📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀉𑀢𑁆𑀢𑀫𑀁 ¶ ¶ ¶ 𑀯𑀦𑁆𑀤𑀦𑁂𑀬𑁆𑀬𑀸𑀦𑀁, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁;

𑀬𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑀫𑁆𑀳𑀺, 𑀔𑀼𑀤𑁆𑀤𑀸𑀘𑀸𑀭𑀧𑁆𑀧𑀳𑀸𑀬𑀺𑀦𑀸.

𑀤𑁂𑀲𑀺𑀢𑁄 𑀮𑁄𑀓𑀦𑀸𑀣𑁂𑀦, 𑀮𑁄𑀓𑀦𑀺𑀲𑁆𑀲𑀭𑀡𑁂𑀲𑀺𑀦𑀸;

𑀢𑀲𑁆𑀲 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀅𑀬𑀁 ¶ 𑀲𑀼𑀢𑁆𑀢𑀦𑀺𑀧𑀸𑀢𑁄 𑀘, 𑀔𑀼𑀤𑁆𑀤𑀓𑁂𑀲𑁆𑀯𑁂𑀯 𑀑𑀕𑀥𑁄;

𑀬𑀲𑁆𑀫𑀸 𑀢𑀲𑁆𑀫𑀸 𑀇𑀫𑀲𑁆𑀲𑀸𑀧𑀺, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀕𑀸𑀣𑀸𑀲𑀢𑀲𑀫𑀸𑀓𑀺𑀡𑁆𑀡𑁄, 𑀕𑁂𑀬𑁆𑀬𑀩𑁆𑀬𑀸𑀓𑀭𑀡𑀗𑁆𑀓𑀺𑀢𑁄;

𑀓𑀲𑁆𑀫𑀸 𑀲𑀼𑀢𑁆𑀢𑀦𑀺𑀧𑀸𑀢𑁄𑀢𑀺, 𑀲𑀗𑁆𑀔𑀫𑁂𑀲 𑀕𑀢𑁄𑀢𑀺 𑀘𑁂.

𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄, 𑀅𑀢𑁆𑀣𑀸𑀦𑀁 𑀲𑀼𑀝𑁆𑀞𑀼 𑀢𑀸𑀡𑀢𑁄;

𑀲𑀽𑀘𑀦𑀸 𑀲𑀽𑀤𑀦𑀸 𑀘𑁂𑀯, 𑀬𑀲𑁆𑀫𑀸 𑀲𑀼𑀢𑁆𑀢𑀁 𑀧𑀯𑀼𑀘𑁆𑀘𑀢𑀺.

𑀢𑀣𑀸𑀭𑀽𑀧𑀸𑀦𑀺 𑀲𑀼𑀢𑁆𑀢𑀸𑀦𑀺, 𑀦𑀺𑀧𑀸𑀢𑁂𑀢𑁆𑀯𑀸 𑀢𑀢𑁄 𑀢𑀢𑁄;

𑀲𑀫𑀽𑀳𑀢𑁄 𑀅𑀬𑀁 𑀢𑀲𑁆𑀫𑀸, 𑀲𑀗𑁆𑀔𑀫𑁂𑀯𑀫𑀼𑀧𑀸𑀕𑀢𑁄.

𑀲𑀩𑁆𑀩𑀸𑀦𑀺 𑀘𑀸𑀧𑀺 𑀲𑀼𑀢𑁆𑀢𑀸𑀦𑀺, 𑀧𑀫𑀸𑀡𑀦𑁆𑀢𑁂𑀦 𑀢𑀸𑀤𑀺𑀦𑁄;

𑀯𑀘𑀦𑀸𑀦𑀺 𑀅𑀬𑀁 𑀢𑁂𑀲𑀁, 𑀦𑀺𑀧𑀸𑀢𑁄 𑀘 𑀬𑀢𑁄 𑀢𑀢𑁄.

𑀅𑀜𑁆𑀜𑀲𑀗𑁆𑀔𑀸𑀦𑀺𑀫𑀺𑀢𑁆𑀢𑀸𑀦𑀁, 𑀯𑀺𑀲𑁂𑀲𑀸𑀦𑀫𑀪𑀸𑀯𑀢𑁄;

𑀲𑀗𑁆𑀔𑀁 𑀲𑀼𑀢𑁆𑀢𑀦𑀺𑀧𑀸𑀢𑁄𑀢𑀺, 𑀏𑀯𑀫𑁂𑀯 𑀲𑀫𑀚𑁆𑀛𑀕𑀸𑀢𑀺.

𑁧. 𑀉𑀭𑀕𑀯𑀕𑁆𑀕𑁄

𑁧. 𑀉𑀭𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 ¶ ¶ 𑀲𑀫𑀥𑀺𑀕𑀢𑀲𑀗𑁆𑀔𑁄 𑀘 𑀬𑀲𑁆𑀫𑀸 𑀏𑀲 𑀯𑀕𑁆𑀕𑀢𑁄 𑀉𑀭𑀕𑀯𑀕𑁆𑀕𑁄, 𑀘𑀽𑀴𑀯𑀕𑁆𑀕𑁄, 𑀫𑀳𑀸𑀯𑀕𑁆𑀕𑁄, 𑀅𑀝𑁆𑀞𑀓𑀯𑀕𑁆𑀕𑁄, 𑀧𑀸𑀭𑀸𑀬𑀦𑀯𑀕𑁆𑀕𑁄𑀢𑀺 𑀧𑀜𑁆𑀘 𑀯𑀕𑁆𑀕𑀸 𑀳𑁄𑀦𑁆𑀢𑀺; 𑀢𑁂𑀲𑀼 𑀉𑀭𑀕𑀯𑀕𑁆𑀕𑁄 𑀆𑀤𑀺. 𑀲𑀼𑀢𑁆𑀢𑀢𑁄 𑀉𑀭𑀕𑀯𑀕𑁆𑀕𑁂 𑀤𑁆𑀯𑀸𑀤𑀲 𑀲𑀼𑀢𑁆𑀢𑀸𑀦𑀺, 𑀘𑀽𑀴𑀯𑀕𑁆𑀕𑁂 𑀘𑀼𑀤𑁆𑀤𑀲, 𑀫𑀳𑀸𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀅𑀝𑁆𑀞𑀓𑀯𑀕𑁆𑀕𑁂 𑀲𑁄𑀴𑀲, 𑀧𑀸𑀭𑀸𑀬𑀦𑀯𑀕𑁆𑀕𑁂 𑀲𑁄𑀴𑀲𑀸𑀢𑀺 𑀲𑀢𑁆𑀢𑀢𑀺 𑀲𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀉𑀭𑀕𑀲𑀼𑀢𑁆𑀢𑀁 𑀆𑀤𑀺. 𑀧𑀭𑀺𑀬𑀢𑁆𑀢𑀺𑀧𑀫𑀸𑀡𑀢𑁄 𑀅𑀝𑁆𑀞 ¶ 𑀪𑀸𑀡𑀯𑀸𑀭𑀸. 𑀏𑀯𑀁 𑀯𑀕𑁆𑀕𑀲𑀼𑀢𑁆𑀢𑀧𑀭𑀺𑀬𑀢𑁆𑀢𑀺𑀧𑀫𑀸𑀡𑀯𑀢𑁄 𑀧𑀦𑀲𑁆𑀲 𑁋

‘‘𑀬𑁄 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁, 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀺;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯 𑀢𑀘𑀁 𑀧𑀼𑀭𑀸𑀡’’𑀦𑁆𑀢𑀺. 𑁋

𑀅𑀬𑀁 𑀕𑀸𑀣𑀸 𑀆𑀤𑀺. 𑀢𑀲𑁆𑀫𑀸 𑀅𑀲𑁆𑀲𑀸 𑀇𑀢𑁄 𑀧𑀪𑀼𑀢𑀺 𑀅𑀢𑁆𑀣𑀯𑀡𑁆𑀡𑀦𑀁 𑀓𑀸𑀢𑀼𑀁 𑀇𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀬𑁂𑀦 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀯𑀼𑀢𑁆𑀢𑀸 𑀕𑀸𑀣𑀸 𑀅𑀬𑀁 𑀇𑀫𑀁;

𑀯𑀺𑀥𑀺𑀁 𑀧𑀓𑀸𑀲𑀬𑀺𑀢𑁆𑀯𑀸𑀲𑁆𑀲𑀸, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺.

𑀓𑁂𑀦 𑀧𑀦𑀸𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸, 𑀓𑀢𑁆𑀣, 𑀓𑀤𑀸, 𑀓𑀲𑁆𑀫𑀸 𑀘 𑀯𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑁄 𑀲𑁄 𑀪𑀕𑀯𑀸 𑀘𑀢𑀼𑀯𑀻𑀲𑀢𑀺𑀩𑀼𑀤𑁆𑀥𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁, 𑀢𑀸𑀯 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀉𑀧𑁆𑀧𑀚𑁆𑀚𑀺, 𑀢𑀢𑁄𑀧𑀺 𑀘𑀯𑀺𑀢𑁆𑀯𑀸 𑀲𑀓𑁆𑀬𑀭𑀸𑀚𑀓𑀼𑀮𑁂 𑀉𑀧𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀓𑀢𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁄 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀤𑁂𑀯-𑀫𑀦𑀼𑀲𑁆𑀲𑀸𑀦𑀁 𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑁂𑀦 𑀪𑀕𑀯𑀢𑀸 𑀲𑀬𑀫𑁆𑀪𑀼𑀦𑀸 𑀅𑀦𑀸𑀘𑀭𑀺𑀬𑀓𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀸. 𑀲𑀸 𑀘 𑀧𑀦 𑀆𑀴𑀯𑀺𑀬𑀁. 𑀬𑀤𑀸 𑀘 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀤𑀸 𑀢𑀢𑁆𑀣 𑀉𑀧𑀕𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀯𑀺𑀲𑁆𑀲𑀚𑁆𑀚𑀦𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀤𑀽𑀭𑁂𑀦𑀺𑀤𑀸𑀦𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫 𑀤𑀻𑀧𑀗𑁆𑀓𑀭𑀢𑁄 ¶ 𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀣𑀸 ¶ , 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫 𑀢𑀼𑀲𑀺𑀢𑀪𑀯𑀦𑀢𑁄 𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀣𑀸, 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀦𑀸𑀫 𑀩𑁄𑀥𑀺𑀫𑀡𑁆𑀟𑀢𑁄 𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀓𑀣𑀸𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀜𑁆𑀘 𑀤𑀽𑀭𑁂𑀦𑀺𑀤𑀸𑀦𑁂𑀬𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀤𑀽𑀭𑁂𑀦𑀺𑀤𑀸𑀦𑀯𑀲𑁂𑀦𑁂𑀯𑁂𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑁆𑀲𑀚𑁆𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀢𑀺 𑀇𑀥 𑀦 𑀯𑀺𑀢𑁆𑀣𑀸𑀭𑀺𑀢𑀸. 𑀢𑀢𑁄 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀲𑀸𑀯𑀢𑁆𑀣𑀺𑀬𑀁 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀁, 𑀇𑀥 𑀆𑀴𑀯𑀺𑀬𑀁. 𑀬𑀣𑀸𑀳 𑁋

‘‘𑀢𑁂𑀦 ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀺𑀧𑀺 𑀙𑁂𑀤𑀸𑀧𑁂𑀦𑁆𑀢𑀺𑀧𑀺. 𑀅𑀜𑁆𑀜𑀢𑀭𑁄𑀧𑀺 𑀆𑀴𑀯𑀓𑁄 𑀪𑀺𑀓𑁆𑀔𑀼 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀫𑀸, 𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀪𑀯𑀦𑀁 𑀓𑀢𑁆𑀢𑀼𑀓𑀸𑀫𑁄 𑀫𑀬𑁆𑀳𑀁 𑀪𑀯𑀦𑀁 𑀙𑀺𑀦𑁆𑀤𑀻’𑀢𑀺. 𑀲𑁄 𑀪𑀺𑀓𑁆𑀔𑀼 𑀅𑀦𑀸𑀤𑀺𑀬𑀦𑁆𑀢𑁄 𑀙𑀺𑀦𑁆𑀤𑀺𑀬𑁂𑀯. 𑀢𑀲𑁆𑀲𑀸 𑀘 𑀤𑁂𑀯𑀢𑀸𑀬 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀆𑀓𑁄𑀝𑁂𑀲𑀺. 𑀅𑀣 𑀔𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀇𑀥𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀇𑀥𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀁, 𑀬𑀁𑀦𑀽𑀦𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘𑀲𑀸𑀥𑀼, 𑀲𑀸𑀥𑀼 𑀤𑁂𑀯𑀢𑁂, 𑀲𑀸𑀥𑀼 𑀔𑁄 𑀢𑁆𑀯𑀁, 𑀤𑁂𑀯𑀢𑁂, 𑀢𑀁 𑀪𑀺𑀓𑁆𑀔𑀼𑀁 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑀺. 𑀲𑀘𑀚𑁆𑀚 𑀢𑁆𑀯𑀁, 𑀤𑁂𑀯𑀢𑁂, 𑀢𑀁 𑀪𑀺𑀓𑁆𑀔𑀼𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀲𑀺, 𑀩𑀳𑀼𑀜𑁆𑀘 𑀢𑁆𑀯𑀁, 𑀤𑁂𑀯𑀢𑁂, 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀸𑀲𑀺. 𑀕𑀘𑁆𑀙 𑀢𑁆𑀯𑀁, 𑀤𑁂𑀯𑀢𑁂, 𑀅𑀫𑀼𑀓𑀲𑁆𑀫𑀺𑀁 𑀑𑀓𑀸𑀲𑁂 𑀭𑀼𑀓𑁆𑀔𑁄 𑀯𑀺𑀯𑀺𑀢𑁆𑀢𑁄, 𑀢𑀲𑁆𑀫𑀺𑀁 𑀉𑀧𑀕𑀘𑁆𑀙𑀸’’’𑀢𑀺 (𑀧𑀸𑀘𑀺. 𑁮𑁯).

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀪𑀕𑀯𑀸 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀉𑀧𑁆𑀧𑀦𑁆𑀦𑀓𑁄𑀥𑀯𑀺𑀦𑀬𑀦𑀢𑁆𑀣𑀁 𑁋

‘‘𑀬𑁄 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁, 𑀭𑀣𑀁 𑀪𑀦𑁆𑀢𑀁𑀯 𑀯𑀸𑀭𑀬𑁂’’𑀢𑀺. (𑀥. 𑀧. 𑁨𑁨𑁨) 𑁋

𑀇𑀫𑀁 ¶ 𑀕𑀸𑀣𑀁 𑀅𑀪𑀸𑀲𑀺. 𑀢𑀢𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺𑀧𑀺, 𑀙𑁂𑀤𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’’𑀢𑀺 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀺𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀆𑀭𑁄𑀘𑀺𑀢𑁄 𑀪𑀕𑀯𑀸 𑁋 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁦) 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀉𑀧𑀕𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑁋

‘‘𑀬𑁄 ¶ 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁,

𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀻’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺. 𑀏𑀯𑀫𑀺𑀤𑀁 𑀏𑀓𑀁𑀬𑁂𑀯 ¶ 𑀯𑀢𑁆𑀣𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀗𑁆𑀕𑀳𑀁 𑀕𑀢𑀁 𑁋 𑀯𑀺𑀦𑀬𑁂, 𑀥𑀫𑁆𑀫𑀧𑀤𑁂, 𑀲𑀼𑀢𑁆𑀢𑀦𑀺𑀧𑀸𑀢𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀬𑀸 𑀲𑀸 𑀫𑀸𑀢𑀺𑀓𑀸 𑀞𑀧𑀺𑀢𑀸 𑁋

‘‘𑀬𑁂𑀦 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀯𑀼𑀢𑁆𑀢𑀸 𑀕𑀸𑀣𑀸 𑀅𑀬𑀁 𑀇𑀫𑀁;

𑀯𑀺𑀥𑀺 𑀧𑀓𑀸𑀲𑀬𑀺𑀢𑁆𑀯𑀸𑀲𑁆𑀲𑀸, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺. 𑁋

𑀲𑀸 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀓𑀸𑀲𑀺𑀢𑀸 𑀳𑁄𑀢𑀺 𑀞𑀧𑁂𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁.

𑁧. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀔𑀢𑁆𑀢𑀺𑀬𑀓𑀼𑀮𑀸 𑀯𑀸 𑀧𑀩𑁆𑀩𑀚𑀺𑀢𑁄, 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀯𑀸 𑀧𑀩𑁆𑀩𑀚𑀺𑀢𑁄, 𑀦𑀯𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸 𑀣𑁂𑀭𑁄 𑀯𑀸. 𑀉𑀧𑁆𑀧𑀢𑀺𑀢𑀦𑁆𑀢𑀺 𑀉𑀤𑁆𑀥𑀫𑀼𑀤𑁆𑀥𑀁 𑀧𑀢𑀺𑀢𑀁 𑀕𑀢𑀁, 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄, 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑁆𑀧𑀦𑁆𑀦𑀜𑁆𑀘 𑀦𑀸𑀫𑁂𑀢𑀁 𑀯𑀢𑁆𑀢𑀫𑀸𑀦𑀪𑀼𑀢𑁆𑀯𑀸𑀧𑀕𑀢𑁄𑀓𑀸𑀲𑀓𑀢𑀪𑀽𑀫𑀺𑀮𑀤𑁆𑀥𑀯𑀲𑁂𑀦 𑀅𑀦𑁂𑀓𑀧𑁆𑀧𑀪𑁂𑀤𑀁. 𑀢𑀢𑁆𑀣 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀢𑀁 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫, 𑀬𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸, 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸, 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁭) 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀭𑀲𑀫𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀅𑀦𑀼𑀪𑀼𑀢𑁆𑀯𑀸𑀧𑀕𑀢𑀲𑀗𑁆𑀔𑀸𑀢𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀉𑀧𑁆𑀧𑀸𑀤𑀸𑀤𑀺𑀢𑁆𑀢𑀬𑀫𑀦𑀼𑀧𑁆𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀼𑀢𑁆𑀯𑀸𑀧𑀕𑀢𑀲𑀗𑁆𑀔𑀸𑀢𑀁 𑀲𑁂𑀲𑀲𑀗𑁆𑀔𑀢𑀜𑁆𑀘 𑀪𑀼𑀢𑁆𑀯𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀤𑁂𑀢𑀁 ‘‘𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁭) 𑀘, ‘‘𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀻’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀤𑀝𑁆𑀞𑀩𑁆𑀩𑀁. ‘‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀓𑀫𑁆𑀫𑀸𑀦𑀻’’𑀢𑀺 𑀏𑀯𑀫𑀸𑀤𑀺𑀦𑀸 (𑀫. 𑀦𑀺. 𑁩.𑁨𑁪𑁮; 𑀦𑁂𑀢𑁆𑀢𑀺. 𑁧𑁨𑁦) 𑀦𑀬𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀁 𑀅𑀢𑀻𑀢𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲𑁄𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸, 𑀢𑀣𑀸 𑀓𑀢𑁄𑀓𑀸𑀲𑀜𑁆𑀘 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀅𑀯𑀲𑁆𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 ¶ 𑀦𑀸𑀫. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼 𑀅𑀲𑀫𑀽𑀳𑀢𑀫𑀓𑀼𑀲𑀮𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫.

𑀏𑀢𑁆𑀣 𑀘 𑀪𑀽𑀫𑀺𑀬𑀸 𑀪𑀽𑀫𑀺𑀮𑀤𑁆𑀥𑀲𑁆𑀲 𑀘 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀪𑀽𑀫𑀺 𑀦𑀸𑀫 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀢𑁂𑀲𑀼 𑀉𑀧𑁆𑀧𑀢𑁆𑀢𑀸𑀭𑀳𑀁 ¶ 𑀓𑀺𑀮𑁂𑀲𑀚𑀸𑀢𑀁. 𑀢𑁂𑀦 𑀳𑀺 𑀲𑀸 𑀪𑀽𑀫𑀺𑀮𑀤𑁆𑀥𑀸 𑀦𑀸𑀫 𑀳𑁄𑀢𑀻𑀢𑀺. 𑀢𑀲𑁆𑀫𑀸 ‘‘𑀪𑀽𑀫𑀺𑀮𑀤𑁆𑀥’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀧𑀦 𑀦 𑀆𑀭𑀫𑁆𑀫𑀡𑀯𑀲𑁂𑀦. 𑀆𑀭𑀫𑁆𑀫𑀡𑀯𑀲𑁂𑀦 𑀳𑀺 𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑁂 𑀧𑀭𑀺𑀜𑁆𑀜𑀸𑀢𑁂𑀧𑀺 𑀘 𑀔𑀻𑀡𑀸𑀲𑀯𑀸𑀦𑀁 ¶ 𑀔𑀦𑁆𑀥𑁂 𑀆𑀭𑀩𑁆𑀪 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀫𑀳𑀸𑀓𑀘𑁆𑀘𑀸𑀬𑀦𑀉𑀧𑁆𑀧𑀮𑀯𑀡𑁆𑀡𑀸𑀤𑀻𑀦𑀁 𑀔𑀦𑁆𑀥𑁂 𑀆𑀭𑀩𑁆𑀪 𑀲𑁄𑀭𑁂𑀬𑁆𑀬𑀲𑁂𑀝𑁆𑀞𑀺𑀧𑀼𑀢𑁆𑀢𑀦𑀦𑁆𑀤𑀫𑀸𑀡𑀯𑀓𑀸𑀤𑀻𑀦𑀁 𑀯𑀺𑀬. 𑀬𑀤𑀺 𑀘𑁂𑀢𑀁 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀲𑀺𑀬𑀸, 𑀢𑀲𑁆𑀲 𑀅𑀧𑁆𑀧𑀳𑁂𑀬𑁆𑀬𑀢𑁄 𑀦 𑀓𑁄𑀘𑀺 𑀪𑀯𑀫𑀽𑀮𑀁 𑀚𑀳𑁂𑀬𑁆𑀬. 𑀯𑀢𑁆𑀣𑀼𑀯𑀲𑁂𑀦 𑀧𑀦 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀅𑀧𑀭𑀺𑀜𑁆𑀜𑀸𑀢𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀸𑀤𑀢𑁄 𑀧𑀪𑀼𑀢𑀺 𑀢𑁂𑀲𑀼 𑀯𑀝𑁆𑀝𑀫𑀽𑀮𑀁 𑀓𑀺𑀮𑁂𑀲𑀚𑀸𑀢𑀁 𑀅𑀦𑀼𑀲𑁂𑀢𑀺. 𑀢𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘 𑀬𑀲𑁆𑀲 𑀔𑀦𑁆𑀥𑁂𑀲𑀼 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀺𑀢𑀸 𑀓𑀺𑀮𑁂𑀲𑀸, 𑀢𑀲𑁆𑀲 𑀢𑁂 𑀏𑀯 𑀔𑀦𑁆𑀥𑀸 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼, 𑀦 𑀇𑀢𑀭𑁂 𑀔𑀦𑁆𑀥𑀸. 𑀅𑀢𑀻𑀢𑀓𑁆𑀔𑀦𑁆𑀥𑁂𑀲𑀼 𑀘𑀲𑁆𑀲 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀢𑀻𑀢𑀓𑁆𑀔𑀦𑁆𑀥𑀸 𑀏𑀯 𑀯𑀢𑁆𑀣𑀼, 𑀦 𑀇𑀢𑀭𑁂. 𑀏𑀲𑁂𑀯 𑀦𑀬𑁄 𑀅𑀦𑀸𑀕𑀢𑀸𑀤𑀻𑀲𑀼. 𑀢𑀣𑀸 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑁂𑀲𑀼 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸 𑀏𑀯 𑀯𑀢𑁆𑀣𑀼, 𑀦 𑀇𑀢𑀭𑁂. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼.

𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀧𑀦 𑀬𑀲𑁆𑀲 𑀬𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀔𑀦𑁆𑀥𑁂𑀲𑀼 𑀢𑀁 𑀢𑀁 𑀯𑀝𑁆𑀝𑀫𑀽𑀮𑀁 𑀓𑀺𑀮𑁂𑀲𑀚𑀸𑀢𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀁, 𑀢𑀲𑁆𑀲 𑀢𑀲𑁆𑀲 𑀢𑁂 𑀢𑁂 𑀔𑀦𑁆𑀥𑀸 𑀧𑀳𑀻𑀦𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀯𑀝𑁆𑀝𑀫𑀽𑀮𑀓𑀺𑀮𑁂𑀲𑀸𑀦𑀁 𑀅𑀯𑀢𑁆𑀣𑀼𑀢𑁄 𑀪𑀽𑀫𑀻𑀢𑀺 𑀲𑀗𑁆𑀔𑀁 𑀦 𑀮𑀪𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀦 𑀲𑀩𑁆𑀩𑀲𑁄 𑀯𑀝𑁆𑀝𑀫𑀽𑀮𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑀁 𑀓𑀺𑀜𑁆𑀘𑀺 𑀓𑀭𑀺𑀬𑀫𑀸𑀦𑀁 𑀓𑀫𑁆𑀫𑀁 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀳𑁄𑀢𑀺, 𑀇𑀘𑁆𑀘𑀲𑁆𑀲 𑀓𑀺𑀮𑁂𑀲𑀧𑁆𑀧𑀘𑁆𑀘𑀬𑀸 𑀯𑀝𑁆𑀝𑀁 𑀯𑀟𑁆𑀠𑀢𑀺. 𑀢𑀲𑁆𑀲𑁂𑀢𑀁 𑀯𑀝𑁆𑀝𑀫𑀽𑀮𑀁 𑀭𑀽𑀧𑀓𑁆𑀔𑀦𑁆𑀥𑁂 𑀏𑀯, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀏𑀯 𑀯𑀸, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀽𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀯𑀺𑀲𑁂𑀲𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀢𑁆𑀢𑀸. 𑀓𑀣𑀁? 𑀧𑀣𑀯𑀻𑀭𑀲𑀸𑀤𑀺𑀫𑀺𑀯 𑀭𑀼𑀓𑁆𑀔𑁂. 𑀬𑀣𑀸 𑀳𑀺 𑀫𑀳𑀸𑀭𑀼𑀓𑁆𑀔𑁂 𑀧𑀣𑀯𑀻𑀢𑀮𑀁 𑀅𑀥𑀺𑀝𑁆𑀞𑀸𑀬 𑀧𑀣𑀯𑀻𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 ¶ 𑀦𑀺𑀲𑁆𑀲𑀸𑀬 𑀢𑀧𑁆𑀧𑀘𑁆𑀘𑀬𑀸 𑀫𑀽𑀮𑀔𑀦𑁆𑀥𑀲𑀸𑀔𑀧𑀲𑀸𑀔𑀧𑀢𑁆𑀢𑀧𑀮𑁆𑀮𑀯𑀧𑀮𑀸𑀲𑀧𑀼𑀧𑁆𑀨𑀨𑀮𑁂𑀳𑀺 𑀯𑀟𑁆𑀠𑀺𑀢𑁆𑀯𑀸 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀬𑀸𑀯𑀓𑀧𑁆𑀧𑀸𑀯𑀲𑀸𑀦𑀁 𑀩𑀻𑀚𑀧𑀭𑀫𑁆𑀧𑀭𑀸𑀬 𑀭𑀼𑀓𑁆𑀔𑀧𑀯𑁂𑀡𑀻𑀲𑀦𑁆𑀢𑀸𑀦𑁂 𑀞𑀺𑀢𑁂 ¶ ‘‘𑀢𑀁 𑀧𑀣𑀯𑀻𑀭𑀲𑀸𑀤𑀺 𑀫𑀽𑀮𑁂 𑀏𑀯, 𑀦 𑀔𑀦𑁆𑀥𑀸𑀤𑀻𑀲𑀼, 𑀨𑀮𑁂 𑀏𑀯 𑀯𑀸, 𑀦 𑀫𑀽𑀮𑀸𑀤𑀻𑀲𑀽’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀲𑁆𑀯𑁂𑀯 𑀫𑀽𑀮𑀸𑀤𑀻𑀲𑀼 𑀅𑀦𑀼𑀕𑀢𑀢𑁆𑀢𑀸, 𑀏𑀯𑀁. 𑀬𑀣𑀸 𑀧𑀦 𑀢𑀲𑁆𑀲𑁂𑀯 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀨𑀮𑀸𑀤𑀻𑀲𑀼 𑀦𑀺𑀩𑁆𑀩𑀺𑀦𑁆𑀦𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑀡𑁆𑀟𑀽𑀓𑀓𑀡𑁆𑀝𑀓𑀁 𑀦𑀸𑀫 𑀭𑀼𑀓𑁆𑀔𑁂 𑀯𑀺𑀲𑀁 𑀧𑀬𑁄𑀚𑁂𑀬𑁆𑀬, 𑀅𑀣 𑀲𑁄 𑀭𑀼𑀓𑁆𑀔𑁄 𑀢𑁂𑀦 𑀯𑀺𑀲𑀲𑀫𑁆𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀧𑀣𑀯𑀻𑀭𑀲𑀆𑀧𑁄𑀭𑀲𑀧𑀭𑀺𑀬𑀸𑀤𑀺𑀦𑁆𑀦𑁂𑀦 𑀅𑀧𑁆𑀧𑀲𑀯𑀦𑀥𑀫𑁆𑀫𑀢𑀁 𑀆𑀕𑀫𑁆𑀫 𑀧𑀼𑀦 𑀲𑀦𑁆𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀦 𑀪𑀯𑁂𑀬𑁆𑀬, 𑀏𑀯𑀫𑁂𑀯𑀁 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀬𑀁 𑀦𑀺𑀩𑁆𑀩𑀺𑀦𑁆𑀦𑁄 𑀓𑀼𑀮𑀧𑀼𑀢𑁆𑀢𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀭𑀼𑀓𑁆𑀔𑁂 𑀯𑀺𑀲𑀧𑁆𑀧𑀬𑁄𑀚𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀘𑀢𑀼𑀫𑀕𑁆𑀕𑀪𑀸𑀯𑀦𑀁 𑀆𑀭𑀪𑀢𑀺. 𑀅𑀣𑀲𑁆𑀲 𑀲𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀢𑁂𑀦 𑀘𑀢𑀼𑀫𑀕𑁆𑀕𑀯𑀺𑀲𑀲𑀫𑁆𑀨𑀲𑁆𑀲𑁂𑀦 𑀲𑀩𑁆𑀩𑀲𑁄 𑀯𑀝𑁆𑀝𑀫𑀽𑀮𑀓𑀺𑀮𑁂𑀲𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀢𑁆𑀢𑀸 𑀓𑀺𑀭𑀺𑀬𑀪𑀸𑀯𑀫𑀢𑁆𑀢𑀫𑀼𑀧𑀕𑀢𑀓𑀸𑀬𑀓𑀫𑁆𑀫𑀸𑀤𑀺 𑀲𑀩𑁆𑀩𑀓𑀫𑁆𑀫𑀧𑁆𑀧𑀪𑁂𑀤𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀥𑀫𑁆𑀫𑀢𑀫𑀸𑀕𑀫𑁆𑀫 𑀪𑀯𑀦𑁆𑀢𑀭𑀲𑀦𑁆𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀦 𑀳𑁄𑀢𑀺. 𑀓𑁂𑀯𑀮𑀁 𑀧𑀦 𑀘𑀭𑀺𑀫𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀦𑀺𑀭𑀺𑀦𑁆𑀥𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀅𑀦𑀼𑀧𑀸𑀤𑀸𑀦𑁄 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀏𑀯𑀁 𑀪𑀽𑀫𑀺𑀬𑀸 𑀪𑀽𑀫𑀺𑀮𑀤𑁆𑀥𑀲𑁆𑀲 𑀘 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 ¶ 𑀅𑀧𑀭𑀫𑁆𑀧𑀺 𑀲𑀫𑀼𑀤𑀸𑀘𑀸𑀭𑀸𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀽𑀳𑀢𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑀼𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀫𑁂𑀯 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁. 𑀘𑀓𑁆𑀔𑀸𑀤𑀻𑀦𑀁 𑀧𑀦 𑀆𑀧𑀸𑀣𑀕𑀢𑁂 𑀆𑀭𑀫𑁆𑀫𑀡𑁂 𑀧𑀼𑀩𑁆𑀩𑀪𑀸𑀕𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀓𑀺𑀮𑁂𑀲𑀚𑀸𑀢𑀁 𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑁆𑀕𑀳𑀺𑀢𑀢𑁆𑀢𑀸 𑀏𑀯 𑀅𑀧𑀭𑀪𑀸𑀕𑁂 𑀅𑀯𑀲𑁆𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀮𑁆𑀬𑀸𑀡𑀺𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀢𑁄 ¶ 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀚𑀸𑀢𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁬.𑁫𑁮) 𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀚𑀸𑀢𑀁 𑀘𑀺𑀢𑁆𑀢𑀲𑀦𑁆𑀢𑀢𑀺𑀫𑀦𑀸𑀭𑀽𑀴𑁆𑀳𑀁 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀓𑀲𑁆𑀲 𑀳𑁂𑀢𑀼𑀦𑁄 𑀅𑀪𑀸𑀯𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀁 ‘‘𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁬𑁫) 𑀤𑀝𑁆𑀞𑀩𑁆𑀩𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀫𑁆𑀧𑀺 𑀓𑀺𑀮𑁂𑀲𑀚𑀸𑀢𑀁 𑀅𑀭𑀺𑀬𑀫𑀕𑁆𑀕𑁂𑀦 𑀅𑀲𑀫𑀽𑀳𑀢𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀢𑀻𑀢𑀦𑁆𑀢𑀺 𑀓𑀢𑁆𑀯𑀸 𑀅𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀣𑁂𑀭𑀲𑁆𑀲 𑀓𑀼𑀲𑀼𑀫𑀺𑀢𑀭𑀼𑀓𑁆𑀔𑁂 𑀉𑀧𑀯𑀦𑁂 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀲𑁆𑀲 𑀫𑀥𑀼𑀭𑀲𑁆𑀲𑀭𑁂𑀦 ¶ 𑀕𑀸𑀬𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀕𑀻𑀢𑀲𑁆𑀲𑀭𑀁 𑀲𑀼𑀢𑀯𑀢𑁄 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀚𑀸𑀢𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲 ‘‘𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀦𑁆𑀢𑀭𑀸𑀬𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁫𑁭) 𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀯𑀺𑀥𑀫𑁆𑀧𑀺 𑀘𑁂𑀢𑀁 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀁 𑀪𑀽𑀫𑀺𑀮𑀤𑁆𑀥𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀫𑁂𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀉𑀧𑁆𑀧𑀦𑁆𑀦𑁂 𑀪𑀽𑀫𑀺𑀮𑀤𑁆𑀥𑀸𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀯𑀲𑁂𑀦𑀸𑀬𑀁 𑀓𑁄𑀥𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀯𑀁𑀯𑀺𑀥𑀲𑁆𑀲 𑀯𑀺𑀦𑁂𑀢𑀩𑁆𑀩𑀢𑁄. 𑀏𑀯𑀁𑀯𑀺𑀥𑀫𑁂𑀯 𑀳𑀺 𑀉𑀧𑁆𑀧𑀦𑁆𑀦𑀁 𑀬𑁂𑀦 𑀓𑁂𑀦𑀘𑀺 𑀯𑀺𑀦𑀬𑁂𑀦 𑀯𑀺𑀦𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀬𑀁 𑀧𑀦𑁂𑀢𑀁 𑀯𑀢𑁆𑀢𑀫𑀸𑀦𑀪𑀼𑀢𑁆𑀯𑀸𑀧𑀕𑀢𑁄𑀓𑀸𑀲𑀓𑀢𑀲𑀫𑀼𑀤𑀸𑀘𑀸𑀭𑀲𑀗𑁆𑀔𑀸𑀢𑀁 𑀉𑀧𑁆𑀧𑀦𑁆𑀦𑀁, 𑀏𑀢𑁆𑀣 𑀅𑀨𑀮𑁄 𑀘 𑀅𑀲𑀓𑁆𑀬𑁄 𑀘 𑀯𑀸𑀬𑀸𑀫𑁄. 𑀅𑀨𑀮𑁄 𑀳𑀺 𑀪𑀼𑀢𑁆𑀯𑀸𑀧𑀕𑀢𑁂 𑀯𑀸𑀬𑀸𑀫𑁄 𑀯𑀸𑀬𑀸𑀫𑀦𑁆𑀢𑀭𑁂𑀦𑀸𑀧𑀺 𑀢𑀲𑁆𑀲 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀢𑀣𑀸 𑀑𑀓𑀸𑀲𑀓𑀢𑁂. 𑀅𑀲𑀓𑁆𑀬𑁄 𑀘 𑀯𑀢𑁆𑀢𑀫𑀸𑀦𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑀯𑁄𑀤𑀸𑀦𑀸𑀦𑀁 𑀏𑀓𑀚𑁆𑀛𑀫𑀦𑀼𑀧𑁆𑀧𑀢𑁆𑀢𑀺𑀢𑁄𑀢𑀺.

𑀯𑀺𑀦𑁂𑀢𑀻𑀢𑀺 ¶ 𑀏𑀢𑁆𑀣 𑀧𑀦 𑁋

‘‘𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫, 𑀏𑀓𑀫𑁂𑀓𑁂𑀢𑁆𑀣 𑀧𑀜𑁆𑀘𑀥𑀸;

𑀢𑁂𑀲𑀼 𑀅𑀝𑁆𑀞𑀯𑀺𑀥𑁂𑀦𑁂𑀲, 𑀯𑀺𑀦𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀺’’.

𑀅𑀬𑀜𑁆𑀳𑀺 ¶ 𑀲𑀁𑀯𑀭𑀯𑀺𑀦𑀬𑁄, 𑀧𑀳𑀸𑀦𑀯𑀺𑀦𑀬𑁄𑀢𑀺 𑀤𑀼𑀯𑀺𑀥𑁄 𑀯𑀺𑀦𑀬𑁄. 𑀏𑀢𑁆𑀣 𑀘 𑀤𑀼𑀯𑀺𑀥𑁂 𑀯𑀺𑀦𑀬𑁂 𑀏𑀓𑀫𑁂𑀓𑁄 𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀲𑀁𑀯𑀭𑀯𑀺𑀦𑀬𑁄𑀧𑀺 𑀳𑀺 𑀲𑀻𑀮𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀧𑀳𑀸𑀦𑀯𑀺𑀦𑀬𑁄𑀧𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑁄.

𑀢𑀢𑁆𑀣 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁧𑁧) 𑀲𑀻𑀮𑀲𑀁𑀯𑀭𑁄, ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁧𑁩; 𑀫. 𑀦𑀺. 𑁧.𑁨𑁯𑁫; 𑀲𑀁. 𑀦𑀺. 𑁪.𑁨𑁩𑁯; 𑀅. 𑀦𑀺. 𑁩.𑁧𑁬) 𑀲𑀢𑀺𑀲𑀁𑀯𑀭𑁄.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺,

𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁧) 𑁋

𑀆𑀤𑀻𑀲𑀼 ¶ 𑀜𑀸𑀡𑀲𑀁𑀯𑀭𑁄, ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪; 𑀅. 𑀦𑀺. 𑁪.𑁧𑁧𑁪) 𑀔𑀦𑁆𑀢𑀺𑀲𑀁𑀯𑀭𑁄, ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀧𑀚𑀳𑀢𑀺, 𑀯𑀺𑀦𑁄𑀤𑁂𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁧𑁪) 𑀯𑀻𑀭𑀺𑀬𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀲𑀁𑀯𑀭𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀗𑁆𑀕𑁂𑀲𑀼 𑀬𑀸𑀯 𑀅𑀢𑁆𑀢𑀦𑁄 𑀅𑀧𑀭𑀺𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀺, 𑀢𑀸𑀯 𑀢𑁂𑀦 𑀢𑁂𑀦 𑀜𑀸𑀡𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀦𑀢𑁆𑀣𑀲𑀦𑁆𑀢𑀸𑀦𑀲𑁆𑀲 𑀧𑀳𑀸𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 ¶ 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀻𑀪𑀸𑀯𑀲𑁆𑀲, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀸𑀳𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂𑀲𑀼 𑀅𑀪𑀬𑀲𑀜𑁆𑀜𑀸𑀬, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑁂𑀦 𑀅𑀪𑀺𑀭𑀢𑀺𑀲𑀜𑁆𑀜𑀸𑀬, 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀅𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀬, 𑀉𑀧𑁂𑀓𑁆𑀔𑀸𑀜𑀸𑀡𑁂𑀦 𑀅𑀦𑀼𑀧𑁂𑀓𑁆𑀔𑀸𑀬, 𑀅𑀦𑀼𑀮𑁄𑀫𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀧𑀝𑀺𑀮𑁄𑀫𑀪𑀸𑀯𑀲𑁆𑀲, 𑀕𑁄𑀢𑁆𑀭𑀪𑀼𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲 𑀧𑀳𑀸𑀦𑀁, 𑀏𑀢𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑀲𑁆𑀲 𑀲𑀫𑀸𑀥𑀺𑀦𑁄 𑀬𑀸𑀯 𑀅𑀢𑁆𑀢𑀦𑁄 𑀅𑀧𑀭𑀺𑀳𑀸𑀦𑀺𑀧𑀯𑀢𑁆𑀢𑀺 ¶ , 𑀢𑀸𑀯 𑀢𑁂𑀦𑀸𑀪𑀺𑀳𑀢𑀸𑀦𑀁 𑀦𑀻𑀯𑀭𑀡𑀸𑀦𑀁 𑀬𑀣𑀸𑀲𑀓𑀁 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀜𑁆𑀘 𑀅𑀦𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀳𑀸𑀦𑀁, 𑀏𑀢𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀬𑀣𑀸𑀲𑀓𑀁 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀳𑀦𑀲𑁆𑀲 𑀧𑀼𑀦 𑀅𑀘𑁆𑀘𑀦𑁆𑀢𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀲𑀫𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀧𑀳𑀸𑀦𑀁, 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁, 𑀇𑀤𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀢𑁆𑀢𑀸 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁, 𑀏𑀢𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁𑀢𑀁𑀧𑀳𑀸𑀦𑀯𑀢𑁄 𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀪𑀯𑀢𑁄𑀧𑁂𑀢𑀁 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 ¶ 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀳𑀸𑀦𑀯𑀺𑀦𑀬𑁄𑀧𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀓𑁂𑀓𑀲𑁆𑀲 𑀧𑀜𑁆𑀘𑀥𑀸 𑀪𑀺𑀦𑁆𑀦𑀢𑁆𑀢𑀸 𑀤𑀲𑁂𑀢𑁂 𑀯𑀺𑀦𑀬𑀸 𑀳𑁄𑀦𑁆𑀢𑀺.

𑀢𑁂𑀲𑀼 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀦𑀬𑀁 𑀦𑀺𑀲𑁆𑀲𑀭𑀡𑀯𑀺𑀦𑀬𑀜𑁆𑀘 𑀞𑀧𑁂𑀢𑁆𑀯𑀸 ¶ 𑀅𑀯𑀲𑁂𑀲𑁂𑀦 𑀅𑀝𑁆𑀞𑀯𑀺𑀥𑁂𑀦 𑀯𑀺𑀦𑀬𑁂𑀦𑁂𑀲 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀺𑀦𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀓𑀣𑀁? 𑀲𑀻𑀮𑀲𑀁𑀯𑀭𑁂𑀦 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀺𑀦𑁂𑀦𑁆𑀢𑁄𑀧𑀺 𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀓𑁄𑀥𑀁 𑀯𑀺𑀦𑁂𑀢𑀺, 𑀲𑀢𑀺𑀧𑀜𑁆𑀜𑀸𑀲𑀁𑀯𑀭𑁂𑀳𑀺 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀤𑀻𑀦𑀺 𑀯𑀺𑀦𑁂𑀦𑁆𑀢𑁄𑀧𑀺 𑀤𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁 𑀓𑁄𑀥𑀁 𑀯𑀺𑀦𑁂𑀢𑀺, 𑀔𑀦𑁆𑀢𑀺𑀲𑀁𑀯𑀭𑁂𑀦 𑀲𑀻𑀢𑀸𑀤𑀻𑀦𑀺 𑀔𑀫𑀦𑁆𑀢𑁄𑀧𑀺 𑀢𑀁𑀢𑀁𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑀁 𑀓𑁄𑀥𑀁 𑀯𑀺𑀦𑁂𑀢𑀺, 𑀯𑀻𑀭𑀺𑀬𑀲𑀁𑀯𑀭𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀺𑀦𑁂𑀦𑁆𑀢𑁄𑀧𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀓𑁄𑀥𑀁 𑀯𑀺𑀦𑁂𑀢𑀺. 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑀺 𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑁂 𑀢𑁂 𑀥𑀫𑁆𑀫𑁂 𑀧𑀚𑀳𑀦𑁆𑀢𑁄𑀧𑀺 𑀢𑀤𑀗𑁆𑀕𑀧𑁆𑀧𑀳𑀸𑀢𑀩𑁆𑀩𑀁 𑀯𑀺𑀓𑁆𑀔𑀫𑁆𑀪𑁂𑀢𑀩𑁆𑀩𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀜𑁆𑀘 𑀓𑁄𑀥𑀁 𑀯𑀺𑀦𑁂𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀳𑀸𑀦𑀯𑀺𑀦𑀬𑁂𑀦 𑀯𑀺𑀦𑀬𑁄 𑀦 𑀲𑀫𑁆𑀪𑀯𑀢𑀺. 𑀬𑁂𑀳𑀺 𑀧𑀦 𑀥𑀫𑁆𑀫𑁂𑀳𑀺 𑀧𑀳𑀸𑀦𑀁 𑀳𑁄𑀢𑀺, 𑀢𑁂𑀳𑀺 𑀯𑀺𑀦𑁂𑀦𑁆𑀢𑁄𑀧𑀺 𑀧𑀭𑀺𑀬𑀸𑀬𑀢𑁄 ‘‘𑀧𑀳𑀸𑀦𑀯𑀺𑀦𑀬𑁂𑀦 𑀯𑀺𑀦𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀓𑀸𑀮𑁂 𑀧𑀦 𑀯𑀺𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀲𑁆𑀲 𑀘 𑀅𑀦𑀼𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀦 𑀢𑁂𑀳𑀺 𑀓𑀺𑀜𑁆𑀘𑀺 𑀯𑀺𑀦𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑁂𑀲𑀼 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀦𑀬𑀁 𑀦𑀺𑀲𑁆𑀲𑀭𑀡𑀯𑀺𑀦𑀬𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀦 𑀅𑀝𑁆𑀞𑀯𑀺𑀥𑁂𑀦 𑀯𑀺𑀦𑀬𑁂𑀦𑁂𑀲 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀺𑀦𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀻𑀢𑀺. 𑀬𑁂 𑀯𑀸 𑁋

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀖𑀸𑀢𑀧𑀝𑀺𑀯𑀺𑀦𑀬𑀸, 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀆𑀖𑀸𑀢𑁄 𑀲𑀩𑁆𑀩𑀲𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄. 𑀓𑀢𑀫𑁂 𑀧𑀜𑁆𑀘? 𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁂 𑀆𑀖𑀸𑀢𑁄 𑀚𑀸𑀬𑁂𑀣, 𑀫𑁂𑀢𑁆𑀢𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀪𑀸𑀯𑁂𑀢𑀩𑁆𑀩𑀸…𑀧𑁂… 𑀓𑀭𑀼𑀡𑀸… 𑀉𑀧𑁂𑀓𑁆𑀔𑀸… 𑀅𑀲𑀢𑀺-𑀅𑀫𑀦𑀲𑀺𑀓𑀸𑀭𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀆𑀧𑀚𑁆𑀚𑀺𑀢𑀩𑁆𑀩𑁄, 𑀏𑀯𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀆𑀖𑀸𑀢𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄. 𑀓𑀫𑁆𑀫𑀲𑁆𑀲𑀓𑀢𑀸 𑀏𑀯 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸 𑀓𑀫𑁆𑀫𑀲𑁆𑀲𑀓𑁄 𑀅𑀬𑀫𑀸𑀬𑀲𑁆𑀫𑀸…𑀧𑁂… 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁫.𑁧𑁬𑁧) 𑁋

𑀏𑀯𑀁 ¶ 𑀧𑀜𑁆𑀘 𑀆𑀖𑀸𑀢𑀧𑀝𑀺𑀯𑀺𑀦𑀬𑀸 𑀯𑀼𑀢𑁆𑀢𑀸. 𑀬𑁂 𑀘 𑁋

‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀆𑀖𑀸𑀢𑀧𑀝𑀺𑀯𑀺𑀦𑀬𑀸, 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀆𑀖𑀸𑀢𑁄 𑀲𑀩𑁆𑀩𑀲𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄. 𑀓𑀢𑀫𑁂 𑀧𑀜𑁆𑀘? 𑀇𑀥𑀸𑀯𑀼𑀲𑁄 ¶ , 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀏𑀯𑀭𑀽𑀧𑁂𑀧𑀺, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑁂 𑀆𑀖𑀸𑀢𑁄 ¶ 𑀧𑀝𑀺𑀯𑀺𑀦𑁂𑀢𑀩𑁆𑀩𑁄’’𑀢𑀺 (𑀅. 𑀦𑀺. 𑁫.𑁧𑁬𑁨) 𑁋

𑀏𑀯𑀫𑀸𑀤𑀺𑀦𑀸𑀧𑀺 𑀦𑀬𑁂𑀦 𑀧𑀜𑁆𑀘 𑀆𑀖𑀸𑀢𑀧𑀝𑀺𑀯𑀺𑀦𑀬𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀆𑀖𑀸𑀢𑀧𑀝𑀺𑀯𑀺𑀦𑀬𑁂𑀦 𑀯𑀺𑀦𑁂𑀦𑁆𑀢𑁄𑀧𑁂𑀲 𑀯𑀺𑀦𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀬𑀲𑁆𑀫𑀸 𑁋

‘‘𑀉𑀪𑀢𑁄𑀤𑀡𑁆𑀟𑀓𑁂𑀦 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀓𑀓𑀘𑁂𑀦 𑀘𑁄𑀭𑀸 𑀑𑀘𑀭𑀓𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀑𑀓𑁆𑀓𑀦𑁆𑀢𑁂𑀬𑁆𑀬𑀼𑀁, 𑀢𑀢𑁆𑀭𑀸𑀧𑀺 𑀬𑁄 𑀫𑀦𑁄 𑀧𑀤𑁄𑀲𑁂𑀬𑁆𑀬, 𑀦 𑀫𑁂 𑀲𑁄 𑀢𑁂𑀦 𑀲𑀸𑀲𑀦𑀓𑀭𑁄’’𑀢𑀺 (𑀫. 𑀦𑀺. 𑁧.𑁨𑁩𑁨) 𑁋-

𑀏𑀯𑀁 𑀲𑀢𑁆𑀣𑀼 𑀑𑀯𑀸𑀤𑀁,

‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺’’. (𑀲𑀁. 𑀦𑀺. 𑁧.𑁧𑁮𑁮);

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀧𑀢𑁆𑀢𑀓𑀦𑁆𑀢𑀸 𑀲𑀧𑀢𑁆𑀢𑀓𑀭𑀡𑀸 𑀓𑁄𑀥𑀦𑀁 𑀆𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄, 𑀯𑀢𑀸𑀬𑀁 𑀤𑀼𑀩𑁆𑀩𑀡𑁆𑀡𑁄 𑀅𑀲𑁆𑀲𑀸’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀯𑀡𑁆𑀡𑀯𑀢𑀸𑀬 𑀦𑀦𑁆𑀤𑀢𑀺. 𑀓𑁄𑀥𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄 𑀓𑀺𑀜𑁆𑀘𑀸𑀧𑀺 𑀲𑁄 𑀳𑁄𑀢𑀺 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼 𑀑𑀤𑀸𑀢𑀯𑀢𑁆𑀣𑀯𑀲𑀦𑁄, 𑀅𑀣 𑀔𑁄 𑀲𑁄 𑀤𑀼𑀩𑁆𑀩𑀡𑁆𑀡𑁄𑀯 𑀳𑁄𑀢𑀺 𑀓𑁄𑀥𑀸𑀪𑀺𑀪𑀽𑀢𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀥𑀫𑁆𑀫𑁄 𑀲𑀧𑀢𑁆𑀢𑀓𑀦𑁆𑀢𑁄 𑀲𑀧𑀢𑁆𑀢𑀓𑀭𑀡𑁄 𑀓𑁄𑀥𑀦𑀁 𑀆𑀕𑀘𑁆𑀙𑀢𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 (𑀅. 𑀦𑀺. 𑁭.𑁬𑁪).

‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀏𑀯𑀁 𑀇𑀘𑁆𑀙𑀢𑀺 𑁋 ‘𑀅𑀳𑁄, 𑀯𑀢𑀸𑀬𑀁 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬𑀸’𑀢𑀺…𑀧𑁂… ‘𑀦 𑀧𑀘𑀼𑀭𑀢𑁆𑀣𑁄 𑀅𑀲𑁆𑀲𑀸’𑀢𑀺…𑀧𑁂… ‘𑀦 𑀪𑁄𑀕𑀯𑀸 𑀅𑀲𑁆𑀲𑀸’𑀢𑀺…𑀧𑁂… ‘𑀦 𑀬𑀲𑀯𑀸 𑀅𑀲𑁆𑀲𑀸’𑀢𑀺…𑀧𑁂… ‘𑀦 𑀫𑀺𑀢𑁆𑀢𑀯𑀸 𑀅𑀲𑁆𑀲𑀸’𑀢𑀺…𑀧𑁂… ‘𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 ¶ 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀲𑀧𑀢𑁆𑀢𑁄 𑀲𑀧𑀢𑁆𑀢𑀲𑁆𑀲 𑀲𑀼𑀕𑀢𑀺𑀕𑀫𑀦𑁂𑀦 𑀦𑀦𑁆𑀤𑀢𑀺. 𑀓𑁄𑀥𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑁄𑀥𑀸𑀪𑀺𑀪𑀽𑀢𑁄 𑀓𑁄𑀥𑀧𑀭𑁂𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬… 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸…𑀧𑁂… 𑀯𑀸𑀘𑀸𑀬…𑀧𑁂… 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 ¶ 𑀪𑁂𑀤𑀸 𑀧𑀭𑀁 𑀫𑀭𑀡𑀸…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑀓𑁄𑀥𑀸𑀪𑀺𑀪𑀽𑀢𑁄’’𑀢𑀺 (𑀅. 𑀦𑀺. 𑁭.𑁬𑁪).

‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺…𑀧𑁂…. (𑀅. 𑀦𑀺. 𑁭.𑁬𑁪; 𑀫𑀳𑀸𑀦𑀺. 𑁫);

‘‘𑀬𑁂𑀦 𑀓𑁄𑀥𑁂𑀦 𑀓𑀼𑀤𑁆𑀥𑀸𑀲𑁂, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁;

𑀢𑀁 𑀓𑁄𑀥𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀚𑀳𑀦𑁆𑀢𑀺 𑀯𑀺𑀧𑀲𑁆𑀲𑀺𑀦𑁄. (𑀇𑀢𑀺𑀯𑀼. 𑁪);

‘‘𑀓𑁄𑀥𑀁 𑀚𑀳𑁂 𑀯𑀺𑀧𑁆𑀧𑀚𑀳𑁂𑀬𑁆𑀬 𑀫𑀸𑀦𑀁, 𑀲𑀁𑀬𑁄𑀚𑀦𑀁 𑀲𑀩𑁆𑀩𑀫𑀢𑀺𑀓𑁆𑀓𑀫𑁂𑀬𑁆𑀬. (𑀥. 𑀧. 𑁨𑁨𑁧);

‘‘𑀅𑀦𑀢𑁆𑀣𑀚𑀦𑀦𑁄 𑀓𑁄𑀥𑁄, 𑀓𑁄𑀥𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄. (𑀅. 𑀦𑀺. 𑁭.𑁬𑁪; 𑀇𑀢𑀺𑀯𑀼. 𑁮𑁮);

‘‘𑀏𑀓𑀸𑀧𑀭𑀸𑀥𑀁 𑀔𑀫 𑀪𑀽𑀭𑀺𑀧𑀜𑁆𑀜, 𑀦 𑀧𑀡𑁆𑀟𑀺𑀢𑀸 𑀓𑁄𑀥𑀩𑀮𑀸 𑀪𑀯𑀦𑁆𑀢𑀻’’𑀢𑀺. (𑀚𑀸. 𑁧.𑁧𑁫.𑁧𑁯) 𑁋

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑁄𑀥𑁂 𑀆𑀤𑀻𑀦𑀯𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀓𑁄𑀥𑁄 𑀯𑀺𑀦𑀬𑀁 𑀉𑀧𑁂𑀢𑀺. 𑀢𑀲𑁆𑀫𑀸 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑁄𑀥𑀁 𑀯𑀺𑀦𑁂𑀦𑁆𑀢𑁄𑀧𑀺 𑀏𑀲 𑀯𑀺𑀦𑁂𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀓𑁄𑀥𑀦𑁆𑀢𑀺 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁪𑁦; 𑀅. 𑀦𑀺. 𑁯.𑁨𑁯) 𑀦𑀬𑁂𑀦 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀁 𑀦𑀯𑀦𑁆𑀦𑀁, ‘‘𑀅𑀢𑁆𑀣𑀁 𑀫𑁂 𑀦 𑀘𑀭𑀻’’𑀢𑀺 𑀆𑀤𑀻𑀦𑀜𑁆𑀘 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 ¶ 𑀲𑀺𑀤𑁆𑀥𑀸𑀦𑀁 𑀦𑀯𑀦𑁆𑀦𑀫𑁂𑀯𑀸𑀢𑀺 𑀅𑀝𑁆𑀞𑀸𑀭𑀲𑀦𑁆𑀦𑀁, 𑀔𑀸𑀡𑀼𑀓𑀡𑁆𑀝𑀓𑀸𑀤𑀺𑀦𑀸 𑀅𑀝𑁆𑀞𑀸𑀦𑁂𑀦 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀆𑀖𑀸𑀢𑀯𑀢𑁆𑀣𑀽𑀦𑀁 𑀅𑀜𑁆𑀜𑀢𑀭𑀸𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑀁 𑀆𑀖𑀸𑀢𑀁. 𑀯𑀺𑀲𑀝𑀦𑁆𑀢𑀺 𑀯𑀺𑀢𑁆𑀣𑀢𑀁. 𑀲𑀧𑁆𑀧𑀯𑀺𑀲𑀦𑁆𑀢𑀺 𑀲𑀧𑁆𑀧𑀲𑁆𑀲 𑀯𑀺𑀲𑀁. 𑀇𑀯𑀸𑀢𑀺 𑀑𑀧𑀫𑁆𑀫𑀯𑀘𑀦𑀁, 𑀇-𑀓𑀸𑀭 𑀮𑁄𑀧𑀁 𑀓𑀢𑁆𑀯𑀸 𑀯-𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀑𑀲𑀥𑁂𑀳𑀻𑀢𑀺 𑀅𑀕𑀤𑁂𑀳𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀺𑀲𑀢𑀺𑀓𑀺𑀘𑁆𑀙𑀓𑁄 𑀯𑁂𑀚𑁆𑀚𑁄 𑀲𑀧𑁆𑀧𑁂𑀦 𑀤𑀝𑁆𑀞𑀁 𑀲𑀩𑁆𑀩𑀁 𑀓𑀸𑀬𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁 𑀫𑀽𑀮𑀔𑀦𑁆𑀥𑀢𑀘𑀧𑀢𑁆𑀢𑀧𑀼𑀧𑁆𑀨𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀳𑀺 ¶ 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀧𑀬𑁄𑀚𑁂𑀢𑁆𑀯𑀸 𑀓𑀢𑁂𑀳𑀺 𑀯𑀸 𑀑𑀲𑀥𑁂𑀳𑀺 𑀔𑀺𑀧𑁆𑀧𑀫𑁂𑀯 𑀯𑀺𑀦𑁂𑀬𑁆𑀬, 𑀏𑀯𑀫𑁂𑀯𑀁 𑀬𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀉𑀧𑁆𑀧𑀢𑀺𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁 𑀓𑁄𑀥𑀁 𑀬𑀣𑀸𑀯𑀼𑀢𑁆𑀢𑁂𑀲𑀼 𑀯𑀺𑀦𑀬𑀦𑀽𑀧𑀸𑀬𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀯𑀺𑀦𑁂𑀢𑀺 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀻𑀢𑀺.

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺 𑀲𑁄 𑀏𑀯𑀁 𑀓𑁄𑀥𑀁 𑀯𑀺𑀦𑁂𑀦𑁆𑀢𑁄 𑀪𑀺𑀓𑁆𑀔𑀼 𑀬𑀲𑁆𑀫𑀸 𑀓𑁄𑀥𑁄 𑀢𑀢𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 ¶ 𑀧𑀳𑀻𑀬𑀢𑀺, 𑀢𑀲𑁆𑀫𑀸 𑀑𑀭𑀧𑀸𑀭𑀲𑀜𑁆𑀜𑀺𑀢𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀚𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑁂𑀦 𑀳𑀺 𑀧𑀸𑀭𑀦𑁆𑀢𑀺 𑀢𑀻𑀭𑀲𑁆𑀲 𑀦𑀸𑀫𑀁, 𑀢𑀲𑁆𑀫𑀸 𑀑𑀭𑀸𑀦𑀺 𑀘 𑀢𑀸𑀦𑀺 𑀲𑀁𑀲𑀸𑀭𑀲𑀸𑀕𑀭𑀲𑁆𑀲 𑀧𑀸𑀭𑀪𑀽𑀢𑀸𑀦𑀺 𑀘𑀸𑀢𑀺 𑀓𑀢𑁆𑀯𑀸 ‘‘𑀑𑀭𑀧𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 ‘‘𑀬𑁄 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀺’’, 𑀲𑁄 𑀢𑀢𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀓𑁄𑀥𑀁 𑀯𑀺𑀦𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀞𑀺𑀢𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁. 𑀢𑀢𑁆𑀣 𑀑𑀭𑀦𑁆𑀢𑀺 𑀲𑀓𑀢𑁆𑀢𑀪𑀸𑀯𑁄, 𑀧𑀸𑀭𑀦𑁆𑀢𑀺 𑀧𑀭𑀢𑁆𑀢𑀪𑀸𑀯𑁄. 𑀑𑀭𑀁 𑀯𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀧𑀸𑀭𑀁 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺. 𑀢𑀣𑀸 𑀑𑀭𑀁 𑀫𑀦𑀼𑀲𑁆𑀲𑀮𑁄𑀓𑁄, 𑀧𑀸𑀭𑀁 𑀤𑁂𑀯𑀮𑁄𑀓𑁄. 𑀑𑀭𑀁 𑀓𑀸𑀫𑀥𑀸𑀢𑀼, 𑀧𑀸𑀭𑀁 𑀭𑀽𑀧𑀸𑀭𑀽𑀧𑀥𑀸𑀢𑀼. 𑀑𑀭𑀁 𑀓𑀸𑀫𑀭𑀽𑀧𑀪𑀯𑁄, 𑀧𑀸𑀭𑀁 𑀅𑀭𑀽𑀧𑀪𑀯𑁄. 𑀑𑀭𑀁 𑀅𑀢𑁆𑀢𑀪𑀸𑀯𑁄, 𑀧𑀸𑀭𑀁 𑀅𑀢𑁆𑀢𑀪𑀸𑀯𑀲𑀼𑀔𑀽𑀧𑀓𑀭𑀡𑀸𑀦𑀺. 𑀏𑀯𑀫𑁂𑀢𑀲𑁆𑀫𑀺𑀁 𑀑𑀭𑀧𑀸𑀭𑁂 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀙𑀦𑁆𑀤𑀭𑀸𑀕𑀁 𑀧𑀚𑀳𑀦𑁆𑀢𑁄 ‘‘𑀚𑀳𑀸𑀢𑀺 𑀑𑀭𑀧𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀅𑀦𑀸𑀕𑀸𑀫𑀺𑀦𑁄 𑀓𑀸𑀫𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀇𑀥𑀢𑁆𑀢𑀪𑀸𑀯𑀸𑀤𑀻𑀲𑀼 𑀙𑀦𑁆𑀤𑀭𑀸𑀕𑁄 𑀏𑀯 𑀦𑀢𑁆𑀣𑀺; 𑀅𑀧𑀺𑀘 𑀔𑁄 𑀧𑀦𑀲𑁆𑀲 𑀢𑀢𑀺𑀬𑀫𑀕𑁆𑀕𑀸𑀤𑀻𑀦𑀁 𑀯𑀺𑀬 𑀯𑀡𑁆𑀡𑀧𑁆𑀧𑀓𑀸𑀲𑀦𑀢𑁆𑀣𑀁 𑀲𑀩𑁆𑀩𑀫𑁂𑀢𑀁 𑀑𑀭𑀧𑀸𑀭𑀪𑁂𑀤𑀁 𑀲𑀗𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 ‘‘𑀚𑀳𑀸𑀢𑀺 𑀑𑀭𑀧𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀢𑀲𑁆𑀲𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀸𑀬 𑀉𑀧𑀫𑀁 𑀆𑀳 ‘‘𑀉𑀭𑀕𑁄 𑀚𑀺𑀡𑁆𑀡𑀫𑀺𑀯 𑀢𑀘𑀁 𑀧𑀼𑀭𑀸𑀡’’𑀦𑁆𑀢𑀺. 𑀢𑀢𑁆𑀣 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄, 𑀲𑀧𑁆𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀤𑀼𑀯𑀺𑀥𑁄 𑁋 𑀓𑀸𑀫𑀭𑀽𑀧𑀻 𑀘 𑀅𑀓𑀸𑀫𑀭𑀽𑀧𑀻 𑀘. 𑀓𑀸𑀫𑀭𑀽𑀧𑀻𑀧𑀺 𑀤𑀼𑀯𑀺𑀥𑁄 𑁋 𑀚𑀮𑀚𑁄 𑀣𑀮𑀚𑁄 𑀘. 𑀚𑀮𑀚𑁄 𑀚𑀮𑁂 𑀏𑀯 𑀓𑀸𑀫𑀭𑀽𑀧𑀁 𑀮𑀪𑀢𑀺, 𑀦 𑀣𑀮𑁂, 𑀲𑀗𑁆𑀔𑀧𑀸𑀮𑀚𑀸𑀢𑀓𑁂 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸 𑀯𑀺𑀬. 𑀣𑀮𑀚𑁄 𑀣𑀮𑁂 𑀏𑀯, 𑀦 𑀚𑀮𑁂. 𑀲𑁄 𑀚𑀚𑁆𑀚𑀭𑀪𑀸𑀯𑁂𑀦 𑀚𑀺𑀡𑁆𑀡𑀁, 𑀘𑀺𑀭𑀓𑀸𑀮𑀢𑀸𑀬 𑀧𑀼𑀭𑀸𑀡𑀜𑁆𑀘𑀸𑀢𑀺 𑀲𑀗𑁆𑀔𑀁 𑀕𑀢𑀁. 𑀢𑀘𑀁 𑀚𑀳𑀦𑁆𑀢𑁄 𑀘𑀢𑀼𑀩𑁆𑀩𑀺𑀥𑁂𑀦 𑀚𑀳𑀸𑀢𑀺 𑁋 𑀲𑀚𑀸𑀢𑀺𑀬𑀁 𑀞𑀺𑀢𑁄, 𑀚𑀺𑀕𑀼𑀘𑁆𑀙𑀦𑁆𑀢𑁄, 𑀦𑀺𑀲𑁆𑀲𑀸𑀬, 𑀣𑀸𑀫𑁂𑀦𑀸𑀢𑀺. 𑀲𑀚𑀸𑀢𑀺 𑀦𑀸𑀫 𑀲𑀧𑁆𑀧𑀚𑀸𑀢𑀺 𑀤𑀻𑀖𑀢𑁆𑀢𑀪𑀸𑀯𑁄. 𑀉𑀭𑀕𑀸 𑀳𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀚𑀸𑀢𑀺𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑁋 𑀉𑀧𑀧𑀢𑁆𑀢𑀺𑀬𑀁, 𑀘𑀼𑀢𑀺𑀬𑀁, 𑀯𑀺𑀲𑁆𑀲𑀝𑁆𑀞𑀦𑀺𑀤𑁆𑀤𑁄𑀓𑁆𑀓𑀫𑀦𑁂, 𑀲𑀫𑀸𑀦𑀚𑀸𑀢𑀺𑀬𑀸 ¶ ¶ 𑀫𑁂𑀣𑀼𑀦𑀧𑀝𑀺𑀲𑁂𑀯𑀦𑁂, 𑀚𑀺𑀡𑁆𑀡𑀢𑀘𑀸𑀧𑀦𑀬𑀦𑁂 𑀘𑀸𑀢𑀺. 𑀲𑀧𑁆𑀧𑁄 𑀳𑀺 𑀬𑀤𑀸 𑀢𑀘𑀁 𑀚𑀳𑀸𑀢𑀺, 𑀢𑀤𑀸 𑀲𑀚𑀸𑀢𑀺𑀬𑀁𑀬𑁂𑀯 𑀞𑀢𑁆𑀯𑀸 𑀚𑀳𑀸𑀢𑀺. 𑀲𑀚𑀸𑀢𑀺𑀬𑀁 𑀞𑀺𑀢𑁄𑀧𑀺 𑀘 𑀚𑀺𑀕𑀼𑀘𑁆𑀙𑀦𑁆𑀢𑁄 ¶ 𑀚𑀳𑀸𑀢𑀺. 𑀚𑀺𑀕𑀼𑀘𑁆𑀙𑀦𑁆𑀢𑁄 𑀦𑀸𑀫 𑀬𑀤𑀸 𑀉𑀧𑀟𑁆𑀠𑀝𑁆𑀞𑀸𑀦𑁂 𑀫𑀼𑀢𑁆𑀢𑁄 𑀳𑁄𑀢𑀺, 𑀉𑀧𑀟𑁆𑀠𑀝𑁆𑀞𑀸𑀦𑁂 𑀅𑀫𑀼𑀢𑁆𑀢𑁄 𑀑𑀮𑀫𑁆𑀩𑀢𑀺, 𑀢𑀤𑀸 𑀦𑀁 𑀅𑀝𑁆𑀝𑀻𑀬𑀦𑁆𑀢𑁄 𑀚𑀳𑀸𑀢𑀺. 𑀏𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄𑀧𑀺 𑀘 𑀤𑀡𑁆𑀟𑀦𑁆𑀢𑀭𑀁 𑀯𑀸 𑀫𑀽𑀮𑀦𑁆𑀢𑀭𑀁 𑀯𑀸 𑀧𑀸𑀲𑀸𑀡𑀦𑁆𑀢𑀭𑀁 𑀯𑀸 𑀦𑀺𑀲𑁆𑀲𑀸𑀬 𑀚𑀳𑀸𑀢𑀺. 𑀦𑀺𑀲𑁆𑀲𑀸𑀬 𑀚𑀳𑀦𑁆𑀢𑁄𑀧𑀺 𑀘 𑀣𑀸𑀫𑀁 𑀚𑀦𑁂𑀢𑁆𑀯𑀸, 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸, 𑀯𑀻𑀭𑀺𑀬𑁂𑀦 𑀯𑀗𑁆𑀓𑀁 𑀦𑀗𑁆𑀕𑀼𑀝𑁆𑀞𑀁 𑀓𑀢𑁆𑀯𑀸, 𑀧𑀲𑁆𑀲𑀲𑀦𑁆𑀢𑁄𑀯 𑀨𑀡𑀁 𑀓𑀭𑀺𑀢𑁆𑀯𑀸 𑀚𑀳𑀸𑀢𑀺. 𑀏𑀯𑀁 𑀚𑀳𑀺𑀢𑁆𑀯𑀸 𑀬𑁂𑀦𑀓𑀸𑀫𑀁 𑀧𑀓𑁆𑀓𑀫𑀢𑀺. 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀑𑀭𑀧𑀸𑀭𑀁 𑀚𑀳𑀺𑀢𑀼𑀓𑀸𑀫𑁄 𑀘𑀢𑀼𑀩𑁆𑀩𑀺𑀥𑁂𑀦 𑀚𑀳𑀸𑀢𑀺 𑁋 𑀲𑀚𑀸𑀢𑀺𑀬𑀁 𑀞𑀺𑀢𑁄, 𑀚𑀺𑀕𑀼𑀘𑁆𑀙𑀦𑁆𑀢𑁄, 𑀦𑀺𑀲𑁆𑀲𑀸𑀬, 𑀣𑀸𑀫𑁂𑀦𑀸𑀢𑀺. 𑀲𑀚𑀸𑀢𑀺 𑀦𑀸𑀫 𑀪𑀺𑀓𑁆𑀔𑀼𑀦𑁄 ‘‘𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄’’𑀢𑀺 (𑀫. 𑀦𑀺. 𑁨.𑁩𑁫𑁧) 𑀯𑀘𑀦𑀢𑁄 𑀲𑀻𑀮𑀁. 𑀢𑁂𑀦𑁂𑀯𑀸𑀳 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑁆𑀧𑀜𑁆𑀜𑁄’’𑀢𑀺 (𑀲𑀁. 𑀦𑀺. 𑁧.𑁨𑁩; 𑀧𑁂𑀝𑀓𑁄. 𑁨𑁨). 𑀏𑀯𑀫𑁂𑀢𑀺𑀲𑁆𑀲𑀁 𑀲𑀚𑀸𑀢𑀺𑀬𑀁 𑀞𑀺𑀢𑁄 𑀪𑀺𑀓𑁆𑀔𑀼 𑀢𑀁 𑀲𑀓𑀢𑁆𑀢𑀪𑀸𑀯𑀸𑀤𑀺𑀪𑁂𑀤𑀁 𑀑𑀭𑀧𑀸𑀭𑀁 𑀚𑀺𑀡𑁆𑀡𑀧𑀼𑀭𑀸𑀡𑀢𑀘𑀫𑀺𑀯 𑀤𑀼𑀓𑁆𑀔𑀁 𑀚𑀦𑁂𑀦𑁆𑀢𑀁 𑀢𑀢𑁆𑀣 𑀢𑀢𑁆𑀣 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀚𑀺𑀕𑀼𑀘𑁆𑀙𑀦𑁆𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀅𑀥𑀺𑀫𑀢𑁆𑀢𑀯𑀸𑀬𑀸𑀫𑀲𑀗𑁆𑀔𑀸𑀢𑀁 𑀣𑀸𑀫𑀁 𑀚𑀦𑁂𑀢𑁆𑀯𑀸 ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺 (𑀅. 𑀦𑀺. 𑁩.𑁧𑁬; 𑀯𑀺𑀪. 𑁫𑁧𑁯) 𑀯𑀼𑀢𑁆𑀢𑀦𑀬𑁂𑀦 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙𑀥𑀸 𑀯𑀺𑀪𑀚𑀺𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀉𑀭𑀕𑁄 𑀯𑀺𑀬, 𑀯𑀗𑁆𑀓𑀁 𑀦𑀗𑁆𑀕𑀼𑀝𑁆𑀞𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀭𑀕𑁄 𑀯𑀺𑀬 𑀧𑀲𑁆𑀲𑀲𑀦𑁆𑀢𑁄, 𑀅𑀬𑀫𑁆𑀧𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸𑀬 𑀯𑀸𑀬𑀫𑀦𑁆𑀢𑁄 𑀉𑀭𑀕𑁄 𑀯𑀺𑀬 𑀨𑀡𑀁 𑀓𑀭𑀺𑀢𑁆𑀯𑀸, 𑀅𑀬𑀫𑁆𑀧𑀺 𑀜𑀸𑀡𑀯𑀺𑀧𑁆𑀨𑀸𑀭𑀁 𑀚𑀦𑁂𑀢𑁆𑀯𑀸 𑀉𑀭𑀕𑁄𑀯 𑀢𑀘𑀁 𑀑𑀭𑀧𑀸𑀭𑀁 𑀚𑀳𑀸𑀢𑀺. 𑀚𑀳𑀺𑀢𑁆𑀯𑀸 𑀘 𑀉𑀭𑀕𑁄 𑀯𑀺𑀬 𑀑𑀳𑀺𑀢𑀢𑀘𑁄 𑀬𑁂𑀦𑀓𑀸𑀫𑀁 𑀅𑀬𑀫𑁆𑀧𑀺 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀤𑀺𑀲𑀁 𑀧𑀓𑁆𑀓𑀫𑀢𑀻𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁄 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁, 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀺;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯 𑀢𑀘𑀁 𑀧𑀼𑀭𑀸𑀡’’𑀦𑁆𑀢𑀺.

𑀏𑀯𑀫𑁂𑀲𑀸 ¶ 𑀪𑀕𑀯𑀢𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀧𑀞𑀫𑀕𑀸𑀣𑀸 𑀤𑁂𑀲𑀺𑀢𑀸𑀢𑀺.

𑁨. 𑀇𑀤𑀸𑀦𑀺 𑀤𑀼𑀢𑀺𑀬𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀭𑀸𑀧𑀺 𑁋

‘‘𑀬𑁂𑀦 ¶ 𑀬𑀢𑁆𑀣 𑀬𑀤𑀸 𑀬𑀲𑁆𑀫𑀸, 𑀯𑀼𑀢𑁆𑀢𑀸 𑀕𑀸𑀣𑀸 𑀅𑀬𑀁 𑀇𑀫𑀁;

𑀯𑀺𑀥𑀺𑀁 𑀧𑀓𑀸𑀲𑀬𑀺𑀢𑁆𑀯𑀸𑀲𑁆𑀲𑀸, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺. 𑁋

𑀅𑀬𑀫𑁂𑀯 𑀫𑀸𑀢𑀺𑀓𑀸. 𑀢𑀢𑁄 𑀧𑀭𑀜𑁆𑀘 𑀲𑀩𑁆𑀩𑀕𑀸𑀣𑀸𑀲𑀼. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀇𑀢𑁄 𑀧𑀪𑀼𑀢𑀺 𑀫𑀸𑀢𑀺𑀓𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀦𑀬𑁂𑀦𑁂𑀯 𑀢𑀲𑁆𑀲𑀸 𑀢𑀲𑁆𑀲𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑀬𑁄 𑀭𑀸𑀕𑀫𑀼𑀤𑀘𑁆𑀙𑀺𑀤𑀸 𑀅𑀲𑁂𑀲𑀦𑁆𑀢𑀺 𑀅𑀬𑀁 𑀤𑀼𑀢𑀺𑀬𑀕𑀸𑀣𑀸.

𑀢𑀲𑁆𑀲𑀼𑀧𑁆𑀧𑀢𑁆𑀢𑀺 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀅𑀜𑁆𑀜𑀢𑀭𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁄. 𑀣𑁂𑀭𑁄 𑀢𑀲𑁆𑀲 ‘‘𑀤𑀳𑀭𑀸𑀦𑀁 𑀅𑀲𑀼𑀪𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀫𑀦𑁆𑀢𑁆𑀯𑀸 𑀭𑀸𑀕𑀯𑀺𑀖𑀸𑀢𑀢𑁆𑀣𑀁 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀢𑀲𑁆𑀲 𑀢𑀲𑁆𑀫𑀺𑀁 𑀆𑀲𑁂𑀯𑀦𑀫𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀮𑀪𑀢𑀺. 𑀲𑁄 ‘‘𑀅𑀦𑀼𑀧𑀓𑀸𑀭𑀁 𑀫𑀫𑁂𑀢’’𑀦𑁆𑀢𑀺 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀣𑁂𑀭𑁄 ‘‘𑀤𑀳𑀭𑀸𑀦𑀫𑁂𑀢𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀫𑀦𑁆𑀢𑁆𑀯𑀸 𑀧𑀼𑀦𑀧𑀺 𑀢𑀤𑁂𑀯𑀸𑀘𑀺𑀓𑁆𑀔𑀺. 𑀏𑀯𑀁 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀻𑀢𑀸, 𑀲𑁄 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀯𑀺𑀲𑁂𑀲𑀁 𑀦 𑀮𑀪𑀢𑀺. 𑀢𑀢𑁄 𑀦𑀁 𑀣𑁂𑀭𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦𑁂𑀲𑀺. 𑀪𑀕𑀯𑀸 ‘‘𑀅𑀯𑀺𑀲𑀬𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑀼𑀬𑁆𑀳𑁂𑀢𑀲𑁆𑀲 𑀲𑀧𑁆𑀧𑀸𑀬𑀁 𑀚𑀸𑀦𑀺𑀢𑀼𑀁, 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀏𑀲𑁄’’𑀢𑀺 𑀯𑀢𑁆𑀯𑀸 𑀧𑀪𑀲𑁆𑀲𑀭𑀯𑀡𑁆𑀡𑀁 𑀧𑀤𑀼𑀫𑀁 𑀇𑀤𑁆𑀥𑀺𑀬𑀸 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀧𑀸𑀤𑀸𑀲𑀺 𑁋 ‘‘𑀳𑀦𑁆𑀤, 𑀪𑀺𑀓𑁆𑀔𑀼, 𑀇𑀫𑀁 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀯𑀸𑀮𑀺𑀓𑀸𑀢𑀮𑁂 𑀦𑀸𑀴𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑁂𑀳𑀺, 𑀅𑀪𑀺𑀫𑀼𑀔𑀜𑁆𑀘𑀲𑁆𑀲 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤 ‘𑀮𑁄𑀳𑀺𑀢𑀁 𑀮𑁄𑀳𑀺𑀢’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄’’𑀢𑀺. 𑀅𑀬𑀁 𑀓𑀺𑀭 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀲𑀼𑀯𑀡𑁆𑀡𑀓𑀸𑀭𑁄𑀯 𑀅𑀳𑁄𑀲𑀺. 𑀢𑁂𑀦𑀲𑁆𑀲 ‘‘𑀮𑁄𑀳𑀺𑀢𑀓𑀦𑀺𑀫𑀺𑀢𑁆𑀢𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀜𑀢𑁆𑀯𑀸 𑀪𑀕𑀯𑀸 𑀮𑁄𑀳𑀺𑀢𑀓𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀬𑀣𑀸𑀓𑁆𑀓𑀫𑀁 ¶ 𑀢𑀢𑁆𑀣 𑀘𑀢𑁆𑀢𑀸𑀭𑀺𑀧𑀺 𑀛𑀸𑀦𑀸𑀦𑀺 𑀅𑀥𑀺𑀕𑀦𑁆𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀸𑀤𑀺𑀦𑀸 𑀦𑀬𑁂𑀦 𑀛𑀸𑀦𑀓𑀻𑀴𑀁 𑀆𑀭𑀪𑀺. 𑀅𑀣 𑀪𑀕𑀯𑀸 ‘𑀢𑀁 𑀧𑀤𑀼𑀫𑀁 𑀫𑀺𑀮𑀸𑀬𑀢𑀽’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑁄 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄 𑀢𑀁 𑀫𑀺𑀮𑀸𑀢𑀁 𑀓𑀸𑀴𑀯𑀡𑁆𑀡𑀁 𑀤𑀺𑀲𑁆𑀯𑀸 ‘‘𑀧𑀪𑀲𑁆𑀲𑀭𑀭𑀽𑀧𑀁 𑀚𑀭𑀸𑀬 𑀧𑀭𑀺𑀫𑀤𑁆𑀤𑀺𑀢’’𑀦𑁆𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑀢𑁄 𑀦𑀁 𑀅𑀚𑁆𑀛𑀢𑁆𑀢𑀫𑁆𑀧𑀺 𑀉𑀧𑀲𑀁𑀳𑀭𑀺. 𑀢𑀢𑁄 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 𑀢𑀬𑁄𑀧𑀺 𑀪𑀯𑁂 𑀆𑀤𑀺𑀢𑁆𑀢𑁂 𑀯𑀺𑀬 𑀧𑀲𑁆𑀲𑀺. 𑀏𑀯𑀁 𑀧𑀲𑁆𑀲𑀢𑁄 𑀘𑀲𑁆𑀲𑀸𑀯𑀺𑀤𑀽𑀭𑁂 𑀧𑀤𑀼𑀫𑀲𑁆𑀲𑀭𑁄 𑀅𑀢𑁆𑀣𑀺. 𑀢𑀢𑁆𑀣 𑀤𑀸𑀭𑀓𑀸 𑀑𑀭𑁄𑀳𑀺𑀢𑁆𑀯𑀸 𑀧𑀤𑀼𑀫𑀸𑀦𑀺 𑀪𑀜𑁆𑀚𑀺𑀢𑁆𑀯𑀸 𑀪𑀜𑁆𑀚𑀺𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀲 𑀢𑀸𑀦𑀺 𑀉𑀤𑀓𑁂 𑀧𑀤𑀼𑀫𑀸𑀦𑀺 𑀦𑀴𑀯𑀦𑁂 𑀅𑀕𑁆𑀕𑀺𑀚𑀸𑀮𑀸 𑀯𑀺𑀬 𑀔𑀸𑀬𑀺𑀁𑀲𑀼, 𑀧𑀢𑁆𑀢𑀸𑀦𑀺 𑀧𑀢𑀦𑁆𑀢𑀸𑀦𑀺 𑀧𑀧𑀸𑀢𑀁 𑀧𑀯𑀺𑀲𑀦𑁆𑀢𑀸𑀦𑀺 𑀯𑀺𑀬 𑀔𑀸𑀬𑀺𑀁𑀲𑀼, 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀧𑀤𑀼𑀫𑀸𑀦𑀁 𑀅𑀕𑁆𑀕𑀸𑀦𑀺 𑀫𑀺𑀮𑀸𑀢𑀸𑀦𑀺 𑀅𑀕𑁆𑀕𑀺𑀟𑀟𑁆𑀠𑀸𑀦𑀺 𑀯𑀺𑀬 ¶ 𑀔𑀸𑀬𑀺𑀁𑀲𑀼. 𑀅𑀣𑀲𑁆𑀲 𑀢𑀤𑀦𑀼𑀲𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑁂 𑀉𑀧𑀦𑀺𑀚𑁆𑀛𑀸𑀬𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀫𑀺𑀯 𑀅𑀕𑀸𑀭𑀁 𑀅𑀧𑁆𑀧𑀝𑀺𑀲𑀭𑀡𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀢𑀢𑁄 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀭𑀺 𑀲𑀭𑀻𑀭𑀸𑀪𑀁 𑀫𑀼𑀜𑁆𑀘𑀺. 𑀲𑀸 𑀘𑀲𑁆𑀲 𑀫𑀼𑀔𑀁𑀬𑁂𑀯 𑀅𑀚𑁆𑀛𑁄𑀢𑁆𑀣𑀭𑀺. 𑀢𑀢𑁄 𑀲𑁄 ‘‘𑀓𑀺𑀫𑁂𑀢’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑀫𑀺𑀯 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀑𑀪𑀸𑀲𑀕𑀸𑀣𑀁 𑀅𑀪𑀸𑀲𑀺 ‘‘𑀬𑁄 𑀭𑀸𑀕𑀫𑀼𑀤𑀘𑁆𑀙𑀺𑀤𑀸 𑀅𑀲𑁂𑀲’’𑀦𑁆𑀢𑀺.

𑀢𑀢𑁆𑀣 𑀭𑀜𑁆𑀚𑀦𑀯𑀲𑁂𑀦 𑀭𑀸𑀕𑁄, 𑀧𑀜𑁆𑀘𑀓𑀸𑀫𑀕𑀼𑀡𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀤𑀘𑁆𑀙𑀺𑀤𑀸𑀢𑀺 𑀉𑀘𑁆𑀙𑀺𑀦𑁆𑀤𑀢𑀺, 𑀪𑀜𑁆𑀚𑀢𑀺 ¶ , 𑀯𑀺𑀦𑀸𑀲𑁂𑀢𑀺. 𑀅𑀢𑀻𑀢𑀓𑀸𑀮𑀺𑀓𑀸𑀦𑀫𑁆𑀧𑀺 𑀳𑀺 𑀙𑀦𑁆𑀤𑀲𑀺 𑀯𑀢𑁆𑀢𑀫𑀸𑀦𑀯𑀘𑀦𑀁 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀇𑀘𑁆𑀙𑀦𑁆𑀢𑀺. 𑀅𑀲𑁂𑀲𑀦𑁆𑀢𑀺 𑀲𑀸𑀦𑀼𑀲𑀬𑀁. 𑀪𑀺𑀲𑀧𑀼𑀧𑁆𑀨𑀁𑀯 𑀲𑀭𑁄𑀭𑀼𑀳𑀦𑁆𑀢𑀺 𑀲𑀭𑁂 𑀯𑀺𑀭𑀽𑀴𑁆𑀳𑀁 𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬. 𑀯𑀺𑀕𑀬𑁆𑀳𑀸𑀢𑀺 𑀑𑀕𑀬𑁆𑀳, 𑀧𑀯𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀦𑀸𑀫 𑀏𑀢𑁂 𑀤𑀸𑀭𑀓𑀸 𑀲𑀭𑀁 𑀑𑀭𑀼𑀬𑁆𑀳 𑀪𑀺𑀲𑀧𑀼𑀧𑁆𑀨𑀁 𑀲𑀭𑁄𑀭𑀼𑀳𑀁 𑀙𑀺𑀦𑁆𑀤𑀦𑁆𑀢𑀺, 𑀏𑀯𑀫𑁂𑀯𑀁 𑀬𑁄 𑀪𑀺𑀓𑁆𑀔𑀼 𑀇𑀫𑀁 𑀢𑁂𑀥𑀸𑀢𑀼𑀓𑀮𑁄𑀓𑀲𑀦𑁆𑀦𑀺𑀯𑀸𑀲𑀁 𑀑𑀕𑀬𑁆𑀳 𑁋

‘‘𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀺’’; (𑀥. 𑀧. 𑁨𑁦𑁨);

‘‘𑀓𑀸𑀫𑀭𑀸𑀕𑁂𑀦 ¶ 𑀤𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀤𑀬𑁆𑀳𑀢𑀺’’; (𑀲𑀁. 𑀦𑀺. 𑁧.𑁨𑁧𑁨);

‘‘𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁, 𑀲𑀬𑀁 𑀓𑀢𑀁 𑀫𑀓𑁆𑀓𑀝𑀓𑁄𑀯 𑀚𑀸𑀮𑀁’’. (𑀥. 𑀧. 𑁩𑁪𑁭);

‘‘𑀭𑀢𑁆𑀢𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀻’’𑀢𑀺 (𑀅. 𑀦𑀺. 𑁩.𑁫𑁬, 𑁭𑁨) 𑁋

𑀏𑀯𑀫𑀸𑀤𑀺𑀦𑀬𑀫𑀦𑀼𑀕𑀦𑁆𑀢𑁆𑀯𑀸 𑀭𑀸𑀕𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀲𑀻𑀮𑀲𑀁𑀯𑀭𑀸𑀤𑀻𑀳𑀺 𑀲𑀁𑀯𑀭𑁂𑀳𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑁂𑀲𑀼 𑀯𑀢𑁆𑀣𑀽𑀲𑀼 𑀅𑀲𑀼𑀪𑀲𑀜𑁆𑀜𑀸𑀬 𑀘 𑀣𑁄𑀓𑀁 𑀣𑁄𑀓𑀁 𑀭𑀸𑀕𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀯𑀲𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀘 𑀢𑀢𑁄 𑀅𑀦𑀯𑀲𑁂𑀲𑀫𑁆𑀧𑀺 𑀉𑀘𑁆𑀙𑀺𑀦𑁆𑀤𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯 𑀢𑀘𑀁 𑀧𑀼𑀭𑀸𑀡𑀦𑁆𑀢𑀺. 𑀏𑀯𑀫𑁂𑀲𑀸 𑀪𑀕𑀯𑀢𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀕𑀸𑀣𑀸 𑀤𑁂𑀲𑀺𑀢𑀸. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑁩. 𑀬𑁄 ¶ 𑀢𑀡𑁆𑀳𑀫𑀼𑀤𑀘𑁆𑀙𑀺𑀤𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀯𑀺𑀳𑀭𑀦𑁆𑀢𑁄 𑀢𑀡𑁆𑀳𑀸𑀯𑀲𑁂𑀦 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺. 𑀪𑀕𑀯𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀇𑀫𑀁 𑀑𑀪𑀸𑀲𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣 𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸. 𑀯𑀺𑀲𑀬𑁂𑀳𑀺 𑀢𑀺𑀢𑁆𑀢𑀺𑀁 𑀦 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀭𑀺𑀢𑀦𑁆𑀢𑀺 𑀕𑀢𑀁 𑀧𑀯𑀢𑁆𑀢𑀁, 𑀬𑀸𑀯 𑀪𑀯𑀕𑁆𑀕𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀖𑀲𑀭𑀦𑁆𑀢𑀺 𑀲𑀻𑀖𑀕𑀸𑀫𑀺𑀦𑀺𑀁, 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀆𑀤𑀻𑀦𑀯𑀁 𑀅𑀕𑀡𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀧𑀭𑀘𑀓𑁆𑀓𑀯𑀸𑀴𑀫𑁆𑀧𑀺 ¶ 𑀪𑀯𑀕𑁆𑀕𑀫𑁆𑀧𑀺 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀢𑀁 𑀲𑀭𑀺𑀢𑀁 𑀲𑀻𑀖𑀲𑀭𑀁 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀢𑀡𑁆𑀳𑀁 𑁋

‘‘𑀉𑀧𑀭𑀺𑀯𑀺𑀲𑀸𑀮𑀸 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻;

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄’’𑀢𑀺.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺. (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭);

‘‘𑀊𑀦𑁄 ¶ 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄𑀢𑀺 𑀔𑁄, 𑀫𑀳𑀸𑀭𑀸𑀚𑀸’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀘 𑁋

𑀏𑀯𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀲𑀻𑀮𑀲𑀁𑀯𑀭𑀸𑀤𑀻𑀳𑀺 𑀘 𑀬𑁄 𑀣𑁄𑀓𑀁 𑀣𑁄𑀓𑀁 𑀯𑀺𑀲𑁄𑀲𑀬𑀺𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀲𑁂𑀲𑀁 𑀉𑀘𑁆𑀙𑀺𑀚𑁆𑀚𑀢𑀺, 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑁪. 𑀬𑁄 𑀫𑀸𑀦𑀫𑀼𑀤𑀩𑁆𑀩𑀥𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀗𑁆𑀕𑀸𑀬 𑀢𑀻𑀭𑁂 𑀯𑀺𑀳𑀭𑀦𑁆𑀢𑁄 𑀕𑀺𑀫𑁆𑀳𑀓𑀸𑀮𑁂 𑀅𑀧𑁆𑀧𑁄𑀤𑀓𑁂 𑀲𑁄𑀢𑁂 𑀓𑀢𑀁 𑀦𑀴𑀲𑁂𑀢𑀼𑀁 𑀧𑀘𑁆𑀙𑀸 𑀆𑀕𑀢𑁂𑀦 𑀫𑀳𑁄𑀖𑁂𑀦 𑀯𑀼𑀬𑁆𑀳𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺 𑀲𑀁𑀯𑀺𑀕𑁆𑀕𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀑𑀪𑀸𑀲𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 ¶ 𑀫𑀸𑀦𑁄𑀢𑀺 𑀚𑀸𑀢𑀺𑀆𑀤𑀺𑀯𑀢𑁆𑀣𑀼𑀓𑁄 𑀘𑁂𑀢𑀲𑁄 𑀉𑀡𑁆𑀡𑀸𑀫𑁄. 𑀲𑁄 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄𑀢𑀺 𑀏𑀯𑀁 𑀢𑀺𑀯𑀺𑀥𑁄 𑀳𑁄𑀢𑀺. 𑀧𑀼𑀦 ‘‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺, 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄, 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄, 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄, 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄, 𑀲𑀤𑀺𑀲𑀲𑁆𑀲 𑀳𑀻𑀦𑁄, 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄, 𑀳𑀻𑀦𑀲𑁆𑀲 𑀲𑀤𑀺𑀲𑁄, 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄𑀢𑀺 𑀏𑀯𑀁 𑀦𑀯𑀯𑀺𑀥𑁄 𑀳𑁄𑀢𑀺. 𑀢𑀁 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀫𑀸𑀦𑀁 𑁋

‘‘𑀬𑁂𑀦 𑀫𑀸𑀦𑁂𑀦 𑀫𑀢𑁆𑀢𑀸𑀲𑁂, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺’’𑀦𑁆𑀢𑀺. (𑀇𑀢𑀺𑀯𑀼. 𑁬) 𑁋

𑀆𑀤𑀺𑀦𑀸 ¶ 𑀦𑀬𑁂𑀦 𑀢𑀢𑁆𑀣 𑀆𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀲𑀻𑀮𑀲𑀁𑀯𑀭𑀸𑀤𑀻𑀳𑀺 𑀘 𑀬𑁄 𑀣𑁄𑀓𑀁 𑀣𑁄𑀓𑀁 𑀯𑀥𑁂𑀦𑁆𑀢𑁄 𑀓𑀺𑀮𑁂𑀲𑀸𑀦𑀁 𑀅𑀩𑀮𑀤𑀼𑀩𑁆𑀩𑀮𑀢𑁆𑀢𑀸 𑀦𑀴𑀲𑁂𑀢𑀼𑀲𑀤𑀺𑀲𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀢𑀺𑀩𑀮𑀢𑁆𑀢𑀸 𑀫𑀳𑁄𑀖𑀲𑀤𑀺𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀲𑁂𑀲𑀁 𑀉𑀤𑀩𑁆𑀩𑀥𑀺, 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀯𑀲𑁂𑀦 𑀉𑀘𑁆𑀙𑀺𑀦𑁆𑀤𑀦𑁆𑀢𑁄 𑀯𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑁫. 𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀇𑀢𑁄 𑀧𑀭𑀸𑀦𑀜𑁆𑀘 𑀤𑁆𑀯𑀸𑀤𑀲𑀦𑁆𑀦𑀁 𑀏𑀓𑀸𑀬𑁂𑀯 𑀉𑀧𑁆𑀧𑀢𑁆𑀢𑀺. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 ¶ 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀯𑀸𑀭𑁂𑀬𑁆𑀬𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑁂𑀦𑀘𑀺 𑀯𑀲𑀮𑁂𑀦 𑀅𑀧𑀭𑀺𑀪𑀼𑀢𑁆𑀢𑀧𑀼𑀩𑁆𑀩𑁂𑀳𑀺 𑀧𑀼𑀧𑁆𑀨𑁂𑀳𑀺 𑀤𑀸𑀭𑀺𑀓𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀢𑀺𑀓𑀼𑀮𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀦𑁆𑀢𑀭𑀩𑀸𑀳𑀺𑀭𑀁 𑀲𑀸𑀯𑀢𑁆𑀣𑀺𑀁 𑀯𑀺𑀘𑀺𑀦𑀦𑁆𑀢𑁄 𑀓𑀺𑀜𑁆𑀘𑀺 𑀢𑀺𑀡𑀧𑀼𑀧𑁆𑀨𑀫𑁆𑀧𑀺 𑀅𑀧𑀭𑀺𑀪𑀼𑀢𑁆𑀢𑀧𑀼𑀩𑁆𑀩𑀁 𑀦𑀸𑀤𑁆𑀤𑀲. 𑀅𑀣 𑀲𑀫𑁆𑀩𑀳𑀼𑀮𑁂 𑀥𑀼𑀢𑁆𑀢𑀓𑀚𑀸𑀢𑀺𑀓𑁂 𑀩𑁆𑀭𑀸𑀳𑁆𑀫𑀡𑀤𑀸𑀭𑀓𑁂 𑀲𑀦𑁆𑀦𑀺𑀧𑀢𑀺𑀢𑁂 𑀤𑀺𑀲𑁆𑀯𑀸 ‘‘𑀏𑀢𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀅𑀯𑀲𑁆𑀲𑀁 𑀲𑀫𑁆𑀩𑀳𑀼𑀮𑁂𑀲𑀼 𑀓𑁄𑀘𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀢𑁂 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀉𑀧𑁆𑀧𑀡𑁆𑀟𑁂𑀦𑁆𑀢𑀸 𑀆𑀳𑀁𑀲𑀼 𑁋 ‘‘𑀉𑀤𑀼𑀫𑁆𑀩𑀭𑀧𑀼𑀧𑁆𑀨𑀁 𑀦𑀸𑀫, 𑀩𑁆𑀭𑀸𑀳𑁆𑀫𑀡, 𑀮𑁄𑀓𑁂 𑀦 𑀓𑁂𑀦𑀘𑀺 𑀧𑀭𑀺𑀪𑀼𑀢𑁆𑀢𑀧𑀼𑀩𑁆𑀩𑀁. 𑀢𑁂𑀦 𑀥𑀻𑀢𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑁂𑀳𑀻’’𑀢𑀺. 𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀓𑀢𑁆𑀯𑀸 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂 𑀉𑀤𑀼𑀫𑁆𑀩𑀭𑀯𑀦𑀁 𑀕𑀦𑁆𑀢𑁆𑀯𑀸 𑀏𑀓𑀫𑁂𑀓𑀁 𑀭𑀼𑀓𑁆𑀔𑀁 𑀯𑀺𑀘𑀺𑀦𑀦𑁆𑀢𑁄 𑀧𑀼𑀧𑁆𑀨𑀲𑁆𑀲 𑀯𑀡𑁆𑀝𑀫𑀢𑁆𑀢𑀫𑁆𑀧𑀺 𑀦𑀸𑀤𑁆𑀤𑀲. 𑀅𑀣 𑀯𑀻𑀢𑀺𑀯𑀢𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀤𑀼𑀢𑀺𑀬𑀢𑀻𑀭𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀘 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀦𑀼𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 ¶ 𑀫𑀦𑀲𑀺 𑀓𑀭𑁄𑀢𑀺. 𑀲𑁄 𑀢𑀢𑁆𑀣 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀫𑀦𑀲𑀺𑀓𑀭𑀺𑀢𑁆𑀯𑀸, 𑀲𑀓𑀺𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀓𑀺𑀁 𑀉𑀓𑁆𑀓𑀼𑀝𑀺𑀓𑁄 𑀳𑀼𑀢𑁆𑀯𑀸, 𑀲𑀓𑀺𑀁 𑀞𑀢𑁆𑀯𑀸, 𑀢𑀁 𑀭𑀼𑀓𑁆𑀔𑀁 𑀲𑀩𑁆𑀩𑀲𑀸𑀔𑀸𑀯𑀺𑀝𑀧𑀧𑀢𑁆𑀢𑀦𑁆𑀢𑀭𑁂𑀲𑀼 𑀯𑀺𑀘𑀺𑀦𑀦𑁆𑀢𑁄 𑀓𑀺𑀮𑀫𑀢𑀺. 𑀢𑀢𑁄 𑀦𑀁 𑀲𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀫𑀕𑁆𑀕𑀲𑀻’’𑀢𑀺? ‘‘𑀉𑀤𑀼𑀫𑁆𑀩𑀭𑀧𑀼𑀧𑁆𑀨𑀁, 𑀪𑁄’’𑀢𑀺. ‘‘𑀉𑀤𑀼𑀫𑁆𑀩𑀭𑀧𑀼𑀧𑁆𑀨𑀁 𑀦𑀸𑀫, 𑀩𑁆𑀭𑀸𑀳𑁆𑀫𑀡, 𑀮𑁄𑀓𑁂 𑀦𑀢𑁆𑀣𑀺, 𑀫𑀼𑀲𑀸 𑀏𑀢𑀁 𑀯𑀘𑀦𑀁, 𑀫𑀸 𑀓𑀺𑀮𑀫𑀸’’𑀢𑀺. 𑀅𑀣 𑀪𑀕𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀑𑀪𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀲𑀫𑀦𑁆𑀦𑀸𑀳𑀸𑀭𑀩𑀳𑀼𑀫𑀸𑀦𑀲𑁆𑀲 𑀇𑀫𑀸 𑀑𑀪𑀸𑀲𑀕𑀸𑀣𑀸𑀬𑁄 𑀅𑀪𑀸𑀲𑀺 ‘‘𑀬𑁄 𑀦𑀸𑀚𑁆𑀛𑀕𑀫𑀸 𑀪𑀯𑁂𑀲𑀼 𑀲𑀸𑀭’’𑀦𑁆𑀢𑀺 𑀲𑀩𑁆𑀩𑀸 𑀯𑀢𑁆𑀢𑀩𑁆𑀩𑀸.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀦𑀸𑀚𑁆𑀛𑀕𑀫𑀸𑀢𑀺 𑀦𑀸𑀥𑀺𑀕𑀘𑁆𑀙𑀺, 𑀦𑀸𑀥𑀺𑀕𑀘𑁆𑀙𑀢𑀺 𑀯𑀸. 𑀪𑀯𑁂𑀲𑀽𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀲𑀜𑁆𑀜𑀻𑀅𑀲𑀜𑁆𑀜𑀻𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼. 𑀲𑀸𑀭𑀦𑁆𑀢𑀺 𑀦𑀺𑀘𑁆𑀘𑀪𑀸𑀯𑀁 𑀅𑀢𑁆𑀢𑀪𑀸𑀯𑀁 𑀯𑀸. 𑀯𑀺𑀘𑀺𑀦𑀦𑁆𑀢𑀺 𑀧𑀜𑁆𑀜𑀸𑀬 𑀕𑀯𑁂𑀲𑀦𑁆𑀢𑁄. 𑀧𑀼𑀧𑁆𑀨𑀫𑀺𑀯 𑀉𑀤𑀼𑀫𑁆𑀩𑀭𑁂𑀲𑀽𑀢𑀺 𑀬𑀣𑀸 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂𑀲𑀼 ¶ 𑀧𑀼𑀧𑁆𑀨𑀁 𑀯𑀺𑀘𑀺𑀦𑀦𑁆𑀢𑁄 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀦𑀸𑀚𑁆𑀛𑀕𑀫𑀸, 𑀏𑀯𑀁 𑀬𑁄 𑀬𑁄𑀕𑀸𑀯𑀘𑀭𑁄𑀧𑀺 𑀧𑀜𑁆𑀜𑀸𑀬 𑀯𑀺𑀘𑀺𑀦𑀦𑁆𑀢𑁄 𑀲𑀩𑁆𑀩𑀪𑀯𑁂𑀲𑀼 𑀓𑀺𑀜𑁆𑀘𑀺 𑀲𑀸𑀭𑀁 𑀦𑀸𑀚𑁆𑀛𑀕𑀫𑀸. 𑀲𑁄 𑀅𑀲𑀸𑀭𑀓𑀝𑁆𑀞𑁂𑀦 𑀢𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀢𑁄 𑀅𑀦𑀢𑁆𑀢𑀢𑁄 𑀘 𑀯𑀺𑀧𑀲𑁆𑀲𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀅𑀥𑀺𑀕𑀘𑁆𑀙𑀦𑁆𑀢𑁄 𑀚𑀳𑀸𑀢𑀺 𑀑𑀭𑀧𑀸𑀭𑀁 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯 ¶ 𑀢𑀘𑀁 𑀧𑀼𑀭𑀸𑀡𑀦𑁆𑀢𑀺 𑀅𑀬𑀫𑀢𑁆𑀣𑁄 𑀬𑁄𑀚𑀦𑀸 𑀘. 𑀅𑀯𑀲𑁂𑀲𑀕𑀸𑀣𑀸𑀲𑀼 𑀧𑀦𑀲𑁆𑀲 𑀬𑁄𑀚𑀦𑀁 𑀅𑀯𑀢𑁆𑀯𑀸 𑀯𑀺𑀲𑁂𑀲𑀢𑁆𑀣𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑁬.

‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸,

𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄’’𑀢𑀺. (𑀉𑀤𑀸. 𑁨𑁦) 𑁋

𑀏𑀢𑁆𑀣 𑀢𑀸𑀯 𑀅𑀬𑀁 ‘𑀅𑀦𑁆𑀢𑀭𑀲𑀤𑁆𑀤𑁄’ 𑁋

‘‘𑀦𑀤𑀻𑀢𑀻𑀭𑁂𑀲𑀼 𑀲𑀡𑁆𑀞𑀸𑀦𑁂, 𑀲𑀪𑀸𑀲𑀼 𑀭𑀣𑀺𑀬𑀸𑀲𑀼 𑀘;

𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁨𑁮);

‘‘𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸 𑀯𑁄𑀲𑀸𑀦𑀫𑀸𑀧𑀸𑀤𑀺’’ (𑀅. 𑀦𑀺. 𑁧𑁦.𑁮𑁪);

‘‘𑀅𑀦𑀢𑁆𑀣𑀚𑀦𑀦𑁄 𑀓𑁄𑀥𑁄, 𑀓𑁄𑀥𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀻’’𑀢𑀺. (𑀅. 𑀦𑀺. 𑁭.𑁬𑁪; 𑀇𑀢𑀺𑀯𑀼. 𑁮𑁮) 𑁋

𑀏𑀯𑀁 ¶ 𑀓𑀸𑀭𑀡𑀯𑁂𑀫𑀚𑁆𑀛𑀘𑀺𑀢𑁆𑀢𑀸𑀤𑀻𑀲𑀼 𑀲𑀫𑁆𑀩𑀳𑀼𑀮𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀇𑀥 𑀧𑀦 𑀘𑀺𑀢𑁆𑀢𑁂. 𑀢𑀢𑁄 𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸𑀢𑀺 𑀢𑀢𑀺𑀬𑀫𑀕𑁆𑀕𑁂𑀦 𑀲𑀫𑀽𑀳𑀢𑀢𑁆𑀢𑀸 𑀬𑀲𑁆𑀲 𑀘𑀺𑀢𑁆𑀢𑁂 𑀦 𑀲𑀦𑁆𑀢𑀺 𑀓𑁄𑀧𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀪𑀯𑁄𑀢𑀺 𑀲𑀫𑁆𑀧𑀢𑁆𑀢𑀺, 𑀯𑀺𑀪𑀯𑁄𑀢𑀺 𑀯𑀺𑀧𑀢𑁆𑀢𑀺. 𑀢𑀣𑀸 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀯𑀺𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀲𑀲𑁆𑀲𑀢𑁄, 𑀯𑀺𑀪𑀯𑁄𑀢𑀺 𑀉𑀘𑁆𑀙𑁂𑀤𑁄. 𑀪𑀯𑁄𑀢𑀺 𑀧𑀼𑀜𑁆𑀜𑀁, 𑀯𑀺𑀪𑀯𑁄𑀢𑀺 𑀧𑀸𑀧𑀁. 𑀯𑀺𑀪𑀯𑁄 𑀅𑀪𑀯𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀢𑀲𑁆𑀫𑀸 𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀏𑀢𑁆𑀣 𑀬𑀸 𑀏𑀲𑀸 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀼𑀟𑁆𑀠𑀺𑀳𑀸𑀦𑀺𑀲𑀲𑁆𑀲𑀢𑀼𑀘𑁆𑀙𑁂𑀤𑀧𑀼𑀜𑁆𑀜𑀧𑀸𑀧𑀯𑀲𑁂𑀦 𑀇𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀪𑀯𑀸𑀪𑀯𑀢𑀸 𑀯𑀼𑀘𑁆𑀘𑀢𑀺. 𑀘𑀢𑀽𑀳𑀺𑀧𑀺 𑀫𑀕𑁆𑀕𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀢𑁂𑀦 𑀢𑁂𑀦 𑀦𑀬𑁂𑀦 𑀢𑀁 𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀜𑀸𑀢𑀩𑁆𑀩𑁄.

𑁭. 𑀬𑀲𑁆𑀲 ¶ 𑀯𑀺𑀢𑀓𑁆𑀓𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀬𑁄 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸, 𑀢𑀬𑁄 𑀜𑀸𑀢𑀺𑀚𑀦𑀧𑀤𑀸𑀫𑀭𑀯𑀺𑀢𑀓𑁆𑀓𑀸, 𑀢𑀬𑁄 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀸𑀢𑀺 𑀏𑀢𑁂 𑀦𑀯 𑀯𑀺𑀢𑀓𑁆𑀓𑀸 𑀲𑀫𑀦𑁆𑀢𑀪𑀤𑁆𑀤𑀓𑁂 𑀯𑀼𑀢𑁆𑀢𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀆𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ¶ 𑀧𑀝𑀺𑀧𑀓𑁆𑀔𑀯𑀯𑀢𑁆𑀣𑀸𑀦𑁂𑀦 𑀢𑀲𑁆𑀲 𑀢𑀲𑁆𑀲 𑀧𑀳𑀸𑀦𑀲𑀫𑀢𑁆𑀣𑁂𑀳𑀺 𑀢𑀻𑀳𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀘 𑀯𑀺𑀥𑀽𑀧𑀺𑀢𑀸 𑀪𑀼𑀲𑀁 𑀥𑀽𑀧𑀺𑀢𑀸 𑀲𑀦𑁆𑀢𑀸𑀧𑀺𑀢𑀸 𑀤𑀟𑁆𑀠𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀺𑀥𑀽𑀧𑁂𑀢𑁆𑀯𑀸 𑀘 𑀅𑀚𑁆𑀛𑀢𑁆𑀢𑀁 𑀲𑀼𑀯𑀺𑀓𑀧𑁆𑀧𑀺𑀢𑀸 𑀅𑀲𑁂𑀲𑀸, 𑀦𑀺𑀬𑀓𑀚𑁆𑀛𑀢𑁆𑀢𑀪𑀽𑀢𑁂 𑀅𑀢𑁆𑀢𑀦𑁄 𑀔𑀦𑁆𑀥𑀲𑀦𑁆𑀢𑀸𑀦𑁂 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀪𑀽𑀢𑁂 𑀘𑀺𑀢𑁆𑀢𑁂 𑀘 𑀬𑀣𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀲𑁂𑀲𑀸 𑀙𑀺𑀦𑁆𑀦𑀸. 𑀙𑀺𑀦𑁆𑀦𑀜𑁆𑀳𑀺 𑀓𑀧𑁆𑀧𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 (𑀲𑀁. 𑀦𑀺. 𑁧.𑁧𑁨𑁨; 𑁪.𑁩𑁬𑁫). 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁮. 𑀇𑀤𑀸𑀦𑀺 𑀬𑁄 𑀦𑀸𑀘𑁆𑀘𑀲𑀸𑀭𑀻𑀢𑀺 𑀏𑀢𑁆𑀣 𑀬𑁄 𑀦𑀸𑀘𑁆𑀘𑀲𑀸𑀭𑀻𑀢𑀺 𑀬𑁄 𑀦𑀸𑀢𑀺𑀥𑀸𑀯𑀺. 𑀦 𑀧𑀘𑁆𑀘𑀲𑀸𑀭𑀻𑀢𑀺 𑀦 𑀑𑀳𑀻𑀬𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑁂𑀦 𑀳𑀺 𑀉𑀤𑁆𑀥𑀘𑁆𑀘𑁂 𑀧𑀢𑀦𑁆𑀢𑁄 𑀅𑀘𑁆𑀘𑀸𑀲𑀭𑀢𑀺, 𑀅𑀢𑀺𑀲𑀺𑀣𑀺𑀮𑁂𑀦 𑀓𑁄𑀲𑀚𑁆𑀚𑁂 𑀧𑀢𑀦𑁆𑀢𑁄 𑀧𑀘𑁆𑀘𑀸𑀲𑀭𑀢𑀺. 𑀢𑀣𑀸 𑀪𑀯𑀢𑀡𑁆𑀳𑀸𑀬 𑀅𑀢𑁆𑀢𑀸𑀦𑀁 𑀓𑀺𑀮𑀫𑁂𑀦𑁆𑀢𑁄 𑀅𑀘𑁆𑀘𑀸𑀲𑀭𑀢𑀺, 𑀓𑀸𑀫𑀢𑀡𑁆𑀳𑀸𑀬 𑀓𑀸𑀫𑀲𑀼𑀔𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀘𑁆𑀘𑀸𑀲𑀭𑀢𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀅𑀘𑁆𑀘𑀸𑀲𑀭𑀢𑀺, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀸𑀲𑀭𑀢𑀺. 𑀅𑀢𑀻𑀢𑀁 𑀅𑀦𑀼𑀲𑁄𑀘𑀦𑁆𑀢𑁄 𑀅𑀘𑁆𑀘𑀸𑀲𑀭𑀢𑀺, 𑀅𑀦𑀸𑀕𑀢 𑀧𑀝𑀺𑀓𑀗𑁆𑀔𑀦𑁆𑀢𑁄 𑀧𑀘𑁆𑀘𑀸𑀲𑀭𑀢𑀺. 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀅𑀘𑁆𑀘𑀸𑀲𑀭𑀢𑀺, 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀸𑀲𑀭𑀢𑀺. 𑀢𑀲𑁆𑀫𑀸 𑀬𑁄 𑀏𑀢𑁂 𑀉𑀪𑁄 𑀅𑀦𑁆𑀢𑁂 𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀦𑀸𑀘𑁆𑀘𑀲𑀸𑀭𑀻 𑀦 𑀧𑀘𑁆𑀘𑀲𑀸𑀭𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀁 ¶ 𑀅𑀘𑁆𑀘𑀕𑀫𑀸 𑀇𑀫𑀁 𑀧𑀧𑀜𑁆𑀘𑀦𑁆𑀢𑀺 𑀢𑀸𑀬 𑀘 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑀯𑁄𑀲𑀸𑀦𑀸𑀬 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀲𑀩𑁆𑀩𑀁 𑀇𑀫𑀁 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀢𑀓𑁆𑀓𑀧𑁆𑀧𑀪𑀯𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀢𑀺𑀯𑀺𑀥𑀁 𑀧𑀧𑀜𑁆𑀘𑀁 𑀅𑀘𑁆𑀘𑀕𑀫𑀸 𑀅𑀢𑀺𑀓𑁆𑀓𑀦𑁆𑀢𑁄, 𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁯. 𑀢𑀤𑀦𑀦𑁆𑀢𑀭𑀕𑀸𑀣𑀸𑀬 𑀧𑀦 𑀲𑀩𑁆𑀩𑀁 𑀯𑀺𑀢𑀣𑀫𑀺𑀤𑀦𑁆𑀢𑀺 𑀜𑀢𑁆𑀯𑀸 𑀮𑁄𑀓𑁂𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀢𑀲𑁆𑀲𑀢𑁆𑀣𑁄 𑁋 𑀲𑀩𑁆𑀩𑀦𑁆𑀢𑀺 𑀅𑀦𑀯𑀲𑁂𑀲𑀁, 𑀲𑀓𑀮𑀫𑀦𑀽𑀦𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀦 𑀯𑀺𑀧𑀲𑁆𑀲𑀦𑀼𑀧𑀕𑀁 𑀮𑁄𑀓𑀺𑀬𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑁆𑀧𑀪𑁂𑀤𑀁 𑀲𑀗𑁆𑀔𑀢𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀯𑀺𑀢𑀣𑀦𑁆𑀢𑀺 𑀯𑀺𑀕𑀢𑀢𑀣𑀪𑀸𑀯𑀁. 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀲𑀼𑀔𑀦𑁆𑀢𑀺 𑀯𑀸 𑀲𑀼𑀪𑀦𑁆𑀢𑀺 𑀯𑀸 𑀅𑀢𑁆𑀢𑀸𑀢𑀺 𑀯𑀸 𑀬𑀣𑀸 𑀬𑀣𑀸 𑀓𑀺𑀮𑁂𑀲𑀯𑀲𑁂𑀦 𑀩𑀸𑀮𑀚𑀦𑁂𑀳𑀺 𑀕𑀬𑁆𑀳𑀢𑀺, 𑀢𑀣𑀸𑀢𑀣𑀸𑀪𑀸𑀯𑀢𑁄 𑀯𑀺𑀢𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀦𑁆𑀢𑀺 𑀢𑀫𑁂𑀯 𑀲𑀩𑁆𑀩𑀁 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀜𑀢𑁆𑀯𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸, 𑀢𑀜𑁆𑀘 𑀧𑀦 𑀅𑀲𑀫𑁆𑀫𑁄𑀳𑀢𑁄, 𑀦 𑀯𑀺𑀲𑀬𑀢𑁄. 𑀮𑁄𑀓𑁂𑀢𑀺 𑀑𑀓𑀸𑀲𑀮𑁄𑀓𑁂 𑀲𑀩𑁆𑀩𑀁 𑀔𑀦𑁆𑀥𑀸𑀤𑀺𑀪𑁂𑀤𑀁 𑀥𑀫𑁆𑀫𑀚𑀸𑀢𑀁 ‘‘𑀯𑀺𑀢𑀣𑀫𑀺𑀤’’𑀦𑁆𑀢𑀺 𑀜𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦-𑁧𑁩. 𑀇𑀤𑀸𑀦𑀺 𑀇𑀢𑁄 𑀧𑀭𑀸𑀲𑀼 𑀘𑀢𑀽𑀲𑀼 𑀕𑀸𑀣𑀸𑀲𑀼 𑀯𑀻𑀢𑀮𑁄𑀪𑁄 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄𑀢𑀺 𑀏𑀢𑁂 𑀯𑀺𑀲𑁂𑀲𑀸. 𑀏𑀢𑁆𑀣 𑀮𑀼𑀩𑁆𑀪𑀦𑀯𑀲𑁂𑀦 𑀮𑁄𑀪𑁄. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀫𑁂𑀢𑀁 𑀧𑀞𑀫𑀲𑁆𑀲 𑀅𑀓𑀼𑀲𑀮𑀫𑀽𑀮𑀲𑁆𑀲 𑀅𑀥𑀺𑀯𑀘𑀦𑀁, 𑀯𑀺𑀲𑀫𑀮𑁄𑀪𑀲𑁆𑀲 𑀯𑀸. 𑀬𑁄 𑀲𑁄 ‘‘𑀅𑀧𑁆𑀧𑁂𑀓𑀤𑀸 𑀫𑀸𑀢𑀼𑀫𑀢𑁆𑀢𑀻𑀲𑀼𑀧𑀺 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀪𑀕𑀺𑀦𑀺𑀫𑀢𑁆𑀢𑀻𑀲𑀼𑀧𑀺 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀥𑀻𑀢𑀼𑀫𑀢𑁆𑀢𑀻𑀲𑀼𑀧𑀺 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁪.𑁧𑁨𑁭) 𑀏𑀯𑀁 𑀯𑀼𑀢𑁆𑀢𑁄. 𑀭𑀚𑁆𑀚𑀦𑀯𑀲𑁂𑀦 𑀭𑀸𑀕𑁄, 𑀧𑀜𑁆𑀘𑀓𑀸𑀫𑀕𑀼𑀡𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀼𑀲𑁆𑀲𑀦𑀯𑀲𑁂𑀦 ¶ 𑀤𑁄𑀲𑁄, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀓𑁄𑀥𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀼𑀬𑁆𑀳𑀦𑀯𑀲𑁂𑀦 𑀫𑁄𑀳𑁄, 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀬𑀲𑁆𑀫𑀸 𑀅𑀬𑀁 𑀪𑀺𑀓𑁆𑀔𑀼 𑀮𑁄𑀪𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀮𑁄𑀪𑀁 𑀯𑀺𑀦𑁂𑀢𑁆𑀯𑀸 𑀯𑀺𑀕𑀢𑀮𑁄𑀪𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀮𑁄𑀪𑀧𑁆𑀧𑀳𑀸𑀦𑀽𑀧𑀸𑀬𑀁 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀯𑀺𑀢𑀣𑀪𑀸𑀯𑀤𑀲𑁆𑀲𑀦𑀁 𑀮𑁄𑀪𑀧𑁆𑀧𑀳𑀸𑀦𑀸𑀦𑀺𑀲𑀁𑀲𑀜𑁆𑀘 𑀑𑀭𑀧𑀸𑀭𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳. 𑀏𑀲 𑀦𑀬𑁄 𑀇𑀢𑁄 𑀧𑀭𑀸𑀲𑀼𑀧𑀺. 𑀓𑁂𑀘𑀺 𑀧𑀦𑀸𑀳𑀼 𑁋 ‘‘𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀏𑀢𑁂 𑀥𑀫𑁆𑀫𑁂 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀫𑀸𑀭𑀤𑁆𑀥𑀲𑁆𑀲 𑀢𑀲𑁆𑀲 ¶ 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀫𑁂𑀓𑀸𑀯 𑀏𑀢𑁆𑀣 𑀕𑀸𑀣𑀸 𑀯𑀼𑀢𑁆𑀢𑀸’’𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑀸𑀲𑀼 𑀘𑀢𑀽𑀲𑀼 𑀕𑀸𑀣𑀸𑀲𑀼.

𑁧𑁪. 𑀅𑀬𑀁 ¶ 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀲𑀬𑀦𑁆𑀢𑀻𑀢𑀺 𑀅𑀦𑀼𑀲𑀬𑀸 𑀓𑀸𑀫𑀭𑀸𑀕𑀧𑀝𑀺𑀖𑀫𑀸𑀦𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀆𑀓𑀸𑀭𑀸𑀦𑀼𑀯𑀺𑀥𑀸𑀦𑀝𑁆𑀞𑁂𑀦 𑀫𑀽𑀮𑀸; 𑀅𑀔𑁂𑀫𑀝𑁆𑀞𑁂𑀦 𑀅𑀓𑀼𑀲𑀮𑀸; 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀪𑀽𑀢𑀸𑀢𑀺𑀧𑀺 𑀫𑀽𑀮𑀸; 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀝𑁆𑀞𑁂𑀦 𑀅𑀓𑀼𑀲𑀮𑀸; 𑀉𑀪𑀬𑀫𑁆𑀧𑁂𑀢𑀁 𑀮𑁄𑀪𑀤𑁄𑀲𑀫𑁄𑀳𑀸𑀦𑀁 𑀅𑀥𑀺𑀯𑀘𑀦𑀁. 𑀢𑁂 𑀳𑀺 ‘‘𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀫𑀽𑀮𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸. 𑀏𑀯𑀫𑁂𑀢𑁂 𑀅𑀦𑀼𑀲𑀬𑀸 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸 𑀬𑀲𑁆𑀲 𑀓𑁂𑀘𑀺 𑀦 𑀲𑀦𑁆𑀢𑀺, 𑀏𑀢𑁂 𑀘 𑀅𑀓𑀼𑀲𑀮𑀫𑀽𑀮𑀸 𑀢𑀣𑁂𑀯 𑀲𑀫𑀽𑀳𑀢𑀸𑀲𑁂, 𑀲𑀫𑀽𑀳𑀢𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀲𑁆𑀲 𑀳𑀺 𑀲𑁂-𑀓𑀸𑀭𑀸𑀕𑀫𑀁 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀮𑀓𑁆𑀔𑀡𑀓𑁄𑀯𑀺𑀤𑀸. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 ‘‘𑀲𑁂𑀢𑀺 𑀦𑀺𑀧𑀸𑀢𑁄’’𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣 𑀧𑀦 ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁𑀯𑀺𑀥𑁄 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑁄 𑀳𑁄𑀢𑀺, 𑀔𑀻𑀡𑀸𑀲𑀯𑁄 𑀘 𑀦𑁂𑀯 𑀆𑀤𑀺𑀬𑀢𑀺, 𑀦 𑀧𑀚𑀳𑀢𑀺, 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄’’𑀢𑀺 𑀯𑀼𑀢𑁆𑀢𑁄. 𑀢𑀣𑀸𑀧𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀮𑀓𑁆𑀔𑀡𑁂𑀦 ‘‘𑀚𑀳𑀸𑀢𑀺 𑀑𑀭𑀧𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁄 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀁 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀘𑀸𑀢𑀺 𑀤𑁆𑀯𑀺𑀥𑀸 𑀅𑀦𑀼𑀲𑀬𑀸𑀦𑀁 𑀅𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀳𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀧𑀝𑀺𑀖𑀸𑀦𑀼𑀲𑀬𑀸𑀦𑀁 𑀢𑀢𑀺𑀬𑀫𑀕𑁆𑀕𑁂𑀦 𑀅𑀪𑀸𑀯𑁄 𑀳𑁄𑀢𑀺, 𑀫𑀸𑀦𑀸𑀦𑀼𑀲𑀬𑀲𑁆𑀲 𑀘𑀢𑀼𑀢𑁆𑀣𑀫𑀕𑁆𑀕𑁂𑀦, 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀧𑀞𑀫𑀫𑀕𑁆𑀕𑁂𑀦, 𑀪𑀯𑀭𑀸𑀕𑀸𑀦𑀼𑀲𑀬𑀸𑀯𑀺𑀚𑁆𑀚𑀸𑀦𑀼𑀲𑀬𑀸𑀦𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦𑁂𑀯. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 ¶ 𑀧𑀦 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀅𑀪𑀸𑀯𑁄 𑀳𑁄𑀢𑀺. 𑀤𑀼𑀢𑀺𑀬𑀫𑀕𑁆𑀕𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑀧𑀝𑀺𑀖𑀸𑀦𑀼𑀲𑀬𑀸𑀦𑀁 𑀢𑀦𑀼𑀪𑀸𑀯𑁄, 𑀢𑀢𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀅𑀪𑀸𑀯𑁄, 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀫𑀸𑀦𑀸𑀦𑀼𑀲𑀬𑀪𑀯𑀭𑀸𑀕𑀸𑀦𑀼𑀲𑀬𑀸𑀯𑀺𑀚𑁆𑀚𑀸𑀦𑀼𑀲𑀬𑀸𑀦𑀁 𑀅𑀪𑀸𑀯𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀦 𑀲𑀩𑁆𑀩𑁂 𑀅𑀦𑀼𑀲𑀬𑀸 𑀅𑀓𑀼𑀲𑀮𑀫𑀽𑀮𑀸; 𑀓𑀸𑀫𑀭𑀸𑀕𑀪𑀯𑀭𑀸𑀕𑀸𑀦𑀼𑀲𑀬𑀸 𑀏𑀯 𑀳𑀺 𑀮𑁄𑀪𑀸𑀓𑀼𑀲𑀮𑀫𑀽𑀮𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀧𑀝𑀺𑀖𑀸𑀦𑀼𑀲𑀬𑀸𑀯𑀺𑀚𑁆𑀚𑀸𑀦𑀼𑀲𑀬𑀸 𑀘 ‘‘𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁’’ 𑀇𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺, 𑀤𑀺𑀝𑁆𑀞𑀺𑀫𑀸𑀦𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 ¶ 𑀧𑀦 𑀦 𑀓𑀺𑀜𑁆𑀘𑀺 𑀅𑀓𑀼𑀲𑀮𑀫𑀽𑀮𑀁 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀯𑀸 𑀅𑀦𑀼𑀲𑀬𑀸𑀪𑀸𑀯𑀯𑀲𑁂𑀦 𑀘 𑀅𑀓𑀼𑀲𑀮𑀫𑀽𑀮𑀲𑀫𑀼𑀕𑁆𑀖𑀸𑀢𑀯𑀲𑁂𑀦 𑀘 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀝𑁆𑀞𑀧𑁂𑀲𑀺, 𑀢𑀲𑁆𑀫𑀸 𑁋

‘‘𑀬𑀲𑁆𑀲𑀸𑀦𑀼𑀲𑀬𑀸 ¶ 𑀦 𑀲𑀦𑁆𑀢𑀺 𑀓𑁂𑀘𑀺, 𑀫𑀽𑀮𑀸 𑀘 𑀅𑀓𑀼𑀲𑀮𑀸 𑀲𑀫𑀽𑀳𑀢𑀸𑀲𑁂’’. 𑁋

𑀇𑀢𑀺 𑀪𑀕𑀯𑀸 𑀆𑀳.

𑁧𑁫. 𑀬𑀲𑁆𑀲 𑀤𑀭𑀣𑀚𑀸𑀢𑀺 𑀏𑀢𑁆𑀣 𑀧𑀦 𑀧𑀞𑀫𑀼𑀧𑁆𑀧𑀦𑁆𑀦𑀸 𑀓𑀺𑀮𑁂𑀲𑀸 𑀧𑀭𑀺𑀴𑀸𑀳𑀝𑁆𑀞𑁂𑀦 𑀤𑀭𑀣𑀸 𑀦𑀸𑀫, 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸 𑀧𑀦 𑀢𑁂𑀳𑀺 𑀤𑀭𑀣𑁂𑀳𑀺 𑀚𑀸𑀢𑀢𑁆𑀢𑀸 𑀤𑀭𑀣𑀚𑀸 𑀦𑀸𑀫. 𑀑𑀭𑀦𑁆𑀢𑀺 𑀲𑀓𑁆𑀓𑀸𑀬𑁄 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀑𑀭𑀺𑀫𑀁 𑀢𑀻𑀭𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁩𑁮). 𑀆𑀕𑀫𑀦𑀸𑀬𑀸𑀢𑀺 𑀉𑀧𑁆𑀧𑀢𑁆𑀢𑀺𑀬𑀸. 𑀧𑀘𑁆𑀘𑀬𑀸𑀲𑁂𑀢𑀺 𑀧𑀘𑁆𑀘𑀬𑀸 𑀏𑀯. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀲 𑀧𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀕𑁆𑀕𑀳𑀡𑀸𑀬 𑀧𑀘𑁆𑀘𑀬𑀪𑀽𑀢𑀸 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸, 𑀓𑁂𑀘𑀺 𑀤𑀭𑀣𑀚𑀯𑁂𑀯𑀘𑀦𑀸 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺.

𑁧𑁬. 𑀬𑀲𑁆𑀲 𑀯𑀦𑀣𑀚𑀸𑀢𑀺 𑀏𑀢𑁆𑀣𑀧𑀺 𑀤𑀭𑀣𑀚𑀸 𑀯𑀺𑀬 𑀯𑀦𑀣𑀚𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀘𑀦𑀢𑁆𑀣𑁂 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑁋 𑀯𑀦𑀼𑀢𑁂, 𑀯𑀦𑁄𑀢𑀻𑀢𑀺 𑀯𑀸 𑀯𑀦𑀁 𑀬𑀸𑀘𑀢𑀺 𑀲𑁂𑀯𑀢𑀺 𑀪𑀚𑀢𑀻𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀳𑀺 𑀯𑀺𑀲𑀬𑀸𑀦𑀁 𑀧𑀢𑁆𑀣𑀦𑀢𑁄 𑀲𑁂𑀯𑀦𑀢𑁄 𑀘 ‘‘𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀯𑀦𑀁 𑀣𑀭𑀢𑀺 𑀢𑀦𑁄𑀢𑀻𑀢𑀺 𑀯𑀦𑀣𑁄, 𑀢𑀡𑁆𑀳𑀸𑀦𑀼𑀲𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀦𑀣𑀸 𑀚𑀸𑀢𑀸𑀢𑀺 𑀯𑀦𑀣𑀚𑀸𑀢𑀺. 𑀓𑁂𑀘𑀺 𑀧𑀦𑀸𑀳𑀼 ‘‘𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀕𑀳𑀦𑀝𑁆𑀞𑁂𑀦 𑀯𑀦𑀣𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸 𑀧𑀦 𑀯𑀦𑀣𑀚𑀸’’𑀢𑀺. 𑀅𑀬𑀫𑁂𑀯 ¶ 𑀘𑁂𑀢𑁆𑀣 𑀉𑀭𑀕𑀲𑀼𑀢𑁆𑀢𑁂 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, 𑀇𑀢𑀭𑁄 𑀧𑀦 𑀥𑀫𑁆𑀫𑀧𑀤𑀕𑀸𑀣𑀸𑀬𑀁. 𑀯𑀺𑀦𑀺𑀩𑀦𑁆𑀥𑀸𑀬 𑀪𑀯𑀸𑀬𑀸𑀢𑀺 𑀪𑀯𑀯𑀺𑀦𑀺𑀩𑀦𑁆𑀥𑀸𑀬. 𑀅𑀣 𑀯𑀸 𑀘𑀺𑀢𑁆𑀢𑀲𑁆𑀲 𑀯𑀺𑀲𑀬𑁂𑀲𑀼 𑀯𑀺𑀦𑀺𑀩𑀦𑁆𑀥𑀸𑀬 𑀆𑀬𑀢𑀺𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀬𑁂𑀯 𑀳𑁂𑀢𑀼𑀓𑀧𑁆𑀧𑀸.

𑁧𑁭. 𑀬𑁄 𑀦𑀻𑀯𑀭𑀡𑁂𑀢𑀺 𑀏𑀢𑁆𑀣 𑀦𑀻𑀯𑀭𑀡𑀸𑀢𑀺 𑀘𑀺𑀢𑁆𑀢𑀁, 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀦𑀻𑀯𑀭𑀦𑁆𑀢𑀻𑀢𑀺 𑀦𑀻𑀯𑀭𑀡𑀸, 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀳𑀸𑀬𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀧𑀜𑁆𑀘𑀸𑀢𑀺 𑀢𑁂𑀲𑀁 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁄. 𑀈𑀖𑀸𑀪𑀸𑀯𑀢𑁄 𑀅𑀦𑀻𑀖𑁄. 𑀓𑀣𑀁𑀓𑀣𑀸𑀬 𑀢𑀺𑀡𑁆𑀡𑀢𑁆𑀢𑀸 𑀢𑀺𑀡𑁆𑀡𑀓𑀣𑀁𑀓𑀣𑁄. 𑀯𑀺𑀕𑀢𑀲𑀮𑁆𑀮𑀢𑁆𑀢𑀸 𑀯𑀺𑀲𑀮𑁆𑀮𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀪𑀺𑀓𑁆𑀔𑀼 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀲𑀫𑀦𑁆𑀢𑀪𑀤𑁆𑀤𑀓𑁂 𑀯𑀼𑀢𑁆𑀢𑀦𑀬𑁂𑀦 𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑀢𑁄 𑀘 𑀦𑀻𑀯𑀭𑀡𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀸𑀬 𑀢𑁂𑀲𑀜𑁆𑀘 𑀧𑀳𑀻𑀦𑀢𑁆𑀢𑀸 𑀏𑀯 𑀓𑀺𑀮𑁂𑀲𑀤𑀼𑀓𑁆𑀔𑀲𑀗𑁆𑀔𑀸𑀢𑀲𑁆𑀲 𑀈𑀖𑀲𑁆𑀲𑀸𑀪𑀸𑀯𑁂𑀦 ¶ 𑀅𑀦𑀻𑀖𑁄, ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀦𑀬𑁂𑀦 𑀧𑀯𑀢𑁆𑀢𑀸𑀬 𑀓𑀣𑀁𑀓𑀣𑀸𑀬 𑀢𑀺𑀡𑁆𑀡𑀢𑁆𑀢𑀸 𑀢𑀺𑀡𑁆𑀡𑀓𑀣𑀁𑀓𑀣𑁄 ¶ , ‘‘𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘 𑀲𑀮𑁆𑀮𑀸? 𑀭𑀸𑀕𑀲𑀮𑁆𑀮𑁄, 𑀤𑁄𑀲𑀲𑀮𑁆𑀮𑁄, 𑀫𑁄𑀳𑀲𑀮𑁆𑀮𑁄, 𑀫𑀸𑀦𑀲𑀮𑁆𑀮𑁄, 𑀤𑀺𑀝𑁆𑀞𑀺𑀲𑀮𑁆𑀮𑁄’’𑀢𑀺 𑀯𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀮𑁆𑀮𑀸𑀦𑀁 𑀯𑀺𑀕𑀢𑀢𑁆𑀢𑀸 𑀯𑀺𑀲𑀮𑁆𑀮𑁄. 𑀲𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺.

𑀅𑀢𑁆𑀭𑀸𑀧𑀺 𑀘 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀘𑀸𑀢𑀺 𑀤𑁆𑀯𑀺𑀥𑀸 𑀏𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸 𑀳𑀺 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲 𑀘 𑀢𑀢𑀺𑀬𑀫𑀕𑁆𑀕𑁂𑀦 𑀧𑀳𑀸𑀦𑀁 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀲𑁆𑀲 𑀘 𑀘𑀢𑀼𑀢𑁆𑀣𑀫𑀕𑁆𑀕𑁂𑀦. ‘‘𑀅𑀓𑀢𑀁 𑀯𑀢 𑀫𑁂 𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪𑁮; 𑀦𑁂𑀢𑁆𑀢𑀺. 𑁧𑁨𑁦) 𑀦𑀬𑁂𑀦 𑀧𑀯𑀢𑁆𑀢𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀲𑀗𑁆𑀔𑀸𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀲𑁆𑀲 ¶ 𑀘 𑀧𑀞𑀫𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀧𑀦 𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀲𑁆𑀲 𑀘 𑀧𑀞𑀫𑀫𑀕𑁆𑀕𑁂𑀦 𑀧𑀳𑀸𑀦𑀁 𑀳𑁄𑀢𑀺, 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲 𑀘 𑀤𑀼𑀢𑀺𑀬𑀫𑀕𑁆𑀕𑁂𑀦 𑀢𑀦𑀼𑀪𑀸𑀯𑁄 𑀳𑁄𑀢𑀺, 𑀢𑀢𑀺𑀬𑁂𑀦 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁. 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀲𑁆𑀲 𑀘 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀧𑀳𑀸𑀦𑀁 𑀳𑁄𑀢𑀻𑀢𑀺. 𑀏𑀯𑀁 𑁋

‘‘𑀬𑁄 𑀦𑀻𑀯𑀭𑀡𑁂 𑀧𑀳𑀸𑀬 𑀧𑀜𑁆𑀘, 𑀅𑀦𑀻𑀖𑁄 𑀢𑀺𑀡𑁆𑀡𑀓𑀣𑀁𑀓𑀣𑁄 𑀯𑀺𑀲𑀮𑁆𑀮𑁄;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡’’𑀦𑁆𑀢𑀺. 𑁋

𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀪𑀕𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄. ‘‘𑀏𑀓𑀘𑁆𑀘𑁂 𑀬𑁂𑀦 𑀬𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀬𑀸 𑀬𑀸 𑀕𑀸𑀣𑀸 𑀤𑁂𑀲𑀺𑀢𑀸, 𑀢𑁂𑀦 𑀢𑁂𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀲𑁄 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀯𑀤𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀉𑀭𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀥𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀧𑀓𑁆𑀓𑁄𑀤𑀦𑁄𑀢𑀺 ¶ ¶ 𑀥𑀦𑀺𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀢𑁂𑀦 𑀲𑀫𑀬𑁂𑀦 𑀥𑀦𑀺𑀬𑁄 𑀕𑁄𑀧𑁄 𑀫𑀳𑀻𑀢𑀻𑀭𑁂 𑀧𑀝𑀺𑀯𑀲𑀢𑀺. 𑀢𑀲𑁆𑀲𑀸𑀬𑀁 𑀧𑀼𑀩𑁆𑀩𑀬𑁄𑀕𑁄 𑁋 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀤𑀺𑀩𑁆𑀩𑀫𑀸𑀦𑁂 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀗𑁆𑀖𑀲𑁆𑀲 𑀯𑀻𑀲𑀢𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀅𑀤𑀸𑀲𑀺. 𑀲𑁄 𑀢𑀢𑁄 𑀘𑀼𑀢𑁄 𑀤𑁂𑀯𑁂𑀲𑀼 𑀉𑀧𑁆𑀧𑀦𑁆𑀦𑁄. 𑀏𑀯𑀁 𑀤𑁂𑀯𑀮𑁄𑀓𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀤𑁂𑀳𑀭𑀝𑁆𑀞𑀫𑀚𑁆𑀛𑁂 𑀧𑀩𑁆𑀩𑀢𑀭𑀝𑁆𑀞𑀁 𑀦𑀸𑀫 𑀅𑀢𑁆𑀣𑀺 𑀢𑀢𑁆𑀣 𑀥𑀫𑁆𑀫𑀓𑁄𑀭𑀡𑁆𑀟𑀁 𑀦𑀸𑀫 𑀦𑀕𑀭𑀁, 𑀢𑀲𑁆𑀫𑀺𑀁 𑀦𑀕𑀭𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑁄, 𑀕𑁄𑀬𑀽𑀣𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺. 𑀢𑀲𑁆𑀲 𑀳𑀺 𑀢𑀺𑀁𑀲𑀫𑀢𑁆𑀢𑀸𑀦𑀺 𑀕𑁄𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀲𑀢𑁆𑀢𑀯𑀻𑀲𑀲𑀳𑀲𑁆𑀲𑀸 𑀕𑀸𑀯𑁄 𑀔𑀻𑀭𑀁 𑀤𑀼𑀬𑁆𑀳𑀦𑁆𑀢𑀺. 𑀕𑁄𑀧𑀸 𑀦𑀸𑀫 𑀦𑀺𑀩𑀤𑁆𑀥𑀯𑀸𑀲𑀺𑀦𑁄 𑀦 𑀳𑁄𑀦𑁆𑀢𑀺. 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄𑀫𑀸𑀲𑁂 𑀣𑀮𑁂 𑀯𑀲𑀦𑁆𑀢𑀺, 𑀅𑀯𑀲𑁂𑀲𑁂 𑀅𑀝𑁆𑀞𑀫𑀸𑀲𑁂 𑀬𑀢𑁆𑀣 𑀢𑀺𑀡𑁄𑀤𑀓𑀁 𑀲𑀼𑀔𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀺. 𑀢𑀜𑁆𑀘 𑀦𑀤𑀻𑀢𑀻𑀭𑀁 𑀯𑀸 𑀚𑀸𑀢𑀲𑁆𑀲𑀭𑀢𑀻𑀭𑀁 𑀯𑀸 𑀳𑁄𑀢𑀺. 𑀅𑀣𑀸𑀬𑀫𑁆𑀧𑀺 𑀯𑀲𑁆𑀲𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑀺𑀢𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀕𑀼𑀦𑁆𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑁄 𑀫𑀳𑀸𑀫𑀳𑀻 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑀢𑁄 𑀓𑀸𑀮𑀫𑀳𑀻 𑀏𑀓𑀢𑁄 𑀫𑀳𑀸𑀫𑀳𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀦𑁆𑀢𑁆𑀯𑀸 𑀲𑀦𑁆𑀤𑀫𑀸𑀦𑀸 𑀧𑀼𑀦 𑀲𑀫𑀼𑀤𑁆𑀤𑀲𑀫𑀻𑀧𑁂 𑀲𑀫𑀸𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀸. 𑀬𑀁 𑀑𑀓𑀸𑀲𑀁 𑀅𑀦𑁆𑀢𑀭𑀤𑀻𑀧𑀁 𑀅𑀓𑀸𑀲𑀺, 𑀢𑀁 𑀧𑀯𑀺𑀲𑀺𑀢𑁆𑀯𑀸 𑀯𑀘𑁆𑀙𑀸𑀦𑀁 𑀲𑀸𑀮𑀁 𑀅𑀢𑁆𑀢𑀦𑁄 𑀘 𑀦𑀺𑀯𑁂𑀲𑀦𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀲𑀢𑁆𑀢 𑀧𑀼𑀢𑁆𑀢𑀸, 𑀲𑀢𑁆𑀢 𑀥𑀻𑀢𑀭𑁄, 𑀲𑀢𑁆𑀢 𑀲𑀼𑀡𑀺𑀲𑀸, 𑀅𑀦𑁂𑀓𑁂 𑀘 𑀓𑀫𑁆𑀫𑀓𑀸𑀭𑀸 𑀳𑁄𑀦𑁆𑀢𑀺. 𑀕𑁄𑀧𑀸 𑀦𑀸𑀫 𑀯𑀲𑁆𑀲𑀦𑀺𑀫𑀺𑀢𑁆𑀢𑀁 𑀚𑀸𑀦𑀦𑁆𑀢𑀺. 𑀬𑀤𑀸 𑀲𑀓𑀼𑀡𑀺𑀓𑀸 𑀓𑀼𑀮𑀸𑀯𑀓𑀸𑀦𑀺 𑀭𑀼𑀓𑁆𑀔𑀕𑁆𑀕𑁂 𑀓𑀭𑁄𑀦𑁆𑀢𑀺, 𑀓𑀓𑁆𑀓𑀝𑀓𑀸 𑀉𑀤𑀓𑀲𑀫𑀻𑀧𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀣𑀮𑀲𑀫𑀻𑀧𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀤𑀸 𑀲𑀼𑀯𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀬𑀤𑀸 𑀧𑀦 𑀲𑀓𑀼𑀡𑀺𑀓𑀸 𑀓𑀼𑀮𑀸𑀯𑀓𑀸𑀦𑀺 𑀦𑀻𑀘𑀝𑁆𑀞𑀸𑀦𑁂 𑀉𑀤𑀓𑀧𑀺𑀝𑁆𑀞𑁂 𑀓𑀭𑁄𑀦𑁆𑀢𑀺, 𑀓𑀓𑁆𑀓𑀝𑀓𑀸 𑀣𑀮𑀲𑀫𑀻𑀧𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀉𑀤𑀓𑀲𑀫𑀻𑀧𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀤𑀸 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻𑀢𑀺 𑀕𑀡𑁆𑀳𑀦𑁆𑀢𑀺.

𑀅𑀣 𑀲𑁄 𑀥𑀦𑀺𑀬𑁄 𑀲𑀼𑀯𑀼𑀝𑁆𑀞𑀺𑀓𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀧𑀓𑀝𑁆𑀞𑁂 𑀯𑀲𑁆𑀲𑀓𑀸𑀮𑁂 𑀅𑀦𑁆𑀢𑀭𑀤𑀻𑀧𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀳𑀺𑀬𑀸 𑀧𑀭𑀢𑀻𑀭𑁂 𑀲𑀢𑁆𑀢𑀲𑀢𑁆𑀢𑀸𑀳𑀫𑁆𑀧𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀅𑀦𑀚𑁆𑀛𑁄𑀢𑁆𑀣𑀭𑀡𑁄𑀓𑀸𑀲𑁂 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀁 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸, 𑀯𑀘𑁆𑀙𑀲𑀸𑀮𑀸𑀬𑁄 𑀫𑀸𑀧𑁂𑀢𑁆𑀯𑀸, 𑀢𑀢𑁆𑀣 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑀲𑁆𑀲 𑀤𑀸𑀭𑀼𑀢𑀺𑀡𑀸𑀤𑀺𑀲𑀗𑁆𑀕𑀳𑁂 𑀓𑀢𑁂 𑀲𑀩𑁆𑀩𑁂𑀲𑀼 𑀧𑀼𑀢𑁆𑀢𑀤𑀸𑀭𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀲𑀼 ¶ 𑀲𑀫𑀸𑀦𑀺𑀬𑁂𑀲𑀼 𑀚𑀸𑀢𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑁂 𑀔𑀚𑁆𑀚𑀪𑁄𑀚𑁆𑀚𑁂 𑀧𑀝𑀺𑀬𑀢𑁆𑀢𑁂 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀫𑁂𑀖𑀫𑀡𑁆𑀟𑀮𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀥𑁂𑀦𑀼𑀬𑁄 𑀤𑀼𑀳𑀸𑀧𑁂𑀢𑁆𑀯𑀸 ¶ , 𑀯𑀘𑁆𑀙𑀲𑀸𑀮𑀸𑀲𑀼 𑀯𑀘𑁆𑀙𑁂 𑀲𑀡𑁆𑀞𑀸𑀧𑁂𑀢𑁆𑀯𑀸, 𑀕𑀼𑀦𑁆𑀦𑀁 𑀘𑀢𑀼𑀤𑁆𑀤𑀺𑀲𑀸 𑀥𑀽𑀫𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀲𑀩𑁆𑀩𑀧𑀭𑀺𑀚𑀦𑀁 𑀪𑁄𑀚𑀸𑀧𑁂𑀢𑁆𑀯𑀸, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑀻𑀧𑁂 𑀉𑀚𑁆𑀚𑀸𑀮𑀸𑀧𑁂𑀢𑁆𑀯𑀸, 𑀲𑀬𑀁 𑀔𑀻𑀭𑁂𑀦 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀫𑀳𑀸𑀲𑀬𑀦𑁂 𑀲𑀬𑀦𑁆𑀢𑁄 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸, 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸, 𑀅𑀧𑀭𑀤𑀺𑀲𑀸𑀬 𑀫𑁂𑀖𑀢𑁆𑀣𑀦𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀧𑀦𑁆𑀦𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 ‘‘𑀧𑀓𑁆𑀓𑁄𑀤𑀦𑁄 𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀻’’𑀢𑀺.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀧𑀓𑁆𑀓𑁄𑀤𑀦𑁄𑀢𑀺 𑀲𑀺𑀤𑁆𑀥𑀪𑀢𑁆𑀢𑁄. 𑀤𑀼𑀤𑁆𑀥𑀔𑀻𑀭𑁄𑀢𑀺 𑀕𑀸𑀯𑁄 𑀤𑀼𑀳𑀺𑀢𑁆𑀯𑀸 𑀕𑀳𑀺𑀢𑀔𑀻𑀭𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑀲𑁆𑀲𑁂𑀢𑀺 ¶ , 𑀅𑀲𑁆𑀫𑀻𑀢𑀺 𑀅𑀢𑁆𑀢𑀦𑁄 𑀢𑀣𑀸𑀪𑀸𑀯𑀁. 𑀧𑀓𑁆𑀓𑁄𑀤𑀦𑁄 𑀤𑀼𑀤𑁆𑀥𑀔𑀻𑀭𑁄 𑀘 𑀅𑀳𑀫𑀲𑁆𑀫𑀺 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀫𑀸𑀳𑀸𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀇𑀢𑀻𑀢𑀺 𑀧𑀤𑀲𑀦𑁆𑀥𑀺, 𑀧𑀤𑀲𑀁𑀲𑀕𑁆𑀕𑁄, 𑀧𑀤𑀧𑀸𑀭𑀺𑀧𑀽𑀭𑀺, 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀫𑁂𑀢’’𑀦𑁆𑀢𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧) 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑀡𑁆𑀡𑀺𑀢𑁄. 𑀲𑁄𑀧𑀺 𑀇𑀤𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀬𑀁 𑀳𑀺 𑀧𑀤𑀁 𑀧𑀼𑀩𑁆𑀩𑀧𑀤𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀲 𑀢𑀲𑁆𑀲 𑀏𑀯𑀫𑀸𑀳𑀸𑀢𑀺 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄𑀬𑁂𑀯 𑀇𑀢𑀺𑀲𑀤𑁆𑀤𑁄 𑀧𑀘𑁆𑀙𑀺𑀫𑁂𑀦 𑀧𑀤𑁂𑀦 𑀫𑁂𑀢𑁆𑀢𑁂𑀬𑁆𑀬𑁄 𑀇𑀢𑀺 𑀯𑀸 𑀪𑀕𑀯𑀸 𑀇𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀧𑀤𑀲𑀦𑁆𑀥𑀺 𑀳𑁄𑀢𑀺, 𑀦𑀸𑀜𑁆𑀜𑀣𑀸.

𑀥𑀦𑀺𑀬𑁄 𑀕𑁄𑀧𑁄𑀢𑀺 𑀢𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀦𑀸𑀫𑀲𑀫𑁄𑀥𑀸𑀦𑀁. 𑀲𑁄 𑀳𑀺 𑀬𑀸𑀦𑀺𑀫𑀸𑀦𑀺 𑀣𑀸𑀯𑀭𑀸𑀤𑀻𑀦𑀺 𑀧𑀜𑁆𑀘 𑀥𑀦𑀸𑀦𑀺, 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀸𑀦𑀲𑀻𑀮𑀸𑀤𑀺𑀅𑀦𑀼𑀕𑀸𑀫𑀺𑀓𑀥𑀦𑀁, 𑀔𑁂𑀢𑁆𑀢𑀯𑀢𑁆𑀣𑀼-𑀆𑀭𑀸𑀫𑀸𑀤𑀺𑀢𑁄 𑀣𑀸𑀯𑀭𑀥𑀦𑀢𑁄𑀧𑀺, 𑀕𑀯𑀲𑁆𑀲𑀸𑀤𑀺𑀢𑁄 𑀚𑀗𑁆𑀕𑀫𑀥𑀦𑀢𑁄𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀢𑁄 𑀲𑀁𑀳𑀸𑀭𑀺𑀫𑀥𑀦𑀢𑁄𑀧𑀺, 𑀲𑀺𑀧𑁆𑀧𑀸𑀬𑀢𑀦𑀸𑀤𑀺𑀢𑁄 𑀅𑀗𑁆𑀕𑀲𑀫𑀥𑀦𑀢𑁄𑀧𑀺 𑀬𑀁 𑀢𑀁 𑀮𑁄𑀓𑀲𑁆𑀲 𑀧𑀜𑁆𑀘𑀕𑁄𑀭𑀲𑀸𑀦𑀼𑀧𑁆𑀧𑀤𑀸𑀦𑁂𑀦 𑀩𑀳𑀽𑀧𑀓𑀸𑀭𑀁 𑀢𑀁 𑀲𑀦𑁆𑀥𑀸𑀬 ‘‘𑀦𑀢𑁆𑀣𑀺 𑀕𑁄𑀲𑀫𑀺𑀢𑀁 𑀥𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁩; 𑀦𑁂𑀢𑁆𑀢𑀺. 𑁧𑁨𑁩) 𑀏𑀯𑀁 𑀯𑀺𑀲𑁂𑀲𑀺𑀢𑀁 𑀕𑁄𑀥𑀦𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀥𑀦𑀺𑀬𑁄, 𑀕𑀼𑀦𑁆𑀦𑀁 𑀧𑀸𑀮𑀦𑀢𑁄 𑀕𑁄𑀧𑁄. 𑀬𑁄 𑀳𑀺 𑀅𑀢𑁆𑀢𑀦𑁄 𑀕𑀸𑀯𑁄 𑀧𑀸𑀮𑁂𑀢𑀺, 𑀲𑁄 ‘‘𑀕𑁄𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀭𑁂𑀲𑀁 𑀯𑁂𑀢𑀦𑁂𑀦 𑀪𑀝𑁄 𑀳𑀼𑀢𑁆𑀯𑀸, 𑀲𑁄 𑀕𑁄𑀧𑀸𑀮𑀓𑁄. 𑀅𑀬𑀁 𑀧𑀦 𑀅𑀢𑁆𑀢𑀦𑁄𑀬𑁂𑀯, 𑀢𑁂𑀦 𑀕𑁄𑀧𑁄𑀢𑀺 𑀯𑀼𑀢𑁆𑀢𑁄.

𑀅𑀦𑀼𑀢𑀻𑀭𑁂𑀢𑀺 ¶ 𑀢𑀻𑀭𑀲𑁆𑀲 𑀲𑀫𑀻𑀧𑁂. 𑀫𑀳𑀺𑀬𑀸𑀢𑀺 𑀫𑀳𑀸𑀫𑀳𑀻𑀦𑀸𑀫𑀺𑀓𑀸𑀬 𑀦𑀤𑀺𑀬𑀸. 𑀲𑀫𑀸𑀦𑁂𑀦 𑀅𑀦𑀼𑀓𑀽𑀮𑀯𑀢𑁆𑀢𑀺𑀦𑀸 𑀧𑀭𑀺𑀚𑀦𑁂𑀦 𑀲𑀤𑁆𑀥𑀺𑀁 𑀯𑀸𑀲𑁄 𑀬𑀲𑁆𑀲 𑀲𑁄 𑀲𑀫𑀸𑀦𑀯𑀸𑀲𑁄, 𑀅𑀬𑀜𑁆𑀘 𑀢𑀣𑀸𑀯𑀺𑀥𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀯𑀸𑀲𑁄’’𑀢𑀺. 𑀙𑀦𑁆𑀦𑀸𑀢𑀺 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑁂𑀳𑀺 𑀅𑀦𑁄𑀯𑀲𑁆𑀲𑀓𑀸 𑀓𑀢𑀸. 𑀓𑀼𑀝𑀻𑀢𑀺 𑀯𑀲𑀦𑀖𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀳𑀺𑀢𑁄𑀢𑀺 𑀆𑀪𑀢𑁄, 𑀚𑀸𑀮𑀺𑀢𑁄 𑀯𑀸. 𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀺 ‘‘𑀕𑀺𑀦𑀻’’𑀢𑀺 𑀯𑁄𑀳𑀭𑀻𑀬𑀢𑀺. 𑀅𑀣 𑀘𑁂 𑀧𑀢𑁆𑀣𑀬𑀲𑀻𑀢𑀺 𑀇𑀤𑀸𑀦𑀺 𑀬𑀤𑀺 𑀇𑀘𑁆𑀙𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀲𑁆𑀲𑀸𑀢𑀺 𑀲𑀺𑀜𑁆𑀘, 𑀧𑀕𑁆𑀖𑀭, 𑀉𑀤𑀓𑀁 𑀫𑀼𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀤𑁂𑀯𑀸𑀢𑀺 𑀫𑁂𑀖𑀁 𑀆𑀮𑀧𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀬𑀁 ¶ 𑀧𑀦 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀏𑀯𑀫𑀬𑀁 𑀥𑀦𑀺𑀬𑁄 𑀕𑁄𑀧𑁄 𑀅𑀢𑁆𑀢𑀦𑁄 𑀲𑀬𑀦𑀖𑀭𑁂 𑀫𑀳𑀸𑀲𑀬𑀦𑁂 𑀦𑀺𑀧𑀦𑁆𑀦𑁄 𑀫𑁂𑀖𑀢𑁆𑀣𑀦𑀺𑀢𑀁 ¶ 𑀲𑀼𑀢𑁆𑀯𑀸 ‘‘𑀧𑀓𑁆𑀓𑁄𑀤𑀦𑁄𑀳𑀫𑀲𑁆𑀫𑀻’’𑀢𑀺 𑀪𑀡𑀦𑁆𑀢𑁄 𑀓𑀸𑀬𑀤𑀼𑀓𑁆𑀔𑀯𑀽𑀧𑀲𑀫𑀽𑀧𑀸𑀬𑀁 𑀓𑀸𑀬𑀲𑀼𑀔𑀳𑁂𑀢𑀼𑀜𑁆𑀘 𑀅𑀢𑁆𑀢𑀦𑁄 𑀲𑀦𑁆𑀦𑀺𑀳𑀺𑀢𑀁 𑀤𑀻𑀧𑁂𑀢𑀺. ‘‘𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀻’’𑀢𑀺 𑀪𑀡𑀦𑁆𑀢𑁄 𑀘𑀺𑀢𑁆𑀢𑀤𑀼𑀓𑁆𑀔𑀯𑀽𑀧𑀲𑀫𑀽𑀧𑀸𑀬𑀁 𑀘𑀺𑀢𑁆𑀢𑀲𑀼𑀔𑀳𑁂𑀢𑀼𑀜𑁆𑀘. ‘‘𑀅𑀦𑀼𑀢𑀻𑀭𑁂 𑀫𑀳𑀺𑀬𑀸’’𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀁, ‘‘𑀲𑀫𑀸𑀦𑀯𑀸𑀲𑁄’’𑀢𑀺 𑀢𑀸𑀤𑀺𑀲𑁂 𑀓𑀸𑀮𑁂 𑀧𑀺𑀬𑀯𑀺𑀧𑁆𑀧𑀬𑁄𑀕𑀧𑀤𑀝𑁆𑀞𑀸𑀦𑀲𑁆𑀲 𑀲𑁄𑀓𑀲𑁆𑀲𑀸𑀪𑀸𑀯𑀁. ‘‘𑀙𑀦𑁆𑀦𑀸 𑀓𑀼𑀝𑀻’’𑀢𑀺 𑀓𑀸𑀬𑀤𑀼𑀓𑁆𑀔𑀸𑀧𑀕𑀫𑀧𑀝𑀺𑀖𑀸𑀢𑀁. ‘‘𑀆𑀳𑀺𑀢𑁄 𑀕𑀺𑀦𑀻’’𑀢𑀺 𑀬𑀲𑁆𑀫𑀸 𑀕𑁄𑀧𑀸𑀮𑀓𑀸 𑀧𑀭𑀺𑀓𑁆𑀔𑁂𑀧𑀥𑀽𑀫𑀤𑀸𑀭𑀼𑀅𑀕𑁆𑀕𑀺𑀯𑀲𑁂𑀦 𑀢𑀬𑁄 𑀅𑀕𑁆𑀕𑀻 𑀓𑀭𑁄𑀦𑁆𑀢𑀺. 𑀢𑁂 𑀘 𑀢𑀲𑁆𑀲 𑀕𑁂𑀳𑁂 𑀲𑀩𑁆𑀩𑁂 𑀓𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀤𑀺𑀲𑀸𑀲𑀼 𑀧𑀭𑀺𑀓𑁆𑀔𑁂𑀧𑀕𑁆𑀕𑀺𑀁 𑀲𑀦𑁆𑀥𑀸𑀬 ‘‘𑀆𑀳𑀺𑀢𑁄 𑀕𑀺𑀦𑀻’’𑀢𑀺 𑀪𑀡𑀦𑁆𑀢𑁄 𑀯𑀸𑀴𑀫𑀺𑀕𑀸𑀕𑀫𑀦𑀦𑀺𑀯𑀸𑀭𑀡𑀁 𑀤𑀻𑀧𑁂𑀢𑀺, 𑀕𑀼𑀦𑁆𑀦𑀁 𑀫𑀚𑁆𑀛𑁂 𑀕𑁄𑀫𑀬𑀸𑀤𑀻𑀳𑀺 𑀥𑀽𑀫𑀕𑁆𑀕𑀺𑀁 𑀲𑀦𑁆𑀥𑀸𑀬 𑀟𑀁𑀲𑀫𑀓𑀲𑀸𑀤𑀻𑀳𑀺 𑀕𑀼𑀦𑁆𑀦𑀁 𑀅𑀦𑀸𑀩𑀸𑀥𑀁, 𑀕𑁄𑀧𑀸𑀮𑀓𑀸𑀦𑀁 𑀲𑀬𑀦𑀝𑁆𑀞𑀸𑀦𑁂 𑀤𑀸𑀭𑀼𑀅𑀕𑁆𑀕𑀺𑀁 𑀲𑀦𑁆𑀥𑀸𑀬 𑀕𑁄𑀧𑀸𑀮𑀓𑀸𑀦𑀁 𑀲𑀻𑀢𑀸𑀩𑀸𑀥𑀧𑀝𑀺𑀖𑀸𑀢𑀁. 𑀲𑁄 𑀏𑀯𑀁 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸 𑀕𑀼𑀦𑁆𑀦𑀁 𑀯𑀸 𑀧𑀭𑀺𑀚𑀦𑀲𑁆𑀲 𑀯𑀸 𑀯𑀼𑀝𑁆𑀞𑀺𑀧𑀘𑁆𑀘𑀬𑀲𑁆𑀲 𑀓𑀲𑁆𑀲𑀘𑀺 𑀆𑀩𑀸𑀥𑀲𑁆𑀲 𑀅𑀪𑀸𑀯𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀆𑀳 𑁋 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

𑁧𑁯. 𑀏𑀯𑀁 𑀥𑀦𑀺𑀬𑀲𑁆𑀲 𑀇𑀫𑀁 𑀕𑀸𑀣𑀁 𑀪𑀸𑀲𑀫𑀸𑀦𑀲𑁆𑀲 𑀅𑀲𑁆𑀲𑁄𑀲𑀺 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀕𑀦𑁆𑀥𑀓𑀼𑀝𑀺𑀬𑀁 𑀯𑀺𑀳𑀭𑀦𑁆𑀢𑁄. 𑀲𑀼𑀢𑁆𑀯𑀸 𑀘 𑀧𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀥𑀦𑀺𑀬𑀜𑁆𑀘 𑀧𑀚𑀸𑀧𑀢𑀺𑀜𑁆𑀘𑀲𑁆𑀲 ‘‘𑀇𑀫𑁂 𑀉𑀪𑁄𑀧𑀺 𑀳𑁂𑀢𑀼𑀲𑀫𑁆𑀧𑀦𑁆𑀦𑀸. 𑀲𑀘𑁂 𑀅𑀳𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀦𑁄 𑀘𑁂 𑀕𑀫𑀺𑀲𑁆𑀲𑀸𑀫𑀺, 𑀲𑁆𑀯𑁂 𑀉𑀤𑀓𑁄𑀖𑁂𑀦 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀁 𑀔𑀡𑁂𑀬𑁂𑀯 𑀲𑀸𑀯𑀢𑁆𑀣𑀺𑀢𑁄 𑀲𑀢𑁆𑀢 𑀬𑁄𑀚𑀦𑀲𑀢𑀸𑀦𑀺 𑀥𑀦𑀺𑀬𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀼𑀝𑀺𑀬𑀸 𑀉𑀧𑀭𑀺 𑀅𑀝𑁆𑀞𑀸𑀲𑀺. 𑀥𑀦𑀺𑀬𑁄 𑀢𑀁 𑀕𑀸𑀣𑀁 𑀧𑀼𑀦𑀧𑁆𑀧𑀼𑀦𑀁 𑀪𑀸𑀲𑀢𑀺𑀬𑁂𑀯 ¶ , 𑀦 𑀦𑀺𑀝𑁆𑀞𑀸𑀧𑁂𑀢𑀺, 𑀪𑀕𑀯𑀢𑀺 𑀕𑀢𑁂𑀧𑀺 𑀪𑀸𑀲𑀢𑀺. 𑀪𑀕𑀯𑀸 𑀘 𑀢𑀁 𑀲𑀼𑀢𑁆𑀯𑀸 ‘‘𑀦 𑀏𑀢𑁆𑀢𑀓𑁂𑀦 𑀲𑀦𑁆𑀢𑀼𑀝𑁆𑀞𑀸 𑀯𑀸 𑀯𑀺𑀲𑁆𑀲𑀢𑁆𑀣𑀸 𑀯𑀸 𑀳𑁄𑀦𑁆𑀢𑀺, 𑀏𑀯𑀁 𑀧𑀦 𑀳𑁄𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑁋

‘‘𑀅𑀓𑁆𑀓𑁄𑀥𑀦𑁄 𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀺, 𑀅𑀦𑀼𑀢𑀻𑀭𑁂 𑀫𑀳𑀺𑀬𑁂𑀓𑀭𑀢𑁆𑀢𑀺𑀯𑀸𑀲𑁄;

𑀯𑀺𑀯𑀝𑀸 𑀓𑀼𑀝𑀺 𑀦𑀺𑀩𑁆𑀩𑀼𑀢𑁄 𑀕𑀺𑀦𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺. 𑁋

𑀇𑀫𑀁 𑀧𑀝𑀺𑀕𑀸𑀣𑀁 𑀅𑀪𑀸𑀲𑀺 𑀩𑁆𑀬𑀜𑁆𑀚𑀦𑀲𑀪𑀸𑀕𑀁 ¶ 𑀦𑁄 𑀅𑀢𑁆𑀣𑀲𑀪𑀸𑀕𑀁. 𑀦 𑀳𑀺 ‘‘𑀧𑀓𑁆𑀓𑁄𑀤𑀦𑁄’’𑀢𑀺, ‘‘𑀅𑀓𑁆𑀓𑁄𑀥𑀦𑁄’’𑀢𑀺 𑀘 𑀆𑀤𑀻𑀦𑀺 𑀧𑀤𑀸𑀦𑀺 𑀅𑀢𑁆𑀣𑀢𑁄 𑀲𑀫𑁂𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀑𑀭𑀺𑀫𑀧𑀸𑀭𑀺𑀫𑀢𑀻𑀭𑀸𑀦𑀺 𑀯𑀺𑀬, 𑀩𑁆𑀬𑀜𑁆𑀚𑀦𑀁 𑀧𑀦𑁂𑀢𑁆𑀣 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀫𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀲𑀪𑀸𑀕𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀕𑀸𑀣𑀸𑀬 𑀲𑀤𑀺𑀲𑀧𑀤𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁂𑀲𑀧𑀤𑀸𑀦𑀁 𑀧𑀦𑀸𑀬𑀁 𑀧𑀤𑀢𑁄 𑀅𑀢𑁆𑀣𑀢𑁄 𑀘 𑀯𑀡𑁆𑀡𑀦𑀸 𑁋 𑀅𑀓𑁆𑀓𑁄𑀥𑀦𑁄𑀢𑀺 𑀅𑀓𑀼𑀚𑁆𑀛𑀦𑀲𑀪𑀸𑀯𑁄. 𑀬𑁄 ¶ 𑀳𑀺 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄 𑀓𑁄𑀥𑁄 𑀏𑀓𑀘𑁆𑀘𑀲𑁆𑀲 𑀲𑀼𑀧𑀭𑀺𑀢𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀤𑀬𑀁 𑀲𑀦𑁆𑀢𑀸𑀧𑁂𑀢𑁆𑀯𑀸 𑀯𑀽𑀧𑀲𑀫𑁆𑀫𑀢𑀺, 𑀬𑁂𑀦 𑀘 𑀢𑀢𑁄 𑀩𑀮𑀯𑀢𑀭𑀼𑀧𑁆𑀧𑀦𑁆𑀦𑁂𑀦 𑀏𑀓𑀘𑁆𑀘𑁄 𑀫𑀼𑀔𑀯𑀺𑀓𑀼𑀡𑀦𑀫𑀢𑁆𑀢𑀁 𑀓𑀭𑁄𑀢𑀺, 𑀢𑀢𑁄 𑀩𑀮𑀯𑀢𑀭𑁂𑀦 𑀏𑀓𑀘𑁆𑀘𑁄 𑀨𑀭𑀼𑀲𑀁 𑀯𑀢𑁆𑀢𑀼𑀓𑀸𑀫𑁄 𑀳𑀦𑀼𑀲𑀜𑁆𑀘𑀮𑀦𑀫𑀢𑁆𑀢𑀁 𑀓𑀭𑁄𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀨𑀭𑀼𑀲𑀁 𑀪𑀡𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀕𑀯𑁂𑀲𑀦𑁆𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀆𑀫𑀲𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀤𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀥𑀸𑀯𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀧𑀳𑀸𑀭𑁂 𑀤𑁂𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀅𑀧𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀏𑀓𑀘𑁆𑀘𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀢𑁆𑀢𑀸𑀦𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺 𑀲𑀻𑀳𑀴𑀤𑀻𑀧𑁂 𑀓𑀸𑀮𑀕𑀸𑀫𑀯𑀸𑀲𑀻 𑀅𑀫𑀘𑁆𑀘𑁄 𑀯𑀺𑀬. 𑀏𑀢𑁆𑀢𑀸𑀯𑀢𑀸 𑀘 𑀓𑁄𑀥𑁄 𑀧𑀭𑀫𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑁄 𑀪𑀕𑀯𑀢𑀸 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀲𑀩𑁆𑀩𑀲𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄, 𑀢𑀲𑁆𑀫𑀸 𑀪𑀕𑀯𑀸 ‘‘𑀅𑀓𑁆𑀓𑁄𑀥𑀦𑁄𑀳𑀫𑀲𑁆𑀫𑀻’’𑀢𑀺 𑀆𑀳.

𑀯𑀺𑀕𑀢𑀔𑀺𑀮𑁄𑀢𑀺 𑀅𑀧𑀕𑀢𑀔𑀺𑀮𑁄. 𑀬𑁂 𑀳𑀺 𑀢𑁂 𑀘𑀺𑀢𑁆𑀢𑀩𑀦𑁆𑀥𑀪𑀸𑀯𑁂𑀦 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀯𑀼𑀢𑁆𑀢𑀸, 𑀬𑁂 𑀳𑀺 𑀘 𑀔𑀺𑀮𑀪𑀽𑀢𑁂 𑀘𑀺𑀢𑁆𑀢𑁂 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀔𑀺𑀮𑁂 𑀪𑀽𑀫𑀺𑀪𑀸𑀕𑁂 ¶ 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑁆𑀲𑀦𑁆𑀢𑁂𑀧𑀺 𑀤𑁂𑀯𑁂 𑀲𑀲𑁆𑀲𑀸𑀦𑀺 𑀦 𑀭𑀼𑀳𑀦𑁆𑀢𑀺, 𑀏𑀯𑀫𑁂𑀯𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀓𑀼𑀲𑀮𑀳𑁂𑀢𑀼𑀯𑀲𑁆𑀲𑁂 𑀯𑀲𑁆𑀲𑀦𑁆𑀢𑁂𑀧𑀺 𑀓𑀼𑀲𑀮𑀁 𑀦 𑀭𑀼𑀳𑀢𑀺 𑀢𑁂 𑀘 𑀪𑀕𑀯𑀢𑀸 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀲𑀩𑁆𑀩𑀲𑁄 𑀧𑀳𑀻𑀦𑀸, 𑀢𑀲𑁆𑀫𑀸 𑀪𑀕𑀯𑀸 ‘‘𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀻’’𑀢𑀺 𑀆𑀳.

𑀏𑀓𑀭𑀢𑁆𑀢𑀺𑀁 𑀯𑀸𑀲𑁄 𑀅𑀲𑁆𑀲𑀸𑀢𑀺 𑀏𑀓𑀭𑀢𑁆𑀢𑀺𑀯𑀸𑀲𑁄 ¶ . 𑀬𑀣𑀸 𑀳𑀺 𑀥𑀦𑀺𑀬𑁄 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀦𑀺𑀩𑀤𑁆𑀥𑀯𑀸𑀲𑀁 𑀉𑀧𑀕𑀢𑁄, 𑀦 𑀢𑀣𑀸 𑀪𑀕𑀯𑀸. 𑀪𑀕𑀯𑀸 𑀳𑀺 𑀢𑀁𑀬𑁂𑀯 𑀭𑀢𑁆𑀢𑀺𑀁 𑀢𑀲𑁆𑀲 𑀅𑀢𑁆𑀣𑀓𑀸𑀫𑀢𑀸𑀬 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁄. 𑀢𑀲𑁆𑀫𑀸 ‘‘𑀏𑀓𑀭𑀢𑁆𑀢𑀺𑀯𑀸𑀲𑁄’’𑀢𑀺 𑀆𑀳. 𑀯𑀺𑀯𑀝𑀸𑀢𑀺 𑀅𑀧𑀦𑀻𑀢𑀘𑁆𑀙𑀤𑀦𑀸. 𑀓𑀼𑀝𑀻𑀢𑀺 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀪𑀸𑀯𑁄 𑀳𑀺 𑀢𑀁 𑀢𑀁 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀓𑀸𑀬𑁄𑀢𑀺𑀧𑀺 𑀕𑀼𑀳𑀸𑀢𑀺𑀧𑀺 𑀤𑁂𑀳𑁄𑀢𑀺𑀧𑀺 𑀲𑀦𑁆𑀤𑁂𑀳𑁄𑀢𑀺𑀧𑀺 𑀦𑀸𑀯𑀸𑀢𑀺𑀧𑀺 𑀭𑀣𑁄𑀢𑀺𑀧𑀺 𑀯𑀡𑁄𑀢𑀺𑀧𑀺 𑀥𑀚𑁄𑀢𑀺𑀧𑀺 𑀯𑀫𑁆𑀫𑀺𑀓𑁄𑀢𑀺𑀧𑀺 𑀓𑀼𑀝𑀻𑀢𑀺𑀧𑀺 𑀓𑀼𑀝𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀓𑀝𑁆𑀞𑀸𑀤𑀻𑀦𑀺 𑀧𑀝𑀺𑀘𑁆𑀘 𑀕𑁂𑀳𑀦𑀸𑀫𑀺𑀓𑀸 𑀓𑀼𑀝𑀺 𑀯𑀺𑀬 𑀅𑀝𑁆𑀞𑀺𑀆𑀤𑀻𑀦𑀺 𑀧𑀝𑀺𑀘𑁆𑀘 𑀲𑀗𑁆𑀔𑁆𑀬𑀁 𑀕𑀢𑀢𑁆𑀢𑀸 ‘‘𑀓𑀼𑀝𑀻’’𑀢𑀺 𑀯𑀼𑀢𑁆𑀢𑁄. 𑀬𑀣𑀸𑀳 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀝𑁆𑀞𑀜𑁆𑀘 𑀧𑀝𑀺𑀘𑁆𑀘, 𑀯𑀮𑁆𑀮𑀺𑀜𑁆𑀘 𑀧𑀝𑀺𑀘𑁆𑀘, 𑀫𑀢𑁆𑀢𑀺𑀓𑀜𑁆𑀘 𑀧𑀝𑀺𑀘𑁆𑀘, 𑀢𑀺𑀡𑀜𑁆𑀘 𑀧𑀝𑀺𑀘𑁆𑀘, 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀅𑀕𑀸𑀭𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘, 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘, 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘, 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘, 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁬).

𑀘𑀺𑀢𑁆𑀢𑀫𑀓𑁆𑀓𑀝𑀲𑁆𑀲 𑀦𑀺𑀯𑀸𑀲𑀢𑁄 𑀯𑀸 𑀓𑀼𑀝𑀺. 𑀬𑀣𑀸𑀳 𑁋

‘‘𑀅𑀝𑁆𑀞𑀺𑀓𑀗𑁆𑀓𑀮𑀓𑀼𑀝𑀺 ¶ 𑀘𑁂 𑀲𑀸, 𑀫𑀓𑁆𑀓𑀝𑀸𑀯𑀲𑀣𑁄 𑀇𑀢𑀺;

𑀫𑀓𑁆𑀓𑀝𑁄 𑀧𑀜𑁆𑀘𑀤𑁆𑀯𑀸𑀭𑀸𑀬, 𑀓𑀼𑀝𑀺𑀓𑀸𑀬 𑀧𑀲𑀓𑁆𑀓𑀺𑀬;

𑀤𑁆𑀯𑀸𑀭𑁂𑀦 𑀅𑀦𑀼𑀧𑀭𑀺𑀬𑀸𑀢𑀺, 𑀖𑀝𑁆𑀝𑀬𑀦𑁆𑀢𑁄 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. (𑀣𑁂𑀭𑀕𑀸. 𑁧𑁨𑁫);

𑀲𑀸 𑀓𑀼𑀝𑀺 𑀬𑁂𑀦 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀙𑀤𑀦𑁂𑀦 𑀲𑀢𑁆𑀢𑀸𑀦𑀁 𑀙𑀦𑁆𑀦𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺. 𑀬𑀣𑀸𑀳 𑁋

‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺. (𑀉𑀤𑀸. 𑁪𑁫; 𑀣𑁂𑀭𑀕𑀸. 𑁪𑁪𑁭; 𑀧𑀭𑀺. 𑁩𑁩𑁯);

𑀅𑀬𑀁 ¶ 𑀕𑀸𑀣𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀼𑀢𑁆𑀢𑀸 𑀔𑀦𑁆𑀥𑀓𑁂 𑀣𑁂𑀭𑀕𑀸𑀣𑀸𑀬𑀜𑁆𑀘. 𑀔𑀦𑁆𑀥𑀓𑁂 𑀳𑀺 ‘‘𑀬𑁄 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀓𑀺𑀮𑁂𑀲𑀸 𑀘 𑀧𑀼𑀦𑀧𑁆𑀧𑀼𑀦𑀁 𑀆𑀧𑀢𑁆𑀢𑀺𑀬𑁄 𑀘 𑀅𑀢𑀺𑀯𑀲𑁆𑀲𑀦𑁆𑀢𑀺, 𑀬𑁄 𑀧𑀦 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀦𑀸𑀢𑀺𑀯𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀁 𑀅𑀢𑁆𑀣𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀸. 𑀣𑁂𑀭𑀕𑀸𑀣𑀸𑀬𑀁 ‘‘𑀬𑀲𑁆𑀲 𑀭𑀸𑀕𑀸𑀤𑀺𑀘𑁆𑀙𑀤𑀦𑀁 𑀅𑀢𑁆𑀣𑀺, 𑀢𑀲𑁆𑀲 𑀧𑀼𑀦 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀲𑀼 𑀭𑀸𑀕𑀸𑀤𑀺𑀲𑀫𑁆𑀪𑀯𑀢𑁄 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺 ¶ . 𑀬𑁄 𑀯𑀸 𑀉𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀅𑀥𑀺𑀯𑀸𑀲𑁂𑀢𑀺, 𑀢𑀲𑁆𑀲𑁂𑀯 𑀅𑀥𑀺𑀯𑀸𑀲𑀺𑀢𑀓𑀺𑀮𑁂𑀲𑀘𑁆𑀙𑀤𑀦𑀘𑁆𑀙𑀦𑁆𑀦𑀸 𑀅𑀢𑁆𑀢𑀪𑀸𑀯𑀓𑀼𑀝𑀺 𑀧𑀼𑀦𑀧𑁆𑀧𑀼𑀦𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺. 𑀬𑀲𑁆𑀲 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀯𑀸𑀢𑁂𑀦 𑀓𑀺𑀮𑁂𑀲𑀘𑁆𑀙𑀤𑀦𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀯𑀺𑀯𑀝𑀸, 𑀢𑀲𑁆𑀲 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺. 𑀅𑀬𑀫𑀢𑁆𑀣𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀪𑀕𑀯𑀢𑀸 𑀳𑀺 𑀬𑀣𑀸𑀯𑀼𑀢𑁆𑀢𑀁 𑀙𑀤𑀦𑀁 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀯𑀺𑀤𑁆𑀥𑀁𑀲𑀺𑀢𑀁, 𑀢𑀲𑁆𑀫𑀸 ‘‘𑀯𑀺𑀯𑀝𑀸 𑀓𑀼𑀝𑀻’’𑀢𑀺 𑀆𑀳. 𑀦𑀺𑀩𑁆𑀩𑀼𑀢𑁄𑀢𑀺 𑀉𑀧𑀲𑀦𑁆𑀢𑁄. 𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀬𑁂𑀦 𑀳𑀺 𑀏𑀓𑀸𑀤𑀲𑀯𑀺𑀥𑁂𑀦 𑀅𑀕𑁆𑀕𑀺𑀦𑀸 𑀲𑀩𑁆𑀩𑀫𑀺𑀤𑀁 𑀆𑀤𑀺𑀢𑁆𑀢𑀁. 𑀬𑀣𑀸𑀳 𑁋 ‘‘𑀆𑀤𑀺𑀢𑁆𑀢𑀁 𑀭𑀸𑀕𑀕𑁆𑀕𑀺𑀦𑀸’’𑀢𑀺 𑀯𑀺𑀢𑁆𑀣𑀸𑀭𑁄. 𑀲𑁄 𑀅𑀕𑁆𑀕𑀺 𑀪𑀕𑀯𑀢𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀭𑀺𑀬𑀫𑀕𑁆𑀕𑀲𑀮𑀺𑀮𑀲𑁂𑀓𑁂𑀦 𑀦𑀺𑀩𑁆𑀩𑀼𑀢𑁄, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀼𑀢𑁄 𑀕𑀺𑀦𑀻’’𑀢𑀺 𑀆𑀳.

𑀏𑀯𑀁 𑀯𑀤𑀦𑁆𑀢𑁄 𑀘 𑀥𑀦𑀺𑀬𑀁 𑀅𑀢𑀼𑀝𑁆𑀞𑀩𑁆𑀩𑁂𑀦 𑀢𑀼𑀲𑁆𑀲𑀫𑀸𑀦𑀁 𑀅𑀜𑁆𑀜𑀸𑀧𑀤𑁂𑀲𑁂𑀦𑁂𑀯 𑀧𑀭𑀺𑀪𑀸𑀲𑀢𑀺, 𑀑𑀯𑀤𑀢𑀺, 𑀅𑀦𑀼𑀲𑀸𑀲𑀢𑀺. 𑀓𑀣𑀁? ‘‘𑀅𑀓𑁆𑀓𑁄𑀥𑀦𑁄’’𑀢𑀺 𑀳𑀺 𑀯𑀤𑀫𑀸𑀦𑁄, 𑀥𑀦𑀺𑀬, 𑀢𑁆𑀯𑀁 ‘‘𑀧𑀓𑁆𑀓𑁄𑀤𑀦𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀝𑁆𑀞𑁄, 𑀑𑀤𑀦𑀧𑀸𑀓𑁄 𑀘 𑀬𑀸𑀯𑀚𑀻𑀯𑀁 𑀥𑀦𑀧𑀭𑀺𑀓𑁆𑀔𑀬𑁂𑀦 𑀓𑀢𑁆𑀢𑀩𑁆𑀩𑁄, 𑀥𑀦𑀧𑀭𑀺𑀓𑁆𑀔𑀬𑁄 𑀘 𑀆𑀭𑀓𑁆𑀔𑀸𑀤𑀺𑀤𑀼𑀓𑁆𑀔𑀧𑀤𑀝𑁆𑀞𑀸𑀦𑁄, 𑀏𑀯𑀁 𑀲𑀦𑁆𑀢𑁂 𑀤𑀼𑀓𑁆𑀔𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀲𑀺. 𑀅𑀳𑀁 𑀧𑀦 ‘‘𑀅𑀓𑁆𑀓𑁄𑀥𑀦𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀸𑀪𑀸𑀯𑁂𑀦 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. ‘‘𑀯𑀺𑀕𑀢𑀔𑀺𑀮𑁄’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 ‘‘𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀓𑀢𑀓𑀺𑀘𑁆𑀘𑁄𑀯 ‘‘𑀓𑀢𑀓𑀺𑀘𑁆𑀘𑁄𑀳𑀫𑀲𑁆𑀫𑀻’’𑀢𑀺 𑀫𑀦𑁆𑀢𑁆𑀯𑀸 𑀢𑀼𑀝𑁆𑀞𑁄, 𑀅𑀳𑀁 𑀧𑀦 ‘‘𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀓𑀢𑀓𑀺𑀘𑁆𑀘𑁄𑀯 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. ‘‘𑀅𑀦𑀼𑀢𑀻𑀭𑁂 ¶ 𑀫𑀳𑀺𑀬𑁂𑀓𑀭𑀢𑁆𑀢𑀺𑀯𑀸𑀲𑁄’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 𑀅𑀦𑀼𑀢𑀻𑀭𑁂 𑀫𑀳𑀺𑀬𑀸 𑀲𑀫𑀸𑀦𑀯𑀸𑀲𑁄𑀢𑀺 𑀢𑀼𑀲𑁆𑀲𑀦𑁆𑀢𑁄 𑀘𑀢𑀼𑀫𑀸𑀲𑀦𑀺𑀩𑀤𑁆𑀥𑀯𑀸𑀲𑁂𑀦 𑀢𑀼𑀝𑁆𑀞𑁄. 𑀦𑀺𑀩𑀤𑁆𑀥𑀯𑀸𑀲𑁄 𑀘 𑀆𑀯𑀸𑀲𑀲𑀗𑁆𑀕𑁂𑀦 𑀳𑁄𑀢𑀺, 𑀲𑁄 𑀘 𑀤𑀼𑀓𑁆𑀔𑁄, 𑀏𑀯𑀁 𑀲𑀦𑁆𑀢𑁂 𑀤𑀼𑀓𑁆𑀔𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀲𑀺. 𑀅𑀳𑀁 𑀧𑀦 𑀏𑀓𑀭𑀢𑁆𑀢𑀺𑀯𑀸𑀲𑁄𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀦𑀺𑀩𑀤𑁆𑀥𑀯𑀸𑀲𑁂𑀦 𑀢𑀼𑀝𑁆𑀞𑁄, 𑀅𑀦𑀺𑀩𑀤𑁆𑀥𑀯𑀸𑀲𑁄 𑀘 𑀆𑀯𑀸𑀲𑀲𑀗𑁆𑀕𑀸𑀪𑀸𑀯𑁂𑀦 𑀳𑁄𑀢𑀺, 𑀆𑀯𑀸𑀲𑀲𑀗𑁆𑀕𑀸𑀪𑀸𑀯𑁄 𑀘 𑀲𑀼𑀔𑁄𑀢𑀺 𑀲𑀼𑀔𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 ¶ 𑀤𑀻𑀧𑁂𑀢𑀺.

‘‘𑀯𑀺𑀯𑀝𑀸 ¶ 𑀓𑀼𑀝𑀻’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 𑀙𑀦𑁆𑀦𑀸 𑀓𑀼𑀝𑀻𑀢𑀺 𑀢𑀼𑀲𑁆𑀲𑀦𑁆𑀢𑁄 𑀙𑀦𑁆𑀦𑀕𑁂𑀳𑀢𑀸𑀬 𑀢𑀼𑀝𑁆𑀞𑁄, 𑀕𑁂𑀳𑁂 𑀘 𑀢𑁂 𑀙𑀦𑁆𑀦𑁂𑀧𑀺 𑀅𑀢𑁆𑀢𑀪𑀸𑀯𑀓𑀼𑀝𑀺𑀓𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺, 𑀬𑁂𑀦 𑀲𑀜𑁆𑀚𑀦𑀺𑀢𑁂𑀳𑀺 𑀘𑀢𑀽𑀳𑀺 𑀫𑀳𑁄𑀖𑁂𑀳𑀺 𑀯𑀼𑀬𑁆𑀳𑀫𑀸𑀦𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑁂𑀬𑁆𑀬𑀸𑀲𑀺, 𑀏𑀯𑀁 𑀲𑀦𑁆𑀢𑁂 𑀅𑀢𑀼𑀝𑁆𑀞𑀩𑁆𑀩𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀲𑀺. 𑀅𑀳𑀁 𑀧𑀦 ‘‘𑀯𑀺𑀯𑀝𑀸 𑀓𑀼𑀝𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀢𑁆𑀢𑀪𑀸𑀯𑀓𑀼𑀝𑀺𑀬𑀸 𑀓𑀺𑀮𑁂𑀲𑀘𑁆𑀙𑀤𑀦𑀸𑀪𑀸𑀯𑁂𑀦 𑀢𑀼𑀝𑁆𑀞𑁄. 𑀏𑀯𑀜𑁆𑀘 𑀫𑁂 𑀯𑀺𑀯𑀝𑀸𑀬 𑀓𑀼𑀝𑀺𑀬𑀸 𑀦 𑀢𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺, 𑀬𑁂𑀦 𑀲𑀜𑁆𑀚𑀦𑀺𑀢𑁂𑀳𑀺 𑀘𑀢𑀽𑀳𑀺 𑀫𑀳𑁄𑀖𑁂𑀳𑀺 𑀯𑀼𑀬𑁆𑀳𑀫𑀸𑀦𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑁂𑀬𑁆𑀬𑀁, 𑀏𑀯𑀁 𑀲𑀦𑁆𑀢𑁂 𑀢𑀼𑀝𑁆𑀞𑀩𑁆𑀩𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. ‘‘𑀦𑀺𑀩𑁆𑀩𑀼𑀢𑁄 𑀕𑀺𑀦𑀻’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 𑀆𑀳𑀺𑀢𑁄 𑀕𑀺𑀦𑀻𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀓𑀢𑀽𑀧𑀤𑁆𑀤𑀯𑀦𑀺𑀯𑀸𑀭𑀡𑁄𑀯 𑀓𑀢𑀽𑀧𑀤𑁆𑀤𑀯𑀦𑀺𑀯𑀸𑀭𑀡𑁄𑀲𑁆𑀫𑀻𑀢𑀺 𑀫𑀦𑁆𑀢𑁆𑀯𑀸 𑀢𑀼𑀝𑁆𑀞𑁄. 𑀅𑀳𑀁 𑀧𑀦 𑀦𑀺𑀩𑁆𑀩𑀼𑀢𑁄 𑀕𑀺𑀦𑀻𑀢𑀺 𑀢𑀼𑀲𑁆𑀲𑀦𑁆𑀢𑁄 𑀏𑀓𑀸𑀤𑀲𑀕𑁆𑀕𑀺𑀧𑀭𑀺𑀴𑀸𑀳𑀸𑀪𑀸𑀯𑀢𑁄 𑀓𑀢𑀽𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑀸𑀬𑁂𑀯 𑀢𑀼𑀝𑁆𑀞𑁄𑀢𑀺 𑀤𑀻𑀧𑁂𑀢𑀺. ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀤𑀫𑀸𑀦𑁄 𑀏𑀯𑀁 𑀯𑀺𑀕𑀢𑀤𑀼𑀓𑁆𑀔𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀲𑀼𑀔𑀸𑀦𑀁 𑀓𑀢𑀲𑀩𑁆𑀩𑀓𑀺𑀘𑁆𑀘𑀸𑀦𑀁 𑀅𑀫𑁆𑀳𑀸𑀤𑀺𑀲𑀸𑀦𑀁 𑀏𑀢𑀁 𑀯𑀘𑀦𑀁 𑀲𑁄𑀪𑀢𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀺, 𑀧𑀯𑀲𑁆𑀲 𑀤𑁂𑀯, 𑀦 𑀦𑁄 𑀢𑀬𑀺 𑀯𑀲𑁆𑀲𑀦𑁆𑀢𑁂 𑀯𑀸 𑀅𑀯𑀲𑁆𑀲𑀦𑁆𑀢𑁂 𑀯𑀸 𑀯𑀼𑀟𑁆𑀠𑀺 𑀯𑀸 𑀳𑀸𑀦𑀺 𑀯𑀸 𑀅𑀢𑁆𑀣𑀺, 𑀢𑁆𑀯𑀁 𑀧𑀦 𑀓𑀲𑁆𑀫𑀸 𑀏𑀯𑀁 𑀯𑀤𑀲𑀻𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀯𑀤𑀦𑁆𑀢𑁄 𑀘 𑀥𑀦𑀺𑀬 𑀅𑀢𑀼𑀝𑁆𑀞𑀩𑁆𑀩𑁂𑀦𑁂𑀯 𑀢𑀼𑀲𑁆𑀲𑀫𑀸𑀦𑀁 𑀅𑀜𑁆𑀜𑀸𑀧𑀤𑁂𑀲𑁂𑀦𑁂𑀯 𑀧𑀭𑀺𑀪𑀸𑀲𑀢𑀺 𑀑𑀯𑀤𑀢𑀺, 𑀅𑀦𑀼𑀲𑀸𑀲𑀢𑀻’’𑀢𑀺, 𑀢𑀁 𑀲𑀫𑁆𑀫𑀤𑁂𑀯 𑀯𑀼𑀢𑁆𑀢𑀦𑁆𑀢𑀺.

𑁨𑁦. 𑀏𑀯𑀫𑀺𑀫𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸𑀧𑀺 𑀥𑀦𑀺𑀬𑁄 𑀕𑁄𑀧𑁄 ‘‘𑀓𑁄 𑀅𑀬𑀁 𑀕𑀸𑀣𑀁 𑀪𑀸𑀲𑀢𑀻’’𑀢𑀺 𑀅𑀯𑀢𑁆𑀯𑀸 𑀢𑁂𑀦 𑀲𑀼𑀪𑀸𑀲𑀺𑀢𑁂𑀦 𑀧𑀭𑀺𑀢𑀼𑀝𑁆𑀞𑁄 𑀧𑀼𑀦𑀧𑀺 𑀢𑀣𑀸𑀭𑀽𑀧𑀁 𑀲𑁄𑀢𑀼𑀓𑀸𑀫𑁄 𑀅𑀧𑀭𑀫𑁆𑀧𑀺 𑀕𑀸𑀣𑀫𑀸𑀳 ‘‘𑀅𑀦𑁆𑀥𑀓𑀫𑀓𑀲𑀸’’𑀢𑀺. 𑀢𑀢𑁆𑀣 𑀅𑀦𑁆𑀥𑀓𑀸𑀢𑀺 𑀓𑀸𑀴𑀫𑀓𑁆𑀔𑀺𑀓𑀸𑀦𑀁 𑀅𑀥𑀺𑀯𑀘𑀦𑀁, 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀫𑀓𑀲𑀸𑀢𑀺 𑀫𑀓𑀲𑀸𑀬𑁂𑀯. 𑀦 𑀯𑀺𑀚𑁆𑀚𑀭𑁂𑀢𑀺 𑀦𑀢𑁆𑀣𑀺. 𑀓𑀘𑁆𑀙𑁂𑀢𑀺 𑀤𑁆𑀯𑁂 𑀓𑀘𑁆𑀙𑀸 𑁋 𑀦𑀤𑀻𑀓𑀘𑁆𑀙𑁄 𑀘 𑀧𑀩𑁆𑀩𑀢𑀓𑀘𑁆𑀙𑁄 𑀘. 𑀇𑀥 𑀦𑀤𑀻𑀓𑀘𑁆𑀙𑁄. 𑀭𑀼𑀴𑁆𑀳𑀢𑀺𑀡𑁂𑀢𑀺 𑀲𑀜𑁆𑀚𑀸𑀢𑀢𑀺𑀡𑁂. 𑀘𑀭𑀦𑁆𑀢𑀻𑀢𑀺 𑀪𑀢𑁆𑀢𑀓𑀺𑀘𑁆𑀘𑀁 ¶ 𑀓𑀭𑁄𑀦𑁆𑀢𑀺. 𑀯𑀼𑀝𑁆𑀞𑀺𑀫𑁆𑀧𑀻𑀢𑀺 𑀯𑀸𑀢𑀯𑀼𑀝𑁆𑀞𑀺𑀆𑀤𑀺𑀓𑀸 𑀅𑀦𑁂𑀓𑀸 𑀯𑀼𑀝𑁆𑀞𑀺𑀬𑁄, 𑀢𑀸 𑀆𑀴𑀯𑀓𑀲𑀼𑀢𑁆𑀢𑁂 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀇𑀥 𑀧𑀦 𑀯𑀲𑁆𑀲𑀯𑀼𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀳𑁂𑀬𑁆𑀬𑀼𑀦𑁆𑀢𑀺 𑀔𑀫𑁂𑀬𑁆𑀬𑀼𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀏𑀢𑁆𑀣 𑀥𑀦𑀺𑀬𑁄 𑀬𑁂 𑀅𑀦𑁆𑀥𑀓𑀫𑀓𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀼𑀥𑀺𑀭𑁂 𑀧𑀺𑀯𑀦𑁆𑀢𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀕𑀸𑀯𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀝𑁆𑀞𑀺𑀢𑀫𑀢𑁆𑀢𑁂𑀬𑁂𑀯 𑀢𑁂 𑀕𑁄𑀧𑀸𑀮𑀓𑀸 𑀧𑀁𑀲𑀼𑀦𑀸 𑀘 𑀲𑀸𑀔𑀸𑀳𑀺 𑀘 ¶ 𑀫𑀸𑀭𑁂𑀦𑁆𑀢𑀺, 𑀢𑁂𑀲𑀁 𑀅𑀪𑀸𑀯𑁂𑀦 𑀕𑀼𑀦𑁆𑀦𑀁 𑀔𑁂𑀫𑀢𑀁, 𑀓𑀘𑁆𑀙𑁂 ¶ 𑀭𑀼𑀴𑁆𑀳𑀢𑀺𑀡𑀘𑀭𑀡𑁂𑀦 𑀅𑀤𑁆𑀥𑀸𑀦𑀕𑀫𑀦𑀧𑀭𑀺𑀲𑁆𑀲𑀫𑀸𑀪𑀸𑀯𑀁 𑀯𑀢𑁆𑀯𑀸 𑀔𑀼𑀤𑀸𑀓𑀺𑀮𑀫𑀣𑀸𑀪𑀸𑀯𑀜𑁆𑀘 𑀤𑀻𑀧𑁂𑀦𑁆𑀢𑁄 ‘‘𑀬𑀣𑀸 𑀅𑀜𑁆𑀜𑁂𑀲𑀁 𑀕𑀸𑀯𑁄 𑀅𑀦𑁆𑀥𑀓𑀫𑀓𑀲𑀲𑀫𑁆𑀨𑀲𑁆𑀲𑁂𑀳𑀺 𑀤𑀺𑀲𑁆𑀲𑀫𑀸𑀦𑀸 𑀅𑀤𑁆𑀥𑀸𑀦𑀕𑀫𑀦𑁂𑀦 𑀓𑀺𑀮𑀦𑁆𑀢𑀸 𑀔𑀼𑀤𑀸𑀬 𑀫𑀺𑀮𑀸𑀬𑀫𑀸𑀦𑀸 𑀏𑀓𑀯𑀼𑀝𑁆𑀞𑀺𑀦𑀺𑀧𑀸𑀢𑀫𑁆𑀧𑀺 𑀦 𑀲𑀳𑁂𑀬𑁆𑀬𑀼𑀁, 𑀦 𑀫𑁂 𑀢𑀣𑀸 𑀕𑀸𑀯𑁄, 𑀫𑀬𑁆𑀳𑀁 𑀧𑀦 𑀕𑀸𑀯𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀪𑀸𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑀼𑀁 𑀯𑀸 𑀯𑀼𑀝𑁆𑀞𑀺𑀫𑁆𑀧𑀺 𑀲𑀳𑁂𑀬𑁆𑀬𑀼’’𑀦𑁆𑀢𑀺 𑀤𑀻𑀧𑁂𑀢𑀺.

𑁨𑁧. 𑀢𑀢𑁄 𑀪𑀕𑀯𑀸 𑀬𑀲𑁆𑀫𑀸 𑀥𑀦𑀺𑀬𑁄 𑀅𑀦𑁆𑀢𑀭𑀤𑀻𑀧𑁂 𑀯𑀲𑀦𑁆𑀢𑁄 𑀪𑀬𑀁 𑀤𑀺𑀲𑁆𑀯𑀸, 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸, 𑀫𑀳𑀸𑀫𑀳𑀺𑀁 𑀢𑀭𑀺𑀢𑁆𑀯𑀸, 𑀢𑀁 𑀓𑀘𑁆𑀙𑀁 𑀆𑀕𑀫𑁆𑀫 ‘‘𑀅𑀳𑀁 𑀲𑀼𑀝𑁆𑀞𑀼 𑀆𑀕𑀢𑁄, 𑀦𑀺𑀩𑁆𑀪𑀬𑁂𑀯 𑀞𑀸𑀦𑁂 𑀞𑀺𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳, 𑀲𑀪𑀬𑁂 𑀏𑀯 𑀘 𑀲𑁄 𑀞𑀸𑀦𑁂 𑀞𑀺𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀆𑀕𑀫𑀦𑀝𑁆𑀞𑀸𑀦𑀸 𑀅𑀢𑁆𑀢𑀦𑁄 𑀆𑀕𑀫𑀦𑀝𑁆𑀞𑀸𑀦𑀁 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀯𑀡𑁆𑀡𑁂𑀦𑁆𑀢𑁄 ‘‘𑀩𑀤𑁆𑀥𑀸𑀲𑀺 𑀪𑀺𑀲𑀻’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺, 𑀅𑀢𑁆𑀣𑀲𑀪𑀸𑀕𑀁 𑀦𑁄 𑀩𑁆𑀬𑀜𑁆𑀚𑀦𑀲𑀪𑀸𑀕𑀁.

𑀢𑀢𑁆𑀣 𑀪𑀺𑀲𑀻𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀧𑀼𑀣𑀼𑀮𑀁 𑀓𑀢𑁆𑀯𑀸 𑀩𑀤𑁆𑀥𑀓𑀼𑀮𑁆𑀮𑁄 𑀯𑀼𑀘𑁆𑀘𑀢𑀺 𑀮𑁄𑀓𑁂. 𑀅𑀭𑀺𑀬𑀲𑁆𑀲 𑀧𑀦 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑁋

‘‘𑀫𑀕𑁆𑀕𑁄 𑀧𑀚𑁆𑀚𑁄 𑀧𑀣𑁄 𑀧𑀦𑁆𑀣𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’. (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧);

‘‘𑀅𑀤𑁆𑀥𑀸𑀦𑀁 𑀧𑀪𑀯𑁄 𑀘𑁂𑀯, 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑁄’’.

𑀇𑀫𑀸𑀬𑀧𑀺 𑀕𑀸𑀣𑀸𑀬 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀅𑀢𑁆𑀣𑀁 𑀆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑁄 𑁋 𑀥𑀦𑀺𑀬, 𑀢𑁆𑀯𑀁 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸, 𑀫𑀳𑀺𑀁 𑀢𑀭𑀺𑀢𑁆𑀯𑀸, 𑀇𑀫𑀁 𑀞𑀸𑀦𑀫𑀸𑀕𑀢𑁄, 𑀧𑀼𑀦𑀧𑀺 𑀘 𑀢𑁂 𑀓𑀼𑀮𑁆𑀮𑁄 ¶ 𑀩𑀦𑁆𑀥𑀺𑀢𑀩𑁆𑀩𑁄 𑀏𑀯 𑀪𑀯𑀺𑀲𑁆𑀲𑀢𑀺, 𑀦𑀤𑀻 𑀘 𑀢𑀭𑀺𑀢𑀩𑁆𑀩𑀸, 𑀦 𑀘𑁂𑀢𑀁 𑀞𑀸𑀦𑀁 𑀔𑁂𑀫𑀁. 𑀫𑀬𑀸 𑀧𑀦 𑀏𑀓𑀘𑀺𑀢𑁆𑀢𑁂 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀜𑀸𑀡𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀅𑀳𑁄𑀲𑀺 𑀪𑀺𑀲𑀺. 𑀲𑀸 𑀘 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀧𑀭𑀺𑀧𑀼𑀡𑁆𑀡𑀢𑀸𑀬 𑀏𑀓𑀭𑀲𑀪𑀸𑀯𑀽𑀧𑀕𑀢𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀦𑁂𑀦 𑀧𑀼𑀦 𑀩𑀦𑁆𑀥𑀺𑀢𑀩𑁆𑀩𑀧𑁆𑀧𑀬𑁄𑀚𑀦𑀸𑀪𑀸𑀯𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀓𑁂𑀦𑀘𑀺 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀘 𑀲𑀼𑀲𑀗𑁆𑀔𑀢𑀸. 𑀢𑀸𑀬 𑀘𑀫𑁆𑀳𑀺 𑀢𑀺𑀡𑁆𑀡𑁄, 𑀧𑀼𑀩𑁆𑀩𑁂 𑀧𑀢𑁆𑀣𑀺𑀢𑀁 𑀢𑀻𑀭𑀧𑁆𑀧𑀤𑁂𑀲𑀁 𑀕𑀢𑁄. 𑀕𑀘𑁆𑀙𑀦𑁆𑀢𑁄𑀧𑀺 𑀘 𑀦 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀯𑀺𑀬 𑀓𑀜𑁆𑀘𑀺𑀤𑁂𑀯 𑀧𑀤𑁂𑀲𑀁 𑀕𑀢𑁄. 𑀅𑀣 𑀔𑁄 𑀧𑀸𑀭𑀕𑀢𑁄 𑀲𑀩𑁆𑀩𑀸𑀲𑀯𑀓𑁆𑀔𑀬𑀁 𑀲𑀩𑁆𑀩𑀥𑀫𑁆𑀫𑀧𑀸𑀭𑀁 𑀧𑀭𑀫𑀁 𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄, 𑀢𑀺𑀡𑁆𑀡𑁄𑀢𑀺 𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀧𑀸𑀭𑀕𑀢𑁄𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 ¶ . 𑀓𑀺𑀁 𑀯𑀺𑀦𑁂𑀬𑁆𑀬 𑀧𑀸𑀭𑀕𑀢𑁄𑀢𑀺 𑀘𑁂? 𑀯𑀺𑀦𑁂𑀬𑁆𑀬 𑀑𑀖𑀁, 𑀓𑀸𑀫𑁄𑀖𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑁆𑀫 𑀢𑀁 𑀧𑀸𑀭𑀁 𑀕𑀢𑁄𑀢𑀺. 𑀇𑀤𑀸𑀦𑀺 𑀘 ¶ 𑀧𑀦 𑀫𑁂 𑀧𑀼𑀦 𑀢𑀭𑀺𑀢𑀩𑁆𑀩𑀸𑀪𑀸𑀯𑀢𑁄 𑀅𑀢𑁆𑀣𑁄 𑀪𑀺𑀲𑀺𑀬𑀸 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀫𑁂𑀯 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

𑁨𑁨. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀕𑁄𑀧𑀻 𑀫𑀫 𑀅𑀲𑁆𑀲𑀯𑀸’’𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺. 𑀢𑀢𑁆𑀣 𑀕𑁄𑀧𑀻𑀢𑀺 𑀪𑀭𑀺𑀬𑀁 𑀦𑀺𑀤𑁆𑀤𑀺𑀲𑀢𑀺. 𑀅𑀲𑁆𑀲𑀯𑀸𑀢𑀺 𑀯𑀘𑀦𑀓𑀭𑀸 𑀓𑀺𑀁𑀓𑀸𑀭𑀧𑀝𑀺𑀲𑀸𑀯𑀺𑀦𑀻. 𑀅𑀮𑁄𑀮𑀸𑀢𑀺 𑀫𑀸𑀢𑀼𑀕𑀸𑀫𑁄 𑀳𑀺 𑀧𑀜𑁆𑀘𑀳𑀺 𑀮𑁄𑀮𑀢𑀸𑀳𑀺 𑀮𑁄𑀮𑁄 𑀳𑁄𑀢𑀺 𑁋 𑀆𑀳𑀸𑀭𑀮𑁄𑀮𑀢𑀸𑀬, 𑀅𑀮𑀗𑁆𑀓𑀸𑀭𑀮𑁄𑀮𑀢𑀸𑀬, 𑀧𑀭𑀧𑀼𑀭𑀺𑀲𑀮𑁄𑀮𑀢𑀸𑀬, 𑀥𑀦𑀮𑁄𑀮𑀢𑀸𑀬, 𑀧𑀸𑀤𑀮𑁄𑀮𑀢𑀸𑀬. 𑀢𑀣𑀸 𑀳𑀺 𑀫𑀸𑀢𑀼𑀕𑀸𑀫𑁄 𑀪𑀢𑁆𑀢𑀧𑀽𑀯𑀲𑀼𑀭𑀸𑀤𑀺𑀪𑁂𑀤𑁂 𑀆𑀳𑀸𑀭𑁂 𑀮𑁄𑀮𑀢𑀸𑀬 𑀅𑀦𑁆𑀢𑀫𑀲𑁄 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀫𑁆𑀧𑀺 𑀪𑀼𑀜𑁆𑀚𑀢𑀺, 𑀳𑀢𑁆𑀣𑁄𑀢𑀸𑀧𑀓𑀫𑁆𑀧𑀺 𑀔𑀸𑀤𑀢𑀺, 𑀤𑀺𑀕𑀼𑀡𑀁 𑀥𑀦𑀫𑀦𑀼𑀧𑁆𑀧𑀤𑀢𑁆𑀯𑀸𑀧𑀺 𑀲𑀼𑀭𑀁 𑀧𑀺𑀯𑀢𑀺. 𑀅𑀮𑀗𑁆𑀓𑀸𑀭𑀮𑁄𑀮𑀢𑀸𑀬 𑀅𑀜𑁆𑀜𑀁 𑀅𑀮𑀗𑁆𑀓𑀸𑀭𑀁 𑀅𑀮𑀪𑀫𑀸𑀦𑁄 𑀅𑀦𑁆𑀢𑀫𑀲𑁄 𑀉𑀤𑀓𑀢𑁂𑀮𑀓𑁂𑀦𑀧𑀺 𑀓𑁂𑀲𑁂 𑀑𑀲𑀡𑁆𑀟𑁂𑀢𑁆𑀯𑀸 𑀫𑀼𑀔𑀁 𑀧𑀭𑀺𑀫𑀚𑁆𑀚𑀢𑀺. 𑀧𑀭𑀧𑀼𑀭𑀺𑀲𑀮𑁄𑀮𑀢𑀸𑀬 𑀅𑀦𑁆𑀢𑀫𑀲𑁄 𑀧𑀼𑀢𑁆𑀢𑁂𑀦𑀧𑀺 ¶ 𑀢𑀸𑀤𑀺𑀲𑁂 𑀧𑀤𑁂𑀲𑁂 𑀧𑀓𑁆𑀓𑁄𑀲𑀺𑀬𑀫𑀸𑀦𑁄 𑀧𑀞𑀫𑀁 𑀅𑀲𑀤𑁆𑀥𑀫𑁆𑀫𑀯𑀲𑁂𑀦 𑀘𑀺𑀦𑁆𑀢𑁂𑀢𑀺. 𑀥𑀦𑀮𑁄𑀮𑀢𑀸𑀬 ‘‘𑀳𑀁𑀲𑀭𑀸𑀚𑀁 𑀕𑀳𑁂𑀢𑁆𑀯𑀸𑀦 𑀲𑀼𑀯𑀡𑁆𑀡𑀸 𑀧𑀭𑀺𑀳𑀸𑀬𑀣’’. 𑀧𑀸𑀤𑀮𑁄𑀮𑀢𑀸𑀬 𑀆𑀭𑀸𑀫𑀸𑀤𑀺𑀕𑀫𑀦𑀲𑀻𑀮𑁄 𑀳𑀼𑀢𑁆𑀯𑀸 𑀲𑀩𑁆𑀩𑀁 𑀥𑀦𑀁 𑀯𑀺𑀦𑀸𑀲𑁂𑀢𑀺. 𑀢𑀢𑁆𑀣 𑀥𑀦𑀺𑀬𑁄 ‘‘𑀏𑀓𑀸𑀧𑀺 𑀮𑁄𑀮𑀢𑀸 𑀫𑀬𑁆𑀳𑀁 𑀕𑁄𑀧𑀺𑀬𑀸 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀮𑁄𑀮𑀸𑀢𑀺 𑀆𑀳.

𑀤𑀻𑀖𑀭𑀢𑁆𑀢𑀁 𑀲𑀁𑀯𑀸𑀲𑀺𑀬𑀸𑀢𑀺 𑀤𑀻𑀖𑀓𑀸𑀮𑀁 𑀲𑀤𑁆𑀥𑀺𑀁 𑀯𑀲𑀫𑀸𑀦𑀸 𑀓𑁄𑀫𑀸𑀭𑀪𑀸𑀯𑀢𑁄 𑀧𑀪𑀼𑀢𑀺 𑀏𑀓𑀢𑁄 𑀯𑀟𑁆𑀠𑀺𑀢𑀸. 𑀢𑁂𑀦 𑀧𑀭𑀧𑀼𑀭𑀺𑀲𑁂 𑀦 𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑀸𑀧𑀸𑀢𑀺 𑀏𑀯𑀁 𑀧𑀭𑀧𑀼𑀭𑀺𑀲𑁂 𑀅𑀚𑀸𑀦𑀦𑁆𑀢𑀻 𑀫𑀫𑁂𑀯 𑀫𑀦𑀁 𑀅𑀮𑁆𑀮𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀦 𑀲𑀼𑀡𑀸𑀫𑀺 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀦𑀸𑀫 𑀲𑀤𑁆𑀥𑀺𑀁 𑀇𑀫𑀸𑀬 𑀳𑀲𑀺𑀢𑀁 𑀯𑀸 𑀮𑀧𑀺𑀢𑀁 𑀯𑀸’’𑀢𑀺 𑀏𑀯𑀁 𑀢𑀲𑁆𑀲𑀸 𑀦 𑀲𑀼𑀡𑀸𑀫𑀺, 𑀓𑀜𑁆𑀘𑀺 𑀅𑀢𑀺𑀘𑀸𑀭𑀤𑁄𑀲𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁨𑁩. 𑀅𑀣 𑀪𑀕𑀯𑀸 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀕𑁄𑀧𑀺𑀬𑀸 𑀢𑀼𑀝𑁆𑀞𑀁 𑀥𑀦𑀺𑀬𑀁 𑀑𑀯𑀤𑀦𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀘𑀺𑀢𑁆𑀢𑀁 𑀫𑀫 𑀅𑀲𑁆𑀲𑀯’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺, 𑀅𑀢𑁆𑀣𑀲𑀪𑀸𑀕𑀁, 𑀩𑁆𑀬𑀜𑁆𑀚𑀦𑀲𑀪𑀸𑀕𑀜𑁆𑀘. 𑀢𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀧𑀤𑀸𑀦𑀺. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 𑀥𑀦𑀺𑀬, 𑀢𑁆𑀯𑀁 ‘‘𑀕𑁄𑀧𑀻 𑀫𑀫 𑀅𑀲𑁆𑀲𑀯𑀸’’𑀢𑀺 𑀢𑀼𑀝𑁆𑀞𑁄, 𑀲𑀸 𑀧𑀦 𑀢𑁂 𑀅𑀲𑁆𑀲𑀯𑀸 ¶ 𑀪𑀯𑁂𑀬𑁆𑀬 𑀯𑀸 𑀦 𑀯𑀸; 𑀤𑀼𑀚𑁆𑀚𑀸𑀦𑀁 𑀧𑀭𑀘𑀺𑀢𑁆𑀢𑀁, 𑀯𑀺𑀲𑁂𑀲𑀢𑁄 𑀫𑀸𑀢𑀼𑀕𑀸𑀫𑀲𑁆𑀲. 𑀫𑀸𑀢𑀼𑀕𑀸𑀫𑀜𑁆𑀳𑀺 𑀓𑀼𑀘𑁆𑀙𑀺𑀬𑀸 𑀧𑀭𑀺𑀳𑀭𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀤𑀼𑀭𑀓𑁆𑀔𑀘𑀺𑀢𑁆𑀢𑀢𑁆𑀢𑀸 𑀏𑀯 𑀦 𑀲𑀓𑁆𑀓𑀸 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀇𑀢𑁆𑀣𑀻 𑀅𑀮𑁄𑀮𑀸𑀢𑀺 𑀯𑀸 𑀲𑀁𑀯𑀸𑀲𑀺𑀬𑀸𑀢𑀺 𑀯𑀸 𑀫𑀦𑀸𑀧𑀸𑀢𑀺 𑀯𑀸 𑀦𑀺𑀧𑁆𑀧𑀸𑀧𑀸𑀢𑀺 𑀯𑀸 𑀚𑀸𑀦𑀺𑀢𑀼𑀁. 𑀫𑀬𑁆𑀳𑀁 𑀧𑀦 𑀘𑀺𑀢𑁆𑀢𑀁 𑀅𑀲𑁆𑀲𑀯𑀁 𑀑𑀯𑀸𑀤𑀧𑀝𑀺𑀓𑀭𑀁 𑀫𑀫 𑀯𑀲𑁂 𑀯𑀢𑁆𑀢𑀢𑀺, 𑀦𑀸𑀳𑀁 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀸𑀫𑀺. 𑀲𑁄 𑀘𑀲𑁆𑀲 𑀅𑀲𑁆𑀲𑀯𑀪𑀸𑀯𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀅𑀕𑁆𑀕𑀺𑀥𑀸𑀭𑀸𑀲𑀼 𑀘 𑀉𑀤𑀓𑀥𑀸𑀭𑀸𑀲𑀼 𑀘 𑀧𑀯𑀢𑁆𑀢𑀫𑀸𑀦𑀸𑀲𑀼 𑀲𑀩𑁆𑀩𑀚𑀦𑀲𑁆𑀲 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀕𑁆𑀕𑀺𑀦𑀺𑀫𑁆𑀫𑀸𑀦𑁂 𑀳𑀺 𑀢𑁂𑀚𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀉𑀤𑀓𑀦𑀺𑀫𑁆𑀫𑀸𑀦𑁂 𑀆𑀧𑁄𑀓𑀲𑀺𑀡𑀁, 𑀦𑀻𑀮𑀸𑀤𑀺𑀦𑀺𑀫𑁆𑀫𑀸𑀦𑁂 𑀦𑀻𑀮𑀸𑀤𑀺𑀓𑀲𑀺𑀡𑀸𑀦𑀺. 𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑀺 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺 𑀏𑀓𑀢𑁄 ¶ 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀏𑀓𑀫𑁂𑀯 𑀧𑀦 𑀅𑀲𑁆𑀲𑀯𑀪𑀸𑀯𑁂𑀦 𑀏𑀯𑀁 𑀯𑀲𑀯𑀢𑁆𑀢𑀺 𑀅𑀳𑁄𑀲𑀺. 𑀢𑀜𑁆𑀘 𑀔𑁄 𑀧𑀦 𑀲𑀩𑁆𑀩𑀓𑀺𑀮𑁂𑀲𑀩𑀦𑁆𑀥𑀦𑀸𑀧𑀕𑀫𑀸 ¶ 𑀯𑀺𑀫𑀼𑀢𑁆𑀢𑀁, 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀤𑁂𑀯 𑀅𑀮𑁄𑀮𑀁, 𑀦 𑀢𑀯 𑀕𑁄𑀧𑀻. 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀓𑀸𑀮𑀢𑁄 𑀘 𑀧𑀪𑀼𑀢𑀺 𑀤𑀸𑀦𑀲𑀻𑀮𑀸𑀤𑀻𑀳𑀺 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀲𑀁𑀯𑀸𑀲𑀺𑀬𑀁, 𑀦 𑀢𑀯 𑀕𑁄𑀧𑀻. 𑀢𑀤𑁂𑀢𑀁 𑀅𑀦𑀼𑀢𑁆𑀢𑀭𑁂𑀦 𑀤𑀫𑀣𑁂𑀦 𑀤𑀫𑀺𑀢𑀢𑁆𑀢𑀸 𑀲𑀼𑀤𑀦𑁆𑀢𑀁, 𑀲𑀼𑀤𑀦𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀯𑀲𑁂𑀦 𑀙𑀤𑁆𑀯𑀸𑀭𑀯𑀺𑀲𑁂𑀯𑀦𑀁 𑀧𑀳𑀸𑀬 𑀫𑀫𑁂𑀯 𑀅𑀥𑀺𑀧𑁆𑀧𑀸𑀬𑀫𑀦𑀲𑁆𑀲 𑀯𑀲𑁂𑀦𑀸𑀦𑀼𑀯𑀢𑁆𑀢𑀦𑀢𑁄 𑀫𑀦𑀸𑀧𑀁, 𑀦 𑀢𑀯 𑀕𑁄𑀧𑀻.

𑀧𑀸𑀧𑀁 𑀧𑀦 𑀫𑁂 𑀦 𑀯𑀺𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀪𑀕𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀧𑀸𑀧𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀥𑀦𑀺𑀬𑁄 𑀯𑀺𑀬 𑀕𑁄𑀧𑀺𑀬𑀸. 𑀲𑁄 𑀘𑀲𑁆𑀲 𑀧𑀸𑀧𑀸𑀪𑀸𑀯𑁄 𑀦 𑀓𑁂𑀯𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂𑀬𑁂𑀯, 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀲𑀭𑀸𑀕𑀸𑀤𑀺𑀓𑀸𑀮𑁂 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀲𑁆𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀸𑀧𑀺 𑀳𑀺𑀲𑁆𑀲 𑀅𑀕𑀸𑀭𑀺𑀬𑀪𑀸𑀯𑀸𑀦𑀼𑀭𑀽𑀧𑀁 𑀯𑀺𑀜𑁆𑀜𑀼𑀧𑀝𑀺𑀓𑀼𑀝𑁆𑀞𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀯𑀸 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀢𑀢𑁄 𑀧𑀭𑀁 𑀫𑀸𑀭𑁄𑀧𑀺 𑀙𑀩𑁆𑀩𑀲𑁆𑀲𑀸𑀦𑀺 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀁, 𑀏𑀓𑀁 𑀯𑀲𑁆𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀢𑀣𑀸𑀕𑀢𑀁 𑀅𑀦𑀼𑀩𑀦𑁆𑀥𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀯𑀸𑀮𑀕𑁆𑀕𑀦𑀺𑀢𑀼𑀤𑀦𑀫𑀢𑁆𑀢𑀫𑁆𑀧𑀺𑀲𑁆𑀲 𑀧𑀸𑀧𑀲𑀫𑀸𑀘𑀸𑀭𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀲𑁄 𑀅𑀤𑀺𑀲𑁆𑀯𑀸𑀯 𑀦𑀺𑀩𑁆𑀩𑀺𑀦𑁆𑀦𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀩𑀼𑀤𑁆𑀥𑀓𑀸𑀮𑁂𑀧𑀺 𑀦𑀁 𑀉𑀢𑁆𑀢𑀭𑀫𑀸𑀡𑀯𑁄 𑀲𑀢𑁆𑀢 𑀫𑀸𑀲𑀸𑀦𑀺 𑀅𑀦𑀼𑀩𑀦𑁆𑀥𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀤𑀝𑁆𑀞𑀼𑀓𑀸𑀫𑁄. 𑀲𑁄 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀅𑀤𑀺𑀲𑁆𑀯𑀸𑀯 𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀪𑀕𑀯𑀸𑀢𑀺 𑀕𑀢𑁄. 𑀘𑀢𑁆𑀢𑀸𑀭𑀺 𑀳𑀺 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺. 𑀬𑀣𑀸𑀳 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀚𑀻𑀯𑁄, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ¶ ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’’’𑀢𑀺 (𑀅. 𑀦𑀺. 𑁭.𑁫𑁮).

𑀏𑀯𑀁 𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦 𑀓𑁂𑀯𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂, 𑀧𑀼𑀩𑁆𑀩𑁂𑀧𑀺 𑀧𑀸𑀧𑀁 𑀦𑀢𑁆𑀣𑀺 𑀏𑀯, 𑀢𑀲𑁆𑀫𑀸 𑀆𑀳 𑁋 ‘‘𑀧𑀸𑀧𑀁 𑀧𑀦 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺. 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑁋 𑀫𑀫𑁂𑀯 𑀘𑀺𑀢𑁆𑀢𑀲𑁆𑀲 𑀧𑀸𑀧𑀁 𑀦 𑀲𑀓𑁆𑀓𑀸 ¶ 𑀲𑀼𑀡𑀺𑀢𑀼𑀁, 𑀦 𑀢𑀯 𑀕𑁄𑀧𑀺𑀬𑀸. 𑀢𑀲𑁆𑀫𑀸 𑀬𑀤𑀺 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀢𑀼𑀝𑁆𑀞𑁂𑀦 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀫𑀬𑀸𑀯𑁂𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑁨𑁪. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀢𑀢𑀼𑀢𑁆𑀢𑀭𑀺𑀧𑀺 𑀲𑀼𑀪𑀸𑀲𑀺𑀢𑀭𑀲𑀸𑀬𑀦𑀁 𑀧𑀺𑀯𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀪𑀼𑀚𑀺𑀲𑁆𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀯𑁂𑀢𑀦𑀪𑀢𑁄𑀳𑀫𑀲𑁆𑀫𑀻’’𑀢𑀺. 𑀢𑀢𑁆𑀣 𑀅𑀢𑁆𑀢𑀯𑁂𑀢𑀦𑀪𑀢𑁄𑀢𑀺 𑀅𑀢𑁆𑀢𑀦𑀺𑀬𑁂𑀦𑁂𑀯 𑀖𑀸𑀲𑀘𑁆𑀙𑀸𑀤𑀦𑁂𑀦 𑀪𑀢𑁄, 𑀅𑀢𑁆𑀢𑀦𑁄𑀬𑁂𑀯 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀸𑀫𑀺, 𑀦 𑀧𑀭𑀲𑁆𑀲 𑀯𑁂𑀢𑀦𑀁 𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀓𑀫𑁆𑀫𑀁 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀢𑁆𑀢𑀸𑀢𑀺 𑀥𑀻𑀢𑀭𑁄 𑀘 𑀧𑀼𑀢𑁆𑀢𑀸 𑀘, 𑀢𑁂 𑀲𑀩𑁆𑀩𑁂 𑀧𑀼𑀢𑁆𑀢𑀸𑀢𑁆𑀯𑁂𑀯 𑀏𑀓𑀚𑁆𑀛𑀁 𑀯𑀼𑀘𑁆𑀘𑀦𑁆𑀢𑀺. 𑀲𑀫𑀸𑀦𑀺𑀬𑀸𑀢𑀺 𑀲𑀦𑁆𑀦𑀺𑀳𑀺𑀢𑀸 𑀅𑀯𑀺𑀧𑁆𑀧𑀯𑀼𑀝𑁆𑀞𑀸. 𑀅𑀭𑁄𑀕𑀸𑀢𑀺 𑀦𑀺𑀭𑀸𑀩𑀸𑀥𑀸, 𑀲𑀩𑁆𑀩𑁂𑀯 𑀊𑀭𑀼𑀩𑀸𑀳𑀼𑀩𑀮𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀦 𑀲𑀼𑀡𑀸𑀫𑀺 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺 𑀢𑁂𑀲𑀁 𑀘𑁄𑀭𑀸𑀢𑀺 𑀯𑀸 𑀧𑀭𑀤𑀸𑀭𑀺𑀓𑀸𑀢𑀺 𑀯𑀸 𑀤𑀼𑀲𑁆𑀲𑀻𑀮𑀸𑀢𑀺 𑀯𑀸 𑀓𑀺𑀜𑁆𑀘𑀺 𑀧𑀸𑀧𑀁 𑀦 𑀲𑀼𑀡𑀸𑀫𑀻𑀢𑀺.

𑁨𑁫. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀥𑀦𑀺𑀬𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋 ‘‘𑀦𑀸𑀳𑀁 𑀪𑀢𑀓𑁄’’𑀢𑀺. 𑀅𑀢𑁆𑀭𑀸𑀧𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀧𑀤𑀸𑀦𑀺. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 𑀢𑁆𑀯𑀁 ‘‘𑀪𑀼𑀚𑀺𑀲𑁆𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀦𑁆𑀢𑁆𑀯𑀸 𑀢𑀼𑀝𑁆𑀞𑁄, 𑀧𑀭𑀫𑀢𑁆𑀣𑀢𑁄 𑀘 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸 𑀚𑀻𑀯𑀦𑁆𑀢𑁄𑀧𑀺 𑀤𑀸𑀲𑁄 𑀏𑀯𑀸𑀲𑀺 𑀢𑀡𑁆𑀳𑀸𑀤𑀸𑀲𑀢𑁆𑀢𑀸, 𑀪𑀢𑀓𑀯𑀸𑀤𑀸 𑀘 𑀦 𑀧𑀭𑀺𑀫𑀼𑀘𑁆𑀘𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄’’𑀢𑀺 (𑀫. 𑀦𑀺. 𑁨.𑁩𑁦𑁫). 𑀧𑀭𑀫𑀢𑁆𑀣𑀢𑁄 𑀧𑀦 𑀦𑀸𑀳𑀁 𑀪𑀢𑀓𑁄𑀲𑁆𑀫𑀺 𑀓𑀲𑁆𑀲𑀘𑀺. 𑀅𑀳𑀜𑁆𑀳𑀺 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀪𑀢𑀓𑁄 𑀦 𑀳𑁄𑀫𑀺. 𑀓𑀺𑀁 𑀓𑀸𑀭𑀡𑀸? 𑀬𑀲𑁆𑀫𑀸 ¶ 𑀦𑀺𑀩𑁆𑀩𑀺𑀝𑁆𑀞𑁂𑀦 𑀘𑀭𑀸𑀫𑀺 𑀲𑀩𑁆𑀩𑀮𑁄𑀓𑁂. 𑀅𑀳𑀜𑁆𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀬𑀸𑀯 𑀩𑁄𑀥𑀺, 𑀢𑀸𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀪𑀢𑀓𑁄 𑀅𑀳𑁄𑀲𑀺𑀁. 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀦 𑀦𑀺𑀩𑁆𑀩𑀺𑀝𑁆𑀞𑁄 𑀦𑀺𑀩𑁆𑀩𑀺𑀲𑁄 𑀭𑀸𑀚𑀪𑀢𑁄 𑀯𑀺𑀬. 𑀢𑁂𑀦𑁂𑀯 𑀦𑀺𑀩𑁆𑀩𑀺𑀝𑁆𑀞𑁂𑀦 𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀲𑀼𑀔𑁂𑀦 𑀘 𑀚𑀻𑀯𑀸𑀫𑀺. 𑀢𑀲𑁆𑀲 𑀫𑁂 𑀇𑀤𑀸𑀦𑀺 ¶ 𑀉𑀢𑁆𑀢𑀭𑀺𑀓𑀭𑀡𑀻𑀬𑀲𑁆𑀲 𑀓𑀢𑀧𑀭𑀺𑀘𑀬𑀲𑁆𑀲 𑀯𑀸 𑀅𑀪𑀸𑀯𑀢𑁄 𑀅𑀧𑁆𑀧𑀳𑀻𑀦𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀢𑀸𑀤𑀺𑀲𑀸𑀦𑀁 𑀯𑀺𑀬 𑀧𑀢𑁆𑀢𑀩𑁆𑀩𑁄 𑀓𑁄𑀘𑀺 𑀅𑀢𑁆𑀣𑁄 𑀪𑀢𑀺𑀬𑀸 𑀦 𑀯𑀺𑀚𑁆𑀚𑀢𑀺. ‘‘𑀪𑀝𑀺𑀬𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀫𑀸 𑀬𑀤𑀺 𑀪𑀼𑀚𑀺𑀲𑁆𑀲𑀢𑀸𑀬 𑀢𑀼𑀝𑁆𑀞𑁂𑀦 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀫𑀬𑀸𑀯𑁂𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑁨𑁬. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀅𑀢𑀺𑀢𑁆𑀢𑁄𑀯 𑀲𑀼𑀪𑀸𑀲𑀺𑀢𑀸𑀫𑀢𑁂𑀦 𑀅𑀢𑁆𑀢𑀦𑁄 𑀧𑀜𑁆𑀘𑀧𑁆𑀧𑀓𑀸𑀭𑀕𑁄𑀫𑀡𑁆𑀟𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀣𑀺 𑀯𑀲𑀸’’𑀢𑀺. 𑀢𑀢𑁆𑀣 𑀯𑀲𑀸𑀢𑀺 𑀅𑀤𑀫𑀺𑀢𑀯𑀼𑀟𑁆𑀠𑀯𑀘𑁆𑀙𑀓𑀸. 𑀥𑁂𑀦𑀼𑀧𑀸𑀢𑀺 𑀥𑁂𑀦𑀼𑀁 𑀧𑀺𑀯𑀦𑁆𑀢𑀸 𑀢𑀭𑀼𑀡𑀯𑀘𑁆𑀙𑀓𑀸, 𑀔𑀻𑀭𑀤𑀸𑀬𑀺𑀓𑀸 𑀯𑀸 𑀕𑀸𑀯𑁄. 𑀕𑁄𑀥𑀭𑀡𑀺𑀬𑁄𑀢𑀺 𑀕𑀩𑁆𑀪𑀺𑀦𑀺𑀬𑁄. 𑀧𑀯𑁂𑀡𑀺𑀬𑁄𑀢𑀺 𑀯𑀬𑀧𑁆𑀧𑀢𑁆𑀢𑀸 𑀩𑀮𑀻𑀩𑀤𑁆𑀤𑁂𑀳𑀺 𑀲𑀤𑁆𑀥𑀺𑀁 𑀫𑁂𑀣𑀼𑀦𑀧𑀢𑁆𑀣𑀦𑀓𑀕𑀸𑀯𑁄. 𑀉𑀲𑀪𑁄𑀧𑀺 𑀕𑀯𑀫𑁆𑀧𑀢𑀻𑀢𑀺 𑀬𑁄 𑀕𑁄𑀧𑀸𑀮𑀓𑁂𑀳𑀺 𑀧𑀸𑀢𑁄 𑀏𑀯 𑀦𑁆𑀳𑀸𑀧𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸, 𑀧𑀜𑁆𑀘𑀗𑁆𑀕𑀼𑀮𑀁 𑀤𑀢𑁆𑀯𑀸, 𑀫𑀸𑀮𑀁 𑀩𑀦𑁆𑀥𑀺𑀢𑁆𑀯𑀸 𑁋 ‘‘𑀏𑀳𑀺, 𑀢𑀸𑀢, 𑀕𑀸𑀯𑁄 𑀕𑁄𑀘𑀭𑀁 𑀧𑀸𑀧𑁂𑀢𑁆𑀯𑀸 𑀭𑀓𑁆𑀔𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀧𑁂𑀲𑀻𑀬𑀢𑀺, 𑀏𑀯𑀁 𑀧𑁂𑀲𑀺𑀢𑁄 ¶ 𑀘 𑀢𑀸 𑀕𑀸𑀯𑁄 𑀅𑀕𑁄𑀘𑀭𑀁 𑀧𑀭𑀺𑀳𑀭𑀺𑀢𑁆𑀯𑀸, 𑀕𑁄𑀘𑀭𑁂 𑀘𑀸𑀭𑁂𑀢𑁆𑀯𑀸, 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀪𑀬𑀸 𑀧𑀭𑀺𑀢𑁆𑀢𑀸𑀬𑀺𑀢𑁆𑀯𑀸 𑀆𑀦𑁂𑀢𑀺, 𑀢𑀣𑀸𑀭𑀽𑀧𑁄 𑀉𑀲𑀪𑁄𑀧𑀺 𑀕𑀯𑀫𑁆𑀧𑀢𑀺 𑀇𑀥 𑀫𑀬𑁆𑀳𑀁 𑀕𑁄𑀫𑀡𑁆𑀟𑀮𑁂 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀲𑀺.

𑁨𑁭. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑀣𑁂𑀯 𑀥𑀦𑀺𑀬𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀧𑀘𑁆𑀘𑀦𑀻𑀓𑀕𑀸𑀣𑀁 𑀆𑀳 ‘‘𑀦𑀢𑁆𑀣𑀺 𑀯𑀲𑀸’’𑀢𑀺. 𑀏𑀢𑁆𑀣 𑀘𑁂𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀥 𑀅𑀫𑁆𑀳𑀸𑀓𑀁 𑀲𑀸𑀲𑀦𑁂 𑀅𑀤𑀫𑀺𑀢𑀝𑁆𑀞𑁂𑀦 𑀯𑀼𑀟𑁆𑀠𑀝𑁆𑀞𑁂𑀦 𑀘 𑀯𑀲𑀸𑀲𑀗𑁆𑀔𑀸𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀸 𑀯𑀸, 𑀢𑀭𑀼𑀡𑀯𑀘𑁆𑀙𑀓𑁂 𑀲𑀦𑁆𑀥𑀸𑀬 𑀯𑀲𑀸𑀦𑀁 𑀫𑀽𑀮𑀝𑁆𑀞𑁂𑀦 𑀔𑀻𑀭𑀤𑀸𑀬𑀺𑀦𑀺𑀬𑁄 𑀲𑀦𑁆𑀥𑀸𑀬 𑀧𑀕𑁆𑀖𑀭𑀡𑀝𑁆𑀞𑁂𑀦 𑀥𑁂𑀦𑀼𑀧𑀸𑀲𑀗𑁆𑀔𑀸𑀢𑀸 𑀅𑀦𑀼𑀲𑀬𑀸 𑀯𑀸, 𑀧𑀝𑀺𑀲𑀦𑁆𑀥𑀺𑀕𑀩𑁆𑀪𑀥𑀸𑀭𑀡𑀝𑁆𑀞𑁂𑀦 𑀕𑁄𑀥𑀭𑀡𑀺𑀲𑀗𑁆𑀔𑀸𑀢𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀘𑁂𑀢𑀦𑀸 𑀯𑀸, 𑀲𑀁𑀬𑁄𑀕𑀧𑀢𑁆𑀣𑀦𑀝𑁆𑀞𑁂𑀦 𑀧𑀯𑁂𑀡𑀺𑀲𑀗𑁆𑀔𑀸𑀢𑀸 𑀧𑀢𑁆𑀣𑀦𑀸 𑀢𑀡𑁆𑀳𑀸 𑀯𑀸, 𑀆𑀥𑀺𑀧𑀘𑁆𑀘𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀲𑁂𑀝𑁆𑀞𑀝𑁆𑀞𑁂𑀦 𑀘 𑀕𑀯𑀫𑁆𑀧𑀢𑀺𑀉𑀲𑀪𑀲𑀗𑁆𑀔𑀸𑀢𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀯𑀸 𑀦𑀢𑁆𑀣𑀺, 𑀲𑁆𑀯𑀸𑀳𑀁 𑀇𑀫𑀸𑀬 𑀲𑀩𑁆𑀩𑀬𑁄𑀕𑀓𑁆𑀔𑁂𑀫𑀪𑀽𑀢𑀸𑀬 𑀦𑀢𑁆𑀣𑀺𑀢𑀸𑀬 𑀢𑀼𑀝𑁆𑀞𑁄. 𑀢𑁆𑀯𑀁 𑀧𑀦 𑀲𑁄𑀓𑀸𑀤𑀺𑀯𑀢𑁆𑀣𑀼𑀪𑀽𑀢𑀸𑀬 𑀅𑀢𑁆𑀣𑀺𑀢𑀸𑀬 𑀢𑀼𑀝𑁆𑀞𑁄 ¶ . 𑀢𑀲𑁆𑀫𑀸 𑀲𑀩𑁆𑀩𑀬𑁄𑀕𑀓𑁆𑀔𑁂𑀫𑀢𑀸𑀬 ¶ 𑀢𑀼𑀝𑁆𑀞𑀲𑁆𑀲 𑀫𑀫𑁂𑀯𑁂𑀢𑀁 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

𑁨𑁮. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀢𑀢𑀼𑀢𑁆𑀢𑀭𑀺𑀧𑀺 𑀲𑀼𑀪𑀸𑀲𑀺𑀢𑀁 𑀅𑀫𑀢𑀭𑀲𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀕𑁄𑀕𑀡𑀲𑁆𑀲 𑀔𑀺𑀮𑀩𑀦𑁆𑀥𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀺𑀮𑀸 𑀦𑀺𑀔𑀸𑀢𑀸’’𑀢𑀺. 𑀢𑀢𑁆𑀣 𑀔𑀺𑀮𑀸𑀢𑀺 𑀕𑀼𑀦𑁆𑀦𑀁 𑀩𑀦𑁆𑀥𑀦𑀢𑁆𑀣𑀫𑁆𑀪𑀸. 𑀦𑀺𑀔𑀸𑀢𑀸𑀢𑀺 𑀆𑀓𑁄𑀝𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀯𑁂𑀲𑀺𑀢𑀸 𑀔𑀼𑀤𑁆𑀤𑀓𑀸 𑀫𑀳𑀦𑁆𑀢𑀸 𑀔𑀡𑀺𑀢𑁆𑀯𑀸 𑀞𑀧𑀺𑀢𑀸. 𑀅𑀲𑀫𑁆𑀧𑀯𑁂𑀥𑀻𑀢𑀺 𑀅𑀓𑀫𑁆𑀧𑀓𑀸. 𑀤𑀸𑀫𑀸𑀢𑀺 𑀯𑀘𑁆𑀙𑀓𑀸𑀦𑀁 𑀩𑀦𑁆𑀥𑀦𑀢𑁆𑀣𑀸𑀬 𑀓𑀢𑀸 𑀕𑀦𑁆𑀣𑀺𑀢𑀧𑀸𑀲𑀬𑀼𑀢𑁆𑀢𑀸 𑀭𑀚𑁆𑀚𑀼𑀩𑀦𑁆𑀥𑀦𑀯𑀺𑀲𑁂𑀲𑀸. 𑀫𑀼𑀜𑁆𑀚𑀫𑀬𑀸𑀢𑀺 𑀫𑀼𑀜𑁆𑀚𑀢𑀺𑀡𑀫𑀬𑀸. 𑀦𑀯𑀸𑀢𑀺 𑀅𑀘𑀺𑀭𑀓𑀢𑀸. 𑀲𑀼𑀲𑀡𑁆𑀞𑀸𑀦𑀸𑀢𑀺 𑀲𑀼𑀝𑁆𑀞𑀼 𑀲𑀡𑁆𑀞𑀸𑀦𑀸, 𑀲𑀼𑀯𑀝𑁆𑀝𑀺𑀢𑀲𑀡𑁆𑀞𑀸𑀦𑀸 𑀯𑀸. 𑀦 𑀳𑀺 𑀲𑀓𑁆𑀔𑀺𑀦𑁆𑀢𑀻𑀢𑀺 𑀦𑁂𑀯 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑁂𑀦𑀼𑀧𑀸𑀧𑀺 𑀙𑁂𑀢𑁆𑀢𑀼𑀦𑁆𑀢𑀺 𑀢𑀭𑀼𑀡𑀯𑀘𑁆𑀙𑀓𑀸𑀧𑀺 𑀙𑀺𑀦𑁆𑀤𑀺𑀢𑀼𑀁.

𑁨𑁯. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀥𑀦𑀺𑀬𑀲𑁆𑀲 𑀇𑀦𑁆𑀤𑁆𑀭𑀺𑀬-𑀧𑀭𑀺𑀧𑀸𑀓𑀓𑀸𑀮𑀁 𑀜𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀘𑀢𑀼𑀲𑀘𑁆𑀘𑀤𑀻𑀧𑀺𑀓𑀁 𑀕𑀸𑀣𑀁 𑀅𑀪𑀸𑀲𑀺 ‘‘𑀉𑀲𑀪𑁄𑀭𑀺𑀯 𑀙𑁂𑀢𑁆𑀯𑀸’’𑀢𑀺. 𑀢𑀢𑁆𑀣 𑀉𑀲𑀪𑁄𑀢𑀺 𑀕𑁄𑀧𑀺𑀢𑀸 𑀕𑁄𑀧𑀭𑀺𑀡𑀸𑀬𑀓𑁄 𑀕𑁄𑀬𑀽𑀣𑀧𑀢𑀺 𑀩𑀮𑀻𑀩𑀤𑁆𑀤𑁄. 𑀓𑁂𑀘𑀺 𑀧𑀦 𑀪𑀡𑀦𑁆𑀢𑀺 ‘‘𑀕𑀯𑀲𑀢𑀚𑁂𑀝𑁆𑀞𑁄 𑀉𑀲𑀪𑁄, 𑀲𑀳𑀲𑁆𑀲𑀚𑁂𑀝𑁆𑀞𑁄 𑀯𑀲𑀪𑁄, 𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑁄 𑀦𑀺𑀲𑀪𑁄’’𑀢𑀺. 𑀅𑀧𑀭𑁂 ‘‘𑀏𑀓𑀕𑀸𑀫𑀔𑁂𑀢𑁆𑀢𑁂 𑀚𑁂𑀝𑁆𑀞𑁄 𑀉𑀲𑀪𑁄, 𑀤𑁆𑀯𑀻𑀲𑀼 𑀚𑁂𑀝𑁆𑀞𑁄 𑀯𑀲𑀪𑁄, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑁄 𑀦𑀺𑀲𑀪𑁄’’𑀢𑀺. 𑀲𑀩𑁆𑀩𑁂𑀧𑁂𑀢𑁂 𑀧𑀧𑀜𑁆𑀘𑀸, 𑀅𑀧𑀺𑀘 𑀔𑁄 𑀧𑀦 𑀉𑀲𑀪𑁄𑀢𑀺 𑀯𑀸 𑀯𑀲𑀪𑁄𑀢𑀺 𑀯𑀸 𑀦𑀺𑀲𑀪𑁄𑀢𑀺 𑀯𑀸 𑀲𑀩𑁆𑀩𑁂𑀧𑁂𑀢𑁂 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋 ‘‘𑀦𑀺𑀲𑀪𑁄 𑀯𑀢 𑀪𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 (𑀲𑀁. 𑀦𑀺. 𑁧.𑁩𑁮). 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀩𑀦𑁆𑀥𑀦𑀸𑀦𑀻𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀦𑀺 𑀓𑀺𑀮𑁂𑀲𑀩𑀦𑁆𑀥𑀦𑀸𑀦𑀺 𑀘. 𑀦𑀸𑀕𑁄𑀢𑀺 𑀳𑀢𑁆𑀣𑀻. 𑀧𑀽𑀢𑀺𑀮𑀢𑀦𑁆𑀢𑀺 𑀕𑀴𑁄𑀘𑀻𑀮𑀢𑀁. 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀧𑀽𑀢𑀺𑀓𑀸𑀬𑁄, 𑀯𑀲𑁆𑀲𑀲𑀢𑀺𑀓𑁄𑀧𑀺 𑀲𑀼𑀦𑀔𑁄 𑀓𑀼𑀓𑁆𑀓𑀼𑀭𑁄, 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 ¶ ‘‘𑀚𑀭𑀲𑀺𑀗𑁆𑀕𑀸𑀮𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀪𑀺𑀦𑀯𑀸𑀧𑀺 𑀕𑀴𑁄𑀘𑀻𑀮𑀢𑀸 𑀅𑀲𑀸𑀭𑀓𑀢𑁆𑀢𑁂𑀦 ‘‘𑀧𑀽𑀢𑀺𑀮𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀤𑀸𑀮𑀬𑀺𑀢𑁆𑀯𑀸𑀢𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀕𑀩𑁆𑀪𑀜𑁆𑀘 ¶ 𑀲𑁂𑀬𑁆𑀬𑀜𑁆𑀘 𑀕𑀩𑁆𑀪𑀲𑁂𑀬𑁆𑀬𑀁. 𑀢𑀢𑁆𑀣 𑀕𑀩𑁆𑀪𑀕𑁆𑀕𑀳𑀡𑁂𑀦 𑀚𑀮𑀸𑀩𑀼𑀚𑀬𑁄𑀦𑀺, 𑀲𑁂𑀬𑁆𑀬𑀕𑁆𑀕𑀳𑀡𑁂𑀦 𑀅𑀯𑀲𑁂𑀲𑀸. 𑀕𑀩𑁆𑀪𑀲𑁂𑀬𑁆𑀬𑀫𑀼𑀔𑁂𑀦 𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯.

𑀅𑀬𑀁 ¶ 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀥𑀦𑀺𑀬, 𑀢𑁆𑀯𑀁 𑀩𑀦𑁆𑀥𑀦𑁂𑀦 𑀢𑀼𑀝𑁆𑀞𑁄, 𑀅𑀳𑀁 𑀧𑀦 𑀩𑀦𑁆𑀥𑀦𑁂𑀦 𑀅𑀝𑁆𑀝𑀻𑀬𑀦𑁆𑀢𑁄 𑀣𑀸𑀫𑀯𑀻𑀭𑀺𑀬𑀽𑀧𑁂𑀢𑁄 𑀫𑀳𑀸𑀉𑀲𑀪𑁄𑀭𑀺𑀯 𑀩𑀦𑁆𑀥𑀦𑀸𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀘𑀢𑀼𑀢𑁆𑀣𑀅𑀭𑀺𑀬𑀫𑀕𑁆𑀕𑀣𑀸𑀫𑀯𑀻𑀭𑀺𑀬𑁂𑀦 𑀙𑁂𑀢𑁆𑀯𑀸, 𑀦𑀸𑀕𑁄 𑀧𑀽𑀢𑀺𑀮𑀢𑀁𑀯 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀩𑀦𑁆𑀥𑀦𑀸𑀦𑀺 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑀣𑀸𑀫𑀯𑀻𑀭𑀺𑀬𑁂𑀦 𑀤𑀸𑀮𑀬𑀺𑀢𑁆𑀯𑀸, 𑀅𑀣 𑀯𑀸 𑀉𑀲𑀪𑁄𑀭𑀺𑀯 𑀩𑀦𑁆𑀥𑀦𑀸𑀦𑀺 𑀅𑀦𑀼𑀲𑀬𑁂 𑀦𑀸𑀕𑁄 𑀧𑀽𑀢𑀺𑀮𑀢𑀁𑀯 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺 𑀙𑁂𑀢𑁆𑀯𑀸 𑀤𑀸𑀮𑀬𑀺𑀢𑁆𑀯𑀸𑀯 𑀞𑀺𑀢𑁄. 𑀢𑀲𑁆𑀫𑀸 𑀦 𑀧𑀼𑀦 𑀕𑀩𑁆𑀪𑀲𑁂𑀬𑁆𑀬𑀁 𑀉𑀧𑁂𑀲𑁆𑀲𑀁. 𑀲𑁄𑀳𑀁 𑀚𑀸𑀢𑀺𑀤𑀼𑀓𑁆𑀔𑀯𑀢𑁆𑀣𑀼𑀓𑁂𑀳𑀺 𑀲𑀩𑁆𑀩𑀤𑀼𑀓𑁆𑀔𑁂𑀳𑀺 𑀧𑀭𑀺𑀫𑀼𑀢𑁆𑀢𑁄 𑀲𑁄𑀪𑀸𑀫𑀺 𑁋 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀤𑀫𑀸𑀦𑁄. 𑀢𑀲𑁆𑀫𑀸 𑀲𑀘𑁂 𑀢𑁆𑀯𑀫𑁆𑀧𑀺 𑀅𑀳𑀁 𑀯𑀺𑀬 𑀯𑀢𑁆𑀢𑀼𑀫𑀺𑀘𑁆𑀙𑀲𑀺, 𑀙𑀺𑀦𑁆𑀤 𑀢𑀸𑀦𑀺 𑀩𑀦𑁆𑀥𑀦𑀸𑀦𑀻𑀢𑀺. 𑀏𑀢𑁆𑀣 𑀘 𑀩𑀦𑁆𑀥𑀦𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀕𑀩𑁆𑀪𑀲𑁂𑀬𑁆𑀬𑀸 𑀤𑀼𑀓𑁆𑀔𑀲𑀘𑁆𑀘𑀁, ‘‘𑀦 𑀉𑀧𑁂𑀲𑁆𑀲’’𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀕𑀫𑁄 𑀅𑀦𑀼𑀧𑀸𑀤𑀺𑀲𑁂𑀲𑀯𑀲𑁂𑀦, ‘‘𑀙𑁂𑀢𑁆𑀯𑀸 𑀤𑀸𑀮𑀬𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀙𑁂𑀤𑁄 𑀧𑀤𑀸𑀮𑀦𑀜𑁆𑀘 𑀲𑀉𑀧𑀸𑀤𑀺𑀲𑁂𑀲𑀯𑀲𑁂𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀬𑁂𑀦 𑀙𑀺𑀦𑁆𑀤𑀢𑀺 𑀧𑀤𑀸𑀮𑁂𑀢𑀺 𑀘, 𑀢𑀁 𑀫𑀕𑁆𑀕𑀲𑀘𑁆𑀘𑀦𑁆𑀢𑀺.

𑀏𑀯𑀫𑁂𑀢𑀁 𑀘𑀢𑀼𑀲𑀘𑁆𑀘𑀤𑀻𑀧𑀺𑀓𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀥𑀦𑀺𑀬𑁄 𑀘 𑀧𑀚𑀸𑀧𑀢𑀺 𑀘𑀲𑁆𑀲 𑀤𑁆𑀯𑁂 𑀘 𑀥𑀻𑀢𑀭𑁄𑀢𑀺 𑀘𑀢𑁆𑀢𑀸𑀭𑁄 𑀚𑀦𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀥𑀦𑀺𑀬𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀬𑁄𑀕𑁂𑀦 𑀢𑀣𑀸𑀕𑀢𑁂 𑀫𑀽𑀮𑀚𑀸𑀢𑀸𑀬 𑀧𑀢𑀺𑀝𑁆𑀞𑀺𑀢𑀸𑀬 𑀲𑀤𑁆𑀥𑀸𑀬 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀪𑀕𑀯𑀢𑁄 𑀥𑀫𑁆𑀫𑀓𑀸𑀬𑀁 𑀤𑀺𑀲𑁆𑀯𑀸 𑀥𑀫𑁆𑀫𑀢𑀸𑀬 𑀘𑁄𑀤𑀺𑀢𑀳𑀤𑀬𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤𑀺𑀁, 𑀕𑀩𑁆𑀪𑀲𑁂𑀬𑁆𑀬𑁄 𑀘 𑀫𑁂 𑀦𑀢𑁆𑀣𑀻’’𑀢𑀺 𑀅𑀯𑀻𑀘𑀺𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀬𑀸𑀯 𑀪𑀯𑀕𑁆𑀕𑀸 𑀓𑁄 𑀅𑀜𑁆𑀜𑁄 𑀏𑀯𑀁 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀺 𑀅𑀜𑁆𑀜𑀢𑁆𑀭 𑀪𑀕𑀯𑀢𑀸, 𑀆𑀕𑀢𑁄 𑀦𑀼 𑀔𑁄 𑀫𑁂 𑀲𑀢𑁆𑀣𑀸𑀢𑀺. 𑀢𑀢𑁄 𑀪𑀕𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀚𑀸𑀮𑀯𑀺𑀘𑀺𑀢𑁆𑀭𑀁 𑀲𑀼𑀯𑀡𑁆𑀡𑀭𑀲𑀲𑁂𑀓𑀧𑀺𑀜𑁆𑀚𑀭𑀁 𑀯𑀺𑀬 𑀲𑀭𑀻𑀭𑀸𑀪𑀁 𑀥𑀦𑀺𑀬𑀲𑁆𑀲 𑀦𑀺𑀯𑁂𑀲𑀦𑁂 𑀫𑀼𑀜𑁆𑀘𑀺 ‘‘𑀧𑀲𑁆𑀲 𑀤𑀸𑀦𑀺 𑀬𑀣𑀸𑀲𑀼𑀔’’𑀦𑁆𑀢𑀺.

𑁩𑁦. 𑀅𑀣 𑀥𑀦𑀺𑀬𑁄 𑀅𑀦𑁆𑀢𑁄 𑀧𑀯𑀺𑀝𑁆𑀞𑀘𑀦𑁆𑀤𑀺𑀫𑀲𑀽𑀭𑀺𑀬𑀁 𑀯𑀺𑀬 ¶ 𑀲𑀫𑀦𑁆𑀢𑀸 𑀧𑀚𑁆𑀚𑀮𑀺𑀢𑀧𑀤𑀻𑀧𑀲𑀳𑀲𑁆𑀲𑀲𑀫𑀼𑀚𑁆𑀚𑀮𑀺𑀢𑀫𑀺𑀯 𑀘 𑀦𑀺𑀯𑁂𑀲𑀦𑀁 𑀤𑀺𑀲𑁆𑀯𑀸 ‘‘𑀆𑀕𑀢𑁄 𑀪𑀕𑀯𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀲𑀫𑀬𑁂 𑀫𑁂𑀖𑁄𑀧𑀺 𑀧𑀸𑀯𑀲𑁆𑀲𑀺. 𑀢𑁂𑀦𑀸𑀳𑀼 𑀲𑀗𑁆𑀕𑀻𑀢𑀺𑀓𑀸𑀭𑀸 ‘‘𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀧𑀽𑀭𑀬𑀦𑁆𑀢𑁄’’𑀢𑀺. 𑀢𑀢𑁆𑀣 𑀦𑀺𑀦𑁆𑀦𑀦𑁆𑀢𑀺 𑀧𑀮𑁆𑀮𑀮𑀁. 𑀣𑀮𑀦𑁆𑀢𑀺 𑀉𑀓𑁆𑀓𑀽𑀮𑀁. 𑀏𑀯𑀫𑁂𑀢𑀁 𑀉𑀓𑁆𑀓𑀽𑀮𑀯𑀺𑀓𑀽𑀮𑀁 𑀲𑀩𑁆𑀩𑀫𑁆𑀧𑀺 𑀲𑀫𑀁 𑀓𑀢𑁆𑀯𑀸 𑀧𑀽𑀭𑀬𑀦𑁆𑀢𑁄 𑀫𑀳𑀸𑀫𑁂𑀖𑁄 𑀧𑀸𑀯𑀲𑁆𑀲𑀺, 𑀯𑀲𑁆𑀲𑀺𑀢𑀼𑀁 𑀆𑀭𑀪𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸𑀯𑀤𑁂𑀯𑀸𑀢𑀺 𑀬𑀁 𑀔𑀡𑀁 𑀪𑀕𑀯𑀸 𑀲𑀭𑀻𑀭𑀸𑀪𑀁 ¶ 𑀫𑀼𑀜𑁆𑀘𑀺, 𑀥𑀦𑀺𑀬𑁄 𑀘 ‘‘𑀲𑀢𑁆𑀣𑀸 𑀫𑁂 𑀆𑀕𑀢𑁄’’𑀢𑀺 𑀲𑀤𑁆𑀥𑀸𑀫𑀬𑀁 𑀘𑀺𑀢𑁆𑀢𑀸𑀪𑀁 ¶ 𑀫𑀼𑀜𑁆𑀘𑀺, 𑀢𑀁 𑀔𑀡𑀁 𑀧𑀸𑀯𑀲𑁆𑀲𑀻𑀢𑀺. 𑀓𑁂𑀘𑀺 𑀧𑀦 ‘‘𑀲𑀽𑀭𑀺𑀬𑀼𑀕𑁆𑀕𑀫𑀦𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂’’𑀢𑀺 𑀯𑀡𑁆𑀡𑀬𑀦𑁆𑀢𑀺.

𑁩𑁧-𑁩𑁨. 𑀏𑀯𑀁 𑀢𑀲𑁆𑀫𑀺𑀁 𑀥𑀦𑀺𑀬𑀲𑁆𑀲 𑀲𑀤𑁆𑀥𑀼𑀧𑁆𑀧𑀸𑀤𑀢𑀣𑀸𑀕𑀢𑁄𑀪𑀸𑀲𑀨𑀭𑀡𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑁆𑀔𑀡𑁂 𑀯𑀲𑁆𑀲𑀢𑁄 𑀤𑁂𑀯𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣 ‘‘𑀮𑀸𑀪𑀸 𑀯𑀢 𑀦𑁄 𑀅𑀦𑀧𑁆𑀧𑀓𑀸’’𑀢𑀺 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀢𑀩𑁆𑀩𑀸.

𑀢𑀢𑁆𑀣 𑀬𑀲𑁆𑀫𑀸 𑀥𑀦𑀺𑀬𑁄 𑀲𑀧𑀼𑀢𑁆𑀢𑀤𑀸𑀭𑁄 𑀪𑀕𑀯𑀢𑁄 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁂𑀦 𑀥𑀫𑁆𑀫𑀓𑀸𑀬𑀁 𑀤𑀺𑀲𑁆𑀯𑀸, 𑀮𑁄𑀓𑀼𑀢𑁆𑀢𑀭𑀘𑀓𑁆𑀔𑀼𑀦𑀸 𑀭𑀽𑀧𑀓𑀸𑀬𑀁 𑀤𑀺𑀲𑁆𑀯𑀸, 𑀮𑁄𑀓𑀺𑀬𑀘𑀓𑁆𑀔𑀼𑀦𑀸 𑀲𑀤𑁆𑀥𑀸𑀧𑀝𑀺𑀮𑀸𑀪𑀁 𑀮𑀪𑀺. 𑀢𑀲𑁆𑀫𑀸 𑀆𑀳 𑁋 ‘‘𑀮𑀸𑀪𑀸 𑀯𑀢 𑀦𑁄 𑀅𑀦𑀧𑁆𑀧𑀓𑀸, 𑀬𑁂 𑀫𑀬𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲𑀸𑀫𑀸’’𑀢𑀺. 𑀢𑀢𑁆𑀣 𑀯𑀢 𑀇𑀢𑀺 𑀯𑀺𑀫𑁆𑀳𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀦𑁄 𑀇𑀢𑀺 𑀅𑀫𑁆𑀳𑀸𑀓𑀁. 𑀅𑀦𑀧𑁆𑀧𑀓𑀸𑀢𑀺 𑀯𑀺𑀧𑀼𑀮𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀭𑀡𑀁 𑀢𑀁 𑀉𑀧𑁂𑀫𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀧𑀝𑀺𑀯𑁂𑀥𑁂𑀦𑁂𑀯𑀲𑁆𑀲 𑀲𑀺𑀤𑁆𑀥𑀁 𑀲𑀭𑀡𑀕𑀫𑀦𑀁, 𑀢𑀢𑁆𑀣 𑀧𑀦 𑀦𑀺𑀘𑁆𑀙𑀬𑀕𑀫𑀦𑀫𑁂𑀯 𑀕𑀢𑁄, 𑀇𑀤𑀸𑀦𑀺 𑀯𑀸𑀘𑀸𑀬 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀓𑀭𑁄𑀢𑀺. 𑀫𑀕𑁆𑀕𑀯𑀲𑁂𑀦 𑀯𑀸 𑀲𑀦𑁆𑀦𑀺𑀬𑁆𑀬𑀸𑀢𑀦𑀲𑀭𑀡𑀢𑀁 𑀅𑀘𑀮𑀲𑀭𑀡𑀢𑀁 𑀧𑀢𑁆𑀢𑁄, 𑀢𑀁 𑀧𑀭𑁂𑀲𑀁 𑀯𑀸𑀘𑀸𑀬 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀧𑀡𑀺𑀧𑀸𑀢𑀲𑀭𑀡𑀕𑀫𑀦𑀁 𑀕𑀘𑁆𑀙𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀪𑀕𑀯𑀸 𑀧𑀓𑀢𑀺𑀤𑀺𑀩𑁆𑀩𑀧𑀜𑁆𑀜𑀸𑀲𑀫𑀦𑁆𑀢𑀩𑀼𑀤𑁆𑀥𑀘𑀓𑁆𑀔𑀽𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀢𑀁 𑀆𑀮𑀧𑀦𑁆𑀢𑁄 𑀆𑀳 𑁋 ‘‘𑀲𑀭𑀡𑀁 𑀢𑀁 𑀉𑀧𑁂𑀫 𑀘𑀓𑁆𑀔𑀼𑀫𑀸’’𑀢𑀺. ‘‘𑀲𑀢𑁆𑀣𑀸 𑀦𑁄 𑀳𑁄𑀳𑀺 𑀢𑀼𑀯𑀁 𑀫𑀳𑀸𑀫𑀼𑀦𑀻’’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦𑀸𑀧𑀺 𑀲𑀭𑀡𑀕𑀫𑀦𑀁 𑀧𑀽𑀭𑁂𑀢𑀼𑀁 𑀪𑀡𑀢𑀺, 𑀕𑁄𑀧𑀻 𑀘 𑀅𑀳𑀜𑁆𑀘 𑀅𑀲𑁆𑀲𑀯𑀸, 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀲𑀼𑀕𑀢𑁂 𑀘𑀭𑀸𑀫𑀲𑁂𑀢𑀺 𑀇𑀤𑀁 𑀲𑀫𑀸𑀤𑀸𑀦𑀯𑀲𑁂𑀦.

𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀫𑀕𑁆𑀕𑀲𑀫𑀡𑀥𑀫𑁆𑀫𑀲𑀸𑀲𑀦𑀲𑀤𑀸𑀭𑀲𑀦𑁆𑀢𑁄𑀲𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁮𑁩) 𑀳𑀺 𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀇𑀤𑀁 𑀔𑁄 𑀧𑀦 𑀫𑁂 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁨𑁯) 𑀫𑀕𑁆𑀕𑁄. ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁫) 𑀲𑀫𑀡𑀥𑀫𑁆𑀫𑁄. ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁭𑁪) 𑀲𑀸𑀲𑀦𑀁.

‘‘𑀫𑀬𑀜𑁆𑀘 ¶ 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫, 𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺. (𑀚𑀸. 𑁧.𑁧𑁦.𑁯𑁭) 𑁋

𑀏𑀯𑀫𑀸𑀤𑀻𑀲𑀼 ¶ 𑀲𑀤𑀸𑀭𑀲𑀦𑁆𑀢𑁄𑀲𑁄. 𑀇𑀥 𑀧𑀦 𑀲𑀫𑀡𑀥𑀫𑁆𑀫𑀩𑁆𑀭𑀳𑁆𑀫𑀘𑀭𑀺𑀬𑀧𑀼𑀩𑁆𑀩𑀗𑁆𑀕𑀫𑀁 𑀉𑀧𑀭𑀺𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀫𑀥𑀺𑀧𑁆𑀧𑁂𑀢𑀁. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀲𑁆𑀲 𑀲𑀦𑁆𑀢𑀺𑀓𑁂. 𑀪𑀕𑀯𑀸 𑀳𑀺 𑀅𑀦𑁆𑀢𑀤𑁆𑀯𑀬𑀫𑀦𑀼𑀧𑀕𑁆𑀕𑀫𑁆𑀫 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸, 𑀲𑁄𑀪𑀡𑁂𑀦 𑀘 𑀅𑀭𑀺𑀬𑀫𑀕𑁆𑀕𑀕𑀫𑀦𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀲𑀼𑀦𑁆𑀤𑀭𑀜𑁆𑀘 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀻𑀧𑀢𑁆𑀣𑁂 𑀘𑁂𑀢𑁆𑀣 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀫𑀸 𑀲𑀼𑀕𑀢𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀘𑀭𑀸𑀫𑀲𑁂𑀢𑀺 𑀘𑀭𑀸𑀫. 𑀬𑀜𑁆𑀳𑀺 𑀢𑀁 𑀲𑀓𑁆𑀓𑀢𑁂 𑀘𑀭𑀸𑀫𑀲𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀇𑀥 𑀘𑀭𑀸𑀫𑀲𑁂𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 ‘‘𑀲𑁂𑀢𑀺 𑀦𑀺𑀧𑀸𑀢𑁄’’𑀢𑀺 𑀪𑀡𑀦𑁆𑀢𑀺. 𑀢𑁂𑀦𑁂𑀯 𑀘𑁂𑀢𑁆𑀣 𑀆𑀬𑀸𑀘𑀦𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀘𑀭𑁂𑀫 𑀲𑁂’’𑀢𑀺𑀧𑀺 𑀧𑀸𑀞𑀁 𑀯𑀺𑀓𑀧𑁆𑀧𑁂𑀦𑁆𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁.

𑀏𑀯𑀁 𑀥𑀦𑀺𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀸𑀧𑀤𑁂𑀲𑁂𑀦 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀧𑀬𑁄𑀚𑀦𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀚𑀸𑀢𑀻𑀫𑀭𑀡𑀲𑁆𑀲 𑀧𑀸𑀭𑀕𑀽, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸 𑀪𑀯𑀸𑀫𑀲𑁂’’𑀢𑀺. 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 ¶ 𑀕𑀘𑁆𑀙𑀸𑀫. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀅𑀦𑁆𑀢𑀓𑀭𑀸𑀢𑀺 𑀅𑀪𑀸𑀯𑀓𑀭𑀸. 𑀪𑀯𑀸𑀫𑀲𑁂𑀢𑀺 𑀪𑀯𑀸𑀫, 𑀅𑀣 𑀯𑀸 𑀅𑀳𑁄 𑀯𑀢 𑀫𑀬𑀁 𑀪𑀯𑁂𑀬𑁆𑀬𑀸𑀫𑀸𑀢𑀺. ‘‘𑀘𑀭𑀸𑀫𑀲𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀯𑀢𑁆𑀯𑀸𑀧𑀺 𑀘 𑀧𑀼𑀦 𑀉𑀪𑁄𑀧𑀺 𑀓𑀺𑀭 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀦𑁄 𑀪𑀕𑀯𑀸’’𑀢𑀺 𑀏𑀯𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀽𑀢𑀺.

