📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀯𑀺𑀫𑀸𑀦𑀯𑀢𑁆𑀣𑀼-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀫𑀳𑀸𑀓𑀸𑀭𑀼𑀡𑀺𑀓𑀁 𑀦𑀸𑀣𑀁, 𑀜𑁂𑀬𑁆𑀬𑀲𑀸𑀕𑀭𑀧𑀸𑀭𑀕𑀼𑀁;

𑀯𑀦𑁆𑀤𑁂 𑀦𑀺𑀧𑀼𑀡𑀕𑀫𑁆𑀪𑀻𑀭-𑀯𑀺𑀘𑀺𑀢𑁆𑀭𑀦𑀬𑀤𑁂𑀲𑀦𑀁.

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀸, 𑀬𑁂𑀦 𑀦𑀺𑀬𑁆𑀬𑀦𑁆𑀢𑀺 𑀮𑁄𑀓𑀢𑁄;

𑀯𑀦𑁆𑀤𑁂 𑀢𑀫𑀼𑀢𑁆𑀢𑀫𑀁 𑀥𑀫𑁆𑀫𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀽𑀚𑀺𑀢𑀁.

𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄, 𑀞𑀺𑀢𑁄 𑀫𑀕𑁆𑀕𑀨𑀮𑁂𑀲𑀼 𑀬𑁄;

𑀯𑀦𑁆𑀤𑁂 𑀅𑀭𑀺𑀬𑀲𑀗𑁆𑀖𑀁 𑀢𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑀯𑀦𑁆𑀤𑀦𑀸𑀚𑀦𑀺𑀢𑀁 𑀧𑀼𑀜𑁆𑀜𑀁, 𑀇𑀢𑀺 𑀬𑀁 𑀭𑀢𑀦𑀢𑁆𑀢𑀬𑁂;

𑀳𑀢𑀦𑁆𑀢𑀭𑀸𑀬𑁄 𑀲𑀩𑁆𑀩𑀢𑁆𑀣, 𑀳𑀼𑀢𑁆𑀯𑀸𑀳𑀁 𑀢𑀲𑁆𑀲 𑀢𑁂𑀚𑀲𑀸.

𑀤𑁂𑀯𑀢𑀸𑀳𑀺 𑀓𑀢𑀁 𑀧𑀼𑀜𑁆𑀜𑀁, 𑀬𑀁 𑀬𑀁 𑀧𑀼𑀭𑀺𑀫𑀚𑀸𑀢𑀺𑀲𑀼;

𑀢𑀲𑁆𑀲 𑀢𑀲𑁆𑀲 𑀯𑀺𑀫𑀸𑀦𑀸𑀤𑀺-𑀨𑀮𑀲𑀫𑁆𑀧𑀢𑁆𑀢𑀺𑀪𑁂𑀤𑀢𑁄.

𑀧𑀼𑀘𑁆𑀙𑀸𑀯𑀲𑁂𑀦 𑀬𑀸 𑀢𑀸𑀲𑀁, 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀘;

𑀧𑀯𑀢𑁆𑀢𑀸 𑀤𑁂𑀲𑀦𑀸 𑀓𑀫𑁆𑀫-𑀨𑀮𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀻.

𑀯𑀺𑀫𑀸𑀦𑀯𑀢𑁆𑀣𑀼 𑀇𑀘𑁆𑀘𑁂𑀯, 𑀦𑀸𑀫𑁂𑀦 𑀯𑀲𑀺𑀦𑁄 𑀧𑀼𑀭𑁂;

𑀬𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑁆𑀫𑀺𑀁, 𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑁂𑀲𑀬𑁄.

𑀢𑀲𑁆𑀲𑀸𑀳𑀫𑀯𑀮𑀫𑁆𑀩𑀺𑀢𑁆𑀯𑀸, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁;

𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀸𑀦𑀺, 𑀯𑀺𑀪𑀸𑀯𑁂𑀦𑁆𑀢𑁄 𑀯𑀺𑀲𑁂𑀲𑀢𑁄.

𑀲𑀼𑀯𑀺𑀲𑀼𑀤𑁆𑀥𑀁 𑀅𑀲𑀁𑀓𑀺𑀡𑁆𑀡𑀁, 𑀦𑀺𑀧𑀼𑀡𑀢𑁆𑀣𑀯𑀺𑀦𑀺𑀘𑁆𑀙𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀲𑀫𑀬𑀁 𑀅𑀯𑀺𑀮𑁄𑀫𑀬𑀁.

𑀬𑀣𑀸𑀩𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀲𑀼𑀪𑀁;

𑀲𑀓𑁆𑀓𑀘𑁆𑀘𑀁 𑀪𑀸𑀲𑀢𑁄 𑀢𑀁 𑀫𑁂, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄𑀢𑀺.

𑀢𑀢𑁆𑀣 𑀯𑀺𑀫𑀸𑀦𑀸𑀦𑀻𑀢𑀺 𑀯𑀺𑀲𑀺𑀝𑁆𑀞𑀫𑀸𑀦𑀸𑀦𑀺 𑀤𑁂𑀯𑀢𑀸𑀦𑀁 𑀓𑀻𑀴𑀸𑀦𑀺𑀯𑀸𑀲𑀝𑁆𑀞𑀸𑀦𑀸𑀦𑀺. 𑀢𑀸𑀦𑀺 𑀳𑀺 𑀢𑀸𑀲𑀁 𑀲𑀼𑀘𑀭𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀸𑀦𑀺 𑀬𑁄𑀚𑀦𑀺𑀓𑀤𑁆𑀯𑀺𑀬𑁄𑀚𑀦𑀺𑀓𑀸𑀤𑀺𑀧𑀫𑀸𑀡𑀯𑀺𑀲𑁂𑀲𑀬𑀼𑀢𑁆𑀢𑀢𑀸𑀬, 𑀦𑀸𑀦𑀸𑀭𑀢𑀦𑀲𑀫𑀼𑀚𑁆𑀚𑀮𑀸𑀦𑀺 𑀯𑀺𑀘𑀺𑀢𑁆𑀢𑀯𑀡𑁆𑀡𑀲𑀡𑁆𑀞𑀸𑀦𑀸𑀦𑀺 𑀲𑁄𑀪𑀸𑀢𑀺𑀲𑀬𑀬𑁄𑀕𑁂𑀦 𑀯𑀺𑀲𑁂𑀲𑀢𑁄 𑀫𑀸𑀦𑀦𑀻𑀬𑀢𑀸𑀬 𑀘 ‘‘𑀯𑀺𑀫𑀸𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀫𑀸𑀦𑀸𑀦𑀁 𑀯𑀢𑁆𑀣𑀼 𑀓𑀸𑀭𑀡𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀫𑀸𑀦𑀯𑀢𑁆𑀣𑀼, ‘‘𑀧𑀻𑀞𑀁 𑀢𑁂 𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑁂𑀲𑀦𑀸. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀭𑀽𑀧𑀪𑁄𑀕𑀧𑀭𑀺𑀯𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀢𑀁𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀜𑁆𑀘 𑀦𑀺𑀲𑁆𑀲𑀸𑀬 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀯𑀺𑀧𑀸𑀓𑀫𑀼𑀔𑁂𑀦 𑀯𑀸 𑀓𑀫𑁆𑀫𑀦𑁆𑀢𑀭𑀫𑀸𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀯𑀺𑀫𑀸𑀦𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀬𑀺𑀤𑀁 𑀓𑁂𑀦 𑀪𑀸𑀲𑀺𑀢𑀁, 𑀓𑀢𑁆𑀣 𑀪𑀸𑀲𑀺𑀢𑀁, 𑀓𑀤𑀸 𑀪𑀸𑀲𑀺𑀢𑀁, 𑀓𑀲𑁆𑀫𑀸 𑀘 𑀪𑀸𑀲𑀺𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀇𑀤𑀜𑁆𑀳𑀺 𑀯𑀺𑀫𑀸𑀦𑀯𑀢𑁆𑀣𑀼 𑀤𑀼𑀯𑀺𑀥𑁂𑀦 𑀧𑀯𑀢𑁆𑀢𑀁 𑁋 𑀧𑀼𑀘𑁆𑀙𑀸𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀘. 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸 𑀢𑀸𑀳𑀺 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀪𑀸𑀲𑀺𑀢𑀸, 𑀧𑀼𑀘𑁆𑀙𑀸𑀕𑀸𑀣𑀸 𑀧𑀦 𑀓𑀸𑀘𑀺 𑀪𑀕𑀯𑀢𑀸 𑀪𑀸𑀲𑀺𑀢𑀸, 𑀓𑀸𑀘𑀺 𑀲𑀓𑁆𑀓𑀸𑀤𑀻𑀳𑀺, 𑀓𑀸𑀘𑀺 𑀲𑀸𑀯𑀓𑁂𑀳𑀺 𑀣𑁂𑀭𑁂𑀳𑀺. 𑀢𑀢𑁆𑀣𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀬𑁄 𑀲𑁄 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀪𑀸𑀯𑀸𑀬 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁂 𑀲𑀫𑁆𑀪𑀭𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀓𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸, 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀕𑀼𑀡𑀯𑀺𑀲𑁂𑀲𑀧𑀭𑀺𑀯𑀸𑀭𑀲𑁆𑀲, 𑀲𑀓𑀮𑀲𑁆𑀲 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄 𑀤𑀼𑀢𑀺𑀬𑁂 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑁂 𑀞𑀺𑀢𑁄 𑀇𑀤𑁆𑀥𑀺𑀫𑀦𑁆𑀢𑁂𑀲𑀼 𑀘 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀢𑁂𑀦 𑀪𑀸𑀲𑀺𑀢𑀸.

𑀪𑀸𑀲𑀦𑁆𑀢𑁂𑀦 𑀘 𑀧𑀞𑀫𑀁 𑀢𑀸𑀯 𑀮𑁄𑀓𑀳𑀺𑀢𑀸𑀬 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁂𑀦 𑀤𑁂𑀯𑀮𑁄𑀓𑁂 𑀤𑁂𑀯𑀢𑀸𑀦𑀁 𑀧𑀼𑀘𑁆𑀙𑀸𑀯𑀲𑁂𑀦 𑀧𑀼𑀦 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀧𑀼𑀜𑁆𑀜𑀨𑀮𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀁 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀧𑀯𑁂𑀤𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀪𑀸𑀲𑀺𑀢𑀸, 𑀲𑀓𑁆𑀓𑁂𑀦 𑀧𑀼𑀘𑁆𑀙𑀸𑀯𑀲𑁂𑀦, 𑀤𑁂𑀯𑀢𑀸𑀳𑀺 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀪𑀸𑀲𑀺𑀢𑀸𑀧𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀪𑀸𑀲𑀺𑀢𑀸 𑀏𑀯. 𑀏𑀯𑀁 𑀪𑀕𑀯𑀢𑀸 𑀣𑁂𑀭𑁂𑀳𑀺 𑀘 𑀤𑁂𑀯𑀢𑀸𑀳𑀺 𑀘 𑀧𑀼𑀘𑁆𑀙𑀸𑀯𑀲𑁂𑀦, 𑀤𑁂𑀯𑀢𑀸𑀳𑀺 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀘 𑀢𑀢𑁆𑀣 𑀢𑀢𑁆𑀣 𑀪𑀸𑀲𑀺𑀢𑀸 𑀧𑀘𑁆𑀙𑀸 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀯𑀺𑀫𑀸𑀦𑀯𑀢𑁆𑀣𑀼’’𑀇𑀘𑁆𑀘𑁂𑀯 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀸. 𑀅𑀬𑀁 𑀢𑀸𑀯𑁂𑀢𑁆𑀣 ‘‘𑀓𑁂𑀦 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀲𑀗𑁆𑀔𑁂𑀧𑀢𑁄 𑀲𑀸𑀥𑀸𑀭𑀡𑀢𑁄 𑀘 𑀯𑀺𑀲𑁆𑀲𑀚𑁆𑀚𑀦𑀸.

𑀯𑀺𑀢𑁆𑀣𑀸𑀭𑀢𑁄 𑀧𑀦 ‘‘𑀓𑁂𑀦 𑀪𑀸𑀲𑀺𑀢’’𑀦𑁆𑀢𑀺 𑀧𑀤𑀲𑁆𑀲 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀓𑀢𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀫𑀳𑀸𑀣𑁂𑀭𑀲𑁆𑀲 𑀆𑀕𑀫𑀦𑀻𑀬𑀧𑀝𑀺𑀧𑀤𑀸 𑀓𑀣𑁂𑀢𑀩𑁆𑀩𑀸, 𑀲𑀸 𑀧𑀦 𑀆𑀕𑀫𑀝𑁆𑀞𑀓𑀣𑀸𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀢𑀢𑁆𑀣 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀲𑀸𑀥𑀸𑀭𑀡𑀢𑁄 ‘‘𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀫𑀸𑀦𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁂𑀦𑁂𑀯 𑀆𑀕𑀫𑀺𑀲𑁆𑀲𑀢𑀺.

𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀏𑀢𑀭𑀳𑀺 𑀔𑁄 𑀫𑀦𑀼𑀲𑁆𑀲𑀸 𑀅𑀲𑀢𑀺𑀧𑀺 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀬𑀸 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀘 𑀘𑀺𑀢𑁆𑀢𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀢𑀸𑀦𑀺 𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸 𑀉𑀴𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸 𑀤𑁂𑀯𑀢𑀸 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀢𑀸𑀳𑀺 𑀬𑀣𑀽𑀧𑀘𑀺𑀢𑀁 𑀧𑀼𑀜𑁆𑀜𑀁 𑀬𑀣𑀸𑀥𑀺𑀕𑀢𑀜𑁆𑀘 𑀧𑀼𑀜𑁆𑀜𑀨𑀮𑀁 𑀓𑀣𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀬𑁆𑀬𑀁. 𑀏𑀯𑀁 𑀫𑁂 𑀲𑀢𑁆𑀣𑀸 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀫𑀦𑀼𑀲𑁆𑀲𑀸𑀦𑀁 𑀓𑀫𑁆𑀫𑀨𑀮𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑁄 𑀅𑀧𑁆𑀧𑀓𑀸𑀦𑀫𑁆𑀧𑀺 𑀓𑀸𑀭𑀸𑀦𑀁 𑀆𑀬𑀢𑀦𑀕𑀢𑀸𑀬 𑀲𑀤𑁆𑀥𑀸𑀬 𑀯𑀲𑁂𑀦 𑀉𑀴𑀸𑀭𑀨𑀮𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀁 𑀢𑀁 𑀯𑀺𑀫𑀸𑀦𑀯𑀢𑁆𑀣𑀼𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀫𑀳𑀢𑀺𑀁 𑀥𑀫𑁆𑀫𑀤𑁂𑀲𑀦𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀲𑀸 𑀳𑁄𑀢𑀺 𑀩𑀳𑀼𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀲𑁄 𑀆𑀲𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀧𑀭𑀁 𑀭𑀢𑁆𑀢𑀤𑀼𑀧𑀝𑁆𑀝𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀥𑀸𑀭𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀲𑀜𑁆𑀛𑀸𑀧𑀪𑀸𑀦𑀼𑀭𑀜𑁆𑀚𑀺𑀢𑁄 𑀯𑀺𑀬 𑀘 𑀚𑀗𑁆𑀕𑀫𑁄 𑀅𑀜𑁆𑀚𑀦𑀕𑀺𑀭𑀺𑀲𑀺𑀔𑀭𑁄, 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀆𑀭𑁄𑀘𑁂𑀢𑁆𑀯𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸, 𑀢𑀢𑁄 𑀯𑀼𑀝𑁆𑀞𑀸𑀬 𑀇𑀤𑁆𑀥𑀺𑀩𑀮𑁂𑀦 𑀢𑀗𑁆𑀔𑀡𑀜𑁆𑀜𑁂𑀯 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀢𑀸𑀳𑀺 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀬𑀣𑀽𑀧𑀘𑀺𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀢𑀲𑁆𑀲 𑀢𑀸 𑀓𑀣𑁂𑀲𑀼𑀁. 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀢𑀢𑁆𑀣 𑀧𑀯𑀢𑁆𑀢𑀺𑀢𑀦𑀺𑀬𑀸𑀫𑁂𑀦𑁂𑀯 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺, 𑀢𑀁 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀇𑀘𑁆𑀘𑁂𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺.

𑀢𑀁 𑀧𑀦𑁂𑀢𑀁 𑀯𑀺𑀫𑀸𑀦𑀯𑀢𑁆𑀣𑀼 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀁, 𑀤𑀻𑀖𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀁, 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀲𑀼 𑀲𑀸𑀲𑀦𑀗𑁆𑀕𑁂𑀲𑀼 𑀕𑀸𑀣𑀸𑀲𑀗𑁆𑀕𑀳𑀁.

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭) 𑁋

𑀏𑀯𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀝𑀺𑀜𑁆𑀜𑀸𑀢𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀓𑀢𑀺𑀧𑀬𑀥𑀫𑁆𑀫𑀓𑁆𑀔𑀦𑁆𑀥𑀲𑀗𑁆𑀕𑀳𑀁. 𑀯𑀕𑁆𑀕𑀢𑁄 𑀧𑀻𑀞𑀯𑀕𑁆𑀕𑁄 𑀘𑀺𑀢𑁆𑀢𑀮𑀢𑀸𑀯𑀕𑁆𑀕𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀕𑁆𑀕𑁄 𑀫𑀜𑁆𑀚𑀺𑀝𑁆𑀞𑀓𑀯𑀕𑁆𑀕𑁄 𑀫𑀳𑀸𑀭𑀣𑀯𑀕𑁆𑀕𑁄 𑀧𑀸𑀬𑀸𑀲𑀺𑀯𑀕𑁆𑀕𑁄 𑀲𑀼𑀦𑀺𑀓𑁆𑀔𑀺𑀢𑁆𑀢𑀯𑀕𑁆𑀕𑁄𑀢𑀺 𑀲𑀢𑁆𑀢 𑀯𑀕𑁆𑀕𑀸. 𑀯𑀢𑁆𑀣𑀼𑀢𑁄 𑀧𑀞𑀫𑁂 𑀯𑀕𑁆𑀕𑁂 𑀲𑀢𑁆𑀢𑀭𑀲 𑀯𑀢𑁆𑀣𑀽𑀦𑀺, 𑀤𑀼𑀢𑀺𑀬𑁂 𑀏𑀓𑀸𑀤𑀲, 𑀢𑀢𑀺𑀬𑁂 𑀤𑀲, 𑀘𑀢𑀼𑀢𑁆𑀣𑁂 𑀤𑁆𑀯𑀸𑀤𑀲, 𑀧𑀜𑁆𑀘𑀫𑁂 𑀘𑀢𑀼𑀤𑁆𑀤𑀲, 𑀙𑀝𑁆𑀞𑁂 𑀤𑀲, 𑀲𑀢𑁆𑀢𑀫𑁂 𑀏𑀓𑀸𑀤𑀲𑀸𑀢𑀺 𑀅𑀦𑁆𑀢𑀭𑀯𑀺𑀫𑀸𑀦𑀸𑀦𑀁 𑀅𑀕𑁆𑀕𑀳𑀡𑁂 𑀧𑀜𑁆𑀘𑀸𑀲𑀻𑀢𑀺, 𑀕𑀳𑀡𑁂 𑀧𑀦 𑀢𑁂𑀯𑀻𑀲𑀲𑀢𑀁 𑀯𑀢𑁆𑀣𑀽𑀦𑀺, 𑀕𑀸𑀣𑀸𑀢𑁄 𑀧𑀦 𑀤𑀺𑀬𑀟𑁆𑀠𑀲𑀳𑀲𑁆𑀲𑀕𑀸𑀣𑀸. 𑀢𑀲𑁆𑀲 𑀯𑀕𑁆𑀕𑁂𑀲𑀼 𑀧𑀻𑀞𑀯𑀕𑁆𑀕𑁄 𑀆𑀤𑀺, 𑀯𑀢𑁆𑀣𑀽𑀲𑀼 𑀲𑁄𑀯𑀡𑁆𑀡𑀧𑀻𑀞𑀯𑀢𑁆𑀣𑀼 𑀆𑀤𑀺, 𑀢𑀲𑁆𑀲𑀸𑀧𑀺 ‘‘𑀧𑀻𑀞𑀁 𑀢𑁂 𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺 𑀕𑀸𑀣𑀸 𑀆𑀤𑀺.

𑁧. 𑀇𑀢𑁆𑀣𑀺𑀯𑀺𑀫𑀸𑀦𑀁

𑁧. 𑀧𑀻𑀞𑀯𑀕𑁆𑀕𑁄

𑁧. 𑀧𑀞𑀫𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸

𑀢𑀢𑁆𑀣 𑀧𑀞𑀫𑀯𑀢𑁆𑀣𑀼𑀲𑁆𑀲 𑀅𑀬𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑁋 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀅𑀲𑀤𑀺𑀲𑀤𑀸𑀦𑁂 𑀧𑀯𑀢𑁆𑀢𑀺𑀢𑁂 𑀢𑀤𑀦𑀼𑀭𑀽𑀧𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀫𑀳𑀸𑀲𑁂𑀝𑁆𑀞𑀺𑀦𑀸 𑀢𑀬𑁄 𑀤𑀺𑀯𑀲𑁂, 𑀢𑀣𑀸 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀫𑀳𑀸𑀤𑀸𑀦𑁂 𑀤𑀺𑀦𑁆𑀦𑁂 𑀅𑀲𑀤𑀺𑀲𑀤𑀸𑀦𑀲𑁆𑀲 𑀧𑀯𑀢𑁆𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀸 𑀅𑀳𑁄𑀲𑀺. 𑀅𑀣 𑀫𑀳𑀸𑀚𑀦𑁄 𑀢𑀢𑁆𑀣 𑀢𑀢𑁆𑀣 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀓𑀺𑀁 𑀦𑀼 𑀔𑁄 𑀏𑀯𑀁 𑀉𑀴𑀸𑀭𑀯𑀺𑀪𑀯𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁 𑀪𑀯𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑀧𑀭𑀺𑀘𑁆𑀘𑀸𑀕𑁂𑀦𑀸𑀧𑀻’’𑀢𑀺. 𑀪𑀺𑀓𑁆𑀔𑀽 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀬𑁆𑀬𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀸𑀯 𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁 𑀪𑀯𑀺𑀲𑁆𑀲𑀢𑀺, 𑀅𑀣 𑀔𑁄 𑀘𑀺𑀢𑁆𑀢𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀘 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘, 𑀢𑀲𑁆𑀫𑀸 𑀓𑀼𑀡𑁆𑀟𑀓𑀫𑀼𑀝𑁆𑀞𑀺𑀫𑀢𑁆𑀢𑀫𑁆𑀧𑀺 𑀧𑀺𑀮𑁄𑀢𑀺𑀓𑀸𑀫𑀢𑁆𑀢𑀫𑁆𑀧𑀺 𑀢𑀺𑀡𑀧𑀡𑁆𑀡𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀧𑀽𑀢𑀺𑀫𑀼𑀢𑁆𑀢𑀳𑀭𑀻𑀢𑀓𑀫𑀢𑁆𑀢𑀫𑁆𑀧𑀺 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑀁, 𑀢𑀫𑁆𑀧𑀺 𑀫𑀳𑀧𑁆𑀨𑀮𑀢𑀭𑀁 𑀪𑀯𑀺𑀲𑁆𑀲𑀢𑀺 𑀫𑀳𑀸𑀚𑀼𑀢𑀺𑀓𑀁 𑀫𑀳𑀸𑀯𑀺𑀧𑁆𑀨𑀸𑀭’’𑀦𑁆𑀢𑀺 𑀆𑀳. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑁋

‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀺𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸;

𑀢𑀣𑀸𑀕𑀢𑁂 𑀯𑀸 𑀲𑀫𑁆𑀩𑀼𑀤𑁆𑀥𑁂, 𑀅𑀣 𑀯𑀸 𑀢𑀲𑁆𑀲 𑀲𑀸𑀯𑀓𑁂’’𑀢𑀺. (𑀯𑀺. 𑀯. 𑁮𑁦𑁪);

𑀲𑀸 𑀧𑀦𑁂𑀲𑀸 𑀓𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀬𑀣𑀸𑀯𑀺𑀪𑀯𑀁 𑀤𑀸𑀦𑀸𑀦𑀺 𑀤𑁂𑀦𑁆𑀢𑀺, 𑀕𑁂𑀳𑀗𑁆𑀕𑀡𑁂 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀆𑀲𑀦𑀸𑀦𑀺 𑀞𑀧𑁂𑀦𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀧𑀸𑀢𑀘𑀸𑀭𑀺𑀓𑁄 𑀣𑁂𑀭𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀅𑀜𑁆𑀜𑀢𑀭𑀁 𑀕𑁂𑀳𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀢𑁆𑀣𑁂𑀓𑀸 𑀓𑀼𑀮𑀥𑀻𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀣𑁂𑀭𑀁 𑀧𑀲𑁆𑀲𑀺𑀢𑁆𑀯𑀸 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸 𑀉𑀴𑀸𑀭𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀧𑀻𑀢𑀓𑀁 𑀫𑀝𑁆𑀞𑀯𑀢𑁆𑀣𑀁 𑀅𑀢𑁆𑀣𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀣𑁂𑀭𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂 ‘‘𑀇𑀤𑀁 𑀫𑀬𑁆𑀳𑀁 𑀉𑀢𑁆𑀢𑀫𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀉𑀧𑀝𑁆𑀞𑀺𑀢’’𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸 𑀬𑀣𑀸𑀯𑀺𑀪𑀯𑀁 𑀆𑀳𑀸𑀭𑁂𑀦 𑀧𑀭𑀺𑀯𑀺𑀲𑀺, 𑀩𑀻𑀚𑀦𑀺𑀜𑁆𑀘 𑀕𑀳𑁂𑀢𑁆𑀯𑀸 𑀩𑀻𑀚𑀺. 𑀲𑁄 𑀣𑁂𑀭𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀆𑀲𑀦𑀤𑀸𑀦𑀪𑁄𑀚𑀦𑀤𑀸𑀦𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀇𑀢𑁆𑀣𑀻 𑀢𑀁 𑀅𑀢𑁆𑀢𑀦𑁄 𑀤𑀸𑀦𑀁 𑀢𑀜𑁆𑀘 𑀥𑀫𑁆𑀫𑀓𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀲𑀭𑀻𑀭𑀸 𑀳𑀼𑀢𑁆𑀯𑀸 𑀢𑀁 𑀧𑀻𑀞𑀫𑁆𑀧𑀺 𑀣𑁂𑀭𑀲𑁆𑀲 𑀅𑀤𑀸𑀲𑀺.

𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀘𑁆𑀙𑀭𑀸𑀲𑀳𑀲𑁆𑀲𑀁 𑀘𑀲𑁆𑀲𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺, 𑀧𑀻𑀞𑀤𑀸𑀦𑀸𑀦𑀼𑀪𑀸𑀯𑁂𑀦 𑀘𑀲𑁆𑀲𑀸 𑀬𑁄𑀚𑀦𑀺𑀓𑁄 𑀓𑀦𑀓𑀧𑀮𑁆𑀮𑀗𑁆𑀓𑁄 𑀦𑀺𑀩𑁆𑀩𑀢𑁆𑀢𑀺 𑀆𑀓𑀸𑀲𑀘𑀸𑀭𑀻 𑀲𑀻𑀖𑀚𑀯𑁄 𑀉𑀧𑀭𑀺 𑀓𑀽𑀝𑀸𑀕𑀸𑀭𑀲𑀡𑁆𑀞𑀸𑀦𑁄, 𑀢𑁂𑀦 𑀢𑀁 ‘‘𑀧𑀻𑀞𑀯𑀺𑀫𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀯𑀢𑁆𑀣𑀁 𑀅𑀢𑁆𑀣𑀭𑀺𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀓𑀫𑁆𑀫𑀲𑀭𑀺𑀓𑁆𑀔𑀢𑀁 𑀯𑀺𑀪𑀸𑀯𑁂𑀦𑁆𑀢𑀁 𑀲𑀼𑀯𑀡𑁆𑀡𑀫𑀬𑀁 𑀅𑀳𑁄𑀲𑀺, 𑀧𑀻𑀢𑀺𑀯𑁂𑀕𑀲𑁆𑀲 𑀩𑀮𑀯𑀪𑀸𑀯𑁂𑀦 𑀲𑀻𑀖𑀚𑀯𑀁, 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀘𑀺𑀢𑁆𑀢𑀭𑀼𑀘𑀺𑀯𑀲𑁂𑀦 𑀤𑀺𑀦𑁆𑀦𑀢𑁆𑀢𑀸 𑀬𑀣𑀸𑀭𑀼𑀘𑀺𑀕𑀸𑀫𑀻, 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀉𑀴𑀸𑀭𑀢𑀸𑀬 𑀲𑀩𑁆𑀩𑀲𑁄𑀯 𑀧𑀸𑀲𑀸𑀤𑀺𑀓𑀁 𑀲𑁄𑀪𑀸𑀢𑀺𑀲𑀬𑀬𑀼𑀢𑁆𑀢𑀜𑁆𑀘 𑀅𑀳𑁄𑀲𑀺.

𑀅𑀣𑁂𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀤𑁂𑀯𑀢𑀸𑀲𑀼 𑀬𑀣𑀸𑀲𑀓𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀦𑀦𑁆𑀤𑀦𑀯𑀦𑀁 𑀕𑀘𑁆𑀙𑀦𑁆𑀢𑀻𑀲𑀼 𑀲𑀸 𑀤𑁂𑀯𑀢𑀸 𑀤𑀺𑀩𑁆𑀩𑀯𑀢𑁆𑀣𑀦𑀺𑀯𑀢𑁆𑀣𑀸 𑀤𑀺𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀲𑀓𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀧𑀻𑀞𑀯𑀺𑀫𑀸𑀦𑀁 𑀅𑀪𑀺𑀭𑀼𑀬𑁆𑀳 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀲𑀫𑀦𑁆𑀢𑀢𑁄 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀑𑀪𑀸𑀲𑁂𑀦𑁆𑀢𑀻 𑀉𑀬𑁆𑀬𑀸𑀦𑀁 𑀕𑀘𑁆𑀙𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀉𑀧𑀕𑀢𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀅𑀯𑀺𑀤𑀽𑀭𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀅𑀣 𑀲𑀸 𑀤𑁂𑀯𑀢𑀸 𑀢𑀁 𑀤𑀺𑀲𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀩𑀮𑀯𑀧𑀲𑀸𑀤𑀕𑀸𑀭𑀯𑀸 𑀲𑀳𑀲𑀸 𑀧𑀮𑁆𑀮𑀗𑁆𑀓𑀢𑁄 𑀑𑀭𑀼𑀬𑁆𑀳 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀓𑀺𑀜𑁆𑀘𑀸𑀧𑀺 𑀢𑀸𑀬 𑀅𑀜𑁆𑀜𑁂𑀳𑀺 𑀘 𑀲𑀢𑁆𑀢𑁂𑀳𑀺 𑀬𑀣𑀽𑀧𑀘𑀺𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀅𑀢𑁆𑀢𑀦𑁄 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀸𑀦𑀼𑀪𑀸𑀯𑁂𑀦 𑀳𑀢𑁆𑀣𑀢𑀮𑁂 𑀞𑀧𑀺𑀢𑀆𑀫𑀮𑀓𑀁 𑀯𑀺𑀬 𑀧𑀜𑁆𑀜𑀸𑀩𑀮𑀪𑁂𑀤𑁂𑀦 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀢𑀺, 𑀢𑀣𑀸𑀧𑀺 𑀬𑀲𑁆𑀫𑀸 𑀤𑁂𑀯𑀢𑀸𑀦𑀁 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 ‘‘𑀓𑀼𑀢𑁄 𑀦𑀼 𑀔𑁄 𑀅𑀳𑀁 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸, 𑀓𑀺𑀁 𑀦𑀼 𑀔𑁄 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀸𑀫𑀻’’𑀢𑀺 𑀅𑀢𑀻𑀢𑀪𑀯𑀁 𑀬𑀣𑀽𑀧𑀘𑀺𑀢𑀜𑁆𑀘 𑀓𑀫𑁆𑀫𑀁 𑀉𑀤𑁆𑀤𑀺𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀥𑀫𑁆𑀫𑀢𑀸𑀲𑀺𑀤𑁆𑀥𑀸 𑀉𑀧𑀥𑀸𑀭𑀡𑀸, 𑀢𑀲𑁆𑀲𑀸 𑀘 𑀬𑀸𑀣𑀸𑀯𑀢𑁄 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀸𑀬 𑀤𑁂𑀯𑀢𑀸𑀬 𑀓𑀢𑀓𑀫𑁆𑀫𑀁 𑀓𑀣𑀸𑀧𑁂𑀢𑁆𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀓𑀫𑁆𑀫𑀨𑀮𑀁 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀓𑀸𑀫𑁄 𑁋

𑁧.

‘‘𑀧𑀻𑀞𑀁 𑀢𑁂 𑀲𑁄𑀯𑀡𑁆𑀡𑀫𑀬𑀁 𑀉𑀴𑀸𑀭𑀁, 𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁;

𑀅𑀮𑀗𑁆𑀓𑀢𑁂 𑀫𑀮𑁆𑀬𑀥𑀭𑁂 𑀲𑀼𑀯𑀢𑁆𑀣𑁂, 𑀑𑀪𑀸𑀲𑀲𑀺 𑀯𑀺𑀚𑁆𑀚𑀼𑀭𑀺𑀯𑀩𑁆𑀪 𑀓𑀽𑀝𑀁.

𑁨.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁩.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑀆𑀳 𑁋

𑁪.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁫.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀩𑁆𑀪𑀸𑀕𑀢𑀸𑀦𑀸𑀲𑀦𑀓𑀁 𑀅𑀤𑀸𑀲𑀺𑀁;

𑀅𑀪𑀺𑀯𑀸𑀤𑀬𑀺𑀁 𑀅𑀜𑁆𑀚𑀮𑀺𑀓𑀁 𑀅𑀓𑀸𑀲𑀺𑀁, 𑀬𑀣𑀸𑀦𑀼𑀪𑀸𑀯𑀜𑁆𑀘 𑀅𑀤𑀸𑀲𑀺 𑀤𑀸𑀦𑀁.

𑁬.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁭.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧. 𑀢𑀢𑁆𑀣 𑀧𑀻𑀞𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀢𑀸𑀤𑀺𑀲𑀁 𑀤𑀸𑀭𑀼𑀓𑁆𑀔𑀦𑁆𑀥𑀫𑁆𑀧𑀺 𑀆𑀧𑀡𑀫𑁆𑀧𑀺 𑀩𑀮𑀺𑀓𑀭𑀡𑀧𑀻𑀞𑀫𑁆𑀧𑀺 𑀯𑁂𑀢𑁆𑀢𑀸𑀲𑀦𑀫𑁆𑀧𑀺 𑀫𑀲𑀸𑀭𑀓𑀸𑀤𑀺𑀯𑀺𑀲𑁂𑀲𑀦𑀸𑀫𑀁 𑀤𑀸𑀭𑀼𑀫𑀬𑀸𑀤𑀺𑀆𑀲𑀦𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 ‘‘𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓’’𑀦𑁆𑀢𑀺 (𑀫𑀳𑀸𑀯. 𑁨𑁦𑁯; 𑀘𑀽𑀴𑀯. 𑁭𑁫) 𑀏𑀢𑁆𑀣 𑀧𑀸𑀤𑀞𑀧𑀦𑀬𑁄𑀕𑁆𑀕𑀁 𑀧𑀻𑀞𑀸𑀤𑀺𑀓𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀯𑀼𑀘𑁆𑀘𑀢𑀺, ‘‘𑀧𑀻𑀞𑀲𑀧𑁆𑀧𑀻’’𑀢𑀺 (𑀫𑀺. 𑀧. 𑁫.𑁩.𑁧) 𑀏𑀢𑁆𑀣 𑀳𑀢𑁆𑀣𑁂𑀦 𑀕𑀳𑀡𑀬𑁄𑀕𑁆𑀕𑀁. ‘‘𑀧𑀻𑀞𑀺𑀓𑀸’’𑀢𑀺 𑀧𑀦 𑀏𑀓𑀘𑁆𑀘𑁂𑀲𑀼 𑀚𑀦𑀧𑀤𑁂𑀲𑀼 𑀤𑁂𑀲𑀯𑁄𑀳𑀸𑀭𑁂𑀦 𑀆𑀧𑀡𑀁. ‘‘𑀪𑀽𑀢𑀧𑀻𑀞𑀺𑀓𑀸 𑀤𑁂𑀯𑀓𑀼𑀮𑀧𑀻𑀞𑀺𑀓𑀸’’𑀢𑀺 𑀏𑀢𑁆𑀣 𑀤𑁂𑀯𑀢𑀸𑀦𑀁 𑀩𑀮𑀺𑀓𑀭𑀡𑀝𑁆𑀞𑀸𑀦𑀪𑀽𑀢𑀁 𑀧𑀻𑀞𑀁. ‘‘𑀪𑀤𑁆𑀤𑀧𑀻𑀞’’𑀦𑁆𑀢𑀺 𑀏𑀢𑁆𑀣 𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀉𑀧𑀭𑀺 𑀯𑀻𑀢𑀁 𑀆𑀲𑀦𑀁, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀪𑀤𑁆𑀤𑀧𑀻𑀞𑀁 𑀉𑀧𑀸𑀦𑀬𑀻’’𑀢𑀺. ‘‘𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞𑀁. 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 (𑀧𑀸𑀘𑀺. 𑁫𑁨𑁨) 𑀘 𑀆𑀤𑀻𑀲𑀼 𑀫𑀲𑀸𑀭𑀓𑀸𑀤𑀺𑀪𑁂𑀤𑀁 𑀤𑀸𑀭𑀼𑀫𑀬𑀸𑀤𑀺𑀆𑀲𑀦𑀁. 𑀇𑀥 𑀧𑀦 𑀧𑀮𑁆𑀮𑀗𑁆𑀓𑀸𑀓𑀸𑀭𑀲𑀡𑁆𑀞𑀺𑀢𑀁 𑀤𑁂𑀯𑀢𑀸𑀬 𑀧𑀼𑀜𑁆𑀜𑀸𑀦𑀼𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀁 𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀢𑀺 𑀢𑁂-𑀲𑀤𑁆𑀤𑁄 ‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺, 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁧, 𑁨𑁨𑁬) 𑀢-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑁂 𑀆𑀕𑀢𑁄. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫 (𑀤𑀻. 𑀦𑀺. 𑁩.𑁨𑁭𑁮; 𑀲𑀼. 𑀦𑀺. 𑁫𑁪𑁯). 𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀽’’𑀢𑀺 (𑀲𑀁. 𑀦𑀺. 𑁧.𑁯𑁦) 𑀘 𑀆𑀤𑀻𑀲𑀼 𑀢𑀼𑀫𑁆𑀳-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀲𑀫𑁆𑀧𑀤𑀸𑀦𑁂, 𑀢𑀼𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀓𑀺𑀁 𑀢𑁂 𑀤𑀺𑀝𑁆𑀞𑀁 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁. 𑀉𑀧𑀥𑀻 𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑀸, 𑀆𑀲𑀯𑀸 𑀢𑁂 𑀧𑀤𑀸𑀮𑀺𑀢𑀸’’𑀢𑀺 (𑀫. 𑀦𑀺. 𑁨.𑁪𑁦𑁦; 𑀲𑀼. 𑀦𑀺. 𑁫𑁫𑁧) 𑀘 𑀆𑀤𑀻𑀲𑀼 𑀓𑀭𑀡𑁂. ‘‘𑀓𑀺𑀁 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺𑀆𑀤𑀻𑀲𑀼 (𑀯𑀺. 𑀯. 𑁧𑁨𑁫𑁧; 𑀚𑀸. 𑁧.𑁧𑁦.𑁯𑁨) 𑀲𑀸𑀫𑀺𑀅𑀢𑁆𑀣𑁂. 𑀇𑀥𑀸𑀧𑀺 𑀲𑀸𑀫𑀺𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄. 𑀢𑀯𑀸𑀢𑀺 𑀳𑀺 𑀅𑀢𑁆𑀣𑁄.

𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀏𑀢𑁆𑀣 𑀲𑀼𑀯𑀡𑁆𑀡-𑀲𑀤𑁆𑀤𑁄 ‘‘𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂’’𑀢𑀺 (𑀫. 𑀦𑀺. 𑁧.𑁧𑁪𑁮) 𑀘 ‘‘𑀲𑀼𑀯𑀡𑁆𑀡𑀢𑀸 𑀲𑀼𑀲𑀭𑀢𑀸’’𑀢𑀺 (𑀔𑀼. 𑀧𑀸. 𑁮.𑁧𑁧) 𑀘 𑀏𑀯𑀫𑀸𑀤𑀻𑀲𑀼 𑀙𑀯𑀺𑀲𑀫𑁆𑀧𑀢𑁆𑀢𑀺𑀬𑀁 𑀆𑀕𑀢𑁄. ‘‘𑀓𑀸𑀓𑀁 𑀲𑀼𑀯𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁭𑁭) 𑀕𑀭𑀼𑀴𑁂. ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁨𑁦𑁦) 𑀚𑀸𑀢𑀭𑀽𑀧𑁂. 𑀇𑀥𑀸𑀧𑀺 𑀚𑀸𑀢𑀭𑀽𑀧𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀲𑀫𑀸𑀦𑀯𑀡𑁆𑀡𑀢𑀸𑀬 𑀲𑁄𑀪𑀦𑁄 𑀯𑀡𑁆𑀡𑁄 𑀏𑀢𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀯𑀡𑁆𑀡𑀫𑁂𑀯 𑀲𑁄𑀯𑀡𑁆𑀡𑀁 𑀬𑀣𑀸 ‘‘𑀯𑁂𑀓𑀢𑀁 𑀯𑁂𑀲𑀫’’𑀦𑁆𑀢𑀺 𑀘. 𑀫𑀬-𑀲𑀤𑁆𑀤𑁄 𑀘 ‘‘𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑀸, 𑀢𑁂𑀯𑀺𑀚𑁆𑀚𑀸 𑀫𑀬𑀫𑀲𑁆𑀫𑀼𑀪𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁫𑁯𑁯; 𑀫. 𑀦𑀺. 𑁨.𑁪𑁫𑁫) 𑀅𑀲𑁆𑀫𑀤𑀢𑁆𑀣𑁂 𑀆𑀕𑀢𑁄. ‘‘𑀫𑀬𑀁 𑀦𑀺𑀲𑁆𑀲𑀸𑀬 𑀳𑁂𑀫𑀸𑀬, 𑀚𑀸𑀢𑀫𑀡𑁆𑀟𑁄 𑀤𑀭𑀻 𑀲𑀼𑀪𑀸’’𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁯; 𑁩.𑁩𑁮) 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁂, 𑀩𑀸𑀳𑀺𑀭𑁂𑀦 𑀧𑀘𑁆𑀘𑀬𑁂𑀦 𑀯𑀺𑀦𑀸 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀸𑀢𑀺 𑀫𑀦𑁄𑀫𑀬𑀸𑀢𑀺 𑀯𑀼𑀢𑁆𑀢𑀸. ‘‘𑀬𑀁𑀦𑀽𑀦𑀸𑀳𑀁 𑀲𑀸𑀫𑀁 𑀘𑀺𑀓𑁆𑀔𑀮𑁆𑀮𑀁 𑀫𑀤𑁆𑀤𑀺𑀢𑁆𑀯𑀸 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀓𑀁 𑀓𑀭𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁮𑁪) 𑀯𑀺𑀓𑀸𑀭𑀢𑁆𑀣𑁂. ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁦𑁫) 𑀧𑀤𑀧𑀽𑀭𑀡𑀫𑀢𑁆𑀢𑁂. 𑀇𑀥𑀸𑀧𑀺 𑀯𑀺𑀓𑀸𑀭𑀢𑁆𑀣𑁂, 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀳𑀺 𑀲𑀼𑀯𑀡𑁆𑀡𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀅𑀬𑀫𑀢𑁆𑀣𑁄, 𑀢𑀤𑀸 𑀲𑀼𑀯𑀡𑁆𑀡𑀲𑁆𑀲 𑀯𑀺𑀓𑀸𑀭𑁄 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀯𑀺𑀓𑀸𑀭𑀢𑁆𑀣𑁂 𑀫𑀬-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, ‘‘𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁂’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀬𑀤𑀸 𑀧𑀦 𑀲𑀼𑀯𑀡𑁆𑀡𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑁄𑀯𑀡𑁆𑀡𑀦𑁆𑀢𑀺 𑀅𑀬𑀫𑀢𑁆𑀣𑁄, 𑀢𑀤𑀸 𑀲𑁄𑀯𑀡𑁆𑀡𑀫𑁂𑀯 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀫𑀬-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀉𑀴𑀸𑀭𑀦𑁆𑀢𑀺 𑀧𑀡𑀻𑀢𑀫𑁆𑀧𑀺 𑀲𑁂𑀝𑁆𑀞𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺. 𑀉𑀴𑀸𑀭-𑀲𑀤𑁆𑀤𑁄 𑀳𑀺 ‘‘𑀧𑀼𑀩𑁆𑀩𑁂𑀦𑀸𑀧𑀭𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁩𑁭𑁬) 𑀧𑀡𑀻𑀢𑁂 𑀆𑀕𑀢𑁄. ‘‘𑀉𑀴𑀸𑀭𑀸𑀬 𑀔𑀮𑀼 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀸𑀬 𑀧𑀲𑀁𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮𑁮) 𑀲𑁂𑀝𑁆𑀞𑁂. ‘‘𑀉𑀴𑀸𑀭𑀪𑁄𑀕𑀸 𑀉𑀴𑀸𑀭𑀬𑀲𑀸 𑀑𑀴𑀸𑀭𑀺𑀓’’𑀦𑁆𑀢𑀺 𑀘 𑀆𑀤𑀻𑀲𑀼 (𑀥. 𑀲. 𑁮𑁯𑁪, 𑁮𑁯𑁬; 𑀫. 𑀦𑀺. 𑁧.𑁨𑁪𑁪) 𑀫𑀳𑀦𑁆𑀢𑁂. 𑀢𑀫𑁆𑀧𑀺 𑀘 𑀯𑀺𑀫𑀸𑀦𑀁 𑀫𑀦𑀼𑀜𑁆𑀜𑀪𑀸𑀯𑁂𑀦 𑀉𑀧𑀪𑀼𑀜𑁆𑀚𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀡𑀢𑁆𑀣𑁂𑀦 𑀧𑀡𑀻𑀢𑀁, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑀸𑀤𑀺𑀦𑀸 𑀧𑀲𑀁𑀲𑀺𑀢𑀢𑀸𑀬 𑀲𑁂𑀝𑁆𑀞𑀁, 𑀧𑀫𑀸𑀡𑀫𑀳𑀦𑁆𑀢𑀢𑀸𑀬 𑀘 𑀫𑀳𑀕𑁆𑀖𑀢𑀸𑀬 𑀘 𑀫𑀳𑀦𑁆𑀢𑀁, 𑀢𑀻𑀳𑀺𑀧𑀺 𑀅𑀢𑁆𑀣𑁂𑀳𑀺 𑀉𑀴𑀸𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀉𑀴𑀸𑀭𑀦𑁆𑀢𑀺.

𑀫𑀦𑁄𑀚𑀯𑀦𑁆𑀢𑀺 𑀏𑀢𑁆𑀣 𑀫𑀦𑁄𑀢𑀺 𑀘𑀺𑀢𑁆𑀢𑀁. 𑀬𑀤𑀺𑀧𑀺 𑀫𑀦𑁄-𑀲𑀤𑁆𑀤𑁄 𑀲𑀩𑁆𑀩𑁂𑀲𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀯𑀸𑀘𑀻, ‘‘𑀫𑀦𑁄𑀚𑀯’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀓𑀲𑁆𑀲 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀫𑀦𑀲𑁄 𑀯𑀺𑀬 𑀚𑀯𑁄 𑀏𑀢𑀲𑁆𑀲𑀸𑀢𑀺 𑀫𑀦𑁄𑀚𑀯𑀁 𑀬𑀣𑀸 𑀑𑀝𑁆𑀞𑀫𑀼𑀔𑁄𑀢𑀺, 𑀅𑀢𑀺𑀯𑀺𑀬 𑀲𑀻𑀖𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀦𑁄 𑀳𑀺 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀅𑀢𑀺𑀤𑀽𑀭𑁂𑀧𑀺 𑀯𑀺𑀲𑀬𑁂 𑀔𑀡𑁂𑀦𑁂𑀯 𑀦𑀺𑀧𑀢𑀢𑀺, 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮) ‘‘𑀤𑀽𑀭𑀗𑁆𑀕𑀫𑀁 𑀏𑀓𑀘𑀭’’𑀦𑁆𑀢𑀺 (𑀥. 𑀧. 𑁩𑁭) 𑀘. 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀲𑀦𑀯𑀺𑀫𑀸𑀦𑀢𑁄 𑀉𑀬𑁆𑀬𑀸𑀦𑀁 𑀉𑀤𑁆𑀤𑀺𑀲𑁆𑀲 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺.

𑀬𑁂𑀦𑀓𑀸𑀫𑀦𑁆𑀢𑀺 𑀏𑀢𑁆𑀣 𑀓𑀸𑀫-𑀲𑀤𑁆𑀤𑁄 ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁫𑁦; 𑀣𑁂𑀭𑀕𑀸. 𑁭𑁮𑁭) 𑀫𑀦𑀸𑀧𑀺𑀬𑁂 𑀭𑀽𑀧𑀸𑀤𑀺𑀯𑀺𑀲𑀬𑁂 𑀆𑀕𑀢𑁄. ‘‘𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁬𑁪; 𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑁮 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲) 𑀙𑀦𑁆𑀤𑀭𑀸𑀕𑁂. ‘‘𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑀼𑀧𑀸𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨𑁧𑁯; 𑀫𑀳𑀸𑀦𑀺. 𑁨) 𑀲𑀩𑁆𑀩𑀲𑁆𑀫𑀺𑀁 𑀮𑁄𑀪𑁂. ‘‘𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁧) 𑀕𑀸𑀫𑀥𑀫𑁆𑀫𑁂. ‘‘𑀲𑀦𑁆𑀢𑁂𑀢𑁆𑀣 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁨𑁫; 𑀫𑀳𑀸𑀯. 𑁪𑁬𑁬) 𑀳𑀺𑀢𑀘𑁆𑀙𑀦𑁆𑀤𑁂. ‘‘𑀅𑀢𑁆𑀢𑀸𑀥𑀻𑀦𑁄 𑀅𑀧𑀭𑀸𑀥𑀻𑀦𑁄 𑀪𑀼𑀚𑀺𑀲𑁆𑀲𑁄 𑀬𑁂𑀦𑀓𑀸𑀫𑀁𑀕𑀫𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁧; 𑀫. 𑀦𑀺. 𑁧.𑁪𑁨𑁬) 𑀲𑁂𑀭𑀺𑀪𑀸𑀯𑁂. 𑀇𑀥𑀸𑀧𑀺 𑀲𑁂𑀭𑀺𑀪𑀸𑀯𑁂 𑀏𑀯 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀫𑀸 𑀬𑁂𑀦𑀓𑀸𑀫𑀦𑁆𑀢𑀺 𑀬𑀣𑀸𑀭𑀼𑀘𑀺, 𑀤𑁂𑀯𑀢𑀸𑀬 𑀇𑀘𑁆𑀙𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄.

𑀅𑀮𑀗𑁆𑀓𑀢𑁂𑀢𑀺 𑀅𑀮𑀗𑁆𑀓𑀢𑀕𑀢𑁆𑀢𑁂, 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀯𑀺𑀯𑀺𑀥𑀭𑀢𑀦𑀯𑀺𑀚𑁆𑀚𑁄𑀢𑀺𑀢𑁂𑀳𑀺 𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀸𑀤𑀺𑀪𑁂𑀤𑁂𑀳𑀺 𑀲𑀝𑁆𑀞𑀺𑀲𑀓𑀝𑀪𑀸𑀭𑀧𑀭𑀺𑀫𑀸𑀡𑁂𑀳𑀺 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀯𑀺𑀪𑀽𑀲𑀺𑀢𑀲𑀭𑀻𑀭𑁂𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀦𑁂 𑀘𑁂𑀢𑀁 𑀏𑀓𑀯𑀘𑀦𑀁. 𑀫𑀮𑁆𑀬𑀥𑀭𑁂𑀢𑀺 𑀓𑀧𑁆𑀧𑀭𑀼𑀓𑁆𑀔𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀦𑁆𑀢𑀸𑀦𑀓𑀮𑀢𑀸𑀤𑀺𑀲𑀫𑁆𑀪𑀯𑁂𑀳𑀺, 𑀲𑀼𑀯𑀺𑀲𑀼𑀤𑁆𑀥𑀘𑀸𑀫𑀻𑀓𑀭𑀯𑀺𑀯𑀺𑀥𑀭𑀢𑀦𑀫𑀬𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀓𑁂𑀲𑀭𑁂𑀳𑀺, 𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀫𑀸𑀦𑀯𑀺𑀧𑁆𑀨𑀼𑀭𑀦𑁆𑀢𑀓𑀺𑀭𑀡𑀦𑀺𑀓𑀭𑀭𑀼𑀘𑀺𑀭𑁂𑀳𑀺 𑀤𑀺𑀩𑁆𑀩𑀓𑀼𑀲𑀼𑀫𑁂𑀳𑀺 𑀲𑀼𑀫𑀡𑁆𑀟𑀺𑀢𑀓𑁂𑀲𑀳𑀢𑁆𑀣𑀸𑀤𑀺𑀢𑀸𑀬 𑀫𑀸𑀮𑀸𑀪𑀸𑀭𑀺𑀦𑀻. 𑀲𑀼𑀯𑀢𑁆𑀣𑁂𑀢𑀺 𑀓𑀧𑁆𑀧𑀮𑀢𑀸𑀦𑀺𑀩𑁆𑀩𑀢𑁆𑀢𑀸𑀦𑀁, 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀲𑁂𑀲𑀸𑀦𑀁 𑀲𑀼𑀧𑀭𑀺𑀲𑀼𑀤𑁆𑀥𑀪𑀸𑀲𑀼𑀭𑀧𑁆𑀧𑀪𑀸𑀦𑀁 𑀦𑀺𑀯𑀸𑀲𑀦𑀼𑀢𑁆𑀢𑀭𑀺𑀬𑀧𑀝𑀺𑀘𑁆𑀙𑀤𑀸𑀤𑀻𑀦𑀁 𑀤𑀺𑀩𑁆𑀩𑀯𑀢𑁆𑀣𑀸𑀦𑀁 𑀯𑀲𑁂𑀦 𑀲𑀼𑀦𑁆𑀤𑀭𑀯𑀢𑁆𑀣𑁂. 𑀑𑀪𑀸𑀲𑀲𑀻𑀢𑀺 𑀯𑀺𑀚𑁆𑀚𑁄𑀢𑀲𑀺. 𑀯𑀺𑀚𑁆𑀚𑀼𑀭𑀺𑀯𑀸𑀢𑀺 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬. 𑀅𑀩𑁆𑀪𑀓𑀽𑀝𑀦𑁆𑀢𑀺 𑀯𑀮𑀸𑀳𑀓𑀲𑀺𑀔𑀭𑁂. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀑𑀪𑀸𑀲𑀲𑀻𑀢𑀺 𑀯𑀸 𑀅𑀦𑁆𑀢𑁄𑀕𑀥𑀳𑁂𑀢𑀼𑀅𑀢𑁆𑀣𑀯𑀘𑀦𑀁, 𑀑𑀪𑀸𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀅𑀩𑁆𑀪𑀓𑀽𑀝’’𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀏𑀯 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀲𑀜𑁆𑀛𑀸𑀧𑀪𑀸𑀦𑀼𑀭𑀜𑁆𑀚𑀺𑀢𑀁 𑀭𑀢𑁆𑀢𑀯𑀮𑀸𑀳𑀓𑀲𑀺𑀔𑀭𑀁 𑀧𑀓𑀢𑀺𑀬𑀸𑀧𑀺 𑀑𑀪𑀸𑀲𑀫𑀸𑀦𑀁 𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀦𑁆𑀢𑀻 𑀯𑀺𑀲𑁂𑀲𑀢𑁄 𑀑𑀪𑀸𑀲𑁂𑀢𑀺, 𑀏𑀯𑀫𑁂𑀯𑀁 𑀲𑀼𑀧𑀭𑀺𑀲𑀼𑀤𑁆𑀥𑀢𑀧𑀦𑀻𑀬𑀫𑀬𑀁 𑀦𑀸𑀦𑀸𑀭𑀢𑀦𑀲𑀫𑀼𑀚𑁆𑀚𑀮𑀁 𑀧𑀓𑀢𑀺𑀧𑀪𑀲𑁆𑀲𑀭𑀁 𑀇𑀫𑀁 𑀯𑀺𑀫𑀸𑀦𑀁 𑀢𑁆𑀯𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀯𑀺𑀪𑀽𑀲𑀺𑀢𑀸 𑀲𑀩𑁆𑀩𑀲𑁄 𑀯𑀺𑀚𑁆𑀚𑁄𑀢𑀬𑀦𑁆𑀢𑀻𑀳𑀺 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀳𑀺 𑀯𑀢𑁆𑀣𑀸𑀪𑀭𑀡𑁄𑀪𑀸𑀲𑁂𑀳𑀺 𑀘 𑀯𑀺𑀲𑁂𑀲𑀢𑁄 𑀑𑀪𑀸𑀲𑁂𑀲𑀻𑀢𑀺.

𑀏𑀢𑁆𑀣 𑀳𑀺 ‘‘𑀧𑀻𑀞’’𑀦𑁆𑀢𑀺 𑀦𑀺𑀤𑀲𑁆𑀲𑁂𑀢𑀩𑁆𑀩𑀯𑀘𑀦𑀫𑁂𑀢𑀁, ‘‘𑀅𑀩𑁆𑀪𑀓𑀽𑀝’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀁. 𑀢𑀣𑀸 ‘‘𑀢𑁂’’𑀢𑀺 𑀦𑀺𑀤𑀲𑁆𑀲𑁂𑀢𑀩𑁆𑀩𑀯𑀘𑀦𑀁. 𑀢𑀜𑁆𑀳𑀺 ‘‘𑀧𑀻𑀞’’𑀦𑁆𑀢𑀺 𑀇𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀺𑀯𑀘𑀦𑁂𑀦 𑀯𑀼𑀢𑁆𑀢𑀫𑁆𑀧𑀺 ‘‘𑀅𑀮𑀗𑁆𑀓𑀢𑁂 𑀫𑀮𑁆𑀬𑀥𑀭𑁂 𑀲𑀼𑀯𑀢𑁆𑀣𑁂 𑀑𑀪𑀸𑀲𑀲𑀻’’𑀢𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀢𑁆𑀢𑀯𑀲𑁂𑀦 𑀧𑀭𑀺𑀡𑀫𑀢𑀺, 𑀢𑀲𑁆𑀫𑀸 ‘‘𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀺𑀚𑁆𑀚𑀼𑀭𑀺𑀯𑀸’’𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀁. ‘‘𑀑𑀪𑀸𑀲𑀲𑀻’’𑀢𑀺 𑀇𑀤𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀧𑀫𑁂𑀬𑁆𑀬𑀼𑀧𑀫𑀸𑀦𑀸𑀦𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀁. ‘‘𑀑𑀪𑀸𑀲𑀲𑀻’’𑀢𑀺 𑀳𑀺 𑀇𑀤𑀁 ‘‘𑀢𑁆𑀯’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀫𑀚𑁆𑀛𑀺𑀫𑀧𑀼𑀭𑀺𑀲𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀧𑀻𑀞’’𑀦𑁆𑀢𑀺 𑀇𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀞𑀫𑀧𑀼𑀭𑀺𑀲𑀯𑀲𑁂𑀦 𑀧𑀭𑀺𑀡𑀫𑀢𑀺. 𑀘-𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. ‘‘𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁 𑀑𑀪𑀸𑀲𑀲𑀻’’𑀢𑀺 𑀘 ‘‘𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑀺𑀢𑀁 𑀅𑀩𑁆𑀪𑀓𑀽𑀝𑀁 𑀯𑀺𑀬𑀸’’𑀢𑀺 𑀧𑀘𑁆𑀘𑀢𑁆𑀢𑀯𑀲𑁂𑀦 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁 𑀧𑀭𑀺𑀡𑀫𑀢𑀺. 𑀢𑀣𑀸 ‘‘𑀧𑀻𑀞’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀯𑀘𑀦𑀫𑁂𑀢𑀁, ‘‘𑀢𑁂 𑀲𑁄𑀯𑀡𑁆𑀡𑀫𑀬𑀁 𑀉𑀴𑀸𑀭’’𑀦𑁆𑀢𑀺𑀆𑀤𑀺 𑀢𑀲𑁆𑀲 𑀯𑀺𑀲𑁂𑀲𑀦𑀁.

𑀦𑀦𑀼 𑀘 ‘‘𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺 𑀯𑀢𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀅𑀕𑁆𑀕𑀮𑁄𑀳𑀢𑀸𑀬 𑀲𑁂𑀝𑁆𑀞𑀪𑀸𑀯𑀢𑁄 𑀤𑀺𑀩𑁆𑀩𑀲𑁆𑀲 𑀘 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀉𑀴𑀸𑀭’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦, 𑀓𑀺𑀜𑁆𑀘𑀺 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀬𑀣𑁂𑀯 𑀳𑀺 𑀫𑀦𑀼𑀲𑁆𑀲𑀧𑀭𑀺𑀪𑁄𑀕𑀲𑀼𑀯𑀡𑁆𑀡𑀯𑀺𑀓𑀢𑀺𑀢𑁄 𑀭𑀲𑀯𑀺𑀤𑁆𑀥𑀁 𑀲𑁂𑀝𑁆𑀞𑀁 𑀲𑀼𑀯𑀺𑀲𑀼𑀤𑁆𑀥𑀁, 𑀢𑀢𑁄 𑀆𑀓𑀭𑀼𑀧𑁆𑀧𑀦𑁆𑀦𑀁, 𑀢𑀢𑁄 𑀬𑀁𑀓𑀺𑀜𑁆𑀘𑀺 𑀤𑀺𑀩𑁆𑀩𑀁 𑀲𑁂𑀝𑁆𑀞𑀁, 𑀏𑀯𑀁 𑀤𑀺𑀩𑁆𑀩𑀲𑀼𑀯𑀡𑁆𑀡𑁂𑀧𑀺 𑀘𑀸𑀫𑀻𑀓𑀭𑀁, 𑀘𑀸𑀫𑀻𑀓𑀭𑀢𑁄 𑀲𑀸𑀢𑀓𑀼𑀫𑁆𑀪𑀁, 𑀲𑀸𑀢𑀓𑀼𑀫𑁆𑀪𑀢𑁄 𑀚𑀫𑁆𑀩𑀼𑀦𑀤𑀁, 𑀚𑀫𑁆𑀩𑀼𑀦𑀤𑀢𑁄 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀁. 𑀢𑀜𑁆𑀳𑀺 𑀲𑀩𑁆𑀩𑀲𑁂𑀝𑁆𑀞𑀁. 𑀢𑁂𑀦𑀸𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑁋

‘‘𑀫𑀼𑀢𑁆𑀢𑁄 𑀫𑀼𑀢𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸’’𑀢𑀺. (𑀫𑀳𑀸𑀯. 𑁫𑁮);

𑀢𑀲𑁆𑀫𑀸 ‘‘𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀉𑀴𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀉𑀴𑀸𑀭’’𑀦𑁆𑀢𑀺 𑀇𑀤𑀁 𑀦 𑀢𑀲𑁆𑀲 𑀲𑁂𑀝𑁆𑀞𑀧𑀡𑀻𑀢𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀫𑀳𑀦𑁆𑀢𑀪𑀸𑀯𑀫𑁆𑀧𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀻𑀞’’𑀦𑁆𑀢𑀺𑀆𑀤𑀺 𑀨𑀮𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀢𑀸𑀤𑀲𑁆𑀲𑀦𑀁. 𑀢𑀢𑁆𑀣𑀸𑀧𑀺 ‘‘𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀯𑀺𑀫𑀸𑀦𑀲𑁆𑀲 𑀯𑀢𑁆𑀣𑀼𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, ‘‘𑀉𑀴𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀲𑁄𑀪𑀸𑀢𑀺𑀲𑀬𑀲𑀫𑁆𑀧𑀤𑀁, ‘‘𑀫𑀦𑁄𑀚𑀯’’𑀦𑁆𑀢𑀺 𑀇𑀫𑀺𑀦𑀸 𑀕𑀫𑀦𑀲𑀫𑁆𑀧𑀤𑀁. ‘‘𑀕𑀘𑁆𑀙𑀢𑀺 𑀬𑁂𑀦𑀓𑀸𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀻𑀖𑀚𑀯𑀢𑀸𑀬 𑀧𑀻𑀞𑀲𑀫𑁆𑀧𑀢𑁆𑀢𑀺𑀪𑀸𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺.

𑀅𑀣 𑀯𑀸 ‘‘𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀧𑀡𑀻𑀢𑀪𑀸𑀯𑀁 𑀤𑀲𑁆𑀲𑁂𑀢𑀺, ‘‘𑀉𑀴𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁. ‘‘𑀫𑀦𑁄𑀚𑀯’’𑀦𑁆𑀢𑀺 𑀇𑀫𑀺𑀦𑀸 𑀆𑀦𑀼𑀪𑀸𑀯𑀫𑀳𑀢𑁆𑀢𑀁. ‘‘𑀕𑀘𑁆𑀙𑀢𑀺 𑀬𑁂𑀦𑀓𑀸𑀫’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀳𑀸𑀭𑀲𑀼𑀔𑀢𑁆𑀢𑀁 𑀤𑀲𑁆𑀲𑁂𑀢𑀺. ‘‘𑀲𑁄𑀯𑀡𑁆𑀡𑀫𑀬’’𑀦𑁆𑀢𑀺 𑀯𑀸 𑀇𑀫𑀺𑀦𑀸 𑀢𑀲𑁆𑀲 𑀅𑀪𑀺𑀭𑀽𑀧𑀢𑀁 𑀯𑀡𑁆𑀡𑀧𑁄𑀓𑁆𑀔𑀭𑀢𑀜𑁆𑀘 𑀤𑀲𑁆𑀲𑁂𑀢𑀺, ‘‘𑀉𑀴𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀤𑀲𑁆𑀲𑀦𑀻𑀬𑀢𑀁 𑀧𑀸𑀲𑀸𑀤𑀺𑀓𑀢𑀜𑁆𑀘 𑀤𑀲𑁆𑀲𑁂𑀢𑀺, ‘‘𑀫𑀦𑁄𑀚𑀯’’𑀦𑁆𑀢𑀺 𑀇𑀫𑀺𑀦𑀸 𑀲𑀻𑀖𑀲𑀫𑁆𑀧𑀤𑀁, ‘‘𑀕𑀘𑁆𑀙𑀢𑀺 𑀬𑁂𑀦𑀓𑀸𑀫’’𑀦𑁆𑀢𑀺 𑀇𑀫𑀺𑀦𑀸 𑀓𑀢𑁆𑀣𑀘𑀺 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀁 𑀤𑀲𑁆𑀲𑁂𑀢𑀺.

𑀅𑀣 𑀯𑀸 𑀢𑀁 𑀯𑀺𑀫𑀸𑀦𑀁 𑀬𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀁, 𑀢𑀲𑁆𑀲 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀢𑀸𑀬 𑀲𑁄𑀯𑀡𑁆𑀡𑀫𑀬𑀁, 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀢𑀸𑀬 𑀉𑀴𑀸𑀭𑀁, 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀢𑀸𑀬 𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁. 𑀢𑀣𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀤𑁆𑀥𑀸𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀲𑁄𑀯𑀡𑁆𑀡𑀫𑀬𑀁, 𑀧𑀜𑁆𑀜𑀸𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀉𑀴𑀸𑀭𑀁, 𑀯𑀻𑀭𑀺𑀬𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀫𑀦𑁄𑀚𑀯𑀁, 𑀲𑀫𑀸𑀥𑀺𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁. 𑀲𑀤𑁆𑀥𑀸𑀲𑀫𑀸𑀥𑀺𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀯𑀸 𑀲𑁄𑀯𑀡𑁆𑀡𑀫𑀬𑀁, 𑀲𑀫𑀸𑀥𑀺𑀧𑀜𑁆𑀜𑀸𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀉𑀴𑀸𑀭𑀁, 𑀲𑀫𑀸𑀥𑀺𑀯𑀻𑀭𑀺𑀬𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀫𑀦𑁄𑀚𑀯𑀁, 𑀲𑀫𑀸𑀥𑀺𑀲𑀢𑀺𑀦𑀺𑀲𑁆𑀲𑀦𑁆𑀤𑀪𑀸𑀯𑁂𑀦 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑀣𑀸 ‘‘𑀧𑀻𑀞’’𑀦𑁆𑀢𑀺𑀆𑀤𑀺 𑀯𑀺𑀫𑀸𑀦𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀼𑀜𑁆𑀜𑀨𑀮𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀁, 𑀏𑀯𑀁 ‘‘𑀅𑀮𑀗𑁆𑀓𑀢𑁂’’𑀢𑀺𑀆𑀤𑀺 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀼𑀜𑁆𑀜𑀨𑀮𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀁. 𑀬𑀣𑀸 𑀳𑀺 𑀲𑀼𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀸𑀘𑀭𑀺𑀬𑀯𑀺𑀭𑀘𑀺𑀢𑁄𑀧𑀺 𑀭𑀢𑁆𑀢𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁄 𑀯𑀺𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀫𑀡𑀺𑀭𑀢𑀦𑀔𑀘𑀺𑀢𑁄 𑀏𑀯 𑀲𑁄𑀪𑀢𑀺, 𑀦 𑀓𑁂𑀯𑀮𑁄, 𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁄 𑀘𑀢𑀼𑀭𑀲𑁆𑀲𑀲𑁄𑀪𑀦𑁄𑀧𑀺 𑀅𑀢𑁆𑀢𑀪𑀸𑀯𑁄 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄𑀯 𑀲𑁄𑀪𑀢𑀺, 𑀦 𑀓𑁂𑀯𑀮𑁄. 𑀢𑁂𑀦𑀲𑁆𑀲𑀸 ‘‘𑀅𑀮𑀗𑁆𑀓𑀢𑁂’’𑀢𑀺𑀆𑀤𑀺𑀦𑀸 𑀆𑀳𑀭𑀺𑀫𑀁 𑀲𑁄𑀪𑀸𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺, ‘‘𑀑𑀪𑀸𑀲𑀲𑀻’’𑀢𑀺 𑀇𑀫𑀺𑀦𑀸 𑀅𑀦𑀸𑀳𑀭𑀺𑀫𑀁. 𑀢𑀣𑀸 𑀧𑀼𑀭𑀺𑀫𑁂𑀦 𑀯𑀢𑁆𑀢𑀫𑀸𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀁 𑀲𑁄𑀪𑀸𑀢𑀺𑀲𑀬𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀢𑀻𑀢𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀁. 𑀧𑀼𑀭𑀺𑀫𑁂𑀦 𑀯𑀸 𑀢𑀲𑁆𑀲𑀸 𑀉𑀧𑀪𑁄𑀕𑀯𑀢𑁆𑀣𑀼𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀉𑀧𑀪𑀼𑀜𑁆𑀚𑀦𑀓𑀯𑀢𑁆𑀣𑀼𑀲𑀫𑁆𑀧𑀤𑀁.

𑀏𑀢𑁆𑀣𑀸𑀳 ‘‘𑀓𑀺𑀁 𑀧𑀦 𑀢𑀁 𑀯𑀺𑀫𑀸𑀦𑀁 𑀬𑀼𑀢𑁆𑀢𑀯𑀸𑀳𑀁, 𑀉𑀤𑀸𑀳𑀼 𑀅𑀬𑀼𑀢𑁆𑀢𑀯𑀸𑀳’’𑀦𑁆𑀢𑀺? 𑀬𑀤𑀺𑀧𑀺 𑀤𑁂𑀯𑀮𑁄𑀓𑁂 𑀭𑀣𑀯𑀺𑀫𑀸𑀦𑀸𑀦𑀺 𑀬𑀼𑀢𑁆𑀢𑀯𑀸𑀳𑀸𑀦𑀺𑀧𑀺 𑀳𑁄𑀦𑁆𑀢𑀺 ‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁬𑁪) 𑀆𑀤𑀺𑀯𑀘𑀦𑀢𑁄, 𑀢𑁂 𑀧𑀦 𑀤𑁂𑀯𑀧𑀼𑀢𑁆𑀢𑀸 𑀏𑀯 𑀓𑀺𑀘𑁆𑀘𑀓𑀭𑀡𑀓𑀸𑀮𑁂 𑀯𑀸𑀳𑀭𑀽𑀧𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀺 𑀬𑀣𑀸 𑀏𑀭𑀸𑀯𑀡𑁄 𑀤𑁂𑀯𑀧𑀼𑀢𑁆𑀢𑁄 𑀓𑀻𑀴𑀦𑀓𑀸𑀮𑁂 𑀳𑀢𑁆𑀣𑀺𑀭𑀽𑀧𑁂𑀦. 𑀇𑀤𑀁 𑀧𑀦 𑀅𑀜𑁆𑀜𑀜𑁆𑀘 𑀏𑀤𑀺𑀲𑀁 𑀅𑀬𑀼𑀢𑁆𑀢𑀯𑀸𑀳𑀁 𑀤𑀝𑁆𑀞𑀩𑁆𑀩𑀁.

𑀬𑀤𑀺 𑀏𑀯𑀁 𑀓𑀺𑀁 𑀢𑀲𑁆𑀲 𑀯𑀺𑀫𑀸𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑀸 𑀯𑀸𑀬𑁄𑀥𑀸𑀢𑀼 𑀕𑀫𑀦𑁂 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀉𑀤𑀸𑀳𑀼 𑀩𑀸𑀳𑀺𑀭𑀸𑀢𑀺? 𑀅𑀩𑁆𑀪𑀦𑁆𑀢𑀭𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀘𑀦𑁆𑀤𑀯𑀺𑀫𑀸𑀦𑀲𑀽𑀭𑀺𑀬𑀯𑀺𑀫𑀸𑀦𑀸𑀤𑀻𑀦𑀁 𑀤𑁂𑀲𑀦𑁆𑀢𑀭𑀕𑀫𑀦𑁂 𑀢𑀤𑀼𑀧𑀚𑀻𑀯𑀻𑀦𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀅𑀢𑀺𑀯𑀺𑀬 𑀲𑀻𑀖𑀚𑀯𑀁 𑀫𑀳𑀦𑁆𑀢𑀁 𑀯𑀸𑀬𑀼𑀫𑀡𑁆𑀟𑀮𑀁 𑀢𑀸𑀦𑀺 𑀧𑁂𑀮𑁂𑀦𑁆𑀢𑀁 𑀧𑀯𑀢𑁆𑀢𑁂𑀢𑀺, 𑀦 𑀏𑀯𑀁 𑀢𑀁 𑀧𑁂𑀮𑁂𑀢𑁆𑀯𑀸 𑀧𑀯𑀢𑁆𑀢𑁂𑀦𑁆𑀢𑀻 𑀩𑀸𑀳𑀺𑀭𑀸 𑀯𑀸𑀬𑁄𑀥𑀸𑀢𑀼 𑀅𑀢𑁆𑀣𑀺. 𑀬𑀣𑀸 𑀘 𑀧𑀦 𑀘𑀓𑁆𑀓𑀭𑀢𑀦𑀁 𑀅𑀦𑁆𑀢𑁄𑀲𑀫𑀼𑀝𑁆𑀞𑀺𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀦 𑀳𑀺 𑀢𑀲𑁆𑀲 𑀘𑀦𑁆𑀤𑀯𑀺𑀫𑀸𑀦𑀸𑀤𑀻𑀦𑀁 𑀯𑀺𑀬 𑀩𑀸𑀳𑀺𑀭𑀸 𑀯𑀸𑀬𑁄𑀥𑀸𑀢𑀼 𑀧𑁂𑀮𑁂𑀢𑁆𑀯𑀸 𑀧𑀯𑀢𑁆𑀢𑀺𑀓𑀸 𑀅𑀢𑁆𑀣𑀺 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀺𑀢𑁆𑀢𑀯𑀲𑁂𑀦 ‘‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺𑀆𑀤𑀺𑀯𑀘𑀦𑀲𑀫𑀦𑀦𑀦𑁆𑀢𑀭𑀫𑁂𑀯 𑀧𑀯𑀢𑁆𑀢𑀦𑀢𑁄, 𑀏𑀯𑀁 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀘𑀺𑀢𑁆𑀢𑀯𑀲𑁂𑀦 𑀅𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫’’𑀦𑁆𑀢𑀺.

𑁨. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀼𑀜𑁆𑀜𑀨𑀮𑀲𑀫𑁆𑀧𑀢𑁆𑀢𑀺𑀁 𑀓𑀺𑀢𑁆𑀢𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀸 𑀓𑀸𑀭𑀡𑀪𑀽𑀢𑀁 𑀧𑀼𑀜𑁆𑀜𑀲𑀫𑁆𑀧𑀤𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄’’𑀢𑀺𑀆𑀤𑀺 𑀕𑀸𑀣𑀸𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁂𑀦𑀸𑀢𑀺 𑀓𑀺𑀁-𑀲𑀤𑁆𑀤𑁄 ‘‘𑀓𑀺𑀁 𑀭𑀸𑀚𑀸 𑀬𑁄 𑀮𑁄𑀓𑀁 𑀦 𑀭𑀓𑁆𑀔𑀢𑀺, 𑀓𑀺𑀁 𑀦𑀼 𑀔𑁄 𑀦𑀸𑀫 𑀢𑀼𑀫𑁆𑀳𑁂 𑀫𑀁 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑀣𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁨𑁪) 𑀕𑀭𑀳𑀡𑁂 𑀆𑀕𑀢𑁄. ‘‘𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪𑁪; 𑀲𑀁. 𑀦𑀺. 𑁩.𑁫𑁯) 𑀅𑀦𑀺𑀬𑀫𑁂. ‘‘𑀓𑀺𑀁 𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁮𑁩; 𑀲𑀁. 𑀦𑀺. 𑁧.𑁭𑁩) 𑀧𑀼𑀘𑁆𑀙𑀸𑀬𑀁. 𑀇𑀥𑀸𑀧𑀺 𑀧𑀼𑀘𑁆𑀙𑀸𑀬𑀫𑁂𑀯 𑀤𑀝𑁆𑀞𑀩𑁆𑀩𑁄. ‘‘𑀓𑁂𑀦𑀸’’𑀢𑀺 𑀘 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀓𑁂𑀦 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀢𑀯. 𑀏𑀢𑀸𑀤𑀺𑀲𑁄𑀢𑀺 𑀏𑀤𑀺𑀲𑁄, 𑀏𑀢𑀭𑀳𑀺 𑀬𑀣𑀸𑀤𑀺𑀲𑁆𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀯𑀡𑁆𑀡𑁄𑀢𑀺 𑀯𑀡𑁆𑀡-𑀲𑀤𑁆𑀤𑁄 ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂, 𑀕𑀳𑀧𑀢𑀺, 𑀇𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁭) 𑀕𑀼𑀡𑁂 𑀆𑀕𑀢𑁄. ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪) 𑀣𑀼𑀢𑀺𑀬𑀁. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪; 𑀚𑀸. 𑁧.𑁬.𑁧𑁧𑁬) 𑀓𑀸𑀭𑀡𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁬𑁦𑁨) 𑀧𑀫𑀸𑀡𑁂. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫; 𑀫. 𑀦𑀺. 𑁨.𑁩𑁭𑁯-𑁩𑁮𑁦) 𑀚𑀸𑀢𑀺𑀬𑀁. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀲𑀡𑁆𑀞𑀸𑀦𑁂. ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸, 𑀲𑀼𑀲𑀼𑀓𑁆𑀓𑀤𑀸𑀞𑁄𑀲𑀺 𑀯𑀻𑀭𑀺𑀬𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁩) 𑀙𑀯𑀺𑀯𑀡𑁆𑀡𑁂. 𑀇𑀥𑀸𑀧𑀺 𑀙𑀯𑀺𑀯𑀡𑁆𑀡𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀓𑁂𑀦 𑀓𑀻𑀤𑀺𑀲𑁂𑀦 𑀧𑀼𑀜𑁆𑀜𑀯𑀺𑀲𑁂𑀲𑁂𑀦 𑀳𑁂𑀢𑀼𑀪𑀽𑀢𑁂𑀦 𑀤𑁂𑀯𑀢𑁂, 𑀢𑀯 𑀏𑀢𑀸𑀤𑀺𑀲𑁄 𑀏𑀯𑀁𑀯𑀺𑀥𑁄 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀨𑀭𑀡𑀓𑀧𑁆𑀧𑀪𑁄 𑀲𑀭𑀻𑀭𑀯𑀡𑁆𑀡𑁄 𑀚𑀸𑀢𑁄𑀢𑀺?

𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀻𑀢𑀺 𑀓𑁂𑀦 𑀧𑀼𑀜𑁆𑀜𑀸𑀢𑀺𑀲𑀬𑁂𑀦 𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀸𑀦𑀺 𑀢𑀬𑀺 𑀮𑀩𑁆𑀪𑀫𑀸𑀦𑀁 𑀉𑀴𑀸𑀭𑀁 𑀲𑀼𑀘𑀭𑀺𑀢𑀨𑀮𑀁 𑀇𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀭𑀽𑀧𑀭𑀺 𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀪𑁄𑀕𑀸𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀯𑀢𑁆𑀣𑀸𑀪𑀭𑀡𑀸𑀤𑀺𑀯𑀺𑀢𑁆𑀢𑀽𑀧𑀓𑀭𑀡𑀯𑀺𑀲𑁂𑀲𑀸. 𑀬𑁂𑀢𑀺 𑀲𑀸𑀫𑀜𑁆𑀜𑁂𑀦 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄, 𑀓𑁂𑀘𑀻𑀢𑀺 𑀧𑀓𑀸𑀭𑀪𑁂𑀤𑀁 𑀆𑀫𑀲𑀺𑀢𑁆𑀯𑀸 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄, 𑀉𑀪𑀬𑁂𑀦𑀸𑀧𑀺 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑁂 𑀢𑀢𑁆𑀣 𑀮𑀩𑁆𑀪𑀫𑀸𑀦𑁂 𑀢𑀸𑀤𑀺𑀲𑁂 𑀪𑁄𑀕𑁂 𑀅𑀦𑀯𑀲𑁂𑀲𑀢𑁄 𑀩𑁆𑀬𑀸𑀧𑁂𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀯𑀲𑁂𑀲𑀩𑁆𑀬𑀸𑀧𑀓𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸’’𑀢𑀺. 𑀫𑀦𑀲𑁄 𑀧𑀺𑀬𑀸𑀢𑀺 𑀫𑀦𑀲𑀸 𑀧𑀺𑀬𑀸𑀬𑀺𑀢𑀩𑁆𑀩𑀸, 𑀫𑀦𑀸𑀧𑀺𑀬𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 ‘‘𑀏𑀢𑀸𑀤𑀺𑀲𑁄 𑀯𑀡𑁆𑀡𑁄’’𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀲𑁂𑀲𑀸 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀯𑀡𑁆𑀡𑀲𑀫𑁆𑀧𑀤𑀸 𑀤𑀲𑁆𑀲𑀺𑀢𑀸. ‘‘𑀪𑁄𑀕𑀸’’𑀢𑀺 𑀇𑀫𑀺𑀦𑀸 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀼𑀪𑀽𑀢𑀸 𑀤𑀺𑀩𑁆𑀩𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀪𑁂𑀤𑀸 𑀓𑀸𑀫𑀕𑀼𑀡𑀲𑀫𑁆𑀧𑀤𑀸. ‘‘𑀫𑀦𑀲𑁄 𑀧𑀺𑀬𑀸’’𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀭𑀽𑀧𑀸𑀤𑀻𑀦𑀁 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀢𑀸. ‘‘𑀇𑀥 𑀫𑀺𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸 𑀧𑀦 𑀤𑀺𑀩𑁆𑀩𑀆𑀬𑀼𑀯𑀡𑁆𑀡𑀬𑀲𑀲𑀼𑀔𑀆𑀥𑀺𑀧𑀢𑁂𑀬𑁆𑀬𑀲𑀫𑁆𑀧𑀤𑀸 𑀤𑀲𑁆𑀲𑀺𑀢𑀸. ‘‘𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸’’𑀢𑀺 𑀇𑀫𑀺𑀦𑀸 𑀬𑀸𑀦𑀺 ‘‘𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑁆𑀕𑀡𑁆𑀳𑀸𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦 𑀤𑀺𑀩𑁆𑀩𑁂𑀦 𑀲𑀼𑀔𑁂𑀦 𑀤𑀺𑀩𑁆𑀩𑁂𑀦 𑀬𑀲𑁂𑀦 𑀤𑀺𑀩𑁆𑀩𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺 𑀤𑀺𑀩𑁆𑀩𑁂𑀳𑀺 𑀲𑀤𑁆𑀤𑁂𑀳𑀺 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺 𑀤𑀺𑀩𑁆𑀩𑁂𑀳𑀺 𑀭𑀲𑁂𑀳𑀺 𑀤𑀺𑀩𑁆𑀩𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’𑀢𑀺 (𑀲𑀁. 𑀦𑀺. 𑁪.𑁩𑁪𑁧) 𑀲𑀼𑀢𑁆𑀢𑁂 𑀆𑀕𑀢𑀸𑀦𑀺 𑀤𑀲 𑀞𑀸𑀦𑀸𑀦𑀺. 𑀢𑁂𑀲𑀁 𑀇𑀥 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩. 𑀧𑀼𑀘𑁆𑀙𑀸𑀫𑀻𑀢𑀺 𑀧𑀜𑁆𑀳𑀁 𑀓𑀭𑁄𑀫𑀺, 𑀜𑀸𑀢𑀼𑀫𑀺𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘𑁂𑀢𑀁 ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺. 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁, 𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸’’𑀢𑀺 𑀘 𑀓𑀺𑀁-𑀲𑀤𑁆𑀤𑀕𑁆𑀕𑀳𑀡𑁂𑀦𑁂𑀯 𑀅𑀢𑁆𑀣𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 𑀧𑀼𑀘𑁆𑀙𑀸𑀯𑀲𑁂𑀦 𑀕𑀸𑀣𑀸𑀢𑁆𑀢𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀧𑀦 ‘‘𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀢𑀸𑀯 𑀦 𑀳𑁄𑀢𑀺 𑀏𑀤𑀺𑀲𑀲𑁆𑀲 𑀅𑀢𑁆𑀣𑀲𑁆𑀲 𑀫𑀳𑀸𑀣𑁂𑀭𑀲𑁆𑀲 𑀅𑀤𑀺𑀝𑁆𑀞𑀪𑀸𑀯𑀸𑀪𑀸𑀯𑀢𑁄, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀺 𑀦 𑀳𑁄𑀢𑀺 𑀲𑀩𑁆𑀩𑀲𑁄 𑀲𑀫𑀼𑀕𑁆𑀖𑀸𑀢𑀺𑀢𑀲𑀁𑀲𑀬𑀢𑁆𑀢𑀸, 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀧𑀺 𑀦 𑀳𑁄𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀭𑀸𑀚𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁪𑁧𑁩) 𑀯𑀺𑀬 𑀅𑀦𑀼𑀫𑀢𑀺𑀕𑀳𑀡𑀸𑀓𑀸𑀭𑁂𑀦 𑀅𑀧𑁆𑀧𑀯𑀢𑁆𑀢𑀢𑁆𑀢𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀧𑀺 𑀦 𑀳𑁄𑀢𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀣𑁂𑀭𑁂𑀦 𑀅𑀧𑀼𑀘𑁆𑀙𑀺𑀢𑀢𑁆𑀢𑀸. 𑀯𑀺𑀲𑁂𑀲𑁂𑀦 𑀧𑀦 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀣𑀸𑀬𑀁 ‘‘𑀣𑁂𑀭𑁄 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑀺𑀢𑁄 𑀏𑀯. 𑀢𑀦𑁆𑀢𑀺 𑀢𑁆𑀯𑀁. 𑀢𑀬𑀺𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁, 𑀧𑀼𑀩𑁆𑀩𑀸𑀧𑁂𑀓𑁆𑀔𑀢𑀸𑀬 𑀉𑀧𑀬𑁄𑀕𑁂𑀓𑀯𑀘𑀦𑀁, 𑀧𑀭𑀸𑀧𑁂𑀓𑁆𑀔𑀢𑀸𑀬 𑀧𑀦 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀤𑁂𑀯𑀻𑀢𑀺 𑀏𑀢𑁆𑀣 𑀤𑁂𑀯-𑀲𑀤𑁆𑀤𑁄 ‘‘𑀇𑀫𑀸𑀦𑀺 𑀢𑁂 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀯𑀢𑀻𑀭𑀸𑀚𑀥𑀸𑀦𑀺𑀧𑀫𑀼𑀔𑀸𑀦𑀺, 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀓𑀭𑁄𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔’’𑀦𑁆𑀢𑀺 𑀘 𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁬𑁬) 𑀲𑀫𑁆𑀫𑀼𑀢𑀺𑀤𑁂𑀯𑀯𑀲𑁂𑀦 𑀆𑀕𑀢𑁄, ‘‘𑀢𑀲𑁆𑀲 𑀤𑁂𑀯𑀸𑀢𑀺𑀤𑁂𑀯𑀲𑁆𑀲, 𑀲𑀸𑀲𑀦𑀁 𑀲𑀩𑁆𑀩𑀤𑀲𑁆𑀲𑀺𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀲𑀼𑀤𑁆𑀥𑀺𑀤𑁂𑀯𑀯𑀲𑁂𑀦. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀜𑁆𑀳𑀺 𑀪𑀕𑀯𑀢𑁄 𑀅𑀢𑀺𑀤𑁂𑀯𑀪𑀸𑀯𑁂 𑀯𑀼𑀢𑁆𑀢𑁂 𑀇𑀢𑀭𑁂𑀲𑀁 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺. ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁩𑁭) 𑀉𑀧𑀧𑀢𑁆𑀢𑀺𑀤𑁂𑀯𑀯𑀲𑁂𑀦. 𑀇𑀥𑀸𑀧𑀺 𑀉𑀧𑀧𑀢𑁆𑀢𑀺𑀤𑁂𑀯𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀢𑁆𑀣𑀢𑁄 𑀧𑀦 𑁋 𑀤𑀺𑀩𑁆𑀩𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀓𑀻𑀴𑀢𑀺 𑀮𑀴𑀢𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀭𑀫𑀢𑀺, 𑀅𑀣 𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀚𑁄𑀢𑀢𑀺 𑀑𑀪𑀸𑀲𑀢𑀺, 𑀆𑀓𑀸𑀲𑁂𑀦 𑀯𑀺𑀫𑀸𑀦𑁂𑀦 𑀘 𑀕𑀘𑁆𑀙𑀢𑀻𑀢𑀺 𑀤𑁂𑀯𑀻. ‘‘𑀢𑁆𑀯𑀁 𑀤𑁂𑀯𑀻’’𑀢𑀺 𑀲𑀫𑁆𑀩𑁄𑀥𑀦𑁂 𑀘𑁂𑀢𑀁 𑀏𑀓𑀯𑀘𑀦𑀁. 𑀫𑀳𑀸𑀦𑀼𑀪𑀸𑀯𑁂𑀢𑀺 𑀉𑀴𑀸𑀭𑀧𑁆𑀧𑀪𑀸𑀯𑁂, 𑀲𑁄 𑀧𑀦𑀲𑁆𑀲𑀸𑀦𑀼𑀪𑀸𑀯𑁄 𑀳𑁂𑀝𑁆𑀞𑀸 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀤𑀲𑁆𑀲𑀺𑀢𑁄𑀬𑁂𑀯.

𑀫𑀦𑀼𑀲𑁆𑀲𑀪𑀽𑀢𑀸𑀢𑀺 𑀏𑀢𑁆𑀣 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸, 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀸 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀸. 𑀓𑁂 𑀧𑀦 𑀢𑁂? 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸, 𑀲𑀢𑀺𑀫𑀦𑁆𑀢𑁄, 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧).

𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀸 𑀫𑀳𑀸𑀲𑀸𑀯𑀓𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀜𑁆𑀜𑁂 𑀘 𑀫𑀳𑀸𑀦𑀼𑀪𑀸𑀯𑀸 𑀲𑀢𑁆𑀢𑀸 𑀏𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀳𑀺 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀧𑀦 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 ‘‘𑀫𑀦𑀼𑀲𑁆𑀲𑀸’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀽𑀢𑀺 𑀏𑀓𑁂.

𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀮𑁄𑀪𑀸𑀤𑀻𑀳𑀺 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀬𑁂 𑀳𑀺 𑀲𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑁄𑀪𑀸𑀤𑀬𑁄 𑀅𑀮𑁄𑀪𑀸𑀤𑀬𑁄 𑀘 𑀉𑀲𑁆𑀲𑀦𑁆𑀦𑀸, 𑀢𑁂 𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀅𑀧𑀸𑀬𑀫𑀕𑁆𑀕𑀁, 𑀅𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀲𑀼𑀕𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀜𑁆𑀘 𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀮𑁄𑀪𑀸𑀤𑀻𑀳𑀺 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀫𑀳𑀸𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸 ‘‘𑀫𑀦𑀼𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑀮𑁄𑀓𑀺𑀬𑀸 𑀧𑀦 ‘‘𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑁄 𑀮𑁄𑀓𑀫𑀭𑀺𑀬𑀸𑀤𑀸𑀬 𑀆𑀤𑀺𑀪𑀽𑀢𑁄 𑀳𑀺𑀢𑀸𑀳𑀺𑀢𑀯𑀺𑀥𑀸𑀬𑀓𑁄 𑀲𑀢𑁆𑀢𑀸𑀦𑀁 𑀧𑀺𑀢𑀼𑀝𑁆𑀞𑀸𑀦𑀺𑀬𑁄, 𑀬𑁄 𑀲𑀸𑀲𑀦𑁂 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀓𑁆𑀔𑀢𑁄 𑀧𑀭𑀫𑁆𑀧𑀭𑀸𑀬 𑀘 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀞𑀺𑀢𑀸 𑀲𑀢𑁆𑀢𑀸 𑀧𑀼𑀢𑁆𑀢𑀲𑀤𑀺𑀲𑀢𑀸𑀬 ‘‘𑀫𑀦𑀼𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀏𑀯 𑀳𑀺 𑀢𑁂 𑀫𑀸𑀡𑀯𑀸 ‘‘𑀫𑀦𑀼𑀚𑀸’’𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀪𑀽𑀢𑀸 𑀚𑀸𑀢𑀸, 𑀫𑀦𑀼𑀲𑁆𑀲𑀪𑀸𑀯𑀁 𑀯𑀸 𑀧𑀢𑁆𑀢𑀸𑀢𑀺 𑀫𑀦𑀼𑀲𑁆𑀲𑀪𑀽𑀢𑀸.

𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀦𑁆𑀢𑀺 𑀓𑀺𑀁 𑀤𑀸𑀦𑀲𑀻𑀮𑀸𑀤𑀺𑀧𑁆𑀧𑀪𑁂𑀤𑁂𑀲𑀼 𑀓𑀻𑀤𑀺𑀲𑀁 𑀧𑀼𑀚𑁆𑀚𑀪𑀸𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄, 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀺 𑀯𑀺𑀲𑁄𑀥𑁂𑀢𑀻𑀢𑀺 𑀘 ‘‘𑀧𑀼𑀜𑁆𑀜’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀼𑀘𑀭𑀺𑀢𑀁 𑀓𑀼𑀲𑀮𑀓𑀫𑁆𑀫𑀁 𑀅𑀓𑀸𑀲𑀺, 𑀉𑀧𑀘𑀺𑀦𑀺 𑀦𑀺𑀩𑁆𑀩𑀢𑁆𑀢𑁂𑀲𑀻𑀢𑀺 𑀅𑀢𑁆𑀣𑁄. 𑀚𑀮𑀺𑀢𑀸𑀦𑀼𑀪𑀸𑀯𑀸𑀢𑀺 𑀲𑀩𑁆𑀩𑀲𑁄 𑀯𑀺𑀚𑁆𑀚𑁄𑀢𑀫𑀸𑀦𑀧𑀼𑀜𑁆𑀜𑀺𑀤𑁆𑀥𑀺𑀓𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀅𑀜𑁆𑀜𑀸𑀲𑀼 𑀕𑀢𑀻𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀬𑀲𑁆𑀫𑀸 𑀦𑀺𑀭𑀬𑁂𑀧𑀺 𑀦𑀸𑀫 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀧𑀯𑀢𑁆𑀢𑀺 𑀓𑀤𑀸𑀘𑀺 𑀮𑀩𑁆𑀪𑀢𑁂𑀯, 𑀓𑀺𑀫𑀗𑁆𑀕𑀁 𑀧𑀦𑀜𑁆𑀜𑀢𑁆𑀣, 𑀦𑀦𑀼 𑀅𑀯𑁄𑀘𑀼𑀫𑁆𑀳𑀸 ‘‘𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸’’𑀢𑀺. 𑀢𑀲𑁆𑀫𑀸 𑀫𑀳𑀸𑀣𑁂𑀭𑁄 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀢𑀁 𑀤𑀺𑀲𑁆𑀯𑀸 𑀪𑀽𑀢𑀢𑁆𑀣𑀯𑀲𑁂𑀦 𑀧𑀼𑀘𑁆𑀙𑀦𑁆𑀢𑁄 ‘‘𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜’’𑀦𑁆𑀢𑀺 𑀅𑀯𑁄𑀘.

𑀅𑀣 𑀯𑀸 𑀅𑀜𑁆𑀜𑀸𑀲𑀼 𑀕𑀢𑀻𑀲𑀼 𑀏𑀓𑀦𑁆𑀢𑀲𑀼𑀔𑀢𑀸𑀬 𑀏𑀓𑀦𑁆𑀢𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀑𑀓𑀸𑀲𑁄 𑀦 𑀲𑀼𑀮𑀪𑀭𑀽𑀧𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀲𑀫𑀯𑀸𑀬𑀲𑁆𑀲 𑀲𑀼𑀤𑀼𑀮𑁆𑀮𑀪𑀪𑀸𑀯𑀢𑁄. 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀉𑀴𑀸𑀭𑁄 𑀯𑀺𑀧𑀼𑀮𑁄 𑀦 𑀘 𑀳𑁄𑀢𑀺, 𑀫𑀦𑀼𑀲𑁆𑀲𑀕𑀢𑀺𑀬𑀁 𑀧𑀦 𑀲𑀼𑀔𑀩𑀳𑀼𑀮𑀢𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀑𑀓𑀸𑀲𑁄 𑀲𑀼𑀮𑀪𑀭𑀽𑀧𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀲𑀫𑀯𑀸𑀬𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑀼𑀮𑀪𑀪𑀸𑀯𑀢𑁄. 𑀬𑀜𑁆𑀘 𑀢𑀢𑁆𑀣 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀫𑁆𑀧𑀺 𑀯𑀺𑀲𑁂𑀲𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀤𑀼𑀓𑁆𑀔𑀽𑀧𑀦𑀺𑀲𑁆𑀲𑀬𑀸 𑀳𑀺 𑀲𑀤𑁆𑀥𑀸𑀢𑀺. 𑀬𑀣𑀸 𑀳𑀺 𑀅𑀬𑁄𑀖𑀦𑁂𑀦 𑀲𑀢𑁆𑀣𑀓𑁂 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑁂 𑀢𑀲𑁆𑀲 𑀏𑀓𑀦𑁆𑀢𑀢𑁄 𑀦 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑀦𑀁 𑀉𑀤𑀓𑁂𑀦 𑀯𑀸 𑀢𑁂𑀫𑀦𑀁 𑀙𑁂𑀤𑀦𑀓𑀺𑀭𑀺𑀬𑀸𑀲𑀫𑀢𑁆𑀣𑀢𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀢𑀸𑀧𑁂𑀢𑁆𑀯𑀸 𑀧𑀦 𑀧𑀫𑀸𑀡𑀬𑁄𑀕𑀢𑁄 𑀉𑀤𑀓𑀢𑁂𑀫𑀦𑀁 𑀢𑀲𑁆𑀲𑀸 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀏𑀯𑀫𑁂𑀯 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀏𑀓𑀦𑁆𑀢𑀤𑀼𑀓𑁆𑀔𑀲𑀫𑀗𑁆𑀕𑀺𑀢𑀸 𑀤𑀼𑀓𑁆𑀔𑀩𑀳𑀼𑀮𑀢𑀸 𑀏𑀓𑀦𑁆𑀢𑀲𑀼𑀔𑀲𑀫𑀗𑁆𑀕𑀺𑀢𑀸 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀦 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀢𑀺 𑀧𑀦 𑀤𑀼𑀓𑁆𑀔𑀲𑀦𑁆𑀢𑀸𑀧𑀦𑁂 𑀧𑀫𑀸𑀡𑀬𑁄𑀕𑀢𑁄 𑀲𑀼𑀔𑀽𑀧𑀩𑁆𑀭𑀽𑀳𑀦𑁂 𑀘 𑀮𑀤𑁆𑀥𑀽𑀧𑀦𑀺𑀲𑁆𑀲𑀬𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀫𑀳𑀸𑀚𑀼𑀢𑀺𑀓𑀸 𑀫𑀳𑀸𑀯𑀺𑀧𑁆𑀨𑀸𑀭𑀸 𑀧𑀝𑀺𑀧𑀓𑁆𑀔𑀙𑁂𑀤𑀦𑀲𑀫𑀢𑁆𑀣𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀪𑀸𑀯𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜’’𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁪. 𑀏𑀯𑀁 𑀧𑀦 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸’’𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸. 𑀓𑁂𑀦 𑀧𑀦𑀸𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸? 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺. 𑀢𑀢𑁆𑀣 𑀲𑀸𑀢𑀺 𑀬𑀸 𑀧𑀼𑀩𑁆𑀩𑁂 ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂’’𑀢𑀺 𑀯𑀼𑀢𑁆𑀢𑀸, 𑀲𑀸. 𑀤𑁂𑀯𑀢𑀸𑀢𑀺 𑀤𑁂𑀯𑀧𑀼𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀸𑀧𑀺 𑀤𑁂𑀯𑀥𑀻𑀢𑀸𑀧𑀺 𑀯𑀼𑀘𑁆𑀘𑀢𑀺. ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧; 𑀔𑀼. 𑀧𑀸. 𑁫.𑁧) 𑀳𑀺 𑀤𑁂𑀯𑀧𑀼𑀢𑁆𑀢𑁄 ‘‘𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁄 𑀤𑁂𑀯𑁄𑀬𑁂𑀯 𑀤𑁂𑀯𑀢𑀸𑀢𑀺 𑀓𑀢𑁆𑀯𑀸. 𑀢𑀣𑀸 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀩𑁆𑀭𑀳𑁆𑀫𑀯𑀺𑀫𑀸𑀦𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀩𑁆𑀭𑀳𑁆𑀫𑀸𑀦𑁄.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸’’𑀢𑀺. (𑀯𑀺. 𑀯. 𑁭𑁫) 𑁋

𑀆𑀤𑀻𑀲𑀼 𑀤𑁂𑀯𑀥𑀻𑀢𑀸. 𑀇𑀥𑀸𑀧𑀺 𑀤𑁂𑀯𑀥𑀻𑀢𑀸 𑀏𑀯 𑀤𑀝𑁆𑀞𑀩𑁆𑀩𑀸. 𑀅𑀢𑁆𑀢𑀫𑀦𑀸𑀢𑀺 𑀢𑀼𑀝𑁆𑀞𑀫𑀦𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀕𑀳𑀺𑀢𑀫𑀦𑀸. 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑁆𑀳𑀺 𑀘𑀺𑀢𑁆𑀢𑀁 𑀤𑁄𑀫𑀦𑀲𑁆𑀲𑀲𑁆𑀲 𑀅𑀦𑁄𑀓𑀸𑀲𑀢𑁄 𑀢𑁂𑀳𑀺 𑀢𑀁 𑀲𑀓𑀁 𑀓𑀢𑁆𑀯𑀸 𑀕𑀳𑀺𑀢𑀁 𑀯𑀺𑀬 𑀳𑁄𑀢𑀺. 𑀅𑀢𑁆𑀢𑀫𑀦𑀸𑀢𑀺 𑀯𑀸 𑀲𑀓𑀫𑀦𑀸. 𑀅𑀦𑀯𑀚𑁆𑀚𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀢𑀲𑀼𑀔𑀸𑀯𑀳𑀢𑁄 ‘‘𑀲𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺, 𑀦 𑀇𑀢𑀭𑀁.

𑀫𑁄𑀕𑁆𑀕𑀮𑁆𑀮𑀸𑀦𑁂𑀦𑀸𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑀪𑀸𑀯𑀢𑁄 𑀲𑁄 𑀫𑀳𑀸𑀣𑁂𑀭𑁄 𑀕𑁄𑀢𑁆𑀢𑀯𑀲𑁂𑀦 ‘‘𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀧𑀜𑁆𑀜𑀸𑀢𑁄, 𑀢𑁂𑀦 𑀫𑁄𑀕𑁆𑀕𑀮𑁆𑀮𑀸𑀦𑁂𑀦. 𑀧𑀼𑀘𑁆𑀙𑀺𑀢𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀯𑀲𑁂𑀦 𑀧𑀼𑀘𑁆𑀙𑀺𑀢𑀸, 𑀅𑀢𑁆𑀢𑀫𑀦𑀸 𑀲𑀸 𑀤𑁂𑀯𑀢𑀸 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀫𑀦𑀢𑀸 𑀘𑀲𑁆𑀲𑀸 ‘‘𑀢𑀫𑁆𑀧𑀺 𑀦𑀸𑀫 𑀧𑀭𑀺𑀢𑁆𑀢𑀓𑀫𑁆𑀧𑀺 𑀓𑀫𑁆𑀫𑀁 𑀏𑀯𑀁 𑀫𑀳𑀢𑀺𑀬𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀅𑀳𑁄𑀲𑀻’’𑀢𑀺 𑀧𑀼𑀩𑁆𑀩𑁂𑀧𑀺 𑀲𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑀁 𑀧𑀝𑀺𑀘𑁆𑀘 𑀅𑀦𑁆𑀢𑀭𑀦𑁆𑀢𑀭𑀸 𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀇𑀤𑀸𑀦𑀺 𑀧𑀦 ‘‘𑀅𑀜𑁆𑀜𑀢𑀭𑀲𑁆𑀲 𑀣𑁂𑀭𑀲𑁆𑀲 𑀓𑀢𑁄𑀧𑀺 𑀦𑀸𑀫 𑀓𑀸𑀭𑁄 𑀏𑀯𑀁 𑀉𑀴𑀸𑀭𑀨𑀮𑁄, 𑀅𑀬𑀁 𑀧𑀦 𑀩𑀼𑀤𑁆𑀥𑀸𑀦𑀁 𑀅𑀕𑁆𑀕𑀲𑀸𑀯𑀓𑁄 𑀉𑀴𑀸𑀭𑀕𑀼𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀇𑀫𑀫𑁆𑀧𑀺 𑀧𑀲𑁆𑀲𑀺𑀢𑀼𑀁 𑀦𑀺𑀧𑀘𑁆𑀘𑀓𑀸𑀭𑀜𑁆𑀘 𑀓𑀸𑀢𑀼𑀁 𑀮𑀪𑀸𑀫𑀺, 𑀫𑀫 𑀧𑀼𑀜𑁆𑀜𑀨𑀮𑀧𑀝𑀺𑀲𑀁𑀬𑀼𑀢𑁆𑀢𑀫𑁂𑀯 𑀘 𑀧𑀼𑀘𑁆𑀙𑀁 𑀓𑀭𑁄𑀢𑀻’’𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀸. 𑀏𑀯𑀁 𑀲𑀜𑁆𑀚𑀸𑀢𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀲𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀩𑁆𑀬𑀸𑀓𑀸𑀲𑀺.

𑀧𑀜𑁆𑀳𑀦𑁆𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀢𑀁 𑀅𑀢𑁆𑀣𑀁 𑀯𑀺𑀬𑀸𑀓𑀸𑀲𑀺 𑀓𑀣𑁂𑀲𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀓𑀣𑀁 𑀧𑀦 𑀩𑁆𑀬𑀸𑀓𑀸𑀲𑀺? 𑀧𑀼𑀝𑁆𑀞𑀸𑀢𑀺 𑀧𑀼𑀝𑁆𑀞𑀸𑀓𑀸𑀭𑀢𑁄, 𑀧𑀼𑀘𑁆𑀙𑀺𑀢𑀸𑀓𑀸𑀭𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 ‘‘𑀧𑀼𑀘𑁆𑀙𑀺𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀧𑀼𑀝𑁆𑀞𑀸’’𑀢𑀺 𑀯𑀘𑀦𑀁 𑀯𑀺𑀲𑁂𑀲𑀢𑁆𑀣𑀦𑀺𑀬𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀺𑀤𑁆𑀥𑁂 𑀳𑀺 𑀲𑀢𑀺 𑀆𑀭𑀫𑁆𑀪𑁄 𑀯𑀺𑀲𑁂𑀲𑀢𑁆𑀣𑀜𑀸𑀧𑀓𑁄𑀯 𑀳𑁄𑀢𑀺. 𑀓𑁄 𑀧𑀦𑁂𑀲𑁄 𑀯𑀺𑀲𑁂𑀲𑀢𑁆𑀣𑁄? 𑀩𑁆𑀬𑀸𑀓𑀭𑀡𑀲𑁆𑀲 𑀧𑀼𑀘𑁆𑀙𑀸𑀦𑀼𑀭𑀽𑀧𑀢𑀸. 𑀬𑀜𑁆𑀳𑀺 𑀓𑀫𑁆𑀫𑀨𑀮𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀪𑀽𑀢𑀁 𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑀁, 𑀢𑀤𑀼𑀪𑀬𑀲𑁆𑀲 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀪𑀸𑀯𑀯𑀺𑀪𑀸𑀯𑀦𑀸. 𑀬𑁂𑀦 𑀘 𑀆𑀓𑀸𑀭𑁂𑀦 𑀧𑀼𑀘𑁆𑀙𑀸 𑀧𑀯𑀢𑁆𑀢𑀸 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘, 𑀢𑀤𑀸𑀓𑀸𑀭𑀲𑁆𑀲 𑀩𑁆𑀬𑀸𑀓𑀭𑀡𑀲𑁆𑀲 𑀧𑀼𑀘𑁆𑀙𑀸𑀦𑀼𑀭𑀽𑀧𑀢𑀸, 𑀢𑀣𑀸 𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀧𑀯𑀢𑁆𑀢𑀁. 𑀇𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀜𑀸𑀧𑀦𑀢𑁆𑀣𑀁 ‘‘𑀧𑀼𑀘𑁆𑀙𑀺𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀧𑀼𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀁.

‘‘𑀧𑀼𑀘𑁆𑀙𑀺𑀢𑀸’’𑀢𑀺 𑀯𑀸 𑀢𑀸𑀬 𑀤𑁂𑀯𑀢𑀸𑀬 𑀯𑀺𑀲𑁂𑀲𑀦𑀫𑀼𑀔𑁂𑀦 𑀧𑀼𑀝𑁆𑀞𑀪𑀸𑀯𑀲𑁆𑀲 𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑁆𑀲 𑀘 𑀓𑀸𑀭𑀡𑀓𑀺𑀢𑁆𑀢𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄’’𑀢𑀺𑀆𑀤𑀺𑀦𑀸 𑀣𑁂𑀭𑁂𑀦 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀢𑀸𑀬 𑀤𑁂𑀯𑀢𑀸𑀬 𑀓𑀢𑀓𑀫𑁆𑀫𑀁, 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀓𑀸𑀭𑀺𑀢𑀸 𑀆𑀘𑀺𑀓𑁆𑀔𑀺𑀢𑀸 𑀯𑀸𑀢𑀺 𑀲𑀸 𑀤𑁂𑀯𑀢𑀸 ‘‘𑀧𑀼𑀘𑁆𑀙𑀺𑀢𑀸’’𑀢𑀺 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀼𑀘𑁆𑀙𑀺𑀢𑀸 𑀧𑀼𑀘𑁆𑀙𑀺𑀬𑀫𑀸𑀦𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀭𑀺𑀢𑀸, 𑀢𑀲𑁆𑀫𑀸 𑀧𑀜𑁆𑀳𑀁 𑀧𑀼𑀝𑁆𑀞𑀸. 𑀬𑀲𑁆𑀫𑀸 𑀘 𑀧𑀼𑀘𑁆𑀙𑀺𑀢𑀸 𑀧𑀼𑀘𑁆𑀙𑀺𑀬𑀫𑀸𑀦𑀲𑁆𑀲 𑀓𑀫𑁆𑀫𑀲𑁆𑀲 𑀆𑀘𑀺𑀓𑁆𑀔𑀦𑀲𑀪𑀸𑀯𑀸, 𑀢𑀲𑁆𑀫𑀸 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻𑀢𑀺. 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀦𑁆𑀢𑀺 𑀇𑀤𑀁 ‘‘𑀧𑀜𑁆𑀳’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀭𑀽𑀧𑀤𑀲𑁆𑀲𑀦𑀁. 𑀅𑀬𑀁 𑀘𑁂𑀢𑁆𑀣 𑀅𑀢𑁆𑀣𑁄 𑁋 𑀇𑀤𑀁 𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀼𑀘𑁆𑀙𑀺𑀬𑀫𑀸𑀦𑀸𑀬 𑀘 𑀧𑀘𑁆𑀘𑀓𑁆𑀔𑀪𑀽𑀢𑀁 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀼𑀜𑁆𑀜𑀨𑀮𑀁, 𑀬𑀲𑁆𑀲 𑀓𑀫𑁆𑀫𑀲𑁆𑀲 𑀢𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀢𑁆𑀢𑀸 𑀧𑀜𑁆𑀳𑀦𑁆𑀢𑀺 𑀯𑀼𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀩𑁆𑀬𑀸𑀓𑀸𑀲𑀻𑀢𑀺.

𑁫. 𑀅𑀳𑀁 𑀫𑀦𑀼𑀲𑁆𑀲𑁂𑀲𑀽𑀢𑀺𑀆𑀤𑀺 𑀧𑀜𑁆𑀳𑀲𑁆𑀲 𑀩𑁆𑀬𑀸𑀓𑀭𑀡𑀸𑀓𑀸𑀭𑁄. 𑀢𑀢𑁆𑀣 𑀅𑀳𑀦𑁆𑀢𑀺 𑀤𑁂𑀯𑀢𑀸 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. ‘‘𑀫𑀦𑀼𑀲𑁆𑀲𑁂𑀲𑀽’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀫𑀦𑀼𑀲𑁆𑀲𑀪𑀽𑀢𑀸’’𑀢𑀺 𑀯𑀘𑀦𑀁 𑀢𑀤𑀸 𑀅𑀢𑁆𑀢𑀦𑀺 𑀫𑀦𑀼𑀲𑁆𑀲𑀕𑀼𑀡𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁. 𑀬𑁄 𑀳𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄𑀯 𑀲𑀫𑀸𑀦𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀅𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀤𑀡𑁆𑀟𑀸𑀭𑀳𑁄 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀸𑀤𑀺𑀢𑁄 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀓𑀫𑁆𑀫𑀓𑀸𑀭𑀡𑀁 𑀧𑀸𑀧𑀼𑀡𑀦𑁆𑀢𑁄 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺, 𑀅𑀬𑀁 𑀫𑀦𑀼𑀲𑁆𑀲𑀦𑁂𑀭𑀬𑀺𑀓𑁄 𑀦𑀸𑀫. 𑀅𑀧𑀭𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑁄𑀯 𑀲𑀫𑀸𑀦𑁄 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀼𑀦𑀸 𑀖𑀸𑀲𑀘𑁆𑀙𑀸𑀤𑀦𑀫𑁆𑀧𑀺 𑀦 𑀮𑀪𑀢𑀺, 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀤𑀼𑀓𑁆𑀔𑀩𑀳𑀼𑀮𑁄 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑁄 𑀯𑀺𑀘𑀭𑀢𑀺, 𑀅𑀬𑀁 𑀫𑀦𑀼𑀲𑁆𑀲𑀧𑁂𑀢𑁄 𑀦𑀸𑀫. 𑀅𑀧𑀭𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑁄𑀯 𑀲𑀫𑀸𑀦𑁄 𑀧𑀭𑀸𑀥𑀻𑀦𑀯𑀼𑀢𑁆𑀢𑀺 𑀧𑀭𑁂𑀲𑀁 𑀪𑀸𑀭𑀁 𑀯𑀳𑀦𑁆𑀢𑁄 𑀪𑀺𑀦𑁆𑀦𑀫𑀭𑀺𑀬𑀸𑀤𑁄 𑀯𑀸 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑁆𑀯𑀸 𑀧𑀭𑁂𑀳𑀺 𑀲𑀦𑁆𑀢𑀚𑁆𑀚𑀺𑀢𑁄 𑀫𑀭𑀡𑀪𑀬𑀪𑀻𑀢𑁄 𑀕𑀳𑀦𑀦𑀺𑀲𑁆𑀲𑀺𑀢𑁄 𑀤𑀼𑀓𑁆𑀔𑀩𑀳𑀼𑀮𑁄 𑀯𑀺𑀘𑀭𑀢𑀺 𑀳𑀺𑀢𑀸𑀳𑀺𑀢𑀁 𑀅𑀚𑀸𑀦𑀦𑁆𑀢𑁄 𑀦𑀺𑀤𑁆𑀤𑀸𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑀯𑀺𑀦𑁄𑀤𑀦𑀸𑀤𑀺𑀧𑀭𑁄, 𑀅𑀬𑀁 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑁄 𑀦𑀸𑀫. 𑀬𑁄 𑀧𑀦 𑀅𑀢𑁆𑀢𑀦𑁄 𑀳𑀺𑀢𑀸𑀳𑀺𑀢𑀁 𑀚𑀸𑀦𑀦𑁆𑀢𑁄 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀦𑁆𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀁𑀯𑁂𑀕𑀩𑀳𑀼𑀮𑁄 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀘𑀭𑀦𑁆𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀅𑀬𑀁 𑀫𑀦𑀼𑀲𑁆𑀲𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄 𑀧𑀭𑀫𑀢𑁆𑀣𑀢𑁄 𑀫𑀦𑀼𑀲𑁆𑀲𑁄 𑀦𑀸𑀫. 𑀅𑀬𑀫𑁆𑀧𑀺 𑀢𑀸𑀤𑀺𑀲𑀸 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸’’𑀢𑀺. 𑀫𑀦𑀼𑀲𑁆𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀫𑀦𑀼𑀲𑁆𑀲𑀪𑀸𑀯𑀁 𑀧𑀢𑁆𑀢𑀸 𑀫𑀦𑀼𑀲𑁆𑀲𑀥𑀫𑁆𑀫𑀜𑁆𑀘 𑀅𑀧𑁆𑀧𑀳𑀸𑀬 𑀞𑀺𑀢𑀸𑀢𑀺 𑀅𑀢𑁆𑀣𑁄.

𑀅𑀩𑁆𑀪𑀸𑀕𑀢𑀸𑀦𑀦𑁆𑀢𑀺 𑀅𑀪𑀺𑀆𑀕𑀢𑀸𑀦𑀁, 𑀲𑀫𑁆𑀧𑀢𑁆𑀢𑀆𑀕𑀦𑁆𑀢𑀼𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀯𑀺𑀥𑀸 𑀳𑀺 𑀆𑀕𑀦𑁆𑀢𑀼𑀓𑀸 𑀅𑀢𑀺𑀣𑀺 𑀅𑀩𑁆𑀪𑀸𑀕𑀢𑁄𑀢𑀺. 𑀢𑁂𑀲𑀼 𑀓𑀢𑀧𑀭𑀺𑀘𑀬𑁄 𑀆𑀕𑀦𑁆𑀢𑀼𑀓𑁄 𑀅𑀢𑀺𑀣𑀺, 𑀅𑀓𑀢𑀧𑀭𑀺𑀘𑀬𑁄 𑀅𑀩𑁆𑀪𑀸𑀕𑀢𑁄. 𑀓𑀢𑀧𑀭𑀺𑀘𑀬𑁄 𑀅𑀓𑀢𑀧𑀭𑀺𑀘𑀬𑁄𑀧𑀺 𑀯𑀸 𑀧𑀼𑀭𑁂𑀢𑀭𑀁 𑀆𑀕𑀢𑁄 𑀅𑀢𑀺𑀣𑀺, 𑀪𑁄𑀚𑀦𑀯𑁂𑀮𑀸𑀬𑀁 𑀉𑀧𑀝𑁆𑀞𑀺𑀢𑁄 𑀲𑀫𑁆𑀧𑀢𑀺 𑀆𑀕𑀢𑁄 𑀅𑀩𑁆𑀪𑀸𑀕𑀢𑁄. 𑀦𑀺𑀫𑀦𑁆𑀢𑀺𑀢𑁄 𑀯𑀸 𑀪𑀢𑁆𑀢𑁂𑀦 𑀅𑀢𑀺𑀣𑀺, 𑀅𑀦𑀺𑀫𑀦𑁆𑀢𑀺𑀢𑁄 𑀅𑀩𑁆𑀪𑀸𑀕𑀢𑁄. 𑀅𑀬𑀁 𑀧𑀦 𑀅𑀓𑀢𑀧𑀭𑀺𑀘𑀬𑁄 𑀅𑀦𑀺𑀫𑀦𑁆𑀢𑀺𑀢𑁄 𑀲𑀫𑁆𑀧𑀢𑀺 𑀆𑀕𑀢𑁄 𑀘, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀩𑁆𑀪𑀸𑀕𑀢𑀸𑀦’’𑀦𑁆𑀢𑀺, 𑀕𑀭𑀼𑀓𑀸𑀭𑁂𑀦 𑀧𑀦𑁂𑀢𑁆𑀣 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀆𑀲𑀢𑀺 𑀦𑀺𑀲𑀻𑀤𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁. 𑀬𑀁𑀓𑀺𑀜𑁆𑀘𑀺 𑀦𑀺𑀲𑀻𑀤𑀦𑀬𑁄𑀕𑁆𑀕𑀁, 𑀇𑀥 𑀧𑀦 𑀧𑀻𑀞𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀲 𑀘 𑀅𑀧𑁆𑀧𑀓𑀢𑁆𑀢𑀸 𑀅𑀦𑀼𑀴𑀸𑀭𑀢𑁆𑀢𑀸 𑀘 ‘‘𑀆𑀲𑀦𑀓’’𑀦𑁆𑀢𑀺 𑀆𑀳. 𑀅𑀤𑀸𑀲𑀺𑀦𑁆𑀢𑀺 ‘‘𑀇𑀤𑀫𑀲𑁆𑀲 𑀣𑁂𑀭𑀲𑁆𑀲 𑀤𑀺𑀦𑁆𑀦𑀁 𑀫𑀬𑁆𑀳𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸 𑀓𑀫𑁆𑀫𑀁 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀢𑀲𑁆𑀲 𑀣𑁂𑀭𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀅𑀤𑀸𑀲𑀺𑀁, 𑀦𑀺𑀭𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀧𑀭𑀺𑀘𑁆𑀘𑀚𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀪𑀺𑀯𑀸𑀤𑀬𑀺𑀦𑁆𑀢𑀺 𑀅𑀪𑀺𑀯𑀸𑀤𑀦𑀫𑀓𑀸𑀲𑀺𑀁, 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑁂 𑀯𑀦𑁆𑀤𑀺𑀦𑁆𑀢𑀺 𑀅𑀦𑁆𑀢𑁄. 𑀯𑀦𑁆𑀤𑀫𑀸𑀦𑀸 𑀳𑀺 𑀢𑀁 𑀢𑀸𑀬𑁂𑀯 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀯𑀦𑁆𑀤𑀺𑀬𑀫𑀸𑀦𑀁 ‘‘𑀲𑀼𑀔𑀺𑀦𑀻 𑀳𑁄𑀳𑀺, 𑀅𑀭𑁄𑀕𑀸 𑀳𑁄𑀳𑀻’’𑀢𑀺𑀆𑀤𑀺𑀦𑀸 𑀆𑀲𑀺𑀯𑀸𑀤𑀁 𑀅𑀢𑁆𑀣𑀢𑁄 𑀯𑀤𑀸𑀧𑁂𑀲𑀺 𑀦𑀸𑀫. 𑀅𑀜𑁆𑀚𑀮𑀺𑀓𑀁 𑀅𑀓𑀸𑀲𑀺𑀦𑁆𑀢𑀺 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀕𑁆𑀕𑀡𑁆𑀳𑀦𑁆𑀢𑀻 𑀕𑀼𑀡𑀯𑀺𑀲𑀺𑀝𑁆𑀞𑀸𑀦𑀁 𑀅𑀧𑀘𑀸𑀬𑀦𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀼𑀪𑀸𑀯𑀦𑁆𑀢𑀺 𑀬𑀣𑀸𑀩𑀮𑀁, 𑀢𑀤𑀸 𑀫𑀫 𑀯𑀺𑀚𑁆𑀚𑀫𑀸𑀦𑀯𑀺𑀪𑀯𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀅𑀤𑀸𑀲𑀺 𑀤𑀸𑀦𑀦𑁆𑀢𑀺 𑀅𑀦𑁆𑀦𑀧𑀸𑀦𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀁 𑀪𑁄𑀚𑁂𑀦𑁆𑀢𑀻 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀧𑀲𑀯𑀺𑀁.

𑀏𑀢𑁆𑀣 𑀘 ‘‘𑀅𑀳’’𑀦𑁆𑀢𑀺 𑀇𑀤𑀁 𑀓𑀫𑁆𑀫𑀲𑁆𑀲 𑀨𑀮𑀲𑁆𑀲 𑀘 𑀏𑀓𑀲𑀦𑁆𑀢𑀢𑀺𑀧𑀢𑀺𑀢𑀢𑀸𑀤𑀲𑁆𑀲𑀦𑁂𑀦 𑀲𑀫𑁆𑀩𑀦𑁆𑀥𑀪𑀸𑀯𑀤𑀲𑁆𑀲𑀦𑀁, ‘‘𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸’’𑀢𑀺 𑀇𑀤𑀁 𑀢𑀲𑁆𑀲𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀲𑀦𑁆𑀢𑀸𑀦𑀯𑀺𑀲𑁂𑀲𑀤𑀲𑁆𑀲𑀦𑀁, ‘‘𑀅𑀩𑁆𑀪𑀸𑀕𑀢𑀸𑀦’’𑀦𑁆𑀢𑀺 𑀇𑀤𑀁 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀜𑁆𑀘𑁂𑀯 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀜𑁆𑀘 𑀤𑀸𑀦𑀲𑁆𑀲 𑀯𑀺𑀬 𑀧𑀝𑀺𑀕𑁆𑀕𑀳𑀡𑀲𑁆𑀲 𑀘 𑀓𑀺𑀜𑁆𑀘𑀺 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀪𑀸𑀯𑀤𑀻𑀧𑀦𑀢𑁄. ‘‘𑀆𑀲𑀦𑀓𑀁 𑀅𑀤𑀸𑀲𑀺𑀁 𑀬𑀣𑀸𑀦𑀼𑀪𑀸𑀯𑀜𑁆𑀘 𑀅𑀤𑀸𑀲𑀺 𑀤𑀸𑀦’’𑀦𑁆𑀢𑀺 𑀇𑀤𑀁 𑀪𑁄𑀕𑀲𑀸𑀭𑀤𑀸𑀦𑀤𑀲𑁆𑀲𑀦𑀁, ‘‘𑀅𑀪𑀺𑀯𑀸𑀤𑀬𑀺𑀁 𑀅𑀜𑁆𑀚𑀮𑀺𑀓𑀁 𑀅𑀓𑀸𑀲𑀺’’𑀦𑁆𑀢𑀺 𑀇𑀤𑀁 𑀓𑀸𑀬𑀲𑀸𑀭𑀤𑀸𑀦𑀤𑀲𑁆𑀲𑀦𑀁.

𑁬. 𑀢𑁂𑀦𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀧𑀼𑀜𑁆𑀜𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀫𑁂𑀢𑀺 𑀅𑀬𑀁 𑀫𑁂-𑀲𑀤𑁆𑀤𑁄 ‘‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁫; 𑀫. 𑀦𑀺. 𑁧.𑁨𑁮𑁧; 𑀲𑀁. 𑀦𑀺. 𑁧.𑁧𑁭𑁨) 𑀓𑀭𑀡𑁂 𑀆𑀕𑀢𑁄, 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁮𑁨; 𑀅. 𑀦𑀺. 𑁪.𑁨𑁫𑁭) 𑀲𑀫𑁆𑀧𑀤𑀸𑀦𑁂, 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀼𑀩𑁆𑀩𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁬; 𑀲𑀁. 𑀦𑀺. 𑁪.𑁧𑁪; 𑀅. 𑀦𑀺. 𑁩.𑁧𑁦𑁪) 𑀲𑀸𑀫𑀺𑀅𑀢𑁆𑀣𑁂 𑀆𑀕𑀢𑁄, 𑀇𑀥𑀸𑀧𑀺 𑀲𑀸𑀫𑀺𑀅𑀢𑁆𑀣𑁂 𑀏𑀯, 𑀫𑀫𑀸𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀬𑀁 𑀫𑁂-𑀲𑀤𑁆𑀤𑁄 𑀢𑁂𑀦 𑀫𑁂 𑀧𑀼𑀜𑁆𑀜𑁂𑀦𑀸𑀢𑀺 𑀘 𑀫𑁂 𑀏𑀢𑀸𑀤𑀺𑀲𑁄𑀢𑀺 𑀘 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀢𑀸𑀬 𑀤𑁂𑀯𑀢𑀸𑀬 𑀧𑀜𑁆𑀳𑁂 𑀩𑁆𑀬𑀸𑀓𑀢𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀧𑀭𑀺𑀯𑀸𑀭𑀸𑀬 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺. 𑀣𑁂𑀭𑁄 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀕𑀸𑀣𑀸 𑀏𑀯 𑀧𑀦 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸𑀢𑀺.

𑀧𑀞𑀫𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀻𑀞𑀁 𑀢𑁂 𑀯𑁂𑀴𑀼𑀭𑀺𑀬𑀫𑀬𑀦𑁆𑀢𑀺 𑀤𑀼𑀢𑀺𑀬𑀧𑀻𑀞𑀯𑀺𑀫𑀸𑀦𑀁. 𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀘 𑀅𑀢𑁆𑀣𑀯𑀡𑁆𑀡𑀦𑀸 𑀘 𑀧𑀞𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑀻 𑀓𑀺𑀭 𑀏𑀓𑀸 𑀇𑀢𑁆𑀣𑀻 𑀅𑀢𑁆𑀢𑀦𑁄 𑀕𑁂𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀏𑀓𑀁 𑀣𑁂𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀢𑀲𑁆𑀲 𑀆𑀲𑀦𑀁 𑀤𑁂𑀦𑁆𑀢𑀻 𑀅𑀢𑁆𑀢𑀦𑁄 𑀧𑀻𑀞𑀁 𑀉𑀧𑀭𑀺 𑀦𑀻𑀮𑀯𑀢𑁆𑀣𑁂𑀦 𑀅𑀢𑁆𑀣𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀢𑁂𑀦 𑀢𑀲𑁆𑀲𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸𑀬 𑀯𑁂𑀴𑀼𑀭𑀺𑀬𑀫𑀬𑀁 𑀧𑀮𑁆𑀮𑀗𑁆𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀧𑀻𑀞𑀁 𑀢𑁂 𑀯𑁂𑀴𑀼𑀭𑀺𑀬𑀫𑀬𑀁 𑀉𑀴𑀸𑀭𑀁, 𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁;

𑀅𑀮𑀗𑁆𑀓𑀢𑁂 𑀫𑀮𑁆𑀬𑀥𑀭𑁂 𑀲𑀼𑀯𑀢𑁆𑀣𑁂, 𑀑𑀪𑀸𑀲𑀲𑀺 𑀯𑀺𑀚𑁆𑀚𑀼𑀭𑀺𑀯𑀩𑁆𑀪 𑀓𑀽𑀝𑀁.

𑁯.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁦.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁨.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀩𑁆𑀪𑀸𑀕𑀢𑀸𑀦𑀸𑀲𑀦𑀓𑀁 𑀅𑀤𑀸𑀲𑀺𑀁;

𑀅𑀪𑀺𑀯𑀸𑀤𑀬𑀺𑀁 𑀅𑀜𑁆𑀚𑀮𑀺𑀓𑀁 𑀅𑀓𑀸𑀲𑀺𑀁, 𑀬𑀣𑀸𑀦𑀼𑀪𑀸𑀯𑀜𑁆𑀘 𑀅𑀤𑀸𑀲𑀺 𑀤𑀸𑀦𑀁.

𑁧𑁩.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁪.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁮. 𑀢𑀢𑁆𑀣 𑀯𑁂𑀴𑀼𑀭𑀺𑀬𑀫𑀬𑀦𑁆𑀢𑀺 𑀯𑁂𑀴𑀼𑀭𑀺𑀬𑀫𑀡𑀺𑀫𑀬𑀁. 𑀯𑁂𑀴𑀼𑀭𑀺𑀬𑀫𑀡𑀺 𑀦𑀸𑀫 𑀯𑀺𑀴𑀽𑀭𑀧𑀩𑁆𑀩𑀢𑀲𑁆𑀲 𑀯𑀺𑀴𑀽𑀭𑀕𑀸𑀫𑀲𑁆𑀲 𑀘 𑀅𑀯𑀺𑀤𑀽𑀭𑁂 𑀉𑀧𑁆𑀧𑀚𑁆𑀚𑀦𑀓𑀫𑀡𑀺. 𑀢𑀲𑁆𑀲 𑀓𑀺𑀭 𑀯𑀺𑀴𑀽𑀭𑀕𑀸𑀫𑀝𑁆𑀞𑀸𑀦𑁂 𑀆𑀓𑀭𑁄, 𑀯𑀺𑀴𑀽𑀭𑀲𑁆𑀲 𑀧𑀦 𑀅𑀯𑀺𑀤𑀽𑀭𑁂 𑀪𑀯𑀢𑁆𑀢𑀸 𑀯𑁂𑀴𑀼𑀭𑀺𑀬𑀦𑁆𑀢𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀁𑀲𑀤𑀺𑀲𑀯𑀡𑁆𑀡𑀦𑀺𑀪𑀢𑀸𑀬 𑀤𑁂𑀯𑀮𑁄𑀓𑁂𑀧𑀺𑀲𑁆𑀲 𑀢𑀣𑁂𑀯 𑀦𑀸𑀫𑀁 𑀚𑀸𑀢𑀁 𑀬𑀣𑀸 𑀢𑀁 𑀫𑀦𑀼𑀲𑁆𑀲𑀮𑁄𑀓𑁂 𑀮𑀤𑁆𑀥𑀦𑀸𑀫𑀯𑀲𑁂𑀦𑁂𑀯 𑀤𑁂𑀯𑀮𑁄𑀓𑁂 𑀤𑁂𑀯𑀧𑀼𑀢𑁆𑀢𑀸𑀦𑀁. 𑀢𑀁 𑀧𑀦 𑀫𑀬𑀽𑀭𑀕𑀻𑀯𑀯𑀡𑁆𑀡𑀁 𑀯𑀸 𑀳𑁄𑀢𑀺, 𑀯𑀸𑀬𑀲𑀧𑀢𑁆𑀢𑀯𑀡𑁆𑀡𑀁 𑀯𑀸, 𑀲𑀺𑀦𑀺𑀤𑁆𑀥𑀯𑁂𑀡𑀼𑀧𑀢𑁆𑀢𑀯𑀡𑁆𑀡𑀁 𑀯𑀸. 𑀇𑀥 𑀧𑀦 𑀫𑀬𑀽𑀭𑀕𑀻𑀯𑀯𑀡𑁆𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀁 𑀧𑀞𑀫𑀧𑀻𑀞𑀯𑀺𑀫𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀤𑀼𑀢𑀺𑀬𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀻𑀞𑀁 𑀢𑁂 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀢𑀢𑀺𑀬𑀧𑀻𑀞𑀯𑀺𑀫𑀸𑀦𑀁. 𑀢𑀲𑁆𑀲 𑀯𑀢𑁆𑀣𑀼 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁. 𑀅𑀜𑁆𑀜𑀢𑀭𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑁄 𑀏𑀓𑀁 𑀯𑀺𑀯𑀝𑀤𑁆𑀯𑀸𑀭𑀕𑁂𑀳𑀁 𑀉𑀧𑀲𑀗𑁆𑀓𑀫𑀺. 𑀢𑀲𑁆𑀫𑀺𑀁 𑀧𑀦 𑀕𑁂𑀳𑁂 𑀕𑁂𑀳𑀲𑀸𑀫𑀺𑀦𑀻 𑀇𑀢𑁆𑀣𑀻 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀣𑁂𑀭𑀲𑁆𑀲 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀣, 𑀪𑀦𑁆𑀢𑁂, 𑀇𑀥 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀣𑀸’’𑀢𑀺 𑀅𑀢𑁆𑀢𑀦𑁄 𑀪𑀤𑁆𑀤𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀧𑀻𑀢𑀯𑀢𑁆𑀣𑀁 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀭𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀅𑀤𑀸𑀲𑀺, ‘‘𑀇𑀤𑀁 𑀫𑁂 𑀧𑀼𑀜𑁆𑀜𑀁 𑀆𑀬𑀢𑀺𑀁 𑀲𑁄𑀯𑀡𑁆𑀡𑀧𑀻𑀞𑀧𑀝𑀺𑀮𑀸𑀪𑀸𑀬 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀜𑁆𑀘 𑀧𑀝𑁆𑀞𑀧𑁂𑀲𑀺. 𑀅𑀣 𑀣𑁂𑀭𑁂 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑁂 ‘‘𑀪𑀦𑁆𑀢𑁂, 𑀇𑀤𑀫𑀸𑀲𑀦𑀁 𑀢𑀼𑀫𑁆𑀳𑀸𑀓𑀁𑀬𑁂𑀯 𑀧𑀭𑀺𑀘𑁆𑀘𑀢𑁆𑀢𑀁, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄 𑀢𑀲𑁆𑀲𑀸 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀧𑀻𑀞𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀧𑀞𑀫𑀯𑀺𑀫𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫.

‘‘𑀧𑀻𑀞𑀁 𑀢𑁂 𑀲𑁄𑀯𑀡𑁆𑀡𑀫𑀬𑀁 𑀉𑀴𑀸𑀭𑀁, 𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁;

𑀅𑀮𑀗𑁆𑀓𑀢𑁂 𑀫𑀮𑁆𑀬𑀥𑀭𑁂 𑀲𑀼𑀯𑀢𑁆𑀣𑁂,𑀑𑀪𑀸𑀲𑀲𑀺 𑀯𑀺𑀚𑁆𑀚𑀼𑀭𑀺𑀯𑀩𑁆𑀪𑀓𑀽𑀝𑀁.

𑁧𑁬.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁭.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁮.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁯.

‘‘𑀅𑀧𑁆𑀧𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀁, 𑀬𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸;

𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂.

𑁨𑁦.

‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀪𑀺𑀓𑁆𑀔𑀼𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀢𑀲𑁆𑀲 𑀅𑀤𑀸𑀲𑀳𑀁 𑀧𑀻𑀞𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁨𑁧.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀻 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁨𑁨.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁯. 𑀬𑀜𑁆𑀘 𑀧𑀦 𑀧𑀜𑁆𑀘𑀫𑀕𑀸𑀣𑀸𑀬𑀁 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂𑀢𑀺𑀆𑀤𑀺, 𑀏𑀢𑁆𑀣 𑀚𑀸𑀢𑀺-𑀲𑀤𑁆𑀤𑁄 𑀅𑀢𑁆𑀣𑁂𑀯 𑀲𑀗𑁆𑀔𑀢𑀮𑀓𑁆𑀔𑀡𑁂 ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀻𑀲𑀼 (𑀥𑀸𑀢𑀼. 𑁭𑁧). 𑀅𑀢𑁆𑀣𑀺 𑀦𑀺𑀓𑀸𑀬𑁂 ‘‘𑀦𑀺𑀕𑀡𑁆𑀞𑀸 𑀦𑀸𑀫 𑀲𑀫𑀡𑀚𑀸𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁭𑁧). 𑀅𑀢𑁆𑀣𑀺 𑀧𑀝𑀺𑀲𑀦𑁆𑀥𑀺𑀬𑀁 ‘‘𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁, 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁨𑁪). 𑀅𑀢𑁆𑀣𑀺 𑀓𑀼𑀮𑁂 ‘‘𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁦𑁩). 𑀅𑀢𑁆𑀣𑀺 𑀧𑀲𑀼𑀢𑀺𑀬𑀁 ‘‘𑀲𑀫𑁆𑀧𑀢𑀺𑀚𑀸𑀢𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭). 𑀅𑀢𑁆𑀣𑀺 𑀪𑀯𑁂 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁪𑁪; 𑀫. 𑀦𑀺. 𑁧.𑁫𑁩). 𑀇𑀥𑀸𑀧𑀺 𑀪𑀯𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂 𑀅𑀦𑀦𑁆𑀢𑀭𑀸𑀢𑀻𑀢𑁂 𑀧𑀼𑀭𑀺𑀫𑁂 𑀅𑀢𑁆𑀢𑀪𑀸𑀯𑁂𑀢𑀺 𑀅𑀢𑁆𑀣𑁄. 𑀪𑀼𑀫𑁆𑀫𑀢𑁆𑀣𑁂 𑀳𑀺𑀤𑀁 𑀓𑀭𑀡𑀯𑀘𑀦𑀁. 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑀪𑀯𑁂, 𑀭𑀸𑀚𑀕𑀳𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀑𑀓𑀸𑀲𑀮𑁄𑀓𑁄 𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄, 𑀲𑀢𑁆𑀢𑀮𑁄𑀓𑁄 𑀧𑀦 ‘‘𑀫𑀦𑀼𑀲𑁆𑀲𑁂𑀲𑀽’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑁄𑀬𑁂𑀯.

𑁨𑁦. 𑀅𑀤𑁆𑀤𑀲𑀦𑁆𑀢𑀺 𑀅𑀤𑁆𑀤𑀓𑁆𑀔𑀺𑀁. 𑀯𑀺𑀭𑀚𑀦𑁆𑀢𑀺 𑀯𑀺𑀕𑀢𑀭𑀸𑀕𑀸𑀤𑀺𑀭𑀚𑀢𑁆𑀢𑀸 𑀯𑀺𑀭𑀚𑀁. 𑀪𑀺𑀓𑁆𑀔𑀼𑀦𑁆𑀢𑀺 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀪𑀺𑀓𑁆𑀔𑀼𑀁, 𑀲𑀩𑁆𑀩𑀲𑁄 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀪𑀸𑀯𑁂𑀦 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀢𑀸𑀬 𑀯𑀺𑀧𑁆𑀧𑀲𑀦𑁆𑀦𑀁, 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀢𑀸𑀬 𑀅𑀦𑀸𑀯𑀺𑀮𑀁. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀧𑀤𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀁, 𑀯𑀺𑀕𑀢𑀭𑀸𑀕𑀸𑀤𑀺𑀭𑀚𑀢𑁆𑀢𑀸 𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀬 𑀪𑀺𑀓𑁆𑀔𑀼𑀁, 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀪𑀸𑀯𑁂𑀦 𑀯𑀺𑀧𑁆𑀧𑀲𑀦𑁆𑀦𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀢𑁆𑀢𑀸 𑀅𑀦𑀸𑀯𑀺𑀮𑀦𑁆𑀢𑀺. 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀯𑀸 𑀧𑀤𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀁, 𑀯𑀺𑀭𑀚𑀁 𑀪𑀺𑀓𑁆𑀔𑀼𑀕𑀼𑀡𑀬𑁄𑀕𑀢𑁄. 𑀪𑀺𑀦𑁆𑀦𑀓𑀺𑀮𑁂𑀲𑁄 𑀳𑀺 𑀪𑀺𑀓𑁆𑀔𑀼. 𑀪𑀺𑀓𑁆𑀔𑀼𑀁 𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑀢𑁄. 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀪𑀸𑀯𑁂𑀦 𑀯𑀺𑀧𑁆𑀧𑀲𑀦𑁆𑀦𑀫𑀸𑀦𑀲𑁄 𑀳𑀺 𑀪𑀺𑀓𑁆𑀔𑀼. 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀪𑀸𑀯𑀢𑁄𑀢𑀺. 𑀭𑀸𑀕𑀭𑀚𑀸𑀪𑀸𑀯𑁂𑀦 𑀯𑀸 ‘‘𑀯𑀺𑀭𑀚’’𑀦𑁆𑀢𑀺 𑀯𑀼𑀢𑁆𑀢𑀁, 𑀤𑁄𑀲𑀓𑀸𑀮𑀼𑀲𑁆𑀲𑀺𑀬𑀸𑀪𑀸𑀯𑁂𑀦 ‘‘𑀯𑀺𑀧𑁆𑀧𑀲𑀦𑁆𑀦’’𑀦𑁆𑀢𑀺, 𑀫𑁄𑀳𑀩𑁆𑀬𑀸𑀓𑀼𑀮𑀸𑀪𑀸𑀯𑁂𑀦 ‘‘𑀅𑀦𑀸𑀯𑀺𑀮’’𑀦𑁆𑀢𑀺. 𑀏𑀯𑀁𑀪𑀽𑀢𑁄 𑀧𑀭𑀫𑀢𑁆𑀣𑀢𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀻𑀢𑀺 ‘‘𑀪𑀺𑀓𑁆𑀔𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀤𑀸𑀲𑀳𑀦𑁆𑀢𑀺 𑀅𑀤𑀸𑀲𑀺𑀁 𑀅𑀳𑀁. 𑀧𑀻𑀞𑀦𑁆𑀢𑀺 𑀢𑀤𑀸 𑀫𑀫 𑀲𑀦𑁆𑀢𑀺𑀓𑁂 𑀯𑀺𑀚𑁆𑀚𑀫𑀸𑀦𑀁 𑀪𑀤𑁆𑀤𑀧𑀻𑀞𑀁. 𑀧𑀲𑀦𑁆𑀦𑀸𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀘 𑀧𑀲𑀦𑁆𑀦𑀘𑀺𑀢𑁆𑀢𑀸. 𑀲𑁂𑀳𑀺 𑀧𑀸𑀡𑀺𑀪𑀻𑀢𑀺 𑀅𑀜𑁆𑀜𑀁 𑀅𑀦𑀸𑀡𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀳𑀢𑁆𑀣𑁂𑀳𑀺 𑀉𑀧𑀦𑀻𑀬 𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 ‘‘𑀯𑀺𑀭𑀚𑀁 𑀪𑀺𑀓𑁆𑀔𑀼𑀁 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮’’𑀦𑁆𑀢𑀺 𑀇𑀫𑀺𑀦𑀸 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, ‘‘𑀧𑀲𑀦𑁆𑀦𑀸’’𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀁, ‘‘𑀲𑁂𑀳𑀺 𑀧𑀸𑀡𑀺𑀪𑀻’’𑀢𑀺 𑀇𑀫𑀺𑀦𑀸 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁. 𑀢𑀣𑀸 ‘‘𑀧𑀲𑀦𑁆𑀦𑀸’’𑀢𑀺 𑀇𑀫𑀺𑀦𑀸 𑀲𑀓𑁆𑀓𑀘𑁆𑀘𑀤𑀸𑀦𑀁 𑀅𑀦𑀼𑀧𑀳𑀘𑁆𑀘𑀤𑀸𑀦𑀦𑁆𑀢𑀺 𑀘 𑀇𑀫𑁂 𑀤𑁆𑀯𑁂 𑀤𑀸𑀦𑀕𑀼𑀡𑀸 𑀤𑀲𑁆𑀲𑀺𑀢𑀸, ‘‘𑀲𑁂𑀳𑀺 𑀧𑀸𑀡𑀺𑀪𑀻’’𑀢𑀺 𑀇𑀫𑀺𑀦𑀸 𑀲𑀳𑀢𑁆𑀣𑁂𑀦 𑀤𑀸𑀦𑀁 𑀅𑀦𑀼𑀧𑀯𑀺𑀤𑁆𑀥𑀤𑀸𑀦𑀦𑁆𑀢𑀺 𑀇𑀫𑁂 𑀤𑁆𑀯𑁂 𑀤𑀸𑀦𑀕𑀼𑀡𑀸 𑀤𑀲𑁆𑀲𑀺𑀢𑀸, 𑀧𑀻𑀢𑀯𑀢𑁆𑀣𑀲𑁆𑀲 𑀅𑀢𑁆𑀣𑀭𑀡𑁂𑀦 𑀦𑀺𑀲𑀻𑀤𑀦𑀓𑀸𑀮𑀜𑁆𑀜𑀼𑀢𑀸𑀬 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 𑀤𑀸𑀦𑀁 𑀓𑀸𑀮𑁂𑀦 𑀤𑀸𑀦𑀦𑁆𑀢𑀺 𑀇𑀫𑁂 𑀤𑁆𑀯𑁂 𑀤𑀸𑀦𑀕𑀼𑀡𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀢𑀢𑀺𑀬𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀻𑀞𑀁 𑀢𑁂 𑀯𑁂𑀴𑀼𑀭𑀺𑀬𑀫𑀬𑀦𑁆𑀢𑀺 𑀘𑀢𑀼𑀢𑁆𑀣𑀧𑀻𑀞𑀯𑀺𑀫𑀸𑀦𑀁. 𑀇𑀫𑀲𑁆𑀲𑀸𑀧𑀺 𑀯𑀢𑁆𑀣𑀼 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁, 𑀢𑀁 𑀤𑀼𑀢𑀺𑀬𑀯𑀺𑀫𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦𑀻𑀮𑀯𑀢𑁆𑀣𑁂𑀦 𑀳𑀺 𑀅𑀢𑁆𑀣𑀭𑀺𑀢𑁆𑀯𑀸 𑀧𑀻𑀞𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀇𑀫𑀺𑀲𑁆𑀲𑀸𑀧𑀺 𑀯𑀺𑀫𑀸𑀦𑀁 𑀯𑁂𑀴𑀼𑀭𑀺𑀬𑀫𑀬𑀁 𑀦𑀺𑀩𑁆𑀩𑀢𑁆𑀢𑀁. 𑀲𑁂𑀲𑀁 𑀧𑀞𑀫𑀯𑀺𑀫𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁩.

‘‘𑀧𑀻𑀞𑀁 𑀢𑁂 𑀯𑁂𑀴𑀼𑀭𑀺𑀬𑀫𑀬𑀁 𑀉𑀴𑀸𑀭𑀁, 𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁;

𑀅𑀮𑀗𑁆𑀓𑀢𑁂 𑀫𑀮𑁆𑀬𑀥𑀭𑁂 𑀲𑀼𑀯𑀢𑁆𑀣𑁂, 𑀑𑀪𑀸𑀲𑀲𑀺 𑀯𑀺𑀚𑁆𑀚𑀼𑀭𑀺𑀯𑀩𑁆𑀪𑀓𑀽𑀝𑀁.

𑁨𑁪.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁨𑁫.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁬.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁨𑁭.

‘‘𑀅𑀧𑁆𑀧𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀁, 𑀬𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸;

𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂.

𑁨𑁮.

‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀪𑀺𑀓𑁆𑀔𑀼𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀢𑀲𑁆𑀲 𑀅𑀤𑀸𑀲𑀳𑀁 𑀧𑀻𑀞𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁨𑁯.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁩𑁦.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀏𑀢𑁆𑀣𑀸𑀧𑀺 𑀳𑀺 𑀦𑀻𑀮𑀯𑀢𑁆𑀣𑁂𑀦 𑀅𑀢𑁆𑀣𑀭𑀺𑀢𑁆𑀯𑀸 𑀧𑀻𑀞𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀇𑀫𑀺𑀲𑁆𑀲𑀸𑀧𑀺 𑀯𑀺𑀫𑀸𑀦𑀁 𑀯𑁂𑀴𑀼𑀭𑀺𑀬𑀫𑀬𑀁 𑀦𑀺𑀩𑁆𑀩𑀢𑁆𑀢𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀧𑀻𑀞𑀁 𑀢𑁂 𑀯𑁂𑀴𑀼𑀭𑀺𑀬𑀫𑀬’’𑀦𑁆𑀢𑀺 𑀆𑀤𑀺𑀢𑁄 𑀆𑀕𑀢𑀁. 𑀲𑁂𑀲𑀁 𑀢𑀢𑀺𑀬𑀲𑀤𑀺𑀲𑀫𑁂𑀯𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀘𑀢𑀼𑀢𑁆𑀣𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀼𑀜𑁆𑀚𑀭𑀯𑀺𑀫𑀸𑀦𑀯𑀡𑁆𑀡𑀦𑀸

𑀓𑀼𑀜𑁆𑀚𑀭𑁄 𑀢𑁂 𑀯𑀭𑀸𑀭𑁄𑀳𑁄𑀢𑀺 𑀓𑀼𑀜𑁆𑀚𑀭𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀕𑀳𑀦𑀕𑀭𑁂 𑀦𑀓𑁆𑀔𑀢𑁆𑀢𑀁 𑀖𑁄𑀲𑀺𑀢𑀁. 𑀦𑀸𑀕𑀭𑀸 𑀯𑀻𑀣𑀺𑀬𑁄 𑀲𑁄𑀥𑁂𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀺𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀧𑁆𑀧𑀓𑀺𑀭𑀺𑀁𑀲𑀼, 𑀕𑁂𑀳𑀤𑁆𑀯𑀸𑀭𑁂 𑀕𑁂𑀳𑀤𑁆𑀯𑀸𑀭𑁂 𑀓𑀤𑀮𑀺𑀬𑁄 𑀘 𑀧𑀼𑀡𑁆𑀡𑀖𑀝𑁂 𑀘 𑀞𑀧𑁂𑀲𑀼𑀁, 𑀬𑀣𑀸𑀯𑀺𑀪𑀯𑀁 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀸 𑀥𑀚𑀧𑀝𑀸𑀓𑀸𑀤𑀬𑁄 𑀉𑀲𑁆𑀲𑀸𑀧𑁂𑀲𑀼𑀁, 𑀲𑀩𑁆𑀩𑁄 𑀚𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑀁 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄 𑀦𑀓𑁆𑀔𑀢𑁆𑀢𑀓𑀻𑀴𑀁 𑀓𑀻𑀴𑀺, 𑀲𑀓𑀮𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀅𑀳𑁄𑀲𑀺. 𑀅𑀣 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀸 𑀧𑀼𑀩𑁆𑀩𑀘𑀸𑀭𑀺𑀢𑁆𑀢𑀯𑀲𑁂𑀦 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀜𑁆𑀘 𑀅𑀢𑁆𑀢𑀦𑁄 𑀭𑀸𑀚𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀉𑀴𑀸𑀭𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑀯𑀸𑀲𑀺𑀦𑀻 𑀏𑀓𑀸 𑀓𑀼𑀮𑀥𑀻𑀢𑀸 𑀭𑀜𑁆𑀜𑁄 𑀢𑀁 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀁 𑀲𑀺𑀭𑀺𑀲𑁄𑀪𑀕𑁆𑀕𑀁 𑀭𑀸𑀚𑀸𑀦𑀼𑀪𑀸𑀯𑀜𑁆𑀘 𑀧𑀲𑁆𑀲𑀺𑀢𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 ‘‘𑀅𑀬𑀁 𑀤𑁂𑀯𑀺𑀤𑁆𑀥𑀺𑀲𑀤𑀺𑀲𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺 𑀓𑀻𑀤𑀺𑀲𑁂𑀦 𑀦𑀼 𑀔𑁄 𑀓𑀫𑁆𑀫𑀼𑀦𑀸 𑀮𑀩𑁆𑀪𑀢𑀻’’𑀢𑀺 𑀧𑀡𑁆𑀟𑀺𑀢𑀲𑀫𑁆𑀫𑀢𑁂 𑀧𑀼𑀘𑁆𑀙𑀺. 𑀢𑁂 𑀢𑀲𑁆𑀲𑀸 𑀓𑀣𑁂𑀲𑀼𑀁 ‘‘𑀪𑀤𑁆𑀤𑁂, 𑀧𑀼𑀜𑁆𑀜𑀓𑀫𑁆𑀫𑀁 𑀦𑀸𑀫 𑀘𑀺𑀦𑁆𑀢𑀸𑀫𑀡𑀺𑀲𑀤𑀺𑀲𑀁 𑀓𑀧𑁆𑀧𑀭𑀼𑀓𑁆𑀔𑀲𑀤𑀺𑀲𑀁, 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀢𑀺 𑀬𑀁 𑀬𑀁 𑀧𑀢𑁆𑀣𑁂𑀢𑁆𑀯𑀸 𑀓𑀭𑁄𑀢𑀺, 𑀢𑀁 𑀢𑀁 𑀦𑀺𑀧𑁆𑀨𑀸𑀤𑁂𑀢𑀺𑀬𑁂𑀯. 𑀅𑀧𑀺𑀘 𑀆𑀲𑀦𑀤𑀸𑀦𑁂𑀦 𑀉𑀘𑁆𑀘𑀸𑀓𑀼𑀮𑀻𑀦𑀢𑀸 𑀳𑁄𑀢𑀺, 𑀅𑀦𑁆𑀦𑀤𑀸𑀦𑁂𑀦 𑀩𑀮𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁄, 𑀯𑀢𑁆𑀣𑀤𑀸𑀦𑁂𑀦 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁄, 𑀬𑀸𑀦𑀤𑀸𑀦𑁂𑀦 𑀲𑀼𑀔𑀯𑀺𑀲𑁂𑀲𑀧𑀝𑀺𑀮𑀸𑀪𑁄, 𑀤𑀻𑀧𑀤𑀸𑀦𑁂𑀦 𑀘𑀓𑁆𑀔𑀼𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁄, 𑀆𑀯𑀸𑀲𑀤𑀸𑀦𑁂𑀦 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁄 𑀳𑁄𑀢𑀻’’𑀢𑀺. 𑀲𑀸 𑀢𑀁 𑀲𑀼𑀢𑁆𑀯𑀸 ‘‘𑀤𑁂𑀯𑀲𑀫𑁆𑀧𑀢𑁆𑀢𑀺 𑀇𑀢𑁄 𑀉𑀴𑀸𑀭𑀸 𑀳𑁄𑀢𑀺 𑀫𑀜𑁆𑀜𑁂’’𑀢𑀺 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀚𑀸𑀢𑀸 𑀅𑀳𑁄𑀲𑀺.

𑀫𑀸𑀢𑀸𑀧𑀺𑀢𑀭𑁄 𑀘𑀲𑁆𑀲𑀸 𑀅𑀳𑀢𑀁 𑀯𑀢𑁆𑀣𑀬𑀼𑀕𑀁 𑀦𑀯𑀧𑀻𑀞𑀁 𑀏𑀓𑀁 𑀧𑀤𑀼𑀫𑀓𑀮𑀸𑀧𑀁 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸 𑀢𑀡𑁆𑀟𑀼𑀮𑀔𑀻𑀭𑀸𑀦𑀺 𑀘 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑁂𑀲𑁂𑀲𑀼𑀁. 𑀲𑀸 𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀅𑀳𑀜𑁆𑀘 𑀤𑀸𑀦𑀁 𑀤𑀸𑀢𑀼𑀓𑀸𑀫𑀸, 𑀅𑀬𑀜𑁆𑀘 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀤𑀼𑀢𑀺𑀬𑀤𑀺𑀯𑀲𑁂 𑀤𑀸𑀦𑀁 𑀲𑀚𑁆𑀚𑁂𑀦𑁆𑀢𑀻 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀸𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸, 𑀢𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑁂𑀦 𑀅𑀜𑁆𑀜𑀫𑁆𑀧𑀺 𑀩𑀳𑀼𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀤𑀸𑀦𑀕𑁆𑀕𑁂 𑀕𑀦𑁆𑀥𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸 𑀯𑀺𑀓𑀲𑀺𑀢𑀧𑀤𑀼𑀫𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀓𑁂𑀲𑀭𑁄𑀧𑀲𑁄𑀪𑀺𑀢𑁂𑀲𑀼 𑀧𑀤𑀼𑀫𑁂𑀲𑀼 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀅𑀳𑀢𑁂𑀦 𑀲𑁂𑀢𑀯𑀢𑁆𑀣𑁂𑀦 𑀅𑀢𑁆𑀣𑀭𑀺𑀢𑁆𑀯𑀸 𑀆𑀲𑀦𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀉𑀧𑀭𑀺 𑀘𑀢𑁆𑀢𑀸𑀭𑀺 𑀧𑀤𑀼𑀫𑀸𑀦𑀺 𑀫𑀸𑀮𑀸𑀕𑀼𑀴𑀜𑁆𑀘 𑀞𑀧𑁂𑀢𑁆𑀯𑀸, 𑀆𑀲𑀦𑀲𑁆𑀲 𑀉𑀧𑀭𑀺 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑀸𑀮𑀸𑀤𑀸𑀫𑀑𑀮𑀫𑁆𑀩𑀓𑀤𑀸𑀫𑀸𑀦𑀺 𑀑𑀮𑀫𑁆𑀩𑀺𑀢𑁆𑀯𑀸, 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄 𑀪𑀽𑀫𑀺𑀁 𑀲𑀓𑁂𑀲𑀭𑁂𑀳𑀺 𑀧𑀤𑀼𑀫𑀧𑀢𑁆𑀢𑁂𑀳𑀺 𑀲𑀩𑁆𑀩𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 ‘‘𑀤𑀓𑁆𑀔𑀺𑀡𑁂𑀬𑁆𑀬𑁂 𑀆𑀕𑀢𑁂 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀧𑁆𑀨𑀧𑀽𑀭𑀺𑀢𑀁 𑀘𑀗𑁆𑀓𑁄𑀝𑀓𑀁 𑀏𑀓𑀫𑀦𑁆𑀢𑁂 𑀞𑀧𑁂𑀲𑀺.

