑀙𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁨𑁫𑁭.

𑀅𑀲𑀸𑀳𑀲𑁂𑀦 ¶ 𑀥𑀫𑁆𑀫𑁂𑀦, 𑀲𑀫𑁂𑀦 𑀦𑀬𑀢𑀻 𑀧𑀭𑁂;

𑀥𑀫𑁆𑀫𑀲𑁆𑀲 𑀕𑀼𑀢𑁆𑀢𑁄 𑀫𑁂𑀥𑀸𑀯𑀻, ‘‘𑀥𑀫𑁆𑀫𑀝𑁆𑀞𑁄’’𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁫𑁮.

𑀦 𑀢𑁂𑀦 𑀧𑀡𑁆𑀟𑀺𑀢𑁄 𑀳𑁄𑀢𑀺, 𑀬𑀸𑀯𑀢𑀸 𑀩𑀳𑀼 𑀪𑀸𑀲𑀢𑀺;

𑀔𑁂𑀫𑀻 𑀅𑀯𑁂𑀭𑀻 𑀅𑀪𑀬𑁄, ‘‘𑀧𑀡𑁆𑀟𑀺𑀢𑁄’’𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁫𑁯.

𑀦 𑀢𑀸𑀯𑀢𑀸 𑀥𑀫𑁆𑀫𑀥𑀭𑁄, 𑀬𑀸𑀯𑀢𑀸 𑀩𑀳𑀼 𑀪𑀸𑀲𑀢𑀺;

𑀬𑁄 𑀘 𑀅𑀧𑁆𑀧𑀫𑁆𑀧𑀺 𑀲𑀼𑀢𑁆𑀯𑀸𑀦, 𑀥𑀫𑁆𑀫𑀁 𑀓𑀸𑀬𑁂𑀦 𑀧𑀲𑁆𑀲𑀢𑀺;

𑀲 𑀯𑁂 𑀥𑀫𑁆𑀫𑀥𑀭𑁄 𑀳𑁄𑀢𑀺, 𑀬𑁄 𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀢𑀺.

𑁨𑁬𑁦.

𑀦 ¶ 𑀢𑁂𑀦 𑀣𑁂𑀭𑁄 𑀲𑁄 𑀳𑁄𑀢𑀺 [𑀣𑁂𑀭𑁄 𑀳𑁄𑀢𑀺 (𑀲𑀻. 𑀲𑁆𑀬𑀸.)], 𑀬𑁂𑀦𑀲𑁆𑀲 𑀧𑀮𑀺𑀢𑀁 𑀲𑀺𑀭𑁄;

𑀧𑀭𑀺𑀧𑀓𑁆𑀓𑁄 ¶ 𑀯𑀬𑁄 𑀢𑀲𑁆𑀲, ‘‘𑀫𑁄𑀖𑀚𑀺𑀡𑁆𑀡𑁄’’𑀢𑀺 𑀯𑀼𑀘𑁆𑀘𑀢𑀺.

𑁨𑁬𑁧.

𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀲 𑀯𑁂 𑀯𑀦𑁆𑀢𑀫𑀮𑁄 𑀥𑀻𑀭𑁄, ‘‘𑀣𑁂𑀭𑁄’’ 𑀇𑀢𑀺 [𑀲𑁄 𑀣𑁂𑀭𑁄𑀢𑀺 (𑀲𑁆𑀬𑀸. 𑀓.)] 𑀧𑀯𑀼𑀘𑁆𑀘𑀢𑀺.

𑁨𑁬𑁨.

𑀦 𑀯𑀸𑀓𑁆𑀓𑀭𑀡𑀫𑀢𑁆𑀢𑁂𑀦, 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸;

𑀲𑀸𑀥𑀼𑀭𑀽𑀧𑁄 𑀦𑀭𑁄 𑀳𑁄𑀢𑀺, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑁄.

𑁨𑁬𑁩.

𑀬𑀲𑁆𑀲 𑀘𑁂𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀁, 𑀫𑀽𑀮𑀖𑀘𑁆𑀘𑀁 𑀲𑀫𑀽𑀳𑀢𑀁;

𑀲 𑀯𑀦𑁆𑀢𑀤𑁄𑀲𑁄 𑀫𑁂𑀥𑀸𑀯𑀻, ‘‘𑀲𑀸𑀥𑀼𑀭𑀽𑀧𑁄’’𑀢𑀺 𑀯𑀼𑀘𑁆𑀘𑀢𑀺.

𑁨𑁬𑁪.

𑀦 𑀫𑀼𑀡𑁆𑀟𑀓𑁂𑀦 𑀲𑀫𑀡𑁄, 𑀅𑀩𑁆𑀩𑀢𑁄 𑀅𑀮𑀺𑀓𑀁 𑀪𑀡𑀁;

𑀇𑀘𑁆𑀙𑀸𑀮𑁄𑀪𑀲𑀫𑀸𑀧𑀦𑁆𑀦𑁄, 𑀲𑀫𑀡𑁄 𑀓𑀺𑀁 𑀪𑀯𑀺𑀲𑁆𑀲𑀢𑀺.

𑁨𑁬𑁫.

𑀬𑁄 ¶ 𑀘 𑀲𑀫𑁂𑀢𑀺 𑀧𑀸𑀧𑀸𑀦𑀺, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁, ‘‘𑀲𑀫𑀡𑁄’’𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁬𑁬.

𑀦 ¶ 𑀢𑁂𑀦 𑀪𑀺𑀓𑁆𑀔𑀼 𑀲𑁄 𑀳𑁄𑀢𑀺, 𑀬𑀸𑀯𑀢𑀸 𑀪𑀺𑀓𑁆𑀔𑀢𑁂 𑀧𑀭𑁂;

𑀯𑀺𑀲𑁆𑀲𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬, 𑀪𑀺𑀓𑁆𑀔𑀼 𑀳𑁄𑀢𑀺 𑀦 𑀢𑀸𑀯𑀢𑀸.

𑁨𑁬𑁭.

𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀩𑀸𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸 [𑀩𑁆𑀭𑀳𑁆𑀫𑀘𑀭𑀺𑀬𑀁 (𑀓.)];

𑀲𑀗𑁆𑀔𑀸𑀬 𑀮𑁄𑀓𑁂 𑀘𑀭𑀢𑀺, 𑀲 𑀯𑁂 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺.

𑁨𑁬𑁮.

𑀦 𑀫𑁄𑀦𑁂𑀦 𑀫𑀼𑀦𑀻 𑀳𑁄𑀢𑀺, 𑀫𑀽𑀴𑁆𑀳𑀭𑀽𑀧𑁄 𑀅𑀯𑀺𑀤𑁆𑀤𑀲𑀼;

𑀬𑁄 𑀘 𑀢𑀼𑀮𑀁𑀯 𑀧𑀕𑁆𑀕𑀬𑁆𑀳, 𑀯𑀭𑀫𑀸𑀤𑀸𑀬 𑀧𑀡𑁆𑀟𑀺𑀢𑁄.

𑁨𑁬𑁯.

𑀧𑀸𑀧𑀸𑀦𑀺 ¶ 𑀧𑀭𑀺𑀯𑀚𑁆𑀚𑁂𑀢𑀺, 𑀲 𑀫𑀼𑀦𑀻 𑀢𑁂𑀦 𑀲𑁄 𑀫𑀼𑀦𑀺;

𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, ‘‘𑀫𑀼𑀦𑀺’’ 𑀢𑁂𑀦 𑀧𑀯𑀼𑀘𑁆𑀘𑀢𑀺.

𑁨𑁭𑁦.

𑀦 𑀢𑁂𑀦 𑀅𑀭𑀺𑀬𑁄 𑀳𑁄𑀢𑀺, 𑀬𑁂𑀦 𑀧𑀸𑀡𑀸𑀦𑀺 𑀳𑀺𑀁𑀲𑀢𑀺;

𑀅𑀳𑀺𑀁𑀲𑀸 ¶ 𑀲𑀩𑁆𑀩𑀧𑀸𑀡𑀸𑀦𑀁, ‘‘𑀅𑀭𑀺𑀬𑁄’’𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁭𑁧.

𑀦 𑀲𑀻𑀮𑀩𑁆𑀩𑀢𑀫𑀢𑁆𑀢𑁂𑀦, 𑀩𑀸𑀳𑀼𑀲𑀘𑁆𑀘𑁂𑀦 𑀯𑀸 𑀧𑀦;

𑀅𑀣 𑀯𑀸 𑀲𑀫𑀸𑀥𑀺𑀮𑀸𑀪𑁂𑀦, 𑀯𑀺𑀯𑀺𑀢𑁆𑀢𑀲𑀬𑀦𑁂𑀦 𑀯𑀸.

𑁨𑁭𑁨.

𑀨𑀼𑀲𑀸𑀫𑀺 𑀦𑁂𑀓𑁆𑀔𑀫𑁆𑀫𑀲𑀼𑀔𑀁, 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁;

𑀪𑀺𑀓𑁆𑀔𑀼 𑀯𑀺𑀲𑁆𑀲𑀸𑀲𑀫𑀸𑀧𑀸𑀤𑀺, 𑀅𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁.

𑀥𑀫𑁆𑀫𑀝𑁆𑀞𑀯𑀕𑁆𑀕𑁄 𑀏𑀓𑀽𑀦𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁦. 𑀫𑀕𑁆𑀕𑀯𑀕𑁆𑀕𑁄

𑁨𑁭𑁩.

𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 ¶ ¶ 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸.

𑁨𑁭𑁪.

𑀏𑀲𑁂𑀯 [𑀏𑀲𑁄𑀯 (𑀲𑀻. 𑀧𑀻.)] 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸;

𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀚𑁆𑀚𑀣, 𑀫𑀸𑀭𑀲𑁆𑀲𑁂𑀢𑀁 𑀧𑀫𑁄𑀳𑀦𑀁.

𑁨𑁭𑁫.

𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀦𑁆𑀦𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣;

𑀅𑀓𑁆𑀔𑀸𑀢𑁄 𑀯𑁄 [𑀅𑀓𑁆𑀔𑀸𑀢𑁄 𑀯𑁂 (𑀲𑀻. 𑀧𑀻.)] 𑀫𑀬𑀸 𑀫𑀕𑁆𑀕𑁄, 𑀅𑀜𑁆𑀜𑀸𑀬 𑀲𑀮𑁆𑀮𑀓𑀦𑁆𑀢𑀦𑀁 [𑀲𑀮𑁆𑀮𑀲𑀦𑁆𑀣𑀦𑀁 (𑀲𑀻. 𑀧𑀻.), 𑀲𑀮𑁆𑀮𑀲𑀢𑁆𑀣𑀦𑀁 (𑀲𑁆𑀬𑀸.)].

𑁨𑁭𑁬.

𑀢𑀼𑀫𑁆𑀳𑁂𑀳𑀺 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀅𑀓𑁆𑀔𑀸𑀢𑀸𑀭𑁄 𑀢𑀣𑀸𑀕𑀢𑀸;

𑀧𑀝𑀺𑀧𑀦𑁆𑀦𑀸 𑀧𑀫𑁄𑀓𑁆𑀔𑀦𑁆𑀢𑀺, 𑀛𑀸𑀬𑀺𑀦𑁄 𑀫𑀸𑀭𑀩𑀦𑁆𑀥𑀦𑀸.

𑁨𑁭𑁭.

‘‘𑀲𑀩𑁆𑀩𑁂 ¶ 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 ¶ 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁨𑁭𑁮.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁨𑁭𑁯.

‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁨𑁮𑁦.

𑀉𑀝𑁆𑀞𑀸𑀦𑀓𑀸𑀮𑀫𑁆𑀳𑀺 𑀅𑀦𑀼𑀝𑁆𑀞𑀳𑀸𑀦𑁄, 𑀬𑀼𑀯𑀸 𑀩𑀮𑀻 𑀆𑀮𑀲𑀺𑀬𑀁 𑀉𑀧𑁂𑀢𑁄;

𑀲𑀁𑀲𑀦𑁆𑀦𑀲𑀗𑁆𑀓𑀧𑁆𑀧𑀫𑀦𑁄 [𑀅𑀲𑀫𑁆𑀧𑀦𑁆𑀦𑀲𑀗𑁆𑀓𑀧𑁆𑀧𑀫𑀦𑁄 (𑀓.)] 𑀓𑀼𑀲𑀻𑀢𑁄, 𑀧𑀜𑁆𑀜𑀸𑀬 𑀫𑀕𑁆𑀕𑀁 𑀅𑀮𑀲𑁄 𑀦 𑀯𑀺𑀦𑁆𑀤𑀢𑀺.