𑁩𑁩. 𑀅𑀣 𑀫𑀸𑀭𑁄 𑀧𑀸𑀧𑀺𑀫𑀸 𑀏𑀯𑀁 𑀢𑁂 𑀉𑀪𑁄𑀧𑀺 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁂 𑀤𑀺𑀲𑁆𑀯𑀸 𑁋 ‘‘𑀇𑀫𑁂 𑀫𑀫 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀸, 𑀳𑀦𑁆𑀤 𑀦𑁂𑀲𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀖𑀭𑀸𑀯𑀸𑀲𑁂 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺. 𑀢𑀢𑁆𑀣 𑀦𑀦𑁆𑀤𑀢𑀻𑀢𑀺 𑀢𑀼𑀲𑁆𑀲𑀢𑀺 𑀫𑁄𑀤𑀢𑀺. 𑀧𑀼𑀢𑁆𑀢𑁂𑀳𑀻𑀢𑀺 𑀧𑀼𑀢𑁆𑀢𑁂𑀳𑀺𑀧𑀺 𑀥𑀻𑀢𑀭𑁂𑀳𑀺𑀧𑀺, 𑀲𑀳𑀬𑁄𑀕𑀢𑁆𑀣𑁂, 𑀓𑀭𑀡𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁, 𑀧𑀼𑀢𑁆𑀢𑁂𑀳𑀺 𑀲𑀳 𑀦𑀦𑁆𑀤𑀢𑀺, 𑀧𑀼𑀢𑁆𑀢𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀦𑀦𑁆𑀤𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀢𑁆𑀢𑀺𑀫𑀸𑀢𑀺 𑀧𑀼𑀢𑁆𑀢𑀯𑀸 𑀧𑀼𑀕𑁆𑀕𑀮𑁄. 𑀇𑀢𑀻𑀢𑀺 𑀏𑀯𑀫𑀸𑀳. 𑀫𑀸𑀭𑁄𑀢𑀺 𑀯𑀲𑀯𑀢𑁆𑀢𑀺𑀪𑀽𑀫𑀺𑀬𑀁 𑀅𑀜𑁆𑀜𑀢𑀭𑁄 𑀤𑀸𑀫𑀭𑀺𑀓𑀤𑁂𑀯𑀧𑀼𑀢𑁆𑀢𑁄. 𑀲𑁄 𑀳𑀺 𑀲𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀁 𑀚𑀦𑀁 ¶ 𑀬𑀁 𑀲𑀓𑁆𑀓𑁄𑀢𑀺, 𑀢𑀁 𑀫𑀸𑀭𑁂𑀢𑀺. 𑀬𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲𑀧𑀺 𑀫𑀭𑀡𑀁 𑀇𑀘𑁆𑀙𑀢𑀺. 𑀢𑁂𑀦 ‘‘𑀫𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀧𑀺𑀫𑀸𑀢𑀺 𑀮𑀸𑀫𑀓𑀧𑀼𑀕𑁆𑀕𑀮𑁄, 𑀧𑀸𑀧𑀲𑀫𑀸𑀘𑀸𑀭𑁄 𑀯𑀸. 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀫𑁂𑀢𑀁 𑀯𑀘𑀦𑀁, 𑀲𑀩𑁆𑀩𑀕𑀸𑀣𑀸𑀲𑀼 𑀘 𑀈𑀤𑀺𑀲𑀸𑀦𑀺. 𑀬𑀣𑀸 𑀘 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺. 𑀬𑀲𑁆𑀲 𑀕𑀸𑀯𑁄 𑀅𑀢𑁆𑀣𑀺, 𑀲𑁄𑀧𑀺 𑀕𑁄𑀧𑀺𑀬𑁄, 𑀕𑁄𑀳𑀺 𑀲𑀳, 𑀕𑁄𑀳𑀺 𑀯𑀸 𑀓𑀭𑀡𑀪𑀽𑀢𑁂𑀳𑀺 𑀢𑀣𑁂𑀯 𑀦𑀦𑁆𑀤𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀢𑀺, ‘‘𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸’’𑀢𑀺. 𑀢𑀢𑁆𑀣 𑀉𑀧𑀥𑀻𑀢𑀺 𑀘𑀢𑁆𑀢𑀸𑀭𑁄 𑀉𑀧𑀥𑀬𑁄 𑁋 𑀓𑀸𑀫𑀽𑀧𑀥𑀺, 𑀔𑀦𑁆𑀥𑀽𑀧𑀥𑀺, 𑀓𑀺𑀮𑁂𑀲𑀽𑀧𑀥𑀺, 𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀢𑀺. 𑀓𑀸𑀫𑀸 𑀳𑀺 ‘‘𑀬𑀁 𑀧𑀜𑁆𑀘𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀉𑀧𑀥𑀻𑀬𑀢𑀺 ¶ 𑀏𑀢𑁆𑀣 𑀲𑀼𑀔𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 𑀉𑀧𑀥𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀔𑀦𑁆𑀥𑀸𑀧𑀺 𑀔𑀦𑁆𑀥𑀫𑀽𑀮𑀓𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀅𑀪𑀺𑀲𑀗𑁆𑀔𑀸𑀭𑀸𑀧𑀺 𑀪𑀯𑀤𑀼𑀓𑁆𑀔𑀲𑁆𑀲 ¶ 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄𑀢𑀺. 𑀇𑀥 𑀧𑀦 𑀓𑀸𑀫𑀽𑀧𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀲𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀢𑁆𑀢𑀧𑀝𑀺𑀩𑀤𑁆𑀥𑁄 𑀧𑀥𑀸𑀦𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀢𑁆𑀢𑁂𑀳𑀺 𑀕𑁄𑀳𑀻’’𑀢𑀺 𑀯𑀢𑁆𑀯𑀸 𑀓𑀸𑀭𑀡𑀫𑀸𑀳 𑁋 ‘‘𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀇𑀫𑁂 𑀓𑀸𑀫𑀽𑀧𑀥𑀻 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦𑀦𑁆𑀤𑀬𑀦𑁆𑀢𑀺 𑀦𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑀲𑀁𑀳𑀭𑀦𑁆𑀢𑀸, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺, 𑀢𑁆𑀯𑀜𑁆𑀘 𑀧𑀼𑀢𑁆𑀢𑀺𑀫𑀸 𑀕𑁄𑀧𑀺𑀬𑁄 𑀘, 𑀢𑀲𑁆𑀫𑀸 𑀏𑀢𑁂𑀳𑀺, 𑀦𑀦𑁆𑀤, 𑀫𑀸 𑀧𑀩𑁆𑀩𑀚𑁆𑀚𑀁 𑀧𑀸𑀝𑀺𑀓𑀗𑁆𑀔𑀺. 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀏𑀢𑁂 𑀉𑀧𑀥𑀬𑁄 𑀦 𑀲𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀧𑀢𑁆𑀣𑁂𑀦𑁆𑀢𑁄𑀧𑀺 𑀤𑀼𑀓𑁆𑀔𑀺𑀢𑁄𑀯 𑀪𑀯𑀺𑀲𑁆𑀲𑀲𑀻’’𑀢𑀺.

𑀇𑀤𑀸𑀦𑀺 𑀢𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀲𑀸𑀥𑀓𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀦 𑀳𑀺 𑀲𑁄 𑀦𑀦𑁆𑀤𑀢𑀺, 𑀬𑁄 𑀦𑀺𑀭𑀽𑀧𑀥𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀬𑀲𑁆𑀲𑁂𑀢𑁂 𑀉𑀧𑀥𑀬𑁄 𑀦𑀢𑁆𑀣𑀺, 𑀲𑁄 𑀧𑀺𑀬𑁂𑀳𑀺 𑀜𑀸𑀢𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄 𑀦𑀺𑀩𑁆𑀪𑁄𑀕𑀽𑀧𑀓𑀭𑀡𑁄 𑀦 𑀦𑀦𑁆𑀤𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀇𑀫𑁂 𑀉𑀧𑀥𑀬𑁄 𑀯𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀤𑀼𑀓𑁆𑀔𑀺𑀢𑁄𑀯 𑀪𑀯𑀺𑀲𑁆𑀲𑀲𑀻𑀢𑀺.

𑁩𑁪. 𑀅𑀣 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸 𑀇𑀫𑁂𑀲𑀁 𑀅𑀦𑁆𑀢𑀭𑀸𑀬𑀸𑀬 𑀆𑀕𑀢𑁄’’𑀢𑀺 𑀯𑀺𑀤𑀺𑀢𑁆𑀯𑀸 𑀨𑀮𑁂𑀦 𑀨𑀮𑀁 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀢𑀸𑀬𑁂𑀯 𑀫𑀸𑀭𑁂𑀦𑀸𑀪𑀢𑀸𑀬 𑀉𑀧𑀫𑀸𑀬 𑀫𑀸𑀭𑀯𑀸𑀤𑀁 𑀪𑀺𑀦𑁆𑀤𑀦𑁆𑀢𑁄 𑀢𑀫𑁂𑀯 𑀕𑀸𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀉𑀧𑀥𑀺 ¶ 𑀲𑁄𑀓𑀯𑀢𑁆𑀣𑀽’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺. 𑀢𑀢𑁆𑀣 𑀲𑀩𑁆𑀩𑀁 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 𑀫𑀸, 𑀧𑀸𑀧𑀺𑀫, 𑀏𑀯𑀁 𑀅𑀯𑀘 ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺. 𑀲𑀩𑁆𑀩𑁂𑀳𑁂𑀯 𑀳𑀺 𑀧𑀺𑀬𑁂𑀳𑀺, 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄, 𑀅𑀦𑀢𑀺𑀓𑁆𑀓𑀫𑀦𑀻𑀬𑁄 𑀅𑀬𑀁 𑀯𑀺𑀥𑀺, 𑀢𑁂𑀲𑀜𑁆𑀘 𑀧𑀺𑀬𑀫𑀦𑀸𑀧𑀸𑀦𑀁 𑀧𑀼𑀢𑁆𑀢𑀤𑀸𑀭𑀸𑀦𑀁 𑀕𑀯𑀸𑀲𑁆𑀲𑀯𑀴𑀯𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀁 𑀯𑀺𑀦𑀸𑀪𑀸𑀯𑁂𑀦 𑀅𑀥𑀺𑀫𑀢𑁆𑀢𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀳𑀤𑀬𑀸 𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑀓𑀸𑀧𑀺 𑀳𑁄𑀦𑁆𑀢𑀺 𑀔𑀺𑀢𑁆𑀢𑀘𑀺𑀢𑁆𑀢𑀸, 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀢𑀲𑁆𑀫𑀸 𑀏𑀯𑀁 𑀕𑀡𑁆𑀳 𑁋 𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸. 𑀬𑀣𑀸 𑀘 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀻𑀢𑀺. 𑀓𑀺𑀁 𑀓𑀸𑀭𑀡𑀸? 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸. 𑀬𑀲𑁆𑀫𑀸 𑀘 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀢𑀲𑁆𑀫𑀸 𑀏𑀯 ‘‘𑀦 𑀳𑀺 𑀲𑁄 𑀲𑁄𑀘𑀢𑀺, 𑀬𑁄 𑀦𑀺𑀭𑀽𑀧𑀥𑀺’’. 𑀬𑁄 𑀉𑀧𑀥𑀻𑀲𑀼 𑀲𑀗𑁆𑀕𑀧𑁆𑀧𑀳𑀸𑀦𑁂𑀦 𑀦𑀺𑀭𑀼𑀧𑀥𑀺 𑀳𑁄𑀢𑀺, 𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦, 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀓𑁆𑀔𑀻 𑀲𑀓𑀼𑀡𑁄 ¶ …𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀲𑀩𑁆𑀩𑀲𑁄𑀓𑀲𑀫𑀼𑀕𑁆𑀖𑀸𑀢𑀸 ‘‘𑀦 𑀳𑀺 𑀲𑁄 𑀲𑁄𑀘𑀢𑀺, 𑀬𑁄 𑀦𑀺𑀭𑀼𑀧𑀥𑀻’’𑀢𑀺. 𑀇𑀢𑀺 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀯𑁄𑀲𑀸𑀧𑁂𑀲𑀺. 𑀅𑀣 𑀯𑀸 𑀬𑁄 𑀦𑀺𑀭𑀼𑀧𑀥𑀺, 𑀬𑁄 𑀦𑀺𑀓𑁆𑀓𑀺𑀮𑁂𑀲𑁄, 𑀲𑁄 𑀦 𑀲𑁄𑀘𑀢𑀺. 𑀬𑀸𑀯𑀤𑁂𑀯 𑀳𑀺 𑀓𑀺𑀮𑁂𑀲𑀸 𑀲𑀦𑁆𑀢𑀺, 𑀢𑀸𑀯𑀤𑁂𑀯 𑀲𑀩𑁆𑀩𑁂 ¶ 𑀉𑀧𑀥𑀬𑁄 𑀲𑁄𑀓𑀧𑁆𑀨𑀮𑀸𑀯 𑀳𑁄𑀦𑁆𑀢𑀺. 𑀓𑀺𑀮𑁂𑀲𑀧𑁆𑀧𑀳𑀸𑀦𑀸 𑀧𑀦 𑀦𑀢𑁆𑀣𑀺 𑀲𑁄𑀓𑁄𑀢𑀺. 𑀏𑀯𑀫𑁆𑀧𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀯𑁄𑀲𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀥𑀦𑀺𑀬𑁄 𑀘 𑀕𑁄𑀧𑀻 𑀘 𑀉𑀪𑁄𑀧𑀺 𑀧𑀩𑁆𑀩𑀚𑀺𑀁𑀲𑀼. 𑀪𑀕𑀯𑀸 𑀆𑀓𑀸𑀲𑁂𑀦𑁂𑀯 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀁𑀲𑀼. 𑀯𑀲𑀦𑀝𑁆𑀞𑀸𑀦𑁂 𑀘 𑀦𑁂𑀲𑀁 𑀕𑁄𑀧𑀸𑀮𑀓𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀼𑀁. 𑀲𑁄 𑀅𑀚𑁆𑀚𑀸𑀧𑀺 𑀕𑁄𑀧𑀸𑀮𑀓𑀯𑀺𑀳𑀸𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀥𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀩𑁆𑀩𑁂𑀲𑀼 ¶ ¶ 𑀪𑀽𑀢𑁂𑀲𑀽𑀢𑀺 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀩𑁆𑀩𑀲𑀼𑀢𑁆𑀢𑀸𑀦𑀁 𑀘𑀢𑀼𑀩𑁆𑀩𑀺𑀥𑀸 𑀉𑀧𑁆𑀧𑀢𑁆𑀢𑀺 𑁋 𑀅𑀢𑁆𑀢𑀚𑁆𑀛𑀸𑀲𑀬𑀢𑁄, 𑀧𑀭𑀚𑁆𑀛𑀸𑀲𑀬𑀢𑁄, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄, 𑀧𑀼𑀘𑁆𑀙𑀸𑀯𑀲𑀺𑀢𑁄 𑀘𑀸𑀢𑀺. 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀜𑁆𑀳𑀺 𑀅𑀢𑁆𑀢𑀚𑁆𑀛𑀸𑀲𑀬𑀢𑁄 𑀉𑀧𑁆𑀧𑀢𑁆𑀢𑀺, 𑀫𑁂𑀢𑁆𑀢𑀲𑀼𑀢𑁆𑀢𑀸𑀤𑀻𑀦𑀁 𑀧𑀭𑀚𑁆𑀛𑀸𑀲𑀬𑀢𑁄, 𑀉𑀭𑀕𑀲𑀼𑀢𑁆𑀢𑀸𑀤𑀻𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄, 𑀥𑀫𑁆𑀫𑀺𑀓𑀲𑀼𑀢𑁆𑀢𑀸𑀤𑀻𑀦𑀁 𑀧𑀼𑀘𑁆𑀙𑀸𑀯𑀲𑀺𑀢𑁄. 𑀢𑀢𑁆𑀣 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀲𑁆𑀲 𑀅𑀯𑀺𑀲𑁂𑀲𑁂𑀦 𑀧𑀼𑀘𑁆𑀙𑀸𑀯𑀲𑀺𑀢𑁄 𑀉𑀧𑁆𑀧𑀢𑁆𑀢𑀺. 𑀯𑀺𑀲𑁂𑀲𑁂𑀦 𑀧𑀦 𑀬𑀲𑁆𑀫𑀸 𑀏𑀢𑁆𑀣 𑀓𑀸𑀘𑀺 𑀕𑀸𑀣𑀸 𑀢𑁂𑀦 𑀢𑁂𑀦 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀦 𑀧𑀼𑀝𑁆𑀞𑁂𑀦 𑀯𑀼𑀢𑁆𑀢𑀸, 𑀓𑀸𑀘𑀺 𑀅𑀧𑀼𑀝𑁆𑀞𑁂𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀦𑀬𑀸𑀦𑀼𑀭𑀽𑀧𑀁 𑀉𑀤𑀸𑀦𑀁𑀬𑁂𑀯 𑀉𑀤𑀸𑀦𑁂𑀦𑁆𑀢𑁂𑀦, 𑀢𑀲𑁆𑀫𑀸 𑀓𑀸𑀬𑀘𑀺 𑀕𑀸𑀣𑀸𑀬 𑀧𑀼𑀘𑁆𑀙𑀸𑀯𑀲𑀺𑀢𑁄, 𑀓𑀸𑀬𑀘𑀺 𑀅𑀢𑁆𑀢𑀚𑁆𑀛𑀸𑀲𑀬𑀢𑁄 𑀉𑀧𑁆𑀧𑀢𑁆𑀢𑀺.

𑀢𑀢𑁆𑀣 ¶ 𑀬𑀸 𑀅𑀬𑀁 𑀅𑀯𑀺𑀲𑁂𑀲𑁂𑀦 𑀧𑀼𑀘𑁆𑀙𑀸𑀯𑀲𑀺𑀢𑁄 𑀉𑀧𑁆𑀧𑀢𑁆𑀢𑀺, 𑀲𑀸 𑀆𑀤𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀩𑀼𑀤𑁆𑀥𑀸𑀦𑀁 𑀧𑀢𑁆𑀣𑀦𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀘 𑀤𑀺𑀲𑁆𑀲𑀢𑀺; 𑀢𑀣𑀸 𑀲𑀸𑀯𑀓𑀸𑀦𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦 𑀤𑀺𑀲𑁆𑀲𑀢𑀺; 𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑁄 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑁂𑀦 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀲𑀼𑀢𑁆𑀢𑀁 𑀅𑀪𑀸𑀲𑀺 𑁋

‘‘𑀧𑀜𑁆𑀘𑀺𑀫𑁂, 𑀆𑀦𑀦𑁆𑀤, 𑀆𑀦𑀺𑀲𑀁𑀲𑀸 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘𑁂𑀯 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺. 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘𑁂𑀯 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀅𑀣 𑀫𑀭𑀡𑀓𑀸𑀮𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺. 𑀦𑁄 𑀘𑁂 𑀫𑀭𑀡𑀓𑀸𑀮𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀲𑀫𑀸𑀦𑁄 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀅𑀣 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀅𑀣 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑁋

𑀏𑀯𑀁 𑀯𑀢𑁆𑀯𑀸 𑀧𑀼𑀦 𑀆𑀳 𑁋

‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫, 𑀆𑀦𑀦𑁆𑀤, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀩𑁆𑀩𑁂𑀲𑀁 𑀧𑀢𑁆𑀣𑀦𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀘 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺.

𑀲𑁄 ¶ ¶ 𑀆𑀳 𑁋 ‘‘𑀩𑀼𑀤𑁆𑀥𑀸𑀦𑀁, 𑀪𑀦𑁆𑀢𑁂, 𑀧𑀢𑁆𑀣𑀦𑀸 𑀓𑀻𑀯 𑀘𑀺𑀭𑀁 𑀯𑀝𑁆𑀝𑀢𑀻’’𑀢𑀺? 𑀩𑀼𑀤𑁆𑀥𑀸𑀦𑀁, 𑀆𑀦𑀦𑁆𑀤, 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀚𑁆𑀛𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀅𑀝𑁆𑀞 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁂 𑀘 𑀪𑁂𑀤𑀸 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀲𑁂𑀦 𑀜𑀸𑀢𑀩𑁆𑀩𑀸. 𑀧𑀜𑁆𑀜𑀸𑀥𑀺𑀓𑀸𑀦𑀜𑁆𑀳𑀺 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺, 𑀧𑀜𑁆𑀜𑀸 𑀢𑀺𑀓𑁆𑀔𑀸. 𑀲𑀤𑁆𑀥𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀚𑁆𑀛𑀺𑀫𑀸 𑀳𑁄𑀢𑀺, 𑀲𑀤𑁆𑀥𑀸 𑀩𑀮𑀯𑀸. 𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀲𑀤𑁆𑀥𑀸𑀧𑀜𑁆𑀜𑀸 𑀫𑀦𑁆𑀤𑀸, 𑀯𑀻𑀭𑀺𑀬𑀁 𑀩𑀮𑀯𑀦𑁆𑀢𑀺. 𑀅𑀧𑁆𑀧𑀢𑁆𑀯𑀸 𑀧𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 ¶ 𑀤𑀸𑀦𑀁 𑀤𑁂𑀦𑁆𑀢𑁄𑀧𑀺 𑀢𑀤𑀦𑀼𑀭𑀽𑀧𑀲𑀻𑀮𑀸𑀤𑀺𑀲𑀩𑁆𑀩𑀧𑀸𑀭𑀫𑀺𑀥𑀫𑁆𑀫𑁂 𑀆𑀘𑀺𑀦𑀦𑁆𑀢𑁄𑀧𑀺 𑀅𑀦𑁆𑀢𑀭𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀜𑀸𑀡𑀁 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺, 𑀯𑁂𑀧𑀼𑀮𑁆𑀮𑀁 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀧𑀸𑀓𑀁 𑀦 𑀕𑀘𑁆𑀙𑀢𑀻𑀢𑀺. 𑀬𑀣𑀸 𑀦𑀸𑀫 𑀢𑀺𑀫𑀸𑀲𑀘𑀢𑀼𑀫𑀸𑀲𑀧𑀜𑁆𑀘𑀫𑀸𑀲𑀘𑁆𑀘𑀬𑁂𑀦 𑀦𑀺𑀧𑁆𑀨𑀚𑁆𑀚𑀦𑀓𑀁 𑀲𑀲𑁆𑀲𑀁 𑀢𑀁 𑀢𑀁 𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀓𑁂𑀴𑀸𑀬𑀦𑁆𑀢𑁄𑀧𑀺 𑀉𑀤𑀓𑁂𑀦 𑀲𑀺𑀜𑁆𑀘𑀦𑁆𑀢𑁄𑀧𑀺 𑀅𑀦𑁆𑀢𑀭𑀸 𑀧𑀓𑁆𑀔𑁂𑀦 𑀯𑀸 𑀫𑀸𑀲𑁂𑀦 𑀯𑀸 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑀲𑁆𑀲𑀁 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺, 𑀯𑁂𑀧𑀼𑀮𑁆𑀮𑀁 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀧𑀸𑀓𑀁 𑀦 𑀕𑀘𑁆𑀙𑀢𑀻𑀢𑀺. 𑀏𑀯𑀫𑁂𑀯𑀁 𑀅𑀧𑁆𑀧𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺…𑀧𑁂… 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯 𑀓𑀸𑀮𑀁 𑀧𑀸𑀭𑀫𑀺𑀧𑀽𑀭𑀡𑀁 𑀓𑀸𑀢𑀩𑁆𑀩𑀁 𑀜𑀸𑀡𑀧𑀭𑀺𑀧𑀸𑀓𑀢𑁆𑀣𑀸𑀬. 𑀏𑀢𑁆𑀢𑀓𑁂𑀦𑀧𑀺 𑀘 𑀓𑀸𑀮𑁂𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀢𑁄 𑀅𑀪𑀺𑀦𑀻𑀳𑀸𑀭𑀓𑀭𑀡𑁂 𑀅𑀝𑁆𑀞 𑀲𑀫𑁆𑀧𑀢𑁆𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑀸. 𑀅𑀬𑀜𑁆𑀳𑀺 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯);

𑀅𑀪𑀺𑀦𑀻𑀳𑀸𑀭𑁄𑀢𑀺 𑀘 𑀫𑀽𑀮𑀧𑀡𑀺𑀥𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺. 𑀅𑀜𑁆𑀜𑀢𑁆𑀭 𑀳𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀅𑀯𑀲𑁂𑀲𑀚𑀸𑀢𑀻𑀲𑀼 𑀤𑁂𑀯𑀚𑀸𑀢𑀺𑀬𑀫𑁆𑀧𑀺 𑀞𑀺𑀢𑀲𑁆𑀲 𑀧𑀡𑀺𑀥𑀺 𑀦 𑀇𑀚𑁆𑀛𑀢𑀺. 𑀏𑀢𑁆𑀣 𑀞𑀺𑀢𑁂𑀦 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁂𑀦 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀫𑀦𑀼𑀲𑁆𑀲𑀢𑁆𑀢𑀁𑀬𑁂𑀯 𑀧𑀢𑁆𑀣𑁂𑀢𑀩𑁆𑀩𑀁. 𑀢𑀢𑁆𑀣 𑀞𑀢𑁆𑀯𑀸 𑀧𑀡𑀺𑀥𑀺 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀫𑀺𑀚𑁆𑀛𑀢𑀺. 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀧𑀼𑀭𑀺𑀲𑀪𑀸𑀯𑁄. 𑀫𑀸𑀢𑀼𑀕𑀸𑀫𑀦𑀧𑀼𑀁𑀲𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀜𑁆𑀳𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀁 𑀞𑀺𑀢𑀸𑀦𑀫𑁆𑀧𑀺 𑀧𑀡𑀺𑀥𑀺 𑀦 𑀲𑀫𑀺𑀚𑁆𑀛𑀢𑀺. 𑀢𑀢𑁆𑀣 𑀞𑀺𑀢𑁂𑀦 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁂𑀦 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀧𑀼𑀭𑀺𑀲𑀪𑀸𑀯𑁄𑀬𑁂𑀯 𑀧𑀢𑁆𑀣𑁂𑀢𑀩𑁆𑀩𑁄. 𑀢𑀢𑁆𑀣 𑀞𑀢𑁆𑀯𑀸 𑀧𑀡𑀺𑀥𑀺 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀳𑀺 ¶ 𑀲𑀫𑀺𑀚𑁆𑀛𑀢𑀺. 𑀳𑁂𑀢𑀽𑀢𑀺 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺. 𑀬𑁄 𑀳𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀸𑀬𑀫𑀦𑁆𑀢𑁄 ¶ 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄, 𑀢𑀲𑁆𑀲 𑀲𑀫𑀺𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲, 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀦𑀢𑁆𑀢𑀪𑀸𑀯𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺 ¶ . 𑀲𑀢𑁆𑀣𑀸𑀭𑀤𑀲𑁆𑀲𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀸𑀤𑀲𑁆𑀲𑀦𑀁. 𑀏𑀯𑀜𑁆𑀳𑀺 𑀇𑀚𑁆𑀛𑀢𑀺, 𑀦𑁄 𑀅𑀜𑁆𑀜𑀣𑀸; 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀤𑀻𑀧𑀗𑁆𑀓𑀭𑀁 𑀲𑀫𑁆𑀫𑀼𑀔𑀸 𑀤𑀺𑀲𑁆𑀯𑀸 𑀧𑀡𑀺𑀥𑁂𑀲𑀺. 𑀧𑀩𑁆𑀩𑀚𑁆𑀚𑀸𑀢𑀺 𑀅𑀦𑀕𑀸𑀭𑀺𑀬𑀪𑀸𑀯𑁄. 𑀲𑁄 𑀘 𑀔𑁄 𑀲𑀸𑀲𑀦𑁂 𑀯𑀸 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀯𑀸𑀤𑀺𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀦𑀺𑀓𑀸𑀬𑁂 𑀯𑀸 𑀯𑀝𑁆𑀝𑀢𑀺 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀲𑀼𑀫𑁂𑀥𑁄 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀧𑀡𑀺𑀥𑁂𑀲𑀺. 𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀛𑀸𑀦𑀸𑀤𑀺𑀕𑀼𑀡𑀧𑀝𑀺𑀮𑀸𑀪𑁄. 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀳𑀺 𑀕𑀼𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀇𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲; 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀧𑀜𑁆𑀘𑀸𑀪𑀺𑀜𑁆𑀜𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀘 𑀳𑀼𑀢𑁆𑀯𑀸 𑀧𑀡𑀺𑀥𑁂𑀲𑀺. 𑀅𑀥𑀺𑀓𑀸𑀭𑁄𑀢𑀺 𑀅𑀥𑀺𑀓𑀓𑀸𑀭𑁄, 𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀸𑀤𑀺𑀧𑀭𑀺𑀘𑁆𑀘𑀸𑀕𑀜𑁆𑀳𑀺 𑀓𑀢𑁆𑀯𑀸 𑀧𑀡𑀺𑀤𑀳𑀢𑁄𑀬𑁂𑀯 𑀇𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲; 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑁋

‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀫𑀁 𑀩𑀼𑀤𑁆𑀥𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀕𑀘𑁆𑀙𑀢𑀼;

𑀫𑀸 𑀦𑀁 𑀓𑀮𑀮𑁂 𑀅𑀓𑁆𑀓𑀫𑀺𑀢𑁆𑀣, 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁩) 𑁋

𑀏𑀯𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀡𑀺𑀥𑁂𑀲𑀺. 𑀙𑀦𑁆𑀤𑀢𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸. 𑀲𑀸 𑀬𑀲𑁆𑀲 𑀩𑀮𑀯𑀢𑀻 𑀳𑁄𑀢𑀺, 𑀢𑀲𑁆𑀲 𑀇𑀚𑁆𑀛𑀢𑀺. 𑀲𑀸 𑀘, 𑀲𑀘𑁂 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀓𑁄 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘 𑀓𑀧𑁆𑀧𑁂 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀻’’𑀢𑀺, 𑀢𑀁 𑀲𑀼𑀢𑁆𑀯𑀸 𑀬𑁄 ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀼𑀁 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀩𑀮𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀬𑀤𑀺 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀅𑀗𑁆𑀕𑀸𑀭𑀸𑀦𑀁 𑀧𑀽𑀭𑀁 𑀅𑀓𑁆𑀓𑀫𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀺, 𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀲𑀢𑁆𑀢𑀺𑀲𑀽𑀮𑁂𑀳𑀺 𑀆𑀓𑀺𑀡𑁆𑀡𑀁 𑀅𑀓𑁆𑀓𑀫𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀺, 𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀲𑀫𑀢𑀺𑀢𑁆𑀢𑀺𑀓𑀁 𑀉𑀤𑀓𑀧𑀼𑀡𑁆𑀡𑀁 𑀉𑀢𑁆𑀢𑀭𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀺, 𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀦𑀺𑀭𑀦𑁆𑀢𑀭𑀁 𑀯𑁂𑀴𑀼𑀕𑀼𑀫𑁆𑀩𑀲𑀜𑁆𑀙𑀦𑁆𑀦𑀁 𑀫𑀤𑁆𑀤𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀻’’𑀢𑀺 𑀢𑀁 𑀲𑀼𑀢𑁆𑀯𑀸 𑀬𑁄 ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀼𑀁 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀩𑀮𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀭𑀽𑀧𑁂𑀦 𑀘 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀧𑀡𑀺𑀥𑁂𑀲𑀻𑀢𑀺.

𑀏𑀯𑀁 ¶ 𑀲𑀫𑀺𑀤𑁆𑀥𑀸𑀪𑀺𑀦𑀻𑀳𑀸𑀭𑁄 ¶ 𑀘 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀅𑀪𑀩𑁆𑀩𑀝𑁆𑀞𑀸𑀦𑀸𑀦𑀺 𑀦 𑀉𑀧𑁂𑀢𑀺. 𑀲𑁄 𑀳𑀺 𑀢𑀢𑁄 𑀧𑀪𑀼𑀢𑀺 𑀦 𑀚𑀘𑁆𑀘𑀦𑁆𑀥𑁄 𑀳𑁄𑀢𑀺, 𑀦 𑀚𑀘𑁆𑀘𑀩𑀥𑀺𑀭𑁄, 𑀦 𑀉𑀫𑁆𑀫𑀢𑁆𑀢𑀓𑁄, 𑀦 𑀏𑀴𑀫𑀽𑀕𑁄, 𑀦 𑀧𑀻𑀞𑀲𑀧𑁆𑀧𑀻, 𑀦 𑀫𑀺𑀮𑀓𑁆𑀔𑀽𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀤𑀸𑀲𑀺𑀓𑀼𑀘𑁆𑀙𑀺𑀬𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀦 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀦𑀸𑀲𑁆𑀲 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀦 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀦 𑀓𑀼𑀝𑁆𑀞𑀻 𑀳𑁄𑀢𑀺, 𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀯𑀝𑁆𑀝𑀓𑀢𑁄 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀦 𑀔𑀼𑀧𑁆𑀧𑀺𑀧𑀸𑀲𑀺𑀓𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀓𑀸𑀮𑀓𑀜𑁆𑀘𑀺𑀓𑀸𑀲𑀼𑀭𑁂𑀲𑀼, 𑀦 𑀅𑀯𑀻𑀘𑀺𑀦𑀺𑀭𑀬𑁂, 𑀦 𑀮𑁄𑀓𑀦𑁆𑀢𑀭𑀺𑀓𑁂𑀲𑀼, 𑀓𑀸𑀫𑀸𑀯𑀘𑀭𑁂𑀲𑀼 𑀦 𑀫𑀸𑀭𑁄 ¶ 𑀳𑁄𑀢𑀺, 𑀭𑀽𑀧𑀸𑀯𑀘𑀭𑁂𑀲𑀼 𑀦 𑀅𑀲𑀜𑁆𑀜𑀻𑀪𑀯𑁂, 𑀦 𑀲𑀼𑀤𑁆𑀥𑀸𑀯𑀸𑀲𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀭𑀽𑀧𑀪𑀯𑁂𑀲𑀼, 𑀦 𑀅𑀜𑁆𑀜𑀁 𑀘𑀓𑁆𑀓𑀯𑀸𑀴𑀁 𑀲𑀗𑁆𑀓𑀫𑀢𑀺.

𑀬𑀸 𑀘𑀺𑀫𑀸 𑀉𑀲𑁆𑀲𑀸𑀳𑁄 𑀉𑀫𑁆𑀫𑀗𑁆𑀕𑁄 𑀅𑀯𑀢𑁆𑀣𑀸𑀦𑀁 𑀳𑀺𑀢𑀘𑀭𑀺𑀬𑀸 𑀘𑀸𑀢𑀺 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄, 𑀢𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀢𑀢𑁆𑀣 𑁋

‘‘𑀉𑀲𑁆𑀲𑀸𑀳𑁄 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁, 𑀉𑀫𑁆𑀫𑀗𑁆𑀕𑁄 𑀧𑀜𑁆𑀜𑀸 𑀧𑀯𑀼𑀘𑁆𑀘𑀢𑀺;

𑀅𑀯𑀢𑁆𑀣𑀸𑀦𑀁 𑀅𑀥𑀺𑀝𑁆𑀞𑀸𑀦𑀁, 𑀳𑀺𑀢𑀘𑀭𑀺𑀬𑀸 𑀫𑁂𑀢𑁆𑀢𑀸𑀪𑀸𑀯𑀦𑀸’’𑀢𑀺. 𑁋

𑀯𑁂𑀤𑀺𑀢𑀩𑁆𑀩𑀸. 𑀬𑁂 𑀘𑀸𑀧𑀺 𑀇𑀫𑁂 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑁄, 𑀅𑀮𑁄𑀪𑀚𑁆𑀛𑀸𑀲𑀬𑁄, 𑀅𑀤𑁄𑀲𑀚𑁆𑀛𑀸𑀲𑀬𑁄, 𑀅𑀫𑁄𑀳𑀚𑁆𑀛𑀸𑀲𑀬𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑁄𑀢𑀺 𑀙 𑀅𑀚𑁆𑀛𑀸𑀲𑀬𑀸 𑀩𑁄𑀥𑀺𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀓𑀸𑀫𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀗𑁆𑀕𑀡𑀺𑀓𑀸𑀬 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀮𑁄𑀪𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀮𑁄𑀪𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀤𑁄𑀲𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀤𑁄𑀲𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀫𑁄𑀳𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀫𑁄𑀳𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀩𑁆𑀩𑀪𑀯𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀦 𑀓𑀻𑀯 𑀘𑀺𑀭𑀁 𑀧𑀢𑁆𑀣𑀦𑀸 𑀯𑀝𑁆𑀝𑀢𑀻𑀢𑀺? 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘. 𑀢𑀢𑁄 𑀑𑀭𑀁 𑀦 𑀲𑀓𑁆𑀓𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀓𑁂𑀦𑀸𑀧𑀺 ¶ 𑀘 𑀓𑀸𑀮𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀢𑁄 𑀅𑀪𑀺𑀦𑀻𑀳𑀸𑀭𑀓𑀭𑀡𑁂 𑀧𑀜𑁆𑀘 𑀲𑀫𑁆𑀧𑀢𑁆𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀲𑀜𑁆𑀳𑀺 𑁋

𑀫𑀦𑀼𑀲𑁆𑀲𑀢𑁆𑀢𑀁 ¶ 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀯𑀺𑀕𑀢𑀸𑀲𑀯𑀤𑀲𑁆𑀲𑀦𑀁;

𑀅𑀥𑀺𑀓𑀸𑀭𑁄 𑀙𑀦𑁆𑀤𑀢𑀸 𑀏𑀢𑁂, 𑀅𑀪𑀺𑀦𑀻𑀳𑀸𑀭𑀓𑀸𑀭𑀡𑀸.

𑀢𑀢𑁆𑀣 𑀯𑀺𑀕𑀢𑀸𑀲𑀯𑀤𑀲𑁆𑀲𑀦𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣 𑀲𑀸𑀯𑀓𑀸𑀦𑀁 𑀧𑀢𑁆𑀣𑀦𑀸 𑀓𑀺𑀢𑁆𑀢𑀓𑀁 𑀯𑀝𑁆𑀝𑀢𑀻𑀢𑀺? 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀁, 𑀢𑀣𑀸 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀓𑀲𑁆𑀲 ¶ 𑀧𑀼𑀢𑁆𑀢𑀲𑁆𑀲 𑀘𑀸𑀢𑀺. 𑀢𑀢𑁄 𑀑𑀭𑀁 𑀦 𑀲𑀓𑁆𑀓𑀸. 𑀯𑀼𑀢𑁆𑀢𑀦𑀬𑀫𑁂𑀯𑁂𑀢𑁆𑀣 𑀓𑀸𑀭𑀡𑀁. 𑀇𑀫𑁂𑀲𑀁 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀥𑀺𑀓𑀸𑀭𑁄 𑀙𑀦𑁆𑀤𑀢𑀸𑀢𑀺 𑀤𑁆𑀯𑀗𑁆𑀕𑀲𑀫𑁆𑀧𑀦𑁆𑀦𑁄𑀬𑁂𑀯 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺.

𑀏𑀯𑀁 𑀇𑀫𑀸𑀬 𑀧𑀢𑁆𑀣𑀦𑀸𑀬 𑀇𑀫𑀺𑀦𑀸 𑀘 𑀅𑀪𑀺𑀦𑀻𑀳𑀸𑀭𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀓𑀸𑀮𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀸 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀼𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁, 𑀅𑀕𑁆𑀕𑀲𑀸𑀯𑀓𑀸 𑀧𑀦 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀲𑁆𑀯𑁂𑀯 𑀩𑀼𑀤𑁆𑀥𑀸 𑀇𑀯 𑀲𑀩𑁆𑀩𑀩𑀼𑀤𑁆𑀥𑀸 𑀲𑀁𑀯𑀝𑁆𑀝𑀫𑀸𑀦𑁂 𑀓𑀧𑁆𑀧𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀯𑀝𑁆𑀝𑀫𑀸𑀦𑁂 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑁂 𑀅𑀧𑁆𑀧𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀼𑀤𑁆𑀥𑀸 𑀲𑀬𑀜𑁆𑀘 𑀩𑀼𑀚𑁆𑀛𑀦𑁆𑀢𑀺, 𑀧𑀭𑁂 𑀘 𑀩𑁄𑀥𑁂𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀬𑀫𑁂𑀯 𑀩𑀼𑀚𑁆𑀛𑀦𑁆𑀢𑀺, 𑀦 𑀧𑀭𑁂 𑀩𑁄𑀥𑁂𑀦𑁆𑀢𑀺. 𑀅𑀢𑁆𑀣𑀭𑀲𑀫𑁂𑀯 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀦 𑀥𑀫𑁆𑀫𑀭𑀲𑀁. 𑀦 𑀳𑀺 𑀢𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀜𑁆𑀜𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀤𑁂𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀫𑀽𑀕𑁂𑀦 𑀤𑀺𑀝𑁆𑀞𑀲𑀼𑀧𑀺𑀦𑁄 𑀯𑀺𑀬 𑀯𑀦𑀘𑀭𑀓𑁂𑀦 𑀦𑀕𑀭𑁂 𑀲𑀸𑀬𑀺𑀢𑀩𑁆𑀬𑀜𑁆𑀚𑀦𑀭𑀲𑁄 𑀯𑀺𑀬 𑀘 𑀦𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺. 𑀲𑀩𑁆𑀩𑀁 𑀇𑀤𑁆𑀥𑀺𑀲𑀫𑀸𑀧𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀁 𑀧𑀸𑀧𑀼𑀡𑀦𑁆𑀢𑀺, 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀩𑀼𑀤𑁆𑀥𑀸𑀦𑀁 𑀳𑁂𑀝𑁆𑀞𑀸 𑀲𑀸𑀯𑀓𑀸𑀦𑀁 𑀉𑀧𑀭𑀺 𑀳𑁄𑀦𑁆𑀢𑀺, 𑀅𑀜𑁆𑀜𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, ‘‘𑀘𑀺𑀢𑁆𑀢𑀲𑀮𑁆𑀮𑁂𑀔𑁄 𑀓𑀸𑀢𑀩𑁆𑀩𑁄, 𑀯𑁄𑀲𑀸𑀦𑀁 𑀦𑀸𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑁆𑀤𑁂𑀲𑁂𑀦 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, ‘𑀅𑀚𑁆𑀚𑀼𑀧𑁄𑀲𑀣𑁄’𑀢𑀺 ¶ 𑀯𑀘𑀦𑀫𑀢𑁆𑀢𑁂𑀦 𑀯𑀸. 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀸 𑀘 𑀕𑀦𑁆𑀥𑀫𑀸𑀤𑀦𑁂 𑀫𑀜𑁆𑀚𑀽𑀲𑀓𑀭𑀼𑀓𑁆𑀔𑀫𑀽𑀮𑁂 𑀭𑀢𑀦𑀫𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺. 𑀏𑀯𑀁 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀧𑀢𑁆𑀣𑀦𑀜𑁆𑀘 𑀅𑀪𑀺𑀦𑀻𑀳𑀸𑀭𑀜𑁆𑀘 𑀓𑀣𑁂𑀢𑁆𑀯𑀸, 𑀇𑀤𑀸𑀦𑀺 𑀇𑀫𑀸𑀬 𑀧𑀢𑁆𑀣𑀦𑀸𑀬 𑀇𑀫𑀺𑀦𑀸 𑀘 𑀅𑀪𑀺𑀦𑀻𑀳𑀸𑀭𑁂𑀦 𑀲𑀫𑀼𑀤𑀸𑀕𑀢𑁂 𑀢𑁂 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑀣𑁂𑀢𑀼𑀁 ‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀇𑀫𑀁 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀅𑀬𑀁 𑀢𑀸𑀯 𑀅𑀯𑀺𑀲𑁂𑀲𑁂𑀦 𑀧𑀼𑀘𑁆𑀙𑀸𑀯𑀲𑀺𑀢𑁄 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺.

𑁩𑁫. 𑀇𑀤𑀸𑀦𑀺 𑀯𑀺𑀲𑁂𑀲𑁂𑀦 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀣 𑀇𑀫𑀺𑀲𑁆𑀲𑀸 𑀢𑀸𑀯 𑀕𑀸𑀣𑀸𑀬 𑀏𑀯𑀁 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀬𑀁 𑀓𑀺𑀭 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀁 𑀑𑀕𑀸𑀳𑀦𑁆𑀢𑁄 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑁄 𑀳𑀼𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀏𑀢𑀁 𑀓𑀺𑀭 𑀯𑀢𑁆𑀢𑀁 𑀅𑀧𑀭𑀺𑀧𑀽𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀓𑀺𑀁 𑀧𑀦𑁂𑀢𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀦𑀸𑀫? 𑀳𑀭𑀡𑀧𑀘𑁆𑀘𑀸𑀳𑀭𑀡𑀦𑁆𑀢𑀺. 𑀢𑀁 𑀬𑀣𑀸 𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀣𑀸 𑀓𑀣𑁂𑀲𑁆𑀲𑀸𑀫.

𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀳𑀭𑀢𑀺, 𑀦 𑀧𑀘𑁆𑀘𑀸𑀳𑀭𑀢𑀺; 𑀏𑀓𑀘𑁆𑀘𑁄 𑀧𑀘𑁆𑀘𑀸𑀳𑀭𑀢𑀺, 𑀦 𑀳𑀭𑀢𑀺; 𑀏𑀓𑀘𑁆𑀘𑁄 𑀧𑀦 𑀦𑁂𑀯 𑀳𑀭𑀢𑀺, 𑀦 𑀧𑀘𑁆𑀘𑀸𑀳𑀭𑀢𑀺; 𑀏𑀓𑀘𑁆𑀘𑁄 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀧𑀕𑁂𑀯 𑀯𑀼𑀝𑁆𑀞𑀸𑀬 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀢𑁆𑀯𑀸, 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸, 𑀧𑀸𑀦𑀻𑀬𑀖𑀝𑀁 𑀧𑀽𑀭𑁂𑀢𑁆𑀯𑀸 ¶ 𑀧𑀸𑀦𑀻𑀬𑀫𑀸𑀴𑁂 𑀞𑀧𑁂𑀢𑁆𑀯𑀸, 𑀆𑀘𑀭𑀺𑀬𑀯𑀢𑁆𑀢𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀢𑁆𑀯𑀸, 𑀤𑁆𑀯𑁂𑀅𑀲𑀻𑀢𑀺 𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀘 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀲𑁄 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸, 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀢𑀸𑀯 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀯𑁂𑀮𑀁 𑀜𑀢𑁆𑀯𑀸, 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸, 𑀲𑀗𑁆𑀖𑀸𑀝𑀺𑀁 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸, 𑀧𑀢𑁆𑀢𑀁 𑀅𑀁𑀲𑁂 𑀆𑀮𑀕𑁆𑀕𑁂𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 ¶ 𑀓𑀭𑁄𑀦𑁆𑀢𑁄 𑀘𑁂𑀢𑀺𑀬𑀗𑁆𑀕𑀡𑀁 𑀧𑀢𑁆𑀯𑀸, 𑀘𑁂𑀢𑀺𑀬𑀜𑁆𑀘 𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸, 𑀕𑀸𑀫𑀲𑀫𑀻𑀧𑁂 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀧𑀢𑁆𑀢𑀫𑀸𑀤𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀯𑀁 𑀧𑀯𑀺𑀝𑁆𑀞𑁄 𑀘 𑀮𑀸𑀪𑀻 𑀪𑀺𑀓𑁆𑀔𑀼 𑀧𑀼𑀜𑁆𑀜𑀯𑀸 𑀉𑀧𑀸𑀲𑀓𑁂𑀳𑀺 𑀲𑀓𑁆𑀓𑀢𑀕𑀭𑀼𑀓𑀢𑁄 𑀉𑀧𑀝𑁆𑀞𑀸𑀓𑀓𑀼𑀮𑁂 𑀯𑀸 𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀬𑀁 𑀯𑀸 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑀸𑀲𑀓𑁂𑀳𑀺 𑀢𑀁 𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀬𑀫𑀸𑀦𑁄 𑀢𑁂𑀲𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀯𑀺𑀓𑁆𑀔𑁂𑀧𑁂𑀦 𑀘 𑀢𑀁 𑀫𑀦𑀲𑀺𑀓𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀳𑀸𑀭𑀁 𑀆𑀕𑀢𑁄𑀧𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀺, 𑀥𑀫𑁆𑀫𑀁 𑀪𑀡𑀢𑀺, 𑀢𑀁 𑀢𑀁 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀢𑀺, 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀧𑀼𑀭𑀺𑀫𑀬𑀸𑀫𑀫𑁆𑀧𑀺 𑀫𑀚𑁆𑀛𑀺𑀫𑀬𑀸𑀫𑀫𑁆𑀧𑀺 𑀏𑀯𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀧𑀜𑁆𑀘𑀺𑀢𑁆𑀯𑀸 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀸𑀪𑀺𑀪𑀽𑀢𑁄 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀲𑀬𑀢𑀺, 𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀳𑀭𑀢𑀺, 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺.

𑀬𑁄 ¶ 𑀧𑀦 𑀩𑁆𑀬𑀸𑀥𑀺𑀩𑀳𑀼𑀮𑁄 𑀳𑁄𑀢𑀺, 𑀪𑀼𑀢𑁆𑀢𑀸𑀳𑀸𑀭𑁄 𑀧𑀘𑁆𑀘𑀽𑀲𑀲𑀫𑀬𑁂 𑀦 𑀲𑀫𑁆𑀫𑀸 𑀧𑀭𑀺𑀡𑀫𑀢𑀺, 𑀧𑀕𑁂𑀯 𑀯𑀼𑀝𑁆𑀞𑀸𑀬 𑀬𑀣𑀸𑀯𑀼𑀢𑁆𑀢𑀁 𑀯𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺 𑀓𑀸𑀢𑀼𑀁, 𑀅𑀜𑁆𑀜𑀤𑀢𑁆𑀣𑀼 𑀬𑀸𑀕𑀼𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀧𑀢𑁆𑀣𑀬𑀫𑀸𑀦𑁄 𑀓𑀸𑀮𑀲𑁆𑀲𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀯𑀺𑀲𑀢𑀺. 𑀢𑀢𑁆𑀣 𑀬𑀸𑀕𑀼𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀪𑀢𑁆𑀢𑀁 𑀯𑀸 𑀮𑀤𑁆𑀥𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸, 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀢𑁆𑀯𑀸, 𑀯𑀺𑀲𑁂𑀲𑀁 𑀧𑀢𑁆𑀯𑀸 𑀯𑀸 𑀅𑀧𑁆𑀧𑀢𑁆𑀯𑀸 𑀯𑀸, 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸, 𑀢𑁂𑀦𑁂𑀯 𑀫𑀦𑀲𑀺𑀓𑀸𑀭𑁂𑀦 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀸𑀳𑀭𑀢𑀺 𑀦 𑀳𑀭𑀢𑀻𑀢𑀺. 𑀏𑀤𑀺𑀲𑀸 𑀘 𑀪𑀺𑀓𑁆𑀔𑀽 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸, 𑀩𑀼𑀤𑁆𑀥𑀲𑀸𑀲𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀲𑀻𑀳𑀴𑀤𑀻𑀧𑁂𑀬𑁂𑀯 𑀢𑁂𑀲𑀼 𑀢𑁂𑀲𑀼 𑀕𑀸𑀫𑁂𑀲𑀼 𑀆𑀲𑀦𑀲𑀸𑀮𑀸𑀬 𑀦 𑀢𑀁 𑀆𑀲𑀦𑀁 𑀅𑀢𑁆𑀣𑀺, 𑀬𑀢𑁆𑀣 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀪𑀺𑀓𑁆𑀔𑀼 𑀦𑀢𑁆𑀣𑀻𑀢𑀺.

𑀬𑁄 𑀧𑀦 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄, 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀦𑀩𑀤𑁆𑀥𑀘𑀺𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀫𑀦𑀦𑀼𑀬𑀼𑀢𑁆𑀢𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀕𑀺𑀳𑀺𑀧𑀧𑀜𑁆𑀘𑁂𑀦 𑀧𑀧𑀜𑁆𑀘𑀺𑀢𑁄 𑀢𑀼𑀘𑁆𑀙𑀓𑁄 𑀦𑀺𑀓𑁆𑀔𑀫𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺.

𑀬𑁄 𑀧𑀦 𑀧𑀕𑁂𑀯 ¶ 𑀯𑀼𑀝𑁆𑀞𑀸𑀬 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀯𑀢𑁆𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀤𑀼𑀯𑀺𑀥𑀁 𑁋 𑀲𑀩𑁆𑀩𑀢𑁆𑀣𑀓𑀁, 𑀧𑀸𑀭𑀺𑀳𑀸𑀭𑀺𑀬𑀜𑁆𑀘. 𑀲𑀩𑁆𑀩𑀢𑁆𑀣𑀓𑀁 𑀦𑀸𑀫 𑀫𑁂𑀢𑁆𑀢𑀸 𑀘 𑀫𑀭𑀡𑀲𑁆𑀲𑀢𑀺 𑀘. 𑀢𑀁 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀢𑁄 ‘‘𑀲𑀩𑁆𑀩𑀢𑁆𑀣𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑁂𑀢𑁆𑀢𑀸 𑀦𑀸𑀫 𑀆𑀯𑀸𑀲𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀆𑀯𑀸𑀲𑁂𑀲𑀼 𑀳𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 ¶ 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀳𑁄𑀢𑀺, 𑀢𑁂𑀦 𑀨𑀸𑀲𑀼 𑀅𑀲𑀗𑁆𑀖𑀝𑁆𑀞𑁄 𑀯𑀺𑀳𑀭𑀢𑀺. 𑀤𑁂𑀯𑀢𑀸𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀤𑁂𑀯𑀢𑀸𑀳𑀺 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻, 𑀢𑁂𑀳𑀺 𑀫𑀫𑀸𑀬𑀺𑀢𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀸𑀘𑀭𑀺𑀬𑀸𑀤𑀻𑀲𑀼 𑀫𑀦𑀼𑀲𑁆𑀲𑁂𑀳𑀺 𑀲𑀓𑁆𑀓𑀢𑀕𑀭𑀼𑀓𑀢𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀫𑀭𑀡𑀲𑁆𑀲𑀢𑀺𑀪𑀸𑀯𑀦𑀸𑀬 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀁 𑀧𑀳𑀸𑀬 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺.

𑀬𑀁 𑀧𑀦 𑀲𑀤𑀸 𑀧𑀭𑀺𑀳𑀭𑀺𑀢𑀩𑁆𑀩𑀁 𑀘𑀭𑀺𑀢𑀸𑀦𑀼𑀓𑀽𑀮𑁂𑀦 𑀕𑀳𑀺𑀢𑀢𑁆𑀢𑀸 𑀤𑀲𑀸𑀲𑀼𑀪𑀓𑀲𑀺𑀡𑀸𑀦𑀼𑀲𑁆𑀲𑀢𑀻𑀲𑀼 𑀅𑀜𑁆𑀜𑀢𑀭𑀁, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑁂𑀯 𑀯𑀸, 𑀢𑀁 𑀲𑀤𑀸 𑀧𑀭𑀺𑀳𑀭𑀺𑀢𑀩𑁆𑀩𑀢𑁄, 𑀭𑀓𑁆𑀔𑀺𑀢𑀩𑁆𑀩𑀢𑁄, 𑀪𑀸𑀯𑁂𑀢𑀩𑁆𑀩𑀢𑁄 𑀘 𑀧𑀸𑀭𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺𑀧𑀺 ¶ 𑀢𑀤𑁂𑀯. 𑀢𑀢𑁆𑀣 𑀬𑀁 𑀧𑀞𑀫𑀁 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀘𑁆𑀙𑀸 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑀼𑀔𑁂𑀦 𑀤𑀲𑁆𑀲𑁂𑀲𑁆𑀲𑀸𑀫.

𑀅𑀬𑀜𑁆𑀳𑀺 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀓𑀸𑀬𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 𑀬𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂𑀲𑀼 𑀓𑀓𑁆𑀔𑀴𑀁 𑀔𑀭𑀕𑀢𑀁, 𑀲𑀸 𑀧𑀣𑀯𑀻𑀥𑀸𑀢𑀼. 𑀬𑀁 𑀤𑁆𑀯𑀸𑀤𑀲𑀲𑀼 𑀆𑀩𑀦𑁆𑀥𑀦𑀓𑀺𑀘𑁆𑀘𑀓𑀭𑀁 𑀲𑁆𑀦𑁂𑀳𑀕𑀢𑀁, 𑀲𑀸 𑀆𑀧𑁄𑀥𑀸𑀢𑀼. 𑀬𑀁 𑀘𑀢𑀽𑀲𑀼 𑀧𑀭𑀺𑀧𑀸𑀘𑀦𑀓𑀭𑀁 𑀉𑀲𑀼𑀫𑀕𑀢𑀁, 𑀲𑀸 𑀢𑁂𑀚𑁄𑀥𑀸𑀢𑀼. 𑀬𑀁 𑀧𑀦 𑀙𑀲𑀼 𑀯𑀺𑀢𑁆𑀣𑀫𑁆𑀪𑀦𑀓𑀭𑀁 𑀯𑀸𑀬𑁄𑀕𑀢𑀁, 𑀲𑀸 𑀯𑀸𑀬𑁄𑀥𑀸𑀢𑀼. 𑀬𑀁 𑀧𑀦𑁂𑀢𑁆𑀣 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀁 𑀙𑀺𑀤𑁆𑀤𑀁 𑀯𑀺𑀯𑀭𑀁, 𑀲𑀸 𑀆𑀓𑀸𑀲𑀥𑀸𑀢𑀼. 𑀢𑀁𑀯𑀺𑀚𑀸𑀦𑀦𑀓𑀁 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺. 𑀓𑁂𑀯𑀮𑀁 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀯 ¶ 𑀅𑀬𑀦𑁆𑀢𑀺.

𑀏𑀯𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸, 𑀓𑀸𑀮𑀁 𑀜𑀢𑁆𑀯𑀸, 𑀉𑀝𑁆𑀞𑀸𑀬𑀸𑀲𑀦𑀸 𑀦𑀺𑀯𑀸𑀲𑁂𑀢𑁆𑀯𑀸, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀢𑀺. 𑀕𑀘𑁆𑀙𑀦𑁆𑀢𑁄 𑀘 𑀬𑀣𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀺, 𑀅𑀢𑁆𑀢𑀦𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀯𑀸, ‘‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀺, 𑀫𑀬𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀯𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀲𑀦𑁆𑀥𑀸𑀭𑀡𑀯𑀸𑀬𑁄𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺. 𑀲𑀸 𑀇𑀫𑀁 𑀧𑀣𑀯𑀻𑀥𑀸𑀢𑁆𑀯𑀸𑀤𑀺𑀲𑀦𑁆𑀦𑀺𑀯𑁂𑀲𑀪𑀽𑀢𑀁 𑀓𑀸𑀬𑀲𑀫𑁆𑀫𑀢𑀁 𑀅𑀝𑁆𑀞𑀺𑀓𑀲𑀗𑁆𑀖𑀸𑀝𑀁 𑀯𑀺𑀧𑁆𑀨𑀭𑀢𑀺, 𑀢𑀢𑁄 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀅𑀬𑀁 𑀓𑀸𑀬𑀲𑀫𑁆𑀫𑀢𑁄 𑀅𑀝𑁆𑀞𑀺𑀓𑀲𑀗𑁆𑀖𑀸𑀝𑁄 𑀅𑀪𑀺𑀓𑁆𑀓𑀫𑀢𑀺. 𑀢𑀲𑁆𑀲𑁂𑀯𑀁 𑀅𑀪𑀺𑀓𑁆𑀓𑀫𑀢𑁄 𑀏𑀓𑁂𑀓𑀧𑀸𑀤𑀼𑀤𑁆𑀥𑀸𑀭𑀡𑁂 𑀘𑀢𑀽𑀲𑀼 𑀥𑀸𑀢𑀽𑀲𑀼 𑀯𑀸𑀬𑁄𑀥𑀸𑀢𑀼𑀅𑀦𑀼𑀕𑀢𑀸 𑀢𑁂𑀚𑁄𑀥𑀸𑀢𑀼 𑀅𑀥𑀺𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁆𑀤𑀸 𑀇𑀢𑀭𑀸. 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀧𑀳𑀭𑀡𑁂𑀲𑀼 𑀧𑀦 𑀢𑁂𑀚𑁄𑀥𑀸𑀢𑀼𑀅𑀦𑀼𑀕𑀢𑀸 𑀯𑀸𑀬𑁄𑀥𑀸𑀢𑀼 𑀅𑀥𑀺𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁆𑀤𑀸 𑀇𑀢𑀭𑀸. 𑀑𑀭𑁄𑀳𑀡𑁂 𑀧𑀦 𑀧𑀣𑀯𑀻𑀥𑀸𑀢𑀼𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼 𑀅𑀥𑀺𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁆𑀤𑀸 𑀇𑀢𑀭𑀸. 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀫𑀼𑀧𑁆𑀧𑀻𑀴𑀦𑁂𑀲𑀼 𑀆𑀧𑁄𑀥𑀸𑀢𑀼𑀅𑀦𑀼𑀕𑀢𑀸 𑀧𑀣𑀯𑀻𑀥𑀸𑀢𑀼 𑀅𑀥𑀺𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁆𑀤𑀸 𑀇𑀢𑀭𑀸. 𑀇𑀘𑁆𑀘𑁂𑀢𑀸 𑀥𑀸𑀢𑀼𑀬𑁄 𑀢𑁂𑀦 𑀢𑁂𑀦 𑀅𑀢𑁆𑀢𑀦𑁄 𑀉𑀧𑁆𑀧𑀸𑀤𑀓𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺 ¶ . 𑀢𑀢𑁆𑀣 𑀓𑁄 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀓𑀲𑁆𑀲 𑀯𑀸 𑀏𑀓𑀲𑁆𑀲 𑀅𑀪𑀺𑀓𑁆𑀓𑀫𑀦’’𑀦𑁆𑀢𑀺 𑀏𑀯𑀁 𑀏𑀓𑁂𑀓𑀧𑀸𑀤𑀼𑀤𑁆𑀥𑀸𑀭𑀡𑀸𑀤𑀺𑀧𑁆𑀧𑀓𑀸𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀓𑀸𑀭𑁂 𑀉𑀧𑁆𑀧𑀦𑁆𑀦𑀥𑀸𑀢𑀼𑀬𑁄, 𑀢𑀤𑀯𑀺𑀦𑀺𑀩𑁆𑀪𑀼𑀢𑁆𑀢𑀸 𑀘 𑀲𑁂𑀲𑀸 𑀭𑀽𑀧𑀥𑀫𑁆𑀫𑀸, 𑀢𑀁𑀲𑀫𑀼𑀝𑁆𑀞𑀸𑀧𑀓𑀁 𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 ¶ 𑀲𑁂𑀲𑀸 𑀅𑀭𑀽𑀧𑀥𑀫𑁆𑀫𑀸𑀢𑀺 𑀏𑀢𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸. 𑀢𑀢𑁄 𑀧𑀭𑀁 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀤𑀻𑀲𑀼 𑀅𑀜𑁆𑀜𑀁 𑀧𑀓𑀸𑀭𑀁 𑀦 𑀲𑀫𑁆𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀅𑀦𑀺𑀘𑁆𑀘𑀸. 𑀬𑀜𑁆𑀘 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀕𑀘𑁆𑀙𑀢𑀺. 𑀅𑀢𑁆𑀣𑀓𑀸𑀫𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀲𑀢𑀫𑁆𑀧𑀺 𑀏𑀓𑀢𑁄 𑀯𑀲𑀦𑁆𑀢𑀸 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀺 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀦 𑀇𑀡𑀝𑁆𑀞𑀸, 𑀦 𑀪𑀬𑀝𑁆𑀞𑀸, 𑀦 𑀚𑀻𑀯𑀺𑀓𑀸𑀧𑀓𑀢𑀸 𑀧𑀩𑁆𑀩𑀚𑀺𑀢𑀸; 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀧𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸. 𑀢𑀲𑁆𑀫𑀸 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀕𑀫𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣, 𑀞𑀸𑀦𑁂 𑀦𑀺𑀲𑀚𑁆𑀚𑀸𑀬, 𑀲𑀬𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀕𑀫𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺. 𑀢𑁂 𑀏𑀯𑀁 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸 𑀅𑀟𑁆𑀠𑀉𑀲𑀪𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀦𑁆𑀢𑀭𑁂𑀲𑀼 𑀧𑀸𑀲𑀸𑀡𑀸 𑀳𑁄𑀦𑁆𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀓𑀲𑁆𑀲𑀘𑀺 𑀕𑀫𑀦𑁂 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀲𑁄 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑀁 𑀚𑀸𑀦𑀸𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂 𑀏𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁄𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀻𑀢𑀺 𑀲𑁄𑀬𑁂𑀯 𑀦𑀬𑁄. 𑀅𑀭𑀺𑀬𑀪𑀽𑀫𑀺 𑀑𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀢𑀁 𑀓𑀺𑀮𑁂𑀲𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀕𑀘𑁆𑀙𑀢𑀺. 𑀦 𑀓𑀫𑁆𑀫𑀝𑁆𑀞𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀢𑀺. 𑀉𑀤𑁆𑀥𑀭𑀢𑀺 𑀘𑁂, 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀭𑀺𑀫𑀧𑁆𑀧𑀤𑁂𑀲𑀁𑀬𑁂𑀯 𑀏𑀢𑀺 𑀲𑀻𑀳𑀴𑀤𑀻𑀧𑁂 𑀆𑀮𑀺𑀦𑁆𑀤𑀓𑀯𑀸𑀲𑀻 𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀯𑀺𑀬 ¶ .

𑀲𑁄 𑀓𑀺𑀭 𑀏𑀓𑀽𑀦𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀏𑀯 𑀯𑀺𑀳𑀸𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀲𑀼𑀤𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀲𑀦𑁆𑀢𑀸 𑀘 𑀯𑀧𑀦𑁆𑀢𑀸 𑀘 𑀫𑀤𑁆𑀤𑀦𑁆𑀢𑀸 𑀘 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀣𑁂𑀭𑀁 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀣𑁂𑀭𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄 𑀫𑀕𑁆𑀕𑀫𑀽𑀴𑁆𑀳𑁄, 𑀉𑀤𑀸𑀳𑀼 𑀓𑀺𑀜𑁆𑀘𑀺 𑀧𑀫𑀼𑀝𑁆𑀞𑁄’’𑀢𑀺 𑀲𑀫𑀼𑀮𑁆𑀮𑀧𑀦𑁆𑀢𑀺. 𑀲𑁄 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀻𑀲𑀢𑀺𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑁂 𑀘𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀗𑁆𑀕𑀼𑀮𑀻𑀳𑀺 𑀤𑀻𑀧𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀉𑀧𑀝𑁆𑀞𑀸𑀦𑀁 𑀆𑀕𑀫𑀁𑀲𑀼. 𑀢𑀜𑁆𑀘 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀯𑀦𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀤𑀼𑀢𑀺𑀬𑀤𑀺𑀯𑀲𑁂 𑀧𑀼𑀘𑁆𑀙𑀺 ¶ ‘‘𑀭𑀢𑁆𑀢𑀺𑀪𑀸𑀕𑁂 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀑𑀪𑀸𑀲𑁄 𑀅𑀳𑁄𑀲𑀺, 𑀓𑀺𑀁 𑀲𑁄 𑀑𑀪𑀸𑀲𑁄’’𑀢𑀺? 𑀣𑁂𑀭𑁄 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 ‘‘𑀑𑀪𑀸𑀲𑁄 𑀦𑀸𑀫 𑀤𑀻𑀧𑁄𑀪𑀸𑀲𑁄𑀧𑀺 𑀳𑁄𑀢𑀺, 𑀫𑀡𑀺𑀑𑀪𑀸𑀲𑁄𑀧𑀻’’𑀢𑀺 ¶ 𑀏𑀯𑀫𑀸𑀤𑀺𑀁 𑀆𑀳. 𑀲𑁄 ‘‘𑀧𑀝𑀺𑀘𑁆𑀙𑀸𑀤𑁂𑀣 𑀢𑀼𑀫𑁆𑀳𑁂’’𑀢𑀺 𑀦𑀺𑀩𑀤𑁆𑀥𑁄 ‘‘𑀆𑀫𑀸’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀆𑀭𑁄𑀘𑁂𑀲𑀺.

𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀘. 𑀲𑁄𑀧𑀺 𑀓𑀺𑀭 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 ‘‘𑀧𑀞𑀫𑀁 𑀢𑀸𑀯 𑀪𑀕𑀯𑀢𑁄 𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀫𑀻’’𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀲𑀺. 𑀧𑀼𑀦 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀉𑀤𑁆𑀥𑀝𑁂 𑀧𑀦 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸, ‘‘𑀕𑀸𑀯𑀻 𑀦𑀼 𑀧𑀩𑁆𑀩𑀚𑀺𑀢𑁄 𑀦𑀽’’𑀢𑀺 𑀆𑀲𑀗𑁆𑀓𑀦𑀻𑀬𑀧𑁆𑀧𑀤𑁂𑀲𑁂 𑀞𑀢𑁆𑀯𑀸, 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸, 𑀓𑀘𑁆𑀙𑀓𑀦𑁆𑀢𑀭𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸, 𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀢𑀺 ‘‘𑀪𑀺𑀓𑁆𑀔𑀁 𑀤𑀸𑀢𑀼𑀁 𑀯𑀸 𑀯𑀦𑁆𑀤𑀺𑀢𑀼𑀁 𑀯𑀸 𑀉𑀧𑀕𑀢𑁂 𑀫𑀦𑀼𑀲𑁆𑀲𑁂 ‘𑀤𑀻𑀖𑀸𑀬𑀼𑀓𑀸 𑀳𑁄𑀣𑀸’𑀢𑀺 𑀯𑀘𑀦𑀫𑀢𑁆𑀢𑁂𑀦𑀧𑀺 𑀫𑀸 𑀫𑁂 𑀓𑀫𑁆𑀫𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑁄 𑀅𑀳𑁄𑀲𑀻’’𑀢𑀺 𑀲𑀘𑁂 𑀧𑀦 ‘‘𑀅𑀚𑁆𑀚, 𑀪𑀦𑁆𑀢𑁂, 𑀓𑀺𑀁 𑀲𑀢𑁆𑀢𑀫𑀻, 𑀉𑀤𑀸𑀳𑀼 𑀅𑀝𑁆𑀞𑀫𑀻’’𑀢𑀺 𑀤𑀺𑀯𑀲𑀁 𑀧𑀼𑀘𑁆𑀙𑀦𑁆𑀢𑀺, 𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀲𑀘𑁂 𑀤𑀺𑀯𑀲𑀧𑀼𑀘𑁆𑀙𑀓𑀸 𑀦 𑀳𑁄𑀦𑁆𑀢𑀺, 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀁 ¶ 𑀕𑀸𑀫𑀤𑁆𑀯𑀸𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸𑀯 𑀬𑀸𑀢𑀺.

𑀲𑀻𑀳𑀴𑀤𑀻𑀧𑁂𑀬𑁂𑀯 𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀸 𑀧𑀜𑁆𑀜𑀸𑀲𑀪𑀺𑀓𑁆𑀔𑀽 𑀯𑀺𑀬 𑀘. 𑀢𑁂 𑀓𑀺𑀭 𑀯𑀲𑁆𑀲𑀽𑀧𑀦𑀸𑀬𑀺𑀓𑀉𑀧𑁄𑀲𑀣𑀤𑀺𑀯𑀲𑁂 𑀓𑀢𑀺𑀓𑀯𑀢𑁆𑀢𑀁 𑀅𑀓𑀁𑀲𑀼 𑁋 ‘‘𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦𑀸𑀮𑀧𑀺𑀲𑁆𑀲𑀸𑀫𑀸’’𑀢𑀺. 𑀕𑀸𑀫𑀜𑁆𑀘 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀸 𑀕𑀸𑀫𑀤𑁆𑀯𑀸𑀭𑁂 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀧𑀯𑀺𑀲𑀺𑀁𑀲𑀼, 𑀤𑀺𑀯𑀲𑁂 𑀧𑀼𑀘𑁆𑀙𑀺𑀢𑁂 𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀲𑀼𑀁, 𑀅𑀧𑀼𑀘𑁆𑀙𑀺𑀢𑁂 𑀕𑀸𑀫𑀤𑁆𑀯𑀸𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀫𑀁𑀲𑀼. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀦𑀺𑀝𑁆𑀞𑀼𑀪𑀦𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀚𑀸𑀦𑀺𑀁𑀲𑀼 ‘‘𑀅𑀚𑁆𑀚 𑀏𑀓𑁄 𑀆𑀕𑀢𑁄, 𑀅𑀚𑁆𑀚 𑀤𑁆𑀯𑁂’’𑀢𑀺. 𑀏𑀯𑀜𑁆𑀘 𑀘𑀺𑀦𑁆𑀢𑁂𑀲𑀼𑀁 ‘‘𑀓𑀺𑀁 𑀦𑀼 𑀔𑁄 𑀏𑀢𑁂 𑀅𑀫𑁆𑀳𑁂𑀳𑁂𑀯 𑀲𑀤𑁆𑀥𑀺𑀁 𑀦 𑀲𑀮𑁆𑀮𑀧𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑀜𑁆𑀜𑀫𑁆𑀧𑀺? 𑀬𑀤𑀺 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀦 𑀲𑀮𑁆𑀮𑀧𑀦𑁆𑀢𑀺, 𑀅𑀤𑁆𑀥𑀸 𑀯𑀺𑀯𑀸𑀤𑀚𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑁂 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀧𑀜𑁆𑀜𑀸𑀲𑀪𑀺𑀓𑁆𑀔𑀽𑀲𑀼 𑀯𑀲𑁆𑀲𑀁 𑀉𑀧𑀕𑀢𑁂𑀲𑀼 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀓𑁄𑀓𑀸𑀲𑁂 𑀦𑀸𑀤𑁆𑀤𑀲𑀁𑀲𑀼. 𑀢𑀢𑁄 𑀬𑁄 𑀢𑁂𑀲𑀼 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄, 𑀲𑁄 𑀏𑀯𑀫𑀸𑀳 𑁋 ‘‘𑀦, 𑀪𑁄, 𑀓𑀮𑀳𑀓𑀸𑀭𑀓𑀸𑀦𑀁 𑀯𑀲𑀦𑁄𑀓𑀸𑀲𑁄 𑀈𑀤𑀺𑀲𑁄 𑀳𑁄𑀢𑀺, 𑀲𑀼𑀲𑀫𑁆𑀫𑀝𑁆𑀞𑀁 𑀘𑁂𑀢𑀺𑀬𑀗𑁆𑀕𑀡𑀁 𑀩𑁄𑀥𑀺𑀬𑀗𑁆𑀕𑀡𑀁, 𑀲𑀼𑀦𑀺𑀓𑁆𑀔𑀺𑀢𑁆𑀢𑀸 𑀲𑀫𑁆𑀫𑀚𑁆𑀚𑀦𑀺𑀬𑁄, 𑀲𑀽𑀧𑀝𑁆𑀞𑀧𑀺𑀢𑀁 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬’’𑀦𑁆𑀢𑀺. 𑀢𑁂 𑀢𑀢𑁄𑀯 ¶ 𑀦𑀺𑀯𑀢𑁆𑀢𑀸. 𑀢𑁂 𑀪𑀺𑀓𑁆𑀔𑀽 𑀅𑀦𑁆𑀢𑁄𑀢𑁂𑀫𑀸𑀲𑁂𑀬𑁂𑀯 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀼𑀁.

𑀏𑀯𑀁 𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀪𑀺𑀓𑁆𑀔𑀽 𑀯𑀺𑀬 𑀘 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 𑀧𑀢𑁆𑀯𑀸, 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸, 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀬𑀢𑁆𑀣 𑀲𑀼𑀭𑀸𑀲𑁄𑀡𑁆𑀟𑀥𑀼𑀢𑁆𑀢𑀸𑀤𑀬𑁄 𑀓𑀮𑀳𑀓𑀸𑀭𑀓𑀸 𑀘𑀡𑁆𑀟𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀦𑀢𑁆𑀣𑀺, 𑀢𑀁 ¶ 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀢𑁆𑀣 𑀘 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀦 𑀢𑀼𑀭𑀺𑀢𑀢𑀼𑀭𑀺𑀢𑁄 𑀯𑀺𑀬 𑀚𑀯𑁂𑀦 𑀕𑀘𑁆𑀙𑀢𑀺, 𑀚𑀯𑀦𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀁 𑀦𑀸𑀫 𑀦𑀢𑁆𑀣𑀺. 𑀯𑀺𑀲𑀫𑀪𑀽𑀫𑀺𑀪𑀸𑀕𑀧𑁆𑀧𑀢𑁆𑀢𑀁 ¶ 𑀧𑀦 𑀉𑀤𑀓𑀪𑀭𑀺𑀢𑀲𑀓𑀝𑀫𑀺𑀯 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀦𑀼𑀖𑀭𑀁 𑀧𑀯𑀺𑀝𑁆𑀞𑁄 𑀘 𑀤𑀸𑀢𑀼𑀓𑀸𑀫𑀁 𑀅𑀤𑀸𑀢𑀼𑀓𑀸𑀫𑀁 𑀯𑀸 𑀲𑀮𑁆𑀮𑀓𑁆𑀔𑁂𑀢𑀼𑀁 𑀢𑀤𑀦𑀼𑀭𑀽𑀧𑀁 𑀓𑀸𑀮𑀁 𑀆𑀕𑀫𑁂𑀦𑁆𑀢𑁄 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸, 𑀧𑀢𑀺𑀭𑀽𑀧𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸, 𑀅𑀓𑁆𑀔𑀩𑁆𑀪𑀜𑁆𑀚𑀦𑀯𑀡𑀸𑀮𑁂𑀧𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬…𑀧𑁂… 𑀪𑀼𑀢𑁆𑀢𑀸𑀯𑀻 𑀘 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸, 𑀫𑀼𑀳𑀼𑀢𑁆𑀢𑀁 𑀪𑀢𑁆𑀢𑀓𑀺𑀮𑀫𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸, 𑀬𑀣𑀸 𑀧𑀼𑀭𑁂 𑀪𑀢𑁆𑀢𑀁, 𑀏𑀯𑀁 𑀧𑀘𑁆𑀙𑀸 𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀳𑀭𑀢𑀺 𑀘𑁂𑀯 𑀧𑀘𑁆𑀘𑀸𑀳𑀭𑀢𑀺 𑀘𑀸𑀢𑀺. 𑀏𑀯𑀫𑁂𑀢𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀏𑀢𑀁 𑀧𑀽𑀭𑁂𑀦𑁆𑀢𑁄 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀞𑀫𑀯𑀬𑁂 𑀏𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀧𑀞𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀫𑀭𑀡𑀲𑀫𑀬𑁂 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀫𑀭𑀡𑀲𑀫𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀼𑀡𑀸𑀢𑀺, 𑀅𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀦𑁄 𑀘𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀣 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺; 𑀲𑁂𑀬𑁆𑀬𑀣𑀸𑀧𑀺 𑁋 𑀣𑁂𑀭𑁄 𑀩𑀸𑀳𑀺𑀬𑁄, 𑀫𑀳𑀸𑀧𑀜𑁆𑀜𑁄 𑀯𑀸 𑀳𑁄𑀢𑀺; 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄.

𑀅𑀬𑀁 𑀧𑀦 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸, 𑀆𑀭𑀜𑁆𑀜𑀺𑀓𑁄 𑀳𑀼𑀢𑁆𑀯𑀸, 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀢𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸, 𑀓𑀸𑀮𑀁 𑀓𑀢𑁆𑀯𑀸, 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀓𑀼𑀲𑀮𑀸 𑀇𑀢𑁆𑀣𑀺𑀬𑁄 𑀢𑀤𑀳𑁂𑀯 𑀕𑀩𑁆𑀪𑀲𑀡𑁆𑀞𑀸𑀦𑀁 𑀚𑀸𑀦𑀦𑁆𑀢𑀺, 𑀲𑀸 𑀘 𑀢𑀸𑀲𑀫𑀜𑁆𑀜𑀢𑀭𑀸 ¶ , 𑀢𑀲𑁆𑀫𑀸 𑀢𑀁 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀁 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺. 𑀥𑀫𑁆𑀫𑀢𑀸 𑀏𑀲𑀸, 𑀬𑀁 𑀧𑀼𑀜𑁆𑀜𑀯𑀦𑁆𑀢𑁂 𑀲𑀢𑁆𑀢𑁂 𑀕𑀩𑁆𑀪𑁂 𑀉𑀧𑁆𑀧𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 ¶ 𑀕𑀩𑁆𑀪𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀢𑀲𑁆𑀫𑀸 𑀭𑀸𑀚𑀸 𑀢𑀲𑁆𑀲𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀢𑀢𑁄 𑀧𑀪𑀼𑀢𑀺 𑀦𑀸𑀘𑁆𑀘𑀼𑀡𑁆𑀳𑀁 𑀓𑀺𑀜𑁆𑀘𑀺 𑀅𑀚𑁆𑀛𑁄𑀳𑀭𑀺𑀢𑀼𑀁 𑀮𑀪𑀢𑀺, 𑀦𑀸𑀢𑀺𑀲𑀻𑀢𑀁, 𑀦𑀸𑀢𑀺𑀅𑀫𑁆𑀩𑀺𑀮𑀁, 𑀦𑀸𑀢𑀺𑀮𑁄𑀡𑀁, 𑀦𑀸𑀢𑀺𑀓𑀝𑀼𑀓𑀁, 𑀦𑀸𑀢𑀺𑀢𑀺𑀢𑁆𑀢𑀓𑀁. 𑀅𑀘𑁆𑀘𑀼𑀡𑁆𑀳𑁂 𑀳𑀺 𑀫𑀸𑀢𑀭𑀸 𑀅𑀚𑁆𑀛𑁄𑀳𑀝𑁂 𑀕𑀩𑁆𑀪𑀲𑁆𑀲 𑀮𑁄𑀳𑀓𑀼𑀫𑁆𑀪𑀺𑀯𑀸𑀲𑁄 𑀯𑀺𑀬 𑀳𑁄𑀢𑀺, 𑀅𑀢𑀺𑀲𑀻𑀢𑁂 𑀮𑁄𑀓𑀦𑁆𑀢𑀭𑀺𑀓𑀯𑀸𑀲𑁄 𑀯𑀺𑀬, 𑀅𑀘𑁆𑀘𑀫𑁆𑀩𑀺𑀮𑀮𑁄𑀡𑀓𑀝𑀼𑀓𑀢𑀺𑀢𑁆𑀢𑀓𑁂𑀲𑀼 𑀪𑀼𑀢𑁆𑀢𑁂𑀲𑀼 𑀲𑀢𑁆𑀣𑁂𑀦 𑀨𑀸𑀮𑁂𑀢𑁆𑀯𑀸 𑀅𑀫𑁆𑀩𑀺𑀮𑀸𑀤𑀻𑀳𑀺 𑀲𑀺𑀢𑁆𑀢𑀸𑀦𑀺 𑀯𑀺𑀬 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀅𑀗𑁆𑀕𑀸𑀦𑀺 𑀢𑀺𑀩𑁆𑀩𑀯𑁂𑀤𑀦𑀸𑀦𑀺 𑀳𑁄𑀦𑁆𑀢𑀺. 𑀅𑀢𑀺𑀘𑀗𑁆𑀓𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑀢𑁄𑀧𑀺 𑀦𑀁 𑀦𑀺𑀯𑀸𑀭𑁂𑀦𑁆𑀢𑀺 𑁋 ‘‘𑀓𑀼𑀘𑁆𑀙𑀺𑀕𑀢𑀲𑁆𑀲 𑀲𑀜𑁆𑀘𑀮𑀦𑀤𑀼𑀓𑁆𑀔𑀁 𑀫𑀸 𑀅𑀳𑁄𑀲𑀻’’𑀢𑀺. 𑀫𑀼𑀤𑀼𑀓𑀢𑁆𑀣𑀭𑀡𑀢𑁆𑀣𑀢𑀸𑀬 𑀪𑀽𑀫𑀺𑀬𑀁 𑀘𑀗𑁆𑀓𑀫𑀦𑀸𑀤𑀻𑀦𑀺 𑀫𑀢𑁆𑀢𑀸𑀬 𑀓𑀸𑀢𑀼𑀁 𑀮𑀪𑀢𑀺, 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀁 𑀲𑀸𑀤𑀼𑀲𑀧𑁆𑀧𑀸𑀬𑀁 𑀅𑀦𑁆𑀦𑀧𑀸𑀦𑀁 𑀮𑀪𑀢𑀺. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀯 𑀦𑀁 𑀘𑀗𑁆𑀓𑀫𑀸𑀧𑁂𑀦𑁆𑀢𑀺, 𑀦𑀺𑀲𑀻𑀤𑀸𑀧𑁂𑀦𑁆𑀢𑀺, 𑀯𑀼𑀝𑁆𑀞𑀸𑀧𑁂𑀦𑁆𑀢𑀺.

𑀲𑀸 ¶ 𑀏𑀯𑀁 𑀧𑀭𑀺𑀳𑀭𑀺𑀬𑀫𑀸𑀦𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀲𑀽𑀢𑀺𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺 𑀧𑀓𑁆𑀓𑀢𑁂𑀮𑀫𑀤𑁆𑀤𑀺𑀢𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀺𑀲𑀤𑀺𑀲𑀁 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀽𑀧𑁂𑀢𑀁. 𑀢𑀢𑁄 𑀦𑀁 𑀧𑀜𑁆𑀘𑀫𑀤𑀺𑀯𑀲𑁂 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁, 𑀭𑀸𑀚𑀸 𑀢𑀼𑀝𑁆𑀞𑁄 𑀙𑀲𑀝𑁆𑀞𑀺𑀬𑀸 𑀥𑀸𑀢𑀻𑀳𑀺 𑀉𑀧𑀝𑁆𑀞𑀸𑀧𑁂𑀲𑀺. 𑀲𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀯𑀟𑁆𑀠𑀫𑀸𑀦𑁄 𑀦 𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀢𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀫𑁂𑀯 𑀲𑀫𑀸𑀦𑀁 𑀭𑀸𑀚𑀸 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺, 𑀯𑀺𑀯𑀺𑀥𑀦𑀸𑀝𑀓𑀸𑀦𑀺 𑀘𑀲𑁆𑀲 𑀉𑀧𑀝𑁆𑀞𑀸𑀧𑁂𑀲𑀺. 𑀅𑀪𑀺𑀲𑀺𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀸𑀫𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀻𑀲𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼. 𑀚𑀫𑁆𑀩𑀼𑀤𑀻𑀧𑁂 𑀳𑀺 𑀧𑀼𑀩𑁆𑀩𑁂 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺 𑀧𑀭𑀺𑀳𑀸𑀬𑀦𑁆𑀢𑀸𑀦𑀺 𑀲𑀝𑁆𑀞𑀺 𑀅𑀳𑁂𑀲𑀼𑀁, 𑀢𑀢𑁄 𑀧𑀭𑀺𑀳𑀸𑀬𑀦𑁆𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀁, 𑀲𑀩𑁆𑀩𑀧𑀭𑀺𑀳𑀸𑀬𑀦𑀓𑀸𑀮𑁂 𑀧𑀦 𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀅𑀬𑀜𑁆𑀘 𑀩𑁆𑀭𑀳𑁆𑀫𑀤𑀢𑁆𑀢𑁄 𑀲𑀩𑁆𑀩𑀧𑀭𑀺𑀳𑀸𑀬𑀦𑀓𑀸𑀮𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀲𑁆𑀲 𑀯𑀻𑀲𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀯𑀻𑀲𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 ¶ , 𑀯𑀻𑀲𑀢𑀺 𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑁋 𑀑𑀭𑁄𑀥𑀸 𑀘 𑀦𑀸𑀝𑀓𑀺𑀢𑁆𑀣𑀺𑀬𑁄 𑀘, 𑀯𑀻𑀲𑀢𑀺 𑀅𑀫𑀘𑁆𑀘𑀲𑀳𑀲𑁆𑀲𑀸𑀦𑀺. 𑀲𑁄 𑀫𑀳𑀸𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁄 𑀏𑀯 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄, 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀬𑀲𑁆𑀫𑀸 𑀧𑀦 𑀅𑀪𑀺𑀲𑀺𑀢𑁆𑀢𑀭𑀜𑁆𑀜𑀸 𑀦𑀸𑀫 𑀅𑀯𑀲𑁆𑀲𑀁 𑀅𑀝𑁆𑀝𑀓𑀭𑀡𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀏𑀓𑀤𑀺𑀯𑀲𑀁 𑀧𑀕𑁂𑀯 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀢𑀢𑁆𑀣 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁 𑀅𑀓𑀁𑀲𑀼. 𑀲𑁄 ‘‘𑀅𑀬𑀁 𑀲𑀤𑁆𑀤𑁄 𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀧𑀸𑀲𑀸𑀤𑀢𑀮𑀁 ¶ 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄 𑀦𑀸𑀲𑀓𑁆𑀔𑀺 𑀅𑀧𑁆𑀧𑁂𑀢𑀼𑀁, 𑀭𑀚𑁆𑀚𑀯𑀺𑀓𑁆𑀔𑁂𑀧𑁂𑀦 𑀲𑀫𑀸𑀧𑀢𑁆𑀢𑀺 𑀧𑀭𑀺𑀳𑀻𑀦𑀸. 𑀢𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀭𑀚𑁆𑀚𑀁 𑀯𑀭𑀁, 𑀉𑀤𑀸𑀳𑀼 𑀲𑀫𑀡𑀥𑀫𑁆𑀫𑁄’’𑀢𑀺. 𑀢𑀢𑁄 ‘‘𑀭𑀚𑁆𑀚𑀲𑀼𑀔𑀁 𑀧𑀭𑀺𑀢𑁆𑀢𑀁 𑀅𑀦𑁂𑀓𑀸𑀤𑀻𑀦𑀯𑀁, 𑀲𑀫𑀡𑀥𑀫𑁆𑀫𑀲𑀼𑀔𑀁 𑀧𑀦 𑀯𑀺𑀧𑀼𑀮𑀫𑀦𑁂𑀓𑀸𑀦𑀺𑀲𑀁𑀲𑀁 𑀉𑀢𑁆𑀢𑀫𑀧𑀼𑀭𑀺𑀲𑀲𑁂𑀯𑀺𑀢𑀜𑁆𑀘𑀸’’𑀢𑀺 𑀜𑀢𑁆𑀯𑀸 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀇𑀫𑀁 𑀭𑀚𑁆𑀚𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀦𑀼𑀲𑀸𑀲, 𑀫𑀸 𑀔𑁄 𑀅𑀥𑀫𑁆𑀫𑀓𑀸𑀭𑀁 𑀅𑀓𑀸𑀲𑀻’’𑀢𑀺 𑀲𑀩𑁆𑀩𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀢𑀺, 𑀦 𑀓𑁄𑀘𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀪𑀢𑀺 𑀅𑀜𑁆𑀜𑀢𑁆𑀭 𑀫𑀼𑀔𑀥𑁄𑀯𑀦𑀤𑀦𑁆𑀢𑀓𑀝𑁆𑀞𑀤𑀸𑀬𑀓𑀪𑀢𑁆𑀢𑀦𑀻𑀳𑀸𑀭𑀓𑀸𑀤𑀻𑀳𑀺.

𑀢𑀢𑁄 𑀅𑀤𑁆𑀥𑀫𑀸𑀲𑀫𑀢𑁆𑀢𑁂 𑀯𑀻𑀢𑀺𑀓𑁆𑀓𑀦𑁆𑀢𑁂 𑀫𑀳𑁂𑀲𑀻 𑀧𑀼𑀘𑁆𑀙𑀺 ‘‘𑀭𑀸𑀚𑀸 𑀉𑀬𑁆𑀬𑀸𑀦𑀕𑀫𑀦𑀩𑀮𑀤𑀲𑁆𑀲𑀦𑀦𑀸𑀝𑀓𑀸𑀤𑀻𑀲𑀼 𑀓𑀢𑁆𑀣𑀘𑀺 𑀦 𑀤𑀺𑀲𑁆𑀲𑀢𑀺, 𑀓𑀼𑀳𑀺𑀁 𑀕𑀢𑁄’’𑀢𑀺? 𑀢𑀲𑁆𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀸 𑀅𑀫𑀘𑁆𑀘𑀲𑁆𑀲 𑀧𑀸𑀳𑁂𑀲𑀺 ‘‘𑀭𑀚𑁆𑀚𑁂 𑀧𑀝𑀺𑀘𑁆𑀙𑀺𑀢𑁂 𑀅𑀳𑀫𑁆𑀧𑀺 𑀧𑀝𑀺𑀘𑁆𑀙𑀺𑀢𑀸 𑀳𑁄𑀫𑀺, 𑀏𑀢𑀼 𑀫𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑀽’’𑀢𑀺. 𑀲𑁄 𑀉𑀪𑁄 𑀓𑀡𑁆𑀡𑁂 𑀣𑀓𑁂𑀢𑁆𑀯𑀸 ‘‘𑀅𑀲𑀯𑀦𑀻𑀬𑀫𑁂𑀢’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀲𑀸 𑀧𑀼𑀦𑀧𑀺 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑁂𑀲𑁂𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀁 𑀢𑀚𑁆𑀚𑀸𑀧𑁂𑀲𑀺 𑁋 ‘‘𑀬𑀤𑀺 𑀦 𑀓𑀭𑁄𑀲𑀺, 𑀞𑀸𑀦𑀸𑀧𑀺 𑀢𑁂 𑀘𑀸𑀯𑁂𑀫𑀺, 𑀚𑀻𑀯𑀺𑀢𑀸𑀧𑀺 𑀯𑁄𑀭𑁄𑀧𑁂𑀫𑀻’’𑀢𑀺. 𑀲𑁄 𑀪𑀻𑀢𑁄 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀤𑀴𑁆𑀳𑀦𑀺𑀘𑁆𑀙𑀬𑁄, 𑀓𑀤𑀸𑀘𑀺 𑀏𑀯𑀫𑁆𑀧𑀺 𑀓𑀸𑀭𑀸𑀧𑁂𑀬𑁆𑀬𑀸’’𑀢𑀺 𑀏𑀓𑀤𑀺𑀯𑀲𑀁 𑀭𑀳𑁄 𑀕𑀦𑁆𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀺𑀭𑀺𑀲𑀬𑀦𑁂 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀧𑀼𑀜𑁆𑀜𑀯𑀢𑀻 ¶ 𑀲𑀼𑀔𑀲𑀫𑁆𑀨𑀲𑁆𑀲𑀸. 𑀲𑁄 𑀢𑀲𑁆𑀲𑀸 𑀲𑀫𑁆𑀨𑀲𑁆𑀲𑀭𑀸𑀕𑁂𑀦 𑀭𑀢𑁆𑀢𑁄 𑀢𑀢𑁆𑀣 𑀅𑀪𑀺𑀓𑁆𑀔𑀡𑀁 𑀲𑀗𑁆𑀓𑀺𑀢𑀲𑀗𑁆𑀓𑀺𑀢𑁄𑀯 𑀅𑀕𑀫𑀸𑀲𑀺. 𑀅𑀦𑀼𑀓𑁆𑀓𑀫𑁂𑀦 ¶ 𑀅𑀢𑁆𑀢𑀦𑁄 𑀖𑀭𑀲𑀸𑀫𑀺𑀓𑁄 𑀯𑀺𑀬 𑀦𑀺𑀩𑁆𑀩𑀺𑀲𑀗𑁆𑀓𑁄 𑀧𑀯𑀺𑀲𑀺𑀢𑀼𑀫𑀸𑀭𑀤𑁆𑀥𑁄.

𑀢𑀢𑁄 𑀭𑀸𑀚𑀫𑀦𑀼𑀲𑁆𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀦 𑀲𑀤𑁆𑀤𑀳𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀦𑀺𑀮𑀻𑀦𑁄 𑀲𑀬𑀫𑁂𑀯 𑀤𑀺𑀲𑁆𑀯𑀸 𑀲𑀩𑁆𑀩𑀸𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀢𑁂 𑁋 ‘‘𑀅𑀬𑀁 𑀭𑀸𑀚𑀸𑀧𑀭𑀸𑀥𑀺𑀓𑁄 𑀳𑀢𑁆𑀣𑀘𑁆𑀙𑁂𑀤𑀁 𑀅𑀭𑀳𑀢𑀺, 𑀧𑀸𑀤𑀘𑁆𑀙𑁂𑀤𑀁 𑀅𑀭𑀳𑀢𑀻’’𑀢𑀺 𑀬𑀸𑀯 𑀲𑀽𑀮𑁂 𑀉𑀢𑁆𑀢𑀸𑀲𑀦𑀁, 𑀢𑀸𑀯 𑀲𑀩𑁆𑀩𑀓𑀫𑁆𑀫𑀓𑀸𑀭𑀡𑀸𑀦𑀺 𑀦𑀺𑀤𑁆𑀤𑀺𑀲𑀺𑀁𑀲𑀼. 𑀭𑀸𑀚𑀸 𑁋 ‘‘𑀏𑀢𑀲𑁆𑀲 𑀯𑀥𑀩𑀦𑁆𑀥𑀦𑀢𑀸𑀴𑀦𑁂 𑀫𑀬𑁆𑀳𑀁 𑀯𑀺𑀳𑀺𑀁𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂 𑀧𑀸𑀡𑀸𑀢𑀺𑀧𑀸𑀢𑁄 𑀪𑀯𑁂𑀬𑁆𑀬, 𑀥𑀦𑀳𑀭𑀡𑁂 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀅𑀮𑀁 𑀏𑀯𑀭𑀽𑀧𑁂𑀳𑀺 𑀓𑀢𑁂𑀳𑀺, 𑀇𑀫𑀁 𑀫𑀫 𑀭𑀚𑁆𑀚𑀸 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 𑀢𑀁 𑀦𑀺𑀩𑁆𑀩𑀺𑀲𑀬𑀁 𑀅𑀓𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀥𑀦𑀲𑀸𑀭𑀜𑁆𑀘 𑀧𑀼𑀢𑁆𑀢𑀤𑀸𑀭𑀜𑁆𑀘 𑀕𑀳𑁂𑀢𑁆𑀯𑀸 𑀧𑀭𑀯𑀺𑀲𑀬𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀭𑀸𑀚𑀸 𑀲𑀼𑀢𑁆𑀯𑀸 ‘‘𑀓𑀺𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀇𑀘𑁆𑀙𑀸𑀫𑀺 𑀢𑀁 𑀉𑀧𑀝𑁆𑀞𑀸𑀢𑀼’’𑀦𑁆𑀢𑀺. 𑀲𑁄 𑀢𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀫𑀘𑁆𑀘𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀮𑀤𑁆𑀥𑀯𑀺𑀲𑁆𑀲𑀸𑀲𑁄 𑀢𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀭𑀸𑀚, 𑀅𑀫𑀓𑁆𑀔𑀺𑀓𑀫𑀥𑀼𑀁 ¶ 𑀧𑀲𑁆𑀲𑀸𑀫𑀺, 𑀢𑀁 𑀔𑀸𑀤𑀦𑁆𑀢𑁄 𑀦𑀢𑁆𑀣𑀻’’𑀢𑀺. 𑀭𑀸𑀚𑀸 ‘‘𑀓𑀺𑀁 𑀏𑀢𑀁 𑀉𑀧𑁆𑀧𑀡𑁆𑀟𑁂𑀢𑀼𑀓𑀸𑀫𑁄 𑀪𑀡𑀢𑀻’’𑀢𑀺 𑀦 𑀲𑀼𑀡𑀸𑀢𑀺. 𑀲𑁄 𑀅𑀦𑁆𑀢𑀭𑀁 𑀮𑀪𑀺𑀢𑁆𑀯𑀸 𑀧𑀼𑀦𑀧𑀺 𑀲𑀼𑀝𑁆𑀞𑀼𑀢𑀭𑀁 𑀯𑀡𑁆𑀡𑁂𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀫𑀁 𑀦𑁂𑀢𑁆𑀯𑀸 𑀫𑀸𑀭𑁂𑀢𑀼𑀓𑀸𑀫𑁄𑀲𑀻’’𑀢𑀺 𑀆𑀳. 𑀲𑁄 ‘‘𑀫𑀸, 𑀤𑁂𑀯, 𑀏𑀯𑀁 𑀅𑀯𑀘, 𑀬𑀤𑀺 𑀦 𑀲𑀤𑁆𑀤𑀳𑀲𑀺, 𑀫𑀦𑀼𑀲𑁆𑀲𑁂 𑀧𑁂𑀲𑁂𑀳𑀻’’𑀢𑀺. 𑀲𑁄 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀕𑁄𑀧𑀼𑀭𑀁 𑀔𑀡𑀺𑀢𑁆𑀯𑀸 𑀭𑀜𑁆𑀜𑁄 𑀲𑀬𑀦𑀖𑀭𑁂 𑀉𑀝𑁆𑀞𑀳𑀺𑀁𑀲𑀼.

𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑀺𑀲𑁆𑀲 𑀆𑀕𑀢𑀸𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀘𑁄𑀭𑀸 𑀫𑀬𑀁, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀢𑁂𑀲𑀁 𑀥𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀫𑀸 𑀧𑀼𑀦 𑀏𑀯𑀫𑀓𑀢𑁆𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀧𑀼𑀦𑀧𑀺 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀢𑀣𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀲𑀻𑀮𑀯𑀸 𑀭𑀸𑀚𑀸’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀻𑀫𑀦𑁆𑀢𑀭𑁂 𑀏𑀓𑀁 𑀦𑀕𑀭𑀁 𑀉𑀧𑀕𑀫𑁆𑀫 𑀢𑀢𑁆𑀣 𑀅𑀫𑀘𑁆𑀘𑀲𑁆𑀲 𑀧𑀸𑀳𑁂𑀲𑀺 ‘‘𑀦𑀕𑀭𑀁 𑀯𑀸 𑀫𑁂 𑀤𑁂𑀳𑀺 𑀬𑀼𑀤𑁆𑀥𑀁 𑀯𑀸’’𑀢𑀺. 𑀲𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑀸𑀧𑁂𑀲𑀺 ‘‘𑀆𑀡𑀸𑀧𑁂𑀢𑀼 𑀤𑁂𑀯𑁄 𑀓𑀺𑀁 𑀬𑀼𑀚𑁆𑀛𑀸𑀫𑀺, 𑀉𑀤𑀸𑀳𑀼 𑀦𑀕𑀭𑀁 𑀤𑁂𑀫𑀻’’𑀢𑀺. 𑀭𑀸𑀚𑀸 ‘‘𑀦 𑀬𑀼𑀚𑁆𑀛𑀺𑀢𑀩𑁆𑀩𑀁, 𑀦𑀕𑀭𑀁 𑀤𑀢𑁆𑀯𑀸 𑀇𑀥𑀸𑀕𑀘𑁆𑀙𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀧𑀝𑀺𑀭𑀸𑀚𑀸𑀧𑀺 𑀢𑀁 𑀦𑀕𑀭𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀦𑀕𑀭𑁂𑀲𑀼𑀧𑀺 ¶ 𑀢𑀣𑁂𑀯 𑀤𑀽𑀢𑀁 𑀧𑀸𑀳𑁂𑀲𑀺. 𑀢𑁂𑀧𑀺 𑀅𑀫𑀘𑁆𑀘𑀸 𑀢𑀣𑁂𑀯 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 ‘‘𑀦 𑀬𑀼𑀚𑁆𑀛𑀺𑀢𑀩𑁆𑀩𑀁, 𑀇𑀥𑀸𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀸 𑀩𑀸𑀭𑀸𑀡𑀲𑀺𑀁 𑀆𑀕𑀫𑀁𑀲𑀼.

𑀢𑀢𑁄 𑀅𑀫𑀘𑁆𑀘𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀢𑁂𑀦 𑀲𑀳 𑀬𑀼𑀚𑁆𑀛𑀸𑀫𑀸’’𑀢𑀺. 𑀭𑀸𑀚𑀸 𑁋 ‘‘𑀫𑀫 𑀧𑀸𑀡𑀸𑀢𑀺𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸𑀭𑁂𑀲𑀺. 𑀅𑀫𑀘𑁆𑀘𑀸 𑁋 ‘‘𑀫𑀬𑀁, 𑀫𑀳𑀸𑀭𑀸𑀚, 𑀢𑀁 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 ¶ 𑀇𑀥𑁂𑀯 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀦𑀸𑀦𑀸𑀉𑀧𑀸𑀬𑁂𑀳𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀏𑀳𑀺 𑀫𑀳𑀸𑀭𑀸𑀚𑀸’’𑀢𑀺 𑀕𑀦𑁆𑀢𑀼𑀁 𑀆𑀭𑀤𑁆𑀥𑀸. 𑀭𑀸𑀚𑀸 ‘‘𑀲𑀘𑁂 𑀲𑀢𑁆𑀢𑀫𑀸𑀭𑀡𑀧𑁆𑀧𑀳𑀭𑀡𑀯𑀺𑀮𑀼𑀫𑁆𑀧𑀦𑀓𑀫𑁆𑀫𑀁 𑀦 𑀓𑀭𑁄𑀣, 𑀕𑀘𑁆𑀙𑀸𑀫𑀻’’𑀢𑀺 𑀪𑀡𑀢𑀺. 𑀅𑀫𑀘𑁆𑀘𑀸 ‘‘𑀦, 𑀤𑁂𑀯, 𑀓𑀭𑁄𑀫, 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀮𑀸𑀧𑁂𑀫𑀸’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀖𑀝𑁂𑀲𑀼 𑀤𑀻𑀧𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀢𑁆𑀢𑀺𑀁 𑀕𑀘𑁆𑀙𑀺𑀁𑀲𑀼. 𑀧𑀝𑀺𑀭𑀸𑀚𑀸 𑀢𑀁 𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀲𑀫𑀻𑀧𑁂 𑀦𑀕𑀭𑀁 𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀦𑁆𑀢𑀺 𑀭𑀢𑁆𑀢𑀺𑀁 𑀲𑀦𑁆𑀦𑀸𑀳𑀁 𑀫𑁄𑀘𑀸𑀧𑁂𑀢𑁆𑀯𑀸 𑀧𑀫𑀢𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦. 𑀢𑀢𑁄 𑀅𑀫𑀘𑁆𑀘𑀸 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀧𑀝𑀺𑀭𑀜𑁆𑀜𑁄 𑀔𑀦𑁆𑀥𑀸𑀯𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀖𑀝𑁂𑀳𑀺 𑀤𑀻𑀧𑁂 𑀦𑀺𑀳𑀭𑀸𑀧𑁂𑀢𑁆𑀯𑀸 𑀏𑀓𑀧𑀚𑁆𑀚𑁄𑀢𑀸𑀬 𑀲𑁂𑀦𑀸𑀬 𑀲𑀤𑁆𑀤𑀁 𑀅𑀓𑀁𑀲𑀼. 𑀧𑀝𑀺𑀭𑀜𑁆𑀜𑁄 𑀅𑀫𑀘𑁆𑀘𑁄 𑀫𑀳𑀸𑀩𑀮𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀅𑀢𑁆𑀢𑀦𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺 𑀅𑀫𑀓𑁆𑀔𑀺𑀓𑀫𑀥𑀼𑀁 𑀔𑀸𑀤𑀸𑀳𑀻’’𑀢𑀺 𑀫𑀳𑀸𑀲𑀤𑁆𑀤𑀁 𑀅𑀓𑀸𑀲𑀺. 𑀢𑀣𑀸 𑀤𑀼𑀢𑀺𑀬𑁄𑀧𑀺, 𑀢𑀢𑀺𑀬𑁄𑀧𑀺. 𑀧𑀝𑀺𑀭𑀸𑀚𑀸 𑀢𑁂𑀦 𑀲𑀤𑁆𑀤𑁂𑀦 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 ¶ 𑀪𑀬𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀺. 𑀉𑀓𑁆𑀓𑀼𑀝𑁆𑀞𑀺𑀲𑀢𑀸𑀦𑀺 𑀧𑀯𑀢𑁆𑀢𑀺𑀁𑀲𑀼. 𑀲𑁄 ‘‘𑀧𑀭𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀅𑀫𑀺𑀢𑁆𑀢𑀳𑀢𑁆𑀣𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀢𑀁 𑀢𑀁 𑀯𑀺𑀧𑁆𑀧𑀮𑀧𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀥𑀫𑁆𑀫𑀺𑀓𑁄 𑀭𑀸𑀚𑀸, 𑀉𑀧𑀭𑁄𑀥𑀁 𑀦 𑀓𑀭𑁂𑀬𑁆𑀬, 𑀕𑀦𑁆𑀢𑁆𑀯𑀸 𑀔𑀫𑀸𑀧𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 ‘‘𑀔𑀫, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀅𑀧𑀭𑀸𑀥’’𑀦𑁆𑀢𑀺 𑀆𑀳. 𑀭𑀸𑀚𑀸 𑀢𑀁 𑀑𑀯𑀤𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀔𑀫𑀸𑀫𑀺 𑀢𑁂’’𑀢𑀺 𑀆𑀳. 𑀲𑁄 𑀭𑀜𑁆𑀜𑀸 𑀏𑀯𑀁 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀫𑀻𑀧𑁂𑀬𑁂𑀯 𑀚𑀦𑀧𑀤𑁂 𑀭𑀚𑁆𑀚𑀁 𑀮𑀪𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁.

𑀅𑀣 𑀩𑁆𑀭𑀳𑁆𑀫𑀤𑀢𑁆𑀢𑁄 𑀤𑁆𑀯𑁂𑀧𑀺 𑀲𑁂𑀦𑀸 𑀲𑀫𑁆𑀫𑁄𑀤𑀫𑀸𑀦𑀸 𑀏𑀓𑀢𑁄 𑀞𑀺𑀢𑀸 𑀤𑀺𑀲𑁆𑀯𑀸 ‘‘𑀫𑀫𑁂𑀓𑀲𑁆𑀲 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀸𑀬 𑀅𑀲𑁆𑀫𑀺𑀁 𑀚𑀦𑀓𑀸𑀬𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀩𑀺𑀦𑁆𑀤𑀼 ¶ 𑀦 𑀉𑀧𑁆𑀧𑀦𑁆𑀦𑀁. 𑀅𑀳𑁄 𑀲𑀸𑀥𑀼, 𑀅𑀳𑁄 𑀲𑀼𑀝𑁆𑀞𑀼, 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼, 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀛𑀸 𑀳𑁄𑀦𑁆𑀢𑀽’’𑀢𑀺 𑀫𑁂𑀢𑁆𑀢𑀸𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸, 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸, 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀲𑀬𑀫𑁆𑀪𑀼𑀢𑀁 𑀧𑀸𑀧𑀼𑀡𑀺. 𑀢𑀁 𑀫𑀕𑁆𑀕𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀲𑀼𑀔𑀺𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀁 𑀅𑀫𑀘𑁆𑀘𑀸 𑀧𑀡𑀺𑀧𑀸𑀢𑀁 𑀓𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀬𑀸𑀦𑀓𑀸𑀮𑁄, 𑀫𑀳𑀸𑀭𑀸𑀚, 𑀯𑀺𑀚𑀺𑀢𑀩𑀮𑀓𑀸𑀬𑀲𑁆𑀲 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀧𑀭𑀸𑀚𑀺𑀢𑀩𑀮𑀓𑀸𑀬𑀲𑁆𑀲 𑀪𑀢𑁆𑀢𑀧𑀭𑀺𑀩𑁆𑀩𑀬𑁄 𑀤𑀸𑀢𑀩𑁆𑀩𑁄’’𑀢𑀺. 𑀲𑁄 𑀆𑀳 𑁋 ‘‘𑀦𑀸𑀳𑀁, 𑀪𑀡𑁂, 𑀭𑀸𑀚𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫𑀸𑀳’’𑀦𑁆𑀢𑀺. 𑀓𑀺𑀁 𑀤𑁂𑀯𑁄 𑀪𑀡𑀢𑀺, 𑀦 𑀏𑀤𑀺𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑁄𑀦𑁆𑀢𑀻𑀢𑀺? 𑀓𑀻𑀤𑀺𑀲𑀸, 𑀪𑀡𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀢𑀺? 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀤𑁆𑀯𑀗𑁆𑀕𑀼𑀮𑀓𑁂𑀲𑀫𑀲𑁆𑀲𑀼 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀬𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺. 𑀲𑁄 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀲𑀻𑀲𑀁 𑀧𑀭𑀸𑀫𑀲𑀺, 𑀢𑀸𑀯𑀤𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀧𑀩𑁆𑀩𑀚𑀺𑀢𑀯𑁂𑀲𑁄 𑀧𑀸𑀢𑀼𑀭𑀳𑁄𑀲𑀺, 𑀤𑁆𑀯𑀗𑁆𑀕𑀼𑀮𑀓𑁂𑀲𑀫𑀲𑁆𑀲𑀼 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑀲𑀤𑀺𑀲𑁄 𑀅𑀳𑁄𑀲𑀺. 𑀲𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑁂 𑀦𑀺𑀲𑀻𑀤𑀺. 𑀅𑀫𑀘𑁆𑀘𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑀫𑁆𑀫𑀝𑁆𑀞𑀸𑀦𑀁, 𑀓𑀣𑀁 𑀅𑀥𑀺𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀬𑀢𑁄 𑀅𑀲𑁆𑀲 𑀫𑁂𑀢𑁆𑀢𑀸𑀛𑀸𑀦𑀓𑀫𑁆𑀫𑀝𑁆𑀞𑀸𑀦𑀁 𑀅𑀳𑁄𑀲𑀺 ¶ , 𑀢𑀜𑁆𑀘 𑀯𑀺𑀧𑀲𑁆𑀲𑀦𑀁 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀉𑀤𑀸𑀦𑀕𑀸𑀣𑀜𑁆𑀘 𑀩𑁆𑀬𑀸𑀓𑀭𑀡𑀕𑀸𑀣𑀜𑁆𑀘 𑀇𑀫𑀜𑁆𑀜𑁂𑀯 𑀕𑀸𑀣𑀁 𑀅𑀪𑀸𑀲𑀺 ‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀽𑀢𑀺 𑀅𑀦𑀯𑀲𑁂𑀲𑁂𑀲𑀼. 𑀪𑀽𑀢𑁂𑀲𑀽𑀢𑀺 𑀲𑀢𑁆𑀢𑁂𑀲𑀼. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫. 𑀦𑀺𑀥𑀸𑀬𑀸𑀢𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀤𑀡𑁆𑀟𑀦𑁆𑀢𑀺 ¶ 𑀓𑀸𑀬𑀯𑀘𑀻𑀫𑀦𑁄𑀤𑀡𑁆𑀟𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀜𑁆𑀳𑀺 𑀤𑀡𑁆𑀟𑀬𑀢𑀻𑀢𑀺 𑀤𑀡𑁆𑀟𑁄, 𑀩𑀸𑀥𑁂𑀢𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀘. 𑀧𑀳𑀭𑀡𑀤𑀡𑁆𑀟𑁄 𑀏𑀯 𑀯𑀸 𑀤𑀡𑁆𑀟𑁄, 𑀢𑀁 𑀦𑀺𑀥𑀸𑀬𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀳𑁂𑀞𑀬𑀦𑁆𑀢𑀺 𑀅𑀯𑀺𑀳𑁂𑀞𑀬𑀦𑁆𑀢𑁄. 𑀅𑀜𑁆𑀜𑀢𑀭𑀫𑁆𑀧𑀻𑀢𑀺 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀲𑀩𑁆𑀩𑀪𑀽𑀢𑀸𑀦𑀁. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀭𑀚𑁄, 𑀔𑁂𑀢𑁆𑀭𑀚𑁄, 𑀤𑀺𑀦𑁆𑀦𑀓𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 ¶ 𑀧𑀼𑀢𑁆𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀼𑀢𑁆𑀢𑀁 𑀦 𑀇𑀘𑁆𑀙𑁂𑀬𑁆𑀬. 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀲𑀳𑀸𑀬𑀁 𑀧𑀦 𑀇𑀘𑁆𑀙𑁂𑀬𑁆𑀬𑀸𑀢𑀺 𑀓𑀼𑀢𑁄 𑀏𑀯 𑀏𑀢𑀁.

𑀏𑀓𑁄𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀧𑀳𑀸𑀦𑁂𑀦 𑀏𑀓𑁄, 𑀏𑀓𑀦𑁆𑀢𑀯𑀺𑀕𑀢𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄. 𑀲𑀫𑀡𑀲𑀳𑀲𑁆𑀲𑀲𑁆𑀲𑀸𑀧𑀺 𑀳𑀺 𑀫𑀚𑁆𑀛𑁂 𑀯𑀢𑁆𑀢𑀫𑀸𑀦𑁄 𑀕𑀺𑀳𑀺𑀲𑀜𑁆𑀜𑁄𑀚𑀦𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀏𑀓𑁄 𑁋 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄. 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀇𑀭𑀺𑀬𑀢𑀺 𑀯𑀢𑁆𑀢𑀢𑀻𑀢𑀺 𑁋 𑀏𑀯𑀁 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺. (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭) 𑁋

𑀏𑀯𑀁 𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 𑀏𑀓𑁄. 𑀲𑀩𑁆𑀩𑀓𑀺𑀮𑁂𑀲𑀸𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑁋 𑀏𑀯𑀁 𑀏𑀓𑀦𑁆𑀢𑀯𑀺𑀕𑀢𑀓𑀺𑀮𑁂𑀲𑁄𑀢𑀺 𑀏𑀓𑁄. 𑀅𑀦𑀸𑀘𑀭𑀺𑀬𑀓𑁄 𑀳𑀼𑀢𑁆𑀯𑀸 𑀲𑀬𑀫𑁆𑀪𑀽 𑀲𑀸𑀫𑀜𑁆𑀜𑁂𑀯 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑁋 𑀏𑀯𑀁 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀘𑀭𑁂𑀢𑀺 𑀬𑀸 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄; 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀇𑀭𑀺𑀬𑀸𑀧𑀣𑀘𑀭𑀺𑀬𑀸 ¶ , 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀆𑀬𑀢𑀦𑀘𑀭𑀺𑀬𑀸, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀢𑀺𑀘𑀭𑀺𑀬𑀸, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺𑀘𑀭𑀺𑀬𑀸, 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀜𑀸𑀡𑀘𑀭𑀺𑀬𑀸, 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼 𑀫𑀕𑁆𑀕𑀘𑀭𑀺𑀬𑀸, 𑀅𑀥𑀺𑀕𑀢𑀧𑁆𑀨𑀮𑀸𑀦𑀁 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼 ¶ 𑀧𑀢𑁆𑀢𑀺𑀘𑀭𑀺𑀬𑀸, 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀢𑀢𑁆𑀣 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀭𑀺𑀬𑀸𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑀇𑀭𑀺𑀬𑀸𑀧𑀣𑀘𑀭𑀺𑀬𑀸’’𑀢𑀺 ¶ (𑀧𑀝𑀺. 𑀫. 𑁧.𑁧𑁯𑁭; 𑁩.𑁨𑁮) 𑀯𑀺𑀢𑁆𑀣𑀸𑀭𑁄. 𑀢𑀸𑀳𑀺 𑀘𑀭𑀺𑀬𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀸 𑀇𑀫𑀸 ‘‘𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀳𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑁂𑀦 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀢𑀦𑁆𑀢𑀻𑀢𑀺 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁯𑁭; 𑁩.𑁨𑁯) 𑀏𑀯𑀁 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸 𑀯𑀼𑀢𑁆𑀢𑀸. 𑀢𑀸𑀳𑀺𑀧𑀺 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀏𑀢𑁆𑀣 𑀔𑀕𑁆𑀕𑀯𑀺𑀲𑀸𑀡𑀁 𑀦𑀸𑀫 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀁. 𑀓𑀧𑁆𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀇𑀥 𑀧𑀦𑀸𑀬𑀁 ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢, 𑀪𑁄, 𑀓𑀺𑀭 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸’’𑀢𑀺 (𑀫. 𑀦𑀺. 𑁧.𑁨𑁬𑁦) 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀧𑀝𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀔𑀕𑁆𑀕𑀯𑀺𑀲𑀸𑀡𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀥𑀺𑀧𑁆𑀧𑀸𑀬𑀸𑀦𑀼𑀲𑀦𑁆𑀥𑀺𑀢𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀬𑁆𑀯𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀤𑀡𑁆𑀟𑁄 𑀪𑀽𑀢𑁂𑀲𑀼 𑀧𑀯𑀢𑁆𑀢𑀺𑀬𑀫𑀸𑀦𑁄 𑀅𑀳𑀺𑀢𑁄 𑀳𑁄𑀢𑀺, 𑀢𑀁 𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀦𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀫𑁂𑀢𑁆𑀢𑀸𑀬 𑀧𑀭𑀳𑀺𑀢𑀽𑀧𑀲𑀁𑀳𑀸𑀭𑁂𑀦 𑀘 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀏𑀯 𑀘. 𑀬𑀣𑀸 𑀅𑀦𑀺𑀳𑀺𑀢𑀤𑀡𑁆𑀟𑀸 𑀲𑀢𑁆𑀢𑀸 𑀪𑀽𑀢𑀸𑀦𑀺 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀯𑀺𑀳𑁂𑀞𑀬𑀦𑁆𑀢𑀺, 𑀢𑀣𑀸 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁. 𑀇𑀫𑀁 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀫𑀸𑀕𑀫𑁆𑀫 𑀬𑀤𑁂𑀯 𑀢𑀢𑁆𑀣 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀕𑀢𑀁 𑀢𑀜𑁆𑀘 𑀢𑀤𑀦𑀼𑀲𑀸𑀭𑁂𑀦𑁂𑀯 𑀢𑀤𑀜𑁆𑀜𑀜𑁆𑀘 𑀲𑀗𑁆𑀔𑀸𑀭𑀕𑀢𑀁 𑀯𑀺𑀧𑀲𑁆𑀲𑀺𑀢𑁆𑀯𑀸 𑀇𑀫𑀁 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀅𑀬𑀁 𑀢𑀸𑀯 𑀅𑀥𑀺𑀧𑁆𑀧𑀸𑀬𑁄.

𑀅𑀬𑀁 𑀧𑀦 𑀅𑀦𑀼𑀲𑀦𑁆𑀥𑀺 𑁋 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺? 𑀢𑀢𑁄 𑀢𑁂𑀦 ‘‘𑀧𑀼𑀩𑁆𑀩𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺 ¶ 𑀆𑀯𑀚𑁆𑀚𑁂𑀢𑁆𑀯𑀸 𑀜𑀢𑁆𑀯𑀸 ‘‘𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦𑀸𑀳𑀁𑀲𑀼 𑁋 ‘‘𑀅𑀫𑁆𑀳𑁂 𑀤𑀸𑀦𑀺, 𑀪𑀦𑁆𑀢𑁂, 𑀧𑀚𑀳𑀣, 𑀦 𑀇𑀘𑁆𑀙𑀣𑀸’’𑀢𑀺. 𑀅𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋 ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬𑀸’’𑀢𑀺 𑀲𑀩𑁆𑀩𑀁. 𑀢𑀢𑁆𑀭𑀸𑀥𑀺𑀧𑁆𑀧𑀸𑀬𑁄 𑁋 𑀅𑀳𑀁 𑀇𑀤𑀸𑀦𑀺 𑀅𑀢𑁆𑀭𑀚𑀸𑀤𑀻𑀲𑀼 𑀬𑀁 ¶ 𑀓𑀺𑀜𑁆𑀘𑀺 𑀧𑀼𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑁂𑀬𑁆𑀬𑀁, 𑀓𑀼𑀢𑁄 𑀧𑀦 𑀢𑀼𑀫𑁆𑀳𑀸𑀤𑀺𑀲𑀁 𑀲𑀳𑀸𑀬𑀁? 𑀢𑀲𑁆𑀫𑀸 𑀢𑀼𑀫𑁆𑀳𑁂𑀲𑀼𑀧𑀺 𑀬𑁄 𑀫𑀬𑀸 𑀲𑀤𑁆𑀥𑀺𑀁 ¶ 𑀕𑀦𑁆𑀢𑀼𑀁 𑀫𑀸𑀤𑀺𑀲𑁄 𑀯𑀸 𑀳𑁄𑀢𑀼𑀁 𑀇𑀘𑁆𑀙𑀢𑀺, 𑀲𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀅𑀣 𑀯𑀸 𑀢𑁂𑀳𑀺 ‘‘𑀅𑀫𑁆𑀳𑁂 𑀤𑀸𑀦𑀺, 𑀪𑀦𑁆𑀢𑁂, 𑀧𑀚𑀳𑀣 𑀦 𑀇𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀏𑀓𑀘𑀭𑀺𑀬𑀸𑀬 𑀕𑀼𑀡𑀁 𑀤𑀺𑀲𑁆𑀯𑀸 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. 𑀏𑀯𑀁 𑀯𑀢𑁆𑀯𑀸 𑀧𑁂𑀓𑁆𑀔𑀫𑀸𑀦𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀁 𑀅𑀕𑀫𑀸𑀲𑀺.

𑀕𑀦𑁆𑀥𑀫𑀸𑀤𑀦𑁄 𑀦𑀸𑀫 𑀳𑀺𑀫𑀯𑀢𑀺 𑀘𑀽𑀴𑀓𑀸𑀴𑀧𑀩𑁆𑀩𑀢𑀁, 𑀫𑀳𑀸𑀓𑀸𑀴𑀧𑀩𑁆𑀩𑀢𑀁, 𑀦𑀸𑀕𑀧𑀮𑀺𑀯𑁂𑀞𑀦𑀁, 𑀘𑀦𑁆𑀤𑀕𑀩𑁆𑀪𑀁, 𑀲𑀽𑀭𑀺𑀬𑀕𑀩𑁆𑀪𑀁, 𑀲𑀼𑀯𑀡𑁆𑀡𑀧𑀲𑁆𑀲𑀁, 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀦𑁆𑀢𑀺 𑀲𑀢𑁆𑀢 𑀧𑀩𑁆𑀩𑀢𑁂 𑀅𑀢𑀺𑀓𑁆𑀓𑀫𑁆𑀫 𑀳𑁄𑀢𑀺. 𑀢𑀢𑁆𑀣 𑀦𑀦𑁆𑀤𑀫𑀽𑀮𑀓𑀁 𑀦𑀸𑀫 𑀧𑀩𑁆𑀪𑀸𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑀦𑁄𑀓𑀸𑀲𑁄. 𑀢𑀺𑀲𑁆𑀲𑁄 𑀘 𑀕𑀼𑀳𑀸𑀬𑁄 𑁋 𑀲𑀼𑀯𑀡𑁆𑀡𑀕𑀼𑀳𑀸, 𑀫𑀡𑀺𑀕𑀼𑀳𑀸, 𑀭𑀚𑀢𑀕𑀼𑀳𑀸𑀢𑀺. 𑀢𑀢𑁆𑀣 𑀫𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀫𑀜𑁆𑀚𑀽𑀲𑀓𑁄 𑀦𑀸𑀫 𑀭𑀼𑀓𑁆𑀔𑁄 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦, 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀲𑁄 𑀬𑀢𑁆𑀢𑀓𑀸𑀦𑀺 𑀉𑀤𑀓𑁂 𑀯𑀸 𑀣𑀮𑁂 𑀯𑀸 𑀧𑀼𑀧𑁆𑀨𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀼𑀧𑁆𑀨𑀬𑀢𑀺 𑀯𑀺𑀲𑁂𑀲𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀕𑀫𑀦𑀤𑀺𑀯𑀲𑁂. 𑀢𑀲𑁆𑀲𑀽𑀧𑀭𑀺𑀢𑁄 𑀲𑀩𑁆𑀩𑀭𑀢𑀦𑀫𑀸𑀴𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀚𑁆𑀚𑀦𑀓𑀯𑀸𑀢𑁄 𑀓𑀘𑀯𑀭𑀁 𑀙𑀟𑁆𑀟𑁂𑀢𑀺, 𑀲𑀫𑀓𑀭𑀡𑀯𑀸𑀢𑁄 𑀲𑀩𑁆𑀩𑀭𑀢𑀦𑀫𑀬𑀁 𑀯𑀸𑀮𑀺𑀓𑀁 𑀲𑀫𑀁 𑀓𑀭𑁄𑀢𑀺, 𑀲𑀺𑀜𑁆𑀘𑀦𑀓𑀯𑀸𑀢𑁄 𑀅𑀦𑁄𑀢𑀢𑁆𑀢𑀤𑀳𑀢𑁄 𑀆𑀦𑁂𑀢𑁆𑀯𑀸 𑀉𑀤𑀓𑀁 𑀲𑀺𑀜𑁆𑀘𑀢𑀺, 𑀲𑀼𑀕𑀦𑁆𑀥𑀓𑀭𑀡𑀯𑀸𑀢𑁄 𑀳𑀺𑀫𑀯𑀦𑁆𑀢𑀢𑁄 𑀲𑀩𑁆𑀩𑁂𑀲𑀁 𑀕𑀦𑁆𑀥𑀭𑀼𑀓𑁆𑀔𑀸𑀦𑀁 𑀕𑀦𑁆𑀥𑁂 𑀆𑀦𑁂𑀢𑀺, 𑀑𑀘𑀺𑀦𑀓𑀯𑀸𑀢𑁄 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 ¶ 𑀧𑀸𑀢𑁂𑀢𑀺, 𑀲𑀦𑁆𑀣𑀭𑀓𑀯𑀸𑀢𑁄 𑀲𑀩𑁆𑀩𑀢𑁆𑀣 𑀲𑀦𑁆𑀣𑀭𑀢𑀺. 𑀲𑀤𑀸 𑀧𑀜𑁆𑀜𑀢𑁆𑀢𑀸𑀦𑁂𑀯 𑀘𑁂𑀢𑁆𑀣 𑀆𑀲𑀦𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀼𑀧𑁆𑀧𑀸𑀤𑀤𑀺𑀯𑀲𑁂 𑀉𑀧𑁄𑀲𑀣𑀤𑀺𑀯𑀲𑁂 𑀘 𑀲𑀩𑁆𑀩𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀧𑀓𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀢𑀺. 𑀢𑀢𑁄 𑀲𑀘𑁂 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀜𑁆𑀜𑁂𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑁂𑀧𑀺 𑀢𑀗𑁆𑀔𑀡𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀦𑁆𑀢𑀺. 𑀦𑀺𑀲𑀻𑀤𑀺𑀢𑁆𑀯𑀸 𑀘 𑀓𑀺𑀜𑁆𑀘𑀺𑀤𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀢𑀢𑁄 𑀲𑀗𑁆𑀖𑀢𑁆𑀣𑁂𑀭𑁄 𑀅𑀥𑀼𑀦𑀸𑀕𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀩𑁆𑀩𑁂𑀲𑀁 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 ‘‘𑀓𑀣𑀫𑀥𑀺𑀕𑀢’’𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺. 𑀢𑀤𑀸𑀧𑀺 𑀲𑁄 𑀢𑀫𑁂𑀯 𑀅𑀢𑁆𑀢𑀦𑁄 𑀉𑀤𑀸𑀦𑀩𑁆𑀬𑀸𑀓𑀭𑀡𑀕𑀸𑀣𑀁 𑀪𑀸𑀲𑀢𑀺. 𑀧𑀼𑀦 𑀪𑀕𑀯𑀸𑀧𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀼𑀝𑁆𑀞𑁄 𑀢𑀫𑁂𑀯 𑀕𑀸𑀣𑀁 𑀪𑀸𑀲𑀢𑀺, 𑀆𑀦𑀦𑁆𑀤𑁄 𑀘 𑀲𑀗𑁆𑀕𑀻𑀢𑀺𑀬𑀦𑁆𑀢𑀺 𑀏𑀯𑀫𑁂𑀓𑁂𑀓𑀸 𑀕𑀸𑀣𑀸 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀅𑀪𑀺𑀲𑀫𑁆𑀩𑀼𑀤𑁆𑀥𑀝𑁆𑀞𑀸𑀦𑁂, 𑀫𑀜𑁆𑀚𑀽𑀲𑀓𑀫𑀸𑀴𑁂 ¶ , 𑀆𑀦𑀦𑁆𑀤𑁂𑀦 𑀧𑀼𑀘𑁆𑀙𑀺𑀢𑀓𑀸𑀮𑁂, 𑀲𑀗𑁆𑀕𑀻𑀢𑀺𑀬𑀦𑁆𑀢𑀺 𑀘𑀢𑀼𑀓𑁆𑀔𑀢𑁆𑀢𑀼𑀁 𑀪𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀧𑀞𑀫𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁬. 𑀲𑀁𑀲𑀕𑁆𑀕𑀚𑀸𑀢𑀲𑁆𑀲𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸, 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸, 𑀮𑀓𑁆𑀔𑀡𑀲𑀫𑁆𑀫𑀲𑀦𑀁 𑀓𑀢𑁆𑀯𑀸, 𑀅𑀭𑀺𑀬𑀫𑀕𑁆𑀕𑀁 𑀅𑀦𑀥𑀺𑀕𑀫𑁆𑀫 𑀩𑁆𑀭𑀳𑁆𑀫𑀮𑁄𑀓𑁂 ¶ 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀟𑁆𑀠𑀫𑀸𑀦𑁄 𑀬𑀢𑁄 𑀧𑀪𑀼𑀢𑀺 ‘‘𑀅𑀬𑀁 𑀇𑀢𑁆𑀣𑀻 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀯𑀺𑀲𑁂𑀲𑀁 𑀅𑀜𑁆𑀜𑀸𑀲𑀺, 𑀢𑀢𑀼𑀧𑀸𑀤𑀸𑀬 𑀇𑀢𑁆𑀣𑀻𑀦𑀁 𑀳𑀢𑁆𑀣𑁂 𑀦 𑀭𑀫𑀢𑀺, 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑀫𑀡𑁆𑀟𑀦𑀸𑀤𑀺𑀫𑀢𑁆𑀢𑀫𑁆𑀧𑀺 𑀦 𑀲𑀳𑀢𑀺. 𑀢𑀁 𑀧𑀼𑀭𑀺𑀲𑀸 𑀏𑀯 𑀧𑁄𑀲𑁂𑀦𑁆𑀢𑀺, 𑀣𑀜𑁆𑀜𑀧𑀸𑀬𑀦𑀓𑀸𑀮𑁂 𑀥𑀸𑀢𑀺𑀬𑁄 𑀓𑀜𑁆𑀘𑀼𑀓𑀁 ¶ 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀭𑀺𑀲𑀯𑁂𑀲𑁂𑀦 𑀣𑀜𑁆𑀜𑀁 𑀧𑀸𑀬𑁂𑀦𑁆𑀢𑀺. 𑀲𑁄 𑀇𑀢𑁆𑀣𑀻𑀦𑀁 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀭𑁄𑀤𑀢𑀺, 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄𑀧𑀺 𑀇𑀢𑁆𑀣𑀺𑀬𑁄 𑀧𑀲𑁆𑀲𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀢𑁂𑀦 𑀢𑀁 𑀅𑀦𑀺𑀢𑁆𑀣𑀺𑀕𑀦𑁆𑀥𑁄𑀢𑁆𑀯𑁂𑀯 𑀲𑀜𑁆𑀚𑀸𑀦𑀺𑀁𑀲𑀼.

𑀢𑀲𑁆𑀫𑀺𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁂 𑀚𑀸𑀢𑁂 𑀭𑀸𑀚𑀸 ‘‘𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀦𑀸𑀦𑀸𑀓𑀼𑀮𑁂𑀳𑀺 𑀢𑀲𑁆𑀲 𑀅𑀦𑀼𑀭𑀽𑀧𑀸 𑀓𑀜𑁆𑀜𑀸𑀬𑁄 𑀆𑀦𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 ‘‘𑀓𑀼𑀫𑀸𑀭𑀁 𑀭𑀫𑀸𑀧𑁂𑀳𑀻’’𑀢𑀺. 𑀅𑀫𑀘𑁆𑀘𑁄 𑀉𑀧𑀸𑀬𑁂𑀦 𑀢𑀁 𑀭𑀫𑀸𑀧𑁂𑀢𑀼𑀓𑀸𑀫𑁄 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀧𑀬𑁄𑀚𑀸𑀧𑁂𑀲𑀺. 𑀓𑀼𑀫𑀸𑀭𑁄 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑁋 ‘‘𑀓𑀲𑁆𑀲𑁂𑀲𑁄 𑀲𑀤𑁆𑀤𑁄’’𑀢𑀺 𑀆𑀳. 𑀅𑀫𑀘𑁆𑀘𑁄 ‘‘𑀢𑀯𑁂𑀲𑁄, 𑀤𑁂𑀯, 𑀦𑀸𑀝𑀓𑀺𑀢𑁆𑀣𑀻𑀦𑀁 𑀲𑀤𑁆𑀤𑁄, 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀈𑀤𑀺𑀲𑀸𑀦𑀺 𑀦𑀸𑀝𑀓𑀸𑀦𑀺 𑀳𑁄𑀦𑁆𑀢𑀺, 𑀅𑀪𑀺𑀭𑀫, 𑀤𑁂𑀯, 𑀫𑀳𑀸𑀧𑀼𑀜𑁆𑀜𑁄𑀲𑀺 𑀢𑁆𑀯’’𑀦𑁆𑀢𑀺 𑀆𑀳. 𑀓𑀼𑀫𑀸𑀭𑁄 𑀅𑀫𑀘𑁆𑀘𑀁 𑀤𑀡𑁆𑀟𑁂𑀦 𑀢𑀸𑀴𑀸𑀧𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺. 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀓𑀼𑀫𑀸𑀭𑀲𑁆𑀲 𑀫𑀸𑀢𑀭𑀸 𑀲𑀳 𑀕𑀦𑁆𑀢𑁆𑀯𑀸, 𑀓𑀼𑀫𑀸𑀭𑀁 𑀔𑀫𑀸𑀧𑁂𑀢𑁆𑀯𑀸, 𑀧𑀼𑀦 𑀅𑀫𑀘𑁆𑀘𑀁 𑀅𑀧𑁆𑀧𑁂𑀲𑀺. 𑀓𑀼𑀫𑀸𑀭𑁄 𑀢𑁂𑀳𑀺 𑀅𑀢𑀺𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀲𑁂𑀝𑁆𑀞𑀲𑀼𑀯𑀡𑁆𑀡𑀁 𑀤𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑁂 𑀆𑀡𑀸𑀧𑁂𑀲𑀺 𑁋 ‘‘𑀲𑀼𑀦𑁆𑀤𑀭𑀁 𑀇𑀢𑁆𑀣𑀺𑀭𑀽𑀧𑀁 𑀓𑀭𑁄𑀣𑀸’’𑀢𑀺. 𑀢𑁂 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀇𑀢𑁆𑀣𑀺𑀭𑀽𑀧𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀓𑀼𑀫𑀸𑀭𑁄 𑀤𑀺𑀲𑁆𑀯𑀸 𑀯𑀺𑀫𑁆𑀳𑀬𑁂𑀦 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑁂𑀲𑁂𑀲𑀺 ‘‘𑀬𑀤𑀺 𑀈𑀤𑀺𑀲𑀺𑀁 𑀇𑀢𑁆𑀣𑀺𑀁 𑀮𑀪𑀺𑀲𑁆𑀲𑀸𑀫𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀢𑀸𑀧𑀺𑀢𑀭𑁄 ¶ ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀫𑀳𑀸𑀧𑀼𑀜𑁆𑀜𑁄, 𑀅𑀯𑀲𑁆𑀲𑀁 𑀢𑁂𑀦 𑀲𑀳 𑀓𑀢𑀧𑀼𑀜𑁆𑀜𑀸 𑀓𑀸𑀘𑀺 𑀤𑀸𑀭𑀺𑀓𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀲𑀼𑀯𑀡𑁆𑀡𑀭𑀽𑀧𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀅𑀧𑁆𑀧𑁂𑀲𑀼𑀁 ‘‘𑀕𑀘𑁆𑀙𑀣, 𑀈𑀤𑀺𑀲𑀺𑀁 𑀤𑀸𑀭𑀺𑀓𑀁 𑀕𑀯𑁂𑀲𑀣𑀸’’𑀢𑀺. 𑀢𑁂 𑀕𑀳𑁂𑀢𑁆𑀯𑀸 𑀲𑁄𑀴𑀲 𑀫𑀳𑀸𑀚𑀦𑀧𑀤𑁂 𑀯𑀺𑀘𑀭𑀦𑁆𑀢𑀸 𑀢𑀁 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀸𑀤𑀻𑀲𑀼 𑀬𑀢𑁆𑀣 𑀬𑀢𑁆𑀣 𑀚𑀦𑀲𑀫𑀽𑀳𑀁 𑀧𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑁂𑀯𑀢𑀁 𑀯𑀺𑀬 𑀲𑀼𑀯𑀡𑁆𑀡𑀭𑀽𑀧𑀁 𑀞𑀧𑁂𑀢𑁆𑀯𑀸 𑀦𑀸𑀦𑀸𑀧𑀼𑀧𑁆𑀨𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸, 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀺 𑁋 ‘‘𑀬𑀤𑀺 𑀓𑁂𑀦𑀘𑀺 𑀏𑀯𑀭𑀽𑀧𑀸 𑀤𑀺𑀝𑁆𑀞𑀧𑀼𑀩𑁆𑀩𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺? 𑀏𑀢𑁂𑀦𑀼𑀧𑀸𑀬𑁂𑀦 𑀅𑀜𑁆𑀜𑀢𑁆𑀭 𑀫𑀤𑁆𑀤𑀭𑀝𑁆𑀞𑀸 𑀲𑀩𑁆𑀩𑁂 ¶ 𑀚𑀦𑀧𑀤𑁂 𑀆𑀳𑀺𑀡𑁆𑀟𑀺𑀢𑁆𑀯𑀸 𑀢𑀁 ‘‘𑀔𑀼𑀤𑁆𑀤𑀓𑀭𑀝𑁆𑀞’’𑀦𑁆𑀢𑀺 𑀅𑀯𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀧𑀞𑀫𑀁 𑀅𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼.

𑀢𑀢𑁄 𑀦𑁂𑀲𑀁 𑀅𑀳𑁄𑀲𑀺 ‘‘𑀫𑀤𑁆𑀤𑀭𑀝𑁆𑀞𑀫𑁆𑀧𑀺 𑀢𑀸𑀯 𑀕𑀘𑁆𑀙𑀸𑀫, 𑀫𑀸 𑀦𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀝𑁆𑀞𑁂𑀧𑀺 𑀭𑀸𑀚𑀸 𑀧𑀼𑀦 𑀧𑀸𑀳𑁂𑀲𑀻’’𑀢𑀺 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀅𑀕𑀫𑀁𑀲𑀼. 𑀲𑀸𑀕𑀮𑀦𑀕𑀭𑁂 𑀘 𑀫𑀤𑁆𑀤𑀯𑁄 𑀦𑀸𑀫 𑀭𑀸𑀚𑀸. 𑀢𑀲𑁆𑀲 𑀥𑀻𑀢𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀪𑀺𑀭𑀽𑀧𑀸 𑀳𑁄𑀢𑀺. 𑀢𑀲𑁆𑀲𑀸 𑀯𑀡𑁆𑀡𑀤𑀸𑀲𑀺𑀬𑁄 𑀦𑁆𑀳𑀸𑀦𑁄𑀤𑀓𑀢𑁆𑀣𑀸𑀬 𑀢𑀺𑀢𑁆𑀣𑀁 𑀕𑀢𑀸. 𑀢𑀢𑁆𑀣 𑀅𑀫𑀘𑁆𑀘𑁂𑀳𑀺 𑀞𑀧𑀺𑀢𑀁 𑀢𑀁 𑀲𑀼𑀯𑀡𑁆𑀡𑀭𑀽𑀧𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀅𑀫𑁆𑀳𑁂 𑀉𑀤𑀓𑀢𑁆𑀣𑀸𑀬 𑀧𑁂𑀲𑁂𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀻 𑀲𑀬𑀫𑁂𑀯 ¶ 𑀆𑀕𑀢𑀸’’𑀢𑀺 𑀪𑀡𑀦𑁆𑀢𑀺𑀬𑁄 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀦𑀸𑀬𑀁 𑀲𑀸𑀫𑀺𑀦𑀻, 𑀅𑀫𑁆𑀳𑀸𑀓𑀁 𑀲𑀸𑀫𑀺𑀦𑀻 𑀇𑀢𑁄 𑀅𑀪𑀺𑀭𑀽𑀧𑀢𑀭𑀸’’𑀢𑀺 𑀆𑀳𑀁𑀲𑀼. 𑀅𑀫𑀘𑁆𑀘𑀸 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑀼𑀭𑀽𑀧𑁂𑀦 𑀦𑀬𑁂𑀦 𑀤𑀸𑀭𑀺𑀓𑀁 𑀬𑀸𑀘𑀺𑀁𑀲𑀼, 𑀲𑁄𑀧𑀺 𑀅𑀤𑀸𑀲𑀺. 𑀢𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀸𑀳𑁂𑀲𑀼𑀁 ‘‘𑀮𑀤𑁆𑀥𑀸 𑀤𑀸𑀭𑀺𑀓𑀸, 𑀲𑀸𑀫𑀁 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀅𑀫𑁆𑀳𑁂𑀯 𑀆𑀦𑁂𑀫𑀸’’𑀢𑀺? 𑀲𑁄 𑀘 ‘‘𑀫𑀬𑀺 𑀆𑀕𑀘𑁆𑀙𑀦𑁆𑀢𑁂 𑀚𑀦𑀧𑀤𑀧𑀻𑀴𑀸 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂𑀯 𑀆𑀦𑁂𑀣𑀸’’𑀢𑀺 𑀧𑁂𑀲𑁂𑀲𑀺.

𑀅𑀫𑀘𑁆𑀘𑀸 𑀤𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀧𑀸𑀳𑁂𑀲𑀼𑀁 𑁋 ‘‘𑀮𑀤𑁆𑀥𑀸 𑀲𑀼𑀯𑀡𑁆𑀡𑀭𑀽𑀧𑀲𑀤𑀺𑀲𑀻 𑀤𑀸𑀭𑀺𑀓𑀸’’𑀢𑀺. 𑀓𑀼𑀫𑀸𑀭𑁄 𑀲𑀼𑀢𑁆𑀯𑀸𑀯 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀞𑀫𑀚𑁆𑀛𑀸𑀦𑀸 𑀧𑀭𑀺𑀳𑀸𑀬𑀺. 𑀲𑁄 𑀤𑀽𑀢𑀧𑀭𑀫𑁆𑀧𑀭𑀁 𑀧𑁂𑀲𑁂𑀲𑀺 ‘‘𑀲𑀻𑀖𑀁 𑀆𑀦𑁂𑀣, 𑀲𑀻𑀖𑀁 𑀆𑀦𑁂𑀣𑀸’’𑀢𑀺. 𑀢𑁂 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦𑁂𑀯 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀩𑀳𑀺𑀦𑀕𑀭𑁂 𑀞𑀺𑀢𑀸 𑀭𑀜𑁆𑀜𑁄 𑀧𑀸𑀳𑁂𑀲𑀼𑀁 𑁋 ‘‘𑀅𑀚𑁆𑀚 𑀧𑀯𑀺𑀲𑀺𑀢𑀩𑁆𑀩𑀁, 𑀦𑁄’’𑀢𑀺? 𑀭𑀸𑀚𑀸 ‘‘𑀲𑁂𑀝𑁆𑀞𑀓𑀼𑀮𑀸 𑀆𑀦𑀻𑀢𑀸 𑀤𑀸𑀭𑀺𑀓𑀸, 𑀫𑀗𑁆𑀕𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑁂𑀦 𑀧𑀯𑁂𑀲𑁂𑀲𑁆𑀲𑀸𑀫, 𑀉𑀬𑁆𑀬𑀸𑀦𑀁 𑀢𑀸𑀯 𑀦𑀁 𑀦𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀲𑀸 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑀸 𑀬𑀸𑀦𑀼𑀕𑁆𑀖𑀸𑀢𑁂𑀦 𑀉𑀩𑁆𑀩𑀸𑀴𑁆𑀳𑀸 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑁂𑀦 𑀉𑀧𑁆𑀧𑀦𑁆𑀦𑀯𑀸𑀢𑀭𑁄𑀕𑀸 𑀫𑀺𑀮𑀸𑀢𑀫𑀸𑀮𑀸 𑀯𑀺𑀬 ¶ 𑀳𑀼𑀢𑁆𑀯𑀸 𑀭𑀢𑁆𑀢𑀺𑀁𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀅𑀫𑀘𑁆𑀘𑀸 ‘‘𑀲𑀓𑁆𑀓𑀸𑀭𑀸 𑀧𑀭𑀺𑀪𑀝𑁆𑀞𑀫𑁆𑀳𑀸’’𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. 𑀭𑀸𑀚𑀸 𑀘 𑀦𑀸𑀕𑀭𑀸 𑀘 ‘‘𑀓𑀼𑀮𑀯𑀁𑀲𑁄 𑀯𑀺𑀦𑀝𑁆𑀞𑁄’’𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. 𑀦𑀕𑀭𑁂 𑀫𑀳𑀸𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀓𑀼𑀫𑀸𑀭𑀲𑁆𑀲 𑀲𑀼𑀢𑀫𑀢𑁆𑀢𑁂𑀬𑁂𑀯 𑀫𑀳𑀸𑀲𑁄𑀓𑁄 𑀉𑀤𑀧𑀸𑀤𑀺. 𑀢𑀢𑁄 𑀓𑀼𑀫𑀸𑀭𑁄 𑀲𑁄𑀓𑀲𑁆𑀲 𑀫𑀽𑀮𑀁 𑀔𑀡𑀺𑀢𑀼𑀫𑀸𑀭𑀤𑁆𑀥𑁄. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑁄𑀓𑁄 𑀦𑀸𑀫 𑀦 𑀅𑀚𑀸𑀢𑀲𑁆𑀲 𑀳𑁄𑀢𑀺, 𑀚𑀸𑀢𑀲𑁆𑀲 𑀧𑀦 𑀳𑁄𑀢𑀺, 𑀢𑀲𑁆𑀫𑀸 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀲𑁄𑀓𑁄’’𑀢𑀺. ‘‘𑀚𑀸𑀢𑀺 𑀧𑀦 𑀓𑀺𑀁 ¶ 𑀧𑀝𑀺𑀘𑁆𑀘𑀸’’𑀢𑀺? 𑀢𑀢𑁄 ‘‘𑀪𑀯𑀁 𑀧𑀝𑀺𑀘𑁆𑀘 𑀚𑀸𑀢𑀻’’𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑀺𑀲𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀁 𑀫𑀕𑁆𑀕𑀨𑀮𑀲𑀼𑀔𑁂𑀦 𑀲𑀼𑀔𑀺𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀢𑀫𑀸𑀦𑀲𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸, 𑀧𑀡𑀺𑀧𑀸𑀢𑀁 𑀓𑀢𑁆𑀯𑀸, 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀫𑀸 𑀲𑁄𑀘𑀺, 𑀤𑁂𑀯, 𑀫𑀳𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑁄, 𑀅𑀜𑁆𑀜𑀁 𑀢𑀢𑁄 𑀲𑀼𑀦𑁆𑀤𑀭𑀢𑀭𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺. 𑀲𑁄 𑀆𑀳 𑁋 ‘‘𑀦𑀸𑀳𑀁 𑀲𑁄𑀘𑀓𑁄, 𑀦𑀺𑀲𑁆𑀲𑁄𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀳’’𑀦𑁆𑀢𑀺. 𑀇𑀢𑁄 𑀧𑀭𑀁 𑀲𑀩𑁆𑀩𑀁 𑀧𑀼𑀭𑀺𑀫𑀕𑀸𑀣𑀸𑀲𑀤𑀺𑀲𑀫𑁂𑀯 𑀞𑀧𑁂𑀢𑁆𑀯𑀸 𑀕𑀸𑀣𑀸𑀯𑀡𑁆𑀡𑀦𑀁.

𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀧𑀦 𑀲𑀁𑀲𑀕𑁆𑀕𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀲𑀁𑀲𑀕𑁆𑀕𑀲𑁆𑀲. 𑀢𑀢𑁆𑀣 𑀤𑀲𑁆𑀲𑀦, 𑀲𑀯𑀦, 𑀓𑀸𑀬, 𑀲𑀫𑀼𑀮𑁆𑀮𑀧𑀦, 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀲𑀁𑀲𑀕𑁆𑀕𑁄. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀤𑀺𑀲𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀣 𑀲𑀻𑀳𑀴𑀤𑀻𑀧𑁂 𑀓𑀸𑀴𑀤𑀻𑀖𑀯𑀸𑀧𑀻𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀓𑀮𑁆𑀬𑀸𑀡𑀯𑀺𑀳𑀸𑀭𑀯𑀸𑀲𑀻𑀤𑀻𑀖𑀪𑀸𑀡𑀓𑀤𑀳𑀭𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑀁 𑀅𑀮𑀪𑀺𑀢𑁆𑀯𑀸, 𑀓𑀸𑀮𑀓𑀢𑀸 𑀓𑀼𑀝𑀼𑀫𑁆𑀩𑀺𑀬𑀥𑀻𑀢𑀸, 𑀢𑀲𑁆𑀲𑀸 𑀦𑀺𑀯𑀸𑀲𑀦𑀘𑁄𑀴𑀔𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀯𑀢𑁆𑀣𑀥𑀸𑀭𑀺𑀦𑀺𑀬𑀸 ¶ 𑀦𑀸𑀫 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦𑀸𑀮𑀢𑁆𑀣’’𑀦𑁆𑀢𑀺 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀓𑀸𑀮𑀓𑀢𑁄. 𑀲𑁄 𑀏𑀯 𑀘 𑀤𑀳𑀭𑁄 𑀦𑀺𑀤𑀲𑁆𑀲𑀦𑀁.

𑀧𑀭𑁂𑀳𑀺 𑀧𑀦 𑀓𑀣𑀺𑀬𑀫𑀸𑀦𑀁 𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀯𑀸 𑀳𑀲𑀺𑀢𑀮𑀧𑀺𑀢𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀭𑀸𑀧𑀺 𑀕𑀺𑀭𑀺𑀕𑀸𑀫𑀯𑀸𑀲𑀻𑀓𑀫𑁆𑀫𑀸𑀭𑀥𑀻𑀢𑀸𑀬 𑀧𑀜𑁆𑀘𑀳𑀺 𑀓𑀼𑀫𑀸𑀭𑀻𑀳𑀺 𑀲𑀤𑁆𑀥𑀺𑀁 𑀧𑀤𑀼𑀫𑀲𑁆𑀲𑀭𑀁 𑀕𑀦𑁆𑀢𑁆𑀯𑀸, 𑀦𑁆𑀳𑀢𑁆𑀯𑀸 𑀫𑀸𑀮𑀁 𑀆𑀭𑁄𑀧𑁂𑀢𑁆𑀯𑀸, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀕𑀸𑀬𑀦𑁆𑀢𑀺𑀬𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀸𑀫𑀭𑀸𑀕𑁂𑀦 𑀯𑀺𑀲𑁂𑀲𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄 𑀧𑀜𑁆𑀘𑀕𑁆𑀕𑀴𑀮𑁂𑀡𑀯𑀸𑀲𑀻 𑀢𑀺𑀲𑁆𑀲𑀤𑀳𑀭𑁄 𑀦𑀺𑀤𑀲𑁆𑀲𑀦𑀁.

𑀅𑀜𑁆𑀜𑀫𑀜𑁆𑀜𑀁 𑀅𑀗𑁆𑀕𑀧𑀭𑀸𑀫𑀲𑀦𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫. 𑀥𑀫𑁆𑀫𑀕𑀸𑀬𑀦𑀤𑀳𑀭𑀪𑀺𑀓𑁆𑀔𑀼 ¶ 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀫𑀳𑀸𑀯𑀺𑀳𑀸𑀭𑁂 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀥𑀫𑁆𑀫𑀁 𑀪𑀸𑀲𑀢𑀺 ¶ . 𑀢𑀢𑁆𑀣 𑀫𑀳𑀸𑀚𑀦𑁂 𑀆𑀕𑀢𑁂 𑀭𑀸𑀚𑀸𑀧𑀺 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀧𑀼𑀭𑁂𑀦. 𑀢𑀢𑁄 𑀭𑀸𑀚𑀥𑀻𑀢𑀸𑀬 𑀢𑀲𑁆𑀲 𑀭𑀽𑀧𑀜𑁆𑀘 𑀲𑀤𑁆𑀤𑀜𑁆𑀘 𑀆𑀕𑀫𑁆𑀫 𑀩𑀮𑀯𑀭𑀸𑀕𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀘 𑀤𑀳𑀭𑀲𑁆𑀲𑀸𑀧𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀭𑀸𑀫𑀲𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀁𑀲𑀼. 𑀧𑀼𑀦 𑀲𑀸𑀡𑀺𑀧𑀸𑀓𑀸𑀭𑀁 𑀅𑀧𑀦𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑀸 𑀤𑁆𑀯𑁂𑀧𑀺 𑀓𑀸𑀮𑀓𑀢𑁂𑀬𑁂𑀯 𑀅𑀤𑁆𑀤𑀲𑀁𑀲𑀽𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀆𑀮𑀧𑀦𑀲𑀫𑀼𑀮𑁆𑀮𑀧𑀦𑁂 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀧𑀦 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀓𑀭𑀡𑁂 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀤𑁆𑀯𑀻𑀲𑀼𑀧𑀺 𑀘𑁂𑀢𑁂𑀲𑀼 𑀧𑀸𑀭𑀸𑀚𑀺𑀓𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀻 𑀘 𑀦𑀺𑀤𑀲𑁆𑀲𑀦𑀁. 𑀫𑀭𑀺𑀘𑀺𑀯𑀝𑁆𑀝𑀺𑀦𑀸𑀫𑀫𑀳𑀸𑀯𑀺𑀳𑀸𑀭𑀫𑀳𑁂 𑀓𑀺𑀭 𑀤𑀼𑀝𑁆𑀞𑀕𑀸𑀫𑀡𑀺 𑀅𑀪𑀬𑀫𑀳𑀸𑀭𑀸𑀚𑀸 𑀫𑀳𑀸𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀉𑀪𑀢𑁄𑀲𑀗𑁆𑀖𑀁 𑀧𑀭𑀺𑀯𑀺𑀲𑀢𑀺. 𑀢𑀢𑁆𑀣 𑀉𑀡𑁆𑀳𑀬𑀸𑀕𑀼𑀬𑀸 𑀤𑀺𑀦𑁆𑀦𑀸𑀬 𑀲𑀗𑁆𑀖𑀦𑀯𑀓𑀲𑀸𑀫𑀡𑁂𑀭𑀻 𑀅𑀦𑀸𑀥𑀸𑀭𑀓𑀲𑁆𑀲 𑀲𑀗𑁆𑀖𑀦𑀯𑀓𑀲𑀸𑀫𑀡𑁂𑀭𑀲𑁆𑀲 𑀤𑀦𑁆𑀢𑀯𑀮𑀬𑀁 𑀤𑀢𑁆𑀯𑀸 𑀲𑀫𑀼𑀮𑁆𑀮𑀸𑀧𑀁 𑀅𑀓𑀸𑀲𑀺. 𑀢𑁂 𑀉𑀪𑁄𑀧𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀸 𑀳𑀼𑀢𑁆𑀯𑀸 𑀧𑀭𑀢𑀻𑀭𑀁 𑀕𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀼𑀮𑁆𑀮𑀸𑀧𑁂𑀦 𑀧𑀼𑀩𑁆𑀩𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀸𑀯𑀤𑁂𑀯 𑀚𑀸𑀢𑀲𑀺𑀦𑁂𑀳𑀸 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀸 𑀅𑀳𑁂𑀲𑀼𑀦𑁆𑀢𑀺.

𑀏𑀯𑀁 𑀧𑀜𑁆𑀘𑀯𑀺𑀥𑁂 𑀲𑀁𑀲𑀕𑁆𑀕𑁂 𑀬𑁂𑀦 𑀓𑁂𑀦𑀘𑀺 𑀲𑀁𑀲𑀕𑁆𑀕𑁂𑀦 𑀚𑀸𑀢𑀲𑀁𑀲𑀕𑁆𑀕𑀲𑁆𑀲 𑀪𑀯𑀢𑀺 𑀲𑁆𑀦𑁂𑀳𑁄, 𑀧𑀼𑀭𑀺𑀫𑀭𑀸𑀕𑀧𑀘𑁆𑀘𑀬𑀸 𑀩𑀮𑀯𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺 𑀢𑀫𑁂𑀯 𑀲𑁆𑀦𑁂𑀳𑀁 𑀅𑀦𑀼𑀕𑀘𑁆𑀙𑀦𑁆𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑁄𑀓𑀧𑀭𑀺𑀤𑁂𑀯𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺, 𑀦𑀺𑀩𑁆𑀩𑀢𑁆𑀢𑀢𑀺, 𑀪𑀯𑀢𑀺, 𑀚𑀸𑀬𑀢𑀺. 𑀅𑀧𑀭𑁂 𑀧𑀦 ‘‘𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀲𑀁𑀲𑀕𑁆𑀕𑁄’’𑀢𑀺 𑀪𑀡𑀦𑁆𑀢𑀺. 𑀢𑀢𑁄 𑀲𑁆𑀦𑁂𑀳𑁄, 𑀲𑁆𑀦𑁂𑀳𑀸 𑀤𑀼𑀓𑁆𑀔𑀫𑀺𑀤𑀦𑁆𑀢𑀺.

𑀏𑀯𑀫𑀢𑁆𑀣𑀧𑁆𑀧𑀪𑁂𑀤𑀁 ¶ ¶ 𑀇𑀫𑀁 𑀅𑀟𑁆𑀠𑀕𑀸𑀣𑀁 𑀯𑀢𑁆𑀯𑀸 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋 ‘‘𑀲𑁆𑀯𑀸𑀳𑀁 𑀬𑀫𑀺𑀤𑀁 𑀲𑁆𑀦𑁂𑀳𑀦𑁆𑀯𑀬𑀁 𑀲𑁄𑀓𑀸𑀤𑀺𑀤𑀼𑀓𑁆𑀔𑀁 𑀧𑀳𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮𑀁 𑀔𑀦𑀦𑁆𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀫𑀥𑀺𑀕𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑁂𑀳𑀺 𑀤𑀸𑀦𑀺, 𑀪𑀦𑁆𑀢𑁂, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? 𑀢𑀢𑁄 𑀲𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀯𑀸 𑀅𑀜𑁆𑀜𑁂 𑀯𑀸 𑀬𑁄 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀲𑀩𑁆𑀩𑁄𑀧𑀺 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. 𑀏𑀢𑁆𑀣 𑀘 𑀬𑀁 ‘‘𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁 ‘‘𑀢𑀤𑁂𑀯 𑀲𑀦𑁆𑀥𑀸𑀬 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀢𑀺 𑀲𑁆𑀦𑁂𑀳𑁄, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺, 𑀏𑀢𑀁 𑀬𑀣𑀸𑀪𑀽𑀢𑀁 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄 𑀅𑀳𑀁 𑀅𑀥𑀺𑀕𑀢𑁄𑀢𑀺. 𑀏𑀯𑀁 𑀅𑀪𑀺𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ¶ 𑀉𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀲𑀩𑁆𑀩𑀁 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀲𑀁𑀲𑀕𑁆𑀕𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁭. 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀧𑀞𑀫𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀲𑀫𑀡𑀥𑀫𑁆𑀫𑁄 𑀯𑀭𑁄, 𑀭𑀚𑁆𑀚𑀁 𑀯𑀭’’𑀦𑁆𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀅𑀫𑀘𑁆𑀘𑀸𑀦𑀁 𑀳𑀢𑁆𑀣𑁂 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀅𑀫𑀘𑁆𑀘𑀸 ‘‘𑀥𑀫𑁆𑀫𑁂𑀦 𑀲𑀫𑁂𑀦 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀸𑀧𑀺 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀥𑀫𑁆𑀫𑁂𑀦 𑀓𑀭𑁄𑀦𑁆𑀢𑀺. 𑀢𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑁂 𑀧𑀭𑀸𑀚𑁂𑀦𑁆𑀢𑀸 𑀏𑀓𑀤𑀸 𑀅𑀜𑁆𑀜𑀢𑀭𑀁 𑀭𑀸𑀚𑀯𑀮𑁆𑀮𑀪𑀁 𑀧𑀭𑀸𑀚𑁂𑀲𑀼𑀁. 𑀲𑁄 𑀭𑀜𑁆𑀜𑁄 𑀪𑀢𑁆𑀢𑀳𑀸𑀭𑀓𑁂𑀦 𑀲𑀤𑁆𑀥𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀬𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁄 𑀫𑀳𑀸𑀚𑀦𑀓𑀸𑀬𑀸 𑁋 ‘‘𑀅𑀫𑀘𑁆𑀘𑀸 𑀲𑀸𑀫𑀺𑀓𑁂 𑀅𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑀻’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀸 𑀫𑀳𑀸𑀬𑀼𑀤𑁆𑀥𑀁 𑀯𑀺𑀬 𑀅𑀓𑀁𑀲𑀼. 𑀅𑀣 𑀭𑀸𑀚𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸 𑀯𑀼𑀝𑁆𑀞𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑀼𑀁 𑀦𑀺𑀲𑀺𑀦𑁆𑀦𑁄 𑀢𑁂𑀦 𑀲𑀤𑁆𑀤𑁂𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 ¶ 𑀦 𑀲𑀓𑁆𑀓𑁄𑀢𑀺 𑀅𑀧𑁆𑀧𑁂𑀢𑀼𑀁. 𑀲𑁄 ‘‘𑀓𑀺𑀁 𑀫𑁂 𑀭𑀚𑁆𑀚𑁂𑀦, 𑀲𑀫𑀡𑀥𑀫𑁆𑀫𑁄 𑀯𑀭𑁄’’𑀢𑀺 𑀭𑀚𑁆𑀚𑀲𑀼𑀔𑀁 𑀧𑀳𑀸𑀬 𑀧𑀼𑀦 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀧𑀼𑀘𑁆𑀙𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀫𑀺𑀢𑁆𑀢𑀸. 𑀲𑀼𑀳𑀤𑀬𑀪𑀸𑀯𑁂𑀦 𑀲𑀼𑀳𑀚𑁆𑀚𑀸. 𑀓𑁂𑀘𑀺 𑀳𑀺 𑀏𑀓𑀦𑁆𑀢𑀳𑀺𑀢𑀓𑀸𑀫𑀢𑀸𑀬 𑀫𑀺𑀢𑁆𑀢𑀸𑀯 𑀳𑁄𑀦𑁆𑀢𑀺, 𑀦 𑀲𑀼𑀳𑀚𑁆𑀚𑀸. 𑀓𑁂𑀘𑀺 𑀕𑀫𑀦𑀸𑀕𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀲𑀫𑀼𑀮𑁆𑀮𑀸𑀧𑀸𑀤𑀻𑀲𑀼 𑀳𑀤𑀬𑀲𑀼𑀔𑀚𑀦𑀦𑁂𑀦 𑀲𑀼𑀳𑀚𑁆𑀚𑀸𑀯 𑀳𑁄𑀦𑁆𑀢𑀺, 𑀦 𑀫𑀺𑀢𑁆𑀢𑀸. 𑀓𑁂𑀘𑀺 𑀢𑀤𑀼𑀪𑀬𑀯𑀲𑁂𑀦 𑀲𑀼𑀳𑀚𑁆𑀚𑀸 𑀘𑁂𑀯 𑀫𑀺𑀢𑁆𑀢𑀸 𑀘. 𑀢𑁂 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 ¶ 𑁋 𑀅𑀕𑀸𑀭𑀺𑀬𑀸 𑀅𑀦𑀕𑀸𑀭𑀺𑀬𑀸 𑀘. 𑀢𑀢𑁆𑀣 𑀅𑀕𑀸𑀭𑀺𑀬𑀸 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑁋 𑀉𑀧𑀓𑀸𑀭𑁄, 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄, 𑀅𑀦𑀼𑀓𑀫𑁆𑀧𑀓𑁄𑀢𑀺. 𑀅𑀦𑀕𑀸𑀭𑀺𑀬𑀸 𑀯𑀺𑀲𑁂𑀲𑁂𑀦 𑀅𑀢𑁆𑀣𑀓𑁆𑀔𑀸𑀬𑀺𑀦𑁄 𑀏𑀯. 𑀢𑁂 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀘𑀢𑀽𑀳𑀺 ¶ 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀫𑀢𑁆𑀢𑀁 𑀭𑀓𑁆𑀔𑀢𑀺, 𑀧𑀫𑀢𑁆𑀢𑀲𑁆𑀲 𑀲𑀸𑀧𑀢𑁂𑀬𑁆𑀬𑀁 𑀭𑀓𑁆𑀔𑀢𑀺, 𑀪𑀻𑀢𑀲𑁆𑀲 𑀲𑀭𑀡𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀢𑀤𑁆𑀤𑀺𑀕𑀼𑀡𑀁 𑀪𑁄𑀕𑀁 𑀅𑀦𑀼𑀧𑁆𑀧𑀤𑁂𑀢𑀺’’ (𑀤𑀻. 𑀦𑀺. 𑁩.𑁨𑁬𑁧).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀺, 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀺, 𑀚𑀻𑀯𑀺𑀢𑀫𑁆𑀧𑀺𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺’’ (𑀤𑀻. 𑀦𑀺. 𑁩.𑁨𑁬𑁨).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀦𑀼𑀓𑀫𑁆𑀧𑀓𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀪𑀯𑁂𑀦𑀲𑁆𑀲 𑀦 𑀦𑀦𑁆𑀤𑀢𑀺, 𑀪𑀯𑁂𑀦𑀲𑁆𑀲 𑀦𑀦𑁆𑀤𑀢𑀺, 𑀅𑀯𑀡𑁆𑀡𑀁 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀯𑀡𑁆𑀡𑀁 𑀪𑀡𑀫𑀸𑀦𑀁 𑀧𑀲𑀁𑀲𑀢𑀺’’ (𑀤𑀻. 𑀦𑀺. 𑁩.𑁨𑁬𑁪).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀢𑁆𑀣𑀓𑁆𑀔𑀸𑀬𑀻 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀸𑀧𑀸 𑀦𑀺𑀯𑀸𑀭𑁂𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀢𑀺, 𑀅𑀲𑁆𑀲𑀼𑀢𑀁 𑀲𑀸𑀯𑁂𑀢𑀺, 𑀲𑀕𑁆𑀕𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁩).

𑀢𑁂𑀲𑁆𑀯𑀺𑀥 𑀅𑀕𑀸𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸. 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀬𑀼𑀚𑁆𑀚𑀦𑁆𑀢𑀺. 𑀢𑁂 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂. 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀅𑀦𑀼𑀤𑀬𑀫𑀸𑀦𑁄. 𑀢𑁂𑀲𑀁 𑀲𑀼𑀔𑀁 𑀉𑀧𑀲𑀁𑀳𑀭𑀺𑀢𑀼𑀓𑀸𑀫𑁄 𑀤𑀼𑀓𑁆𑀔𑀁 ¶ 𑀅𑀧𑀳𑀭𑀺𑀢𑀼𑀓𑀸𑀫𑁄 𑀘.

𑀳𑀸𑀧𑁂𑀢𑀺 𑀅𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀯𑀲𑁂𑀦 𑀢𑀺𑀯𑀺𑀥𑀁, 𑀢𑀣𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀉𑀪𑀬𑀢𑁆𑀣𑀯𑀲𑁂𑀦𑀸𑀧𑀺 ¶ 𑀢𑀺𑀯𑀺𑀥𑀁. 𑀅𑀢𑁆𑀣𑀁 𑀮𑀤𑁆𑀥𑀯𑀺𑀦𑀸𑀲𑀦𑁂𑀦 𑀅𑀮𑀤𑁆𑀥𑀸𑀦𑀼𑀧𑁆𑀧𑀸𑀤𑀦𑁂𑀦𑀸𑀢𑀺 𑀤𑁆𑀯𑀺𑀥𑀸𑀧𑀺 𑀳𑀸𑀧𑁂𑀢𑀺 𑀯𑀺𑀦𑀸𑀲𑁂𑀢𑀺. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 ‘‘𑀅𑀳𑀁 𑀇𑀫𑀁 𑀯𑀺𑀦𑀸 𑀦 𑀚𑀻𑀯𑀸𑀫𑀺, 𑀏𑀲 𑀫𑁂 𑀕𑀢𑀺, 𑀏𑀲 𑀫𑁂 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄𑀧𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. ‘‘𑀇𑀫𑁂 𑀫𑀁 𑀯𑀺𑀦𑀸 𑀦 𑀚𑀻𑀯𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀕𑀢𑀺, 𑀢𑁂𑀲𑀁 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄𑀧𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀇𑀥 𑀧𑀦 𑀏𑀯𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀢𑀁 𑀪𑀬𑀦𑁆𑀢𑀺 𑀏𑀢𑀁 𑀅𑀢𑁆𑀣𑀳𑀸𑀧𑀦𑀪𑀬𑀁, 𑀅𑀢𑁆𑀢𑀦𑁄 𑀲𑀫𑀸𑀧𑀢𑁆𑀢𑀺𑀳𑀸𑀦𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀦𑁆𑀣𑀯𑁂𑀢𑀺 ¶ 𑀢𑀺𑀯𑀺𑀥𑁄 𑀲𑀦𑁆𑀣𑀯𑁄 𑁋 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦. 𑀢𑀢𑁆𑀣 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸𑀧𑀺 𑀢𑀡𑁆𑀳𑀸 𑀢𑀡𑁆𑀳𑀸𑀲𑀦𑁆𑀣𑀯𑁄, 𑀤𑁆𑀯𑀸𑀲𑀝𑁆𑀞𑀺𑀪𑁂𑀤𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀦𑁆𑀣𑀯𑁄, 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀦𑀸 𑀫𑀺𑀢𑁆𑀢𑀲𑀦𑁆𑀣𑀯𑁄. 𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀳𑀺𑀲𑁆𑀲 𑀲𑀫𑀸𑀧𑀢𑁆𑀢𑀺 𑀧𑀭𑀺𑀳𑀻𑀦𑀸. 𑀢𑁂𑀦𑀸𑀳 𑁋 ‘‘𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄 𑀅𑀳𑀫𑀥𑀺𑀕𑀢𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀫𑀺𑀢𑁆𑀢𑀲𑀼𑀳𑀚𑁆𑀚𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁮. 𑀯𑀁𑀲𑁄 𑀯𑀺𑀲𑀸𑀮𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀢𑀬𑁄 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀩𑀸𑀭𑀸𑀡𑀲𑀺𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀢𑀭𑁂 𑀧𑀘𑁆𑀘𑀦𑁆𑀢𑀭𑀸𑀚𑀓𑀼𑀮𑁂𑀲𑀼. 𑀢𑁂 𑀉𑀪𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸, 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀼𑀢𑁆𑀯𑀸, 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀲𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀫𑀬𑀁 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀅𑀦𑀼𑀧𑁆𑀧𑀢𑁆𑀢𑀸’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀅𑀢𑁆𑀢𑀦𑁄 𑀘𑀭𑀺𑀬𑀁 𑀅𑀤𑁆𑀤𑀲𑀁𑀲𑀼. 𑀢𑀢𑁄 ‘‘𑀢𑀢𑀺𑀬𑁄 𑀓𑀼𑀳𑀺’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑀸 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 ¶ 𑀓𑀸𑀭𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀕𑀼𑀡𑁂 𑀲𑀭𑀺𑀢𑁆𑀯𑀸 ‘‘𑀲𑁄 𑀧𑀓𑀢𑀺𑀬𑀸𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺, 𑀅𑀫𑁆𑀳𑀸𑀓𑀜𑁆𑀜𑁂𑀯 𑀑𑀯𑀸𑀤𑀓𑁄 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄 𑀧𑀸𑀧𑀕𑀭𑀳𑀻, 𑀳𑀦𑁆𑀤, 𑀦𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀫𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑀸 𑀢𑀁 𑀏𑀓𑀤𑀺𑀯𑀲𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀯𑁂𑀴𑀼𑀕𑀼𑀫𑁆𑀩𑀫𑀽𑀮𑁂 𑀅𑀝𑁆𑀞𑀁𑀲𑀼. 𑀫𑀳𑀸𑀚𑀦𑁄 𑀅𑀢𑀺𑀢𑁆𑀢𑁄 𑀭𑀸𑀚𑀤𑀲𑁆𑀲𑀦𑁂𑀦 𑀭𑀸𑀚𑀸𑀦𑀁 𑀑𑀮𑁄𑀓𑁂𑀢𑀺. 𑀢𑀢𑁄 𑀭𑀸𑀚𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀫𑀫 𑀤𑀲𑁆𑀲𑀦𑁂 𑀅𑀩𑁆𑀬𑀸𑀯𑀝𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀤𑁆𑀤𑀓𑁆𑀔𑀺. 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀘𑀲𑁆𑀲 𑀢𑁂𑀲𑀼 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺.

𑀲𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀑𑀭𑀼𑀬𑁆𑀳 𑀲𑀦𑁆𑀢𑁂𑀦 𑀉𑀧𑀘𑀸𑀭𑁂𑀦 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀁 𑀦𑀸𑀫𑀸 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. 𑀢𑁂 𑀆𑀳𑀁𑀲𑀼 ‘‘𑀫𑀬𑀁, 𑀫𑀳𑀸𑀭𑀸𑀚, 𑀅𑀲𑀚𑁆𑀚𑀫𑀸𑀦𑀸 𑀦𑀸𑀫𑀸’’𑀢𑀺. ‘‘𑀪𑀦𑁆𑀢𑁂, ‘𑀅𑀲𑀚𑁆𑀚𑀫𑀸𑀦𑀸’𑀢𑀺 𑀏𑀢𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺? ‘‘𑀅𑀮𑀕𑁆𑀕𑀦𑀢𑁆𑀣𑁄, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀢𑀁 𑀯𑁂𑀴𑀼𑀕𑀼𑀫𑁆𑀩𑀁 𑀤𑀲𑁆𑀲𑁂𑀦𑁆𑀢𑀸 𑀆𑀳𑀁𑀲𑀼 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀇𑀫𑀁 𑀯𑁂𑀴𑀼𑀕𑀼𑀫𑁆𑀩𑀁 𑀲𑀩𑁆𑀩𑀲𑁄 𑀫𑀽𑀮𑀔𑀦𑁆𑀥𑀲𑀸𑀔𑀸𑀦𑀼𑀲𑀸𑀔𑀸𑀳𑀺 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 ¶ 𑀞𑀺𑀢𑀁 𑀅𑀲𑀺𑀳𑀢𑁆𑀣𑁄 𑀧𑀼𑀭𑀺𑀲𑁄 𑀫𑀽𑀮𑁂 𑀙𑁂𑀢𑁆𑀯𑀸 𑀆𑀯𑀺𑀜𑁆𑀙𑀦𑁆𑀢𑁄 𑀦 𑀲𑀓𑁆𑀓𑀼𑀡𑁂𑀬𑁆𑀬 𑀉𑀤𑁆𑀥𑀭𑀺𑀢𑀼𑀁 ¶ , 𑀏𑀯𑀫𑁂𑀯 𑀢𑁆𑀯𑀁 𑀅𑀦𑁆𑀢𑁄 𑀘 𑀩𑀳𑀺 𑀘 𑀚𑀝𑀸𑀬 𑀚𑀝𑀺𑀢𑁄 𑀆𑀲𑀢𑁆𑀢𑀯𑀺𑀲𑀢𑁆𑀢𑁄 𑀢𑀢𑁆𑀣 𑀮𑀕𑁆𑀕𑁄. 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦𑀲𑁆𑀲 𑀯𑁂𑀫𑀚𑁆𑀛𑀕𑀢𑁄𑀧𑀺 𑀅𑀬𑀁 𑀯𑀁𑀲𑀓𑀴𑀻𑀭𑁄 𑀅𑀲𑀜𑁆𑀚𑀸𑀢𑀲𑀸𑀔𑀢𑁆𑀢𑀸 𑀓𑁂𑀦𑀘𑀺 𑀅𑀮𑀕𑁆𑀕𑁄 𑀞𑀺𑀢𑁄, 𑀲𑀓𑁆𑀓𑀸 𑀘 𑀧𑀦 𑀅𑀕𑁆𑀕𑁂 𑀯𑀸 𑀫𑀽𑀮𑁂 𑀯𑀸 𑀙𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑀼𑀁, 𑀏𑀯𑀫𑁂𑀯 𑀫𑀬𑀁 𑀓𑀢𑁆𑀣𑀘𑀺 𑀅𑀲𑀚𑁆𑀚𑀫𑀸𑀦𑀸 𑀲𑀩𑁆𑀩𑀤𑀺𑀲𑀸 𑀕𑀘𑁆𑀙𑀸𑀫𑀸’’𑀢𑀺 𑀢𑀸𑀯𑀤𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀲𑁆𑀲𑀢𑁄 𑀏𑀯 𑀭𑀜𑁆𑀜𑁄 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀁 𑀅𑀲𑀚𑁆𑀚𑀫𑀸𑀦𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 ¶ 𑀯𑀁𑀲𑁄𑀢𑀺 𑀯𑁂𑀴𑀼. 𑀯𑀺𑀲𑀸𑀮𑁄𑀢𑀺 𑀯𑀺𑀢𑁆𑀣𑀺𑀡𑁆𑀡𑁄. 𑀘𑀓𑀸𑀭𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀏𑀯𑀓𑀸𑀭𑁄 𑀯𑀸 𑀅𑀬𑀁, 𑀲𑀦𑁆𑀥𑀺𑀯𑀲𑁂𑀦𑁂𑀢𑁆𑀣 𑀏𑀓𑀸𑀭𑁄 𑀦𑀝𑁆𑀞𑁄. 𑀢𑀲𑁆𑀲 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑁄, 𑀢𑀁 𑀧𑀘𑁆𑀙𑀸 𑀬𑁄𑀚𑁂𑀲𑁆𑀲𑀸𑀫. 𑀬𑀣𑀸𑀢𑀺 𑀧𑀝𑀺𑀪𑀸𑀕𑁂. 𑀯𑀺𑀲𑀢𑁆𑀢𑁄𑀢𑀺 𑀮𑀕𑁆𑀕𑁄, 𑀚𑀝𑀺𑀢𑁄 𑀲𑀁𑀲𑀺𑀩𑁆𑀩𑀺𑀢𑁄. 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘𑀸𑀢𑀺 𑀧𑀼𑀢𑁆𑀢𑀥𑀻𑀢𑀼𑀪𑀭𑀺𑀬𑀸𑀲𑀼. 𑀬𑀸 𑀅𑀧𑁂𑀓𑁆𑀔𑀸𑀢𑀺 𑀬𑀸 𑀢𑀡𑁆𑀳𑀸 𑀬𑁄 𑀲𑁆𑀦𑁂𑀳𑁄. 𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄𑀢𑀺 𑀯𑀁𑀲𑀓𑀴𑀻𑀭𑁄 𑀯𑀺𑀬 𑀅𑀮𑀕𑁆𑀕𑀫𑀸𑀦𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀯𑀁𑀲𑁄 𑀯𑀺𑀲𑀸𑀮𑁄 𑀯𑀺𑀲𑀢𑁆𑀢𑁄 𑀏𑀯 𑀳𑁄𑀢𑀺, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸, 𑀲𑀸𑀧𑀺 𑀏𑀯𑀁 𑀢𑀸𑀦𑀺 𑀯𑀢𑁆𑀣𑀽𑀦𑀺 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀺𑀲𑀢𑁆𑀢𑀸 𑀏𑀯. 𑀲𑁆𑀯𑀸𑀳𑀁 𑀢𑀸𑀬 𑀅𑀧𑁂𑀓𑁆𑀔𑀸𑀬 𑀅𑀧𑁂𑀓𑁆𑀔𑀯𑀸 𑀯𑀺𑀲𑀸𑀮𑁄 𑀯𑀁𑀲𑁄 𑀯𑀺𑀬 𑀯𑀺𑀲𑀢𑁆𑀢𑁄𑀢𑀺 𑀏𑀯𑀁 𑀅𑀧𑁂𑀓𑁆𑀔𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀅𑀧𑁂𑀓𑁆𑀔𑀁 𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀦𑁆𑀢𑁄 𑀅𑀬𑀁 𑀯𑀁𑀲𑀓𑀴𑀻𑀭𑁄𑀯 𑀭𑀽𑀧𑀸𑀤𑀻𑀲𑀼 𑀯𑀸 𑀮𑁄𑀪𑀸𑀤𑀻𑀲𑀼 𑀯𑀸 𑀓𑀸𑀫𑀪𑀯𑀸𑀤𑀻𑀲𑀼 𑀯𑀸 𑀤𑀺𑀝𑁆𑀞𑀸𑀤𑀻𑀲𑀼 𑀯𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀅𑀲𑀚𑁆𑀚𑀫𑀸𑀦𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀯𑀁𑀲𑀓𑀴𑀻𑀭𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁯. 𑀫𑀺𑀕𑁄 ¶ 𑀅𑀭𑀜𑁆𑀜𑀫𑁆𑀳𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀬𑁄𑀕𑀸𑀯𑀘𑀭𑁄 𑀓𑀸𑀮𑀁 𑀓𑀢𑁆𑀯𑀸, 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂, 𑀲𑁄 𑀲𑀼𑀪𑀕𑁄 𑀅𑀳𑁄𑀲𑀺. 𑀢𑀢𑁄 𑀧𑀭𑀤𑀸𑀭𑀺𑀓𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀓𑀸𑀮𑀓𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀇𑀢𑁆𑀣𑀺𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀦𑀺𑀭𑀬𑀢𑁄 𑀆𑀕𑀢𑀸𑀦𑀁 𑀕𑀢𑁆𑀢𑀸𑀦𑀺 𑀉𑀡𑁆𑀳𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀟𑀬𑁆𑀳𑀫𑀸𑀦𑁂𑀦 𑀉𑀤𑀭𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀁 𑀕𑀩𑁆𑀪𑀁 𑀥𑀸𑀭𑁂𑀢𑁆𑀯𑀸 ¶ 𑀓𑀸𑀮𑁂𑀦 𑀤𑀸𑀭𑀺𑀓𑀁 𑀯𑀺𑀚𑀸𑀬𑀺. 𑀲𑀸 𑀚𑀸𑀢𑀤𑀺𑀯𑀲𑀢𑁄 𑀧𑀪𑀼𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑁂𑀲𑀩𑀦𑁆𑀥𑀼𑀧𑀭𑀺𑀚𑀦𑀸𑀦𑀜𑁆𑀘 𑀤𑁂𑀲𑁆𑀲𑀸 𑀅𑀳𑁄𑀲𑀺. 𑀯𑀬𑀧𑁆𑀧𑀢𑁆𑀢𑀸 𑀘 𑀬𑀫𑁆𑀳𑀺 𑀓𑀼𑀮𑁂 𑀤𑀺𑀦𑁆𑀦𑀸, 𑀢𑀢𑁆𑀣𑀸𑀧𑀺 𑀲𑀸𑀫𑀺𑀓𑀲𑀲𑁆𑀲𑀼𑀲𑀲𑀼𑀭𑀸𑀦𑀁 𑀤𑁂𑀲𑁆𑀲𑀸𑀯 𑀅𑀳𑁄𑀲𑀺 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸. 𑀅𑀣 𑀦𑀓𑁆𑀔𑀢𑁆𑀢𑁂 𑀖𑁄𑀲𑀺𑀢𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀓𑀻𑀴𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀯𑁂𑀲𑀺𑀁 𑀆𑀦𑁂𑀢𑁆𑀯𑀸 𑀓𑀻𑀴𑀢𑀺. 𑀲𑀸 𑀢𑀁 𑀤𑀸𑀲𑀻𑀦𑀁 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀦𑀼𑀦𑀬𑀺𑀢𑁆𑀯𑀸 𑀆𑀳 𑁋 ‘‘𑀅𑀬𑁆𑀬𑀧𑀼𑀢𑁆𑀢, 𑀇𑀢𑁆𑀣𑀻 𑀦𑀸𑀫 𑀲𑀘𑁂𑀧𑀺 𑀤𑀲𑀦𑁆𑀦𑀁 𑀭𑀸𑀚𑀽𑀦𑀁 𑀓𑀦𑀺𑀝𑁆𑀞𑀸 𑀳𑁄𑀢𑀺, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀯𑀸 𑀥𑀻𑀢𑀸, 𑀢𑀣𑀸𑀧𑀺 𑀲𑀸𑀫𑀺𑀓𑀲𑁆𑀲 𑀧𑁂𑀲𑀦𑀓𑀭𑀸 𑀳𑁄𑀢𑀺. 𑀲𑀸𑀫𑀺𑀓𑁂 𑀅𑀦𑀸𑀮𑀧𑀦𑁆𑀢𑁂 𑀲𑀽𑀮𑁂 𑀆𑀭𑁄𑀧𑀺𑀢𑀸 𑀯𑀺𑀬 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑀘𑁂 ¶ 𑀅𑀳𑀁 𑀅𑀦𑀼𑀕𑁆𑀕𑀳𑀸𑀭𑀳𑀸, 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸, 𑀅𑀢𑁆𑀢𑀦𑁄 𑀜𑀸𑀢𑀺𑀓𑀼𑀮𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑁋 ‘‘𑀳𑁄𑀢𑀼, 𑀪𑀤𑁆𑀤𑁂, 𑀫𑀸 𑀲𑁄𑀘𑀺, 𑀓𑀻𑀴𑀦𑀲𑀚𑁆𑀚𑀸 𑀳𑁄𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀲𑁂𑀝𑁆𑀞𑀺𑀥𑀻𑀢𑀸 𑀢𑀸𑀯𑀢𑀓𑁂𑀦𑀧𑀺 𑀲𑀮𑁆𑀮𑀸𑀧𑀫𑀢𑁆𑀢𑁂𑀦 𑀉𑀲𑁆𑀲𑀸𑀳𑀚𑀸𑀢𑀸 ‘‘𑀲𑁆𑀯𑁂 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀁 𑀔𑀚𑁆𑀚𑀪𑁄𑀚𑁆𑀚𑀁 𑀧𑀝𑀺𑀬𑀸𑀤𑁂𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀓𑀻𑀴𑀦𑀝𑁆𑀞𑀸𑀦𑀁 𑀕𑀢𑁄. 𑀲𑀸 ‘‘𑀇𑀤𑀸𑀦𑀺 𑀧𑁂𑀲𑁂𑀲𑁆𑀲𑀢𑀺, 𑀇𑀤𑀸𑀦𑀺 𑀧𑁂𑀲𑁂𑀲𑁆𑀲𑀢𑀻’’𑀢𑀺 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀻 𑀦𑀺𑀲𑀺𑀦𑁆𑀦𑀸 𑀉𑀲𑁆𑀲𑀽𑀭𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀩𑁆𑀩𑀁 𑀢𑀁 𑀧𑀝𑀺𑀬𑀸𑀤𑀺𑀢𑀁 𑀆𑀤𑀸𑀬 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑀼𑀁 𑀆𑀭𑀤𑁆𑀥𑀸.

𑀅𑀣 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀦𑁄𑀢𑀢𑁆𑀢𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀦𑀸𑀕𑀮𑀢𑀸𑀤𑀦𑁆𑀢𑀧𑁄𑀡𑀁 𑀔𑀸𑀤𑀺𑀢𑁆𑀯𑀸 ‘‘𑀓𑀢𑁆𑀣 𑀅𑀚𑁆𑀚 𑀪𑀺𑀓𑁆𑀔𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀲𑁂𑀝𑁆𑀞𑀺𑀥𑀻𑀢𑀭𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀫𑀬𑀺 𑀲𑀓𑁆𑀓𑀸𑀭𑀁 𑀓𑀭𑀺𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀩𑁆𑀪𑀸𑀭𑀲𑀫𑀻𑀧𑁂 ¶ 𑀲𑀝𑁆𑀞𑀺𑀬𑁄𑀚𑀦𑀁 𑀫𑀦𑁄𑀲𑀺𑀮𑀸𑀢𑀮𑀁, 𑀢𑀢𑁆𑀣 𑀞𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀝𑀺𑀧𑀣𑁂 𑀑𑀭𑀼𑀬𑁆𑀳 𑀩𑀸𑀭𑀸𑀡𑀲𑀻𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀤𑀸𑀲𑀺𑀬𑁄 𑀲𑁂𑀝𑁆𑀞𑀺𑀥𑀻𑀢𑀸𑀬 𑀆𑀭𑁄𑀘𑁂𑀲𑀼𑀁. 𑀲𑀸 𑀬𑀸𑀦𑀸 𑀑𑀭𑀼𑀬𑁆𑀳 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀲𑀩𑁆𑀩𑀭𑀲𑀲𑀫𑁆𑀧𑀦𑁆𑀦𑁂𑀦 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀦 𑀧𑀽𑀭𑁂𑀢𑁆𑀯𑀸, 𑀧𑀤𑀼𑀫𑀧𑀼𑀧𑁆𑀨𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀺 𑀧𑀤𑀼𑀫𑀧𑀼𑀧𑁆𑀨𑀁 𑀓𑀢𑁆𑀯𑀸, 𑀧𑀼𑀧𑁆𑀨𑀓𑀮𑀸𑀧𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀢𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸, 𑀧𑀼𑀧𑁆𑀨𑀓𑀮𑀸𑀧𑀳𑀢𑁆𑀣𑀸 𑀧𑀢𑁆𑀣𑁂𑀲𑀺 ‘‘𑀪𑀦𑁆𑀢𑁂, 𑀬𑀣𑀸 𑀇𑀤𑀁 𑀧𑀼𑀧𑁆𑀨𑀁, 𑀏𑀯𑀸𑀳𑀁 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀸𑀫𑀺, 𑀢𑀢𑁆𑀣 𑀢𑀢𑁆𑀣 𑀫𑀳𑀸𑀚𑀦𑀲𑁆𑀲 𑀧𑀺𑀬𑀸 𑀪𑀯𑁂𑀬𑁆𑀬𑀁 𑀫𑀦𑀸𑀧𑀸’’𑀢𑀺. 𑀏𑀯𑀁 𑀧𑀢𑁆𑀣𑁂𑀢𑁆𑀯𑀸 𑀤𑀼𑀢𑀺𑀬𑀁 𑀧𑀢𑁆𑀣𑁂𑀲𑀺 ‘‘𑀪𑀦𑁆𑀢𑁂, 𑀤𑀼𑀓𑁆𑀔𑁄 𑀕𑀩𑁆𑀪𑀯𑀸𑀲𑁄, 𑀢𑀁 𑀅𑀦𑀼𑀧𑀕𑀫𑁆𑀫 𑀧𑀤𑀼𑀫𑀧𑀼𑀧𑁆𑀨𑁂 𑀏𑀯𑀁 𑀧𑀝𑀺𑀲𑀦𑁆𑀥𑀺 𑀪𑀯𑁂𑀬𑁆𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀧𑀢𑁆𑀣𑁂𑀲𑀺 ‘‘𑀪𑀦𑁆𑀢𑁂, 𑀚𑀺𑀕𑀼𑀘𑁆𑀙𑀦𑀻𑀬𑁄 𑀫𑀸𑀢𑀼𑀕𑀸𑀫𑁄, 𑀘𑀓𑁆𑀓𑀯𑀢𑁆𑀢𑀺𑀥𑀻𑀢𑀸𑀧𑀺 𑀧𑀭𑀯𑀲𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀳𑀁 𑀇𑀢𑁆𑀣𑀺𑀪𑀸𑀯𑀁 𑀅𑀦𑀼𑀧𑀕𑀫𑁆𑀫 𑀧𑀼𑀭𑀺𑀲𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀘𑀢𑀼𑀢𑁆𑀣𑀫𑁆𑀧𑀺 ¶ 𑀧𑀢𑁆𑀣𑁂𑀲𑀺 ‘‘𑀪𑀦𑁆𑀢𑁂, 𑀇𑀫𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀺𑀬𑁄𑀲𑀸𑀦𑁂 𑀢𑀼𑀫𑁆𑀳𑁂𑀳𑀺 𑀧𑀢𑁆𑀢𑀁 𑀅𑀫𑀢𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺.

𑀏𑀯𑀁 ¶ 𑀘𑀢𑀼𑀭𑁄 𑀧𑀡𑀺𑀥𑀬𑁄 𑀓𑀢𑁆𑀯𑀸, 𑀢𑀁 𑀧𑀤𑀼𑀫𑀧𑀼𑀧𑁆𑀨𑀓𑀮𑀸𑀧𑀁 𑀧𑀽𑀚𑁂𑀢𑁆𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀼𑀧𑁆𑀨𑀲𑀤𑀺𑀲𑁄 𑀏𑀯 𑀫𑁂 𑀕𑀦𑁆𑀥𑁄 𑀘𑁂𑀯 𑀯𑀡𑁆𑀡𑁄 𑀘 𑀳𑁄𑀢𑀽’’𑀢𑀺 𑀇𑀫𑀁 𑀧𑀜𑁆𑀘𑀫𑀁 𑀧𑀡𑀺𑀥𑀺𑀁 𑀅𑀓𑀸𑀲𑀺. 𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀢𑁆𑀢𑀁 𑀧𑀼𑀧𑁆𑀨𑀓𑀮𑀸𑀧𑀜𑁆𑀘 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 ‘‘𑀲𑁂𑀝𑁆𑀞𑀺𑀥𑀻𑀢𑀸 𑀫𑀁 𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸𑀬 𑀢𑀁 𑀤𑀺𑀲𑁆𑀯𑀸 𑀫𑀳𑀢𑀻 𑀧𑀻𑀢𑀺 𑀉𑀧𑁆𑀧𑀦𑁆𑀦𑀸. 𑀪𑀯𑀦𑁆𑀢𑀭𑁂 𑀓𑀢𑀁 𑀅𑀓𑀼𑀲𑀮𑀓𑀫𑁆𑀫𑀁 𑀅𑀦𑁄𑀓𑀸𑀲𑀢𑀸𑀬 𑀧𑀭𑀺𑀓𑁆𑀔𑀻𑀡𑀁, 𑀘𑀺𑀜𑁆𑀘𑀫𑁆𑀩𑀺𑀮𑀥𑁄𑀢𑀢𑀫𑁆𑀩𑀪𑀸𑀚𑀦𑀫𑀺𑀯 𑀲𑀼𑀤𑁆𑀥𑀸 𑀚𑀸𑀢𑀸. 𑀢𑀸𑀯𑀤𑁂𑀯 𑀘𑀲𑁆𑀲𑀸 𑀧𑀢𑀺𑀓𑀼𑀮𑁂 𑀜𑀸𑀢𑀺𑀓𑀼𑀮𑁂 𑀘 𑀲𑀩𑁆𑀩𑁄 𑀚𑀦𑁄 𑀢𑀼𑀝𑁆𑀞𑁄 ‘‘𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀺𑀬𑀯𑀘𑀦𑀸𑀦𑀺 𑀧𑀡𑁆𑀡𑀸𑀓𑀸𑀭𑀸𑀦𑀺 𑀘 𑀧𑁂𑀲𑁂𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺 ‘‘𑀲𑀻𑀖𑀁 𑀲𑀻𑀖𑀁 𑀆𑀦𑁂𑀣 𑀲𑁂𑀝𑁆𑀞𑀺𑀥𑀻𑀢𑀭𑀁, 𑀅𑀳𑀁 𑀯𑀺𑀲𑁆𑀲𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀆𑀕𑀢𑁄’’𑀢𑀺. 𑀢𑀢𑁄 𑀧𑀪𑀼𑀢𑀺 𑀘 𑀦𑀁 𑀉𑀭𑁂 𑀯𑀺𑀮𑀺𑀢𑁆𑀢𑀘𑀦𑁆𑀤𑀦𑀁 𑀯𑀺𑀬 𑀆𑀫𑀼𑀢𑁆𑀢𑀫𑀼𑀢𑁆𑀢𑀸𑀳𑀸𑀭𑀁 𑀯𑀺𑀬 𑀧𑀼𑀧𑁆𑀨𑀫𑀸𑀮𑀁 𑀯𑀺𑀬 𑀘 𑀧𑀺𑀬𑀸𑀬𑀦𑁆𑀢𑁄 𑀧𑀭𑀺𑀳𑀭𑀺.

𑀲𑀸 ¶ 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀇𑀲𑁆𑀲𑀭𑀺𑀬𑀪𑁄𑀕𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀼𑀭𑀺𑀲𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀧𑀤𑀼𑀫𑀧𑀼𑀧𑁆𑀨𑁂 𑀉𑀧𑁆𑀧𑀚𑁆𑀚𑀺. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀕𑀘𑁆𑀙𑀦𑁆𑀢𑁄𑀧𑀺 𑀧𑀤𑀼𑀫𑀧𑀼𑀧𑁆𑀨𑀕𑀩𑁆𑀪𑁂𑀬𑁂𑀯 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀦𑁆𑀢𑁄𑀧𑀺, 𑀦𑀺𑀲𑀻𑀤𑀦𑁆𑀢𑁄𑀧𑀺, 𑀲𑀬𑀦𑁆𑀢𑁄𑀧𑀺 𑀧𑀤𑀼𑀫𑀕𑀩𑁆𑀪𑁂𑀬𑁂𑀯 𑀲𑀬𑀢𑀺. 𑀫𑀳𑀸𑀧𑀤𑀼𑀫𑀤𑁂𑀯𑀧𑀼𑀢𑁆𑀢𑁄𑀢𑀺 𑀘𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀏𑀯𑀁 𑀲𑁄 𑀢𑁂𑀦 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀙𑀤𑁂𑀯𑀮𑁄𑀓𑁂 𑀏𑀯 𑀲𑀁𑀲𑀭𑀢𑀺.

𑀢𑁂𑀦 ¶ 𑀘 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀭𑀸𑀚𑀸 𑀏𑀓𑀺𑀲𑁆𑀲𑀸𑀧𑀺 𑀓𑀼𑀘𑁆𑀙𑀺𑀬𑀁 𑀧𑀼𑀢𑁆𑀢𑀁 𑀦 𑀮𑀪𑀢𑀺. 𑀅𑀫𑀘𑁆𑀘𑀸 𑀭𑀸𑀚𑀸𑀦𑀁 𑀯𑀺𑀜𑁆𑀜𑀸𑀧𑁂𑀲𑀼𑀁 ‘‘𑀤𑁂𑀯, 𑀓𑀼𑀮𑀯𑀁𑀲𑀸𑀦𑀼𑀧𑀸𑀮𑀓𑁄 𑀧𑀼𑀢𑁆𑀢𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀢𑁆𑀭𑀚𑁂 𑀅𑀯𑀺𑀚𑁆𑀚𑀫𑀸𑀦𑁂 𑀔𑁂𑀢𑁆𑀭𑀚𑁄𑀧𑀺 𑀓𑀼𑀮𑀯𑀁𑀲𑀥𑀭𑁄 𑀳𑁄𑀢𑀻’’𑀢𑀺. 𑀭𑀸𑀚𑀸 ‘‘𑀞𑀧𑁂𑀢𑁆𑀯𑀸 𑀫𑀳𑁂𑀲𑀺𑀁 𑀅𑀯𑀲𑁂𑀲𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀲𑀢𑁆𑀢𑀸𑀳𑀁 𑀥𑀫𑁆𑀫𑀦𑀸𑀝𑀓𑀁 𑀓𑀭𑁄𑀣𑀸’’𑀢𑀺 𑀬𑀣𑀸𑀓𑀸𑀫𑀁 𑀩𑀳𑀺 𑀘𑀭𑀸𑀧𑁂𑀲𑀺, 𑀢𑀣𑀸𑀧𑀺 𑀧𑀼𑀢𑁆𑀢𑀁 𑀦𑀸𑀮𑀢𑁆𑀣. 𑀧𑀼𑀦 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀫𑀳𑁂𑀲𑀻 𑀦𑀸𑀫 𑀧𑀼𑀜𑁆𑀜𑁂𑀦 𑀘 𑀧𑀜𑁆𑀜𑀸𑀬 𑀘 𑀲𑀩𑁆𑀩𑀺𑀢𑁆𑀣𑀻𑀦𑀁 𑀅𑀕𑁆𑀕𑀸, 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑁄 𑀫𑀳𑁂𑀲𑀺𑀬𑀸𑀧𑀺 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬𑀸’’𑀢𑀺. 𑀭𑀸𑀚𑀸 𑀫𑀳𑁂𑀲𑀺𑀬𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀸 𑀆𑀳 𑁋 ‘‘𑀫𑀳𑀸𑀭𑀸𑀚, 𑀬𑀸 𑀇𑀢𑁆𑀣𑀻 𑀲𑀘𑁆𑀘𑀯𑀸𑀤𑀺𑀦𑀻 𑀲𑀻𑀮𑀯𑀢𑀻, 𑀲𑀸 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬, 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀸𑀬 𑀓𑀼𑀢𑁄 𑀧𑀼𑀢𑁆𑀢𑁄’’𑀢𑀺 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀫𑀚𑁆𑀚𑀢𑀺. 𑀲𑀻𑀮𑀯𑀢𑀺𑀬𑀸 𑀭𑀸𑀚𑀥𑀻𑀢𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀅𑀦𑀼𑀫𑀚𑁆𑀚𑀦𑁆𑀢𑀺𑀬𑀸 𑀧𑀼𑀢𑁆𑀢𑀧𑀢𑁆𑀣𑀦𑀸𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀲𑀦𑁆𑀢𑀧𑁆𑀧𑀺.

𑀅𑀣 ¶ 𑀲𑀓𑁆𑀓𑁄 𑀆𑀲𑀦𑀢𑀸𑀧𑀓𑀸𑀭𑀡𑀁 𑀆𑀯𑀚𑁆𑀚𑁂𑀦𑁆𑀢𑁄 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 ‘‘𑀲𑀻𑀮𑀯𑀢𑀺𑀬𑀸 𑀭𑀸𑀚𑀥𑀻𑀢𑀸𑀬 𑀧𑀼𑀢𑁆𑀢𑀯𑀭𑀁 𑀤𑁂𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑁂𑀯𑀺𑀬𑀸 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 ‘‘𑀓𑀺𑀁 𑀧𑀢𑁆𑀣𑁂𑀲𑀺 𑀤𑁂𑀯𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀼𑀢𑁆𑀢𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀤𑀫𑁆𑀫𑀺 𑀢𑁂, 𑀤𑁂𑀯𑀺, 𑀧𑀼𑀢𑁆𑀢𑀁, 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀯𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀔𑀻𑀡𑀸𑀬𑀼𑀓𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀬𑀁 𑀫𑀳𑀸𑀧𑀤𑀼𑀫𑁄 𑀉𑀧𑀭𑀺𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀇𑀢𑁄 𑀘𑀯𑀢𑀻’’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀯𑀺𑀫𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀢 𑀫𑀳𑀸𑀧𑀤𑀼𑀫, 𑀫𑀦𑀼𑀲𑁆𑀲𑀮𑁄𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀬𑀸𑀘𑀺. 𑀲𑁄 𑀆𑀳 𑁋 ‘‘𑀫𑀳𑀸𑀭𑀸𑀚, 𑀫𑀸 𑀏𑀯𑀁 𑀪𑀡𑀺, 𑀚𑁂𑀕𑀼𑀘𑁆𑀙𑁄 𑀫𑀦𑀼𑀲𑁆𑀲𑀮𑁄𑀓𑁄’’𑀢𑀺. ‘‘𑀢𑀸𑀢, 𑀢𑁆𑀯𑀁 𑀫𑀦𑀼𑀲𑁆𑀲𑀮𑁄𑀓𑁂 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄, 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀩𑁆𑀩𑀸, 𑀕𑀘𑁆𑀙, 𑀢𑀸𑀢𑀸’’𑀢𑀺. ‘‘𑀤𑀼𑀓𑁆𑀔𑁄, 𑀫𑀳𑀸𑀭𑀸𑀚, 𑀕𑀩𑁆𑀪𑀯𑀸𑀲𑁄, 𑀦 𑀲𑀓𑁆𑀓𑁄𑀫𑀺 𑀢𑀢𑁆𑀣 𑀯𑀲𑀺𑀢𑀼’’𑀦𑁆𑀢𑀺. ‘‘𑀓𑀺𑀁 𑀢𑁂, 𑀢𑀸𑀢, 𑀕𑀩𑁆𑀪𑀯𑀸𑀲𑁂𑀦, 𑀢𑀣𑀸 𑀳𑀺 𑀢𑁆𑀯𑀁 𑀓𑀫𑁆𑀫𑀫𑀓𑀸𑀲𑀺, 𑀬𑀣𑀸 ¶ 𑀧𑀤𑀼𑀫𑀕𑀩𑁆𑀪𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺, 𑀕𑀘𑁆𑀙, 𑀢𑀸𑀢𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀅𑀥𑀺𑀯𑀸𑀲𑁂𑀲𑀺.

𑀢𑀢𑁄 𑀫𑀳𑀸𑀧𑀤𑀼𑀫𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 ¶ 𑀉𑀬𑁆𑀬𑀸𑀦𑁂 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀁 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀜𑁆𑀘 𑀭𑀢𑁆𑀢𑀺𑀁 𑀫𑀳𑁂𑀲𑀻 𑀧𑀘𑁆𑀘𑀽𑀲𑀲𑀫𑀬𑁂 𑀲𑀼𑀧𑀺𑀦𑀦𑁆𑀢𑁂𑀦 𑀯𑀻𑀲𑀢𑀺𑀇𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀁 𑀧𑀤𑀼𑀫𑀲𑁆𑀲𑀭𑁂 𑀧𑀼𑀢𑁆𑀢𑀁 𑀮𑀤𑁆𑀥𑀸 𑀯𑀺𑀬 𑀅𑀳𑁄𑀲𑀺. 𑀲𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀻𑀮𑀸𑀦𑀺 𑀭𑀓𑁆𑀔𑀫𑀸𑀦𑀸 𑀢𑀣𑁂𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀤𑀼𑀫𑀧𑀼𑀧𑁆𑀨𑀁 𑀅𑀤𑁆𑀤𑀲. 𑀢𑀁 𑀦𑁂𑀯 𑀢𑀻𑀭𑁂 𑀳𑁄𑀢𑀺 𑀦 𑀕𑀫𑁆𑀪𑀻𑀭𑁂. 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀘𑀲𑁆𑀲𑀸 𑀢𑀢𑁆𑀣 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀲𑀸 𑀲𑀸𑀫𑀁𑀬𑁂𑀯 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀅𑀕𑁆𑀕𑀳𑁂𑀲𑀺. 𑀧𑀼𑀧𑁆𑀨𑁂 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀧𑀢𑁆𑀢𑀸𑀦𑀺 𑀯𑀺𑀓𑀲𑀺𑀁𑀲𑀼. 𑀢𑀢𑁆𑀣 𑀢𑀝𑁆𑀝𑀓𑁂 𑀆𑀲𑀺𑀢𑁆𑀢𑀲𑀼𑀯𑀡𑁆𑀡𑀧𑀝𑀺𑀫𑀁 𑀯𑀺𑀬 𑀤𑀸𑀭𑀓𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸𑀯 ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀫𑀼𑀜𑁆𑀘𑀺, 𑀭𑀜𑁆𑀜𑁄 𑀘 𑀧𑁂𑀲𑁂𑀲𑀺. 𑀭𑀸𑀚𑀸 𑀲𑀼𑀢𑁆𑀯𑀸 ‘‘𑀓𑀢𑁆𑀣 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀮𑀤𑁆𑀥𑁄𑀓𑀸𑀲𑀜𑁆𑀘 𑀲𑀼𑀢𑁆𑀯𑀸 ‘‘𑀉𑀬𑁆𑀬𑀸𑀦𑀜𑁆𑀘 𑀧𑁄𑀓𑁆𑀔𑀭𑀡𑀺𑀬𑀁 𑀧𑀤𑀼𑀫𑀜𑁆𑀘 𑀅𑀫𑁆𑀳𑀸𑀓𑀜𑁆𑀜𑁂𑀯 𑀔𑁂𑀢𑁆𑀢𑀁, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀔𑁂𑀢𑁆𑀢𑁂 𑀚𑀸𑀢𑀢𑁆𑀢𑀸 𑀔𑁂𑀢𑁆𑀭𑀚𑁄 𑀦𑀸𑀫𑀸𑀬𑀁 𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀇𑀢𑁆𑀣𑀺𑀬𑁄 𑀥𑀸𑀢𑀺𑀓𑀺𑀘𑁆𑀘𑀁 𑀓𑀸𑀭𑀸𑀧𑁂𑀲𑀺. 𑀬𑀸 𑀬𑀸 𑀓𑀼𑀫𑀸𑀭𑀲𑁆𑀲 𑀭𑀼𑀘𑀺𑀁 𑀜𑀢𑁆𑀯𑀸 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀁 𑀔𑀸𑀤𑀦𑀻𑀬𑀁 𑀔𑀸𑀤𑀸𑀧𑁂𑀢𑀺, 𑀲𑀸 𑀲𑀸 𑀲𑀳𑀲𑁆𑀲𑀁 𑀮𑀪𑀢𑀺. 𑀲𑀓𑀮𑀩𑀸𑀭𑀸𑀡𑀲𑀻 𑀘𑀮𑀺𑀢𑀸, 𑀲𑀩𑁆𑀩𑁄 𑀚𑀦𑁄 𑀓𑀼𑀫𑀸𑀭𑀲𑁆𑀲 𑀧𑀡𑁆𑀡𑀸𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺. 𑀓𑀼𑀫𑀸𑀭𑁄 𑀢𑀁 𑀢𑀁 𑀅𑀢𑀺𑀦𑁂𑀢𑁆𑀯𑀸 ‘‘𑀇𑀫𑀁 𑀔𑀸𑀤, 𑀇𑀫𑀁 𑀪𑀼𑀜𑁆𑀚𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀪𑁄𑀚𑀦𑁂𑀦 𑀉𑀩𑁆𑀩𑀸𑀴𑁆𑀳𑁄 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸, 𑀕𑁄𑀧𑀼𑀭𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸, 𑀮𑀸𑀔𑀸𑀕𑀼𑀴𑀓𑁂𑀦 𑀓𑀻𑀴𑀢𑀺.

𑀢𑀤𑀸 𑀅𑀜𑁆𑀜𑀢𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀩𑀸𑀭𑀸𑀡𑀲𑀺𑀁 𑀦𑀺𑀲𑁆𑀲𑀸𑀬 𑀇𑀲𑀺𑀧𑀢𑀦𑁂 𑀯𑀲𑀢𑀺. 𑀲𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀲𑁂𑀦𑀸𑀲𑀦𑀯𑀢𑁆𑀢𑀲𑀭𑀻𑀭𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸, 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 ‘‘𑀅𑀚𑁆𑀚 𑀓𑀢𑁆𑀣 𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀓𑀼𑀫𑀸𑀭𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀲 𑀧𑀼𑀩𑁆𑀩𑁂 𑀓𑀺𑀁 𑀓𑀫𑁆𑀫𑀁 𑀓𑀭𑀻’’𑀢𑀺 𑀯𑀻𑀫𑀁𑀲𑀦𑁆𑀢𑁄 ‘‘𑀫𑀸𑀤𑀺𑀲𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸, 𑀘𑀢𑀲𑁆𑀲𑁄 𑀧𑀢𑁆𑀣𑀦𑀸 𑀧𑀢𑁆𑀣𑁂𑀲𑀺 𑀢𑀢𑁆𑀣 𑀢𑀺𑀲𑁆𑀲𑁄 ¶ 𑀲𑀺𑀤𑁆𑀥𑀸, 𑀏𑀓𑀸 𑀢𑀸𑀯 𑀦 𑀲𑀺𑀚𑁆𑀛𑀢𑀺, 𑀢𑀲𑁆𑀲 𑀉𑀧𑀸𑀬𑁂𑀦 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀫𑀻’’𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀯𑀲𑁂𑀦 ¶ 𑀓𑀼𑀫𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀫𑀡, 𑀫𑀸 𑀇𑀥 𑀆𑀕𑀘𑁆𑀙𑀺, 𑀇𑀫𑁂 𑀳𑀺 𑀢𑀫𑁆𑀧𑀺 ‘𑀇𑀤𑀁 𑀔𑀸𑀤, 𑀇𑀤𑀁 𑀪𑀼𑀜𑁆𑀚𑀸’𑀢𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀆𑀳. 𑀲𑁄 𑀏𑀓𑀯𑀘𑀦𑁂𑀦𑁂𑀯 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ¶ 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀧𑀸𑀯𑀺𑀲𑀺. 𑀓𑀼𑀫𑀸𑀭𑁄 𑀧𑀭𑀺𑀚𑀦𑀁 𑀆𑀳 𑁋 ‘‘𑀅𑀬𑀁 𑀲𑀫𑀡𑁄 𑀫𑀬𑀸 𑀯𑀼𑀢𑁆𑀢𑀫𑀢𑁆𑀢𑁄𑀯 𑀦𑀺𑀯𑀢𑁆𑀢𑁄, 𑀓𑀼𑀤𑁆𑀥𑁄, 𑀦𑀼, 𑀔𑁄 𑀫𑀫𑀸’’𑀢𑀺. 𑀢𑀢𑁄 𑀢𑁂𑀳𑀺 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫, 𑀤𑁂𑀯, 𑀦 𑀓𑁄𑀥𑀧𑀭𑀸𑀬𑀡𑀸 𑀳𑁄𑀦𑁆𑀢𑀺, 𑀧𑀭𑁂𑀦 𑀧𑀲𑀦𑁆𑀦𑀫𑀦𑁂𑀦 𑀬𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀢𑁂𑀦 𑀬𑀸𑀧𑁂𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀓𑀼𑀤𑁆𑀥𑁄 𑀏𑀯 𑀫𑀫𑀸𑀬𑀁 𑀲𑀫𑀡𑁄, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀢𑁆𑀯𑀸 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸, 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸, 𑀫𑀺𑀕𑀬𑀽𑀣𑀁 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀺 ‘‘𑀓𑀺𑀁 𑀦𑀸𑀫 𑀏𑀢𑁂’’𑀢𑀺? ‘‘𑀏𑀢𑁂, 𑀲𑀸𑀫𑀺, 𑀫𑀺𑀕𑀸 𑀦𑀸𑀫𑀸’’𑀢𑀺. 𑀏𑀢𑁂𑀲𑀁 ‘‘𑀇𑀫𑀁 𑀔𑀸𑀤𑀣, 𑀇𑀫𑀁 𑀪𑀼𑀜𑁆𑀚𑀣, 𑀇𑀫𑀁 𑀲𑀸𑀬𑀣𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀢𑁆𑀣𑀻𑀢𑀺. 𑀦𑀢𑁆𑀣𑀺 𑀲𑀸𑀫𑀺, 𑀬𑀢𑁆𑀣 𑀢𑀺𑀡𑁄𑀤𑀓𑀁 𑀲𑀼𑀮𑀪𑀁, 𑀢𑀢𑁆𑀣 𑀯𑀲𑀦𑁆𑀢𑀻𑀢𑀺.

𑀓𑀼𑀫𑀸𑀭𑁄 ‘‘𑀬𑀣𑀸 𑀇𑀫𑁂 𑀅𑀭𑀓𑁆𑀔𑀺𑀬𑀫𑀸𑀦𑀸𑀯 𑀬𑀢𑁆𑀣 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀺, 𑀓𑀤𑀸 𑀦𑀼, 𑀔𑁄, 𑀅𑀳𑀫𑁆𑀧𑀺 𑀏𑀯𑀁 𑀯𑀲𑁂𑀬𑁆𑀬’’𑀦𑁆𑀢𑀺 𑀏𑀢𑀫𑀸𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀢𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 𑀲𑁂𑀦𑀸𑀲𑀦𑀫𑀕𑁆𑀕𑀜𑁆𑀘 𑀘𑀗𑁆𑀓𑀫𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸, 𑀫𑀝𑁆𑀞𑀁 𑀓𑀢𑁆𑀯𑀸, 𑀏𑀓𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀗𑁆𑀓𑀫𑀺𑀢𑁆𑀯𑀸, 𑀧𑀤𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑁆𑀯𑀸, 𑀤𑀺𑀯𑀸𑀯𑀺𑀳𑀸𑀭𑁄𑀓𑀸𑀲𑀜𑁆𑀘 𑀧𑀡𑁆𑀡𑀲𑀸𑀮𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸, 𑀫𑀝𑁆𑀞𑀁 𑀓𑀢𑁆𑀯𑀸, 𑀧𑀯𑀺𑀲𑀦𑀧𑀤𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑁆𑀯𑀸, 𑀦𑀺𑀓𑁆𑀔𑀫𑀦𑀧𑀤𑀦𑀺𑀓𑁆𑀔𑁂𑀧𑀁 𑀅𑀤𑀲𑁆𑀲𑁂𑀢𑁆𑀯𑀸, 𑀅𑀜𑁆𑀜𑀢𑁆𑀭 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀝𑁆𑀞𑀁 𑀓𑀢𑀁 𑀤𑀺𑀲𑁆𑀯𑀸 ‘‘𑀯𑀲𑀢𑀺 𑀫𑀜𑁆𑀜𑁂 𑀏𑀢𑁆𑀣 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄’’𑀢𑀺 𑀧𑀭𑀺𑀚𑀦𑁂𑀦 𑀪𑀸𑀲𑀺𑀢𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀧𑀸𑀢𑁄𑀧𑀺 𑀲𑁄 𑀲𑀫𑀡𑁄 𑀓𑀼𑀤𑁆𑀥𑁄, 𑀇𑀤𑀸𑀦𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀳𑀺 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀅𑀓𑁆𑀓𑀦𑁆𑀢𑀁 𑀤𑀺𑀲𑁆𑀯𑀸, 𑀲𑀼𑀝𑁆𑀞𑀼𑀢𑀭𑀁 𑀓𑀼𑀚𑁆𑀛𑁂𑀬𑁆𑀬, 𑀇𑀥𑁂𑀯 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣𑀸’’𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀑𑀭𑀼𑀬𑁆𑀳 𑀏𑀓𑀓𑁄𑀯 𑀲𑁂𑀦𑀸𑀲𑀦𑀁 𑀧𑀯𑀺𑀝𑁆𑀞𑁄 𑀯𑀢𑁆𑀢𑀲𑀻𑀲𑁂𑀦 𑀲𑀼𑀲𑀫𑁆𑀫𑀝𑁆𑀞𑁄𑀓𑀸𑀲𑁂 ¶ 𑀧𑀤𑀦𑀺𑀓𑁆𑀔𑁂𑀧𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀲𑀫𑀡𑁄 𑀏𑀢𑁆𑀣 𑀘𑀗𑁆𑀓𑀫𑀦𑁆𑀢𑁄 𑀦 𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀘𑀺𑀦𑁆𑀢𑁂𑀲𑀺, 𑀅𑀤𑁆𑀥𑀸 𑀅𑀢𑁆𑀢𑀦𑁄 𑀳𑀺𑀢𑀫𑁂𑀯 𑀘𑀺𑀦𑁆𑀢𑁂𑀲𑀺 𑀫𑀜𑁆𑀜𑁂’’𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀘𑀗𑁆𑀓𑀫𑀁 𑀆𑀭𑀼𑀳𑀺𑀢𑁆𑀯𑀸, 𑀤𑀽𑀭𑀻𑀓𑀢𑀧𑀼𑀣𑀼𑀯𑀺𑀢𑀓𑁆𑀓𑁄 𑀕𑀦𑁆𑀢𑁆𑀯𑀸, 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀜𑁆𑀚𑀸𑀢𑀏𑀓𑀕𑁆𑀕𑁄 𑀳𑀼𑀢𑁆𑀯𑀸, 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀅𑀥𑀺𑀕𑀦𑁆𑀢𑁆𑀯𑀸, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀭𑁄𑀳𑀺𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑁂 𑀧𑀼𑀘𑁆𑀙𑀺𑀢𑁂 𑀕𑀕𑀦𑀢𑀮𑁂 𑀦𑀺𑀲𑀺𑀦𑁆𑀦𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀺𑀕𑁄 ¶ 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀫𑀺𑀕𑁄𑀢𑀺 𑀤𑁆𑀯𑁂 𑀫𑀺𑀕𑀸 𑀏𑀡𑀻𑀫𑀺𑀕𑁄, 𑀧𑀲𑀤𑀫𑀺𑀕𑁄 𑀘𑀸𑀢𑀺. 𑀅𑀧𑀺𑀘 𑀲𑀩𑁆𑀩𑁂𑀲𑀁 𑀆𑀭𑀜𑁆𑀜𑀺𑀓𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀫𑁂𑀢𑀁 ¶ 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀧𑀲𑀤𑀫𑀺𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀭𑀜𑁆𑀜𑀫𑁆𑀳𑀻𑀢𑀺 𑀕𑀸𑀫𑀜𑁆𑀘 ¶ 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁, 𑀇𑀥𑀁 𑀧𑀦 𑀉𑀬𑁆𑀬𑀸𑀦𑀫𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀉𑀬𑁆𑀬𑀸𑀦𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀢𑀺 𑀧𑀝𑀺𑀪𑀸𑀕𑁂. 𑀅𑀩𑀤𑁆𑀥𑁄𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀅𑀩𑀤𑁆𑀥𑁄, 𑀏𑀢𑁂𑀦 𑀯𑀺𑀲𑁆𑀲𑀢𑁆𑀣𑀘𑀭𑀺𑀬𑀁 𑀤𑀻𑀧𑁂𑀢𑀺. 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬𑀢𑀺 𑀬𑁂𑀦 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀦𑁆𑀢𑀼𑀫𑀺𑀘𑁆𑀙𑀢𑀺, 𑀢𑁂𑀦 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑁄𑀘𑀭𑀸𑀬 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀓𑁄 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺, 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺, 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺, 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄, 𑀪𑀺𑀓𑁆𑀔𑀯𑁂, 𑀮𑀼𑀤𑁆𑀤𑀲𑁆𑀲; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁 𑀅𑀧𑀤𑀁, 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’’𑀢𑀺 (𑀫. 𑀦𑀺. 𑁧.𑁨𑁮𑁭; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁫) 𑀯𑀺𑀢𑁆𑀣𑀸𑀭𑁄.

𑀯𑀺𑀜𑁆𑀜𑀽 ¶ 𑀦𑀭𑁄𑀢𑀺 𑀧𑀡𑁆𑀟𑀺𑀢𑀧𑀼𑀭𑀺𑀲𑁄. 𑀲𑁂𑀭𑀺𑀢𑀦𑁆𑀢𑀺 𑀲𑀘𑁆𑀙𑀦𑁆𑀤𑀯𑀼𑀢𑁆𑀢𑀺𑀢𑀁 𑀅𑀧𑀭𑀸𑀬𑀢𑁆𑀢𑀢𑀁. 𑀧𑁂𑀓𑁆𑀔𑀫𑀸𑀦𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀑𑀮𑁄𑀓𑀬𑀫𑀸𑀦𑁄. 𑀅𑀣 𑀯𑀸 𑀥𑀫𑁆𑀫𑀲𑁂𑀭𑀺𑀢𑀁 𑀧𑀼𑀕𑁆𑀕𑀮𑀲𑁂𑀭𑀺𑀢𑀜𑁆𑀘. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀳𑀺 𑀓𑀺𑀮𑁂𑀲𑀯𑀲𑀁 𑀅𑀕𑀫𑀦𑀢𑁄 𑀲𑁂𑀭𑀺𑀦𑁄 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀧𑀼𑀕𑁆𑀕𑀮𑀸 𑀘, 𑀢𑁂𑀲𑀁 𑀪𑀸𑀯𑀦𑀺𑀤𑁆𑀤𑁂𑀲𑁄 𑀲𑁂𑀭𑀺𑀢𑀸. 𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀬𑀣𑀸 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀅𑀩𑀤𑁆𑀥𑁄 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬, 𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀁 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀇𑀢𑀺 𑀫𑁂 𑀢𑀼𑀫𑁆𑀳𑁂𑀳𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀳𑀺 𑀩𑀤𑁆𑀥𑀲𑁆𑀲 𑀬𑁂𑀦𑀺𑀘𑁆𑀙𑀓𑀁 𑀕𑀦𑁆𑀢𑀼𑀁 𑀅𑀮𑀪𑀦𑁆𑀢𑀲𑁆𑀲 ¶ 𑀢𑀲𑁆𑀫𑀺𑀁 𑀬𑁂𑀦𑀺𑀘𑁆𑀙𑀓𑀕𑀫𑀦𑀸𑀪𑀸𑀯𑁂𑀦 𑀬𑁂𑀦𑀺𑀘𑁆𑀙𑀓𑀕𑀫𑀦𑁂 𑀘𑀸𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀧𑀸𑀭𑀺𑀧𑀽𑀭𑀺𑀁 𑀅𑀕𑀫𑀁𑀲𑀼. 𑀢𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑁄 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀫𑀺𑀕𑀅𑀭𑀜𑁆𑀜𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁦. 𑀆𑀫𑀦𑁆𑀢𑀦𑀸 𑀳𑁄𑀢𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀢𑀻𑀢𑁂 𑀓𑀺𑀭 𑀏𑀓𑀯𑀚𑁆𑀚𑀺𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 𑀫𑀼𑀤𑀼𑀓𑀚𑀸𑀢𑀺𑀓𑁄. 𑀬𑀤𑀸 𑀅𑀫𑀘𑁆𑀘𑀸 𑀢𑁂𑀦 𑀲𑀳 𑀬𑀼𑀢𑁆𑀢𑀁 𑀯𑀸 𑀅𑀬𑀼𑀢𑁆𑀢𑀁 𑀯𑀸 𑀫𑀦𑁆𑀢𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀤𑀸 𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀏𑀓𑀫𑀦𑁆𑀢𑀁 𑀦𑁂𑀦𑁆𑀢𑀺. 𑀢𑀁 𑀏𑀓𑀤𑀺𑀯𑀲𑀁 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑀁 𑀅𑀜𑁆𑀜𑀢𑀭𑁄 𑀅𑀫𑀘𑁆𑀘𑁄 ‘‘𑀤𑁂𑀯, 𑀫𑀫 𑀲𑁄𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀏𑀓𑀫𑀦𑁆𑀢𑀁 𑀕𑀫𑀦𑀁 𑀬𑀸𑀘𑀺. 𑀲𑁄 𑀉𑀝𑁆𑀞𑀸𑀬 𑀅𑀕𑀫𑀸𑀲𑀺. 𑀧𑀼𑀦 𑀏𑀓𑁄 𑀫𑀳𑀸𑀉𑀧𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀯𑀭𑀁 𑀬𑀸𑀘𑀺, 𑀏𑀓𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂, 𑀏𑀓𑁄 𑀅𑀲𑁆𑀲𑀧𑀺𑀝𑁆𑀞𑀺𑀬𑀁 ¶ , 𑀏𑀓𑁄 𑀲𑀼𑀯𑀡𑁆𑀡𑀭𑀣𑁂, 𑀏𑀓𑁄 𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀁 𑀬𑀸𑀘𑀺. 𑀭𑀸𑀚𑀸 𑀢𑀢𑁄 𑀑𑀭𑁄𑀳𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀕𑀫𑀸𑀲𑀺. 𑀅𑀧𑀭𑁄 𑀚𑀦𑀧𑀤𑀘𑀸𑀭𑀺𑀓𑀁 𑀕𑀘𑁆𑀙𑀦𑁆𑀢𑀁 𑀬𑀸𑀘𑀺, 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀢𑁆𑀣𑀺𑀢𑁄 𑀑𑀭𑀼𑀬𑁆𑀳 𑀏𑀓𑀫𑀦𑁆𑀢𑀁 𑀅𑀕𑀫𑀸𑀲𑀺. 𑀏𑀯𑀁 𑀲𑁄 𑀢𑁂𑀳𑀺 𑀦𑀺𑀩𑁆𑀩𑀺𑀦𑁆𑀦𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺. 𑀅𑀫𑀘𑁆𑀘𑀸 𑀇𑀲𑁆𑀲𑀭𑀺𑀬𑁂𑀦 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀅𑀫𑀼𑀓𑀁, 𑀫𑀳𑀸𑀭𑀸𑀚, 𑀚𑀦𑀧𑀤𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺. 𑀭𑀸𑀚𑀸 ‘‘𑀢𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀼𑀜𑁆𑀚𑀢𑀻’’𑀢𑀺 𑀪𑀡𑀢𑀺. 𑀲𑁄 𑀭𑀜𑁆𑀜𑁄 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 ‘‘𑀕𑀘𑁆𑀙𑀸𑀫𑀳𑀁 𑀢𑀁 𑀚𑀦𑀧𑀤𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀸𑀫𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀓𑀮𑀳𑀁 𑀓𑀢𑁆𑀯𑀸, 𑀧𑀼𑀦 𑀉𑀪𑁄𑀧𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑁄𑀲𑀁 𑀆𑀭𑁄𑀘𑁂𑀦𑁆𑀢𑀺. 𑀭𑀸𑀚𑀸 ‘‘𑀦 𑀲𑀓𑁆𑀓𑀸 𑀇𑀫𑁂 𑀢𑁄𑀲𑁂𑀢𑀼’’𑀦𑁆𑀢𑀺 𑀢𑁂𑀲𑀁 ¶ 𑀮𑁄𑀪𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀲𑀳𑀸𑀬𑀫𑀚𑁆𑀛𑁂 𑀞𑀺𑀢𑀲𑁆𑀲 𑀤𑀺𑀯𑀸𑀲𑁂𑀬𑁆𑀬𑀲𑀗𑁆𑀔𑀸𑀢𑁂 𑀯𑀸𑀲𑁂 𑀘, 𑀫𑀳𑀸𑀉𑀧𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀞𑀸𑀦𑁂 𑀘, 𑀉𑀬𑁆𑀬𑀸𑀦𑀕𑀫𑀦𑀲𑀗𑁆𑀔𑀸𑀢𑁂 𑀕𑀫𑀦𑁂 𑀘, 𑀚𑀦𑀧𑀤𑀘𑀸𑀭𑀺𑀓𑀲𑀗𑁆𑀔𑀸𑀢𑀸𑀬 𑀘𑀸𑀭𑀺𑀓𑀸𑀬 𑀘 ‘‘𑀇𑀤𑀁 𑀫𑁂 𑀲𑀼𑀡, 𑀇𑀤𑀁 𑀫𑁂 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀣𑀸 𑀢𑀣𑀸 𑀆𑀫𑀦𑁆𑀢𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀳𑀁 𑀢𑀢𑁆𑀣 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀬𑀸𑀬𑀁 𑀅𑀭𑀺𑀬𑀚𑀦𑀲𑁂𑀯𑀺𑀢𑀸 𑀅𑀦𑁂𑀓𑀸𑀦𑀺𑀲𑀁𑀲𑀸 𑀏𑀓𑀦𑁆𑀢𑀲𑀼𑀔𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀮𑁄𑀪𑀸𑀪𑀺𑀪𑀽𑀢𑁂𑀳𑀺 𑀲𑀩𑁆𑀩𑀓𑀸𑀧𑀼𑀭𑀺𑀲𑁂𑀳𑀺 𑀅𑀦𑀪𑀺𑀚𑁆𑀛𑀺𑀢𑀸 𑀅𑀦𑀪𑀺𑀧𑀢𑁆𑀣𑀺𑀢𑀸 𑀧𑀩𑁆𑀩𑀚𑁆𑀚𑀸, 𑀢𑀁 𑀅𑀦𑀪𑀺𑀚𑁆𑀛𑀺𑀢𑀁 𑀧𑀭𑁂𑀲𑀁 𑀅𑀯𑀲𑀯𑀢𑁆𑀢𑀦𑁂𑀦 𑀥𑀫𑁆𑀫𑀧𑀼𑀕𑁆𑀕𑀮𑀯𑀲𑁂𑀦 𑀘 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀫𑀦𑁆𑀢𑀦𑀸𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁧. 𑀔𑀺𑀟𑁆𑀟𑀸 𑀭𑀢𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀏𑀓𑀧𑀼𑀢𑁆𑀢𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀘𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄 𑀧𑀸𑀡𑀲𑀫𑁄. 𑀲𑁄 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸𑀯 𑀯𑀢𑁆𑀢𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀞𑀧𑁂𑀢𑁆𑀯𑀸 𑀕𑀢𑁄. 𑀓𑀼𑀫𑀸𑀭𑁄𑀧𑀺 𑀢𑀁 𑀤𑀺𑀯𑀲𑀁𑀬𑁂𑀯 𑀉𑀧𑁆𑀧𑀦𑁆𑀦𑁂𑀦 𑀩𑁆𑀬𑀸𑀥𑀺𑀦𑀸 𑀫𑀢𑁄. 𑀅𑀫𑀘𑁆𑀘𑀸 ‘‘𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀭𑀜𑁆𑀜𑁄 𑀳𑀤𑀬𑀫𑁆𑀧𑀺 𑀨𑀮𑁂𑀬𑁆𑀬𑀸’’𑀢𑀺 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀦𑀁 𑀛𑀸𑀧𑁂𑀲𑀼𑀁. 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀧𑀼𑀢𑁆𑀢𑀁 𑀦𑁂𑀯 𑀲𑀭𑀺, 𑀢𑀣𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀦𑁆𑀳𑀸𑀦𑀪𑁄𑀚𑀦𑀯𑁂𑀮𑀸𑀲𑀼. 𑀅𑀣 𑀪𑀼𑀢𑁆𑀢𑀸𑀯𑀻 𑀦𑀺𑀲𑀺𑀦𑁆𑀦𑁄 𑀲𑀭𑀺𑀢𑁆𑀯𑀸 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀣𑀸’’𑀢𑀺 𑀆𑀳. 𑀢𑀲𑁆𑀲 𑀅𑀦𑀼𑀭𑀽𑀧𑁂𑀦 𑀯𑀺𑀥𑀸𑀦𑁂𑀦 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀲𑁄𑀓𑀸𑀪𑀺𑀪𑀽𑀢𑁄 𑀦𑀺𑀲𑀺𑀦𑁆𑀦𑁄 𑀏𑀯𑀁 𑀬𑁄𑀦𑀺𑀲𑁄 𑀫𑀦𑀲𑀸𑀓𑀸𑀲𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑁄 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 ¶ 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀫𑁆𑀫𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁂𑀲𑀁 𑀲𑀁𑀲𑀕𑁆𑀕𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 𑀞𑀧𑁂𑀢𑁆𑀯𑀸 𑀕𑀸𑀣𑀸𑀬𑀢𑁆𑀣𑀯𑀡𑁆𑀡𑀦𑀁.

𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ¶ 𑀧𑀦 𑀔𑀺𑀟𑁆𑀟𑀸𑀢𑀺 𑀓𑀻𑀴𑀦𑀸. 𑀲𑀸 𑀤𑀼𑀯𑀺𑀥𑀸 𑀳𑁄𑀢𑀺 𑁋 𑀓𑀸𑀬𑀺𑀓𑀸, 𑀯𑀸𑀘𑀲𑀺𑀓𑀸 𑀘. 𑀢𑀢𑁆𑀣 𑀓𑀸𑀬𑀺𑀓𑀸 𑀦𑀸𑀫 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀲𑁆𑀲𑁂𑀳𑀺𑀧𑀺, 𑀭𑀣𑁂𑀳𑀺𑀧𑀺, 𑀥𑀦𑀽𑀳𑀺𑀧𑀺, 𑀣𑀭𑀽𑀳𑀺𑀧𑀻𑀢𑀺 𑀏𑀯𑀫𑀸𑀤𑀺. 𑀯𑀸𑀘𑀲𑀺𑀓𑀸 𑀦𑀸𑀫 𑀕𑀻𑀢𑀁, 𑀲𑀺𑀮𑁄𑀓𑀪𑀡𑀦𑀁, 𑀫𑀼𑀔𑀪𑁂𑀭𑀻𑀢𑀺 𑀏𑀯𑀫𑀸𑀤𑀺. 𑀭𑀢𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺. 𑀯𑀺𑀧𑀼𑀮𑀦𑁆𑀢𑀺 𑀬𑀸𑀯 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀞𑀸𑀦𑁂𑀦 𑀲𑀓𑀮𑀢𑁆𑀢𑀪𑀸𑀯𑀩𑁆𑀬𑀸𑀧𑀓𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀅𑀦𑀼𑀲𑀦𑁆𑀥𑀺𑀬𑁄𑀚𑀦𑀸𑀧𑀺 𑀘𑁂𑀢𑁆𑀣 𑀲𑀁𑀲𑀕𑁆𑀕𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀢𑀢𑁄 𑀧𑀭𑀜𑁆𑀘 𑀲𑀩𑁆𑀩𑀦𑁆𑀢𑀺.

𑀔𑀺𑀟𑁆𑀟𑀸𑀭𑀢𑀺𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁨. 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀸 𑀅𑀳𑁄𑀲𑀺, 𑀲𑁂𑀲𑀸 𑀧𑀸𑀓𑀢𑀺𑀓𑀭𑀸𑀚𑀸𑀦𑁄. 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸, 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀼𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀲𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀁𑀲𑀓𑀴𑀻𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀢𑀦𑁄 𑀓𑀫𑁆𑀫𑀜𑁆𑀘 𑀲𑀳𑀸𑀬𑀜𑁆𑀘 𑀆𑀯𑀚𑁆𑀚𑁂𑀢𑁆𑀯𑀸 𑀜𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀧𑀸𑀬𑁂𑀦 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀼𑀁 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑀺. 𑀲𑁄 𑀘 𑀭𑀸𑀚𑀸 𑀢𑀺𑀓𑁆𑀔𑀢𑁆𑀢𑀼𑀁 𑀭𑀢𑁆𑀢𑀺𑀬𑀸 𑀉𑀩𑁆𑀩𑀺𑀚𑁆𑀚𑀢𑀺, 𑀪𑀻𑀢𑁄 𑀯𑀺𑀲𑁆𑀲𑀭𑀁 𑀓𑀭𑁄𑀢𑀺, 𑀫𑀳𑀸𑀢𑀮𑁂 𑀥𑀸𑀯𑀢𑀺. 𑀧𑀼𑀭𑁄𑀳𑀺𑀢𑁂𑀦 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺𑀢𑁄𑀧𑀺 ‘‘𑀓𑀼𑀢𑁄 𑀫𑁂, 𑀆𑀘𑀭𑀺𑀬, 𑀲𑀼𑀔’’𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀧𑀼𑀭𑁄𑀳𑀺𑀢𑁄𑀧𑀺 ‘‘𑀅𑀬𑀁 𑀭𑁄𑀕𑁄 𑀦 𑀲𑀓𑁆𑀓𑀸 𑀬𑁂𑀦 𑀓𑁂𑀦𑀘𑀺 𑀉𑀤𑁆𑀥𑀁𑀯𑀺𑀭𑁂𑀘𑀦𑀸𑀤𑀺𑀦𑀸 𑀪𑁂𑀲𑀚𑁆𑀚𑀓𑀫𑁆𑀫𑁂𑀦 𑀯𑀺𑀦𑁂𑀢𑀼𑀁 ¶ , 𑀫𑀬𑁆𑀳𑀁 𑀧𑀦 𑀔𑀸𑀤𑀦𑀽𑀧𑀸𑀬𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀭𑀚𑁆𑀚𑀳𑀸𑀦𑀺𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀤𑀻𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀏𑀢𑀁 𑀫𑀳𑀸𑀭𑀸𑀚𑀸’’𑀢𑀺 𑀭𑀸𑀚𑀸𑀦𑀁 𑀲𑀼𑀝𑁆𑀞𑀼𑀢𑀭𑀁 𑀉𑀩𑁆𑀩𑁂𑀚𑁂𑀢𑁆𑀯𑀸 𑀢𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀁 ‘‘𑀏𑀢𑁆𑀢𑀓𑁂 𑀘 𑀏𑀢𑁆𑀢𑀓𑁂 𑀘 𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀤𑀬𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀜𑁆𑀘 𑀤𑀓𑁆𑀔𑀺𑀡𑀁 𑀤𑀢𑁆𑀯𑀸 𑀬𑀜𑁆𑀜𑁄 𑀬𑀚𑀺𑀢𑀩𑁆𑀩𑁄’’𑀢𑀺 𑀢𑀁 𑀬𑀜𑁆𑀜𑀬𑀚𑀦𑁂 𑀲𑀫𑀸𑀤𑀧𑁂𑀲𑀺.

𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀦𑁂𑀓𑀸𑀦𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀬𑀜𑁆𑀜𑀢𑁆𑀣𑀸𑀬 𑀲𑀫𑁆𑀧𑀺𑀡𑁆𑀟𑀺𑀬𑀫𑀸𑀦𑀸𑀦𑀺 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂 𑀤𑀼𑀩𑁆𑀩𑁄𑀥𑀦𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀧𑀝𑀺𑀓𑀘𑁆𑀘𑁂𑀯 𑀕𑀦𑁆𑀢𑁆𑀯𑀸 𑀧𑁂𑀓𑁆𑀔𑀸𑀫𑀸’’𑀢𑀺 𑀯𑀁𑀲𑀓𑀴𑀻𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀸 𑀭𑀸𑀚𑀗𑁆𑀕𑀡𑁂 𑀧𑀝𑀺𑀧𑀸𑀝𑀺𑀬𑀸 𑀅𑀕𑀫𑀁𑀲𑀼. 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑀬𑀫𑀸𑀦𑁄 𑀢𑁂 𑀅𑀤𑁆𑀤𑀓𑁆𑀔𑀺 ¶ , 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀘𑀲𑁆𑀲 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀢𑁆𑀯𑀸 ¶ 𑀓𑀢𑀪𑀢𑁆𑀢𑀓𑀺𑀘𑁆𑀘𑁂 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀁, 𑀫𑀳𑀸𑀭𑀸𑀚, 𑀘𑀸𑀢𑀼𑀤𑁆𑀤𑀺𑀲𑀸 𑀦𑀸𑀫𑀸’’𑀢𑀺. ‘‘𑀪𑀦𑁆𑀢𑁂, 𑀘𑀸𑀢𑀼𑀤𑁆𑀤𑀺𑀲𑀸𑀢𑀺 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺? ‘‘𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀢𑁆𑀣𑀘𑀺 𑀓𑀼𑀢𑁄𑀘𑀺 𑀪𑀬𑀁 𑀯𑀸 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀯𑀸 𑀅𑀫𑁆𑀳𑀸𑀓𑀁 𑀦𑀢𑁆𑀣𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀢𑀁 𑀪𑀬𑀁 𑀓𑀺𑀁 𑀓𑀸𑀭𑀡𑀸 𑀦 𑀳𑁄𑀢𑀻’’𑀢𑀺? ‘‘𑀫𑀬𑀜𑁆𑀳𑀺, 𑀫𑀳𑀸𑀭𑀸𑀚, 𑀫𑁂𑀢𑁆𑀢𑀁 𑀪𑀸𑀯𑁂𑀫, 𑀓𑀭𑀼𑀡𑀁 𑀪𑀸𑀯𑁂𑀫, 𑀫𑀼𑀤𑀺𑀢𑀁 𑀪𑀸𑀯𑁂𑀫, 𑀉𑀧𑁂𑀓𑁆𑀔𑀁 𑀪𑀸𑀯𑁂𑀫, 𑀢𑁂𑀦 𑀦𑁄 𑀢𑀁 𑀪𑀬𑀁 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀢𑁆𑀢𑀦𑁄 𑀯𑀲𑀢𑀺𑀁 𑀅𑀕𑀫𑀁𑀲𑀼.

𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀲𑀫𑀡𑀸 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀪𑀬𑀁 𑀦 𑀳𑁄𑀢𑀻𑀢𑀺 𑀪𑀡𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀅𑀦𑁂𑀓𑀲𑀳𑀲𑁆𑀲𑀧𑀸𑀡𑀯𑀥𑀁 𑀯𑀡𑁆𑀡𑀬𑀦𑁆𑀢𑀺, 𑀓𑁂𑀲𑀁 𑀦𑀼 𑀔𑁄 𑀯𑀘𑀦𑀁 𑀲𑀘𑁆𑀘’’𑀦𑁆𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑀡𑀸 𑀲𑀼𑀤𑁆𑀥𑁂𑀦 𑀅𑀲𑀼𑀤𑁆𑀥𑀁 𑀥𑁄𑀯𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀅𑀲𑀼𑀤𑁆𑀥𑁂𑀦 𑀅𑀲𑀼𑀤𑁆𑀥𑀁. 𑀦 𑀘 𑀲𑀓𑁆𑀓𑀸 𑀅𑀲𑀼𑀤𑁆𑀥𑁂𑀦 𑀅𑀲𑀼𑀤𑁆𑀥𑀁 𑀥𑁄𑀯𑀺𑀢𑀼𑀁, 𑀧𑀩𑁆𑀩𑀚𑀺𑀢𑀸𑀦𑀁 𑀏𑀯 𑀯𑀘𑀦𑀁 𑀲𑀘𑁆𑀘’’𑀦𑁆𑀢𑀺. 𑀲𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀢𑁆𑀢𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀳𑀺𑀢𑀨𑀭𑀡𑀘𑀺𑀢𑁆𑀢𑁂𑀦 𑀅𑀫𑀘𑁆𑀘𑁂 ¶ 𑀆𑀡𑀸𑀧𑁂𑀲𑀺 ‘‘𑀲𑀩𑁆𑀩𑁂 𑀧𑀸𑀡𑁂 𑀫𑀼𑀜𑁆𑀘𑀣, 𑀲𑀻𑀢𑀸𑀦𑀺 𑀧𑀸𑀦𑀻𑀬𑀸𑀦𑀺 𑀧𑀺𑀯𑀦𑁆𑀢𑀼, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀼, 𑀲𑀻𑀢𑁄 𑀘 𑀦𑁂𑀲𑀁 𑀯𑀸𑀢𑁄 𑀉𑀧𑀯𑀸𑀬𑀢𑀽’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼.

𑀢𑀢𑁄 𑀭𑀸𑀚𑀸 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀯𑀘𑀦𑁂𑀦𑁂𑀯 𑀧𑀸𑀧𑀓𑀫𑁆𑀫𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀅𑀫𑀘𑁆𑀘𑁂𑀳𑀺 𑀘 𑀪𑁄𑀚𑀦𑀯𑁂𑀮𑀸𑀬𑀁 ‘‘𑀪𑀼𑀜𑁆𑀚, 𑀫𑀳𑀸𑀭𑀸𑀚, 𑀓𑀸𑀮𑁄’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁 𑀭𑀸𑀚𑀸’’𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀯𑀢𑁆𑀯𑀸 𑀇𑀫𑀁 𑀉𑀤𑀸𑀦𑀩𑁆𑀬𑀸𑀓𑀭𑀡𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺, 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀬𑀣𑀸𑀲𑀼𑀔𑀯𑀺𑀳𑀸𑀭𑀻, ‘‘𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁦𑁮; 𑀅. 𑀦𑀺. 𑁪.𑁧𑁨𑁫; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑀯𑀸 𑀦𑀬𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀨𑀭𑀺𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺𑀧𑀺 𑀘𑀸𑀢𑀼𑀤𑁆𑀤𑀺𑀲𑁄. 𑀢𑀸𑀲𑀼 𑀤𑀺𑀲𑀸𑀲𑀼 𑀓𑀢𑁆𑀣𑀘𑀺 𑀲𑀢𑁆𑀢𑁂 ¶ 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀧𑁆𑀧𑀝𑀺𑀖𑁄. 𑀲𑀦𑁆𑀢𑀼𑀲𑁆𑀲𑀫𑀸𑀦𑁄𑀢𑀺 𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀲𑀦𑁆𑀢𑁄𑀲𑀲𑁆𑀲𑀯𑀲𑁂𑀦 𑀲𑀦𑁆𑀢𑀼𑀲𑁆𑀲𑀓𑁄, 𑀇𑀢𑀭𑀻𑀢𑀭𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀦 𑀧𑀘𑁆𑀘𑀬𑁂𑀦. 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻𑀢𑀺 𑀏𑀢𑁆𑀣 𑀧𑀭𑀺𑀲𑁆𑀲𑀬𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀺, 𑀧𑀭𑀺𑀳𑀸𑀧𑁂𑀦𑁆𑀢𑀺 𑀯𑀸 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀁, 𑀢𑀸𑀦𑀺 𑀯𑀸 𑀧𑀝𑀺𑀘𑁆𑀘 𑀲𑀬𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀩𑀸𑀳𑀺𑀭𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑀸𑀦𑀜𑁆𑀘 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀓𑀸𑀬𑀘𑀺𑀢𑁆𑀢𑀼𑀧𑀤𑁆𑀤𑀯𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀧𑀭𑀺𑀲𑁆𑀲𑀬𑁂 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 ¶ 𑀘 𑀯𑀻𑀭𑀺𑀬𑀸𑀤𑀻𑀳𑀺 𑀥𑀫𑁆𑀫𑁂𑀳𑀺 𑀘 𑀲𑀳𑀢𑀻𑀢𑀺 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀣𑀤𑁆𑀥𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 𑀅𑀙𑀫𑁆𑀪𑀻. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑁂 𑀘𑀢𑁆𑀢𑀸𑀭𑁄 𑀲𑀫𑀡𑀸, 𑀏𑀯𑀁 𑀇𑀢𑀭𑀻𑀢𑀭𑁂𑀦 𑀧𑀘𑁆𑀘𑀬𑁂𑀦 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀏𑀢𑁆𑀣 𑀧𑀝𑀺𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑁂 𑀲𑀦𑁆𑀢𑁄𑀲𑁂 𑀞𑀺𑀢𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀘𑀸𑀢𑀼𑀤𑁆𑀤𑀺𑀲𑁄, 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀧𑀝𑀺𑀳𑀦𑀦𑀪𑀬𑀸𑀪𑀸𑀯𑁂𑀦 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺. 𑀲𑁄 𑀘𑀸𑀢𑀼𑀤𑁆𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸, 𑀅𑀧𑁆𑀧𑀝𑀺𑀖𑀢𑁆𑀢𑀸 𑀅𑀙𑀫𑁆𑀪𑀻 𑀘 𑀳𑁄𑀢𑀻𑀢𑀺 𑀏𑀯𑀁 𑀧𑀝𑀺𑀧𑀢𑁆𑀢𑀺𑀕𑀼𑀡𑀁 𑀤𑀺𑀲𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀅𑀣 𑀯𑀸 𑀢𑁂 𑀲𑀫𑀡𑀸 𑀯𑀺𑀬 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 ¶ 𑀇𑀢𑀭𑀻𑀢𑀭𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀸𑀢𑀼𑀤𑁆𑀤𑀺𑀲𑁄 𑀳𑁄𑀢𑀻𑀢𑀺 𑀜𑀢𑁆𑀯𑀸 𑀏𑀯𑀁 𑀘𑀸𑀢𑀼𑀤𑁆𑀤𑀺𑀲𑀪𑀸𑀯𑀁 𑀧𑀢𑁆𑀣𑀬𑀦𑁆𑀢𑁄 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀕𑀢𑁄𑀫𑁆𑀳𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀈𑀤𑀺𑀲𑀁 𑀞𑀸𑀦𑀁 𑀧𑀢𑁆𑀣𑀬𑀫𑀸𑀦𑁄 𑀘𑀸𑀢𑀼𑀤𑁆𑀤𑀺𑀲𑀢𑀸𑀬 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀧𑁆𑀧𑀝𑀺𑀖𑀢𑀸𑀬 𑀘 𑀅𑀙𑀫𑁆𑀪𑀻 𑀳𑀼𑀢𑁆𑀯𑀸 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀘𑀸𑀢𑀼𑀤𑁆𑀤𑀺𑀲𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁩. 𑀤𑀼𑀲𑁆𑀲𑀗𑁆𑀕𑀳𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀻 𑀓𑀸𑀮𑀫𑀓𑀸𑀲𑀺. 𑀢𑀢𑁄 𑀯𑀻𑀢𑀺𑀯𑀢𑁆𑀢𑁂𑀲𑀼 𑀲𑁄𑀓𑀤𑀺𑀯𑀲𑁂𑀲𑀼 𑀏𑀓𑀁 𑀤𑀺𑀯𑀲𑀁 𑀅𑀫𑀘𑁆𑀘𑀸 ‘‘𑀭𑀸𑀚𑀽𑀦𑀁 𑀦𑀸𑀫 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀅𑀕𑁆𑀕𑀫𑀳𑁂𑀲𑀻 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸𑀥𑀼, 𑀤𑁂𑀯𑁄, 𑀅𑀜𑁆𑀜𑀁 𑀤𑁂𑀯𑀺𑀁 𑀆𑀦𑁂𑀢𑀽’’𑀢𑀺 𑀬𑀸𑀘𑀺𑀁𑀲𑀼. 𑀭𑀸𑀚𑀸‘‘𑀢𑁂𑀦 𑀳𑀺, 𑀪𑀡𑁂, 𑀚𑀸𑀦𑀸𑀣𑀸’’𑀢𑀺 𑀆𑀳. 𑀢𑁂 𑀧𑀭𑀺𑀬𑁂𑀲𑀦𑁆𑀢𑀸 𑀲𑀸𑀫𑀦𑁆𑀢𑀭𑀚𑁆𑀚𑁂 𑀭𑀸𑀚𑀸 𑀫𑀢𑁄. 𑀢𑀲𑁆𑀲 𑀤𑁂𑀯𑀻 𑀭𑀚𑁆𑀚𑀁 𑀅𑀦𑀼𑀲𑀸𑀲𑀢𑀺. 𑀲𑀸 𑀘 𑀕𑀩𑁆𑀪𑀺𑀦𑀻 𑀳𑁄𑀢𑀺. 𑀅𑀫𑀘𑁆𑀘𑀸 ‘‘𑀅𑀬𑀁 𑀭𑀜𑁆𑀜𑁄 𑀅𑀦𑀼𑀭𑀽𑀧𑀸’’𑀢𑀺 𑀜𑀢𑁆𑀯𑀸 𑀢𑀁 𑀬𑀸𑀘𑀺𑀁𑀲𑀼. 𑀲𑀸 ‘‘𑀕𑀩𑁆𑀪𑀺𑀦𑀻 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀸 𑀳𑁄𑀢𑀺, 𑀲𑀘𑁂 𑀆𑀕𑀫𑁂𑀣, 𑀬𑀸𑀯 𑀯𑀺𑀚𑀸𑀬𑀸𑀫𑀺, 𑀏𑀯𑀁 𑀳𑁄𑀢𑀼, 𑀦𑁄 𑀘𑁂, 𑀅𑀜𑁆𑀜𑀁 𑀧𑀭𑀺𑀬𑁂𑀲𑀣𑀸’’𑀢𑀺 𑀆𑀳. 𑀢𑁂 𑀭𑀜𑁆𑀜𑁄𑀧𑀺 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀕𑀩𑁆𑀪𑀺𑀦𑀻𑀧𑀺 𑀳𑁄𑀢𑀼 𑀆𑀦𑁂𑀣𑀸’’𑀢𑀺. 𑀢𑁂 𑀆𑀦𑁂𑀲𑀼𑀁. 𑀭𑀸𑀚𑀸 𑀢𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀲𑀩𑁆𑀩𑀁 𑀫𑀳𑁂𑀲𑀻𑀪𑁄𑀕𑀁 𑀅𑀤𑀸𑀲𑀺. 𑀢𑀲𑁆𑀲𑀸 𑀧𑀭𑀺𑀚𑀦𑀜𑁆𑀘 𑀦𑀸𑀦𑀸𑀯𑀺𑀥𑁂𑀳𑀺 ¶ 𑀧𑀡𑁆𑀡𑀸𑀓𑀸𑀭𑁂𑀳𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸 𑀓𑀸𑀮𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀫𑁆𑀧𑀺 𑀭𑀸𑀚𑀸 𑀅𑀢𑁆𑀢𑀦𑁄 𑀚𑀸𑀢𑀧𑀼𑀢𑁆𑀢𑀫𑀺𑀯 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀅𑀗𑁆𑀓𑁂 𑀘 𑀉𑀭𑁂 𑀘 𑀓𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀢𑁄 𑀤𑁂𑀯𑀺𑀬𑀸 𑀧𑀭𑀺𑀚𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀭𑀸𑀚𑀸 𑀅𑀢𑀺𑀯𑀺𑀬 𑀲𑀗𑁆𑀕𑀡𑁆𑀳𑀸𑀢𑀺 𑀓𑀼𑀫𑀸𑀭𑀁, 𑀅𑀢𑀺𑀯𑀺𑀲𑁆𑀲𑀸𑀲𑀦𑀺𑀬𑀸𑀦𑀺 𑀭𑀸𑀚𑀳𑀤𑀬𑀸𑀦𑀺, 𑀳𑀦𑁆𑀤 𑀦𑀁 𑀧𑀭𑀺𑀪𑁂𑀤𑁂𑀫𑀸’’𑀢𑀺.

𑀢𑀢𑁄 𑀓𑀼𑀫𑀸𑀭𑀁 𑁋 ‘‘𑀢𑁆𑀯𑀁, 𑀢𑀸𑀢, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀦 𑀇𑀫𑀲𑁆𑀲 𑀭𑀜𑁆𑀜𑁄, 𑀫𑀸 𑀏𑀢𑁆𑀣 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀻’’𑀢𑀺 𑀆𑀳𑀁𑀲𑀼. 𑀅𑀣 𑀓𑀼𑀫𑀸𑀭𑁄 ‘‘𑀏𑀳𑀺 𑀧𑀼𑀢𑁆𑀢𑀸’’𑀢𑀺 𑀭𑀜𑁆𑀜𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀬𑀫𑀸𑀦𑁄𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀭𑀸𑀚𑀸𑀦𑀁 𑀦 𑀅𑀮𑁆𑀮𑀻𑀬𑀢𑀺. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀅𑀭𑁂, 𑀏𑀢𑁂 𑀫𑀬𑀸 𑀏𑀯𑀁 𑀲𑀗𑁆𑀕𑀳𑀺𑀢𑀸𑀧𑀺 ¶ 𑀧𑀝𑀺𑀓𑀽𑀮𑀯𑀼𑀢𑁆𑀢𑀺𑀦𑁄 𑀏𑀯𑀸’’𑀢𑀺 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄. ‘‘𑀭𑀸𑀚𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀅𑀫𑀘𑁆𑀘𑀧𑀭𑀺𑀚𑀦𑀸𑀧𑀺 𑀩𑀳𑀽 𑀧𑀩𑁆𑀩𑀚𑀺𑀢𑀸 ¶ , ‘‘𑀲𑀧𑀭𑀺𑀚𑀦𑁄 𑀭𑀸𑀚𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀫𑀦𑀼𑀲𑁆𑀲𑀸 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀉𑀧𑀦𑁂𑀦𑁆𑀢𑀺. 𑀭𑀸𑀚𑀸 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀬𑀣𑀸𑀯𑀼𑀟𑁆𑀠𑀁 𑀤𑀸𑀧𑁂𑀢𑀺. 𑀢𑀢𑁆𑀣 𑀬𑁂 𑀲𑀼𑀦𑁆𑀤𑀭𑀁 𑀮𑀪𑀦𑁆𑀢𑀺, 𑀢𑁂 𑀢𑀼𑀲𑁆𑀲𑀦𑁆𑀢𑀺. 𑀇𑀢𑀭𑁂 𑀉𑀚𑁆𑀛𑀸𑀬𑀦𑁆𑀢𑀺 ‘‘𑀫𑀬𑀁 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀸 𑀮𑀽𑀔𑀪𑀢𑁆𑀢𑀁 𑀚𑀺𑀡𑁆𑀡𑀯𑀢𑁆𑀣𑀜𑁆𑀘 𑀮𑀪𑀸𑀫𑀸’’𑀢𑀺. 𑀲𑁄 𑀢𑀫𑁆𑀧𑀺 𑀜𑀢𑁆𑀯𑀸 ‘‘𑀅𑀭𑁂, 𑀬𑀣𑀸𑀯𑀼𑀟𑁆𑀠𑀁 𑀤𑀺𑀬𑁆𑀬𑀫𑀸𑀦𑁂𑀧𑀺 𑀦𑀸𑀫 𑀉𑀚𑁆𑀛𑀸𑀬𑀦𑁆𑀢𑀺, 𑀅𑀳𑁄, 𑀅𑀬𑀁 𑀧𑀭𑀺𑀲𑀸 𑀤𑀼𑀲𑁆𑀲𑀗𑁆𑀕𑀳𑀸’’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀏𑀓𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀢𑁆𑀣 𑀆𑀕𑀢𑁂𑀳𑀺 𑀘 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀲𑀸 𑀅𑀢𑁆𑀣𑀢𑁄 𑀧𑀸𑀓𑀝𑀸 𑀏𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀬𑁂 𑀅𑀲𑀦𑁆𑀢𑁄𑀲𑀸𑀪𑀺𑀪𑀽𑀢𑀸, 𑀢𑀣𑀸𑀯𑀺𑀥𑀸 𑀏𑀯 𑀘 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸. 𑀏𑀢𑀫𑀳𑀁 𑀤𑀼𑀲𑁆𑀲𑀗𑁆𑀕𑀳𑀪𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑀼𑀲𑁆𑀲𑀗𑁆𑀕𑀳𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁪. 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 ¶ 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀘𑀸𑀢𑀼𑀫𑀸𑀲𑀺𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀕𑀺𑀫𑁆𑀳𑀸𑀦𑀁 𑀧𑀞𑀫𑁂 𑀫𑀸𑀲𑁂 𑀉𑀬𑁆𑀬𑀸𑀦𑀁 𑀕𑀢𑁄. 𑀢𑀢𑁆𑀣 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀦𑀻𑀮𑀖𑀦𑀧𑀢𑁆𑀢𑀲𑀜𑁆𑀙𑀦𑁆𑀦𑀁 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀓𑁄𑀯𑀺𑀴𑀸𑀭𑀫𑀽𑀮𑁂 𑀫𑀫 𑀲𑀬𑀦𑀁 𑀧𑀜𑁆𑀜𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀧𑀼𑀦 𑀕𑀺𑀫𑁆𑀳𑀸𑀦𑀁 𑀫𑀚𑁆𑀛𑀺𑀫𑁂 𑀫𑀸𑀲𑁂 𑀉𑀬𑁆𑀬𑀸𑀦𑀁 𑀕𑀢𑁄. 𑀢𑀤𑀸 𑀓𑁄𑀯𑀺𑀴𑀸𑀭𑁄 𑀧𑀼𑀧𑁆𑀨𑀺𑀢𑁄 𑀳𑁄𑀢𑀺, 𑀢𑀤𑀸𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀧𑀼𑀦 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀕𑀢𑁄. 𑀢𑀤𑀸 𑀓𑁄𑀯𑀺𑀴𑀸𑀭𑁄 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀲𑀼𑀓𑁆𑀔𑀭𑀼𑀓𑁆𑀔𑁄 𑀯𑀺𑀬 𑀳𑁄𑀢𑀺. 𑀢𑀤𑀸𑀧𑀺 𑀲𑁄 𑀅𑀤𑀺𑀲𑁆𑀯𑀸𑀯 𑀢𑀁 𑀭𑀼𑀓𑁆𑀔𑀁 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 𑀢𑀢𑁆𑀣𑁂𑀯 𑀲𑁂𑀬𑁆𑀬𑀁 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀚𑀸𑀦𑀦𑁆𑀢𑀸𑀧𑀺 ‘‘𑀭𑀜𑁆𑀜𑀸 𑀆𑀡𑀢𑁆𑀢’’𑀦𑁆𑀢𑀺 𑀪𑀬𑁂𑀦 𑀢𑀢𑁆𑀣 𑀲𑀬𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀲𑁄 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 ¶ 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑁄 𑀢𑀁 𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀅𑀭𑁂, 𑀅𑀬𑀁 𑀧𑀼𑀩𑁆𑀩𑁂 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀫𑀡𑀺𑀫𑀬𑁄 𑀯𑀺𑀬 𑀅𑀪𑀺𑀭𑀽𑀧𑀤𑀲𑁆𑀲𑀦𑁄 𑀅𑀳𑁄𑀲𑀺. 𑀢𑀢𑁄 𑀫𑀡𑀺𑀯𑀡𑁆𑀡𑀲𑀸𑀔𑀦𑁆𑀢𑀭𑁂 𑀞𑀧𑀺𑀢𑀧𑀯𑀸𑀴𑀗𑁆𑀓𑀼𑀭𑀲𑀤𑀺𑀲𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀲𑁆𑀲𑀺𑀭𑀺𑀓𑀘𑀸𑀭𑀼𑀤𑀲𑁆𑀲𑀦𑁄 𑀅𑀳𑁄𑀲𑀺. 𑀫𑀼𑀢𑁆𑀢𑀸𑀤𑀮𑀲𑀤𑀺𑀲𑀯𑀸𑀮𑀺𑀓𑀸𑀓𑀺𑀡𑁆𑀡𑁄 𑀘𑀲𑁆𑀲 𑀳𑁂𑀝𑁆𑀞𑀸 𑀪𑀽𑀫𑀺𑀪𑀸𑀕𑁄 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑁄 𑀭𑀢𑁆𑀢𑀓𑀫𑁆𑀩𑀮𑀲𑀦𑁆𑀣𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀦𑀸𑀫𑀚𑁆𑀚 𑀲𑀼𑀓𑁆𑀔𑀭𑀼𑀓𑁆𑀔𑁄 𑀯𑀺𑀬 𑀲𑀸𑀔𑀸𑀫𑀢𑁆𑀢𑀸𑀯𑀲𑁂𑀲𑁄 𑀞𑀺𑀢𑁄. ‘𑀅𑀳𑁄, 𑀚𑀭𑀸𑀬 𑀉𑀧𑀳𑀢𑁄 𑀓𑁄𑀯𑀺𑀴𑀸𑀭𑁄’’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀦𑀼𑀧𑀸𑀤𑀺𑀦𑁆𑀦𑀫𑁆𑀧𑀺 𑀢𑀸𑀯 𑀚𑀭𑀸 𑀳𑀜𑁆𑀜𑀢𑀺, 𑀓𑀺𑀫𑀗𑁆𑀕 𑀧𑀦 𑀉𑀧𑀸𑀤𑀺𑀦𑁆𑀦’’𑀦𑁆𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑀤𑀦𑀼𑀲𑀸𑀭𑁂𑀦𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀘 𑀯𑀺𑀧𑀲𑁆𑀲𑀦𑁆𑀢𑁄 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 ¶ 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀓𑁄𑀯𑀺𑀴𑀸𑀭𑁄 𑀯𑀺𑀬 𑀅𑀧𑁂𑀢𑀕𑀺𑀳𑀺𑀩𑁆𑀬𑀜𑁆𑀚𑀦𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀬𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀫𑀺𑀁 𑀲𑀬𑀦𑀢𑀮𑁂 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄𑀬𑁂𑀯 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀢𑁄 𑀕𑀫𑀦𑀓𑀸𑀮𑁂 𑀅𑀫𑀘𑁆𑀘𑁂𑀳𑀺 ‘‘𑀓𑀸𑀮𑁄 𑀕𑀦𑁆𑀢𑀼𑀁, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁 𑀭𑀸𑀚𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄;

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀓𑁂𑀲𑀫𑀲𑁆𑀲𑀼𑀑𑀤𑀸𑀢𑀯𑀢𑁆𑀣𑀸𑀮𑀗𑁆𑀓𑀸𑀭𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀇𑀢𑁆𑀣𑀺𑀧𑀼𑀢𑁆𑀢𑀤𑀸𑀲𑀺𑀤𑀸𑀲𑀸𑀤𑀻𑀦𑀺. 𑀏𑀢𑀸𑀦𑀺 𑀳𑀺 𑀕𑀺𑀳𑀺𑀪𑀸𑀯𑀁 ¶ 𑀩𑁆𑀬𑀜𑁆𑀚𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄𑀢𑀺 𑀧𑀢𑀺𑀢𑀧𑀢𑁆𑀢𑁄. 𑀙𑁂𑀢𑁆𑀯𑀸𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀺𑀢𑁆𑀯𑀸. 𑀯𑀻𑀭𑁄𑀢𑀺 𑀫𑀕𑁆𑀕𑀯𑀻𑀭𑀺𑀬𑀲𑀫𑀦𑁆𑀦𑀸𑀕𑀢𑁄. 𑀕𑀺𑀳𑀺𑀩𑀦𑁆𑀥𑀦𑀸𑀦𑀻𑀢𑀺 𑀓𑀸𑀫𑀩𑀦𑁆𑀥𑀦𑀸𑀦𑀺. 𑀓𑀸𑀫𑀸 𑀳𑀺 𑀕𑀺𑀳𑀻𑀦𑀁 𑀩𑀦𑁆𑀥𑀦𑀸𑀦𑀺. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄.

𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀜𑁆𑀳𑀺 𑀘𑀺𑀦𑁆𑀢𑀬𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑁄𑀯𑀺𑀴𑀸𑀭𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸. 𑀧𑀞𑀫𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁪𑁫-𑁪𑁬. 𑀲𑀘𑁂 ¶ 𑀮𑀪𑁂𑀣𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀤𑁆𑀯𑁂 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀓𑀦𑀺𑀝𑁆𑀞𑁄 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀢𑁂 𑀏𑀓𑀤𑀺𑀯𑀲𑀁𑀬𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀏𑀓𑀤𑀺𑀯𑀲𑀫𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀳𑀧𑀁𑀲𑀼𑀓𑀻𑀴𑀺𑀢𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀧𑀜𑁆𑀜𑀯𑀸 𑀅𑀳𑁄𑀲𑀺. 𑀲𑁄 𑀭𑀸𑀚𑀧𑀼𑀢𑁆𑀢𑀁 𑀆𑀳 𑁋 ‘‘𑀲𑀫𑁆𑀫, 𑀢𑁆𑀯𑀁 𑀧𑀺𑀢𑀼𑀦𑁄 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀮𑀪𑀺𑀲𑁆𑀲𑀲𑀺, 𑀅𑀳𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁, 𑀲𑀼𑀲𑀺𑀓𑁆𑀔𑀺𑀢𑁂𑀦 𑀘 𑀲𑀼𑀔𑀁 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀢𑀼𑀁 𑀲𑀓𑁆𑀓𑀸, 𑀏𑀳𑀺 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀉𑀪𑁄𑀧𑀺 𑀧𑀼𑀩𑁆𑀩𑁄𑀧𑀘𑀺𑀢𑀓𑀫𑁆𑀫𑀸 𑀳𑀼𑀢𑁆𑀯𑀸 ¶ 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀪𑀺𑀓𑁆𑀔𑀁 𑀘𑀭𑀫𑀸𑀦𑀸 𑀧𑀘𑁆𑀘𑀦𑁆𑀢𑀚𑀦𑀧𑀤𑀕𑀸𑀫𑀁 𑀕𑀢𑀸. 𑀢𑀜𑁆𑀘 𑀕𑀸𑀫𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀧𑀯𑀺𑀲𑀦𑁆𑀢𑀺. 𑀅𑀣 𑀫𑀦𑀼𑀲𑁆𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀉𑀲𑁆𑀲𑀸𑀳𑀚𑀸𑀢𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀫𑀸𑀦𑁂𑀦𑁆𑀢𑀺, 𑀧𑀽𑀚𑁂𑀦𑁆𑀢𑀺. 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀳𑁂𑀳𑀺 𑀲𑀤𑀺𑀲𑀸 𑀉𑀘𑁆𑀘𑀸𑀓𑀼𑀮𑀺𑀓𑀸 𑀦𑀸𑀫 𑀦𑀢𑁆𑀣𑀺, 𑀅𑀣 𑀘 𑀧𑀦𑀺𑀫𑁂 𑀫𑀦𑀼𑀲𑁆𑀲𑀸 𑀬𑀤𑀺 𑀇𑀘𑁆𑀙𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀤𑁂𑀦𑁆𑀢𑀺, 𑀬𑀤𑀺 𑀘 𑀦𑀺𑀘𑁆𑀙𑀦𑁆𑀢𑀺, 𑀦 𑀤𑁂𑀦𑁆𑀢𑀺, 𑀇𑀫𑁂𑀲𑀁 𑀧𑀦 𑀧𑀩𑁆𑀩𑀚𑀺𑀢𑀸𑀦𑀁 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀅𑀤𑁆𑀥𑀸 𑀏𑀢𑁂 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀫𑀸’’𑀢𑀺.