𑀅𑀣𑁂𑀯𑀁 𑀓𑀢𑀤𑀸𑀦𑀽𑀧𑀓𑀭𑀡𑀲𑀁𑀯𑀺𑀥𑀸𑀦𑀸 𑀲𑀻𑀲𑀁𑀦𑁆𑀳𑀸𑀢𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀓𑀁 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙 𑀚𑁂, 𑀅𑀫𑁆𑀳𑀸𑀓𑀁 𑀢𑀸𑀤𑀺𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀳𑀲𑁆𑀲𑀣𑀯𑀺𑀓𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀲𑀸 𑀤𑀸𑀲𑀻 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀫𑁂 𑀤𑁂𑀣𑀸’’𑀢𑀺. ‘‘𑀏𑀓𑀺𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀅𑀦𑀼𑀕𑁆𑀕𑀳𑀢𑁆𑀣𑀁 𑀇𑀢𑁄 𑀏𑀣𑀸’’𑀢𑀺 𑀘 𑀆𑀳. 𑀣𑁂𑀭𑁄 𑀢𑀲𑁆𑀲𑀸 𑀧𑀢𑁆𑀢𑀁 𑀅𑀤𑀸𑀲𑀺. 𑀲𑀸 𑀣𑁂𑀭𑀁 𑀕𑁂𑀳𑀁 𑀧𑀯𑁂𑀲𑁂𑀲𑀺. 𑀅𑀣 𑀲𑀸 𑀇𑀢𑁆𑀣𑀻 𑀣𑁂𑀭𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀆𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂 𑀲𑀓𑁂𑀲𑀭𑁂𑀳𑀺 𑀧𑀤𑀼𑀫𑀧𑀢𑁆𑀢𑁂𑀳𑀺 𑀣𑁂𑀭𑀁 𑀧𑀽𑀚𑀬𑀫𑀸𑀦𑀸 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄 𑀑𑀓𑀺𑀭𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀲𑀫𑁆𑀫𑀺𑀲𑁆𑀲𑁂𑀦 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀺. 𑀧𑀭𑀺𑀯𑀺𑀲𑀦𑁆𑀢𑀻 𑀘 ‘‘𑀇𑀫𑀲𑁆𑀲 𑀫𑁂 𑀧𑀼𑀜𑁆𑀜𑀲𑁆𑀲𑀸𑀦𑀼𑀪𑀸𑀯𑁂𑀦 𑀤𑀺𑀩𑁆𑀩𑀕𑀚𑀓𑀽𑀝𑀸𑀕𑀸𑀭𑀧𑀮𑁆𑀮𑀗𑁆𑀓𑀲𑁄𑀪𑀺𑀢𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀼, 𑀲𑀩𑁆𑀩𑀸𑀲𑀼 𑀧𑀯𑀢𑁆𑀢𑀻𑀲𑀼 𑀧𑀤𑀼𑀫𑀸 𑀦𑀸𑀫 𑀫𑀸 𑀯𑀺𑀕𑀢𑀸 𑀳𑁄𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀼𑀦 𑀣𑁂𑀭𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑁂 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀳𑀺 𑀧𑀽𑀭𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀅𑀢𑁆𑀣𑀢𑀁 𑀲𑀸𑀝𑀓𑀁 𑀘𑀼𑀫𑁆𑀩𑀝𑀓𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀣𑁂𑀭𑁂 𑀘 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁂 𑀤𑁆𑀯𑁂 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 ‘‘𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀇𑀫𑀜𑁆𑀘 𑀧𑀮𑁆𑀮𑀗𑁆𑀓𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼.

𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸. 𑀧𑀢𑁆𑀣𑀦𑀸𑀯𑀲𑁂𑀦 𑀘𑀲𑁆𑀲𑀸 𑀧𑀜𑁆𑀘𑀬𑁄𑀚𑀦𑀼𑀩𑁆𑀩𑁂𑀥𑁄 𑀧𑀤𑀼𑀫𑀫𑀸𑀮𑀸𑀮𑀗𑁆𑀓𑀢𑁄 𑀲𑀫𑀦𑁆𑀢𑀢𑁄 𑀧𑀤𑀼𑀫𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀓𑁂𑀲𑀭𑁄𑀧𑀲𑁄𑀪𑀺𑀢𑁄 𑀫𑀦𑀼𑀜𑁆𑀜𑀤𑀲𑁆𑀲𑀦𑁄 𑀲𑀼𑀔𑀲𑀫𑁆𑀨𑀲𑁆𑀲𑁄 𑀯𑀺𑀯𑀺𑀥𑀭𑀢𑀦𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀳𑁂𑀫𑀸𑀪𑀭𑀡𑀯𑀺𑀪𑀽𑀲𑀺𑀢𑁄 𑀕𑀚𑀯𑀭𑁄 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀽𑀧𑀭𑀺 𑀬𑀣𑀸𑀯𑀼𑀢𑁆𑀢𑀲𑁄𑀪𑀸𑀢𑀺𑀲𑀬𑀬𑀼𑀢𑁆𑀢𑁄 𑀬𑁄𑀚𑀦𑀺𑀓𑁄 𑀓𑀦𑀓𑀧𑀮𑁆𑀮𑀗𑁆𑀓𑁄 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀅𑀦𑁆𑀢𑀭𑀦𑁆𑀢𑀭𑀸 𑀢𑀁 𑀓𑀼𑀜𑁆𑀚𑀭𑀯𑀺𑀫𑀸𑀦𑀲𑁆𑀲 𑀉𑀧𑀭𑀺 𑀭𑀢𑀦𑀯𑀺𑀘𑀺𑀢𑁆𑀢𑀁 𑀧𑀮𑁆𑀮𑀗𑁆𑀓𑀁 𑀅𑀪𑀺𑀭𑀼𑀬𑁆𑀳 𑀫𑀳𑀢𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀦𑁆𑀤𑀦𑀯𑀦𑀁 𑀕𑀘𑁆𑀙𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀤𑁂𑀯𑀢𑀸𑀲𑀼 𑀬𑀣𑀸𑀲𑀓𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀦𑀦𑁆𑀤𑀦𑀯𑀦𑀁 𑀕𑀘𑁆𑀙𑀦𑁆𑀢𑀻𑀲𑀽𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀧𑀞𑀫𑀧𑀻𑀞𑀯𑀺𑀫𑀸𑀦𑀯𑀡𑁆𑀡𑀦𑀸𑀬𑀁 𑀆𑀕𑀢𑀲𑀤𑀺𑀲𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀣𑁂𑀭𑁄 𑁋

𑁩𑁧.

‘‘𑀓𑀼𑀜𑁆𑀚𑀭𑁄 𑀢𑁂 𑀯𑀭𑀸𑀭𑁄𑀳𑁄, 𑀦𑀸𑀦𑀸𑀭𑀢𑀦𑀓𑀧𑁆𑀧𑀦𑁄;

𑀭𑀼𑀘𑀺𑀭𑁄 𑀣𑀸𑀫𑀯𑀸 𑀚𑀯𑀲𑀫𑁆𑀧𑀦𑁆𑀦𑁄, 𑀆𑀓𑀸𑀲𑀫𑁆𑀳𑀺 𑀲𑀫𑀻𑀳𑀢𑀺.

𑁩𑁨.

‘‘𑀧𑀤𑀼𑀫𑀺 𑀧𑀤𑁆𑀫𑀧𑀢𑁆𑀢𑀓𑁆𑀔𑀺, 𑀧𑀤𑁆𑀫𑀼𑀧𑁆𑀧𑀮𑀚𑀼𑀢𑀺𑀦𑁆𑀥𑀭𑁄;

𑀧𑀤𑁆𑀫𑀘𑀼𑀡𑁆𑀡𑀸𑀪𑀺𑀓𑀺𑀡𑁆𑀡𑀗𑁆𑀕𑁄, 𑀲𑁄𑀡𑁆𑀡𑀧𑁄𑀓𑁆𑀔𑀭𑀫𑀸𑀮𑀥𑀸.

𑁩𑁩.

‘‘𑀧𑀤𑀼𑀫𑀸𑀦𑀼𑀲𑀝𑀁 𑀫𑀕𑁆𑀕𑀁, 𑀧𑀤𑁆𑀫𑀧𑀢𑁆𑀢𑀯𑀺𑀪𑀽𑀲𑀺𑀢𑀁;

𑀞𑀺𑀢𑀁 𑀯𑀕𑁆𑀕𑀼 𑀫𑀦𑀼𑀕𑁆𑀖𑀸𑀢𑀻, 𑀫𑀺𑀢𑀁 𑀕𑀘𑁆𑀙𑀢𑀺 𑀯𑀸𑀭𑀡𑁄.

𑁩𑁪.

‘‘𑀢𑀲𑁆𑀲 𑀧𑀓𑁆𑀓𑀫𑀫𑀸𑀦𑀲𑁆𑀲, 𑀲𑁄𑀡𑁆𑀡𑀓𑀁𑀲𑀸 𑀭𑀢𑀺𑀲𑁆𑀲𑀭𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁩𑁫.

‘‘𑀢𑀲𑁆𑀲 𑀦𑀸𑀕𑀲𑁆𑀲 𑀔𑀦𑁆𑀥𑀫𑁆𑀳𑀺, 𑀲𑀼𑀘𑀺𑀯𑀢𑁆𑀣𑀸 𑀅𑀮𑀗𑁆𑀓𑀢𑀸;

𑀫𑀳𑀦𑁆𑀢𑀁 𑀅𑀘𑁆𑀙𑀭𑀸𑀲𑀗𑁆𑀖𑀁, 𑀯𑀡𑁆𑀡𑁂𑀦 𑀅𑀢𑀺𑀭𑁄𑀘𑀲𑀺.

𑁩𑁬.

‘‘𑀤𑀸𑀦𑀲𑁆𑀲 𑀢𑁂 𑀇𑀤𑀁 𑀨𑀮𑀁, 𑀅𑀣𑁄 𑀲𑀻𑀮𑀲𑁆𑀲 𑀯𑀸 𑀧𑀦;

𑀅𑀣𑁄 𑀅𑀜𑁆𑀚𑀮𑀺𑀓𑀫𑁆𑀫𑀲𑁆𑀲, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸’’𑀢𑀺. 𑁋 𑀆𑀳;

𑁩𑁧. 𑀢𑀢𑁆𑀣 𑀓𑀼𑀜𑁆𑀚𑀭𑁄 𑀢𑁂 𑀯𑀭𑀸𑀭𑁄𑀳𑁄𑀢𑀺 𑀓𑀼𑀜𑁆𑀚𑁂 𑀕𑀺𑀭𑀺𑀢𑀝𑁂 𑀭𑀫𑀢𑀺 𑀅𑀪𑀺𑀭𑀫𑀢𑀺, 𑀢𑀢𑁆𑀣 𑀯𑀸 𑀭𑀯𑀢𑀺 𑀓𑁄𑀜𑁆𑀘𑀦𑀸𑀤𑀁 𑀦𑀤𑀦𑁆𑀢𑁄 𑀯𑀺𑀘𑀭𑀢𑀺. 𑀓𑀼𑀁 𑀯𑀸 𑀧𑀣𑀯𑀺𑀁 𑀢𑀤𑀪𑀺𑀖𑀸𑀢𑁂𑀦 𑀚𑀭𑀬𑀢𑀻𑀢𑀺 𑀓𑀼𑀜𑁆𑀚𑀭𑁄, 𑀕𑀺𑀭𑀺𑀘𑀭𑀸𑀤𑀺𑀪𑁂𑀤𑁄 𑀫𑀦𑀼𑀲𑁆𑀲𑀮𑁄𑀓𑁂 𑀳𑀢𑁆𑀣𑀻, 𑀅𑀬𑀁 𑀧𑀦 𑀓𑀻𑀴𑀦𑀓𑀸𑀮𑁂 𑀓𑀼𑀜𑁆𑀚𑀭𑀲𑀤𑀺𑀲𑀢𑀸𑀬 𑀏𑀯𑀁 𑀯𑀼𑀢𑁆𑀢𑁄. 𑀆𑀭𑀼𑀬𑁆𑀳𑀢𑀻𑀢𑀺 𑀆𑀭𑁄𑀳𑁄, 𑀆𑀭𑁄𑀳𑀦𑀻𑀬𑁄𑀢𑀺 𑀅𑀢𑁆𑀣𑁄. 𑀯𑀭𑁄 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀆𑀭𑁄𑀳𑁄𑀢𑀺 𑀯𑀭𑀸𑀭𑁄𑀳𑁄, 𑀉𑀢𑁆𑀢𑀫𑀬𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀸𑀦𑀸𑀭𑀢𑀦𑀓𑀧𑁆𑀧𑀦𑁄𑀢𑀺 𑀦𑀸𑀦𑀸𑀯𑀺𑀥𑀸𑀦𑀺 𑀭𑀢𑀦𑀸𑀦𑀺 𑀏𑀢𑁂𑀲𑀦𑁆𑀢𑀺 𑀦𑀸𑀦𑀸𑀭𑀢𑀦𑀸, 𑀓𑀼𑀫𑁆𑀪𑀸𑀮𑀗𑁆𑀓𑀸𑀭𑀸𑀤𑀺𑀳𑀢𑁆𑀣𑀸𑀮𑀗𑁆𑀓𑀸𑀭𑀸. 𑀢𑁂𑀳𑀺 𑀯𑀺𑀳𑀺𑀢𑁄 𑀓𑀧𑁆𑀧𑀦𑁆𑀦𑁄 𑀲𑀦𑁆𑀦𑀸𑀳𑁄 𑀬𑀲𑁆𑀲 𑀲𑁄 𑀦𑀸𑀦𑀸𑀭𑀢𑀦𑀓𑀧𑁆𑀧𑀦𑁄. 𑀭𑀼𑀘𑀺𑀁 𑀅𑀪𑀺𑀭𑀢𑀺𑀁 𑀤𑁂𑀢𑀻𑀢𑀺 𑀭𑀼𑀘𑀺𑀭𑁄, 𑀫𑀦𑀼𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀣𑀸𑀫𑀯𑀸𑀢𑀺 𑀣𑀺𑀭𑁄, 𑀩𑀮𑀯𑀸𑀢𑀺 𑀅𑀢𑁆𑀣𑁄. 𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑁆𑀧𑀦𑁆𑀦𑀚𑀯𑁄, 𑀲𑀻𑀖𑀚𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀓𑀸𑀲𑀫𑁆𑀳𑀺 𑀲𑀫𑀻𑀳𑀢𑀻𑀢𑀺 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀲𑀫𑁆𑀫𑀸 𑀈𑀳𑀢𑀺, 𑀆𑀭𑀼𑀴𑁆𑀳𑀸𑀦𑀁 𑀔𑁄𑀪𑀁 𑀅𑀓𑀭𑁄𑀦𑁆𑀢𑁄 𑀘𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑁩𑁨. 𑀧𑀤𑀼𑀫𑀻𑀢𑀺 𑀧𑀤𑀼𑀫𑀲𑀫𑀸𑀦𑀯𑀡𑁆𑀡𑀢𑀸𑀬 ‘‘𑀧𑀤𑀼𑀫’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀓𑀼𑀫𑁆𑀪𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀤𑀼𑀫𑀻. 𑀧𑀤𑁆𑀫𑀧𑀢𑁆𑀢𑀓𑁆𑀔𑀻𑀢𑀺 𑀓𑀫𑀮𑀤𑀮𑀲𑀤𑀺𑀲𑀦𑀬𑀦𑁂, 𑀆𑀮𑀧𑀦𑀫𑁂𑀢𑀁 𑀢𑀲𑁆𑀲𑀸 𑀤𑁂𑀯𑀢𑀸𑀬. 𑀧𑀤𑁆𑀫𑀼𑀧𑁆𑀧𑀮𑀚𑀼𑀢𑀺𑀦𑁆𑀥𑀭𑁄𑀢𑀺 𑀤𑀺𑀩𑁆𑀩𑀧𑀤𑀼𑀫𑀼𑀧𑁆𑀧𑀮𑀫𑀸𑀮𑀸𑀮𑀗𑁆𑀓𑀢𑀲𑀭𑀻𑀭𑀢𑀸𑀬 𑀢𑀳𑀁 𑀢𑀳𑀁 𑀯𑀺𑀧𑁆𑀨𑀼𑀭𑀦𑁆𑀢𑀁 𑀯𑀺𑀚𑁆𑀚𑁄𑀢𑀫𑀸𑀦𑀁 𑀧𑀤𑀼𑀫𑀼𑀧𑁆𑀧𑀮𑀚𑀼𑀢𑀺𑀁 𑀥𑀸𑀭𑁂𑀢𑀻𑀢𑀺 𑀧𑀤𑀼𑀫𑀼𑀧𑁆𑀧𑀮𑀚𑀼𑀢𑀺𑀦𑁆𑀥𑀭𑁄. 𑀧𑀤𑁆𑀫𑀘𑀼𑀡𑁆𑀡𑀸𑀪𑀺𑀓𑀺𑀡𑁆𑀡𑀗𑁆𑀕𑁄𑀢𑀺 𑀧𑀤𑀼𑀫𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀓𑁂𑀲𑀭𑁂𑀳𑀺 𑀲𑀫𑀦𑁆𑀢𑀢𑁄 𑀑𑀓𑀺𑀡𑁆𑀡𑀕𑀢𑁆𑀢𑁄. 𑀲𑁄𑀡𑁆𑀡𑀧𑁄𑀓𑁆𑀔𑀭𑀫𑀸𑀮𑀥𑀸𑀢𑀺 𑀳𑁂𑀫𑀫𑀬𑀓𑀫𑀮𑀫𑀸𑀮𑀸𑀪𑀸𑀭𑀻.

𑁩𑁩. 𑀧𑀤𑀼𑀫𑀸𑀦𑀼𑀲𑀝𑀁 𑀫𑀕𑁆𑀕𑀁 𑀧𑀤𑁆𑀫𑀧𑀢𑁆𑀢𑀯𑀺𑀪𑀽𑀲𑀺𑀢𑀦𑁆𑀢𑀺 𑀳𑀢𑁆𑀣𑀺𑀦𑁄 𑀧𑀤𑀦𑀺𑀓𑁆𑀔𑁂𑀧𑁂 𑀧𑀤𑀦𑀺𑀓𑁆𑀔𑁂𑀧𑁂 𑀢𑀲𑁆𑀲 𑀧𑀸𑀤𑀁 𑀲𑀦𑁆𑀥𑀸𑀭𑁂𑀦𑁆𑀢𑁂𑀳𑀺 𑀫𑀳𑀦𑁆𑀢𑁂𑀳𑀺 𑀧𑀤𑀼𑀫𑁂𑀳𑀺 𑀅𑀦𑀼𑀲𑀝𑀁 𑀯𑀺𑀧𑁆𑀧𑀓𑀺𑀡𑁆𑀡𑀁, 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑁂𑀳𑀺 𑀢𑁂𑀲𑀁𑀬𑁂𑀯 𑀘 𑀧𑀢𑁆𑀢𑁂𑀳𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑁂𑀳𑀺 𑀯𑀺𑀲𑁂𑀲𑀢𑁄 𑀫𑀡𑁆𑀟𑀺𑀢𑀢𑀸𑀬 𑀯𑀺𑀪𑀽𑀲𑀺𑀢𑀁 𑀫𑀕𑁆𑀕𑀁 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀞𑀺𑀢𑀦𑁆𑀢𑀺 𑀇𑀤𑀁 𑀫𑀕𑁆𑀕𑀯𑀺𑀲𑁂𑀲𑀦𑀁, 𑀧𑀤𑀼𑀫𑀧𑀢𑁆𑀢𑀯𑀺𑀪𑀽𑀲𑀺𑀢𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀯𑀕𑁆𑀕𑀽𑀢𑀺 𑀘𑀸𑀭𑀼, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀜𑁆𑀘𑁂𑀢𑀁, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀦𑀼𑀕𑁆𑀖𑀸𑀢𑀻𑀢𑀺 𑀦 𑀉𑀕𑁆𑀖𑀸𑀢𑀺, 𑀅𑀢𑁆𑀢𑀦𑁄 𑀉𑀧𑀭𑀺 𑀦𑀺𑀲𑀺𑀦𑁆𑀦𑀸𑀦𑀁 𑀈𑀲𑀓𑀫𑁆𑀧𑀺 𑀔𑁄𑀪𑀁 𑀅𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀺𑀢𑀦𑁆𑀢𑀺 𑀦𑀺𑀫𑁆𑀫𑀺𑀢𑀁, 𑀦𑀺𑀓𑁆𑀔𑁂𑀧𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀯𑀕𑁆𑀕𑀼 𑀘𑀸𑀭𑀼 𑀧𑀤𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺. 𑀫𑀺𑀢𑀦𑁆𑀢𑀺 𑀯𑀸 𑀧𑀭𑀺𑀫𑀺𑀢𑀁 𑀧𑀫𑀸𑀡𑀬𑀼𑀢𑁆𑀢𑀁, 𑀦𑀸𑀢𑀺𑀲𑀻𑀖𑀁, 𑀦𑀸𑀢𑀺𑀲𑀡𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀸𑀭𑀡𑁄𑀢𑀺 𑀳𑀢𑁆𑀣𑀻. 𑀲𑁄 𑀳𑀺 𑀧𑀘𑁆𑀘𑀢𑁆𑀣𑀺𑀓𑀯𑀸𑀭𑀡𑀢𑁄 𑀕𑀫𑀦𑀧𑀭𑀺𑀓𑁆𑀓𑀺𑀮𑁂𑀲𑀯𑀸𑀭𑀡𑀢𑁄 𑀘 ‘‘𑀯𑀸𑀭𑀡𑁄’’𑀢𑀺 𑀯𑀼𑀘𑁆𑀘𑀢𑀺.

𑁩𑁪. 𑀢𑀲𑁆𑀲 𑀧𑀓𑁆𑀓𑀫𑀫𑀸𑀦𑀲𑁆𑀲, 𑀲𑁄𑀡𑁆𑀡𑀲𑀁𑀓𑀸 𑀭𑀢𑀺𑀲𑁆𑀲𑀭𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀼𑀜𑁆𑀚𑀭𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀲𑁄𑀡𑁆𑀡𑀓𑀁𑀲𑀸 𑀲𑀼𑀯𑀡𑁆𑀡𑀫𑀬𑀸 𑀖𑀡𑁆𑀝𑀸 𑀭𑀢𑀺𑀲𑁆𑀲𑀭𑀸 𑀭𑀫𑀡𑀻𑀬𑀲𑀤𑁆𑀤𑀸 𑀫𑀦𑀼𑀜𑁆𑀜𑀦𑀺𑀕𑁆𑀖𑁄𑀲𑀸 𑀑𑀮𑀫𑁆𑀩𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲 𑀳𑀺 𑀓𑀼𑀜𑁆𑀚𑀭𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀫𑀳𑀸𑀓𑁄𑀮𑀫𑁆𑀩𑀧𑁆𑀧𑀫𑀸𑀡𑀸 𑀫𑀡𑀺𑀫𑀼𑀢𑁆𑀢𑀸𑀤𑀺𑀔𑀘𑀺𑀢𑀸 𑀳𑁂𑀫𑀫𑀬𑀸 𑀅𑀦𑁂𑀓𑀲𑀢𑀸 𑀫𑀳𑀦𑁆𑀢𑀺𑀬𑁄 𑀖𑀡𑁆𑀝𑀸 𑀢𑀳𑀁 𑀢𑀳𑀁 𑀑𑀮𑀫𑁆𑀩𑀫𑀸𑀦𑀸 𑀧𑀘𑀮𑀦𑁆𑀢𑀺, 𑀬𑀢𑁄 𑀙𑁂𑀓𑁂𑀦 𑀕𑀦𑁆𑀥𑀩𑁆𑀩𑀓𑁂𑀦 𑀧𑀬𑀼𑀢𑁆𑀢𑀯𑀸𑀤𑀺𑀢𑀢𑁄 𑀅𑀢𑀺𑀯𑀺𑀬 𑀫𑀦𑁄𑀳𑀭𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀆𑀢𑀢𑀁 𑀯𑀺𑀢𑀢𑀁 𑀆𑀢𑀢𑀯𑀺𑀢𑀢𑀁 𑀖𑀦𑀁 𑀲𑀼𑀲𑀺𑀭𑀦𑁆𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀺𑀓𑁂 𑀢𑀽𑀭𑀺𑀬𑁂 𑀓𑀼𑀲𑀮𑁂𑀳𑀺 𑀯𑀸𑀤𑀺𑀬𑀫𑀸𑀦𑁂 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀫𑀦𑁆𑀤𑀢𑀸𑀭𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁂𑀦 𑀕𑀸𑀬𑀦𑁆𑀢𑁂𑀦 𑀲𑀫𑀻𑀭𑀺𑀢𑁄 𑀯𑀸𑀤𑀺𑀢𑀲𑀭𑁄 𑀯𑀕𑁆𑀕𑀼 𑀭𑀚𑀦𑀻𑀬𑁄 𑀦𑀺𑀕𑁆𑀖𑁄𑀲𑁄 𑀲𑀼𑀬𑁆𑀬𑀢𑀺, 𑀏𑀯𑀁 𑀢𑁂𑀲𑀁 𑀲𑁄𑀯𑀡𑁆𑀡𑀓𑀁𑀲𑀸𑀦𑀁 𑀢𑀧𑀦𑀻𑀬𑀖𑀡𑁆𑀝𑀸𑀦𑀁 𑀦𑀺𑀕𑁆𑀖𑁄𑀲𑁄 𑀲𑀼𑀬𑁆𑀬𑀢𑀻𑀢𑀺.

𑁩𑁫. 𑀦𑀸𑀕𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀸𑀕𑀲𑁆𑀲. 𑀫𑀳𑀦𑁆𑀢𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀫𑀳𑀢𑁆𑀢𑁂𑀦𑀸𑀧𑀺 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀸𑀧𑀺 𑀫𑀳𑀦𑁆𑀢𑀁. 𑀅𑀘𑁆𑀙𑀭𑀸𑀲𑀗𑁆𑀖𑀦𑁆𑀢𑀺 𑀤𑁂𑀯𑀓𑀜𑁆𑀜𑀸𑀲𑀫𑀽𑀳𑀁. 𑀯𑀡𑁆𑀡𑁂𑀦𑀸𑀢𑀺 𑀭𑀽𑀧𑁂𑀦.

𑁩𑁬. 𑀤𑀸𑀦𑀲𑁆𑀲𑀸𑀢𑀺 𑀤𑀸𑀦𑀫𑀬𑀧𑀼𑀜𑁆𑀜𑀲𑁆𑀲. 𑀲𑀻𑀮𑀲𑁆𑀲𑀸𑀢𑀺 𑀓𑀸𑀬𑀺𑀓𑀲𑀁𑀯𑀭𑀸𑀤𑀺𑀲𑀁𑀯𑀭𑀲𑀻𑀮𑀲𑁆𑀲. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑀢𑁆𑀣𑁄. 𑀢𑁂𑀦 𑀅𑀪𑀺𑀯𑀸𑀤𑀦𑀸𑀤𑀺𑀁 𑀅𑀯𑀼𑀢𑁆𑀢𑀁 𑀘𑀸𑀭𑀺𑀢𑁆𑀢𑀲𑀻𑀮𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑁋

𑁩𑁭.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀅𑀬𑀁 𑀕𑀸𑀣𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯.

𑁩𑁮.

‘‘𑀤𑀺𑀲𑁆𑀯𑀸𑀦 𑀕𑀼𑀡𑀲𑀫𑁆𑀧𑀦𑁆𑀦𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀲𑀢𑀁;

𑀅𑀤𑀸𑀲𑀺𑀁 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁, 𑀆𑀲𑀦𑀁 𑀤𑀼𑀲𑁆𑀲𑀲𑀦𑁆𑀣𑀢𑀁.

𑁩𑁯.

‘‘𑀉𑀧𑀟𑁆𑀠𑀁 𑀧𑀤𑁆𑀫𑀫𑀸𑀮𑀸𑀳𑀁, 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄;

𑀅𑀩𑁆𑀪𑁄𑀓𑀺𑀭𑀺𑀲𑁆𑀲𑀁 𑀧𑀢𑁆𑀢𑁂𑀳𑀺, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁦.

‘‘𑀢𑀲𑁆𑀲 𑀓𑀫𑁆𑀫𑀓𑀼𑀲𑀮𑀲𑁆𑀲, 𑀇𑀤𑀁 𑀫𑁂 𑀈𑀤𑀺𑀲𑀁 𑀨𑀮𑀁;

𑀲𑀓𑁆𑀓𑀸𑀭𑁄 𑀕𑀭𑀼𑀓𑀸𑀭𑁄 𑀘, 𑀤𑁂𑀯𑀸𑀦𑀁 𑀅𑀧𑀘𑀺𑀢𑀸 𑀅𑀳𑀁.

𑁪𑁧.

‘‘𑀬𑁄 𑀯𑁂 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;

𑀧𑀲𑀦𑁆𑀦𑁄 𑀆𑀲𑀦𑀁 𑀤𑀚𑁆𑀚𑀸, 𑀏𑀯𑀁 𑀦𑀦𑁆𑀤𑁂 𑀬𑀣𑀸 𑀅𑀳𑀁.

𑁪𑁨.

‘‘𑀢𑀲𑁆𑀫𑀸 𑀳𑀺 𑀅𑀢𑁆𑀢𑀓𑀸𑀫𑁂𑀦, 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸;

𑀆𑀲𑀦𑀁 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦’’𑀦𑁆𑀢𑀺. 𑁋 𑀤𑁂𑀯𑀢𑀸𑀬 𑀯𑀼𑀢𑁆𑀢𑀕𑀸𑀣𑀸;

𑁩𑁮. 𑀢𑀢𑁆𑀣 𑀕𑀼𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀲𑀸𑀯𑀓𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀢𑁂𑀳𑀺 𑀯𑀸 𑀧𑀭𑀺𑀧𑀼𑀡𑁆𑀡𑀁. 𑀏𑀢𑁂𑀦 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀛𑀸𑀬𑀺𑀦𑁆𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀤𑀼𑀯𑀺𑀥𑁂𑀦𑀸𑀧𑀺 𑀛𑀸𑀦𑁂𑀦 𑀛𑀸𑀬𑀦𑀲𑀻𑀮𑀁, 𑀢𑁂𑀦 𑀯𑀸 𑀛𑀸𑀧𑁂𑀢𑀩𑁆𑀩𑀁 𑀲𑀩𑁆𑀩𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀛𑀸𑀧𑁂𑀢𑁆𑀯𑀸 𑀞𑀺𑀢𑀁. 𑀢𑀢𑁄 𑀏𑀯 𑀛𑀸𑀦𑁂 𑀭𑀢𑀦𑁆𑀢𑀺 𑀛𑀸𑀦𑀭𑀢𑀁. 𑀲𑀢𑀦𑁆𑀢𑀺 𑀲𑀫𑀸𑀦𑀁, 𑀲𑀦𑁆𑀢𑀁 𑀯𑀸, 𑀲𑀧𑁆𑀧𑀼𑀭𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀦𑁆𑀢𑀺 𑀧𑀼𑀧𑁆𑀨𑁂𑀳𑀺 𑀅𑀪𑀺𑀓𑀺𑀡𑁆𑀡𑀁, 𑀓𑀫𑀮𑀤𑀮𑁂𑀳𑀺 𑀅𑀪𑀺𑀧𑁆𑀧𑀓𑀺𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀲𑀦𑁆𑀣𑀢𑀦𑁆𑀢𑀺 𑀯𑀢𑁆𑀣𑁂𑀦 𑀉𑀧𑀭𑀺 𑀅𑀢𑁆𑀣𑀢𑀁.

𑁩𑁯. 𑀉𑀧𑀟𑁆𑀠𑀁 𑀧𑀤𑁆𑀫𑀫𑀸𑀮𑀸𑀳𑀦𑁆𑀢𑀺 𑀉𑀧𑀟𑁆𑀠𑀁 𑀧𑀤𑀼𑀫𑀧𑀼𑀧𑁆𑀨𑀁 𑀅𑀳𑀁. 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄𑀢𑀺 𑀣𑁂𑀭𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀆𑀲𑀦𑀲𑁆𑀲 𑀲𑀫𑀦𑁆𑀢𑀸 𑀪𑀽𑀫𑀺𑀬𑀁. 𑀅𑀩𑁆𑀪𑁄𑀓𑀺𑀭𑀺𑀲𑁆𑀲𑀦𑁆𑀢𑀺 𑀅𑀪𑀺𑀑𑀓𑀺𑀭𑀺𑀁 𑀅𑀪𑀺𑀧𑁆𑀧𑀓𑀺𑀭𑀺𑀁. 𑀓𑀣𑀁? 𑀧𑀢𑁆𑀢𑁂𑀳𑀻𑀢𑀺, 𑀢𑀲𑁆𑀲 𑀉𑀧𑀟𑁆𑀠𑀧𑀤𑀼𑀫𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁂𑀳𑀺 𑀧𑀢𑁆𑀢𑁂𑀳𑀺 𑀧𑀼𑀧𑁆𑀨𑀯𑀲𑁆𑀲𑀸𑀪𑀺𑀯𑀲𑁆𑀲𑀦𑀓𑀦𑀺𑀬𑀸𑀫𑁂𑀦 𑀑𑀓𑀺𑀭𑀺𑀦𑁆𑀢𑀺 𑀅𑀢𑁆𑀣𑁄.

𑁪𑁦. 𑀇𑀤𑀁 𑀫𑁂 𑀈𑀤𑀺𑀲𑀁 𑀨𑀮𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀼𑀜𑁆𑀚𑀭𑁄 𑀢𑁂 𑀯𑀭𑀸𑀭𑁄𑀳𑁄’’𑀢𑀺𑀆𑀤𑀺𑀦𑀸 𑀣𑁂𑀭𑁂𑀦 𑀕𑀳𑀺𑀢𑀁 𑀅𑀕𑁆𑀕𑀳𑀺𑀢𑀜𑁆𑀘 𑀆𑀬𑀼𑀬𑀲𑀲𑀼𑀔𑀭𑀽𑀧𑀸𑀤𑀺𑀪𑁂𑀤𑀁 𑀅𑀢𑁆𑀢𑀦𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀏𑀓𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀣𑁂𑀭𑁂𑀦 𑀅𑀕𑁆𑀕𑀳𑀺𑀢𑀫𑁂𑀯 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑀸𑀭𑁄 𑀕𑀭𑀼𑀓𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀦 𑀓𑁂𑀯𑀮𑀁 𑀪𑀦𑁆𑀢𑁂 𑀢𑀼𑀫𑁆𑀳𑁂𑀳𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀇𑀥 𑀫𑀬𑁆𑀳𑀁 𑀧𑀼𑀜𑁆𑀜𑀨𑀮𑀁, 𑀅𑀧𑀺𑀘 𑀔𑁄 𑀇𑀤𑀁 𑀤𑀺𑀩𑁆𑀩𑀁 𑀆𑀥𑀺𑀧𑀢𑁂𑀬𑁆𑀬𑀫𑁆𑀧𑀻’’𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀓𑁆𑀓𑀸𑀭𑁄𑀢𑀺 𑀆𑀤𑀭𑀓𑀺𑀭𑀺𑀬𑀸, 𑀤𑁂𑀯𑁂𑀳𑀺 𑀅𑀢𑁆𑀢𑀦𑁄 𑀲𑀓𑁆𑀓𑀸𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀕𑀭𑀼𑀓𑀸𑀭𑁄𑀢𑀺 𑀕𑀭𑀼𑀓𑀸𑀢𑀩𑁆𑀩𑀢𑀸. 𑀤𑁂𑀯𑀸𑀦𑀦𑁆𑀢𑀺 𑀤𑁂𑀯𑁂𑀳𑀺. 𑀅𑀧𑀘𑀺𑀢𑀸𑀢𑀺 𑀧𑀽𑀚𑀺𑀢𑀸.

𑁪𑁧. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀸𑀦𑀁 𑀲𑀩𑁆𑀩𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀬𑀻𑀦𑀁. 𑀲𑀦𑁆𑀢𑀸𑀦𑀦𑁆𑀢𑀺 𑀲𑀦𑁆𑀢𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀁 𑀲𑀸𑀥𑀽𑀦𑀁. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘 𑀘𑀺𑀡𑁆𑀡𑀢𑁆𑀢𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀁. 𑀧𑀲𑀦𑁆𑀦𑁄 𑀆𑀲𑀦𑀁 𑀤𑀚𑁆𑀚𑀸𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀘 𑀧𑀲𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸 𑀬𑀤𑀺 𑀆𑀲𑀦𑀫𑀢𑁆𑀢𑀫𑁆𑀧𑀺 𑀤𑀤𑁂𑀬𑁆𑀬. 𑀏𑀯𑀁 𑀦𑀦𑁆𑀤𑁂 𑀬𑀣𑀸 𑀅𑀳𑀦𑁆𑀢𑀺 𑀬𑀣𑀸 𑀅𑀳𑀁 𑀢𑁂𑀦 𑀆𑀲𑀦𑀤𑀸𑀦𑁂𑀦 𑀏𑀢𑀭𑀳𑀺 𑀦𑀦𑁆𑀤𑀸𑀫𑀺 𑀫𑁄𑀤𑀸𑀫𑀺, 𑀏𑀯𑀫𑁂𑀯 𑀅𑀜𑁆𑀜𑁄𑀧𑀺 𑀦𑀦𑁆𑀤𑁂𑀬𑁆𑀬 𑀫𑁄𑀤𑁂𑀬𑁆𑀬.

𑁪𑁨. 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀳𑀺-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀢𑁆𑀢𑀓𑀸𑀫𑁂𑀦𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀓𑀸𑀫𑁂𑀦. 𑀬𑁄 𑀳𑀺 𑀅𑀢𑁆𑀢𑀦𑁄 𑀳𑀺𑀢𑀸𑀯𑀳𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀅𑀳𑀺𑀢𑀸𑀯𑀳𑀁, 𑀲𑁄 𑀅𑀢𑁆𑀢𑀓𑀸𑀫𑁄. 𑀫𑀳𑀢𑁆𑀢𑀦𑁆𑀢𑀺 𑀯𑀺𑀧𑀸𑀓𑀫𑀳𑀢𑁆𑀢𑀁. 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦𑀦𑁆𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁 𑀥𑀸𑀭𑁂𑀦𑁆𑀢𑀸𑀦𑀁, 𑀔𑀻𑀡𑀸𑀲𑀯𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀲𑁆𑀫𑀸 𑀅𑀭𑀳𑀢𑀁 𑀆𑀲𑀦𑀤𑀸𑀦𑁂𑀦 𑀅𑀳𑀁 𑀏𑀯𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀫𑁄𑀤𑀸𑀫𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀦𑀸𑀧𑀺 𑀅𑀢𑁆𑀢𑀦𑁄 𑀅𑀪𑀺𑀯𑀼𑀤𑁆𑀥𑀺𑀁 𑀧𑀢𑁆𑀣𑀬𑀫𑀸𑀦𑁂𑀦 𑀅𑀦𑁆𑀢𑀺𑀫𑀲𑀫𑀼𑀲𑁆𑀲𑀬𑁂 𑀞𑀺𑀢𑀸𑀦𑀁 𑀆𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀢𑁆𑀣𑀺 𑀢𑀸𑀤𑀺𑀲𑀁 𑀧𑀼𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀓𑀼𑀜𑁆𑀚𑀭𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀞𑀫𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀦𑁆𑀢𑀺 𑀦𑀸𑀯𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀲𑁄𑀴𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀸 ‘‘𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀥𑀫𑁆𑀫𑀜𑁆𑀘 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀯𑀢𑁆𑀣𑀺𑀁 𑀉𑀤𑁆𑀤𑀺𑀲𑁆𑀲 𑀕𑀺𑀫𑁆𑀳𑀲𑀫𑀬𑁂 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀦𑀺𑀭𑀼𑀤𑀓𑁄 𑀓𑀦𑁆𑀢𑀸𑀭𑁄, 𑀢𑁂 𑀘 𑀢𑀢𑁆𑀣 𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀓𑀺𑀮𑀦𑁆𑀢𑀸 𑀢𑀲𑀺𑀢𑀸 𑀧𑀸𑀦𑀻𑀬𑀁 𑀅𑀮𑀪𑀫𑀸𑀦𑀸 𑀅𑀜𑁆𑀜𑀢𑀭𑀲𑁆𑀲 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂𑀦 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀉𑀤𑀓𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀉𑀤𑀓𑀢𑁆𑀣𑀸𑀬 𑀉𑀤𑀧𑀸𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. 𑀅𑀣 𑀢𑁂 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 ‘‘𑀬𑀢𑁆𑀣𑀸𑀬𑀁 𑀇𑀢𑁆𑀣𑀻 𑀕𑀘𑁆𑀙𑀢𑀺, 𑀢𑀢𑁆𑀣 𑀕𑀢𑁂 𑀧𑀸𑀦𑀻𑀬𑀁 𑀮𑀤𑁆𑀥𑀼𑀁 𑀲𑀓𑁆𑀓𑀸’’𑀢𑀺 𑀧𑀺𑀧𑀸𑀲𑀸𑀧𑀭𑁂𑀢𑀸 𑀢𑀁𑀤𑀺𑀲𑀸𑀪𑀺𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀤𑀧𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀅𑀝𑁆𑀞𑀁𑀲𑀼. 𑀲𑀸 𑀇𑀢𑁆𑀣𑀻 𑀢𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀬𑁆𑀬𑀸 𑀉𑀤𑀓𑁂𑀦 𑀅𑀢𑁆𑀣𑀺𑀓𑀸 𑀧𑀺𑀧𑀸𑀲𑀺𑀢𑀸’’𑀢𑀺 𑀜𑀢𑁆𑀯𑀸 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀤𑀓𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀢𑁂 𑀧𑀢𑁆𑀢𑀣𑀯𑀺𑀓𑀢𑁄 𑀧𑀭𑀺𑀲𑁆𑀲𑀸𑀯𑀦𑀁 𑀦𑀻𑀳𑀭𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀲𑀻𑀢𑀮𑁂 𑀓𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀸𑀦𑀻𑀬𑀤𑀸𑀦𑁂 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀅𑀕𑀫𑀁𑀲𑀼.

𑀲𑀸 𑀢𑀁 𑀧𑀼𑀜𑁆𑀜𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀅𑀦𑀼𑀲𑁆𑀲𑀭𑀦𑁆𑀢𑀻 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀓𑀧𑁆𑀧𑀭𑀼𑀓𑁆𑀔𑁄𑀧𑀲𑁄𑀪𑀺𑀢𑀁 𑀫𑀳𑀦𑁆𑀢𑀁 𑀯𑀺𑀫𑀸𑀦𑀁 𑀉𑀧𑁆𑀧𑀚𑁆𑀚𑀺. 𑀢𑀁 𑀯𑀺𑀫𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀚𑀸𑀮𑀭𑀚𑀢𑀯𑀺𑀪𑀽𑀲𑀺𑀢𑀸 𑀯𑀺𑀬 𑀲𑀺𑀓𑀢𑀸𑀯𑀓𑀺𑀡𑁆𑀡𑀧𑀡𑁆𑀟𑀭𑀧𑀼𑀮𑀺𑀦𑀢𑀝𑀸 𑀫𑀡𑀺𑀓𑁆𑀔𑀦𑁆𑀥𑀦𑀺𑀫𑁆𑀫𑀮𑀲𑀮𑀺𑀮𑀯𑀸𑀳𑀺𑀦𑀻 𑀲𑀭𑀺𑀢𑀸. 𑀢𑀲𑁆𑀲𑀸 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀉𑀬𑁆𑀬𑀸𑀦𑀯𑀺𑀫𑀸𑀦𑀤𑁆𑀯𑀸𑀭𑁂 𑀘 𑀫𑀳𑀢𑀻 𑀧𑁄𑀓𑁆𑀔𑀭𑀡𑀻 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀡𑁆𑀟𑀫𑀡𑁆𑀟𑀺𑀢𑀸 𑀲𑀳 𑀲𑀼𑀯𑀡𑁆𑀡𑀦𑀸𑀯𑀸𑀬 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀦𑀸𑀯𑀸𑀬 𑀓𑀻𑀴𑀦𑁆𑀢𑀻 𑀮𑀴𑀦𑁆𑀢𑀻 𑀯𑀺𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀤𑁂𑀯𑀥𑀻𑀢𑀭𑀁 𑀦𑀸𑀯𑀸𑀬 𑀓𑀻𑀴𑀦𑁆𑀢𑀺𑀁 𑀤𑀺𑀲𑁆𑀯𑀸 𑀢𑀸𑀬 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

𑁪𑁩.

‘‘𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀁, 𑀦𑀸𑀭𑀺 𑀆𑀭𑀼𑀬𑁆𑀳 𑀢𑀺𑀝𑁆𑀞𑀲𑀺;

𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀁, 𑀧𑀤𑁆𑀫𑀁 𑀙𑀺𑀦𑁆𑀤𑀲𑀺 𑀧𑀸𑀡𑀺𑀦𑀸.

𑁪𑁪.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁪𑁫.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀆𑀳;

𑀢𑀢𑁄 𑀣𑁂𑀭𑁂𑀦 𑀧𑀼𑀝𑁆𑀞𑀸𑀬 𑀤𑁂𑀯𑀢𑀸𑀬 𑀯𑀺𑀲𑁆𑀲𑀚𑁆𑀚𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑁋

𑁪𑁬.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

𑁪𑁭.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀢𑀲𑀺𑀢𑁂 𑀓𑀺𑀮𑀦𑁆𑀢𑁂, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀅𑀤𑀸𑀲𑀺𑀁.

𑁪𑁮.

‘‘𑀬𑁄 𑀯𑁂 𑀓𑀺𑀮𑀦𑁆𑀢𑀸𑀦 𑀧𑀺𑀧𑀸𑀲𑀺𑀢𑀸𑀦𑀁, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀤𑀤𑀸𑀢𑀺;

𑀲𑀻𑀢𑁄𑀤𑀓𑀸 𑀢𑀲𑁆𑀲 𑀪𑀯𑀦𑁆𑀢𑀺 𑀦𑀚𑁆𑀚𑁄, 𑀧𑀳𑀽𑀢𑀫𑀮𑁆𑀬𑀸 𑀩𑀳𑀼𑀧𑀼𑀡𑁆𑀟𑀭𑀻𑀓𑀸.

𑁪𑁯.

‘‘𑀢𑀁 𑀆𑀧𑀕𑀸 𑀅𑀦𑀼𑀧𑀭𑀺𑀬𑀦𑁆𑀢𑀺 𑀲𑀩𑁆𑀩𑀤𑀸, 𑀲𑀻𑀢𑁄𑀤𑀓𑀸 𑀯𑀸𑀮𑀼𑀓𑀲𑀦𑁆𑀣𑀢𑀸 𑀦𑀤𑀻;

𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸.

𑁫𑁦.

‘‘𑀢𑀁𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀯𑀺𑀫𑀸𑀦𑀲𑁂𑀝𑁆𑀞𑀁 𑀪𑀼𑀲 𑀲𑁄𑀪𑀫𑀸𑀦𑀁;

𑀢𑀲𑁆𑀲𑀻𑀥 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀓𑀢𑀸 𑀮𑀪𑀦𑁆𑀢𑀺.

𑁫𑁧.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁫𑁨.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀅𑀬𑀁 𑀤𑁂𑀯𑀢𑀸𑀬 𑀯𑀺𑀲𑁆𑀲𑀚𑁆𑀚𑀺𑀢𑀸𑀓𑀸𑀭𑁄.

𑁪𑁩. 𑀢𑀢𑁆𑀣 𑀲𑀼𑀯𑀡𑁆𑀡𑀘𑁆𑀙𑀤𑀦𑀦𑁆𑀢𑀺 𑀯𑀺𑀘𑀺𑀢𑁆𑀢𑀪𑀺𑀢𑁆𑀢𑀺𑀯𑀺𑀭𑀘𑀦𑁂𑀳𑀺 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑁂𑀳𑀺 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀩𑁆𑀪𑀦𑁆𑀢𑀭𑀢𑀸𑀬 𑀘𑁂𑀯 𑀦𑀸𑀦𑀸𑀭𑀢𑀦𑀲𑀫𑀼𑀚𑁆𑀚𑀮𑀺𑀢𑁂𑀦 𑀓𑀦𑀓𑀫𑀬𑀸𑀮𑀗𑁆𑀓𑀸𑀭𑁂𑀦 𑀉𑀧𑀭𑀺 𑀙𑀸𑀤𑀺𑀢𑀢𑀸𑀬 𑀘 𑀲𑀼𑀯𑀡𑁆𑀡𑀘𑁆𑀙𑀤𑀦𑀁. 𑀦𑀸𑀯𑀦𑁆𑀢𑀺 𑀧𑁄𑀢𑀁. 𑀲𑁄 𑀳𑀺 𑀑𑀭𑀢𑁄 𑀧𑀸𑀭𑀁 𑀧𑀯𑀢𑀺 𑀕𑀘𑁆𑀙𑀢𑀻𑀢𑀺 𑀧𑁄𑀢𑁄, 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑀸𑀯𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀸𑀭𑀻𑀢𑀺 𑀢𑀲𑁆𑀲𑀸 𑀤𑁂𑀯𑀥𑀻𑀢𑀸𑀬 𑀆𑀮𑀧𑀦𑀁. 𑀦𑀭𑀢𑀺 𑀦𑁂𑀢𑀻𑀢𑀺 𑀦𑀭𑁄, 𑀧𑀼𑀭𑀺𑀲𑁄. 𑀬𑀣𑀸 𑀳𑀺 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄 𑀇𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀢𑁆𑀣𑁂𑀦 𑀧𑀼𑀭𑀺 𑀲𑁂𑀢𑀻𑀢𑀺 ‘‘𑀧𑀼𑀭𑀺𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀦𑀬𑀦𑀝𑁆𑀞𑁂𑀦 ‘‘𑀦𑀭𑁄’’𑀢𑀺. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀪𑀢𑁆𑀢𑀼𑀪𑀽𑀢𑁄. 𑀦𑀭𑀲𑁆𑀲 𑀏𑀲𑀸𑀢𑀺 𑀦𑀸𑀭𑀻, 𑀅𑀬𑀜𑁆𑀘 𑀲𑀫𑀜𑁆𑀜𑀸 𑀫𑀦𑀼𑀲𑁆𑀲𑀺𑀢𑁆𑀣𑀻𑀲𑀼 𑀧𑀯𑀢𑁆𑀢𑀸 𑀭𑀼𑀴𑁆𑀳𑀺𑀯𑀲𑁂𑀦 𑀇𑀢𑀭𑀸𑀲𑀼𑀧𑀺 𑀢𑀣𑀸 𑀯𑀼𑀘𑁆𑀘𑀢𑀺. 𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀲𑀢𑀺𑀧𑀺 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀺𑀓𑁂 𑀩𑀳𑀼𑀯𑀺𑀥𑁂 𑀭𑀢𑀦𑀫𑀬𑁂 𑀚𑀮𑀚𑀓𑀼𑀲𑀼𑀫𑁂 𑀧𑁄𑀓𑁆𑀔𑀭𑀲𑀗𑁆𑀔𑀸𑀢𑀸𑀦𑀁 𑀤𑀺𑀩𑁆𑀩𑀧𑀤𑀼𑀫𑀸𑀦𑀁 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀺𑀢𑀸𑀬 ‘‘𑀧𑁄𑀓𑁆𑀔𑀭𑀡𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀤𑀺𑀩𑁆𑀩𑀲𑀭𑀁 𑀚𑀮𑀯𑀺𑀳𑀸𑀭𑀭𑀢𑀺𑀬𑀸 𑀅𑀦𑀼𑀧𑀯𑀺𑀲𑀲𑀺. 𑀧𑀤𑁆𑀫𑀁 𑀙𑀺𑀦𑁆𑀤𑀲𑀺 𑀧𑀸𑀡𑀺𑀦𑀸𑀢𑀺 𑀭𑀚𑀢𑀫𑀬𑀦𑀸𑀴𑀁 𑀧𑀤𑀼𑀫𑀭𑀸𑀕𑀭𑀢𑀦𑀫𑀬𑀧𑀢𑁆𑀢𑀲𑀗𑁆𑀖𑀸𑀢𑀁 𑀓𑀦𑀓𑀫𑀬𑀓𑀡𑁆𑀡𑀺𑀓𑀸𑀓𑀺𑀜𑁆𑀚𑀓𑁆𑀔𑀓𑁂𑀲𑀭𑀁 𑀤𑀺𑀩𑁆𑀩𑀓𑀫𑀮𑀁 𑀮𑀻𑀮𑀸𑀭𑀯𑀺𑀦𑁆𑀤𑀁 𑀓𑀢𑁆𑀢𑀼𑀓𑀸𑀫𑀢𑀸𑀬 𑀢𑀯 𑀳𑀢𑁆𑀣𑁂𑀦 𑀪𑀜𑁆𑀚𑀲𑀺.

𑁪𑁭. 𑀢𑀲𑀺𑀢𑁂𑀢𑀺 𑀧𑀺𑀧𑀸𑀲𑀺𑀢𑁂. 𑀓𑀺𑀮𑀦𑁆𑀢𑁂𑀢𑀺 𑀢𑀸𑀬 𑀧𑀺𑀧𑀸𑀲𑀸𑀬 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑁂𑀦 𑀘 𑀓𑀺𑀮𑀦𑁆𑀢𑀓𑀸𑀬𑁂. 𑀉𑀝𑁆𑀞𑀸𑀬𑀸𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀓𑀢𑁆𑀯𑀸, 𑀆𑀮𑀲𑀺𑀬𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁪𑁮. 𑀬𑁄 𑀯𑁂𑀢𑀺𑀆𑀤𑀺𑀦𑀸 𑀬𑀣𑀸 𑀅𑀳𑀁, 𑀏𑀯𑀁 𑀅𑀜𑁆𑀜𑁂𑀧𑀺 𑀆𑀬𑀢𑀦𑀕𑀢𑁂𑀦 𑀉𑀤𑀓𑀤𑀸𑀦𑀧𑀼𑀜𑁆𑀜𑁂𑀦 𑀏𑀢𑀸𑀤𑀺𑀲𑀁 𑀨𑀮𑀁 𑀧𑀝𑀺𑀮𑀪𑀦𑁆𑀢𑀻𑀢𑀺 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑀻 𑀣𑁂𑀭𑁂𑀦 𑀧𑀼𑀝𑁆𑀞𑀫𑀢𑁆𑀣𑀁 𑀲𑀸𑀥𑀸𑀭𑀡𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀢𑀦𑁆𑀢𑀺 𑀘 𑀬𑀣𑀸𑀯𑀼𑀢𑁆𑀢𑀧𑀼𑀜𑁆𑀜𑀓𑀸𑀭𑀺𑀦𑀁 𑀧𑀘𑁆𑀘𑀸𑀫𑀲𑀢𑀺.

𑁪𑁯. 𑀅𑀦𑀼𑀧𑀭𑀺𑀬𑀦𑁆𑀢𑀻𑀢𑀺 𑀅𑀦𑀼𑀭𑀽𑀧𑀯𑀲𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑀺. 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀧𑀭𑀺𑀓𑁆𑀔𑀺𑀧𑀦𑁂𑀦 𑀲𑁄𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀢𑀺𑀮𑀓𑀸𑀢𑀺 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑀧𑀼𑀧𑁆𑀨𑀸 𑀏𑀓𑀸 𑀭𑀼𑀓𑁆𑀔𑀚𑀸𑀢𑀺. 𑀉𑀤𑁆𑀤𑀸𑀮𑀓𑀸𑀢𑀺 𑀯𑀸𑀢𑀖𑀸𑀢𑀓𑀸, 𑀬𑁂 ‘‘𑀭𑀸𑀚𑀭𑀼𑀓𑁆𑀔𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑁫𑁦. 𑀢𑀁𑀪𑀽𑀫𑀺𑀪𑀸𑀕𑁂𑀳𑀻𑀢𑀺 𑀢𑀸𑀤𑀺𑀲𑁂𑀳𑀺 𑀪𑀽𑀫𑀺𑀪𑀸𑀕𑁂𑀳𑀺, 𑀬𑀣𑀸𑀯𑀼𑀢𑁆𑀢𑀧𑁄𑀓𑁆𑀔𑀭𑀡𑀻𑀦𑀤𑀻𑀉𑀬𑁆𑀬𑀸𑀦𑀯𑀦𑁆𑀢𑁂𑀳𑀺 𑀪𑀽𑀫𑀺𑀧𑀤𑁂𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀉𑀧𑁂𑀢𑀭𑀽𑀧𑀦𑁆𑀢𑀺 𑀧𑀸𑀲𑀁𑀲𑀺𑀬𑀪𑀸𑀯𑁂𑀦 𑀉𑀧𑁂𑀢𑀁, 𑀢𑁂𑀲𑀁 𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀁 𑀯𑀲𑁂𑀦 𑀭𑀫𑀡𑀻𑀬𑀲𑀦𑁆𑀦𑀺𑀯𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀼𑀲 𑀲𑁄𑀪𑀫𑀸𑀦𑀦𑁆𑀢𑀺 𑀪𑀼𑀲𑀁 𑀅𑀢𑀺𑀯𑀺𑀬 𑀯𑀺𑀭𑁄𑀘𑀫𑀸𑀦𑀁 𑀯𑀺𑀫𑀸𑀦𑀲𑁂𑀝𑁆𑀞𑀁 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀞𑀫𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀢𑀺𑀬𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀦𑁆𑀢𑀺 𑀤𑀼𑀢𑀺𑀬𑀦𑀸𑀯𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀕𑀸𑀫𑀓𑀸𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑁄 𑀲𑀸𑀯𑀢𑁆𑀣𑀺𑀢𑁄 𑀢𑀁 𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄, 𑀫𑀕𑁆𑀕𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀲𑀫𑁆𑀧𑀢𑁆𑀢𑁄, 𑀩𑀳𑀺𑀕𑀸𑀫𑁂 𑀢𑀸𑀤𑀺𑀲𑀁 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀧𑀭𑀺𑀲𑁆𑀲𑀫𑁂𑀦 𑀘 𑀅𑀪𑀺𑀪𑀼𑀬𑁆𑀬𑀫𑀸𑀦𑁄 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀥𑀼𑀭𑀕𑁂𑀳𑀲𑁆𑀲𑁂𑀯 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀣𑁂𑀭𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀼𑀢𑁄, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀫𑀕𑁆𑀕𑀧𑀭𑀺𑀲𑁆𑀲𑀫𑀁 𑀧𑀺𑀧𑀸𑀲𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘𑀏𑀣, 𑀪𑀦𑁆𑀢𑁂’’𑀢𑀺 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 ‘‘𑀇𑀥 𑀦𑀺𑀲𑀻𑀤𑀣𑀸’’𑀢𑀺 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂 𑀧𑀸𑀤𑁄𑀤𑀓𑀁 𑀧𑀸𑀤𑀩𑁆𑀪𑀜𑁆𑀚𑀦𑀢𑁂𑀮𑀜𑁆𑀘 𑀤𑀢𑁆𑀯𑀸 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀩𑀻𑀚𑀺. 𑀧𑀭𑀺𑀴𑀸𑀳𑁂 𑀯𑀽𑀧𑀲𑀦𑁆𑀢𑁂 𑀫𑀥𑀼𑀭𑀁 𑀲𑀻𑀢𑀮𑀁 𑀲𑀼𑀕𑀦𑁆𑀥𑀁 𑀧𑀸𑀦𑀓𑀁 𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀢𑀁 𑀧𑀺𑀯𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑀫𑀣𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀻𑀢𑀺 𑀲𑀩𑁆𑀩𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑀲𑀤𑀺𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫𑁩.

‘‘𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀁, 𑀦𑀸𑀭𑀺 𑀆𑀭𑀼𑀬𑁆𑀳 𑀢𑀺𑀝𑁆𑀞𑀲𑀺;

𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀁, 𑀧𑀤𑁆𑀫𑀁 𑀙𑀺𑀦𑁆𑀤𑀲𑀺 𑀧𑀸𑀡𑀺𑀦𑀸.

𑁫𑁪.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁫𑁫.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁫𑁬.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁫𑁭.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀼𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀅𑀤𑀸𑀲𑀺𑀁.

𑁫𑁮.

‘‘𑀬𑁄 𑀯𑁂 𑀓𑀺𑀮𑀦𑁆𑀢𑀲𑁆𑀲 𑀧𑀺𑀧𑀸𑀲𑀺𑀢𑀲𑁆𑀲, 𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀤𑀤𑀸𑀢𑀺;

𑀲𑀻𑀢𑁄𑀤𑀓𑀸 𑀢𑀲𑁆𑀲 𑀪𑀯𑀦𑁆𑀢𑀺 𑀦𑀚𑁆𑀚𑁄, 𑀧𑀳𑀽𑀢𑀫𑀮𑁆𑀬𑀸 𑀩𑀳𑀼𑀧𑀼𑀡𑁆𑀟𑀭𑀻𑀓𑀸.

𑁫𑁯.

‘‘𑀢𑀁 𑀆𑀧𑀕𑀸 𑀅𑀦𑀼𑀧𑀭𑀺𑀬𑀦𑁆𑀢𑀺 𑀲𑀩𑁆𑀩𑀤𑀸, 𑀲𑀻𑀢𑁄𑀤𑀓𑀸 𑀯𑀸𑀮𑀼𑀓𑀲𑀦𑁆𑀣𑀢𑀸 𑀦𑀤𑀻;

𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸.

𑁬𑁦.

‘‘𑀢𑀁𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀯𑀺𑀫𑀸𑀦𑀲𑁂𑀝𑁆𑀞𑀁 𑀪𑀼𑀲 𑀲𑁄𑀪𑀫𑀸𑀦𑀁;

𑀢𑀲𑁆𑀲𑀻𑀥 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀓𑀢𑀸 𑀮𑀪𑀦𑁆𑀢𑀺.

𑁬𑁧.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁬𑁨.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀅𑀢𑁆𑀣𑀯𑀡𑁆𑀡𑀦𑀸𑀲𑀼𑀧𑀺 𑀇𑀥 𑀏𑀓𑁄𑀯 𑀣𑁂𑀭𑁄𑀢𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀤𑀼𑀢𑀺𑀬𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀢𑀢𑀺𑀬𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀦𑁆𑀢𑀺 𑀢𑀢𑀺𑀬𑀦𑀸𑀯𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀓𑁄𑀲𑀮𑀚𑀦𑀧𑀤𑁂 𑀬𑁂𑀦 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀣𑀽𑀡𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀕𑀸𑀫𑀔𑁂𑀢𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀣𑀽𑀡𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀅𑀧𑁆𑀧𑀲𑀦𑁆𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀘𑁆𑀙𑁂𑀭𑀧𑀓𑀢𑀸 ‘‘𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀁 𑀯𑀲𑁂𑀬𑁆𑀬, 𑀲𑀩𑁆𑀩𑀁 𑀇𑀫𑀁 𑀚𑀦𑀁 𑀅𑀢𑁆𑀢𑀦𑁄 𑀯𑀘𑀦𑁂 𑀧𑀢𑀺𑀝𑁆𑀞𑀧𑁂𑀬𑁆𑀬, 𑀢𑀢𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀧𑀢𑀺𑀝𑁆𑀞𑀁 𑀦 𑀮𑀪𑁂𑀬𑁆𑀬𑀸’’𑀢𑀺 𑀢𑀢𑁆𑀣 𑀪𑀕𑀯𑀢𑁄 𑀅𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀦𑁆𑀢𑀸 𑀦𑀤𑀻𑀢𑀺𑀢𑁆𑀣𑁂𑀲𑀼 𑀞𑀧𑀺𑀢𑀦𑀸𑀯𑀸𑀬𑁄 𑀅𑀧𑀦𑁂𑀲𑀼𑀁, 𑀲𑁂𑀢𑀼𑀲𑀗𑁆𑀓𑀫𑀦𑀸𑀦𑀺 𑀘 𑀅𑀯𑀮𑀜𑁆𑀚𑁂 𑀅𑀓𑀁𑀲𑀼, 𑀢𑀣𑀸 𑀧𑀧𑀸𑀫𑀡𑁆𑀟𑀧𑀸𑀤𑀻𑀦𑀺, 𑀏𑀓𑀁 𑀉𑀤𑀧𑀸𑀦𑀁 𑀞𑀧𑁂𑀢𑁆𑀯𑀸 𑀇𑀢𑀭𑀸𑀦𑀺 𑀉𑀤𑀧𑀸𑀦𑀸𑀦𑀺 𑀢𑀺𑀡𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀧𑀺𑀤𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑀉𑀤𑀸𑀦𑁂 (𑀉𑀤𑀸. 𑁬𑁯) ‘‘𑀅𑀣 𑀔𑁄 𑀣𑀽𑀡𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀉𑀤𑀧𑀸𑀦𑀁 𑀢𑀺𑀡𑀲𑁆𑀲 𑀘 𑀪𑀼𑀲𑀲𑁆𑀲 𑀘 𑀬𑀸𑀯 𑀫𑀼𑀔𑀢𑁄 𑀧𑀽𑀭𑁂𑀲𑀼𑀁 ‘𑀫𑀸 𑀢𑁂 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀧𑀸𑀦𑀻𑀬𑀁 𑀅𑀧𑀁𑀲𑀽’’’𑀢𑀺.

𑀪𑀕𑀯𑀸 𑀢𑁂𑀲𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀜𑀢𑁆𑀯𑀸 𑀢𑁂 𑀅𑀦𑀼𑀓𑀫𑁆𑀧𑀦𑁆𑀢𑁄 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀆𑀓𑀸𑀲𑁂𑀦 𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀣𑀽𑀡𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀉𑀤𑀓𑀳𑀸𑀭𑀺𑀦𑀺𑀬𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂𑀦 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀕𑀸𑀫𑁂 ‘‘𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀥𑀸𑀕𑀫𑀺𑀲𑁆𑀲𑀢𑀺, 𑀦 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀓𑀁 𑀓𑀸𑀢𑀩𑁆𑀩𑀁, 𑀕𑁂𑀳𑀁 𑀆𑀕𑀢𑀲𑁆𑀲 𑀘𑀲𑁆𑀲 𑀲𑀸𑀯𑀓𑀸𑀦𑀜𑁆𑀘 𑀪𑀺𑀓𑁆𑀔𑀸𑀧𑀺 𑀦 𑀤𑀸𑀢𑀩𑁆𑀩𑀸’’𑀢𑀺 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺.

𑀢𑀢𑁆𑀣 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀲𑀻 𑀖𑀝𑁂𑀦 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀘 𑀫𑀕𑁆𑀕𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑁂 𑀢𑀲𑀺𑀢𑁂 𑀜𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀸𑀦𑀻𑀬𑀁 𑀤𑀸𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 ‘‘𑀬𑀤𑀺𑀧𑀺 𑀫𑁂 𑀕𑀸𑀫𑀯𑀸𑀲𑀺𑀦𑁄 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀦 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁, 𑀲𑀸𑀫𑀻𑀘𑀺𑀓𑀫𑁆𑀫𑀫𑁆𑀧𑀺 𑀦 𑀓𑀸𑀢𑀩𑁆𑀩’𑀦𑁆𑀢𑀺 𑀓𑀢𑀺𑀓𑀁 𑀓𑀢𑁆𑀯𑀸 𑀞𑀺𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀤𑀺 𑀅𑀳𑀁 𑀈𑀤𑀺𑀲𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑁂 𑀮𑀪𑀺𑀢𑁆𑀯𑀸 𑀧𑀸𑀦𑀻𑀬𑀤𑀸𑀦𑀫𑀢𑁆𑀢𑁂𑀦𑀸𑀧𑀺 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀦 𑀓𑀭𑁂𑀬𑁆𑀬𑀁, 𑀓𑀤𑀸𑀳𑀁 𑀇𑀢𑁄 𑀤𑀼𑀓𑁆𑀔𑀚𑀻𑀯𑀺𑀢𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀺, 𑀓𑀸𑀫𑀁 𑀫𑁂 𑀅𑀬𑁆𑀬𑀓𑁄 𑀲𑀩𑁆𑀩𑁂𑀧𑀺𑀫𑁂 𑀕𑀸𑀫𑀯𑀸𑀲𑀺𑀦𑁄 𑀫𑀁 𑀳𑀦𑀦𑁆𑀢𑀼 𑀯𑀸 𑀩𑀦𑁆𑀥𑀦𑁆𑀢𑀼 𑀯𑀸, 𑀈𑀤𑀺𑀲𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀧𑀸𑀦𑀻𑀬𑀤𑀸𑀦𑀁 𑀤𑀲𑁆𑀲𑀸𑀫𑀺 𑀏𑀯𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀜𑁆𑀜𑀸𑀳𑀺 𑀉𑀤𑀓𑀳𑀸𑀭𑀺𑀦𑀻𑀳𑀺 𑀯𑀸𑀭𑀺𑀬𑀫𑀸𑀦𑀸𑀧𑀺 𑀚𑀻𑀯𑀺𑀢𑁂 𑀦𑀺𑀭𑀧𑁂𑀓𑁆𑀔𑀸 𑀲𑀻𑀲𑀢𑁄 𑀧𑀸𑀦𑀻𑀬𑀖𑀝𑀁 𑀑𑀢𑀸𑀭𑁂𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀸𑀦𑀻𑀬𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀪𑀕𑀯𑀸 𑀢𑀲𑁆𑀲𑀸 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺, 𑀖𑀝𑁂 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀢𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀼𑀦 𑀧𑀲𑀦𑁆𑀦𑀘𑀺𑀢𑁆𑀢𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀅𑀤𑀸𑀲𑀺, 𑀢𑀣𑀸 𑀅𑀧𑀭𑀲𑁆𑀲 𑀅𑀧𑀭𑀲𑁆𑀲𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀅𑀤𑀸𑀲𑀺, 𑀉𑀤𑀓𑀁 𑀦 𑀔𑀻𑀬𑀢𑁂𑀯. 𑀲𑀸 𑀳𑀝𑁆𑀞𑀢𑀼𑀝𑁆𑀞𑀸 𑀬𑀣𑀸𑀧𑀼𑀡𑁆𑀡𑁂𑀦 𑀖𑀝𑁂𑀦 𑀕𑁂𑀳𑀸𑀪𑀺𑀫𑀼𑀔𑀻 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀧𑀸𑀦𑀻𑀬𑀲𑁆𑀲 𑀤𑀺𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀇𑀫𑀸𑀬 𑀕𑀸𑀫𑀯𑀢𑁆𑀢𑀁 𑀪𑀺𑀦𑁆𑀦𑀁, 𑀅𑀳𑀜𑁆𑀘 𑀕𑀸𑀭𑀬𑁆𑀳𑁄 𑀓𑀢𑁄’’𑀢𑀺 𑀓𑁄𑀥𑁂𑀦 𑀧𑀚𑁆𑀚𑀮𑀦𑁆𑀢𑁄 𑀢𑀝𑀢𑀝𑀸𑀬𑀫𑀸𑀦𑁄 𑀢𑀁 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑀳𑀭𑀺. 𑀲𑀸 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑀺, 𑀯𑀺𑀫𑀸𑀦𑀁 𑀘𑀲𑁆𑀲𑀸 𑀧𑀞𑀫𑀦𑀸𑀯𑀸𑀯𑀺𑀫𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀁 𑀉𑀧𑁆𑀧𑀚𑁆𑀚𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀉𑀤𑀧𑀸𑀦𑀢𑁄 𑀧𑀸𑀦𑀻𑀬𑀁 𑀆𑀳𑀭𑀸’’𑀢𑀺. 𑀣𑁂𑀭𑁄 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀉𑀤𑀧𑀸𑀦𑁄 𑀣𑀽𑀡𑁂𑀬𑁆𑀬𑀓𑁂𑀳𑀺 𑀤𑀽𑀲𑀺𑀢𑁄, 𑀦 𑀲𑀓𑁆𑀓𑀸 𑀧𑀸𑀦𑀻𑀬𑀁 𑀆𑀳𑀭𑀺𑀢𑀼’’𑀦𑁆𑀢𑀺 𑀆𑀳. 𑀪𑀕𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀆𑀡𑀸𑀧𑁂𑀲𑀺. 𑀢𑀢𑀺𑀬𑀯𑀸𑀭𑁂 𑀣𑁂𑀭𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀆𑀤𑀸𑀬 𑀉𑀤𑀧𑀸𑀦𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀕𑀘𑁆𑀙𑀦𑁆𑀢𑁂 𑀣𑁂𑀭𑁂 𑀉𑀤𑀧𑀸𑀦𑁂 𑀉𑀤𑀓𑀁 𑀧𑀭𑀺𑀧𑀼𑀡𑁆𑀡𑀁 𑀳𑀼𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀦𑁆𑀤𑀢𑀺, 𑀲𑀩𑁆𑀩𑀁 𑀢𑀺𑀡𑀪𑀼𑀲𑀁 𑀉𑀧𑀮𑀯𑀺𑀢𑁆𑀯𑀸 𑀲𑀬𑀫𑁂𑀯 𑀅𑀧𑀕𑀘𑁆𑀙𑀢𑀺. 𑀢𑁂𑀦 𑀲𑀦𑁆𑀤𑀫𑀸𑀦𑁂𑀦 𑀲𑀮𑀺𑀮𑁂𑀦 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦𑁆𑀢𑁂𑀦 𑀅𑀜𑁆𑀜𑁂 𑀚𑀮𑀸𑀲𑀬𑁂 𑀧𑀽𑀭𑁂𑀢𑁆𑀯𑀸 𑀢𑀁 𑀕𑀸𑀫𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀕𑀸𑀫𑀧𑁆𑀧𑀤𑁂𑀲𑁄 𑀅𑀚𑁆𑀛𑁄𑀢𑁆𑀣𑀭𑀻𑀬𑀢𑀺. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀲𑀼𑀁, 𑀢𑀗𑁆𑀔𑀡𑀜𑁆𑀜𑁂𑀯 𑀉𑀤𑀓𑁄𑀖𑁄 𑀅𑀦𑁆𑀢𑀭𑀥𑀸𑀬𑀺. 𑀢𑁂 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀦𑀺𑀯𑀸𑀲𑀝𑁆𑀞𑀸𑀦𑀁 𑀲𑀁𑀯𑀺𑀥𑀸𑀬 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂 𑀣𑀽𑀡𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼.

𑀢𑁂𑀦 𑀘 𑀲𑀫𑀬𑁂𑀦 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑀲𑁆𑀲𑀸 𑀓𑀸𑀭𑀡𑀁 𑀉𑀧𑀥𑀸𑀭𑁂𑀦𑁆𑀢𑀻 𑀢𑀁 ‘‘𑀧𑀸𑀦𑀻𑀬𑀤𑀸𑀦’’𑀦𑁆𑀢𑀺 𑀜𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀳𑀦𑁆𑀤𑀸𑀳𑀁 𑀇𑀤𑀸𑀦𑁂𑀯 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀲𑀼 𑀓𑀢𑀸𑀦𑀁 𑀅𑀧𑁆𑀧𑀓𑀸𑀦𑀫𑁆𑀧𑀺 𑀓𑀸𑀭𑀸𑀦𑀁 𑀉𑀴𑀸𑀭𑀨𑀮𑀢𑀜𑁆𑀘 𑀫𑀦𑀼𑀲𑁆𑀲𑀮𑁄𑀓𑁂 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀉𑀬𑁆𑀬𑀸𑀦𑀸𑀤𑀺𑀲𑀳𑀺𑀢𑁂𑀦 𑀯𑀺𑀫𑀸𑀦𑁂𑀦 𑀲𑀤𑁆𑀥𑀺𑀁𑀬𑁂𑀯 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀫𑀳𑀦𑁆𑀢𑁂𑀦 𑀤𑁂𑀯𑀸𑀦𑀼𑀪𑀸𑀯𑁂𑀦 𑀫𑀳𑀸𑀚𑀦𑀓𑀸𑀬𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀪𑀕𑀯𑀸 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀓𑀫𑁆𑀫𑀨𑀮𑀁 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑁋

𑁬𑁩.

‘‘𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀁, 𑀦𑀸𑀭𑀺 𑀆𑀭𑀼𑀬𑁆𑀳 𑀢𑀺𑀝𑁆𑀞𑀲𑀺;

𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀁, 𑀧𑀤𑁆𑀫𑀁 𑀙𑀺𑀦𑁆𑀤𑀲𑀺 𑀧𑀸𑀡𑀺𑀦𑀸.

𑁬𑁪.

‘‘𑀓𑀽𑀝𑀸𑀕𑀸𑀭𑀸 𑀦𑀺𑀯𑁂𑀲𑀸 𑀢𑁂, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑀦𑁆𑀢𑀺, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

𑁬𑁫.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁬𑁬.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁,

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺.

𑁬𑁭.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀲𑀗𑁆𑀕𑀻𑀢𑀺𑀓𑀸𑀭𑀸 𑀆𑀳𑀁𑀲𑀼.

𑁬𑁮.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀢𑀲𑀺𑀢𑁂 𑀓𑀺𑀮𑀦𑁆𑀢𑁂, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀅𑀤𑀸𑀲𑀺𑀁.

𑁬𑁯.

‘‘𑀬𑁄 𑀯𑁂 𑀓𑀺𑀮𑀦𑁆𑀢𑀸𑀦 𑀧𑀺𑀧𑀸𑀲𑀺𑀢𑀸𑀦𑀁, 𑀉𑀝𑁆𑀞𑀸𑀬 𑀧𑀸𑀢𑀼𑀁 𑀉𑀤𑀓𑀁 𑀤𑀤𑀸𑀢𑀺;

𑀲𑀻𑀢𑁄𑀤𑀓𑀸 𑀢𑀲𑁆𑀲 𑀪𑀯𑀦𑁆𑀢𑀺 𑀦𑀚𑁆𑀚𑁄, 𑀧𑀳𑀽𑀢𑀫𑀮𑁆𑀬𑀸 𑀩𑀳𑀼𑀧𑀼𑀡𑁆𑀟𑀭𑀻𑀓𑀸.

𑁭𑁦.

‘‘𑀢𑀁 𑀆𑀧𑀕𑀸 𑀅𑀦𑀼𑀧𑀭𑀺𑀬𑀦𑁆𑀢𑀺 𑀲𑀩𑁆𑀩𑀤𑀸, 𑀲𑀻𑀢𑁄𑀤𑀓𑀸 𑀯𑀸𑀮𑀼𑀓𑀲𑀦𑁆𑀣𑀢𑀸 𑀦𑀤𑀻;

𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸.

𑁭𑁧.

‘‘𑀢𑀁𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀯𑀺𑀫𑀸𑀦𑀲𑁂𑀝𑁆𑀞𑀁 𑀪𑀼𑀲 𑀲𑁄𑀪𑀫𑀸𑀦𑀁;

𑀢𑀲𑁆𑀲𑀻𑀥 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀓𑀢𑀸 𑀮𑀪𑀦𑁆𑀢𑀺.