𑁨𑁮𑁧.

𑀯𑀸𑀘𑀸𑀦𑀼𑀭𑀓𑁆𑀔𑀻 ¶ ¶ 𑀫𑀦𑀲𑀸 𑀲𑀼𑀲𑀁𑀯𑀼𑀢𑁄, 𑀓𑀸𑀬𑁂𑀦 𑀘 𑀦𑀸𑀓𑀼𑀲𑀮𑀁 𑀓𑀬𑀺𑀭𑀸 [𑀅𑀓𑀼𑀲𑀮𑀁 𑀦 𑀓𑀬𑀺𑀭𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀏𑀢𑁂 𑀢𑀬𑁄 𑀓𑀫𑁆𑀫𑀧𑀣𑁂 𑀯𑀺𑀲𑁄𑀥𑀬𑁂, 𑀆𑀭𑀸𑀥𑀬𑁂 𑀫𑀕𑁆𑀕𑀫𑀺𑀲𑀺𑀧𑁆𑀧𑀯𑁂𑀤𑀺𑀢𑀁.

𑁨𑁮𑁨.

𑀬𑁄𑀕𑀸 𑀯𑁂 𑀚𑀸𑀬𑀢𑀻 [𑀚𑀸𑀬𑀢𑁂 (𑀓𑀢𑁆𑀣𑀘𑀺)] 𑀪𑀽𑀭𑀺, 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄;

𑀏𑀢𑀁 𑀤𑁆𑀯𑁂𑀥𑀸𑀧𑀣𑀁 𑀜𑀢𑁆𑀯𑀸, 𑀪𑀯𑀸𑀬 𑀯𑀺𑀪𑀯𑀸𑀬 𑀘;

𑀢𑀣𑀸𑀢𑁆𑀢𑀸𑀦𑀁 𑀦𑀺𑀯𑁂𑀲𑁂𑀬𑁆𑀬, 𑀬𑀣𑀸 𑀪𑀽𑀭𑀺 𑀧𑀯𑀟𑁆𑀠𑀢𑀺.

𑁨𑁮𑁩.

𑀯𑀦𑀁 ¶ 𑀙𑀺𑀦𑁆𑀤𑀣 𑀫𑀸 𑀭𑀼𑀓𑁆𑀔𑀁, 𑀯𑀦𑀢𑁄 𑀚𑀸𑀬𑀢𑁂 𑀪𑀬𑀁;

𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄.

𑁨𑁮𑁪.

𑀬𑀸𑀯 𑀳𑀺 𑀯𑀦𑀣𑁄 𑀦 𑀙𑀺𑀚𑁆𑀚𑀢𑀺, 𑀅𑀡𑀼𑀫𑀢𑁆𑀢𑁄𑀧𑀺 𑀦𑀭𑀲𑁆𑀲 𑀦𑀸𑀭𑀺𑀲𑀼;

𑀧𑀝𑀺𑀩𑀤𑁆𑀥𑀫𑀦𑁄𑀯 [𑀧𑀝𑀺𑀩𑀦𑁆𑀥𑀫𑀦𑁄𑀯 (𑀓.)] 𑀢𑀸𑀯 𑀲𑁄, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 [𑀔𑀻𑀭𑀧𑀸𑀦𑁄𑀯 (𑀧𑀻.)] 𑀫𑀸𑀢𑀭𑀺.

𑁨𑁮𑁫.

𑀉𑀘𑁆𑀙𑀺𑀦𑁆𑀤 ¶ 𑀲𑀺𑀦𑁂𑀳𑀫𑀢𑁆𑀢𑀦𑁄 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 [𑀧𑀸𑀡𑀺𑀦𑀸];

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁.

𑁨𑁮𑁬.

𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀺, 𑀇𑀥 𑀳𑁂𑀫𑀦𑁆𑀢𑀕𑀺𑀫𑁆𑀳𑀺𑀲𑀼;

𑀇𑀢𑀺 𑀩𑀸𑀮𑁄 𑀯𑀺𑀘𑀺𑀦𑁆𑀢𑁂𑀢𑀺, 𑀅𑀦𑁆𑀢𑀭𑀸𑀬𑀁 𑀦 𑀩𑀼𑀚𑁆𑀛𑀢𑀺.

𑁨𑁮𑁭.

𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀺.

𑁨𑁮𑁮.

𑀦 ¶ 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸.

𑁨𑁮𑁯.

𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀫𑁂𑀯 𑀯𑀺𑀲𑁄𑀥𑀬𑁂.

𑀫𑀕𑁆𑀕𑀯𑀕𑁆𑀕𑁄 𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁧. 𑀧𑀓𑀺𑀡𑁆𑀡𑀓𑀯𑀕𑁆𑀕𑁄

𑁨𑁯𑁦.

𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸 ¶ ¶ , 𑀧𑀲𑁆𑀲𑁂 𑀘𑁂 𑀯𑀺𑀧𑀼𑀮𑀁 𑀲𑀼𑀔𑀁;

𑀘𑀚𑁂 𑀫𑀢𑁆𑀢𑀸𑀲𑀼𑀔𑀁 𑀥𑀻𑀭𑁄, 𑀲𑀫𑁆𑀧𑀲𑁆𑀲𑀁 𑀯𑀺𑀧𑀼𑀮𑀁 𑀲𑀼𑀔𑀁.

𑁨𑁯𑁧.

𑀧𑀭𑀤𑀼𑀓𑁆𑀔𑀽𑀧𑀥𑀸𑀦𑁂𑀦, 𑀅𑀢𑁆𑀢𑀦𑁄 [𑀬𑁄 𑀅𑀢𑁆𑀢𑀦𑁄 (𑀲𑁆𑀬𑀸. 𑀧𑀻. 𑀓.)] 𑀲𑀼𑀔𑀫𑀺𑀘𑁆𑀙𑀢𑀺;

𑀯𑁂𑀭𑀲𑀁𑀲𑀕𑁆𑀕𑀲𑀁𑀲𑀝𑁆𑀞𑁄, 𑀯𑁂𑀭𑀸 𑀲𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺.

𑁨𑁯𑁨.

𑀬𑀜𑁆𑀳𑀺 ¶ 𑀓𑀺𑀘𑁆𑀘𑀁 𑀅𑀧𑀯𑀺𑀤𑁆𑀥𑀁 [𑀢𑀤𑀧𑀯𑀺𑀤𑁆𑀥𑀁 (𑀲𑀻. 𑀲𑁆𑀬𑀸.)], 𑀅𑀓𑀺𑀘𑁆𑀘𑀁 𑀧𑀦 𑀓𑀬𑀺𑀭𑀢𑀺;

𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀁, 𑀢𑁂𑀲𑀁 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸.

𑁨𑁯𑁩.

𑀬𑁂𑀲𑀜𑁆𑀘 𑀲𑀼𑀲𑀫𑀸𑀭𑀤𑁆𑀥𑀸, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸 𑀲𑀢𑀺;

𑀅𑀓𑀺𑀘𑁆𑀘𑀁 𑀢𑁂 𑀦 𑀲𑁂𑀯𑀦𑁆𑀢𑀺, 𑀓𑀺𑀘𑁆𑀘𑁂 𑀲𑀸𑀢𑀘𑁆𑀘𑀓𑀸𑀭𑀺𑀦𑁄;

𑀲𑀢𑀸𑀦𑀁 𑀲𑀫𑁆𑀧𑀚𑀸𑀦𑀸𑀦𑀁, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀆𑀲𑀯𑀸.

𑁨𑁯𑁪.

𑀫𑀸𑀢𑀭𑀁 ¶ 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀔𑀢𑁆𑀢𑀺𑀬𑁂;

𑀭𑀝𑁆𑀞𑀁 𑀲𑀸𑀦𑀼𑀘𑀭𑀁 𑀳𑀦𑁆𑀢𑁆𑀯𑀸, 𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁨𑁯𑁫.

𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀲𑁄𑀢𑁆𑀣𑀺𑀬𑁂;

𑀯𑁂𑀬𑀕𑁆𑀖𑀧𑀜𑁆𑀘𑀫𑀁 𑀳𑀦𑁆𑀢𑁆𑀯𑀸, 𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁨𑁯𑁬.

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀩𑀼𑀤𑁆𑀥𑀕𑀢𑀸 𑀲𑀢𑀺.

𑁨𑁯𑁭.

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀥𑀫𑁆𑀫𑀕𑀢𑀸 𑀲𑀢𑀺.

𑁨𑁯𑁮.

𑀲𑀼𑀧𑁆𑀧𑀩𑀼𑀤𑁆𑀥𑀁 ¶ ¶ 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀲𑀗𑁆𑀖𑀕𑀢𑀸 𑀲𑀢𑀺.

𑁨𑁯𑁯.

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸 𑀲𑀢𑀺.

𑁩𑁦𑁦.

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀅𑀳𑀺𑀁𑀲𑀸𑀬 𑀭𑀢𑁄 𑀫𑀦𑁄.

𑁩𑁦𑁧.

𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 ¶ 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀪𑀸𑀯𑀦𑀸𑀬 𑀭𑀢𑁄 𑀫𑀦𑁄.

𑁩𑁦𑁨.

𑀤𑀼𑀧𑁆𑀧𑀩𑁆𑀩𑀚𑁆𑀚𑀁 𑀤𑀼𑀭𑀪𑀺𑀭𑀫𑀁, 𑀤𑀼𑀭𑀸𑀯𑀸𑀲𑀸 𑀖𑀭𑀸 𑀤𑀼𑀔𑀸;

𑀤𑀼𑀓𑁆𑀔𑁄𑀲𑀫𑀸𑀦𑀲𑀁𑀯𑀸𑀲𑁄, 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀤𑁆𑀥𑀕𑀽;

𑀢𑀲𑁆𑀫𑀸 𑀦 𑀘𑀤𑁆𑀥𑀕𑀽 𑀲𑀺𑀬𑀸, 𑀦 𑀘 [𑀢𑀲𑁆𑀫𑀸 𑀦 𑀘𑀤𑁆𑀥𑀕𑀽 𑀦 𑀘 (𑀓.)] 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑁄 𑀲𑀺𑀬𑀸 [𑀤𑀼𑀓𑁆𑀔𑀸𑀦𑀼𑀧𑀸𑀢𑀺𑀢𑁄 (?)].

𑁩𑁦𑁩.

𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀬𑀲𑁄𑀪𑁄𑀕𑀲𑀫𑀧𑁆𑀧𑀺𑀢𑁄;

𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀽𑀚𑀺𑀢𑁄.

𑁩𑁦𑁪.

𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸.

𑁩𑁦𑁫.

𑀏𑀓𑀸𑀲𑀦𑀁 ¶ 𑀏𑀓𑀲𑁂𑀬𑁆𑀬𑀁, 𑀏𑀓𑁄 𑀘𑀭𑀫𑀢𑀦𑁆𑀤𑀺𑀢𑁄;

𑀏𑀓𑁄 𑀤𑀫𑀬𑀫𑀢𑁆𑀢𑀸𑀦𑀁, 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸.

𑀧𑀓𑀺𑀡𑁆𑀡𑀓𑀯𑀕𑁆𑀕𑁄 𑀏𑀓𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁨. 𑀦𑀺𑀭𑀬𑀯𑀕𑁆𑀕𑁄

𑁩𑁦𑁬.

𑀅𑀪𑀽𑀢𑀯𑀸𑀤𑀻 ¶ ¶ 𑀦𑀺𑀭𑀬𑀁 𑀉𑀧𑁂𑀢𑀺, 𑀬𑁄 𑀯𑀸𑀧𑀺 [𑀬𑁄 𑀘𑀸𑀧𑀺 (𑀲𑀻. 𑀧𑀻. 𑀓.)] 𑀓𑀢𑁆𑀯𑀸 𑀦 𑀓𑀭𑁄𑀫𑀺 𑀘𑀸𑀳 [𑀦 𑀓𑀭𑁄𑀫𑀻𑀢𑀺 𑀘𑀸𑀳 (𑀲𑁆𑀬𑀸.)];

𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺, 𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣.

𑁩𑁦𑁭.

𑀓𑀸𑀲𑀸𑀯𑀓𑀡𑁆𑀞𑀸 𑀩𑀳𑀯𑁄, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀧𑀸𑀧𑀸 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂.

𑁩𑁦𑁮.