𑀢𑁂 ¶ 𑀫𑀦𑀼𑀲𑁆𑀲𑁂𑀲𑀼 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀬𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀺𑀧𑁆𑀧𑀁 𑀚𑀸𑀦𑀸𑀣, 𑀢𑀁 𑀅𑀫𑁆𑀳𑁂𑀧𑀺 𑀲𑀺𑀓𑁆𑀔𑀸𑀧𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀦 𑀲𑀓𑁆𑀓𑀸 𑀅𑀧𑀩𑁆𑀩𑀚𑀺𑀢𑁂𑀦 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀢𑁂 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀢𑀢𑁄 𑀦𑁂𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀏𑀯𑀁 𑀯𑁄 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀏𑀓𑀻𑀪𑀸𑀯𑀸𑀪𑀺𑀭𑀢𑀺 𑀦𑀺𑀧𑁆𑀨𑀢𑁆𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀏𑀓𑁂𑀦 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀞𑀸𑀢𑀩𑁆𑀩𑀁, 𑀲𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀧𑀡𑁆𑀡𑀲𑀸𑀮𑀫𑀤𑀁𑀲𑀼. 𑀢𑀢𑁄 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 ¶ 𑀧𑀪𑀼𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑀁 𑀮𑀤𑁆𑀥𑀸 𑀛𑀸𑀦𑀁 𑀮𑀪𑀺. 𑀭𑀸𑀚𑀧𑀼𑀢𑁆𑀢𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀲𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀇𑀥 𑀦𑀺𑀲𑀻𑀤𑀸’’𑀢𑀺. 𑀲𑁄 𑀢𑀢𑁆𑀣 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳 𑁋 ‘‘𑀇𑀫𑀲𑁆𑀲 𑀓𑀺𑀭, 𑀲𑀫𑁆𑀫, 𑀲𑀺𑀧𑁆𑀧𑀲𑁆𑀲 𑀏𑀓𑀻𑀪𑀸𑀯𑀸𑀪𑀺𑀭𑀢𑀺 𑀦𑀺𑀧𑁆𑀨𑀢𑁆𑀢𑀻’’𑀢𑀺 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 ‘‘𑀏𑀯𑀁, 𑀲𑀫𑁆𑀫, 𑀢𑁂𑀦 𑀳𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀏𑀯 𑀕𑀘𑁆𑀙, 𑀉𑀕𑁆𑀕𑀳𑁂𑀲𑁆𑀲𑀸𑀫𑀺 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀦𑀺𑀧𑁆𑀨𑀢𑁆𑀢𑀺’’𑀦𑁆𑀢𑀺 𑀆𑀳. 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑀫𑀼𑀳𑀼𑀢𑁆𑀢𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑁄.

𑀢𑀢𑁄 𑀦𑀁 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀢𑀣𑁂𑀯 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀅𑀢𑁆𑀢𑀦𑁄 𑀘 𑀓𑀫𑁆𑀫𑀁 𑀳𑀸𑀧𑁂𑀢𑀺, 𑀫𑀫 𑀘 𑀇𑀥𑀸𑀪𑀺𑀓𑁆𑀔𑀡𑀁 𑀆𑀕𑀘𑁆𑀙𑀦𑁆𑀢𑁄’’𑀢𑀺. 𑀲𑁄 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑁆𑀫 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄. 𑀇𑀢𑀭𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬𑁂𑀯 𑀦𑀺𑀲𑀺𑀦𑁆𑀦𑁄 𑀧𑀼𑀦𑀧𑀺 𑀫𑀼𑀳𑀼𑀢𑁆𑀢𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀲𑀸𑀮𑀁 𑀆𑀕𑀦𑁆𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀫𑀕𑁆𑀕𑀦𑁆𑀢𑁄𑀧𑀺 𑀢𑀁 𑀅𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑁄 𑀕𑀳𑀝𑁆𑀞𑀓𑀸𑀮𑁂 𑀧𑀡𑁆𑀡𑀸𑀓𑀸𑀭𑀫𑁆𑀧𑀺 𑀆𑀤𑀸𑀬 𑀆𑀕𑀢𑁄 𑀫𑀁 𑀤𑀝𑁆𑀞𑀼𑀁 𑀦 𑀮𑀪𑀢𑀺, 𑀲𑁄 𑀦𑀸𑀫 𑀫𑀬𑀺 𑀆𑀕𑀢𑁂 𑀤𑀲𑁆𑀲𑀦𑀫𑁆𑀧𑀺 𑀅𑀤𑀸𑀢𑀼𑀓𑀸𑀫𑁄 𑀧𑀓𑁆𑀓𑀸𑀫𑀺, 𑀅𑀳𑁄, 𑀭𑁂 𑀘𑀺𑀢𑁆𑀢, 𑀦 𑀮𑀚𑁆𑀚𑀲𑀺, 𑀬𑀁 𑀫𑀁 𑀘𑀢𑀼𑀓𑁆𑀔𑀢𑁆𑀢𑀼𑀁 𑀇𑀥𑀸𑀦𑁂𑀲𑀺, 𑀲𑁄𑀤𑀸𑀦𑀺 𑀢𑁂 𑀯𑀲𑁂 𑀦 𑀯𑀢𑁆𑀢𑀺𑀲𑁆𑀲𑀸𑀫𑀺, 𑀅𑀜𑁆𑀜𑀤𑀢𑁆𑀣𑀼 𑀢𑀁𑀬𑁂𑀯 𑀫𑀫 𑀯𑀲𑁂 𑀯𑀢𑁆𑀢𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀇𑀢𑀭𑁄𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 ¶ 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀢𑁂 𑀉𑀪𑁄𑀧𑀺 𑀫𑀦𑁄𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀇𑀫𑀸 𑀉𑀤𑀸𑀦𑀕𑀸𑀣𑀸𑀬𑁄 𑀅𑀪𑀸𑀲𑀺𑀁𑀲𑀼 𑁋

‘‘𑀲𑀘𑁂 ¶ 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺.

𑀢𑀢𑁆𑀣 𑀦𑀺𑀧𑀓𑀦𑁆𑀢𑀺 𑀧𑀓𑀢𑀺𑀦𑀺𑀧𑀼𑀡𑀁 𑀧𑀡𑁆𑀟𑀺𑀢𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀲𑀼 𑀓𑀼𑀲𑀮𑀁. 𑀲𑀸𑀥𑀼𑀯𑀺𑀳𑀸𑀭𑀺𑀦𑁆𑀢𑀺 𑀅𑀧𑁆𑀧𑀦𑀸𑀯𑀺𑀳𑀸𑀭𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀁. 𑀥𑀻𑀭𑀦𑁆𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀁. 𑀢𑀢𑁆𑀣 𑀦𑀺𑀧𑀓𑀢𑁆𑀢𑁂𑀦 𑀥𑀺𑀢𑀺𑀲𑀫𑁆𑀧𑀤𑀸 𑀯𑀼𑀢𑁆𑀢𑀸. 𑀇𑀥 𑀧𑀦 𑀥𑀺𑀢𑀺𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀥𑀺𑀢𑀺 𑀦𑀸𑀫 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸, ‘‘𑀓𑀸𑀫𑀁 𑀢𑀘𑁄 ¶ 𑀘 𑀦𑁆𑀳𑀸𑀭𑀼 𑀘𑀸’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀧𑀯𑀢𑁆𑀢𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀺𑀘 𑀥𑀺𑀓𑀢𑀧𑀸𑀧𑁄𑀢𑀺𑀧𑀺 𑀥𑀻𑀭𑁄. 𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬𑀸𑀢𑀺 𑀬𑀣𑀸 𑀧𑀝𑀺𑀭𑀸𑀚𑀸 ‘‘𑀯𑀺𑀚𑀺𑀢𑀁 𑀭𑀝𑁆𑀞𑀁 𑀅𑀦𑀢𑁆𑀣𑀸𑀯𑀳’’𑀦𑁆𑀢𑀺 𑀜𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀏𑀓𑁄 𑀘𑀭𑀢𑀺, 𑀏𑀯𑀁 𑀩𑀸𑀮𑀲𑀳𑀸𑀬𑀁 𑀧𑀳𑀸𑀬 𑀏𑀓𑁄 𑀘𑀭𑁂. 𑀅𑀣 𑀯𑀸 𑀭𑀸𑀚𑀸𑀯 𑀭𑀝𑁆𑀞𑀦𑁆𑀢𑀺 𑀬𑀣𑀸 𑀲𑀼𑀢𑀲𑁄𑀫𑁄 𑀭𑀸𑀚𑀸 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀧𑀳𑀸𑀬 𑀏𑀓𑁄 𑀘𑀭𑀺, 𑀬𑀣𑀸 𑀘 𑀫𑀳𑀸𑀚𑀦𑀓𑁄, 𑀏𑀯𑀁 𑀏𑀓𑁄 𑀘𑀭𑁂𑀢𑀺 𑀅𑀬𑀫𑁆𑀧𑀺 𑀢𑀲𑁆𑀲𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀲𑀳𑀸𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁭. 𑀅𑀤𑁆𑀥𑀸 𑀧𑀲𑀁𑀲𑀸𑀫𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀬𑀸𑀯 𑀆𑀓𑀸𑀲𑀢𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀲𑀚𑁆𑀚𑀸, 𑀢𑀸𑀯 𑀘𑀸𑀢𑀼𑀤𑁆𑀤𑀺𑀲𑀕𑀸𑀣𑀸𑀬 𑀉𑀧𑁆𑀧𑀢𑁆𑀢𑀺𑀲𑀤𑀺𑀲𑀸 𑀏𑀯 𑀉𑀧𑁆𑀧𑀢𑁆𑀢𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀲𑁄 𑀭𑀸𑀚𑀸 𑀭𑀢𑁆𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀩𑁆𑀩𑀺𑀚𑁆𑀚𑀺, 𑀦 𑀢𑀣𑀸 𑀅𑀬𑀁, 𑀦𑁂𑀯𑀲𑁆𑀲 𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀳𑁄𑀲𑀺. 𑀲𑁄 𑀆𑀓𑀸𑀲𑀢𑀮𑁂 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀁, 𑀫𑀳𑀸𑀭𑀸𑀚, 𑀅𑀦𑀯𑀚𑁆𑀚𑀪𑁄𑀚𑀺𑀦𑁄 𑀦𑀸𑀫𑀸’’𑀢𑀺. ‘‘𑀪𑀦𑁆𑀢𑁂, ‘𑀅𑀦𑀯𑀚𑁆𑀚𑀪𑁄𑀚𑀺𑀦𑁄’𑀢𑀺 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺? ‘‘𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸 𑀮𑀤𑁆𑀥𑀸 𑀦𑀺𑀩𑁆𑀩𑀺𑀓𑀸𑀭𑀸 𑀪𑀼𑀜𑁆𑀚𑀸𑀫, 𑀫𑀳𑀸𑀭𑀸𑀚𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 ‘‘𑀬𑀁𑀦𑀽𑀦𑀸𑀳𑀁 𑀇𑀫𑁂 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀁 𑀏𑀤𑀺𑀲𑀸 𑀯𑀸 𑀦𑁄 𑀯𑀸’’𑀢𑀺. 𑀢𑀁 𑀤𑀺𑀯𑀲𑀁 𑀓𑀡𑀸𑀚𑀓𑁂𑀦 ¶ 𑀩𑀺𑀮𑀗𑁆𑀕𑀤𑀼𑀢𑀺𑀬𑁂𑀦 𑀧𑀭𑀺𑀯𑀺𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀫𑀢𑀁 𑀪𑀼𑀜𑁆𑀚𑀦𑁆𑀢𑀸 𑀯𑀺𑀬 𑀦𑀺𑀩𑁆𑀩𑀺𑀓𑀸𑀭𑀸 𑀪𑀼𑀜𑁆𑀚𑀺𑀁𑀲𑀼. 𑀭𑀸𑀚𑀸 ‘‘𑀳𑁄𑀦𑁆𑀢𑀺 𑀦𑀸𑀫 𑀏𑀓𑀤𑀺𑀯𑀲𑀁 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀦𑀺𑀩𑁆𑀩𑀺𑀓𑀸𑀭𑀸, 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑁆𑀯𑀸𑀢𑀦𑀸𑀬𑀧𑀺 ¶ 𑀦𑀺𑀫𑀦𑁆𑀢𑁂𑀲𑀺. 𑀢𑀢𑁄 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯𑀸𑀓𑀸𑀲𑀺. 𑀢𑁂𑀧𑀺 𑀢𑀣𑁂𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀭𑀸𑀚𑀸 ‘‘𑀇𑀤𑀸𑀦𑀺 𑀲𑀼𑀦𑁆𑀤𑀭𑀁 𑀤𑀢𑁆𑀯𑀸 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀧𑀺 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀤𑁆𑀯𑁂 𑀤𑀺𑀯𑀲𑁂 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸, 𑀧𑀡𑀻𑀢𑁂𑀦 𑀅𑀢𑀺𑀯𑀺𑀘𑀺𑀢𑁆𑀭𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺. 𑀢𑁂𑀧𑀺 𑀢𑀣𑁂𑀯 𑀦𑀺𑀩𑁆𑀩𑀺𑀓𑀸𑀭𑀸 𑀪𑀼𑀜𑁆𑀚𑀺𑀢𑁆𑀯𑀸 𑀭𑀜𑁆𑀜𑁄 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀭𑀸𑀚𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 ‘‘𑀅𑀦𑀯𑀚𑁆𑀚𑀪𑁄𑀚𑀺𑀦𑁄𑀯 𑀏𑀢𑁂 𑀲𑀫𑀡𑀸, 𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀯𑀚𑁆𑀚𑀪𑁄𑀚𑀻 ¶ 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑁆𑀚𑀁 𑀲𑀫𑀸𑀤𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸, 𑀫𑀜𑁆𑀚𑀽𑀲𑀓𑀭𑀼𑀓𑁆𑀔𑀫𑀽𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀯𑀺𑀪𑀸𑀯𑁂𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀁, 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸;

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀲𑀸 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀸 𑀏𑀯. 𑀓𑁂𑀯𑀮𑀁 𑀧𑀦 𑀲𑀳𑀸𑀬𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣 𑀅𑀲𑁂𑀔𑁂𑀳𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀦𑁆𑀦𑀸 𑀲𑀳𑀸𑀬𑀸 𑀏𑀯 𑀲𑀳𑀸𑀬𑀲𑀫𑁆𑀧𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀬𑀸𑀬𑀁 𑀯𑀼𑀢𑁆𑀢𑀸 𑀲𑀳𑀸𑀬𑀲𑀫𑁆𑀧𑀤𑀸, 𑀢𑀁 𑀲𑀳𑀸𑀬𑀲𑀫𑁆𑀧𑀤𑀁 𑀅𑀤𑁆𑀥𑀸 𑀧𑀲𑀁𑀲𑀸𑀫, 𑀏𑀓𑀁𑀲𑁂𑀦𑁂𑀯 𑀣𑁄𑀫𑁂𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁? 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸𑀢𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀳𑀺 𑀲𑀻𑀮𑀸𑀤𑀻𑀳𑀺 𑀲𑁂𑀝𑁆𑀞𑁂 𑀲𑁂𑀯𑀫𑀸𑀦𑀲𑁆𑀲 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀦𑁆𑀢𑀺. 𑀲𑀫𑁂 𑀲𑁂𑀯𑀫𑀸𑀦𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀲𑀫𑀥𑀸𑀭𑀡𑁂𑀦 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀯𑀺𑀦𑁄𑀤𑀦𑁂𑀦 𑀘 𑀮𑀤𑁆𑀥𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀏𑀢𑁂 𑀧𑀦 𑀲𑀳𑀸𑀬𑀓𑁂 𑀲𑁂𑀝𑁆𑀞𑁂 𑀘 𑀲𑀫𑁂 𑀘 𑀅𑀮𑀤𑁆𑀥𑀸 𑀓𑀼𑀳𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀢𑀢𑁆𑀣 𑀘 𑀧𑀝𑀺𑀖𑀸𑀦𑀼𑀦𑀬𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀅𑀦𑀯𑀚𑁆𑀚𑀪𑁄𑀚𑀻 𑀳𑀼𑀢𑁆𑀯𑀸 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀅𑀳𑀫𑁆𑀧𑀺 𑀳𑀺 𑀏𑀯𑀁 𑀘𑀭𑀦𑁆𑀢𑁄 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺.

𑀅𑀦𑀯𑀚𑁆𑀚𑀪𑁄𑀚𑀺𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁮. 𑀤𑀺𑀲𑁆𑀯𑀸 ¶ 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀕𑀺𑀫𑁆𑀳𑀲𑀫𑀬𑁂 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄. 𑀲𑀦𑁆𑀢𑀺𑀓𑁂 𑀘𑀲𑁆𑀲 𑀯𑀡𑁆𑀡𑀤𑀸𑀲𑀻 𑀕𑁄𑀲𑀻𑀢𑀘𑀦𑁆𑀤𑀦𑀁 𑀧𑀺𑀲𑀢𑀺. 𑀢𑀲𑁆𑀲𑀸 𑀏𑀓𑀩𑀸𑀳𑀸𑀬𑀁 𑀏𑀓𑀁 𑀲𑀼𑀯𑀡𑁆𑀡𑀯𑀮𑀬𑀁, 𑀏𑀓𑀩𑀸𑀳𑀸𑀬𑀁 𑀤𑁆𑀯𑁂, 𑀢𑀸𑀦𑀺 𑀲𑀗𑁆𑀖𑀝𑁆𑀝𑀦𑁆𑀢𑀺 𑀇𑀢𑀭𑀁 𑀦 𑀲𑀗𑁆𑀖𑀝𑁆𑀝𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀯𑀫𑁂𑀯 𑀕𑀡𑀯𑀸𑀲𑁂 𑀲𑀗𑁆𑀖𑀝𑁆𑀝𑀦𑀸, 𑀏𑀓𑀯𑀸𑀲𑁂 𑀅𑀲𑀗𑁆𑀖𑀝𑁆𑀝𑀦𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀤𑀸𑀲𑀺𑀁 𑀑𑀮𑁄𑀓𑀬𑀫𑀸𑀦𑁄 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸 𑀤𑁂𑀯𑀻 𑀢𑀁 𑀩𑀻𑀚𑀬𑀦𑁆𑀢𑀻 𑀞𑀺𑀢𑀸 𑀳𑁄𑀢𑀺. 𑀲𑀸 ‘‘𑀯𑀡𑁆𑀡𑀤𑀸𑀲𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀜𑁆𑀜𑁂 𑀭𑀸𑀚𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀤𑀸𑀲𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀧𑀺𑀲𑀺𑀢𑀼𑀫𑀸𑀭𑀤𑁆𑀥𑀸 ¶ . 𑀢𑀲𑁆𑀲𑀸 𑀉𑀪𑁄𑀲𑀼 𑀩𑀸𑀳𑀸𑀲𑀼 𑀅𑀦𑁂𑀓𑁂 𑀲𑀼𑀯𑀡𑁆𑀡𑀯𑀮𑀬𑀸, 𑀢𑁂 𑀲𑀗𑁆𑀖𑀝𑁆𑀝𑀦𑁆𑀢𑀸 𑀫𑀳𑀸𑀲𑀤𑁆𑀤𑀁 𑀚𑀦𑀬𑀺𑀁𑀲𑀼. 𑀭𑀸𑀚𑀸 𑀲𑀼𑀝𑁆𑀞𑀼𑀢𑀭𑀁 𑀦𑀺𑀩𑁆𑀩𑀺𑀦𑁆𑀦𑁄 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄𑀬𑁂𑀯 𑀯𑀺𑀧𑀲𑁆𑀲𑀦𑀁 ¶ 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀁 𑀅𑀦𑀼𑀢𑁆𑀢𑀭𑁂𑀦 𑀲𑀼𑀔𑁂𑀦 𑀲𑀼𑀔𑀺𑀢𑀁 𑀦𑀺𑀧𑀦𑁆𑀦𑀁 𑀘𑀦𑁆𑀤𑀦𑀳𑀢𑁆𑀣𑀸 𑀤𑁂𑀯𑀻 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀮𑀺𑀫𑁆𑀧𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀭𑀸𑀚𑀸 𑁋 ‘‘𑀅𑀧𑁂𑀳𑀺, 𑀫𑀸 𑀆𑀮𑀺𑀫𑁆𑀧𑀸𑀳𑀻’’𑀢𑀺 𑀆𑀳. 𑀲𑀸 ‘‘𑀓𑀺𑀲𑁆𑀲, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀲𑁄 ‘‘𑀦𑀸𑀳𑀁 𑀭𑀸𑀚𑀸’’𑀢𑀺. 𑀏𑀯𑀫𑁂𑀢𑁂𑀲𑀁 𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀳𑀺𑀧𑀺 𑀫𑀳𑀸𑀭𑀸𑀚𑀯𑀸𑀤𑁂𑀦 𑀆𑀮𑀧𑀺𑀢𑁄 ‘‘𑀦𑀸𑀳𑀁, 𑀪𑀡𑁂, 𑀭𑀸𑀚𑀸’’𑀢𑀺 𑀆𑀳. 𑀲𑁂𑀲𑀁 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀅𑀬𑀁 𑀧𑀦 𑀕𑀸𑀣𑀸𑀯𑀡𑁆𑀡𑀦𑀸 𑁋 𑀤𑀺𑀲𑁆𑀯𑀸𑀢𑀺 𑀑𑀮𑁄𑀓𑁂𑀢𑁆𑀯𑀸. 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀓𑀜𑁆𑀘𑀦𑀲𑁆𑀲 ‘‘𑀯𑀮𑀬𑀸𑀦𑀻’’𑀢𑀺 𑀧𑀸𑀞𑀲𑁂𑀲𑁄. 𑀲𑀸𑀯𑀲𑁂𑀲𑀧𑀸𑀞𑁄 𑀳𑀺 𑀅𑀬𑀁 𑀅𑀢𑁆𑀣𑁄. 𑀧𑀪𑀲𑁆𑀲𑀭𑀸𑀦𑀻𑀢𑀺 𑀧𑀪𑀸𑀲𑀦𑀲𑀻𑀮𑀸𑀦𑀺, 𑀚𑀼𑀢𑀺𑀫𑀦𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀤𑀺𑀲𑁆𑀯𑀸 𑀪𑀼𑀚𑀲𑁆𑀫𑀺𑀁 𑀲𑀼𑀯𑀡𑁆𑀡𑀲𑁆𑀲 𑀯𑀮𑀬𑀸𑀦𑀺 ‘‘𑀕𑀡𑀯𑀸𑀲𑁂 𑀲𑀢𑀺 𑀲𑀗𑁆𑀖𑀝𑁆𑀝𑀦𑀸, 𑀏𑀓𑀯𑀸𑀲𑁂 𑀅𑀲𑀗𑁆𑀖𑀝𑁆𑀝𑀦𑀸’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀼𑀯𑀡𑁆𑀡𑀯𑀮𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁯. 𑀏𑀯𑀁 𑀤𑀼𑀢𑀺𑀬𑁂𑀦𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑀳𑀭𑁄𑀯 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 ‘‘𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀭𑀚𑁆𑀚𑀁 𑀧𑀭𑀺𑀳𑀭𑀣, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀫𑀘𑁆𑀘𑀸 ‘‘𑀦, 𑀫𑀳𑀸𑀭𑀸𑀚, 𑀅𑀭𑀸𑀚𑀓𑀁 𑀭𑀚𑁆𑀚𑀁 𑀅𑀫𑁆𑀳𑁂𑀳𑀺 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀁, 𑀲𑀸𑀫𑀦𑁆𑀢𑀭𑀸𑀚𑀸𑀦𑁄 𑀆𑀕𑀫𑁆𑀫 𑀯𑀺𑀮𑀼𑀫𑁆𑀧𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀏𑀓𑀧𑀼𑀢𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀆𑀕𑀫𑁂𑀳𑀻’’𑀢𑀺 𑀲𑀜𑁆𑀜𑀸𑀧𑁂𑀲𑀼𑀁. 𑀫𑀼𑀤𑀼𑀘𑀺𑀢𑁆𑀢𑁄 𑀭𑀸𑀚𑀸 ¶ 𑀅𑀥𑀺𑀯𑀸𑀲𑁂𑀲𑀺. 𑀅𑀣 𑀤𑁂𑀯𑀻 𑀕𑀩𑁆𑀪𑀁 𑀕𑀡𑁆𑀳𑀺. 𑀭𑀸𑀚𑀸 𑀧𑀼𑀦𑀧𑀺 𑀢𑁂 𑀆𑀡𑀸𑀧𑁂𑀲𑀺 𑁋 ‘‘𑀤𑁂𑀯𑀻 𑀕𑀩𑁆𑀪𑀺𑀦𑀻, 𑀧𑀼𑀢𑁆𑀢𑀁 𑀚𑀸𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀚𑁆𑀚𑀁 𑀧𑀭𑀺𑀳𑀭𑀣, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀫𑀘𑁆𑀘𑀸 ‘‘𑀤𑀼𑀚𑁆𑀚𑀸𑀦𑀁, 𑀫𑀳𑀸𑀭𑀸𑀚, 𑀏𑀢𑀁 𑀤𑁂𑀯𑀻 𑀧𑀼𑀢𑁆𑀢𑀁 𑀯𑀸 𑀯𑀺𑀚𑀸𑀬𑀺𑀲𑁆𑀲𑀢𑀺 𑀥𑀻𑀢𑀭𑀁 𑀯𑀸, 𑀯𑀺𑀚𑀸𑀬𑀦𑀓𑀸𑀮𑀁 𑀢𑀸𑀯 𑀆𑀕𑀫𑁂𑀳𑀻’’𑀢𑀺 𑀧𑀼𑀦𑀧𑀺 𑀲𑀜𑁆𑀜𑀸𑀧𑁂𑀲𑀼𑀁. 𑀅𑀣 𑀲𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀤𑀸𑀧𑀺 𑀭𑀸𑀚𑀸 𑀢𑀣𑁂𑀯 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀧𑀼𑀦𑀧𑀺 𑀭𑀸𑀚𑀸𑀦𑀁 ‘‘𑀆𑀕𑀫𑁂𑀳𑀺, 𑀫𑀳𑀸𑀭𑀸𑀚, 𑀬𑀸𑀯, 𑀧𑀝𑀺𑀩𑀮𑁄 𑀳𑁄𑀢𑀻’’𑀢𑀺 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀲𑀜𑁆𑀜𑀸𑀧𑁂𑀲𑀼𑀁. 𑀢𑀢𑁄 𑀓𑀼𑀫𑀸𑀭𑁂 𑀧𑀝𑀺𑀩𑀮𑁂 ¶ 𑀚𑀸𑀢𑁂 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀧𑀝𑀺𑀩𑀮𑁄 𑀅𑀬𑀁, 𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀝𑀺𑀧𑀚𑁆𑀚𑀣𑀸’’𑀢𑀺 𑀅𑀫𑀘𑁆𑀘𑀸𑀦𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀸 𑀓𑀸𑀲𑀸𑀬𑀯𑀢𑁆𑀣𑀸𑀤𑀬𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀆𑀳𑀭𑀸𑀧𑁂𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑁂 𑀏𑀯 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀚𑀦𑀓𑁄 𑀯𑀺𑀬 𑀦𑀺𑀓𑁆𑀔𑀫𑀺. 𑀲𑀩𑁆𑀩𑀧𑀭𑀺𑀚𑀦𑁄 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀭𑀺𑀤𑁂𑀯𑀫𑀸𑀦𑁄 𑀭𑀸𑀚𑀸𑀦𑀁 𑀅𑀦𑀼𑀩𑀦𑁆𑀥𑀺.

𑀭𑀸𑀚𑀸 ¶ 𑀬𑀸𑀯 𑀅𑀢𑁆𑀢𑀦𑁄 𑀭𑀚𑁆𑀚𑀲𑀻𑀫𑀸, 𑀢𑀸𑀯 𑀕𑀦𑁆𑀢𑁆𑀯𑀸 𑀓𑀢𑁆𑀢𑀭𑀤𑀡𑁆𑀟𑁂𑀦 𑀮𑁂𑀔𑀁 𑀓𑀢𑁆𑀯𑀸 ‘‘𑀅𑀬𑀁 𑀮𑁂𑀔𑀸 𑀦𑀸𑀢𑀺𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 𑀆𑀳. 𑀫𑀳𑀸𑀚𑀦𑁄 𑀮𑁂𑀔𑀸𑀬 𑀲𑀻𑀲𑀁 𑀓𑀢𑁆𑀯𑀸, 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑁄 𑀧𑀭𑀺𑀤𑁂𑀯𑀫𑀸𑀦𑁄 ‘‘𑀢𑀼𑀬𑁆𑀳𑀁 𑀤𑀸𑀦𑀺, 𑀢𑀸𑀢, 𑀭𑀜𑁆𑀜𑁄 𑀆𑀡𑀸, 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀓𑀼𑀫𑀸𑀭𑀁 𑀮𑁂𑀔𑀁 𑀅𑀢𑀺𑀓𑁆𑀓𑀫𑀸𑀧𑁂𑀲𑀺. 𑀓𑀼𑀫𑀸𑀭𑁄 ‘‘𑀢𑀸𑀢, 𑀢𑀸𑀢𑀸’’𑀢𑀺 𑀥𑀸𑀯𑀺𑀢𑁆𑀯𑀸 𑀭𑀸𑀚𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀸 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀳𑀸𑀚𑀦𑀁 𑀧𑀭𑀺𑀳𑀭𑀦𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺𑀁, 𑀓𑀺𑀁 𑀤𑀸𑀦𑀺 𑀏𑀓𑀁 𑀤𑀸𑀭𑀓𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀢𑀢𑁆𑀣 𑀧𑀼𑀩𑁆𑀩𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀯𑀲𑀺𑀢𑀧𑀡𑁆𑀡𑀲𑀸𑀮𑀁 𑀤𑀺𑀲𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦. 𑀢𑀢𑁄 𑀓𑀼𑀫𑀸𑀭𑁄 𑀯𑀭𑀲𑀬𑀦𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑁄 𑀢𑀺𑀡𑀲𑀦𑁆𑀣𑀸𑀭𑀓𑁂 𑀯𑀸 𑀭𑀚𑁆𑀚𑀼𑀫𑀜𑁆𑀘𑀓𑁂 𑀯𑀸 𑀲𑀬𑀫𑀸𑀦𑁄 𑀭𑁄𑀤𑀢𑀺. 𑀲𑀻𑀢𑀯𑀸𑀢𑀸𑀤𑀻𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 ‘‘𑀲𑀻𑀢𑀁, 𑀢𑀸𑀢, 𑀉𑀡𑁆𑀳𑀁, 𑀢𑀸𑀢, 𑀫𑀓𑁆𑀔𑀺𑀓𑀸, 𑀢𑀸𑀢, 𑀔𑀸𑀤𑀦𑁆𑀢𑀺, 𑀙𑀸𑀢𑁄𑀫𑁆𑀳𑀺, 𑀢𑀸𑀢, 𑀧𑀺𑀧𑀸𑀲𑀺𑀢𑁄𑀫𑁆𑀳𑀺, 𑀢𑀸𑀢𑀸’’𑀢𑀺 𑀯𑀤𑀢𑀺. 𑀭𑀸𑀚𑀸 𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑁄𑀬𑁂𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀤𑀺𑀯𑀸𑀧𑀺𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀁 𑀉𑀧𑀦𑀸𑀫𑁂𑀢𑀺, 𑀢𑀁 𑀳𑁄𑀢𑀺 𑀫𑀺𑀲𑁆𑀲𑀓𑀪𑀢𑁆𑀢𑀁 𑀓𑀗𑁆𑀕𑀼𑀯𑀭𑀓𑀫𑀼𑀕𑁆𑀕𑀸𑀤𑀺𑀩𑀳𑀼𑀮𑀁. 𑀓𑀼𑀫𑀸𑀭𑁄 𑀅𑀘𑁆𑀙𑀸𑀤𑁂𑀦𑁆𑀢𑀫𑁆𑀧𑀺 𑀢𑀁 𑀚𑀺𑀖𑀘𑁆𑀙𑀸𑀯𑀲𑁂𑀦 𑀪𑀼𑀜𑁆𑀚𑀫𑀸𑀦𑁄 𑀓𑀢𑀺𑀧𑀸𑀳𑁂𑀦𑁂𑀯 𑀉𑀡𑁆𑀳𑁂 𑀞𑀧𑀺𑀢𑀧𑀤𑀼𑀫𑀁 𑀯𑀺𑀬 𑀫𑀺𑀮𑀸𑀬𑀺. 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀧𑀦 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀦𑀺𑀩𑁆𑀩𑀺𑀓𑀸𑀭𑁄𑀬𑁂𑀯 𑀪𑀼𑀜𑁆𑀚𑀢𑀺.

𑀢𑀢𑁄 𑀲𑁄 𑀓𑀼𑀫𑀸𑀭𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀆𑀳 𑁋 ‘‘𑀦𑀕𑀭𑀲𑁆𑀫𑀺𑀁, 𑀢𑀸𑀢, 𑀧𑀡𑀻𑀢𑀸𑀳𑀸𑀭𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. 𑀓𑀼𑀫𑀸𑀭𑁄 ‘‘𑀆𑀫, 𑀢𑀸𑀢𑀸’’𑀢𑀺 𑀆𑀳. 𑀢𑀢𑁄 𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀦𑀺𑀯𑀢𑁆𑀢𑀺. 𑀓𑀼𑀫𑀸𑀭𑀫𑀸𑀢𑀸𑀧𑀺 𑀤𑁂𑀯𑀻 ¶ ‘‘𑀦 𑀤𑀸𑀦𑀺 𑀭𑀸𑀚𑀸 𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀘𑀺𑀭𑀁 𑀯𑀲𑀺𑀲𑁆𑀲𑀢𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀦𑀺𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑀸 𑀓𑀢𑁆𑀢𑀭𑀤𑀡𑁆𑀟𑁂𑀦 𑀮𑀺𑀔𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀢𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁄 𑀭𑀸𑀚𑀸 𑀢𑀲𑁆𑀲𑀸 𑀯𑀢𑀺𑀬𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘‘𑀏𑀢𑁆𑀣 𑀢𑁂, 𑀢𑀸𑀢, 𑀫𑀸𑀢𑀸 𑀦𑀺𑀲𑀺𑀦𑁆𑀦𑀸, 𑀕𑀘𑁆𑀙𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀬𑀸𑀯 𑀘 𑀲𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀉𑀤𑀺𑀓𑁆𑀔𑀦𑁆𑀢𑁄 𑀅𑀝𑁆𑀞𑀸𑀲𑀺 ‘‘𑀫𑀸 𑀳𑁂𑀯 𑀦𑀁 𑀓𑁄𑀘𑀺 𑀯𑀺𑀳𑁂𑀞𑁂𑀬𑁆𑀬𑀸’’𑀢𑀺. 𑀓𑀼𑀫𑀸𑀭𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀥𑀸𑀯𑀦𑁆𑀢𑁄 𑀅𑀕𑀫𑀸𑀲𑀺. 𑀆𑀭𑀓𑁆𑀔𑀓𑀧𑀼𑀭𑀺𑀲𑀸 𑀘 𑀦𑀁 𑀤𑀺𑀲𑁆𑀯𑀸 𑀤𑁂𑀯𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀤𑁂𑀯𑀻 𑀯𑀻𑀲𑀢𑀺𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀕𑀦𑁆𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀲𑀺, 𑀭𑀜𑁆𑀜𑁄 𑀘 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀅𑀣 ‘‘𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀭𑀸𑀚𑀸𑀧𑀺 𑀢𑀸𑀯𑀤𑁂𑀯 𑀲𑀓𑀯𑀲𑀢𑀺𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀭𑀸𑀚𑀸𑀦𑀁 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑀢𑁄 𑀤𑁂𑀯𑀻 𑀦𑀺𑀭𑀸𑀲𑀸𑀯 𑀳𑀼𑀢𑁆𑀯𑀸, 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀦𑀕𑀭𑀁 𑀕𑀦𑁆𑀢𑁆𑀯𑀸, 𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀭𑀸𑀚𑀸𑀧𑀺 𑀅𑀢𑁆𑀢𑀦𑁄 𑀯𑀲𑀢𑀺𑀁 𑀧𑀢𑁆𑀯𑀸, 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀢𑁆𑀯𑀸, 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀫𑀜𑁆𑀚𑀽𑀲𑀓𑀭𑀼𑀓𑁆𑀔𑀫𑀽𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀯𑀁 𑀤𑀼𑀢𑀺𑀬𑁂𑀦 𑀲𑀳 𑀫𑀫𑀲𑁆𑀲, 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸;

𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀲𑀸 ¶ 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀸 𑀏𑀯. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁆𑀯𑀸𑀬𑀁 𑀏𑀢𑁂𑀦 𑀤𑀼𑀢𑀺𑀬𑁂𑀦 𑀓𑀼𑀫𑀸𑀭𑁂𑀦 𑀲𑀻𑀢𑀼𑀡𑁆𑀳𑀸𑀤𑀻𑀦𑀺 𑀦𑀺𑀯𑁂𑀤𑁂𑀦𑁆𑀢𑁂𑀦 𑀲𑀳𑀯𑀸𑀲𑁂𑀦 𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀫𑀫 𑀯𑀸𑀘𑀸𑀪𑀺𑀮𑀸𑀧𑁄, 𑀢𑀲𑁆𑀫𑀺𑀁 𑀲𑀺𑀦𑁂𑀳𑀯𑀲𑁂𑀦 𑀅𑀪𑀺𑀲𑀚𑁆𑀚𑀦𑀸 𑀘 𑀚𑀸𑀢𑀸, 𑀲𑀘𑁂 𑀅𑀳𑀁 𑀇𑀫𑀁 𑀦 𑀧𑀭𑀺𑀘𑁆𑀘𑀚𑀸𑀫𑀺, 𑀢𑀢𑁄 𑀆𑀬𑀢𑀺𑀫𑁆𑀧𑀺 𑀳𑁂𑀲𑁆𑀲𑀢𑀺 𑀬𑀣𑁂𑀯 𑀇𑀤𑀸𑀦𑀺; 𑀏𑀯𑀁 𑀤𑀼𑀢𑀺𑀬𑁂𑀦 𑀲𑀳 𑀫𑀫𑀲𑁆𑀲 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑁆𑀢𑀭𑀸𑀬𑀓𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲𑀸𑀢𑀺 𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀬𑀢𑀺𑀪𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁦. 𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑀳𑀭𑁄𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺. 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀢𑀬𑁄 𑀧𑀸𑀲𑀸𑀤𑀸 𑀳𑁄𑀦𑁆𑀢𑀺 ¶ . 𑀲𑁄 𑀢𑀢𑁆𑀣 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀧𑀭𑀺𑀘𑀸𑀭𑁂𑀢𑀺. 𑀲𑁄 𑀤𑀳𑀭𑁄𑀯 𑀲𑀫𑀸𑀦𑁄 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺. 𑀢𑁂 𑀦𑀁 𑀯𑀸𑀭𑁂𑀦𑁆𑀢𑀺. 𑀲𑁄 𑀢𑀣𑁂𑀯 𑀦𑀺𑀩𑀦𑁆𑀥𑀢𑀺. 𑀧𑀼𑀦𑀧𑀺 𑀦𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀢𑁆𑀯𑀁, 𑀢𑀸𑀢, 𑀲𑀼𑀔𑀼𑀫𑀸𑀮𑁄, 𑀤𑀼𑀓𑁆𑀓𑀭𑀸 𑀧𑀩𑁆𑀩𑀚𑁆𑀚𑀸, 𑀔𑀼𑀭𑀥𑀸𑀭𑀸𑀬 𑀉𑀧𑀭𑀺 𑀘𑀗𑁆𑀓𑀫𑀦𑀲𑀤𑀺𑀲𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀸𑀭𑁂𑀦𑁆𑀢𑀺. 𑀲𑁄 𑀢𑀣𑁂𑀯 𑀦𑀺𑀩𑀦𑁆𑀥𑀢𑀺. 𑀢𑁂 𑀘𑀺𑀦𑁆𑀢𑁂𑀲𑀼𑀁 ‘‘𑀲𑀘𑀸𑀬𑀁 ¶ 𑀧𑀩𑁆𑀩𑀚𑀢𑀺, 𑀅𑀫𑁆𑀳𑀸𑀓𑀁 𑀤𑁄𑀫𑀦𑀲𑁆𑀲𑀁 𑀳𑁄𑀢𑀺. 𑀲𑀘𑁂 𑀦𑀁 𑀦𑀺𑀯𑀸𑀭𑁂𑀫, 𑀏𑀢𑀲𑁆𑀲 𑀤𑁄𑀫𑀦𑀲𑁆𑀲𑀁 𑀳𑁄𑀢𑀺. 𑀅𑀧𑀺𑀘 𑀅𑀫𑁆𑀳𑀸𑀓𑀁 𑀤𑁄𑀫𑀦𑀲𑁆𑀲𑀁 𑀳𑁄𑀢𑀼, 𑀫𑀸 𑀘 𑀏𑀢𑀲𑁆𑀲𑀸’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼. 𑀢𑀢𑁄 𑀲𑁄 𑀲𑀩𑁆𑀩𑀧𑀭𑀺𑀚𑀦𑀁 𑀧𑀭𑀺𑀤𑁂𑀯𑀫𑀸𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀢𑀲𑁆𑀲 𑀉𑀴𑀸𑀭𑀲𑁂𑀦𑀸𑀲𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀫𑀜𑁆𑀘𑀓𑁂 𑀢𑀝𑁆𑀝𑀺𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀲𑀬𑀺. 𑀲𑁄 𑀯𑀭𑀲𑀬𑀦𑁂 𑀓𑀢𑀧𑀭𑀺𑀘𑀬𑁄 𑀲𑀩𑁆𑀩𑀭𑀢𑁆𑀢𑀺𑀁 𑀅𑀢𑀺𑀤𑀼𑀓𑁆𑀔𑀺𑀢𑁄 𑀅𑀳𑁄𑀲𑀺. 𑀧𑀪𑀸𑀢𑁂𑀧𑀺 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀢𑁆𑀣 𑀯𑀼𑀟𑁆𑀠𑀸 𑀅𑀕𑁆𑀕𑀸𑀲𑀦𑀜𑁆𑀘 𑀅𑀕𑁆𑀕𑀧𑀺𑀡𑁆𑀟𑀜𑁆𑀘 𑀮𑀪𑀦𑁆𑀢𑀺, 𑀦𑀯𑀓𑀸 𑀬𑀁𑀓𑀺𑀜𑁆𑀘𑀺𑀤𑁂𑀯 𑀆𑀲𑀦𑀁 𑀮𑀽𑀔𑀪𑁄𑀚𑀦𑀜𑁆𑀘. 𑀲𑁄 𑀢𑁂𑀦 𑀮𑀽𑀔𑀪𑁄𑀚𑀦𑁂𑀦𑀸𑀧𑀺 𑀅𑀢𑀺𑀤𑀼𑀓𑁆𑀔𑀺𑀢𑁄 𑀅𑀳𑁄𑀲𑀺. 𑀲𑁄 𑀓𑀢𑀺𑀧𑀸𑀳𑀁𑀬𑁂𑀯 𑀓𑀺𑀲𑁄 𑀤𑀼𑀩𑁆𑀩𑀡𑁆𑀡𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀺𑀚𑁆𑀚𑀺 𑀬𑀣𑀸 𑀢𑀁 𑀅𑀧𑀭𑀺𑀧𑀸𑀓𑀕𑀢𑁂 𑀲𑀫𑀡𑀥𑀫𑁆𑀫𑁂. 𑀢𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺. 𑀲𑁄 𑀓𑀢𑀺𑀧𑀸𑀳𑀁𑀬𑁂𑀯 𑀩𑀮𑀁 𑀕𑀳𑁂𑀢𑁆𑀯𑀸 𑀧𑀼𑀦𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀢𑁄 𑀢𑁂𑀦𑁂𑀯 𑀓𑀫𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀦𑀧𑀺 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀇𑀫𑀫𑁂𑀯 𑀩𑁆𑀬𑀸𑀓𑀭𑀡𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 ¶ 𑀓𑀸𑀫𑀸𑀢𑀺 𑀤𑁆𑀯𑁂 𑀓𑀸𑀫𑀸 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀬𑀭𑀽𑀧𑀸𑀤𑀬𑁄 𑀥𑀫𑁆𑀫𑀸, 𑀓𑀺𑀮𑁂𑀲𑀓𑀸𑀫𑀸 𑀙𑀦𑁆𑀤𑀸𑀤𑀬𑁄 𑀲𑀩𑁆𑀩𑁂𑀧𑀺 𑀭𑀸𑀕𑀧𑁆𑀧𑀪𑁂𑀤𑀸. 𑀇𑀥 𑀧𑀦 𑀯𑀢𑁆𑀣𑀼𑀓𑀸𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀭𑀽𑀧𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀯𑀲𑁂𑀦 𑀘𑀺𑀢𑁆𑀭𑀸. 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀫𑀥𑀼𑀭𑀸. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀫𑀦𑀁 𑀭𑀫𑁂𑀦𑁆𑀢𑀻𑀢𑀺 𑀫𑀦𑁄𑀭𑀫𑀸. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀭𑀽𑀧𑁂𑀦 𑀭𑀽𑀧𑁂𑀦, 𑀅𑀦𑁂𑀓𑀯𑀺𑀥𑁂𑀦 𑀲𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀳𑀺 𑀭𑀽𑀧𑀸𑀤𑀺𑀯𑀲𑁂𑀦 𑀘𑀺𑀢𑁆𑀭𑀸, 𑀭𑀽𑀧𑀸𑀤𑀻𑀲𑀼𑀧𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀭𑀽𑀧𑀸. 𑀏𑀯𑀁 𑀢𑁂𑀦 𑀯𑀺𑀭𑀽𑀧𑀭𑀽𑀧𑁂𑀦 𑀢𑀣𑀸 𑀢𑀣𑀸 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁 𑀧𑀩𑁆𑀩𑀚𑁆𑀚𑀸𑀬 𑀅𑀪𑀺𑀭𑀫𑀺𑀢𑀼𑀁 𑀦 𑀤𑁂𑀦𑁆𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀯𑀸 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀫𑀕𑀸𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀸𑀫𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁧. 𑀈𑀢𑀻 ¶ 𑀘𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀭𑀜𑁆𑀜𑁄 𑀕𑀡𑁆𑀟𑁄 𑀉𑀤𑀧𑀸𑀤𑀺. 𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀯𑁂𑀚𑁆𑀚𑀸 ‘‘𑀲𑀢𑁆𑀣𑀓𑀫𑁆𑀫𑁂𑀦 𑀯𑀺𑀦𑀸 𑀨𑀸𑀲𑀼 𑀦 𑀳𑁄𑀢𑀻’’𑀢𑀺 𑀪𑀡𑀦𑁆𑀢𑀺. 𑀭𑀸𑀚𑀸 𑀢𑁂𑀲𑀁 𑀅𑀪𑀬𑀁 𑀤𑀢𑁆𑀯𑀸 𑀲𑀢𑁆𑀣𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀺. 𑀢𑁂 𑀨𑀸𑀮𑁂𑀢𑁆𑀯𑀸, 𑀧𑀼𑀩𑁆𑀩𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸, 𑀦𑀺𑀩𑁆𑀩𑁂𑀤𑀦𑀁 𑀓𑀢𑁆𑀯𑀸, 𑀯𑀡𑀁 𑀧𑀝𑁆𑀝𑁂𑀦 𑀩𑀦𑁆𑀥𑀺𑀁𑀲𑀼, 𑀆𑀳𑀸𑀭𑀸𑀘𑀸𑀭𑁂𑀲𑀼 𑀘 𑀦𑀁 𑀲𑀫𑁆𑀫𑀸 𑀑𑀯𑀤𑀺𑀁𑀲𑀼. 𑀭𑀸𑀚𑀸 𑀮𑀽𑀔𑀪𑁄𑀚𑀦𑁂𑀦 𑀓𑀺𑀲𑀲𑀭𑀻𑀭𑁄 𑀅𑀳𑁄𑀲𑀺, 𑀕𑀡𑁆𑀟𑁄 𑀘𑀲𑁆𑀲 𑀫𑀺𑀮𑀸𑀬𑀺. 𑀲𑁄 𑀨𑀸𑀲𑀼𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀲𑀺𑀦𑀺𑀤𑁆𑀥𑀸𑀳𑀸𑀭𑀁 𑀪𑀼𑀜𑁆𑀚𑀺. 𑀢𑁂𑀦 𑀘 𑀲𑀜𑁆𑀚𑀸𑀢𑀩𑀮𑁄 𑀯𑀺𑀲𑀬𑁂 𑀧𑀝𑀺𑀲𑁂𑀯𑀺. 𑀢𑀲𑁆𑀲 𑀕𑀡𑁆𑀟𑁄 𑀧𑀼𑀦 𑀧𑀼𑀭𑀺𑀫𑀲𑀪𑀸𑀯𑀫𑁂𑀯 𑀲𑀫𑁆𑀧𑀸𑀧𑀼𑀡𑀺. 𑀏𑀯𑀁 𑀬𑀸𑀯 𑀢𑀺𑀓𑁆𑀔𑀢𑁆𑀢𑀼𑀁 𑀲𑀢𑁆𑀣𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀯𑁂𑀚𑁆𑀚𑁂𑀳𑀺 𑀧𑀭𑀺𑀯𑀚𑁆𑀚𑀺𑀢𑁄 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸, 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸, 𑀲𑀢𑁆𑀢𑀳𑀺 𑀯𑀲𑁆𑀲𑁂𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀪𑀸𑀲𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺.

‘‘𑀈𑀢𑀻 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀁;

𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀪𑀸𑀕𑀺𑀬𑀸𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸𑀧𑀺 𑀏𑀢𑁂 𑀅𑀦𑁂𑀓𑀩𑁆𑀬𑀲𑀦𑀸𑀯𑀳𑀝𑁆𑀞𑁂𑀦 𑀤𑀴𑁆𑀳𑀲𑀦𑁆𑀦𑀺𑀧𑀸𑀢𑀝𑁆𑀞𑁂𑀦 𑀘 𑀈𑀢𑀺. 𑀕𑀡𑁆𑀟𑁄𑀧𑀺 𑀅𑀲𑀼𑀘𑀺𑀁 𑀧𑀕𑁆𑀖𑀭𑀢𑀺, 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀭𑀺𑀪𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀸 𑀏𑀢𑁂 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀭𑀺𑀪𑀺𑀦𑁆𑀦𑀪𑀸𑀯𑀢𑁄 𑀘 𑀕𑀡𑁆𑀟𑁄. 𑀉𑀧𑀤𑁆𑀤𑀯𑀢𑀻𑀢𑀺 𑀉𑀧𑀤𑁆𑀤𑀯𑁄; 𑀅𑀦𑀢𑁆𑀣𑀁 𑀚𑀦𑁂𑀦𑁆𑀢𑁄 𑀅𑀪𑀺𑀪𑀯𑀢𑀺; 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄, 𑀭𑀸𑀚𑀤𑀡𑁆𑀟𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸𑀧𑁂𑀢𑁂 𑀅𑀯𑀺𑀤𑀺𑀢𑀦𑀺𑀩𑁆𑀩𑀸𑀦𑀢𑁆𑀣𑀸𑀯𑀳𑀳𑁂𑀢𑀼𑀢𑀸𑀬 𑀲𑀩𑁆𑀩𑀼𑀧𑀤𑁆𑀤𑀯𑀯𑀢𑁆𑀣𑀼𑀢𑀸𑀬 𑀘 𑀉𑀧𑀤𑁆𑀤𑀯𑁄. 𑀬𑀲𑁆𑀫𑀸 𑀧𑀦𑁂𑀢𑁂 𑀓𑀺𑀮𑁂𑀲𑀸𑀢𑀼𑀭𑀪𑀸𑀯𑀁 𑀚𑀦𑁂𑀦𑁆𑀢𑀸 𑀲𑀻𑀮𑀲𑀗𑁆𑀔𑀸𑀢𑀫𑀸𑀭𑁄𑀕𑁆𑀬𑀁, 𑀮𑁄𑀮𑀼𑀧𑁆𑀧𑀁 𑀯𑀸 ¶ 𑀉𑀧𑁆𑀧𑀸𑀤𑁂𑀦𑁆𑀢𑀸 𑀧𑀸𑀓𑀢𑀺𑀓𑀫𑁂𑀯 𑀆𑀭𑁄𑀕𑁆𑀬𑀁 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 ¶ 𑀆𑀭𑁄𑀕𑁆𑀬𑀯𑀺𑀮𑀼𑀫𑁆𑀧𑀦𑀝𑁆𑀞𑁂𑀦𑁂𑀯 𑀭𑁄𑀕𑁄. 𑀅𑀩𑁆𑀪𑀦𑁆𑀢𑀭𑀫𑀦𑀼𑀧𑁆𑀧𑀯𑀺𑀝𑁆𑀞𑀝𑁆𑀞𑁂𑀦 𑀧𑀦 𑀅𑀦𑁆𑀢𑁄𑀢𑀼𑀤𑀓𑀝𑁆𑀞𑁂𑀦 𑀤𑀼𑀦𑁆𑀦𑀺𑀳𑀭𑀡𑀻𑀬𑀝𑁆𑀞𑁂𑀦 𑀘 𑀲𑀮𑁆𑀮𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑀬𑀸𑀯𑀳𑀦𑀢𑁄 ¶ 𑀪𑀬𑀁. 𑀫𑁂 𑀏𑀢𑀦𑁆𑀢𑀺 𑀫𑁂𑀢𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀈𑀢𑀺𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁨. 𑀲𑀻𑀢𑀜𑁆𑀘𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀲𑀻𑀢𑀸𑀮𑀼𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀓𑀼𑀝𑀺𑀓𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀲𑀻𑀢𑁂 𑀲𑀻𑀢𑀁, 𑀉𑀡𑁆𑀳𑁂 𑀉𑀡𑁆𑀳𑀫𑁂𑀯 𑀘 𑀳𑁄𑀢𑀺 𑀅𑀩𑁆𑀪𑁄𑀓𑀸𑀲𑀢𑁆𑀢𑀸 𑀧𑀤𑁂𑀲𑀲𑁆𑀲. 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀸 𑀬𑀸𑀯𑀤𑀢𑁆𑀣𑀸𑀬 𑀦 𑀮𑀩𑁆𑀪𑀢𑀺. 𑀧𑀺𑀯𑀦𑀓𑀧𑀸𑀦𑀻𑀬𑀫𑁆𑀧𑀺 𑀤𑀼𑀮𑁆𑀮𑀪𑀁, 𑀯𑀸𑀢𑀸𑀢𑀧𑀟𑀁𑀲𑀲𑀭𑀻𑀲𑀧𑀸𑀧𑀺 𑀩𑀸𑀥𑁂𑀦𑁆𑀢𑀺. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀢𑁄 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀲𑀫𑁆𑀧𑀦𑁆𑀦𑁄 𑀧𑀤𑁂𑀲𑁄, 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀏𑀢𑁂 𑀧𑀭𑀺𑀲𑁆𑀲𑀬𑀸 𑀦𑀢𑁆𑀣𑀺. 𑀬𑀁𑀦𑀽𑀦𑀸𑀳𑀁 𑀢𑀢𑁆𑀣 𑀕𑀘𑁆𑀙𑁂𑀬𑁆𑀬𑀁; 𑀨𑀸𑀲𑀼𑀓𑀁 𑀯𑀺𑀳𑀭𑀦𑁆𑀢𑁂𑀦 𑀲𑀓𑁆𑀓𑀸 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼’’𑀦𑁆𑀢𑀺. 𑀢𑀲𑁆𑀲 𑀧𑀼𑀦 𑀅𑀳𑁄𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀧𑀘𑁆𑀘𑀬𑀯𑀲𑀺𑀓𑀸 𑀳𑁄𑀦𑁆𑀢𑀺, 𑀏𑀯𑀭𑀽𑀧𑀜𑁆𑀘 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺, 𑀦 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺, 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦 𑀅𑀕𑀫𑀸𑀲𑀺. 𑀏𑀯𑀁 𑀬𑀸𑀯𑀢𑀢𑀺𑀬𑀓𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀲𑀺. 𑀢𑀢𑁄 𑀢𑀢𑁆𑀣𑁂𑀯 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸, 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀪𑀸𑀲𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺.

‘‘𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀁, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘;

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀲𑀫𑁆𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀲𑀻𑀢𑀜𑁆𑀘𑀸𑀢𑀺 𑀲𑀻𑀢𑀁 𑀦𑀸𑀫 𑀤𑀼𑀯𑀺𑀥𑀁 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀜𑁆𑀘, 𑀩𑀸𑀳𑀺𑀭𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀜𑁆𑀘; 𑀢𑀣𑀸 𑀉𑀡𑁆𑀳𑀁. 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀤𑀻𑀖𑀚𑀸𑀢𑀺𑀓𑀸 𑀲𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀻𑀢𑀸𑀮𑀼𑀓𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁩. 𑀦𑀸𑀕𑁄𑀯𑀸𑀢𑀺 ¶ 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀓𑀢𑁄 𑀦𑀺𑀭𑀬𑁂 𑀯𑀻𑀲𑀢𑀺 𑀏𑀯 𑀯𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀳𑀢𑁆𑀣𑀺𑀬𑁄𑀦𑀺𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 ¶ 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀧𑀤𑀼𑀫𑀯𑀡𑁆𑀡𑀲𑀓𑀮𑀲𑀭𑀻𑀭𑁄 𑀉𑀴𑀸𑀭𑁄 𑀬𑀽𑀣𑀧𑀢𑀺 𑀫𑀳𑀸𑀦𑀸𑀕𑁄 𑀅𑀳𑁄𑀲𑀺. 𑀢𑀲𑁆𑀲 𑀑𑀪𑀕𑁆𑀕𑁄𑀪𑀕𑁆𑀕𑀁 𑀲𑀸𑀔𑀸𑀪𑀗𑁆𑀕𑀁 𑀳𑀢𑁆𑀣𑀺𑀙𑀸𑀧𑀸𑀯 𑀔𑀸𑀤𑀦𑁆𑀢𑀺. 𑀑𑀕𑀸𑀳𑁂𑀧𑀺 𑀦𑀁 𑀳𑀢𑁆𑀣𑀺𑀦𑀺𑀬𑁄 𑀓𑀤𑁆𑀤𑀫𑁂𑀦 𑀮𑀺𑀫𑁆𑀧𑀦𑁆𑀢𑀺 ¶ , 𑀲𑀩𑁆𑀩𑀁 𑀧𑀸𑀮𑀺𑀮𑁂𑀬𑁆𑀬𑀓𑀦𑀸𑀕𑀲𑁆𑀲𑁂𑀯 𑀅𑀳𑁄𑀲𑀺. 𑀲𑁄 𑀬𑀽𑀣𑀸 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀧𑀓𑁆𑀓𑀫𑀺. 𑀢𑀢𑁄 𑀦𑀁 𑀧𑀤𑀸𑀦𑀼𑀲𑀸𑀭𑁂𑀦 𑀬𑀽𑀣𑀁 𑀅𑀦𑀼𑀩𑀦𑁆𑀥𑀺. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀧𑀓𑁆𑀓𑀦𑁆𑀢𑁄 𑀅𑀦𑀼𑀩𑀤𑁆𑀥𑁄𑀯. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀦𑀢𑁆𑀢𑀓𑁄 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀬𑀁𑀦𑀽𑀦𑀸𑀳𑀁 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀬𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑁂𑀬𑁆𑀬𑀁, 𑀢𑀢𑁆𑀭 𑀫𑀁 𑀲𑁄 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀯𑀲𑀁 𑀕𑀢𑁂 𑀬𑀽𑀣𑁂 𑀬𑀽𑀣𑀁 𑀧𑀳𑀸𑀬 𑀢𑀫𑁂𑀯 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀳𑀢𑁆𑀣𑀺𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀲𑀺. 𑀳𑀢𑁆𑀣𑀻 𑀭𑀸𑀚𑀸𑀦𑀁 𑀏𑀯 𑀅𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀭𑀸𑀚𑀸 ‘‘𑀫𑀁 𑀅𑀪𑀺𑀫𑀼𑀔𑁄 𑀏𑀢𑀻’’𑀢𑀺 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀳𑀢𑁆𑀣𑀻 ‘‘𑀯𑀺𑀚𑁆𑀛𑁂𑀬𑁆𑀬𑀸𑀧𑀺 𑀫𑀁 𑀏𑀲𑁄’’𑀢𑀺 𑀫𑀸𑀦𑀼𑀲𑀺𑀓𑀸𑀬 𑀯𑀸𑀘𑀸𑀬 ‘‘𑀩𑁆𑀭𑀳𑁆𑀫𑀤𑀢𑁆𑀢, 𑀫𑀸 𑀫𑀁 𑀯𑀺𑀚𑁆𑀛, 𑀅𑀳𑀁 𑀢𑁂 𑀅𑀬𑁆𑀬𑀓𑁄’’𑀢𑀺 𑀆𑀳. 𑀭𑀸𑀚𑀸 ‘‘𑀓𑀺𑀁 𑀪𑀡𑀲𑀻’’𑀢𑀺 𑀲𑀩𑁆𑀩𑀁 𑀧𑀼𑀘𑁆𑀙𑀺. 𑀳𑀢𑁆𑀣𑀻𑀧𑀺 𑀭𑀚𑁆𑀚𑁂 𑀘 𑀦𑀭𑀓𑁂 𑀘 𑀳𑀢𑁆𑀣𑀺𑀬𑁄𑀦𑀺𑀬𑀜𑁆𑀘 𑀧𑀯𑀢𑁆𑀢𑀺𑀁 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀼𑀦𑁆𑀤𑀭𑀁, 𑀫𑀸 𑀪𑀸𑀬𑀺, 𑀫𑀸 𑀘 𑀓𑀜𑁆𑀘𑀺 𑀪𑀺𑀁𑀲𑀸𑀧𑁂𑀳𑀻’’𑀢𑀺 𑀳𑀢𑁆𑀣𑀺𑀦𑁄 𑀯𑀝𑁆𑀝𑀜𑁆𑀘 𑀆𑀭𑀓𑁆𑀔𑀓𑁂 𑀘 𑀳𑀢𑁆𑀣𑀺𑀪𑀡𑁆𑀟𑁂 𑀘 𑀉𑀧𑀝𑁆𑀞𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 ‘‘𑀅𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀧𑀓𑁆𑀓𑁄, 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀘 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣𑀧𑀺 𑀕𑀡𑀯𑀸𑀲𑀲𑀗𑁆𑀖𑀝𑁆𑀝𑀦𑀁 𑀅𑀲𑀳𑀦𑁆𑀢𑁄 𑀇𑀥𑀸𑀕𑀢𑁄. 𑀅𑀳𑁄 𑀤𑀼𑀓𑁆𑀔𑁄 𑀕𑀡𑀯𑀸𑀲𑁄, 𑀏𑀓𑀻𑀪𑀸𑀯𑁄 𑀏𑀯 𑀘 𑀧𑀦 𑀲𑀼𑀔𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑀁 𑀅𑀫𑀘𑁆𑀘𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀧𑀡𑀺𑀧𑀸𑀢𑀁 𑀓𑀢𑁆𑀯𑀸 ‘‘𑀬𑀸𑀦𑀓𑀸𑀮𑁄 𑀫𑀳𑀸𑀭𑀸𑀚𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 ‘‘𑀦𑀸𑀳𑀁 𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸, 𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄;

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀲𑀸 ¶ ¶ 𑀧𑀤𑀢𑁆𑀣𑀢𑁄 𑀧𑀸𑀓𑀝𑀸 𑀏𑀯. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸. 𑀲𑀸 𑀘 𑀔𑁄 𑀬𑀼𑀢𑁆𑀢𑀺𑀯𑀲𑁂𑀦𑁂𑀯, 𑀦 𑀅𑀦𑀼𑀲𑁆𑀲𑀯𑀯𑀲𑁂𑀦. 𑀬𑀣𑀸 𑀅𑀬𑀁 𑀳𑀢𑁆𑀣𑀻 𑀫𑀦𑀼𑀲𑁆𑀲𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀤𑀦𑁆𑀢𑀢𑁆𑀢𑀸 𑀅𑀤𑀦𑁆𑀢𑀪𑀽𑀫𑀺𑀁 𑀦𑀸𑀕𑀘𑁆𑀙𑀢𑀻𑀢𑀺 𑀯𑀸, 𑀲𑀭𑀻𑀭𑀫𑀳𑀦𑁆𑀢𑀢𑀸𑀬 𑀯𑀸 𑀦𑀸𑀕𑁄, 𑀏𑀯𑀁 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀺𑀬𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀤𑀦𑁆𑀢𑀢𑁆𑀢𑀸 𑀅𑀤𑀦𑁆𑀢𑀪𑀽𑀫𑀺𑀁 𑀦𑀸𑀕𑀫𑀦𑁂𑀦 𑀆𑀕𑀼𑀁 𑀅𑀓𑀭𑀡𑁂𑀦 𑀧𑀼𑀦 𑀇𑀢𑁆𑀣𑀢𑁆𑀢𑀁 𑀅𑀦𑀸𑀕𑀫𑀦𑁂𑀦 𑀘 𑀕𑀼𑀡𑀲𑀭𑀻𑀭𑀫𑀳𑀦𑁆𑀢𑀢𑀸𑀬 𑀯𑀸 𑀦𑀸𑀕𑁄 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑁂𑀢𑁆𑀯𑀸 𑀏𑀓𑀘𑀭𑀺𑀬𑀲𑀼𑀔𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀕𑀡𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀏𑀓𑀯𑀺𑀳𑀸𑀭𑀲𑀼𑀔𑁂𑀦 𑀛𑀸𑀦𑀲𑀼𑀔𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂 𑀅𑀢𑁆𑀢𑀦𑁄 𑀬𑀣𑀸 𑀬𑀣𑀸 𑀲𑀼𑀔𑀁, 𑀢𑀣𑀸 𑀢𑀣𑀸 𑀬𑀢𑁆𑀢𑀓𑀁 𑀯𑀸 𑀇𑀘𑁆𑀙𑀸𑀫𑀺, 𑀢𑀢𑁆𑀢𑀓𑀁 𑀅𑀭𑀜𑁆𑀜𑁂 𑀦𑀺𑀯𑀸𑀲𑀁 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀘𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀘𑁂𑀲 𑀲𑀼𑀲𑀡𑁆𑀞𑀺𑀢𑀓𑁆𑀔𑀦𑁆𑀥𑀢𑀸𑀬 ¶ 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀅𑀲𑁂𑀔𑀲𑀻𑀮𑀓𑁆𑀔𑀦𑁆𑀥𑀫𑀳𑀦𑁆𑀢𑀢𑀸𑀬 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀧𑀤𑀼𑀫𑀲𑀤𑀺𑀲𑀕𑀢𑁆𑀢𑀢𑀸𑀬 𑀯𑀸 𑀧𑀤𑀼𑀫𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑀸𑀬 𑀯𑀸 𑀧𑀤𑀼𑀫𑀻, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀧𑀤𑀼𑀫𑀲𑀤𑀺𑀲𑀉𑀚𑀼𑀕𑀢𑁆𑀢𑀢𑀸𑀬 𑀯𑀸 𑀅𑀭𑀺𑀬𑀚𑀸𑀢𑀺𑀧𑀤𑀼𑀫𑁂 𑀉𑀧𑁆𑀧𑀦𑁆𑀦𑀢𑀸𑀬 𑀯𑀸 𑀧𑀤𑀼𑀫𑀻 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀣𑀸𑀫𑀩𑀮𑀚𑀯𑀸𑀤𑀻𑀳𑀺 𑀉𑀴𑀸𑀭𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸𑀤𑀻𑀳𑀺 𑀲𑀻𑀮𑀲𑀫𑀸𑀥𑀺𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀤𑀻𑀳𑀺 𑀯𑀸 𑀉𑀴𑀸𑀭𑁄 𑀪𑀯𑁂𑀬𑁆𑀬𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺.

𑀦𑀸𑀕𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁪. 𑀅𑀝𑁆𑀞𑀸𑀦 𑀢𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀧𑀼𑀢𑁆𑀢𑁄 𑀤𑀳𑀭𑁄 𑀏𑀯 𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺. 𑀫𑀸𑀢𑀸𑀧𑀺𑀢𑀭𑁄 𑀦𑀁 𑀯𑀸𑀭𑁂𑀦𑁆𑀢𑀺. 𑀲𑁄 𑀯𑀸𑀭𑀺𑀬𑀫𑀸𑀦𑁄𑀧𑀺 𑀦𑀺𑀩𑀦𑁆𑀥𑀢𑀺𑀬𑁂𑀯 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁂𑀝𑁆𑀞𑀺𑀧𑀼𑀢𑁆𑀢𑀁 ¶ 𑀯𑀺𑀬 𑀲𑀩𑁆𑀩𑀁 𑀯𑀢𑁆𑀯𑀸 𑀅𑀦𑀼𑀚𑀸𑀦𑀺𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀚𑀸𑀦𑀸𑀧𑁂𑀲𑀼𑀁, 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀲𑁆𑀲 𑀫𑀸𑀢𑀸 𑀧𑀸𑀢𑁄𑀯 𑀯𑀻𑀲𑀢𑀺𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀯𑀼𑀢𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸, 𑀧𑀼𑀢𑁆𑀢𑀁 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸, 𑀅𑀦𑁆𑀢𑀭𑀸 𑀔𑀚𑁆𑀚𑀓𑀸𑀤𑀻𑀦𑀺 𑀘 𑀔𑀸𑀤𑀸𑀧𑁂𑀢𑁆𑀯𑀸, 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀮𑁆𑀮𑀧𑀺𑀢𑁆𑀯𑀸, 𑀦𑀕𑀭𑀁 𑀧𑀯𑀺𑀲𑀢𑀺. 𑀧𑀺𑀢𑀸 𑀘 𑀫𑀚𑁆𑀛𑀦𑁆𑀳𑀺𑀓𑁂 𑀆𑀕𑀦𑁆𑀢𑁆𑀯𑀸, 𑀢𑀁 𑀪𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀪𑀼𑀜𑁆𑀚𑀺𑀢𑁆𑀯𑀸, 𑀤𑀺𑀯𑀲𑀁 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀮𑁆𑀮𑀧𑀺𑀢𑁆𑀯𑀸, 𑀲𑀸𑀬𑀦𑁆𑀳𑀲𑀫𑀬𑁂 ¶ 𑀚𑀕𑁆𑀕𑀦𑀧𑀼𑀭𑀺𑀲𑁂 𑀞𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀢𑀺. 𑀲𑁄 𑀏𑀯𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀯𑀺𑀯𑀺𑀢𑁆𑀢𑁄 𑀯𑀺𑀳𑀭𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀤𑀺𑀘𑁆𑀘𑀩𑀦𑁆𑀥𑀼 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀺𑀳𑀭𑀢𑀺. 𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀅𑀤𑁆𑀤𑀲 𑁋 ‘‘𑀅𑀬𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑀼𑀁 𑀅𑀲𑀓𑁆𑀔𑀺, 𑀚𑀝𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀢𑀢𑁄 𑀧𑀭𑀁 𑀆𑀯𑀚𑁆𑀚𑀺 ‘‘𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀦𑀺𑀩𑁆𑀩𑀺𑀚𑁆𑀚𑀺𑀲𑁆𑀲𑀢𑀺, 𑀦𑁄’’𑀢𑀺. 𑀅𑀣 ‘‘𑀥𑀫𑁆𑀫𑀢𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀢𑀺𑀘𑀺𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀲𑁆𑀲 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀦𑁄𑀲𑀺𑀮𑀸𑀢𑀮𑀢𑁄 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀕𑀢𑁄, 𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀇𑀤𑀸𑀦𑀺 𑀫𑁂 𑀧𑀼𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀅𑀦𑀼𑀓𑁆𑀓𑀡𑁆𑀞𑀺𑀢𑁄 𑀯𑀲𑀺𑀲𑁆𑀲𑀢𑀻’’𑀢𑀺 𑀧𑀫𑀼𑀤𑀺𑀢𑀫𑀦𑁄 𑀳𑀼𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀸𑀲𑀁 𑀬𑀸𑀘𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑀘𑀗𑁆𑀓𑀫𑀸𑀤𑀺𑀲𑀩𑁆𑀩𑀁 𑀓𑀸𑀭𑁂𑀢𑁆𑀯𑀸 𑀯𑀸𑀲𑁂𑀲𑀺.

𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀓𑀼𑀫𑀸𑀭𑀁 𑀧𑀼𑀘𑁆𑀙𑀺 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? 𑀲𑁄 𑀆𑀳 ‘‘𑀅𑀳𑀁 𑀧𑀩𑁆𑀩𑀚𑀺𑀢𑁄’’𑀢𑀺. ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀏𑀤𑀺𑀲𑀸 𑀳𑁄𑀦𑁆𑀢𑀻’’𑀢𑀺. ‘‘𑀅𑀣 𑀪𑀦𑁆𑀢𑁂, 𑀓𑀻𑀤𑀺𑀲𑀸 𑀳𑁄𑀦𑁆𑀢𑀺, 𑀓𑀺𑀁 𑀫𑀬𑁆𑀳𑀁 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁆𑀯𑀁 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀦 𑀧𑁂𑀓𑁆𑀔𑀲𑀺 ¶ , 𑀦𑀦𑀼 𑀢𑁂 𑀫𑀸𑀢𑀸 𑀯𑀻𑀲𑀢𑀺𑀲𑀳𑀲𑁆𑀲𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀆𑀕𑀘𑁆𑀙𑀦𑁆𑀢𑀻 𑀉𑀬𑁆𑀬𑀸𑀦𑀁 𑀅𑀯𑀺𑀯𑀺𑀢𑁆𑀢𑀁 𑀓𑀭𑁄𑀢𑀺, 𑀧𑀺𑀢𑀸 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀲𑀸𑀬𑀦𑁆𑀳𑀲𑀫𑀬𑁂, 𑀚𑀕𑁆𑀕𑀦𑀧𑀼𑀭𑀺𑀲𑀸 𑀲𑀓𑀮𑀭𑀢𑁆𑀢𑀺𑀁; 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀢𑀯 𑀲𑀤𑀺𑀲𑀸 𑀦 𑀳𑁄𑀦𑁆𑀢𑀺, ‘𑀏𑀤𑀺𑀲𑀸 𑀧𑀦 𑀳𑁄𑀦𑁆𑀢𑀻’’’𑀢𑀺 𑀢𑀢𑁆𑀭 𑀞𑀺𑀢𑀲𑁆𑀲𑁂𑀯 𑀇𑀤𑁆𑀥𑀺𑀬𑀸 𑀳𑀺𑀫𑀯𑀦𑁆𑀢𑁂 𑀅𑀜𑁆𑀜𑀢𑀭𑀁 𑀯𑀺𑀳𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀆𑀮𑀫𑁆𑀩𑀦𑀩𑀸𑀳𑀁 ¶ 𑀦𑀺𑀲𑁆𑀲𑀸𑀬 𑀞𑀺𑀢𑁂 𑀘 𑀘𑀗𑁆𑀓𑀫𑀦𑁆𑀢𑁂 𑀘 𑀭𑀚𑀦𑀓𑀫𑁆𑀫𑀲𑀽𑀘𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀘 𑀤𑀺𑀲𑁆𑀯𑀸 𑀆𑀳 𑁋 ‘‘𑀢𑀼𑀫𑁆𑀳𑁂 𑀇𑀥, 𑀦𑀸𑀕𑀘𑁆𑀙𑀣, 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀅𑀦𑀼𑀜𑁆𑀜𑀸𑀢𑀸’’𑀢𑀺. ‘‘𑀆𑀫, 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸, 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀫𑀡𑀸 𑀦𑀸𑀫 𑀅𑀢𑁆𑀢𑀦𑁄 𑀦𑀺𑀲𑁆𑀲𑀭𑀡𑀁 𑀓𑀸𑀢𑀼𑀁 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀜𑁆𑀘 𑀧𑀤𑁂𑀲𑀁 𑀕𑀦𑁆𑀢𑀼𑀁 𑀮𑀪𑀦𑁆𑀢𑀺, 𑀏𑀢𑁆𑀢𑀓𑀁𑀯 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑁋

‘‘𑀅𑀝𑁆𑀞𑀸𑀦 𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺. 𑁋

𑀇𑀫𑀁 ¶ 𑀉𑀧𑀟𑁆𑀠𑀕𑀸𑀣𑀁 𑀯𑀢𑁆𑀯𑀸, 𑀤𑀺𑀲𑁆𑀲𑀫𑀸𑀦𑁂𑀦𑁂𑀯 𑀓𑀸𑀬𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀏𑀯𑀁 𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀆𑀭𑀓𑁆𑀔𑀓𑀧𑀼𑀭𑀺𑀲𑁄𑀧𑀺 ‘‘𑀲𑀬𑀺𑀢𑁄 𑀓𑀼𑀫𑀸𑀭𑁄, 𑀇𑀤𑀸𑀦𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀫𑀢𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀲𑁄 𑀢𑀲𑁆𑀲 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑀢𑁆𑀭 𑀘 𑀯𑀺𑀯𑀺𑀢𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸, 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀝𑁆𑀞𑀸𑀦𑀁 𑀕𑀢𑁄. 𑀢𑀢𑁆𑀭 𑀘 ‘‘𑀓𑀣𑀫𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀯𑀼𑀢𑁆𑀢𑀁 𑀉𑀧𑀟𑁆𑀠𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀝𑁆𑀞𑀸𑀦 𑀢𑀦𑁆𑀢𑀺. 𑀅𑀝𑁆𑀞𑀸𑀦𑀁 𑀢𑀁, 𑀅𑀓𑀸𑀭𑀡𑀁 𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄 ‘‘𑀅𑀭𑀺𑀬𑀲𑀘𑁆𑀘𑀸𑀦 𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁫.𑁧𑁧; 𑀲𑀼. 𑀦𑀺. 𑁨𑁭𑁦) 𑀯𑀺𑀬. 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲𑀸𑀢𑀺 𑀕𑀡𑀸𑀪𑀺𑀭𑀢𑀲𑁆𑀲. 𑀬𑀦𑁆𑀢𑀺 𑀓𑀭𑀡𑀯𑀘𑀦𑀫𑁂𑀢𑀁 ‘‘𑀬𑀁 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁩𑁦) 𑀯𑀺𑀬. 𑀨𑀲𑁆𑀲𑀬𑁂𑀢𑀺 𑀅𑀥𑀺𑀕𑀘𑁆𑀙𑁂. 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀁. 𑀲𑀸 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀲𑀫𑀬𑁂 𑀏𑀯 𑀧𑀘𑁆𑀘𑀦𑀻𑀓𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 ‘‘𑀲𑀸𑀫𑀬𑀺𑀓𑀸 𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁. 𑀅𑀝𑁆𑀞𑀸𑀦𑀁 𑀢𑀁, 𑀦 𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑁂𑀦 𑀓𑀸𑀭𑀡𑁂𑀦 𑀨𑀲𑁆𑀲𑀬𑁂𑀢𑀺 𑀏𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫 𑀲𑀗𑁆𑀕𑀡𑀺𑀓𑀸𑀭𑀢𑀺𑀁 𑀧𑀳𑀸𑀬 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀆𑀳. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀝𑁆𑀞𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀼𑀢𑀺𑀬𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁫𑁫. 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀻𑀢𑀺 ¶ ¶ 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀲𑀻𑀢𑀸𑀤𑀻𑀦𑀁 𑀧𑀝𑀺𑀖𑀸𑀢𑀓𑀸𑀦𑀺 𑀉𑀡𑁆𑀳𑀸𑀤𑀻𑀦𑀺 𑀅𑀢𑁆𑀣𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀯𑀁 𑀯𑀝𑁆𑀝𑀧𑀝𑀺𑀖𑀸𑀢𑀓𑀁 𑀯𑀺𑀦𑀝𑁆𑀝𑀁, 𑀦𑁄’’𑀢𑀺. 𑀲𑁄 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀯𑀺𑀯𑀝𑁆𑀝𑀁 𑀚𑀸𑀦𑀸𑀣𑀸’’𑀢𑀺? 𑀢𑁂 ‘‘𑀚𑀸𑀦𑀸𑀫, 𑀫𑀳𑀸𑀭𑀸𑀚𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑁋 ‘‘𑀓𑀺𑀁 𑀢’’𑀦𑁆𑀢𑀺? 𑀢𑀢𑁄 ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀲𑁆𑀲𑀢𑀼𑀘𑁆𑀙𑁂𑀤𑀁 𑀓𑀣𑁂𑀲𑀼𑀁. 𑀅𑀣 𑀭𑀸𑀚𑀸 ‘‘𑀇𑀫𑁂 𑀦 𑀚𑀸𑀦𑀦𑁆𑀢𑀺, 𑀲𑀩𑁆𑀩𑁂𑀧𑀺𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸’’𑀢𑀺 𑀲𑀬𑀫𑁂𑀯 𑀢𑁂𑀲𑀁 𑀯𑀺𑀮𑁄𑀫𑀢𑀜𑁆𑀘 𑀅𑀬𑀼𑀢𑁆𑀢𑀢𑀜𑁆𑀘 𑀤𑀺𑀲𑁆𑀯𑀸 ‘‘𑀯𑀝𑁆𑀝𑀧𑀝𑀺𑀖𑀸𑀢𑀓𑀁 𑀯𑀺𑀯𑀝𑁆𑀝𑀁 𑀅𑀢𑁆𑀣𑀺, 𑀢𑀁 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀇𑀫𑀜𑁆𑀘 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀚𑁆𑀛𑁂 𑀩𑁆𑀬𑀸𑀓𑀭𑀡𑀕𑀸𑀣𑀜𑁆𑀘 𑁋

‘‘𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 ¶ 𑀉𑀧𑀸𑀢𑀺𑀯𑀢𑁆𑀢𑁄, 𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄;

𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑀸𑀦𑀺 𑀳𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀲𑀽𑀓𑀝𑁆𑀞𑁂𑀦 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀮𑁄𑀫𑀝𑁆𑀞𑁂𑀦 𑀘 𑀯𑀺𑀲𑀽𑀓𑀸𑀦𑀺. 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀯𑀺𑀲𑀽𑀓𑀸𑀦𑀺, 𑀤𑀺𑀝𑁆𑀞𑀺 𑀏𑀯 𑀯𑀸 𑀯𑀺𑀲𑀽𑀓𑀸𑀦𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺. 𑀉𑀧𑀸𑀢𑀺𑀯𑀢𑁆𑀢𑁄𑀢𑀺 𑀤𑀲𑁆𑀲𑀦𑀫𑀕𑁆𑀕𑁂𑀦 𑀅𑀢𑀺𑀓𑁆𑀓𑀦𑁆𑀢𑁄. 𑀧𑀢𑁆𑀢𑁄 𑀦𑀺𑀬𑀸𑀫𑀦𑁆𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑀸𑀬 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀢𑀸𑀬 𑀘 𑀦𑀺𑀬𑀢𑀪𑀸𑀯𑀁 𑀅𑀥𑀺𑀕𑀢𑁄, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀯𑀸 𑀧𑀞𑀫𑀫𑀕𑁆𑀕𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀞𑀫𑀫𑀕𑁆𑀕𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀘 𑀢𑀲𑁆𑀲 𑀧𑀝𑀺𑀮𑀸𑀪𑁄 𑀘 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀧𑀝𑀺𑀮𑀤𑁆𑀥𑀫𑀕𑁆𑀕𑁄𑀢𑀺 𑀇𑀫𑀺𑀦𑀸 𑀲𑁂𑀲𑀫𑀕𑁆𑀕𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀻𑀢𑀺 𑀉𑀧𑁆𑀧𑀦𑁆𑀦𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄 𑀅𑀫𑁆𑀳𑀺. 𑀏𑀢𑁂𑀦 𑀨𑀮𑀁 𑀤𑀲𑁆𑀲𑁂𑀢𑀺. 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺 𑀅𑀜𑁆𑀜𑁂𑀳𑀺 ‘‘𑀇𑀤𑀁 𑀲𑀘𑁆𑀘𑀁, 𑀇𑀤𑀁 𑀲𑀘𑁆𑀘’’𑀦𑁆𑀢𑀺 𑀦 𑀦𑁂𑀢𑀩𑁆𑀩𑁄. 𑀏𑀢𑁂𑀦 𑀲𑀬𑀫𑁆𑀪𑀼𑀢𑀁 𑀤𑀻𑀧𑁂𑀢𑀺, 𑀧𑀢𑁆𑀢𑁂 𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂 𑀅𑀦𑁂𑀬𑁆𑀬𑀢𑀸𑀬 𑀅𑀪𑀸𑀯𑀸 𑀲𑀬𑀁𑀯𑀲𑀺𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀯𑀸 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀆𑀤𑀺𑀫𑀕𑁆𑀕𑁂𑀦 𑀧𑀢𑁆𑀢𑁄 𑀦𑀺𑀬𑀸𑀫𑀁, 𑀲𑁂𑀲𑁂𑀳𑀺 ¶ 𑀧𑀝𑀺𑀮𑀤𑁆𑀥𑀫𑀕𑁆𑀕𑁄, 𑀨𑀮𑀜𑀸𑀡𑁂𑀦 𑀉𑀧𑁆𑀧𑀦𑁆𑀦𑀜𑀸𑀡𑁄, 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀦𑀸𑀯 𑀅𑀥𑀺𑀕𑀢𑁄𑀢𑀺 𑀅𑀦𑀜𑁆𑀜𑀦𑁂𑀬𑁆𑀬𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑀺𑀝𑁆𑀞𑀺𑀯𑀺𑀲𑀽𑀓𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁬. 𑀦𑀺𑀮𑁆𑀮𑁄𑀮𑀼𑀧𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀲𑀽𑀤𑁄 𑀅𑀦𑁆𑀢𑀭𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺 𑀫𑀦𑀼𑀜𑁆𑀜𑀤𑀲𑁆𑀲𑀦𑀁 𑀲𑀸𑀤𑀼𑀭𑀲𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀫𑁂 𑀭𑀸𑀚𑀸 𑀥𑀦𑀫𑀦𑀼𑀧𑁆𑀧𑀤𑁂𑀬𑁆𑀬𑀸’’𑀢𑀺. 𑀢𑀁 𑀭𑀜𑁆𑀜𑁄 𑀕𑀦𑁆𑀥𑁂𑀦𑁂𑀯 𑀪𑁄𑀢𑁆𑀢𑀼𑀓𑀸𑀫𑀢𑀁 𑀚𑀦𑁂𑀲𑀺 𑀫𑀼𑀔𑁂 𑀔𑁂𑀴𑀁 𑀉𑀧𑁆𑀧𑀸𑀤𑁂𑀦𑁆𑀢𑀁. 𑀧𑀞𑀫𑀓𑀩𑀴𑁂 𑀧𑀦 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀲𑀢𑁆𑀢𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀅𑀫𑀢𑁂𑀦𑁂𑀯 𑀨𑀼𑀝𑁆𑀞𑀸𑀦𑀺 𑀅𑀳𑁂𑀲𑀼𑀁. 𑀲𑀽𑀤𑁄 ‘‘𑀇𑀤𑀸𑀦𑀺 𑀫𑁂 𑀤𑀲𑁆𑀲𑀢𑀺, 𑀇𑀤𑀸𑀦𑀺 𑀫𑁂 𑀤𑀲𑁆𑀲𑀢𑀻’’𑀢𑀺 ¶ 𑀘𑀺𑀦𑁆𑀢𑁂𑀲𑀺. 𑀭𑀸𑀚𑀸𑀧𑀺 ‘‘𑀲𑀓𑁆𑀓𑀸𑀭𑀸𑀭𑀳𑁄 𑀲𑀽𑀤𑁄’’𑀢𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀲𑀁 𑀲𑀸𑀬𑀺𑀢𑁆𑀯𑀸 𑀧𑀦 𑀲𑀓𑁆𑀓𑀭𑁄𑀦𑁆𑀢𑀁 𑀫𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑁂𑀬𑁆𑀬 𑁋 ‘𑀮𑁄𑀮𑁄 𑀅𑀬𑀁 𑀭𑀸𑀚𑀸 𑀭𑀲𑀕𑀭𑀼𑀓𑁄’’’𑀢𑀺 𑀦 𑀓𑀺𑀜𑁆𑀘𑀺 𑀅𑀪𑀡𑀺. 𑀏𑀯𑀁 𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀁, 𑀢𑀸𑀯 𑀲𑀽𑀤𑁄𑀧𑀺 ‘‘𑀇𑀤𑀸𑀦𑀺 𑀤𑀲𑁆𑀲𑀢𑀺, 𑀇𑀤𑀸𑀦𑀺 𑀤𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀭𑀸𑀚𑀸𑀧𑀺 𑀅𑀯𑀡𑁆𑀡𑀪𑀬𑁂𑀦 𑀦 𑀓𑀺𑀜𑁆𑀘𑀺 𑀅𑀪𑀡𑀺. 𑀢𑀢𑁄 ¶ 𑀲𑀽𑀤𑁄 ‘‘𑀦𑀢𑁆𑀣𑀺 𑀇𑀫𑀲𑁆𑀲 𑀭𑀜𑁆𑀜𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀅𑀭𑀲𑀪𑀢𑁆𑀢𑀁 𑀉𑀧𑀦𑀸𑀫𑁂𑀲𑀺. 𑀭𑀸𑀚𑀸 𑀪𑀼𑀜𑁆𑀚𑀦𑁆𑀢𑁄 ‘‘𑀦𑀺𑀕𑁆𑀕𑀳𑀸𑀭𑀳𑁄 𑀅𑀚𑁆𑀚 𑀲𑀽𑀤𑁄’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀯𑀡𑁆𑀡𑀪𑀬𑁂𑀦 𑀦 𑀓𑀺𑀜𑁆𑀘𑀺 𑀅𑀪𑀡𑀺. 𑀢𑀢𑁄 𑀲𑀽𑀤𑁄 ‘‘𑀭𑀸𑀚𑀸 𑀦𑁂𑀯 𑀲𑀼𑀦𑁆𑀤𑀭𑀁 𑀦𑀸𑀲𑀼𑀦𑁆𑀤𑀭𑀁 𑀚𑀸𑀦𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀩𑁆𑀩𑀬𑀁 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺𑀤𑁂𑀯 𑀧𑀘𑀺𑀢𑁆𑀯𑀸 𑀭𑀜𑁆𑀜𑁄 𑀤𑁂𑀢𑀺. 𑀭𑀸𑀚𑀸 ‘‘𑀅𑀳𑁄 𑀯𑀢 𑀮𑁄𑀪𑁄, 𑀅𑀳𑀁 𑀦𑀸𑀫 𑀯𑀻𑀲𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀇𑀫𑀲𑁆𑀲 𑀮𑁄𑀪𑁂𑀦 𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀻’’𑀢𑀺 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸, 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀺𑀮𑁆𑀮𑁄𑀮𑀼𑀧𑁄 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄, 𑀦𑀺𑀫𑁆𑀫𑀓𑁆𑀔𑁄 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄;

𑀦𑀺𑀭𑀸𑀲𑀬𑁄 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀦𑀺𑀮𑁆𑀮𑁄𑀮𑀼𑀧𑁄𑀢𑀺 𑀅𑀮𑁄𑀮𑀼𑀧𑁄. 𑀬𑁄 𑀳𑀺 𑀭𑀲𑀢𑀡𑁆𑀳𑀸𑀪𑀺𑀪𑀽𑀢𑁄 𑀳𑁄𑀢𑀺, 𑀲𑁄 𑀪𑀼𑀲𑀁 𑀮𑀼𑀧𑁆𑀧𑀢𑀺 𑀧𑀼𑀦𑀧𑁆𑀧𑀼𑀦𑀜𑁆𑀘 𑀮𑀼𑀧𑁆𑀧𑀢𑀺, 𑀢𑁂𑀦 𑀮𑁄𑀮𑀼𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀏𑀲 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀦𑀺𑀮𑁆𑀮𑁄𑀮𑀼𑀧𑁄’’𑀢𑀺. 𑀦𑀺𑀓𑁆𑀓𑀼𑀳𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑀲𑁆𑀲 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼 𑀦𑀢𑁆𑀣𑀺, 𑀲𑁄 𑀦𑀺𑀓𑁆𑀓𑀼𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀲𑁆𑀲𑀸 𑀧𑀦 𑀕𑀸𑀣𑀸𑀬 𑀫𑀦𑀼𑀜𑁆𑀜𑀪𑁄𑀚𑀦𑀸𑀤𑀻𑀲𑀼 𑀯𑀺𑀫𑁆𑀳𑀬𑀫𑀦𑀸𑀧𑀚𑁆𑀚𑀦𑀢𑁄 𑀦𑀺𑀓𑁆𑀓𑀼𑀳𑁄𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 ¶ . 𑀦𑀺𑀧𑁆𑀧𑀺𑀧𑀸𑀲𑁄𑀢𑀺 𑀏𑀢𑁆𑀣 𑀧𑀸𑀢𑀼𑀫𑀺𑀘𑁆𑀙𑀸 𑀧𑀺𑀧𑀸𑀲𑀸, 𑀢𑀲𑁆𑀲𑀸 𑀅𑀪𑀸𑀯𑁂𑀦 𑀦𑀺𑀧𑁆𑀧𑀺𑀧𑀸𑀲𑁄, 𑀲𑀸𑀤𑀼𑀭𑀲𑀮𑁄𑀪𑁂𑀦 𑀪𑁄𑀢𑁆𑀢𑀼𑀓𑀫𑁆𑀬𑀢𑀸𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀫𑁆𑀫𑀓𑁆𑀔𑁄𑀢𑀺 𑀏𑀢𑁆𑀣 𑀧𑀭𑀕𑀼𑀡𑀯𑀺𑀦𑀸𑀲𑀦𑀮𑀓𑁆𑀔𑀡𑁄 𑀫𑀓𑁆𑀔𑁄, 𑀢𑀲𑁆𑀲 𑀅𑀪𑀸𑀯𑁂𑀦 𑀦𑀺𑀫𑁆𑀫𑀓𑁆𑀔𑁄. 𑀅𑀢𑁆𑀢𑀦𑁄 𑀕𑀳𑀝𑁆𑀞𑀓𑀸𑀮𑁂 𑀲𑀽𑀤𑀲𑁆𑀲 𑀕𑀼𑀡𑀫𑀓𑁆𑀔𑀦𑀸𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄 𑀢𑀬𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀘 𑀢𑀻𑀡𑀻𑀢𑀺 𑀙 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀅𑀧𑁆𑀧𑀲𑀦𑁆𑀦𑀝𑁆𑀞𑁂𑀦 𑀲𑀓𑀪𑀸𑀯𑀁 𑀯𑀺𑀚𑀳𑀸𑀧𑁂𑀢𑁆𑀯𑀸 𑀧𑀭𑀪𑀸𑀯𑀁 𑀕𑀡𑁆𑀳𑀸𑀧𑀦𑀝𑁆𑀞𑁂𑀦 𑀓𑀲𑀝𑀝𑁆𑀞𑁂𑀦 𑀘 𑀓𑀲𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀢𑀢𑁆𑀣, 𑀓𑀢𑀫𑁂 𑀢𑀬𑁄 𑀓𑀲𑀸𑀯𑀸? 𑀭𑀸𑀕𑀓𑀲𑀸𑀯𑁄, 𑀤𑁄𑀲𑀓𑀲𑀸𑀯𑁄, 𑀫𑁄𑀳𑀓𑀲𑀸𑀯𑁄, 𑀇𑀫𑁂 𑀢𑀬𑁄 𑀓𑀲𑀸𑀯𑀸. 𑀢𑀢𑁆𑀣, 𑀓𑀢𑀫𑁂 𑀅𑀧𑀭𑁂𑀧𑀺 𑀢𑀬𑁄 𑀓𑀲𑀸𑀯𑀸? 𑀓𑀸𑀬𑀓𑀲𑀸𑀯𑁄, 𑀯𑀘𑀻𑀓𑀲𑀸𑀯𑁄, 𑀫𑀦𑁄𑀓𑀲𑀸𑀯𑁄’’𑀢𑀺 (𑀯𑀺𑀪. 𑁯𑁨𑁪).

𑀢𑁂𑀲𑀼 ¶ ¶ 𑀫𑁄𑀳𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀓𑀲𑀸𑀯𑀸𑀦𑀁 𑀢𑁂𑀲𑀜𑁆𑀘 𑀲𑀩𑁆𑀩𑁂𑀲𑀁 𑀫𑀽𑀮𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀦𑀺𑀤𑁆𑀥𑀦𑁆𑀢𑀢𑁆𑀢𑀸 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄, 𑀢𑀺𑀡𑁆𑀡𑀁 𑀏𑀯 𑀯𑀸 𑀓𑀸𑀬𑀯𑀘𑀻𑀫𑀦𑁄𑀓𑀲𑀸𑀯𑀸𑀦𑀁 𑀫𑁄𑀳𑀲𑁆𑀲 𑀘 𑀦𑀺𑀤𑁆𑀥𑀦𑁆𑀢𑀢𑁆𑀢𑀸 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄. 𑀇𑀢𑀭𑁂𑀲𑀼 𑀦𑀺𑀮𑁆𑀮𑁄𑀮𑀼𑀧𑀢𑀸𑀤𑀻𑀳𑀺 𑀭𑀸𑀕𑀓𑀲𑀸𑀯𑀲𑁆𑀲, 𑀦𑀺𑀫𑁆𑀫𑀓𑁆𑀔𑀢𑀸𑀬 𑀤𑁄𑀲𑀓𑀲𑀸𑀯𑀲𑁆𑀲 𑀦𑀺𑀤𑁆𑀥𑀦𑁆𑀢𑀪𑀸𑀯𑁄 𑀲𑀺𑀤𑁆𑀥𑁄 𑀏𑀯. 𑀦𑀺𑀭𑀸𑀲𑀬𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀓𑀮𑀮𑁄𑀓𑁂, 𑀢𑀻𑀲𑀼 𑀪𑀯𑁂𑀲𑀼 𑀤𑁆𑀯𑀸𑀤𑀲𑀲𑀼 𑀯𑀸 𑀆𑀬𑀢𑀦𑁂𑀲𑀼 𑀪𑀯𑀯𑀺𑀪𑀯𑀢𑀡𑁆𑀳𑀸𑀯𑀺𑀭𑀳𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀢𑀬𑁄𑀧𑀺 𑀧𑀸𑀤𑁂 𑀯𑀢𑁆𑀯𑀸 𑀏𑀓𑁄 𑀘𑀭𑁂𑀢𑀺 𑀏𑀓𑁄 𑀘𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀏𑀯𑀫𑁆𑀧𑀺 𑀏𑀢𑁆𑀣 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄𑀢𑀺.

𑀦𑀺𑀮𑁆𑀮𑁄𑀮𑀼𑀧𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁭. 𑀧𑀸𑀧𑀁 𑀲𑀳𑀸𑀬𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀫𑀦𑀼𑀲𑁆𑀲𑁂 𑀓𑁄𑀝𑁆𑀞𑀸𑀕𑀸𑀭𑀢𑁄 𑀧𑀼𑀭𑀸𑀡𑀥𑀜𑁆𑀜𑀸𑀦𑀺 𑀩𑀳𑀺𑀤𑁆𑀥𑀸 𑀦𑀻𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑀡𑁂, 𑀇𑀤’’𑀦𑁆𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. ‘‘𑀇𑀤𑀸𑀦𑀺, 𑀫𑀳𑀸𑀭𑀸𑀚, 𑀦𑀯𑀥𑀜𑁆𑀜𑀸𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀑𑀓𑀸𑀲𑀁 𑀓𑀸𑀢𑀼𑀁 𑀇𑀫𑁂 𑀫𑀦𑀼𑀲𑁆𑀲𑀸 𑀧𑀼𑀭𑀸𑀡𑀥𑀜𑁆𑀜𑀸𑀤𑀻𑀦𑀺 𑀙𑀟𑁆𑀟𑁂𑀦𑁆𑀢𑀻’’𑀢𑀺. 𑀭𑀸𑀚𑀸 𑁋 ‘‘𑀓𑀺𑀁, 𑀪𑀡𑁂, 𑀇𑀢𑁆𑀣𑀸𑀕𑀸𑀭𑀩𑀮𑀓𑀸𑀬𑀸𑀤𑀻𑀦𑀁 𑀯𑀝𑁆𑀝𑀁 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 ¶ ? ‘‘𑀆𑀫, 𑀫𑀳𑀸𑀭𑀸𑀚, 𑀧𑀭𑀺𑀧𑀼𑀡𑁆𑀡𑀦𑁆𑀢𑀺’’. ‘‘𑀢𑁂𑀦 𑀳𑀺, 𑀪𑀡𑁂, 𑀤𑀸𑀦𑀲𑀸𑀮𑀁 𑀓𑀸𑀭𑀸𑀧𑁂𑀣, 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀫𑀸 𑀇𑀫𑀸𑀦𑀺 𑀥𑀜𑁆𑀜𑀸𑀦𑀺 𑀅𑀦𑀼𑀧𑀓𑀸𑀭𑀸𑀦𑀺 𑀯𑀺𑀦𑀲𑁆𑀲𑀺𑀁𑀲𑀽’’𑀢𑀺. 𑀢𑀢𑁄 𑀦𑀁 𑀅𑀜𑁆𑀜𑀢𑀭𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀫𑀘𑁆𑀘𑁄 ‘‘𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀆𑀭𑀩𑁆𑀪 𑀬𑀸𑀯 ‘‘𑀩𑀸𑀮𑀸 𑀘 𑀧𑀡𑁆𑀟𑀺𑀢𑀸 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀲𑁄 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀓𑁄𑀝𑁆𑀞𑀸𑀕𑀸𑀭𑁂 𑀯𑀺𑀮𑀼𑀫𑁆𑀧𑀦𑁆𑀢𑁂 𑀤𑀺𑀲𑁆𑀯𑀸 𑀢𑀣𑁂𑀯 𑀆𑀡𑀸𑀧𑁂𑀲𑀺. 𑀢𑀢𑀺𑀬𑀫𑁆𑀧𑀺 𑀦𑀁 ‘‘𑀫𑀳𑀸𑀭𑀸𑀚, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀬𑀤𑀺𑀤𑀁 𑀤𑀸𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀲𑁄 ‘‘𑀅𑀭𑁂, 𑀅𑀳𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀦 𑀮𑀪𑀸𑀫𑀺 𑀤𑀸𑀢𑀼𑀁, 𑀓𑀺𑀁 𑀫𑁂 𑀇𑀫𑁂𑀳𑀺 𑀧𑀸𑀧𑀲𑀳𑀸𑀬𑁂𑀳𑀻’’𑀢𑀺 𑀦𑀺𑀩𑁆𑀩𑀺𑀦𑁆𑀦𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀜𑁆𑀘 𑀧𑀸𑀧𑀁 𑀲𑀳𑀸𑀬𑀁 𑀕𑀭𑀳𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁;

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀲𑁆𑀲𑀸𑀬𑀁 ¶ 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀤𑀲𑀯𑀢𑁆𑀣𑀼𑀓𑀸𑀬 𑀧𑀸𑀧𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑁄, 𑀧𑀭𑁂𑀲𑀫𑁆𑀧𑀺 𑀅𑀦𑀢𑁆𑀣𑀁 𑀧𑀲𑁆𑀲𑀢𑀻𑀢𑀺 𑀅𑀦𑀢𑁆𑀣𑀤𑀲𑁆𑀲𑀻, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀫𑁆𑀳𑀺 𑀘 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑁄, 𑀢𑀁 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁. 𑀲𑀬𑀁 𑀦 𑀲𑁂𑀯𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂𑀦 𑀦 𑀲𑁂𑀯𑁂. 𑀬𑀤𑀺 𑀧𑀦 𑀧𑀭𑀯𑀲𑁄 𑀳𑁄𑀢𑀺, 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀲𑀼𑀢𑀦𑁆𑀢𑀺 𑀧𑀲𑀝𑀁 ¶ , 𑀤𑀺𑀝𑁆𑀞𑀺𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀧𑀫𑀢𑁆𑀢𑀦𑁆𑀢𑀺 𑀓𑀸𑀫𑀕𑀼𑀡𑁂𑀲𑀼 𑀯𑁄𑀲𑁆𑀲𑀝𑁆𑀞𑀘𑀺𑀢𑁆𑀢𑀁, 𑀓𑀼𑀲𑀮𑀪𑀸𑀯𑀦𑀸𑀭𑀳𑀺𑀢𑀁 𑀯𑀸. 𑀢𑀁 𑀏𑀯𑀭𑀽𑀧𑀁 𑀦 𑀲𑁂𑀯𑁂, 𑀦 𑀪𑀚𑁂, 𑀦 𑀧𑀬𑀺𑀭𑀼𑀧𑀸𑀲𑁂, 𑀅𑀜𑁆𑀜𑀤𑀢𑁆𑀣𑀼 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀧𑀸𑀧𑀲𑀳𑀸𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁮. 𑀩𑀳𑀼𑀲𑁆𑀲𑀼𑀢𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀅𑀝𑁆𑀞 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸𑀢𑀺 𑀲𑀩𑁆𑀩𑀁 𑀅𑀦𑀯𑀚𑁆𑀚𑀪𑁄𑀚𑀻𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀸𑀚𑀸 𑀆𑀳 ‘‘𑀓𑁂 𑀢𑀼𑀫𑁆𑀳𑁂’’𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀫𑀬𑀁, 𑀫𑀳𑀸𑀭𑀸𑀚, 𑀩𑀳𑀼𑀲𑁆𑀲𑀼𑀢𑀸 𑀦𑀸𑀫𑀸’’𑀢𑀺. 𑀭𑀸𑀚𑀸 ¶ 𑁋 ‘‘𑀅𑀳𑀁 𑀲𑀼𑀢𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫, 𑀲𑀼𑀢𑁂𑀦 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀸𑀫𑀺, 𑀳𑀦𑁆𑀤, 𑀦𑁂𑀲𑀁 𑀲𑀦𑁆𑀢𑀺𑀓𑁂 𑀯𑀺𑀘𑀺𑀢𑁆𑀭𑀦𑀬𑀁 𑀲𑀤𑁆𑀥𑀫𑁆𑀫𑀤𑁂𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀫𑀦𑁄 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸, 𑀧𑀭𑀺𑀯𑀺𑀲𑀺𑀢𑁆𑀯𑀸, 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸, 𑀧𑀼𑀭𑀢𑁄 𑀦𑀺𑀲𑀻𑀤𑀺 ‘‘𑀥𑀫𑁆𑀫𑀓𑀣𑀁, 𑀪𑀦𑁆𑀢𑁂, 𑀓𑀭𑁄𑀣𑀸’’𑀢𑀺. 𑀲𑁄 ‘‘𑀲𑀼𑀔𑀺𑀢𑁄 𑀳𑁄𑀢𑀼, 𑀫𑀳𑀸𑀭𑀸𑀚, 𑀭𑀸𑀕𑀓𑁆𑀔𑀬𑁄 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀺𑀢𑁄. 𑀭𑀸𑀚𑀸 ‘‘𑀅𑀬𑀁 𑀦 𑀩𑀳𑀼𑀲𑁆𑀲𑀼𑀢𑁄, 𑀤𑀼𑀢𑀺𑀬𑁄 𑀩𑀳𑀼𑀲𑁆𑀲𑀼𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁆𑀯𑁂 𑀤𑀸𑀦𑀺 𑀯𑀺𑀘𑀺𑀢𑁆𑀭𑀥𑀫𑁆𑀫𑀤𑁂𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀲𑀺. 𑀏𑀯𑀁 𑀬𑀸𑀯 𑀲𑀩𑁆𑀩𑁂𑀲𑀁 𑀧𑀝𑀺𑀧𑀸𑀝𑀺 𑀕𑀘𑁆𑀙𑀢𑀺, 𑀢𑀸𑀯 𑀦𑀺𑀫𑀦𑁆𑀢𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 ‘‘𑀤𑁄𑀲𑀓𑁆𑀔𑀬𑁄 𑀳𑁄𑀢𑀼, 𑀫𑁄𑀳𑀓𑁆𑀔𑀬𑁄, 𑀕𑀢𑀺𑀓𑁆𑀔𑀬𑁄, 𑀯𑀝𑁆𑀝𑀓𑁆𑀔𑀬𑁄, 𑀉𑀧𑀥𑀺𑀓𑁆𑀔𑀬𑁄, 𑀢𑀡𑁆𑀳𑀓𑁆𑀔𑀬𑁄 𑀳𑁄𑀢𑀽’’𑀢𑀺 𑀏𑀯𑀁 𑀏𑀓𑁂𑀓𑀁 𑀧𑀤𑀁 𑀯𑀺𑀲𑁂𑀲𑁂𑀢𑁆𑀯𑀸 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯 𑀯𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼.

𑀢𑀢𑁄 𑀭𑀸𑀚𑀸 ‘‘𑀇𑀫𑁂 ‘𑀩𑀳𑀼𑀲𑁆𑀲𑀼𑀢𑀸 𑀫𑀬’𑀦𑁆𑀢𑀺 𑀪𑀡𑀦𑁆𑀢𑀺, 𑀦 𑀘 𑀢𑁂𑀲𑀁 𑀯𑀺𑀘𑀺𑀢𑁆𑀭𑀓𑀣𑀸, 𑀓𑀺𑀫𑁂𑀢𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑁂𑀲𑀁 𑀯𑀘𑀦𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀢𑀼𑀫𑀸𑀭𑀤𑁆𑀥𑁄. 𑀅𑀣 ‘‘𑀭𑀸𑀕𑀓𑁆𑀔𑀬𑁄 𑀳𑁄𑀢𑀽’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀭𑀸𑀕𑁂 𑀔𑀻𑀡𑁂 𑀤𑁄𑀲𑁄𑀧𑀺 𑀫𑁄𑀳𑁄𑀧𑀺 ¶ 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀧𑀺 𑀓𑀺𑀮𑁂𑀲𑀸 𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺 𑁋 ‘‘𑀦𑀺𑀧𑁆𑀧𑀭𑀺𑀬𑀸𑀬𑀩𑀳𑀼𑀲𑁆𑀲𑀼𑀢𑀸 𑀇𑀫𑁂 𑀲𑀫𑀡𑀸. 𑀬𑀣𑀸 𑀳𑀺 𑀧𑀼𑀭𑀺𑀲𑁂𑀦 𑀫𑀳𑀸𑀧𑀣𑀯𑀺𑀁 𑀯𑀸 𑀆𑀓𑀸𑀲𑀁 𑀯𑀸 𑀅𑀗𑁆𑀕𑀼𑀮𑀺𑀬𑀸 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀦 𑀅𑀗𑁆𑀕𑀼𑀮𑀺𑀫𑀢𑁆𑀢𑁄𑀯 𑀧𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺, 𑀅𑀧𑀺𑀘, 𑀔𑁄, 𑀧𑀦 𑀧𑀣𑀯𑀻𑀆𑀓𑀸𑀲𑀸 𑀏𑀯 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀏𑀯𑀁 𑀇𑀫𑁂𑀳𑀺 𑀏𑀓𑀫𑁂𑀓𑀁 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑁆𑀢𑁂𑀳𑀺 𑀅𑀧𑀭𑀺𑀫𑀸𑀡𑀸 𑀅𑀢𑁆𑀣𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀻’’𑀢𑀺. 𑀢𑀢𑁄 𑀲𑁄 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀩𑀳𑀼𑀲𑁆𑀲𑀼𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀣𑀸𑀭𑀽𑀧𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀧𑀢𑁆𑀣𑁂𑀦𑁆𑀢𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣, 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁;

𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣𑀸𑀬𑀁 ¶ 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀩𑀳𑀼𑀲𑁆𑀲𑀼𑀢𑀦𑁆𑀢𑀺 𑀤𑀼𑀯𑀺𑀥𑁄 𑀩𑀳𑀼𑀲𑁆𑀲𑀼𑀢𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀢𑁆𑀣𑀢𑁄 𑀦𑀺𑀔𑀺𑀮𑁄 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁄 𑀘, 𑀫𑀕𑁆𑀕𑀨𑀮𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀦𑀁 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁄 𑀘. 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄. 𑀉𑀴𑀸𑀭𑁂𑀳𑀺 𑀧𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀴𑀸𑀭𑁄. 𑀬𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀫𑀼𑀢𑁆𑀢𑀧𑀝𑀺𑀪𑀸𑀦𑁄 ¶ 𑀘 𑀬𑀼𑀢𑁆𑀢𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀧𑀝𑀺𑀪𑀸𑀦𑀯𑀸. 𑀧𑀭𑀺𑀬𑀢𑁆𑀢𑀺𑀧𑀭𑀺𑀧𑀼𑀘𑁆𑀙𑀸𑀥𑀺𑀕𑀫𑀯𑀲𑁂𑀦 𑀯𑀸 𑀢𑀺𑀥𑀸 𑀧𑀝𑀺𑀪𑀸𑀦𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀳𑀺 𑀧𑀭𑀺𑀬𑀢𑁆𑀢𑀺 𑀧𑀝𑀺𑀪𑀸𑀢𑀺, 𑀲𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀅𑀢𑁆𑀣𑀜𑁆𑀘 𑀜𑀸𑀡𑀜𑁆𑀘 𑀮𑀓𑁆𑀔𑀡𑀜𑁆𑀘 𑀞𑀸𑀦𑀸𑀝𑁆𑀞𑀸𑀦𑀜𑁆𑀘 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀭𑀺𑀧𑀼𑀘𑁆𑀙𑀸 𑀧𑀝𑀺𑀪𑀸𑀢𑀺, 𑀲𑁄 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸. 𑀬𑁂𑀦 𑀫𑀕𑁆𑀕𑀸𑀤𑀬𑁄 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀲𑁄 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸. 𑀢𑀁 𑀏𑀯𑀭𑀽𑀧𑀁 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁. 𑀢𑀢𑁄 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀉𑀪𑀬𑀢𑁆𑀣𑀪𑁂𑀤𑀢𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀪𑁂𑀤𑀢𑁄 𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺. 𑀢𑀢𑁄 𑁋 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀓𑀗𑁆𑀔𑀝𑁆𑀞𑀸𑀦𑁂𑀲𑀼 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀦𑁂𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸 𑀏𑀯𑀁 𑀓𑀢𑀲𑀩𑁆𑀩𑀓𑀺𑀘𑁆𑀘𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀩𑀳𑀼𑀲𑁆𑀲𑀼𑀢𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁯. 𑀔𑀺𑀟𑁆𑀟𑀁 ¶ 𑀭𑀢𑀺𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀯𑀺𑀪𑀽𑀲𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀸𑀢𑁄𑀯 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀦𑀸𑀦𑀸𑀯𑀺𑀥𑀯𑀺𑀪𑀽𑀲𑀦𑁂𑀳𑀺 𑀅𑀢𑁆𑀢𑀸𑀦𑀁 𑀯𑀺𑀪𑀽𑀲𑀸𑀧𑁂𑀢𑁆𑀯𑀸 𑀫𑀳𑀸𑀆𑀤𑀸𑀲𑁂 𑀲𑀓𑀮𑀲𑀭𑀻𑀭𑀁 𑀤𑀺𑀲𑁆𑀯𑀸 𑀬𑀁 𑀦 𑀇𑀘𑁆𑀙𑀢𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑁂𑀦 𑀯𑀺𑀪𑀽𑀲𑀦𑁂𑀦 𑀯𑀺𑀪𑀽𑀲𑀸𑀧𑁂𑀢𑀺. 𑀢𑀲𑁆𑀲 𑀏𑀓𑀤𑀺𑀯𑀲𑀁 𑀏𑀯𑀁 𑀓𑀭𑁄𑀢𑁄 𑀪𑀢𑁆𑀢𑀯𑁂𑀮𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁄 𑀧𑀢𑁆𑀢𑁄. 𑀅𑀣 𑀅𑀯𑀺𑀪𑀽𑀲𑀺𑀢𑁄𑀯 𑀤𑀼𑀲𑁆𑀲𑀧𑀝𑁆𑀝𑁂𑀦 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸, 𑀪𑀼𑀜𑁆𑀚𑀺𑀢𑁆𑀯𑀸, 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀘𑁆𑀙𑀺. 𑀧𑀼𑀦𑀧𑀺 𑀉𑀝𑁆𑀞𑀳𑀺𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑁄 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄. 𑀏𑀯𑀁 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀢𑀺𑀬𑀤𑀺𑀯𑀲𑁂𑀧𑀺. 𑀅𑀣𑀲𑁆𑀲 𑀏𑀯𑀁 𑀫𑀡𑁆𑀟𑀦𑀧𑁆𑀧𑀲𑀼𑀢𑀲𑁆𑀲 𑀧𑀺𑀝𑁆𑀞𑀺𑀭𑁄𑀕𑁄 𑀉𑀤𑀧𑀸𑀤𑀺. 𑀢𑀲𑁆𑀲𑁂𑀢𑀤𑀳𑁄𑀲𑀺 𑁋 ‘‘𑀅𑀳𑁄 𑀭𑁂, 𑀅𑀳𑀁 𑀲𑀩𑁆𑀩𑀣𑀸𑀫𑁂𑀦 𑀯𑀺𑀪𑀽𑀲𑀦𑁆𑀢𑁄𑀧𑀺 𑀇𑀫𑀲𑁆𑀫𑀺𑀁 𑀓𑀧𑁆𑀧𑀓𑁂 𑀯𑀺𑀪𑀽𑀲𑀦𑁂 𑀅𑀲𑀦𑁆𑀢𑀼𑀝𑁆𑀞𑁄 𑀮𑁄𑀪𑀁 𑀉𑀧𑁆𑀧𑀸𑀤𑁂𑀲𑀺𑀁. 𑀮𑁄𑀪𑁄 𑀘 𑀦𑀸𑀫𑁂𑀲 𑀅𑀧𑀸𑀬𑀕𑀫𑀦𑀻𑀬𑁄 𑀥𑀫𑁆𑀫𑁄, 𑀳𑀦𑁆𑀤𑀸𑀳𑀁, 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂, 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄;

𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 ¶ 𑀔𑀺𑀟𑁆𑀟𑀸 𑀘 𑀭𑀢𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀯. 𑀓𑀸𑀫𑀲𑀼𑀔𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀲𑀼𑀔𑀁. 𑀯𑀢𑁆𑀣𑀼𑀓𑀸𑀫𑀸𑀧𑀺 𑀳𑀺 𑀲𑀼𑀔𑀲𑁆𑀲 𑀯𑀺𑀲𑀬𑀸𑀤𑀺𑀪𑀸𑀯𑁂𑀦 𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀅𑀢𑁆𑀣𑀺 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁩.𑁬𑁦). 𑀏𑀯𑀫𑁂𑀢𑀁 ¶ 𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀇𑀫𑀲𑁆𑀫𑀺𑀁 𑀑𑀓𑀸𑀲𑀮𑁄𑀓𑁂 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀮𑀦𑁆𑀢𑀺 𑀅𑀓𑀢𑁆𑀯𑀸, 𑀏𑀢𑀁 𑀢𑀧𑁆𑀧𑀓𑀦𑁆𑀢𑀺 𑀯𑀸 𑀲𑀸𑀭𑀪𑀽𑀢𑀦𑁆𑀢𑀺 𑀯𑀸 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀅𑀦𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑁂𑀦 𑀅𑀮𑀗𑁆𑀓𑀭𑀡𑁂𑀦 𑀅𑀦𑀧𑁂𑀓𑁆𑀔𑀡𑀲𑀻𑀮𑁄, 𑀅𑀧𑀺𑀳𑀸𑀮𑀼𑀓𑁄, 𑀦𑀺𑀢𑁆𑀢𑀡𑁆𑀳𑁄, 𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻 𑀏𑀓𑁄 𑀘𑀭𑁂𑀢𑀺. 𑀢𑀢𑁆𑀣 𑀯𑀺𑀪𑀽𑀲𑀸 𑀤𑀼𑀯𑀺𑀥𑀸 𑁋 𑀅𑀕𑀸𑀭𑀺𑀓𑀯𑀺𑀪𑀽𑀲𑀸, 𑀅𑀦𑀕𑀸𑀭𑀺𑀓𑀯𑀺𑀪𑀽𑀲𑀸 𑀘. 𑀢𑀢𑁆𑀣 𑀅𑀕𑀸𑀭𑀺𑀓𑀯𑀺𑀪𑀽𑀲𑀸 𑀲𑀸𑀝𑀓𑀯𑁂𑀞𑀦𑀫𑀸𑀮𑀸𑀕𑀦𑁆𑀥𑀸𑀤𑀺, 𑀅𑀦𑀕𑀸𑀭𑀺𑀓𑀯𑀺𑀪𑀽𑀲𑀸 𑀧𑀢𑁆𑀢𑀫𑀡𑁆𑀟𑀦𑀸𑀤𑀺. 𑀯𑀺𑀪𑀽𑀲𑀸 𑀏𑀯 𑀯𑀺𑀪𑀽𑀲𑀦𑀝𑁆𑀞𑀸𑀦𑀁. 𑀢𑀲𑁆𑀫𑀸 𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀢𑀺𑀯𑀺𑀥𑀸𑀬 𑀯𑀺𑀭𑀢𑀺𑀬𑀸 𑀯𑀺𑀭𑀢𑁄. 𑀅𑀯𑀺𑀢𑀣𑀯𑀘𑀦𑀢𑁄 𑀲𑀘𑁆𑀘𑀯𑀸𑀤𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀪𑀽𑀲𑀦𑀝𑁆𑀞𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁦. 𑀧𑀼𑀢𑁆𑀢𑀜𑁆𑀘 ¶ 𑀤𑀸𑀭𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀧𑀼𑀢𑁆𑀢𑁄 𑀤𑀳𑀭𑀓𑀸𑀮𑁂 𑀏𑀯 𑀅𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀭𑀚𑁆𑀚𑀲𑀺𑀭𑀺𑀫𑀦𑀼𑀪𑀯𑀦𑁆𑀢𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀩𑀳𑀽𑀦𑀁 𑀤𑀼𑀓𑁆𑀔𑀁 𑀓𑀭𑁄𑀫𑀺. 𑀓𑀺𑀁 𑀫𑁂 𑀏𑀓𑀪𑀢𑁆𑀢𑀢𑁆𑀣𑀸𑀬 𑀇𑀫𑀺𑀦𑀸 𑀧𑀸𑀧𑁂𑀦, 𑀳𑀦𑁆𑀤 𑀲𑀼𑀔𑀫𑀼𑀧𑁆𑀧𑀸𑀤𑁂𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁, 𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀺;

𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀥𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀭𑀚𑀢𑀚𑀸𑀢𑀭𑀽𑀧𑀸𑀤𑀻𑀦𑀺 𑀭𑀢𑀦𑀸𑀦𑀺. 𑀥𑀜𑁆𑀜𑀸𑀦𑀻𑀢𑀺 𑀲𑀸𑀮𑀺𑀯𑀻𑀳𑀺𑀬𑀯𑀕𑁄𑀥𑀼𑀫𑀓𑀗𑁆𑀓𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑀧𑀪𑁂𑀤𑀸𑀦𑀺 𑀲𑀢𑁆𑀢 𑀲𑁂𑀲𑀸𑀧𑀭𑀡𑁆𑀡𑀸𑀦𑀺 𑀘. 𑀩𑀦𑁆𑀥𑀯𑀸𑀦𑀻𑀢𑀺 𑀜𑀸𑀢𑀺𑀩𑀦𑁆𑀥𑀼𑀕𑁄𑀢𑁆𑀢𑀩𑀦𑁆𑀥𑀼𑀫𑀺𑀢𑁆𑀢𑀩𑀦𑁆𑀥𑀼𑀲𑀺𑀧𑁆𑀧𑀩𑀦𑁆𑀥𑀼𑀯𑀲𑁂𑀦 ¶ 𑀘𑀢𑀼𑀩𑁆𑀩𑀺𑀥𑁂 𑀩𑀦𑁆𑀥𑀯𑁂. 𑀬𑀣𑁄𑀥𑀺𑀓𑀸𑀦𑀻𑀢𑀺 𑀲𑀓𑀲𑀓𑀑𑀥𑀺𑀯𑀲𑁂𑀦 𑀞𑀺𑀢𑀸𑀦𑁂𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀼𑀢𑁆𑀢𑀤𑀸𑀭𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁧. 𑀲𑀗𑁆𑀕𑁄 𑀏𑀲𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀧𑀸𑀤𑀮𑁄𑀮𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀧𑀸𑀢𑁄𑀯 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀦𑀸𑀝𑀓𑀸𑀦𑀺 𑀧𑀲𑁆𑀲𑀢𑀺. 𑀢𑀺𑀯𑀺𑀥𑀦𑀸𑀝𑀓𑀸𑀦𑀻𑀢𑀺 𑀓𑀺𑀭 𑀧𑀼𑀩𑁆𑀩𑀭𑀸𑀚𑀢𑁄 𑀆𑀕𑀢𑀁, 𑀅𑀦𑀦𑁆𑀢𑀭𑀭𑀸𑀚𑀢𑁄 𑀆𑀕𑀢𑀁, 𑀅𑀢𑁆𑀢𑀦𑁄 𑀓𑀸𑀮𑁂 𑀉𑀝𑁆𑀞𑀺𑀢𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀤𑀳𑀭𑀦𑀸𑀝𑀓𑀧𑀸𑀲𑀸𑀤𑀁 𑀕𑀢𑁄. 𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 ‘‘𑀭𑀸𑀚𑀸𑀦𑀁 ¶ 𑀭𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀅𑀘𑁆𑀙𑀭𑀸𑀬𑁄 𑀯𑀺𑀬 𑀅𑀢𑀺𑀫𑀦𑁄𑀳𑀭𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀁 𑀧𑀬𑁄𑀚𑁂𑀲𑀼𑀁. 𑀭𑀸𑀚𑀸 𑁋 ‘‘𑀅𑀦𑀘𑁆𑀙𑀭𑀺𑀬𑀫𑁂𑀢𑀁 𑀤𑀳𑀭𑀸𑀦’’𑀦𑁆𑀢𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀫𑀚𑁆𑀛𑀺𑀫𑀦𑀸𑀝𑀓𑀧𑀸𑀲𑀸𑀤𑀁 𑀕𑀢𑁄. 𑀢𑀸𑀧𑀺 𑀦𑀸𑀝𑀓𑀺𑀢𑁆𑀣𑀺𑀬𑁄 𑀢𑀣𑁂𑀯 𑀅𑀓𑀁𑀲𑀼. 𑀲𑁄 𑀢𑀢𑁆𑀣𑀸𑀧𑀺 𑀢𑀣𑁂𑀯 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀫𑀳𑀸𑀦𑀸𑀝𑀓𑀧𑀸𑀲𑀸𑀤𑀁 𑀕𑀢𑁄. 𑀢𑀸𑀧𑀺 𑀦𑀸𑀝𑀓𑀺𑀢𑁆𑀣𑀺𑀬𑁄 𑀢𑀣𑁂𑀯 𑀅𑀓𑀁𑀲𑀼. 𑀭𑀸𑀚𑀸 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀅𑀢𑀻𑀢𑀸𑀦𑀁 𑀢𑀸𑀲𑀁 𑀫𑀳𑀮𑁆𑀮𑀓𑀪𑀸𑀯𑁂𑀦 𑀅𑀝𑁆𑀞𑀺𑀓𑀻𑀴𑀦𑀲𑀤𑀺𑀲𑀁 𑀦𑀘𑁆𑀘𑀁 𑀤𑀺𑀲𑁆𑀯𑀸 𑀕𑀻𑀢𑀜𑁆𑀘 𑀅𑀫𑀥𑀼𑀭𑀁 𑀲𑀼𑀢𑁆𑀯𑀸 𑀧𑀼𑀦𑀤𑁂𑀯 𑀤𑀳𑀭𑀦𑀸𑀝𑀓𑀧𑀸𑀲𑀸𑀤𑀁, 𑀧𑀼𑀦 𑀫𑀚𑁆𑀛𑀺𑀫𑀦𑀸𑀝𑀓𑀧𑀸𑀲𑀸𑀤𑀦𑁆𑀢𑀺 𑀏𑀯𑀁 𑀯𑀺𑀘𑀭𑀺𑀢𑁆𑀯𑀸 𑀓𑀢𑁆𑀣𑀘𑀺 𑀅𑀲𑀦𑁆𑀢𑀼𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀲𑀓𑁆𑀓𑀁 ¶ 𑀤𑁂𑀯𑀸𑀦𑀫𑀺𑀦𑁆𑀤𑀁 𑀅𑀘𑁆𑀙𑀭𑀸𑀬𑁄 𑀯𑀺𑀬 𑀫𑀁 𑀭𑀫𑀸𑀧𑁂𑀢𑀼𑀓𑀸𑀫𑀸 𑀲𑀩𑁆𑀩𑀣𑀸𑀫𑁂𑀦 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀁 𑀧𑀬𑁄𑀚𑁂𑀲𑀼𑀁, 𑀲𑁆𑀯𑀸𑀳𑀁 𑀓𑀢𑁆𑀣𑀘𑀺 𑀅𑀲𑀦𑁆𑀢𑀼𑀝𑁆𑀞𑁄 𑀮𑁄𑀪𑀫𑁂𑀯 𑀯𑀟𑁆𑀠𑁂𑀫𑀺, 𑀮𑁄𑀪𑁄 𑀘 𑀦𑀸𑀫𑁂𑀲 𑀅𑀧𑀸𑀬𑀕𑀫𑀦𑀻𑀬𑁄 𑀥𑀫𑁆𑀫𑁄, 𑀳𑀦𑁆𑀤𑀸𑀳𑀁 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀗𑁆𑀕𑁄 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀁, 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄;

𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀗𑁆𑀕𑁄 𑀏𑀲𑁄𑀢𑀺 𑀅𑀢𑁆𑀢𑀦𑁄 𑀉𑀧𑀪𑁄𑀕𑀁 𑀦𑀺𑀤𑁆𑀤𑀺𑀲𑀢𑀺. 𑀲𑁄 𑀳𑀺 𑀲𑀚𑁆𑀚𑀦𑁆𑀢𑀺 𑀢𑀢𑁆𑀣 𑀧𑀸𑀡𑀺𑀦𑁄 𑀓𑀤𑁆𑀤𑀫𑁂 𑀧𑀯𑀺𑀝𑁆𑀞𑁄 𑀳𑀢𑁆𑀣𑀻 𑀯𑀺𑀬𑀸𑀢𑀺 𑀲𑀗𑁆𑀕𑁄. 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑀪𑁄𑀕𑀓𑀸𑀮𑁂 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀓𑀸𑀫𑀸𑀯𑀘𑀭𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁄 𑀯𑀸 𑀮𑀸𑀫𑀓𑀝𑁆𑀞𑁂𑀦 𑀲𑁄𑀔𑁆𑀬𑀁 𑀧𑀭𑀺𑀢𑁆𑀢𑀁, 𑀯𑀺𑀚𑁆𑀚𑀼𑀧𑁆𑀧𑀪𑀸𑀬 𑀑𑀪𑀸𑀲𑀺𑀢𑀦𑀘𑁆𑀘𑀤𑀲𑁆𑀲𑀦𑀲𑀼𑀔𑀁 𑀯𑀺𑀬 𑀇𑀢𑁆𑀢𑀭𑀁 ¶ , 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄𑀢𑀺 𑀏𑀢𑁆𑀣 𑀘 𑀬𑁆𑀯𑀸𑀬𑀁 ‘‘𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀯𑀼𑀢𑁆𑀢𑁄. 𑀲𑁄 𑀬𑀤𑀺𑀤𑀁 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀬𑀤𑀺 𑀫𑀼𑀤𑁆𑀤𑀸𑀬, 𑀬𑀤𑀺 𑀕𑀡𑀦𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 (𑀫. 𑀦𑀺. 𑁧.𑁧𑁬𑁭) 𑀦𑀬𑁂𑀦𑁂𑀢𑁆𑀣 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑀁 𑀉𑀧𑀦𑀺𑀥𑀸𑀬 𑀅𑀧𑁆𑀧𑁄 𑀉𑀤𑀓𑀩𑀺𑀦𑁆𑀤𑀼𑀫𑀢𑁆𑀢𑁄 𑀳𑁄𑀢𑀺. 𑀅𑀣 𑀔𑁄 𑀤𑀼𑀓𑁆𑀔𑀫𑁂𑀯 𑀪𑀺𑀬𑁆𑀬𑁄 𑀩𑀳𑀼, 𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀲𑀤𑀺𑀲𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄’’𑀢𑀺. 𑀕𑀴𑁄 𑀏𑀲𑁄𑀢𑀺 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀆𑀓𑀟𑁆𑀠𑀦𑀯𑀲𑁂𑀦 𑀩𑀴𑀺𑀲𑁄 𑀯𑀺𑀬 𑀏𑀲𑁄 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸𑀢𑀺 𑀏𑀯𑀁 𑀜𑀢𑁆𑀯𑀸 𑀩𑀼𑀤𑁆𑀥𑀺𑀫𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀲𑀩𑁆𑀩𑀫𑁆𑀧𑁂𑀢𑀁 𑀧𑀳𑀸𑀬 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀲𑀗𑁆𑀕𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁨. 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀦𑀺𑀯𑀢𑁆𑀢𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 ¶ . 𑀲𑁄 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑁄 𑀅𑀚𑀺𑀦𑀺𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀘𑁆𑀘𑀁 𑀆𑀭𑀤𑁆𑀥𑁄 𑀅𑀦𑀺𑀝𑁆𑀞𑀧𑁂𑀢𑁆𑀯𑀸 𑀦 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦𑀁 𑀏𑀯𑀁 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 ¶ 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀯𑀦𑀤𑀸𑀳𑁄 𑀉𑀝𑁆𑀞𑀸𑀲𑀺. 𑀲𑁄 𑀅𑀕𑁆𑀕𑀺 𑀲𑀼𑀓𑁆𑀔𑀸𑀦𑀺 𑀘 𑀳𑀭𑀺𑀢𑀸𑀦𑀺 𑀘 𑀢𑀺𑀡𑀸𑀤𑀻𑀦𑀺 𑀤𑀳𑀦𑁆𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑁄 𑀏𑀯 𑀕𑀘𑁆𑀙𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀢𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. ‘‘𑀬𑀣𑀸𑀬𑀁 𑀯𑀦𑀤𑀸𑀳𑁄, 𑀏𑀯𑀫𑁂𑀯 𑀏𑀓𑀸𑀤𑀲𑀯𑀺𑀥𑁄 𑀅𑀕𑁆𑀕𑀺 𑀲𑀩𑁆𑀩𑀲𑀢𑁆𑀢𑁂 𑀤𑀳𑀦𑁆𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑁄𑀯 𑀕𑀘𑁆𑀙𑀢𑀺 𑀫𑀳𑀸𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀬𑀁 𑀅𑀕𑁆𑀕𑀺 𑀯𑀺𑀬 𑀅𑀭𑀺𑀬𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀓𑀺𑀮𑁂𑀲𑁂 𑀤𑀳𑀦𑁆𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑁄 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺? 𑀢𑀢𑁄 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀓𑁂𑀯𑀝𑁆𑀝𑁂 𑀅𑀤𑁆𑀤𑀲 𑀦𑀤𑀺𑀬𑀁 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁂 ¶ . 𑀢𑁂𑀲𑀁 𑀚𑀸𑀮𑀦𑁆𑀢𑀭𑀁 𑀧𑀯𑀺𑀝𑁆𑀞𑁄 𑀏𑀓𑁄 𑀫𑀳𑀸𑀫𑀘𑁆𑀙𑁄 𑀚𑀸𑀮𑀁 𑀪𑁂𑀢𑁆𑀯𑀸 𑀧𑀮𑀸𑀬𑀺. 𑀢𑁂 ‘‘𑀫𑀘𑁆𑀙𑁄 𑀚𑀸𑀮𑀁 𑀪𑁂𑀢𑁆𑀯𑀸 𑀕𑀢𑁄’’𑀢𑀺 𑀲𑀤𑁆𑀤𑀫𑀓𑀁𑀲𑀼. 𑀭𑀸𑀚𑀸 𑀢𑀫𑁆𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀚𑀸𑀮𑀁 𑀪𑁂𑀢𑁆𑀯𑀸 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺, 𑀇𑀫𑀜𑁆𑀘 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺, 𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻;

𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀲𑁆𑀲𑀸 𑀤𑀼𑀢𑀺𑀬𑀧𑀸𑀤𑁂 𑀚𑀸𑀮𑀦𑁆𑀢𑀺 𑀲𑀼𑀢𑁆𑀢𑀫𑀬𑀁 𑀯𑀼𑀘𑁆𑀘𑀢𑀺. 𑀅𑀫𑁆𑀩𑀽𑀢𑀺 𑀉𑀤𑀓𑀁, 𑀢𑀢𑁆𑀣 𑀘𑀭𑀢𑀻𑀢𑀺 𑀅𑀫𑁆𑀩𑀼𑀘𑀸𑀭𑀻, 𑀫𑀘𑁆𑀙𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀮𑀺𑀮𑁂 𑀅𑀫𑁆𑀩𑀼𑀘𑀸𑀭𑀻 𑀲𑀮𑀺𑀮𑀫𑁆𑀩𑀼𑀘𑀸𑀭𑀻, 𑀢𑀲𑁆𑀫𑀺𑀁 𑀦𑀤𑀻𑀲𑀮𑀺𑀮𑁂 𑀚𑀸𑀮𑀁 𑀪𑁂𑀢𑁆𑀯𑀸 𑀅𑀫𑁆𑀩𑀼𑀘𑀸𑀭𑀻𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑀧𑀸𑀤𑁂 𑀤𑀟𑁆𑀠𑀦𑁆𑀢𑀺 𑀤𑀟𑁆𑀠𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀬𑀣𑀸 𑀅𑀕𑁆𑀕𑀺 𑀤𑀟𑁆𑀠𑀝𑁆𑀞𑀸𑀦𑀁 𑀧𑀼𑀦 𑀦 𑀦𑀺𑀯𑀢𑁆𑀢𑀢𑀺, 𑀦 𑀢𑀢𑁆𑀣 𑀪𑀺𑀬𑁆𑀬𑁄 𑀆𑀕𑀘𑁆𑀙𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁 𑀓𑀸𑀫𑀕𑀼𑀡𑀝𑁆𑀞𑀸𑀦𑀁 𑀅𑀦𑀺𑀯𑀢𑁆𑀢𑀫𑀸𑀦𑁄 𑀢𑀢𑁆𑀣 𑀪𑀺𑀬𑁆𑀬𑁄 𑀅𑀦𑀸𑀕𑀘𑁆𑀙𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀦𑁆𑀤𑀸𑀮𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁩. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀘𑀓𑁆𑀔𑀼𑀮𑁄𑀮𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀸𑀤𑀮𑁄𑀮𑀩𑁆𑀭𑀳𑁆𑀫𑀤𑀢𑁆𑀢𑁄 𑀯𑀺𑀬 𑀦𑀸𑀝𑀓𑀤𑀲𑁆𑀲𑀦𑀫𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑁄 𑀅𑀲𑀦𑁆𑀢𑀼𑀝𑁆𑀞𑁄 𑀢𑀢𑁆𑀣 𑀢𑀢𑁆𑀣 𑀕𑀘𑁆𑀙𑀢𑀺, 𑀅𑀬𑀁 𑀢𑀁 𑀢𑀁 𑀦𑀸𑀝𑀓𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀦𑀸𑀝𑀓𑀧𑀭𑀺𑀯𑀢𑁆𑀢𑀤𑀲𑁆𑀲𑀦𑁂𑀦 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀓𑀺𑀭 𑀦𑀸𑀝𑀓𑀤𑀲𑁆𑀲𑀦𑀸𑀬 𑀆𑀕𑀢𑀁 𑀅𑀜𑁆𑀜𑀢𑀭𑀁 ¶ 𑀓𑀼𑀝𑀼𑀫𑁆𑀩𑀺𑀬𑀪𑀭𑀺𑀬𑀁 𑀤𑀺𑀲𑁆𑀯𑀸 𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀢𑁄 𑀲𑀁𑀯𑁂𑀕𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 ‘‘𑀅𑀳𑀁 𑀇𑀫𑀁 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑁄 𑀅𑀧𑀸𑀬𑀧𑀭𑀺𑀧𑀽𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀳𑀦𑁆𑀤 𑀦𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 ¶ 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀧𑀝𑀺𑀧𑀢𑁆𑀢𑀺𑀁 𑀕𑀭𑀳𑀦𑁆𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀕𑀼𑀡𑀤𑀻𑀧𑀺𑀓𑀁 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽 𑀦 𑀘 𑀧𑀸𑀤𑀮𑁄𑀮𑁄, 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄;

𑀅𑀦𑀯𑀲𑁆𑀲𑀼𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 ¶ 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀼, 𑀲𑀢𑁆𑀢 𑀕𑀻𑀯𑀝𑁆𑀞𑀻𑀦𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀧𑀭𑀺𑀯𑀚𑁆𑀚𑀕𑀳𑁂𑀢𑀩𑁆𑀩𑀤𑀲𑁆𑀲𑀦𑀢𑁆𑀣𑀁 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑀼 𑀳𑀦𑀼𑀓𑀝𑁆𑀞𑀺𑀦𑀸 𑀳𑀤𑀬𑀝𑁆𑀞𑀺𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑁄. 𑀏𑀯𑀜𑁆𑀳𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸 𑀦 𑀲𑀫𑀡𑀲𑀸𑀭𑀼𑀧𑁆𑀧𑀸 𑀳𑁄𑀢𑀻. 𑀦 𑀘 𑀧𑀸𑀤𑀮𑁄𑀮𑁄𑀢𑀺 𑀏𑀓𑀲𑁆𑀲 𑀤𑀼𑀢𑀺𑀬𑁄, 𑀤𑁆𑀯𑀺𑀦𑁆𑀦𑀁 𑀢𑀢𑀺𑀬𑁄𑀢𑀺 𑀏𑀯𑀁 𑀕𑀡𑀫𑀚𑁆𑀛𑀁 𑀧𑀯𑀺𑀲𑀺𑀢𑀼𑀓𑀸𑀫𑀢𑀸𑀬 𑀓𑀡𑁆𑀟𑀽𑀬𑀫𑀸𑀦𑀧𑀸𑀤𑁄 𑀯𑀺𑀬 𑀅𑀪𑀯𑀦𑁆𑀢𑁄, 𑀤𑀻𑀖𑀘𑀸𑀭𑀺𑀓𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀯𑀺𑀭𑀢𑁄 𑀯𑀸. 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀇𑀥 𑀯𑀺𑀲𑀼𑀁𑀯𑀼𑀢𑁆𑀢𑀸𑀯𑀲𑁂𑀲𑀯𑀲𑁂𑀦 𑀕𑁄𑀧𑀺𑀢𑀺𑀦𑁆𑀤𑁆𑀭𑀺𑀬𑁄. 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄𑀢𑀺 𑀫𑀸𑀦𑀲𑀁 𑀬𑁂𑀯 𑀫𑀸𑀦𑀲𑀸𑀦𑀁, 𑀢𑀁 𑀭𑀓𑁆𑀔𑀺𑀢𑀫𑀲𑁆𑀲𑀸𑀢𑀺 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄. 𑀬𑀣𑀸 𑀓𑀺𑀮𑁂𑀲𑁂𑀳𑀺 𑀦 𑀯𑀺𑀮𑀼𑀧𑁆𑀧𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂𑀲𑀼 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀺𑀮𑁂𑀲𑀅𑀦𑁆𑀯𑀸𑀲𑁆𑀲𑀯𑀯𑀺𑀭𑀳𑀺𑀢𑁄. 𑀅𑀧𑀭𑀺𑀟𑀬𑁆𑀳𑀫𑀸𑀦𑁄𑀢𑀺 𑀏𑀯𑀁 𑀅𑀦𑁆𑀯𑀸𑀲𑁆𑀲𑀯𑀯𑀺𑀭𑀳𑀸𑀯 𑀓𑀺𑀮𑁂𑀲𑀕𑁆𑀕𑀻𑀳𑀺 𑀅𑀧𑀭𑀺𑀟𑀬𑁆𑀳𑀫𑀸𑀦𑁄. 𑀩𑀳𑀺𑀤𑁆𑀥𑀸 𑀯𑀸 𑀅𑀦𑀯𑀲𑁆𑀲𑀼𑀢𑁄, 𑀅𑀚𑁆𑀛𑀢𑁆𑀢𑀁 𑀅𑀧𑀭𑀺𑀟𑀬𑁆𑀳𑀫𑀸𑀦𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁪. 𑀑𑀳𑀸𑀭𑀬𑀺𑀢𑁆𑀯𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀬𑀁 𑀅𑀜𑁆𑀜𑁄𑀧𑀺 𑀘𑀸𑀢𑀼𑀫𑀸𑀲𑀺𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀘𑀢𑀼𑀫𑀸𑀲𑁂 𑀘𑀢𑀼𑀫𑀸𑀲𑁂 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀕𑀺𑀫𑁆𑀳𑀸𑀦𑀁 𑀫𑀚𑁆𑀛𑀺𑀫𑁂 𑀫𑀸𑀲𑁂 𑀉𑀬𑁆𑀬𑀸𑀦𑀁 𑀧𑀯𑀺𑀲𑀦𑁆𑀢𑁄 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 ¶ 𑀧𑀢𑁆𑀢𑀲𑀜𑁆𑀙𑀦𑁆𑀦𑀁 𑀧𑀼𑀧𑁆𑀨𑀸𑀮𑀗𑁆𑀓𑀢𑀯𑀺𑀝𑀧𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀁 𑀤𑀺𑀲𑁆𑀯𑀸 𑀏𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀢𑀢𑁄 ‘‘𑀭𑀜𑁆𑀜𑀸 𑀅𑀕𑁆𑀕𑀧𑀼𑀧𑁆𑀨𑀁 𑀕𑀳𑀺𑀢’’𑀦𑁆𑀢𑀺 𑀅𑀜𑁆𑀜𑀢𑀭𑁄𑀧𑀺 𑀅𑀫𑀘𑁆𑀘𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀺𑀢𑁄 𑀏𑀯 𑀏𑀓𑀁 𑀧𑀼𑀧𑁆𑀨𑀁 𑀅𑀕𑁆𑀕𑀳𑁂𑀲𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀩𑁆𑀩𑁄 𑀩𑀮𑀓𑀸𑀬𑁄 𑀅𑀕𑁆𑀕𑀳𑁂𑀲𑀺. 𑀧𑀼𑀧𑁆𑀨𑀁 𑀅𑀦𑀲𑁆𑀲𑀸𑀤𑁂𑀦𑁆𑀢𑀸 ¶ 𑀧𑀢𑁆𑀢𑀫𑁆𑀧𑀺 𑀕𑀡𑁆𑀳𑀺𑀁𑀲𑀼. 𑀲𑁄 𑀭𑀼𑀓𑁆𑀔𑁄 𑀦𑀺𑀧𑁆𑀧𑀢𑁆𑀢𑀧𑀼𑀧𑁆𑀨𑁄 𑀔𑀦𑁆𑀥𑀫𑀢𑁆𑀢𑁄𑀯 𑀅𑀳𑁄𑀲𑀺. 𑀢𑀁 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑁂 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀢𑁄 𑀅𑀬𑀁 𑀭𑀼𑀓𑁆𑀔𑁄, 𑀫𑀫 𑀆𑀕𑀫𑀦𑀯𑁂𑀮𑀸𑀬𑀁 𑀫𑀡𑀺𑀯𑀡𑁆𑀡𑀲𑀸𑀔𑀦𑁆𑀢𑀭𑁂𑀲𑀼 𑀧𑀯𑀸𑀴𑀲𑀤𑀺𑀲𑀧𑀼𑀧𑁆𑀨𑀸𑀮𑀗𑁆𑀓𑀢𑁄 𑀅𑀳𑁄𑀲𑀺, 𑀇𑀤𑀸𑀦𑀺 𑀦𑀺𑀧𑁆𑀧𑀢𑁆𑀢𑀧𑀼𑀧𑁆𑀨𑁄 𑀚𑀸𑀢𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀢𑀲𑁆𑀲𑁂𑀯𑀸𑀯𑀺𑀤𑀽𑀭𑁂 𑀅𑀧𑀼𑀧𑁆𑀨𑀺𑀢𑀁 𑀭𑀼𑀓𑁆𑀔𑀁 𑀲𑀜𑁆𑀙𑀦𑁆𑀦𑀧𑀮𑀸𑀲𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀭𑀼𑀓𑁆𑀔𑁄 𑀧𑀼𑀧𑁆𑀨𑀪𑀭𑀺𑀢𑀲𑀸𑀔𑀢𑁆𑀢𑀸 𑀩𑀳𑀼𑀚𑀦𑀲𑁆𑀲 𑀮𑁄𑀪𑀦𑀻𑀬𑁄 𑀅𑀳𑁄𑀲𑀺, 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦𑁂𑀯 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀅𑀬𑀁 𑀧𑀦𑀜𑁆𑀜𑁄 𑀅𑀮𑁄𑀪𑀦𑀻𑀬𑀢𑁆𑀢𑀸 𑀢𑀣𑁂𑀯 𑀞𑀺𑀢𑁄. 𑀇𑀤𑀫𑁆𑀧𑀺 𑀭𑀚𑁆𑀚𑀁 𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑁄 ¶ 𑀯𑀺𑀬 𑀮𑁄𑀪𑀦𑀻𑀬𑀁, 𑀪𑀺𑀓𑁆𑀔𑀼𑀪𑀸𑀯𑁄 𑀧𑀦 𑀅𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑁄 𑀯𑀺𑀬 𑀅𑀮𑁄𑀪𑀦𑀻𑀬𑁄. 𑀢𑀲𑁆𑀫𑀸 𑀬𑀸𑀯 𑀇𑀤𑀫𑁆𑀧𑀺 𑀅𑀬𑀁 𑀭𑀼𑀓𑁆𑀔𑁄 𑀯𑀺𑀬 𑀦 𑀯𑀺𑀮𑀼𑀧𑁆𑀧𑀢𑀺, 𑀢𑀸𑀯 𑀅𑀬𑀫𑀜𑁆𑀜𑁄 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀏𑀯𑀁 𑀓𑀸𑀲𑀸𑀯𑁂𑀦 𑀧𑀭𑀺𑀲𑀜𑁆𑀙𑀦𑁆𑀦𑁂𑀦 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑁄;

𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀧𑀸𑀤𑀲𑁆𑀲 𑀕𑁂𑀳𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀲𑀸𑀬𑀯𑀢𑁆𑀣𑁄 𑀳𑀼𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀧𑀸𑀭𑀺𑀘𑁆𑀙𑀢𑁆𑀢𑀓𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀢𑀢𑀺𑀬𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁬𑁫. 𑀭𑀲𑁂𑀲𑀽𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀉𑀬𑁆𑀬𑀸𑀦𑁂 𑀅𑀫𑀘𑁆𑀘𑀧𑀼𑀢𑁆𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀁 𑀓𑀻𑀴𑀢𑀺. 𑀢𑀲𑁆𑀲 𑀲𑀽𑀤𑁄 ¶ 𑀲𑀩𑁆𑀩𑀫𑀁𑀲𑀸𑀦𑀁 𑀭𑀲𑀁 𑀕𑀳𑁂𑀢𑁆𑀯𑀸 𑀅𑀢𑀻𑀯 𑀲𑀼𑀲𑀗𑁆𑀔𑀢𑀁 𑀅𑀫𑀢𑀓𑀧𑁆𑀧𑀁 𑀅𑀦𑁆𑀢𑀭𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀲𑁄 𑀢𑀢𑁆𑀣 𑀕𑁂𑀥𑀫𑀸𑀧𑀦𑁆𑀦𑁄 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸𑀯 𑀪𑀼𑀜𑁆𑀚𑀺. 𑀉𑀤𑀓𑀓𑀻𑀴𑀢𑁄 𑀘 𑀅𑀢𑀺𑀯𑀺𑀓𑀸𑀮𑁂 𑀦𑀺𑀓𑁆𑀔𑀦𑁆𑀢𑁄 𑀲𑀻𑀖𑀁 𑀲𑀻𑀖𑀁 𑀪𑀼𑀜𑁆𑀚𑀺. 𑀬𑁂𑀳𑀺 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀪𑀼𑀜𑁆𑀚𑀢𑀺, 𑀦 𑀢𑁂𑀲𑀁 𑀓𑀜𑁆𑀘𑀺 𑀲𑀭𑀺. 𑀅𑀣 𑀧𑀘𑁆𑀙𑀸 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀳𑁄, 𑀫𑀬𑀸 𑀧𑀸𑀧𑀁 𑀓𑀢𑀁, 𑀬𑁆𑀯𑀸𑀳𑀁 𑀭𑀲𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄 𑀲𑀩𑁆𑀩𑀚𑀦𑀁 𑀯𑀺𑀲𑀭𑀺𑀢𑁆𑀯𑀸 ¶ 𑀏𑀓𑀓𑁄𑀯 𑀪𑀼𑀜𑁆𑀚𑀺𑀁. 𑀳𑀦𑁆𑀤 𑀭𑀲𑀢𑀡𑁆𑀳𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀧𑀝𑀺𑀧𑀢𑁆𑀢𑀺𑀁 𑀕𑀭𑀳𑀦𑁆𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀕𑀼𑀡𑀤𑀻𑀧𑀺𑀓𑀁 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄, 𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻;

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀭𑀲𑁂𑀲𑀽𑀢𑀺 𑀅𑀫𑁆𑀩𑀺𑀮𑀫𑀥𑀼𑀭𑀢𑀺𑀢𑁆𑀢𑀓𑀓𑀝𑀼𑀓𑀮𑁄𑀡𑀺𑀓𑀔𑀸𑀭𑀺𑀓𑀓𑀲𑀸𑀯𑀸𑀤𑀺𑀪𑁂𑀤𑁂𑀲𑀼 𑀲𑀸𑀬𑀦𑀻𑀬𑁂𑀲𑀼. 𑀕𑁂𑀥𑀁 𑀅𑀓𑀭𑀦𑁆𑀢𑀺 𑀕𑀺𑀤𑁆𑀥𑀺𑀁 𑀅𑀓𑀭𑁄𑀦𑁆𑀢𑁄, 𑀢𑀡𑁆𑀳𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁄𑀮𑁄𑀢𑀺 ‘‘𑀇𑀤𑀁 𑀲𑀸𑀬𑀺𑀲𑁆𑀲𑀸𑀫𑀺, 𑀇𑀤𑀁 𑀲𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀭𑀲𑀯𑀺𑀲𑁂𑀲𑁂𑀲𑀼 𑀅𑀦𑀸𑀓𑀼𑀮𑁄. 𑀅𑀦𑀜𑁆𑀜𑀧𑁄𑀲𑀻𑀢𑀺 𑀧𑁄𑀲𑁂𑀢𑀩𑁆𑀩𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀯𑀺𑀭𑀳𑀺𑀢𑁄 ¶ , 𑀓𑀸𑀬𑀲𑀦𑁆𑀥𑀸𑀭𑀡𑀫𑀢𑁆𑀢𑁂𑀦 𑀲𑀦𑁆𑀢𑀼𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀯𑀸 𑀧𑀼𑀩𑁆𑀩𑁂 𑀉𑀬𑁆𑀬𑀸𑀦𑁂 𑀭𑀲𑁂𑀲𑀼 𑀕𑁂𑀥𑀓𑀭𑀡𑀮𑁄𑀮𑁄 𑀳𑀼𑀢𑁆𑀯𑀸 𑀅𑀜𑁆𑀜𑀧𑁄𑀲𑀻 𑀆𑀲𑀺𑀁, 𑀏𑀯𑀁 𑀅𑀳𑀼𑀢𑁆𑀯𑀸 𑀬𑀸𑀬 𑀢𑀡𑁆𑀳𑀸𑀬 𑀮𑁄𑀮𑁄 𑀳𑀼𑀢𑁆𑀯𑀸 𑀭𑀲𑁂𑀲𑀼 𑀕𑁂𑀥𑀁 𑀓𑀭𑁄𑀢𑀺. 𑀢𑀁 𑀢𑀡𑁆𑀳𑀁 𑀳𑀺𑀢𑁆𑀯𑀸 𑀆𑀬𑀢𑀺𑀁 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀅𑀜𑁆𑀜𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀜𑁆𑀜𑀧𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀅𑀢𑁆𑀣𑀪𑀜𑁆𑀚𑀦𑀓𑀝𑁆𑀞𑁂𑀦 𑀅𑀜𑁆𑀜𑁂𑀢𑀺 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀁 𑀅𑀧𑁄𑀲𑀦𑁂𑀦 𑀅𑀦𑀜𑁆𑀜𑀧𑁄𑀲𑀻𑀢𑀺 𑀅𑀬𑀫𑁆𑀧𑁂𑀢𑁆𑀣 𑀅𑀢𑁆𑀣𑁄. 𑀲𑀧𑀤𑀸𑀦𑀘𑀸𑀭𑀻𑀢𑀺 𑀅𑀯𑁄𑀓𑁆𑀓𑀫𑁆𑀫𑀘𑀸𑀭𑀻 𑀅𑀦𑀼𑀧𑀼𑀩𑁆𑀩𑀘𑀸𑀭𑀻, 𑀖𑀭𑀧𑀝𑀺𑀧𑀸𑀝𑀺𑀁 𑀅𑀙𑀟𑁆𑀟𑁂𑀢𑁆𑀯𑀸 𑀅𑀟𑁆𑀠𑀓𑀼𑀮𑀜𑁆𑀘 𑀤𑀮𑀺𑀤𑁆𑀤𑀓𑀼𑀮𑀜𑁆𑀘 𑀦𑀺𑀭𑀦𑁆𑀢𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀺𑀮𑁂𑀲𑀯𑀲𑁂𑀦 𑀅𑀮𑀕𑁆𑀕𑀘𑀺𑀢𑁆𑀢𑁄, 𑀘𑀦𑁆𑀤𑀽𑀧𑀫𑁄 𑀦𑀺𑀘𑁆𑀘𑀦𑀯𑀓𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀭𑀲𑀕𑁂𑀥𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁬. 𑀧𑀳𑀸𑀬 ¶ 𑀧𑀜𑁆𑀘𑀸𑀯𑀭𑀡𑀸𑀦𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀧𑀞𑀫𑀚𑁆𑀛𑀸𑀦𑀮𑀸𑀪𑀻 𑀅𑀳𑁄𑀲𑀺. 𑀲𑁄 𑀛𑀸𑀦𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄, 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂;

𑀅𑀦𑀺𑀲𑁆𑀲𑀺𑀢𑁄 𑀙𑁂𑀢𑁆𑀯 𑀲𑀺𑀦𑁂𑀳𑀤𑁄𑀲𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀆𑀯𑀭𑀡𑀸𑀦𑀻𑀢𑀺 𑀦𑀻𑀯𑀭𑀡𑀸𑀦𑁂𑀯. 𑀢𑀸𑀦𑀺 𑀅𑀢𑁆𑀣𑀢𑁄 𑀉𑀭𑀕𑀲𑀼𑀢𑁆𑀢𑁂 ¶ 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀅𑀩𑁆𑀪𑀸𑀤𑀬𑁄 𑀯𑀺𑀬 𑀘𑀦𑁆𑀤𑀲𑀽𑀭𑀺𑀬𑁂 𑀘𑁂𑀢𑁄 𑀆𑀯𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀯𑀭𑀡𑀸𑀦𑀺 𑀘𑁂𑀢𑀲𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀧𑀳𑀸𑀬. 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀉𑀧𑀕𑀫𑁆𑀫 𑀘𑀺𑀢𑁆𑀢𑀁 𑀯𑀺𑀩𑀸𑀥𑁂𑀦𑁆𑀢𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂, 𑀯𑀢𑁆𑀣𑁄𑀧𑀫𑀸𑀤𑀻𑀲𑀼 𑀯𑀼𑀢𑁆𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀯𑀸. 𑀩𑁆𑀬𑀧𑀦𑀼𑀚𑁆𑀚𑀸𑀢𑀺 𑀧𑀦𑀼𑀤𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀧𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑁂. 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀦𑁆𑀦𑁄 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀦𑀺𑀲𑁆𑀲𑀺𑀢𑁄. 𑀲𑁂𑀲𑀫𑀕𑁆𑀕𑁂𑀳𑀺 𑀙𑁂𑀢𑁆𑀯𑀸 𑀢𑁂𑀥𑀸𑀢𑀼𑀓𑀁 𑀲𑀺𑀦𑁂𑀳𑀤𑁄𑀲𑀁, 𑀢𑀡𑁆𑀳𑀸𑀭𑀸𑀕𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀦𑁂𑀳𑁄 𑀏𑀯 𑀳𑀺 𑀕𑀼𑀡𑀧𑀝𑀺𑀧𑀓𑁆𑀔𑀢𑁄 𑀲𑀺𑀦𑁂𑀳𑀤𑁄𑀲𑁄𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀯𑀭𑀡𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁭. 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 ¶ 𑀅𑀳𑁄𑀲𑀺. 𑀲𑁄 𑀛𑀸𑀦𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀔𑀜𑁆𑀘, 𑀧𑀼𑀩𑁆𑀩𑁂𑀯 𑀘 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁;

𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 ¶ 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦𑀸𑀢𑀺 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸, 𑀙𑀟𑁆𑀟𑁂𑀢𑁆𑀯𑀸 𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀁 𑀤𑀼𑀔𑀜𑁆𑀘𑀸𑀢𑀺 𑀓𑀸𑀬𑀺𑀓𑀁 𑀲𑀸𑀢𑀸𑀲𑀸𑀢𑀁. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀦𑁆𑀢𑀺 𑀘𑁂𑀢𑀲𑀺𑀓𑀁 𑀲𑀸𑀢𑀸𑀲𑀸𑀢𑀁. 𑀉𑀧𑁂𑀓𑁆𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁. 𑀲𑀫𑀣𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀣𑀫𑁂𑀯. 𑀯𑀺𑀲𑀼𑀤𑁆𑀥𑀦𑁆𑀢𑀺 𑀧𑀜𑁆𑀘𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀗𑁆𑀔𑀸𑀢𑁂𑀳𑀺 𑀦𑀯𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑀁, 𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀫𑀺𑀯 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀓𑁆𑀔𑀜𑁆𑀘 𑀧𑀼𑀩𑁆𑀩𑁂𑀯 𑀧𑀞𑀫𑀚𑁆𑀛𑀸𑀦𑀼𑀧𑀘𑀸𑀭𑀪𑀽𑀫𑀺𑀬𑀁𑀬𑁂𑀯 𑀤𑀼𑀓𑁆𑀔𑀁, 𑀢𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑀪𑀽𑀫𑀺𑀬𑀁 𑀲𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀦 𑀆𑀤𑀺𑀢𑁄 𑀯𑀼𑀢𑁆𑀢𑀁 𑀘𑀓𑀸𑀭𑀁 𑀧𑀭𑀢𑁄 𑀦𑁂𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀜𑁆𑀘 ¶ 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀧𑀼𑀩𑁆𑀩𑁂𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀢𑁂𑀦 𑀲𑁄𑀫𑀦𑀲𑁆𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑀘𑀸𑀭𑁂, 𑀤𑁄𑀫𑀦𑀲𑁆𑀲𑀜𑁆𑀘 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀏𑀢𑀸𑀦𑀺 𑀳𑀺 𑀏𑀢𑁂𑀲𑀁 𑀧𑀭𑀺𑀬𑀸𑀬𑀢𑁄 𑀧𑀳𑀸𑀦𑀝𑁆𑀞𑀸𑀦𑀸𑀦𑀺. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀤𑀼𑀓𑁆𑀔𑀲𑁆𑀲 𑀧𑀞𑀫𑀚𑁆𑀛𑀸𑀦𑀁, 𑀤𑁄𑀫𑀦𑀲𑁆𑀲𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀁, 𑀲𑀼𑀔𑀲𑁆𑀲 𑀢𑀢𑀺𑀬𑀚𑁆𑀛𑀸𑀦𑀁, 𑀲𑁄𑀫𑀦𑀲𑁆𑀲𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀳𑀸𑀦𑀝𑁆𑀞𑀸𑀦𑀁. 𑀬𑀣𑀸𑀳 𑁋 ‘‘𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁫𑁧𑁦). 𑀢𑀁 𑀲𑀩𑁆𑀩𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁬𑁫) 𑀯𑀼𑀢𑁆𑀢𑀁. 𑀬𑀢𑁄 𑀧𑀼𑀩𑁆𑀩𑁂𑀯 𑀢𑀻𑀲𑀼 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀸𑀦𑀺 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸 𑀏𑀢𑁆𑀣𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑁄𑀫𑀦𑀲𑁆𑀲𑀁 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁 𑀏𑀓𑁄 𑀘𑀭𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁮. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀧𑀘𑁆𑀘𑀦𑁆𑀢𑀭𑀸𑀚𑀸 𑀲𑀳𑀲𑁆𑀲𑀬𑁄𑀥𑀧𑀭𑀺𑀫𑀸𑀡𑀩𑀮𑀓𑀸𑀬𑁄 𑀭𑀚𑁆𑀚𑁂𑀦 𑀔𑀼𑀤𑁆𑀤𑀓𑁄, 𑀧𑀜𑁆𑀜𑀸𑀬 𑀫𑀳𑀦𑁆𑀢𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 ‘‘𑀓𑀺𑀜𑁆𑀘𑀸𑀧𑀺 𑀅𑀳𑀁 𑀔𑀼𑀤𑁆𑀤𑀓𑁄, 𑀧𑀜𑁆𑀜𑀯𑀢𑀸 𑀘 𑀧𑀦 𑀲𑀓𑁆𑀓𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀕𑀳𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀫𑀦𑁆𑀢𑀭𑀜𑁆𑀜𑁄 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀫𑁂 𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀢𑀢𑁄 𑀲𑁄 𑀅𑀢𑁆𑀢𑀦𑁄 ¶ 𑀅𑀫𑀘𑁆𑀘𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑀸 𑀢𑀼𑀫𑁆𑀳𑁂 𑀅𑀦𑀸𑀧𑀼𑀘𑁆𑀙𑀸𑀬𑁂𑀯 𑀲𑀸𑀳𑀲𑀁 𑀓𑀢𑀁, 𑀅𑀫𑀼𑀓𑀲𑁆𑀲 𑀭𑀜𑁆𑀜𑁄 𑀏𑀯𑀁 𑀧𑀳𑀺𑀢𑀁, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀲𑁄 𑀤𑀽𑀢𑁄 𑀦𑀺𑀯𑀢𑁆𑀢𑁂𑀢𑀼’’𑀦𑁆𑀢𑀺? ‘‘𑀦 𑀲𑀓𑁆𑀓𑀸, 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀬𑀤𑀺 𑀏𑀯𑀁 𑀯𑀺𑀦𑀸𑀲𑀺𑀢𑀫𑁆𑀳𑀸 𑀢𑀬𑀸, 𑀢𑁂𑀦 𑀳𑀺 𑀤𑀼𑀓𑁆𑀔𑀁 ¶ 𑀅𑀜𑁆𑀜𑀲𑁆𑀲 𑀲𑀢𑁆𑀣𑁂𑀦 𑀫𑀭𑀺𑀢𑀼𑀁. 𑀳𑀦𑁆𑀤, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀫𑀭𑀸𑀫, 𑀅𑀢𑁆𑀢𑀸𑀦𑀁 𑀧𑀳𑀭𑀺𑀢𑁆𑀯𑀸 𑀫𑀭𑀸𑀫, 𑀉𑀩𑁆𑀩𑀦𑁆𑀥𑀸𑀫, 𑀯𑀺𑀲𑀁 𑀔𑀸𑀤𑀸𑀫𑀸’’𑀢𑀺. 𑀏𑀯𑀁 𑀢𑁂𑀲𑀼 𑀏𑀓𑀫𑁂𑀓𑁄 𑀫𑀭𑀡𑀫𑁂𑀯 𑀲𑀁𑀯𑀡𑁆𑀡𑁂𑀢𑀺. 𑀢𑀢𑁄 𑀭𑀸𑀚𑀸 𑁋 ‘‘𑀓𑀺𑀁 𑀫𑁂, 𑀇𑀫𑁂𑀳𑀺, 𑀅𑀢𑁆𑀣𑀺, 𑀪𑀡𑁂, 𑀫𑀬𑁆𑀳𑀁 𑀬𑁄𑀥𑀸’’𑀢𑀺 𑀆𑀳. 𑀅𑀣 ‘‘𑀅𑀳𑀁, 𑀫𑀳𑀸𑀭𑀸𑀚, 𑀬𑁄𑀥𑁄, 𑀅𑀳𑀁, 𑀫𑀳𑀸𑀭𑀸𑀚, 𑀬𑁄𑀥𑁄’’𑀢𑀺 𑀢𑀁 𑀬𑁄𑀥𑀲𑀳𑀲𑁆𑀲𑀁 𑀉𑀝𑁆𑀞𑀳𑀺.

𑀭𑀸𑀚𑀸 ‘‘𑀏𑀢𑁂 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀫𑀦𑁆𑀢𑁆𑀯𑀸 ¶ 𑀘𑀺𑀢𑀓𑀁 𑀲𑀚𑁆𑀚𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑀸, 𑀪𑀡𑁂, 𑀇𑀤𑀁 𑀦𑀸𑀫 𑀲𑀸𑀳𑀲𑀁 𑀓𑀢𑀁, 𑀢𑀁 𑀫𑁂 𑀅𑀫𑀘𑁆𑀘𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀲𑁄𑀳𑀁 𑀘𑀺𑀢𑀓𑀁 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀯𑀺𑀲𑀺𑀲𑁆𑀲𑀢𑀺, 𑀓𑁂𑀦 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀲𑀢𑀸 𑀬𑁄𑀥𑀸 𑀉𑀝𑁆𑀞𑀳𑀺𑀁𑀲𑀼 𑁋 ‘‘𑀫𑀬𑀁, 𑀫𑀳𑀸𑀭𑀸𑀚, 𑀧𑀯𑀺𑀲𑀸𑀫𑀸’’𑀢𑀺. 𑀢𑀢𑁄 𑀭𑀸𑀚𑀸 𑀅𑀧𑀭𑁂 𑀧𑀜𑁆𑀘𑀲𑀢𑁂 𑀬𑁄𑀥𑁂 𑀆𑀳 𑁋 ‘‘𑀢𑀼𑀫𑁆𑀳𑁂 𑀇𑀤𑀸𑀦𑀺, 𑀢𑀸𑀢𑀸, 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀦𑀸𑀬𑀁, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀓𑀸𑀭𑁄, 𑀇𑀢𑁆𑀣𑀺𑀓𑀺𑀭𑀺𑀬𑀸 𑀏𑀲𑀸, 𑀅𑀧𑀺𑀘 𑀫𑀳𑀸𑀭𑀸𑀚𑁂𑀦 𑀧𑀝𑀺𑀭𑀜𑁆𑀜𑁄 𑀤𑀽𑀢𑁄 𑀧𑁂𑀲𑀺𑀢𑁄, 𑀢𑁂𑀦 𑀫𑀬𑀁 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀭𑀸𑀚𑀸 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀢𑀼𑀫𑁆𑀳𑁂𑀳𑀺 𑀫𑀫 𑀚𑀻𑀯𑀺𑀢’’𑀦𑁆𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀢𑁂𑀦 𑀬𑁄𑀥𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀕𑀦𑁆𑀢𑁆𑀯𑀸 𑀭𑀚𑁆𑀚𑀲𑀻𑀫𑀸𑀬 𑀦𑀺𑀲𑀻𑀤𑀺.

𑀲𑁄𑀧𑀺 𑀧𑀝𑀺𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀭𑁂, 𑀲𑁄 𑀔𑀼𑀤𑁆𑀤𑀓𑀭𑀸𑀚𑀸 𑀫𑀫 𑀤𑀸𑀲𑀲𑁆𑀲𑀸𑀧𑀺 𑀦𑀧𑁆𑀧𑀳𑁄𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀁 𑀩𑀮𑀓𑀸𑀬𑀁 𑀆𑀤𑀸𑀬 𑀬𑀼𑀚𑁆𑀛𑀺𑀢𑀼𑀁 𑀦𑀺𑀓𑁆𑀔𑀫𑀺. 𑀔𑀼𑀤𑁆𑀤𑀓𑀭𑀸𑀚𑀸 𑀢𑀁 𑀅𑀩𑁆𑀪𑀼𑀬𑁆𑀬𑀸𑀢𑀁 𑀤𑀺𑀲𑁆𑀯𑀸 𑀩𑀮𑀓𑀸𑀬𑀁 𑀆𑀳 𑁋 ‘‘𑀢𑀸𑀢𑀸, 𑀢𑀼𑀫𑁆𑀳𑁂 𑀦 𑀩𑀳𑀼𑀓𑀸; 𑀲𑀩𑁆𑀩𑁂 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸, 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸, 𑀲𑀻𑀖𑀁 𑀇𑀫𑀲𑁆𑀲 𑀭𑀜𑁆𑀜𑁄 𑀧𑀼𑀭𑀢𑁄 𑀉𑀚𑀼𑀓𑀁 𑀏𑀯 𑀕𑀘𑁆𑀙𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀅𑀣 𑀲𑀸 𑀲𑁂𑀦𑀸 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑀭𑀫𑀤𑀸𑀲𑀺. 𑀢𑁂 𑀢𑀁 𑀭𑀸𑀚𑀸𑀦𑀁 𑀚𑀻𑀯𑀕𑁆𑀕𑀸𑀳𑀁 𑀕𑀡𑁆𑀳𑀺𑀁𑀲𑀼, 𑀅𑀜𑁆𑀜𑁂 𑀬𑁄𑀥𑀸 𑀧𑀮𑀸𑀬𑀺𑀁𑀲𑀼. 𑀔𑀼𑀤𑁆𑀤𑀓𑀭𑀸𑀚𑀸 ‘‘𑀢𑀁 𑀫𑀸𑀭𑁂𑀫𑀻’’𑀢𑀺 𑀧𑀼𑀭𑀢𑁄 𑀥𑀸𑀯𑀢𑀺, 𑀧𑀝𑀺𑀭𑀸𑀚𑀸 𑀢𑀁 𑀅𑀪𑀬𑀁 𑀬𑀸𑀘𑀺. 𑀢𑀢𑁄 𑀢𑀲𑁆𑀲 𑀅𑀪𑀬𑀁 𑀤𑀢𑁆𑀯𑀸, 𑀲𑀧𑀣𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀢𑀁 𑀅𑀢𑁆𑀢𑀦𑁄 𑀫𑀦𑀼𑀲𑁆𑀲𑀁 𑀓𑀢𑁆𑀯𑀸, 𑀢𑁂𑀦 𑀲𑀳 𑀅𑀜𑁆𑀜𑀁 𑀭𑀸𑀚𑀸𑀦𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸, 𑀢𑀲𑁆𑀲 𑀭𑀚𑁆𑀚𑀲𑀻𑀫𑀸𑀬 𑀞𑀢𑁆𑀯𑀸 𑀧𑁂𑀲𑁂𑀲𑀺 𑁋 ‘‘𑀭𑀚𑁆𑀚𑀁 𑀯𑀸 𑀫𑁂 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀲𑁄 ‘‘𑀅𑀳𑀁 𑀏𑀓𑀬𑀼𑀤𑁆𑀥𑀫𑁆𑀧𑀺 𑀦 𑀲𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀩𑁆𑀩𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀅𑀦𑁆𑀢𑁂 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀫𑁆𑀧𑀺 𑀅𑀕𑁆𑀕𑀳𑁂𑀲𑀺.

𑀲𑁄 ¶ 𑀏𑀓𑀲𑀢𑀭𑀸𑀚𑀧𑀭𑀺𑀯𑀼𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀔𑀼𑀤𑁆𑀤𑀓𑁄 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀅𑀢𑁆𑀢𑀦𑁄 𑀜𑀸𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀲𑁆𑀲 𑀇𑀲𑁆𑀲𑀭𑁄 𑀚𑀸𑀢𑁄. 𑀢𑀁 ¶ 𑀔𑁄 𑀧𑀦 ¶ 𑀫𑁂 𑀜𑀸𑀡𑀁 𑀮𑁄𑀓𑀺𑀬𑀯𑀻𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀢𑀺, 𑀲𑀸𑀥𑀼 𑀯𑀢𑀲𑁆𑀲 𑀲𑁆𑀯𑀸𑀳𑀁 𑀇𑀫𑀺𑀦𑀸 𑀜𑀸𑀡𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀕𑀯𑁂𑀲𑁂𑀬𑁆𑀬’’𑀦𑁆𑀢𑀺. 𑀢𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀭𑀚𑁆𑀚𑀁 𑀤𑀢𑁆𑀯𑀸, 𑀧𑀼𑀢𑁆𑀢𑀤𑀸𑀭𑀜𑁆𑀘 𑀲𑀓𑀚𑀦𑀧𑀤𑀫𑁂𑀯 𑀧𑁂𑀲𑁂𑀢𑁆𑀯𑀸, 𑀧𑀩𑁆𑀩𑀚𑁆𑀚𑀁 𑀲𑀫𑀸𑀤𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸, 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀆𑀭𑀤𑁆𑀥𑀯𑀺𑀭𑀺𑀬𑁄 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸, 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺;

𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀆𑀭𑀤𑁆𑀥𑀁 𑀯𑀻𑀭𑀺𑀬𑀫𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀺𑀭𑀺𑀬𑁄. 𑀏𑀢𑁂𑀦 𑀅𑀢𑁆𑀢𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀁 𑀆𑀤𑀺𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀧𑀭𑀫𑀢𑁆𑀣𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀧𑀢𑁆𑀢𑀺𑀬𑀸 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸. 𑀏𑀢𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀧𑀢𑁆𑀢𑀩𑁆𑀩𑀨𑀮𑀁 𑀤𑀲𑁆𑀲𑁂𑀢𑀺. 𑀅𑀮𑀻𑀦𑀘𑀺𑀢𑁆𑀢𑁄𑀢𑀺 𑀏𑀢𑁂𑀦 𑀩𑀮𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀮𑀻𑀦𑀢𑀁 𑀤𑀲𑁆𑀲𑁂𑀢𑀺. 𑀅𑀓𑀼𑀲𑀻𑀢𑀯𑀼𑀢𑁆𑀢𑀻𑀢𑀺 𑀏𑀢𑁂𑀦 𑀞𑀸𑀦𑀆𑀲𑀦𑀘𑀗𑁆𑀓𑀫𑀦𑀸𑀤𑀻𑀲𑀼 𑀓𑀸𑀬𑀲𑁆𑀲 𑀅𑀦𑀯𑀲𑀻𑀤𑀦𑀁. 𑀤𑀴𑁆𑀳𑀦𑀺𑀓𑁆𑀓𑀫𑁄𑀢𑀺 𑀏𑀢𑁂𑀦 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀧𑀯𑀢𑁆𑀢𑀁 𑀧𑀤𑀳𑀦𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺, 𑀬𑀁 𑀢𑀁 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀤𑀻𑀲𑀼 𑀧𑀤𑀳𑀦𑁆𑀢𑁄 ‘‘𑀓𑀸𑀬𑁂𑀦 𑀘𑁂𑀯 𑀧𑀭𑀫𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀦𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀏𑀢𑁂𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀢𑀜𑁆𑀳𑀺 𑀤𑀴𑁆𑀳𑀜𑁆𑀘 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑀢𑁆𑀢𑀸, 𑀦𑀺𑀓𑁆𑀓𑀫𑁄 𑀘 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀸 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄𑀧𑀺 𑀤𑀴𑁆𑀳𑁄 𑀦𑀺𑀓𑁆𑀓𑀫𑁄 𑀅𑀲𑁆𑀲𑀸𑀢𑀺 ‘‘𑀤𑀴𑁆𑀳𑀦𑀺𑀓𑁆𑀓𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀣𑀸𑀫𑀩𑀮𑀽𑀧𑀧𑀦𑁆𑀦𑁄𑀢𑀺 𑀫𑀕𑁆𑀕𑀓𑁆𑀔𑀡𑁂 𑀓𑀸𑀬𑀣𑀸𑀫𑁂𑀦 𑀜𑀸𑀡𑀩𑀮𑁂𑀦 𑀘 𑀉𑀧𑀧𑀦𑁆𑀦𑁄, 𑀅𑀣 𑀯𑀸 𑀣𑀸𑀫𑀪𑀽𑀢𑁂𑀦 𑀩𑀮𑁂𑀦 𑀉𑀧𑀧𑀦𑁆𑀦𑁄𑀢𑀺 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀣𑀺𑀭𑀜𑀸𑀡𑀩𑀮𑀽𑀧𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑁄𑀕𑀁 𑀤𑀻𑀧𑁂𑀦𑁆𑀢𑁄 𑀬𑁄𑀦𑀺𑀲𑁄 𑀧𑀤𑀳𑀦𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀼𑀩𑁆𑀩𑀪𑀸𑀕𑀫𑀚𑁆𑀛𑀺𑀫𑀉𑀓𑁆𑀓𑀝𑁆𑀞𑀯𑀻𑀭𑀺𑀬𑀯𑀲𑁂𑀦 𑀯𑀸 𑀢𑀬𑁄𑀧𑀺 𑀧𑀸𑀤𑀸 𑀬𑁄𑀚𑁂𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀭𑀤𑁆𑀥𑀯𑀻𑀭𑀺𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬𑁯. 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 ¶ 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀆𑀯𑀭𑀡𑀕𑀸𑀣𑀸𑀬 𑀉𑀧𑁆𑀧𑀢𑁆𑀢𑀺𑀲𑀤𑀺𑀲𑀸 𑀏𑀯 𑀉𑀧𑁆𑀧𑀢𑁆𑀢𑀺, 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄. 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 𑀧𑀦𑀲𑁆𑀲𑀸 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 ¶ 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀮𑁆𑀮𑀻𑀦𑀁 𑀏𑀓𑀢𑁆𑀢𑀲𑁂𑀯𑀺𑀢𑀸 𑀏𑀓𑀻𑀪𑀸𑀯𑁄, 𑀓𑀸𑀬𑀯𑀺𑀯𑁂𑀓𑁄𑀢𑀺 𑀅𑀢𑁆𑀣𑁄. 𑀛𑀸𑀦𑀦𑁆𑀢𑀺 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀲𑀢𑁆𑀢𑀲𑀜𑁆𑀜𑀸𑀤𑀺𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄, 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄𑀬𑁂𑀯 𑀘𑁂𑀢𑁆𑀣 𑀨𑀮𑀸𑀦𑀺. 𑀇𑀥 ¶ 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀫𑁂𑀢𑀁 𑀧𑀝𑀺𑀲𑀮𑁆𑀮𑀸𑀦𑀜𑁆𑀘 𑀛𑀸𑀦𑀜𑁆𑀘 𑀅𑀭𑀺𑀜𑁆𑀘𑀫𑀸𑀦𑁄, 𑀅𑀚𑀳𑀫𑀸𑀦𑁄, 𑀅𑀦𑀺𑀲𑁆𑀲𑀚𑁆𑀚𑀫𑀸𑀦𑁄. 𑀥𑀫𑁆𑀫𑁂𑀲𑀽𑀢𑀺 𑀯𑀺𑀧𑀲𑁆𑀲𑀦𑀽𑀧𑀕𑁂𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼. 𑀦𑀺𑀘𑁆𑀘𑀦𑁆𑀢𑀺 𑀲𑀢𑀢𑀁, 𑀲𑀫𑀺𑀢𑀁, 𑀅𑀩𑁆𑀪𑁄𑀓𑀺𑀡𑁆𑀡𑀁. 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑁂𑀦 𑀅𑀦𑀼𑀕𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀘𑀭𑀫𑀸𑀦𑁄. 𑀅𑀣 𑀯𑀸 𑀥𑀫𑁆𑀫𑀸𑀢𑀺 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑁄 𑀥𑀫𑁆𑀫𑁄𑀢𑀺 𑀅𑀦𑀼𑀥𑀫𑁆𑀫𑁄, 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 ‘‘𑀥𑀫𑁆𑀫𑀸𑀦𑀁 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 ‘‘𑀥𑀫𑁆𑀫𑁂𑀲𑀽’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀽𑀢𑀺 𑀢𑀸𑀬 𑀅𑀦𑀼𑀥𑀫𑁆𑀫𑀘𑀭𑀺𑀢𑀸𑀲𑀗𑁆𑀔𑀸𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀺𑀤𑁄𑀲𑀁 𑀢𑀻𑀲𑀼 𑀪𑀯𑁂𑀲𑀼 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀏𑀯𑀁 𑀇𑀫𑀁 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀁 𑀅𑀭𑀺𑀜𑁆𑀘𑀫𑀸𑀦𑁄 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑁄𑀢𑀺 𑀯𑀢𑁆𑀢𑀩𑁆𑀩𑁄 𑀏𑀓𑁄 𑀘𑀭𑁂𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑀮𑁆𑀮𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭𑁦. 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀢𑀲𑁆𑀲 𑀲𑀭𑀻𑀭𑀲𑁄𑀪𑀸𑀬 𑀆𑀯𑀝𑁆𑀝𑀺𑀢𑀳𑀤𑀬𑀸 𑀲𑀢𑁆𑀢𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀫𑁂𑀯 𑀉𑀮𑁆𑀮𑁄𑀓𑁂𑀦𑁆𑀢𑀺, 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀧𑀺, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀕𑀘𑁆𑀙𑀦𑁆𑀢𑀸𑀧𑀺. 𑀧𑀓𑀢𑀺𑀬𑀸 𑀏𑀯 𑀳𑀺 𑀩𑀼𑀤𑁆𑀥𑀤𑀲𑁆𑀲𑀦𑁂 𑀧𑀼𑀡𑁆𑀡𑀘𑀦𑁆𑀤𑀲𑀫𑀼𑀤𑁆𑀤𑀭𑀸𑀚𑀤𑀲𑁆𑀲𑀦𑁂 𑀘 𑀅𑀢𑀺𑀢𑁆𑀢𑁄 𑀮𑁄𑀓𑁄. 𑀅𑀣 𑀅𑀜𑁆𑀜𑀢𑀭𑀸 𑀓𑀼𑀝𑀼𑀫𑁆𑀩𑀺𑀬𑀪𑀭𑀺𑀬𑀸𑀧𑀺 𑀉𑀧𑀭𑀺𑀧𑀸𑀲𑀸𑀤𑀕𑀢𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸𑀯 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀚𑀸𑀦𑀸𑀳𑀺 𑀢𑀸𑀯, 𑀪𑀡𑁂, 𑀅𑀬𑀁 𑀇𑀢𑁆𑀣𑀻 𑀲𑀲𑀸𑀫𑀺𑀓𑀸 𑀯𑀸 ¶ 𑀅𑀲𑀸𑀫𑀺𑀓𑀸 𑀯𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 ¶ ‘‘𑀲𑀲𑀸𑀫𑀺𑀓𑀸’’𑀢𑀺 𑀆𑀭𑁄𑀘𑁂𑀲𑀺. 𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸 𑀯𑀻𑀲𑀢𑀺𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀬𑁄 𑀤𑁂𑀯𑀘𑁆𑀙𑀭𑀸𑀬𑁄 𑀯𑀺𑀬 𑀫𑀁𑀬𑁂𑀯 𑀏𑀓𑀁 𑀅𑀪𑀺𑀭𑀫𑁂𑀦𑁆𑀢𑀺, 𑀲𑁄 𑀤𑀸𑀦𑀸𑀳𑀁 𑀏𑀢𑀸𑀧𑀺 𑀅𑀢𑀼𑀲𑀺𑀢𑁆𑀯𑀸 𑀧𑀭𑀲𑁆𑀲 𑀇𑀢𑁆𑀣𑀺𑀬𑀸 𑀢𑀡𑁆𑀳𑀁 𑀉𑀧𑁆𑀧𑀸𑀤𑁂𑀲𑀺𑀁, 𑀲𑀸 𑀉𑀧𑁆𑀧𑀦𑁆𑀦𑀸 𑀅𑀧𑀸𑀬𑀫𑁂𑀯 𑀆𑀓𑀟𑁆𑀠𑀢𑀻’’𑀢𑀺 𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 ‘‘𑀳𑀦𑁆𑀤 𑀦𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄, 𑀅𑀦𑁂𑀴𑀫𑀽𑀕𑁄 𑀲𑀼𑀢𑀯𑀸 𑀲𑀢𑀻𑀫𑀸;

𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀏𑀯𑀁 𑀤𑀺𑀝𑁆𑀞𑀸𑀤𑀻𑀦𑀯𑀸𑀬 𑀢𑀡𑁆𑀳𑀸𑀬 𑀏𑀯 𑀅𑀧𑁆𑀧𑀯𑀢𑁆𑀢𑀺𑀁. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀸𑀢𑀘𑁆𑀘𑀓𑀸𑀭𑀻 𑀲𑀓𑁆𑀓𑀘𑁆𑀘𑀓𑀸𑀭𑀻. 𑀅𑀦𑁂𑀴𑀫𑀽𑀕𑁄𑀢𑀺 𑀅𑀮𑀸𑀮𑀸𑀫𑀼𑀔𑁄. 𑀅𑀣 𑀯𑀸 𑀅𑀦𑁂𑀴𑁄 𑀘 𑀅𑀫𑀽𑀕𑁄 𑀘, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀺𑀢𑀲𑀼𑀔𑀲𑀫𑁆𑀧𑀸𑀧𑀓𑀁 𑀲𑀼𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀢𑀯𑀸 𑀆𑀕𑀫𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀲𑀢𑀻𑀫𑀸𑀢𑀺 𑀘𑀺𑀭𑀓𑀢𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀺𑀢𑀸. 𑀲𑀗𑁆𑀔𑀸𑀢𑀥𑀫𑁆𑀫𑁄𑀢𑀺 𑀥𑀫𑁆𑀫𑀼𑀧𑀧𑀭𑀺𑀓𑁆𑀔𑀸𑀬 𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑁄. 𑀦𑀺𑀬𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀬𑀸𑀫𑀁 𑀧𑀢𑁆𑀢𑁄. 𑀧𑀥𑀸𑀦𑀯𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀏𑀲 𑀧𑀸𑀞𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀫𑁂𑀢𑁂𑀳𑀺 𑀅𑀧𑁆𑀧𑀫𑀸𑀤𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀬𑀸𑀫𑀲𑀫𑁆𑀧𑀸𑀧𑀓𑁂𑀦 𑀧𑀥𑀸𑀦𑁂𑀦 𑀧𑀥𑀸𑀦𑀯𑀸, 𑀢𑁂𑀦 𑀧𑀥𑀸𑀦𑁂𑀦 𑀧𑀢𑁆𑀢𑀦𑀺𑀬𑀸𑀫𑀢𑁆𑀢𑀸 𑀦𑀺𑀬𑀢𑁄, 𑀢𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀢𑀥𑀫𑁆𑀫𑁄. 𑀅𑀭𑀳𑀸 𑀳𑀺 𑀧𑀼𑀦 𑀲𑀗𑁆𑀔𑀸𑀢𑀩𑁆𑀩𑀸𑀪𑀸𑀯𑀢𑁄 ‘‘𑀲𑀗𑁆𑀔𑀸𑀢𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥𑀸’’𑀢𑀺 (𑀲𑀼. 𑀦𑀺. 𑁧𑁦𑁪𑁪; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀢𑀡𑁆𑀳𑀓𑁆𑀔𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭𑁧. 𑀲𑀻𑀳𑁄 𑀯𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑀲𑁆𑀲 𑀓𑀺𑀭 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑀽𑀭𑁂 𑀉𑀬𑁆𑀬𑀸𑀦𑀁 𑀳𑁄𑀢𑀺. 𑀲𑁄 𑀧𑀕𑁂𑀯 𑀯𑀼𑀝𑁆𑀞𑀸𑀬 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑀸𑀦𑀸 𑀑𑀭𑀼𑀬𑁆𑀳 𑀉𑀤𑀓𑀝𑁆𑀞𑀸𑀦𑀁 𑀉𑀧𑀕𑀢𑁄 ‘‘𑀫𑀼𑀔𑀁 ¶ 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀲𑀻𑀳𑀻 𑀧𑁄𑀢𑀓𑀁 𑀚𑀦𑁂𑀢𑁆𑀯𑀸 𑀕𑁄𑀘𑀭𑀸𑀬 𑀕𑀢𑀸. 𑀭𑀸𑀚𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀻𑀳𑀧𑁄𑀢𑀓𑁄 𑀤𑁂𑀯𑀸’’𑀢𑀺 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀻𑀳𑁄 𑀓𑀺𑀭 ¶ 𑀦 𑀓𑀲𑁆𑀲𑀘𑀺 𑀪𑀸𑀬𑀢𑀻’’𑀢𑀺 𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑀼𑀁 𑀪𑁂𑀭𑀺𑀆𑀤𑀻𑀦𑀺 𑀆𑀓𑁄𑀝𑀸𑀧𑁂𑀲𑀺. 𑀲𑀻𑀳𑀧𑁄𑀢𑀓𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺 𑀢𑀣𑁂𑀯 𑀲𑀬𑀺. 𑀭𑀸𑀚𑀸 𑀬𑀸𑀯𑀢𑀢𑀺𑀬𑀓𑀁 𑀆𑀓𑁄𑀝𑀸𑀧𑁂𑀲𑀺, 𑀲𑁄 𑀢𑀢𑀺𑀬𑀯𑀸𑀭𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀣𑁂𑀯 𑀲𑀬𑀺. 𑀅𑀣 𑀭𑀸𑀚𑀸 ‘‘𑀬𑀸𑀯𑀲𑁆𑀲 𑀫𑀸𑀢𑀸 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑀁 𑀤𑀺𑀯𑀲𑀁 𑀚𑀸𑀢𑁄𑀧𑀺 𑀲𑀻𑀳𑀧𑁄𑀢𑀓𑁄 𑀦 𑀲𑀦𑁆𑀢𑀲𑀢𑀺 𑀦 𑀪𑀸𑀬𑀢𑀺, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀭𑀺𑀢𑀸𑀲𑀁 𑀙𑁂𑀢𑁆𑀯𑀸 𑀦 𑀲𑀦𑁆𑀢𑀲𑁂𑀬𑁆𑀬𑀁 𑀦 𑀪𑀸𑀬𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸, 𑀕𑀘𑁆𑀙𑀦𑁆𑀢𑁄 𑀧𑀼𑀦 𑀓𑁂𑀯𑀝𑁆𑀝𑁂𑀳𑀺 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀲𑀸𑀔𑀸𑀲𑀼 𑀩𑀦𑁆𑀥𑀺𑀢𑁆𑀯𑀸 𑀧𑀲𑀸𑀭𑀺𑀢𑁂 𑀚𑀸𑀮𑁂 𑀯𑀸𑀢𑀁 𑀅𑀮𑀕𑁆𑀕𑀁𑀬𑁂𑀯 𑀕𑀘𑁆𑀙𑀫𑀸𑀦𑀁 𑀤𑀺𑀲𑁆𑀯𑀸, 𑀢𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀚𑀸𑀮𑀁 𑀫𑁄𑀳𑀚𑀸𑀮𑀁 𑀯𑀸 𑀨𑀸𑀮𑁂𑀢𑁆𑀯𑀸 𑀏𑀯𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀅𑀣 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀯𑀸𑀢𑀩𑁆𑀪𑀸𑀳𑀢𑀸𑀦𑀺 𑀧𑀤𑀼𑀫𑀸𑀦𑀺 𑀑𑀦𑀫𑀺𑀢𑁆𑀯𑀸 𑀉𑀤𑀓𑀁 𑀨𑀼𑀲𑀺𑀢𑁆𑀯𑀸 𑀯𑀸𑀢𑀯𑀺𑀕𑀫𑁂 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀺𑀢𑀸𑀦𑀺 𑀉𑀤𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀢𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀬𑀣𑀸 𑀏𑀢𑀸𑀦𑀺 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀫𑁂𑀯𑀁 𑀮𑁄𑀓𑁂 𑀚𑀸𑀢𑁄 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑁄 𑀢𑀺𑀝𑁆𑀞𑁂𑀬𑁆𑀬’’𑀦𑁆𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 ‘‘𑀬𑀣𑀸 𑀲𑀻𑀳𑀯𑀸𑀢𑀧𑀤𑀼𑀫𑀸𑀦𑀺, 𑀏𑀯𑀁 𑀅𑀲𑀦𑁆𑀢𑀲𑀦𑁆𑀢𑁂𑀦 𑀅𑀲𑀚𑁆𑀚𑀫𑀸𑀦𑁂𑀦 𑀅𑀦𑀼𑀧𑀮𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀻𑀳𑁄𑀯 ¶ 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄;

𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀧𑁆𑀧𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀲𑀻𑀳𑁄𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑁋 𑀢𑀺𑀡𑀲𑀻𑀳𑁄, 𑀧𑀡𑁆𑀟𑀼𑀲𑀻𑀳𑁄, 𑀓𑀸𑀴𑀲𑀻𑀳𑁄, 𑀓𑁂𑀲𑀭𑀲𑀻𑀳𑁄𑀢𑀺. 𑀓𑁂𑀲𑀭𑀲𑀻𑀳𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀯𑀸𑀢𑁄 𑀧𑀼𑀭𑀢𑁆𑀣𑀺𑀫𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄, 𑀧𑀤𑀼𑀫𑀁 𑀭𑀢𑁆𑀢𑀲𑁂𑀢𑀸𑀤𑀺𑀯𑀲𑁂𑀦. 𑀢𑁂𑀲𑀼 𑀬𑁄 𑀓𑁄𑀘𑀺 𑀯𑀸𑀢𑁄 𑀬𑀁𑀓𑀺𑀜𑁆𑀘𑀺 𑀧𑀤𑀼𑀫𑀜𑁆𑀘 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣 𑀬𑀲𑁆𑀫𑀸 𑀲𑀦𑁆𑀢𑀸𑀲𑁄 𑀅𑀢𑁆𑀢𑀲𑀺𑀦𑁂𑀳𑁂𑀦 𑀳𑁄𑀢𑀺, 𑀅𑀢𑁆𑀢𑀲𑀺𑀦𑁂𑀳𑁄 𑀘 𑀢𑀡𑁆𑀳𑀸𑀮𑁂𑀧𑁄, 𑀲𑁄𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀸 𑀮𑁄𑀪𑁂𑀦 ¶ 𑀳𑁄𑀢𑀺, 𑀲𑁄 𑀘 𑀢𑀡𑁆𑀳𑀸𑀬𑁂𑀯. 𑀲𑀚𑁆𑀚𑀦𑀁 𑀧𑀦 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀸𑀯𑀺𑀭𑀳𑀺𑀢𑀲𑁆𑀲 𑀫𑁄𑀳𑁂𑀦 𑀳𑁄𑀢𑀺, 𑀫𑁄𑀳𑁄 ¶ 𑀘 𑀅𑀯𑀺𑀚𑁆𑀚𑀸. 𑀢𑀢𑁆𑀣 𑀲𑀫𑀣𑁂𑀦 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀬, 𑀅𑀯𑀺𑀚𑁆𑀚𑀸𑀬. 𑀢𑀲𑁆𑀫𑀸 𑀲𑀫𑀣𑁂𑀦 𑀅𑀢𑁆𑀢𑀲𑀺𑀦𑁂𑀳𑀁 𑀧𑀳𑀸𑀬 𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀦𑀺𑀘𑁆𑀘𑀸𑀤𑀻𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀺𑀧𑀲𑁆𑀲𑀦𑀸𑀬 𑀫𑁄𑀳𑀁 𑀧𑀳𑀸𑀬 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑁄, 𑀲𑀫𑀣𑁂𑀦𑁂𑀯 𑀮𑁄𑀪𑀁 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀁 𑀏𑀯 𑀤𑀺𑀝𑁆𑀞𑀺𑀜𑁆𑀘 𑀧𑀳𑀸𑀬, 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀲𑀩𑁆𑀩𑀪𑀯𑀪𑁄𑀕𑀮𑁄𑀪𑁂𑀦 𑀅𑀮𑀺𑀧𑁆𑀧𑀫𑀸𑀦𑁄. 𑀏𑀢𑁆𑀣 𑀘 𑀲𑀫𑀣𑀲𑁆𑀲 𑀲𑀻𑀮𑀁 𑀧𑀤𑀝𑁆𑀞𑀸𑀦𑀁, 𑀲𑀫𑀣𑁄 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀢𑀺. 𑀏𑀯𑀁 𑀢𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀲𑀺𑀤𑁆𑀥𑁂𑀲𑀼 𑀢𑀬𑁄𑀧𑀺 𑀔𑀦𑁆𑀥𑀸 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀼𑀭𑀢𑁄 𑀳𑁄𑀢𑀺. 𑀲𑁄 𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑀼𑀚𑁆𑀛𑀺𑀢𑀼𑀓𑀸𑀫𑀢𑀸𑀬 𑀦 𑀲𑀦𑁆𑀢𑀲𑀢𑀺. 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀧𑀝𑀺𑀯𑀺𑀤𑁆𑀥𑀲𑀪𑀸𑀯𑁄 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑀪𑁂𑀤𑁂 𑀦 𑀲𑀚𑁆𑀚𑀢𑀺, 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀯𑀻𑀢𑀭𑀸𑀕𑁄 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀭𑀸𑀕𑁂𑀦 𑀦 𑀮𑀺𑀧𑁆𑀧𑀢𑀺. 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀢𑀺𑀡𑁆𑀡𑀜𑁆𑀘 𑀅𑀓𑀼𑀲𑀮𑀫𑀽𑀮𑀸𑀦𑀁 𑀧𑀳𑀸𑀦𑀯𑀲𑁂𑀦 𑀅𑀲𑀦𑁆𑀢𑀲𑀦𑁆𑀢𑁄 𑀅𑀲𑀚𑁆𑀚𑀫𑀸𑀦𑁄 𑀅𑀮𑀺𑀧𑁆𑀧𑀫𑀸𑀦𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀲𑀦𑁆𑀢𑀲𑀦𑁆𑀢𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭𑁨. 𑀲𑀻𑀳𑁄 𑀬𑀣𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀓𑀼𑀧𑁆𑀧𑀺𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀸𑀫𑀸𑀦𑀼𑀕𑀸𑀫𑀺𑀫𑀕𑁆𑀕𑀁 𑀙𑀟𑁆𑀟𑁂𑀢𑁆𑀯𑀸, 𑀉𑀚𑀼𑀁 𑀅𑀝𑀯𑀺𑀫𑀕𑁆𑀕𑀁 𑀕𑀳𑁂𑀢𑁆𑀯𑀸, 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀕𑀘𑁆𑀙𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀲𑀻𑀳𑁄 𑀩𑀸𑀮𑀲𑀽𑀭𑀺𑀬𑀸𑀢𑀧𑀁 𑀢𑀧𑁆𑀧𑀫𑀸𑀦𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀧𑀼𑀭𑀺𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀻𑀳𑁄 𑀓𑀺𑀭 𑀲𑀤𑁆𑀤𑁂𑀦 𑀦 𑀲𑀦𑁆𑀢𑀲𑀢𑀻’’𑀢𑀺 𑀪𑁂𑀭𑀺𑀲𑀗𑁆𑀔𑀧𑀡𑀯𑀸𑀤𑀻𑀳𑀺 𑀲𑀤𑁆𑀤𑀁 𑀓𑀸𑀭𑀸𑀧𑁂𑀲𑀺. 𑀲𑀻𑀳𑁄 𑀢𑀣𑁂𑀯 𑀦𑀺𑀧𑀚𑁆𑀚𑀺. 𑀤𑀼𑀢𑀺𑀬𑀫𑁆𑀧𑀺 𑀓𑀸𑀭𑀸𑀧𑁂𑀲𑀺. 𑀲𑀻𑀳𑁄 𑀢𑀣𑁂𑀯 𑀦𑀺𑀧𑀚𑁆𑀚𑀺. 𑀢𑀢𑀺𑀬𑀫𑁆𑀧𑀺 𑀓𑀸𑀭𑀸𑀧𑁂𑀲𑀺. 𑀲𑀻𑀳𑁄 ‘‘𑀫𑀫 𑀧𑀝𑀺𑀲𑀢𑁆𑀢𑀼 𑀅𑀢𑁆𑀣𑀻’’𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀺. 𑀢𑀁 𑀲𑀼𑀢𑁆𑀯𑀸𑀯 𑀳𑀢𑁆𑀣𑀸𑀭𑁄𑀳𑀸𑀤𑀬𑁄 𑀳𑀢𑁆𑀣𑀺𑀆𑀤𑀻𑀳𑀺 𑀑𑀭𑁄𑀳𑀺𑀢𑁆𑀯𑀸 ¶ 𑀢𑀺𑀡𑀕𑀳𑀦𑀸𑀦𑀺 𑀧𑀯𑀺𑀝𑁆𑀞𑀸, 𑀳𑀢𑁆𑀣𑀺𑀅𑀲𑁆𑀲𑀕𑀡𑀸 𑀤𑀺𑀲𑀸𑀯𑀺𑀤𑀺𑀲𑀸 𑀧𑀮𑀸𑀢𑀸. 𑀭𑀜𑁆𑀜𑁄 𑀳𑀢𑁆𑀣𑀻𑀧𑀺 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀯𑀦𑀕𑀳𑀦𑀸𑀦𑀺 ¶ 𑀧𑁄𑀣𑀬𑀫𑀸𑀦𑁄 𑀧𑀮𑀸𑀬𑀺. 𑀲𑁄 𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀼𑀓𑁆𑀔𑀲𑀸𑀔𑀸𑀬 𑀑𑀮𑀫𑁆𑀩𑀺𑀢𑁆𑀯𑀸 ¶ , 𑀧𑀣𑀯𑀺𑀁 𑀧𑀢𑀺𑀢𑁆𑀯𑀸, 𑀏𑀓𑀧𑀤𑀺𑀓𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀼𑀘𑁆𑀙𑀺 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀲𑀤𑁆𑀤𑀫𑀲𑁆𑀲𑀼𑀢𑁆𑀣𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀲𑁆𑀲 𑀲𑀤𑁆𑀤𑀁, 𑀪𑀦𑁆𑀢𑁂’’𑀢𑀺? ‘‘𑀧𑀞𑀫𑀁 𑀪𑁂𑀭𑀺𑀲𑀗𑁆𑀔𑀸𑀤𑀻𑀦𑀁, 𑀧𑀘𑁆𑀙𑀸 𑀲𑀻𑀳𑀲𑁆𑀲𑀸’’𑀢𑀺. ‘‘𑀦 𑀪𑀸𑀬𑀺𑀢𑁆𑀣, 𑀪𑀦𑁆𑀢𑁂’’𑀢𑀺? ‘‘𑀦 𑀫𑀬𑀁, 𑀫𑀳𑀸𑀭𑀸𑀚, 𑀓𑀲𑁆𑀲𑀘𑀺 𑀲𑀤𑁆𑀤𑀲𑁆𑀲 𑀪𑀸𑀬𑀸𑀫𑀸’’𑀢𑀺. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀫𑀬𑁆𑀳𑀫𑁆𑀧𑀺 𑀏𑀤𑀺𑀲𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀲𑀘𑁂 𑀧𑀩𑁆𑀩𑀚𑀲𑀻’’𑀢𑀺. ‘‘𑀧𑀩𑁆𑀩𑀚𑀸𑀫𑀺, 𑀪𑀦𑁆𑀢𑁂’’𑀢𑀺. 𑀢𑀢𑁄 𑀦𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀲𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻;

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀲𑀳𑀦𑀸 𑀘 𑀳𑀦𑀦𑀸 𑀘 𑀲𑀻𑀖𑀚𑀯𑀢𑁆𑀢𑀸 𑀘 𑀲𑀻𑀳𑁄. 𑀓𑁂𑀲𑀭𑀲𑀻𑀳𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀤𑀸𑀞𑀸 𑀩𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀤𑀸𑀞𑀩𑀮𑀻. 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬𑀸𑀢𑀺, 𑀉𑀪𑀬𑀁 𑀘𑀸𑀭𑀻𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑀩𑁆𑀩𑀁 𑀧𑀲𑀬𑁆𑀳𑀘𑀸𑀭𑀻 𑀅𑀪𑀺𑀪𑀼𑀬𑁆𑀬𑀘𑀸𑀭𑀻𑀢𑀺 𑀢𑀢𑁆𑀣 𑀧𑀲𑀬𑁆𑀳 𑀦𑀺𑀕𑁆𑀕𑀳𑁂𑀢𑁆𑀯𑀸 𑀘𑀭𑀡𑁂𑀦 𑀧𑀲𑀬𑁆𑀳𑀘𑀸𑀭𑀻, 𑀅𑀪𑀺𑀪𑀯𑀺𑀢𑁆𑀯𑀸, 𑀲𑀦𑁆𑀢𑀸𑀲𑁂𑀢𑁆𑀯𑀸, 𑀯𑀲𑀻𑀓𑀢𑁆𑀯𑀸, 𑀘𑀭𑀡𑁂𑀦 𑀅𑀪𑀺𑀪𑀼𑀬𑁆𑀬𑀘𑀸𑀭𑀻. 𑀲𑁆𑀯𑀸𑀬𑀁 𑀓𑀸𑀬𑀩𑀮𑁂𑀦 𑀧𑀲𑀬𑁆𑀳𑀘𑀸𑀭𑀻, 𑀢𑁂𑀚𑀲𑀸 𑀅𑀪𑀺𑀪𑀼𑀬𑁆𑀬𑀘𑀸𑀭𑀻. 𑀢𑀢𑁆𑀣 𑀲𑀘𑁂 𑀓𑁄𑀘𑀺 𑀯𑀤𑁂𑀬𑁆𑀬 𑁋 ‘‘𑀓𑀺𑀁 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻’’𑀢𑀺, 𑀢𑀢𑁄 𑀫𑀺𑀕𑀸𑀦𑀦𑁆𑀢𑀺 𑀲𑀸𑀫𑀺𑀯𑀘𑀦𑀁 𑀉𑀧𑀬𑁄𑀕𑀯𑀘𑀦𑀁 𑀓𑀢𑁆𑀯𑀸 ‘‘𑀫𑀺𑀕𑁂 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻’’𑀢𑀺 𑀧𑀝𑀺𑀯𑀢𑁆𑀢𑀩𑁆𑀩𑀁. 𑀧𑀦𑁆𑀢𑀸𑀦𑀻𑀢𑀺 𑀤𑀽𑀭𑀸𑀦𑀺. 𑀲𑁂𑀦𑀸𑀲𑀦𑀸𑀦𑀻𑀢𑀺 𑀯𑀲𑀦𑀝𑁆𑀞𑀸𑀦𑀸𑀦𑀺. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀤𑀸𑀞𑀩𑀮𑀻𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭𑁩. 𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀭𑀸𑀚𑀸 𑀫𑁂𑀢𑁆𑀢𑀸𑀤𑀺𑀛𑀸𑀦𑀮𑀸𑀪𑀻 𑀅𑀳𑁄𑀲𑀺. 𑀲𑁄 ‘‘𑀛𑀸𑀦𑀲𑀼𑀔𑀦𑁆𑀢𑀭𑀸𑀬𑀓𑀭𑀁 𑀭𑀚𑁆𑀚’’𑀦𑁆𑀢𑀺 𑀛𑀸𑀦𑀸𑀦𑀼𑀭𑀓𑁆𑀔𑀡𑀢𑁆𑀣𑀁 ¶ 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸, 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

𑀫𑁂𑀢𑁆𑀢𑀁 ¶ 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂;

𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺𑀢𑀲𑀼𑀔𑀼𑀧𑀦𑀬𑀦𑀓𑀸𑀫𑀢𑀸 𑀫𑁂𑀢𑁆𑀢𑀸. ‘‘𑀅𑀳𑁄 ¶ 𑀯𑀢 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀯𑀺𑀫𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀳𑀺𑀢𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀓𑀭𑀼𑀡𑀸. ‘‘𑀫𑁄𑀤𑀦𑁆𑀢𑀺 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀫𑁄𑀤𑀦𑁆𑀢𑀺 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺𑀢𑀲𑀼𑀔𑀸𑀯𑀺𑀧𑁆𑀧𑀬𑁄𑀕𑀓𑀸𑀫𑀢𑀸 𑀫𑀼𑀤𑀺𑀢𑀸. ‘‘𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺 𑀲𑀼𑀔𑀤𑀼𑀓𑁆𑀔𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀉𑀧𑁂𑀓𑁆𑀔𑀸. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀫𑁂𑀢𑁆𑀢𑀁 𑀯𑀢𑁆𑀯𑀸 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸, 𑀫𑀼𑀤𑀺𑀢𑀸 𑀧𑀘𑁆𑀙𑀸. 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀘𑀢𑀲𑁆𑀲𑁄𑀧𑀺 𑀳𑀺 𑀏𑀢𑀸 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁, 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂’’𑀢𑀺.

𑀢𑀢𑁆𑀣 𑀆𑀲𑁂𑀯𑀫𑀸𑀦𑁄𑀢𑀺 𑀢𑀺𑀲𑁆𑀲𑁄 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦, 𑀉𑀧𑁂𑀓𑁆𑀔𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀪𑀸𑀯𑀬𑀫𑀸𑀦𑁄. 𑀓𑀸𑀮𑁂𑀢𑀺 𑀫𑁂𑀢𑁆𑀢𑀁 𑀆𑀲𑁂𑀯𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀓𑀭𑀼𑀡𑀁, 𑀢𑀢𑁄 𑀯𑀼𑀝𑁆𑀞𑀸𑀬 𑀫𑀼𑀤𑀺𑀢𑀁, 𑀢𑀢𑁄 𑀇𑀢𑀭𑀢𑁄 𑀯𑀸 𑀦𑀺𑀧𑁆𑀧𑀻𑀢𑀺𑀓𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀉𑀧𑁂𑀓𑁆𑀔𑀁 𑀆𑀲𑁂𑀯𑀫𑀸𑀦𑁄 ‘‘𑀓𑀸𑀮𑁂 𑀆𑀲𑁂𑀯𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀆𑀲𑁂𑀯𑀺𑀢𑀼𑀁 𑀨𑀸𑀲𑀼𑀓𑀸𑀮𑁂 𑀯𑀸. 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄𑀢𑀺 𑀤𑀲𑀲𑀼 𑀤𑀺𑀲𑀸𑀲𑀼 𑀲𑀩𑁆𑀩𑁂𑀦 𑀲𑀢𑁆𑀢𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄. 𑀫𑁂𑀢𑁆𑀢𑀸𑀤𑀻𑀦𑀜𑁆𑀳𑀺 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀲𑀢𑁆𑀢𑁂𑀲𑀼 𑀘 𑀯𑀺𑀭𑁄𑀥𑀪𑀽𑀢𑁄 𑀧𑀝𑀺𑀖𑁄 𑀯𑀽𑀧𑀲𑀫𑁆𑀫𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄’’𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀫𑁂𑀢𑁆𑀢𑀸𑀤𑀺𑀓𑀣𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁨𑁫𑁧) 𑀯𑀼𑀢𑁆𑀢𑀸. 𑀲𑁂𑀲𑀁 𑀧𑀼𑀩𑁆𑀩𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀅𑀧𑁆𑀧𑀫𑀜𑁆𑀜𑀸𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭𑁪. 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀭𑀸𑀚𑀕𑀳𑀁 𑀓𑀺𑀭 𑀉𑀧𑀦𑀺𑀲𑁆𑀲𑀸𑀬 𑀫𑀸𑀢𑀗𑁆𑀕𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑁄 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁. 𑀅𑀣 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀤𑁂𑀯𑀢𑀸𑀬𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀽𑀚𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺𑀬𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀸𑀭𑀺𑀲𑀸, 𑀫𑀸𑀭𑀺𑀲𑀸, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀪𑀡𑀺𑀁𑀲𑀼 ¶ . 𑀲𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸, 𑀅𑀢𑁆𑀢𑀦𑁄 𑀘 𑀚𑀻𑀯𑀺𑀢𑀓𑁆𑀔𑀬𑀁 𑀤𑀺𑀲𑁆𑀯𑀸, 𑀳𑀺𑀫𑀯𑀦𑁆𑀢𑁂 𑀫𑀳𑀸𑀧𑀧𑀸𑀢𑁄 𑀦𑀸𑀫 𑀧𑀩𑁆𑀩𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁, 𑀢𑀢𑁆𑀣 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀧𑀼𑀩𑁆𑀩𑁂 𑀧𑀭𑀺𑀦𑀺𑀩𑁆𑀩𑀼𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀝𑁆𑀞𑀺𑀲𑀗𑁆𑀖𑀸𑀢𑀁 𑀧𑀧𑀸𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸, 𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺;

𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀸 𑀉𑀭𑀕𑀲𑀼𑀢𑁆𑀢𑁂 𑀯𑀼𑀢𑁆𑀢𑀸. 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺. 𑀢𑀸𑀦𑀺 𑀘 𑀢𑁂𑀦 𑀢𑁂𑀦 ¶ 𑀫𑀕𑁆𑀕𑁂𑀦 𑀲𑀦𑁆𑀤𑀸𑀮𑀬𑀺𑀢𑁆𑀯𑀸. 𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀻𑀢𑀺 𑀚𑀻𑀯𑀺𑀢𑀲𑀗𑁆𑀔𑀬𑁄 𑀯𑀼𑀘𑁆𑀘𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀭𑀺𑀪𑁂𑀤𑁄, 𑀢𑀲𑁆𑀫𑀺𑀜𑁆𑀘 𑀚𑀻𑀯𑀺𑀢𑀲𑀗𑁆𑀔𑀬𑁂 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀧𑀳𑀻𑀦𑀢𑁆𑀢𑀸 𑀅𑀲𑀦𑁆𑀢𑀲𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑁄𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀚𑀻𑀯𑀺𑀢𑀲𑀗𑁆𑀔𑀬𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭𑁫. 𑀪𑀚𑀦𑁆𑀢𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀆𑀤𑀺𑀕𑀸𑀣𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀨𑀻𑀢𑀁 𑀭𑀚𑁆𑀚𑀁 𑀲𑀫𑀦𑀼𑀲𑀸𑀲𑀢𑀺. 𑀢𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀯𑀻𑀲𑀢𑀺𑀲𑀳𑀲𑁆𑀲𑀺𑀢𑁆𑀣𑀺𑀬𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. 𑀅𑀫𑀘𑁆𑀘𑀸 ‘‘𑀦 𑀤𑀸𑀦𑀸𑀬𑀁 𑀭𑀸𑀚𑀸 𑀚𑀻𑀯𑀺𑀲𑁆𑀲𑀢𑀺, 𑀳𑀦𑁆𑀤 𑀫𑀬𑀁 𑀅𑀢𑁆𑀢𑀦𑁄 𑀲𑀭𑀡𑀁 𑀕𑀯𑁂𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀧𑀝𑁆𑀞𑀸𑀦𑀁 𑀬𑀸𑀘𑀺𑀁𑀲𑀼. 𑀢𑁂 𑀢𑀢𑁆𑀣 𑀉𑀧𑀝𑁆𑀞𑀳𑀦𑁆𑀢𑀺𑀬𑁂𑀯, 𑀦 𑀓𑀺𑀜𑁆𑀘𑀺 𑀮𑀪𑀦𑁆𑀢𑀺. 𑀭𑀸𑀚𑀸𑀧𑀺 𑀆𑀩𑀸𑀥𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀓𑀼𑀳𑀺’’𑀦𑁆𑀢𑀺? 𑀢𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑁂𑀧𑀺 𑀅𑀫𑀘𑁆𑀘𑀸 ‘‘𑀭𑀸𑀚𑀸 𑀯𑀼𑀝𑁆𑀞𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀮𑀪𑀫𑀸𑀦𑀸 𑀧𑀭𑀫𑁂𑀦 𑀧𑀸𑀭𑀺𑀚𑀼𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀼𑀦𑀤𑁂𑀯 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀢𑁂𑀦 𑀘 𑀭𑀜𑁆𑀜𑀸 ¶ ‘‘𑀓𑀼𑀳𑀺𑀁, 𑀢𑀸𑀢𑀸, 𑀢𑀼𑀫𑁆𑀳𑁂 𑀕𑀢𑀸’’𑀢𑀺 𑀯𑀼𑀢𑁆𑀢𑀸 𑀆𑀳𑀁𑀲𑀼 𑁋 ‘‘𑀤𑁂𑀯𑀁 𑀤𑀼𑀩𑁆𑀩𑀮𑀁 𑀤𑀺𑀲𑁆𑀯𑀸 𑀆𑀚𑀻𑀯𑀺𑀓𑀪𑀬𑁂𑀦𑀫𑁆𑀳𑀸 𑀅𑀲𑀼𑀓𑀁 𑀦𑀸𑀫 𑀚𑀦𑀧𑀤𑀁 𑀕𑀢𑀸’’𑀢𑀺. 𑀭𑀸𑀚𑀸 ¶ 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑁂 𑀯𑀻𑀫𑀁𑀲𑁂𑀬𑁆𑀬𑀁, 𑀓𑀺𑀁 𑀧𑀼𑀦𑀧𑀺 𑀏𑀯𑀁 𑀓𑀭𑁂𑀬𑁆𑀬𑀼𑀁 𑀦𑁄’’𑀢𑀺? 𑀲𑁄 𑀧𑀼𑀩𑁆𑀩𑁂 𑀆𑀩𑀸𑀥𑀺𑀓𑀭𑁄𑀕𑁂𑀦 𑀨𑀼𑀝𑁆𑀞𑁄 𑀯𑀺𑀬 𑀩𑀸𑀴𑁆𑀳𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀕𑀺𑀮𑀸𑀦𑀸𑀮𑀬𑀁 𑀅𑀓𑀸𑀲𑀺. 𑀇𑀢𑁆𑀣𑀺𑀬𑁄 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀲𑀩𑁆𑀩𑀁 𑀅𑀓𑀁𑀲𑀼. 𑀢𑁂𑀧𑀺 𑀅𑀫𑀘𑁆𑀘𑀸 𑀢𑀣𑁂𑀯 𑀧𑀼𑀦 𑀩𑀳𑀼𑀢𑀭𑀁 𑀚𑀦𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀏𑀯𑀁 𑀭𑀸𑀚𑀸 𑀬𑀸𑀯𑀢𑀢𑀺𑀬𑀁 𑀲𑀩𑁆𑀩𑀁 𑀧𑀼𑀩𑁆𑀩𑀲𑀤𑀺𑀲𑀁 𑀅𑀓𑀸𑀲𑀺. 𑀢𑁂𑀧𑀺 𑀢𑀣𑁂𑀯 𑀧𑀓𑁆𑀓𑀫𑀺𑀁𑀲𑀼. 𑀢𑀢𑁄 𑀘𑀢𑀼𑀢𑁆𑀣𑀫𑁆𑀧𑀺 𑀢𑁂 𑀆𑀕𑀢𑁂 𑀤𑀺𑀲𑁆𑀯𑀸 ‘‘𑀅𑀳𑁄 𑀇𑀫𑁂 𑀤𑀼𑀓𑁆𑀓𑀭𑀁 𑀅𑀓𑀁𑀲𑀼, 𑀬𑁂 𑀫𑀁 𑀩𑁆𑀬𑀸𑀥𑀺𑀢𑀁 𑀧𑀳𑀸𑀬 𑀅𑀦𑀧𑁂𑀓𑁆𑀔𑀸 𑀧𑀓𑁆𑀓𑀫𑀺𑀁𑀲𑀽’’𑀢𑀺 𑀦𑀺𑀩𑁆𑀩𑀺𑀦𑁆𑀦𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸, 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸;

𑀅𑀢𑁆𑀢𑀝𑁆𑀞𑀧𑀜𑁆𑀜𑀸 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀪𑀚𑀦𑁆𑀢𑀻𑀢𑀺 𑀲𑀭𑀻𑀭𑁂𑀦 𑀅𑀮𑁆𑀮𑀻𑀬𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀲𑁂𑀯𑀦𑁆𑀢𑀻𑀢𑀺 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀻𑀳𑀺 𑀓𑀺𑀁 𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀢𑀸𑀬 𑀘 𑀧𑀭𑀺𑀘𑀭𑀦𑁆𑀢𑀺. 𑀓𑀸𑀭𑀡𑀁 𑀅𑀢𑁆𑀣𑁄 𑀏𑀢𑁂𑀲𑀦𑁆𑀢𑀺 𑀓𑀸𑀭𑀡𑀢𑁆𑀣𑀸, 𑀪𑀚𑀦𑀸𑀬 𑀲𑁂𑀯𑀦𑀸𑀬 𑀘 𑀦𑀸𑀜𑁆𑀜𑀁 𑀓𑀸𑀭𑀡𑀫𑀢𑁆𑀣𑀺, 𑀅𑀢𑁆𑀣𑁄 𑀏𑀯 𑀦𑁂𑀲𑀁 𑀓𑀸𑀭𑀡𑀁, 𑀅𑀢𑁆𑀣𑀳𑁂𑀢𑀼 𑀲𑁂𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀓𑁆𑀓𑀸𑀭𑀡𑀸 ¶ 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸𑀢𑀺 ‘‘𑀇𑀢𑁄 𑀓𑀺𑀜𑁆𑀘𑀺 𑀮𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀅𑀢𑁆𑀢𑀧𑀝𑀺𑀮𑀸𑀪𑀓𑀸𑀭𑀡𑁂𑀦 𑀦𑀺𑀓𑁆𑀓𑀸𑀭𑀡𑀸, 𑀓𑁂𑀯𑀮𑀁 𑁋

‘‘𑀉𑀧𑀓𑀸𑀭𑁄 𑀘 𑀬𑁄 𑀫𑀺𑀢𑁆𑀢𑁄,

𑀲𑀼𑀔𑁂 𑀤𑀼𑀓𑁆𑀔𑁂 𑀘 𑀬𑁄 𑀲𑀔𑀸;

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑁄 𑀫𑀺𑀢𑁆𑀢𑁄,

𑀬𑁄 𑀘 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀁 𑀯𑀼𑀢𑁆𑀢𑁂𑀦 𑀅𑀭𑀺𑀬𑁂𑀦 𑀫𑀺𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸. 𑀅𑀢𑁆𑀢𑀦𑀺 𑀞𑀺𑀢𑀸 𑀏𑀢𑁂𑀲𑀁 𑀧𑀜𑁆𑀜𑀸, 𑀅𑀢𑁆𑀢𑀸𑀦𑀁𑀬𑁂𑀯 𑀑𑀮𑁄𑀓𑁂𑀦𑁆𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀅𑀢𑁆𑀢𑀝𑁆𑀞𑀧𑀜𑁆𑀜𑀸. 𑀤𑀺𑀝𑁆𑀞𑀢𑁆𑀣𑀧𑀜𑁆𑀜𑀸𑀢𑀺 𑀅𑀬𑀫𑁆𑀧𑀺 ¶ 𑀓𑀺𑀭 𑀧𑁄𑀭𑀸𑀡𑀧𑀸𑀞𑁄, 𑀲𑀫𑁆𑀧𑀢𑀺 𑀤𑀺𑀝𑁆𑀞𑀺𑀬𑁂𑀯 𑀅𑀢𑁆𑀣𑁂 𑀏𑀢𑁂𑀲𑀁 𑀧𑀜𑁆𑀜𑀸, 𑀆𑀬𑀢𑀺𑀁 𑀦 𑀧𑁂𑀓𑁆𑀔𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀼𑀘𑀻𑀢𑀺 ¶ 𑀅𑀲𑀼𑀘𑀺𑀦𑀸 𑀅𑀦𑀭𑀺𑀬𑁂𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀸𑀭𑀡𑀢𑁆𑀣𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀏𑀓𑀸𑀤𑀲𑀳𑀺 𑀕𑀸𑀣𑀸𑀳𑀺.

𑀏𑀯𑀫𑁂𑀢𑀁 𑀏𑀓𑀘𑀢𑁆𑀢𑀸𑀮𑀻𑀲𑀕𑀸𑀣𑀸𑀧𑀭𑀺𑀫𑀸𑀡𑀁 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀁 𑀓𑀢𑁆𑀣𑀘𑀺𑀤𑁂𑀯 𑀯𑀼𑀢𑁆𑀢𑁂𑀦 𑀬𑁄𑀚𑀦𑀸𑀦𑀬𑁂𑀦 𑀲𑀩𑁆𑀩𑀢𑁆𑀣 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀢𑁄 𑀅𑀢𑁆𑀣𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀅𑀫𑁆𑀳𑁂𑀳𑀺 𑀦 𑀲𑀩𑁆𑀩𑀢𑁆𑀣 𑀬𑁄𑀚𑀺𑀢𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀏𑀓𑀦𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀦𑁆𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀩𑀼𑀤𑁆𑀥𑀓𑀺𑀘𑁆𑀘𑁂𑀲𑀼 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀬𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸, 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺.

𑀢𑀢𑁆𑀣 𑀲𑀺𑀬𑀸 ‘‘𑀓𑀢𑀫𑀁 𑀩𑀼𑀤𑁆𑀥𑀸𑀦𑀁 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁, 𑀓𑀢𑀫𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀩𑀼𑀤𑁆𑀥𑁄 𑀪𑀕𑀯𑀸 𑀧𑀸𑀢𑁄 𑀏𑀯 𑀉𑀝𑁆𑀞𑀸𑀬 𑀉𑀧𑀝𑁆𑀞𑀸𑀓𑀸𑀦𑀼𑀕𑁆𑀕𑀳𑀢𑁆𑀣𑀁 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀜𑁆𑀘 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 ¶ 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀧𑀢𑁆𑀢𑀫𑀸𑀤𑀸𑀬 𑀓𑀤𑀸𑀘𑀺 𑀏𑀓𑀓𑁄𑀯 𑀓𑀤𑀸𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀓𑀤𑀸𑀘𑀺 𑀧𑀓𑀢𑀺𑀬𑀸, 𑀓𑀤𑀸𑀘𑀺 𑀅𑀦𑁂𑀓𑁂𑀳𑀺 ¶ 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀢𑁆𑀢𑀫𑀸𑀦𑁂𑀳𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑁄 𑀮𑁄𑀓𑀦𑀸𑀣𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀼𑀤𑀼𑀕𑀢𑀺𑀬𑁄 𑀯𑀸𑀢𑀸 𑀧𑀣𑀯𑀺𑀁 𑀲𑁄𑀥𑁂𑀦𑁆𑀢𑀺; 𑀯𑀮𑀸𑀳𑀓𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀫𑀼𑀜𑁆𑀘𑀦𑁆𑀢𑀸 𑀫𑀕𑁆𑀕𑁂 𑀭𑁂𑀡𑀼𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀅𑀧𑀭𑁂 𑀯𑀸𑀢𑀸 𑀧𑀼𑀧𑁆𑀨𑀸𑀦𑀺 𑀉𑀧𑀲𑀁𑀳𑀭𑀺𑀢𑁆𑀯𑀸 𑀫𑀕𑁆𑀕𑁂 𑀑𑀓𑀺𑀭𑀦𑁆𑀢𑀺, 𑀉𑀦𑁆𑀦𑀢𑀸 𑀪𑀽𑀫𑀺𑀧𑁆𑀧𑀤𑁂𑀲𑀸 𑀑𑀦𑀫𑀦𑁆𑀢𑀺, 𑀑𑀦𑀢𑀸 𑀉𑀦𑁆𑀦𑀫𑀦𑁆𑀢𑀺, 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀲𑀫𑀸𑀯 𑀪𑀽𑀫𑀺 𑀳𑁄𑀢𑀺, 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀭𑀣𑀘𑀓𑁆𑀓𑀫𑀢𑁆𑀢𑀸𑀦𑀺 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀯𑀸 𑀧𑀸𑀤𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂 𑀲𑀭𑀻𑀭𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀦𑀺 𑀯𑀺𑀬 𑀘𑀺𑀢𑁆𑀭𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀯𑀺𑀬 𑀘 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀦𑁆𑀢𑀺, 𑀳𑀢𑁆𑀣𑀺𑀅𑀲𑁆𑀲𑀯𑀺𑀳𑀗𑁆𑀕𑀸𑀤𑀬𑁄 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀞𑀺𑀢𑀸𑀬𑁂𑀯 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀣𑀸 𑀪𑁂𑀭𑀺𑀯𑀻𑀡𑀸𑀤𑀻𑀦𑀺 𑀢𑀽𑀭𑀺𑀬𑀸𑀦𑀺 𑀫𑀦𑀼𑀲𑁆𑀲𑀸𑀦𑀁 𑀓𑀸𑀬𑀽𑀧𑀕𑀸𑀦𑀺 𑀘 𑀆𑀪𑀭𑀡𑀸𑀦𑀺, 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀫𑀦𑀼𑀲𑁆𑀲𑀸 𑀚𑀸𑀦𑀦𑁆𑀢𑀺 ‘‘𑀅𑀚𑁆𑀚 𑀪𑀕𑀯𑀸 𑀇𑀥 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺. 𑀢𑁂 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 ¶ , 𑀪𑀦𑁆𑀢𑁂, 𑀤𑀲 𑀪𑀺𑀓𑁆𑀔𑀽, 𑀅𑀫𑁆𑀳𑀸𑀓𑀁 𑀯𑀻𑀲𑀢𑀺, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀼𑀲𑀢𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀪𑀕𑀯𑀢𑁄𑀧𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀫𑀸𑀦𑁂𑀦𑁆𑀢𑀺.

𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑁂𑀲𑀁 𑀲𑀦𑁆𑀢𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀣𑀸 𑀓𑁂𑀘𑀺 𑀲𑀭𑀡𑀕𑀫𑀦𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁, 𑀓𑁂𑀘𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂𑀢𑀺. 𑀏𑀯𑀁 𑀢𑀣𑀸 𑀢𑀣𑀸 𑀚𑀦𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀫𑀡𑁆𑀟𑀮𑀫𑀸𑀴𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀢𑀺 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄. 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀝𑁆𑀞𑀸𑀓𑁄 ¶ 𑀪𑀕𑀯𑀢𑁄 𑀦𑀺𑀯𑁂𑀤𑁂𑀢𑀺. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺. 𑀇𑀤𑀁 𑀢𑀸𑀯 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁. 𑀬𑀜𑁆𑀘𑁂𑀢𑁆𑀣 𑀦 𑀯𑀼𑀢𑁆𑀢𑀁, 𑀢𑀁 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀅𑀣 𑀪𑀕𑀯𑀸 𑀏𑀯𑀁 𑀓𑀢𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑁄 𑀕𑀦𑁆𑀥𑀓𑀼𑀝𑀺𑀬𑀸 𑀉𑀧𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸, 𑀧𑀸𑀤𑀧𑀻𑀞𑁂 𑀞𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀢𑀺 𑁋 ‘‘𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄 𑀤𑀼𑀮𑁆𑀮𑀪𑁄, 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸, 𑀧𑀩𑁆𑀩𑀚𑁆𑀚𑀸 𑀤𑀼𑀮𑁆𑀮𑀪𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀤𑀼𑀮𑁆𑀮𑀪𑀁 ¶ 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀢𑀢𑁄 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀘𑀭𑀺𑀬𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺; 𑀓𑁂𑀘𑀺 𑀅𑀭𑀜𑁆𑀜𑀁, 𑀓𑁂𑀘𑀺 𑀭𑀼𑀓𑁆𑀔𑀫𑀽𑀮𑀁, 𑀓𑁂𑀘𑀺 𑀧𑀩𑁆𑀩𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀓𑁂𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀁…𑀧𑁂… 𑀓𑁂𑀘𑀺 𑀯𑀲𑀯𑀢𑁆𑀢𑀺𑀪𑀯𑀦𑀦𑁆𑀢𑀺. 𑀢𑀢𑁄 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀆𑀓𑀗𑁆𑀔𑀢𑀺, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀼𑀳𑀼𑀢𑁆𑀢𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀅𑀣 𑀲𑀫𑀲𑁆𑀲𑀸𑀲𑀺𑀢𑀓𑀸𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀪𑀸𑀕𑁂 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺. 𑀢𑀢𑀺𑀬𑀪𑀸𑀕𑁂 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀢𑀢𑁆𑀣 𑀚𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀢𑀺. 𑀢𑀢𑁄 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀚𑁆𑀚 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀸𑀮𑀬𑀼𑀢𑁆𑀢𑀁 𑀧𑀫𑀸𑀡𑀬𑀼𑀢𑁆𑀢𑀁. 𑀅𑀣 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺.

𑀢𑀢𑁄 𑀲𑀘𑁂 𑀕𑀢𑁆𑀢𑀸𑀦𑀺 𑀑𑀲𑀺𑀜𑁆𑀘𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣 𑀩𑀼𑀤𑁆𑀥𑀸𑀲𑀦𑀸 𑀉𑀝𑁆𑀞𑀸𑀬 𑀉𑀧𑀝𑁆𑀞𑀸𑀓𑁂𑀦 𑀉𑀤𑀓𑀧𑀝𑀺𑀬𑀸𑀤𑀺𑀢𑁄𑀓𑀸𑀲𑀁 𑀕𑀦𑁆𑀢𑁆𑀯𑀸, 𑀉𑀧𑀝𑁆𑀞𑀸𑀓𑀳𑀢𑁆𑀣𑀢𑁄 𑀉𑀤𑀓𑀲𑀸𑀝𑀺𑀓𑀁 𑀕𑀳𑁂𑀢𑁆𑀯𑀸, 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀧𑀯𑀺𑀲𑀢𑀺. 𑀉𑀧𑀝𑁆𑀞𑀸𑀓𑁄𑀧𑀺 𑀩𑀼𑀤𑁆𑀥𑀸𑀲𑀦𑀁 𑀆𑀦𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀸𑀧𑁂𑀢𑀺. 𑀪𑀕𑀯𑀸 𑀕𑀢𑁆𑀢𑀸𑀦𑀺 𑀑𑀲𑀺𑀜𑁆𑀘𑀺𑀢𑁆𑀯𑀸, 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 ¶ , 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸, 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸, 𑀦𑀺𑀲𑀻𑀤𑀢𑀺 𑀏𑀓𑀓𑁄𑀯 𑀫𑀼𑀳𑀼𑀢𑁆𑀢𑀁 𑀧𑀝𑀺𑀲𑀮𑁆𑀮𑀻𑀦𑁄. 𑀅𑀣 𑀪𑀺𑀓𑁆𑀔𑀽 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 ¶ 𑀏𑀓𑀘𑁆𑀘𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀏𑀓𑀘𑁆𑀘𑁂 𑀥𑀫𑁆𑀫𑀲𑁆𑀲𑀯𑀦𑀁 𑀬𑀸𑀘𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀧𑀞𑀫𑀁 𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺.

𑀫𑀚𑁆𑀛𑀺𑀫𑀬𑀸𑀫𑁂 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸𑀬𑁄 𑀑𑀓𑀸𑀲𑀁 𑀮𑀪𑀫𑀸𑀦𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺 𑀬𑀣𑀸𑀪𑀺𑀲𑀗𑁆𑀔𑀢𑀁 𑀅𑀦𑁆𑀢𑀫𑀲𑁄 𑀘𑀢𑀼𑀭𑀓𑁆𑀔𑀭𑀫𑁆𑀧𑀺. 𑀪𑀕𑀯𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀢𑁄 𑀧𑀘𑁆𑀙𑀺𑀫𑀬𑀸𑀫𑀁 𑀘𑀢𑁆𑀢𑀸𑀭𑁄 𑀪𑀸𑀕𑁂 𑀓𑀢𑁆𑀯𑀸 𑀏𑀓𑀁 𑀪𑀸𑀕𑀁 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀤𑀼𑀢𑀺𑀬𑀪𑀸𑀕𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀢𑀺𑀬𑀪𑀸𑀕𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀺, 𑀘𑀢𑀼𑀢𑁆𑀣𑀪𑀸𑀕𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀧𑀯𑀺𑀲𑀺𑀢𑁆𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺 𑀅𑀧𑁆𑀧𑀭𑀚𑀓𑁆𑀔𑀫𑀳𑀸𑀭𑀚𑀓𑁆𑀔𑀸𑀤𑀺𑀲𑀢𑁆𑀢𑀤𑀲𑁆𑀲𑀦𑀢𑁆𑀣𑀁. 𑀇𑀤𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀁.

𑀏𑀯𑀫𑀺𑀫𑀲𑁆𑀲 ¶ 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀮𑁄𑀓𑀯𑁄𑀮𑁄𑀓𑀦𑀲𑀗𑁆𑀔𑀸𑀢𑁂 𑀘𑀢𑀼𑀢𑁆𑀣𑀪𑀸𑀕𑀸𑀯𑀲𑀸𑀦𑁂 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀤𑀸𑀦𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑀸𑀤𑀻𑀲𑀼 𑀘 𑀅𑀓𑀢𑀸𑀥𑀺𑀓𑀸𑀭𑁂 𑀓𑀢𑀸𑀥𑀺𑀓𑀸𑀭𑁂 𑀘 𑀅𑀦𑀼𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀘 𑀲𑀢𑁆𑀢𑁂 𑀧𑀲𑁆𑀲𑀺𑀢𑀼𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁂𑀦 𑀧𑀜𑁆𑀘𑀦𑁆𑀦𑀁 𑀅𑀭𑀳𑀦𑁆𑀢𑀲𑀢𑀸𑀦𑀁 𑀯𑀼𑀢𑁆𑀢𑀁, ‘‘𑀅𑀳𑀁, 𑀔𑁄, 𑀲𑀫𑀡 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’’𑀢𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑁂𑀦 𑀯𑀼𑀢𑁆𑀢𑀁, ‘‘𑀅𑀳𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡 𑀓𑀲𑀸𑀫𑀺 ¶ 𑀘 𑀯𑀧𑀸𑀫𑀺 𑀘𑀸’’𑀢𑀺𑀆𑀤𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀅𑀬𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄. 𑀆𑀓𑀸𑀭𑀢𑁆𑀣𑁂𑀦 𑀳𑀺 𑀏𑀢𑁂𑀦 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀫𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑁂𑀳𑀺 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀫𑀼𑀧𑀮𑀓𑁆𑀔𑀡𑀺𑀬𑀲𑀪𑀸𑀯𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁, 𑀢𑀁 𑀲𑀩𑁆𑀩𑀸𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁; 𑀅𑀣, 𑀔𑁄, ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢’’𑀦𑁆𑀢𑀺. 𑀦𑀺𑀤𑀲𑁆𑀲𑀦𑀢𑁆𑀣𑁂𑀦 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸 𑀏𑀯𑀁 𑀲𑀼𑀢’’𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂𑀦 ¶ ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀕𑀢𑀺𑀫𑀦𑁆𑀢𑀸𑀦𑀁, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀏𑀯𑀁 𑀪𑀕𑀯𑀢𑀸 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺 ‘‘𑀏𑀯𑀁 𑀫𑁂 𑀲𑀼𑀢𑀁 𑀢𑀜𑁆𑀘 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯, 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀫𑁂 𑀲𑀼𑀢𑀦𑁆𑀢𑀺 𑀏𑀢𑁆𑀣 𑀫𑀬𑀸𑀲𑀤𑁆𑀤𑀢𑁆𑀣𑁄 𑀫𑁂-𑀲𑀤𑁆𑀤𑁄, 𑀲𑁄𑀢𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀢𑁆𑀣𑁄 𑀲𑀼𑀢𑀲𑀤𑁆𑀤𑁄. 𑀢𑀲𑁆𑀫𑀸 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀏𑀯𑀁 𑀫𑀬𑀸 𑀲𑁄𑀢𑀯𑀺𑀜𑁆𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀓𑀁 ¶ 𑀲𑀫𑀬𑀦𑁆𑀢𑀺 𑀏𑀓𑀁 𑀓𑀸𑀮𑀁. 𑀪𑀕𑀯𑀸𑀢𑀺 𑀪𑀸𑀕𑁆𑀬𑀯𑀸, 𑀪𑀕𑁆𑀕𑀯𑀸, 𑀪𑀢𑁆𑀢𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀕𑀥𑁂𑀲𑀼 𑀯𑀺𑀳𑀭𑀢𑀻𑀢𑀺 𑀫𑀕𑀥𑀸 𑀦𑀸𑀫 𑀚𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀫𑀕𑀥𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀫𑀕𑀥𑁂𑀲𑀼 𑀚𑀦𑀧𑀤𑁂. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀘𑁂𑀢𑀺𑀬𑀭𑀸𑀚𑀸 𑀫𑀼𑀲𑀸𑀯𑀸𑀤𑀁 𑀪𑀡𑀺𑀢𑁆𑀯𑀸 𑀪𑀽𑀫𑀺𑀁 𑀧𑀯𑀺𑀲𑀦𑁆𑀢𑁄 ‘𑀫𑀸 𑀕𑀥𑀁 𑀧𑀯𑀺𑀲𑀸’𑀢𑀺 𑀯𑀼𑀢𑁆𑀢𑁄, 𑀬𑀲𑁆𑀫𑀸 𑀯𑀸 𑀢𑀁 𑀭𑀸𑀚𑀸𑀦𑀁 𑀫𑀕𑁆𑀕𑀦𑁆𑀢𑀸 𑀪𑀽𑀫𑀺𑀁 𑀔𑀦𑀦𑁆𑀢𑀸 𑀧𑀼𑀭𑀺𑀲𑀸 ‘𑀫𑀸 𑀕𑀥𑀁 𑀓𑀭𑁄𑀣𑀸’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀫𑀕𑀥𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀩𑀳𑀼𑀥𑀸 ¶ 𑀧𑀧𑀜𑁆𑀘𑁂𑀦𑁆𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀯𑀺𑀳𑀭𑀢𑀻𑀢𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀧𑀭𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀯𑀸 𑀲𑀢𑁆𑀢𑀸𑀦𑀁 𑀯𑀺𑀯𑀺𑀥𑀁 𑀳𑀺𑀢𑀁 𑀳𑀭𑀢𑀻𑀢𑀺 𑀯𑀺𑀳𑀭𑀢𑀺. 𑀳𑀭𑀢𑀻𑀢𑀺 𑀉𑀧𑀲𑀁𑀳𑀭𑀢𑀺, 𑀉𑀧𑀦𑁂𑀢𑀺, 𑀚𑀦𑁂𑀢𑀺, 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀬𑀤𑀸 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀓𑀺𑀭 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀮𑁄𑀪𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀇𑀲𑁆𑀲𑀭𑀺𑀬𑀢𑁆𑀣𑀁 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀤𑁄𑀲𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀤𑁄𑀲𑁂𑀦 𑀤𑁄𑀲𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀯𑀤𑀦𑁆𑀢𑀺, 𑀢𑀤𑀸 𑀅𑀭𑀺𑀬𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀫𑁄𑀳𑁂𑀦 𑀫𑁄𑀳𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀧𑀦 𑀦 𑀓𑀤𑀸𑀘𑀺 𑀦 𑀯𑀺𑀳𑀭𑀢𑀺 𑀢𑀁 𑀯𑀺𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀳𑀭𑀡𑀸𑀪𑀸𑀯𑀢𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫.

𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 𑀬𑁄 𑀲𑁄 𑀭𑀸𑀚𑀕𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁄 𑀕𑀺𑀭𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑁂 𑀚𑀦𑀧𑀤𑁄 ‘‘𑀤𑀓𑁆𑀔𑀺𑀡𑀸𑀕𑀺𑀭𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀚𑀦𑀧𑀤𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀯𑀺𑀳𑀸𑀭𑀲𑁆𑀲𑀸𑀧𑀺 𑀢𑀤𑁂𑀯 𑀦𑀸𑀫𑀁. 𑀏𑀓𑀦𑀸𑀴𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂𑀢𑀺 𑀏𑀓𑀦𑀸𑀴𑀸𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀩𑁆𑀭𑀸𑀳𑁆𑀫𑀡𑀸 𑀘𑁂𑀢𑁆𑀣 𑀲𑀫𑁆𑀩𑀳𑀼𑀮𑀸 𑀧𑀝𑀺𑀯𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀪𑁄𑀕𑁄 𑀯𑀸 𑀲𑁄, 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑀕𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀁 𑀲𑀫𑀬𑀁 𑀪𑀕𑀯𑀸 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀫𑀕𑀥𑀭𑀝𑁆𑀞𑁂 ¶ 𑀏𑀓𑀦𑀸𑀴𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀤𑀓𑁆𑀔𑀺𑀡𑀸𑀕𑀺𑀭𑀺𑀫𑀳𑀸𑀯𑀺𑀳𑀸𑀭𑁂 ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑁄 𑀧𑀦𑀸𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀧𑀸𑀢𑀤𑁆𑀯𑀬𑀁 𑀧𑀤𑀧𑀽𑀭𑀡𑀫𑀢𑁆𑀢𑀁, 𑀅𑀥𑀺𑀓𑀸𑀭𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀲𑀺𑀬𑀸 𑀚𑀻𑀯𑀢𑀺, 𑀪𑀸𑀭𑀤𑁆𑀯𑀸𑀚𑁄𑀢𑀺 𑀘𑀲𑁆𑀲 𑀕𑁄𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀧𑀜𑁆𑀘𑀫𑀢𑁆𑀢𑀸𑀦𑀻𑀢𑀺 𑀬𑀣𑀸 𑁋 ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽’’𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁄 𑀧𑀫𑀸𑀡𑁂 𑀯𑀢𑁆𑀢𑀢𑀺, 𑀏𑀯𑀫𑀺𑀥𑀸𑀧𑀺, 𑀢𑀲𑁆𑀫𑀸 𑀧𑀜𑁆𑀘𑀧𑀫𑀸𑀡𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺, 𑀧𑀜𑁆𑀘𑀦𑀗𑁆𑀕𑀮𑀲𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀬𑀼𑀢𑁆𑀢𑀸𑀦𑀻𑀢𑀺 𑀧𑀬𑁄𑀚𑀺𑀢𑀸𑀦𑀺, 𑀩𑀮𑀺𑀩𑀤𑁆𑀤𑀸𑀦𑀁 𑀔𑀦𑁆𑀥𑁂𑀲𑀼 𑀞𑀧𑁂𑀢𑁆𑀯𑀸 𑀬𑀼𑀕𑁂 𑀬𑁄𑀢𑁆𑀢𑁂𑀳𑀺 𑀬𑁄𑀚𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀯𑀧𑁆𑀧𑀓𑀸𑀮𑁂𑀢𑀺 𑀯𑀧𑀦𑀓𑀸𑀮𑁂, 𑀩𑀻𑀚𑀦𑀺𑀓𑁆𑀔𑀺𑀧𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑁂 𑀯𑀧𑁆𑀧𑀸𑀦𑀺 𑀓𑀮𑀮𑀯𑀧𑁆𑀧𑀜𑁆𑀘, 𑀧𑀁𑀲𑀼𑀯𑀧𑁆𑀧𑀜𑁆𑀘. 𑀧𑀁𑀲𑀼𑀯𑀧𑁆𑀧𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀘 𑀔𑁄 𑀧𑀞𑀫𑀤𑀺𑀯𑀲𑁂 𑀫𑀗𑁆𑀕𑀮𑀯𑀧𑁆𑀧𑀁. 𑀢𑀢𑁆𑀣𑀸𑀬𑀁 𑀉𑀧𑀓𑀭𑀡𑀲𑀫𑁆𑀧𑀤𑀸 𑁋 𑀢𑀻𑀡𑀺 𑀩𑀮𑀺𑀩𑀤𑁆𑀤𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀧𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀲𑀼𑀯𑀡𑁆𑀡𑀫𑀬𑀸𑀦𑀺 𑀲𑀺𑀗𑁆𑀕𑀸𑀦𑀺 𑀧𑀝𑀺𑀫𑀼𑀓𑁆𑀓𑀸𑀦𑀺, 𑀭𑀚𑀢𑀫𑀬𑀸 𑀔𑀼𑀭𑀸, 𑀲𑀩𑁆𑀩𑁂 𑀲𑁂𑀢𑀫𑀸𑀮𑀸𑀳𑀺 𑀲𑀩𑁆𑀩𑀕𑀦𑁆𑀥𑀲𑀼𑀕𑀦𑁆𑀥𑁂𑀳𑀺 𑀧𑀜𑁆𑀘𑀗𑁆𑀕𑀼𑀮𑀺𑀓𑁂𑀳𑀺 𑀘 𑀅𑀮𑀗𑁆𑀓𑀢𑀸 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑀸 𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸, 𑀏𑀓𑀘𑁆𑀘𑁂 𑀓𑀸𑀴𑀸 𑀅𑀜𑁆𑀚𑀦𑀯𑀡𑁆𑀡𑀸𑀬𑁂𑀯, 𑀏𑀓𑀘𑁆𑀘𑁂 𑀲𑁂𑀢𑀸 𑀨𑀮𑀺𑀓𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀭𑀢𑁆𑀢𑀸 𑀧𑀯𑀸𑀴𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀓𑀫𑁆𑀫𑀸𑀲𑀸 𑀫𑀲𑀸𑀭𑀕𑀮𑁆𑀮𑀯𑀡𑁆𑀡𑀸. 𑀧𑀜𑁆𑀘𑀲𑀢𑀸 𑀓𑀲𑁆𑀲𑀓𑀧𑀼𑀭𑀺𑀲𑀸 𑀲𑀩𑁆𑀩𑁂 𑀅𑀳𑀢𑀲𑁂𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀫𑀸𑀮𑀸𑀮𑀗𑁆𑀓𑀢𑀸 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑁂𑀲𑀼 𑀞𑀧𑀺𑀢𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀸 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀮𑀜𑁆𑀙𑀦𑀼𑀚𑁆𑀚𑀮𑀺𑀢𑀕𑀢𑁆𑀢𑀪𑀸𑀕𑀸 𑀤𑀲 𑀤𑀲 𑀦𑀗𑁆𑀕𑀮𑀸 𑀏𑀓𑁂𑀓𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀦𑀗𑁆𑀕𑀮𑀸𑀦𑀁 𑀲𑀻𑀲𑀜𑁆𑀘 𑀬𑀼𑀕𑀜𑁆𑀘 𑀧𑀢𑁄𑀤𑀸 𑀘 𑀲𑀼𑀯𑀡𑁆𑀡𑀯𑀺𑀦𑀤𑁆𑀥𑀸. 𑀧𑀞𑀫𑀦𑀗𑁆𑀕𑀮𑁂 𑀅𑀝𑁆𑀞 𑀩𑀮𑀺𑀩𑀤𑁆𑀤𑀸 𑀬𑀼𑀢𑁆𑀢𑀸, 𑀲𑁂𑀲𑁂𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄, 𑀅𑀯𑀲𑁂𑀲𑀸 𑀓𑀺𑀮𑀦𑁆𑀢𑀧𑀭𑀺𑀯𑀢𑁆𑀢𑀦𑀢𑁆𑀣𑀁 𑀆𑀦𑀻𑀢𑀸. 𑀏𑀓𑁂𑀓𑀕𑀼𑀫𑁆𑀩𑁂 𑀏𑀓𑀫𑁂𑀓𑀁 𑀩𑀻𑀚𑀲𑀓𑀝𑀁 𑀏𑀓𑁂𑀓𑁄 𑀓𑀲𑀢𑀺, 𑀏𑀓𑁂𑀓𑁄 𑀯𑀧𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀧𑀦 𑀧𑀕𑁂𑀯 𑀫𑀲𑁆𑀲𑀼𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀼𑀕𑀦𑁆𑀥𑀕𑀦𑁆𑀥𑁂𑀳𑀺 𑀯𑀺𑀮𑀺𑀢𑁆𑀢𑁄 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 ¶ 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀏𑀓𑀫𑁂𑀓𑀺𑀲𑁆𑀲𑀸 𑀅𑀗𑁆𑀕𑀼𑀮𑀺𑀬𑀸 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀯𑀻𑀲𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀬𑁄, 𑀓𑀡𑁆𑀡𑁂𑀲𑀼 𑀲𑀻𑀳𑀓𑀼𑀡𑁆𑀟𑀮𑀸𑀦𑀺, 𑀲𑀻𑀲𑁂 𑀘 𑀩𑁆𑀭𑀳𑁆𑀫𑀯𑁂𑀞𑀦𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀸𑀮𑀁 𑀓𑀡𑁆𑀞𑁂 ¶ 𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀕𑀡𑀧𑀭𑀺𑀯𑀼𑀢𑁄 𑀓𑀫𑁆𑀫𑀦𑁆𑀢𑀁 𑀯𑁄𑀲𑀸𑀲𑀢𑀺. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀅𑀦𑁂𑀓𑀲𑀢𑀪𑀸𑀚𑀦𑁂𑀲𑀼 𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀫𑀳𑀸𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀩𑁆𑀭𑀸𑀳𑁆𑀫𑀡𑀻𑀕𑀡𑀧𑀭𑀺𑀯𑀼𑀢𑀸 𑀓𑀫𑁆𑀫𑀦𑁆𑀢𑀁 𑀅𑀕𑀫𑀸𑀲𑀺. 𑀕𑁂𑀳𑀫𑁆𑀧𑀺𑀲𑁆𑀲 𑀲𑀩𑁆𑀩𑀢𑁆𑀣 𑀕𑀦𑁆𑀥𑁂𑀳𑀺 𑀲𑀼𑀯𑀺𑀮𑀺𑀢𑁆𑀢𑀁 𑀧𑀼𑀧𑁆𑀨𑁂𑀳𑀺 𑀲𑀼𑀓𑀢𑀩𑀮𑀺𑀓𑀫𑁆𑀫𑀁, 𑀔𑁂𑀢𑁆𑀢𑀜𑁆𑀘 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀫𑀼𑀲𑁆𑀲𑀺𑀢𑀧𑀝𑀸𑀓𑀁 𑀅𑀳𑁄𑀲𑀺. 𑀧𑀭𑀺𑀚𑀦𑀓𑀫𑁆𑀫𑀓𑀸𑀭𑁂𑀳𑀺 ¶ 𑀲𑀳 𑀓𑀫𑁆𑀫𑀦𑁆𑀢𑀁 𑀑𑀲𑀝𑀧𑀭𑀺𑀲𑀸 𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑀸 𑀅𑀳𑁄𑀲𑀺. 𑀲𑀩𑁆𑀩𑁂 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑀸, 𑀲𑀩𑁆𑀩𑁂𑀲𑀜𑁆𑀘 𑀧𑀸𑀬𑀸𑀲𑀪𑁄𑀚𑀦𑀁 𑀧𑀝𑀺𑀬𑀢𑁆𑀢𑀁 𑀅𑀳𑁄𑀲𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀬𑀢𑁆𑀣 𑀲𑀸𑀫𑀁 𑀪𑀼𑀜𑁆𑀚𑀢𑀺, 𑀢𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀥𑁄𑀯𑀸𑀧𑁂𑀢𑁆𑀯𑀸 𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀗𑁆𑀕𑀮𑀩𑀮𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀻 𑀧𑀜𑁆𑀘 𑀓𑀲𑁆𑀲𑀓𑀲𑀢𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀓𑀁𑀲𑀢𑀫𑁆𑀩𑀫𑀬𑀸𑀦𑀺 𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀺 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀦𑁆𑀢𑀻 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀩𑀮𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀩𑀦𑁆𑀥𑀽𑀧𑀸𑀳𑀦𑀸𑀬𑁄 𑀆𑀭𑁄𑀳𑀺𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 ‘‘𑀇𑀥 𑀧𑀸𑀬𑀸𑀲𑀁 𑀤𑁂𑀣, 𑀇𑀥 𑀲𑀧𑁆𑀧𑀺𑀁, 𑀇𑀥 𑀲𑀓𑁆𑀔𑀭𑀁 𑀤𑁂𑀣𑀸’’𑀢𑀺 𑀯𑁄𑀲𑀸𑀲𑀫𑀸𑀦𑁄 𑀯𑀺𑀘𑀭𑀢𑀺. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀯𑁂𑀲𑀦𑀁 𑀯𑀢𑁆𑀢𑀫𑀸𑀦𑀁 𑀜𑀢𑁆𑀯𑀸 ‘‘𑀅𑀬𑀁 𑀓𑀸𑀮𑁄 𑀩𑁆𑀭𑀸𑀳𑁆𑀫𑀡𑀁 𑀤𑀫𑁂𑀢𑀼’’𑀦𑁆𑀢𑀺 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸’’𑀢𑀺.

𑀢𑀢𑁆𑀣 𑀅𑀣 𑀇𑀢𑀺 𑀦𑀺𑀧𑀸𑀢𑁄 𑀅𑀜𑁆𑀜𑀸𑀥𑀺𑀓𑀸𑀭𑀯𑀘𑀦𑀸𑀭𑀫𑁆𑀪𑁂 𑀔𑁄𑀢𑀺 ¶ 𑀧𑀤𑀧𑀽𑀭𑀡𑁂. 𑀪𑀕𑀯𑀸𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄, 𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀫𑀬𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀮𑀩𑁆𑀪𑀢𑀺. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀧𑀭𑀺𑀤𑀳𑀺𑀢𑁆𑀯𑀸, 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀪𑀕𑀯𑀸 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀯𑀢𑁆𑀣𑁄 𑀆𑀲𑀺. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺, 𑀘𑀻𑀯𑀭𑀁 𑀓𑀸𑀬𑁂𑀦 𑀆𑀤𑀺𑀬𑀺𑀢𑁆𑀯𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀓𑀺𑀭 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀓𑀸𑀫𑀲𑁆𑀲 𑀪𑀫𑀭𑁄 𑀯𑀺𑀬 𑀯𑀺𑀓𑀲𑀺𑀢𑀧𑀤𑀼𑀫𑀤𑁆𑀯𑀬𑀫𑀚𑁆𑀛𑀁, 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑀁 ¶ 𑀲𑁂𑀮𑀫𑀬𑀁 𑀧𑀢𑁆𑀢𑀁 𑀳𑀢𑁆𑀣𑀤𑁆𑀯𑀬𑀫𑀚𑁆𑀛𑀁 𑀆𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀕𑀢𑀁 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘𑀻𑀯𑀭𑀜𑁆𑀘 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀢𑀁 𑀓𑀸𑀬𑁂𑀦 𑀥𑀸𑀭𑁂𑀢𑁆𑀯𑀸𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀯𑀸 𑀢𑁂𑀦 𑀯𑀸 𑀳𑀺 𑀧𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑁄 𑀆𑀤𑀸𑀬 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻’’𑀢𑀺.

𑀬𑁂𑀦𑀸𑀢𑀺 𑀬𑁂𑀦 𑀫𑀕𑁆𑀕𑁂𑀦. 𑀓𑀫𑁆𑀫𑀦𑁆𑀢𑁄𑀢𑀺 𑀓𑀫𑁆𑀫𑀓𑀭𑀡𑁄𑀓𑀸𑀲𑁄. 𑀢𑁂𑀦𑀸𑀢𑀺 𑀢𑁂𑀦 𑀫𑀕𑁆𑀕𑁂𑀦. 𑀉𑀧𑀲𑀗𑁆𑀓𑀫𑀻𑀢𑀺 𑀕𑀢𑁄, 𑀬𑁂𑀦 𑀫𑀕𑁆𑀕𑁂𑀦 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀦𑁆𑀢𑁄 𑀕𑀫𑁆𑀫𑀢𑀺, 𑀢𑁂𑀦 𑀫𑀕𑁆𑀕𑁂𑀦 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀓𑀲𑁆𑀫𑀸, 𑀪𑀺𑀓𑁆𑀔𑀽, 𑀪𑀕𑀯𑀦𑁆𑀢𑀁 𑀦𑀸𑀦𑀼𑀩𑀦𑁆𑀥𑀺𑀁𑀲𑀽𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀤𑀸 𑀪𑀕𑀯𑀸 𑀏𑀓𑀓𑁄𑀯 𑀓𑀢𑁆𑀣𑀘𑀺 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺. 𑀢𑀢𑁄 𑀪𑀺𑀓𑁆𑀔𑀽 𑀢𑀸𑀬 𑀲𑀜𑁆𑀜𑀸𑀬 𑀚𑀸𑀦𑀦𑁆𑀢𑀺 𑁋 ‘‘𑀅𑀚𑁆𑀚 𑀪𑀕𑀯𑀸 𑀏𑀓𑀓𑁄𑀯 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄, 𑀅𑀤𑁆𑀥𑀸 𑀓𑀜𑁆𑀘𑀺 𑀏𑀯 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀁 𑀅𑀤𑁆𑀤𑀲𑀸’’𑀢𑀺. 𑀢𑁂 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀁 𑀧𑀤𑀓𑁆𑀔𑀺𑀡𑀁 ¶ 𑀓𑀢𑁆𑀯𑀸, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀤𑀸 𑀘 𑀪𑀕𑀯𑀸 𑀏𑀯𑀫𑀓𑀸𑀲𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀦𑀸𑀦𑀼𑀩𑀦𑁆𑀥𑀺𑀁𑀲𑀽𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀓𑀫𑁆𑀫𑀦𑁆𑀢𑀁 𑀉𑀧𑀲𑀗𑁆𑀓𑀫𑀺, 𑀢𑁂𑀦 𑀲𑀫𑀬𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀯𑁂𑀲𑀦𑀸 𑀯𑀢𑁆𑀢𑀢𑀺, 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑁄 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀧𑀼𑀩𑁆𑀩𑁂 𑀅𑀯𑁄𑀘𑀼𑀫𑁆𑀳 𑁋 ‘‘𑀩𑁆𑀭𑀸𑀳𑁆𑀫𑀡𑀻 𑀧𑀜𑁆𑀘 𑀓𑀲𑁆𑀲𑀓𑀲𑀢𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀓𑀁𑀲𑀢𑀫𑁆𑀩𑀫𑀬𑀸𑀦𑀺 𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀺 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀦𑁆𑀢𑀻 𑀕𑀘𑁆𑀙𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁. 𑀦 𑀳𑀺 𑀪𑀕𑀯𑀸 𑀓𑀧𑀡𑀧𑀼𑀭𑀺𑀲𑁄 𑀯𑀺𑀬 𑀪𑁄𑀢𑁆𑀢𑀼𑀓𑀸𑀫𑀢𑀸𑀬 𑀧𑀭𑀺𑀯𑁂𑀲𑀦𑀁 𑀉𑀧𑀲𑀗𑁆𑀓𑀫𑀢𑀺. 𑀪𑀕𑀯𑀢𑁄 𑀳𑀺 𑀤𑁆𑀯𑁂 𑀅𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀲𑀓𑁆𑀬𑀓𑁄𑀮𑀺𑀬𑀭𑀸𑀚𑀸𑀦𑁄 𑀜𑀸𑀢𑀬𑁄, 𑀢𑁂 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀩𑀤𑁆𑀥𑀪𑀢𑁆𑀢𑀁 𑀤𑀸𑀢𑀼𑀁 𑀉𑀲𑁆𑀲𑀳𑀦𑁆𑀢𑀺. 𑀦 𑀧𑀦 𑀪𑀕𑀯𑀸 𑀪𑀢𑁆𑀢𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀧𑀺𑀘 𑀔𑁄 𑀧𑀦 ‘‘𑀅𑀦𑁂𑀓𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀺, 𑀤𑀦𑁆𑀢𑁄 𑀤𑀫𑁂𑀲𑁆𑀲𑀸𑀫𑀺; 𑀲𑀦𑁆𑀢𑁄 𑀲𑀫𑁂𑀲𑁆𑀲𑀸𑀫𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀫𑀼𑀢𑁆𑀢𑀢𑁆𑀢𑀸…𑀧𑁂… 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀘 𑀧𑀭𑀁 𑀫𑁄𑀘𑁂𑀦𑁆𑀢𑁄…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀘 𑀮𑁄𑀓𑁂 𑀯𑀺𑀘𑀭𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁 𑀬𑁂𑀦 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀏𑀓𑁄𑀓𑀸𑀲𑀁 𑀏𑀓𑀧𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀤𑀲𑁆𑀲𑀦𑀽𑀧𑀘𑀸𑀭𑁂 𑀓𑀣𑀸𑀲𑀯𑀦𑀝𑁆𑀞𑀸𑀦𑁂, 𑀬𑀢𑁆𑀣 𑀞𑀺𑀢𑀁 𑀩𑁆𑀭𑀸𑀳𑁆𑀫𑀡𑁄 𑀧𑀲𑁆𑀲𑀢𑀺, 𑀢𑀢𑁆𑀣 𑀉𑀘𑁆𑀘𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀞𑀢𑁆𑀯𑀸 𑀘 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀁 𑀲𑀳𑀲𑁆𑀲𑀘𑀦𑁆𑀤𑀲𑀽𑀭𑀺𑀬𑁄𑀪𑀸𑀲𑀸𑀢𑀺𑀪𑀸𑀲𑀬𑀫𑀸𑀦𑀁 𑀲𑀭𑀻𑀭𑀸𑀪𑀁 𑀫𑀼𑀜𑁆𑀘𑀺 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀧𑀭𑀺𑀫𑀸𑀡𑀁, 𑀬𑀸𑀬 𑀅𑀚𑁆𑀛𑁄𑀢𑁆𑀣𑀭𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀦𑁆𑀢𑀲𑀸𑀮𑀸𑀪𑀺𑀢𑁆𑀢𑀺𑀭𑀼𑀓𑁆𑀔𑀓𑀲𑀺𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸𑀤𑀬𑁄 𑀲𑀼𑀯𑀡𑁆𑀡𑀫𑀬𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀣 𑀫𑀦𑀼𑀲𑁆𑀲𑀸 𑀧𑀸𑀬𑀸𑀲𑀁 𑀪𑀼𑀢𑁆𑀢𑀸 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀭𑀺𑀯𑀸𑀭𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀲𑀭𑀻𑀭𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀪𑀽𑀲𑀺𑀢𑀩𑀸𑀳𑀼𑀬𑀼𑀕𑀴𑀁 𑀓𑁂𑀢𑀼𑀫𑀸𑀮𑀸𑀲𑀫𑀼𑀚𑁆𑀚𑀮𑀺𑀢𑀲𑀲𑁆𑀲𑀺𑀭𑀺𑀓𑀤𑀲𑁆𑀲𑀦𑀁 ¶ 𑀚𑀗𑁆𑀕𑀫𑀫𑀺𑀯 𑀧𑀤𑀼𑀫𑀲𑁆𑀲𑀭𑀁, 𑀭𑀁𑀲𑀺𑀚𑀸𑀮𑀼𑀚𑁆𑀚𑀮𑀺𑀢𑀢𑀸𑀭𑀸𑀕𑀡𑀫𑀺𑀯 𑀕𑀕𑀦𑀢𑀮𑀁, 𑀆𑀤𑀺𑀢𑁆𑀢𑀫𑀺𑀯 𑀘 𑀓𑀦𑀓𑀕𑀺𑀭𑀺𑀲𑀺𑀔𑀭𑀁 𑀲𑀺𑀭𑀺𑀬𑀸 𑀚𑀮𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀢𑁂𑀳𑀺 𑀲𑀫𑁆𑀧𑀭𑀺𑀯𑀸𑀭𑀺𑀢𑀁 𑀅𑀤𑁆𑀤𑀲 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀧𑀺𑀡𑁆𑀟𑀸𑀬 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀳𑀁 𑀔𑁄, 𑀲𑀫𑀡, 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’’𑀢𑀺.

𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀫𑀸𑀳? 𑀓𑀺𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁂 𑀧𑀲𑀸𑀤𑀦𑀻𑀬𑁂 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑁂𑀧𑀺 𑀪𑀕𑀯𑀢𑀺 ¶ 𑀅𑀧𑁆𑀧𑀲𑀸𑀤𑁂𑀦, 𑀉𑀤𑀸𑀳𑀼 𑀅𑀟𑁆𑀠𑀢𑁂𑀬𑁆𑀬𑀸𑀦𑀁 𑀚𑀦𑀲𑀳𑀲𑁆𑀲𑀸𑀦𑀁 𑀧𑀸𑀬𑀸𑀲𑀁 𑀧𑀝𑀺𑀬𑀸𑀤𑁂𑀢𑁆𑀯𑀸𑀧𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀬 𑀫𑀘𑁆𑀙𑁂𑀭𑁂𑀦𑀸𑀢𑀺? 𑀉𑀪𑀬𑀣𑀸𑀧𑀺 𑀦𑁄, 𑀅𑀧𑀺𑀘 𑀔𑁆𑀯𑀸𑀲𑁆𑀲 𑀪𑀕𑀯𑀢𑁄 𑀤𑀲𑁆𑀲𑀦𑁂𑀦 𑀅𑀢𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀦𑁆𑀢𑀁 𑀚𑀦𑀁 𑀤𑀺𑀲𑁆𑀯𑀸 ‘‘𑀓𑀫𑁆𑀫𑀪𑀗𑁆𑀕𑀁 𑀫𑁂 𑀓𑀸𑀢𑀼𑀁 𑀆𑀕𑀢𑁄’’𑀢𑀺 𑀅𑀦𑀢𑁆𑀢𑀫𑀦𑀢𑀸 𑀅𑀳𑁄𑀲𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀪𑀕𑀯𑀢𑁄 𑀘 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑁂 𑀘𑀽𑀴𑀸𑀫𑀡𑀺 𑀯𑀺𑀬 𑀅𑀪𑀯𑀺𑀲𑁆𑀲, 𑀓𑁄 𑀦𑀸𑀫𑀲𑁆𑀲 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲, 𑀏𑀯𑀫𑁂𑀯𑀁 𑀅𑀮𑀲𑀢𑀸𑀬 𑀓𑀫𑁆𑀫𑀦𑁆𑀢𑁂 𑀅𑀧𑁆𑀧𑀬𑁄𑀚𑁂𑀢𑁆𑀯𑀸 𑀯𑀧𑁆𑀧𑀫𑀗𑁆𑀕𑀮𑀸𑀤𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀯𑀺𑀘𑀭𑀢𑀻’’𑀢𑀺𑀧𑀺𑀲𑁆𑀲 𑀅𑀳𑁄𑀲𑀺. 𑀢𑁂𑀦𑀸𑀳 𑁋 ‘‘𑀅𑀳𑀁 𑀔𑁄, 𑀲𑀫𑀡, 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘, 𑀓𑀲𑀺𑀢𑁆𑀯𑀸 𑀘 𑀯𑀧𑀺𑀢𑁆𑀯𑀸 𑀘 𑀪𑀼𑀜𑁆𑀚𑀸𑀫𑀻’’𑀢𑀺. 𑀦 𑀫𑁂 𑀓𑀫𑁆𑀫𑀦𑁆𑀢𑀸 𑀩𑁆𑀬𑀸𑀧𑀚𑁆𑀚𑀦𑁆𑀢𑀺, 𑀦 𑀘𑀫𑁆𑀳𑀺 𑀬𑀣𑀸 𑀢𑁆𑀯𑀁 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁆𑀯𑀫𑁆𑀧𑀺 𑀲𑀫𑀡…𑀧𑁂… 𑀪𑀼𑀜𑁆𑀚𑀲𑁆𑀲𑀼, 𑀓𑁄 𑀢𑁂 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀺𑀘𑀸𑀬𑀁 ¶ 𑀅𑀲𑁆𑀲𑁄𑀲𑀺 𑁋 ‘‘𑀲𑀓𑁆𑀬𑀭𑀸𑀚𑀓𑀼𑀮𑁂 𑀓𑀺𑀭 𑀓𑀼𑀫𑀸𑀭𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄’’𑀢𑀺. 𑀢𑀲𑁆𑀫𑀸 ‘‘𑀇𑀤𑀸𑀦𑀺 𑀅𑀬𑀁 𑀲𑁄’’𑀢𑀺 𑀜𑀢𑁆𑀯𑀸 ‘‘𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀺𑀭 𑀧𑀳𑀸𑀬 𑀓𑀺𑀮𑀦𑁆𑀢𑁄𑀲𑀻’’𑀢𑀺 𑀉𑀧𑀸𑀭𑀫𑁆𑀪𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀳𑀁 𑀔𑁄 𑀲𑀫𑀡𑀸’’𑀢𑀺. 𑀅𑀧𑀺𑀘𑀸𑀬𑀁 𑀢𑀺𑀓𑁆𑀔𑀧𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑁄, 𑀦 𑀪𑀕𑀯𑀦𑁆𑀢𑀁 𑀅𑀯𑀓𑁆𑀔𑀺𑀧𑀦𑁆𑀢𑁄 ¶ 𑀪𑀡𑀢𑀺, 𑀪𑀕𑀯𑀢𑁄 𑀧𑀦 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀫𑁆𑀧𑀺 𑀏𑀯𑀫𑀸𑀳 𑁋 ‘‘𑀅𑀳𑀁 𑀔𑁄 𑀲𑀫𑀡𑀸’’𑀢𑀺. 𑀢𑀢𑁄 𑀪𑀕𑀯𑀸 𑀯𑁂𑀦𑁂𑀬𑁆𑀬𑀯𑀲𑁂𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀓𑀲𑁆𑀲𑀓𑀯𑀧𑁆𑀧𑀓𑀪𑀸𑀯𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀦𑁆𑀢𑀸 𑀉𑀤𑀧𑀸𑀤𑀺 𑁋 ‘‘𑀅𑀬𑀁 𑀲𑀫𑀡𑁄 ‘𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’𑀢𑀺 𑀆𑀳. 𑀦 𑀘𑀲𑁆𑀲 𑀑𑀴𑀸𑀭𑀺𑀓𑀸𑀦𑀺 𑀬𑀼𑀕𑀦𑀗𑁆𑀕𑀮𑀸𑀤𑀻𑀦𑀺 𑀓𑀲𑀺𑀪𑀡𑁆𑀟𑀸𑀦𑀺 𑀧𑀲𑁆𑀲𑀸𑀫𑀺, 𑀲𑁄 𑀫𑀼𑀲𑀸 𑀦𑀼 𑀔𑁄 𑀪𑀡𑀢𑀺, 𑀦𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀸𑀤𑀢𑀮𑀸 𑀧𑀝𑁆𑀞𑀸𑀬 𑀬𑀸𑀯 𑀉𑀧𑀭𑀺 𑀓𑁂𑀲𑀦𑁆𑀢𑀸 𑀲𑀫𑁆𑀫𑀸𑀮𑁄𑀓𑀬𑀫𑀸𑀦𑁄 𑀅𑀗𑁆𑀕𑀯𑀺𑀚𑁆𑀚𑀸𑀬 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀫𑀲𑁆𑀲 𑀜𑀢𑁆𑀯𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀯𑀭𑀽𑀧𑁄 𑀫𑀼𑀲𑀸 𑀪𑀡𑁂𑀬𑁆𑀬𑀸’’𑀢𑀺 𑀢𑀸𑀯𑀤𑁂𑀯 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄 𑀪𑀕𑀯𑀢𑀺 𑀲𑀫𑀡𑀯𑀸𑀤𑀁 𑀧𑀳𑀸𑀬 𑀕𑁄𑀢𑁆𑀢𑁂𑀦 𑀪𑀕𑀯𑀦𑁆𑀢𑀁 𑀲𑀫𑀼𑀤𑀸𑀘𑀭𑀫𑀸𑀦𑁄 𑀆𑀳 ‘‘𑀦 𑀔𑁄 𑀧𑀦 𑀫𑀬𑀁 𑀧𑀲𑁆𑀲𑀸𑀫 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸’’𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀺𑀓𑁆𑀔𑀧𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀕𑀫𑁆𑀪𑀻𑀭𑀢𑁆𑀣𑀁 𑀲𑀦𑁆𑀥𑀸𑀬 𑀇𑀫𑀺𑀦𑀸 𑀏𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀜𑀸𑀢𑀼𑀓𑀸𑀫𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀅𑀣 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻’’𑀢𑀺. 𑀢𑀢𑁆𑀣 𑀕𑀸𑀣𑀸𑀬𑀸𑀢𑀺 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑁂𑀦 𑀯𑀘𑀦𑁂𑀦. 𑀅𑀚𑁆𑀛𑀪𑀸𑀲𑀻𑀢𑀺 𑀅𑀪𑀸𑀲𑀺.