𑁭𑁨.

‘‘𑀓𑀽𑀝𑀸𑀕𑀸𑀭𑀸 𑀦𑀺𑀯𑁂𑀲𑀸 𑀫𑁂, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑀦𑁆𑀢𑀺, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

𑁭𑁩.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀢𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁭𑁪.

‘‘𑀅𑀓𑁆𑀔𑀸𑀫𑀺 𑀢𑁂 𑀩𑀼𑀤𑁆𑀥 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀺;

𑀏𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀁, 𑀅𑀢𑁆𑀣𑀸𑀬 𑀩𑀼𑀤𑁆𑀥𑁄 𑀉𑀤𑀓𑀁 𑀅𑀧𑀸𑀬𑀻’’𑀢𑀺. 𑁋

𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑁄.

𑁬𑁩. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀸 𑀤𑁂𑀯𑀢𑀸 𑀬𑀤𑀸 𑀪𑀕𑀯𑀸 𑀧𑀼𑀘𑁆𑀙𑀺, 𑀢𑀤𑀸 𑀢𑀁 𑀦𑀸𑀯𑀁 𑀆𑀭𑀼𑀬𑁆𑀳 𑀦 𑀞𑀺𑀢𑀸, 𑀦 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑀢𑀺, 𑀦𑀸𑀧𑀺 𑀧𑀤𑀼𑀫𑀁 𑀙𑀺𑀦𑁆𑀤𑀢𑀺, 𑀓𑀫𑁆𑀫𑀸𑀦𑀼𑀪𑀸𑀯𑀘𑁄𑀤𑀺𑀢𑀸 𑀧𑀦 𑀅𑀪𑀺𑀡𑁆𑀳𑀁 𑀚𑀮𑀯𑀺𑀳𑀸𑀭𑀧𑀲𑀼𑀢𑀸 𑀢𑀣𑀸 𑀓𑀭𑁄𑀢𑀻𑀢𑀺 𑀢𑀁 𑀓𑀺𑀭𑀺𑀬𑀸𑀯𑀺𑀘𑁆𑀙𑁂𑀤𑀁 𑀤𑀲𑁆𑀲𑀦𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀦 𑀓𑁂𑀯𑀮𑀫𑀺𑀥𑁂𑀯, 𑀅𑀣 𑀔𑁄 𑀳𑁂𑀝𑁆𑀞𑀺𑀫𑁂𑀲𑀼𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑁭𑁨. 𑀓𑀽𑀝𑀸𑀕𑀸𑀭𑀸𑀢𑀺 𑀲𑀼𑀯𑀡𑁆𑀡𑀫𑀬𑀓𑀡𑁆𑀡𑀺𑀓𑀸𑀩𑀤𑁆𑀥𑀕𑁂𑀳𑀯𑀦𑁆𑀢𑁄. 𑀦𑀺𑀯𑁂𑀲𑀸𑀢𑀺 𑀦𑀺𑀯𑁂𑀲𑀦𑀸𑀦𑀺, 𑀓𑀘𑁆𑀙𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸’’𑀢𑀺. 𑀢𑀸𑀦𑀺 𑀳𑀺 𑀘𑀢𑀼𑀲𑀸𑀮𑀪𑀽𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑀸𑀦𑀺 𑀯𑀺𑀬 𑀧𑀝𑀺𑀯𑀺𑀪𑀢𑁆𑀢𑀭𑀽𑀧𑀸𑀦𑀺 𑀲𑀫𑀧𑁆𑀧𑀫𑀸𑀡𑀢𑀸𑀬 𑀪𑀸𑀕𑀲𑁄 𑀫𑀺𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺. 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀅𑀢𑀺𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀸. 𑀆𑀪𑀦𑁆𑀢𑀻𑀢𑀺 𑀫𑀡𑀺𑀭𑀢𑀦𑀓𑀦𑀓𑀭𑀁𑀲𑀺𑀚𑀸𑀮𑁂𑀳𑀺 𑀑𑀪𑀸𑀲𑁂𑀦𑁆𑀢𑀺.

𑁭𑁪. 𑀫𑀫𑀸𑀢𑀺 𑀇𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁, 𑀫𑀫 𑀓𑀫𑁆𑀫𑀲𑁆𑀲 𑀫𑀫 𑀅𑀢𑁆𑀣𑀸𑀬𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀬𑁄𑀚𑀦𑀸. 𑀉𑀤𑀓𑀁 𑀅𑀧𑀸𑀬𑀻𑀢𑀺 𑀬𑀤𑁂𑀢𑀁 𑀉𑀤𑀓𑀤𑀸𑀦𑀁 𑀯𑀼𑀢𑁆𑀢𑀁, 𑀏𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀇𑀤𑀁 𑀨𑀮𑀁 𑀬𑀸𑀬𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺, 𑀬𑀲𑁆𑀫𑀸 𑀫𑀫𑀢𑁆𑀣𑀸𑀬 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀩𑀼𑀤𑁆𑀥𑁄 𑀪𑀕𑀯𑀸 𑀫𑀬𑀸 𑀤𑀺𑀦𑁆𑀦𑀁 𑀉𑀤𑀓𑀁 𑀅𑀧𑀸𑀬𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀧𑀲𑀦𑁆𑀦𑀫𑀸𑀦𑀲𑀸𑀬 𑀤𑁂𑀯𑀢𑀸𑀬 𑀪𑀕𑀯𑀸 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀦𑁆𑀢𑁄 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀥𑀫𑁆𑀫𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺.

𑀢𑀢𑀺𑀬𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀻𑀧𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀤𑀻𑀧𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀉𑀧𑁄𑀲𑀣𑀤𑀺𑀯𑀲𑁂 𑀲𑀫𑁆𑀩𑀳𑀼𑀮𑀸 𑀉𑀧𑀸𑀲𑀓𑀸 𑀉𑀧𑁄𑀲𑀣𑀺𑀓𑀸 𑀳𑀼𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀁 𑀬𑀣𑀸𑀯𑀺𑀪𑀯𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀲𑀸𑀬𑀦𑁆𑀳𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀯𑀺𑀳𑀸𑀭𑁂𑀬𑁂𑀯 𑀯𑀲𑀺𑀢𑀼𑀓𑀸𑀫𑀸𑀦𑀁 𑀢𑁂𑀲𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁𑀬𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄, 𑀅𑀦𑁆𑀥𑀓𑀸𑀭𑁄 𑀚𑀸𑀢𑁄. 𑀢𑀢𑁆𑀣𑁂𑀓𑀸 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 ‘‘𑀇𑀤𑀸𑀦𑀺 𑀤𑀻𑀧𑀸𑀮𑁄𑀓𑀁 𑀓𑀸𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀢𑁄 𑀧𑀤𑀻𑀧𑁂𑀬𑁆𑀬𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀤𑀻𑀧𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑀲𑁆𑀲 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀺. 𑀲𑀸 𑀢𑁂𑀦 𑀧𑀤𑀻𑀧𑀤𑀸𑀦𑁂𑀦 𑀅𑀢𑁆𑀢𑀫𑀦𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀢𑀸. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀚𑁄𑀢𑀺𑀭𑀲𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀭𑀻𑀭𑀲𑁄𑀪𑀸 𑀧𑀦𑀲𑁆𑀲𑀸 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑀸 𑀅𑀜𑁆𑀜𑁂 𑀤𑁂𑀯𑁂 𑀅𑀪𑀺𑀪𑀯𑀺𑀢𑁆𑀯𑀸 𑀤𑀲 𑀤𑀺𑀲𑀸 𑀑𑀪𑀸𑀲𑀬𑀫𑀸𑀦𑀸 𑀢𑀺𑀝𑁆𑀞𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑁋

𑁭𑁫.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁭𑁬.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁭𑁭.

‘‘𑀓𑁂𑀦 𑀢𑁆𑀯𑀁 𑀯𑀺𑀫𑀮𑁄𑀪𑀸𑀲𑀸, 𑀅𑀢𑀺𑀭𑁄𑀘𑀲𑀺 𑀤𑁂𑀯𑀢𑀸;

𑀓𑁂𑀦 𑀢𑁂 𑀲𑀩𑁆𑀩𑀕𑀢𑁆𑀢𑁂𑀳𑀺, 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸.

𑁭𑁮.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺.

𑁭𑁯.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁮𑁦.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀢𑀫𑀦𑁆𑀥𑀓𑀸𑀭𑀫𑁆𑀳𑀺 𑀢𑀺𑀫𑀻𑀲𑀺𑀓𑀸𑀬𑀁, 𑀧𑀤𑀻𑀧𑀓𑀸𑀮𑀫𑁆𑀳𑀺 𑀅𑀤𑀸𑀲𑀺 𑀤𑀻𑀧𑀁.

𑁮𑁧.

‘‘𑀬𑁄 𑀅𑀦𑁆𑀥𑀓𑀸𑀭𑀫𑁆𑀳𑀺 𑀢𑀺𑀫𑀻𑀲𑀺𑀓𑀸𑀬𑀁, 𑀧𑀤𑀻𑀧𑀓𑀸𑀮𑀫𑁆𑀳𑀺 𑀤𑀤𑀸𑀢𑀺 𑀤𑀻𑀧𑀁;

𑀉𑀧𑁆𑀧𑀚𑁆𑀚𑀢𑀺 𑀚𑁄𑀢𑀺𑀭𑀲𑀁 𑀯𑀺𑀫𑀸𑀦𑀁, 𑀧𑀳𑀽𑀢𑀫𑀮𑁆𑀬𑀁 𑀩𑀳𑀼𑀧𑀼𑀡𑁆𑀟𑀭𑀻𑀓𑀁.

𑁮𑁨.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁮𑁩.

‘‘𑀢𑁂𑀦𑀸𑀳𑀁 𑀯𑀺𑀫𑀮𑁄𑀪𑀸𑀲𑀸, 𑀅𑀢𑀺𑀭𑁄𑀘𑀸𑀫𑀺 𑀤𑁂𑀯𑀢𑀸;

𑀢𑁂𑀦 𑀫𑁂 𑀲𑀩𑁆𑀩𑀕𑀢𑁆𑀢𑁂𑀳𑀺, 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸.

𑁮𑁪.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀯𑀺𑀲𑁆𑀲𑀚𑁆𑀚𑁂𑀲𑀺.

𑁭𑁫. 𑀢𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢-𑀲𑀤𑁆𑀤𑁄 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁦; 𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁩) 𑀔𑀬𑁂 𑀆𑀕𑀢𑁄. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁦; 𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺𑀆𑀤𑀻𑀲𑀼 (𑀯𑀺. 𑀯. 𑁮𑁫𑁭) 𑀅𑀪𑀺𑀭𑀽𑀧𑁂. 𑀇𑀥𑀸𑀧𑀺 𑀅𑀪𑀺𑀭𑀽𑀧𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀓𑀦𑁆𑀢𑁂𑀦 𑀅𑀢𑀺𑀫𑀦𑀸𑀧𑁂𑀦, 𑀅𑀪𑀺𑀭𑀽𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦. 𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸𑀧𑀺 𑀤𑀲 𑀤𑀺𑀲𑀸 𑀚𑁄𑀢𑁂𑀦𑁆𑀢𑀻 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑀻. 𑀓𑀺𑀁 𑀯𑀺𑀬𑀸𑀢𑀺 𑀆𑀳 ‘‘𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸’’𑀢𑀺. 𑀉𑀲𑁆𑀲𑀦𑁆𑀦𑀸 𑀧𑀪𑀸 𑀏𑀢𑀸𑀬 𑀥𑀻𑀬𑀢𑀺, 𑀑𑀲𑀥𑀻𑀦𑀁 𑀯𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸𑀢𑀺 𑀓𑀢𑁆𑀯𑀸 ‘‘𑀑𑀲𑀥𑀻’’𑀢𑀺 𑀮𑀤𑁆𑀥𑀦𑀸𑀫𑀸 𑀢𑀸𑀭𑀓𑀸 𑀬𑀣𑀸 𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀓𑀼𑀭𑀼𑀫𑀸𑀦𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀢𑁆𑀯𑀁 𑀲𑀩𑁆𑀩𑀸 𑀤𑀺𑀲𑀸 𑀑𑀪𑀸𑀲𑀬𑀦𑁆𑀢𑀻 𑀢𑀺𑀝𑁆𑀞𑀲𑀻𑀢𑀺.

𑁭𑁭. 𑀲𑀩𑁆𑀩𑀕𑀢𑁆𑀢𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀲𑀭𑀻𑀭𑀸𑀯𑀬𑀯𑁂𑀳𑀺, 𑀲𑀓𑀮𑁂𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀑𑀪𑀸𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀳𑁂𑀢𑀼𑀫𑁆𑀳𑀺 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸𑀢𑀺 𑀲𑀩𑁆𑀩𑀸𑀧𑀺 𑀤𑀲𑀤𑀺𑀲𑀸 𑀯𑀺𑀚𑁆𑀚𑁄𑀢𑀢𑀺. ‘‘𑀑𑀪𑀸𑀲𑀭𑁂’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑀸 𑀤𑀺𑀲𑀸𑀢𑀺 𑀩𑀳𑀼𑀯𑀘𑀦𑀫𑁂𑀯 𑀤𑀝𑁆𑀞𑀩𑁆𑀩𑀁.

𑁮𑁧. 𑀧𑀤𑀻𑀧𑀓𑀸𑀮𑀫𑁆𑀳𑀻𑀢𑀺 𑀧𑀤𑀻𑀧𑀓𑀭𑀡𑀓𑀸𑀮𑁂, 𑀧𑀤𑀻𑀧𑀼𑀚𑁆𑀚𑀮𑀦𑀬𑁄𑀕𑁆𑀕𑁂 𑀅𑀦𑁆𑀥𑀓𑀸𑀭𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑁄 𑀅𑀦𑁆𑀥𑀓𑀸𑀭𑀫𑁆𑀳𑀺 𑀢𑀺𑀫𑀻𑀲𑀺𑀓𑀸𑀬’’𑀦𑁆𑀢𑀺, 𑀩𑀳𑀮𑁂 𑀫𑀳𑀦𑁆𑀥𑀓𑀸𑀭𑁂𑀢𑀺 𑀅𑀢𑁆𑀣𑁄. 𑀤𑀤𑀸𑀢𑀺 𑀤𑀻𑀧𑀦𑁆𑀢𑀺 𑀧𑀤𑀻𑀧𑀁 𑀉𑀚𑁆𑀚𑀸𑀮𑁂𑀦𑁆𑀢𑁄 𑀯𑀸 𑀅𑀦𑀼𑀚𑁆𑀚𑀸𑀮𑁂𑀦𑁆𑀢𑁄 𑀯𑀸 𑀧𑀤𑀻𑀧𑀤𑀸𑀦𑀁 𑀤𑀤𑀸𑀢𑀺, 𑀧𑀤𑀻𑀧𑁄𑀧𑀓𑀭𑀡𑀸𑀦𑀺 𑀤𑀓𑁆𑀔𑀺𑀡𑁂𑀬𑁆𑀬𑁂 𑀉𑀤𑁆𑀤𑀺𑀲𑁆𑀲 𑀧𑀭𑀺𑀘𑁆𑀘𑀚𑀢𑀺. 𑀉𑀧𑀧𑀚𑁆𑀚𑀢𑀺 𑀚𑁄𑀢𑀺𑀭𑀲𑀁 𑀯𑀺𑀫𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀚𑁄𑀢𑀺𑀭𑀲𑀁 𑀯𑀺𑀫𑀸𑀦𑀁 𑀉𑀧𑀕𑀘𑁆𑀙𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣 𑀬𑀣𑀸𑀧𑀼𑀘𑁆𑀙𑀺𑀢𑁂 𑀅𑀢𑁆𑀣𑁂 𑀤𑁂𑀯𑀢𑀸𑀬 𑀓𑀣𑀺𑀢𑁂 𑀣𑁂𑀭𑁄 𑀢𑀫𑁂𑀯 𑀓𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀤𑀸𑀦𑀸𑀤𑀺𑀓𑀣𑀸𑀬 𑀢𑀲𑁆𑀲𑀸 𑀓𑀮𑁆𑀮𑀘𑀺𑀢𑁆𑀢𑀸𑀤𑀺𑀪𑀸𑀯𑀁 𑀜𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀧𑀭𑀺𑀯𑀸𑀭𑀸 𑀲𑀸 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀣𑁂𑀭𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺, 𑀪𑀕𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸, 𑀫𑀳𑀸𑀚𑀦𑁄 𑀯𑀺𑀲𑁂𑀲𑀢𑁄 𑀤𑀻𑀧𑀤𑀸𑀦𑁂 𑀲𑀓𑁆𑀓𑀘𑁆𑀘𑀓𑀸𑀭𑀻 𑀅𑀳𑁄𑀲𑀻𑀢𑀺.

𑀤𑀻𑀧𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀢𑀺𑀮𑀤𑀓𑁆𑀔𑀺𑀡𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀢𑀺𑀮𑀤𑀓𑁆𑀔𑀺𑀡𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀕𑀩𑁆𑀪𑀺𑀦𑀻 𑀢𑀺𑀮𑁂 𑀥𑁄𑀯𑀺𑀢𑁆𑀯𑀸 𑀆𑀢𑀧𑁂 𑀲𑀼𑀓𑁆𑀔𑀸𑀧𑁂𑀢𑀺 𑀢𑁂𑀮𑀁 𑀓𑀸𑀢𑀼𑀓𑀸𑀫𑀸. 𑀲𑀸 𑀘 𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑀸 𑀢𑀁 𑀤𑀺𑀯𑀲𑀫𑁂𑀯 𑀘𑀯𑀦𑀥𑀫𑁆𑀫𑀸, 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁 𑀘𑀲𑁆𑀲𑀸 𑀓𑀫𑁆𑀫𑀁 𑀑𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀁. 𑀅𑀣 𑀦𑀁 𑀪𑀕𑀯𑀸 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀇𑀢𑁆𑀣𑀻 𑀅𑀚𑁆𑀚 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀢𑀺𑀮𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑁂𑀦 𑀢𑀁 𑀲𑀕𑁆𑀕𑀽𑀧𑀕𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀲𑁄 𑀲𑀸𑀯𑀢𑁆𑀣𑀺𑀢𑁄 𑀢𑀗𑁆𑀔𑀡𑁂𑀦𑁂𑀯 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀲𑀸 𑀕𑁂𑀳𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀲𑀸 𑀇𑀢𑁆𑀣𑀻 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀲𑀳𑀲𑀸 𑀉𑀝𑁆𑀞𑀳𑀺𑀢𑁆𑀯𑀸 𑀓𑀢𑀜𑁆𑀚𑀮𑀻 𑀅𑀜𑁆𑀜𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀧𑀲𑁆𑀲𑀦𑁆𑀢𑀻 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑀺𑀮𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀚𑀮𑀺𑀧𑀽𑀭𑀁 𑀢𑀺𑀮𑀁 𑀪𑀕𑀯𑀢𑁄 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺. 𑀢𑀁 𑀪𑀕𑀯𑀸 𑀅𑀦𑀼𑀓𑀫𑁆𑀧𑀫𑀸𑀦𑁄 ‘‘𑀲𑀼𑀔𑀺𑀦𑀻 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀲𑀼𑀢𑁆𑀢𑀧𑀩𑀼𑀤𑁆𑀥𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀺.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑀁 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀯𑀺𑀭𑁄𑀘𑀫𑀸𑀦𑀫𑀼𑀧𑀕𑀦𑁆𑀢𑁆𑀯𑀸 𑁋

𑁮𑁫.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁮𑁬.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁮𑁭.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀼𑀘𑁆𑀙𑀺;

𑁮𑁮.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁮𑁯.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂.

𑁯𑁦.

‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀆𑀲𑀚𑁆𑀚 𑀤𑀸𑀦𑀁 𑀅𑀤𑀸𑀲𑀺𑀁, 𑀅𑀓𑀸𑀫𑀸 𑀢𑀺𑀮𑀤𑀓𑁆𑀔𑀺𑀡𑀁;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁯𑁧.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁯𑁨.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑀸 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁯𑁦. 𑀢𑀢𑁆𑀣 𑀆𑀲𑀚𑁆𑀚𑀸𑀢𑀺 𑀅𑀬𑀁 𑀆𑀲𑀚𑁆𑀚-𑀲𑀤𑁆𑀤𑁄 ‘‘𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁫𑁦) 𑀖𑀝𑁆𑀝𑁂𑀦 𑀆𑀕𑀢𑁄. ‘‘𑀆𑀲𑀚𑁆𑀚 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁩𑁬; 𑀅. 𑀦𑀺. 𑁮.𑁩𑁧) 𑀲𑀫𑀸𑀕𑀫𑁂. 𑀇𑀥𑀸𑀧𑀺 𑀲𑀫𑀸𑀕𑀫𑁂𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀆𑀲𑀚𑁆𑀚𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸, 𑀲𑀫𑀯𑀸𑀬𑁂𑀦 𑀲𑀫𑁆𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀓𑀸𑀫𑀸’’𑀢𑀺. 𑀲𑀸 𑀳𑀺 𑀤𑁂𑀬𑁆𑀬𑀥𑀫𑁆𑀫𑀲𑀁𑀯𑀺𑀥𑀸𑀦𑀧𑀼𑀩𑁆𑀩𑀓𑀁 𑀧𑀼𑀭𑀺𑀫𑀲𑀺𑀤𑁆𑀥𑀁 𑀤𑀸𑀦𑀲𑀗𑁆𑀓𑀧𑁆𑀧𑀁 𑀯𑀺𑀦𑀸 𑀲𑀳𑀲𑀸 𑀲𑀫𑁆𑀧𑀢𑁆𑀢𑁂 𑀪𑀕𑀯𑀢𑀺 𑀧𑀯𑀢𑁆𑀢𑀺𑀢𑀁 𑀢𑀺𑀮𑀤𑀸𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀲𑀚𑁆𑀚 𑀤𑀸𑀦𑀁 𑀅𑀤𑀸𑀲𑀺𑀁, 𑀅𑀓𑀸𑀫𑀸 𑀢𑀺𑀮𑀤𑀓𑁆𑀔𑀺𑀡’’𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀢𑀺𑀮𑀤𑀓𑁆𑀔𑀺𑀡𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀞𑀫𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀓𑁄𑀜𑁆𑀘𑀸 𑀫𑀬𑀽𑀭𑀸 𑀤𑀺𑀯𑀺𑀬𑀸 𑀘 𑀳𑀁𑀲𑀸𑀢𑀺 𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀣 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀧𑀢𑀺𑀩𑁆𑀩𑀢𑀸 𑀅𑀳𑁄𑀲𑀺 𑀪𑀢𑁆𑀢𑀼 𑀅𑀦𑀼𑀓𑀽𑀮𑀯𑀢𑁆𑀢𑀺𑀦𑀻 𑀔𑀫𑀸 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑀻, 𑀦 𑀓𑀼𑀤𑁆𑀥𑀸𑀧𑀺 𑀧𑀝𑀺𑀧𑁆𑀨𑀭𑀢𑀺, 𑀅𑀨𑀭𑀼𑀲𑀯𑀸𑀘𑀸 𑀲𑀘𑁆𑀘𑀯𑀸𑀤𑀺𑀦𑀻 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀬𑀣𑀸𑀯𑀺𑀪𑀯𑀁 𑀤𑀸𑀦𑀸𑀦𑀺 𑀘 𑀅𑀤𑀸𑀲𑀺. 𑀲𑀸 𑀓𑁂𑀦𑀘𑀺𑀤𑁂𑀯 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀤𑁂𑀯𑀥𑀻𑀢𑀭𑀁 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀲𑀫𑀻𑀧𑀫𑀼𑀧𑀕𑀢𑁄. 𑀲𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀲𑀝𑁆𑀞𑀺𑀲𑀓𑀝𑀪𑀸𑀭𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀪𑀸𑀯𑀸 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀣𑁂𑀭𑁄𑀧𑀺 𑀢𑀸𑀬 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

𑁯𑁩.

‘‘𑀓𑁄𑀜𑁆𑀘𑀸 𑀫𑀬𑀽𑀭𑀸 𑀤𑀺𑀯𑀺𑀬𑀸 𑀘 𑀳𑀁𑀲𑀸, 𑀯𑀕𑁆𑀕𑀼𑀲𑁆𑀲𑀭𑀸 𑀓𑁄𑀓𑀺𑀮𑀸 𑀲𑀫𑁆𑀧𑀢𑀦𑁆𑀢𑀺;

𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀭𑀫𑁆𑀫𑀫𑀺𑀤𑀁 𑀯𑀺𑀫𑀸𑀦𑀁, 𑀅𑀦𑁂𑀓𑀘𑀺𑀢𑁆𑀢𑀁 𑀦𑀭𑀦𑀸𑀭𑀺𑀲𑁂𑀯𑀺𑀢𑀁.

𑁯𑁪.

‘‘𑀢𑀢𑁆𑀣𑀘𑁆𑀙𑀲𑀺 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀇𑀤𑁆𑀥𑀻 𑀯𑀺𑀓𑀼𑀩𑁆𑀩𑀦𑁆𑀢𑀺 𑀅𑀦𑁂𑀓𑀭𑀽𑀧𑀸;

𑀇𑀫𑀸 𑀘 𑀢𑁂 𑀅𑀘𑁆𑀙𑀭𑀸𑀬𑁄 𑀲𑀫𑀦𑁆𑀢𑀢𑁄, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺 𑀘.

𑁯𑁫.

‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸𑀲𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀆𑀳;

𑁯𑁬.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁯𑁭.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀢𑀺𑀩𑁆𑀩𑀢𑀸𑀦𑀜𑁆𑀜𑀫𑀦𑀸 𑀅𑀳𑁄𑀲𑀺𑀁;

𑀫𑀸𑀢𑀸𑀯 𑀧𑀼𑀢𑁆𑀢𑀁 𑀅𑀦𑀼𑀭𑀓𑁆𑀔𑀫𑀸𑀦𑀸, 𑀓𑀼𑀤𑁆𑀥𑀸𑀧𑀺𑀳𑀁 𑀦𑀧𑁆𑀨𑀭𑀼𑀲𑀁 𑀅𑀯𑁄𑀘𑀁.

𑁯𑁮.

‘‘𑀲𑀘𑁆𑀘𑁂 𑀞𑀺𑀢𑀸 𑀫𑁄𑀲𑀯𑀚𑁆𑀚𑀁 𑀧𑀳𑀸𑀬, 𑀤𑀸𑀦𑁂 𑀭𑀢𑀸 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑀸;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁯𑁯.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁦𑁦.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑀸 𑀤𑁂𑀯𑀢𑀸 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁯𑁩. 𑀢𑀢𑁆𑀣 𑀓𑁄𑀜𑁆𑀘𑀸𑀢𑀺 𑀓𑁄𑀜𑁆𑀘𑀲𑀓𑀼𑀡𑀸, 𑀬𑁂 ‘‘𑀲𑀸𑀭𑀲𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀬𑀽𑀭𑀸𑀢𑀺 𑀫𑁄𑀭𑀸. 𑀤𑀺𑀯𑀺𑀬𑀸𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑀸. 𑀇𑀤𑀜𑁆𑀳𑀺 𑀧𑀤𑀁 ‘‘𑀤𑀺𑀯𑀺𑀬𑀸 𑀓𑁄𑀜𑁆𑀘𑀸, 𑀤𑀺𑀯𑀺𑀬𑀸 𑀫𑀬𑀽𑀭𑀸’’𑀢𑀺𑀆𑀤𑀺𑀦𑀸 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀳𑀁𑀲𑀸𑀢𑀺 𑀲𑀼𑀯𑀡𑁆𑀡𑀳𑀁𑀲𑀸𑀤𑀺𑀳𑀁𑀲𑀸. 𑀯𑀕𑁆𑀕𑀼𑀲𑁆𑀲𑀭𑀸𑀢𑀺 𑀫𑀥𑀼𑀭𑀲𑁆𑀲𑀭𑀸. 𑀓𑁄𑀓𑀺𑀮𑀸𑀢𑀺 𑀓𑀸𑀴𑀓𑁄𑀓𑀺𑀮𑀸 𑀘𑁂𑀯 𑀲𑀼𑀓𑁆𑀓𑀓𑁄𑀓𑀺𑀮𑀸 𑀘. 𑀲𑀫𑁆𑀧𑀢𑀦𑁆𑀢𑀻𑀢𑀺 𑀤𑁂𑀯𑀢𑀸𑀬 𑀅𑀪𑀺𑀭𑀫𑀡𑀢𑁆𑀣𑀁 𑀓𑀻𑀴𑀦𑁆𑀢𑀸 𑀮𑀴𑀦𑁆𑀢𑀸 𑀲𑀫𑀦𑁆𑀢𑀢𑁄 𑀧𑀢𑀦𑁆𑀢𑀺 𑀯𑀺𑀘𑀭𑀦𑁆𑀢𑀺. 𑀓𑁄𑀜𑁆𑀘𑀸𑀤𑀺𑀭𑀽𑀧𑁂𑀦 𑀳𑀺 𑀤𑁂𑀯𑀢𑀸𑀬 𑀭𑀢𑀺𑀚𑀦𑀦𑀢𑁆𑀣𑀁 𑀧𑀭𑀺𑀯𑀸𑀭𑀪𑀽𑀢𑀸 𑀤𑁂𑀯𑀢𑀸 𑀓𑀻𑀴𑀦𑁆𑀢𑀸 𑀮𑀴𑀦𑁆𑀢𑀸 ‘‘𑀓𑁄𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸. 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀦𑁆𑀢𑀺 𑀕𑀦𑁆𑀣𑀺𑀢𑀸𑀕𑀦𑁆𑀣𑀺𑀢𑁂𑀳𑀺 𑀦𑀸𑀦𑀸𑀯𑀺𑀥𑀭𑀢𑀦𑀓𑀼𑀲𑀼𑀫𑁂𑀳𑀺 𑀑𑀓𑀺𑀡𑁆𑀡𑀁. 𑀭𑀫𑁆𑀫𑀦𑁆𑀢𑀺 𑀭𑀫𑀡𑀻𑀬𑀁, 𑀫𑀦𑁄𑀭𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀘𑀺𑀢𑁆𑀢𑀦𑁆𑀢𑀺 𑀅𑀦𑁂𑀓𑁂𑀳𑀺 𑀉𑀬𑁆𑀬𑀸𑀦𑀓𑀧𑁆𑀧𑀭𑀼𑀓𑁆𑀔𑀧𑁄𑀓𑁆𑀔𑀭𑀡𑀺𑀆𑀤𑀻𑀳𑀺 𑀯𑀺𑀫𑀸𑀦𑁂𑀲𑀼 𑀘 𑀅𑀦𑁂𑀓𑁂𑀳𑀺 𑀪𑀺𑀢𑁆𑀢𑀺𑀯𑀺𑀲𑁂𑀲𑀸𑀤𑀻𑀳𑀺 𑀘𑀺𑀢𑁆𑀢𑀁. 𑀦𑀭𑀦𑀸𑀭𑀺𑀲𑁂𑀯𑀺𑀢𑀦𑁆𑀢𑀺 𑀧𑀭𑀺𑀯𑀸𑀭𑀪𑀽𑀢𑁂𑀳𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀤𑁂𑀯𑀥𑀻𑀢𑀸𑀳𑀺 𑀘 𑀉𑀧𑀲𑁂𑀯𑀺𑀢𑀁.

𑁯𑁪. 𑀇𑀤𑁆𑀥𑀻 𑀯𑀺𑀓𑀼𑀩𑁆𑀩𑀦𑁆𑀢𑀺 𑀅𑀦𑁂𑀓𑀭𑀽𑀧𑀸𑀢𑀺 𑀦𑀸𑀦𑀸𑀭𑀽𑀧𑀸𑀦𑀁 𑀯𑀺𑀤𑀁𑀲𑀦𑁂𑀦 𑀅𑀦𑁂𑀓𑀭𑀽𑀧𑀸 𑀓𑀫𑁆𑀫𑀸𑀦𑀼𑀪𑀸𑀯𑀲𑀺𑀤𑁆𑀥𑀸 𑀇𑀤𑁆𑀥𑀻 𑀯𑀺𑀓𑀼𑀩𑁆𑀩𑀦𑁆𑀢𑀻 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑁄 𑀯𑀮𑀜𑁆𑀚𑁂𑀦𑁆𑀢𑀻 𑀅𑀘𑁆𑀙𑀲𑀻𑀢𑀺 𑀬𑁄𑀚𑀦𑀸.

𑁯𑁭. 𑀅𑀦𑀜𑁆𑀜𑀫𑀦𑀸𑀢𑀺 𑀧𑀢𑀺𑀩𑁆𑀩𑀢𑀸, 𑀧𑀢𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀫𑀦𑁄 𑀏𑀢𑀺𑀲𑁆𑀲𑀸𑀢𑀺 𑀅𑀜𑁆𑀜𑀫𑀦𑀸, 𑀦 𑀅𑀜𑁆𑀜𑀫𑀦𑀸𑀢𑀺 𑀅𑀦𑀜𑁆𑀜𑀫𑀦𑀸, 𑀫𑀬𑁆𑀳𑀁 𑀲𑀸𑀫𑀺𑀓𑀢𑁄 𑀅𑀜𑁆𑀜𑀲𑁆𑀫𑀺𑀁 𑀧𑀼𑀭𑀺𑀲𑁂 𑀧𑀸𑀧𑀓𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀫𑀸𑀢𑀸𑀯 𑀧𑀼𑀢𑁆𑀢𑀁 𑀅𑀦𑀼𑀭𑀓𑁆𑀔𑀫𑀸𑀦𑀸𑀢𑀺 𑀬𑀣𑀸 𑀫𑀸𑀢𑀸 𑀧𑀼𑀢𑁆𑀢𑀁, 𑀏𑀯𑀁 𑀫𑀬𑁆𑀳𑀁 𑀲𑀸𑀫𑀺𑀓𑀁, 𑀲𑀩𑁆𑀩𑁂𑀧𑀺 𑀯𑀸 𑀲𑀢𑁆𑀢𑁂 𑀳𑀺𑀢𑁂𑀲𑀺𑀢𑀸𑀬 𑀅𑀳𑀺𑀢𑀸𑀧𑀦𑀬𑀦𑀓𑀸𑀫𑀢𑀸𑀬 𑀘 𑀅𑀦𑀼𑀤𑁆𑀤𑀬𑀫𑀸𑀦𑀸. 𑀓𑀼𑀤𑁆𑀥𑀸𑀧𑀺𑀳𑀁 𑀦𑀧𑁆𑀨𑀭𑀼𑀲𑀁 𑀅𑀯𑁄𑀘𑀦𑁆𑀢𑀺 𑀧𑀭𑁂𑀦 𑀓𑀢𑀁 𑀅𑀨𑀸𑀲𑀼𑀓𑀁 𑀧𑀝𑀺𑀘𑁆𑀘 𑀓𑀼𑀤𑁆𑀥𑀸𑀧𑀺 𑀲𑀫𑀸𑀦𑀸 𑀅𑀳𑀁 𑀨𑀭𑀼𑀲𑀯𑀘𑀦𑀁 𑀦 𑀓𑀣𑁂𑀲𑀺𑀁, 𑀅𑀜𑁆𑀜𑀤𑀢𑁆𑀣𑀼 𑀧𑀺𑀬𑀯𑀘𑀦𑀫𑁂𑀯 𑀅𑀪𑀸𑀲𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁮. 𑀲𑀘𑁆𑀘𑁂 𑀞𑀺𑀢𑀸𑀢𑀺 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸. 𑀬𑀲𑁆𑀫𑀸 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀺, 𑀦 𑀓𑀤𑀸𑀘𑀺 𑀲𑀘𑁆𑀘𑀯𑀘𑀦𑀫𑀢𑁆𑀢𑁂𑀦𑀸𑀢𑀺 𑀆𑀳 𑁋 𑀫𑁄𑀲𑀯𑀚𑁆𑀚𑀁 𑀧𑀳𑀸𑀬𑀸𑀢𑀺 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬. 𑀤𑀸𑀦𑁂 𑀭𑀢𑀸𑀢𑀺 𑀤𑀸𑀦𑁂 𑀅𑀪𑀺𑀭𑀢𑀸, 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀅𑀢𑁆𑀢𑀸𑀦𑀁 𑀯𑀺𑀬 𑀲𑀪𑀸𑀯𑁂𑀦𑁂𑀯 𑀧𑀭𑁂𑀲𑀁 𑀲𑀗𑁆𑀕𑀡𑁆𑀳𑀦𑀲𑀻𑀮𑀸 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀓𑁆𑀓𑀘𑁆𑀘𑀁 𑀘𑀺𑀢𑁆𑀢𑀻𑀓𑀸𑀭𑁂𑀦 𑀅𑀤𑀸𑀲𑀺𑀁, 𑀅𑀜𑁆𑀜𑀜𑁆𑀘 𑀯𑀢𑁆𑀣𑀸𑀤𑀺𑀤𑀸𑀦𑀁 𑀯𑀺𑀧𑀼𑀮𑀁 𑀉𑀴𑀸𑀭𑀁 𑀅𑀤𑀸𑀲𑀺𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀢𑀺𑀬𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀯𑁂𑀴𑀼𑀭𑀺𑀬𑀣𑀫𑁆𑀪𑀦𑁆𑀢𑀺 𑀤𑀼𑀢𑀺𑀬𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀸 𑀉𑀧𑀸𑀲𑀺𑀓𑀸 𑀧𑀢𑀺𑀩𑁆𑀩𑀢𑀸 𑀳𑀼𑀢𑁆𑀯𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀼𑀯𑀺𑀲𑀼𑀤𑁆𑀥𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀺, 𑀬𑀣𑀸𑀯𑀺𑀪𑀯𑀜𑁆𑀘 𑀤𑀸𑀦𑀸𑀦𑀺 𑀅𑀤𑀸𑀲𑀺, 𑀲𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀚𑁆𑀚𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁦𑁧.

‘‘𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀯𑀺𑀫𑀸𑀦𑀫𑀸𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀁;

𑀢𑀢𑁆𑀣𑀘𑁆𑀙𑀲𑀺 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀉𑀘𑁆𑀘𑀸𑀯𑀘𑀸 𑀇𑀤𑁆𑀥𑀺 𑀯𑀺𑀓𑀼𑀩𑁆𑀩𑀫𑀸𑀦𑀸;

𑀇𑀫𑀸 𑀘 𑀢𑁂 𑀅𑀘𑁆𑀙𑀭𑀸𑀬𑁄 𑀲𑀫𑀦𑁆𑀢𑀢𑁄, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺 𑀘.

𑁧𑁦𑁨.

‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸𑀲𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀼𑀘𑁆𑀙𑀺;

𑁧𑁦𑁩.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁦𑁪.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄 𑀅𑀳𑁄𑀲𑀺𑀁;

𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸 𑀅𑀳𑁄𑀲𑀺𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀺𑀲𑁆𑀲𑀁.

𑁧𑁦𑁫.

‘‘𑀅𑀫𑀚𑁆𑀚𑀧𑀸 𑀦𑁄 𑀘 𑀫𑀼𑀲𑀸 𑀅𑀪𑀸𑀡𑀺𑀁, 𑀲𑀓𑁂𑀦 𑀲𑀸𑀫𑀺𑀦𑀸 𑀅𑀳𑁄𑀲𑀺𑀁 𑀢𑀼𑀝𑁆𑀞𑀸;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁦𑁬.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁦𑁭.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯,

𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀯𑀺𑀲𑁆𑀲𑀚𑁆𑀚𑁂𑀲𑀺;

𑁧𑁦𑁧. 𑀢𑀢𑁆𑀣 𑀯𑁂𑀴𑀼𑀭𑀺𑀬𑀣𑀫𑁆𑀪𑀦𑁆𑀢𑀺 𑀯𑁂𑀴𑀼𑀭𑀺𑀬𑀫𑀡𑀺𑀫𑀬𑀣𑀫𑁆𑀪𑀁. 𑀭𑀼𑀘𑀺𑀭𑀦𑁆𑀢𑀺 𑀭𑀫𑀡𑀻𑀬𑀁. 𑀧𑀪𑀲𑁆𑀲𑀭𑀦𑁆𑀢𑀺 𑀅𑀢𑀺𑀯𑀺𑀬 𑀪𑀸𑀲𑀼𑀭𑀁. 𑀉𑀘𑁆𑀘𑀸𑀯𑀘𑀸𑀢𑀺 𑀉𑀘𑁆𑀘𑀸 𑀘 𑀅𑀯𑀘𑀸 𑀘, 𑀯𑀺𑀯𑀺𑀥𑀸𑀢𑀺 𑀅𑀢𑁆𑀣𑁄.

𑁧𑁦𑁪-𑁫. 𑀉𑀧𑀸𑀲𑀺𑀓𑀸𑀢𑀺 𑀲𑀭𑀡𑀕𑀫𑀦𑁂𑀦 𑀉𑀧𑀸𑀲𑀺𑀓𑀸𑀮𑀓𑁆𑀔𑀡𑁂 𑀞𑀺𑀢𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀘𑀓𑁆𑀔𑀼𑀫𑀢𑁄𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄. 𑀏𑀯𑀁 𑀉𑀧𑀸𑀲𑀺𑀓𑀸𑀪𑀸𑀯𑀓𑀺𑀢𑁆𑀢𑀦𑁂𑀦 𑀆𑀲𑀬𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀬𑁄𑀕𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑁂𑀦 𑀲𑀸𑀫𑀺𑀦𑀸 𑀅𑀳𑁄𑀲𑀺𑀁 𑀢𑀼𑀝𑁆𑀞𑀸𑀢𑀺 𑀫𑀺𑀘𑁆𑀙𑀸𑀘𑀸𑀭𑀸𑀯𑁂𑀭𑀫𑀡𑀺𑀫𑀸𑀳. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀤𑀼𑀢𑀺𑀬𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀞𑀫𑀲𑀼𑀡𑀺𑀲𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀲𑀼𑀡𑀺𑀲𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑁂𑀳𑁂 𑀏𑀓𑀸 𑀓𑀼𑀮𑀲𑀼𑀡𑁆𑀳𑀸 𑀕𑁂𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 ‘‘𑀇𑀤𑀁 𑀫𑀬𑁆𑀳𑀁 𑀉𑀢𑁆𑀢𑀫𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀉𑀧𑀝𑁆𑀞𑀺𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀽𑀯𑀪𑀸𑀕𑀁 𑀆𑀤𑀸𑀬 𑀆𑀤𑀭𑁂𑀦 𑀣𑁂𑀭𑀲𑁆𑀲 𑀉𑀧𑀦𑁂𑀲𑀺, 𑀣𑁂𑀭𑁄 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀢𑁄. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀚𑁆𑀚𑀺. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦𑁮.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁦𑁯.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁧𑁦.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧𑁧.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁧𑁨.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀲𑀼𑀡𑀺𑀲𑀸 𑀅𑀳𑁄𑀲𑀺𑀁 𑀲𑀲𑀼𑀭𑀲𑁆𑀲 𑀕𑁂𑀳𑁂.

𑁧𑁧𑁩.

‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀪𑀺𑀓𑁆𑀔𑀼𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀢𑀲𑁆𑀲 𑀅𑀤𑀸𑀲𑀳𑀁 𑀧𑀽𑀯𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀪𑀸𑀕𑀟𑁆𑀠𑀪𑀸𑀕𑀁 𑀤𑀢𑁆𑀯𑀸𑀦, 𑀫𑁄𑀤𑀸𑀫𑀺 𑀦𑀦𑁆𑀤𑀦𑁂 𑀯𑀦𑁂.

𑁧𑁧𑁪.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁧𑁫.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧𑁨. 𑀢𑀢𑁆𑀣 𑀲𑀼𑀡𑀺𑀲𑀸𑀢𑀺 𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀸. 𑀇𑀢𑁆𑀣𑀺𑀬𑀸 𑀳𑀺 𑀲𑀸𑀫𑀺𑀓𑀲𑁆𑀲 𑀧𑀺𑀢𑀸 ‘‘𑀲𑀲𑀼𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀘 𑀲𑀸 ‘‘𑀲𑀼𑀡𑀺𑀲𑀸’’𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀲𑀼𑀡𑀺𑀲𑀸 𑀅𑀳𑁄𑀲𑀺𑀁 𑀲𑀲𑀼𑀭𑀲𑁆𑀲 𑀕𑁂𑀳𑁂’’𑀢𑀺.

𑁧𑁧𑁩. 𑀪𑀸𑀕𑀟𑁆𑀠𑀪𑀸𑀕𑀦𑁆𑀢𑀺 𑀅𑀢𑁆𑀢𑀦𑀸 𑀮𑀤𑁆𑀥𑀧𑀝𑀺𑀯𑀻𑀲𑀢𑁄 𑀉𑀧𑀟𑁆𑀠𑀪𑀸𑀕𑀁. 𑀫𑁄𑀤𑀸𑀫𑀺 𑀦𑀦𑁆𑀤𑀦𑁂 𑀯𑀦𑁂𑀢𑀺 𑀣𑁂𑀭𑁂𑀦 𑀦𑀦𑁆𑀤𑀦𑀯𑀦𑁂 𑀤𑀺𑀝𑁆𑀞𑀢𑀸𑀬 𑀆𑀳. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀼𑀡𑀺𑀲𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀤𑀼𑀢𑀺𑀬𑀲𑀼𑀡𑀺𑀲𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀤𑀼𑀢𑀺𑀬𑀲𑀼𑀡𑀺𑀲𑀸𑀯𑀺𑀫𑀸𑀦𑀁. 𑀏𑀢𑁆𑀣 𑀧𑀦 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀓𑀼𑀫𑁆𑀫𑀸𑀲𑀤𑀸𑀦𑀫𑁂𑀯 𑀯𑀺𑀲𑁂𑀲𑁄. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁬.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁧𑁭.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁧𑁮.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁧𑁯.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁨𑁦.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀲𑀼𑀡𑀺𑀲𑀸 𑀅𑀳𑁄𑀲𑀺𑀁 𑀲𑀲𑀼𑀭𑀲𑁆𑀲 𑀕𑁂𑀳𑁂.

𑁧𑁨𑁧.

‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀪𑀺𑀓𑁆𑀔𑀼𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀢𑀲𑁆𑀲 𑀅𑀤𑀸𑀲𑀳𑀁 𑀪𑀸𑀕𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀁 𑀤𑀢𑁆𑀯𑀸𑀦, 𑀫𑁄𑀤𑀸𑀫𑀺 𑀦𑀦𑁆𑀤𑀦𑁂 𑀯𑀦𑁂.

𑁧𑁨𑁨.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁨𑁩.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁨𑁧. 𑀢𑀢𑁆𑀣 𑀪𑀸𑀕𑀦𑁆𑀢𑀺 𑀓𑀼𑀫𑁆𑀫𑀸𑀲𑀓𑁄𑀝𑁆𑀞𑀸𑀲𑀁. 𑀢𑁂𑀦𑀸𑀳 ‘‘𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀁 𑀤𑀢𑁆𑀯𑀸𑀦𑀸’’𑀢𑀺. 𑀓𑀼𑀫𑁆𑀫𑀸𑀲𑁄𑀢𑀺 𑀘 𑀬𑀯𑀓𑀼𑀫𑁆𑀫𑀸𑀲𑁄 𑀯𑀼𑀢𑁆𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀲𑀼𑀡𑀺𑀲𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀉𑀢𑁆𑀢𑀭𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀉𑀢𑁆𑀢𑀭𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀘 𑀲𑀫𑀬𑁂𑀦 𑀧𑀼𑀡𑁆𑀡𑁄 𑀦𑀸𑀫 𑀤𑀼𑀕𑁆𑀕𑀢𑀧𑀼𑀭𑀺𑀲𑁄 𑀭𑀸𑀚𑀕𑀳𑀲𑁂𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀢𑀺, 𑀢𑀲𑁆𑀲 𑀪𑀭𑀺𑀬𑀸 𑀉𑀢𑁆𑀢𑀭𑀸, 𑀉𑀢𑁆𑀢𑀭𑀸 𑀘 𑀦𑀸𑀫 𑀥𑀻𑀢𑀸𑀢𑀺 𑀤𑁆𑀯𑁂 𑀏𑀯 𑀕𑁂𑀳𑀫𑀸𑀦𑀼𑀲𑀓𑀸. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀕𑀳𑁂 ‘‘𑀫𑀳𑀸𑀚𑀦𑁂𑀦 𑀲𑀢𑁆𑀢𑀸𑀳𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀩𑁆𑀩’’𑀦𑁆𑀢𑀺 𑀖𑁄𑀲𑀦𑀁 𑀓𑀭𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀧𑀸𑀢𑁄𑀯 𑀆𑀕𑀢𑀁 𑀧𑀼𑀡𑁆𑀡𑀁 ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀧𑀭𑀺𑀚𑀦𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀼𑀓𑀸𑀫𑁄, 𑀢𑁆𑀯𑀁 𑀓𑀺𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀪𑀢𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀦𑀓𑁆𑀔𑀢𑁆𑀢𑀁 𑀦𑀸𑀫 𑀲𑀥𑀦𑀸𑀦𑀁 𑀳𑁄𑀢𑀺, 𑀫𑀫 𑀧𑀦 𑀕𑁂𑀳𑁂 𑀲𑁆𑀯𑀸𑀢𑀦𑀸𑀬 𑀬𑀸𑀕𑀼𑀢𑀡𑁆𑀟𑀼𑀮𑀸𑀦𑀺𑀧𑀺 𑀦𑀢𑁆𑀣𑀺, 𑀓𑀺𑀁 𑀫𑁂 𑀦𑀓𑁆𑀔𑀢𑁆𑀢𑁂𑀦? 𑀕𑁄𑀡𑁂 𑀮𑀪𑀦𑁆𑀢𑁄 𑀓𑀲𑀺𑀢𑀼𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺. ‘‘𑀢𑁂𑀦 𑀳𑀺 𑀕𑁄𑀡𑁂 𑀕𑀡𑁆𑀳𑀲𑁆𑀲𑀽’’𑀢𑀺. 𑀲𑁄 𑀩𑀮𑀯𑀕𑁄𑀡𑁂 𑀘 𑀪𑀤𑁆𑀤𑀦𑀗𑁆𑀕𑀮𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀦𑀸𑀕𑀭𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑀺, 𑀅𑀳𑀁 𑀤𑀮𑀺𑀤𑁆𑀤𑀢𑀸𑀬 𑀪𑀢𑀺𑀁 𑀓𑀸𑀢𑀼𑀁 𑀕𑀫𑀺𑀲𑁆𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀢𑀸𑀯 𑀅𑀚𑁆𑀚 𑀤𑀺𑀕𑀼𑀡𑀁 𑀦𑀺𑀯𑀸𑀧𑀁 𑀧𑀘𑀺𑀢𑁆𑀯𑀸 𑀪𑀢𑁆𑀢𑀁 𑀆𑀳𑀭𑁂𑀬𑁆𑀬𑀸𑀲𑀻’’𑀢𑀺 𑀪𑀭𑀺𑀬𑀁 𑀯𑀢𑁆𑀯𑀸 𑀔𑁂𑀢𑁆𑀢𑀁 𑀅𑀕𑀫𑀸𑀲𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀼𑀡𑁆𑀡𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀲𑀤𑁆𑀥𑁄 𑀦𑀼 𑀔𑁄 𑀏𑀲, 𑀲𑀓𑁆𑀔𑀺𑀲𑁆𑀲𑀢𑀺 𑀯𑀸 𑀫𑁂 𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑀤𑁆𑀥𑀪𑀸𑀯𑀜𑁆𑀘 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑀜𑁆𑀘 𑀢𑀧𑁆𑀧𑀘𑁆𑀘𑀬𑀸 𑀘 𑀢𑀲𑁆𑀲 𑀫𑀳𑀸𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀁 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀯𑀸𑀝𑀢𑀻𑀭𑁂 𑀏𑀓𑀁 𑀕𑀼𑀫𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀧𑀼𑀡𑁆𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀓𑀲𑀺𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀤𑀦𑁆𑀢𑀓𑀝𑁆𑀞𑁂𑀦 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀦𑁆𑀢𑀓𑀝𑁆𑀞𑀁 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀅𑀣𑀲𑁆𑀲 𑀣𑁂𑀭𑁄 𑀧𑀢𑁆𑀢𑀜𑁆𑀘 𑀧𑀭𑀺𑀲𑁆𑀲𑀸𑀯𑀦𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 ‘‘𑀧𑀸𑀦𑀻𑀬𑁂𑀦 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀆𑀤𑀸𑀬 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺.

𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀭𑁂𑀲𑀁 𑀧𑀘𑁆𑀙𑀺𑀫𑀕𑁂𑀳𑁂 𑀯𑀲𑀢𑀺, 𑀲𑀘𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀫𑀺𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀪𑀭𑀺𑀬𑀸 𑀫𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀬𑀸𑀯𑀲𑁆𑀲 𑀪𑀭𑀺𑀬𑀸 𑀪𑀢𑁆𑀢𑀁 𑀆𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀸𑀯 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁆𑀣𑁂𑀯 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲𑀸 𑀫𑀕𑁆𑀕𑀸𑀭𑀼𑀴𑁆𑀳𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀧𑁆𑀧𑁂𑀓𑀤𑀸𑀳𑀁 𑀤𑁂𑀬𑁆𑀬𑀥𑀫𑁆𑀫𑁂 𑀲𑀢𑀺 𑀅𑀬𑁆𑀬𑀁 𑀦 𑀧𑀲𑁆𑀲𑀸𑀫𑀺, 𑀅𑀧𑁆𑀧𑁂𑀓𑀤𑀸 𑀫𑁂 𑀅𑀬𑁆𑀬𑀁 𑀧𑀲𑁆𑀲𑀦𑁆𑀢𑀺𑀬𑀸 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀳𑁄𑀢𑀺, 𑀅𑀚𑁆𑀚 𑀧𑀦 𑀫𑁂 𑀅𑀬𑁆𑀬𑁄 𑀘 𑀤𑀺𑀝𑁆𑀞𑁄, 𑀤𑁂𑀬𑁆𑀬𑀥𑀫𑁆𑀫𑁄 𑀘𑀸𑀬𑀁 𑀅𑀢𑁆𑀣𑀺, 𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑀗𑁆𑀕𑀳’’𑀦𑁆𑀢𑀺. 𑀲𑀸 𑀪𑀢𑁆𑀢𑀪𑀸𑀚𑀦𑀁 𑀑𑀢𑀸𑀭𑁂𑀢𑁆𑀯𑀸 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀤𑀁 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀤𑀸𑀲𑀲𑁆𑀲 𑀯𑁄 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀣𑁂𑀭𑁄 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀢𑀸𑀬 𑀏𑀓𑁂𑀦 𑀳𑀢𑁆𑀣𑁂𑀦 𑀪𑀸𑀚𑀦𑀁 𑀥𑀸𑀭𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀢𑀢𑁄 𑀪𑀢𑁆𑀢𑀁 𑀤𑀤𑀫𑀸𑀦𑀸𑀬 𑀉𑀧𑀟𑁆𑀠𑀪𑀢𑁆𑀢𑁂 𑀤𑀺𑀦𑁆𑀦𑁂 ‘‘𑀅𑀮’’𑀦𑁆𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀲𑀸 ‘‘𑀪𑀦𑁆𑀢𑁂, 𑀏𑀓𑁄𑀯 𑀧𑀝𑀺𑀯𑀻𑀲𑁄, 𑀦 𑀲𑀓𑁆𑀓𑀸 𑀤𑁆𑀯𑀺𑀥𑀸 𑀓𑀸𑀢𑀼𑀁, 𑀢𑀼𑀫𑁆𑀳𑀸𑀓𑀁 𑀤𑀸𑀲𑀲𑁆𑀲 𑀇𑀥𑀮𑁄𑀓𑀲𑀗𑁆𑀕𑀳𑀁 𑀅𑀓𑀢𑁆𑀯𑀸 𑀧𑀭𑀮𑁄𑀓𑀲𑀗𑁆𑀕𑀳𑀁 𑀓𑀭𑁄𑀣, 𑀦𑀺𑀭𑀯𑀲𑁂𑀲𑀫𑁂𑀯 𑀤𑀸𑀢𑀼𑀓𑀸𑀫𑀸𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀫𑁂𑀯𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀪𑀸𑀕𑀺𑀦𑀻 𑀅𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀣𑁂𑀭𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀞𑀺𑀢𑀓𑁄𑀯 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀲𑀸𑀧𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀡𑁆𑀟𑀼𑀮𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺.

𑀧𑀼𑀡𑁆𑀡𑁄𑀧𑀺 𑀅𑀟𑁆𑀠𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀓𑀲𑀺𑀢𑁆𑀯𑀸 𑀚𑀺𑀖𑀘𑁆𑀙𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑁄𑀡𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀁 𑀭𑀼𑀓𑁆𑀔𑀙𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀪𑀢𑁆𑀢𑀫𑀸𑀤𑀸𑀬 𑀕𑀘𑁆𑀙𑀫𑀸𑀦𑀸 𑀢𑀁 𑀤𑀺𑀲𑁆𑀯𑀸𑀯 ‘‘𑀏𑀲 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀫𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄, 𑀲𑀘𑁂 𑀫𑀁 ‘𑀅𑀢𑀺𑀯𑀺𑀬 𑀘𑀺𑀭𑀸𑀬𑀻’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑀢𑁄𑀤𑀮𑀝𑁆𑀞𑀺𑀬𑀸 𑀧𑀳𑀭𑀺𑀲𑁆𑀲𑀢𑀺, 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀺𑀭𑀢𑁆𑀣𑀓𑀁 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀓𑀘𑁆𑀘𑁂𑀯𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀲𑀸𑀫𑀺, 𑀅𑀚𑁆𑀚𑁂𑀓𑀤𑀺𑀯𑀲𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀫𑀸 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀺𑀭𑀢𑁆𑀣𑀓𑀁 𑀓𑀭𑀺, 𑀅𑀳𑀁 𑀧𑀸𑀢𑁄𑀯 𑀢𑁂 𑀪𑀢𑁆𑀢𑀁 𑀆𑀳𑀭𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀤𑀺𑀲𑁆𑀯𑀸 𑀢𑀯 𑀪𑀢𑁆𑀢𑀁 𑀢𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀆𑀕𑀢𑀸, 𑀧𑀲𑀸𑀤𑁂𑀳𑀺, 𑀲𑀸𑀫𑀺, 𑀘𑀺𑀢𑁆𑀢’’𑀦𑁆𑀢𑀺. 𑀲𑁄 ‘‘𑀓𑀺𑀁 𑀯𑀤𑁂𑀲𑀺, 𑀪𑀤𑁆𑀤𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀪𑀤𑁆𑀤𑁂, 𑀲𑀸𑀥𑀼 𑀯𑀢 𑀢𑁂 𑀓𑀢𑀁 𑀫𑀫 𑀪𑀢𑁆𑀢𑀁 𑀅𑀬𑁆𑀬𑀲𑁆𑀲 𑀤𑀤𑀫𑀸𑀦𑀸𑀬, 𑀫𑀬𑀸𑀧𑀺𑀲𑁆𑀲 𑀅𑀚𑁆𑀚 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦’’𑀦𑁆𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀢𑀁 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀉𑀲𑁆𑀲𑀽𑀭𑁂 𑀮𑀤𑁆𑀥𑀪𑀢𑁆𑀢𑀢𑀸𑀬 𑀓𑀺𑀮𑀦𑁆𑀢𑀓𑀸𑀬𑁄 𑀢𑀲𑁆𑀲𑀸 𑀅𑀗𑁆𑀓𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀅𑀣𑀲𑁆𑀲 𑀧𑀸𑀢𑁄𑀯 𑀓𑀲𑀺𑀢𑀝𑁆𑀞𑀸𑀦𑀁 𑀧𑀁𑀲𑀼𑀘𑀼𑀡𑁆𑀡𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀭𑀢𑁆𑀢𑀲𑀼𑀯𑀡𑁆𑀡𑀁 𑀳𑀼𑀢𑁆𑀯𑀸 𑀓𑀡𑀺𑀓𑀸𑀭𑀧𑀼𑀧𑁆𑀨𑀭𑀸𑀲𑀺 𑀯𑀺𑀬 𑀲𑁄𑀪𑀫𑀸𑀦𑀁 𑀅𑀝𑁆𑀞𑀸𑀲𑀺. 𑀲𑁄 𑀧𑀩𑀼𑀤𑁆𑀥𑁄 𑀑𑀮𑁄𑀓𑁂𑀢𑁆𑀯𑀸 𑀪𑀭𑀺𑀬𑀁 𑀆𑀳 ‘‘𑀪𑀤𑁆𑀤𑁂, 𑀏𑀢𑀁 𑀫𑀬𑀸 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀫𑀫 𑀲𑀼𑀯𑀡𑁆𑀡𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀫𑁂 𑀅𑀢𑀺𑀉𑀲𑁆𑀲𑀽𑀭𑁂 𑀮𑀤𑁆𑀥𑀪𑀢𑁆𑀢𑀢𑀸𑀬 𑀅𑀓𑁆𑀔𑀻𑀦𑀺 𑀪𑀫𑀦𑁆𑀢𑀻’’𑀢𑀺. ‘‘𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀏𑀯𑀫𑁂𑀯 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑁄 𑀉𑀝𑁆𑀞𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀲𑀻𑀲𑁂 𑀧𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀳𑁄 𑀅𑀬𑁆𑀬𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀤𑀺𑀦𑁆𑀦𑀤𑀸𑀦𑁂 𑀅𑀚𑁆𑀚𑁂𑀯 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄, 𑀦 𑀔𑁄 𑀧𑀦 𑀲𑀓𑁆𑀓𑀸 𑀏𑀢𑁆𑀢𑀓𑀁 𑀥𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀪𑀭𑀺𑀬𑀸𑀬 𑀆𑀪𑀢𑀁 𑀪𑀢𑁆𑀢𑀧𑀸𑀢𑀺𑀁 𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀓𑀢𑁄𑀓𑀸𑀲𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀅𑀚𑁆𑀚 𑀫𑀬𑀸 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀲𑀼𑀯𑀡𑁆𑀡𑀭𑀸𑀲𑀺𑀫𑁂𑀯 𑀳𑀼𑀢𑁆𑀯𑀸 𑀞𑀺𑀢𑀁, 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀧𑀼𑀡𑁆𑀡𑁄 𑀦𑀸𑀫𑀸𑀳’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁂 𑀅𑀚𑁆𑀚 𑀓𑀢’’𑀦𑁆𑀢𑀺? ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀫𑁂 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦𑀁, 𑀪𑀭𑀺𑀬𑀸𑀬𑀧𑀺 𑀫𑁂 𑀫𑀬𑁆𑀳𑀁 𑀆𑀳𑀝𑀪𑀢𑁆𑀢𑀁 𑀢𑀲𑁆𑀲𑁂𑀯 𑀤𑀺𑀦𑁆𑀦’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀚𑁆𑀚𑁂𑀯 𑀓𑀺𑀭 𑀪𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀤𑀺𑀦𑁆𑀦𑀤𑀸𑀦𑁂 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀸𑀢, 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑀳𑀽𑀦𑀺 𑀲𑀓𑀝𑀲𑀳𑀲𑁆𑀲𑀸𑀦𑀺 𑀧𑀳𑀺𑀡𑀺𑀢𑁆𑀯𑀸 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀲𑀓𑀝𑀸𑀦𑀺 𑀧𑀳𑀺𑀡𑀺. 𑀭𑀸𑀚𑀧𑀼𑀭𑀺𑀲𑁂𑀲𑀼 ‘‘𑀭𑀜𑁆𑀜𑁄 𑀲𑀦𑁆𑀢𑀓’’𑀦𑁆𑀢𑀺 𑀕𑀡𑁆𑀳𑀦𑁆𑀢𑁂𑀲𑀼 𑀕𑀳𑀺𑀢𑀁 𑀕𑀳𑀺𑀢𑀁 𑀫𑀢𑁆𑀢𑀺𑀓𑀸𑀯 𑀳𑁄𑀢𑀺. 𑀢𑁂𑀳𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀺𑀢𑁂 ‘‘𑀢𑀸𑀢𑀸, 𑀢𑀼𑀫𑁆𑀳𑁂𑀳𑀺 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀕𑀳𑀺𑀢’’𑀦𑁆𑀢𑀺 𑀧𑀼𑀝𑁆𑀞𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺, 𑀢𑀸𑀢𑀸, 𑀧𑀼𑀦 𑀕𑀘𑁆𑀙𑀣, ‘‘𑀧𑀼𑀡𑁆𑀡𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀯𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼 𑀕𑀳𑀺𑀢𑀁 𑀕𑀳𑀺𑀢𑀁 𑀲𑀼𑀯𑀡𑁆𑀡𑀫𑁂𑀯 𑀅𑀳𑁄𑀲𑀺. 𑀢𑀁 𑀲𑀩𑁆𑀩𑀁 𑀆𑀳𑀭𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀁 𑀅𑀓𑀁𑀲𑀼, 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀭𑀸𑀲𑀺 𑀅𑀳𑁄𑀲𑀺. 𑀭𑀸𑀚𑀸 𑀦𑀸𑀕𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀳 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀢𑁆𑀣𑀺 𑀓𑀲𑁆𑀲𑀘𑀺 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡’’𑀦𑁆𑀢𑀺? ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀧𑀦𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀩𑀳𑀼𑀥𑀦𑀲𑁂𑀝𑁆𑀞𑀺 𑀦𑀸𑀫 𑀳𑁄𑀢𑀽’’𑀢𑀺 𑀫𑀳𑀦𑁆𑀢𑁂𑀦 𑀪𑁄𑀕𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁 𑀅𑀤𑀸𑀲𑀺.

𑀅𑀣 𑀦𑀁 𑀲𑁄 𑀆𑀳 ‘‘𑀫𑀬𑀁, 𑀤𑁂𑀯, 𑀏𑀢𑁆𑀢𑀓𑀁 𑀓𑀸𑀮𑀁 𑀧𑀭𑀓𑀼𑀮𑁂 𑀯𑀲𑀺𑀫𑁆𑀳𑀸, 𑀯𑀲𑀦𑀝𑁆𑀞𑀸𑀦𑀁 𑀦𑁄 𑀤𑁂𑀣𑀸’’𑀢𑀺. 𑀢𑁂𑀦 𑀳𑀺 𑀧𑀲𑁆𑀲, 𑀏𑀲 𑀕𑀼𑀫𑁆𑀩𑁄 𑀧𑀜𑁆𑀜𑀸𑀬𑀢𑀺, 𑀏𑀢𑀁 𑀳𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀓𑀸𑀭𑁂𑀳𑀻𑀢𑀺 𑀧𑀼𑀭𑀸𑀡𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀢𑀺𑀧𑀸𑀳𑁂𑀦𑁂𑀯 𑀕𑁂𑀳𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑁂𑀳𑀧𑀯𑁂𑀲𑀦𑀫𑀗𑁆𑀕𑀮𑀜𑁆𑀘 𑀙𑀢𑁆𑀢𑀫𑀗𑁆𑀕𑀮𑀜𑁆𑀘 𑀏𑀓𑀢𑁄𑀯 𑀓𑀭𑁄𑀦𑁆𑀢𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀅𑀤𑀸𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀤𑀸𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀧𑀼𑀡𑁆𑀡𑀲𑁂𑀝𑁆𑀞𑀺 𑀘 𑀪𑀭𑀺𑀬𑀸 𑀘𑀲𑁆𑀲 𑀥𑀻𑀢𑀸 𑀘 𑀉𑀢𑁆𑀢𑀭𑀸𑀢𑀺 𑀢𑀬𑁄𑀧𑀺 𑀚𑀦𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁.

𑀅𑀧𑀭𑀪𑀸𑀕𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 𑀧𑀼𑀡𑁆𑀡𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀯𑀸𑀭𑁂𑀲𑀺. 𑀲𑁄 ‘‘𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁄 ‘‘𑀫𑀸 𑀏𑀯𑀁 𑀓𑀭𑁄𑀢𑀼, 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀦𑁂𑀯 𑀢𑁂 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸, 𑀤𑁂𑀢𑀼 𑀫𑁂 𑀧𑀼𑀢𑁆𑀢𑀲𑁆𑀲 𑀢𑁂 𑀥𑀻𑀢𑀭’’𑀦𑁆𑀢𑀺 𑀆𑀳. 𑀲𑁄 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀢𑀼𑀫𑁆𑀳𑁂, 𑀫𑀫 𑀥𑀻𑀢𑀸 𑀢𑀻𑀳𑀺 𑀭𑀢𑀦𑁂𑀳𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑁂𑀯𑀲𑁆𑀲 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀩𑀳𑀽 𑀲𑁂𑀝𑁆𑀞𑀺𑀕𑀳𑀧𑀢𑀺𑀓𑀸𑀤𑀬𑁄 𑀓𑀼𑀮𑀧𑀼𑀢𑁆𑀢𑀸 ‘‘𑀫𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀪𑀺𑀦𑁆𑀤𑀺, 𑀤𑁂𑀳𑀺𑀲𑁆𑀲 𑀥𑀻𑀢𑀭’’𑀦𑁆𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀥𑀻𑀢𑀭𑀁 𑀅𑀤𑀸𑀲𑀺. 𑀲𑀸 𑀧𑀢𑀺𑀓𑀼𑀮𑀁 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑀼𑀁 𑀤𑀸𑀦𑀁 𑀯𑀸 𑀤𑀸𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀦𑀸𑀮𑀢𑁆𑀣, 𑀏𑀯𑀁 𑀅𑀟𑁆𑀠𑀢𑀺𑀬𑁂𑀲𑀼 𑀫𑀸𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀺𑀢𑁂 𑀧𑀭𑀺𑀘𑀸𑀭𑀺𑀓𑁂 𑀧𑀼𑀘𑁆𑀙𑀺 ‘‘𑀇𑀤𑀸𑀦𑀺 𑀓𑀺𑀢𑁆𑀢𑀓𑀁 𑀅𑀦𑁆𑀢𑁄𑀯𑀲𑁆𑀲𑀁 𑀅𑀯𑀲𑀺𑀝𑁆𑀞’’𑀦𑁆𑀢𑀺? ‘‘𑀅𑀟𑁆𑀠𑀫𑀸𑀲𑁄, 𑀅𑀬𑁆𑀬𑁂’’𑀢𑀺. 𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀓𑀲𑁆𑀫𑀸 𑀫𑀁 𑀏𑀯𑀭𑀽𑀧𑁂 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀺𑀁𑀲𑀼, 𑀯𑀭𑀁 𑀢𑀼𑀫𑁆𑀳𑁂𑀳𑀺 𑀫𑀁 𑀮𑀓𑁆𑀔𑀡𑀸𑀳𑀢𑀁 𑀓𑀢𑁆𑀯𑀸 𑀧𑀭𑁂𑀲𑀁 𑀤𑀸𑀲𑀺𑀁 𑀲𑀸𑀯𑁂𑀢𑀼𑀁, 𑀦 𑀏𑀯𑀭𑀽𑀧𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀓𑀼𑀮𑀲𑁆𑀲 𑀤𑀸𑀢𑀼𑀁, 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀤𑀲𑁆𑀲𑀦𑀸𑀤𑀻𑀲𑀼 𑀏𑀓𑀫𑁆𑀧𑀺 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀦 𑀮𑀪𑀸𑀫𑀻’’𑀢𑀺. 𑀅𑀣𑀲𑁆𑀲𑀸 𑀧𑀺𑀢𑀸 ‘‘𑀤𑀼𑀓𑁆𑀔𑀺𑀢𑀸 𑀯𑀢 𑀫𑁂 𑀥𑀻𑀢𑀸’’𑀢𑀺 𑀅𑀦𑀢𑁆𑀢𑀫𑀦𑀢𑀁 𑀧𑀯𑁂𑀤𑁂𑀢𑁆𑀯𑀸 𑀧𑀜𑁆𑀘𑀤𑀲 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺, ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑀺𑀭𑀺𑀫𑀸 𑀦𑀸𑀫 𑀕𑀡𑀺𑀓𑀸 𑀅𑀢𑁆𑀣𑀺, 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀢𑀺, 𑀇𑀫𑁂𑀳𑀺 𑀓𑀳𑀸𑀧𑀡𑁂𑀳𑀺 𑀢𑀁 𑀆𑀦𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀲𑀬𑀁 𑀬𑀣𑀸𑀭𑀼𑀘𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀽’’𑀢𑀺 𑀲𑀸𑀲𑀦𑀜𑁆𑀘 𑀧𑀳𑀺𑀡𑀺. 𑀉𑀢𑁆𑀢𑀭𑀸 𑀢𑀣𑀸 𑀓𑀢𑁆𑀯𑀸 𑀲𑀸𑀫𑀺𑀓𑁂𑀦 𑀲𑀺𑀭𑀺𑀫𑀁 𑀤𑀺𑀲𑁆𑀯𑀸 ‘‘𑀓𑀺𑀫𑀺𑀤’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀫𑀺, 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀫𑀫 𑀲𑀳𑀸𑀬𑀺𑀓𑀸 𑀢𑀼𑀫𑁆𑀳𑁂 𑀧𑀭𑀺𑀘𑀭𑀢𑀼, 𑀅𑀳𑀁 𑀧𑀦 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀤𑀸𑀦𑀜𑁆𑀘𑁂𑀯 𑀤𑀸𑀢𑀼𑀓𑀸𑀫𑀸 𑀥𑀫𑁆𑀫𑀜𑁆𑀘 𑀲𑁄𑀢𑀼𑀓𑀸𑀫𑀸’’𑀢𑀺 𑀆𑀳. 𑀲𑁄 𑀢𑀁 𑀅𑀪𑀺𑀭𑀽𑀧𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀉𑀢𑁆𑀢𑀭𑀸𑀧𑀺 𑀔𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀲𑀢𑁆𑀣𑀼 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀧𑀯𑀸𑀭𑀡𑀸, 𑀢𑀸𑀯 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀏𑀯𑀁 𑀬𑀸𑀕𑀼𑀁 𑀧𑀘𑀣, 𑀏𑀯𑀁 𑀪𑀢𑁆𑀢𑀁 𑀧𑀘𑀣, 𑀏𑀯𑀁 𑀧𑀽𑀯𑀁 𑀧𑀘𑀣𑀸’’𑀢𑀺 𑀫𑀳𑀸𑀦𑀲𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀁𑀯𑀺𑀤𑀳𑀦𑁆𑀢𑀻 𑀯𑀺𑀘𑀭𑀢𑀺. 𑀅𑀣𑀲𑁆𑀲𑀸 𑀲𑀸𑀫𑀺𑀓𑁄 ‘‘𑀲𑁆𑀯𑁂 𑀫𑀳𑀸𑀧𑀯𑀸𑀭𑀡𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀦𑀲𑀸𑀪𑀺𑀫𑀼𑀔𑁄 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀭𑁄𑀦𑁆𑀢𑀻 𑀲𑀸 𑀅𑀦𑁆𑀥𑀩𑀸𑀮𑀸 𑀯𑀺𑀘𑀭𑀢𑀻’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀲𑁂𑀤𑀓𑀺𑀮𑀺𑀦𑁆𑀦𑀁 𑀙𑀸𑀭𑀺𑀓𑀸𑀬 𑀑𑀓𑀺𑀡𑁆𑀡𑀁 𑀅𑀗𑁆𑀕𑀸𑀭𑀫𑀲𑀺𑀫𑀓𑁆𑀔𑀺𑀢𑀁 𑀢𑀣𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀯𑀺𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀦𑁆𑀥𑀩𑀸𑀮𑀸 𑀏𑀯𑀭𑀽𑀧𑁂 𑀞𑀸𑀦𑁂 𑀇𑀫𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀦𑀸𑀦𑀼𑀪𑀯𑀢𑀺, ‘‘𑀫𑀼𑀡𑁆𑀟𑀓𑀲𑀫𑀡𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀘𑀭𑀢𑀻’’𑀢𑀺 𑀳𑀲𑀺𑀢𑁆𑀯𑀸 𑀅𑀧𑀕𑀜𑁆𑀙𑀺.