𑀲𑁂𑀬𑁆𑀬𑁄 ¶ 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄, 𑀢𑀢𑁆𑀢𑁄 𑀅𑀕𑁆𑀕𑀺𑀲𑀺𑀔𑀽𑀧𑀫𑁄;

𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬 𑀤𑀼𑀲𑁆𑀲𑀻𑀮𑁄, 𑀭𑀝𑁆𑀞𑀧𑀺𑀡𑁆𑀟𑀫𑀲𑀜𑁆𑀜𑀢𑁄.

𑁩𑁦𑁯.

𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀦𑀭𑁄 𑀧𑀫𑀢𑁆𑀢𑁄, 𑀆𑀧𑀚𑁆𑀚𑀢𑀺 𑀧𑀭𑀤𑀸𑀭𑀽𑀧𑀲𑁂𑀯𑀻;

𑀅𑀧𑀼𑀜𑁆𑀜𑀮𑀸𑀪𑀁 𑀦 𑀦𑀺𑀓𑀸𑀫𑀲𑁂𑀬𑁆𑀬𑀁, 𑀦𑀺𑀦𑁆𑀤𑀁 𑀢𑀢𑀻𑀬𑀁 𑀦𑀺𑀭𑀬𑀁 𑀘𑀢𑀼𑀢𑁆𑀣𑀁.

𑁩𑁧𑁦.

𑀅𑀧𑀼𑀜𑁆𑀜𑀮𑀸𑀪𑁄 ¶ 𑀘 𑀕𑀢𑀻 𑀘 𑀧𑀸𑀧𑀺𑀓𑀸, 𑀪𑀻𑀢𑀲𑁆𑀲 𑀪𑀻𑀢𑀸𑀬 𑀭𑀢𑀻 𑀘 𑀣𑁄𑀓𑀺𑀓𑀸;

𑀭𑀸𑀚𑀸 𑀘 𑀤𑀡𑁆𑀟𑀁 𑀕𑀭𑀼𑀓𑀁 𑀧𑀡𑁂𑀢𑀺, 𑀢𑀲𑁆𑀫𑀸 𑀦𑀭𑁄 𑀧𑀭𑀤𑀸𑀭𑀁 𑀦 𑀲𑁂𑀯𑁂.

𑁩𑁧𑁧.

𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸𑀦𑀼𑀓𑀦𑁆𑀢𑀢𑀺;

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀺.

𑁩𑁧𑁨.

𑀬𑀁 ¶ 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀯𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦 𑀢𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁧𑁩.

𑀓𑀬𑀺𑀭𑀸 𑀘𑁂 𑀓𑀬𑀺𑀭𑀸𑀣𑁂𑀦𑀁 [𑀓𑀬𑀺𑀭𑀸 𑀦𑀁 (𑀓.)], 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂;

𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀁.

𑁩𑁧𑁪.

𑀅𑀓𑀢𑀁 ¶ 𑀤𑀼𑀓𑁆𑀓𑀝𑀁 𑀲𑁂𑀬𑁆𑀬𑁄, 𑀧𑀘𑁆𑀙𑀸 𑀢𑀧𑁆𑀧𑀢𑀺 𑀤𑀼𑀓𑁆𑀓𑀝𑀁;

𑀓𑀢𑀜𑁆𑀘 𑀲𑀼𑀓𑀢𑀁 𑀲𑁂𑀬𑁆𑀬𑁄, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺.

𑁩𑁧𑁫.

𑀦𑀕𑀭𑀁 𑀬𑀣𑀸 𑀧𑀘𑁆𑀘𑀦𑁆𑀢𑀁, 𑀕𑀼𑀢𑁆𑀢𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀏𑀯𑀁 ¶ 𑀕𑁄𑀧𑁂𑀣 𑀅𑀢𑁆𑀢𑀸𑀦𑀁, 𑀔𑀡𑁄 𑀯𑁄 [𑀔𑀡𑁄 𑀯𑁂 (𑀲𑀻. 𑀧𑀻. 𑀓.)] 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸.

𑁩𑁧𑁬.

𑀅𑀮𑀚𑁆𑀚𑀺𑀢𑀸𑀬𑁂 𑀮𑀚𑁆𑀚𑀦𑁆𑀢𑀺, 𑀮𑀚𑁆𑀚𑀺𑀢𑀸𑀬𑁂 𑀦 𑀮𑀚𑁆𑀚𑀭𑁂;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧𑁭.

𑀅𑀪𑀬𑁂 𑀪𑀬𑀤𑀲𑁆𑀲𑀺𑀦𑁄, 𑀪𑀬𑁂 𑀘𑀸𑀪𑀬𑀤𑀲𑁆𑀲𑀺𑀦𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧𑁮.

𑀅𑀯𑀚𑁆𑀚𑁂 ¶ 𑀯𑀚𑁆𑀚𑀫𑀢𑀺𑀦𑁄, 𑀯𑀚𑁆𑀚𑁂 𑀘𑀸𑀯𑀚𑁆𑀚𑀤𑀲𑁆𑀲𑀺𑀦𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧𑁯.

𑀯𑀚𑁆𑀚𑀜𑁆𑀘 𑀯𑀚𑁆𑀚𑀢𑁄 𑀜𑀢𑁆𑀯𑀸, 𑀅𑀯𑀚𑁆𑀚𑀜𑁆𑀘 𑀅𑀯𑀚𑁆𑀚𑀢𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁.

𑀦𑀺𑀭𑀬𑀯𑀕𑁆𑀕𑁄 𑀤𑁆𑀯𑀸𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁩. 𑀦𑀸𑀕𑀯𑀕𑁆𑀕𑁄

𑁩𑁨𑁦.

𑀅𑀳𑀁 ¶ 𑀦𑀸𑀕𑁄𑀯 𑀲𑀗𑁆𑀕𑀸𑀫𑁂, 𑀘𑀸𑀧𑀢𑁄 𑀧𑀢𑀺𑀢𑀁 𑀲𑀭𑀁;

𑀅𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀺𑀲𑁆𑀲𑀁, 𑀤𑀼𑀲𑁆𑀲𑀻𑀮𑁄 𑀳𑀺 𑀩𑀳𑀼𑀚𑁆𑀚𑀦𑁄.

𑁩𑁨𑁧.

𑀤𑀦𑁆𑀢𑀁 ¶ 𑀦𑀬𑀦𑁆𑀢𑀺 𑀲𑀫𑀺𑀢𑀺𑀁, 𑀤𑀦𑁆𑀢𑀁 𑀭𑀸𑀚𑀸𑀪𑀺𑀭𑀽𑀳𑀢𑀺;

𑀤𑀦𑁆𑀢𑁄 𑀲𑁂𑀝𑁆𑀞𑁄 𑀫𑀦𑀼𑀲𑁆𑀲𑁂𑀲𑀼, 𑀬𑁄𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀢𑀺.

𑁩𑁨𑁨.

𑀯𑀭𑀫𑀲𑁆𑀲𑀢𑀭𑀸 𑀤𑀦𑁆𑀢𑀸, 𑀆𑀚𑀸𑀦𑀻𑀬𑀸 𑀘 [𑀆𑀚𑀸𑀦𑀻𑀬𑀸𑀯 (𑀲𑁆𑀬𑀸.)] 𑀲𑀺𑀦𑁆𑀥𑀯𑀸;

𑀓𑀼𑀜𑁆𑀚𑀭𑀸 𑀘 [𑀓𑀼𑀜𑁆𑀚𑀭𑀸𑀯 (𑀲𑁆𑀬𑀸.)] 𑀫𑀳𑀸𑀦𑀸𑀕𑀸, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭𑀁.

𑁩𑁨𑁩.

𑀦 ¶ 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺, 𑀕𑀘𑁆𑀙𑁂𑀬𑁆𑀬 𑀅𑀕𑀢𑀁 𑀤𑀺𑀲𑀁;

𑀬𑀣𑀸𑀢𑁆𑀢𑀦𑀸 𑀲𑀼𑀤𑀦𑁆𑀢𑁂𑀦, 𑀤𑀦𑁆𑀢𑁄 𑀤𑀦𑁆𑀢𑁂𑀦 𑀕𑀘𑁆𑀙𑀢𑀺.

𑁩𑁨𑁪.

𑀥𑀦𑀧𑀸𑀮𑁄 [𑀥𑀦𑀧𑀸𑀮𑀓𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀸𑀫 𑀓𑀼𑀜𑁆𑀚𑀭𑁄, 𑀓𑀝𑀼𑀓𑀪𑁂𑀤𑀦𑁄 [𑀓𑀝𑀼𑀓𑀧𑁆𑀧𑀪𑁂𑀤𑀦𑁄 (𑀲𑀻. 𑀲𑁆𑀬𑀸. 𑀧𑀻.)] 𑀤𑀼𑀦𑁆𑀦𑀺𑀯𑀸𑀭𑀬𑁄;

𑀩𑀤𑁆𑀥𑁄 𑀓𑀩𑀴𑀁 𑀦 𑀪𑀼𑀜𑁆𑀚𑀢𑀺, 𑀲𑀼𑀫𑀭𑀢𑀺 [𑀲𑀼𑀲𑀭𑀢𑀺 (𑀓.)] 𑀦𑀸𑀕𑀯𑀦𑀲𑁆𑀲 𑀓𑀼𑀜𑁆𑀚𑀭𑁄.

𑁩𑁨𑁫.

𑀫𑀺𑀤𑁆𑀥𑀻 ¶ 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄.

𑁩𑁨𑁬.

𑀇𑀤𑀁 ¶ 𑀧𑀼𑀭𑁂 𑀘𑀺𑀢𑁆𑀢𑀫𑀘𑀸𑀭𑀺 𑀘𑀸𑀭𑀺𑀓𑀁, 𑀬𑁂𑀦𑀺𑀘𑁆𑀙𑀓𑀁 𑀬𑀢𑁆𑀣𑀓𑀸𑀫𑀁 𑀬𑀣𑀸𑀲𑀼𑀔𑀁;

𑀢𑀤𑀚𑁆𑀚𑀳𑀁 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺 𑀬𑁄𑀦𑀺𑀲𑁄, 𑀳𑀢𑁆𑀣𑀺𑀧𑁆𑀧𑀪𑀺𑀦𑁆𑀦𑀁 𑀯𑀺𑀬 𑀅𑀗𑁆𑀓𑀼𑀲𑀕𑁆𑀕𑀳𑁄.

𑁩𑁨𑁭.

𑀅𑀧𑁆𑀧𑀫𑀸𑀤𑀭𑀢𑀸 𑀳𑁄𑀣, 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑀣;

𑀤𑀼𑀕𑁆𑀕𑀸 𑀉𑀤𑁆𑀥𑀭𑀣𑀢𑁆𑀢𑀸𑀦𑀁, 𑀧𑀗𑁆𑀓𑁂 𑀲𑀦𑁆𑀦𑁄𑀯 [𑀲𑀢𑁆𑀢𑁄𑀯 (𑀲𑀻. 𑀧𑀻.)] 𑀓𑀼𑀜𑁆𑀚𑀭𑁄.

𑁩𑁨𑁮.

𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

𑁩𑁨𑁯.

𑀦𑁄 ¶ 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑁩𑁩𑁦.

𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑁩𑁩𑁧.

𑀅𑀢𑁆𑀣𑀫𑁆𑀳𑀺 ¶ 𑀚𑀸𑀢𑀫𑁆𑀳𑀺 𑀲𑀼𑀔𑀸 𑀲𑀳𑀸𑀬𑀸, 𑀢𑀼𑀝𑁆𑀞𑀻 𑀲𑀼𑀔𑀸 𑀬𑀸 𑀇𑀢𑀭𑀻𑀢𑀭𑁂𑀦;

𑀧𑀼𑀜𑁆𑀜𑀁 𑀲𑀼𑀔𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀲𑀩𑁆𑀩𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀼𑀔𑀁 𑀧𑀳𑀸𑀦𑀁.

𑁩𑁩𑁨.

𑀲𑀼𑀔𑀸 ¶ ¶ 𑀫𑀢𑁆𑀢𑁂𑀬𑁆𑀬𑀢𑀸 𑀮𑁄𑀓𑁂, 𑀅𑀣𑁄 𑀧𑁂𑀢𑁆𑀢𑁂𑀬𑁆𑀬𑀢𑀸 𑀲𑀼𑀔𑀸;

𑀲𑀼𑀔𑀸 𑀲𑀸𑀫𑀜𑁆𑀜𑀢𑀸 𑀮𑁄𑀓𑁂, 𑀅𑀣𑁄 𑀩𑁆𑀭𑀳𑁆𑀫𑀜𑁆𑀜𑀢𑀸 𑀲𑀼𑀔𑀸.