𑁭𑁬-𑁭𑁭. 𑀢𑀢𑁆𑀣 ¶ 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀲𑀺’’𑀦𑁆𑀢𑀺 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀲𑀫𑀸𑀬𑁄𑀕𑀁 𑀯𑀤𑀢𑀺. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁂𑀦 𑀭𑁄𑀧𑁂𑀢𑁆𑀯𑀸 𑀓𑀣𑀦𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁂𑀦 𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀓𑁄 𑀧𑀦𑁂𑀢𑁆𑀣 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁄, 𑀦𑀦𑀼 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀲𑀫𑀸𑀬𑁄𑀕𑀁 𑀧𑀼𑀘𑁆𑀙𑀺𑀢𑁄 𑀅𑀣 𑀘 𑀧𑀦 𑀅𑀧𑀼𑀘𑁆𑀙𑀺𑀢𑀲𑁆𑀲 𑀩𑀻𑀚𑀲𑁆𑀲 𑀲𑀪𑀸𑀕𑁂𑀦 𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀅𑀦𑀦𑀼𑀲𑀦𑁆𑀥𑀺𑀓𑀸𑀯 𑀅𑀬𑀁 𑀓𑀣𑀸 𑀳𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀩𑀼𑀤𑁆𑀥𑀸𑀦𑀁 ¶ 𑀅𑀦𑀦𑀼𑀲𑀦𑁆𑀥𑀺𑀓𑀸 𑀦𑀸𑀫 𑀓𑀣𑀸 𑀅𑀢𑁆𑀣𑀺, 𑀦𑀸𑀧𑀺 𑀩𑀼𑀤𑁆𑀥𑀸 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀏𑀯𑀜𑁆𑀘𑁂𑀢𑁆𑀣 ¶ 𑀅𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀦𑁂𑀦 𑀳𑀺 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀯𑀲𑁂𑀦 𑀓𑀲𑀺𑀁 𑀧𑀼𑀘𑁆𑀙𑀺𑀢𑁄. 𑀲𑁄 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 ‘‘𑀇𑀤𑀁 𑀅𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑀫𑀽𑀮𑀁 𑀲𑀉𑀧𑀓𑀸𑀭𑀁 𑀲𑀲𑀫𑁆𑀪𑀸𑀭𑀁 𑀲𑀨𑀮𑀁 𑀓𑀲𑀺𑀁 𑀜𑀸𑀧𑁂𑀢𑀼𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀲𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀩𑀻𑀚𑀜𑁆𑀳𑀺 𑀓𑀲𑀺𑀬𑀸 𑀫𑀽𑀮𑀁 𑀢𑀲𑁆𑀫𑀺𑀁 𑀲𑀢𑀺 𑀓𑀢𑁆𑀢𑀩𑁆𑀩𑀢𑁄, 𑀅𑀲𑀢𑀺 𑀅𑀓𑀢𑁆𑀢𑀩𑁆𑀩𑀢𑁄, 𑀢𑀧𑁆𑀧𑀫𑀸𑀡𑁂𑀦 𑀘 𑀓𑀢𑁆𑀢𑀩𑁆𑀩𑀢𑁄. 𑀩𑀻𑀚𑁂 𑀳𑀺 𑀲𑀢𑀺 𑀓𑀲𑀺𑀁 𑀓𑀭𑁄𑀦𑁆𑀢𑀺, 𑀅𑀲𑀢𑀺 𑀦 𑀓𑀭𑁄𑀦𑁆𑀢𑀺. 𑀩𑀻𑀚𑀧𑁆𑀧𑀫𑀸𑀡𑁂𑀦 𑀘 𑀓𑀼𑀲𑀮𑀸 𑀓𑀲𑁆𑀲𑀓𑀸 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺, 𑀦 𑀊𑀦𑀁 ‘‘𑀫𑀸 𑀦𑁄 𑀲𑀲𑁆𑀲𑀁 𑀧𑀭𑀺𑀳𑀸𑀬𑀻’’𑀢𑀺, 𑀦 𑀅𑀥𑀺𑀓𑀁 ‘‘𑀫𑀸 𑀦𑁄 𑀫𑁄𑀖𑁄 𑀯𑀸𑀬𑀸𑀫𑁄 𑀅𑀳𑁄𑀲𑀻’’𑀢𑀺. 𑀬𑀲𑁆𑀫𑀸 𑀘 𑀩𑀻𑀚𑀫𑁂𑀯 𑀫𑀽𑀮𑀁, 𑀢𑀲𑁆𑀫𑀸 𑀪𑀕𑀯𑀸 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀲𑀺𑀁 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀲𑀺𑀬𑀸 𑀧𑀼𑀩𑁆𑀩𑀥𑀫𑁆𑀫𑀲𑁆𑀲 𑀩𑀻𑀚𑀲𑁆𑀲 𑀲𑀪𑀸𑀕𑁂𑀦 𑀅𑀢𑁆𑀢𑀦𑁄 𑀓𑀲𑀺𑀬𑀸 𑀧𑀼𑀩𑁆𑀩𑀥𑀫𑁆𑀫𑀁 𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀘𑁆𑀙𑀺𑀢𑀁𑀬𑁂𑀯 𑀯𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀁 𑀧𑀘𑁆𑀙𑀸 𑀓𑀺𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀲𑁆𑀲 𑀉𑀧𑀓𑀸𑀭𑀪𑀸𑀯𑀢𑁄 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄 𑀘. 𑀅𑀬𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀜𑀯𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂 𑀧𑀦 𑀚𑀸𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀭𑀳𑀺𑀢𑁄. 𑀲𑀤𑁆𑀥𑀸𑀯𑀺𑀭𑀳𑀺𑀢𑁄 𑀘 𑀧𑀜𑁆𑀜𑀯𑀸 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀅𑀧𑀝𑀺𑀧𑀚𑁆𑀚𑀫𑀸𑀦𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀪𑀸𑀯𑀸𑀧𑀕𑀫𑀧𑁆𑀧𑀲𑀸𑀤𑀫𑀢𑁆𑀢𑀮𑀓𑁆𑀔𑀡𑀸𑀧𑀺 𑀘𑀲𑁆𑀲 𑀤𑀼𑀩𑁆𑀩𑀮𑀸 𑀲𑀤𑁆𑀥𑀸 𑀩𑀮𑀯𑀢𑀺𑀬𑀸 𑀧𑀜𑁆𑀜𑀸𑀬 𑀲𑀳 𑀯𑀢𑁆𑀢𑀫𑀸𑀦𑀸 𑀅𑀢𑁆𑀣𑀲𑀺𑀤𑁆𑀥𑀺𑀁 𑀦 𑀓𑀭𑁄𑀢𑀺, 𑀳𑀢𑁆𑀣𑀺𑀦𑀸 𑀲𑀳 𑀏𑀓𑀥𑀼𑀭𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬. 𑀢𑀲𑁆𑀫𑀸 𑀢𑀲𑁆𑀲 𑀲𑀤𑁆𑀥𑀸 𑀉𑀧𑀓𑀸𑀭𑀺𑀓𑀸. 𑀏𑀯𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀉𑀧𑀓𑀸𑀭𑀪𑀸𑀯𑀢𑁄 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀧𑀘𑁆𑀙𑀸𑀧𑀺 𑀯𑀢𑁆𑀢𑀩𑁆𑀩𑁄 𑀅𑀬𑀫𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀬𑀣𑀸 𑀅𑀜𑁆𑀜𑀢𑁆𑀭𑀸𑀧𑀺 ‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁯) 𑀘, ‘‘𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁯) 𑀘, ‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁩, 𑁨𑁪𑁬; 𑀲𑀼. 𑀦𑀺. 𑁧𑁮𑁪) 𑀘, ‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁬) 𑀘, ‘‘𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄’’𑀢𑀺 (𑀅. 𑀦𑀺. 𑁬.𑁪𑁩; 𑀣𑁂𑀭𑀕𑀸. 𑁬𑁯𑁪) 𑀘, ‘‘𑀲𑀤𑁆𑀥𑁂𑀲𑀺𑀓𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄𑀢𑀺 𑀘𑀸’’𑀢𑀺 (𑀅. 𑀦𑀺. 𑁭.𑁬𑁭). 𑀩𑀻𑀚𑀲𑁆𑀲 𑀘 𑀉𑀧𑀓𑀸𑀭𑀺𑀓𑀸 ¶ 𑀯𑀼𑀝𑁆𑀞𑀺, 𑀲𑀸 𑀢𑀤𑀦𑀦𑁆𑀢𑀭𑀜𑁆𑀜𑁂𑀯 𑀯𑀼𑀘𑁆𑀘𑀫𑀸𑀦𑀸 𑀲𑀫𑀢𑁆𑀣𑀸 𑀳𑁄𑀢𑀺 ¶ . 𑀏𑀯𑀁 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄 ¶ 𑀧𑀘𑁆𑀙𑀸𑀧𑀺 𑀯𑀢𑁆𑀢𑀩𑁆𑀩𑁄 𑀅𑀬𑀫𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄, 𑀅𑀜𑁆𑀜𑁄 𑀘 𑀏𑀯𑀁𑀯𑀺𑀥𑁄 𑀈𑀲𑀸𑀬𑁄𑀢𑁆𑀢𑀸𑀤𑀺.

𑀢𑀢𑁆𑀣 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸, 𑀧𑀓𑁆𑀔𑀦𑁆𑀤𑀦𑀭𑀲𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀓𑀸𑀮𑀼𑀲𑁆𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸, 𑀲𑀤𑁆𑀤𑀳𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀸 𑀯𑀸, 𑀆𑀤𑀸𑀲𑀚𑀮𑀢𑀮𑀸𑀤𑀻𑀦𑀁 𑀧𑀲𑀸𑀤𑁄 𑀯𑀺𑀬 𑀘𑁂𑀢𑀲𑁄 𑀧𑀲𑀸𑀤𑀪𑀽𑀢𑀸, 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬 𑀉𑀤𑀓𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀲𑀸𑀤𑀺𑀓𑀸. 𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑁋 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀨𑀮𑀼𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁, 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀭𑀼𑀳𑀦𑀝𑁆𑀞𑁂𑀦 𑀩𑀻𑀚𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀣𑀸𑀳 𑁋 ‘‘𑀩𑀻𑀚𑀜𑁆𑀘𑁂𑀢𑀁 𑀯𑀺𑀭𑀼𑀳𑀦𑀝𑁆𑀞𑁂𑀦𑀸’’𑀢𑀺.

𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀲𑀺𑀬𑀸 𑀫𑀽𑀮𑀪𑀽𑀢𑀁 𑀩𑀻𑀚𑀁 𑀤𑁆𑀯𑁂 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀳𑁂𑀝𑁆𑀞𑀸 𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀉𑀧𑀭𑀺 𑀅𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀺; 𑀏𑀯𑀁 𑀪𑀕𑀯𑀢𑁄 𑀓𑀲𑀺𑀬𑀸 𑀫𑀽𑀮𑀪𑀽𑀢𑀸 𑀲𑀤𑁆𑀥𑀸 𑀳𑁂𑀝𑁆𑀞𑀸 𑀲𑀻𑀮𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀉𑀧𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀘 𑀢𑀁 𑀫𑀽𑀮𑁂𑀦 𑀧𑀣𑀯𑀺𑀭𑀲𑀁 𑀆𑀧𑁄𑀭𑀲𑀁 𑀕𑀳𑁂𑀢𑁆𑀯𑀸 𑀦𑀸𑀴𑁂𑀦 𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀁 𑀯𑀟𑁆𑀠𑀢𑀺; 𑀏𑀯𑀫𑀬𑀁 𑀲𑀻𑀮𑀫𑀽𑀮𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀭𑀲𑀁 𑀕𑀳𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑀸𑀴𑁂𑀦 𑀅𑀭𑀺𑀬𑀨𑀮𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀁 𑀯𑀟𑁆𑀠𑀢𑀺. 𑀬𑀣𑀸 𑀘 𑀢𑀁 𑀲𑀼𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀫𑀽𑀮𑀗𑁆𑀓𑀼𑀭𑀧𑀡𑁆𑀡𑀦𑀸𑀴𑀓𑀡𑁆𑀟𑀧𑁆𑀧𑀲𑀯𑁂𑀳𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸, 𑀔𑀻𑀭𑀁 𑀚𑀦𑁂𑀢𑁆𑀯𑀸, 𑀅𑀦𑁂𑀓𑀲𑀸𑀮𑀺𑀨𑀮𑀪𑀭𑀺𑀢𑀁 𑀲𑀸𑀮𑀺𑀲𑀻𑀲𑀁 𑀦𑀺𑀧𑁆𑀨𑀸𑀤𑁂𑀢𑀺; 𑀏𑀯𑀫𑀬𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀮𑀘𑀺𑀢𑁆𑀢𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀳𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀔𑀻𑀭𑀁 𑀚𑀦𑁂𑀢𑁆𑀯𑀸 𑀅𑀦𑁂𑀓𑀧𑀝𑀺𑀲𑀫𑁆𑀪𑀺𑀤𑀸𑀪𑀺𑀜𑁆𑀜𑀸𑀪𑀭𑀺𑀢𑀁 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺.

𑀢𑀢𑁆𑀣 𑀲𑀺𑀬𑀸 ‘‘𑀧𑀭𑁄𑀧𑀜𑁆𑀜𑀸𑀲𑀓𑀼𑀲𑀮𑀥𑀫𑁆𑀫𑁂𑀲𑀼 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 𑀲𑀤𑁆𑀥𑀸𑀯 𑀩𑀻𑀚𑀦𑁆𑀢𑀺 𑀯𑀼𑀢𑁆𑀢𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀩𑀻𑀚𑀓𑀺𑀘𑁆𑀘𑀓𑀭𑀡𑀢𑁄. 𑀬𑀣𑀸 𑀳𑀺 𑀢𑁂𑀲𑀼 𑀯𑀺𑀜𑁆𑀜𑀸𑀡𑀁𑀬𑁂𑀯 𑀯𑀺𑀚𑀸𑀦𑀦𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀏𑀯𑀁 𑀲𑀤𑁆𑀥𑀸 𑀩𑀻𑀚𑀓𑀺𑀘𑁆𑀘𑀁, 𑀲𑀸 𑀘 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸. 𑀬𑀣𑀸𑀳 𑁋

‘‘𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀲𑁄𑀢𑀁 𑀑𑀤𑀳𑀢𑀺 ¶ , 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺 ¶ , 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑁄 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀢𑀺 𑀙𑀦𑁆𑀤𑁄 𑀚𑀸𑀬𑀢𑀺, 𑀙𑀦𑁆𑀤𑀚𑀸𑀢𑁄 𑀉𑀲𑁆𑀲𑀳𑀢𑀺, 𑀉𑀲𑁆𑀲𑀸𑀳𑁂𑀢𑁆𑀯𑀸 𑀢𑀼𑀮𑀬𑀢𑀺, 𑀢𑀼𑀮𑀬𑀺𑀢𑁆𑀯𑀸 𑀧𑀤𑀳𑀢𑀺, 𑀧𑀳𑀺𑀢𑀢𑁆𑀢𑁄 ¶ 𑀲𑀫𑀸𑀦𑁄 𑀓𑀸𑀬𑁂𑀦 𑀘𑁂𑀯 𑀧𑀭𑀫𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀦𑀁 𑀅𑀢𑀺𑀯𑀺𑀚𑁆𑀛𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁧𑁮𑁩, 𑁪𑁩𑁨).

𑀢𑀧𑀢𑀺 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀓𑀸𑀬𑀜𑁆𑀘𑀸𑀢𑀺 𑀢𑀧𑁄; 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀻𑀭𑀺𑀬𑀥𑀼𑀢𑀗𑁆𑀕𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀝𑁆𑀞𑀻𑀢𑀺 𑀯𑀲𑁆𑀲𑀯𑀼𑀝𑁆𑀞𑀺𑀯𑀸𑀢𑀯𑀼𑀝𑁆𑀞𑀻𑀢𑀺𑀆𑀤𑀺𑀦𑀸 𑀅𑀦𑁂𑀓𑀯𑀺𑀥𑀸. 𑀇𑀥 𑀯𑀲𑁆𑀲𑀯𑀼𑀝𑁆𑀞𑀺 𑀅𑀥𑀺𑀧𑁆𑀧𑁂𑀢𑀸. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀲𑁆𑀲𑀯𑀼𑀝𑁆𑀞𑀺𑀲𑀫𑀦𑀼𑀕𑁆𑀕𑀳𑀺𑀢𑀁 𑀩𑀻𑀚𑀁 𑀩𑀻𑀚𑀫𑀽𑀮𑀓𑀜𑁆𑀘 𑀲𑀲𑁆𑀲𑀁 𑀯𑀺𑀭𑀼𑀳𑀢𑀺 𑀦 𑀫𑀺𑀮𑀸𑀬𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀏𑀯𑀁 𑀪𑀕𑀯𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑀦𑀼𑀕𑁆𑀕𑀳𑀺𑀢𑀸 𑀲𑀤𑁆𑀥𑀸 𑀲𑀤𑁆𑀥𑀸𑀫𑀽𑀮𑀸 𑀘 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀯𑀺𑀭𑀼𑀳𑀦𑁆𑀢𑀺 𑀦 𑀫𑀺𑀮𑀸𑀬𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀢𑀧𑁄 𑀯𑀼𑀝𑁆𑀞𑀻’’𑀢𑀺. ‘‘𑀧𑀜𑁆𑀜𑀸 𑀫𑁂’’𑀢𑀺 𑀏𑀢𑁆𑀣 𑀘 𑀯𑀼𑀢𑁆𑀢𑁄 𑀫𑁂-𑀲𑀤𑁆𑀤𑁄 𑀇𑀫𑁂𑀲𑀼𑀧𑀺 𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄 ‘‘𑀲𑀤𑁆𑀥𑀸 𑀫𑁂 𑀩𑀻𑀚𑀁, 𑀢𑀧𑁄 𑀫𑁂 𑀯𑀼𑀝𑁆𑀞𑀻’’𑀢𑀺. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸, 𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀯𑀧𑀺𑀢𑁂 𑀩𑀻𑀚𑁂 𑀲𑀘𑁂 𑀯𑀼𑀝𑁆𑀞𑀺 𑀅𑀢𑁆𑀣𑀺, 𑀲𑀸𑀥𑀼, 𑀦𑁄 𑀘𑁂 𑀅𑀢𑁆𑀣𑀺, 𑀉𑀤𑀓𑀫𑁆𑀧𑀺 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀣𑀸 𑀫𑀬𑀸 𑀳𑀺𑀭𑀺-𑀈𑀲𑁂 𑀧𑀜𑁆𑀜𑀸𑀬𑀼𑀕𑀦𑀗𑁆𑀕𑀮𑁂 𑀫𑀦𑁄𑀬𑁄𑀢𑁆𑀢𑁂𑀦 𑀏𑀓𑀸𑀩𑀤𑁆𑀥𑁂 𑀓𑀢𑁂 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀲𑀢𑀺𑀧𑀸𑀘𑀦𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀔𑁂𑀢𑁆𑀢𑁂 𑀲𑀤𑁆𑀥𑀸𑀩𑀻𑀚𑁂 𑀯𑀧𑀺𑀢𑁂 𑀯𑀼𑀝𑁆𑀞𑀺-𑀅𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀧𑀦 𑀫𑁂 𑀲𑀢𑀢𑀁 𑀲𑀫𑀺𑀢𑀁 𑀢𑀧𑁄 𑀯𑀼𑀝𑁆𑀞𑀻𑀢𑀺.

𑀧𑀚𑀸𑀦𑀸𑀢𑀺 𑀏𑀢𑀸𑀬 𑀧𑀼𑀕𑁆𑀕𑀮𑁄, 𑀲𑀬𑀁 𑀯𑀸 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀲𑀸 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀅𑀦𑁂𑀓𑀯𑀺𑀥𑀸. 𑀇𑀥 𑀧𑀦 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀼𑀕𑀦𑀗𑁆𑀕𑀮𑀦𑁆𑀢𑀺 𑀬𑀼𑀕𑀜𑁆𑀘 𑀦𑀗𑁆𑀕𑀮𑀜𑁆𑀘. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀼𑀕𑀦𑀗𑁆𑀕𑀮𑀁, 𑀏𑀯𑀁 ¶ 𑀪𑀕𑀯𑀢𑁄 𑀤𑀼𑀯𑀺𑀥𑀸𑀧𑀺 𑀧𑀜𑁆𑀜𑀸. 𑀢𑀢𑁆𑀣 𑀬𑀣𑀸 𑀬𑀼𑀕𑀁 𑀈𑀲𑀸𑀬 𑀉𑀧𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀈𑀲𑀸𑀩𑀤𑁆𑀥𑀁 𑀳𑁄𑀢𑀺, 𑀬𑁄𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀩𑀮𑀺𑀩𑀤𑁆𑀤𑀸𑀦𑀁 𑀏𑀓𑀢𑁄 𑀕𑀫𑀦𑀁 𑀥𑀸𑀭𑁂𑀢𑀺, 𑀏𑀯𑀁 𑀧𑀜𑁆𑀜𑀸 𑀳𑀺𑀭𑀺𑀧𑀫𑀼𑀔𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀸 𑀳𑁄𑀢𑀺. 𑀬𑀣𑀸𑀳 𑁋 ‘‘𑀧𑀜𑁆𑀜𑀼𑀢𑁆𑀢𑀭𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀅. 𑀦𑀺. 𑁮.𑁮𑁩) 𑀘, ‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦’’𑀦𑁆𑀢𑀺 (𑀚𑀸. 𑁨.𑁧𑁭.𑁮𑁧) 𑀘. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀧𑀼𑀭𑀢𑁄 𑀘 𑀳𑁄𑀢𑀺. 𑀬𑀣𑀸𑀳 𑁋 ‘‘𑀲𑀻𑀮𑀁 𑀳𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄, 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀻’’𑀢𑀺. 𑀳𑀺𑀭𑀺𑀯𑀺𑀧𑁆𑀧𑀬𑁄𑀕𑁂𑀦 ¶ 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀈𑀲𑀸𑀩𑀤𑁆𑀥𑀸 𑀳𑁄𑀢𑀺, 𑀫𑀦𑁄𑀲𑀗𑁆𑀔𑀸𑀢𑀲𑁆𑀲 𑀲𑀫𑀸𑀥𑀺𑀬𑁄𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁄 𑀬𑁄𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀅𑀘𑁆𑀘𑀸𑀭𑀤𑁆𑀥𑀸𑀢𑀺𑀮𑀻𑀦𑀪𑀸𑀯𑀧𑀝𑀺𑀲𑁂𑀥𑀦𑀢𑁄 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑀸𑀦𑀁 𑀏𑀓𑀢𑁄 𑀕𑀫𑀦𑀁 𑀥𑀸𑀭𑁂𑀢𑀺. 𑀬𑀣𑀸 𑀘 𑀦𑀗𑁆𑀕𑀮𑀁 𑀨𑀸𑀮𑀬𑀼𑀢𑁆𑀢𑀁 𑀓𑀲𑀦𑀓𑀸𑀮𑁂 𑀧𑀣𑀯𑀺𑀖𑀦𑀁 𑀪𑀺𑀦𑁆𑀤𑀢𑀺, 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀧𑀤𑀸𑀮𑁂𑀢𑀺, 𑀏𑀯𑀁 𑀲𑀢𑀺𑀬𑀼𑀢𑁆𑀢𑀸 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀁 𑀪𑀺𑀦𑁆𑀤𑀢𑀺, 𑀲𑀩𑁆𑀩𑀓𑀺𑀮𑁂𑀲𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀧𑀤𑀸𑀮𑁂𑀢𑀺. 𑀲𑀸 𑀘 𑀔𑁄 𑀮𑁄𑀓𑀼𑀢𑁆𑀢𑀭𑀸𑀯 𑀇𑀢𑀭𑀸 𑀧𑀦 𑀮𑁄𑀓𑀺𑀬𑀸𑀧𑀺 𑀲𑀺𑀬𑀸. 𑀢𑁂𑀦𑀸𑀳 𑁋 ‘‘𑀧𑀜𑁆𑀜𑀸 𑀫𑁂 𑀬𑀼𑀕𑀦𑀗𑁆𑀕𑀮’’𑀦𑁆𑀢𑀺.

𑀳𑀺𑀭𑀻𑀬𑀢𑀺 ¶ 𑀏𑀢𑀸𑀬 𑀧𑀼𑀕𑁆𑀕𑀮𑁄, 𑀲𑀬𑀁 𑀯𑀸 𑀳𑀺𑀭𑀻𑀬𑀢𑀺 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀚𑀺𑀕𑀼𑀘𑁆𑀙𑀢𑀻𑀢𑀺 𑀳𑀺𑀭𑀻. 𑀢𑀕𑁆𑀕𑀳𑀡𑁂𑀦 𑀲𑀳𑀘𑀭𑀡𑀪𑀸𑀯𑀢𑁄 𑀑𑀢𑁆𑀢𑀧𑁆𑀧𑀁 𑀕𑀳𑀺𑀢𑀁𑀬𑁂𑀯 𑀳𑁄𑀢𑀺. 𑀈𑀲𑀸𑀢𑀺 𑀬𑀼𑀕𑀦𑀗𑁆𑀕𑀮𑀲𑀦𑁆𑀥𑀸𑀭𑀺𑀓𑀸 𑀤𑀸𑀭𑀼𑀬𑀝𑁆𑀞𑀺. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀈𑀲𑀸 𑀬𑀼𑀕𑀦𑀗𑁆𑀕𑀮𑀁 𑀲𑀦𑁆𑀥𑀸𑀭𑁂𑀢𑀺, 𑀏𑀯𑀁 𑀪𑀕𑀯𑀢𑁄𑀧𑀺 𑀳𑀺𑀭𑀻 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀬𑀼𑀕𑀦𑀗𑁆𑀕𑀮𑀁 𑀲𑀦𑁆𑀥𑀸𑀭𑁂𑀢𑀺 𑀳𑀺𑀭𑀺𑀬𑀸 𑀅𑀲𑀢𑀺 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀬𑀣𑀸 𑀘 𑀈𑀲𑀸𑀧𑀝𑀺𑀩𑀤𑁆𑀥𑀁 𑀬𑀼𑀕𑀦𑀗𑁆𑀕𑀮𑀁 𑀓𑀺𑀘𑁆𑀘𑀓𑀭𑀁 𑀳𑁄𑀢𑀺 𑀅𑀘𑀮𑀁 𑀅𑀲𑀺𑀣𑀺𑀮𑀁, 𑀏𑀯𑀁 𑀳𑀺𑀭𑀺𑀧𑀝𑀺𑀩𑀤𑁆𑀥𑀸 𑀘 𑀧𑀜𑁆𑀜𑀸 𑀓𑀺𑀘𑁆𑀘𑀓𑀸𑀭𑀻 𑀳𑁄𑀢𑀺 𑀅𑀘𑀮𑀸 𑀅𑀲𑀺𑀣𑀺𑀮𑀸 𑀅𑀩𑁆𑀩𑁄𑀓𑀺𑀡𑁆𑀡𑀸 𑀅𑀳𑀺𑀭𑀺𑀓𑁂𑀦. 𑀢𑁂𑀦𑀸𑀳 ‘‘𑀳𑀺𑀭𑀻 𑀈𑀲𑀸’’𑀢𑀺.

𑀫𑀼𑀦𑀸𑀢𑀻𑀢𑀺 𑀫𑀦𑁄, 𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀫𑀦𑁄𑀲𑀻𑀲𑁂𑀦 ¶ 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀬𑁄𑀢𑁆𑀢𑀦𑁆𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀁. 𑀢𑀁 𑀢𑀺𑀯𑀺𑀥𑀁 𑀈𑀲𑀸𑀬 𑀲𑀳 𑀬𑀼𑀕𑀲𑁆𑀲 𑀩𑀦𑁆𑀥𑀦𑀁, 𑀬𑀼𑀕𑁂𑀦 𑀲𑀳 𑀩𑀮𑀺𑀩𑀤𑁆𑀤𑀸𑀦𑀁 𑀩𑀦𑁆𑀥𑀦𑀁, 𑀲𑀸𑀭𑀣𑀺𑀦𑀸 𑀲𑀳 𑀩𑀮𑀺𑀩𑀤𑁆𑀤𑀸𑀦𑀁 𑀩𑀦𑁆𑀥𑀦𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀢𑁆𑀢𑀁 𑀈𑀲𑀸𑀬𑀼𑀕𑀩𑀮𑀺𑀩𑀤𑁆𑀤𑁂 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀲𑀫𑀸𑀥𑀺 𑀲𑀩𑁆𑀩𑁂𑀯 𑀢𑁂 𑀳𑀺𑀭𑀺𑀧𑀜𑁆𑀜𑀸𑀯𑀻𑀭𑀺𑀬𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑁂𑀧𑀪𑀸𑀯𑁂𑀦 𑀩𑀦𑁆𑀥𑀺𑀢𑁆𑀯𑀸 𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀺. 𑀢𑁂𑀦𑀸𑀳 𑁋 ‘‘𑀫𑀦𑁄 𑀬𑁄𑀢𑁆𑀢’’𑀦𑁆𑀢𑀺.

𑀲𑀭𑀢𑀺 𑀏𑀢𑀸𑀬 𑀘𑀺𑀭𑀓𑀢𑀸𑀤𑀺𑀫𑀢𑁆𑀣𑀁 𑀧𑀼𑀕𑁆𑀕𑀮𑁄, 𑀲𑀬𑀁 𑀯𑀸 𑀲𑀭𑀢𑀻𑀢𑀺 𑀲𑀢𑀺, 𑀲𑀸 𑀅𑀲𑀫𑁆𑀫𑀼𑀲𑁆𑀲𑀦𑀮𑀓𑁆𑀔𑀡𑀸. 𑀨𑀸𑀮𑁂𑀢𑀻𑀢𑀺 𑀨𑀸𑀮𑁄. 𑀧𑀸𑀚𑁂𑀢𑀺 𑀏𑀢𑁂𑀦𑀸𑀢𑀺 𑀧𑀸𑀚𑀦𑀁. 𑀢𑀁 𑀇𑀥 ‘‘𑀧𑀸𑀘𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀢𑁄𑀤𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀨𑀸𑀮𑁄 𑀘 𑀧𑀸𑀘𑀦𑀜𑁆𑀘 𑀨𑀸𑀮𑀧𑀸𑀘𑀦𑀁. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀨𑀸𑀮𑀧𑀸𑀘𑀦𑀁, 𑀏𑀯𑀁 𑀪𑀕𑀯𑀢𑁄 𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀸 𑀫𑀕𑁆𑀕𑀬𑀼𑀢𑁆𑀢𑀸 𑀘 𑀲𑀢𑀺. 𑀢𑀢𑁆𑀣 𑀬𑀣𑀸 𑀨𑀸𑀮𑁄 𑀦𑀗𑁆𑀕𑀮𑀫𑀦𑀼𑀭𑀓𑁆𑀔𑀢𑀺, 𑀧𑀼𑀭𑀢𑁄 𑀘𑀲𑁆𑀲 𑀕𑀘𑁆𑀙𑀢𑀺, 𑀏𑀯𑀁 𑀲𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸 𑀆𑀭𑀫𑁆𑀫𑀡𑁂 𑀯𑀸 𑀉𑀧𑀝𑁆𑀞𑀸𑀧𑀬𑀫𑀸𑀦𑀸 𑀧𑀜𑁆𑀜𑀸𑀦𑀗𑁆𑀕𑀮𑀁 𑀭𑀓𑁆𑀔𑀢𑀺, 𑀢𑀣𑀸 𑀳𑀺 ‘‘𑀲𑀢𑀸𑀭𑀓𑁆𑀔𑁂𑀦 ¶ 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁨𑁦) ‘‘𑀆𑀭𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀸. 𑀅𑀲𑀫𑁆𑀫𑀼𑀲𑁆𑀲𑀦𑀯𑀲𑁂𑀦 𑀘𑀲𑁆𑀲 𑀧𑀼𑀭𑀢𑁄 𑀳𑁄𑀢𑀺. 𑀲𑀢𑀺𑀧𑀭𑀺𑀘𑀺𑀢𑁂 𑀳𑀺 𑀥𑀫𑁆𑀫𑁂 𑀧𑀜𑁆𑀜𑀸 𑀧𑀚𑀸𑀦𑀸𑀢𑀺, 𑀦𑁄 𑀲𑀫𑁆𑀫𑀼𑀝𑁆𑀞𑁂. 𑀬𑀣𑀸 𑀘 𑀧𑀸𑀘𑀦𑀁 𑀩𑀮𑀺𑀩𑀤𑁆𑀤𑀸𑀦𑀁 𑀯𑀺𑀚𑁆𑀛𑀦𑀪𑀬𑀁 𑀤𑀲𑁆𑀲𑁂𑀦𑁆𑀢𑀁 𑀲𑀁𑀲𑀻𑀤𑀦𑀁 𑀦 𑀤𑁂𑀢𑀺, 𑀉𑀧𑁆𑀧𑀣𑀕𑀫𑀦𑀜𑁆𑀘 𑀯𑀸𑀭𑁂𑀢𑀺, 𑀏𑀯𑀁 𑀲𑀢𑀺 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑀸𑀦𑀁 𑀅𑀧𑀸𑀬𑀪𑀬𑀁 𑀤𑀲𑁆𑀲𑁂𑀦𑁆𑀢𑀻 𑀓𑁄𑀲𑀚𑁆𑀚𑀲𑀁𑀲𑀻𑀤𑀦𑀁 𑀦 𑀤𑁂𑀢𑀺, 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂 𑀅𑀕𑁄𑀘𑀭𑁂 𑀘𑀸𑀭𑀁 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑀻 𑀉𑀧𑁆𑀧𑀣𑀕𑀫𑀦𑀜𑁆𑀘 𑀯𑀸𑀭𑁂𑀢𑀺. 𑀢𑁂𑀦𑀸𑀳 𑁋 ‘‘𑀲𑀢𑀺 𑀫𑁂 𑀨𑀸𑀮𑀧𑀸𑀘𑀦’’𑀦𑁆𑀢𑀺.

𑁭𑁮. 𑀓𑀸𑀬𑀕𑀼𑀢𑁆𑀢𑁄𑀢𑀺 𑀢𑀺𑀯𑀺𑀥𑁂𑀦 𑀓𑀸𑀬𑀲𑀼𑀘𑀭𑀺𑀢𑁂𑀦 𑀕𑀼𑀢𑁆𑀢𑁄. 𑀯𑀘𑀻𑀕𑀼𑀢𑁆𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑁂𑀦 𑀯𑀘𑀻𑀲𑀼𑀘𑀭𑀺𑀢𑁂𑀦 𑀕𑀼𑀢𑁆𑀢𑁄. 𑀏𑀢𑁆𑀢𑀸𑀯𑀢𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁. 𑀆𑀳𑀸𑀭𑁂 𑀉𑀤𑀭𑁂 𑀬𑀢𑁄𑀢𑀺 𑀏𑀢𑁆𑀣 𑀆𑀳𑀸𑀭𑀫𑀼𑀔𑁂𑀦 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑁂𑀧𑀺 𑀧𑀘𑁆𑀘𑀬𑁂 ¶ 𑀬𑀢𑁄 𑀲𑀁𑀬𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀼𑀢𑁆𑀢𑀁. 𑀉𑀤𑀭𑁂 𑀬𑀢𑁄𑀢𑀺 𑀉𑀤𑀭𑁂 𑀬𑀢𑁄 𑀲𑀁𑀬𑀢𑁄 𑀫𑀺𑀢𑀪𑁄𑀚𑀻, 𑀆𑀳𑀸𑀭𑁂 ¶ 𑀫𑀢𑁆𑀢𑀜𑁆𑀜𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀫𑀼𑀔𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀻𑀮𑀁 𑀯𑀼𑀢𑁆𑀢𑀁. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀩𑀻𑀚𑀁 𑀯𑀧𑀺𑀢𑁆𑀯𑀸 𑀲𑀲𑁆𑀲𑀧𑀭𑀺𑀧𑀸𑀮𑀦𑀢𑁆𑀣𑀁 𑀓𑀡𑁆𑀝𑀓𑀯𑀢𑀺𑀁 𑀯𑀸 𑀭𑀼𑀓𑁆𑀔𑀯𑀢𑀺𑀁 𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀯𑀸 𑀓𑀭𑁄𑀲𑀺, 𑀢𑁂𑀦 𑀢𑁂 𑀕𑁄𑀫𑀳𑀺𑀁𑀲𑀫𑀺𑀕𑀕𑀡𑀸 𑀧𑀯𑁂𑀲𑀁 𑀅𑀮𑀪𑀦𑁆𑀢𑀸 𑀲𑀲𑁆𑀲𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀏𑀯𑀫𑀳𑀫𑁆𑀧𑀺 𑀲𑀤𑁆𑀥𑀸𑀩𑀻𑀚𑀁 𑀯𑀧𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀼𑀲𑀮𑀲𑀲𑁆𑀲𑀧𑀭𑀺𑀧𑀸𑀮𑀦𑀢𑁆𑀣𑀁 𑀓𑀸𑀬𑀯𑀘𑀻𑀆𑀳𑀸𑀭𑀕𑀼𑀢𑁆𑀢𑀺𑀫𑀬𑀁 𑀢𑀺𑀯𑀺𑀥𑀧𑀭𑀺𑀓𑁆𑀔𑁂𑀧𑀁 𑀓𑀭𑁄𑀫𑀺. 𑀢𑁂𑀦 𑀫𑁂 𑀭𑀸𑀕𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀕𑁄𑀫𑀳𑀺𑀁𑀲𑀫𑀺𑀕𑀕𑀡𑀸 𑀧𑀯𑁂𑀲𑀁 𑀅𑀮𑀪𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀓𑀼𑀲𑀮𑀲𑀲𑁆𑀲𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺.

𑀲𑀘𑁆𑀘𑀁 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀁. 𑀦𑀺𑀤𑁆𑀤𑀸𑀦𑀦𑁆𑀢𑀺 𑀙𑁂𑀤𑀦𑀁 𑀮𑀼𑀦𑀦𑀁 𑀉𑀧𑁆𑀧𑀸𑀝𑀦𑀁, 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄 ‘‘𑀲𑀘𑁆𑀘𑁂𑀦 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦’’𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑁆𑀯𑀁 𑀩𑀸𑀳𑀺𑀭𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸 𑀲𑀲𑁆𑀲𑀤𑀽𑀲𑀓𑀸𑀦𑀁 𑀢𑀺𑀡𑀸𑀦𑀁 𑀳𑀢𑁆𑀣𑁂𑀦 𑀯𑀸 𑀅𑀲𑀺𑀢𑁂𑀦 𑀯𑀸 𑀦𑀺𑀤𑁆𑀤𑀸𑀦𑀁 𑀓𑀭𑁄𑀲𑀺; 𑀏𑀯𑀫𑀳𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸 𑀓𑀼𑀲𑀮𑀲𑀲𑁆𑀲𑀤𑀽𑀲𑀓𑀸𑀦𑀁 𑀯𑀺𑀲𑀁𑀯𑀸𑀤𑀦𑀢𑀺𑀡𑀸𑀦𑀁 𑀲𑀘𑁆𑀘𑁂𑀦 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀺. 𑀜𑀸𑀡𑀲𑀘𑁆𑀘𑀁 𑀯𑀸 𑀏𑀢𑁆𑀣 𑀲𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀬𑀁 𑀢𑀁 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀅𑀢𑁆𑀢𑀲𑀜𑁆𑀜𑀸𑀤𑀻𑀦𑀁 𑀢𑀺𑀡𑀸𑀦𑀁 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀻𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀣 𑀯𑀸 𑀦𑀺𑀤𑁆𑀤𑀸𑀦𑀦𑁆𑀢𑀺 𑀙𑁂𑀤𑀓𑀁 𑀮𑀸𑀯𑀓𑀁, 𑀉𑀧𑁆𑀧𑀸𑀝𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀢𑁆𑀯𑀁 𑀤𑀸𑀲𑀁 𑀯𑀸 𑀓𑀫𑁆𑀫𑀓𑀭𑀁 ¶ 𑀯𑀸 𑀦𑀺𑀤𑁆𑀤𑀸𑀦𑀁 𑀓𑀭𑁄𑀲𑀺, ‘‘𑀦𑀺𑀤𑁆𑀤𑁂𑀳𑀺 𑀢𑀺𑀡𑀸𑀦𑀻’’𑀢𑀺 𑀢𑀺𑀡𑀸𑀦𑀁 𑀙𑁂𑀤𑀓𑀁 𑀮𑀸𑀯𑀓𑀁 𑀉𑀧𑁆𑀧𑀸𑀝𑀓𑀁 𑀓𑀭𑁄𑀲𑀺; 𑀏𑀯𑀫𑀳𑀁 𑀲𑀘𑁆𑀘𑀁 𑀓𑀭𑁄𑀫𑀻𑀢𑀺 𑀉𑀧𑀬𑁄𑀕𑀯𑀘𑀦𑁂𑀦𑁂𑀯 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀅𑀣 𑀯𑀸 𑀲𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀲𑀘𑁆𑀘𑀁. 𑀢𑀫𑀳𑀁 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀺, 𑀙𑀺𑀦𑁆𑀤𑀺𑀢𑀩𑁆𑀩𑀁 𑀮𑀼𑀦𑀺𑀢𑀩𑁆𑀩𑀁 𑀉𑀧𑁆𑀧𑀸𑀝𑁂𑀢𑀩𑁆𑀩𑀁 𑀓𑀭𑁄𑀫𑀻𑀢𑀺 𑀏𑀯𑀫𑁆𑀧𑀺 𑀉𑀧𑀬𑁄𑀕𑀯𑀘𑀦𑁂𑀦𑁂𑀯 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦𑀦𑁆𑀢𑀺 𑀏𑀢𑁆𑀣 𑀬𑀁 𑀢𑀁 ‘‘𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺, 𑀏𑀯𑀁 ¶ 𑀲𑀻𑀮𑀫𑁂𑀯 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁, 𑀯𑀼𑀢𑁆𑀢𑀫𑁂𑀯 𑀏𑀢𑀁 ‘‘𑀓𑀸𑀬𑀕𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦, 𑀅𑀭𑀳𑀢𑁆𑀢𑀨𑀮𑀁 𑀧𑀦 𑀅𑀥𑀺𑀧𑁆𑀧𑁂𑀢𑀁. 𑀢𑀫𑁆𑀧𑀺 𑀳𑀺 𑀲𑀼𑀦𑁆𑀤𑀭𑁂 𑀦𑀺𑀩𑁆𑀩𑀸𑀦𑁂 𑀭𑀢𑀪𑀸𑀯𑀢𑁄 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀫𑁄𑀘𑀦𑀦𑁆𑀢𑀺 𑀬𑁄𑀕𑁆𑀕𑀯𑀺𑀲𑁆𑀲𑀚𑁆𑀚𑀦𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑀯 𑀧𑀫𑁄𑀘𑀦𑀁 𑀧𑀼𑀦𑀧𑀺 𑀲𑀸𑀬𑀦𑁆𑀳𑁂 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀯𑀸 𑀅𑀦𑀸𑀕𑀢𑀲𑀁𑀯𑀘𑁆𑀙𑀭𑁂 𑀯𑀸 𑀬𑁄𑀚𑁂𑀢𑀩𑁆𑀩𑀢𑁄 𑀅𑀧𑁆𑀧𑀫𑁄𑀘𑀦𑀫𑁂𑀯 𑀳𑁄𑀢𑀺, 𑀦 𑀫𑀫 𑀏𑀯𑀁. 𑀦 𑀳𑀺 𑀫𑀫 𑀅𑀦𑁆𑀢𑀭𑀸 𑀫𑁄𑀘𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀳𑀜𑁆𑀳𑀺 𑀤𑀻𑀧𑀗𑁆𑀓𑀭𑀤𑀲𑀩𑀮𑀓𑀸𑀮𑀢𑁄 𑀧𑀪𑀼𑀢𑀺 𑀧𑀜𑁆𑀜𑀸𑀦𑀗𑁆𑀕𑀮𑁂 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀫𑀳𑀸𑀓𑀲𑀺𑀁 𑀓𑀲𑀦𑁆𑀢𑁄 𑀢𑀸𑀯 𑀦 𑀫𑀼𑀜𑁆𑀘𑀺𑀁, 𑀬𑀸𑀯 𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀬𑀤𑀸 𑀘 𑀫𑁂 𑀲𑀩𑁆𑀩𑀁 𑀢𑀁 𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀩𑁆𑀩𑀕𑀼𑀡𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀨𑀮𑀁 𑀉𑀤𑀧𑀸𑀤𑀺, 𑀢𑀤𑀸 𑀫𑀬𑀸 𑀢𑀁 𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 ¶ 𑀧𑀫𑀼𑀢𑁆𑀢𑀁, 𑀦 𑀤𑀸𑀦𑀺 𑀧𑀼𑀦 𑀬𑁄𑀚𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 𑀪𑀕𑀯𑀸 𑁋 ‘‘𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦’’𑀦𑁆𑀢𑀺.

𑁭𑁯. 𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀦𑁆𑀢𑀺 𑀏𑀢𑁆𑀣 𑀯𑀻𑀭𑀺𑀬𑀦𑁆𑀢𑀺 ‘‘𑀓𑀸𑀬𑀺𑀓𑁄 𑀯𑀸, 𑀘𑁂𑀢𑀲𑀺𑀓𑁄 𑀯𑀸 𑀯𑀻𑀭𑀺𑀬𑀸𑀭𑀫𑁆𑀪𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀧𑀥𑀸𑀦𑀁. 𑀥𑀼𑀭𑀸𑀬𑀁 𑀥𑁄𑀭𑀬𑁆𑀳𑀁 𑀥𑀼𑀭𑀥𑁄𑀭𑀬𑁆𑀳𑀁, 𑀥𑀼𑀭𑀁 𑀯𑀳𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀼𑀭𑀸𑀬𑀁 𑀥𑁄𑀭𑀬𑁆𑀳𑀸𑀓𑀟𑁆𑀠𑀺𑀢𑀁 𑀦𑀗𑁆𑀕𑀮𑀁 𑀪𑀽𑀫𑀺𑀖𑀦𑀁 𑀪𑀺𑀦𑁆𑀤𑀢𑀺, 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀘 𑀧𑀤𑀸𑀮𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀯𑀻𑀭𑀺𑀬𑀸𑀓𑀟𑁆𑀠𑀺𑀢𑀁 𑀧𑀜𑁆𑀜𑀸𑀦𑀗𑁆𑀕𑀮𑀁 𑀬𑀣𑀸𑀯𑀼𑀢𑁆𑀢𑀁 𑀖𑀦𑀁 𑀪𑀺𑀦𑁆𑀤𑀢𑀺, 𑀓𑀺𑀮𑁂𑀲𑀲𑀦𑁆𑀢𑀸𑀦𑀓𑀸𑀦𑀺 𑀘 𑀧𑀤𑀸𑀮𑁂𑀢𑀺. 𑀢𑁂𑀦𑀸𑀳 𑁋 ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳’’𑀦𑁆𑀢𑀺. 𑀅𑀣 𑀯𑀸 𑀧𑀼𑀭𑀺𑀫𑀥𑀼𑀭𑀁 𑀯𑀳𑀦𑁆𑀢𑀸 𑀥𑀼𑀭𑀸, 𑀫𑀽𑀮𑀥𑀼𑀭𑀁 𑀯𑀳𑀦𑁆𑀢𑀸 𑀥𑁄𑀭𑀬𑁆𑀳𑀸; 𑀥𑀼𑀭𑀸 𑀘 𑀥𑁄𑀭𑀬𑁆𑀳𑀸 𑀘 𑀥𑀼𑀭𑀥𑁄𑀭𑀬𑁆𑀳𑀸. 𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀓𑀫𑁂𑀓𑀲𑁆𑀫𑀺𑀁 𑀦𑀗𑁆𑀕𑀮𑁂 𑀘𑀢𑀼𑀩𑀮𑀺𑀩𑀤𑁆𑀤𑀧𑁆𑀧𑀪𑁂𑀤𑀁 𑀥𑀼𑀭𑀥𑁄𑀭𑀬𑁆𑀳𑀁 𑀯𑀳𑀦𑁆𑀢𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀢𑀺𑀡𑀫𑀽𑀮𑀖𑀸𑀢𑀁 𑀲𑀲𑁆𑀲𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀸𑀥𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀧𑁆𑀧𑀪𑁂𑀤𑀁 𑀥𑀼𑀭𑀥𑁄𑀭𑀬𑁆𑀳𑀁 𑀯𑀳𑀦𑁆𑀢𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀫𑀽𑀮𑀖𑀸𑀢𑀁 𑀓𑀼𑀲𑀮𑀲𑀫𑁆𑀧𑀢𑁆𑀢𑀺𑀜𑁆𑀘 ¶ 𑀲𑀸𑀥𑁂𑀢𑀺. 𑀢𑁂𑀦𑀸𑀳 𑁋 ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳’’𑀦𑁆𑀢𑀺.

𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀦𑁆𑀢𑀺 ¶ 𑀏𑀢𑁆𑀣 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸 ‘‘𑀬𑁄𑀕𑀓𑁆𑀔𑁂𑀫’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺, 𑀢𑀁 𑀅𑀥𑀺𑀓𑀢𑁆𑀯𑀸 𑀯𑀸𑀳𑀻𑀬𑀢𑀺, 𑀅𑀪𑀺𑀫𑀼𑀔𑀁 𑀯𑀸 𑀯𑀸𑀳𑀻𑀬𑀢𑀻𑀢𑀺 𑀅𑀥𑀺𑀯𑀸𑀳𑀦𑀁. 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀯𑀸𑀳𑀦𑀁 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀧𑀘𑁆𑀙𑀺𑀫𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀅𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀺, 𑀢𑀣𑀸 𑀫𑀫 𑀥𑀼𑀭𑀥𑁄𑀭𑀬𑁆𑀳𑀁 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀺.

𑀏𑀯𑀁 𑀯𑀸𑀳𑀺𑀬𑀫𑀸𑀦𑀜𑁆𑀘 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁. 𑀬𑀣𑀸 𑀢𑀯 𑀦𑀗𑁆𑀕𑀮𑀁 𑀯𑀳𑀦𑁆𑀢𑀁 𑀥𑀼𑀭𑀥𑁄𑀭𑀬𑁆𑀳𑀁 𑀔𑁂𑀢𑁆𑀢𑀓𑁄𑀝𑀺𑀁 𑀧𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀤𑀻𑀧𑀗𑁆𑀓𑀭𑀓𑀸𑀮𑀢𑁄 𑀧𑀪𑀼𑀢𑀺 𑀕𑀘𑁆𑀙𑀢𑁂𑀯. 𑀬𑀲𑁆𑀫𑀸 𑀯𑀸 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦𑀧𑁆𑀧𑀼𑀦𑀁 𑀧𑀳𑀸𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺, 𑀬𑀣𑀸 𑀢𑀯 𑀦𑀗𑁆𑀕𑀮𑁂𑀦 𑀙𑀺𑀦𑁆𑀦𑀸𑀦𑀺 𑀢𑀺𑀡𑀸𑀦𑀺 𑀧𑀼𑀦𑀧𑀺 𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀧𑀺 𑀏𑀢𑀁 𑀧𑀞𑀫𑀫𑀕𑁆𑀕𑀯𑀲𑁂𑀦 𑀤𑀺𑀝𑁆𑀞𑁂𑀓𑀝𑁆𑀞𑁂 𑀓𑀺𑀮𑁂𑀲𑁂, 𑀤𑀼𑀢𑀺𑀬𑀯𑀲𑁂𑀦 𑀑𑀴𑀸𑀭𑀺𑀓𑁂, 𑀢𑀢𑀺𑀬𑀯𑀲𑁂𑀦 𑀅𑀦𑀼𑀲𑀳𑀕𑀢𑁂 𑀓𑀺𑀮𑁂𑀲𑁂, 𑀘𑀢𑀼𑀢𑁆𑀣𑀯𑀲𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀁 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁. 𑀅𑀣 𑀯𑀸 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀺 𑀦𑀺𑀯𑀢𑁆𑀢𑀦𑀭𑀳𑀺𑀢𑀁 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑁆𑀢𑀺 𑀢𑀁 𑀥𑀼𑀭𑀥𑁄𑀭𑀬𑁆𑀳𑀁. 𑀏𑀯𑀫𑁆𑀧𑁂𑀢𑁆𑀣 𑀧𑀤𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀕𑀘𑁆𑀙𑀦𑁆𑀢𑀜𑁆𑀘 𑀬𑀣𑀸 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁 𑀦 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀓𑀲𑁆𑀲𑀓𑁄 𑀅𑀲𑁄𑀓𑁄 𑀦𑀺𑀲𑁆𑀲𑁄𑀓𑁄 𑀯𑀺𑀭𑀚𑁄 𑀳𑀼𑀢𑁆𑀯𑀸 𑀦 𑀲𑁄𑀘𑀢𑀺, 𑀏𑀢𑀁 𑀧𑀦 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺. 𑀬𑀢𑁆𑀣 𑀲𑀢𑀺𑀧𑀸𑀘𑀦𑁂𑀦 𑀏𑀢𑀁 𑀯𑀻𑀭𑀺𑀬𑀥𑀼𑀭𑀥𑁄𑀭𑀬𑁆𑀳𑀁 𑀘𑁄𑀤𑁂𑀦𑁆𑀢𑁄 𑀕𑀦𑁆𑀢𑁆𑀯𑀸 𑀫𑀸𑀤𑀺𑀲𑁄 𑀓𑀲𑁆𑀲𑀓𑁄 𑀅𑀲𑁄𑀓𑁄 𑀦𑀺𑀲𑁆𑀲𑁄𑀓𑁄 𑀯𑀺𑀭𑀚𑁄 𑀳𑀼𑀢𑁆𑀯𑀸 𑀦 𑀲𑁄𑀘𑀢𑀺, 𑀢𑀁 𑀲𑀩𑁆𑀩𑀲𑁄𑀓𑀲𑀮𑁆𑀮𑀲𑀫𑀼𑀕𑁆𑀖𑀸𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀸𑀫𑀢𑀲𑀗𑁆𑀔𑀸𑀢𑀁 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺.

𑁮𑁦. 𑀇𑀤𑀸𑀦𑀺 ¶ 𑀦𑀺𑀕𑀫𑀦𑀁 𑀓𑀭𑁄𑀦𑁆𑀢𑁄 𑀪𑀕𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀯𑀫𑁂𑀲𑀸 𑀓𑀲𑀻 𑀓𑀝𑁆𑀞𑀸, 𑀲𑀸 𑀳𑁄𑀢𑀺 𑀅𑀫𑀢𑀧𑁆𑀨𑀮𑀸;

𑀏𑀢𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸𑀦, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀬𑀸 𑀩𑁆𑀭𑀸𑀳𑁆𑀫𑀡 𑀏𑀲𑀸 𑀲𑀤𑁆𑀥𑀸𑀩𑀻𑀚𑀸 𑀢𑀧𑁄𑀯𑀼𑀝𑁆𑀞𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑀸 𑀓𑀲𑀺, 𑀧𑀜𑁆𑀜𑀸𑀫𑀬𑀁 𑀬𑀼𑀕𑀦𑀗𑁆𑀕𑀮𑀁, 𑀳𑀺𑀭𑀺𑀫𑀬𑀜𑁆𑀘 𑀈𑀲𑀁, 𑀫𑀦𑁄𑀫𑀬𑁂𑀦 𑀬𑁄𑀢𑁆𑀢𑁂𑀦, 𑀏𑀓𑀸𑀩𑀤𑁆𑀥𑀁 ¶ 𑀓𑀢𑁆𑀯𑀸, 𑀧𑀜𑁆𑀜𑀸𑀦𑀗𑁆𑀕𑀮𑁂 𑀲𑀢𑀺𑀨𑀸𑀮𑀁 𑀆𑀓𑁄𑀝𑁂𑀢𑁆𑀯𑀸, 𑀲𑀢𑀺𑀧𑀸𑀘𑀦𑀁 𑀕𑀳𑁂𑀢𑁆𑀯𑀸, 𑀓𑀸𑀬𑀯𑀘𑀻𑀆𑀳𑀸𑀭𑀕𑀼𑀢𑁆𑀢𑀺𑀬𑀸 𑀕𑁄𑀧𑁂𑀢𑁆𑀯𑀸, 𑀲𑀘𑁆𑀘𑀁 𑀦𑀺𑀤𑁆𑀤𑀸𑀦𑀁 𑀓𑀢𑁆𑀯𑀸, 𑀲𑁄𑀭𑀘𑁆𑀘𑀁 𑀧𑀫𑁄𑀘𑀦𑀁 𑀯𑀻𑀭𑀺𑀬𑀁 𑀥𑀼𑀭𑀥𑁄𑀭𑀬𑁆𑀳𑀁 𑀬𑁄𑀕𑀓𑁆𑀔𑁂𑀫𑀸𑀪𑀺𑀫𑀼𑀔𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀯𑀸𑀳𑁂𑀦𑁆𑀢𑁂𑀦 𑀓𑀝𑁆𑀞𑀸, 𑀓𑀲𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀁 𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜𑀨𑀮𑀁 𑀧𑀸𑀧𑀺𑀢𑀸, 𑀲𑀸 ¶ 𑀳𑁄𑀢𑀺 𑀅𑀫𑀢𑀧𑁆𑀨𑀮𑀸, 𑀲𑀸 𑀏𑀲𑀸 𑀓𑀲𑀺 𑀅𑀫𑀢𑀧𑁆𑀨𑀮𑀸 𑀳𑁄𑀢𑀺. 𑀅𑀫𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀦𑀺𑀩𑁆𑀩𑀸𑀦𑀸𑀦𑀺𑀲𑀁𑀲𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀔𑁄 𑀧𑀦𑁂𑀲𑀸 𑀓𑀲𑀺 𑀦 𑀫𑀫𑁂𑀯𑁂𑀓𑀲𑁆𑀲 𑀅𑀫𑀢𑀧𑁆𑀨𑀮𑀸 𑀳𑁄𑀢𑀺, 𑀅𑀧𑀺𑀘, 𑀔𑁄, 𑀧𑀦 𑀬𑁄 𑀓𑁄𑀘𑀺 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀏𑀢𑀁 𑀓𑀲𑀺𑀁 𑀓𑀲𑀢𑀺, 𑀲𑁄 𑀲𑀩𑁆𑀩𑁄𑀧𑀺 𑀏𑀢𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸𑀦, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺, 𑀲𑀩𑁆𑀩𑀲𑁆𑀫𑀸 𑀯𑀝𑁆𑀝𑀤𑀼𑀓𑁆𑀔𑀤𑀼𑀓𑁆𑀔𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀕𑀫𑁆𑀪𑀻𑀭𑀢𑁆𑀣𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀫𑀫 𑀓𑀲𑀺𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑀭𑀚𑁆𑀚𑀼 𑀏𑀯 𑀙𑀸𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀧𑀦 𑀓𑀲𑀺 𑀅𑀫𑀢𑀧𑁆𑀨𑀮𑀸, 𑀢𑀲𑁆𑀲𑀸 𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀘 𑀯𑀺𑀤𑀺𑀢𑁆𑀯𑀸 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀸𑀢𑀼𑀁 𑀧𑀸𑀬𑀸𑀲𑀁 𑀤𑀸𑀢𑀼𑀫𑀸𑀭𑀤𑁆𑀥𑁄. 𑀢𑁂𑀦𑀸𑀳 ‘‘𑀅𑀣 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄’’𑀢𑀺. 𑀢𑀢𑁆𑀣 𑀫𑀳𑀢𑀺𑀬𑀸𑀢𑀺 𑀫𑀳𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀁𑀲𑀧𑀸𑀢𑀺𑀬𑀸𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀬𑀁, 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀅𑀢𑁆𑀢𑀦𑁄 𑀲𑀼𑀯𑀡𑁆𑀡𑀣𑀸𑀮𑁂. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀙𑀼𑀧𑀺𑀢𑁆𑀯𑀸, 𑀆𑀓𑀺𑀭𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀻𑀢𑀺 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀯𑀺𑀘𑀺𑀢𑁆𑀭𑀁 𑀓𑀢𑁆𑀯𑀸, 𑀤𑀼𑀓𑀽𑀮𑀯𑀺𑀢𑀸𑀦𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸, 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀲𑀓𑁆𑀓𑀘𑁆𑀘𑀁 𑀢𑀣𑀸𑀕𑀢𑀲𑁆𑀲 𑀅𑀪𑀺𑀳𑀭𑀺. 𑀓𑀺𑀦𑁆𑀢𑀺? ‘‘𑀪𑀼𑀜𑁆𑀚𑀢𑀼 𑀪𑀯𑀁 𑀕𑁄𑀢𑀫𑁄 𑀧𑀸𑀬𑀸𑀲𑀁, 𑀓𑀲𑁆𑀲𑀓𑁄 𑀪𑀯’’𑀦𑁆𑀢𑀺. 𑀢𑀢𑁄 𑀓𑀲𑁆𑀲𑀓𑀪𑀸𑀯𑀲𑀸𑀥𑀓𑀁 𑀓𑀸𑀭𑀡𑀫𑀸𑀳 ‘‘𑀬𑀜𑁆𑀳𑀺…𑀧𑁂… 𑀓𑀲𑀢𑀻’’𑀢𑀺, 𑀬𑀲𑁆𑀫𑀸 𑀪𑀯𑀁…𑀧𑁂… 𑀓𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀪𑀕𑀯𑀸 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂’’𑀢𑀺 𑀆𑀳.

𑁮𑁧. 𑀢𑀢𑁆𑀣 𑀕𑀸𑀣𑀸𑀪𑀺𑀕𑀻𑀢𑀦𑁆𑀢𑀺 𑀕𑀸𑀣𑀸𑀳𑀺 𑀅𑀪𑀺𑀕𑀻𑀢𑀁, 𑀕𑀸𑀣𑀸𑀬𑁄 𑀪𑀸𑀲𑀺𑀢𑁆𑀯𑀸 𑀮𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑁂𑀢𑀺 𑀫𑀬𑀸. 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺 𑀪𑀼𑀜𑁆𑀚𑀦𑀸𑀭𑀳𑀁 𑀦 𑀳𑁄𑀢𑀺. 𑀲𑀫𑁆𑀧𑀲𑁆𑀲𑀢𑀦𑁆𑀢𑀺 𑀲𑀫𑁆𑀫𑀸 𑀆𑀚𑀻𑀯𑀲𑀼𑀤𑁆𑀥𑀺𑀁 𑀧𑀲𑁆𑀲𑀢𑀁 ¶ , 𑀲𑀫𑀦𑁆𑀢𑀸 𑀯𑀸 𑀧𑀲𑁆𑀲𑀢𑀁 𑀲𑀫𑁆𑀧𑀲𑁆𑀲𑀢𑀁, 𑀩𑀼𑀤𑁆𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁂𑀲 𑀥𑀫𑁆𑀫𑁄𑀢𑀺 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 ¶ 𑀏𑀲 𑀥𑀫𑁆𑀫𑁄 𑀏𑀢𑀁 𑀘𑀸𑀭𑀺𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀦 𑀪𑀼𑀜𑁆𑀚𑀦𑁆𑀢𑀻𑀢𑀺. 𑀓𑀺𑀁 𑀧𑀦 𑀪𑀕𑀯𑀢𑀸 𑀧𑀸𑀬𑀸𑀲𑀢𑁆𑀣𑀁 𑀕𑀸𑀣𑀸 𑀅𑀪𑀺𑀕𑀻𑀢𑀸, 𑀬𑁂𑀦 𑀏𑀯𑀫𑀸𑀳𑀸𑀢𑀺? 𑀦 𑀏𑀢𑀤𑀢𑁆𑀣𑀁 𑀅𑀪𑀺𑀕𑀻𑀢𑀸, 𑀅𑀧𑀺𑀘, 𑀔𑁄, 𑀧𑀦 𑀧𑀸𑀢𑁄 𑀧𑀝𑁆𑀞𑀸𑀬 𑀔𑁂𑀢𑁆𑀢𑀲𑀫𑀻𑀧𑁂 𑀞𑀢𑁆𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀧𑀼𑀦 𑀲𑀓𑀮𑀩𑀼𑀤𑁆𑀥𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀮𑀤𑁆𑀥𑀁 𑀢𑀤𑁂𑀢𑀁 𑀦𑀝𑀦𑀘𑁆𑀘𑀓𑀸𑀤𑀻𑀳𑀺 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀘 𑀮𑀤𑁆𑀥𑀲𑀤𑀺𑀲𑀁 𑀳𑁄𑀢𑀺, 𑀢𑁂𑀦 ‘‘𑀕𑀸𑀣𑀸𑀪𑀺𑀕𑀻𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀜𑁆𑀘 𑀬𑀲𑁆𑀫𑀸 ¶ 𑀩𑀼𑀤𑁆𑀥𑀸𑀦𑀁 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 ‘‘𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀺𑀘𑁆𑀙𑀢𑀸𑀦𑀼𑀭𑀽𑀧𑀜𑁆𑀘𑁂𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀘 𑀏𑀯𑀁 𑀯𑀼𑀢𑁆𑀢𑀁. 𑀬𑀢𑁆𑀭 𑀘 𑀦𑀸𑀫 𑀧𑀭𑀧𑁆𑀧𑀓𑀸𑀲𑀺𑀢𑁂𑀦𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑁂𑀦 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀅𑀧𑁆𑀧𑀺𑀘𑁆𑀙𑁄 𑀖𑀝𑀺𑀓𑀸𑀭𑁄 𑀓𑀼𑀫𑁆𑀪𑀓𑀸𑀭𑁄, 𑀢𑀢𑁆𑀭 𑀓𑀣𑀁 𑀓𑁄𑀝𑀺𑀧𑁆𑀧𑀢𑁆𑀢𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀕𑀼𑀡𑀧𑁆𑀧𑀓𑀸𑀲𑀦𑁂𑀦 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀲𑀸𑀤𑀺𑀬𑀺𑀲𑁆𑀲𑀢𑀺, 𑀬𑀢𑁄 𑀬𑀼𑀢𑁆𑀢𑀫𑁂𑀯 𑀏𑀢𑀁 𑀪𑀕𑀯𑀢𑁄 𑀯𑀢𑁆𑀢𑀼𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 ‘‘𑀅𑀧𑁆𑀧𑀲𑀦𑁆𑀦𑀁 𑀅𑀤𑀸𑀢𑀼𑀓𑀸𑀫𑀁 𑀩𑁆𑀭𑀸𑀳𑁆𑀫𑀡𑀁 𑀕𑀸𑀣𑀸𑀕𑀸𑀬𑀦𑁂𑀦 𑀤𑀸𑀢𑀼𑀓𑀸𑀫𑀁 𑀓𑀢𑁆𑀯𑀸, 𑀲𑀫𑀡𑁄 𑀕𑁄𑀢𑀫𑁄 𑀪𑁄𑀚𑀦𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀆𑀫𑀺𑀲𑀓𑀸𑀭𑀡𑀸 𑀇𑀫𑀲𑁆𑀲 𑀤𑁂𑀲𑀦𑀸’’𑀢𑀺 𑀇𑀫𑀫𑁆𑀳𑀸 𑀮𑁄𑀓𑀸𑀧𑀯𑀸𑀤𑀸 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑁄 𑀤𑁂𑀲𑀦𑀸𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀻𑀧𑁂𑀢𑁆𑀯𑀸, 𑀇𑀤𑀸𑀦𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑁂 𑀲𑀢𑀻 𑀩𑁆𑀭𑀸𑀳𑁆𑀫𑀡 𑀯𑀼𑀢𑁆𑀢𑀺𑀭𑁂𑀲𑀸’’𑀢𑀺 𑀢𑀲𑁆𑀲𑀢𑁆𑀣𑁄 𑁋 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀥𑀫𑁆𑀫𑁂 𑀯𑀸 𑀤𑀲𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑁂 𑀯𑀸 𑀩𑀼𑀤𑁆𑀥𑀸𑀦𑀁 𑀘𑀸𑀭𑀺𑀢𑁆𑀢𑀥𑀫𑁆𑀫𑁂 𑀯𑀸 𑀲𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑁂 𑀅𑀦𑀼𑀧𑀳𑀢𑁂 𑀯𑀢𑁆𑀢𑀫𑀸𑀦𑁂 𑀯𑀼𑀢𑁆𑀢𑀺𑀭𑁂𑀲𑀸 𑀏𑀓𑀦𑁆𑀢𑀯𑁄𑀤𑀸𑀢𑀸 𑀆𑀓𑀸𑀲𑁂 𑀧𑀸𑀡𑀺𑀧𑁆𑀧𑀲𑀸𑀭𑀡𑀓𑀧𑁆𑀧𑀸 𑀏𑀲𑀦𑀸 𑀧𑀭𑀺𑀬𑁂𑀲𑀦𑀸 𑀚𑀻𑀯𑀺𑀢𑀯𑀼𑀢𑁆𑀢𑀺 𑀩𑀼𑀤𑁆𑀥𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀢𑀺.

𑁮𑁨. 𑀏𑀯𑀁 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 ‘‘𑀧𑀸𑀬𑀸𑀲𑀁 𑀫𑁂 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀓𑀧𑁆𑀧𑀺𑀬𑀁 𑀓𑀺𑀭𑁂𑀢𑀁 𑀪𑁄𑀚𑀦𑀁, 𑀅𑀥𑀜𑁆𑀜𑁄 𑀯𑀢𑀲𑁆𑀫𑀺𑀁, 𑀤𑀸𑀦𑀁 𑀤𑀸𑀢𑀼𑀁 ¶ 𑀦 𑀮𑀪𑀸𑀫𑀻’’𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀧𑁆𑀧𑁂𑀯 𑀦𑀸𑀫 𑀅𑀜𑁆𑀜𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀘 𑀘𑀺𑀦𑁆𑀢𑁂𑀲𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 ‘‘𑀅𑀳𑀁 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀕𑀢𑁄 𑁋 ‘𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀧𑀲𑀸𑀤𑁂𑀲𑁆𑀲𑀸𑀫𑀻’𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀘 𑀤𑁄𑀫𑀦𑀲𑁆𑀲𑀁 𑀅𑀓𑀸𑀲𑀺. 𑀇𑀤𑀸𑀦𑀺 𑀢𑁂𑀦 𑀤𑁄𑀫𑀦𑀲𑁆𑀲𑁂𑀦 𑀫𑀬𑀺 𑀘𑀺𑀢𑁆𑀢𑀁 𑀧𑀓𑁄𑀧𑁂𑀢𑁆𑀯𑀸 𑀅𑀫𑀢𑀯𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀲𑀸𑀤𑀚𑀦𑀦𑀢𑁆𑀣𑀁 𑀢𑁂𑀦 𑀧𑀢𑁆𑀣𑀺𑀢𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑁂𑀦 𑀘 𑀓𑁂𑀯𑀮𑀺𑀦’’𑀦𑁆𑀢𑀺. 𑀢𑀢𑁆𑀣 𑀓𑁂𑀯𑀮𑀺𑀦𑀦𑁆𑀢𑀺 𑀲𑀩𑁆𑀩𑀕𑀼𑀡𑀧𑀭𑀺𑀧𑀼𑀡𑁆𑀡𑀁, 𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀕𑀼𑀡𑀸𑀦𑀁 𑀏𑀲𑀦𑀢𑁄 𑀫𑀳𑁂𑀲𑀺𑀁. 𑀧𑀭𑀺𑀓𑁆𑀔𑀻𑀡𑀲𑀩𑁆𑀩𑀸𑀲𑀯𑀢𑁆𑀢𑀸 𑀔𑀻𑀡𑀸𑀲𑀯𑀁. 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑀸𑀤𑀺𑀁 𑀓𑀢𑁆𑀯𑀸 𑀯𑀽𑀧𑀲𑀦𑁆𑀢𑀲𑀩𑁆𑀩𑀓𑀼𑀓𑁆𑀓𑀼𑀘𑁆𑀘𑀢𑁆𑀢𑀸 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀁. 𑀉𑀧𑀝𑁆𑀞𑀳𑀲𑁆𑀲𑀽𑀢𑀺 𑀧𑀭𑀺𑀯𑀺𑀲𑀲𑁆𑀲𑀼 𑀧𑀝𑀺𑀫𑀸𑀦𑀬𑀲𑁆𑀲𑀼. 𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀦 𑀘𑀺𑀢𑁆𑀢𑁂 𑀉𑀧𑁆𑀧𑀸𑀤𑀺𑀢𑁂𑀧𑀺 𑀧𑀭𑀺𑀬𑀸𑀬𑀫𑁂𑀯 𑀪𑀡𑀢𑀺, 𑀦 𑀢𑀼 𑀪𑀡𑀢𑀺 ‘‘𑀤𑁂𑀳𑀺, 𑀆𑀳𑀭𑀸𑀳𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀅𑀣 ¶ ¶ 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀧𑀸𑀬𑀸𑀲𑁄 𑀪𑀕𑀯𑀢𑁄 𑀆𑀦𑀻𑀢𑁄 𑀦𑀸𑀳𑀁 𑀅𑀭𑀳𑀸𑀫𑀺 𑀢𑀁 𑀅𑀢𑁆𑀢𑀦𑁄 𑀙𑀦𑁆𑀤𑁂𑀦 𑀓𑀲𑁆𑀲𑀘𑀺 𑀤𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 ‘‘𑀅𑀣 𑀓𑀲𑁆𑀲 𑀘𑀸𑀳’’𑀦𑁆𑀢𑀺. 𑀢𑀢𑁄 𑀪𑀕𑀯𑀸 ‘‘𑀢𑀁 𑀧𑀸𑀬𑀸𑀲𑀁 𑀞𑀧𑁂𑀢𑁆𑀯𑀸 𑀢𑀣𑀸𑀕𑀢𑀁 𑀢𑀣𑀸𑀕𑀢𑀲𑀸𑀯𑀓𑀜𑁆𑀘 𑀅𑀜𑁆𑀜𑀲𑁆𑀲 𑀅𑀚𑀻𑀭𑀡𑀥𑀫𑁆𑀫𑁄’’𑀢𑀺 𑀜𑀢𑁆𑀯𑀸 𑀆𑀳 𑁋 ‘‘𑀦 𑀔𑁆𑀯𑀸𑀳𑀁 𑀢’’𑀦𑁆𑀢𑀺. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀕𑁆𑀕𑀳𑀡𑀁 𑀅𑀭𑀽𑀧𑀸𑀯𑀘𑀭𑀸 𑀧𑀦 𑀪𑀼𑀜𑁆𑀚𑁂𑀬𑁆𑀬𑀼𑀦𑁆𑀢𑀺 𑀅𑀲𑀫𑁆𑀪𑀸𑀯𑀦𑁂𑀬𑁆𑀬𑀸. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀯𑀘𑀦𑁂𑀦 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘. 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁, 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀯𑀘𑀦𑁂𑀳𑀺 𑀑𑀓𑀸𑀲𑀮𑁄𑀓𑁄, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀆𑀴𑀯𑀓𑀲𑀼𑀢𑁆𑀢𑁂 ¶ 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀓𑀲𑁆𑀫𑀸 𑀧𑀦 𑀲𑀤𑁂𑀯𑀓𑀸𑀤𑀻𑀲𑀼 𑀓𑀲𑁆𑀲𑀘𑀺 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬𑀸𑀢𑀺? 𑀑𑀴𑀸𑀭𑀺𑀓𑁂 𑀲𑀼𑀔𑀼𑀫𑁄𑀚𑀸𑀧𑀓𑁆𑀔𑀺𑀧𑀦𑀢𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀸𑀬𑀸𑀲𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀤𑁂𑀯𑀢𑀸𑀳𑀺 𑀑𑀚𑀸 𑀧𑀓𑁆𑀔𑀺𑀢𑁆𑀢𑀸 𑀬𑀣𑀸 𑀲𑀼𑀚𑀸𑀢𑀸𑀬 𑀧𑀸𑀬𑀸𑀲𑁂, 𑀘𑀼𑀦𑁆𑀤𑀲𑁆𑀲 𑀘 𑀲𑀽𑀓𑀭𑀫𑀤𑁆𑀤𑀯𑁂 𑀧𑀘𑁆𑀘𑀫𑀸𑀦𑁂, 𑀯𑁂𑀭𑀜𑁆𑀚𑀸𑀬𑀜𑁆𑀘 𑀪𑀕𑀯𑀢𑀸 𑀕𑀳𑀺𑀢𑀕𑀳𑀺𑀢𑀸𑀮𑁄𑀧𑁂, 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀘 𑀓𑀘𑁆𑀘𑀸𑀦𑀲𑁆𑀲 𑀕𑀼𑀴𑁆𑀳𑀓𑀼𑀫𑁆𑀪𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑀕𑀼𑀴𑁆𑀳𑁂. 𑀲𑁄 𑀑𑀴𑀸𑀭𑀺𑀓𑁂 𑀲𑀼𑀔𑀼𑀫𑁄𑀚𑀸𑀧𑀓𑁆𑀔𑀺𑀧𑀦𑀢𑁄 𑀤𑁂𑀯𑀸𑀦𑀁 𑀦 𑀧𑀭𑀺𑀡𑀫𑀢𑀺. 𑀤𑁂𑀯𑀸 𑀳𑀺 𑀲𑀼𑀔𑀼𑀫𑀲𑀭𑀻𑀭𑀸, 𑀢𑁂𑀲𑀁 𑀑𑀴𑀸𑀭𑀺𑀓𑁄 𑀫𑀦𑀼𑀲𑁆𑀲𑀸𑀳𑀸𑀭𑁄 𑀦 𑀲𑀫𑁆𑀫𑀸 𑀧𑀭𑀺𑀡𑀫𑀢𑀺. 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀦 𑀧𑀭𑀺𑀡𑀫𑀢𑀺. 𑀫𑀦𑀼𑀲𑁆𑀲𑀸 𑀳𑀺 𑀑𑀴𑀸𑀭𑀺𑀓𑀲𑀭𑀻𑀭𑀸, 𑀢𑁂𑀲𑀁 𑀲𑀼𑀔𑀼𑀫𑀸 𑀤𑀺𑀩𑁆𑀩𑁄𑀚𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀫𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀧𑀓𑀢𑀺𑀅𑀕𑁆𑀕𑀺𑀦𑀸𑀯 𑀧𑀭𑀺𑀡𑀫𑀢𑀺, 𑀲𑀫𑁆𑀫𑀸 𑀚𑀻𑀭𑀢𑀺. 𑀓𑀸𑀬𑀩𑀮𑀜𑀸𑀡𑀩𑀮𑀧𑁆𑀧𑀪𑀸𑀯𑁂𑀦𑀸𑀢𑀺 𑀏𑀓𑁂 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀲𑀫𑀸𑀥𑀺𑀩𑀮𑁂𑀦 𑀫𑀢𑁆𑀢𑀜𑁆𑀜𑀼𑀢𑀸𑀬 𑀘 𑀧𑀭𑀺𑀡𑀫𑀢𑀺, 𑀇𑀢𑀭𑁂𑀲𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀫𑁆𑀧𑀺 𑀦 𑀧𑀭𑀺𑀡𑀫𑀢𑀺. 𑀅𑀘𑀺𑀦𑁆𑀢𑀦𑀻𑀬𑀁 𑀯𑀸 𑀏𑀢𑁆𑀣 𑀓𑀸𑀭𑀡𑀁, 𑀩𑀼𑀤𑁆𑀥𑀯𑀺𑀲𑀬𑁄 𑀏𑀲𑁄𑀢𑀺.

𑀢𑁂𑀦 𑀳𑀺 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀫𑀫 𑀦 𑀓𑀧𑁆𑀧𑀢𑀺, 𑀫𑀫 𑀅𑀓𑀧𑁆𑀧𑀦𑁆𑀢𑀁 𑀲𑀸𑀯𑀓𑀲𑁆𑀲𑀸𑀧𑀺 𑀫𑁂 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀳𑀭𑀺𑀢𑁂𑀢𑀺 𑀧𑀭𑀺𑀢𑁆𑀢𑀳𑀭𑀺𑀢𑀢𑀺𑀡𑁂, 𑀅𑀧𑁆𑀧𑀭𑀼𑀴𑁆𑀳𑀭𑀺𑀢𑀢𑀺𑀡𑁂 𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀲𑀤𑀺𑀲𑁂. 𑀅𑀧𑁆𑀧𑀸𑀡𑀓𑁂𑀢𑀺 𑀦𑀺𑀧𑁆𑀧𑀸𑀡𑀓𑁂, 𑀧𑀸𑀬𑀸𑀲𑀚𑁆𑀛𑁄𑀢𑁆𑀣𑀭𑀡𑀓𑀸𑀭𑀡𑁂𑀦 𑀫𑀭𑀺𑀢𑀩𑁆𑀩𑀧𑀸𑀡𑀭𑀳𑀺𑀢𑁂 𑀯𑀸 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁂. 𑀲𑀳 𑀢𑀺𑀡𑀦𑀺𑀲𑁆𑀲𑀺𑀢𑁂𑀳𑀺 𑀧𑀸𑀡𑁂𑀳𑀺 𑀢𑀺𑀡𑀸𑀦𑀁 𑀧𑀸𑀡𑀓𑀸𑀦𑀜𑁆𑀘 𑀅𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀏𑀢𑀁 𑀯𑀼𑀢𑁆𑀢𑀁. 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀻𑀢𑀺 ¶ 𑀏𑀯𑀁 𑀲𑀤𑁆𑀤𑀁 𑀓𑀭𑁄𑀢𑀺. 𑀲𑀁𑀥𑀽𑀧𑀸𑀬𑀢𑀻𑀢𑀺 𑀲𑀫𑀦𑁆𑀢𑀸 𑀥𑀽𑀧𑀸𑀬𑀢𑀺. 𑀲𑀫𑁆𑀧𑀥𑀽𑀧𑀸𑀬𑀢𑀻𑀢𑀺 𑀢𑀣𑁂𑀯 𑀅𑀥𑀺𑀫𑀢𑁆𑀢𑀁 𑀥𑀽𑀧𑀸𑀬𑀢𑀺. 𑀓𑀲𑁆𑀫𑀸 𑀏𑀯𑀁 𑀅𑀳𑁄𑀲𑀻𑀢𑀺? 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦, 𑀦 𑀉𑀤𑀓𑀲𑁆𑀲, 𑀦 𑀧𑀸𑀬𑀸𑀲𑀲𑁆𑀲, 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀦 𑀅𑀜𑁆𑀜𑁂𑀲𑀁 𑀤𑁂𑀯𑀬𑀓𑁆𑀔𑀸𑀤𑀻𑀦𑀁. 𑀪𑀕𑀯𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀲𑀁𑀯𑁂𑀕𑀢𑁆𑀣𑀁 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸𑀢𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀬𑀣𑀸 𑀨𑀸𑀮𑁄𑀢𑀺 𑀏𑀢𑁆𑀢𑀓𑀫𑁂𑀯 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀯𑀺𑀕𑁆𑀕𑁄 𑀘𑀺𑀢𑁆𑀢𑁂𑀦, 𑀮𑁄𑀫𑀳𑀝𑁆𑀞𑀚𑀸𑀢𑁄 ¶ 𑀲𑀭𑀻𑀭𑁂𑀦. 𑀲𑀭𑀻𑀭𑁂 𑀓𑀺𑀭𑀲𑁆𑀲 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑀸𑀦𑀺 𑀲𑀼𑀯𑀡𑁆𑀡𑀪𑀺𑀢𑁆𑀢𑀺𑀬𑀸 𑀆𑀳𑀢𑀫𑀡𑀺𑀦𑀸𑀕𑀤𑀦𑁆𑀢𑀸 𑀯𑀺𑀬 𑀉𑀤𑁆𑀥𑀕𑁆𑀕𑀸 𑀅𑀳𑁂𑀲𑀼𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀧𑀸𑀤𑁂𑀲𑀼 𑀧𑀦 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺. 𑀅𑀩𑁆𑀪𑀦𑀼𑀫𑁄𑀤𑀦𑁂 𑀳𑀺 𑀅𑀬𑀫𑀺𑀥 𑀅𑀪𑀺𑀓𑁆𑀓𑀦𑁆𑀢 𑀲𑀤𑁆𑀤𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑀲𑁆𑀲 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀘 𑀅𑀩𑁆𑀪𑀦𑀼𑀫𑁄𑀤𑀦𑀢𑁆𑀣𑁂, 𑀢𑀲𑁆𑀫𑀸 𑀲𑀸𑀥𑀼 𑀲𑀸𑀥𑀼 𑀪𑁄 𑀕𑁄𑀢𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬𑀁, 𑀢𑀼𑀭𑀺𑀢𑁂 𑀓𑁄𑀢𑀽𑀳𑀮𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘, 𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄’’𑀢𑀺. 𑁋

𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀇𑀥 𑀧𑀲𑀸𑀤𑀯𑀲𑁂𑀦 𑀧𑀲𑀁𑀲𑀸𑀯𑀲𑁂𑀦 𑀘𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀪𑀺𑀓𑀦𑁆𑀢𑀁 𑀅𑀢𑀺𑀇𑀝𑁆𑀞𑀁, 𑀅𑀢𑀺𑀫𑀦𑀸𑀧𑀁, 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺, 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀪𑀺𑀓𑁆𑀓𑀦𑁆𑀢𑀁 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄𑀢𑀺. 𑀪𑀕𑀯𑀢𑁄 𑀏𑀯 𑀯𑀸 𑀯𑀘𑀦𑀁 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀣𑁄𑀫𑁂𑀢𑀺 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀅𑀪𑀺𑀓𑁆𑀓𑀦𑁆𑀢𑀁 𑀤𑁄𑀲𑀦𑀸𑀲𑀦𑀢𑁄, 𑀅𑀪𑀺𑀓𑁆𑀓𑀦𑁆𑀢𑀁 𑀕𑀼𑀡𑀸𑀥𑀺𑀕𑀫𑀦𑀢𑁄, 𑀢𑀣𑀸 𑀲𑀤𑁆𑀥𑀸𑀚𑀦𑀦𑀢𑁄, 𑀧𑀜𑁆𑀜𑀸𑀚𑀦𑀦𑀢𑁄, 𑀲𑀸𑀢𑁆𑀣𑀢𑁄, 𑀲𑀩𑁆𑀬𑀜𑁆𑀚𑀦𑀢𑁄, 𑀉𑀢𑁆𑀢𑀸𑀦𑀧𑀤𑀢𑁄, 𑀕𑀫𑁆𑀪𑀻𑀭𑀢𑁆𑀣𑀢𑁄, 𑀓𑀡𑁆𑀡𑀲𑀼𑀔𑀢𑁄, 𑀳𑀤𑀬𑀗𑁆𑀕𑀫𑀢𑁄, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀅𑀧𑀭𑀯𑀫𑁆𑀪𑀦𑀢𑁄, 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀧𑀜𑁆𑀜𑀸𑀯𑀤𑀸𑀢𑀢𑁄, 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁄 ¶ 𑀧𑀭𑀫𑁆𑀧𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀁, 𑀳𑁂𑀝𑁆𑀞𑀸 𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀘𑁆𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ¶ ‘‘𑀏𑀲 𑀫𑀕𑁆𑀕𑁄’’𑀢𑀺 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀅𑀟𑁆𑀠𑀭𑀢𑁆𑀢𑀖𑀦𑀯𑀦𑀲𑀡𑁆𑀟𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄.

𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 ¶ 𑀅𑀲𑀤𑁆𑀥𑀫𑁆𑀫𑀧𑀢𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬; 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀥𑀸𑀭𑀡𑁂𑀦 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀤𑁂𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄.

𑀅𑀣 𑀯𑀸 𑀏𑀓𑀘𑁆𑀘𑀺𑀬𑁂𑀦 𑀫𑀢𑁆𑀢𑁂𑀦 𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀺𑀢𑀲𑀤𑀺𑀲𑁄, 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀲𑀤𑀺𑀲𑁄, 𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀸𑀘𑀺𑀓𑁆𑀔𑀡𑀲𑀤𑀺𑀲𑁄, 𑀫𑀕𑁆𑀕𑀤𑀲𑁆𑀲𑀦𑁂𑀦 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀅𑀦𑁆𑀥𑀓𑀸𑀭𑁂 𑀧𑀚𑁆𑀚𑁄𑀢𑀲𑀤𑀺𑀲𑁄, 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬…𑀧𑁂… 𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺, 𑀏𑀯𑀁 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀤𑁆𑀥𑀸𑀢𑀧𑀓𑀸𑀬𑀕𑀼𑀢𑁆𑀢𑀢𑀸𑀤𑀻𑀳𑀺 𑀲𑀻𑀮𑀓𑁆𑀔𑀦𑁆𑀥𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺, 𑀧𑀜𑁆𑀜𑀸𑀬 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀳𑀺𑀭𑀺𑀫𑀦𑀸𑀤𑀻𑀳𑀺 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀬𑁄𑀕𑀓𑁆𑀔𑁂𑀫𑁂𑀦 𑀦𑀺𑀭𑁄𑀥𑁄𑀢𑀺 𑀏𑀯𑀁 𑀢𑀺𑀓𑁆𑀔𑀦𑁆𑀥𑁄 𑀅𑀭𑀺𑀬𑀫𑀕𑁆𑀕𑁄 𑀦𑀺𑀭𑁄𑀥𑁄 𑀘𑀸𑀢𑀺 𑀲𑀭𑀽𑀧𑁂𑀦𑁂𑀯 𑀤𑁆𑀯𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀢𑀢𑁆𑀣 𑀫𑀕𑁆𑀕𑁄 𑀧𑀝𑀺𑀧𑀓𑁆𑀔𑁄 𑀲𑀫𑀼𑀤𑀬𑀲𑁆𑀲, 𑀦𑀺𑀭𑁄𑀥𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀧𑀝𑀺𑀧𑀓𑁆𑀔𑁂𑀦 𑀤𑁆𑀯𑁂. 𑀇𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀢𑀲𑁆𑀫𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄 ¶ .

𑀏𑀲𑀸𑀳𑀦𑁆𑀢𑀺𑀆𑀤𑀻𑀲𑀼 ¶ 𑀏𑀲𑁄 𑀅𑀳𑀦𑁆𑀢𑀺 𑀏𑀲𑀸𑀳𑀁. 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀧𑀡𑀺𑀧𑀸𑀢𑁂𑀦 𑀲𑀭𑀡𑀕𑀫𑀦𑁂𑀦 𑀕𑀢𑁄𑀧𑀺 𑀇𑀤𑀸𑀦𑀺 𑀯𑀸𑀘𑀸𑀬 𑀲𑀫𑀸𑀤𑀺𑀬𑀦𑁆𑀢𑁄 𑀆𑀳. 𑀅𑀣 𑀯𑀸 𑀧𑀡𑀺𑀧𑀸𑀢𑁂𑀦 𑀩𑀼𑀤𑁆𑀥𑀁𑀬𑁂𑀯 𑀲𑀭𑀡𑀁 𑀕𑀢𑁄𑀢𑀺 𑀇𑀤𑀸𑀦𑀺 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑁂𑀲𑁂 𑀥𑀫𑁆𑀫𑀲𑀗𑁆𑀖𑁂𑀧𑀺 𑀕𑀦𑁆𑀢𑀼𑀁 𑀆𑀳. 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸, 𑀅𑀚𑁆𑀚𑀤𑀕𑁆𑀕𑁂𑀢𑀺 𑀯𑀸 𑀧𑀸𑀞𑁄, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁂𑀳𑀺 𑀉𑀧𑁂𑀢𑀁 𑀧𑀸𑀡𑀼𑀧𑁂𑀢𑀁, 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁, 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀁 𑀕𑀢𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀚𑀸𑀦𑀸𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀦𑁂𑀦 𑀲𑀼𑀢𑀸𑀦𑀼𑀭𑀽𑀧𑀸 𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀦𑀺𑀓𑁆𑀓𑀼𑀚𑁆𑀚𑀺𑀢𑀸𑀤𑀻𑀳𑀺 𑀯𑀸 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 ‘‘𑀏𑀲𑀸𑀳’’𑀦𑁆𑀢𑀺𑀆𑀤𑀺𑀦𑀸 𑀲𑀺𑀲𑁆𑀲𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀢𑁂𑀦 𑀯𑀸 𑀧𑀜𑁆𑀜𑀸𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀏𑀯𑀁 𑀧𑀝𑀺𑀮𑀤𑁆𑀥𑀲𑀤𑁆𑀥𑁂𑀦 𑀧𑀜𑁆𑀜𑀯𑀢𑀸 𑀬𑀁 ¶ 𑀓𑀢𑁆𑀢𑀩𑁆𑀩𑀁, 𑀢𑀁 𑀓𑀢𑁆𑀢𑀼𑀓𑀸𑀫𑁄 𑀪𑀕𑀯𑀦𑁆𑀢𑀁 𑀬𑀸𑀘𑀢𑀺 ‘‘𑀮𑀪𑁂𑀬𑁆𑀬𑀸𑀳’’𑀦𑁆𑀢𑀺. 𑀢𑀢𑁆𑀣 𑀪𑀕𑀯𑀢𑁄 𑀇𑀤𑁆𑀥𑀺𑀬𑀸𑀤𑀻𑀳𑀺 𑀅𑀪𑀺𑀧𑁆𑀧𑀲𑀸𑀤𑀺𑀢𑀘𑀺𑀢𑁆𑀢𑁄 ‘‘𑀪𑀕𑀯𑀸𑀧𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄, 𑀓𑀺𑀫𑀗𑁆𑀕𑀁 𑀧𑀦𑀸𑀳’’𑀦𑁆𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑁆𑀚𑀁 𑀬𑀸𑀘𑀢𑀺, 𑀢𑀢𑁆𑀣 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀧𑀢𑁆𑀣𑁂𑀦𑁆𑀢𑁄 𑀧𑀜𑁆𑀜𑀸𑀬 𑀉𑀧𑀲𑀫𑁆𑀧𑀤𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀏𑀓𑁄 𑀯𑀽𑀧𑀓𑀝𑁆𑀞𑁄𑀢𑀺𑀆𑀤𑀻𑀲𑀼 𑀧𑀦 𑀏𑀓𑁄 𑀓𑀸𑀬𑀯𑀺𑀯𑁂𑀓𑁂𑀦, 𑀯𑀽𑀧𑀓𑀝𑁆𑀞𑁄 𑀘𑀺𑀢𑁆𑀢𑀯𑀺𑀯𑁂𑀓𑁂𑀦, 𑀅𑀧𑁆𑀧𑀫𑀢𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺𑀅𑀯𑀺𑀚𑀳𑀦𑁂𑀦, 𑀆𑀢𑀸𑀧𑀻 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀦 𑀆𑀢𑀸𑀧𑁂𑀦, 𑀧𑀳𑀺𑀢𑀢𑁆𑀢𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦. 𑀦 𑀘𑀺𑀭𑀲𑁆𑀲𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀤𑀼𑀯𑀺𑀥𑀸 𑀓𑀼𑀮𑀧𑀼𑀢𑁆𑀢𑀸, 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸, 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘. 𑀅𑀬𑀁 𑀧𑀦 𑀉𑀪𑀬𑀣𑀸𑀧𑀺 𑀓𑀼𑀮𑀧𑀼𑀢𑁆𑀢𑁄. 𑀅𑀕𑀸𑀭𑀲𑁆𑀫𑀸𑀢𑀺 𑀖𑀭𑀸. 𑀅𑀕𑀸𑀭𑀸𑀦𑀁 𑀳𑀺𑀢𑀁 𑀅𑀕𑀸𑀭𑀺𑀬𑀁 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀼𑀝𑀼𑀫𑁆𑀩𑀧𑁄𑀲𑀦𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑀸𑀭𑀺𑀬𑀦𑁆𑀢𑀺 𑀅𑀦𑀕𑀸𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁 𑀧𑀩𑁆𑀩𑀚𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁, 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀸 𑀯𑀺𑀳𑀸𑀲𑀺. 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀘 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀺. 𑀏𑀢𑁂𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺𑀁 𑀤𑀲𑁆𑀲𑁂𑀢𑀺.

𑀓𑀢𑀫𑀸 ¶ 𑀧𑀦𑀲𑁆𑀲 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸, 𑀦 𑀅𑀦𑀸𑀕𑀢𑀸 𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸. 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸 𑀦𑀢𑁆𑀣𑀻𑀢𑀺. 𑀅𑀣 𑀯𑀸 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀢𑁄, 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀦𑀢𑁆𑀣𑀺. 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑁄 𑀭𑀼𑀓𑁆𑀔𑁄 𑀯𑀺𑀬𑀸𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄𑀢𑀺 ¶ 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁. 𑀫𑀳𑀸𑀲𑀸𑀯𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀆𑀬𑀲𑁆𑀫𑀸 𑀪𑀸𑀭𑀤𑁆𑀯𑀸𑀚𑁄 𑀅𑀳𑁄𑀲𑀻𑀢𑀺 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀧𑀼𑀘𑁆𑀙𑀸𑀫𑀺 ¶ ¶ 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜𑀦𑁆𑀢𑀺 𑀘𑀼𑀦𑁆𑀤𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀗𑁆𑀔𑁂𑀧𑀢𑁄 𑀢𑀸𑀯 𑀅𑀢𑁆𑀢𑀚𑁆𑀛𑀸𑀲𑀬𑀧𑀭𑀚𑁆𑀛𑀸𑀲𑀬𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀧𑀼𑀘𑁆𑀙𑀸𑀯𑀲𑀺𑀓𑀪𑁂𑀤𑀢𑁄 𑀘𑀢𑀽𑀲𑀼 𑀉𑀧𑁆𑀧𑀢𑁆𑀢𑀻𑀲𑀼 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀼𑀘𑁆𑀙𑀸𑀯𑀲𑀺𑀓𑀸 𑀉𑀧𑁆𑀧𑀢𑁆𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀮𑁆𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀯𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀅𑀫𑁆𑀩𑀯𑀦𑁂. 𑀇𑀢𑁄 𑀧𑀪𑀼𑀢𑀺 𑀬𑀸𑀯 ‘‘𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀘𑀼𑀦𑁆𑀤𑀲𑁆𑀲 ¶ 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻’’𑀢𑀺 (𑀤𑀻. 𑀦𑀺. 𑁨.𑁧𑁮𑁯), 𑀢𑀸𑀯 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁂 𑀪𑀕𑀯𑀢𑀺 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀦𑁆𑀢𑁄 𑀩𑁆𑀬𑀜𑁆𑀚𑀦𑀲𑀽𑀧𑀸𑀤𑀺𑀕𑀳𑀡𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀉𑀧𑀦𑀸𑀫𑁂𑀲𑀺. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀓𑁂𑀘𑀺 𑀪𑀺𑀓𑁆𑀔𑀽 𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀧𑀝𑀺𑀘𑁆𑀙𑀺𑀁𑀲𑀼 𑀓𑁂𑀘𑀺 𑀦 𑀧𑀝𑀺𑀘𑁆𑀙𑀺𑀁𑀲𑀼. 𑀪𑀕𑀯𑀢𑁄 𑀧𑀦 𑀏𑀓𑀫𑁂𑀯 𑀪𑀸𑀚𑀦𑀁 𑀅𑀢𑁆𑀢𑀦𑁄 𑀲𑁂𑀮𑀫𑀬𑀁 𑀧𑀢𑁆𑀢𑀁, 𑀤𑀼𑀢𑀺𑀬𑀪𑀸𑀚𑀦𑀁 𑀩𑀼𑀤𑁆𑀥𑀸 𑀦 𑀕𑀡𑁆𑀳𑀦𑁆𑀢𑀺. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀧𑀸𑀧𑀪𑀺𑀓𑁆𑀔𑀼 𑀲𑀳𑀲𑁆𑀲𑀕𑁆𑀖𑀦𑀓𑀁 𑀲𑀼𑀯𑀡𑁆𑀡𑀪𑀸𑀚𑀦𑀁 𑀅𑀢𑁆𑀢𑀦𑁄 𑀪𑁄𑀚𑀦𑀢𑁆𑀣𑀸𑀬 𑀲𑀫𑁆𑀧𑀢𑁆𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀼𑀜𑁆𑀘𑀺𑀓𑀢𑁆𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺. 𑀘𑀼𑀦𑁆𑀤𑁄 𑀧𑀭𑀺𑀯𑀺𑀲𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀁 𑀥𑁄𑀯𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 𑀧𑀦 𑀅𑀧𑀲𑁆𑀲𑀫𑀸𑀦𑁄 𑀯𑀺𑀬 𑀳𑀼𑀢𑁆𑀯𑀸 𑀦 𑀦𑀁 𑀓𑀺𑀜𑁆𑀘𑀺 𑀅𑀪𑀡𑀺 𑀪𑀕𑀯𑀢𑀺 𑀣𑁂𑀭𑁂𑀲𑀼 𑀘 𑀕𑀸𑀭𑀯𑁂𑀦, 𑀅𑀧𑀺𑀘 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀘𑀦𑀧𑀣𑁄 𑀫𑀸 𑀅𑀳𑁄𑀲𑀻’’𑀢𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀲𑀁𑀯𑀭𑀬𑀼𑀢𑁆𑀢𑀸𑀬𑁂𑀯 𑀲𑀫𑀡𑀸, 𑀉𑀤𑀸𑀳𑀼 𑀪𑀺𑀦𑁆𑀦𑀲𑀁𑀯𑀭𑀸 𑀈𑀤𑀺𑀲𑀸𑀧𑀺 𑀲𑀫𑀡𑀸’’𑀢𑀺 𑀜𑀸𑀢𑀼𑀓𑀸𑀫𑁄 𑀲𑀸𑀬𑀦𑁆𑀳𑀲𑀫𑀬𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ‘‘𑀧𑀼𑀘𑁆𑀙𑀸𑀫𑀺 𑀫𑀼𑀦𑀺’’𑀦𑁆𑀢𑀺.

𑀢𑀢𑁆𑀣 𑀧𑀼𑀘𑁆𑀙𑀸𑀫𑀻𑀢𑀺 𑀇𑀤𑀁 ‘‘𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸’’𑀢𑀺𑀆𑀤𑀺𑀦𑀸 ¶ (𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨) 𑀦𑀬𑁂𑀦 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀫𑀼𑀦𑀺𑀦𑁆𑀢𑀺 𑀏𑀢𑀫𑁆𑀧𑀺 ‘‘𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀺, 𑀫𑁄𑀦𑀧𑁆𑀧𑀢𑁆𑀢𑁄𑀢𑀺, 𑀢𑀻𑀡𑀺 𑀫𑁄𑀦𑁂𑀬𑁆𑀬𑀸𑀦𑀺 𑀓𑀸𑀬𑀫𑁄𑀦𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁪) 𑀦𑀬𑁂𑀦 𑀢𑀢𑁆𑀣𑁂𑀯 𑀯𑀼𑀢𑁆𑀢𑀦𑀬𑀫𑁂𑀯 ¶ . 𑀅𑀬𑀫𑁆𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀧𑀼𑀘𑁆𑀙𑀸𑀫𑀻𑀢𑀺 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑁄 𑀫𑀼𑀦𑀺𑀦𑁆𑀢𑀺 𑀫𑀼𑀦𑀺𑀫𑀼𑀦𑀺𑀁 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀧𑀳𑀽𑀢𑀧𑀜𑁆𑀜𑀦𑁆𑀢𑀺𑀆𑀤𑀻𑀦𑀺 𑀣𑀼𑀢𑀺𑀯𑀘𑀦𑀸𑀦𑀺, 𑀢𑁂𑀳𑀺 𑀢𑀁 𑀫𑀼𑀦𑀺𑀁 𑀣𑀼𑀦𑀸𑀢𑀺. 𑀢𑀢𑁆𑀣 𑀧𑀳𑀽𑀢𑀧𑀜𑁆𑀜𑀦𑁆𑀢𑀺 𑀯𑀺𑀧𑀼𑀮𑀧𑀜𑁆𑀜𑀁. 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀘𑀲𑁆𑀲 𑀯𑀺𑀧𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄𑀢𑀺 𑀇𑀤𑀁 𑀤𑁆𑀯𑀬𑀁 𑀥𑀦𑀺𑀬𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑁄 𑀧𑀭𑀁 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀯𑀼𑀢𑁆𑀢𑀦𑀬𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀩𑀼𑀤𑁆𑀥𑀦𑁆𑀢𑀺 𑀢𑀻𑀲𑀼 𑀩𑀼𑀤𑁆𑀥𑁂𑀲𑀼 𑀢𑀢𑀺𑀬𑀩𑀼𑀤𑁆𑀥𑀁. 𑀥𑀫𑁆𑀫𑀲𑁆𑀲𑀸𑀫𑀺𑀦𑁆𑀢𑀺 𑀫𑀕𑁆𑀕𑀥𑀫𑁆𑀫𑀲𑁆𑀲 𑀚𑀦𑀓𑀢𑁆𑀢𑀸 𑀧𑀼𑀢𑁆𑀢𑀲𑁆𑀲𑁂𑀯 𑀧𑀺𑀢𑀭𑀁 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀲𑀺𑀧𑁆𑀧𑀸𑀬𑀢𑀦𑀸𑀤𑀻𑀦𑀁 𑀯𑀺𑀬 𑀘 𑀆𑀘𑀭𑀺𑀬𑀁 𑀥𑀫𑁆𑀫𑀲𑁆𑀲 𑀲𑀸𑀫𑀺𑀁, 𑀥𑀫𑁆𑀫𑀺𑀲𑁆𑀲𑀭𑀁 𑀥𑀫𑁆𑀫𑀭𑀸𑀚𑀁 𑀥𑀫𑁆𑀫𑀯𑀲𑀯𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑁄 ¶ 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽, 𑀫𑀕𑁆𑀕𑀯𑀺𑀤𑀽, 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸’’𑀢𑀺 (𑀫. 𑀦𑀺. 𑁩.𑁭𑁯).

𑀯𑀻𑀢𑀢𑀡𑁆𑀳𑀦𑁆𑀢𑀺 𑀯𑀺𑀕𑀢𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀁. 𑀤𑁆𑀯𑀺𑀧𑀤𑀼𑀢𑁆𑀢𑀫𑀦𑁆𑀢𑀺 𑀤𑁆𑀯𑀺𑀧𑀤𑀸𑀦𑀁 𑀉𑀢𑁆𑀢𑀫𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀕𑀯𑀸 𑀦 𑀓𑁂𑀯𑀮𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑁄 𑀏𑀯, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀉𑀢𑁆𑀢𑀫𑁄. 𑀅𑀣 𑀔𑁄 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀤𑁆𑀯𑀺𑀧𑀤𑀼𑀢𑁆𑀢𑀫𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀧𑀤𑀸 𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀓𑁆𑀓𑀝𑁆𑀞𑀸 𑀘𑀓𑁆𑀓𑀯𑀢𑁆𑀢𑀺𑀫𑀳𑀸𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺𑀢𑁄, 𑀢𑁂𑀲𑀜𑁆𑀘 𑀉𑀢𑁆𑀢𑀫𑁄𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄𑀢𑀺 ¶ 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺. 𑀲𑀸𑀭𑀣𑀻𑀦𑀁 𑀧𑀯𑀭𑀦𑁆𑀢𑀺 𑀲𑀸𑀭𑁂𑀢𑀻𑀢𑀺 𑀲𑀸𑀭𑀣𑀺, 𑀳𑀢𑁆𑀣𑀺𑀤𑀫𑀓𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀲𑀜𑁆𑀘 𑀪𑀕𑀯𑀸 𑀧𑀯𑀭𑁄 𑀅𑀦𑀼𑀢𑁆𑀢𑀭𑁂𑀦 𑀤𑀫𑀦𑁂𑀦 𑀧𑀼𑀭𑀺𑀲𑀤𑀫𑁆𑀫𑁂 𑀤𑀫𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀳𑀢𑁆𑀣𑀺𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁 𑀏𑀯 𑀤𑀺𑀲𑀁 𑀥𑀸𑀯𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀉𑀢𑁆𑀢𑀭𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸. 𑀅𑀲𑁆𑀲𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀤𑀫𑁆𑀫𑁄…𑀧𑁂… 𑀕𑁄𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀕𑁄𑀤𑀫𑁆𑀫𑁄…𑀧𑁂… 𑀤𑀓𑁆𑀔𑀺𑀡𑀁 𑀯𑀸. 𑀢𑀣𑀸𑀕𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀼𑀭𑀺𑀲𑀤𑀫𑁆𑀫𑁄 𑀲𑀸𑀭𑀺𑀢𑁄 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺, 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀬𑀫𑁂𑀓𑀸 𑀤𑀺𑀲𑀸…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀅𑀝𑁆𑀞𑀫𑀻 𑀤𑀺𑀲𑀸’’𑀢𑀺 (𑀫. 𑀦𑀺. 𑁩.𑁩𑁧𑁨).

𑀓𑀢𑀻𑀢𑀺 ¶ 𑀅𑀢𑁆𑀣𑀧𑁆𑀧𑀪𑁂𑀤𑀧𑀼𑀘𑁆𑀙𑀸. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀲𑀫𑀡𑀸𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀅𑀢𑁆𑀣𑀦𑀺𑀤𑀲𑁆𑀲𑀦𑀁. 𑀇𑀗𑁆𑀖𑀸𑀢𑀺 𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀤𑀺𑀗𑁆𑀖𑀸𑀢𑀺 𑀢𑁂 𑀇𑀗𑁆𑀖. 𑀩𑁆𑀭𑀽𑀳𑀻𑀢𑀺 𑀆𑀘𑀺𑀓𑁆𑀔 𑀓𑀣𑀬𑀲𑁆𑀲𑀽𑀢𑀺.

𑁮𑁪. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮𑀁, 𑀓𑀺𑀁 𑀅𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁯𑁬) 𑀦𑀬𑁂𑀦 𑀕𑀺𑀳𑀺𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑀡𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀅𑀬𑀁 𑀧𑀼𑀘𑁆𑀙𑀢𑀻’’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀅𑀜𑁆𑀜𑀢𑁆𑀭 𑀯𑁄𑀳𑀸𑀭𑀫𑀢𑁆𑀢𑀸 𑀅𑀲𑁆𑀲𑀫𑀡𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀭𑁄 𑀲𑀫𑀡𑀸’’𑀢𑀺. 𑀢𑀢𑁆𑀣 𑀘𑀢𑀼𑀭𑁄𑀢𑀺 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁄. 𑀲𑀫𑀡𑀸𑀢𑀺 𑀓𑀤𑀸𑀘𑀺 ¶ 𑀪𑀕𑀯𑀸 𑀢𑀺𑀢𑁆𑀣𑀺𑀬𑁂 𑀲𑀫𑀡𑀯𑀸𑀤𑁂𑀦 𑀯𑀤𑀢𑀺; 𑀬𑀣𑀸𑀳 𑁋 ‘‘𑀬𑀸𑀦𑀺 𑀢𑀸𑀦𑀺 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀦𑀻’’𑀢𑀺 (𑀫. 𑀦𑀺. 𑁧.𑁪𑁦𑁭). 𑀓𑀤𑀸𑀘𑀺 𑀧𑀼𑀣𑀼𑀚𑁆𑀚𑀦𑁂; 𑀬𑀣𑀸𑀳 𑁋 ‘‘𑀲𑀫𑀡𑀸 𑀲𑀫𑀡𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀚𑀦𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁧.𑁪𑁩𑁫). 𑀓𑀤𑀸𑀘𑀺 𑀲𑁂𑀓𑁆𑀔𑁂; 𑀬𑀣𑀸𑀳 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀤𑀻. 𑀦𑀺. 𑁨.𑁨𑁧𑁪; 𑀅. 𑀦𑀺. 𑁪.𑁨𑁪𑁧). 𑀓𑀤𑀸𑀘𑀺 𑀔𑀻𑀡𑀸𑀲𑀯𑁂; 𑀬𑀣𑀸𑀳 𑁋 ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁩𑁮). 𑀓𑀤𑀸𑀘𑀺 𑀅𑀢𑁆𑀢𑀸𑀦𑀁𑀬𑁂𑀯; 𑀬𑀣𑀸𑀳 𑁋 ‘‘𑀲𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁮.𑁮𑁫). 𑀇𑀥 𑀧𑀦 𑀢𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑁂𑀧𑀺 𑀅𑀭𑀺𑀬𑁂 𑀲𑀻𑀮𑀯𑀦𑁆𑀢𑀁 𑀧𑀼𑀣𑀼𑀚𑁆𑀚𑀦𑀜𑁆𑀘 ¶ , 𑀘𑀢𑀼𑀢𑁆𑀣𑁂𑀦 𑀇𑀢𑀭𑀁 𑀅𑀲𑁆𑀲𑀫𑀡𑀫𑁆𑀧𑀺 𑀪𑀡𑁆𑀟𑀼𑀁 𑀓𑀸𑀲𑀸𑀯𑀓𑀡𑁆𑀞𑀁 𑀓𑁂𑀯𑀮𑀁 𑀯𑁄𑀳𑀸𑀭𑀫𑀢𑁆𑀢𑀓𑁂𑀦 𑀲𑀫𑀡𑁄𑀢𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀘𑀢𑀼𑀭𑁄 𑀲𑀫𑀡𑀸’’𑀢𑀺 𑀆𑀳. 𑀦 𑀧𑀜𑁆𑀘𑀫𑀢𑁆𑀣𑀻𑀢𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑁄𑀳𑀸𑀭𑀫𑀢𑁆𑀢𑀓𑁂𑀦 𑀧𑀝𑀺𑀜𑁆𑀜𑀸𑀫𑀢𑁆𑀢𑀓𑁂𑀦𑀸𑀧𑀺 𑀧𑀜𑁆𑀘𑀫𑁄 𑀲𑀫𑀡𑁄 𑀦𑀸𑀫 𑀦𑀢𑁆𑀣𑀺.

𑀢𑁂 𑀢𑁂 𑀆𑀯𑀺𑀓𑀭𑁄𑀫𑀻𑀢𑀺 𑀢𑁂 𑀘𑀢𑀼𑀭𑁄 𑀲𑀫𑀡𑁂 𑀢𑀯 𑀧𑀸𑀓𑀝𑁂 𑀓𑀭𑁄𑀫𑀺. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀲𑀫𑁆𑀫𑀼𑀔𑀸 𑀧𑀼𑀘𑁆𑀙𑀺𑀢𑁄. 𑀫𑀕𑁆𑀕𑀚𑀺𑀦𑁄𑀢𑀺 𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀯𑀺𑀚𑀺𑀢𑀸𑀯𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀤𑁂𑀲𑀓𑁄𑀢𑀺 𑀧𑀭𑁂𑀲𑀁 𑀫𑀕𑁆𑀕𑀁 𑀤𑁂𑀲𑁂𑀢𑀸. 𑀫𑀕𑁆𑀕𑁂 𑀚𑀻𑀯𑀢𑀻𑀢𑀺 𑀲𑀢𑁆𑀢𑀲𑀼 𑀲𑁂𑀓𑁆𑀔𑁂𑀲𑀼 𑀬𑁄 𑀓𑁄𑀘𑀺 𑀲𑁂𑀓𑁆𑀔𑁄 𑀅𑀧𑀭𑀺𑀬𑁄𑀲𑀺𑀢𑀫𑀕𑁆𑀕𑀯𑀸𑀲𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑁂, 𑀲𑀻𑀮𑀯𑀦𑁆𑀢𑀧𑀼𑀣𑀼𑀚𑁆𑀚𑀦𑁄 𑀘 𑀮𑁄𑀓𑀺𑀬𑁂 𑀫𑀕𑁆𑀕𑁂 𑀚𑀻𑀯𑀢𑀺 𑀦𑀸𑀫, 𑀲𑀻𑀮𑀯𑀦𑁆𑀢𑀧𑀼𑀣𑀼𑀚𑁆𑀚𑀦𑁄 𑀯𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀦𑀺𑀫𑀺𑀢𑁆𑀢𑀁 𑀚𑀻𑀯𑀦𑀢𑁄𑀧𑀺 𑀫𑀕𑁆𑀕𑁂 𑀚𑀻𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀘 𑀫𑀕𑁆𑀕𑀤𑀽𑀲𑀻𑀢𑀺 𑀬𑁄 𑀘 𑀤𑀼𑀲𑁆𑀲𑀻𑀮𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀕𑁆𑀕𑀧𑀝𑀺𑀮𑁄𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀫𑀕𑁆𑀕𑀤𑀽𑀲𑀓𑁄𑀢𑀺 𑀅𑀢𑁆𑀣𑁄.

𑁮𑁫. ‘‘𑀇𑀫𑁂 𑀢𑁂 𑀘𑀢𑀼𑀭𑁄 𑀲𑀫𑀡𑀸’’𑀢𑀺 𑀏𑀯𑀁 𑀪𑀕𑀯𑀢𑀸 𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑀺𑀝𑁆𑀞𑁂 𑀘𑀢𑀼𑀭𑁄 𑀲𑀫𑀡𑁂 ‘‘𑀅𑀬𑀁 𑀦𑀸𑀫𑁂𑀢𑁆𑀣 𑀫𑀕𑁆𑀕𑀚𑀺𑀦𑁄, 𑀅𑀬𑀁 𑀫𑀕𑁆𑀕𑀤𑁂𑀲𑀓𑁄, 𑀅𑀬𑀁 𑀫𑀕𑁆𑀕𑁂 𑀚𑀻𑀯𑀢𑀺, 𑀅𑀬𑀁 𑀫𑀕𑁆𑀕𑀤𑀽𑀲𑀻’’𑀢𑀺 𑀏𑀯𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦 𑀧𑀼𑀘𑁆𑀙𑀺𑀢𑀼𑀁 𑀘𑀼𑀦𑁆𑀤𑁄 𑀆𑀳 ‘‘𑀓𑀁 𑀫𑀕𑁆𑀕𑀚𑀺𑀦’’𑀦𑁆𑀢𑀺. 𑀢𑀢𑁆𑀣 𑀫𑀕𑁆𑀕𑁂 𑀚𑀻𑀯𑀢𑀺 𑀫𑁂𑀢𑀺 𑀬𑁄 𑀲𑁄 𑀫𑀕𑁆𑀕𑁂 𑀚𑀻𑀯𑀢𑀺, 𑀢𑀁 𑀫𑁂 𑀩𑁆𑀭𑀽𑀳𑀺 𑀧𑀼𑀝𑁆𑀞𑁄𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁮𑁬. 𑀇𑀤𑀸𑀦𑀺𑀲𑁆𑀲 𑀪𑀕𑀯𑀸 ¶ 𑀘𑀢𑀼𑀭𑁄𑀧𑀺 𑀲𑀫𑀡𑁂 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀬𑁄 𑀢𑀺𑀡𑁆𑀡𑀓𑀣𑀁𑀓𑀣𑁄 𑀯𑀺𑀲𑀮𑁆𑀮𑁄’’𑀢𑀺. 𑀢𑀢𑁆𑀣 𑀢𑀺𑀡𑁆𑀡𑀓𑀣𑀁𑀓𑀣𑁄 𑀯𑀺𑀲𑀮𑁆𑀮𑁄𑀢𑀺 𑀏𑀢𑀁 𑀉𑀭𑀕𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀬𑀲𑁆𑀫𑀸 𑀇𑀫𑀸𑀬 𑀕𑀸𑀣𑀸𑀬 𑀫𑀕𑁆𑀕𑀚𑀺𑀦𑁄𑀢𑀺 𑀩𑀼𑀤𑁆𑀥𑀲𑀫𑀡𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 ¶ 𑀓𑀣𑀁𑀓𑀣𑀸𑀧𑀢𑀺𑀭𑀽𑀧𑀓𑀲𑁆𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀲𑁆𑀲 𑀢𑀺𑀡𑁆𑀡𑀢𑁆𑀢𑀸𑀧𑀺 ‘‘𑀢𑀺𑀡𑁆𑀡𑀓𑀣𑀁𑀓𑀣𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀳𑀺 𑀢𑀺𑀡𑁆𑀡𑀓𑀣𑀁𑀓𑀣𑀸𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀧𑀭𑀺𑀬𑁄𑀲𑀸𑀦𑀸 𑀲𑀓𑀤𑀸𑀕𑀸𑀫𑀺𑀯𑀺𑀲𑀬𑀸𑀤𑀻𑀲𑀼 𑀩𑀼𑀤𑁆𑀥𑀯𑀺𑀲𑀬𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀅𑀢𑀺𑀡𑁆𑀡𑀓𑀣𑀁𑀓𑀣𑀸𑀯 ¶ 𑀳𑁄𑀦𑁆𑀢𑀺. 𑀪𑀕𑀯𑀸 𑀧𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀢𑀺𑀡𑁆𑀡𑀓𑀣𑀁𑀓𑀣𑁄𑀢𑀺. 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄𑀢𑀺 𑀦𑀺𑀩𑁆𑀩𑀸𑀦𑁂 𑀅𑀪𑀺𑀭𑀢𑁄, 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀤𑀸 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄 𑀘 𑀪𑀕𑀯𑀸. 𑀬𑀣𑀸𑀳 𑁋

‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸 𑀏𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂, 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺, 𑀲𑀦𑁆𑀦𑀺𑀲𑀸𑀤𑁂𑀫𑀺, 𑀏𑀓𑁄𑀤𑀺𑀁 𑀓𑀭𑁄𑀫𑀺, 𑀲𑀫𑀸𑀤𑀳𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭).

𑀅𑀦𑀸𑀦𑀼𑀕𑀺𑀤𑁆𑀥𑁄𑀢𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀢𑀡𑁆𑀳𑀸𑀕𑁂𑀥𑁂𑀦 𑀅𑀦𑀦𑀼𑀕𑀺𑀚𑁆𑀛𑀦𑁆𑀢𑁄. 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲 𑀦𑁂𑀢𑀸𑀢𑀺 𑀆𑀲𑀬𑀸𑀦𑀼𑀲𑀬𑀸𑀦𑀼𑀮𑁄𑀫𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀧𑀸𑀭𑀸𑀬𑀦𑀫𑀳𑀸𑀲𑀫𑀬𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑀲𑀫𑁆𑀧𑀸𑀤𑀦𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀦𑁂𑀢𑀸, 𑀕𑀫𑀬𑀺𑀢𑀸, 𑀢𑀸𑀭𑁂𑀢𑀸, 𑀧𑀸𑀭𑀁 𑀲𑀫𑁆𑀧𑀸𑀧𑁂𑀢𑀸𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀦𑁆𑀢𑀺 𑀢𑀸𑀤𑀺𑀲𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀮𑁄𑀓𑀥𑀫𑁆𑀫𑁂𑀳𑀺 𑀦𑀺𑀩𑁆𑀩𑀺𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁮𑁭. 𑀏𑀯𑀁 𑀪𑀕𑀯𑀸 𑀇𑀫𑀸𑀬 𑀕𑀸𑀣𑀸𑀬 ‘‘𑀫𑀕𑁆𑀕𑀚𑀺𑀦’’𑀦𑁆𑀢𑀺 𑀩𑀼𑀤𑁆𑀥𑀲𑀫𑀡𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑀫𑀡𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀧𑀭𑀫𑀁 𑀧𑀭𑀫𑀦𑁆𑀢𑀻’’𑀢𑀺. 𑀢𑀢𑁆𑀣 𑀧𑀭𑀫𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀕𑁆𑀕𑀁 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀫𑀦𑁆𑀢𑀺 𑀬𑁄𑀥 𑀜𑀢𑁆𑀯𑀸𑀢𑀺 𑀢𑀁 𑀧𑀭𑀫𑀁 𑀧𑀭𑀫𑀫𑀺𑀘𑁆𑀘𑁂𑀯 𑀬𑁄 𑀇𑀥 𑀲𑀸𑀲𑀦𑁂 𑀜𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦. 𑀅𑀓𑁆𑀔𑀸𑀢𑀺 𑀯𑀺𑀪𑀚𑀢𑁂 𑀇𑀥𑁂𑀯 𑀥𑀫𑁆𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀅𑀓𑁆𑀔𑀸𑀢𑀺, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀧𑀭𑁂𑀲𑀁 𑀧𑀸𑀓𑀝𑀁 𑀓𑀭𑁄𑀢𑀺 ‘‘𑀇𑀤𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺, 𑀫𑀕𑁆𑀕𑀥𑀫𑁆𑀫𑀁 𑀯𑀺𑀪𑀚𑀢𑀺 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺. 𑀉𑀪𑀬𑀫𑁆𑀧𑀺 𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁 𑀲𑀗𑁆𑀔𑁂𑀧𑀤𑁂𑀲𑀦𑀸𑀬 𑀆𑀘𑀺𑀓𑁆𑀔𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑀁 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬 𑀯𑀺𑀪𑀚𑀢𑀺. 𑀏𑀯𑀁 𑀆𑀘𑀺𑀓𑁆𑀔𑀦𑁆𑀢𑁄 𑀯𑀺𑀪𑀚𑀦𑁆𑀢𑁄 𑀘 ‘‘𑀇𑀥𑁂𑀯 𑀲𑀸𑀲𑀦𑁂 𑀅𑀬𑀁 𑀥𑀫𑁆𑀫𑁄, 𑀦 𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀅𑀓𑁆𑀔𑀸𑀢𑀺 𑀘 𑀯𑀺𑀪𑀚𑀢𑀺 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀓𑁆𑀔𑀸𑀢𑀺 𑀯𑀺𑀪𑀚𑀢𑁂 𑀇𑀥𑁂𑀯 𑀥𑀫𑁆𑀫’’𑀦𑁆𑀢𑀺. 𑀢𑀁 𑀓𑀗𑁆𑀔𑀙𑀺𑀤𑀁 𑀫𑀼𑀦𑀺𑀁 𑀅𑀦𑁂𑀚𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑁂𑀦 ¶ 𑀅𑀢𑁆𑀢𑀦𑁄, 𑀤𑁂𑀲𑀦𑀸𑀬 𑀘 𑀧𑀭𑁂𑀲𑀁 𑀓𑀗𑁆𑀔𑀘𑁆𑀙𑁂𑀤𑀦𑁂𑀦 𑀓𑀗𑁆𑀔𑀘𑁆𑀙𑀺𑀤𑀁 ¶ , 𑀫𑁄𑀦𑁂𑀬𑁆𑀬𑀲𑀫𑀦𑁆𑀦𑀸𑀕𑀫𑁂𑀦 𑀫𑀼𑀦𑀺𑀁, 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑀢𑁄 𑀅𑀦𑁂𑀚𑀁 𑀤𑀼𑀢𑀺𑀬𑀁 𑀪𑀺𑀓𑁆𑀔𑀼𑀦𑀫𑀸𑀳𑀼 𑀫𑀕𑁆𑀕𑀤𑁂𑀲𑀺𑀦𑁆𑀢𑀺.

𑁮𑁮. 𑀏𑀯𑀁 ¶ 𑀇𑀫𑀸𑀬 𑀕𑀸𑀣𑀸𑀬 𑀲𑀬𑀁 𑀅𑀦𑀼𑀢𑁆𑀢𑀭𑀁 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑁂𑀲𑀦𑀸𑀬 𑀅𑀦𑀼𑀢𑁆𑀢𑀭𑁄 𑀫𑀕𑁆𑀕𑀤𑁂𑀲𑀻 𑀲𑀫𑀸𑀦𑁄𑀧𑀺 𑀤𑀽𑀢𑀫𑀺𑀯 𑀮𑁂𑀔𑀯𑀸𑀘𑀓𑀫𑀺𑀯 𑀘 𑀭𑀜𑁆𑀜𑁄 𑀅𑀢𑁆𑀢𑀦𑁄 𑀲𑀸𑀲𑀦𑀳𑀭𑀁 𑀲𑀸𑀲𑀦𑀚𑁄𑀢𑀓𑀜𑁆𑀘 ‘‘𑀫𑀕𑁆𑀕𑀤𑁂𑀲𑀺’’𑀦𑁆𑀢𑀺 𑀔𑀻𑀡𑀸𑀲𑀯𑀲𑀫𑀡𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀲𑁂𑀓𑁆𑀔𑀲𑀫𑀡𑀜𑁆𑀘 𑀲𑀻𑀮𑀯𑀦𑁆𑀢𑀧𑀼𑀣𑀼𑀚𑁆𑀚𑀦𑀲𑀫𑀡𑀜𑁆𑀘 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀬𑁄 𑀥𑀫𑁆𑀫𑀧𑀤𑁂’’𑀢𑀺. 𑀢𑀢𑁆𑀣 𑀧𑀤𑀯𑀡𑁆𑀡𑀦𑀸 𑀧𑀸𑀓𑀝𑀸𑀬𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑁄 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀧𑀤𑀢𑁆𑀢𑀸 𑀥𑀫𑁆𑀫𑀧𑀤𑁂, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀤𑁂𑀲𑀺𑀢𑀢𑁆𑀢𑀸 𑀆𑀲𑀬𑀸𑀦𑀼𑀭𑀽𑀧𑀢𑁄 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀤𑁂𑀲𑀺𑀢𑀢𑁆𑀢𑀸 𑀲𑀼𑀤𑁂𑀲𑀺𑀢𑁂, 𑀫𑀕𑁆𑀕𑀲𑀫𑀗𑁆𑀕𑀻𑀧𑀺 𑀅𑀦𑀯𑀲𑀺𑀢𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸 𑀫𑀕𑁆𑀕𑁂 𑀚𑀻𑀯𑀢𑀺, 𑀲𑀻𑀮𑀲𑀁𑀬𑀫𑁂𑀦 𑀲𑀜𑁆𑀜𑀢𑁄, 𑀓𑀸𑀬𑀸𑀤𑀻𑀲𑀼 𑀲𑀽𑀧𑀝𑁆𑀞𑀺𑀢𑀸𑀬 𑀘𑀺𑀭𑀓𑀢𑀸𑀤𑀺𑀲𑀭𑀡𑀸𑀬 𑀯𑀸 𑀲𑀢𑀺𑀬𑀸 𑀲𑀢𑀺𑀫𑀸, 𑀅𑀡𑀼𑀫𑀢𑁆𑀢𑀲𑁆𑀲𑀸𑀧𑀺 𑀯𑀚𑁆𑀚𑀲𑁆𑀲 𑀅𑀪𑀸𑀯𑀢𑁄 𑀅𑀦𑀯𑀚𑁆𑀚𑀢𑁆𑀢𑀸, 𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀘 𑀧𑀤𑀢𑁆𑀢𑀸 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑀸𑀦𑀺 𑀅𑀦𑀯𑀚𑁆𑀚𑀧𑀤𑀸𑀦𑀺 𑀪𑀗𑁆𑀕𑀜𑀸𑀡𑀢𑁄 𑀧𑀪𑀼𑀢𑀺 𑀪𑀸𑀯𑀦𑀸𑀲𑁂𑀯𑀦𑀸𑀬 𑀲𑁂𑀯𑀫𑀸𑀦𑁄, 𑀢𑀁 𑀪𑀺𑀓𑁆𑀔𑀼𑀦𑀁 𑀢𑀢𑀺𑀬𑀁 𑀫𑀕𑁆𑀕𑀚𑀻𑀯𑀺𑀦𑁆𑀢𑀺 𑀆𑀳𑀽𑀢𑀺.

𑁮𑁯. 𑀏𑀯𑀁 𑀪𑀕𑀯𑀸 𑀇𑀫𑀸𑀬 𑀕𑀸𑀣𑀸𑀬 ‘‘𑀫𑀕𑁆𑀕𑀚𑀻𑀯𑀺’’𑀦𑁆𑀢𑀺 𑀲𑁂𑀓𑁆𑀔𑀲𑀫𑀡𑀁 𑀲𑀻𑀮𑀯𑀦𑁆𑀢𑀧𑀼𑀣𑀼𑀚𑁆𑀚𑀦𑀲𑀫𑀡𑀜𑁆𑀘 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀪𑀡𑁆𑀟𑀼𑀁 𑀓𑀸𑀲𑀸𑀯𑀓𑀡𑁆𑀞𑀁 𑀓𑁂𑀯𑀮𑀁 𑀯𑁄𑀳𑀸𑀭𑀫𑀢𑁆𑀢𑀲𑀫𑀡𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀙𑀤𑀦𑀁 𑀓𑀢𑁆𑀯𑀸𑀦𑀸’’𑀢𑀺. 𑀢𑀢𑁆𑀣 𑀙𑀤𑀦𑀁 𑀓𑀢𑁆𑀯𑀸𑀦𑀸𑀢𑀺 𑀧𑀢𑀺𑀭𑀽𑀧𑀁 𑀓𑀭𑀺𑀢𑁆𑀯𑀸, 𑀯𑁂𑀲𑀁 𑀕𑀳𑁂𑀢𑁆𑀯𑀸, 𑀮𑀺𑀗𑁆𑀕𑀁 𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀩𑁆𑀩𑀢𑀸𑀦𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁. 𑀢𑁂𑀲𑀜𑁆𑀳𑀺 𑀲𑀼𑀦𑁆𑀤𑀭𑀸𑀦𑀺 𑀯𑀢𑀸𑀦𑀺, 𑀢𑀲𑁆𑀫𑀸 𑀢𑁂 𑀲𑀼𑀩𑁆𑀩𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀓𑁆𑀔𑀦𑁆𑀤𑀻𑀢𑀺 𑀧𑀓𑁆𑀔𑀦𑁆𑀤𑀓𑁄, 𑀅𑀦𑁆𑀢𑁄 𑀧𑀯𑀺𑀲𑀓𑁄𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀻𑀮𑁄 𑀳𑀺 𑀕𑀽𑀣𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀢𑀺𑀡𑀧𑀡𑁆𑀡𑀸𑀤𑀺𑀘𑁆𑀙𑀤𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀲𑀼𑀩𑁆𑀩𑀢𑀸𑀦𑀁 𑀙𑀤𑀦𑀁 ¶ 𑀓𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀪𑀺𑀓𑁆𑀔𑀽’’𑀢𑀺 𑀪𑀺𑀓𑁆𑀔𑀼𑀫𑀚𑁆𑀛𑁂 𑀧𑀓𑁆𑀔𑀦𑁆𑀤𑀢𑀺, ‘‘𑀏𑀢𑁆𑀢𑀓𑀯𑀲𑁆𑀲𑁂𑀦 𑀪𑀺𑀓𑁆𑀔𑀼𑀦𑀸 𑀕𑀳𑁂𑀢𑀩𑁆𑀩𑀁 𑀏𑀢’’𑀦𑁆𑀢𑀺 𑀮𑀸𑀪𑁂 𑀤𑀻𑀬𑀫𑀸𑀦𑁂 ‘‘𑀅𑀳𑀁 𑀏𑀢𑁆𑀢𑀓𑀯𑀲𑁆𑀲𑁄’’𑀢𑀺 𑀕𑀡𑁆𑀳𑀺𑀢𑀼𑀁 𑀧𑀓𑁆𑀔𑀦𑁆𑀤𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀙𑀤𑀦𑀁 𑀓𑀢𑁆𑀯𑀸𑀦 𑀲𑀼𑀩𑁆𑀩𑀢𑀸𑀦𑀁 𑀧𑀓𑁆𑀔𑀦𑁆𑀤𑀻’’𑀢𑀺. 𑀘𑀢𑀼𑀦𑁆𑀦𑀫𑁆𑀧𑀺 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀸𑀦𑀁 𑀉𑀧𑁆𑀧𑀦𑁆𑀦𑀁 𑀧𑀲𑀸𑀤𑀁 𑀅𑀦𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀬𑀸 𑀤𑀽𑀲𑁂𑀢𑀻𑀢𑀺 𑀓𑀼𑀮𑀤𑀽𑀲𑀓𑁄. 𑀧𑀕𑀩𑁆𑀪𑁄𑀢𑀺 𑀅𑀝𑁆𑀞𑀝𑁆𑀞𑀸𑀦𑁂𑀦 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦, 𑀘𑀢𑀼𑀝𑁆𑀞𑀸𑀦𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑁂𑀦, 𑀅𑀦𑁂𑀓𑀝𑁆𑀞𑀸𑀦𑁂𑀦 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫.

𑀓𑀢𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 ¶ 𑀫𑀸𑀬𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀸𑀬𑀸𑀯𑀻. 𑀲𑀻𑀮𑀲𑀁𑀬𑀫𑀸𑀪𑀸𑀯𑁂𑀦 𑀅𑀲𑀜𑁆𑀜𑀢𑁄. 𑀧𑀮𑀸𑀧𑀲𑀤𑀺𑀲𑀢𑁆𑀢𑀸 𑀧𑀮𑀸𑀧𑁄. 𑀬𑀣𑀸 𑀳𑀺 𑀧𑀮𑀸𑀧𑁄 𑀅𑀦𑁆𑀢𑁄 𑀢𑀡𑁆𑀟𑀼𑀮𑀭𑀳𑀺𑀢𑁄𑀧𑀺 𑀩𑀳𑀺 𑀣𑀼𑀲𑁂𑀦 𑀯𑀻𑀳𑀺 𑀯𑀺𑀬 𑀤𑀺𑀲𑁆𑀲𑀢𑀺, 𑀏𑀯𑀫𑀺𑀥𑁂𑀓𑀘𑁆𑀘𑁄 𑀅𑀦𑁆𑀢𑁄 𑀲𑀻𑀮𑀸𑀤𑀺𑀕𑀼𑀡𑀲𑀸𑀭𑀯𑀺𑀭𑀳𑀺𑀢𑁄𑀧𑀺 𑀩𑀳𑀺 𑀲𑀼𑀩𑁆𑀩𑀢𑀘𑁆𑀙𑀤𑀦𑁂𑀦 𑀲𑀫𑀡𑀯𑁂𑀲𑁂𑀦 𑀲𑀫𑀡𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀲𑁄 𑀏𑀯𑀁 𑀧𑀮𑀸𑀧𑀲𑀤𑀺𑀲𑀢𑁆𑀢𑀸 ‘‘𑀧𑀮𑀸𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑁂 𑀧𑀦 ‘‘𑀅𑀧𑀮𑀸𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸, 𑀦𑀺𑀧𑁆𑀧𑀮𑀸𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸, 𑀲𑀼𑀤𑁆𑀥𑀸 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺 (𑀫. 𑀦𑀺. 𑁩.𑁧𑁪𑁬) 𑀏𑀯𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑁄𑀧𑀺 ‘‘𑀧𑀮𑀸𑀧𑁄’’𑀢𑀺 𑀯𑀼𑀢𑁆𑀢𑁄 ¶ . 𑀇𑀥 𑀧𑀦 𑀓𑀧𑀺𑀮𑀲𑀼𑀢𑁆𑀢𑁂 𑀘 ‘‘𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂’’𑀢𑀺 (𑀲𑀼. 𑀦𑀺. 𑁨𑁮𑁪) 𑀏𑀯𑀁 𑀧𑀭𑀸𑀚𑀺𑀢𑀓𑁄 ‘‘𑀧𑀮𑀸𑀧𑁄’’𑀢𑀺 𑀯𑀼𑀢𑁆𑀢𑁄. 𑀧𑀢𑀺𑀭𑀽𑀧𑁂𑀦 𑀘𑀭𑀁 𑀲𑀫𑀕𑁆𑀕𑀤𑀽𑀲𑀻𑀢𑀺 𑀢𑀁 𑀲𑀼𑀩𑁆𑀩𑀢𑀸𑀦𑀁 𑀙𑀤𑀦𑀁 𑀓𑀢𑁆𑀯𑀸 𑀬𑀣𑀸 𑀘𑀭𑀦𑁆𑀢𑀁 ‘‘𑀆𑀭𑀜𑁆𑀜𑀺𑀓𑁄 𑀅𑀬𑀁 𑀭𑀼𑀓𑁆𑀔𑀫𑀽𑀮𑀺𑀓𑁄, 𑀧𑀁𑀲𑀼𑀓𑀽𑀮𑀺𑀓𑁄, 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀅𑀧𑁆𑀧𑀺𑀘𑁆𑀙𑁄, 𑀲𑀦𑁆𑀢𑀼𑀝𑁆𑀞𑁄’’𑀢𑀺 𑀚𑀦𑁄 𑀚𑀸𑀦𑀸𑀢𑀺, 𑀏𑀯𑀁 𑀧𑀢𑀺𑀭𑀽𑀧𑁂𑀦 𑀬𑀼𑀢𑁆𑀢𑀭𑀽𑀧𑁂𑀦 𑀩𑀸𑀳𑀺𑀭𑀫𑀝𑁆𑀞𑁂𑀦 𑀆𑀘𑀸𑀭𑁂𑀦 𑀘𑀭𑀦𑁆𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲, 𑀧𑀭𑁂𑀲𑀁 𑀲𑀼𑀕𑀢𑀺𑀫𑀕𑁆𑀕𑀲𑁆𑀲 𑀘 𑀤𑀽𑀲𑀦𑀢𑁄 ‘‘𑀫𑀕𑁆𑀕𑀤𑀽𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁯𑁦. 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 ‘‘𑀫𑀕𑁆𑀕𑀤𑀽𑀲𑀻’’𑀢𑀺 𑀤𑀼𑀲𑁆𑀲𑀻𑀮𑀁 𑀯𑁄𑀳𑀸𑀭𑀫𑀢𑁆𑀢𑀓𑀲𑀫𑀡𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀩𑁆𑀬𑀸𑀫𑀺𑀲𑁆𑀲𑀻𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀏𑀢𑁂 𑀘 𑀧𑀝𑀺𑀯𑀺𑀚𑁆𑀛𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀏𑀢𑁂 𑀘𑀢𑀼𑀭𑁄 𑀲𑀫𑀡𑁂 𑀬𑀣𑀸𑀯𑀼𑀢𑁆𑀢𑁂𑀦 ¶ 𑀮𑀓𑁆𑀔𑀡𑁂𑀦 𑀧𑀝𑀺𑀯𑀺𑀚𑁆𑀛𑀺 𑀅𑀜𑁆𑀜𑀸𑀲𑀺 𑀲𑀘𑁆𑀙𑀸𑀓𑀸𑀲𑀺 𑀬𑁄 𑀕𑀳𑀝𑁆𑀞𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀫𑀡𑀸𑀦𑀁 𑀮𑀓𑁆𑀔𑀡𑀲𑁆𑀲𑀯𑀦𑀫𑀢𑁆𑀢𑁂𑀦 𑀲𑀼𑀢𑀯𑀸, 𑀢𑀲𑁆𑀲𑁂𑀯 𑀮𑀓𑁆𑀔𑀡𑀲𑁆𑀲 𑀅𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑁄, 𑀢𑁂𑀬𑁂𑀯 𑀲𑀫𑀡𑁂 ‘‘𑀅𑀬𑀜𑁆𑀘 𑀅𑀬𑀜𑁆𑀘 𑀏𑀯𑀁𑀮𑀓𑁆𑀔𑀡𑁄’’𑀢𑀺 𑀧𑀚𑀸𑀦𑀦𑀫𑀢𑁆𑀢𑁂𑀦 𑀲𑀧𑁆𑀧𑀜𑁆𑀜𑁄, 𑀬𑀸𑀤𑀺𑀲𑁄 𑀅𑀬𑀁 𑀧𑀘𑁆𑀙𑀸 𑀯𑀼𑀢𑁆𑀢𑁄 𑀫𑀕𑁆𑀕𑀤𑀽𑀲𑀻, 𑀇𑀢𑀭𑁂𑀧𑀺 𑀲𑀩𑁆𑀩𑁂 𑀦𑁂𑀢𑀸𑀤𑀺𑀲𑀸𑀢𑀺 𑀜𑀢𑁆𑀯𑀸 𑀇𑀢𑀺 𑀤𑀺𑀲𑁆𑀯𑀸 𑀏𑀯𑀁 𑀧𑀸𑀧𑀁 𑀓𑀭𑁄𑀦𑁆𑀢𑀫𑁆𑀧𑀺 𑀏𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀏𑀢𑁂 𑀘 𑀧𑀝𑀺𑀯𑀺𑀚𑁆𑀛𑀺 𑀬𑁄 𑀕𑀳𑀝𑁆𑀞𑁄 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀲𑀧𑁆𑀧𑀜𑁆𑀜𑁄, 𑀢𑀲𑁆𑀲 𑀢𑀸𑀬 𑀧𑀜𑁆𑀜𑀸𑀬 𑀲𑀩𑁆𑀩𑁂 ‘‘𑀦𑁂𑀢𑀸𑀤𑀺𑀲𑀸’’𑀢𑀺 𑀜𑀢𑁆𑀯𑀸 𑀯𑀺𑀳𑀭𑀢𑁄 𑀇𑀢𑀺 𑀤𑀺𑀲𑁆𑀯𑀸 𑀦 𑀳𑀸𑀧𑁂𑀢𑀺 𑀲𑀤𑁆𑀥𑀸, 𑀏𑀯𑀁 𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸𑀧𑀺 𑀦 𑀳𑀸𑀧𑁂𑀢𑀺, 𑀦 𑀳𑀸𑀬𑀢𑀺, 𑀦 𑀦𑀲𑁆𑀲𑀢𑀺 𑀲𑀤𑁆𑀥𑀸𑀢𑀺.

𑀏𑀯𑀁 ¶ 𑀇𑀫𑀸𑀬 𑀕𑀸𑀣𑀸𑀬 𑀢𑁂𑀲𑀁 𑀅𑀩𑁆𑀬𑀸𑀫𑀺𑀲𑁆𑀲𑀻𑀪𑀸𑀯𑀁 𑀤𑀻𑀧𑁂𑀢𑁆𑀯𑀸 𑀇𑀤𑀸𑀦𑀺 𑀇𑀢𑀺 𑀤𑀺𑀲𑁆𑀯𑀸𑀧𑀺 ‘‘𑀲𑀩𑁆𑀩𑁂 𑀦𑁂𑀢𑀸𑀤𑀺𑀲𑀸’’𑀢𑀺 𑀚𑀸𑀦𑀦𑁆𑀢𑀁 𑀅𑀭𑀺𑀬𑀲𑀸𑀯𑀓𑀁 𑀧𑀲𑀁𑀲𑀦𑁆𑀢𑁄 𑀆𑀳 ‘‘𑀓𑀣𑀜𑁆𑀳𑀺 𑀤𑀼𑀝𑁆𑀞𑁂𑀦𑀸’’𑀢𑀺. 𑀢𑀲𑁆𑀲 𑀲𑀫𑁆𑀩𑀦𑁆𑀥𑁄 𑁋 𑀏𑀢𑀤𑁂𑀯 𑀘 𑀬𑀼𑀢𑁆𑀢𑀁 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲, 𑀬𑀤𑀺𑀤𑀁 𑀏𑀓𑀘𑁆𑀘𑀁 𑀧𑀸𑀧𑀁 𑀓𑀭𑁄𑀦𑁆𑀢𑀁 𑀇𑀢𑀺 𑀤𑀺𑀲𑁆𑀯𑀸𑀧𑀺 𑀲𑀩𑁆𑀩𑁂 ‘‘𑀦𑁂𑀢𑀸𑀤𑀺𑀲𑀸’’𑀢𑀺 𑀚𑀸𑀦𑀦𑀁. 𑀓𑀺𑀁 𑀓𑀸𑀭𑀡𑀸? 𑀓𑀣𑀜𑁆𑀳𑀺 𑀤𑀼𑀝𑁆𑀞𑁂𑀦 𑀅𑀲𑀫𑁆𑀧𑀤𑀼𑀝𑁆𑀞𑀁, 𑀲𑀼𑀤𑁆𑀥𑀁 𑀅𑀲𑀼𑀤𑁆𑀥𑁂𑀦 𑀲𑀫𑀁 𑀓𑀭𑁂𑀬𑁆𑀬𑀸𑀢𑀺? 𑀢𑀲𑁆𑀲𑀢𑁆𑀣𑁄 𑁋 𑀓𑀣𑀜𑁆𑀳𑀺 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀲𑀧𑁆𑀧𑀜𑁆𑀜𑁄, 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀼𑀝𑁆𑀞𑁂𑀦 𑀫𑀕𑁆𑀕𑀤𑀽𑀲𑀺𑀦𑀸 𑀅𑀤𑀼𑀝𑁆𑀞𑀁 𑀇𑀢𑀭𑀁 𑀲𑀫𑀡𑀢𑁆𑀢𑀬𑀁, 𑀲𑀼𑀤𑁆𑀥𑀁 𑀲𑀫𑀡𑀢𑁆𑀢𑀬𑀫𑁂𑀯𑀁 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸𑀤𑀻𑀳𑀺 𑀅𑀲𑀼𑀤𑁆𑀥𑁂𑀦 𑀧𑀘𑁆𑀙𑀺𑀫𑁂𑀦 𑀯𑁄𑀳𑀸𑀭𑀫𑀢𑁆𑀢𑀓𑀲𑀫𑀡𑁂𑀦 𑀲𑀫𑀁 𑀓𑀭𑁂𑀬𑁆𑀬 𑀲𑀤𑀺𑀲𑀦𑁆𑀢𑀺 𑀚𑀸𑀦𑁂𑀬𑁆𑀬𑀸𑀢𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑀲𑁆𑀲 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀦 𑀓𑀣𑀺𑀢𑀁. 𑀓𑀗𑁆𑀔𑀸𑀫𑀢𑁆𑀢𑀫𑁂𑀯 𑀳𑀺 𑀢𑀲𑁆𑀲 𑀧𑀳𑀻𑀦𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀭𑀸𑀪𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀧𑀭𑀸𑀪𑀯𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀫𑀗𑁆𑀕𑀮𑀲𑀼𑀢𑁆𑀢𑀁 𑀓𑀺𑀭 𑀲𑀼𑀢𑁆𑀯𑀸 𑀤𑁂𑀯𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀫𑀗𑁆𑀕𑀮𑀲𑀼𑀢𑁆𑀢𑁂 𑀲𑀢𑁆𑀢𑀸𑀦𑀁 𑀯𑀼𑀟𑁆𑀠𑀺𑀜𑁆𑀘 𑀲𑁄𑀢𑁆𑀣𑀺𑀜𑁆𑀘 𑀓𑀣𑀬𑀫𑀸𑀦𑁂𑀦 𑀏𑀓𑀁𑀲𑁂𑀦 𑀪𑀯𑁄 𑀏𑀯 𑀓𑀣𑀺𑀢𑁄, 𑀦𑁄 𑀧𑀭𑀸𑀪𑀯𑁄. 𑀳𑀦𑁆𑀤 𑀤𑀸𑀦𑀺 𑀬𑁂𑀦 𑀲𑀢𑁆𑀢𑀸 𑀧𑀭𑀺𑀳𑀸𑀬𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀁 𑀦𑁂𑀲𑀁 𑀧𑀭𑀸𑀪𑀯𑀫𑁆𑀧𑀺 ¶ 𑀧𑀼𑀘𑁆𑀙𑀸𑀫𑀸’’𑀢𑀺. 𑀅𑀣 𑀫𑀗𑁆𑀕𑀮𑀲𑀼𑀢𑁆𑀢𑀁 𑀓𑀣𑀺𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸𑀬𑁄 𑀧𑀭𑀸𑀪𑀯𑀲𑀼𑀢𑁆𑀢𑀁 𑀲𑁄𑀢𑀼𑀓𑀸𑀫𑀸 𑀇𑀫𑀲𑁆𑀫𑀺𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀯𑀸𑀮𑀕𑁆𑀕𑀓𑁄𑀝𑀺𑀑𑀓𑀸𑀲𑀫𑀢𑁆𑀢𑁂 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀅𑀲𑀻𑀢𑀺𑀧𑀺 𑀲𑀼𑀔𑀼𑀫𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀩𑁆𑀩𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀸𑀦𑁄 𑀲𑀺𑀭𑀺𑀬𑀸 𑀘 𑀢𑁂𑀚𑁂𑀦 𑀘 𑀅𑀥𑀺𑀕𑀬𑁆𑀳 𑀯𑀺𑀭𑁄𑀘𑀫𑀸𑀦𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀢𑁄 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀡𑀢𑁆𑀢𑁄 𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀧𑀭𑀸𑀪𑀯𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀣 𑀪𑀕𑀯𑀸 𑀧𑀼𑀘𑁆𑀙𑀸𑀯𑀲𑁂𑀦 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 ¶ ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀯𑀼𑀢𑁆𑀢𑀁. ‘‘𑀧𑀭𑀸𑀪𑀯𑀦𑁆𑀢𑀁 𑀧𑀼𑀭𑀺𑀲’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀦𑁆𑀢𑀭𑀺𑀓𑀸 𑀕𑀸𑀣𑀸 𑀤𑁂𑀯𑀧𑀼𑀢𑁆𑀢𑁂𑀦 𑀯𑀼𑀢𑁆𑀢𑀸, ‘‘𑀲𑀼𑀯𑀺𑀚𑀸𑀦𑁄 𑀪𑀯𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀦𑁆𑀢𑀭𑀺𑀓𑀸 𑀏𑀯 𑀅𑀯𑀲𑀸𑀦𑀕𑀸𑀣𑀸 𑀘 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀧𑀭𑀸𑀪𑀯𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫.

𑁯𑁧. 𑀧𑀭𑀸𑀪𑀯𑀦𑁆𑀢𑀁 𑀧𑀼𑀭𑀺𑀲𑀦𑁆𑀢𑀺𑀆𑀤𑀻𑀲𑀼 𑀧𑀦 𑀧𑀭𑀸𑀪𑀯𑀦𑁆𑀢𑀦𑁆𑀢𑀺 𑀧𑀭𑀺𑀳𑀸𑀬𑀦𑁆𑀢𑀁 𑀯𑀺𑀦𑀲𑁆𑀲𑀦𑁆𑀢𑀁. 𑀧𑀼𑀭𑀺𑀲𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀢𑁆𑀢𑀁 𑀚𑀦𑁆𑀢𑀼𑀁. 𑀫𑀬𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫𑀸𑀢𑀺 𑀲𑁂𑀲𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀸𑀦𑀁 𑀦𑀺𑀤𑀲𑁆𑀲𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑁄 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀕𑁄𑀢𑁆𑀢𑁂𑀦 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀪𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫𑀸𑀢𑀺 𑀫𑀬𑀜𑁆𑀳𑀺 𑀪𑀯𑀦𑁆𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸𑀢𑀺 𑀢𑀢𑁄 𑀢𑀢𑁄 𑀘𑀓𑁆𑀓𑀯𑀸𑀴𑀸 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀆𑀤𑀭𑀁 𑀤𑀲𑁆𑀲𑁂𑀢𑀺. 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀦𑁆𑀢𑀺 𑀏𑀯𑀁 𑀆𑀕𑀢𑀸𑀦𑀁 𑀅𑀫𑁆𑀳𑀸𑀓𑀁 𑀩𑁆𑀭𑀽𑀳𑀺 𑀧𑀭𑀸𑀪𑀯𑀢𑁄 𑀧𑀼𑀭𑀺𑀲𑀲𑁆𑀲 𑀓𑀺𑀁 𑀫𑀼𑀔𑀁, 𑀓𑀺𑀁 𑀤𑁆𑀯𑀸𑀭𑀁, 𑀓𑀸 𑀬𑁄𑀦𑀺, 𑀓𑀺𑀁 𑀓𑀸𑀭𑀡𑀁, 𑀬𑁂𑀦 𑀫𑀬𑀁 𑀧𑀭𑀸𑀪𑀯𑀦𑁆𑀢𑀁 𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 ‘‘𑀧𑀭𑀸𑀪𑀯𑀦𑁆𑀢𑀁 𑀧𑀼𑀭𑀺𑀲’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀧𑀭𑀸𑀪𑀯𑀢𑁄 𑀧𑀼𑀭𑀺𑀲𑀲𑁆𑀲 𑀧𑀭𑀸𑀪𑀯𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀧𑀭𑀸𑀪𑀯𑀓𑀸𑀭𑀡𑁂 𑀳𑀺 𑀜𑀸𑀢𑁂 𑀢𑁂𑀦 𑀓𑀸𑀭𑀡𑀲𑀸𑀫𑀜𑁆𑀜𑁂𑀦 𑀲𑀓𑁆𑀓𑀸 𑀬𑁄 𑀓𑁄𑀘𑀺 𑀧𑀭𑀸𑀪𑀯𑀧𑀼𑀭𑀺𑀲𑁄 𑀚𑀸𑀦𑀺𑀢𑀼𑀦𑁆𑀢𑀺 ¶ .

𑁯𑁨. 𑀅𑀣𑀲𑁆𑀲 ¶ 𑀪𑀕𑀯𑀸 𑀲𑀼𑀝𑁆𑀞𑀼 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀧𑀭𑀸𑀪𑀯𑀫𑀼𑀔𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀲𑀼𑀯𑀺𑀚𑀸𑀦𑁄 𑀪𑀯’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀪𑀯𑀁 𑀯𑀟𑁆𑀠𑀦𑁆𑀢𑁄 𑀅𑀧𑀭𑀺𑀳𑀸𑀬𑀦𑁆𑀢𑁄 𑀧𑀼𑀭𑀺𑀲𑁄, 𑀲𑁄 𑀲𑀼𑀯𑀺𑀚𑀸𑀦𑁄 𑀳𑁄𑀢𑀺, 𑀲𑀼𑀔𑁂𑀦 𑀅𑀓𑀲𑀺𑀭𑁂𑀦 𑀅𑀓𑀺𑀘𑁆𑀙𑁂𑀦 𑀲𑀓𑁆𑀓𑀸 𑀯𑀺𑀚𑀸𑀦𑀺𑀢𑀼𑀁. 𑀬𑁄𑀧𑀸𑀬𑀁 𑀧𑀭𑀸𑀪𑀯𑀢𑀻𑀢𑀺 𑀧𑀭𑀸𑀪𑀯𑁄, 𑀧𑀭𑀺𑀳𑀸𑀬𑀢𑀺 𑀯𑀺𑀦𑀲𑁆𑀲𑀢𑀺, 𑀬𑀲𑁆𑀲 𑀢𑀼𑀫𑁆𑀳𑁂 𑀧𑀭𑀸𑀪𑀯𑀢𑁄 𑀧𑀼𑀭𑀺𑀲𑀲𑁆𑀲 𑀫𑀼𑀔𑀁 𑀫𑀁 𑀧𑀼𑀘𑁆𑀙𑀣, 𑀲𑁄𑀧𑀺 𑀲𑀼𑀯𑀺𑀚𑀸𑀦𑁄. 𑀓𑀣𑀁? 𑀅𑀬𑀜𑁆𑀳𑀺 𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀓𑀸𑀫𑁂𑀢𑀺, 𑀧𑀺𑀳𑁂𑀢𑀺, 𑀧𑀢𑁆𑀣𑁂𑀢𑀺, 𑀲𑀼𑀡𑀸𑀢𑀺, 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀚𑀸𑀦𑀺𑀢𑀩𑁆𑀩𑀢𑁄 𑀲𑀼𑀯𑀺𑀚𑀸𑀦𑁄 𑀳𑁄𑀢𑀺. 𑀇𑀢𑀭𑁄𑀧𑀺 𑀥𑀫𑁆𑀫𑀤𑁂𑀲𑁆𑀲𑀻 𑀧𑀭𑀸𑀪𑀯𑁄, 𑀢𑀫𑁂𑀯 𑀥𑀫𑁆𑀫𑀁 𑀤𑁂𑀲𑁆𑀲𑀢𑀺, 𑀦 𑀓𑀸𑀫𑁂𑀢𑀺, 𑀦 𑀧𑀺𑀳𑁂𑀢𑀺, 𑀦 𑀧𑀢𑁆𑀣𑁂𑀢𑀺, 𑀦 𑀲𑀼𑀡𑀸𑀢𑀺, 𑀦 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀢𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀚𑀸𑀦𑀺𑀢𑀩𑁆𑀩𑀢𑁄 𑀲𑀼𑀯𑀺𑀚𑀸𑀦𑁄 𑀳𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀪𑀕𑀯𑀸 𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑀢𑁄 𑀥𑀫𑁆𑀫𑀓𑀸𑀫𑀢𑀁 𑀪𑀯𑀢𑁄 𑀫𑀼𑀔𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑁆𑀲𑀺𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁩. 𑀅𑀣 ¶ 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀫𑀸𑀦𑀸 𑀆𑀳 ‘‘𑀇𑀢𑀺 𑀳𑁂𑀢’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀇𑀢𑀺 𑀳𑀺 𑀬𑀣𑀸 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀢𑀣𑁂𑀯 𑀏𑀢𑀁 𑀯𑀺𑀚𑀸𑀦𑀸𑀫, 𑀕𑀡𑁆𑀳𑀸𑀫, 𑀥𑀸𑀭𑁂𑀫, 𑀧𑀞𑀫𑁄 𑀲𑁄 𑀧𑀭𑀸𑀪𑀯𑁄 𑀲𑁄 𑀥𑀫𑁆𑀫𑀤𑁂𑀲𑁆𑀲𑀺𑀢𑀸𑀮𑀓𑁆𑀔𑀡𑁄 𑀧𑀞𑀫𑁄 𑀧𑀭𑀸𑀪𑀯𑁄. 𑀬𑀸𑀦𑀺 𑀫𑀬𑀁 𑀧𑀭𑀸𑀪𑀯𑀫𑀼𑀔𑀸𑀦𑀺 𑀯𑀺𑀚𑀸𑀦𑀺𑀢𑀼𑀁 𑀆𑀕𑀢𑀫𑁆𑀳𑀸, 𑀢𑁂𑀲𑀼 𑀇𑀤𑀁 𑀢𑀸𑀯 𑀏𑀓𑀁 𑀧𑀭𑀸𑀪𑀯𑀫𑀼𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀯𑀺𑀕𑁆𑀕𑀳𑁄, 𑀧𑀭𑀸𑀪𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀸𑀪𑀯𑁄. 𑀓𑁂𑀦 𑀘 𑀧𑀭𑀸𑀪𑀯𑀦𑁆𑀢𑀺? 𑀬𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁, 𑀓𑀸𑀭𑀡𑀁, 𑀢𑁂𑀦. 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦 𑀏𑀯 𑀳𑀺 𑀏𑀢𑁆𑀣 𑀦𑀸𑀦𑀸𑀓𑀭𑀡𑀁, 𑀅𑀢𑁆𑀣𑀢𑁄 𑀧𑀦 𑀧𑀭𑀸𑀪𑀯𑁄𑀢𑀺 𑀯𑀸 𑀧𑀭𑀸𑀪𑀯𑀢𑁄 𑀫𑀼𑀔𑀦𑁆𑀢𑀺 𑀯𑀸 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺. 𑀏𑀯𑀫𑁂𑀓𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁 𑀯𑀺𑀚𑀸𑀦𑀸𑀫𑀸𑀢𑀺 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀜𑀸𑀢𑀼𑀓𑀸𑀫𑀢𑀸𑀬𑀸𑀳 ‘‘𑀤𑀼𑀢𑀺𑀬𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺. 𑀇𑀢𑁄 𑀧𑀭𑀜𑁆𑀘 𑀢𑀢𑀺𑀬𑀁 𑀘𑀢𑀼𑀢𑁆𑀣𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯𑁪. 𑀩𑁆𑀬𑀸𑀓𑀭𑀡𑀧𑀓𑁆𑀔𑁂𑀧𑀺 𑀘 𑀬𑀲𑁆𑀫𑀸 ¶ 𑀢𑁂 𑀢𑁂 𑀲𑀢𑁆𑀢𑀸 𑀢𑁂𑀳𑀺 𑀢𑁂𑀳𑀺 𑀧𑀭𑀸𑀪𑀯𑀫𑀼𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀦 𑀏𑀓𑁄𑀬𑁂𑀯 𑀲𑀩𑁆𑀩𑁂𑀳𑀺, 𑀦 𑀘 𑀲𑀩𑁆𑀩𑁂 𑀏𑀓𑁂𑀦𑁂𑀯, 𑀢𑀲𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀢𑀸𑀦𑀺 𑀢𑀸𑀦𑀺 𑀧𑀭𑀸𑀪𑀯𑀫𑀼𑀔𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀦𑁆𑀢𑀲𑁆𑀲 𑀧𑀺𑀬𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀤𑁂𑀲𑀦𑀸𑀬 𑀦𑀸𑀦𑀸𑀯𑀺𑀥𑀸𑀦𑀺 𑀧𑀭𑀸𑀪𑀯𑀫𑀼𑀔𑀸𑀦𑀺 𑀩𑁆𑀬𑀸𑀓𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀅𑀲𑀦𑁆𑀢𑁄 𑀦𑀸𑀫 𑀙 𑀲𑀢𑁆𑀣𑀸𑀭𑁄, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀅𑀯𑀽𑀧𑀲𑀦𑁆𑀢𑁂𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀢𑁂 𑀅𑀲𑀦𑁆𑀢𑁄 𑀅𑀲𑁆𑀲𑀧𑀺𑀬𑀸 𑀳𑁄𑀦𑁆𑀢𑀺 𑀲𑀼𑀦𑀓𑁆𑀔𑀢𑁆𑀢𑀸𑀤𑀻𑀦𑀁 𑀅𑀘𑁂𑀮𑀓𑀓𑁄𑀭𑀔𑀢𑁆𑀢𑀺𑀬𑀸𑀤𑀬𑁄 𑀯𑀺𑀬. 𑀲𑀦𑁆𑀢𑁄 𑀦𑀸𑀫 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸. 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀯𑀽𑀧𑀲𑀦𑁆𑀢𑁂𑀦 ¶ 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀢𑁂 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀧𑀺𑀬𑀁, 𑀅𑀢𑁆𑀢𑀦𑁄 𑀧𑀺𑀬𑁂 𑀇𑀝𑁆𑀞𑁂 𑀓𑀦𑁆𑀢𑁂 𑀫𑀦𑀸𑀧𑁂 𑀦 𑀓𑀼𑀭𑀼𑀢𑁂𑀢𑀺 𑀅𑀢𑁆𑀣𑁄. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀳𑁂𑀢𑁆𑀣 𑀯𑀘𑀦𑀪𑁂𑀤𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂𑀢𑀺 𑀲𑀦𑁆𑀢𑁂 𑀦 𑀲𑁂𑀯𑀢𑀻𑀢𑀺 𑀅𑀢𑁆𑀣𑁄, 𑀬𑀣𑀸 ‘‘𑀭𑀸𑀚𑀸𑀦𑀁 𑀲𑁂𑀯𑀢𑀻’’𑀢𑀺 𑀏𑀢𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀭𑀸𑀚𑀸𑀦𑀁 𑀧𑀺𑀬𑀁 𑀓𑀼𑀭𑀼𑀢𑁂𑀢𑀺 𑀲𑀤𑁆𑀤𑀯𑀺𑀤𑀽 𑀫𑀦𑁆𑀢𑁂𑀦𑁆𑀢𑀺. 𑀧𑀺𑀬𑀦𑁆𑀢𑀺 𑀧𑀺𑀬𑀫𑀸𑀦𑁄, 𑀢𑀼𑀲𑁆𑀲𑀫𑀸𑀦𑁄, 𑀫𑁄𑀤𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀅𑀲𑀢𑀁 ¶ 𑀥𑀫𑁆𑀫𑁄 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀸 𑀯𑀸. 𑀢𑀁 𑀅𑀲𑀢𑀁 𑀥𑀫𑁆𑀫𑀁 𑀭𑁄𑀘𑁂𑀢𑀺, 𑀧𑀺𑀳𑁂𑀢𑀺, 𑀧𑀢𑁆𑀣𑁂𑀢𑀺, 𑀲𑁂𑀯𑀢𑀺. 𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 𑀅𑀲𑀦𑁆𑀢𑀧𑀺𑀬𑀢𑀸, 𑀲𑀦𑁆𑀢𑀅𑀧𑁆𑀧𑀺𑀬𑀢𑀸, 𑀅𑀲𑀤𑁆𑀥𑀫𑁆𑀫𑀭𑁄𑀘𑀦𑀜𑁆𑀘𑀸𑀢𑀺 𑀢𑀺𑀯𑀺𑀥𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀧𑀭𑀸𑀪𑀯𑀢𑀺 𑀧𑀭𑀺𑀳𑀸𑀬𑀢𑀺, 𑀦𑁂𑀯 𑀇𑀥 𑀦 𑀳𑀼𑀭𑀁 𑀯𑀼𑀟𑁆𑀠𑀺𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 ‘‘𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀢𑁆𑀣𑀸𑀭𑀁 𑀧𑀦𑁂𑀢𑁆𑀣 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀁, 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸’’𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫.

𑁯𑁬. 𑀦𑀺𑀤𑁆𑀤𑀸𑀲𑀻𑀮𑀻 𑀦𑀸𑀫 𑀬𑁄 𑀕𑀘𑁆𑀙𑀦𑁆𑀢𑁄𑀧𑀺, 𑀦𑀺𑀲𑀻𑀤𑀦𑁆𑀢𑁄𑀧𑀺, 𑀢𑀺𑀝𑁆𑀞𑀦𑁆𑀢𑁄𑀧𑀺, 𑀲𑀬𑀸𑀦𑁄𑀧𑀺 𑀦𑀺𑀤𑁆𑀤𑀸𑀬𑀢𑀺𑀬𑁂𑀯. 𑀲𑀪𑀸𑀲𑀻𑀮𑀻 𑀦𑀸𑀫 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁, 𑀪𑀲𑁆𑀲𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄. 𑀅𑀦𑀼𑀝𑁆𑀞𑀸𑀢𑀸𑀢𑀺 𑀯𑀻𑀭𑀺𑀬𑀢𑁂𑀚𑀯𑀺𑀭𑀳𑀺𑀢𑁄 𑀉𑀝𑁆𑀞𑀸𑀦𑀲𑀻𑀮𑁄 𑀦 𑀳𑁄𑀢𑀺, 𑀅𑀜𑁆𑀜𑁂𑀳𑀺 𑀘𑁄𑀤𑀺𑀬𑀫𑀸𑀦𑁄 𑀕𑀳𑀝𑁆𑀞𑁄 𑀯𑀸 𑀲𑀫𑀸𑀦𑁄 𑀕𑀳𑀝𑁆𑀞𑀓𑀫𑁆𑀫𑀁 ¶ , 𑀧𑀩𑁆𑀩𑀚𑀺𑀢𑁄 𑀯𑀸 𑀧𑀩𑁆𑀩𑀚𑀺𑀢𑀓𑀫𑁆𑀫𑀁 𑀆𑀭𑀪𑀢𑀺. 𑀅𑀮𑀲𑁄𑀢𑀺 𑀚𑀸𑀢𑀺𑀅𑀮𑀲𑁄, 𑀅𑀘𑁆𑀘𑀦𑁆𑀢𑀸𑀪𑀺𑀪𑀽𑀢𑁄 𑀣𑀺𑀦𑁂𑀦 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑁄 𑀏𑀯 𑀳𑁄𑀢𑀺, 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀏𑀯 𑀳𑁄𑀢𑀺, 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳𑁂𑀦 𑀅𑀜𑁆𑀜𑀁 𑀇𑀭𑀺𑀬𑀸𑀧𑀣𑀁 𑀦 𑀓𑀧𑁆𑀧𑁂𑀢𑀺. 𑀅𑀢𑀻𑀢𑁂 𑀅𑀭𑀜𑁆𑀜𑁂 𑀅𑀕𑁆𑀕𑀺𑀫𑁆𑀳𑀺 𑀉𑀝𑁆𑀞𑀺𑀢𑁂 𑀅𑀧𑀮𑀸𑀬𑀦𑀅𑀮𑀲𑀸 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀅𑀬𑀫𑁂𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄, 𑀢𑀢𑁄 𑀮𑀸𑀫𑀓𑀧𑀭𑀺𑀘𑁆𑀙𑁂𑀤𑁂𑀦𑀸𑀧𑀺 𑀧𑀦 𑀅𑀮𑀲𑁄 𑀅𑀮𑀲𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀥𑀚𑁄𑀯 𑀭𑀣𑀲𑁆𑀲, 𑀥𑀽𑀫𑁄𑀯 𑀅𑀕𑁆𑀕𑀺𑀦𑁄, 𑀓𑁄𑀥𑁄 𑀧𑀜𑁆𑀜𑀸𑀡𑀫𑀲𑁆𑀲𑀸𑀢𑀺 𑀓𑁄𑀥𑀧𑀜𑁆𑀜𑀸𑀡𑁄. 𑀤𑁄𑀲𑀘𑀭𑀺𑀢𑁄 𑀔𑀺𑀧𑁆𑀧𑀓𑁄𑀧𑀻 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀏𑀯𑀭𑀽𑀧𑁄 𑀳𑁄𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀦𑀺𑀤𑁆𑀤𑀸𑀲𑀻𑀮𑀢𑀸, 𑀲𑀪𑀸𑀲𑀻𑀮𑀢𑀸, 𑀅𑀦𑀼𑀝𑁆𑀞𑀸𑀦𑀢𑀸, 𑀅𑀮𑀲𑀢𑀸, 𑀓𑁄𑀥𑀧𑀜𑁆𑀜𑀸𑀡𑀢𑀸𑀢𑀺 𑀧𑀜𑁆𑀘𑀯𑀺𑀥𑀁 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑁂𑀯 𑀕𑀳𑀝𑁆𑀞𑁄 𑀕𑀳𑀝𑁆𑀞𑀯𑀼𑀟𑁆𑀠𑀺𑀁, 𑀦 𑀧𑀩𑁆𑀩𑀚𑀺𑀢𑁄 𑀧𑀩𑁆𑀩𑀚𑀺𑀢𑀯𑀼𑀟𑁆𑀠𑀺𑀁 𑀧𑀸𑀧𑀼𑀡𑀸𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀭𑀺𑀳𑀸𑀬𑀢𑀺𑀬𑁂𑀯 𑀧𑀭𑀸𑀪𑀯𑀢𑀺𑀬𑁂𑀯, 𑀢𑀲𑁆𑀫𑀸 ‘‘𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁯𑁮. 𑀫𑀸𑀢𑀸𑀢𑀺 𑀚𑀦𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀺𑀢𑀸𑀢𑀺 𑀚𑀦𑀓𑁄𑀬𑁂𑀯. 𑀚𑀺𑀡𑁆𑀡𑀓𑀁 𑀲𑀭𑀻𑀭𑀲𑀺𑀣𑀺𑀮𑀢𑀸𑀬. 𑀕𑀢𑀬𑁄𑀩𑁆𑀩𑀦𑀁 𑀬𑁄𑀩𑁆𑀩𑀦𑀸𑀢𑀺𑀓𑁆𑀓𑀫𑁂𑀦 𑀆𑀲𑀻𑀢𑀺𑀓𑀁 𑀯𑀸 𑀦𑀸𑀯𑀼𑀢𑀺𑀓𑀁 𑀯𑀸 𑀲𑀬𑀁 𑀓𑀫𑁆𑀫𑀸𑀦𑀺 𑀓𑀸𑀢𑀼𑀫𑀲𑀫𑀢𑁆𑀣𑀁. 𑀧𑀳𑀼 𑀲𑀦𑁆𑀢𑁄𑀢𑀺 𑀲𑀫𑀢𑁆𑀣𑁄 𑀲𑀫𑀸𑀦𑁄 𑀲𑀼𑀔𑀁 𑀚𑀻𑀯𑀫𑀸𑀦𑁄. 𑀦 𑀪𑀭𑀢𑀻𑀢𑀺 𑀦 𑀧𑁄𑀲𑁂𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀅𑀪𑀭𑀡𑀁, 𑀅𑀧𑁄𑀲𑀦𑀁, 𑀅𑀦𑀼𑀧𑀝𑁆𑀞𑀸𑀦𑀁 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀁 𑀢𑀁 𑁋

‘‘𑀢𑀸𑀬 ¶ ¶ 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. (𑀇𑀢𑀺𑀯𑀼. 𑁧𑁦𑁬; 𑀅. 𑀦𑀺. 𑁪.𑁬𑁩) 𑁋

𑀫𑀸𑀢𑀸𑀧𑀺𑀢𑀼𑀪𑀭𑀡𑁂 𑀆𑀦𑀺𑀲𑀁𑀲𑀁 𑀯𑀼𑀢𑁆𑀢𑀁. 𑀢𑀁 𑀦 𑀧𑀸𑀧𑀼𑀡𑀸𑀢𑀺, 𑀅𑀜𑁆𑀜𑀤𑀢𑁆𑀣𑀼 ‘‘𑀫𑀸𑀢𑀸𑀧𑀺𑀢𑀭𑁄𑀧𑀺 𑀦 𑀪𑀭𑀢𑀺, 𑀓𑀁 𑀅𑀜𑁆𑀜𑀁 𑀪𑀭𑀺𑀲𑁆𑀲𑀢𑀻’’𑀢𑀺 𑀦𑀺𑀦𑁆𑀤𑀜𑁆𑀘 𑀯𑀚𑁆𑀚𑀦𑀻𑀬𑀢𑀜𑁆𑀘 𑀤𑀼𑀕𑁆𑀕𑀢𑀺𑀜𑁆𑀘 𑀧𑀸𑀧𑀼𑀡𑀦𑁆𑀢𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑀲𑁆𑀫𑀸 ‘‘𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁦. 𑀧𑀸𑀧𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀁, 𑀲𑀫𑀺𑀢𑀢𑁆𑀢𑀸 𑀲𑀫𑀡𑀁. 𑀩𑁆𑀭𑀸𑀳𑁆𑀫𑀡𑀓𑀼𑀮𑀧𑁆𑀧𑀪𑀯𑀫𑁆𑀧𑀺 𑀯𑀸 𑀩𑁆𑀭𑀸𑀳𑁆𑀫𑀡𑀁, 𑀧𑀩𑁆𑀩𑀚𑁆𑀚𑀼𑀧𑀕𑀢𑀁 ¶ 𑀲𑀫𑀡𑀁, 𑀢𑀢𑁄 𑀅𑀜𑁆𑀜𑀁 𑀯𑀸𑀧𑀺 𑀬𑀁𑀓𑀺𑀜𑁆𑀘𑀺 𑀬𑀸𑀘𑀦𑀓𑀁. 𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀻𑀢𑀺 ‘‘𑀯𑀤, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’’𑀢𑀺 𑀧𑀯𑀸𑀭𑁂𑀢𑁆𑀯𑀸 𑀬𑀸𑀘𑀺𑀢𑁄 𑀯𑀸 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀅𑀧𑁆𑀧𑀤𑀸𑀦𑁂𑀦 𑀢𑀲𑁆𑀲 𑀢𑀁 𑀆𑀲𑀁 𑀯𑀺𑀲𑀁𑀯𑀸𑀤𑁂𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑀦𑀁 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀇𑀥 𑀦𑀺𑀦𑁆𑀤𑀁, 𑀲𑀫𑁆𑀧𑀭𑀸𑀬𑁂 𑀤𑀼𑀕𑁆𑀕𑀢𑀺𑀁 𑀲𑀼𑀕𑀢𑀺𑀬𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑀯𑀺𑀧𑀢𑁆𑀢𑀺𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁪𑁯; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫).

𑀢𑀣𑀸 𑁋

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀫𑀼𑀲𑀸𑀯𑀸𑀤𑀻 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁮𑁨).

𑀢𑀣𑀸 𑁋

‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺, ‘𑀯𑀤, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’𑀢𑀺, 𑀲𑁄 𑀬𑁂𑀦 𑀧𑀯𑀸𑀭𑁂𑀢𑀺, 𑀢𑀁 𑀦 𑀤𑁂𑀢𑀺. 𑀲𑁄 𑀘𑁂 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀲𑁄 𑀬𑀁 𑀬𑀤𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀲𑀸𑀲𑁆𑀲 𑀳𑁄𑀢𑀺 𑀙𑁂𑀤𑀕𑀸𑀫𑀺𑀦𑀻. 𑀇𑀥 𑀧𑀦 𑀲𑀸𑀭𑀺𑀧𑀼𑀢𑁆𑀢…𑀧𑁂… 𑀲𑁄 𑀬𑁂𑀦 𑀧𑀯𑀸𑀭𑁂𑀢𑀺, 𑀦 𑀢𑀁 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀺. 𑀲𑁄 𑀘𑁂 𑀢𑀢𑁄 𑀘𑀼𑀢𑁄 ¶ 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀲𑁄 𑀬𑀁 𑀬𑀤𑁂𑀯 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑀺, 𑀲𑀸𑀲𑁆𑀲 𑀦 𑀳𑁄𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀸’’𑀢𑀺 (𑀅. 𑀦𑀺. 𑁪.𑁭𑁯).

𑀏𑀯𑀫𑀺𑀫𑀸𑀦𑀺 ¶ 𑀦𑀺𑀦𑁆𑀤𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑀲𑁆𑀫𑀸 ‘‘𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁦𑁨. 𑀧𑀳𑀽𑀢𑀯𑀺𑀢𑁆𑀢𑁄𑀢𑀺 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀫𑀡𑀺𑀭𑀢𑀦𑁄. 𑀲𑀳𑀺𑀭𑀜𑁆𑀜𑁄𑀢𑀺 𑀲𑀓𑀳𑀸𑀧𑀡𑁄. 𑀲𑀪𑁄𑀚𑀦𑁄𑀢𑀺 𑀅𑀦𑁂𑀓𑀲𑀽𑀧𑀩𑁆𑀬𑀜𑁆𑀚𑀦𑀪𑁄𑀚𑀦𑀲𑀫𑁆𑀧𑀦𑁆𑀦𑁄. 𑀏𑀓𑁄 𑀪𑀼𑀜𑁆𑀚𑀢𑀺 𑀲𑀸𑀤𑀽𑀦𑀻𑀢𑀺 𑀲𑀸𑀤𑀽𑀦𑀺 𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀫𑁆𑀧𑀺 𑀅𑀤𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀪𑀼𑀜𑁆𑀚𑀢𑀻𑀢𑀺 𑀏𑀓𑁄 𑀪𑀼𑀜𑁆𑀚𑀢𑀺 𑀲𑀸𑀤𑀽𑀦𑀺. 𑀇𑀫𑀸𑀬 𑀕𑀸𑀣𑀸𑀬 𑀪𑁄𑀚𑀦𑀕𑀺𑀤𑁆𑀥𑀢𑀸𑀬 𑀪𑁄𑀚𑀦𑀫𑀘𑁆𑀙𑀭𑀺𑀬𑀁 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀦𑁆𑀤𑀁 𑀯𑀚𑁆𑀚𑀦𑀻𑀬𑀁 𑀤𑀼𑀕𑁆𑀕𑀢𑀺𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑀲𑁆𑀫𑀸 ‘‘𑀧𑀭𑀸𑀪𑀯𑀢𑁄 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀁 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀇𑀤𑀸𑀦𑀺 𑀬𑁄𑀚𑀦𑀸𑀦𑀬𑀁 𑀅𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀪𑀡𑀸𑀫.

𑁧𑁦𑁪. 𑀚𑀸𑀢𑀺𑀢𑁆𑀣𑀤𑁆𑀥𑁄 𑀦𑀸𑀫 𑀬𑁄 ‘‘𑀅𑀳𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑁄’’𑀢𑀺 𑀫𑀸𑀦𑀁 𑀚𑀦𑁂𑀢𑁆𑀯𑀸 𑀢𑁂𑀦 𑀣𑀤𑁆𑀥𑁄 𑀯𑀸𑀢𑀧𑀽𑀭𑀺𑀢𑀪𑀲𑁆𑀢𑀸 𑀯𑀺𑀬 𑀉𑀤𑁆𑀥𑀼𑀫𑀸𑀢𑁄 𑀳𑀼𑀢𑁆𑀯𑀸 𑀦 𑀓𑀲𑁆𑀲𑀘𑀺 ¶ 𑀑𑀦𑀫𑀢𑀺. 𑀏𑀲 𑀦𑀬𑁄 𑀥𑀦𑀕𑁄𑀢𑁆𑀢𑀢𑁆𑀣𑀤𑁆𑀥𑁂𑀲𑀼. 𑀲𑀜𑁆𑀜𑀸𑀢𑀺𑀁 𑀅𑀢𑀺𑀫𑀜𑁆𑀜𑁂𑀢𑀻𑀢𑀺 𑀅𑀢𑁆𑀢𑀦𑁄 𑀜𑀸𑀢𑀺𑀫𑁆𑀧𑀺 𑀚𑀸𑀢𑀺𑀬𑀸 𑀅𑀢𑀺𑀫𑀜𑁆𑀜𑀢𑀺 𑀲𑀓𑁆𑀬𑀸 𑀯𑀺𑀬 𑀯𑀺𑀝𑀝𑀽𑀪𑀁. 𑀥𑀦𑁂𑀦𑀸𑀧𑀺 𑀘 ‘‘𑀓𑀧𑀡𑁄 𑀅𑀬𑀁 𑀤𑀮𑀺𑀤𑁆𑀤𑁄’’𑀢𑀺 𑀅𑀢𑀺𑀫𑀜𑁆𑀜𑀢𑀺, 𑀲𑀸𑀫𑀻𑀘𑀺𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀢𑀲𑁆𑀲 𑀢𑁂 𑀜𑀸𑀢𑀬𑁄 𑀧𑀭𑀸𑀪𑀯𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀯𑀢𑁆𑀣𑀼𑀢𑁄 𑀘𑀢𑀼𑀩𑁆𑀩𑀺𑀥𑀁, 𑀮𑀓𑁆𑀔𑀡𑀢𑁄 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁.

𑁧𑁦𑁬. 𑀇𑀢𑁆𑀣𑀺𑀥𑀼𑀢𑁆𑀢𑁄𑀢𑀺 𑀇𑀢𑁆𑀣𑀻𑀲𑀼 𑀲𑀸𑀭𑀢𑁆𑀢𑁄, 𑀬𑀁𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀤𑀢𑁆𑀯𑀸 𑀅𑀧𑀭𑀸𑀧𑀭𑀁 𑀇𑀢𑁆𑀣𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀭𑀸𑀧𑀸𑀦𑀧𑀬𑀼𑀢𑁆𑀢𑁄 𑀲𑀼𑀭𑀸𑀥𑀼𑀢𑁆𑀢𑁄. 𑀦𑀺𑀯𑀢𑁆𑀣𑀲𑀸𑀝𑀓𑀫𑁆𑀧𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀚𑀽𑀢𑀓𑀻𑀴𑀦𑀫𑀦𑀼𑀬𑀼𑀢𑁆𑀢𑁄 𑀅𑀓𑁆𑀔𑀥𑀼𑀢𑁆𑀢𑁄. 𑀏𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀬𑀁𑀓𑀺𑀜𑁆𑀘𑀺𑀧𑀺 𑀮𑀤𑁆𑀥𑀁 𑀳𑁄𑀢𑀺, 𑀢𑀲𑁆𑀲 𑀯𑀺𑀦𑀸𑀲𑀦𑀢𑁄 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀸𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁𑀯𑀺𑀥𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑁂𑀦𑀲𑁆𑀲𑁂𑀢𑀁 𑀇𑀫𑀸𑀬 𑀕𑀸𑀣𑀸𑀬 𑀢𑀺𑀯𑀺𑀥𑀁 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁.

𑁧𑁦𑁮. 𑀲𑁂𑀳𑀺 𑀤𑀸𑀭𑁂𑀳𑀻𑀢𑀺 𑀅𑀢𑁆𑀢𑀦𑁄 𑀤𑀸𑀭𑁂𑀳𑀺. 𑀬𑁄 𑀅𑀢𑁆𑀢𑀦𑁄 𑀤𑀸𑀭𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀯𑁂𑀲𑀺𑀬𑀸𑀲𑀼 𑀧𑀤𑀼𑀲𑁆𑀲𑀢𑀺, 𑀢𑀣𑀸 𑀧𑀭𑀤𑀸𑀭𑁂𑀲𑀼, 𑀲𑁄 ¶ 𑀬𑀲𑁆𑀫𑀸 𑀯𑁂𑀲𑀻𑀦𑀁 𑀥𑀦𑀧𑁆𑀧𑀤𑀸𑀦𑁂𑀦 𑀧𑀭𑀤𑀸𑀭𑀲𑁂𑀯𑀦𑁂𑀦 𑀘 𑀭𑀸𑀚𑀤𑀡𑁆𑀟𑀸𑀤𑀻𑀳𑀺 𑀧𑀭𑀸𑀪𑀯𑀢𑀺𑀬𑁂𑀯, 𑀢𑁂𑀦𑀲𑁆𑀲𑁂𑀢𑀁 𑀇𑀫𑀸𑀬 𑀕𑀸𑀣𑀸𑀬 𑀤𑀼𑀯𑀺𑀥𑀁 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁.

𑁧𑁧𑁦. 𑀅𑀢𑀻𑀢𑀬𑁄𑀩𑁆𑀩𑀦𑁄𑀢𑀺 ¶ 𑀬𑁄𑀩𑁆𑀩𑀦𑀫𑀢𑀺𑀘𑁆𑀘 𑀆𑀲𑀻𑀢𑀺𑀓𑁄 𑀯𑀸 𑀦𑀸𑀯𑀼𑀢𑀺𑀓𑁄 𑀯𑀸 𑀳𑀼𑀢𑁆𑀯𑀸 𑀆𑀦𑁂𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑀺𑀫𑁆𑀩𑀭𑀼𑀢𑁆𑀣𑀦𑀺𑀦𑁆𑀢𑀺 𑀢𑀺𑀫𑁆𑀩𑀭𑀼𑀨𑀮𑀲𑀤𑀺𑀲𑀢𑁆𑀣𑀦𑀺𑀁 𑀢𑀭𑀼𑀡𑀤𑀸𑀭𑀺𑀓𑀁. 𑀢𑀲𑁆𑀲𑀸 𑀇𑀲𑁆𑀲𑀸 𑀦 𑀲𑀼𑀧𑀢𑀻𑀢𑀺 ‘‘𑀤𑀳𑀭𑀸𑀬 𑀫𑀳𑀮𑁆𑀮𑀓𑁂𑀦 𑀲𑀤𑁆𑀥𑀺𑀁 𑀭𑀢𑀺 𑀘 𑀲𑀁𑀯𑀸𑀲𑁄 𑀘 𑀅𑀫𑀦𑀸𑀧𑁄, 𑀫𑀸 𑀳𑁂𑀯 𑀔𑁄 𑀢𑀭𑀼𑀡𑀁 𑀧𑀢𑁆𑀣𑁂𑀬𑁆𑀬𑀸’’𑀢𑀺 𑀇𑀲𑁆𑀲𑀸𑀬 𑀢𑀁 𑀭𑀓𑁆𑀔𑀦𑁆𑀢𑁄 𑀦 𑀲𑀼𑀧𑀢𑀺. 𑀲𑁄 𑀬𑀲𑁆𑀫𑀸 𑀓𑀸𑀫𑀭𑀸𑀕𑁂𑀦 𑀘 𑀇𑀲𑁆𑀲𑀸𑀬 𑀘 𑀟𑀬𑁆𑀳𑀦𑁆𑀢𑁄 𑀩𑀳𑀺𑀤𑁆𑀥𑀸 𑀓𑀫𑁆𑀫𑀦𑁆𑀢𑁂 𑀘 𑀅𑀧𑁆𑀧𑀬𑁄𑀚𑁂𑀦𑁆𑀢𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑁂𑀦𑀲𑁆𑀲𑁂𑀢𑀁 𑀇𑀫𑀸𑀬 𑀕𑀸𑀣𑀸𑀬 𑀇𑀫𑀁 𑀇𑀲𑁆𑀲𑀸𑀬 𑀅𑀲𑀼𑀧𑀦𑀁 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁.

𑁧𑁧𑁨. 𑀲𑁄𑀡𑁆𑀟𑀺𑀦𑁆𑀢𑀺 𑀫𑀘𑁆𑀙𑀫𑀁𑀲𑀸𑀤𑀻𑀲𑀼 𑀮𑁄𑀮𑀁 𑀕𑁂𑀥𑀚𑀸𑀢𑀺𑀓𑀁. 𑀯𑀺𑀓𑀺𑀭𑀡𑀺𑀦𑁆𑀢𑀺 𑀢𑁂𑀲𑀁 𑀅𑀢𑁆𑀣𑀸𑀬 𑀥𑀦𑀁 𑀧𑀁𑀲𑀼𑀓𑀁 𑀯𑀺𑀬 𑀯𑀺𑀓𑀺𑀭𑀺𑀢𑁆𑀯𑀸 𑀦𑀸𑀲𑀦𑀲𑀻𑀮𑀁. 𑀧𑀼𑀭𑀺𑀲𑀁 𑀯𑀸𑀧𑀺 𑀢𑀸𑀤𑀺𑀲𑀦𑁆𑀢𑀺 𑀧𑀼𑀭𑀺𑀲𑁄 𑀯𑀸𑀧𑀺 𑀬𑁄 𑀏𑀯𑀭𑀽𑀧𑁄 𑀳𑁄𑀢𑀺, 𑀢𑀁 𑀬𑁄 𑀇𑀲𑁆𑀲𑀭𑀺𑀬𑀲𑁆𑀫𑀺𑀁 𑀞𑀧𑁂𑀢𑀺, 𑀮𑀜𑁆𑀙𑀦𑀫𑀼𑀤𑁆𑀤𑀺𑀓𑀸𑀤𑀻𑀦𑀺 𑀤𑀢𑁆𑀯𑀸 𑀖𑀭𑀸𑀯𑀸𑀲𑁂 𑀓𑀫𑁆𑀫𑀦𑁆𑀢𑁂 ¶ 𑀯𑀸 𑀯𑀡𑀺𑀚𑁆𑀚𑀸𑀤𑀺𑀯𑁄𑀳𑀸𑀭𑁂𑀲𑀼 𑀯𑀸 𑀢𑀤𑁂𑀯 𑀯𑀸𑀯𑀝𑀁 𑀓𑀸𑀭𑁂𑀢𑀺. 𑀲𑁄 𑀬𑀲𑁆𑀫𑀸 𑀢𑀲𑁆𑀲 𑀤𑁄𑀲𑁂𑀦 𑀥𑀦𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑁂𑀦𑀲𑁆𑀲𑁂𑀢𑀁 𑀇𑀫𑀸𑀬 𑀕𑀸𑀣𑀸𑀬 𑀢𑀣𑀸𑀯𑀺𑀥𑀲𑁆𑀲 𑀇𑀲𑁆𑀲𑀭𑀺𑀬𑀲𑁆𑀫𑀺𑀁 𑀞𑀧𑀦𑀁 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁.

𑁧𑁧𑁪. 𑀅𑀧𑁆𑀧𑀪𑁄𑀕𑁄 𑀦𑀸𑀫 𑀲𑀦𑁆𑀦𑀺𑀘𑀺𑀢𑀸𑀦𑀜𑁆𑀘 𑀪𑁄𑀕𑀸𑀦𑀁 𑀆𑀬𑀫𑀼𑀔𑀲𑁆𑀲 𑀘 𑀅𑀪𑀸𑀯𑀢𑁄. 𑀫𑀳𑀸𑀢𑀡𑁆𑀳𑁄𑀢𑀺 𑀫𑀳𑀢𑀺𑀬𑀸 𑀪𑁄𑀕𑀢𑀡𑁆𑀳𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀬𑀁 𑀮𑀤𑁆𑀥𑀁, 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑁄. 𑀔𑀢𑁆𑀢𑀺𑀬𑁂 𑀚𑀸𑀬𑀢𑁂 𑀓𑀼𑀮𑁂𑀢𑀺 𑀔𑀢𑁆𑀢𑀺𑀬𑀸𑀦𑀁 𑀓𑀼𑀮𑁂 𑀚𑀸𑀬𑀢𑀺. 𑀲𑁄 𑀘 𑀭𑀚𑁆𑀚𑀁 𑀧𑀢𑁆𑀣𑀬𑀢𑀻𑀢𑀺 𑀲𑁄 𑀏𑀢𑀸𑀬 𑀫𑀳𑀸𑀢𑀡𑁆𑀳𑀢𑀸𑀬 𑀅𑀦𑀼𑀧𑀸𑀬𑁂𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀤𑀸𑀬𑀚𑁆𑀚𑀪𑀽𑀢𑀁 𑀅𑀮𑀩𑁆𑀪𑀦𑁂𑀬𑁆𑀬𑀁 𑀯𑀸 𑀧𑀭𑀲𑀦𑁆𑀢𑀓𑀁 𑀭𑀚𑁆𑀚𑀁 𑀧𑀢𑁆𑀣𑁂𑀢𑀺, 𑀲𑁄 𑀏𑀯𑀁 𑀧𑀢𑁆𑀣𑁂𑀦𑁆𑀢𑁄 𑀬𑀲𑁆𑀫𑀸 𑀢𑀫𑁆𑀧𑀺 𑀅𑀧𑁆𑀧𑀓𑀁 𑀪𑁄𑀕𑀁 𑀬𑁄𑀥𑀸𑀚𑀻𑀯𑀸𑀤𑀻𑀦𑀁 𑀤𑀢𑁆𑀯𑀸 𑀭𑀚𑁆𑀚𑀁 𑀅𑀧𑀸𑀧𑀼𑀡𑀦𑁆𑀢𑁄 𑀧𑀭𑀸𑀪𑀯𑀢𑀺𑀬𑁂𑀯, 𑀢𑁂𑀦𑀲𑁆𑀲𑁂𑀢𑀁 𑀇𑀫𑀸𑀬 𑀕𑀸𑀣𑀸𑀬 𑀭𑀚𑁆𑀚𑀧𑀢𑁆𑀣𑀦𑀁 𑀏𑀓𑀁𑀬𑁂𑀯 𑀧𑀭𑀸𑀪𑀯𑀫𑀼𑀔𑀁 𑀯𑀼𑀢𑁆𑀢𑀁.

𑁧𑁧𑁫. 𑀇𑀢𑁄 ¶ 𑀧𑀭𑀁 𑀬𑀤𑀺 𑀲𑀸 𑀤𑁂𑀯𑀢𑀸 ‘‘𑀢𑁂𑀭𑀲𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺…𑀧𑁂… 𑀲𑀢𑀲𑀳𑀲𑁆𑀲𑀺𑀫𑀁 𑀪𑀕𑀯𑀸 𑀩𑁆𑀭𑀽𑀳𑀻’’𑀢𑀺 𑀧𑀼𑀘𑁆𑀙𑁂𑀬𑁆𑀬, 𑀢𑀫𑁆𑀧𑀺 𑀪𑀕𑀯𑀸 𑀓𑀣𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀲𑀸 𑀤𑁂𑀯𑀢𑀸 ‘‘𑀓𑀺𑀁 𑀇𑀫𑁂𑀳𑀺 𑀧𑀼𑀘𑁆𑀙𑀺𑀢𑁂𑀳𑀺, 𑀏𑀓𑀫𑁂𑀢𑁆𑀣 𑀯𑀼𑀟𑁆𑀠𑀺𑀓𑀭𑀁 𑀦𑀢𑁆𑀣𑀻’’𑀢𑀺 𑀢𑀸𑀦𑀺 𑀧𑀭𑀸𑀪𑀯𑀫𑀼𑀔𑀸𑀦𑀺 𑀅𑀲𑀼𑀬𑁆𑀬𑀫𑀸𑀦𑀸 𑀏𑀢𑁆𑀢𑀓𑀫𑁆𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 ‘‘𑀏𑀢𑁂 𑀧𑀭𑀸𑀪𑀯𑁂 𑀮𑁄𑀓𑁂’’𑀢𑀺.

𑀢𑀢𑁆𑀣 𑀧𑀡𑁆𑀟𑀺𑀢𑁄𑀢𑀺 𑀧𑀭𑀺𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀫𑀯𑁂𑀓𑁆𑀔𑀺𑀬𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀅𑀭𑀺𑀬𑁄𑀢𑀺 𑀦 𑀫𑀕𑁆𑀕𑁂𑀦, 𑀦 𑀨𑀮𑁂𑀦, 𑀅𑀧𑀺𑀘 𑀔𑁄, 𑀧𑀦 𑀏𑀢𑀲𑁆𑀫𑀺𑀁 𑀧𑀭𑀸𑀪𑀯𑀲𑀗𑁆𑀔𑀸𑀢𑁂 𑀅𑀦𑀬𑁂 𑀦 𑀇𑀭𑀺𑀬𑀢𑀻𑀢𑀺 𑀅𑀭𑀺𑀬𑁄. 𑀬𑁂𑀦 𑀤𑀲𑁆𑀲𑀦𑁂𑀦 𑀬𑀸𑀬 𑀧𑀜𑁆𑀜𑀸𑀬 𑀧𑀭𑀸𑀪𑀯𑁂 𑀤𑀺𑀲𑁆𑀯𑀸 𑀯𑀺𑀯𑀚𑁆𑀚𑁂𑀢𑀺, 𑀢𑁂𑀦 ¶ 𑀲𑀫𑁆𑀧𑀦𑁆𑀦𑀢𑁆𑀢𑀸 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄. 𑀲 𑀮𑁄𑀓𑀁 𑀪𑀚𑀢𑁂 𑀲𑀺𑀯𑀦𑁆𑀢𑀺 𑀲𑁄 𑀏𑀯𑀭𑀽𑀧𑁄 𑀲𑀺𑀯𑀁 𑀔𑁂𑀫𑀫𑀼𑀢𑁆𑀢𑀫𑀫𑀦𑀼𑀧𑀤𑁆𑀤𑀯𑀁 𑀤𑁂𑀯𑀮𑁄𑀓𑀁 𑀪𑀚𑀢𑀺, 𑀅𑀮𑁆𑀮𑀻𑀬𑀢𑀺, 𑀉𑀧𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀭𑀸𑀪𑀯𑀫𑀼𑀔𑀸𑀦𑀺 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀸𑀦𑀼𑀭𑀽𑀧𑀁 𑀬𑁄𑀦𑀺𑀲𑁄 𑀧𑀤𑀳𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀸𑀦𑀺 𑀧𑀢𑁆𑀢𑀸 𑀤𑁂𑀯𑀢𑀸 𑀕𑀡𑀦𑀁 𑀯𑀻𑀢𑀺𑀯𑀢𑁆𑀢𑀸. 𑀬𑀣𑀸𑀳 𑁋

‘‘𑀫𑀳𑀸𑀲𑀫𑀬𑀲𑀼𑀢𑁆𑀢𑁂 ¶ 𑀘, 𑀅𑀣𑁄 𑀫𑀗𑁆𑀕𑀮𑀲𑀼𑀢𑁆𑀢𑀓𑁂;

𑀲𑀫𑀘𑀺𑀢𑁆𑀢𑁂 𑀭𑀸𑀳𑀼𑀮𑁄𑀯𑀸𑀤𑁂, 𑀥𑀫𑁆𑀫𑀘𑀓𑁆𑀓𑁂 𑀧𑀭𑀸𑀪𑀯𑁂.

‘‘𑀤𑁂𑀯𑀢𑀸𑀲𑀫𑀺𑀢𑀻 𑀢𑀢𑁆𑀣, 𑀅𑀧𑁆𑀧𑀫𑁂𑀬𑁆𑀬𑀸 𑀅𑀲𑀗𑁆𑀔𑀺𑀬𑀸;

𑀥𑀫𑁆𑀫𑀸𑀪𑀺𑀲𑀫𑀬𑁄 𑀘𑁂𑀢𑁆𑀣, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑁄’’𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀭𑀸𑀪𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁, ‘‘𑀯𑀲𑀮𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 ¶ 𑀯𑁄𑀮𑁄𑀓𑁂𑀦𑁆𑀢𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀲𑀭𑀡𑀲𑀺𑀓𑁆𑀔𑀸𑀧𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀧𑀯𑀢𑁆𑀢𑀸𑀬 𑀓𑀣𑀸𑀬 𑀩𑁆𑀭𑀸𑀳𑁆𑀫𑀡𑁂𑀦 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺𑀢𑁄 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀢𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀁 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀡𑁆𑀡𑀬𑀺𑀲𑁆𑀲𑀸𑀫, ‘‘𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬’’𑀦𑁆𑀢𑀺𑀆𑀤𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲𑀸𑀢𑀺 𑀬𑀁 𑀬𑀁 𑀅𑀯𑀼𑀢𑁆𑀢𑀧𑀼𑀩𑁆𑀩𑀁, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀁 𑀚𑀼𑀳𑀢𑀺 𑀧𑀭𑀺𑀘𑀭𑀢𑀻𑀢𑀺 𑀓𑀢𑁆𑀯𑀸 𑀅𑀕𑁆𑀕𑀺𑀓𑁄𑀢𑀺 𑀦𑀸𑀫𑁂𑀦 𑀧𑀸𑀓𑀝𑁄 𑀅𑀳𑁄𑀲𑀺, 𑀪𑀸𑀭𑀤𑁆𑀯𑀸𑀚𑁄𑀢𑀺 𑀕𑁄𑀢𑁆𑀢𑁂𑀦. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲𑀸’’𑀢𑀺. 𑀦𑀺𑀯𑁂𑀲𑀦𑁂𑀢𑀺 𑀖𑀭𑁂. 𑀢𑀲𑁆𑀲 𑀓𑀺𑀭 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀅𑀕𑁆𑀕𑀺𑀳𑀼𑀢𑀲𑀸𑀮𑀸 𑀅𑀳𑁄𑀲𑀺. 𑀢𑀢𑁄 ‘‘𑀦𑀺𑀯𑁂𑀲𑀦𑀤𑁆𑀯𑀸𑀭𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀲𑁆𑀲𑀧𑀺 𑀧𑀤𑁂𑀲𑀲𑁆𑀲 𑀦𑀺𑀯𑁂𑀲𑀦𑁂𑀬𑁂𑀯 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀦𑀺𑀯𑁂𑀲𑀦𑁂’’𑀢𑀺 𑀯𑀼𑀢𑁆𑀢𑀁. 𑀲𑀫𑀻𑀧𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁, 𑀦𑀺𑀯𑁂𑀲𑀦𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀳𑁄𑀢𑀻𑀢𑀺 𑀅𑀕𑁆𑀕𑀺𑀬𑀸𑀥𑀸𑀦𑁂 𑀞𑀺𑀢𑁄 𑀅𑀕𑁆𑀕𑀺 𑀓𑀢𑀩𑁆𑀪𑀼𑀤𑁆𑀥𑀭𑀡𑁄 𑀲𑀫𑀺𑀥𑀸𑀧𑀓𑁆𑀔𑁂𑀧𑀁 𑀩𑀻𑀚𑀦𑀯𑀸𑀢𑀜𑁆𑀘 𑀮𑀪𑀺𑀢𑁆𑀯𑀸 ¶ 𑀚𑀮𑀺𑀢𑁄 𑀉𑀤𑁆𑀥𑀁 𑀲𑀫𑀼𑀕𑁆𑀕𑀢𑀘𑁆𑀘𑀺𑀲𑀫𑀸𑀓𑀼𑀮𑁄 𑀳𑁄𑀢𑀺. 𑀆𑀳𑀼𑀢𑀺 𑀧𑀕𑁆𑀕𑀳𑀺𑀢𑀸𑀢𑀺 𑀲𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀧𑀸𑀬𑀸𑀲𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀅𑀪𑀺𑀲𑀗𑁆𑀔𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀅𑀕𑁆𑀕𑀺𑀫𑁆𑀳𑀺 𑀚𑀼𑀳𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 ‘‘𑀆𑀳𑀼𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀧𑀤𑀸𑀦𑀦𑁆𑀢𑀺 𑀅𑀦𑀼𑀖𑀭𑀁. 𑀪𑀕𑀯𑀸 𑀳𑀺 𑀲𑀩𑁆𑀩𑀚𑀦𑀸𑀦𑀼𑀕𑁆𑀕𑀳𑀢𑁆𑀣𑀸𑀬 𑀆𑀳𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀉𑀘𑁆𑀘𑀦𑀻𑀘𑀓𑀼𑀮𑀁 𑀅𑀯𑁄𑀓𑁆𑀓𑀫𑁆𑀫 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄’’𑀢𑀺.

𑀅𑀣 𑀓𑀺𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀁 𑀦𑀧𑁆𑀧𑀲𑀻𑀤𑀢𑀺? 𑀓𑀲𑁆𑀫𑀸 𑀘 𑀏𑀯𑀁 𑀨𑀭𑀼𑀲𑁂𑀦 𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀲𑀫𑀼𑀤𑀸𑀘𑀭𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀬𑀁 𑀓𑀺𑀭 ¶ 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀗𑁆𑀕𑀮𑀓𑀺𑀘𑁆𑀘𑁂𑀲𑀼 𑀲𑀫𑀡𑀤𑀲𑁆𑀲𑀦𑀁 𑀅𑀯𑀫𑀗𑁆𑀕𑀮’’𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄, 𑀢𑀢𑁄 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀪𑀼𑀜𑁆𑀚𑀦𑀯𑁂𑀮𑀸𑀬 𑀓𑀸𑀴𑀓𑀡𑁆𑀡𑀻 𑀫𑀼𑀡𑁆𑀟𑀓𑀲𑀫𑀡𑀓𑁄 𑀫𑀫 𑀦𑀺𑀯𑁂𑀲𑀦𑀁 𑀉𑀧𑀲𑀗𑁆𑀓𑀫𑀢𑀻’’𑀢𑀺 𑀫𑀦𑁆𑀢𑁆𑀯𑀸 𑀘𑀺𑀢𑁆𑀢𑀁 𑀦𑀧𑁆𑀧𑀲𑀸𑀤𑁂𑀲𑀺, 𑀅𑀜𑁆𑀜𑀤𑀢𑁆𑀣𑀼 𑀤𑁄𑀲𑀯𑀲𑀁𑀬𑁂𑀯 𑀅𑀕𑀫𑀸𑀲𑀺. 𑀅𑀣 𑀓𑀼𑀤𑁆𑀥𑁄 𑀅𑀦𑀢𑁆𑀢𑀫𑀦𑁄 𑀅𑀦𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 ‘‘𑀢𑀢𑁆𑀭𑁂𑀯 𑀫𑀼𑀡𑁆𑀟𑀓𑀸’’𑀢𑀺𑀆𑀤𑀺. 𑀢𑀢𑁆𑀭𑀸𑀧𑀺 ¶ 𑀘 𑀬𑀲𑁆𑀫𑀸 ‘‘𑀫𑀼𑀡𑁆𑀟𑁄 𑀅𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀺, 𑀢𑀲𑁆𑀫𑀸 ‘‘𑀅𑀬𑀁 𑀅𑀲𑀼𑀤𑁆𑀥𑁄, 𑀢𑁂𑀦 𑀤𑁂𑀯𑀩𑁆𑀭𑀸𑀳𑁆𑀫𑀡𑀧𑀽𑀚𑀓𑁄 𑀦 𑀳𑁄𑀢𑀻’’𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀫𑀼𑀡𑁆𑀟𑀓𑀸’’𑀢𑀺 𑀆𑀳. 𑀫𑀼𑀡𑁆𑀟𑀓𑀢𑁆𑀢𑀸 𑀯𑀸 𑀉𑀘𑁆𑀙𑀺𑀝𑁆𑀞𑁄 𑀏𑀲, 𑀦 𑀇𑀫𑀁 𑀧𑀤𑁂𑀲𑀁 𑀅𑀭𑀳𑀢𑀺 𑀆𑀕𑀘𑁆𑀙𑀺𑀢𑀼𑀦𑁆𑀢𑀺 𑀲𑀫𑀡𑁄 𑀳𑀼𑀢𑁆𑀯𑀸𑀧𑀺 𑀈𑀤𑀺𑀲𑀁 𑀓𑀸𑀬𑀓𑀺𑀮𑁂𑀲𑀁 𑀦 𑀯𑀡𑁆𑀡𑁂𑀢𑀻𑀢𑀺 𑀘 𑀲𑀫𑀡𑀪𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀲𑀫𑀡𑀓𑀸’’𑀢𑀺 𑀆𑀳. 𑀦 𑀓𑁂𑀯𑀮𑀁 𑀤𑁄𑀲𑀯𑀲𑁂𑀦𑁂𑀯, 𑀯𑀲𑀮𑁂 𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀓𑀭𑀡𑁂𑀦 𑀧𑀢𑀺𑀢𑁄 𑀅𑀬𑀁 𑀯𑀲𑀮𑀢𑁄𑀧𑀺 𑀧𑀸𑀧𑀢𑀭𑁄𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀯𑀲𑀮𑀓𑀸’’𑀢𑀺 𑀆𑀳 𑁋 ‘‘𑀯𑀲𑀮𑀚𑀸𑀢𑀺𑀓𑀸𑀦𑀁 𑀯𑀸 𑀆𑀳𑀼𑀢𑀺𑀤𑀲𑁆𑀲𑀦𑀫𑀢𑁆𑀢𑀲𑀯𑀦𑁂𑀦 𑀧𑀸𑀧𑀁 𑀳𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄𑀧𑀺 𑀏𑀯𑀫𑀸𑀳.

𑀪𑀕𑀯𑀸 𑀢𑀣𑀸 𑀯𑀼𑀢𑁆𑀢𑁄𑀧𑀺 𑀯𑀺𑀧𑁆𑀧𑀲𑀦𑁆𑀦𑁂𑀦𑁂𑀯 𑀫𑀼𑀔𑀯𑀡𑁆𑀡𑁂𑀦 𑀫𑀥𑀼𑀭𑁂𑀦 𑀲𑀭𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀧𑀭𑀺 𑀅𑀦𑀼𑀓𑀫𑁆𑀧𑀸𑀲𑀻𑀢𑀮𑁂𑀦 𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀸𑀥𑀸𑀭𑀡𑀢𑀸𑀤𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀦𑀸𑀲𑀺 𑀧𑀦, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 ¶ 𑀫𑀼𑀔𑀧𑁆𑀧𑀲𑀸𑀤𑀲𑀽𑀘𑀺𑀢𑀁 𑀢𑀸𑀤𑀺𑀪𑀸𑀯𑀁 𑀜𑀢𑁆𑀯𑀸 𑀅𑀦𑀼𑀓𑀫𑁆𑀧𑀸𑀲𑀻𑀢𑀮𑁂𑀦 𑀘𑀺𑀢𑁆𑀢𑁂𑀦 𑀦𑀺𑀘𑁆𑀙𑀸𑀭𑀺𑀢𑀁 𑀫𑀥𑀼𑀭𑀲𑁆𑀲𑀭𑀁 𑀲𑀼𑀢𑁆𑀯𑀸 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑀳𑀤𑀬𑁄 𑀅𑀢𑁆𑀢𑀫𑀦𑁄 𑀯𑀺𑀧𑁆𑀧𑀲𑀦𑁆𑀦𑀺𑀦𑁆𑀤𑁆𑀭𑀺𑀬𑁄 𑀦𑀺𑀳𑀢𑀫𑀸𑀦𑁄 𑀳𑀼𑀢𑁆𑀯𑀸 𑀢𑀁 𑀚𑀸𑀢𑀺𑀲𑀪𑀸𑀯𑀁 𑀯𑀺𑀲𑀉𑀕𑁆𑀕𑀺𑀭𑀲𑀤𑀺𑀲𑀁 𑀲𑀫𑀼𑀤𑀸𑀘𑀸𑀭𑀯𑀘𑀦𑀁 𑀧𑀳𑀸𑀬 ‘‘𑀦𑀽𑀦 𑀬𑀫𑀳𑀁 𑀳𑀻𑀦𑀚𑀘𑁆𑀘𑀁 𑀯𑀲𑀮𑀦𑁆𑀢𑀺 𑀧𑀘𑁆𑀘𑁂𑀫𑀺, 𑀦 𑀲𑁄 𑀧𑀭𑀫𑀢𑁆𑀣𑀢𑁄 𑀯𑀲𑀮𑁄, 𑀦 𑀘 𑀳𑀻𑀦𑀚𑀘𑁆𑀘𑀢𑀸 𑀏𑀯 𑀯𑀲𑀮𑀓𑀭𑀡𑁄 𑀥𑀫𑁆𑀫𑁄’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀦 𑀔𑁆𑀯𑀸𑀳𑀁, 𑀪𑁄 𑀕𑁄𑀢𑀫𑀸’’𑀢𑀺 𑀆𑀳. 𑀥𑀫𑁆𑀫𑀢𑀸 𑀳𑁂𑀲𑀸, 𑀬𑀁 𑀳𑁂𑀢𑀼𑀲𑀫𑁆𑀧𑀦𑁆𑀦𑁄 𑀧𑀘𑁆𑀘𑀬𑀸𑀮𑀸𑀪𑁂𑀦 𑀨𑀭𑀼𑀲𑁄𑀧𑀺 𑀲𑀫𑀸𑀦𑁄 𑀮𑀤𑁆𑀥𑀫𑀢𑁆𑀢𑁂 𑀧𑀘𑁆𑀘𑀬𑁂 𑀫𑀼𑀤𑀼𑀓𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀲𑀸𑀥𑀽𑀢𑀺 𑀅𑀬𑀁 𑀲𑀤𑁆𑀤𑁄 𑀆𑀬𑀸𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀳𑀁𑀲𑀦𑀲𑀼𑀦𑁆𑀤𑀭𑀤𑀴𑁆𑀳𑀻𑀓𑀫𑁆𑀫𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁯𑁫; 𑀅. 𑀦𑀺. 𑁭.𑁮𑁩) 𑀳𑀺 𑀆𑀬𑀸𑀘𑀦𑁂. ‘‘𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀲𑀸𑀥𑀼, 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯) 𑀲𑀫𑁆𑀧𑀳𑀁𑀲𑀦𑁂.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀻 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺. (𑀚𑀸. 𑁨.𑁧𑁮.𑁧𑁦𑁧) 𑁋

𑀆𑀤𑀻𑀲𑀼 ¶ ¶ 𑀲𑀼𑀦𑁆𑀤𑀭𑁂. ‘‘𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧) 𑀤𑀴𑁆𑀳𑀻𑀓𑀫𑁆𑀫𑁂. 𑀇𑀥 𑀧𑀦 𑀆𑀬𑀸𑀘𑀦𑁂.

𑀢𑁂𑀦 𑀳𑀻𑀢𑀺 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀦𑀺𑀤𑀲𑁆𑀲𑀦𑀁, 𑀲𑀘𑁂 𑀜𑀸𑀢𑀼𑀓𑀸𑀫𑁄𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀭𑀡𑀯𑀘𑀦𑀁 𑀯𑀸, 𑀢𑀲𑁆𑀲 𑀬𑀲𑁆𑀫𑀸 𑀜𑀸𑀢𑀼𑀓𑀸𑀫𑁄𑀲𑀺, 𑀢𑀲𑁆𑀫𑀸, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀢𑀣𑀸 𑀢𑁂 𑀪𑀸𑀲𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁆𑀯𑀁 𑀚𑀸𑀦𑀺𑀲𑁆𑀲𑀲𑀻𑀢𑀺 𑀏𑀯𑀁 𑀧𑀭𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭 𑀘 𑀲𑀼𑀡𑀸𑀳𑀻𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻𑀢𑀺 𑀫𑀦𑀲𑀺𑀓𑀸𑀭𑁂 𑀤𑀴𑁆𑀳𑀻𑀓𑀫𑁆𑀫𑀦𑀺𑀬𑁄𑀚𑀦𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁. 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁 ¶ . 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀤𑀻𑀲𑀼. 𑀧𑀼𑀭𑀺𑀫𑁂𑀦 𑀘 ‘‘𑀲𑀩𑁆𑀬𑀜𑁆𑀚𑀦𑁄 𑀅𑀬𑀁 𑀥𑀫𑁆𑀫𑁄, 𑀢𑀲𑁆𑀫𑀸 𑀲𑀯𑀦𑀻𑀬𑁄’’𑀢𑀺 𑀤𑀻𑀧𑁂𑀢𑀺, 𑀧𑀘𑁆𑀙𑀺𑀫𑁂𑀦 ‘‘𑀲𑀸𑀢𑁆𑀣𑁄, 𑀢𑀲𑁆𑀫𑀸 𑀫𑀦𑀲𑀺 𑀓𑀸𑀢𑀩𑁆𑀩𑁄’’𑀢𑀺. 𑀲𑀸𑀥𑀼𑀓𑀧𑀤𑀁 𑀯𑀸 𑀉𑀪𑀬𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀥𑀫𑁆𑀫𑀕𑀫𑁆𑀪𑀻𑀭𑁄 𑀘 𑀤𑁂𑀲𑀦𑀸𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀼𑀡𑀸𑀳𑀺 𑀲𑀸𑀥𑀼𑀓𑀁. 𑀬𑀲𑁆𑀫𑀸 𑀅𑀢𑁆𑀣𑀕𑀫𑁆𑀪𑀻𑀭𑁄 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀼𑀡𑀸𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺.

𑀢𑀢𑁄 ‘‘𑀏𑀯𑀁 𑀕𑀫𑁆𑀪𑀻𑀭𑁂 𑀓𑀣𑀫𑀳𑀁 𑀧𑀢𑀺𑀝𑁆𑀞𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀻𑀤𑀦𑁆𑀢𑀫𑀺𑀯 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀲𑀫𑀼𑀲𑁆𑀲𑀸𑀳𑁂𑀦𑁆𑀢𑁄 𑀆𑀳 𑁋 ‘‘𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁆𑀣 ‘‘𑀬𑀣𑀸 𑀢𑁆𑀯𑀁 𑀜𑀲𑁆𑀲𑀲𑀺, 𑀢𑀣𑀸 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀉𑀢𑁆𑀢𑀸𑀦𑁂𑀦 𑀦𑀬𑁂𑀦 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀉𑀲𑁆𑀲𑀸𑀳𑀚𑀸𑀢𑁄 𑀳𑀼𑀢𑁆𑀯𑀸 ‘‘𑀏𑀯𑀁 𑀪𑁄’’𑀢𑀺 𑀔𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺, 𑀲𑀫𑁆𑀧𑀝𑀺𑀘𑁆𑀙𑀺 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀯𑀸 𑀧𑀝𑀺𑀧𑀚𑁆𑀚𑀦𑁂𑀦 𑀅𑀪𑀺𑀫𑀼𑀔𑁄 𑀅𑀲𑁆𑀲𑁄𑀲𑀻𑀢𑀺. 𑀅𑀣𑀲𑁆𑀲 ‘‘𑀪𑀕𑀯𑀸 𑀏𑀢𑀤𑀯𑁄𑀘𑀸’’𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑁄𑀥𑀦𑁄 𑀉𑀧𑀦𑀸𑀳𑀻’’𑀢𑀺 𑀏𑀯𑀫𑀸𑀤𑀺𑀓𑀁.

𑁧𑁧𑁬. 𑀢𑀢𑁆𑀣 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀲𑀻𑀮𑁄. 𑀉𑀧𑀦𑀸𑀳𑀻𑀢𑀺 𑀢𑀲𑁆𑀲𑁂𑀯 𑀓𑁄𑀥𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑁂𑀦 𑀉𑀧𑀦𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀭𑁂𑀲𑀁 𑀕𑀼𑀡𑁂 𑀫𑀓𑁆𑀔𑁂𑀢𑀺 𑀧𑀼𑀜𑁆𑀙𑀢𑀻𑀢𑀺 𑀫𑀓𑁆𑀔𑀻, 𑀧𑀸𑀧𑁄 𑀘 𑀲𑁄 𑀫𑀓𑁆𑀔𑀻 𑀘𑀸𑀢𑀺 𑀧𑀸𑀧𑀫𑀓𑁆𑀔𑀻. 𑀯𑀺𑀧𑀦𑁆𑀦𑀤𑀺𑀝𑁆𑀞𑀻𑀢𑀺 𑀯𑀺𑀦𑀝𑁆𑀞𑀲𑀫𑁆𑀫𑀸𑀤𑀺𑀝𑁆𑀞𑀺, 𑀯𑀺𑀧𑀦𑁆𑀦𑀸𑀬 𑀯𑀸 𑀯𑀺𑀭𑀽𑀧𑀁 𑀕𑀢𑀸𑀬 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀫𑀸𑀬𑀸𑀯𑀻𑀢𑀺 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀫𑀸𑀬𑀸𑀬 ¶ 𑀲𑀫𑀦𑁆𑀦𑀸𑀕𑀢𑁄. 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀏𑀢𑁂𑀲𑀁 𑀳𑀻𑀦𑀥𑀫𑁆𑀫𑀸𑀦𑀁 𑀯𑀲𑁆𑀲𑀦𑀢𑁄 𑀲𑀺𑀜𑁆𑀘𑀦𑀢𑁄 𑀅𑀦𑁆𑀯𑀸𑀲𑁆𑀲𑀯𑀦𑀢𑁄 ‘‘𑀯𑀲𑀮𑁄’’𑀢𑀺 𑀚𑀸𑀦𑁂𑀬𑁆𑀬𑀸𑀢𑀺, 𑀏𑀢𑁂𑀳𑀺 𑀲𑀩𑁆𑀩𑁂𑀳𑀺 𑀩𑁆𑀭𑀸𑀳𑁆𑀫𑀡𑀫𑀢𑁆𑀣𑀓𑁂 𑀚𑀸𑀢𑁄. 𑀅𑀬𑀜𑁆𑀳𑀺 𑀧𑀭𑀫𑀢𑁆𑀣𑀢𑁄 𑀯𑀲𑀮𑁄 𑀏𑀯, 𑀅𑀢𑁆𑀢𑀦𑁄 ¶ 𑀳𑀤𑀬𑀢𑀼𑀝𑁆𑀞𑀺𑀫𑀢𑁆𑀢𑀁, 𑀦 𑀧𑀭𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀪𑀕𑀯𑀸 𑀆𑀤𑀺𑀧𑀤𑁂𑀦𑁂𑀯 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄𑀥𑀦𑀺𑀕𑁆𑀕𑀳𑀁 𑀓𑀢𑁆𑀯𑀸 ‘‘𑀓𑁄𑀥𑀸𑀤𑀺𑀥𑀫𑁆𑀫𑁄 𑀳𑀻𑀦𑀧𑀼𑀕𑁆𑀕𑀮𑁄’’𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 ¶ 𑀘 𑀤𑁂𑀲𑀦𑀸𑀬 𑀓𑁄𑀥𑀸𑀤𑀺𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀏𑀓𑁂𑀦 𑀢𑀸𑀯 𑀧𑀭𑀺𑀬𑀸𑀬𑁂𑀦 𑀯𑀲𑀮𑀜𑁆𑀘 𑀯𑀲𑀮𑀓𑀭𑀡𑁂 𑀘 𑀥𑀫𑁆𑀫𑁂 𑀤𑁂𑀲𑁂𑀲𑀺. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 ‘‘𑀢𑁆𑀯𑀁 𑀅𑀳’’𑀦𑁆𑀢𑀺 𑀧𑀭𑀯𑀫𑁆𑀪𑀦𑀁 𑀅𑀢𑁆𑀢𑀼𑀓𑁆𑀓𑀁𑀲𑀦𑀜𑁆𑀘 𑀅𑀓𑀢𑁆𑀯𑀸 𑀥𑀫𑁆𑀫𑁂𑀦𑁂𑀯 𑀲𑀫𑁂𑀦 𑀜𑀸𑀬𑁂𑀦 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀲𑀮𑀪𑀸𑀯𑁂, 𑀅𑀢𑁆𑀢𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀪𑀸𑀯𑁂 𑀞𑀧𑁂𑀲𑀺.

𑁧𑁧𑁭. 𑀇𑀤𑀸𑀦𑀺 𑀬𑀸𑀬𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀺 ‘‘𑀓𑀤𑀸𑀘𑀺 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀏𑀯𑀸’’𑀢𑀺. 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄, 𑀬𑁂 𑀘 𑀲𑀢𑁆𑀢𑀯𑀺𑀳𑀺𑀁𑀲𑀸𑀤𑀻𑀲𑀼 𑀅𑀓𑀼𑀲𑀮𑀥𑀫𑁆𑀫𑁂𑀲𑀼 𑀢𑁂𑀳𑀺 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑁂𑀲𑀁 ‘‘𑀳𑀻𑀦𑀸 𑀏𑀢𑁂 𑀥𑀫𑁆𑀫𑀸 𑀯𑀲𑀮𑀓𑀭𑀡𑀸’’𑀢𑀺 𑀢𑀢𑁆𑀣 𑀆𑀤𑀻𑀦𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀯𑀲𑀮𑀜𑁆𑀘 𑀯𑀲𑀮𑀓𑀭𑀡𑁂 𑀘 𑀥𑀫𑁆𑀫𑁂 𑀤𑁂𑀲𑁂𑀢𑀼𑀁 ‘‘𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀏𑀓𑀚𑁄𑀢𑀺 𑀞𑀧𑁂𑀢𑁆𑀯𑀸 𑀅𑀡𑁆𑀟𑀚𑀁 𑀅𑀯𑀲𑁂𑀲𑀬𑁄𑀦𑀺𑀚𑁄. 𑀲𑁄 𑀳𑀺 𑀏𑀓𑀤𑀸 𑀏𑀯 𑀚𑀸𑀬𑀢𑀺. 𑀤𑁆𑀯𑀺𑀚𑁄𑀢𑀺 𑀅𑀡𑁆𑀟𑀚𑁄. 𑀲𑁄 𑀳𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀡𑁆𑀟𑀓𑁄𑀲𑀢𑁄 𑀘𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀬𑀢𑀺. 𑀢𑀁 𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 𑀯𑀸𑀧𑀺. 𑀬𑁄𑀥 𑀧𑀸𑀡𑀦𑁆𑀢𑀺 𑀬𑁄 𑀇𑀥 𑀲𑀢𑁆𑀢𑀁. 𑀯𑀺𑀳𑀺𑀁𑀲𑀢𑀻𑀢𑀺 𑀓𑀸𑀬𑀤𑁆𑀯𑀸𑀭𑀺𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀺𑀢𑁂𑀦 𑀯𑀸 𑀯𑀘𑀻𑀤𑁆𑀯𑀸𑀭𑀺𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀺𑀢𑁂𑀦 𑀯𑀸 𑀧𑀬𑁄𑀕𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺. ‘‘𑀧𑀸𑀡𑀸𑀦𑀺 𑀳𑀺𑀁𑀲𑀢𑀻’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 𑀯𑀸𑀢𑀺 𑀏𑀯𑀁𑀧𑀪𑁂𑀤𑀸𑀦𑀺 𑀬𑁄𑀥 𑀧𑀸𑀡𑀸𑀦𑀺 𑀳𑀺𑀁𑀲𑀢𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀧𑀸𑀡𑁂 𑀤𑀬𑀸 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀸𑀬 𑀅𑀪𑀸𑀯𑀁 𑀆𑀳. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑁄 𑀧𑀭𑀸𑀲𑀼 𑀘 𑀕𑀸𑀣𑀸𑀲𑀼, 𑀬𑀢𑁄 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀇𑀢𑁄 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀺𑀳𑀭𑀦𑁆𑀢𑀸 𑀅𑀯𑀡𑁆𑀡𑀺𑀢𑀧𑀤𑀯𑀡𑁆𑀡𑀦𑀸𑀫𑀢𑁆𑀢𑀫𑁂𑀯 𑀓𑀭𑀺𑀲𑁆𑀲𑀸𑀫.

𑁧𑁧𑁮. 𑀳𑀦𑁆𑀢𑀻𑀢𑀺 ¶ 𑀳𑀦𑀢𑀺 𑀯𑀺𑀦𑀸𑀲𑁂𑀢𑀺. 𑀧𑀭𑀺𑀭𑀼𑀦𑁆𑀥𑀢𑀻𑀢𑀺 𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀕𑀸𑀫𑀸𑀦𑀺 𑀦𑀺𑀕𑀫𑀸𑀦𑀺 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀦𑀕𑀭𑀸𑀦𑀻𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀕𑁆𑀕𑀸𑀳𑀓𑁄 𑀲𑀫𑀜𑁆𑀜𑀸𑀢𑁄𑀢𑀺 𑀇𑀫𑀺𑀦𑀸 𑀳𑀦𑀦𑀧𑀭𑀺𑀭𑀼𑀦𑁆𑀥𑀦𑁂𑀦 𑀕𑀸𑀫𑀦𑀺𑀕𑀫𑀦𑀕𑀭𑀖𑀸𑀢𑀓𑁄𑀢𑀺 𑀮𑁄𑀓𑁂 𑀯𑀺𑀤𑀺𑀢𑁄.

𑁧𑁧𑁯. 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂𑀢𑀺 ¶ 𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀲𑀩𑁆𑀩𑁄𑀯 𑀇𑀥 𑀕𑀸𑀫𑁄 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀅𑀭𑀜𑁆𑀜𑀁. 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂 𑀬𑀁 𑀧𑀭𑁂𑀲𑀁 𑀫𑀫𑀸𑀬𑀺𑀢𑀁, 𑀬𑀁 𑀧𑀭𑀲𑀢𑁆𑀢𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀫𑀧𑀭𑀺𑀘𑁆𑀘𑀢𑁆𑀢𑀁 𑀲𑀢𑁆𑀢𑁄 𑀯𑀸 𑀲𑀗𑁆𑀔𑀸𑀭𑁄 𑀯𑀸. 𑀣𑁂𑀬𑁆𑀬𑀸 𑀅𑀤𑀺𑀦𑁆𑀦𑀫𑀸𑀤𑁂𑀢𑀻𑀢𑀺 𑀢𑁂𑀳𑀺 𑀅𑀤𑀺𑀦𑁆𑀦𑀁 𑀅𑀦𑀦𑀼𑀜𑁆𑀜𑀸𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀤𑀺𑀬𑀢𑀺, 𑀬𑁂𑀦 𑀓𑁂𑀦𑀘𑀺 𑀧𑀬𑁄𑀕𑁂𑀦 𑀬𑁂𑀦 𑀓𑁂𑀦𑀘𑀺 𑀅𑀯𑀳𑀸𑀭𑁂𑀦 𑀅𑀢𑁆𑀢𑀦𑁄 𑀕𑀳𑀡𑀁 𑀲𑀸𑀥𑁂𑀢𑀺.

𑁧𑁨𑁦. 𑀇𑀡𑀫𑀸𑀤𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑁂𑀧𑀕𑁆𑀕𑀳𑀡𑁂𑀦 𑀯𑀸, 𑀓𑀺𑀜𑁆𑀘𑀺 ¶ 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀏𑀢𑁆𑀢𑀓𑀁 𑀯𑀟𑁆𑀠𑀺𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀟𑁆𑀠𑀺𑀕𑁆𑀕𑀳𑀡𑁂𑀦 𑀯𑀸, ‘‘𑀬𑀁 𑀇𑀢𑁄 𑀉𑀤𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀫𑀬𑁆𑀳𑀁 𑀫𑀽𑀮𑀁 𑀢𑀯𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀉𑀤𑀬𑀁 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡’’𑀦𑁆𑀢𑀺 𑀯𑀸 𑀏𑀯𑀁 𑀢𑀁𑀢𑀁𑀆𑀬𑁄𑀕𑀕𑁆𑀕𑀳𑀡𑁂𑀦 𑀯𑀸 𑀇𑀡𑀁 𑀕𑀳𑁂𑀢𑁆𑀯𑀸. 𑀘𑀼𑀚𑁆𑀚𑀫𑀸𑀦𑁄 𑀧𑀮𑀸𑀬𑀢𑀺 𑀦 𑀳𑀺 𑀢𑁂 𑀇𑀡𑀫𑀢𑁆𑀣𑀻𑀢𑀺 𑀢𑁂𑀦 𑀇𑀡𑀸𑀬𑀺𑀓𑁂𑀦 ‘‘𑀤𑁂𑀳𑀺 𑀫𑁂 𑀇𑀡’’𑀦𑁆𑀢𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀦 𑀳𑀺 𑀢𑁂 𑀇𑀡𑀫𑀢𑁆𑀣𑀺, 𑀫𑀬𑀸 𑀕𑀳𑀺𑀢𑀦𑁆𑀢𑀺 𑀓𑁄 𑀲𑀓𑁆𑀔𑀻’’𑀢𑀺 𑀏𑀯𑀁 𑀪𑀡𑀦𑁂𑀦 𑀖𑀭𑁂 𑀯𑀲𑀦𑁆𑀢𑁄𑀧𑀺 𑀧𑀮𑀸𑀬𑀢𑀺.

𑁧𑁨𑁧. 𑀓𑀺𑀜𑁆𑀘𑀺𑀓𑁆𑀔𑀓𑀫𑁆𑀬𑀢𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀇𑀘𑁆𑀙𑀸𑀬. 𑀧𑀦𑁆𑀣𑀲𑁆𑀫𑀺𑀁 𑀯𑀚𑀦𑁆𑀢𑀁 𑀚𑀦𑀦𑁆𑀢𑀺 𑀫𑀕𑁆𑀕𑁂 𑀕𑀘𑁆𑀙𑀦𑁆𑀢𑀁 𑀬𑀁𑀓𑀺𑀜𑁆𑀘𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀳𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀓𑁆𑀔𑀫𑀸𑀤𑁂𑀢𑀻𑀢𑀺 𑀫𑀸𑀭𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀢𑀁 𑀪𑀡𑁆𑀟𑀓𑀁 𑀕𑀡𑁆𑀳𑀸𑀢𑀺.

𑁧𑁨𑁨. 𑀅𑀢𑁆𑀢𑀳𑁂𑀢𑀽𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀓𑀸𑀭𑀡𑀸, 𑀢𑀣𑀸 𑀧𑀭𑀳𑁂𑀢𑀼. 𑀥𑀦𑀳𑁂𑀢𑀽𑀢𑀺 𑀲𑀓𑀥𑀦𑀲𑁆𑀲 𑀯𑀸 𑀧𑀭𑀥𑀦𑀲𑁆𑀲 𑀯𑀸 𑀓𑀸𑀭𑀡𑀸. 𑀘-𑀓𑀸𑀭𑁄 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀬𑀁 𑀚𑀸𑀦𑀸𑀲𑀺, 𑀢𑀁 𑀯𑀤𑁂𑀳𑀻𑀢𑀺 𑀧𑀼𑀘𑁆𑀙𑀺𑀢𑁄. 𑀫𑀼𑀲𑀸 𑀩𑁆𑀭𑀽𑀢𑀻𑀢𑀺 𑀚𑀸𑀦𑀦𑁆𑀢𑁄 𑀯𑀸 ‘‘𑀦 𑀚𑀸𑀦𑀸𑀫𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀯𑀸 ‘‘𑀚𑀸𑀦𑀸𑀫𑀻’’𑀢𑀺 𑀪𑀡𑀢𑀺, 𑀲𑀸𑀫𑀺𑀓𑁂 𑀅𑀲𑀸𑀫𑀺𑀓𑁂, 𑀅𑀲𑀸𑀫𑀺𑀓𑁂 𑀘 𑀲𑀸𑀫𑀺𑀓𑁂 𑀓𑀭𑁄𑀢𑀺.

𑁧𑁨𑁩. 𑀜𑀸𑀢𑀻𑀦𑀦𑁆𑀢𑀺 ¶ 𑀲𑀫𑁆𑀩𑀦𑁆𑀥𑀻𑀦𑀁. 𑀲𑀔𑀻𑀦𑀦𑁆𑀢𑀺 𑀯𑀬𑀲𑁆𑀲𑀸𑀦𑀁 𑀤𑀸𑀭𑁂𑀲𑀽𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼. 𑀧𑀝𑀺𑀤𑀺𑀲𑁆𑀲𑀢𑀻𑀢𑀺 𑀧𑀝𑀺𑀓𑀽𑀮𑁂𑀦 𑀤𑀺𑀲𑁆𑀲𑀢𑀺, 𑀅𑀢𑀺𑀘𑀭𑀦𑁆𑀢𑁄 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀳𑀲𑀸𑀢𑀺 𑀩𑀮𑀓𑁆𑀓𑀸𑀭𑁂𑀦 𑀅𑀦𑀺𑀘𑁆𑀙𑀁. 𑀲𑀫𑁆𑀧𑀺𑀬𑁂𑀦𑀸𑀢𑀺 𑀢𑁂𑀳𑀺 𑀢𑁂𑀲𑀁 𑀤𑀸𑀭𑁂𑀳𑀺 𑀧𑀢𑁆𑀣𑀺𑀬𑀫𑀸𑀦𑁄 𑀲𑀬𑀜𑁆𑀘 𑀧𑀢𑁆𑀣𑀬𑀫𑀸𑀦𑁄, 𑀉𑀪𑀬𑀲𑀺𑀦𑁂𑀳𑀯𑀲𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁨𑁪. 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸𑀢𑀺 𑀏𑀯𑀁 𑀫𑁂𑀢𑁆𑀢𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀫𑁆𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀦𑁆𑀢𑀺 𑀏𑀯𑀁 𑀓𑀭𑀼𑀡𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀫𑁆𑀧𑀺 ¶ . 𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀻𑀢𑀺 𑀅𑀢𑁆𑀣𑀲𑀫𑁆𑀧𑀦𑁆𑀦𑁄 𑀉𑀧𑀓𑀭𑀡𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺 𑀦 𑀧𑁄𑀲𑁂𑀢𑀺.

𑁧𑁨𑁫. 𑀲𑀲𑀼𑀦𑁆𑀢𑀺 𑀲𑀲𑁆𑀲𑀼𑀁. 𑀳𑀦𑁆𑀢𑀻𑀢𑀺 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀧𑀳𑀭𑀢𑀺. 𑀭𑁄𑀲𑁂𑀢𑀻𑀢𑀺 𑀓𑁄𑀥𑀫𑀲𑁆𑀲 𑀲𑀜𑁆𑀚𑀦𑁂𑀢𑀺 𑀯𑀸𑀘𑀸𑀬 𑀨𑀭𑀼𑀲𑀯𑀘𑀦𑁂𑀦.

𑁧𑁨𑁬. 𑀅𑀢𑁆𑀣𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀁𑀓𑀺𑀜𑁆𑀘𑀺. 𑀧𑀼𑀘𑁆𑀙𑀺𑀢𑁄 𑀲𑀦𑁆𑀢𑁄𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄. 𑀅𑀦𑀢𑁆𑀣𑀫𑀦𑀼𑀲𑀸𑀲𑀢𑀻𑀢𑀺 𑀢𑀲𑁆𑀲 𑀅𑀳𑀺𑀢𑀫𑁂𑀯 𑀆𑀘𑀺𑀓𑁆𑀔𑀢𑀺. 𑀧𑀝𑀺𑀘𑁆𑀙𑀦𑁆𑀦𑁂𑀦 𑀫𑀦𑁆𑀢𑁂𑀢𑀻𑀢𑀺 𑀅𑀢𑁆𑀣𑀁 𑀆𑀘𑀺𑀓𑁆𑀔𑀦𑁆𑀢𑁄𑀧𑀺 ¶ 𑀬𑀣𑀸 𑀲𑁄 𑀦 𑀚𑀸𑀦𑀸𑀢𑀺, 𑀢𑀣𑀸 𑀅𑀧𑀸𑀓𑀝𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑁂𑀦 𑀯𑀘𑀦𑁂𑀦 𑀫𑀦𑁆𑀢𑁂𑀢𑀺, 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀯𑀸 𑀓𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀯𑀲𑀸𑀧𑁂𑀢𑁆𑀯𑀸 𑀲𑀸𑀯𑀲𑁂𑀲𑀫𑁂𑀯 𑀫𑀦𑁆𑀢𑁂𑀢𑀺.

𑁧𑁨𑁭. 𑀬𑁄 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀫𑀬𑀸 𑀧𑀼𑀩𑁆𑀩𑀪𑀸𑀕𑁂 𑀧𑀸𑀧𑀺𑀘𑁆𑀙𑀢𑀸 𑀯𑀼𑀢𑁆𑀢𑀸. 𑀬𑀸 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀇𑀘𑁆𑀙𑀢𑀻’’𑀢𑀺 𑀏𑀯𑀁 𑀆𑀕𑀢𑀸. 𑀬𑀣𑀸 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀺, 𑀢𑀣𑀸 𑀓𑀭𑀡𑁂𑀦 𑀓𑀢𑀸𑀦𑀜𑁆𑀘 𑀅𑀯𑀺𑀯𑀭𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀅𑀲𑁆𑀲 𑀓𑀫𑁆𑀫𑀦𑁆𑀢𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄.

𑁧𑁨𑁮. 𑀧𑀭𑀓𑀼𑀮𑀦𑁆𑀢𑀺 𑀜𑀸𑀢𑀺𑀓𑀼𑀮𑀁 𑀯𑀸 𑀫𑀺𑀢𑁆𑀢𑀓𑀼𑀮𑀁 𑀯𑀸. 𑀆𑀕𑀢𑀦𑁆𑀢𑀺 𑀬𑀲𑁆𑀲 𑀢𑁂𑀦 𑀓𑀼𑀮𑁂 𑀪𑀼𑀢𑁆𑀢𑀁, 𑀢𑀁 𑀅𑀢𑁆𑀢𑀦𑁄 𑀕𑁂𑀳𑀫𑀸𑀕𑀢𑀁 𑀧𑀸𑀦𑀪𑁄𑀚𑀦𑀸𑀤𑀻𑀳𑀺 𑀦𑀧𑁆𑀧𑀝𑀺𑀧𑀽𑀚𑁂𑀢𑀺, 𑀦 𑀯𑀸 𑀤𑁂𑀢𑀺, 𑀅𑀯𑀪𑀼𑀢𑁆𑀢𑀁 𑀯𑀸 𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁨𑁯. 𑀬𑁄 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀧𑀭𑀸𑀪𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁩𑁦. 𑀪𑀢𑁆𑀢𑀓𑀸𑀮𑁂 ¶ 𑀉𑀧𑀝𑁆𑀞𑀺𑀢𑁂𑀢𑀺 𑀪𑁄𑀚𑀦𑀓𑀸𑀮𑁂 𑀚𑀸𑀢𑁂. 𑀉𑀧𑀝𑁆𑀞𑀺𑀢𑀦𑁆𑀢𑀺𑀧𑀺 𑀧𑀸𑀞𑁄, 𑀪𑀢𑁆𑀢𑀓𑀸𑀮𑁂 𑀆𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀭𑁄𑀲𑁂𑀢𑀺 𑀯𑀸𑀘𑀸 𑀦 𑀘 𑀤𑁂𑀢𑀻𑀢𑀺 ‘‘𑀅𑀢𑁆𑀣𑀓𑀸𑀫𑁄 𑀫𑁂 𑀅𑀬𑀁 𑀩𑀮𑀓𑁆𑀓𑀸𑀭𑁂𑀦 𑀫𑀁 𑀧𑀼𑀜𑁆𑀜𑀁 𑀓𑀸𑀭𑀸𑀧𑁂𑀢𑀼𑀁 𑀆𑀕𑀢𑁄’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀧𑁆𑀧𑀢𑀺𑀭𑀽𑀧𑁂𑀦 𑀨𑀭𑀼𑀲𑀯𑀘𑀦𑁂𑀦 𑀭𑁄𑀲𑁂𑀢𑀺, 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀔𑀪𑀸𑀯𑀫𑀢𑁆𑀢𑀫𑁆𑀧𑀺 𑀘𑀲𑁆𑀲 𑀦 𑀤𑁂𑀢𑀺, 𑀧𑀕𑁂𑀯 𑀪𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁧. 𑀅𑀲𑀢𑀁 𑀬𑁄𑀥 𑀧𑀩𑁆𑀭𑀽𑀢𑀻𑀢𑀺 𑀬𑁄 𑀇𑀥 𑀬𑀣𑀸 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀅𑀲𑀼𑀓𑀤𑀺𑀯𑀲𑁂 𑀇𑀤𑀜𑁆𑀘𑀺𑀤𑀜𑁆𑀘 𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀅𑀲𑀚𑁆𑀚𑀦𑀸𑀦𑀁 𑀯𑀘𑀦𑀁 𑀧𑀩𑁆𑀭𑀽𑀢𑀺. ‘‘𑀅𑀲𑀦𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀩𑁆𑀭𑀽𑀢𑀻𑀢𑀺 𑀪𑀡𑀢𑀺 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀫𑀬𑁆𑀳𑀁 𑀈𑀤𑀺𑀲𑁄 𑀖𑀭𑀯𑀺𑀪𑀯𑁄, 𑀏𑀳𑀺 𑀢𑀢𑁆𑀣 𑀕𑀘𑁆𑀙𑀸𑀫, 𑀖𑀭𑀡𑀻 ¶ 𑀫𑁂 𑀪𑀯𑀺𑀲𑁆𑀲𑀲𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀧𑀭𑀪𑀭𑀺𑀬𑀁 𑀧𑀭𑀤𑀸𑀲𑀺𑀁 𑀯𑀸 𑀯𑀜𑁆𑀘𑁂𑀦𑁆𑀢𑁄 𑀥𑀼𑀢𑁆𑀢𑁄 𑀯𑀺𑀬. 𑀦𑀺𑀚𑀺𑀕𑀻𑀲𑀸𑀦𑁄𑀢𑀺 𑀦𑀺𑀚𑀺𑀕𑀻𑀲𑀫𑀸𑀦𑁄 𑀫𑀕𑁆𑀕𑀫𑀸𑀦𑁄, 𑀢𑀁 𑀯𑀜𑁆𑀘𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁨. 𑀬𑁄 𑀘𑀢𑁆𑀢𑀸𑀦𑀦𑁆𑀢𑀺 𑀬𑁄 𑀘 𑀅𑀢𑁆𑀢𑀸𑀦𑀁. 𑀲𑀫𑀼𑀓𑁆𑀓𑀁𑀲𑁂𑀢𑀺 𑀚𑀸𑀢𑀺𑀆𑀤𑀻𑀳𑀺 𑀲𑀫𑀼𑀓𑁆𑀓𑀁𑀲𑀢𑀺 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀢𑀺. 𑀧𑀭𑁂 𑀘 𑀫𑀯𑀚𑀸𑀦𑀸𑀢𑀻𑀢𑀺 𑀢𑁂𑀳𑀺𑀬𑁂𑀯 𑀧𑀭𑁂 𑀅𑀯𑀚𑀸𑀦𑀸𑀢𑀺, 𑀦𑀻𑀘𑀁 𑀓𑀭𑁄𑀢𑀺. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 ¶ . 𑀦𑀺𑀳𑀻𑀦𑁄𑀢𑀺 𑀕𑀼𑀡𑀯𑀼𑀟𑁆𑀠𑀺𑀢𑁄 𑀧𑀭𑀺𑀳𑀻𑀦𑁄, 𑀅𑀥𑀫𑀪𑀸𑀯𑀁 𑀯𑀸 𑀕𑀢𑁄. 𑀲𑁂𑀦 𑀫𑀸𑀦𑁂𑀦𑀸𑀢𑀺 𑀢𑁂𑀦 𑀉𑀓𑁆𑀓𑀁𑀲𑀦𑀸𑀯𑀚𑀸𑀦𑀦𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀫𑀸𑀦𑁂𑀦.

𑁧𑁩𑁩. 𑀭𑁄𑀲𑀓𑁄𑀢𑀺 𑀓𑀸𑀬𑀯𑀸𑀘𑀸𑀳𑀺 𑀧𑀭𑁂𑀲𑀁 𑀭𑁄𑀲𑀚𑀦𑀓𑁄. 𑀓𑀤𑀭𑀺𑀬𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀻, 𑀬𑁄 𑀧𑀭𑁂 𑀧𑀭𑁂𑀲𑀁 𑀤𑁂𑀦𑁆𑀢𑁂 𑀅𑀜𑁆𑀜𑀁 𑀯𑀸 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑁂 𑀯𑀸𑀭𑁂𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀧𑀺𑀘𑁆𑀙𑁄𑀢𑀺 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀘𑁆𑀙𑀭𑀻𑀢𑀺 𑀆𑀯𑀸𑀲𑀸𑀤𑀺𑀫𑀘𑁆𑀙𑀭𑀺𑀬𑀬𑀼𑀢𑁆𑀢𑁄. 𑀲𑀞𑁄𑀢𑀺 𑀅𑀲𑀦𑁆𑀢𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑁂𑀦 𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀲𑀫𑁆𑀫𑀸𑀪𑀸𑀲𑀻 𑀯𑀸 𑀅𑀓𑀸𑀢𑀼𑀓𑀸𑀫𑁄𑀧𑀺 ‘‘𑀓𑀭𑁄𑀫𑀻’’𑀢𑀺𑀆𑀤𑀺𑀯𑀘𑀦𑁂𑀦. 𑀦𑀸𑀲𑁆𑀲 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀦𑀸𑀲𑁆𑀲 𑀉𑀢𑁆𑀢𑀸𑀲𑀦𑀢𑁄 𑀉𑀩𑁆𑀩𑁂𑀕𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀦𑁆𑀢𑀺 𑀅𑀳𑀺𑀭𑀺𑀓𑁄 𑀅𑀦𑁄𑀢𑁆𑀢𑀧𑁆𑀧𑀻.

𑁧𑁩𑁪. 𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀧𑀭𑀺𑀪𑀸𑀲𑀢𑀻𑀢𑀺 ‘‘𑀅𑀲𑀩𑁆𑀩𑀜𑁆𑀜𑀽’’𑀢𑀺𑀆𑀤𑀻𑀳𑀺 𑀅𑀧𑀯𑀤𑀢𑀺, 𑀲𑀸𑀯𑀓𑀜𑁆𑀘 ‘‘𑀤𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀳𑀺. 𑀧𑀭𑀺𑀩𑁆𑀩𑀸𑀚𑀁 𑀕𑀳𑀝𑁆𑀞𑀁 𑀯𑀸𑀢𑀺 𑀲𑀸𑀯𑀓𑀯𑀺𑀲𑁂𑀲𑀦𑀫𑁂𑀯𑁂𑀢𑀁 ¶ 𑀧𑀩𑁆𑀩𑀚𑀺𑀢𑀁 𑀯𑀸 𑀢𑀲𑁆𑀲 𑀲𑀸𑀯𑀓𑀁, 𑀕𑀳𑀝𑁆𑀞𑀁 𑀯𑀸 𑀧𑀘𑁆𑀘𑀬𑀤𑀸𑀬𑀓𑀦𑁆𑀢𑀺 𑀅𑀢𑁆𑀣𑁄. 𑀩𑀸𑀳𑀺𑀭𑀓𑀁 𑀯𑀸 𑀧𑀭𑀺𑀩𑁆𑀩𑀸𑀚𑀓𑀁 𑀬𑀁𑀓𑀺𑀜𑁆𑀘𑀺 𑀕𑀳𑀝𑁆𑀞𑀁 𑀯𑀸 𑀅𑀪𑀽𑀢𑁂𑀦 𑀤𑁄𑀲𑁂𑀦 𑀧𑀭𑀺𑀪𑀸𑀲𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑀁 𑀇𑀘𑁆𑀙𑀦𑁆𑀢𑀺 𑀧𑁄𑀭𑀸𑀡𑀸.

𑁧𑁩𑁫. 𑀅𑀦𑀭𑀳𑀁 𑀲𑀦𑁆𑀢𑁄𑀢𑀺 𑀅𑀔𑀻𑀡𑀸𑀲𑀯𑁄 𑀲𑀫𑀸𑀦𑁄. 𑀅𑀭𑀳𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 ‘‘𑀅𑀳𑀁 𑀅𑀭𑀳𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀬𑀣𑀸 𑀦𑀁 ‘‘𑀅𑀭𑀳𑀸 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀢𑀣𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀺, 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺, 𑀘𑀺𑀢𑁆𑀢𑁂𑀦 𑀇𑀘𑁆𑀙𑀢𑀺 𑀅𑀥𑀺𑀯𑀸𑀲𑁂𑀢𑀺. 𑀘𑁄𑀭𑁄𑀢𑀺 𑀣𑁂𑀦𑁄. 𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀆𑀳 𑁋 𑀲𑀩𑁆𑀩𑀮𑁄𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀮𑁄𑀓𑁂 𑀳𑀺 𑀲𑀦𑁆𑀥𑀺𑀘𑁆𑀙𑁂𑀤𑀦𑀦𑀺𑀮𑁆𑀮𑁄𑀧𑀳𑀭𑀡𑀏𑀓𑀸𑀕𑀸𑀭𑀺𑀓𑀓𑀭𑀡𑀧𑀭𑀺𑀧𑀦𑁆𑀣𑀢𑀺𑀝𑁆𑀞𑀦𑀸𑀤𑀻𑀳𑀺 𑀧𑀭𑁂𑀲𑀁 𑀥𑀦𑀁 𑀯𑀺𑀮𑀼𑀫𑁆𑀧𑀦𑁆𑀢𑀸 𑀘𑁄𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀸𑀲𑀦𑁂 𑀧𑀦 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀆𑀤𑀻𑀳𑀺 𑀧𑀘𑁆𑀘𑀬𑀸𑀤𑀻𑀦𑀺 𑀯𑀺𑀮𑀼𑀫𑁆𑀧𑀦𑁆𑀢𑀸. 𑀬𑀣𑀸𑀳 𑁋

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀫𑀳𑀸𑀘𑁄𑀭𑀲𑁆𑀲 𑀏𑀯𑀁 𑀳𑁄𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀺𑀲𑁆𑀲𑀸𑀫𑀺 𑀳𑀦𑀦𑁆𑀢𑁄, 𑀖𑀸𑀢𑁂𑀦𑁆𑀢𑁄, 𑀙𑀺𑀦𑁆𑀤𑀦𑁆𑀢𑁄, 𑀙𑁂𑀤𑀸𑀧𑁂𑀦𑁆𑀢𑁄, 𑀧𑀘𑀦𑁆𑀢𑁄 𑀧𑀸𑀘𑁂𑀦𑁆𑀢𑁄𑀢𑀺, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀢𑀺 𑀳𑀦𑀦𑁆𑀢𑁄…𑀧𑁂… 𑀧𑀸𑀘𑁂𑀦𑁆𑀢𑁄. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀲𑀢𑁂𑀦 𑀯𑀸…𑀧𑁂… 𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀸𑀫𑀺 𑀲𑀓𑁆𑀓𑀢𑁄, 𑀕𑀭𑀼𑀓𑀢𑁄, 𑀫𑀸𑀦𑀺𑀢𑁄, 𑀧𑀽𑀚𑀺𑀢𑁄, 𑀅𑀧𑀘𑀺𑀢𑁄, 𑀕𑀳𑀝𑁆𑀞𑀸𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀮𑀸𑀪𑀻 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺. 𑀲𑁄 𑀅𑀧𑀭𑁂𑀦 ¶ 𑀲𑀫𑀬𑁂𑀦 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀲𑀓𑁆𑀓𑀢𑁄…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀫𑀳𑀸𑀘𑁄𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀺, 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄…𑀧𑁂… 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄…𑀧𑁂… 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄, 𑀧𑀸𑀧𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀕𑀭𑀼𑀪𑀡𑁆𑀟𑀸𑀦𑀺 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼, 𑀯𑀺𑀳𑀸𑀭𑁄, 𑀯𑀺𑀳𑀸𑀭𑀯𑀢𑁆𑀣𑀼, 𑀫𑀜𑁆𑀘𑁄, 𑀧𑀻𑀞𑀁, 𑀪𑀺𑀲𑀺, 𑀩𑀺𑀫𑁆𑀩𑁄𑀳𑀦𑀁, 𑀮𑁄𑀳𑀓𑀼𑀫𑁆𑀪𑀻, 𑀮𑁄𑀳𑀪𑀸𑀡𑀓𑀁, 𑀮𑁄𑀳𑀯𑀸𑀭𑀓𑁄, 𑀮𑁄𑀳𑀓𑀝𑀸𑀳𑀁, 𑀯𑀸𑀲𑀺, 𑀨𑀭𑀲𑀼, 𑀓𑀼𑀞𑀸𑀭𑀻, 𑀓𑀼𑀤𑀸𑀮𑁄, 𑀦𑀺𑀔𑀸𑀤𑀦𑀁, 𑀯𑀮𑁆𑀮𑀺, 𑀯𑁂𑀴𑀼, 𑀫𑀼𑀜𑁆𑀚𑀁, 𑀧𑀩𑁆𑀩𑀚𑀁, 𑀢𑀺𑀡𑀁, 𑀫𑀢𑁆𑀢𑀺𑀓𑀸, 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟𑀁, 𑀢𑁂𑀳𑀺 𑀕𑀺𑀳𑀺𑀁 𑀲𑀗𑁆𑀕𑀡𑁆𑀳𑀸𑀢𑀺 𑀉𑀧𑀮𑀸𑀧𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄…𑀧𑁂… 𑀮𑁄𑀓𑀲𑁆𑀫𑀺𑀁.

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄, 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫).

𑀢𑀢𑁆𑀣 𑀮𑁄𑀓𑀺𑀬𑀘𑁄𑀭𑀸 𑀮𑁄𑀓𑀺𑀬𑀫𑁂𑀯 𑀥𑀦𑀥𑀜𑁆𑀜𑀸𑀤𑀺𑀁 𑀣𑁂𑀦𑁂𑀦𑁆𑀢𑀺. 𑀲𑀸𑀲𑀦𑁂 𑀯𑀼𑀢𑁆𑀢𑀘𑁄𑀭𑁂𑀲𑀼 𑀧𑀞𑀫𑁄 𑀢𑀣𑀸𑀭𑀽𑀧𑀫𑁂𑀯 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀫𑀢𑁆𑀢𑀁, 𑀤𑀼𑀢𑀺𑀬𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁, 𑀢𑀢𑀺𑀬𑁄 𑀧𑀭𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑀼𑀢𑁆𑀣𑁄 𑀲𑀗𑁆𑀖𑀺𑀓𑀕𑀭𑀼𑀪𑀡𑁆𑀟𑀁, 𑀧𑀜𑁆𑀘𑀫𑁄 𑀛𑀸𑀦𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀧𑁆𑀧𑀪𑁂𑀤𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀥𑀦𑀁, 𑀮𑁄𑀓𑀺𑀬𑀜𑁆𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀚𑀸𑀢𑀁. 𑀬𑀣𑀸𑀳 𑁋 ‘‘𑀣𑁂𑀬𑁆𑀬𑀸𑀬 𑀯𑁄, 𑀪𑀺𑀓𑁆𑀔𑀯𑁂, 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀬𑁆𑀯𑀸𑀬𑀁 𑀧𑀜𑁆𑀘𑀫𑁄 𑀫𑀳𑀸𑀘𑁄𑀭𑁄, 𑀢𑀁 𑀲𑀦𑁆𑀥𑀸𑀬𑀸𑀳 𑀪𑀕𑀯𑀸 ‘‘𑀘𑁄𑀭𑁄 𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂’’𑀢𑀺. 𑀲𑁄 𑀳𑀺 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄, 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀦𑀣𑁂𑀦𑀦𑀢𑁄 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀁 𑀇𑀥𑀸𑀧𑀺 ‘‘𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂’’𑀢𑀺 𑀇𑀫𑀺𑀦𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀓𑀸𑀲𑁂𑀲𑀺.

𑀏𑀲𑁄 𑀔𑁄 𑀯𑀲𑀮𑀸𑀥𑀫𑁄𑀢𑀺. 𑀏𑀢𑁆𑀣 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁄, 𑀢𑁂𑀦 𑀏𑀲𑁄 𑀏𑀯 𑀯𑀲𑀮𑀸𑀥𑀫𑁄. 𑀯𑀲𑀮𑀸𑀦𑀁 ¶ 𑀳𑀻𑀦𑁄 𑀲𑀩𑁆𑀩𑀧𑀘𑁆𑀙𑀺𑀫𑀓𑁄𑀢𑀺 𑀅𑀯𑀥𑀸𑀭𑁂𑀢𑀺. 𑀓𑀲𑁆𑀫𑀸? 𑀯𑀺𑀲𑀺𑀝𑁆𑀞𑀯𑀢𑁆𑀣𑀼𑀫𑁆𑀳𑀺 𑀣𑁂𑀬𑁆𑀬𑀥𑀫𑁆𑀫𑀯𑀲𑁆𑀲𑀦𑀢𑁄, 𑀬𑀸𑀯 𑀢𑀁 𑀧𑀝𑀺𑀜𑁆𑀜𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀸𑀯 𑀅𑀯𑀺𑀕𑀢𑀯𑀲𑀮𑀓𑀭𑀡𑀥𑀫𑁆𑀫𑀢𑁄 𑀘𑀸𑀢𑀺.

𑀏𑀢𑁂 ¶ 𑀔𑁄 𑀯𑀲𑀮𑀸𑀢𑀺. 𑀇𑀤𑀸𑀦𑀺 𑀬𑁂 𑀢𑁂 𑀧𑀞𑀫𑀕𑀸𑀣𑀸𑀬 𑀆𑀲𑀬𑀯𑀺𑀧𑀢𑁆𑀢𑀺𑀯𑀲𑁂𑀦 ¶ 𑀓𑁄𑀥𑀦𑀸𑀤𑀬𑁄 𑀧𑀜𑁆𑀘, 𑀧𑀸𑀧𑀫𑀓𑁆𑀔𑀺𑀁 𑀯𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀙, 𑀤𑀼𑀢𑀺𑀬𑀕𑀸𑀣𑀸𑀬 𑀧𑀬𑁄𑀕𑀯𑀺𑀧𑀢𑁆𑀢𑀺𑀯𑀲𑁂𑀦 𑀧𑀸𑀡𑀳𑀺𑀁𑀲𑀓𑁄 𑀏𑀓𑁄, 𑀢𑀢𑀺𑀬𑀸𑀬 𑀧𑀬𑁄𑀕𑀯𑀺𑀧𑀢𑁆𑀢𑀺𑀯𑀲𑁂𑀦𑁂𑀯 𑀕𑀸𑀫𑀦𑀺𑀕𑀫𑀦𑀺𑀕𑁆𑀕𑀸𑀳𑀓𑁄 𑀏𑀓𑁄, 𑀘𑀢𑀼𑀢𑁆𑀣𑀸𑀬 𑀣𑁂𑀬𑁆𑀬𑀸𑀯𑀳𑀸𑀭𑀯𑀲𑁂𑀦 𑀏𑀓𑁄, 𑀧𑀜𑁆𑀘𑀫𑀸𑀬 𑀇𑀡𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀙𑀝𑁆𑀞𑀸𑀬 𑀧𑀲𑀬𑁆𑀳𑀸𑀯𑀳𑀸𑀭𑀯𑀲𑁂𑀦 𑀧𑀦𑁆𑀣𑀤𑀽𑀲𑀓𑁄 𑀏𑀓𑁄, 𑀲𑀢𑁆𑀢𑀫𑀸𑀬 𑀓𑀽𑀝𑀲𑀓𑁆𑀔𑀺𑀯𑀲𑁂𑀦 𑀏𑀓𑁄, 𑀅𑀝𑁆𑀞𑀫𑀸𑀬 𑀫𑀺𑀢𑁆𑀢𑀤𑀼𑀩𑁆𑀪𑀺𑀯𑀲𑁂𑀦 𑀏𑀓𑁄, 𑀦𑀯𑀫𑀸𑀬 𑀅𑀓𑀢𑀜𑁆𑀜𑀼𑀯𑀲𑁂𑀦 𑀏𑀓𑁄, 𑀤𑀲𑀫𑀸𑀬 𑀓𑀢𑀦𑀸𑀲𑀦𑀯𑀺𑀳𑁂𑀲𑀦𑀯𑀲𑁂𑀦 𑀏𑀓𑁄, 𑀏𑀓𑀸𑀤𑀲𑀫𑀸𑀬 𑀳𑀤𑀬𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀤𑁆𑀯𑀸𑀤𑀲𑀫𑀸𑀬 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀯𑀲𑁂𑀦 𑀤𑁆𑀯𑁂, 𑀢𑁂𑀭𑀲𑀫𑀸𑀬 𑀅𑀓𑀢𑀜𑁆𑀜𑀼𑀯𑀲𑁂𑀦 𑀏𑀓𑁄, 𑀘𑀼𑀤𑁆𑀤𑀲𑀫𑀸𑀬 𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀧𑀦𑁆𑀦𑀭𑀲𑀫𑀸𑀬 𑀯𑀺𑀳𑁂𑀲𑀦𑀯𑀲𑁂𑀦 𑀏𑀓𑁄, 𑀲𑁄𑀴𑀲𑀫𑀸𑀬 𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀲𑀢𑁆𑀢𑀭𑀲𑀫𑀸𑀬 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀯𑀲𑁂𑀦 𑀤𑁆𑀯𑁂, 𑀅𑀝𑁆𑀞𑀸𑀭𑀲𑀫𑀸𑀬 𑀧𑀬𑁄𑀕𑀸𑀲𑀬𑀯𑀺𑀧𑀢𑁆𑀢𑀺𑀯𑀲𑁂𑀦 𑀭𑁄𑀲𑀓𑀸𑀤𑀬𑁄 𑀲𑀢𑁆𑀢, 𑀏𑀓𑀽𑀦𑀯𑀻𑀲𑀢𑀺𑀫𑀸𑀬 𑀧𑀭𑀺𑀪𑀸𑀲𑀦𑀯𑀲𑁂𑀦 𑀤𑁆𑀯𑁂, 𑀯𑀻𑀲𑀢𑀺𑀫𑀸𑀬 𑀅𑀕𑁆𑀕𑀫𑀳𑀸𑀘𑁄𑀭𑀯𑀲𑁂𑀦 𑀏𑀓𑁄𑀢𑀺 𑀏𑀯𑀁 𑀢𑁂𑀢𑁆𑀢𑀺𑀁𑀲 𑀘𑀢𑀼𑀢𑁆𑀢𑀺𑀁𑀲 𑀯𑀸 𑀯𑀲𑀮𑀸 𑀯𑀼𑀢𑁆𑀢𑀸. 𑀢𑁂 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀢𑁂 𑀔𑁄 𑀯𑀲𑀮𑀸 𑀯𑀼𑀢𑁆𑀢𑀸, 𑀫𑀬𑀸 𑀬𑁂 𑀢𑁂 𑀧𑀓𑀸𑀲𑀺𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀢𑁂 𑀫𑀬𑀸 𑀧𑀼𑀩𑁆𑀩𑁂 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀯𑀲𑀮’’𑀦𑁆𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀲𑀮𑀸 𑀯𑀼𑀢𑁆𑀢𑀸, 𑀢𑁂 𑀯𑀺𑀢𑁆𑀣𑀸𑀭𑀢𑁄 𑀏𑀢𑁂 𑀔𑁄 𑀧𑀓𑀸𑀲𑀺𑀢𑀸𑀢𑀺. 𑀅𑀣 𑀯𑀸 𑀬𑁂 𑀢𑁂 𑀫𑀬𑀸 𑀧𑀼𑀕𑁆𑀕𑀮𑀯𑀲𑁂𑀦 𑀯𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀯𑀲𑁂𑀦𑀸𑀧𑀺 𑀏𑀢𑁂 𑀔𑁄 𑀧𑀓𑀸𑀲𑀺𑀢𑀸. 𑀅𑀣 𑀯𑀸 𑀏𑀢𑁂 𑀔𑁄 𑀯𑀲𑀮𑀸 𑀯𑀼𑀢𑁆𑀢𑀸 𑀅𑀭𑀺𑀬𑁂𑀳𑀺 𑀓𑀫𑁆𑀫𑀯𑀲𑁂𑀦, 𑀦 𑀚𑀸𑀢𑀺𑀯𑀲𑁂𑀦, 𑀫𑀬𑀸 𑀬𑁂 𑀢𑁂 𑀧𑀓𑀸𑀲𑀺𑀢𑀸 ‘‘𑀓𑁄𑀥𑀦𑁄 𑀉𑀧𑀦𑀸𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦.