𑀢𑀲𑁆𑀫𑀺𑀁 𑀅𑀧𑀕𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸 𑀲𑀺𑀭𑀺𑀫𑀸 ‘‘𑀓𑀺𑀁 𑀦𑀼 𑀔𑁄 𑀑𑀮𑁄𑀓𑁂𑀢𑁆𑀯𑀸 𑀏𑀲 𑀳𑀲𑀢𑀻’’𑀢𑀺 𑀢𑁂𑀦𑁂𑀯 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑀻 𑀉𑀢𑁆𑀢𑀭𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀑𑀮𑁄𑀓𑁂𑀢𑁆𑀯𑀸 𑀇𑀫𑀺𑀦𑀸 𑀳𑀲𑀺𑀢𑀁, 𑀅𑀤𑁆𑀥𑀸 𑀇𑀫𑀲𑁆𑀲 𑀏𑀢𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑁄 𑀅𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀸 𑀓𑀺𑀭 𑀅𑀟𑁆𑀠𑀫𑀸𑀲𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀩𑀸𑀳𑀺𑀭𑀓𑀇𑀢𑁆𑀣𑀻 𑀳𑀼𑀢𑁆𑀯𑀸 𑀯𑀲𑀫𑀸𑀦𑀸𑀧𑀺 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀸 𑀅𑀢𑁆𑀢𑀦𑁄 𑀩𑀸𑀳𑀺𑀭𑀓𑀇𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀅𑀳𑀁 𑀖𑀭𑀲𑀸𑀫𑀺𑀦𑀻’’𑀢𑀺 𑀲𑀜𑁆𑀜𑀫𑀓𑀸𑀲𑀺. 𑀲𑀸 𑀉𑀢𑁆𑀢𑀭𑀸𑀬 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀤𑀼𑀓𑁆𑀔𑀫𑀲𑁆𑀲𑀸 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀫𑀳𑀸𑀦𑀲𑀁 𑀧𑀯𑀺𑀲𑀺𑀢𑁆𑀯𑀸 𑀧𑀽𑀯𑀧𑀘𑀦𑀝𑁆𑀞𑀸𑀦𑁂 𑀧𑀓𑁆𑀓𑀼𑀣𑀺𑀢𑀁 𑀲𑀧𑁆𑀧𑀺𑀁 𑀓𑀝𑀘𑁆𑀙𑀼𑀦𑀸 𑀆𑀤𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀧𑀸𑀬𑀸𑀲𑀺. 𑀉𑀢𑁆𑀢𑀭𑀸 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀫𑀫 𑀲𑀳𑀸𑀬𑀺𑀓𑀸𑀬 𑀫𑀬𑁆𑀳𑀁 𑀉𑀧𑀓𑀸𑀭𑁄 𑀓𑀢𑁄, 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄, 𑀫𑀫 𑀧𑀦 𑀲𑀳𑀸𑀬𑀺𑀓𑀸𑀬 𑀕𑀼𑀡𑁄𑀯 𑀫𑀳𑀦𑁆𑀢𑁄, 𑀅𑀳𑀫𑁆𑀧𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀪𑀺𑀁, 𑀲𑀘𑁂 𑀫𑀫 𑀏𑀢𑀺𑀲𑁆𑀲𑀸𑀬 𑀉𑀧𑀭𑀺 𑀓𑁄𑀥𑁄 𑀅𑀢𑁆𑀣𑀺, 𑀇𑀤𑀁 𑀲𑀧𑁆𑀧𑀺 𑀫𑀁 𑀤𑀳𑀢𑀼, 𑀲𑀘𑁂 𑀦𑀢𑁆𑀣𑀺, 𑀫𑀸 𑀫𑀁 𑀤𑀳𑀢𑀽’’𑀢𑀺 𑀢𑀁 𑀫𑁂𑀢𑁆𑀢𑀸𑀬 𑀨𑀭𑀺. 𑀢𑀸𑀬 𑀢𑀲𑁆𑀲𑀸 𑀫𑀢𑁆𑀣𑀓𑁂 𑀆𑀲𑀺𑀜𑁆𑀘𑀺𑀢𑀫𑁆𑀧𑀺 𑀧𑀓𑁆𑀓𑀼𑀣𑀺𑀢𑀲𑀧𑁆𑀧𑀺 𑀲𑀻𑀢𑁄𑀤𑀓𑀁 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 ‘‘𑀇𑀤𑀁 𑀲𑀻𑀢𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀓𑀝𑀘𑁆𑀙𑀼𑀓𑀁 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑀺𑀁 𑀉𑀢𑁆𑀢𑀭𑀸𑀬 𑀤𑀸𑀲𑀺𑀬𑁄 𑀤𑀺𑀲𑁆𑀯𑀸 ‘‘𑀅𑀭𑁂 𑀤𑀼𑀩𑁆𑀩𑀺𑀦𑀻𑀢𑁂 𑀦 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀉𑀧𑀭𑀺 𑀧𑀓𑁆𑀓𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀉𑀝𑁆𑀞𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑁄𑀣𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀼𑀁, 𑀉𑀢𑁆𑀢𑀭𑀸 𑀯𑀸𑀭𑁂𑀦𑁆𑀢𑀻𑀧𑀺 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀲𑀸 𑀉𑀧𑀭𑀺 𑀞𑀢𑁆𑀯𑀸 𑀲𑀩𑁆𑀩𑀸 𑀤𑀸𑀲𑀺𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀓𑀺𑀲𑁆𑀲 𑀢𑁂 𑀏𑀯𑀭𑀽𑀧𑀁 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀲𑀺𑀭𑀺𑀫𑀁 𑀑𑀯𑀤𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀅𑀢𑁆𑀢𑀦𑁄 𑀩𑀸𑀳𑀺𑀭𑀓𑀺𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀫𑀺𑀓𑀲𑁆𑀲 𑀳𑀲𑀺𑀢𑀫𑀢𑁆𑀢𑀓𑀸𑀭𑀡𑀸 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀧𑀓𑁆𑀓𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀦𑁆𑀢𑀺𑀬𑀸, 𑀅𑀬𑀁 ‘𑀕𑀡𑁆𑀳𑀣 𑀦’𑀦𑁆𑀢𑀺 𑀤𑀸𑀲𑀺𑀬𑁄 𑀦 𑀆𑀡𑀸𑀧𑁂𑀢𑁆𑀯𑀸 𑀫𑀁 𑀯𑀺𑀳𑁂𑀞𑀦𑀓𑀸𑀮𑁂𑀧𑀺 𑀲𑀩𑁆𑀩𑀸 𑀤𑀸𑀲𑀺𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 𑀫𑀬𑁆𑀳𑀁 𑀓𑀢𑁆𑀢𑀩𑁆𑀩𑀫𑁂𑀯 𑀅𑀓𑀸𑀲𑀺. 𑀲𑀘𑀸𑀳𑀁 𑀇𑀫𑀁 𑀦 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀫𑀼𑀤𑁆𑀥𑀸 𑀫𑁂 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬𑀸’’𑀢𑀺 𑀢𑀲𑁆𑀲𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀬𑁆𑀬𑁂, 𑀔𑀫𑀸𑀳𑀺 𑀫𑁂 𑀤𑁄𑀲’’𑀦𑁆𑀢𑀺 𑀆𑀳. ‘‘𑀅𑀳𑀁 𑀲𑀧𑁆𑀧𑀺𑀢𑀺𑀓𑀸 𑀥𑀻𑀢𑀸, 𑀧𑀺𑀢𑀭𑀺 𑀫𑁂 𑀔𑀫𑀸𑀧𑀺𑀢𑁂 𑀔𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀳𑁄𑀢𑀼, 𑀅𑀬𑁆𑀬𑁂, 𑀧𑀺𑀢𑀭𑀫𑁆𑀧𑀺 𑀢𑁂 𑀧𑀼𑀡𑁆𑀡𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀧𑀼𑀡𑁆𑀡𑁄 𑀫𑀫 𑀯𑀝𑁆𑀝𑁂 𑀚𑀦𑀓𑀧𑀺𑀢𑀸, 𑀯𑀺𑀯𑀝𑁆𑀝𑁂 𑀚𑀦𑀓𑀧𑀺𑀢𑀭𑀺 𑀔𑀫𑀸𑀧𑀺𑀢𑁂 𑀧𑀦 𑀅𑀳𑀁 𑀔𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑁄 𑀧𑀦 𑀢𑁂 𑀯𑀺𑀯𑀝𑁆𑀝𑁂 𑀚𑀦𑀓𑀧𑀺𑀢𑀸’’𑀢𑀺? ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. ‘‘𑀫𑀬𑁆𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀺, 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀲𑀢𑁆𑀣𑀸 𑀲𑁆𑀯𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀇𑀥𑀸𑀕𑀫𑀺𑀲𑁆𑀲𑀢𑀺, 𑀢𑁆𑀯𑀁 𑀬𑀣𑀸𑀮𑀤𑁆𑀥𑀁 𑀲𑀓𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀆𑀕𑀦𑁆𑀢𑁆𑀯𑀸 𑀢𑀁 𑀔𑀫𑀸𑀧𑁂𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀉𑀝𑁆𑀞𑀸𑀬 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀢𑀧𑀭𑀺𑀘𑀸𑀭𑀺𑀓𑀺𑀢𑁆𑀣𑀺𑀬𑁄 𑀆𑀡𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀘𑁂𑀯 𑀲𑀽𑀧𑁂𑀬𑁆𑀬𑀸𑀦𑀺 𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀁 𑀲𑀓𑁆𑀓𑀸𑀭𑀁 𑀆𑀤𑀸𑀬 𑀉𑀢𑁆𑀢𑀭𑀸𑀬 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀅𑀝𑁆𑀞𑀸𑀲𑀺, 𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀸𑀯 𑀲𑀁𑀯𑀺𑀤𑀳𑀺.

𑀲𑀺𑀭𑀺𑀫𑀸𑀧𑀺 𑀲𑀢𑁆𑀣𑀼 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀤𑁆𑀥𑀺𑀁 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 ‘‘𑀓𑁄 𑀢𑁂 𑀅𑀧𑀭𑀸𑀥𑁄’’𑀢𑀺. ‘‘𑀪𑀦𑁆𑀢𑁂 𑀫𑀬𑀸 𑀳𑀺𑀬𑁆𑀬𑁄 𑀇𑀤𑀁 𑀦𑀸𑀫 𑀓𑀢𑀁, 𑀅𑀣 𑀫𑁂 𑀲𑀳𑀸𑀬𑀺𑀓𑀸 𑀫𑀁 𑀯𑀺𑀳𑁂𑀞𑀬𑀫𑀸𑀦𑀸 𑀤𑀸𑀲𑀺𑀬𑁄 𑀦𑀺𑀯𑀸𑀭𑁂𑀢𑁆𑀯𑀸 𑀫𑀬𑁆𑀳𑀁 𑀉𑀧𑀓𑀸𑀭𑀫𑁂𑀯 𑀅𑀓𑀸𑀲𑀺. 𑀲𑀸𑀳𑀁 𑀇𑀫𑀺𑀲𑁆𑀲𑀸 𑀕𑀼𑀡𑀁 𑀚𑀸𑀦𑀺𑀢𑁆𑀯𑀸 𑀇𑀫𑀁 𑀔𑀫𑀸𑀧𑁂𑀲𑀺𑀁, 𑀅𑀣 𑀫𑀁 𑀏𑀲𑀸 ‘𑀢𑀼𑀫𑁆𑀳𑁂𑀲𑀼 𑀔𑀫𑀸𑀧𑀺𑀢𑁂𑀲𑀼 𑀔𑀫𑀺𑀲𑁆𑀲𑀸𑀫𑀻’𑀢𑀺 𑀆𑀳𑀸’’𑀢𑀺. ‘‘𑀏𑀯𑀁 𑀓𑀺𑀭 𑀉𑀢𑁆𑀢𑀭𑁂’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀲𑀻𑀲𑁂 𑀫𑁂 𑀲𑀳𑀸𑀬𑀺𑀓𑀸𑀬 𑀧𑀓𑁆𑀓𑀲𑀧𑁆𑀧𑀺 𑀆𑀲𑀺𑀢𑁆𑀢’’𑀦𑁆𑀢𑀺. ‘‘𑀅𑀣 𑀢𑀬𑀸 𑀓𑀺𑀁 𑀘𑀺𑀦𑁆𑀢𑀺𑀢’’𑀦𑁆𑀢𑀺? ‘‘𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄, 𑀫𑀫 𑀲𑀳𑀸𑀬𑀺𑀓𑀸𑀬 𑀕𑀼𑀡𑁄𑀯 𑀫𑀳𑀦𑁆𑀢𑁄, 𑀅𑀳𑀜𑁆𑀳𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀅𑀮𑀢𑁆𑀣𑀁, 𑀲𑀘𑁂 𑀫𑁂 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀓𑁄𑀥𑁄 𑀅𑀢𑁆𑀣𑀺, 𑀇𑀤𑀁 𑀫𑀁 𑀤𑀳𑀢𑀼, 𑀦𑁄 𑀘𑁂, 𑀫𑀸 𑀤𑀳𑀢𑀽’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀫𑁂𑀢𑁆𑀢𑀸𑀬 𑀨𑀭𑀺𑀁, 𑀪𑀦𑁆𑀢𑁂𑀢𑀺. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀉𑀢𑁆𑀢𑀭𑁂, 𑀏𑀯𑀁 𑀓𑁄𑀥𑀁 𑀚𑀺𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁄𑀥𑀦𑁄 𑀳𑀺 𑀦𑀸𑀫 𑀅𑀓𑁆𑀓𑁄𑀥𑁂𑀦, 𑀅𑀓𑁆𑀓𑁄𑀲𑀓𑁄 𑀅𑀦𑀓𑁆𑀓𑁄𑀲𑀦𑁆𑀢𑁂𑀦, 𑀧𑀭𑀺𑀪𑀸𑀲𑀓𑁄 𑀅𑀧𑀭𑀺𑀪𑀸𑀲𑀦𑁆𑀢𑁂𑀦, 𑀣𑀤𑁆𑀥𑀫𑀘𑁆𑀙𑀭𑀻 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀤𑀸𑀦𑁂𑀦, 𑀫𑀼𑀲𑀸𑀯𑀸𑀤𑀻 𑀲𑀘𑁆𑀘𑀯𑀘𑀦𑁂𑀦 𑀚𑀺𑀦𑀺𑀢𑀩𑁆𑀩𑁄’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦’’𑀦𑁆𑀢𑀺. (𑀥. 𑀧. 𑁨𑁨𑁩) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀲𑀘𑁆𑀘𑀓𑀣𑀁 𑀅𑀪𑀸𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀢𑁆𑀢𑀭𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀸𑀫𑀺𑀓𑁄 𑀘 𑀲𑀲𑀼𑀭𑁄 𑀘 𑀲𑀲𑁆𑀲𑀼 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑀺𑀁𑀲𑀼, 𑀲𑀺𑀭𑀺𑀫𑀸𑀧𑀺 𑀧𑀜𑁆𑀘𑀲𑀢𑀧𑀭𑀺𑀯𑀸𑀭𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀉𑀢𑁆𑀢𑀭𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀚𑁆𑀚𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀉𑀢𑁆𑀢𑀭𑀁 𑀤𑁂𑀯𑀥𑀻𑀢𑀭𑀁 𑀤𑀺𑀲𑁆𑀯𑀸 𑁋

𑁧𑁨𑁪.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁨𑁫.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁨𑁬.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀝𑀺𑀧𑀼𑀘𑁆𑀙𑀺;

𑁧𑁨𑁭.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁨𑁮.

‘‘𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀫𑀣𑁄 𑀧𑀴𑀸𑀲𑁄, 𑀦𑀸𑀳𑁄𑀲𑀺 𑀫𑀬𑁆𑀳𑀁 𑀖𑀭𑀫𑀸𑀯𑀲𑀦𑁆𑀢𑀺𑀬𑀸;

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻, 𑀉𑀧𑁄𑀲𑀣𑁂 𑀦𑀺𑀘𑁆𑀘𑀳𑀫𑀧𑁆𑀧𑀫𑀢𑁆𑀢𑀸.

𑁧𑁨𑁯.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁧𑁩𑁦.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁧𑁩𑁧.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁧𑁩𑁨.

‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁩𑁩.

‘‘𑀲𑀸𑀳𑀁 𑀲𑀓𑁂𑀦 𑀲𑀻𑀮𑁂𑀦, 𑀬𑀲𑀲𑀸 𑀘 𑀬𑀲𑀲𑁆𑀲𑀺𑀦𑀻;

𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜𑀁, 𑀲𑀼𑀔𑀺𑀢𑀸 𑀘𑀫𑁆𑀳𑀺𑀦𑀸𑀫𑀬𑀸.

𑁧𑁩𑁪.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁩𑁫.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀳𑀁 𑀅𑀓𑀸𑀲𑀺𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀤𑁂𑀯𑀢𑀸𑀧𑀺𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁧𑁨𑁬. 𑀫𑀫 𑀘, 𑀪𑀦𑁆𑀢𑁂, 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑁂𑀬𑁆𑀬𑀸𑀲𑀺 ‘‘𑀉𑀢𑁆𑀢𑀭𑀸 𑀦𑀸𑀫 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀫𑀁 𑀪𑀕𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀫𑀜𑁆𑀜𑀨𑀮𑁂 𑀩𑁆𑀬𑀸𑀓𑀭𑁂𑀬𑁆𑀬, 𑀢𑀁 𑀪𑀕𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀩𑁆𑀬𑀸𑀓𑀸𑀲𑀻𑀢𑀺.

𑁧𑁨𑁮. 𑀢𑀢𑁆𑀣 𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀫𑀣𑁄 𑀧𑀴𑀸𑀲𑁄, 𑀦𑀸𑀳𑁄𑀲𑀺 𑀫𑀬𑁆𑀳𑀁 𑀖𑀭𑀫𑀸𑀯𑀲𑀦𑁆𑀢𑀺𑀬𑀸𑀢𑀺 𑀬𑀸 𑀘 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀻𑀦𑀁 𑀅𑀜𑁆𑀜𑀸𑀲𑀁 𑀇𑀢𑁆𑀣𑀻𑀦𑀁 𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀺𑀲𑀬𑀸 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸, 𑀬𑀜𑁆𑀘 𑀢𑀸𑀯𑀓𑀸𑀮𑀺𑀓𑀸𑀤𑀺𑀯𑀲𑁂𑀦𑀸𑀧𑀺 𑀓𑀺𑀜𑁆𑀘𑀺 𑀬𑀸𑀘𑀦𑁆𑀢𑀸𑀦𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁, 𑀬𑁄 𑀘 𑀓𑀼𑀮𑀧𑀤𑁂𑀲𑀸𑀤𑀺𑀦𑀸 𑀧𑀭𑁂𑀳𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀺𑀯𑀺𑀥𑁄𑀧𑀺 𑀧𑀸𑀧𑀥𑀫𑁆𑀫𑁄 𑀕𑁂𑀳𑁂 𑀞𑀺𑀢𑀸𑀬 𑀫𑀬𑁆𑀳𑀁 𑀲𑀢𑀺𑀧𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀦𑀸𑀳𑁄𑀲𑀺 𑀦 𑀉𑀧𑁆𑀧𑀚𑁆𑀚𑀺. 𑀅𑀓𑁆𑀓𑁄𑀥𑀦𑀸𑀢𑀺 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑀢𑀸𑀬 𑀅𑀓𑀼𑀚𑁆𑀛𑀦𑀲𑀪𑀸𑀯𑀸. 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀦𑀧𑀘𑁆𑀙𑀸𑀦𑀺𑀧𑀸𑀢𑀦𑀸𑀤𑀺𑀦𑀸 𑀲𑀸𑀫𑀺𑀓𑀲𑁆𑀲 𑀅𑀦𑀼𑀓𑀽𑀮𑀪𑀸𑀯𑁂𑀦 𑀯𑀲𑁂 𑀯𑀢𑁆𑀢𑀦𑀲𑀻𑀮𑀸, 𑀫𑀦𑀸𑀧𑀘𑀸𑀭𑀺𑀦𑀻𑀢𑀺 𑀅𑀢𑁆𑀣𑁄. 𑀉𑀧𑁄𑀲𑀣𑁂 𑀦𑀺𑀘𑁆𑀘𑀳𑀫𑀧𑁆𑀧𑀫𑀢𑁆𑀢𑀸𑀢𑀺 𑀅𑀳𑀁 𑀉𑀧𑁄𑀲𑀣𑀲𑀻𑀮𑀭𑀓𑁆𑀔𑀡𑁂 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀻.

𑁧𑁨𑁯. 𑀢𑀫𑁂𑀯 𑀉𑀧𑁄𑀲𑀣𑁂 𑀅𑀧𑁆𑀧𑀫𑀸𑀤𑀁 𑀤𑀲𑁆𑀲𑁂𑀦𑁆𑀢𑀻 𑀬𑁂𑀲𑀼 𑀤𑀺𑀯𑀲𑁂𑀲𑀼 𑀢𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀬𑀸𑀤𑀺𑀲𑀁 𑀬𑀣𑀸 𑀘 𑀭𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀢𑀼𑀤𑁆𑀤𑀲𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀦𑁆𑀢𑀺 𑀧𑀓𑁆𑀔𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻𑀢𑀺 𑀏𑀢𑁆𑀣 𑀘𑀸𑀢𑀺 𑀯𑀘𑀦𑀲𑁂𑀲𑁄. 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀧𑀝𑀺𑀳𑀭𑀡𑀓𑀧𑀓𑁆𑀔𑀜𑁆𑀘, 𑀘𑀸𑀢𑀼𑀤𑁆𑀤𑀲𑀻𑀧𑀜𑁆𑀘𑀤𑀲𑀻𑀅𑀝𑁆𑀞𑀫𑀻𑀦𑀁 𑀬𑀣𑀸𑀓𑁆𑀓𑀫𑀁 𑀆𑀤𑀺𑀢𑁄 𑀅𑀦𑁆𑀢𑀢𑁄 𑀘𑀸𑀢𑀺 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀯𑀲𑁂𑀦 𑀉𑀧𑁄𑀲𑀣𑀲𑀻𑀮𑀲𑁆𑀲 𑀧𑀝𑀺𑀳𑀭𑀺𑀢𑀩𑁆𑀩𑀁 𑀧𑀓𑁆𑀔𑀜𑁆𑀘, 𑀢𑁂𑀭𑀲𑀻 𑀧𑀸𑀝𑀺𑀧𑀤𑀸 𑀲𑀢𑁆𑀢𑀫𑀻 𑀦𑀯𑀫𑀻 𑀘𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀻𑀆𑀤𑀻𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀏𑀯 𑀲𑀼𑀝𑁆𑀞𑀼 𑀲𑀫𑀸𑀕𑀢𑀁 𑀲𑀫𑀦𑁆𑀦𑀸𑀕𑀢𑀁.

𑁧𑁩𑁦. 𑀉𑀧𑀯𑀲𑀺𑀲𑁆𑀲𑀦𑁆𑀢𑀺 𑀉𑀧𑀯𑀲𑀺𑀁. 𑀅𑀢𑀻𑀢𑀢𑁆𑀣𑁂 𑀳𑀺 𑀇𑀤𑀁 𑀅𑀦𑀸𑀕𑀢𑀯𑀘𑀦𑀁. 𑀓𑁂𑀘𑀺 𑀧𑀦 ‘‘𑀉𑀧𑀯𑀲𑀺𑀁’’𑀇𑀘𑁆𑀘𑁂𑀯 𑀧𑀞𑀦𑁆𑀢𑀺. 𑀲𑀤𑀸𑀢𑀺 𑀲𑀧𑁆𑀧𑀝𑀺𑀳𑀸𑀭𑀺𑀓𑁂𑀲𑀼 𑀲𑀩𑁆𑀩𑁂𑀲𑀼 𑀉𑀧𑁄𑀲𑀣𑀤𑀺𑀯𑀲𑁂𑀲𑀼. 𑀲𑀻𑀮𑁂𑀲𑀽𑀢𑀺 𑀉𑀧𑁄𑀲𑀣𑀲𑀻𑀮𑁂𑀲𑀼 𑀲𑀸𑀥𑁂𑀢𑀩𑁆𑀩𑁂𑀲𑀼. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀁. 𑀲𑀁𑀯𑀼𑀢𑀸𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀁𑀯𑀼𑀢𑀸. 𑀲𑀤𑀸𑀢𑀺 𑀯𑀸 𑀲𑀩𑁆𑀩𑀓𑀸𑀮𑀁. 𑀲𑀻𑀮𑁂𑀲𑀽𑀢𑀺 𑀦𑀺𑀘𑁆𑀘𑀲𑀻𑀮𑁂𑀲𑀼. 𑀲𑀁𑀯𑀼𑀢𑀸𑀢𑀺 𑀓𑀸𑀬𑀯𑀸𑀘𑀸𑀳𑀺 𑀲𑀁𑀯𑀼𑀢𑀸.

𑁧𑁩𑁧. 𑀇𑀤𑀸𑀦𑀺 𑀢𑀁 𑀦𑀺𑀘𑁆𑀘𑀲𑀻𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀢𑁆𑀣𑀢𑁄 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸. 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸. 𑀯𑀺𑀭𑀢𑀸𑀢𑀺 𑀑𑀭𑀢𑀸, 𑀦𑀺𑀯𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀫𑀼𑀲𑀸𑀯𑀸𑀤𑀸𑀢𑀺 𑀫𑀼𑀲𑀸 𑀦𑀸𑀫 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄 𑀯𑀘𑀻𑀧𑀬𑁄𑀕𑁄 𑀯𑀸 𑀓𑀸𑀬𑀧𑀬𑁄𑀕𑁄 𑀯𑀸, 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀲𑁆𑀲 𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀅𑀣 𑀯𑀸 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼, 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀢𑀢𑁄 𑀫𑀼𑀲𑀸𑀯𑀸𑀤𑀸 𑀲𑀜𑁆𑀜𑀢𑀸 𑀑𑀭𑀢𑀸, 𑀯𑀺𑀭𑀢𑀸𑀢𑀺 𑀅𑀢𑁆𑀣𑁄. 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄.

𑀣𑁂𑀬𑁆𑀬𑀸𑀢𑀺 𑀣𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀣𑁂𑀦𑀪𑀸𑀯𑁄, 𑀘𑁄𑀭𑀺𑀓𑀸𑀬 𑀧𑀭𑀲𑁆𑀲𑀳𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀣𑁂𑀬𑁆𑀬𑀁. 𑀢𑀢𑁄 𑀣𑁂𑀬𑁆𑀬𑀸 𑀲𑀜𑁆𑀜𑀢𑀸, 𑀆𑀭𑀓𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄.

𑀅𑀢𑀺𑀘𑀸𑀭𑀸𑀢𑀺 𑀅𑀢𑀺𑀘𑁆𑀘 𑀘𑀸𑀭𑁄 𑀅𑀢𑀺𑀘𑀸𑀭𑁄, 𑀮𑁄𑀓𑀫𑀭𑀺𑀬𑀸𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀓𑀸𑀫𑀯𑀲𑁂𑀦 𑀘𑀸𑀭𑁄 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑁋 𑀧𑀼𑀭𑀺𑀲𑀸𑀦𑀁 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸𑀢𑀺 𑀤𑀲, 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀧𑀝𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀝𑀘𑀼𑀫𑁆𑀩𑀝𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁 𑀤𑀲𑀦𑁆𑀦𑀜𑁆𑀘 𑀥𑀦𑀓𑁆𑀓𑀻𑀢𑀸𑀤𑀻𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀅𑀜𑁆𑀜𑀧𑀼𑀭𑀺𑀲𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀁, 𑀇𑀤𑀫𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀅𑀢𑀺𑀘𑀸𑀭𑁄. 𑀢𑀲𑁆𑀫𑀸 𑀅𑀢𑀺𑀘𑀸𑀭𑀸.

𑀫𑀚𑁆𑀚𑀧𑀸𑀦𑀸𑀢𑀺 𑀫𑀚𑁆𑀚𑀁 𑀯𑀼𑀘𑁆𑀘𑀢𑀺𑀫𑀤𑀦𑀻𑀬𑀝𑁆𑀞𑁂𑀦 𑀲𑀼𑀭𑀸 𑀘 𑀫𑁂𑀭𑀬𑀜𑁆𑀘, 𑀧𑀺𑀯𑀦𑁆𑀢𑀺 𑀢𑁂𑀦𑀸𑀢𑀺 𑀧𑀸𑀦𑀁, 𑀫𑀚𑁆𑀚𑀲𑁆𑀲 𑀧𑀸𑀦𑀁 𑀫𑀚𑁆𑀚𑀧𑀸𑀦𑀁. 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀫𑀚𑁆𑀚𑀲𑀗𑁆𑀔𑀸𑀢𑀁 𑀧𑀺𑀝𑁆𑀞𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀑𑀤𑀦𑀺𑀬𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘𑀪𑁂𑀤𑀁 𑀲𑀼𑀭𑀁 𑀯𑀸, 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄, 𑀕𑀼𑀴𑀸𑀲𑀯𑁄, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘𑀪𑁂𑀤𑀁 𑀫𑁂𑀭𑀬𑀁 𑀯𑀸 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀓𑀼𑀲𑀕𑁆𑀕𑁂𑀦𑀸𑀧𑀺 𑀧𑀺𑀯𑀢𑀺, 𑀲𑀸 𑀘𑁂𑀢𑀦𑀸 𑀫𑀚𑁆𑀚𑀧𑀸𑀦𑀁. 𑀢𑀲𑁆𑀫𑀸 𑀫𑀚𑁆𑀚𑀧𑀸𑀦𑀸 𑀆𑀭𑀓𑀸 𑀯𑀺𑀭𑀢𑀸.

𑁧𑁩𑁨. 𑀏𑀯𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸’’𑀢𑀺𑀆𑀤𑀺𑀦𑀸 𑀧𑀳𑀸𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀁 𑀦𑀺𑀘𑁆𑀘𑀲𑀻𑀮𑀁 𑀧𑀼𑀦 𑀲𑀫𑀸𑀤𑀸𑀢𑀩𑁆𑀩𑀢𑀸𑀯𑀲𑁂𑀦 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸’’𑀢𑀺 𑀆𑀳. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀧𑀤𑀁, 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀛𑀸𑀦𑀸𑀤𑀬𑁄 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸, 𑀧𑀜𑁆𑀘𑀲𑀼 𑀧𑀦 𑀲𑀻𑀮𑀗𑁆𑀕𑁂𑀲𑀼 𑀬𑀁𑀓𑀺𑀜𑁆𑀘𑀺 𑀅𑀗𑁆𑀕𑀁 𑀢𑀸𑀲𑀁 𑀲𑀺𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀤𑀦𑁆𑀢𑀺 𑀲𑀺𑀓𑁆𑀔𑀸𑀦𑀁 𑀧𑀤𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀁, 𑀧𑀜𑁆𑀘 𑀲𑀻𑀮𑀗𑁆𑀕𑀸𑀦𑀺. 𑀢𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀲𑀺𑀓𑁆𑀔𑀸𑀧𑀤𑁂 𑀭𑀢𑀸 𑀅𑀪𑀺𑀭𑀢𑀸𑀢𑀺 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸. 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀓𑀼𑀲𑀮𑀸 𑀦𑀺𑀧𑀼𑀡𑀸, 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀕𑁄𑀢𑀫𑀲𑁆𑀲𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀓𑀺𑀢𑁆𑀢𑁂𑀢𑀺. 𑀬𑀲𑀲𑁆𑀲𑀺𑀦𑁄𑀢𑀺 𑀓𑀺𑀢𑁆𑀢𑀺𑀫𑀢𑁄, 𑀧𑀭𑀺𑀯𑀸𑀭𑀯𑀢𑁄 𑀯𑀸.

𑁧𑁩𑁩. 𑀲𑀸𑀳𑀦𑁆𑀢𑀺 𑀲𑀸 𑀬𑀣𑀸𑀯𑀼𑀢𑁆𑀢𑀕𑀼𑀡𑀸 𑀅𑀳𑀁. 𑀲𑀓𑁂𑀦 𑀲𑀻𑀮𑁂𑀦𑀸𑀢𑀺 𑀅𑀦𑀼𑀲𑁆𑀲𑀼𑀓𑀺𑀢𑀸𑀤𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑀲𑀻𑀮𑁂𑀦 𑀘 𑀉𑀧𑁄𑀲𑀣𑀲𑀻𑀮𑀸𑀤𑀺𑀲𑀫𑀸𑀤𑀸𑀦𑀲𑀻𑀮𑁂𑀦 𑀘 𑀓𑀸𑀭𑀡𑀪𑀽𑀢𑁂𑀦. 𑀢𑀜𑁆𑀳𑀺 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲𑀓𑀢𑀸𑀬 𑀳𑀺𑀢𑀲𑀼𑀔𑀸𑀯𑀳𑀢𑀸𑀬 𑀘 𑀯𑀺𑀲𑁂𑀲𑀢𑁄 ‘‘𑀲𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀜𑁆𑀘𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺. (𑀲𑀁. 𑀦𑀺. 𑁧.𑁧𑁧𑁫);

𑀬𑀲𑀲𑀸 𑀘 𑀬𑀲𑀲𑁆𑀲𑀺𑀦𑀻𑀢𑀺 ‘‘𑀉𑀢𑁆𑀢𑀭𑀸 𑀉𑀧𑀸𑀲𑀺𑀓𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀼𑀓𑀻 𑀅𑀫𑀘𑁆𑀙𑀭𑀻 𑀅𑀓𑁆𑀓𑁄𑀥𑀦𑀸’’𑀢𑀺𑀆𑀤𑀺𑀦𑀸 ‘‘𑀆𑀕𑀢𑀨𑀮𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸’’𑀢𑀺𑀆𑀤𑀺𑀦𑀸 𑀘 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀢𑁂𑀦 𑀚𑀮𑀢𑀮𑁂 𑀢𑁂𑀮𑁂𑀦 𑀯𑀺𑀬 𑀲𑀫𑀦𑁆𑀢𑀢𑁄 𑀧𑀢𑁆𑀣𑀝𑁂𑀦 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀬𑀲𑀲𑁆𑀲𑀺𑀦𑀻 𑀓𑀺𑀢𑁆𑀢𑀺𑀫𑀢𑀻, 𑀢𑁂𑀦 𑀯𑀸 𑀲𑀻𑀮𑀕𑀼𑀡𑁂𑀦 𑀇𑀥 𑀅𑀥𑀺𑀕𑀢𑁂𑀦 𑀬𑀲𑀧𑀭𑀺𑀯𑀸𑀭𑁂𑀦 𑀬𑀲𑀲𑁆𑀲𑀺𑀦𑀻 𑀲𑀫𑁆𑀧𑀦𑁆𑀦𑀧𑀭𑀺𑀯𑀸𑀭𑀸. 𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜𑀦𑁆𑀢𑀺 𑀬𑀣𑀽𑀧𑀘𑀺𑀢𑀁 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀘𑁆𑀘𑀦𑀼𑀪𑁄𑀫𑀺. 𑀬𑀲𑁆𑀲 𑀳𑀺 𑀧𑀼𑀜𑁆𑀜𑀨𑀮𑀁 𑀅𑀦𑀼𑀪𑀽𑀬𑀢𑀺, 𑀨𑀮𑀽𑀧𑀘𑀸𑀭𑁂𑀦 𑀢𑀁 𑀧𑀼𑀜𑁆𑀜𑀫𑁆𑀧𑀺 𑀅𑀦𑀼𑀪𑀽𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀧𑀼𑀣𑀼𑀚𑁆𑀚𑀦𑀪𑀸𑀯𑀢𑁄 𑀲𑀼𑀘𑀭𑀺𑀢𑀨𑀮𑀫𑁆𑀧𑀺 ‘‘𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺. 𑀲𑀼𑀔𑀺𑀢𑀸 𑀘𑀫𑁆𑀳𑀺𑀦𑀸𑀫𑀬𑀸𑀢𑀺 𑀤𑀺𑀩𑁆𑀩𑀲𑀼𑀔𑁂𑀦 𑀘 𑀨𑀮𑀲𑀼𑀔𑁂𑀦 𑀘 𑀲𑀼𑀔𑀺𑀢𑀸 𑀘𑀫𑁆𑀳𑀺 𑀪𑀯𑀸𑀫𑀺, 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀸𑀪𑀸𑀯𑀢𑁄 𑀅𑀦𑀸𑀫𑀬𑀸 𑀅𑀭𑁄𑀕𑀸.

𑁧𑁩𑁬. 𑀫𑀫 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 ‘‘𑀫𑀫 𑀯𑀘𑀦𑁂𑀦 𑀘 𑀯𑀦𑁆𑀤𑁂𑀬𑁆𑀬𑀸𑀲𑀺, 𑀦 𑀢𑀯 𑀲𑀪𑀸𑀯𑁂𑀦𑁂𑀯𑀸’’𑀢𑀺 𑀯𑀦𑁆𑀤𑀦𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀅𑀦𑀘𑁆𑀙𑀭𑀺𑀬𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀺𑀓𑀸𑀪𑀸𑀯𑀲𑁆𑀲 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀁 𑀪𑀕𑀯𑀸𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀉𑀢𑁆𑀢𑀭𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀲𑀺𑀭𑀺𑀫𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀬𑀼𑀢𑁆𑀢𑀸 𑀘 𑀢𑁂 𑀧𑀭𑀫𑀅𑀮𑀗𑁆𑀓𑀢𑀸 𑀳𑀬𑀸𑀢𑀺 𑀲𑀺𑀭𑀺𑀫𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀘 𑀲𑀫𑀬𑁂𑀦 𑀳𑁂𑀝𑁆𑀞𑀸 𑀅𑀦𑀦𑁆𑀢𑀭𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀸 𑀲𑀺𑀭𑀺𑀫𑀸 𑀕𑀡𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀓𑀺𑀮𑀺𑀝𑁆𑀞𑀓𑀫𑁆𑀫𑀦𑁆𑀢𑀸 𑀳𑀼𑀢𑁆𑀯𑀸 𑀲𑀗𑁆𑀖𑀲𑁆𑀲 𑀅𑀝𑁆𑀞 𑀲𑀮𑀸𑀓𑀪𑀢𑁆𑀢𑀸𑀦𑀺 𑀧𑀝𑁆𑀞𑀧𑁂𑀲𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀺𑀩𑀤𑁆𑀥𑀁 𑀅𑀝𑁆𑀞 𑀪𑀺𑀓𑁆𑀔𑀽 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀺. 𑀲𑀸 ‘‘𑀲𑀧𑁆𑀧𑀺𑀁 𑀕𑀡𑁆𑀳𑀣 𑀔𑀻𑀭𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑁂𑀲𑀁 𑀧𑀢𑁆𑀢𑁂 𑀧𑀽𑀭𑁂𑀢𑀺, 𑀏𑀓𑁂𑀦 𑀮𑀤𑁆𑀥𑀁 𑀢𑀺𑀡𑁆𑀡𑀫𑁆𑀧𑀺 𑀘𑀢𑀼𑀦𑁆𑀦𑀫𑁆𑀧𑀺 𑀧𑀳𑁄𑀢𑀺, 𑀤𑁂𑀯𑀲𑀺𑀓𑀁 𑀲𑁄𑀴𑀲𑀓𑀳𑀸𑀧𑀡𑀧𑀭𑀺𑀩𑁆𑀩𑀬𑁂𑀦 𑀧𑀺𑀡𑁆𑀟𑀧𑀸𑀢𑁄 𑀤𑀻𑀬𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀕𑁂𑀳𑁂 𑀅𑀝𑁆𑀞𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀺𑀬𑁄𑀚𑀦𑀫𑀢𑁆𑀣𑀓𑁂 𑀏𑀓𑀁 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀸𑀬𑀁 𑀣𑁂𑀭𑀼𑀧𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀧𑀼𑀘𑁆𑀙𑀺𑀁𑀲𑀼, ‘‘𑀆𑀯𑀼𑀲𑁄, 𑀓𑀳𑀁 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀇𑀥𑀸𑀕𑀢𑁄𑀲𑀻’’𑀢𑀺? ‘‘𑀲𑀺𑀭𑀺𑀫𑀸𑀬 𑀅𑀝𑁆𑀞𑀓𑀪𑀢𑁆𑀢𑀁 𑀫𑁂 𑀪𑀼𑀢𑁆𑀢’’𑀦𑁆𑀢𑀺. ‘‘𑀢𑀁 𑀫𑀦𑀸𑀧𑀁 𑀓𑀢𑁆𑀯𑀸 𑀤𑁂𑀢𑀺, 𑀆𑀯𑀼𑀲𑁄’’𑀢𑀺. ‘‘𑀦 𑀲𑀓𑁆𑀓𑀸 𑀢𑀲𑁆𑀲𑀸 𑀪𑀢𑁆𑀢𑀁 𑀯𑀡𑁆𑀡𑁂𑀢𑀼𑀁, 𑀅𑀢𑀺𑀧𑀡𑀻𑀢𑀁 𑀓𑀢𑁆𑀯𑀸 𑀤𑁂𑀢𑀺, 𑀏𑀓𑁂𑀦 𑀮𑀤𑁆𑀥𑀁 𑀢𑀺𑀡𑁆𑀡𑀫𑁆𑀧𑀺 𑀘𑀢𑀼𑀦𑁆𑀦𑀫𑁆𑀧𑀺 𑀧𑀳𑁄𑀢𑀺, 𑀢𑀲𑁆𑀲𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀢𑁄𑀧𑀺 𑀤𑀲𑁆𑀲𑀦𑀫𑁂𑀯 𑀉𑀢𑁆𑀢𑀭𑀺𑀢𑀭𑀁’’. 𑀲𑀸 𑀳𑀺 𑀇𑀢𑁆𑀣𑀻 𑀏𑀯𑀭𑀽𑀧𑀸 𑀘 𑀏𑀯𑀭𑀽𑀧𑀸 𑀘𑀸𑀢𑀺 𑀢𑀲𑁆𑀲𑀸 𑀕𑀼𑀡𑁂 𑀓𑀣𑁂𑀲𑀺.

𑀅𑀣𑁂𑀓𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀅𑀤𑀺𑀲𑁆𑀯𑀸𑀧𑀺 𑀲𑀯𑀦𑁂𑀦𑁂𑀯 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀫𑀬𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑀁 𑀓𑀣𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀞𑀺𑀢𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁆𑀯𑁂, 𑀆𑀯𑀼𑀲𑁄, 𑀢𑀲𑁆𑀫𑀺𑀁 𑀕𑁂𑀳𑁂 𑀢𑁆𑀯𑀁 𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀅𑀝𑁆𑀞𑀓𑀪𑀢𑁆𑀢𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀲𑀼𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀓𑁆𑀓𑀦𑁆𑀢𑁄 𑀧𑀸𑀢𑁄𑀯 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀲𑀮𑀸𑀓𑀕𑁆𑀕𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁄 𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀕𑁂𑀳𑁂 𑀅𑀝𑁆𑀞𑀓𑀪𑀢𑁆𑀢𑀁 𑀮𑀪𑀺. 𑀬𑁄 𑀧𑀦 𑀲𑁄 𑀪𑀺𑀓𑁆𑀔𑀼 𑀳𑀺𑀬𑁆𑀬𑁄 𑀪𑀼𑀜𑁆𑀚𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀢𑀲𑁆𑀲 𑀕𑀢𑀯𑁂𑀮𑀸𑀬𑀫𑁂𑀯𑀲𑁆𑀲𑀸 𑀲𑀭𑀻𑀭𑁂 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀫𑀸 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲𑀸 𑀤𑀸𑀲𑀺𑀬𑁄 𑀅𑀝𑁆𑀞𑀓𑀪𑀢𑁆𑀢𑀁 𑀮𑀪𑀺𑀢𑀼𑀁 𑀆𑀕𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀕𑀦𑁆𑀢𑁆𑀯𑀸 𑀲𑀳𑀢𑁆𑀣𑀸 𑀧𑀢𑁆𑀢𑁂 𑀕𑀳𑁂𑀢𑀼𑀁 𑀯𑀸 𑀦𑀺𑀲𑀻𑀤𑀸𑀧𑁂𑀢𑀼𑀁 𑀯𑀸 𑀅𑀲𑀓𑁆𑀓𑁄𑀦𑁆𑀢𑀻 𑀤𑀸𑀲𑀺𑀬𑁄 𑀆𑀡𑀸𑀧𑁂𑀲𑀺 ‘‘𑀅𑀫𑁆𑀫𑀸 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸 𑀅𑀬𑁆𑀬𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀔𑀚𑁆𑀚𑀓𑀁 𑀤𑀢𑁆𑀯𑀸 𑀪𑀢𑁆𑀢𑀯𑁂𑀮𑀸𑀬 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑁂𑀣𑀸’’𑀢𑀺. 𑀢𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀪𑀺𑀓𑁆𑀔𑀽 𑀧𑀯𑁂𑀲𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀔𑀚𑁆𑀚𑀓𑀁 𑀤𑀢𑁆𑀯𑀸 𑀪𑀢𑁆𑀢𑀯𑁂𑀮𑀸𑀬 𑀪𑀢𑁆𑀢𑀲𑁆𑀲 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑀬𑀺𑀁𑀲𑀼. 𑀲𑀸 ‘‘𑀫𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑁂𑀣, 𑀅𑀬𑁆𑀬𑁂 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀦𑀻𑀢𑀸 𑀯𑁂𑀥𑀫𑀸𑀦𑁂𑀦 𑀲𑀭𑀻𑀭𑁂𑀦 𑀪𑀺𑀓𑁆𑀔𑀽 𑀯𑀦𑁆𑀤𑀺. 𑀲𑁄 𑀪𑀺𑀓𑁆𑀔𑀼 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀕𑀺𑀮𑀸𑀦𑀸𑀬 𑀢𑀸𑀯 𑀅𑀬𑀁 𑀏𑀢𑀺𑀲𑁆𑀲𑀸 𑀭𑀽𑀧𑀲𑁄𑀪𑀸, 𑀅𑀭𑁄𑀕𑀓𑀸𑀮𑁂 𑀧𑀦 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸𑀬 𑀇𑀫𑀺𑀲𑁆𑀲𑀸 𑀓𑀻𑀤𑀺𑀲𑀻 𑀭𑀽𑀧𑀲𑀫𑁆𑀧𑀢𑁆𑀢𑀻’’𑀢𑀺. 𑀅𑀣𑀲𑁆𑀲 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀦𑁆𑀦𑀺𑀘𑀺𑀢𑁄 𑀓𑀺𑀮𑁂𑀲𑁄 𑀲𑀫𑀼𑀤𑀸𑀘𑀭𑀺. 𑀲𑁄 𑀅𑀜𑁆𑀜𑀸𑀡𑀻 𑀳𑀼𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀢𑁆𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀧𑀺𑀥𑀸𑀬 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀏𑀓𑁄 𑀲𑀳𑀸𑀬𑀓𑁄 𑀪𑀺𑀓𑁆𑀔𑀼 𑀬𑀸𑀘𑀦𑁆𑀢𑁄𑀧𑀺 𑀪𑁄𑀚𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀲𑁄 𑀙𑀺𑀦𑁆𑀦𑀪𑀢𑁆𑀢𑁄 𑀅𑀳𑁄𑀲𑀺.

𑀢𑀁 𑀤𑀺𑀯𑀲𑀫𑁂𑀯 𑀲𑀸𑀬𑀦𑁆𑀳𑀲𑀫𑀬𑁂 𑀲𑀺𑀭𑀺𑀫𑀸 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀲𑀸𑀲𑀦𑀁 𑀧𑁂𑀲𑁂𑀲𑀺 ‘‘𑀪𑀦𑁆𑀢𑁂, 𑀚𑀻𑀯𑀓𑀲𑁆𑀲 𑀓𑀦𑀺𑀝𑁆𑀞𑀪𑀕𑀺𑀦𑀻 𑀲𑀺𑀭𑀺𑀫𑀸 𑀓𑀸𑀮𑀫𑀓𑀸𑀲𑀻’’𑀢𑀺. 𑀲𑀢𑁆𑀣𑀸 𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀲𑀺𑀭𑀺𑀫𑀸𑀬 𑀲𑀭𑀻𑀭𑀛𑀸𑀧𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀆𑀫𑀓𑀲𑀼𑀲𑀸𑀦𑁂 𑀢𑀁 𑀬𑀣𑀸 𑀓𑀸𑀓𑀸𑀤𑀬𑁄 𑀦 𑀔𑀸𑀤𑀦𑁆𑀢𑀺, 𑀢𑀣𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀭𑀓𑁆𑀔𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀬𑀺, 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀼𑀴𑀯𑀓𑀸 𑀧𑀕𑁆𑀖𑀭𑀺𑀁𑀲𑀼, 𑀲𑀓𑀮𑀲𑀭𑀻𑀭𑀁 𑀪𑀺𑀦𑁆𑀦𑀲𑀸𑀮𑀺𑀪𑀢𑁆𑀢𑀘𑀸𑀝𑀺 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀞𑀧𑁂𑀢𑁆𑀯𑀸 𑀕𑁂𑀳𑀭𑀓𑁆𑀔𑀡𑀓𑀤𑀸𑀭𑀓𑁂 𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀅𑀝𑁆𑀞 𑀓𑀳𑀸𑀧𑀡𑀸 𑀤𑀡𑁆𑀟𑁄’’𑀢𑀺. 𑀲𑀢𑁆𑀣𑀼 𑀲𑀦𑁆𑀢𑀺𑀓𑀜𑁆𑀘 𑀧𑁂𑀲𑁂𑀲𑀺 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀓𑀺𑀭 𑀲𑀗𑁆𑀖𑁄 𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀆𑀕𑀘𑁆𑀙𑀢𑀽’’𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑀸𑀧𑁂𑀲𑀺 ‘‘𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺.

𑀲𑁄𑀧𑀺 𑀤𑀳𑀭𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀤𑀺𑀯𑀲𑁂 𑀓𑀲𑁆𑀲𑀘𑀺 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀙𑀺𑀦𑁆𑀦𑀪𑀢𑁆𑀢𑁄𑀯 𑀦𑀺𑀧𑀚𑁆𑀚𑀺. 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀽𑀢𑀺𑀓𑀁 𑀚𑀸𑀢𑀁, 𑀧𑀢𑁆𑀢𑁂 𑀫𑀮𑀫𑁆𑀧𑀺 𑀉𑀝𑁆𑀞𑀳𑀺. 𑀅𑀣 𑀲𑁄 𑀲𑀳𑀸𑀬𑀓𑀪𑀺𑀓𑁆𑀔𑀼𑀦𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀯𑀼𑀲𑁄 𑀲𑀢𑁆𑀣𑀸 𑀲𑀺𑀭𑀺𑀫𑀸𑀬 𑀤𑀲𑁆𑀲𑀦𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀢𑀣𑀸 𑀙𑀸𑀢𑀚𑁆𑀛𑀢𑁆𑀢𑁄𑀧𑀺 ‘‘𑀲𑀺𑀭𑀺𑀫𑀸’’𑀢𑀺 𑀯𑀼𑀢𑁆𑀢𑀧𑀤𑁂𑀬𑁂𑀯 𑀲𑀳𑀲𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀲𑀺𑀭𑀺𑀫𑀁 𑀤𑀝𑁆𑀞𑀼𑀁 𑀕𑀘𑁆𑀙𑀢𑀺, 𑀢𑁆𑀯𑀫𑁆𑀧𑀺 𑀕𑀫𑀺𑀲𑁆𑀲𑀲𑀻’’𑀢𑀺? ‘‘𑀆𑀫 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀏𑀓𑀧𑀲𑁆𑀲𑁂 𑀅𑀝𑁆𑀞𑀸𑀲𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀧𑀺 𑀭𑀸𑀚𑀧𑀭𑀺𑀲𑀸𑀧𑀺 𑀉𑀧𑀸𑀲𑀓𑀧𑀭𑀺𑀲𑀸𑀧𑀺 𑀉𑀧𑀸𑀲𑀺𑀓𑀸𑀧𑀭𑀺𑀲𑀸𑀧𑀺 𑀏𑀓𑁂𑀓𑀧𑀲𑁆𑀲𑁂 𑀅𑀝𑁆𑀞𑀁𑀲𑀼.

𑀲𑀢𑁆𑀣𑀸 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺 ‘‘𑀓𑀸 𑀏𑀲𑀸, 𑀫𑀳𑀸𑀭𑀸𑀚𑀸’’𑀢𑀺? ‘‘𑀪𑀦𑁆𑀢𑁂, 𑀚𑀻𑀯𑀓𑀲𑁆𑀲 𑀓𑀦𑀺𑀝𑁆𑀞𑀪𑀕𑀺𑀦𑀻 𑀲𑀺𑀭𑀺𑀫𑀸 𑀦𑀸𑀫𑀸’’𑀢𑀺. ‘‘𑀲𑀺𑀭𑀺𑀫𑀸 𑀏𑀲𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀳𑀺 ‘‘𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀺𑀭𑀺𑀫𑀁 𑀕𑀡𑁆𑀳𑀦𑁆𑀢𑀽’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺, 𑀏𑀓𑁄𑀧𑀺 ‘‘𑀳’’𑀦𑁆𑀢𑀺 𑀯𑀸 ‘‘𑀳𑀼’’𑀦𑁆𑀢𑀺 𑀯𑀸 𑀯𑀤𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 ‘‘𑀦 𑀕𑀡𑁆𑀳𑀦𑁆𑀢𑀺 𑀪𑀦𑁆𑀢𑁂’’𑀢𑀺, 𑀢𑁂𑀦 𑀳𑀺 𑀫𑀳𑀸𑀭𑀸𑀚 𑀅𑀕𑁆𑀖𑀁 𑀑𑀳𑀸𑀧𑁂𑀳𑀻𑀢𑀺. 𑀭𑀸𑀚𑀸 ‘‘𑀧𑀜𑁆𑀘𑀲𑀢𑀸𑀦𑀺 𑀤𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀓𑀜𑁆𑀘𑀺 𑀕𑀡𑁆𑀳𑀦𑀓𑀁 𑀅𑀤𑀺𑀲𑁆𑀯𑀸 ‘‘𑀅𑀟𑁆𑀠𑀢𑁂𑀬𑁆𑀬𑀲𑀢𑀸𑀦𑀺, 𑀤𑁆𑀯𑁂𑀲𑀢𑀸𑀦𑀺, 𑀲𑀢𑀁, 𑀧𑀜𑁆𑀜𑀸𑀲𑀁, 𑀧𑀜𑁆𑀘𑀯𑀻𑀲𑀢𑀺, 𑀯𑀻𑀲𑀢𑀺 𑀓𑀳𑀸𑀧𑀡𑁂, 𑀤𑀲 𑀓𑀳𑀸𑀧𑀡𑁂, 𑀧𑀜𑁆𑀘 𑀓𑀳𑀸𑀧𑀡𑁂, 𑀏𑀓𑀁 𑀓𑀳𑀸𑀧𑀡𑀁, 𑀅𑀟𑁆𑀠𑀁, 𑀧𑀸𑀤𑀁, 𑀫𑀸𑀲𑀓𑀁, 𑀓𑀸𑀓𑀡𑀺𑀓𑀁 𑀤𑀢𑁆𑀯𑀸 𑀲𑀺𑀭𑀺𑀫𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 ‘‘𑀫𑀼𑀥𑀸𑀧𑀺 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺, 𑀢𑀣𑀸𑀧𑀺 ‘‘𑀳’’𑀦𑁆𑀢𑀺 𑀯𑀸 ‘‘𑀳𑀼’’𑀦𑁆𑀢𑀺 𑀯𑀸 𑀯𑀤𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀭𑀸𑀚𑀸 ‘‘𑀫𑀼𑀥𑀸𑀧𑀺, 𑀪𑀦𑁆𑀢𑁂, 𑀕𑀡𑁆𑀳𑀦𑁆𑀢𑁄 𑀦𑀢𑁆𑀣𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀫𑀳𑀸𑀚𑀦𑀲𑁆𑀲 𑀧𑀺𑀬𑀫𑀸𑀢𑀼𑀕𑀸𑀫𑀁, 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀩𑁆𑀩𑁂 𑀏𑀓𑀤𑀺𑀯𑀲𑀁 𑀮𑀪𑀺𑀁𑀲𑀼, 𑀇𑀤𑀸𑀦𑀺 𑀫𑀼𑀥𑀸𑀧𑀺 𑀕𑀡𑁆𑀳𑀦𑁆𑀢𑁄 𑀦𑀢𑁆𑀣𑀺 𑀏𑀯𑀭𑀽𑀧𑀁 𑀦𑀸𑀫 𑀭𑀽𑀧𑀁 𑀔𑀬𑀯𑀬𑀧𑁆𑀧𑀢𑁆𑀢𑀁 𑀆𑀳𑀭𑀺𑀫𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀯𑀺𑀘𑀺𑀢𑁆𑀢𑀓𑀢𑀁 𑀦𑀯𑀦𑁆𑀦𑀁 𑀯𑀡𑁆𑀡𑀫𑀼𑀔𑀸𑀦𑀁 𑀯𑀲𑁂𑀦 𑀅𑀭𑀼𑀪𑀽𑀢𑀁 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀲𑀫𑀼𑀲𑁆𑀲𑀺𑀢𑀁 𑀦𑀺𑀘𑁆𑀘𑀸𑀢𑀼𑀭𑀁 𑀓𑁂𑀯𑀮𑀁 𑀩𑀸𑀮𑀫𑀳𑀸𑀚𑀦𑁂𑀦 𑀩𑀳𑀼𑀥𑀸 𑀲𑀗𑁆𑀓𑀧𑁆𑀧𑀺𑀢𑀢𑀸𑀬 𑀩𑀳𑀼𑀲𑀗𑁆𑀓𑀧𑁆𑀧𑀁 𑀅𑀤𑁆𑀥𑀼𑀯𑀁 𑀅𑀢𑁆𑀢𑀪𑀸𑀯’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀻’’𑀢𑀺. (𑀣𑁂𑀭𑀕𑀸. 𑁧𑁧𑁬𑁦) 𑁋

𑀕𑀸𑀣𑀫𑀸𑀳. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀺𑀭𑀺𑀫𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀯𑀺𑀕𑀢𑀙𑀦𑁆𑀤𑀭𑀸𑀕𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀺𑀭𑀺𑀫𑀸 𑀤𑁂𑀯𑀓𑀜𑁆𑀜𑀸 𑀅𑀢𑁆𑀢𑀦𑁄 𑀯𑀺𑀪𑀯𑀲𑀫𑀺𑀤𑁆𑀥𑀺𑀁 𑀑𑀮𑁄𑀓𑁂𑀢𑁆𑀯𑀸 𑀆𑀕𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀻 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀲𑀭𑀻𑀭𑀲𑀫𑀻𑀧𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀪𑀕𑀯𑀦𑁆𑀢𑀁 𑀞𑀺𑀢𑀁 𑀫𑀳𑀸𑀚𑀦𑀓𑀸𑀬𑀜𑁆𑀘 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 𑀧𑀜𑁆𑀘𑀳𑀺 𑀤𑁂𑀯𑀓𑀜𑁆𑀜𑀸𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀤𑀺𑀲𑁆𑀲𑀫𑀸𑀦𑀓𑀸𑀬𑀸 𑀆𑀕𑀦𑁆𑀢𑁆𑀯𑀸 𑀭𑀣𑀢𑁄 𑀑𑀢𑀭𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀜𑁆𑀚𑀮𑀻 𑀅𑀝𑁆𑀞𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀳𑁄𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼’’𑀦𑁆𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀢𑀁 𑀲𑀺𑀭𑀺𑀫𑀁 𑀤𑁂𑀯𑀥𑀻𑀢𑀭𑀁 𑁋

𑁧𑁩𑁭.

‘‘𑀬𑀼𑀢𑁆𑀢𑀸 𑀘 𑀢𑁂 𑀧𑀭𑀫𑀅𑀮𑀗𑁆𑀓𑀢𑀸 𑀳𑀬𑀸, 𑀅𑀥𑁄𑀫𑀼𑀔𑀸 𑀅𑀖𑀲𑀺𑀕𑀫𑀸 𑀩𑀮𑀻 𑀚𑀯𑀸;

𑀅𑀪𑀺𑀦𑀺𑀫𑁆𑀫𑀺𑀢𑀸 𑀧𑀜𑁆𑀘𑀭𑀣𑀸𑀲𑀢𑀸 𑀘 𑀢𑁂, 𑀅𑀦𑁆𑀯𑁂𑀦𑁆𑀢𑀺 𑀢𑀁 𑀲𑀸𑀭𑀣𑀺𑀘𑁄𑀤𑀺𑀢𑀸 𑀳𑀬𑀸.

𑁧𑁩𑁮.

‘‘𑀲𑀸 𑀢𑀺𑀝𑁆𑀞𑀲𑀺 𑀭𑀣𑀯𑀭𑁂 𑀅𑀮𑀗𑁆𑀓𑀢𑀸,

𑀑𑀪𑀸𑀲𑀬𑀁 𑀚𑀮𑀫𑀺𑀯 𑀚𑁄𑀢𑀺 𑀧𑁄𑀯𑀓𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀯𑀭𑀢𑀦𑀼 𑀅𑀦𑁄𑀫𑀤𑀲𑁆𑀲𑀦𑁂,

𑀓𑀲𑁆𑀫𑀸 𑀦𑀼 𑀓𑀸𑀬𑀸 𑀅𑀦𑀥𑀺𑀯𑀭𑀁 𑀉𑀧𑀸𑀕𑀫𑀻’’𑀢𑀺. 𑁋 𑀧𑀝𑀺𑀧𑀼𑀘𑁆𑀙𑀺;

𑁧𑁩𑁭. 𑀢𑀢𑁆𑀣 𑀬𑀼𑀢𑁆𑀢𑀸 𑀘 𑀢𑁂 𑀧𑀭𑀫𑀅𑀮𑀗𑁆𑀓𑀢𑀸 𑀳𑀬𑀸𑀢𑀺 𑀧𑀭𑀫𑀁 𑀅𑀢𑀺𑀯𑀺𑀬 𑀯𑀺𑀲𑁂𑀲𑀢𑁄 𑀅𑀮𑀗𑁆𑀓𑀢𑀸, 𑀧𑀭𑀫𑁂𑀳𑀺 𑀯𑀸 𑀉𑀢𑁆𑀢𑀫𑁂𑀳𑀺 𑀤𑀺𑀩𑁆𑀩𑁂𑀳𑀺 𑀅𑀲𑁆𑀲𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀸, 𑀧𑀭𑀫𑀸 𑀯𑀸 𑀅𑀕𑁆𑀕𑀸 𑀲𑁂𑀝𑁆𑀞𑀸 𑀆𑀚𑀸𑀦𑀻𑀬𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀸 𑀳𑀬𑀸 𑀅𑀲𑁆𑀲𑀸 𑀢𑁂 𑀢𑀯 𑀭𑀣𑁂 𑀬𑁄𑀚𑀺𑀢𑀸, 𑀬𑀼𑀢𑁆𑀢𑀸 𑀯𑀸 𑀢𑁂 𑀭𑀣𑀲𑁆𑀲 𑀘 𑀅𑀦𑀼𑀘𑁆𑀙𑀯𑀺𑀓𑀸, 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀲𑀤𑀺𑀲𑀢𑀸𑀬 𑀬𑀼𑀢𑁆𑀢𑀸 𑀲𑀁𑀲𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀭𑀫𑀅𑀮𑀗𑁆𑀓𑀢𑀸’’𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀲𑀦𑁆𑀥𑀺𑀁 𑀅𑀓𑀢𑁆𑀯𑀸 𑀤𑀼𑀢𑀺𑀬𑀲𑁆𑀫𑀺𑀁 𑀧𑀓𑁆𑀔𑁂 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀥𑁄𑀫𑀼𑀔𑀸𑀢𑀺 𑀳𑁂𑀝𑁆𑀞𑀸𑀫𑀼𑀔𑀸. 𑀬𑀤𑀺𑀧𑀺 𑀢𑁂 𑀢𑀤𑀸 𑀧𑀓𑀢𑀺𑀬𑀸𑀯 𑀞𑀺𑀢𑀸, 𑀤𑁂𑀯𑀮𑁄𑀓𑀢𑁄 𑀑𑀭𑁄𑀳𑀡𑀯𑀲𑁂𑀦 ‘‘𑀅𑀥𑁄𑀫𑀼𑀔𑀸’’𑀢𑀺 𑀯𑀼𑀢𑁆𑀢𑀸. 𑀅𑀖𑀲𑀺𑀕𑀫𑀸𑀢𑀺 𑀯𑁂𑀳𑀸𑀲𑀁𑀕𑀫𑀸. 𑀩𑀮𑀻𑀢𑀺 𑀩𑀮𑀯𑀦𑁆𑀢𑁄. 𑀚𑀯𑀸𑀢𑀺 𑀚𑀯𑀦𑀓𑀸, 𑀩𑀮𑀯𑀦𑁆𑀢𑁄 𑀘𑁂𑀯 𑀯𑁂𑀕𑀯𑀦𑁆𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀫𑁆𑀫𑀺𑀢𑀸𑀢𑀺 𑀢𑀯 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀫𑁆𑀫𑀺𑀢𑀸 𑀦𑀺𑀩𑁆𑀩𑀢𑁆𑀢𑀸. 𑀲𑀬𑀁 𑀦𑀺𑀫𑁆𑀫𑀺𑀢𑀫𑁂𑀯 𑀯𑀸 𑀲𑀦𑁆𑀥𑀸𑀬 ‘‘𑀅𑀪𑀺𑀦𑀺𑀫𑁆𑀫𑀺𑀢𑀸’’𑀢𑀺 𑀯𑀼𑀢𑁆𑀢𑀁 𑀦𑀺𑀫𑁆𑀫𑀸𑀦𑀭𑀢𑀺𑀪𑀸𑀯𑀢𑁄 𑀲𑀺𑀭𑀺𑀫𑀸𑀬 𑀤𑁂𑀯𑀥𑀻𑀢𑀸𑀬. 𑀧𑀜𑁆𑀘𑀭𑀣𑀸𑀲𑀢𑀸𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀣𑀓𑀸𑀭𑀲𑁆𑀲 𑀤𑀻𑀖𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀯𑀺𑀪𑀢𑁆𑀢𑀺𑀅𑀮𑁄𑀧𑁄 𑀯𑀸 𑀤𑀝𑁆𑀞𑀩𑁆𑀩𑁄, 𑀧𑀜𑁆𑀘 𑀭𑀣𑀲𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀯𑁂𑀦𑁆𑀢𑀺 𑀢𑀁 𑀲𑀸𑀭𑀣𑀺𑀘𑁄𑀤𑀺𑀢𑀸 𑀳𑀬𑀸𑀢𑀺 𑀲𑀸𑀭𑀣𑀻𑀳𑀺 𑀘𑁄𑀤𑀺𑀢𑀸 𑀯𑀺𑀬 𑀭𑀣𑁂𑀲𑀼 𑀬𑀼𑀢𑁆𑀢𑀸 𑀇𑀫𑁂 𑀳𑀬𑀸 𑀪𑀤𑁆𑀤𑁂, 𑀤𑁂𑀯𑀢𑁂, 𑀢𑀁 𑀅𑀦𑀼𑀕𑀘𑁆𑀙𑀦𑁆𑀢𑀺. ‘‘𑀲𑀸𑀭𑀣𑀺𑀅𑀘𑁄𑀤𑀺𑀢𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀲𑀸𑀭𑀣𑀻𑀳𑀺 𑀅𑀘𑁄𑀤𑀺𑀢𑀸 𑀏𑀯 𑀅𑀦𑀼𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀸𑀭𑀣𑀺𑀘𑁄𑀤𑀺𑀢𑀸 𑀳𑀬𑀸’’𑀢𑀺 𑀏𑀓𑀁𑀬𑁂𑀯 𑀯𑀸 𑀧𑀤𑀁 𑀕𑀸𑀣𑀸𑀲𑀼𑀔𑀢𑁆𑀣𑀁 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀸𑀭𑀣𑀺𑀘𑁄𑀤𑀺𑀢𑀳𑀬𑀸 𑀧𑀜𑁆𑀘 𑀭𑀣𑀲𑀢𑀸𑀢𑀺 𑀬𑁄𑀚𑀦𑀸.

𑁧𑁩𑁮. 𑀲𑀸 𑀢𑀺𑀝𑁆𑀞𑀲𑀻𑀢𑀺 𑀲𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺. 𑀭𑀣𑀯𑀭𑁂𑀢𑀺 𑀭𑀣𑀼𑀢𑁆𑀢𑀫𑁂. 𑀅𑀮𑀗𑁆𑀓𑀢𑀸𑀢𑀺 𑀲𑀝𑁆𑀞𑀺𑀲𑀓𑀝𑀪𑀸𑀭𑁂𑀳𑀺 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀲𑀭𑀻𑀭𑀸. 𑀑𑀪𑀸𑀲𑀬𑀁 𑀚𑀮𑀫𑀺𑀯 𑀚𑁄𑀢𑀺 𑀧𑀸𑀯𑀓𑁄𑀢𑀺 𑀑𑀪𑀸𑀲𑁂𑀦𑁆𑀢𑀻 𑀚𑁄𑀢𑀺𑀭𑀺𑀯 𑀚𑀮𑀦𑁆𑀢𑀻 𑀧𑀸𑀯𑀓𑁄 𑀯𑀺𑀬 𑀘 𑀢𑀺𑀝𑁆𑀞𑀲𑀺, 𑀲𑀫𑀦𑁆𑀢𑀢𑁄 𑀑𑀪𑀸𑀲𑁂𑀦𑁆𑀢𑀻 𑀚𑀮𑀦𑁆𑀢𑀻 𑀢𑀺𑀝𑁆𑀞𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀚𑁄𑀢𑀻’’𑀢𑀺 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀢𑀸𑀭𑀓𑀭𑀽𑀧𑀸𑀦𑀁 𑀲𑀸𑀥𑀸𑀭𑀡𑀦𑀸𑀫𑀁. 𑀯𑀭𑀢𑀦𑀽𑀢𑀺 𑀉𑀢𑁆𑀢𑀫𑀭𑀽𑀧𑀥𑀭𑁂 𑀲𑀩𑁆𑀩𑀗𑁆𑀕𑀲𑁄𑀪𑀦𑁂. 𑀢𑀢𑁄 𑀏𑀯 𑀅𑀦𑁄𑀫𑀤𑀲𑁆𑀲𑀦𑁂 𑀅𑀮𑀸𑀫𑀓𑀤𑀲𑁆𑀲𑀦𑁂, 𑀤𑀲𑁆𑀲𑀦𑀻𑀬𑁂 𑀧𑀸𑀲𑀸𑀤𑀺𑀓𑁂𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀦𑀼 𑀓𑀸𑀬𑀸 𑀅𑀦𑀥𑀺𑀯𑀭𑀁 𑀉𑀧𑀸𑀕𑀫𑀻𑀢𑀺 𑀓𑀼𑀢𑁄 𑀦𑀸𑀫 𑀤𑁂𑀯𑀓𑀸𑀬𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀬𑀺𑀭𑀼𑀧𑀸𑀲𑀦𑀸𑀬 𑀉𑀧𑀕𑀜𑁆𑀙𑀺 𑀉𑀧𑀕𑀢𑀸𑀲𑀺.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑀻 𑁋

𑁧𑁩𑁯.

‘‘𑀓𑀸𑀫𑀕𑁆𑀕𑀧𑀢𑁆𑀢𑀸𑀦𑀁 𑀬𑀫𑀸𑀳𑀼𑀦𑀼𑀢𑁆𑀢𑀭𑀁, 𑀦𑀺𑀫𑁆𑀫𑀸𑀬 𑀦𑀺𑀫𑁆𑀫𑀸𑀬 𑀭𑀫𑀦𑁆𑀢𑀺 𑀤𑁂𑀯𑀢𑀸;

𑀢𑀲𑁆𑀫𑀸 𑀓𑀸𑀬𑀸 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻, 𑀇𑀥𑀸𑀕𑀢𑀸 𑀅𑀦𑀥𑀺𑀯𑀭𑀁 𑀦𑀫𑀲𑁆𑀲𑀺𑀢𑀼’’𑀦𑁆𑀢𑀺. 𑁋

𑀕𑀸𑀣𑀫𑀸𑀳.

𑁧𑁩𑁯. 𑀢𑀢𑁆𑀣 𑀓𑀸𑀫𑀕𑁆𑀕𑀧𑀢𑁆𑀢𑀸𑀦𑀁 𑀬𑀫𑀸𑀳𑀼𑀦𑀼𑀢𑁆𑀢𑀭𑀦𑁆𑀢𑀺 𑀓𑀸𑀫𑀽𑀧𑀪𑁄𑀕𑁂𑀳𑀺 𑀅𑀕𑁆𑀕𑀪𑀸𑀯𑀁 𑀧𑀢𑁆𑀢𑀸𑀦𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀬𑀁 𑀤𑁂𑀯𑀓𑀸𑀬𑀁 𑀬𑀲𑁂𑀦 𑀪𑁄𑀕𑀸𑀤𑀺𑀯𑀲𑁂𑀦 𑀘 𑀅𑀦𑀼𑀢𑁆𑀢𑀭𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀢𑁄 𑀓𑀸𑀬𑀸. 𑀦𑀺𑀫𑁆𑀫𑀸𑀬 𑀦𑀺𑀫𑁆𑀫𑀸𑀬 𑀭𑀫𑀦𑁆𑀢𑀺 𑀤𑁂𑀯𑀢𑀸𑀢𑀺 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀢𑀸 𑀅𑀢𑁆𑀢𑀦𑀸 𑀬𑀣𑀸𑀭𑀼𑀘𑀺𑀢𑁂 𑀓𑀸𑀫𑁂 𑀲𑀬𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀭𑀫𑀦𑁆𑀢𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀸 𑀅𑀪𑀺𑀭𑀫𑀦𑁆𑀢𑀺. 𑀢𑀲𑁆𑀫𑀸 𑀓𑀸𑀬𑀸𑀢𑀺 𑀢𑀲𑁆𑀫𑀸 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀦𑀺𑀓𑀸𑀬𑀸. 𑀓𑀸𑀫𑀯𑀡𑁆𑀡𑀺𑀦𑀻𑀢𑀺 𑀓𑀸𑀫𑀭𑀽𑀧𑀥𑀭𑀸 𑀬𑀣𑀺𑀘𑁆𑀙𑀺𑀢𑀭𑀽𑀧𑀥𑀸𑀭𑀺𑀦𑀻. 𑀇𑀥𑀸𑀕𑀢𑀸𑀢𑀺 𑀇𑀥 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂, 𑀇𑀫𑀁 𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑀸.

𑀏𑀯𑀁 𑀤𑁂𑀯𑀢𑀸𑀬 𑀅𑀢𑁆𑀢𑀦𑁄 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀢𑀸𑀪𑀸𑀯𑁂 𑀓𑀣𑀺𑀢𑁂 𑀧𑀼𑀦 𑀣𑁂𑀭𑁄 𑀢𑀲𑁆𑀲𑀸 𑀧𑀼𑀭𑀺𑀫𑀪𑀯𑀁 𑀢𑀢𑁆𑀣 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀮𑀤𑁆𑀥𑀺𑀜𑁆𑀘 𑀓𑀣𑀸𑀧𑁂𑀢𑀼𑀓𑀸𑀫𑁄 𑁋

𑁧𑁪𑁦.

‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀲𑀼𑀘𑀭𑀺𑀢𑀫𑀸𑀘𑀭𑀻𑀥, 𑀓𑁂𑀦𑀘𑁆𑀙𑀲𑀺 𑀢𑁆𑀯𑀁 𑀅𑀫𑀺𑀢𑀬𑀲𑀸 𑀲𑀼𑀔𑁂𑀥𑀺𑀢𑀸;

𑀇𑀤𑁆𑀥𑀻 𑀘 𑀢𑁂 𑀅𑀦𑀥𑀺𑀯𑀭𑀸 𑀯𑀺𑀳𑀗𑁆𑀕𑀫𑀸, 𑀯𑀡𑁆𑀡𑁄 𑀘 𑀢𑁂 𑀤𑀲 𑀤𑀺𑀲𑀸 𑀯𑀺𑀭𑁄𑀘𑀢𑀺.

𑁧𑁪𑁧.

‘‘𑀤𑁂𑀯𑁂𑀳𑀺 𑀢𑁆𑀯𑀁 𑀧𑀭𑀺𑀯𑀼𑀢𑀸 𑀲𑀓𑁆𑀓𑀢𑀸 𑀘𑀲𑀺,

𑀓𑀼𑀢𑁄 𑀘𑀼𑀢𑀸 𑀲𑀼𑀕𑀢𑀺𑀕𑀢𑀸𑀲𑀺 𑀤𑁂𑀯𑀢𑁂;

𑀓𑀲𑁆𑀲 𑀯𑀸 𑀢𑁆𑀯𑀁 𑀯𑀘𑀦𑀓𑀭𑀸𑀦𑀼𑀲𑀸𑀲𑀦𑀺𑀁,

𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀬𑀤𑀺 𑀩𑀼𑀤𑁆𑀥𑀲𑀸𑀯𑀺𑀓𑀸’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑁧𑁪𑁦. 𑀢𑀢𑁆𑀣 𑀆𑀘𑀭𑀻𑀢𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀉𑀧𑀘𑀺𑀦𑀻𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀥 𑀯𑀸 𑀇𑀫𑀲𑁆𑀫𑀺𑀁 𑀤𑁂𑀯𑀢𑁆𑀢𑀪𑀸𑀯𑁂. 𑀓𑁂𑀦𑀘𑁆𑀙𑀲𑀻𑀢𑀺 𑀓𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀲𑁆𑀲𑀢𑁆𑀣𑀸 𑀅𑀘𑁆𑀙𑀲𑀺. ‘‘𑀓𑁂𑀦𑀸𑀲𑀺 𑀢𑁆𑀯’’𑀦𑁆𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀅𑀫𑀺𑀢𑀬𑀲𑀸𑀢𑀺 𑀦 𑀫𑀺𑀢𑀬𑀲𑀸 𑀅𑀦𑀧𑁆𑀧𑀓𑀧𑀭𑀺𑀯𑀸𑀭𑀸. 𑀲𑀼𑀔𑁂𑀥𑀺𑀢𑀸𑀢𑀺 𑀲𑀼𑀔𑁂𑀦 𑀯𑀟𑁆𑀠𑀺𑀢𑀸, 𑀲𑀼𑀧𑀭𑀺𑀩𑁆𑀭𑀽𑀳𑀺𑀢𑀤𑀺𑀩𑁆𑀩𑀲𑀼𑀔𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀻𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑁄. 𑀅𑀦𑀥𑀺𑀯𑀭𑀸𑀢𑀺 𑀅𑀥𑀺𑀓𑀸 𑀯𑀺𑀲𑀺𑀝𑁆𑀞𑀸 𑀅𑀜𑁆𑀜𑀸 𑀏𑀢𑀺𑀲𑁆𑀲𑀸 𑀦𑀢𑁆𑀣𑀻𑀢𑀺 𑀅𑀦𑀥𑀺𑀯𑀭𑀸, 𑀅𑀢𑀺𑀉𑀢𑁆𑀢𑀫𑀸𑀢𑀺 𑀅𑀢𑁆𑀣𑁄. 𑀯𑀺𑀳𑀗𑁆𑀕𑀫𑀸𑀢𑀺 𑀯𑁂𑀳𑀸𑀲𑀕𑀸𑀫𑀺𑀦𑀻. 𑀤𑀲 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸. 𑀯𑀺𑀭𑁄𑀘𑀢𑀻𑀢𑀺 𑀑𑀪𑀸𑀲𑁂𑀢𑀺.

𑁧𑁪𑁧. 𑀧𑀭𑀺𑀯𑀼𑀢𑀸 𑀲𑀓𑁆𑀓𑀢𑀸 𑀘𑀲𑀻𑀢𑀺 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑀺𑀢𑀸 𑀲𑀫𑁆𑀪𑀸𑀯𑀺𑀢𑀸 𑀘 𑀅𑀲𑀺. 𑀓𑀼𑀢𑁄 𑀘𑀼𑀢𑀸 𑀲𑀼𑀕𑀢𑀺𑀕𑀢𑀸𑀲𑀻𑀢𑀺 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀓𑀢𑀭𑀕𑀢𑀺𑀢𑁄 𑀘𑀼𑀢𑀸 𑀳𑀼𑀢𑁆𑀯𑀸 𑀲𑀼𑀕𑀢𑀺𑀁 𑀇𑀫𑀁 𑀤𑁂𑀯𑀕𑀢𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀕𑀢𑀸 𑀅𑀲𑀺. 𑀓𑀲𑁆𑀲 𑀯𑀸 𑀢𑁆𑀯𑀁 𑀯𑀘𑀦𑀓𑀭𑀸𑀦𑀼𑀲𑀸𑀲𑀦𑀺𑀦𑁆𑀢𑀺 𑀓𑀲𑁆𑀲 𑀦𑀼 𑀯𑀸 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀸𑀯𑀘𑀦𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀢𑁆𑀯𑀁 𑀯𑀘𑀦𑀓𑀭𑀸 𑀅𑀲𑀻𑀢𑀺 𑀬𑁄𑀚𑀦𑀸. 𑀓𑀲𑁆𑀲 𑀯𑀸 𑀢𑁆𑀯𑀁 𑀲𑀢𑁆𑀣𑀼 𑀯𑀘𑀦𑀓𑀭𑀸 𑀅𑀦𑀼𑀲𑀸𑀲𑀓𑀲𑁆𑀲 𑀅𑀦𑀼𑀲𑀺𑀝𑁆𑀞𑀺𑀬𑀁 𑀧𑀢𑀺𑀝𑁆𑀞𑀸𑀦𑁂𑀦𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀅𑀦𑀼𑀤𑁆𑀤𑁂𑀲𑀺𑀓𑀯𑀲𑁂𑀦 𑀢𑀲𑁆𑀲𑀸 𑀮𑀤𑁆𑀥𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀉𑀤𑁆𑀤𑁂𑀲𑀺𑀓𑀯𑀲𑁂𑀦 ‘‘𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀬𑀤𑀺 𑀩𑀼𑀤𑁆𑀥𑀲𑀸𑀯𑀺𑀓𑀸’’𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀩𑀼𑀤𑁆𑀥𑀲𑀸𑀯𑀺𑀓𑀸𑀢𑀺 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀥𑀫𑁆𑀫𑀁 𑀲𑀬𑀫𑁆𑀪𑀼𑀜𑀸𑀡𑁂𑀦 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑁂 𑀚𑀸𑀢𑀸𑀢𑀺 𑀩𑀼𑀤𑁆𑀥𑀲𑀸𑀯𑀺𑀓𑀸.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀓𑀣𑁂𑀦𑁆𑀢𑀻 𑀤𑁂𑀯𑀢𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁨.

‘‘𑀦𑀕𑀦𑁆𑀢𑀭𑁂 𑀦𑀕𑀭𑀯𑀭𑁂 𑀲𑀼𑀫𑀸𑀧𑀺𑀢𑁂, 𑀧𑀭𑀺𑀘𑀸𑀭𑀺𑀓𑀸 𑀭𑀸𑀚𑀯𑀭𑀲𑁆𑀲 𑀲𑀺𑀭𑀺𑀫𑀢𑁄;

𑀦𑀘𑁆𑀘𑁂 𑀕𑀻𑀢𑁂 𑀧𑀭𑀫𑀲𑀼𑀲𑀺𑀓𑁆𑀔𑀺𑀢𑀸 𑀅𑀳𑀼𑀁, 𑀲𑀺𑀭𑀺𑀫𑀸𑀢𑀺 𑀫𑀁 𑀭𑀸𑀚𑀕𑀳𑁂 𑀅𑀯𑁂𑀤𑀺𑀁𑀲𑀼.

𑁧𑁪𑁩.

‘‘𑀩𑀼𑀤𑁆𑀥𑁄 𑀘 𑀫𑁂 𑀇𑀲𑀺𑀦𑀺𑀲𑀪𑁄 𑀯𑀺𑀦𑀸𑀬𑀓𑁄, 𑀅𑀤𑁂𑀲𑀬𑀻 𑀲𑀫𑀼𑀤𑀬𑀤𑀼𑀓𑁆𑀔𑀦𑀺𑀘𑁆𑀘𑀢𑀁;

𑀅𑀲𑀗𑁆𑀔𑀢𑀁 𑀤𑀼𑀓𑁆𑀔𑀦𑀺𑀭𑁄𑀥 𑀲𑀲𑁆𑀲𑀢𑀁, 𑀫𑀕𑁆𑀕𑀜𑁆𑀘𑀺𑀫𑀁 𑀅𑀓𑀼𑀝𑀺𑀮𑀫𑀜𑁆𑀚𑀲𑀁 𑀲𑀺𑀯𑀁.

𑁧𑁪𑁪.