𑁩𑁩𑁩.

𑀲𑀼𑀔𑀁 𑀬𑀸𑀯 𑀚𑀭𑀸 𑀲𑀻𑀮𑀁, 𑀲𑀼𑀔𑀸 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸;

𑀲𑀼𑀔𑁄 𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑁄, 𑀧𑀸𑀧𑀸𑀦𑀁 𑀅𑀓𑀭𑀡𑀁 𑀲𑀼𑀔𑀁.

𑀦𑀸𑀕𑀯𑀕𑁆𑀕𑁄 𑀢𑁂𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁪. 𑀢𑀡𑁆𑀳𑀸𑀯𑀕𑁆𑀕𑁄

𑁩𑁩𑁪.

𑀫𑀦𑀼𑀚𑀲𑁆𑀲 ¶ 𑀧𑀫𑀢𑁆𑀢𑀘𑀸𑀭𑀺𑀦𑁄, 𑀢𑀡𑁆𑀳𑀸 𑀯𑀟𑁆𑀠𑀢𑀺 𑀫𑀸𑀮𑀼𑀯𑀸 𑀯𑀺𑀬;

𑀲𑁄 𑀧𑁆𑀮𑀯𑀢𑀻 [𑀧𑁆𑀮𑀯𑀢𑀺 (𑀲𑀻. 𑀧𑀻.), 𑀧𑀮𑀯𑁂𑀢𑀻 (𑀓.), 𑀉𑀧𑁆𑀮𑀯𑀢𑀺 (?)] 𑀳𑀼𑀭𑀸 𑀳𑀼𑀭𑀁, 𑀨𑀮𑀫𑀺𑀘𑁆𑀙𑀁𑀯 𑀯𑀦𑀲𑁆𑀫𑀺 𑀯𑀸𑀦𑀭𑁄.

𑁩𑁩𑁫.

𑀬𑀁 𑀏𑀲𑀸 𑀲𑀳𑀢𑁂 𑀚𑀫𑁆𑀫𑀻, 𑀢𑀡𑁆𑀳𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸;

𑀲𑁄𑀓𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀅𑀪𑀺𑀯𑀝𑁆𑀞𑀁𑀯 [𑀅𑀪𑀺𑀯𑀟𑁆𑀠𑀁𑀯 (𑀲𑁆𑀬𑀸.), 𑀅𑀪𑀺𑀯𑀝𑁆𑀝𑀁𑀯 (𑀧𑀻.), 𑀅𑀪𑀺𑀯𑀼𑀟𑁆𑀠𑀁𑀯 (𑀓.)] 𑀩𑀻𑀭𑀡𑀁.

𑁩𑁩𑁬.

𑀬𑁄 𑀘𑁂𑀢𑀁 𑀲𑀳𑀢𑁂 𑀚𑀫𑁆𑀫𑀺𑀁, 𑀢𑀡𑁆𑀳𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀲𑁄𑀓𑀸 𑀢𑀫𑁆𑀳𑀸 𑀧𑀧𑀢𑀦𑁆𑀢𑀺, 𑀉𑀤𑀩𑀺𑀦𑁆𑀤𑀼𑀯 𑀧𑁄𑀓𑁆𑀔𑀭𑀸.

𑁩𑁩𑁭.

𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀢𑀡𑁆𑀳𑀸𑀬 𑀫𑀽𑀮𑀁 𑀔𑀡𑀣, 𑀉𑀲𑀻𑀭𑀢𑁆𑀣𑁄𑀯 𑀩𑀻𑀭𑀡𑀁;

𑀫𑀸 𑀯𑁄 𑀦𑀴𑀁𑀯 𑀲𑁄𑀢𑁄𑀯, 𑀫𑀸𑀭𑁄 𑀪𑀜𑁆𑀚𑀺 𑀧𑀼𑀦𑀧𑁆𑀧𑀼𑀦𑀁.

𑁩𑁩𑁮.

𑀬𑀣𑀸𑀧𑀺 ¶ ¶ ¶ 𑀫𑀽𑀮𑁂 𑀅𑀦𑀼𑀧𑀤𑁆𑀤𑀯𑁂 𑀤𑀴𑁆𑀳𑁂, 𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀭𑁂𑀯 𑀭𑀽𑀳𑀢𑀺;

𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂, 𑀦𑀺𑀩𑁆𑀩𑀢𑁆𑀢𑀢𑀻 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦𑀁.

𑁩𑁩𑁯.

𑀬𑀲𑁆𑀲 𑀙𑀢𑁆𑀢𑀺𑀁𑀲𑀢𑀺 𑀲𑁄𑀢𑀸, 𑀫𑀦𑀸𑀧𑀲𑀯𑀦𑀸 𑀪𑀼𑀲𑀸;

𑀫𑀸𑀳𑀸 [𑀯𑀸𑀳𑀸 (𑀲𑀻. 𑀲𑁆𑀬𑀸. 𑀧𑀻.)] 𑀯𑀳𑀦𑁆𑀢𑀺 𑀤𑀼𑀤𑁆𑀤𑀺𑀝𑁆𑀞𑀺𑀁, 𑀲𑀗𑁆𑀓𑀧𑁆𑀧𑀸 𑀭𑀸𑀕𑀦𑀺𑀲𑁆𑀲𑀺𑀢𑀸.

𑁩𑁪𑁦.

𑀲𑀯𑀦𑁆𑀢𑀺 ¶ 𑀲𑀩𑁆𑀩𑀥𑀺 𑀲𑁄𑀢𑀸, 𑀮𑀢𑀸 𑀉𑀧𑁆𑀧𑀚𑁆𑀚 [𑀉𑀩𑁆𑀪𑀺𑀚𑁆𑀚 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑀺𑀝𑁆𑀞𑀢𑀺;

𑀢𑀜𑁆𑀘 𑀤𑀺𑀲𑁆𑀯𑀸 𑀮𑀢𑀁 𑀚𑀸𑀢𑀁, 𑀫𑀽𑀮𑀁 𑀧𑀜𑁆𑀜𑀸𑀬 𑀙𑀺𑀦𑁆𑀤𑀣.

𑁩𑁪𑁧.

𑀲𑀭𑀺𑀢𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺 𑀘, 𑀲𑁄𑀫𑀦𑀲𑁆𑀲𑀸𑀦𑀺 𑀪𑀯𑀦𑁆𑀢𑀺 𑀚𑀦𑁆𑀢𑀼𑀦𑁄;

𑀢𑁂 𑀲𑀸𑀢𑀲𑀺𑀢𑀸 𑀲𑀼𑀔𑁂𑀲𑀺𑀦𑁄, 𑀢𑁂 𑀯𑁂 𑀚𑀸𑀢𑀺𑀚𑀭𑀽𑀧𑀕𑀸 𑀦𑀭𑀸.

𑁩𑁪𑁨.

𑀢𑀲𑀺𑀡𑀸𑀬 𑀧𑀼𑀭𑀓𑁆𑀔𑀢𑀸 𑀧𑀚𑀸, 𑀧𑀭𑀺𑀲𑀧𑁆𑀧𑀦𑁆𑀢𑀺 𑀲𑀲𑁄𑀯 𑀩𑀦𑁆𑀥𑀺𑀢𑁄 [𑀩𑀸𑀥𑀺𑀢𑁄 (𑀩𑀳𑀽𑀲𑀼)];

𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀓𑀸, 𑀤𑀼𑀓𑁆𑀔𑀫𑀼𑀧𑁂𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀭𑀸𑀬.

𑁩𑁪𑁩.

𑀢𑀲𑀺𑀡𑀸𑀬 𑀧𑀼𑀭𑀓𑁆𑀔𑀢𑀸 𑀧𑀚𑀸, 𑀧𑀭𑀺𑀲𑀧𑁆𑀧𑀦𑁆𑀢𑀺 𑀲𑀲𑁄𑀯 𑀩𑀦𑁆𑀥𑀺𑀢𑁄;

𑀢𑀲𑁆𑀫𑀸 𑀢𑀲𑀺𑀡𑀁 𑀯𑀺𑀦𑁄𑀤𑀬𑁂, 𑀆𑀓𑀗𑁆𑀔𑀦𑁆𑀢 [𑀪𑀺𑀓𑁆𑀔𑀽 𑀆𑀓𑀗𑁆𑀔𑀻 (𑀲𑀻.), 𑀪𑀺𑀓𑁆𑀔𑀼 𑀆𑀓𑀗𑁆𑀔𑀁 (𑀲𑁆𑀬𑀸.)] 𑀯𑀺𑀭𑀸𑀕𑀫𑀢𑁆𑀢𑀦𑁄.

𑁩𑁪𑁪.

𑀬𑁄 𑀦𑀺𑀩𑁆𑀩𑀦𑀣𑁄 𑀯𑀦𑀸𑀥𑀺𑀫𑀼𑀢𑁆𑀢𑁄, 𑀯𑀦𑀫𑀼𑀢𑁆𑀢𑁄 𑀯𑀦𑀫𑁂𑀯 𑀥𑀸𑀯𑀢𑀺;

𑀢𑀁 𑀧𑀼𑀕𑁆𑀕𑀮𑀫𑁂𑀣 𑀧𑀲𑁆𑀲𑀣, 𑀫𑀼𑀢𑁆𑀢𑁄 𑀩𑀦𑁆𑀥𑀦𑀫𑁂𑀯 𑀥𑀸𑀯𑀢𑀺.

𑁩𑁪𑁫.

𑀦 ¶ ¶ 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀤𑀸𑀭𑀽𑀚𑀁 𑀩𑀩𑁆𑀩𑀚𑀜𑁆𑀘 (𑀲𑀻. 𑀧𑀻.)];

𑀲𑀸𑀭𑀢𑁆𑀢𑀭𑀢𑁆𑀢𑀸 ¶ 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑁩𑁪𑁬.

𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬.

𑁩𑁪𑁭.

𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁, 𑀲𑀬𑀁𑀓𑀢𑀁 𑀫𑀓𑁆𑀓𑀝𑀓𑁄𑀯 𑀚𑀸𑀮𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀤𑀼𑀓𑁆𑀔𑀁 𑀧𑀳𑀸𑀬.

𑁩𑁪𑁮.

𑀫𑀼𑀜𑁆𑀘 ¶ 𑀧𑀼𑀭𑁂 𑀫𑀼𑀜𑁆𑀘 𑀧𑀘𑁆𑀙𑀢𑁄, 𑀫𑀚𑁆𑀛𑁂 𑀫𑀼𑀜𑁆𑀘 𑀪𑀯𑀲𑁆𑀲 𑀧𑀸𑀭𑀕𑀽;

𑀲𑀩𑁆𑀩𑀢𑁆𑀣 𑀯𑀺𑀫𑀼𑀢𑁆𑀢𑀫𑀸𑀦𑀲𑁄, 𑀦 𑀧𑀼𑀦𑀁 𑀚𑀸𑀢𑀺𑀚𑀭𑀁 𑀉𑀧𑁂𑀳𑀺𑀲𑀺.

𑁩𑁪𑁯.

𑀯𑀺𑀢𑀓𑁆𑀓𑀫𑀣𑀺𑀢𑀲𑁆𑀲 𑀚𑀦𑁆𑀢𑀼𑀦𑁄, 𑀢𑀺𑀩𑁆𑀩𑀭𑀸𑀕𑀲𑁆𑀲 𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄;

𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀏𑀲 𑀔𑁄 𑀤𑀴𑁆𑀳𑀁 [𑀏𑀲 𑀕𑀸𑀴𑁆𑀳𑀁 (𑀓.)] 𑀓𑀭𑁄𑀢𑀺 𑀩𑀦𑁆𑀥𑀦𑀁.

𑁩𑁫𑁦.