𑁧𑁩𑁬. 𑀏𑀯𑀁 𑀪𑀕𑀯𑀸 𑀯𑀲𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀢𑀻𑀯 𑀅𑀪𑀺𑀦𑀺𑀯𑀺𑀝𑁆𑀞𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀆𑀳 ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀭𑀫𑀢𑁆𑀣𑀢𑁄 𑀳𑀺 𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀅𑀧𑀺𑀘 𑀔𑁄 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀅𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀯𑀲𑁆𑀲𑀦𑀢𑁄 𑀯𑀲𑀮𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑁂𑀦 𑀓𑀫𑁆𑀫𑀼𑀦𑀸 𑀅𑀧𑀭𑀺𑀲𑀼𑀤𑁆𑀥𑀯𑀸𑀳𑀦𑀢𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀬𑀲𑁆𑀫𑀸 𑀯𑀸 𑀢𑀼𑀫𑁆𑀳𑁂 𑀳𑀻𑀦𑀁 𑀯𑀲𑀮𑀁 𑀉𑀓𑁆𑀓𑀝𑁆𑀞𑀁 ¶ 𑀩𑁆𑀭𑀸𑀳𑁆𑀫𑀡𑀁 ¶ 𑀫𑀜𑁆𑀜𑀺𑀢𑁆𑀣, 𑀢𑀲𑁆𑀫𑀸 𑀳𑀻𑀦𑁂𑀦 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀉𑀓𑁆𑀓𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑀁 𑀜𑀸𑀧𑁂𑀦𑁆𑀢𑁄 𑀏𑀯𑀫𑀸𑀳.

𑁧𑁩𑁭-𑁧𑁩𑁯. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀦𑀺𑀤𑀲𑁆𑀲𑀦𑁂𑀦 𑀲𑀸𑀥𑁂𑀢𑀼𑀁 ‘‘𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣𑀸’’𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀸𑀲𑀼 𑀤𑁆𑀯𑁂 𑀘𑀢𑀼𑀧𑁆𑀧𑀸𑀤𑀸, 𑀏𑀓𑀸 𑀙𑀧𑁆𑀧𑀸𑀤𑀸, 𑀢𑀸𑀲𑀁 𑀅𑀢𑁆𑀣𑁄 𑁋 𑀬𑀁 𑀫𑀬𑀸 𑀯𑀼𑀢𑁆𑀢𑀁 ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀻’’𑀢𑀺𑀆𑀤𑀺, 𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣, 𑀬𑀣𑀸 𑀫𑁂𑀤𑀁 𑀦𑀺𑀤𑀲𑁆𑀲𑀦𑀁, 𑀢𑀁 𑀇𑀫𑀺𑀦𑀸𑀧𑀺 𑀧𑀓𑀸𑀭𑁂𑀦 ¶ 𑀚𑀸𑀦𑀸𑀣, 𑀬𑁂𑀦 𑀫𑁂 𑀧𑀓𑀸𑀭𑁂𑀦 𑀬𑁂𑀦 𑀲𑀸𑀫𑀜𑁆𑀜𑁂𑀦 𑀇𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑁂? 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀲𑁄𑀧𑀸𑀓𑁄…𑀧𑁂… 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸𑀢𑀺.

𑀘𑀡𑁆𑀟𑀸𑀮𑀲𑁆𑀲 𑀧𑀼𑀢𑁆𑀢𑁄 𑀘𑀡𑁆𑀟𑀸𑀮𑀧𑀼𑀢𑁆𑀢𑁄. 𑀅𑀢𑁆𑀢𑀦𑁄 𑀔𑀸𑀤𑀦𑀢𑁆𑀣𑀸𑀬 𑀫𑀢𑁂 𑀲𑀼𑀦𑀔𑁂 𑀮𑀪𑀺𑀢𑁆𑀯𑀸 𑀧𑀘𑀢𑀻𑀢𑀺 𑀲𑁄𑀧𑀸𑀓𑁄. 𑀫𑀸𑀢𑀗𑁆𑀕𑁄𑀢𑀺 𑀏𑀯𑀁𑀦𑀸𑀫𑁄 𑀯𑀺𑀲𑁆𑀲𑀼𑀢𑁄𑀢𑀺 𑀏𑀯𑀁 𑀳𑀻𑀦𑀸𑀬 𑀚𑀸𑀢𑀺𑀬𑀸 𑀘 𑀚𑀻𑀯𑀺𑀓𑀸𑀬 𑀘 𑀦𑀸𑀫𑁂𑀦 𑀘 𑀧𑀸𑀓𑀝𑁄.

𑀲𑁄𑀢𑀺 𑀧𑀼𑀭𑀺𑀫𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑁄 𑀫𑀸𑀢𑀗𑁆𑀕𑁄 𑀬𑀲𑀁 𑀧𑀭𑀫𑀁 𑀧𑀢𑁆𑀢𑁄, 𑀅𑀩𑁆𑀪𑀼𑀢𑀁 𑀉𑀢𑁆𑀢𑀫𑀁 𑀅𑀢𑀺𑀯𑀺𑀲𑀺𑀝𑁆𑀞𑀁 𑀬𑀲𑀁 𑀓𑀺𑀢𑁆𑀢𑀺𑀁 𑀧𑀲𑀁𑀲𑀁 𑀧𑀢𑁆𑀢𑁄. 𑀬𑀁 𑀲𑀼𑀤𑀼𑀮𑁆𑀮𑀪𑀦𑁆𑀢𑀺 𑀬𑀁 𑀉𑀴𑀸𑀭𑀓𑀼𑀮𑀽𑀧𑀧𑀦𑁆𑀦𑁂𑀦𑀸𑀧𑀺 𑀤𑀼𑀮𑁆𑀮𑀪𑀁, 𑀳𑀻𑀦𑀓𑀼𑀮𑀽𑀧𑀧𑀦𑁆𑀦𑁂𑀦 𑀲𑀼𑀤𑀼𑀮𑁆𑀮𑀪𑀁. 𑀏𑀯𑀁 𑀬𑀲𑀧𑁆𑀧𑀢𑁆𑀢𑀲𑁆𑀲 𑀘 𑀆𑀕𑀘𑁆𑀙𑀼𑀁 𑀢𑀲𑁆𑀲𑀼𑀧𑀝𑁆𑀞𑀸𑀦𑀁, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀩𑀳𑀽, 𑀢𑀲𑁆𑀲 𑀫𑀸𑀢𑀗𑁆𑀕𑀲𑁆𑀲 𑀧𑀸𑀭𑀺𑀘𑀭𑀺𑀬𑀢𑁆𑀣𑀁 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀅𑀜𑁆𑀜𑁂 𑀘 𑀩𑀳𑀽 𑀯𑁂𑀲𑁆𑀲𑀲𑀼𑀤𑁆𑀤𑀸𑀤𑀬𑁄 𑀚𑀫𑁆𑀩𑀼𑀤𑀻𑀧𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀉𑀧𑀝𑁆𑀞𑀸𑀦𑀁 𑀆𑀕𑀫𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀏𑀯𑀁 𑀉𑀧𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀲𑁄 𑀫𑀸𑀢𑀗𑁆𑀕𑁄 𑀯𑀺𑀕𑀢𑀓𑀺𑀮𑁂𑀲𑀭𑀚𑀢𑁆𑀢𑀸 𑀯𑀺𑀭𑀚𑀁, 𑀫𑀳𑀦𑁆𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀝𑀺𑀧𑀦𑁆𑀦𑀢𑁆𑀢𑀸 𑀫𑀳𑀸𑀧𑀣𑀁, 𑀩𑁆𑀭𑀳𑁆𑀫𑀮𑁄𑀓𑀲𑀗𑁆𑀔𑀸𑀢𑀁 𑀤𑁂𑀯𑀮𑁄𑀓𑀁 𑀬𑀸𑀧𑁂𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀤𑁂𑀯𑀮𑁄𑀓𑀬𑀸𑀦𑀲𑀜𑁆𑀜𑀺𑀢𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑀸𑀦𑀁 𑀅𑀪𑀺𑀭𑀼𑀬𑁆𑀳, 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑀼, 𑀲𑀸 𑀢𑀣𑀸 𑀳𑀻𑀦𑀸𑀧𑀺 𑀦 𑀦𑀁 𑀚𑀸𑀢𑀺 𑀦𑀺𑀯𑀸𑀭𑁂𑀲𑀺 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀬𑀁 𑀧𑀦𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀢𑀻𑀢𑁂 𑀓𑀺𑀭 𑀫𑀳𑀸𑀧𑀼𑀭𑀺𑀲𑁄 𑀢𑁂𑀦 𑀢𑁂𑀦𑀼𑀧𑀸𑀬𑁂𑀦 𑀲𑀢𑁆𑀢𑀳𑀺𑀢𑀁 𑀓𑀭𑁄𑀦𑁆𑀢𑁄 𑀲𑁄𑀧𑀸𑀓𑀚𑀻𑀯𑀺𑀓𑁂 𑀘𑀡𑁆𑀟𑀸𑀮𑀓𑀼𑀮𑁂 𑀉𑀧𑁆𑀧𑀚𑁆𑀚𑀺. 𑀲𑁄 𑀦𑀸𑀫𑁂𑀦 𑀫𑀸𑀢𑀗𑁆𑀕𑁄 ¶ , 𑀭𑀽𑀧𑁂𑀦 𑀤𑀼𑀤𑁆𑀤𑀲𑀺𑀓𑁄 𑀳𑀼𑀢𑁆𑀯𑀸 𑀩𑀳𑀺𑀦𑀕𑀭𑁂 𑀘𑀫𑁆𑀫𑀓𑀼𑀝𑀺𑀓𑀸𑀬 𑀯𑀲𑀢𑀺, 𑀅𑀦𑁆𑀢𑁄𑀦𑀕𑀭𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 ¶ 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀼𑀭𑀸𑀦𑀓𑁆𑀔𑀢𑁆𑀢𑁂 𑀖𑁄𑀲𑀺𑀢𑁂 𑀥𑀼𑀢𑁆𑀢𑀸 𑀬𑀣𑀸𑀲𑀓𑁂𑀦 𑀧𑀭𑀺𑀯𑀸𑀭𑁂𑀦 𑀓𑀻𑀴𑀦𑁆𑀢𑀺. 𑀅𑀜𑁆𑀜𑀢𑀭𑀸𑀧𑀺 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀥𑀻𑀢𑀸 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀭𑀽𑀧𑁂𑀦 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 ‘‘𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀸𑀦𑀼𑀭𑀽𑀧𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀧𑀳𑀽𑀢𑀁 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀓𑀻𑀴𑀦𑀲𑀫𑁆𑀪𑀸𑀭𑀁 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀲𑀩𑁆𑀩𑀲𑁂𑀢𑀯𑀴𑀯𑀬𑀼𑀢𑁆𑀢𑀁 𑀬𑀸𑀦𑀫𑀸𑀭𑀼𑀬𑁆𑀳 𑀫𑀳𑀸𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀢𑀺 𑀦𑀸𑀫𑁂𑀦. 𑀲𑀸 𑀓𑀺𑀭 ‘‘𑀤𑀼𑀲𑁆𑀲𑀡𑁆𑀞𑀺𑀢𑀁 𑀭𑀽𑀧𑀁 𑀅𑀯𑀫𑀗𑁆𑀕𑀮’’𑀦𑁆𑀢𑀺 𑀤𑀝𑁆𑀞𑀼𑀁 𑀦 𑀇𑀘𑁆𑀙𑀢𑀺, 𑀢𑁂𑀦𑀲𑁆𑀲𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀢𑁆𑀯𑁂𑀯 𑀲𑀗𑁆𑀔𑀸 𑀉𑀤𑀧𑀸𑀤𑀺.

𑀢𑀤𑀸 𑀲𑁄 𑀫𑀸𑀢𑀗𑁆𑀕𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀧𑀝𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀁𑀲𑀢𑀸𑀴𑀁 𑀳𑀢𑁆𑀣𑁂 𑀩𑀦𑁆𑀥𑀺𑀢𑁆𑀯𑀸, 𑀪𑀸𑀚𑀦𑀳𑀢𑁆𑀣𑁄 ¶ 𑀦𑀕𑀭𑀁 𑀧𑀯𑀺𑀲𑀢𑀺, 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀤𑀽𑀭𑀢𑁄 𑀏𑀯 𑀓𑀁𑀲𑀢𑀸𑀴𑀁 𑀆𑀓𑁄𑀝𑁂𑀦𑁆𑀢𑁄. 𑀅𑀣 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 ‘‘𑀉𑀲𑁆𑀲𑀭𑀣, 𑀉𑀲𑁆𑀲𑀭𑀣𑀸’’𑀢𑀺 𑀧𑀼𑀭𑀢𑁄 𑀧𑀼𑀭𑀢𑁄 𑀳𑀻𑀦𑀚𑀦𑀁 𑀅𑀧𑀦𑁂𑀦𑁆𑀢𑁂𑀳𑀺 𑀧𑀼𑀭𑀺𑀲𑁂𑀳𑀺 𑀦𑀻𑀬𑀫𑀸𑀦𑀸 𑀦𑀕𑀭𑀤𑁆𑀯𑀸𑀭𑀫𑀚𑁆𑀛𑁂 𑀫𑀸𑀢𑀗𑁆𑀕𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀆𑀳. 𑀅𑀳𑀁 𑀫𑀸𑀢𑀗𑁆𑀕𑀘𑀡𑁆𑀟𑀸𑀮𑁄𑀢𑀺. 𑀲𑀸 ‘‘𑀈𑀤𑀺𑀲𑀁 𑀤𑀺𑀲𑁆𑀯𑀸 𑀕𑀢𑀸𑀦𑀁 𑀓𑀼𑀢𑁄 𑀯𑀼𑀟𑁆𑀠𑀻’’𑀢𑀺 𑀬𑀸𑀦𑀁 𑀦𑀺𑀯𑀢𑁆𑀢𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀬𑀁 𑀫𑀬𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀁 𑀮𑀪𑁂𑀬𑁆𑀬𑀸𑀫, 𑀢𑀲𑁆𑀲 𑀦𑁄 𑀫𑀸𑀢𑀗𑁆𑀕𑁂𑀦 𑀅𑀦𑁆𑀢𑀭𑀸𑀬𑁄 𑀓𑀢𑁄’’𑀢𑀺 𑀓𑀼𑀧𑀺𑀢𑀸 ‘‘𑀕𑀡𑁆𑀳𑀣 𑀘𑀡𑁆𑀟𑀸𑀮’’𑀦𑁆𑀢𑀺 𑀮𑁂𑀟𑁆𑀟𑀽𑀳𑀺 𑀧𑀳𑀭𑀺𑀢𑁆𑀯𑀸 ‘‘𑀫𑀢𑁄’’𑀢𑀺 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀙𑀟𑁆𑀟𑁂𑀢𑁆𑀯𑀸 𑀓𑀘𑀯𑀭𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀲𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀝𑁆𑀞𑀸𑀬 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀅𑀬𑁆𑀬𑀸, 𑀤𑁆𑀯𑀸𑀭𑀁 𑀦𑀸𑀫 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑀸𑀦𑀁𑀬𑁂𑀯 𑀓𑀢’’𑀦𑁆𑀢𑀺? 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡’’𑀦𑁆𑀢𑀺. ‘‘𑀏𑀯𑀁 𑀲𑀩𑁆𑀩𑀲𑀸𑀥𑀸𑀭𑀡𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑀁 𑀫𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀦𑀼𑀲𑁆𑀲𑀸 𑀇𑀫𑀁 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀼’’𑀦𑁆𑀢𑀺 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑁂 𑀦𑀺𑀧𑀚𑁆𑀚𑀺 𑁋 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀤𑁆𑀥𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺.

𑀩𑁆𑀭𑀸𑀳𑁆𑀫𑀡𑁄 ‘‘𑀖𑀭𑀤𑁆𑀯𑀸𑀭𑁂 𑀫𑀸𑀢𑀗𑁆𑀕𑁄 𑀦𑀺𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀲𑁆𑀲 𑀓𑀸𑀓𑀡𑀺𑀓𑀁 𑀤𑁂𑀣, 𑀢𑁂𑀮𑁂𑀦 𑀅𑀗𑁆𑀕𑀁 𑀫𑀓𑁆𑀔𑁂𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺 𑀆𑀳. 𑀲𑁄 𑀢𑀁 𑀦 𑀇𑀘𑁆𑀙𑀢𑀺, ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 ¶ 𑀅𑀮𑀤𑁆𑀥𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺’’𑀘𑁆𑀘𑁂𑀯 𑀆𑀳. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀤𑁆𑀯𑁂 𑀓𑀸𑀓𑀡𑀺𑀓𑀸𑀬𑁄 𑀤𑁂𑀣, 𑀓𑀸𑀓𑀡𑀺𑀓𑀸𑀬 𑀧𑀽𑀯𑀁 𑀔𑀸𑀤𑀢𑀼, 𑀓𑀸𑀓𑀡𑀺𑀓𑀸𑀬 ¶ 𑀢𑁂𑀮𑁂𑀦 𑀅𑀗𑁆𑀕𑀁 𑀫𑀓𑁆𑀔𑁂𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺 𑀆𑀳. 𑀲𑁄 𑀢𑀁 𑀦 𑀇𑀘𑁆𑀙𑀢𑀺, 𑀢𑀣𑁂𑀯 𑀯𑀤𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀼𑀢𑁆𑀯𑀸 ‘‘𑀫𑀸𑀲𑀓𑀁 𑀤𑁂𑀣, 𑀧𑀸𑀤𑀁, 𑀉𑀧𑀟𑁆𑀠𑀓𑀳𑀸𑀧𑀡𑀁, 𑀓𑀳𑀸𑀧𑀡𑀁 𑀤𑁆𑀯𑁂 𑀢𑀻𑀡𑀻’’𑀢𑀺 𑀬𑀸𑀯 𑀲𑀢𑀁 𑀆𑀡𑀸𑀧𑁂𑀲𑀺. 𑀲𑁄 𑀦 𑀇𑀘𑁆𑀙𑀢𑀺, 𑀢𑀣𑁂𑀯 𑀯𑀤𑀢𑀺. 𑀏𑀯𑀁 𑀬𑀸𑀘𑀦𑁆𑀢𑀸𑀦𑀁𑀬𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄. 𑀅𑀣 𑀩𑁆𑀭𑀸𑀳𑁆𑀫𑀡𑀻 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺 𑁋 ‘‘𑀢𑀸𑀢 𑀫𑀸𑀢𑀗𑁆𑀕, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀧𑀭𑀸𑀥𑀁 𑀔𑀫, 𑀲𑀳𑀲𑁆𑀲𑀁 𑀕𑀡𑁆𑀳𑀸𑀳𑀺, 𑀤𑁆𑀯𑁂 𑀢𑀻𑀡𑀻’’𑀢𑀺 𑀬𑀸𑀯 ‘‘𑀲𑀢𑀲𑀳𑀲𑁆𑀲𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀧𑀚𑁆𑀚𑀺𑀬𑁂𑀯.

𑀏𑀯𑀁 𑀘𑀢𑀽𑀳𑀧𑀜𑁆𑀘𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀩𑀳𑀼𑀫𑁆𑀧𑀺 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀪𑀦𑁆𑀢𑀸 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀫𑀸𑀢𑀗𑁆𑀕𑀲𑁆𑀲 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑀸𑀧𑁂𑀲𑀼𑀁 𑁋 ‘‘𑀧𑀼𑀭𑀺𑀲𑀸 𑀦𑀸𑀫 𑀅𑀦𑁂𑀓𑀸𑀦𑀺𑀧𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀢𑁆𑀣𑀁 𑀧𑀸𑀧𑀼𑀡𑀦𑁆𑀢𑀺, 𑀫𑀸 𑀔𑁄 𑀢𑁆𑀯𑀁 𑀦𑀺𑀩𑁆𑀩𑀺𑀚𑁆𑀚𑀺, 𑀅𑀤𑁆𑀥𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀮𑀘𑁆𑀙𑀲𑀻’’𑀢𑀺. 𑀲𑁄 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀧𑀚𑁆𑀚𑀺𑀬𑁂𑀯. 𑀅𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀦𑁆𑀢𑀸 𑀧𑀝𑀺𑀯𑀺𑀲𑁆𑀲𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸𑀢𑀗𑁆𑀕𑀁 𑀯𑀸 𑀉𑀝𑁆𑀞𑀸𑀧𑁂𑀣, 𑀤𑀸𑀭𑀺𑀓𑀁 𑀯𑀸 𑀤𑁂𑀣, 𑀫𑀸 𑀅𑀫𑁆𑀳𑁂 𑀲𑀩𑁆𑀩𑁂 𑀦𑀸𑀲𑀬𑀺𑀢𑁆𑀣𑀸’’𑀢𑀺 𑀆𑀳𑀁𑀲𑀼. 𑀢𑁂𑀲𑀁 𑀓𑀺𑀭 𑀅𑀬𑀁 𑀤𑀺𑀝𑁆𑀞𑀺 ‘‘𑀬𑀲𑁆𑀲 𑀖𑀭𑀤𑁆𑀯𑀸𑀭𑁂 𑀏𑀯𑀁 𑀦𑀺𑀧𑀦𑁆𑀦𑁄 𑀘𑀡𑁆𑀟𑀸𑀮𑁄 𑀫𑀭𑀢𑀺, 𑀢𑀲𑁆𑀲 𑀖𑀭𑁂𑀦 𑀲𑀳 𑀲𑀫𑀦𑁆𑀢𑀸 𑀲𑀢𑁆𑀢𑀲𑀢𑁆𑀢𑀖𑀭𑀯𑀸𑀲𑀺𑀦𑁄 𑀘𑀡𑁆𑀟𑀸𑀮𑀸 𑀳𑁄𑀦𑁆𑀢𑀻’’𑀢𑀺. 𑀢𑀢𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀦𑀻𑀮𑀧𑀝𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀉𑀴𑀼𑀗𑁆𑀓𑀓𑀴𑁄𑀧𑀺𑀓𑀸𑀤𑀻𑀦𑀺 𑀤𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 ¶ 𑀦𑁂𑀢𑁆𑀯𑀸 ‘‘𑀕𑀡𑁆𑀳 𑀤𑀸𑀭𑀺𑀓𑀁, 𑀉𑀝𑁆𑀞𑀸𑀬 𑀕𑀘𑁆𑀙𑀸𑀳𑀻’’𑀢𑀺 𑀅𑀤𑀁𑀲𑀼. 𑀲𑀸 𑀧𑀲𑁆𑀲𑁂 𑀞𑀢𑁆𑀯𑀸 ‘‘𑀉𑀝𑁆𑀞𑀸𑀳𑀻’’𑀢𑀺 𑀆𑀳, 𑀲𑁄 ‘‘𑀳𑀢𑁆𑀣𑁂𑀦 𑀫𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀦𑀁 𑀉𑀝𑁆𑀞𑀸𑀧𑁂𑀲𑀺. 𑀲𑁄 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳 𑁋 ‘‘𑀫𑀬𑀁 𑀅𑀦𑁆𑀢𑁄𑀦𑀕𑀭𑁂 𑀯𑀲𑀺𑀢𑀼𑀁 𑀦 𑀮𑀪𑀸𑀫, 𑀏𑀳𑀺 𑀫𑀁 𑀩𑀳𑀺𑀦𑀕𑀭𑁂 𑀘𑀫𑁆𑀫𑀓𑀼𑀝𑀺𑀁 𑀦𑁂𑀳𑀻’’𑀢𑀺. 𑀲𑀸 𑀦𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀦𑁂𑀲𑀺. ‘‘𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺 𑀚𑀸𑀢𑀓𑀪𑀸𑀡𑀓𑀸. 𑀦𑁂𑀢𑁆𑀯𑀸 ¶ 𑀘𑀲𑁆𑀲 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸, 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 ‘‘𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸 𑀅𑀬𑀁 𑀫𑀸 𑀯𑀺𑀦𑀲𑁆𑀲𑀻’’𑀢𑀺 𑀚𑀸𑀢𑀺𑀲𑀫𑁆𑀪𑁂𑀤𑀁 𑀅𑀓𑀢𑁆𑀯𑀸𑀯 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀩𑀮𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀯𑀦𑀁 𑀕𑀘𑁆𑀙𑀸𑀫𑀺, ‘𑀅𑀢𑀺𑀘𑀺𑀭𑀸𑀬𑀢𑀻’𑀢𑀺 𑀫𑀸 𑀢𑁆𑀯𑀁 𑀉𑀓𑁆𑀓𑀡𑁆𑀞𑀻’’𑀢𑀺 𑀯𑀢𑁆𑀯𑀸 𑀖𑀭𑀫𑀸𑀦𑀼𑀲𑀓𑀸𑀦𑀺 𑀘 ‘‘𑀇𑀫𑀁 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀓𑀢𑀺𑀧𑀸𑀳𑁂𑀦𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀇𑀤𑀸𑀦𑀸𑀳𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 ¶ 𑀫𑀦𑀸𑀧𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀑𑀭𑁄𑀳𑀺𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺.

𑀲𑀸 𑀲𑀼𑀢𑁆𑀯𑀸 ‘‘𑀓𑁄𑀘𑀺 𑀫𑀜𑁆𑀜𑁂 𑀫𑀫 𑀜𑀸𑀢𑀓𑁄 𑀧𑀩𑁆𑀩𑀚𑀺𑀢𑁄 𑀫𑀁 𑀤𑀼𑀓𑁆𑀔𑀺𑀢𑀁 𑀜𑀢𑁆𑀯𑀸 𑀤𑀝𑁆𑀞𑀼𑀁 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀕𑀦𑁆𑀢𑁆𑀯𑀸, 𑀢𑀁 𑀜𑀢𑁆𑀯𑀸, 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀓𑀺𑀲𑁆𑀲 𑀫𑀁 𑀅𑀦𑀸𑀣𑀁 𑀢𑀼𑀫𑁆𑀳𑁂 𑀅𑀓𑀢𑁆𑀣𑀸’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 ‘‘𑀫𑀸 𑀢𑁆𑀯𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂 𑀤𑀼𑀓𑁆𑀔𑀺𑀦𑀻 𑀅𑀳𑁄𑀲𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀳𑀺 𑀢𑁂 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙 𑀢𑁆𑀯𑀁 𑀖𑁄𑀲𑀦𑀁 𑀓𑀭𑁄𑀳𑀺 𑁋 ‘𑀫𑀳𑀸𑀩𑁆𑀭𑀳𑁆𑀫𑀸 𑀫𑀫 𑀲𑀸𑀫𑀺𑀓𑁄 𑀦 𑀫𑀸𑀢𑀗𑁆𑀕𑁄, 𑀲𑁄 𑀘𑀦𑁆𑀤𑀯𑀺𑀫𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀻’’’𑀢𑀺. 𑀲𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀥𑀻𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀧𑀓𑀫𑁆𑀫𑁂𑀦 𑀇𑀫𑀁 𑀘𑀡𑁆𑀟𑀸𑀮𑀪𑀸𑀯𑀁 𑀧𑀢𑁆𑀢𑀸, 𑀦 𑀲𑀓𑁆𑀓𑁄𑀫𑀺 𑀏𑀯𑀁 𑀯𑀢𑁆𑀢𑀼’’𑀦𑁆𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀦 𑀢𑁆𑀯𑀁 𑀫𑀸𑀢𑀗𑁆𑀕𑀲𑁆𑀲 𑀆𑀦𑀼𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀬𑀣𑀸 𑀲𑀸 𑀲𑀤𑁆𑀤𑀳𑀢𑀺, 𑀢𑀣𑀸 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑀣𑁂𑀯 𑀢𑀁 𑀆𑀡𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀢𑀺𑀁 𑀅𑀕𑀫𑀸𑀲𑀺. 𑀲𑀸 𑀢𑀣𑀸 𑀅𑀓𑀸𑀲𑀺.

𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀳𑀲𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫𑀸𑀬𑀁 𑀅𑀢𑁆𑀢𑀦𑁄 𑀧𑀸𑀧𑀓𑀫𑁆𑀫𑁂𑀦 𑀘𑀡𑁆𑀟𑀸𑀮𑀪𑀸𑀯𑀁 𑀧𑀢𑁆𑀯𑀸 𑀧𑀼𑀦 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑀸 𑀅𑀥𑀺𑀫𑀸𑀦𑀸 𑀏𑀯 𑀳𑀼𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀖𑁄𑀲𑀦𑁆𑀢𑀻 𑀦𑀕𑀭𑀁 𑀆𑀳𑀺𑀡𑁆𑀟𑀢𑀺 ‘‘𑀇𑀢𑁄 𑀙𑀝𑁆𑀞𑁂 𑀤𑀺𑀯𑀲𑁂, 𑀧𑀜𑁆𑀘𑀫𑁂, 𑀘𑀢𑀼𑀢𑁆𑀣𑁂, 𑀢𑀢𑀺𑀬𑁂, 𑀲𑀼𑀯𑁂, 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀫𑀦𑀼𑀲𑁆𑀲𑀸 ¶ 𑀢𑀲𑁆𑀲𑀸 𑀯𑀺𑀲𑁆𑀲𑀢𑁆𑀣𑀯𑀸𑀘𑀁 𑀲𑀼𑀢𑁆𑀯𑀸 ‘‘𑀓𑀤𑀸𑀘𑀺 𑀏𑀯𑀫𑁆𑀧𑀺 𑀲𑀺𑀬𑀸’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂𑀲𑀼 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀲𑀸𑀡𑀺𑀧𑀸𑀓𑀸𑀭𑀁 𑀲𑀚𑁆𑀚𑁂𑀢𑁆𑀯𑀸, 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸𑀬𑁄 𑀅𑀮𑀗𑁆𑀓𑀭𑀺𑀢𑁆𑀯𑀸 ‘‘𑀫𑀳𑀸𑀩𑁆𑀭𑀳𑁆𑀫𑀦𑀺 𑀆𑀕𑀢𑁂 𑀓𑀜𑁆𑀜𑀸𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀧𑀼𑀡𑁆𑀡𑀫𑀤𑀺𑀯𑀲𑁂 𑀕𑀕𑀦𑀢𑀮𑀁 𑀉𑀧𑀸𑀭𑀽𑀴𑁆𑀳𑁂 𑀘𑀦𑁆𑀤𑁂 𑀘𑀦𑁆𑀤𑀯𑀺𑀫𑀸𑀦𑀁 𑀨𑀸𑀮𑁂𑀢𑁆𑀯𑀸 𑀧𑀲𑁆𑀲𑀢𑁄 𑀫𑀳𑀸𑀚𑀦𑀲𑁆𑀲 𑀫𑀳𑀸𑀩𑁆𑀭𑀳𑁆𑀫𑀭𑀽𑀧𑁂𑀦 𑀦𑀺𑀕𑁆𑀕𑀘𑁆𑀙𑀺. 𑀫𑀳𑀸𑀚𑀦𑁄 ‘‘𑀤𑁆𑀯𑁂 𑀘𑀦𑁆𑀤𑀸 𑀚𑀸𑀢𑀸’’𑀢𑀺 𑀅𑀢𑀺𑀫𑀜𑁆𑀜𑀺. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀲𑀘𑁆𑀘𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀆𑀳, 𑀫𑀳𑀸𑀩𑁆𑀭𑀳𑁆𑀫𑀸𑀯 𑀅𑀬𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀤𑀫𑁂𑀢𑀼𑀁 ¶ 𑀧𑀼𑀩𑁆𑀩𑁂 𑀫𑀸𑀢𑀗𑁆𑀕𑀯𑁂𑀲𑁂𑀦𑀸𑀕𑀘𑁆𑀙𑀻’’𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺. 𑀏𑀯𑀁 𑀲𑁄 𑀫𑀳𑀸𑀚𑀦𑁂𑀦 𑀤𑀺𑀲𑁆𑀲𑀫𑀸𑀦𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀯𑀲𑀦𑀝𑁆𑀞𑀸𑀦𑁂 𑀏𑀯 𑀑𑀢𑀭𑀺. 𑀲𑀸 𑀘 𑀢𑀤𑀸 𑀉𑀢𑀼𑀦𑀻 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀦𑀸𑀪𑀺𑀁 𑀅𑀗𑁆𑀕𑀼𑀝𑁆𑀞𑀓𑁂𑀦 𑀧𑀭𑀸𑀫𑀲𑀺. 𑀢𑁂𑀦 𑀨𑀲𑁆𑀲𑁂𑀦 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀢𑀢𑁄 𑀦𑀁 ‘‘𑀕𑀩𑁆𑀪𑁄 𑀢𑁂 𑀲𑀡𑁆𑀞𑀺𑀢𑁄 ¶ , 𑀧𑀼𑀢𑁆𑀢𑀫𑁆𑀳𑀺 𑀚𑀸𑀢𑁂 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀲𑁆𑀲𑀢𑁄 𑀫𑀳𑀸𑀚𑀦𑀲𑁆𑀲 𑀧𑀼𑀦 𑀘𑀦𑁆𑀤𑀯𑀺𑀫𑀸𑀦𑀁 𑀧𑀸𑀯𑀺𑀲𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀚𑀸𑀧𑀢𑀺 𑀅𑀫𑁆𑀳𑀸𑀓𑀁 𑀫𑀸𑀢𑀸 𑀚𑀸𑀢𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀕𑀘𑁆𑀙𑀦𑁆𑀢𑀺. 𑀢𑀁 𑀲𑀓𑁆𑀓𑀸𑀭𑀁 𑀓𑀸𑀢𑀼𑀓𑀸𑀫𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀫𑁆𑀧𑀻𑀴𑀦𑁂𑀦 𑀦𑀕𑀭𑀤𑁆𑀯𑀸𑀭𑀸𑀦𑀺 𑀅𑀦𑁄𑀓𑀸𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀳𑀺𑀭𑀜𑁆𑀜𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸, 𑀦𑁆𑀳𑀸𑀧𑁂𑀢𑁆𑀯𑀸, 𑀫𑀡𑁆𑀟𑁂𑀢𑁆𑀯𑀸, 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸, 𑀫𑀳𑀸𑀲𑀓𑁆𑀓𑀸𑀭𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀦𑀕𑀭𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀢𑀢𑁆𑀭 𑀦𑀁 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀚𑀸𑀧𑀢𑀻’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀯𑀲𑀸𑀧𑁂𑀦𑁆𑀢𑀺 ‘‘𑀬𑀸𑀯𑀲𑁆𑀲𑀸 𑀧𑀢𑀺𑀭𑀽𑀧𑀁 𑀯𑀲𑀦𑁄𑀓𑀸𑀲𑀁 𑀓𑀭𑁄𑀫, 𑀢𑀸𑀯 𑀇𑀥𑁂𑀯 𑀯𑀲𑀢𑀽’’𑀢𑀺. 𑀲𑀸 𑀫𑀡𑁆𑀟𑀧𑁂 𑀏𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀯𑀺𑀲𑀼𑀤𑁆𑀥𑀤𑀺𑀯𑀲𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦 𑀲𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑀧𑁂 𑀚𑀸𑀢𑁄𑀢𑀺 𑀤𑀸𑀭𑀓𑀲𑁆𑀲 ‘‘𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀘 𑀦𑀁 𑀩𑁆𑀭𑀸𑀳𑁆𑀫𑀡𑀸 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑁄’’𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀺. 𑀢𑀢𑁄 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑁆𑀧𑀓𑀸𑀭𑀸 𑀧𑀡𑁆𑀡𑀸𑀓𑀸𑀭𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀓𑀼𑀫𑀸𑀭𑀲𑁆𑀲𑀸𑀭𑀓𑁆𑀔𑀁 ¶ 𑀞𑀧𑁂𑀲𑀼𑀁, 𑀆𑀕𑀢𑀸 𑀮𑀳𑀼𑀁 𑀓𑀼𑀫𑀸𑀭𑀁 𑀤𑀝𑁆𑀞𑀼𑀁 𑀦 𑀮𑀪𑀦𑁆𑀢𑀺.

𑀓𑀼𑀫𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀤𑀸𑀦𑀁 𑀤𑀸𑀢𑀼𑀁 𑀆𑀭𑀤𑁆𑀥𑁄. 𑀲𑁄 𑀲𑀸𑀮𑀸𑀬 𑀲𑀫𑁆𑀧𑀢𑁆𑀢𑀸𑀦𑀁 𑀓𑀧𑀡𑀤𑁆𑀥𑀺𑀓𑀸𑀦𑀁 𑀅𑀤𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁𑀬𑁂𑀯 𑀤𑁂𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀓𑀺𑀁 𑀫𑀫 𑀧𑀼𑀢𑁆𑀢𑁄 𑀤𑀸𑀦𑀁 𑀤𑁂𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁𑀬𑁂𑀯 𑀤𑀸𑀦𑀁 𑀤𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀬𑀣𑀸 𑀲𑀩𑁆𑀩𑁂𑀲𑀁 𑀤𑀲𑁆𑀲𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀆𑀕𑀫𑁆𑀫 𑀧𑀼𑀢𑁆𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀓𑀼𑀫𑀸𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀅𑀬𑀁 𑀏𑀯𑀁 𑀯𑀺𑀭𑀽𑀧𑀯𑁂𑀲𑁄 𑀯𑀲𑀮𑁄 𑀆𑀕𑀢𑁄’’𑀢𑀺 𑀓𑀼𑀤𑁆𑀥𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻, 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂, 𑀓𑁄 𑀭𑁂 𑀢𑀼𑀯𑀁 𑀳𑁄𑀲𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀼𑀁. 𑀲𑁄 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺𑀦𑀕𑀭𑁂 𑀧𑀘𑁆𑀘𑀝𑁆𑀞𑀸𑀲𑀺 ¶ . 𑀤𑁂𑀯𑀢𑀸 𑀓𑀼𑀧𑀺𑀢𑀸 𑀓𑀼𑀫𑀸𑀭𑀁 𑀕𑀮𑁂 𑀕𑀳𑁂𑀢𑁆𑀯𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀞𑀧𑁂𑀲𑀼𑀁. 𑀲𑁄 𑀅𑀓𑁆𑀔𑀻𑀳𑀺 𑀦𑀺𑀕𑁆𑀕𑀢𑁂𑀳𑀺 𑀫𑀼𑀔𑁂𑀦 𑀔𑁂𑀴𑀁 𑀧𑀕𑁆𑀖𑀭𑀦𑁆𑀢𑁂𑀦 𑀖𑀭𑀼𑀖𑀭𑀼𑀧𑀲𑁆𑀲𑀸𑀲𑀻 𑀤𑀼𑀓𑁆𑀔𑀁 𑀯𑁂𑀤𑀬𑀢𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀲𑀼𑀢𑁆𑀯𑀸 ‘‘𑀓𑁄𑀘𑀺 𑀆𑀕𑀢𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀧𑀩𑁆𑀩𑀚𑀺𑀢𑁄 𑀆𑀕𑀘𑁆𑀙𑀻’’𑀢𑀺. ‘‘𑀓𑀼𑀳𑀺𑀁 𑀕𑀢𑁄’’𑀢𑀺? ‘‘𑀏𑀯𑀁 𑀕𑀢𑁄’’𑀢𑀺. 𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀔𑀫𑀣, 𑀪𑀦𑁆𑀢𑁂, 𑀅𑀢𑁆𑀢𑀦𑁄 ¶ 𑀤𑀸𑀲𑀲𑁆𑀲𑀸’’𑀢𑀺 𑀬𑀸𑀘𑀦𑁆𑀢𑀻 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀪𑀽𑀫𑀺𑀬𑀸 𑀦𑀺𑀧𑀚𑁆𑀚𑀺. 𑀢𑁂𑀦 𑀘 𑀲𑀫𑀬𑁂𑀦 𑀫𑀳𑀸𑀧𑀼𑀭𑀺𑀲𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸, 𑀢𑀁 𑀧𑀺𑀯𑀦𑁆𑀢𑁄 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑁄 𑀅𑀯𑀲𑀺𑀝𑁆𑀞𑀁 𑀣𑁄𑀓𑀁 𑀬𑀸𑀕𑀼𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀤𑀸𑀲𑀺. ‘‘𑀕𑀘𑁆𑀙 𑀇𑀫𑀁 𑀬𑀸𑀕𑀼𑀁 𑀉𑀤𑀓𑀓𑀼𑀫𑁆𑀪𑀺𑀬𑀸 𑀆𑀮𑁄𑀮𑁂𑀢𑁆𑀯𑀸 𑀬𑁂𑀲𑀁 𑀪𑀽𑀢𑀯𑀺𑀓𑀸𑀭𑁄 𑀅𑀢𑁆𑀣𑀺, 𑀢𑁂𑀲𑀁 𑀅𑀓𑁆𑀔𑀺𑀫𑀼𑀔𑀓𑀡𑁆𑀡𑀦𑀸𑀲𑀸𑀩𑀺𑀮𑁂𑀲𑀼 𑀆𑀲𑀺𑀜𑁆𑀘, 𑀲𑀭𑀻𑀭𑀜𑁆𑀘 𑀧𑀭𑀺𑀧𑁆𑀨𑁄𑀲𑁂𑀳𑀺, 𑀏𑀯𑀁 𑀦𑀺𑀩𑁆𑀩𑀺𑀓𑀸𑀭𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀢𑀢𑁄 ¶ 𑀓𑀼𑀫𑀸𑀭𑁂 𑀧𑀓𑀢𑀺𑀲𑀭𑀻𑀭𑁂 𑀚𑀸𑀢𑁂 ‘‘𑀏𑀳𑀺, 𑀢𑀸𑀢 𑀫𑀡𑁆𑀟𑀩𑁆𑀬, 𑀢𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀧𑀼𑀢𑁆𑀢𑀜𑁆𑀘 𑀲𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑁂 𑀘 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀲𑀺.

𑀲𑁄 ‘‘𑀲𑀩𑁆𑀩𑀚𑀦𑀲𑁆𑀲 𑀤𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀺𑀢𑁆𑀯𑀸, 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁𑀬𑁂𑀯 𑀕𑀦𑁆𑀢𑁆𑀯𑀸, 𑀘𑀺𑀦𑁆𑀢𑁂𑀲𑀺 ‘‘𑀇𑀢𑁆𑀣𑀻𑀲𑀼 𑀧𑀸𑀓𑀝𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀤𑀫𑀺𑀢𑀸, 𑀧𑀼𑀭𑀺𑀲𑁂𑀲𑀼 𑀧𑀸𑀓𑀝𑁄 𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄, 𑀇𑀤𑀸𑀦𑀺 𑀓𑁄 𑀤𑀫𑁂𑀢𑀩𑁆𑀩𑁄’’𑀢𑀺. 𑀢𑀢𑁄 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑀁 𑀅𑀤𑁆𑀤𑀲 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀦𑀺𑀲𑁆𑀲𑀸𑀬 𑀓𑀼𑀫𑁆𑀪𑀯𑀢𑀻𑀦𑀤𑀻𑀢𑀻𑀭𑁂 𑀯𑀺𑀳𑀭𑀦𑁆𑀢𑀁. 𑀲𑁄 ‘‘𑀅𑀳𑀁 𑀚𑀸𑀢𑀺𑀬𑀸 𑀯𑀺𑀲𑀺𑀝𑁆𑀞𑁄, 𑀅𑀜𑁆𑀜𑁂𑀳𑀺 𑀧𑀭𑀺𑀪𑀼𑀢𑁆𑀢𑁄𑀤𑀓𑀁 𑀦 𑀧𑀭𑀺𑀪𑀼𑀜𑁆𑀚𑀸𑀫𑀻’’𑀢𑀺 𑀉𑀧𑀭𑀺𑀦𑀤𑀺𑀬𑀸 𑀯𑀲𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀢𑀲𑁆𑀲 𑀉𑀤𑀓𑀧𑀭𑀺𑀪𑁄𑀕𑀯𑁂𑀮𑀸𑀬𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺. 𑀢𑀸𑀧𑀲𑁄 𑀢𑀁 𑀉𑀤𑀓𑁂𑀦 𑀯𑀼𑀬𑁆𑀳𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀤𑀁 𑀔𑀺𑀢𑁆𑀢’’𑀦𑁆𑀢𑀺 𑀧𑀝𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. ‘‘𑀫𑀸𑀢𑀗𑁆𑀕𑀘𑀡𑁆𑀟𑀸𑀮𑁄, 𑀆𑀘𑀭𑀺𑀬𑀸’’𑀢𑀺. ‘‘𑀅𑀧𑁂𑀳𑀺, 𑀘𑀡𑁆𑀟𑀸𑀮, 𑀫𑀸 𑀉𑀧𑀭𑀺𑀦𑀤𑀺𑀬𑀸 𑀯𑀲𑀻’’𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀲𑀸𑀥𑀼, 𑀆𑀘𑀭𑀺𑀬𑀸’’𑀢𑀺 𑀳𑁂𑀝𑁆𑀞𑀸𑀦𑀤𑀺𑀬𑀸 𑀯𑀲𑀢𑀺, 𑀧𑀝𑀺𑀲𑁄𑀢𑀫𑁆𑀧𑀺 𑀤𑀦𑁆𑀢𑀓𑀝𑁆𑀞𑀁 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀺. 𑀢𑀸𑀧𑀲𑁄 𑀧𑀼𑀦 𑀕𑀦𑁆𑀢𑁆𑀯𑀸 ‘‘𑀅𑀧𑁂𑀳𑀺, 𑀘𑀡𑁆𑀟𑀸𑀮, 𑀫𑀸 𑀳𑁂𑀝𑁆𑀞𑀸𑀦𑀤𑀺𑀬𑀁 𑀯𑀲, 𑀉𑀧𑀭𑀺𑀦𑀤𑀺𑀬𑀸𑀬𑁂𑀯 𑀯𑀲𑀸’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 ‘‘𑀲𑀸𑀥𑀼, 𑀆𑀘𑀭𑀺𑀬𑀸’’𑀢𑀺 𑀢𑀣𑀸 𑀅𑀓𑀸𑀲𑀺, 𑀧𑀼𑀦𑀧𑀺 𑀢𑀣𑁂𑀯 𑀅𑀳𑁄𑀲𑀺. 𑀢𑀸𑀧𑀲𑁄 𑀧𑀼𑀦𑀧𑀺 ‘‘𑀢𑀣𑀸 𑀓𑀭𑁄𑀢𑀻’’𑀢𑀺 𑀤𑀼𑀝𑁆𑀞𑁄 𑀫𑀳𑀸𑀧𑀼𑀭𑀺𑀲𑀁 𑀲𑀧𑀺 ‘‘𑀲𑀽𑀭𑀺𑀬𑀲𑁆𑀲 𑀢𑁂 𑀉𑀕𑁆𑀕𑀫𑀦𑀯𑁂𑀮𑀸𑀬 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀽’’𑀢𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 ‘‘𑀲𑀸𑀥𑀼, 𑀆𑀘𑀭𑀺𑀬, 𑀅𑀳𑀁 𑀧𑀦 𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀦 𑀤𑁂𑀫𑀻’’𑀢𑀺 𑀯𑀢𑁆𑀯𑀸 𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀸𑀭𑁂𑀲𑀺 ¶ . 𑀢𑀢𑁄 𑀭𑀢𑁆𑀢𑀺 𑀦 𑀯𑀺𑀪𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀚𑀸𑀢𑁄, 𑀪𑀻𑀢𑀸 𑀩𑀦𑁆𑀥𑀼𑀫𑀢𑀻𑀯𑀸𑀲𑀺𑀦𑁄 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄, 𑀆𑀘𑀭𑀺𑀬, 𑀅𑀫𑁆𑀳𑀸𑀓𑀁 𑀲𑁄𑀢𑁆𑀣𑀺𑀪𑀸𑀯𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂 𑀳𑀺 𑀢𑀁 ‘‘𑀅𑀭𑀳𑀸’’𑀢𑀺 𑀫𑀜𑁆𑀜𑀦𑁆𑀢𑀺. 𑀲𑁄 𑀢𑁂𑀲𑀁 𑀲𑀩𑁆𑀩𑀫𑀸𑀘𑀺𑀓𑁆𑀔𑀺. 𑀢𑁂 𑀫𑀳𑀸𑀧𑀼𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ ‘‘𑀲𑀽𑀭𑀺𑀬𑀁, 𑀪𑀦𑁆𑀢𑁂, 𑀫𑀼𑀜𑁆𑀘𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 ‘‘𑀬𑀤𑀺 𑀢𑀼𑀫𑁆𑀳𑀸𑀓𑀁 𑀅𑀭𑀳𑀸 𑀆𑀕𑀦𑁆𑀢𑁆𑀯𑀸 𑀫𑀁 𑀔𑀫𑀸𑀧𑁂𑀢𑀺, 𑀫𑀼𑀜𑁆𑀘𑀸𑀫𑀻’’𑀢𑀺 𑀆𑀳.

𑀫𑀦𑀼𑀲𑁆𑀲𑀸 𑀕𑀦𑁆𑀢𑁆𑀯𑀸 𑀢𑀸𑀧𑀲𑀁 𑀆𑀳𑀁𑀲𑀼 𑁋 ‘‘𑀏𑀳𑀺, 𑀪𑀦𑁆𑀢𑁂, 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀁 𑀔𑀫𑀸𑀧𑁂𑀳𑀺, 𑀫𑀸 𑀢𑀼𑀫𑁆𑀳𑀸𑀓𑀁 𑀓𑀮𑀳𑀓𑀸𑀭𑀡𑀸 𑀫𑀬𑀁 𑀦𑀲𑁆𑀲𑀺𑀫𑁆𑀳𑀸’’𑀢𑀺. 𑀲𑁄 ‘‘𑀦𑀸𑀳𑀁 𑀘𑀡𑁆𑀟𑀸𑀮𑀁 𑀔𑀫𑀸𑀧𑁂𑀫𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑁂 𑀢𑁆𑀯𑀁 𑀦𑀸𑀲𑁂𑀲𑀻’’𑀢𑀺 𑀢𑀁 𑀳𑀢𑁆𑀣𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀲𑀼𑀁. 𑀫𑀳𑀸𑀧𑀼𑀭𑀺𑀲𑁄 ‘‘𑀫𑀫 𑀧𑀸𑀤𑀫𑀽𑀮𑁂 ¶ 𑀓𑀼𑀘𑁆𑀙𑀺𑀬𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑁂 𑀔𑀫𑀸𑀫𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀏𑀯𑀁 𑀓𑀭𑁄𑀳𑀻’’𑀢𑀺 𑀆𑀳𑀁𑀲𑀼. 𑀢𑀸𑀧𑀲𑁄 ‘‘𑀦𑀸𑀳𑀁 𑀘𑀡𑁆𑀟𑀸𑀮𑀁 𑀯𑀦𑁆𑀤𑀸𑀫𑀻’’𑀢𑀺. 𑀫𑀦𑀼𑀲𑁆𑀲𑀸 ‘‘𑀢𑀯 𑀙𑀦𑁆𑀤𑁂𑀦 𑀦 𑀯𑀦𑁆𑀤𑀺𑀲𑁆𑀲𑀲𑀻’’𑀢𑀺 𑀳𑀢𑁆𑀣𑀧𑀸𑀤𑀫𑀲𑁆𑀲𑀼𑀕𑀻𑀯𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀤𑀫𑀽𑀮𑁂 𑀲𑀬𑀸𑀧𑁂𑀲𑀼𑀁. 𑀲𑁄 ‘‘𑀔𑀫𑀸𑀫𑀳𑀁 𑀇𑀫𑀲𑁆𑀲, 𑀅𑀧𑀺𑀘𑀸𑀳𑀁 𑀢𑀲𑁆𑀲𑁂𑀯𑀸𑀦𑀼𑀓𑀫𑁆𑀧𑀸𑀬 𑀲𑀽𑀭𑀺𑀬𑀁 𑀦 𑀫𑀼𑀜𑁆𑀘𑀸𑀫𑀺, 𑀲𑀽𑀭𑀺𑀬𑁂 𑀳𑀺 𑀉𑀕𑁆𑀕𑀢𑀫𑀢𑁆𑀢𑁂 𑀫𑀼𑀤𑁆𑀥𑀸 𑀅𑀲𑁆𑀲 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀆𑀳𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 ‘‘𑀢𑁂𑀦 𑀳𑀺 𑀇𑀫𑀁 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀧𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂𑀦𑀲𑁆𑀲 𑀲𑀻𑀲𑀁 𑀧𑀝𑀺𑀘𑁆𑀙𑀸𑀤𑁂𑀣, 𑀲𑀽𑀭𑀺𑀬𑀭𑀲𑁆𑀫𑀻𑀳𑀺 𑀨𑀼𑀝𑁆𑀞𑁄 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀨𑀮𑀺𑀢𑁂 𑀏𑀲 𑀅𑀜𑁆𑀜𑀢𑁆𑀭 𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑁂 𑀢𑀸𑀧𑀲𑀁 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀲𑀽𑀭𑀺𑀬𑁂 𑀫𑀼𑀜𑁆𑀘𑀺𑀢𑀫𑀢𑁆𑀢𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀨𑀮𑀺𑀢𑁆𑀯𑀸 𑀧𑀢𑀺, 𑀢𑀸𑀧𑀲𑁄 𑀪𑀻𑀢𑁄 𑀧𑀮𑀸𑀬𑀺. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀧𑀲𑁆𑀲𑀣, 𑀪𑁄, 𑀲𑀫𑀡𑀲𑁆𑀲 𑀆𑀦𑀼𑀪𑀸𑀯’’𑀦𑁆𑀢𑀺 𑀤𑀦𑁆𑀢𑀓𑀝𑁆𑀞𑀧𑀓𑁆𑀔𑀺𑀧𑀦𑀫𑀸𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀈𑀤𑀺𑀲𑁄 𑀲𑀫𑀡𑁄’’𑀢𑀺 𑀢𑀲𑁆𑀫𑀺𑀁 𑀧𑀲𑀻𑀤𑀺𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣…𑀧𑁂… 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺.

𑁧𑁪𑁦-𑁧𑁪𑁧. 𑀏𑀯𑀁 ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀻’’𑀢𑀺 𑀲𑀸𑀥𑁂𑀢𑁆𑀯𑀸 ¶ 𑀇𑀤𑀸𑀦𑀺 ‘‘𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀢𑀁 𑀲𑀸𑀥𑁂𑀢𑀼𑀁 𑀆𑀳 ‘‘𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸 ¶ …𑀧𑁂… 𑀤𑀼𑀕𑁆𑀕𑀢𑁆𑀬𑀸 𑀕𑀭𑀳𑀸𑀬 𑀯𑀸’’𑀢𑀺. 𑀢𑀢𑁆𑀣 𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸𑀢𑀺 𑀫𑀦𑁆𑀢𑀚𑁆𑀛𑀸𑀬𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑀸. ‘‘𑀅𑀚𑁆𑀛𑀸𑀬𑀓𑀸𑀓𑀼𑀴𑁂 𑀚𑀸𑀢𑀸’’𑀢𑀺𑀧𑀺 𑀧𑀸𑀞𑁄. 𑀫𑀦𑁆𑀢𑀸𑀦𑀁 𑀅𑀚𑁆𑀛𑀸𑀬𑀓𑁂 𑀅𑀦𑀼𑀧𑀓𑀼𑀝𑁆𑀞𑁂 𑀘 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑀸𑀢𑀺 𑀅𑀢𑁆𑀣𑁄. 𑀫𑀦𑁆𑀢𑀸 𑀩𑀦𑁆𑀥𑀯𑀸 𑀏𑀢𑁂𑀲𑀦𑁆𑀢𑀺 𑀫𑀦𑁆𑀢𑀩𑀦𑁆𑀥𑀯𑀸. 𑀯𑁂𑀤𑀩𑀦𑁆𑀥𑀽 𑀯𑁂𑀤𑀧𑀝𑀺𑀲𑁆𑀲𑀭𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀧𑀸𑀧𑁂𑀲𑀼 𑀓𑀫𑁆𑀫𑁂𑀲𑀼 𑀅𑀪𑀺𑀡𑁆𑀳𑀫𑀼𑀧𑀤𑀺𑀲𑁆𑀲𑀭𑁂𑀢𑀺 𑀢𑁂 𑀏𑀯𑀁 𑀓𑀼𑀮𑁂 𑀚𑀸𑀢𑀸 𑀫𑀦𑁆𑀢𑀩𑀦𑁆𑀥𑀯𑀸 𑀘 𑀲𑀫𑀸𑀦𑀸𑀧𑀺 𑀬𑀤𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀧𑀸𑀧𑀓𑀫𑁆𑀫𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑀤𑀺𑀲𑁆𑀲𑀦𑁆𑀢𑀺, 𑀅𑀣 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺 𑀢𑁂 𑀏𑀯𑀫𑀼𑀧𑀤𑀺𑀲𑁆𑀲𑀫𑀸𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 ‘‘𑀦𑀬𑀺𑀫𑁂 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀸, 𑀤𑀼𑀚𑁆𑀚𑀸𑀢𑀸 𑀏𑀢𑁂 𑀓𑀼𑀮𑀲𑁆𑀲 𑀅𑀗𑁆𑀕𑀸𑀭𑀪𑀽𑀢𑀸, 𑀦𑀺𑀓𑁆𑀓𑀟𑁆𑀠𑀣 𑀦𑁂’’𑀢𑀺, 𑀩𑁆𑀭𑀸𑀳𑁆𑀫𑀡𑁂𑀳𑀺𑀧𑀺 ‘‘𑀕𑀳𑀧𑀢𑀺𑀓𑀸 𑀏𑀢𑁂, 𑀦 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸, 𑀫𑀸 𑀦𑁂𑀲𑀁 𑀲𑀤𑁆𑀥𑀬𑀜𑁆𑀜𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀧𑀯𑁂𑀲𑀁 𑀤𑁂𑀣, 𑀫𑀸 𑀦𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀣𑀸’’𑀢𑀺, 𑀅𑀜𑁆𑀜𑁂𑀳𑀺𑀧𑀺 𑀫𑀦𑀼𑀲𑁆𑀲𑁂𑀳𑀺 ‘‘𑀧𑀸𑀧𑀓𑀫𑁆𑀫𑀦𑁆𑀢𑀸 𑀏𑀢𑁂, 𑀦 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀏𑀯𑀁 𑀕𑀸𑀭𑀬𑁆𑀳𑀸 𑀳𑁄𑀦𑁆𑀢𑀺. 𑀲𑀫𑁆𑀧𑀭𑀸𑀬𑁂 𑀘 𑀦𑁂𑀲𑀁 𑀤𑀼𑀕𑁆𑀕𑀢𑀺 𑀦𑀺𑀭𑀬𑀸𑀤𑀺𑀪𑁂𑀤𑀸, 𑀤𑀼𑀕𑁆𑀕𑀢𑀺 𑀏𑀢𑁂𑀲𑀁 𑀧𑀭𑀮𑁄𑀓𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀭𑀸𑀬𑁂 𑀯𑀸𑀢𑀺𑀧𑀺 𑀧𑀸𑀞𑁄. 𑀧𑀭𑀮𑁄𑀓𑁂 𑀏𑀢𑁂𑀲𑀁 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀤𑀼𑀕𑁆𑀕𑀢𑀺, 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀦𑁂 𑀚𑀸𑀢𑀺 𑀦𑀺𑀯𑀸𑀭𑁂𑀢𑀺, 𑀤𑀼𑀕𑁆𑀕𑀢𑁆𑀬𑀸 𑀕𑀭𑀳𑀸𑀬 𑀯𑀸𑀢𑀺 𑀲𑀸 𑀢𑀣𑀸 𑀉𑀓𑁆𑀓𑀝𑁆𑀞𑀸𑀧𑀺 𑀬𑀁 𑀢𑁆𑀯𑀁 𑀲𑀸𑀭𑀢𑁄 𑀧𑀘𑁆𑀘𑁂𑀲𑀺, 𑀚𑀸𑀢𑀺 𑀏𑀢𑁂 𑀧𑀸𑀧𑀓𑀫𑁆𑀫𑁂𑀲𑀼 𑀧𑀤𑀺𑀲𑁆𑀲𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 ‘‘𑀲𑀫𑁆𑀧𑀭𑀸𑀬𑁂 ¶ 𑀘 𑀤𑀼𑀕𑁆𑀕𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀤𑀼𑀕𑁆𑀕𑀢𑀺𑀬𑀸 𑀯𑀸, ‘‘𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀕𑀭𑀳𑀸𑀬 𑀯𑀸 𑀦 𑀦𑀺𑀯𑀸𑀭𑁂𑀢𑀺.

𑁧𑁪𑁨. 𑀏𑀯𑀁 𑀪𑀕𑀯𑀸 𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸𑀦𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀸𑀭𑀬𑁆𑀳𑀸𑀤𑀺𑀓𑀫𑁆𑀫𑀯𑀲𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀢𑀺𑀢𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀤𑀼𑀕𑁆𑀕𑀢𑀺𑀕𑀫𑀦𑁂𑀦 𑀘 𑀲𑀫𑁆𑀧𑀭𑀸𑀬𑁂 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀸 𑀅𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 ‘‘𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀢𑀫𑁆𑀧𑀺 𑀅𑀢𑁆𑀣𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳, 𑀏𑀯𑀁 𑀩𑁆𑀭𑀸𑀳𑁆𑀫𑀡 𑁋

‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀲𑁂𑀲𑀁 ¶ 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀲𑁂𑀲𑀢𑁄 𑀯𑀸 𑀏𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸𑀢𑀺𑀆𑀤𑀻𑀦𑀁 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 ¶ 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀫𑀁 𑀓𑀫𑁆𑀫𑀯𑀺𑀫𑀼𑀔𑀁 𑀚𑀸𑀢𑀺𑀯𑀸𑀤𑁂 𑀧𑀢𑀺𑀢𑀁 ‘‘𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀯𑀲𑀮𑀪𑀸𑀯𑁄 𑀳𑁄𑀢𑀻’’𑀢𑀺 𑀤𑀺𑀝𑁆𑀞𑀺𑀢𑁄 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀏𑀯𑀁 𑀚𑀸𑀢𑀺𑀯𑀸𑀤𑀧𑀝𑀺𑀘𑁆𑀙𑀦𑁆𑀦𑀁 𑀓𑀫𑁆𑀫𑀯𑀸𑀤𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀩𑁆𑀭𑀸𑀳𑁆𑀫𑀡𑀯𑀲𑀮𑀪𑀸𑀯𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀉𑀚𑀼𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑀸𑀢𑀗𑁆𑀕𑀸𑀤𑀺𑀦𑀺𑀤𑀲𑁆𑀲𑀦𑀧𑀚𑁆𑀚𑁄𑀢𑀥𑀸𑀭𑀡𑁂𑀦 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸𑀢𑀺 ¶ 𑀫𑁂𑀢𑁆𑀢𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀳𑀺𑀫𑀯𑀦𑁆𑀢𑀧𑀲𑁆𑀲𑀢𑁄 𑀓𑀺𑀭 𑀤𑁂𑀯𑀢𑀸𑀳𑀺 𑀉𑀩𑁆𑀩𑀸𑀴𑁆𑀳𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀧𑀭𑀺𑀢𑁆𑀢𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀸𑀬 𑀘 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀅𑀬𑀁 𑀢𑀸𑀯 𑀲𑀗𑁆𑀔𑁂𑀧𑁄.

𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀕𑀘𑀭𑀺𑀢𑀸𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑀁 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀤𑁄𑀲𑀘𑀭𑀺𑀢𑀸𑀦𑀁 𑀘𑀢𑀼𑀩𑁆𑀩𑀺𑀥𑀁 𑀫𑁂𑀢𑁆𑀢𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀁, 𑀫𑁄𑀳𑀘𑀭𑀺𑀢𑀸𑀦𑀁 𑀫𑀭𑀡𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺, 𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺, 𑀲𑀤𑁆𑀥𑀸𑀘𑀭𑀺𑀢𑀸𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺, 𑀩𑀼𑀤𑁆𑀥𑀺𑀘𑀭𑀺𑀢𑀸𑀦𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀦𑀸𑀤𑀻𑀦𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀧𑁆𑀧𑀪𑁂𑀤𑀘𑀭𑀺𑀢𑀸𑀦𑀼𑀓𑀽𑀮𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀓𑀣𑁂𑀢𑀺.

𑀅𑀣 𑀔𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀜𑁆𑀘 𑀕𑁄𑀘𑀭𑀕𑀸𑀫𑀜𑁆𑀘 𑀧𑀭𑀺𑀬𑁂𑀲𑀫𑀸𑀦𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀕𑀦𑁆𑀢𑁆𑀯𑀸 ¶ 𑀧𑀘𑁆𑀘𑀦𑁆𑀢𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀦𑀻𑀮𑀓𑀸𑀘𑀫𑀡𑀺𑀲𑀦𑁆𑀦𑀺𑀪𑀲𑀺𑀮𑀸𑀢𑀮𑀁 𑀲𑀻𑀢𑀮𑀖𑀦𑀘𑁆𑀙𑀸𑀬𑀦𑀻𑀮𑀯𑀦𑀲𑀡𑁆𑀟𑀫𑀡𑁆𑀟𑀺𑀢𑀁 𑀫𑀼𑀢𑁆𑀢𑀸𑀢𑀮𑀭𑀚𑀢𑀧𑀝𑁆𑀝𑀲𑀤𑀺𑀲𑀯𑀸𑀮𑀼𑀓𑀸𑀓𑀺𑀡𑁆𑀡𑀪𑀽𑀫𑀺𑀪𑀸𑀕𑀁 𑀲𑀼𑀘𑀺𑀲𑀸𑀢𑀲𑀻𑀢𑀮𑀚𑀮𑀸𑀲𑀬𑀧𑀭𑀺𑀯𑀸𑀭𑀺𑀢𑀁 𑀧𑀩𑁆𑀩𑀢𑀫𑀤𑁆𑀤𑀲𑀁𑀲𑀼. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣𑁂𑀓𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀕𑀸𑀫𑁄 𑀖𑀦𑀦𑀺𑀯𑁂𑀲𑀲𑀦𑁆𑀦𑀺𑀯𑀺𑀝𑁆𑀞𑀓𑀼𑀮𑀲𑀳𑀲𑁆𑀲𑀬𑀼𑀢𑁆𑀢𑁄, 𑀫𑀦𑀼𑀲𑁆𑀲𑀸 𑀘𑁂𑀢𑁆𑀣 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂 𑀧𑀘𑁆𑀘𑀦𑁆𑀢𑁂 𑀧𑀩𑁆𑀩𑀚𑀺𑀢𑀤𑀲𑁆𑀲𑀦𑀲𑁆𑀲 𑀤𑀼𑀮𑁆𑀮𑀪𑀢𑀸𑀬 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀏𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀢𑁂𑀫𑀸𑀲𑀁 𑀯𑀲𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀧𑀜𑁆𑀘𑀧𑀥𑀸𑀦𑀓𑀼𑀝𑀺𑀲𑀢𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀫𑀜𑁆𑀘𑀧𑀻𑀞𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀖𑀝𑀸𑀤𑀻𑀦𑀺 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀧𑀝𑀺𑀬𑀸𑀤𑁂𑀲𑀼𑀁.

𑀪𑀺𑀓𑁆𑀔𑀽 𑀤𑀼𑀢𑀺𑀬𑀤𑀺𑀯𑀲𑁂 𑀅𑀜𑁆𑀜𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣𑀸𑀧𑀺 𑀫𑀦𑀼𑀲𑁆𑀲𑀸 𑀢𑀣𑁂𑀯 𑀉𑀧𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺𑀁𑀲𑀼. 𑀪𑀺𑀓𑁆𑀔𑀽 ‘‘𑀅𑀲𑀢𑀺 𑀅𑀦𑁆𑀢𑀭𑀸𑀬𑁂’’𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀦𑁆𑀤𑀺𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑀸 𑀳𑀼𑀢𑁆𑀯𑀸 𑀬𑀸𑀫𑀕𑀡𑁆𑀟𑀺𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀻𑀮𑀯𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑁂𑀚𑁂𑀦 𑀯𑀺𑀳𑀢𑀢𑁂𑀚𑀸 𑀭𑀼𑀓𑁆𑀔𑀤𑁂𑀯𑀢𑀸 ¶ 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑀸 𑀑𑀭𑀼𑀬𑁆𑀳 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀭𑀸𑀚𑀽𑀳𑀺 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀯𑀸 𑀕𑀸𑀫𑀓𑀸𑀯𑀸𑀲𑀁 𑀕𑀢𑁂𑀳𑀺 𑀕𑀸𑀫𑀯𑀸𑀲𑀻𑀦𑀁 𑀖𑀭𑁂𑀲𑀼 𑀑𑀓𑀸𑀲𑁂 𑀕𑀳𑀺𑀢𑁂 𑀖𑀭𑀫𑀸𑀦𑀼𑀲𑀓𑀸 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀯𑀲𑀦𑁆𑀢𑀸 ‘‘𑀓𑀤𑀸 𑀦𑀼 𑀔𑁄 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀤𑀽𑀭𑀢𑁄 𑀑𑀮𑁄𑀓𑁂𑀦𑁆𑀢𑀺; 𑀏𑀯𑀫𑁂𑀯 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺𑀬𑁄 𑀤𑀽𑀭𑀢𑁄𑀯 𑀑𑀮𑁄𑀓𑁂𑀦𑁆𑀢𑀺 𑁋 ‘‘𑀓𑀤𑀸 𑀦𑀼 𑀔𑁄 𑀪𑀤𑀦𑁆𑀢𑀸 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 ‘‘𑀧𑀞𑀫𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀅𑀯𑀲𑁆𑀲𑀁 𑀢𑁂𑀫𑀸𑀲𑀁 𑀯𑀲𑀺𑀲𑁆𑀲𑀦𑁆𑀢𑀺. 𑀫𑀬𑀁 𑀧𑀦 𑀢𑀸𑀯 𑀘𑀺𑀭𑀁 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀑𑀓𑁆𑀓𑀫𑁆𑀫 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫. 𑀳𑀦𑁆𑀤 𑀫𑀬𑀁 𑀪𑀺𑀓𑁆𑀔𑀽𑀦𑀁 𑀪𑀬𑀸𑀦𑀓𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀫𑀸’’𑀢𑀺. 𑀢𑀸 𑀭𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀲𑀫𑀡𑀥𑀫𑁆𑀫𑀓𑀭𑀡𑀯𑁂𑀮𑀸𑀬 𑀪𑀺𑀁𑀲𑀦𑀓𑀸𑀦𑀺 𑀬𑀓𑁆𑀔𑀭𑀽𑀧𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀢𑀺𑀝𑁆𑀞𑀦𑁆𑀢𑀺, 𑀪𑁂𑀭𑀯𑀲𑀤𑁆𑀤𑀜𑁆𑀘 𑀓𑀭𑁄𑀦𑁆𑀢𑀺. 𑀪𑀺𑀓𑁆𑀔𑀽𑀦𑀁 𑀢𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀸𑀦𑀁 𑀢𑀜𑁆𑀘 𑀲𑀤𑁆𑀤𑀁 𑀲𑀼𑀡𑀦𑁆𑀢𑀸𑀦𑀁 𑀳𑀤𑀬𑀁 𑀨𑀦𑁆𑀤𑀺, 𑀤𑀼𑀩𑁆𑀩𑀡𑁆𑀡𑀸 𑀘 𑀅𑀳𑁂𑀲𑀼𑀁 𑀉𑀧𑁆𑀧𑀡𑁆𑀟𑀼𑀧𑀡𑁆𑀟𑀼𑀓𑀚𑀸𑀢𑀸. 𑀢𑁂𑀦 𑀢𑁂 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑁂𑀲𑀁 𑀅𑀦𑁂𑀓𑀕𑁆𑀕𑀘𑀺𑀢𑁆𑀢𑀸𑀦𑀁 𑀪𑀬𑁂𑀦 𑀘 𑀧𑀼𑀦𑀧𑁆𑀧𑀼𑀦𑀁 𑀲𑀁𑀯𑀺𑀕𑁆𑀕𑀸𑀦𑀁 𑀲𑀢𑀺 𑀲𑀫𑁆𑀫𑀼𑀲𑁆𑀲𑀺. 𑀢𑀢𑁄 𑀦𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀤𑀼𑀕𑁆𑀕𑀦𑁆𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀬𑁄𑀚𑁂𑀲𑀼𑀁. 𑀢𑁂𑀲𑀁 𑀢𑁂𑀦 ¶ 𑀤𑀼𑀕𑁆𑀕𑀦𑁆𑀥𑁂𑀦 𑀦𑀺𑀫𑁆𑀫𑀣𑀺𑀬𑀫𑀸𑀦𑀫𑀺𑀯 𑀫𑀢𑁆𑀣𑀮𑀼𑀗𑁆𑀕𑀁 𑀅𑀳𑁄𑀲𑀺, 𑀩𑀸𑀴𑁆𑀳𑀸 𑀲𑀻𑀲𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀦 𑀘 𑀢𑀁 𑀧𑀯𑀢𑁆𑀢𑀺𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑁄𑀘𑁂𑀲𑀼𑀁.

𑀅𑀣𑁂𑀓𑀤𑀺𑀯𑀲𑀁 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀓𑀸𑀮𑁂 𑀲𑀩𑁆𑀩𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀇𑀫𑀁 𑀯𑀦𑀲𑀡𑁆𑀟𑀁 𑀧𑀯𑀺𑀝𑁆𑀞𑀸𑀦𑀁 𑀓𑀢𑀺𑀧𑀸𑀳𑀁 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀅𑀳𑁄𑀲𑀺 𑀧𑀭𑀺𑀬𑁄𑀤𑀸𑀢𑁄, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀢𑀭𑀳𑀺 𑀧𑀦𑀢𑁆𑀣 𑀓𑀺𑀲𑀸 𑀤𑀼𑀩𑁆𑀩𑀡𑁆𑀡𑀸 𑀉𑀧𑁆𑀧𑀡𑁆𑀟𑀼𑀧𑀡𑁆𑀟𑀼𑀓𑀚𑀸𑀢𑀸, 𑀓𑀺𑀁 𑀯𑁄 𑀇𑀥 𑀅𑀲𑀧𑁆𑀧𑀸𑀬’’𑀦𑁆𑀢𑀺? 𑀢𑀢𑁄 𑀏𑀓𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀁 𑀈𑀤𑀺𑀲𑀜𑁆𑀘 𑀈𑀤𑀺𑀲𑀜𑁆𑀘 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀲𑁆𑀲𑀸𑀫𑀺 𑀘 𑀲𑀼𑀡𑀸𑀫𑀺 𑀘, 𑀈𑀤𑀺𑀲𑀜𑁆𑀘 𑀕𑀦𑁆𑀥𑀁 𑀖𑀸𑀬𑀸𑀫𑀺, 𑀢𑁂𑀦 𑀫𑁂 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀻’’𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀩𑁆𑀩𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑀗𑁆𑀖𑀢𑁆𑀣𑁂𑀭𑁄 𑀆𑀳 𑁋 ‘‘𑀪𑀕𑀯𑀢𑀸 𑀆𑀯𑀼𑀲𑁄 𑀤𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀧𑀜𑁆𑀜𑀢𑁆𑀢𑀸, 𑀅𑀫𑁆𑀳𑀸𑀓𑀜𑁆𑀘 𑀇𑀤𑀁 𑀲𑁂𑀦𑀸𑀲𑀦𑀁 𑀅𑀲𑀧𑁆𑀧𑀸𑀬𑀁, 𑀆𑀬𑀸𑀫𑀸𑀯𑀼𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁, 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀸𑀫𑀸’’𑀢𑀺. ‘‘𑀲𑀸𑀥𑀼 𑀪𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀩𑁆𑀩𑁂 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀼𑀧𑀮𑀺𑀢𑁆𑀢𑀢𑁆𑀢𑀸 𑀓𑀼𑀮𑁂𑀲𑀼 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀏𑀯 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀺𑀁𑀲𑀼.

𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀸 𑀘𑀭𑀺𑀢𑀩𑁆𑀩𑀸𑀢𑀺 𑀫𑀬𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀘𑀸𑀭𑀺𑀓𑀁 𑀘𑀭𑀣𑀸’’𑀢𑀺. 𑀢𑁂 𑀪𑀕𑀯𑀢𑁄 𑀲𑀩𑁆𑀩𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀦𑁆𑀢𑀫𑀲𑁄 𑀘𑀢𑀼𑀧𑁆𑀧𑀸𑀤𑀧𑀻𑀞𑀓𑀝𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀢𑁂𑀲𑀁 𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁 𑀦𑀸𑀤𑁆𑀤𑀲. 𑀅𑀣 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀅𑀜𑁆𑀜𑀁 𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀢𑀼𑀫𑁆𑀳𑁂 𑀯𑀺𑀳𑀭𑀦𑁆𑀢𑀸 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑁂𑀬𑁆𑀬𑀸𑀣. 𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀫𑁂𑀯 𑀲𑁂𑀦𑀸𑀲𑀦𑀁 ¶ 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀣. 𑀲𑀘𑁂 𑀧𑀦 𑀤𑁂𑀯𑀢𑀸𑀳𑀺 𑀅𑀪𑀬𑀁 𑀇𑀘𑁆𑀙𑀣, 𑀇𑀫𑀁 𑀧𑀭𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀣, 𑀏𑀢𑀜𑁆𑀳𑀺 𑀯𑁄 𑀧𑀭𑀺𑀢𑁆𑀢𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀅𑀧𑀭𑁂 𑀧𑀦𑀸𑀳𑀼 𑁋 ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀫𑁂𑀯 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀣𑀸’’𑀢𑀺 𑀇𑀤𑀜𑁆𑀘 𑀯𑀢𑁆𑀯𑀸 𑀪𑀕𑀯𑀸 𑀆𑀳 𑁋 ‘‘𑀅𑀧𑀺𑀘 𑀔𑁄 𑀆𑀭𑀜𑁆𑀜𑀓𑁂𑀦 𑀧𑀭𑀺𑀳𑀭𑀡𑀁 𑀜𑀸𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀸𑀬𑀁𑀧𑀸𑀢𑀁 𑀓𑀭𑀡𑀯𑀲𑁂𑀦 𑀤𑁆𑀯𑁂 𑀫𑁂𑀢𑁆𑀢𑀸, 𑀤𑁆𑀯𑁂 𑀧𑀭𑀺𑀢𑁆𑀢𑀸, 𑀤𑁆𑀯𑁂 𑀅𑀲𑀼𑀪𑀸, 𑀤𑁆𑀯𑁂 𑀫𑀭𑀡𑀲𑁆𑀲𑀢𑀻 𑀅𑀝𑁆𑀞 𑀫𑀳𑀸𑀲𑀁𑀯𑁂𑀕𑀯𑀢𑁆𑀣𑀼𑀲𑀫𑀸𑀯𑀚𑁆𑀚𑀦𑀜𑁆𑀘. 𑀅𑀝𑁆𑀞 𑀫𑀳𑀸𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺 𑀚𑀭𑀸 𑀩𑁆𑀬𑀸𑀥𑀺 𑀫𑀭𑀡𑀁 𑀘𑀢𑁆𑀢𑀸𑀭𑀺 𑀅𑀧𑀸𑀬𑀤𑀼𑀓𑁆𑀔𑀸𑀦𑀻𑀢𑀺 ¶ . 𑀅𑀣 𑀯𑀸 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔’’𑀦𑁆𑀢𑀺. 𑀏𑀯𑀁 𑀪𑀕𑀯𑀸 𑀧𑀭𑀺𑀳𑀭𑀡𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀢𑁆𑀣𑀜𑁆𑀘 𑀧𑀭𑀺𑀢𑁆𑀢𑀢𑁆𑀣𑀜𑁆𑀘 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀛𑀸𑀦𑀢𑁆𑀣𑀜𑁆𑀘 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀻𑀢𑀺.

𑁧𑁪𑁩. 𑀢𑀢𑁆𑀣 𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀇𑀫𑀺𑀲𑁆𑀲𑀸 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀬𑀁 𑀧𑀤𑀯𑀡𑁆𑀡𑀦𑀸 𑁋 𑀓𑀭𑀡𑀻𑀬𑀦𑁆𑀢𑀺 𑀓𑀸𑀢𑀩𑁆𑀩𑀁, 𑀓𑀭𑀡𑀸𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄𑀢𑀺 𑀧𑀝𑀺𑀧𑀤𑀸, 𑀬𑀁 𑀯𑀸 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀳𑀺𑀢𑀁, 𑀢𑀁 𑀲𑀩𑁆𑀩𑀁 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺, 𑀅𑀭𑀡𑀻𑀬𑀢𑁄 𑀦𑀸𑀫 𑀉𑀧𑀕𑀦𑁆𑀢𑀩𑁆𑀩𑀢𑁄. 𑀅𑀢𑁆𑀣𑁂 𑀓𑀼𑀲𑀮𑁂𑀦 𑀅𑀢𑁆𑀣𑀓𑀼𑀲𑀮𑁂𑀦, 𑀅𑀢𑁆𑀣𑀙𑁂𑀓𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀘𑁆𑀘𑀢𑁆𑀢𑀁. 𑀦𑁆𑀢𑀺 𑀦𑀺𑀬𑀫𑀺𑀢𑀉𑀧𑀬𑁄𑀕𑀁. 𑀉𑀪𑀬𑀫𑁆𑀧𑀺 𑀯𑀸 𑀬𑀁 𑀢𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀲𑀦𑁆𑀢𑀁 𑀧𑀤𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. 𑀢𑀢𑁆𑀣 𑀮𑀓𑁆𑀔𑀡𑀢𑁄 𑀲𑀦𑁆𑀢𑀁, 𑀧𑀢𑁆𑀢𑀩𑁆𑀩𑀢𑁄 𑀧𑀤𑀁, 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸. 𑀲𑀓𑁆𑀓𑁄𑀢𑀻𑀢𑀺 𑀲𑀓𑁆𑀓𑁄, 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀚𑀽𑀢𑀺 𑀅𑀚𑁆𑀚𑀯𑀬𑀼𑀢𑁆𑀢𑁄. 𑀲𑀼𑀝𑁆𑀞𑀼 𑀉𑀚𑀽𑀢𑀺 𑀲𑀼𑀳𑀼𑀚𑀼. 𑀲𑀼𑀔𑀁 𑀯𑀘𑁄 𑀅𑀲𑁆𑀫𑀺𑀦𑁆𑀢𑀺 𑀲𑀼𑀯𑀘𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀫𑀼𑀤𑀽𑀢𑀺 𑀫𑀤𑁆𑀤𑀯𑀬𑀼𑀢𑁆𑀢𑁄. 𑀦 𑀅𑀢𑀺𑀫𑀸𑀦𑀻𑀢𑀺 𑀅𑀦𑀢𑀺𑀫𑀸𑀦𑀻.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦 𑀬𑀦𑁆𑀢 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺. 𑀏𑀢𑁆𑀣 𑀢𑀸𑀯 𑀅𑀢𑁆𑀣𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀅𑀓𑀭𑀡𑀻𑀬𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀲𑀺𑀓𑁆𑀔𑀢𑁆𑀢𑀬𑀁 𑀓𑀭𑀡𑀻𑀬𑀁, 𑀲𑀻𑀮𑀯𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀺 𑀅𑀓𑀭𑀡𑀻𑀬𑀁. 𑀢𑀣𑀸 𑀅𑀢𑁆𑀣𑀺 𑀅𑀢𑁆𑀣𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀦𑀢𑁆𑀣𑀓𑀼𑀲𑀮𑁄.

𑀢𑀢𑁆𑀣 𑀬𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀧𑀬𑁄𑀚𑁂𑀢𑀺, 𑀔𑀡𑁆𑀟𑀲𑀻𑀮𑁄 𑀳𑁄𑀢𑀺, 𑀏𑀓𑀯𑀻𑀲𑀢𑀺𑀯𑀺𑀥𑀁 𑀅𑀦𑁂𑀲𑀦𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀯𑁂𑀴𑀼𑀤𑀸𑀦𑀁, 𑀧𑀢𑁆𑀢𑀤𑀸𑀦𑀁, 𑀧𑀼𑀧𑁆𑀨𑀤𑀸𑀦𑀁, 𑀨𑀮𑀤𑀸𑀦𑀁, 𑀤𑀦𑁆𑀢𑀓𑀝𑁆𑀞𑀤𑀸𑀦𑀁, 𑀫𑀼𑀔𑁄𑀤𑀓𑀤𑀸𑀦𑀁, 𑀲𑀺𑀦𑀸𑀦𑀤𑀸𑀦𑀁, 𑀘𑀼𑀡𑁆𑀡𑀤𑀸𑀦𑀁, 𑀫𑀢𑁆𑀢𑀺𑀓𑀸𑀤𑀸𑀦𑀁, 𑀘𑀸𑀝𑀼𑀓𑀫𑁆𑀬𑀢𑀁, 𑀫𑀼𑀕𑁆𑀕𑀲𑀽𑀧𑁆𑀬𑀢𑀁, 𑀧𑀸𑀭𑀺𑀪𑀝𑀼𑀢𑀁, 𑀚𑀗𑁆𑀖𑀧𑁂𑀲𑀦𑀺𑀬𑀁, 𑀯𑁂𑀚𑁆𑀚𑀓𑀫𑁆𑀫𑀁, 𑀤𑀽𑀢𑀓𑀫𑁆𑀫𑀁, 𑀧𑀳𑀺𑀡𑀕𑀫𑀦𑀁, 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑀁, 𑀯𑀢𑁆𑀣𑀼𑀯𑀺𑀚𑁆𑀚𑀁, 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀁, 𑀅𑀗𑁆𑀕𑀯𑀺𑀚𑁆𑀚𑀦𑁆𑀢𑀺. 𑀙𑀩𑁆𑀩𑀺𑀥𑁂 𑀘 𑀅𑀕𑁄𑀘𑀭𑁂 𑀘𑀭𑀢𑀺 ¶ . 𑀲𑁂𑀬𑁆𑀬𑀣𑀺𑀤𑀁 𑁋 𑀯𑁂𑀲𑀺𑀬𑀕𑁄𑀘𑀭𑁂 𑀯𑀺𑀥𑀯𑀸𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀧𑀡𑁆𑀟𑀓𑀪𑀺𑀓𑁆𑀔𑀼𑀦𑀺𑀧𑀸𑀦𑀸𑀕𑀸𑀭𑀕𑁄𑀘𑀭𑁂𑀢𑀺. 𑀲𑀁𑀲𑀝𑁆𑀞𑁄 𑀘 ¶ 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀺𑀲𑀁𑀲𑀕𑁆𑀕𑁂𑀦. 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑀤𑁆𑀥𑀸𑀦𑀺 𑀅𑀧𑁆𑀧𑀲𑀦𑁆𑀦𑀸𑀦𑀺 𑀅𑀦𑁄𑀧𑀸𑀦𑀪𑀽𑀢𑀸𑀦𑀺 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀺 𑀅𑀦𑀢𑁆𑀣𑀓𑀸𑀫𑀸𑀦𑀺 𑀅𑀳𑀺𑀢𑀅𑀨𑀸𑀲𑀼𑀓𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺 𑀪𑀺𑀓𑁆𑀔𑀽𑀦𑀁…𑀧𑁂… 𑀉𑀧𑀸𑀲𑀺𑀓𑀸𑀦𑀁, 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀬𑀁 𑀅𑀦𑀢𑁆𑀣𑀓𑀼𑀲𑀮𑁄.

𑀬𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀧𑀬𑁄𑀚𑁂𑀢𑀺, 𑀅𑀦𑁂𑀲𑀦𑀁 𑀧𑀳𑀸𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀸𑀢𑀼𑀓𑀸𑀫𑁄 𑀲𑀤𑁆𑀥𑀸𑀲𑀻𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁, 𑀲𑀢𑀺𑀲𑀻𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁, 𑀯𑀻𑀭𑀺𑀬𑀲𑀻𑀲𑁂𑀦 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁, 𑀧𑀜𑁆𑀜𑀸𑀲𑀻𑀲𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁 𑀧𑀽𑀭𑁂𑀢𑀺 𑀅𑀬𑀁 𑀅𑀢𑁆𑀣𑀓𑀼𑀲𑀮𑁄.

𑀬𑁄 𑀯𑀸 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑁄𑀥𑀦𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁, 𑀙𑀤𑁆𑀯𑀸𑀭𑁂 𑀖𑀝𑁆𑀝𑀺𑀢𑀸𑀭𑀫𑁆𑀫𑀡𑁂𑀲𑀼 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁, 𑀅𑀦𑁂𑀲𑀦𑀧𑀭𑀺𑀯𑀚𑁆𑀚𑀦𑀯𑀲𑁂𑀦 𑀯𑀺𑀜𑁆𑀜𑀼𑀧𑀲𑀢𑁆𑀣𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀯𑀡𑁆𑀡𑀺𑀢𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑁂𑀦 𑀘 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁, 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁, 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑁂 𑀲𑀸𑀢𑁆𑀣𑀓𑀸𑀤𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑁄𑀥𑁂𑀢𑀺, 𑀅𑀬𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁄.

𑀬𑁄 𑀯𑀸 𑀬𑀣𑀸 𑀊𑀲𑁄𑀤𑀓𑀁 𑀧𑀝𑀺𑀘𑁆𑀘 𑀲𑀁𑀓𑀺𑀮𑀺𑀝𑁆𑀞𑀁 𑀯𑀢𑁆𑀣𑀁 𑀧𑀭𑀺𑀬𑁄𑀤𑀸𑀬𑀢𑀺, 𑀙𑀸𑀭𑀺𑀓𑀁 𑀧𑀝𑀺𑀘𑁆𑀘 𑀆𑀤𑀸𑀲𑁄, 𑀉𑀓𑁆𑀓𑀸𑀫𑀼𑀔𑀁 𑀧𑀝𑀺𑀘𑁆𑀘 𑀚𑀸𑀢𑀭𑀽𑀧𑀁, 𑀢𑀣𑀸 𑀜𑀸𑀡𑀁 𑀧𑀝𑀺𑀘𑁆𑀘 𑀲𑀻𑀮𑀁 𑀯𑁄𑀤𑀸𑀬𑀢𑀻𑀢𑀺 𑀜𑀢𑁆𑀯𑀸 𑀜𑀸𑀡𑁄𑀤𑀓𑁂𑀦 𑀥𑁄𑀯𑀦𑁆𑀢𑁄 𑀲𑀻𑀮𑀁 𑀧𑀭𑀺𑀬𑁄𑀤𑀸𑀧𑁂𑀢𑀺. 𑀬𑀣𑀸 𑀘 𑀓𑀺𑀓𑀻 𑀲𑀓𑀼𑀡𑀺𑀓𑀸 𑀅𑀡𑁆𑀟𑀁, 𑀘𑀫𑀭𑀻𑀫𑀺𑀕𑁄 𑀯𑀸𑀮𑀥𑀺𑀁, 𑀏𑀓𑀧𑀼𑀢𑁆𑀢𑀺𑀓𑀸 𑀦𑀸𑀭𑀻 𑀧𑀺𑀬𑀁 𑀏𑀓𑀧𑀼𑀢𑁆𑀢𑀓𑀁, 𑀏𑀓𑀦𑀬𑀦𑁄 𑀧𑀼𑀭𑀺𑀲𑁄 𑀢𑀁 𑀏𑀓𑀦𑀬𑀦𑀁 𑀭𑀓𑁆𑀔𑀢𑀺, 𑀢𑀣𑀸 𑀅𑀢𑀺𑀯𑀺𑀬 𑀅𑀧𑁆𑀧𑀫𑀢𑁆𑀢𑁄 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑀁 𑀭𑀓𑁆𑀔𑀢𑀺, 𑀲𑀸𑀬𑀁𑀧𑀸𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀦 𑀧𑀲𑁆𑀲𑀢𑀺, 𑀅𑀬𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁄.

𑀬𑁄 𑀯𑀸 𑀧𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀧𑀝𑀺𑀧𑀤𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀢𑀁 𑀧𑀕𑁆𑀕𑀳𑁂𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀅𑀬𑀫𑁆𑀧𑀺 𑀅𑀢𑁆𑀣𑀓𑀼𑀲𑀮𑁄. 𑀬𑁄 𑀯𑀸 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 ¶ 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀅𑀢𑁆𑀣𑀓𑀼𑀲𑀮𑀸𑀦𑀁 𑀅𑀕𑁆𑀕𑁄.

𑀢𑀢𑁆𑀣 𑀬𑁂 𑀇𑀫𑁂 𑀬𑀸𑀯 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑁂𑀦, 𑀬𑀸𑀯 𑀯𑀸 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀧𑀝𑀺𑀧𑀤𑀸𑀬 𑀧𑀕𑁆𑀕𑀳𑀡𑁂𑀦 𑀫𑀕𑁆𑀕𑀨𑀮𑁂𑀦 𑀯𑀡𑁆𑀡𑀺𑀢𑀸 𑀅𑀢𑁆𑀣𑀓𑀼𑀲𑀮𑀸, 𑀢𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀢𑁆𑀣𑀓𑀼𑀲𑀮𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸𑀯𑀺𑀥𑀸 𑀘 𑀢𑁂 𑀪𑀺𑀓𑁆𑀔𑀽. 𑀢𑁂𑀦 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 ‘‘𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸’’𑀢𑀺 𑀆𑀳.

𑀢𑀢𑁄 ¶ ‘‘𑀓𑀺𑀁 𑀓𑀭𑀡𑀻𑀬’’𑀦𑁆𑀢𑀺 𑀢𑁂𑀲𑀁 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁 𑀆𑀳 ‘‘𑀬𑀦𑁆𑀢 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸’’𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀢𑀁 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑀁 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀧𑀤𑀁 𑀧𑀝𑀺𑀯𑁂𑀥𑀯𑀲𑁂𑀦 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑁂𑀦 𑀬𑀁 𑀓𑀭𑀡𑀻𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀦𑁆𑀢𑀺 𑀇𑀫𑀲𑁆𑀲 𑀕𑀸𑀣𑀸𑀧𑀸𑀤𑀲𑁆𑀲 𑀆𑀤𑀺𑀢𑁄 𑀯𑀼𑀢𑁆𑀢𑀫𑁂𑀯 𑀓𑀭𑀡𑀻𑀬𑀦𑁆𑀢𑀺. 𑀅𑀥𑀺𑀓𑀸𑀭𑀢𑁄 𑀅𑀦𑀼𑀯𑀢𑁆𑀢𑀢𑀺 𑀢𑀁 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀸𑀯𑀲𑁂𑀲𑀧𑀸𑀞𑁄 𑀅𑀢𑁆𑀣𑁄, 𑀢𑀲𑁆𑀫𑀸 ‘‘𑀯𑀺𑀳𑀭𑀺𑀢𑀼𑀓𑀸𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀯𑀸 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀮𑁄𑀓𑀺𑀬𑀧𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀧𑀤𑀁 𑀲𑀦𑁆𑀢𑀦𑁆𑀢𑀺 𑀜𑀢𑁆𑀯𑀸 𑀢𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁂𑀦 𑀬𑀦𑁆𑀢𑀁 𑀓𑀭𑀡𑀻𑀬𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀅𑀦𑀼𑀯𑀢𑁆𑀢𑀢𑀺, 𑀢𑀁 𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 ‘‘𑀓𑀭𑀡𑀻𑀬𑀫𑀢𑁆𑀣𑀓𑀼𑀲𑀮𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀆𑀳 ‘‘𑀬𑀦𑁆𑀢 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘𑀸’’𑀢𑀺. 𑀢𑀲𑁆𑀲𑁂𑀯𑀁 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀮𑁄𑀓𑀺𑀬𑀧𑀜𑁆𑀜𑀸𑀬 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀬𑀁 𑀓𑀭𑀡𑀻𑀬𑀁, 𑀢𑀦𑁆𑀢𑀺. 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀓𑀭𑀡𑀻𑀬𑀁, 𑀓𑀭𑀡𑀸𑀭𑀳𑀫𑁂𑀯 𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀺𑀁 𑀧𑀦 𑀢𑀦𑁆𑀢𑀺? 𑀓𑀺𑀫𑀜𑁆𑀜𑀁 𑀲𑀺𑀬𑀸 𑀅𑀜𑁆𑀜𑀢𑁆𑀭 𑀢𑀤𑀥𑀺𑀕𑀫𑀽𑀧𑀸𑀬𑀢𑁄. 𑀓𑀸𑀫𑀜𑁆𑀘𑁂𑀢𑀁 𑀓𑀭𑀡𑀸𑀭𑀳𑀢𑁆𑀣𑁂𑀦 𑀲𑀺𑀓𑁆𑀔𑀢𑁆𑀢𑀬𑀤𑀻𑀧𑀓𑁂𑀦 𑀆𑀤𑀺𑀧𑀤𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 𑀅𑀯𑁄𑀘𑀼𑀫𑁆𑀳𑀸 ‘‘𑀅𑀢𑁆𑀣𑀺 𑀓𑀭𑀡𑀻𑀬𑀁 𑀅𑀢𑁆𑀣𑀺 𑀅𑀓𑀭𑀡𑀻𑀬𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀲𑀺𑀓𑁆𑀔𑀢𑁆𑀢𑀬𑀁 𑀓𑀭𑀡𑀻𑀬’’𑀦𑁆𑀢𑀺. 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑀢𑁆𑀢𑀸 𑀧𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑁂𑀳𑀺𑀘𑀺 𑀯𑀺𑀜𑁆𑀜𑀸𑀢𑀁, 𑀓𑁂𑀳𑀺𑀘𑀺 𑀦 𑀯𑀺𑀜𑁆𑀜𑀸𑀢𑀁. 𑀢𑀢𑁄 𑀬𑁂𑀳𑀺 𑀦 𑀯𑀺𑀜𑁆𑀜𑀸𑀢𑀁, 𑀢𑁂𑀲𑀁 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀬𑀁 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀸𑀢𑀩𑁆𑀩𑀁, 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ¶ ‘‘𑀲𑀓𑁆𑀓𑁄 𑀉𑀚𑀽 𑀘 𑀲𑀼𑀳𑀼𑀚𑀽 𑀘, 𑀲𑀼𑀯𑀘𑁄 𑀘𑀲𑁆𑀲 𑀫𑀼𑀤𑀼 𑀅𑀦𑀢𑀺𑀫𑀸𑀦𑀻’’𑀢𑀺 𑀇𑀫𑀁 𑀢𑀸𑀯 𑀉𑀧𑀟𑁆𑀠𑀕𑀸𑀣𑀁 𑀆𑀳.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑁄 𑀮𑁄𑀓𑀺𑀬𑀧𑀜𑁆𑀜𑀸𑀬 𑀯𑀸 𑀢𑀁 𑀅𑀪𑀺𑀲𑀫𑁂𑀘𑁆𑀘 𑀢𑀤𑀥𑀺𑀕𑀫𑀸𑀬 𑀧𑀝𑀺𑀧𑀚𑁆𑀚𑀫𑀸𑀦𑁄 𑀆𑀭𑀜𑁆𑀜𑀓𑁄 𑀪𑀺𑀓𑁆𑀔𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀧𑀥𑀸𑀦𑀺𑀬𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀲𑀘𑁆𑀘𑀧𑀝𑀺𑀯𑁂𑀥𑀸𑀬 𑀧𑀝𑀺𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄 𑀅𑀲𑁆𑀲, 𑀢𑀣𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀯𑀢𑁆𑀢𑀲𑀫𑀸𑀤𑀸𑀦𑀸𑀤𑀻𑀲𑀼, 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀧𑀝𑀺𑀲𑀗𑁆𑀔𑀭𑀡𑀸𑀤𑀻𑀲𑀼 𑀘 𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀺𑀁 𑀓𑀭𑀡𑀻𑀬𑀸𑀦𑀺, 𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀏𑀯𑀭𑀽𑀧𑁂𑀲𑀼 𑀲𑀓𑁆𑀓𑁄 𑀅𑀲𑁆𑀲 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑀢𑁆𑀣𑁄. 𑀲𑀓𑁆𑀓𑁄 𑀳𑁄𑀦𑁆𑀢𑁄𑀧𑀺 𑀘 𑀢𑀢𑀺𑀬𑀧𑀥𑀸𑀦𑀺𑀬𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀉𑀚𑀼 𑀅𑀲𑁆𑀲. 𑀉𑀚𑀼 𑀳𑁄𑀦𑁆𑀢𑁄𑀧𑀺 𑀘 𑀲𑀓𑀺𑀁 𑀉𑀚𑀼𑀪𑀸𑀯𑁂𑀦 𑀲𑀦𑁆𑀢𑁄𑀲𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀦𑀧𑁆𑀧𑀼𑀦𑀁 𑀅𑀲𑀺𑀣𑀺𑀮𑀓𑀭𑀡𑁂𑀦 𑀲𑀼𑀝𑁆𑀞𑀼𑀢𑀭𑀁 𑀉𑀚𑀼 𑀅𑀲𑁆𑀲. 𑀅𑀲𑀞𑀢𑀸𑀬 𑀯𑀸 𑀉𑀚𑀼, 𑀅𑀫𑀸𑀬𑀸𑀯𑀺𑀢𑀸𑀬 𑀲𑀼𑀳𑀼𑀚𑀼. 𑀓𑀸𑀬𑀯𑀘𑀻𑀯𑀗𑁆𑀓𑀧𑁆𑀧𑀳𑀸𑀦𑁂𑀦 𑀯𑀸 𑀉𑀚𑀼, 𑀫𑀦𑁄𑀯𑀗𑁆𑀓𑀧𑁆𑀧𑀳𑀸𑀦𑁂𑀦 𑀲𑀼𑀳𑀼𑀚𑀼. 𑀅𑀲𑀦𑁆𑀢𑀕𑀼𑀡𑀲𑁆𑀲 𑀯𑀸 𑀅𑀦𑀸𑀯𑀺𑀓𑀭𑀡𑁂𑀦 𑀉𑀚𑀼, 𑀅𑀲𑀦𑁆𑀢𑀕𑀼𑀡𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀮𑀸𑀪𑀲𑁆𑀲 𑀅𑀦𑀥𑀺𑀯𑀸𑀲𑀦𑁂𑀦 𑀲𑀼𑀳𑀼𑀚𑀼. 𑀏𑀯𑀁 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀳𑀺 𑀧𑀼𑀭𑀺𑀫𑀤𑁆𑀯𑀬𑀢𑀢𑀺𑀬𑀲𑀺𑀓𑁆𑀔𑀸𑀳𑀺 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀻𑀳𑀺 𑀘 𑀉𑀚𑀼 𑀘 𑀲𑀼𑀳𑀼𑀚𑀼 𑀘 𑀅𑀲𑁆𑀲.

𑀦 ¶ 𑀓𑁂𑀯𑀮𑀜𑁆𑀘 𑀉𑀚𑀼 𑀘 𑀲𑀼𑀳𑀼𑀚𑀼 𑀘, 𑀅𑀧𑀺𑀘 𑀧𑀦 𑀲𑀼𑀩𑁆𑀩𑀘𑁄 𑀘 𑀅𑀲𑁆𑀲. 𑀬𑁄 𑀳𑀺 𑀧𑀼𑀕𑁆𑀕𑀮𑁄 ‘‘𑀇𑀤𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀁 𑀢𑁂 𑀲𑀼𑀢𑀁, 𑀓𑁄 𑀫𑁂 𑀳𑀼𑀢𑁆𑀯𑀸 𑀯𑀤𑀲𑀺, 𑀓𑀺𑀁 𑀉𑀧𑀚𑁆𑀛𑀸𑀬𑁄 𑀆𑀘𑀭𑀺𑀬𑁄 𑀲𑀦𑁆𑀤𑀺𑀝𑁆𑀞𑁄 𑀲𑀫𑁆𑀪𑀢𑁆𑀢𑁄 𑀯𑀸’’𑀢𑀺 𑀯𑀤𑀢𑀺, 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀸 𑀢𑀁 𑀯𑀺𑀳𑁂𑀞𑁂𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀸 𑀦 𑀢𑀣𑀸 𑀓𑀭𑁄𑀢𑀺, 𑀲𑁄 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀤𑀽𑀭𑁂 𑀳𑁄𑀢𑀺. 𑀬𑁄 𑀧𑀦 𑀑𑀯𑀤𑀺𑀬𑀫𑀸𑀦𑁄 ‘‘𑀲𑀸𑀥𑀼, 𑀪𑀦𑁆𑀢𑁂, 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀯𑀚𑁆𑀚𑀁 𑀦𑀸𑀫 𑀤𑀼𑀤𑁆𑀤𑀲𑀁 𑀳𑁄𑀢𑀺, 𑀧𑀼𑀦𑀧𑀺 𑀫𑀁 𑀏𑀯𑀭𑀽𑀧𑀁 𑀤𑀺𑀲𑁆𑀯𑀸 𑀯𑀤𑁂𑀬𑁆𑀬𑀸𑀣 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀘𑀺𑀭𑀲𑁆𑀲𑀁 𑀫𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀑𑀯𑀸𑀤𑁄 𑀮𑀤𑁆𑀥𑁄’’𑀢𑀺 𑀯𑀤𑀢𑀺, 𑀬𑀣𑀸𑀦𑀼𑀲𑀺𑀝𑁆𑀞𑀜𑁆𑀘 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀅𑀯𑀺𑀤𑀽𑀭𑁂 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀧𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀭𑁄𑀦𑁆𑀢𑁄 𑀲𑀼𑀩𑁆𑀩𑀘𑁄 𑀘 𑀅𑀲𑁆𑀲.

𑀬𑀣𑀸 𑀘 𑀲𑀼𑀯𑀘𑁄, 𑀏𑀯𑀁 𑀫𑀼𑀤𑀼 𑀅𑀲𑁆𑀲. 𑀫𑀼𑀤𑀽𑀢𑀺 𑀕𑀳𑀝𑁆𑀞𑁂𑀳𑀺 𑀤𑀽𑀢𑀕𑀫𑀦𑀧𑁆𑀧𑀳𑀺𑀡𑀕𑀫𑀦𑀸𑀤𑀻𑀲𑀼 𑀦𑀺𑀬𑀼𑀜𑁆𑀚𑀺𑀬𑀫𑀸𑀦𑁄 𑀢𑀢𑁆𑀣 𑀫𑀼𑀤𑀼𑀪𑀸𑀯𑀁 𑀅𑀓𑀢𑁆𑀯𑀸 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀓𑀮𑀩𑁆𑀭𑀳𑁆𑀫𑀘𑀭𑀺𑀬𑁂 𑀘 𑀫𑀼𑀤𑀼 𑀅𑀲𑁆𑀲 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑀼𑀯𑀡𑁆𑀡𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀺𑀬𑁄𑀕𑀓𑁆𑀔𑀫𑁄. 𑀅𑀣 𑀯𑀸 𑀫𑀼𑀤𑀽𑀢𑀺 𑀅𑀪𑀸𑀓𑀼𑀝𑀺𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀲𑀼𑀔𑀲𑀫𑁆𑀪𑀸𑀲𑁄 ¶ 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺 𑀲𑀼𑀢𑀺𑀢𑁆𑀣𑀁 𑀯𑀺𑀬 𑀲𑀼𑀔𑀸𑀯𑀕𑀸𑀳𑁄 𑀅𑀲𑁆𑀲. 𑀦 𑀓𑁂𑀯𑀮𑀜𑁆𑀘 𑀫𑀼𑀤𑀼, 𑀅𑀧𑀺𑀘 𑀧𑀦 𑀅𑀦𑀢𑀺𑀫𑀸𑀦𑀻 𑀅𑀲𑁆𑀲, 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀳𑀺 𑀅𑀢𑀺𑀫𑀸𑀦𑀯𑀢𑁆𑀣𑀽𑀳𑀺 𑀧𑀭𑁂 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺.

𑁧𑁪𑁪. 𑀏𑀯𑀁 𑀪𑀕𑀯𑀸 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀢𑀤𑀥𑀺𑀕𑀫𑀸𑀬 𑀯𑀸 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀘𑁆𑀘𑀁 𑀓𑀭𑀡𑀻𑀬𑀁 𑀯𑀢𑁆𑀯𑀸 𑀧𑀼𑀦 𑀢𑀢𑀼𑀢𑁆𑀢𑀭𑀺𑀧𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀲𑀦𑁆𑀢𑀼𑀲𑁆𑀲𑀓𑁄 𑀘𑀸’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳.

𑀢𑀢𑁆𑀣 ‘‘𑀲𑀦𑁆𑀢𑀼𑀝𑁆𑀞𑀻 𑀘 𑀓𑀢𑀜𑁆𑀜𑀼𑀢𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀦 𑀤𑁆𑀯𑀸𑀤𑀲𑀯𑀺𑀥𑁂𑀦 𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀲𑁆𑀲𑀢𑀻𑀢𑀺 𑀲𑀦𑁆𑀢𑀼𑀲𑁆𑀲𑀓𑁄. 𑀅𑀣 𑀯𑀸 𑀢𑀼𑀲𑁆𑀲𑀢𑀻𑀢𑀺 𑀢𑀼𑀲𑁆𑀲𑀓𑁄, 𑀲𑀓𑁂𑀦 𑀢𑀼𑀲𑁆𑀲𑀓𑁄, 𑀲𑀦𑁆𑀢𑁂𑀦 𑀢𑀼𑀲𑁆𑀲𑀓𑁄, 𑀲𑀫𑁂𑀦 𑀢𑀼𑀲𑁆𑀲𑀓𑁄𑀢𑀺 𑀲𑀦𑁆𑀢𑀼𑀲𑁆𑀲𑀓𑁄. 𑀢𑀢𑁆𑀣 𑀲𑀓𑀁 𑀦𑀸𑀫 ‘‘𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬𑀸’’𑀢𑀺 (𑀫𑀳𑀸𑀯. 𑁭𑁩) 𑀏𑀯𑀁 𑀉𑀧𑀲𑀫𑁆𑀧𑀤𑀫𑀸𑀴𑀓𑁂 𑀉𑀤𑁆𑀤𑀺𑀝𑁆𑀞𑀁 𑀅𑀢𑁆𑀢𑀦𑀸 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀘𑀢𑀼𑀧𑀘𑁆𑀘𑀬𑀚𑀸𑀢𑀁. 𑀢𑁂𑀦 𑀲𑀼𑀦𑁆𑀤𑀭𑁂𑀦 𑀯𑀸 𑀅𑀲𑀼𑀦𑁆𑀤𑀭𑁂𑀦 𑀯𑀸 𑀲𑀓𑁆𑀓𑀘𑁆𑀘𑀁 𑀯𑀸 𑀅𑀲𑀓𑁆𑀓𑀘𑁆𑀘𑀁 𑀯𑀸 𑀤𑀺𑀦𑁆𑀦𑁂𑀦 𑀧𑀝𑀺𑀕𑁆𑀕𑀳𑀡𑀓𑀸𑀮𑁂 𑀧𑀭𑀺𑀪𑁄𑀕𑀓𑀸𑀮𑁂 𑀘 𑀯𑀺𑀓𑀸𑀭𑀫𑀤𑀲𑁆𑀲𑁂𑀢𑁆𑀯𑀸 𑀬𑀸𑀧𑁂𑀦𑁆𑀢𑁄 ‘‘𑀲𑀓𑁂𑀦 𑀢𑀼𑀲𑁆𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀦𑁆𑀢𑀁 𑀦𑀸𑀫 𑀬𑀁 𑀮𑀤𑁆𑀥𑀁 𑀳𑁄𑀢𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀁, 𑀢𑁂𑀦 𑀲𑀦𑁆𑀢𑁂𑀦𑁂𑀯 𑀢𑀼𑀲𑁆𑀲𑀦𑁆𑀢𑁄 𑀢𑀢𑁄 𑀧𑀭𑀁 𑀦 𑀧𑀢𑁆𑀣𑁂𑀦𑁆𑀢𑁄 𑀅𑀢𑁆𑀭𑀺𑀘𑁆𑀙𑀢𑀁 𑀧𑀚𑀳𑀦𑁆𑀢𑁄 ‘‘𑀲𑀦𑁆𑀢𑁂𑀦 𑀢𑀼𑀲𑁆𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀁 𑀦𑀸𑀫 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀦𑀼𑀦𑀬𑀧𑀝𑀺𑀖𑀧𑁆𑀧𑀳𑀸𑀦𑀁. 𑀢𑁂𑀦 𑀲𑀫𑁂𑀦 𑀲𑀩𑁆𑀩𑀸𑀭𑀫𑁆𑀫𑀡𑁂𑀲𑀼 𑀢𑀼𑀲𑁆𑀲𑀦𑁆𑀢𑁄 ‘‘𑀲𑀫𑁂𑀦 𑀢𑀼𑀲𑁆𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀔𑁂𑀦 𑀪𑀭𑀻𑀬𑀢𑀻𑀢𑀺 𑀲𑀼𑀪𑀭𑁄, 𑀲𑀼𑀧𑁄𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀲𑀸𑀮𑀺𑀫𑀁𑀲𑁄𑀤𑀦𑀸𑀤𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑁂𑀧𑀺 𑀤𑀼𑀫𑁆𑀫𑀼𑀔𑀪𑀸𑀯𑀁 𑀅𑀦𑀢𑁆𑀢𑀫𑀦𑀪𑀸𑀯𑀫𑁂𑀯 𑀘 𑀤𑀲𑁆𑀲𑁂𑀢𑀺, 𑀢𑁂𑀲𑀁 𑀯𑀸 𑀲𑀫𑁆𑀫𑀼𑀔𑀸𑀯 𑀢𑀁 𑀧𑀺𑀡𑁆𑀟𑀧𑀸𑀢𑀁 ¶ ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦’’𑀦𑁆𑀢𑀺 𑀅𑀧𑀲𑀸𑀤𑁂𑀦𑁆𑀢𑁄 𑀲𑀸𑀫𑀡𑁂𑀭𑀕𑀳𑀝𑁆𑀞𑀸𑀤𑀻𑀦𑀁 𑀤𑁂𑀢𑀺, 𑀏𑀲 𑀤𑀼𑀩𑁆𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀤𑀽𑀭𑀢𑁄𑀯 𑀧𑀭𑀺𑀯𑀚𑁆𑀚𑁂𑀦𑁆𑀢𑀺 ‘‘𑀤𑀼𑀩𑁆𑀪𑀭𑁄 𑀪𑀺𑀓𑁆𑀔𑀼 𑀦 𑀲𑀓𑁆𑀓𑀸 𑀧𑁄𑀲𑀺𑀢𑀼’’𑀦𑁆𑀢𑀺. 𑀬𑁄 𑀧𑀦 𑀬𑀁𑀓𑀺𑀜𑁆𑀘𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀮𑀪𑀺𑀢𑁆𑀯𑀸 𑀅𑀢𑁆𑀢𑀫𑀦𑁄 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑁄 𑀳𑀼𑀢𑁆𑀯𑀸 𑀬𑀸𑀧𑁂𑀢𑀺, 𑀏𑀲 𑀲𑀼𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑀸 𑀳𑁄𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀪𑀤𑀦𑁆𑀢𑁄 𑀲𑀼𑀪𑀭𑁄 𑀣𑁄𑀓𑀣𑁄𑀓𑁂𑀦𑀧𑀺 ¶ 𑀢𑀼𑀲𑁆𑀲𑀢𑀺, 𑀫𑀬𑀫𑁂𑀯 𑀦𑀁 𑀧𑁄𑀲𑁂𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀧𑁄𑀲𑁂𑀦𑁆𑀢𑀺. 𑀏𑀯𑀭𑀽𑀧𑁄 𑀇𑀥 𑀲𑀼𑀪𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀅𑀧𑁆𑀧𑀁 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀅𑀧𑁆𑀧𑀓𑀺𑀘𑁆𑀘𑁄, 𑀦 𑀓𑀫𑁆𑀫𑀸𑀭𑀸𑀫𑀢𑀸𑀪𑀲𑁆𑀲𑀸𑀭𑀸𑀫𑀢𑀸𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀤𑀺𑀅𑀦𑁂𑀓𑀓𑀺𑀘𑁆𑀘𑀩𑁆𑀬𑀸𑀯𑀝𑁄. 𑀅𑀣 𑀯𑀸 𑀲𑀓𑀮𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀲𑀗𑁆𑀖𑀪𑁄𑀕𑀲𑀸𑀫𑀡𑁂𑀭𑀆𑀭𑀸𑀫𑀺𑀓𑀯𑁄𑀲𑀸𑀲𑀦𑀸𑀤𑀺𑀓𑀺𑀘𑁆𑀘𑀯𑀺𑀭𑀳𑀺𑀢𑁄, 𑀅𑀢𑁆𑀢𑀦𑁄 𑀓𑁂𑀲𑀦𑀔𑀘𑁆𑀙𑁂𑀤𑀦𑀧𑀢𑁆𑀢𑀘𑀻𑀯𑀭𑀧𑀭𑀺𑀓𑀫𑁆𑀫𑀸𑀤𑀺𑀁 𑀓𑀢𑁆𑀯𑀸 𑀲𑀫𑀡𑀥𑀫𑁆𑀫𑀓𑀺𑀘𑁆𑀘𑀧𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀮𑁆𑀮𑀳𑀼𑀓𑀸 𑀯𑀼𑀢𑁆𑀢𑀺 𑀅𑀲𑁆𑀲𑀸𑀢𑀺 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺. 𑀬𑀣𑀸 𑀏𑀓𑀘𑁆𑀘𑁄 𑀩𑀳𑀼𑀪𑀡𑁆𑀟𑁄 𑀪𑀺𑀓𑁆𑀔𑀼 𑀤𑀺𑀲𑀸𑀧𑀓𑁆𑀓𑀫𑀦𑀓𑀸𑀮𑁂 𑀩𑀳𑀼𑀁 𑀧𑀢𑁆𑀢𑀘𑀻𑀯𑀭𑀧𑀘𑁆𑀘𑀢𑁆𑀣𑀭𑀡𑀢𑁂𑀮𑀕𑀼𑀴𑀸𑀤𑀺𑀁 𑀫𑀳𑀸𑀚𑀦𑁂𑀦 𑀲𑀻𑀲𑀪𑀸𑀭𑀓𑀝𑀺𑀪𑀸𑀭𑀸𑀤𑀻𑀳𑀺 𑀉𑀘𑁆𑀘𑀸𑀭𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀏𑀯𑀁 𑀅𑀳𑀼𑀢𑁆𑀯𑀸 𑀬𑁄 𑀅𑀧𑁆𑀧𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀧𑀢𑁆𑀢𑀘𑀻𑀯𑀭𑀸𑀤𑀺𑀅𑀝𑁆𑀞𑀲𑀫𑀡𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀫𑁂𑀯 𑀧𑀭𑀺𑀳𑀭𑀢𑀺, 𑀤𑀺𑀲𑀸𑀧𑀓𑁆𑀓𑀫𑀦𑀓𑀸𑀮𑁂 𑀧𑀓𑁆𑀔𑀻 𑀲𑀓𑀼𑀡𑁄 𑀯𑀺𑀬 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺, 𑀏𑀯𑀭𑀽𑀧𑁄 𑀇𑀥 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀲𑁆𑀲𑀸𑀢𑀺 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄, 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀲𑀼 𑀭𑀸𑀕𑀸𑀤𑀺𑀯𑀲𑁂𑀦 𑀅𑀦𑀼𑀤𑁆𑀥𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀧𑀓𑁄𑀢𑀺 𑀯𑀺𑀜𑁆𑀜𑀽 𑀯𑀺𑀪𑀸𑀯𑀻 𑀧𑀜𑁆𑀜𑀯𑀸, 𑀲𑀻𑀮𑀸𑀦𑀼𑀭𑀓𑁆𑀔𑀡𑀧𑀜𑁆𑀜𑀸𑀬 𑀘𑀻𑀯𑀭𑀸𑀤𑀺𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀆𑀯𑀸𑀲𑀸𑀤𑀺𑀲𑀢𑁆𑀢𑀲𑀧𑁆𑀧𑀸𑀬𑀧𑀭𑀺𑀚𑀸𑀦𑀦𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦 𑀧𑀕𑀩𑁆𑀪𑁄𑀢𑀺 𑀅𑀧𑁆𑀧𑀕𑀩𑁆𑀪𑁄, 𑀅𑀝𑁆𑀞𑀝𑁆𑀞𑀸𑀦𑁂𑀦 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦, 𑀘𑀢𑀼𑀝𑁆𑀞𑀸𑀦𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑁂𑀦, 𑀅𑀦𑁂𑀓𑀝𑁆𑀞𑀸𑀦𑁂𑀦 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦 𑀘 𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀝𑁆𑀞𑀸𑀦𑀁 𑀓𑀸𑀬𑀧𑀸𑀕𑀩𑁆𑀪𑀺𑀬𑀁 (𑀫𑀳𑀸𑀦𑀺. 𑁮𑁭) 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀪𑁄𑀚𑀦𑀲𑀸𑀮𑀸𑀚𑀦𑁆𑀢𑀸𑀖𑀭𑀦𑁆𑀳𑀸𑀦𑀢𑀺𑀢𑁆𑀣𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀅𑀦𑁆𑀢𑀭𑀖𑀭𑀧𑀯𑁂𑀲𑀦𑁂𑀲𑀼 𑀓𑀸𑀬𑁂𑀦 𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀫𑀚𑁆𑀛𑁂 𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀦𑀺𑀲𑀻𑀤𑀢𑀺, 𑀧𑀸𑀤𑁂 𑀧𑀸𑀤𑀫𑁄𑀤𑀳𑀺𑀢𑁆𑀯𑀸 𑀯𑀸𑀢𑀺 𑀏𑀯𑀫𑀸𑀤𑀺, 𑀢𑀣𑀸 𑀕𑀡𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂𑀢𑀺 𑀘𑀢𑀼𑀧𑀭𑀺𑀲𑀲𑀦𑁆𑀦𑀺𑀧𑀸𑀢𑁂, 𑀢𑀣𑀸 𑀯𑀼𑀟𑁆𑀠𑀢𑀭𑁂 𑀧𑀼𑀕𑁆𑀕𑀮𑁂. 𑀪𑁄𑀚𑀦𑀲𑀸𑀮𑀸𑀬𑀁 𑀧𑀦 𑀯𑀼𑀟𑁆𑀠𑀸𑀦𑀁 𑀆𑀲𑀦𑀁 𑀦 𑀤𑁂𑀢𑀺, 𑀦𑀯𑀸𑀦𑀁 𑀆𑀲𑀦𑀁 𑀧𑀝𑀺𑀩𑀸𑀳𑀢𑀺, 𑀢𑀣𑀸 𑀚𑀦𑁆𑀢𑀸𑀖𑀭𑁂. 𑀯𑀼𑀟𑁆𑀠𑁂 𑀘𑁂𑀢𑁆𑀣 𑀅𑀦𑀸𑀧𑀼𑀘𑁆𑀙𑀸 𑀅𑀕𑁆𑀕𑀺𑀚𑀸𑀮𑀦𑀸𑀤𑀻𑀦𑀺 𑀓𑀭𑁄𑀢𑀺. 𑀦𑁆𑀳𑀸𑀦𑀢𑀺𑀢𑁆𑀣𑁂 𑀘 𑀬𑀤𑀺𑀤𑀁 ‘‘𑀤𑀳𑀭𑁄 𑀯𑀼𑀟𑁆𑀠𑁄𑀢𑀺 𑀧𑀫𑀸𑀡𑀁 𑀅𑀓𑀢𑁆𑀯𑀸 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀦𑁆𑀳𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁 ¶ , 𑀢𑀫𑁆𑀧𑀺 𑀅𑀦𑀸𑀤𑀺𑀬𑀦𑁆𑀢𑁄 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀯𑀼𑀟𑁆𑀠𑁂 𑀘 𑀦𑀯𑁂 𑀘 𑀩𑀸𑀥𑁂𑀢𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂 𑀧𑀦 𑀅𑀕𑁆𑀕𑀸𑀲𑀦𑀅𑀕𑁆𑀕𑁄𑀤𑀓𑀅𑀕𑁆𑀕𑀧𑀺𑀡𑁆𑀟𑀢𑁆𑀣𑀁 𑀯𑀼𑀟𑁆𑀠𑀸𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀬𑀸𑀢𑀺 𑀩𑀸𑀳𑀸𑀬 ¶ 𑀩𑀸𑀳𑀁 𑀧𑀳𑀭𑀦𑁆𑀢𑁄, 𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀦𑁂 𑀯𑀼𑀟𑁆𑀠𑀸𑀦𑀁 𑀧𑀞𑀫𑀢𑀭𑀁 𑀧𑀯𑀺𑀲𑀢𑀺, 𑀤𑀳𑀭𑁂𑀳𑀺 𑀓𑀸𑀬𑀓𑀻𑀴𑀦𑀁 𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀺.

𑀘𑀢𑀼𑀝𑁆𑀞𑀸𑀦𑀁 𑀯𑀘𑀻𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀅𑀦𑁆𑀢𑀭𑀖𑀭𑁂𑀲𑀼 𑀅𑀧𑁆𑀧𑀢𑀺𑀭𑀽𑀧𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀫𑀚𑁆𑀛𑁂 𑀅𑀦𑀸𑀧𑀼𑀘𑁆𑀙𑀸 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀣𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀡𑁂 𑀯𑀼𑀟𑁆𑀠𑀢𑀭𑁂 𑀧𑀼𑀕𑁆𑀕𑀮𑁂 𑀘. 𑀢𑀢𑁆𑀣 𑀫𑀦𑀼𑀲𑁆𑀲𑁂𑀳𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀼𑀟𑁆𑀠𑀢𑀭𑀁 𑀅𑀦𑀸𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀦𑁆𑀢𑀭𑀖𑀭𑁂 𑀧𑀦 ‘‘𑀇𑀢𑁆𑀣𑀦𑁆𑀦𑀸𑀫𑁂 𑀓𑀺𑀁 𑀅𑀢𑁆𑀣𑀺, 𑀓𑀺𑀁 𑀬𑀸𑀕𑀼 𑀉𑀤𑀸𑀳𑀼 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁, 𑀓𑀺𑀁 𑀫𑁂 𑀤𑀲𑁆𑀲𑀲𑀺, 𑀓𑀺𑀫𑀚𑁆𑀚 𑀔𑀸𑀤𑀺𑀲𑁆𑀲𑀸𑀫𑀺, 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀓𑀺𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀤𑀫𑀸𑀤𑀺𑀁 𑀪𑀸𑀲𑀢𑀺.

𑀅𑀦𑁂𑀓𑀝𑁆𑀞𑀸𑀦𑀁 𑀫𑀦𑁄𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑀸𑀬𑀯𑀸𑀘𑀸𑀳𑀺 𑀅𑀚𑁆𑀛𑀸𑀘𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀫𑀦𑀲𑀸 𑀏𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀅𑀧𑁆𑀧𑀢𑀺𑀭𑀽𑀧𑀯𑀺𑀢𑀓𑁆𑀓𑀦𑀁.

𑀓𑀼𑀮𑁂𑀲𑁆𑀯𑀦𑀦𑀼𑀕𑀺𑀤𑁆𑀥𑁄𑀢𑀺 𑀬𑀸𑀦𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺, 𑀢𑁂𑀲𑀼 𑀧𑀘𑁆𑀘𑀬𑀢𑀡𑁆𑀳𑀸𑀬 𑀯𑀸 𑀅𑀦𑀦𑀼𑀮𑁄𑀫𑀺𑀬𑀕𑀺𑀳𑀺𑀲𑀁𑀲𑀕𑁆𑀕𑀯𑀲𑁂𑀦 𑀯𑀸 𑀅𑀦𑀦𑀼𑀕𑀺𑀤𑁆𑀥𑁄, 𑀦 𑀲𑀳𑀲𑁄𑀓𑀻, 𑀦 𑀲𑀳𑀦𑀦𑁆𑀤𑀻, 𑀦 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀦 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀦 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑀸 𑀬𑁄𑀕𑀫𑀸𑀧𑀚𑁆𑀚𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀲𑁆𑀲𑀸 𑀘 𑀕𑀸𑀣𑀸𑀬 𑀬𑀁 ‘‘𑀲𑀼𑀯𑀘𑁄 𑀘𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀸’’𑀢𑀺 𑀯𑀘𑀦𑀁, 𑀢𑀁 𑀲𑀩𑁆𑀩𑀧𑀤𑁂𑀳𑀺 𑀲𑀤𑁆𑀥𑀺𑀁 ‘‘𑀲𑀦𑁆𑀢𑀼𑀲𑁆𑀲𑀓𑁄 𑀘 𑀅𑀲𑁆𑀲, 𑀲𑀼𑀪𑀭𑁄 𑀘 𑀅𑀲𑁆𑀲𑀸’’𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁.

𑁧𑁪𑁫. 𑀏𑀯𑀁 𑀪𑀕𑀯𑀸 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀢𑀤𑀥𑀺𑀕𑀫𑀸𑀬 𑀯𑀸 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑀼𑀢𑁆𑀢𑀭𑀺𑀧𑀺 𑀓𑀭𑀡𑀻𑀬𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀇𑀤𑀸𑀦𑀺 𑀅𑀓𑀭𑀡𑀻𑀬𑀫𑁆𑀧𑀺 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑁄 ‘‘𑀦 𑀘 𑀔𑀼𑀤𑁆𑀤𑀫𑀸𑀘𑀭𑁂 𑀓𑀺𑀜𑁆𑀘𑀺, 𑀬𑁂𑀦 𑀯𑀺𑀜𑁆𑀜𑀽 𑀧𑀭𑁂 𑀉𑀧𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀁 𑀉𑀧𑀟𑁆𑀠𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀏𑀯𑀫𑀺𑀫𑀁 𑀓𑀭𑀡𑀻𑀬𑀁 𑀓𑀭𑁄𑀦𑁆𑀢𑁄 𑀬𑀁 𑀢𑀁 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀔𑀼𑀤𑁆𑀤𑀁 𑀮𑀸𑀫𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦 𑀘 𑀔𑀼𑀤𑁆𑀤𑀁 𑀲𑀫𑀸𑀘𑀭𑁂. 𑀅𑀲𑀫𑀸𑀘𑀭𑀦𑁆𑀢𑁄 𑀘 𑀦 𑀓𑁂𑀯𑀮𑀁 𑀑𑀴𑀸𑀭𑀺𑀓𑀁, 𑀓𑀺𑀁 𑀧𑀦 𑀓𑀺𑀜𑁆𑀘𑀺 𑀦 𑀲𑀫𑀸𑀘𑀭𑁂, 𑀅𑀧𑁆𑀧𑀫𑀢𑁆𑀢𑀓𑀁 𑀅𑀡𑀼𑀫𑀢𑁆𑀢𑀫𑁆𑀧𑀺 𑀦 𑀲𑀫𑀸𑀘𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁄 ¶ 𑀢𑀲𑁆𑀲 𑀲𑀫𑀸𑀘𑀸𑀭𑁂 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯𑀸𑀤𑀻𑀦𑀯𑀁 𑀤𑀲𑁆𑀲𑁂𑀢𑀺 ‘‘𑀬𑁂𑀦 𑀯𑀺𑀜𑁆𑀜𑀽 𑀧𑀭𑁂 𑀉𑀧𑀯𑀤𑁂𑀬𑁆𑀬𑀼’’𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀯𑀺𑀜𑁆𑀜𑀽 𑀧𑀭𑁂 𑀅𑀧𑁆𑀧𑀫𑀸𑀡𑀁. 𑀢𑁂 𑀳𑀺 𑀅𑀦𑀯𑀚𑁆𑀚𑀁 𑀯𑀸 𑀲𑀸𑀯𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀅𑀧𑁆𑀧𑀲𑀸𑀯𑀚𑁆𑀚𑀁 𑀯𑀸 𑀫𑀳𑀸𑀲𑀸𑀯𑀚𑁆𑀚𑀁. 𑀯𑀺𑀜𑁆𑀜𑀽 𑀏𑀯 𑀧𑀦 𑀧𑀫𑀸𑀡𑀁. 𑀢𑁂 𑀳𑀺 𑀅𑀦𑀼𑀯𑀺𑀘𑁆𑀘 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀯𑀡𑁆𑀡𑀸𑀭𑀳𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑀺𑀜𑁆𑀜𑀽 𑀧𑀭𑁂’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀪𑀕𑀯𑀸 𑀇𑀫𑀸𑀳𑀺 𑀅𑀟𑁆𑀠𑀢𑁂𑀬𑁆𑀬𑀸𑀳𑀺 𑀕𑀸𑀣𑀸𑀳𑀺 𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑀲𑁆𑀲, 𑀢𑀤𑀥𑀺𑀕𑀫𑀸𑀬 ¶ 𑀯𑀸 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀺𑀲𑁂𑀲𑀢𑁄 𑀆𑀭𑀜𑁆𑀜𑀓𑀲𑁆𑀲 𑀆𑀭𑀜𑁆𑀜𑀓𑀲𑀻𑀲𑁂𑀦 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑀸𑀦𑀁 𑀓𑀭𑀡𑀻𑀬𑀸𑀓𑀭𑀡𑀻𑀬𑀪𑁂𑀤𑀁 𑀓𑀫𑁆𑀫𑀝𑁆𑀞𑀸𑀦𑀽𑀧𑀘𑀸𑀭𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀲𑁆𑀲 𑀤𑁂𑀯𑀢𑀸𑀪𑀬𑀲𑁆𑀲 𑀧𑀝𑀺𑀖𑀸𑀢𑀸𑀬 𑀧𑀭𑀺𑀢𑁆𑀢𑀢𑁆𑀣𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀜𑁆𑀘 ‘‘𑀲𑀼𑀔𑀺𑀦𑁄 𑀯 𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀢𑁆𑀢𑀓𑀣𑀁 𑀓𑀣𑁂𑀢𑀼𑀫𑀸𑀭𑀤𑁆𑀥𑁄.

𑀢𑀢𑁆𑀣 𑀲𑀼𑀔𑀺𑀦𑁄𑀢𑀺 𑀲𑀼𑀔𑀲𑀫𑀗𑁆𑀕𑀺𑀦𑁄. 𑀔𑁂𑀫𑀺𑀦𑁄𑀢𑀺 𑀔𑁂𑀫𑀯𑀦𑁆𑀢𑁄, 𑀅𑀪𑀬𑀸 𑀦𑀺𑀭𑀼𑀧𑀤𑁆𑀤𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀸. 𑀲𑀢𑁆𑀢𑀸𑀢𑀺 𑀧𑀸𑀡𑀺𑀦𑁄. 𑀲𑀼𑀔𑀺𑀢𑀢𑁆𑀢𑀸𑀢𑀺 𑀲𑀼𑀔𑀺𑀢𑀘𑀺𑀢𑁆𑀢𑀸. 𑀏𑀢𑁆𑀣 𑀘 𑀓𑀸𑀬𑀺𑀓𑁂𑀦 𑀲𑀼𑀔𑁂𑀦 𑀲𑀼𑀔𑀺𑀦𑁄, 𑀫𑀸𑀦𑀲𑁂𑀦 𑀲𑀼𑀔𑀺𑀢𑀢𑁆𑀢𑀸, 𑀢𑀤𑀼𑀪𑀬𑁂𑀦𑀸𑀧𑀺 𑀲𑀩𑁆𑀩𑀪𑀬𑀽𑀧𑀤𑁆𑀤𑀯𑀯𑀺𑀕𑀫𑁂𑀦 𑀯𑀸 𑀔𑁂𑀫𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀲𑁆𑀫𑀸 𑀧𑀦 𑀏𑀯𑀁 𑀯𑀼𑀢𑁆𑀢𑀁? 𑀫𑁂𑀢𑁆𑀢𑀸𑀪𑀸𑀯𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁. 𑀏𑀯𑀜𑁆𑀳𑀺 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽’’𑀢𑀺 𑀯𑀸, ‘‘𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺 𑀯𑀸, ‘‘𑀲𑀼𑀔𑀺𑀢𑀢𑁆𑀢𑀸 𑀳𑁄𑀦𑁆𑀢𑀽’’𑀢𑀺 𑀯𑀸.

𑁧𑁪𑁬. 𑀏𑀯𑀁 𑀬𑀸𑀯 𑀉𑀧𑀘𑀸𑀭𑀢𑁄 𑀅𑀧𑁆𑀧𑀦𑀸𑀓𑁄𑀝𑀺, 𑀢𑀸𑀯 𑀲𑀗𑁆𑀔𑁂𑀧𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀓𑁂𑀘𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀅𑀣 𑀯𑀸 𑀬𑀲𑁆𑀫𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀦 𑀆𑀤𑀺𑀓𑁂𑀦𑁂𑀯 𑀏𑀓𑀢𑁆𑀢𑁂 𑀲𑀡𑁆𑀞𑀸𑀢𑀺, 𑀆𑀭𑀫𑁆𑀫𑀡𑀧𑁆𑀧𑀪𑁂𑀤𑀁 𑀧𑀦 𑀅𑀦𑀼𑀕𑀦𑁆𑀢𑁆𑀯𑀸 𑀓𑀫𑁂𑀦 𑀲𑀡𑁆𑀞𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀲𑀣𑀸𑀯𑀭𑀸𑀤𑀺𑀤𑀼𑀓𑀢𑀺𑀓𑀧𑁆𑀧𑀪𑁂𑀤𑁂 𑀆𑀭𑀫𑁆𑀫𑀡𑁂 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀡𑁆𑀞𑀸𑀦𑀢𑁆𑀣𑀫𑁆𑀧𑀺 ‘‘𑀬𑁂 𑀓𑁂𑀘𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀅𑀣 𑀯𑀸 𑀬𑀲𑁆𑀫𑀸 𑀬𑀲𑁆𑀲 𑀬𑀁 𑀆𑀭𑀫𑁆𑀫𑀡𑀁 𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀲𑁆𑀲 𑀢𑀢𑁆𑀣 𑀘𑀺𑀢𑁆𑀢𑀁 𑀲𑀼𑀔𑀁 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀬𑀲𑁆𑀲 𑀬𑀁 𑀯𑀺𑀪𑀽𑀢𑀁 𑀆𑀭𑀫𑁆𑀫𑀡𑀁, 𑀢𑀲𑁆𑀲 𑀢𑀢𑁆𑀣 𑀘𑀺𑀢𑁆𑀢𑀁 𑀲𑀡𑁆𑀞𑀸𑀧𑁂𑀢𑀼𑀓𑀸𑀫𑁄 𑀢𑀲𑀣𑀸𑀯𑀭𑀸𑀤𑀺𑀤𑀼𑀓𑀢𑁆𑀢𑀺𑀓𑀆𑀭𑀫𑁆𑀫𑀡𑀧𑁆𑀧𑀪𑁂𑀤𑀤𑀻𑀧𑀓𑀁 ‘‘𑀬𑁂 𑀓𑁂𑀘𑀻’’𑀢𑀺 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀏𑀢𑁆𑀣 ¶ 𑀳𑀺 𑀢𑀲𑀣𑀸𑀯𑀭𑀤𑀼𑀓𑀁 𑀤𑀺𑀝𑁆𑀞𑀸𑀤𑀺𑀝𑁆𑀞𑀤𑀼𑀓𑀁 𑀤𑀽𑀭𑀲𑀦𑁆𑀢𑀺𑀓𑀤𑀼𑀓𑀁 𑀪𑀽𑀢𑀲𑀫𑁆𑀪𑀯𑁂𑀲𑀺𑀤𑀼𑀓𑀦𑁆𑀢𑀺 𑀘𑀢𑁆𑀢𑀸𑀭𑀺 𑀤𑀼𑀓𑀸𑀦𑀺, 𑀤𑀻𑀖𑀸𑀤𑀻𑀳𑀺 𑀘 𑀙𑀳𑀺 𑀧𑀤𑁂𑀳𑀺 𑀫𑀚𑁆𑀛𑀺𑀫𑀧𑀤𑀲𑁆𑀲 𑀢𑀻𑀲𑀼, 𑀅𑀡𑀼𑀓𑀧𑀤𑀲𑁆𑀲 𑀘 𑀤𑁆𑀯𑀻𑀲𑀼 𑀢𑀺𑀓𑁂𑀲𑀼 𑀅𑀢𑁆𑀣𑀲𑀫𑁆𑀪𑀯𑀢𑁄 𑀤𑀻𑀖𑀭𑀲𑁆𑀲𑀫𑀚𑁆𑀛𑀺𑀫𑀢𑁆𑀢𑀺𑀓𑀁 𑀫𑀳𑀦𑁆𑀢𑀸𑀡𑀼𑀓𑀫𑀚𑁆𑀛𑀺𑀫𑀢𑁆𑀢𑀺𑀓𑀁 𑀣𑀽𑀮𑀸𑀡𑀼𑀓𑀫𑀚𑁆𑀛𑀺𑀫𑀢𑁆𑀢𑀺𑀓𑀦𑁆𑀢𑀺 𑀢𑀬𑁄 𑀢𑀺𑀓𑁂 𑀤𑀻𑀧𑁂𑀢𑀺. 𑀢𑀢𑁆𑀣 𑀬𑁂 𑀓𑁂𑀘𑀻𑀢𑀺 𑀅𑀦𑀯𑀲𑁂𑀲𑀯𑀘𑀦𑀁. 𑀧𑀸𑀡𑀸 𑀏𑀯 𑀪𑀽𑀢𑀸 𑀧𑀸𑀡𑀪𑀽𑀢𑀸. 𑀅𑀣 𑀯𑀸 𑀧𑀸𑀡𑀦𑁆𑀢𑀻𑀢𑀺 𑀧𑀸𑀡𑀸. 𑀏𑀢𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀝𑀺𑀩𑀤𑁆𑀥𑁂 𑀧𑀜𑁆𑀘𑀯𑁄𑀓𑀸𑀭𑀲𑀢𑁆𑀢𑁂 𑀕𑀡𑁆𑀳𑀸𑀢𑀺. 𑀪𑀯𑀦𑁆𑀢𑀻𑀢𑀺 𑀪𑀽𑀢𑀸. 𑀏𑀢𑁂𑀦 𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑀲𑀢𑁆𑀢𑁂 𑀕𑀡𑁆𑀳𑀸𑀢𑀺. 𑀅𑀢𑁆𑀣𑀻𑀢𑀺 𑀲𑀦𑁆𑀢𑀺, 𑀲𑀁𑀯𑀺𑀚𑁆𑀚𑀦𑁆𑀢𑀺.

𑀏𑀯𑀁 ‘‘𑀬𑁂 𑀓𑁂𑀘𑀺 𑀧𑀸𑀡𑀪𑀽𑀢𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀤𑀼𑀓𑀢𑁆𑀢𑀺𑀓𑁂𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑁂 𑀲𑀩𑁆𑀩𑁂 𑀲𑀢𑁆𑀢𑁂 𑀏𑀓𑀚𑁆𑀛𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑁂𑀧𑀺 𑀢𑁂 𑀢𑀲𑀸 𑀯𑀸 𑀣𑀸𑀯𑀭𑀸 𑀯𑀸 𑀅𑀦𑀯𑀲𑁂𑀲𑀸𑀢𑀺 𑀇𑀫𑀺𑀦𑀸 𑀤𑀼𑀓𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀢𑀲𑀦𑁆𑀢𑀻𑀢𑀺 𑀢𑀲𑀸, 𑀲𑀢𑀡𑁆𑀳𑀸𑀦𑀁 𑀲𑀪𑀬𑀸𑀦𑀜𑁆𑀘𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀣𑀸𑀯𑀭𑀸, 𑀧𑀳𑀻𑀦𑀢𑀡𑁆𑀳𑀸𑀪𑀬𑀸𑀦𑀁 𑀅𑀭𑀳𑀢𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀢𑁂𑀲𑀁 𑀅𑀯𑀲𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀸, 𑀲𑀩𑁆𑀩𑁂𑀧𑀻𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀬𑀜𑁆𑀘 𑀤𑀼𑀢𑀺𑀬𑀕𑀸𑀣𑀸𑀬 𑀅𑀦𑁆𑀢𑁂 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀤𑀼𑀓𑀢𑀺𑀓𑁂𑀳𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑁋 𑀬𑁂 𑀓𑁂𑀘𑀺 𑀧𑀸𑀡𑀪𑀽𑀢𑀢𑁆𑀣𑀺 𑀢𑀲𑀸 𑀯𑀸 𑀣𑀸𑀯𑀭𑀸 𑀯𑀸 𑀅𑀦𑀯𑀲𑁂𑀲𑀸, 𑀇𑀫𑁂𑀧𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀪𑀯𑀦𑁆𑀢𑀼 𑀲𑀼𑀔𑀺𑀢𑀢𑁆𑀢𑀸. 𑀏𑀯𑀁 𑀬𑀸𑀯 𑀪𑀽𑀢𑀸 𑀯𑀸 𑀲𑀫𑁆𑀪𑀯𑁂𑀲𑀻 𑀯𑀸 𑀇𑀫𑁂𑀧𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀪𑀯𑀦𑁆𑀢𑀼 𑀲𑀼𑀔𑀺𑀢𑀢𑁆𑀢𑀸𑀢𑀺.

𑀇𑀤𑀸𑀦𑀺 𑀤𑀻𑀖𑀭𑀲𑁆𑀲𑀫𑀚𑁆𑀛𑀺𑀫𑀸𑀤𑀺𑀢𑀺𑀓𑀢𑁆𑀢𑀬𑀤𑀻𑀧𑀓𑁂𑀲𑀼 𑀤𑀻𑀖𑀸 𑀯𑀸𑀢𑀺𑀆𑀤𑀻𑀲𑀼 𑀙𑀲𑀼 𑀧𑀤𑁂𑀲𑀼 𑀤𑀻𑀖𑀸𑀢𑀺 𑀤𑀻𑀖𑀢𑁆𑀢𑀪𑀸𑀯𑀸 𑀦𑀸𑀕𑀫𑀘𑁆𑀙𑀕𑁄𑀥𑀸𑀤𑀬𑁄. 𑀅𑀦𑁂𑀓𑀩𑁆𑀬𑀸𑀫𑀲𑀢𑀧𑁆𑀧𑀫𑀸𑀡𑀸𑀧𑀺 𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀦𑀸𑀕𑀸𑀦𑀁 𑀅𑀢𑁆𑀢𑀪𑀸𑀯𑀸 𑀅𑀦𑁂𑀓𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀫𑀘𑁆𑀙𑀕𑁄𑀥𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑀸 𑀳𑁄𑀦𑁆𑀢𑀺. 𑀫𑀳𑀦𑁆𑀢𑀸𑀢𑀺 𑀫𑀳𑀦𑁆𑀢𑀢𑁆𑀢𑀪𑀸𑀯𑀸 𑀚𑀮𑁂 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄, 𑀣𑀮𑁂 𑀳𑀢𑁆𑀣𑀺𑀦𑀸𑀕𑀸𑀤𑀬𑁄, 𑀅𑀫𑀦𑀼𑀲𑁆𑀲𑁂𑀲𑀼 𑀤𑀸𑀦𑀯𑀸𑀤𑀬𑁄. 𑀆𑀳 𑀘 𑁋 ‘‘𑀭𑀸𑀳𑀼𑀕𑁆𑀕𑀁 𑀅𑀢𑁆𑀢𑀪𑀸𑀯𑀻𑀦’’𑀦𑁆𑀢𑀺 (𑀅. 𑀦𑀺. 𑁪.𑁧𑁫). 𑀢𑀲𑁆𑀲 𑀳𑀺 𑀅𑀢𑁆𑀢𑀪𑀸𑀯𑁄 𑀉𑀩𑁆𑀩𑁂𑀥𑁂𑀦 𑀘𑀢𑁆𑀢𑀸𑀭𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀬𑁄𑀚𑀦𑀲𑀢𑀸𑀦𑀺, 𑀩𑀸𑀳𑀽 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑀸, 𑀧𑀜𑁆𑀜𑀸𑀲𑀬𑁄𑀚𑀦𑀁 𑀪𑀫𑀼𑀓𑀦𑁆𑀢𑀭𑀁, 𑀢𑀣𑀸 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸, 𑀳𑀢𑁆𑀣𑀢𑀮𑀸𑀦𑀺 𑀤𑁆𑀯𑁂 𑀬𑁄𑀚𑀦𑀲𑀢𑀸𑀦𑀻𑀢𑀺. 𑀫𑀚𑁆𑀛𑀺𑀫𑀸𑀢𑀺 𑀅𑀲𑁆𑀲𑀕𑁄𑀡𑀫𑀳𑀺𑀁𑀲𑀲𑀽𑀓𑀭𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑀸. 𑀭𑀲𑁆𑀲𑀓𑀸𑀢𑀺 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼 𑀯𑀸𑀫𑀦𑀸𑀤𑀬𑁄 𑀤𑀻𑀖𑀫𑀚𑁆𑀛𑀺𑀫𑁂𑀳𑀺 𑀑𑀫𑀓𑀧𑁆𑀧𑀫𑀸𑀡𑀸 𑀲𑀢𑁆𑀢𑀸. 𑀅𑀡𑀼𑀓𑀸𑀢𑀺 𑀫𑀁𑀲𑀘𑀓𑁆𑀔𑀼𑀲𑁆𑀲 ¶ 𑀅𑀕𑁄𑀘𑀭𑀸, 𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀲𑀬𑀸 𑀉𑀤𑀓𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀸 𑀲𑀼𑀔𑀼𑀫𑀢𑁆𑀢𑀪𑀸𑀯𑀸 𑀲𑀢𑁆𑀢𑀸, 𑀊𑀓𑀸𑀤𑀬𑁄 𑀯𑀸. 𑀅𑀧𑀺𑀘 𑀬𑁂 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼 𑀫𑀳𑀦𑁆𑀢𑀫𑀚𑁆𑀛𑀺𑀫𑁂𑀳𑀺 𑀣𑀽𑀮𑀫𑀚𑁆𑀛𑀺𑀫𑁂𑀳𑀺 𑀘 𑀑𑀫𑀓𑀧𑁆𑀧𑀫𑀸𑀡𑀸 𑀲𑀢𑁆𑀢𑀸, 𑀢𑁂 𑀅𑀡𑀼𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀣𑀽𑀮𑀸𑀢𑀺 𑀧𑀭𑀺𑀫𑀡𑁆𑀟𑀮𑀢𑁆𑀢𑀪𑀸𑀯𑀸 𑀫𑀘𑁆𑀙𑀓𑀼𑀫𑁆𑀫𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀸𑀤𑀬𑁄 𑀲𑀢𑁆𑀢𑀸.

𑁧𑁪𑁭. 𑀏𑀯𑀁 𑀢𑀻𑀳𑀺 𑀢𑀺𑀓𑁂𑀳𑀺 𑀅𑀦𑀯𑀲𑁂𑀲𑀢𑁄 𑀲𑀢𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀤𑀺𑀝𑁆𑀞𑀸 𑀯𑀸 𑀬𑁂𑀯 𑀅𑀤𑀺𑀝𑁆𑀞𑀸’’𑀢𑀺𑀆𑀤𑀻𑀳𑀺 𑀢𑀻𑀳𑀺 𑀤𑀼𑀓𑁂𑀳𑀺𑀧𑀺 𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀤𑀺𑀝𑁆𑀞𑀸𑀢𑀺 𑀬𑁂 𑀅𑀢𑁆𑀢𑀦𑁄 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀫𑀸𑀕𑀢𑀯𑀲𑁂𑀦 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀅𑀤𑀺𑀝𑁆𑀞𑀸𑀢𑀺 𑀬𑁂 𑀧𑀭𑀲𑀫𑀼𑀤𑁆𑀤𑀧𑀭𑀲𑁂𑀮𑀧𑀭𑀘𑀓𑁆𑀓𑀯𑀸𑀴𑀸𑀤𑀻𑀲𑀼 𑀞𑀺𑀢𑀸. ‘‘𑀬𑁂𑀯 𑀤𑀽𑀭𑁂 𑀯𑀲𑀦𑁆𑀢𑀺 𑀅𑀯𑀺𑀤𑀽𑀭𑁂’’𑀢𑀺 𑀇𑀫𑀺𑀦𑀸 𑀧𑀦 𑀤𑀼𑀓𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑁆𑀲 𑀤𑀽𑀭𑁂 𑀘 𑀅𑀯𑀺𑀤𑀽𑀭𑁂 𑀘 𑀯𑀲𑀦𑁆𑀢𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀢𑁂 𑀉𑀧𑀸𑀤𑀸𑀬𑀼𑀧𑀸𑀤𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀢𑀦𑁄 𑀳𑀺 𑀓𑀸𑀬𑁂 𑀯𑀲𑀦𑁆𑀢𑀸 𑀲𑀢𑁆𑀢𑀸 𑀅𑀯𑀺𑀤𑀽𑀭𑁂, 𑀩𑀳𑀺𑀓𑀸𑀬𑁂 𑀯𑀲𑀦𑁆𑀢𑀸 𑀤𑀽𑀭𑁂. 𑀢𑀣𑀸 𑀅𑀦𑁆𑀢𑁄𑀉𑀧𑀘𑀸𑀭𑁂 𑀯𑀲𑀦𑁆𑀢𑀸 𑀅𑀯𑀺𑀤𑀽𑀭𑁂, 𑀩𑀳𑀺𑀉𑀧𑀘𑀸𑀭𑁂 𑀯𑀲𑀦𑁆𑀢𑀸 𑀤𑀽𑀭𑁂. 𑀅𑀢𑁆𑀢𑀦𑁄 𑀯𑀺𑀳𑀸𑀭𑁂 𑀕𑀸𑀫𑁂 𑀚𑀦𑀧𑀤𑁂 𑀤𑀻𑀧𑁂 𑀘𑀓𑁆𑀓𑀯𑀸𑀴𑁂 𑀯𑀲𑀦𑁆𑀢𑀸 𑀅𑀯𑀺𑀤𑀽𑀭𑁂, 𑀧𑀭𑀘𑀓𑁆𑀓𑀯𑀸𑀴𑁂 𑀯𑀲𑀦𑁆𑀢𑀸 𑀤𑀽𑀭𑁂 𑀯𑀲𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀪𑀽𑀢𑀸𑀢𑀺 𑀚𑀸𑀢𑀸, 𑀅𑀪𑀺𑀦𑀺𑀩𑁆𑀩𑀢𑁆𑀢𑀸. 𑀬𑁂 𑀪𑀽𑀢𑀸 𑀏𑀯, 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀔𑀻𑀡𑀸𑀲𑀯𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀪𑀯𑀫𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀻. 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀆𑀬𑀢𑀺𑀫𑁆𑀧𑀺 𑀲𑀫𑁆𑀪𑀯𑀁 𑀏𑀲𑀦𑁆𑀢𑀸𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀣 𑀯𑀸 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫. 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫. 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 ¶ 𑀲𑀫𑁆𑀪𑀯𑁂𑀲𑀻 𑀦𑀸𑀫. 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀪𑀼𑀢𑀺 𑀪𑀽𑀢𑀸 𑀦𑀸𑀫. 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫. 𑀢𑀢𑁄 𑀧𑀭𑀁 𑀪𑀽𑀢𑀸𑀢𑀺.

𑁧𑁪𑁮. 𑀏𑀯𑀁 𑀪𑀕𑀯𑀸 ‘‘𑀲𑀼𑀔𑀺𑀦𑁄 𑀯𑀸’’𑀢𑀺𑀆𑀤𑀻𑀳𑀺 𑀅𑀟𑁆𑀠𑀢𑁂𑀬𑁆𑀬𑀸𑀳𑀺 𑀕𑀸𑀣𑀸𑀳𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀳𑀺𑀢𑀲𑀼𑀔𑀸𑀕𑀫𑀧𑀢𑁆𑀣𑀦𑀸𑀯𑀲𑁂𑀦 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀪𑀸𑀯𑀦𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀳𑀺𑀢𑀤𑀼𑀓𑁆𑀔𑀸𑀦𑀸𑀕𑀫𑀧𑀢𑁆𑀣𑀦𑀸𑀯𑀲𑁂𑀦𑀸𑀧𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀧𑀭𑁄 𑀧𑀭𑀁 𑀦𑀺𑀓𑀼𑀩𑁆𑀩𑁂𑀣𑀸’’𑀢𑀺. 𑀏𑀲 𑀧𑁄𑀭𑀸𑀡𑀧𑀸𑀞𑁄, 𑀇𑀤𑀸𑀦𑀺 𑀧𑀦 ‘‘𑀧𑀭𑀁 𑀳𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀅𑀬𑀁 𑀦 𑀲𑁄𑀪𑀦𑁄.

𑀢𑀢𑁆𑀣 𑀧𑀭𑁄𑀢𑀺 𑀧𑀭𑀚𑀦𑁄. 𑀧𑀭𑀦𑁆𑀢𑀺 𑀧𑀭𑀚𑀦𑀁. 𑀦 𑀦𑀺𑀓𑀼𑀩𑁆𑀩𑁂𑀣𑀸𑀢𑀺 𑀦 𑀯𑀜𑁆𑀘𑁂𑀬𑁆𑀬. 𑀦𑀸𑀢𑀺𑀫𑀜𑁆𑀜𑁂𑀣𑀸𑀢𑀺 𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑁂𑀬𑁆𑀬. 𑀓𑀢𑁆𑀣𑀘𑀻𑀢𑀺 𑀓𑀢𑁆𑀣𑀘𑀺 𑀑𑀓𑀸𑀲𑁂, 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀔𑁂𑀢𑁆𑀢𑁂 𑀯𑀸 𑀜𑀸𑀢𑀺𑀫𑀚𑁆𑀛𑁂 𑀯𑀸 𑀧𑀽𑀕𑀫𑀚𑁆𑀛𑁂 𑀯𑀸𑀢𑀺𑀆𑀤𑀺. 𑀦𑀦𑁆𑀢𑀺 𑀏𑀢𑀁. 𑀓𑀜𑁆𑀘𑀻𑀢𑀺 𑀬𑀁 𑀓𑀜𑁆𑀘𑀺 𑀔𑀢𑁆𑀢𑀺𑀬𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀕𑀳𑀝𑁆𑀞𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀲𑀼𑀕𑀢𑀁 𑀯𑀸 𑀤𑀼𑀕𑁆𑀕𑀢𑀁 𑀯𑀸𑀢𑀺𑀆𑀤𑀺. 𑀩𑁆𑀬𑀸𑀭𑁄𑀲𑀦𑀸 𑀧𑀝𑀺𑀖𑀲𑀜𑁆𑀜𑀸𑀢𑀺 𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀳𑀺 𑀩𑁆𑀬𑀸𑀭𑁄𑀲𑀦𑀸𑀬 𑀘, 𑀫𑀦𑁄𑀯𑀺𑀓𑀸𑀭𑁂𑀦 𑀧𑀝𑀺𑀖𑀲𑀜𑁆𑀜𑀸𑀬 𑀘. ‘‘𑀩𑁆𑀬𑀸𑀭𑁄𑀲𑀦𑀸𑀬 𑀧𑀝𑀺𑀖𑀲𑀜𑁆𑀜𑀸𑀬𑀸’’𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀩𑁆𑀬𑀸𑀭𑁄𑀲𑀦𑀸 𑀧𑀝𑀺𑀖𑀲𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀲𑀫𑁆𑀫 𑀤𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀫𑁆𑀫 𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸’’𑀢𑀺, 𑀬𑀣𑀸 𑀘 ‘‘𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀬 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸𑀬 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸’’𑀢𑀺 (𑀅. 𑀦𑀺. 𑁮.𑁧𑁯; 𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫). 𑀦𑀸𑀜𑁆𑀜𑀫𑀜𑁆𑀜𑀲𑁆𑀲 𑀤𑀼𑀓𑁆𑀔𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑀼𑀓𑁆𑀔𑀁 𑀦 𑀇𑀘𑁆𑀙𑁂𑀬𑁆𑀬. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀦 𑀓𑁂𑀯𑀮𑀁 ‘‘𑀲𑀼𑀔𑀺𑀦𑁄 𑀯𑀸 𑀔𑁂𑀫𑀺𑀦𑁄 𑀯𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺 𑀫𑀦𑀲𑀺𑀓𑀸𑀭𑀯𑀲𑁂𑀦𑁂𑀯 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬. 𑀓𑀺𑀁 𑀧𑀦 ‘‘𑀅𑀳𑁄 𑀯𑀢 𑀬𑁄 𑀓𑁄𑀘𑀺 𑀧𑀭𑀧𑀼𑀕𑁆𑀕𑀮𑁄 𑀬𑀁 𑀓𑀜𑁆𑀘𑀺 𑀧𑀭𑀧𑀼𑀕𑁆𑀕𑀮𑀁 𑀯𑀜𑁆𑀘𑀦𑀸𑀤𑀻𑀳𑀺 𑀦𑀺𑀓𑀢𑀻𑀳𑀺 𑀦 𑀦𑀺𑀓𑀼𑀩𑁆𑀩𑁂𑀣, 𑀚𑀸𑀢𑀺𑀆𑀤𑀻𑀳𑀺 𑀘 𑀦𑀯𑀳𑀺 𑀫𑀸𑀦𑀯𑀢𑁆𑀣𑀽𑀳𑀺 𑀓𑀢𑁆𑀣𑀘𑀺 𑀧𑀤𑁂𑀲𑁂 𑀬𑀁 𑀓𑀜𑁆𑀘𑀺 𑀧𑀭𑀧𑀼𑀕𑁆𑀕𑀮𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘 𑀩𑁆𑀬𑀸𑀭𑁄𑀲𑀦𑀸𑀬 𑀯𑀸 𑀧𑀝𑀺𑀖𑀲𑀜𑁆𑀜𑀸𑀬 𑀯𑀸 𑀤𑀼𑀓𑁆𑀔𑀁 𑀦 𑀇𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀯𑀫𑁆𑀧𑀺 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀪𑀸𑀯𑁂𑀬𑁆𑀬𑀸𑀢𑀺.

𑁧𑁪𑁯. 𑀏𑀯𑀁 𑀅𑀳𑀺𑀢𑀤𑀼𑀓𑁆𑀔𑀸𑀦𑀸𑀕𑀫𑀧𑀢𑁆𑀣𑀦𑀸𑀯𑀲𑁂𑀦 𑀅𑀢𑁆𑀣𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀢𑀸 𑀬𑀣𑀸 𑀦𑀺𑀬𑀁 𑀧𑀼𑀢𑁆𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀫𑀸𑀢𑀸 𑀦𑀺𑀬𑀁 𑀧𑀼𑀢𑁆𑀢𑀁 𑀅𑀢𑁆𑀢𑀦𑀺 𑀚𑀸𑀢𑀁 𑀑𑀭𑀲𑀁 𑀧𑀼𑀢𑁆𑀢𑀁, 𑀢𑀜𑁆𑀘 𑀏𑀓𑀧𑀼𑀢𑁆𑀢𑀫𑁂𑀯 𑀆𑀬𑀼𑀲𑀸 𑀅𑀦𑀼𑀭𑀓𑁆𑀔𑁂, 𑀢𑀲𑁆𑀲 𑀤𑀼𑀓𑁆𑀔𑀸𑀕𑀫𑀧𑀝𑀺𑀩𑀸𑀳𑀦𑀢𑁆𑀣𑀁 𑀅𑀢𑁆𑀢𑀦𑁄 𑀆𑀬𑀼𑀫𑁆𑀧𑀺 𑀘𑀚𑀺𑀢𑁆𑀯𑀸 𑀢𑀁 𑀅𑀦𑀼𑀭𑀓𑁆𑀔𑁂, 𑀏𑀯𑀫𑁆𑀧𑀺 𑀲𑀩𑁆𑀩𑀪𑀽𑀢𑁂𑀲𑀼 𑀇𑀤𑀁 𑀫𑁂𑀢𑁆𑀢𑀫𑀸𑀦𑀲𑀁 𑀪𑀸𑀯𑀬𑁂, 𑀧𑀼𑀦𑀧𑁆𑀧𑀼𑀦𑀁 𑀚𑀦𑀬𑁂 𑀯𑀟𑁆𑀠𑀬𑁂, 𑀢𑀜𑁆𑀘 𑀅𑀧𑀭𑀺𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀏𑀓𑀲𑁆𑀫𑀺𑀁 𑀯𑀸 𑀲𑀢𑁆𑀢𑁂 𑀅𑀦𑀯𑀲𑁂𑀲𑀨𑀭𑀡𑀯𑀲𑁂𑀦 𑀅𑀧𑀭𑀺𑀫𑀸𑀡𑀁 𑀪𑀸𑀯𑀬𑁂𑀢𑀺.

𑁧𑁫𑁦. 𑀏𑀯𑀁 ¶ ¶ 𑀲𑀩𑁆𑀩𑀸𑀓𑀸𑀭𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀯𑀟𑁆𑀠𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑁂𑀢𑁆𑀢𑀜𑁆𑀘 𑀲𑀩𑁆𑀩𑀮𑁄𑀓𑀲𑁆𑀫𑀻’’𑀢𑀺.

𑀢𑀢𑁆𑀣 𑀫𑀺𑀚𑁆𑀚𑀢𑀺 𑀢𑀸𑀬𑀢𑀺 𑀘𑀸𑀢𑀺 𑀫𑀺𑀢𑁆𑀢𑁄, 𑀳𑀺𑀢𑀚𑁆𑀛𑀸𑀲𑀬𑀢𑀸𑀬 𑀲𑀺𑀦𑀺𑀬𑁆𑀳𑀢𑀺, 𑀅𑀳𑀺𑀢𑀸𑀕𑀫𑀢𑁄 𑀭𑀓𑁆𑀔𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀁. 𑀲𑀩𑁆𑀩𑀲𑁆𑀫𑀺𑀦𑁆𑀢𑀺 𑀅𑀦𑀯𑀲𑁂𑀲𑁂. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. 𑀫𑀦𑀲𑀺 𑀪𑀯𑀦𑁆𑀢𑀺 𑀫𑀸𑀦𑀲𑀁. 𑀢𑀜𑁆𑀳𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀪𑀸𑀯𑀬𑁂𑀢𑀺 𑀯𑀟𑁆𑀠𑀬𑁂. 𑀦𑀸𑀲𑁆𑀲 𑀧𑀭𑀺𑀫𑀸𑀡𑀦𑁆𑀢𑀺 𑀅𑀧𑀭𑀺𑀫𑀸𑀡𑀁, 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺. 𑀢𑁂𑀦 𑀅𑀭𑀽𑀧𑀪𑀯𑀁 𑀕𑀡𑁆𑀳𑀸𑀢𑀺. 𑀅𑀥𑁄𑀢𑀺 𑀳𑁂𑀝𑁆𑀞𑀸. 𑀢𑁂𑀦 𑀓𑀸𑀫𑀪𑀯𑀁 𑀕𑀡𑁆𑀳𑀸𑀢𑀺. 𑀢𑀺𑀭𑀺𑀬𑀦𑁆𑀢𑀺 𑀯𑁂𑀫𑀚𑁆𑀛𑀁. 𑀢𑁂𑀦 𑀭𑀽𑀧𑀪𑀯𑀁 𑀕𑀡𑁆𑀳𑀸𑀢𑀺. 𑀅𑀲𑀫𑁆𑀩𑀸𑀥𑀦𑁆𑀢𑀺 𑀲𑀫𑁆𑀩𑀸𑀥𑀯𑀺𑀭𑀳𑀺𑀢𑀁, 𑀪𑀺𑀦𑁆𑀦𑀲𑀻𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀫𑀸 𑀦𑀸𑀫 𑀧𑀘𑁆𑀘𑀢𑁆𑀣𑀺𑀓𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀯𑁂𑀭𑀦𑁆𑀢𑀺 𑀯𑁂𑀭𑀯𑀺𑀭𑀳𑀺𑀢𑀁, 𑀅𑀦𑁆𑀢𑀭𑀦𑁆𑀢𑀭𑀸𑀧𑀺 𑀯𑁂𑀭𑀘𑁂𑀢𑀦𑀸𑀧𑀸𑀢𑀼𑀪𑀸𑀯𑀯𑀺𑀭𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀧𑀢𑁆𑀢𑀦𑁆𑀢𑀺 𑀯𑀺𑀕𑀢𑀧𑀘𑁆𑀘𑀢𑁆𑀣𑀺𑀓𑀁. 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀳𑀺 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀦𑀸𑀲𑁆𑀲 𑀓𑁄𑀘𑀺 𑀧𑀘𑁆𑀘𑀢𑁆𑀣𑀺𑀓𑁄 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀫𑀸𑀦𑀲𑀁 𑀯𑀺𑀕𑀢𑀧𑀘𑁆𑀘𑀢𑁆𑀣𑀺𑀓𑀢𑁆𑀢𑀸 ‘‘𑀅𑀲𑀧𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀸𑀬𑀯𑀘𑀦𑀜𑁆𑀳𑀺 𑀏𑀢𑀁, 𑀬𑀤𑀺𑀤𑀁 𑀧𑀘𑁆𑀘𑀢𑁆𑀣𑀺𑀓𑁄 𑀲𑀧𑀢𑁆𑀢𑁄𑀢𑀺. 𑀅𑀬𑀁 𑀅𑀦𑀼𑀧𑀤𑀢𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀣𑀯𑀡𑁆𑀡𑀦𑀸 𑁋 𑀬𑀤𑁂𑀢𑀁 ‘‘𑀏𑀯𑀫𑁆𑀧𑀺 𑀲𑀩𑁆𑀩𑀪𑀽𑀢𑁂𑀲𑀼 𑀫𑀸𑀦𑀲𑀁 𑀪𑀸𑀯𑀬𑁂 𑀅𑀧𑀭𑀺𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘𑁂𑀢𑀁 𑀅𑀧𑀭𑀺𑀫𑀸𑀡𑀁 𑀫𑁂𑀢𑁆𑀢𑀁 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑀲𑁆𑀫𑀺𑀁 𑀪𑀸𑀯𑀬𑁂 𑀯𑀟𑁆𑀠𑀬𑁂, 𑀯𑀼𑀟𑁆𑀠𑀺𑀁, 𑀯𑀺𑀭𑀽𑀴𑁆𑀳𑀺𑀁, 𑀯𑁂𑀧𑀼𑀮𑁆𑀮𑀁 𑀕𑀫𑀬𑁂. 𑀓𑀣𑀁? 𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀜𑁆𑀘, 𑀉𑀤𑁆𑀥𑀁 𑀬𑀸𑀯 𑀪𑀯𑀕𑁆𑀕𑀸, 𑀅𑀥𑁄 𑀬𑀸𑀯 𑀅𑀯𑀻𑀘𑀺𑀢𑁄, 𑀢𑀺𑀭𑀺𑀬𑀁 𑀬𑀸𑀯 𑀅𑀯𑀲𑁂𑀲𑀤𑀺𑀲𑀸. 𑀉𑀤𑁆𑀥𑀁 𑀯𑀸 𑀆𑀭𑀼𑀧𑁆𑀧𑀁, 𑀅𑀥𑁄 𑀓𑀸𑀫𑀥𑀸𑀢𑀼𑀁, 𑀢𑀺𑀭𑀺𑀬𑀁 𑀭𑀽𑀧𑀥𑀸𑀢𑀼𑀁 𑀅𑀦𑀯𑀲𑁂𑀲𑀁 𑀨𑀭𑀦𑁆𑀢𑁄. 𑀏𑀯𑀁 𑀪𑀸𑀯𑁂𑀦𑁆𑀢𑁄𑀧𑀺 𑀘 𑀢𑀁 𑀬𑀣𑀸 𑀅𑀲𑀫𑁆𑀩𑀸𑀥𑀁, 𑀅𑀯𑁂𑀭𑀁, 𑀅𑀲𑀧𑀢𑁆𑀢𑀜𑁆𑀘, 𑀳𑁄𑀢𑀺 𑀢𑀣𑀸 𑀲𑀫𑁆𑀩𑀸𑀥𑀯𑁂𑀭𑀲𑀧𑀢𑁆𑀢𑀸𑀪𑀸𑀯𑀁 𑀓𑀭𑁄𑀦𑁆𑀢𑁄 𑀪𑀸𑀯𑀬𑁂. 𑀬𑀁 𑀯𑀸 𑀢𑀁 𑀪𑀸𑀯𑀦𑀸𑀲𑀫𑁆𑀧𑀤𑀁 𑀧𑀢𑁆𑀢𑀁 𑀲𑀩𑁆𑀩𑀢𑁆𑀣 𑀑𑀓𑀸𑀲𑀮𑀸𑀪𑀯𑀲𑁂𑀦 𑀅𑀲𑀫𑁆𑀩𑀸𑀥𑀁. 𑀅𑀢𑁆𑀢𑀦𑁄 𑀧𑀭𑁂𑀲𑀼 𑀆𑀖𑀸𑀢𑀧𑀝𑀺𑀯𑀺𑀦𑀬𑁂𑀦 𑀅𑀯𑁂𑀭𑀁, 𑀅𑀢𑁆𑀢𑀦𑀺 𑀘 𑀧𑀭𑁂𑀲𑀁 𑀆𑀖𑀸𑀢𑀧𑀝𑀺𑀯𑀺𑀦𑀬𑁂𑀦 𑀅𑀲𑀧𑀢𑁆𑀢𑀁 𑀳𑁄𑀢𑀺, 𑀢𑀁 𑀅𑀲𑀫𑁆𑀩𑀸𑀥𑀁 𑀅𑀯𑁂𑀭𑀁 𑀅𑀲𑀧𑀢𑁆𑀢𑀁 𑀅𑀧𑀭𑀺𑀫𑀸𑀡𑀁 𑀫𑁂𑀢𑁆𑀢𑀁 𑀫𑀸𑀦𑀲𑀁 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀢𑀺 𑀢𑀺𑀯𑀺𑀥𑀧𑀭𑀺𑀘𑁆𑀙𑁂𑀤𑁂 𑀲𑀩𑁆𑀩𑀮𑁄𑀓𑀲𑁆𑀫𑀺𑀁 𑀪𑀸𑀯𑀬𑁂 𑀯𑀟𑁆𑀠𑀬𑁂𑀢𑀺.

𑁧𑁫𑁧. 𑀏𑀯𑀁 ¶ 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀟𑁆𑀠𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀇𑀭𑀺𑀬𑀸𑀧𑀣𑀦𑀺𑀬𑀫𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀝𑁆𑀞𑀁 𑀘𑀭𑀁…𑀧𑁂… 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀏𑀯𑀫𑁂𑀢𑀁 𑀫𑁂𑀢𑁆𑀢𑀁 𑀫𑀸𑀦𑀲𑀁 𑀪𑀸𑀯𑁂𑀦𑁆𑀢𑁄 𑀲𑁄 ‘‘𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸, 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭; 𑀯𑀺𑀪. 𑁫𑁦𑁮) 𑀯𑀺𑀬 𑀇𑀭𑀺𑀬𑀸𑀧𑀣𑀦𑀺𑀬𑀫𑀁 𑀅𑀓𑀢𑁆𑀯𑀸 𑀬𑀣𑀸𑀲𑀼𑀔𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀩𑀸𑀥𑀦𑀯𑀺𑀦𑁄𑀤𑀦𑀁 𑀓𑀭𑁄𑀦𑁆𑀢𑁄 𑀢𑀺𑀝𑁆𑀞𑀁 𑀯𑀸 𑀘𑀭𑀁 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀲𑀬𑀸𑀦𑁄 𑀯𑀸 𑀬𑀸𑀯𑀢𑀸 𑀯𑀺𑀕𑀢𑀫𑀺𑀤𑁆𑀥𑁄 𑀅𑀲𑁆𑀲, 𑀅𑀣 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑁆𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬.

𑀅𑀣 ¶ 𑀯𑀸 𑀏𑀯𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀟𑁆𑀠𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀲𑀻𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀝𑁆𑀞𑀁 𑀘𑀭’’𑀦𑁆𑀢𑀺. 𑀯𑀲𑀺𑀧𑁆𑀧𑀢𑁆𑀢𑁄 𑀳𑀺 𑀢𑀺𑀝𑁆𑀞𑀁 𑀯𑀸 𑀘𑀭𑀁 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀲𑀬𑀸𑀦𑁄 𑀯𑀸 𑀬𑀸𑀯𑀢𑀸 𑀇𑀭𑀺𑀬𑀸𑀧𑀣𑁂𑀦 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑁆𑀲𑀢𑀺𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣 𑀯𑀸 𑀢𑀺𑀝𑁆𑀞𑀁 𑀯𑀸 𑀘𑀭𑀁 𑀯𑀸𑀢𑀺 𑀦 𑀢𑀲𑁆𑀲 𑀞𑀸𑀦𑀸𑀤𑀻𑀦𑀺 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀳𑁄𑀦𑁆𑀢𑀺, 𑀅𑀧𑀺𑀘 𑀔𑁄 𑀲𑁄 𑀬𑀸𑀯𑀢𑀸 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑁆𑀲𑀢𑀺𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀸𑀯𑀢𑀸 𑀯𑀺𑀢𑀫𑀺𑀤𑁆𑀥𑁄 𑀳𑀼𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀢𑀢𑁆𑀣 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀺𑀝𑁆𑀞𑀁 𑀘𑀭𑀁 𑀦𑀺𑀲𑀺𑀦𑁆𑀦𑁄 𑀯 𑀲𑀬𑀸𑀦𑁄, 𑀬𑀸𑀯𑀢𑀸𑀲𑁆𑀲 𑀯𑀺𑀢𑀫𑀺𑀤𑁆𑀥𑁄. 𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀢𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀢𑀁 ‘‘𑀫𑁂𑀢𑁆𑀢𑀜𑁆𑀘 𑀲𑀩𑁆𑀩𑀮𑁄𑀓𑀲𑁆𑀫𑀺, 𑀫𑀸𑀦𑀲𑀁 𑀪𑀸𑀯𑀬𑁂’’𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀣𑀸 𑀪𑀸𑀯𑀬𑁂, 𑀬𑀣𑀸 𑀞𑀸𑀦𑀸𑀤𑀻𑀲𑀼 𑀬𑀸𑀯𑀢𑀸 𑀇𑀭𑀺𑀬𑀸𑀧𑀣𑁂𑀦, 𑀞𑀸𑀦𑀸𑀤𑀻𑀦𑀺 𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀬𑀸𑀯𑀢𑀸 𑀏𑀢𑀁 𑀫𑁂𑀢𑁆𑀢𑀸𑀛𑀸𑀦𑀲𑁆𑀲𑀢𑀺𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁄 𑀅𑀲𑁆𑀲, 𑀢𑀸𑀯𑀢𑀸 𑀯𑀺𑀢𑀫𑀺𑀤𑁆𑀥𑁄 𑀳𑀼𑀢𑁆𑀯𑀸 𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺.

𑀏𑀯𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀲𑀻𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀢𑀲𑁆𑀫𑀺𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑁂 𑀦𑀺𑀬𑁄𑀚𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀯𑀺𑀳𑀸𑀭𑀁 𑀣𑀼𑀦𑀦𑁆𑀢𑁄 𑀆𑀳 ‘‘𑀩𑁆𑀭𑀳𑁆𑀫𑀫𑁂𑀢𑀁 𑀯𑀺𑀳𑀸𑀭𑀫𑀺𑀥𑀫𑀸𑀳𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 ‘‘𑀲𑀼𑀔𑀺𑀦𑁄𑀯 𑀔𑁂𑀫𑀺𑀦𑁄 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 ‘‘𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀲𑀁𑀯𑀡𑁆𑀡𑀺𑀢𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑁄, 𑀏𑀢𑀁 𑀘𑀢𑀽𑀲𑀼 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀲𑀼 𑀦𑀺𑀤𑁆𑀤𑁄𑀲𑀢𑁆𑀢𑀸 𑀅𑀢𑁆𑀢𑀦𑁄𑀧𑀺 𑀧𑀭𑁂𑀲𑀫𑁆𑀧𑀺 𑀅𑀢𑁆𑀣𑀓𑀭𑀢𑁆𑀢𑀸 𑀘 𑀇𑀥 𑀅𑀭𑀺𑀬𑀲𑁆𑀲 𑀥𑀫𑁆𑀫𑀯𑀺𑀦𑀬𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀸𑀳𑀼, 𑀲𑁂𑀝𑁆𑀞𑀯𑀺𑀳𑀸𑀭𑀫𑀸𑀳𑀽𑀢𑀺. 𑀬𑀢𑁄 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀢𑀺𑀝𑁆𑀞𑀁 𑀘𑀭𑀁 𑀦𑀺𑀲𑀺𑀦𑁆𑀦𑁄 ¶ 𑀯𑀸 𑀲𑀬𑀸𑀦𑁄 𑀯𑀸 𑀬𑀸𑀯𑀢𑀸𑀲𑁆𑀲 𑀯𑀺𑀢𑀫𑀺𑀤𑁆𑀥𑁄, 𑀏𑀢𑀁 𑀲𑀢𑀺𑀁 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺.

𑁧𑁫𑁨. 𑀏𑀯𑀁 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀫𑁂𑀢𑁆𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀆𑀲𑀦𑁆𑀦𑀸 𑀳𑁄𑀢𑀺 𑀢𑀲𑁆𑀫𑀸 𑀤𑀺𑀝𑁆𑀞𑀺𑀕𑀳𑀡𑀦𑀺𑀲𑁂𑀥𑀦𑀫𑀼𑀔𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀤𑁂𑀯 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀺𑀝𑁆𑀞𑀺𑀜𑁆𑀘 𑀅𑀦𑀼𑀧𑀕𑁆𑀕𑀫𑁆𑀫𑀸’’𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 ‘‘𑀩𑁆𑀭𑀳𑁆𑀫𑀫𑁂𑀢𑀁 𑀯𑀺𑀳𑀸𑀭𑀫𑀺𑀥𑀫𑀸𑀳𑀽’’𑀢𑀺 𑀲𑀁𑀯𑀡𑁆𑀡𑀺𑀢𑁄 𑀫𑁂𑀢𑁆𑀢𑀸𑀛𑀸𑀦𑀯𑀺𑀳𑀸𑀭𑁄, 𑀢𑀢𑁄 𑀯𑀼𑀝𑁆𑀞𑀸𑀬 𑀬𑁂 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀬𑁄 𑀥𑀫𑁆𑀫𑀸, 𑀢𑁂, 𑀢𑁂𑀲𑀜𑁆𑀘 𑀯𑀢𑁆𑀣𑀸𑀤𑀺𑀅𑀦𑀼𑀲𑀸𑀭𑁂𑀦 𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 ‘‘𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦 𑀇𑀥 𑀲𑀢𑁆𑀢𑀽𑀧𑀮𑀩𑁆𑀪𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁭𑁧) 𑀏𑀯𑀁 𑀤𑀺𑀝𑁆𑀞𑀺𑀜𑁆𑀘 𑀅𑀦𑀼𑀧𑀕𑁆𑀕𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦 𑀲𑀻𑀮𑀯𑀸 𑀳𑀼𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀲𑀻𑀮𑀲𑀫𑁆𑀧𑀬𑀼𑀢𑁆𑀢𑁂𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀤𑀲𑁆𑀲𑀦𑁂𑀦 𑀲𑀫𑁆𑀧𑀦𑁆𑀦𑁄. 𑀢𑀢𑁄 𑀧𑀭𑀁 𑀬𑁄𑀧𑀸𑀬𑀁 𑀯𑀢𑁆𑀣𑀼𑀓𑀸𑀫𑁂𑀲𑀼 𑀕𑁂𑀥𑁄 𑀓𑀺𑀮𑁂𑀲𑀓𑀸𑀫𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀢𑀫𑁆𑀧𑀺 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀳𑀺 𑀢𑀦𑀼𑀪𑀸𑀯𑁂𑀦 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑁂𑀦 𑀘 𑀓𑀸𑀫𑁂𑀲𑀼 𑀕𑁂𑀥𑀁 𑀯𑀺𑀦𑁂𑀬𑁆𑀬 𑀯𑀺𑀦𑀬𑀺𑀢𑁆𑀯𑀸 𑀯𑀽𑀧𑀲𑀫𑁂𑀢𑁆𑀯𑀸 𑀦 𑀳𑀺 𑀚𑀸𑀢𑀼 𑀕𑀩𑁆𑀪𑀲𑁂𑀬𑁆𑀬 𑀧𑀼𑀦 𑀭𑁂𑀢𑀺 ¶ 𑀏𑀓𑀁𑀲𑁂𑀦𑁂𑀯 𑀧𑀼𑀦 𑀕𑀩𑁆𑀪𑀲𑁂𑀬𑁆𑀬𑀁 𑀦 𑀏𑀢𑀺, 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀤𑁂𑀲𑀦𑀁 𑀲𑀫𑀸𑀧𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀭𑀣. 𑀇𑀫𑀜𑁆𑀘 𑀲𑀼𑀢𑁆𑀢𑀁 𑀫𑀸𑀲𑀲𑁆𑀲 𑀅𑀝𑁆𑀞𑀲𑀼 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂𑀲𑀼 𑀕𑀡𑁆𑀟𑀺𑀁 𑀆𑀓𑁄𑀝𑁂𑀢𑁆𑀯𑀸 𑀉𑀲𑁆𑀲𑀸𑀭𑁂𑀣, 𑀥𑀫𑁆𑀫𑀓𑀣𑀁 𑀓𑀭𑁄𑀣, 𑀲𑀸𑀓𑀘𑁆𑀙𑀣, 𑀅𑀦𑀼𑀫𑁄𑀤𑀣, 𑀇𑀤𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀆𑀲𑁂𑀯𑀣, 𑀪𑀸𑀯𑁂𑀣, 𑀩𑀳𑀼𑀮𑀻𑀓𑀭𑁄𑀣. 𑀢𑁂𑀧𑀺 𑀯𑁄 𑀅𑀫𑀦𑀼𑀲𑁆𑀲𑀸 𑀢𑀁 𑀪𑁂𑀭𑀯𑀸𑀭𑀫𑁆𑀫𑀡𑀁 𑀦 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀢𑀣𑀸 𑀅𑀓𑀁𑀲𑀼. 𑀤𑁂𑀯𑀢𑀸𑀬𑁄 𑀘 ‘‘𑀪𑀤𑀦𑁆𑀢𑀸 𑀅𑀫𑁆𑀳𑀸𑀓𑀁 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸’’𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀲𑁂𑀦𑀸𑀲𑀦𑀁 𑀲𑀫𑁆𑀫𑀚𑁆𑀚𑀦𑁆𑀢𑀺, 𑀉𑀡𑁆𑀳𑁄𑀤𑀓𑀁 𑀧𑀝𑀺𑀬𑀸𑀤𑁂𑀦𑁆𑀢𑀺, 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀧𑀸𑀤𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽 𑀢𑀣𑁂𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀢𑀫𑁂𑀯 ¶ 𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀩𑁆𑀩𑁂𑀯 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀢𑁂𑀫𑀸𑀲𑁂 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀼𑀦𑁆𑀢𑀺.

𑀏𑀯𑀜𑁆𑀳𑀺 𑀅𑀢𑁆𑀣𑀓𑀼𑀲𑀮𑁂𑀦 𑀢𑀣𑀸𑀕𑀢𑁂𑀦,

𑀥𑀫𑁆𑀫𑀺𑀲𑁆𑀲𑀭𑁂𑀦 𑀓𑀣𑀺𑀢𑀁 𑀓𑀭𑀡𑀻𑀬𑀫𑀢𑁆𑀣𑀁;

𑀓𑀢𑁆𑀯𑀸𑀦𑀼𑀪𑀼𑀬𑁆𑀬 𑀧𑀭𑀫𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁,

𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀦𑁆𑀢𑀺 𑀲𑀫𑀢𑁆𑀢𑀧𑀜𑁆𑀜𑀸.

𑀢𑀲𑁆𑀫𑀸 𑀳𑀺 𑀢𑀁 𑀅𑀫𑀢𑀫𑀩𑁆𑀪𑀼𑀢𑀫𑀭𑀺𑀬𑀓𑀦𑁆𑀢𑀁,

𑀲𑀦𑁆𑀢𑀁 𑀧𑀤𑀁 𑀅𑀪𑀺𑀲𑀫𑁂𑀘𑁆𑀘 𑀯𑀺𑀳𑀭𑀺𑀢𑀼𑀓𑀸𑀫𑁄;

𑀯𑀺𑀜𑁆𑀜𑀽 𑀚𑀦𑁄 𑀯𑀺𑀫𑀮𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸,

𑀪𑁂𑀤𑀁 𑀓𑀭𑁂𑀬𑁆𑀬 𑀲𑀢𑀢𑀁 𑀓𑀭𑀡𑀻𑀬𑀫𑀢𑁆𑀣𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀳𑁂𑀫𑀯𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀚𑁆𑀚 ¶ 𑀧𑀦𑁆𑀦𑀭𑀲𑁄𑀢𑀺 𑀳𑁂𑀫𑀯𑀢𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀘𑁆𑀙𑀸𑀯𑀲𑀺𑀓𑀸 𑀉𑀧𑁆𑀧𑀢𑁆𑀢𑀺. 𑀳𑁂𑀫𑀯𑀢𑁂𑀦 𑀳𑀺 𑀧𑀼𑀝𑁆𑀞𑁄 𑀪𑀕𑀯𑀸 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺𑀆𑀤𑀻𑀦𑀺 𑀅𑀪𑀸𑀲𑀺. 𑀢𑀢𑁆𑀣 ‘‘𑀅𑀚𑁆𑀚 𑀧𑀦𑁆𑀦𑀭𑀲𑁄’’𑀢𑀺𑀆𑀤𑀺 𑀲𑀸𑀢𑀸𑀕𑀺𑀭𑁂𑀦 𑀯𑀼𑀢𑁆𑀢𑀁, ‘‘𑀇𑀢𑀺 𑀲𑀸𑀢𑀸𑀕𑀺𑀭𑁄’’𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺, ‘‘𑀓𑀘𑁆𑀘𑀺𑀫𑀦𑁄’’𑀢𑀺𑀆𑀤𑀺 𑀳𑁂𑀫𑀯𑀢𑁂𑀦, ‘‘𑀙𑀲𑀼 𑀮𑁄𑀓𑁄’’𑀢𑀺𑀆𑀤𑀺 𑀪𑀕𑀯𑀢𑀸, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 ¶ ‘‘𑀳𑁂𑀫𑀯𑀢𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀸𑀢𑀸𑀕𑀺𑀭𑀺𑀲𑀼𑀢𑁆𑀢’’𑀦𑁆𑀢𑀺 𑀏𑀓𑀘𑁆𑀘𑁂𑀳𑀺.

𑀢𑀢𑁆𑀣 𑀬𑀸𑀬𑀁 ‘‘𑀅𑀚𑁆𑀚 𑀧𑀦𑁆𑀦𑀭𑀲𑁄’’𑀢𑀺𑀆𑀤𑀺 𑀕𑀸𑀣𑀸. 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺 𑁋 𑀇𑀫𑀲𑁆𑀫𑀺𑀁𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀧𑀼𑀭𑀺𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀲𑀭𑀻𑀭𑀓𑀺𑀘𑁆𑀘𑀁 𑀅𑀓𑀁𑀲𑀼. 𑀢𑀲𑁆𑀲 𑀥𑀸𑀢𑀼𑀬𑁄 𑀅𑀯𑀺𑀓𑀺𑀭𑀺𑀢𑁆𑀯𑀸 ¶ 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀸 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀏𑀲𑀸 𑀥𑀫𑁆𑀫𑀢𑀸. 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸 𑀧𑀦 𑀬𑀲𑁆𑀫𑀸 𑀩𑀳𑀼𑀢𑀭𑁂𑀦 𑀚𑀦𑁂𑀦 𑀅𑀤𑀺𑀝𑁆𑀞𑀸 𑀏𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀥𑀸𑀢𑀼𑀧𑀽𑀚𑀫𑁆𑀧𑀺 𑀓𑀢𑁆𑀯𑀸 ‘‘𑀢𑀢𑁆𑀣 𑀢𑀢𑁆𑀣 𑀚𑀦𑀸 𑀧𑀼𑀜𑁆𑀜𑀁 𑀧𑀲𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀼𑀓𑀫𑁆𑀧𑀸𑀬 ‘‘𑀥𑀸𑀢𑀼𑀬𑁄 𑀯𑀺𑀓𑀺𑀭𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀲𑀼𑀯𑀡𑁆𑀡𑀘𑀼𑀡𑁆𑀡𑀸𑀦𑀺 𑀯𑀺𑀬 𑀥𑀸𑀢𑀼𑀬𑁄 𑀯𑀺𑀓𑀺𑀭𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄.

𑀫𑀦𑀼𑀲𑁆𑀲𑀸 𑀢𑀲𑁆𑀲 𑀪𑀕𑀯𑀢𑁄 𑀏𑀓𑀁𑀬𑁂𑀯 𑀥𑀸𑀢𑀼𑀖𑀭𑀁 𑀓𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦 𑀧𑀭𑀺𑀓𑁆𑀔𑁂𑀧𑁂𑀦 𑀘. 𑀢𑀲𑁆𑀲 𑀏𑀓𑁂𑀓𑀕𑀸𑀯𑀼𑀢𑀦𑁆𑀢𑀭𑀸𑀦𑀺 𑀘𑀢𑁆𑀢𑀸𑀭𑀺 𑀤𑁆𑀯𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀏𑀓𑀁 𑀤𑁆𑀯𑀸𑀭𑀁 𑀓𑀺𑀓𑀻 𑀭𑀸𑀚𑀸 𑀅𑀕𑁆𑀕𑀳𑁂𑀲𑀺; 𑀏𑀓𑀁 𑀢𑀲𑁆𑀲𑁂𑀯 𑀧𑀼𑀢𑁆𑀢𑁄 𑀧𑀣𑀯𑀺𑀦𑁆𑀥𑀭𑁄 𑀦𑀸𑀫; 𑀏𑀓𑀁 𑀲𑁂𑀦𑀸𑀧𑀢𑀺𑀧𑀫𑀼𑀔𑀸 𑀅𑀫𑀘𑁆𑀘𑀸; 𑀏𑀓𑀁 𑀲𑁂𑀝𑁆𑀞𑀺𑀧𑀫𑀼𑀔𑀸 𑀚𑀸𑀦𑀧𑀤𑀸 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸 𑀏𑀓𑀕𑁆𑀖𑀦𑀸 𑀲𑀼𑀯𑀡𑁆𑀡𑀭𑀲𑀧𑀝𑀺𑀪𑀸𑀕𑀸 𑀘 𑀦𑀸𑀦𑀸𑀭𑀢𑀦𑀫𑀬𑀸 𑀇𑀝𑁆𑀞𑀓𑀸 𑀅𑀳𑁂𑀲𑀼𑀁 𑀏𑀓𑁂𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸. 𑀢𑁂 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀳𑀺 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀲𑀼𑀭𑀪𑀺𑀢𑁂𑀮𑁂𑀦 𑀉𑀤𑀓𑀓𑀺𑀘𑁆𑀘𑀜𑁆𑀘 𑀓𑀢𑁆𑀯𑀸 𑀢𑀁 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀏𑀯𑀁 𑀧𑀢𑀺𑀝𑁆𑀞𑀺𑀢𑁂 𑀘𑁂𑀢𑀺𑀬𑁂 𑀤𑁆𑀯𑁂 𑀓𑀼𑀮𑀧𑀼𑀢𑁆𑀢𑀸 𑀲𑀳𑀸𑀬𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀫𑁆𑀫𑀼𑀔𑀲𑀸𑀯𑀓𑀸𑀬𑁂𑀯 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀦𑀺𑀲𑁆𑀲𑀬𑀁 ¶ 𑀤𑁂𑀦𑁆𑀢𑀺, 𑀇𑀢𑀭𑁂 𑀦 𑀮𑀪𑀦𑁆𑀢𑀺. 𑀢𑀢𑁄 𑀢𑁂 𑀓𑀼𑀮𑀧𑀼𑀢𑁆𑀢𑀸 ‘‘𑀲𑀸𑀲𑀦𑁂, 𑀪𑀦𑁆𑀢𑁂, 𑀓𑀢𑀺 𑀥𑀼𑀭𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑀸 ‘‘𑀤𑁆𑀯𑁂 𑀥𑀼𑀭𑀸𑀦𑀻’’𑀢𑀺 𑀓𑀣𑁂𑀲𑀼𑀁 𑁋 ‘‘𑀯𑀸𑀲𑀥𑀼𑀭𑀁, 𑀧𑀭𑀺𑀬𑀢𑁆𑀢𑀺𑀥𑀼𑀭𑀜𑁆𑀘𑀸’’𑀢𑀺. 𑀢𑀢𑁆𑀣 𑀧𑀩𑁆𑀩𑀚𑀺𑀢𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸, 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀤𑁆𑀯𑁂 𑀢𑀻𑀡𑀺 𑀪𑀸𑀡𑀯𑀸𑀭𑀲𑀼𑀢𑁆𑀢𑀦𑁆𑀢𑀸𑀦𑀺 𑀘 𑀧𑀕𑀼𑀡𑀁 ¶ 𑀓𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸, 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀦𑀺𑀭𑀸𑀮𑀬𑁂𑀦 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸, 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀖𑀝𑀺𑀢𑀩𑁆𑀩𑀁 𑀯𑀸𑀬𑀫𑀺𑀢𑀩𑁆𑀩𑀁, 𑀏𑀢𑀁 𑀯𑀸𑀲𑀥𑀼𑀭𑀁. 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀧𑀦 𑀏𑀓𑀁 𑀯𑀸 𑀦𑀺𑀓𑀸𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀤𑁆𑀯𑁂 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀭𑀺𑀬𑀢𑁆𑀢𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀲𑀼𑀯𑀺𑀲𑀤𑀁 𑀲𑀸𑀲𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁, 𑀏𑀢𑀁 𑀧𑀭𑀺𑀬𑀢𑁆𑀢𑀺𑀥𑀼𑀭𑀦𑁆𑀢𑀺. 𑀅𑀣 𑀢𑁂 𑀓𑀼𑀮𑀧𑀼𑀢𑁆𑀢𑀸 ‘‘𑀤𑁆𑀯𑀺𑀦𑁆𑀦𑀁 𑀥𑀼𑀭𑀸𑀦𑀁 𑀯𑀸𑀲𑀥𑀼𑀭𑀫𑁂𑀯 𑀲𑁂𑀝𑁆𑀞’’𑀦𑁆𑀢𑀺 𑀯𑀢𑁆𑀯𑀸 ‘‘𑀫𑀬𑀁 𑀧𑀦𑀫𑁆𑀳𑀸 𑀤𑀳𑀭𑀸, 𑀯𑀼𑀟𑁆𑀠𑀓𑀸𑀮𑁂 𑀯𑀸𑀲𑀥𑀼𑀭𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫, 𑀧𑀭𑀺𑀬𑀢𑁆𑀢𑀺𑀥𑀼𑀭𑀁 𑀢𑀸𑀯 𑀧𑀽𑀭𑁂𑀫𑀸’’𑀢𑀺 𑀧𑀭𑀺𑀬𑀢𑁆𑀢𑀺𑀁 𑀆𑀭𑀪𑀺𑀁𑀲𑀼. 𑀢𑁂 𑀧𑀓𑀢𑀺𑀬𑀸𑀯 𑀧𑀜𑁆𑀜𑀯𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀓𑀮𑁂 𑀩𑀼𑀤𑁆𑀥𑀯𑀘𑀦𑁂 𑀧𑀓𑀢𑀜𑁆𑀜𑀦𑁄 𑀯𑀺𑀦𑀬𑁂 𑀘 𑀅𑀢𑀺𑀯𑀺𑀬 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀭𑀺𑀯𑀸𑀭𑁄 𑀉𑀧𑁆𑀧𑀚𑁆𑀚𑀺, 𑀧𑀭𑀺𑀯𑀸𑀭𑀁 𑀦𑀺𑀲𑁆𑀲𑀸𑀬 ¶ 𑀮𑀸𑀪𑁄, 𑀏𑀓𑀫𑁂𑀓𑀲𑁆𑀲 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀧𑀭𑀺𑀯𑀸𑀭𑀸 𑀅𑀳𑁂𑀲𑀼𑀁. 𑀢𑁂 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸 𑀯𑀺𑀳𑀭𑀺𑀁𑀲𑀼, 𑀧𑀼𑀦 𑀩𑀼𑀤𑁆𑀥𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺.

𑀢𑀤𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀕𑀸𑀫𑀓𑀸𑀯𑀸𑀲𑁂 𑀯𑀺𑀳𑀭𑀦𑁆𑀢𑀺 𑀥𑀫𑁆𑀫𑀯𑀸𑀤𑀻 𑀘 𑀅𑀥𑀫𑁆𑀫𑀯𑀸𑀤𑀻 𑀘. 𑀅𑀥𑀫𑁆𑀫𑀯𑀸𑀤𑀻 𑀘𑀡𑁆𑀟𑁄 𑀳𑁄𑀢𑀺 𑀨𑀭𑀼𑀲𑁄, 𑀫𑀼𑀔𑀭𑁄, 𑀢𑀲𑁆𑀲 𑀅𑀚𑁆𑀛𑀸𑀘𑀸𑀭𑁄 𑀇𑀢𑀭𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀢𑀢𑁄 𑀦𑀁 ‘‘𑀇𑀤𑀁 𑀢𑁂, 𑀆𑀯𑀼𑀲𑁄, 𑀓𑀫𑁆𑀫𑀁 𑀲𑀸𑀲𑀦𑀲𑁆𑀲 𑀅𑀧𑁆𑀧𑀢𑀺𑀭𑀽𑀧’’𑀦𑁆𑀢𑀺 𑀘𑁄𑀤𑁂𑀲𑀺. 𑀲𑁄 ‘‘𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀁 𑀲𑀼𑀢’’𑀦𑁆𑀢𑀺 𑀯𑀺𑀓𑁆𑀔𑀺𑀧𑀢𑀺. 𑀇𑀢𑀭𑁄 ‘‘𑀯𑀺𑀦𑀬𑀥𑀭𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀢𑀢𑁄 𑀅𑀥𑀫𑁆𑀫𑀯𑀸𑀤𑀻 ‘‘𑀲𑀘𑁂 𑀇𑀫𑀁 𑀯𑀢𑁆𑀣𑀼𑀁 𑀯𑀺𑀦𑀬𑀥𑀭𑀸 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀦𑁆𑀢𑀺, 𑀅𑀤𑁆𑀥𑀸 𑀫𑁂 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑁆𑀔𑀁 𑀓𑀸𑀢𑀼𑀓𑀸𑀫𑁄 𑀢𑀸𑀯𑀤𑁂𑀯 𑀧𑀭𑀺𑀓𑁆𑀔𑀸𑀭𑁂 𑀆𑀤𑀸𑀬 𑀢𑁂 𑀤𑁆𑀯𑁂 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀢𑁂𑀲𑀁 𑀦𑀺𑀲𑁆𑀲𑀬𑁂𑀦 𑀯𑀺𑀳𑀭𑀺𑀢𑀼𑀫𑀸𑀭𑀤𑁆𑀥𑁄. 𑀲𑀩𑁆𑀩𑀜𑁆𑀘 𑀦𑁂𑀲𑀁 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀧𑀽𑀭𑁂𑀢𑀼𑀓𑀸𑀫𑁄 𑀯𑀺𑀬 𑀅𑀓𑀸𑀲𑀺. 𑀢𑀢𑁄 𑀏𑀓𑀤𑀺𑀯𑀲𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁄𑀧𑀺 𑀅𑀝𑁆𑀞𑀸𑀲𑀺𑀬𑁂𑀯. 𑀣𑁂𑀭𑀸 ‘‘𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀻’’𑀢𑀺 𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀆𑀫, 𑀪𑀦𑁆𑀢𑁂, 𑀏𑀓𑁂𑀦 𑀫𑁂 𑀪𑀺𑀓𑁆𑀔𑀼𑀦𑀸 𑀲𑀳 𑀅𑀚𑁆𑀛𑀸𑀘𑀸𑀭𑀁 𑀧𑀝𑀺𑀘𑁆𑀘 𑀯𑀺𑀯𑀸𑀤𑁄 𑀅𑀢𑁆𑀣𑀺. 𑀲𑁄 𑀬𑀤𑀺 𑀢𑀁 𑀯𑀢𑁆𑀣𑀼𑀁 𑀇𑀥𑀸𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀺, 𑀬𑀣𑀸𑀯𑀺𑀦𑀺𑀘𑁆𑀙𑀬𑀁 𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩’’𑀦𑁆𑀢𑀺. 𑀣𑁂𑀭𑀸 ‘‘𑀑𑀲𑀝𑀁 ¶ 𑀯𑀢𑁆𑀣𑀼𑀁 𑀬𑀣𑀸𑀯𑀺𑀦𑀺𑀘𑁆𑀙𑀬𑀁 𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀏𑀯𑀁 𑀓𑀭𑀺𑀬𑀫𑀸𑀦𑁂, 𑀪𑀦𑁆𑀢𑁂, 𑀫𑀫 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀦𑀢𑁆𑀣𑀺, 𑀫𑀬𑁆𑀳𑁂𑀢𑀁 𑀧𑀸𑀧𑀁 𑀳𑁄𑀢𑀼, 𑀫𑀸 𑀢𑀼𑀫𑁆𑀳𑁂 𑀯𑀺𑀦𑀺𑀘𑁆𑀙𑀺𑀦𑀣𑀸’’𑀢𑀺. 𑀢𑁂 𑀢𑁂𑀦 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀸 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 ‘‘𑀲𑀩𑁆𑀩𑀁 𑀯𑀺𑀦𑀬𑀥𑀭𑀸𑀦𑀁 𑀲𑀦𑁆𑀢𑀺𑀓𑁂 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀢𑀁 𑀥𑀫𑁆𑀫𑀯𑀸𑀤𑀺𑀁 𑀲𑀼𑀝𑁆𑀞𑀼𑀢𑀭𑀁 𑀅𑀯𑀫𑀜𑁆𑀜𑀦𑁆𑀢𑁄 𑀨𑀭𑀼𑀲𑁂𑀦 𑀲𑀫𑀼𑀤𑀸𑀘𑀭𑀢𑀺. 𑀥𑀫𑁆𑀫𑀯𑀸𑀤𑀻 ‘‘𑀦𑀺𑀲𑁆𑀲𑀗𑁆𑀓𑁄 𑀅𑀬𑀁 𑀚𑀸𑀢𑁄’’𑀢𑀺 𑀢𑀸𑀯𑀤𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀸𑀦𑀁 𑀧𑀭𑀺𑀯𑀸𑀭𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ¶ 𑁋 ‘‘𑀦𑀦𑀼, 𑀆𑀯𑀼𑀲𑁄, 𑀑𑀲𑀝𑀁 𑀯𑀢𑁆𑀣𑀼 𑀬𑀣𑀸𑀥𑀫𑁆𑀫𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁, 𑀅𑀦𑁄𑀲𑀭𑀸𑀧𑁂𑀢𑁆𑀯𑀸 𑀏𑀯 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸 𑀲𑀸𑀫𑀕𑁆𑀕𑀻 𑀓𑀸𑀢𑀩𑁆𑀩𑀸. 𑀇𑀫𑁂 𑀧𑀦 𑀣𑁂𑀭𑀸 𑀦𑁂𑀯 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀁𑀲𑀼, 𑀦 𑀲𑀸𑀫𑀕𑁆𑀕𑀺𑀁 𑀅𑀓𑀁𑀲𑀼. 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺? 𑀢𑁂𑀧𑀺 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁 𑁋 ‘‘𑀦𑀽𑀦 𑀓𑀺𑀜𑁆𑀘𑀺 𑀆𑀘𑀭𑀺𑀬𑁂𑀳𑀺 𑀜𑀸𑀢’’𑀦𑁆𑀢𑀺. 𑀢𑀢𑁄 𑀅𑀥𑀫𑁆𑀫𑀯𑀸𑀤𑀻 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀢𑁆𑀯𑀁 𑀧𑀼𑀩𑁆𑀩𑁂 ‘𑀯𑀺𑀦𑀬𑀥𑀭𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺 𑀪𑀡𑀲𑀺. 𑀇𑀤𑀸𑀦𑀺 𑀢𑁂𑀲𑀁 𑀯𑀺𑀦𑀬𑀥𑀭𑀸𑀦𑀁 𑀆𑀭𑁄𑀘𑁂𑀳𑀺 𑀢𑀁 ¶ 𑀯𑀢𑁆𑀣𑀼’’𑀦𑁆𑀢𑀺 𑀥𑀫𑁆𑀫𑀯𑀸𑀤𑀺𑀁 𑀧𑀻𑀴𑁂𑀢𑁆𑀯𑀸 ‘‘𑀅𑀚𑁆𑀚𑀢𑀕𑁆𑀕𑁂 𑀧𑀭𑀸𑀚𑀺𑀢𑁄 𑀢𑁆𑀯𑀁, 𑀫𑀸 𑀢𑀁 𑀆𑀯𑀸𑀲𑀁 𑀆𑀕𑀘𑁆𑀙𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀥𑀫𑁆𑀫𑀯𑀸𑀤𑀻 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀲𑀸𑀲𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 ‘𑀅𑀫𑁆𑀳𑁂 𑀉𑀧𑀝𑁆𑀞𑁂𑀲𑀺 𑀧𑀭𑀺𑀢𑁄𑀲𑁂𑀲𑀻’𑀢𑀺 𑀧𑀼𑀕𑁆𑀕𑀮𑀫𑁂𑀯 𑀅𑀧𑁂𑀓𑁆𑀔𑀺𑀢𑁆𑀣, 𑀲𑀸𑀲𑀦𑀁 𑀅𑀭𑀓𑁆𑀔𑀺𑀢𑁆𑀯𑀸 𑀧𑀼𑀕𑁆𑀕𑀮𑀁 𑀭𑀓𑁆𑀔𑀺𑀢𑁆𑀣, 𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀯𑀺𑀦𑀺𑀘𑁆𑀙𑀬𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀚𑁆𑀚 𑀧𑀭𑀺𑀦𑀺𑀩𑁆𑀩𑀼𑀢𑁄 𑀓𑀲𑁆𑀲𑀧𑁄 𑀪𑀕𑀯𑀸’’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀓𑀦𑁆𑀤𑀺𑀢𑁆𑀯𑀸 ‘‘𑀦𑀝𑁆𑀞𑀁 𑀲𑀢𑁆𑀣𑀼 𑀲𑀸𑀲𑀦’’𑀦𑁆𑀢𑀺 𑀧𑀭𑀺𑀤𑁂𑀯𑀫𑀸𑀦𑁄 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 ‘‘𑀫𑀬𑀁 𑀧𑀼𑀕𑁆𑀕𑀮𑀫𑀦𑀼𑀭𑀓𑁆𑀔𑀦𑁆𑀢𑀸 𑀲𑀸𑀲𑀦𑀭𑀢𑀦𑀁 𑀲𑁄𑀩𑁆𑀪𑁂 𑀧𑀓𑁆𑀔𑀺𑀧𑀺𑀫𑁆𑀳𑀸’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀲𑀼𑀁 ¶ . 𑀢𑁂 𑀢𑁂𑀦𑁂𑀯 𑀓𑀼𑀓𑁆𑀓𑀼𑀘𑁆𑀘𑁂𑀦 𑀉𑀧𑀳𑀢𑀸𑀲𑀬𑀢𑁆𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀸 𑀏𑀓𑀸𑀘𑀭𑀺𑀬𑁄 𑀳𑀺𑀫𑀯𑀢𑀺 𑀳𑁂𑀫𑀯𑀢𑁂 𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄𑀢𑀺 𑀦𑀸𑀫𑁂𑀦. 𑀤𑀼𑀢𑀺𑀬𑀸𑀘𑀭𑀺𑀬𑁄 𑀫𑀚𑁆𑀛𑀺𑀫𑀤𑁂𑀲𑁂 𑀲𑀸𑀢𑀧𑀩𑁆𑀩𑀢𑁂 𑀲𑀸𑀢𑀸𑀕𑀺𑀭𑁄𑀢𑀺 𑀦𑀸𑀫𑁂𑀦. 𑀢𑁂𑀧𑀺 𑀦𑁂𑀲𑀁 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽 𑀢𑁂𑀲𑀁𑀬𑁂𑀯 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀸 𑀢𑁂𑀲𑀁 𑀧𑀭𑀺𑀯𑀸𑀭𑀸 𑀬𑀓𑁆𑀔𑀸𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀧𑀦 𑀧𑀘𑁆𑀘𑀬𑀤𑀸𑀬𑀓𑀸 𑀕𑀳𑀝𑁆𑀞𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑀺𑀁𑀲𑀼. 𑀳𑁂𑀫𑀯𑀢𑀲𑀸𑀢𑀸𑀕𑀺𑀭𑀸 𑀅𑀝𑁆𑀞𑀯𑀻𑀲𑀢𑀺𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀫𑀩𑁆𑀪𑀦𑁆𑀢𑀭𑀸 𑀫𑀳𑀸𑀦𑀼𑀪𑀸𑀯𑀸 𑀬𑀓𑁆𑀔𑀭𑀸𑀚𑀸𑀦𑁄 𑀅𑀳𑁂𑀲𑀼𑀁.

𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀜𑁆𑀘 𑀅𑀬𑀁 𑀥𑀫𑁆𑀫𑀢𑀸 𑁋 𑀫𑀸𑀲𑁂 𑀫𑀸𑀲𑁂 𑀅𑀝𑁆𑀞 𑀤𑀺𑀯𑀲𑀸𑀦𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀳𑀺𑀫𑀯𑀢𑀺 𑀫𑀦𑁄𑀲𑀺𑀮𑀸𑀢𑀮𑁂 𑀦𑀸𑀕𑀯𑀢𑀺𑀫𑀡𑁆𑀟𑀧𑁂 𑀤𑁂𑀯𑀢𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀳𑁄𑀢𑀺, 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀦𑁆𑀢𑀺. 𑀅𑀣 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀅𑀜𑁆𑀜𑀫𑀜𑁆𑀜𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀁𑀲𑀼 𑁋 ‘‘𑀢𑁆𑀯𑀁, 𑀲𑀫𑁆𑀫, 𑀓𑀼𑀳𑀺𑀁 𑀉𑀧𑁆𑀧𑀦𑁆𑀦𑁄, 𑀢𑁆𑀯𑀁 𑀓𑀼𑀳𑀺’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀜𑁆𑀘 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑁂𑀲𑀼𑀁. ‘‘𑀦𑀝𑁆𑀞𑀸 𑀫𑀬𑀁, 𑀲𑀫𑁆𑀫, 𑀧𑀼𑀩𑁆𑀩𑁂 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀏𑀓𑀁 𑀧𑀸𑀧𑀲𑀳𑀸𑀬𑀁 𑀦𑀺𑀲𑁆𑀲𑀸𑀬 𑀬𑀓𑁆𑀔𑀬𑁄𑀦𑀺𑀬𑀁 𑀉𑀧𑁆𑀧𑀦𑁆𑀦𑀸, 𑀅𑀫𑁆𑀳𑀸𑀓𑀁 𑀧𑀦 𑀧𑀘𑁆𑀘𑀬𑀤𑀸𑀬𑀓𑀸 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀸’’𑀢𑀺. 𑀅𑀣 𑀲𑀸𑀢𑀸𑀕𑀺𑀭𑁄 𑀆𑀳 𑁋 ‘‘𑀫𑀸𑀭𑀺𑀲, 𑀳𑀺𑀫𑀯𑀸 𑀦𑀸𑀫 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀫𑁆𑀫𑀢𑁄, 𑀓𑀺𑀜𑁆𑀘𑀺 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀫𑀫𑀸𑀧𑀺 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀳𑁂𑀫𑀯𑀢𑁄𑀧𑀺 𑀆𑀳 𑁋 ‘‘𑀫𑀸𑀭𑀺𑀲, 𑀫𑀚𑁆𑀛𑀺𑀫𑀤𑁂𑀲𑁄 𑀦𑀸𑀫 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀫𑁆𑀫𑀢𑁄, 𑀓𑀺𑀜𑁆𑀘𑀺 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀫𑀫𑀸𑀧𑀺 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀏𑀯𑀁 𑀢𑁂𑀲𑀼 𑀤𑁆𑀯𑀻𑀲𑀼 𑀲𑀳𑀸𑀬𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀓𑀢𑀺𑀓𑀁 𑀓𑀢𑁆𑀯𑀸, 𑀢𑀫𑁂𑀯 𑀉𑀧𑁆𑀧𑀢𑁆𑀢𑀺𑀁 𑀅𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀲𑀫𑀸𑀦𑁂𑀲𑀼 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀯𑀻𑀢𑀺𑀯𑀢𑁆𑀢𑀁, 𑀫𑀳𑀸𑀧𑀣𑀯𑀻 𑀏𑀓𑀬𑁄𑀚𑀦𑀢𑀺𑀕𑀸𑀯𑀼𑀢𑀫𑀢𑁆𑀢𑀁 𑀉𑀲𑁆𑀲𑀤𑀸.

𑀅𑀣𑀫𑁆𑀳𑀸𑀓𑀁 ¶ ¶ ¶ 𑀩𑁄𑀥𑀺𑀲𑀢𑁆𑀢𑁄 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀧𑀡𑀺𑀥𑀸𑀦𑁄 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁, 𑀢𑀸𑀯 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸, 𑀢𑀼𑀲𑀺𑀢𑀪𑀯𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸, 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸, 𑀥𑀫𑁆𑀫𑀧𑀤𑀦𑀺𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦 𑀤𑁂𑀯𑀢𑀸𑀳𑀺 𑀆𑀬𑀸𑀘𑀺𑀢𑁄 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸, 𑀤𑁂𑀯𑀢𑀸𑀦𑀁 𑀆𑀭𑁄𑀘𑁂𑀢𑁆𑀯𑀸, 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀇𑀥 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀓𑀫𑁆𑀧𑁂𑀢𑁆𑀯𑀸. 𑀢𑀸𑀦𑀺 𑀤𑀺𑀲𑁆𑀯𑀸𑀧𑀺 𑀇𑀫𑁂 𑀭𑀸𑀚𑀬𑀓𑁆𑀔𑀸 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀻’’𑀢𑀺 𑀦 𑀚𑀸𑀦𑀺𑀁𑀲𑀼. ‘‘𑀔𑀺𑀟𑁆𑀟𑀸𑀧𑀲𑀼𑀢𑀢𑁆𑀢𑀸 𑀦𑁂𑀯𑀸𑀤𑁆𑀤𑀲𑀁𑀲𑀽’’𑀢𑀺 𑀏𑀓𑁂. 𑀏𑀲 𑀦𑀬𑁄 𑀚𑀸𑀢𑀺𑀬𑀁 𑀅𑀪𑀺𑀦𑀺𑀓𑁆𑀔𑀫𑀦𑁂 𑀩𑁄𑀥𑀺𑀬𑀜𑁆𑀘. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀧𑀦 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀫𑀦𑁆𑀢𑁂𑀢𑁆𑀯𑀸 𑀪𑀕𑀯𑀢𑀺 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀯𑀭𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂 𑀫𑀳𑀸𑀪𑀽𑀫𑀺𑀘𑀸𑀮𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀘 𑀏𑀢𑁂𑀲𑀁 𑀏𑀓𑁄 𑀲𑀸𑀢𑀸𑀕𑀺𑀭𑁄𑀬𑁂𑀯 𑀧𑀞𑀫𑀁 𑀅𑀤𑁆𑀤𑀲. 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀜𑁆𑀘 𑀢𑁂𑀲𑀁 𑀜𑀢𑁆𑀯𑀸 𑀲𑀧𑀭𑀺𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀥𑀫𑁆𑀫𑀤𑁂𑀲𑀦𑀁 𑀅𑀲𑁆𑀲𑁄𑀲𑀺, 𑀦 𑀘 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀺. 𑀓𑀲𑁆𑀫𑀸? 𑀲𑁄 𑀳𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀳𑁂𑀫𑀯𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀆𑀕𑀢𑁄 𑀦𑀼 𑀔𑁄 𑀫𑁂 𑀲𑀳𑀸𑀬𑀓𑁄, 𑀦𑁄’’𑀢𑀺 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀯𑀜𑁆𑀘𑀺𑀢𑁄 𑀫𑁂 𑀲𑀳𑀸𑀬𑁄, 𑀬𑁄 𑀏𑀯𑀁 𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀦 𑀲𑀼𑀡𑀸𑀢𑀻’’𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀪𑀕𑀯𑀸 𑀘 𑀅𑀢𑁆𑀣𑀗𑁆𑀕𑀢𑁂𑀧𑀺 𑀘 𑀲𑀽𑀭𑀺𑀬𑁂 𑀤𑁂𑀲𑀦𑀁 𑀦 𑀦𑀺𑀝𑁆𑀞𑀸𑀧𑁂𑀲𑀺.

𑀅𑀣 𑀲𑀸𑀢𑀸𑀕𑀺𑀭𑁄 ‘‘𑀲𑀳𑀸𑀬𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀳𑀸𑀕𑀫𑁆𑀫 𑀥𑀫𑁆𑀫𑀤𑁂𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑀺𑀬𑀸𑀦𑀅𑀲𑁆𑀲𑀬𑀸𑀦𑀕𑀭𑀼𑀴𑀬𑀸𑀦𑀸𑀤𑀻𑀦𑀺 𑀫𑀸𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀬𑀓𑁆𑀔𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺, 𑀢𑀤𑀸 𑀳𑁂𑀫𑀯𑀢𑁄𑀧𑀺. 𑀬𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀚𑀸𑀢𑀺-𑀅𑀪𑀺𑀦𑀺𑀓𑁆𑀔𑀫𑀦-𑀩𑁄𑀥𑀺𑀧𑀭𑀺𑀦𑀺𑀩𑁆𑀩𑀸𑀦𑁂𑀲𑁆𑀯𑁂𑀯 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀳𑀼𑀢𑁆𑀯𑀸𑀯 𑀧𑀢𑀺𑀯𑀺𑀕𑀘𑁆𑀙𑀦𑁆𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑁂 𑀧𑀦 𑀢𑀸𑀦𑀺 𑀲𑀯𑀺𑀲𑁂𑀲𑀸𑀦𑀺 𑀳𑀼𑀢𑁆𑀯𑀸, 𑀘𑀺𑀭𑀢𑀭𑀁 𑀞𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀳𑀺𑀫𑀯𑀢𑀺 𑀢𑀁 𑀅𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀬𑀢𑁄 𑀅𑀳𑀁 𑀚𑀸𑀢𑁄, 𑀦 𑀓𑀤𑀸𑀘𑀺 𑀅𑀬𑀁 𑀧𑀩𑁆𑀩𑀢𑁄 𑀏𑀯𑀁 𑀅𑀪𑀺𑀭𑀸𑀫𑁄 𑀪𑀽𑀢𑀧𑀼𑀩𑁆𑀩𑁄, 𑀳𑀦𑁆𑀤 𑀤𑀸𑀦𑀺 𑀫𑀫 𑀲𑀳𑀸𑀬𑀁 𑀕𑀳𑁂𑀢𑁆𑀯𑀸 𑀆𑀕𑀫𑁆𑀫 𑀢𑁂𑀦 𑀲𑀳 𑀇𑀫𑀁 𑀧𑀼𑀧𑁆𑀨𑀲𑀺𑀭𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀫𑀚𑁆𑀛𑀺𑀫𑀤𑁂𑀲𑀸𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺. 𑀢𑁂 𑀉𑀪𑁄𑀧𑀺 𑀭𑀸𑀚𑀕𑀳𑀲𑁆𑀲 ¶ 𑀉𑀧𑀭𑀺 𑀲𑀫𑀸𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀕𑀫𑀦𑀓𑀸𑀭𑀡𑀁 𑀧𑀼𑀘𑁆𑀙𑀺𑀁𑀲𑀼. 𑀳𑁂𑀫𑀯𑀢𑁄 𑀆𑀳 𑁋 ‘‘𑀬𑀢𑁄 𑀅𑀳𑀁, 𑀫𑀸𑀭𑀺𑀲, 𑀚𑀸𑀢𑁄, 𑀦𑀸𑀬𑀁 𑀧𑀩𑁆𑀩𑀢𑁄 𑀏𑀯𑀁 𑀅𑀓𑀸𑀮𑀓𑀼𑀲𑀼𑀫𑀺𑀢𑁂𑀳𑀺 𑀭𑀼𑀓𑁆𑀔𑁂𑀳𑀺 𑀅𑀪𑀺𑀭𑀸𑀫𑁄 𑀪𑀽𑀢𑀧𑀼𑀩𑁆𑀩𑁄, 𑀢𑀲𑁆𑀫𑀸 𑀏𑀢𑀁 𑀧𑀼𑀧𑁆𑀨𑀲𑀺𑀭𑀺𑀁 𑀢𑀬𑀸 𑀲𑀤𑁆𑀥𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀻’’𑀢𑀺 ¶ . 𑀲𑀸𑀢𑀸𑀕𑀺𑀭𑁄 𑀆𑀳 𑁋 ‘‘𑀚𑀸𑀦𑀸𑀲𑀺, 𑀧𑀦, 𑀢𑁆𑀯𑀁 𑀫𑀸𑀭𑀺𑀲, 𑀬𑁂𑀦 𑀓𑀸𑀭𑀡𑁂𑀦 𑀇𑀫𑀁 𑀅𑀓𑀸𑀮𑀧𑀼𑀧𑁆𑀨𑀧𑀸𑀝𑀺𑀳𑀸𑀭𑀺𑀬𑀁 𑀚𑀸𑀢’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀫𑀸𑀭𑀺𑀲𑀸’’𑀢𑀺. ‘‘𑀇𑀫𑀁, 𑀫𑀸𑀭𑀺𑀲, 𑀧𑀸𑀝𑀺𑀳𑀸𑀭𑀺𑀬𑀁 𑀦 𑀓𑁂𑀯𑀮 𑀳𑀺𑀫𑀯𑀦𑁆𑀢𑁂𑀬𑁂𑀯, 𑀅𑀧𑀺𑀘 𑀔𑁄 𑀧𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽𑀲𑀼 𑀦𑀺𑀩𑁆𑀩𑀢𑁆𑀢𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀅𑀚𑁆𑀚 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀢𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀏𑀯𑀁 𑀲𑀸𑀢𑀸𑀕𑀺𑀭𑁄 𑀳𑁂𑀫𑀯𑀢𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀓𑀣𑁂𑀢𑁆𑀯𑀸, 𑀢𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀦𑁂𑀢𑀼𑀓𑀸𑀫𑁄 𑀇𑀫𑀁 𑀕𑀸𑀣𑀫𑀸𑀳. 𑀓𑁂𑀘𑀺 𑀧𑀦 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁂 𑀪𑀕𑀯𑀢𑀺 𑀅𑀬𑀫𑁂𑀯𑀫𑀸𑀳𑀸𑀢𑀺 𑀪𑀡𑀦𑁆𑀢𑀺 ‘‘𑀅𑀚𑁆𑀚 𑀧𑀦𑁆𑀦𑀭𑀲𑁄’’𑀢𑀺.

𑁧𑁫𑁩. 𑀢𑀢𑁆𑀣 ¶ 𑀅𑀚𑁆𑀚𑀸𑀢𑀺 𑀅𑀬𑀁 𑀭𑀢𑁆𑀢𑀺𑀦𑁆𑀤𑀺𑀯𑁄 𑀧𑀓𑁆𑀔𑀕𑀡𑀦𑀢𑁄 𑀧𑀦𑁆𑀦𑀭𑀲𑁄, 𑀉𑀧𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄. 𑀢𑀻𑀲𑀼 𑀯𑀸 𑀉𑀧𑁄𑀲𑀣𑁂𑀲𑀼 𑀅𑀚𑁆𑀚 𑀧𑀦𑁆𑀦𑀭𑀲𑁄 𑀉𑀧𑁄𑀲𑀣𑁄, 𑀦 𑀘𑀸𑀢𑀼𑀤𑁆𑀤𑀲𑀻 𑀉𑀧𑁄𑀲𑀣𑁄, 𑀦 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄. 𑀬𑀲𑁆𑀫𑀸 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀅𑀝𑁆𑀞𑀗𑁆𑀕𑀉𑀧𑀯𑀸𑀲𑀧𑀜𑁆𑀜𑀢𑁆𑀢𑀺𑀤𑀺𑀯𑀲𑀸𑀤𑀻𑀲𑀼 𑀲𑀫𑁆𑀩𑀳𑀼𑀮𑁂𑀲𑀼 𑀅𑀢𑁆𑀣𑁂𑀲𑀼 𑀉𑀧𑁄𑀲𑀣𑀲𑀤𑁆𑀤𑁄 𑀯𑀢𑁆𑀢𑀢𑀺. ‘‘𑀆𑀬𑀸𑀫𑀸𑀯𑀼𑀲𑁄, 𑀓𑀧𑁆𑀧𑀺𑀦, 𑀉𑀧𑁄𑀲𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 𑀳𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀉𑀧𑁄𑀲𑀣𑀲𑀤𑁆𑀤𑁄. ‘‘𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀯𑀺𑀲𑀸𑀔𑁂 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁪𑁩) 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀆𑀤𑀺𑀓𑁂𑀲𑀼 𑀅𑀝𑁆𑀞𑀗𑁆𑀕𑁂𑀲𑀼. ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀼, 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁯) 𑀉𑀧𑀯𑀸𑀲𑁂. ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁬; 𑀫. 𑀦𑀺. 𑁩.𑁨𑁫𑁮) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁫; 𑀫. 𑀦𑀺. 𑁩.𑁨𑁫𑁬) 𑀤𑀺𑀯𑀲𑁂. 𑀢𑀲𑁆𑀫𑀸 𑀅𑀯𑀲𑁂𑀲𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀤𑀺𑀯𑀲𑀁𑀬𑁂𑀯 𑀦𑀺𑀬𑀸𑀫𑁂𑀦𑁆𑀢𑁄 𑀆𑀳 𑁋 ‘‘𑀅𑀚𑁆𑀚 𑀧𑀦𑁆𑀦𑀭𑀲𑁄 𑀉𑀧𑁄𑀲𑀣𑁄’’𑀢𑀺. 𑀧𑀸𑀝𑀺𑀧𑀤𑁄 𑀤𑀼𑀢𑀺𑀬𑁄𑀢𑀺 𑀏𑀯𑀁 𑀕𑀡𑀺𑀬𑀫𑀸𑀦𑁂 𑀅𑀚𑁆𑀚 𑀧𑀦𑁆𑀦𑀭𑀲𑁄 𑀤𑀺𑀯𑀲𑁄𑀢𑀺 𑀅𑀢𑁆𑀣𑁄.

𑀤𑀺𑀯𑀺 𑀪𑀯𑀸𑀦𑀺 𑀤𑀺𑀩𑁆𑀩𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀤𑀺𑀩𑁆𑀩𑀸. 𑀓𑀸𑀦𑀺 𑀢𑀸𑀦𑀺? 𑀭𑀽𑀧𑀸𑀦𑀺. 𑀢𑀜𑁆𑀳𑀺 ¶ 𑀭𑀢𑁆𑀢𑀺𑀁 𑀤𑁂𑀯𑀸𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀢𑁄 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀭𑀻𑀭𑀯𑀢𑁆𑀣𑀸𑀪𑀭𑀡𑀯𑀺𑀫𑀸𑀦𑀧𑁆𑀧𑀪𑀸𑀳𑀺 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑀸𑀬 𑀘𑀦𑁆𑀤𑀧𑁆𑀧𑀪𑀸𑀬 𑀘 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀅𑀮𑀗𑁆𑀓𑀢𑁄 𑀅𑀳𑁄𑀲𑀺. 𑀯𑀺𑀲𑁂𑀲𑀸𑀮𑀗𑁆𑀓𑀢𑁄 𑀘 𑀧𑀭𑀫𑀯𑀺𑀲𑀼𑀤𑁆𑀥𑀺𑀤𑁂𑀯𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸𑀬. 𑀢𑁂𑀦𑀸𑀳 ‘‘𑀤𑀺𑀩𑁆𑀩𑀸 𑀭𑀢𑁆𑀢𑀺 𑀉𑀧𑀝𑁆𑀞𑀺𑀢𑀸’’𑀢𑀺.

𑀏𑀯𑀁 ¶ 𑀭𑀢𑁆𑀢𑀺𑀕𑀼𑀡𑀯𑀡𑁆𑀡𑀦𑀸𑀧𑀤𑁂𑀲𑁂𑀦𑀸𑀧𑀺 𑀲𑀳𑀸𑀬𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀚𑀦𑁂𑀦𑁆𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀓𑀣𑁂𑀢𑁆𑀯𑀸 𑀆𑀳 ‘‘𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭𑀁, 𑀳𑀦𑁆𑀤 𑀧𑀲𑁆𑀲𑀸𑀫 𑀕𑁄𑀢𑀫’’𑀦𑁆𑀢𑀺. 𑀢𑀢𑁆𑀣 𑀅𑀦𑁄𑀫𑁂𑀳𑀺 𑀅𑀮𑀸𑀫𑀓𑁂𑀳𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁂𑀳𑀺 𑀕𑀼𑀡𑁂𑀳𑀺 𑀦𑀸𑀫𑀁 𑀅𑀲𑁆𑀲𑀸𑀢𑀺 𑀅𑀦𑁄𑀫𑀦𑀸𑀫𑁄. 𑀢𑀣𑀸 𑀳𑀺𑀲𑁆𑀲 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀬𑁂𑀦 𑀩𑀼𑀤𑁆𑀥𑁄𑀢𑀺 𑀅𑀦𑁄𑀫𑁂𑀳𑀺 𑀕𑀼𑀡𑁂𑀳𑀺 𑀦𑀸𑀫𑀁, ‘‘𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁮𑁪) 𑀦𑀬𑁂𑀦 𑀘 𑀅𑀦𑁄𑀫𑁂𑀳𑀺 𑀕𑀼𑀡𑁂𑀳𑀺 𑀦𑀸𑀫𑀁. 𑀏𑀲 𑀦𑀬𑁄 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑁂 𑀅𑀦𑀼𑀲𑀸𑀲𑀢𑀺 ‘‘𑀇𑀫𑀁 𑀧𑀚𑀳𑀣, 𑀇𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀣𑀸’’𑀢𑀺 𑀲𑀢𑁆𑀣𑀸. 𑀅𑀧𑀺𑀘 ‘‘𑀲𑀢𑁆𑀣𑀸 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄, 𑀬𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁦) 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀲𑀢𑁆𑀣𑀸. 𑀢𑀁 𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭𑀁. 𑀳𑀦𑁆𑀤𑀸𑀢𑀺 𑀩𑁆𑀬𑀯𑀲𑀸𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀲𑁆𑀲𑀸𑀫𑀸𑀢𑀺 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀳 𑀲𑀗𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀘𑀦𑀁. 𑀕𑁄𑀢𑀫𑀦𑁆𑀢𑀺 𑀕𑁄𑀢𑀫𑀕𑁄𑀢𑁆𑀢𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 ¶ ? ‘‘𑀲𑀢𑁆𑀣𑀸, 𑀦 𑀲𑀢𑁆𑀣𑀸’’𑀢𑀺 𑀫𑀸 𑀯𑀺𑀫𑀢𑀺𑀁 𑀅𑀓𑀸𑀲𑀺, 𑀏𑀓𑀦𑁆𑀢𑀩𑁆𑀬𑀯𑀲𑀺𑀢𑁄 𑀳𑀼𑀢𑁆𑀯𑀸𑀯 𑀏𑀳𑀺 𑀧𑀲𑁆𑀲𑀸𑀫 𑀕𑁄𑀢𑀫𑀦𑁆𑀢𑀺.

𑁧𑁫𑁪. 𑀏𑀯𑀁 𑀯𑀼𑀢𑁆𑀢𑁂 𑀳𑁂𑀫𑀯𑀢𑁄 ‘‘𑀅𑀬𑀁 𑀲𑀸𑀢𑀸𑀕𑀺𑀭𑁄 ‘𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭’𑀦𑁆𑀢𑀺 𑀪𑀡𑀦𑁆𑀢𑁄 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀁 𑀧𑀓𑀸𑀲𑁂𑀢𑀺, 𑀲𑀩𑁆𑀩𑀜𑁆𑀜𑀼𑀦𑁄 𑀘 𑀤𑀼𑀮𑁆𑀮𑀪𑀸 𑀮𑁄𑀓𑁂, 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑁂𑀳𑀺 𑀧𑀽𑀭𑀡𑀸𑀤𑀺𑀲𑀤𑀺𑀲𑁂𑀳𑁂𑀯 𑀮𑁄𑀓𑁄 𑀉𑀧𑀤𑁆𑀤𑀼𑀢𑁄. 𑀲𑁄 𑀧𑀦 𑀬𑀤𑀺 𑀲𑀩𑁆𑀩𑀜𑁆𑀜𑀽, 𑀅𑀤𑁆𑀥𑀸 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀢𑀁 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀤𑀺𑀮𑀓𑁆𑀔𑀡𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋 ‘‘𑀓𑀘𑁆𑀘𑀺 𑀫𑀦𑁄’’𑀢𑀺.

𑀢𑀢𑁆𑀣 𑀓𑀘𑁆𑀘𑀻𑀢𑀺 𑀧𑀼𑀘𑁆𑀙𑀸. 𑀫𑀦𑁄𑀢𑀺 𑀘𑀺𑀢𑁆𑀢𑀁. 𑀲𑀼𑀧𑀡𑀺𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑁄, 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻. 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀲𑀩𑁆𑀩𑀪𑀽𑀢𑁂𑀲𑀼. 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀲𑁆𑀲𑁂𑀯 ¶ 𑀲𑀢𑁄. 𑀧𑀼𑀘𑁆𑀙𑀸 𑀏𑀯 𑀯𑀸 𑀅𑀬𑀁 ‘‘𑀲𑁄 𑀢𑁂 𑀲𑀢𑁆𑀣𑀸 𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀻, 𑀉𑀤𑀸𑀳𑀼 𑀦𑁄’’𑀢𑀺. 𑀇𑀝𑁆𑀞𑁂 𑀅𑀦𑀺𑀝𑁆𑀞𑁂 𑀘𑀸𑀢𑀺 𑀏𑀯𑀭𑀽𑀧𑁂 𑀆𑀭𑀫𑁆𑀫𑀡𑁂. 𑀲𑀗𑁆𑀓𑀧𑁆𑀧𑀸𑀢𑀺 𑀯𑀺𑀢𑀓𑁆𑀓𑀸. 𑀯𑀲𑀻𑀓𑀢𑀸𑀢𑀺 𑀯𑀲𑀁 𑀕𑀫𑀺𑀢𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑁆𑀯𑀁 𑀲𑀢𑁆𑀣𑀸𑀭𑀁 𑀯𑀤𑀲𑀺, 𑀢𑀲𑁆𑀲 𑀢𑁂 𑀲𑀢𑁆𑀣𑀼𑀦𑁄 𑀓𑀘𑁆𑀘𑀺 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀲𑁆𑀲 𑀲𑀢𑁄 𑀲𑀩𑁆𑀩𑀪𑀽𑀢𑁂𑀲𑀼 𑀫𑀦𑁄 𑀲𑀼𑀧𑀡𑀺𑀳𑀺𑀢𑁄, 𑀉𑀤𑀸𑀳𑀼 𑀬𑀸𑀯 𑀘𑀮𑀦𑀧𑀘𑁆𑀘𑀬𑀁 𑀦 𑀮𑀪𑀢𑀺, 𑀢𑀸𑀯 𑀲𑀼𑀧𑀡𑀺𑀳𑀺𑀢𑁄 𑀯𑀺𑀬 𑀔𑀸𑀬𑀢𑀺. 𑀲𑁄 𑀯𑀸 𑀢𑁂 𑀲𑀢𑁆𑀣𑀸 𑀓𑀘𑁆𑀘𑀺 𑀲𑀩𑁆𑀩𑀪𑀽𑀢𑁂𑀲𑀼 𑀲𑀫𑀘𑀺𑀢𑁆𑀢𑁂𑀦 𑀢𑀸𑀤𑀻, 𑀉𑀤𑀸𑀳𑀼 𑀦𑁄, 𑀬𑁂 𑀘 𑀔𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 ¶ 𑀆𑀭𑀫𑁆𑀫𑀡𑁂𑀲𑀼 𑀭𑀸𑀕𑀤𑁄𑀲𑀯𑀲𑁂𑀦 𑀲𑀗𑁆𑀓𑀧𑁆𑀧𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁆𑀬𑀸𑀲𑁆𑀲 𑀓𑀘𑁆𑀘𑀺 𑀯𑀲𑀻𑀓𑀢𑀸, 𑀉𑀤𑀸𑀳𑀼 𑀓𑀤𑀸𑀘𑀺 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀯𑀢𑁆𑀢𑀢𑀻𑀢𑀺.

𑁧𑁫𑁫. 𑀢𑀢𑁄 𑀲𑀸𑀢𑀸𑀕𑀺𑀭𑁄 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑁂 𑀩𑁆𑀬𑀯𑀲𑀺𑀢𑀢𑁆𑀢𑀸 𑀲𑀩𑁆𑀩𑁂 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀅𑀦𑀼𑀚𑀸𑀦𑀦𑁆𑀢𑁄 𑀆𑀳 ‘‘𑀫𑀦𑁄 𑀘𑀲𑁆𑀲 𑀲𑀼𑀧𑀡𑀺𑀳𑀺𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀧𑀡𑀺𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑁄, 𑀧𑀣𑀯𑀻𑀲𑀫𑁄 𑀅𑀯𑀺𑀭𑀼𑀚𑁆𑀛𑀦𑀝𑁆𑀞𑁂𑀦, 𑀲𑀺𑀦𑁂𑀭𑀼𑀲𑀫𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀘𑀮𑀦𑀝𑁆𑀞𑁂𑀦, 𑀇𑀦𑁆𑀤𑀔𑀻𑀮𑀲𑀫𑁄 𑀘𑀢𑀼𑀩𑁆𑀩𑀺𑀥𑀫𑀸𑀭𑀧𑀭𑀯𑀸𑀤𑀺𑀕𑀡𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀪𑀕𑀯𑀢𑁄 𑀇𑀤𑀸𑀦𑀺 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑁂 𑀞𑀺𑀢𑀲𑁆𑀲 𑀫𑀦𑁄 𑀲𑀼𑀧𑀡𑀺𑀳𑀺𑀢𑁄 𑀅𑀘𑀮𑁄 𑀪𑀯𑁂𑀬𑁆𑀬. 𑀬𑀲𑁆𑀲 𑀢𑀺𑀭𑀘𑁆𑀙𑀸𑀦𑀪𑀽𑀢𑀲𑁆𑀲𑀸𑀧𑀺 𑀲𑀭𑀸𑀕𑀸𑀤𑀺𑀓𑀸𑀮𑁂 𑀙𑀤𑁆𑀤𑀦𑁆𑀢𑀦𑀸𑀕𑀓𑀼𑀮𑁂 𑀉𑀧𑁆𑀧𑀦𑁆𑀦𑀲𑁆𑀲 𑀲𑀯𑀺𑀲𑁂𑀦 𑀲𑀮𑁆𑀮𑁂𑀦 𑀯𑀺𑀤𑁆𑀥𑀲𑁆𑀲 𑀅𑀘𑀮𑁄 𑀅𑀳𑁄𑀲𑀺, 𑀯𑀥𑀓𑁂𑀧𑀺 𑀢𑀲𑁆𑀫𑀺𑀁 𑀦𑀧𑁆𑀧𑀤𑀼𑀲𑁆𑀲𑀺, 𑀅𑀜𑁆𑀜𑀤𑀢𑁆𑀣𑀼 𑀢𑀲𑁆𑀲𑁂𑀯 𑀅𑀢𑁆𑀢𑀦𑁄 𑀤𑀦𑁆𑀢𑁂 𑀙𑁂𑀢𑁆𑀯𑀸 𑀅𑀤𑀸𑀲𑀺; 𑀢𑀣𑀸 𑀫𑀳𑀸𑀓𑀧𑀺𑀪𑀽𑀢𑀲𑁆𑀲 𑀫𑀳𑀢𑀺𑀬𑀸 𑀲𑀺𑀮𑀸𑀬 𑀲𑀻𑀲𑁂 𑀧𑀳𑀝𑀲𑁆𑀲𑀸𑀧𑀺 𑀢𑀲𑁆𑀲𑁂𑀯 𑀘 𑀫𑀕𑁆𑀕𑀁 𑀤𑀲𑁆𑀲𑁂𑀲𑀺; 𑀢𑀣𑀸 𑀯𑀺𑀥𑀼𑀭𑀧𑀡𑁆𑀟𑀺𑀢𑀪𑀽𑀢𑀲𑁆𑀲 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑁂 𑀓𑀸𑀴𑀧𑀩𑁆𑀩𑀢𑀧𑀧𑀸𑀢𑁂 𑀧𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀜𑁆𑀜𑀤𑀢𑁆𑀣𑀼 𑀢𑀲𑁆𑀲𑁂𑀯 𑀬𑀓𑁆𑀔𑀲𑁆𑀲𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀲𑁆𑀫𑀸 𑀲𑀫𑁆𑀫𑀤𑁂𑀯 𑀆𑀳 𑀲𑀸𑀢𑀸𑀕𑀺𑀭𑁄 𑁋 ‘‘𑀫𑀦𑁄 𑀘𑀲𑁆𑀲 𑀲𑀼𑀧𑀡𑀺𑀳𑀺𑀢𑁄’’𑀢𑀺.

𑀲𑀩𑁆𑀩𑀪𑀽𑀢𑁂𑀲𑀼 ¶ 𑀢𑀸𑀤𑀺𑀦𑁄𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀲𑁆𑀲𑁂𑀯 𑀲𑀢𑁄 𑀫𑀦𑁄 𑀲𑀼𑀧𑀡𑀺𑀳𑀺𑀢𑁄, 𑀦 𑀬𑀸𑀯 𑀧𑀘𑁆𑀘𑀬𑀁 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄 ¶ . 𑀢𑀢𑁆𑀣 𑀪𑀕𑀯𑀢𑁄 𑀢𑀸𑀤𑀺𑀮𑀓𑁆𑀔𑀡𑀁 𑀧𑀜𑁆𑀘𑀥𑀸 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋

‘‘𑀪𑀕𑀯𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻, 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀢𑀦𑁆𑀦𑀺𑀤𑁆𑀤𑁂𑀲𑀸𑀢𑀺 𑀢𑀸𑀤𑀻. 𑀓𑀣𑀁 𑀪𑀕𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀪𑀕𑀯𑀸 𑀮𑀸𑀪𑁂𑀧𑀺 𑀢𑀸𑀤𑀻’’𑀢𑀺 (𑀫𑀳𑀸𑀦𑀺. 𑁩𑁮).

𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀮𑀸𑀪𑀸𑀤𑀬𑁄 𑀘 𑀢𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀼𑀘𑁆𑀙𑀸 𑀏𑀯 𑀯𑀸 𑀅𑀬𑀁. 𑀲𑁄 𑀢𑁂 𑀲𑀢𑁆𑀣𑀸 𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀻, 𑀉𑀤𑀸𑀳𑀼 𑀦𑁄’’𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀯𑀺𑀓𑀧𑁆𑀧𑁂 𑀲𑀩𑁆𑀩𑀪𑀽𑀢𑁂𑀲𑀼 𑀲𑀫𑀘𑀺𑀢𑁆𑀢𑀢𑀸𑀬 𑀢𑀸𑀤𑀻 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀪𑀕𑀯𑀸 𑀲𑀼𑀔𑀽𑀧𑀲𑀁𑀳𑀸𑀭𑀓𑀸𑀫𑀢𑀸𑀬 𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀫𑀘𑀺𑀢𑁆𑀢𑁄, 𑀬𑀸𑀤𑀺𑀲𑁄 𑀅𑀢𑁆𑀢𑀦𑀺, 𑀢𑀸𑀤𑀺𑀲𑁄 𑀧𑀭𑁂𑀲𑀼, 𑀬𑀸𑀤𑀺𑀲𑁄 ¶ 𑀫𑀸𑀢𑀭𑀺 𑀫𑀳𑀸𑀫𑀸𑀬𑀸𑀬, 𑀢𑀸𑀤𑀺𑀲𑁄 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀬, 𑀬𑀸𑀤𑀺𑀲𑁄 𑀧𑀺𑀢𑀭𑀺 𑀲𑀼𑀤𑁆𑀥𑁄𑀤𑀦𑁂, 𑀢𑀸𑀤𑀺𑀲𑁄 𑀲𑀼𑀧𑁆𑀧𑀩𑀼𑀤𑁆𑀥𑁂, 𑀬𑀸𑀤𑀺𑀲𑁄 𑀧𑀼𑀢𑁆𑀢𑁂 𑀭𑀸𑀳𑀼𑀮𑁂, 𑀢𑀸𑀤𑀺𑀲𑁄 𑀯𑀥𑀓𑁂𑀲𑀼 𑀤𑁂𑀯𑀤𑀢𑁆𑀢𑀥𑀦𑀧𑀸𑀮𑀓𑀅𑀗𑁆𑀕𑀼𑀮𑀺𑀫𑀸𑀮𑀸𑀤𑀻𑀲𑀼. 𑀲𑀤𑁂𑀯𑀓𑁂 𑀮𑁄𑀓𑁂𑀧𑀺 𑀢𑀸𑀤𑀻. 𑀢𑀲𑁆𑀫𑀸 𑀲𑀫𑁆𑀫𑀤𑁂𑀯𑀸𑀳 𑀲𑀸𑀢𑀸𑀕𑀺𑀭𑁄 𑁋 ‘‘𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀺𑀦𑁄’’𑀢𑀺.

𑀅𑀣𑁄 𑀇𑀝𑁆𑀞𑁂 𑀅𑀦𑀺𑀝𑁆𑀞𑁂 𑀘𑀸𑀢𑀺. 𑀏𑀢𑁆𑀣 𑀧𑀦 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀬𑀁 𑀓𑀺𑀜𑁆𑀘𑀺 𑀇𑀝𑁆𑀞𑀁 𑀯𑀸 𑀅𑀦𑀺𑀝𑁆𑀞𑀁 𑀯𑀸 𑀆𑀭𑀫𑁆𑀫𑀡𑀁, 𑀲𑀩𑁆𑀩𑀧𑁆𑀧𑀓𑀸𑀭𑁂𑀳𑀺 𑀢𑀢𑁆𑀣 𑀬𑁂 𑀭𑀸𑀕𑀤𑁄𑀲𑀯𑀲𑁂𑀦 𑀲𑀗𑁆𑀓𑀧𑁆𑀧𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁆𑀬𑀸𑀲𑁆𑀲 𑀅𑀦𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦 𑀭𑀸𑀕𑀸𑀤𑀻𑀦𑀁 𑀧𑀳𑀻𑀦𑀢𑁆𑀢𑀸 𑀯𑀲𑀻𑀓𑀢𑀸, 𑀦 𑀓𑀤𑀸𑀘𑀺 𑀢𑁂𑀲𑀁 𑀯𑀲𑁂 𑀯𑀢𑁆𑀢𑀢𑀺. 𑀲𑁄 𑀳𑀺 𑀪𑀕𑀯𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄𑀢𑀺. 𑀏𑀢𑁆𑀣 𑀘 𑀲𑀼𑀧𑀡𑀺𑀳𑀺𑀢𑀫𑀦𑀢𑀸𑀬 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀲𑀩𑁆𑀩𑀪𑀽𑀢𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑁂𑀳𑀺 𑀲𑁄 𑀬𑀢𑁆𑀣 𑀪𑀯𑁂𑀬𑁆𑀬, 𑀢𑀁 𑀲𑀢𑁆𑀢𑀲𑀗𑁆𑀔𑀸𑀭𑀪𑁂𑀤𑀢𑁄 𑀤𑀼𑀯𑀺𑀥𑀫𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀲𑀗𑁆𑀓𑀧𑁆𑀧𑀯𑀲𑀻𑀪𑀸𑀯𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀲𑁆𑀲 𑀫𑀦𑀲𑀺𑀓𑀸𑀭𑀸𑀪𑀸𑀯𑀢𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀲𑀼𑀧𑀡𑀺𑀳𑀺𑀢𑀫𑀦𑀢𑀸𑀬 𑀘 𑀫𑀦𑁄𑀲𑀫𑀸𑀘𑀸𑀭𑀲𑀼𑀤𑁆𑀥𑀺, 𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀺𑀢𑀸𑀬 𑀓𑀸𑀬𑀲𑀫𑀸𑀘𑀸𑀭𑀲𑀼𑀤𑁆𑀥𑀺, 𑀲𑀗𑁆𑀓𑀧𑁆𑀧𑀯𑀲𑀻𑀪𑀸𑀯𑁂𑀦 𑀯𑀺𑀢𑀓𑁆𑀓𑀫𑀽𑀮𑀓𑀢𑁆𑀢𑀸 𑀯𑀸𑀘𑀸𑀬 𑀯𑀘𑀻𑀲𑀫𑀸𑀘𑀸𑀭𑀲𑀼𑀤𑁆𑀥𑀺. 𑀢𑀣𑀸 𑀲𑀼𑀧𑀡𑀺𑀳𑀺𑀢𑀫𑀦𑀢𑀸𑀬 𑀮𑁄𑀪𑀸𑀤𑀺𑀲𑀩𑁆𑀩𑀤𑁄𑀲𑀸𑀪𑀸𑀯𑁄 ¶ , 𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀺𑀢𑀸𑀬 𑀫𑁂𑀢𑁆𑀢𑀸𑀤𑀺𑀕𑀼𑀡𑀲𑀩𑁆𑀪𑀸𑀯𑁄, 𑀲𑀗𑁆𑀓𑀧𑁆𑀧𑀯𑀲𑀻𑀪𑀸𑀯𑁂𑀦 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀺𑀢𑀸𑀤𑀺𑀪𑁂𑀤𑀸 𑀅𑀭𑀺𑀬𑀺𑀤𑁆𑀥𑀺, 𑀢𑀸𑀬 𑀘𑀲𑁆𑀲 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁫𑁬. 𑀏𑀯𑀁 𑀳𑁂𑀫𑀯𑀢𑁄 𑀧𑀼𑀩𑁆𑀩𑁂 𑀫𑀦𑁄𑀤𑁆𑀯𑀸𑀭𑀯𑀲𑁂𑀦𑁂𑀯 𑀢𑀸𑀤𑀺𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀜𑁆𑀘 𑀧𑀝𑀺𑀚𑀸𑀦𑀦𑁆𑀢𑀫𑀺𑀫𑀁 𑀲𑀼𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀇𑀤𑀸𑀦𑀺 𑀤𑁆𑀯𑀸𑀭𑀢𑁆𑀢𑀬𑀯𑀲𑁂𑀦𑀸𑀧𑀺, 𑀧𑀼𑀩𑁆𑀩𑁂 𑀯𑀸 𑀲𑀗𑁆𑀔𑁂𑀧𑁂𑀦 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑀲𑀼𑀤𑁆𑀥𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀜𑁆𑀘 𑀧𑀝𑀺𑀚𑀸𑀦𑀦𑁆𑀢𑀫𑀺𑀫𑀁 𑀲𑀼𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀫𑁂𑀯 𑀯𑀺𑀢𑁆𑀣𑀸𑀭𑁂𑀦𑀸𑀧𑀺 𑀧𑀼𑀘𑁆𑀙𑀦𑁆𑀢𑁄 ¶ 𑀆𑀳 ‘‘𑀓𑀘𑁆𑀘𑀺 𑀅𑀤𑀺𑀦𑁆𑀦’’𑀦𑁆𑀢𑀺. 𑀢𑀢𑁆𑀣 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀸𑀬 𑀧𑀞𑀫𑀁 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀭𑀢𑀺𑀁 𑀧𑀼𑀘𑁆𑀙𑀢𑀺. 𑀆𑀭𑀸 𑀧𑀫𑀸𑀤𑀫𑁆𑀳𑀸𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀢𑁄 𑀤𑀽𑀭𑀻𑀪𑀸𑀯𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀭𑀢𑀺𑀁 𑀧𑀼𑀘𑁆𑀙𑀢𑀺. ‘‘𑀆𑀭𑀸 𑀧𑀫𑀤𑀫𑁆𑀳𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀆𑀭𑀸 𑀫𑀸𑀢𑀼𑀕𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀢𑀲𑁆𑀲𑀸𑀬𑁂𑀯 𑀢𑀺𑀯𑀺𑀥𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺𑀬𑀸 𑀩𑀮𑀯𑀪𑀸𑀯𑀁 𑀧𑀼𑀘𑁆𑀙𑀢𑀺. 𑀛𑀸𑀦𑀬𑀼𑀢𑁆𑀢𑀲𑁆𑀲 𑀳𑀺 𑀯𑀺𑀭𑀢𑀺 𑀩𑀮𑀯𑀢𑀻 𑀳𑁄𑀢𑀻𑀢𑀺.

𑁧𑁫𑁭. 𑀅𑀣 ¶ 𑀲𑀸𑀢𑀸𑀕𑀺𑀭𑁄 𑀬𑀲𑁆𑀫𑀸 𑀪𑀕𑀯𑀸 𑀦 𑀓𑁂𑀯𑀮𑀁 𑀏𑀢𑀭𑀳𑀺, 𑀅𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀤𑀻𑀖𑀭𑀢𑁆𑀢𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑁄, 𑀢𑀲𑁆𑀲𑀸 𑀢𑀲𑁆𑀲𑀸𑀬𑁂𑀯 𑀘 𑀯𑀺𑀭𑀢𑀺𑀬𑀸 𑀆𑀦𑀼𑀪𑀸𑀯𑁂𑀦 𑀢𑀁 𑀢𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀺, 𑀲𑀤𑁂𑀯𑀓𑁄 𑀘𑀲𑁆𑀲 𑀮𑁄𑀓𑁄 ‘‘𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀡𑁆𑀡𑀁 𑀪𑀸𑀲𑀢𑀺. 𑀢𑀲𑁆𑀫𑀸 𑀯𑀺𑀲𑁆𑀲𑀝𑁆𑀞𑀸𑀬 𑀯𑀸𑀘𑀸𑀬 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀆𑀳 ‘‘𑀦 𑀲𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀻’’𑀢𑀺. 𑀢𑀁 𑀅𑀢𑁆𑀣𑀢𑁄 𑀧𑀸𑀓𑀝𑀫𑁂𑀯. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀢𑀢𑀺𑀬𑀧𑀸𑀤𑁂 ‘‘𑀧𑀫𑀸𑀤𑀫𑁆𑀳𑀸 𑀧𑀫𑀤𑀫𑁆𑀳𑀸’’𑀢𑀺 𑀤𑁆𑀯𑀺𑀥𑀸 𑀧𑀸𑀞𑁄. 𑀘𑀢𑀼𑀢𑁆𑀣𑀧𑀸𑀤𑁂 𑀘 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀻𑀢𑀺 𑀛𑀸𑀦𑀁 𑀭𑀺𑀢𑁆𑀢𑀓𑀁 𑀲𑀼𑀜𑁆𑀜𑀓𑀁 𑀦 𑀓𑀭𑁄𑀢𑀺, 𑀦 𑀧𑀭𑀺𑀘𑁆𑀘𑀚𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁫𑁮. 𑀏𑀯𑀁 𑀓𑀸𑀬𑀤𑁆𑀯𑀸𑀭𑁂 𑀲𑀼𑀤𑁆𑀥𑀺𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀯𑀘𑀻𑀤𑁆𑀯𑀸𑀭𑁂 𑀲𑀼𑀤𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄 ¶ 𑀆𑀳 𑁋 ‘‘𑀓𑀘𑁆𑀘𑀺 𑀫𑀼𑀲𑀸 𑀦 𑀪𑀡𑀢𑀻’’𑀢𑀺. 𑀏𑀢𑁆𑀣 𑀔𑀻𑀡𑀸𑀢𑀻𑀢𑀺 𑀔𑀻𑀡𑁄, 𑀯𑀺𑀳𑀺𑀁𑀲𑀢𑀺 𑀩𑀥𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀘𑀸𑀬 𑀧𑀣𑁄 𑀩𑁆𑀬𑀧𑁆𑀧𑀣𑁄, 𑀔𑀻𑀡𑁄 𑀩𑁆𑀬𑀧𑁆𑀧𑀣𑁄 𑀅𑀲𑁆𑀲𑀸𑀢𑀺 𑀔𑀻𑀡𑀩𑁆𑀬𑀧𑁆𑀧𑀣𑁄. 𑀢𑀁 𑀦-𑀓𑀸𑀭𑁂𑀦 𑀧𑀝𑀺𑀲𑁂𑀥𑁂𑀢𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀦 𑀔𑀻𑀡𑀩𑁆𑀬𑀧𑁆𑀧𑀣𑁄’’𑀢𑀺, 𑀦 𑀨𑀭𑀼𑀲𑀯𑀸𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦𑀸𑀔𑀻𑀡𑀩𑁆𑀬𑀧𑁆𑀧𑀣𑁄’’𑀢𑀺𑀧𑀺 𑀧𑀸𑀞𑁄, 𑀦 𑀅𑀔𑀻𑀡𑀯𑀘𑀦𑁄𑀢𑀺 𑀅𑀢𑁆𑀣𑁄. 𑀨𑀭𑀼𑀲𑀯𑀘𑀦𑀜𑁆𑀳𑀺 𑀧𑀭𑁂𑀲𑀁 𑀳𑀤𑀬𑁂 𑀅𑀔𑀻𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀢𑀸𑀤𑀺𑀲𑀯𑀘𑀦𑁄 𑀓𑀘𑁆𑀘𑀺 𑀦 𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀽𑀢𑀻𑀢𑀺 𑀯𑀺𑀦𑀸𑀲𑁄, 𑀯𑀺𑀪𑀽𑀢𑀺𑀁 𑀓𑀸𑀲𑀢𑀺 𑀓𑀭𑁄𑀢𑀺 𑀯𑀸𑀢𑀺 𑀯𑀺𑀪𑀽𑀢𑀺𑀓𑀁, 𑀯𑀺𑀪𑀽𑀢𑀺𑀓𑀫𑁂𑀯 𑀯𑁂𑀪𑀽𑀢𑀺𑀓𑀁, 𑀯𑁂𑀪𑀽𑀢𑀺𑀬𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀧𑁂𑀲𑀼𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀜𑁆𑀳𑀺 𑀲𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀢𑁄 𑀪𑁂𑀤𑀦𑁂𑀦 𑀯𑀺𑀦𑀸𑀲𑀁 𑀓𑀭𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁫𑁯. 𑀅𑀣 𑀲𑀸𑀢𑀸𑀕𑀺𑀭𑁄 𑀬𑀲𑁆𑀫𑀸 𑀪𑀕𑀯𑀸 𑀦 𑀓𑁂𑀯𑀮𑀁 𑀏𑀢𑀭𑀳𑀺, 𑀅𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑁂 𑀤𑀻𑀖𑀭𑀢𑁆𑀢𑀁 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑁄, 𑀢𑀲𑁆𑀲𑀸 𑀢𑀲𑁆𑀲𑀸𑀬𑁂𑀯 𑀘 𑀯𑀺𑀭𑀢𑀺𑀬𑀸 𑀆𑀦𑀼𑀪𑀸𑀯𑁂𑀦 𑀢𑀁 𑀢𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀺, 𑀲𑀤𑁂𑀯𑀓𑁄 𑀘𑀲𑁆𑀲 𑀮𑁄𑀓𑁄 ‘‘𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀡𑁆𑀡𑀁 𑀪𑀸𑀲𑀢𑀺. 𑀢𑀲𑁆𑀫𑀸 𑀯𑀺𑀲𑁆𑀲𑀝𑁆𑀞𑀸𑀬 𑀯𑀸𑀘𑀸𑀬 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀆𑀳, ‘‘𑀫𑀼𑀲𑀸 𑀘 𑀲𑁄 𑀦 𑀪𑀡𑀢𑀻’’𑀢𑀺. 𑀢𑀢𑁆𑀣 𑀫𑀼𑀲𑀸𑀢𑀺 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀸𑀤𑀻𑀦𑀺 𑀧𑀭𑀯𑀺𑀲𑀁𑀯𑀸𑀤𑀦𑀯𑀘𑀦𑀁. 𑀢𑀁 𑀲𑁄 𑀦 𑀪𑀡𑀢𑀺. 𑀤𑀼𑀢𑀺𑀬𑀧𑀸𑀤𑁂 𑀧𑀦 𑀧𑀞𑀫𑀢𑁆𑀣𑀯𑀲𑁂𑀦 𑀦 𑀔𑀻𑀡𑀩𑁆𑀬𑀧𑁆𑀧𑀣𑁄𑀢𑀺, 𑀤𑀼𑀢𑀺𑀬𑀢𑁆𑀣𑀯𑀲𑁂𑀦 𑀦𑀸𑀔𑀻𑀡𑀩𑁆𑀬𑀧𑁆𑀧𑀣𑁄𑀢𑀺 𑀧𑀸𑀞𑁄. 𑀘𑀢𑀼𑀢𑁆𑀣𑀧𑀸𑀤𑁂 𑀫𑀦𑁆𑀢𑀸𑀢𑀺 𑀧𑀜𑁆𑀜𑀸 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀬𑀲𑁆𑀫𑀸 𑀢𑀸𑀬 𑀫𑀦𑁆𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 ¶ 𑀪𑀸𑀲𑀢𑀺 𑀅𑀢𑁆𑀣𑀢𑁄 𑀅𑀦𑀧𑁂𑀢𑀯𑀘𑀦𑀁, 𑀦 𑀲𑀫𑁆𑀨𑀁 ¶ . 𑀅𑀜𑁆𑀜𑀸𑀡𑀧𑀼𑀭𑁂𑀓𑁆𑀔𑀸𑀭𑀜𑁆𑀳𑀺 𑀦𑀺𑀭𑀢𑁆𑀣𑀓𑀯𑀘𑀦𑀁 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀆𑀳 𑁋 ‘‘𑀫𑀦𑁆𑀢𑀸 𑀅𑀢𑁆𑀣𑀁 𑀲𑁄 𑀪𑀸𑀲𑀢𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁧𑁬𑁦. 𑀏𑀯𑀁 𑀯𑀘𑀻𑀤𑁆𑀯𑀸𑀭𑀲𑀼𑀤𑁆𑀥𑀺𑀫𑁆𑀧𑀺 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀫𑀦𑁄𑀤𑁆𑀯𑀸𑀭𑀲𑀼𑀤𑁆𑀥𑀺𑀁 ¶ 𑀧𑀼𑀘𑁆𑀙𑀦𑁆𑀢𑁄 𑀆𑀳 ‘‘𑀓𑀘𑁆𑀘𑀺 𑀦 𑀭𑀚𑁆𑀚𑀢𑀺 𑀓𑀸𑀫𑁂𑀲𑀽’’𑀢𑀺. 𑀢𑀢𑁆𑀣 𑀓𑀸𑀫𑀸𑀢𑀺 𑀯𑀢𑁆𑀣𑀼𑀓𑀸𑀫𑀸. 𑀢𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀦 𑀭𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 𑀅𑀦𑀪𑀺𑀚𑁆𑀛𑀸𑀮𑀼𑀢𑀁 𑀧𑀼𑀘𑁆𑀙𑀢𑀺. 𑀅𑀦𑀸𑀯𑀺𑀮𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀩𑁆𑀬𑀸𑀧𑀸𑀤𑁂𑀦 𑀆𑀯𑀺𑀮𑀪𑀸𑀯𑀁 𑀲𑀦𑁆𑀥𑀸𑀬 𑀅𑀩𑁆𑀬𑀸𑀧𑀸𑀤𑀢𑀁 𑀧𑀼𑀘𑁆𑀙𑀢𑀺. 𑀫𑁄𑀳𑀁 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀧𑀼𑀘𑁆𑀙𑀦𑁆𑀢𑁄 𑀬𑁂𑀦 𑀫𑁄𑀳𑁂𑀦 𑀫𑀽𑀴𑁆𑀳𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲𑀸𑀢𑀺𑀓𑁆𑀓𑀫𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑀁 𑀧𑀼𑀘𑁆𑀙𑀢𑀺. 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸𑀢𑀺 𑀧𑀼𑀘𑁆𑀙𑀦𑁆𑀢𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑁄, 𑀧𑀜𑁆𑀘𑀘𑀓𑁆𑀔𑀼𑀯𑀺𑀲𑀬𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀧𑀜𑁆𑀘𑀦𑁆𑀦𑀫𑁆𑀧𑀺 𑀘𑀓𑁆𑀔𑀽𑀦𑀁 𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀼𑀘𑁆𑀙𑀢𑀺 ‘‘𑀤𑁆𑀯𑀸𑀭𑀢𑁆𑀢𑀬𑀧𑀸𑀭𑀺𑀲𑀼𑀤𑁆𑀥𑀺𑀬𑀸𑀧𑀺 𑀲𑀩𑁆𑀩𑀜𑁆𑀜𑀽 𑀦 𑀳𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸.

𑁧𑁬𑁧. 𑀅𑀣 𑀲𑀸𑀢𑀸𑀕𑀺𑀭𑁄 𑀬𑀲𑁆𑀫𑀸 𑀪𑀕𑀯𑀸 𑀅𑀧𑁆𑀧𑀢𑁆𑀯𑀸𑀯 𑀅𑀭𑀳𑀢𑁆𑀢𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀧𑀳𑀻𑀦𑀢𑁆𑀢𑀸 𑀦𑁂𑀯 𑀓𑀸𑀫𑁂𑀲𑀼 𑀭𑀚𑁆𑀚𑀢𑀺, 𑀦 𑀩𑁆𑀬𑀸𑀧𑀸𑀤𑁂𑀦 𑀆𑀯𑀺𑀮𑀘𑀺𑀢𑁆𑀢𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀫𑁄𑀳𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀲𑀸𑀫𑀜𑁆𑀘 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀩𑀼𑀤𑁆𑀥𑁄𑀢𑀺 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁 𑀦𑀸𑀫𑀁 𑀬𑀣𑀸𑀯𑀼𑀢𑁆𑀢𑀸𑀦𑀺 𑀘 𑀘𑀓𑁆𑀔𑀽𑀦𑀺 𑀧𑀝𑀺𑀮𑀪𑀺, 𑀢𑀲𑁆𑀫𑀸 𑀢𑀲𑁆𑀲 𑀫𑀦𑁄𑀤𑁆𑀯𑀸𑀭𑀲𑀼𑀤𑁆𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀘 𑀉𑀕𑁆𑀖𑁄𑀲𑁂𑀦𑁆𑀢𑁄 𑀆𑀳 ‘‘𑀦 𑀲𑁄 𑀭𑀚𑁆𑀚𑀢𑀺 𑀓𑀸𑀫𑁂𑀲𑀽’’𑀢𑀺.

𑁧𑁬𑁨. 𑀏𑀯𑀁 𑀳𑁂𑀫𑀯𑀢𑁄 𑀪𑀕𑀯𑀢𑁄 𑀤𑁆𑀯𑀸𑀭𑀢𑁆𑀢𑀬𑀧𑀸𑀭𑀺𑀲𑀼𑀤𑁆𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀘 𑀲𑀼𑀢𑁆𑀯𑀸 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀅𑀢𑀻𑀢𑀚𑀸𑀢𑀺𑀬𑀁 𑀩𑀸𑀳𑀼𑀲𑀘𑁆𑀘𑀯𑀺𑀲𑀤𑀸𑀬 𑀧𑀜𑁆𑀜𑀸𑀬 𑀅𑀲𑀚𑁆𑀚𑀫𑀸𑀦𑀯𑀘𑀦𑀧𑁆𑀧𑀣𑁄 𑀳𑀼𑀢𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀭𑀽𑀧𑁂 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀲𑁄𑀢𑀼𑀓𑀸𑀫𑁄 𑀆𑀳 ‘‘𑀓𑀘𑁆𑀘𑀺 𑀯𑀺𑀚𑁆𑀚𑀸𑀬 𑀲𑀫𑁆𑀧𑀦𑁆𑀦𑁄’’𑀢𑀺. 𑀢𑀢𑁆𑀣 𑀯𑀺𑀚𑁆𑀚𑀸𑀬 𑀲𑀫𑁆𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀢𑀺, 𑀲𑀁𑀲𑀼𑀤𑁆𑀥𑀘𑀸𑀭𑀡𑁄𑀢𑀺 𑀇𑀫𑀺𑀦𑀸 𑀕𑀫𑀦𑀲𑀫𑁆𑀧𑀢𑁆𑀢𑀺𑀁. 𑀙𑀦𑁆𑀤𑀯𑀲𑁂𑀦 𑀘𑁂𑀢𑁆𑀣 𑀤𑀻𑀖𑀁 𑀓𑀢𑁆𑀯𑀸 𑀘𑀸𑀓𑀸𑀭𑀫𑀸𑀳, 𑀲𑀁𑀲𑀼𑀤𑁆𑀥𑀘𑀭𑀡𑁄𑀢𑀺 𑀅𑀢𑁆𑀣𑁄. 𑀆𑀲𑀯𑀸 𑀔𑀻𑀡𑀸𑀢𑀺 𑀇𑀫𑀺𑀦𑀸 𑀏𑀢𑀸𑀬 𑀤𑀲𑁆𑀲𑀦𑀕𑀫𑀦𑀲𑀫𑁆𑀧𑀢𑁆𑀢𑀺𑀬𑀸 𑀧𑀢𑁆𑀢𑀩𑁆𑀩𑀸𑀬 𑀆𑀲𑀯𑀓𑁆𑀔𑀬𑀲𑀜𑁆𑀜𑀺𑀢𑀸𑀬 𑀧𑀞𑀫𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀢𑁆𑀢𑀺𑀁 𑀧𑀼𑀘𑁆𑀙𑀢𑀺, 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑀢𑁆𑀢𑀺𑀲𑀫𑀢𑁆𑀣𑀢𑀁, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀯𑀸 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀞𑀺𑀢𑀪𑀸𑀯𑀁.