‘‘𑀲𑀼𑀢𑁆𑀯𑀸𑀦𑀳𑀁 𑀅𑀫𑀢𑀧𑀤𑀁 𑀅𑀲𑀗𑁆𑀔𑀢𑀁, 𑀢𑀣𑀸𑀕𑀢𑀲𑁆𑀲𑀦𑀥𑀺𑀯𑀭𑀲𑁆𑀲 𑀲𑀸𑀲𑀦𑀁;

𑀲𑀻𑀮𑁂𑀲𑁆𑀯𑀳𑀁 𑀧𑀭𑀫𑀲𑀼𑀲𑀁𑀯𑀼𑀢𑀸 𑀅𑀳𑀼𑀁, 𑀥𑀫𑁆𑀫𑁂 𑀞𑀺𑀢𑀸 𑀦𑀭𑀯𑀭𑀩𑀼𑀤𑁆𑀥𑀤𑁂𑀲𑀺𑀢𑁂.

𑁧𑁪𑁫.

‘‘𑀜𑀢𑁆𑀯𑀸𑀦𑀳𑀁 𑀯𑀺𑀭𑀚𑀧𑀤𑀁 𑀅𑀲𑀗𑁆𑀔𑀢𑀁, 𑀢𑀣𑀸𑀕𑀢𑁂𑀦𑀦𑀥𑀺𑀯𑀭𑁂𑀦 𑀤𑁂𑀲𑀺𑀢𑀁;

𑀢𑀢𑁆𑀣𑁂𑀯𑀳𑀁 𑀲𑀫𑀣𑀲𑀫𑀸𑀥𑀺𑀫𑀸𑀨𑀼𑀲𑀺𑀁, 𑀲𑀸𑀬𑁂𑀯 𑀫𑁂 𑀧𑀭𑀫𑀦𑀺𑀬𑀸𑀫𑀢𑀸 𑀅𑀳𑀼.

𑁧𑁪𑁬.

‘‘𑀮𑀤𑁆𑀥𑀸𑀦𑀳𑀁 𑀅𑀫𑀢𑀯𑀭𑀁 𑀯𑀺𑀲𑁂𑀲𑀦𑀁, 𑀏𑀓𑀁𑀲𑀺𑀓𑀸 𑀅𑀪𑀺𑀲𑀫𑀬𑁂 𑀯𑀺𑀲𑁂𑀲𑀺𑀬;

𑀅𑀲𑀁𑀲𑀬𑀸 𑀩𑀳𑀼𑀚𑀦𑀧𑀽𑀚𑀺𑀢𑀸 𑀅𑀳𑀁, 𑀔𑀺𑀟𑁆𑀟𑀸𑀭𑀢𑀺𑀁 𑀧𑀘𑁆𑀘𑀦𑀼𑀪𑁄𑀫𑀦𑀧𑁆𑀧𑀓𑀁.

𑁧𑁪𑁭.

‘‘𑀏𑀯𑀁 𑀅𑀳𑀁 𑀅𑀫𑀢𑀤𑀲𑀫𑁆𑀳𑀺 𑀤𑁂𑀯𑀢𑀸, 𑀢𑀣𑀸𑀕𑀢𑀲𑁆𑀲𑀦𑀥𑀺𑀯𑀭𑀲𑁆𑀲 𑀲𑀸𑀯𑀺𑀓𑀸;

𑀥𑀫𑁆𑀫𑀤𑁆𑀤𑀲𑀸 𑀧𑀞𑀫𑀨𑀮𑁂 𑀧𑀢𑀺𑀝𑁆𑀞𑀺𑀢𑀸, 𑀲𑁄𑀢𑀸𑀧𑀦𑁆𑀦𑀸 𑀦 𑀘 𑀧𑀦 𑀫𑀢𑁆𑀣𑀺 𑀤𑀼𑀕𑁆𑀕𑀢𑀺.

𑁧𑁪𑁮.

‘‘𑀲𑀸 𑀯𑀦𑁆𑀤𑀺𑀢𑀼𑀁 𑀅𑀦𑀥𑀺𑀯𑀭𑀁 𑀉𑀧𑀸𑀕𑀫𑀺𑀁, 𑀧𑀸𑀲𑀸𑀤𑀺𑀓𑁂 𑀓𑀼𑀲𑀮𑀭𑀢𑁂 𑀘 𑀪𑀺𑀓𑁆𑀔𑀯𑁄;

𑀦𑀫𑀲𑁆𑀲𑀺𑀢𑀼𑀁 𑀲𑀫𑀡𑀲𑀫𑀸𑀕𑀫𑀁 𑀲𑀺𑀯𑀁, 𑀲𑀕𑀸𑀭𑀯𑀸 𑀲𑀺𑀭𑀺𑀫𑀢𑁄 𑀥𑀫𑁆𑀫𑀭𑀸𑀚𑀺𑀦𑁄.

𑁧𑁪𑁯.

‘‘𑀤𑀺𑀲𑁆𑀯𑀸 𑀫𑀼𑀦𑀺𑀁 𑀫𑀼𑀤𑀺𑀢𑀫𑀦𑀫𑁆𑀳𑀺 𑀧𑀻𑀡𑀺𑀢𑀸, 𑀢𑀣𑀸𑀕𑀢𑀁 𑀦𑀭𑀯𑀭𑀤𑀫𑁆𑀫𑀲𑀸𑀭𑀣𑀺𑀁;

𑀢𑀡𑁆𑀳𑀘𑁆𑀙𑀺𑀤𑀁 𑀓𑀼𑀲𑀮𑀭𑀢𑀁 𑀯𑀺𑀦𑀸𑀬𑀓𑀁, 𑀯𑀦𑁆𑀤𑀸𑀫𑀳𑀁 𑀧𑀭𑀫𑀳𑀺𑀢𑀸𑀦𑀼𑀓𑀫𑁆𑀧𑀓’’𑀦𑁆𑀢𑀺.

𑁧𑁪𑁨. 𑀢𑀢𑁆𑀣 𑀦𑀕𑀦𑁆𑀢𑀭𑁂𑀢𑀺 𑀇𑀲𑀺𑀕𑀺𑀮𑀺𑀯𑁂𑀧𑀼𑀮𑁆𑀮𑀯𑁂𑀪𑀸𑀭𑀧𑀡𑁆𑀟𑀯𑀕𑀺𑀚𑁆𑀛𑀓𑀽𑀝𑀲𑀗𑁆𑀔𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂, 𑀬𑀢𑁄 𑀢𑀁 𑀦𑀕𑀭𑀁 ‘‘𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀕𑀭𑀯𑀭𑁂𑀢𑀺 𑀉𑀢𑁆𑀢𑀫𑀦𑀕𑀭𑁂, 𑀭𑀸𑀚𑀕𑀳𑀁 𑀲𑀦𑁆𑀥𑀸𑀬𑀸𑀳. 𑀲𑀼𑀫𑀸𑀧𑀺𑀢𑁂𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀧𑀡𑁆𑀟𑀺𑀢𑁂𑀦 𑀯𑀢𑁆𑀣𑀼𑀯𑀺𑀚𑁆𑀚𑀸𑀯𑀺𑀥𑀺𑀦𑀸 𑀲𑀫𑁆𑀫𑀤𑁂𑀯 𑀦𑀺𑀯𑁂𑀲𑀺𑀢𑁂. 𑀧𑀭𑀺𑀘𑀸𑀭𑀺𑀓𑀸𑀢𑀺 𑀲𑀁𑀕𑀻𑀢𑀧𑀭𑀺𑀘𑀭𑀺𑀬𑀸𑀬 𑀉𑀧𑀝𑁆𑀞𑀸𑀬𑀺𑀓𑀸. 𑀭𑀸𑀚𑀯𑀭𑀲𑁆𑀲𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀲𑁆𑀲. 𑀲𑀺𑀭𑀺𑀫𑀢𑁄𑀢𑀺 𑀏𑀢𑁆𑀣 ‘‘𑀲𑀺𑀭𑀻𑀢𑀺 𑀩𑀼𑀤𑁆𑀥𑀺𑀧𑀼𑀜𑁆𑀜𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀣 𑀯𑀸 𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀸 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀫𑁆𑀧𑀢𑁆𑀢𑀺 𑀓𑀢𑀧𑀼𑀜𑁆𑀜𑀁 𑀦𑀺𑀲𑁆𑀲𑀬𑀢𑀺, 𑀓𑀢𑀧𑀼𑀜𑁆𑀜𑁂𑀳𑀺 𑀯𑀸 𑀦𑀺𑀲𑁆𑀲𑀻𑀬𑀢𑀻𑀢𑀺 ‘‘𑀲𑀺𑀭𑀻’’𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀺𑀭𑀺𑀫𑀸, 𑀢𑀲𑁆𑀲 𑀲𑀺𑀭𑀺𑀫𑀢𑁄. 𑀧𑀭𑀫𑀲𑀼𑀲𑀺𑀓𑁆𑀔𑀺𑀢𑀸𑀢𑀺 𑀅𑀢𑀺𑀯𑀺𑀬 𑀲𑀫𑁆𑀫𑀤𑁂𑀯 𑀘 𑀲𑀺𑀓𑁆𑀔𑀺𑀢𑀸. 𑀅𑀳𑀼𑀦𑁆𑀢𑀺 𑀅𑀳𑁄𑀲𑀺𑀁. 𑀅𑀯𑁂𑀤𑀺𑀁𑀲𑀽𑀢𑀺 𑀅𑀜𑁆𑀜𑀸𑀲𑀼𑀁.

𑁧𑁪𑁩. 𑀇𑀲𑀺𑀦𑀺𑀲𑀪𑁄𑀢𑀺 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀦𑀺𑀲𑀪𑁄. 𑀭𑀣𑀸 𑀲𑁄 𑀅𑀢𑁆𑀢𑀦𑁄 𑀦𑀺𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀓𑁂𑀦𑀘𑀺 𑀧𑀭𑀺𑀲𑁆𑀲𑀬𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀪𑀕𑀯𑀸 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀦𑀺𑀲𑀪𑁄 𑀯𑀺𑀬𑀸𑀢𑀺 𑀦𑀺𑀲𑀪𑁄. 𑀲𑀻𑀮𑀸𑀤𑀻𑀦𑀁 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀏𑀲𑀦𑀝𑁆𑀞𑁂𑀦 ‘‘𑀇𑀲𑀻’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀲𑀼 𑀲𑁂𑀓𑁆𑀔𑀸𑀲𑁂𑀓𑁆𑀔𑀇𑀲𑀻𑀲𑀼 𑀦𑀺𑀲𑀪𑁄, 𑀇𑀲𑀻𑀦𑀁 𑀯𑀸 𑀦𑀺𑀲𑀪𑁄, 𑀇𑀲𑀺 𑀘 𑀲𑁄 𑀦𑀺𑀲𑀪𑁄 𑀘𑀸𑀢𑀺 𑀯𑀸 𑀇𑀲𑀺𑀦𑀺𑀲𑀪𑁄. 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀯𑀺𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀦𑀸𑀬𑀓𑀯𑀺𑀭𑀳𑀺𑀢𑁄𑀢𑀺 𑀯𑀸 𑀯𑀺𑀦𑀸𑀬𑀓𑁄, 𑀲𑀬𑀫𑁆𑀪𑀽𑀢𑀺 𑀅𑀢𑁆𑀣𑁄.

𑀅𑀤𑁂𑀲𑀬𑀻 𑀲𑀫𑀼𑀤𑀬𑀤𑀼𑀓𑁆𑀔𑀦𑀺𑀘𑁆𑀘𑀢𑀦𑁆𑀢𑀺 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀘 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀘 𑀅𑀦𑀺𑀘𑁆𑀘𑀢𑀁 𑀯𑀬𑀥𑀫𑁆𑀫𑀢𑀁 𑀅𑀪𑀸𑀲𑀺. 𑀢𑁂𑀦 ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀪𑀺𑀲𑀫𑀬𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀲𑀫𑀼𑀤𑀬𑀤𑀼𑀓𑁆𑀔𑀦𑀺𑀘𑁆𑀘𑀢𑀦𑁆𑀢𑀺 𑀯𑀸 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀅𑀦𑀺𑀘𑁆𑀘𑀢𑀜𑁆𑀘. 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀕𑁆𑀕𑀳𑀡𑁂𑀦 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀁 𑀤𑀲𑁆𑀲𑁂𑀢𑀺, 𑀅𑀦𑀺𑀘𑁆𑀘𑀢𑀸𑀕𑀳𑀡𑁂𑀦 𑀢𑀲𑁆𑀲𑀸 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀲𑀗𑁆𑀔𑀸𑀭𑀸𑀦𑀜𑁆𑀳𑀺 𑀅𑀦𑀺𑀘𑁆𑀘𑀸𑀓𑀸𑀭𑁂 𑀯𑀺𑀪𑀸𑀯𑀺𑀢𑁂 𑀤𑀼𑀓𑁆𑀔𑀸𑀓𑀸𑀭𑁄 𑀅𑀦𑀢𑁆𑀢𑀸𑀓𑀸𑀭𑁄𑀧𑀺 𑀯𑀺𑀪𑀸𑀯𑀺𑀢𑁄𑀬𑁂𑀯 𑀳𑁄𑀢𑀺 𑀢𑀁𑀦𑀺𑀩𑀦𑁆𑀥𑀦𑀢𑁆𑀢𑀸 𑀢𑁂𑀲𑀁. 𑀢𑁂𑀦𑀸𑀳 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫). 𑀅𑀲𑀗𑁆𑀔𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀲𑀲𑁆𑀲𑀢𑀦𑁆𑀢𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀦 𑀲𑀗𑁆𑀔𑀢𑀦𑁆𑀢𑀺 𑀅𑀲𑀗𑁆𑀔𑀢𑀁, 𑀲𑀩𑁆𑀩𑀓𑀸𑀮𑀁 𑀢𑀣𑀪𑀸𑀯𑁂𑀦 𑀲𑀲𑁆𑀲𑀢𑀁, 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀭𑁄𑀥𑀪𑀸𑀯𑀢𑁄 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀜𑁆𑀘 𑀫𑁂 𑀅𑀤𑁂𑀲𑀬𑀻𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀜𑁆𑀘𑀺𑀫𑀁 𑀅𑀓𑀼𑀝𑀺𑀮𑀫𑀜𑁆𑀚𑀲𑀁 𑀲𑀺𑀯𑀦𑁆𑀢𑀺 𑀅𑀦𑁆𑀢𑀤𑁆𑀯𑀬𑀧𑀭𑀺𑀯𑀚𑁆𑀚𑀦𑁂𑀦 𑀓𑀼𑀝𑀺𑀮𑀪𑀸𑀯𑀓𑀭𑀸𑀦𑀁 𑀫𑀸𑀬𑀸𑀤𑀻𑀦𑀁 𑀓𑀸𑀬𑀯𑀗𑁆𑀓𑀸𑀤𑀻𑀦𑀜𑁆𑀘 𑀧𑀳𑀸𑀦𑁂𑀦 𑀅𑀓𑀼𑀝𑀺𑀮𑀁, 𑀢𑀢𑁄 𑀏𑀯 𑀅𑀜𑁆𑀚𑀲𑀁, 𑀅𑀲𑀺𑀯𑀪𑀸𑀯𑀓𑀭𑀸𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀲𑀺𑀯𑀁 𑀦𑀺𑀩𑁆𑀩𑀸𑀦𑀁. 𑀫𑀕𑁆𑀕𑀦𑁆𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 ‘‘𑀫𑀕𑁆𑀕𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀇𑀤𑀁 𑀢𑀼𑀫𑁆𑀳𑀸𑀓𑀜𑁆𑀘 𑀫𑀫𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀅𑀭𑀺𑀬𑀲𑀘𑁆𑀘𑀜𑁆𑀘 𑀫𑁂 𑀅𑀤𑁂𑀲𑀬𑀻𑀢𑀺 𑀬𑁄𑀚𑀦𑀸.

𑁧𑁪𑁪. 𑀲𑀼𑀢𑁆𑀯𑀸𑀦𑀳𑀁 𑀅𑀫𑀢𑀧𑀤𑀁 𑀅𑀲𑀗𑁆𑀔𑀢𑀁, 𑀢𑀣𑀸𑀕𑀢𑀲𑁆𑀲𑀦𑀥𑀺𑀯𑀭𑀲𑁆𑀲 𑀲𑀸𑀲𑀦𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀣𑀸 𑀆𑀕𑀫𑀦𑀸𑀤𑀺𑀅𑀢𑁆𑀣𑁂𑀦 𑀢𑀣𑀸𑀕𑀢𑀲𑁆𑀲, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀪𑀸𑀯𑀢𑁄 𑀅𑀦𑀥𑀺𑀯𑀭𑀲𑁆𑀲, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀫𑀢𑀧𑀤𑀁 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀉𑀤𑁆𑀤𑀺𑀲𑁆𑀲 𑀤𑁂𑀲𑀺𑀢𑀢𑁆𑀢𑀸, 𑀅𑀫𑀢𑀲𑁆𑀲 𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀧𑀝𑀺𑀧𑀚𑁆𑀚𑀦𑀼𑀧𑀸𑀬𑀢𑁆𑀢𑀸 𑀓𑁂𑀦𑀘𑀺𑀧𑀺 𑀅𑀲𑀗𑁆𑀔𑀭𑀡𑀻𑀬𑀢𑁆𑀢𑀸 𑀘 𑀅𑀫𑀢𑀧𑀤𑀁 𑀅𑀲𑀗𑁆𑀔𑀢𑀁 𑀲𑀸𑀲𑀦𑀁 𑀲𑀤𑁆𑀥𑀫𑁆𑀫𑀁 𑀅𑀳𑀁 𑀲𑀼𑀢𑁆𑀯𑀸𑀦𑀸𑀢𑀺. 𑀲𑀻𑀮𑁂𑀲𑁆𑀯𑀳𑀦𑁆𑀢𑀺 𑀲𑀻𑀮𑁂𑀲𑀼 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀲𑀼 𑀅𑀳𑀁. 𑀧𑀭𑀫𑀲𑀼𑀲𑀁𑀯𑀼𑀢𑀸𑀢𑀺 𑀅𑀢𑀺𑀯𑀺𑀬 𑀲𑀫𑁆𑀫𑀤𑁂𑀯 𑀲𑀁𑀯𑀼𑀢𑀸. 𑀅𑀳𑀼𑀦𑁆𑀢𑀺 𑀅𑀳𑁄𑀲𑀺𑀁. 𑀥𑀫𑁆𑀫𑁂 𑀞𑀺𑀢𑀸𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸.

𑁧𑁪𑁫. 𑀜𑀢𑁆𑀯𑀸𑀦𑀸𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀚𑀸𑀦𑀺𑀢𑁆𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀢𑀲𑁆𑀫𑀺𑀁𑀬𑁂𑀯 𑀯𑀸 𑀅𑀢𑁆𑀢𑀪𑀸𑀯𑁂. 𑀲𑀫𑀣𑀲𑀫𑀸𑀥𑀺𑀫𑀸𑀨𑀼𑀲𑀺𑀦𑁆𑀢𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀫𑀦𑀢𑁄 𑀯𑀽𑀧𑀲𑀫𑀦𑀢𑁄 𑀧𑀭𑀫𑀢𑁆𑀣𑀲𑀫𑀣𑀪𑀽𑀢𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀁 𑀆𑀨𑀼𑀲𑀺𑀁 𑀅𑀥𑀺𑀕𑀘𑁆𑀙𑀺𑀁. 𑀬𑀤𑀺𑀧𑀺 𑀬𑀲𑁆𑀫𑀺𑀁 𑀔𑀡𑁂 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀪𑀺𑀲𑀫𑀬𑁄, 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑀁 𑀧𑀦 𑀪𑀸𑀯𑀦𑀸𑀧𑀝𑀺𑀯𑁂𑀥𑀲𑁆𑀲𑁂𑀯 𑀧𑀼𑀭𑀺𑀫𑀲𑀺𑀤𑁆𑀥𑀺𑀓𑀸𑀭𑀡𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋

‘‘𑀜𑀢𑁆𑀯𑀸𑀦𑀳𑀁 𑀯𑀺𑀭𑀚𑀧𑀤𑀁 𑀅𑀲𑀗𑁆𑀔𑀢𑀁, 𑀢𑀣𑀸𑀕𑀢𑁂𑀦𑀦𑀥𑀺𑀯𑀭𑁂𑀦 𑀤𑁂𑀲𑀺𑀢𑀁’’.

𑀢𑀢𑁆𑀣𑁂𑀯𑀳𑀁 ‘𑀲𑀫𑀣𑀲𑀫𑀸𑀥𑀺𑀫𑀸𑀨𑀼𑀲𑀺’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁪𑁦𑁦; 𑁩.𑁪𑁨𑁧; 𑀲𑀁. 𑀦𑀺. 𑁪.𑁬𑁦). 𑀜𑀢𑁆𑀯𑀸𑀦𑀸𑀢𑀺 𑀯𑀸 𑀲𑀫𑀸𑀦𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 ‘‘𑀦𑀺𑀳𑀦𑁆𑀢𑁆𑀯𑀸𑀦 𑀢𑀫𑀁 𑀲𑀩𑁆𑀩𑀁, 𑀆𑀤𑀺𑀘𑁆𑀘𑁄 𑀦𑀪𑀫𑀼𑀕𑁆𑀕𑀢𑁄’’𑀢𑀺. 𑀲𑀸𑀬𑁂𑀯𑀸𑀢𑀺 𑀬𑀸 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀨𑀼𑀲𑀦𑀸 𑀮𑀤𑁆𑀥𑀸, 𑀲𑀸𑀬𑁂𑀯. 𑀧𑀭𑀫𑀦𑀺𑀬𑀸𑀫𑀢𑀸𑀢𑀺 𑀧𑀭𑀫𑀸 𑀉𑀢𑁆𑀢𑀫𑀸 𑀫𑀕𑁆𑀕𑀦𑀺𑀬𑀸𑀫𑀢𑀸.

𑁧𑁪𑁬. 𑀯𑀺𑀲𑁂𑀲𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀯𑀺𑀲𑁂𑀲𑀓𑀁 𑀯𑀺𑀲𑀺𑀝𑁆𑀞𑀪𑀸𑀯𑀲𑀸𑀥𑀓𑀁. 𑀏𑀓𑀁𑀲𑀺𑀓𑀸𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀏𑀓𑀁𑀲𑀕𑀸𑀳𑀯𑀢𑀻 𑀭𑀢𑀦𑀢𑁆𑀢𑀬𑁂 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸. 𑀅𑀪𑀺𑀲𑀫𑀬𑁂 𑀯𑀺𑀲𑁂𑀲𑀺𑀬𑀸𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀯𑀲𑁂𑀦 𑀯𑀺𑀲𑁂𑀲𑀁 𑀧𑀢𑁆𑀯𑀸. ‘‘𑀯𑀺𑀲𑁂𑀲𑀺𑀦𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀅𑀪𑀺𑀲𑀫𑀬𑀳𑁂𑀢𑀼 𑀯𑀺𑀲𑁂𑀲𑀯𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀁𑀲𑀬𑀸𑀢𑀺 𑀲𑁄𑀴𑀲𑀯𑀢𑁆𑀣𑀼𑀓𑀸𑀬 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀻𑀦𑀢𑁆𑀢𑀸 𑀅𑀧𑀕𑀢𑀲𑀁𑀲𑀬𑀸. ‘‘𑀅𑀲𑀁𑀲𑀺𑀬𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀩𑀳𑀼𑀚𑀦𑀧𑀽𑀚𑀺𑀢𑀸𑀢𑀺 𑀲𑀼𑀕𑀢𑀻𑀳𑀺 𑀧𑀭𑁂𑀳𑀺 𑀧𑀢𑁆𑀣𑀦𑀻𑀬𑀕𑀼𑀡𑀸𑀢𑀺 𑀅𑀢𑁆𑀣𑁄. 𑀔𑀺𑀟𑁆𑀟𑀸𑀭𑀢𑀺𑀦𑁆𑀢𑀺 𑀔𑀺𑀟𑁆𑀟𑀸𑀪𑀽𑀢𑀁 𑀭𑀢𑀺𑀁, 𑀅𑀣 𑀯𑀸 𑀔𑀺𑀟𑁆𑀟𑀜𑁆𑀘 𑀭𑀢𑀺𑀜𑁆𑀘 𑀔𑀺𑀟𑁆𑀟𑀸𑀯𑀺𑀳𑀸𑀭𑀜𑁆𑀘 𑀭𑀢𑀺𑀲𑀼𑀔𑀜𑁆𑀘.

𑁧𑁪𑁭. 𑀅𑀫𑀢𑀤𑀲𑀫𑁆𑀳𑀻𑀢𑀺 𑀅𑀫𑀢𑀤𑀲𑀸 𑀦𑀺𑀩𑁆𑀩𑀸𑀦𑀤𑀲𑁆𑀲𑀸𑀯𑀺𑀦𑀻 𑀅𑀫𑁆𑀳𑀺. 𑀥𑀫𑁆𑀫𑀤𑁆𑀤𑀲𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀤𑀺𑀝𑁆𑀞𑀯𑀢𑀻. 𑀲𑁄𑀢𑀸𑀧𑀦𑁆𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁄𑀢𑀁 𑀆𑀤𑀺𑀢𑁄 𑀧𑀢𑁆𑀢𑀸. 𑀦 𑀘 𑀧𑀦 𑀫𑀢𑁆𑀣𑀺 𑀤𑀼𑀕𑁆𑀕𑀢𑀻𑀢𑀺 𑀦 𑀘 𑀧𑀦 𑀫𑁂 𑀅𑀢𑁆𑀣𑀺 𑀤𑀼𑀕𑁆𑀕𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑁆𑀢𑀸.

𑁧𑁪𑁮. 𑀧𑀸𑀲𑀸𑀤𑀺𑀓𑁂𑀢𑀺 𑀧𑀲𑀸𑀤𑀸𑀯𑀳𑁂. 𑀓𑀼𑀲𑀮𑀭𑀢𑁂𑀢𑀺 𑀓𑀼𑀲𑀮𑁂 𑀅𑀦𑀯𑀚𑁆𑀚𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑁂 𑀭𑀢𑁂. 𑀪𑀺𑀓𑁆𑀔𑀯𑁄𑀢𑀺 𑀪𑀺𑀓𑁆𑀔𑀽 𑀦𑀫𑀲𑁆𑀲𑀺𑀢𑀼𑀁 𑀉𑀧𑀸𑀕𑀫𑀺𑀦𑁆𑀢𑀺 𑀬𑁄𑀚𑀦𑀸. 𑀲𑀫𑀡𑀲𑀫𑀸𑀕𑀫𑀁 𑀲𑀺𑀯𑀦𑁆𑀢𑀺 𑀲𑀫𑀡𑀸𑀦𑀁 𑀲𑀫𑀺𑀢𑀧𑀸𑀧𑀸𑀦𑀁 𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀺𑀯𑀜𑁆𑀘 𑀥𑀫𑁆𑀫𑀁 𑀔𑁂𑀫𑀁 𑀲𑀫𑀸𑀕𑀫𑀁 𑀲𑀗𑁆𑀕𑀫𑀁 𑀧𑀬𑀺𑀭𑀼𑀧𑀸𑀲𑀺𑀢𑀼𑀁 𑀉𑀧𑀸𑀕𑀫𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀭𑀺𑀫𑀢𑁄 𑀥𑀫𑁆𑀫𑀭𑀸𑀚𑀺𑀦𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀲𑀺𑀭𑀺𑀫𑀢𑀺 𑀥𑀫𑁆𑀫𑀭𑀸𑀚𑀺𑀦𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 𑀘 𑀓𑁂𑀘𑀺 𑀧𑀞𑀦𑁆𑀢𑀺.

𑁧𑁪𑁯. 𑀫𑀼𑀤𑀺𑀢𑀫𑀦𑀫𑁆𑀳𑀻𑀢𑀺 𑀫𑁄𑀤𑀺𑀢𑀫𑀦𑀸 𑀅𑀫𑁆𑀳𑀺. 𑀧𑀻𑀡𑀺𑀢𑀸𑀢𑀺 𑀢𑀼𑀝𑁆𑀞𑀸, 𑀧𑀻𑀢𑀺𑀭𑀲𑀯𑀲𑁂𑀦 𑀯𑀸 𑀢𑀺𑀢𑁆𑀢𑀸. 𑀦𑀭𑀯𑀭𑀤𑀫𑁆𑀫𑀲𑀸𑀭𑀣𑀺𑀦𑁆𑀢𑀺 𑀦𑀭𑀯𑀭𑁄 𑀘 𑀲𑁄 𑀅𑀕𑁆𑀕𑀧𑀼𑀕𑁆𑀕𑀮𑀢𑁆𑀢𑀸, 𑀤𑀫𑁆𑀫𑀸𑀦𑀁 𑀤𑀫𑁂𑀢𑀩𑁆𑀩𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀲𑀸𑀭𑀡𑀢𑁄 𑀤𑀫𑁆𑀫𑀲𑀸𑀭𑀣𑀺 𑀘𑀸𑀢𑀺 𑀦𑀭𑀯𑀭𑀤𑀫𑁆𑀫𑀲𑀸𑀭𑀣𑀺, 𑀢𑀁. 𑀧𑀭𑀫𑀳𑀺𑀢𑀸𑀦𑀼𑀓𑀫𑁆𑀧𑀓𑀦𑁆𑀢𑀺 𑀧𑀭𑀫𑁂𑀦 𑀉𑀢𑁆𑀢𑀫𑁂𑀦 𑀳𑀺𑀢𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀓𑀫𑁆𑀧𑀓𑀁.

𑀏𑀯𑀁 𑀲𑀺𑀭𑀺𑀫𑀸 𑀤𑁂𑀯𑀥𑀻𑀢𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀧𑀯𑁂𑀤𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑀁 𑀧𑀯𑁂𑀤𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑀸. 𑀪𑀕𑀯𑀸 𑀢𑀫𑁂𑀯 𑀑𑀢𑀺𑀡𑁆𑀡𑀯𑀢𑁆𑀣𑀼𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸 𑀥𑀫𑁆𑀫𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀲𑀺𑀭𑀺𑀫𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀓𑁂𑀲𑀓𑀸𑀭𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀇𑀤𑀁 𑀯𑀺𑀫𑀸𑀦𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀦𑁆𑀢𑀺 𑀓𑁂𑀲𑀓𑀸𑀭𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀩𑀸𑀭𑀸𑀡𑀲𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑁂 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀕𑁂𑀳𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀓𑁂𑀲𑀓𑀸𑀭𑀻 𑀦𑀸𑀫 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂 𑀫𑀸𑀢𑀼 𑀲𑀻𑀲𑀢𑁄 𑀊𑀓𑀸 𑀕𑀡𑁆𑀳𑀦𑁆𑀢𑀻 𑀢𑁂 𑀪𑀺𑀓𑁆𑀔𑀽 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀆𑀳 ‘‘𑀅𑀫𑁆𑀫, 𑀇𑀫𑁂 𑀧𑀩𑁆𑀩𑀚𑀺𑀢𑀸 𑀧𑀞𑀫𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀲𑀼𑀔𑀼𑀫𑀸𑀮𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑀸 𑀫𑀜𑁆𑀜𑁂, 𑀓𑀲𑁆𑀫𑀸 𑀦𑀼 𑀔𑁄 𑀇𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀯𑀬𑁂 𑀧𑀩𑁆𑀩𑀚𑀦𑁆𑀢𑀻’’𑀢𑀺? 𑀢𑀁 𑀫𑀸𑀢𑀸 𑀆𑀳 ‘‘𑀅𑀢𑁆𑀣𑀺, 𑀅𑀫𑁆𑀫, 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁, 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀲𑁆𑀲 𑀇𑀫𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀻’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀢𑀸𑀬 𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀻 𑀆𑀳 ‘‘𑀏𑀢𑀭𑀳𑀺 𑀔𑁄 𑀉𑀧𑀸𑀲𑀓 𑀩𑀳𑀽 𑀓𑀼𑀮𑀧𑀼𑀢𑁆𑀢𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀲𑀓𑁆𑀬𑀲𑀫𑀬𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀓𑀺𑀁 𑀦𑀼 𑀔𑁄 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀦𑁆𑀢𑀸 𑀧𑀩𑁆𑀩𑀚𑀦𑁆𑀢𑀻’’𑀢𑀺? 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 ‘‘𑀓𑀸𑀫𑁂𑀲𑀼 𑀆𑀤𑀻𑀦𑀯𑀁, 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀦𑁆𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺, 𑀢𑀺𑀡𑁆𑀡𑀜𑁆𑀘 𑀭𑀢𑀦𑀸𑀦𑀁 𑀕𑀼𑀡𑁂 𑀧𑀓𑀸𑀲𑁂𑀲𑀺, 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀕𑀼𑀡𑀸𑀦𑀺𑀲𑀁𑀲𑀁 𑀧𑀯𑁂𑀤𑁂𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑀥𑀻𑀢𑀸 𑀢𑀁 ‘‘𑀓𑀺𑀁 𑀅𑀫𑁆𑀳𑁂𑀳𑀺𑀧𑀺 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀢𑀬𑀸 𑀯𑀼𑀢𑁆𑀢𑁂 𑀕𑀼𑀡𑀸𑀦𑀺𑀲𑀁𑀲𑁂 𑀅𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀲𑀩𑁆𑀩𑀲𑀸𑀥𑀸𑀭𑀡𑀸 𑀇𑀫𑁂 𑀥𑀫𑁆𑀫𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸, 𑀓𑀲𑁆𑀫𑀸 𑀦 𑀲𑀓𑁆𑀓𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀲𑀭𑀡𑀸𑀦𑀺 𑀘 𑀲𑀻𑀮𑀸𑀦𑀺 𑀘 𑀅𑀤𑀸𑀲𑀺. 𑀲𑀸 𑀕𑀳𑀺𑀢𑀲𑀭𑀡𑀸 𑀲𑀫𑀸𑀤𑀺𑀦𑁆𑀦𑀲𑀻𑀮𑀸 𑀘 𑀳𑀼𑀢𑁆𑀯𑀸 𑀧𑀼𑀦 𑀆𑀳 ‘‘𑀓𑀺𑀁 𑀇𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑀫𑁆𑀧𑀺 𑀓𑀭𑀡𑀻𑀬𑀁 𑀅𑀢𑁆𑀣𑀻’’𑀢𑀺. 𑀲𑁄 𑀢𑀲𑁆𑀲𑀸 𑀯𑀺𑀜𑁆𑀜𑀼𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀲𑀭𑀻𑀭𑀲𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀓𑀸𑀬𑁂 𑀯𑀺𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀭𑀺 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀁𑀯𑁂𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀢𑁄. 𑀲𑀸 𑀢𑁂𑀦 𑀯𑀼𑀢𑁆𑀢𑀦𑀬𑀁 𑀲𑀩𑁆𑀩𑀁 𑀫𑀦𑀲𑀺 𑀓𑀢𑁆𑀯𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑁂 𑀲𑀫𑀸𑀳𑀺𑀢𑀘𑀺𑀢𑁆𑀢𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀦 𑀘𑀺𑀭𑀲𑁆𑀲𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀢𑀲𑀳𑀲𑁆𑀲𑀜𑁆𑀘𑀲𑁆𑀲𑀸 𑀅𑀘𑁆𑀙𑀭𑀸𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀢𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀧𑀫𑀼𑀤𑀺𑀢𑀳𑀤𑀬𑁄 𑁋

𑁧𑁫𑁦.

‘‘𑀇𑀤𑀁 𑀯𑀺𑀫𑀸𑀦𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀲𑀢𑀢𑀁 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀼𑀯𑀡𑁆𑀡𑀭𑀼𑀓𑁆𑀔𑁂𑀳𑀺 𑀲𑀫𑀦𑁆𑀢𑀫𑁄𑀢𑁆𑀣𑀢𑀁, 𑀞𑀸𑀦𑀁 𑀫𑀫𑀁 𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀯𑀁.

𑁧𑁫𑁧.

‘‘𑀢𑀢𑁆𑀭𑀽𑀧𑀧𑀦𑁆𑀦𑀸 𑀧𑀼𑀭𑀺𑀫𑀘𑁆𑀙𑀭𑀸 𑀇𑀫𑀸, 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀲𑀓𑁂𑀦 𑀓𑀫𑁆𑀫𑀼𑀦𑀸;

𑀢𑀼𑀯𑀁𑀲𑀺 𑀅𑀚𑁆𑀛𑀼𑀧𑀕𑀢𑀸 𑀬𑀲𑀲𑁆𑀲𑀺𑀦𑀻, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀲𑀺 𑀧𑀼𑀩𑁆𑀩𑀤𑁂𑀯𑀢𑀸.

𑁧𑁫𑁨.

‘‘𑀲𑀲𑀻 𑀅𑀥𑀺𑀕𑁆𑀕𑀬𑁆𑀳 𑀬𑀣𑀸 𑀯𑀺𑀭𑁄𑀘𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀕𑀡𑀁;

𑀢𑀣𑁂𑀯 𑀢𑁆𑀯𑀁 𑀅𑀘𑁆𑀙𑀭𑀸𑀲𑀗𑁆𑀕𑀡𑀁 𑀇𑀫𑀁, 𑀤𑀤𑁆𑀤𑀮𑁆𑀮𑀫𑀸𑀦𑀸 𑀬𑀲𑀲𑀸 𑀯𑀺𑀭𑁄𑀘𑀲𑀺.

𑁧𑁫𑁩.

‘‘𑀓𑀼𑀢𑁄 𑀦𑀼 𑀆𑀕𑀫𑁆𑀫 𑀅𑀦𑁄𑀫𑀤𑀲𑁆𑀲𑀦𑁂, 𑀉𑀧𑀧𑀦𑁆𑀦𑀸 𑀢𑁆𑀯𑀁 𑀪𑀯𑀦𑀁 𑀫𑀫𑀁 𑀇𑀤𑀁;

𑀩𑁆𑀭𑀳𑁆𑀫𑀁𑀯 𑀤𑁂𑀯𑀸 𑀢𑀺𑀤𑀲𑀸 𑀲𑀳𑀺𑀦𑁆𑀤𑀓𑀸, 𑀲𑀩𑁆𑀩𑁂 𑀦 𑀢𑀧𑁆𑀧𑀸𑀫𑀲𑁂 𑀤𑀲𑁆𑀲𑀦𑁂𑀦 𑀢’’𑀦𑁆𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺.

𑁧𑁫𑁦. 𑀢𑀢𑁆𑀣 𑀇𑀤𑀁 𑀯𑀺𑀫𑀸𑀦𑀦𑁆𑀢𑀺 𑀬𑀲𑁆𑀫𑀺𑀁 𑀯𑀺𑀫𑀸𑀦𑁂 𑀲𑀸 𑀤𑁂𑀯𑀢𑀸 𑀉𑀧𑁆𑀧𑀦𑁆𑀦𑀸, 𑀢𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀲𑀢𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀦𑁆𑀢𑀺 𑀬𑁄𑀚𑀦𑀸. 𑀲𑀢𑀢𑀦𑁆𑀢𑀺 𑀯𑀸 𑀲𑀫𑁆𑀫𑀸𑀢𑀢𑀁, 𑀅𑀢𑀺𑀯𑀺𑀬 𑀯𑀺𑀢𑁆𑀣𑀺𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀦𑁆𑀢𑀫𑁄𑀢𑁆𑀣𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀅𑀯𑀢𑁆𑀣𑀢𑀁 𑀙𑀸𑀤𑀺𑀢𑀁. 𑀞𑀸𑀦𑀦𑁆𑀢𑀺 𑀯𑀺𑀫𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀜𑁆𑀳𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀓𑀢𑀧𑀼𑀜𑁆𑀜𑀸𑀢𑀺 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀯𑀦𑁆𑀢𑀺 𑀓𑀫𑁆𑀫𑀯𑀺𑀧𑀸𑀓𑀪𑀸𑀯𑁂𑀦 𑀲𑀫𑁆𑀪𑀽𑀢𑀁, 𑀓𑀫𑁆𑀫𑀯𑀺𑀧𑀸𑀓𑁂𑀦 𑀯𑀸 𑀲𑀳 𑀲𑀫𑁆𑀪𑀽𑀢𑀁. 𑀫𑀫𑀦𑁆𑀢𑀺 𑀇𑀤𑀁 𑀫𑀫 𑀞𑀸𑀦𑀁 𑀫𑀫 𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀯𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁.

𑁧𑁫𑁧. 𑀢𑀢𑁆𑀭𑀽𑀧𑀧𑀦𑁆𑀦𑀸𑀢𑀺 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀢𑁆𑀭 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀯𑀺𑀫𑀸𑀦𑁂 𑀉𑀧𑀧𑀦𑁆𑀦𑀸𑀢𑀺 𑀦𑀺𑀩𑁆𑀩𑀢𑁆𑀢𑀸 𑀧𑀕𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀼𑀩𑁆𑀩𑀤𑁂𑀯𑀢𑀸 𑀇𑀫𑀸 𑀧𑀼𑀭𑀺𑀫𑀸 𑀅𑀘𑁆𑀙𑀭𑀸𑀬𑁄 𑀧𑀭𑀺𑀫𑀸𑀡𑀢𑁄 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀢𑀼𑀯𑀁𑀲𑀻𑀢𑀺 𑀢𑁆𑀯𑀁 𑀅𑀲𑀺 𑀲𑀓𑁂𑀦 𑀓𑀫𑁆𑀫𑀼𑀦𑀸 𑀅𑀚𑁆𑀛𑀼𑀧𑀕𑀢𑀸 𑀉𑀧𑀧𑀦𑁆𑀦𑀸. 𑀬𑀲𑀲𑁆𑀲𑀺𑀦𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸, 𑀢𑁂𑀦𑁂𑀯 𑀲𑀓𑁂𑀦 𑀓𑀫𑁆𑀫𑀼𑀦𑀸 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀑𑀪𑀸𑀲𑀬𑀦𑁆𑀢𑀻 𑀯𑀺𑀭𑁄𑀘𑀫𑀸𑀦𑀸 𑀢𑀺𑀝𑁆𑀞𑀲𑀻𑀢𑀺.

𑁧𑁫𑁨. 𑀇𑀤𑀸𑀦𑀺 𑀢𑀫𑁂𑀯 𑀑𑀪𑀸𑀲𑀦𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀲𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀲𑀲𑀮𑀜𑁆𑀙𑀦𑀬𑁄𑀕𑁂𑀦 ‘‘𑀲𑀲𑀻’’𑀢𑀺, 𑀦𑀓𑁆𑀔𑀢𑁆𑀢𑁂𑀳𑀺 𑀅𑀥𑀺𑀓𑀕𑀼𑀡𑀢𑀸𑀬 ‘‘𑀦𑀓𑁆𑀔𑀢𑁆𑀢𑀭𑀸𑀚𑀸’’𑀢𑀺 𑀘 𑀮𑀤𑁆𑀥𑀦𑀸𑀫𑁄 𑀘𑀦𑁆𑀤𑁄 𑀲𑀩𑁆𑀩𑀁 𑀢𑀸𑀭𑀓𑀸𑀕𑀡𑀁 𑀅𑀥𑀺𑀕𑁆𑀕𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀭𑁄𑀘𑀢𑀺 𑀯𑀺𑀭𑀸𑀚𑀢𑀺, 𑀢𑀣𑁂𑀯 𑀢𑁆𑀯𑀁 𑀇𑀫𑀁 𑀅𑀘𑁆𑀙𑀭𑀸𑀦𑀁 𑀤𑁂𑀯𑀓𑀜𑁆𑀜𑀸𑀦𑀁 𑀕𑀡𑀁 𑀲𑀫𑀽𑀳𑀁 𑀅𑀢𑁆𑀢𑀦𑁄 𑀬𑀲𑀲𑀸 𑀤𑀤𑁆𑀤𑀮𑁆𑀮𑀫𑀸𑀦𑀸 𑀅𑀢𑀺𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀭𑁄𑀘𑀲𑀻𑀢𑀺. 𑀏𑀢𑁆𑀣 𑀘 ‘‘𑀇𑀫𑀸’’𑀢𑀺 ‘‘𑀇𑀫’’𑀦𑁆𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀸𑀕𑀡𑀁 𑀢𑀣𑁂𑀯 𑀢𑁆𑀯’’𑀦𑁆𑀢𑀺 𑀧𑀞𑀦𑁆𑀢𑀺.

𑁧𑁫𑁩. 𑀇𑀤𑀸𑀦𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀼𑀭𑀺𑀫𑀪𑀯𑀁 𑀢𑀢𑁆𑀣 𑀓𑀢𑀧𑀼𑀜𑁆𑀜𑀜𑁆𑀘 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀼𑀢𑁄 𑀦𑀼 𑀆𑀕𑀫𑁆𑀫𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀼𑀢𑁄 𑀦𑀼 𑀆𑀕𑀫𑁆𑀫𑀸𑀢𑀺 𑀓𑀼𑀢𑁄 𑀦𑀼 𑀪𑀯𑀢𑁄 𑀓𑀼𑀢𑁄 𑀦𑀼 𑀧𑀼𑀜𑁆𑀜𑀓𑀫𑁆𑀫𑀢𑁄 𑀓𑀸𑀭𑀡𑀪𑀽𑀢𑀢𑁄 𑀇𑀤𑀁 𑀫𑀫 𑀪𑀯𑀦𑀁 𑀆𑀕𑀫𑁆𑀫 𑀪𑀤𑁆𑀤𑁂 𑀅𑀦𑁄𑀫𑀤𑀲𑁆𑀲𑀦𑁂 𑀲𑀩𑁆𑀩𑀗𑁆𑀕𑀲𑁄𑀪𑀦𑁂 𑀢𑁆𑀯𑀁 𑀉𑀧𑀧𑀦𑁆𑀦𑀸 𑀉𑀧𑁆𑀧𑀢𑁆𑀢𑀺𑀕𑀳𑀡𑀯𑀲𑁂𑀦 𑀉𑀧𑀕𑀢𑀸. ‘‘𑀅𑀦𑁄𑀫𑀤𑀲𑁆𑀲𑀦𑁂’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀧𑀓𑀸𑀲𑁂𑀦𑁆𑀢𑁄 ‘‘𑀩𑁆𑀭𑀳𑁆𑀫𑀁𑀯 𑀤𑁂𑀯𑀸 𑀢𑀺𑀤𑀲𑀸 𑀲𑀳𑀺𑀦𑁆𑀤𑀓𑀸, 𑀲𑀩𑁆𑀩𑁂 𑀦 𑀢𑀧𑁆𑀧𑀸𑀫𑀲𑁂 𑀤𑀲𑁆𑀲𑀦𑁂𑀦 𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀲𑀦𑀗𑁆𑀓𑀼𑀫𑀸𑀭𑀁 𑀯𑀸 𑀉𑀧𑀕𑀢𑀁 𑀲𑀳 𑀇𑀦𑁆𑀤𑁂𑀦𑀸𑀢𑀺 𑀲𑀳𑀺𑀦𑁆𑀤𑀓𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀧𑀲𑁆𑀲𑀦𑁆𑀢𑀸 𑀤𑀲𑁆𑀲𑀦𑁂𑀦 𑀦 𑀢𑀧𑁆𑀧𑀦𑁆𑀢𑀺, 𑀏𑀯𑀁 𑀢𑀯 𑀤𑀲𑁆𑀲𑀦𑁂𑀦 𑀫𑀬𑀁 𑀲𑀩𑁆𑀩𑁂 𑀤𑁂𑀯𑀸 𑀦 𑀢𑀧𑁆𑀧𑀸𑀫𑀲𑁂𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀦 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑁋

𑁧𑁫𑁪.

‘‘𑀬𑀫𑁂𑀢𑀁 𑀲𑀓𑁆𑀓 𑀅𑀦𑀼𑀧𑀼𑀘𑁆𑀙𑀲𑁂 𑀫𑀫𑀁, 𑀓𑀼𑀢𑁄 𑀘𑀼𑀢𑀸 𑀢𑁆𑀯𑀁 𑀇𑀥 𑀆𑀕𑀢𑀸𑀢𑀺;

𑀩𑀸𑀭𑀸𑀡𑀲𑀻 𑀦𑀸𑀫 𑀧𑀼𑀭𑀢𑁆𑀣𑀺 𑀓𑀸𑀲𑀺𑀦𑀁, 𑀢𑀢𑁆𑀣 𑀅𑀳𑁄𑀲𑀺𑀁 𑀧𑀼𑀭𑁂 𑀓𑁂𑀲𑀓𑀸𑀭𑀺𑀓𑀸.

𑁧𑁫𑁫.

‘‘𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀧𑀲𑀦𑁆𑀦𑀫𑀸𑀦𑀲𑀸, 𑀲𑀗𑁆𑀖𑁂 𑀘 𑀏𑀓𑀦𑁆𑀢𑀕𑀢𑀸 𑀅𑀲𑀁𑀲𑀬𑀸;

𑀅𑀔𑀡𑁆𑀟𑀲𑀺𑀓𑁆𑀔𑀸𑀧𑀤𑀸 𑀆𑀕𑀢𑀧𑁆𑀨𑀮𑀸, 𑀲𑀫𑁆𑀩𑁄𑀥𑀺𑀥𑀫𑁆𑀫𑁂 𑀦𑀺𑀬𑀢𑀸 𑀅𑀦𑀸𑀫𑀬𑀸’’𑀢𑀺. 𑁋

𑀕𑀸𑀣𑀤𑁆𑀯𑀬𑀫𑀸𑀳.

𑁧𑁫𑁪-𑁫. 𑀢𑀢𑁆𑀣 𑀬𑀫𑁂𑀢𑀦𑁆𑀢𑀺 𑀬𑀁 𑀏𑀢𑀁 𑀧𑀜𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀼𑀘𑁆𑀙𑀲𑁂𑀢𑀺 𑀅𑀦𑀼𑀓𑀽𑀮𑀪𑀸𑀯𑁂𑀦 𑀧𑀼𑀘𑁆𑀙𑀲𑀺. 𑀫𑀫𑀦𑁆𑀢𑀺 𑀫𑀁. 𑀧𑀼𑀭𑀢𑁆𑀣𑀻𑀢𑀺 𑀧𑀼𑀭𑀁 𑀅𑀢𑁆𑀣𑀺. 𑀓𑀸𑀲𑀺𑀦𑀦𑁆𑀢𑀺 𑀓𑀸𑀲𑀺𑀭𑀝𑁆𑀞𑀲𑁆𑀲. 𑀓𑁂𑀲𑀓𑀸𑀭𑀺𑀓𑀸𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀦𑀸𑀫𑀁 𑀯𑀤𑀢𑀺. 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘𑀸𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀯𑀺𑀪𑀸𑀯𑁂𑀢𑀺.

𑀧𑀼𑀦 𑀲𑀓𑁆𑀓𑁄 𑀢𑀲𑁆𑀲𑀸 𑀢𑀁 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀜𑁆𑀘 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀫𑁄𑀤𑀫𑀸𑀦𑁄 𑁋

𑁧𑁫𑁬.

‘‘𑀢𑀦𑁆𑀢𑁆𑀬𑀸𑀪𑀺𑀦𑀦𑁆𑀤𑀸𑀫𑀲𑁂 𑀲𑁆𑀯𑀸𑀕𑀢𑀜𑁆𑀘 𑀢𑁂,

𑀥𑀫𑁆𑀫𑁂𑀦 𑀘 𑀢𑁆𑀯𑀁 𑀬𑀲𑀲𑀸 𑀯𑀺𑀭𑁄𑀘𑀲𑀺;

𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀧𑀲𑀦𑁆𑀦𑀫𑀸𑀦𑀲𑁂,

𑀲𑀗𑁆𑀖𑁂 𑀘 𑀏𑀓𑀦𑁆𑀢𑀕𑀢𑁂 𑀅𑀲𑀁𑀲𑀬𑁂;

𑀅𑀔𑀡𑁆𑀟𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀧𑁆𑀨𑀮𑁂,

𑀲𑀫𑁆𑀩𑁄𑀥𑀺𑀥𑀫𑁆𑀫𑁂 𑀦𑀺𑀬𑀢𑁂 𑀅𑀦𑀸𑀫𑀬𑁂’’𑀢𑀺. 𑁋 𑀆𑀳;

𑁧𑁫𑁬. 𑀢𑀢𑁆𑀣 𑀢𑀦𑁆𑀢𑁆𑀬𑀸𑀪𑀺𑀦𑀦𑁆𑀤𑀸𑀫𑀲𑁂𑀢𑀺 𑀢𑀁 𑀢𑁂 𑀤𑀼𑀯𑀺𑀥𑀫𑁆𑀧𑀺 𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀦𑀦𑁆𑀤𑀸𑀫 𑀅𑀦𑀼𑀫𑁄𑀤𑀸𑀫. 𑀲𑁆𑀯𑀸𑀕𑀢𑀜𑁆𑀘 𑀢𑁂𑀢𑀺 𑀢𑀼𑀬𑁆𑀳𑀜𑁆𑀘 𑀇𑀥𑀸𑀕𑀫𑀦𑀁 𑀲𑁆𑀯𑀸𑀕𑀢𑀁, 𑀅𑀫𑁆𑀳𑀸𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀁𑀯𑀤𑁆𑀥𑀦𑀫𑁂𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀢𑀁 𑀧𑀦 𑀧𑀯𑀢𑁆𑀢𑀺𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀓𑀣𑁂𑀲𑀺, 𑀣𑁂𑀭𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀓𑁂𑀲𑀓𑀸𑀭𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀲𑀢𑁆𑀢𑀭𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀧𑀞𑀫𑀲𑁆𑀲 𑀧𑀻𑀞𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑀺𑀢𑁆𑀢𑀮𑀢𑀸𑀯𑀕𑁆𑀕𑁄

𑁧. 𑀤𑀸𑀲𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀤𑀼𑀢𑀺𑀬𑀯𑀕𑁆𑀕𑁂 𑀅𑀧𑀺 𑀲𑀓𑁆𑀓𑁄𑀯 𑀤𑁂𑀯𑀺𑀦𑁆𑀤𑁄𑀢𑀺 𑀤𑀸𑀲𑀺𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀸𑀯𑀢𑁆𑀣𑀺𑀯𑀸𑀲𑀻 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀲𑀫𑁆𑀩𑀳𑀼𑀮𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀭𑀺𑀲𑀸𑀬 𑀯𑀼𑀝𑁆𑀞𑀺𑀢𑀸𑀬 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀪𑀕𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 ‘‘𑀫𑀬𑀸, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀲𑁆𑀯𑁂 𑀧𑀝𑁆𑀞𑀸𑀬 𑀅𑀬𑁆𑀬𑀸 𑀫𑀫 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀤𑀸𑀲𑀺𑀬𑀸 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑀢𑁆𑀣 𑀢𑀬𑀸 𑀦𑀺𑀘𑁆𑀘𑀓𑀸𑀮𑀁 𑀅𑀧𑁆𑀧𑀫𑀢𑁆𑀢𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀧𑀓𑀢𑀺𑀬𑀸𑀯 𑀲𑀸 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀧𑀼𑀜𑁆𑀜𑀓𑀸𑀫𑀸 𑀲𑀻𑀮𑀯𑀢𑀻, 𑀢𑀲𑁆𑀫𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀧𑀡𑀻𑀢𑀁 𑀅𑀦𑁆𑀦𑀧𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀲𑀼𑀲𑀫𑁆𑀫𑀝𑁆𑀞𑀁 𑀲𑀼𑀧𑀭𑀺𑀪𑀡𑁆𑀟𑀓𑀁 𑀓𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀕𑀢𑁂 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀥𑀽𑀧𑀤𑀻𑀧𑁂𑀳𑀺 𑀧𑀽𑀚𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀓𑀢𑀪𑀢𑁆𑀢𑀓𑀺𑀘𑁆𑀘𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀇𑀢𑁄 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀢𑁄 𑀧𑀭𑀺𑀫𑀼𑀢𑁆𑀢𑀺 𑀳𑁄𑀢𑀻’’𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀲𑀭𑀡𑀸𑀦𑀺 𑀘 𑀧𑀜𑁆𑀘 𑀲𑀻𑀮𑀸𑀦𑀺 𑀘 𑀤𑀢𑁆𑀯𑀸 𑀓𑀸𑀬𑀲𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑁂 𑀦𑀺𑀬𑁄𑀚𑁂𑀲𑀼𑀁, 𑀅𑀧𑀭𑁂 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀼𑀁. 𑀲𑀸 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀲𑀻𑀮𑀁 𑀭𑀓𑁆𑀔𑀦𑁆𑀢𑀻 𑀅𑀦𑁆𑀢𑀭𑀦𑁆𑀢𑀭𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑀻 𑀏𑀓𑀤𑀺𑀯𑀲𑀁 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀜𑀸𑀡𑀲𑁆𑀲 𑀘 𑀧𑀭𑀺𑀧𑀓𑁆𑀓𑀢𑁆𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀸𑀓𑀸𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀯𑀮𑁆𑀮𑀪𑀸 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀲𑀝𑁆𑀞𑀺𑀢𑀽𑀭𑀺𑀬𑀲𑀳𑀲𑁆𑀲𑁂𑀳𑀺 𑀧𑀭𑀺𑀘𑀭𑀺𑀬𑀫𑀸𑀦𑀸 𑀅𑀘𑁆𑀙𑀭𑀸𑀲𑀢𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀫𑀳𑀦𑁆𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀧𑀫𑀼𑀤𑀸 𑀫𑁄𑀤𑀫𑀸𑀦𑀸 𑀲𑀧𑀭𑀺𑀯𑀸𑀭𑀸 𑀉𑀬𑁆𑀬𑀸𑀦𑀸𑀤𑀻𑀲𑀼 𑀯𑀺𑀘𑀭𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀲𑁆𑀯𑀸 𑁋

𑁧𑁫𑁭.

‘‘𑀅𑀧𑀺 𑀲𑀓𑁆𑀓𑁄𑀯 𑀤𑁂𑀯𑀺𑀦𑁆𑀤𑁄, 𑀭𑀫𑁆𑀫𑁂 𑀘𑀺𑀢𑁆𑀢𑀮𑀢𑀸𑀯𑀦𑁂;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀲𑀺, 𑀦𑀸𑀭𑀻𑀕𑀡𑀧𑀼𑀭𑀓𑁆𑀔𑀢𑀸;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁫𑁮.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁫𑁯.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀼𑀘𑁆𑀙𑀺;

𑁧𑁬𑁦.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁬𑁧.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀤𑀸𑀲𑀻 𑀅𑀳𑁄𑀲𑀺𑀁 𑀧𑀭𑀧𑁂𑀲𑁆𑀲𑀺𑀬𑀸 𑀓𑀼𑀮𑁂.

𑁧𑁬𑁨.

‘‘𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀢𑀲𑁆𑀲𑀸 𑀫𑁂 𑀦𑀺𑀓𑁆𑀓𑀫𑁄 𑀆𑀲𑀺, 𑀲𑀸𑀲𑀦𑁂 𑀢𑀲𑁆𑀲 𑀢𑀸𑀤𑀺𑀦𑁄.

𑁧𑁬𑁩.

‘‘𑀓𑀸𑀫𑀁 𑀪𑀺𑀚𑁆𑀚𑀢𑀼𑀬𑀁 𑀓𑀸𑀬𑁄, 𑀦𑁂𑀯 𑀅𑀢𑁆𑀣𑁂𑀢𑁆𑀣 𑀲𑀡𑁆𑀞𑀦𑀁;

𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀫𑀕𑁆𑀕𑁄 𑀲𑁄𑀯𑀢𑁆𑀣𑀺𑀓𑁄 𑀲𑀺𑀯𑁄.

𑁧𑁬𑁪.

‘‘𑀅𑀓𑀡𑁆𑀝𑀓𑁄 𑀅𑀕𑀳𑀦𑁄, 𑀉𑀚𑀼 𑀲𑀩𑁆𑀪𑀺 𑀧𑀯𑁂𑀤𑀺𑀢𑁄;

𑀦𑀺𑀓𑁆𑀓𑀫𑀲𑁆𑀲 𑀨𑀮𑀁 𑀧𑀲𑁆𑀲, 𑀬𑀣𑀺𑀤𑀁 𑀧𑀸𑀧𑀼𑀡𑀺𑀢𑁆𑀣𑀺𑀓𑀸.

𑁧𑁬𑁫.

‘‘𑀆𑀫𑀦𑁆𑀢𑀦𑀺𑀓𑀸 𑀭𑀜𑁆𑀜𑁄𑀫𑁆𑀳𑀺, 𑀲𑀓𑁆𑀓𑀲𑁆𑀲 𑀯𑀲𑀯𑀢𑁆𑀢𑀺𑀦𑁄;

𑀲𑀝𑁆𑀞𑀺 𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀧𑀝𑀺𑀩𑁄𑀥𑀁 𑀓𑀭𑁄𑀦𑁆𑀢𑀺 𑀫𑁂.

𑁧𑁬𑁬.

‘‘𑀆𑀮𑀫𑁆𑀩𑁄 𑀕𑀕𑁆𑀕𑀭𑁄 𑀪𑀻𑀫𑁄, 𑀲𑀸𑀥𑀼𑀯𑀸𑀤𑀻 𑀘 𑀲𑀁𑀲𑀬𑁄;

𑀧𑁄𑀓𑁆𑀔𑀭𑁄 𑀘 𑀲𑀼𑀨𑀲𑁆𑀲𑁄 𑀘, 𑀯𑀻𑀡𑀸𑀫𑁄𑀓𑁆𑀔𑀸 𑀘 𑀦𑀸𑀭𑀺𑀬𑁄.

𑁧𑁬𑁭.

‘‘𑀦𑀦𑁆𑀤𑀸 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀲𑁄𑀡𑀤𑀺𑀦𑁆𑀦𑀸 𑀲𑀼𑀘𑀺𑀫𑁆𑀳𑀺𑀢𑀸;

𑀅𑀮𑀫𑁆𑀩𑀼𑀲𑀸 𑀫𑀺𑀲𑁆𑀲𑀓𑁂𑀲𑀻 𑀘, 𑀧𑀼𑀡𑁆𑀟𑀭𑀻𑀓𑀸𑀢𑀺 𑀤𑀸𑀭𑀼𑀡𑀻.

𑁧𑁬𑁮.

‘‘𑀏𑀡𑀻𑀨𑀲𑁆𑀲𑀸 𑀲𑀼𑀨𑀲𑁆𑀲𑀸 𑀘, 𑀲𑀼𑀪𑀤𑁆𑀤𑀸 𑀫𑀼𑀤𑀼𑀯𑀸𑀤𑀺𑀦𑀻;

𑀏𑀢𑀸 𑀘𑀜𑁆𑀜𑀸 𑀘 𑀲𑁂𑀬𑁆𑀬𑀸𑀲𑁂, 𑀅𑀘𑁆𑀙𑀭𑀸𑀦𑀁 𑀧𑀩𑁄𑀥𑀺𑀓𑀸.

𑁧𑁬𑁯.

‘‘𑀢𑀸 𑀫𑀁 𑀓𑀸𑀮𑁂𑀦𑀼𑀧𑀸𑀕𑀦𑁆𑀢𑁆𑀯𑀸, 𑀅𑀪𑀺𑀪𑀸𑀲𑀦𑁆𑀢𑀺 𑀤𑁂𑀯𑀢𑀸;

𑀳𑀦𑁆𑀤 𑀦𑀘𑁆𑀘𑀸𑀫 𑀕𑀸𑀬𑀸𑀫, 𑀳𑀦𑁆𑀤 𑀢𑀁 𑀭𑀫𑀬𑀸𑀫𑀲𑁂.

𑁧𑁭𑁦.

‘‘𑀦𑀬𑀺𑀤𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀓𑀢𑀧𑀼𑀜𑁆𑀜𑀸𑀦𑀫𑁂𑀯𑀺𑀤𑀁;

𑀅𑀲𑁄𑀓𑀁 𑀦𑀦𑁆𑀤𑀦𑀁 𑀭𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀫𑀳𑀸𑀯𑀦𑀁.

𑁧𑁭𑁧.

‘‘𑀲𑀼𑀔𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀦𑀢𑁆𑀣𑀺 𑀧𑀭𑀢𑁆𑀣 𑀘;

𑀲𑀼𑀔𑀜𑁆𑀘 𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀘𑁂𑀯 𑀧𑀭𑀢𑁆𑀣 𑀘.

𑁧𑁭𑁨.

‘‘𑀢𑁂𑀲𑀁 𑀲𑀳𑀩𑁆𑀬𑀓𑀸𑀫𑀸𑀦𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁;

𑀓𑀢𑀧𑀼𑀜𑁆𑀜𑀸 𑀳𑀺 𑀫𑁄𑀤𑀦𑁆𑀢𑀺, 𑀲𑀕𑁆𑀕𑁂 𑀪𑁄𑀕𑀲𑀫𑀗𑁆𑀕𑀺𑀦𑁄’’𑀢𑀺. 𑁋 𑀤𑁂𑀯𑀢𑀸 𑀯𑀺𑀲𑁆𑀲𑀚𑁆𑀚𑁂𑀲𑀺;

𑁧𑁫𑁭. 𑀢𑀢𑁆𑀣 𑀅𑀧𑀺 𑀲𑀓𑁆𑀓𑁄𑀯 𑀤𑁂𑀯𑀺𑀦𑁆𑀤𑁄𑀢𑀺 𑀅𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀸𑀬𑀁, 𑀇𑀯𑀲𑀤𑁆𑀤𑁄 𑀇𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄 𑀉𑀧𑀫𑀸𑀬𑀁, 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀲𑀫𑀪𑀸𑀯𑁄 𑀢𑀺𑀲𑁆𑀲𑀸 𑀤𑁂𑀯𑀢𑀸𑀬 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀓𑁂𑀘𑀺 ‘‘𑀅𑀧𑀻𑀢𑀺 𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀘𑀺𑀢𑁆𑀢𑀮𑀢𑀸𑀯𑀦𑁂𑀢𑀺 𑀘𑀺𑀢𑁆𑀢𑀸𑀬 𑀦𑀸𑀫 𑀤𑁂𑀯𑀥𑀻𑀢𑀸𑀬 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂, 𑀘𑀺𑀢𑁆𑀢𑀸𑀦𑀁 𑀯𑀸 𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀨𑀮𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀁 𑀲𑀦𑁆𑀢𑀸𑀦𑀓𑀯𑀮𑁆𑀮𑀺𑀆𑀤𑀻𑀦𑀁 𑀢𑀢𑁆𑀣 𑀬𑁂𑀪𑀼𑀬𑁆𑀬𑀢𑀸𑀬 𑀘𑀺𑀢𑁆𑀢𑀮𑀢𑀸𑀯𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀤𑁂𑀯𑀼𑀬𑁆𑀬𑀸𑀦𑁂.

𑁧𑁬𑁧. 𑀧𑀭𑀧𑁂𑀲𑁆𑀲𑀺𑀬𑀸𑀢𑀺 𑀧𑀭𑁂𑀲𑀁 𑀓𑀼𑀮𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀧𑁂𑀲𑀦𑀺𑀬𑀸, 𑀧𑀭𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀸𑀭𑀻𑀢𑀺 𑀅𑀢𑁆𑀣𑁄.

𑁧𑁬𑁨. 𑀢𑀲𑁆𑀲𑀸 𑀫𑁂 𑀦𑀺𑀓𑁆𑀓𑀫𑁄 𑀆𑀲𑀺, 𑀲𑀸𑀲𑀦𑁂 𑀢𑀲𑁆𑀲 𑀢𑀸𑀤𑀺𑀦𑁄𑀢𑀺 𑀢𑀲𑁆𑀲𑀸 𑀤𑀸𑀲𑀺𑀬𑀸𑀧𑀺 𑀲𑀫𑀸𑀦𑀸𑀬 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀲𑀻𑀮𑀁 𑀭𑀓𑁆𑀔𑀦𑁆𑀢𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀫𑀦𑀲𑀺 𑀓𑀭𑁄𑀦𑁆𑀢𑀺𑀬𑀸 𑀫𑀦𑀲𑀺𑀓𑀸𑀭𑀸𑀦𑀼𑀪𑀸𑀯𑁂𑀦 𑀫𑁂 𑀫𑀬𑁆𑀳𑀁 𑀉𑀧𑁆𑀧𑀚𑁆𑀚𑀫𑀸𑀦𑁂 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑁂 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀦𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑁄𑀬𑁂𑀯 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄 𑀦𑀺𑀓𑁆𑀓𑀫𑀦𑁂𑀦 ‘‘𑀦𑀺𑀓𑁆𑀓𑀫𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀆𑀲𑀺 𑀅𑀳𑁄𑀲𑀺 𑀉𑀧𑁆𑀧𑀚𑁆𑀚𑀺.

𑁧𑁬𑁩-𑁪. 𑀢𑀲𑁆𑀲 𑀧𑀦 𑀦𑀺𑀓𑁆𑀓𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑁆𑀲 𑀧𑀯𑀢𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀁 𑀪𑀺𑀚𑁆𑀚𑀢𑀼𑀬𑀁 𑀓𑀸𑀬𑁄, 𑀦𑁂𑀯 𑀅𑀢𑁆𑀣𑁂𑀢𑁆𑀣 𑀲𑀡𑁆𑀞𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺𑀧𑀺 𑀫𑁂 𑀅𑀬𑀁 𑀓𑀸𑀬𑁄 𑀪𑀺𑀚𑁆𑀚𑀢𑀼 𑀯𑀺𑀦𑀲𑁆𑀲𑀢𑀼, 𑀢𑀢𑁆𑀣 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀧𑁂𑀓𑁆𑀔𑀁 𑀅𑀓𑀭𑁄𑀦𑁆𑀢𑀻 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂 𑀦𑁂𑀯 𑀅𑀢𑁆𑀣𑀺, 𑀫𑁂 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀦𑀁 𑀲𑀺𑀣𑀺𑀮𑀻𑀓𑀭𑀡𑀦𑁆𑀢𑀺 𑀯𑀻𑀭𑀺𑀬𑀁 𑀲𑀫𑀼𑀢𑁆𑀢𑁂𑀚𑁂𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀲𑀺𑀦𑁆𑀢𑀺.

𑀇𑀤𑀸𑀦𑀺 𑀢𑀣𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑀻 𑁋

‘‘𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀫𑀕𑁆𑀕𑁄 𑀲𑁄𑀯𑀢𑁆𑀣𑀺𑀓𑁄 𑀲𑀺𑀯𑁄;

𑀅𑀓𑀡𑁆𑀝𑀓𑁄 𑀅𑀕𑀳𑀦𑁄, 𑀉𑀚𑀼 𑀲𑀩𑁆𑀪𑀺 𑀧𑀯𑁂𑀤𑀺𑀢𑁄;

𑀦𑀺𑀓𑁆𑀓𑀫𑀲𑁆𑀲 𑀨𑀮𑀁 𑀧𑀲𑁆𑀲, 𑀬𑀣𑀺𑀤𑀁 𑀧𑀸𑀧𑀼𑀡𑀺𑀢𑁆𑀣𑀺𑀓𑀸’’𑀢𑀺. 𑁋 𑀆𑀳;

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀦𑀺𑀘𑁆𑀘𑀲𑀻𑀮𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀮𑀤𑁆𑀥𑀢𑁆𑀢𑀸 𑀢𑁂𑀲𑀁 𑀧𑀭𑀺𑀧𑀽𑀭𑀺𑀢𑀢𑁆𑀢𑀸 𑀘 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀫𑁆𑀩𑀦𑁆𑀥𑀻𑀪𑀽𑀢𑁄, 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀲𑁄𑀢𑁆𑀣𑀺𑀪𑀸𑀯𑀲𑀫𑁆𑀧𑀸𑀤𑀦𑀢𑁄 𑀲𑀼𑀦𑁆𑀤𑀭𑀢𑁆𑀣𑀪𑀸𑀯𑀢𑁄 𑀘 𑀲𑁄𑀯𑀢𑁆𑀣𑀺𑀓𑁄 𑀲𑁄𑀢𑁆𑀣𑀺𑀓𑁄, 𑀲𑀁𑀓𑀺𑀮𑁂𑀲𑀥𑀫𑁆𑀫𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀔𑁂𑀫𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀘 𑀲𑀺𑀯𑁄, 𑀭𑀸𑀕𑀓𑀡𑁆𑀝𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀓𑀡𑁆𑀝𑀓𑁄, 𑀓𑀺𑀮𑁂𑀲𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀕𑀳𑀦𑀲𑀫𑀼𑀘𑁆𑀙𑁂𑀤𑀦𑀢𑁄 𑀅𑀕𑀳𑀦𑁄, 𑀲𑀩𑁆𑀩𑀚𑀺𑀫𑁆𑀳𑀯𑀗𑁆𑀓𑀓𑀼𑀝𑀺𑀮𑀪𑀸𑀯𑀸𑀧𑀕𑀫𑀳𑁂𑀢𑀼𑀢𑀸𑀬 𑀉𑀚𑀼, 𑀩𑀼𑀤𑁆𑀥𑀸𑀤𑀻𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀲𑀩𑁆𑀪𑀺 𑀧𑀯𑁂𑀤𑀺𑀢𑁄 𑀅𑀭𑀺𑀬𑀫𑀕𑁆𑀕𑁄, 𑀢𑀁 𑀬𑀣𑀸 𑀬𑁂𑀦 𑀉𑀧𑀸𑀬𑀪𑀽𑀢𑁂𑀦 𑀇𑀢𑁆𑀣𑀺𑀓𑀸 𑀤𑁆𑀯𑀗𑁆𑀕𑀼𑀮𑀩𑀳𑀮𑀩𑀼𑀤𑁆𑀥𑀺𑀓𑀸𑀧𑀺 𑀲𑀫𑀸𑀦𑀸 𑀧𑀸𑀧𑀼𑀡𑀺𑀁, 𑀢𑀲𑁆𑀲 𑀦𑀺𑀓𑁆𑀓𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀲𑁆𑀲 𑀇𑀤𑀁 𑀨𑀮𑀁 𑀧𑀲𑁆𑀲𑀸𑀢𑀺 𑀲𑀓𑁆𑀓𑀁 𑀆𑀮𑀧𑀢𑀺.

𑁧𑁬𑁫. 𑀆𑀫𑀦𑁆𑀢𑀦𑀺𑀓𑀸 𑀭𑀜𑁆𑀜𑁄𑀫𑁆𑀳𑀺, 𑀲𑀓𑁆𑀓𑀲𑁆𑀲 𑀯𑀲𑀯𑀢𑁆𑀢𑀺𑀦𑁄𑀢𑀺 𑀲𑀬𑀁𑀯𑀲𑀻𑀪𑀸𑀯𑁂𑀦 𑀯𑀢𑁆𑀢𑀦𑀢𑁄, 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀅𑀢𑁆𑀢𑀦𑁄 𑀯𑀲𑀁 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑁂𑀢𑀻𑀢𑀺 𑀯𑀸 𑀯𑀲𑀯𑀢𑁆𑀢𑀻, 𑀢𑀲𑁆𑀲 𑀯𑀲𑀯𑀢𑁆𑀢𑀺𑀦𑁄 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀆𑀫𑀦𑁆𑀢𑀦𑀺𑀓𑀸 𑀆𑀮𑀸𑀧𑀲𑀮𑁆𑀮𑀸𑀧𑀬𑁄𑀕𑁆𑀕𑀸, 𑀓𑀻𑀴𑀦𑀓𑀸𑀮𑁂 𑀯𑀸 𑀢𑁂𑀦 𑀆𑀫𑀦𑁆𑀢𑁂𑀢𑀩𑁆𑀩𑀸 𑀅𑀫𑁆𑀳𑀺, 𑀦𑀺𑀓𑁆𑀓𑀫𑀲𑁆𑀲 𑀯𑀻𑀭𑀺𑀬𑀲𑁆𑀲 𑀨𑀮𑀁 𑀧𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀆𑀢𑀢𑀯𑀺𑀢𑀢𑀸𑀤𑀺𑀪𑁂𑀤𑁂𑀦 𑀧𑀜𑁆𑀘 𑀢𑀽𑀭𑀺𑀬𑀗𑁆𑀕𑀸𑀦𑀺 𑀤𑁆𑀯𑀸𑀤𑀲𑀳𑀺 𑀧𑀸𑀡𑀺𑀪𑀸𑀕𑁂𑀳𑀺 𑀏𑀓𑀢𑁄 𑀧𑀯𑀚𑁆𑀚𑀫𑀸𑀦𑀸𑀦𑀺 𑀲𑀝𑁆𑀞𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀧𑀦 𑀲𑀳𑀲𑁆𑀲𑀫𑀢𑁆𑀢𑀸𑀦𑀺 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦 𑀉𑀧𑀝𑁆𑀞𑀺𑀢𑀸𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀲𑀝𑁆𑀞𑀺 𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀧𑀝𑀺𑀩𑁄𑀥𑀁 𑀓𑀭𑁄𑀦𑁆𑀢𑀺 𑀫𑁂’’𑀢𑀺. 𑀢𑀢𑁆𑀣 𑀧𑀝𑀺𑀩𑁄𑀥𑀦𑁆𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀦𑀁 𑀧𑀩𑁄𑀥𑀦𑀁.

𑁧𑁬𑁬-𑁮. 𑀆𑀮𑀫𑁆𑀩𑁄𑀢𑀺𑀆𑀤𑀺 𑀢𑀽𑀭𑀺𑀬𑀯𑀸𑀤𑀓𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀏𑀓𑀤𑁂𑀲𑀢𑁄 𑀦𑀸𑀫𑀕𑁆𑀕𑀳𑀡𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀽𑀭𑀺𑀬𑀸𑀦𑀁 𑀧𑀦𑁂𑀢𑀁 𑀦𑀸𑀫𑀕𑁆𑀕𑀳𑀡𑀁. 𑀯𑀻𑀡𑀸𑀫𑁄𑀓𑁆𑀔𑀸𑀤𑀺𑀓𑀸 𑀤𑁂𑀯𑀥𑀻𑀢𑀸. 𑀲𑀼𑀘𑀺𑀫𑁆𑀳𑀺𑀢𑀸𑀢𑀺 𑀲𑀼𑀤𑁆𑀥𑀫𑀺𑀳𑀺𑀢𑀸, 𑀦𑀸𑀫𑀫𑁂𑀯 𑀯𑀸 𑀏𑀢𑀁. 𑀫𑀼𑀤𑀼𑀯𑀸𑀤𑀺𑀦𑀻𑀢𑀺 𑀫𑀼𑀤𑀼𑀦𑀸𑀯 𑀯𑀤𑀢𑀻𑀢𑀺 𑀫𑀼𑀤𑀼𑀯𑀸𑀤𑀺𑀦𑀻, 𑀫𑀼𑀤𑀼𑀓𑀁 𑀅𑀢𑀺𑀯𑀺𑀬 𑀯𑀸𑀤𑀦𑀲𑀻𑀮𑀸, 𑀦𑀸𑀫𑀫𑁂𑀯 𑀯𑀸. 𑀲𑁂𑀬𑁆𑀬𑀸𑀲𑁂𑀢𑀺 𑀲𑁂𑀬𑁆𑀬𑀢𑀭𑀸. 𑀅𑀘𑁆𑀙𑀭𑀸𑀦𑀦𑁆𑀢𑀺 𑀅𑀘𑁆𑀙𑀭𑀸𑀲𑀼 𑀲𑀗𑁆𑀕𑀻𑀢𑁂 𑀧𑀸𑀲𑀁𑀲𑀢𑀭𑀸. 𑀧𑀩𑁄𑀥𑀺𑀓𑀸𑀢𑀺 𑀧𑀩𑁄𑀥𑀦𑀓𑀭𑀸.

𑁧𑁬𑁯. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀦. 𑀅𑀪𑀺𑀪𑀸𑀲𑀦𑁆𑀢𑀻𑀢𑀺 𑀅𑀪𑀺𑀫𑀼𑀔𑀸, 𑀅𑀪𑀺𑀭𑀢𑀸 𑀯𑀸 𑀳𑀼𑀢𑁆𑀯𑀸 𑀪𑀸𑀲𑀦𑁆𑀢𑀺. 𑀬𑀣𑀸 𑀘 𑀪𑀸𑀲𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀦𑁆𑀤 𑀦𑀘𑁆𑀘𑀸𑀫 𑀕𑀸𑀬𑀸𑀫, 𑀳𑀦𑁆𑀤 𑀢𑀁 𑀭𑀫𑀬𑀸𑀫𑀲𑁂’’𑀢𑀺 𑀯𑀼𑀢𑁆𑀢𑀁.