𑀯𑀺𑀢𑀓𑁆𑀓𑀽𑀧𑀲𑀫𑁂 ¶ 𑀘 [𑀯𑀺𑀢𑀓𑁆𑀓𑀽𑀧𑀲𑀫𑁂𑀯 (𑀓.)] 𑀬𑁄 𑀭𑀢𑁄, 𑀅𑀲𑀼𑀪𑀁 𑀪𑀸𑀯𑀬𑀢𑁂 𑀲𑀤𑀸 𑀲𑀢𑁄;

𑀏𑀲 ¶ [𑀏𑀲𑁄 (?)] 𑀔𑁄 𑀩𑁆𑀬𑀦𑁆𑀢𑀺 𑀓𑀸𑀳𑀺𑀢𑀺, 𑀏𑀲 [𑀏𑀲𑁄 (?)] 𑀙𑁂𑀘𑁆𑀙𑀢𑀺 𑀫𑀸𑀭𑀩𑀦𑁆𑀥𑀦𑀁.

𑁩𑁫𑁧.

𑀦𑀺𑀝𑁆𑀞𑀗𑁆𑀕𑀢𑁄 ¶ 𑀅𑀲𑀦𑁆𑀢𑀸𑀲𑀻, 𑀯𑀻𑀢𑀢𑀡𑁆𑀳𑁄 𑀅𑀦𑀗𑁆𑀕𑀡𑁄;

𑀅𑀘𑁆𑀙𑀺𑀦𑁆𑀤𑀺 𑀪𑀯𑀲𑀮𑁆𑀮𑀸𑀦𑀺, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄.

𑁩𑁫𑁨.

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄;

𑀅𑀓𑁆𑀔𑀭𑀸𑀦𑀁 𑀲𑀦𑁆𑀦𑀺𑀧𑀸𑀢𑀁, 𑀚𑀜𑁆𑀜𑀸 𑀧𑀼𑀩𑁆𑀩𑀸𑀧𑀭𑀸𑀦𑀺 𑀘;

𑀲 𑀯𑁂 ‘‘𑀅𑀦𑁆𑀢𑀺𑀫𑀲𑀸𑀭𑀻𑀭𑁄, 𑀫𑀳𑀸𑀧𑀜𑁆𑀜𑁄 𑀫𑀳𑀸𑀧𑀼𑀭𑀺𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑁩𑁫𑁩.

𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀺, 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄;

𑀲𑀩𑁆𑀩𑀜𑁆𑀚𑀳𑁄 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀁.

𑁩𑁫𑁪.

𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀺, 𑀲𑀩𑁆𑀩𑀭𑀲𑀁 𑀥𑀫𑁆𑀫𑀭𑀲𑁄 𑀚𑀺𑀦𑀸𑀢𑀺;

𑀲𑀩𑁆𑀩𑀭𑀢𑀺𑀁 𑀥𑀫𑁆𑀫𑀭𑀢𑀺 𑀚𑀺𑀦𑀸𑀢𑀺, 𑀢𑀡𑁆𑀳𑀓𑁆𑀔𑀬𑁄 𑀲𑀩𑁆𑀩𑀤𑀼𑀓𑁆𑀔𑀁 𑀚𑀺𑀦𑀸𑀢𑀺.

𑁩𑁫𑁫.

𑀳𑀦𑀦𑁆𑀢𑀺 𑀪𑁄𑀕𑀸 𑀤𑀼𑀫𑁆𑀫𑁂𑀥𑀁, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄;

𑀪𑁄𑀕𑀢𑀡𑁆𑀳𑀸𑀬 𑀤𑀼𑀫𑁆𑀫𑁂𑀥𑁄, 𑀳𑀦𑁆𑀢𑀺 𑀅𑀜𑁆𑀜𑁂𑀯 𑀅𑀢𑁆𑀢𑀦𑀁.

𑁩𑁫𑁬.

𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀭𑀸𑀕𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀭𑀸𑀕𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁫𑁭.

𑀢𑀺𑀡𑀤𑁄𑀲𑀸𑀦𑀺 ¶ ¶ ¶ 𑀔𑁂𑀢𑁆𑀢𑀸𑀦𑀺, 𑀤𑁄𑀲𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀤𑁄𑀲𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁫𑁮.

𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀫𑁄𑀳𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀫𑁄𑀳𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁫𑁯.

(𑀢𑀺𑀡𑀤𑁄𑀲𑀸𑀦𑀺 ¶ 𑀔𑁂𑀢𑁆𑀢𑀸𑀦𑀺, 𑀇𑀘𑁆𑀙𑀸𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀺𑀕𑀢𑀺𑀘𑁆𑀙𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.) [( ) 𑀯𑀺𑀤𑁂𑀲𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀦 𑀤𑀺𑀲𑁆𑀲𑀢𑀺]

𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀢𑀡𑁆𑀳𑀸𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀢𑀡𑁆𑀳𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑀢𑀡𑁆𑀳𑀸𑀯𑀕𑁆𑀕𑁄 𑀘𑀢𑀼𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁫. 𑀪𑀺𑀓𑁆𑀔𑀼𑀯𑀕𑁆𑀕𑁄

𑁩𑁬𑁦.

𑀘𑀓𑁆𑀔𑀼𑀦𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑁄𑀢𑁂𑀦 𑀲𑀁𑀯𑀭𑁄;

𑀖𑀸𑀦𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀚𑀺𑀯𑁆𑀳𑀸𑀬 𑀲𑀁𑀯𑀭𑁄.

𑁩𑁬𑁧.

𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀪𑀺𑀓𑁆𑀔𑀼, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

𑁩𑁬𑁨.

𑀳𑀢𑁆𑀣𑀲𑀁𑀬𑀢𑁄 𑀧𑀸𑀤𑀲𑀁𑀬𑀢𑁄, 𑀯𑀸𑀘𑀸𑀲𑀁𑀬𑀢𑁄 𑀲𑀁𑀬𑀢𑀼𑀢𑁆𑀢𑀫𑁄;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀏𑀓𑁄 𑀲𑀦𑁆𑀢𑀼𑀲𑀺𑀢𑁄 𑀢𑀫𑀸𑀳𑀼 𑀪𑀺𑀓𑁆𑀔𑀼𑀁.

𑁩𑁬𑁩.

𑀬𑁄 ¶ 𑀫𑀼𑀔𑀲𑀁𑀬𑀢𑁄 𑀪𑀺𑀓𑁆𑀔𑀼, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑀻𑀧𑁂𑀢𑀺, 𑀫𑀥𑀼𑀭𑀁 𑀢𑀲𑁆𑀲 𑀪𑀸𑀲𑀺𑀢𑀁.

𑁩𑁬𑁪.

𑀥𑀫𑁆𑀫𑀸𑀭𑀸𑀫𑁄 ¶ ¶ ¶ 𑀥𑀫𑁆𑀫𑀭𑀢𑁄, 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁;

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀁 𑀪𑀺𑀓𑁆𑀔𑀼, 𑀲𑀤𑁆𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀢𑀺.

𑁩𑁬𑁫.

𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀦𑀸𑀜𑁆𑀜𑁂𑀲𑀁 𑀧𑀺𑀳𑀬𑀁 𑀘𑀭𑁂;

𑀅𑀜𑁆𑀜𑁂𑀲𑀁 𑀧𑀺𑀳𑀬𑀁 𑀪𑀺𑀓𑁆𑀔𑀼, 𑀲𑀫𑀸𑀥𑀺𑀁 𑀦𑀸𑀥𑀺𑀕𑀘𑁆𑀙𑀢𑀺.

𑁩𑁬𑁬.

𑀅𑀧𑁆𑀧𑀮𑀸𑀪𑁄𑀧𑀺 𑀘𑁂 𑀪𑀺𑀓𑁆𑀔𑀼, 𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑀢𑀺;

𑀢𑀁 𑀯𑁂 𑀤𑁂𑀯𑀸 𑀧𑀲𑀁𑀲𑀦𑁆𑀢𑀺, 𑀲𑀼𑀤𑁆𑀥𑀸𑀚𑀻𑀯𑀺𑀁 𑀅𑀢𑀦𑁆𑀤𑀺𑀢𑀁.

𑁩𑁬𑁭.

𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁;

𑀅𑀲𑀢𑀸 𑀘 𑀦 𑀲𑁄𑀘𑀢𑀺, 𑀲 𑀯𑁂 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺.

𑁩𑁬𑁮.

𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀬𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀁.

𑁩𑁬𑁯.

𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀺;

𑀙𑁂𑀢𑁆𑀯𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀢𑀢𑁄 𑀦𑀺𑀩𑁆𑀩𑀸𑀦𑀫𑁂𑀳𑀺𑀲𑀺.

𑁩𑁭𑁦.

𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, ‘‘𑀑𑀖𑀢𑀺𑀡𑁆𑀡𑁄’’𑀢𑀺 𑀯𑀼𑀘𑁆𑀘𑀢𑀺.

𑁩𑁭𑁧.

𑀛𑀸𑀬 𑀪𑀺𑀓𑁆𑀔𑀼 [𑀛𑀸𑀬 𑀢𑀼𑀯𑀁 𑀪𑀺𑀓𑁆𑀔𑀼 (?)] 𑀫𑀸 𑀧𑀫𑀸𑀤𑁄 [𑀫𑀸 𑀘 𑀧𑀫𑀸𑀤𑁄 (𑀲𑀻. 𑀲𑁆𑀬𑀸. 𑀧𑀻.)], 𑀫𑀸 𑀢𑁂 𑀓𑀸𑀫𑀕𑀼𑀡𑁂 𑀭𑀫𑁂𑀲𑁆𑀲𑀼 [𑀪𑀫𑀲𑁆𑀲𑀼 (𑀲𑀻. 𑀧𑀻.), 𑀪𑀯𑀲𑁆𑀲𑀼 (𑀲𑁆𑀬𑀸.), 𑀭𑀫𑀲𑁆𑀲𑀼 (𑀓.)] 𑀘𑀺𑀢𑁆𑀢𑀁;

𑀫𑀸 𑀮𑁄𑀳𑀕𑀼𑀴𑀁 𑀕𑀺𑀮𑀻 𑀧𑀫𑀢𑁆𑀢𑁄, 𑀫𑀸 𑀓𑀦𑁆𑀤𑀺 ‘‘𑀤𑀼𑀓𑁆𑀔𑀫𑀺𑀤’’𑀦𑁆𑀢𑀺 𑀟𑀬𑁆𑀳𑀫𑀸𑀦𑁄.

𑁩𑁭𑁨.

𑀦𑀢𑁆𑀣𑀺 𑀛𑀸𑀦𑀁 𑀅𑀧𑀜𑁆𑀜𑀲𑁆𑀲, 𑀧𑀜𑁆𑀜𑀸 𑀦𑀢𑁆𑀣𑀺 𑀅𑀛𑀸𑀬𑀢𑁄 [𑀅𑀚𑁆𑀛𑀸𑀬𑀺𑀦𑁄 (𑀓.)];

𑀬𑀫𑁆𑀳𑀺 𑀛𑀸𑀦𑀜𑁆𑀘 𑀧𑀜𑁆𑀜𑀸 𑀘, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑁩𑁭𑁩.

𑀲𑀼𑀜𑁆𑀜𑀸𑀕𑀸𑀭𑀁 ¶ ¶ ¶ ¶ 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑁩𑁭𑁪.

𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 [𑀮𑀪𑀢𑀺 (𑀧𑀻.), 𑀮𑀪𑀢𑁂 (𑀓.)] 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁.

𑁩𑁭𑁫.

𑀢𑀢𑁆𑀭𑀸𑀬𑀫𑀸𑀤𑀺 𑀪𑀯𑀢𑀺, 𑀇𑀥 𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀇𑀦𑁆𑀤𑁆𑀭𑀺𑀬𑀕𑀼𑀢𑁆𑀢𑀺 𑀲𑀦𑁆𑀢𑀼𑀝𑁆𑀞𑀺, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄.

𑁩𑁭𑁬.

𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂, 𑀲𑀼𑀤𑁆𑀥𑀸𑀚𑀻𑀯𑁂 𑀅𑀢𑀦𑁆𑀤𑀺𑀢𑁂;

𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲 [𑀧𑀝𑀺𑀲𑀦𑁆𑀥𑀸𑀭𑀯𑀼𑀢𑁆𑀬𑀲𑁆𑀲 (𑀓.)], 𑀆𑀘𑀸𑀭𑀓𑀼𑀲𑀮𑁄 𑀲𑀺𑀬𑀸;

𑀢𑀢𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺.

𑁩𑁭𑁭.