𑁧𑁬𑁩. 𑀢𑀢𑁄 ¶ 𑀬𑀸 𑀏𑀲𑀸 ‘‘𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 ¶ 𑀧𑀼𑀩𑁆𑀩𑁂𑀦𑀺𑀯𑀸𑀲’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁫𑁨) 𑀦𑀬𑁂𑀦 𑀪𑀬𑀪𑁂𑀭𑀯𑀸𑀤𑀻𑀲𑀼 𑀢𑀺𑀯𑀺𑀥𑀸, ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁭𑁯) 𑀦𑀬𑁂𑀦 𑀅𑀫𑁆𑀩𑀝𑁆𑀞𑀸𑀤𑀻𑀲𑀼 𑀅𑀝𑁆𑀞𑀯𑀺𑀥𑀸 𑀯𑀺𑀚𑁆𑀚𑀸 𑀯𑀼𑀢𑁆𑀢𑀸, 𑀢𑀸𑀬 𑀬𑀲𑁆𑀫𑀸 𑀲𑀩𑁆𑀩𑀸𑀬𑀧𑀺 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸𑀬 𑀪𑀕𑀯𑀸 𑀉𑀧𑁂𑀢𑁄. 𑀬𑀜𑁆𑀘𑁂𑀢𑀁 ‘‘𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺 ¶ , 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺, 𑀲𑀢𑁆𑀢𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀻’’𑀢𑀺 𑀏𑀯𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀓𑀣𑀜𑁆𑀘, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁨𑁪) 𑀦𑀬𑁂𑀦 𑀲𑁂𑀔𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑀁 𑀧𑀦𑁆𑀦𑀭𑀲𑀧𑁆𑀧𑀪𑁂𑀤𑀁 𑀘𑀭𑀡𑀁. 𑀢𑀜𑁆𑀘 𑀬𑀲𑁆𑀫𑀸 𑀲𑀩𑁆𑀩𑀽𑀧𑀓𑁆𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀪𑀕𑀯𑀢𑁄 𑀅𑀢𑀺𑀯𑀺𑀬 𑀲𑀁𑀲𑀼𑀤𑁆𑀥𑀁. 𑀬𑁂𑀧𑀺𑀫𑁂 𑀓𑀸𑀫𑀸𑀲𑀯𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀢𑁂𑀧𑀺 𑀬𑀲𑁆𑀫𑀸 𑀲𑀩𑁆𑀩𑁂 𑀲𑀧𑀭𑀺𑀯𑀸𑀭𑀸 𑀲𑀯𑀸𑀲𑀦𑀸 𑀪𑀕𑀯𑀢𑁄 𑀔𑀻𑀡𑀸. 𑀬𑀲𑁆𑀫𑀸 𑀘 𑀇𑀫𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀔𑀻𑀡𑀸𑀲𑀯𑁄 𑀳𑀼𑀢𑁆𑀯𑀸 𑀢𑀤𑀸 𑀪𑀕𑀯𑀸 ‘‘𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀞𑀺𑀢𑁄, 𑀢𑀲𑁆𑀫𑀸 𑀲𑀸𑀢𑀸𑀕𑀺𑀭𑁄 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑁂 𑀩𑁆𑀬𑀯𑀲𑀸𑀬𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀳𑀤𑀬𑁄 𑀲𑀩𑁆𑀩𑁂𑀧𑀺 𑀕𑀼𑀡𑁂 𑀅𑀦𑀼𑀚𑀸𑀦𑀦𑁆𑀢𑁄 𑀆𑀳 ‘‘𑀯𑀺𑀚𑁆𑀚𑀸𑀬 𑀘𑁂𑀯 𑀲𑀫𑁆𑀧𑀦𑁆𑀦𑁄’’𑀢𑀺.

𑁧𑁬𑁪. 𑀢𑀢𑁄 𑀳𑁂𑀫𑀯𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀪𑀕𑀯𑀢𑀺 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄𑀬𑁂𑀯 𑀪𑀕𑀯𑀦𑁆𑀢𑀁 𑀧𑀲𑀁𑀲𑀦𑁆𑀢𑁄 𑀲𑀸𑀢𑀸𑀕𑀺𑀭𑀜𑁆𑀘 𑀆𑀭𑀸𑀥𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀧𑀦𑁆𑀦𑀁 𑀫𑀼𑀦𑀺𑀦𑁄 𑀘𑀺𑀢𑁆𑀢’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀫𑁆𑀧𑀦𑁆𑀦𑀁 𑀫𑀼𑀦𑀺𑀦𑁄 𑀘𑀺𑀢𑁆𑀢𑀁, ‘‘𑀫𑀦𑁄 𑀘𑀲𑁆𑀲 𑀲𑀼𑀧𑀡𑀺𑀳𑀺𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀢𑀸𑀤𑀺𑀪𑀸𑀯𑁂𑀦 𑀧𑀼𑀡𑁆𑀡𑀁 𑀲𑀫𑁆𑀧𑀼𑀡𑁆𑀡𑀁, ‘‘𑀦 𑀲𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀬𑀓𑀫𑁆𑀫𑀼𑀦𑀸, ‘‘𑀦 𑀲𑁄 𑀭𑀚𑁆𑀚𑀢𑀺 𑀓𑀸𑀫𑁂𑀲𑀽’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀫𑀦𑁄𑀓𑀫𑁆𑀫𑀼𑀦𑀸 𑀘 𑀧𑀼𑀡𑁆𑀡𑀁 𑀲𑀫𑁆𑀧𑀼𑀡𑁆𑀡𑀁, ‘‘𑀫𑀼𑀲𑀸 𑀘 𑀲𑁄 𑀦 𑀪𑀡𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀩𑁆𑀬𑀧𑁆𑀧𑀣𑁂𑀦 𑀘 𑀯𑀘𑀻𑀓𑀫𑁆𑀫𑀼𑀦𑀸𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑀫𑁆𑀧𑀦𑁆𑀦𑀘𑀺𑀢𑁆𑀢𑀜𑁆𑀘 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀜𑁆𑀘 𑀇𑀫𑁂𑀳𑀺 𑀕𑀼𑀡𑁂𑀳𑀺 ‘‘𑀫𑀦𑁄 𑀘𑀲𑁆𑀲 𑀲𑀼𑀧𑀡𑀺𑀳𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀢𑁄 𑀦𑀁 𑀧𑀲𑀁𑀲𑀲𑀺, 𑀲𑀪𑀸𑀯𑀢𑁄 𑀢𑀘𑁆𑀙𑀢𑁄 𑀪𑀽𑀢𑀢𑁄 𑀏𑀯 𑀦𑀁 𑀧𑀲𑀁𑀲𑀲𑀺, 𑀦 𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁬𑁫-𑁧𑁬𑁬. 𑀢𑀢𑁄 ¶ 𑀲𑀸𑀢𑀸𑀕𑀺𑀭𑁄𑀧𑀺 ‘‘𑀏𑀯𑀫𑁂𑀢𑀁, 𑀫𑀸𑀭𑀺𑀲, 𑀲𑀼𑀝𑁆𑀞𑀼 𑀢𑀬𑀸 𑀜𑀸𑀢𑀜𑁆𑀘 𑀅𑀦𑀼𑀫𑁄𑀤𑀺𑀢𑀜𑁆𑀘𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀫𑁂𑀯 𑀲𑀁𑀭𑀸𑀥𑁂𑀦𑁆𑀢𑁄 𑀆𑀳 𑁋 ‘‘𑀲𑀫𑁆𑀧𑀦𑁆𑀦𑀁 𑀫𑀼𑀦𑀺𑀦𑁄…𑀧𑁂… 𑀥𑀫𑁆𑀫𑀢𑁄 𑀅𑀦𑀼𑀫𑁄𑀤𑀲𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀪𑀕𑀯𑀢𑁄 𑀤𑀲𑁆𑀲𑀦𑁂 𑀢𑀁 𑀅𑀪𑀺𑀢𑁆𑀣𑀯𑀬𑀫𑀸𑀦𑁄 𑀆𑀳 ‘‘𑀲𑀫𑁆𑀧𑀦𑁆𑀦𑀁…𑀧𑁂… 𑀳𑀦𑁆𑀤 𑀧𑀲𑁆𑀲𑀸𑀫 𑀕𑁄𑀢𑀫’’𑀦𑁆𑀢𑀺.

𑁧𑁬𑁭. 𑀅𑀣 𑀳𑁂𑀫𑀯𑀢𑁄 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀕𑀼𑀡𑁂𑀳𑀺 𑀧𑀼𑀭𑀺𑀫𑀚𑀸𑀢𑀺𑀩𑀸𑀳𑀼𑀲𑀘𑁆𑀘𑀩𑀮𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀼𑀦𑀦𑁆𑀢𑁄 𑀲𑀸𑀢𑀸𑀕𑀺𑀭𑀁 𑀆𑀳 𑁋 ‘‘𑀏𑀡𑀺𑀚𑀗𑁆𑀖𑀁…𑀧𑁂… 𑀏𑀳𑀺 𑀧𑀲𑁆𑀲𑀸𑀫 𑀕𑁄𑀢𑀫’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀏𑀡𑀺𑀫𑀺𑀕𑀲𑁆𑀲𑁂𑀯 𑀚𑀗𑁆𑀖𑀸 𑀅𑀲𑁆𑀲𑀸𑀢𑀺 𑀏𑀡𑀺𑀚𑀗𑁆𑀖𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀏𑀡𑀺𑀫𑀺𑀕𑀲𑁆𑀲𑁂𑀯 𑀅𑀦𑀼𑀧𑀼𑀩𑁆𑀩𑀯𑀝𑁆𑀝𑀸 𑀚𑀗𑁆𑀖𑀸 𑀳𑁄𑀦𑁆𑀢𑀺, 𑀦 𑀧𑀼𑀭𑀢𑁄 𑀦𑀺𑀫𑁆𑀫𑀁𑀲𑀸 𑀧𑀘𑁆𑀙𑀢𑁄 𑀲𑀼𑀲𑀼𑀫𑀸𑀭𑀓𑀼𑀘𑁆𑀙𑀺 𑀯𑀺𑀬 𑀉𑀤𑁆𑀥𑀼𑀫𑀸𑀢𑀸. 𑀓𑀺𑀲𑀸 𑀘 𑀩𑀼𑀤𑁆𑀥𑀸 𑀳𑁄𑀦𑁆𑀢𑀺 𑀤𑀻𑀖𑀭𑀲𑁆𑀲𑀲𑀫𑀯𑀝𑁆𑀝𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀢𑀣𑀸𑀭𑀽𑀧𑀸𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸, 𑀦 𑀯𑀞𑀭𑀧𑀼𑀭𑀺𑀲𑀸 𑀯𑀺𑀬 𑀣𑀽𑀮𑀸. 𑀧𑀜𑁆𑀜𑀸𑀬 𑀯𑀺𑀮𑀺𑀔𑀺𑀢𑀓𑀺𑀮𑁂𑀲𑀢𑁆𑀢𑀸 𑀯𑀸 𑀓𑀺𑀲𑀸. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀲𑀧𑀢𑁆𑀢𑀯𑀺𑀤𑁆𑀥𑀁𑀲𑀦𑀢𑁄 𑀯𑀻𑀭𑀸. 𑀏𑀓𑀸𑀲𑀦𑀪𑁄𑀚𑀺𑀢𑀸𑀬 𑀧𑀭𑀺𑀫𑀺𑀢𑀪𑁄𑀚𑀺𑀢𑀸𑀬 𑀘 𑀅𑀧𑁆𑀧𑀸𑀳𑀸𑀭𑀸, 𑀦 𑀤𑁆𑀯𑀢𑁆𑀢𑀺𑀫𑀢𑁆𑀢𑀸𑀮𑁄𑀧𑀪𑁄𑀚𑀺𑀢𑀸𑀬. 𑀬𑀣𑀸𑀳 𑁋

‘‘𑀅𑀳𑀁 ¶ 𑀔𑁄 𑀧𑀦, 𑀉𑀤𑀸𑀬𑀺, 𑀅𑀧𑁆𑀧𑁂𑀓𑀤𑀸 𑀇𑀫𑀺𑀦𑀸 𑀧𑀢𑁆𑀢𑁂𑀦 𑀲𑀫𑀢𑀺𑀢𑁆𑀢𑀺𑀓𑀫𑁆𑀧𑀺 𑀪𑀼𑀜𑁆𑀚𑀸𑀫𑀺, 𑀪𑀺𑀬𑁆𑀬𑁄𑀧𑀺 𑀪𑀼𑀜𑁆𑀚𑀸𑀫𑀺. ‘𑀅𑀧𑁆𑀧𑀸𑀳𑀸𑀭𑁄 𑀲𑀫𑀡𑁄 𑀕𑁄𑀢𑀫𑁄 𑀅𑀧𑁆𑀧𑀸𑀳𑀸𑀭𑀢𑀸𑀬 𑀘 𑀯𑀡𑁆𑀡𑀯𑀸𑀤𑀻’𑀢𑀺 𑀇𑀢𑀺 𑀘𑁂 𑀫𑀁, 𑀉𑀤𑀸𑀬𑀺, 𑀲𑀸𑀯𑀓𑀸 𑀲𑀓𑁆𑀓𑀭𑁂𑀬𑁆𑀬𑀼𑀁, 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁, 𑀫𑀸𑀦𑁂𑀬𑁆𑀬𑀼𑀁, 𑀧𑀽𑀚𑁂𑀬𑁆𑀬𑀼𑀁, 𑀲𑀓𑁆𑀓𑀢𑁆𑀯𑀸, 𑀕𑀭𑀼𑀁 𑀓𑀢𑁆𑀯𑀸, 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀼𑀁. 𑀬𑁂 𑀢𑁂, 𑀉𑀤𑀸𑀬𑀺, 𑀫𑀫 𑀲𑀸𑀯𑀓𑀸 𑀓𑁄𑀲𑀓𑀸𑀳𑀸𑀭𑀸𑀧𑀺 𑀅𑀟𑁆𑀠𑀓𑁄𑀲𑀓𑀸𑀳𑀸𑀭𑀸𑀧𑀺 𑀩𑁂𑀮𑀼𑀯𑀸𑀳𑀸𑀭𑀸𑀧𑀺 𑀅𑀟𑁆𑀠𑀩𑁂𑀮𑀼𑀯𑀸𑀳𑀸𑀭𑀸𑀧𑀺, 𑀦 𑀫𑀁 𑀢𑁂 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀲𑀓𑁆𑀓𑀭𑁂𑀬𑁆𑀬𑀼𑀁…𑀧𑁂… 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺 (𑀫. 𑀦𑀺. 𑁨.𑁨𑁪𑁨).

𑀆𑀳𑀸𑀭𑁂 𑀙𑀦𑁆𑀤𑀭𑀸𑀕𑀸𑀪𑀸𑀯𑁂𑀦 ¶ 𑀅𑀮𑁄𑀮𑀼𑀧𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀦𑁆𑀢𑀺 𑀫𑁄𑀦𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀫𑀼𑀦𑀺𑀦𑁄. 𑀅𑀦𑀕𑀸𑀭𑀺𑀓𑀢𑀸𑀬 𑀯𑀺𑀯𑁂𑀓𑀦𑀺𑀦𑁆𑀦𑀫𑀸𑀦𑀲𑀢𑀸𑀬 𑀘 𑀯𑀦𑁂 𑀛𑀸𑀬𑀦𑁆𑀢𑀺. 𑀢𑁂𑀦𑀸𑀳 𑀳𑁂𑀫𑀯𑀢𑁄 𑀬𑀓𑁆𑀔𑁄 ‘‘𑀏𑀡𑀺𑀚𑀗𑁆𑀖𑀁…𑀧𑁂… 𑀏𑀳𑀺 𑀧𑀲𑁆𑀲𑀸𑀫 𑀕𑁄𑀢𑀫’’𑀦𑁆𑀢𑀺.

𑁧𑁬𑁮. 𑀏𑀯𑀜𑁆𑀘 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀢𑀸𑀬 ‘‘𑀲𑀻𑀳𑀁𑀯𑁂𑀓𑀘𑀭’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀻𑀳𑀁𑀯𑀸𑀢𑀺 𑀤𑀼𑀭𑀸𑀲𑀤𑀝𑁆𑀞𑁂𑀦 ¶ 𑀔𑀫𑀦𑀝𑁆𑀞𑁂𑀦 𑀦𑀺𑀩𑁆𑀪𑀬𑀝𑁆𑀞𑁂𑀦 𑀘 𑀓𑁂𑀲𑀭𑀲𑀻𑀳𑀲𑀤𑀺𑀲𑀁. 𑀬𑀸𑀬 𑀢𑀡𑁆𑀳𑀸𑀬 ‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀅𑀪𑀸𑀯𑁂𑀦 𑀏𑀓𑀘𑀭𑀁, 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄𑀧𑀺 𑀏𑀓𑀘𑀭𑀁. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀘𑁂𑀢𑁆𑀣 𑀢𑀁 𑀢𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀕𑀦𑁆𑀢𑀺 𑀧𑀼𑀦𑀩𑁆𑀪𑀯𑀁 𑀦𑁂𑀯 𑀕𑀦𑁆𑀢𑀸𑀭𑀁 𑀦𑀸𑀕𑀦𑁆𑀢𑀸𑀭𑀁. 𑀅𑀣 𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺𑀧𑀺 𑀦𑀸𑀕𑁄. 𑀩𑀮𑀯𑀸𑀢𑀺𑀧𑀺 𑀦𑀸𑀕𑁄. 𑀢𑀁 𑀦𑀸𑀕𑀁. 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀦𑁆𑀢𑀺 𑀤𑁆𑀯𑀻𑀲𑀼𑀧𑀺 𑀓𑀸𑀫𑁂𑀲𑀼 𑀙𑀦𑁆𑀤𑀭𑀸𑀕𑀸𑀪𑀸𑀯𑁂𑀦 𑀅𑀦𑀧𑁂𑀓𑁆𑀔𑀺𑀦𑀁. 𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙𑀸𑀫, 𑀫𑀘𑁆𑀘𑀼𑀧𑀸𑀲𑀧𑁆𑀧𑀫𑁄𑀘𑀦𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀫𑀳𑁂𑀲𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀪𑀽𑀫𑀓𑀯𑀝𑁆𑀝𑀲𑁆𑀲 𑀫𑀘𑁆𑀘𑀼𑀧𑀸𑀲𑀲𑁆𑀲 𑀧𑀫𑁄𑀘𑀦𑀁 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀫. 𑀬𑁂𑀦 𑀯𑀸 𑀉𑀧𑀸𑀬𑁂𑀦 𑀤𑀼𑀓𑁆𑀔𑀲𑀫𑀼𑀤𑀬𑀲𑀗𑁆𑀔𑀸𑀢𑀸 𑀫𑀘𑁆𑀘𑀼𑀧𑀸𑀲𑀸 𑀧𑀫𑀼𑀘𑁆𑀘𑀢𑀺, 𑀢𑀁 𑀫𑀘𑁆𑀘𑀼𑀧𑀸𑀲𑀧𑁆𑀧𑀫𑁄𑀘𑀦𑀁 𑀧𑀼𑀘𑁆𑀙𑀸𑀫𑀸𑀢𑀺. 𑀇𑀫𑀁 𑀕𑀸𑀣𑀁 𑀳𑁂𑀫𑀯𑀢𑁄 𑀲𑀸𑀢𑀸𑀕𑀺𑀭𑀜𑁆𑀘 𑀲𑀸𑀢𑀸𑀕𑀺𑀭𑀧𑀭𑀺𑀲𑀜𑁆𑀘 𑀅𑀢𑁆𑀢𑀦𑁄 𑀧𑀭𑀺𑀲𑀜𑁆𑀘 𑀲𑀦𑁆𑀥𑀸𑀬 𑀆𑀳.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀲𑀸𑀴𑁆𑀳𑀻𑀦𑀓𑁆𑀔𑀢𑁆𑀢𑀁 𑀖𑁄𑀲𑀺𑀢𑀁 𑀅𑀳𑁄𑀲𑀺. 𑀅𑀣 𑀲𑀫𑀦𑁆𑀢𑀢𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀤𑁂𑀯𑀦𑀕𑀭𑁂 𑀲𑀺𑀭𑀺𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀻 𑀯𑀺𑀬 𑀭𑀸𑀚𑀕𑀳𑁂 𑀓𑀸𑀴𑀻 𑀦𑀸𑀫 𑀓𑀼𑀭𑀭𑀖𑀭𑀺𑀓𑀸 𑀉𑀧𑀸𑀲𑀺𑀓𑀸 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 ¶ 𑀕𑀩𑁆𑀪𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀦𑁆𑀢𑀻 𑀲𑀯𑀸𑀢𑀧𑁆𑀧𑀤𑁂𑀲𑁂 𑀉𑀢𑀼𑀕𑁆𑀕𑀳𑀡𑀢𑁆𑀣𑀁 𑀞𑀺𑀢𑀸 𑀢𑁂𑀲𑀁 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁 𑀢𑀁 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀢𑁄 𑀅𑀲𑁆𑀲𑁄𑀲𑀺. 𑀲𑀼𑀢𑁆𑀯𑀸 𑀘 ‘‘𑀏𑀯𑀁 𑀯𑀺𑀯𑀺𑀥𑀕𑀼𑀡𑀲𑀫𑀦𑁆𑀦𑀸𑀕𑀢𑀸 𑀩𑀼𑀤𑁆𑀥𑀸’’𑀢𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀸𑀬 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀺𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀢𑁄 𑀏𑀯 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀅𑀦𑀼𑀲𑁆𑀲𑀯𑀧𑁆𑀧𑀲𑀦𑁆𑀦𑀸𑀦𑀁, 𑀬𑀤𑀺𑀤𑀁 𑀓𑀸𑀴𑀻 𑀉𑀧𑀸𑀲𑀺𑀓𑀸 𑀓𑀼𑀭𑀭𑀖𑀭𑀺𑀓𑀸’’𑀢𑀺 (𑀅. 𑀦𑀺. 𑁧.𑁨𑁬𑁭) 𑀏𑀢𑀤𑀕𑁆𑀕𑁂 𑀞𑀧𑀺𑀢𑀸.

𑁧𑁬𑁯. 𑀢𑁂𑀧𑀺 ¶ 𑀬𑀓𑁆𑀔𑀲𑁂𑀦𑀸𑀧𑀢𑀬𑁄 𑀲𑀳𑀲𑁆𑀲𑀬𑀓𑁆𑀔𑀧𑀭𑀺𑀯𑀸𑀭𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀬𑁂 𑀇𑀲𑀺𑀧𑀢𑀦𑀁 𑀧𑀢𑁆𑀯𑀸, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀢𑀧𑀮𑁆𑀮𑀗𑁆𑀓𑁂𑀦𑁂𑀯 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸, 𑀇𑀫𑀸𑀬 𑀕𑀸𑀣𑀸𑀬 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀑𑀓𑀸𑀲𑀫𑀓𑀸𑀭𑀬𑀺𑀁𑀲𑀼 ‘‘𑀅𑀓𑁆𑀔𑀸𑀢𑀸𑀭𑀁 𑀧𑀯𑀢𑁆𑀢𑀸𑀭’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀢𑁂𑀪𑀽𑀫𑀓𑁂 𑀥𑀫𑁆𑀫𑁂 ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁪) 𑀦𑀬𑁂𑀦 𑀲𑀘𑁆𑀘𑀸𑀦𑀁 𑀯𑀯𑀢𑁆𑀣𑀸𑀦𑀓𑀣𑀸𑀬 𑀅𑀓𑁆𑀔𑀸𑀢𑀸𑀭𑀁, ‘‘‘𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬’𑀦𑁆𑀢𑀺 𑀫𑁂 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂𑀲𑀼 𑀓𑀺𑀘𑁆𑀘𑀜𑀸𑀡𑀓𑀢𑀜𑀸𑀡𑀧𑁆𑀧𑀯𑀢𑁆𑀢𑀦𑁂𑀦 𑀧𑀯𑀢𑁆𑀢𑀸𑀭𑀁. 𑀬𑁂 𑀯𑀸 𑀥𑀫𑁆𑀫𑀸 𑀬𑀣𑀸 𑀯𑁄𑀳𑀭𑀺𑀢𑀩𑁆𑀩𑀸, 𑀢𑁂𑀲𑀼 𑀢𑀣𑀸 ¶ 𑀯𑁄𑀳𑀸𑀭𑀓𑀣𑀦𑁂𑀦 𑀅𑀓𑁆𑀔𑀸𑀢𑀸𑀭𑀁, 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀼𑀭𑀽𑀧𑀢𑁄 𑀧𑀯𑀢𑁆𑀢𑀸𑀭𑀁. 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑀁 𑀯𑀸 𑀤𑁂𑀲𑀦𑀸𑀬 𑀅𑀓𑁆𑀔𑀸𑀢𑀸𑀭𑀁, 𑀦𑁂𑀬𑁆𑀬𑀸𑀦𑀁 𑀧𑀝𑀺𑀧𑀸𑀤𑀦𑁂𑀦 𑀧𑀯𑀢𑁆𑀢𑀸𑀭𑀁. 𑀉𑀤𑁆𑀤𑁂𑀲𑁂𑀦 𑀯𑀸 𑀅𑀓𑁆𑀔𑀸𑀢𑀸𑀭𑀁, 𑀯𑀺𑀪𑀗𑁆𑀕𑁂𑀦 𑀢𑁂𑀳𑀺 𑀢𑁂𑀳𑀺 𑀧𑀓𑀸𑀭𑁂𑀳𑀺 𑀯𑀘𑀦𑀢𑁄 𑀧𑀯𑀢𑁆𑀢𑀸𑀭𑀁. 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀯𑀸 𑀲𑀮𑀓𑁆𑀔𑀡𑀓𑀣𑀦𑁂𑀦 𑀅𑀓𑁆𑀔𑀸𑀢𑀸𑀭𑀁, 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑁂𑀦 𑀧𑀯𑀢𑁆𑀢𑀸𑀭𑀁. 𑀲𑀗𑁆𑀔𑁂𑀧𑀢𑁄 𑀯𑀸 𑀢𑀻𑀳𑀺 𑀧𑀭𑀺𑀯𑀝𑁆𑀝𑁂𑀳𑀺 ¶ 𑀲𑀘𑁆𑀘𑀸𑀦𑀁 𑀓𑀣𑀦𑁂𑀦 𑀅𑀓𑁆𑀔𑀸𑀢𑀸𑀭𑀁, 𑀯𑀺𑀢𑁆𑀣𑀸𑀭𑀢𑁄 𑀧𑀯𑀢𑁆𑀢𑀸𑀭𑀁. ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀫𑁆𑀫𑁄, 𑀢𑀁 𑀥𑀫𑁆𑀫𑀁 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺 (𑀧𑀝𑀺. 𑀫. 𑁨.𑁪𑁦) 𑀏𑀯𑀫𑀸𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀧𑀯𑀢𑁆𑀢𑀦𑀢𑁄 𑀧𑀯𑀢𑁆𑀢𑀸𑀭𑀁.

𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁. 𑀧𑀸𑀭𑀕𑀼𑀦𑁆𑀢𑀺 𑀙𑀳𑀸𑀓𑀸𑀭𑁂𑀳𑀺 𑀧𑀸𑀭𑀁 𑀕𑀢𑀁 𑀅𑀪𑀺𑀜𑁆𑀜𑀸𑀬, 𑀧𑀭𑀺𑀜𑁆𑀜𑀸𑀬, 𑀧𑀳𑀸𑀦𑁂𑀦, 𑀪𑀸𑀯𑀦𑀸𑀬, 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀲𑀫𑀸𑀧𑀢𑁆𑀢𑀺𑀬𑀸. 𑀲𑁄 𑀳𑀺 𑀪𑀕𑀯𑀸 𑀲𑀩𑁆𑀩𑀥𑀫𑁆𑀫𑁂 𑀅𑀪𑀺𑀚𑀸𑀦𑀦𑁆𑀢𑁄 𑀕𑀢𑁄𑀢𑀺 𑀅𑀪𑀺𑀜𑁆𑀜𑀸𑀧𑀸𑀭𑀕𑀽, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀦𑁆𑀢𑁄 𑀕𑀢𑁄𑀢𑀺 𑀧𑀭𑀺𑀜𑁆𑀜𑀸𑀧𑀸𑀭𑀕𑀽, 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀕𑀢𑁄𑀢𑀺 𑀧𑀳𑀸𑀦𑀧𑀸𑀭𑀕𑀽, 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀪𑀸𑀯𑁂𑀦𑁆𑀢𑁄 𑀕𑀢𑁄𑀢𑀺 𑀪𑀸𑀯𑀦𑀸𑀧𑀸𑀭𑀕𑀽, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀕𑀢𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽, 𑀲𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑁄 𑀕𑀢𑁄𑀢𑀺 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽. 𑀏𑀯𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀸𑀭𑀕𑀼𑀁. 𑀩𑀼𑀤𑁆𑀥𑀁 𑀯𑁂𑀭𑀪𑀬𑀸𑀢𑀻𑀢𑀦𑁆𑀢𑀺 𑀅𑀜𑁆𑀜𑀸𑀡𑀲𑀬𑀦𑀢𑁄 𑀧𑀝𑀺𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀁, 𑀲𑀩𑁆𑀩𑁂𑀦 𑀯𑀸 𑀲𑀭𑀡𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀩𑀼𑀤𑁆𑀥𑀁, 𑀧𑀜𑁆𑀘𑀯𑁂𑀭𑀪𑀬𑀸𑀦𑀁 𑀅𑀢𑀻𑀢𑀢𑁆𑀢𑀸 𑀯𑁂𑀭𑀪𑀬𑀸𑀢𑀻𑀢𑀁. 𑀏𑀯𑀁 𑀪𑀕𑀯𑀦𑁆𑀢𑀁 𑀅𑀢𑀺𑀢𑁆𑀣𑀯𑀦𑁆𑀢𑀸 ‘‘𑀫𑀬𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫’’𑀦𑁆𑀢𑀺 𑀑𑀓𑀸𑀲𑀫𑀓𑀸𑀭𑀬𑀺𑀁𑀲𑀼.

𑁧𑁭𑁦. 𑀅𑀣 𑀦𑁂𑀲𑀁 𑀬𑀓𑁆𑀔𑀸𑀦𑀁 𑀢𑁂𑀚𑁂𑀦 𑀘 𑀧𑀜𑁆𑀜𑀸𑀬 𑀘 𑀅𑀕𑁆𑀕𑁄 𑀳𑁂𑀫𑀯𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀲𑁆𑀫𑀺𑀁 𑀮𑁄𑀓𑁄’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀸𑀤𑀺𑀧𑀸𑀤𑁂 𑀓𑀺𑀲𑁆𑀫𑀺𑀦𑁆𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀯𑀘𑀦𑀁, 𑀓𑀺𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀢𑀮𑁄𑀓𑀲𑀗𑁆𑀔𑀸𑀭𑀮𑁄𑀓𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺. 𑀓𑀺𑀲𑁆𑀫𑀺𑀁 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯𑀦𑁆𑀢𑀺 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀦𑁆𑀣𑀯𑀁 𑀓𑀺𑀲𑁆𑀫𑀺𑀁 𑀓𑀼𑀩𑁆𑀩𑀢𑀺, 𑀅𑀥𑀺𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀓𑀺𑀲𑁆𑀲 𑀮𑁄𑀓𑁄𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀓𑀺𑀁 𑀉𑀧𑀸𑀤𑀸𑀬 𑀮𑁄𑀓𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀲𑁆𑀫𑀺𑀁 𑀮𑁄𑀓𑁄𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀓𑀸𑀭𑀡𑀢𑁆𑀣𑁂𑀲𑀼 ¶ 𑀪𑀼𑀫𑁆𑀫𑀯𑀘𑀦𑀁. 𑀓𑀺𑀲𑁆𑀫𑀺𑀁 ¶ 𑀲𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀮𑁄𑀓𑁄 𑀯𑀺𑀳𑀜𑁆𑀜𑀢𑀺 𑀧𑀻𑀴𑀻𑀬𑀢𑀺 𑀩𑀸𑀥𑀻𑀬𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁧𑁭𑁧. 𑀅𑀣 ¶ 𑀪𑀕𑀯𑀸 𑀬𑀲𑁆𑀫𑀸 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀢𑁆𑀢𑀮𑁄𑀓𑁄 𑀘 𑀥𑀦𑀥𑀜𑁆𑀜𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀮𑁄𑀓𑁄 𑀘 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀬𑀲𑁆𑀫𑀸 𑀘𑁂𑀢𑁆𑀣 𑀲𑀢𑁆𑀢𑀮𑁄𑀓𑁄 𑀢𑁂𑀲𑁆𑀯𑁂𑀯 𑀙𑀲𑀼 𑀤𑀼𑀯𑀺𑀥𑀫𑁆𑀧𑀺 𑀲𑀦𑁆𑀣𑀯𑀁 𑀓𑀭𑁄𑀢𑀺. 𑀘𑀓𑁆𑀔𑀸𑀬𑀢𑀦𑀁 𑀯𑀸 𑀳𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀕𑀡𑁆𑀳𑀸𑀢𑀺 𑀅𑀯𑀲𑁂𑀲𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁. 𑀬𑀣𑀸𑀳 𑁋 ‘‘𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀁 𑀦 𑀉𑀧𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁩.𑁪𑁨𑁨). 𑀬𑀲𑁆𑀫𑀸 𑀘 𑀏𑀢𑀸𑀦𑀺𑀬𑁂𑀯 𑀙 𑀉𑀧𑀸𑀤𑀸𑀬 𑀤𑀼𑀯𑀺𑀥𑁄𑀧𑀺 𑀮𑁄𑀓𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀬𑀲𑁆𑀫𑀸 𑀘 𑀢𑁂𑀲𑁆𑀯𑁂𑀯 𑀙𑀲𑀼 𑀲𑀢𑀺 𑀲𑀢𑁆𑀢𑀮𑁄𑀓𑁄 𑀤𑀼𑀓𑁆𑀔𑀧𑀸𑀢𑀼𑀪𑀸𑀯𑁂𑀦 𑀯𑀺𑀳𑀜𑁆𑀜𑀢𑀺. 𑀬𑀣𑀸𑀳 𑁋

‘‘𑀳𑀢𑁆𑀣𑁂𑀲𑀼, 𑀪𑀺𑀓𑁆𑀔𑀯𑁂, 𑀲𑀢𑀺 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀁 𑀳𑁄𑀢𑀺, 𑀧𑀸𑀤𑁂𑀲𑀼 𑀲𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑁄 𑀳𑁄𑀢𑀺, 𑀧𑀩𑁆𑀩𑁂𑀲𑀼 𑀲𑀢𑀺 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀳𑁄𑀢𑀺, 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀢𑀺 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸 𑀳𑁄𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀲𑁆𑀫𑀺𑀁 𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁨𑁩𑁭).

𑀢𑀣𑀸 𑀢𑁂𑀲𑀼 𑀆𑀥𑀸𑀭𑀪𑀽𑀢𑁂𑀲𑀼 𑀧𑀝𑀺𑀳𑀢𑁄 𑀲𑀗𑁆𑀔𑀸𑀭𑀮𑁄𑀓𑁄 𑀯𑀺𑀳𑀜𑁆𑀜𑀢𑀺. 𑀬𑀣𑀸𑀳 𑁋

‘‘𑀘𑀓𑁆𑀔𑀼𑀲𑁆𑀫𑀺𑀁 𑀅𑀦𑀺𑀤𑀲𑁆𑀲𑀦𑁂 𑀲𑀧𑁆𑀧𑀝𑀺𑀖𑁂 𑀧𑀝𑀺𑀳𑀜𑁆𑀜𑀺 𑀯𑀸’’𑀇𑀢𑀺 (𑀥. 𑀲. 𑁫𑁯𑁭-𑁮) 𑀘.

‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀝𑀺𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀽𑀧𑁂𑀲𑀽’’𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀏𑀯𑀫𑀸𑀤𑀺.

𑀢𑀣𑀸 𑀢𑁂𑀳𑀺𑀬𑁂𑀯 𑀓𑀸𑀭𑀡𑀪𑀽𑀢𑁂𑀳𑀺 𑀤𑀼𑀯𑀺𑀥𑁄𑀧𑀺 𑀮𑁄𑀓𑁄 𑀯𑀺𑀳𑀜𑁆𑀜𑀢𑀺. 𑀬𑀣𑀸𑀳 𑁋

‘‘𑀘𑀓𑁆𑀔𑀼 𑀯𑀺𑀳𑀜𑁆𑀜𑀢𑀺 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀽𑀧𑁂𑀲𑀽’’𑀢𑀺 (𑀲𑀁. 𑀦𑀺. 𑁪.𑁨𑁩𑁮) 𑀘.

‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁, 𑀭𑀽𑀧𑀸 𑀆𑀤𑀺𑀢𑁆𑀢𑀸. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸’’𑀢𑀺 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀏𑀯𑀫𑀸𑀤𑀺.

𑀢𑀲𑁆𑀫𑀸 ¶ 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀯𑀲𑁂𑀦 𑀢𑀁 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺.

𑁧𑁭𑁨. 𑀅𑀣 𑀲𑁄 𑀬𑀓𑁆𑀔𑁄 𑀅𑀢𑁆𑀢𑀦𑀸 𑀯𑀝𑁆𑀝𑀯𑀲𑁂𑀦 𑀧𑀼𑀝𑁆𑀞𑀧𑀜𑁆𑀳𑀁 𑀪𑀕𑀯𑀢𑀸 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀁 𑀦 ¶ 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑁆𑀯𑀸 𑀢𑀜𑁆𑀘 𑀅𑀢𑁆𑀣𑀁 ¶ 𑀢𑀧𑁆𑀧𑀝𑀺𑀧𑀓𑁆𑀔𑀜𑁆𑀘 𑀜𑀸𑀢𑀼𑀓𑀸𑀫𑁄 𑀲𑀗𑁆𑀔𑁂𑀧𑁂𑀦𑁂𑀯 𑀯𑀝𑁆𑀝𑀯𑀺𑀯𑀝𑁆𑀝𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 ‘‘𑀓𑀢𑀫𑀁 𑀢’’𑀦𑁆𑀢𑀺. 𑀢𑀢𑁆𑀣 𑀉𑀧𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀉𑀧𑀸𑀤𑀸𑀦𑀁, 𑀤𑀼𑀓𑁆𑀔𑀲𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀢𑁆𑀣 𑀮𑁄𑀓𑁄 𑀯𑀺𑀳𑀜𑁆𑀜𑀢𑀻𑀢𑀺 ‘‘𑀙𑀲𑀼 𑀮𑁄𑀓𑁄 𑀯𑀺𑀳𑀜𑁆𑀜𑀢𑀻’’𑀢𑀺 𑀏𑀯𑀁 𑀪𑀕𑀯𑀢𑀸 𑀬𑀢𑁆𑀣 𑀙𑀩𑁆𑀩𑀺𑀥𑁂 𑀉𑀧𑀸𑀤𑀸𑀦𑁂 𑀮𑁄𑀓𑁄 𑀯𑀺𑀳𑀜𑁆𑀜𑀢𑀻𑀢𑀺 𑀯𑀼𑀢𑁆𑀢𑁄, 𑀢𑀁 𑀓𑀢𑀫𑀁 𑀉𑀧𑀸𑀤𑀸𑀦𑀦𑁆𑀢𑀺? 𑀏𑀯𑀁 𑀉𑀧𑀟𑁆𑀠𑀕𑀸𑀣𑀸𑀬 𑀲𑀭𑀽𑀧𑁂𑀦𑁂𑀯 𑀤𑀼𑀓𑁆𑀔𑀲𑀘𑁆𑀘𑀁 𑀧𑀼𑀘𑁆𑀙𑀺. 𑀲𑀫𑀼𑀤𑀬𑀲𑀘𑁆𑀘𑀁 𑀧𑀦 𑀢𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀦𑀺𑀬𑁆𑀬𑀸𑀦𑀁 𑀧𑀼𑀘𑁆𑀙𑀺𑀢𑁄𑀢𑀺 𑀇𑀫𑀸𑀬 𑀧𑀦 𑀉𑀧𑀟𑁆𑀠𑀕𑀸𑀣𑀸𑀬 𑀫𑀕𑁆𑀕𑀲𑀘𑁆𑀘𑀁 𑀧𑀼𑀘𑁆𑀙𑀺. 𑀫𑀕𑁆𑀕𑀲𑀘𑁆𑀘𑁂𑀦 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀦𑁆𑀢𑁄, 𑀲𑀫𑀼𑀤𑀬𑀁 𑀧𑀚𑀳𑀦𑁆𑀢𑁄, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄, 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀮𑁄𑀓𑀫𑁆𑀳𑀸 𑀦𑀺𑀬𑁆𑀬𑀸𑀢𑀺, 𑀢𑀲𑁆𑀫𑀸 𑀦𑀺𑀬𑁆𑀬𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦. 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺 ‘‘𑀉𑀧𑀸𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸 𑀯𑀝𑁆𑀝𑀤𑀼𑀓𑁆𑀔𑀸 𑀧𑀫𑁄𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀫𑁂𑀢𑁆𑀣 𑀲𑀭𑀽𑀧𑁂𑀦𑁂𑀯 𑀫𑀕𑁆𑀕𑀲𑀘𑁆𑀘𑀁 𑀧𑀼𑀘𑁆𑀙𑀺, 𑀦𑀺𑀭𑁄𑀥𑀲𑀘𑁆𑀘𑀁 𑀧𑀦 𑀢𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺.

𑁧𑁭𑁩. 𑀏𑀯𑀁 𑀬𑀓𑁆𑀔𑁂𑀦 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 𑀘 𑀅𑀤𑀲𑁆𑀲𑁂𑀢𑁆𑀯𑀸 𑀘 𑀘𑀢𑀼𑀲𑀘𑁆𑀘𑀯𑀲𑁂𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀪𑀕𑀯𑀸 𑀢𑁂𑀦𑁂𑀯 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺. 𑀢𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀕𑁄𑀘𑀭𑀕𑁆𑀕𑀳𑀡𑁂𑀦 𑀢𑀕𑁆𑀕𑁄𑀘𑀭𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀫𑀦𑁄 𑀙𑀝𑁆𑀞𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀙𑀝𑁆𑀞𑀸. 𑀧𑀯𑁂𑀤𑀺𑀢𑀸𑀢𑀺 𑀧𑀓𑀸𑀲𑀺𑀢𑀸. 𑀏𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀙𑀝𑁆𑀞𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀕𑀳𑀡𑁂𑀦 𑀢𑀲𑁆𑀲 𑀯𑀺𑀲𑀬𑀪𑀽𑀢𑀁 𑀥𑀫𑁆𑀫𑀸𑀬𑀢𑀦𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀏𑀯𑀁 ‘‘𑀓𑀢𑀫𑀁 𑀢𑀁 𑀉𑀧𑀸𑀤𑀸𑀦’’𑀦𑁆𑀢𑀺 𑀇𑀫𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀼𑀦𑀧𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀁 𑀯𑀲𑁂𑀦𑁂𑀯 𑀤𑀼𑀓𑁆𑀔𑀲𑀘𑁆𑀘𑀁 𑀧𑀓𑀸𑀲𑁂𑀲𑀺. 𑀫𑀦𑁄𑀕𑀳𑀡𑁂𑀦 𑀯𑀸 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀕𑀳𑀺𑀢𑀢𑁆𑀢𑀸 𑀢𑀸𑀲𑀼 𑀧𑀼𑀭𑀺𑀫𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀸𑀲𑀁 𑀯𑀢𑁆𑀣𑀽𑀦𑀺 𑀧𑀜𑁆𑀘 𑀘𑀓𑁆𑀔𑀸𑀤𑀻𑀦𑀺 𑀆𑀬𑀢𑀦𑀸𑀦𑀺, 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀕𑁆𑀕𑀳𑀡𑁂𑀦 𑀢𑀸𑀲𑀁 𑀯𑀢𑁆𑀣𑀼𑀕𑁄𑀘𑀭𑀪𑁂𑀤𑀁 𑀥𑀫𑁆𑀫𑀸𑀬𑀢𑀦𑀁 𑀕𑀳𑀺𑀢𑀫𑁂𑀯𑀸𑀢𑀺 𑀏𑀯𑀫𑁆𑀧𑀺 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀧𑀓𑀸𑀲𑁂𑀲𑀺. 𑀮𑁄𑀓𑀼𑀢𑁆𑀢𑀭𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄 ¶ 𑀧𑀦𑁂𑀢𑁆𑀣 𑀬𑀢𑁆𑀣 𑀮𑁄𑀓𑁄 𑀯𑀺𑀳𑀜𑁆𑀜𑀢𑀺, 𑀢𑀁 𑀲𑀦𑁆𑀥𑀸𑀬 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦 𑀲𑀗𑁆𑀕𑀬𑁆𑀳𑀢𑀺.

𑀏𑀢𑁆𑀣 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀏𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀪𑁂𑀤𑁂 𑀤𑀼𑀓𑁆𑀔𑀲𑀘𑁆𑀘𑁂 𑀢𑀸𑀦𑁂𑀯𑀸𑀬𑀢𑀦𑀸𑀦𑀺 𑀔𑀦𑁆𑀥𑀢𑁄 𑀥𑀸𑀢𑀼𑀢𑁄 𑀦𑀸𑀫𑀭𑀽𑀧𑀢𑁄𑀢𑀺 𑀢𑀣𑀸 𑀢𑀣𑀸 𑀯𑀯𑀢𑁆𑀣𑀧𑁂𑀢𑁆𑀯𑀸, 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸, 𑀯𑀺𑀧𑀲𑁆𑀲𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀧𑀭𑀺𑀬𑁄𑀲𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀙𑀦𑁆𑀤𑀁 𑀲𑀩𑁆𑀩𑀲𑁄 𑀯𑀺𑀭𑀸𑀚𑁂𑀢𑁆𑀯𑀸 𑀯𑀺𑀦𑁂𑀢𑁆𑀯𑀸 𑀯𑀺𑀤𑁆𑀥𑀁𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀏𑀢𑀲𑁆𑀫𑀸 ¶ 𑀯𑀝𑁆𑀝𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺 ¶ . 𑀏𑀯𑀫𑀺𑀫𑀸𑀬 𑀉𑀧𑀟𑁆𑀠𑀕𑀸𑀣𑀸𑀬 ‘‘𑀦𑀺𑀬𑁆𑀬𑀸𑀦𑀁 𑀧𑀼𑀘𑁆𑀙𑀺𑀢𑁄 𑀩𑁆𑀭𑀽𑀳𑀺, 𑀓𑀣𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀅𑀬𑀁 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺, 𑀫𑀕𑁆𑀕𑀲𑀘𑁆𑀘𑀜𑁆𑀘 𑀧𑀓𑀸𑀲𑀺𑀢𑀁 𑀲𑀫𑀼𑀤𑀬𑀦𑀺𑀭𑁄𑀥𑀲𑀘𑁆𑀘𑀸𑀦𑀺 𑀧𑀦𑁂𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀓𑀸𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀉𑀧𑀟𑁆𑀠𑀕𑀸𑀣𑀸𑀬 𑀯𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀙𑀦𑁆𑀤𑁂𑀦 𑀲𑀫𑀼𑀤𑀬𑀲𑀘𑁆𑀘𑀁, ‘‘𑀯𑀺𑀭𑀸𑀚𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀺𑀭𑀸𑀕𑁂𑀦 𑀦𑀺𑀭𑁄𑀥𑀲𑀘𑁆𑀘𑀁, ‘‘𑀯𑀺𑀭𑀸𑀕𑀸𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀯𑀘𑀦𑀢𑁄 𑀯𑀸 𑀫𑀕𑁆𑀕𑀲𑀘𑁆𑀘𑀁. ‘‘𑀏𑀯’’𑀦𑁆𑀢𑀺 𑀉𑀧𑀸𑀬𑀦𑀺𑀤𑀲𑁆𑀲𑀦𑁂𑀦 𑀫𑀕𑁆𑀕𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺 𑀯𑀘𑀦𑀢𑁄 𑀯𑀸. ‘‘𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀤𑀼𑀓𑁆𑀔𑀧𑀫𑁄𑀓𑁆𑀔𑁂𑀦 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀏𑀯𑀫𑁂𑀢𑁆𑀣 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁭𑁪. 𑀏𑀯𑀁 𑀘𑀢𑀼𑀲𑀘𑁆𑀘𑀕𑀩𑁆𑀪𑀸𑀬 𑀕𑀸𑀣𑀸𑀬 𑀮𑀓𑁆𑀔𑀡𑀢𑁄 𑀦𑀺𑀬𑁆𑀬𑀸𑀦𑀁 𑀧𑀓𑀸𑀲𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀲𑀓𑁂𑀦 𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂𑀦 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀏𑀢𑀁 𑀮𑁄𑀓𑀲𑁆𑀲 𑀦𑀺𑀬𑁆𑀬𑀸𑀦’’𑀦𑁆𑀢𑀺. 𑀏𑀢𑁆𑀣 𑀏𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀦𑀺𑀤𑁆𑀤𑁂𑀲𑁄, 𑀮𑁄𑀓𑀲𑁆𑀲𑀸𑀢𑀺 𑀢𑁂𑀥𑀸𑀢𑀼𑀓𑀮𑁄𑀓𑀲𑁆𑀲. 𑀬𑀣𑀸𑀢𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀁. 𑀏𑀢𑀁 𑀯𑁄 𑀅𑀳𑀫𑀓𑁆𑀔𑀸𑀫𑀻𑀢𑀺 𑀲𑀘𑁂𑀧𑀺 𑀫𑀁 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑁂𑀬𑁆𑀬𑀸𑀣, 𑀏𑀢𑀁 𑀯𑁄 𑀅𑀳𑀫𑀓𑁆𑀔𑀸𑀫𑀺, 𑀦 𑀅𑀜𑁆𑀜𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀏𑀢𑁂𑀦 𑀦𑀺𑀬𑁆𑀬𑀸𑀦𑁂𑀦 𑀏𑀓𑀤𑁆𑀯𑀢𑁆𑀢𑀺𑀓𑁆𑀔𑀢𑀼𑀁 𑀦𑀺𑀕𑁆𑀕𑀢𑀸𑀦𑀫𑁆𑀧𑀺 𑀏𑀢𑀁 𑀯𑁄 𑀅𑀳𑀫𑀓𑁆𑀔𑀸𑀫𑀺, 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀸𑀬𑀧𑀺 𑀏𑀢𑀤𑁂𑀯 𑀅𑀳𑀫𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺 𑀅𑀲𑁂𑀲𑀦𑀺𑀲𑁆𑀲𑁂𑀲𑀸𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁆𑀯𑁂𑀧𑀺 𑀬𑀓𑁆𑀔𑀲𑁂𑀦𑀸𑀧𑀢𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼 𑀲𑀤𑁆𑀥𑀺𑀁 𑀬𑀓𑁆𑀔𑀲𑀳𑀲𑁆𑀲𑁂𑀦.

𑁧𑁭𑁫. 𑀅𑀣 𑀳𑁂𑀫𑀯𑀢𑁄 𑀧𑀓𑀢𑀺𑀬𑀸𑀧𑀺 𑀥𑀫𑁆𑀫𑀕𑀭𑀼 𑀇𑀤𑀸𑀦𑀺 𑀅𑀭𑀺𑀬𑀪𑀽𑀫𑀺𑀬𑀁 ¶ 𑀧𑀢𑀺𑀝𑁆𑀞𑀸𑀬 𑀲𑀼𑀝𑁆𑀞𑀼𑀢𑀭𑀁 𑀅𑀢𑀺𑀢𑁆𑀢𑁄 𑀪𑀕𑀯𑀢𑁄 𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑀸𑀬 𑀤𑁂𑀲𑀦𑀸𑀬 𑀪𑀕𑀯𑀦𑁆𑀢𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀺𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑁄 𑀲𑀽𑀥 𑀢𑀭𑀢𑀻’’𑀢𑀺 𑀕𑀸𑀣𑀫𑀪𑀸𑀲𑀺. 𑀢𑀢𑁆𑀣 𑀓𑁄 𑀲𑀽𑀥 𑀢𑀭𑀢𑀺 𑀑𑀖𑀦𑁆𑀢𑀺 𑀇𑀫𑀺𑀦𑀸 𑀘𑀢𑀼𑀭𑁄𑀖𑀁 𑀓𑁄 𑀢𑀭𑀢𑀻𑀢𑀺 𑀲𑁂𑀓𑁆𑀔𑀪𑀽𑀫𑀺𑀁 𑀧𑀼𑀘𑁆𑀙𑀢𑀺 𑀅𑀯𑀺𑀲𑁂𑀲𑁂𑀦. 𑀬𑀲𑁆𑀫𑀸 𑀅𑀡𑁆𑀡𑀯𑀦𑁆𑀢𑀺 𑀦 𑀯𑀺𑀢𑁆𑀣𑀢𑀫𑀢𑁆𑀢𑀁 𑀦𑀸𑀧𑀺 𑀕𑀫𑁆𑀪𑀻𑀭𑀫𑀢𑁆𑀢𑀁 𑀅𑀧𑀺𑀘 𑀧𑀦 𑀬𑀁 𑀯𑀺𑀢𑁆𑀣𑀢𑀢𑀭𑀜𑁆𑀘 𑀕𑀫𑁆𑀪𑀻𑀭𑀢𑀭𑀜𑁆𑀘, 𑀢𑀁 𑀯𑀼𑀘𑁆𑀘𑀢𑀺. 𑀢𑀸𑀤𑀺𑀲𑁄 𑀘 𑀲𑀁𑀲𑀸𑀭𑀡𑁆𑀡𑀯𑁄. 𑀅𑀬𑀜𑁆𑀳𑀺 𑀲𑀫𑀦𑁆𑀢𑀢𑁄 𑀧𑀭𑀺𑀬𑀦𑁆𑀢𑀸𑀪𑀸𑀯𑁂𑀦 𑀯𑀺𑀢𑁆𑀣𑀢𑁄, 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀉𑀧𑀭𑀺 𑀆𑀮𑀫𑁆𑀩𑀦𑀸𑀪𑀸𑀯𑁂𑀦 𑀘 𑀕𑀫𑁆𑀪𑀻𑀭𑁄, 𑀢𑀲𑁆𑀫𑀸 ‘‘𑀓𑁄 𑀇𑀥 𑀢𑀭𑀢𑀺 𑀅𑀡𑁆𑀡𑀯𑀁, 𑀢𑀲𑁆𑀫𑀺𑀜𑁆𑀘 𑀅𑀧𑁆𑀧𑀢𑀺𑀝𑁆𑀞𑁂 𑀅𑀦𑀸𑀮𑀫𑁆𑀩𑁂 𑀕𑀫𑁆𑀪𑀻𑀭𑁂 𑀅𑀡𑁆𑀡𑀯𑁂 𑀓𑁄 𑀦 𑀲𑀻𑀤𑀢𑀻’’𑀢𑀺 𑀅𑀲𑁂𑀓𑁆𑀔𑀪𑀽𑀫𑀺𑀁 𑀧𑀼𑀘𑁆𑀙𑀢𑀺.

𑁧𑁭𑁬. 𑀅𑀣 ¶ 𑀪𑀕𑀯𑀸 𑀬𑁄 𑀪𑀺𑀓𑁆𑀔𑀼 𑀚𑀻𑀯𑀺𑀢𑀳𑁂𑀢𑀼𑀧𑀺 𑀯𑀻𑀢𑀺𑀓𑁆𑀓𑀫𑀁 𑀅𑀓𑀭𑁄𑀦𑁆𑀢𑁄 𑀲𑀩𑁆𑀩𑀤𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀘 𑀧𑀜𑁆𑀜𑀸𑀬 𑀧𑀜𑁆𑀜𑀯𑀸, 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀦𑀸 𑀇𑀭𑀺𑀬𑀸𑀧𑀣𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑁂𑀳𑀺 𑀘 𑀲𑀼𑀲𑀫𑀸𑀳𑀺𑀢𑁄, 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀘𑀺𑀦𑁆𑀢𑀦𑀲𑀻𑀮𑁄, 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀯𑀳𑀸𑀬 ¶ 𑀅𑀧𑁆𑀧𑀫𑀸𑀤𑀲𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑁄. 𑀬𑀲𑁆𑀫𑀸 𑀲𑁄 𑀘𑀢𑀼𑀢𑁆𑀣𑁂𑀦 𑀫𑀕𑁆𑀕𑁂𑀦 𑀇𑀫𑀁 𑀲𑀼𑀤𑀼𑀢𑁆𑀢𑀭𑀁 𑀑𑀖𑀁 𑀅𑀦𑀯𑀲𑁂𑀲𑀁 𑀢𑀭𑀢𑀺, 𑀢𑀲𑁆𑀫𑀸 𑀲𑁂𑀓𑁆𑀔𑀪𑀽𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀲𑀩𑁆𑀩𑀤𑀸 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀫𑀁 𑀢𑀺𑀲𑀺𑀓𑁆𑀔𑀸𑀕𑀩𑁆𑀪𑀁 𑀕𑀸𑀣𑀫𑀸𑀳. 𑀏𑀢𑁆𑀣 𑀳𑀺 𑀲𑀻𑀮𑀲𑀫𑁆𑀧𑀤𑀸𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀲𑀢𑀺𑀲𑀫𑀸𑀥𑀻𑀳𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀚𑁆𑀛𑀢𑁆𑀢𑀘𑀺𑀦𑁆𑀢𑀺𑀢𑀸𑀧𑀜𑁆𑀜𑀸𑀳𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀉𑀧𑀓𑀸𑀭𑀸 𑀲𑀸𑀦𑀺𑀲𑀁𑀲𑀸 𑀘 𑀯𑀼𑀢𑁆𑀢𑀸. 𑀉𑀧𑀓𑀸𑀭𑁄 𑀳𑀺 𑀲𑀺𑀓𑁆𑀔𑀸𑀦𑀁 𑀮𑁄𑀓𑀺𑀬𑀧𑀜𑁆𑀜𑀸 𑀲𑀢𑀺 𑀘, 𑀅𑀦𑀺𑀲𑀁𑀲𑁄 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺.

𑁧𑁭𑁭. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀲𑁂𑀓𑁆𑀔𑀪𑀽𑀫𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀲𑁂𑀓𑁆𑀔𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀯𑀺𑀭𑀢𑁄 𑀓𑀸𑀫𑀲𑀜𑁆𑀜𑀸𑀬𑀸𑀢𑀺 𑀬𑀸 𑀓𑀸𑀘𑀺 𑀓𑀸𑀫𑀲𑀜𑁆𑀜𑀸, 𑀢𑀢𑁄 𑀲𑀩𑁆𑀩𑀢𑁄 𑀘𑀢𑀼𑀢𑁆𑀣𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀬𑀸 𑀯𑀺𑀭𑀢𑁄. ‘‘𑀯𑀺𑀭𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀢𑀤𑀸 ‘‘𑀓𑀸𑀫𑀲𑀜𑁆𑀜𑀸𑀬𑀸’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀳𑁄𑀢𑀺, 𑀲𑀕𑀸𑀣𑀸𑀯𑀕𑁆𑀕𑁂 𑀧𑀦 ‘‘𑀓𑀸𑀫𑀲𑀜𑁆𑀜𑀸𑀲𑀽’’𑀢𑀺𑀧𑀺 (𑀲𑀁. 𑀦𑀺. 𑁧.𑁯𑁬) 𑀧𑀸𑀞𑁄. 𑀘𑀢𑀽𑀳𑀺𑀧𑀺 𑀫𑀕𑁆𑀕𑁂𑀳𑀺 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀢𑀻𑀢𑀢𑁆𑀢𑀸 𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀺𑀕𑁄, 𑀘𑀢𑀼𑀢𑁆𑀣𑁂𑀦𑁂𑀯 𑀯𑀸 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀺𑀕𑁄 ¶ , 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀦𑀦𑁆𑀤𑀺𑀬𑀸 𑀢𑀺𑀡𑁆𑀡𑀜𑁆𑀘 𑀪𑀯𑀸𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑁄 𑀲𑁄 𑀢𑀸𑀤𑀺𑀲𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀕𑀫𑁆𑀪𑀻𑀭𑁂 𑀲𑀁𑀲𑀸𑀭𑀡𑁆𑀡𑀯𑁂 𑀦 𑀲𑀻𑀤𑀢𑀺 𑀦𑀦𑁆𑀤𑀻𑀧𑀭𑀺𑀓𑁆𑀔𑀬𑁂𑀦 𑀲𑀉𑀧𑀸𑀤𑀺𑀲𑁂𑀲𑀁, 𑀪𑀯𑀧𑀭𑀺𑀓𑁆𑀔𑀬𑁂𑀦 𑀘 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀣𑀮𑀁 𑀲𑀫𑀸𑀧𑀚𑁆𑀚 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑀺𑀬𑀸𑀢𑀺.

𑁧𑁭𑁮. 𑀅𑀣 𑀳𑁂𑀫𑀯𑀢𑁄 𑀲𑀳𑀸𑀬𑀜𑁆𑀘 𑀬𑀓𑁆𑀔𑀧𑀭𑀺𑀲𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀕𑀫𑁆𑀪𑀻𑀭𑀧𑀜𑁆𑀜’’𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀕𑀸𑀣𑀸𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀲𑀩𑁆𑀩𑀸𑀯𑀢𑀺𑀬𑀸 𑀧𑀭𑀺𑀲𑀸𑀬 𑀲𑀳𑀸𑀬𑁂𑀦 𑀘 𑀲𑀤𑁆𑀥𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀢𑀸𑀲𑀁 𑀧𑀦 𑀕𑀸𑀣𑀸𑀦𑀁 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀕𑀫𑁆𑀪𑀻𑀭𑀧𑀜𑁆𑀜𑀦𑁆𑀢𑀺 𑀕𑀫𑁆𑀪𑀻𑀭𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀢𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀫𑁆𑀪𑀻𑀭𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ¶ ‘‘𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀕𑀫𑁆𑀪𑀻𑀭𑀧𑀜𑁆𑀜𑀸’’𑀢𑀺𑀆𑀤𑀺 (𑀧𑀝𑀺. 𑀫. 𑁩.𑁪). 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀦𑁆𑀢𑀺 𑀦𑀺𑀧𑀼𑀡𑁂𑀳𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑀸𑀦𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑀤𑀲𑁆𑀲𑀺𑀁 𑀅𑀢𑁆𑀣𑀸𑀦𑀁 𑀯𑀸 𑀬𑀸𑀦𑀺 𑀦𑀺𑀧𑀼𑀡𑀸𑀦𑀺 𑀓𑀸𑀭𑀡𑀸𑀦𑀺 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸𑀦𑀺 𑀅𑀜𑁆𑀜𑁂𑀳𑀺 𑀢𑁂𑀲𑀁 𑀤𑀲𑁆𑀲𑀦𑁂𑀦 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀁. 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀪𑀸𑀯𑁂𑀦 𑀅𑀓𑀺𑀜𑁆𑀘𑀦𑀁. 𑀤𑀼𑀯𑀺𑀥𑁂 𑀓𑀸𑀫𑁂 𑀢𑀺𑀯𑀺𑀥𑁂 𑀘𑁂 𑀪𑀯𑁂 𑀅𑀮𑀕𑁆𑀕𑀦𑁂𑀦 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁. 𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀲𑀩𑁆𑀩𑀸𑀭𑀫𑁆𑀫𑀡𑁂𑀲𑀼 𑀙𑀦𑁆𑀤𑀭𑀸𑀕𑀩𑀦𑁆𑀥𑀦𑀸𑀪𑀸𑀯𑁂𑀦 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑀁. 𑀤𑀺𑀩𑁆𑀩𑁂 𑀧𑀣𑁂 𑀓𑀫𑀫𑀸𑀦𑀦𑁆𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀪𑁂𑀤𑁂 𑀤𑀺𑀩𑁆𑀩𑁂 𑀧𑀣𑁂 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀘𑀗𑁆𑀓𑀫𑀦𑁆𑀢𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀢𑀸𑀬 𑀯𑁂𑀮𑀸𑀬 𑀪𑀕𑀯𑀸 𑀤𑀺𑀩𑁆𑀩𑁂 𑀧𑀣𑁂 𑀓𑀫𑀢𑀺, 𑀅𑀧𑀺𑀘 𑀔𑁄 𑀧𑀼𑀩𑁆𑀩𑁂 𑀓𑀫𑀦𑀁 𑀉𑀧𑀸𑀤𑀸𑀬 𑀓𑀫𑀦𑀲𑀢𑁆𑀢𑀺𑀲𑀩𑁆𑀪𑀸𑀯𑁂𑀦 𑀢𑀢𑁆𑀣 𑀮𑀤𑁆𑀥𑀯𑀲𑀻𑀪𑀸𑀯𑀢𑀸𑀬 𑀏𑀯𑀁 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀬𑁂 𑀢𑁂 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀁 𑀧𑀣𑁂 𑀲𑀦𑁆𑀢𑀯𑀺𑀳𑀸𑀭𑁂 𑀓𑀫𑀦𑁂𑀦𑀸𑀧𑁂𑀢𑀁 𑀯𑀼𑀢𑁆𑀢𑀁. 𑀫𑀳𑀦𑁆𑀢𑀸𑀦𑀁 𑀕𑀼𑀡𑀸𑀦𑀁 𑀏𑀲𑀦𑁂𑀦 𑀫𑀳𑁂𑀲𑀺𑀁.

𑁧𑁭𑁯. 𑀤𑀼𑀢𑀺𑀬𑀕𑀸𑀣𑀸𑀬 ¶ 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀣𑀼𑀢𑀺 𑀆𑀭𑀤𑁆𑀥𑀸𑀢𑀺 𑀓𑀢𑁆𑀯𑀸 𑀧𑀼𑀦 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀕𑁆𑀕𑀳𑀡𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀦𑀺𑀧𑀼𑀡𑀢𑁆𑀣𑁂 𑀤𑀲𑁆𑀲𑁂𑀢𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀤𑀤𑀦𑁆𑀢𑀺 𑀧𑀜𑁆𑀜𑀸𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸𑀬 ¶ 𑀧𑀝𑀺𑀧𑀢𑁆𑀢𑀺𑀬𑀸 𑀓𑀣𑀦𑁂𑀦 𑀧𑀜𑁆𑀜𑀸𑀤𑀸𑀬𑀓𑀁. 𑀓𑀸𑀫𑀸𑀮𑀬𑁂 𑀅𑀲𑀢𑁆𑀢𑀦𑁆𑀢𑀺 𑀬𑁆𑀯𑀸𑀬𑀁 𑀓𑀸𑀫𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀤𑀼𑀯𑀺𑀥𑁄 𑀆𑀮𑀬𑁄, 𑀢𑀢𑁆𑀣 𑀅𑀲𑀢𑁆𑀢𑀁. 𑀲𑀩𑁆𑀩𑀯𑀺𑀤𑀼𑀦𑁆𑀢𑀺 𑀲𑀩𑁆𑀩𑀥𑀫𑁆𑀫𑀯𑀺𑀤𑀼𑀁, 𑀲𑀩𑁆𑀩𑀜𑁆𑀜𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀫𑁂𑀥𑀦𑁆𑀢𑀺 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀪𑀸𑀯𑀲𑁆𑀲 𑀫𑀕𑁆𑀕𑀪𑀽𑀢𑀸𑀬 𑀧𑀸𑀭𑀫𑀻𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀅𑀭𑀺𑀬𑁂 𑀧𑀣𑁂𑀢𑀺 𑀅𑀝𑁆𑀞𑀗𑁆𑀕𑀺𑀓𑁂 𑀫𑀕𑁆𑀕𑁂, 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀯𑀸. 𑀓𑀫𑀫𑀸𑀦𑀦𑁆𑀢𑀺 𑀧𑀜𑁆𑀜𑀸𑀬 𑀅𑀚𑁆𑀛𑁄𑀕𑀸𑀳𑀫𑀸𑀦𑀁 𑀫𑀕𑁆𑀕𑀮𑀓𑁆𑀔𑀡𑀁 𑀜𑀢𑁆𑀯𑀸 𑀤𑁂𑀲𑀦𑀢𑁄, 𑀧𑀯𑀺𑀲𑀫𑀸𑀦𑀁 𑀯𑀸 𑀔𑀡𑁂 𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀢𑁄, 𑀘𑀢𑀼𑀩𑁆𑀩𑀺𑀥𑀫𑀕𑁆𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑀸𑀬 𑀓𑀫𑀦𑀲𑀢𑁆𑀢𑀺𑀬𑀸 𑀓𑀫𑀺𑀢𑀧𑀼𑀩𑁆𑀩𑀁 𑀯𑀸.

𑁧𑁮𑁦. 𑀲𑀼𑀤𑀺𑀝𑁆𑀞𑀁 𑀯𑀢 𑀦𑁄 𑀅𑀚𑁆𑀚𑀸𑀢𑀺. 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀲𑀼𑀦𑁆𑀤𑀭𑀁 𑀤𑀺𑀝𑁆𑀞𑀁, 𑀅𑀚𑁆𑀚 𑀯𑀸 𑀅𑀫𑁆𑀳𑀸𑀓𑀁 𑀲𑀼𑀦𑁆𑀤𑀭𑀁 𑀤𑀺𑀝𑁆𑀞𑀁, 𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀧𑁆𑀧𑀪𑀸𑀢𑀁 𑀲𑀼𑀳𑀼𑀝𑁆𑀞𑀺𑀢𑀦𑁆𑀢𑀺 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀼𑀝𑁆𑀞𑀼 𑀧𑀪𑀸𑀢𑀁 𑀲𑁄𑀪𑀦𑀁 𑀯𑀸 𑀧𑀪𑀸𑀢𑀁 𑀅𑀳𑁄𑀲𑀺. 𑀅𑀚𑁆𑀚 𑀘 𑀦𑁄 𑀲𑀼𑀦𑁆𑀤𑀭𑀁 𑀉𑀝𑁆𑀞𑀺𑀢𑀁 𑀅𑀳𑁄𑀲𑀺, 𑀅𑀦𑀼𑀧𑀭𑁄𑀥𑁂𑀦 𑀲𑀬𑀦𑀢𑁄 𑀉𑀝𑁆𑀞𑀺𑀢𑀁. 𑀓𑀺𑀁 𑀓𑀸𑀭𑀡𑀁? 𑀬𑀁 𑀅𑀤𑁆𑀤𑀲𑀸𑀫 𑀲𑀫𑁆𑀩𑀼𑀤𑁆𑀥𑀁, 𑀬𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲𑀸𑀫𑀸𑀢𑀺 𑀅𑀢𑁆𑀢𑀦𑁄 𑀮𑀸𑀪𑀲𑀫𑁆𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀸𑀫𑁄𑀚𑁆𑀚𑀁 𑀧𑀯𑁂𑀤𑁂𑀢𑀺.

𑁧𑁮𑁧. 𑀇𑀤𑁆𑀥𑀺𑀫𑀦𑁆𑀢𑁄𑀢𑀺 ¶ 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀬𑀲𑀲𑁆𑀲𑀺𑀦𑁄𑀢𑀺 𑀮𑀸𑀪𑀕𑁆𑀕𑀧𑀭𑀺𑀯𑀸𑀭𑀕𑁆𑀕𑀲𑀫𑁆𑀧𑀦𑁆𑀦𑀸. 𑀲𑀭𑀡𑀁 𑀬𑀦𑁆𑀢𑀻𑀢𑀺 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑁂𑀦𑁂𑀯 𑀕𑀢𑀸, 𑀢𑀣𑀸𑀧𑀺 𑀲𑁄𑀢𑀸𑀧𑀦𑁆𑀦𑀪𑀸𑀯𑀧𑀭𑀺𑀤𑀻𑀧𑀦𑀢𑁆𑀣𑀁 𑀧𑀲𑀸𑀤𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀸𑀘𑀁 𑀪𑀺𑀦𑁆𑀤𑀢𑀺.

𑁧𑁮𑁨. 𑀕𑀸𑀫𑀸 𑀕𑀸𑀫𑀦𑁆𑀢𑀺 𑀤𑁂𑀯𑀕𑀸𑀫𑀸 𑀤𑁂𑀯𑀕𑀸𑀫𑀁. 𑀦𑀕𑀸 𑀦𑀕𑀦𑁆𑀢𑀺 𑀤𑁂𑀯𑀧𑀩𑁆𑀩𑀢𑀸 𑀤𑁂𑀯𑀧𑀩𑁆𑀩𑀢𑀁. 𑀦𑀫𑀲𑁆𑀲𑀫𑀸𑀦𑀸 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀯𑀢 𑀪𑀕𑀯𑀢𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀜𑁆𑀘 𑀥𑀫𑁆𑀫𑀲𑀼𑀥𑀫𑁆𑀫𑀢𑀜𑁆𑀘. ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀖-𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀥𑀫𑁆𑀫𑀖𑁄𑀲𑀓𑀸 𑀳𑀼𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀳𑁂𑀫𑀯𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀴𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀆𑀴𑀯𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁂𑀦𑁂𑀯𑀲𑁆𑀲 𑀉𑀧𑁆𑀧𑀢𑁆𑀢𑀺 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀯𑀡𑁆𑀡𑀦𑀸𑀬 𑀘 ‘‘𑀏𑀯𑀁 𑀫𑁂 𑀲𑀼𑀢𑀁, 𑀏𑀓𑀁 𑀲𑀫𑀬𑀁 𑀪𑀕𑀯𑀸’’𑀢𑀺 𑀏𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂𑀢𑀺 𑀏𑀢𑁆𑀣 𑀧𑀦 𑀓𑀸 𑀆𑀴𑀯𑀻, 𑀓𑀲𑁆𑀫𑀸 𑀘 𑀪𑀕𑀯𑀸 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂 𑀯𑀺𑀳𑀭𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀆𑀴𑀯𑀻𑀢𑀺 𑀭𑀝𑁆𑀞𑀫𑁆𑀧𑀺 𑀦𑀕𑀭𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀯𑀝𑁆𑀝𑀢𑀺. 𑀆𑀴𑀯𑀻𑀦𑀕𑀭𑀲𑁆𑀲 𑀳𑀺 𑀲𑀫𑀻𑀧𑁂 𑀯𑀺𑀳𑀭𑀦𑁆𑀢𑁄𑀧𑀺 ‘‘𑀆𑀴𑀯𑀺𑀬𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀘 𑀦𑀕𑀭𑀲𑁆𑀲 𑀲𑀫𑀻𑀧𑁂 𑀅𑀯𑀺𑀤𑀽𑀭𑁂 𑀕𑀸𑀯𑀼𑀢𑀫𑀢𑁆𑀢𑁂 𑀢𑀁 𑀪𑀯𑀦𑀁, 𑀆𑀴𑀯𑀻𑀭𑀝𑁆𑀞𑁂 𑀯𑀺𑀳𑀭𑀦𑁆𑀢𑁄𑀧𑀺 ‘‘𑀆𑀴𑀯𑀺𑀬𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀆𑀴𑀯𑀻𑀭𑀝𑁆𑀞𑁂 𑀘𑁂𑀢𑀁 𑀪𑀯𑀦𑀁.

𑀬𑀲𑁆𑀫𑀸 𑀧𑀦 𑀆𑀴𑀯𑀓𑁄 𑀭𑀸𑀚𑀸 𑀯𑀺𑀯𑀺𑀥𑀦𑀸𑀝𑀓𑀽𑀧𑀪𑁄𑀕𑀁 𑀙𑀟𑁆𑀟𑁂𑀢𑁆𑀯𑀸 𑀘𑁄𑀭𑀧𑀝𑀺𑀩𑀸𑀳𑀦𑀢𑁆𑀣𑀁 𑀧𑀝𑀺𑀭𑀸𑀚𑀦𑀺𑀲𑁂𑀥𑀦𑀢𑁆𑀣𑀁 𑀩𑁆𑀬𑀸𑀬𑀸𑀫𑀓𑀭𑀡𑀢𑁆𑀣𑀜𑁆𑀘 𑀲𑀢𑁆𑀢𑀫𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀺𑀕𑀯𑀁 𑀕𑀘𑁆𑀙𑀦𑁆𑀢𑁄 𑀏𑀓𑀤𑀺𑀯𑀲𑀁 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀓𑀢𑀺𑀓𑀁 𑀅𑀓𑀸𑀲𑀺 𑁋 ‘‘𑀬𑀲𑁆𑀲 𑀧𑀲𑁆𑀲𑁂𑀦 ¶ 𑀫𑀺𑀕𑁄 𑀧𑀮𑀸𑀬𑀢𑀺, 𑀢𑀲𑁆𑀲𑁂𑀯 𑀲𑁄 𑀪𑀸𑀭𑁄’’𑀢𑀺. 𑀅𑀣 𑀢𑀲𑁆𑀲𑁂𑀯 𑀧𑀲𑁆𑀲𑁂𑀦 𑀫𑀺𑀕𑁄 𑀧𑀮𑀸𑀬𑀺, 𑀚𑀯𑀲𑀫𑁆𑀧𑀦𑁆𑀦𑁄 𑀭𑀸𑀚𑀸 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀢𑀺𑀬𑁄𑀚𑀦𑀁 𑀢𑀁 𑀫𑀺𑀕𑀁 𑀅𑀦𑀼𑀩𑀦𑁆𑀥𑀺. 𑀏𑀡𑀺𑀫𑀺𑀕𑀸 𑀘 𑀢𑀺𑀬𑁄𑀚𑀦𑀯𑁂𑀕𑀸 𑀏𑀯 𑀳𑁄𑀦𑁆𑀢𑀺. 𑀅𑀣 𑀧𑀭𑀺𑀓𑁆𑀔𑀻𑀡𑀚𑀯𑀁 𑀢𑀁 𑀫𑀺𑀕𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸, 𑀞𑀺𑀢𑀁 𑀯𑀥𑀺𑀢𑁆𑀯𑀸, 𑀤𑁆𑀯𑀺𑀥𑀸 𑀙𑁂𑀢𑁆𑀯𑀸, 𑀅𑀦𑀢𑁆𑀣𑀺𑀓𑁄𑀧𑀺 𑀫𑀁𑀲𑁂𑀦 ‘‘𑀦𑀸𑀲𑀓𑁆𑀔𑀺 𑀫𑀺𑀕𑀁 𑀕𑀳𑁂𑀢𑀼’’𑀦𑁆𑀢𑀺 𑀅𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀓𑀸𑀚𑁂𑀦𑀸𑀤𑀸𑀬 𑀆𑀕𑀘𑁆𑀙𑀦𑁆𑀢𑁄 𑀦𑀕𑀭𑀲𑁆𑀲𑀸𑀯𑀺𑀤𑀽𑀭𑁂 𑀩𑀳𑀮𑀧𑀢𑁆𑀢𑀧𑀮𑀸𑀲𑀁 𑀫𑀳𑀸𑀦𑀺𑀕𑁆𑀭𑁄𑀥𑀁 𑀤𑀺𑀲𑁆𑀯𑀸 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀢𑀲𑁆𑀲 𑀫𑀽𑀮𑀫𑀼𑀧𑀕𑀢𑁄. 𑀢𑀲𑁆𑀫𑀺𑀜𑁆𑀘 𑀦𑀺𑀕𑁆𑀭𑁄𑀥𑁂 𑀆𑀴𑀯𑀓𑁄 𑀬𑀓𑁆𑀔𑁄 𑀫𑀳𑀸𑀭𑀸𑀚𑀲𑀦𑁆𑀢𑀺𑀓𑀸 𑀯𑀭𑀁 𑀮𑀪𑀺𑀢𑁆𑀯𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀁 𑀧𑀯𑀺𑀝𑁆𑀞𑁂 𑀧𑀸𑀡𑀺𑀦𑁄 𑀔𑀸𑀤𑀦𑁆𑀢𑁄 𑀧𑀝𑀺𑀯𑀲𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 ¶ 𑀔𑀸𑀤𑀺𑀢𑀼𑀁 𑀉𑀧𑀕𑀢𑁄. 𑀅𑀣 𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀢𑀺𑀓𑀁 𑀅𑀓𑀸𑀲𑀺 𑁋 ‘‘𑀫𑀼𑀜𑁆𑀘 𑀫𑀁, 𑀅𑀳𑀁 𑀢𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀦𑀼𑀲𑁆𑀲𑀜𑁆𑀘 𑀣𑀸𑀮𑀺𑀧𑀸𑀓𑀜𑁆𑀘 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀬𑀓𑁆𑀔𑁄 ‘‘𑀢𑁆𑀯𑀁 𑀭𑀸𑀚𑀽𑀧𑀪𑁄𑀕𑁂𑀦 𑀧𑀫𑀢𑁆𑀢𑁄 𑀲𑀫𑁆𑀫𑀼𑀲𑁆𑀲𑀲𑀺, 𑀅𑀳𑀁 𑀧𑀦 𑀪𑀯𑀦𑀁 𑀅𑀦𑀼𑀧𑀕𑀢𑀜𑁆𑀘 𑀅𑀦𑀦𑀼𑀜𑁆𑀜𑀸𑀢𑀜𑁆𑀘 𑀔𑀸𑀤𑀺𑀢𑀼𑀁 𑀦 𑀮𑀪𑀸𑀫𑀺, 𑀲𑁆𑀯𑀸𑀳𑀁 𑀪𑀯𑀦𑁆𑀢𑀫𑁆𑀧𑀺 𑀚𑀻𑀬𑁂𑀬𑁆𑀬’’𑀦𑁆𑀢𑀺 𑀦 𑀫𑀼𑀜𑁆𑀘𑀺. 𑀭𑀸𑀚𑀸 ‘‘𑀬𑀁 𑀤𑀺𑀯𑀲𑀁 𑀦 𑀧𑁂𑀲𑁂𑀫𑀺, 𑀢𑀁 𑀤𑀺𑀯𑀲𑀁 𑀫𑀁 𑀕𑀳𑁂𑀢𑁆𑀯𑀸 𑀔𑀸𑀤𑀸𑀳𑀻’’𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑁂𑀦 𑀫𑀼𑀢𑁆𑀢𑁄 𑀦𑀕𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺.

𑀩𑀮𑀓𑀸𑀬𑁄 ¶ 𑀫𑀕𑁆𑀕𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑁋 ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀬𑀲𑀫𑀢𑁆𑀢𑀪𑀬𑀸 𑀏𑀯𑀁 𑀓𑀺𑀮𑀦𑁆𑀢𑁄𑀲𑀻’’𑀢𑀺 𑀯𑀤𑀦𑁆𑀢𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸, 𑀓𑀢𑀧𑀸𑀢𑀭𑀸𑀲𑁄 𑀦𑀕𑀭𑀕𑀼𑀢𑁆𑀢𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀦𑀕𑀭𑀕𑀼𑀢𑁆𑀢𑀺𑀓𑁄 𑁋 ‘‘𑀓𑀺𑀁, 𑀤𑁂𑀯, 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀓𑀢𑁄’’𑀢𑀺 𑀆𑀳. 𑀭𑀸𑀚𑀸 ‘‘𑀦 𑀓𑀢𑁄, 𑀪𑀡𑁂’’𑀢𑀺 𑀆𑀳. ‘‘𑀤𑀼𑀝𑁆𑀞𑀼 𑀓𑀢𑀁, 𑀤𑁂𑀯, 𑀅𑀫𑀦𑀼𑀲𑁆𑀲𑀸 𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀫𑀢𑁆𑀢𑀫𑁂𑀯 𑀮𑀪𑀦𑁆𑀢𑀺, 𑀅𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀦 𑀚𑀦𑀧𑀤𑀲𑁆𑀲 𑀆𑀩𑀸𑀥𑁄 𑀪𑀯𑀺𑀲𑁆𑀲𑀢𑀺. 𑀳𑁄𑀢𑀼, 𑀤𑁂𑀯, 𑀓𑀺𑀜𑁆𑀘𑀸𑀧𑀺 𑀏𑀯𑀫𑀓𑀸𑀲𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁 𑀭𑀚𑁆𑀚𑀲𑀼𑀔𑀁 𑀅𑀦𑀼𑀪𑁄𑀳𑀺, 𑀅𑀳𑀫𑁂𑀢𑁆𑀣 𑀓𑀸𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀩𑀦𑁆𑀥𑀦𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀬𑁂 𑀬𑁂 𑀯𑀚𑁆𑀛𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀲𑀦𑁆𑀥𑀸𑀬 𑁋 ‘‘𑀬𑁄 𑀚𑀻𑀯𑀺𑀢𑀢𑁆𑀣𑀺𑀓𑁄 𑀳𑁄𑀢𑀺, 𑀲𑁄 ¶ 𑀦𑀺𑀓𑁆𑀔𑀫𑀢𑀽’’𑀢𑀺 𑀪𑀡𑀢𑀺. 𑀬𑁄 𑀧𑀞𑀫𑀁 𑀦𑀺𑀓𑁆𑀔𑀫𑀢𑀺 𑀢𑀁 𑀕𑁂𑀳𑀁 𑀦𑁂𑀢𑁆𑀯𑀸, 𑀦𑁆𑀳𑀸𑀧𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸 𑀘, ‘‘𑀇𑀫𑀁 𑀣𑀸𑀮𑀺𑀧𑀸𑀓𑀁 𑀬𑀓𑁆𑀔𑀲𑁆𑀲 𑀤𑁂𑀳𑀻’’𑀢𑀺 𑀧𑁂𑀲𑁂𑀢𑀺. 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀧𑀯𑀺𑀝𑁆𑀞𑀫𑀢𑁆𑀢𑀁𑀬𑁂𑀯 𑀬𑀓𑁆𑀔𑁄 𑀪𑁂𑀭𑀯𑀁 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀽𑀮𑀓𑀦𑁆𑀤𑀁 𑀯𑀺𑀬 𑀔𑀸𑀤𑀢𑀺 ¶ . 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 𑀓𑁂𑀲𑀸𑀤𑀻𑀦𑀺 𑀉𑀧𑀸𑀤𑀸𑀬 𑀲𑀓𑀮𑀲𑀭𑀻𑀭𑀁 𑀦𑀯𑀦𑀻𑀢𑀧𑀺𑀡𑁆𑀟𑁄 𑀯𑀺𑀬 𑀳𑁄𑀢𑀺. 𑀬𑀓𑁆𑀔𑀲𑁆𑀲 𑀪𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀢𑀼𑀁 𑀕𑀢𑀧𑀼𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀬𑀣𑀸𑀫𑀺𑀢𑁆𑀢𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀧𑀪𑀼𑀢𑀺 ‘‘𑀭𑀸𑀚𑀸 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀬𑀓𑁆𑀔𑀲𑁆𑀲 𑀤𑁂𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀘𑁄𑀭𑀓𑀫𑁆𑀫𑀢𑁄 𑀧𑀝𑀺𑀯𑀺𑀭𑀢𑀸. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀦𑀯𑀘𑁄𑀭𑀸𑀦𑀁 𑀅𑀪𑀸𑀯𑁂𑀦 𑀧𑀼𑀭𑀸𑀡𑀘𑁄𑀭𑀸𑀦𑀜𑁆𑀘 𑀧𑀭𑀺𑀓𑁆𑀔𑀬𑁂𑀦 𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀁.

𑀅𑀣 𑀦𑀕𑀭𑀕𑀼𑀢𑁆𑀢𑀺𑀓𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀥𑀦𑀁 𑀦𑀕𑀭𑀭𑀘𑁆𑀙𑀸𑀲𑀼 𑀙𑀟𑁆𑀟𑀸𑀧𑁂𑀲𑀺 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀓𑁄𑀘𑀺 𑀮𑁄𑀪𑁂𑀦 𑀕𑀡𑁆𑀳𑁂𑀬𑁆𑀬𑀸’’𑀢𑀺. 𑀢𑀁 𑀧𑀸𑀤𑁂𑀦𑀧𑀺 𑀦 𑀓𑁄𑀘𑀺 𑀙𑀼𑀧𑀺. 𑀲𑁄 𑀘𑁄𑀭𑁂 𑀅𑀮𑀪𑀦𑁆𑀢𑁄 𑀅𑀫𑀘𑁆𑀘𑀸𑀦𑀁 𑀆𑀭𑁄𑀘𑁂𑀲𑀺. 𑀅𑀫𑀘𑁆𑀘𑀸 ‘‘𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀏𑀓𑀫𑁂𑀓𑀁 𑀚𑀺𑀡𑁆𑀡𑀓𑀁 𑀧𑁂𑀲𑁂𑀫, 𑀲𑁄 𑀧𑀓𑀢𑀺𑀬𑀸𑀧𑀺 𑀫𑀘𑁆𑀘𑀼𑀫𑀼𑀔𑁂 𑀯𑀢𑁆𑀢𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘‘𑀅𑀫𑁆𑀳𑀸𑀓𑀁 𑀧𑀺𑀢𑀭𑀁, 𑀅𑀫𑁆𑀳𑀸𑀓𑀁 𑀧𑀺𑀢𑀸𑀫𑀳𑀁 𑀧𑁂𑀲𑁂𑀢𑀻’𑀢𑀺 𑀫𑀦𑀼𑀲𑁆𑀲𑀸 𑀔𑁄𑀪𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀫𑀸 𑀯𑁄 𑀏𑀢𑀁 𑀭𑀼𑀘𑁆𑀘𑀻’’𑀢𑀺 𑀦𑀺𑀯𑀸𑀭𑁂𑀲𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀤𑀸𑀭𑀓𑀁 𑀧𑁂𑀲𑁂𑀫 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀁, 𑀢𑀣𑀸𑀯𑀺𑀥𑀲𑁆𑀲 𑀳𑀺 ‘𑀫𑀸𑀢𑀸 𑀫𑁂 𑀧𑀺𑀢𑀸 𑀫𑁂’𑀢𑀺 𑀲𑀺𑀦𑁂𑀳𑁄 𑀦𑀢𑁆𑀣𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀅𑀦𑀼𑀚𑀸𑀦𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀦𑀕𑀭𑁂 𑀤𑀸𑀭𑀓𑀫𑀸𑀢𑀭𑁄 𑀘 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀩𑁆𑀪𑀺𑀦𑀺𑀬𑁄 𑀘 𑀧𑀮𑀸𑀬𑀺𑀢𑁆𑀯𑀸 𑀧𑀭𑀚𑀦𑀧𑀤𑁂 𑀤𑀸𑀭𑀓𑁂 𑀲𑀁𑀯𑀟𑁆𑀠𑁂𑀢𑁆𑀯𑀸 𑀆𑀦𑁂𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀕𑀢𑀸𑀦𑀺.

𑀢𑀢𑁄 𑀏𑀓𑀤𑀺𑀯𑀲𑀁 𑀲𑀓𑀮𑀦𑀕𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑁆𑀧𑀺 𑀤𑀸𑀭𑀓𑀁 𑀅𑀮𑀪𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀢𑁆𑀣𑀺, 𑀤𑁂𑀯, 𑀦𑀕𑀭𑁂 𑀤𑀸𑀭𑀓𑁄 𑀞𑀧𑁂𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑁂 𑀢𑀯 𑀧𑀼𑀢𑁆𑀢𑀁 𑀆𑀴𑀯𑀓𑀓𑀼𑀫𑀸𑀭’’𑀦𑁆𑀢𑀺. 𑀭𑀸𑀚𑀸 ‘‘𑀬𑀣𑀸 𑀫𑀫 𑀧𑀼𑀢𑁆𑀢𑁄 𑀧𑀺𑀬𑁄, 𑀏𑀯𑀁 𑀲𑀩𑁆𑀩𑀮𑁄𑀓𑀲𑁆𑀲, 𑀅𑀢𑁆𑀢𑀦𑀸 𑀧𑀦 𑀧𑀺𑀬𑀢𑀭𑀁 𑀦𑀢𑁆𑀣𑀺, 𑀕𑀘𑁆𑀙𑀣, 𑀢𑀫𑁆𑀧𑀺 𑀤𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁 𑀭𑀓𑁆𑀔𑀣𑀸’’𑀢𑀺 𑀆𑀳. 𑀢𑁂𑀦 𑀘 𑀲𑀫𑀬𑁂𑀦 𑀆𑀴𑀯𑀓𑀓𑀼𑀫𑀸𑀭𑀲𑁆𑀲 𑀫𑀸𑀢𑀸 𑀧𑀼𑀢𑁆𑀢𑀁 ¶ 𑀦𑁆𑀳𑀸𑀧𑁂𑀢𑁆𑀯𑀸, 𑀫𑀡𑁆𑀟𑁂𑀢𑁆𑀯𑀸, 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀓𑀢𑁆𑀯𑀸, 𑀅𑀗𑁆𑀓𑁂 𑀲𑀬𑀸𑀧𑁂𑀢𑁆𑀯𑀸, 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺. 𑀭𑀸𑀚𑀧𑀼𑀭𑀺𑀲𑀸 𑀭𑀜𑁆𑀜𑁄 𑀆𑀡𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑀸 𑀢𑀲𑁆𑀲𑀸 𑀲𑁄𑀴𑀲𑀦𑁆𑀦𑀜𑁆𑀘 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀲𑀤𑁆𑀥𑀺𑀁 𑀥𑀸𑀢𑀺𑀬𑀸 𑀢𑀁 𑀆𑀤𑀸𑀬 𑀧𑀓𑁆𑀓𑀫𑀺𑀁𑀲𑀼 ‘‘𑀲𑁆𑀯𑁂 𑀬𑀓𑁆𑀔𑀪𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀁 𑀤𑀺𑀯𑀲𑀜𑁆𑀘 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 ¶ 𑀧𑀘𑁆𑀘𑀼𑀝𑁆𑀞𑀸𑀬 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 ¶ 𑀕𑀦𑁆𑀥𑀓𑀼𑀝𑀺𑀬𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀆𑀴𑀯𑀓𑀲𑁆𑀲 𑀓𑀼𑀫𑀸𑀭𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀁, 𑀬𑀓𑁆𑀔𑀲𑁆𑀲 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀁 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲𑀸𑀢𑀺. 𑀢𑀲𑁆𑀫𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀦𑀺𑀝𑁆𑀞𑀺𑀢𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑁄𑀯 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑁂 𑀯𑀢𑁆𑀢𑀫𑀸𑀦𑁂 𑀑𑀕𑁆𑀕𑀢𑁂 𑀲𑀽𑀭𑀺𑀬𑁂 𑀏𑀓𑀓𑁄𑀯 𑀅𑀤𑀼𑀢𑀺𑀬𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀸𑀤𑀕𑀫𑀦𑁂𑀦𑁂𑀯 𑀲𑀸𑀯𑀢𑁆𑀣𑀺𑀢𑁄 𑀢𑀺𑀁𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀧𑀸𑀯𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂’’𑀢𑀺.

𑀓𑀺𑀁 𑀧𑀦 𑀪𑀕𑀯𑀸 𑀬𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑁂 𑀆𑀴𑀯𑀓𑀲𑁆𑀲 𑀪𑀯𑀦𑀁, 𑀢𑀲𑁆𑀲 𑀫𑀽𑀮𑁂 𑀯𑀺𑀳𑀸𑀲𑀺, 𑀉𑀤𑀸𑀳𑀼 𑀪𑀯𑀦𑁂𑀬𑁂𑀯𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀪𑀯𑀦𑁂𑀬𑁂𑀯. 𑀬𑀣𑁂𑀯 𑀳𑀺 𑀬𑀓𑁆𑀔𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀪𑀕𑀯𑀸𑀧𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀯𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀤𑀸 𑀆𑀴𑀯𑀓𑁄 𑀳𑀺𑀫𑀯𑀦𑁆𑀢𑁂 𑀬𑀓𑁆𑀔𑀲𑀫𑀸𑀕𑀫𑀁 𑀕𑀢𑁄 𑀳𑁄𑀢𑀺. 𑀢𑀢𑁄 𑀆𑀴𑀯𑀓𑀲𑁆𑀲 𑀤𑁆𑀯𑀸𑀭𑀧𑀸𑀮𑁄 𑀕𑀤𑁆𑀭𑀪𑁄 𑀦𑀸𑀫 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀪𑀕𑀯𑀸 𑀯𑀺𑀓𑀸𑀮𑁂 𑀆𑀕𑀢𑁄’’𑀢𑀺 𑀆𑀳. ‘‘𑀆𑀫, 𑀕𑀤𑁆𑀭𑀪, 𑀆𑀕𑀢𑁄𑀫𑁆𑀳𑀺. 𑀲𑀘𑁂 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢𑀺𑀁 𑀆𑀴𑀯𑀓𑀲𑁆𑀲 𑀪𑀯𑀦𑁂’’𑀢𑀺. ‘‘𑀦 𑀫𑁂, 𑀪𑀦𑁆𑀢𑁂, 𑀕𑀭𑀼, 𑀅𑀧𑀺𑀘 𑀔𑁄 𑀲𑁄 𑀬𑀓𑁆𑀔𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄, 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀦 𑀓𑀭𑁄𑀢𑀺, 𑀫𑀸 𑀭𑀼𑀘𑁆𑀘𑀺 𑀪𑀕𑀯𑀢𑁄 𑀇𑀥 𑀯𑀸𑀲𑁄’’𑀢𑀺. ‘‘𑀚𑀸𑀦𑀸𑀫𑀺, 𑀕𑀤𑁆𑀭𑀪, 𑀢𑀲𑁆𑀲 𑀓𑀓𑁆𑀔𑀴𑀢𑁆𑀢𑀁, 𑀦 𑀓𑁄𑀘𑀺 𑀫𑀫𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢𑀺’’𑀦𑁆𑀢𑀺 ¶ .

𑀤𑀼𑀢𑀺𑀬𑀫𑁆𑀧𑀺 𑀕𑀤𑁆𑀭𑀪𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀕𑁆𑀕𑀺𑀢𑀢𑁆𑀢𑀓𑀧𑀸𑀮𑀲𑀤𑀺𑀲𑁄, 𑀪𑀦𑁆𑀢𑁂, 𑀆𑀴𑀯𑀓𑁄, ‘𑀫𑀸𑀢𑀸𑀧𑀺𑀢𑀭𑁄’𑀢𑀺 𑀯𑀸 ‘𑀲𑀫𑀡𑀩𑁆𑀭𑀸𑀳𑁆𑀫𑀡𑀸’𑀢𑀺 𑀯𑀸 ‘𑀥𑀫𑁆𑀫𑁄’𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀇𑀥𑀸𑀕𑀢𑀸𑀦𑀁 𑀘𑀺𑀢𑁆𑀢𑀓𑁆𑀔𑁂𑀧𑀫𑁆𑀧𑀺 𑀓𑀭𑁄𑀢𑀺, 𑀳𑀤𑀬𑀫𑁆𑀧𑀺 𑀨𑀸𑀮𑁂𑀢𑀺, 𑀧𑀸𑀤𑁂𑀧𑀺 𑀕𑀳𑁂𑀢𑁆𑀯𑀸 𑀧𑀭𑀲𑀫𑀼𑀤𑁆𑀤𑁂 𑀯𑀸 𑀧𑀭𑀘𑀓𑁆𑀓𑀯𑀸𑀴𑁂 𑀯𑀸 𑀔𑀺𑀧𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀪𑀕𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀺, 𑀕𑀤𑁆𑀭𑀪, 𑀲𑀘𑁂 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢𑀺’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀕𑀤𑁆𑀭𑀪𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀕𑁆𑀕𑀺𑀢𑀢𑁆𑀢𑀓𑀧𑀸𑀮𑀲𑀤𑀺𑀲𑁄, 𑀪𑀦𑁆𑀢𑁂, 𑀆𑀴𑀯𑀓𑁄, ‘𑀫𑀸𑀢𑀸𑀧𑀺𑀢𑀭𑁄’𑀢𑀺 𑀯𑀸 ‘𑀲𑀫𑀡𑀩𑁆𑀭𑀸𑀳𑁆𑀫𑀡𑀸’𑀢𑀺 𑀯𑀸 ‘𑀥𑀫𑁆𑀫𑁄’𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀇𑀥𑀸𑀕𑀢𑀸𑀦𑀁 𑀘𑀺𑀢𑁆𑀢𑀓𑁆𑀔𑁂𑀧𑀫𑁆𑀧𑀺 𑀓𑀭𑁄𑀢𑀺, 𑀳𑀤𑀬𑀫𑁆𑀧𑀺 𑀨𑀸𑀮𑁂𑀢𑀺, 𑀧𑀸𑀤𑁂𑀧𑀺 𑀕𑀳𑁂𑀢𑁆𑀯𑀸 𑀧𑀭𑀲𑀫𑀼𑀤𑁆𑀤𑁂 ¶ 𑀯𑀸 𑀧𑀭𑀘𑀓𑁆𑀓𑀯𑀸𑀴𑁂 𑀯𑀸 𑀔𑀺𑀧𑀢𑀻’’𑀢𑀺. 𑀢𑀢𑀺𑀬𑀫𑁆𑀧𑀺 𑀪𑀕𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀺, 𑀕𑀤𑁆𑀭𑀪, 𑀲𑀘𑁂 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢𑀺’’𑀦𑁆𑀢𑀺. ‘‘𑀦 𑀫𑁂, 𑀪𑀦𑁆𑀢𑁂, 𑀕𑀭𑀼, 𑀅𑀧𑀺𑀘 𑀔𑁄 𑀲𑁄 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 ¶ 𑀅𑀦𑀼𑀚𑀸𑀦𑀦𑁆𑀢𑀁 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀆𑀭𑁄𑀘𑁂𑀫𑀺, 𑀪𑀦𑁆𑀢𑁂, 𑀢𑀲𑁆𑀲𑀸’’𑀢𑀺. ‘‘𑀬𑀣𑀸𑀲𑀼𑀔𑀁, 𑀕𑀤𑁆𑀭𑀪, 𑀆𑀭𑁄𑀘𑁂𑀳𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀢𑁆𑀯𑀫𑁂𑀯 𑀚𑀸𑀦𑀸𑀳𑀻’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑁄 𑀧𑀓𑁆𑀓𑀸𑀫𑀺. 𑀪𑀯𑀦𑀤𑁆𑀯𑀸𑀭𑀫𑁆𑀧𑀺 𑀲𑀬𑀫𑁂𑀯 𑀪𑀕𑀯𑀢𑁄 𑀯𑀺𑀯𑀭𑀫𑀤𑀸𑀲𑀺. 𑀪𑀕𑀯𑀸 𑀅𑀦𑁆𑀢𑁄𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀬𑀢𑁆𑀣 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀫𑀗𑁆𑀕𑀮𑀤𑀺𑀯𑀲𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀆𑀴𑀯𑀓𑁄 𑀲𑀺𑀭𑀺𑀁 𑀅𑀦𑀼𑀪𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀤𑀺𑀩𑁆𑀩𑀭𑀢𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀸𑀪𑀁 𑀫𑀼𑀜𑁆𑀘𑀺. 𑀢𑀁 𑀤𑀺𑀲𑁆𑀯𑀸 𑀬𑀓𑁆𑀔𑀲𑁆𑀲 𑀇𑀢𑁆𑀣𑀺𑀬𑁄 𑀆𑀕𑀦𑁆𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀪𑀕𑀯𑀸 ‘‘𑀧𑀼𑀩𑁆𑀩𑁂 𑀢𑀼𑀫𑁆𑀳𑁂 𑀤𑀸𑀦𑀁 𑀤𑀢𑁆𑀯𑀸, 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸, 𑀧𑀽𑀚𑀦𑁂𑀬𑁆𑀬𑀁 𑀧𑀽𑀚𑁂𑀢𑁆𑀯𑀸, 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀸, 𑀇𑀤𑀸𑀦𑀺𑀧𑀺 𑀢𑀣𑁂𑀯 𑀓𑀭𑁄𑀣, 𑀫𑀸 𑀅𑀜𑁆𑀜𑀫𑀜𑁆𑀜𑀁 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀪𑀺𑀪𑀽𑀢𑀸 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀸𑀲𑀁 𑀧𑀓𑀺𑀡𑁆𑀡𑀓𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑀸 𑀘 𑀪𑀕𑀯𑀢𑁄 𑀫𑀥𑀼𑀭𑀦𑀺𑀕𑁆𑀖𑁄𑀲𑀁 𑀲𑀼𑀢𑁆𑀯𑀸, 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀤𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼𑀬𑁂𑀯. 𑀕𑀤𑁆𑀭𑀪𑁄𑀧𑀺 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀆𑀴𑀯𑀓𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀬𑀕𑁆𑀖𑁂, 𑀫𑀸𑀭𑀺𑀲, 𑀚𑀸𑀦𑁂𑀬𑁆𑀬𑀸𑀲𑀺, 𑀯𑀺𑀫𑀸𑀦𑁂 𑀢𑁂 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺. 𑀲𑁄 𑀕𑀤𑁆𑀭𑀪𑀲𑁆𑀲 𑀲𑀜𑁆𑀜𑀫𑀓𑀸𑀲𑀺 ‘‘𑀢𑀼𑀡𑁆𑀳𑀻 𑀳𑁄𑀳𑀺, 𑀕𑀦𑁆𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀧𑀼𑀭𑀺𑀲𑀫𑀸𑀦𑁂𑀦 𑀓𑀺𑀭 𑀮𑀚𑁆𑀚𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀫𑀸 𑀓𑁄𑀘𑀺 𑀧𑀭𑀺𑀲𑀫𑀚𑁆𑀛𑁂 𑀲𑀼𑀡𑁂𑀬𑁆𑀬𑀸’’𑀢𑀺 𑀯𑀸𑀭𑁂𑀲𑀺.

𑀢𑀤𑀸 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸 𑀪𑀕𑀯𑀦𑁆𑀢𑀁 𑀚𑁂𑀢𑀯𑀦𑁂𑀬𑁂𑀯 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀓𑁆𑀔𑀲𑀫𑀸𑀕𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀧𑀭𑀺𑀯𑀸𑀭𑀸 𑀦𑀸𑀦𑀸𑀬𑀸𑀦𑁂𑀳𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀆𑀓𑀸𑀲𑁂 𑀘 𑀬𑀓𑁆𑀔𑀸𑀦𑀁 𑀦 𑀲𑀩𑁆𑀩𑀢𑁆𑀣 ¶ 𑀫𑀕𑁆𑀕𑁄 𑀅𑀢𑁆𑀣𑀺, 𑀆𑀓𑀸𑀲𑀝𑁆𑀞𑀸𑀦𑀺 𑀯𑀺𑀫𑀸𑀦𑀸𑀦𑀺 𑀧𑀭𑀺𑀳𑀭𑀺𑀢𑁆𑀯𑀸 𑀫𑀕𑁆𑀕𑀝𑁆𑀞𑀸𑀦𑁂𑀦𑁂𑀯 𑀫𑀕𑁆𑀕𑁄 𑀳𑁄𑀢𑀺. 𑀆𑀴𑀯𑀓𑀲𑁆𑀲 𑀧𑀦 𑀯𑀺𑀫𑀸𑀦𑀁 𑀪𑀽𑀫𑀝𑁆𑀞𑀁 𑀲𑀼𑀕𑀼𑀢𑁆𑀢𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀼𑀲𑀁𑀯𑀺𑀳𑀺𑀢𑀤𑁆𑀯𑀸𑀭𑀝𑁆𑀝𑀸𑀮𑀓𑀕𑁄𑀧𑀼𑀭𑀁, 𑀉𑀧𑀭𑀺 𑀓𑀁𑀲𑀚𑀸𑀮𑀲𑀜𑁆𑀙𑀦𑁆𑀦𑀁 𑀫𑀜𑁆𑀚𑀽𑀲𑀲𑀤𑀺𑀲𑀁 𑀢𑀺𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦. 𑀢𑀲𑁆𑀲 𑀉𑀧𑀭𑀺 𑀫𑀕𑁆𑀕𑁄 𑀳𑁄𑀢𑀺. 𑀢𑁂 𑀢𑀁 𑀧𑀤𑁂𑀲𑀫𑀸𑀕𑀫𑁆𑀫 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀸 𑀅𑀳𑁂𑀲𑀼𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀦𑀺𑀲𑀺𑀦𑁆𑀦𑁄𑀓𑀸𑀲𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀬𑀸𑀯 𑀪𑀯𑀕𑁆𑀕𑀸, 𑀢𑀸𑀯 𑀓𑁄𑀘𑀺 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑁄. 𑀢𑁂 ‘‘𑀓𑀺𑀫𑀺𑀤’’𑀦𑁆𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂 𑀔𑀺𑀢𑁆𑀢𑀮𑁂𑀟𑁆𑀟𑀼 𑀯𑀺𑀬 𑀑𑀭𑀼𑀬𑁆𑀳 𑀯𑀦𑁆𑀤𑀺𑀢𑁆𑀯𑀸, 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 ‘‘𑀬𑀓𑁆𑀔𑀲𑀫𑀸𑀕𑀫𑀁 𑀕𑀘𑁆𑀙𑀸𑀫 𑀪𑀕𑀯𑀸’’𑀢𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀧𑀲𑀁𑀲𑀦𑁆𑀢𑀸 𑀬𑀓𑁆𑀔𑀲𑀫𑀸𑀕𑀫𑀁 𑀅𑀕𑀫𑀁𑀲𑀼. 𑀆𑀴𑀯𑀓𑁄 𑀢𑁂 𑀤𑀺𑀲𑁆𑀯𑀸 ‘‘𑀇𑀥 𑀦𑀺𑀲𑀻𑀤𑀣𑀸’’𑀢𑀺 𑀧𑀝𑀺𑀓𑁆𑀓𑀫𑁆𑀫 𑀑𑀓𑀸𑀲𑀫𑀤𑀸𑀲𑀺. 𑀢𑁂 ¶ 𑀆𑀴𑀯𑀓𑀲𑁆𑀲 𑀦𑀺𑀯𑁂𑀤𑁂𑀲𑀼𑀁 ‘‘𑀮𑀸𑀪𑀸 𑀢𑁂, 𑀆𑀴𑀯𑀓, 𑀬𑀲𑁆𑀲 𑀢𑁂 𑀪𑀯𑀦𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀕𑀘𑁆𑀙𑀸𑀯𑀼𑀲𑁄 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀲𑁆𑀲𑀽’’𑀢𑀺. 𑀏𑀯𑀁 𑀪𑀕𑀯𑀸 𑀪𑀯𑀦𑁂𑀬𑁂𑀯 𑀯𑀺𑀳𑀸𑀲𑀺, 𑀦 𑀬𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑁂 𑀆𑀴𑀯𑀓𑀲𑁆𑀲 𑀪𑀯𑀦𑀁, 𑀢𑀲𑁆𑀲 𑀫𑀽𑀮𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂’’𑀢𑀺.

𑀅𑀣 𑀔𑁄 𑀆𑀴𑀯𑀓𑁄…𑀧𑁂… 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀦𑀺𑀓𑁆𑀔𑀫 𑀲𑀫𑀡𑀸’’𑀢𑀺. ‘‘𑀓𑀲𑁆𑀫𑀸 𑀧𑀦𑀸𑀬𑀁 𑀏𑀢𑀤𑀯𑁄𑀘𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀭𑁄𑀲𑁂𑀢𑀼𑀓𑀸𑀫𑀢𑀸𑀬. 𑀢𑀢𑁆𑀭𑁂𑀯𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 ¶ 𑁋 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑀲𑁆𑀲 𑀲𑀤𑁆𑀥𑀸𑀓𑀣𑀸 𑀤𑀼𑀓𑁆𑀓𑀣𑀸 𑀳𑁄𑀢𑀺 𑀤𑀼𑀲𑁆𑀲𑀻𑀮𑀸𑀤𑀻𑀦𑀁 𑀲𑀻𑀮𑀸𑀤𑀺𑀓𑀣𑀸 𑀯𑀺𑀬, 𑀢𑀲𑁆𑀫𑀸 𑀢𑁂𑀲𑀁 𑀬𑀓𑁆𑀔𑀸𑀦𑀁 𑀲𑀦𑁆𑀢𑀺𑀓𑀸 𑀪𑀕𑀯𑀢𑁄 𑀧𑀲𑀁𑀲𑀁 𑀲𑀼𑀢𑁆𑀯𑀸 𑀏𑀯 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀅𑀩𑁆𑀪𑀦𑁆𑀢𑀭𑀓𑁄𑀧𑁂𑀦 𑀢𑀝𑀢𑀝𑀸𑀬𑀫𑀸𑀦𑀳𑀤𑀬𑁄 𑀳𑀼𑀢𑁆𑀯𑀸 ‘‘𑀓𑁄 𑀲𑁄 𑀪𑀕𑀯𑀸 𑀦𑀸𑀫, 𑀬𑁄 𑀫𑀫 𑀪𑀯𑀦𑀁 𑀧𑀯𑀺𑀝𑁆𑀞𑁄’’𑀢𑀺 𑀆𑀳. 𑀢𑁂 𑀆𑀳𑀁𑀲𑀼 𑁋 ‘‘𑀦 𑀢𑁆𑀯𑀁, 𑀆𑀯𑀼𑀲𑁄, 𑀚𑀸𑀦𑀸𑀲𑀺 𑀪𑀕𑀯𑀦𑁆𑀢𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁, 𑀬𑁄 𑀢𑀼𑀲𑀺𑀢𑀪𑀯𑀦𑁂 𑀞𑀺𑀢𑁄 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀓𑀣𑁂𑀦𑁆𑀢𑀸 𑀧𑀝𑀺𑀲𑀦𑁆𑀥𑀺𑀆𑀤𑀺𑀦𑀸 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀯𑀢𑁆𑀯𑀸 ‘‘𑀇𑀫𑀸𑀦𑀺𑀧𑀺 𑀢𑁆𑀯𑀁, 𑀆𑀯𑀼𑀲𑁄 ¶ , 𑀅𑀘𑁆𑀙𑀭𑀺𑀬𑀸𑀦𑀺 𑀦𑀸𑀤𑁆𑀤𑀲𑀸’’𑀢𑀺 𑀘𑁄𑀤𑁂𑀲𑀼𑀁. 𑀲𑁄 𑀤𑀺𑀲𑁆𑀯𑀸𑀧𑀺 𑀓𑁄𑀥𑀯𑀲𑁂𑀦 ‘‘𑀦𑀸𑀤𑁆𑀤𑀲’’𑀦𑁆𑀢𑀺 𑀆𑀳. 𑀆𑀯𑀼𑀲𑁄 𑀆𑀴𑀯𑀓 𑀧𑀲𑁆𑀲𑁂𑀬𑁆𑀬𑀸𑀲𑀺 𑀯𑀸 𑀢𑁆𑀯𑀁, 𑀦 𑀯𑀸, 𑀓𑁄 𑀢𑀬𑀸 𑀅𑀢𑁆𑀣𑁄 𑀧𑀲𑁆𑀲𑀢𑀸 𑀯𑀸 𑀅𑀧𑀲𑁆𑀲𑀢𑀸 𑀯𑀸, 𑀓𑀺𑀁 𑀢𑁆𑀯𑀁 𑀓𑀭𑀺𑀲𑁆𑀲𑀲𑀺 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄, 𑀬𑁄 𑀢𑁆𑀯𑀁 𑀢𑀁 𑀉𑀧𑀦𑀺𑀥𑀸𑀬 𑀘𑀮𑀓𑁆𑀓𑀓𑀼𑀥𑀫𑀳𑀸𑀉𑀲𑀪𑀲𑀫𑀻𑀧𑁂 𑀢𑀤𑀳𑀼𑀚𑀸𑀢𑀯𑀘𑁆𑀙𑀓𑁄 𑀯𑀺𑀬, 𑀢𑀺𑀥𑀸𑀧𑀪𑀺𑀦𑁆𑀦𑀫𑀢𑁆𑀢𑀯𑀸𑀭𑀡𑀲𑀫𑀻𑀧𑁂 𑀪𑀺𑀗𑁆𑀓𑀧𑁄𑀢𑀓𑁄 𑀯𑀺𑀬, 𑀪𑀸𑀲𑀼𑀭𑀯𑀺𑀮𑀫𑁆𑀩𑀓𑁂𑀲𑀭𑀉𑀧𑀲𑁄𑀪𑀺𑀢𑀓𑁆𑀔𑀦𑁆𑀥𑀲𑁆𑀲 𑀫𑀺𑀕𑀭𑀜𑁆𑀜𑁄 𑀲𑀫𑀻𑀧𑁂 𑀚𑀭𑀲𑀺𑀗𑁆𑀕𑀸𑀮𑁄 𑀯𑀺𑀬, 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑁆𑀧𑀯𑀟𑁆𑀠𑀓𑀸𑀬𑀲𑀼𑀧𑀡𑁆𑀡𑀭𑀸𑀚𑀲𑀫𑀻𑀧𑁂 𑀙𑀺𑀦𑁆𑀦𑀧𑀓𑁆𑀔𑀓𑀸𑀓𑀧𑁄𑀢𑀓𑁄 𑀯𑀺𑀬 𑀔𑀸𑀬𑀲𑀺, 𑀕𑀘𑁆𑀙 𑀬𑀁 𑀢𑁂 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀼𑀤𑁆𑀥𑁄 𑀆𑀴𑀯𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀯𑀸𑀫𑀧𑀸𑀤𑁂𑀦 𑀞𑀢𑁆𑀯𑀸 ‘‘𑀧𑀲𑁆𑀲𑀣 𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀯𑀸 𑀲𑀢𑁆𑀣𑀸 𑀫𑀳𑀸𑀦𑀼𑀪𑀸𑀯𑁄, 𑀅𑀳𑀁 𑀯𑀸’’𑀢𑀺 𑀤𑀓𑁆𑀔𑀺𑀡𑀧𑀸𑀤𑁂𑀦 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑀁 𑀓𑁂𑀮𑀸𑀲𑀧𑀩𑁆𑀩𑀢𑀓𑀽𑀝𑀁 𑀅𑀓𑁆𑀓𑀫𑀺, 𑀢𑀁 𑀅𑀬𑁄𑀓𑀽𑀝𑀧𑀳𑀝𑁄 𑀦𑀺𑀤𑁆𑀥𑀦𑁆𑀢𑀅𑀬𑁄𑀧𑀺𑀡𑁆𑀟𑁄 𑀯𑀺𑀬 𑀧𑀧𑀝𑀺𑀓𑀸𑀬𑁄 𑀫𑀼𑀜𑁆𑀘𑀺. 𑀲𑁄 𑀢𑀢𑁆𑀭 𑀞𑀢𑁆𑀯𑀸 ‘‘𑀅𑀳𑀁 𑀆𑀴𑀯𑀓𑁄’’𑀢𑀺 𑀖𑁄𑀲𑁂𑀲𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀤𑁆𑀤𑁄 𑀨𑀭𑀺.

𑀘𑀢𑁆𑀢𑀸𑀭𑁄 ¶ 𑀓𑀺𑀭 𑀲𑀤𑁆𑀤𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀼𑀬𑁆𑀬𑀺𑀁𑀲𑀼 𑁋 𑀬𑀜𑁆𑀘 𑀧𑀼𑀡𑁆𑀡𑀓𑁄 𑀬𑀓𑁆𑀔𑀲𑁂𑀦𑀸𑀧𑀢𑀺 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀭𑀸𑀚𑀸𑀦𑀁 𑀚𑀽𑀢𑁂 𑀚𑀺𑀦𑀺𑀢𑁆𑀯𑀸 𑀅𑀧𑁆𑀨𑁄𑀝𑁂𑀢𑁆𑀯𑀸 ‘‘𑀅𑀳𑀁 𑀚𑀺𑀦𑀺’’𑀦𑁆𑀢𑀺 𑀉𑀕𑁆𑀖𑁄𑀲𑁂𑀲𑀺, 𑀬𑀜𑁆𑀘 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑀺𑀲𑁆𑀲𑀓𑀫𑁆𑀫𑀁 𑀤𑁂𑀯𑀧𑀼𑀢𑁆𑀢𑀁 𑀲𑀼𑀦𑀔𑀁 𑀓𑀸𑀭𑁂𑀢𑁆𑀯𑀸 ‘‘𑀅𑀳𑀁 𑀧𑀸𑀧𑀪𑀺𑀓𑁆𑀔𑀽 𑀘 𑀧𑀸𑀧𑀪𑀺𑀓𑁆𑀔𑀼𑀦𑀺𑀬𑁄 𑀘 𑀉𑀧𑀸𑀲𑀓𑁂 𑀘 𑀉𑀧𑀸𑀲𑀺𑀓𑀸𑀬𑁄 𑀘 𑀲𑀩𑁆𑀩𑁂𑀯 𑀅𑀥𑀫𑁆𑀫𑀯𑀸𑀤𑀺𑀦𑁄 𑀔𑀸𑀤𑀸𑀫𑀻’’𑀢𑀺 𑀉𑀕𑁆𑀖𑁄𑀲𑀸𑀧𑁂𑀲𑀺, 𑀬𑀜𑁆𑀘 𑀓𑀼𑀲𑀚𑀸𑀢𑀓𑁂 𑀧𑀪𑀸𑀯𑀢𑀺𑀳𑁂𑀢𑀼 𑀲𑀢𑁆𑀢𑀳𑀺 𑀭𑀸𑀚𑀽𑀳𑀺 𑀦𑀕𑀭𑁂 𑀉𑀧𑀭𑀼𑀤𑁆𑀥𑁂 𑀧𑀪𑀸𑀯𑀢𑀺𑀁 𑀅𑀢𑁆𑀢𑀦𑀸 𑀲𑀳 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 ‘‘𑀅𑀳𑀁 𑀲𑀻𑀳𑀲𑁆𑀲𑀭𑀓𑀼𑀲𑀫𑀳𑀸𑀭𑀸𑀚𑀸’’𑀢𑀺 𑀫𑀳𑀸𑀧𑀼𑀭𑀺𑀲𑁄 𑀉𑀕𑁆𑀖𑁄𑀲𑁂𑀲𑀺, 𑀬𑀜𑁆𑀘 𑀆𑀴𑀯𑀓𑁄 𑀓𑁂𑀮𑀸𑀲𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 ‘‘𑀅𑀳𑀁 𑀆𑀴𑀯𑀓𑁄’’𑀢𑀺. 𑀢𑀤𑀸 𑀳𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁆𑀯𑀸𑀭𑁂 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀉𑀕𑁆𑀖𑁄𑀲𑀺𑀢𑀲𑀤𑀺𑀲𑀁 𑀅𑀳𑁄𑀲𑀺, 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁄 ¶ 𑀘 𑀳𑀺𑀫𑀯𑀸𑀧𑀺 𑀲𑀗𑁆𑀓𑀫𑁆𑀧𑀺 𑀬𑀓𑁆𑀔𑀲𑁆𑀲 𑀆𑀦𑀼𑀪𑀸𑀯𑁂𑀦.

𑀲𑁄 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋 ‘‘𑀏𑀢𑁂𑀦𑁂𑀯 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑁂 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀯𑀦𑀕𑀘𑁆𑀙𑀭𑀼𑀓𑁆𑀔𑀸𑀤𑀻𑀦𑀺 𑀉𑀫𑁆𑀫𑀽𑀮𑁂𑀢𑁆𑀯𑀸 𑀆𑀴𑀯𑀻𑀦𑀕𑀭𑀁 𑀧𑀓𑁆𑀔𑀦𑁆𑀢𑀸 𑀚𑀺𑀡𑁆𑀡𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀺 𑀘𑀼𑀡𑁆𑀡𑁂𑀦𑁆𑀢𑀸 𑀙𑀤𑀦𑀺𑀝𑁆𑀞𑀓𑀸 ¶ 𑀆𑀓𑀸𑀲𑁂 𑀪𑀫𑁂𑀦𑁆𑀢𑀸. 𑀪𑀕𑀯𑀸 ‘‘𑀫𑀸 𑀓𑀲𑁆𑀲𑀘𑀺 𑀉𑀧𑀭𑁄𑀥𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑁂 𑀯𑀸𑀢𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑀫𑀳𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀫𑀡𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀸𑀤𑀺𑀪𑁂𑀤𑀸 𑀯𑀮𑀸𑀳𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀺𑀁𑀲𑀼, 𑀯𑀼𑀝𑁆𑀞𑀺𑀥𑀸𑀭𑀸𑀯𑁂𑀕𑁂𑀦 𑀧𑀣𑀯𑀻 𑀙𑀺𑀤𑁆𑀤𑀸 𑀅𑀳𑁄𑀲𑀺, 𑀯𑀦𑀭𑀼𑀓𑁆𑀔𑀸𑀤𑀻𑀦𑀁 𑀉𑀧𑀭𑀺 𑀫𑀳𑁄𑀖𑁄 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀘𑀻𑀯𑀭𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀧𑀸𑀲𑀸𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀫𑀳𑀦𑁆𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀥𑀽𑀫𑀸𑀬𑀦𑁆𑀢𑀸𑀦𑀺 𑀧𑀚𑁆𑀚𑀮𑀦𑁆𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀤𑀺𑀩𑁆𑀩𑀫𑀸𑀮𑀸𑀕𑀼𑀴𑀸𑀦𑀺 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀳𑀭𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀏𑀓𑀢𑁄𑀥𑀸𑀭𑀸𑀉𑀪𑀢𑁄𑀥𑀸𑀭𑀸 𑀅𑀲𑀺𑀲𑀢𑁆𑀢𑀺𑀔𑀼𑀭𑀧𑁆𑀧𑀸𑀤𑀬𑁄 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀅𑀗𑁆𑀕𑀸𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀓𑀺𑀁𑀲𑀼𑀓𑀯𑀡𑁆𑀡𑀸 𑀅𑀗𑁆𑀕𑀸𑀭𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀯𑀺𑀓𑀺𑀭𑀺𑀁𑀲𑀼. 𑀢𑀢𑁄 𑀓𑀼𑀓𑁆𑀓𑀼𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀅𑀘𑁆𑀘𑀼𑀡𑁆𑀳𑁄 𑀓𑀼𑀓𑁆𑀓𑀼𑀮𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀘𑀦𑁆𑀤𑀦𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 𑀯𑀸𑀮𑀼𑀓𑀸𑀯𑀲𑁆𑀲𑀁 ¶ 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀅𑀢𑀺𑀲𑀼𑀔𑀼𑀫𑀸 𑀯𑀸𑀮𑀼𑀓𑀸 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀓𑀮𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀢𑀁 𑀓𑀮𑀮𑀯𑀲𑁆𑀲𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀕𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 𑀅𑀦𑁆𑀥𑀓𑀸𑀭𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀪𑀺𑀁𑀲𑁂𑀢𑁆𑀯𑀸 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀥𑀓𑀸𑀭𑀲𑀤𑀺𑀲𑀁 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀯𑀺𑀳𑀢𑀫𑀺𑀯𑀦𑁆𑀥𑀓𑀸𑀭𑀁 𑀅𑀦𑁆𑀢𑀭𑀥𑀸𑀬𑀺.

𑀏𑀯𑀁 𑀬𑀓𑁆𑀔𑁄 𑀇𑀫𑀸𑀳𑀺 𑀦𑀯𑀳𑀺 𑀯𑀸𑀢𑀯𑀲𑁆𑀲𑀧𑀸𑀲𑀸𑀡𑀧𑀳𑀭𑀡𑀗𑁆𑀕𑀸𑀭𑀓𑀼𑀓𑁆𑀓𑀼𑀮𑀯𑀸𑀮𑀼𑀓𑀓𑀮𑀮𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 ¶ 𑀪𑀕𑀯𑀦𑁆𑀢𑀁 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀸𑀦𑀸𑀯𑀺𑀥𑀧𑀳𑀭𑀡𑀳𑀢𑁆𑀣𑀸𑀬 𑀅𑀦𑁂𑀓𑀧𑁆𑀧𑀓𑀸𑀭𑀭𑀽𑀧𑀪𑀽𑀢𑀕𑀡𑀲𑀫𑀸𑀓𑀼𑀮𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀬𑀫𑁂𑀯 𑀪𑀕𑀯𑀦𑁆𑀢𑀁 𑀅𑀪𑀺𑀕𑀢𑁄. 𑀢𑁂 𑀪𑀽𑀢𑀕𑀡𑀸 𑀅𑀦𑁂𑀓𑀧𑁆𑀧𑀓𑀸𑀭𑁂 𑀯𑀺𑀓𑀸𑀭𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀳𑀦𑀣𑀸’’𑀢𑀺 𑀪𑀕𑀯𑀢𑁄 𑀉𑀧𑀭𑀺 𑀆𑀕𑀘𑁆𑀙𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀅𑀧𑀺𑀘 𑀢𑁂 𑀦𑀺𑀤𑁆𑀥𑀦𑁆𑀢𑀮𑁄𑀳𑀧𑀺𑀡𑁆𑀟𑀁 𑀯𑀺𑀬 𑀫𑀓𑁆𑀔𑀺𑀓𑀸, 𑀪𑀕𑀯𑀦𑁆𑀢𑀁 𑀅𑀮𑁆𑀮𑀻𑀬𑀺𑀢𑀼𑀁 𑀅𑀲𑀫𑀢𑁆𑀣𑀸 𑀏𑀯𑀁 𑀅𑀳𑁂𑀲𑀼𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸 𑀩𑁄𑀥𑀺𑀫𑀡𑁆𑀟𑁂 𑀫𑀸𑀭𑁄 𑀆𑀕𑀢𑀯𑁂𑀮𑀸𑀬𑀫𑁂𑀯 𑀦𑀺𑀯𑀢𑁆𑀢𑁄, 𑀢𑀣𑀸 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀧𑀟𑁆𑀠𑀭𑀢𑁆𑀢𑀺𑀫𑀢𑁆𑀢𑀁 𑀩𑁆𑀬𑀸𑀓𑀼𑀮𑀫𑀓𑀁𑀲𑀼. 𑀏𑀯𑀁 𑀉𑀧𑀟𑁆𑀠𑀭𑀢𑁆𑀢𑀺𑀫𑀢𑁆𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀯𑀺𑀪𑀺𑀁𑀲𑀦𑀤𑀲𑁆𑀲𑀦𑁂𑀦𑀧𑀺 𑀪𑀕𑀯𑀦𑁆𑀢𑀁 𑀘𑀸𑀮𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀆𑀴𑀯𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀓𑁂𑀦𑀘𑀺 𑀅𑀚𑁂𑀬𑁆𑀬𑀁 𑀤𑀼𑀲𑁆𑀲𑀸𑀯𑀼𑀥𑀁 𑀫𑀼𑀜𑁆𑀘𑁂𑀬𑁆𑀬’’𑀦𑁆𑀢𑀺.

𑀘𑀢𑁆𑀢𑀸𑀭𑀺 𑀓𑀺𑀭 𑀆𑀯𑀼𑀥𑀸𑀦𑀺 𑀮𑁄𑀓𑁂 𑀲𑁂𑀝𑁆𑀞𑀸𑀦𑀺 𑁋 𑀲𑀓𑁆𑀓𑀲𑁆𑀲 𑀯𑀚𑀺𑀭𑀸𑀯𑀼𑀥𑀁, 𑀯𑁂𑀲𑁆𑀲𑀯𑀡𑀲𑁆𑀲 𑀕𑀤𑀸𑀯𑀼𑀥𑀁, 𑀬𑀫𑀲𑁆𑀲 𑀦𑀬𑀦𑀸𑀯𑀼𑀥𑀁, 𑀆𑀴𑀯𑀓𑀲𑁆𑀲 𑀤𑀼𑀲𑁆𑀲𑀸𑀯𑀼𑀥𑀦𑁆𑀢𑀺. 𑀬𑀤𑀺 𑀳𑀺 𑀲𑀓𑁆𑀓𑁄 𑀓𑀼𑀤𑁆𑀥𑁄 𑀯𑀚𑀺𑀭𑀸𑀯𑀼𑀥𑀁 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀧𑀳𑀭𑁂𑀬𑁆𑀬 𑀅𑀝𑁆𑀞𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀬𑁄𑀚𑀦𑀲𑀢𑀲𑀳𑀲𑁆𑀲𑀁 𑀲𑀺𑀦𑁂𑀭𑀼𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀳𑁂𑀝𑁆𑀞𑀢𑁄 𑀕𑀘𑁆𑀙𑁂𑀬𑁆𑀬 ¶ . 𑀯𑁂𑀲𑁆𑀲𑀯𑀡𑀲𑁆𑀲 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀯𑀺𑀲𑁆𑀲𑀚𑁆𑀚𑀺𑀢𑀕𑀤𑀸 𑀩𑀳𑀽𑀦𑀁 𑀬𑀓𑁆𑀔𑀲𑀳𑀲𑁆𑀲𑀸𑀦𑀁 𑀲𑀻𑀲𑀁 𑀧𑀸𑀢𑁂𑀢𑁆𑀯𑀸 𑀧𑀼𑀦 𑀳𑀢𑁆𑀣𑀧𑀸𑀲𑀁 𑀆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑀫𑁂𑀦 𑀓𑀼𑀤𑁆𑀥𑁂𑀦 𑀦𑀬𑀦𑀸𑀯𑀼𑀥𑁂𑀦 𑀑𑀮𑁄𑀓𑀺𑀢𑀫𑀢𑁆𑀢𑁂 𑀅𑀦𑁂𑀓𑀸𑀦𑀺 𑀓𑀼𑀫𑁆𑀪𑀡𑁆𑀟𑀲𑀳𑀲𑁆𑀲𑀸𑀦𑀺 𑀢𑀢𑁆𑀢𑀓𑀧𑀸𑀮𑁂 𑀢𑀺𑀮𑀸 𑀯𑀺𑀬 𑀯𑀺𑀧𑁆𑀨𑀼𑀭𑀦𑁆𑀢𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀺. 𑀆𑀴𑀯𑀓𑁄 𑀓𑀼𑀤𑁆𑀥𑁄 𑀲𑀘𑁂 𑀆𑀓𑀸𑀲𑁂 𑀤𑀼𑀲𑁆𑀲𑀸𑀯𑀼𑀥𑀁 𑀫𑀼𑀜𑁆𑀘𑁂𑀬𑁆𑀬, 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑁂𑀬𑁆𑀬. 𑀲𑀘𑁂 𑀧𑀣𑀯𑀺𑀬𑀁 𑀫𑀼𑀜𑁆𑀘𑁂𑀬𑁆𑀬, 𑀲𑀩𑁆𑀩𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀺 𑀲𑀼𑀲𑁆𑀲𑀺𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀦𑁆𑀢𑀭𑀁 𑀦 𑀧𑀼𑀦 𑀭𑀼𑀳𑁂𑀬𑁆𑀬𑀼𑀁. 𑀲𑀘𑁂 𑀲𑀫𑀼𑀤𑁆𑀤𑁂 𑀫𑀼𑀜𑁆𑀘𑁂𑀬𑁆𑀬, 𑀢𑀢𑁆𑀢𑀓𑀧𑀸𑀮𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀫𑀼𑀤𑀓𑀁 𑀲𑀼𑀲𑁆𑀲𑁂𑀬𑁆𑀬. 𑀲𑀘𑁂 𑀲𑀺𑀦𑁂𑀭𑀼𑀲𑀤𑀺𑀲𑁂𑀧𑀺 𑀧𑀩𑁆𑀩𑀢𑁂 𑀫𑀼𑀜𑁆𑀘𑁂𑀬𑁆𑀬, 𑀔𑀡𑁆𑀟𑀸𑀔𑀡𑁆𑀟𑀁 𑀳𑀼𑀢𑁆𑀯𑀸 𑀯𑀺𑀓𑀺𑀭𑁂𑀬𑁆𑀬. 𑀲𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑀁 𑀤𑀼𑀲𑁆𑀲𑀸𑀯𑀼𑀥𑀁 𑀉𑀢𑁆𑀢𑀭𑀻𑀬𑀓𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀳𑁂𑀲𑀺 ¶ ¶ . 𑀬𑁂𑀪𑀼𑀬𑁆𑀬𑁂𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸 𑀯𑁂𑀕𑁂𑀦 𑀲𑀦𑁆𑀦𑀺𑀧𑀢𑀺𑀁𑀲𑀼 𑁋 ‘‘𑀅𑀚𑁆𑀚 𑀪𑀕𑀯𑀸 𑀆𑀴𑀯𑀓𑀁 𑀤𑀫𑁂𑀲𑁆𑀲𑀢𑀺, 𑀢𑀢𑁆𑀣 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺. 𑀬𑀼𑀤𑁆𑀥𑀤𑀲𑁆𑀲𑀦𑀓𑀸𑀫𑀸𑀧𑀺 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀏𑀯𑀁 𑀲𑀓𑀮𑀫𑁆𑀧𑀺 𑀆𑀓𑀸𑀲𑀁 𑀤𑁂𑀯𑀢𑀸𑀳𑀺 𑀧𑀼𑀭𑀺𑀧𑀼𑀡𑁆𑀡𑀫𑀳𑁄𑀲𑀺.

𑀅𑀣 𑀆𑀴𑀯𑀓𑁄 𑀪𑀕𑀯𑀢𑁄 𑀲𑀫𑀻𑀧𑁂 𑀉𑀧𑀭𑀽𑀧𑀭𑀺 𑀯𑀺𑀘𑀭𑀺𑀢𑁆𑀯𑀸 𑀯𑀢𑁆𑀣𑀸𑀯𑀼𑀥𑀁 𑀫𑀼𑀜𑁆𑀘𑀺. 𑀢𑀁 𑀅𑀲𑀦𑀺𑀯𑀺𑀘𑀓𑁆𑀓𑀁 𑀯𑀺𑀬 𑀆𑀓𑀸𑀲𑁂 𑀪𑁂𑀭𑀯𑀲𑀤𑁆𑀤𑀁 𑀓𑀭𑁄𑀦𑁆𑀢𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀪𑀕𑀯𑀦𑁆𑀢𑀁 𑀧𑀢𑁆𑀯𑀸 𑀬𑀓𑁆𑀔𑀲𑁆𑀲 𑀫𑀸𑀦𑀫𑀤𑁆𑀤𑀦𑀢𑁆𑀣𑀁 𑀧𑀸𑀤𑀫𑀼𑀜𑁆𑀙𑀦𑀘𑁄𑀴𑀓𑀁 𑀳𑀼𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺. 𑀆𑀴𑀯𑀓𑁄 𑀢𑀁 𑀤𑀺𑀲𑁆𑀯𑀸 𑀙𑀺𑀦𑁆𑀦𑀯𑀺𑀲𑀸𑀡𑁄 𑀯𑀺𑀬 𑀉𑀲𑀪𑁄, 𑀉𑀤𑁆𑀥𑀝𑀤𑀸𑀞𑁄 𑀯𑀺𑀬 𑀲𑀧𑁆𑀧𑁄, 𑀦𑀺𑀢𑁆𑀢𑁂𑀚𑁄 𑀦𑀺𑀫𑁆𑀫𑀤𑁄 𑀦𑀺𑀧𑀢𑀺𑀢𑀫𑀸𑀦𑀤𑁆𑀥𑀚𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑀼𑀲𑁆𑀲𑀸𑀯𑀼𑀥𑀫𑁆𑀧𑀺 𑀲𑀫𑀡𑀁 𑀦𑀪𑀺𑀪𑁄𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? 𑀇𑀤𑀁 𑀓𑀸𑀭𑀡𑀁, 𑀫𑁂𑀢𑁆𑀢𑀸𑀯𑀺𑀳𑀸𑀭𑀬𑀼𑀢𑁆𑀢𑁄 𑀲𑀫𑀡𑁄, 𑀳𑀦𑁆𑀤 𑀦𑀁 𑀭𑁄𑀲𑁂𑀢𑁆𑀯𑀸 𑀫𑁂𑀢𑁆𑀢𑀸𑀬 𑀯𑀺𑀬𑁄𑀚𑁂𑀫𑀻𑀢𑀺. 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸…𑀧𑁂… 𑀦𑀺𑀓𑁆𑀔𑀫 𑀲𑀫𑀡𑀸’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀓𑀲𑁆𑀫𑀸 𑀫𑀬𑀸 𑀅𑀦𑀦𑀼𑀜𑁆𑀜𑀸𑀢𑁄 𑀫𑀫 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀖𑀭𑀲𑀸𑀫𑀺𑀓𑁄 𑀯𑀺𑀬 𑀇𑀢𑁆𑀣𑀸𑀕𑀸𑀭𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀲𑀺, 𑀦𑀦𑀼 𑀅𑀬𑀼𑀢𑁆𑀢𑀫𑁂𑀢𑀁 𑀲𑀫𑀡𑀲𑁆𑀲 𑀬𑀤𑀺𑀤𑀁 𑀅𑀤𑀺𑀦𑁆𑀦𑀧𑀝𑀺𑀪𑁄𑀕𑁄 𑀇𑀢𑁆𑀣𑀺𑀲𑀁𑀲𑀕𑁆𑀕𑁄 𑀘, 𑀢𑀲𑁆𑀫𑀸 𑀬𑀤𑀺 𑀢𑁆𑀯𑀁 𑀲𑀫𑀡𑀥𑀫𑁆𑀫𑁂 𑀞𑀺𑀢𑁄, 𑀦𑀺𑀓𑁆𑀔𑀫 𑀲𑀫𑀡𑀸𑀢𑀺. 𑀏𑀓𑁂 𑀧𑀦 ‘‘𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀨𑀭𑀼𑀲𑀯𑀘𑀦𑀸𑀦𑀺 𑀯𑀢𑁆𑀯𑀸 𑀏𑀯𑀸𑀬𑀁 𑀏𑀢𑀤𑀯𑁄𑀘𑀸’’𑀢𑀺 𑀪𑀡𑀦𑁆𑀢𑀺.

𑀅𑀣 𑀪𑀕𑀯𑀸 ‘‘𑀬𑀲𑁆𑀫𑀸 𑀣𑀤𑁆𑀥𑁄 𑀧𑀝𑀺𑀣𑀤𑁆𑀥𑀪𑀸𑀯𑁂𑀦 𑀯𑀺𑀦𑁂𑀢𑀼𑀁 𑀦 𑀲𑀓𑁆𑀓𑀸, 𑀲𑁄 𑀳𑀺 𑀧𑀝𑀺𑀣𑀤𑁆𑀥𑀪𑀸𑀯𑁂 𑀓𑀭𑀺𑀬𑀫𑀸𑀦𑁂 𑀲𑁂𑀬𑁆𑀬𑀣𑀸𑀧𑀺 𑀘𑀡𑁆𑀟𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬, 𑀲𑁄 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀘𑀡𑁆𑀟𑀢𑀭𑁄 𑀅𑀲𑁆𑀲, 𑀏𑀯𑀁 𑀣𑀤𑁆𑀥𑀢𑀭𑁄 𑀳𑁄𑀢𑀺, 𑀫𑀼𑀤𑀼𑀦𑀸 𑀧𑀦 𑀲𑁄 𑀲𑀓𑁆𑀓𑀸 𑀯𑀺𑀦𑁂𑀢𑀼’’𑀦𑁆𑀢𑀺 𑀜𑀢𑁆𑀯𑀸 ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀧𑀺𑀬𑀯𑀘𑀦𑁂𑀦 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀔𑀫𑀺 ¶ . 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀥𑀸𑀯𑀼𑀲𑁄𑀢𑀺 𑀪𑀕𑀯𑀸 𑀦𑀺𑀓𑁆𑀔𑀫𑀻’’𑀢𑀺.

𑀢𑀢𑁄 𑀆𑀴𑀯𑀓𑁄 ‘‘𑀲𑀼𑀯𑀘𑁄 𑀯𑀢𑀸𑀬𑀁 𑀲𑀫𑀡𑁄 𑀏𑀓𑀯𑀘𑀦𑁂𑀦𑁂𑀯 𑀦𑀺𑀓𑁆𑀔𑀦𑁆𑀢𑁄, 𑀏𑀯𑀁 𑀦𑀸𑀫 𑀦𑀺𑀓𑁆𑀔𑀫𑁂𑀢𑀼𑀁 ¶ 𑀲𑀼𑀔𑀁 𑀲𑀫𑀡𑀁 𑀅𑀓𑀸𑀭𑀡𑁂𑀦𑁂𑀯𑀸𑀳𑀁 𑀲𑀓𑀮𑀭𑀢𑁆𑀢𑀺𑀁 𑀬𑀼𑀤𑁆𑀥𑁂𑀦 𑀅𑀩𑁆𑀪𑀼𑀬𑁆𑀬𑀸𑀲𑀺’’𑀦𑁆𑀢𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺𑀧𑀺 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀓𑀺𑀁 𑀦𑀼 𑀔𑁄 𑀲𑀼𑀯𑀘𑀢𑀸𑀬 𑀦𑀺𑀓𑁆𑀔𑀦𑁆𑀢𑁄, 𑀉𑀤𑀸𑀳𑀼 𑀓𑁄𑀥𑁂𑀦, 𑀳𑀦𑁆𑀤 𑀦𑀁 𑀯𑀻𑀫𑀁𑀲𑀸𑀫𑀻’’𑀢𑀺. 𑀢𑀢𑁄 ‘‘𑀧𑀯𑀺𑀲 𑀲𑀫𑀡𑀸’’𑀢𑀺 𑀆𑀳. 𑀅𑀣 ‘‘𑀲𑀼𑀯𑀘𑁄’’𑀢𑀺 𑀫𑀼𑀤𑀼𑀪𑀽𑀢𑀘𑀺𑀢𑁆𑀢𑀯𑀯𑀢𑁆𑀣𑀸𑀦𑀓𑀭𑀡𑀢𑁆𑀣𑀁 𑀧𑀼𑀦𑀧𑀺 𑀧𑀺𑀬𑀯𑀘𑀦𑀁 𑀯𑀤𑀦𑁆𑀢𑁄 𑀲𑀸𑀥𑀸𑀯𑀼𑀲𑁄𑀢𑀺 𑀪𑀕𑀯𑀸 𑀧𑀸𑀯𑀺𑀲𑀺. 𑀆𑀴𑀯𑀓𑁄 𑀧𑀼𑀦𑀧𑁆𑀧𑀼𑀦𑀁 𑀢𑀫𑁂𑀯 𑀲𑀼𑀯𑀘𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑁄 ¶ 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 ‘‘𑀦𑀺𑀓𑁆𑀔𑀫 𑀧𑀯𑀺𑀲𑀸’’𑀢𑀺 𑀆𑀳. 𑀪𑀕𑀯𑀸𑀧𑀺 𑀢𑀣𑀸 𑀅𑀓𑀸𑀲𑀺. 𑀬𑀤𑀺 𑀦 𑀓𑀭𑁂𑀬𑁆𑀬, 𑀧𑀓𑀢𑀺𑀬𑀸𑀧𑀺 𑀣𑀤𑁆𑀥𑀬𑀓𑁆𑀔𑀲𑁆𑀲 𑀘𑀺𑀢𑁆𑀢𑀁 𑀣𑀤𑁆𑀥𑀢𑀭𑀁 𑀳𑀼𑀢𑁆𑀯𑀸 𑀥𑀫𑁆𑀫𑀓𑀣𑀸𑀬 𑀪𑀸𑀚𑀦𑀁 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀫𑀸𑀢𑀸 𑀭𑁄𑀤𑀦𑁆𑀢𑀁 𑀧𑀼𑀢𑁆𑀢𑀓𑀁 𑀬𑀁 𑀲𑁄 𑀇𑀘𑁆𑀙𑀢𑀺, 𑀢𑀁 𑀤𑀢𑁆𑀯𑀸 𑀯𑀸 𑀓𑀢𑁆𑀯𑀸 𑀯𑀸 𑀲𑀜𑁆𑀜𑀸𑀧𑁂𑀢𑀺, 𑀢𑀣𑀸 𑀪𑀕𑀯𑀸 𑀓𑀺𑀮𑁂𑀲𑀭𑁄𑀤𑀦𑁂𑀦 𑀭𑁄𑀤𑀦𑁆𑀢𑀁 𑀬𑀓𑁆𑀔𑀁 𑀲𑀜𑁆𑀜𑀸𑀧𑁂𑀢𑀼𑀁 𑀬𑀁 𑀲𑁄 𑀪𑀡𑀢𑀺, 𑀢𑀁 𑀅𑀓𑀸𑀲𑀺. 𑀬𑀣𑀸 𑀘 𑀥𑀸𑀢𑀻 𑀣𑀜𑁆𑀜𑀁 𑀅𑀧𑀺𑀯𑀦𑁆𑀢𑀁 𑀤𑀸𑀭𑀓𑀁 𑀓𑀺𑀜𑁆𑀘𑀺 𑀤𑀢𑁆𑀯𑀸 𑀉𑀧𑀮𑀸𑀴𑁂𑀢𑁆𑀯𑀸 𑀧𑀸𑀬𑁂𑀢𑀺, 𑀢𑀣𑀸 𑀪𑀕𑀯𑀸 𑀬𑀓𑁆𑀔𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀔𑀻𑀭𑀁 𑀧𑀸𑀬𑁂𑀢𑀼𑀁 𑀢𑀲𑁆𑀲 𑀧𑀢𑁆𑀣𑀺𑀢𑀯𑀘𑀦𑀓𑀭𑀡𑁂𑀦 𑀉𑀧𑀮𑀸𑀴𑁂𑀦𑁆𑀢𑁄 𑀏𑀯𑀫𑀓𑀸𑀲𑀺. 𑀬𑀣𑀸 𑀘 𑀧𑀼𑀭𑀺𑀲𑁄 𑀮𑀸𑀩𑀼𑀫𑁆𑀳𑀺 𑀘𑀢𑀼𑀫𑀥𑀼𑀭𑀁 𑀧𑀽𑀭𑁂𑀢𑀼𑀓𑀸𑀫𑁄 𑀢𑀲𑁆𑀲𑀩𑁆𑀪𑀦𑁆𑀢𑀭𑀁 𑀲𑁄𑀥𑁂𑀢𑀺, 𑀏𑀯𑀁 𑀪𑀕𑀯𑀸 𑀬𑀓𑁆𑀔𑀲𑁆𑀲 𑀘𑀺𑀢𑁆𑀢𑁂 𑀮𑁄𑀓𑀼𑀢𑁆𑀢𑀭𑀘𑀢𑀼𑀫𑀥𑀼𑀭𑀁 𑀧𑀽𑀭𑁂𑀢𑀼𑀓𑀸𑀫𑁄 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑁄𑀥𑀫𑀮𑀁 𑀲𑁄𑀥𑁂𑀢𑀼𑀁 𑀬𑀸𑀯 𑀢𑀢𑀺𑀬𑀁 𑀦𑀺𑀓𑁆𑀔𑀫𑀦𑀧𑀯𑁂𑀲𑀦𑀁 𑀅𑀓𑀸𑀲𑀺.

𑀅𑀣 𑀆𑀴𑀯𑀓𑁄 ‘‘𑀲𑀼𑀯𑀘𑁄 𑀅𑀬𑀁 𑀲𑀫𑀡𑁄, ‘𑀦𑀺𑀓𑁆𑀔𑀫𑀸’𑀢𑀺 𑀯𑀼𑀢𑁆𑀢𑁄 𑀦𑀺𑀓𑁆𑀔𑀫𑀢𑀺, ‘𑀧𑀯𑀺𑀲𑀸’𑀢𑀺 𑀯𑀼𑀢𑁆𑀢𑁄 𑀧𑀯𑀺𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀫𑀡𑀁 𑀏𑀯𑀫𑁂𑀯𑀁 𑀲𑀓𑀮𑀭𑀢𑁆𑀢𑀺𑀁 𑀓𑀺𑀮𑀫𑁂𑀢𑁆𑀯𑀸, 𑀧𑀸𑀤𑁂 𑀕𑀳𑁂𑀢𑁆𑀯𑀸, 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑁂𑀬𑁆𑀬’’𑀦𑁆𑀢𑀺 𑀧𑀸𑀧𑀓𑀁 𑀘𑀺𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑀁 𑀆𑀳 𑁋 ‘‘𑀦𑀺𑀓𑁆𑀔𑀫 𑀲𑀫𑀡𑀸’’𑀢𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 ‘‘𑀦 𑀔𑁆𑀯𑀸𑀳𑀁 𑀢’’𑀦𑁆𑀢𑀺 𑀆𑀳. ‘‘𑀏𑀯𑀁 𑀯𑀼𑀢𑁆𑀢𑁂 𑀢𑀤𑀼𑀢𑁆𑀢𑀭𑀺𑀁 𑀓𑀭𑀡𑀻𑀬𑀁 𑀧𑀭𑀺𑀬𑁂𑀲𑀫𑀸𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀺, 𑀢𑀁 𑀥𑀫𑁆𑀫𑀓𑀣𑀸𑀬 𑀫𑀼𑀔𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ¶ ‘‘𑀦 𑀔𑁆𑀯𑀸𑀳𑀁 𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀦𑀇𑀢𑀺 𑀧𑀝𑀺𑀓𑁆𑀔𑁂𑀧𑁂, 𑀔𑁄𑀇𑀢𑀺 𑀅𑀯𑀥𑀸𑀭𑀡𑁂. 𑀅𑀳𑀦𑁆𑀢𑀺 𑀅𑀢𑁆𑀢𑀦𑀺𑀤𑀲𑁆𑀲𑀦𑀁, 𑀦𑁆𑀢𑀺 𑀳𑁂𑀢𑀼𑀯𑀘𑀦𑀁. 𑀢𑁂𑀦𑁂𑀢𑁆𑀣 ‘‘𑀬𑀲𑁆𑀫𑀸 𑀢𑁆𑀯𑀁 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀢𑀲𑁆𑀫𑀸 𑀅𑀳𑀁 𑀆𑀯𑀼𑀲𑁄 𑀦𑁂𑀯 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀬𑀁 𑀢𑁂 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻’’𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀢𑁄 𑀆𑀴𑀯𑀓𑁄 𑀬𑀲𑁆𑀫𑀸 𑀧𑀼𑀩𑁆𑀩𑁂𑀧𑀺 𑀆𑀓𑀸𑀲𑁂𑀦𑀸𑀕𑀫𑀦𑀯𑁂𑀮𑀸𑀬𑀁 ‘‘𑀓𑀺𑀁 𑀦𑀼 𑀔𑁄, 𑀏𑀢𑀁 𑀲𑀼𑀯𑀡𑁆𑀡𑀯𑀺𑀫𑀸𑀦𑀁, 𑀉𑀤𑀸𑀳𑀼 𑀭𑀚𑀢𑀫𑀡𑀺𑀯𑀺𑀫𑀸𑀦𑀸𑀦𑀁 𑀅𑀜𑁆𑀜𑀢𑀭𑀁, 𑀳𑀦𑁆𑀤 𑀦𑀁 𑀧𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀆𑀕𑀢𑁂 𑀇𑀤𑁆𑀥𑀺𑀫𑀦𑁆𑀢𑁂 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁂 𑀘𑀺𑀢𑁆𑀢𑀓𑁆𑀔𑁂𑀧𑀸𑀤𑀻𑀳𑀺 𑀯𑀺𑀳𑁂𑀞𑁂𑀢𑀺. 𑀓𑀣𑀁? 𑀅𑀫𑀦𑀼𑀲𑁆𑀲𑀸 𑀳𑀺 𑀪𑀺𑀁𑀲𑀦𑀓𑀭𑀽𑀧𑀤𑀲𑁆𑀲𑀦𑁂𑀦 𑀯𑀸 𑀳𑀤𑀬𑀯𑀢𑁆𑀣𑀼𑀧𑀭𑀺𑀫𑀤𑁆𑀤𑀦𑁂𑀦 𑀯𑀸𑀢𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀺. 𑀅𑀬𑀁 𑀧𑀦 𑀬𑀲𑁆𑀫𑀸 ‘‘𑀇𑀤𑁆𑀥𑀺𑀫𑀦𑁆𑀢𑁄 𑀪𑀺𑀁𑀲𑀦𑀓𑀭𑀽𑀧𑀤𑀲𑁆𑀲𑀦𑁂𑀦 𑀦 𑀢𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀺𑀧𑁆𑀧𑀪𑀸𑀯𑁂𑀦 𑀲𑀼𑀔𑀼𑀫𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸, 𑀢𑁂𑀲𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀳𑀤𑀬𑀯𑀢𑁆𑀣𑀼𑀁 𑀧𑀭𑀺𑀫𑀤𑁆𑀤𑀢𑀺, 𑀢𑀢𑁄 𑀘𑀺𑀢𑁆𑀢𑀲𑀦𑁆𑀢𑀢𑀺 𑀦 𑀲𑀡𑁆𑀞𑀸𑀢𑀺, 𑀢𑀲𑁆𑀲𑀸 𑀅𑀲𑀡𑁆𑀞𑀫𑀸𑀦𑀸𑀬 ¶ 𑀉𑀫𑁆𑀫𑀢𑁆𑀢𑀓𑀸 𑀳𑁄𑀦𑁆𑀢𑀺 ¶ 𑀔𑀺𑀢𑁆𑀢𑀘𑀺𑀢𑁆𑀢𑀸. 𑀏𑀯𑀁 𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀏𑀢𑁂𑀲𑀁 𑀉𑀭𑀫𑁆𑀧𑀺 𑀨𑀸𑀮𑁂𑀢𑀺, 𑀧𑀸𑀤𑁂𑀧𑀺 𑀦𑁂 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑀢𑀺 ‘‘𑀫𑀸𑀲𑁆𑀲𑀼 𑀫𑁂 𑀧𑀼𑀦 𑀏𑀯𑀭𑀽𑀧𑀸 𑀪𑀯𑀦𑀫𑀸𑀕𑀫𑀺𑀁𑀲𑀽’’𑀢𑀺, 𑀢𑀲𑁆𑀫𑀸 𑀢𑁂 𑀧𑀜𑁆𑀳𑁂 𑀲𑀭𑀺𑀢𑁆𑀯𑀸 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀫𑀡𑀁 𑀇𑀤𑀸𑀦𑀺 𑀏𑀯𑀁 𑀯𑀺𑀳𑁂𑀞𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 ‘‘𑀧𑀜𑁆𑀳𑀁 𑀢𑀁 𑀲𑀫𑀡𑀸’’𑀢𑀺𑀆𑀤𑀺.

𑀓𑀼𑀢𑁄 𑀧𑀦𑀲𑁆𑀲 𑀢𑁂 𑀧𑀜𑁆𑀳𑀸𑀢𑀺? 𑀢𑀲𑁆𑀲 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀅𑀝𑁆𑀞 𑀧𑀜𑁆𑀳𑁂 𑀲𑀯𑀺𑀲𑁆𑀲𑀚𑁆𑀚𑀦𑁂 𑀉𑀕𑁆𑀕𑀳𑁂𑀲𑀼𑀁. 𑀢𑁂 𑀤𑀳𑀭𑀓𑀸𑀮𑁂 𑀆𑀴𑀯𑀓𑀁 𑀧𑀭𑀺𑀬𑀸𑀧𑀼𑀡𑀸𑀧𑁂𑀲𑀼𑀁. 𑀲𑁄 𑀓𑀸𑀮𑀘𑁆𑀘𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀲𑀫𑁆𑀫𑀼𑀲𑁆𑀲𑀺. 𑀢𑀢𑁄 ‘‘𑀇𑀫𑁂 𑀧𑀜𑁆𑀳𑀸𑀧𑀺 𑀫𑀸 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀮𑀺𑀔𑀸𑀧𑁂𑀢𑁆𑀯𑀸 𑀯𑀺𑀫𑀸𑀦𑁂 𑀦𑀺𑀓𑁆𑀔𑀺𑀧𑀺. 𑀏𑀯𑀫𑁂𑀢𑁂 𑀩𑀼𑀤𑁆𑀥𑀧𑀜𑁆𑀳𑀸 𑀩𑀼𑀤𑁆𑀥𑀯𑀺𑀲𑀬𑀸 𑀏𑀯 𑀳𑁄𑀦𑁆𑀢𑀺. 𑀪𑀕𑀯𑀸 𑀢𑀁 𑀲𑀼𑀢𑁆𑀯𑀸 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀮𑀸𑀪𑀦𑁆𑀢𑀭𑀸𑀬𑁄 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀩𑁆𑀬𑀸𑀫𑀧𑁆𑀧𑀪𑀸𑀦𑀁 𑀧𑀝𑀺𑀖𑀸𑀢𑁄 𑀯𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀓𑀸𑀢𑀼𑀁, 𑀢𑀲𑁆𑀫𑀸 𑀢𑀁 𑀮𑁄𑀓𑁂 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ¶ ‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂’’𑀢𑀺.

𑀢𑀢𑁆𑀣 ‘‘𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑁂𑀦 𑀲𑀗𑁆𑀔𑁂𑀧𑁄 𑀯𑀼𑀢𑁆𑀢𑁄, 𑀦 𑀅𑀦𑀼𑀲𑀦𑁆𑀥𑀺𑀬𑁄𑀚𑀦𑀸𑀓𑁆𑀓𑀫𑁂𑀦 𑀯𑀺𑀢𑁆𑀣𑀸𑀭𑁄. 𑀲𑁆𑀯𑀸𑀬𑀁 𑀯𑀼𑀘𑁆𑀘𑀢𑀺 𑁋 𑀲𑀤𑁂𑀯𑀓𑀯𑀘𑀦𑁂𑀦 𑀳𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀲𑀩𑁆𑀩𑀤𑁂𑀯𑁂𑀲𑀼 𑀕𑀳𑀺𑀢𑁂𑀲𑀼𑀧𑀺 𑀬𑁂𑀲𑀁 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁂 𑀤𑁂𑀯𑀕𑀡𑁂 𑀯𑀺𑀫𑀢𑀺 𑀅𑀳𑁄𑀲𑀺 ‘‘𑀫𑀸𑀭𑁄 𑀫𑀳𑀸𑀦𑀼𑀪𑀸𑀯𑁄 𑀙𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁄 𑀯𑀲𑀯𑀢𑁆𑀢𑀻 𑀧𑀘𑁆𑀘𑀦𑀻𑀓𑀲𑀸𑀢𑁄 𑀥𑀫𑁆𑀫𑀤𑁂𑀲𑁆𑀲𑀻 𑀓𑀼𑀭𑀼𑀭𑀓𑀫𑁆𑀫𑀦𑁆𑀢𑁄, 𑀓𑀺𑀁 𑀦𑀼 𑀔𑁄, 𑀲𑁄𑀧𑀺𑀲𑁆𑀲 𑀘𑀺𑀢𑁆𑀢𑀓𑁆𑀔𑁂𑀧𑀸𑀤𑀻𑀦𑀺 𑀦 𑀓𑀭𑁂𑀬𑁆𑀬𑀸’’𑀢𑀺, 𑀢𑁂𑀲𑀁 𑀯𑀺𑀫𑀢𑀺𑀧𑀝𑀺𑀩𑀸𑀳𑀦𑀢𑁆𑀣𑀁 ‘‘𑀲𑀫𑀸𑀭𑀓𑁂’’𑀢𑀺 𑀆𑀳. 𑀢𑀢𑁄 𑀬𑁂𑀲𑀁 𑀅𑀳𑁄𑀲𑀺 𑁋 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀆𑀮𑁄𑀓𑀁 𑀓𑀭𑁄𑀢𑀺, 𑀤𑁆𑀯𑀻𑀳𑀺…𑀧𑁂… 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼, 𑀅𑀦𑀼𑀢𑁆𑀢𑀭𑀜𑁆𑀘 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀓𑀺𑀁 𑀲𑁄𑀧𑀺 𑀦 𑀓𑀭𑁂𑀬𑁆𑀬𑀸’’𑀢𑀺, 𑀢𑁂𑀲𑀁 𑀯𑀺𑀫𑀢𑀺𑀧𑀝𑀺𑀩𑀸𑀳𑀦𑀢𑁆𑀣𑀁 ‘‘𑀲𑀩𑁆𑀭𑀳𑁆𑀫𑀓𑁂’’𑀢𑀺 𑀆𑀳. 𑀅𑀣 𑀬𑁂𑀲𑀁 𑀅𑀳𑁄𑀲𑀺 ‘‘𑀧𑀼𑀣𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀸 𑀧𑀘𑁆𑀘𑀸𑀫𑀺𑀢𑁆𑀢𑀸 𑀫𑀦𑁆𑀢𑀸𑀤𑀺𑀩𑀮𑀲𑀫𑀦𑁆𑀦𑀸𑀕𑀢𑀸, 𑀓𑀺𑀁 𑀢𑁂𑀧𑀺 𑀦 𑀓𑀭𑁂𑀬𑁆𑀬𑀼’’𑀦𑁆𑀢𑀺, 𑀢𑁂𑀲𑀁 𑀯𑀺𑀫𑀢𑀺𑀧𑀝𑀺𑀩𑀸𑀳𑀦𑀢𑁆𑀣𑀁 ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬𑀸’’𑀢𑀺 𑀆𑀳. 𑀏𑀯𑀁 𑀉𑀓𑁆𑀓𑀝𑁆𑀞𑀝𑁆𑀞𑀸𑀦𑁂𑀲𑀼 𑀓𑀲𑁆𑀲𑀘𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑀯𑀘𑀦𑁂𑀦 ¶ 𑀲𑀫𑁆𑀫𑀼𑀢𑀺𑀤𑁂𑀯𑁂 𑀅𑀯𑀲𑁂𑀲𑀫𑀦𑀼𑀲𑁆𑀲𑁂 𑀘 𑀉𑀧𑀸𑀤𑀸𑀬 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀲𑁂𑀲𑀲𑀢𑁆𑀢𑀮𑁄𑀓𑁂𑀧𑀺 𑀓𑀲𑁆𑀲𑀘𑀺 𑀅𑀪𑀸𑀯𑀁 𑀤𑀲𑁆𑀲𑁂𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀦𑀼𑀲𑀦𑁆𑀥𑀺𑀬𑁄𑀚𑀦𑀸𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀪𑀕𑀯𑀸 𑀢𑀲𑁆𑀲 𑀩𑀸𑀥𑀦𑀘𑀺𑀢𑁆𑀢𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘 𑀢𑁆𑀯𑀁, 𑀆𑀯𑀼𑀲𑁄, 𑀧𑀼𑀘𑁆𑀙 𑀬𑀤𑀸𑀓𑀗𑁆𑀔𑀲𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀘𑁆𑀙, 𑀬𑀤𑀺 𑀆𑀓𑀗𑁆𑀔𑀲𑀺, 𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 ¶ 𑀪𑀸𑀭𑁄 𑀅𑀢𑁆𑀣𑀺. 𑀅𑀣 𑀯𑀸 ‘‘𑀧𑀼𑀘𑁆𑀙 𑀬𑀁 𑀆𑀓𑀗𑁆𑀔𑀲𑀺, 𑀢𑁂 𑀲𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺 𑀅𑀲𑀸𑀥𑀸𑀭𑀡𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑁂𑀳𑀺. 𑀢𑁂 𑀳𑀺 ‘‘𑀧𑀼𑀘𑁆𑀙𑀸𑀯𑀼𑀲𑁄 𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀩𑀼𑀤𑁆𑀥𑀸 𑀧𑀦 ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀲𑀁. 𑀦𑀺. 𑁧.𑁨𑁩𑁭, 𑁨𑁪𑁬) 𑀯𑀸,

‘‘𑀧𑀼𑀘𑁆𑀙 𑀯𑀸𑀲𑀯 𑀫𑀁 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺 𑀯𑀸. (𑀤𑀻. 𑀦𑀺. 𑁨.𑁩𑁫𑁬);

‘‘𑀩𑀸𑀯𑀭𑀺𑀲𑁆𑀲 ¶ 𑀘 𑀢𑀼𑀬𑁆𑀳𑀁 𑀯𑀸, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀲𑀁𑀲𑀬𑀁;

𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣𑀸’’𑀢𑀺 𑀯𑀸. (𑀲𑀼. 𑀦𑀺. 𑁧𑁦𑁩𑁬) 𑁋

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀪𑀕𑀯𑀸 𑀩𑀼𑀤𑁆𑀥𑀪𑀽𑀫𑀺𑀁 𑀧𑀢𑁆𑀯𑀸 𑀏𑀯𑀁 𑀧𑀯𑀸𑀭𑀡𑀁 𑀧𑀯𑀸𑀭𑁂𑀬𑁆𑀬, 𑀬𑁄 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀤𑁂𑀲𑀜𑀸𑀡𑁂 𑀯𑀢𑁆𑀢𑀫𑀸𑀦𑁄𑀧𑀺 𑁋

‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑁄𑀳𑀺, 𑀬𑀸𑀘𑀦𑁆𑀢𑀺 𑀢𑀁 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀓𑁄𑀡𑁆𑀟𑀜𑁆𑀜 𑀏𑀲𑁄 𑀫𑀦𑀼𑀚𑁂𑀲𑀼 𑀥𑀫𑁆𑀫𑁄, 𑀬𑀁 𑀯𑀼𑀤𑁆𑀥𑀫𑀸𑀕𑀘𑁆𑀙𑀢𑀺 𑀏𑀲 𑀪𑀸𑀭𑁄’’𑀢𑀺. (𑀚𑀸. 𑁨.𑁧𑁭.𑁬𑁦) 𑁋

𑀏𑀯𑀁 𑀇𑀲𑀻𑀳𑀺 𑀬𑀸𑀘𑀺𑀢𑁄 𑁋

‘‘𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄, 𑀬𑀁 𑀓𑀺𑀜𑁆𑀘𑀺 𑀧𑀜𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁;

𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀯𑀺𑀬𑀸𑀓𑀭𑀺𑀲𑁆𑀲𑀁, 𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. 𑁋

𑀏𑀯𑀁 ¶ 𑀲𑀭𑀪𑀗𑁆𑀕𑀓𑀸𑀮𑁂 𑀲𑀫𑁆𑀪𑀯𑀚𑀸𑀢𑀓𑁂 𑀘 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀘𑀭𑀺𑀢𑁆𑀯𑀸 𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑀁 𑀅𑀤𑀺𑀲𑁆𑀯𑀸 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄 𑀭𑀣𑀺𑀓𑀸𑀬 𑀧𑀁𑀲𑀼𑀓𑀻𑀴𑀺𑀓𑀁 𑀓𑀻𑀴𑀦𑁆𑀢𑁄 𑀲𑀼𑀘𑀺𑀭𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑀼𑀝𑁆𑀞𑁄 𑁋

‘‘𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸;

𑀭𑀸𑀚𑀸 𑀘 𑀔𑁄 𑀦𑀁 𑀚𑀸𑀦𑀸𑀢𑀺, 𑀬𑀤𑀺 𑀓𑀸𑀳𑀢𑀺 𑀯𑀸 𑀦 𑀯𑀸’’𑀢𑀺. (𑀚𑀸. 𑁧.𑁧𑁬.𑁧𑁭𑁨) 𑁋

𑀏𑀯𑀁 ¶ 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺. 𑀏𑀯𑀁 𑀪𑀕𑀯𑀢𑀸 𑀆𑀴𑀯𑀓𑀲𑁆𑀲 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀬 𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 ‘‘𑀓𑀺𑀁 𑀲𑀽𑀥 𑀯𑀺𑀢𑁆𑀢’’𑀦𑁆𑀢𑀺.

𑁧𑁮𑁩. 𑀢𑀢𑁆𑀣 𑀓𑀺𑀦𑁆𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀲𑀽𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀯𑀺𑀢𑁆𑀢𑀦𑁆𑀢𑀺 𑀯𑀺𑀤𑀢𑀺, 𑀧𑀻𑀢𑀺𑀁 𑀓𑀭𑁄𑀢𑀻𑀢𑀺 𑀯𑀺𑀢𑁆𑀢𑀁, 𑀥𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀼𑀘𑀺𑀡𑁆𑀡𑀦𑁆𑀢𑀺 𑀲𑀼𑀓𑀢𑀁. 𑀲𑀼𑀔𑀦𑁆𑀢𑀺 ¶ 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀲𑀸𑀢𑀁. 𑀆𑀯𑀳𑀸𑀢𑀻𑀢𑀺 𑀆𑀯𑀳𑀢𑀺, 𑀆𑀦𑁂𑀢𑀺, 𑀤𑁂𑀢𑀺, 𑀅𑀧𑁆𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀳𑀯𑁂𑀢𑀺 𑀤𑀴𑁆𑀳𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀸𑀤𑀼𑀢𑀭𑀦𑁆𑀢𑀺 𑀅𑀢𑀺𑀲𑀬𑁂𑀦 𑀲𑀸𑀤𑀼𑀁. ‘‘𑀲𑀸𑀥𑀼𑀢𑀭’’𑀦𑁆𑀢𑀺𑀧𑀺 𑀧𑀸𑀞𑁄. 𑀭𑀲𑀸𑀦𑀦𑁆𑀢𑀺 𑀭𑀲𑀲𑀜𑁆𑀜𑀺𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦, 𑀓𑀣𑀁𑀚𑀻𑀯𑀺𑀦𑁄 𑀚𑀻𑀯𑀺𑀢𑀁 𑀓𑀣𑀁𑀚𑀻𑀯𑀺𑀚𑀻𑀯𑀺𑀢𑀁, 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀲𑀸𑀦𑀼𑀦𑀸𑀲𑀺𑀓𑀁 𑀯𑀼𑀘𑁆𑀘𑀢𑀺. ‘‘𑀓𑀣𑀁𑀚𑀻𑀯𑀺𑀁 𑀚𑀻𑀯𑀢’’𑀦𑁆𑀢𑀺 𑀯𑀸 𑀧𑀸𑀞𑁄. 𑀢𑀲𑁆𑀲 𑀚𑀻𑀯𑀦𑁆𑀢𑀸𑀦𑀁 𑀓𑀣𑀁𑀚𑀻𑀯𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 ‘‘𑀓𑀺𑀁 𑀲𑀼 𑀇𑀥 𑀮𑁄𑀓𑁂 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀁 𑀲𑁂𑀝𑁆𑀞𑀁, 𑀓𑀺𑀁 𑀲𑀼 𑀲𑀼𑀘𑀺𑀡𑁆𑀡𑀁 𑀲𑀼𑀔𑀫𑀸𑀯𑀳𑀸𑀢𑀺, 𑀓𑀺𑀁 𑀭𑀲𑀸𑀦𑀁 𑀲𑀸𑀤𑀼𑀢𑀭𑀁, 𑀓𑀣𑀁𑀚𑀻𑀯𑀺𑀦𑁄 𑀚𑀻𑀯𑀺𑀢𑀁 𑀲𑁂𑀝𑁆𑀞𑀫𑀸𑀳𑀽’’𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺.

𑁧𑁮𑁪. 𑀅𑀣𑀲𑁆𑀲 𑀪𑀕𑀯𑀸 𑀓𑀲𑁆𑀲𑀧𑀤𑀲𑀩𑀮𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 ‘‘𑀲𑀤𑁆𑀥𑀻𑀥 𑀯𑀺𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀯𑀺𑀢𑁆𑀢𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀲𑀼𑀔𑀁 𑀆𑀯𑀳𑀢𑀺, 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀁 𑀧𑀝𑀺𑀩𑀸𑀳𑀢𑀺, 𑀤𑀸𑀮𑀺𑀤𑁆𑀤𑀺𑀬𑀁 𑀯𑀽𑀧𑀲𑀫𑁂𑀢𑀺, 𑀫𑀼𑀢𑁆𑀢𑀸𑀤𑀺𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼 𑀳𑁄𑀢𑀺, 𑀮𑁄𑀓𑀲𑀦𑁆𑀣𑀼𑀢𑀺𑀜𑁆𑀘 𑀆𑀯𑀳𑀢𑀺, 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀤𑁆𑀥𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑀼𑀔𑀫𑀸𑀯𑀳𑀢𑀺, 𑀲𑀤𑁆𑀥𑀸𑀥𑀼𑀭𑁂𑀦 𑀧𑀝𑀺𑀧𑀦𑁆𑀦𑀸𑀦𑀁 𑀚𑀸𑀢𑀺𑀚𑀭𑀸𑀤𑀺𑀤𑀼𑀓𑁆𑀔𑀁 𑀧𑀝𑀺𑀩𑀸𑀳𑀢𑀺, 𑀕𑀼𑀡𑀤𑀸𑀮𑀺𑀤𑁆𑀤𑀺𑀬𑀁 𑀯𑀽𑀧𑀲𑀫𑁂𑀢𑀺, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼 𑀳𑁄𑀢𑀺.

‘‘𑀲𑀤𑁆𑀥𑁄 ¶ 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀬𑀲𑁄 𑀪𑁄𑀕𑀲𑀫𑀧𑁆𑀧𑀺𑀢𑁄;

𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀽𑀚𑀺𑀢𑁄’’𑀢𑀺. (𑀥. 𑀧. 𑁩𑁦𑁩) 𑁋

𑀯𑀘𑀦𑀢𑁄 𑀮𑁄𑀓𑀲𑀦𑁆𑀣𑀼𑀢𑀺𑀜𑁆𑀘 𑀆𑀯𑀳𑀢𑀻𑀢𑀺 𑀓𑀢𑁆𑀯𑀸 ‘‘𑀯𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦𑁂𑀢𑀁 𑀲𑀤𑁆𑀥𑀸𑀯𑀺𑀢𑁆𑀢𑀁 𑀅𑀦𑀼𑀕𑀸𑀫𑀺𑀓𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀳𑁂𑀢𑀼, 𑀮𑁄𑀓𑀺𑀬𑀲𑁆𑀲 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀯𑀺𑀢𑁆𑀢𑀲𑁆𑀲𑀸𑀧𑀺 𑀦𑀺𑀤𑀸𑀦𑀁. 𑀲𑀤𑁆𑀥𑁄𑀬𑁂𑀯 𑀳𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀯𑀺𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀲𑁆𑀲𑀤𑁆𑀥𑀲𑁆𑀲 𑀧𑀦 𑀯𑀺𑀢𑁆𑀢𑀁 𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑁂𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀤𑁂𑀲𑀦𑀸; 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀧𑀼𑀭𑀺𑀲𑀲𑁆𑀲 ¶ , 𑀇𑀢𑁆𑀣𑀺𑀆𑀤𑀻𑀦𑀫𑁆𑀧𑀺 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯 𑀲𑁂𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄, 𑀤𑀸𑀦𑀲𑀻𑀮𑀪𑀸𑀯𑀦𑀸𑀥𑀫𑁆𑀫𑁄 𑀯𑀸. 𑀲𑀼𑀘𑀺𑀡𑁆𑀡𑁄𑀢𑀺 𑀲𑀼𑀓𑀢𑁄 𑀲𑀼𑀘𑀭𑀺𑀢𑁄 ¶ . 𑀲𑀼𑀔𑀫𑀸𑀯𑀳𑀸𑀢𑀻𑀢𑀺 𑀲𑁄𑀡𑀲𑁂𑀝𑁆𑀞𑀺𑀧𑀼𑀢𑁆𑀢𑀭𑀝𑁆𑀞𑀧𑀸𑀮𑀸𑀤𑀻𑀦𑀁 𑀯𑀺𑀬 𑀫𑀦𑀼𑀲𑁆𑀲𑀲𑀼𑀔𑀁, 𑀲𑀓𑁆𑀓𑀸𑀤𑀻𑀦𑀁 𑀯𑀺𑀬 𑀤𑀺𑀩𑁆𑀩𑀲𑀼𑀔𑀁, 𑀧𑀭𑀺𑀬𑁄𑀲𑀸𑀦𑁂 𑀘 𑀫𑀳𑀸𑀧𑀤𑀼𑀫𑀸𑀤𑀻𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀆𑀯𑀳𑀢𑀻𑀢𑀺.

𑀲𑀘𑁆𑀘𑀦𑁆𑀢𑀺 𑀅𑀬𑀁 𑀲𑀘𑁆𑀘𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁨𑁪) 𑀯𑀸𑀘𑀸𑀲𑀘𑁆𑀘𑁂. ‘‘𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁪𑁩𑁩) 𑀯𑀺𑀭𑀢𑀺𑀲𑀘𑁆𑀘𑁂. ‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁧) 𑀤𑀺𑀝𑁆𑀞𑀺𑀲𑀘𑁆𑀘𑁂. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁮𑁫) 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑁂. ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁦) 𑀧𑀭𑀫𑀢𑁆𑀣𑀲𑀘𑁆𑀘𑁂. ‘‘𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁧𑁬) 𑀅𑀭𑀺𑀬𑀲𑀘𑁆𑀘𑁂. 𑀇𑀥 𑀧𑀦 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁, 𑀯𑀺𑀭𑀢𑀺𑀲𑀘𑁆𑀘𑀁 𑀯𑀸 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸 𑀯𑀸𑀘𑀸𑀲𑀘𑁆𑀘𑀁 𑀅𑀥𑀺𑀧𑁆𑀧𑁂𑀢𑀁, 𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀤𑀓𑀸𑀤𑀻𑀦𑀺 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀧𑀸𑀭𑀁 𑀢𑀭𑀦𑁆𑀢𑀺. 𑀬𑀣𑀸𑀳 𑁋

‘‘𑀲𑀘𑁆𑀘𑁂𑀦 𑀯𑀸𑀘𑁂𑀦𑀼𑀤𑀓𑀫𑁆𑀧𑀺 𑀥𑀸𑀯𑀢𑀺, 𑀯𑀺𑀲𑀫𑁆𑀧𑀺 𑀲𑀘𑁆𑀘𑁂𑀦 𑀳𑀦𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀲𑀘𑁆𑀘𑁂𑀦 𑀤𑁂𑀯𑁄 𑀣𑀦𑀬𑀁 𑀧𑀯𑀲𑁆𑀲𑀢𑀺, 𑀲𑀘𑁆𑀘𑁂 𑀞𑀺𑀢𑀸 𑀦𑀺𑀩𑁆𑀩𑀼𑀢𑀺𑀁 𑀧𑀢𑁆𑀣𑀬𑀦𑁆𑀢𑀺.

‘‘𑀬𑁂 ¶ 𑀓𑁂𑀘𑀺𑀫𑁂 𑀅𑀢𑁆𑀣𑀺 𑀭𑀲𑀸 𑀧𑀣𑀩𑁆𑀬𑀸, 𑀲𑀘𑁆𑀘𑀁 𑀢𑁂𑀲𑀁 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁;

𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀢𑀭𑀦𑁆𑀢𑀺 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭’’𑀦𑁆𑀢𑀺. (𑀚𑀸. 𑁨.𑁨𑁧.𑁪𑁩𑁩);

𑀲𑀸𑀤𑀼𑀢𑀭𑀦𑁆𑀢𑀺 𑀫𑀥𑀼𑀭𑀢𑀭𑀁, 𑀧𑀡𑀻𑀢𑀢𑀭𑀁. 𑀭𑀲𑀸𑀦𑀦𑁆𑀢𑀺 𑀬𑁂 𑀇𑀫𑁂 ‘‘𑀫𑀽𑀮𑀭𑀲𑁄, 𑀔𑀦𑁆𑀥𑀭𑀲𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁨𑁮-𑁬𑁩𑁦) 𑀦𑀬𑁂𑀦 𑀲𑀸𑀬𑀦𑀻𑀬𑀥𑀫𑁆𑀫𑀸, 𑀬𑁂 𑀘𑀺𑀫𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀭𑀲𑀁 ¶ (𑀫𑀳𑀸𑀯. 𑁩𑁦𑁦) 𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄, 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀭𑀲𑀸, 𑀲𑀤𑁆𑀤𑀭𑀲𑀸 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁩), 𑀅𑀦𑀸𑀧𑀢𑁆𑀢𑀺 𑀭𑀲𑀭𑀲𑁂 (𑀧𑀸𑀘𑀺. 𑁬𑁦𑁭-𑁬𑁦𑁯), 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀏𑀓𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 (𑀅. 𑀦𑀺. 𑁮.𑁧𑁯; 𑀘𑀽𑀴𑀯. 𑁩𑁮𑁫), 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁪𑁯; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨) 𑀦𑀬𑁂𑀦 𑀯𑀸𑀘𑀸𑀭𑀲𑀽𑀧𑀯𑀚𑁆𑀚𑀸 𑀅𑀯𑀲𑁂𑀲𑀩𑁆𑀬𑀜𑁆𑀚𑀦𑀸𑀤𑀬𑁄 𑀥𑀫𑁆𑀫𑀸 ‘‘𑀭𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀭𑀲𑀸𑀦𑀁 𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀲𑀘𑁆𑀘𑀫𑁂𑀯 𑀲𑀸𑀤𑀼𑀢𑀭𑀁, 𑀲𑀸𑀥𑀼𑀢𑀭𑀁 𑀯𑀸 𑀲𑁂𑀝𑁆𑀞𑀢𑀭𑀁, 𑀉𑀢𑁆𑀢𑀫𑀢𑀭𑀁. 𑀫𑀽𑀮𑀭𑀲𑀸𑀤𑀬𑁄 𑀳𑀺 𑀲𑀭𑀻𑀭𑀁 𑀉𑀧𑀩𑁆𑀭𑀽𑀳𑁂𑀦𑁆𑀢𑀺, 𑀲𑀁𑀓𑀺𑀮𑁂𑀲𑀺𑀓𑀜𑁆𑀘 𑀲𑀼𑀔𑀫𑀸𑀯𑀳𑀦𑁆𑀢𑀺. 𑀲𑀘𑁆𑀘𑀭𑀲𑁂 𑀯𑀺𑀭𑀢𑀺𑀲𑀘𑁆𑀘𑀯𑀸𑀘𑀸𑀲𑀘𑁆𑀘𑀭𑀲𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀳𑀺 𑀘𑀺𑀢𑁆𑀢𑀫𑀼𑀧𑀩𑁆𑀭𑀽𑀳𑁂𑀦𑁆𑀢𑀺, 𑀅𑀲𑀁𑀓𑀺𑀮𑁂𑀲𑀺𑀓𑀜𑁆𑀘 𑀲𑀼𑀔𑀫𑀸𑀯𑀳𑀦𑁆𑀢𑀺, 𑀯𑀺𑀫𑀼𑀢𑁆𑀢𑀺𑀭𑀲𑁄 ¶ 𑀧𑀭𑀫𑀢𑁆𑀣𑀲𑀘𑁆𑀘𑀭𑀲𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀲𑀸𑀤𑀼, 𑀅𑀢𑁆𑀣𑀭𑀲𑀥𑀫𑁆𑀫𑀭𑀲𑀸 𑀘 𑀢𑀤𑀥𑀺𑀕𑀫𑀽𑀧𑀸𑀬𑀪𑀽𑀢𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑁄𑀢𑀺.

𑀧𑀜𑁆𑀜𑀸𑀚𑀻𑀯𑀺𑀦𑁆𑀢𑀺 𑀏𑀢𑁆𑀣 𑀧𑀦 𑀬𑁆𑀯𑀸𑀬𑀁 𑀅𑀦𑁆𑀥𑁂𑀓𑀘𑀓𑁆𑀔𑀼𑀤𑁆𑀯𑀺𑀘𑀓𑁆𑀔𑀼𑀓𑁂𑀲𑀼 𑀤𑁆𑀯𑀺𑀘𑀓𑁆𑀔𑀼𑀧𑀼𑀕𑁆𑀕𑀮𑁄 𑀕𑀳𑀝𑁆𑀞𑁄 𑀯𑀸 𑀓𑀫𑁆𑀫𑀦𑁆𑀢𑀸𑀦𑀼𑀝𑁆𑀞𑀸𑀦𑀲𑀭𑀡𑀕𑀫𑀦𑀤𑀸𑀦𑀲𑀁𑀯𑀺𑀪𑀸𑀕𑀲𑀻𑀮𑀲𑀫𑀸𑀤𑀸𑀦𑀉𑀧𑁄𑀲𑀣𑀓𑀫𑁆𑀫𑀸𑀤𑀺𑀕𑀳𑀝𑁆𑀞𑀧𑀝𑀺𑀧𑀤𑀁, 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀻𑀮𑀲𑀗𑁆𑀔𑀸𑀢𑀁 𑀢𑀤𑀼𑀢𑁆𑀢𑀭𑀺𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀪𑁂𑀤𑀁 𑀯𑀸 𑀧𑀩𑁆𑀩𑀚𑀺𑀢𑀧𑀝𑀺𑀧𑀤𑀁 𑀧𑀜𑁆𑀜𑀸𑀬 𑀆𑀭𑀸𑀥𑁂𑀢𑁆𑀯𑀸 𑀚𑀻𑀯𑀢𑀺, 𑀢𑀲𑁆𑀲 𑀧𑀜𑁆𑀜𑀸𑀚𑀻𑀯𑀺𑀦𑁄 𑀚𑀻𑀯𑀺𑀢𑀁, 𑀢𑀁 𑀯𑀸 𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀁 𑀲𑁂𑀝𑁆𑀞𑀫𑀸𑀳𑀽𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁮𑁫-𑁬. 𑀏𑀯𑀁 𑀪𑀕𑀯𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑁂 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀳𑁂 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀬𑀓𑁆𑀔𑁄 𑀅𑀯𑀲𑁂𑀲𑁂𑀧𑀺 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀲𑀼 𑀢𑀭𑀢𑀺 𑀑𑀖’’𑀦𑁆𑀢𑀺 𑀕𑀸𑀣𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀲𑀤𑁆𑀥𑀸𑀬 𑀢𑀭𑀢𑀻’’𑀢𑀺 ¶ 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑁄 𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀢𑀭𑀢𑀺, 𑀲𑁄 𑀲𑀁𑀲𑀸𑀭𑀡𑁆𑀡𑀯𑀫𑁆𑀧𑀺 𑀢𑀭𑀢𑀺, 𑀯𑀝𑁆𑀝𑀤𑀼𑀓𑁆𑀔𑀫𑁆𑀧𑀺 𑀅𑀘𑁆𑀘𑁂𑀢𑀺, 𑀓𑀺𑀮𑁂𑀲𑀫𑀮𑀸𑀧𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀏𑀯𑀁 ¶ 𑀲𑀦𑁆𑀢𑁂𑀧𑀺 𑀧𑀦 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑁄 𑀑𑀖𑀢𑀭𑀡𑀁 𑀅𑀲𑀤𑁆𑀤𑀳𑀦𑁆𑀢𑁄 𑀦 𑀧𑀓𑁆𑀔𑀦𑁆𑀤𑀢𑀺, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑁂𑀦 𑀧𑀫𑀢𑁆𑀢𑁄 𑀢𑀢𑁆𑀣𑁂𑀯 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀁𑀲𑀸𑀭𑀡𑁆𑀡𑀯𑀁 𑀦 𑀢𑀭𑀢𑀺, 𑀓𑀼𑀲𑀻𑀢𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀯𑁄𑀓𑀺𑀡𑁆𑀡𑁄 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀅𑀧𑁆𑀧𑀜𑁆𑀜𑁄 𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀚𑀸𑀦𑀦𑁆𑀢𑁄 𑀦 𑀧𑀭𑀺𑀲𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀧𑁆𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

𑀏𑀯𑀁 𑀯𑀼𑀢𑁆𑀢𑀸𑀬 𑀘𑁂𑀢𑀸𑀬 𑀬𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀢𑀲𑁆𑀫𑀸 ‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑀺𑀝𑁆𑀞𑁄𑀖𑀢𑀭𑀡𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀲𑁄𑀢𑀸𑀧𑀦𑁆𑀦𑀜𑁆𑀘 𑀧𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀦 𑀅𑀧𑁆𑀧𑀫𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀤𑀼𑀢𑀺𑀬𑀫𑀕𑁆𑀕𑀁 𑀆𑀭𑀸𑀥𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀫𑀦𑀫𑀢𑁆𑀢𑀁 𑀅𑀯𑀲𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀢𑀺𑀡𑁆𑀡𑀁 𑀪𑀯𑁄𑀖𑀯𑀢𑁆𑀣𑀼𑀁 𑀲𑀁𑀲𑀸𑀭𑀡𑁆𑀡𑀯𑀁 𑀢𑀭𑀢𑀺, 𑀢𑀲𑁆𑀫𑀸 ‘‘𑀅𑀧𑁆𑀧𑀫𑀸𑀤𑁂𑀦 𑀅𑀡𑁆𑀡𑀯’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀪𑀯𑁄𑀖𑀢𑀭𑀡𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀲𑀓𑀤𑀸𑀕𑀸𑀫𑀺𑀜𑁆𑀘 𑀧𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀲𑀓𑀤𑀸𑀕𑀸𑀫𑀻 𑀯𑀻𑀭𑀺𑀬𑁂𑀦 𑀢𑀢𑀺𑀬𑀫𑀕𑁆𑀕𑀁 𑀆𑀭𑀸𑀥𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀢𑀻𑀢𑀁 𑀓𑀸𑀫𑁄𑀖𑀯𑀢𑁆𑀣𑀼𑀁; 𑀓𑀸𑀫𑁄𑀖𑀲𑀜𑁆𑀜𑀺𑀢𑀜𑁆𑀘 𑀓𑀸𑀫𑀤𑀼𑀓𑁆𑀔𑀫𑀘𑁆𑀘𑁂𑀢𑀺, 𑀢𑀲𑁆𑀫𑀸 ‘‘𑀯𑀻𑀭𑀺𑀬𑁂𑀦 𑀤𑀼𑀓𑁆𑀔𑀫𑀘𑁆𑀘𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑀸𑀫𑁄𑀖𑀢𑀭𑀡𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀅𑀦𑀸𑀕𑀸𑀫𑀺𑀜𑁆𑀘 𑀧𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀸𑀕𑀸𑀫𑀻 𑀯𑀺𑀕𑀢𑀓𑀸𑀫𑀧𑀗𑁆𑀓𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀧𑀜𑁆𑀜𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀁 𑀆𑀭𑀸𑀥𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀧𑀭𑀫𑀫𑀮𑀁 𑀧𑀚𑀳𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀯𑀺𑀚𑁆𑀚𑁄𑀖𑀢𑀭𑀡𑀁 ¶ 𑀅𑀭𑀳𑀢𑁆𑀢𑀫𑀕𑁆𑀕𑀁 𑀅𑀭𑀳𑀦𑁆𑀢𑀜𑁆𑀘 𑀧𑀓𑀸𑀲𑁂𑀢𑀺. 𑀇𑀫𑀸𑀬 𑀘 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀓𑀣𑀺𑀢𑀸𑀬 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀬𑀓𑁆𑀔𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑁧𑁮𑁭. 𑀇𑀤𑀸𑀦𑀺 𑀢𑀫𑁂𑀯 ‘‘𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀧𑀜𑁆𑀜𑀸𑀧𑀤𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀲𑀼 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 ¶ 𑀇𑀫𑀁 𑀙𑀧𑁆𑀧𑀤𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀣𑀁 𑀲𑀽𑀢𑀺 𑀲𑀩𑁆𑀩𑀢𑁆𑀣𑁂𑀯 𑀅𑀢𑁆𑀣𑀬𑀼𑀢𑁆𑀢𑀺𑀧𑀼𑀘𑁆𑀙𑀸 𑀳𑁄𑀢𑀺. 𑀅𑀬𑀜𑁆𑀳𑀺 𑀧𑀜𑁆𑀜𑀸𑀤𑀺𑀅𑀢𑁆𑀣𑀁 𑀜𑀢𑁆𑀯𑀸 𑀢𑀲𑁆𑀲 𑀬𑀼𑀢𑁆𑀢𑀺𑀁 𑀧𑀼𑀘𑁆𑀙𑀢𑀺 ‘‘𑀓𑀣𑀁 𑀓𑀸𑀬 𑀬𑀼𑀢𑁆𑀢𑀺𑀬𑀸 𑀓𑁂𑀦 𑀓𑀸𑀭𑀡𑁂𑀦 𑀧𑀜𑁆𑀜𑀁 𑀮𑀪𑀢𑀻’’𑀢𑀺. 𑀏𑀲 𑀦𑀬𑁄 𑀥𑀦𑀸𑀤𑀻𑀲𑀼.

𑁧𑁮𑁮. 𑀅𑀣𑀲𑁆𑀲 ¶ 𑀪𑀕𑀯𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀜𑁆𑀜𑀸𑀮𑀸𑀪𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀤𑀳𑀸𑀦𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁂𑀦 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑁂𑀦, 𑀅𑀧𑀭𑀪𑀸𑀕𑁂 𑀘 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀪𑁂𑀤𑁂𑀦 𑀥𑀫𑁆𑀫𑁂𑀦 𑀅𑀭𑀳𑀦𑁆𑀢𑁄 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸, 𑀢𑀁 𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀁 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀧𑀜𑁆𑀜𑀁 𑀮𑀪𑀢𑀺. 𑀢𑀜𑁆𑀘 𑀔𑁄 𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯, 𑀬𑀲𑁆𑀫𑀸 𑀧𑀦 𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀲𑁄𑀢𑀁 𑀑𑀤𑀳𑀢𑀺, 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀦𑀢𑁄 𑀧𑀪𑀼𑀢𑀺 𑀬𑀸𑀯 𑀥𑀫𑁆𑀫𑀲𑁆𑀲𑀯𑀦𑁂𑀦 𑀲𑀼𑀲𑁆𑀲𑀽𑀲𑀁 𑀮𑀪𑀢𑀺. 𑀓𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀁 𑀥𑀫𑁆𑀫𑀁 𑀲𑀤𑁆𑀤𑀳𑀺𑀢𑁆𑀯𑀸𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀓𑀸𑀮𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀓𑀭𑀡𑁂𑀦 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀬𑀤𑀸 𑀧𑀬𑀺𑀭𑀼𑀧𑀸𑀲𑀦𑀸𑀬 𑀆𑀭𑀸𑀥𑀺𑀢𑀘𑀺𑀢𑁆𑀢𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀣 𑀅𑀥𑀺𑀕𑀢𑀸𑀬 𑀲𑁄𑀢𑀼𑀓𑀸𑀫𑀢𑀸𑀬 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀲𑀼𑀡𑀦𑁆𑀢𑁄 𑀮𑀪𑀢𑀻𑀢𑀺. 𑀏𑀯𑀁 𑀲𑀼𑀲𑀽𑀲𑀫𑁆𑀧𑀺 𑀘 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀜𑁆𑀜𑀼𑀢𑀸𑀬 𑀯𑀺𑀘𑀓𑁆𑀔𑀡𑁄 𑀏𑀯 𑀮𑀪𑀢𑀺, 𑀦 𑀇𑀢𑀭𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄’’𑀢𑀺.

𑀏𑀯𑀁 𑀬𑀲𑁆𑀫𑀸 𑀲𑀤𑁆𑀥𑀸𑀬 𑀧𑀜𑁆𑀜𑀸𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀁 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺, 𑀲𑀼𑀲𑁆𑀲𑀽𑀲𑀸𑀬 𑀲𑀓𑁆𑀓𑀘𑁆𑀘𑀁 𑀧𑀜𑁆𑀜𑀸𑀥𑀺𑀕𑀫𑀽𑀧𑀸𑀬𑀁 𑀲𑀼𑀡𑀸𑀢𑀺, 𑀅𑀧𑁆𑀧𑀫𑀸𑀤𑁂𑀦 𑀕𑀳𑀺𑀢𑀁 𑀦 𑀲𑀫𑁆𑀫𑀼𑀲𑁆𑀲𑀢𑀺, 𑀯𑀺𑀘𑀓𑁆𑀔𑀡𑀢𑀸𑀬 𑀅𑀦𑀽𑀦𑀸𑀥𑀺𑀓𑀁 𑀅𑀯𑀺𑀧𑀭𑀻𑀢𑀜𑁆𑀘 𑀕𑀳𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀺. 𑀲𑀼𑀲𑁆𑀲𑀽𑀲𑀸𑀬 𑀯𑀸 𑀑𑀳𑀺𑀢𑀲𑁄𑀢𑁄 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀧𑁆𑀧𑀫𑀸𑀤𑁂𑀦 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺 ¶ , 𑀯𑀺𑀘𑀓𑁆𑀔𑀡𑀢𑀸𑀬 𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀢𑀺, 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀪𑀕𑀯𑀸 ‘‘𑀓𑀣𑀁 𑀲𑀼 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀧𑀼𑀝𑁆𑀞𑁄 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋 ‘‘𑀲𑀤𑁆𑀤𑀳𑀸𑀦𑁄…𑀧𑁂… 𑀯𑀺𑀘𑀓𑁆𑀔𑀡𑁄’’𑀢𑀺.

𑁧𑁮𑁯. 𑀇𑀤𑀸𑀦𑀺 𑀢𑀢𑁄 𑀧𑀭𑁂 𑀢𑀬𑁄 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀧𑀢𑀺𑀭𑀽𑀧𑀓𑀸𑀭𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀤𑁂𑀲𑀓𑀸𑀮𑀸𑀤𑀻𑀦𑀺 𑀅𑀳𑀸𑀧𑁂𑀢𑁆𑀯𑀸 𑀮𑁄𑀓𑀺𑀬𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑁆𑀲 𑀯𑀸 𑀥𑀦𑀲𑁆𑀲 𑀧𑀢𑀺𑀭𑀽𑀧𑀁 𑀅𑀥𑀺𑀕𑀫𑀽𑀧𑀸𑀬𑀁 𑀓𑀭𑁄𑀢𑀻𑀢𑀺 𑀧𑀢𑀺𑀭𑀽𑀧𑀓𑀸𑀭𑀻. 𑀥𑀼𑀭𑀯𑀸𑀢𑀺 𑀘𑁂𑀢𑀲𑀺𑀓𑀯𑀻𑀭𑀺𑀬𑀯𑀲𑁂𑀦 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄. 𑀉𑀝𑁆𑀞𑀸𑀢𑀸𑀢𑀺 ‘‘𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 (𑀣𑁂𑀭𑀕𑀸. 𑁨𑁩𑁨; 𑀤𑀻. 𑀦𑀺. 𑁩.𑁨𑁫𑁩) 𑀦𑀬𑁂𑀦 𑀓𑀸𑀬𑀺𑀓𑀯𑀻𑀭𑀺𑀬𑀯𑀲𑁂𑀦 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑁄. 𑀯𑀺𑀦𑁆𑀤𑀢𑁂 ¶ 𑀥𑀦𑀦𑁆𑀢𑀺 𑀏𑀓𑀫𑀽𑀲𑀺𑀓𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀤𑁆𑀯𑁂𑀲𑀢𑀲𑀳𑀲𑁆𑀲𑀲𑀗𑁆𑀔𑀁 𑀘𑀽𑀴𑀦𑁆𑀢𑁂𑀯𑀸𑀲𑀻 𑀯𑀺𑀬 𑀮𑁄𑀓𑀺𑀬𑀥𑀦𑀜𑁆𑀘, 𑀫𑀳𑀮𑁆𑀮𑀓𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬 𑀮𑁄𑀓𑀼𑀢𑁆𑀢𑀭𑀥𑀦𑀜𑁆𑀘 𑀮𑀪𑀢𑀺. 𑀲𑁄 𑀳𑀺 ‘‘𑀢𑀻𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀁 𑀓𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀸𑀕𑀫𑀦𑀯𑁂𑀮𑀸𑀬 𑀧𑀮𑀸𑀮𑀘𑀼𑀫𑁆𑀩𑀝𑀓𑀁 𑀢𑁂𑀫𑁂𑀢𑁆𑀯𑀸, 𑀲𑀻𑀲𑁂 𑀓𑀢𑁆𑀯𑀸, 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸, 𑀣𑀺𑀦𑀫𑀺𑀤𑁆𑀥𑀁 𑀧𑀝𑀺𑀩𑀸𑀳𑁂𑀦𑁆𑀢𑁄 𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀘𑁆𑀘𑁂𑀦𑀸𑀢𑀺 𑀯𑀘𑀻𑀲𑀘𑁆𑀘𑁂𑀦𑀸𑀧𑀺 ‘‘𑀲𑀘𑁆𑀘𑀯𑀸𑀤𑀻 𑀪𑀽𑀢𑀯𑀸𑀤𑀻’’𑀢𑀺, 𑀧𑀭𑀫𑀢𑁆𑀣𑀲𑀘𑁆𑀘𑁂𑀦𑀸𑀧𑀺 ‘‘𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀏𑀯𑀁 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺. 𑀤𑀤𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀁 𑀤𑀤𑀦𑁆𑀢𑁄 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺, 𑀲𑀫𑁆𑀧𑀸𑀤𑁂𑀢𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀤𑁆𑀤𑀤𑀁 𑀯𑀸 𑀤𑀤𑀁 𑀕𑀦𑁆𑀣𑀢𑀺, 𑀤𑀸𑀦𑀫𑀼𑀔𑁂𑀦 𑀯𑀸 𑀘𑀢𑁆𑀢𑀸𑀭𑀺𑀧𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀳𑀺 𑀫𑀺𑀢𑁆𑀢𑀸𑀦𑀺 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁯𑁦. 𑀏𑀯𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂𑀦 𑀦𑀬𑁂𑀦 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀣𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺 𑀇𑀫𑀁 𑀧𑀜𑁆𑀘𑀫𑀁 𑀧𑀜𑁆𑀳𑀁 𑀕𑀳𑀝𑁆𑀞𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑁂𑀢𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 ‘‘𑀲𑀤𑁆𑀤𑀳𑀸𑀦𑁄 𑀅𑀭𑀳𑀢’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀸𑀬 𑀲𑀩𑁆𑀩𑀓𑀮𑁆𑀬𑀸𑀡𑀥𑀫𑁆𑀫𑀼𑀧𑁆𑀧𑀸𑀤𑀺𑀓𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁆𑀥𑀲𑁆𑀲 ¶ 𑀖𑀭𑀫𑁂𑀲𑀺𑀦𑁄 𑀖𑀭𑀸𑀯𑀸𑀲𑀁 𑀧𑀜𑁆𑀘 𑀯𑀸 𑀓𑀸𑀫𑀕𑀼𑀡𑁂 𑀏𑀲𑀦𑁆𑀢𑀲𑁆𑀲 𑀕𑀯𑁂𑀲𑀦𑁆𑀢𑀲𑁆𑀲 𑀓𑀸𑀫𑀪𑁄𑀕𑀺𑀦𑁄 𑀕𑀳𑀝𑁆𑀞𑀲𑁆𑀲 ‘‘𑀲𑀘𑁆𑀘𑁂𑀦 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀘𑁆𑀘𑀁, ‘‘𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀏𑀢𑁆𑀣 𑀲𑀼𑀲𑁆𑀲𑀽𑀲𑀧𑀜𑁆𑀜𑀸𑀦𑀸𑀫𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄, ‘‘𑀥𑀼𑀭𑀯𑀸 𑀉𑀝𑁆𑀞𑀸𑀢𑀸’’𑀢𑀺 𑀏𑀢𑁆𑀣 𑀥𑀼𑀭𑀦𑀸𑀫𑁂𑀦 𑀉𑀝𑁆𑀞𑀸𑀦𑀦𑀸𑀫𑁂𑀦 𑀘 𑀯𑀼𑀢𑁆𑀢𑀸 𑀥𑀻𑀢𑀺, ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀘𑀸𑀕𑁄 𑀘𑀸𑀢𑀺 𑀏𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸 𑀲𑀦𑁆𑀢𑀺. 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀻𑀢𑀺 𑀇𑀥𑀮𑁄𑀓𑀸 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲 𑀯𑁂 𑀦 𑀲𑁄𑀘𑀢𑀻𑀢𑀺.

𑁧𑁯𑁧. 𑀏𑀯𑀁 𑀪𑀕𑀯𑀸 𑀧𑀜𑁆𑀘𑀫𑀫𑁆𑀧𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀁 𑀬𑀓𑁆𑀔𑀁 𑀘𑁄𑀤𑁂𑀦𑁆𑀢𑁄 𑀆𑀳 𑁋 ‘‘𑀇𑀗𑁆𑀖 𑀅𑀜𑁆𑀜𑁂𑀧𑀻’’𑀢𑀺. 𑀢𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀜𑁆𑀜𑁂𑀧𑀻𑀢𑀺 𑀅𑀜𑁆𑀜𑁂𑀧𑀺 𑀥𑀫𑁆𑀫𑁂 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀲𑁆𑀲𑀼, 𑀅𑀜𑁆𑀜𑁂𑀧𑀺 𑀯𑀸 𑀧𑀽𑀭𑀡𑀸𑀤𑀬𑁄 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑁂 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀲𑁆𑀲𑀼. 𑀬𑀤𑀺 𑀅𑀫𑁆𑀳𑁂𑀳𑀺 ‘‘𑀲𑀘𑁆𑀘𑁂𑀦 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀘𑁆𑀘𑀸 𑀪𑀺𑀬𑁆𑀬𑁄 𑀓𑀺𑀢𑁆𑀢𑀺𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀯𑀸, ‘‘𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀏𑀢𑁆𑀣 𑀲𑀼𑀲𑁆𑀲𑀽𑀲𑀦𑀧𑀜𑁆𑀜𑀸𑀧𑀤𑁂𑀲𑁂𑀦 𑀯𑀼𑀢𑁆𑀢𑀸 𑀤𑀫𑀸 𑀪𑀺𑀬𑁆𑀬𑁄 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀧𑀝𑀺𑀮𑀸𑀪𑀓𑀸𑀭𑀡𑀁 𑀯𑀸. ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀘𑀸𑀕𑀸 𑀪𑀺𑀬𑁆𑀬𑁄 𑀫𑀺𑀢𑁆𑀢𑀕𑀦𑁆𑀣𑀦𑀓𑀸𑀭𑀡𑀁 𑀯𑀸, ‘‘𑀥𑀼𑀭𑀯𑀸 𑀉𑀝𑁆𑀞𑀸𑀢𑀸’’𑀢𑀺 𑀏𑀢𑁆𑀣 𑀢𑀁 𑀢𑀁 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀥𑀼𑀭𑀦𑀸𑀫𑁂𑀦 𑀉𑀝𑁆𑀞𑀸𑀦𑀦𑀸𑀫𑁂𑀦 ¶ 𑀘 𑀯𑀼𑀢𑁆𑀢𑀸𑀬 𑀫𑀳𑀸𑀪𑀸𑀭𑀲𑀳𑀦𑀝𑁆𑀞𑁂𑀦 𑀉𑀲𑁆𑀲𑁄𑀴𑁆𑀳𑀻𑀪𑀸𑀯𑀧𑁆𑀧𑀢𑁆𑀢𑀸𑀬 𑀯𑀻𑀭𑀺𑀬𑀲𑀗𑁆𑀔𑀸𑀢𑀸𑀬 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀦𑀯𑀺𑀦𑁆𑀤𑀦𑀓𑀸𑀭𑀡𑀁 𑀯𑀸, ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀪𑀺𑀬𑁆𑀬𑁄 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀧𑁂𑀘𑁆𑀘 𑀅𑀲𑁄𑀘𑀦𑀓𑀸𑀭𑀡𑀁 𑀯𑀸 𑀇𑀥 𑀯𑀺𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀤𑁆𑀥𑀺𑀁 𑀲𑀗𑁆𑀔𑁂𑀧𑀬𑁄𑀚𑀦𑀸𑀬 𑀅𑀢𑁆𑀣𑀯𑀡𑁆𑀡𑀦𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀏𑀓𑀫𑁂𑀓𑀁 𑀧𑀤𑀁 𑀅𑀢𑁆𑀣𑀼𑀤𑁆𑀥𑀸𑀭𑀧𑀤𑀼𑀤𑁆𑀥𑀸𑀭𑀯𑀡𑁆𑀡𑀦𑀸𑀦𑀬𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁯𑁨. 𑀏𑀯𑀁 𑀯𑀼𑀢𑁆𑀢𑁂 𑀬𑀓𑁆𑀔𑁄 𑀬𑁂𑀦 𑀲𑀁𑀲𑀬𑁂𑀦 𑀅𑀜𑁆𑀜𑁂 𑀧𑀼𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 ‘‘𑀓𑀣𑀁 𑀦𑀼 𑀤𑀸𑀦𑀺 𑀧𑀼𑀘𑁆𑀙𑁂𑀬𑁆𑀬𑀁, 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀢𑀺 𑀯𑀢𑁆𑀯𑀸 𑀬𑁂𑀧𑀺𑀲𑁆𑀲 𑀅𑀧𑀼𑀘𑁆𑀙𑀦𑀓𑀸𑀭𑀡𑀁 𑀦 𑀚𑀸𑀦𑀦𑁆𑀢𑀺, 𑀢𑁂𑀧𑀺 𑀚𑀸𑀦𑀸𑀧𑁂𑀦𑁆𑀢𑁄 ‘‘𑀬𑁄𑀳𑀁 𑀅𑀚𑁆𑀚 𑀧𑀚𑀸𑀦𑀸𑀫𑀺, 𑀬𑁄 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺 ¶ 𑀆𑀳. 𑀢𑀢𑁆𑀣 𑀅𑀚𑁆𑀚𑀸𑀢𑀺 𑀅𑀚𑁆𑀚𑀸𑀤𑀺𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀚𑀸𑀦𑀸𑀫𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀚𑀸𑀦𑀸𑀫𑀺. 𑀬𑁄 𑀅𑀢𑁆𑀣𑁄𑀢𑀺 𑀏𑀢𑁆𑀢𑀸𑀯𑀢𑀸 ‘‘𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀤𑀲𑁆𑀲𑁂𑀢𑀺 𑀲𑀫𑁆𑀧𑀭𑀸𑀬𑀺𑀓𑁄𑀢𑀺 𑀇𑀫𑀺𑀦𑀸 ‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁 𑀧𑁂𑀘𑁆𑀘 𑀲𑁄𑀓𑀸𑀪𑀸𑀯𑀓𑀭𑀁 𑀲𑀫𑁆𑀧𑀭𑀸𑀬𑀺𑀓𑀁. 𑀅𑀢𑁆𑀣𑁄𑀢𑀺 𑀘 𑀓𑀸𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀜𑁆𑀳𑀺 𑀅𑀢𑁆𑀣𑀲𑀤𑁆𑀤𑁄 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧; 𑀤𑀻. 𑀦𑀺. 𑁧.𑁨𑁫𑁫) 𑀧𑀸𑀞𑀢𑁆𑀣𑁂 𑀯𑀢𑁆𑀢𑀢𑀺. ‘‘𑀅𑀢𑁆𑀣𑁄 𑀫𑁂, 𑀕𑀳𑀧𑀢𑀺, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁫𑁦; 𑀫. 𑀦𑀺. 𑁩.𑁨𑁫𑁮) 𑀓𑀺𑀘𑁆𑀘𑀢𑁆𑀣𑁂 ‘‘𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁧𑁧) 𑀯𑀼𑀟𑁆𑀠𑀺𑀫𑁆𑀳𑀺. ‘‘𑀩𑀳𑀼𑀚𑀦𑁄 𑀪𑀚𑀢𑁂 𑀅𑀢𑁆𑀣𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁮𑁯) 𑀥𑀦𑁂. ‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁭.𑁬𑁬; 𑀲𑀁. 𑀦𑀺. 𑁧.𑁨𑁫𑁦; 𑀣𑁂𑀭𑀕𑀸. 𑁪𑁪𑁩) 𑀳𑀺𑀢𑁂. ‘‘𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁯𑁨) 𑀓𑀸𑀭𑀡𑁂. 𑀇𑀥 𑀧𑀦 𑀓𑀸𑀭𑀡𑁂. 𑀢𑀲𑁆𑀫𑀸 𑀬𑀁 𑀧𑀜𑁆𑀜𑀸𑀤𑀺𑀮𑀸𑀪𑀸𑀤𑀻𑀦𑀁 𑀓𑀸𑀭𑀡𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁, 𑀬𑀜𑁆𑀘 𑀧𑁂𑀘𑁆𑀘 𑀲𑁄𑀓𑀸𑀪𑀸𑀯𑀲𑁆𑀲 𑀓𑀸𑀭𑀡𑀁 𑀲𑀫𑁆𑀧𑀭𑀸𑀬𑀺𑀓𑀁, 𑀢𑀁 𑀬𑁄𑀳𑀁 𑀅𑀚𑁆𑀚 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦 𑀲𑀸𑀫𑀁𑀬𑁂𑀯 𑀧𑀚𑀸𑀦𑀸𑀫𑀺, 𑀲𑁄 𑀓𑀣𑀁 𑀦𑀼 𑀤𑀸𑀦𑀺 𑀧𑀼𑀘𑁆𑀙𑁂𑀬𑁆𑀬𑀁 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀢𑀺 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁯𑁩. 𑀏𑀯𑀁 ¶ 𑀬𑀓𑁆𑀔𑁄 ‘‘𑀧𑀚𑀸𑀦𑀸𑀫𑀺 𑀬𑁄 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀜𑀸𑀡𑀲𑁆𑀲 𑀪𑀕𑀯𑀁𑀫𑀽𑀮𑀓𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀸𑀬 𑀯𑀢 𑀫𑁂 𑀩𑀼𑀤𑁆𑀥𑁄’’𑀢𑀺 𑀆𑀳. 𑀢𑀢𑁆𑀣 𑀅𑀢𑁆𑀣𑀸𑀬𑀸𑀢𑀺 𑀳𑀺𑀢𑀸𑀬, 𑀯𑀼𑀟𑁆𑀠𑀺𑀬𑀸 𑀯𑀸. 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 ‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸’’𑀢𑀺 (𑀚𑀸. 𑁧.𑁧.𑁯𑁭) 𑀏𑀢𑁆𑀣 𑀯𑀼𑀢𑁆𑀢𑀘𑀸𑀕𑁂𑀦 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀁 𑀩𑀼𑀤𑁆𑀥𑀁 𑀧𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀲𑀗𑁆𑀖𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀸’’𑀢𑀺 𑀪𑀡𑀦𑁆𑀢𑀺.

𑁧𑁯𑁪. 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀢𑀦𑁄 𑀳𑀺𑀢𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑀳𑁂𑀫𑀯𑀢𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑀺𑀫𑀸𑀬 ¶ ¶ 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑀜𑁆𑀘 𑀭𑀢𑁆𑀢𑀺𑀯𑀺𑀪𑀸𑀬𑀦𑀜𑁆𑀘 𑀲𑀸𑀥𑀼𑀓𑀸𑀭𑀲𑀤𑁆𑀤𑀼𑀝𑁆𑀞𑀸𑀦𑀜𑁆𑀘 𑀆𑀴𑀯𑀓𑀓𑀼𑀫𑀸𑀭𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀆𑀦𑀬𑀦𑀜𑁆𑀘 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀲𑀸𑀥𑀼𑀓𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀏𑀯𑀭𑀽𑀧𑁄 𑀲𑀸𑀥𑀼𑀓𑀸𑀭𑀲𑀤𑁆𑀤𑁄 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑁂 𑀦 𑀅𑀜𑁆𑀜𑁂𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀆𑀕𑀢𑁄 𑀦𑀼 𑀔𑁄 𑀪𑀕𑀯𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀸 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀁 𑀤𑀺𑀲𑁆𑀯𑀸, 𑀧𑀼𑀩𑁆𑀩𑁂 𑀯𑀺𑀬 𑀩𑀳𑀺 𑀅𑀝𑁆𑀞𑀢𑁆𑀯𑀸, 𑀦𑀺𑀩𑁆𑀩𑀺𑀲𑀗𑁆𑀓𑀸 𑀅𑀦𑁆𑀢𑁄𑀬𑁂𑀯 𑀧𑀯𑀺𑀲𑀺𑀢𑁆𑀯𑀸, 𑀅𑀤𑁆𑀤𑀲𑀁𑀲𑀼 𑀪𑀕𑀯𑀦𑁆𑀢𑀁 𑀬𑀓𑁆𑀔𑀲𑁆𑀲 𑀪𑀯𑀦𑁂 𑀦𑀺𑀲𑀺𑀦𑁆𑀦𑀁, 𑀬𑀓𑁆𑀔𑀜𑁆𑀘 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀬𑀓𑁆𑀔𑀁 𑀆𑀳𑀁𑀲𑀼 𑁋 ‘‘𑀅𑀬𑀁 𑀢𑁂, 𑀫𑀳𑀸𑀬𑀓𑁆𑀔, 𑀭𑀸𑀚𑀓𑀼𑀫𑀸𑀭𑁄 𑀩𑀮𑀺𑀓𑀫𑁆𑀫𑀸𑀬 𑀆𑀦𑀻𑀢𑁄, 𑀳𑀦𑁆𑀤 𑀦𑀁 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸, 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺. 𑀲𑁄 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀮𑀚𑁆𑀚𑀺𑀢𑁄 𑀯𑀺𑀲𑁂𑀲𑀢𑁄 𑀘 𑀪𑀕𑀯𑀢𑁄 𑀧𑀼𑀭𑀢𑁄 𑀏𑀯𑀁 𑀯𑀼𑀘𑁆𑀘𑀫𑀸𑀦𑁄, 𑀅𑀣 𑀢𑀁 𑀓𑀼𑀫𑀸𑀭𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀅𑀬𑀁 𑀪𑀦𑁆𑀢𑁂 𑀓𑀼𑀫𑀸𑀭𑁄 𑀫𑀬𑁆𑀳𑀁 𑀧𑁂𑀲𑀺𑀢𑁄, 𑀇𑀫𑀸𑀳𑀁 𑀪𑀕𑀯𑀢𑁄 𑀤𑀫𑁆𑀫𑀺, 𑀳𑀺𑀢𑀸𑀦𑀼𑀓𑀫𑁆𑀧𑀓𑀸 𑀩𑀼𑀤𑁆𑀥𑀸, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀤𑀸𑀭𑀓𑀁 𑀇𑀫𑀲𑁆𑀲 𑀳𑀺𑀢𑀢𑁆𑀣𑀸𑀬 𑀲𑀼𑀔𑀢𑁆𑀣𑀸𑀬𑀸’’𑀢𑀺. 𑀇𑀫𑀜𑁆𑀘 𑀕𑀸𑀣𑀫𑀸𑀳 𑁋

‘‘𑀇𑀫𑀁 𑀓𑀼𑀫𑀸𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁, 𑀲𑀩𑁆𑀩𑀗𑁆𑀕𑀼𑀧𑁂𑀢𑀁 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄 𑀤𑀤𑀸𑀫𑀺 𑀢𑁂, 𑀧𑀝𑀺𑀕𑁆𑀕𑀳 𑀮𑁄𑀓𑀳𑀺𑀢𑀸𑀬 𑀘𑀓𑁆𑀔𑀼𑀫𑀸’’𑀢𑀺.

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀓𑀼𑀫𑀸𑀭𑀁, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑀬𑀓𑁆𑀔𑀲𑁆𑀲 𑀘 𑀓𑀼𑀫𑀸𑀭𑀲𑁆𑀲 𑀘 𑀫𑀗𑁆𑀕𑀮𑀓𑀭𑀡𑀢𑁆𑀣𑀁 𑀧𑀸𑀤𑀽𑀦𑀕𑀸𑀣𑀁 𑀅𑀪𑀸𑀲𑀺. 𑀢𑀁 𑀬𑀓𑁆𑀔𑁄 𑀓𑀼𑀫𑀸𑀭𑀁 𑀲𑀭𑀡𑀁 𑀕𑀫𑁂𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀘𑀢𑀼𑀢𑁆𑀣𑀧𑀸𑀤𑁂𑀦 𑀧𑀽𑀭𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋

‘‘𑀤𑀻𑀖𑀸𑀬𑀼𑀓𑁄 ¶ 𑀳𑁄𑀢𑀼 𑀅𑀬𑀁 𑀓𑀼𑀫𑀸𑀭𑁄,

𑀢𑀼𑀯𑀜𑁆𑀘 𑀬𑀓𑁆𑀔 𑀲𑀼𑀔𑀺𑀢𑁄 𑀪𑀯𑀸𑀳𑀺;

𑀅𑀩𑁆𑀬𑀸𑀥𑀺𑀢𑀸 𑀮𑁄𑀓𑀳𑀺𑀢𑀸𑀬 𑀢𑀺𑀝𑁆𑀞𑀣,

𑀅𑀬𑀁 𑀓𑀼𑀫𑀸𑀭𑁄 𑀲𑀭𑀡𑀫𑀼𑀧𑁂𑀢𑀺 𑀩𑀼𑀤𑁆𑀥𑀁…𑀧𑁂… 𑀥𑀫𑁆𑀫𑀁…𑀧𑁂… 𑀲𑀗𑁆𑀖’’𑀦𑁆𑀢𑀺.

𑀪𑀕𑀯𑀸 𑀓𑀼𑀫𑀸𑀭𑀁 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀤𑀸𑀲𑀺 𑁋 ‘‘𑀇𑀫𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀦 𑀫𑀫𑁂𑀯 𑀤𑁂𑀣𑀸’’𑀢𑀺. 𑀏𑀯𑀁 𑀲𑁄 𑀓𑀼𑀫𑀸𑀭𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀢𑁄 𑀬𑀓𑁆𑀔𑀲𑁆𑀲 𑀳𑀢𑁆𑀣𑀁 𑀬𑀓𑁆𑀔𑀲𑁆𑀲 𑀳𑀢𑁆𑀣𑀢𑁄 𑀪𑀕𑀯𑀢𑁄 ¶ 𑀳𑀢𑁆𑀣𑀁, 𑀪𑀕𑀯𑀢𑁄 𑀳𑀢𑁆𑀣𑀢𑁄 𑀧𑀼𑀦 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀁 𑀕𑀢𑀢𑁆𑀢𑀸 𑀦𑀸𑀫𑀢𑁄 ‘‘𑀳𑀢𑁆𑀣𑀓𑁄 𑀆𑀴𑀯𑀓𑁄’’𑀢𑀺 𑀚𑀸𑀢𑁄. 𑀢𑀁 𑀆𑀤𑀸𑀬 𑀧𑀝𑀺𑀦𑀺𑀯𑀢𑁆𑀢𑁂 𑀭𑀸𑀚𑀧𑀼𑀭𑀺𑀲𑁂 𑀤𑀺𑀲𑁆𑀯𑀸 𑀓𑀲𑁆𑀲𑀓𑀯𑀦𑀓𑀫𑁆𑀫𑀺𑀓𑀸𑀤𑀬𑁄 ‘‘𑀓𑀺𑀁 𑀬𑀓𑁆𑀔𑁄 𑀓𑀼𑀫𑀸𑀭𑀁 𑀅𑀢𑀺𑀤𑀳𑀭𑀢𑁆𑀢𑀸 𑀦 𑀇𑀘𑁆𑀙𑀢𑀻’’𑀢𑀺 𑀪𑀻𑀢𑀸 𑀧𑀼𑀘𑁆𑀙𑀺𑀁𑀲𑀼. 𑀭𑀸𑀚𑀧𑀼𑀭𑀺𑀲𑀸 ‘‘𑀫𑀸 𑀪𑀸𑀬𑀣, 𑀔𑁂𑀫𑀁 𑀓𑀢𑀁 𑀪𑀕𑀯𑀢𑀸’’𑀢𑀺 𑀲𑀩𑁆𑀩𑀫𑀸𑀭𑁄𑀘𑁂𑀲𑀼𑀁. 𑀢𑀢𑁄 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 ¶ 𑀲𑀓𑀮𑀁 𑀆𑀴𑀯𑀻𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑁂𑀦 𑀬𑀓𑁆𑀔𑀸𑀪𑀺𑀫𑀼𑀔𑀁 𑀅𑀳𑁄𑀲𑀺. 𑀬𑀓𑁆𑀔𑁄𑀧𑀺 𑀪𑀕𑀯𑀢𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀅𑀦𑀼𑀧𑁆𑀧𑀢𑁆𑀢𑁂 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀉𑀧𑀟𑁆𑀠𑀫𑀕𑁆𑀕𑀁 𑀆𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀅𑀣 𑀪𑀕𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀕𑀭𑀤𑁆𑀯𑀸𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀺𑀯𑀺𑀢𑁆𑀢𑁂 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀢𑀢𑁄 𑀫𑀳𑀸𑀚𑀦𑀓𑀸𑀬𑁂𑀦 𑀲𑀤𑁆𑀥𑀺𑀁 𑀭𑀸𑀚𑀸 𑀘 𑀦𑀸𑀕𑀭𑀸 𑀘 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ‘‘𑀓𑀣𑀁, 𑀪𑀦𑁆𑀢𑁂, 𑀏𑀯𑀁 𑀤𑀸𑀭𑀼𑀡𑀁 𑀬𑀓𑁆𑀔𑀁 𑀤𑀫𑀬𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀬𑀼𑀤𑁆𑀥𑀫𑀸𑀤𑀺𑀁 𑀓𑀢𑁆𑀯𑀸 ‘‘𑀏𑀯𑀁 𑀦𑀯𑀯𑀺𑀥𑀯𑀲𑁆𑀲𑀁 𑀯𑀲𑁆𑀲𑀺, 𑀏𑀯𑀁 𑀯𑀺𑀪𑀺𑀁𑀲𑀦𑀓𑀁 𑀅𑀓𑀸𑀲𑀺, 𑀏𑀯𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀲𑁆𑀲𑀸𑀳𑀁 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀲𑀺’’𑀦𑁆𑀢𑀺 𑀢𑀫𑁂𑀯𑀸𑀴𑀯𑀓𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑀢𑁄 𑀭𑀸𑀚𑀸 𑀘 𑀦𑀸𑀕𑀭𑀸 𑀘 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀪𑀯𑀦𑀲𑀫𑀻𑀧𑁂 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀓𑀢𑁆𑀯𑀸 𑀧𑀼𑀧𑁆𑀨𑀕𑀦𑁆𑀥𑀸𑀤𑀺𑀲𑀓𑁆𑀓𑀸𑀭𑀽𑀧𑁂𑀢𑀁 𑀦𑀺𑀘𑁆𑀘𑀁 𑀩𑀮𑀺𑀁 𑀧𑀯𑀢𑁆𑀢𑁂𑀲𑀼𑀁. 𑀢𑀜𑁆𑀘 𑀓𑀼𑀫𑀸𑀭𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀁 ‘‘𑀢𑁆𑀯𑀁 𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺, 𑀕𑀘𑁆𑀙, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀬𑀺𑀭𑀼𑀧𑀸𑀲𑀲𑁆𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀪𑀕𑀯𑀸 𑀘 𑀦𑀁 𑀏𑀢𑀤𑀕𑁆𑀕𑁂 𑀦𑀺𑀤𑁆𑀤𑀺𑀲𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀘𑀢𑀽𑀳𑀺 ¶ 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑁆𑀢𑀸𑀦𑀁 𑀬𑀤𑀺𑀤𑀁 𑀳𑀢𑁆𑀣𑀓𑁄 𑀆𑀴𑀯𑀓𑁄’’𑀢𑀺 (𑀅 𑀦𑀺. 𑁧.𑁨𑁫𑁧).

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀆𑀴𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀯𑀺𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀘𑀭𑀁 ¶ ¶ 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀦𑁆𑀢𑀺 𑀦𑀦𑁆𑀤𑀲𑀼𑀢𑁆𑀢𑀁. ‘‘𑀯𑀺𑀚𑀬𑀲𑀼𑀢𑁆𑀢𑀁 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀺𑀓𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀤𑀁 𑀓𑀺𑀭 𑀲𑀼𑀢𑁆𑀢𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀲𑁆𑀲 𑀤𑀼𑀯𑀺𑀥𑀸 𑀉𑀧𑁆𑀧𑀢𑁆𑀢𑀺. 𑀢𑀢𑁆𑀣 𑀪𑀕𑀯𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀅𑀦𑀼𑀧𑁆𑀧𑀢𑁆𑀯𑀸, 𑀲𑀸𑀓𑀺𑀬𑁂 𑀯𑀺𑀦𑁂𑀢𑁆𑀯𑀸 𑀦𑀦𑁆𑀤𑀸𑀤𑀬𑁄 𑀧𑀩𑁆𑀩𑀸𑀚𑁂𑀢𑁆𑀯𑀸, 𑀅𑀦𑀼𑀜𑁆𑀜𑀸𑀢𑀸𑀬 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀪𑀕𑀺𑀦𑀻 𑀦𑀦𑁆𑀤𑀸, 𑀔𑁂𑀫𑀓𑀲𑀓𑁆𑀓𑀭𑀜𑁆𑀜𑁄 𑀥𑀻𑀢𑀸 𑀅𑀪𑀺𑀭𑀽𑀧𑀦𑀦𑁆𑀤𑀸, 𑀚𑀦𑀧𑀤𑀓𑀮𑁆𑀬𑀸𑀡𑀻 𑀦𑀦𑁆𑀤𑀸𑀢𑀺 𑀢𑀺𑀲𑁆𑀲𑁄 𑀦𑀦𑁆𑀤𑀸𑀬𑁄 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀪𑀺𑀭𑀽𑀧𑀦𑀦𑁆𑀤𑀸 𑀅𑀪𑀺𑀭𑀽𑀧𑀸 𑀏𑀯 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸, 𑀢𑁂𑀦𑁂𑀯𑀲𑁆𑀲𑀸 𑀅𑀪𑀺𑀭𑀽𑀧𑀦𑀦𑁆𑀤𑀸𑀢𑀺 𑀦𑀸𑀫𑀫𑀓𑀁𑀲𑀼. 𑀚𑀦𑀧𑀤𑀓𑀮𑁆𑀬𑀸𑀡𑀻 𑀦𑀦𑁆𑀤𑀸𑀧𑀺 𑀭𑀽𑀧𑁂𑀦 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀦 𑀧𑀲𑁆𑀲𑀢𑀺. 𑀢𑀸 𑀉𑀪𑁄𑀧𑀺 𑀭𑀽𑀧𑀫𑀤𑀫𑀢𑁆𑀢𑀸 ‘‘𑀪𑀕𑀯𑀸 𑀭𑀽𑀧𑀁 𑀯𑀺𑀯𑀡𑁆𑀡𑁂𑀢𑀺, 𑀕𑀭𑀳𑀢𑀺, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀭𑀽𑀧𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀻’’𑀢𑀺 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀤𑀝𑁆𑀞𑀼𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀺. 𑀏𑀯𑀁 𑀅𑀧𑁆𑀧𑀲𑀦𑁆𑀦𑀸 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑀸𑀢𑀺 𑀘𑁂? 𑀅𑀕𑀢𑀺𑀬𑀸. 𑀅𑀪𑀺𑀭𑀽𑀧𑀦𑀦𑁆𑀤𑀸𑀬 𑀳𑀺 𑀯𑀸𑀭𑁂𑀬𑁆𑀬𑀤𑀺𑀯𑀲𑁂𑀬𑁂𑀯 𑀲𑀸𑀫𑀺𑀓𑁄 𑀲𑀓𑁆𑀬𑀓𑀼𑀫𑀸𑀭𑁄 𑀓𑀸𑀮𑀫𑀓𑀸𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀓𑀸𑀫𑀓𑀁 𑀧𑀩𑁆𑀩𑀸𑀚𑁂𑀲𑀼𑀁. 𑀚𑀦𑀧𑀤𑀓𑀮𑁆𑀬𑀸𑀡𑀻 𑀦𑀦𑁆𑀤𑀸𑀧𑀺 𑀆𑀬𑀲𑁆𑀫𑀦𑁆𑀢𑁂 𑀦𑀦𑁆𑀤𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀦𑀺𑀭𑀸𑀲𑀸 𑀳𑀼𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀸𑀫𑀺𑀓𑁄 𑀘 𑀫𑀸𑀢𑀸 𑀘 𑀫𑀳𑀸𑀧𑀚𑀸𑀧𑀢𑀺 𑀅𑀜𑁆𑀜𑁂 𑀘 𑀜𑀸𑀢𑀓𑀸 𑀧𑀩𑁆𑀩𑀚𑀺𑀢𑀸, 𑀜𑀸𑀢𑀻𑀳𑀺 𑀯𑀺𑀦𑀸 𑀤𑀼𑀓𑁆𑀔𑁄 𑀖𑀭𑀸𑀯𑀸𑀲𑁄’’𑀢𑀺 𑀖𑀭𑀸𑀯𑀸𑀲𑁂 𑀅𑀲𑁆𑀲𑀸𑀤𑀫𑀮𑀪𑀦𑁆𑀢𑀻 𑀧𑀩𑁆𑀩𑀚𑀺𑀢𑀸, 𑀦 𑀲𑀤𑁆𑀥𑀸𑀬.

𑀅𑀣 𑀪𑀕𑀯𑀸 𑀢𑀸𑀲𑀁 𑀜𑀸𑀡𑀧𑀭𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀆𑀡𑀸𑀧𑁂𑀲𑀺 ‘‘𑀲𑀩𑁆𑀩𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀑𑀯𑀸𑀤𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 ¶ . 𑀢𑀸 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑀁 𑀧𑁂𑀲𑁂𑀦𑁆𑀢𑀺. 𑀢𑀢𑁄 𑀪𑀕𑀯𑀸 ‘‘𑀲𑀫𑁆𑀧𑀢𑁆𑀢𑁂 𑀯𑀸𑀭𑁂 𑀅𑀢𑁆𑀢𑀦𑀸𑀯 ¶ 𑀆𑀕𑀦𑁆𑀢𑀩𑁆𑀩𑀁, 𑀦 𑀅𑀜𑁆𑀜𑀸 𑀧𑁂𑀲𑁂𑀢𑀩𑁆𑀩𑀸’’𑀢𑀺 𑀆𑀳. 𑀅𑀣𑁂𑀓𑀤𑀺𑀯𑀲𑀁 𑀅𑀪𑀺𑀭𑀽𑀧𑀦𑀦𑁆𑀤𑀸 𑀅𑀕𑀫𑀸𑀲𑀺. 𑀢𑀁 𑀪𑀕𑀯𑀸 𑀦𑀺𑀫𑁆𑀫𑀺𑀢𑀭𑀽𑀧𑁂𑀦 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀅𑀝𑁆𑀞𑀻𑀦𑀁 𑀦𑀕𑀭𑀁 𑀓𑀢’’𑀦𑁆𑀢𑀺 𑀇𑀫𑀸𑀬 𑀥𑀫𑁆𑀫𑀧𑀤𑀕𑀸𑀣𑀸𑀬 𑁋

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀧𑀢𑁆𑀣𑀺𑀢𑀁. (𑀣𑁂𑀭𑀻𑀕𑀸. 𑁧𑁯);

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 ¶ 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺. (𑀲𑀼. 𑀦𑀺. 𑁩𑁪𑁪; 𑀣𑁂𑀭𑀻𑀕𑀸. 𑁨𑁦) 𑁋

𑀇𑀫𑀸𑀳𑀺 𑀣𑁂𑀭𑀻𑀕𑀸𑀣𑀸𑀳𑀺 𑀘 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑀸 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀧𑀭𑀺𑀬𑁄𑀲𑀸𑀦𑁂 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀧𑀺 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀕𑀯𑀢𑁄 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀘𑀢𑀼𑀧𑁆𑀧𑀫𑀸𑀡𑀺𑀓𑁂 𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀅𑀧𑁆𑀧𑀲𑀻𑀤𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀭𑀽𑀧𑀧𑁆𑀧𑀫𑀸𑀡𑀺𑀓𑀸 𑀳𑀺 𑀧𑀼𑀕𑁆𑀕𑀮𑀸 𑀪𑀕𑀯𑀢𑁄 𑀮𑀓𑁆𑀔𑀡𑀔𑀘𑀺𑀢𑀫𑀦𑀼𑀩𑁆𑀬𑀜𑁆𑀚𑀦𑀯𑀺𑀘𑀺𑀢𑁆𑀭𑀁 𑀲𑀫𑀼𑀚𑁆𑀚𑀮𑀺𑀢𑀓𑁂𑀢𑀼𑀫𑀸𑀮𑀸𑀩𑁆𑀬𑀸𑀫𑀧𑁆𑀧𑀪𑀸𑀯𑀺𑀦𑀤𑁆𑀥𑀫𑀮𑀗𑁆𑀓𑀸𑀭𑀢𑁆𑀣𑀫𑀺𑀯 𑀮𑁄𑀓𑀲𑁆𑀲 𑀲𑀫𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀲𑀻𑀤𑀦𑁆𑀢𑀺, 𑀖𑁄𑀲𑀧𑁆𑀧𑀫𑀸𑀡𑀺𑀓𑀸 𑀅𑀦𑁂𑀓𑀲𑀢𑁂𑀲𑀼 𑀚𑀸𑀢𑀓𑁂𑀲𑀼 𑀓𑀺𑀢𑁆𑀢𑀺𑀖𑁄𑀲𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀓𑀭𑀯𑀻𑀓𑀫𑀥𑀼𑀭𑀦𑀺𑀕𑁆𑀖𑁄𑀲𑀁 𑀩𑁆𑀭𑀳𑁆𑀫𑀲𑁆𑀲𑀭𑀜𑁆𑀘 𑀲𑀼𑀢𑁆𑀯𑀸, 𑀮𑀽𑀔𑀧𑁆𑀧𑀫𑀸𑀡𑀺𑀓𑀸 𑀧𑀢𑁆𑀢𑀘𑀻𑀯𑀭𑀸𑀤𑀺𑀮𑀽𑀔𑀢𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀮𑀽𑀔𑀢𑀁 𑀯𑀸 𑀤𑀺𑀲𑁆𑀯𑀸, 𑀥𑀫𑁆𑀫𑀧𑁆𑀧𑀫𑀸𑀡𑀺𑀓𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀥𑀫𑁆𑀫𑀓𑁆𑀔𑀦𑁆𑀥𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀢𑀲𑁆𑀫𑀸 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀪𑀕𑀯𑀢𑁄 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀚𑀦𑀧𑀤𑀓𑀮𑁆𑀬𑀸𑀡𑀻 𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀺𑀧𑀲𑁆𑀲𑀬𑀁 𑀧𑀢𑁆𑀯𑀸𑀧𑀺 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀪𑀕𑀯𑀢𑁄 𑀯𑀡𑁆𑀡𑀁 𑀪𑀸𑀲𑀦𑁆𑀢𑀸𑀦𑀁 ¶ 𑀢𑁂𑀲𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀕𑀦𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀪𑀕𑀯𑀸 𑀧𑀝𑀺𑀓𑀘𑁆𑀘𑁂𑀯 𑀢𑀲𑁆𑀲𑀸𑀕𑀫𑀦𑀁 𑀯𑀺𑀤𑀺𑀢𑁆𑀯𑀸 𑀓𑀡𑁆𑀝𑀓𑁂𑀦 𑀓𑀡𑁆𑀝𑀓𑀁, 𑀆𑀡𑀺𑀬𑀸 𑀘 𑀆𑀡𑀺𑀁 𑀦𑀻𑀳𑀭𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀭𑀽𑀧𑁂𑀦𑁂𑀯 𑀭𑀽𑀧𑀫𑀤𑀁 𑀯𑀺𑀦𑁂𑀢𑀼𑀁 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀅𑀢𑀺𑀤𑀲𑁆𑀲𑀦𑀻𑀬𑀁 𑀇𑀢𑁆𑀣𑀺𑀁 𑀧𑀲𑁆𑀲𑁂 𑀞𑀢𑁆𑀯𑀸 𑀩𑀻𑀚𑀫𑀸𑀦𑀁 𑀅𑀪𑀺𑀦𑀺𑀫𑁆𑀫𑀺𑀦𑀺. 𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀸𑀤𑀢𑀮𑀸 𑀧𑀪𑀼𑀢𑀺 𑀬𑀸𑀯 𑀓𑁂𑀲𑀕𑁆𑀕𑀸 𑀪𑀕𑀯𑀢𑁄 ¶ 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀼𑀦 𑀢𑀁 𑀪𑀕𑀯𑀢𑁄 𑀧𑀲𑁆𑀲𑁂 𑀞𑀺𑀢𑀁 𑀦𑀺𑀫𑁆𑀫𑀢𑀭𑀽𑀧𑀜𑁆𑀘 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀬𑀁 𑀇𑀢𑁆𑀣𑀻 𑀭𑀽𑀧𑀯𑀢𑀻’’𑀢𑀺 𑀅𑀢𑁆𑀢𑀦𑁄 𑀭𑀽𑀧𑀫𑀤𑀁 𑀚𑀳𑀺𑀢𑁆𑀯𑀸 𑀢𑀲𑁆𑀲𑀸 𑀭𑀽𑀧𑁂 𑀅𑀪𑀺𑀭𑀢𑁆𑀢𑀪𑀸𑀯𑀸 𑀅𑀳𑁄𑀲𑀺. 𑀢𑀢𑁄 𑀪𑀕𑀯𑀸 𑀢𑀁 𑀇𑀢𑁆𑀣𑀺𑀁 𑀯𑀻𑀲𑀢𑀺𑀯𑀲𑁆𑀲𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀫𑀸𑀢𑀼𑀕𑀸𑀫𑁄 𑀳𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄𑀬𑁂𑀯 𑀲𑁄𑀪𑀢𑀺, 𑀦 𑀢𑀢𑁄 𑀉𑀤𑁆𑀥𑀁. 𑀅𑀣 𑀢𑀲𑁆𑀲𑀸 𑀭𑀽𑀧𑀧𑀭𑀺𑀳𑀸𑀦𑀺𑀁 𑀤𑀺𑀲𑁆𑀯𑀸 𑀦𑀦𑁆𑀤𑀸𑀬 𑀢𑀲𑁆𑀫𑀺𑀁 𑀭𑀽𑀧𑁂 𑀙𑀦𑁆𑀤𑀭𑀸𑀕𑁄 𑀢𑀦𑀼𑀓𑁄 𑀅𑀳𑁄𑀲𑀺. 𑀢𑀢𑁄 𑀪𑀕𑀯𑀸 𑀅𑀯𑀺𑀚𑀸𑀢𑀯𑀡𑁆𑀡𑀁, 𑀲𑀓𑀺𑀁𑀯𑀺𑀚𑀸𑀢𑀯𑀡𑁆𑀡𑀁, 𑀫𑀚𑁆𑀛𑀺𑀫𑀺𑀢𑁆𑀣𑀺𑀯𑀡𑁆𑀡𑀁, 𑀫𑀳𑀺𑀢𑁆𑀣𑀺𑀯𑀡𑁆𑀡𑀦𑁆𑀢𑀺 𑀏𑀯𑀁 𑀬𑀸𑀯 𑀯𑀲𑁆𑀲𑀲𑀢𑀺𑀓𑀁 𑀑𑀪𑀕𑁆𑀕𑀁 𑀤𑀡𑁆𑀟𑀧𑀭𑀸𑀬𑀡𑀁 𑀢𑀺𑀮𑀓𑀸𑀳𑀢𑀕𑀢𑁆𑀢𑀁 𑀓𑀢𑁆𑀯𑀸, 𑀤𑀲𑁆𑀲𑁂𑀢𑁆𑀯𑀸 𑀧𑀲𑁆𑀲𑀫𑀸𑀦𑀸𑀬𑁂𑀯 𑀦𑀦𑁆𑀤𑀸𑀬 𑀢𑀲𑁆𑀲𑀸 𑀫𑀭𑀡𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑁂𑀤𑀁 𑀓𑀸𑀓𑀸𑀤𑀻𑀳𑀺 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀔𑀚𑁆𑀚𑀫𑀸𑀦𑀁 𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀪𑀸𑀯𑀜𑁆𑀘 𑀤𑀲𑁆𑀲𑁂𑀲𑀺 ¶ . 𑀦𑀦𑁆𑀤𑀸𑀬 𑀢𑀁 𑀓𑀫𑀁 𑀤𑀺𑀲𑁆𑀯𑀸 ‘‘𑀏𑀯𑀫𑁂𑀯𑀁 𑀫𑀫𑀧𑀺 𑀅𑀜𑁆𑀜𑁂𑀲𑀫𑁆𑀧𑀺 𑀲𑀩𑁆𑀩𑀲𑀸𑀥𑀸𑀭𑀡𑁄 𑀅𑀬𑀁 𑀓𑀫𑁄’’𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸 𑀲𑀡𑁆𑀞𑀸𑀲𑀺, 𑀢𑀤𑀦𑀼𑀲𑀸𑀭𑁂𑀦 𑀘 𑀤𑀼𑀓𑁆𑀔𑀦𑀢𑁆𑀢𑀲𑀜𑁆𑀜𑀸𑀧𑀺, 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀫𑀺𑀯 𑀅𑀕𑀸𑀭𑀁 𑀅𑀧𑁆𑀧𑀝𑀺𑀲𑀭𑀡𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀅𑀣 𑀪𑀕𑀯𑀸 ‘‘𑀓𑀫𑁆𑀫𑀝𑁆𑀞𑀸𑀦𑁂 𑀧𑀓𑁆𑀔𑀦𑁆𑀢𑀁 𑀦𑀦𑁆𑀤𑀸𑀬 𑀘𑀺𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀢𑀲𑁆𑀲𑀸 𑀲𑀧𑁆𑀧𑀸𑀬𑀯𑀲𑁂𑀦 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀆𑀢𑀼𑀭𑀁 ¶ 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀧𑀢𑁆𑀣𑀺𑀢𑀁. (𑀣𑁂𑀭𑀻𑀕𑀸. 𑁧𑁯);

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀥𑀸𑀢𑀼𑀲𑁄 𑀲𑀼𑀜𑁆𑀜𑀢𑁄 𑀧𑀲𑁆𑀲, 𑀫𑀸 𑀮𑁄𑀓𑀁 𑀧𑀼𑀦𑀭𑀸𑀕𑀫𑀺;

𑀪𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺. (𑀲𑀼. 𑀦𑀺. 𑁨𑁦𑁫);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀦𑀦𑁆𑀤𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀪𑀕𑀯𑀸 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀁 𑀲𑀼𑀜𑁆𑀜𑀢𑀧𑀭𑀺𑀯𑀸𑀭𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺. 𑀅𑀬𑀁 𑀢𑀸𑀯𑀲𑁆𑀲 𑀏𑀓𑀸 𑀉𑀧𑁆𑀧𑀢𑁆𑀢𑀺.

𑀪𑀕𑀯𑀢𑀺 𑀧𑀦 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂 𑀬𑀸 𑀲𑀸 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁨𑁬) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀥𑀻𑀢𑀸 𑀚𑀻𑀯𑀓𑀲𑁆𑀲 𑀓𑀦𑀺𑀝𑁆𑀞𑀸 𑀲𑀺𑀭𑀺𑀫𑀸 𑀦𑀸𑀫 𑀫𑀸𑀢𑀼 𑀅𑀘𑁆𑀘𑀬𑁂𑀦 𑀢𑀁 𑀞𑀸𑀦𑀁 𑀮𑀪𑀺𑀢𑁆𑀯𑀸 ‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥’’𑀦𑁆𑀢𑀺 (𑀥. 𑀧. 𑁨𑁨𑁩; 𑀚𑀸. 𑁧.𑁨.𑁧) 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀢𑁆𑀣𑀼𑀫𑁆𑀳𑀺 𑀧𑀼𑀡𑁆𑀡𑀓𑀲𑁂𑀝𑁆𑀞𑀺𑀥𑀻𑀢𑀭𑀁 𑀅𑀯𑀫𑀜𑁆𑀜𑀺𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀦𑁆𑀢𑀻 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸, 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀅𑀝𑁆𑀞 𑀦𑀺𑀘𑁆𑀘𑀪𑀢𑁆𑀢𑀸𑀦𑀺 ¶ 𑀧𑀯𑀢𑁆𑀢𑁂𑀲𑀺. 𑀢𑀁 𑀆𑀭𑀩𑁆𑀪 𑀅𑀜𑁆𑀜𑀢𑀭𑁄 𑀦𑀺𑀘𑁆𑀘𑀪𑀢𑁆𑀢𑀺𑀓𑁄 𑀪𑀺𑀓𑁆𑀔𑀼 𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀆𑀳𑀸𑀭𑀓𑀺𑀘𑁆𑀘𑀫𑁆𑀧𑀺 𑀘 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀭𑀸𑀳𑀸𑀭𑁄 𑀦𑀺𑀧𑀚𑁆𑀚𑀻𑀢𑀺 𑀥𑀫𑁆𑀫𑀧𑀤𑀕𑀸𑀣𑀸𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀢𑀣𑀸𑀦𑀺𑀧𑀦𑁆𑀦𑁂𑀬𑁂𑀯 𑀲𑀺𑀭𑀺𑀫𑀸 𑀓𑀸𑀮𑀁 𑀓𑀢𑁆𑀯𑀸 𑀬𑀸𑀫𑀪𑀯𑀦𑁂 𑀲𑀼𑀬𑀸𑀫𑀲𑁆𑀲 𑀤𑁂𑀯𑀻 𑀅𑀳𑁄𑀲𑀺. 𑀅𑀣 𑀢𑀲𑁆𑀲𑀸 𑀲𑀭𑀻𑀭𑀲𑁆𑀲 𑀅𑀕𑁆𑀕𑀺𑀓𑀺𑀘𑁆𑀘𑀁 𑀦𑀺𑀯𑀸𑀭𑁂𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀭𑀜𑁆𑀜𑀸 𑀦𑀺𑀓𑁆𑀔𑀺𑀧𑀸𑀧𑀺𑀢𑀁 𑀲𑀭𑀻𑀭𑀁 𑀤𑀲𑁆𑀲𑀦𑀸𑀬 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺, 𑀢𑀫𑁆𑀧𑀺 𑀪𑀺𑀓𑁆𑀔𑀼𑀁 𑀆𑀤𑀸𑀬, 𑀢𑀣𑀸 𑀦𑀸𑀕𑀭𑀸 𑀘 𑀭𑀸𑀚𑀸 𑀘. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀪𑀡𑀦𑁆𑀢𑀺 ‘‘𑀧𑀼𑀩𑁆𑀩𑁂 𑀲𑀺𑀭𑀺𑀫𑀸𑀬 𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑁂𑀦𑀸𑀧𑀺 𑀤𑀲𑁆𑀲𑀦𑀁 𑀤𑀼𑀮𑁆𑀮𑀪𑀁 ¶ , 𑀢𑀁 𑀤𑀸𑀦𑀚𑁆𑀚 𑀓𑀸𑀓𑀡𑀺𑀓𑀸𑀬𑀸𑀧𑀺 𑀤𑀝𑁆𑀞𑀼𑀓𑀸𑀫𑁄 𑀦𑀢𑁆𑀣𑀻’’𑀢𑀺. 𑀲𑀺𑀭𑀺𑀫𑀸𑀧𑀺 𑀤𑁂𑀯𑀓𑀜𑁆𑀜𑀸 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀢𑀢𑁆𑀭𑀸𑀕𑀫𑀸𑀲𑀺. 𑀢𑀢𑁆𑀭𑀸𑀧𑀺 𑀪𑀕𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀑𑀯𑀸𑀤𑀢𑁆𑀣𑀁 ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩’’𑀦𑁆𑀢𑀺 (𑀥. 𑀧. 𑁧𑁪𑁭) 𑀇𑀫𑀜𑁆𑀘 𑀥𑀫𑁆𑀫𑀧𑀤𑀕𑀸𑀣𑀁 𑀅𑀪𑀸𑀲𑀺. 𑀅𑀬𑀫𑀲𑁆𑀲 𑀤𑀼𑀢𑀺𑀬𑀸 𑀉𑀧𑁆𑀧𑀢𑁆𑀢𑀺.

𑁧𑁯𑁫. 𑀢𑀢𑁆𑀣 ¶ 𑀘𑀭𑀁 𑀯𑀸𑀢𑀺 𑀲𑀓𑀮𑀭𑀽𑀧𑀓𑀸𑀬𑀲𑁆𑀲 𑀕𑀦𑁆𑀢𑀩𑁆𑀩𑀤𑀺𑀲𑀸𑀪𑀺𑀫𑀼𑀔𑁂𑀦𑀸𑀪𑀺𑀦𑀻𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑁄 𑀯𑀸. 𑀬𑀤𑀺 𑀯𑀸 𑀢𑀺𑀝𑁆𑀞𑀦𑁆𑀢𑀺 𑀢𑀲𑁆𑀲𑁂𑀯 𑀉𑀲𑁆𑀲𑀸𑀧𑀦𑀪𑀸𑀯𑁂𑀦 𑀢𑀺𑀝𑁆𑀞𑀦𑁆𑀢𑁄 𑀯𑀸. 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀦𑁆𑀢𑀺 𑀢𑀲𑁆𑀲𑁂𑀯 𑀳𑁂𑀝𑁆𑀞𑀺𑀫𑀪𑀸𑀕𑀲𑀫𑀺𑀜𑁆𑀚𑀦𑀉𑀧𑀭𑀺𑀫𑀪𑀸𑀕𑀲𑀫𑀼𑀲𑁆𑀲𑀸𑀧𑀦𑀪𑀸𑀯𑁂𑀦 𑀦𑀺𑀲𑀺𑀦𑁆𑀦𑁄 𑀯𑀸, 𑀢𑀺𑀭𑀺𑀬𑀁 𑀧𑀲𑀸𑀭𑀡𑀪𑀸𑀯𑁂𑀦 𑀲𑀬𑀦𑁆𑀢𑁄 𑀯𑀸. 𑀲𑀫𑀺𑀜𑁆𑀚𑁂𑀢𑀺 𑀧𑀲𑀸𑀭𑁂𑀢𑀻𑀢𑀺 𑀢𑀸𑀦𑀺 𑀢𑀸𑀦𑀺 𑀧𑀩𑁆𑀩𑀸𑀦𑀺 𑀲𑀫𑀺𑀜𑁆𑀚𑁂𑀢𑀺 𑀘 𑀧𑀲𑀸𑀭𑁂𑀢𑀺 𑀘.

𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸𑀢𑀺 𑀲𑀩𑁆𑀩𑀸𑀧𑁂𑀲𑀸 𑀇𑀫𑀲𑁆𑀲𑁂𑀯 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸 𑀘𑀮𑀦𑀸 𑀨𑀦𑁆𑀤𑀦𑀸, 𑀦𑀢𑁆𑀣𑁂𑀢𑁆𑀣 𑀅𑀜𑁆𑀜𑁄 𑀓𑁄𑀘𑀺 𑀘𑀭𑀦𑁆𑀢𑁄 𑀯𑀸 𑀧𑀲𑀸𑀭𑁂𑀦𑁆𑀢𑁄 𑀯𑀸, 𑀅𑀧𑀺𑀘 𑀔𑁄 𑀧𑀦 ‘‘𑀘𑀭𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀓𑀸𑀬𑀁 𑀨𑀭𑀢𑀺, 𑀢𑁂𑀦𑀲𑁆𑀲 𑀕𑀦𑁆𑀢𑀩𑁆𑀩𑀤𑀺𑀲𑀸𑀪𑀺𑀫𑀼𑀔𑁄 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺, 𑀤𑁂𑀲𑀦𑁆𑀢𑀭𑁂 𑀭𑀽𑀧𑀦𑁆𑀢𑀭𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀘𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀢𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀓𑀸𑀬𑀁 𑀨𑀭𑀢𑀺, 𑀢𑁂𑀦𑀲𑁆𑀲 𑀲𑀫𑀼𑀲𑁆𑀲𑀸𑀧𑀦𑀁 𑀳𑁄𑀢𑀺, 𑀉𑀧𑀭𑀽𑀧𑀭𑀺𑀝𑁆𑀞𑀸𑀦𑁂𑀦 𑀭𑀽𑀧𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀢𑀺𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀦𑀺𑀲𑀻𑀤𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀓𑀸𑀬𑀁 𑀨𑀭𑀢𑀺, 𑀢𑁂𑀦𑀲𑁆𑀲 𑀳𑁂𑀝𑁆𑀞𑀺𑀫𑀪𑀸𑀕𑀲𑀫𑀺𑀜𑁆𑀚𑀦𑀜𑁆𑀘 𑀉𑀧𑀭𑀺𑀫𑀪𑀸𑀕𑀲𑀫𑀼𑀲𑁆𑀲𑀸𑀧𑀦𑀜𑁆𑀘 𑀳𑁄𑀢𑀺, 𑀢𑀣𑀸𑀪𑀸𑀯𑁂𑀦 𑀭𑀽𑀧𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀲𑀬𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑁂 𑀢𑀁𑀲𑀫𑀼𑀝𑁆𑀞𑀸𑀦𑀸 ¶ 𑀯𑀸𑀬𑁄𑀥𑀸𑀢𑀼 𑀓𑀸𑀬𑀁 𑀨𑀭𑀢𑀺, 𑀢𑁂𑀦𑀲𑁆𑀲 𑀢𑀺𑀭𑀺𑀬𑀁 𑀧𑀲𑀸𑀭𑀡𑀁 𑀳𑁄𑀢𑀺, 𑀢𑀣𑀸𑀪𑀸𑀯𑁂𑀦 𑀭𑀽𑀧𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀲𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀏𑀯𑀁 𑀘𑀸𑀬𑀫𑀸𑀬𑀲𑁆𑀫𑀸 𑀬𑁄 𑀓𑁄𑀘𑀺 𑀇𑀢𑁆𑀣𑀦𑁆𑀦𑀸𑀫𑁄 𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁 𑀬𑀫𑁂𑀢𑀁 ¶ 𑀢𑀢𑁆𑀣 𑀢𑀢𑁆𑀣 𑀇𑀭𑀺𑀬𑀸𑀧𑀣𑁂 𑀢𑁂𑀲𑀁 𑀢𑁂𑀲𑀁 𑀧𑀩𑁆𑀩𑀸𑀦𑀁 𑀲𑀫𑀺𑀜𑁆𑀚𑀦𑀧𑁆𑀧𑀲𑀸𑀭𑀡𑀯𑀲𑁂𑀦 𑀲𑀫𑀺𑀜𑁆𑀚𑁂𑀢𑀺 𑀧𑀲𑀸𑀭𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀫𑁆𑀧𑀺 𑀬𑀲𑁆𑀫𑀸 𑀲𑀫𑀺𑀜𑁆𑀚𑀦𑀧𑁆𑀧𑀲𑀸𑀭𑀡𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀳𑁄𑀢𑀺, 𑀢𑀲𑁆𑀫𑀸 𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸, 𑀦𑀢𑁆𑀣𑁂𑀢𑁆𑀣 𑀅𑀜𑁆𑀜𑁄 𑀓𑁄𑀘𑀺, 𑀲𑀼𑀜𑁆𑀜𑀫𑀺𑀤𑀁 𑀓𑁂𑀦𑀘𑀺 𑀘𑀭𑀦𑁆𑀢𑁂𑀦 𑀯𑀸 𑀧𑀲𑀸𑀭𑁂𑀦𑁆𑀢𑁂𑀦 𑀯𑀸 𑀲𑀢𑁆𑀢𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀓𑁂𑀯𑀮𑀁 𑀧𑀦 𑁋

‘‘𑀘𑀺𑀢𑁆𑀢𑀦𑀸𑀦𑀢𑁆𑀢𑀫𑀸𑀕𑀫𑁆𑀫, 𑀦𑀸𑀦𑀢𑁆𑀢𑀁 𑀳𑁄𑀢𑀺 𑀯𑀸𑀬𑀼𑀦𑁄;

𑀯𑀸𑀬𑀼𑀦𑀸𑀦𑀢𑁆𑀢𑀢𑁄 𑀦𑀸𑀦𑀸, 𑀳𑁄𑀢𑀺 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸’’𑀢𑀺. 𑁋

𑀅𑀬𑀫𑁂𑀢𑁆𑀣 𑀧𑀭𑀫𑀢𑁆𑀣𑁄.

𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 𑀪𑀕𑀯𑀸 𑀬𑀲𑁆𑀫𑀸 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀘𑀺𑀭𑀯𑀺𑀦𑀺𑀬𑁄𑀕𑁂𑀦 𑀓𑀸𑀬𑀧𑀻𑀴𑀦𑀁 𑀳𑁄𑀢𑀺, 𑀢𑀲𑁆𑀲 𑀘 𑀯𑀺𑀦𑁄𑀤𑀦𑀢𑁆𑀣𑀁 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀁 𑀓𑀭𑀻𑀬𑀢𑀺, 𑀢𑀲𑁆𑀫𑀸 ‘‘𑀘𑀭𑀁 𑀯𑀸’’𑀢𑀺𑀆𑀤𑀻𑀳𑀺 𑀇𑀭𑀺𑀬𑀸𑀧𑀣𑀧𑀝𑀺𑀘𑁆𑀙𑀦𑁆𑀦𑀁 𑀤𑀼𑀓𑁆𑀔𑀮𑀓𑁆𑀔𑀡𑀁 𑀤𑀻𑀧𑁂𑀢𑀺, 𑀢𑀣𑀸 𑀘𑀭𑀡𑀓𑀸𑀮𑁂 𑀞𑀸𑀦𑀸𑀤𑀻𑀦𑀫𑀪𑀸𑀯𑀢𑁄 𑀲𑀩𑁆𑀩𑀫𑁂𑀢𑀁 𑀘𑀭𑀡𑀸𑀤𑀺𑀪𑁂𑀤𑀁 ¶ ‘‘𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸’’𑀢𑀺 𑀪𑀡𑀦𑁆𑀢𑁄 𑀲𑀦𑁆𑀢𑀢𑀺𑀧𑀝𑀺𑀘𑁆𑀙𑀦𑁆𑀦𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁. 𑀢𑀸𑀬 𑀢𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀯𑀢𑁆𑀢𑀸𑀬 ‘‘𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸’’𑀢𑀺 𑀘 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑁂𑀦 𑀪𑀡𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀸𑀖𑀦𑀧𑀝𑀺𑀘𑁆𑀙𑀦𑁆𑀦𑀁 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀻𑀧𑁂𑀢𑀺.

𑁧𑁯𑁬. 𑀏𑀯𑀁 𑀮𑀓𑁆𑀔𑀡𑀢𑁆𑀢𑀬𑀤𑀻𑀧𑀦𑁂𑀦 𑀲𑀼𑀜𑁆𑀜𑀢𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑀤𑀲𑁆𑀲𑀦𑀢𑁆𑀣𑀁 ‘‘𑀅𑀝𑁆𑀞𑀺𑀦𑀳𑀸𑀭𑀼𑀲𑀁𑀬𑀼𑀢𑁆𑀢𑁄’’𑀢𑀺 𑀆𑀭𑀪𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀘𑁂𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸, 𑀲𑁆𑀯𑀸𑀬𑀁 𑀓𑀸𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀡𑁆𑀡𑀦𑀸𑀬𑀁 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀪𑁂𑀤𑁂𑀦 𑀅𑀩𑁆𑀬𑀸𑀧𑀸𑀭𑀦𑀬𑁂𑀦 𑀘 𑀧𑀓𑀸𑀲𑀺𑀢𑁂𑀳𑀺 𑀲𑀝𑁆𑀞𑀸𑀥𑀺𑀓𑁂𑀳𑀺 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀦𑀯𑀳𑀺 𑀦𑁆𑀳𑀸𑀭𑀼𑀲𑀢𑁂𑀳𑀺 𑀘 𑀲𑀁𑀬𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀺𑀦𑀳𑀸𑀭𑀼𑀲𑀁𑀬𑀼𑀢𑁆𑀢𑁄. 𑀢𑀢𑁆𑀣𑁂𑀯 𑀧𑀓𑀸𑀲𑀺𑀢𑁂𑀦 𑀅𑀕𑁆𑀕𑀧𑀸𑀤𑀗𑁆𑀕𑀼𑀮𑀺𑀢𑀘𑀸𑀤𑀺𑀦𑀸 ¶ 𑀢𑀘𑁂𑀦 𑀘 𑀦𑀯𑀧𑁂𑀲𑀺𑀲𑀢𑀧𑁆𑀧𑀪𑁂𑀤𑁂𑀦 𑀘 𑀫𑀁𑀲𑁂𑀦 𑀅𑀯𑀮𑀺𑀢𑁆𑀢𑀢𑁆𑀢𑀸 𑀢𑀘𑀫𑀁𑀲𑀸𑀯𑀮𑁂𑀧𑀦𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 ¶ . 𑀓𑀺𑀜𑁆𑀘𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑀁 𑀲𑀺𑀬𑀸, 𑀬𑀤𑀺 𑀏𑀲 𑀬𑀸 𑀲𑀸 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀓𑀮𑀲𑀭𑀻𑀭𑀢𑁄 𑀲𑀁𑀓𑀟𑁆𑀠𑀺𑀢𑀸 𑀩𑀤𑀭𑀝𑁆𑀞𑀺𑀧𑁆𑀧𑀫𑀸𑀡𑀸 𑀪𑀯𑁂𑀬𑁆𑀬, 𑀢𑀸𑀬 𑀫𑀓𑁆𑀔𑀺𑀓𑀸𑀧𑀢𑁆𑀢𑀲𑀼𑀔𑀼𑀫𑀘𑁆𑀙𑀯𑀺𑀬𑀸 𑀦𑀻𑀮𑀸𑀤𑀺𑀭𑀗𑁆𑀕𑀚𑀸𑀢𑁂𑀦 𑀕𑁂𑀳𑀪𑀺𑀢𑁆𑀢𑀺 𑀯𑀺𑀬 𑀧𑀝𑀺𑀘𑁆𑀙𑀦𑁆𑀦𑁄 𑀦 𑀪𑀯𑁂𑀬𑁆𑀬, 𑀅𑀬𑀁 𑀧𑀦 𑀏𑀯𑀁 𑀲𑀼𑀔𑀼𑀫𑀸𑀬𑀧𑀺 𑀙𑀯𑀺𑀬𑀸 𑀓𑀸𑀬𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀜𑁆𑀜𑀸𑀘𑀓𑁆𑀔𑀼𑀯𑀺𑀭𑀳𑀺𑀢𑁂𑀳𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁂𑀳𑀺 𑀬𑀣𑀸𑀪𑀽𑀢𑀁 𑀦 𑀤𑀺𑀲𑁆𑀲𑀢𑀺. 𑀙𑀯𑀺𑀭𑀸𑀕𑀭𑀜𑁆𑀚𑀺𑀢𑁄 𑀳𑀺𑀲𑁆𑀲 𑀧𑀭𑀫𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀥𑀫𑁆𑀫𑀲𑀗𑁆𑀔𑀸𑀢𑁄 𑀢𑀘𑁄𑀧𑀺 𑀢𑀘𑀧𑀮𑀺𑀯𑁂𑀞𑀺𑀢𑀁 𑀬𑀁 𑀢𑀁 𑀧𑀪𑁂𑀤𑀢𑁄 𑁋

‘‘𑀦𑀯𑀧𑁂𑀲𑀺𑀲𑀢𑀸 𑀫𑀁𑀲𑀸, 𑀅𑀯𑀮𑀺𑀢𑁆𑀢𑀸 𑀓𑀴𑁂𑀯𑀭𑁂;

𑀦𑀸𑀦𑀸𑀓𑀺𑀫𑀺𑀓𑀼𑀮𑀸𑀓𑀺𑀡𑁆𑀡𑀁, 𑀫𑀺𑀴𑁆𑀳𑀝𑁆𑀞𑀸𑀦𑀁𑀯 𑀧𑀽𑀢𑀺𑀓𑀸’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀁 𑀦𑀯𑀫𑀁𑀲𑀲𑀢𑀫𑁆𑀧𑀺, 𑀫𑀁𑀲𑀸𑀯𑀮𑀺𑀢𑁆𑀢𑀸 𑀬𑁂 𑀢𑁂 𑁋

‘‘𑀦𑀯𑀦𑁆𑀳𑀸𑀭𑀼𑀲𑀢𑀸 𑀳𑁄𑀦𑁆𑀢𑀺, 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂;

𑀩𑀦𑁆𑀥𑀦𑁆𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀢𑀁, 𑀅𑀕𑀸𑀭𑀫𑀺𑀯 𑀯𑀮𑁆𑀮𑀺𑀬𑀸’’𑀢𑀺. 𑁋

𑀢𑁂𑀧𑀺, 𑀦𑁆𑀳𑀸𑀭𑀼𑀲𑀫𑀼𑀝𑁆𑀞𑀺𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀅𑀯𑀝𑁆𑀞𑀺𑀢𑀸𑀦𑀺 𑀧𑀽𑀢𑀻𑀦𑀺 𑀤𑀼𑀕𑁆𑀕𑀦𑁆𑀥𑀸𑀦𑀺 𑀢𑀻𑀡𑀺 𑀲𑀝𑁆𑀞𑀸𑀥𑀺𑀓𑀸𑀦𑀺 𑀅𑀝𑁆𑀞𑀺𑀲𑀢𑀸𑀦𑀺𑀧𑀺 𑀬𑀣𑀸𑀪𑀽𑀢𑀁 𑀦 𑀤𑀺𑀲𑁆𑀲𑀦𑁆𑀢𑀺 𑀬𑀢𑁄 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑀁 𑀫𑀓𑁆𑀔𑀺𑀓𑀸𑀧𑀢𑁆𑀢𑀲𑀼𑀔𑀼𑀫𑀘𑁆𑀙𑀯𑀺𑀁. 𑀬𑀸𑀦𑀺 𑀧𑀦𑀲𑁆𑀲 𑀙𑀯𑀺𑀭𑀸𑀕𑀭𑀢𑁆𑀢𑁂𑀦 𑀢𑀘𑁂𑀦 𑀧𑀮𑀺𑀯𑁂𑀞𑀺𑀢𑀢𑁆𑀢𑀸 𑀲𑀩𑁆𑀩𑀮𑁄𑀓𑀲𑁆𑀲 𑀅𑀧𑀸𑀓𑀝𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀅𑀩𑁆𑀪𑀦𑁆𑀢𑀭𑀓𑀼𑀡𑀧𑀸𑀦𑀺 𑀧𑀭𑀫𑀸𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀦𑀻𑀬𑀧𑀝𑀺𑀓𑀽𑀮𑀸𑀦𑀺, 𑀢𑀸𑀦𑀺𑀧𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀏𑀯𑀁 𑀧𑀲𑁆𑀲𑀺𑀢𑀩𑁆𑀩𑁄 ‘‘𑀅𑀦𑁆𑀢𑀧𑀽𑀭𑁄 𑀉𑀤𑀭𑀧𑀽𑀭𑁄…𑀧𑁂… 𑀧𑀺𑀢𑁆𑀢𑀲𑁆𑀲 𑀘 𑀯𑀲𑀸𑀬 𑀘𑀸’’𑀢𑀺.