𑁧𑁭𑁦. 𑀇𑀤𑀦𑁆𑀢𑀺 𑀇𑀤𑀁 𑀫𑀬𑀸 𑀮𑀤𑁆𑀥𑀝𑁆𑀞𑀸𑀦𑀁. 𑀅𑀲𑁄𑀓𑀦𑁆𑀢𑀺 𑀇𑀝𑁆𑀞𑀓𑀦𑁆𑀢𑀧𑀺𑀬𑀫𑀦𑀸𑀧𑀸𑀦𑀁𑀬𑁂𑀯 𑀭𑀽𑀧𑀸𑀤𑀻𑀦𑀁 𑀲𑀫𑁆𑀪𑀯𑀢𑁄 𑀯𑀺𑀲𑁄𑀓𑀁. 𑀢𑀢𑁄 𑀏𑀯 𑀲𑀩𑁆𑀩𑀓𑀸𑀮𑀁 𑀧𑀫𑁄𑀤𑀲𑀁𑀯𑀤𑁆𑀥𑀦𑀢𑁄 𑀦𑀦𑁆𑀤𑀦𑀁. 𑀢𑀺𑀤𑀲𑀸𑀦𑀁 𑀫𑀳𑀸𑀯𑀦𑀦𑁆𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀸𑀦𑀁 𑀫𑀳𑀦𑁆𑀢𑀁 𑀫𑀳𑀦𑀻𑀬𑀜𑁆𑀘 𑀉𑀬𑁆𑀬𑀸𑀦𑀁.

𑁧𑁭𑁧. 𑀏𑀯𑀭𑀽𑀧𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀦𑀸𑀫 𑀧𑀼𑀜𑁆𑀜𑀓𑀫𑁆𑀫𑀯𑀲𑁂𑀦𑁂𑀯𑀸𑀢𑀺 𑀑𑀤𑀺𑀲𑁆𑀲𑀓𑀦𑀬𑁂𑀦 𑀯𑀢𑁆𑀯𑀸 𑀧𑀦𑀼 𑀅𑀦𑁄𑀤𑀺𑀲𑁆𑀲𑀓𑀦𑀬𑁂𑀦 𑀤𑀲𑁆𑀲𑁂𑀦𑁆𑀢𑀻 ‘‘𑀲𑀼𑀔𑀁 𑀅𑀓𑀢𑀧𑀼𑀜𑁆𑀜𑀸𑀦’’𑀦𑁆𑀢𑀺 𑀕𑀸𑀣𑀫𑀸𑀳.

𑁧𑁭𑁨. 𑀧𑀼𑀦 𑀅𑀢𑁆𑀢𑀦𑀸 𑀮𑀤𑁆𑀥𑀲𑁆𑀲 𑀤𑀺𑀩𑁆𑀩𑀝𑁆𑀞𑀸𑀦𑀲𑁆𑀲 𑀧𑀭𑁂𑀳𑀺 𑀲𑀸𑀥𑀸𑀭𑀡𑀓𑀸𑀫𑀢𑀸𑀯𑀲𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑀻 ‘‘𑀢𑁂𑀲𑀁 𑀲𑀳𑀩𑁆𑀬𑀓𑀸𑀫𑀸𑀦’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑁂𑀲𑀦𑁆𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀸𑀦𑀁. 𑀲𑀳𑀩𑁆𑀬𑀓𑀸𑀫𑀸𑀦𑀦𑁆𑀢𑀺 𑀲𑀳𑀪𑀸𑀯𑀁 𑀇𑀘𑁆𑀙𑀦𑁆𑀢𑁂𑀳𑀺, 𑀓𑀢𑁆𑀢𑀼𑀅𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀲𑀳 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀳𑀯𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀁 𑀬𑀣𑀸 𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬𑀦𑁆𑀢𑀺.

𑀏𑀯𑀁 𑀣𑁂𑀭𑁄 𑀤𑁂𑀯𑀢𑀸𑀬 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀫𑁆𑀫𑁂 𑀆𑀯𑀺𑀓𑀢𑁂 𑀢𑀲𑁆𑀲𑀸 𑀲𑀧𑀭𑀺𑀯𑀸𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀤𑀸𑀲𑀺𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀮𑀔𑀼𑀫𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀮𑀔𑀼𑀫𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑁂 𑀓𑁂𑀯𑀝𑁆𑀝𑀤𑁆𑀯𑀸𑀭𑀁 𑀦𑀸𑀫 𑀩𑀸𑀭𑀸𑀡𑀲𑀺𑀦𑀕𑀭𑀲𑁆𑀲 𑀏𑀓𑀁 𑀤𑁆𑀯𑀸𑀭𑀁, 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀯𑀺𑀝𑁆𑀞𑀕𑀸𑀫𑁄𑀧𑀺 ‘‘𑀓𑁂𑀯𑀝𑁆𑀝𑀤𑁆𑀯𑀸𑀭’’𑀦𑁆𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀢𑁆𑀣 𑀮𑀔𑀼𑀫𑀸 𑀦𑀸𑀫 𑀏𑀓𑀸 𑀇𑀢𑁆𑀣𑀻 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀢𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸 𑀢𑁂𑀦𑁂𑀯 𑀧𑀭𑀺𑀘𑀬𑁂𑀦 𑀲𑀤𑁆𑀥𑀸𑀬 𑀯𑀟𑁆𑀠𑀫𑀸𑀦𑀸𑀬 𑀆𑀲𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀧𑀯𑀺𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀁 𑀉𑀧𑀦𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑀺. 𑀬𑀜𑁆𑀘 𑀑𑀤𑀦𑀓𑀼𑀫𑁆𑀫𑀸𑀲𑀟𑀸𑀓𑀸𑀤𑀺 𑀅𑀢𑁆𑀢𑀦𑁄 𑀕𑁂𑀳𑁂 𑀯𑀺𑀚𑁆𑀚𑀢𑀺, 𑀢𑀁 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺. 𑀲𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀲𑀫𑀸𑀳𑀺𑀢𑀸 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑀻 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀫𑀳𑀢𑀺 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀜𑁆𑀘𑀲𑁆𑀲𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀲𑀸 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀧𑀫𑁄𑀤𑀫𑀸𑀦𑀸 𑀯𑀺𑀘𑀭𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀺𑀕𑀸𑀣𑀸𑀳𑀺 𑀧𑀼𑀘𑁆𑀙𑀻𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁭𑁩.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁭𑁪.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁭𑁫.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁭𑁬.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁭𑁭.

‘‘𑀓𑁂𑀯𑀝𑁆𑀝𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀅𑀳𑀼 𑀫𑀬𑁆𑀳𑀁 𑀦𑀺𑀯𑁂𑀲𑀦𑀁;

𑀢𑀢𑁆𑀣 𑀲𑀜𑁆𑀘𑀭𑀫𑀸𑀦𑀸𑀦𑀁, 𑀲𑀸𑀯𑀓𑀸𑀦𑀁 𑀫𑀳𑁂𑀲𑀺𑀦𑀁.

𑁧𑁭𑁮.

‘‘𑀑𑀤𑀦𑀁 𑀓𑀼𑀫𑁆𑀫𑀸𑀲𑀁 𑀟𑀸𑀓𑀁, 𑀮𑁄𑀡𑀲𑁄𑀯𑀻𑀭𑀓𑀜𑁆𑀘𑀳𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁭𑁯.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁧𑁮𑁦.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁧𑁮𑁧.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁧𑁮𑁨.

‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁮𑁩.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀫𑀫 𑀘, 𑀪𑀦𑁆𑀢𑁂, 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑁂𑀬𑁆𑀬𑀸𑀲𑀺 ‘‘𑀮𑀔𑀼𑀫𑀸 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀫𑀁 𑀪𑀕𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀫𑀜𑁆𑀜𑀨𑀮𑁂 𑀩𑁆𑀬𑀸𑀓𑀭𑁂𑀬𑁆𑀬. 𑀢𑀁 𑀪𑀕𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀩𑁆𑀬𑀸𑀓𑀸𑀲𑀻𑀢𑀺.

𑁧𑁭𑁭. 𑀢𑀢𑁆𑀣 𑀓𑁂𑀯𑀝𑁆𑀝𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫𑀸𑀢𑀺 𑀓𑁂𑀯𑀝𑁆𑀝𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀫𑀦𑀝𑁆𑀞𑀸𑀦𑁂.

𑁧𑁭𑁮. 𑀟𑀸𑀓𑀦𑁆𑀢𑀺 𑀢𑀡𑁆𑀟𑀼𑀮𑁂𑀬𑁆𑀬𑀓𑀸𑀤𑀺𑀲𑀸𑀓𑀩𑁆𑀬𑀜𑁆𑀚𑀦𑀁. 𑀮𑁄𑀡𑀲𑁄𑀯𑀻𑀭𑀓𑀦𑁆𑀢𑀺 𑀥𑀜𑁆𑀜𑀭𑀲𑀸𑀤𑀻𑀳𑀺 𑀩𑀳𑀽𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀏𑀓𑀁 𑀧𑀸𑀦𑀓𑀁. ‘‘𑀆𑀘𑀸𑀫𑀓𑀜𑁆𑀚𑀺𑀓𑀮𑁄𑀡𑀽𑀤𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀲𑀸 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺. 𑀲𑁂𑀲𑀁 𑀉𑀢𑁆𑀢𑀭𑀸𑀯𑀺𑀥𑀸𑀦𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀏𑀯 𑀯𑁂𑀤𑀺𑀢𑀩𑁆𑀩𑀁.

𑀮𑀔𑀼𑀫𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀘𑀸𑀫𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀺𑀡𑁆𑀟𑀸𑀬 𑀢𑁂 𑀘𑀭𑀦𑁆𑀢𑀲𑁆𑀲𑀸𑀢𑀺 𑀆𑀘𑀸𑀫𑀤𑀸𑀬𑀺𑀓𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀁 𑀓𑀼𑀮𑀁 𑀅𑀳𑀺𑀯𑀸𑀢𑀭𑁄𑀕𑁂𑀦 𑀉𑀧𑀤𑁆𑀤𑀼𑀢𑀁 𑀅𑀳𑁄𑀲𑀺. 𑀢𑀢𑁆𑀣 𑀲𑀩𑁆𑀩𑁂 𑀚𑀦𑀸 𑀫𑀢𑀸 𑀞𑀧𑁂𑀢𑁆𑀯𑀸 𑀏𑀓𑀁 𑀇𑀢𑁆𑀣𑀺𑀁. 𑀲𑀸 𑀕𑁂𑀳𑀁 𑀕𑁂𑀳𑀕𑀢𑀜𑁆𑀘 𑀲𑀩𑁆𑀩𑀁 𑀥𑀦𑀥𑀜𑁆𑀜𑀁 𑀙𑀟𑁆𑀟𑁂𑀢𑁆𑀯𑀸 𑀫𑀭𑀡𑀪𑀬𑀪𑀻𑀢𑀸 𑀪𑀺𑀢𑁆𑀢𑀺𑀙𑀺𑀤𑁆𑀤𑁂𑀦 𑀧𑀮𑀸𑀢𑀸 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀧𑀭𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀯𑀲𑀢𑀺. 𑀢𑀲𑁆𑀫𑀺𑀁 𑀕𑁂𑀳𑁂 𑀫𑀦𑀼𑀲𑁆𑀲𑀸 𑀓𑀭𑀼𑀡𑀸𑀬𑀦𑁆𑀢𑀸 𑀉𑀓𑁆𑀔𑀮𑀺𑀆𑀤𑀻𑀲𑀼 𑀅𑀯𑀲𑀺𑀝𑁆𑀞𑀁 𑀬𑀸𑀕𑀼𑀪𑀢𑁆𑀢𑀆𑀘𑀸𑀫𑀸𑀤𑀺𑀁 𑀢𑀲𑁆𑀲𑀸 𑀤𑁂𑀦𑁆𑀢𑀺. 𑀲𑀸 𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀺𑀢𑁄 ‘‘𑀓𑀁 𑀦𑀼 𑀔𑁄 𑀅𑀳𑀁 𑀅𑀚𑁆𑀚 𑀆𑀳𑀸𑀭𑀧𑀝𑀺𑀕𑁆𑀕𑀳𑀡𑁂𑀦 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀺, 𑀤𑀼𑀕𑁆𑀕𑀢𑀺𑀢𑁄 𑀘 𑀤𑀼𑀓𑁆𑀔𑀢𑁄 𑀘 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀆𑀲𑀦𑁆𑀦𑀫𑀭𑀡𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀜𑁆𑀘𑀲𑁆𑀲𑀸 𑀓𑀫𑁆𑀫𑀁 𑀓𑀢𑁄𑀓𑀸𑀲𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑀺 𑀕𑀢𑁂 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀆𑀘𑀸𑀫𑀁 𑀤𑀲𑁆𑀲𑀢𑀺, 𑀢𑁂𑀦𑁂𑀯 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀏𑀯𑀁 𑀦𑀺𑀭𑀬𑀽𑀧𑀧𑀢𑁆𑀢𑀺𑀢𑁄 𑀫𑁄𑀘𑁂𑀢𑁆𑀯𑀸 𑀳𑀦𑁆𑀤𑀸𑀳𑀁 𑀇𑀫𑀺𑀲𑁆𑀲𑀸 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀲𑀸 𑀦𑀺𑀯𑁂𑀲𑀦𑀝𑁆𑀞𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀅𑀦𑁂𑀓𑀭𑀲𑀁 𑀅𑀦𑁂𑀓𑀲𑀽𑀧𑀩𑁆𑀬𑀜𑁆𑀚𑀦𑀁 𑀤𑀺𑀩𑁆𑀩𑀸𑀳𑀸𑀭𑀁 𑀉𑀧𑀦𑁂𑀲𑀺. 𑀢𑀁 𑀜𑀢𑁆𑀯𑀸 𑀣𑁂𑀭𑁄 ‘‘𑀓𑁄𑀲𑀺𑀬, 𑀢𑁆𑀯𑀁 𑀓𑀢𑀓𑀼𑀲𑀮𑁄, 𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺, 𑀫𑀸 𑀤𑀼𑀕𑁆𑀕𑀢𑀸𑀦𑀁 𑀓𑀧𑀡𑀸𑀦𑀁 𑀲𑀫𑁆𑀧𑀢𑁆𑀢𑀺𑀁 𑀯𑀺𑀮𑀼𑀫𑁆𑀧𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺.

𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀳𑀸𑀦𑀼𑀪𑀸𑀯𑁄 𑀣𑁂𑀭𑁄, 𑀇𑀫𑀲𑁆𑀲 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀇𑀥 𑀦𑀢𑁆𑀣𑀺, 𑀇𑀤𑀜𑁆𑀘 𑀓𑀺𑀮𑀺𑀝𑁆𑀞𑀪𑀸𑀚𑀦𑀕𑀢𑀁 𑀢𑀺𑀡𑀘𑀼𑀡𑁆𑀡𑀭𑀚𑀸𑀦𑀼𑀓𑀺𑀡𑁆𑀡𑀁 𑀅𑀮𑁄𑀡𑀁 𑀲𑀻𑀢𑀮𑀁 𑀅𑀧𑁆𑀧𑀭𑀲𑀁 𑀆𑀘𑀸𑀫𑀓𑀜𑁆𑀚𑀺𑀬𑀫𑀢𑁆𑀢𑀁 𑀏𑀤𑀺𑀲𑀲𑁆𑀲 𑀤𑀸𑀢𑀼𑀁 𑀦 𑀉𑀲𑁆𑀲𑀳𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑀺𑀘𑁆𑀙𑀣𑀸’’𑀢𑀺 𑀆𑀳. 𑀣𑁂𑀭𑁄 𑀏𑀓𑀧𑀤𑀦𑀺𑀓𑁆𑀔𑁂𑀧𑀫𑀢𑁆𑀢𑀁 𑀅𑀧𑀲𑀓𑁆𑀓𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀕𑁂𑀳𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀁 𑀉𑀧𑀦𑁂𑀲𑀼𑀁, 𑀣𑁂𑀭𑁄 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀲𑀸 𑀤𑀼𑀕𑁆𑀕𑀢𑀺𑀢𑁆𑀣𑀻 ‘‘𑀫𑀫𑁂𑀯 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀇𑀥𑀸𑀕𑀢𑁄, 𑀫𑀫 𑀲𑀦𑁆𑀢𑀓𑀫𑁂𑀯 𑀧𑀝𑀺𑀕𑁆𑀕𑀳𑁂𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀆𑀤𑀭𑀚𑀸𑀢𑀸 𑀢𑀁 𑀆𑀘𑀸𑀫𑀁 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀺. 𑀣𑁂𑀭𑁄 𑀢𑀲𑁆𑀲𑀸 𑀧𑀲𑀸𑀤𑀲𑀁𑀯𑀤𑁆𑀥𑀦𑀢𑁆𑀣𑀁 𑀪𑀼𑀜𑁆𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀫𑀦𑀼𑀲𑁆𑀲𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀆𑀘𑀸𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀑𑀦𑀻𑀢𑀧𑀢𑁆𑀢𑀧𑀸𑀡𑀻 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀢𑀁 𑀤𑀼𑀕𑁆𑀕𑀢𑀺𑀢𑁆𑀣𑀺𑀁 ‘‘𑀢𑁆𑀯𑀁 𑀇𑀢𑁄 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀫𑀫 𑀫𑀸𑀢𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀕𑀢𑁄. 𑀲𑀸 𑀢𑁂𑀦 𑀣𑁂𑀭𑁂 𑀅𑀢𑀺𑀧𑀲𑀸𑀤𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀲𑁆𑀲𑀸 𑀓𑀸𑀮𑀓𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀓𑀢𑁆𑀣 𑀦𑀼 𑀔𑁄 𑀉𑀧𑁆𑀧𑀦𑁆𑀦𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀸𑀯𑀢𑀺𑀁𑀲𑁂𑀲𑀼 𑀅𑀤𑀺𑀲𑁆𑀯𑀸 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀬𑀸𑀫𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑁄 𑁋

𑁧𑁮𑁫.

‘‘𑀧𑀺𑀡𑁆𑀟𑀸𑀬 𑀢𑁂 𑀘𑀭𑀦𑁆𑀢𑀲𑁆𑀲, 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀢𑀺𑀝𑁆𑀞𑀢𑁄;

𑀤𑀮𑀺𑀤𑁆𑀤𑀸 𑀓𑀧𑀡𑀸 𑀦𑀸𑀭𑀻, 𑀧𑀭𑀸𑀕𑀸𑀭𑀁 𑀅𑀧𑀲𑁆𑀲𑀺𑀢𑀸.

𑁧𑁮𑁬.

‘‘𑀬𑀸 𑀢𑁂 𑀅𑀤𑀸𑀲𑀺 𑀆𑀘𑀸𑀫𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀲𑀸 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀓𑀁 𑀦𑀼 𑀲𑀸 𑀤𑀺𑀲𑀢𑀁 𑀕𑀢𑀸’’𑀢𑀺. 𑁋

𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑁧𑁮𑁫. 𑀢𑀢𑁆𑀣 𑀧𑀺𑀡𑁆𑀟𑀸𑀬𑀸𑀢𑀺 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬. 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀢𑀺𑀝𑁆𑀞𑀢𑁄𑀢𑀺 𑀇𑀤𑀁 𑀧𑀺𑀡𑁆𑀟𑀸𑀬 𑀘𑀭𑀡𑀸𑀓𑀸𑀭𑀤𑀲𑁆𑀲𑀦𑀁, 𑀉𑀤𑁆𑀤𑀺𑀲𑁆𑀲 𑀢𑀺𑀝𑁆𑀞𑀢𑁄𑀢𑀺 𑀅𑀢𑁆𑀣𑁄. 𑀤𑀮𑀺𑀤𑁆𑀤𑀸𑀢𑀺 𑀤𑀼𑀕𑁆𑀕𑀢𑀸. 𑀓𑀧𑀡𑀸𑀢𑀺 𑀯𑀭𑀸𑀓𑀻. ‘‘𑀤𑀮𑀺𑀤𑁆𑀤𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀁 𑀤𑀲𑁆𑀲𑁂𑀢𑀺, ‘‘𑀓𑀧𑀡𑀸’’𑀢𑀺 𑀇𑀫𑀺𑀦𑀸 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀁. 𑀧𑀭𑀸𑀕𑀸𑀭𑀁 𑀅𑀧𑀲𑁆𑀲𑀺𑀢𑀸𑀢𑀺 𑀧𑀭𑀕𑁂𑀳𑀁 𑀦𑀺𑀲𑁆𑀲𑀺𑀢𑀸, 𑀧𑀭𑁂𑀲𑀁 𑀖𑀭𑁂 𑀩𑀳𑀺𑀧𑀺𑀝𑁆𑀞𑀺𑀙𑀤𑀦𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀻.

𑁧𑁮𑁬. 𑀓𑀁 𑀦𑀼 𑀲𑀸 𑀤𑀺𑀲𑀢𑀁 𑀕𑀢𑀸𑀢𑀺 𑀙𑀲𑀼 𑀓𑀸𑀫𑀤𑁂𑀯𑀮𑁄𑀓𑁂𑀲𑀼 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀓𑀁 𑀦𑀸𑀫 𑀤𑀺𑀲𑀁 𑀕𑀢𑀸. 𑀇𑀢𑀺 𑀲𑀓𑁆𑀓𑁄 ‘‘𑀣𑁂𑀭𑁂𑀦 𑀢𑀣𑀸 𑀓𑀢𑀸𑀦𑀼𑀕𑁆𑀕𑀳𑀸 𑀉𑀴𑀸𑀭𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀪𑀸𑀕𑀺𑀦𑀻, 𑀦 𑀘 𑀤𑀺𑀲𑁆𑀲𑀢𑀻’’𑀢𑀺 𑀳𑁂𑀝𑁆𑀞𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀅𑀧𑀲𑁆𑀲𑀦𑁆𑀢𑁄 𑀲𑀁𑀲𑀬𑀸𑀧𑀦𑁆𑀦𑁄 𑀧𑀼𑀘𑁆𑀙𑀢𑀺.

𑀅𑀣𑀲𑁆𑀲 𑀣𑁂𑀭𑁄 𑁋

𑁧𑁮𑁭.

‘‘𑀧𑀺𑀡𑁆𑀟𑀸𑀬 𑀫𑁂 𑀘𑀭𑀦𑁆𑀢𑀲𑁆𑀲, 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀢𑀺𑀝𑁆𑀞𑀢𑁄;

𑀤𑀮𑀺𑀤𑁆𑀤𑀸 𑀓𑀧𑀡𑀸 𑀦𑀸𑀭𑀻, 𑀧𑀭𑀸𑀕𑀸𑀭𑀁 𑀅𑀧𑀲𑁆𑀲𑀺𑀢𑀸.

𑁧𑁮𑁮.

‘‘𑀬𑀸 𑀫𑁂 𑀅𑀤𑀸𑀲𑀺 𑀆𑀘𑀸𑀫𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀲𑀸 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀇𑀢𑁄 𑀘𑀼𑀢𑀸.

𑁧𑁮𑁯.

‘‘𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀦𑀸𑀫, 𑀲𑀦𑁆𑀢𑀺 𑀤𑁂𑀯𑀸 𑀫𑀳𑀺𑀤𑁆𑀥𑀺𑀓𑀸;

𑀢𑀢𑁆𑀣 𑀲𑀸 𑀲𑀼𑀔𑀺𑀢𑀸 𑀦𑀸𑀭𑀻, 𑀫𑁄𑀤𑀢𑀸𑀘𑀸𑀫𑀤𑀸𑀬𑀺𑀓𑀸’’𑀢𑀺. 𑁋

𑀧𑀼𑀘𑁆𑀙𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁄 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀓𑀣𑁂𑀲𑀺.

𑁧𑁮𑁮. 𑀢𑀢𑁆𑀣 𑀯𑀺𑀧𑁆𑀧𑀫𑀼𑀢𑁆𑀢𑀸𑀢𑀺 𑀢𑀢𑁄 𑀫𑀦𑀼𑀲𑁆𑀲𑀤𑁄𑀪𑀕𑁆𑀕𑀺𑀬𑀢𑁄 𑀧𑀭𑀫𑀓𑀸𑀭𑀼𑀜𑁆𑀜𑀯𑀼𑀢𑁆𑀢𑀺𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀸 𑀅𑀧𑀕𑀢𑀸.

𑁧𑁮𑁯. 𑀫𑁄𑀤𑀢𑀸𑀘𑀸𑀫𑀤𑀸𑀬𑀺𑀓𑀸𑀢𑀺 𑀆𑀘𑀸𑀫𑀫𑀢𑁆𑀢𑀤𑀸𑀬𑀺𑀓𑀸, 𑀲𑀸𑀧𑀺 𑀦𑀸𑀫 𑀧𑀜𑁆𑀘𑀫𑁂 𑀓𑀸𑀫𑀲𑀕𑁆𑀕𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀫𑁄𑀤𑀢𑀺, 𑀧𑀲𑁆𑀲 𑀢𑀸𑀯 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀨𑀮𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀦 𑀲𑀓𑁆𑀓𑁄 𑀢𑀲𑁆𑀲𑀸 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀁 𑀫𑀳𑀸𑀦𑀺𑀲𑀁𑀲𑀢𑀜𑁆𑀘 𑀲𑀼𑀢𑁆𑀯𑀸 𑀢𑀁 𑀣𑁄𑀫𑁂𑀦𑁆𑀢𑁄 𑁋

𑁧𑁯𑁦.

‘‘𑀅𑀳𑁄 𑀤𑀸𑀦𑀁 𑀯𑀭𑀸𑀓𑀺𑀬𑀸, 𑀓𑀲𑁆𑀲𑀧𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁;

𑀧𑀭𑀸𑀪𑀢𑁂𑀦 𑀤𑀸𑀦𑁂𑀦, 𑀇𑀚𑁆𑀛𑀺𑀢𑁆𑀣 𑀯𑀢 𑀤𑀓𑁆𑀔𑀺𑀡𑀸.

𑁧𑁯𑁧.

‘‘𑀬𑀸 𑀫𑀳𑁂𑀲𑀺𑀢𑁆𑀢𑀁 𑀓𑀸𑀭𑁂𑀬𑁆𑀬, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀭𑀸𑀚𑀺𑀦𑁄;

𑀦𑀸𑀭𑀻 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀻, 𑀪𑀢𑁆𑀢𑀼 𑀘𑀸𑀦𑁄𑀫𑀤𑀲𑁆𑀲𑀺𑀓𑀸;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁧𑁯𑁨.

‘‘𑀲𑀼𑀢𑀁 𑀦𑀺𑀓𑁆𑀔𑀸 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

𑁧𑁯𑁩.

‘‘𑀲𑀢𑀁 𑀳𑁂𑀫𑀯𑀢𑀸 𑀦𑀸𑀕𑀸, 𑀈𑀲𑀸𑀤𑀦𑁆𑀢𑀸 𑀉𑀭𑀽𑀴𑁆𑀳𑀯𑀸;

𑀲𑀼𑀯𑀡𑁆𑀡𑀓𑀘𑁆𑀙𑀸 𑀫𑀺𑀢𑀗𑁆𑀕𑀸, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑀘𑁆𑀙𑀦𑁆𑀢𑀺 𑀲𑁄𑀴𑀲𑀺𑀁.

𑁧𑁯𑁪.

‘‘𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀁, 𑀇𑀲𑁆𑀲𑀭𑀁 𑀬𑁄𑀥 𑀓𑀸𑀭𑀬𑁂;

𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺. 𑁋 𑀆𑀳;

𑁧𑁯𑁦. 𑀢𑀢𑁆𑀣 𑀅𑀳𑁄𑀢𑀺 𑀅𑀘𑁆𑀙𑀭𑀺𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀭𑀸𑀓𑀺𑀬𑀸𑀢𑀺 𑀓𑀧𑀡𑀺𑀬𑀸. 𑀧𑀭𑀸𑀪𑀢𑁂𑀦𑀸𑀢𑀺 𑀧𑀭𑀢𑁄 𑀆𑀦𑀻𑀢𑁂𑀦, 𑀧𑀭𑁂𑀲𑀁 𑀖𑀭𑀢𑁄 𑀉𑀘𑁆𑀙𑀸𑀘𑀭𑀺𑀬𑀸𑀬 𑀮𑀤𑁆𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀸𑀦𑁂𑀦𑀸𑀢𑀺 𑀤𑀸𑀢𑀩𑁆𑀩𑁂𑀦 𑀆𑀘𑀸𑀫𑀫𑀢𑁆𑀢𑁂𑀦 𑀤𑁂𑀬𑁆𑀬𑀥𑀫𑁆𑀫𑁂𑀦. 𑀇𑀚𑁆𑀛𑀺𑀢𑁆𑀣 𑀯𑀢 𑀤𑀓𑁆𑀔𑀺𑀡𑀸𑀢𑀺 𑀤𑀓𑁆𑀔𑀺𑀡𑀸 𑀤𑀸𑀦𑀁 𑀅𑀳𑁄 𑀦𑀺𑀧𑁆𑀨𑀚𑁆𑀚𑀺𑀢𑁆𑀣, 𑀅𑀳𑁄 𑀫𑀳𑀧𑁆𑀨𑀮𑀸 𑀫𑀳𑀸𑀚𑀼𑀢𑀺𑀓𑀸 𑀫𑀳𑀸𑀯𑀺𑀧𑁆𑀨𑀸𑀭𑀸 𑀅𑀳𑀼𑀯𑀢𑁆𑀣𑀸𑀢𑀺 𑀅𑀢𑁆𑀣𑁄.

𑁧𑁯𑁧. 𑀇𑀤𑀸𑀦𑀺 ‘‘𑀇𑀢𑁆𑀣𑀺𑀭𑀢𑀦𑀸𑀤𑀻𑀦𑀺𑀧𑀺 𑀢𑀲𑁆𑀲 𑀤𑀸𑀦𑀲𑁆𑀲 𑀲𑀢𑀪𑀸𑀕𑀫𑁆𑀧𑀺 𑀲𑀳𑀲𑁆𑀲𑀪𑀸𑀕𑀫𑁆𑀧𑀺 𑀦 𑀉𑀧𑁂𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀸 𑀫𑀳𑁂𑀲𑀺𑀢𑁆𑀢𑀁 𑀓𑀸𑀭𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀻𑀢𑀺 ‘‘𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀻 𑀦𑀸𑀘𑁆𑀘𑁄𑀤𑀸𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀲𑀩𑁆𑀩𑁂𑀳𑀺 𑀅𑀗𑁆𑀕𑁂𑀳𑀺 𑀓𑀸𑀭𑀡𑁂𑀳𑀺, 𑀲𑀩𑁆𑀩𑁂𑀳𑀺 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀓𑀮𑁆𑀬𑀸𑀡𑀻 𑀲𑁄𑀪𑀦𑀸 𑀲𑀼𑀦𑁆𑀤𑀭𑀸. 𑀪𑀢𑁆𑀢𑀼 𑀘𑀸𑀦𑁄𑀫𑀤𑀲𑁆𑀲𑀺𑀓𑀸𑀢𑀺 𑀲𑀸𑀫𑀺𑀓𑀲𑁆𑀲 𑀅𑀮𑀸𑀫𑀓𑀤𑀲𑁆𑀲𑀦𑀸 𑀲𑀸𑀢𑀺𑀲𑀬𑀁 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀏𑀢𑀲𑁆𑀲𑀸𑀘𑀸𑀫𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀦𑁆𑀢𑀺 𑀏𑀢𑀲𑁆𑀲 𑀏𑀢𑀸𑀬 𑀤𑀺𑀦𑁆𑀦𑀲𑁆𑀲 𑀆𑀘𑀸𑀫𑀤𑀸𑀦𑀲𑁆𑀲 𑀨𑀮𑀁 𑀲𑁄𑀴𑀲𑀪𑀸𑀕𑀁 𑀓𑀢𑁆𑀯𑀸 𑀢𑀢𑁄 𑀏𑀓𑀁 𑀪𑀸𑀕𑀁 𑀧𑀼𑀦 𑀲𑁄𑀴𑀲𑀪𑀸𑀕𑀁 𑀓𑀢𑁆𑀯𑀸 𑀕𑀳𑀺𑀢𑀪𑀸𑀕𑀲𑀗𑁆𑀔𑀸𑀢𑀁 𑀲𑁄𑀴𑀲𑀺𑀁 𑀓𑀮𑀁 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀇𑀢𑁆𑀣𑀺𑀭𑀢𑀦𑀪𑀸𑀯𑁄𑀧𑀺 𑀦𑀸𑀕𑁆𑀖𑀢𑀺 𑀦𑀸𑀦𑀼𑀪𑁄𑀢𑀺 𑀦 𑀧𑀸𑀧𑀼𑀡𑀸𑀢𑀺. ‘‘𑀲𑀼𑀯𑀡𑁆𑀡𑀲𑁆𑀲 𑀧𑀜𑁆𑀘𑀤𑀲𑀥𑀭𑀡𑀁 𑀦𑀺𑀓𑁆𑀔’’𑀦𑁆𑀢𑀺 𑀯𑀤𑀦𑁆𑀢𑀺, ‘‘𑀲𑀢𑀥𑀭𑀡’’𑀦𑁆𑀢𑀺 𑀅𑀧𑀭𑁂.

𑁧𑁯𑁩. 𑀳𑁂𑀫𑀯𑀢𑀸𑀢𑀺 𑀳𑀺𑀫𑀯𑀢𑀺 𑀚𑀸𑀢𑀸, 𑀳𑁂𑀫𑀯𑀢𑀚𑀸𑀢𑀺𑀓𑀸 𑀯𑀸. 𑀢𑁂 𑀳𑀺 𑀫𑀳𑀦𑁆𑀢𑀸 𑀣𑀸𑀫𑀚𑀯𑀲𑀫𑁆𑀧𑀦𑁆𑀦𑀸 𑀘 𑀳𑁄𑀦𑁆𑀢𑀺. 𑀈𑀲𑀸𑀤𑀦𑁆𑀢𑀸𑀢𑀺 𑀭𑀣𑀻𑀲𑀸𑀲𑀤𑀺𑀲𑀤𑀦𑁆𑀢𑀸, 𑀣𑁄𑀓𑀁𑀬𑁂𑀯 𑀅𑀯𑀦𑀢𑀤𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀺𑀲𑀸𑀮𑀓𑀤𑀸𑀞𑀻𑀪𑀸𑀯𑀁 𑀦𑀺𑀯𑀸𑀭𑁂𑀢𑀺. 𑀉𑀭𑀽𑀴𑁆𑀳𑀯𑀸𑀢𑀺 𑀣𑀸𑀫𑀚𑀯𑀧𑀭𑀓𑁆𑀓𑀫𑁂𑀳𑀺 𑀩𑁆𑀭𑀽𑀳𑀦𑁆𑀢𑁄, 𑀫𑀳𑀦𑁆𑀢𑀁 𑀬𑀼𑀤𑁆𑀥𑀓𑀺𑀘𑁆𑀘𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀼𑀯𑀡𑁆𑀡𑀓𑀘𑁆𑀙𑀸𑀢𑀺 𑀳𑁂𑀫𑀫𑀬𑀕𑀻𑀯𑁂𑀬𑁆𑀬𑀓𑀧𑀝𑀺𑀫𑀼𑀓𑁆𑀓𑀸. 𑀓𑀘𑁆𑀙𑀲𑀻𑀲𑁂𑀦 𑀳𑀺 𑀲𑀩𑁆𑀩𑀁 𑀳𑀢𑁆𑀣𑀺𑀬𑁄𑀕𑁆𑀕𑀁 𑀯𑀤𑀢𑀺. 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀕𑀚𑀢𑁆𑀣𑀭𑀡𑀓𑀗𑁆𑀓𑀦𑀸𑀤𑀺𑀳𑀢𑁆𑀣𑀸𑀮𑀗𑁆𑀓𑀸𑀭𑀲𑀫𑁆𑀧𑀦𑁆𑀦𑀸.

𑁧𑁯𑁪. 𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀁 𑀇𑀲𑁆𑀲𑀭𑀦𑁆𑀢𑀺 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀚𑀫𑁆𑀩𑀼𑀤𑀻𑀧𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀇𑀲𑁆𑀲𑀭𑀺𑀬𑀁. 𑀢𑁂𑀦 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀲𑀓𑀮𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀯𑀤𑀢𑀺. 𑀬𑀁 𑀧𑀦𑁂𑀢𑁆𑀣, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀥 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀅𑀢𑁆𑀢𑀦𑀸 𑀘 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀆𑀘𑀸𑀫𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀡𑁆𑀟𑀸𑀮𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀘𑀡𑁆𑀟𑀸𑀮𑀺 𑀯𑀦𑁆𑀤 𑀧𑀸𑀤𑀸𑀦𑀻𑀢𑀺 𑀘𑀡𑁆𑀟𑀸𑀮𑀺𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁄 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀘𑀡𑁆𑀟𑀸𑀮𑀸𑀯𑀲𑀣𑁂 𑀯𑀲𑀦𑁆𑀢𑀺𑀁 𑀏𑀓𑀁 𑀫𑀳𑀮𑁆𑀮𑀺𑀓𑀁 𑀘𑀡𑁆𑀟𑀸𑀮𑀺𑀁 𑀔𑀻𑀡𑀸𑀬𑀼𑀓𑀁, 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀜𑁆𑀘𑀲𑁆𑀲𑀸 𑀓𑀫𑁆𑀫𑀁 𑀉𑀧𑀝𑁆𑀞𑀺𑀢𑀁. 𑀲𑁄 𑀫𑀳𑀸𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄 ‘‘𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀢𑁂𑀦𑀲𑁆𑀲𑀸 𑀦𑀺𑀭𑀬𑀽𑀧𑀧𑀢𑁆𑀢𑀺𑀁 𑀦𑀺𑀲𑁂𑀥𑁂𑀢𑁆𑀯𑀸 𑀲𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀸 𑀘𑀡𑁆𑀟𑀸𑀮𑀻 𑀤𑀡𑁆𑀟𑀁 𑀑𑀮𑀼𑀩𑁆𑀪 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀻 𑀪𑀕𑀯𑀦𑁆𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀪𑀺𑀫𑀼𑀔𑀻 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀪𑀕𑀯𑀸𑀧𑀺 𑀢𑀲𑁆𑀲𑀸 𑀕𑀫𑀦𑀁 𑀦𑀺𑀯𑀸𑀭𑁂𑀦𑁆𑀢𑁄 𑀯𑀺𑀬 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀢𑀲𑁆𑀲𑀸 𑀘 𑀆𑀬𑀼𑀧𑀭𑀺𑀓𑁆𑀔𑀬𑀁 𑀪𑀕𑀯𑀢𑁄 𑀯𑀦𑁆𑀤𑀦𑀸𑀬 𑀢𑀁 𑀦𑀺𑀬𑁄𑀚𑁂𑀦𑁆𑀢𑁄 𑁋

𑁧𑁯𑁫.

‘‘𑀘𑀡𑁆𑀟𑀸𑀮𑀺 𑀯𑀦𑁆𑀤 𑀧𑀸𑀤𑀸𑀦𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀢𑀫𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀅𑀝𑁆𑀞𑀸𑀲𑀺 𑀇𑀲𑀺𑀲𑀢𑁆𑀢𑀫𑁄.

𑁧𑁯𑁬.

‘‘𑀅𑀪𑀺𑀧𑁆𑀧𑀲𑀸𑀤𑁂𑀳𑀺 𑀫𑀦𑀁, 𑀅𑀭𑀳𑀦𑁆𑀢𑀫𑁆𑀳𑀺 𑀢𑀸𑀤𑀺𑀦𑀺;

𑀔𑀺𑀧𑁆𑀧𑀁 𑀧𑀜𑁆𑀚𑀮𑀺𑀓𑀸 𑀯𑀦𑁆𑀤, 𑀧𑀭𑀺𑀢𑁆𑀢𑀁 𑀢𑀯 𑀚𑀻𑀯𑀺𑀢’’𑀦𑁆𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑁧𑁯𑁫. 𑀢𑀢𑁆𑀣 𑀘𑀡𑁆𑀟𑀸𑀮𑀻𑀢𑀺 𑀚𑀸𑀢𑀺𑀆𑀕𑀢𑁂𑀦 𑀦𑀸𑀫𑁂𑀦 𑀢𑀁 𑀆𑀮𑀧𑀢𑀺. 𑀯𑀦𑁆𑀤𑀸𑀢𑀺 𑀅𑀪𑀺𑀯𑀸𑀤𑀬. 𑀧𑀸𑀤𑀸𑀦𑀻𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀭𑀡𑀸𑀦𑀺 𑀘𑀭𑀡𑀸𑀦𑀺. 𑀢𑀫𑁂𑀯 𑀅𑀦𑀼𑀓𑀫𑁆𑀧𑀸𑀬𑀸𑀢𑀺 𑀢𑀫𑁂𑀯 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀁, 𑀅𑀧𑀸𑀬𑀽𑀧𑀧𑀢𑁆𑀢𑀺𑀢𑁄 𑀦𑀺𑀲𑁂𑀥𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀸𑀲𑀻𑀢𑀺 𑀦𑀕𑀭𑀫𑁆𑀧𑀺 𑀅𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁄. 𑀇𑀲𑀺𑀲𑀢𑁆𑀢𑀫𑁄𑀢𑀺 𑀮𑁄𑀓𑀺𑀬𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑀇𑀲𑀻𑀳𑀺 𑀉𑀢𑁆𑀢𑀫𑁄 𑀉𑀓𑁆𑀓𑀝𑁆𑀞𑀢𑀫𑁄, 𑀅𑀣 𑀯𑀸 𑀩𑀼𑀤𑁆𑀥𑀇𑀲𑀻𑀦𑀁 𑀯𑀺𑀧𑀲𑁆𑀲𑀺𑀆𑀤𑀻𑀦𑀁 𑀲𑀢𑁆𑀢𑀫𑁄𑀢𑀺 𑀇𑀲𑀺𑀲𑀢𑁆𑀢𑀫𑁄.

𑁧𑁯𑁬. 𑀅𑀪𑀺𑀧𑁆𑀧𑀲𑀸𑀤𑁂𑀳𑀺 𑀫𑀦𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀢𑀯 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺. 𑀅𑀭𑀳𑀦𑁆𑀢𑀫𑁆𑀳𑀺 𑀢𑀸𑀤𑀺𑀦𑀻𑀢𑀺 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑀸𑀦𑀁, 𑀢𑁂𑀲𑀁𑀬𑁂𑀯 𑀅𑀭𑀻𑀦𑀁 𑀳𑀢𑀢𑁆𑀢𑀸, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸 𑀘 𑀅𑀭𑀳𑀦𑁆𑀢𑁂, 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀫𑁆𑀳𑀺. 𑀔𑀺𑀧𑁆𑀧𑀁 𑀧𑀜𑁆𑀚𑀮𑀺𑀓𑀸 𑀯𑀦𑁆𑀤𑀸𑀢𑀺 𑀲𑀻𑀖𑀁𑀬𑁂𑀯 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀓𑀸 𑀳𑀼𑀢𑁆𑀯𑀸 𑀯𑀦𑁆𑀤𑀲𑁆𑀲𑀼. 𑀓𑀲𑁆𑀫𑀸𑀢𑀺 𑀘𑁂? 𑀧𑀭𑀺𑀢𑁆𑀢𑀁 𑀢𑀯 𑀚𑀻𑀯𑀺𑀢𑀦𑁆𑀢𑀺, 𑀇𑀤𑀸𑀦𑁂𑀯 𑀪𑀺𑀚𑁆𑀚𑀦𑀲𑀪𑀸𑀯𑀢𑁆𑀢𑀸 𑀧𑀭𑀺𑀢𑁆𑀢𑀁 𑀅𑀢𑀺𑀇𑀢𑁆𑀢𑀭𑀁.

𑀇𑀢𑀺 𑀣𑁂𑀭𑁄 𑀕𑀸𑀣𑀸𑀤𑁆𑀯𑀬𑁂𑀦 𑀪𑀕𑀯𑀢𑁄 𑀕𑀼𑀡𑁂 𑀧𑀓𑀺𑀢𑁆𑀢𑁂𑀦𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂 𑀞𑀢𑁆𑀯𑀸 𑀢𑀲𑁆𑀲𑀸 𑀘 𑀔𑀻𑀡𑀸𑀬𑀼𑀓𑀢𑀸𑀯𑀺𑀪𑀸𑀯𑀦𑁂𑀦 𑀲𑀁𑀯𑁂𑀚𑁂𑀦𑁆𑀢𑁄 𑀲𑀢𑁆𑀣𑀼 𑀯𑀦𑁆𑀤𑀦𑀸𑀬 𑀦𑀺𑀬𑁄𑀚𑁂𑀲𑀺. 𑀲𑀸 𑀘 𑀢𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑀸 𑀲𑀢𑁆𑀣𑀭𑀺 𑀧𑀲𑀦𑁆𑀦𑀫𑀸𑀦𑀲𑀸𑀯 𑀳𑀼𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀩𑀼𑀤𑁆𑀥𑀕𑀢𑀸𑀬 𑀧𑀻𑀢𑀺𑀬𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀪𑀕𑀯𑀸 ‘‘𑀅𑀮𑀫𑁂𑀢𑁆𑀢𑀓𑀫𑁂𑀢𑀺𑀲𑁆𑀲𑀸 𑀲𑀕𑁆𑀕𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀦𑀕𑀭𑀁 𑀧𑀸𑀯𑀺𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀦𑀁 𑀏𑀓𑀸 𑀪𑀦𑁆𑀢𑀸 𑀕𑀸𑀯𑀻 𑀢𑀭𑀼𑀡𑀯𑀘𑁆𑀙𑀸 𑀢𑀢𑁄 𑀏𑀯 𑀅𑀪𑀺𑀥𑀸𑀯𑀦𑁆𑀢𑀻 𑀲𑀺𑀗𑁆𑀕𑁂𑀦 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀢𑀁 𑀲𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

𑁧𑁯𑁭.

‘‘𑀘𑁄𑀤𑀺𑀢𑀸 𑀪𑀸𑀯𑀺𑀢𑀢𑁆𑀢𑁂𑀦, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦𑀸;

𑀘𑀡𑁆𑀟𑀸𑀮𑀻 𑀯𑀦𑁆𑀤𑀺 𑀧𑀸𑀤𑀸𑀦𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁯𑁮.

‘‘𑀢𑀫𑁂𑀦𑀁 𑀅𑀯𑀥𑀻 𑀕𑀸𑀯𑀻, 𑀘𑀡𑁆𑀟𑀸𑀮𑀺𑀁 𑀧𑀜𑁆𑀚𑀮𑀺𑀁 𑀞𑀺𑀢𑀁;

𑀦𑀫𑀲𑁆𑀲𑀫𑀸𑀦𑀁 𑀲𑀫𑁆𑀩𑀼𑀤𑁆𑀥𑀁, 𑀅𑀦𑁆𑀥𑀓𑀸𑀭𑁂 𑀧𑀪𑀗𑁆𑀓𑀭’’𑀦𑁆𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳𑀁𑀲𑀼;

𑁧𑁯𑁮. 𑀢𑀢𑁆𑀣 𑀧𑀜𑁆𑀚𑀮𑀺𑀁 𑀞𑀺𑀢𑀁 𑀦𑀫𑀲𑁆𑀲𑀫𑀸𑀦𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀕𑀢𑁂𑀧𑀺 𑀪𑀕𑀯𑀢𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀲𑀫𑀸𑀳𑀺𑀢𑀸 𑀳𑀼𑀢𑁆𑀯𑀸 𑀲𑀫𑁆𑀫𑀼𑀔𑀸 𑀯𑀺𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑀁 𑀞𑀺𑀢𑀁. 𑀅𑀦𑁆𑀥𑀓𑀸𑀭𑁂𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂𑀦 𑀲𑀓𑀮𑁂𑀦 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀘 𑀅𑀦𑁆𑀥𑀓𑀸𑀭𑁂 𑀮𑁄𑀓𑁂. 𑀧𑀪𑀗𑁆𑀓𑀭𑀦𑁆𑀢𑀺 𑀜𑀸𑀡𑁄𑀪𑀸𑀲𑀓𑀭𑀁.

𑀲𑀸 𑀘 𑀢𑀢𑁄 𑀘𑀼𑀢𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀲𑁆𑀲𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀢𑀤𑀳𑁂𑀯 𑀘 𑀲𑀸 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀢𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑁋

𑁧𑁯𑁯.

‘‘𑀔𑀻𑀡𑀸𑀲𑀯𑀁 𑀯𑀺𑀕𑀢𑀭𑀚𑀁 𑀅𑀦𑁂𑀚𑀁, 𑀏𑀓𑀁 𑀅𑀭𑀜𑁆𑀜𑀫𑁆𑀳𑀺 𑀭𑀳𑁄 𑀦𑀺𑀲𑀺𑀦𑁆𑀦𑀁;

𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀸𑀫𑀺 𑀢𑀁 𑀯𑀻𑀭 𑀫𑀳𑀸𑀦𑀼𑀪𑀸𑀯’’𑀦𑁆𑀢𑀺. 𑁋

𑀤𑁂𑀯𑀢𑀸 𑀆𑀳. 𑀢𑀁 𑀣𑁂𑀭𑁄 𑀧𑀼𑀘𑁆𑀙𑀺 𑁋

𑁨𑁦𑁦.

‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀚𑀮𑀺𑀢𑀸 𑀫𑀳𑀸𑀬𑀲𑀸, 𑀯𑀺𑀫𑀸𑀦𑀫𑁄𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀸;

𑀧𑀭𑀺𑀯𑀸𑀭𑀺𑀢𑀸 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦, 𑀓𑀸 𑀢𑁆𑀯𑀁 𑀲𑀼𑀪𑁂 𑀤𑁂𑀯𑀢𑁂 𑀯𑀦𑁆𑀤𑀲𑁂 𑀫𑀫’’𑀦𑁆𑀢𑀺.

𑁨𑁦𑁦. 𑀢𑀢𑁆𑀣 𑀚𑀮𑀺𑀢𑀸𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀯𑀢𑁆𑀣𑀸𑀪𑀭𑀡𑀸𑀤𑀻𑀦𑀁 𑀑𑀪𑀸𑀲𑁂𑀦 𑀘 𑀚𑀮𑀦𑁆𑀢𑀻 𑀚𑁄𑀢𑁂𑀦𑁆𑀢𑀻. 𑀫𑀳𑀸𑀬𑀲𑀸𑀢𑀺 𑀫𑀳𑀸𑀧𑀭𑀺𑀯𑀸𑀭𑀸. 𑀯𑀺𑀫𑀸𑀦𑀫𑁄𑀭𑀼𑀬𑁆𑀳𑀸𑀢𑀺 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳. 𑀅𑀦𑁂𑀓𑀘𑀺𑀢𑁆𑀢𑀸𑀢𑀺 𑀅𑀦𑁂𑀓𑀯𑀺𑀥𑀘𑀺𑀢𑁆𑀢𑀢𑀸𑀬𑀼𑀢𑁆𑀢𑀸. 𑀲𑀼𑀪𑁂𑀢𑀺 𑀲𑀼𑀪𑀕𑀼𑀡𑁂. 𑀫𑀫𑀦𑁆𑀢𑀺 𑀫𑀁.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀧𑀼𑀦 𑀲𑀸 𑁋

𑁨𑁦𑁧.

‘‘𑀅𑀳𑀁 𑀪𑀤𑁆𑀤𑀦𑁆𑀢𑁂 𑀘𑀡𑁆𑀟𑀸𑀮𑀻, 𑀢𑀬𑀸 𑀯𑀻𑀭𑁂𑀦 𑀧𑁂𑀲𑀺𑀢𑀸;

𑀯𑀦𑁆𑀤𑀺𑀁 𑀅𑀭𑀳𑀢𑁄 𑀧𑀸𑀤𑁂, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁦𑁨.

‘‘𑀲𑀸𑀳𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑀸𑀦𑀺, 𑀘𑀼𑀢𑀸 𑀘𑀡𑁆𑀟𑀸𑀮𑀬𑁄𑀦𑀺𑀬𑀸;

𑀯𑀺𑀫𑀸𑀦𑀁 𑀲𑀩𑁆𑀩𑀢𑁄 𑀪𑀤𑁆𑀤𑀁, 𑀉𑀧𑀧𑀦𑁆𑀦𑀫𑁆𑀳𑀺 𑀦𑀦𑁆𑀤𑀦𑁂.

𑁨𑁦𑁩.

‘‘𑀅𑀘𑁆𑀙𑀭𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀧𑀼𑀭𑀓𑁆𑀔𑀢𑁆𑀯𑀸𑀦 𑀢𑀺𑀝𑁆𑀞𑀢𑀺;

𑀢𑀸𑀲𑀸𑀳𑀁 𑀧𑀯𑀭𑀸 𑀲𑁂𑀝𑁆𑀞𑀸, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸.

𑁨𑁦𑁪.

‘‘𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸, 𑀲𑀫𑁆𑀧𑀚𑀸𑀦𑀸 𑀧𑀝𑀺𑀲𑁆𑀲𑀢𑀸;

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀢𑀁 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳.

𑁨𑁦𑁧-𑁪. 𑀢𑀢𑁆𑀣 𑀧𑁂𑀲𑀺𑀢𑀸𑀢𑀺 ‘‘𑀘𑀡𑁆𑀟𑀸𑀮𑀺, 𑀯𑀦𑁆𑀤 𑀧𑀸𑀤𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀦𑁆𑀤𑀦𑀸𑀬 𑀉𑀬𑁆𑀬𑁄𑀚𑀺𑀢𑀸. 𑀬𑀤𑀺𑀧𑀺 𑀢𑀁 𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁 𑀧𑀯𑀢𑁆𑀢𑀺𑀓𑁆𑀔𑀡𑀯𑀲𑁂𑀦 𑀧𑀭𑀺𑀢𑁆𑀢𑀁, 𑀔𑁂𑀢𑁆𑀢𑀫𑀳𑀦𑁆𑀢𑀢𑀸𑀬 𑀧𑀦 𑀨𑀮𑀫𑀳𑀦𑁆𑀢𑀢𑀸𑀬 𑀘 𑀅𑀢𑀺𑀯𑀺𑀬 𑀫𑀳𑀦𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸’’𑀢𑀺. 𑀢𑀣𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀜𑁆𑀜𑀸𑀬 𑀲𑀢𑀺𑀬𑀸 𑀘 𑀯𑀺𑀲𑀤𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑁆𑀧𑀚𑀸𑀦𑀸 𑀧𑀝𑀺𑀲𑁆𑀲𑀢𑀸’’𑀢𑀺. 𑀧𑀼𑀦 𑁋

𑁨𑁦𑁫.

‘‘𑀇𑀤𑀁 𑀯𑀢𑁆𑀯𑀸𑀦 𑀘𑀡𑁆𑀟𑀸𑀮𑀻, 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺𑀦𑀻;

𑀯𑀦𑁆𑀤𑀺𑀢𑁆𑀯𑀸 𑀅𑀭𑀳𑀢𑁄 𑀧𑀸𑀤𑁂, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸’’𑀢𑀺. 𑁋

𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸.

𑁨𑁦𑁫. 𑀢𑀢𑁆𑀣 𑀘𑀡𑁆𑀟𑀸𑀮𑀻𑀢𑀺 𑀘𑀡𑁆𑀟𑀸𑀮𑀻𑀪𑀽𑀢𑀧𑀼𑀩𑁆𑀩𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀤𑁂𑀯𑀮𑁄𑀓𑁂 𑀘 𑀇𑀤𑀫𑀸𑀘𑀺𑀡𑁆𑀡𑀁, 𑀬𑀁 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀭𑀼𑀴𑁆𑀳𑀲𑀫𑀜𑁆𑀜𑀸𑀬 𑀯𑁄𑀳𑀸𑀭𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀆𑀬𑀲𑁆𑀫𑀸 𑀧𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀇𑀫𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀘𑀡𑁆𑀟𑀸𑀮𑀺𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀤𑁆𑀤𑀺𑀢𑁆𑀣𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀦𑀻𑀮𑀸 𑀧𑀻𑀢𑀸 𑀘 𑀓𑀸𑀴𑀸 𑀘𑀸𑀢𑀺 𑀪𑀤𑁆𑀤𑀺𑀢𑁆𑀣𑀺𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀘 𑀲𑀫𑀬𑁂𑀦 𑀓𑀺𑀫𑀺𑀮𑀦𑀕𑀭𑁂 𑀭𑁄𑀳𑀓𑁄 𑀦𑀸𑀫 𑀕𑀳𑀧𑀢𑀺𑀧𑀼𑀢𑁆𑀢𑁄 𑀅𑀳𑁄𑀲𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄. 𑀢𑀲𑁆𑀫𑀺𑀁𑀬𑁂𑀯 𑀘 𑀦𑀕𑀭𑁂 𑀢𑁂𑀦 𑀲𑀫𑀸𑀦𑀫𑀳𑀸𑀪𑁄𑀕𑁂 𑀓𑀼𑀮𑁂 𑀏𑀓𑀸 𑀤𑀸𑀭𑀺𑀓𑀸 𑀅𑀳𑁄𑀲𑀺 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀧𑀓𑀢𑀺𑀬𑀸𑀧𑀺 𑀪𑀤𑁆𑀤𑀢𑀸𑀬 𑀪𑀤𑁆𑀤𑀸𑀢𑀺 𑀦𑀸𑀫𑁂𑀦. 𑀅𑀣 𑀭𑁄𑀳𑀓𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀓𑀼𑀫𑀸𑀭𑀺𑀁 𑀯𑀸𑀭𑁂𑀢𑁆𑀯𑀸 𑀢𑀸𑀤𑀺𑀲𑁂 𑀓𑀸𑀮𑁂 𑀢𑀁 𑀆𑀦𑁂𑀢𑁆𑀯𑀸 𑀆𑀯𑀸𑀳𑀯𑀺𑀯𑀸𑀳𑀁 𑀅𑀓𑀁𑀲𑀼. 𑀢𑁂 𑀉𑀪𑁄𑀧𑀺 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑀺. 𑀲𑀸 𑀅𑀢𑁆𑀢𑀦𑁄 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 ‘‘𑀪𑀤𑁆𑀤𑀺𑀢𑁆𑀣𑀻’’𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸 𑀅𑀳𑁄𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀓𑀺𑀫𑀺𑀮𑀦𑀕𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀭𑁄𑀳𑀓𑁄 𑀢𑁂𑀲𑀁 𑀢𑀢𑁆𑀣 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀧𑀭𑀺𑀯𑀸𑀭𑁂 𑀢𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀧𑀼𑀢𑁆𑀢𑀤𑀸𑀭𑁄 𑀢𑁂𑀳𑀺 𑀤𑁂𑀲𑀺𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀲𑀭𑀡𑀸𑀦𑀺 𑀕𑀡𑁆𑀳𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀅𑀝𑁆𑀞𑀫𑀻𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑁂𑀲𑀼 𑀉𑀧𑁄𑀲𑀣𑀁 𑀉𑀧𑀯𑀲𑀺, 𑀯𑀺𑀲𑁂𑀲𑀢𑁄 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀅𑀳𑁄𑀲𑀺 𑀤𑁂𑀯𑀢𑀸𑀳𑀺 𑀘 𑀅𑀦𑀼𑀓𑀫𑁆𑀧𑀺𑀢𑀸. 𑀢𑀸𑀬 𑀏𑀯 𑀘 𑀤𑁂𑀯𑀢𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀢𑀺𑀢𑀁 𑀫𑀺𑀘𑁆𑀙𑀸𑀧𑀯𑀸𑀤𑀁 𑀦𑀺𑀭𑀁𑀓𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀢𑀸𑀬 𑀅𑀢𑀺𑀯𑀺𑀬 𑀮𑁄𑀓𑁂 𑀧𑀢𑁆𑀣𑀝𑀬𑀲𑀸 𑀅𑀳𑁄𑀲𑀺.

𑀲𑀸 𑀳𑀺 𑀲𑀬𑀁 𑀓𑀺𑀫𑀺𑀮𑀦𑀕𑀭𑁂 𑀞𑀺𑀢𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀯𑀡𑀺𑀚𑁆𑀚𑀸𑀯𑀲𑁂𑀦 𑀢𑀓𑁆𑀓𑀲𑀺𑀮𑀸𑀬𑀁 𑀯𑀲𑀦𑁆𑀢𑀲𑁆𑀲, 𑀉𑀲𑁆𑀲𑀯𑀤𑀺𑀯𑀲𑁂 𑀲𑀳𑀸𑀬𑁂𑀳𑀺 𑀉𑀲𑁆𑀲𑀸𑀳𑀺𑀢𑀲𑁆𑀲 𑀦𑀓𑁆𑀔𑀢𑁆𑀢𑀓𑀻𑀴𑀸𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀖𑀭𑀤𑁂𑀯𑀢𑀸𑀬 𑀅𑀢𑁆𑀢𑀦𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 𑀲𑀸𑀫𑀺𑀓𑁂𑀦 𑀲𑀳 𑀬𑁄𑀚𑀺𑀢𑀸 𑀢𑁂𑀦𑁂𑀯 𑀲𑀫𑀸𑀕𑀫𑁂𑀦 𑀧𑀢𑀺𑀝𑁆𑀞𑀺𑀢𑀕𑀩𑁆𑀪𑀸 𑀳𑀼𑀢𑁆𑀯𑀸 𑀤𑁂𑀯𑀢𑀸𑀬 𑀓𑀺𑀫𑀺𑀮𑀦𑀕𑀭𑀁 𑀧𑀝𑀺𑀦𑀻𑀢𑀸, 𑀅𑀦𑀼𑀓𑁆𑀓𑀫𑁂𑀦 𑀕𑀩𑁆𑀪𑀺𑀦𑀺𑀪𑀸𑀯𑁂 𑀧𑀸𑀓𑀝𑁂 𑀚𑀸𑀢𑁂 𑀲𑀲𑁆𑀲𑀼𑀆𑀤𑀻𑀳𑀺 ‘‘𑀅𑀢𑀺𑀘𑀸𑀭𑀺𑀦𑀻’’𑀢𑀺 𑀆𑀲𑀗𑁆𑀓𑀺𑀢𑀸, 𑀢𑀸𑀬 𑀏𑀯 𑀤𑁂𑀯𑀢𑀸𑀬 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀕𑀗𑁆𑀕𑀸𑀫𑀳𑁄𑀖𑁂 𑀓𑀺𑀫𑀺𑀮𑀦𑀕𑀭𑀁 𑀑𑀢𑁆𑀣𑀭𑀦𑁆𑀢𑁂 𑀯𑀺𑀬 𑀉𑀧𑀝𑁆𑀞𑀸𑀧𑀺𑀢𑁂 𑀅𑀢𑁆𑀢𑀦𑁄 𑀧𑀢𑀺𑀩𑁆𑀩𑀢𑀸𑀪𑀸𑀯𑀲𑀁𑀲𑀽𑀘𑀓𑁂𑀦 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀼𑀩𑁆𑀩𑀓𑁂𑀦 𑀲𑀧𑀣𑁂𑀦 𑀯𑀸𑀢𑀯𑁂𑀕𑀲𑀫𑀼𑀝𑁆𑀞𑀺𑀢𑀯𑀻𑀘𑀺𑀚𑀸𑀮𑀁 𑀕𑀗𑁆𑀕𑀸𑀫𑀳𑁄𑀖𑀁 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀧𑀢𑀺𑀢𑀁 𑀆𑀬𑀲𑁆𑀲𑀜𑁆𑀘 𑀦𑀺𑀯𑀢𑁆𑀢𑁂𑀢𑁆𑀯𑀸, 𑀲𑀸𑀫𑀺𑀓𑁂𑀦 𑀲𑀫𑀸𑀕𑀢𑀸𑀧𑀺 𑀢𑁂𑀦 𑀧𑀼𑀩𑁆𑀩𑁂 𑀲𑀲𑁆𑀲𑀼𑀆𑀤𑀻𑀳𑀺 𑀯𑀺𑀬 𑀆𑀲𑀗𑁆𑀓𑀺𑀢𑀸 𑀢𑀓𑁆𑀓𑀲𑀺𑀮𑀸𑀬𑀁 𑀢𑁂𑀦 𑀤𑀺𑀦𑁆𑀦𑀁 𑀦𑀸𑀫𑀫𑀼𑀤𑁆𑀤𑀺𑀢𑀁 𑀲𑀜𑁆𑀜𑀸𑀡𑀜𑁆𑀘 𑀅𑀧𑁆𑀧𑁂𑀦𑁆𑀢𑀻, 𑀢𑀁 𑀆𑀲𑀗𑁆𑀓𑀁 𑀦𑀺𑀭𑀁𑀓𑀢𑁆𑀯𑀸 𑀪𑀢𑁆𑀢𑀼𑀦𑁄 𑀜𑀸𑀢𑀺𑀚𑀦𑀲𑁆𑀲 𑀘 𑀫𑀳𑀸𑀚𑀦𑀲𑁆𑀲 𑀘 𑀲𑀫𑁆𑀪𑀸𑀯𑀦𑀻𑀬𑀸 𑀚𑀸𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀢𑀸𑀬 𑀅𑀢𑀺𑀯𑀺𑀬 𑀮𑁄𑀓𑁂 𑀧𑀢𑁆𑀣𑀝𑀬𑀲𑀸 𑀅𑀳𑁄𑀲𑀻’’𑀢𑀺.

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀦𑁆𑀦𑀸. 𑀅𑀣 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑁂, 𑀤𑁂𑀯𑀧𑀭𑀺𑀲𑀸𑀬 𑀘 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸𑀬 𑀪𑀤𑁆𑀤𑀺𑀢𑁆𑀣𑀻𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑀸𑀬 𑀤𑁂𑀯𑀩𑁆𑀭𑀳𑁆𑀫𑀧𑀭𑀺𑀲𑀸𑀬 𑀫𑀚𑁆𑀛𑁂 𑀢𑀸𑀬 𑀤𑁂𑀯𑀢𑀸𑀬 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

𑁨𑁦𑁬.

‘‘𑀦𑀻𑀮𑀸 𑀧𑀻𑀢𑀸 𑀘 𑀓𑀸𑀴𑀸 𑀘, 𑀫𑀜𑁆𑀚𑀺𑀝𑁆𑀞𑀸 𑀅𑀣 𑀮𑁄𑀳𑀺𑀢𑀸;

𑀉𑀘𑁆𑀘𑀸𑀯𑀘𑀸𑀦𑀁 𑀯𑀡𑁆𑀡𑀸𑀦𑀁, 𑀓𑀺𑀜𑁆𑀚𑀓𑁆𑀔𑀧𑀭𑀺𑀯𑀸𑀭𑀺𑀢𑀸.

𑁨𑁦𑁭.

‘‘𑀫𑀦𑁆𑀤𑀸𑀭𑀯𑀸𑀦𑀁 𑀧𑀼𑀧𑁆𑀨𑀸𑀦𑀁, 𑀫𑀸𑀮𑀁 𑀥𑀸𑀭𑁂𑀲𑀺 𑀫𑀼𑀤𑁆𑀥𑀦𑀺;

𑀦𑀬𑀺𑀫𑁂 𑀅𑀜𑁆𑀜𑁂𑀲𑀼 𑀓𑀸𑀬𑁂𑀲, 𑀭𑀼𑀓𑁆𑀔𑀸 𑀲𑀦𑁆𑀢𑀺 𑀲𑀼𑀫𑁂𑀥𑀲𑁂.

𑁨𑁦𑁮.

‘‘𑀓𑁂𑀦 𑀓𑀸𑀬𑀁 𑀉𑀧𑀧𑀦𑁆𑀦𑀸, 𑀢𑀸𑀯𑀢𑀺𑀁𑀲𑀁 𑀬𑀲𑀲𑁆𑀲𑀺𑀦𑀻;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋 𑀆𑀳;

𑁨𑁦𑁬-𑁭. 𑀢𑀢𑁆𑀣 𑀦𑀻𑀮𑀸 𑀧𑀻𑀢𑀸 𑀘 𑀓𑀸𑀴𑀸 𑀘, 𑀫𑀜𑁆𑀚𑀺𑀝𑁆𑀞𑀸 𑀅𑀣 𑀮𑁄𑀳𑀺𑀢𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑁄, 𑀲𑁄 𑀦𑀻𑀮𑀸 𑀘 𑀧𑀻𑀢𑀸 𑀘𑀸𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀅𑀣𑀸𑀢𑀺 𑀅𑀜𑁆𑀜𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀑𑀤𑀸𑀢𑀸𑀤𑀺𑀓𑁂 𑀅𑀯𑀼𑀢𑁆𑀢𑀯𑀡𑁆𑀡𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀘-𑀲𑀤𑁆𑀤𑁄 𑀯𑀸 𑀅𑀯𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑁄. 𑀅𑀣𑀸𑀢𑀺 𑀇𑀢𑀺-𑀲𑀤𑁆𑀤𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀘𑁆𑀘𑀸𑀯𑀘𑀸𑀦𑀁 𑀯𑀡𑁆𑀡𑀸𑀦𑀦𑁆𑀢𑀺 𑀏𑀢𑁆𑀣 𑀉𑀘𑁆𑀘𑀸𑀯𑀘𑀸𑀦𑀦𑁆𑀢𑀺 𑀯𑀺𑀪𑀢𑁆𑀢𑀺𑀬𑀸 𑀅𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀉𑀘𑁆𑀘𑀸𑀯𑀘𑀯𑀡𑁆𑀡𑀸𑀦𑀁 𑀦𑀸𑀦𑀸𑀯𑀺𑀥𑀯𑀡𑁆𑀡𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀡𑁆𑀡𑀸𑀦𑀦𑁆𑀢𑀺 𑀯𑀸 𑀯𑀡𑁆𑀡𑀯𑀦𑁆𑀢𑀸𑀦𑀁. 𑀓𑀺𑀜𑁆𑀚𑀓𑁆𑀔𑀧𑀭𑀺𑀯𑀸𑀭𑀺𑀢𑀸𑀢𑀺 𑀓𑀺𑀜𑁆𑀚𑀓𑁆𑀔𑁂𑀳𑀺 𑀧𑀭𑀺𑀯𑀸𑀭𑀺𑀢𑀸𑀦𑀁. 𑀲𑀸𑀫𑀺𑀅𑀢𑁆𑀣𑁂 𑀳𑀺 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑀻𑀮𑀸 𑀘 𑀧𑀻𑀢𑀸 𑀘 𑀓𑀸𑀴𑀸 𑀘 𑀫𑀜𑁆𑀚𑀺𑀝𑁆𑀞𑀸 𑀘 𑀮𑁄𑀳𑀺𑀢𑀸 𑀘 𑀅𑀣 𑀅𑀜𑁆𑀜𑁂 𑀑𑀤𑀸𑀢𑀸𑀤𑀬𑁄 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀉𑀘𑁆𑀘𑀸𑀯𑀘𑀯𑀡𑁆𑀡𑀸𑀦𑀁 𑀢𑀣𑀸𑀪𑀽𑀢𑁂𑀳𑀺𑀬𑁂𑀯 𑀓𑀺𑀜𑁆𑀚𑀓𑁆𑀔𑁂𑀳𑀺 𑀓𑁂𑀲𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑀸𑀦𑀁 𑀯𑀺𑀘𑀺𑀢𑁆𑀢𑀲𑀡𑁆𑀞𑀸𑀦𑀸𑀤𑀺𑀢𑀸𑀬 𑀯𑀸 𑀉𑀘𑁆𑀘𑀸𑀯𑀘𑀸𑀦𑀁 𑀬𑀣𑀸𑀯𑀼𑀢𑁆𑀢𑀯𑀡𑁆𑀡𑀯𑀦𑁆𑀢𑀸𑀦𑀁 𑀫𑀦𑁆𑀤𑀸𑀭𑀯𑀭𑀼𑀓𑁆𑀔𑀲𑀫𑁆𑀪𑀽𑀢𑀢𑀸𑀬 𑀫𑀦𑁆𑀤𑀸𑀭𑀯𑀸𑀦𑀁 𑀧𑀼𑀧𑁆𑀨𑀸𑀦𑀁 𑀫𑀸𑀮𑀁 𑀢𑁂𑀳𑀺 𑀓𑀢𑀁 𑀫𑀸𑀮𑀸𑀕𑀼𑀡𑀁 𑀢𑁆𑀯𑀁 𑀤𑁂𑀯𑀢𑁂 𑀅𑀢𑁆𑀢𑀦𑁄 𑀲𑀻𑀲𑁂 𑀥𑀸𑀭𑁂𑀲𑀺 𑀧𑀺𑀴𑀦𑁆𑀥𑀲𑀻𑀢𑀺.

𑀬𑀢𑁄 𑀭𑀼𑀓𑁆𑀔𑀢𑁄 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀢𑁂𑀲𑀁 𑀯𑀺𑀲𑁂𑀲𑀯𑀡𑁆𑀡𑀢𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀬𑀺𑀫𑁂 𑀅𑀜𑁆𑀜𑁂𑀲𑀼 𑀓𑀸𑀬𑁂𑀲𑀼, 𑀭𑀼𑀓𑁆𑀔𑀸 𑀲𑀦𑁆𑀢𑀺 𑀲𑀼𑀫𑁂𑀥𑀲𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑁂𑀢𑀺 𑀬𑀣𑀸𑀯𑀼𑀢𑁆𑀢𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀬𑀼𑀢𑁆𑀢𑀸 𑀧𑀼𑀧𑁆𑀨𑀯𑀦𑁆𑀢𑁄 𑀭𑀼𑀓𑁆𑀔𑀸 𑀦 𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀬𑁂𑀲𑀽𑀢𑀺 𑀤𑁂𑀯𑀦𑀺𑀓𑀸𑀬𑁂𑀲𑀼. 𑀲𑀼𑀫𑁂𑀥𑀲𑁂𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁂.

𑀢𑀢𑁆𑀣 𑀦𑀻𑀮𑀸𑀢𑀺 𑀇𑀦𑁆𑀤𑀦𑀻𑀮𑀫𑀳𑀸𑀦𑀻𑀮𑀸𑀤𑀺𑀫𑀡𑀺𑀭𑀢𑀦𑀸𑀦𑀁 𑀯𑀲𑁂𑀦 𑀦𑀻𑀮𑁄𑀪𑀸𑀲𑀸. 𑀧𑀻𑀢𑀸𑀢𑀺 𑀧𑀼𑀧𑁆𑀨𑀭𑀸𑀕𑀓𑀓𑁆𑀓𑁂𑀢𑀦𑀧𑀼𑀮𑀓𑀸𑀤𑀺𑀫𑀡𑀺𑀭𑀢𑀦𑀸𑀦𑀜𑁆𑀘𑁂𑀯 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀲𑁆𑀲 𑀘 𑀯𑀲𑁂𑀦 𑀧𑀻𑀢𑁄𑀪𑀸𑀲𑀸. 𑀓𑀸𑀴𑀸𑀢𑀺 𑀅𑀲𑁆𑀫𑀓𑀉𑀧𑀮𑀓𑀸𑀤𑀺𑀫𑀡𑀺𑀭𑀢𑀦𑀸𑀦𑀁 𑀯𑀲𑁂𑀦 𑀓𑀡𑁆𑀳𑁄𑀪𑀸𑀲𑀸. 𑀫𑀜𑁆𑀚𑀺𑀝𑁆𑀞𑀸𑀢𑀺 𑀚𑁄𑀢𑀺𑀭𑀲𑀕𑁄𑀫𑀼𑀢𑁆𑀢𑀓𑀕𑁄𑀫𑁂𑀤𑀓𑀸𑀤𑀺𑀫𑀡𑀺𑀭𑀢𑀦𑀸𑀦𑀁 𑀯𑀲𑁂𑀦 𑀫𑀜𑁆𑀚𑀺𑀝𑁆𑀞𑁄𑀪𑀸𑀲𑀸. 𑀮𑁄𑀳𑀺𑀢𑀸𑀢𑀺 𑀧𑀤𑀼𑀫𑀭𑀸𑀕𑀮𑁄𑀳𑀺𑀢𑀗𑁆𑀓𑀧𑀯𑀸𑀴𑀭𑀢𑀦𑀸𑀤𑀻𑀦𑀁 𑀯𑀲𑁂𑀦 𑀮𑁄𑀳𑀺𑀢𑁄𑀪𑀸𑀲𑀸. 𑀓𑁂𑀘𑀺 𑀧𑀦 𑀦𑀻𑀮𑀸𑀤𑀺𑀧𑀤𑀸𑀦𑀺 ‘‘𑀭𑀼𑀓𑁆𑀔𑀸’’𑀢𑀺 𑀇𑀫𑀺𑀦𑀸 ‘‘𑀦𑀻𑀮𑀸 𑀭𑀼𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀼𑀓𑁆𑀔𑀸𑀧𑀺 𑀳𑀺 𑀦𑀻𑀮𑀸𑀤𑀺𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑀢𑁆𑀢𑀸 𑀦𑀻𑀮𑀸𑀤𑀺𑀬𑁄𑀕𑀢𑁄 𑀦𑀻𑀮𑀸𑀤𑀺𑀯𑁄𑀳𑀸𑀭𑀁 𑀮𑀪𑀦𑁆𑀢𑀻𑀢𑀺 𑀢𑁂𑀳𑀺 ‘‘𑀦𑀻𑀮𑀸…𑀧𑁂… 𑀮𑁄𑀳𑀺𑀢𑀸…𑀧𑁂… 𑀦𑀬𑀺𑀫𑁂 𑀅𑀜𑁆𑀜𑁂𑀲𑀼 𑀓𑀸𑀬𑁂𑀲𑀼 𑀭𑀼𑀓𑁆𑀔𑀸 𑀲𑀦𑁆𑀢𑀺 𑀲𑀼𑀫𑁂𑀥𑀲𑁂𑀢𑀺, 𑀬𑀢𑁄 𑀢𑁆𑀯𑀁 𑀉𑀘𑁆𑀘𑀸𑀯𑀘𑀸𑀦𑀁 𑀯𑀡𑁆𑀡𑀸𑀦𑀁 𑀓𑀺𑀜𑁆𑀚𑀓𑁆𑀔𑀧𑀭𑀺𑀯𑀸𑀭𑀺𑀢𑀸𑀦𑀁 𑀫𑀦𑁆𑀤𑀸𑀭𑀯𑀸𑀦𑀁 𑀧𑀼𑀧𑁆𑀨𑀸𑀦𑀁 𑀫𑀸𑀮𑀁 𑀥𑀸𑀭𑁂𑀲𑀻’’𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁆𑀣 𑀬𑀣𑀸𑀤𑀺𑀝𑁆𑀞𑁂 𑀯𑀡𑁆𑀡𑀯𑀺𑀲𑁂𑀲𑀬𑀼𑀢𑁆𑀢𑁂 𑀧𑀼𑀧𑁆𑀨𑁂 𑀓𑀺𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑁂𑀦 𑀭𑀼𑀓𑁆𑀔𑀸𑀦𑀁 𑀆𑀯𑁂𑀦𑀺𑀓𑀪𑀸𑀯𑀤𑀲𑁆𑀲𑀦𑀁 𑀧𑀞𑀫𑀦𑀬𑁄, 𑀭𑀼𑀓𑁆𑀔𑀸𑀦𑀁 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑁂𑀦 𑀧𑀼𑀧𑁆𑀨𑀸𑀦𑀁 𑀆𑀯𑁂𑀦𑀺𑀓𑀪𑀸𑀯𑀤𑀲𑁆𑀲𑀦𑀁 𑀤𑀼𑀢𑀺𑀬𑀦𑀬𑁄. 𑀧𑀞𑀫𑀦𑀬𑁂 𑀯𑀡𑁆𑀡𑀸𑀤𑀬𑁄 𑀲𑀭𑀽𑀧𑁂𑀦 𑀕𑀳𑀺𑀢𑀸, 𑀤𑀼𑀢𑀺𑀬𑀦𑀬𑁂 𑀦𑀺𑀲𑁆𑀲𑀬𑀫𑀼𑀔𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁨𑁦𑁮. 𑀓𑁂𑀦𑀸𑀢𑀺 𑀓𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀓𑀸𑀬𑀁 𑀢𑀸𑀯𑀢𑀺𑀁𑀲𑀦𑁆𑀢𑀺 𑀬𑁄𑀚𑀦𑀸. 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔𑀸𑀢𑀺 𑀧𑀼𑀘𑁆𑀙𑀺𑀢𑀸 𑀢𑁆𑀯𑀁 𑀆𑀘𑀺𑀓𑁆𑀔 𑀓𑀣𑁂𑀳𑀺.