𑀯𑀲𑁆𑀲𑀺𑀓𑀸 𑀯𑀺𑀬 𑀧𑀼𑀧𑁆𑀨𑀸𑀦𑀺, 𑀫𑀤𑁆𑀤𑀯𑀸𑀦𑀺 [𑀫𑀚𑁆𑀚𑀯𑀸𑀦𑀺 (𑀓. 𑀝𑀻𑀓𑀸) 𑀧𑀘𑁆𑀘𑀯𑀸𑀦𑀺 (𑀓. 𑀅𑀝𑁆𑀞.)] 𑀧𑀫𑀼𑀜𑁆𑀘𑀢𑀺;

𑀏𑀯𑀁 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀯𑀺𑀧𑁆𑀧𑀫𑀼𑀜𑁆𑀘𑁂𑀣 𑀪𑀺𑀓𑁆𑀔𑀯𑁄.

𑁩𑁭𑁮.

𑀲𑀦𑁆𑀢𑀓𑀸𑀬𑁄 𑀲𑀦𑁆𑀢𑀯𑀸𑀘𑁄, 𑀲𑀦𑁆𑀢𑀯𑀸 𑀲𑀼𑀲𑀫𑀸𑀳𑀺𑀢𑁄 [𑀲𑀦𑁆𑀢𑀫𑀦𑁄 𑀲𑀼𑀲𑀫𑀸𑀳𑀺𑀢𑁄 (𑀲𑁆𑀬𑀸. 𑀧𑀻.), 𑀲𑀦𑁆𑀢𑀫𑀦𑁄 𑀲𑀫𑀸𑀳𑀺𑀢𑁄 (𑀓.)];

𑀯𑀦𑁆𑀢𑀮𑁄𑀓𑀸𑀫𑀺𑀲𑁄 𑀪𑀺𑀓𑁆𑀔𑀼, ‘‘𑀉𑀧𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑁩𑁭𑁯.

𑀅𑀢𑁆𑀢𑀦𑀸 𑀘𑁄𑀤𑀬𑀢𑁆𑀢𑀸𑀦𑀁, 𑀧𑀝𑀺𑀫𑀁𑀲𑁂𑀣 𑀅𑀢𑁆𑀢𑀦𑀸 [𑀧𑀝𑀺𑀫𑀸𑀲𑁂 𑀅𑀢𑁆𑀢𑀫𑀢𑁆𑀢𑀦𑀸 (𑀲𑀻. 𑀧𑀻.), 𑀧𑀝𑀺𑀫𑀁𑀲𑁂 𑀢𑀫𑀢𑁆𑀢𑀦𑀸 (𑀲𑁆𑀬𑀸.)];

𑀲𑁄 𑀅𑀢𑁆𑀢𑀕𑀼𑀢𑁆𑀢𑁄 𑀲𑀢𑀺𑀫𑀸, 𑀲𑀼𑀔𑀁 𑀪𑀺𑀓𑁆𑀔𑀼 𑀯𑀺𑀳𑀸𑀳𑀺𑀲𑀺.

𑁩𑁮𑁦.

𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄, (𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸) [( ) 𑀯𑀺𑀤𑁂𑀲𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺]

𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀕𑀢𑀺;

𑀢𑀲𑁆𑀫𑀸 𑀲𑀁𑀬𑀫𑀫𑀢𑁆𑀢𑀸𑀦𑀁 [𑀲𑀁𑀬𑀫𑀬’𑀢𑁆𑀢𑀸𑀦𑀁 (𑀲𑀻. 𑀧𑀻.)], 𑀅𑀲𑁆𑀲𑀁 𑀪𑀤𑁆𑀭𑀁𑀯 𑀯𑀸𑀡𑀺𑀚𑁄.

𑁩𑁮𑁧.

𑀧𑀸𑀫𑁄𑀚𑁆𑀚𑀩𑀳𑀼𑀮𑁄 ¶ 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀁.

𑁩𑁮𑁨.

𑀬𑁄 ¶ ¶ 𑀳𑀯𑁂 𑀤𑀳𑀭𑁄 𑀪𑀺𑀓𑁆𑀔𑀼, 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂;

𑀲𑁄𑀫𑀁 ¶ [𑀲𑁄 𑀇𑀫𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑀪𑀺𑀓𑁆𑀔𑀼𑀯𑀕𑁆𑀕𑁄 𑀧𑀜𑁆𑀘𑀯𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

𑁨𑁬. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁩𑁮𑁩.

𑀙𑀺𑀦𑁆𑀤 𑀲𑁄𑀢𑀁 𑀧𑀭𑀓𑁆𑀓𑀫𑁆𑀫, 𑀓𑀸𑀫𑁂 𑀧𑀦𑀼𑀤 𑀩𑁆𑀭𑀸𑀳𑁆𑀫𑀡;

𑀲𑀗𑁆𑀔𑀸𑀭𑀸𑀦𑀁 𑀔𑀬𑀁 𑀜𑀢𑁆𑀯𑀸, 𑀅𑀓𑀢𑀜𑁆𑀜𑀽𑀲𑀺 𑀩𑁆𑀭𑀸𑀳𑁆𑀫𑀡.

𑁩𑁮𑁪.

𑀬𑀤𑀸 𑀤𑁆𑀯𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀸𑀭𑀕𑀽 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀅𑀣𑀲𑁆𑀲 𑀲𑀩𑁆𑀩𑁂 𑀲𑀁𑀬𑁄𑀕𑀸, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀚𑀸𑀦𑀢𑁄.

𑁩𑁮𑁫.

𑀬𑀲𑁆𑀲 𑀧𑀸𑀭𑀁 𑀅𑀧𑀸𑀭𑀁 𑀯𑀸, 𑀧𑀸𑀭𑀸𑀧𑀸𑀭𑀁 𑀦 𑀯𑀺𑀚𑁆𑀚𑀢𑀺;

𑀯𑀻𑀢𑀤𑁆𑀤𑀭𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁮𑁬.

𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀉𑀢𑁆𑀢𑀫𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁮𑁭.

𑀤𑀺𑀯𑀸 ¶ 𑀢𑀧𑀢𑀺 𑀆𑀤𑀺𑀘𑁆𑀘𑁄, 𑀭𑀢𑁆𑀢𑀺𑀫𑀸𑀪𑀸𑀢𑀺 𑀘𑀦𑁆𑀤𑀺𑀫𑀸;

𑀲𑀦𑁆𑀦𑀤𑁆𑀥𑁄 𑀔𑀢𑁆𑀢𑀺𑀬𑁄 𑀢𑀧𑀢𑀺, 𑀛𑀸𑀬𑀻 𑀢𑀧𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀅𑀣 𑀲𑀩𑁆𑀩𑀫𑀳𑁄𑀭𑀢𑁆𑀢𑀺𑀁 [𑀲𑀩𑁆𑀩𑀫𑀳𑁄𑀭𑀢𑁆𑀢𑀁 (?)], 𑀩𑀼𑀤𑁆𑀥𑁄 𑀢𑀧𑀢𑀺 𑀢𑁂𑀚𑀲𑀸.

𑁩𑁮𑁮.

𑀩𑀸𑀳𑀺𑀢𑀧𑀸𑀧𑁄𑀢𑀺 ¶ 𑀩𑁆𑀭𑀸𑀳𑁆𑀫𑀡𑁄, 𑀲𑀫𑀘𑀭𑀺𑀬𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀺;

𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 ‘‘𑀧𑀩𑁆𑀩𑀚𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑁩𑁮𑁯.

𑀦 ¶ ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀳𑀭𑁂𑀬𑁆𑀬, 𑀦𑀸𑀲𑁆𑀲 𑀫𑀼𑀜𑁆𑀘𑁂𑀣 𑀩𑁆𑀭𑀸𑀳𑁆𑀫𑀡𑁄;

𑀥𑀻 [𑀥𑀺 (𑀲𑁆𑀬𑀸. 𑀩𑁆𑀬𑀸𑀓𑀭𑀡𑁂𑀲𑀼)] 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀦𑁆𑀢𑀸𑀭𑀁, 𑀢𑀢𑁄 𑀥𑀻 𑀬𑀲𑁆𑀲 [𑀬𑁄 + 𑀅𑀲𑁆𑀲 = 𑀬𑀲𑁆𑀲] 𑀫𑀼𑀜𑁆𑀘𑀢𑀺.

𑁩𑁯𑁦.

𑀦 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀢𑀤𑀓𑀺𑀜𑁆𑀘𑀺 𑀲𑁂𑀬𑁆𑀬𑁄, 𑀬𑀤𑀸 𑀦𑀺𑀲𑁂𑀥𑁄 𑀫𑀦𑀲𑁄 𑀧𑀺𑀬𑁂𑀳𑀺;

𑀬𑀢𑁄 𑀬𑀢𑁄 𑀳𑀺𑀁𑀲𑀫𑀦𑁄 𑀦𑀺𑀯𑀢𑁆𑀢𑀢𑀺, 𑀢𑀢𑁄 𑀢𑀢𑁄 𑀲𑀫𑁆𑀫𑀢𑀺𑀫𑁂𑀯 𑀤𑀼𑀓𑁆𑀔𑀁.

𑁩𑁯𑁧.

𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁;

𑀲𑀁𑀯𑀼𑀢𑀁 𑀢𑀻𑀳𑀺 𑀞𑀸𑀦𑁂𑀳𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁯𑁨.

𑀬𑀫𑁆𑀳𑀸 𑀥𑀫𑁆𑀫𑀁 𑀯𑀺𑀚𑀸𑀦𑁂𑀬𑁆𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀲𑀓𑁆𑀓𑀘𑁆𑀘𑀁 𑀢𑀁 𑀦𑀫𑀲𑁆𑀲𑁂𑀬𑁆𑀬, 𑀅𑀕𑁆𑀕𑀺𑀳𑀼𑀢𑁆𑀢𑀁𑀯 𑀩𑁆𑀭𑀸𑀳𑁆𑀫𑀡𑁄.

𑁩𑁯𑁩.

𑀦 𑀚𑀝𑀸𑀳𑀺 𑀦 𑀕𑁄𑀢𑁆𑀢𑁂𑀦, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀲𑁄 𑀲𑀼𑀘𑀻 𑀲𑁄 𑀘 𑀩𑁆𑀭𑀸𑀳𑁆𑀫𑀡𑁄.

𑁩𑁯𑁪.

𑀓𑀺𑀁 ¶ 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀺.

𑁩𑁯𑁫.

𑀧𑀁𑀲𑀼𑀓𑀽𑀮𑀥𑀭𑀁 𑀚𑀦𑁆𑀢𑀼𑀁, 𑀓𑀺𑀲𑀁 𑀥𑀫𑀦𑀺𑀲𑀦𑁆𑀣𑀢𑀁;

𑀏𑀓𑀁 𑀯𑀦𑀲𑁆𑀫𑀺𑀁 𑀛𑀸𑀬𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁯𑁬.

𑀦 ¶ 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁;

𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁯𑁭.

𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸, 𑀬𑁄 𑀯𑁂 𑀦 𑀧𑀭𑀺𑀢𑀲𑁆𑀲𑀢𑀺;

𑀲𑀗𑁆𑀕𑀸𑀢𑀺𑀕𑀁 ¶ 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁯𑁮.

𑀙𑁂𑀢𑁆𑀯𑀸 ¶ 𑀦𑀤𑁆𑀥𑀺𑀁 [𑀦𑀦𑁆𑀥𑀺𑀁 (𑀓. 𑀲𑀻.), 𑀦𑀦𑁆𑀤𑀺𑀁 (𑀧𑀻.)] 𑀯𑀭𑀢𑁆𑀢𑀜𑁆𑀘, 𑀲𑀦𑁆𑀤𑀸𑀦𑀁 [𑀲𑀦𑁆𑀤𑀸𑀫𑀁 (𑀲𑀻.)] 𑀲𑀳𑀦𑀼𑀓𑁆𑀓𑀫𑀁;

𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁩𑁯𑁯.

𑀅𑀓𑁆𑀓𑁄𑀲𑀁 𑀯𑀥𑀩𑀦𑁆𑀥𑀜𑁆𑀘, 𑀅𑀤𑀼𑀝𑁆𑀞𑁄 𑀬𑁄 𑀢𑀺𑀢𑀺𑀓𑁆𑀔𑀢𑀺;

𑀔𑀦𑁆𑀢𑀻𑀩𑀮𑀁 𑀩𑀮𑀸𑀦𑀻𑀓𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁦.

𑀅𑀓𑁆𑀓𑁄𑀥𑀦𑀁 𑀯𑀢𑀯𑀦𑁆𑀢𑀁, 𑀲𑀻𑀮𑀯𑀦𑁆𑀢𑀁 𑀅𑀦𑀼𑀲𑁆𑀲𑀤𑀁;

𑀤𑀦𑁆𑀢𑀁 𑀅𑀦𑁆𑀢𑀺𑀫𑀲𑀸𑀭𑀻𑀭𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁧.