𑁧𑁯𑁭. 𑀢𑀢𑁆𑀣 ¶ 𑀅𑀦𑁆𑀢𑀲𑁆𑀲 𑀧𑀽𑀭𑁄 𑀅𑀦𑁆𑀢𑀧𑀽𑀭𑁄. 𑀉𑀤𑀭𑀲𑁆𑀲 𑀧𑀽𑀭𑁄 𑀉𑀤𑀭𑀧𑀽𑀭𑁄. 𑀉𑀤𑀭𑀦𑁆𑀢𑀺 𑀘 𑀉𑀤𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀜𑁆𑀳𑀺 𑀞𑀸𑀦𑀦𑀸𑀫𑁂𑀦 ‘‘𑀉𑀤𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀓𑀦𑀧𑁂𑀴𑀲𑁆𑀲𑀸𑀢𑀺 𑀬𑀓𑀦𑀧𑀺𑀡𑁆𑀟𑀲𑁆𑀲. 𑀯𑀢𑁆𑀣𑀺𑀦𑁄𑀢𑀺 𑀫𑀼𑀢𑁆𑀢𑀲𑁆𑀲. 𑀞𑀸𑀦𑀽𑀧𑀘𑀸𑀭𑁂𑀦 𑀧𑀦𑁂𑀢𑀁 ‘‘𑀯𑀢𑁆𑀣𑀻’’𑀢𑀺 ¶ 𑀯𑀼𑀢𑁆𑀢𑀁. 𑀧𑀽𑀭𑁄𑀢𑀺 𑀅𑀥𑀺𑀓𑀸𑀭𑁄, 𑀢𑀲𑁆𑀫𑀸 𑀬𑀓𑀦𑀧𑁂𑀴𑀲𑁆𑀲 𑀧𑀽𑀭𑁄 𑀯𑀢𑁆𑀣𑀺𑀦𑁄 𑀧𑀽𑀭𑁄𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀳𑀤𑀬𑀲𑁆𑀲𑀸𑀢𑀺𑀆𑀤𑀻𑀲𑀼. 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀅𑀦𑁆𑀢𑀸𑀤𑀻𑀦𑀺 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀪𑁂𑀤𑁂𑀦 𑀅𑀩𑁆𑀬𑀸𑀧𑀸𑀭𑀦𑀬𑁂𑀦 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁯𑁯-𑁨𑁦𑁦. 𑀏𑀯𑀁 𑀪𑀕𑀯𑀸 ‘‘𑀦 𑀓𑀺𑀜𑁆𑀘𑁂𑀢𑁆𑀣 𑀏𑀓𑀫𑁆𑀧𑀺 𑀕𑀬𑁆𑀳𑀽𑀧𑀕𑀁 𑀫𑀼𑀢𑁆𑀢𑀸𑀫𑀡𑀺𑀲𑀤𑀺𑀲𑀁 𑀅𑀢𑁆𑀣𑀺, 𑀅𑀜𑁆𑀜𑀤𑀢𑁆𑀣𑀼 𑀅𑀲𑀼𑀘𑀺𑀧𑀭𑀺𑀧𑀽𑀭𑁄𑀯𑀸𑀬𑀁 𑀓𑀸𑀬𑁄’’𑀢𑀺 𑀅𑀩𑁆𑀪𑀦𑁆𑀢𑀭𑀓𑀼𑀡𑀧𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀇𑀤𑀸𑀦𑀺 𑀢𑀫𑁂𑀯 𑀅𑀩𑁆𑀪𑀦𑁆𑀢𑀭𑀓𑀼𑀡𑀧𑀁 𑀩𑀳𑀺𑀦𑀺𑀓𑁆𑀔𑀫𑀦𑀓𑀼𑀡𑀧𑁂𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀜𑁆𑀘 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀅𑀣𑀲𑁆𑀲 𑀦𑀯𑀳𑀺 𑀲𑁄𑀢𑁂𑀳𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀢𑁆𑀣 𑀅𑀣𑀸𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑀦𑀺𑀤𑀲𑁆𑀲𑀦𑀁, 𑀅𑀧𑀭𑁂𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀅𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲. 𑀦𑀯𑀳𑀺 𑀲𑁄𑀢𑁂𑀳𑀻𑀢𑀺 𑀉𑀪𑁄𑀅𑀓𑁆𑀔𑀺𑀘𑁆𑀙𑀺𑀤𑁆𑀤𑀓𑀡𑁆𑀡𑀘𑁆𑀙𑀺𑀤𑁆𑀤𑀦𑀸𑀲𑀸𑀙𑀺𑀤𑁆𑀤𑀫𑀼𑀔𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂𑀳𑀺. 𑀅𑀲𑀼𑀘𑀺 𑀲𑀯𑀢𑀻𑀢𑀺 𑀲𑀩𑁆𑀩𑀮𑁄𑀓𑀧𑀸𑀓𑀝𑀦𑀸𑀦𑀧𑁆𑀧𑀓𑀸𑀭𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀅𑀲𑀼𑀘𑀺𑀬𑁂𑀯 𑀲𑀯𑀢𑀺, 𑀲𑀦𑁆𑀤𑀢𑀺, 𑀧𑀕𑁆𑀖𑀭𑀢𑀺, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀕𑀭𑀼𑀘𑀦𑁆𑀤𑀦𑀸𑀤𑀺𑀕𑀦𑁆𑀥𑀚𑀸𑀢𑀁 𑀯𑀸 𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀢𑀦𑀚𑀸𑀢𑀁 𑀯𑀸. 𑀲𑀩𑁆𑀩𑀤𑀸𑀢𑀺 𑀢𑀜𑁆𑀘 𑀔𑁄 𑀲𑀩𑁆𑀩𑀤𑀸 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀧𑀼𑀩𑁆𑀩𑀡𑁆𑀳𑁂𑀧𑀺 𑀲𑀸𑀬𑀦𑁆𑀳𑁂𑀧𑀺 𑀢𑀺𑀝𑁆𑀞𑀢𑁄𑀧𑀺 𑀕𑀘𑁆𑀙𑀢𑁄𑀧𑀻𑀢𑀺. 𑀓𑀺𑀁 𑀢𑀁 𑀅𑀲𑀼𑀘𑀻𑀢𑀺 𑀘𑁂? ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺. 𑀏𑀢𑀲𑁆𑀲 𑀳𑀺 𑀤𑁆𑀯𑀻𑀳𑀺 𑀅𑀓𑁆𑀔𑀺𑀘𑁆𑀙𑀺𑀤𑁆𑀤𑁂𑀳𑀺 𑀅𑀧𑀦𑀻𑀢𑀢𑀘𑀫𑀁𑀲𑀲𑀤𑀺𑀲𑁄 𑀅𑀓𑁆𑀔𑀺𑀕𑀽𑀣𑀓𑁄, 𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀳𑀺 𑀭𑀚𑁄𑀚𑀮𑁆𑀮𑀲𑀤𑀺𑀲𑁄 𑀓𑀡𑁆𑀡𑀕𑀽𑀣𑀓𑁄, 𑀦𑀸𑀲𑀸𑀙𑀺𑀤𑁆𑀤𑁂𑀳𑀺 𑀧𑀼𑀩𑁆𑀩𑀲𑀤𑀺𑀲𑀸 𑀲𑀺𑀗𑁆𑀖𑀸𑀡𑀺𑀓𑀸 𑀘 𑀲𑀯𑀢𑀺, 𑀫𑀼𑀔𑁂𑀦 𑀘 𑀯𑀫𑀢𑀺. 𑀓𑀺𑀁 𑀯𑀫𑀢𑀻𑀢𑀺 𑀘𑁂? 𑀏𑀓𑀤𑀸 𑀧𑀺𑀢𑁆𑀢𑀁, 𑀬𑀤𑀸 𑀅𑀩𑀤𑁆𑀥𑀧𑀺𑀢𑁆𑀢𑀁 𑀓𑀼𑀧𑁆𑀧𑀺𑀢𑀁 𑀳𑁄𑀢𑀺, 𑀢𑀤𑀸 𑀢𑀁 𑀯𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀫𑁆𑀳𑀜𑁆𑀘𑀸𑀢𑀺 𑀦 𑀓𑁂𑀯𑀮𑀜𑁆𑀘 𑀧𑀺𑀢𑁆𑀢𑀁, 𑀬𑀫𑁆𑀧𑀺 𑀉𑀤𑀭𑀧𑀝𑀮𑁂 𑀏𑀓𑀧𑀢𑁆𑀣𑀧𑀽𑀭𑀧𑁆𑀧𑀫𑀸𑀡𑀁 𑀲𑁂𑀫𑁆𑀳𑀁 𑀢𑀺𑀝𑁆𑀞𑀢𑀺, 𑀢𑀫𑁆𑀧𑀺 𑀏𑀓𑀤𑀸 𑀯𑀫𑀢𑀺. 𑀢𑀁 𑀧𑀦𑁂𑀢𑀁 𑀯𑀡𑁆𑀡𑀸𑀤𑀺𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁦𑁩-𑁨𑁦𑁪, 𑁨𑁧𑁦-𑁨𑁧𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀲𑁂𑀫𑁆𑀳𑀜𑁆𑀘𑀸’’𑀢𑀺 𑀘-𑀲𑀤𑁆𑀤𑁂𑀦 𑀲𑁂𑀫𑁆𑀳𑀜𑁆𑀘 𑀅𑀜𑁆𑀜𑀜𑁆𑀘 𑀏𑀯𑀭𑀽𑀧𑀁 𑀉𑀤𑀭𑀺𑀬𑀮𑁄𑀳𑀺𑀢𑀸𑀤𑀺𑀅𑀲𑀼𑀘𑀺𑀁 𑀯𑀫𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀢𑁆𑀢𑀳𑀺 𑀤𑁆𑀯𑀸𑀭𑁂𑀳𑀺 𑀅𑀲𑀼𑀘𑀺𑀯𑀫𑀦𑀁 𑀤𑀲𑁆𑀲𑁂𑀢𑁆𑀯𑀸 𑀓𑀸𑀮𑀜𑁆𑀜𑀽 𑀧𑀼𑀕𑁆𑀕𑀮𑀜𑁆𑀜𑀽 𑀧𑀭𑀺𑀲𑀜𑁆𑀜𑀽 𑀘 𑀪𑀕𑀯𑀸 𑀢𑀤𑀼𑀢𑁆𑀢𑀭𑀺 ¶ 𑀤𑁆𑀯𑁂 𑀤𑁆𑀯𑀸𑀭𑀸𑀦𑀺 𑀯𑀺𑀲𑁂𑀲𑀯𑀘𑀦𑁂𑀦 𑀅𑀦𑀸𑀫𑀲𑀺𑀢𑁆𑀯𑀸 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀲𑀩𑁆𑀩𑀲𑁆𑀫𑀸𑀧𑀺 𑀓𑀸𑀬𑀸 𑀅𑀲𑀼𑀘𑀺𑀲𑀯𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀬𑀫𑁆𑀳𑀸 𑀲𑁂𑀤𑀚𑀮𑁆𑀮𑀺𑀓𑀸’’𑀢𑀺. 𑀢𑀢𑁆𑀣 𑀲𑁂𑀤𑀚𑀮𑁆𑀮𑀺𑀓𑀸𑀢𑀺 𑀲𑁂𑀤𑁄 𑀘 𑀮𑁄𑀡𑀧𑀝𑀮𑀫𑀮𑀪𑁂𑀤𑀸 𑀚𑀮𑁆𑀮𑀺𑀓𑀸 𑀘, 𑀢𑀲𑁆𑀲 ‘‘𑀲𑀯𑀢𑀺 𑀲𑀩𑁆𑀩𑀤𑀸’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄.

𑁨𑁦𑁧. 𑀏𑀯𑀁 ¶ 𑀪𑀕𑀯𑀸 𑀬𑀣𑀸 𑀦𑀸𑀫 𑀪𑀢𑁆𑀢𑁂 𑀧𑀘𑁆𑀘𑀫𑀸𑀦𑁂 𑀢𑀡𑁆𑀟𑀼𑀮𑀫𑀮𑀜𑁆𑀘 𑀉𑀤𑀓𑀫𑀮𑀜𑁆𑀘 𑀨𑁂𑀡𑁂𑀦 𑀲𑀤𑁆𑀥𑀺𑀁 𑀉𑀝𑁆𑀞𑀳𑀺𑀢𑁆𑀯𑀸 𑀉𑀓𑁆𑀔𑀮𑀺𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀩𑀳𑀺 𑀕𑀴𑀢𑀺, 𑀢𑀣𑀸 𑀅𑀲𑀺𑀢𑀧𑀻𑀢𑀸𑀤𑀺𑀪𑁂𑀤𑁂 𑀆𑀳𑀸𑀭𑁂 𑀓𑀫𑁆𑀫𑀚𑁂𑀦 𑀅𑀕𑁆𑀕𑀺𑀦𑀸 𑀧𑀘𑁆𑀘𑀫𑀸𑀦𑁂 𑀬𑀁 𑀅𑀲𑀺𑀢𑀧𑀻𑀢𑀸𑀤𑀺𑀫𑀮𑀁 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 𑀪𑁂𑀤𑁂𑀦 𑀦𑀺𑀓𑁆𑀔𑀫𑀦𑁆𑀢𑀁 𑀅𑀓𑁆𑀔𑀺𑀆𑀤𑀻𑀦𑀺 𑀫𑀓𑁆𑀔𑁂𑀢𑁆𑀯𑀸 𑀩𑀳𑀺 𑀕𑀴𑀢𑀺, 𑀢𑀲𑁆𑀲𑀸𑀧𑀺 𑀯𑀲𑁂𑀦 𑀇𑀫𑀲𑁆𑀲 𑀓𑀸𑀬𑀲𑁆𑀲 ¶ 𑀅𑀲𑀼𑀘𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀮𑁄𑀓𑁂 𑀉𑀢𑁆𑀢𑀫𑀗𑁆𑀕𑀲𑀫𑁆𑀫𑀢𑀁 𑀲𑀻𑀲𑀁 𑀅𑀢𑀺𑀯𑀺𑀲𑀺𑀝𑁆𑀞𑀪𑀸𑀯𑀢𑁄 𑀧𑀘𑁆𑀘𑁂𑀦𑁆𑀢𑀸 𑀯𑀦𑁆𑀤𑀦𑁂𑀬𑁆𑀬𑀸𑀦𑀫𑁆𑀧𑀺 𑀯𑀦𑁆𑀤𑀦𑀁 𑀦 𑀓𑀭𑁄𑀦𑁆𑀢𑀺, 𑀢𑀲𑁆𑀲𑀸𑀧𑀺 𑀦𑀺𑀲𑁆𑀲𑀸𑀭𑀢𑀸𑀬 𑀅𑀲𑀼𑀘𑀺𑀢𑀸𑀬 𑀘𑀲𑁆𑀲 𑀅𑀲𑀼𑀘𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣𑀲𑁆𑀲 𑀲𑀼𑀲𑀺𑀭𑀁 𑀲𑀻𑀲’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀲𑀼𑀲𑀺𑀭𑀦𑁆𑀢𑀺 𑀙𑀺𑀤𑁆𑀤𑀁. 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀽𑀭𑀺𑀢𑀦𑁆𑀢𑀺 𑀤𑀥𑀺𑀪𑀭𑀺𑀢𑀅𑀮𑀸𑀩𑀼𑀓𑀁 𑀯𑀺𑀬 𑀫𑀢𑁆𑀣𑀮𑀼𑀗𑁆𑀕𑀪𑀭𑀺𑀢𑀁. 𑀢𑀜𑁆𑀘 𑀧𑀦𑁂𑀢𑀁 𑀫𑀢𑁆𑀣𑀮𑀼𑀗𑁆𑀕𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀪𑀢𑁄 𑀦𑀁 𑀫𑀜𑁆𑀜𑀢𑀺 𑀩𑀸𑀮𑁄𑀢𑀺 𑀢𑀫𑁂𑀦𑀁 𑀏𑀯𑀁 𑀦𑀸𑀦𑀸𑀯𑀺𑀥𑀓𑀼𑀡𑀧𑀪𑀭𑀺𑀢𑀫𑁆𑀧𑀺 𑀓𑀸𑀬𑀁 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀩𑀸𑀮𑁄 𑀲𑀼𑀪𑀢𑁄 𑀫𑀜𑁆𑀜𑀢𑀺, 𑀲𑀼𑀪𑀁 𑀲𑀼𑀘𑀺𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀦𑁆𑀢𑀺 𑀢𑀻𑀳𑀺𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑁂𑀦 𑀫𑁄𑀳𑁂𑀦 𑀧𑀼𑀭𑀓𑁆𑀔𑀢𑁄, 𑀘𑁄𑀤𑀺𑀢𑁄, 𑀧𑀯𑀢𑁆𑀢𑀺𑀢𑁄, ‘‘𑀏𑀯𑀁 𑀆𑀤𑀺𑀬, 𑀏𑀯𑀁 𑀅𑀪𑀺𑀦𑀺𑀯𑀺𑀲 𑀏𑀯𑀁 𑀫𑀜𑁆𑀜𑀸𑀳𑀻’’𑀢𑀺 𑀕𑀸𑀳𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀲𑁆𑀲 𑀬𑀸𑀯 𑀅𑀦𑀢𑁆𑀣𑀓𑀭𑀸 𑀘𑀸𑀬𑀁 𑀅𑀯𑀺𑀚𑁆𑀚𑀸𑀢𑀺.

𑁨𑁦𑁨. 𑀏𑀯𑀁 𑀪𑀕𑀯𑀸 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀅𑀲𑀼𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁, 𑀬𑀲𑁆𑀫𑀸 𑀯𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄𑀧𑀺 𑀓𑀸𑀬𑁄 𑀬𑀣𑀸𑀯𑀼𑀢𑁆𑀢𑀓𑀼𑀡𑀧𑀪𑀭𑀺𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 ¶ 𑀲𑀫𑁆𑀧𑀢𑁆𑀢𑀺𑀪𑀯𑁂 𑀅𑀲𑀼𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀧𑀢𑁆𑀢𑀺𑀪𑀯𑁂 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸 𑀘 𑀲𑁄 𑀫𑀢𑁄 𑀲𑁂𑀢𑀻’’𑀢𑀺 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀲𑁆𑀯𑀸𑀬𑀫𑁂𑀯𑀁𑀯𑀺𑀥𑁄 𑀓𑀸𑀬𑁄 𑀬𑀤𑀸 𑀆𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀸𑀧𑀕𑀫𑁂𑀦 𑀫𑀢𑁄 𑀯𑀸𑀢𑀪𑀭𑀺𑀢𑀪𑀲𑁆𑀢𑀸 𑀯𑀺𑀬 𑀉𑀤𑁆𑀥𑀼𑀫𑀸𑀢𑀓𑁄 𑀯𑀡𑁆𑀡𑀧𑀭𑀺𑀪𑁂𑀤𑁂𑀦 𑀯𑀺𑀦𑀻𑀮𑀓𑁄 𑀲𑀼𑀲𑀸𑀦𑀲𑁆𑀫𑀺𑀁 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭𑀁 𑀙𑀟𑁆𑀟𑀺𑀢𑀢𑁆𑀢𑀸 𑀅𑀧𑀯𑀺𑀤𑁆𑀥𑁄 𑀲𑁂𑀢𑀺, 𑀅𑀣 ‘‘𑀦 𑀤𑀸𑀦𑀺𑀲𑁆𑀲 𑀧𑀼𑀦 𑀉𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀁𑀲𑀢𑁄𑀬𑁂𑀯 𑀅𑀦𑀧𑁂𑀓𑁆𑀔𑀸 𑀳𑁄𑀦𑁆𑀢𑀺 𑀜𑀸𑀢𑀬𑁄. 𑀢𑀢𑁆𑀣 𑀫𑀢𑁄𑀢𑀺 𑀅𑀦𑀺𑀘𑁆𑀘𑀢𑀁 𑀤𑀲𑁆𑀲𑁂𑀢𑀺, 𑀲𑁂𑀢𑀻𑀢𑀺 𑀦𑀺𑀭𑀻𑀳𑀓𑀢𑁆𑀢𑀁. 𑀢𑀤𑀼𑀪𑀬𑁂𑀦 𑀘 𑀚𑀻𑀯𑀺𑀢𑀩𑀮𑀫𑀤𑀧𑁆𑀧𑀳𑀸𑀦𑁂 𑀦𑀺𑀬𑁄𑀚𑁂𑀢𑀺. 𑀉𑀤𑁆𑀥𑀼𑀫𑀸𑀢𑁄𑀢𑀺 𑀲𑀡𑁆𑀞𑀸𑀦𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀯𑀺𑀦𑀻𑀮𑀓𑁄𑀢𑀺 𑀙𑀯𑀺𑀭𑀸𑀕𑀯𑀺𑀧𑀢𑁆𑀢𑀺𑀁. 𑀢𑀤𑀼𑀪𑀬𑁂𑀦 𑀘 𑀭𑀽𑀧𑀫𑀤𑀧𑁆𑀧𑀳𑀸𑀦𑁂 𑀯𑀡𑁆𑀡𑀧𑁄𑀓𑁆𑀔𑀭𑀢𑀁 𑀧𑀝𑀺𑀘𑁆𑀘 𑀫𑀸𑀦𑀧𑁆𑀧𑀳𑀸𑀦𑁂 𑀘 𑀦𑀺𑀬𑁄𑀚𑁂𑀢𑀺. 𑀅𑀧𑀯𑀺𑀤𑁆𑀥𑁄𑀢𑀺 𑀕𑀳𑁂𑀢𑀩𑁆𑀩𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀲𑀼𑀲𑀸𑀦𑀲𑁆𑀫𑀺𑀦𑁆𑀢𑀺 𑀅𑀦𑁆𑀢𑁄 𑀅𑀥𑀺𑀯𑀸𑀲𑁂𑀢𑀼𑀫𑀦𑀭𑀳𑀁 𑀚𑀺𑀕𑀼𑀘𑁆𑀙𑀦𑀻𑀬𑀪𑀸𑀯𑀁. 𑀢𑀤𑀼𑀪𑀬𑁂𑀦𑀧𑀺 ‘‘𑀫𑀫’’𑀦𑁆𑀢𑀺 𑀕𑀸𑀳𑀲𑁆𑀲 𑀲𑀼𑀪𑀲𑀜𑁆𑀜𑀸𑀬 𑀘 𑀧𑀳𑀸𑀦𑁂 𑀦𑀺𑀬𑁄𑀚𑁂𑀢𑀺. 𑀅𑀦𑀧𑁂𑀓𑁆𑀔𑀸 𑀳𑁄𑀦𑁆𑀢𑀺 𑀜𑀸𑀢𑀬𑁄𑀢𑀺 𑀧𑀝𑀺𑀓𑀺𑀭𑀺𑀬𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀧𑀭𑀺𑀯𑀸𑀭𑀫𑀤𑀧𑁆𑀧𑀳𑀸𑀦𑁂 𑀦𑀺𑀬𑁄𑀚𑁂𑀢𑀺.

𑁨𑁦𑁩. 𑀏𑀯𑀫𑀺𑀫𑀸𑀬 ¶ ¶ 𑀕𑀸𑀣𑀸𑀬 𑀅𑀧𑀭𑀺𑀪𑀺𑀦𑁆𑀦𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀅𑀲𑀼𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀪𑀺𑀦𑁆𑀦𑀯𑀲𑁂𑀦𑀸𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀔𑀸𑀤𑀦𑁆𑀢𑀺 𑀦’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑁂 𑀘𑀜𑁆𑀜𑁂𑀢𑀺 𑀬𑁂 𑀘 𑀅𑀜𑁆𑀜𑁂𑀧𑀺 𑀓𑀸𑀓𑀓𑀼𑀮𑀮𑀸𑀤𑀬𑁄 𑀓𑀼𑀡𑀧𑀪𑀓𑁆𑀔𑀸 𑀧𑀸𑀡𑀺𑀦𑁄 𑀲𑀦𑁆𑀢𑀺, 𑀢𑁂𑀧𑀺 𑀦𑀁 𑀔𑀸𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁨𑁦𑁪. 𑀏𑀯𑀁 ‘‘𑀘𑀭𑀁 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀜𑁆𑀜𑀢𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦, ‘‘𑀅𑀝𑁆𑀞𑀺𑀦𑀳𑀸𑀭𑀼𑀲𑀁𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑀯𑀲𑁂𑀦 ‘‘𑀬𑀤𑀸 𑀘 𑀲𑁄 𑀫𑀢𑁄 𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑀯𑀲𑁂𑀦 𑀓𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀁 𑀦𑀺𑀘𑁆𑀘𑀲𑀼𑀔𑀢𑁆𑀢𑀪𑀸𑀯𑀲𑀼𑀜𑁆𑀜𑁂 𑀏𑀓𑀦𑁆𑀢𑀅𑀲𑀼𑀪𑁂 𑀘𑀸𑀧𑀺 𑀓𑀸𑀬𑀲𑁆𑀫𑀺𑀁 ‘‘𑀲𑀼𑀪𑀢𑁄 𑀦𑀁 𑀫𑀜𑁆𑀜𑀢𑀺 𑀩𑀸𑀮𑁄, 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄’’𑀢𑀺 𑀇𑀫𑀺𑀦𑀸 𑀩𑀸𑀮𑀲𑁆𑀲 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀢𑁆𑀯𑀸 𑀅𑀯𑀺𑀚𑁆𑀚𑀸𑀫𑀼𑀔𑁂𑀦 𑀘 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀧𑀡𑁆𑀟𑀺𑀢𑀲𑁆𑀲 𑀯𑀼𑀢𑁆𑀢𑀺𑀁 𑀧𑀭𑀺𑀜𑁆𑀜𑀸𑀫𑀼𑀔𑁂𑀦 𑀘 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀯𑀸𑀦 𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀆𑀭𑀪𑀺.

𑀢𑀢𑁆𑀣 𑀲𑀼𑀢𑁆𑀯𑀸𑀦𑀸𑀢𑀺 𑀬𑁄𑀦𑀺𑀲𑁄 𑀦𑀺𑀲𑀸𑀫𑁂𑀢𑁆𑀯𑀸. 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀓𑀭𑀁 ¶ 𑀩𑀼𑀤𑁆𑀥𑀯𑀘𑀦𑀁. 𑀪𑀺𑀓𑁆𑀔𑀽𑀢𑀺 𑀲𑁂𑀓𑁆𑀔𑁄 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀜𑁆𑀜𑀸𑀡𑀁 𑀯𑀼𑀘𑁆𑀘𑀢𑀺 𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀤𑀺𑀧𑁆𑀧𑀓𑀸𑀭𑁂𑀲𑀼 𑀧𑀯𑀢𑁆𑀢𑀢𑁆𑀢𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀲𑀸𑀲𑀦𑁂. 𑀲𑁄 𑀔𑁄 𑀦𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀲𑁄 𑀇𑀫𑀁 𑀓𑀸𑀬𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀸𑀢𑀺. 𑀓𑀣𑀁? 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀯𑀸𑀡𑀺𑀚𑁄 𑀇𑀤𑀜𑁆𑀘𑀺𑀤𑀜𑁆𑀘𑀸𑀢𑀺 𑀪𑀡𑁆𑀟𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀏𑀢𑁆𑀢𑀓𑁂𑀦 𑀕𑀳𑀺𑀢𑁂 𑀏𑀢𑁆𑀢𑀓𑁄 𑀦𑀸𑀫 𑀉𑀤𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀧𑀼𑀦 𑀲𑀉𑀤𑀬𑀁 𑀫𑀽𑀮𑀁 𑀕𑀡𑁆𑀳𑀦𑁆𑀢𑁄 𑀢𑀁 𑀪𑀡𑁆𑀟𑀁 𑀙𑀟𑁆𑀟𑁂𑀢𑀺, 𑀏𑀯𑀫𑁂𑀯𑀁 ‘‘𑀅𑀝𑁆𑀞𑀺𑀦𑁆𑀳𑀸𑀭𑀼𑀆𑀤𑀬𑁄 𑀇𑀫𑁂 𑀓𑁂𑀲𑀮𑁄𑀫𑀸𑀤𑀬𑁄 𑀘𑀸’’𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀜𑀸𑀢𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺, ‘‘𑀅𑀦𑀺𑀘𑁆𑀘𑀸 𑀏𑀢𑁂 𑀥𑀫𑁆𑀫𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’’𑀢𑀺 𑀢𑀼𑀮𑀬𑀦𑁆𑀢𑁄 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺, 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀸𑀧𑀼𑀡𑀦𑁆𑀢𑁄 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺. 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀅𑀲𑀼𑀪𑀯𑀲𑁂𑀦 𑀯𑀸 𑀧𑀲𑁆𑀲𑀦𑁆𑀢𑁄 𑀜𑀸𑀢𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀲𑁆𑀲𑀦𑁆𑀢𑁄 𑀢𑀻𑀭𑀡𑀧𑀭𑀺𑀜𑁆𑀜𑀸𑀬, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀢𑁄 𑀙𑀦𑁆𑀤𑀭𑀸𑀕𑀁 𑀅𑀧𑀓𑀟𑁆𑀠𑀺𑀢𑁆𑀯𑀸 𑀢𑀁 𑀧𑀚𑀳𑀦𑁆𑀢𑁄 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺.

𑀓𑀲𑁆𑀫𑀸 𑀲𑁄 𑀏𑀯𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀘𑁂? 𑀬𑀣𑀸𑀪𑀽𑀢𑀜𑁆𑀳𑀺 𑀧𑀲𑁆𑀲𑀢𑀺, 𑀬𑀲𑁆𑀫𑀸 𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀜𑀸𑀡𑀯𑀸’’𑀢𑀺𑀆𑀤𑀺𑀦𑀸 𑀏𑀯 𑀘 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ¶ 𑀲𑀺𑀤𑁆𑀥𑁂 𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀧𑀜𑁆𑀜𑀸𑀡𑀯𑀢𑁆𑀢𑀁 𑀳𑁄𑀢𑀺, 𑀬𑀲𑁆𑀫𑀸 𑀘 𑀲𑀩𑁆𑀩𑀚𑀦𑀲𑁆𑀲 𑀧𑀸𑀓𑀝𑁄𑀧𑀸𑀬𑀁 𑀓𑀸𑀬𑁄 𑀅𑀲𑀼𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀦 𑀲𑀓𑁆𑀓𑀸 𑀧𑀭𑀺𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀢𑀲𑁆𑀲 𑀜𑀸𑀡𑀳𑁂𑀢𑀼𑀁 𑀇𑀢𑁄 𑀩𑀸𑀳𑀺𑀭𑀸𑀦𑀁 𑀏𑀯𑀁 𑀤𑀝𑁆𑀞𑀼𑀁 𑀅𑀲𑀫𑀢𑁆𑀣𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀯𑀸𑀦 𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀆𑀳. 𑀦𑀦𑁆𑀤𑀸𑀪𑀺𑀓𑁆𑀔𑀼𑀦𑀺𑀁 𑀢𑀜𑁆𑀘 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀤𑁂𑀲𑀦𑀸𑀧𑀯𑀢𑁆𑀢𑀺𑀢𑁄 𑀅𑀕𑁆𑀕𑀧𑀭𑀺𑀲𑀢𑁄 𑀢𑀧𑁆𑀧𑀝𑀺𑀧𑀢𑁆𑀢𑀺𑀧𑁆𑀧𑀢𑁆𑀢𑀸𑀦𑀁 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄 𑀘 ‘‘𑀪𑀺𑀓𑁆𑀔𑀽’’𑀢𑀺 𑀆𑀳.

𑁨𑁦𑁫. 𑀇𑀤𑀸𑀦𑀺 ¶ ¶ ‘‘𑀬𑀣𑀸𑀪𑀽𑀢𑀜𑁆𑀳𑀺 𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀬𑀣𑀸 𑀧𑀲𑁆𑀲𑀦𑁆𑀢𑁄 𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀇𑀤𑀁 𑀲𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑀁 𑀆𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀧𑀕𑀫𑀸 𑀘𑀭𑀢𑀺, 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀲𑀬𑀢𑀺; 𑀢𑀣𑀸 𑀏𑀢𑀁 𑀏𑀢𑀭𑀳𑀺 𑀲𑀼𑀲𑀸𑀦𑁂 𑀲𑀬𑀺𑀢𑀁 𑀅𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀧𑀼𑀩𑁆𑀩𑁂 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀧𑀕𑀫𑀸 𑀅𑀳𑁄𑀲𑀺. 𑀬𑀣𑀸 𑀘 𑀏𑀢𑀁 𑀏𑀢𑀭𑀳𑀺 𑀫𑀢𑀲𑀭𑀻𑀭𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀧𑀕𑀫𑀸 𑀦 𑀘𑀭𑀢𑀺, 𑀦 𑀢𑀺𑀝𑁆𑀞𑀢𑀺, 𑀦 𑀦𑀺𑀲𑀻𑀤𑀢𑀺, 𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀣𑀸 𑀇𑀤𑀁 𑀲𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀧𑀕𑀫𑀸 𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀘 𑀇𑀤𑀁 𑀲𑀯𑀺𑀜𑁆𑀜𑀸𑀡𑀓𑀁 𑀏𑀢𑀭𑀳𑀺 𑀦 𑀲𑀼𑀲𑀸𑀦𑁂 𑀫𑀢𑀁 𑀲𑁂𑀢𑀺, 𑀦 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀫𑀼𑀧𑀕𑀢𑀁, 𑀢𑀣𑀸 𑀏𑀢𑀁 𑀏𑀢𑀭𑀳𑀺 𑀫𑀢𑀲𑀭𑀻𑀭𑀫𑁆𑀧𑀺 𑀧𑀼𑀩𑁆𑀩𑁂 𑀅𑀳𑁄𑀲𑀺. 𑀬𑀣𑀸 𑀧𑀦𑁂𑀢𑀁 𑀏𑀢𑀭𑀳𑀺 𑀅𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑀁 𑀫𑀢𑀁 𑀲𑀼𑀲𑀸𑀦𑁂 𑀲𑁂𑀢𑀺, 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀜𑁆𑀘 𑀉𑀧𑀕𑀢𑀁, 𑀢𑀣𑀸 𑀇𑀤𑀁 𑀲𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀪𑀯𑀺𑀲𑁆𑀲𑀢𑀻𑀢𑀺.

𑀢𑀢𑁆𑀣 𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀦𑁆𑀢𑀺 𑀅𑀢𑁆𑀢𑀦𑀸 𑀫𑀢𑀲𑁆𑀲 𑀲𑀭𑀻𑀭𑀲𑁆𑀲 𑀲𑀫𑀸𑀦𑀪𑀸𑀯𑀁 𑀓𑀭𑁄𑀦𑁆𑀢𑁄 𑀩𑀸𑀳𑀺𑀭𑁂 𑀤𑁄𑀲𑀁 𑀧𑀚𑀳𑀢𑀺. 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀦𑁆𑀢𑀺 𑀫𑀢𑀲𑀭𑀻𑀭𑁂𑀦 𑀅𑀢𑁆𑀢𑀦𑁄 𑀲𑀫𑀸𑀦𑀪𑀸𑀯𑀁 𑀓𑀭𑁄𑀦𑁆𑀢𑁄 𑀅𑀚𑁆𑀛𑀢𑁆𑀢𑀺𑀓𑁂 𑀭𑀸𑀕𑀁 𑀧𑀚𑀳𑀢𑀺. 𑀬𑁂𑀦𑀸𑀓𑀸𑀭𑁂𑀦 𑀉𑀪𑀬𑀁 𑀲𑀪𑀁 𑀓𑀭𑁄𑀢𑀺, 𑀢𑀁 𑀧𑀚𑀸𑀦𑀦𑁆𑀢𑁄 𑀉𑀪𑀬𑀢𑁆𑀣 𑀫𑁄𑀳𑀁 𑀧𑀚𑀳𑀢𑀺. 𑀏𑀯𑀁 𑀬𑀣𑀸𑀪𑀽𑀢𑀤𑀲𑁆𑀲𑀦𑁂𑀦 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀅𑀓𑀼𑀲𑀮𑀫𑀽𑀮𑀧𑁆𑀧𑀳𑀸𑀦𑀁 𑀲𑀸𑀥𑁂𑀢𑁆𑀯𑀸, 𑀬𑀲𑁆𑀫𑀸 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀢𑁆𑀯𑀸 𑀲𑀩𑁆𑀩𑀁 𑀙𑀦𑁆𑀤𑀭𑀸𑀕𑀁 𑀯𑀺𑀭𑀸𑀚𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀳 ‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀓𑀸𑀬𑁂 𑀙𑀦𑁆𑀤𑀁 𑀯𑀺𑀭𑀸𑀚𑀬𑁂’’𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀧𑀸𑀞𑀲𑁂𑀲𑁄.

𑁨𑁦𑁬. 𑀏𑀯𑀁 𑀲𑁂𑀓𑁆𑀔𑀪𑀽𑀫𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀲𑁂𑀓𑁆𑀔𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀦𑁆𑀤𑀭𑀸𑀕𑀯𑀺𑀭𑀢𑁆𑀢𑁄 𑀲𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀧𑀜𑁆𑀜𑀸𑀡𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁 𑀧𑀸𑀧𑀼𑀡𑀸𑀢𑀺, 𑀅𑀣 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀲𑁆𑀲 ¶ 𑀧𑀳𑀻𑀦𑀢𑁆𑀢𑀸 ‘‘𑀙𑀦𑁆𑀤𑀭𑀸𑀕𑀯𑀺𑀭𑀢𑁆𑀢𑁄’’𑀢𑀺 𑀘, 𑀫𑀭𑀡𑀸𑀪𑀸𑀯𑁂𑀦 𑀧𑀡𑀻𑀢𑀝𑁆𑀞𑁂𑀦 ¶ 𑀯𑀸 𑀅𑀫𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑀯𑀽𑀧𑀲𑀫𑀦𑀢𑁄 𑀲𑀦𑁆𑀢𑀺𑀁 𑀢𑀡𑁆𑀳𑀸𑀲𑀗𑁆𑀔𑀸𑀢𑀯𑀸𑀦𑀸𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁, 𑀘𑀯𑀦𑀸𑀪𑀸𑀯𑀢𑁄 𑀅𑀘𑁆𑀘𑀼𑀢𑀦𑁆𑀢𑀺 𑀲𑀁𑀯𑀡𑁆𑀡𑀺𑀢𑀁 𑀧𑀤𑀫𑀚𑁆𑀛𑀕𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀧𑀜𑁆𑀜𑀸𑀡𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑁂 𑀞𑀺𑀢𑁄 𑀙𑀦𑁆𑀤𑀭𑀸𑀕𑀯𑀺𑀭𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀜𑁆𑀘 𑀧𑀤𑀫𑀚𑁆𑀛𑀕𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 ‘‘𑀇𑀤𑀫𑀲𑁆𑀲 𑀧𑀳𑀻𑀦𑀁, 𑀇𑀤𑀜𑁆𑀘𑀸𑀦𑁂𑀦 𑀮𑀤𑁆𑀥’’𑀦𑁆𑀢𑀺 𑀤𑀻𑀧𑁂𑀢𑀺.

𑁨𑁦𑁭-𑁨𑁦𑁮. 𑀏𑀯𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀲𑀳 𑀦𑀺𑀧𑁆𑀨𑀢𑁆𑀢𑀺𑀬𑀸 𑀓𑀣𑁂𑀢𑁆𑀯𑀸 𑀧𑀼𑀦 𑀲𑀗𑁆𑀔𑁂𑀧𑀤𑁂𑀲𑀦𑀸𑀬 𑀏𑀯𑀁 𑀫𑀳𑀢𑁄 𑀆𑀦𑀺𑀲𑀁𑀲𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀁 𑀧𑀫𑀸𑀤𑀯𑀺𑀳𑀸𑀭𑀁 𑀕𑀭𑀳𑀦𑁆𑀢𑁄 ‘‘𑀤𑁆𑀯𑀺𑀧𑀸𑀤𑀓𑁄𑀬’’𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀧𑀸𑀤𑀓𑀸𑀤𑀬𑁄𑀧𑀺 𑀓𑀸𑀬𑀸 𑀅𑀲𑀼𑀘𑀻𑀬𑁂𑀯, 𑀇𑀥𑀸𑀥𑀺𑀓𑀸𑀭𑀯𑀲𑁂𑀦 𑀧𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀸, 𑀬𑀲𑁆𑀫𑀸 𑀯𑀸 𑀅𑀜𑁆𑀜𑁂 𑀅𑀲𑀼𑀘𑀺𑀪𑀽𑀢𑀸𑀧𑀺 𑀓𑀸𑀬𑀸 𑀮𑁄𑀡𑀫𑁆𑀩𑀺𑀮𑀸𑀤𑀻𑀳𑀺 ¶ 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀪𑁄𑀚𑀦𑁂𑀧𑀺 𑀉𑀧𑀦𑀻𑀬𑀦𑁆𑀢𑀺, 𑀦 𑀢𑁆𑀯𑁂𑀯 𑀫𑀦𑀼𑀲𑁆𑀲𑀓𑀸𑀬𑁄, 𑀢𑀲𑁆𑀫𑀸 𑀅𑀲𑀼𑀘𑀺𑀢𑀭𑀪𑀸𑀯𑀫𑀲𑁆𑀲 𑀤𑀲𑁆𑀲𑁂𑀦𑁆𑀢𑁄𑀧𑀺 ‘‘𑀤𑁆𑀯𑀺𑀧𑀸𑀤𑀓𑁄’’𑀢𑀺 𑀆𑀳.

𑀅𑀬𑀦𑁆𑀢𑀺 𑀫𑀦𑀼𑀲𑁆𑀲𑀓𑀸𑀬𑀁 𑀤𑀲𑁆𑀲𑁂𑀢𑀺. 𑀤𑀼𑀕𑁆𑀕𑀦𑁆𑀥𑁄 𑀧𑀭𑀺𑀳𑀻𑀭𑀢𑀻𑀢𑀺 𑀤𑀼𑀕𑁆𑀕𑀦𑁆𑀥𑁄 𑀲𑀫𑀸𑀦𑁄 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀭𑀺𑀳𑀻𑀭𑀢𑀺. 𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑁄𑀢𑀺 𑀓𑁂𑀲𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀓𑀼𑀡𑀧𑀪𑀭𑀺𑀢𑁄. 𑀯𑀺𑀲𑁆𑀲𑀯𑀦𑁆𑀢𑁄 𑀢𑀢𑁄 𑀢𑀢𑁄𑀢𑀺 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀖𑀝𑁂𑀦𑁆𑀢𑀸𑀦𑀫𑁆𑀧𑀺 𑀢𑀁 𑀯𑀸𑀬𑀸𑀫𑀁 𑀦𑀺𑀧𑁆𑀨𑀮𑀁 𑀓𑀢𑁆𑀯𑀸 𑀦𑀯𑀳𑀺 𑀤𑁆𑀯𑀸𑀭𑁂𑀳𑀺 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺, 𑀮𑁄𑀫𑀓𑀽𑀧𑁂𑀳𑀺 𑀘 𑀲𑁂𑀤𑀚𑀮𑁆𑀮𑀺𑀓𑀁 𑀯𑀺𑀲𑁆𑀲𑀯𑀦𑁆𑀢𑁄𑀬𑁂𑀯. 𑀢𑀢𑁆𑀣 𑀤𑀸𑀦𑀺 𑀧𑀲𑁆𑀲𑀣 𑁋 𑀏𑀢𑀸𑀤𑀺𑀲𑁂𑀦 𑀓𑀸𑀬𑁂𑀦 𑀬𑁄 𑀧𑀼𑀭𑀺𑀲𑁄 𑀯𑀸 𑀇𑀢𑁆𑀣𑀻 𑀯𑀸 𑀓𑁄𑀘𑀺 𑀩𑀸𑀮𑁄 𑀫𑀜𑁆𑀜𑁂 𑀉𑀡𑁆𑀡𑀫𑁂𑀢𑀯𑁂 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀳𑀺 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 ‘‘𑀦𑀺𑀘𑁆𑀘𑁄’’𑀢𑀺 𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁄 𑀉𑀡𑁆𑀡𑀫𑀺𑀢𑀼𑀁 𑀫𑀜𑁆𑀜𑁂𑀬𑁆𑀬, 𑀧𑀭𑀁 𑀯𑀸 𑀚𑀸𑀢𑀺𑀆𑀤𑀻𑀳𑀺 𑀅𑀯𑀚𑀸𑀦𑁂𑀬𑁆𑀬 𑀅𑀢𑁆𑀢𑀸𑀦𑀁 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄, 𑀓𑀺𑀫𑀜𑁆𑀜𑀢𑁆𑀭 𑀅𑀤𑀲𑁆𑀲𑀦𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀅𑀭𑀺𑀬𑀲𑀘𑁆𑀘𑀤𑀲𑁆𑀲𑀦𑀸𑀪𑀸𑀯𑀁 𑀓𑀺𑀫𑀜𑁆𑀜𑀁 𑀢𑀲𑁆𑀲 𑀏𑀯𑀁 𑀉𑀡𑁆𑀡𑀫𑀸𑀯𑀚𑀸𑀦𑀦𑀓𑀸𑀭𑀡𑀁 𑀲𑀺𑀬𑀸𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀁𑀯𑁂𑀕𑀫𑀸𑀧𑀸𑀤𑀺 𑁋 ‘‘𑀅𑀳𑁄 𑀯𑀢 𑀭𑁂, 𑀅𑀳𑀁 𑀩𑀸𑀮𑀸, 𑀬𑀸 𑀫𑀁𑀬𑁂𑀯 𑀆𑀭𑀩𑁆𑀪 𑀏𑀯𑀁 𑀯𑀺𑀯𑀺𑀥𑀥𑀫𑁆𑀫𑀤𑁂𑀲𑀦𑀸𑀧𑀯𑀢𑁆𑀢𑀓𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 ¶ 𑀦𑀸𑀕𑀫𑀸𑀲𑀺’’𑀦𑁆𑀢𑀺. 𑀏𑀯𑀁 𑀲𑀁𑀯𑀺𑀕𑁆𑀕𑀸 𑀘 𑀢𑀫𑁂𑀯 𑀥𑀫𑁆𑀫𑀤𑁂𑀲𑀦𑀁 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 ¶ 𑀢𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑁂𑀦 𑀓𑀢𑀺𑀧𑀬𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀤𑀼𑀢𑀺𑀬𑀝𑁆𑀞𑀸𑀦𑁂𑀧𑀺 𑀓𑀺𑀭 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀲𑀺𑀭𑀺𑀫𑀸 𑀤𑁂𑀯𑀓𑀜𑁆𑀜𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑀸, 𑀲𑁄 𑀘 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀯𑀺𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀫𑀼𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀲𑀦𑁆𑀣𑀯𑀸𑀢𑁄 ¶ 𑀪𑀬𑀁 𑀚𑀸𑀢𑀦𑁆𑀢𑀺 𑀫𑀼𑀦𑀺𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀦 𑀲𑀩𑁆𑀩𑀲𑁆𑀲𑁂𑀯 𑀲𑀼𑀢𑁆𑀢𑀲𑁆𑀲 𑀏𑀓𑀸 𑀉𑀧𑁆𑀧𑀢𑁆𑀢𑀺, 𑀅𑀧𑀺𑀘𑁂𑀢𑁆𑀣 𑀆𑀤𑀺𑀢𑁄 𑀢𑀸𑀯 𑀘𑀢𑀼𑀦𑁆𑀦𑀁 𑀕𑀸𑀣𑀸𑀦𑀁 𑀅𑀬𑀫𑀼𑀧𑁆𑀧𑀢𑁆𑀢𑀺 𑁋 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀕𑀸𑀫𑀓𑀸𑀯𑀸𑀲𑁂 𑀅𑀜𑁆𑀜𑀢𑀭𑀸 𑀤𑀼𑀕𑁆𑀕𑀢𑀺𑀢𑁆𑀣𑀻 𑀫𑀢𑀧𑀢𑀺𑀓𑀸 𑀧𑀼𑀢𑁆𑀢𑀁 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺. 𑀢𑁂 𑀉𑀪𑁄𑀧𑀺 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀪𑀺𑀡𑁆𑀳𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑀲𑁆𑀲𑀦𑀓𑀸𑀫𑀸 𑀅𑀳𑁂𑀲𑀼𑀁. 𑀫𑀸𑀢𑀸 𑀓𑀺𑀜𑁆𑀘𑀺 𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀳𑀭𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀼. 𑀏𑀯𑀁 𑀲𑀸𑀬𑀫𑁆𑀧𑀺 𑀧𑀸𑀢𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀦𑁆𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀲𑀁𑀯𑀺𑀪𑀚𑀫𑀸𑀦𑀸, 𑀲𑀫𑁆𑀫𑁄𑀤𑀫𑀸𑀦𑀸, 𑀲𑀼𑀔𑀤𑀼𑀓𑁆𑀔𑀁 𑀧𑀼𑀘𑁆𑀙𑀫𑀸𑀦𑀸, 𑀦𑀺𑀭𑀸𑀲𑀗𑁆𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀏𑀯𑀁 𑀅𑀪𑀺𑀡𑁆𑀳𑀤𑀲𑁆𑀲𑀦𑁂𑀦 𑀲𑀁𑀲𑀕𑁆𑀕𑁄 𑀉𑀧𑁆𑀧𑀚𑁆𑀚𑀺, 𑀲𑀁𑀲𑀕𑁆𑀕𑀸 𑀯𑀺𑀲𑁆𑀲𑀸𑀲𑁄, 𑀯𑀺𑀲𑁆𑀲𑀸𑀲𑀸 𑀑𑀢𑀸𑀭𑁄, 𑀭𑀸𑀕𑁂𑀦 𑀑𑀢𑀺𑀡𑁆𑀡𑀘𑀺𑀢𑁆𑀢𑀸𑀦𑀁 𑀧𑀩𑁆𑀩𑀚𑀺𑀢𑀲𑀜𑁆𑀜𑀸 𑀘 𑀫𑀸𑀢𑀼𑀧𑀼𑀢𑁆𑀢𑀲𑀜𑁆𑀜𑀸 𑀘 𑀅𑀦𑁆𑀢𑀭𑀥𑀸𑀬𑀺. 𑀢𑀢𑁄 𑀫𑀭𑀺𑀬𑀸𑀤𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀯𑀸 𑀅𑀲𑀤𑁆𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀼, 𑀅𑀬𑀲𑀧𑁆𑀧𑀢𑁆𑀢𑀸 𑀘 𑀯𑀺𑀩𑁆𑀪𑀫𑀺𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀺𑀁𑀲𑀼. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. ‘‘𑀓𑀺𑀁 𑀦𑀼 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀫𑀜𑁆𑀜𑀢𑀺 𑀦 𑀫𑀸𑀢𑀸 𑀧𑀼𑀢𑁆𑀢𑁂 𑀲𑀸𑀭𑀚𑁆𑀚𑀢𑀺, 𑀧𑀼𑀢𑁆𑀢𑁄 𑀯𑀸 𑀧𑀦 𑀫𑀸𑀢𑀭𑀻’’𑀢𑀺 𑀕𑀭𑀳𑀺𑀢𑁆𑀯𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 ¶ 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁫.𑁫𑁫) 𑀅𑀯𑀲𑁂𑀲𑀲𑀼𑀢𑁆𑀢𑁂𑀦𑀧𑀺 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂 𑁋

‘‘𑀯𑀺𑀲𑀁 𑀬𑀣𑀸 𑀳𑀮𑀸𑀳𑀮𑀁, 𑀢𑁂𑀮𑀁 𑀧𑀓𑁆𑀓𑀼𑀣𑀺𑀢𑀁 𑀬𑀣𑀸;

𑀢𑀫𑁆𑀩𑀮𑁄𑀳𑀯𑀺𑀮𑀻𑀦𑀁𑀯, 𑀫𑀸𑀢𑀼𑀕𑀸𑀫𑀁 𑀯𑀺𑀯𑀚𑁆𑀚𑀬𑁂’’𑀢𑀺 𑀘. 𑁋

𑀯𑀢𑁆𑀯𑀸 ¶ 𑀧𑀼𑀦 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑁋 ‘‘𑀲𑀦𑁆𑀣𑀯𑀸𑀢𑁄 𑀪𑀬𑀁 𑀚𑀸𑀢’’𑀦𑁆𑀢𑀺 𑀇𑀫𑀸 𑀅𑀢𑁆𑀢𑀼𑀧𑀦𑀸𑀬𑀺𑀓𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀦𑁆𑀣𑀯𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀺𑀢𑁆𑀢𑀪𑁂𑀤𑁂𑀦 𑀢𑀺𑀯𑀺𑀥𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄. 𑀇𑀥 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀦𑁆𑀣𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀆𑀳 𑁋 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀬𑀣𑀸 𑀇𑀤𑀁 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀲𑀦𑁆𑀣𑀯𑀸𑀢𑁄 𑀪𑀬𑀁 𑀚𑀸𑀢’’𑀦𑁆𑀢𑀺. 𑀢𑀜𑁆𑀳𑀺 𑀢𑀲𑁆𑀲 𑀅𑀪𑀺𑀡𑁆𑀳𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀢𑀡𑁆𑀳𑀸𑀬 𑀩𑀮𑀯𑀓𑀺𑀮𑁂𑀲𑀪𑀬𑀁 𑀚𑀸𑀢𑀁, 𑀬𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀸𑀢𑀭𑀺 𑀯𑀺𑀧𑁆𑀧𑀝𑀺𑀧𑀚𑁆𑀚𑀺. 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀓𑀁 𑀯𑀸 𑀫𑀳𑀸𑀪𑀬𑀁, 𑀬𑁂𑀦 𑀲𑀸𑀲𑀦𑀁 ¶ 𑀙𑀟𑁆𑀟𑁂𑀢𑁆𑀯𑀸 𑀯𑀺𑀩𑁆𑀪𑀦𑁆𑀢𑁄. 𑀦𑀺𑀓𑁂𑀢𑀸𑀢𑀺 ‘‘𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀔𑁄, 𑀕𑀳𑀧𑀢𑀺, ‘𑀦𑀺𑀓𑁂𑀢𑀲𑀸𑀭𑀻’𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁩) 𑀦𑀬𑁂𑀦 𑀯𑀼𑀢𑁆𑀢𑀸 𑀆𑀭𑀫𑁆𑀫𑀡𑀧𑁆𑀧𑀪𑁂𑀤𑀸. 𑀚𑀸𑀬𑀢𑁂 𑀭𑀚𑁄𑀢𑀺 𑀭𑀸𑀕𑀤𑁄𑀲𑀫𑁄𑀳𑀭𑀚𑁄 𑀚𑀸𑀬𑀢𑁂. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲 𑀲𑀦𑁆𑀣𑀯𑀸𑀢𑁄 𑀪𑀬𑀁 𑀚𑀸𑀢𑀁, 𑀅𑀧𑀺𑀘 𑀔𑁄 𑀧𑀦 𑀬𑀤𑁂𑀢𑀁 𑀓𑀺𑀮𑁂𑀲𑀸𑀦𑀁 𑀦𑀺𑀯𑀸𑀲𑀝𑁆𑀞𑁂𑀦 𑀲𑀸𑀲𑀯𑀸𑀭𑀫𑁆𑀫𑀡𑀁 ‘‘𑀦𑀺𑀓𑁂𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀸𑀦𑀺𑀲𑁆𑀲 𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀫𑀭𑀺𑀬𑀸𑀤𑀢𑁆𑀢𑀸 𑀲𑀼𑀝𑁆𑀞𑀼𑀢𑀭𑀁 𑀢𑀢𑁄 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄, 𑀬𑁂𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀅𑀣 𑀯𑀸 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀬𑀣𑀸 𑀇𑀤𑀁 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀲𑀦𑁆𑀣𑀯𑀸𑀢𑁄 𑀪𑀬𑀁 𑀚𑀸𑀢𑀁, 𑀬𑀣𑀸 𑀘 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄𑀢𑀺 𑀏𑀯𑀫𑁆𑀧𑁂𑀢𑀁 𑀧𑀤𑀤𑁆𑀯𑀬𑀁 𑀬𑁄𑀚𑁂𑀢𑀩𑁆𑀩𑀁.

𑀲𑀩𑁆𑀩𑀣𑀸 𑀧𑀦 𑀇𑀫𑀺𑀦𑀸 𑀧𑀼𑀭𑀺𑀫𑀤𑁆𑀥𑁂𑀦 𑀪𑀕𑀯𑀸 𑀧𑀼𑀣𑀼𑀚𑁆𑀚𑀦𑀤𑀲𑁆𑀲𑀦𑀁 𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀧𑀲𑀁𑀲𑀦𑁆𑀢𑁄 ‘‘𑀅𑀦𑀺𑀓𑁂𑀢’’𑀦𑁆𑀢𑀺 𑀧𑀘𑁆𑀙𑀺𑀫𑀤𑁆𑀥𑀫𑀸𑀳. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀦𑀺𑀓𑁂𑀢𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀺𑀓𑁂𑀢𑀁, 𑀲𑀦𑁆𑀣𑀯𑀧𑀝𑀺𑀓𑁆𑀔𑁂𑀧𑁂𑀦 ¶ 𑀘 𑀅𑀲𑀦𑁆𑀣𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀬𑀫𑁆𑀧𑁂𑀢𑀁 𑀦𑀺𑀩𑁆𑀩𑀸𑀦𑀲𑁆𑀲𑀸𑀥𑀺𑀯𑀘𑀦𑀁. 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦𑀦𑁆𑀢𑀺 𑀏𑀢𑀁 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁 𑀩𑀼𑀤𑁆𑀥𑀫𑀼𑀦𑀺𑀦𑀸 𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑁂𑀢𑀺 𑀯𑀺𑀫𑁆𑀳𑀬𑀢𑁆𑀣𑁂 𑀦𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀘 𑀬𑀁 𑀦𑀸𑀫 𑀦𑀺𑀓𑁂𑀢𑀲𑀦𑁆𑀣𑀯𑀯𑀲𑁂𑀦 𑀫𑀸𑀢𑀸𑀧𑀼𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁂𑀲𑀼 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀫𑀼𑀦𑀺𑀦𑀸 𑀤𑀺𑀝𑁆𑀞𑀁 𑀅𑀳𑁄 𑀅𑀩𑁆𑀪𑀼𑀢𑀦𑁆𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀅𑀣 𑀯𑀸 𑀫𑀼𑀦𑀺𑀦𑁄 𑀤𑀲𑁆𑀲𑀦𑀦𑁆𑀢𑀺𑀧𑀺 𑀫𑀼𑀦𑀺𑀤𑀲𑁆𑀲𑀦𑀁, 𑀤𑀲𑁆𑀲𑀦𑀁 𑀦𑀸𑀫 𑀔𑀦𑁆𑀢𑀺 𑀭𑀼𑀘𑀺, 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘𑀸𑀢𑀺 𑀅𑀢𑁆𑀣𑁄.

𑁨𑁧𑁦. 𑀤𑀼𑀢𑀺𑀬𑀕𑀸𑀣𑀸𑀬 𑀬𑁄 𑀚𑀸𑀢𑀫𑀼𑀘𑁆𑀙𑀺𑀚𑁆𑀚𑀸𑀢𑀺 𑀬𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀚𑀸𑀢𑀁 𑀪𑀽𑀢𑀁 𑀦𑀺𑀩𑁆𑀩𑀢𑁆𑀢𑀁 𑀓𑀺𑀮𑁂𑀲𑀁 𑀬𑀣𑀸 𑀉𑀧𑁆𑀧𑀦𑁆𑀦𑀸𑀓𑀼𑀲𑀮𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀢𑀣𑀸 ¶ 𑀯𑀸𑀬𑀫𑀦𑁆𑀢𑁄 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀼𑀦 𑀅𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀉𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑁄 𑀅𑀦𑀸𑀕𑀢𑁄𑀧𑀺 𑀓𑀺𑀮𑁂𑀲𑁄 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀲𑀫𑁄𑀥𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀅𑀪𑀺𑀫𑀼𑀔𑀻𑀪𑀽𑀢𑀢𑁆𑀢𑀸 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀮𑀓𑁆𑀔𑀡𑁂𑀦 ‘‘𑀚𑀸𑀬𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀦 𑀭𑁄𑀧𑀬𑁂𑀬𑁆𑀬 𑀚𑀸𑀬𑀦𑁆𑀢𑀁, 𑀬𑀣𑀸 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀣𑀸 𑀯𑀸𑀬𑀫𑀦𑁆𑀢𑁄 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀣𑀜𑁆𑀘 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬? 𑀅𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂, 𑀬𑁂𑀦 𑀧𑀘𑁆𑀘𑀬𑁂𑀦 𑀲𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀢𑀁 𑀦𑀸𑀦𑀼𑀧𑁆𑀧𑀯𑁂𑀲𑁂𑀬𑁆𑀬 𑀦 𑀲𑀫𑁄𑀥𑀸𑀦𑁂𑀬𑁆𑀬. 𑀏𑀯𑀁 𑀲𑀫𑁆𑀪𑀸𑀭𑀯𑁂𑀓𑀮𑁆𑀮𑀓𑀭𑀡𑁂𑀦 𑀢𑀁 𑀦 𑀭𑁄𑀧𑀬𑁂𑀬𑁆𑀬 𑀚𑀸𑀬𑀦𑁆𑀢𑀁. 𑀅𑀣 𑀯𑀸 𑀬𑀲𑁆𑀫𑀸 𑀫𑀕𑁆𑀕𑀪𑀸𑀯𑀦𑀸𑀬 𑀅𑀢𑀻𑀢𑀸𑀧𑀺 𑀓𑀺𑀮𑁂𑀲𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀆𑀬𑀢𑀺𑀁 𑀯𑀺𑀧𑀸𑀓𑀸𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑀸𑀧𑀺 𑀦 𑀭𑁄𑀧𑀻𑀬𑀦𑁆𑀢𑀺 𑀢𑀤𑀪𑀸𑀯𑁂𑀦, 𑀅𑀦𑀸𑀕𑀢𑀸𑀧𑀺 𑀘𑀺𑀢𑁆𑀢𑀲𑀦𑁆𑀢𑀢𑀺𑀁 𑀦𑀸𑀦𑀼𑀧𑁆𑀧𑀯𑁂𑀲𑀻𑀬𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀲𑀸𑀫𑀢𑁆𑀣𑀺𑀬𑀯𑀺𑀖𑀸𑀢𑁂𑀦, 𑀢𑀲𑁆𑀫𑀸 𑀬𑁄 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀚𑀸𑀢𑀫𑀼𑀘𑁆𑀙𑀺𑀚𑁆𑀚 𑀦 𑀭𑁄𑀧𑀬𑁂𑀬𑁆𑀬 𑀚𑀸𑀬𑀦𑁆𑀢𑀁, 𑀅𑀦𑀸𑀕𑀢𑀫𑁆𑀧𑀺 𑀘𑀲𑁆𑀲 𑀚𑀸𑀬𑀦𑁆𑀢𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂, 𑀢𑀫𑀸𑀳𑀼 𑀏𑀓𑀁 𑀫𑀼𑀦𑀺𑀦𑀁 𑀘𑀭𑀦𑁆𑀢𑀁, 𑀲𑁄 𑀘 𑀅𑀤𑁆𑀤𑀓𑁆𑀔𑀺 𑀲𑀦𑁆𑀢𑀺𑀧𑀤𑀁 𑀫𑀳𑁂𑀲𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀏𑀓𑀁, 𑀲𑁂𑀝𑁆𑀞𑀝𑁆𑀞𑁂𑀦 𑀯𑀸 𑀏𑀓𑀁. 𑀫𑀼𑀦𑀺𑀦𑀦𑁆𑀢𑀺 𑀫𑀼𑀦𑀺𑀁, 𑀫𑀼𑀦𑀻𑀲𑀼 𑀯𑀸 𑀏𑀓𑀁. 𑀘𑀭𑀦𑁆𑀢𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀬 𑀮𑁄𑀓𑀢𑁆𑀣𑀘𑀭𑀺𑀬𑀸𑀬 𑀅𑀯𑀲𑁂𑀲𑀘𑀭𑀺𑀬𑀸𑀳𑀺 ¶ 𑀘 ¶ 𑀘𑀭𑀦𑁆𑀢𑀁. 𑀅𑀤𑁆𑀤𑀓𑁆𑀔𑀻𑀢𑀺 𑀅𑀤𑁆𑀤𑀲. 𑀲𑁄𑀢𑀺 𑀬𑁄 𑀚𑀸𑀢𑀫𑀼𑀘𑁆𑀙𑀺𑀚𑁆𑀚 𑀅𑀭𑁄𑀧𑀦𑁂 𑀅𑀦𑀦𑀼𑀧𑁆𑀧𑀯𑁂𑀲𑀦𑁂 𑀘 𑀲𑀫𑀢𑁆𑀣𑀢𑀸𑀬 ‘‘𑀦 𑀭𑁄𑀧𑀬𑁂𑀬𑁆𑀬 𑀚𑀸𑀬𑀦𑁆𑀢𑀫𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂’’𑀢𑀺 𑀯𑀼𑀢𑁆𑀢𑁄 𑀩𑀼𑀤𑁆𑀥𑀫𑀼𑀦𑀺. 𑀲𑀦𑁆𑀢𑀺𑀧𑀤𑀦𑁆𑀢𑀺 𑀲𑀦𑁆𑀢𑀺𑀓𑁄𑀝𑁆𑀞𑀸𑀲𑀁, 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀺𑀧𑀲𑁆𑀲𑀦𑀸𑀦𑀺𑀩𑁆𑀩𑀸𑀦𑀪𑁂𑀤𑀸𑀲𑀼 𑀢𑀻𑀲𑀼 𑀲𑀫𑁆𑀫𑀼𑀢𑀺𑀲𑀦𑁆𑀢𑀺, 𑀢𑀤𑀗𑁆𑀕𑀲𑀦𑁆𑀢𑀺, 𑀅𑀘𑁆𑀘𑀦𑁆𑀢𑀲𑀦𑁆𑀢𑀻𑀲𑀼 𑀲𑁂𑀝𑁆𑀞𑀁 𑀏𑀯𑀁 𑀅𑀦𑀼𑀧𑀲𑀦𑁆𑀢𑁂 𑀮𑁄𑀓𑁂 𑀅𑀘𑁆𑀘𑀦𑁆𑀢𑀲𑀦𑁆𑀢𑀺𑀁 𑀅𑀤𑁆𑀤𑀲 𑀫𑀳𑁂𑀲𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁧𑁧. 𑀢𑀢𑀺𑀬𑀕𑀸𑀣𑀸𑀬 𑀲𑀗𑁆𑀔𑀸𑀬𑀸𑀢𑀺 𑀕𑀡𑀬𑀺𑀢𑁆𑀯𑀸, 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀬𑀣𑀸𑀪𑀽𑀢𑀢𑁄 𑀜𑀢𑁆𑀯𑀸, 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀽𑀦𑀻𑀢𑀺 𑀬𑁂𑀲𑀼 𑀏𑀯𑀫𑀬𑀁 𑀮𑁄𑀓𑁄 𑀲𑀚𑁆𑀚𑀢𑀺, 𑀢𑀸𑀦𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀪𑁂𑀤𑀸𑀦𑀺 𑀓𑀺𑀮𑁂𑀲𑀝𑁆𑀞𑀸𑀦𑀸𑀦𑀺. 𑀧𑀫𑀸𑀬 𑀩𑀻𑀚𑀦𑁆𑀢𑀺 𑀬𑀁 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀩𑀻𑀚𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀢𑀁 𑀧𑀫𑀸𑀬 𑀳𑀺𑀁𑀲𑀺𑀢𑁆𑀯𑀸, 𑀩𑀸𑀥𑀺𑀢𑁆𑀯𑀸, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀧𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀺𑀦𑁂𑀳𑀫𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂𑀢𑀺 𑀬𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀺𑀦𑁂𑀳𑁂𑀦 𑀲𑀺𑀦𑁂𑀳𑀺𑀢𑀁 𑀢𑀁 𑀩𑀻𑀚𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀯𑀢𑁆𑀣𑀼𑀲𑀲𑁆𑀲𑀁 𑀯𑀺𑀭𑀼𑀳𑁂𑀬𑁆𑀬, 𑀢𑀁 𑀲𑀺𑀦𑁂𑀳𑀫𑀲𑁆𑀲 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂, 𑀢𑀧𑁆𑀧𑀝𑀺𑀧𑀓𑁆𑀔𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀢𑀁 𑀦𑀸𑀦𑀼𑀧𑁆𑀧𑀯𑁂𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲 𑀯𑁂 𑀫𑀼𑀦𑀺 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀩𑀼𑀤𑁆𑀥𑀫𑀼𑀦𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀚𑀸𑀢𑀺𑀬𑀸 𑀘 𑀫𑀭𑀡𑀲𑁆𑀲 𑀘 𑀅𑀦𑁆𑀢𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀚𑀸𑀢𑀺𑀓𑁆𑀔𑀬𑀦𑁆𑀢𑀤𑀲𑁆𑀲𑀻 ¶ 𑀢𑀓𑁆𑀓𑀁 𑀧𑀳𑀸𑀬 𑀦 𑀉𑀧𑁂𑀢𑀺 𑀲𑀗𑁆𑀔𑀁. 𑀇𑀫𑀸𑀬 𑀘𑀢𑀼𑀲𑀘𑁆𑀘𑀪𑀸𑀯𑀦𑀸𑀬 𑀦𑀯𑀧𑁆𑀧𑀪𑁂𑀤𑀫𑁆𑀧𑀺 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀧𑀳𑀸𑀬 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀢𑁆𑀯𑀸 𑀮𑁄𑀓𑀢𑁆𑀣𑀘𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀭𑀺𑀫𑀯𑀺𑀜𑁆𑀜𑀸𑀡𑀓𑁆𑀔𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑁆𑀧𑀢𑁆𑀢𑀺𑀬𑀸 ‘‘𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’’𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁. 𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀏𑀯 𑀯𑀸 𑀬𑀣𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀦𑁄 𑀯𑀺𑀢𑀓𑁆𑀓𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀸 𑀲𑀗𑁆𑀔𑀁 𑀉𑀧𑁂𑀢𑀺, 𑀏𑀯𑀁 𑀢𑀓𑁆𑀓𑀁 𑀧𑀳𑀸𑀬 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ¶ .

𑁨𑁧𑁨. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀅𑀜𑁆𑀜𑀸𑀬𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀦𑀬𑁂𑀦 𑀚𑀸𑀦𑀺𑀢𑁆𑀯𑀸. 𑀲𑀩𑁆𑀩𑀸𑀦𑀻𑀢𑀺 𑀅𑀦𑀯𑀲𑁂𑀲𑀸𑀦𑀺, 𑀦𑀺𑀯𑁂𑀲𑀦𑀸𑀦𑀻𑀢𑀺 𑀓𑀸𑀫𑀪𑀯𑀸𑀤𑀺𑀓𑁂 𑀪𑀯𑁂. 𑀦𑀺𑀯𑀲𑀦𑁆𑀢𑀺 𑀳𑀺 𑀢𑁂𑀲𑀼 𑀲𑀢𑁆𑀢𑀸, 𑀢𑀲𑁆𑀫𑀸 ‘‘𑀦𑀺𑀯𑁂𑀲𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀦𑀺𑀓𑀸𑀫𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀦𑁆𑀢𑀺 𑀏𑀯𑀁 𑀤𑀺𑀝𑁆𑀞𑀸𑀤𑀻𑀦𑀯𑀢𑁆𑀢𑀸 𑀢𑁂𑀲𑀁 𑀦𑀺𑀯𑁂𑀲𑀦𑀸𑀦𑀁 𑀏𑀓𑀫𑁆𑀧𑀺 𑀅𑀧𑀢𑁆𑀣𑁂𑀦𑁆𑀢𑁄 𑀲𑁄 𑀏𑀯𑀭𑀽𑀧𑁄 𑀩𑀼𑀤𑁆𑀥𑀫𑀼𑀦𑀺 𑀫𑀕𑁆𑀕𑀪𑀸𑀯𑀦𑀸𑀩𑀮𑁂𑀦 𑀢𑀡𑁆𑀳𑀸𑀕𑁂𑀥𑀲𑁆𑀲 𑀯𑀺𑀕𑀢𑀢𑁆𑀢𑀸 𑀯𑀻𑀢𑀕𑁂𑀥𑁄, 𑀯𑀻𑀢𑀕𑁂𑀥𑀢𑁆𑀢𑀸 𑀏𑀯 𑀘 𑀅𑀕𑀺𑀤𑁆𑀥𑁄, 𑀦 𑀬𑀣𑀸 𑀏𑀓𑁂 𑀅𑀯𑀻𑀢𑀕𑁂𑀥𑀸 𑀏𑀯 𑀲𑀫𑀸𑀦𑀸 ‘‘𑀅𑀕𑀺𑀤𑁆𑀥𑀫𑁆𑀳𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀏𑀯𑀁. 𑀦𑀸𑀬𑀽𑀳𑀢𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀦𑀺𑀯𑁂𑀲𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀦 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀸𑀭𑀕𑀢𑁄 𑀳𑀺 𑀳𑁄𑀢𑀺, 𑀬𑀲𑁆𑀫𑀸 𑀏𑀯𑀭𑀽𑀧𑁄 𑀲𑀩𑁆𑀩𑀦𑀺𑀯𑁂𑀲𑀦𑀸𑀦𑀁 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀧𑀞𑀫𑀕𑀸𑀣𑀸𑀬 𑀧𑀼𑀣𑀼𑀚𑁆𑀚𑀦𑀤𑀲𑁆𑀲𑀦𑀁 𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀧𑀲𑀁𑀲𑀦𑁆𑀢𑁄 𑀤𑀼𑀢𑀺𑀬𑀕𑀸𑀣𑀸𑀬 𑀬𑁂𑀳𑀺 𑀓𑀺𑀮𑁂𑀲𑁂𑀳𑀺 𑀧𑀼𑀣𑀼𑀚𑁆𑀚𑀦𑁄 𑀅𑀦𑀼𑀧𑀲𑀦𑁆𑀢𑁄 𑀳𑁄𑀢𑀺, 𑀢𑁂𑀲𑀁 𑀅𑀪𑀸𑀯𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀺𑀧𑀤𑀸𑀥𑀺𑀕𑀫𑀁 𑀧𑀲𑀁𑀲𑀦𑁆𑀢𑁄 𑀢𑀢𑀺𑀬𑀕𑀸𑀣𑀸𑀬 𑀬𑁂𑀲𑀼 𑀯𑀢𑁆𑀣𑀽𑀲𑀼 𑀧𑀼𑀣𑀼𑀚𑁆𑀚𑀦𑁄 𑀢𑀓𑁆𑀓𑀁 𑀅𑀧𑁆𑀧𑀳𑀸𑀬 𑀢𑀣𑀸 𑀢𑀣𑀸 𑀲𑀗𑁆𑀔𑀁 𑀉𑀧𑁂𑀢𑀺, 𑀢𑁂𑀲𑀼 𑀘𑀢𑀼𑀲𑀘𑁆𑀘𑀪𑀸𑀯𑀦𑀸𑀬 𑀢𑀓𑁆𑀓𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀲𑀗𑁆𑀔𑀸𑀦𑀼𑀧𑀕𑀫𑀦𑀁 𑀧𑀲𑀁𑀲𑀦𑁆𑀢𑁄 𑀘𑀢𑀼𑀢𑁆𑀣𑀕𑀸𑀣𑀸𑀬 𑀆𑀬𑀢𑀺𑀫𑁆𑀧𑀺 𑀬𑀸𑀦𑀺 𑀦𑀺𑀯𑁂𑀲𑀦𑀸𑀦𑀺 𑀓𑀸𑀫𑀬𑀫𑀸𑀦𑁄 𑀧𑀼𑀣𑀼𑀚𑁆𑀚𑀦𑁄 𑀪𑀯𑀢𑀡𑁆𑀳𑀸𑀬 𑀆𑀬𑀽𑀳𑀢𑀺, 𑀢𑁂𑀲𑀼 𑀢𑀡𑁆𑀳𑀸𑀪𑀸𑀯𑁂𑀦 𑀅𑀢𑁆𑀢𑀦𑁄 𑀅𑀦𑀸𑀬𑀽𑀳𑀦𑀁 𑀧𑀲𑀁𑀲𑀦𑁆𑀢𑁄 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀏𑀓𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀁 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑁨𑁧𑁩. 𑀲𑀩𑁆𑀩𑀸𑀪𑀺𑀪𑀼𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀓𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑁄 ¶ 𑀩𑁄𑀥𑀺𑀫𑀡𑁆𑀟𑀲𑁆𑀲 𑀘 𑀕𑀬𑀸𑀬 𑀘 𑀅𑀦𑁆𑀢𑀭𑁂 𑀉𑀧𑀓𑁂𑀦𑀸𑀚𑀻𑀯𑀓𑁂𑀦 𑀲𑀫𑀸𑀕𑀘𑁆𑀙𑀺. 𑀢𑁂𑀦 𑀘 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧) 𑀦𑀬𑁂𑀦 𑀧𑀼𑀝𑁆𑀞𑁄 ‘‘𑀲𑀩𑁆𑀩𑀸𑀪𑀺𑀪𑀽’’𑀢𑀺𑀆𑀤𑀻𑀦𑀺 𑀆𑀳. 𑀉𑀧𑀓𑁄 ‘‘𑀳𑀼𑀧𑁂𑀬𑁆𑀬𑀸𑀯𑀼𑀲𑁄’’𑀢𑀺 𑀯𑀢𑁆𑀯𑀸, 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸, 𑀉𑀫𑁆𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺 ¶ . 𑀅𑀦𑀼𑀓𑁆𑀓𑀫𑁂𑀦 𑀘 𑀯𑀗𑁆𑀓𑀳𑀸𑀭𑀚𑀦𑀧𑀤𑁂 𑀅𑀜𑁆𑀜𑀢𑀭𑀁 𑀫𑀸𑀕𑀯𑀺𑀓𑀕𑀸𑀫𑀁 𑀧𑀸𑀧𑀼𑀡𑀺. 𑀢𑀫𑁂𑀦𑀁 𑀫𑀸𑀕𑀯𑀺𑀓𑀚𑁂𑀝𑁆𑀞𑀓𑁄 𑀤𑀺𑀲𑁆𑀯𑀸 𑁋 ‘‘𑀅𑀳𑁄 𑀅𑀧𑁆𑀧𑀺𑀘𑁆𑀙𑁄 𑀲𑀫𑀡𑁄 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀺, 𑀅𑀬𑀁 𑀮𑁄𑀓𑁂 𑀅𑀭𑀳𑀸’’𑀢𑀺 𑀖𑀭𑀁 𑀦𑁂𑀢𑁆𑀯𑀸 𑀫𑀁𑀲𑀭𑀲𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀼𑀢𑁆𑀢𑀸𑀯𑀺𑀜𑁆𑀘 𑀦𑀁 𑀲𑀧𑀼𑀢𑁆𑀢𑀤𑀸𑀭𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣, 𑀅𑀳𑀁 𑀧𑀘𑁆𑀘𑀬𑁂𑀦 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀯𑀲𑀦𑁄𑀓𑀸𑀲𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀢𑁆𑀣 𑀯𑀲𑀢𑀺.

𑀫𑀸𑀕𑀯𑀺𑀓𑁄 𑀕𑀺𑀫𑁆𑀳𑀓𑀸𑀮𑁂 𑀉𑀤𑀓𑀲𑀫𑁆𑀧𑀦𑁆𑀦𑁂 𑀲𑀻𑀢𑀮𑁂 𑀧𑀤𑁂𑀲𑁂 𑀘𑀭𑀺𑀢𑀼𑀁 𑀤𑀽𑀭𑀁 𑀅𑀧𑀓𑁆𑀓𑀦𑁆𑀢𑁂𑀲𑀼 𑀫𑀺𑀕𑁂𑀲𑀼 𑀢𑀢𑁆𑀣 𑀕𑀘𑁆𑀙𑀦𑁆𑀢𑁄 ‘‘𑀅𑀫𑁆𑀳𑀸𑀓𑀁 𑀅𑀭𑀳𑀦𑁆𑀢𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀲𑁆𑀲𑀽’’𑀢𑀺 𑀙𑀸𑀯𑀁 𑀦𑀸𑀫 𑀥𑀻𑀢𑀭𑀁 𑀆𑀡𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀧𑀼𑀢𑁆𑀢𑀪𑀸𑀢𑀼𑀓𑁂𑀳𑀺. 𑀲𑀸 𑀘𑀲𑁆𑀲 𑀥𑀻𑀢𑀸 𑀤𑀲𑁆𑀲𑀦𑀻𑀬𑀸 𑀳𑁄𑀢𑀺 𑀓𑁄𑀝𑁆𑀞𑀸𑀲𑀲𑀫𑁆𑀧𑀦𑁆𑀦𑀸. 𑀤𑀼𑀢𑀺𑀬𑀤𑀺𑀯𑀲𑁂 𑀉𑀧𑀓𑁄 𑀖𑀭𑀁 𑀆𑀕𑀢𑁄 𑀢𑀁 𑀤𑀸𑀭𑀺𑀓𑀁 𑀲𑀩𑁆𑀩𑀁 𑀉𑀧𑀘𑀸𑀭𑀁 𑀓𑀢𑁆𑀯𑀸, 𑀧𑀭𑀺𑀯𑀺𑀲𑀺𑀢𑀼𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀪𑀸𑀚𑀦𑁂𑀦 𑀪𑀢𑁆𑀢𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, 𑀪𑀢𑁆𑀢𑀁 𑀏𑀓𑀫𑀦𑁆𑀢𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑁋 ‘‘𑀲𑀘𑁂 𑀙𑀸𑀯𑀁 𑀮𑀪𑀸𑀫𑀺, 𑀚𑀻𑀯𑀸𑀫𑀺, 𑀦𑁄 𑀘𑁂, 𑀫𑀭𑀸𑀫𑀻’’𑀢𑀺 𑀦𑀺𑀭𑀸𑀳𑀸𑀭𑁄 𑀲𑀬𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀸𑀕𑀯𑀺𑀓𑁄 𑀆𑀕𑀦𑁆𑀢𑁆𑀯𑀸 𑀥𑀻𑀢𑀭𑀁 𑀉𑀧𑀓𑀲𑁆𑀲 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀲𑀸 𑁋 ‘‘𑀏𑀓𑀤𑀺𑀯𑀲𑀫𑁂𑀯 𑀆𑀕𑀦𑁆𑀢𑁆𑀯𑀸 𑀧𑀼𑀦 𑀦𑀸𑀕𑀢𑀧𑀼𑀩𑁆𑀩𑁄’’𑀢𑀺 𑀆𑀳. 𑀫𑀸𑀕𑀯𑀺𑀓𑁄 ‘‘𑀆𑀕𑀢𑀯𑁂𑀲𑁂𑀦𑁂𑀯 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀕𑀦𑁆𑀢𑁆𑀯𑀸 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀸𑀤𑁂 𑀧𑀭𑀸𑀫𑀲𑀦𑁆𑀢𑁄 𑀧𑀼𑀘𑁆𑀙𑀺. 𑀉𑀧𑀓𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 𑀧𑀭𑀺𑀯𑀢𑁆𑀢𑀢𑀺𑀬𑁂𑀯. 𑀲𑁄 ‘‘𑀯𑀤, 𑀪𑀦𑁆𑀢𑁂, 𑀬𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼𑀁, 𑀲𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀉𑀧𑀓𑁄 𑁋 ‘‘𑀲𑀘𑁂 𑀙𑀸𑀯𑀁 𑀮𑀪𑀸𑀫𑀺, 𑀚𑀻𑀯𑀸𑀫𑀺, 𑀦𑁄 𑀘𑁂, 𑀇𑀥𑁂𑀯 𑀫𑀭𑀡𑀁 𑀲𑁂𑀬𑁆𑀬𑁄’’𑀢𑀺 𑀆𑀳. ‘‘𑀚𑀸𑀦𑀸𑀲𑀺 𑀧𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀲𑀺𑀧𑁆𑀧’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀻’’𑀢𑀺 ¶ . ‘‘𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀚𑀸𑀦𑀦𑁆𑀢𑁂𑀦 𑀲𑀓𑁆𑀓𑀸 𑀖𑀭𑀸𑀯𑀸𑀲𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺? 𑀲𑁄 𑀆𑀳 𑁋 ‘‘𑀦𑀸𑀳𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀫𑀺, 𑀅𑀧𑀺𑀘 𑀢𑀼𑀫𑁆𑀳𑀸𑀓𑀁 𑀫𑀁𑀲𑀳𑀸𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀁𑀲𑀜𑁆𑀘 𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀕𑀯𑀺𑀓𑁄𑀧𑀺 ‘‘𑀅𑀫𑁆𑀳𑀸𑀓𑀁 𑀏𑀢𑀤𑁂𑀯 𑀭𑀼𑀘𑁆𑀘𑀢𑀻’’𑀢𑀺 𑀉𑀢𑁆𑀢𑀭𑀲𑀸𑀝𑀓𑀁 ¶ 𑀤𑀢𑁆𑀯𑀸, 𑀖𑀭𑀁 𑀆𑀦𑁂𑀢𑁆𑀯𑀸 𑀥𑀻𑀢𑀭𑀁 𑀅𑀤𑀸𑀲𑀺. 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑁄 ¶ 𑀯𑀺𑀚𑀸𑀬𑀺. 𑀲𑀼𑀪𑀤𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀙𑀸𑀯𑀸 𑀧𑀼𑀢𑁆𑀢𑀢𑁄𑀲𑀦𑀕𑀻𑀢𑁂𑀦 𑀉𑀧𑀓𑀁 𑀉𑀧𑁆𑀧𑀡𑁆𑀟𑁂𑀲𑀺. 𑀲𑁄 𑀢𑀁 𑀅𑀲𑀳𑀦𑁆𑀢𑁄 ‘‘𑀪𑀤𑁆𑀤𑁂, 𑀅𑀳𑀁 𑀅𑀦𑀦𑁆𑀢𑀚𑀺𑀦𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻’’𑀢𑀺 𑀫𑀚𑁆𑀛𑀺𑀫𑀤𑁂𑀲𑀸𑀪𑀺𑀫𑀼𑀔𑁄 𑀧𑀓𑁆𑀓𑀸𑀫𑀺.

𑀪𑀕𑀯𑀸 𑀘 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂. 𑀅𑀣 𑀔𑁄 𑀪𑀕𑀯𑀸 𑀧𑀝𑀺𑀓𑀘𑁆𑀘𑁂𑀯 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀅𑀦𑀦𑁆𑀢𑀚𑀺𑀦𑁄𑀢𑀺 𑀧𑀼𑀘𑁆𑀙𑀫𑀸𑀦𑁄 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀫𑀁 𑀤𑀲𑁆𑀲𑁂𑀬𑁆𑀬𑀸𑀣𑀸’’𑀢𑀺. 𑀉𑀧𑀓𑁄𑀧𑀺 𑀔𑁄 𑀅𑀦𑀼𑀧𑀼𑀩𑁆𑀩𑁂𑀦𑁂𑀯 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀫 𑀲𑀳𑀸𑀬𑁄 𑀅𑀦𑀦𑁆𑀢𑀚𑀺𑀦𑁄 𑀦𑀸𑀫 𑀅𑀢𑁆𑀣𑀺, 𑀲𑁄 𑀓𑀼𑀳𑀺𑀁 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀢𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀪𑀕𑀯𑀸 𑀢𑀲𑁆𑀲𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀼𑀩𑁆𑀩𑀧𑁆𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀪𑀕𑀯𑀸 𑀧𑀞𑀫𑀁 𑀦𑀺𑀲𑁆𑀲𑀺𑀭𑀺𑀓𑀲𑁆𑀲 𑀦𑀕𑁆𑀕𑀲𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺. 𑀪𑀕𑀯𑀸 𑀢𑀁 𑀓𑀣𑀸𑀲𑀫𑀼𑀝𑁆𑀞𑀸𑀦𑀁 𑀯𑀺𑀤𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺? 𑀢𑁂 𑀲𑀩𑁆𑀩𑀁 𑀓𑀣𑁂𑀲𑀼𑀁. 𑀢𑀢𑁄 𑀪𑀕𑀯𑀸 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀳𑁂𑀢𑀼𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑀺𑀫𑁆𑀫𑀮𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀦 𑀲𑀓𑁆𑀓𑀸 𑀢𑀢𑁆𑀣 𑀤𑁄𑀲𑀁 𑀤𑀝𑁆𑀞𑀼𑀁. 𑀢𑁂𑀦, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑁂𑀲𑀦𑀽𑀧𑀦𑀺𑀲𑁆𑀲𑀬𑁂𑀦 𑀉𑀧𑀓𑁄 𑀏𑀢𑀭𑀳𑀺 𑀅𑀦𑀸𑀕𑀸𑀫𑀻 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀫𑀮𑀸𑀪𑀸𑀯𑀤𑀻𑀧𑀺𑀓𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀸𑀲𑀯𑁂𑀲𑀼 𑀲𑀩𑁆𑀩𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀢𑁂𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸 𑀲𑀬𑀜𑁆𑀘 𑀢𑁂 𑀥𑀫𑁆𑀫𑁂 𑀲𑀩𑁆𑀩𑁂 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑀸𑀪𑀺𑀪𑀼𑀁. 𑀢𑁂𑀲𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀤𑀺𑀢𑀢𑁆𑀢𑀸 𑀲𑀩𑁆𑀩𑀯𑀺𑀤𑀼𑀁. 𑀲𑀩𑁆𑀩𑀥𑀫𑁆𑀫𑀤𑁂𑀲𑀦𑀲𑀫𑀢𑁆𑀣𑀸𑀬 𑀲𑁄𑀪𑀦𑀸𑀬 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀼𑀫𑁂𑀥𑀁. 𑀬𑁂𑀲𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑀸𑀦𑀁 ¶ 𑀯𑀲𑁂𑀦 𑀲𑀸𑀲𑀯𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀉𑀧𑀮𑀺𑀫𑁆𑀧𑀢𑀺, 𑀢𑁂𑀲𑀁 𑀮𑁂𑀧𑀸𑀦𑀁 𑀅𑀪𑀸𑀯𑀸 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀮𑀺𑀢𑁆𑀢𑀁. 𑀢𑁂𑀲𑀼 𑀘 𑀲𑀩𑁆𑀩𑀥𑀫𑁆𑀫𑁂𑀲𑀼 𑀙𑀦𑁆𑀤𑀭𑀸𑀕𑀸𑀪𑀸𑀯𑁂𑀦 𑀲𑀩𑁆𑀩𑁂 𑀢𑁂 𑀥𑀫𑁆𑀫𑁂 𑀚𑀳𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀩𑁆𑀩𑀜𑁆𑀚𑀳𑀁. 𑀉𑀧𑀥𑀺𑀯𑀺𑀯𑁂𑀓𑀦𑀺𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀢𑀡𑁆𑀳𑀓𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀯𑀺𑀲𑁂𑀲𑁂𑀦 𑀫𑀼𑀢𑁆𑀢𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑀁, 𑀅𑀥𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻𑀢𑀺 𑀢𑀫𑁆𑀧𑀺 𑀧𑀡𑁆𑀟𑀺𑀢𑀸 𑀲𑀢𑁆𑀢𑀸 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺 𑀚𑀸𑀦𑀦𑁆𑀢𑀺. 𑀧𑀲𑁆𑀲𑀣 𑀬𑀸𑀯 𑀧𑀝𑀺𑀯𑀺𑀲𑀺𑀝𑁆𑀞𑁄𑀯𑀸𑀬𑀁 𑀫𑀼𑀦𑀺, 𑀢𑀲𑁆𑀲 𑀓𑀼𑀢𑁄 𑀤𑁂𑀲𑀦𑀸𑀫𑀮𑀦𑁆𑀢𑀺 𑀅𑀢𑁆𑀢𑀸𑀦𑀁 𑀯𑀺𑀪𑀸𑀯𑁂𑀢𑀺 ¶ . 𑀯𑀺𑀪𑀸𑀯𑀦𑀢𑁆𑀣𑁄 𑀳𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄𑀢𑀺. 𑀓𑁂𑀘𑀺 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘‘𑀉𑀧𑀓𑁄 𑀢𑀤𑀸 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸𑀧𑀺 ‘𑀅𑀬𑀁 𑀩𑀼𑀤𑁆𑀥𑀫𑀼𑀦𑀻’𑀢𑀺 𑀦 𑀲𑀤𑁆𑀤𑀳𑀻’’𑀢𑀺 𑀏𑀯𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ¶ , 𑀢𑀢𑁄 𑀪𑀕𑀯𑀸 ‘‘𑀲𑀤𑁆𑀤𑀳𑀢𑀼 𑀯𑀸 𑀫𑀸 𑀯𑀸, 𑀥𑀻𑀭𑀸 𑀧𑀦 𑀢𑀁 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀪𑀸𑀲𑀻𑀢𑀺.

𑁨𑁧𑁪. 𑀧𑀜𑁆𑀜𑀸𑀩𑀮𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀕𑀸𑀣𑀸 𑀭𑁂𑀯𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀯𑀼𑀢𑁆𑀢𑀸. 𑀢𑀢𑁆𑀣 ‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂’’𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀆𑀤𑀺𑀢𑁄 𑀧𑀪𑀼𑀢𑀺 𑀧𑀩𑁆𑀩𑀚𑁆𑀚𑀸, 𑀧𑀩𑁆𑀩𑀚𑀺𑀢𑀲𑁆𑀲 𑀔𑀤𑀺𑀭𑀯𑀦𑁂 𑀯𑀺𑀳𑀸𑀭𑁄, 𑀢𑀢𑁆𑀣 𑀯𑀺𑀳𑀭𑀢𑁄 𑀯𑀺𑀲𑁂𑀲𑀸𑀥𑀺𑀕𑀫𑁄, 𑀪𑀕𑀯𑀢𑁄 𑀢𑀢𑁆𑀣 𑀕𑀫𑀦𑀧𑀘𑁆𑀘𑀸𑀕𑀫𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀘𑀸𑀕𑀢𑁂 𑀧𑀦 𑀪𑀕𑀯𑀢𑀺 𑀬𑁄 𑀲𑁄 𑀫𑀳𑀮𑁆𑀮𑀓𑀪𑀺𑀓𑁆𑀔𑀼 𑀉𑀧𑀸𑀳𑀦𑀁 𑀲𑀫𑁆𑀫𑀼𑀲𑁆𑀲𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁄 𑀔𑀤𑀺𑀭𑀭𑀼𑀓𑁆𑀔𑁂 𑀆𑀮𑀕𑁆𑀕𑀺𑀢𑀁 𑀤𑀺𑀲𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀯𑀺𑀲𑀸𑀔𑀸𑀬 𑀉𑀧𑀸𑀲𑀺𑀓𑀸𑀬 ‘‘𑀓𑀺𑀁, 𑀪𑀦𑁆𑀢𑁂, 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀯𑀲𑀦𑁄𑀓𑀸𑀲𑁄 𑀭𑀫𑀡𑀻𑀬𑁄’’𑀢𑀺 𑀪𑀺𑀓𑁆𑀔𑀽 𑀧𑀼𑀘𑁆𑀙𑀫𑀸𑀦𑀸𑀬 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀲𑀁𑀲𑀺𑀢𑁄, 𑀢𑁂 𑀅𑀧𑀲𑀸𑀤𑁂𑀦𑁆𑀢𑁄 ‘‘𑀉𑀧𑀸𑀲𑀺𑀓𑁂, 𑀏𑀢𑁂 𑀢𑀼𑀘𑁆𑀙𑀁 𑀪𑀡𑀦𑁆𑀢𑀺, 𑀦 𑀲𑀼𑀦𑁆𑀤𑀭𑁄 𑀪𑀽𑀫𑀺𑀧𑁆𑀧𑀤𑁂𑀲𑁄, 𑀅𑀢𑀺𑀮𑀽𑀔𑀓𑀓𑁆𑀔𑀴𑀁 𑀔𑀤𑀺𑀭𑀯𑀦𑀫𑁂𑀯𑀸’’𑀢𑀺 𑀆𑀳. 𑀲𑁄 𑀯𑀺𑀲𑀸𑀔𑀸𑀬 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁂 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑁄 𑀆𑀳 𑁋 ‘‘𑀓𑀺𑀁, 𑀆𑀯𑀼𑀲𑁄, 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀲𑁂𑀦𑀸𑀲𑀦𑁂 𑀭𑀫𑀡𑀻𑀬𑀁 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞’’𑀦𑁆𑀢𑀺 ¶ . 𑀪𑀕𑀯𑀸 𑀢𑀁 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀧𑀭𑀺𑀲𑀫𑀚𑁆𑀛𑀁 𑀧𑀢𑁆𑀯𑀸, 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀭𑁂𑀯𑀢𑀁, 𑀪𑀦𑁆𑀢𑁂, 𑀆𑀭𑀩𑁆𑀪 𑀓𑀣𑀸 𑀉𑀧𑁆𑀧𑀦𑁆𑀦𑀸 ‘𑀏𑀯𑀁 𑀦𑀯𑀓𑀫𑁆𑀫𑀺𑀓𑁄 𑀓𑀤𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀭𑁂𑀯𑀢𑁄 𑀦𑀯𑀓𑀫𑁆𑀫𑀺𑀓𑁄, 𑀅𑀭𑀳𑀸 𑀭𑁂𑀯𑀢𑁄 𑀔𑀻𑀡𑀸𑀲𑀯𑁄’’𑀢𑀺 𑀯𑀢𑁆𑀯𑀸 𑀢𑀁 𑀆𑀭𑀩𑁆𑀪 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀤𑀼𑀩𑁆𑀩𑀮𑀓𑀭𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑀸𑀥𑀓𑁂𑀦 𑀯𑀺𑀓𑀼𑀩𑁆𑀩𑀦𑀅𑀥𑀺𑀝𑁆𑀞𑀸𑀦𑀧𑁆𑀧𑀪𑁂𑀤𑁂𑀦 𑀯𑀸 𑀧𑀜𑁆𑀜𑀸𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀜𑁆𑀜𑀸𑀩𑀮𑀁, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀥𑀼𑀢𑀗𑁆𑀕𑀯𑀢𑁂𑀦 𑀘 𑀉𑀧𑀧𑀦𑁆𑀦𑀢𑁆𑀢𑀸 𑀲𑀻𑀮𑀯𑀢𑀽𑀧𑀧𑀦𑁆𑀦𑀁, 𑀫𑀕𑁆𑀕𑀲𑀫𑀸𑀥𑀺𑀦𑀸 𑀨𑀮𑀲𑀫𑀸𑀥𑀺𑀦𑀸 𑀇𑀭𑀺𑀬𑀸𑀧𑀣𑀲𑀫𑀸𑀥𑀺𑀦𑀸 𑀘 𑀲𑀫𑀸𑀳𑀺𑀢𑀁, 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀛𑀸𑀦𑁂𑀦 𑀛𑀸𑀦𑁂 𑀯𑀸 𑀭𑀢𑀢𑁆𑀢𑀸 𑀛𑀸𑀦𑀭𑀢𑀁, 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸 𑀲𑀢𑀺𑀫𑀁, 𑀭𑀸𑀕𑀸𑀤𑀺𑀲𑀗𑁆𑀕𑀢𑁄 𑀧𑀫𑀼𑀢𑁆𑀢𑀢𑀸 𑀲𑀗𑁆𑀕𑀸 𑀧𑀫𑀼𑀢𑁆𑀢𑀁, 𑀧𑀜𑁆𑀘𑀘𑁂𑀢𑁄𑀔𑀺𑀮𑀘𑀢𑀼𑀆𑀲𑀯𑀸𑀪𑀸𑀯𑁂𑀦 𑀅𑀔𑀺𑀮𑀁 𑀅𑀦𑀸𑀲𑀯𑀁 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺. 𑀢𑀫𑁆𑀧𑀺 𑀏𑀯𑀁 𑀧𑀜𑁆𑀜𑀸𑀤𑀺𑀕𑀼𑀡𑀲𑀁𑀬𑀼𑀢𑁆𑀢𑀁 𑀲𑀗𑁆𑀕𑀸𑀤𑀺𑀤𑁄𑀲𑀯𑀺𑀲𑀁𑀬𑀼𑀢𑁆𑀢𑀁 𑀧𑀡𑁆𑀟𑀺𑀢𑀸 𑀲𑀢𑁆𑀢𑀸 𑀫𑀼𑀦𑀺𑀁 𑀯𑀸 𑀯𑁂𑀤𑀬𑀦𑁆𑀢𑀺. 𑀧𑀲𑁆𑀲𑀣 𑀬𑀸𑀯 𑀧𑀝𑀺𑀯𑀺𑀲𑀺𑀝𑁆𑀞𑁄𑀯𑀸𑀬𑀁 ¶ 𑀔𑀻𑀡𑀸𑀲𑀯𑀫𑀼𑀦𑀺, 𑀲𑁄 ‘‘𑀦𑀯𑀓𑀫𑁆𑀫𑀺𑀓𑁄’’𑀢𑀺 𑀯𑀸 ‘‘𑀓𑀤𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸 𑀓𑀣𑀁 𑀯𑀢𑁆𑀢𑀩𑁆𑀩𑁄. 𑀲𑁄 𑀳𑀺 𑀧𑀜𑁆𑀜𑀸𑀩𑀮𑁂𑀦 𑀢𑀁 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀦 𑀦𑀯𑀓𑀫𑁆𑀫𑀓𑀭𑀡𑁂𑀦, 𑀓𑀢𑀓𑀺𑀘𑁆𑀘𑁄𑀯 𑀲𑁄, 𑀦 𑀇𑀤𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀢𑀻𑀢𑀺 𑀭𑁂𑀯𑀢𑀢𑁆𑀣𑁂𑀭𑀁 𑀯𑀺𑀪𑀸𑀯𑁂𑀢𑀺. 𑀯𑀺𑀪𑀸𑀯𑀦𑀢𑁆𑀣𑁄 𑀳𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄𑀢𑀺.

𑁨𑁧𑁫. 𑀏𑀓𑀁 𑀘𑀭𑀦𑁆𑀢𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑁄𑀥𑀺𑀫𑀡𑁆𑀟𑀢𑁄 𑀧𑀪𑀼𑀢𑀺 𑀬𑀣𑀸𑀓𑁆𑀓𑀫𑀁 𑀓𑀧𑀺𑀮𑀯𑀢𑁆𑀣𑀼𑀁 𑀅𑀦𑀼𑀧𑁆𑀧𑀢𑁆𑀢𑁂 ¶ 𑀪𑀕𑀯𑀢𑀺 𑀧𑀺𑀢𑀸𑀧𑀼𑀢𑁆𑀢𑀲𑀫𑀸𑀕𑀫𑁂 𑀯𑀢𑁆𑀢𑀫𑀸𑀦𑁂 𑀪𑀕𑀯𑀸 𑀲𑀫𑁆𑀫𑁄𑀤𑀫𑀸𑀦𑁂𑀦 𑀭𑀜𑁆𑀜𑀸 𑀲𑀼𑀤𑁆𑀥𑁄𑀤𑀦𑁂𑀦 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀕𑀳𑀝𑁆𑀞𑀓𑀸𑀮𑁂 𑀕𑀦𑁆𑀥𑀓𑀭𑀡𑁆𑀟𑀓𑁂 𑀯𑀸𑀲𑀺𑀢𑀸𑀦𑀺 𑀓𑀸𑀲𑀺𑀓𑀸𑀤𑀻𑀦𑀺 𑀤𑀼𑀲𑁆𑀲𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀣𑀁 𑀙𑀺𑀦𑁆𑀦𑀓𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀥𑀸𑀭𑁂𑀣𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑁄 𑀭𑀸𑀚𑀸𑀦𑀁 𑀅𑀦𑀼𑀦𑀬𑀫𑀸𑀦𑁄 𑁋

‘‘𑀬𑀁 ¶ 𑀢𑁆𑀯𑀁 𑀢𑀸𑀢 𑀯𑀤𑁂 𑀫𑀬𑁆𑀳𑀁, 𑀧𑀝𑁆𑀝𑀼𑀡𑁆𑀡𑀁 𑀤𑀼𑀓𑀽𑀮𑀓𑀸𑀲𑀺𑀓𑀁;

𑀧𑀁𑀲𑀼𑀓𑀽𑀮𑀁 𑀢𑀢𑁄 𑀲𑁂𑀬𑁆𑀬𑀁, 𑀏𑀢𑀁 𑀫𑁂 𑀅𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺. 𑁋

𑀆𑀤𑀻𑀦𑀺 𑀯𑀢𑁆𑀯𑀸 𑀮𑁄𑀓𑀥𑀫𑁆𑀫𑁂𑀳𑀺 𑀅𑀢𑁆𑀢𑀦𑁄 𑀅𑀯𑀺𑀓𑀫𑁆𑀧𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀜𑁆𑀜𑁄 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀲𑀢𑁆𑀢𑀧𑀤𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑀸𑀤𑀻𑀳𑀺 𑀏𑀓𑀁, 𑀇𑀭𑀺𑀬𑀸𑀧𑀣𑀸𑀤𑀻𑀳𑀺 𑀘𑀭𑀺𑀬𑀸𑀳𑀺 𑀘𑀭𑀦𑁆𑀢𑀁. 𑀫𑁄𑀦𑁂𑀬𑁆𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑁂𑀦 𑀫𑀼𑀦𑀺𑀁. 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀧𑀫𑀸𑀤𑀸𑀪𑀸𑀯𑀢𑁄 𑀅𑀧𑁆𑀧𑀫𑀢𑁆𑀢𑀁. 𑀅𑀓𑁆𑀓𑁄𑀲𑀦𑀕𑀭𑀳𑀦𑀸𑀤𑀺𑀪𑁂𑀤𑀸𑀬 𑀦𑀺𑀦𑁆𑀤𑀸𑀬 𑀯𑀡𑁆𑀡𑀦𑀣𑁄𑀫𑀦𑀸𑀤𑀺𑀪𑁂𑀤𑀸𑀬 𑀧𑀲𑀁𑀲𑀸𑀬 𑀘𑀸𑀢𑀺 𑀇𑀫𑀸𑀲𑀼 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀧𑀝𑀺𑀖𑀸𑀦𑀼𑀦𑀬𑀯𑀲𑁂𑀦 𑀅𑀯𑁂𑀥𑀫𑀸𑀦𑀁. 𑀦𑀺𑀦𑁆𑀤𑀸𑀧𑀲𑀁𑀲𑀸𑀫𑀼𑀔𑁂𑀦 𑀘𑁂𑀢𑁆𑀣 𑀅𑀝𑁆𑀞𑀧𑀺 𑀮𑁄𑀓𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀳𑀁𑀯 𑀪𑁂𑀭𑀺𑀲𑀤𑁆𑀤𑀸𑀤𑀻𑀲𑀼 𑀲𑀤𑁆𑀤𑁂𑀲𑀼 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀧𑀓𑀢𑀺𑀯𑀺𑀓𑀸𑀭𑀸𑀦𑀼𑀧𑀕𑀫𑁂𑀦 𑀅𑀲𑀦𑁆𑀢𑀲𑀦𑁆𑀢𑀁, 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀲𑀦𑁆𑀢𑀸𑀲𑀸𑀪𑀸𑀯𑁂𑀦. 𑀯𑀸𑀢𑀁𑀯 𑀲𑀼𑀢𑁆𑀢𑀫𑀬𑀸𑀤𑀺𑀪𑁂𑀤𑁂 𑀚𑀸𑀮𑀫𑁆𑀳𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀚𑀸𑀮𑁂 𑀅𑀲𑀚𑁆𑀚𑀫𑀸𑀦𑀁, 𑀅𑀝𑁆𑀞𑀲𑀼 𑀯𑀸 𑀮𑁄𑀓𑀥𑀫𑁆𑀫𑁂𑀲𑀼 𑀧𑀝𑀺𑀖𑀸𑀦𑀼𑀦𑀬𑀯𑀲𑁂𑀦 𑀅𑀲𑀚𑁆𑀚𑀫𑀸𑀦𑀁. 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀮𑁄𑀓𑁂 𑀚𑀸𑀢𑀫𑁆𑀧𑀺 𑀬𑁂𑀲𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑀸𑀦𑀁 𑀯𑀲𑁂𑀦 𑀲𑀢𑁆𑀢𑀸 𑀮𑁄𑀓𑁂𑀦 𑀮𑀺𑀧𑁆𑀧𑀦𑁆𑀢𑀺, 𑀢𑁂𑀲𑀁 𑀮𑁂𑀧𑀸𑀦𑀁 𑀧𑀳𑀻𑀦𑀢𑁆𑀢𑀸 𑀮𑁄𑀓𑁂𑀦 𑀅𑀮𑀺𑀧𑁆𑀧𑀫𑀸𑀦𑀁, 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂𑀦 𑀫𑀕𑁆𑀕𑁂𑀦 𑀦𑁂𑀢𑀸𑀭𑀫𑀜𑁆𑀜𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀅𑀢𑁆𑀢𑀦𑁄 𑀧𑀦 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀫𑀕𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁂𑀢𑀩𑁆𑀩𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀁 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺 𑀩𑀼𑀤𑁆𑀥𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀻𑀢𑀺 𑀅𑀢𑁆𑀢𑀸𑀦𑀁 𑀯𑀺𑀪𑀸𑀯𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁧𑁬. 𑀬𑁄 ¶ 𑀑𑀕𑀳𑀡𑁂𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑁄 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀽𑀭𑀺𑀢𑀤𑀲𑀧𑀸𑀭𑀫𑀺𑀤𑀲𑀉𑀧𑀧𑀸𑀭𑀫𑀺𑀤𑀲𑀧𑀭𑀫𑀢𑁆𑀣𑀧𑀸𑀭𑀫𑀺𑀧𑁆𑀧𑀪𑁂𑀤𑀁 ¶ 𑀅𑀪𑀺𑀦𑀻𑀳𑀸𑀭𑀕𑀼𑀡𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀕𑀼𑀡𑀁 𑀢𑀢𑁆𑀣 𑀦𑀺𑀯𑀸𑀲𑀕𑀼𑀡𑀁 𑀫𑀳𑀸𑀯𑀺𑀮𑁄𑀓𑀦𑀕𑀼𑀡𑀁 𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀁 𑀕𑀩𑁆𑀪𑀯𑀸𑀲𑀁 𑀕𑀩𑁆𑀪𑀦𑀺𑀓𑁆𑀔𑀫𑀦𑀁 𑀧𑀤𑀯𑀻𑀢𑀺𑀳𑀸𑀭𑀁 𑀤𑀺𑀲𑀸𑀯𑀺𑀮𑁄𑀓𑀦𑀁 𑀩𑁆𑀭𑀳𑁆𑀫𑀕𑀚𑁆𑀚𑀦𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀫𑀳𑀸𑀧𑀥𑀸𑀦𑀁 𑀅𑀪𑀺𑀲𑀫𑁆𑀩𑁄𑀥𑀺𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀜𑀸𑀡𑀁 𑀨𑀮𑀜𑀸𑀡𑀁 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀤𑀲𑀩𑀮𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀙𑀩𑁆𑀩𑀺𑀥𑀁 𑀅𑀲𑀸𑀥𑀸𑀭𑀡𑀜𑀸𑀡𑀁, 𑀅𑀝𑁆𑀞𑀯𑀺𑀥𑀁 𑀲𑀸𑀯𑀓𑀲𑀸𑀥𑀸𑀭𑀡𑀩𑀼𑀤𑁆𑀥𑀜𑀸𑀡𑀁, 𑀘𑀼𑀤𑁆𑀤𑀲𑀯𑀺𑀥𑀁 𑀩𑀼𑀤𑁆𑀥𑀜𑀸𑀡𑀁, 𑀅𑀝𑁆𑀞𑀸𑀭𑀲𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁, 𑀲𑀢𑁆𑀢𑀲𑀢𑁆𑀢𑀢𑀺𑀯𑀺𑀥𑀜𑀸𑀡𑀯𑀢𑁆𑀣𑀼 ¶ 𑀏𑀯𑀫𑀺𑀘𑁆𑀘𑀸𑀤𑀺𑀕𑀼𑀡𑀲𑀢𑀲𑀳𑀲𑁆𑀲𑁂 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀉𑀬𑁆𑀬𑁄𑀚𑀺𑀢𑀸𑀬 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀬 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲𑀸’’𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀪𑀕𑀯𑀢𑁄 𑀅𑀬𑀲𑁂 𑀉𑀧𑁆𑀧𑀸𑀤𑀺𑀢𑁂 𑀢𑀧𑁆𑀧𑀘𑁆𑀘𑀬𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀏𑀯𑀭𑀽𑀧𑁂𑀧𑀺 𑀦𑀸𑀫 𑀅𑀬𑀲𑁂 𑀉𑀧𑁆𑀧𑀦𑁆𑀦𑁂 𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀻’’𑀢𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀧𑀭𑀺𑀲𑀫𑀚𑁆𑀛𑀁 𑀧𑀢𑁆𑀯𑀸, 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺? 𑀢𑁂 𑀲𑀩𑁆𑀩𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀪𑀕𑀯𑀸 𑁋 ‘‘𑀩𑀼𑀤𑁆𑀥𑀸 𑀦𑀸𑀫, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀢𑀸𑀤𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑀣𑀸 𑀦𑀸𑀫 𑀑𑀕𑀳𑀡𑁂 𑀫𑀦𑀼𑀲𑁆𑀲𑀸𑀦𑀁 𑀦𑁆𑀳𑀸𑀦𑀢𑀺𑀢𑁆𑀣𑁂 𑀅𑀗𑁆𑀕𑀖𑀁𑀲𑀦𑀢𑁆𑀣𑀸𑀬 𑀘𑀢𑀼𑀭𑀲𑁆𑀲𑁂 𑀯𑀸 𑀅𑀝𑁆𑀞𑀁𑀲𑁂 𑀯𑀸 𑀣𑀫𑁆𑀪𑁂 𑀦𑀺𑀔𑀸𑀢𑁂 𑀉𑀘𑁆𑀘𑀓𑀼𑀮𑀻𑀦𑀸𑀧𑀺 𑀦𑀻𑀘𑀓𑀼𑀮𑀻𑀦𑀸𑀧𑀺 𑀅𑀗𑁆𑀕𑀁 𑀖𑀁𑀲𑀦𑁆𑀢𑀺, 𑀦 𑀢𑁂𑀦 𑀣𑀫𑁆𑀪𑀲𑁆𑀲 𑀉𑀦𑁆𑀦𑀢𑀺 𑀯𑀸 𑀑𑀦𑀢𑀺 𑀯𑀸 𑀳𑁄𑀢𑀺. 𑀏𑀯𑀫𑁂𑀯𑀁 𑀬𑁄 𑀑𑀕𑀳𑀡𑁂 𑀣𑀫𑁆𑀪𑁄𑀭𑀺𑀯𑀸𑀪𑀺𑀚𑀸𑀬𑀢𑀺 𑀬𑀲𑁆𑀫𑀺𑀁 𑀧𑀭𑁂 𑀯𑀸𑀘𑀸𑀧𑀭𑀺𑀬𑀦𑁆𑀢𑀁 𑀯𑀤𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀭𑁂 𑀢𑀺𑀢𑁆𑀣𑀺𑀬𑀸 𑀯𑀸 𑀅𑀜𑁆𑀜𑁂 𑀯𑀸 𑀯𑀡𑁆𑀡𑀯𑀲𑁂𑀦 𑀉𑀧𑀭𑀺𑀫𑀁 𑀯𑀸 𑀅𑀯𑀡𑁆𑀡𑀯𑀲𑁂𑀦 𑀳𑁂𑀝𑁆𑀞𑀺𑀫𑀁 𑀯𑀸 𑀯𑀸𑀘𑀸𑀧𑀭𑀺𑀬𑀦𑁆𑀢𑀁 𑀯𑀤𑀦𑁆𑀢𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀦𑀬𑀁 𑀯𑀸 𑀧𑀝𑀺𑀖𑀁 𑀯𑀸 𑀅𑀦𑀸𑀧𑀚𑁆𑀚𑀫𑀸𑀦𑁄 𑀢𑀸𑀤𑀺𑀪𑀸𑀯𑁂𑀦 𑀬𑁄 𑀑𑀕𑀳𑀡𑁂 𑀣𑀫𑁆𑀪𑁄𑀭𑀺𑀯 𑀪𑀯𑀢𑀻𑀢𑀺. 𑀢𑀁 𑀯𑀻𑀢𑀭𑀸𑀕𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀢𑀁 𑀇𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑀸𑀪𑀸𑀯𑁂𑀦 𑀯𑀻𑀢𑀭𑀸𑀕𑀁, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀘 𑀤𑁄𑀲𑀫𑁄𑀳𑀸𑀪𑀸𑀯𑁂𑀦 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑀼𑀝𑁆𑀞𑀼 𑀯𑀸 𑀲𑀫𑁄𑀥𑀸𑀦𑁂𑀢𑁆𑀯𑀸 𑀞𑀧𑀺𑀢𑀺𑀦𑁆𑀤𑁆𑀭𑀺𑀬𑀁, 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑀁, 𑀕𑁄𑀧𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀺 𑀩𑀼𑀤𑁆𑀥𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺, 𑀢𑀲𑁆𑀲 𑀓𑀣𑀁 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀸𑀦𑀁 𑀯𑀺𑀪𑀸𑀯𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁧𑁭. 𑀬𑁄 𑀯𑁂 𑀞𑀺𑀢𑀢𑁆𑀢𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀸 𑀲𑁂𑀝𑁆𑀞𑀺𑀥𑀻𑀢𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀢𑀦𑁆𑀢𑀯𑀸𑀬𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀲𑀭𑀁 𑀯𑀝𑁆𑀝𑁂𑀦𑁆𑀢𑁂 𑀤𑀺𑀲𑁆𑀯𑀸 𑀢𑀲𑁆𑀲 𑀉𑀚𑀼𑀪𑀸𑀯𑁂𑀦 𑀢𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀩𑁂 𑀲𑀢𑁆𑀢𑀸 𑀓𑀸𑀬𑀯𑀘𑀻𑀫𑀦𑁄𑀯𑀗𑁆𑀓𑀁 𑀧𑀳𑀸𑀬 𑀢𑀲𑀭𑀁 𑀯𑀺𑀬 𑀉𑀚𑀼𑀘𑀺𑀢𑁆𑀢𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺. 𑀲𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑁂𑀦𑁆𑀢𑀻 𑀦𑀺𑀲𑀻𑀤𑀺. 𑀏𑀯𑀁 𑀧𑀝𑀺𑀧𑀦𑁆𑀦𑀸𑀬 𑀘𑀲𑁆𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀅𑀳𑁄𑀲𑀺, 𑀢𑀤𑀦𑀼𑀲𑀸𑀭𑁂𑀦𑁂𑀯 𑀘 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀺𑀧𑀺. 𑀅𑀣𑀲𑁆𑀲𑀸 𑀢𑀬𑁄𑀧𑀺 𑀪𑀯𑀸 𑀆𑀤𑀺𑀢𑁆𑀢𑀸 𑀯𑀺𑀬 𑀉𑀧𑀝𑁆𑀞𑀳𑀺𑀁𑀲𑀼. 𑀢𑀁 𑀢𑀣𑀸 𑀯𑀺𑀧𑀲𑁆𑀲𑀫𑀸𑀦𑀁 𑀜𑀢𑁆𑀯𑀸 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀫𑀼𑀜𑁆𑀘𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑀻 𑀪𑀕𑀯𑀦𑁆𑀢𑀁 𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀫𑀺𑀯 ¶ 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀧𑀜𑁆𑀚𑀮𑀺𑀓𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀪𑀕𑀯𑀸 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑁄 𑀯𑁂 𑀏𑀓𑀕𑁆𑀕𑀘𑀺𑀢𑁆𑀢𑀢𑀸𑀬 𑀅𑀓𑀼𑀧𑁆𑀧𑀯𑀺𑀫𑀼𑀢𑁆𑀢𑀺𑀢𑀸𑀬 𑀘 𑀯𑀼𑀟𑁆𑀠𑀺𑀳𑀸𑀦𑀻𑀦𑀁 𑀅𑀪𑀸𑀯𑀢𑁄 𑀯𑀺𑀓𑁆𑀔𑀻𑀡𑀚𑀸𑀢𑀺𑀲𑀁𑀲𑀸𑀭𑀢𑁆𑀢𑀸 𑀪𑀯𑀦𑁆𑀢𑀭𑀽𑀧𑀕𑀫𑀦𑀸𑀪𑀸𑀯𑀢𑁄 𑀘 𑀞𑀺𑀢𑀢𑁆𑀢𑁄, 𑀧𑀳𑀻𑀦𑀓𑀸𑀬𑀯𑀘𑀻𑀫𑀦𑁄𑀯𑀗𑁆𑀓𑀢𑀸𑀬 𑀅𑀕𑀢𑀺𑀕𑀫𑀦𑀸𑀪𑀸𑀯𑁂𑀦 𑀯𑀸 𑀢𑀲𑀭𑀁𑀯 𑀉𑀚𑀼, 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀢𑁆𑀢𑀸 𑀚𑀺𑀕𑀼𑀘𑁆𑀙𑀢𑀺 𑀓𑀫𑁆𑀫𑁂𑀳𑀺 𑀧𑀸𑀧𑀓𑁂𑀳𑀺, 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀕𑀽𑀣𑀕𑀢𑀁 𑀯𑀺𑀬 𑀫𑀼𑀢𑁆𑀢𑀕𑀢𑀁 𑀯𑀺𑀬 𑀘 𑀚𑀺𑀕𑀼𑀘𑁆𑀙𑀢𑀺, 𑀳𑀺𑀭𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄𑀕𑀯𑀺𑀪𑀸𑀕𑁂𑀦 𑀳𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁 𑀲𑀤𑁆𑀤𑀲𑀢𑁆𑀣𑁂 𑀲𑀺𑀚𑁆𑀛𑀢𑀺. 𑀯𑀻𑀫𑀁𑀲𑀫𑀸𑀦𑁄 𑀯𑀺𑀲𑀫𑀁 𑀲𑀫𑀜𑁆𑀘𑀸𑀢𑀺 𑀓𑀸𑀬𑀯𑀺𑀲𑀫𑀸𑀤𑀺𑀯𑀺𑀲𑀫𑀁 𑀓𑀸𑀬𑀲𑀫𑀸𑀤𑀺𑀲𑀫𑀜𑁆𑀘 𑀧𑀳𑀸𑀦𑀪𑀸𑀯𑀦𑀸𑀓𑀺𑀘𑁆𑀘𑀲𑀸𑀥𑀦𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀯𑀻𑀫𑀁𑀲𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄. 𑀢𑀁 𑀯𑀸𑀧𑀺 𑀔𑀻𑀡𑀸𑀲𑀯𑀁 𑀥𑀻𑀭𑀸 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀻𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀯𑀻𑀫𑀁𑀲𑀫𑀸𑀦𑁄 𑀯𑀺𑀲𑀫𑀁 𑀲𑀫𑀜𑁆𑀘 𑀬𑁄 𑀯𑁂 𑀞𑀺𑀢𑀢𑁆𑀢𑁄 𑀳𑁄𑀢𑀺, 𑀲𑁄 𑀏𑀯𑀁 𑀢𑀲𑀭𑀁𑀯 𑀉𑀚𑀼 𑀳𑀼𑀢𑁆𑀯𑀸 𑀓𑀺𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀅𑀦𑀸𑀧𑀚𑁆𑀚𑀦𑁆𑀢𑁄 𑀚𑀺𑀕𑀼𑀘𑁆𑀙𑀢𑀺 𑀓𑀫𑁆𑀫𑁂𑀳𑀺 𑀧𑀸𑀧𑀓𑁂𑀳𑀺. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺. 𑀬𑀢𑁄 𑀈𑀤𑀺𑀲𑁄 𑀳𑁄𑀢𑀻𑀢𑀺 𑀔𑀻𑀡𑀸𑀲𑀯𑀫𑀼𑀦𑀺𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀕𑀸𑀣𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁂𑀝𑁆𑀞𑀺𑀥𑀻𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 ¶ 𑀧𑀢𑀺𑀝𑁆𑀞𑀳𑀺. 𑀏𑀢𑁆𑀣 𑀘 𑀯𑀺𑀓𑀧𑁆𑀧𑁂 𑀯𑀸 𑀲𑀫𑀼𑀘𑁆𑀘𑀬𑁂 𑀯𑀸 𑀯𑀸𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑁨𑁧𑁮. 𑀬𑁄 𑀲𑀜𑁆𑀜𑀢𑀢𑁆𑀢𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀆𑀴𑀯𑀺𑀬𑀁 𑀯𑀺𑀳𑀭𑀦𑁆𑀢𑁂 𑀆𑀴𑀯𑀻𑀦𑀕𑀭𑁂 𑀅𑀜𑁆𑀜𑀢𑀭𑁄 𑀢𑀦𑁆𑀢𑀯𑀸𑀬𑁄 𑀲𑀢𑁆𑀢𑀯𑀲𑁆𑀲𑀺𑀓𑀁 𑀥𑀻𑀢𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀅𑀫𑁆𑀫, 𑀳𑀺𑀬𑁆𑀬𑁄 𑀅𑀯𑀲𑀺𑀝𑁆𑀞𑀢𑀲𑀭𑀁 𑀦 𑀩𑀳𑀼, 𑀢𑀲𑀭𑀁 𑀯𑀝𑁆𑀝𑁂𑀢𑁆𑀯𑀸 𑀮𑀳𑀼𑀁 𑀢𑀦𑁆𑀢𑀯𑀸𑀬𑀲𑀸𑀮𑀁 𑀆𑀕𑀘𑁆𑀙𑁂𑀬𑁆𑀬𑀸𑀲𑀺, 𑀫𑀸 𑀔𑁄 𑀘𑀺𑀭𑀸𑀬𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀦𑁆𑀢𑀁 𑀯𑀺𑀦𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀯𑀲𑀜𑁆𑀘 𑀪𑀕𑀯𑀸 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀲𑁆𑀲𑀸 𑀤𑀸𑀭𑀺𑀓𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 ¶ 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀜𑁆𑀘 𑀥𑀫𑁆𑀫𑀸𑀪𑀺𑀲𑀫𑀬𑀁 𑀤𑀺𑀲𑁆𑀯𑀸 𑀧𑀕𑁂𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀕𑀭𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀤𑁆𑀥𑀸 𑀅𑀚𑁆𑀚 𑀓𑁄𑀘𑀺 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄 𑀅𑀢𑁆𑀣𑀺, 𑀧𑀕𑁂𑀯 𑀧𑀯𑀺𑀝𑁆𑀞𑁄 𑀪𑀕𑀯𑀸’’𑀢𑀺 𑀪𑀕𑀯𑀦𑁆𑀢𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀬𑁂𑀦 𑀫𑀕𑁆𑀕𑁂𑀦 𑀲𑀸 𑀤𑀸𑀭𑀺𑀓𑀸 𑀧𑀺𑀢𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀝𑁆𑀞𑀸𑀲𑀺. 𑀦𑀕𑀭𑀯𑀸𑀲𑀺𑀦𑁄 𑀢𑀁 𑀧𑀤𑁂𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸, 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸, 𑀧𑀼𑀧𑁆𑀨𑀽𑀧𑀳𑀸𑀭𑀁 𑀓𑀢𑁆𑀯𑀸, 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀫𑀳𑀸𑀚𑀦𑀓𑀸𑀬𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀤𑀸𑀭𑀺𑀓𑀸 𑀢𑀁 𑀧𑀤𑁂𑀲𑀁 𑀧𑀢𑁆𑀢𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺. 𑀢𑀁 𑀪𑀕𑀯𑀸 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀤𑀸𑀭𑀺𑀓𑁂 𑀓𑀼𑀢𑁄 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀚𑀸𑀦𑀸𑀫𑀺 𑀪𑀕𑀯𑀸’’𑀢𑀺. ‘‘𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺 𑀪𑀕𑀯𑀸’’𑀢𑀺. ‘‘𑀦 𑀚𑀸𑀦𑀸𑀲𑀻’’𑀢𑀺? ‘‘𑀚𑀸𑀦𑀸𑀫𑀺 𑀪𑀕𑀯𑀸’’𑀢𑀺. ‘‘𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺 𑀪𑀕𑀯𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀬𑀁 𑀤𑀸𑀭𑀺𑀓𑀸 𑀅𑀢𑁆𑀢𑀦𑁄 𑀖𑀭𑀸 𑀆𑀕𑀢𑀸𑀧𑀺 𑀪𑀕𑀯𑀢𑀸 ¶ 𑀧𑀼𑀘𑁆𑀙𑀺𑀬𑀫𑀸𑀦𑀸 ‘𑀦 𑀚𑀸𑀦𑀸𑀫𑀻’𑀢𑀺 𑀆𑀳, 𑀢𑀦𑁆𑀢𑀯𑀸𑀬𑀲𑀸𑀮𑀁 𑀕𑀘𑁆𑀙𑀦𑁆𑀢𑀻 𑀘𑀸𑀧𑀺 𑀧𑀼𑀘𑁆𑀙𑀺𑀬𑀫𑀸𑀦𑀸 ‘𑀦 𑀚𑀸𑀦𑀸𑀫𑀻’𑀢𑀺 𑀆𑀳, ‘𑀦 𑀚𑀸𑀦𑀸𑀲𑀻’𑀢𑀺 𑀯𑀼𑀢𑁆𑀢𑀸 ‘𑀚𑀸𑀦𑀸𑀫𑀻’𑀢𑀺 𑀆𑀳, ‘𑀚𑀸𑀦𑀸𑀲𑀻’𑀢𑀺 𑀯𑀼𑀢𑁆𑀢𑀸 ‘𑀦 𑀚𑀸𑀦𑀸𑀫𑀻’𑀢𑀺 𑀆𑀳, 𑀲𑀩𑁆𑀩𑀁 𑀧𑀘𑁆𑀘𑀦𑀻𑀓𑀫𑁂𑀯 𑀓𑀭𑁄𑀢𑀻’’𑀢𑀺. 𑀪𑀕𑀯𑀸 𑀫𑀦𑀼𑀲𑁆𑀲𑀸𑀦𑀁 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀓𑀸𑀫𑁄 𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀫𑀬𑀸 𑀧𑀼𑀘𑁆𑀙𑀺𑀢𑀁, 𑀓𑀺𑀁 𑀢𑀬𑀸 𑀯𑀼𑀢𑁆𑀢’’𑀦𑁆𑀢𑀺? 𑀲𑀸 𑀆𑀳 𑁋 ‘‘𑀦 𑀫𑀁, 𑀪𑀦𑁆𑀢𑁂, 𑀓𑁄𑀘𑀺 𑀦 𑀚𑀸𑀦𑀸𑀢𑀺, 𑀖𑀭𑀢𑁄 𑀆𑀕𑀢𑀸 𑀢𑀦𑁆𑀢𑀯𑀸𑀬𑀲𑀸𑀮𑀁 𑀕𑀘𑁆𑀙𑀢𑀻’’𑀢𑀺; 𑀅𑀧𑀺𑀘 𑀫𑀁 𑀢𑀼𑀫𑁆𑀳𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀼𑀘𑁆𑀙𑀣, ‘‘𑀓𑀼𑀢𑁄 𑀆𑀕𑀢𑀸𑀲𑀻’’𑀢𑀺, 𑀘𑀼𑀢𑀺𑀯𑀲𑁂𑀦 𑀧𑀼𑀘𑁆𑀙𑀣, ‘‘𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀅𑀳𑀜𑁆𑀘 𑀦 𑀚𑀸𑀦𑀸𑀫𑀺. ‘‘𑀓𑀼𑀢𑁄 𑀘𑀫𑁆𑀳𑀺 𑀆𑀕𑀢𑀸; 𑀦𑀺𑀭𑀬𑀸 𑀯𑀸 𑀤𑁂𑀯𑀮𑁄𑀓𑀸 𑀯𑀸’’𑀢𑀺, 𑀦 𑀳𑀺 𑀚𑀸𑀦𑀸𑀫𑀺, ‘‘𑀓𑀼𑀳𑀺𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀺 𑀦𑀺𑀭𑀬𑀁 𑀯𑀸 𑀤𑁂𑀯𑀮𑁄𑀓𑀁 𑀯𑀸’’𑀢𑀺, 𑀢𑀲𑁆𑀫𑀸 ‘‘𑀦 𑀚𑀸𑀦𑀸𑀫𑀻’’𑀢𑀺 ¶ 𑀅𑀯𑀘𑀁. 𑀢𑀢𑁄 𑀫𑀁 𑀪𑀕𑀯𑀸 𑀫𑀭𑀡𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀺 𑁋 ‘‘𑀦 ¶ 𑀚𑀸𑀦𑀸𑀲𑀻’’𑀢𑀺, 𑀅𑀳𑀜𑁆𑀘 𑀚𑀸𑀦𑀸𑀫𑀺. ‘‘𑀲𑀩𑁆𑀩𑁂𑀲𑀁 𑀫𑀭𑀡𑀁 𑀥𑀼𑀯’’𑀦𑁆𑀢𑀺, 𑀢𑁂𑀦𑀸𑀯𑁄𑀘𑀁 ‘‘𑀚𑀸𑀦𑀸𑀫𑀻’’𑀢𑀺. 𑀢𑀢𑁄 𑀫𑀁 𑀪𑀕𑀯𑀸 𑀫𑀭𑀡𑀓𑀸𑀮𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀺 ‘‘𑀚𑀸𑀦𑀸𑀲𑀻’’𑀢𑀺, 𑀅𑀳𑀜𑁆𑀘 𑀦 𑀚𑀸𑀦𑀸𑀫𑀺 ‘‘𑀓𑀤𑀸 𑀫𑀭𑀺𑀲𑁆𑀲𑀸𑀫𑀺 𑀓𑀺𑀁 𑀅𑀚𑁆𑀚 𑀯𑀸 𑀉𑀤𑀸𑀳𑀼 𑀲𑁆𑀯𑁂 𑀯𑀸’’𑀢𑀺, 𑀢𑁂𑀦𑀸𑀯𑁄𑀘𑀁 ‘‘𑀦 𑀚𑀸𑀦𑀸𑀫𑀻’’𑀢𑀺. 𑀪𑀕𑀯𑀸 𑀢𑀸𑀬 𑀯𑀺𑀲𑁆𑀲𑀚𑁆𑀚𑀺𑀢𑀁 𑀧𑀜𑁆𑀳𑀁 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀅𑀦𑀼𑀫𑁄𑀤𑀺. 𑀫𑀳𑀸𑀚𑀦𑀓𑀸𑀬𑁄𑀧𑀺 ‘‘𑀬𑀸𑀯 𑀧𑀡𑁆𑀟𑀺𑀢𑀸 𑀅𑀬𑀁 𑀤𑀸𑀭𑀺𑀓𑀸’’𑀢𑀺 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀅𑀣 𑀪𑀕𑀯𑀸 𑀤𑀸𑀭𑀺𑀓𑀸𑀬 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

‘‘𑀅𑀦𑁆𑀥𑀪𑀽𑀢𑁄 𑀅𑀬𑀁 𑀮𑁄𑀓𑁄, 𑀢𑀦𑀼𑀓𑁂𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀲𑀓𑀼𑀡𑁄 𑀚𑀸𑀮𑀫𑀼𑀢𑁆𑀢𑁄𑀯, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀻’’𑀢𑀺. (𑀥. 𑀧. 𑁧𑁭𑁪) 𑁋

𑀇𑀫𑀁 𑀕𑀸𑀣𑀫𑀸𑀳. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀜𑁆𑀘 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀧𑀺𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀘𑀺𑀭𑁂𑀦𑀸𑀕𑀢𑀸’’𑀢𑀺 𑀓𑀼𑀤𑁆𑀥𑁄 𑀯𑁂𑀕𑁂𑀦 𑀢𑀦𑁆𑀢𑁂 𑀯𑁂𑀫𑀁 𑀧𑀓𑁆𑀔𑀺𑀧𑀺. 𑀢𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀁 𑀪𑀺𑀦𑁆𑀤𑀺. 𑀲𑀸 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀲𑁄 𑀤𑀺𑀲𑁆𑀯𑀸 𑁋 ‘‘𑀦𑀸𑀳𑀁 𑀫𑀫 𑀥𑀻𑀢𑀭𑀁 𑀧𑀳𑀭𑀺𑀁, 𑀅𑀧𑀺𑀘 𑀔𑁄 𑀇𑀫𑀁 𑀯𑁂𑀫𑀁 𑀯𑁂𑀕𑀲𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀫𑀺𑀲𑁆𑀲𑀸 𑀓𑀼𑀘𑁆𑀙𑀺𑀁 𑀪𑀺𑀦𑁆𑀤𑀺. 𑀚𑀻𑀯𑀢𑀺 𑀦𑀼 𑀔𑁄 𑀦𑀦𑀼 𑀔𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀫𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀸 𑀫𑀁 ‘𑀇𑀫𑀺𑀦𑀸 𑀥𑀻𑀢𑀸 𑀫𑀸𑀭𑀺𑀢𑀸’𑀢𑀺 𑀜𑀢𑁆𑀯𑀸 𑀉𑀧𑀓𑁆𑀓𑁄𑀲𑁂𑀬𑁆𑀬𑀼𑀁, 𑀢𑁂𑀦 𑀭𑀸𑀚𑀸𑀧𑀺 𑀕𑀭𑀼𑀓𑀁 𑀤𑀡𑁆𑀟𑀁 𑀧𑀡𑁂𑀬𑁆𑀬, 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀧𑀮𑀸𑀬𑀸𑀫𑀻’’𑀢𑀺. 𑀲𑁄 𑀤𑀡𑁆𑀟𑀪𑀬𑁂𑀦 𑀧𑀮𑀸𑀬𑀦𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑁄𑀓𑀸𑀲𑀁 𑀧𑀸𑀧𑀼𑀡𑀺. 𑀢𑁂 𑀘 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀁𑀲𑀼. 𑀲𑁄 𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀢𑁂 𑀘𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸. 𑀅𑀣 𑀫𑀳𑀸𑀧𑀯𑀸𑀭𑀡𑀸𑀬 ¶ 𑀲𑀩𑁆𑀩𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼 ¶ 𑁋 ‘‘𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀸𑀫𑀸’’𑀢𑀺. 𑀪𑀕𑀯𑀸 𑀧𑀯𑀸𑀭𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀆𑀴𑀯𑀺𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀥𑀻𑀢𑀭𑀁 𑀫𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀓𑀁 𑀫𑀸𑀭𑁂𑀢𑀼𑀁 𑀆𑀕𑀢𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀉𑀧𑁆𑀧𑀡𑁆𑀟𑁂𑀲𑀼𑀁. 𑀪𑀺𑀓𑁆𑀔𑀽 𑀢𑀁 𑀲𑀼𑀢𑁆𑀯𑀸 𑀉𑀧𑀝𑁆𑀞𑀸𑀦𑀯𑁂𑀮𑀸𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑁋 ‘‘𑀦, 𑀪𑀺𑀓𑁆𑀔𑀯𑁂 ¶ , 𑀅𑀬𑀁 𑀪𑀺𑀓𑁆𑀔𑀼 𑀥𑀻𑀢𑀭𑀁 𑀫𑀸𑀭𑁂𑀲𑀺, 𑀲𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀫𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀦𑀼𑀲𑁆𑀲𑁂𑀳𑀺 𑀤𑀼𑀩𑁆𑀩𑀺𑀚𑀸𑀦𑀁 𑀔𑀻𑀡𑀸𑀲𑀯𑀫𑀼𑀦𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀢𑀻𑀲𑀼𑀧𑀺 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀲𑀻𑀮𑀲𑀁𑀬𑀫𑁂𑀦 𑀲𑀁𑀬𑀢𑀢𑁆𑀢𑁄 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀘𑁂𑀢𑀲𑀸 𑀯𑀸 𑀳𑀺𑀁𑀲𑀸𑀤𑀺𑀓𑀁 𑀦 𑀓𑀭𑁄𑀢𑀺 𑀧𑀸𑀧𑀁, 𑀢𑀜𑁆𑀘 𑀔𑁄 𑀧𑀦 𑀤𑀳𑀭𑁄 𑀯𑀸 𑀤𑀳𑀭𑀯𑀬𑁂 𑀞𑀺𑀢𑁄, 𑀫𑀚𑁆𑀛𑀺𑀫𑁄 𑀯𑀸 𑀫𑀚𑁆𑀛𑀺𑀫𑀯𑀬𑁂 𑀞𑀺𑀢𑁄, 𑀏𑀢𑁂𑀦𑁂𑀯 𑀦𑀬𑁂𑀦 𑀣𑁂𑀭𑁄 𑀯𑀸 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑁄𑀢𑀺 𑀓𑀤𑀸𑀘𑀺𑀧𑀺 𑀦 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀬𑀢𑀢𑁆𑀢𑁄, 𑀬𑀲𑁆𑀫𑀸 𑀅𑀦𑀼𑀢𑁆𑀢𑀭𑀸𑀬 𑀯𑀺𑀭𑀢𑀺𑀬𑀸 𑀲𑀩𑁆𑀩𑀧𑀸𑀧𑁂𑀳𑀺 𑀉𑀧𑀭𑀢𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀫𑀼𑀦𑀺 𑀅𑀭𑁄𑀲𑀦𑁂𑀬𑁆𑀬𑁄 𑀦 𑀲𑁄 𑀭𑁄𑀲𑁂𑀢𑀺 𑀓𑀜𑁆𑀘𑀻𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀅𑀬𑀁 𑀬𑁄𑀚𑀦𑀸 𑀘 𑀅𑀥𑀺𑀧𑁆𑀧𑀸𑀬𑁄 𑀘 𑁋 𑀲𑁄 𑀔𑀻𑀡𑀸𑀲𑀯𑀫𑀼𑀦𑀺 𑀅𑀭𑁄𑀲𑀦𑁂𑀬𑁆𑀬𑁄 ‘‘𑀥𑀻𑀢𑀼𑀫𑀸𑀭𑀓𑁄’’𑀢𑀺 𑀯𑀸 ‘‘𑀧𑁂𑀲𑀓𑀸𑀭𑁄’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀭𑁄𑀲𑁂𑀢𑀼𑀁, 𑀖𑀝𑁆𑀝𑁂𑀢𑀼𑀁, 𑀩𑀸𑀥𑁂𑀢𑀼𑀁 𑀅𑀭𑀳𑁄 𑀦 𑀳𑁄𑀢𑀺. 𑀲𑁄𑀧𑀺 𑀳𑀺 𑀦 𑀭𑁄𑀲𑁂𑀢𑀺 𑀓𑀜𑁆𑀘𑀺, ‘‘𑀦𑀸𑀳𑀁 𑀫𑀫 𑀥𑀻𑀢𑀭𑀁 𑀫𑀸𑀭𑁂𑀫𑀺, 𑀢𑁆𑀯𑀁 𑀫𑀸𑀭𑁂𑀲𑀺, 𑀢𑀼𑀫𑁆𑀳𑀸𑀤𑀺𑀲𑁄 𑀯𑀸 𑀫𑀸𑀭𑁂𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀓𑀜𑁆𑀘𑀺 𑀦 𑀭𑁄𑀲𑁂𑀢𑀺, 𑀦 𑀖𑀝𑁆𑀝𑁂𑀢𑀺, 𑀦 𑀩𑀸𑀥𑁂𑀢𑀺, 𑀢𑀲𑁆𑀫𑀸 𑀲𑁄𑀧𑀺 𑀦 𑀭𑁄𑀲𑀦𑁂𑀬𑁆𑀬𑁄. 𑀅𑀧𑀺𑀘 𑀔𑁄 𑀧𑀦 ‘‘𑀢𑀺𑀝𑁆𑀞𑀢𑀼 𑀦𑀸𑀕𑁄, 𑀫𑀸 𑀦𑀸𑀕𑀁 𑀖𑀝𑁆𑀝𑁂𑀲𑀺, 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁪𑁯) 𑀯𑀼𑀢𑁆𑀢𑀦𑀬𑁂𑀦 𑀦𑀫𑀲𑁆𑀲𑀺𑀢𑀩𑁆𑀩𑁄𑀬𑁂𑀯 𑀳𑁄𑀢𑀺. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻𑀢𑀺 𑀏𑀢𑁆𑀣 𑀧𑀦 𑀢𑀫𑁆𑀧𑀺 𑀥𑀻𑀭𑀸𑀯 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀻𑀢𑀺 𑀏𑀯𑀁 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀥𑀺𑀧𑁆𑀧𑀸𑀬𑁄 𑀘𑁂𑀢𑁆𑀣 𑁋 𑀢𑀁 ‘‘𑀅𑀬𑀁 𑀅𑀭𑁄𑀲𑀦𑁂𑀬𑁆𑀬𑁄’’𑀢𑀺 𑀏𑀢𑁂 𑀩𑀸𑀮𑀫𑀦𑀼𑀲𑁆𑀲𑀸 ¶ 𑀅𑀚𑀸𑀦𑀺𑀢𑁆𑀯𑀸 𑀭𑁄𑀲𑁂𑀦𑁆𑀢𑀺. 𑀬𑁂 𑀧𑀦 𑀥𑀻𑀭𑀸 𑀳𑁄𑀦𑁆𑀢𑀺, 𑀢𑁂 𑀥𑀻𑀭𑀸𑀯 𑀢𑀫𑁆𑀧𑀺 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺, 𑀅𑀬𑀁 𑀔𑀻𑀡𑀸𑀲𑀯𑀫𑀼𑀦𑀻𑀢𑀺 𑀚𑀸𑀦𑀦𑁆𑀢𑀻𑀢𑀺.

𑁨𑁧𑁯. 𑀬𑀤𑀕𑁆𑀕𑀢𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀕𑁆𑀕𑀤𑀸𑀬𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀲𑁄 𑀦𑀺𑀧𑁆𑀨𑀚𑁆𑀚𑀫𑀸𑀦𑁂𑀲𑀼 𑀲𑀲𑁆𑀲𑁂𑀲𑀼 𑀔𑁂𑀢𑁆𑀢𑀕𑁆𑀕𑀁, 𑀭𑀸𑀲𑀕𑁆𑀕𑀁, 𑀓𑁄𑀝𑁆𑀞𑀕𑁆𑀕𑀁, 𑀓𑀼𑀫𑁆𑀪𑀺𑀅𑀕𑁆𑀕𑀁, 𑀪𑁄𑀚𑀦𑀕𑁆𑀕𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀅𑀕𑁆𑀕𑀸𑀦𑀺 𑀤𑁂𑀢𑀺. 𑀢𑀢𑁆𑀣 𑀧𑀞𑀫𑀧𑀓𑁆𑀓𑀸𑀦𑀺𑀬𑁂𑀯 𑀲𑀸𑀮𑀺-𑀬𑀯-𑀕𑁄𑀥𑀽𑀫-𑀲𑀻𑀲𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀬𑀸𑀕𑀼𑀧𑀸𑀬𑀸𑀲𑀧𑀼𑀣𑀼𑀓𑀸𑀤𑀻𑀦𑀺 𑀧𑀝𑀺𑀬𑀸𑀤𑁂𑀢𑁆𑀯𑀸 ‘‘𑀅𑀕𑁆𑀕𑀲𑁆𑀲 𑀤𑀸𑀢𑀸 𑀫𑁂𑀥𑀸𑀯𑀻, 𑀅𑀕𑁆𑀕𑀁 𑀲𑁄 𑀅𑀥𑀺𑀕𑀘𑁆𑀙𑀢𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 ¶ 𑀤𑁂𑀢𑀺, 𑀇𑀤𑀫𑀲𑁆𑀲 𑀔𑁂𑀢𑁆𑀢𑀕𑁆𑀕𑀤𑀸𑀦𑀁. 𑀦𑀺𑀧𑁆𑀨𑀦𑁆𑀦𑁂𑀲𑀼 𑀧𑀦 𑀲𑀲𑁆𑀲𑁂𑀲𑀼 𑀮𑀸𑀬𑀺𑀢𑁂𑀲𑀼 𑀫𑀤𑁆𑀤𑀺𑀢𑁂𑀲𑀼 𑀘 𑀯𑀭𑀥𑀜𑁆𑀜𑀸𑀦𑀺 𑀕𑀳𑁂𑀢𑁆𑀯𑀸 𑀢𑀣𑁂𑀯 𑀤𑀸𑀦𑀁 𑀤𑁂𑀢𑀺, 𑀇𑀤𑀫𑀲𑁆𑀲 𑀭𑀸𑀲𑀕𑁆𑀕𑀤𑀸𑀦𑀁 ¶ . 𑀧𑀼𑀦 𑀢𑁂𑀳𑀺 𑀥𑀜𑁆𑀜𑁂𑀳𑀺 𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀧𑀽𑀭𑀸𑀧𑁂𑀢𑁆𑀯𑀸 𑀧𑀞𑀫𑀓𑁄𑀝𑁆𑀞𑀸𑀕𑀸𑀭𑀯𑀺𑀯𑀭𑀡𑁂 𑀧𑀞𑀫𑀦𑀻𑀳𑀝𑀸𑀦𑀺 𑀥𑀜𑁆𑀜𑀸𑀦𑀺 𑀕𑀳𑁂𑀢𑁆𑀯𑀸 𑀢𑀣𑁂𑀯 𑀤𑀸𑀦𑀁 𑀤𑁂𑀢𑀺, 𑀇𑀤𑀫𑀲𑁆𑀲 𑀓𑁄𑀝𑁆𑀞𑀕𑁆𑀕𑀤𑀸𑀦𑀁. 𑀬𑀁 𑀬𑀤𑁂𑀯 𑀧𑀦𑀲𑁆𑀲 𑀖𑀭𑁂 𑀭𑀦𑁆𑀥𑁂𑀢𑀺, 𑀢𑀢𑁄 𑀅𑀕𑁆𑀕𑀁 𑀅𑀦𑀼𑀧𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀸𑀦𑀁 𑀅𑀤𑀢𑁆𑀯𑀸 𑀅𑀦𑁆𑀢𑀫𑀲𑁄 𑀤𑀸𑀭𑀓𑀸𑀦𑀫𑁆𑀧𑀺 𑀦 𑀓𑀺𑀜𑁆𑀘𑀺 𑀤𑁂𑀢𑀺, 𑀇𑀤𑀫𑀲𑁆𑀲 𑀓𑀼𑀫𑁆𑀪𑀺𑀅𑀕𑁆𑀕𑀤𑀸𑀦𑀁. 𑀧𑀼𑀦 𑀅𑀢𑁆𑀢𑀦𑁄 𑀪𑁄𑀚𑀦𑀓𑀸𑀮𑁂 𑀧𑀞𑀫𑀽𑀧𑀦𑀻𑀢𑀁 𑀪𑁄𑀚𑀦𑀁 𑀧𑀼𑀭𑁂𑀪𑀢𑁆𑀢𑀓𑀸𑀮𑁂 𑀲𑀗𑁆𑀖𑀲𑁆𑀲, 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑁂 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁, 𑀢𑀤𑀪𑀸𑀯𑁂 𑀅𑀦𑁆𑀢𑀫𑀲𑁄 𑀲𑀼𑀦𑀔𑀸𑀦𑀫𑁆𑀧𑀺 𑀅𑀤𑀢𑁆𑀯𑀸 𑀦 𑀪𑀼𑀜𑁆𑀚𑀢𑀺, 𑀇𑀤𑀫𑀲𑁆𑀲 𑀪𑁄𑀚𑀦𑀕𑁆𑀕𑀤𑀸𑀦𑀁. 𑀏𑀯𑀁 𑀲𑁄 𑀧𑀜𑁆𑀘𑀕𑁆𑀕𑀤𑀸𑀬𑀓𑁄𑀢𑁆𑀯𑁂𑀯 𑀅𑀪𑀺𑀮𑀓𑁆𑀔𑀺𑀢𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 ¶ 𑀅𑀢𑀺𑀧𑁆𑀧𑀕𑁂𑀯 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀧𑀺𑀳𑀺𑀢𑀤𑁆𑀯𑀸𑀭𑀁 𑀕𑀦𑁆𑀥𑀓𑀼𑀝𑀺𑀁 𑀤𑀺𑀲𑁆𑀯𑀸 𑁋 ‘‘𑀅𑀚𑁆𑀚 𑀪𑀕𑀯𑀸 𑀏𑀓𑀓𑁄𑀯 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀕𑀦𑁆𑀥𑀓𑀼𑀝𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀪𑀕𑀯𑀸𑀧𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑁄𑀚𑀦𑀯𑁂𑀮𑀸𑀬𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀏𑀯𑀁 𑁋 ‘‘𑀦𑀽𑀦𑀚𑁆𑀚 𑀓𑁄𑀘𑀺 𑀲𑀢𑁆𑀢𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄 𑀅𑀢𑁆𑀣𑀺, 𑀢𑀣𑀸 𑀳𑀺 𑀪𑀕𑀯𑀸 𑀏𑀓𑀓𑁄𑀯 𑀧𑀯𑀺𑀝𑁆𑀞𑁄’’𑀢𑀺 𑀜𑀢𑁆𑀯𑀸 𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼 𑀦𑀺𑀫𑀦𑁆𑀢𑀦𑀢𑁆𑀣𑀸𑀬. 𑀪𑀕𑀯𑀸𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 𑀪𑁄𑀚𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀻 𑀧𑀦𑀲𑁆𑀲 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸. 𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀲𑁆𑀲𑁂𑀬𑁆𑀬, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀪𑁄𑀚𑀦𑀁 𑀤𑀤𑁂𑀬𑁆𑀬, 𑀢𑀢𑁄 𑀫𑁂 𑀧𑀼𑀦 𑀧𑀘𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀧𑁆𑀧𑀲𑀸𑀤𑀜𑁆𑀘 𑀫𑀘𑁆𑀙𑁂𑀭𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀬𑀣𑀸 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀦 𑀧𑀲𑁆𑀲𑀢𑀺, 𑀏𑀯𑀁 𑀢𑀸𑀮𑀯𑀡𑁆𑀝𑁂𑀦 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀪𑀕𑀯𑀸 𑀢𑀁 𑀜𑀢𑁆𑀯𑀸 𑀲𑀭𑀻𑀭𑀸𑀪𑀁 𑀫𑀼𑀜𑁆𑀘𑀺. 𑀢𑀁 𑀩𑁆𑀭𑀸𑀳𑁆𑀫𑀡𑁄 𑀲𑀼𑀯𑀡𑁆𑀡𑁄𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀉𑀮𑁆𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀤𑁆𑀯𑀸𑀭𑁂 𑀞𑀺𑀢𑀁. 𑀩𑁆𑀭𑀸𑀳𑁆𑀫𑀡𑀻𑀧𑀺 ‘‘𑀤𑀺𑀝𑁆𑀞𑁄𑀦𑁂𑀦 𑀪𑀕𑀯𑀸’’𑀢𑀺 𑀢𑀸𑀯𑀤𑁂𑀯 𑀢𑀸𑀮𑀯𑀡𑁆𑀝𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺, 𑀯𑀦𑁆𑀤𑀺𑀢𑁆𑀯𑀸 𑀘𑀲𑁆𑀲𑀸 𑀉𑀝𑁆𑀞𑀳𑀦𑁆𑀢𑀺𑀬𑀸 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑁋

‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁;

𑀅𑀲𑀢𑀸 𑀘 𑀦 𑀲𑁄𑀘𑀢𑀺, 𑀲 𑀯𑁂 𑀪𑀺𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁩𑁬𑁭) 𑁋

𑀇𑀫𑀁 ¶ 𑀕𑀸𑀣𑀫𑀪𑀸𑀲𑀺. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 ¶ 𑀪𑀕𑀯𑀦𑁆𑀢𑀁 𑀅𑀦𑁆𑀢𑁄𑀖𑀭𑀁 𑀧𑀯𑁂𑀲𑁂𑀢𑁆𑀯𑀸, 𑀯𑀭𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸, 𑀅𑀢𑁆𑀢𑀦𑁄 𑀉𑀧𑀦𑀻𑀢𑀪𑁄𑀚𑀦𑀁 𑀉𑀧𑀦𑀸𑀫𑁂𑀲𑀺 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸, 𑀲𑀸𑀥𑀼, 𑀫𑁂 𑀢𑀁 𑀪𑁄𑀚𑀦𑀁 𑀅𑀢𑁆𑀢𑀦𑁄 𑀧𑀢𑁆𑀢𑁂 ¶ 𑀧𑀢𑀺𑀝𑁆𑀞𑀸𑀧𑁂𑀣𑀸’’𑀢𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀓𑀼𑀫𑁆𑀪𑀺𑀢𑁄 𑀧𑀞𑀫𑀫𑁂𑀯 𑀕𑀳𑀺𑀢𑀢𑁆𑀢𑀸 𑀅𑀕𑁆𑀕𑀢𑁄, 𑀅𑀤𑁆𑀥𑀸𑀯𑀲𑁂𑀲𑀸𑀬 𑀓𑀼𑀫𑁆𑀪𑀺𑀬𑀸 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀕𑀳𑀺𑀢𑀢𑁆𑀢𑀸 𑀫𑀚𑁆𑀛𑀢𑁄, 𑀏𑀓𑀤𑁆𑀯𑀺𑀓𑀝𑀘𑁆𑀙𑀼𑀫𑀢𑁆𑀢𑀸𑀯𑀲𑁂𑀲𑀸𑀬 𑀓𑀼𑀫𑁆𑀪𑀺𑀬𑀸 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀕𑀳𑀺𑀢𑀢𑁆𑀢𑀸 𑀲𑁂𑀲𑀢𑁄 𑀯𑀸 𑀧𑀺𑀡𑁆𑀟𑀁 𑀮𑀪𑁂𑀣. 𑀧𑀭𑀤𑀢𑁆𑀢𑀽𑀧𑀚𑀻𑀯𑀻𑀢𑀺 𑀧𑀩𑁆𑀩𑀚𑀺𑀢𑁄. 𑀲𑁄 𑀳𑀺 𑀉𑀤𑀓𑀤𑀦𑁆𑀢𑀧𑁄𑀡𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀧𑀭𑁂𑀦𑁂𑀯 𑀤𑀢𑁆𑀢𑀁 𑀉𑀧𑀚𑀻𑀯𑀢𑀺, 𑀢𑀲𑁆𑀫𑀸 ‘‘𑀧𑀭𑀤𑀢𑁆𑀢𑀽𑀧𑀚𑀻𑀯𑀻’’𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀮𑀁 𑀣𑀼𑀢𑀼𑀁 𑀦𑁄𑀧𑀺 𑀦𑀺𑀧𑀘𑁆𑀘𑀯𑀸𑀤𑀻𑀢𑀺 𑀅𑀕𑁆𑀕𑀢𑁄 𑀮𑀤𑁆𑀥𑀸 𑀅𑀢𑁆𑀢𑀸𑀦𑀁 𑀯𑀸 𑀤𑀸𑀬𑀓𑀁 𑀯𑀸 𑀣𑁄𑀫𑁂𑀢𑀼𑀫𑁆𑀧𑀺 𑀦𑀸𑀭𑀳𑀢𑀺 𑀧𑀳𑀻𑀦𑀸𑀦𑀼𑀦𑀬𑀢𑁆𑀢𑀸. 𑀲𑁂𑀲𑀢𑁄 𑀮𑀤𑁆𑀥𑀸 ‘‘𑀓𑀺𑀁 𑀏𑀢𑀁 𑀇𑀫𑀺𑀦𑀸 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀸𑀬𑀓𑀁 𑀦𑀺𑀧𑀸𑀢𑁂𑀢𑁆𑀯𑀸 𑀅𑀧𑁆𑀧𑀺𑀬𑀯𑀘𑀦𑀸𑀦𑀺 𑀯𑀢𑁆𑀢𑀸𑀧𑀺 𑀦 𑀳𑁄𑀢𑀺 𑀧𑀳𑀻𑀦𑀧𑀝𑀺𑀖𑀢𑁆𑀢𑀸. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻𑀢𑀺 𑀢𑀫𑁆𑀧𑀺 𑀧𑀳𑀻𑀦𑀸𑀦𑀼𑀦𑀬𑀧𑀝𑀺𑀖𑀁 𑀥𑀻𑀭𑀸𑀯 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀕𑀸𑀣𑀁 𑀤𑁂𑀲𑁂𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑁨𑁨𑁦. 𑀫𑀼𑀦𑀺𑀁 𑀘𑀭𑀦𑁆𑀢𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀉𑀢𑀼𑀯𑀲𑁂𑀦 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 𑀤𑀳𑀭𑁄𑀯 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸, 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺𑀢𑁆𑀯𑀸, 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁂 ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸’’𑀢𑀺 (𑀲𑀼. 𑀦𑀺. 𑁫𑁦) 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀘 𑀘𑀢𑀼𑀢𑁆𑀣𑀯𑀸𑀭𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 𑀪𑀺𑀓𑁆𑀔𑀽 𑀪𑀡𑀦𑁆𑀢𑀺 𑁋 ‘‘𑀲𑀫𑀬𑁄, 𑀆𑀯𑀼𑀲𑁄, 𑀉𑀧𑁆𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺. 𑀲𑁄 ‘‘𑀅𑀪𑀩𑁆𑀩𑁄 𑀤𑀸𑀦𑀸𑀳𑀁, 𑀆𑀯𑀼𑀲𑁄, 𑀯𑀺𑀩𑁆𑀪𑀫𑀺𑀢𑀼’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀏𑀯𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀩𑁆𑀩𑁄 𑀲𑁄 ¶ 𑀤𑀸𑀦𑀺 𑀯𑀺𑀩𑁆𑀪𑀫𑀺𑀢𑀼’’𑀦𑁆𑀢𑀺 𑀢𑀲𑁆𑀲 𑀔𑀻𑀡𑀸𑀲𑀯𑀫𑀼𑀦𑀺𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 ¶ 𑁋 𑀫𑁄𑀦𑁂𑀬𑁆𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑁂𑀦 𑀫𑀼𑀦𑀺𑀁, 𑀏𑀓𑀯𑀺𑀳𑀸𑀭𑀺𑀢𑀸𑀬, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀲𑀼 𑀯𑀸 𑀘𑀭𑀺𑀬𑀸𑀲𑀼 𑀬𑀸𑀬 𑀓𑀸𑀬𑀘𑀺 𑀘𑀭𑀺𑀬𑀸𑀬 𑀘𑀭𑀦𑁆𑀢𑀁, 𑀧𑀼𑀩𑁆𑀩𑁂 𑀯𑀺𑀬 𑀫𑁂𑀣𑀼𑀦𑀥𑀫𑁆𑀫𑁂 𑀘𑀺𑀢𑁆𑀢𑀁 𑀅𑀓𑀢𑁆𑀯𑀸 𑀅𑀦𑀼𑀢𑁆𑀢𑀭𑀸𑀬 𑀯𑀺𑀭𑀢𑀺𑀬𑀸 𑀯𑀺𑀭𑀢𑀁 𑀫𑁂𑀣𑀼𑀦𑀲𑁆𑀫𑀸. 𑀤𑀼𑀢𑀺𑀬𑀧𑀸𑀤𑀲𑁆𑀲 𑀲𑀫𑁆𑀩𑀦𑁆𑀥𑁄 𑁋 𑀓𑀻𑀤𑀺𑀲𑀁 𑀫𑀼𑀦𑀺𑀁 𑀘𑀭𑀦𑁆𑀢𑀁 𑀯𑀺𑀭𑀢𑀁 𑀫𑁂𑀣𑀼𑀦𑀲𑁆𑀫𑀸𑀢𑀺 𑀘𑁂? 𑀬𑁄 𑀬𑁄𑀩𑁆𑀩𑀦𑁂 𑀦𑁄𑀧𑀦𑀺𑀩𑀚𑁆𑀛𑀢𑁂 𑀓𑁆𑀯𑀘𑀺, 𑀬𑁄 𑀪𑀤𑁆𑀭𑁂𑀧𑀺 𑀬𑁄𑀩𑁆𑀩𑀦𑁂 𑀯𑀢𑁆𑀢𑀫𑀸𑀦𑁂 𑀓𑁆𑀯𑀘𑀺 𑀇𑀢𑁆𑀣𑀺𑀭𑀽𑀧𑁂 𑀬𑀣𑀸 𑀧𑀼𑀭𑁂, 𑀏𑀯𑀁 𑀫𑁂𑀣𑀼𑀦𑀭𑀸𑀕𑁂𑀦 𑀦 𑀉𑀧𑀦𑀺𑀩𑀚𑁆𑀛𑀢𑀺. 𑀅𑀣 𑀯𑀸 𑀓𑁆𑀯𑀘𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀬𑁄𑀩𑁆𑀩𑀦𑁂 ‘‘𑀬𑀼𑀯𑀸 𑀢𑀸𑀯𑀫𑁆𑀳𑀺, 𑀅𑀬𑀁 𑀯𑀸 𑀬𑀼𑀯𑀸𑀢𑀺 𑀧𑀝𑀺𑀲𑁂𑀯𑀸𑀫𑀺 𑀢𑀸𑀯 𑀓𑀸𑀫𑁂’’𑀢𑀺 𑀏𑀯𑀁 𑀬𑁄 𑀭𑀸𑀕𑁂𑀦 𑀦 𑀉𑀧𑀦𑀺𑀩𑀚𑁆𑀛𑀢𑀻𑀢𑀺 𑀅𑀬𑀫𑁆𑀧𑁂𑀢𑁆𑀣 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀯𑀺𑀭𑀢𑀁 𑀫𑁂𑀣𑀼𑀦𑀲𑁆𑀫𑀸, 𑀅𑀧𑀺𑀘 𑀔𑁄 𑀧𑀦 𑀚𑀸𑀢𑀺𑀫𑀤𑀸𑀤𑀺𑀪𑁂𑀤𑀸 𑀫𑀤𑀸, 𑀓𑀸𑀫𑀕𑀼𑀡𑁂𑀲𑀼 𑀲𑀢𑀺𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑀸 𑀧𑀫𑀸𑀤𑀸𑀧𑀺 𑀘 𑀯𑀺𑀭𑀢𑀁, 𑀏𑀯𑀁 𑀫𑀤𑀧𑁆𑀧𑀫𑀸𑀤𑀸 𑀯𑀺𑀭𑀢𑀢𑁆𑀢𑀸 ¶ 𑀏𑀯 𑀘 𑀯𑀺𑀧𑁆𑀧𑀫𑀼𑀢𑁆𑀢𑀁 𑀲𑀩𑁆𑀩𑀓𑀺𑀮𑁂𑀲𑀩𑀦𑁆𑀥𑀦𑁂𑀳𑀺. 𑀬𑀣𑀸 𑀯𑀸 𑀏𑀓𑁄 𑀮𑁄𑀓𑀺𑀓𑀸𑀬𑀧𑀺 𑀯𑀺𑀭𑀢𑀺𑀬𑀸 𑀯𑀺𑀭𑀢𑁄 𑀳𑁄𑀢𑀺, 𑀦 𑀏𑀯𑀁, 𑀓𑀺𑀁 𑀧𑀦 𑀯𑀺𑀧𑁆𑀧𑀫𑀼𑀢𑁆𑀢𑀁 𑀯𑀺𑀭𑀢𑀁, 𑀲𑀩𑁆𑀩𑀓𑀺𑀮𑁂𑀲𑀩𑀦𑁆𑀥𑀦𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀯𑀺𑀭𑀢𑀺𑀬𑀸 𑀯𑀺𑀭𑀢𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻𑀢𑀺 𑀢𑀫𑁆𑀧𑀺 𑀥𑀻𑀭𑀸 𑀏𑀯 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺, 𑀢𑀼𑀫𑁆𑀳𑁂 𑀧𑀦 𑀦𑀁 𑀦 𑀯𑁂𑀤𑀬𑀣, 𑀢𑁂𑀦 𑀦𑀁 𑀏𑀯𑀁 𑀪𑀡𑀣𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁨𑁧. 𑀅𑀜𑁆𑀜𑀸𑀬 𑀮𑁄𑀓𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀳𑀭𑀢𑀺. 𑀢𑁂𑀦 𑀲𑀫𑀬𑁂𑀦 𑀦𑀦𑁆𑀤𑀲𑁆𑀲 𑀆𑀪𑀭𑀡𑀫𑀗𑁆𑀕𑀮𑀁, 𑀅𑀪𑀺𑀲𑁂𑀓𑀫𑀗𑁆𑀕𑀮𑀁, 𑀆𑀯𑀸𑀳𑀫𑀗𑁆𑀕𑀮𑀦𑁆𑀢𑀺 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀅𑀓𑀁𑀲𑀼. 𑀪𑀕𑀯𑀸𑀧𑀺 𑀢𑀢𑁆𑀣 𑀦𑀺𑀫𑀦𑁆𑀢𑀺𑀢𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀦𑀦𑁆𑀤𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀅𑀤𑀸𑀲𑀺. 𑀢𑀁 𑀦𑀺𑀓𑁆𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀻 ‘‘𑀢𑀼𑀯𑀝𑁆𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 ¶ 𑀆𑀳. 𑀲𑁄 𑀪𑀕𑀯𑀢𑁄 𑀕𑀸𑀭𑀯𑁂𑀦 ‘‘𑀳𑀦𑁆𑀤 𑀪𑀕𑀯𑀸 𑀧𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀳𑀸𑀭𑀫𑁂𑀯 𑀕𑀢𑁄. 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀞𑀢𑁆𑀯𑀸 ‘‘𑀆𑀳𑀭, 𑀦𑀦𑁆𑀤, 𑀧𑀢𑁆𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 𑀪𑀕𑀯𑀢𑁄 𑀕𑀸𑀭𑀯𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀧𑀩𑁆𑀩𑀚𑀸𑀫𑀺, 𑀪𑀕𑀯𑀸’’𑀢𑀺 𑀆𑀳. 𑀢𑀁 𑀪𑀕𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀦 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀯𑀘𑀦𑀁 𑀧𑀼𑀦𑀧𑁆𑀧𑀼𑀦𑀁 𑀲𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀦𑀦𑁆𑀤𑀲𑁆𑀲 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑀼𑀓𑀸𑀫𑁄 ‘‘𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀢𑀧𑀼𑀩𑁆𑀩𑁄𑀲𑀺, 𑀦𑀦𑁆𑀤𑀸’’𑀢𑀺 𑀆𑀳. 𑀦𑀦𑁆𑀤𑁄 ‘‘𑀦𑀸𑀳𑀁, 𑀪𑀦𑁆𑀢𑁂, 𑀕𑀢𑀧𑀼𑀩𑁆𑀩𑁄’’𑀢𑀺 𑀅𑀯𑁄𑀘.

𑀢𑀢𑁄 𑀦𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀪𑀕𑀯𑀢𑁄 𑀆𑀕𑀫𑀦𑀁 𑀯𑀺𑀤𑀺𑀢𑁆𑀯𑀸 𑀲𑀓𑁆𑀓𑁄 𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑁄 ¶ 𑀧𑀸𑀲𑀸𑀤𑀸 𑀑𑀭𑁄𑀳𑀺. 𑀢𑀸 𑀲𑀩𑁆𑀩𑀸𑀧𑀺 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀧𑀸𑀤𑀫𑀓𑁆𑀔𑀦𑀢𑁂𑀮𑀁 𑀤𑀢𑁆𑀯𑀸 𑀓𑀓𑀼𑀝𑀧𑀸𑀤𑀺𑀦𑀺𑀬𑁄 𑀅𑀳𑁂𑀲𑀼𑀁. 𑀅𑀣 𑀪𑀕𑀯𑀸 𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀲𑀺 𑀦𑁄, 𑀢𑁆𑀯𑀁 𑀦𑀦𑁆𑀤, 𑀇𑀫𑀸𑀦𑀺 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀓𑀓𑀼𑀝𑀧𑀸𑀤𑀸𑀦𑀻’’𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀦𑀸𑀫 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀲𑀓𑀮𑁂𑀧𑀺 𑀩𑀼𑀤𑁆𑀥𑀯𑀘𑀦𑁂 𑀏𑀢𑀁 𑀦𑀢𑁆𑀣𑀺. 𑀅𑀣 𑀘 𑀧𑀦𑁂𑀢𑁆𑀣 𑀪𑀕𑀯𑀸 𑀉𑀧𑀸𑀬𑀓𑀼𑀲𑀮𑀢𑀸𑀬 𑀆𑀢𑀼𑀭𑀲𑁆𑀲 𑀤𑁄𑀲𑁂 𑀉𑀕𑁆𑀕𑀺𑀮𑁂𑀢𑁆𑀯𑀸 𑀦𑀻𑀳𑀭𑀺𑀢𑀼𑀓𑀸𑀫𑁄 𑀯𑁂𑀚𑁆𑀚𑁄 𑀲𑀼𑀪𑁄𑀚𑀦𑀁 𑀯𑀺𑀬 𑀦𑀦𑁆𑀤𑀲𑁆𑀲 𑀭𑀸𑀕𑀁 𑀉𑀕𑁆𑀕𑀺𑀮𑁂𑀢𑁆𑀯𑀸 𑀦𑀻𑀳𑀭𑀺𑀢𑀼𑀓𑀸𑀫𑁄 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀅𑀦𑀼𑀜𑁆𑀜𑀸𑀲𑀺 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺. 𑀢𑀢𑁄 𑀪𑀕𑀯𑀸 𑀅𑀘𑁆𑀙𑀭𑀸𑀳𑁂𑀢𑀼 𑀦𑀦𑁆𑀤𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑁂 𑀅𑀪𑀺𑀭𑀢𑀺𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺 𑁋 ‘‘𑀪𑀢𑀓𑀯𑀸𑀤𑁂𑀦 𑀦𑀦𑁆𑀤𑀁 𑀘𑁄𑀤𑁂𑀣𑀸’’𑀢𑀺. 𑀲𑁄 𑀢𑁂𑀳𑀺 𑀘𑁄𑀤𑀺𑀬𑀫𑀸𑀦𑁄 𑀮𑀚𑁆𑀚𑀺𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀕𑀯𑀢𑁄𑀧𑀺 𑀜𑀸𑀡𑀁 𑀉𑀤𑀧𑀸𑀤𑀺. 𑀪𑀺𑀓𑁆𑀔𑀽 𑀅𑀚𑀸𑀦𑀦𑁆𑀢𑀸 ¶ 𑀢𑀣𑁂𑀯𑀸𑀬𑀲𑁆𑀫𑀦𑁆𑀢𑀁 𑀘𑁄𑀤𑁂𑀦𑁆𑀢𑀺. 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀦𑀦𑁆𑀤𑁄 𑀏𑀯𑀁 𑀘𑁄𑀤𑁂𑀢𑀩𑁆𑀩𑁄’’𑀢𑀺 𑀢𑀲𑁆𑀲 𑀔𑀻𑀡𑀸𑀲𑀯𑀫𑀼𑀦𑀺𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀤𑀼𑀓𑁆𑀔𑀲𑀘𑁆𑀘𑀯𑀯𑀢𑁆𑀣𑀸𑀦𑀓𑀭𑀡𑁂𑀦 𑀔𑀦𑁆𑀥𑀸𑀤𑀺𑀮𑁄𑀓𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀯𑀯𑀢𑁆𑀣𑀧𑁂𑀢𑁆𑀯𑀸 𑀦𑀺𑀭𑁄𑀥𑀲𑀘𑁆𑀘𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀭𑀫𑀢𑁆𑀣𑀤𑀲𑁆𑀲𑀺𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁, 𑀧𑀳𑀻𑀦𑀲𑀫𑀼𑀤𑀬𑀢𑁆𑀢𑀸 𑀭𑀽𑀧𑀫𑀤𑀸𑀤𑀺𑀯𑁂𑀕𑀲𑀳𑀦𑁂𑀦 𑀘𑀓𑁆𑀔𑀸𑀤𑀺𑀆𑀬𑀢𑀦𑀲𑀫𑀼𑀤𑁆𑀤𑀜𑁆𑀘 𑀅𑀢𑀺𑀢𑀭𑀺𑀬 𑀅𑀢𑀺𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀕𑁆𑀕𑀪𑀸𑀯𑀦𑀸𑀬, ‘‘𑀢𑀦𑁆𑀦𑀺𑀤𑁆𑀤𑁂𑀲𑀸 𑀢𑀸𑀤𑀻’’𑀢𑀺 𑀇𑀫𑀸𑀬 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀁. 𑀬𑁄 𑀯𑀸𑀬𑀁 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀭𑀸𑀲𑀺𑀬𑁂𑀯 𑀅𑀯𑀳𑀦𑀦𑀝𑁆𑀞𑁂𑀦 𑀑𑀖𑁄, 𑀓𑀼𑀘𑁆𑀙𑀺𑀢𑀕𑀢𑀺𑀧𑀭𑀺𑀬𑀸𑀬𑁂𑀦 𑀲𑀫𑀼𑀤𑁆𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄, 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦𑁂𑀯 𑀢𑀁 𑀑𑀖𑀁 𑀲𑀫𑀼𑀤𑁆𑀤𑀜𑁆𑀘 𑀅𑀢𑀺𑀢𑀭𑀺𑀬 𑀅𑀢𑀺𑀢𑀺𑀡𑁆𑀡𑁄𑀖𑀢𑁆𑀢𑀸 𑀇𑀤𑀸𑀦𑀺 𑀢𑀼𑀫𑁆𑀳𑁂𑀳𑀺 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀧𑀺 𑀯𑀺𑀓𑀸𑀭𑀫𑀦𑀸𑀧𑀚𑁆𑀚𑀦𑀢𑀸𑀬 𑀢𑀸𑀤𑀺𑀫𑁆𑀧𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀘 𑀅𑀥𑀺𑀧𑁆𑀧𑀸𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀙𑀺𑀦𑁆𑀦𑀕𑀦𑁆𑀣𑀁 𑀅𑀲𑀺𑀢𑀁 𑀅𑀦𑀸𑀲𑀯𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲 𑀣𑀼𑀢𑀺𑀯𑀘𑀦𑀫𑁂𑀯, 𑀇𑀫𑀸𑀬 𑀘𑀢𑀼𑀲𑀘𑁆𑀘𑀪𑀸𑀯𑀦𑀸𑀬 𑀘𑀢𑀼𑀦𑁆𑀦𑀁 𑀕𑀦𑁆𑀣𑀸𑀦𑀁 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀕𑀦𑁆𑀣𑀁, 𑀤𑀺𑀝𑁆𑀞𑀺𑀬𑀸 𑀢𑀡𑁆𑀳𑀸𑀬 𑀯𑀸 𑀓𑀢𑁆𑀣𑀘𑀺 𑀅𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀲𑀺𑀢𑀁, 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻𑀢𑀺 𑀢𑀫𑁆𑀧𑀺 𑀥𑀻𑀭𑀸𑀯 𑀔𑀻𑀡𑀸𑀲𑀯𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀺 𑀢𑀼𑀫𑁆𑀳𑁂 𑀧𑀦 𑀅𑀯𑁂𑀤𑀬𑀫𑀸𑀦𑀸 𑀏𑀯𑀁 𑀪𑀡𑀣𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁨𑁨. 𑀅𑀲𑀫𑀸 ¶ 𑀉𑀪𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑀭𑀝𑁆𑀞𑁂 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀕𑀸𑀫𑁂 𑀫𑀺𑀕𑀮𑀼𑀤𑁆𑀤𑀓𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑀦𑁄𑀓𑀸𑀲𑀁 𑀕𑀦𑁆𑀢𑁆𑀯𑀸 𑀫𑀺𑀕𑁂 𑀩𑀦𑁆𑀥𑀢𑀺. 𑀲𑁄 𑀅𑀭𑀜𑁆𑀜𑀁 𑀧𑀯𑀺𑀲𑀦𑁆𑀢𑁄 𑀣𑁂𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀫𑁆𑀧𑀺 𑀧𑀲𑁆𑀲𑀢𑀺, 𑀅𑀭𑀜𑁆𑀜𑀸 𑀆𑀕𑀘𑁆𑀙𑀦𑁆𑀢𑁄 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀫𑁆𑀧𑀺 ¶ 𑀧𑀲𑁆𑀲𑀢𑀺. 𑀏𑀯𑀁 𑀅𑀪𑀺𑀡𑁆𑀳𑀤𑀲𑁆𑀲𑀦𑁂𑀦 𑀣𑁂𑀭𑁂 𑀚𑀸𑀢𑀲𑀺𑀦𑁂𑀳𑁄 𑀅𑀳𑁄𑀲𑀺. 𑀲𑁄 𑀬𑀤𑀸 𑀩𑀳𑀼𑀁 𑀫𑀁𑀲𑀁 𑀮𑀪𑀢𑀺, 𑀢𑀤𑀸 𑀣𑁂𑀭𑀲𑁆𑀲𑀸𑀧𑀺 𑀭𑀲𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑁋 ‘‘𑀅𑀬𑀁 𑀪𑀺𑀓𑁆𑀔𑀼 ‘𑀅𑀫𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀫𑀺𑀕𑀸 𑀢𑀺𑀝𑁆𑀞𑀦𑁆𑀢𑀺, 𑀘𑀭𑀦𑁆𑀢𑀺, 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀻’𑀢𑀺 𑀮𑀼𑀤𑁆𑀤𑀓𑀲𑁆𑀲 𑀆𑀭𑁄𑀘𑁂𑀢𑀺. 𑀢𑀢𑁄 𑀮𑀼𑀤𑁆𑀤𑀓𑁄 𑀫𑀺𑀕𑁂 𑀫𑀸𑀭𑁂𑀢𑀺, 𑀢𑁂𑀦 𑀉𑀪𑁄 𑀲𑀗𑁆𑀕𑀫𑁆𑀫 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻’’𑀢𑀺. 𑀅𑀣 𑀪𑀕𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀮𑀼𑀤𑁆𑀤𑀓𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀚𑀻𑀯𑀺𑀓𑀸𑀪𑀸𑀯𑀲𑀸𑀥𑀓𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀔𑀻𑀡𑀸𑀲𑀯𑀫𑀼𑀦𑀺𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼, 𑀬𑁄 𑀘 𑀮𑀼𑀤𑁆𑀤𑀓𑁄, 𑀏𑀢𑁂 𑀅𑀲𑀫𑀸 𑀉𑀪𑁄. 𑀬𑀁 𑀫𑀦𑀼𑀲𑁆𑀲𑀸 𑀪𑀡𑀦𑁆𑀢𑀺 ‘‘𑀲𑀫𑀸𑀦𑀚𑀻𑀯𑀺𑀓𑀸’’𑀢𑀺, 𑀢𑀁 𑀫𑀺𑀘𑁆𑀙𑀸. 𑀓𑀺𑀁 𑀓𑀸𑀭𑀡𑀸? 𑀤𑀽𑀭𑀯𑀺𑀳𑀸𑀭𑀯𑀼𑀢𑁆𑀢𑀺𑀦𑁄, 𑀤𑀽𑀭𑁂 𑀯𑀺𑀳𑀸𑀭𑁄 𑀘 𑀯𑀼𑀢𑁆𑀢𑀺 𑀘 𑀦𑁂𑀲𑀦𑁆𑀢𑀺 𑀤𑀽𑀭𑀯𑀺𑀳𑀸𑀭𑀯𑀼𑀢𑁆𑀢𑀺𑀦𑁄. 𑀯𑀺𑀳𑀸𑀭𑁄𑀢𑀺 𑀯𑀲𑀦𑁄𑀓𑀸𑀲𑁄, 𑀲𑁄 𑀘 𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑁂, 𑀮𑀼𑀤𑁆𑀤𑀓𑀲𑁆𑀲 𑀘 𑀕𑀸𑀫𑁂. 𑀯𑀼𑀢𑁆𑀢𑀻𑀢𑀺 𑀚𑀻𑀯𑀺𑀓𑀸, 𑀲𑀸 𑀘 𑀪𑀺𑀓𑁆𑀔𑀼𑀦𑁄 𑀕𑀸𑀫𑁂 𑀲𑀧𑀤𑀸𑀦𑀪𑀺𑀓𑁆𑀔𑀸𑀘𑀭𑀺𑀬𑀸, 𑀮𑀼𑀤𑁆𑀤𑀓𑀲𑁆𑀲 𑀘 𑀅𑀭𑀜𑁆𑀜𑁂 𑀫𑀺𑀕𑀲𑀓𑀼𑀡𑀫𑀸𑀭𑀡𑀸. 𑀧𑀼𑀦 𑀘𑀧𑀭𑀁 𑀕𑀺𑀳𑀻 𑀤𑀸𑀭𑀧𑁄𑀲𑀻, 𑀲𑁄 𑀮𑀼𑀤𑁆𑀤𑀓𑁄 𑀢𑁂𑀦 𑀓𑀫𑁆𑀫𑁂𑀦 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀢𑀺. 𑀅𑀫𑀫𑁄 𑀘 𑀲𑀼𑀩𑁆𑀩𑀢𑁄, 𑀧𑀼𑀢𑁆𑀢𑀤𑀸𑀭𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀫𑀢𑁆𑀢𑀯𑀺𑀭𑀳𑀺𑀢𑁄 𑀲𑀼𑀘𑀺𑀯𑀢𑀢𑁆𑀢𑀸 𑀲𑀼𑀦𑁆𑀤𑀭𑀯𑀢𑀢𑁆𑀢𑀸 𑀘 𑀲𑀼𑀩𑁆𑀩𑀢𑁄 𑀲𑁄 𑀔𑀻𑀡𑀸𑀲𑀯𑀪𑀺𑀓𑁆𑀔𑀼. 𑀧𑀼𑀦 𑀘𑀧𑀭𑀁 𑀧𑀭𑀧𑀸𑀡𑀭𑁄𑀥𑀸𑀬 𑀕𑀺𑀳𑀻 𑀅𑀲𑀜𑁆𑀜𑀢𑁄, 𑀲𑁄 𑀮𑀼𑀤𑁆𑀤𑀓𑁄 𑀕𑀺𑀳𑀻 𑀧𑀭𑀧𑀸𑀡𑀭𑁄𑀥𑀸𑀬 ¶ 𑀢𑁂𑀲𑀁 𑀧𑀸𑀡𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀸𑀬 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀅𑀲𑀁𑀬𑀢𑁄. 𑀦𑀺𑀘𑁆𑀘𑀁 𑀫𑀼𑀦𑀻 𑀭𑀓𑁆𑀔𑀢𑀺 𑀧𑀸𑀡𑀺𑀦𑁂 𑀬𑀢𑁄, 𑀇𑀢𑀭𑁄 𑀧𑀦 𑀔𑀻𑀡𑀸𑀲𑀯𑀫𑀼𑀦𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀦𑀺𑀘𑁆𑀘𑀁 𑀬𑀢𑁄 𑀲𑀁𑀬𑀢𑁄 𑀧𑀸𑀡𑀺𑀦𑁄 𑀭𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂 𑀢𑁂 𑀓𑀣𑀁 𑀲𑀫𑀸𑀦𑀚𑀻𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺?

𑁨𑁨𑁩. 𑀲𑀺𑀔𑀻 𑀬𑀣𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀳𑀭𑀦𑁆𑀢𑁂 𑀲𑀸𑀓𑀺𑀬𑀸𑀦𑀁 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀧𑀞𑀫𑀓𑀲𑁄𑀢𑀸𑀧𑀦𑁆𑀦𑁄 𑀧𑀘𑁆𑀙𑀸 𑀲𑁄𑀢𑀸𑀧𑀢𑁆𑀢𑀺𑀁 𑀧𑀢𑁆𑀢𑀲𑁆𑀲 𑀥𑀫𑁆𑀫𑁂𑀦 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀘𑁆𑀙𑀸 𑀲𑁄𑀢𑀸𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀞𑀫𑀲𑁄𑀢𑀸𑀧𑀦𑁆𑀦𑀲𑁆𑀲 𑀕𑀺𑀳𑀺𑀦𑁄 ¶ 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀢𑀁 𑀓𑀣𑀁 𑀅𑀜𑁆𑀜𑀢𑀭𑁄 ¶ 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 ‘‘𑀅𑀜𑁆𑀜𑀸 𑀏𑀯 𑀳𑀺 𑀅𑀬𑀁 𑀚𑀸𑀢𑀺, 𑀧𑀽𑀚𑀦𑁂𑀬𑁆𑀬𑀯𑀢𑁆𑀣𑀼 𑀮𑀺𑀗𑁆𑀕’’𑀦𑁆𑀢𑀺 𑀲𑀦𑁆𑀥𑀸𑀬 ‘‘𑀅𑀦𑀸𑀕𑀸𑀫𑀻𑀧𑀺 𑀘𑁂, 𑀪𑀺𑀓𑁆𑀔𑀯𑁂, 𑀕𑀺𑀳𑀻 𑀳𑁄𑀢𑀺, 𑀢𑁂𑀦 𑀢𑀤𑀳𑀼𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀲𑀸𑀫𑀡𑁂𑀭𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀢𑁆𑀢𑀩𑁆𑀩𑀸𑀦𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀘𑁆𑀙𑀸 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀧𑀞𑀫𑀲𑁄𑀢𑀸𑀧𑀦𑁆𑀦𑀕𑀳𑀝𑁆𑀞𑀢𑁄 𑀅𑀢𑀺𑀫𑀳𑀦𑁆𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀫𑀢𑁆𑀣𑀓𑁂 𑀚𑀸𑀢𑀸𑀬 𑀲𑀺𑀔𑀸𑀬 𑀲𑀩𑁆𑀪𑀸𑀯𑁂𑀦 𑀲𑀺𑀔𑀻, 𑀫𑀡𑀺𑀤𑀡𑁆𑀟𑀲𑀤𑀺𑀲𑀸𑀬 𑀕𑀻𑀯𑀸𑀬 𑀦𑀻𑀮𑀕𑀻𑀯𑁄𑀢𑀺 𑀘 𑀫𑀬𑀽𑀭𑀯𑀺𑀳𑀗𑁆𑀕𑀫𑁄 𑀯𑀼𑀘𑁆𑀘𑀢𑀺. 𑀲𑁄 𑀬𑀣𑀸 𑀳𑀭𑀺𑀢𑀳𑀁𑀲𑀢𑀫𑁆𑀩𑀳𑀁𑀲𑀔𑀻𑀭𑀳𑀁𑀲𑀓𑀸𑀴𑀳𑀁𑀲𑀧𑀸𑀓𑀳𑀁𑀲𑀲𑀼𑀯𑀡𑁆𑀡𑀳𑀁𑀲𑁂𑀲𑀼 𑀬𑁆𑀯𑀸𑀬𑀁 𑀲𑀼𑀯𑀡𑁆𑀡𑀳𑀁𑀲𑁄, 𑀢𑀲𑁆𑀲 𑀳𑀁𑀲𑀲𑁆𑀲 𑀚𑀯𑁂𑀦 𑀲𑁄𑀴𑀲𑀺𑀫𑁆𑀧𑀺 𑀓𑀮𑀁 𑀦 𑀉𑀧𑁂𑀢𑀺. 𑀲𑀼𑀯𑀡𑁆𑀡𑀳𑀁𑀲𑁄 𑀳𑀺 𑀫𑀼𑀳𑀼𑀢𑁆𑀢𑀓𑁂𑀦 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀕𑀘𑁆𑀙𑀢𑀺, 𑀬𑁄𑀚𑀦𑀫𑁆𑀧𑀺 𑀅𑀲𑀫𑀢𑁆𑀣𑁄 𑀇𑀢𑀭𑁄. 𑀤𑀲𑁆𑀲𑀦𑀻𑀬𑀢𑀸𑀬 𑀧𑀦 𑀉𑀪𑁄𑀧𑀺 𑀤𑀲𑁆𑀲𑀦𑀻𑀬𑀸 𑀳𑁄𑀦𑁆𑀢𑀺, 𑀏𑀯𑀁 𑀕𑀺𑀳𑀻 𑀧𑀞𑀫𑀲𑁄𑀢𑀸𑀧𑀦𑁆𑀦𑁄𑀧𑀺 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀤𑀲𑁆𑀲𑀦𑁂𑀦 𑀤𑀲𑁆𑀲𑀦𑀻𑀬𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀧𑀘𑁆𑀙𑀸 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀧𑀺 𑀫𑀕𑁆𑀕𑀤𑀲𑁆𑀲𑀦𑁂𑀦 𑀢𑀼𑀮𑁆𑀬𑀤𑀲𑁆𑀲𑀦𑀻𑀬𑀪𑀸𑀯𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀚𑀯𑁂𑀦 𑀦𑀸𑀦𑀼𑀓𑀭𑁄𑀢𑀺. 𑀓𑀢𑀫𑁂𑀦 𑀚𑀯𑁂𑀦? 𑀉𑀧𑀭𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀜𑀸𑀡𑀚𑀯𑁂𑀦. 𑀕𑀺𑀳𑀺𑀦𑁄 𑀳𑀺 𑀢𑀁 𑀜𑀸𑀡𑀁 𑀤𑀦𑁆𑀥𑀁 𑀳𑁄𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀺𑀚𑀝𑀸𑀬 𑀚𑀝𑀺𑀢𑀢𑁆𑀢𑀸, 𑀪𑀺𑀓𑁆𑀔𑀼𑀦𑁄 𑀧𑀦 𑀢𑀺𑀓𑁆𑀔𑀁 𑀳𑁄𑀢𑀺 𑀢𑀲𑁆𑀲𑀸 𑀚𑀝𑀸𑀬 𑀯𑀺𑀚𑀝𑀺𑀢𑀢𑁆𑀢𑀸. 𑀲𑁆𑀯𑀸𑀬𑀫𑀢𑁆𑀣𑁄 𑀪𑀕𑀯𑀢𑀸 ‘‘𑀫𑀼𑀦𑀺𑀦𑁄 𑀯𑀺𑀯𑀺𑀢𑁆𑀢𑀲𑁆𑀲 𑀯𑀦𑀫𑁆𑀳𑀺 𑀛𑀸𑀬𑀢𑁄’’𑀢𑀺 𑀇𑀫𑀺𑀦𑀸 𑀧𑀸𑀤𑁂𑀦 𑀤𑀻𑀧𑀺𑀢𑁄. 𑀅𑀬𑀜𑁆𑀳𑀺 𑀲𑁂𑀓𑁆𑀔𑀫𑀼𑀦𑀺 𑀪𑀺𑀓𑁆𑀔𑀼 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑁂𑀦 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺, 𑀮𑀓𑁆𑀔𑀡𑀸𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀦𑀺𑀘𑁆𑀘𑀁 𑀯𑀦𑀲𑁆𑀫𑀺𑀁 𑀛𑀸𑀬𑀢𑀺. 𑀓𑀼𑀢𑁄 𑀕𑀺𑀳𑀺𑀦𑁄 𑀏𑀯𑀭𑀽𑀧𑁄 𑀯𑀺𑀯𑁂𑀓𑁄 𑀘 𑀛𑀸𑀦𑀜𑁆𑀘𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺?

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑀼𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘 𑀧𑀞𑀫𑁄 𑀯𑀕𑁆𑀕𑁄 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑀢𑁄, 𑀦𑀸𑀫𑁂𑀦

𑀉𑀭𑀕𑀯𑀕𑁆𑀕𑁄𑀢𑀺.

𑁨. 𑀘𑀽𑀴𑀯𑀕𑁆𑀕𑁄

𑁧. 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀬𑀸𑀦𑀻𑀥 ¶ ¶ ¶ 𑀪𑀽𑀢𑀸𑀦𑀻𑀢𑀺 𑀭𑀢𑀦𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀢𑀻𑀢𑁂 𑀓𑀺𑀭 𑀯𑁂𑀲𑀸𑀮𑀺𑀬𑀁 𑀤𑀼𑀩𑁆𑀪𑀺𑀓𑁆𑀔𑀸𑀤𑀬𑁄 𑀉𑀧𑀤𑁆𑀤𑀯𑀸 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑁂𑀲𑀁 𑀯𑀽𑀧𑀲𑀫𑀦𑀢𑁆𑀣𑀸𑀬 𑀮𑀺𑀘𑁆𑀙𑀯𑀬𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸, 𑀬𑀸𑀘𑀺𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀯𑁂𑀲𑀸𑀮𑀺𑀫𑀸𑀦𑀬𑀺𑀁𑀲𑀼. 𑀏𑀯𑀁 𑀆𑀦𑀻𑀢𑁄 𑀪𑀕𑀯𑀸 𑀢𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀯𑀽𑀧𑀲𑀫𑀦𑀢𑁆𑀣𑀸𑀬 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀧𑁄𑀭𑀸𑀡𑀸 𑀧𑀦𑀲𑁆𑀲 𑀯𑁂𑀲𑀸𑀮𑀺𑀯𑀢𑁆𑀣𑀼𑀢𑁄 𑀧𑀪𑀼𑀢𑀺 𑀉𑀧𑁆𑀧𑀢𑁆𑀢𑀺𑀁 𑀯𑀡𑁆𑀡𑀬𑀦𑁆𑀢𑀺. 𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺. 𑀲𑀸 𑀢𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀲𑀫𑁆𑀫𑀸 𑀧𑀭𑀺𑀳𑀭𑀺𑀬𑀫𑀸𑀦𑀕𑀩𑁆𑀪𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀯𑀺𑀚𑀸𑀬𑀦𑀖𑀭𑀁 𑀧𑀸𑀯𑀺𑀲𑀺. 𑀧𑀼𑀜𑁆𑀜𑀯𑀢𑀻𑀦𑀁 𑀧𑀘𑁆𑀘𑀽𑀲𑀲𑀫𑀬𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑀸 𑀘 𑀢𑀸𑀲𑀁 𑀅𑀜𑁆𑀜𑀢𑀭𑀸, 𑀢𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀅𑀮𑀢𑁆𑀢𑀓𑀧𑀝𑀮𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑀁 𑀫𑀁𑀲𑀧𑁂𑀲𑀺𑀁 𑀯𑀺𑀚𑀸𑀬𑀺. 𑀢𑀢𑁄 ‘‘𑀅𑀜𑁆𑀜𑀸 𑀤𑁂𑀯𑀺𑀬𑁄 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀦𑁆𑀢𑀺, 𑀅𑀕𑁆𑀕𑀫𑀳𑁂𑀲𑀻 𑀫𑀁𑀲𑀧𑁂𑀲𑀺𑀦𑁆𑀢𑀺 𑀭𑀜𑁆𑀜𑁄 𑀧𑀼𑀭𑀢𑁄 𑀫𑀫 𑀅𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀅𑀯𑀡𑁆𑀡𑀪𑀬𑁂𑀦 𑀢𑀁 𑀫𑀁𑀲𑀧𑁂𑀲𑀺𑀁 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑁂𑀦 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 𑀕𑀗𑁆𑀕𑀸𑀬 𑀲𑁄𑀢𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀲𑀼𑀯𑀡𑁆𑀡𑀧𑀝𑁆𑀝𑀺𑀓𑀜𑁆𑀘𑁂𑀢𑁆𑀣 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀚𑀸’’𑀢𑀺 𑀮𑀺𑀔𑀺𑀢𑁆𑀯𑀸 𑀩𑀦𑁆𑀥𑀺𑀁𑀲𑀼. 𑀢𑀢𑁄 𑀢𑀁 𑀪𑀸𑀚𑀦𑀁 𑀊𑀫𑀺𑀪𑀬𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀁 𑀕𑀗𑁆𑀕𑀸𑀬 𑀲𑁄𑀢𑁂𑀦 𑀧𑀸𑀬𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀕𑁄𑀧𑀸𑀮𑀓𑀼𑀮𑀁 𑀦𑀺𑀲𑁆𑀲𑀸𑀬 𑀕𑀗𑁆𑀕𑀸𑀬 𑀢𑀻𑀭𑁂 𑀯𑀲𑀢𑀺. 𑀲𑁄 𑀧𑀸𑀢𑁄𑀯𑀕𑀗𑁆𑀕𑀁 𑀑𑀢𑀺𑀡𑁆𑀡𑁄 𑀢𑀁 𑀪𑀸𑀚𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀲𑀺. 𑀢𑀢𑁄 𑀢𑀢𑁆𑀣 𑀢𑀁 𑀅𑀓𑁆𑀔𑀭𑀧𑀝𑁆𑀝𑀺𑀓𑀁 𑀭𑀸𑀚𑀫𑀼𑀤𑁆𑀤𑀺𑀓𑀸𑀮𑀜𑁆𑀙𑀦𑀜𑁆𑀘 𑀤𑀺𑀲𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀫𑀁𑀲𑀧𑁂𑀲𑀺𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀺𑀬𑀸 𑀕𑀩𑁆𑀪𑁄, 𑀢𑀣𑀸 𑀳𑀺𑀲𑁆𑀲 𑀤𑀼𑀕𑁆𑀕𑀦𑁆𑀥𑀧𑀽𑀢𑀺𑀪𑀸𑀯𑁄 𑀦𑀢𑁆𑀣𑀻’’𑀢𑀺 𑀢𑀁 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀲𑀼𑀤𑁆𑀥𑁂 𑀑𑀓𑀸𑀲𑁂 𑀞𑀧𑁂𑀲𑀺. 𑀅𑀣 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀤𑁆𑀯𑁂 𑀫𑀁𑀲𑀧𑁂𑀲𑀺𑀬𑁄 𑀅𑀳𑁂𑀲𑀼𑀁. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀲𑀸𑀥𑀼𑀓𑀢𑀭𑀁 𑀞𑀧𑁂𑀲𑀺. 𑀢𑀢𑁄 𑀧𑀼𑀦 𑀅𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀧𑁂𑀲𑀺𑀬𑀸 𑀳𑀢𑁆𑀣𑀧𑀸𑀤𑀲𑀻𑀲𑀸𑀦𑀫𑀢𑁆𑀣𑀸𑀬 𑀧𑀜𑁆𑀘 𑀧𑀜𑁆𑀘 𑀧𑀺𑀴𑀓𑀸 ¶ 𑀉𑀝𑁆𑀞𑀳𑀺𑀁𑀲𑀼. 𑀅𑀣 𑀢𑀢𑁄 𑀅𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀏𑀓𑀸 ¶ 𑀫𑀁𑀲𑀧𑁂𑀲𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄; 𑀏𑀓𑀸 𑀤𑀸𑀭𑀺𑀓𑀸 𑀅𑀳𑁄𑀲𑀺. 𑀢𑁂𑀲𑀼 𑀢𑀸𑀧𑀲𑀲𑁆𑀲 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺, 𑀅𑀗𑁆𑀕𑀼𑀝𑁆𑀞𑀢𑁄 𑀘𑀲𑁆𑀲 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀧𑀪𑀼𑀢𑀺 𑀘 𑀔𑀻𑀭𑀪𑀢𑁆𑀢𑀁 𑀮𑀪𑀢𑀺. 𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀻𑀭𑀁 𑀤𑀸𑀭𑀓𑀸𑀦𑀁 𑀫𑀼𑀔𑁂 𑀆𑀲𑀺𑀜𑁆𑀘𑀢𑀺. 𑀢𑁂𑀲𑀁 𑀬𑀁 𑀬𑀁 𑀉𑀤𑀭𑀁 𑀧𑀯𑀺𑀲𑀢𑀺, 𑀢𑀁 𑀲𑀩𑁆𑀩𑀁 𑀫𑀡𑀺𑀪𑀸𑀚𑀦𑀕𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀯𑀁 𑀦𑀺𑀘𑁆𑀙𑀯𑀻 𑀅𑀳𑁂𑀲𑀼𑀁. 𑀅𑀧𑀭𑁂 𑀧𑀦 𑀆𑀳𑀼 𑁋 ‘‘𑀲𑀺𑀩𑁆𑀩𑀺𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀮𑀻𑀦𑀸 𑀙𑀯𑀺 𑀅𑀳𑁄𑀲𑀻’’𑀢𑀺. 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀺𑀢𑀸𑀬 𑀯𑀸 𑀮𑀻𑀦𑀘𑁆𑀙𑀯𑀺𑀢𑀸𑀬 𑀯𑀸 𑀮𑀺𑀘𑁆𑀙𑀯𑀻𑀢𑀺 𑀧𑀜𑁆𑀜𑀸𑀬𑀺𑀁𑀲𑀼.

𑀢𑀸𑀧𑀲𑁄 𑀤𑀸𑀭𑀓𑁂 𑀧𑁄𑀲𑁂𑀦𑁆𑀢𑁄 𑀉𑀲𑁆𑀲𑀽𑀭𑁂 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀢𑀲𑁆𑀲 𑀢𑀁 𑀩𑁆𑀬𑀸𑀧𑀸𑀭𑀁 𑀜𑀢𑁆𑀯𑀸 𑀕𑁄𑀧𑀸𑀮𑀓𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀭𑀓𑀧𑁄𑀲𑀦𑀁 𑀧𑀮𑀺𑀩𑁄𑀥𑁄, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀤𑁂𑀣, 𑀫𑀬𑀁 𑀧𑁄𑀲𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑀸𑀧𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀕𑁄𑀧𑀸𑀮𑀓𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀕𑁆𑀕𑀁 𑀲𑀫𑀁 𑀓𑀢𑁆𑀯𑀸, 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀢𑁆𑀯𑀸; 𑀥𑀚𑀧𑀝𑀸𑀓𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀽𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺 𑀅𑀲𑁆𑀲𑀫𑀁 𑀆𑀕𑀢𑀸. 𑀢𑀸𑀧𑀲𑁄 ‘‘𑀫𑀳𑀸𑀧𑀼𑀜𑁆𑀜𑀸 𑀤𑀸𑀭𑀓𑀸, 𑀅𑀧𑁆𑀧𑀫𑀸𑀤𑁂𑀦 𑀯𑀟𑁆𑀠𑁂𑀣, 𑀯𑀟𑁆𑀠𑁂𑀢𑁆𑀯𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀣, 𑀧𑀜𑁆𑀘𑀕𑁄𑀭𑀲𑁂𑀦 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀣, 𑀢𑀢𑁆𑀭 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀭𑀓𑁂 𑀅𑀤𑀸𑀲𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑀸𑀭𑀓𑁂 𑀦𑁂𑀢𑁆𑀯𑀸 𑀧𑁄𑀲𑁂𑀲𑀼𑀁.

𑀤𑀸𑀭𑀓𑀸 𑀯𑀟𑁆𑀠𑀺𑀫𑀦𑁆𑀯𑀸𑀬 𑀓𑀻𑀴𑀦𑁆𑀢𑀸 𑀯𑀺𑀯𑀸𑀤𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑁂 𑀕𑁄𑀧𑀸𑀮𑀤𑀸𑀭𑀓𑁂 𑀳𑀢𑁆𑀣𑁂𑀦𑀧𑀺 𑀧𑀸𑀤𑁂𑀦𑀧𑀺 𑀧𑀳𑀭𑀦𑁆𑀢𑀺, 𑀢𑁂 𑀭𑁄𑀤𑀦𑁆𑀢𑀺. ‘‘𑀓𑀺𑀲𑁆𑀲 𑀭𑁄𑀤𑀣𑀸’’𑀢𑀺 𑀘 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀸 ‘‘𑀇𑀫𑁂 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑀸 𑀢𑀸𑀧𑀲𑀧𑁄𑀲𑀺𑀢𑀸 𑀅𑀫𑁆𑀳𑁂 𑀅𑀢𑀻𑀯 𑀧𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀇𑀫𑁂 𑀤𑀸𑀭𑀓𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀯𑀺𑀳𑁂𑀞𑁂𑀦𑁆𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺, 𑀦 𑀇𑀫𑁂 𑀲𑀗𑁆𑀕𑀳𑁂𑀢𑀩𑁆𑀩𑀸, 𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀓𑀺𑀭 𑀲𑁄 𑀧𑀤𑁂𑀲𑁄 ‘‘𑀯𑀚𑁆𑀚𑀻’’𑀢𑀺 𑀯𑀼𑀘𑁆𑀘𑀢𑀺 𑀬𑁄𑀚𑀦𑀲𑀢𑀁 𑀧𑀭𑀺𑀫𑀸𑀡𑁂𑀦. 𑀅𑀣 𑀢𑀁 𑀧𑀤𑁂𑀲𑀁 𑀕𑁄𑀧𑀸𑀮𑀓𑀸 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀼𑀁. 𑀢𑀢𑁆𑀣𑁂𑀯 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀢𑀸𑀬 𑀘𑀲𑁆𑀲 𑀤𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀯𑀸𑀭𑁂𑀬𑁆𑀬𑀁 𑀓𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼 𑁋 ‘‘𑀦 𑀩𑀸𑀳𑀺𑀭𑀢𑁄 𑀤𑀸𑀭𑀺𑀓𑀸 𑀆𑀦𑁂𑀢𑀩𑁆𑀩𑀸, 𑀇𑀢𑁄 𑀤𑀸𑀭𑀺𑀓𑀸 𑀦 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀸’’𑀢𑀺. 𑀢𑁂𑀲𑀁 𑀧𑀞𑀫𑀲𑀁𑀯𑀸𑀲𑁂𑀦 𑀤𑁆𑀯𑁂 𑀤𑀸𑀭𑀓𑀸 𑀚𑀸𑀢𑀸 𑀥𑀻𑀢𑀸 𑀘 𑀧𑀼𑀢𑁆𑀢𑁄 𑀘, 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀤𑁆𑀯𑁂 𑀤𑁆𑀯𑁂 𑀚𑀸𑀢𑀸. 𑀢𑀢𑁄 𑀢𑁂𑀲𑀁 ¶ 𑀤𑀸𑀭𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀟𑁆𑀠𑀦𑁆𑀢𑀸𑀦𑀁 𑀆𑀭𑀸𑀫𑀼𑀬𑁆𑀬𑀸𑀦𑀦𑀺𑀯𑀸𑀲𑀦𑀝𑁆𑀞𑀸𑀦𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀁 𑀢𑀁 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀓𑀢𑀢𑁆𑀢𑀸 𑀯𑁂𑀲𑀸𑀮𑀻𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀇𑀤𑀁 𑀯𑁂𑀲𑀸𑀮𑀻𑀯𑀢𑁆𑀣𑀼.

𑀅𑀬𑀁 𑀧𑀦 𑀯𑁂𑀲𑀸𑀮𑀻 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀓𑀸𑀮𑁂 𑀇𑀤𑁆𑀥𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀢𑀢𑁆𑀣 𑀳𑀺 𑀭𑀸𑀚𑀽𑀦𑀁𑀬𑁂𑀯 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀲𑀢𑀸𑀦𑀺 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀅𑀳𑁂𑀲𑀼𑀁, 𑀢𑀣𑀸 𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀪𑀡𑁆𑀟𑀸𑀕𑀸𑀭𑀺𑀓𑀧𑁆𑀧𑀪𑀼𑀢𑀻𑀦𑀁. 𑀬𑀣𑀸𑀳 𑁋

‘‘𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀲𑀼𑀪𑀺𑀓𑁆𑀔𑀸 𑀘, 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀢𑀸𑀦𑀺, 𑀲𑀢𑁆𑀢 𑀘 𑀧𑀸𑀲𑀸𑀤𑀸, 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺, 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀸𑀦𑀺, 𑀲𑀢𑁆𑀢 𑀘 𑀆𑀭𑀸𑀫𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀘 𑀆𑀭𑀸𑀫𑀲𑀢𑀸𑀦𑀺, 𑀲𑀢𑁆𑀢 𑀘 𑀆𑀭𑀸𑀫𑀸, 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀲𑀢𑀸𑀦𑀺, 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀬𑁄’’𑀢𑀺 (𑀫𑀳𑀸𑀯. 𑁩𑁨𑁬).

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀤𑀼𑀩𑁆𑀪𑀺𑀓𑁆𑀔𑀸 𑀅𑀳𑁄𑀲𑀺 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀤𑀼𑀲𑁆𑀲𑀲𑁆𑀲𑀸. 𑀧𑀞𑀫𑀁 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸 𑀫𑀭𑀦𑁆𑀢𑀺, 𑀢𑁂 𑀩𑀳𑀺𑀤𑁆𑀥𑀸 𑀙𑀟𑁆𑀟𑁂𑀦𑁆𑀢𑀺. 𑀫𑀢𑀫𑀦𑀼𑀲𑁆𑀲𑀸𑀦𑀁 𑀓𑀼𑀡𑀧𑀕𑀦𑁆𑀥𑁂𑀦 𑀅𑀫𑀦𑀼𑀲𑁆𑀲𑀸 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀢𑀢𑁄 𑀩𑀳𑀼𑀢𑀭𑀸 𑀫𑀻𑀬𑀦𑁆𑀢𑀺, 𑀢𑀸𑀬 𑀧𑀝𑀺𑀓𑀽𑀮𑀢𑀸𑀬 𑀘 𑀲𑀢𑁆𑀢𑀸𑀦𑀁 𑀅𑀳𑀺𑀯𑀸𑀢𑀓𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀇𑀢𑀺 𑀢𑀻𑀳𑀺 𑀤𑀼𑀩𑁆𑀪𑀺𑀓𑁆𑀔𑀅𑀫𑀦𑀼𑀲𑁆𑀲𑀭𑁄𑀕𑀪𑀬𑁂𑀳𑀺 𑀉𑀧𑀤𑁆𑀤𑀼𑀢𑀸𑀬 𑀯𑁂𑀲𑀸𑀮𑀺𑀬𑀸 𑀦𑀕𑀭𑀯𑀸𑀲𑀺𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀫𑀸𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀢𑀺𑀯𑀺𑀥𑀁 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀇𑀢𑁄 𑀧𑀼𑀩𑁆𑀩𑁂 𑀬𑀸𑀯 𑀲𑀢𑁆𑀢𑀫𑀸 𑀭𑀸𑀚𑀓𑀼𑀮𑀧𑀭𑀺𑀯𑀝𑁆𑀝𑀸 𑀏𑀯𑀭𑀽𑀧𑀁 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀢𑀼𑀫𑁆𑀳𑀸𑀓𑀁 𑀫𑀜𑁆𑀜𑁂 𑀅𑀥𑀫𑁆𑀫𑀺𑀓𑀢𑁆𑀢𑁂𑀦 𑀏𑀢𑀭𑀳𑀺 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀭𑀸𑀚𑀸 𑀲𑀩𑁆𑀩𑁂 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸, ‘‘𑀫𑀬𑁆𑀳𑀁 𑀅𑀥𑀫𑁆𑀫𑀺𑀓𑀪𑀸𑀯𑀁 𑀯𑀺𑀘𑀺𑀦𑀣𑀸’’𑀢𑀺 𑀆𑀳. 𑀢𑁂 𑀲𑀩𑁆𑀩𑀁 𑀧𑀯𑁂𑀡𑀺𑀁 𑀯𑀺𑀘𑀺𑀦𑀦𑁆𑀢𑀸 𑀦 𑀓𑀺𑀜𑁆𑀘𑀺 𑀅𑀤𑁆𑀤𑀲𑀁𑀲𑀼.

𑀢𑀢𑁄 𑀭𑀜𑁆𑀜𑁄 𑀤𑁄𑀲𑀁 𑀅𑀤𑀺𑀲𑁆𑀯𑀸 ‘‘𑀇𑀤𑀁 𑀪𑀬𑀁 𑀅𑀫𑁆𑀳𑀸𑀓𑀁 𑀓𑀣𑀁 𑀯𑀽𑀧𑀲𑀫𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀢𑀢𑁆𑀣 𑀏𑀓𑀘𑁆𑀘𑁂 𑀙 𑀲𑀢𑁆𑀣𑀸𑀭𑁄 𑀅𑀧𑀤𑀺𑀲𑀺𑀁𑀲𑀼 𑁋 ‘‘𑀏𑀢𑁂𑀳𑀺 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀯𑀽𑀧𑀲𑀫𑀺𑀲𑁆𑀲𑀢𑀻’’𑀢𑀺. 𑀏𑀓𑀘𑁆𑀘𑁂 𑀆𑀳𑀁𑀲𑀼 𑁋 ‘‘𑀩𑀼𑀤𑁆𑀥𑁄 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁄 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀫𑀳𑀺𑀤𑁆𑀥𑀺𑀓𑁄 ¶ 𑀫𑀳𑀸𑀦𑀼𑀪𑀸𑀯𑁄, 𑀢𑁂𑀦 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀩𑁆𑀩𑀪𑀬𑀸𑀦𑀺 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀢𑁂𑀦 𑀢𑁂 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 ‘‘𑀓𑀳𑀁 𑀧𑀦 𑀲𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺, 𑀅𑀫𑁆𑀳𑁂𑀳𑀺 𑀯𑀸 𑀧𑁂𑀲𑀺𑀢𑁂 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀆𑀳𑀁𑀲𑀼. 𑀅𑀣𑀸𑀧𑀭𑁂 𑀆𑀳𑀁𑀲𑀼 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀦𑀼𑀓𑀫𑁆𑀧𑀓𑀸, 𑀓𑀺𑀲𑁆𑀲 𑀦𑀸𑀕𑀘𑁆𑀙𑁂𑀬𑁆𑀬𑀼𑀁, 𑀲𑁄 𑀧𑀦 𑀪𑀕𑀯𑀸 𑀏𑀢𑀭𑀳𑀺 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺, 𑀭𑀸𑀚𑀸 𑀘 𑀩𑀺𑀫𑁆𑀩𑀺𑀲𑀸𑀭𑁄 𑀢𑀁 𑀉𑀧𑀝𑁆𑀞𑀳𑀢𑀺, 𑀓𑀤𑀸𑀘𑀺 𑀲𑁄 𑀆𑀕𑀦𑁆𑀢𑀼𑀁 𑀦 𑀤𑀤𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀤𑁆𑀯𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀧𑀳𑀽𑀢𑀁 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀼𑀁 𑁋 ‘‘𑀩𑀺𑀫𑁆𑀩𑀺𑀲𑀸𑀭𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀦𑁂𑀣𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀦𑀺𑀯𑁂𑀤𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀪𑀕𑀯𑀦𑁆𑀢𑀁 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑁂𑀲𑁂𑀳𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀦 𑀲𑀫𑁆𑀧𑀝𑀺𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀏𑀯 𑀚𑀸𑀦𑀸𑀣𑀸’’𑀢𑀺 𑀆𑀳. 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀦𑀕𑀭𑁂 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺. 𑀲𑀘𑁂 𑀪𑀕𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑁄𑀢𑁆𑀣𑀺 𑀦𑁄 𑀪𑀯𑁂𑀬𑁆𑀬𑀸’’𑀢𑀺. 𑀪𑀕𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀯𑁂𑀲𑀸𑀮𑀺𑀬𑀁 𑀭𑀢𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀲𑀸 𑀭𑀓𑁆𑀔𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀨𑀭𑀺𑀲𑁆𑀲𑀢𑀺, 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀅𑀣 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀪𑀕𑀯𑀢𑀸 𑀯𑁂𑀲𑀸𑀮𑀺𑀕𑀫𑀦𑀁 𑀅𑀥𑀺𑀯𑀸𑀲𑀺𑀢’’𑀦𑁆𑀢𑀺 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀣 𑀯𑁂𑀲𑀸𑀮𑀺𑀕𑀫𑀦’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀆𑀕𑀫𑁂𑀣, 𑀬𑀸𑀯 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀫𑀻’’𑀢𑀺.

𑀅𑀣 𑀔𑁄 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀕𑀳𑀲𑁆𑀲 𑀘 𑀕𑀗𑁆𑀕𑀸𑀬 𑀘 𑀅𑀦𑁆𑀢𑀭𑀸 𑀧𑀜𑁆𑀘𑀬𑁄𑀚𑀦𑀁 𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸, 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀫𑀸𑀧𑁂𑀢𑁆𑀯𑀸, 𑀪𑀕𑀯𑀢𑁄 𑀕𑀫𑀦𑀓𑀸𑀮𑀁 𑀧𑀝𑀺𑀯𑁂𑀤𑁂𑀲𑀺. 𑀪𑀕𑀯𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀸𑀬𑀸𑀲𑀺. 𑀭𑀸𑀚𑀸 𑀧𑀜𑁆𑀘𑀬𑁄𑀚𑀦𑀁 𑀫𑀕𑁆𑀕𑀁 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺 𑀚𑀸𑀡𑀼𑀫𑀢𑁆𑀢𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀸𑀧𑀼𑀡𑁆𑀡𑀖𑀝𑀓𑀤𑀮𑀺𑀆𑀤𑀻𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀤𑁆𑀯𑁂 𑀲𑁂𑀢𑀘𑁆𑀙𑀢𑁆𑀢𑀸𑀦𑀺, 𑀏𑀓𑁂𑀓𑀲𑁆𑀲 𑀘 𑀪𑀺𑀓𑁆𑀔𑀼𑀲𑁆𑀲 𑀏𑀓𑀫𑁂𑀓𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀦𑁆𑀢𑀁 𑀯𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀧𑀜𑁆𑀘𑀳𑀺 𑀤𑀺𑀯𑀲𑁂𑀳𑀺 𑀕𑀗𑁆𑀕𑀸𑀢𑀻𑀭𑀁 𑀦𑁂𑀲𑀺. 𑀢𑀢𑁆𑀣 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀦𑀸𑀯𑀁 𑀅𑀮𑀗𑁆𑀓𑀭𑁄𑀦𑁆𑀢𑁄 𑀯𑁂𑀲𑀸𑀮𑀺𑀓𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀆𑀕𑀢𑁄 𑀪𑀕𑀯𑀸, 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀲𑀩𑁆𑀩𑁂 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 ¶ 𑀓𑀭𑁄𑀣𑀸’’𑀢𑀺. 𑀢𑁂 ‘‘𑀤𑀺𑀕𑀼𑀡𑀁 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑁂𑀲𑀸𑀮𑀺𑀬𑀸 𑀘 𑀕𑀗𑁆𑀕𑀸𑀬 𑀘 𑀅𑀦𑁆𑀢𑀭𑀸 𑀢𑀺𑀬𑁄𑀚𑀦𑀁 𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀘𑀢𑁆𑀢𑀸𑀭𑀺, 𑀏𑀓𑁂𑀓𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀤𑁆𑀯𑁂 𑀲𑁂𑀢𑀘𑁆𑀙𑀢𑁆𑀢𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀧𑀽𑀚𑀁 𑀓𑀼𑀭𑀼𑀫𑀸𑀦𑀸 𑀕𑀗𑁆𑀕𑀸𑀢𑀻𑀭𑁂 𑀆𑀕𑀦𑁆𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀩𑀺𑀫𑁆𑀩𑀺𑀲𑀸𑀭𑁄 𑀤𑁆𑀯𑁂 𑀦𑀸𑀯𑀸𑀬𑁄 𑀲𑀗𑁆𑀖𑀸𑀝𑁂𑀢𑁆𑀯𑀸, 𑀫𑀡𑁆𑀟𑀧𑀁 𑀓𑀢𑁆𑀯𑀸, 𑀧𑀼𑀧𑁆𑀨𑀤𑀸𑀫𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀢𑁆𑀣 𑀲𑀩𑁆𑀩𑀭𑀢𑀦𑀫𑀬𑀁 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀪𑀕𑀯𑀸 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺. 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀧𑀺 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀦𑀺𑀲𑀻𑀤𑀺𑀁𑀲𑀼. 𑀭𑀸𑀚𑀸 𑀪𑀕𑀯𑀦𑁆𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑁄𑀳𑀺𑀢𑁆𑀯𑀸 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀸 𑀆𑀕𑀘𑁆𑀙𑀢𑀺, 𑀢𑀸𑀯𑀸𑀳𑀁 𑀇𑀥𑁂𑀯 𑀕𑀗𑁆𑀕𑀸𑀢𑀻𑀭𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀉𑀧𑀭𑀺 𑀤𑁂𑀯𑀢𑀸 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀧𑀽𑀚𑀫𑀓𑀁𑀲𑀼, 𑀳𑁂𑀝𑁆𑀞𑀸 𑀕𑀗𑁆𑀕𑀸𑀦𑀺𑀯𑀸𑀲𑀺𑀦𑁄 𑀓𑀫𑁆𑀩𑀮𑀲𑁆𑀲𑀢𑀭𑀸𑀤𑀬𑁄 𑀦𑀸𑀕𑀸 𑀧𑀽𑀚𑀫𑀓𑀁𑀲𑀼. 𑀏𑀯𑀁 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀪𑀕𑀯𑀸 𑀬𑁄𑀚𑀦𑀫𑀢𑁆𑀢𑀁 𑀅𑀤𑁆𑀥𑀸𑀦𑀁 𑀕𑀗𑁆𑀕𑀸𑀬 𑀕𑀦𑁆𑀢𑁆𑀯𑀸 𑀯𑁂𑀲𑀸𑀮𑀺𑀓𑀸𑀦𑀁 𑀲𑀻𑀫𑀦𑁆𑀢𑀭𑀁 𑀧𑀯𑀺𑀝𑁆𑀞𑁄.

𑀢𑀢𑁄 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀢𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀓𑀢𑀧𑀽𑀚𑀸𑀬 𑀤𑀺𑀕𑀼𑀡𑀁 𑀓𑀭𑁄𑀦𑁆𑀢𑀸 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀺𑀁𑀲𑀼. 𑀢𑁂𑀦𑁂𑀯 𑀔𑀡𑁂𑀦 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀯𑀺𑀚𑁆𑀚𑀼𑀧𑁆𑀧𑀪𑀸𑀯𑀺𑀦𑀤𑁆𑀥𑀦𑁆𑀥𑀓𑀸𑀭𑀯𑀺𑀲𑀝𑀓𑀽𑀝𑁄 𑀕𑀴𑀕𑀴𑀸𑀬𑀦𑁆𑀢𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀢𑀸 𑀧𑀞𑀫𑀧𑀸𑀤𑁂 𑀕𑀗𑁆𑀕𑀸𑀢𑀻𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀬𑁂 𑀢𑁂𑀫𑁂𑀢𑀼𑀓𑀸𑀫𑀸, 𑀢𑁂 𑀏𑀯 𑀢𑁂𑀫𑁂𑀦𑁆𑀢𑀺, 𑀅𑀢𑁂𑀫𑁂𑀢𑀼𑀓𑀸𑀫𑀸 𑀦 𑀢𑁂𑀫𑁂𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀚𑀸𑀡𑀼𑀫𑀢𑁆𑀢𑀁 𑀊𑀭𑀼𑀫𑀢𑁆𑀢𑀁 𑀓𑀝𑀺𑀫𑀢𑁆𑀢𑀁 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀯𑀳𑀢𑀺, 𑀲𑀩𑁆𑀩𑀓𑀼𑀡𑀧𑀸𑀦𑀺 𑀉𑀤𑀓𑁂𑀦 𑀕𑀗𑁆𑀕𑀁 𑀧𑀯𑁂𑀲𑀺𑀢𑀸𑀦𑀺 𑀧𑀭𑀺𑀲𑀼𑀤𑁆𑀥𑁄 𑀪𑀽𑀫𑀺𑀪𑀸𑀕𑁄 𑀅𑀳𑁄𑀲𑀺.

𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀸𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀤𑀺𑀕𑀼𑀡𑀁 𑀧𑀽𑀚𑀁 𑀓𑀭𑁄𑀦𑁆𑀢𑀸 𑀯𑁂𑀲𑀸𑀮𑀺𑀁 𑀦𑀬𑀺𑀁𑀲𑀼. 𑀯𑁂𑀲𑀸𑀮𑀺𑀁 𑀲𑀫𑁆𑀧𑀢𑁆𑀢𑁂 𑀪𑀕𑀯𑀢𑀺 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 ¶ 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄 𑀆𑀕𑀘𑁆𑀙𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀸𑀦𑀁 𑀲𑀦𑁆𑀦𑀺𑀧𑀸𑀢𑁂𑀦 𑀅𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀧𑀮𑀸𑀬𑀺𑀁𑀲𑀼. 𑀪𑀕𑀯𑀸 𑀦𑀕𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀆𑀦𑀦𑁆𑀤, 𑀭𑀢𑀦𑀲𑀼𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀽𑀧𑀓𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁 𑀯𑁂𑀲𑀸𑀮𑀺𑀬𑀸 𑀢𑀻𑀲𑀼 𑀧𑀸𑀓𑀸𑀭𑀦𑁆𑀢𑀭𑁂𑀲𑀼 𑀯𑀺𑀘𑀭𑀦𑁆𑀢𑁄 𑀧𑀭𑀺𑀢𑁆𑀢𑀁 𑀓𑀭𑁄𑀳𑀻’’𑀢𑀺 𑀭𑀢𑀦𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀏𑀯𑀁 ‘‘𑀓𑁂𑀦 𑀧𑀦𑁂𑀢𑀁 𑀲𑀼𑀢𑁆𑀢𑀁, 𑀓𑀤𑀸, 𑀓𑀢𑁆𑀣, 𑀓𑀲𑁆𑀫𑀸 𑀘 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀲𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸 𑀯𑀺𑀢𑁆𑀣𑀸𑀭𑁂𑀦 𑀯𑁂𑀲𑀸𑀮𑀺𑀯𑀢𑁆𑀣𑀼𑀢𑁄 𑀧𑀪𑀼𑀢𑀺 𑀧𑁄𑀭𑀸𑀡𑁂𑀳𑀺 𑀯𑀡𑁆𑀡𑀺𑀬𑀢𑀺.

𑀏𑀯𑀁 ¶ 𑀪𑀕𑀯𑀢𑁄 𑀯𑁂𑀲𑀸𑀮𑀺𑀁 𑀅𑀦𑀼𑀧𑁆𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀯𑁂𑀲𑀸𑀮𑀺𑀦𑀕𑀭𑀤𑁆𑀯𑀸𑀭𑁂 𑀢𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀯𑀼𑀢𑁆𑀢𑀫𑀺𑀤𑀁 𑀭𑀢𑀦𑀲𑀼𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀭𑀺𑀢𑁆𑀢𑀢𑁆𑀣𑀸𑀬 𑀪𑀸𑀲𑀫𑀸𑀦𑁄 𑀪𑀕𑀯𑀢𑁄 𑀧𑀢𑁆𑀢𑁂𑀦 𑀉𑀤𑀓𑀁 𑀆𑀤𑀸𑀬 𑀲𑀩𑁆𑀩𑀦𑀕𑀭𑀁 𑀅𑀩𑁆𑀪𑀼𑀓𑁆𑀓𑀺𑀭𑀦𑁆𑀢𑁄 𑀅𑀦𑀼𑀯𑀺𑀘𑀭𑀺. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀘 𑀣𑁂𑀭𑁂𑀦 𑀬𑁂 𑀧𑀼𑀩𑁆𑀩𑁂 𑀅𑀧𑀮𑀸𑀢𑀸 𑀲𑀗𑁆𑀓𑀸𑀭𑀓𑀽𑀝𑀪𑀺𑀢𑁆𑀢𑀺𑀧𑁆𑀧𑀤𑁂𑀲𑀸𑀤𑀺𑀦𑀺𑀲𑁆𑀲𑀺𑀢𑀸 𑀅𑀫𑀦𑀼𑀲𑁆𑀲𑀸, 𑀢𑁂 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀧𑀮𑀸𑀬𑀺𑀁𑀲𑀼, 𑀤𑁆𑀯𑀸𑀭𑀸𑀦𑀺 𑀅𑀦𑁄𑀓𑀸𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀏𑀓𑀘𑁆𑀘𑁂 𑀤𑁆𑀯𑀸𑀭𑁂𑀲𑀼 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀢𑀸. 𑀅𑀫𑀦𑀼𑀲𑁆𑀲𑁂𑀲𑀼 𑀕𑀢𑀫𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀕𑀢𑁆𑀢𑁂𑀲𑀼 𑀭𑁄𑀕𑁄 𑀯𑀽𑀧𑀲𑀦𑁆𑀢𑁄, 𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀣𑁂𑀭𑀁 𑀧𑀽𑀚𑁂𑀲𑀼𑀁. 𑀫𑀳𑀸𑀚𑀦𑁄 𑀦𑀕𑀭𑀫𑀚𑁆𑀛𑁂 𑀲𑀦𑁆𑀣𑀸𑀕𑀸𑀭𑀁 𑀲𑀩𑁆𑀩𑀕𑀦𑁆𑀥𑁂𑀳𑀺 𑀮𑀺𑀫𑁆𑀧𑀺𑀢𑁆𑀯𑀸 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀢𑁆𑀣 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀦𑁂𑀲𑀺.

𑀪𑀕𑀯𑀸 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀭𑀸𑀚𑀸𑀦𑁄 𑀫𑀦𑀼𑀲𑁆𑀲𑀸 𑀘 𑀧𑀢𑀺𑀭𑀽𑀧𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀉𑀧𑀦𑀺𑀲𑀻𑀤𑀺 𑀅𑀜𑁆𑀜𑁂 𑀘 𑀤𑁂𑀯𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀲𑀩𑁆𑀩𑀁 𑀯𑁂𑀲𑀸𑀮𑀺𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀆𑀭𑀓𑁆𑀔𑀁 𑀓𑀢𑁆𑀯𑀸 𑀯𑁂𑀲𑀸𑀮𑀺𑀦𑀕𑀭𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀢𑁆𑀣 𑀪𑀕𑀯𑀸 𑀲𑀩𑁆𑀩𑁂𑀲𑀁 𑀢𑀤𑁂𑀯 𑀭𑀢𑀦𑀲𑀼𑀢𑁆𑀢𑀁 𑀅𑀪𑀸𑀲𑀻𑀢𑀺.

𑁨𑁨𑁪. 𑀢𑀢𑁆𑀣 𑀬𑀸𑀦𑀻𑀥 𑀪𑀽𑀢𑀸𑀦𑀻𑀢𑀺 𑀧𑀞𑀫𑀕𑀸𑀣𑀸𑀬𑀁 𑀬𑀸𑀦𑀻𑀢𑀺 𑀬𑀸𑀤𑀺𑀲𑀸𑀦𑀺 𑀅𑀧𑁆𑀧𑁂𑀲𑀓𑁆𑀔𑀸𑀦𑀺 𑀯𑀸 𑀫𑀳𑁂𑀲𑀓𑁆𑀔𑀸𑀦𑀺 𑀯𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂, 𑀢𑀲𑁆𑀫𑀺𑀁 𑀔𑀡𑁂 𑀲𑀦𑁆𑀦𑀺𑀧𑀢𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀪𑀽𑀢𑀸𑀦𑀻𑀢𑀺 𑀓𑀺𑀜𑁆𑀘𑀸𑀧𑀺 𑀪𑀽𑀢𑀲𑀤𑁆𑀤𑁄 ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁬𑁯) 𑀯𑀺𑀚𑁆𑀚𑀫𑀸𑀦𑁂, ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁪𑁦𑁧) 𑀔𑀦𑁆𑀥𑀧𑀜𑁆𑀘𑀓𑁂, ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀼, 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀘𑀢𑀼𑀩𑁆𑀩𑀺𑀥𑁂 𑀧𑀣𑀯𑀻𑀥𑀸𑀢𑁆𑀯𑀸𑀤𑀺𑀭𑀽𑀧𑁂, ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁧.𑁨.𑁧𑁯𑁦) 𑀔𑀻𑀡𑀸𑀲𑀯𑁂, ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁦) 𑀲𑀩𑁆𑀩𑀲𑀢𑁆𑀢𑁂, ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁯𑁦) 𑀭𑀼𑀓𑁆𑀔𑀸𑀤𑀺𑀓𑁂, ‘‘𑀪𑀽𑀢𑀁 𑀪𑀽𑀢𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩) 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀳𑁂𑀝𑁆𑀞𑀸 𑀲𑀢𑁆𑀢𑀦𑀺𑀓𑀸𑀬𑀁 𑀉𑀧𑀸𑀤𑀸𑀬 𑀯𑀢𑁆𑀢𑀢𑀺. 𑀇𑀥 𑀧𑀦 𑀅𑀯𑀺𑀲𑁂𑀲𑀢𑁄 𑀅𑀫𑀦𑀼𑀲𑁆𑀲𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀲𑀫𑀸𑀕𑀢𑀸𑀦𑀻𑀢𑀺 ¶ ¶ 𑀲𑀦𑁆𑀦𑀺𑀧𑀢𑀺𑀢𑀸𑀦𑀺. 𑀪𑀼𑀫𑁆𑀫𑀸𑀦𑀻𑀢𑀺 𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀯𑀸𑀢𑀺 𑀯𑀺𑀓𑀧𑁆𑀧𑀦𑁂. 𑀢𑁂𑀦 𑀬𑀸𑀦𑀻𑀥 𑀪𑀼𑀫𑁆𑀫𑀸𑀦𑀺 𑀯𑀸 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻𑀢𑀺 𑀇𑀫𑀫𑁂𑀓𑀁 𑀯𑀺𑀓𑀧𑁆𑀧𑀁 𑀓𑀢𑁆𑀯𑀸 𑀧𑀼𑀦 𑀤𑀼𑀢𑀺𑀬𑀁 𑀯𑀺𑀓𑀧𑁆𑀧𑀁 𑀓𑀸𑀢𑀼𑀁 ‘‘𑀬𑀸𑀦𑀺 𑀯𑀸 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀆𑀳. 𑀅𑀦𑁆𑀢𑀮𑀺𑀓𑁆𑀔𑁂 𑀯𑀸 𑀬𑀸𑀦𑀺 𑀪𑀽𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀇𑀥 𑀲𑀫𑀸𑀕𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑀸𑀫𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀁, 𑀢𑀸𑀯 𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑀽𑀢𑀸𑀦𑀺 𑀆𑀓𑀸𑀲𑁂 𑀧𑀸𑀢𑀼𑀪𑀽𑀢𑀯𑀺𑀫𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀅𑀦𑁆𑀢𑀮𑀺𑀓𑁆𑀔𑁂 𑀪𑀽𑀢𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁄 𑀳𑁂𑀝𑁆𑀞𑀸 𑀲𑀺𑀦𑁂𑀭𑀼𑀢𑁄 𑀧𑀪𑀼𑀢𑀺 𑀬𑀸𑀯 𑀪𑀽𑀫𑀺𑀬𑀁 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀅𑀥𑀺𑀯𑀢𑁆𑀣𑀸𑀦𑀺 𑀧𑀣𑀯𑀺𑀬𑀜𑁆𑀘 𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑀽𑀢𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀪𑀽𑀫𑀺𑀬𑀁 𑀪𑀽𑀫𑀺𑀧𑀝𑀺𑀩𑀤𑁆𑀥𑁂𑀲𑀼 𑀘 𑀭𑀼𑀓𑁆𑀔𑀮𑀢𑀸𑀧𑀩𑁆𑀩𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀪𑀼𑀫𑁆𑀫𑀸𑀦𑀺 𑀪𑀽𑀢𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀁 𑀪𑀕𑀯𑀸 𑀲𑀩𑁆𑀩𑀸𑀦𑁂𑀯 𑀅𑀫𑀦𑀼𑀲𑁆𑀲𑀪𑀽𑀢𑀸𑀦𑀺 ‘‘𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀼𑀦 𑀏𑀓𑁂𑀦 𑀧𑀤𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑁂𑀯 𑀪𑀽𑀢𑀸 𑀲𑀼𑀫𑀦𑀸 𑀪𑀯𑀦𑁆𑀢𑀽’’𑀢𑀺 𑀆𑀳. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀸. 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂, 𑀏𑀓𑀫𑁆𑀧𑀺 𑀅𑀦𑀧𑀦𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀽𑀢𑀸𑀢𑀺 𑀅𑀫𑀦𑀼𑀲𑁆𑀲𑀸. 𑀲𑀼𑀫𑀦𑀸 𑀪𑀯𑀦𑁆𑀢𑀽𑀢𑀺 𑀲𑀼𑀔𑀺𑀢𑀫𑀦𑀸, 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀯𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀅𑀣𑁄𑀧𑀻𑀢𑀺 𑀓𑀺𑀘𑁆𑀘𑀦𑁆𑀢𑀭𑀲𑀦𑁆𑀦𑀺𑀬𑁄𑀚𑀦𑀢𑁆𑀣𑀁 𑀯𑀸𑀓𑁆𑀬𑁄𑀧𑀸𑀤𑀸𑀦𑁂 𑀦𑀺𑀧𑀸𑀢𑀤𑁆𑀯𑀬𑀁. 𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀼 𑀪𑀸𑀲𑀺𑀢𑀦𑁆𑀢𑀺 𑀅𑀝𑁆𑀞𑀺𑀁 𑀓𑀢𑁆𑀯𑀸, 𑀫𑀦𑀲𑀺 𑀓𑀢𑁆𑀯𑀸, 𑀲𑀩𑁆𑀩𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀯𑀳𑀁 𑀫𑀫 𑀤𑁂𑀲𑀦𑀁 𑀲𑀼𑀡𑀦𑁆𑀢𑀼.

𑀏𑀯𑀫𑁂𑀢𑁆𑀣 𑀪𑀕𑀯𑀸 ‘‘𑀬𑀸𑀦𑀻𑀥 𑀪𑀽𑀢𑀸𑀦𑀺 𑀲𑀫𑀸𑀕𑀢𑀸𑀦𑀻’’𑀢𑀺 𑀅𑀦𑀺𑀬𑀫𑀺𑀢𑀯𑀘𑀦𑁂𑀦 𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 ‘‘𑀪𑀼𑀫𑁆𑀫𑀸𑀦𑀺 𑀯𑀸 𑀬𑀸𑀦𑀺 𑀯 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀤𑁆𑀯𑀺𑀥𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀢𑀢𑁄 ‘‘𑀲𑀩𑁆𑀩𑁂𑀯 𑀪𑀽𑀢𑀸’’𑀢𑀺 𑀧𑀼𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀲𑀼𑀫𑀦𑀸 𑀪𑀯𑀦𑁆𑀢𑀽’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀆𑀲𑀬𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀼 𑀪𑀸𑀲𑀺𑀢’’𑀦𑁆𑀢𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀁, 𑀢𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀢𑁆𑀢𑀺𑀬𑀁 𑀧𑀭𑀢𑁄𑀖𑁄𑀲𑀲𑀫𑁆𑀧𑀢𑁆𑀢𑀺𑀬𑀜𑁆𑀘, 𑀢𑀣𑀸 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀻𑀲𑀼 𑀲𑀫𑀸𑀥𑀺𑀧𑀜𑁆𑀜𑀸𑀳𑁂𑀢𑀼𑀲𑀫𑁆𑀧𑀢𑁆𑀢𑀻𑀲𑀼 𑀘 𑀦𑀺𑀬𑁄𑀚𑁂𑀦𑁆𑀢𑁄 𑀕𑀸𑀣𑀁 𑀲𑀫𑀸𑀧𑁂𑀲𑀺.

𑁨𑁨𑁫. 𑀢𑀲𑁆𑀫𑀸 𑀳𑀺 𑀪𑀽𑀢𑀸𑀢𑀺 𑀤𑀼𑀢𑀺𑀬𑀕𑀸𑀣𑀸. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀪𑀽𑀢𑀸𑀢𑀺 𑀆𑀫𑀦𑁆𑀢𑀦𑀯𑀘𑀦𑀁. 𑀦𑀺𑀲𑀸𑀫𑁂𑀣𑀸𑀢𑀺 𑀲𑀼𑀡𑀸𑀣. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀸 ¶ . 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀤𑀺𑀩𑁆𑀩𑀝𑁆𑀞𑀸𑀦𑀸𑀦𑀺 𑀢𑀢𑁆𑀣 𑀉𑀧𑀪𑁄𑀕𑀲𑀫𑁆𑀧𑀤𑀜𑁆𑀘 𑀧𑀳𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀇𑀥 𑀲𑀫𑀸𑀕𑀢𑀸, 𑀦 𑀦𑀝𑀦𑀘𑁆𑀘𑀦𑀸𑀤𑀺𑀤𑀲𑁆𑀲𑀦𑀢𑁆𑀣𑀁, 𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂𑀢𑀺. 𑀅𑀣 𑀯𑀸 ‘‘𑀲𑀼𑀫𑀦𑀸 𑀪𑀯𑀦𑁆𑀢𑀼 𑀲𑀓𑁆𑀓𑀘𑁆𑀘 𑀲𑀼𑀡𑀦𑁆𑀢𑀽’’𑀢𑀺 𑀯𑀘𑀦𑁂𑀦 𑀢𑁂𑀲𑀁 𑀲𑀼𑀫𑀦𑀪𑀸𑀯𑀁 𑀲𑀓𑁆𑀓𑀘𑁆𑀘𑀁 𑀲𑁄𑀢𑀼𑀓𑀫𑁆𑀬𑀢𑀜𑁆𑀘 𑀤𑀺𑀲𑁆𑀯𑀸 𑀆𑀳 𑁋 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀲𑀼𑀫𑀦𑀪𑀸𑀯𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀲𑀬𑀲𑀼𑀤𑁆𑀥𑀻𑀳𑀺 𑀲𑀓𑁆𑀓𑀘𑁆𑀘𑀁 𑀲𑁄𑀢𑀼𑀓𑀫𑁆𑀬𑀢𑀸𑀬 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀧𑀭𑀢𑁄𑀖𑁄𑀲𑀧𑀤𑀝𑁆𑀞𑀸𑀦𑀢𑁄 𑀧𑀬𑁄𑀕𑀲𑀼𑀤𑁆𑀥𑀻𑀳𑀺 𑀘 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂𑀢𑀺. 𑀅𑀣 𑀯𑀸 𑀬𑀁 𑀧𑀼𑀭𑀺𑀫𑀕𑀸𑀣𑀸𑀬 𑀅𑀦𑁆𑀢𑁂 ‘‘𑀪𑀸𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀸𑀭𑀡𑀪𑀸𑀯𑁂𑀦 𑀅𑀧𑀤𑀺𑀲𑀦𑁆𑀢𑁄 𑀆𑀳 𑁋 ‘‘𑀬𑀲𑁆𑀫𑀸 𑀫𑀫 𑀪𑀸𑀲𑀺𑀢𑀁 𑀦𑀸𑀫 𑀅𑀢𑀺𑀤𑀼𑀮𑁆𑀮𑀪𑀁 𑀅𑀝𑁆𑀞𑀓𑁆𑀔𑀡𑀧𑀭𑀺𑀯𑀚𑁆𑀚𑀺𑀢𑀲𑁆𑀲 𑀔𑀡𑀲𑁆𑀲 ¶ 𑀤𑀼𑀮𑁆𑀮𑀪𑀢𑁆𑀢𑀸, 𑀅𑀦𑁂𑀓𑀸𑀦𑀺𑀲𑀁𑀲𑀜𑁆𑀘 𑀧𑀜𑁆𑀜𑀸𑀓𑀭𑀼𑀡𑀸𑀕𑀼𑀡𑁂𑀦 𑀧𑀯𑀢𑁆𑀢𑀢𑁆𑀢𑀸, 𑀢𑀜𑁆𑀘𑀸𑀳𑀁 𑀯𑀢𑁆𑀢𑀼𑀓𑀸𑀫𑁄 ‘𑀲𑀼𑀡𑀦𑁆𑀢𑀼 𑀪𑀸𑀲𑀺𑀢’𑀦𑁆𑀢𑀺 𑀅𑀯𑁄𑀘𑀁. 𑀢𑀲𑁆𑀫𑀸 𑀳𑀺 𑀪𑀽𑀢𑀸 𑀦𑀺𑀲𑀸𑀫𑁂𑀣 𑀲𑀩𑁆𑀩𑁂’’𑀢𑀺 𑀇𑀤𑀁 𑀇𑀫𑀺𑀦𑀸 𑀕𑀸𑀣𑀸𑀧𑀤𑁂𑀦 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑁂𑀢𑀁 𑀓𑀸𑀭𑀡𑀁 𑀦𑀺𑀭𑁄𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀲𑀺𑀢𑀦𑀺𑀲𑀸𑀫𑀦𑁂 𑀦𑀺𑀬𑁄𑀚𑁂𑀢𑁆𑀯𑀸 𑀦𑀺𑀲𑀸𑀫𑁂𑀢𑀩𑁆𑀩𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀸𑀬𑀁 𑀢𑀻𑀳𑀺 𑀉𑀧𑀤𑁆𑀤𑀯𑁂𑀳𑀺 𑀉𑀧𑀤𑁆𑀤𑀼𑀢𑀸 𑀫𑀸𑀦𑀼𑀲𑀻 𑀧𑀚𑀸, 𑀢𑀲𑁆𑀲𑀸 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬 𑀫𑀺𑀢𑁆𑀢𑀪𑀸𑀯𑀁 𑀳𑀺𑀢𑀚𑁆𑀛𑀸𑀲𑀬𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀣𑀸𑀢𑀺. 𑀓𑁂𑀘𑀺 𑀧𑀦 ‘‘𑀫𑀸𑀦𑀼𑀲𑀺𑀬𑀁 𑀧𑀚’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑀁 𑀪𑀼𑀫𑁆𑀫𑀢𑁆𑀣𑀸𑀲𑀫𑁆𑀪𑀯𑀸 𑀦 𑀬𑀼𑀚𑁆𑀚𑀢𑀺. 𑀬𑀫𑁆𑀧𑀺 𑀘𑀜𑁆𑀜𑁂 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺, 𑀲𑁄𑀧𑀺 𑀦 𑀬𑀼𑀚𑁆𑀚𑀢𑀺. 𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑁋 𑀦𑀸𑀳𑀁 𑀩𑀼𑀤𑁆𑀥𑁄𑀢𑀺 𑀇𑀲𑁆𑀲𑀭𑀺𑀬𑀩𑀮𑁂𑀦 𑀯𑀤𑀸𑀫𑀺, 𑀅𑀧𑀺𑀘 𑀧𑀦 𑀢𑀼𑀫𑁆𑀳𑀸𑀓𑀜𑁆𑀘 𑀇𑀫𑀺𑀲𑁆𑀲𑀸 𑀘 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬 𑀳𑀺𑀢𑀢𑁆𑀣𑀁 𑀯𑀤𑀸𑀫𑀺 𑁋 ‘‘𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬𑀸’’𑀢𑀺. 𑀏𑀢𑁆𑀣 𑀘 𑁋

‘‘𑀬𑁂 𑀲𑀢𑁆𑀢𑀲𑀡𑁆𑀟𑀁 𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀭𑀸𑀚𑀺𑀲𑀬𑁄 𑀬𑀚𑀫𑀸𑀦𑀸 𑀅𑀦𑀼𑀧𑀭𑀺𑀬𑀕𑀸;

𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀁, 𑀲𑀫𑁆𑀫𑀸𑀧𑀸𑀲𑀁 𑀯𑀸𑀚𑀧𑁂𑀬𑁆𑀬𑀁 𑀦𑀺𑀭𑀕𑁆𑀕𑀴𑀁.

‘‘𑀫𑁂𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀼𑀪𑀸𑀯𑀺𑀢𑀲𑁆𑀲, 𑀓𑀮𑀫𑁆𑀧𑀺 𑀢𑁂 𑀦𑀸𑀦𑀼𑀪𑀯𑀦𑁆𑀢𑀺 𑀲𑁄𑀴𑀲𑀺𑀁.

‘‘𑀏𑀓𑀫𑁆𑀧𑀺 ¶ 𑀘𑁂 𑀧𑀸𑀡𑀫𑀤𑀼𑀝𑁆𑀞𑀘𑀺𑀢𑁆𑀢𑁄, 𑀫𑁂𑀢𑁆𑀢𑀸𑀬𑀢𑀺 𑀓𑀼𑀲𑀮𑀻 𑀢𑁂𑀦 𑀳𑁄𑀢𑀺;

𑀲𑀩𑁆𑀩𑁂 𑀘 𑀧𑀸𑀡𑁂 𑀫𑀦𑀲𑀸𑀦𑀼𑀓𑀫𑁆𑀧𑀻, 𑀧𑀳𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺. (𑀅. 𑀦𑀺. 𑁮.𑁧) 𑁋

𑀏𑀯𑀫𑀸𑀤𑀻𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑀸𑀤𑀲𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀲𑁂𑀦 𑀬𑁂 𑀫𑁂𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀫𑁂𑀢𑁆𑀢𑀸 𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁨.𑁧𑁫𑁩; 𑀉𑀤𑀸. 𑁭𑁬; 𑀫𑀳𑀸𑀯. 𑁨𑁮𑁬) 𑁋

𑀏𑀯𑀫𑀸𑀤𑀻𑀦𑀁 𑀯𑀲𑁂𑀦 𑀬𑁂𑀲𑀼 𑀓𑀭𑀻𑀬𑀢𑀺, 𑀢𑁂𑀲𑀫𑁆𑀧𑀺 𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀉𑀪𑀬𑁂𑀲𑀫𑁆𑀧𑀺 𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑁂𑀢𑁆𑀢𑀁 𑀓𑀭𑁄𑀣 𑀫𑀸𑀦𑀼𑀲𑀺𑀬𑀸 𑀧𑀚𑀸𑀬𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀉𑀧𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀳𑀭𑀦𑁆𑀢𑀺 𑀬𑁂 𑀩𑀮𑀺𑀁, 𑀢𑀲𑁆𑀫𑀸 𑀳𑀺 𑀦𑁂 𑀭𑀓𑁆𑀔𑀣 𑀅𑀧𑁆𑀧𑀫𑀢𑁆𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀫𑀦𑀼𑀲𑁆𑀲𑀸 𑀘𑀺𑀢𑁆𑀢𑀓𑀫𑁆𑀫𑀓𑀝𑁆𑀞𑀓𑀫𑁆𑀫𑀸𑀤𑀻𑀳𑀺𑀧𑀺 𑀤𑁂𑀯𑀢𑀸 𑀓𑀢𑁆𑀯𑀸 𑀘𑁂𑀢𑀺𑀬𑀭𑀼𑀓𑁆𑀔𑀸𑀤𑀻𑀦𑀺 ¶ 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁂𑀯𑀢𑀸 𑀉𑀤𑁆𑀤𑀺𑀲𑁆𑀲 𑀤𑀺𑀯𑀸 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀓𑀸𑀴𑀧𑀓𑁆𑀔𑀸𑀤𑀻𑀲𑀼 𑀘 𑀭𑀢𑁆𑀢𑀺𑀁 𑀩𑀮𑀺𑀁 𑀓𑀭𑁄𑀦𑁆𑀢𑀺. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀤𑀢𑁆𑀯𑀸 𑀆𑀭𑀓𑁆𑀔𑀤𑁂𑀯𑀢𑀸 𑀉𑀧𑀸𑀤𑀸𑀬 𑀬𑀸𑀯 𑀩𑁆𑀭𑀳𑁆𑀫𑀤𑁂𑀯𑀢𑀸𑀦𑀁 𑀧𑀢𑁆𑀢𑀺𑀤𑀸𑀦𑀦𑀺𑀬𑁆𑀬𑀸𑀢𑀦𑁂𑀦 𑀤𑀺𑀯𑀸 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀙𑀢𑁆𑀢𑀸𑀭𑁄𑀧𑀦𑀤𑀻𑀧𑀫𑀸𑀮𑀸 𑀲𑀩𑁆𑀩𑀭𑀢𑁆𑀢𑀺𑀓𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀧𑀢𑁆𑀢𑀺𑀤𑀸𑀦𑀦𑀺𑀬𑁆𑀬𑀸𑀢𑀦𑁂𑀦 𑀘 𑀭𑀢𑁆𑀢𑀺𑀁 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀢𑁂 𑀓𑀣𑀁 𑀦 𑀭𑀓𑁆𑀔𑀺𑀢𑀩𑁆𑀩𑀸. 𑀬𑀢𑁄 𑀏𑀯𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀭𑁄𑀦𑁆𑀢𑀺 𑀬𑁂 𑀩𑀮𑀺𑀁, 𑀢𑀲𑁆𑀫𑀸 𑀳𑀺 𑀦𑁂 𑀭𑀓𑁆𑀔𑀣. 𑀢𑀲𑁆𑀫𑀸 𑀩𑀮𑀺𑀓𑀫𑁆𑀫𑀓𑀸𑀭𑀡𑀸𑀧𑀺 𑀢𑁂 𑀫𑀦𑀼𑀲𑁆𑀲𑁂 𑀭𑀓𑁆𑀔𑀣 𑀕𑁄𑀧𑀬𑀣, 𑀅𑀳𑀺𑀢𑀁 𑀢𑁂𑀲𑀁 𑀅𑀧𑀦𑁂𑀣, 𑀳𑀺𑀢𑀁 𑀉𑀧𑀦𑁂𑀣 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀢𑀁 𑀓𑀢𑀜𑁆𑀜𑀼𑀪𑀸𑀯𑀁 𑀳𑀤𑀬𑁂 𑀓𑀢𑁆𑀯𑀸 𑀦𑀺𑀘𑁆𑀘𑀫𑀦𑀼𑀲𑁆𑀲𑀭𑀦𑁆𑀢𑀸𑀢𑀺.

𑁨𑁨𑁬. 𑀏𑀯𑀁 𑀤𑁂𑀯𑀢𑀸𑀲𑀼 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀉𑀧𑀤𑁆𑀤𑀯𑀯𑀽𑀧𑀲𑀫𑀦𑀢𑁆𑀣𑀁 𑀩𑀼𑀤𑁆𑀥𑀸𑀤𑀺𑀕𑀼𑀡𑀧𑁆𑀧𑀓𑀸𑀲𑀦𑁂𑀦 𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 ‘‘𑀬𑀁𑀓𑀺𑀜𑁆𑀘𑀺 𑀯𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀘𑁆𑀘𑀯𑀘𑀦𑀁 𑀧𑀬𑀼𑀚𑁆𑀚𑀺𑀢𑀼𑀫𑀸𑀭𑀤𑁆𑀥𑁄. 𑀢𑀢𑁆𑀣 𑀬𑀁𑀓𑀺𑀜𑁆𑀘𑀻𑀢𑀺 𑀅𑀦𑀺𑀬𑀫𑀺𑀢𑀯𑀲𑁂𑀦 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀢𑀺 𑀬𑀁𑀓𑀺𑀜𑁆𑀘𑀺 𑀢𑀢𑁆𑀣 𑀢𑀢𑁆𑀣 𑀯𑁄𑀳𑀸𑀭𑀽𑀧𑀕𑀁 ¶ . 𑀯𑀺𑀢𑁆𑀢𑀦𑁆𑀢𑀺 𑀥𑀦𑀁. 𑀢𑀜𑁆𑀳𑀺 𑀯𑀺𑀢𑁆𑀢𑀺𑀁 𑀚𑀦𑁂𑀢𑀻𑀢𑀺 𑀯𑀺𑀢𑁆𑀢𑀁. 𑀇𑀥 𑀯𑀸𑀢𑀺 𑀫𑀦𑀼𑀲𑁆𑀲𑀮𑁄𑀓𑀁 𑀦𑀺𑀤𑁆𑀤𑀺𑀲𑀢𑀺, 𑀳𑀼𑀭𑀁 𑀯𑀸𑀢𑀺 𑀢𑀢𑁄 𑀧𑀭𑀁 𑀅𑀯𑀲𑁂𑀲𑀮𑁄𑀓𑀁. 𑀢𑁂𑀦 𑀘 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀲𑀩𑁆𑀩𑀮𑁄𑀓𑀕𑁆𑀕𑀳𑀡𑁂 𑀧𑀢𑁆𑀢𑁂 ‘‘𑀲𑀕𑁆𑀕𑁂𑀲𑀼 𑀯𑀸’’𑀢𑀺 𑀧𑀭𑀢𑁄 𑀯𑀼𑀢𑁆𑀢𑀢𑁆𑀢𑀸 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀘 𑀲𑀕𑁆𑀕𑁂 𑀘 𑀅𑀯𑀲𑁂𑀲𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀯𑁄𑀳𑀸𑀭𑀽𑀧𑀕𑀁 𑀅𑀮𑀗𑁆𑀓𑀸𑀭𑀧𑀭𑀺𑀪𑁄𑀕𑀽𑀧𑀕𑀜𑁆𑀘 𑀚𑀸𑀢𑀭𑀽𑀧𑀭𑀚𑀢𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀧𑀯𑀸𑀴𑀮𑁄𑀳𑀺𑀢𑀗𑁆𑀓𑀫𑀲𑀸𑀭𑀕𑀮𑁆𑀮𑀸𑀤𑀺𑀓𑀁, 𑀬𑀜𑁆𑀘 𑀫𑀼𑀢𑁆𑀢𑀸𑀫𑀡𑀺𑀯𑀸𑀮𑀼𑀓𑀢𑁆𑀣𑀢𑀸𑀬 𑀪𑀽𑀫𑀺𑀬𑀸 𑀭𑀢𑀦𑀫𑀬𑀯𑀺𑀫𑀸𑀦𑁂𑀲𑀼 𑀅𑀦𑁂𑀓𑀬𑁄𑀚𑀦𑀲𑀢𑀯𑀺𑀢𑁆𑀣𑀢𑁂𑀲𑀼 𑀪𑀯𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀯𑀺𑀢𑁆𑀢𑀁, 𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺.

𑀲𑀕𑁆𑀕𑁂𑀲𑀼 𑀯𑀸𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀤𑁂𑀯𑀮𑁄𑀓𑁂𑀲𑀼. 𑀢𑁂 𑀳𑀺 𑀲𑁄𑀪𑀦𑁂𑀦 𑀓𑀫𑁆𑀫𑁂𑀦 𑀅𑀚𑀻𑀬𑀦𑁆𑀢𑀺 𑀕𑀫𑁆𑀫𑀦𑁆𑀢𑀻𑀢𑀺 𑀲𑀕𑁆𑀕𑀸, 𑀲𑀼𑀝𑁆𑀞𑀼 𑀯𑀸 𑀅𑀕𑁆𑀕𑀸𑀢𑀺𑀧𑀺 𑀲𑀕𑁆𑀕𑀸. 𑀬𑀦𑁆𑀢𑀺 𑀬𑀁 𑀲𑀲𑁆𑀲𑀸𑀫𑀺𑀓𑀁 𑀯𑀸 𑀅𑀲𑁆𑀲𑀸𑀫𑀺𑀓𑀁 𑀯𑀸. 𑀭𑀢𑀦𑀦𑁆𑀢𑀺 𑀭𑀢𑀺𑀁 𑀦𑀬𑀢𑀺, 𑀯𑀳𑀢𑀺, 𑀚𑀦𑀬𑀢𑀺, 𑀯𑀟𑁆𑀠𑁂𑀢𑀻𑀢𑀺 𑀭𑀢𑀦𑀁, 𑀬𑀁𑀓𑀺𑀜𑁆𑀘𑀺 𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀁 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀜𑁆𑀘, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀧𑀡𑀻𑀢𑀦𑁆𑀢𑀺 𑀉𑀢𑁆𑀢𑀫𑀁, 𑀲𑁂𑀝𑁆𑀞𑀁, 𑀅𑀢𑀧𑁆𑀧𑀓𑀁. 𑀏𑀯𑀁 𑀇𑀫𑀺𑀦𑀸 𑀕𑀸𑀣𑀸𑀧𑀤𑁂𑀦 𑀬𑀁 𑀲𑀕𑁆𑀕𑁂𑀲𑀼 𑀅𑀦𑁂𑀓𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀲𑀩𑁆𑀩𑀭𑀢𑀦𑀫𑀬𑀯𑀺𑀫𑀸𑀦𑁂𑀲𑀼 𑀲𑀼𑀥𑀫𑁆𑀫𑀯𑁂𑀚𑀬𑀦𑁆𑀢𑀧𑁆𑀧𑀪𑀼𑀢𑀻𑀲𑀼 𑀲𑀲𑁆𑀲𑀸𑀫𑀺𑀓𑀁, 𑀬𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑀯𑀺𑀭𑀳𑁂𑀦 𑀅𑀧𑀸𑀬𑀫𑁂𑀯 𑀧𑀭𑀺𑀧𑀽𑀭𑁂𑀦𑁆𑀢𑁂𑀲𑀼 𑀲𑀢𑁆𑀢𑁂𑀲𑀼 𑀲𑀼𑀜𑁆𑀜𑀯𑀺𑀫𑀸𑀦𑀧𑀝𑀺𑀩𑀤𑁆𑀥𑀁 𑀅𑀲𑁆𑀲𑀸𑀫𑀺𑀓𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀧𑀣𑀯𑀻𑀫𑀳𑀸𑀲𑀫𑀼𑀤𑁆𑀤𑀳𑀺𑀫𑀯𑀦𑁆𑀢𑀸𑀤𑀺𑀦𑀺𑀲𑁆𑀲𑀺𑀢𑀁 𑀅𑀲𑁆𑀲𑀸𑀫𑀺𑀓𑀁 𑀭𑀢𑀦𑀁, 𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺.

𑀦 ¶ 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦𑀸𑀢𑀺 𑀦-𑀇𑀢𑀺 𑀧𑀝𑀺𑀲𑁂𑀥𑁂, 𑀦𑁄-𑀇𑀢𑀺 𑀅𑀯𑀥𑀸𑀭𑀡𑁂. 𑀲𑀫𑀦𑁆𑀢𑀺 𑀢𑀼𑀮𑁆𑀬𑀁. 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀢𑀺. 𑀢𑀣𑀸𑀕𑀢𑁂𑀦𑀸𑀢𑀺 𑀩𑀼𑀤𑁆𑀥𑁂𑀦. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀁 𑀏𑀢𑀁 𑀯𑀺𑀢𑁆𑀢𑀜𑁆𑀘 𑀭𑀢𑀦𑀜𑁆𑀘 𑀧𑀓𑀸𑀲𑀺𑀢𑀁, 𑀏𑀢𑁆𑀣 𑀏𑀓𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀤𑀺𑀲𑀁 𑀭𑀢𑀦𑀁 𑀦𑁂𑀯𑀢𑁆𑀣𑀺. 𑀬𑀫𑁆𑀧𑀺 𑀳𑀺 𑀢𑀁 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁 𑀫𑀡𑀺𑀭𑀢𑀦𑀜𑁆𑀘, 𑀬𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀫𑀳𑀸𑀚𑀦𑁄 𑀦 𑀅𑀜𑁆𑀜𑀢𑁆𑀣 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀢𑀺, 𑀦 𑀓𑁄𑀘𑀺 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀬𑀓𑁆𑀔𑀝𑁆𑀞𑀸𑀦𑀁 𑀯𑀸 𑀪𑀽𑀢𑀝𑁆𑀞𑀸𑀦𑀁 𑀯𑀸 𑀕𑀘𑁆𑀙𑀢𑀺, 𑀲𑀩𑁆𑀩𑁄𑀧𑀺 𑀚𑀦𑁄 𑀘𑀓𑁆𑀓𑀭𑀢𑀦𑀫𑀡𑀺𑀭𑀢𑀦𑀫𑁂𑀯 𑀘𑀺𑀢𑁆𑀢𑀺𑀁 𑀓𑀭𑁄𑀢𑀺 𑀧𑀽𑀚𑁂𑀢𑀺, 𑀢𑀁 𑀢𑀁 𑀯𑀭𑀁 𑀧𑀢𑁆𑀣𑁂𑀢𑀺, 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀜𑁆𑀘𑀲𑁆𑀲 𑀏𑀓𑀘𑁆𑀘𑀁 𑀲𑀫𑀺𑀚𑁆𑀛𑀢𑀺, 𑀢𑀫𑁆𑀧𑀺 ¶ 𑀭𑀢𑀦𑀁 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁂 𑀳𑀺 𑀉𑀧𑁆𑀧𑀦𑁆𑀦𑁂 𑀬𑁂 𑀓𑁂𑀘𑀺 𑀫𑀳𑁂𑀲𑀓𑁆𑀔𑀸 𑀤𑁂𑀯𑀫𑀦𑀼𑀲𑁆𑀲𑀸, 𑀦 𑀢𑁂 𑀅𑀜𑁆𑀜𑀢𑁆𑀭 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀦 𑀓𑀜𑁆𑀘𑀺 𑀅𑀜𑁆𑀜𑀁 𑀧𑀽𑀚𑁂𑀦𑁆𑀢𑀺. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀲𑀺𑀦𑁂𑀭𑀼𑀫𑀢𑁆𑀢𑁂𑀦 𑀭𑀢𑀦𑀤𑀸𑀫𑁂𑀦 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺, 𑀬𑀣𑀸𑀩𑀮𑀜𑁆𑀘 𑀅𑀜𑁆𑀜𑁂 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄. 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀧𑀺 𑀘 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀲𑁄𑀓𑀫𑀳𑀸𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀻𑀓𑀸𑀭𑀸𑀦𑀁. 𑀅𑀧𑀺𑀘 𑀓𑀲𑁆𑀲𑀜𑁆𑀜𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀚𑀸𑀢𑀺𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀸𑀦𑀺 𑀧𑀝𑀺𑀫𑀸𑀘𑁂𑀢𑀺𑀬𑀸𑀤𑀻𑀦𑀺 𑀯𑀸 𑀉𑀤𑁆𑀤𑀺𑀲𑁆𑀲 𑀏𑀯𑀁 𑀘𑀺𑀢𑁆𑀢𑀻𑀓𑀸𑀭𑀕𑀭𑀼𑀓𑀸𑀭𑁄 𑀯𑀢𑁆𑀢𑀢𑀺 𑀬𑀣𑀸 𑀪𑀕𑀯𑀢𑁄. 𑀏𑀯𑀁 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀫𑀳𑀕𑁆𑀖𑀝𑁆𑀞𑁂𑀦 𑀭𑀢𑀦𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀲𑀺𑀓𑀁 𑀯𑀢𑁆𑀣𑀁. 𑀬𑀣𑀸𑀳 𑁋 ‘‘𑀚𑀺𑀡𑁆𑀡𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀯𑀡𑁆𑀡𑀯𑀦𑁆𑀢𑀜𑁆𑀘𑁂𑀯 𑀳𑁄𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀜𑁆𑀘 𑀫𑀳𑀕𑁆𑀖𑀜𑁆𑀘𑀸’’𑀢𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀫𑀳𑀕𑁆𑀖𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁄 𑀳𑀺 𑀬𑁂𑀲𑀁 𑀧𑀁𑀲𑀼𑀓𑀫𑁆𑀧𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁, 𑀲𑁂𑀬𑁆𑀬𑀣𑀸𑀧𑀺 𑀅𑀲𑁄𑀓𑀲𑁆𑀲 𑀭𑀜𑁆𑀜𑁄. 𑀇𑀤𑀫𑀲𑁆𑀲 𑀫𑀳𑀕𑁆𑀖𑀢𑀸𑀬. 𑀏𑀯𑀁 𑀫𑀳𑀕𑁆𑀖𑀢𑀸𑀯𑀘𑀦𑁂 𑀘𑁂𑀢𑁆𑀣 𑀤𑁄𑀲𑀸𑀪𑀸𑀯𑀲𑀸𑀥𑀓𑀁 𑀇𑀤𑀁 𑀢𑀸𑀯 𑀲𑀼𑀢𑁆𑀢𑀧𑀤𑀁 𑀯𑁂𑀤𑀺𑀢𑀩𑁆𑀩𑀁 𑁋

‘‘𑀬𑁂𑀲𑀁 𑀔𑁄 𑀧𑀦 𑀲𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀇𑀤𑀫𑀲𑁆𑀲 𑀫𑀳𑀕𑁆𑀖𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀳𑀕𑁆𑀖𑀁, 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁩.𑁧𑁦𑁦).

𑀏𑀯𑀁 𑀫𑀳𑀕𑁆𑀖𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀦𑀸𑀪𑀺 𑀲𑀢𑁆𑀢𑀭𑀢𑀦𑀫𑀬𑀲𑀳𑀲𑁆𑀲𑀸𑀭𑀁 𑀧𑀯𑀸𑀴𑀫𑀬𑀦𑁂𑀫𑀺, 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀲𑀦𑁆𑀥𑀺, 𑀬𑀲𑁆𑀲 ¶ 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀁 𑀉𑀧𑀭𑀺 𑀏𑀓𑀁 𑀫𑀼𑀡𑁆𑀟𑀸𑀭𑀁 𑀳𑁄𑀢𑀺 ¶ 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀲𑀤𑁆𑀤𑀓𑀭𑀡𑀢𑁆𑀣𑀁, 𑀬𑁂𑀦 𑀓𑀢𑁄 𑀲𑀤𑁆𑀤𑁄 𑀲𑀼𑀓𑀼𑀲𑀮𑀧𑁆𑀧𑀢𑀸𑀴𑀺𑀢𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀤𑁆𑀤𑁄 𑀯𑀺𑀬 𑀳𑁄𑀢𑀺. 𑀬𑀲𑁆𑀲 𑀦𑀸𑀪𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀲𑀻𑀳𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀅𑀩𑁆𑀪𑀦𑁆𑀢𑀭𑀁 𑀲𑀓𑀝𑀘𑀓𑁆𑀓𑀲𑁆𑀲𑁂𑀯 𑀲𑀼𑀲𑀺𑀭𑀁, 𑀢𑀲𑁆𑀲 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦𑀢𑁆𑀣𑀺, 𑀓𑀫𑁆𑀫𑀧𑀘𑁆𑀘𑀬𑁂𑀦 𑀉𑀢𑀼𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀬𑀁 𑀭𑀸𑀚𑀸 𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀻𑀲𑀁𑀦𑁆𑀳𑀸𑀢𑁄 𑀉𑀧𑁄𑀲𑀣𑀺𑀓𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀲𑀻𑀮𑀸𑀦𑀺 𑀲𑁄𑀥𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀲𑀽𑀭𑀺𑀬𑀁 𑀯𑀺𑀬 𑀘 𑀉𑀝𑁆𑀞𑁂𑀦𑁆𑀢𑀁 𑀧𑀲𑁆𑀲𑀢𑀺, 𑀬𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀢𑁄 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀬𑁄𑀚𑀦𑀢𑁄 𑀯𑀡𑁆𑀡𑁄 𑀤𑀺𑀲𑁆𑀲𑀢𑀺, 𑀬𑀁 𑀫𑀳𑀸𑀚𑀦𑁂𑀦 ‘‘𑀤𑀼𑀢𑀺𑀬𑁄 𑀫𑀜𑁆𑀜𑁂 𑀘𑀦𑁆𑀤𑁄 𑀲𑀽𑀭𑀺𑀬𑁄 𑀯𑀸 𑀉𑀝𑁆𑀞𑀺𑀢𑁄’’𑀢𑀺 𑀅𑀢𑀺𑀯𑀺𑀬 𑀓𑁄𑀢𑀽𑀳𑀮𑀚𑀸𑀢𑁂𑀦 𑀤𑀺𑀲𑁆𑀲𑀫𑀸𑀦𑀁 𑀦𑀕𑀭𑀲𑁆𑀲 𑀉𑀧𑀭𑀺 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀲𑁆𑀲 𑀧𑀸𑀘𑀻𑀦𑀧𑀲𑁆𑀲𑁂 𑀦𑀸𑀢𑀺𑀉𑀘𑁆𑀘𑀁 𑀦𑀸𑀢𑀺𑀦𑀻𑀘𑀁 𑀳𑀼𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺.

𑀢𑀤𑁂𑀯 𑀅𑀦𑀼𑀩𑀦𑁆𑀥𑀫𑀸𑀦𑀁 𑀳𑀢𑁆𑀣𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀲𑁂𑀢𑁄 𑀭𑀢𑁆𑀢𑀧𑀸𑀤𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀉𑀧𑁄𑀲𑀣𑀓𑀼𑀮𑀸 𑀯𑀸 𑀙𑀤𑁆𑀤𑀦𑁆𑀢𑀓𑀼𑀮𑀸 𑀯𑀸 𑀆𑀕𑀘𑁆𑀙𑀢𑀺. 𑀉𑀧𑁄𑀲𑀣𑀓𑀼𑀮𑀸 𑀆𑀕𑀘𑁆𑀙𑀦𑁆𑀢𑁄 𑀳𑀺 𑀲𑀩𑁆𑀩𑀚𑁂𑀝𑁆𑀞𑁄 𑀆𑀕𑀘𑁆𑀙𑀢𑀺, 𑀙𑀤𑁆𑀤𑀦𑁆𑀢𑀓𑀼𑀮𑀸 𑀲𑀩𑁆𑀩𑀓𑀦𑀺𑀝𑁆𑀞𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄 𑀤𑀫𑀣𑀽𑀧𑁂𑀢𑁄. 𑀲𑁄 𑀤𑁆𑀯𑀸𑀤𑀲𑀬𑁄𑀚𑀦𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀧𑀼𑀭𑁂𑀧𑀸𑀢𑀭𑀸𑀲𑀫𑁂𑀯 𑀲𑀓𑀁 𑀭𑀸𑀚𑀥𑀸𑀦𑀺𑀁 𑀆𑀕𑀘𑁆𑀙𑀢𑀺.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀅𑀲𑁆𑀲𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀲𑁂𑀢𑁄 𑀭𑀢𑁆𑀢𑀧𑀸𑀤𑁄 𑀓𑀸𑀓𑀲𑀻𑀲𑁄 𑀫𑀼𑀜𑁆𑀚𑀓𑁂𑀲𑁄 𑀯𑀮𑀸𑀳𑀓𑀲𑁆𑀲 𑀭𑀸𑀚𑀓𑀼𑀮𑀸 𑀆𑀕𑀘𑁆𑀙𑀢𑀺. 𑀲𑁂𑀲𑀫𑁂𑀢𑁆𑀣 𑀳𑀢𑁆𑀣𑀺𑀭𑀢𑀦𑀲𑀤𑀺𑀲𑀫𑁂𑀯.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀫𑀡𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀳𑁄𑀢𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀆𑀬𑀸𑀫𑀢𑁄 𑀘𑀓𑁆𑀓𑀦𑀸𑀪𑀺𑀲𑀤𑀺𑀲𑁄, 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀸 𑀆𑀕𑀘𑁆𑀙𑀢𑀺, 𑀲𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀧𑀺 𑀅𑀦𑁆𑀥𑀓𑀸𑀭𑁂 𑀭𑀜𑁆𑀜𑁄 𑀥𑀚𑀕𑁆𑀕𑀢𑁄 𑀬𑁄𑀚𑀦𑀁 𑀑𑀪𑀸𑀲𑁂𑀢𑀺, 𑀬𑀲𑁆𑀲𑁄𑀪𑀸𑀲𑁂𑀦 𑀫𑀦𑀼𑀲𑁆𑀲𑀸 ‘‘𑀤𑀺𑀯𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀧𑀲𑁆𑀲𑀦𑁆𑀢𑀺.