𑀯𑀸𑀭𑀺 ¶ 𑀧𑁄𑀓𑁆𑀔𑀭𑀧𑀢𑁆𑀢𑁂𑀯, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄;

𑀬𑁄 𑀦 𑀮𑀺𑀫𑁆𑀧𑀢𑀺 [𑀮𑀺𑀧𑁆𑀧𑀢𑀺 (𑀲𑀻. 𑀧𑀻.)] 𑀓𑀸𑀫𑁂𑀲𑀼, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁨.

𑀬𑁄 𑀤𑀼𑀓𑁆𑀔𑀲𑁆𑀲 𑀧𑀚𑀸𑀦𑀸𑀢𑀺, 𑀇𑀥𑁂𑀯 𑀔𑀬𑀫𑀢𑁆𑀢𑀦𑁄;

𑀧𑀦𑁆𑀦𑀪𑀸𑀭𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁩.

𑀕𑀫𑁆𑀪𑀻𑀭𑀧𑀜𑁆𑀜𑀁 𑀫𑁂𑀥𑀸𑀯𑀺𑀁, 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑀁;

𑀉𑀢𑁆𑀢𑀫𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁪.

𑀅𑀲𑀁𑀲𑀝𑁆𑀞𑀁 ¶ 𑀕𑀳𑀝𑁆𑀞𑁂𑀳𑀺, 𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀁;

𑀅𑀦𑁄𑀓𑀲𑀸𑀭𑀺𑀫𑀧𑁆𑀧𑀺𑀘𑁆𑀙𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁫.

𑀦𑀺𑀥𑀸𑀬 𑀤𑀡𑁆𑀟𑀁 𑀪𑀽𑀢𑁂𑀲𑀼, 𑀢𑀲𑁂𑀲𑀼 𑀣𑀸𑀯𑀭𑁂𑀲𑀼 𑀘;

𑀬𑁄 𑀦 𑀳𑀦𑁆𑀢𑀺 𑀦 𑀖𑀸𑀢𑁂𑀢𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁬.

𑀅𑀯𑀺𑀭𑀼𑀤𑁆𑀥𑀁 𑀯𑀺𑀭𑀼𑀤𑁆𑀥𑁂𑀲𑀼, 𑀅𑀢𑁆𑀢𑀤𑀡𑁆𑀟𑁂𑀲𑀼 𑀦𑀺𑀩𑁆𑀩𑀼𑀢𑀁;

𑀲𑀸𑀤𑀸𑀦𑁂𑀲𑀼 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁭.

𑀬𑀲𑁆𑀲 𑀭𑀸𑀕𑁄 𑀘 𑀤𑁄𑀲𑁄 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀧𑀸𑀢𑀺𑀢𑁄;

𑀲𑀸𑀲𑀧𑁄𑀭𑀺𑀯 ¶ 𑀆𑀭𑀕𑁆𑀕𑀸 [𑀆𑀭𑀕𑁆𑀕𑁂 (𑀓.)], 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁮.

𑀅𑀓𑀓𑁆𑀓𑀲𑀁 ¶ ¶ 𑀯𑀺𑀜𑁆𑀜𑀸𑀧𑀦𑀺𑀁, 𑀕𑀺𑀭𑀁 𑀲𑀘𑁆𑀘𑀫𑀼𑀤𑀻𑀭𑀬𑁂;

𑀬𑀸𑀬 𑀦𑀸𑀪𑀺𑀲𑀚𑁂 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.)], 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁦𑁯.

𑀬𑁄𑀥 𑀤𑀻𑀖𑀁 𑀯 𑀭𑀲𑁆𑀲𑀁 𑀯𑀸, 𑀅𑀡𑀼𑀁 𑀣𑀽𑀮𑀁 𑀲𑀼𑀪𑀸𑀲𑀼𑀪𑀁;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀢𑀺 [𑀦𑀸𑀤𑁂𑀢𑀺 (𑀫. 𑀦𑀺. 𑁨.𑁪𑁫𑁯)], 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁦.

𑀆𑀲𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀦𑀺𑀭𑀸𑀲𑀸𑀲𑀁 [𑀦𑀺𑀭𑀸𑀲𑀬𑀁 (𑀲𑀻. 𑀲𑁆𑀬𑀸. 𑀧𑀻.), 𑀦𑀺𑀭𑀸𑀲𑀓𑀁 (?)] 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁧.

𑀬𑀲𑁆𑀲𑀸𑀮𑀬𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸𑀬 𑀅𑀓𑀣𑀁𑀓𑀣𑀻;

𑀅𑀫𑀢𑁄𑀕𑀥𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁨.

𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀉𑀪𑁄 𑀲𑀗𑁆𑀕𑀫𑀼𑀧𑀘𑁆𑀘𑀕𑀸;

𑀅𑀲𑁄𑀓𑀁 𑀯𑀺𑀭𑀚𑀁 𑀲𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁩.

𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁪.

𑀬𑁄𑀫𑀁 ¶ [𑀬𑁄 𑀇𑀫𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀮𑀺𑀧𑀣𑀁 𑀤𑀼𑀕𑁆𑀕𑀁, 𑀲𑀁𑀲𑀸𑀭𑀁 𑀫𑁄𑀳𑀫𑀘𑁆𑀘𑀕𑀸;

𑀢𑀺𑀡𑁆𑀡𑁄 𑀧𑀸𑀭𑀕𑀢𑁄 [𑀧𑀸𑀭𑀕𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀛𑀸𑀬𑀻, 𑀅𑀦𑁂𑀚𑁄 𑀅𑀓𑀣𑀁𑀓𑀣𑀻;

𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑁄, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁫.

𑀬𑁄𑀥 ¶ 𑀓𑀸𑀫𑁂 𑀧𑀳𑀦𑁆𑀢𑁆𑀯𑀸𑀦 [𑀧𑀳𑀢𑁆𑀯𑀸𑀦 (𑀲𑀻. 𑀧𑀻.)], 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀓𑀸𑀫𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁 [𑀇𑀤𑀁 𑀕𑀸𑀣𑀸𑀤𑁆𑀯𑀬𑀁 𑀯𑀺𑀤𑁂𑀲𑀧𑁄𑀢𑁆𑀣𑀓𑁂𑀲𑀼 𑀲𑀓𑀺𑀤𑁂𑀯 𑀤𑀲𑁆𑀲𑀺𑀢𑀁].

𑁪𑁧𑁬.

𑀬𑁄𑀥 𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦, 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀢𑀡𑁆𑀳𑀸𑀪𑀯𑀧𑀭𑀺𑀓𑁆𑀔𑀻𑀡𑀁 ¶ , 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁭.

𑀳𑀺𑀢𑁆𑀯𑀸 ¶ 𑀫𑀸𑀦𑀼𑀲𑀓𑀁 𑀬𑁄𑀕𑀁, 𑀤𑀺𑀩𑁆𑀩𑀁 𑀬𑁄𑀕𑀁 𑀉𑀧𑀘𑁆𑀘𑀕𑀸;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁮.

𑀳𑀺𑀢𑁆𑀯𑀸 𑀭𑀢𑀺𑀜𑁆𑀘 𑀅𑀭𑀢𑀺𑀜𑁆𑀘, 𑀲𑀻𑀢𑀺𑀪𑀽𑀢𑀁 𑀦𑀺𑀭𑀽𑀧𑀥𑀺𑀁;

𑀲𑀩𑁆𑀩𑀮𑁄𑀓𑀸𑀪𑀺𑀪𑀼𑀁 𑀯𑀻𑀭𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁧𑁯.

𑀘𑀼𑀢𑀺𑀁 𑀬𑁄 𑀯𑁂𑀤𑀺 𑀲𑀢𑁆𑀢𑀸𑀦𑀁, 𑀉𑀧𑀧𑀢𑁆𑀢𑀺𑀜𑁆𑀘 𑀲𑀩𑁆𑀩𑀲𑁄;

𑀅𑀲𑀢𑁆𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁨𑁦.

𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸;

𑀔𑀻𑀡𑀸𑀲𑀯𑀁 𑀅𑀭𑀳𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁨𑁧.

𑀬𑀲𑁆𑀲 ¶ 𑀧𑀼𑀭𑁂 𑀘 𑀧𑀘𑁆𑀙𑀸 𑀘, 𑀫𑀚𑁆𑀛𑁂 𑀘 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁨𑁨.

𑀉𑀲𑀪𑀁 ¶ 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀅𑀦𑁂𑀚𑀁 𑀦𑁆𑀳𑀸𑀢𑀓𑀁 [𑀦𑀳𑀸𑀢𑀓𑀁 (𑀲𑀻. 𑀲𑁆𑀬𑀸. 𑀓𑀁 𑀧𑀻.)] 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁨𑁩.

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀺, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺,

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺;

𑀲𑀩𑁆𑀩𑀯𑁄𑀲𑀺𑀢𑀯𑁄𑀲𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 𑀙𑀩𑁆𑀩𑀻𑀲𑀢𑀺𑀫𑁄 𑀦𑀺𑀝𑁆𑀞𑀺𑀢𑁄.

(𑀏𑀢𑁆𑀢𑀸𑀯𑀢𑀸 ¶ 𑀲𑀩𑁆𑀩𑀧𑀞𑀫𑁂 𑀬𑀫𑀓𑀯𑀕𑁆𑀕𑁂 𑀘𑀼𑀤𑁆𑀤𑀲 𑀯𑀢𑁆𑀣𑀽𑀦𑀺, 𑀅𑀧𑁆𑀧𑀫𑀸𑀤𑀯𑀕𑁆𑀕𑁂 𑀦𑀯, 𑀘𑀺𑀢𑁆𑀢𑀯𑀕𑁆𑀕𑁂 𑀦𑀯, 𑀧𑀼𑀧𑁆𑀨𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀩𑀸𑀮𑀯𑀕𑁆𑀕𑁂 𑀧𑀦𑁆𑀦𑀭𑀲, 𑀧𑀡𑁆𑀟𑀺𑀢𑀯𑀕𑁆𑀕𑁂 𑀏𑀓𑀸𑀤𑀲, 𑀅𑀭𑀳𑀦𑁆𑀢𑀯𑀕𑁆𑀕𑁂 𑀤𑀲, 𑀲𑀳𑀲𑁆𑀲𑀯𑀕𑁆𑀕𑁂 𑀘𑀼𑀤𑁆𑀤𑀲, 𑀧𑀸𑀧𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀤𑀡𑁆𑀟𑀯𑀕𑁆𑀕𑁂 𑀏𑀓𑀸𑀤𑀲, 𑀚𑀭𑀸𑀯𑀕𑁆𑀕𑁂 𑀦𑀯, 𑀅𑀢𑁆𑀢𑀯𑀕𑁆𑀕𑁂 𑀤𑀲, 𑀮𑁄𑀓𑀯𑀕𑁆𑀕𑁂 𑀏𑀓𑀸𑀤𑀲, 𑀩𑀼𑀤𑁆𑀥𑀯𑀕𑁆𑀕𑁂 𑀦𑀯 [𑀅𑀝𑁆𑀞 (𑀓.)], 𑀲𑀼𑀔𑀯𑀕𑁆𑀕𑁂 𑀅𑀝𑁆𑀞, 𑀧𑀺𑀬𑀯𑀕𑁆𑀕𑁂 𑀦𑀯, 𑀓𑁄𑀥𑀯𑀕𑁆𑀕𑁂 𑀅𑀝𑁆𑀞, 𑀫𑀮𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀥𑀫𑁆𑀫𑀝𑁆𑀞𑀯𑀕𑁆𑀕𑁂 𑀤𑀲, 𑀫𑀕𑁆𑀕𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀧𑀓𑀺𑀡𑁆𑀡𑀓𑀯𑀕𑁆𑀕𑁂 𑀦𑀯, 𑀦𑀺𑀭𑀬𑀯𑀕𑁆𑀕𑁂 𑀦𑀯, 𑀦𑀸𑀕𑀯𑀕𑁆𑀕𑁂 𑀅𑀝𑁆𑀞, 𑀢𑀡𑁆𑀳𑀸𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀪𑀺𑀓𑁆𑀔𑀼𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀘𑀢𑁆𑀢𑀸𑀮𑀻𑀲𑀸𑀢𑀺 𑀧𑀜𑁆𑀘𑀸𑀥𑀺𑀓𑀸𑀦𑀺 𑀢𑀻𑀡𑀺 𑀯𑀢𑁆𑀣𑀼𑀲𑀢𑀸𑀦𑀺.

𑀲𑀢𑁂𑀯𑀻𑀲𑀘𑀢𑀼𑀲𑁆𑀲𑀢𑀸, 𑀘𑀢𑀼𑀲𑀘𑁆𑀘𑀯𑀺𑀪𑀸𑀯𑀺𑀦𑀸;

𑀲𑀢𑀢𑁆𑀢𑀬𑀜𑁆𑀘 𑀯𑀢𑁆𑀣𑀽𑀦𑀁, 𑀧𑀜𑁆𑀘𑀸𑀥𑀺𑀓𑀁 𑀲𑀫𑀼𑀝𑁆𑀞𑀺𑀢𑀸𑀢𑀺) [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀯𑀺𑀤𑁂𑀲𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀅𑀝𑁆𑀞𑀓𑀣𑀸𑀲𑀼𑀬𑁂𑀯 𑀤𑀺𑀲𑁆𑀲𑀢𑀺].

[𑀥𑀫𑁆𑀫𑀧𑀤𑀲𑁆𑀲 𑀯𑀕𑁆𑀕𑀲𑁆𑀲𑀼𑀤𑁆𑀤𑀸𑀦𑀁§𑀬𑀫𑀓𑀁 𑀧𑀫𑀸𑀤𑀁 𑀘𑀺𑀢𑁆𑀢𑀁, 𑀧𑀼𑀧𑁆𑀨𑀁 𑀩𑀸𑀮𑀜𑁆𑀘 𑀧𑀡𑁆𑀟𑀺𑀢𑀁.§𑀭𑀳𑀦𑁆𑀢𑀁 𑀲𑀳𑀲𑁆𑀲𑀁 𑀧𑀸𑀧𑀁, 𑀤𑀡𑁆𑀟𑀁 𑀚𑀭𑀸 𑀅𑀢𑁆𑀢𑀮𑁄𑀓𑀁.§𑀩𑀼𑀤𑁆𑀥𑀁 𑀲𑀼𑀔𑀁 𑀧𑀺𑀬𑀁 𑀓𑁄𑀥𑀁, 𑀫𑀮𑀁 𑀥𑀫𑁆𑀫𑀝𑁆𑀞𑀫𑀕𑁆𑀕𑀜𑁆𑀘.§𑀧𑀓𑀺𑀡𑁆𑀡𑀓𑀁 𑀦𑀺𑀭𑀬𑀁 𑀦𑀸𑀕𑀁, 𑀢𑀡𑁆𑀳𑀸 𑀪𑀺𑀓𑁆𑀔𑀽 𑀘 𑀩𑁆𑀭𑀸𑀳𑁆𑀫𑀡𑁄.§𑀕𑀸𑀣𑀸𑀬𑀼𑀤𑁆𑀤𑀸𑀦𑀁§𑀬𑀫𑀓𑁂 𑀯𑀻𑀲𑀕𑀸𑀣𑀸𑀬𑁄, 𑀅𑀧𑁆𑀧𑀫𑀸𑀤𑀮𑁄𑀓𑀫𑁆𑀳𑀺 𑀘.§𑀧𑀺𑀬𑁂 𑀤𑁆𑀯𑀸𑀤𑀲𑀕𑀸𑀣𑀸𑀬𑁄, 𑀘𑀺𑀢𑁆𑀢𑁂 𑀚𑀭𑀢𑁆𑀢𑁂𑀓𑀸𑀤𑀲.§𑀧𑀼𑀧𑁆𑀨𑀩𑀸𑀮𑀲𑀳𑀲𑁆𑀲𑀫𑁆𑀳𑀺, 𑀩𑀼𑀤𑁆𑀥 𑀫𑀕𑁆𑀕 𑀧𑀓𑀺𑀡𑁆𑀡𑀓𑁂.§𑀲𑁄𑀴𑀲 𑀧𑀡𑁆𑀟𑀺𑀢𑁂 𑀓𑁄𑀥𑁂, 𑀦𑀺𑀭𑀬𑁂 𑀦𑀸𑀕𑁂 𑀘𑀢𑀼𑀤𑁆𑀤𑀲.§𑀅𑀭𑀳𑀦𑁆𑀢𑁂 𑀤𑀲𑀕𑁆𑀕𑀸𑀣𑀸, 𑀧𑀸𑀧𑀲𑀼𑀔𑀫𑁆𑀳𑀺 𑀢𑁂𑀭𑀲.§𑀲𑀢𑁆𑀢𑀭𑀲 𑀤𑀡𑁆𑀟𑀥𑀫𑁆𑀫𑀝𑁆𑀞𑁂, 𑀫𑀮𑀫𑁆𑀳𑀺 𑀏𑀓𑀯𑀻𑀲𑀢𑀺.§𑀢𑀡𑁆𑀳𑀸𑀯𑀕𑁆𑀕𑁂 𑀲𑀢𑁆𑀢𑀩𑁆𑀩𑀻𑀲, 𑀢𑁂𑀯𑀻𑀲 𑀪𑀺𑀓𑁆𑀔𑀼𑀯𑀕𑁆𑀕𑀫𑁆𑀳𑀺.§𑀩𑁆𑀭𑀸𑀳𑁆𑀫𑀡𑁂 𑀏𑀓𑀢𑀸𑀮𑀻𑀲, 𑀘𑀢𑀼𑀲𑁆𑀲𑀢𑀸 𑀲𑀢𑁂𑀯𑀻𑀲. (𑀓.)]

𑀥𑀫𑁆𑀫𑀧𑀤𑁂 𑀯𑀕𑁆𑀕𑀸𑀦𑀫𑀼𑀤𑁆𑀤𑀸𑀦𑀁 𑁋

𑀬𑀫𑀓𑀧𑁆𑀧𑀫𑀸𑀤𑁄 ¶ 𑀘𑀺𑀢𑁆𑀢𑀁, 𑀧𑀼𑀧𑁆𑀨𑀁 𑀩𑀸𑀮𑁂𑀦 𑀧𑀡𑁆𑀟𑀺𑀢𑁄;

𑀅𑀭𑀳𑀦𑁆𑀢𑁄 𑀲𑀳𑀲𑁆𑀲𑀜𑁆𑀘, 𑀧𑀸𑀧𑀁 𑀤𑀡𑁆𑀟𑁂𑀦 𑀢𑁂 𑀤𑀲.

𑀚𑀭𑀸 ¶ 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀩𑀼𑀤𑁆𑀥𑁄 𑀲𑀼𑀔𑀁 𑀧𑀺𑀬𑁂𑀦 𑀘;

𑀓𑁄𑀥𑁄 𑀫𑀮𑀜𑁆𑀘 𑀥𑀫𑁆𑀫𑀝𑁆𑀞𑁄, 𑀫𑀕𑁆𑀕𑀯𑀕𑁆𑀕𑁂𑀦 𑀯𑀻𑀲𑀢𑀺.

𑀧𑀓𑀺𑀡𑁆𑀡𑀁 𑀦𑀺𑀭𑀬𑁄 𑀦𑀸𑀕𑁄, 𑀢𑀡𑁆𑀳𑀸 𑀪𑀺𑀓𑁆𑀔𑀼 𑀘 𑀩𑁆𑀭𑀸𑀳𑁆𑀫𑀡𑁄;

𑀏𑀢𑁂 𑀙𑀩𑁆𑀩𑀻𑀲𑀢𑀺 𑀯𑀕𑁆𑀕𑀸, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀕𑀸𑀣𑀸𑀦𑀫𑀼𑀤𑁆𑀤𑀸𑀦𑀁 𑁋

𑀬𑀫𑀓𑁂 𑀯𑀻𑀲𑀢𑀺 𑀕𑀸𑀣𑀸, 𑀅𑀧𑁆𑀧𑀫𑀸𑀤𑀫𑁆𑀳𑀺 𑀤𑁆𑀯𑀸𑀤𑀲;

𑀏𑀓𑀸𑀤𑀲 𑀘𑀺𑀢𑁆𑀢𑀯𑀕𑁆𑀕𑁂, 𑀧𑀼𑀧𑁆𑀨𑀯𑀕𑁆𑀕𑀫𑁆𑀳𑀺 𑀲𑁄𑀴𑀲.

𑀩𑀸𑀮𑁂 𑀘 𑀲𑁄𑀴𑀲 𑀕𑀸𑀣𑀸, 𑀧𑀡𑁆𑀟𑀺𑀢𑀫𑁆𑀳𑀺 𑀘𑀢𑀼𑀤𑁆𑀤𑀲;

𑀅𑀭𑀳𑀦𑁆𑀢𑁂 𑀤𑀲 𑀕𑀸𑀣𑀸, 𑀲𑀳𑀲𑁆𑀲𑁂 𑀳𑁄𑀦𑁆𑀢𑀺 𑀲𑁄𑀴𑀲.

𑀢𑁂𑀭𑀲 𑀧𑀸𑀧𑀯𑀕𑁆𑀕𑀫𑁆𑀳𑀺, 𑀤𑀡𑁆𑀟𑀫𑁆𑀳𑀺 𑀤𑀲 𑀲𑀢𑁆𑀢 𑀘;

𑀏𑀓𑀸𑀤𑀲 𑀚𑀭𑀸 𑀯𑀕𑁆𑀕𑁂, 𑀅𑀢𑁆𑀢𑀯𑀕𑁆𑀕𑀫𑁆𑀳𑀺 𑀢𑀸 𑀤𑀲.

𑀤𑁆𑀯𑀸𑀤𑀲 ¶ ¶ 𑀮𑁄𑀓𑀯𑀕𑁆𑀕𑀫𑁆𑀳𑀺, 𑀩𑀼𑀤𑁆𑀥𑀯𑀕𑁆𑀕𑀫𑁆𑀳𑀺 𑀞𑀸𑀭𑀲 [𑀲𑁄𑀴𑀲 (𑀲𑀩𑁆𑀩𑀢𑁆𑀣)];

𑀲𑀼𑀔𑁂 𑀘 𑀧𑀺𑀬𑀯𑀕𑁆𑀕𑁂 𑀘, 𑀕𑀸𑀣𑀸𑀬𑁄 𑀳𑁄𑀦𑁆𑀢𑀺 𑀤𑁆𑀯𑀸𑀤𑀲.

𑀘𑀼𑀤𑁆𑀤𑀲 𑀓𑁄𑀥𑀯𑀕𑁆𑀕𑀫𑁆𑀳𑀺, 𑀫𑀮𑀯𑀕𑁆𑀕𑁂𑀓𑀯𑀻𑀲𑀢𑀺;

𑀲𑀢𑁆𑀢𑀭𑀲 𑀘 𑀥𑀫𑁆𑀫𑀝𑁆𑀞𑁂, 𑀫𑀕𑁆𑀕𑀯𑀕𑁆𑀕𑁂 𑀲𑀢𑁆𑀢𑀭𑀲.

𑀧𑀓𑀺𑀡𑁆𑀡𑁂 𑀲𑁄𑀴𑀲 𑀕𑀸𑀣𑀸, 𑀦𑀺𑀭𑀬𑁂 𑀦𑀸𑀕𑁂 𑀘 𑀘𑀼𑀤𑁆𑀤𑀲;

𑀙𑀩𑁆𑀩𑀻𑀲 𑀢𑀡𑁆𑀳𑀸𑀯𑀕𑁆𑀕𑀫𑁆𑀳𑀺, 𑀢𑁂𑀯𑀻𑀲 𑀪𑀺𑀓𑁆𑀔𑀼𑀯𑀕𑁆𑀕𑀺𑀓𑀸.

𑀏𑀓𑀢𑀸𑀮𑀻𑀲𑀕𑀸𑀣𑀸𑀬𑁄, 𑀩𑁆𑀭𑀸𑀳𑁆𑀫𑀡𑁂 𑀯𑀕𑁆𑀕𑀫𑀼𑀢𑁆𑀢𑀫𑁂;

𑀕𑀸𑀣𑀸𑀲𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀢𑁂𑀯𑀻𑀲 𑀘 𑀧𑀼𑀦𑀸𑀧𑀭𑁂;

𑀥𑀫𑁆𑀫𑀧𑀤𑁂 𑀦𑀺𑀧𑀸𑀢𑀫𑁆𑀳𑀺, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺.

𑀥𑀫𑁆𑀫𑀧𑀤𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.