𑀢𑀫𑁆𑀧𑀺 ¶ 𑀅𑀦𑀼𑀩𑀦𑁆𑀥𑀫𑀸𑀦𑀁 𑀇𑀢𑁆𑀣𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀓𑀢𑀺𑀅𑀕𑁆𑀕𑀫𑀳𑁂𑀲𑀻 𑀯𑀸 𑀳𑁄𑀢𑀺, 𑀉𑀢𑁆𑀢𑀭𑀓𑀼𑀭𑀼𑀢𑁄 𑀯𑀸 𑀆𑀕𑀘𑁆𑀙𑀢𑀺 𑀫𑀤𑁆𑀤𑀭𑀸𑀚𑀓𑀼𑀮𑀢𑁄 𑀯𑀸, 𑀅𑀢𑀺𑀤𑀻𑀖𑀸𑀤𑀺𑀙𑀤𑁄𑀲𑀯𑀺𑀯𑀚𑁆𑀚𑀺𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀁 𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀁 𑀯𑀡𑁆𑀡𑀁, 𑀬𑀲𑁆𑀲𑀸 𑀭𑀜𑁆𑀜𑁄 𑀲𑀻𑀢𑀓𑀸𑀮𑁂 𑀉𑀡𑁆𑀳𑀸𑀦𑀺 𑀕𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀡𑁆𑀳𑀓𑀸𑀮𑁂 𑀲𑀻𑀢𑀸𑀦𑀺, 𑀲𑀢𑀥𑀸 𑀨𑁄𑀝𑀺𑀢𑀢𑀽𑀮𑀧𑀺𑀘𑀼𑀦𑁄 𑀯𑀺𑀬 𑀲𑀫𑁆𑀨𑀲𑁆𑀲𑁄 𑀳𑁄𑀢𑀺, 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄, 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀢𑀸𑀤𑀺𑀅𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑀸 𑀘 𑀳𑁄𑀢𑀺.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀕𑀳𑀧𑀢𑀺𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺 𑀭𑀜𑁆𑀜𑁄 𑀧𑀓𑀢𑀺𑀓𑀫𑁆𑀫𑀓𑀭𑁄 𑀲𑁂𑀝𑁆𑀞𑀺, 𑀬𑀲𑁆𑀲 𑀘𑀓𑁆𑀓𑀭𑀢𑀦𑁂 ¶ 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀤𑀺𑀩𑁆𑀩𑀁 𑀘𑀓𑁆𑀔𑀼 𑀧𑀸𑀢𑀼𑀪𑀯𑀢𑀺, 𑀬𑁂𑀦 𑀲𑀫𑀦𑁆𑀢𑀢𑁄 𑀬𑁄𑀚𑀦𑀫𑀢𑁆𑀢𑁂 𑀦𑀺𑀥𑀺𑀁 𑀧𑀲𑁆𑀲𑀢𑀺 𑀲𑀲𑁆𑀲𑀸𑀫𑀺𑀓𑀫𑁆𑀧𑀺 𑀅𑀲𑁆𑀲𑀸𑀫𑀺𑀓𑀫𑁆𑀧𑀺. 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀁 𑀢𑁂 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀫𑀸𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺 𑀭𑀜𑁆𑀜𑁄 𑀧𑀓𑀢𑀺𑀚𑁂𑀝𑁆𑀞𑀧𑀼𑀢𑁆𑀢𑁄, 𑀘𑀓𑁆𑀓𑀭𑀢𑀦𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀅𑀢𑀺𑀭𑁂𑀓𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀧𑀭𑀺𑀚𑀸𑀦𑀺𑀢𑁆𑀯𑀸 𑀦𑀺𑀕𑁆𑀕𑀳𑀧𑀕𑁆𑀕𑀳𑀲𑀫𑀢𑁆𑀣𑁄 𑀳𑁄𑀢𑀺. 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀺 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀁 𑀢𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁, 𑀬𑀲𑁆𑀲 𑀦 𑀲𑀓𑁆𑀓𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀅𑀕𑁆𑀖𑁄 𑀓𑀸𑀢𑀼𑀁 ‘‘𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀅𑀕𑁆𑀖𑀢𑀺 𑀓𑁄𑀝𑀺𑀁 𑀯𑀸’’𑀢𑀺. 𑀢𑀢𑁆𑀣 𑀏𑀓𑀭𑀢𑀦𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁄 𑀳𑀺 𑀦 𑀲𑀓𑁆𑀓𑀸 𑀲𑀻𑀮𑀢𑁄 𑀯𑀸 𑀲𑀫𑀸𑀥𑀺𑀢𑁄 𑀯𑀸 𑀧𑀜𑁆𑀜𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀢𑁄 𑀓𑁂𑀦𑀘𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 ‘‘𑀏𑀢𑁆𑀢𑀓𑀕𑀼𑀡𑁄 𑀯𑀸 𑀇𑀫𑀺𑀦𑀸 𑀲𑀫𑁄 𑀯𑀸 𑀲𑀧𑁆𑀧𑀝𑀺𑀪𑀸𑀕𑁄 𑀯𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁. 𑀏𑀯𑀁 𑀅𑀢𑀼𑀮𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀘𑀓𑁆𑀓𑀸𑀤𑀻𑀦𑀺 𑀘 𑀢𑀲𑁆𑀲 𑀭𑀢𑀦𑀸𑀦𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁, 𑀓𑀼𑀢𑁄 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀭𑀢𑀦𑀢𑁆𑀢𑀁, 𑀬𑀸𑀦𑀺 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀅𑀦𑁂𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀓𑀧𑁆𑀧𑁂 𑀢𑀣𑀸𑀕𑀢𑀲𑀼𑀜𑁆𑀜𑁄 𑀮𑁄𑀓𑁄 ¶ 𑀳𑁄𑀢𑀺, 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀏𑀯 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀮𑁆𑀮𑀪𑀤𑀲𑁆𑀲𑀦𑁄. 𑀯𑀼𑀢𑁆𑀢𑀁 𑀘𑁂𑀢𑀁 𑀪𑀕𑀯𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑁋

‘‘𑀤𑁂𑀯𑀢𑀸, 𑀆𑀦𑀦𑁆𑀤, 𑀉𑀚𑁆𑀛𑀸𑀬𑀦𑁆𑀢𑀺 𑁋 ‘𑀤𑀽𑀭𑀸 𑀘 𑀯𑀢𑀫𑁆𑀳 𑀆𑀕𑀢𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀚𑁆𑀚𑁂𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑁂𑀲𑀓𑁆𑀔𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀺𑀢𑁄 𑀑𑀯𑀸𑀭𑁂𑀦𑁆𑀢𑁄, 𑀦 𑀫𑀬𑀁 𑀮𑀪𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸’’’𑀢𑀺 (𑀤𑀻. 𑀦𑀺. 𑁨.𑁨𑁦𑁦).

𑀏𑀯𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀢𑀣𑀸 𑀬𑀫𑁆𑀧𑀺 𑀢𑀁 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀸𑀤𑀺. 𑀢𑀜𑁆𑀳𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀥𑀦𑀸𑀦𑀫𑁆𑀧𑀺 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀯𑀭𑀢𑀮𑁂 𑀯𑀲𑀦𑁆𑀢𑀸𑀦𑀫𑁆𑀧𑀺 𑀘𑀡𑁆𑀟𑀸𑀮𑀯𑁂𑀦𑀦𑁂𑀲𑀸𑀤𑀭𑀣𑀓𑀸𑀭𑀧𑀼𑀓𑁆𑀓𑀼𑀲𑀸𑀤𑀻𑀦𑀁 𑀦𑀻𑀘𑀓𑀼𑀮𑀺𑀓𑀸𑀦𑀁 𑀑𑀫𑀓𑀧𑀼𑀭𑀺𑀲𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀧𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀦 ¶ 𑀦𑀺𑀩𑁆𑀩𑀢𑁆𑀢𑀢𑀺. 𑀉𑀪𑀢𑁄 𑀲𑀼𑀚𑀸𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲𑁂𑀯 𑀧𑀭𑀺𑀧𑀽𑀭𑀺𑀢𑀤𑀲𑀯𑀺𑀥𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀦𑀺𑀩𑁆𑀩𑀢𑁆𑀢𑀦𑀢𑁄 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁𑀬𑁂𑀯 𑀳𑁄𑀢𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀢𑀣𑀸𑀕𑀢𑁄 𑀳𑀺 𑀮𑁄𑀓𑁂 𑀅𑀦𑁄𑀫𑀲𑀢𑁆𑀢𑀲𑀫𑁆𑀫𑀢𑀸𑀦𑀫𑁆𑀧𑀺 𑀅𑀦𑀼𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀯𑀺𑀧𑀭𑀻𑀢𑀤𑀲𑁆𑀲𑀦𑀸𑀦𑀁 𑀧𑀽𑀭𑀡𑀓𑀲𑁆𑀲𑀧𑀸𑀤𑀻𑀦𑀁 𑀙𑀦𑁆𑀦𑀁 𑀲𑀢𑁆𑀣𑀸𑀭𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀏𑀯𑀭𑀽𑀧𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀧𑀺 𑀅𑀧𑀭𑀺𑀪𑁄𑀕𑁄, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀧𑀦 𑀘𑀢𑀼𑀧𑁆𑀧𑀤𑀸𑀬𑀧𑀺 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀫𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸𑀦𑀁 𑀦𑀺𑀩𑁆𑀩𑁂𑀥𑀺𑀓𑀜𑀸𑀡𑀤𑀲𑁆𑀲𑀦𑀸𑀦𑀁 𑀩𑀸𑀳𑀺𑀬𑀤𑀸𑀭𑀼𑀘𑀻𑀭𑀺𑀬𑀧𑁆𑀧𑀪𑀼𑀢𑀻𑀦𑀁 𑀅𑀜𑁆𑀜𑁂𑀲𑀜𑁆𑀘 𑀫𑀳𑀸𑀓𑀼𑀮𑀧𑁆𑀧𑀲𑀼𑀢𑀸𑀦𑀁 𑀫𑀳𑀸𑀲𑀸𑀯𑀓𑀸𑀦𑀁 𑀧𑀭𑀺𑀪𑁄𑀕𑁄. 𑀢𑁂 𑀳𑀺 𑀢𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀸𑀤𑀻𑀦𑀺 𑀲𑀸𑀥𑁂𑀦𑁆𑀢𑀸 𑀢𑀣𑀸 𑀢𑀣𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀯𑀁 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺.

𑀬𑀫𑁆𑀧𑀺 𑀢𑀁 𑀅𑀯𑀺𑀲𑁂𑀲𑀢𑁄 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁. 𑀢𑀜𑁆𑀳𑀺 𑀤𑀺𑀲𑁆𑀯𑀸 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀯𑀫𑁆𑀧𑀺 𑀢𑀁 𑀭𑀜𑁆𑀜𑁄 𑀭𑀢𑀺𑀁 𑀚𑀦𑁂𑀢𑀺. 𑀧𑀼𑀦 𑀘𑀧𑀭𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀢𑀺 ‘‘𑀧𑀯𑀢𑁆𑀢𑀢𑀼 ¶ 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺. 𑀢𑀢𑁄 𑀘𑀓𑁆𑀓𑀭𑀢𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀯𑀺𑀬 𑀢𑀽𑀭𑀺𑀬𑀁 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀭𑀦𑁆𑀢𑀁 𑀆𑀓𑀸𑀲𑁂𑀦 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀘𑀓𑁆𑀓𑀸𑀦𑀼𑀪𑀸𑀯𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀸𑀢𑀺𑀉𑀘𑁆𑀘𑀁 𑀦𑀸𑀢𑀺𑀦𑀻𑀘𑀁 𑀉𑀘𑁆𑀘𑀭𑀼𑀓𑁆𑀔𑀸𑀦𑀁 𑀳𑁂𑀝𑁆𑀞𑀸𑀪𑀸𑀕𑁂𑀦, 𑀦𑀻𑀘𑀭𑀼𑀓𑁆𑀔𑀸𑀦𑀁 𑀉𑀧𑀭𑀺𑀪𑀸𑀕𑁂𑀦, 𑀭𑀼𑀓𑁆𑀔𑁂𑀲𑀼 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀳𑀢𑁆𑀣𑀢𑁄 𑀧𑀡𑁆𑀡𑀸𑀓𑀸𑀭𑀜𑁆𑀘 𑀕𑀡𑁆𑀳𑀦𑁆𑀢𑁄 ‘‘𑀏𑀳𑀺 𑀔𑁄 𑀫𑀳𑀸𑀭𑀸𑀚𑀸’’𑀢𑀺𑀏𑀯𑀫𑀸𑀤𑀺𑀦𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁂𑀦 𑀆𑀕𑀢𑁂 𑀧𑀝𑀺𑀭𑀸𑀚𑀸𑀦𑁄 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑀸𑀲𑀦𑁆𑀢𑁄 𑀕𑀘𑁆𑀙𑀢𑀺. 𑀬𑀢𑁆𑀣 𑀧𑀦 𑀭𑀸𑀚𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀯𑀸 𑀤𑀺𑀯𑀸𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀘𑀓𑁆𑀓𑀭𑀢𑀦𑀁 𑀆𑀓𑀸𑀲𑀸 𑀑𑀢𑀭𑀺𑀢𑁆𑀯𑀸 𑀉𑀤𑀓𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑀓𑁆𑀔𑀫𑁂 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀧𑀼𑀦 𑀭𑀜𑁆𑀜𑁄 𑀕𑀫𑀦𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀤𑁆𑀤𑀁 𑀓𑀭𑁄𑀦𑁆𑀢𑀁 𑀕𑀘𑁆𑀙𑀢𑀺, 𑀬𑀁 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀧𑀺 𑀧𑀭𑀺𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺. 𑀘𑀓𑁆𑀓𑀭𑀢𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀢𑀺, 𑀢𑀲𑁆𑀫𑀺𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑁂 𑀉𑀤𑀓𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀧𑀕𑀦𑁆𑀢𑁆𑀯𑀸 𑀪𑀺𑀢𑁆𑀢𑀻𑀓𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀫𑀳𑀸𑀚𑀦𑁄 𑀬𑀣𑀸𑀓𑀸𑀫𑀁 𑀲𑀢𑁆𑀢 𑀭𑀢𑀦𑀸𑀦𑀺 𑀕𑀡𑁆𑀳𑀸𑀢𑀺. 𑀧𑀼𑀦 𑀭𑀸𑀚𑀸 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀫 𑀭𑀚𑁆𑀚’’𑀦𑁆𑀢𑀺 𑀉𑀤𑀓𑁂𑀦 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀲𑁂𑀦𑀸 𑀧𑀼𑀭𑀢𑁄 𑀳𑁄𑀢𑀺, 𑀘𑀓𑁆𑀓𑀭𑀢𑀦𑀁 𑀧𑀘𑁆𑀙𑀢𑁄, 𑀭𑀸𑀚𑀸 𑀫𑀚𑁆𑀛𑁂. 𑀘𑀓𑁆𑀓𑀭𑀢𑀦𑀲𑁆𑀲 𑀑𑀲𑀓𑁆𑀓𑀺𑀢𑁄𑀲𑀓𑁆𑀓𑀺𑀢𑀝𑁆𑀞𑀸𑀦𑀁 𑀉𑀤𑀓𑀁 𑀧𑀭𑀺𑀧𑀽𑀭𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀉𑀢𑁆𑀢𑀭𑁂𑀧𑀺 𑀲𑀫𑀼𑀤𑁆𑀤𑁂 𑀕𑀘𑁆𑀙𑀢𑀺.

𑀏𑀯𑀁 𑀘𑀢𑀼𑀤𑁆𑀤𑀺𑀲𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀆𑀭𑁄𑀳𑀢𑀺. 𑀢𑀢𑁆𑀣 𑀞𑀺𑀢𑁄 𑀭𑀸𑀚𑀸 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀯𑀺𑀚𑀺𑀢𑀁 𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀝𑀺𑀫𑀡𑁆𑀟𑀺𑀢𑀁 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁 𑀧𑀼𑀩𑁆𑀩𑀯𑀺𑀤𑁂𑀳𑀁, 𑀢𑀣𑀸 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁 𑀉𑀢𑁆𑀢𑀭𑀓𑀼𑀭𑀼𑀁, 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁𑀬𑁂𑀯 ¶ 𑀅𑀧𑀭𑀕𑁄𑀬𑀸𑀦𑀁, 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀡𑁆𑀟𑀮𑀁 𑀚𑀫𑁆𑀩𑀼𑀤𑀻𑀧𑀜𑁆𑀘𑀸𑀢𑀺 𑀏𑀯𑀁 𑀘𑀢𑀼𑀫𑀳𑀸𑀤𑀻𑀧𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀝𑀺𑀫𑀡𑁆𑀟𑀺𑀢𑀁 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀲𑀼𑀨𑀼𑀮𑁆𑀮𑀧𑀼𑀡𑁆𑀟𑀭𑀻𑀓𑀯𑀦𑀁 𑀯𑀺𑀬 𑀑𑀮𑁄𑀓𑁂𑀢𑀺. 𑀏𑀯𑀁 𑀑𑀮𑁄𑀓𑀬𑀢𑁄 𑀘𑀲𑁆𑀲 𑀅𑀦𑀧𑁆𑀧𑀺𑀓𑀸 𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀢𑀁 𑀘𑀓𑁆𑀓𑀭𑀢𑀦𑀁 𑀭𑀜𑁆𑀜𑁄 𑀭𑀢𑀺𑀁 𑀚𑀦𑁂𑀢𑀺, 𑀢𑀫𑁆𑀧𑀺 𑀩𑀼𑀤𑁆𑀥𑀭𑀢𑀦𑀲𑀫𑀁 𑀦𑀢𑁆𑀣𑀺. 𑀬𑀤𑀺 𑀳𑀺 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀢𑀣𑀸𑀕𑀢𑁄𑀯 𑀭𑀢𑀦𑀁. 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀏𑀢𑀁 𑀘𑀓𑁆𑀓𑀭𑀢𑀦𑀁? 𑀢𑀣𑀸𑀕𑀢𑁄 𑀳𑀺 𑀬𑀲𑁆𑀲𑀸 𑀤𑀺𑀩𑁆𑀩𑀸𑀬 𑀭𑀢𑀺𑀬𑀸 𑀘𑀓𑁆𑀓𑀭𑀢𑀦𑀸𑀤𑀻𑀳𑀺 𑀲𑀩𑁆𑀩𑁂𑀳𑀺𑀧𑀺 𑀚𑀦𑀺𑀢𑀸 𑀘𑀓𑁆𑀓𑀯𑀢𑁆𑀢𑀺𑀭𑀢𑀺 𑀲𑀗𑁆𑀔𑀫𑁆𑀧𑀺 𑀓𑀮𑀫𑁆𑀧𑀺 𑀓𑀮𑀪𑀸𑀕𑀫𑁆𑀧𑀺 𑀦 ¶ 𑀉𑀧𑁂𑀢𑀺, 𑀢𑀢𑁄𑀧𑀺 𑀭𑀢𑀺𑀢𑁄 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀅𑀢𑁆𑀢𑀦𑁄 𑀑𑀯𑀸𑀤𑀧𑁆𑀧𑀢𑀺𑀓𑀭𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀫𑁆𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀞𑀫𑀚𑁆𑀛𑀸𑀦𑀭𑀢𑀺𑀁, 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀭𑀢𑀺𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀭𑀢𑀺𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀭𑀢𑀺𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀭𑀢𑀺𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀭𑀢𑀺𑀁, 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀭𑀢𑀺𑀜𑁆𑀘 𑀚𑀦𑁂𑀢𑀺. 𑀏𑀯𑀁 𑀭𑀢𑀺𑀚𑀦𑀦𑀝𑁆𑀞𑁂𑀦𑀸𑀧𑀺 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀻𑀢𑀺.

𑀅𑀧𑀺𑀘 𑀭𑀢𑀦𑀁 𑀦𑀸𑀫𑁂𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑀁 𑀅𑀯𑀺𑀜𑁆𑀜𑀸𑀡𑀓𑀜𑁆𑀘. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑀁 𑀘𑀓𑁆𑀓𑀭𑀢𑀦𑀁 𑀫𑀡𑀺𑀭𑀢𑀦𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀲𑀼𑀯𑀡𑁆𑀡𑀭𑀚𑀢𑀸𑀤𑀺, 𑀲𑀯𑀺𑀜𑁆𑀜𑀸𑀡𑀓𑀁 𑀳𑀢𑁆𑀣𑀺𑀭𑀢𑀦𑀸𑀤𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑀭𑀺𑀬𑁄𑀲𑀸𑀦𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁. 𑀏𑀯𑀁 𑀤𑀼𑀯𑀺𑀥𑁂 𑀘𑁂𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀯𑀺𑀜𑁆𑀜𑀸𑀡𑀓𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀢𑀦𑀁, 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀳𑀢𑁆𑀣𑀺𑀭𑀢𑀦𑀸𑀤𑀻𑀦𑀁 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀉𑀧𑀦𑀻𑀬𑀢𑀺.

𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁, 𑀫𑀦𑀼𑀲𑁆𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀫𑀦𑀼𑀲𑁆𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀲𑁆𑀲 𑀑𑀧𑀯𑀬𑁆𑀳𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀇𑀢𑁆𑀣𑀺𑀭𑀢𑀦𑀁, 𑀧𑀼𑀭𑀺𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀧𑀼𑀭𑀺𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀲𑁆𑀲 𑀧𑀭𑀺𑀘𑀸𑀭𑀺𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀧𑀼𑀭𑀺𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀕𑀸𑀭𑀺𑀓𑀭𑀢𑀦𑀁, 𑀅𑀦𑀕𑀸𑀭𑀺𑀓𑀭𑀢𑀦𑀜𑁆𑀘. 𑀢𑀢𑁆𑀣 𑀅𑀦𑀕𑀸𑀭𑀺𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀕𑀸𑀭𑀺𑀓𑀭𑀢𑀦𑁂𑀲𑀼 𑀅𑀕𑁆𑀕𑁄 𑀘𑀓𑁆𑀓𑀯𑀢𑁆𑀢𑀻𑀧𑀺 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀅𑀦𑀕𑀸𑀭𑀺𑀓𑀭𑀢𑀦𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀘 𑀤𑀺𑀩𑁆𑀩𑀫𑀸𑀦𑀼𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺.

𑀏𑀯𑀁 𑀅𑀦𑀕𑀸𑀭𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑁋 𑀅𑀭𑀺𑀬𑀧𑀼𑀣𑀼𑀚𑁆𑀚𑀦𑀯𑀲𑁂𑀦. 𑀅𑀭𑀺𑀬𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀯𑀲𑁂𑀦. 𑀅𑀲𑁂𑀓𑁆𑀔𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑀫𑀣𑀬𑀸𑀦𑀺𑀓𑀯𑀲𑁂𑀦, 𑀲𑀫𑀣𑀬𑀸𑀦𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘. 𑀢𑀢𑁆𑀣 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀭𑀢𑀦𑀢𑁄𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀲𑀤𑀺𑀲𑀸𑀧𑀺 𑀳𑀺 𑀅𑀦𑁂𑀓𑀲𑀢𑀸 𑀲𑀸𑀯𑀓𑀸 ¶ 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀁 𑀲𑀢𑀪𑀸𑀕𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀢𑁄𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸? 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀲𑀓𑀮𑀫𑁆𑀧𑀺 𑀳𑀺 𑀚𑀫𑁆𑀩𑀼𑀤𑀻𑀧𑀁 𑀧𑀽𑀭𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀧𑀮𑁆𑀮𑀗𑁆𑀓𑀁 𑀖𑀝𑁆𑀝𑁂𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀏𑀓𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀁 𑀦𑁂𑀯 𑀲𑀗𑁆𑀔𑀁 𑀦 𑀓𑀮𑀁 𑀦 ¶ 𑀓𑀮𑀪𑀸𑀕𑀁 𑀉𑀧𑁂𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁩𑁯; 𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦). 𑀏𑀯𑀁 𑀓𑁂𑀦𑀘𑀺𑀧𑀺 𑀧𑀭𑀺𑀬𑀸𑀬𑁂𑀦 𑀢𑀣𑀸𑀕𑀢𑀲𑀫𑀁 𑀭𑀢𑀦𑀁 𑀦𑀢𑁆𑀣𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦𑀸’’𑀢𑀺.

𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀭𑀢𑀦𑀲𑁆𑀲 𑀅𑀜𑁆𑀜𑁂𑀳𑀺 𑀭𑀢𑀦𑁂𑀳𑀺 𑀅𑀲𑀫𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀉𑀧𑀤𑁆𑀤𑀯𑀯𑀽𑀧𑀲𑀫𑀦𑀢𑁆𑀣𑀁 𑀦𑁂𑀯 𑀚𑀸𑀢𑀺𑀁 𑀦 𑀕𑁄𑀢𑁆𑀢𑀁 𑀦 𑀓𑁄𑀮𑀧𑀼𑀢𑁆𑀢𑀺𑀬𑀁 𑀦 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀤𑀺𑀁 𑀦𑀺𑀲𑁆𑀲𑀸𑀬, 𑀅𑀧𑀺𑀘 𑀔𑁄 𑀅𑀯𑀻𑀘𑀺𑀫𑀼𑀧𑀸𑀤𑀸𑀬 𑀪𑀯𑀕𑁆𑀕𑀧𑀭𑀺𑀬𑀦𑁆𑀢𑁂 𑀮𑁄𑀓𑁂 𑀲𑀻𑀮𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀳𑀺 𑀕𑀼𑀡𑁂𑀳𑀺 𑀩𑀼𑀤𑁆𑀥𑀭𑀢𑀦𑀲𑁆𑀲 𑀅𑀲𑀤𑀺𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀇𑀤𑀫𑁆𑀧𑀺 𑀇𑀥 𑀯𑀸 𑀳𑀼𑀭𑀁 𑀯𑀸 𑀲𑀕𑁆𑀕𑁂𑀲𑀼 𑀯𑀸 𑀬𑀁𑀓𑀺𑀜𑁆𑀘𑀺 𑀅𑀢𑁆𑀣𑀺 𑀯𑀺𑀢𑁆𑀢𑀁 𑀯𑀸 𑀭𑀢𑀦𑀁 𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀢𑁂𑀳𑀺 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀲𑀫𑀢𑁆𑀢𑀸 𑀩𑀼𑀤𑁆𑀥𑀭𑀢𑀦𑀁 𑀧𑀡𑀻𑀢𑀁. 𑀬𑀤𑀺 𑀏𑀢𑀁 𑀲𑀘𑁆𑀘𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀇𑀫𑁂𑀲𑀁 𑀧𑀸𑀡𑀻𑀦𑀁 𑀲𑁄𑀢𑁆𑀣𑀺 𑀳𑁄𑀢𑀼, 𑀲𑁄𑀪𑀦𑀸𑀦𑀁 𑀅𑀢𑁆𑀣𑀺𑀢𑀸 𑀳𑁄𑀢𑀼, 𑀅𑀭𑁄𑀕𑀢𑀸 𑀦𑀺𑀭𑀼𑀧𑀤𑁆𑀤𑀯𑀢𑀸𑀢𑀺. 𑀏𑀢𑁆𑀣 𑀘 𑀬𑀣𑀸 ‘‘𑀘𑀓𑁆𑀔𑀼𑀁 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁫) 𑀅𑀢𑁆𑀢𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑀺𑀬𑀪𑀸𑀯𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀣𑀸 𑀳𑀺 𑀘𑀓𑁆𑀔𑀼 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀅𑀧𑁆𑀧𑀝𑀺𑀲𑀺𑀤𑁆𑀥𑀫𑁂𑀯 𑀲𑀺𑀬𑀸. 𑀏𑀯𑀁 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀭𑀢𑀦𑀢𑁆𑀢𑀁 𑀧𑀡𑀻𑀢𑀁, 𑀭𑀢𑀦𑀪𑀸𑀯𑁄 𑀧𑀡𑀻𑀢𑁄𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀩𑀼𑀤𑁆𑀥𑁄 𑀦𑁂𑀯 𑀭𑀢𑀦𑀦𑁆𑀢𑀺 𑀲𑀺𑀚𑁆𑀛𑁂𑀬𑁆𑀬. 𑀦 𑀳𑀺 𑀬𑀢𑁆𑀣 𑀭𑀢𑀦𑀁 𑀅𑀢𑁆𑀣𑀺, 𑀢𑀁 𑀭𑀢𑀦𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀬𑀢𑁆𑀣 𑀧𑀦 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑀲𑀗𑁆𑀔𑀸𑀢𑀁 𑀬𑁂𑀦 𑀯𑀸 𑀢𑁂𑀦 𑀯𑀸 𑀯𑀺𑀥𑀺𑀦𑀸 𑀲𑀫𑁆𑀩𑀦𑁆𑀥𑀕𑀢𑀁 𑀭𑀢𑀦𑀢𑁆𑀢𑀁 𑀅𑀢𑁆𑀣𑀺, 𑀬𑀲𑁆𑀫𑀸 𑀢𑀁 𑀭𑀢𑀦𑀢𑁆𑀢𑀫𑀼𑀧𑀸𑀤𑀸𑀬 𑀭𑀢𑀦𑀦𑁆𑀢𑀺 𑀧𑀜𑁆𑀜𑀸𑀧𑀻𑀬𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀭𑀢𑀦𑀢𑁆𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀭𑀢𑀦𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀅𑀣 𑀯𑀸 𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀦𑁆𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀩𑀼𑀤𑁆𑀥𑁄𑀯 𑀭𑀢𑀦𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀫𑀢𑁆𑀢𑀸𑀬 𑀘 𑀪𑀕𑀯𑀢𑀸 𑀇𑀫𑀸𑀬 𑀕𑀸𑀣𑀸𑀬 𑀭𑀸𑀚𑀓𑀼𑀮𑀲𑁆𑀲 𑀲𑁄𑀢𑁆𑀣𑀺 𑀚𑀸𑀢𑀸, 𑀪𑀬𑀁 𑀯𑀽𑀧𑀲𑀦𑁆𑀢𑀁. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁨𑁭. 𑀏𑀯𑀁 𑀩𑀼𑀤𑁆𑀥𑀕𑀼𑀡𑁂𑀦 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀔𑀬𑀁 𑀯𑀺𑀭𑀸𑀕’’𑀦𑁆𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀭𑀸𑀕𑀸𑀤𑀬𑁄 𑀔𑀻𑀡𑀸 𑀳𑁄𑀦𑁆𑀢𑀺 𑀧𑀭𑀺𑀓𑁆𑀔𑀻𑀡𑀸, 𑀬𑀲𑁆𑀫𑀸 𑀯𑀸 𑀢𑀁 𑀢𑁂𑀲𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑁆𑀔𑀬𑀫𑀢𑁆𑀢𑀁, 𑀬𑀲𑁆𑀫𑀸 𑀘 ¶ 𑀢𑀁 𑀭𑀸𑀕𑀸𑀤𑀺𑀯𑀺𑀬𑀼𑀢𑁆𑀢𑀁 𑀲𑀫𑁆𑀧𑀬𑁄𑀕𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘, 𑀬𑀲𑁆𑀫𑀸 𑀯𑀸 𑀢𑀫𑁆𑀳𑀺 𑀲𑀘𑁆𑀙𑀺𑀓𑀢𑁂 𑀭𑀸𑀕𑀸𑀤𑀬𑁄 𑀅𑀘𑁆𑀘𑀦𑁆𑀢𑀁 𑀯𑀺𑀭𑀢𑁆𑀢𑀸 𑀳𑁄𑀦𑁆𑀢𑀺 𑀯𑀺𑀕𑀢𑀸 𑀯𑀺𑀤𑁆𑀥𑀲𑁆𑀢𑀸 ¶ , 𑀢𑀲𑁆𑀫𑀸 ‘‘𑀔𑀬’’𑀦𑁆𑀢𑀺 𑀘 ‘‘𑀯𑀺𑀭𑀸𑀕’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦𑀲𑁆𑀲 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄 𑀦 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀫𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀉𑀢𑁆𑀢𑀫𑀝𑁆𑀞𑁂𑀦 𑀧𑀦 𑀅𑀢𑀧𑁆𑀧𑀓𑀝𑁆𑀞𑁂𑀦 𑀘 𑀧𑀡𑀻𑀢𑀦𑁆𑀢𑀺. 𑀬𑀤𑀚𑁆𑀛𑀕𑀸𑀢𑀺 𑀬𑀁 𑀅𑀚𑁆𑀛𑀕𑀸 𑀯𑀺𑀦𑁆𑀤𑀺, 𑀧𑀝𑀺𑀮𑀪𑀺, 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀲𑀘𑁆𑀙𑀸𑀓𑀸𑀲𑀺. 𑀲𑀓𑁆𑀬𑀫𑀼𑀦𑀻𑀢𑀺 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑀢𑁆𑀢𑀸 𑀲𑀓𑁆𑀬𑁄, 𑀫𑁄𑀦𑁂𑀬𑁆𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀦𑀺, 𑀲𑀓𑁆𑀬𑁄 𑀏𑀯 𑀫𑀼𑀦𑀺 𑀲𑀓𑁆𑀬𑀫𑀼𑀦𑀺. 𑀲𑀫𑀸𑀳𑀺𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑁄. 𑀦 𑀢𑁂𑀦 𑀥𑀫𑁆𑀫𑁂𑀦 𑀲𑀫𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀢𑁂𑀦 𑀔𑀬𑀸𑀤𑀺𑀦𑀸𑀫𑀓𑁂𑀦 𑀲𑀓𑁆𑀬𑀫𑀼𑀦𑀺𑀦𑀸 𑀅𑀥𑀺𑀕𑀢𑁂𑀦 𑀥𑀫𑁆𑀫𑁂𑀦 𑀲𑀫𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀏𑀯𑀁 𑀪𑀕𑀯𑀸 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀅𑀲𑀫𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀉𑀧𑀤𑁆𑀤𑀯𑀯𑀽𑀧𑀲𑀫𑀦𑀢𑁆𑀣𑀁 𑀔𑀬𑀯𑀺𑀭𑀸𑀕𑀸𑀫𑀢𑀧𑀡𑀻𑀢𑀢𑀸𑀕𑀼𑀡𑁂𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀭𑀢𑀦𑀲𑁆𑀲 𑀅𑀲𑀤𑀺𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀥𑀫𑁆𑀫𑁂 𑀭𑀢𑀦𑀁 𑀧𑀡𑀻𑀢𑀁 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁨𑁮. 𑀏𑀯𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀕𑀼𑀡𑁂𑀦 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀫𑀕𑁆𑀕𑀥𑀫𑁆𑀫𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄’’𑀢𑀺. 𑀢𑀢𑁆𑀣 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀬𑁂𑀦 𑀩𑀼𑀤𑁆𑀥𑁄, 𑀉𑀢𑁆𑀢𑀫𑁄 𑀧𑀲𑀁𑀲𑀦𑀻𑀬𑁄 𑀘𑀸𑀢𑀺 𑀲𑁂𑀝𑁆𑀞𑁄, 𑀩𑀼𑀤𑁆𑀥𑁄 𑀘 𑀲𑁄 𑀲𑁂𑀝𑁆𑀞𑁄 𑀘𑀸𑀢𑀺 𑀩𑀼𑀤𑁆𑀥𑀲𑁂𑀝𑁆𑀞𑁄. 𑀅𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀗𑁆𑀔𑀸𑀢𑁂𑀲𑀼 𑀯𑀸 𑀩𑀼𑀤𑁆𑀥𑁂𑀲𑀼 𑀲𑁂𑀝𑁆𑀞𑁄𑀢𑀺 𑀩𑀼𑀤𑁆𑀥𑀲𑁂𑀝𑁆𑀞𑁄. 𑀲𑁄 𑀩𑀼𑀤𑁆𑀥𑀲𑁂𑀝𑁆𑀞𑁄 𑀬𑀁 𑀧𑀭𑀺𑀯𑀡𑁆𑀡𑀬𑀻, ‘‘𑀅𑀝𑁆𑀞𑀗𑁆𑀕𑀺𑀓𑁄 𑀘 𑀫𑀕𑁆𑀕𑀸𑀦𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸’’𑀢𑀺 (𑀫. 𑀦𑀺. 𑁨.𑁨𑁧𑁫) 𑀘 ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 (𑀫. 𑀦𑀺. 𑁩.𑁧𑁩𑁬) 𑀘 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀲𑀁𑀲𑀺 𑀧𑀓𑀸𑀲𑀬𑀺. 𑀲𑀼𑀘𑀺𑀦𑁆𑀢𑀺 𑀓𑀺𑀮𑁂𑀲𑀫𑀮𑀲𑀫𑀼𑀘𑁆𑀙𑁂𑀤𑀓𑀭𑀡𑀢𑁄 𑀅𑀘𑁆𑀘𑀦𑁆𑀢𑀯𑁄𑀤𑀸𑀦𑀁. 𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀽𑀢𑀺 𑀬𑀜𑁆𑀘 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀁 𑀦𑀺𑀬𑀫𑁂𑀦𑁂𑀯 𑀨𑀮𑀤𑀸𑀦𑀢𑁄 ‘‘𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀻’’𑀢𑀺 𑀆𑀳𑀼. 𑀦 𑀳𑀺 𑀫𑀕𑁆𑀕𑀲𑀫𑀸𑀥𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀨𑀮𑀼𑀧𑁆𑀧𑀢𑁆𑀢𑀺𑀦𑀺𑀲𑁂𑀥𑀓𑁄 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀅𑀢𑁆𑀣𑀺. 𑀬𑀣𑀸𑀳 𑁋

‘‘𑀅𑀬𑀜𑁆𑀘 ¶ 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀅𑀲𑁆𑀲, 𑀓𑀧𑁆𑀧𑀲𑁆𑀲 𑀘 𑀉𑀟𑁆𑀟𑀬𑁆𑀳𑀦𑀯𑁂𑀮𑀸 𑀅𑀲𑁆𑀲, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀉𑀟𑁆𑀟𑀬𑁆𑀳𑁂𑀬𑁆𑀬, 𑀬𑀸𑀯𑀸𑀬𑀁 𑀧𑀼𑀕𑁆𑀕𑀮𑁄 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀞𑀺𑀢𑀓𑀧𑁆𑀧𑀻. 𑀲𑀩𑁆𑀩𑁂𑀧𑀺 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸 𑀞𑀺𑀢𑀓𑀧𑁆𑀧𑀺𑀦𑁄’’𑀢𑀺 (𑀧𑀼. 𑀧. 𑁧𑁭).

𑀲𑀫𑀸𑀥𑀺𑀦𑀸 ¶ 𑀢𑁂𑀦 𑀲𑀫𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀦 𑀩𑀼𑀤𑁆𑀥𑀲𑁂𑀝𑁆𑀞𑀧𑀭𑀺𑀯𑀡𑁆𑀡𑀺𑀢𑁂𑀦 𑀲𑀼𑀘𑀺𑀦𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀦𑀸 𑀲𑀫𑁄 𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀯𑀸 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀯𑀸 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀢𑁂𑀲𑀁 𑀪𑀸𑀯𑀺𑀢𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲𑀸𑀧𑀺 𑀧𑀼𑀦 𑀦𑀺𑀭𑀬𑀸𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑀢𑁄, 𑀇𑀫𑀲𑁆𑀲 𑀘 𑀅𑀭𑀳𑀢𑁆𑀢𑀲𑀫𑀸𑀥𑀺𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑀼𑀧𑁆𑀧𑀢𑁆𑀢𑀺𑀲𑀫𑀼𑀕𑁆𑀖𑀸𑀢𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

𑀏𑀯𑀁 𑀪𑀕𑀯𑀸 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀺𑀲𑁆𑀲 𑀅𑀜𑁆𑀜𑁂𑀳𑀺 𑀲𑀫𑀸𑀥𑀻𑀳𑀺 𑀅𑀲𑀫𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑀕𑁆𑀕𑀥𑀫𑁆𑀫𑀭𑀢𑀦𑀲𑁆𑀲 𑀅𑀲𑀤𑀺𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀥𑀫𑁆𑀫𑁂…𑀧𑁂… 𑀳𑁄𑀢𑀽’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁨𑁯. 𑀏𑀯𑀁 𑀫𑀕𑁆𑀕𑀥𑀫𑁆𑀫𑀕𑀼𑀡𑁂𑀦𑀸𑀧𑀺 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀗𑁆𑀖𑀕𑀼𑀡𑁂𑀦𑀸𑀧𑀺 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑁂 𑀧𑀼𑀕𑁆𑀕𑀮𑀸’’𑀢𑀺. 𑀢𑀢𑁆𑀣 𑀬𑁂𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀉𑀤𑁆𑀤𑁂𑀲𑁄. 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀸. 𑀅𑀝𑁆𑀞𑀸𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂 𑀳𑀺 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸𑀢𑀺 𑀅𑀝𑁆𑀞 𑀳𑁄𑀦𑁆𑀢𑀺. 𑀲𑀢𑀁 𑀧𑀲𑀢𑁆𑀣𑀸𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀲𑀢𑁆𑀣𑀸. 𑀓𑀲𑁆𑀫𑀸? 𑀲𑀳𑀚𑀸𑀢𑀲𑀻𑀮𑀸𑀤𑀺𑀕𑀼𑀡𑀬𑁄𑀕𑀸. 𑀢𑁂𑀲𑀜𑁆𑀳𑀺 𑀘𑀫𑁆𑀧𑀓𑀯𑀓𑀼𑀮𑀓𑀼𑀲𑀼𑀫𑀸𑀤𑀻𑀦𑀁 𑀲𑀳𑀚𑀸𑀢𑀯𑀡𑁆𑀡𑀕𑀦𑁆𑀥𑀸𑀤𑀬𑁄 𑀯𑀺𑀬 𑀲𑀳𑀚𑀸𑀢𑀲𑀻𑀮𑀲𑀫𑀸𑀥𑀺𑀆𑀤𑀬𑁄 𑀕𑀼𑀡𑀸. 𑀢𑁂𑀦 𑀢𑁂 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀸𑀦𑀺 𑀯𑀺𑀬 𑀧𑀼𑀧𑁆𑀨𑀸𑀦𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀢𑀁 𑀧𑀺𑀬𑀸 𑀫𑀦𑀸𑀧𑀸 𑀧𑀲𑀁𑀲𑀦𑀻𑀬𑀸 𑀘 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀁 𑀧𑀲𑀢𑁆𑀣𑀸’’𑀢𑀺.

𑀅𑀣 𑀯𑀸 𑀬𑁂𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀉𑀤𑁆𑀤𑁂𑀲𑁄. 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀸. 𑀅𑀝𑁆𑀞𑀲𑀢𑀦𑁆𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂 𑀳𑀺 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 ¶ 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸, 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀅𑀥𑀺𑀕𑀢𑀧𑁆𑀨𑀮𑀸 𑀢𑀬𑁄 𑀲𑀓𑀤𑀸𑀕𑀸𑀫𑀺𑀦𑁄, 𑀢𑁂 𑀲𑀩𑁆𑀩𑁂𑀧𑀺 𑀘𑀢𑀼𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺, 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺, 𑀅𑀯𑀺𑀳𑁂𑀲𑀼 𑀧𑀜𑁆𑀘, 𑀢𑀣𑀸 𑀅𑀢𑀧𑁆𑀧𑀲𑀼𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀼. 𑀅𑀓𑀦𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀁𑀲𑁄𑀢𑀯𑀚𑁆𑀚𑀸 𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀯𑀻𑀲𑀢𑀺 𑀅𑀦𑀸𑀕𑀸𑀫𑀺𑀦𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀲𑀫𑀣𑀬𑀸𑀦𑀺𑀓𑁄𑀢𑀺 𑀤𑁆𑀯𑁂 𑀅𑀭𑀳𑀦𑁆𑀢𑁄, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸𑀢𑀺 𑀘𑀢𑀼𑀧𑀜𑁆𑀜𑀸𑀲. 𑀢𑁂 𑀲𑀩𑁆𑀩𑁂𑀧𑀺 𑀲𑀤𑁆𑀥𑀸𑀥𑀼𑀭𑀧𑀜𑁆𑀜𑀸𑀥𑀼𑀭𑀸𑀦𑀁 𑀯𑀲𑁂𑀦 𑀤𑀺𑀕𑀼𑀡𑀸 𑀳𑀼𑀢𑁆𑀯𑀸 𑀅𑀝𑁆𑀞𑀲𑀢𑀁 𑀳𑁄𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀅𑀝𑁆𑀞 𑀯𑀸 𑀅𑀝𑁆𑀞𑀲𑀢𑀁 𑀯𑀸𑀢𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀧𑀼𑀕𑁆𑀕𑀮𑀸, 𑀲𑀗𑁆𑀔𑁂𑀧𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀁, 𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀦𑁆𑀢𑀺 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀏𑀢𑁆𑀣 𑀢𑁂𑀢𑀺 𑀧𑀼𑀩𑁆𑀩𑁂 𑀅𑀦𑀺𑀬𑀫𑁂𑀢𑁆𑀯𑀸 ¶ 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀬𑀫𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀬𑁂 𑀧𑀼𑀕𑁆𑀕𑀮𑀸 𑀯𑀺𑀢𑁆𑀣𑀸𑀭𑀯𑀲𑁂𑀦 𑀅𑀝𑁆𑀞 𑀯𑀸 𑀅𑀝𑁆𑀞𑀲𑀢𑀁 𑀯𑀸, 𑀲𑀗𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑁂𑀧𑀺 𑀢𑁂 𑀤𑀓𑁆𑀔𑀺𑀡𑀁 𑀅𑀭𑀳𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸. 𑀤𑀓𑁆𑀔𑀺𑀡𑀸 𑀦𑀸𑀫 𑀓𑀫𑁆𑀫𑀜𑁆𑀘 𑀓𑀫𑁆𑀫𑀯𑀺𑀧𑀸𑀓𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀏𑀲 𑀫𑁂 𑀇𑀤𑀁 𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑀁 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀤𑀻𑀬𑀫𑀸𑀦𑁄 𑀤𑁂𑀬𑁆𑀬𑀥𑀫𑁆𑀫𑁄, 𑀢𑀁 𑀅𑀭𑀳𑀦𑁆𑀢𑀺 𑀦𑀸𑀫 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑀸 𑀧𑀼𑀕𑁆𑀕𑀮𑀸. 𑀇𑀫𑁂 𑀘 𑀢𑀸𑀤𑀺𑀲𑀸, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 𑀢𑁂 ‘‘𑀤𑀓𑁆𑀔𑀺𑀡𑁂𑀬𑁆𑀬𑀸’’𑀢𑀺.

𑀲𑀼𑀕𑀢𑀲𑁆𑀲 𑀲𑀸𑀯𑀓𑀸𑀢𑀺 𑀪𑀕𑀯𑀸 𑀲𑁄𑀪𑀦𑁂𑀦 𑀕𑀫𑀦𑁂𑀦 𑀬𑀼𑀢𑁆𑀢𑀢𑁆𑀢𑀸, 𑀲𑁄𑀪𑀦𑀜𑁆𑀘 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀼𑀝𑁆𑀞𑀼 𑀘 𑀕𑀢𑀢𑁆𑀢𑀸 𑀲𑀼𑀝𑁆𑀞𑀼 𑀏𑀯 𑀘 𑀕𑀤𑀢𑁆𑀢𑀸 𑀲𑀼𑀕𑀢𑁄, 𑀢𑀲𑁆𑀲 𑀲𑀼𑀕𑀢𑀲𑁆𑀲. 𑀲𑀩𑁆𑀩𑁂𑀧𑀺 𑀢𑁂 𑀯𑀘𑀦𑀁 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸. 𑀓𑀸𑀫𑀜𑁆𑀘 𑀅𑀜𑁆𑀜𑁂𑀧𑀺 𑀲𑀼𑀡𑀦𑁆𑀢𑀺, 𑀦 𑀧𑀦 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀇𑀫𑁂 𑀧𑀦 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀧𑀢𑁆𑀢𑀸, 𑀢𑀲𑁆𑀫𑀸 ‘‘𑀲𑀸𑀯𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀻𑀢𑀺 𑀏𑀢𑁂𑀲𑀼 𑀲𑀼𑀕𑀢𑀲𑀸𑀯𑀓𑁂𑀲𑀼 𑀅𑀧𑁆𑀧𑀓𑀸𑀦𑀺𑀧𑀺 𑀤𑀸𑀦𑀸𑀦𑀺 𑀤𑀺𑀦𑁆𑀦𑀸𑀦𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀪𑀸𑀯𑀁 𑀉𑀧𑀕𑀢𑀢𑁆𑀢𑀸 𑀫𑀳𑀧𑁆𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸, 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄…𑀧𑁂… 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦).

𑀏𑀯𑀁 ¶ 𑀪𑀕𑀯𑀸 𑀲𑀩𑁆𑀩𑁂𑀲𑀫𑁆𑀧𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀸𑀦𑀁 𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁦. 𑀏𑀯𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀸𑀦𑀁 𑀯𑀲𑁂𑀦 𑀲𑀗𑁆𑀖𑀕𑀼𑀡𑁂𑀦 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀏𑀓𑀘𑁆𑀘𑀺𑀬𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀫𑀦𑀼𑀪𑀯𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑁂 𑀲𑀼𑀧𑁆𑀧𑀬𑀼𑀢𑁆𑀢𑀸’’𑀢𑀺. 𑀢𑀢𑁆𑀣 𑀬𑁂𑀢𑀺 𑀅𑀦𑀺𑀬𑀫𑀺𑀢𑀼𑀤𑁆𑀤𑁂𑀲𑀯𑀘𑀦𑀁. 𑀲𑀼𑀧𑁆𑀧𑀬𑀼𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀧𑀬𑀼𑀢𑁆𑀢𑀸, 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀧𑀳𑀸𑀬 𑀲𑀼𑀤𑁆𑀥𑀸𑀚𑀻𑀯𑀺𑀢𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀢𑁆𑀢𑀸𑀦𑀁 𑀧𑀬𑀼𑀜𑁆𑀚𑀺𑀢𑀼𑀫𑀸𑀭𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀧𑁆𑀧𑀬𑀼𑀢𑁆𑀢𑀸𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀦𑁆𑀦𑀸𑀕𑀢𑀸. 𑀢𑁂𑀦 𑀢𑁂𑀲𑀁 𑀲𑀻𑀮𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀫𑀦𑀲𑀸 𑀤𑀴𑁆𑀳𑁂𑀦𑀸𑀢𑀺 𑀤𑀴𑁆𑀳𑁂𑀦 𑀫𑀦𑀲𑀸, 𑀣𑀺𑀭𑀲𑀫𑀸𑀥𑀺𑀬𑀼𑀢𑁆𑀢𑁂𑀦 𑀘𑁂𑀢𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀢𑁂𑀲𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀦𑀺𑀓𑁆𑀓𑀸𑀫𑀺𑀦𑁄𑀢𑀺 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀥𑀼𑀭𑁂𑀦 𑀯𑀻𑀭𑀺𑀬𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀓𑀢𑀦𑀺𑀓𑁆𑀓𑀫𑀦𑀸. 𑀢𑁂𑀦 𑀢𑁂𑀲𑀁 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺.

𑀕𑁄𑀢𑀫𑀲𑀸𑀲𑀦𑀫𑁆𑀳𑀻𑀢𑀺 ¶ 𑀕𑁄𑀢𑁆𑀢𑀢𑁄 𑀕𑁄𑀢𑀫𑀲𑁆𑀲 𑀢𑀣𑀸𑀕𑀢𑀲𑁆𑀲𑁂𑀯 𑀲𑀸𑀲𑀦𑀫𑁆𑀳𑀺. 𑀢𑁂𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀸𑀦𑀧𑁆𑀧𑀓𑀸𑀭𑀫𑁆𑀧𑀺 𑀅𑀫𑀭𑀢𑀧𑀁 𑀓𑀭𑁄𑀦𑁆𑀢𑀸𑀦𑀁 𑀲𑀼𑀧𑁆𑀧𑀬𑁄𑀕𑀸𑀤𑀺𑀕𑀼𑀡𑀸𑀪𑀸𑀯𑀢𑁄 𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀓𑀫𑀦𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀢𑁂𑀢𑀺 𑀧𑀼𑀩𑁆𑀩𑁂 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀤𑁆𑀤𑁂𑀲𑀯𑀘𑀦𑀁. 𑀧𑀢𑁆𑀢𑀺𑀧𑀢𑁆𑀢𑀸𑀢𑀺 𑀏𑀢𑁆𑀣 𑀧𑀢𑁆𑀢𑀩𑁆𑀩𑀸𑀢𑀺 𑀧𑀢𑁆𑀢𑀺, 𑀧𑀢𑁆𑀢𑀩𑁆𑀩𑀸 𑀦𑀸𑀫 𑀧𑀢𑁆𑀢𑀼𑀁 𑀅𑀭𑀳𑀸, 𑀬𑀁 𑀧𑀢𑁆𑀯𑀸 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀺𑀦𑁄 𑀳𑁄𑀦𑁆𑀢𑀺, 𑀅𑀭𑀳𑀢𑁆𑀢𑀨𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀧𑀢𑁆𑀢𑀺𑀁 𑀧𑀢𑁆𑀢𑀸𑀢𑀺 𑀧𑀢𑁆𑀢𑀺𑀧𑀢𑁆𑀢𑀸. 𑀅𑀫𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀯𑀺𑀕𑀬𑁆𑀳𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀯𑀺𑀕𑀸𑀳𑀺𑀢𑁆𑀯𑀸. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀫𑀼𑀥𑀸𑀢𑀺 𑀅𑀩𑁆𑀬𑀬𑁂𑀦 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀩𑁆𑀬𑀬𑀁 𑀅𑀓𑀢𑁆𑀯𑀸. 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀤𑀭𑀣𑀁 𑀨𑀮𑀲𑀫𑀸𑀧𑀢𑁆𑀢𑀺𑀁. 𑀪𑀼𑀜𑁆𑀚𑀫𑀸𑀦𑀸𑀢𑀺 𑀅𑀦𑀼𑀪𑀯𑀫𑀸𑀦𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂 𑀇𑀫𑀲𑁆𑀫𑀺𑀁 𑀕𑁄𑀢𑀫𑀲𑀸𑀲𑀦𑀫𑁆𑀳𑀺 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀼𑀧𑁆𑀧𑀬𑀼𑀢𑁆𑀢𑀸, 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀫𑀦𑀲𑀸 𑀤𑀴𑁆𑀳𑁂𑀦, 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀢𑁆𑀢𑀸 𑀦𑀺𑀓𑁆𑀓𑀸𑀫𑀺𑀦𑁄, 𑀢𑁂 𑀇𑀫𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀫𑀢𑀁 𑀯𑀺𑀕𑀬𑁆𑀳 𑀫𑀼𑀥𑀸 𑀮𑀤𑁆𑀥𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀦𑀺𑀩𑁆𑀩𑀼𑀢𑀺𑀁 𑀪𑀼𑀜𑁆𑀚𑀫𑀸𑀦𑀸 𑀧𑀢𑁆𑀢𑀺𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀫𑀦𑀼𑀪𑀯𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ¶ ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁧. 𑀏𑀯𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀩𑀳𑀼𑀚𑀦𑀧𑀘𑁆𑀘𑀓𑁆𑀔𑁂𑀦 𑀲𑁄𑀢𑀸𑀧𑀦𑁆𑀦𑀲𑁆𑀲𑁂𑀯 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑀣𑀺𑀦𑁆𑀤𑀔𑀻𑀮𑁄’’𑀢𑀺. 𑀢𑀢𑁆𑀣 𑀬𑀣𑀸𑀢𑀺 𑀉𑀧𑀫𑀸𑀯𑀘𑀦𑀁. 𑀇𑀦𑁆𑀤𑀔𑀻𑀮𑁄𑀢𑀺 𑀦𑀕𑀭𑀤𑁆𑀯𑀸𑀭𑀦𑀺𑀯𑀸𑀭𑀡𑀢𑁆𑀣𑀁 𑀉𑀫𑁆𑀫𑀸𑀭𑀩𑁆𑀪𑀦𑁆𑀢𑀭𑁂 𑀅𑀝𑁆𑀞 𑀯𑀸 𑀤𑀲 𑀯𑀸 𑀳𑀢𑁆𑀣𑁂 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀆𑀓𑁄𑀝𑀺𑀢𑀲𑁆𑀲 𑀲𑀸𑀭𑀤𑀸𑀭𑀼𑀫𑀬𑀣𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀣𑀯𑀺𑀦𑁆𑀢𑀺 𑀪𑀽𑀫𑀺𑀁. 𑀲𑀺𑀢𑁄𑀢𑀺 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑁆𑀲𑀺𑀢𑁄. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬. 𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀻𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑀯𑀸𑀢𑁂𑀳𑀺. 𑀅𑀲𑀫𑁆𑀧𑀓𑀫𑁆𑀧𑀺𑀬𑁄𑀢𑀺 𑀓𑀫𑁆𑀧𑁂𑀢𑀼𑀁 𑀯𑀸 𑀘𑀸𑀮𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀢𑀣𑀽𑀧𑀫𑀦𑁆𑀢𑀺 𑀢𑀣𑀸𑀯𑀺𑀥𑀁. 𑀲𑀧𑁆𑀧𑀼𑀭𑀺𑀲𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀁. 𑀯𑀤𑀸𑀫𑀻𑀢𑀺 𑀪𑀡𑀸𑀫𑀺. 𑀬𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑁂𑀘𑁆𑀘 𑀧𑀲𑁆𑀲𑀢𑀻𑀢𑀺 𑀬𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀜𑁆𑀜𑀸𑀬 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀲𑁆𑀲𑀢𑀺. 𑀢𑀢𑁆𑀣 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀳𑀺 𑀇𑀦𑁆𑀤𑀔𑀻𑀮𑁄 𑀕𑀫𑁆𑀪𑀻𑀭𑀦𑁂𑀫𑀢𑀸𑀬 𑀧𑀣𑀯𑀺𑀲𑁆𑀲𑀺𑀢𑁄 𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀲𑀺𑀬𑀸, 𑀇𑀫𑀫𑁆𑀧𑀺 𑀲𑀧𑁆𑀧𑀼𑀭𑀺𑀲𑀁 𑀢𑀣𑀽𑀧𑀫𑀫𑁂𑀯 𑀯𑀤𑀸𑀫𑀺, 𑀬𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑁂𑀘𑁆𑀘 𑀧𑀲𑁆𑀲𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑁄𑀧𑀺 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀘𑀢𑀽𑀳𑀺 𑀯𑀸𑀢𑁂𑀳𑀺 𑀲𑀩𑁆𑀩𑀢𑀺𑀢𑁆𑀣𑀺𑀬𑀯𑀸𑀤𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀳𑁄𑀢𑀺, 𑀢𑀫𑁆𑀳𑀸 𑀤𑀲𑁆𑀲𑀦𑀸 𑀓𑁂𑀦𑀘𑀺 𑀓𑀫𑁆𑀧𑁂𑀢𑀼𑀁 𑀯𑀸 𑀘𑀸𑀮𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺 ¶ , 𑀪𑀺𑀓𑁆𑀔𑀯𑁂, 𑀅𑀬𑁄𑀔𑀻𑀮𑁄 𑀯𑀸 𑀇𑀦𑁆𑀤𑀔𑀻𑀮𑁄 𑀯𑀸 𑀕𑀫𑁆𑀪𑀻𑀭𑀦𑁂𑀫𑁄 𑀲𑀼𑀦𑀺𑀔𑀸𑀢𑁄 𑀅𑀘𑀮𑁄 𑀅𑀲𑀫𑁆𑀧𑀓𑀫𑁆𑀧𑀻, 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺, 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀘𑀸𑀮𑁂𑀬𑁆𑀬. 𑀧𑀘𑁆𑀙𑀺𑀫𑀸𑀬…𑀧𑁂… 𑀤𑀓𑁆𑀔𑀺𑀡𑀸𑀬… 𑀉𑀢𑁆𑀢𑀭𑀸𑀬 𑀘𑁂𑀧𑀺…𑀧𑁂… 𑀦 𑀲𑀫𑁆𑀧𑀘𑀸𑀮𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀕𑀫𑁆𑀪𑀻𑀭𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀦𑁂𑀫𑀲𑁆𑀲 𑀲𑀼𑀦𑀺𑀔𑀸𑀢𑀢𑁆𑀢𑀸 𑀇𑀦𑁆𑀤𑀔𑀻𑀮𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀘 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 ‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺…𑀧𑁂… 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂 𑀦 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 ¶ 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀺 ‘𑀅𑀬𑀁 𑀦𑀽𑀦 𑀪𑀯𑀁 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀻’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀤𑀺𑀝𑁆𑀞𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁯).

𑀏𑀯𑀁 𑀪𑀕𑀯𑀸 𑀩𑀳𑀼𑀚𑀦𑀧𑀘𑁆𑀘𑀓𑁆𑀔𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲𑁂𑀯 𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁨. 𑀏𑀯𑀁 𑀅𑀯𑀺𑀲𑁂𑀲𑀢𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀢𑁂 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺. 𑀬𑀣𑀸𑀳 𑁋

‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀲𑁄 𑀏𑀓𑀁𑀬𑁂𑀯 𑀪𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀏𑀓𑀩𑀻𑀚𑀻. 𑀢𑀣𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄. 𑀢𑀣𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 (𑀧𑀼. 𑀧. 𑁩𑁧-𑁩𑁩).

𑀢𑁂𑀲𑀁 𑀲𑀩𑁆𑀩𑀓𑀦𑀺𑀝𑁆𑀞𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺. 𑀢𑀢𑁆𑀣 𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀏𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀪𑀸𑀯𑀬𑀦𑁆𑀢𑀻𑀢𑀺 𑀧𑀜𑁆𑀜𑀸𑀑𑀪𑀸𑀲𑁂𑀦 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑀸𑀲𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀦𑁆𑀢𑀺. 𑀕𑀫𑁆𑀪𑀻𑀭𑀧𑀜𑁆𑀜𑁂𑀦𑀸𑀢𑀺 𑀅𑀧𑁆𑀧𑀫𑁂𑀬𑁆𑀬𑀧𑀜𑁆𑀜𑀢𑀸𑀬 𑀲𑀤𑁂𑀯𑀓𑀲𑁆𑀲𑀧𑀺 𑀮𑁄𑀓𑀲𑁆𑀲 𑀜𑀸𑀡𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀧𑀜𑁆𑀜𑁂𑀦, 𑀲𑀩𑁆𑀩𑀜𑁆𑀜𑀼𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀤𑁂𑀲𑀺𑀢𑀸𑀦𑀻𑀢𑀺 𑀲𑀫𑀸𑀲𑀩𑁆𑀬𑀸𑀲𑀲𑀸𑀓𑀮𑁆𑀬𑀯𑁂𑀓𑀮𑁆𑀬𑀸𑀤𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀦𑀬𑁂𑀳𑀺 𑀲𑀼𑀝𑁆𑀞𑀼 𑀤𑁂𑀲𑀺𑀢𑀸𑀦𑀺. 𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁 𑀧𑀫𑀢𑁆𑀢𑀸𑀢𑀺 𑀢𑁂 𑀯𑀺𑀪𑀸𑀯𑀺𑀢𑀅𑀭𑀺𑀬𑀲𑀘𑁆𑀘𑀸 𑀧𑀼𑀕𑁆𑀕𑀮𑀸 𑀓𑀺𑀜𑁆𑀘𑀸𑀧𑀺 𑀤𑁂𑀯𑀭𑀚𑁆𑀚𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀸𑀤𑀺𑀧𑁆𑀧𑀫𑀸𑀤𑀝𑁆𑀞𑀸𑀦𑀁 𑀆𑀕𑀫𑁆𑀫 𑀪𑀼𑀲𑀁 𑀧𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀞𑀧𑁂𑀢𑁆𑀯𑀸 𑀲𑀢𑁆𑀢 ¶ 𑀪𑀯𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 ¶ , 𑀢𑁂𑀲𑀁 𑀦𑀺𑀭𑀼𑀤𑁆𑀥𑀢𑁆𑀢𑀸 𑀅𑀢𑁆𑀣𑀗𑁆𑀕𑀢𑀢𑁆𑀢𑀸 𑀦 𑀅𑀝𑁆𑀞𑀫𑀁 𑀪𑀯𑀁 𑀆𑀤𑀺𑀬𑀦𑁆𑀢𑀺, 𑀲𑀢𑁆𑀢𑀫𑀪𑀯𑁂 𑀏𑀯 𑀧𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁩. 𑀏𑀯𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲 𑀅𑀝𑁆𑀞𑀫𑀁 𑀪𑀯𑀁 𑀅𑀦𑀸𑀤𑀺𑀬𑀦𑀕𑀼𑀡𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀢𑁄𑀧𑀺 𑀅𑀜𑁆𑀜𑁂𑀳𑀺 𑀅𑀧𑁆𑀧𑀳𑀻𑀦𑀪𑀯𑀸𑀤𑀸𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀺𑀝𑁆𑀞𑁂𑀦 𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀲𑀳𑀸𑀯𑀲𑁆𑀲𑀸’’𑀢𑀺. 𑀢𑀢𑁆𑀣 𑀲𑀳𑀸𑀯𑀸𑀢𑀺 𑀲𑀤𑁆𑀥𑀺𑀁𑀬𑁂𑀯. 𑀅𑀲𑁆𑀲𑀸𑀢𑀺 ‘‘𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀲𑁆𑀲. 𑀤𑀲𑁆𑀲𑀦𑀲𑀫𑁆𑀧𑀤𑀸𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀢𑁆𑀢𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑀫𑁆𑀧𑀤𑀸𑀬 𑀲𑀩𑁆𑀩𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀅𑀢𑁆𑀢𑀦𑀺 𑀧𑀸𑀢𑀼𑀪𑀸𑀯𑁄 𑀤𑀲𑁆𑀲𑀦𑀲𑀫𑁆𑀧𑀤𑀸, 𑀢𑀸𑀬 𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀲𑀳 𑀏𑀯. 𑀢𑀬𑀲𑁆𑀲𑀼 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀻𑀢𑀺 𑀏𑀢𑁆𑀣 𑀲𑀼𑀇𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. ‘‘𑀇𑀤𑀁𑀲𑀼 𑀫𑁂, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀯𑀺𑀓𑀝𑀪𑁄𑀚𑀦𑀲𑁆𑀫𑀺𑀁 𑀳𑁄𑀢𑀻’’𑀢𑀺𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁬) 𑀯𑀺𑀬. 𑀬𑀢𑁄 𑀲𑀳𑀸𑀯𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀢𑀬𑁄 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀺 𑀧𑀳𑀻𑀦𑀸 𑀪𑀯𑀦𑁆𑀢𑀻𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄.

𑀇𑀤𑀸𑀦𑀺 𑀚𑀳𑀺𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀆𑀳 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀻 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺. 𑀢𑀢𑁆𑀣 𑀲𑀢𑀺 𑀓𑀸𑀬𑁂 𑀯𑀺𑀚𑁆𑀚𑀫𑀸𑀦𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀓𑀸𑀬𑁂 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀢𑀻 𑀯𑀸 𑀢𑀢𑁆𑀣 𑀓𑀸𑀬𑁂 𑀤𑀺𑀝𑁆𑀞𑀻𑀢𑀺𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀓𑀸𑀬𑁂 𑀯𑀺𑀚𑁆𑀚𑀫𑀸𑀦𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀲𑀢𑀺𑀬𑁂𑀯 𑀯𑀸 𑀓𑀸𑀬𑁂 𑀤𑀺𑀝𑁆𑀞𑀻𑀢𑀺𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀓𑀸𑀬𑁂 𑀯𑀺𑀚𑁆𑀚𑀫𑀸𑀦𑁂 𑀭𑀽𑀧𑀸𑀤𑀺𑀲𑀗𑁆𑀔𑀸𑀢𑁄 𑀅𑀢𑁆𑀢𑀸𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀘 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀲𑀸 𑀳𑀺 𑀦𑁂𑀲𑀁 𑀫𑀽𑀮𑀁. 𑀲𑀩𑁆𑀩𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑀢𑁄 𑀧𑀜𑁆𑀜𑀸 ‘‘𑀘𑀺𑀓𑀺𑀘𑁆𑀙𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀜𑁆𑀜𑀸𑀘𑀺𑀓𑀺𑀘𑁆𑀙𑀺𑀢𑀁 𑀇𑀢𑁄 𑀯𑀺𑀕𑀢𑀁, 𑀢𑀢𑁄 𑀯𑀸 𑀧𑀜𑁆𑀜𑀸𑀘𑀺𑀓𑀺𑀘𑁆𑀙𑀺𑀢𑀸 𑀇𑀤𑀁 𑀯𑀺𑀕𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀺𑀢𑀁, ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁦𑁮; 𑀯𑀺𑀪. 𑁯𑁧𑁫) 𑀦𑀬𑁂𑀦 ¶ 𑀯𑀼𑀢𑁆𑀢𑀸𑀬 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀯𑀺𑀫𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀲𑀸 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀜𑁆𑀳𑀺 𑀦𑁂𑀲𑀁 𑀫𑀽𑀮𑀁. ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺𑀏𑀯𑀫𑀸𑀤𑀻𑀲𑀼 (𑀥. 𑀲. 𑁧𑁨𑁨𑁨; 𑀯𑀺𑀪. 𑁯𑁩𑁮) 𑀆𑀕𑀢𑀁 𑀕𑁄𑀲𑀻𑀮𑀓𑀼𑀓𑁆𑀓𑀼𑀭𑀲𑀻𑀮𑀸𑀤𑀺𑀓𑀁 𑀲𑀻𑀮𑀁 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀸𑀤𑀺𑀓𑀜𑁆𑀘 𑀯𑀢𑀁 ‘‘𑀲𑀻𑀮𑀩𑁆𑀩𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀦𑀕𑁆𑀕𑀺𑀬𑀫𑀼𑀡𑁆𑀟𑀺𑀓𑀸𑀤𑀺 𑀅𑀫𑀭𑀢𑀧𑀁 𑀧𑀳𑀻𑀦𑀁 𑀳𑁄𑀢𑀺. 𑀢𑀜𑁆𑀳𑀺 𑀢𑀲𑁆𑀲 𑀫𑀽𑀮𑀁. 𑀢𑁂𑀦 𑀲𑀩𑁆𑀩𑀸𑀯𑀲𑀸𑀦𑁂 𑀯𑀼𑀢𑁆𑀢𑀁 ‘‘𑀬𑀤𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺. 𑀤𑀼𑀓𑁆𑀔𑀤𑀲𑁆𑀲𑀦𑀲𑀫𑁆𑀧𑀤𑀸𑀬 ¶ 𑀘𑁂𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀫𑀼𑀤𑀬𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀯𑀺𑀘𑀺𑀓𑀺𑀘𑁆𑀙𑀺𑀢𑀁, 𑀫𑀕𑁆𑀕𑀤𑀲𑁆𑀲𑀦𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀲𑀫𑁆𑀧𑀤𑀸𑀬 𑀲𑀻𑀮𑀩𑁆𑀩𑀢𑀁 𑀧𑀳𑀻𑀬𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁.

𑁨𑁩𑁪. 𑀏𑀯𑀫𑀲𑁆𑀲 𑀓𑀺𑀮𑁂𑀲𑀯𑀝𑁆𑀝𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀓𑀺𑀮𑁂𑀲𑀯𑀝𑁆𑀝𑁂 𑀲𑀢𑀺 𑀬𑁂𑀦 𑀯𑀺𑀧𑀸𑀓𑀯𑀝𑁆𑀝𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀧𑁆𑀧𑀳𑀸𑀦𑀸 𑀢𑀲𑁆𑀲𑀸𑀧𑀺 𑀧𑀳𑀸𑀦𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀘𑀢𑀽𑀳𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀦𑀸𑀫 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀅𑀲𑀼𑀭𑀓𑀸𑀬𑀸, 𑀢𑁂𑀳𑀺 𑀏𑀲 𑀲𑀢𑁆𑀢 𑀪𑀯𑁂 𑀉𑀧𑀸𑀤𑀺𑀬𑀦𑁆𑀢𑁄𑀧𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀫𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀇𑀫𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀫𑀽𑀮𑀪𑀽𑀢𑀁 𑀓𑀫𑁆𑀫𑀯𑀝𑁆𑀝𑀁, 𑀢𑀲𑁆𑀲𑀸𑀧𑀺 𑀧𑀳𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀘𑁆𑀘𑀸𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩 𑀓𑀸𑀢𑀼’’𑀦𑁆𑀢𑀺. 𑀢𑀢𑁆𑀣 𑀅𑀪𑀺𑀞𑀸𑀦𑀸𑀦𑀻𑀢𑀺 𑀑𑀴𑀸𑀭𑀺𑀓𑀝𑁆𑀞𑀸𑀦𑀸𑀦𑀺, 𑀢𑀸𑀦𑀺 𑀏𑀲 𑀙 𑀅𑀪𑀩𑁆𑀩𑁄 𑀓𑀸𑀢𑀼𑀁. 𑀢𑀸𑀦𑀺 𑀘 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧.𑁨𑁭𑁧; 𑀫. 𑀦𑀺. 𑁩.𑁧𑁨𑁮; 𑀯𑀺𑀪. 𑁮𑁦𑁯) 𑀦𑀬𑁂𑀦 𑀏𑀓𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀸𑀦𑀺 𑀫𑀸𑀢𑀼𑀖𑀸𑀢𑀧𑀺𑀢𑀼𑀖𑀸𑀢𑀅𑀭𑀳𑀦𑁆𑀢𑀖𑀸𑀢𑀮𑁄𑀳𑀺𑀢𑀼𑀧𑁆𑀧𑀸𑀤𑀲𑀗𑁆𑀖𑀪𑁂𑀤𑀅𑀜𑁆𑀜𑀲𑀢𑁆𑀣𑀸𑀭𑀼𑀤𑁆𑀤𑁂𑀲𑀓𑀫𑁆𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀢𑀺, 𑀅𑀧𑀺𑀘 𑀔𑁄 𑀧𑀦 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀯𑀺𑀕𑀭𑀳𑀡𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀅𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀏𑀯𑀁𑀫𑀳𑀸𑀲𑀸𑀯𑀚𑁆𑀚𑀸𑀦𑀺 𑀅𑀪𑀺𑀞𑀸𑀦𑀸𑀦𑀺𑀧𑀺 𑀓𑀭𑁄𑀢𑀺, 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀧𑀦 𑀅𑀪𑀩𑁆𑀩𑁄 𑀢𑀸𑀦𑀺 𑀓𑀸𑀢𑀼𑀦𑁆𑀢𑀺. 𑀅𑀪𑀩𑁆𑀩𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀪𑀯𑀦𑁆𑀢𑀭𑁂𑀧𑀺 𑀅𑀓𑀭𑀡𑀤𑀲𑁆𑀲𑀦𑀢𑁆𑀣𑀁. 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀏𑀲 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀧𑀺 𑀥𑀫𑁆𑀫𑀢𑀸𑀬 𑀏𑀯 𑀏𑀢𑀸𑀦𑀺 𑀯𑀸 𑀙, 𑀧𑀓𑀢𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀯𑀸 𑀧𑀜𑁆𑀘 𑀯𑁂𑀭𑀸𑀦𑀺 𑀅𑀜𑁆𑀜𑀲𑀢𑁆𑀣𑀸𑀭𑀼𑀤𑁆𑀤𑁂𑀲𑁂𑀦 𑀲𑀳 𑀙 𑀞𑀸𑀦𑀸𑀦𑀺 𑀦 𑀓𑀭𑁄𑀢𑀺, 𑀬𑀸𑀦𑀺 𑀲𑀦𑁆𑀥𑀸𑀬 𑀏𑀓𑀘𑁆𑀘𑁂 ‘‘𑀙𑀙𑀸𑀪𑀺𑀞𑀸𑀦𑀸𑀦𑀻’’𑀢𑀺 𑀧𑀞𑀦𑁆𑀢𑀺. 𑀫𑀢𑀫𑀘𑁆𑀙𑀕𑁆𑀕𑀸𑀳𑀸𑀤𑀬𑁄 𑀘𑁂𑀢𑁆𑀣 𑀅𑀭𑀺𑀬𑀲𑀸𑀯𑀓𑀕𑀸𑀫𑀤𑀸𑀭𑀓𑀸𑀦𑀁 𑀦𑀺𑀤𑀲𑁆𑀲𑀦𑀁.

𑀏𑀯𑀁 ¶ 𑀪𑀕𑀯𑀸 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀢𑁄𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀜𑁆𑀜𑁂𑀳𑀺 𑀅𑀧𑁆𑀧𑀳𑀻𑀦𑀪𑀯𑀸𑀤𑀸𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀺𑀝𑁆𑀞𑀕𑀼𑀡𑀯𑀲𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁫. 𑀏𑀯𑀁 𑀲𑀢𑁆𑀢 𑀪𑀯𑁂 𑀆𑀤𑀺𑀬𑀢𑁄𑀧𑀺 𑀅𑀜𑁆𑀜𑁂𑀳𑀺 𑀅𑀧𑁆𑀧𑀳𑀻𑀦𑀪𑀯𑀸𑀤𑀸𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀺𑀝𑁆𑀞𑀕𑀼𑀡𑀯𑀲𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀦 𑀓𑁂𑀯𑀮𑀁 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀙 𑀅𑀪𑀺𑀞𑀸𑀦𑀸𑀦𑀺 𑀅𑀪𑀩𑁆𑀩𑁄 𑀓𑀸𑀢𑀼𑀁, 𑀓𑀺𑀁 𑀧𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀸𑀬𑀧𑀺 𑀅𑀪𑀩𑁆𑀩𑁄’’𑀢𑀺 𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀧𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀓𑀢𑀧𑀝𑀺𑀘𑁆𑀙𑀸𑀤𑀦𑀸𑀪𑀸𑀯𑀕𑀼𑀡𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀧𑀸𑀧𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀲𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀓𑀺𑀜𑁆𑀘𑀸𑀧𑀺 𑀲𑀢𑀺𑀲𑀫𑁆𑀫𑁄𑀲𑁂𑀦 𑀧𑀫𑀸𑀤𑀯𑀺𑀳𑀸𑀭𑀁 𑀆𑀕𑀫𑁆𑀫 𑀬𑀁 𑀢𑀁 𑀪𑀕𑀯𑀢𑀸 𑀮𑁄𑀓𑀯𑀚𑁆𑀚𑀲𑀜𑁆𑀘𑀺𑀘𑁆𑀘𑀸𑀦𑀢𑀺𑀓𑁆𑀓𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀘𑀽𑀴𑀯. 𑁩𑁮𑁫; 𑀅. 𑀦𑀺. 𑁮.𑁧𑁯; 𑀉𑀤𑀸. 𑁪𑁫), 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀼𑀝𑀺𑀓𑀸𑀭𑀲𑀳𑀲𑁂𑀬𑁆𑀬𑀸𑀤𑀺𑀁 𑀯𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀁 𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀤𑀲𑁄𑀥𑀫𑁆𑀫𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀥𑀫𑁆𑀫𑀤𑁂𑀲𑀦𑀸𑀲𑀫𑁆𑀨𑀧𑁆𑀧𑀮𑀸𑀧𑀨𑀭𑀼𑀲𑀯𑀘𑀦𑀸𑀤𑀺𑀁 𑀯𑀸 𑀯𑀸𑀘𑀸𑀬, 𑀉𑀤 𑀘𑁂𑀢𑀲𑀸 𑀯𑀸 𑀓𑀢𑁆𑀣𑀘𑀺 𑀮𑁄𑀪𑀤𑁄𑀲𑀼𑀧𑁆𑀧𑀸𑀤𑀦𑀚𑀸𑀢𑀭𑀽𑀧𑀸𑀤𑀺𑀲𑀸𑀤𑀺𑀬𑀦𑀁 𑀘𑀻𑀯𑀭𑀸𑀤𑀺𑀧𑀭𑀺𑀪𑁄𑀕𑁂𑀲𑀼 𑀅𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀁 𑀯𑀸 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀪𑀩𑁆𑀩𑁄 𑀲𑁄 𑀢𑀲𑁆𑀲 𑀧𑀝𑀺𑀘𑁆𑀙𑀤𑀸𑀬, 𑀦 𑀲𑁄 𑀢𑀁 ‘‘𑀇𑀤𑀁 𑀅𑀓𑀧𑁆𑀧𑀺𑀬𑀫𑀓𑀭𑀡𑀻𑀬’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀧𑀦 𑀲𑀢𑁆𑀣𑀭𑀺 𑀯𑀸 𑀯𑀺𑀜𑁆𑀜𑀽𑀲𑀼 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀓𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, ‘‘𑀦 𑀧𑀼𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀁𑀯𑀭𑀺𑀢𑀩𑁆𑀩𑀁 𑀯𑀸 𑀲𑀁𑀯𑀭𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀪𑀩𑁆𑀩𑀢𑀸 𑀤𑀺𑀝𑁆𑀞𑀧𑀤𑀲𑁆𑀲 𑀯𑀼𑀢𑁆𑀢𑀸, 𑀏𑀯𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀸𑀬 𑀤𑀺𑀝𑁆𑀞𑀦𑀺𑀩𑁆𑀩𑀸𑀦𑀧𑀤𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀪𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀓𑀣𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀳𑀭𑁄 𑀓𑀼𑀫𑀸𑀭𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀅𑀗𑁆𑀕𑀸𑀭𑀁 𑀅𑀓𑁆𑀓𑀫𑀺𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀧𑀝𑀺𑀲𑀁𑀳𑀭𑀢𑀺 ¶ , 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀖𑀫𑁆𑀫𑀢𑀸 𑀏𑀲𑀸 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀓𑀺𑀜𑁆𑀘𑀸𑀧𑀺 𑀢𑀣𑀸𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀬𑀣𑀸𑀭𑀽𑀧𑀸𑀬 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀲𑀢𑁆𑀣𑀭𑀺 𑀯𑀸 𑀯𑀺𑀜𑁆𑀜𑀽𑀲𑀼 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀤𑁂𑀲𑁂𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺, 𑀤𑁂𑀲𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀉𑀢𑁆𑀢𑀸𑀦𑀻𑀓𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁪𑁯𑁬).

𑀏𑀯𑀁 𑀪𑀕𑀯𑀸 𑀧𑀫𑀸𑀤𑀯𑀺𑀳𑀸𑀭𑀺𑀦𑁄𑀧𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀓𑀢𑀧𑀝𑀺𑀘𑁆𑀙𑀸𑀤𑀦𑀸𑀪𑀸𑀯𑀕𑀼𑀡𑁂𑀦 𑀲𑀗𑁆𑀖𑀭𑀢𑀦𑀲𑁆𑀲 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁬. 𑀏𑀯𑀁 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀢𑁂𑀦 𑀢𑁂𑀦 𑀕𑀼𑀡𑀧𑁆𑀧𑀓𑀸𑀭𑁂𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁆𑀯𑀸𑀬𑀁 𑀪𑀕𑀯𑀢𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀤𑀻𑀧𑁂𑀦𑁆𑀢𑁂𑀦 𑀇𑀥 𑀲𑀗𑁆𑀔𑁂𑀧𑁂𑀦 𑀅𑀜𑁆𑀜𑀢𑁆𑀭 𑀘 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀧𑀼𑀦 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣 𑀨𑀼𑀲𑁆𑀲𑀺𑀢𑀕𑁆𑀕𑁂’’𑀢𑀺. 𑀢𑀢𑁆𑀣 𑀆𑀲𑀦𑁆𑀦𑀲𑀦𑁆𑀦𑀺𑀯𑁂𑀲𑀯𑀯𑀢𑁆𑀣𑀺𑀢𑀸𑀦𑀁 𑀭𑀼𑀓𑁆𑀔𑀸𑀦𑀁 𑀲𑀫𑀽𑀳𑁄 𑀯𑀦𑀁, 𑀫𑀽𑀮𑀲𑀸𑀭𑀨𑁂𑀕𑁆𑀕𑀼𑀢𑀘𑀲𑀸𑀔𑀸𑀧𑀮𑀸𑀲𑁂𑀳𑀺 𑀧𑀯𑀼𑀟𑁆𑀠𑁄 𑀕𑀼𑀫𑁆𑀩𑁄 𑀧𑀕𑀼𑀫𑁆𑀩𑁄, 𑀯𑀦𑁂 𑀧𑀕𑀼𑀫𑁆𑀩𑁄 𑀯𑀦𑀧𑁆𑀧𑀕𑀼𑀫𑁆𑀩𑁄, 𑀲𑁆𑀯𑀸𑀬𑀁 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂’’𑀢𑀺 𑀯𑀼𑀢𑁆𑀢𑁄 ¶ . 𑀏𑀯𑀫𑁆𑀧𑀺 𑀳𑀺 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺 ‘‘𑀅𑀢𑁆𑀣𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂, 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂, 𑀲𑀼𑀔𑁂 𑀤𑀼𑀓𑁆𑀔𑁂 𑀚𑀻𑀯𑁂’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀣𑀸𑀢𑀺 𑀑𑀧𑀫𑁆𑀫𑀯𑀘𑀦𑀁. 𑀨𑀼𑀲𑁆𑀲𑀺𑀢𑀸𑀦𑀺 𑀅𑀕𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀨𑀼𑀲𑁆𑀲𑀺𑀢𑀕𑁆𑀕𑁄, 𑀲𑀩𑁆𑀩𑀲𑀸𑀔𑀸𑀧𑀲𑀸𑀔𑀸𑀲𑀼 𑀲𑀜𑁆𑀚𑀸𑀢𑀧𑀼𑀧𑁆𑀨𑁄𑀢𑀺 𑀅𑀢𑁆𑀣𑁄. 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀨𑀼𑀲𑁆𑀲𑀺𑀢𑀕𑁆𑀕𑁂’’𑀢𑀺 𑀯𑀼𑀢𑁆𑀢𑁄. 𑀕𑀺𑀫𑁆𑀳𑀸𑀦 𑀫𑀸𑀲𑁂 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂𑀢𑀺 𑀬𑁂 𑀘𑀢𑁆𑀢𑀸𑀭𑁄 𑀕𑀺𑀫𑁆𑀳𑀫𑀸𑀲𑀸, 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀕𑀺𑀫𑁆𑀳𑀸𑀦𑀁 𑀏𑀓𑀲𑁆𑀫𑀺𑀁 𑀫𑀸𑀲𑁂. 𑀓𑀢𑀫𑀲𑁆𑀫𑀺𑀁 𑀫𑀸𑀲𑁂 𑀇𑀢𑀺 𑀘𑁂? 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂, 𑀘𑀺𑀢𑁆𑀭𑀫𑀸𑀲𑁂𑀢𑀺 𑀅𑀢𑁆𑀣𑁄. 𑀲𑁄 𑀳𑀺 ‘‘𑀧𑀞𑀫𑀕𑀺𑀫𑁆𑀳𑁄’’𑀢𑀺 𑀘 ‘‘𑀩𑀸𑀮𑀯𑀲𑀦𑁆𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀢𑁄 𑀧𑀭𑀁 𑀧𑀤𑀢𑁆𑀣𑀢𑁄 𑀧𑀸𑀓𑀝𑀫𑁂𑀯.

𑀅𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄 𑁋 𑀬𑀣𑀸 𑀧𑀞𑀫𑀕𑀺𑀫𑁆𑀳𑀦𑀸𑀫𑀓𑁂 𑀩𑀸𑀮𑀯𑀲𑀦𑁆𑀢𑁂 𑀦𑀸𑀦𑀸𑀯𑀺𑀥𑀭𑀼𑀓𑁆𑀔𑀕𑀳𑀦𑁂 𑀯𑀦𑁂 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀲𑀸𑀔𑁄 𑀢𑀭𑀼𑀡𑀭𑀼𑀓𑁆𑀔𑀕𑀘𑁆𑀙𑀧𑀭𑀺𑀬𑀸𑀬𑀦𑀸𑀫𑁄 𑀧𑀕𑀼𑀫𑁆𑀩𑁄 𑀅𑀢𑀺𑀯𑀺𑀬 𑀲𑀲𑁆𑀲𑀺𑀭𑀺𑀓𑁄 𑀳𑁄𑀢𑀺, 𑀏𑀯𑀫𑁂𑀯𑀁 𑀔𑀦𑁆𑀥𑀸𑀬𑀢𑀦𑀸𑀤𑀻𑀳𑀺 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀳𑀺 ¶ 𑀲𑀻𑀮𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀢𑁆𑀣𑀧𑁆𑀧𑀪𑁂𑀤𑀧𑀼𑀧𑁆𑀨𑁂𑀳𑀺 𑀅𑀢𑀺𑀯𑀺𑀬 𑀲𑀲𑁆𑀲𑀺𑀭𑀺𑀓𑀢𑁆𑀢𑀸 𑀢𑀣𑀽𑀧𑀫𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀤𑀻𑀧𑀦𑀢𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀭𑀁 𑀦𑁂𑀯 𑀮𑀸𑀪𑀳𑁂𑀢𑀼 𑀦 𑀲𑀓𑁆𑀓𑀸𑀭𑀸𑀤𑀺𑀳𑁂𑀢𑀼, 𑀓𑁂𑀯𑀮𑀜𑁆𑀳𑀺 𑀫𑀳𑀸𑀓𑀭𑀼𑀡𑀸𑀬 𑀅𑀩𑁆𑀪𑀼𑀲𑁆𑀲𑀸𑀳𑀺𑀢𑀳𑀤𑀬𑁄 𑀲𑀢𑁆𑀢𑀸𑀦𑀁 𑀧𑀭𑀫𑀁𑀳𑀺𑀢𑀸𑀬 𑀅𑀤𑁂𑀲𑀬𑀻𑀢𑀺. 𑀧𑀭𑀫𑀁𑀳𑀺𑀢𑀸𑀬𑀸𑀢𑀺 𑀏𑀢𑁆𑀣 𑀘 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀅𑀦𑀼𑀦𑀸𑀲𑀺𑀓𑁄, 𑀅𑀬𑀁 𑀧𑀦𑀢𑁆𑀣𑁄 ‘‘𑀧𑀭𑀫𑀳𑀺𑀢𑀸𑀬 𑀦𑀺𑀩𑁆𑀩𑀸𑀦𑀸𑀬 𑀅𑀤𑁂𑀲𑀬𑀻’’𑀢𑀺.

𑀏𑀯𑀁 𑀪𑀕𑀯𑀸 𑀇𑀫𑀁 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀯𑀦𑀧𑁆𑀧𑀕𑀼𑀫𑁆𑀩𑀲𑀤𑀺𑀲𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀓𑁂𑀯𑀮𑀁 𑀧𑀦 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁭. 𑀏𑀯𑀁 𑀪𑀕𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀯𑀭𑁄 𑀯𑀭𑀜𑁆𑀜𑀽’’𑀢𑀺. 𑀢𑀢𑁆𑀣 𑀯𑀭𑁄𑀢𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀇𑀘𑁆𑀙𑀺𑀢𑁄 ‘‘𑀅𑀳𑁄 𑀯𑀢 𑀫𑀬𑀫𑁆𑀧𑀺 𑀏𑀯𑀭𑀽𑀧𑀸 𑀅𑀲𑁆𑀲𑀸𑀫𑀸’’𑀢𑀺, 𑀯𑀭𑀕𑀼𑀡𑀬𑁄𑀕𑀢𑁄 𑀯𑀸 𑀯𑀭𑁄, 𑀉𑀢𑁆𑀢𑀫𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀯𑀭𑀜𑁆𑀜𑀽𑀢𑀺 𑀦𑀺𑀩𑁆𑀩𑀸𑀦𑀜𑁆𑀜𑀽. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀉𑀢𑁆𑀢𑀫𑀝𑁆𑀞𑁂𑀦 𑀯𑀭𑀁, 𑀢𑀜𑁆𑀘𑁂𑀲 𑀩𑁄𑀥𑀺𑀫𑀽𑀮𑁂 𑀲𑀬𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀸𑀲𑀺. 𑀯𑀭𑀤𑁄𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀪𑀤𑁆𑀤𑀯𑀕𑁆𑀕𑀺𑀬𑀚𑀝𑀺𑀮𑀸𑀤𑀻𑀦𑀁 𑀅𑀜𑁆𑀜𑁂𑀲𑀜𑁆𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀯𑀸𑀲𑀦𑀸𑀪𑀸𑀕𑀺𑀬𑀯𑀭𑀥𑀫𑁆𑀫𑀤𑀸𑀬𑀻𑀢𑀺 𑀅𑀢𑁆𑀣𑁄. 𑀯𑀭𑀸𑀳𑀭𑁄𑀢𑀺 𑀯𑀭𑀲𑁆𑀲 𑀫𑀕𑁆𑀕𑀲𑁆𑀲 𑀆𑀳𑀝𑀢𑁆𑀢𑀸 𑀯𑀭𑀸𑀳𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀪𑀕𑀯𑀸 𑀤𑀻𑀧𑀗𑁆𑀓𑀭𑀢𑁄 𑀧𑀪𑀼𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢𑀁 𑀧𑀼𑀭𑀸𑀡𑀁 𑀫𑀕𑁆𑀕𑀯𑀭𑀁 𑀆𑀳𑀭𑀺, 𑀢𑁂𑀦 𑀯𑀭𑀸𑀳𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑁂𑀦 𑀯𑀭𑁄, 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀭𑀜𑁆𑀜𑀽, 𑀲𑀢𑁆𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀤𑀸𑀦𑁂𑀦 𑀯𑀭𑀤𑁄, 𑀉𑀢𑁆𑀢𑀫𑀧𑀝𑀺𑀧𑀤𑀸𑀳𑀭𑀡𑁂𑀦 𑀯𑀭𑀸𑀳𑀭𑁄, 𑀏𑀢𑁂𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀅𑀥𑀺𑀓𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑁄.

𑀅𑀧𑀭𑁄 ¶ 𑀦𑀬𑁄 𑁋 𑀯𑀭𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀜𑁆𑀜𑀽 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀤𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀸𑀳𑀭𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑁂𑀦, 𑀯𑀭𑀁 𑀫𑀕𑁆𑀕𑀲𑀘𑁆𑀘𑀫𑀸𑀳𑀭𑀻𑀢𑀺. 𑀢𑀣𑀸 𑀯𑀭𑁄 𑀧𑀼𑀜𑁆𑀜𑀼𑀲𑁆𑀲𑀬𑁂𑀦, 𑀯𑀭𑀜𑁆𑀜𑀽 𑀧𑀜𑁆𑀜𑀼𑀲𑁆𑀲𑀬𑁂𑀦, 𑀯𑀭𑀤𑁄 𑀩𑀼𑀤𑁆𑀥𑀪𑀸𑀯𑀢𑁆𑀣𑀺𑀓𑀸𑀦𑀁 𑀢𑀤𑀼𑀧𑀸𑀬𑀲𑀫𑁆𑀧𑀤𑀸𑀦𑁂𑀦, 𑀯𑀭𑀸𑀳𑀭𑁄 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀯𑀢𑁆𑀣𑀺𑀓𑀸𑀦𑀁 𑀢𑀤𑀼𑀧𑀸𑀬𑀸𑀳𑀭𑀡𑁂𑀦, 𑀅𑀦𑀼𑀢𑁆𑀢𑀭𑁄 𑀢𑀢𑁆𑀣 𑀢𑀢𑁆𑀣 𑀅𑀲𑀤𑀺𑀲𑀢𑀸𑀬, 𑀅𑀢𑁆𑀢𑀦𑀸 𑀯𑀸 𑀅𑀦𑀸𑀘𑀭𑀺𑀬𑀓𑁄 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀆𑀘𑀭𑀺𑀬𑀪𑀸𑀯𑁂𑀦, 𑀥𑀫𑁆𑀫𑀯𑀭𑀁 𑀅𑀤𑁂𑀲𑀬𑀺 𑀲𑀸𑀯𑀓𑀪𑀸𑀯𑀢𑁆𑀣𑀺𑀓𑀸𑀦𑀁 𑀢𑀤𑀢𑁆𑀣𑀸𑀬 𑀲𑁆𑀯𑀸𑀔𑀸𑀢𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑀲𑁆𑀲 𑀯𑀭𑀥𑀫𑁆𑀫𑀲𑁆𑀲 𑀤𑁂𑀲𑀦𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀏𑀯𑀁 𑀪𑀕𑀯𑀸 𑀦𑀯𑀯𑀺𑀥𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀦 𑀅𑀢𑁆𑀢𑀦𑁄 𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀢𑀺 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀬𑀁 𑀯𑀭𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀏𑀲 𑀅𑀜𑁆𑀜𑀸𑀲𑀺, 𑀬𑀜𑁆𑀘 𑀅𑀤𑀸𑀲𑀺, 𑀬𑀜𑁆𑀘 𑀆𑀳𑀭𑀺, 𑀬𑀜𑁆𑀘 𑀅𑀤𑁂𑀲𑀬𑀺, 𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑁨𑁩𑁮. 𑀏𑀯𑀁 𑀪𑀕𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀜𑁆𑀘 𑀦𑀺𑀲𑁆𑀲𑀸𑀬 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁 𑀲𑀼𑀢𑀸𑀦𑀼𑀲𑀸𑀭𑁂𑀦 𑀘 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦𑀯𑀧𑁆𑀧𑀓𑀸𑀭𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀫𑀺𑀁𑀲𑀼, 𑀢𑁂𑀲𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀕𑀼𑀡𑀁 𑀦𑀺𑀲𑁆𑀲𑀸𑀬 𑀧𑀼𑀦 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄 ‘‘𑀔𑀻𑀡𑀁 𑀧𑀼𑀭𑀸𑀡’’𑀦𑁆𑀢𑀺. 𑀢𑀢𑁆𑀣 𑀔𑀻𑀡𑀦𑁆𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀁. 𑀧𑀼𑀭𑀸𑀡𑀦𑁆𑀢𑀺 𑀧𑀼𑀭𑀸𑀢𑀦𑀁. 𑀦𑀯𑀦𑁆𑀢𑀺 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁. 𑀦𑀢𑁆𑀣𑀺𑀲𑀫𑁆𑀪𑀯𑀦𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀸𑀢𑀼𑀪𑀸𑀯𑀁. 𑀯𑀺𑀭𑀢𑁆𑀢𑀘𑀺𑀢𑁆𑀢𑀸𑀢𑀺 𑀯𑀺𑀕𑀢𑀭𑀸𑀕𑀘𑀺𑀢𑁆𑀢𑀸. 𑀆𑀬𑀢𑀺𑀓𑁂 𑀪𑀯𑀲𑁆𑀫𑀺𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀧𑀼𑀦𑀩𑁆𑀪𑀯𑁂. 𑀢𑁂𑀢𑀺 𑀬𑁂𑀲𑀁 𑀔𑀻𑀡𑀁 𑀧𑀼𑀭𑀸𑀡𑀁 𑀦𑀯𑀁 𑀦𑀢𑁆𑀣𑀺𑀲𑀫𑁆𑀪𑀯𑀁, 𑀬𑁂 𑀘 𑀆𑀬𑀢𑀺𑀓𑁂 𑀪𑀯𑀲𑁆𑀫𑀺𑀁 𑀯𑀺𑀭𑀢𑁆𑀢𑀘𑀺𑀢𑁆𑀢𑀸, 𑀢𑁂 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽. 𑀔𑀻𑀡𑀩𑀻𑀚𑀸𑀢𑀺 𑀉𑀘𑁆𑀙𑀺𑀦𑁆𑀦𑀩𑀻𑀚𑀸. 𑀅𑀯𑀺𑀭𑀽𑀴𑁆𑀳𑀺𑀙𑀦𑁆𑀤𑀸𑀢𑀺 𑀯𑀺𑀭𑀽𑀴𑁆𑀳𑀺𑀙𑀦𑁆𑀤𑀯𑀺𑀭𑀳𑀺𑀢𑀸. 𑀦𑀺𑀩𑁆𑀩𑀦𑁆𑀢𑀻𑀢𑀺 𑀯𑀺𑀚𑁆𑀛𑀸𑀬𑀦𑁆𑀢𑀺. 𑀥𑀻𑀭𑀸𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀸. 𑀬𑀣𑀸𑀬𑀁 𑀧𑀤𑀻𑀧𑁄𑀢𑀺 𑀅𑀬𑀁 𑀧𑀤𑀻𑀧𑁄 𑀯𑀺𑀬.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀁 𑀢𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀫𑁆𑀧𑀺 𑀧𑀼𑀭𑀸𑀡𑀁 𑀅𑀢𑀻𑀢𑀓𑀸𑀮𑀺𑀓𑀁 𑀓𑀫𑁆𑀫𑀁 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀆𑀳𑀭𑀡𑀲𑀫𑀢𑁆𑀣𑀢𑀸𑀬 𑀅𑀔𑀻𑀡𑀁𑀬𑁂𑀯 𑀳𑁄𑀢𑀺, 𑀢𑀁 𑀧𑀼𑀭𑀸𑀡𑀁 𑀓𑀫𑁆𑀫𑀁 𑀬𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀡𑁆𑀳𑀸𑀲𑀺𑀦𑁂𑀳𑀲𑁆𑀲 𑀲𑁄𑀲𑀺𑀢𑀢𑁆𑀢𑀸 𑀅𑀕𑁆𑀕𑀺𑀦𑀸 𑀤𑀟𑁆𑀠𑀩𑀻𑀚𑀫𑀺𑀯 𑀆𑀬𑀢𑀺𑀁 𑀯𑀺𑀧𑀸𑀓𑀤𑀸𑀦𑀸𑀲𑀫𑀢𑁆𑀣𑀢𑀸𑀬 𑀔𑀻𑀡𑀁. 𑀬𑀜𑁆𑀘 𑀦𑁂𑀲𑀁 𑀩𑀼𑀤𑁆𑀥𑀧𑀽𑀚𑀸𑀤𑀺𑀯𑀲𑁂𑀦 𑀇𑀤𑀸𑀦𑀺 𑀧𑀯𑀢𑁆𑀢𑀫𑀸𑀦𑀁 𑀓𑀫𑁆𑀫𑀁 𑀦𑀯𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀢𑀡𑁆𑀳𑀸𑀧𑀳𑀸𑀦𑁂𑀦𑁂𑀯 𑀙𑀺𑀦𑁆𑀦𑀫𑀽𑀮𑀧𑀸𑀤𑀧𑀧𑀼𑀧𑁆𑀨𑀫𑀺𑀯 𑀆𑀬𑀢𑀺𑀁 𑀨𑀮𑀤𑀸𑀦𑀸𑀲𑀫𑀢𑁆𑀣𑀢𑀸𑀬 𑀬𑁂𑀲𑀁 𑀦𑀢𑁆𑀣𑀺𑀲𑀫𑁆𑀪𑀯𑀁, 𑀬𑁂 𑀘 𑀢𑀡𑁆𑀳𑀸𑀧𑀳𑀸𑀦𑁂𑀦𑁂𑀯 𑀆𑀬𑀢𑀺𑀓𑁂 𑀪𑀯𑀲𑁆𑀫𑀺𑀁 𑀯𑀺𑀭𑀢𑁆𑀢𑀘𑀺𑀢𑁆𑀢𑀸, 𑀢𑁂 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽 ‘‘𑀓𑀫𑁆𑀫𑀁 𑀔𑁂𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 ¶ 𑀩𑀻𑀚’’𑀦𑁆𑀢𑀺 (𑀅. 𑀦𑀺. 𑁩.𑁭𑁭) 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀓𑀫𑁆𑀫𑀓𑁆𑀔𑀬𑁂𑀦𑁂𑀯 𑀔𑀻𑀡𑀢𑁆𑀢𑀸 𑀔𑀻𑀡𑀩𑀻𑀚𑀸. 𑀬𑁄𑀧𑀺 𑀧𑀼𑀩𑁆𑀩𑁂 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀢𑀸𑀬 𑀯𑀺𑀭𑀽𑀴𑁆𑀳𑀺𑀬𑀸 𑀙𑀦𑁆𑀤𑁄 𑀅𑀳𑁄𑀲𑀺, 𑀢𑀲𑁆𑀲𑀸𑀧𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦𑁂𑀯 𑀧𑀳𑀻𑀦𑀢𑁆𑀢𑀸 𑀧𑀼𑀩𑁆𑀩𑁂 𑀯𑀺𑀬 𑀘𑀼𑀢𑀺𑀓𑀸𑀮𑁂 𑀅𑀲𑀫𑁆𑀪𑀯𑁂𑀦 𑀅𑀯𑀺𑀭𑀽𑀴𑁆𑀳𑀺𑀙𑀦𑁆𑀤𑀸 ¶ 𑀥𑀺𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀥𑀻𑀭𑀸 𑀘𑀭𑀺𑀫𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀬𑀣𑀸𑀬𑀁 𑀧𑀤𑀻𑀧𑁄 𑀦𑀺𑀩𑁆𑀩𑀼𑀢𑁄, 𑀏𑀯𑀁 𑀦𑀺𑀩𑁆𑀩𑀦𑁆𑀢𑀺, 𑀧𑀼𑀦 ‘‘𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸’’𑀢𑀺 𑀏𑀯𑀫𑀸𑀤𑀺𑀁 𑀧𑀜𑁆𑀜𑀢𑁆𑀢𑀺𑀧𑀣𑀁 𑀅𑀘𑁆𑀘𑁂𑀦𑁆𑀢𑀻𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀦𑀕𑀭𑀤𑁂𑀯𑀢𑀸𑀦𑀁 𑀧𑀽𑀚𑀦𑀢𑁆𑀣𑀸𑀬 𑀚𑀸𑀮𑀺𑀢𑁂𑀲𑀼 𑀧𑀤𑀻𑀧𑁂𑀲𑀼 𑀏𑀓𑁄 𑀧𑀤𑀻𑀧𑁄 𑀯𑀺𑀚𑁆𑀛𑀸𑀬𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀬𑀣𑀸𑀬𑀁 𑀧𑀤𑀻𑀧𑁄’’𑀢𑀺.

𑀏𑀯𑀁 𑀪𑀕𑀯𑀸 𑀬𑁂 𑀢𑀁 𑀧𑀼𑀭𑀺𑀫𑀸𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀯𑀼𑀢𑁆𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁, 𑀲𑀼𑀢𑀸𑀦𑀼𑀲𑀸𑀭𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦𑀯𑀧𑁆𑀧𑀓𑀸𑀭𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀫𑀺𑀁𑀲𑀼, 𑀢𑁂𑀲𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀕𑀼𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀦𑁆𑀢𑁄 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺 ‘‘𑀇𑀤𑀫𑁆𑀧𑀺 𑀲𑀗𑁆𑀖𑁂’’𑀢𑀺. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀓𑁂𑀯𑀮𑀁 𑀧𑀦 𑀇𑀤𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀦𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀲𑀗𑁆𑀖𑁂 𑀭𑀢𑀦𑀁 𑀧𑀡𑀻𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀆𑀡𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀅𑀫𑀦𑀼𑀲𑁆𑀲𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀸𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀓𑀼𑀮𑀲𑁆𑀲 𑀲𑁄𑀢𑁆𑀣𑀺 𑀅𑀳𑁄𑀲𑀺, 𑀲𑀩𑁆𑀩𑀽𑀧𑀤𑁆𑀤𑀯𑀸 𑀯𑀽𑀧𑀲𑀫𑀺𑀁𑀲𑀼 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑁨𑁩𑁯-𑁨𑁪𑁧. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀪𑀕𑀯𑀢𑀸 𑀭𑀢𑀦𑀢𑁆𑀢𑀬𑀕𑀼𑀡𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀯𑀘𑀦𑀁 𑀧𑀬𑀼𑀜𑁆𑀚𑀫𑀸𑀦𑁂𑀦 𑀦𑀸𑀕𑀭𑀲𑁆𑀲 𑀲𑁄𑀢𑁆𑀣𑀺 𑀓𑀢𑀸, 𑀫𑀬𑀸𑀧𑀺 𑀦𑀸𑀕𑀭𑀲𑁆𑀲 𑀲𑁄𑀢𑁆𑀣𑀺𑀢𑁆𑀣𑀁 𑀭𑀢𑀦𑀢𑁆𑀢𑀬𑀕𑀼𑀡𑀁 𑀦𑀺𑀲𑁆𑀲𑀸𑀬 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑀲𑀸𑀦𑁂 𑀕𑀸𑀣𑀸𑀢𑁆𑀢𑀬𑀁 𑀅𑀪𑀸𑀲𑀺 ‘‘𑀬𑀸𑀦𑀻𑀥 𑀪𑀽𑀢𑀸𑀦𑀻’’𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑁄 𑀬𑀣𑀸 𑀮𑁄𑀓𑀳𑀺𑀢𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁂𑀳𑀺 𑀆𑀕𑀦𑁆𑀢𑀩𑁆𑀩𑀁, 𑀢𑀣𑀸 𑀆𑀕𑀢𑀢𑁄, 𑀬𑀣𑀸 𑀘 𑀏𑀢𑁂𑀳𑀺 𑀕𑀦𑁆𑀢𑀩𑁆𑀩𑀁, 𑀢𑀣𑀸 𑀕𑀢𑀢𑁄, 𑀬𑀣𑀸 𑀯𑀸 𑀏𑀢𑁂𑀳𑀺 𑀆𑀚𑀸𑀦𑀺𑀢𑀩𑁆𑀩𑀁, 𑀢𑀣𑀸 𑀆𑀚𑀸𑀦𑀦𑀢𑁄, 𑀬𑀣𑀸 𑀘 𑀚𑀸𑀦𑀺𑀢𑀩𑁆𑀩𑀁, 𑀢𑀣𑀸 𑀚𑀸𑀦𑀦𑀢𑁄, 𑀬𑀜𑁆𑀘 𑀢𑀣𑁂𑀯 𑀳𑁄𑀢𑀺, 𑀢𑀲𑁆𑀲 𑀕𑀤𑀦𑀢𑁄 𑀘 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀲𑁄 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀼𑀧𑁆𑀨𑀕𑀦𑁆𑀥𑀸𑀤𑀺𑀦𑀸 𑀩𑀳𑀺𑀦𑀺𑀩𑁆𑀩𑀢𑁆𑀢𑁂𑀦 𑀉𑀧𑀓𑀭𑀡𑁂𑀦, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀸𑀤𑀺𑀦𑀸 𑀘 𑀅𑀢𑁆𑀢𑀦𑀺 𑀦𑀺𑀩𑁆𑀩𑀢𑁆𑀢𑁂𑀦 𑀅𑀢𑀺𑀯𑀺𑀬 𑀧𑀽𑀚𑀺𑀢𑁄, 𑀢𑀲𑁆𑀫𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀩𑁆𑀩𑀤𑁂𑀯𑀧𑀭𑀺𑀲𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 ¶ 𑀆𑀳 ‘‘𑀢𑀣𑀸𑀕𑀢𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁, 𑀩𑀼𑀤𑁆𑀥𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺.

𑀬𑀲𑁆𑀫𑀸 𑀧𑀦 𑀥𑀫𑁆𑀫𑁂 𑀫𑀕𑁆𑀕𑀥𑀫𑁆𑀫𑁄 𑀬𑀣𑀸 𑀬𑀼𑀕𑀦𑀦𑁆𑀥 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀕𑀦𑁆𑀢𑀩𑁆𑀩𑀁 𑀓𑀺𑀮𑁂𑀲𑀧𑀓𑁆𑀔𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁂𑀦, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀦𑀺𑀩𑁆𑀩𑀸𑀦𑀥𑀫𑁆𑀫𑁄𑀧𑀺 𑀬𑀣𑀸 𑀕𑀢𑁄 𑀧𑀜𑁆𑀜𑀸𑀬 𑀧𑀝𑀺𑀯𑀺𑀤𑁆𑀥𑁄 𑀲𑀩𑁆𑀩𑀤𑀼𑀓𑁆𑀔𑀯𑀺𑀖𑀸𑀢𑀸𑀬 𑀲𑀫𑁆𑀧𑀚𑁆𑀚𑀢𑀺, 𑀩𑀼𑀤𑁆𑀥𑀸𑀤𑀻𑀳𑀺 𑀢𑀣𑀸 𑀅𑀯𑀕𑀢𑁄, 𑀢𑀲𑁆𑀫𑀸 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀲𑀗𑁆𑀖𑁄𑀧𑀺 𑀬𑀣𑀸 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁂𑀳𑀺 𑀕𑀦𑁆𑀢𑀩𑁆𑀩𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦, 𑀢𑀣𑀸 𑀕𑀢𑁄, 𑀢𑀲𑁆𑀫𑀸 ‘‘𑀢𑀣𑀸𑀕𑀢𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀅𑀯𑀲𑁂𑀲𑀕𑀸𑀣𑀸𑀤𑁆𑀯𑀬𑁂𑀧𑀺 𑀢𑀣𑀸𑀕𑀢𑀁 𑀥𑀫𑁆𑀫𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀼, 𑀢𑀣𑀸𑀕𑀢𑀁 𑀲𑀗𑁆𑀖𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀏𑀯𑀁 ¶ 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀁 𑀕𑀸𑀣𑀸𑀢𑁆𑀢𑀬𑀁 𑀪𑀸𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑁂𑀯𑀧𑀼𑀭𑀫𑁂𑀯 𑀕𑀢𑁄 𑀲𑀤𑁆𑀥𑀺𑀁 𑀤𑁂𑀯𑀧𑀭𑀺𑀲𑀸𑀬. 𑀪𑀕𑀯𑀸 𑀧𑀦 𑀢𑀤𑁂𑀯 𑀭𑀢𑀦𑀲𑀼𑀢𑁆𑀢𑀁 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀤𑁂𑀲𑁂𑀲𑀺, 𑀧𑀼𑀦 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀏𑀯𑀁 𑀪𑀕𑀯𑀸 𑀬𑀸𑀯 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀤𑁂𑀲𑁂𑀲𑀺, 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀣𑁂𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀅𑀟𑁆𑀠𑀫𑀸𑀲𑀫𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀺𑀢𑁆𑀯𑀸 𑀭𑀸𑀚𑀽𑀦𑀁 ‘‘𑀕𑀘𑁆𑀙𑀸𑀫𑀸’’𑀢𑀺 𑀧𑀝𑀺𑀯𑁂𑀤𑁂𑀲𑀺. 𑀢𑀢𑁄 𑀭𑀸𑀚𑀸𑀦𑁄 𑀤𑀺𑀕𑀼𑀡𑁂𑀦 𑀲𑀓𑁆𑀓𑀸𑀭𑁂𑀦 𑀧𑀼𑀦 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀪𑀕𑀯𑀦𑁆𑀢𑀁 𑀕𑀗𑁆𑀕𑀸𑀢𑀻𑀭𑀁 𑀦𑀬𑀺𑀁𑀲𑀼. 𑀕𑀗𑁆𑀕𑀸𑀬𑀁 𑀦𑀺𑀩𑁆𑀩𑀢𑁆𑀢𑀸 𑀦𑀸𑀕𑀭𑀸𑀚𑀸𑀦𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀫𑀬𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑀸 𑀦𑀸𑀯𑀸𑀬𑁄 𑀫𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑁂 𑀏𑀯 𑀧𑀮𑁆𑀮𑀗𑁆𑀓𑁂 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀉𑀤𑀓𑀁 𑀓𑀭𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀉𑀧𑀕𑀢𑀸. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀭𑀢𑀦𑀦𑀸𑀯𑀫𑀸𑀭𑀽𑀴𑁆𑀳𑁄 𑀧𑀜𑁆𑀘 𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀓𑀁 𑀲𑀓𑀁 𑀦𑀸𑀯𑀁. 𑀦𑀸𑀕𑀭𑀸𑀚𑀸𑀦𑁄 𑀪𑀕𑀯𑀦𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀲𑀼𑀁. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀸𑀕𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀤𑀺𑀩𑁆𑀩𑁂𑀳𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀳𑀺 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀪𑀕𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺.

𑀪𑀽𑀫𑀝𑁆𑀞𑀸 𑀤𑁂𑀯𑀸 ‘‘𑀫𑀦𑀼𑀲𑁆𑀲𑀸 𑀘 𑀦𑀸𑀕𑀸 𑀘 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀫𑀬𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀦𑀕𑀼𑀫𑁆𑀩𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀻𑀲𑀼 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀓𑁆𑀔𑀺𑀧𑀺𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀪𑀯𑀦𑀁, 𑀢𑀸𑀯 𑀫𑀳𑀸𑀲𑀓𑁆𑀓𑀸𑀭𑀯𑀺𑀲𑁂𑀲𑁄 ¶ 𑀦𑀺𑀩𑁆𑀩𑀢𑁆𑀢𑀺. 𑀩𑀺𑀫𑁆𑀩𑀺𑀲𑀸𑀭𑁄𑀧𑀺 𑀮𑀺𑀘𑁆𑀙𑀯𑀻𑀳𑀺 𑀆𑀕𑀢𑀓𑀸𑀮𑁂 𑀓𑀢𑀲𑀓𑁆𑀓𑀸𑀭𑀢𑁄 𑀤𑀺𑀕𑀼𑀡𑀫𑀓𑀸𑀲𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀘𑀳𑀺 𑀤𑀺𑀯𑀲𑁂𑀳𑀺 𑀪𑀕𑀯𑀦𑁆𑀢𑀁 𑀭𑀸𑀚𑀕𑀳𑀁 𑀆𑀦𑁂𑀲𑀺.

𑀭𑀸𑀚𑀕𑀳𑀫𑀦𑀼𑀧𑁆𑀧𑀢𑁆𑀢𑁂 𑀪𑀕𑀯𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀬𑀫𑀦𑁆𑀢𑀭𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀳𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀦𑀼𑀪𑀸𑀯𑁄, 𑀬𑀁 𑀉𑀤𑁆𑀤𑀺𑀲𑁆𑀲 𑀕𑀗𑁆𑀕𑀸𑀬 𑀑𑀭𑀢𑁄 𑀘 𑀧𑀸𑀭𑀢𑁄 𑀘 𑀅𑀝𑁆𑀞𑀬𑁄𑀚𑀦𑁄 𑀪𑀽𑀫𑀺𑀪𑀸𑀕𑁄 𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀲𑀫𑀁 𑀓𑀢𑁆𑀯𑀸 𑀯𑀸𑀮𑀼𑀓𑀸𑀬 𑀑𑀓𑀺𑀭𑀺𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀬𑁄𑀚𑀦𑀧𑁆𑀧𑀫𑀸𑀡𑀁 𑀕𑀗𑁆𑀕𑀸𑀬 𑀉𑀤𑀓𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀁, 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀲𑁆𑀲𑀺𑀢𑀸𑀦𑀻’’𑀢𑀺. 𑀪𑀕𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀕𑀦𑁆𑀢𑁆𑀯𑀸 𑀫𑀡𑁆𑀟𑀮𑀫𑀸𑀴𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺? 𑀪𑀺𑀓𑁆𑀔𑀽 𑀲𑀩𑁆𑀩𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀁 𑀧𑀽𑀚𑀸𑀯𑀺𑀲𑁂𑀲𑁄 𑀫𑀬𑁆𑀳𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀦 𑀦𑀸𑀕𑀤𑁂𑀯𑀩𑁆𑀭𑀳𑁆𑀫𑀸𑀦𑀼𑀪𑀸𑀯𑁂𑀦, 𑀅𑀧𑀺𑀘 𑀔𑁄 𑀧𑀼𑀩𑁆𑀩𑁂 𑀅𑀧𑁆𑀧𑀫𑀢𑁆𑀢𑀓𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀦 𑀫𑀬𑀁, 𑀪𑀦𑁆𑀢𑁂, 𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀧𑀭𑀺𑀘𑁆𑀘𑀸𑀕𑀁 𑀚𑀸𑀦𑀸𑀫, 𑀲𑀸𑀥𑀼 𑀦𑁄 𑀪𑀕𑀯𑀸 𑀢𑀣𑀸 𑀓𑀣𑁂𑀢𑀼, 𑀬𑀣𑀸 𑀫𑀬𑀁 𑀢𑀁 𑀚𑀸𑀦𑁂𑀬𑁆𑀬𑀸𑀫𑀸’’𑀢𑀺.

𑀪𑀕𑀯𑀸 𑀆𑀳 𑁋 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀢𑀓𑁆𑀓𑀲𑀺𑀮𑀸𑀬𑀁 𑀲𑀗𑁆𑀔𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀢𑀲𑁆𑀲 ¶ 𑀧𑀼𑀢𑁆𑀢𑁄 𑀲𑀼𑀲𑀻𑀫𑁄 𑀦𑀸𑀫 𑀫𑀸𑀡𑀯𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀬𑁂𑀦, 𑀲𑁄 𑀏𑀓𑀤𑀺𑀯𑀲𑀁 𑀧𑀺𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀁 𑀧𑀺𑀢𑀸 𑀆𑀳 𑁋 ‘‘𑀓𑀺𑀁, 𑀢𑀸𑀢 𑀲𑀼𑀲𑀻𑀫𑀸’’𑀢𑀺? 𑀲𑁄 𑀆𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀢𑀸𑀢, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀢𑀸𑀢 𑀲𑀼𑀲𑀻𑀫, 𑀅𑀲𑀼𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀫𑀫 𑀲𑀳𑀸𑀬𑀓𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀓𑀳𑀸𑀧𑀡𑀲𑀳𑀲𑁆𑀲𑀁 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀧𑀘𑀸𑀭𑀬𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦𑀺𑀯𑁂𑀤𑁂𑀲𑀺. 𑀆𑀘𑀭𑀺𑀬𑁄 ‘‘𑀫𑀫 𑀲𑀳𑀸𑀬𑀓𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀫𑀸𑀡𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀸𑀳𑀼𑀦𑁂𑀬𑁆𑀬𑀫𑀓𑀸𑀲𑀺. 𑀲𑁄 𑀅𑀤𑁆𑀥𑀸𑀦𑀓𑀺𑀮𑀫𑀣𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀢𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀆𑀘𑀭𑀺𑀬𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼𑀁 𑀑𑀓𑀸𑀲𑀁 𑀬𑀸𑀘𑀺. 𑀆𑀘𑀭𑀺𑀬𑁄 𑀑𑀓𑀸𑀲𑀁 𑀓𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀲𑀺.

𑀲𑁄 ¶ 𑀮𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄 𑀩𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄 𑀕𑀳𑀺𑀢𑀕𑀳𑀺𑀢𑀜𑁆𑀘 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀫𑀺𑀯 𑀲𑀻𑀳𑀢𑁂𑀮𑀁 𑀅𑀯𑀺𑀦𑀲𑁆𑀲𑀫𑀸𑀦𑀁 𑀥𑀸𑀭𑁂𑀦𑁆𑀢𑁄 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀁 𑀲𑀺𑀧𑁆𑀧𑀁 𑀓𑀢𑀺𑀧𑀬𑀫𑀸𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀧𑁂𑀲𑀺. 𑀲𑁄 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀆𑀤𑀺𑀫𑀚𑁆𑀛𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀧𑀭𑀺𑀬𑁄𑀲𑀸𑀦𑀁. 𑀅𑀣 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀆𑀤𑀺𑀫𑀚𑁆𑀛𑀫𑁂𑀯 𑀧𑀲𑁆𑀲𑀸𑀫𑀺, 𑀧𑀭𑀺𑀬𑁄𑀲𑀸𑀦𑀁 𑀦 𑀧𑀲𑁆𑀲𑀸𑀫𑀻’’𑀢𑀺. 𑀆𑀘𑀭𑀺𑀬𑁄 𑀆𑀳 𑁋 ‘‘𑀅𑀳𑀫𑁆𑀧𑀺, 𑀢𑀸𑀢, 𑀏𑀯𑀫𑁂𑀯𑀸’’𑀢𑀺. ‘‘𑀅𑀣 𑀓𑁄, 𑀆𑀘𑀭𑀺𑀬, 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀻’’𑀢𑀺? ‘‘𑀇𑀲𑀺𑀧𑀢𑀦𑁂, 𑀢𑀸𑀢, 𑀇𑀲𑀬𑁄 𑀅𑀢𑁆𑀣𑀺, 𑀢𑁂 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺. 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀼𑀘𑁆𑀙𑀸𑀫𑀺, 𑀆𑀘𑀭𑀺𑀬𑀸’’𑀢𑀺. ‘‘𑀧𑀼𑀘𑁆𑀙, 𑀢𑀸𑀢, 𑀬𑀣𑀸𑀲𑀼𑀔’’𑀦𑁆𑀢𑀺. 𑀲𑁄 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫𑀸𑀯𑀼𑀲𑁄, 𑀚𑀸𑀦𑀸𑀫𑀸’’𑀢𑀺. ‘‘𑀢𑀁 𑀫𑀫𑁆𑀧𑀺 𑀲𑀺𑀓𑁆𑀔𑀸𑀧𑁂𑀣𑀸’’𑀢𑀺. ‘‘𑀢𑁂𑀦, 𑀳𑀸𑀯𑀼𑀲𑁄, 𑀧𑀩𑁆𑀩𑀚𑀸𑀳𑀺, 𑀦 𑀲𑀓𑁆𑀓𑀸 𑀅𑀧𑀩𑁆𑀩𑀚𑀺𑀢𑁂𑀦 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣 𑀯𑀸 𑀫𑀁, 𑀬𑀁 𑀯𑀸 𑀇𑀘𑁆𑀙𑀣, 𑀢𑀁 𑀓𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀧𑁂𑀣𑀸’’𑀢𑀺. 𑀢𑁂 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑀸 ‘‘𑀏𑀯𑀁 𑀢𑁂 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀲𑁄 𑀢𑀢𑁆𑀣 𑀲𑀺𑀓𑁆𑀔𑀦𑁆𑀢𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀦 𑀘𑀺𑀭𑁂𑀦𑁂𑀯 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀲𑀓𑀮𑀩𑀸𑀭𑀸𑀡𑀲𑀺𑀬𑀁 ‘‘𑀲𑀼𑀲𑀻𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀲𑀫𑁆𑀧𑀦𑁆𑀦𑀧𑀭𑀺𑀯𑀸𑀭𑁄. 𑀲𑁄 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦 𑀘𑀺𑀭𑁂𑀦𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀫𑀳𑀸𑀚𑀦𑀓𑀸𑀬𑁄 𑀘 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀸𑀢𑀼𑀢𑁄 𑀕𑀳𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀣𑀽𑀧𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀅𑀣 𑀔𑁄 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀧𑀼𑀢𑁆𑀢𑁄 𑀫𑁂 𑀘𑀺𑀭𑀕𑀢𑁄, 𑀦 𑀘𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀫𑀻’’𑀢𑀺 𑀧𑀼𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀢𑀓𑁆𑀓𑀲𑀺𑀮𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀩𑀳𑀽𑀲𑀼 𑀏𑀓𑁄𑀧𑀺 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀲𑀼𑀲𑀻𑀫𑁄 𑀦𑀸𑀫 𑀫𑀸𑀡𑀯𑁄 𑀇𑀥 𑀆𑀕𑀢𑁄 𑀅𑀢𑁆𑀣𑀺, 𑀅𑀧𑀺 𑀦𑀼 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀣𑀸’’𑀢𑀺? 𑀢𑁂 ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀚𑀸𑀦𑀸𑀫, 𑀅𑀲𑁆𑀫𑀺𑀁 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀳𑀼𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 ¶ 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀬𑀫𑀲𑁆𑀲 𑀣𑀽𑀧𑁄 𑀧𑀢𑀺𑀝𑁆𑀞𑀸𑀧𑀺𑀢𑁄’’𑀢𑀺 𑀆𑀳𑀁𑀲𑀼. 𑀲𑁄 𑀪𑀽𑀫𑀺𑀁 𑀳𑀢𑁆𑀣𑁂𑀦 ¶ 𑀧𑀳𑀭𑀺𑀢𑁆𑀯𑀸, 𑀭𑁄𑀤𑀺𑀢𑁆𑀯𑀸 𑀘 𑀧𑀭𑀺𑀤𑁂𑀯𑀺𑀢𑁆𑀯𑀸 𑀘 𑀢𑀁 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀢𑀺𑀡𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑁂𑀦 𑀯𑀸𑀮𑀼𑀓𑀁 𑀆𑀦𑁂𑀢𑁆𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀘𑁂𑀢𑀺𑀬𑀗𑁆𑀕𑀡𑁂 𑀆𑀓𑀺𑀭𑀺𑀢𑁆𑀯𑀸, 𑀓𑀫𑀡𑁆𑀟𑀮𑀼𑀢𑁄 𑀉𑀤𑀓𑁂𑀦 𑀲𑀫𑀦𑁆𑀢𑀢𑁄 𑀪𑀽𑀫𑀺𑀁 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑁂𑀦 𑀧𑀝𑀸𑀓𑀁 𑀆𑀭𑁄𑀧𑁂𑀢𑁆𑀯𑀸 𑀣𑀽𑀧𑀲𑁆𑀲 𑀉𑀧𑀭𑀺 𑀅𑀢𑁆𑀢𑀦𑁄 𑀙𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀏𑀯𑀁 𑀅𑀢𑀻𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀚𑀸𑀢𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀅𑀦𑀼𑀲𑀦𑁆𑀥𑁂𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦 𑀯𑁄, 𑀪𑀺𑀓𑁆𑀔𑀯𑁂, 𑀏𑀯𑀫𑀲𑁆𑀲 𑀅𑀜𑁆𑀜𑁄 𑀦𑀽𑀦 𑀢𑁂𑀦 𑀲𑀫𑀬𑁂𑀦 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀻’’𑀢𑀺, 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁, 𑀫𑀬𑀸 𑀲𑀼𑀲𑀻𑀫𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀗𑁆𑀕𑀡𑁂 𑀢𑀺𑀡𑀸𑀦𑀺 𑀉𑀤𑁆𑀥𑀝𑀸𑀦𑀺, 𑀢𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑀁 𑀯𑀺𑀕𑀢𑀔𑀸𑀡𑀼𑀓𑀡𑁆𑀝𑀓𑀁 𑀓𑀢𑁆𑀯𑀸 𑀲𑀫𑀁 𑀲𑀼𑀤𑁆𑀥𑀫𑀓𑀁𑀲𑀼, 𑀫𑀬𑀸 𑀢𑀢𑁆𑀣 𑀯𑀸𑀮𑀼𑀓𑀸 𑀑𑀓𑀺𑀡𑁆𑀡𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑁂 𑀯𑀸𑀮𑀼𑀓𑀁 𑀑𑀓𑀺𑀭𑀺𑀁𑀲𑀼. 𑀫𑀬𑀸 𑀢𑀢𑁆𑀣 𑀯𑀦𑀓𑀼𑀲𑀼𑀫𑁂𑀳𑀺 𑀧𑀽𑀚𑀸 𑀓𑀢𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀦𑀯𑀬𑁄𑀚𑀦𑀫𑀕𑁆𑀕𑁂 𑀣𑀮𑁂 𑀘 𑀉𑀤𑀓𑁂 𑀘 𑀦𑀸𑀦𑀸𑀧𑀼𑀧𑁆𑀨𑁂𑀳𑀺 𑀧𑀼𑀧𑁆𑀨𑀲𑀦𑁆𑀣𑀭𑀁 𑀅𑀓𑀁𑀲𑀼. 𑀫𑀬𑀸 𑀢𑀢𑁆𑀣 𑀓𑀫𑀡𑁆𑀟𑀮𑀼𑀤𑀓𑁂𑀦 𑀪𑀽𑀫𑀺 𑀧𑀭𑀺𑀧𑁆𑀨𑁄𑀲𑀺𑀢𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀯𑁂𑀲𑀸𑀮𑀺𑀬𑀁 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀬𑀸 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀧𑀝𑀸𑀓𑀸 𑀆𑀭𑁄𑀧𑀺𑀢𑀸, 𑀙𑀢𑁆𑀢𑀜𑁆𑀘 𑀩𑀤𑁆𑀥𑀁, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀧𑀝𑀸𑀓𑀸 𑀘 𑀆𑀭𑁄𑀧𑀺𑀢𑀸, 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀘 𑀉𑀲𑁆𑀲𑀺𑀢𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀫𑀬𑁆𑀳𑀁 𑀧𑀽𑀚𑀸𑀯𑀺𑀲𑁂𑀲𑁄 𑀦𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀦 𑀦𑀸𑀕𑀤𑁂𑀯𑀩𑁆𑀭𑀳𑁆𑀫𑀸𑀦𑀼𑀪𑀸𑀯𑁂𑀦, 𑀅𑀧𑀺𑀘 𑀔𑁄 𑀅𑀧𑁆𑀧𑀫𑀢𑁆𑀢𑀓𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀥𑀫𑁆𑀫𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀇𑀫𑀁 𑀕𑀸𑀣𑀫𑀪𑀸𑀲𑀺 𑁋

‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸, 𑀧𑀲𑁆𑀲𑁂 𑀘𑁂 𑀯𑀺𑀧𑀼𑀮𑀁 𑀲𑀼𑀔𑀁;

𑀘𑀚𑁂 𑀫𑀢𑁆𑀢𑀸𑀲𑀼𑀔𑀁 𑀥𑀻𑀭𑁄, 𑀲𑀫𑁆𑀧𑀲𑁆𑀲𑀁 𑀯𑀺𑀧𑀼𑀮𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁨𑁯𑁦);

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀫𑀕𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀸𑀫𑀸𑀓𑀘𑀺𑀗𑁆𑀕𑀽𑀮𑀓𑀘𑀻𑀦𑀓𑀸𑀦𑀺 ¶ ¶ 𑀘𑀸𑀢𑀺 𑀆𑀫𑀕𑀦𑁆𑀥𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀦𑀼𑀧𑁆𑀧𑀦𑁆𑀦𑁂 𑀪𑀕𑀯𑀢𑀺 𑀆𑀫𑀕𑀦𑁆𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀘𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑀭𑁂 𑀅𑀲𑁆𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀧𑀝𑀺𑀯𑀲𑀢𑀺, 𑀦 𑀓𑀤𑀸𑀘𑀺 𑀫𑀘𑁆𑀙𑀫𑀁𑀲𑀁 𑀔𑀸𑀤𑀢𑀺. 𑀅𑀣 𑀢𑁂𑀲𑀁 𑀢𑀸𑀧𑀲𑀸𑀦𑀁 𑀮𑁄𑀡𑀫𑁆𑀩𑀺𑀮𑀸𑀤𑀻𑀦𑀺 𑀅𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀧𑀡𑁆𑀟𑀼𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀢𑁂 ‘‘𑀮𑁄𑀡𑀫𑁆𑀩𑀺𑀮𑀸𑀤𑀺𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀕𑀘𑁆𑀙𑀸𑀫𑀸’’𑀢𑀺 𑀧𑀘𑁆𑀘𑀦𑁆𑀢𑀕𑀸𑀫𑀁 𑀲𑀫𑁆𑀧𑀢𑁆𑀢𑀸. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀢𑁂𑀲𑀼 𑀧𑀲𑀻𑀤𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀲𑀼𑀁, 𑀓𑀢𑀪𑀢𑁆𑀢𑀓𑀺𑀘𑁆𑀘𑀸𑀦𑀁 𑀦𑁂𑀲𑀁 𑀫𑀜𑁆𑀘𑀧𑀻𑀞𑀧𑀭𑀺𑀪𑁄𑀕𑀪𑀸𑀚𑀦𑀧𑀸𑀤𑀫𑀓𑁆𑀔𑀦𑀸𑀤𑀻𑀦𑀺 𑀉𑀧𑀦𑁂𑀢𑁆𑀯𑀸 ‘‘𑀏𑀢𑁆𑀣, 𑀪𑀦𑁆𑀢𑁂, 𑀯𑀲𑀣, 𑀫𑀸 𑀉𑀓𑁆𑀓𑀡𑁆𑀞𑀺𑀢𑁆𑀣𑀸’’𑀢𑀺 𑀯𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀦𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 𑀖𑀭𑀧𑀝𑀺𑀧𑀸𑀝𑀺𑀬𑀸 𑀏𑀓𑁂𑀓𑀤𑀺𑀯𑀲𑀁 𑀤𑀸𑀦𑀫𑀤𑀁𑀲𑀼. 𑀢𑀸𑀧𑀲𑀸 𑀘𑀢𑀼𑀫𑀸𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀸𑀤𑀺𑀲𑁂𑀯𑀦𑀸𑀬 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀲𑀭𑀻𑀭𑀸 𑀳𑀼𑀢𑁆𑀯𑀸 ‘‘𑀫𑀬𑀁, 𑀆𑀯𑀼𑀲𑁄, 𑀕𑀘𑁆𑀙𑀸𑀫𑀸’’𑀢𑀺 ¶ 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀲𑀼𑀁. 𑀫𑀦𑀼𑀲𑁆𑀲𑀸 𑀢𑁂𑀲𑀁 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀅𑀤𑀁𑀲𑀼. 𑀢𑁂 𑀢𑀸𑀦𑀺 𑀆𑀤𑀸𑀬 𑀅𑀢𑁆𑀢𑀦𑁄 𑀅𑀲𑁆𑀲𑀫𑀫𑁂𑀯 𑀅𑀕𑀫𑀁𑀲𑀼. 𑀢𑀜𑁆𑀘 𑀕𑀸𑀫𑀁 𑀢𑀣𑁂𑀯 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀆𑀕𑀫𑀺𑀁𑀲𑀼. 𑀫𑀦𑀼𑀲𑁆𑀲𑀸𑀧𑀺 𑀢𑁂𑀲𑀁 𑀆𑀕𑀫𑀦𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀤𑀸𑀦𑀢𑁆𑀣𑀸𑀬 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀚𑁆𑀚𑁂𑀢𑁆𑀯𑀸𑀯 𑀅𑀘𑁆𑀙𑀦𑁆𑀢𑀺, 𑀆𑀕𑀢𑁂 𑀘 𑀦𑁂 𑀢𑀣𑁂𑀯 𑀲𑀫𑁆𑀫𑀸𑀦𑁂𑀦𑁆𑀢𑀺.

𑀅𑀣 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀢𑁂𑀲𑀁 𑀢𑀸𑀧𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀅𑀤𑀁𑀲𑀼. 𑀪𑀕𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁂𑀓𑀘𑁆𑀘𑁂 𑀲𑁄𑀢𑀸𑀧𑀦𑁆𑀦𑀸, 𑀏𑀓𑀘𑁆𑀘𑁂 𑀲𑀓𑀤𑀸𑀕𑀸𑀫𑀺𑀦𑁄, 𑀏𑀓𑀘𑁆𑀘𑁂 𑀅𑀦𑀸𑀕𑀸𑀫𑀺𑀦𑁄 𑀅𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀪𑀕𑀯𑀸 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀫𑀸𑀲𑀺. 𑀅𑀣 𑀢𑁂 𑀢𑀸𑀧𑀲𑀸 𑀢𑀁 𑀕𑀸𑀫𑀁 𑀆𑀕𑀫𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑀸𑀧𑀲𑁂 𑀤𑀺𑀲𑁆𑀯𑀸 𑀦 𑀧𑀼𑀩𑁆𑀩𑀲𑀤𑀺𑀲𑀁 𑀓𑁄𑀢𑀽𑀳𑀮𑀫𑀓𑀁𑀲𑀼. 𑀢𑀸𑀧𑀲𑀸 𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁, 𑀆𑀯𑀼𑀲𑁄, 𑀇𑀫𑁂 𑀫𑀦𑀼𑀲𑁆𑀲𑀸 𑀦 𑀧𑀼𑀩𑁆𑀩𑀲𑀤𑀺𑀲𑀸, 𑀓𑀺𑀁 𑀦𑀼 𑀔𑁄 𑀅𑀬𑀁 𑀕𑀸𑀫𑁄 𑀭𑀸𑀚𑀤𑀡𑁆𑀟𑁂𑀦 𑀉𑀧𑀤𑁆𑀤𑀼𑀢𑁄, 𑀉𑀤𑀸𑀳𑀼 𑀤𑀼𑀩𑁆𑀪𑀺𑀓𑁆𑀔𑁂𑀦, 𑀉𑀤𑀸𑀳𑀼 𑀅𑀫𑁆𑀳𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑀢𑀭𑁄 𑀓𑁄𑀘𑀺 𑀧𑀩𑁆𑀩𑀚𑀺𑀢𑁄 𑀇𑀫𑀁 𑀕𑀸𑀫𑀫𑀦𑀼𑀧𑁆𑀧𑀢𑁆𑀢𑁄’’𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀦, 𑀪𑀦𑁆𑀢𑁂, 𑀭𑀸𑀚𑀤𑀡𑁆𑀟𑁂𑀦, 𑀦 𑀤𑀼𑀩𑁆𑀪𑀺𑀓𑁆𑀔𑁂𑀦𑀸𑀬𑀁 𑀕𑀸𑀫𑁄 𑀉𑀧𑀤𑁆𑀤𑀼𑀢𑁄, 𑀅𑀧𑀺𑀘 𑀩𑀼𑀤𑁆𑀥𑁄 𑀮𑁄𑀓𑁂 ¶ 𑀉𑀧𑁆𑀧𑀦𑁆𑀦𑁄, 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀥𑀸𑀕𑀢𑁄’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀆𑀫𑀕𑀦𑁆𑀥𑀢𑀸𑀧𑀲𑁄 ‘‘𑀩𑀼𑀤𑁆𑀥𑁄𑀢𑀺, 𑀕𑀳𑀧𑀢𑀬𑁄, 𑀯𑀤𑁂𑀣𑀸’’𑀢𑀺? ‘‘𑀩𑀼𑀤𑁆𑀥𑁄𑀢𑀺, 𑀪𑀦𑁆𑀢𑁂, 𑀯𑀤𑀸𑀫𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 ‘‘𑀖𑁄𑀲𑁄𑀧𑀺 𑀔𑁄 𑀏𑀲𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺 𑀅𑀢𑁆𑀢𑀫𑀦𑁄 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀼 𑀔𑁄 𑀲𑁄 𑀩𑀼𑀤𑁆𑀥𑁄 𑀆𑀫𑀕𑀦𑁆𑀥𑀁 𑀪𑀼𑀜𑁆𑀚𑀢𑀺, 𑀦 𑀪𑀼𑀜𑁆𑀚𑀢𑀻’’𑀢𑀺? ‘‘𑀓𑁄, 𑀪𑀦𑁆𑀢𑁂, 𑀆𑀫𑀕𑀦𑁆𑀥𑁄’’𑀢𑀺? ‘‘𑀆𑀫𑀕𑀦𑁆𑀥𑁄 𑀦𑀸𑀫 𑀫𑀘𑁆𑀙𑀫𑀁𑀲𑀁, 𑀕𑀳𑀧𑀢𑀬𑁄’’𑀢𑀺. ‘‘𑀪𑀕𑀯𑀸, 𑀪𑀦𑁆𑀢𑁂, 𑀫𑀘𑁆𑀙𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺 𑁋 ‘‘𑀫𑀸𑀳𑁂𑀯 𑀔𑁄 𑀧𑀦 𑀩𑀼𑀤𑁆𑀥𑁄 𑀲𑀺𑀬𑀸’’𑀢𑀺 ¶ . 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀦𑀸𑀫 𑀤𑀼𑀮𑁆𑀮𑀪𑁄, 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀬𑁂𑀦 𑀪𑀕𑀯𑀸 𑀕𑀢𑁄, 𑀢𑀁 𑀫𑀕𑁆𑀕𑀁 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺𑀢𑁆𑀯𑀸 𑀯𑀘𑁆𑀙𑀕𑀺𑀤𑁆𑀥𑀺𑀦𑀻 𑀕𑀸𑀯𑀻 𑀯𑀺𑀬 𑀢𑀼𑀭𑀺𑀢𑀢𑀼𑀭𑀺𑀢𑁄 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀧𑀸𑀯𑀺𑀲𑀺 𑀲𑀤𑁆𑀥𑀺𑀁 𑀲𑀓𑀸𑀬 𑀧𑀭𑀺𑀲𑀸𑀬. 𑀪𑀕𑀯𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀏𑀯 𑀳𑁄𑀢𑀺. 𑀢𑀸𑀧𑀲𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀢𑀼𑀡𑁆𑀳𑀻𑀪𑀽𑀢𑀸 𑀅𑀦𑀪𑀺𑀯𑀸𑀤𑁂𑀢𑁆𑀯𑀸𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀪𑀕𑀯𑀸 ‘‘𑀓𑀘𑁆𑀘𑀺 𑀯𑁄 𑀇𑀲𑀬𑁄 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺. 𑀢𑁂𑀧𑀺 ‘‘𑀔𑀫𑀦𑀻𑀬𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁄 𑀆𑀫𑀕𑀦𑁆𑀥𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀆𑀫𑀕𑀦𑁆𑀥𑀁, 𑀪𑁄 𑀕𑁄𑀢𑀫, 𑀪𑀼𑀜𑁆𑀚𑀲𑀺, 𑀦 𑀪𑀼𑀜𑁆𑀚𑀲𑀻’’𑀢𑀺? ‘‘𑀓𑁄 𑀲𑁄, 𑀩𑁆𑀭𑀸𑀳𑁆𑀫𑀡, 𑀆𑀫𑀕𑀦𑁆𑀥𑁄 𑀦𑀸𑀫𑀸’’𑀢𑀺? ‘‘𑀫𑀘𑁆𑀙𑀫𑀁𑀲𑀁, 𑀪𑁄 𑀕𑁄𑀢𑀫𑀸’’𑀢𑀺. 𑀪𑀕𑀯𑀸 ‘‘𑀦, 𑀩𑁆𑀭𑀸𑀳𑁆𑀫𑀡, 𑀫𑀘𑁆𑀙𑀫𑀁𑀲𑀁 𑀆𑀫𑀕𑀦𑁆𑀥𑁄. 𑀅𑀧𑀺𑀘 𑀔𑁄 𑀆𑀫𑀕𑀦𑁆𑀥𑁄 𑀦𑀸𑀫 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑀢𑁆𑀯𑀸 ‘‘𑀦, 𑀩𑁆𑀭𑀸𑀳𑁆𑀫𑀡, 𑀇𑀤𑀸𑀦𑀺 𑀢𑁆𑀯𑀫𑁂𑀯 𑀆𑀫𑀕𑀦𑁆𑀥𑀁 𑀧𑀼𑀘𑁆𑀙𑀺, 𑀅𑀢𑀻𑀢𑁂𑀧𑀺 𑀢𑀺𑀲𑁆𑀲𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀏𑀯𑀜𑁆𑀘 𑀲𑁄 𑀧𑀼𑀘𑁆𑀙𑀺, 𑀏𑀯𑀜𑁆𑀘𑀲𑁆𑀲 𑀪𑀕𑀯𑀸 𑀩𑁆𑀬𑀸𑀓𑀸𑀲𑀻’’𑀢𑀺 𑀢𑀺𑀲𑁆𑀲𑁂𑀦 𑀘 𑀩𑁆𑀭𑀸𑀳𑁆𑀫𑀡𑁂𑀦 𑀓𑀲𑁆𑀲𑀧𑁂𑀦 𑀘 𑀪𑀕𑀯𑀢𑀸 𑀯𑀼𑀢𑁆𑀢𑀕𑀸𑀣𑀸𑀬𑁄 𑀏𑀯 𑀆𑀦𑁂𑀢𑁆𑀯𑀸 𑀢𑀸𑀳𑀺 𑀕𑀸𑀣𑀸𑀳𑀺 𑀩𑁆𑀭𑀸𑀳𑁆𑀫𑀡𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀸𑀫𑀸𑀓𑀘𑀺𑀗𑁆𑀕𑀽𑀮𑀓𑀘𑀻𑀦𑀓𑀸𑀦𑀺 𑀘𑀸’’𑀢𑀺. 𑀅𑀬𑀁 𑀢𑀸𑀯 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀇𑀥 𑀉𑀧𑁆𑀧𑀢𑁆𑀢𑀺.

𑀅𑀢𑀻𑀢𑁂 𑀧𑀦 𑀓𑀲𑁆𑀲𑀧𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀅𑀝𑁆𑀞𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀅𑀕𑁆𑀕𑀲𑀸𑀯𑀓𑁄𑀧𑀺 𑀢𑀁 𑀤𑀺𑀯𑀲𑀁𑀬𑁂𑀯 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀦𑀼𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀚𑀸𑀧𑀢𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀏𑀯𑀁 𑀢𑁂𑀲𑀁 𑀏𑀓𑀤𑀺𑀯𑀲𑀫𑁂𑀯 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀜𑁆𑀘 ¶ 𑀕𑀩𑁆𑀪𑀯𑀼𑀝𑁆𑀞𑀸𑀦𑀜𑁆𑀘 𑀅𑀳𑁄𑀲𑀺, 𑀏𑀓𑀤𑀺𑀯𑀲𑀫𑁂𑀯 ¶ 𑀏𑀢𑁂𑀲𑀁 𑀏𑀓𑀲𑁆𑀲 𑀓𑀲𑁆𑀲𑀧𑁄, 𑀏𑀓𑀲𑁆𑀲 𑀢𑀺𑀲𑁆𑀲𑁄𑀢𑀺 𑀦𑀸𑀫𑀫𑀓𑀁𑀲𑀼. 𑀢𑁂 𑀲𑀳𑀧𑀁𑀲𑀼𑀓𑀻𑀴𑀦𑀓𑀸 𑀤𑁆𑀯𑁂 𑀲𑀳𑀸𑀬𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀁 𑀅𑀕𑀫𑀺𑀁𑀲𑀼. 𑀢𑀺𑀲𑁆𑀲𑀲𑁆𑀲 𑀧𑀺𑀢𑀸 𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 𑁋 ‘‘𑀅𑀬𑀁, 𑀢𑀸𑀢, 𑀓𑀲𑁆𑀲𑀧𑁄 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀫𑁆𑀧𑀺𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀪𑀯𑀦𑀺𑀲𑁆𑀲𑀭𑀡𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀉𑀪𑁄𑀧𑀺, 𑀲𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀢𑀢𑁄 𑀯𑀼𑀟𑁆𑀠𑀺𑀁 ¶ 𑀅𑀦𑀼𑀧𑁆𑀧𑀢𑁆𑀢𑀓𑀸𑀮𑁂𑀧𑀺 𑀢𑀺𑀲𑁆𑀲𑁄 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀏𑀳𑀺, 𑀲𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀦 𑀦𑀺𑀓𑁆𑀔𑀫𑀺. 𑀢𑀺𑀲𑁆𑀲𑁄 ‘‘𑀦 𑀢𑀸𑀯𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀢’’𑀦𑁆𑀢𑀺 𑀲𑀬𑀁 𑀦𑀺𑀓𑁆𑀔𑀫𑁆𑀫 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀧𑀩𑁆𑀩𑀢𑀧𑀸𑀤𑁂 𑀅𑀲𑁆𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀲𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀖𑀭𑁂 𑀞𑀺𑀢𑁄𑀬𑁂𑀯 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀅𑀪𑀺𑀜𑁆𑀜𑀸𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀸𑀲𑀸𑀤𑁂𑀦 𑀩𑁄𑀥𑀺𑀫𑀡𑁆𑀟𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀦 𑀧𑀸𑀲𑀸𑀤𑁄 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀲𑁄 𑀲𑀓𑀝𑁆𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀲𑀺. 𑀅𑀧𑀩𑁆𑀩𑀚𑀺𑀢𑁂𑀦 𑀓𑀺𑀭 𑀩𑁄𑀥𑀺𑀫𑀡𑁆𑀟𑀁 𑀉𑀧𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀧𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑁂 𑀧𑀥𑀸𑀦𑀬𑁄𑀕𑀁 𑀓𑀢𑁆𑀯𑀸 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺.

𑀢𑀤𑀸 𑀇𑀲𑀺𑀧𑀢𑀦𑁂 𑀯𑀻𑀲𑀢𑀺𑀲𑀳𑀲𑁆𑀲𑀸 𑀧𑀩𑁆𑀩𑀚𑀺𑀢𑀸 𑀧𑀝𑀺𑀯𑀲𑀦𑁆𑀢𑀺. 𑀅𑀣 𑀓𑀲𑁆𑀲𑀧𑁄 𑀪𑀕𑀯𑀸 𑀢𑁂 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀯 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. 𑀲𑁄 𑀲𑀼𑀤𑀁 𑀪𑀕𑀯𑀸 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀢𑀢𑁆𑀣𑁂𑀯 𑀇𑀲𑀺𑀧𑀢𑀦𑁂 𑀯𑀲𑀢𑀺. 𑀓𑀺𑀓𑀻 𑀘 𑀦𑀁 𑀓𑀸𑀲𑀺𑀭𑀸𑀚𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀧𑀼𑀭𑀺𑀲𑁄 𑀧𑀩𑁆𑀩𑀢𑁂 𑀘𑀦𑁆𑀤𑀦𑀲𑀸𑀭𑀸𑀤𑀻𑀦𑀺 𑀕𑀯𑁂𑀲𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀢𑀸𑀧𑀲𑀲𑁆𑀲 𑀅𑀲𑁆𑀲𑀫𑀁 𑀧𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀸𑀧𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 ¶ 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀢𑁄, 𑀪𑀦𑁆𑀢𑁂’’𑀢𑀺. ‘‘𑀓𑀸 𑀢𑀢𑁆𑀣 𑀧𑀯𑀢𑁆𑀢𑀻’’𑀢𑀺? ‘‘𑀢𑀢𑁆𑀣, 𑀪𑀦𑁆𑀢𑁂, 𑀓𑀲𑁆𑀲𑀧𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀢𑀸𑀧𑀲𑁄 𑀤𑀼𑀮𑁆𑀮𑀪𑀯𑀘𑀦𑀁 𑀲𑀼𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀲𑁄 𑀆𑀫𑀕𑀦𑁆𑀥𑀁 𑀪𑀼𑀜𑁆𑀚𑀢𑀺, 𑀦 𑀪𑀼𑀜𑁆𑀚𑀢𑀻’’𑀢𑀺? ‘‘𑀓𑁄 𑀪𑀦𑁆𑀢𑁂, 𑀆𑀫𑀕𑀦𑁆𑀥𑁄’’𑀢𑀺? ‘‘𑀫𑀘𑁆𑀙𑀫𑀁𑀲𑀁 𑀆𑀯𑀼𑀲𑁄’’𑀢𑀺. ‘‘𑀪𑀕𑀯𑀸, 𑀪𑀦𑁆𑀢𑁂, 𑀫𑀘𑁆𑀙𑀫𑀁𑀲𑀁 𑀪𑀼𑀜𑁆𑀚𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀕𑀦𑁆𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑀘𑁂 ‘𑀆𑀫𑀕𑀦𑁆𑀥𑀁 𑀧𑀭𑀺𑀪𑀼𑀜𑁆𑀚𑀸𑀫𑀻’𑀢𑀺 𑀯𑀓𑁆𑀔𑀢𑀺, 𑀢𑀢𑁄 𑀦𑀁 ‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀚𑀸𑀢𑀺𑀬𑀸 𑀘 𑀓𑀼𑀮𑀲𑁆𑀲 𑀘 𑀕𑁄𑀢𑁆𑀢𑀲𑁆𑀲 𑀘 𑀅𑀦𑀦𑀼𑀘𑁆𑀙𑀯𑀺𑀓𑀫𑁂𑀢’𑀦𑁆𑀢𑀺 𑀦𑀺𑀯𑀸𑀭𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀪𑀯𑀦𑀺𑀲𑁆𑀲𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀮𑁆𑀮𑀳𑀼𑀓𑀁 𑀉𑀧𑀓𑀭𑀡𑀁 ¶ 𑀕𑀳𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀲𑀸𑀬𑀦𑁆𑀳𑀲𑀫𑀬𑁂 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀇𑀲𑀺𑀧𑀢𑀦𑀫𑁂𑀯 𑀧𑀸𑀯𑀺𑀲𑀺. 𑀪𑀕𑀯𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀳𑁄𑀢𑀺. 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀅𑀦𑀪𑀺𑀯𑀸𑀤𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀢𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀲𑀫𑁆𑀫𑁄𑀤𑀺. 𑀲𑁄𑀧𑀺 ‘‘𑀔𑀫𑀦𑀻𑀬𑀁, 𑀪𑁄 𑀓𑀲𑁆𑀲𑀧𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀆𑀫𑀕𑀦𑁆𑀥𑀁, 𑀪𑁄 𑀓𑀲𑁆𑀲𑀧, 𑀪𑀼𑀜𑁆𑀚𑀲𑀺, 𑀦 𑀪𑀼𑀜𑁆𑀚𑀲𑀻’’𑀢𑀺? ‘‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀆𑀫𑀕𑀦𑁆𑀥𑀁 𑀪𑀼𑀜𑁆𑀚𑀸𑀫𑀻’’𑀢𑀺. ‘‘𑀲𑀸𑀥𑀼, 𑀲𑀸𑀥𑀼, 𑀪𑁄 𑀓𑀲𑁆𑀲𑀧, 𑀧𑀭𑀓𑀼𑀡𑀧𑀁 𑀅𑀔𑀸𑀤𑀦𑁆𑀢𑁄 𑀲𑀼𑀦𑁆𑀤𑀭𑀫𑀓𑀸𑀲𑀺, 𑀬𑀼𑀢𑁆𑀢𑀫𑁂𑀢𑀁 𑀪𑁄𑀢𑁄 𑀓𑀲𑁆𑀲𑀧𑀲𑁆𑀲 𑀚𑀸𑀢𑀺𑀬𑀸 𑀘 𑀓𑀼𑀮𑀲𑁆𑀲 𑀘 𑀕𑁄𑀢𑁆𑀢𑀲𑁆𑀲 𑀘𑀸’’𑀢𑀺. 𑀢𑀢𑁄 𑀪𑀕𑀯𑀸 ‘‘𑀅𑀳𑀁 𑀓𑀺𑀮𑁂𑀲𑁂 𑀲𑀦𑁆𑀥𑀸𑀬 ‘𑀆𑀫𑀕𑀦𑁆𑀥𑀁 𑀦 𑀪𑀼𑀜𑁆𑀚𑀸𑀫𑀻’𑀢𑀺 𑀯𑀤𑀸𑀫𑀺, 𑀩𑁆𑀭𑀸𑀳𑁆𑀫𑀡𑁄 𑀫𑀘𑁆𑀙𑀫𑀁𑀲𑀁 𑀧𑀘𑁆𑀘𑁂𑀢𑀺, 𑀬𑀁𑀦𑀽𑀦𑀸𑀳𑀁 𑀲𑁆𑀯𑁂 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀅𑀧𑀯𑀺𑀲𑀺𑀢𑁆𑀯𑀸 𑀓𑀺𑀓𑀻𑀭𑀜𑁆𑀜𑁄 𑀕𑁂𑀳𑀸 𑀆𑀪𑀢𑀁 ¶ 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀁, 𑀏𑀯𑀁 𑀆𑀫𑀕𑀦𑁆𑀥𑀁 𑀆𑀭𑀩𑁆𑀪 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑀁 𑀥𑀫𑁆𑀫𑀤𑁂𑀲𑀦𑀸𑀬 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀁 𑀧𑀺𑀳𑀺𑀢𑀁 𑀤𑀺𑀲𑁆𑀯𑀸 ‘‘𑀦 ¶ 𑀪𑀕𑀯𑀸 𑀅𑀚𑁆𑀚 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀺𑀲𑀺𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼.

𑀪𑀕𑀯𑀸𑀧𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀢𑀸𑀧𑀲𑁄𑀧𑀺 𑀔𑁄 𑀧𑀢𑁆𑀢𑀲𑀸𑀓𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀓𑀺𑀓𑀻 𑀓𑀸𑀲𑀺𑀭𑀸𑀚𑀸 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀼𑀳𑀺𑀁 𑀪𑀕𑀯𑀸, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀺𑀳𑀸𑀭𑁂, 𑀫𑀳𑀸𑀭𑀸𑀚𑀸’’𑀢𑀺 𑀘 𑀲𑀼𑀢𑁆𑀯𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀭𑀲𑀫𑀦𑁂𑀓𑀫𑀁𑀲𑀯𑀺𑀓𑀢𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀕𑀯𑀢𑁄 𑀧𑀸𑀳𑁂𑀲𑀺. 𑀅𑀫𑀘𑁆𑀘𑀸 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀧𑀭𑀺𑀯𑀺𑀲𑀦𑁆𑀢𑀸 𑀧𑀞𑀫𑀁 𑀦𑀸𑀦𑀸𑀫𑀁𑀲𑀯𑀺𑀓𑀢𑀺𑀲𑀫𑁆𑀧𑀦𑁆𑀦𑀁 𑀬𑀸𑀕𑀼𑀁 𑀅𑀤𑀁𑀲𑀼, 𑀢𑀸𑀧𑀲𑁄 𑀤𑀺𑀲𑁆𑀯𑀸 ‘‘𑀔𑀸𑀤𑀢𑀺 𑀦𑀼 𑀔𑁄 𑀦𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀧𑀲𑁆𑀲𑀢𑁄𑀬𑁂𑀯 𑀬𑀸𑀕𑀼𑀁 𑀧𑀺𑀯𑀦𑁆𑀢𑁄 𑀫𑀁𑀲𑀔𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀓𑀼𑀤𑁆𑀥𑁄. 𑀧𑀼𑀦 𑀬𑀸𑀕𑀼𑀧𑀻𑀢𑀲𑁆𑀲 𑀦𑀸𑀦𑀸𑀭𑀲𑀩𑁆𑀬𑀜𑁆𑀚𑀦𑀁 𑀪𑁄𑀚𑀦𑀫𑀤𑀁𑀲𑀼, 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀓𑀼𑀤𑁆𑀥𑁄 ‘‘𑀫𑀘𑁆𑀙𑀫𑀁𑀲𑀁 𑀔𑀸𑀤𑀦𑁆𑀢𑁄𑀬𑁂𑀯 ‘𑀦 𑀔𑀸𑀤𑀸𑀫𑀻’𑀢𑀺 𑀪𑀡𑀢𑀻’’𑀢𑀺. 𑀅𑀣 𑀪𑀕𑀯𑀦𑁆𑀢𑀁 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀉𑀧𑀲𑀗𑁆𑀓𑀫𑁆𑀫 ‘‘𑀪𑁄 𑀓𑀲𑁆𑀲𑀧, 𑀫𑀼𑀲𑀸 𑀢𑁆𑀯𑀁 𑀪𑀡𑀲𑀺, 𑀦𑁂𑀢𑀁 𑀧𑀡𑁆𑀟𑀺𑀢𑀓𑀺𑀘𑁆𑀘𑀁. 𑀫𑀼𑀲𑀸𑀯𑀸𑀤𑁄 𑀳𑀺 𑀕𑀭𑀳𑀺𑀢𑁄 𑀩𑀼𑀤𑁆𑀥𑀸𑀦𑀁, 𑀬𑁂𑀧𑀺 𑀢𑁂 𑀧𑀩𑁆𑀩𑀢𑀧𑀸𑀤𑁂 𑀯𑀦𑀫𑀽𑀮𑀨𑀮𑀸𑀤𑀻𑀳𑀺 𑀬𑀸𑀧𑁂𑀦𑁆𑀢𑀸 𑀇𑀲𑀬𑁄 𑀯𑀲𑀦𑁆𑀢𑀺, 𑀢𑁂𑀧𑀺 𑀫𑀼𑀲𑀸 𑀦 𑀪𑀡𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀇𑀲𑀻𑀦𑀁 𑀕𑀼𑀡𑁂 𑀕𑀸𑀣𑀸𑀬 𑀯𑀡𑁆𑀡𑁂𑀦𑁆𑀢𑁄 𑀆𑀳 ‘‘𑀲𑀸𑀫𑀸𑀓𑀘𑀺𑀗𑁆𑀕𑀽𑀮𑀓𑀘𑀻𑀦𑀓𑀸𑀦𑀺 𑀘𑀸’’𑀢𑀺.

𑁨𑁪𑁨. 𑀢𑀢𑁆𑀣 ¶ 𑀲𑀸𑀫𑀸𑀓𑀸𑀢𑀺 𑀥𑀼𑀦𑀺𑀢𑁆𑀯𑀸 𑀯𑀸 𑀲𑀻𑀲𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀯𑀸 𑀕𑀬𑁆𑀳𑀽𑀧𑀕𑀸 𑀢𑀺𑀡𑀥𑀜𑁆𑀜𑀚𑀸𑀢𑀺. 𑀢𑀣𑀸 𑀘𑀺𑀗𑁆𑀕𑀽𑀮𑀓𑀸 𑀓𑀡𑀯𑀻𑀭𑀧𑀼𑀧𑁆𑀨𑀲𑀡𑁆𑀞𑀸𑀦𑀲𑀻𑀲𑀸 𑀳𑁄𑀦𑁆𑀢𑀺. 𑀘𑀻𑀦𑀓𑀸𑀦𑀻𑀢𑀺 𑀅𑀝𑀯𑀺𑀧𑀩𑁆𑀩𑀢𑀧𑀸𑀤𑁂𑀲𑀼 𑀅𑀭𑁄𑀧𑀺𑀢𑀚𑀸𑀢𑀸 𑀘𑀻𑀦𑀫𑀼𑀕𑁆𑀕𑀸. 𑀧𑀢𑁆𑀢𑀧𑁆𑀨𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀳𑀭𑀺𑀢𑀧𑀡𑁆𑀡𑀁. 𑀫𑀽𑀮𑀨𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀓𑀦𑁆𑀤𑀫𑀽𑀮𑀁. 𑀕𑀯𑀺𑀧𑁆𑀨𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀭𑀼𑀓𑁆𑀔𑀯𑀮𑁆𑀮𑀺𑀨𑀮𑀁. 𑀫𑀽𑀮𑀕𑁆𑀕𑀳𑀡𑁂𑀦 𑀯𑀸 𑀓𑀦𑁆𑀤𑀫𑀽𑀮𑀁, 𑀨𑀮𑀕𑁆𑀕𑀳𑀡𑁂𑀦 𑀭𑀼𑀓𑁆𑀔𑀯𑀮𑁆𑀮𑀺𑀨𑀮𑀁, 𑀕𑀯𑀺𑀧𑁆𑀨𑀮𑀕𑁆𑀕𑀳𑀡𑁂𑀦 ¶ 𑀉𑀤𑀓𑁂 𑀚𑀸𑀢𑀲𑀺𑀗𑁆𑀖𑀸𑀢𑀓𑀓𑀲𑁂𑀭𑀼𑀓𑀸𑀤𑀺𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑁂𑀦 𑀮𑀤𑁆𑀥𑀦𑁆𑀢𑀺 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀯𑀦𑁂 𑀉𑀜𑁆𑀙𑀸𑀘𑀭𑀺𑀬𑀸𑀬 𑀮𑀤𑁆𑀥𑀁. 𑀲𑀢𑀦𑁆𑀢𑀺 𑀲𑀦𑁆𑀢𑁄 𑀅𑀭𑀺𑀬𑀸. 𑀅𑀲𑁆𑀦𑀫𑀸𑀦𑀸𑀢𑀺 𑀪𑀼𑀜𑁆𑀚𑀫𑀸𑀦𑀸. 𑀦 𑀓𑀸𑀫𑀓𑀸𑀫𑀸 𑀅𑀮𑀺𑀓𑀁 𑀪𑀡𑀦𑁆𑀢𑀻𑀢𑀺 𑀢𑁂 𑀏𑀯𑀁 𑀅𑀫𑀫𑀸 𑀅𑀧𑀭𑀺𑀕𑁆𑀕𑀳𑀸 𑀏𑀢𑀸𑀦𑀺 𑀲𑀸𑀫𑀸𑀓𑀸𑀤𑀻𑀦𑀺 𑀪𑀼𑀜𑁆𑀚𑀫𑀸𑀦𑀸 𑀇𑀲𑀬𑁄 𑀬𑀣𑀸 𑀢𑁆𑀯𑀁 𑀲𑀸𑀤𑀼𑀭𑀲𑀸𑀤𑀺𑀓𑁂 𑀓𑀸𑀫𑁂 𑀧𑀢𑁆𑀣𑀬𑀦𑁆𑀢𑁄 𑀆𑀫𑀕𑀦𑁆𑀥𑀁 𑀪𑀼𑀜𑁆𑀚𑀦𑁆𑀢𑁄𑀬𑁂𑀯 ‘‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀆𑀫𑀕𑀦𑁆𑀥𑀁 𑀪𑀼𑀜𑁆𑀚𑀸𑀫𑀻’’𑀢𑀺 𑀪𑀡𑀦𑁆𑀢𑁄 𑀅𑀮𑀺𑀓𑀁 𑀪𑀡𑀲𑀺, 𑀢𑀣𑀸 𑀦 𑀓𑀸𑀫𑀓𑀸𑀫𑀸 𑀅𑀮𑀺𑀓𑀁 𑀪𑀡𑀦𑁆𑀢𑀺, 𑀓𑀸𑀫𑁂 𑀓𑀸𑀫𑀬𑀦𑁆𑀢𑀸 𑀫𑀼𑀲𑀸 𑀦 𑀪𑀡𑀦𑁆𑀢𑀻𑀢𑀺 𑀇𑀲𑀻𑀦𑀁 𑀧𑀲𑀁𑀲𑀸𑀬 𑀪𑀕𑀯𑀢𑁄 𑀦𑀺𑀦𑁆𑀤𑀁 𑀤𑀻𑀧𑁂𑀢𑀺.

𑁨𑁪𑁩. 𑀏𑀯𑀁 ¶ 𑀇𑀲𑀻𑀦𑀁 𑀧𑀲𑀁𑀲𑀸𑀧𑀤𑁂𑀲𑁂𑀦 𑀪𑀕𑀯𑀦𑁆𑀢𑀁 𑀦𑀺𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀦𑀺𑀦𑁆𑀤𑀸𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀪𑀕𑀯𑀦𑁆𑀢𑀁 𑀦𑀺𑀦𑁆𑀤𑀦𑁆𑀢𑁄 𑀆𑀳 ‘‘𑀬𑀤𑀲𑁆𑀦𑀫𑀸𑀦𑁄’’𑀢𑀺 𑀢𑀢𑁆𑀣 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀬𑀁 𑀧𑀦𑀢𑁆𑀣𑁄 𑁋 𑀬𑀁 𑀓𑀺𑀜𑁆𑀘𑀺𑀤𑁂𑀯 𑀲𑀲𑀫𑀁𑀲𑀁 𑀯𑀸 𑀢𑀺𑀢𑁆𑀢𑀺𑀭𑀫𑀁𑀲𑀁 𑀯𑀸 𑀥𑁄𑀯𑀦𑀘𑁆𑀙𑁂𑀤𑀦𑀸𑀤𑀺𑀦𑀸 𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑁂𑀦 𑀲𑀼𑀓𑀢𑀁, 𑀧𑀘𑀦𑀯𑀸𑀲𑀦𑀸𑀤𑀺𑀦𑀸 𑀧𑀘𑁆𑀙𑀸𑀧𑀭𑀺𑀓𑀫𑁆𑀫𑁂𑀦 𑀲𑀼𑀦𑀺𑀝𑁆𑀞𑀺𑀢𑀁, 𑀦 𑀫𑀸𑀢𑀭𑀸 𑀦 𑀧𑀺𑀢𑀭𑀸, 𑀅𑀧𑀺𑀘 𑀔𑁄 𑀧𑀦 ‘‘𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀳𑀺 𑀥𑀫𑁆𑀫𑀓𑀸𑀫𑁂𑀳𑀺 𑀧𑀭𑁂𑀳𑀺 𑀤𑀺𑀦𑁆𑀦𑀁, 𑀲𑀓𑁆𑀓𑀸𑀭𑀓𑀭𑀡𑁂𑀦 𑀧𑀬𑀢𑀁 𑀧𑀡𑀻𑀢𑀫𑀮𑀗𑁆𑀓𑀢𑀁, 𑀉𑀢𑁆𑀢𑀫𑀭𑀲𑀢𑀸𑀬 𑀑𑀚𑀯𑀦𑁆𑀢𑀢𑀸𑀬 𑀣𑀸𑀫𑀩𑀮𑀪𑀭𑀡𑀲𑀫𑀢𑁆𑀣𑀢𑀸𑀬 𑀘 𑀧𑀡𑀻𑀢𑀁 𑀅𑀲𑁆𑀦𑀫𑀸𑀦𑁄 𑀆𑀳𑀸𑀭𑀬𑀫𑀸𑀦𑁄, 𑀦 𑀓𑁂𑀯𑀮𑀜𑁆𑀘 𑀬𑀁𑀓𑀺𑀜𑁆𑀘𑀺 𑀫𑀁𑀲𑀫𑁂𑀯, 𑀅𑀧𑀺𑀘 𑀔𑁄 𑀧𑀦 𑀇𑀤𑀫𑁆𑀧𑀺 𑀲𑀸𑀮𑀻𑀦𑀫𑀦𑁆𑀦𑀁 𑀯𑀺𑀘𑀺𑀢𑀓𑀸𑀴𑀓𑀁 𑀲𑀸𑀮𑀺𑀢𑀡𑁆𑀟𑀼𑀮𑁄𑀤𑀦𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀲𑁄 𑀪𑀼𑀜𑁆𑀚𑀲𑀺, 𑀓𑀲𑁆𑀲𑀧, 𑀆𑀫𑀕𑀦𑁆𑀥𑀁, 𑀲𑁄 𑀢𑁆𑀯𑀁 𑀬𑀁𑀓𑀺𑀜𑁆𑀘𑀺 𑀫𑀁𑀲𑀁 𑀪𑀼𑀜𑁆𑀚𑀫𑀸𑀦𑁄 𑀇𑀤𑀜𑁆𑀘 𑀲𑀸𑀮𑀻𑀦𑀫𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀪𑀼𑀜𑁆𑀚𑀲𑀺, 𑀓𑀲𑁆𑀲𑀧, 𑀆𑀫𑀕𑀦𑁆𑀥𑀦𑁆𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑁨𑁪𑁪. 𑀏𑀯𑀁 ¶ 𑀆𑀳𑀸𑀭𑀢𑁄 𑀪𑀕𑀯𑀦𑁆𑀢𑀁 𑀦𑀺𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀫𑀼𑀲𑀸𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀦𑁆𑀤𑀦𑁆𑀢𑁄 𑀆𑀳 ‘‘𑀦 𑀆𑀫𑀕𑀦𑁆𑀥𑁄…𑀧𑁂… 𑀲𑀼𑀲𑀗𑁆𑀔𑀢𑁂𑀳𑀻’’𑀢𑀺. 𑀢𑀲𑁆𑀲𑀢𑁆𑀣𑁄 ¶ 𑁋 𑀧𑀼𑀩𑁆𑀩𑁂 𑀫𑀬𑀸 𑀧𑀼𑀘𑁆𑀙𑀺𑀢𑁄 𑀲𑀫𑀸𑀦𑁄 ‘‘𑀦 𑀆𑀫𑀕𑀦𑁆𑀥𑁄 𑀫𑀫 𑀓𑀧𑁆𑀧𑀢𑀻’’𑀢𑀺 𑀇𑀘𑁆𑀘𑁂𑀯 𑀢𑁆𑀯𑀁 𑀪𑀸𑀲𑀲𑀺, 𑀏𑀯𑀁 𑀏𑀓𑀁𑀲𑁂𑀦𑁂𑀯 𑀢𑁆𑀯𑀁 𑀪𑀸𑀲𑀲𑀺 𑀩𑁆𑀭𑀳𑁆𑀫𑀩𑀦𑁆𑀥𑀼 𑀩𑁆𑀭𑀸𑀳𑁆𑀫𑀡𑀕𑀼𑀡𑀯𑀺𑀭𑀳𑀺𑀢𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀭𑀺𑀪𑀸𑀲𑀦𑁆𑀢𑁄 𑀪𑀡𑀢𑀺. 𑀲𑀸𑀮𑀻𑀦𑀫𑀦𑁆𑀦𑀦𑁆𑀢𑀺 𑀲𑀸𑀮𑀺𑀢𑀡𑁆𑀟𑀼𑀮𑁄𑀤𑀦𑀁. 𑀧𑀭𑀺𑀪𑀼𑀜𑁆𑀚𑀫𑀸𑀦𑁄𑀢𑀺 𑀪𑀼𑀜𑁆𑀚𑀫𑀸𑀦𑁄. 𑀲𑀓𑀼𑀦𑁆𑀢𑀫𑀁𑀲𑁂𑀳𑀺 𑀲𑀼𑀲𑀗𑁆𑀔𑀢𑁂𑀳𑀻𑀢𑀺 𑀢𑀤𑀸 𑀪𑀕𑀯𑀢𑁄 𑀅𑀪𑀺𑀳𑀝𑀁 𑀲𑀓𑀼𑀡𑀫𑀁𑀲𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀪𑀡𑀢𑀺.

𑀏𑀯𑀁 𑀪𑀡𑀦𑁆𑀢𑁄 𑀏𑀯 𑀘 𑀪𑀕𑀯𑀢𑁄 𑀳𑁂𑀝𑁆𑀞𑀸 𑀧𑀸𑀤𑀢𑀮𑀸 𑀧𑀪𑀼𑀢𑀺 𑀬𑀸𑀯 𑀉𑀧𑀭𑀺 𑀓𑁂𑀲𑀕𑁆𑀕𑀸 𑀲𑀭𑀻𑀭𑀫𑀼𑀮𑁆𑀮𑁄𑀓𑁂𑀦𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀸𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀤𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀜𑁆𑀘 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑁄 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀓𑀸𑀬𑁄 𑀦 𑀫𑀼𑀲𑀸 𑀪𑀡𑀺𑀢𑀼𑀁 𑀅𑀭𑀳𑀢𑀺. 𑀅𑀬𑀁 𑀳𑀺𑀲𑁆𑀲 𑀪𑀯𑀦𑁆𑀢𑀭𑁂𑀧𑀺 𑀲𑀘𑁆𑀘𑀯𑀸𑀘𑀸𑀦𑀺𑀲𑁆𑀲𑀦𑁆𑀤𑁂𑀦𑁂𑀯 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼 𑀢𑀽𑀮𑀲𑀦𑁆𑀦𑀺𑀪𑀸, 𑀏𑀓𑁂𑀓𑀸𑀦𑀺 𑀘 𑀮𑁄𑀫𑀓𑀽𑀧𑁂𑀲𑀼 𑀮𑁄𑀫𑀸𑀦𑀺. 𑀲𑁆𑀯𑀸𑀬𑀁 𑀓𑀣𑀫𑀺𑀤𑀸𑀦𑀺 𑀫𑀼𑀲𑀸 𑀪𑀡𑀺𑀲𑁆𑀲𑀢𑀺. 𑀅𑀤𑁆𑀥𑀸 𑀅𑀜𑁆𑀜𑁄 𑀇𑀫𑀲𑁆𑀲 𑀆𑀫𑀕𑀦𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀬𑀁 𑀲𑀦𑁆𑀥𑀸𑀬 𑀏𑀢𑀤𑀯𑁄𑀘 𑁋 ‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀆𑀫𑀕𑀦𑁆𑀥𑀁 𑀪𑀼𑀜𑁆𑀚𑀸𑀫𑀻’𑀢𑀺, 𑀬𑀁𑀦𑀽𑀦𑀸𑀳𑀁 𑀏𑀢𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄 𑀕𑁄𑀢𑁆𑀢𑁂𑀦𑁂𑀯 𑀆𑀮𑀧𑀦𑁆𑀢𑁄 𑀇𑀫𑀁 𑀕𑀸𑀣𑀸𑀲𑁂𑀲𑀁 𑀆𑀳 𑁋

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀓𑀲𑁆𑀲𑀧 𑀏𑀢𑀫𑀢𑁆𑀣𑀁, 𑀓𑀣𑀁𑀧𑀓𑀸𑀭𑁄 𑀢𑀯 𑀆𑀫𑀕𑀦𑁆𑀥𑁄’’𑀢𑀺.

𑁨𑁪𑁫. 𑀅𑀣𑀲𑁆𑀲 𑀪𑀕𑀯𑀸 𑀆𑀫𑀕𑀦𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀧𑀸𑀡𑀸𑀢𑀺𑀧𑀸𑀢𑁄’’𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 ¶ 𑀧𑀸𑀡𑀯𑀥𑁄. 𑀯𑀥𑀙𑁂𑀤𑀩𑀦𑁆𑀥𑀦𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸𑀦𑀁 𑀤𑀡𑁆𑀟𑀸𑀤𑀻𑀳𑀺 𑀆𑀓𑁄𑀝𑀦𑀁 𑀯𑀥𑁄, 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀙𑁂𑀤𑀦𑀁 𑀙𑁂𑀤𑁄, 𑀭𑀚𑁆𑀚𑀼𑀆𑀤𑀻𑀳𑀺 𑀩𑀦𑁆𑀥𑁄 𑀩𑀦𑁆𑀥𑀦𑀁. 𑀣𑁂𑀬𑁆𑀬𑀁 𑀫𑀼𑀲𑀸𑀯𑀸𑀤𑁄𑀢𑀺 𑀣𑁂𑀬𑁆𑀬𑀜𑁆𑀘 𑀫𑀼𑀲𑀸𑀯𑀸𑀤𑁄 𑀘. 𑀦𑀺𑀓𑀢𑀻𑀢𑀺 ‘‘𑀤𑀲𑁆𑀲𑀸𑀫𑀺, 𑀓𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀲𑀁 ¶ 𑀉𑀧𑁆𑀧𑀸𑀤𑁂𑀢𑁆𑀯𑀸 𑀦𑀺𑀭𑀸𑀲𑀸𑀓𑀭𑀡𑀁. 𑀯𑀜𑁆𑀘𑀦𑀸𑀦𑀻𑀢𑀺 𑀅𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀦𑁆𑀢𑀺 𑀕𑀸𑀳𑀸𑀧𑀦𑀸𑀤𑀻𑀦𑀺. 𑀅𑀚𑁆𑀛𑁂𑀦𑀓𑀼𑀢𑁆𑀢𑀦𑁆𑀢𑀺 𑀦𑀺𑀭𑀢𑁆𑀣𑀓𑀫𑀦𑁂𑀓𑀕𑀦𑁆𑀣𑀧𑀭𑀺𑀬𑀸𑀧𑀼𑀡𑀦𑀁. 𑀧𑀭𑀤𑀸𑀭𑀲𑁂𑀯𑀦𑀸𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀲𑀼 𑀘𑀸𑀭𑀺𑀢𑁆𑀢𑀸𑀧𑀚𑁆𑀚𑀦𑀁. 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀏𑀲 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑁄 𑀆𑀫𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄 ¶ 𑀓𑀼𑀡𑀧𑀕𑀦𑁆𑀥𑁄. 𑀓𑀺𑀁 𑀓𑀸𑀭𑀡𑀸? 𑀅𑀫𑀦𑀼𑀜𑁆𑀜𑀢𑁆𑀢𑀸 𑀓𑀺𑀮𑁂𑀲𑀅𑀲𑀼𑀘𑀺𑀫𑀺𑀲𑁆𑀲𑀓𑀢𑁆𑀢𑀸 𑀲𑀩𑁆𑀪𑀺 𑀚𑀺𑀕𑀼𑀘𑁆𑀙𑀺𑀢𑀢𑁆𑀢𑀸 𑀧𑀭𑀫𑀤𑀼𑀕𑁆𑀕𑀦𑁆𑀥𑀪𑀸𑀯𑀸𑀯𑀳𑀢𑁆𑀢𑀸 𑀘. 𑀬𑁂 𑀳𑀺 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀲𑀢𑁆𑀢𑀸, 𑀢𑁂 𑀢𑁂𑀳𑀺 𑀅𑀢𑀺𑀤𑀼𑀕𑁆𑀕𑀦𑁆𑀥𑀸 𑀳𑁄𑀦𑁆𑀢𑀺, 𑀦𑀺𑀓𑁆𑀓𑀺𑀮𑁂𑀲𑀸𑀦𑀁 𑀫𑀢𑀲𑀭𑀻𑀭𑀫𑁆𑀧𑀺 𑀤𑀼𑀕𑁆𑀕𑀦𑁆𑀥𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀏𑀲𑀸𑀫𑀕𑀦𑁆𑀥𑁄. 𑀫𑀁𑀲𑀪𑁄𑀚𑀦𑀁 𑀧𑀦 𑀅𑀤𑀺𑀝𑁆𑀞𑀫𑀲𑀼𑀢𑀫𑀧𑀭𑀺𑀲𑀗𑁆𑀓𑀺𑀢𑀜𑁆𑀘 𑀅𑀦𑀯𑀚𑁆𑀚𑀁, 𑀢𑀲𑁆𑀫𑀸 𑀦 𑀳𑀺 𑀫𑀁𑀲𑀪𑁄𑀚𑀦𑀁 𑀆𑀫𑀕𑀦𑁆𑀥𑁄𑀢𑀺.

𑁨𑁪𑁬. 𑀏𑀯𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀏𑀓𑁂𑀦 𑀦𑀬𑁂𑀦 𑀆𑀫𑀕𑀦𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂 𑀢𑁂 𑀲𑀢𑁆𑀢𑀸 𑀢𑁂𑀳𑀺 𑀢𑁂𑀳𑀺 𑀆𑀫𑀕𑀦𑁆𑀥𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀦 𑀏𑀓𑁄 𑀏𑀯 𑀲𑀩𑁆𑀩𑁂𑀳𑀺, 𑀦 𑀘 𑀲𑀩𑁆𑀩𑁂 𑀏𑀓𑁂𑀦𑁂𑀯, 𑀢𑀲𑁆𑀫𑀸 𑀦𑁂𑀲𑀁 𑀢𑁂 𑀢𑁂 𑀆𑀫𑀕𑀦𑁆𑀥𑁂 𑀧𑀓𑀸𑀲𑁂𑀢𑀼𑀁 ‘‘𑀬𑁂 𑀇𑀥 𑀓𑀸𑀫𑁂𑀲𑀼 𑀅𑀲𑀜𑁆𑀜𑀢𑀸 𑀚𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀢𑀸𑀯 𑀤𑁂𑀲𑀦𑀸𑀬 𑀆𑀫𑀕𑀦𑁆𑀥𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀬𑁂 𑀇𑀥 𑀓𑀸𑀫𑁂𑀲𑀼 𑀅𑀲𑀜𑁆𑀜𑀢𑀸 𑀚𑀦𑀸𑀢𑀺 𑀬𑁂 𑀓𑁂𑀘𑀺 𑀇𑀥 𑀮𑁄𑀓𑁂 𑀓𑀸𑀫𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀲𑀼 𑀓𑀸𑀫𑁂𑀲𑀼 𑀫𑀸𑀢𑀺𑀫𑀸𑀢𑀼𑀘𑁆𑀙𑀸𑀤𑀻𑀲𑀼𑀧𑀺 𑀫𑀭𑀺𑀬𑀸𑀤𑀸𑀯𑀺𑀭𑀳𑁂𑀦 𑀪𑀺𑀦𑁆𑀦𑀲𑀁𑀯𑀭𑀢𑀸𑀬 𑀅𑀲𑀁𑀬𑀢𑀸 𑀧𑀼𑀣𑀼𑀚𑁆𑀚𑀦𑀸. 𑀭𑀲𑁂𑀲𑀼 𑀕𑀺𑀤𑁆𑀥𑀸𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀲𑁂𑀲𑀼 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸 𑀭𑀲𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀲𑀼𑀘𑀺𑀪𑀸𑀯𑀫𑀲𑁆𑀲𑀺𑀢𑀸𑀢𑀺 𑀢𑀸𑀬 𑀭𑀲𑀕𑀺𑀤𑁆𑀥𑀺𑀬𑀸 𑀭𑀲𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀸𑀦𑀧𑁆𑀧𑀓𑀸𑀭𑀫𑀺𑀘𑁆𑀙𑀸𑀚𑀻𑀯𑀲𑀗𑁆𑀔𑀸𑀢𑀅𑀲𑀼𑀘𑀺𑀪𑀸𑀯𑀫𑀺𑀲𑁆𑀲𑀺𑀢𑀸. 𑀦𑀢𑁆𑀣𑀺𑀓𑀤𑀺𑀝𑁆𑀞𑀻𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀤𑀲𑀯𑀢𑁆𑀣𑀼𑀓𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀦𑁆𑀦𑀸𑀕𑀢𑀸. 𑀯𑀺𑀲𑀫𑀸𑀢𑀺 ¶ 𑀯𑀺𑀲𑀫𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀦𑀸 𑀲𑀫𑀦𑁆𑀦𑀸𑀕𑀢𑀸. 𑀤𑀼𑀭𑀦𑁆𑀦𑀬𑀸𑀢𑀺 𑀤𑀼𑀯𑀺𑀜𑁆𑀜𑀸𑀧𑀬𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀆𑀥𑀸𑀦𑀕𑁆𑀕𑀸𑀳𑀻𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀢𑀸𑀲𑀫𑀦𑁆𑀦𑀸𑀕𑀢𑀸. 𑀏𑀲𑀸𑀫𑀕𑀦𑁆𑀥𑁄𑀢𑀺 𑀏𑀲 𑀏𑀢𑀸𑀬 𑀕𑀸𑀣𑀸𑀬 𑀧𑀼𑀕𑁆𑀕𑀮𑁂 𑀅𑀥𑀺𑀝𑁆𑀞𑀸𑀬 𑀦𑀺𑀤𑁆𑀤𑀺𑀝𑁆𑀞𑁄 ‘‘𑀓𑀸𑀫𑁂𑀲𑀼 𑀅𑀲𑀁𑀬𑀢𑀢𑀸 𑀭𑀲𑀕𑀺𑀤𑁆𑀥𑀢𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀲𑀫𑀢𑀸 𑀤𑀼𑀭𑀦𑁆𑀦𑀬𑀪𑀸𑀯𑀢𑀸’’𑀢𑀺 𑀅𑀧𑀭𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀙𑀩𑁆𑀩𑀺𑀥𑁄 𑀆𑀫𑀕𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀫𑀁𑀲𑀪𑁄𑀚𑀦𑀁 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀦 𑀆𑀫𑀕𑀦𑁆𑀥𑁄𑀢𑀺.

𑁨𑁪𑁭. 𑀤𑀼𑀢𑀺𑀬𑀕𑀸𑀣𑀸𑀬𑀧𑀺 𑀬𑁂 𑀮𑀽𑀔𑀲𑀸𑀢𑀺 𑀬𑁂 𑀮𑀽𑀔𑀸 𑀦𑀺𑀭𑀲𑀸, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀸𑀭𑀼𑀡𑀸𑀢𑀺 𑀓𑀓𑁆𑀔𑀴𑀸 𑀤𑁄𑀯𑀘𑀲𑁆𑀲𑀢𑀸𑀬𑀼𑀢𑁆𑀢𑀸. 𑀧𑀺𑀝𑁆𑀞𑀺𑀫𑀁𑀲𑀺𑀓𑀸𑀢𑀺 ¶ 𑀧𑀼𑀭𑀢𑁄 𑀫𑀥𑀼𑀭𑀁 𑀪𑀡𑀺𑀢𑁆𑀯𑀸 𑀧𑀭𑀫𑁆𑀫𑀼𑀔𑁂 𑀅𑀯𑀡𑁆𑀡𑀪𑀸𑀲𑀺𑀦𑁄 ¶ . 𑀏𑀢𑁂 𑀳𑀺 𑀅𑀪𑀺𑀫𑀼𑀔𑀁 𑀑𑀮𑁄𑀓𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑀸 𑀧𑀭𑀫𑁆𑀫𑀼𑀔𑀸𑀦𑀁 𑀧𑀺𑀝𑁆𑀞𑀺𑀫𑀁𑀲𑀔𑀸𑀤𑀓𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑁂𑀦 ‘‘𑀧𑀺𑀝𑁆𑀞𑀺𑀫𑀁𑀲𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀺𑀢𑁆𑀢𑀤𑁆𑀤𑀼𑀦𑁄𑀢𑀺 𑀫𑀺𑀢𑁆𑀢𑀤𑀽𑀳𑀓𑀸, 𑀤𑀸𑀭𑀥𑀦𑀚𑀻𑀯𑀺𑀢𑁂𑀲𑀼 𑀯𑀺𑀲𑁆𑀲𑀸𑀲𑀫𑀸𑀧𑀦𑁆𑀦𑀸𑀦𑀁 𑀫𑀺𑀢𑁆𑀢𑀸𑀦𑀁 𑀢𑀢𑁆𑀣 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀓𑁆𑀓𑀭𑀼𑀡𑀸𑀢𑀺 𑀓𑀭𑀼𑀡𑀸𑀯𑀺𑀭𑀳𑀺𑀢𑀸 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀓𑀸𑀫𑀸. 𑀅𑀢𑀺𑀫𑀸𑀦𑀺𑀦𑁄𑀢𑀺 ‘‘𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂 𑀅𑀢𑀺𑀫𑀜𑁆𑀜𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺 (𑀯𑀺𑀪. 𑁮𑁮𑁦) 𑀏𑀯𑀁 𑀯𑀼𑀢𑁆𑀢𑁂𑀦 𑀅𑀢𑀺𑀫𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀤𑀸𑀦𑀲𑀻𑀮𑀸𑀢𑀺 𑀅𑀤𑀸𑀦𑀧𑀓𑀢𑀺𑀓𑀸, 𑀅𑀤𑀸𑀦𑀸𑀥𑀺𑀫𑀼𑀢𑁆𑀢𑀸 𑀅𑀲𑀁𑀯𑀺𑀪𑀸𑀕𑀭𑀢𑀸𑀢𑀺 𑀅𑀢𑁆𑀣𑁄. 𑀦 𑀘 𑀤𑁂𑀦𑁆𑀢𑀺 𑀓𑀲𑁆𑀲𑀘𑀻𑀢𑀺 𑀢𑀸𑀬 𑀘 𑀧𑀦 𑀅𑀤𑀸𑀦𑀲𑀻𑀮𑀢𑀸𑀬 𑀬𑀸𑀘𑀺𑀢𑀸𑀧𑀺 𑀲𑀦𑁆𑀢𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑁂𑀦𑁆𑀢𑀺, 𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑀓𑀼𑀮𑁂 𑀫𑀦𑀼𑀲𑁆𑀲𑀲𑀤𑀺𑀲𑀸 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑀧𑀭𑀸𑀬𑀡𑀸 𑀳𑁄𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀆𑀤𑀸𑀦𑀲𑀻𑀮𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀓𑁂𑀯𑀮𑀁 𑀕𑀳𑀡𑀲𑀻𑀮𑀸, 𑀓𑀲𑁆𑀲𑀘𑀺 𑀧𑀦 𑀓𑀺𑀜𑁆𑀘𑀺 𑀦 𑀤𑁂𑀦𑁆𑀢𑀻𑀢𑀺. 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀏𑀲 𑀏𑀢𑀸𑀬 𑀕𑀸𑀣𑀸𑀬 𑀧𑀼𑀕𑁆𑀕𑀮𑁂 𑀅𑀥𑀺𑀝𑁆𑀞𑀸𑀬 𑀦𑀺𑀤𑁆𑀤𑀺𑀝𑁆𑀞𑁄 ‘‘𑀮𑀽𑀔𑀢𑀸, 𑀤𑀸𑀭𑀼𑀡𑀢𑀸 ¶ , 𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸, 𑀫𑀺𑀢𑁆𑀢𑀤𑀽𑀪𑀺𑀢𑀸, 𑀦𑀺𑀓𑁆𑀓𑀭𑀼𑀡𑀢𑀸, 𑀅𑀢𑀺𑀫𑀸𑀦𑀺𑀢𑀸, 𑀅𑀤𑀸𑀦𑀲𑀻𑀮𑀢𑀸, 𑀅𑀤𑀸𑀦’’𑀦𑁆𑀢𑀺 𑀅𑀧𑀭𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀅𑀝𑁆𑀞𑀯𑀺𑀥𑁄 𑀆𑀫𑀕𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺.

𑁨𑁪𑁮. 𑀏𑀯𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀤𑁆𑀯𑁂 𑀕𑀸𑀣𑀸𑀬𑁄 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀢𑀸𑀧𑀲𑀲𑁆𑀲 𑀆𑀲𑀬𑀸𑀦𑀼𑀧𑀭𑀺𑀯𑀢𑁆𑀢𑀦𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬𑁂𑀯 𑀤𑁂𑀲𑀦𑀸𑀬 𑀏𑀓𑀁 𑀕𑀸𑀣𑀁 𑀅𑀪𑀸𑀲𑀺. 𑀢𑀢𑁆𑀣 𑀓𑁄𑀥𑁄 𑀉𑀭𑀕𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀫𑀤𑁄𑀢𑀺 ‘‘𑀚𑀸𑀢𑀺𑀫𑀤𑁄, 𑀕𑁄𑀢𑁆𑀢𑀫𑀤𑁄, 𑀆𑀭𑁄𑀕𑁆𑀬𑀫𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁩𑁨) 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀘𑀺𑀢𑁆𑀢𑀲𑁆𑀲 𑀫𑀚𑁆𑀚𑀦𑀪𑀸𑀯𑁄. 𑀣𑀫𑁆𑀪𑁄𑀢𑀺 𑀣𑀤𑁆𑀥𑀪𑀸𑀯𑁄. 𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑀸𑀢𑀺 𑀧𑀘𑁆𑀘𑀦𑀻𑀓𑀝𑁆𑀞𑀸𑀧𑀦𑀸, 𑀥𑀫𑁆𑀫𑁂𑀦 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀞𑀸𑀦𑀁. 𑀫𑀸𑀬𑀸𑀢𑀺 ‘‘𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁯𑁪) 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑀸 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀢𑀸. 𑀉𑀲𑀽𑀬𑀸𑀢𑀺 𑀧𑀭𑀮𑀸𑀪𑀲𑀓𑁆𑀓𑀸𑀭𑀸𑀤𑀻𑀲𑀼 𑀇𑀲𑁆𑀲𑀸. 𑀪𑀲𑁆𑀲𑀲𑀫𑀼𑀲𑁆𑀲𑀬𑁄𑀢𑀺 𑀲𑀫𑀼𑀲𑁆𑀲𑀺𑀢𑀁 𑀪𑀲𑁆𑀲𑀁, 𑀅𑀢𑁆𑀢𑀼𑀓𑁆𑀓𑀁𑀲𑀦𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸𑀦𑀸𑀢𑀺𑀫𑀸𑀦𑁄𑀢𑀺 ‘‘𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀼𑀩𑁆𑀩𑀓𑀸𑀮𑀁 𑀧𑀭𑁂𑀳𑀺 ¶ 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺, 𑀅𑀧𑀭𑀓𑀸𑀮𑀁 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀁 𑀤𑀳𑀢𑀺, 𑀧𑀭𑁂 𑀳𑀻𑀦𑁂 𑀤𑀳𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄…𑀧𑁂… 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺 (𑀯𑀺𑀪. 𑁮𑁮𑁦) 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑁄. 𑀅𑀲𑀩𑁆𑀪𑀺 𑀲𑀦𑁆𑀣𑀯𑁄𑀢𑀺 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀦𑁆𑀣𑀯𑁄. 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀏𑀲 𑀓𑁄𑀥𑀸𑀤𑀺 𑀦𑀯𑀯𑀺𑀥𑁄 𑀅𑀓𑀼𑀲𑀮𑀭𑀸𑀲𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀆𑀫𑀕𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺.

𑁨𑁪𑁯. 𑀏𑀯𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀦𑀯𑀯𑀺𑀥𑀁 𑀆𑀫𑀕𑀦𑁆𑀥𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀆𑀫𑀕𑀦𑁆𑀥𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀬𑁂 ¶ 𑀧𑀸𑀧𑀲𑀻𑀮𑀸𑀢𑀺 𑀬𑁂 𑀧𑀸𑀧𑀲𑀫𑀸𑀘𑀸𑀭𑀢𑀸𑀬 ‘‘𑀧𑀸𑀧𑀲𑀻𑀮𑀸’’𑀢𑀺 ¶ 𑀮𑁄𑀓𑁂 𑀧𑀸𑀓𑀝𑀸. 𑀇𑀡𑀖𑀸𑀢𑀲𑀽𑀘𑀓𑀸𑀢𑀺 𑀯𑀲𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀇𑀡𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀧𑁆𑀧𑀤𑀸𑀦𑁂𑀦 𑀇𑀡𑀖𑀸𑀢𑀸, 𑀧𑁂𑀲𑀼𑀜𑁆𑀜𑁂𑀦 𑀲𑀽𑀘𑀓𑀸 𑀘. 𑀯𑁄𑀳𑀸𑀭𑀓𑀽𑀝𑀸 𑀇𑀥 𑀧𑀸𑀝𑀺𑀭𑀽𑀧𑀺𑀓𑀸𑀢𑀺 𑀥𑀫𑁆𑀫𑀝𑁆𑀝𑀝𑁆𑀞𑀸𑀦𑁂 𑀞𑀺𑀢𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑁂 𑀧𑀭𑀸𑀚𑁂𑀦𑁆𑀢𑀸 𑀓𑀽𑀝𑁂𑀦 𑀯𑁄𑀳𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑁄𑀳𑀸𑀭𑀓𑀽𑀝𑀸, 𑀥𑀫𑁆𑀫𑀝𑁆𑀞𑀧𑀝𑀺𑀭𑀽𑀧𑀓𑀢𑁆𑀢𑀸 𑀧𑀸𑀝𑀺𑀭𑀽𑀧𑀺𑀓𑀸. 𑀅𑀣 𑀯𑀸 𑀇𑀥𑀸𑀢𑀺 𑀲𑀸𑀲𑀦𑁂. 𑀧𑀸𑀝𑀺𑀭𑀽𑀧𑀺𑀓𑀸𑀢𑀺 𑀤𑀼𑀲𑁆𑀲𑀻𑀮𑀸. 𑀢𑁂 𑀳𑀺 𑀬𑀲𑁆𑀫𑀸 𑀦𑁂𑀲𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀤𑀸𑀤𑀻𑀳𑀺 𑀲𑀻𑀮𑀯𑀦𑁆𑀢𑀧𑀝𑀺𑀭𑀽𑀧𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀺𑀭𑀽𑀧𑀸, 𑀧𑀝𑀺𑀭𑀽𑀧𑀸 𑀏𑀯 𑀧𑀸𑀝𑀺𑀭𑀽𑀧𑀺𑀓𑀸. 𑀦𑀭𑀸𑀥𑀫𑀸 𑀬𑁂𑀥 𑀓𑀭𑁄𑀦𑁆𑀢𑀺 𑀓𑀺𑀩𑁆𑀩𑀺𑀲𑀦𑁆𑀢𑀺 𑀬𑁂 𑀇𑀥 𑀮𑁄𑀓𑁂 𑀦𑀭𑀸𑀥𑀫𑀸 𑀫𑀸𑀢𑀸𑀧𑀺𑀢𑀽𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀲𑀼 𑀘 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀓𑀺𑀩𑁆𑀩𑀺𑀲𑀁 𑀓𑀭𑁄𑀦𑁆𑀢𑀺. 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀏𑀲 𑀏𑀢𑀸𑀬 𑀕𑀸𑀣𑀸𑀬 𑀧𑀼𑀕𑁆𑀕𑀮𑁂 𑀅𑀥𑀺𑀝𑁆𑀞𑀸𑀬 𑀦𑀺𑀤𑁆𑀤𑀺𑀝𑁆𑀞𑁄 ‘‘𑀧𑀸𑀧𑀲𑀻𑀮𑀢𑀸, 𑀇𑀡𑀖𑀸𑀢𑀢𑀸, 𑀲𑀽𑀘𑀓𑀢𑀸, 𑀯𑁄𑀳𑀸𑀭𑀓𑀽𑀝𑀢𑀸, 𑀧𑀸𑀝𑀺𑀭𑀽𑀧𑀺𑀓𑀢𑀸, 𑀓𑀺𑀩𑁆𑀩𑀺𑀲𑀓𑀸𑀭𑀺𑀢𑀸’’𑀢𑀺 𑀅𑀧𑀭𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑁂𑀯𑀢𑁆𑀣𑁂𑀦 𑀙𑀩𑁆𑀩𑀺𑀥𑁄 𑀆𑀫𑀕𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺.

𑁨𑁫𑁦. 𑀬𑁂 𑀇𑀥 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀸 𑀚𑀦𑀸𑀢𑀺 𑀬𑁂 𑀚𑀦𑀸 𑀇𑀥𑀮𑁄𑀓𑁂 𑀧𑀸𑀡𑁂𑀲𑀼 𑀬𑀣𑀸𑀓𑀸𑀫𑀘𑀸𑀭𑀺𑀢𑀸𑀬 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀫𑀸𑀭𑁂𑀢𑁆𑀯𑀸 𑀅𑀦𑀼𑀤𑁆𑀤𑀬𑀸𑀫𑀢𑁆𑀢𑀲𑁆𑀲𑀸𑀧𑀺 𑀅𑀓𑀭𑀡𑁂𑀦 𑀅𑀲𑀁𑀬𑀢𑀸. 𑀧𑀭𑁂𑀲𑀫𑀸𑀤𑀸𑀬 𑀯𑀺𑀳𑁂𑀲𑀫𑀼𑀬𑁆𑀬𑀼𑀢𑀸𑀢𑀺 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀆𑀤𑀸𑀬 𑀥𑀦𑀁 𑀯𑀸 𑀚𑀻𑀯𑀺𑀢𑀁 𑀯𑀸 𑀢𑀢𑁄 ‘‘𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀬𑀸𑀘𑀦𑁆𑀢𑀸𑀦𑀁 𑀯𑀸 𑀦𑀺𑀯𑀸𑀭𑁂𑀦𑁆𑀢𑀸𑀦𑀁 𑀯𑀸 𑀧𑀸𑀡𑀺𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀲𑀁 𑀉𑀬𑁆𑀬𑀼𑀢𑀸. 𑀧𑀭𑁂 𑀯𑀸 𑀲𑀢𑁆𑀢𑁂 𑀲𑀫𑀸𑀤𑀸𑀬 ‘‘𑀅𑀚𑁆𑀚 𑀤𑀲, 𑀅𑀚𑁆𑀚 𑀯𑀻𑀲’’𑀦𑁆𑀢𑀺 𑀏𑀯𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑁂𑀲𑀁 𑀯𑀥𑀩𑀦𑁆𑀥𑀦𑀸𑀤𑀻𑀳𑀺 𑀯𑀺𑀳𑁂𑀲𑀫𑀼𑀬𑁆𑀬𑀼𑀢𑀸. 𑀤𑀼𑀲𑁆𑀲𑀻𑀮𑀮𑀼𑀤𑁆𑀤𑀸𑀢𑀺 𑀦𑀺𑀲𑁆𑀲𑀻𑀮𑀸 𑀘 𑀤𑀼𑀭𑀸𑀘𑀸𑀭𑀢𑁆𑀢𑀸 ¶ , 𑀮𑀼𑀤𑁆𑀤𑀸 𑀘 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸 𑀮𑁄𑀳𑀺𑀢𑀧𑀸𑀡𑀺𑀢𑀸𑀬, 𑀫𑀘𑁆𑀙𑀖𑀸𑀢𑀓𑀫𑀺𑀕𑀩𑀦𑁆𑀥𑀓𑀲𑀸𑀓𑀼𑀡𑀺𑀓𑀸𑀤𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀨𑀭𑀼𑀲𑀸𑀢𑀺 𑀨𑀭𑀼𑀲𑀯𑀸𑀘𑀸. 𑀅𑀦𑀸𑀤𑀭𑀸𑀢𑀺 ‘‘𑀇𑀤𑀸𑀦𑀺 𑀦 𑀓𑀭𑀺𑀲𑁆𑀲𑀸𑀫, 𑀯𑀺𑀭𑀫𑀺𑀲𑁆𑀲𑀸𑀫 𑀏𑀯𑀭𑀽𑀧𑀸’’𑀢𑀺 𑀏𑀯𑀁 𑀆𑀤𑀭𑀯𑀺𑀭𑀳𑀺𑀢𑀸 ¶ . 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀏𑀲 𑀏𑀢𑀸𑀬 𑀕𑀸𑀣𑀸𑀬 𑀧𑀼𑀕𑁆𑀕𑀮𑁂 𑀅𑀥𑀺𑀝𑁆𑀞𑀸𑀬 𑀦𑀺𑀤𑁆𑀤𑀺𑀝𑁆𑀞𑁄 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀯𑀥𑀙𑁂𑀤𑀩𑀦𑁆𑀥𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀘 𑀅𑀯𑀼𑀢𑁆𑀢𑁄 𑀘 ‘‘𑀧𑀸𑀡𑁂𑀲𑀼 𑀅𑀲𑀁𑀬𑀢𑀢𑀸 𑀧𑀭𑁂𑀲𑀁 𑀯𑀺𑀳𑁂𑀲𑀢𑀸 𑀤𑀼𑀲𑁆𑀲𑀻𑀮𑀢𑀸 𑀮𑀼𑀤𑁆𑀤𑀢𑀸 𑀨𑀭𑀼𑀲𑀢𑀸 𑀅𑀦𑀸𑀤𑀭𑁄’’𑀢𑀺 𑀙𑀩𑁆𑀩𑀺𑀥𑁄 𑀆𑀫𑀕𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁆𑀧𑀺 𑀳𑀺 𑀲𑁄𑀢𑀽𑀦𑀁 𑀲𑁄𑀢𑀼𑀓𑀸𑀫𑀢𑀸𑀬 𑀅𑀯𑀥𑀸𑀭𑀡𑀢𑀸𑀬 𑀤𑀴𑁆𑀳𑀻𑀓𑀭𑀡𑀢𑀸𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀦 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀘 𑀧𑀭𑀢𑁄 𑀯𑀓𑁆𑀔𑀢𑀺 ‘‘𑀇𑀘𑁆𑀘𑁂𑀢𑀫𑀢𑁆𑀣𑀁 𑀪𑀕𑀯𑀸 𑀧𑀼𑀦𑀧𑁆𑀧𑀼𑀦𑀁, 𑀅𑀓𑁆𑀔𑀸𑀲𑀺 𑀦𑀁 𑀯𑁂𑀤𑀬𑀺 𑀫𑀦𑁆𑀢𑀧𑀸𑀭𑀕𑀽’’𑀢𑀺.

𑁨𑁫𑁧. 𑀏𑀢𑁂𑀲𑀼 𑀕𑀺𑀤𑁆𑀥𑀸 𑀯𑀺𑀭𑀼𑀤𑁆𑀥𑀸𑀢𑀺𑀧𑀸𑀢𑀺𑀦𑁄𑀢𑀺 𑀏𑀢𑁂𑀲𑀼 𑀧𑀸𑀡𑁂𑀲𑀼 𑀕𑁂𑀥𑁂𑀦 𑀕𑀺𑀤𑁆𑀥𑀸, 𑀤𑁄𑀲𑁂𑀦 𑀯𑀺𑀭𑀼𑀤𑁆𑀥𑀸, 𑀫𑁄𑀳𑁂𑀦 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀅𑀚𑁆𑀛𑀸𑀘𑀸𑀭𑀧𑁆𑀧𑀢𑁆𑀢𑀺𑀬𑀸 𑀅𑀢𑀺𑀧𑀸𑀢𑀺𑀦𑁄, 𑀏𑀢𑁂𑀲𑀼 𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀯𑀥𑀙𑁂𑀤𑀩𑀦𑁆𑀥𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀧𑀸𑀧𑀓𑀫𑁆𑀫𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀬𑁂 𑀕𑁂𑀥𑀯𑀺𑀭𑁄𑀥𑀸𑀢𑀺𑀧𑀸𑀢𑀲𑀗𑁆𑀔𑀸𑀢𑀸 𑀭𑀸𑀕𑀤𑁄𑀲𑀫𑁄𑀳𑀸, 𑀢𑁂𑀳𑀺 𑀕𑀺𑀤𑁆𑀥𑀸 𑀯𑀺𑀭𑀼𑀤𑁆𑀥𑀸 𑀅𑀢𑀺𑀧𑀸𑀢𑀺𑀦𑁄 𑀘. 𑀦𑀺𑀘𑁆𑀘𑀼𑀬𑁆𑀬𑀼𑀢𑀸𑀢𑀺 𑀅𑀓𑀼𑀲𑀮𑀓𑀭𑀡𑁂 ¶ 𑀦𑀺𑀘𑁆𑀘𑀁 𑀉𑀬𑁆𑀬𑀼𑀢𑀸, 𑀓𑀤𑀸𑀘𑀺 𑀧𑀝𑀺𑀲𑀗𑁆𑀔𑀸𑀬 𑀅𑀧𑁆𑀧𑀝𑀺𑀯𑀺𑀭𑀢𑀸. 𑀧𑁂𑀘𑁆𑀘𑀸𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀕𑀦𑁆𑀢𑁆𑀯𑀸. 𑀢𑀫𑀁 𑀯𑀚𑀦𑁆𑀢𑀺 𑀬𑁂, 𑀧𑀢𑀦𑁆𑀢𑀺 𑀲𑀢𑁆𑀢𑀸 𑀦𑀺𑀭𑀬𑀁 𑀅𑀯𑀁𑀲𑀺𑀭𑀸𑀢𑀺 𑀬𑁂 𑀮𑁄𑀓𑀦𑁆𑀢𑀭𑀺𑀓𑀦𑁆𑀥𑀓𑀸𑀭𑀲𑀗𑁆𑀔𑀸𑀢𑀁 𑀦𑀻𑀘𑀓𑀼𑀮𑀢𑀸𑀤𑀺𑀪𑁂𑀤𑀁 𑀯𑀸 𑀢𑀫𑀁 𑀯𑀚𑀦𑁆𑀢𑀺, 𑀬𑁂 𑀘 𑀧𑀢𑀦𑁆𑀢𑀺 𑀲𑀢𑁆𑀢𑀸 𑀅𑀯𑀻𑀘𑀺𑀆𑀤𑀺𑀪𑁂𑀤𑀁 𑀦𑀺𑀭𑀬𑀁 𑀅𑀯𑀁𑀲𑀺𑀭𑀸 𑀅𑀥𑁄𑀕𑀢𑀲𑀻𑀲𑀸. 𑀏𑀲𑀸𑀫𑀕𑀦𑁆𑀥𑁄𑀢𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑀯𑀚𑀦𑀦𑀺𑀭𑀬𑀧𑀢𑀦𑀳𑁂𑀢𑀼 𑀏𑀲 𑀕𑁂𑀥𑀯𑀺𑀭𑁄𑀥𑀸𑀢𑀺𑀧𑀸𑀢𑀪𑁂𑀤𑁄 𑀲𑀩𑁆𑀩𑀸𑀫𑀕𑀦𑁆𑀥𑀫𑀽𑀮𑀪𑀽𑀢𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀢𑀺𑀯𑀺𑀥𑁄 𑀆𑀫𑀕𑀦𑁆𑀥𑁄. 𑀦 𑀳𑀺 𑀫𑀁𑀲𑀪𑁄𑀚𑀦𑀦𑁆𑀢𑀺 𑀫𑀁𑀲𑀪𑁄𑀚𑀦𑀁 𑀧𑀦 𑀦 𑀆𑀫𑀕𑀦𑁆𑀥𑁄𑀢𑀺.

𑁨𑁫𑁨. 𑀏𑀯𑀁 𑀪𑀕𑀯𑀸 𑀧𑀭𑀫𑀢𑁆𑀣𑀢𑁄 𑀆𑀫𑀕𑀦𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀼𑀕𑁆𑀕𑀢𑀺𑀫𑀕𑁆𑀕𑀪𑀸𑀯𑀜𑁆𑀘𑀲𑁆𑀲 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀺𑀁 𑀫𑀘𑁆𑀙𑀫𑀁𑀲𑀪𑁄𑀚𑀦𑁂 𑀢𑀸𑀧𑀲𑁄 𑀆𑀫𑀕𑀦𑁆𑀥𑀲𑀜𑁆𑀜𑀻 𑀤𑀼𑀕𑁆𑀕𑀢𑀺𑀫𑀕𑁆𑀕𑀲𑀜𑁆𑀜𑀻 ¶ 𑀘 𑀳𑀼𑀢𑁆𑀯𑀸 𑀢𑀲𑁆𑀲 𑀅𑀪𑁄𑀚𑀦𑁂𑀦 𑀲𑀼𑀤𑁆𑀥𑀺𑀓𑀸𑀫𑁄 𑀳𑀼𑀢𑁆𑀯𑀸 𑀢𑀁 𑀦 𑀪𑀼𑀜𑁆𑀚𑀢𑀺, 𑀢𑀲𑁆𑀲 𑀘 𑀅𑀜𑁆𑀜𑀲𑁆𑀲 𑀘 𑀢𑀣𑀸𑀯𑀺𑀥𑀲𑁆𑀲 𑀲𑁄𑀥𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀫𑀘𑁆𑀙𑀫𑀁𑀲’’𑀦𑁆𑀢𑀺 𑀇𑀫𑀁 𑀙𑀧𑁆𑀧𑀤𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀧𑀤𑀸𑀦𑀺 ¶ 𑀅𑀦𑁆𑀢𑀺𑀫𑀧𑀸𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺 𑁋 𑀦 𑀫𑀘𑁆𑀙𑀫𑀁𑀲𑀁 𑀲𑁄𑀥𑁂𑀢𑀺 𑀫𑀘𑁆𑀘𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑀁, 𑀦 𑀆𑀳𑀼𑀢𑀺𑀬𑀜𑁆𑀜𑀫𑀼𑀢𑀽𑀧𑀲𑁂𑀯𑀦𑀸 𑀲𑁄𑀥𑁂𑀢𑀺 𑀫𑀘𑁆𑀘𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑀦𑁆𑀢𑀺 𑀏𑀯𑀁. 𑀏𑀢𑁆𑀣 𑀘 𑀦 𑀫𑀘𑁆𑀙𑀫𑀁𑀲𑀦𑁆𑀢𑀺 𑀅𑀔𑀸𑀤𑀺𑀬𑀫𑀸𑀦𑀁 𑀫𑀘𑁆𑀙𑀫𑀁𑀲𑀁 𑀦 𑀲𑁄𑀥𑁂𑀢𑀺, 𑀢𑀣𑀸 𑀅𑀦𑀸𑀲𑀓𑀢𑁆𑀢𑀦𑁆𑀢𑀺 𑀏𑀯𑀁 𑀧𑁄𑀭𑀸𑀡𑀸 𑀯𑀡𑁆𑀡𑁂𑀦𑁆𑀢𑀺. 𑀏𑀯𑀁 𑀧𑀦 𑀲𑀼𑀦𑁆𑀤𑀭𑀢𑀭𑀁 𑀲𑀺𑀬𑀸 ‘‘𑀦 𑀫𑀘𑁆𑀙𑀫𑀁𑀲𑀸𑀦𑀁 𑀅𑀦𑀸𑀲𑀓𑀢𑁆𑀢𑀁 𑀦 𑀫𑀘𑁆𑀙𑀫𑀁𑀲𑀸𑀦𑀸𑀦𑀸𑀲𑀓𑀢𑁆𑀢𑀁, 𑀫𑀘𑁆𑀙𑀫𑀁𑀲𑀸𑀦𑀁 𑀅𑀦𑀸𑀲𑀓𑀢𑁆𑀢𑀁 𑀦 𑀲𑁄𑀥𑁂𑀢𑀺, 𑀫𑀘𑁆𑀘’’𑀦𑁆𑀢𑀺 𑀅𑀣𑀸𑀧𑀺 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀲𑀓𑀢𑁆𑀢𑀁 𑀑𑀳𑀻𑀬𑀢𑀻𑀢𑀺? 𑀢𑀜𑁆𑀘 𑀦, 𑀅𑀫𑀭𑀢𑀧𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. ‘‘𑀬𑁂 𑀯𑀸𑀧𑀺 𑀮𑁄𑀓𑁂 𑀅𑀫𑀭𑀸 𑀩𑀳𑀽 𑀢𑀧𑀸’’𑀢𑀺 𑀏𑀢𑁆𑀣 𑀳𑀺 𑀲𑀩𑁆𑀩𑁄𑀧𑀺 𑀯𑀼𑀢𑁆𑀢𑀸𑀯𑀲𑁂𑀲𑁄 𑀅𑀢𑁆𑀢𑀓𑀺𑀮𑀫𑀣𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺. 𑀦𑀕𑁆𑀕𑀺𑀬𑀦𑁆𑀢𑀺 𑀅𑀘𑁂𑀮𑀓𑀢𑁆𑀢𑀁. 𑀫𑀼𑀡𑁆𑀟𑀺𑀬𑀦𑁆𑀢𑀺 𑀫𑀼𑀡𑁆𑀟𑀪𑀸𑀯𑁄. 𑀚𑀝𑀸𑀚𑀮𑁆𑀮𑀦𑁆𑀢𑀺 𑀚𑀝𑀸 𑀘 𑀭𑀚𑁄𑀚𑀮𑁆𑀮𑀜𑁆𑀘. 𑀔𑀭𑀸𑀚𑀺𑀦𑀸𑀦𑀻𑀢𑀺 𑀔𑀭𑀸𑀦𑀺 𑀅𑀚𑀺𑀦𑀘𑀫𑁆𑀫𑀸𑀦𑀺. 𑀅𑀕𑁆𑀕𑀺𑀳𑀼𑀢𑁆𑀢𑀲𑁆𑀲𑀼𑀧𑀲𑁂𑀯𑀦𑀸𑀢𑀺 𑀅𑀕𑁆𑀕𑀺𑀧𑀸𑀭𑀺𑀘𑀸𑀭𑀺𑀬𑀸. 𑀅𑀫𑀭𑀸𑀢𑀺 𑀅𑀫𑀭𑀪𑀸𑀯𑀧𑀢𑁆𑀣𑀦𑀢𑀸𑀬 𑀧𑀯𑀢𑁆𑀢𑀓𑀸𑀬𑀓𑀺𑀮𑁂𑀲𑀸. 𑀩𑀳𑀽𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀺𑀪𑁂𑀤𑀢𑁄 𑀅𑀦𑁂𑀓𑁂. 𑀢𑀧𑀸𑀢𑀺 𑀲𑀭𑀻𑀭𑀲𑀦𑁆𑀢𑀸𑀧𑀸. 𑀫𑀦𑁆𑀢𑀸𑀢𑀺 𑀯𑁂𑀤𑀸. 𑀆𑀳𑀼𑀢𑀻𑀢𑀺 𑀅𑀕𑁆𑀕𑀺𑀳𑁄𑀫𑀓𑀫𑁆𑀫𑀁. 𑀬𑀜𑁆𑀜𑀫𑀼𑀢𑀽𑀧𑀲𑁂𑀯𑀦𑀸𑀢𑀺 𑀅𑀲𑁆𑀲𑀫𑁂𑀥𑀸𑀤𑀺𑀬𑀜𑁆𑀜𑀸 𑀘 𑀉𑀢𑀽𑀧𑀲𑁂𑀯𑀦𑀸 𑀘. 𑀉𑀢𑀽𑀧𑀲𑁂𑀯𑀦𑀸 𑀦𑀸𑀫 𑀕𑀺𑀫𑁆𑀳𑁂 𑀆𑀢𑀧𑀝𑁆𑀞𑀸𑀦𑀲𑁂𑀯𑀦𑀸, 𑀯𑀲𑁆𑀲𑁂 𑀭𑀼𑀓𑁆𑀔𑀫𑀽𑀮𑀲𑁂𑀯𑀦𑀸, 𑀳𑁂𑀫𑀦𑁆𑀢𑁂 𑀚𑀮𑀧𑁆𑀧𑀯𑁂𑀲𑀲𑁂𑀯𑀦𑀸. 𑀦 𑀲𑁄𑀥𑁂𑀦𑁆𑀢𑀺 𑀫𑀘𑁆𑀘𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑀦𑁆𑀢𑀺 𑀓𑀺𑀮𑁂𑀲𑀲𑀼𑀤𑁆𑀥𑀺𑀬𑀸 𑀯𑀸 𑀪𑀯𑀲𑀼𑀤𑁆𑀥𑀺𑀬𑀸 𑀯𑀸 𑀅𑀯𑀺𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀁 𑀫𑀘𑁆𑀘𑀁 𑀦 𑀲𑁄𑀥𑁂𑀦𑁆𑀢𑀺. 𑀓𑀗𑁆𑀔𑀸𑀫𑀮𑁂 𑀳𑀺 𑀲𑀢𑀺 𑀦 𑀯𑀺𑀲𑀼𑀤𑁆𑀥𑁄 𑀳𑁄𑀢𑀺, 𑀢𑁆𑀯𑀜𑁆𑀘 𑀲𑀓𑀗𑁆𑀔𑁄𑀬𑁂𑀯𑀸𑀢𑀺. 𑀏𑀢𑁆𑀣 𑀘 ‘‘𑀅𑀯𑀺𑀢𑀺𑀡𑁆𑀡𑀓𑀗𑁆𑀔’’𑀦𑁆𑀢𑀺 𑀏𑀢𑀁 ‘‘𑀦 𑀫𑀘𑁆𑀙𑀫𑀁𑀲’’𑀦𑁆𑀢𑀺𑀆𑀤𑀻𑀦𑀺 ¶ 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑀘𑁆𑀙𑀫𑀁𑀲𑀸𑀦𑀁 𑀅𑀪𑁄𑀚𑀦𑀸𑀤𑀺𑀦𑀸 𑀲𑀺𑀬𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀢𑀸𑀧𑀲𑀲𑁆𑀲 𑀓𑀗𑁆𑀔𑀸𑀬 𑀉𑀧𑁆𑀧𑀦𑁆𑀦𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀦𑁄 𑀅𑀥𑀺𑀧𑁆𑀧𑀸𑀬𑁄. 𑀬𑀸 𑀘𑀲𑁆𑀲 ‘‘𑀲𑁄 𑀫𑀘𑁆𑀙𑀫𑀁𑀲𑀁 𑀪𑀼𑀜𑁆𑀚𑀢𑀻’’𑀢𑀺 𑀲𑀼𑀢𑁆𑀯𑀸𑀯 𑀩𑀼𑀤𑁆𑀥𑁂 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁫𑁩. 𑀏𑀯𑀁 ¶ 𑀫𑀘𑁆𑀙𑀫𑀁𑀲𑀸𑀦𑀸𑀲𑀓𑀢𑁆𑀢𑀸𑀤𑀻𑀦𑀁 𑀲𑁄𑀥𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑁄𑀥𑁂𑀢𑀼𑀁 𑀲𑀫𑀢𑁆𑀣𑁂 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑁂𑀲𑀼 𑀕𑀼𑀢𑁆𑀢𑁄’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑁄𑀢𑁂𑀲𑀽𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀕𑀼𑀢𑁆𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀕𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀏𑀢𑁆𑀢𑀸𑀯𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀭𑀺𑀯𑀸𑀭𑀲𑀻𑀮𑀁 𑀤𑀲𑁆𑀲𑁂𑀢𑀺. 𑀯𑀺𑀤𑀺𑀢𑀺𑀦𑁆𑀤𑁆𑀭𑀺𑀬𑁄 𑀘𑀭𑁂𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀙𑀴𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀤𑀺𑀢𑁆𑀯𑀸 𑀧𑀸𑀓𑀝𑀸𑀦𑀺 𑀓𑀢𑁆𑀯𑀸 𑀘𑀭𑁂𑀬𑁆𑀬, 𑀯𑀺𑀳𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂 𑀞𑀺𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀪𑀺𑀲𑀫𑁂𑀢𑀩𑁆𑀩𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀞𑀺𑀢𑁄. 𑀏𑀢𑁂𑀦 𑀲𑁄𑀢𑀸𑀧𑀢𑁆𑀢𑀺𑀪𑀽𑀫𑀺𑀁 𑀤𑀲𑁆𑀲𑁂𑀢𑀺. 𑀅𑀚𑁆𑀚𑀯𑀫𑀤𑁆𑀤𑀯𑁂 ¶ 𑀭𑀢𑁄𑀢𑀺 𑀉𑀚𑀼𑀪𑀸𑀯𑁂 𑀘 𑀫𑀼𑀤𑀼𑀪𑀸𑀯𑁂 𑀘 𑀭𑀢𑁄. 𑀏𑀢𑁂𑀦 𑀲𑀓𑀤𑀸𑀕𑀸𑀫𑀺𑀪𑀽𑀫𑀺𑀁 𑀤𑀲𑁆𑀲𑁂𑀢𑀺. 𑀲𑀓𑀤𑀸𑀕𑀸𑀫𑀻 𑀳𑀺 𑀓𑀸𑀬𑀯𑀗𑁆𑀓𑀸𑀤𑀺𑀓𑀭𑀸𑀦𑀁 𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀓𑀭𑀸𑀦𑀜𑁆𑀘 𑀭𑀸𑀕𑀤𑁄𑀲𑀸𑀦𑀁 𑀢𑀦𑀼𑀪𑀸𑀯𑀸 𑀅𑀚𑁆𑀚𑀯𑀫𑀤𑁆𑀤𑀯𑁂 𑀭𑀢𑁄 𑀳𑁄𑀢𑀺. 𑀲𑀗𑁆𑀕𑀸𑀢𑀺𑀕𑁄𑀢𑀺 𑀭𑀸𑀕𑀤𑁄𑀲𑀲𑀗𑁆𑀕𑀸𑀢𑀺𑀕𑁄. 𑀏𑀢𑁂𑀦 𑀅𑀦𑀸𑀕𑀸𑀫𑀺𑀪𑀽𑀫𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄𑀢𑀺 𑀲𑀩𑁆𑀩𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑀲𑀩𑁆𑀩𑀤𑀼𑀓𑁆𑀔𑁄. 𑀏𑀢𑁂𑀦 𑀅𑀭𑀳𑀢𑁆𑀢𑀪𑀽𑀫𑀺𑀁 𑀤𑀲𑁆𑀲𑁂𑀢𑀺. 𑀦 𑀮𑀺𑀧𑁆𑀧𑀢𑀺 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄𑀢𑀺 𑀲𑁄 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀥𑀺𑀢𑀺𑀲𑀫𑁆𑀧𑀤𑀸𑀬 𑀥𑀻𑀭𑁄 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑁂𑀦𑀘𑀺 𑀓𑀺𑀮𑁂𑀲𑁂𑀦 𑀦 𑀮𑀺𑀧𑁆𑀧𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑀺𑀝𑁆𑀞𑀲𑀼𑀢𑁂𑀲𑀼, 𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼 𑀘 𑀦 𑀮𑀺𑀧𑁆𑀧𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀭𑀫𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑁨𑁫𑁪-𑁫. 𑀇𑀢𑁄 𑀧𑀭𑀁 ‘‘𑀇𑀘𑁆𑀘𑁂𑀢𑀫𑀢𑁆𑀣’’𑀦𑁆𑀢𑀺 𑀤𑁆𑀯𑁂 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀸. 𑀢𑀸𑀲𑀫𑀢𑁆𑀣𑁄 𑁋 𑀇𑀢𑀺 𑀪𑀕𑀯𑀸 𑀓𑀲𑁆𑀲𑀧𑁄 𑀏𑀢𑀫𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀅𑀦𑁂𑀓𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀘 𑀤𑁂𑀲𑀦𑀸𑀬 𑀬𑀸𑀯 𑀢𑀸𑀧𑀲𑁄 𑀅𑀜𑁆𑀜𑀸𑀲𑀺, 𑀢𑀸𑀯 𑀲𑁄 𑀅𑀓𑁆𑀔𑀸𑀲𑀺 ¶ 𑀓𑀣𑁂𑀲𑀺 𑀯𑀺𑀢𑁆𑀣𑀸𑀭𑁂𑀲𑀺. 𑀦𑀁 𑀯𑁂𑀤𑀬𑀺 𑀫𑀦𑁆𑀢𑀧𑀸𑀭𑀕𑀽𑀢𑀺 𑀲𑁄𑀧𑀺 𑀢𑀜𑁆𑀘 𑀅𑀢𑁆𑀣𑀁 𑀫𑀦𑁆𑀢𑀧𑀸𑀭𑀕𑀽, 𑀯𑁂𑀤𑀧𑀸𑀭𑀕𑀽, 𑀢𑀺𑀲𑁆𑀲𑁄 𑀩𑁆𑀭𑀸𑀳𑁆𑀫𑀡𑁄 𑀯𑁂𑀤𑀬𑀺 𑀅𑀜𑁆𑀜𑀸𑀲𑀺. 𑀓𑀺𑀁 𑀓𑀸𑀭𑀡𑀸? 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀘 𑀧𑀤𑀢𑁄 𑀘 𑀤𑁂𑀲𑀦𑀸𑀦𑀬𑀢𑁄 𑀘 𑀘𑀺𑀢𑁆𑀭𑀸𑀳𑀺 𑀕𑀸𑀣𑀸𑀳𑀺 𑀫𑀼𑀦𑀻 𑀧𑀓𑀸𑀲𑀬𑀺. 𑀓𑀻𑀤𑀺𑀲𑁄? 𑀦𑀺𑀭𑀸𑀫𑀕𑀦𑁆𑀥𑁄 𑀅𑀲𑀺𑀢𑁄 𑀤𑀼𑀭𑀦𑁆𑀦𑀬𑁄, 𑀆𑀫𑀕𑀦𑁆𑀥𑀓𑀺𑀮𑁂𑀲𑀸𑀪𑀸𑀯𑀸 𑀦𑀺𑀭𑀸𑀫𑀕𑀦𑁆𑀥𑁄, 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀪𑀸𑀯𑀸 𑀅𑀲𑀺𑀢𑁄, 𑀩𑀸𑀳𑀺𑀭𑀤𑀺𑀝𑁆𑀞𑀺𑀯𑀲𑁂𑀦 ‘‘𑀇𑀤𑀁 𑀲𑁂𑀬𑁆𑀬𑁄 𑀇𑀤𑀁 𑀯𑀭’’𑀦𑁆𑀢𑀺 𑀓𑁂𑀦𑀘𑀺 𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀭𑀦𑁆𑀦𑀬𑁄. 𑀏𑀯𑀁 𑀧𑀓𑀸𑀲𑀺𑀢𑀯𑀢𑁄 𑀘𑀲𑁆𑀲 𑀲𑀼𑀢𑁆𑀯𑀸𑀦 𑀩𑀼𑀤𑁆𑀥𑀲𑁆𑀲 𑀲𑀼𑀪𑀸𑀲𑀺𑀢𑀁 𑀧𑀤𑀁 𑀲𑀼𑀓𑀣𑀺𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀺𑀭𑀸𑀫𑀕𑀦𑁆𑀥𑀁 𑀦𑀺𑀓𑁆𑀓𑀺𑀮𑁂𑀲𑀬𑁄𑀕𑀁, 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀦𑀽𑀤𑀦𑀁 𑀲𑀩𑁆𑀩𑀯𑀝𑁆𑀝𑀤𑀼𑀓𑁆𑀔𑀧𑁆𑀧𑀦𑀽𑀤𑀦𑀁, 𑀦𑀻𑀘𑀫𑀦𑁄 𑀦𑀻𑀘𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀦𑁆𑀤𑀺 𑀢𑀣𑀸𑀕𑀢𑀲𑁆𑀲, 𑀢𑀺𑀲𑁆𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑀁 𑀓𑀢𑁆𑀯𑀸 𑀯𑀦𑁆𑀤𑀺. 𑀢𑀢𑁆𑀣𑁂𑀯 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀢𑁆𑀣𑀸𑀢𑀺 𑀢𑀢𑁆𑀣𑁂𑀯 𑀘 𑀦𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑀁 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀢𑀺𑀲𑁆𑀲𑁄 𑀢𑀸𑀧𑀲𑁄 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀢𑁆𑀣, 𑀅𑀬𑀸𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀪𑀕𑀯𑀸 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀆𑀳. 𑀲𑁄 𑀢𑀗𑁆𑀔𑀡𑀁𑀬𑁂𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑁄 𑀯𑀺𑀬 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀲𑁆𑀲𑁄 𑀦𑀸𑀫 𑀅𑀕𑁆𑀕𑀲𑀸𑀯𑀓𑁄 𑀅𑀳𑁄𑀲𑀺, 𑀧𑀼𑀦 𑀤𑀼𑀢𑀺𑀬𑁄 𑀪𑀸𑀭𑀤𑁆𑀯𑀸𑀚𑁄 𑀦𑀸𑀫. 𑀏𑀯𑀁 𑀢𑀲𑁆𑀲 𑀪𑀕𑀯𑀢𑁄 𑀢𑀺𑀲𑁆𑀲𑀪𑀸𑀭𑀤𑁆𑀯𑀸𑀚𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺.

𑀅𑀫𑁆𑀳𑀸𑀓𑀁 ¶ ¶ 𑀧𑀦 𑀪𑀕𑀯𑀸 𑀬𑀸 𑀘 𑀢𑀺𑀲𑁆𑀲𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀆𑀤𑀺𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀯𑀼𑀢𑁆𑀢𑀸, 𑀬𑀸 𑀘 𑀓𑀲𑁆𑀲𑀧𑁂𑀦 𑀪𑀕𑀯𑀢𑀸 𑀫𑀚𑁆𑀛𑁂 𑀦𑀯, 𑀬𑀸 𑀘 𑀢𑀤𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀅𑀦𑁆𑀢𑁂 𑀤𑁆𑀯𑁂, 𑀢𑀸 𑀲𑀩𑁆𑀩𑀸𑀧𑀺 𑀘𑀼𑀤𑁆𑀤𑀲 𑀕𑀸𑀣𑀸 𑀆𑀦𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀇𑀫𑀁 𑀆𑀫𑀕𑀦𑁆𑀥𑀲𑀼𑀢𑁆𑀢𑀁 𑀆𑀘𑀭𑀺𑀬𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀢𑀸𑀧𑀲𑀲𑀢𑀸𑀦𑀁 𑀆𑀫𑀕𑀦𑁆𑀥𑀁 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀣𑁂𑀯 𑀦𑀻𑀘𑀫𑀦𑁄 ¶ 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘. 𑀢𑁂 𑀢𑀣𑁂𑀯 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀲𑀩𑁆𑀩𑁂𑀯 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀆𑀫𑀕𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀳𑀺𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀳𑀺𑀭𑀺𑀁 ¶ 𑀢𑀭𑀦𑁆𑀢𑀦𑁆𑀢𑀺 𑀳𑀺𑀭𑀺𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀦𑀼𑀧𑁆𑀧𑀦𑁆𑀦𑁂 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀅𑀟𑁆𑀠𑁄 𑀅𑀳𑁄𑀲𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀯𑀺𑀪𑀯𑁄. 𑀢𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺 𑀧𑀺𑀬𑁄 𑀫𑀦𑀸𑀧𑁄. 𑀲𑁄 𑀢𑀁 𑀤𑁂𑀯𑀓𑀼𑀫𑀸𑀭𑀁 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀲𑀼𑀔𑀽𑀧𑀓𑀭𑀡𑁂𑀳𑀺 𑀲𑀁𑀯𑀟𑁆𑀠𑁂𑀦𑁆𑀢𑁄 𑀢𑀁 𑀲𑀸𑀧𑀢𑁂𑀬𑁆𑀬𑀁 𑀢𑀲𑁆𑀲 𑀅𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀯 𑀓𑀸𑀮𑀫𑀓𑀸𑀲𑀺 𑀲𑀤𑁆𑀥𑀺𑀁 𑀩𑁆𑀭𑀸𑀳𑁆𑀫𑀡𑀺𑀬𑀸. 𑀢𑀢𑁄 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀪𑀡𑁆𑀟𑀸𑀕𑀸𑀭𑀺𑀓𑁄 𑀲𑀸𑀭𑀕𑀩𑁆𑀪𑀁 𑀯𑀺𑀯𑀭𑀺𑀢𑁆𑀯𑀸 𑀲𑀸𑀧𑀢𑁂𑀬𑁆𑀬𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀆𑀳 𑁋 ‘‘𑀇𑀤𑀁 𑀢𑁂, 𑀲𑀸𑀫𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁, 𑀇𑀤𑀁 𑀅𑀬𑁆𑀬𑀓𑀧𑀬𑁆𑀬𑀓𑀸𑀦𑀁 𑀲𑀦𑁆𑀢𑀓𑀁, 𑀇𑀤𑀁 𑀲𑀢𑁆𑀢𑀓𑀼𑀮𑀧𑀭𑀺𑀯𑀝𑁆𑀝𑁂𑀦 𑀆𑀕𑀢’’𑀦𑁆𑀢𑀺. 𑀫𑀸𑀡𑀯𑁄 𑀥𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀥𑀦𑀁𑀬𑁂𑀯 𑀤𑀺𑀲𑁆𑀲𑀢𑀺, 𑀬𑁂𑀳𑀺 𑀧𑀦 𑀇𑀤𑀁 𑀲𑀜𑁆𑀘𑀺𑀢𑀁, 𑀢𑁂 𑀦 𑀤𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂𑀯 𑀫𑀘𑁆𑀘𑀼𑀯𑀲𑀁 𑀕𑀢𑀸. 𑀕𑀘𑁆𑀙𑀦𑁆𑀢𑀸 𑀘 𑀦 𑀇𑀢𑁄 𑀓𑀺𑀜𑁆𑀘𑀺 𑀆𑀤𑀸𑀬 𑀅𑀕𑀫𑀁𑀲𑀼, 𑀏𑀯𑀁 𑀦𑀸𑀫 𑀪𑁄𑀕𑁂 𑀧𑀳𑀸𑀬 𑀕𑀦𑁆𑀢𑀩𑁆𑀩𑁄 𑀧𑀭𑀮𑁄𑀓𑁄, 𑀦 𑀲𑀓𑁆𑀓𑀸 𑀓𑀺𑀜𑁆𑀘𑀺 𑀆𑀤𑀸𑀬 𑀕𑀦𑁆𑀢𑀼𑀁 𑀅𑀜𑁆𑀜𑀢𑁆𑀭 𑀲𑀼𑀘𑀭𑀺𑀢𑁂𑀦. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀥𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀼𑀘𑀭𑀺𑀢𑀥𑀦𑀁 𑀕𑀡𑁆𑀳𑁂𑀬𑁆𑀬𑀁, 𑀬𑀁 𑀲𑀓𑁆𑀓𑀸 𑀆𑀤𑀸𑀬 𑀕𑀦𑁆𑀢𑀼’’𑀦𑁆𑀢𑀺. 𑀲𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀳𑀽𑀢𑀫𑀺𑀤𑀁 𑀥𑀦𑀁, 𑀓𑀺𑀁 𑀇𑀫𑀺𑀦𑀸 𑀏𑀯𑀫𑀧𑁆𑀧𑀓𑁂𑀦 𑀧𑀭𑀺𑀘𑁆𑀘𑀸𑀕𑁂𑀦, 𑀬𑀁𑀦𑀽𑀦𑀸𑀳𑀁 ¶ 𑀫𑀳𑀸𑀤𑀸𑀦𑀁 𑀤𑀤𑁂𑀬𑁆𑀬’’𑀦𑁆𑀢𑀺. 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀫𑀳𑀸𑀭𑀸𑀚, 𑀫𑀫 𑀖𑀭𑁂 𑀏𑀢𑁆𑀢𑀓𑀁 𑀥𑀦𑀁 𑀅𑀢𑁆𑀣𑀺, 𑀇𑀘𑁆𑀙𑀸𑀫𑀺 𑀢𑁂𑀦 𑀫𑀳𑀸𑀤𑀸𑀦𑀁 𑀤𑀸𑀢𑀼𑀁. 𑀲𑀸𑀥𑀼, 𑀫𑀳𑀸𑀭𑀸𑀚, 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑀸𑀧𑁂𑀲𑀺. 𑀲𑁄 𑀆𑀕𑀢𑀸𑀕𑀢𑀸𑀦𑀁 𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀲𑀩𑁆𑀩𑀥𑀦𑀫𑀤𑀸𑀲𑀺 ¶ , 𑀤𑀢𑁆𑀯𑀸 𑀘 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀫𑀳𑀸𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀅𑀬𑀼𑀢𑁆𑀢𑀁 𑀖𑀭𑁂 𑀯𑀲𑀺𑀢𑀼𑀁, 𑀬𑀁𑀦𑀽𑀦𑀸𑀳𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀢𑀢𑁄 𑀧𑀭𑀺𑀚𑀦𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂 ‘‘𑀫𑀸, 𑀢𑁆𑀯𑀁 𑀲𑀸𑀫𑀺, ‘𑀥𑀦𑀁 𑀧𑀭𑀺𑀓𑁆𑀔𑀻𑀡’𑀦𑁆𑀢𑀺 𑀘𑀺𑀦𑁆𑀢𑀬𑀺, 𑀫𑀬𑀁 𑀅𑀧𑁆𑀧𑀓𑁂𑀦𑁂𑀯 𑀓𑀸𑀮𑁂𑀦 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀥𑀦𑀲𑀜𑁆𑀘𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀢𑀁 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀲𑀁 𑀬𑀸𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀯 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺.

𑀢𑀢𑁆𑀣 𑀅𑀝𑁆𑀞𑀯𑀺𑀥𑀸 𑀢𑀸𑀧𑀲𑀸 𑁋 𑀲𑀧𑀼𑀢𑁆𑀢𑀪𑀭𑀺𑀬𑀸, 𑀉𑀜𑁆𑀙𑀸𑀘𑀸𑀭𑀺𑀓𑀸, 𑀲𑀫𑁆𑀧𑀢𑁆𑀢𑀓𑀸𑀮𑀺𑀓𑀸, 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸, 𑀅𑀲𑁆𑀫𑀫𑀼𑀝𑁆𑀞𑀺𑀓𑀸, 𑀤𑀦𑁆𑀢𑀮𑀼𑀬𑁆𑀬𑀓𑀸, 𑀧𑀯𑀢𑁆𑀢𑀨𑀮𑀺𑀓𑀸, 𑀯𑀡𑁆𑀝𑀫𑀼𑀢𑁆𑀢𑀺𑀓𑀸 𑀘𑀸𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁮𑁦). 𑀢𑀢𑁆𑀣 𑀲𑀧𑀼𑀢𑁆𑀢𑀪𑀭𑀺𑀬𑀸𑀢𑀺 𑀧𑀼𑀢𑁆𑀢𑀤𑀸𑀭𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑀬𑀫𑀸𑀦𑀸 𑀓𑁂𑀡𑀺𑀬𑀚𑀝𑀺𑀮𑀸𑀤𑀬𑁄. 𑀉𑀜𑁆𑀙𑀸𑀘𑀸𑀭𑀺𑀓𑀸𑀢𑀺 𑀦𑀕𑀭𑀤𑁆𑀯𑀸𑀭𑁂 𑀅𑀲𑁆𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀸𑀤𑀬𑁄 ¶ 𑀲𑀺𑀧𑁆𑀧𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀓𑀧𑁆𑀧𑀺𑀬𑀪𑀡𑁆𑀟𑀧𑀝𑀺𑀕𑁆𑀕𑀸𑀳𑀓𑀸, 𑀢𑁂 𑀲𑀧𑀼𑀢𑁆𑀢𑀪𑀭𑀺𑀬𑁂𑀳𑀺 𑀲𑁂𑀝𑁆𑀞𑀢𑀭𑀸. 𑀲𑀫𑁆𑀧𑀢𑁆𑀢𑀓𑀸𑀮𑀺𑀓𑀸𑀢𑀺 𑀆𑀳𑀸𑀭𑀯𑁂𑀮𑀸𑀬 𑀲𑀫𑁆𑀧𑀢𑁆𑀢𑀁 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀬𑀸𑀧𑁂𑀦𑁆𑀢𑀸, 𑀢𑁂 𑀉𑀜𑁆𑀙𑀸𑀘𑀸𑀭𑀺𑀓𑁂𑀳𑀺 𑀲𑁂𑀝𑁆𑀞𑀢𑀭𑀸. 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸𑀢𑀺 𑀅𑀕𑁆𑀕𑀺𑀦𑀸 𑀅𑀧𑀓𑁆𑀓𑀧𑀢𑁆𑀢𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀬𑀸𑀧𑁂𑀦𑁆𑀢𑀸, 𑀢𑁂 𑀲𑀫𑁆𑀧𑀢𑁆𑀢𑀓𑀸𑀮𑀺𑀓𑁂𑀳𑀺 𑀲𑁂𑀝𑁆𑀞𑀢𑀭𑀸. 𑀅𑀲𑁆𑀫𑀫𑀼𑀝𑁆𑀞𑀺𑀓𑀸𑀢𑀺 𑀫𑀼𑀝𑁆𑀞𑀺𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀯𑀸𑀲𑀺𑀲𑀢𑁆𑀣𑀓𑀸𑀤𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀬𑀤𑀸 𑀙𑀸𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀲𑀫𑁆𑀧𑀢𑁆𑀢𑀭𑀼𑀓𑁆𑀔𑀢𑁄 𑀢𑀘𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀦𑁆𑀢𑀺, 𑀢𑁂 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑁂𑀳𑀺 𑀲𑁂𑀝𑁆𑀞𑀢𑀭𑀸. 𑀤𑀦𑁆𑀢𑀮𑀼𑀬𑁆𑀬𑀓𑀸𑀢𑀺 𑀫𑀼𑀝𑁆𑀞𑀺𑀧𑀸𑀲𑀸𑀡𑀸𑀤𑀻𑀦𑀺𑀧𑀺 𑀅𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑀸 𑀔𑀼𑀤𑀸𑀓𑀸𑀮𑁂 𑀲𑀫𑁆𑀧𑀢𑁆𑀢𑀭𑀼𑀓𑁆𑀔𑀢𑁄 𑀤𑀦𑁆𑀢𑁂𑀳𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀘𑀁 𑀔𑀸𑀤𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀦𑁆𑀢𑀺, 𑀢𑁂 𑀅𑀲𑁆𑀫𑀫𑀼𑀝𑁆𑀞𑀺𑀓𑁂𑀳𑀺 𑀲𑁂𑀝𑁆𑀞𑀢𑀭𑀸. 𑀧𑀯𑀢𑁆𑀢𑀨𑀮𑀺𑀓𑀸𑀢𑀺 𑀚𑀸𑀢𑀲𑁆𑀲𑀭𑀁 ¶ 𑀯𑀸 𑀯𑀦𑀲𑀡𑁆𑀟𑀁 𑀯𑀸 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀸 𑀬𑀁 𑀢𑀢𑁆𑀣 𑀲𑀭𑁂 𑀪𑀺𑀲𑀫𑀼𑀴𑀸𑀮𑀸𑀤𑀺, 𑀬𑀁 𑀯𑀸 𑀯𑀦𑀲𑀡𑁆𑀟𑁂 𑀧𑀼𑀧𑁆𑀨𑀓𑀸𑀮𑁂 𑀧𑀼𑀧𑁆𑀨𑀁, 𑀨𑀮𑀓𑀸𑀮𑁂 𑀨𑀮𑀁, 𑀢𑀫𑁂𑀯 𑀔𑀸𑀤𑀦𑁆𑀢𑀺. 𑀧𑀼𑀧𑁆𑀨𑀨𑀮𑁂 𑀅𑀲𑀢𑀺 𑀅𑀦𑁆𑀢𑀫𑀲𑁄 𑀢𑀢𑁆𑀣 𑀭𑀼𑀓𑁆𑀔𑀧𑀧𑀝𑀺𑀓𑀫𑁆𑀧𑀺 𑀔𑀸𑀤𑀺𑀢𑁆𑀯𑀸 𑀯𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀆𑀳𑀸𑀭𑀢𑁆𑀣𑀸𑀬 𑀅𑀜𑁆𑀜𑀢𑁆𑀭 𑀕𑀘𑁆𑀙𑀦𑁆𑀢𑀺. 𑀉𑀧𑁄𑀲𑀣𑀗𑁆𑀕𑀸𑀥𑀺𑀝𑁆𑀞𑀸𑀦𑀁 ¶ 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀘 𑀓𑀭𑁄𑀦𑁆𑀢𑀺, 𑀢𑁂 𑀤𑀦𑁆𑀢𑀮𑀼𑀬𑁆𑀬𑀓𑁂𑀳𑀺 𑀲𑁂𑀝𑁆𑀞𑀢𑀭𑀸. 𑀯𑀡𑁆𑀝𑀫𑀼𑀢𑁆𑀢𑀺𑀓𑀸 𑀦𑀸𑀫 𑀯𑀡𑁆𑀝𑀫𑀼𑀢𑁆𑀢𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺 𑀧𑀡𑁆𑀡𑀸𑀦𑀺𑀬𑁂𑀯 𑀔𑀸𑀤𑀦𑁆𑀢𑀺, 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯, 𑀢𑁂 𑀲𑀩𑁆𑀩𑀲𑁂𑀝𑁆𑀞𑀸.

𑀅𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑀓𑀼𑀮𑀧𑀼𑀢𑁆𑀢𑁄 ‘‘𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀲𑀼 𑀅𑀕𑁆𑀕𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀡𑁆𑀝𑀫𑀼𑀢𑁆𑀢𑀺𑀓𑀧𑀩𑁆𑀩𑀚𑁆𑀚𑀫𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀤𑁆𑀯𑁂 𑀢𑀬𑁄 𑀧𑀩𑁆𑀩𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀲𑁆𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀯𑀲𑀢𑀺. 𑀅𑀣 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀻 𑀏𑀓𑁄 𑀧𑀼𑀭𑀺𑀲𑁄 𑀧𑀩𑁆𑀩𑀢𑁂 𑀘𑀦𑁆𑀤𑀦𑀲𑀸𑀭𑀸𑀤𑀻𑀦𑀺 𑀕𑀯𑁂𑀲𑀦𑁆𑀢𑁄 𑀢𑀲𑁆𑀲 𑀅𑀲𑁆𑀲𑀫𑀁 𑀧𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀯𑀢𑁆𑀣𑀺𑀢𑁄, 𑀪𑀦𑁆𑀢𑁂’’𑀢𑀺. ‘‘𑀓𑀸 𑀢𑀢𑁆𑀣 𑀧𑀯𑀢𑁆𑀢𑀻’’𑀢𑀺? ‘‘𑀢𑀢𑁆𑀣, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀅𑀧𑁆𑀧𑀫𑀢𑁆𑀢𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺. ‘‘𑀓𑀲𑁆𑀲 𑀑𑀯𑀸𑀤𑀁 𑀲𑀼𑀢𑁆𑀯𑀸’’𑀢𑀺? ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄’’𑀢𑀺. 𑀢𑀸𑀧𑀲𑁄 𑀩𑀼𑀤𑁆𑀥𑀲𑀤𑁆𑀤𑀲𑁆𑀲𑀯𑀦𑁂𑀦 𑀯𑀺𑀫𑁆𑀳𑀺𑀢𑁄 ‘‘𑀩𑀼𑀤𑁆𑀥𑁄𑀢𑀺 𑀢𑁆𑀯𑀁, 𑀪𑁄 𑀧𑀼𑀭𑀺𑀲, 𑀯𑀤𑁂𑀲𑀻’’𑀢𑀺 𑀆𑀫𑀕𑀦𑁆𑀥𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀖𑁄𑀲𑁄𑀧𑀺 𑀔𑁄 𑀏𑀲𑁄 𑀤𑀼𑀮𑁆𑀮𑀪𑁄’’𑀢𑀺 𑀅𑀢𑁆𑀢𑀫𑀦𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀬𑀼𑀢𑁆𑀢𑀁 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀢𑀼𑀘𑁆𑀙𑀫𑁂𑀯 𑀕𑀦𑁆𑀢𑀼𑀁, 𑀓𑀺𑀁 𑀦𑀼 𑀔𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀆𑀫𑀺𑀲𑀕𑀭𑀼𑀓𑀸 𑀦 𑀳𑁄𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺 ¶ 𑁋

‘‘𑀓𑀻𑀤𑀺𑀲𑁄 ¶ 𑀫𑀺𑀢𑁆𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄, 𑀓𑀻𑀤𑀺𑀲𑁄 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄;

𑀓𑀻𑀤𑀺𑀲𑁄 𑀧𑀬𑁄𑀕𑁄 𑀧𑀬𑀼𑀜𑁆𑀚𑀺𑀢𑀩𑁆𑀩𑁄, 𑀓𑀺𑀁 𑀭𑀲𑀸𑀦𑀁 𑀅𑀕𑁆𑀕’’𑀦𑁆𑀢𑀺.

𑀲𑁄 𑀢𑁂 𑀧𑀜𑁆𑀳𑁂 𑀕𑀳𑁂𑀢𑁆𑀯𑀸 𑀫𑀚𑁆𑀛𑀺𑀫𑀤𑁂𑀲𑀸𑀪𑀺𑀫𑀼𑀔𑁄 𑀧𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀝𑁆𑀞𑁄. 𑀪𑀕𑀯𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀳𑁄𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀅𑀯𑀦𑁆𑀤𑀺𑀢𑁆𑀯𑀸𑀯 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀪𑀕𑀯𑀸 ‘‘𑀓𑀘𑁆𑀘𑀺, 𑀇𑀲𑀺, 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀫𑁄𑀤𑀺. 𑀲𑁄𑀧𑀺 ‘‘𑀔𑀫𑀦𑀻𑀬𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀲𑀫𑁆𑀫𑁄𑀤𑀺𑀢𑁆𑀯𑀸 ‘‘𑀬𑀤𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂 𑀯𑀸𑀘𑀸𑀬 𑀏𑀯 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀻’’𑀢𑀺 𑀫𑀦𑀲𑀸 𑀏𑀯 𑀪𑀕𑀯𑀦𑁆𑀢𑀁 𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀧𑀼𑀝𑁆𑀞𑁄 𑀆𑀤𑀺𑀧𑀜𑁆𑀳𑀁 ¶ 𑀢𑀸𑀯 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀳𑀺𑀭𑀺𑀁 𑀢𑀭𑀦𑁆𑀢𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀸 𑀕𑀸𑀣𑀸𑀬𑁄 𑀆𑀳.

𑁨𑁫𑁬. 𑀢𑀸𑀲𑀁 𑀅𑀢𑁆𑀣𑁄 𑁋 𑀳𑀺𑀭𑀺𑀁 𑀢𑀭𑀦𑁆𑀢𑀦𑁆𑀢𑀺 𑀳𑀺𑀭𑀺𑀁 𑀅𑀢𑀺𑀓𑁆𑀓𑀫𑀦𑁆𑀢𑀁 𑀅𑀳𑀺𑀭𑀺𑀓𑀁 𑀦𑀺𑀮𑁆𑀮𑀚𑁆𑀚𑀁. 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀦𑁆𑀢𑀺 𑀅𑀲𑀼𑀘𑀺𑀫𑀺𑀯 𑀧𑀲𑁆𑀲𑀫𑀸𑀦𑀁. 𑀅𑀳𑀺𑀭𑀺𑀓𑁄 𑀳𑀺 𑀳𑀺𑀭𑀺𑀁 𑀚𑀺𑀕𑀼𑀘𑁆𑀙𑀢𑀺 𑀅𑀲𑀼𑀘𑀺𑀫𑀺𑀯 𑀧𑀲𑁆𑀲𑀢𑀺, 𑀢𑁂𑀦 𑀦𑀁 𑀦 𑀪𑀚𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀚𑀺𑀕𑀼𑀘𑁆𑀙𑀫𑀸𑀦’’𑀦𑁆𑀢𑀺. 𑀢𑀯𑀸𑀳𑀫𑀲𑁆𑀫𑀺 𑀇𑀢𑀺 𑀪𑀸𑀲𑀫𑀸𑀦𑀦𑁆𑀢𑀺 ‘‘𑀅𑀳𑀁, 𑀲𑀫𑁆𑀫, 𑀢𑀯 𑀲𑀳𑀸𑀬𑁄 𑀳𑀺𑀢𑀓𑀸𑀫𑁄 𑀲𑀼𑀔𑀓𑀸𑀫𑁄, 𑀚𑀻𑀯𑀺𑀢𑀫𑁆𑀧𑀺 𑀫𑁂 𑀢𑀼𑀬𑁆𑀳𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀪𑀸𑀲𑀫𑀸𑀦𑀁. 𑀲𑀬𑁆𑀳𑀸𑀦𑀺 𑀓𑀫𑁆𑀫𑀸𑀦𑀺 𑀅𑀦𑀸𑀤𑀺𑀬𑀦𑁆𑀢𑀦𑁆𑀢𑀺 𑀏𑀯𑀁 𑀪𑀸𑀲𑀺𑀢𑁆𑀯𑀸𑀧𑀺 𑀘 𑀲𑀬𑁆𑀳𑀸𑀦𑀺 𑀓𑀸𑀢𑀼𑀁 𑀲𑀓𑁆𑀓𑀸𑀦𑀺𑀧𑀺 𑀢𑀲𑁆𑀲 𑀓𑀫𑁆𑀫𑀸𑀦𑀺 𑀅𑀦𑀸𑀤𑀺𑀬𑀦𑁆𑀢𑀁 𑀓𑀭𑀡𑀢𑁆𑀣𑀸𑀬 𑀅𑀲𑀫𑀸𑀤𑀺𑀬𑀦𑁆𑀢𑀁. 𑀅𑀣 𑀯𑀸 𑀘𑀺𑀢𑁆𑀢𑁂𑀦 𑀢𑀢𑁆𑀣 𑀆𑀤𑀭𑀫𑀢𑁆𑀢𑀫𑁆𑀧𑀺 𑀅𑀓𑀭𑁄𑀦𑁆𑀢𑀁, 𑀅𑀧𑀺𑀘 𑀔𑁄 𑀧𑀦 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑁂𑀲𑀼 𑀩𑁆𑀬𑀲𑀦𑀫𑁂𑀯 𑀤𑀲𑁆𑀲𑁂𑀦𑁆𑀢𑀁. 𑀦𑁂𑀲𑁄 𑀫𑀫𑀦𑁆𑀢𑀺 𑀇𑀢𑀺 𑀦𑀁 𑀯𑀺𑀚𑀜𑁆𑀜𑀸𑀢𑀺 𑀢𑀁 𑀏𑀯𑀭𑀽𑀧𑀁 ‘‘𑀫𑀺𑀢𑁆𑀢𑀧𑀝𑀺𑀭𑀽𑀧𑀓𑁄 𑀏𑀲𑁄, 𑀦𑁂𑀲𑁄 𑀫𑁂 𑀫𑀺𑀢𑁆𑀢𑁄’’𑀢𑀺 𑀏𑀯𑀁 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀯𑀺𑀚𑀸𑀦𑁂𑀬𑁆𑀬.

𑁨𑁫𑁭. 𑀅𑀦𑀦𑁆𑀯𑀬𑀦𑁆𑀢𑀺 𑀬𑀁 𑀅𑀢𑁆𑀣𑀁 𑀤𑀲𑁆𑀲𑀸𑀫𑀺, 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘 𑀪𑀸𑀲𑀢𑀺, 𑀢𑁂𑀦 𑀅𑀦𑀦𑀼𑀕𑀢𑀁. 𑀧𑀺𑀬𑀁 𑀯𑀸𑀘𑀁 𑀬𑁄 𑀫𑀺𑀢𑁆𑀢𑁂𑀲𑀼 𑀧𑀓𑀼𑀩𑁆𑀩𑀢𑀻𑀢𑀺 𑀬𑁄 𑀅𑀢𑀻𑀢𑀸𑀦𑀸𑀕𑀢𑁂𑀳𑀺 𑀧𑀤𑁂𑀳𑀺 𑀧𑀝𑀺𑀲𑀦𑁆𑀣𑀭𑀦𑁆𑀢𑁄 𑀦𑀺𑀭𑀢𑁆𑀣𑀓𑁂𑀦 𑀲𑀗𑁆𑀕𑀡𑁆𑀳𑀦𑁆𑀢𑁄 ¶ 𑀓𑁂𑀯𑀮𑀁 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀫𑀢𑁆𑀢𑁂𑀦𑁂𑀯 𑀧𑀺𑀬𑀁 𑀫𑀺𑀢𑁆𑀢𑁂𑀲𑀼 𑀯𑀸𑀘𑀁 𑀧𑀯𑀢𑁆𑀢𑁂𑀢𑀺. 𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺 𑀏𑀯𑀭𑀽𑀧𑀁 𑀬𑀁 𑀪𑀸𑀲𑀢𑀺, 𑀢𑀁 𑀅𑀓𑀭𑁄𑀦𑁆𑀢𑀁, 𑀓𑁂𑀯𑀮𑀁 𑀯𑀸𑀘𑀸𑀬 𑀪𑀸𑀲𑀫𑀸𑀦𑀁 ‘‘𑀯𑀘𑀻𑀧𑀭𑀫𑁄 𑀦𑀸𑀫𑁂𑀲 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀝𑀺𑀭𑀽𑀧𑀓𑁄’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀡𑁆𑀟𑀺𑀢𑀸 𑀚𑀸𑀦𑀦𑁆𑀢𑀺.

𑁨𑁫𑁮. 𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻𑀢𑀺 𑀬𑁄 𑀪𑁂𑀤𑀫𑁂𑀯 𑀆𑀲𑀗𑁆𑀓𑀫𑀸𑀦𑁄 𑀓𑀢𑀫𑀥𑀼𑀭𑁂𑀦 𑀉𑀧𑀘𑀸𑀭𑁂𑀦 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺, 𑀬𑀁𑀓𑀺𑀜𑁆𑀘𑀺 𑀅𑀲𑁆𑀲𑀢𑀺𑀬𑀸 𑀅𑀫𑀦𑀲𑀺𑀓𑀸𑀭𑁂𑀦 ¶ 𑀓𑀢𑀁, 𑀅𑀜𑁆𑀜𑀸𑀡𑀓𑁂𑀦 𑀯𑀸 𑀅𑀓𑀢𑀁, ‘‘𑀬𑀤𑀸 𑀫𑀁 𑀕𑀭𑀳𑀺𑀲𑁆𑀲𑀢𑀺, 𑀢𑀤𑀸 𑀦𑀁 𑀏𑀢𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀭𑀦𑁆𑀥𑀫𑁂𑀯 𑀅𑀦𑀼𑀧𑀲𑁆𑀲𑀢𑀺, 𑀦 𑀲𑁄 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄𑀢𑀺.

𑀏𑀯𑀁 𑀪𑀕𑀯𑀸 ‘‘𑀓𑀻𑀤𑀺𑀲𑁄 𑀫𑀺𑀢𑁆𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀇𑀫𑀁 𑀆𑀤𑀺𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀬𑀲𑁆𑀫𑀺𑀜𑁆𑀘 𑀲𑁂𑀢𑀻’’𑀢𑀺 𑀇𑀫𑀁 𑀉𑀧𑀟𑁆𑀠𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 ¶ 𑀬𑀲𑁆𑀫𑀺𑀜𑁆𑀘 𑀫𑀺𑀢𑁆𑀢𑁂 𑀫𑀺𑀢𑁆𑀢𑁄 𑀢𑀲𑁆𑀲 𑀳𑀤𑀬𑀫𑀦𑀼𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑁂𑀦 𑀬𑀣𑀸 𑀦𑀸𑀫 𑀧𑀺𑀢𑀼 𑀉𑀭𑀲𑀺 𑀧𑀼𑀢𑁆𑀢𑁄 ‘‘𑀇𑀫𑀲𑁆𑀲 𑀫𑀬𑀺 𑀉𑀭𑀲𑀺 𑀲𑀬𑀦𑁆𑀢𑁂 𑀤𑀼𑀓𑁆𑀔𑀁 𑀯𑀸 𑀅𑀦𑀢𑁆𑀢𑀫𑀦𑀢𑀸 𑀯𑀸 𑀪𑀯𑁂𑀬𑁆𑀬𑀸’’𑀢𑀺𑀆𑀤𑀻𑀳𑀺 𑀅𑀧𑀭𑀺𑀲𑀗𑁆𑀓𑀫𑀸𑀦𑁄 𑀦𑀺𑀩𑁆𑀩𑀺𑀲𑀗𑁆𑀓𑁄 𑀳𑀼𑀢𑁆𑀯𑀸 𑀲𑁂𑀢𑀺, 𑀏𑀯𑀫𑁂𑀯𑀁 𑀤𑀸𑀭𑀥𑀦𑀚𑀻𑀯𑀺𑀢𑀸𑀤𑀻𑀲𑀼 𑀯𑀺𑀲𑁆𑀲𑀸𑀲𑀁 𑀓𑀭𑁄𑀦𑁆𑀢𑁄 𑀫𑀺𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀺𑀲𑀗𑁆𑀓𑁄 𑀲𑁂𑀢𑀺. 𑀬𑁄 𑀘 𑀧𑀭𑁂𑀳𑀺 𑀓𑀸𑀭𑀡𑀲𑀢𑀁 𑀓𑀸𑀭𑀡𑀲𑀳𑀲𑁆𑀲𑀫𑁆𑀧𑀺 𑀯𑀢𑁆𑀯𑀸 𑀅𑀪𑁂𑀚𑁆𑀚𑁄, 𑀲 𑀯𑁂 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄𑀢𑀺.

𑁨𑁫𑁯. 𑀏𑀯𑀁 𑀪𑀕𑀯𑀸 ‘‘𑀓𑀻𑀤𑀺𑀲𑁄 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀏𑀯𑀁 𑀤𑀼𑀢𑀺𑀬𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀧𑀸𑀫𑀼𑀚𑁆𑀚𑀓𑀭𑀡’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀸𑀫𑀼𑀚𑁆𑀚𑀁 𑀓𑀭𑁄𑀢𑀻𑀢𑀺 𑀧𑀸𑀫𑀼𑀚𑁆𑀚𑀓𑀭𑀡𑀁. 𑀞𑀸𑀦𑀦𑁆𑀢𑀺 𑀓𑀸𑀭𑀡𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀯𑀻𑀭𑀺𑀬𑀁. 𑀢𑀜𑁆𑀳𑀺 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀼𑀔𑀫𑀼𑀧𑁆𑀧𑀸𑀤𑀦𑀢𑁄 𑀧𑀸𑀫𑀼𑀚𑁆𑀚𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀲𑁆𑀯𑀸𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁧.𑁩𑁧𑁯). 𑀧𑀲𑀁𑀲𑀁 𑀆𑀯𑀳𑀢𑀻𑀢𑀺 𑀧𑀲𑀁𑀲𑀸𑀯𑀳𑀦𑀁. 𑀆𑀤𑀺𑀢𑁄 𑀤𑀺𑀩𑁆𑀩𑀫𑀸𑀦𑀼𑀲𑀓𑀲𑀼𑀔𑀸𑀦𑀁 ¶ , 𑀧𑀭𑀺𑀬𑁄𑀲𑀸𑀦𑁂 𑀦𑀺𑀩𑁆𑀩𑀸𑀦𑀲𑀼𑀔𑀲𑁆𑀲 𑀆𑀯𑀳𑀦𑀢𑁄 𑀨𑀮𑀽𑀧𑀘𑀸𑀭𑁂𑀦 𑀲𑀼𑀔𑀁. 𑀨𑀮𑀁 𑀧𑀝𑀺𑀓𑀗𑁆𑀔𑀫𑀸𑀦𑁄 𑀨𑀮𑀸𑀦𑀺𑀲𑀁𑀲𑁄. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺. 𑀯𑀳𑀦𑁆𑀢𑁄 𑀧𑁄𑀭𑀺𑀲𑀁 𑀥𑀼𑀭𑀦𑁆𑀢𑀺 𑀧𑀼𑀭𑀺𑀲𑀸𑀦𑀼𑀘𑁆𑀙𑀯𑀺𑀓𑀁 𑀪𑀸𑀭𑀁 𑀆𑀤𑀸𑀬 𑀯𑀺𑀳𑀭𑀦𑁆𑀢𑁄 𑀏𑀢𑀁 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑀗𑁆𑀔𑀸𑀢𑀁 𑀞𑀸𑀦𑀁 𑀪𑀸𑀯𑁂𑀢𑀺, 𑀈𑀤𑀺𑀲𑁄 𑀧𑀬𑁄𑀕𑁄 𑀲𑁂𑀯𑀺𑀢𑀩𑁆𑀩𑁄𑀢𑀺.

𑁨𑁬𑁦. 𑀏𑀯𑀁 𑀪𑀕𑀯𑀸 ‘‘𑀓𑀻𑀤𑀺𑀲𑁄 𑀧𑀬𑁄𑀕𑁄 𑀧𑀬𑀼𑀜𑁆𑀚𑀺𑀢𑀩𑁆𑀩𑁄’’𑀢𑀺 𑀢𑀢𑀺𑀬𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀼𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀧𑀯𑀺𑀯𑁂𑀓𑀭𑀲’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀯𑀺𑀯𑁂𑀓𑁄𑀢𑀺 𑀓𑀺𑀮𑁂𑀲𑀯𑀺𑀯𑁂𑀓𑀢𑁄 𑀚𑀸𑀢𑀢𑁆𑀢𑀸 𑀅𑀕𑁆𑀕𑀨𑀮𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀭𑀲𑁄𑀢𑀺 𑀅𑀲𑁆𑀲𑀸𑀤𑀦𑀝𑁆𑀞𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁. 𑀉𑀧𑀲𑀫𑁄𑀧𑀺 𑀓𑀺𑀮𑁂𑀲𑀽𑀧𑀲𑀫𑀦𑁆𑀢𑁂 𑀚𑀸𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀉𑀧𑀲𑀫𑀸𑀭𑀫𑁆𑀫𑀡𑀢𑁆𑀢𑀸 𑀯𑀸 𑀢𑀤𑁂𑀯, 𑀥𑀫𑁆𑀫𑀧𑀻𑀢𑀺𑀭𑀲𑁄𑀧𑀺 𑀅𑀭𑀺𑀬𑀥𑀫𑁆𑀫𑀢𑁄 𑀅𑀦𑀧𑁂𑀢𑀸𑀬 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂 𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑀸𑀬 𑀧𑀻𑀢𑀺𑀬𑀸 𑀭𑀲𑀢𑁆𑀢𑀸 𑀢𑀤𑁂𑀯. 𑀢𑀁 𑀧𑀯𑀺𑀯𑁂𑀓𑀭𑀲𑀁 𑀉𑀧𑀲𑀫𑀲𑁆𑀲 𑀘 𑀭𑀲𑀁 𑀧𑀺𑀢𑁆𑀯𑀸 𑀢𑀤𑁂𑀯 𑀥𑀫𑁆𑀫𑀧𑀻𑀢𑀺𑀭𑀲𑀁 𑀧𑀺𑀯𑀁 𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄, 𑀧𑀺𑀯𑀺𑀢𑁆𑀯𑀸𑀧𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀦𑀺𑀤𑁆𑀤𑀭𑁄, 𑀧𑀺𑀯𑀦𑁆𑀢𑁄𑀧𑀺 𑀧𑀳𑀻𑀦𑀧𑀸𑀧𑀢𑁆𑀢𑀸 𑀦𑀺𑀧𑁆𑀧𑀸𑀧𑁄 𑀳𑁄𑀢𑀺, 𑀢𑀲𑁆𑀫𑀸 𑀏𑀢𑀁 𑀭𑀲𑀸𑀦𑀫𑀕𑁆𑀕𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀛𑀸𑀦𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀁 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸𑀦𑀜𑁆𑀘 𑀯𑀲𑁂𑀦 𑀧𑀯𑀺𑀯𑁂𑀓𑀭𑀲𑀸𑀤𑀬𑁄 𑀢𑀬𑁄 𑀏𑀯 𑀏𑀢𑁂 𑀥𑀫𑁆𑀫𑀸’’𑀢𑀺 𑀬𑁄𑀚𑁂𑀦𑁆𑀢𑀺 ¶ , 𑀧𑀼𑀭𑀺𑀫𑀫𑁂𑀯 𑀲𑀼𑀦𑁆𑀤𑀭𑀁. 𑀏𑀯𑀁 𑀪𑀕𑀯𑀸 𑀘𑀢𑀼𑀢𑁆𑀣𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 ¶ 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀅𑀭𑀳𑀸 𑀅𑀳𑁄𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀳𑀺𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.