𑀏𑀯𑀁 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁨𑁦𑁯.

‘‘𑀪𑀤𑁆𑀤𑀺𑀢𑁆𑀣𑀺𑀓𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼, 𑀓𑀺𑀫𑀺𑀮𑀸𑀬𑀁 𑀉𑀧𑀸𑀲𑀺𑀓𑀸;

𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀁𑀯𑀺𑀪𑀸𑀕𑀭𑀢𑀸 𑀲𑀤𑀸.

𑁨𑁧𑁦.

‘‘𑀅𑀘𑁆𑀙𑀸𑀤𑀦𑀜𑁆𑀘 𑀪𑀢𑁆𑀢𑀜𑁆𑀘, 𑀲𑁂𑀦𑀸𑀲𑀦𑀁 𑀧𑀤𑀻𑀧𑀺𑀬𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁧𑁧.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁨𑁧𑁨.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁨𑁧𑁩.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁨𑁧𑁪.

‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀻;

𑀓𑀢𑀸𑀯𑀸𑀲𑀸 𑀓𑀢𑀓𑀼𑀲𑀮𑀸 𑀢𑀢𑁄 𑀘𑀼𑀢𑀸, 𑀲𑀬𑀁𑀧𑀪𑀸 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦𑀁.

𑁨𑁧𑁫.

‘‘𑀪𑀺𑀓𑁆𑀔𑀽 𑀘𑀸𑀳𑀁 𑀧𑀭𑀫𑀳𑀺𑀢𑀸𑀦𑀼𑀓𑀫𑁆𑀧𑀓𑁂, 𑀅𑀪𑁄𑀚𑀬𑀺𑀁 𑀢𑀧𑀲𑁆𑀲𑀺𑀬𑀼𑀕𑀁 𑀫𑀳𑀸𑀫𑀼𑀦𑀺𑀁;

𑀓𑀢𑀸𑀯𑀸𑀲𑀸 𑀓𑀢𑀓𑀼𑀲𑀮𑀸 𑀢𑀢𑁄 𑀘𑀼𑀢𑀸, 𑀲𑀬𑀁𑀧𑀪𑀸 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦𑀁.

𑁨𑁧𑁬.

‘‘𑀅𑀝𑁆𑀞𑀗𑁆𑀕𑀺𑀓𑀁 𑀅𑀧𑀭𑀺𑀫𑀺𑀢𑀁 𑀲𑀼𑀔𑀸𑀯𑀳𑀁, 𑀉𑀧𑁄𑀲𑀣𑀁 𑀲𑀢𑀢𑀫𑀼𑀧𑀸𑀯𑀲𑀺𑀁 𑀅𑀳𑀁;

𑀓𑀢𑀸𑀯𑀸𑀲𑀸 𑀓𑀢𑀓𑀼𑀲𑀮𑀸 𑀢𑀢𑁄 𑀘𑀼𑀢𑀸, 𑀲𑀬𑀁𑀧𑀪𑀸 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦’’𑀦𑁆𑀢𑀺.

𑁨𑁦𑁯-𑁨𑁧𑁪. 𑀢𑀢𑁆𑀣 𑀪𑀤𑁆𑀤𑀺𑀢𑁆𑀣𑀺𑀓𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼, 𑀓𑀺𑀫𑀺𑀮𑀸𑀬𑀁 𑀉𑀧𑀸𑀲𑀺𑀓𑀸𑀢𑀺 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀓𑀺𑀭𑀺𑀬𑀸𑀬 𑀉𑀩𑁆𑀩𑀢𑁆𑀢𑀫𑀸𑀦𑀫𑀳𑁄𑀖𑀦𑀺𑀯𑀢𑁆𑀢𑀦𑁂𑀦 𑀅𑀔𑀡𑁆𑀟𑀲𑀻𑀮𑀸𑀢𑀺 𑀲𑀜𑁆𑀚𑀸𑀢𑀦𑀺𑀘𑁆𑀙𑀬𑀸 𑀪𑀤𑁆𑀤𑀸 𑀲𑀼𑀦𑁆𑀤𑀭𑀸 𑀅𑀬𑀁 𑀇𑀢𑁆𑀣𑀻, 𑀢𑀲𑁆𑀫𑀸 ‘‘𑀪𑀤𑁆𑀤𑀺𑀢𑁆𑀣𑀺𑀓𑀸 𑀉𑀧𑀸𑀲𑀺𑀓𑀸’’𑀢𑀺 𑀘 𑀫𑀁 𑀓𑀺𑀫𑀺𑀮𑀦𑀕𑀭𑀯𑀸𑀲𑀺𑀦𑁄 𑀚𑀸𑀦𑀺𑀁𑀲𑀼. 𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀧𑀺𑀘 ‘‘𑀲𑀤𑁆𑀥𑀸’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀸𑀥𑀦𑀁, ‘‘𑀲𑀁𑀯𑀺𑀪𑀸𑀕𑀭𑀢𑀸, 𑀅𑀘𑁆𑀙𑀸𑀤𑀦𑀜𑁆𑀘 𑀪𑀢𑁆𑀢𑀜𑁆𑀘, 𑀲𑁂𑀦𑀸𑀲𑀦𑀁 𑀧𑀤𑀻𑀧𑀺𑀬𑀁. 𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸’’𑀢𑀺 𑀇𑀫𑀺𑀦𑀸 𑀘𑀸𑀕𑀥𑀦𑀁, ‘‘𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀘𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁…𑀧𑁂… 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸’’𑀢𑀺 𑀇𑀫𑀺𑀦𑀸 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀜𑁆𑀘, ‘‘𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸’’𑀢𑀺 𑀇𑀫𑀺𑀦𑀸 𑀲𑀼𑀢𑀥𑀦𑀁 𑀧𑀜𑁆𑀜𑀸𑀥𑀦𑀜𑁆𑀘 𑀤𑀲𑁆𑀲𑀺𑀢𑀦𑁆𑀢𑀺 𑀲𑀸 𑀅𑀢𑁆𑀢𑀦𑁄 𑀲𑀢𑁆𑀢𑀯𑀺𑀥𑀅𑀭𑀺𑀬𑀥𑀦𑀧𑀝𑀺𑀮𑀸𑀪𑀁. ‘‘𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄…𑀧𑁂… 𑀅𑀦𑀼𑀯𑀺𑀘𑀭𑀸𑀫𑀺 𑀦𑀦𑁆𑀤𑀦’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀦𑀺𑀲𑀁𑀲𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀓𑀢𑀸𑀯𑀸𑀲𑀸𑀢𑀺 𑀦𑀺𑀧𑁆𑀨𑀸𑀤𑀺𑀢𑀲𑀼𑀘𑀭𑀺𑀢𑀸𑀯𑀸𑀲𑀸. 𑀲𑀼𑀘𑀭𑀺𑀢𑀓𑀫𑁆𑀫𑀜𑁆𑀳𑀺 𑀢𑀤𑀢𑁆𑀢𑁂 𑀆𑀬𑀢𑀺𑀜𑁆𑀘 𑀲𑀼𑀔𑀸𑀯𑀸𑀲𑀳𑁂𑀢𑀼𑀢𑀸𑀬 ‘‘𑀲𑀼𑀔𑀯𑀺𑀳𑀸𑀭𑀲𑁆𑀲 𑀆𑀯𑀸𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀓𑀢𑀓𑀼𑀲𑀮𑀸’’𑀢𑀺.

𑁨𑁧𑁫. 𑀧𑀼𑀩𑁆𑀩𑁂 𑀅𑀦𑀸𑀫𑀲𑀺𑀢𑀔𑁂𑀢𑁆𑀢𑀯𑀺𑀲𑁂𑀲𑀁 𑀅𑀢𑁆𑀢𑀦𑁄 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀆𑀬𑀢𑀦𑀕𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀽 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀺𑀓𑁆𑀔𑀽𑀢𑀺 𑀅𑀦𑀯𑀲𑁂𑀲𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀬 𑀪𑀺𑀓𑁆𑀔𑀽. 𑀧𑀭𑀫𑀳𑀺𑀢𑀸𑀦𑀼𑀓𑀫𑁆𑀧𑀓𑁂𑀢𑀺 𑀧𑀭𑀫𑀁 𑀅𑀢𑀺𑀯𑀺𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀦𑀸 𑀳𑀺𑀢𑁂𑀦 𑀅𑀦𑀼𑀕𑁆𑀕𑀸𑀳𑀓𑁂. 𑀅𑀪𑁄𑀚𑀬𑀺𑀦𑁆𑀢𑀺 𑀧𑀡𑀻𑀢𑁂𑀦 𑀪𑁄𑀚𑀦𑁂𑀦 𑀪𑁄𑀚𑁂𑀲𑀺𑀁. 𑀢𑀧𑀲𑁆𑀲𑀺𑀬𑀼𑀕𑀦𑁆𑀢𑀺 𑀉𑀢𑁆𑀢𑀫𑁂𑀦 𑀢𑀧𑀲𑀸 𑀲𑀩𑁆𑀩𑀓𑀺𑀮𑁂𑀲𑀫𑀮𑀁 𑀢𑀸𑀧𑁂𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀢𑀧𑀲𑁆𑀲𑀺𑀪𑀽𑀢𑀁 𑀬𑀼𑀕𑀁. 𑀫𑀳𑀸𑀫𑀼𑀦𑀺𑀦𑁆𑀢𑀺 𑀢𑀢𑁄 𑀏𑀯 𑀫𑀳𑀸𑀇𑀲𑀺𑀪𑀽𑀢𑀁, 𑀫𑀳𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀺𑀲𑀬𑀲𑁆𑀲 𑀫𑀳𑀦𑁆𑀢𑁂𑀦𑁂𑀯 𑀜𑀸𑀡𑁂𑀦 𑀫𑀼𑀦𑀦𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄 𑀫𑀳𑀸𑀫𑀼𑀦𑀺𑀁. 𑀲𑀩𑁆𑀩𑀫𑁂𑀢𑀁 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺.

𑁨𑁧𑁬. 𑀅𑀧𑀭𑀺𑀫𑀺𑀢𑀁 𑀲𑀼𑀔𑀸𑀯𑀳𑀦𑁆𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁 𑀬𑀸𑀯 𑀲𑀼𑀔𑀸 𑀲𑀕𑁆𑀕𑀸’’𑀢𑀺 (𑀫. 𑀦𑀺. 𑁩.𑁨𑁫𑁫) 𑀯𑀘𑀦𑀢𑁄 𑀪𑀕𑀯𑀢𑁄𑀧𑀺 𑀯𑀘𑀦𑀧𑀣𑀸𑀢𑀻𑀢𑀧𑀭𑀺𑀫𑀸𑀡𑀭𑀳𑀺𑀢𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁 𑀅𑀢𑁆𑀢𑀦𑁄 𑀯𑀸 𑀆𑀦𑀼𑀪𑀸𑀯𑁂𑀦 𑀅𑀧𑀭𑀺𑀫𑀺𑀢𑀲𑀼𑀔𑀸𑀯𑀳𑀁 𑀲𑀼𑀔𑀲𑁆𑀲 𑀆𑀯𑀳𑀦𑀓𑀁. 𑀲𑀢𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁. 𑀢𑀁 𑀢𑀁 𑀉𑀧𑁄𑀲𑀣𑀭𑀓𑁆𑀔𑀡𑀤𑀺𑀯𑀲𑀁 𑀅𑀳𑀸𑀧𑁂𑀢𑁆𑀯𑀸, 𑀢𑀁 𑀢𑀁 𑀯𑀸 𑀉𑀧𑁄𑀲𑀣𑀭𑀓𑁆𑀔𑀡𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀲𑀢𑀢𑀁 𑀯𑀸 𑀲𑀩𑁆𑀩𑀓𑀸𑀮𑀁 𑀲𑀼𑀔𑀸𑀯𑀳𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣 𑀪𑀕𑀯𑀸 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀧𑁆𑀧𑀫𑀼𑀔𑀸𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀯𑀸𑀲𑀻𑀦𑀁 𑀤𑁂𑀯𑀩𑁆𑀭𑀳𑁆𑀫𑀲𑀗𑁆𑀖𑀸𑀦𑀁 𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀤𑁆𑀤𑀺𑀢𑁆𑀣𑀺𑀯𑀺𑀫𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀪𑀤𑁆𑀤𑀺𑀢𑁆𑀣𑀺𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁄𑀡𑀤𑀺𑀦𑁆𑀦𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀲𑁄𑀡𑀤𑀺𑀦𑁆𑀦𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀦𑀸𑀴𑀦𑁆𑀤𑀸𑀬𑀁 𑀲𑁄𑀡𑀤𑀺𑀦𑁆𑀦𑀸 𑀦𑀸𑀫 𑀏𑀓𑀸 𑀉𑀧𑀸𑀲𑀺𑀓𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀪𑀺𑀓𑁆𑀔𑀽𑀦𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀻 𑀲𑀼𑀯𑀺𑀲𑀼𑀤𑁆𑀥𑀦𑀺𑀘𑁆𑀘𑀲𑀻𑀮𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀫𑁆𑀧𑀺 𑀉𑀧𑀯𑀲𑀢𑀺. 𑀲𑀸 𑀥𑀫𑁆𑀫𑀲𑀯𑀦𑀲𑀧𑁆𑀧𑀸𑀬𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀩𑁆𑀭𑀽𑀳𑀦𑁆𑀢𑀻 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀅𑀣 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋

𑁨𑁧𑁭.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁨𑁧𑁮.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁨𑁧𑁯.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀇𑀫𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺.

𑁨𑁨𑁦.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁨𑁨𑁧-𑁨𑁨𑁬.

‘‘𑀲𑁄𑀡𑀤𑀺𑀦𑁆𑀦𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼…𑀧𑁂… 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁨𑁭.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀤𑁂𑀯𑀢𑀸 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀲𑁄𑀡𑀤𑀺𑀦𑁆𑀦𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭.𑀉𑀧𑁄𑀲𑀣𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀉𑀧𑁄𑀲𑀣𑀸𑀯𑀺𑀫𑀸𑀦𑀁. 𑀇𑀥 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀲𑀸𑀓𑁂𑀢𑁂 𑀉𑀧𑁄𑀲𑀣𑀸 𑀦𑀸𑀫 𑀏𑀓𑀸 𑀉𑀧𑀸𑀲𑀺𑀓𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑀲𑀤𑀺𑀲𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁨𑁯-𑁨𑁩𑁧.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁩𑁨.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁨𑁩𑁩-𑁨𑁩𑁮.

‘‘𑀉𑀧𑁄𑀲𑀣𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼, 𑀲𑀸𑀓𑁂𑀢𑀸𑀬𑀁 𑀉𑀧𑀸𑀲𑀺𑀓𑀸…𑀧𑁂…

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁩𑁯.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀤𑁂𑀯𑀢𑀸 𑀩𑁆𑀬𑀸𑀓𑀸𑀲𑀺. 𑀧𑀼𑀦 𑀅𑀢𑁆𑀢𑀦𑁄 𑀏𑀓𑀁 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑀻 𑁋

𑁨𑁪𑁧.

‘‘𑀅𑀪𑀺𑀓𑁆𑀔𑀡𑀁 𑀦𑀦𑁆𑀤𑀦𑀁 𑀲𑀼𑀢𑁆𑀯𑀸, 𑀙𑀦𑁆𑀤𑁄 𑀫𑁂 𑀉𑀤𑀧𑀚𑁆𑀚𑀣;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑀸𑀬, 𑀉𑀧𑀧𑀦𑁆𑀦𑀸𑀫𑁆𑀳𑀺 𑀦𑀦𑁆𑀤𑀦𑀁.

𑁨𑁪𑁨.

‘‘𑀦𑀸𑀓𑀸𑀲𑀺𑀁 𑀲𑀢𑁆𑀣𑀼 𑀯𑀘𑀦𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀳𑀻𑀦𑁂 𑀘𑀺𑀢𑁆𑀢𑀁 𑀧𑀡𑀺𑀥𑀸𑀬, 𑀲𑀸𑀫𑁆𑀳𑀺 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑁨𑁩𑁩. 𑀢𑀢𑁆𑀣 𑀉𑀧𑁄𑀲𑀣𑀸𑀢𑀺 𑀫𑀁 𑀅𑀜𑁆𑀜𑀁𑀲𑀽𑀢𑀺 ‘‘𑀉𑀧𑁄𑀲𑀣𑀸’’𑀢𑀺 𑀇𑀫𑀺𑀦𑀸 𑀦𑀸𑀫𑁂𑀦 𑀫𑀁 𑀫𑀦𑀼𑀲𑁆𑀲𑀸 𑀚𑀸𑀦𑀺𑀁𑀲𑀼. 𑀲𑀸𑀓𑁂𑀢𑀸𑀬𑀦𑁆𑀢𑀺 𑀲𑀸𑀓𑁂𑀢𑀦𑀕𑀭𑁂.

𑁨𑁪𑁧. 𑀅𑀪𑀺𑀓𑁆𑀔𑀡𑀦𑁆𑀢𑀺 𑀅𑀪𑀺𑀡𑁆𑀳𑀁. 𑀦𑀦𑁆𑀤𑀦𑀁 𑀲𑀼𑀢𑁆𑀯𑀸𑀢𑀺 ‘‘𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀦𑁆𑀤𑀦𑀯𑀦𑀁 𑀦𑀸𑀫 𑀏𑀤𑀺𑀲𑀜𑁆𑀘 𑀏𑀤𑀺𑀲𑀜𑁆𑀘𑀸’’𑀢𑀺 𑀢𑀢𑁆𑀣 𑀦𑀸𑀦𑀸𑀯𑀺𑀥𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸. 𑀙𑀦𑁆𑀤𑁄𑀢𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀽𑀢𑁄 𑀓𑀼𑀲𑀮𑀘𑁆𑀙𑀦𑁆𑀤𑁄, 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀧𑀢𑁆𑀣𑀦𑀸𑀪𑀽𑀢𑁄 𑀢𑀡𑁆𑀳𑀸𑀙𑀦𑁆𑀤𑁄 𑀯𑀸. 𑀉𑀤𑀧𑀚𑁆𑀚𑀣𑀸𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀢𑀢𑁆𑀣𑀸𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂, 𑀦𑀦𑁆𑀤𑀦𑀸𑀧𑀤𑁂𑀲𑁂𑀦𑀧𑀺 𑀳𑀺 𑀢𑀁 𑀤𑁂𑀯𑀮𑁄𑀓𑀁 𑀯𑀤𑀢𑀺. 𑀉𑀧𑀧𑀦𑁆𑀦𑀸𑀫𑁆𑀳𑀻𑀢𑀺 𑀉𑀧𑁆𑀧𑀦𑁆𑀦𑀸 𑀦𑀺𑀩𑁆𑀩𑀢𑁆𑀢𑀸 𑀅𑀫𑁆𑀳𑀺.

𑁨𑁪𑁨. 𑀦𑀸𑀓𑀸𑀲𑀺𑀁 𑀲𑀢𑁆𑀣𑀼 𑀯𑀘𑀦𑀦𑁆𑀢𑀺 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀯𑀡𑁆𑀡𑁂𑀫𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧.𑁩𑁨𑁦-𑁩𑁨𑁧) 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀯𑀘𑀦𑀁 𑀦 𑀓𑀭𑀺𑀁, 𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑀁 𑀦 𑀧𑀚𑀳𑀺𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺𑀘𑁆𑀘𑁄 𑀕𑁄𑀢𑀫𑀕𑁄𑀢𑁆𑀢𑁄, 𑀪𑀕𑀯𑀸𑀧𑀺 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀲𑀕𑁄𑀢𑁆𑀢𑀢𑀸𑀬 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄’’𑀢𑀺. 𑀅𑀣 𑀯𑀸 𑀆𑀤𑀺𑀘𑁆𑀘𑀲𑁆𑀲 𑀩𑀦𑁆𑀥𑀼 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀪𑀕𑀯𑀸. 𑀢𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀆𑀤𑀺𑀘𑁆𑀘𑁄 𑀯𑀸 𑀩𑀦𑁆𑀥𑀼 𑀏𑀢𑀲𑁆𑀲 𑀑𑀭𑀲𑀧𑀼𑀢𑁆𑀢𑀪𑀸𑀯𑀢𑁄𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀪𑀕𑀯𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀬𑁄 𑀅𑀦𑁆𑀥𑀓𑀸𑀭𑁂 𑀢𑀫𑀲𑀻 𑀧𑀪𑀗𑁆𑀓𑀭𑁄, 𑀯𑁂𑀭𑁄𑀘𑀦𑁄 𑀫𑀡𑁆𑀟𑀮𑀻 𑀉𑀕𑁆𑀕𑀢𑁂𑀚𑁄;

𑀫𑀸 𑀭𑀸𑀳𑀼 𑀕𑀺𑀮𑀻 𑀘𑀭𑀫𑀦𑁆𑀢𑀮𑀺𑀓𑁆𑀔𑁂, 𑀧𑀚𑀁 𑀫𑀫𑀁 𑀭𑀸𑀳𑀼 𑀧𑀫𑀼𑀜𑁆𑀘 𑀲𑀽𑀭𑀺𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁯𑁧);

𑀳𑀻𑀦𑁂𑀢𑀺 𑀮𑀸𑀫𑀓𑁂. 𑀅𑀢𑁆𑀢𑀦𑁄 𑀪𑀯𑀸𑀪𑀺𑀭𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀸𑀫𑁆𑀳𑀻𑀢𑀺 𑀲𑀸 𑀅𑀫𑁆𑀳𑀺.

𑀏𑀯𑀁 𑀢𑀸𑀬 𑀤𑁂𑀯𑀢𑀸𑀬 𑀪𑀯𑀸𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀯𑀺𑀧𑁆𑀧𑀝𑀺𑀲𑀸𑀭𑁂 𑀧𑀯𑁂𑀤𑀺𑀢𑁂 𑀣𑁂𑀭𑁄 𑀪𑀯𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀸𑀬𑀼𑀪𑀸𑀯𑀯𑀺𑀪𑀸𑀯𑀦𑀫𑀼𑀔𑁂𑀦 𑀆𑀬𑀢𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀲𑀫𑀢𑀺𑀓𑁆𑀓𑀫𑁄 𑀓𑀸𑀢𑀼𑀁 𑀲𑀼𑀓𑀭𑁄, 𑀲𑀩𑁆𑀩𑀲𑁄 𑀔𑀻𑀡𑀸𑀲𑀯𑀪𑀸𑀯𑁄 𑀦𑀸𑀫 𑀫𑀳𑀸𑀦𑀺𑀲𑀁𑀲𑁄𑀢𑀺 𑀘 𑀲𑀫𑀲𑁆𑀲𑀸𑀲𑁂𑀢𑀼𑀁 𑁋

𑁨𑁪𑁩.

‘‘𑀓𑀻𑀯 𑀘𑀺𑀭𑀁 𑀯𑀺𑀫𑀸𑀦𑀫𑁆𑀳𑀺, 𑀇𑀥 𑀯𑀘𑁆𑀙𑀲𑀼𑀧𑁄𑀲𑀣𑁂;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀬𑀤𑀺 𑀚𑀸𑀦𑀸𑀲𑀺 𑀆𑀬𑀼𑀦𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀧𑀼𑀦 𑀲𑀸 𑁋

𑁨𑁪𑁪.

‘‘𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄;

𑀇𑀥 𑀞𑀢𑁆𑀯𑀸 𑀫𑀳𑀸𑀫𑀼𑀦𑀺, 𑀇𑀢𑁄 𑀘𑀼𑀢𑀸 𑀕𑀫𑀺𑀲𑁆𑀲𑀸𑀫𑀺;

𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺. 𑁋 𑀆𑀳;

𑀧𑀼𑀦 𑀣𑁂𑀭𑁄 𑁋

𑁨𑁪𑁫.

‘‘𑀫𑀸 𑀢𑁆𑀯𑀁 𑀉𑀧𑁄𑀲𑀣𑁂 𑀪𑀸𑀬𑀺, 𑀲𑀫𑁆𑀩𑀼𑀤𑁆𑀥𑁂𑀦𑀸𑀲𑀺 𑀩𑁆𑀬𑀸𑀓𑀢𑀸;

𑀲𑁄𑀢𑀸𑀧𑀦𑁆𑀦𑀸 𑀯𑀺𑀲𑁂𑀲𑀬𑀺, 𑀧𑀳𑀻𑀦𑀸 𑀢𑀯 𑀤𑀼𑀕𑁆𑀕𑀢𑀻’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀲𑀫𑀼𑀢𑁆𑀢𑁂𑀚𑁂𑀲𑀺.

𑁨𑁪𑁩-𑁪. 𑀢𑀢𑁆𑀣 𑀓𑀻𑀯 𑀘𑀺𑀭𑀦𑁆𑀢𑀺 𑀓𑀺𑀢𑁆𑀢𑀓𑀁 𑀅𑀤𑁆𑀥𑀸𑀦𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂, 𑀇𑀥 𑀯𑀸 𑀯𑀺𑀫𑀸𑀦𑀲𑁆𑀫𑀺𑀁. 𑀆𑀬𑀼 𑀦𑁄𑀢𑀺 𑀆𑀬𑀼, 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀆𑀬𑀼𑀦𑁄 𑀯𑀸 𑀘𑀺𑀭𑀸𑀘𑀺𑀭𑀪𑀸𑀯𑀁, 𑀅𑀣 𑀯𑀸 𑀬𑀤𑀺 𑀚𑀸𑀦𑀸𑀲𑀺 𑀆𑀬𑀼𑀦𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀫𑀼𑀦𑀻𑀢𑀺 𑀣𑁂𑀭𑀁 𑀆𑀮𑀧𑀢𑀺.

𑁨𑁪𑁫. 𑀫𑀸 𑀢𑁆𑀯𑀁 𑀉𑀧𑁄𑀲𑀣𑁂 𑀪𑀸𑀬𑀻𑀢𑀺 𑀪𑀤𑁆𑀤𑁂 𑀉𑀧𑁄𑀲𑀣𑁂 𑀢𑁆𑀯𑀁 𑀫𑀸 𑀪𑀸𑀬𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑁂𑀦𑀸𑀲𑀺 𑀩𑁆𑀬𑀸𑀓𑀢𑀸. 𑀓𑀺𑀦𑁆𑀢𑀺? 𑀲𑁄𑀢𑀸𑀧𑀦𑁆𑀦𑀸 𑀯𑀺𑀲𑁂𑀲𑀬𑀻𑀢𑀺. 𑀫𑀕𑁆𑀕𑀨𑀮𑀲𑀜𑁆𑀜𑀺𑀢𑀁 𑀯𑀺𑀲𑁂𑀲𑀁 𑀬𑀸𑀢𑀸 𑀅𑀥𑀺𑀕𑀢𑀸, 𑀢𑀲𑁆𑀫𑀸 𑀧𑀳𑀻𑀦𑀸 𑀢𑀯 𑀲𑀩𑁆𑀩𑀸𑀧𑀺 𑀤𑀼𑀕𑁆𑀕𑀢𑀻𑀢𑀺 𑀇𑀫𑀫𑁆𑀧𑀺 𑀯𑀺𑀲𑁂𑀲𑀁 𑀬𑀸𑀢𑀸𑀢𑀺 𑀯𑀺𑀲𑁂𑀲𑀬𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀉𑀧𑁄𑀲𑀣𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀦𑀺𑀤𑁆𑀤𑀸-𑀲𑀼𑀦𑀺𑀤𑁆𑀤𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀝𑁆𑀞𑀫𑀦𑀯𑀫𑀯𑀺𑀫𑀸𑀦𑀸𑀦𑀺 𑀭𑀸𑀚𑀕𑀳𑀦𑀺𑀤𑀸𑀦𑀸𑀦𑀺. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀬𑀣𑀸𑀓𑁆𑀓𑀫𑀁 ‘‘𑀦𑀺𑀤𑁆𑀤𑀸 𑀦𑀸𑀫 𑀉𑀧𑀸𑀲𑀺𑀓𑀸…𑀧𑁂… 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄. 𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀲𑀼𑀦𑀺𑀤𑁆𑀤𑀸 𑀦𑀸𑀫 𑀉𑀧𑀸𑀲𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀕𑀸𑀣𑀸𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀢𑀣𑀸 𑀳𑀺 𑀏𑀓𑀘𑁆𑀘𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀧𑀸𑀴𑀺 𑀧𑁂𑀬𑁆𑀬𑀸𑀮𑀯𑀲𑁂𑀦 𑀞𑀧𑀺𑀢𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁪𑁬.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁪𑁭.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁨𑁪𑁮.

‘‘𑀦𑀺𑀤𑁆𑀤𑀸𑀢𑀺 𑀫𑀫𑀁 𑀅𑀜𑁆𑀜𑀁𑀲𑀼, 𑀭𑀸𑀚𑀕𑀳𑀲𑁆𑀫𑀺𑀁 𑀉𑀧𑀸𑀲𑀺𑀓𑀸…𑀧𑁂…

𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁫𑁬.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁫𑁮.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂… 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁬𑁧.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂….

𑁨𑁬𑁨.

‘‘𑀲𑀼𑀦𑀺𑀤𑁆𑀤𑀸𑀢𑀺 𑀫𑀁 𑀅𑀜𑁆𑀜𑀁𑀲𑀼, 𑀭𑀸𑀚𑀕𑀳𑀲𑁆𑀫𑀺𑀁 𑀉𑀧𑀸𑀲𑀺𑀓𑀸…𑀧𑁂…

𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁬𑁮.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀦𑀺𑀤𑁆𑀤𑀸-𑀲𑀼𑀦𑀺𑀤𑁆𑀤𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀞𑀫𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀉𑀢𑁆𑀢𑀭𑀫𑀥𑀼𑀭𑀸𑀬𑀁 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀔𑀻𑀡𑀸𑀬𑀼𑀓𑀸 𑀳𑁄𑀢𑀺 𑀅𑀧𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸. 𑀪𑀕𑀯𑀸 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀅𑀧𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀤𑀺𑀲𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀢𑀁 𑀲𑀼𑀕𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀫𑀥𑀼𑀭𑀁 𑀅𑀕𑀫𑀸𑀲𑀺. 𑀕𑀦𑁆𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀩𑀳𑀺𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑁂𑀦 𑀲𑀫𑀬𑁂𑀦 𑀲𑀸 𑀇𑀢𑁆𑀣𑀻 𑀕𑁂𑀳𑁂 𑀆𑀳𑀸𑀭𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀝𑀺𑀲𑀸𑀫𑁂𑀢𑁆𑀯𑀸 𑀖𑀝𑀁 𑀕𑀳𑁂𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀖𑀝𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑁄 𑀮𑀤𑁆𑀥𑁄’’𑀢𑀺 𑀯𑀢𑁆𑀯𑀸 ‘‘𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘 𑀪𑀕𑀯𑀢𑀸 𑀯𑀼𑀢𑁆𑀢𑁂 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀖𑀝𑀁 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀺, 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀆𑀳. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀲𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑁂 𑀧𑀤𑁂𑀲𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀧𑀯𑁂𑀲𑀦𑀁 𑀉𑀤𑀺𑀓𑁆𑀔𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀲𑀸 𑀪𑀕𑀯𑀦𑁆𑀢𑀁 𑀪𑁄𑀚𑁂𑀲𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀑𑀦𑀻𑀢𑀧𑀢𑁆𑀢𑀧𑀸𑀡𑀻 𑀢𑀲𑁆𑀲𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻 𑀬𑀸𑀯 𑀘𑀓𑁆𑀔𑀼𑀧𑀣𑀲𑀫𑀢𑀺𑀓𑁆𑀓𑀫𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀅𑀯𑀺𑀚𑀳𑀦𑁆𑀢𑀻 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀲𑀸 𑀓𑀢𑀺𑀧𑀬𑀤𑀺𑀯𑀲𑀸𑀢𑀺𑀓𑁆𑀓𑀫𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀜𑁆𑀘𑀲𑁆𑀲𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋

𑁨𑁭𑁦.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂… 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁨𑁭𑁧.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺;

𑁨𑁭𑁩.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁨𑁭𑁪.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸,

𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂.

𑁨𑁭𑁫.

‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀢𑀲𑁆𑀲 𑀅𑀤𑀸𑀲𑀳𑀁 𑀪𑀺𑀓𑁆𑀔𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁨𑁭𑁬.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀤𑁂𑀯𑀢𑀸 𑀩𑁆𑀬𑀸𑀓𑀸𑀲𑀺. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀞𑀫𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀼𑀢𑀺𑀬𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀤𑀼𑀢𑀺𑀬𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺. 𑀢𑀢𑁆𑀣 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀅𑀜𑁆𑀜𑀢𑀭𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀪𑁄𑀚𑀦𑀁 𑀅𑀤𑀸𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁂𑀲𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑀲𑀤𑀺𑀲𑀫𑁂𑀯.

𑁨𑁭𑁮.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂… 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁮𑁧.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁨𑁮𑁨.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀤𑀼𑀢𑀺𑀬𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀏𑀓𑀸𑀤𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘𑀺𑀢𑁆𑀢𑀮𑀢𑀸𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀕𑁆𑀕𑁄

𑁧. 𑀉𑀴𑀸𑀭𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀕𑁆𑀕𑁂 𑀉𑀴𑀸𑀭𑁄 𑀢𑁂 𑀬𑀲𑁄 𑀯𑀡𑁆𑀡𑁄𑀢𑀺 𑀉𑀴𑀸𑀭𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑁂 𑀏𑀓𑀸 𑀤𑀸𑀭𑀺𑀓𑀸 𑀤𑀸𑀦𑀚𑁆𑀛𑀸𑀲𑀬𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸 𑀅𑀳𑁄𑀲𑀺. 𑀲𑀸 𑀬𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀧𑀼𑀭𑁂𑀪𑀢𑁆𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀅𑀢𑁆𑀢𑀦𑀸 𑀮𑀤𑁆𑀥𑀧𑀝𑀺𑀯𑀻𑀲𑀢𑁄 𑀉𑀧𑀟𑁆𑀠𑀁 𑀤𑁂𑀢𑀺, 𑀉𑀧𑀟𑁆𑀠𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀤𑀢𑁆𑀯𑀸 𑀧𑀦 𑀦 𑀪𑀼𑀜𑁆𑀚𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀧𑀲𑁆𑀲𑀦𑁆𑀢𑀻𑀧𑀺 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀓𑀸𑀮𑁂 𑀤𑁂𑀢𑀺, 𑀬𑀸𑀘𑀓𑀸𑀦𑀫𑁆𑀧𑀺 𑀤𑁂𑀢𑀺𑀬𑁂𑀯. 𑀅𑀣𑀲𑁆𑀲𑀸 𑀫𑀸𑀢𑀸 ‘‘𑀫𑀫 𑀥𑀻𑀢𑀸 𑀤𑀸𑀦𑀚𑁆𑀛𑀸𑀲𑀬𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀢𑀲𑁆𑀲𑀸 𑀤𑀺𑀕𑀼𑀡𑀁 𑀪𑀸𑀕𑀁 𑀤𑁂𑀢𑀺. 𑀤𑁂𑀦𑁆𑀢𑀻 𑀘 𑀏𑀓𑀲𑁆𑀫𑀺𑀁 𑀪𑀸𑀕𑁂 𑀢𑀸𑀬 𑀲𑀁𑀯𑀺𑀪𑀸𑀕𑁂 𑀓𑀢𑁂 𑀧𑀼𑀦 𑀅𑀧𑀭𑀁 𑀤𑁂𑀢𑀺, 𑀲𑀸 𑀢𑀢𑁄𑀧𑀺 𑀲𑀁𑀯𑀺𑀪𑀸𑀕𑀁 𑀓𑀭𑁄𑀢𑀺𑀬𑁂𑀯.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀓𑀼𑀫𑀸𑀭𑀲𑁆𑀲 𑀅𑀤𑀁𑀲𑀼. 𑀢𑀁 𑀧𑀦 𑀓𑀼𑀮𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀁 𑀳𑁄𑀢𑀺 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀁. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀭𑀸𑀚𑀕𑀳𑁂 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀢𑀲𑁆𑀲𑀸 𑀤𑀸𑀭𑀺𑀓𑀸𑀬 𑀲𑀲𑀼𑀭𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀸 𑀤𑀸𑀭𑀺𑀓𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 ‘‘𑀧𑀯𑀺𑀲𑀣 𑀪𑀦𑁆𑀢𑁂’’𑀢𑀺 𑀧𑀯𑁂𑀲𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀲𑁆𑀲𑀼𑀬𑀸 𑀞𑀧𑀺𑀢𑀁 𑀧𑀽𑀯𑀁 𑀢𑀁 𑀅𑀧𑀲𑁆𑀲𑀦𑁆𑀢𑀻 ‘‘𑀢𑀲𑁆𑀲𑀸 𑀓𑀣𑁂𑀢𑁆𑀯𑀸 𑀅𑀦𑀼𑀫𑁄𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺, 𑀣𑁂𑀭𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀤𑀸𑀭𑀺𑀓𑀸 ‘‘𑀢𑀼𑀫𑁆𑀳𑁂𑀳𑀺 𑀞𑀧𑀺𑀢𑀁 𑀧𑀽𑀯𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀅𑀤𑀸𑀲𑀺’’𑀦𑁆𑀢𑀺 𑀲𑀲𑁆𑀲𑀼𑀬𑀸 𑀓𑀣𑁂𑀲𑀺. 𑀲𑀸 𑀢𑀁 𑀲𑀼𑀢𑁆𑀯𑀸 ‘‘𑀓𑀺𑀦𑁆𑀦𑀸𑀫𑀺𑀤𑀁 𑀧𑀸𑀕𑀩𑁆𑀪𑀺𑀬𑀁, 𑀅𑀬𑀁 𑀫𑀫 𑀲𑀦𑁆𑀢𑀓𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀲𑀫𑀡𑀲𑁆𑀲 𑀅𑀤𑀸𑀲𑀻’’𑀢𑀺 𑀢𑀁 𑀓𑀝𑀢𑀝𑀸𑀬𑀫𑀸𑀦𑀸 𑀓𑁄𑀥𑀸𑀪𑀺𑀪𑀽𑀢𑀸 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀅𑀘𑀺𑀦𑁆𑀢𑁂𑀦𑁆𑀢𑀻 𑀧𑀼𑀭𑀢𑁄 𑀞𑀺𑀢𑀁 𑀫𑀼𑀲𑀮𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀁𑀲𑀓𑀽𑀝𑁂 𑀧𑀳𑀭𑀺. 𑀲𑀸 𑀲𑀼𑀔𑀼𑀫𑀸𑀮𑀢𑀸𑀬 𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑀢𑀸𑀬 𑀘 𑀢𑁂𑀦𑁂𑀯 𑀧𑀳𑀸𑀭𑁂𑀦 𑀩𑀮𑀯𑀤𑀼𑀓𑁆𑀔𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀲𑀢𑀺𑀧𑀺 𑀅𑀜𑁆𑀜𑀲𑁆𑀫𑀺𑀁 𑀲𑀼𑀘𑀭𑀺𑀢𑀓𑀫𑁆𑀫𑁂 𑀣𑁂𑀭𑀲𑁆𑀲 𑀓𑀢𑀤𑀸𑀦𑀫𑁂𑀯 𑀲𑀸𑀢𑀺𑀲𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑁋

𑁨𑁮𑁬.

‘‘𑀉𑀴𑀸𑀭𑁄 𑀢𑁂 𑀬𑀲𑁄 𑀯𑀡𑁆𑀡𑁄, 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸;

𑀦𑀸𑀭𑀺𑀬𑁄 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺, 𑀤𑁂𑀯𑀧𑀼𑀢𑁆𑀢𑀸 𑀅𑀮𑀗𑁆𑀓𑀢𑀸.

𑁨𑁮𑁭.

‘‘𑀫𑁄𑀤𑁂𑀦𑁆𑀢𑀺 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀢𑀯 𑀧𑀽𑀚𑀸𑀬 𑀤𑁂𑀯𑀢𑁂;

𑀲𑁄𑀯𑀡𑁆𑀡𑀸𑀦𑀺 𑀯𑀺𑀫𑀸𑀦𑀸𑀦𑀺, 𑀢𑀯𑀺𑀫𑀸𑀦𑀺 𑀲𑀼𑀤𑀲𑁆𑀲𑀦𑁂.

𑁨𑁮𑁮.

‘‘𑀢𑀼𑀯𑀁𑀲𑀺 𑀇𑀲𑁆𑀲𑀭𑀸 𑀢𑁂𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻;

𑀅𑀪𑀺𑀚𑀸𑀢𑀸 𑀫𑀳𑀦𑁆𑀢𑀸𑀲𑀺, 𑀤𑁂𑀯𑀓𑀸𑀬𑁂 𑀧𑀫𑁄𑀤𑀲𑀺;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀢𑀻𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺.

𑁨𑁮𑁬. 𑀢𑀢𑁆𑀣 𑀬𑀲𑁄𑀢𑀺 𑀧𑀭𑀺𑀯𑀸𑀭𑁄. 𑀯𑀡𑁆𑀡𑁄𑀢𑀺 𑀯𑀡𑁆𑀡𑀦𑀺𑀪𑀸 𑀲𑀭𑀻𑀭𑁄𑀪𑀸𑀲𑁄. ‘‘𑀉𑀴𑀸𑀭𑁄’’𑀢𑀺 𑀧𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺 𑀘 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀘 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑀸𑀲𑀼 ‘‘𑀉𑀴𑀸𑀭𑁄 𑀢𑁂 𑀯𑀡𑁆𑀡𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁 𑀯𑀺𑀲𑀬𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸’’𑀢𑀺 𑀯𑀢𑁆𑀯𑀸 ‘‘𑀉𑀴𑀸𑀭𑁄 𑀢𑁂 𑀬𑀲𑁄’’𑀢𑀺 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀯𑀢𑁆𑀣𑀼𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀭𑀺𑀬𑁄 𑀦𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸𑀢𑀺 𑀲𑀩𑁆𑀩𑀸𑀲𑀼 𑀤𑀺𑀲𑀸𑀲𑀼 𑀯𑀺𑀚𑁆𑀚𑁄𑀢𑀢𑁂, 𑀲𑀩𑁆𑀩𑀸 𑀯𑀸 𑀤𑀺𑀲𑀸 𑀑𑀪𑀸𑀲𑀬𑀢𑁂, 𑀯𑀺𑀚𑁆𑀚𑁄𑀢𑀬𑀢𑀻𑀢𑀺 𑀅𑀢𑁆𑀣𑁄. ‘‘𑀑𑀪𑀸𑀲𑀢𑁂’’𑀢𑀺 𑀧𑀤𑀲𑁆𑀲 ‘‘𑀑𑀪𑀸𑀲𑀦𑁆𑀢𑁂’’𑀢𑀺 𑀓𑁂𑀘𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀳𑀺 ‘‘𑀯𑀡𑁆𑀡𑁂𑀦𑀸’’𑀢𑀺 𑀯𑀺𑀪𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀸. 𑀯𑀡𑁆𑀡𑁂𑀦𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁, 𑀯𑀡𑁆𑀡𑁂𑀦 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑀸 𑀤𑀺𑀲𑀸’’𑀢𑀺 𑀘 𑀚𑀸𑀢𑀺𑀯𑀲𑁂𑀦 𑀤𑀺𑀲𑀸𑀲𑀸𑀫𑀜𑁆𑀜𑁂 𑀅𑀧𑁂𑀓𑁆𑀔𑀺𑀢𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦𑀧𑀺 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀦𑀸𑀭𑀺𑀬𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀮𑀗𑁆𑀓𑀢𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀤𑁂𑀯𑀧𑀼𑀢𑁆𑀢𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑁂𑀦 𑀦𑀸𑀭𑀺𑀬𑁄 𑀤𑁂𑀯𑀧𑀼𑀢𑁆𑀢𑀸 𑀘𑀸𑀢𑀺 𑀲𑀫𑀼𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁭. 𑀫𑁄𑀤𑁂𑀦𑁆𑀢𑀻𑀢𑀺 𑀧𑀫𑁄𑀤𑀬𑀦𑁆𑀢𑀺. 𑀧𑀽𑀚𑀸𑀬𑀸𑀢𑀺 𑀧𑀽𑀚𑀦𑀢𑁆𑀣𑀁 𑀧𑀽𑀚𑀸𑀦𑀺𑀫𑀺𑀢𑁆𑀢𑀁 𑀯𑀸, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀯𑀺𑀫𑀸𑀦𑀻𑀢𑀺 𑀢𑀯 𑀇𑀫𑀸𑀦𑀺.

𑁨𑁮𑁮. 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻𑀢𑀺 𑀲𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺, 𑀲𑀩𑁆𑀩𑁂𑀳𑀺 𑀯𑀸 𑀢𑀬𑀸 𑀓𑀸𑀫𑀺𑀢𑁂𑀳𑀺 𑀇𑀘𑁆𑀙𑀺𑀢𑁂𑀳𑀺 𑀯𑀢𑁆𑀣𑀽𑀳𑀺 𑀲𑀫𑀺𑀤𑁆𑀥𑀸. 𑀅𑀪𑀺𑀚𑀸𑀢𑀸𑀢𑀺 𑀲𑀼𑀚𑀸𑀢𑀸. 𑀫𑀳𑀦𑁆𑀢𑀸𑀲𑀻𑀢𑀺 𑀫𑀳𑀢𑀻 𑀫𑀳𑀸𑀦𑀼𑀪𑀸𑀯𑀸 𑀅𑀲𑀺. 𑀤𑁂𑀯𑀓𑀸𑀬𑁂 𑀧𑀫𑁄𑀤𑀲𑀻𑀢𑀺 𑀇𑀫𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀓𑁂𑀦 𑀧𑀭𑀫𑁂𑀦 𑀧𑀫𑁄𑀤𑀦𑁂𑀦 𑀧𑀫𑁄𑀤𑀲𑀺.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺 𑁋

𑁨𑁮𑁯.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀤𑀼𑀲𑁆𑀲𑀻𑀮𑀓𑀼𑀮𑁂 𑀲𑀼𑀡𑀺𑀲𑀸 𑀅𑀳𑁄𑀲𑀺𑀁, 𑀅𑀲𑁆𑀲𑀤𑁆𑀥𑁂𑀲𑀼 𑀓𑀤𑀭𑀺𑀬𑁂𑀲𑀼 𑀅𑀳𑀁.

𑁨𑁯𑁦.

‘‘𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀁𑀯𑀺𑀪𑀸𑀕𑀭𑀢𑀸 𑀲𑀤𑀸;

𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀲𑁆𑀲, 𑀅𑀧𑀽𑀯𑀁 𑀢𑁂 𑀅𑀤𑀸𑀲𑀳𑀁.

𑁨𑁯𑁧.

‘‘𑀢𑀤𑀸𑀳𑀁 𑀲𑀲𑁆𑀲𑀼𑀬𑀸𑀘𑀺𑀓𑁆𑀔𑀺𑀁, ‘𑀲𑀫𑀡𑁄 𑀆𑀕𑀢𑁄 𑀇𑀥;

𑀢𑀲𑁆𑀲 𑀅𑀤𑀸𑀲𑀳𑀁 𑀧𑀽𑀯𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺’.

𑁨𑁯𑁨.

‘‘𑀇𑀢𑀺𑀲𑁆𑀲𑀸 𑀲𑀲𑁆𑀲𑀼 𑀧𑀭𑀺𑀪𑀸𑀲𑀺, 𑀅𑀯𑀺𑀦𑀻𑀢𑀸𑀲𑀺 𑀢𑁆𑀯𑀁 𑀯𑀥𑀼;

𑀦 𑀫𑀁 𑀲𑀫𑁆𑀧𑀼𑀘𑁆𑀙𑀺𑀢𑀼𑀁 𑀇𑀘𑁆𑀙𑀺, ‘𑀲𑀫𑀡𑀲𑁆𑀲 𑀤𑀤𑀸𑀫𑀳𑀁’.

𑁨𑁯𑁩.

‘‘𑀢𑀢𑁄 𑀫𑁂 𑀲𑀲𑁆𑀲𑀼 𑀓𑀼𑀧𑀺𑀢𑀸, 𑀧𑀳𑀸𑀲𑀺 𑀫𑀼𑀲𑀮𑁂𑀦 𑀫𑀁;

𑀓𑀽𑀝𑀗𑁆𑀕𑀘𑁆𑀙𑀺 𑀅𑀯𑀥𑀺 𑀫𑀁, 𑀦𑀸𑀲𑀓𑁆𑀔𑀺𑀁 𑀚𑀻𑀯𑀺𑀢𑀼𑀁 𑀘𑀺𑀭𑀁.

𑁨𑁯𑁪.

‘‘𑀅𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀢𑀢𑁄 𑀘𑀼𑀢𑀸;

𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁, 𑀉𑀧𑀧𑀦𑁆𑀦𑀸 𑀲𑀳𑀩𑁆𑀬𑀢𑀁.

𑁨𑁯𑁫.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁨𑁮𑁯. 𑀢𑀢𑁆𑀣 𑀅𑀲𑁆𑀲𑀤𑁆𑀥𑁂𑀲𑀽𑀢𑀺 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀘 𑀅𑀪𑀸𑀯𑁂𑀦 𑀅𑀲𑁆𑀲𑀤𑁆𑀥𑁂𑀲𑀼, 𑀣𑀤𑁆𑀥𑀫𑀘𑁆𑀙𑀭𑀺𑀬𑀢𑀸𑀬 𑀓𑀤𑀭𑀺𑀬𑁂𑀲𑀼 𑀲𑀲𑁆𑀲𑀼𑀆𑀤𑀻𑀲𑀼 𑀅𑀳𑀁 𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸 𑀅𑀳𑁄𑀲𑀺𑀦𑁆𑀢𑀺 𑀬𑁄𑀚𑀦𑀸.

𑁨𑁯𑁦-𑁧. 𑀅𑀧𑀽𑀯𑀦𑁆𑀢𑀺 𑀓𑀧𑀮𑁆𑀮𑀧𑀽𑀯𑀁. 𑀢𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀲𑁆𑀲𑀼𑀬𑀸 𑀆𑀘𑀺𑀓𑁆𑀔𑀺𑀁 𑀕𑀳𑀺𑀢𑀪𑀸𑀯𑀜𑀸𑀧𑀦𑀢𑁆𑀣𑀜𑁆𑀘 𑀅𑀦𑀼𑀫𑁄𑀤𑀦𑀢𑁆𑀣𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁯𑁨. 𑀇𑀢𑀺𑀲𑁆𑀲𑀸𑀢𑀺 𑀏𑀢𑁆𑀣 𑀅𑀲𑁆𑀲𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀫𑀡𑀲𑁆𑀲 𑀤𑀤𑀸𑀫𑀳𑀦𑁆𑀢𑀺 𑀅𑀳𑀁 𑀲𑀫𑀡𑀲𑁆𑀲 𑀅𑀧𑀽𑀯𑀁 𑀤𑀤𑀸𑀫𑀻𑀢𑀺. 𑀬𑀲𑁆𑀫𑀸 𑀦 𑀫𑀁 𑀲𑀫𑁆𑀧𑀼𑀘𑁆𑀙𑀺𑀢𑀼𑀁 𑀇𑀘𑁆𑀙𑀺, 𑀢𑀲𑁆𑀫𑀸 𑀢𑁆𑀯𑀁 𑀯𑀥𑀼 𑀅𑀯𑀺𑀦𑀻𑀢𑀸𑀲𑀻𑀢𑀺 𑀲𑀲𑁆𑀲𑀼 𑀧𑀭𑀺𑀪𑀸𑀲𑀻𑀢𑀺 𑀬𑁄𑀚𑀦𑀸.

𑁨𑁯𑁩. 𑀧𑀳𑀸𑀲𑀻𑀢𑀺 𑀧𑀳𑀭𑀺. 𑀓𑀽𑀝𑀗𑁆𑀕𑀘𑁆𑀙𑀺 𑀅𑀯𑀥𑀺 𑀫𑀦𑁆𑀢𑀺 𑀏𑀢𑁆𑀣 𑀓𑀽𑀝𑀦𑁆𑀢𑀺 𑀅𑀁𑀲𑀓𑀽𑀝𑀁 𑀯𑀼𑀢𑁆𑀢𑀁 𑀧𑀼𑀭𑀺𑀫𑀧𑀤𑀮𑁄𑀧𑁂𑀦, 𑀓𑀽𑀝𑀫𑁂𑀯 𑀅𑀗𑁆𑀕𑀦𑁆𑀢𑀺 𑀓𑀽𑀝𑀗𑁆𑀕𑀁, 𑀢𑀁 𑀙𑀺𑀦𑁆𑀤𑀢𑀻𑀢𑀺 𑀓𑀽𑀝𑀗𑁆𑀕𑀘𑁆𑀙𑀺. 𑀏𑀯𑀁 𑀓𑁄𑀥𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸 𑀫𑀁 𑀅𑀯𑀥𑀺, 𑀫𑀫 𑀅𑀁𑀲𑀓𑀽𑀝𑀁 𑀙𑀺𑀦𑁆𑀤𑀺, 𑀢𑁂𑀦𑁂𑀯 𑀉𑀧𑀓𑁆𑀓𑀫𑁂𑀦 𑀫𑀢𑀢𑁆𑀢𑀸 𑀫𑀁 𑀫𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀸𑀲𑀓𑁆𑀔𑀺𑀁 𑀚𑀻𑀯𑀺𑀢𑀼𑀁 𑀘𑀺𑀭’’𑀦𑁆𑀢𑀺.

𑁨𑁯𑁪. 𑀯𑀺𑀧𑁆𑀧𑀫𑀼𑀢𑁆𑀢𑀸𑀢𑀺 𑀢𑀢𑁄 𑀤𑀼𑀓𑁆𑀔𑀢𑁄 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀉𑀴𑀸𑀭𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀘𑁆𑀙𑀼𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀑𑀪𑀸𑀲𑀬𑀺𑀢𑁆𑀯𑀸 𑀧𑀣𑀯𑀺𑀁 𑀲𑀤𑁂𑀯𑀓𑀦𑁆𑀢𑀺 𑀉𑀘𑁆𑀙𑀼𑀤𑀸𑀬𑀺𑀓𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀅𑀦𑀦𑁆𑀢𑀭𑀯𑀺𑀫𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀥 𑀉𑀘𑁆𑀙𑀼 𑀤𑀺𑀦𑁆𑀦𑀸, 𑀲𑀲𑁆𑀲𑀼𑀬𑀸 𑀘 𑀧𑀻𑀞𑀓𑁂𑀦 𑀧𑀳𑀝𑀸, 𑀢𑀗𑁆𑀔𑀡𑀜𑁆𑀜𑁂𑀯 𑀫𑀢𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲𑀁𑀬𑁂𑀯 𑀭𑀢𑁆𑀢𑀺𑀬𑀁 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀢𑀸, 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀑𑀪𑀸𑀲𑁂𑀦𑁆𑀢𑀻 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑁋

𑁨𑁯𑁬.

‘‘𑀑𑀪𑀸𑀲𑀬𑀺𑀢𑁆𑀯𑀸 𑀧𑀣𑀯𑀺𑀁 𑀲𑀤𑁂𑀯𑀓𑀁, 𑀅𑀢𑀺𑀭𑁄𑀘𑀲𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬;

𑀲𑀺𑀭𑀺𑀬𑀸 𑀘 𑀯𑀡𑁆𑀡𑁂𑀦 𑀬𑀲𑁂𑀦 𑀢𑁂𑀚𑀲𑀸, 𑀩𑁆𑀭𑀳𑁆𑀫𑀸𑀯 𑀤𑁂𑀯𑁂 𑀢𑀺𑀤𑀲𑁂 𑀲𑀳𑀺𑀦𑁆𑀤𑀓𑁂.

𑁨𑁯𑁭.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀉𑀧𑁆𑀧𑀮𑀫𑀸𑀮𑀥𑀸𑀭𑀺𑀦𑀻, 𑀆𑀯𑁂𑀴𑀺𑀦𑀻 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁂;

𑀅𑀮𑀗𑁆𑀓𑀢𑁂 𑀉𑀢𑁆𑀢𑀫𑀯𑀢𑁆𑀣𑀥𑀸𑀭𑀺𑀦𑀻, 𑀓𑀸 𑀢𑁆𑀯𑀁 𑀲𑀼𑀪𑁂 𑀤𑁂𑀯𑀢𑁂 𑀯𑀦𑁆𑀤𑀲𑁂 𑀫𑀫𑀁.

𑁨𑁯𑁮.

‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀓𑀫𑁆𑀫𑀫𑀓𑀸𑀲𑀺 𑀅𑀢𑁆𑀢𑀦𑀸, 𑀫𑀦𑀼𑀲𑁆𑀲𑀪𑀽𑀢𑀸 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀤𑀸𑀦𑀁 𑀲𑀼𑀘𑀺𑀡𑁆𑀡𑀁 𑀅𑀣 𑀲𑀻𑀮𑀲𑀁𑀬𑀫𑀁, 𑀓𑁂𑀦𑀽𑀧𑀧𑀦𑁆𑀦𑀸 𑀲𑀼𑀕𑀢𑀺𑀁 𑀬𑀲𑀲𑁆𑀲𑀺𑀦𑀻;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺.

𑁨𑁯𑁬-𑁭. 𑀢𑀢𑁆𑀣 𑀑𑀪𑀸𑀲𑀬𑀺𑀢𑁆𑀯𑀸 𑀧𑀣𑀯𑀺𑀁 𑀲𑀤𑁂𑀯𑀓𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀫𑀺𑀲𑁆𑀲𑁂𑀳𑀺 𑀲𑀺𑀦𑁂𑀭𑀼𑀧𑀲𑁆𑀲𑀯𑀺𑀦𑀺𑀕𑁆𑀕𑀢𑁂𑀳𑀺 𑀧𑀪𑀸𑀯𑀺𑀲𑀭𑁂𑀳𑀺 𑀯𑀺𑀚𑁆𑀚𑁄𑀢𑀬𑀫𑀸𑀦𑀢𑀸𑀬 𑀤𑁂𑀯𑁂𑀦 𑀆𑀓𑀸𑀲𑁂𑀦 𑀲𑀳𑀸𑀢𑀺 𑀲𑀤𑁂𑀯𑀓𑀁 𑀉𑀧𑀕𑀢𑀪𑀽𑀫𑀺𑀪𑀸𑀕𑀪𑀽𑀢𑀁 𑀇𑀫𑀁 𑀧𑀣𑀯𑀺𑀁 𑀯𑀺𑀚𑁆𑀚𑁄𑀢𑁂𑀢𑁆𑀯𑀸, 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀪𑀸𑀲𑀬𑀺𑀢𑁆𑀯𑀸 𑀧𑀣𑀯𑀺𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀅𑀢𑀺𑀭𑁄𑀘𑀲𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑁄𑀘𑀲𑀺. 𑀢𑀁 𑀧𑀦 𑀅𑀢𑀺𑀭𑁄𑀘𑀦𑀁 𑀓𑁂𑀦 𑀓𑀺𑀁 𑀯𑀺𑀬 𑀓𑁂𑀦 𑀯𑀸𑀢𑀺 𑀆𑀳 ‘‘𑀲𑀺𑀭𑀺𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀺𑀭𑀺𑀬𑀸𑀢𑀺 𑀲𑁄𑀪𑀕𑁆𑀕𑀸𑀤𑀺𑀲𑁄𑀪𑀸𑀯𑀺𑀲𑁂𑀲𑁂𑀦. 𑀢𑁂𑀚𑀲𑀸𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦. 𑀆𑀯𑁂𑀴𑀺𑀦𑀻𑀢𑀺 𑀭𑀢𑀦𑀫𑀬𑀧𑀼𑀧𑁆𑀨𑀸𑀯𑁂𑀴𑀯𑀢𑀻.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀯𑀺𑀲𑁆𑀲𑀚𑁆𑀚𑁂𑀲𑀺 𑁋

𑁨𑁯𑁯.

‘‘𑀇𑀤𑀸𑀦𑀺 𑀪𑀦𑁆𑀢𑁂 𑀇𑀫𑀫𑁂𑀯 𑀕𑀸𑀫𑀁, 𑀧𑀺𑀡𑁆𑀟𑀸𑀬 𑀅𑀫𑁆𑀳𑀸𑀓𑀁 𑀖𑀭𑀁 𑀉𑀧𑀸𑀕𑀫𑀺;

𑀢𑀢𑁄 𑀢𑁂 𑀉𑀘𑁆𑀙𑀼𑀲𑁆𑀲 𑀅𑀤𑀸𑀲𑀺 𑀔𑀡𑁆𑀟𑀺𑀓𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀢𑀼𑀮𑀸𑀬 𑀧𑀻𑀢𑀺𑀬𑀸.

𑁩𑁦𑁦.

‘‘𑀲𑀲𑁆𑀲𑀼 𑀘 𑀧𑀘𑁆𑀙𑀸 𑀅𑀦𑀼𑀬𑀼𑀜𑁆𑀚𑀢𑁂 𑀫𑀫𑀁, 𑀓𑀳𑀁 𑀦𑀼 𑀉𑀘𑁆𑀙𑀼𑀁 𑀯𑀥𑀼𑀓𑁂 𑀅𑀯𑀸𑀓𑀺𑀭𑀺;

𑀦 𑀙𑀟𑁆𑀟𑀺𑀢𑀁 𑀦𑁄 𑀧𑀦 𑀔𑀸𑀤𑀺𑀢𑀁 𑀫𑀬𑀸, 𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀬𑀁 𑀅𑀤𑀸𑀲𑀳𑀁.

𑁩𑁦𑁧.

‘‘𑀢𑀼𑀬𑁆𑀳𑀁 𑀦𑁆𑀯𑀺𑀤𑀁 𑀇𑀲𑁆𑀲𑀭𑀺𑀬𑀁 𑀅𑀣𑁄 𑀫𑀫, 𑀇𑀢𑀺𑀲𑁆𑀲𑀸 𑀲𑀲𑁆𑀲𑀼 𑀧𑀭𑀺𑀪𑀸𑀲𑀢𑁂 𑀫𑀫𑀁;

𑀧𑀻𑀞𑀁 𑀕𑀳𑁂𑀢𑁆𑀯𑀸 𑀧𑀳𑀸𑀭𑀁 𑀅𑀤𑀸𑀲𑀺 𑀫𑁂, 𑀢𑀢𑁄 𑀘𑀼𑀢𑀸 𑀓𑀸𑀮𑀓𑀢𑀸𑀫𑁆𑀳𑀺 𑀤𑁂𑀯𑀢𑀸.

𑁩𑁦𑁨.

‘‘𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸, 𑀲𑀼𑀔𑀜𑁆𑀘 𑀓𑀫𑁆𑀫𑀁 𑀅𑀦𑀼𑀪𑁄𑀫𑀺 𑀅𑀢𑁆𑀢𑀦𑀸;

𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀘𑀸𑀭𑀬𑀸𑀫𑀳𑀁, 𑀫𑁄𑀤𑀸𑀫𑀳𑀁 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺.

𑁩𑁦𑁩.

‘‘𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸, 𑀲𑀼𑀔𑀜𑁆𑀘 𑀓𑀫𑁆𑀫𑀁 𑀅𑀦𑀼𑀪𑁄𑀫𑀺 𑀅𑀢𑁆𑀢𑀦𑀸;

𑀤𑁂𑀯𑀺𑀦𑁆𑀤𑀕𑀼𑀢𑁆𑀢𑀸 𑀢𑀺𑀤𑀲𑁂𑀳𑀺 𑀭𑀓𑁆𑀔𑀺𑀢𑀸, 𑀲𑀫𑀧𑁆𑀧𑀺𑀢𑀸 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺.

𑁩𑁦𑁪.

‘‘𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀨𑀮𑀁 𑀅𑀦𑀧𑁆𑀧𑀓𑀁, 𑀫𑀳𑀸𑀯𑀺𑀧𑀸𑀓𑀸 𑀫𑀫 𑀉𑀘𑁆𑀙𑀼𑀤𑀓𑁆𑀔𑀺𑀡𑀸;

𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀘𑀸𑀭𑀬𑀸𑀫𑀳𑀁, 𑀫𑁄𑀤𑀸𑀫𑀳𑀁 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺.

𑁩𑁦𑁫.

‘‘𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀨𑀮𑀁 𑀅𑀦𑀧𑁆𑀧𑀓𑀁, 𑀫𑀳𑀸𑀚𑀼𑀢𑀺𑀓𑀸 𑀫𑀫 𑀉𑀘𑁆𑀙𑀼𑀤𑀓𑁆𑀔𑀺𑀡𑀸;

𑀤𑁂𑀯𑀺𑀦𑁆𑀤𑀕𑀼𑀢𑁆𑀢𑀸 𑀢𑀺𑀤𑀲𑁂𑀳𑀺 𑀭𑀓𑁆𑀔𑀺𑀢𑀸, 𑀲𑀳𑀲𑁆𑀲𑀦𑁂𑀢𑁆𑀢𑁄𑀭𑀺𑀯 𑀦𑀦𑁆𑀤𑀦𑁂 𑀯𑀦𑁂.

𑁩𑁦𑁬.

‘‘𑀢𑀼𑀯𑀜𑁆𑀘 𑀪𑀦𑁆𑀢𑁂 𑀅𑀦𑀼𑀓𑀫𑁆𑀧𑀓𑀁 𑀯𑀺𑀤𑀼𑀁, 𑀉𑀧𑁂𑀘𑁆𑀘 𑀯𑀦𑁆𑀤𑀺𑀁 𑀓𑀼𑀲𑀮𑀜𑁆𑀘 𑀧𑀼𑀘𑁆𑀙𑀺𑀲𑀁;

𑀢𑀢𑁄 𑀢𑁂 𑀉𑀘𑁆𑀙𑀼𑀲𑁆𑀲 𑀅𑀤𑀸𑀲𑀺 𑀔𑀡𑁆𑀟𑀺𑀓𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀢𑀼𑀮𑀸𑀬 𑀧𑀻𑀢𑀺𑀬𑀸’’𑀢𑀺.

𑁨𑁯𑁯. 𑀢𑀢𑁆𑀣 𑀇𑀤𑀸𑀦𑀻𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀤𑀺𑀯𑀲𑀢𑁆𑀢𑀸 𑀆𑀳, 𑀅𑀥𑀼𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯 𑀕𑀸𑀫𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀕𑀸𑀫𑁂, 𑀭𑀸𑀚𑀕𑀳𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 ‘𑀕𑀸𑀫𑁄’ 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀻’’𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀉𑀧𑀸𑀕𑀫𑀻𑀢𑀺 𑀉𑀧𑀕𑀢𑁄 𑀅𑀳𑁄𑀲𑀺. 𑀅𑀢𑀼𑀮𑀸𑀬𑀸𑀢𑀺 𑀅𑀦𑀼𑀧𑀫𑀸𑀬, 𑀅𑀧𑁆𑀧𑀫𑀸𑀡𑀸𑀬 𑀯𑀸.

𑁩𑁦𑁦. 𑀅𑀯𑀸𑀓𑀺𑀭𑀻𑀢𑀺 𑀅𑀧𑀦𑁂𑀲𑀺 𑀙𑀟𑁆𑀟𑁂𑀲𑀺, 𑀯𑀺𑀦𑀸𑀲𑁂𑀲𑀺 𑀯𑀸. 𑀲𑀦𑁆𑀢𑀲𑁆𑀲𑀸𑀢𑀺 𑀲𑀸𑀥𑀼𑀭𑀽𑀧𑀲𑁆𑀲 𑀲𑀦𑁆𑀢𑀓𑀺𑀮𑁂𑀲𑀲𑁆𑀲 𑀧𑀭𑀺𑀲𑁆𑀲𑀫𑀫𑀧𑁆𑀧𑀢𑁆𑀢𑀲𑁆𑀲 𑀯𑀸.

𑁩𑁦𑁧. 𑀢𑀼𑀬𑁆𑀳𑀁 𑀦𑀽𑀢𑀺 𑀦𑀼-𑀲𑀤𑁆𑀤𑁄 𑀅𑀦𑀢𑁆𑀢𑀫𑀦𑀢𑀸𑀲𑀽𑀘𑀦𑁂 𑀦𑀺𑀧𑀸𑀢𑁄, 𑀲𑁄 ‘‘𑀫𑀫𑀸’’𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄 ‘‘𑀫𑀫 𑀦𑀽’’𑀢𑀺. 𑀇𑀤𑀁 𑀇𑀲𑁆𑀲𑀭𑀺𑀬𑀦𑁆𑀢𑀺 𑀕𑁂𑀳𑁂 𑀆𑀥𑀺𑀧𑀘𑁆𑀘𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁄 𑀘𑀼𑀢𑀸𑀢𑀺 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀸. 𑀬𑀲𑁆𑀫𑀸 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀕𑀢𑀸𑀧𑀺 ‘‘𑀘𑀼𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀘𑀼𑀢𑀺𑀁 𑀯𑀺𑀲𑁂𑀲𑁂𑀢𑀼𑀁 ‘‘𑀓𑀸𑀮𑀓𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀮𑀓𑀢𑀸𑀧𑀺 𑀘 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀸, 𑀅𑀧𑀺𑀘 𑀔𑁄 𑀤𑁂𑀯𑀢𑁆𑀢𑀁 𑀉𑀧𑀕𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑀻 𑀆𑀳 ‘‘𑀅𑀫𑁆𑀳𑀺 𑀤𑁂𑀯𑀢𑀸’’𑀢𑀺.

𑁩𑁦𑁨. 𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸𑀢𑀺 𑀢𑀤𑁂𑀯 𑀉𑀘𑁆𑀙𑀼𑀔𑀡𑁆𑀟𑀤𑀸𑀦𑀫𑀢𑁆𑀢𑀁 𑀓𑀼𑀲𑀮𑀁 𑀓𑀫𑁆𑀫𑀁 𑀓𑀢𑀁 𑀫𑀬𑀸, 𑀅𑀜𑁆𑀜𑀁 𑀦 𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀼𑀔𑀜𑁆𑀘 𑀓𑀫𑁆𑀫𑀦𑁆𑀢𑀺 𑀲𑀼𑀔𑀜𑁆𑀘 𑀓𑀫𑁆𑀫𑀨𑀮𑀁. 𑀓𑀫𑁆𑀫𑀨𑀮𑀜𑁆𑀳𑀺 𑀇𑀥 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀓𑀸𑀭𑀡𑁄𑀧𑀘𑀸𑀭𑁂𑀦 𑀯𑀸 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺 (𑀤𑀻. 𑀦𑀺. 𑁩.𑁮𑁦). 𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜’’𑀦𑁆𑀢𑀺 (𑀯𑀺. 𑀯. 𑁧𑁩𑁩) 𑀘 𑀆𑀤𑀻𑀲𑀼 𑀯𑀺𑀬. 𑀓𑀫𑁆𑀫𑀦𑁆𑀢𑀺 𑀯𑀸 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑁂 𑀯𑀸 𑀪𑀯𑀁 𑀓𑀫𑁆𑀫𑀁 𑀬𑀣𑀸 𑀓𑀫𑁆𑀫𑀦𑁆𑀢𑀺. 𑀅𑀣 𑀯𑀸 𑀓𑀸𑀫𑁂𑀢𑀩𑁆𑀩𑀢𑀸𑀬 𑀓𑀫𑁆𑀫𑀁. 𑀢𑀜𑁆𑀳𑀺 𑀲𑀼𑀔𑀭𑀚𑀦𑀻𑀬𑀪𑀸𑀯𑀢𑁄 𑀓𑀸𑀫𑀽𑀧𑀲𑀁𑀳𑀺𑀢𑀁 𑀓𑀸𑀫𑁂𑀢𑀩𑁆𑀩𑀦𑁆𑀢𑀺 𑀓𑀫𑀦𑀻𑀬𑀁. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀦𑀸 𑀏𑀯, 𑀲𑀬𑀁𑀯𑀲𑀺𑀢𑀸𑀬 𑀲𑁂𑀭𑀺𑀪𑀸𑀯𑁂𑀦 𑀲𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀘𑀸𑀭𑀬𑀸𑀫𑀳𑀁 𑀅𑀢𑁆𑀢𑀸𑀦𑀦𑁆𑀢𑀺 𑀧𑀼𑀭𑀺𑀫𑀕𑀸𑀣𑀸𑀬 ‘‘𑀅𑀢𑁆𑀢𑀦𑀸’’𑀢𑀺 𑀯𑀼𑀢𑁆𑀢𑀁 𑀧𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 ‘‘𑀅𑀢𑁆𑀢𑀸𑀦’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁩𑁦𑁩-𑁫. 𑀤𑁂𑀯𑀺𑀦𑁆𑀤𑀕𑀼𑀢𑁆𑀢𑀸𑀢𑀺 𑀤𑁂𑀯𑀺𑀦𑁆𑀤𑁂𑀦 𑀲𑀓𑁆𑀓𑁂𑀦 𑀕𑀼𑀢𑁆𑀢𑀸, 𑀤𑁂𑀯𑀺𑀦𑁆𑀤𑁄 𑀯𑀺𑀬 𑀯𑀸 𑀕𑀼𑀢𑁆𑀢𑀸 𑀫𑀳𑀸𑀧𑀭𑀺𑀯𑀸𑀭𑀢𑀸𑀬. 𑀲𑀫𑀧𑁆𑀧𑀺𑀢𑀸𑀢𑀺 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀸 𑀲𑀫𑀦𑁆𑀦𑀸𑀕𑀢𑀸. 𑀫𑀳𑀸𑀯𑀺𑀧𑀸𑀓𑀸𑀢𑀺 𑀯𑀺𑀧𑀼𑀮𑀨𑀮𑀸. 𑀫𑀳𑀸𑀚𑀼𑀢𑀺𑀓𑀸𑀢𑀺 𑀫𑀳𑀸𑀢𑁂𑀚𑀸, 𑀫𑀳𑀸𑀦𑀼𑀪𑀸𑀯𑀸𑀢𑀺 𑀅𑀢𑁆𑀣𑁄.

𑁩𑁦𑁬. 𑀢𑀼𑀯𑀦𑁆𑀢𑀺 𑀢𑀁. 𑀅𑀦𑀼𑀓𑀫𑁆𑀧𑀓𑀦𑁆𑀢𑀺 𑀓𑀸𑀭𑀼𑀡𑀺𑀓𑀁. 𑀯𑀺𑀤𑀼𑀦𑁆𑀢𑀺 𑀲𑀧𑁆𑀧𑀜𑁆𑀜𑀁, 𑀲𑀸𑀯𑀓𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀯𑀦𑁆𑀤𑀺𑀦𑁆𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀅𑀪𑀺𑀯𑀸𑀤𑀬𑀺𑀁. 𑀓𑀼𑀲𑀮𑀜𑁆𑀘 𑀆𑀭𑁄𑀕𑁆𑀬 𑀧𑀼𑀘𑁆𑀙𑀺𑀲𑀁 𑀅𑀧𑀼𑀘𑁆𑀙𑀺𑀁, 𑀅𑀢𑀼𑀮𑀸𑀬 𑀧𑀻𑀢𑀺𑀬𑀸 𑀇𑀤𑀜𑁆𑀘 𑀓𑀼𑀲𑀮𑀁 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀉𑀘𑁆𑀙𑀼𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀮𑁆𑀮𑀗𑁆𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂 𑀫𑀡𑀺𑀲𑁄𑀡𑁆𑀡𑀘𑀺𑀢𑁆𑀢𑁂𑀢𑀺 𑀧𑀮𑁆𑀮𑀗𑁆𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀥𑀻𑀢𑀸 𑀓𑀼𑀮𑀧𑀤𑁂𑀲𑀸𑀤𑀺𑀦𑀸 𑀲𑀤𑀺𑀲𑀲𑁆𑀲 𑀢𑀢𑁆𑀣𑁂𑀯 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀦𑁆𑀦𑀸, 𑀲𑀸 𑀘 𑀳𑁄𑀢𑀺 𑀅𑀓𑁆𑀓𑁄𑀥𑀦𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀧𑀢𑀺𑀤𑁂𑀯𑀢𑀸 𑀲𑀫𑀸𑀤𑀺𑀦𑁆𑀦𑀧𑀜𑁆𑀘𑀲𑀻𑀮𑀸, 𑀉𑀧𑁄𑀲𑀣𑁂 𑀲𑀓𑁆𑀓𑀘𑁆𑀘𑀁 𑀉𑀧𑁄𑀲𑀣𑀲𑀻𑀮𑀸𑀦𑀺 𑀘 𑀭𑀓𑁆𑀔𑀢𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑁋

𑁩𑁦𑁭.

‘‘𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂 𑀫𑀡𑀺𑀲𑁄𑀡𑁆𑀡𑀘𑀺𑀢𑁆𑀢𑁂, 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑁂 𑀲𑀬𑀦𑁂 𑀉𑀴𑀸𑀭𑁂;

𑀢𑀢𑁆𑀣𑀘𑁆𑀙𑀲𑀺 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀉𑀘𑁆𑀘𑀸𑀯𑀘𑀸 𑀇𑀤𑁆𑀥𑀺 𑀯𑀺𑀓𑀼𑀩𑁆𑀩𑀫𑀸𑀦𑀸.

𑁩𑁦𑁮.

‘‘𑀇𑀫𑀸 𑀘 𑀢𑁂 𑀅𑀘𑁆𑀙𑀭𑀸𑀬𑁄 𑀲𑀫𑀦𑁆𑀢𑀢𑁄, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺;

𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸𑀲𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀕𑀸𑀣𑀸𑀳𑀺 𑀧𑀼𑀘𑁆𑀙𑀺.

𑀲𑀸𑀧𑀺𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁩𑁦𑁯.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀟𑁆𑀠𑁂 𑀓𑀼𑀮𑁂 𑀲𑀼𑀡𑀺𑀲𑀸 𑀅𑀳𑁄𑀲𑀺𑀁;

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻, 𑀉𑀧𑁄𑀲𑀣𑁂 𑀅𑀧𑁆𑀧𑀫𑀢𑁆𑀢𑀸 𑀅𑀳𑁄𑀲𑀺𑀁.

𑁩𑁧𑁦.

‘‘𑀫𑀦𑀼𑀲𑁆𑀲𑀪𑀽𑀢𑀸 𑀤𑀳𑀭𑀸 𑀅𑀧𑀸𑀧𑀺𑀓𑀸, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀢𑀺𑀫𑀸𑀪𑀺𑀭𑀸𑀥𑀬𑀺𑀁;

𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀫𑀦𑀸𑀧𑀘𑀸𑀭𑀺𑀦𑀻, 𑀅𑀳𑀁 𑀧𑀼𑀭𑁂 𑀲𑀻𑀮𑀯𑀢𑀻 𑀅𑀳𑁄𑀲𑀺𑀁.

𑁩𑁧𑁧.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸 𑀅𑀘𑁄𑀭𑀺𑀓𑀸, 𑀲𑀁𑀲𑀼𑀤𑁆𑀥𑀓𑀸𑀬𑀸 𑀲𑀼𑀘𑀺𑀩𑁆𑀭𑀳𑁆𑀫𑀘𑀸𑀭𑀺𑀦𑀻;

𑀅𑀫𑀚𑁆𑀚𑀧𑀸 𑀦𑁄 𑀘 𑀫𑀼𑀲𑀸 𑀅𑀪𑀸𑀡𑀺𑀁, 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻.

𑁩𑁧𑁨.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀧𑀲𑀦𑁆𑀦𑀫𑀸𑀦𑀲𑀸 𑀅𑀳𑀁.

𑁩𑁧𑁩.

‘‘𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀻, 𑀉𑀧𑁄𑀲𑀣𑀁 𑀧𑀻𑀢𑀺𑀫𑀦𑀸 𑀉𑀧𑀸𑀯𑀲𑀺𑀁;

𑀇𑀫𑀜𑁆𑀘 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀯𑀭𑁂𑀳𑀼𑀧𑁂𑀢𑀁, 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀼𑀲𑀮𑀁 𑀲𑀼𑀔𑀼𑀤𑁆𑀭𑀬𑀁;

𑀧𑀢𑀺𑀫𑁆𑀳𑀺 𑀓𑀮𑁆𑀬𑀸𑀡𑀻 𑀯𑀲𑀸𑀦𑀼𑀯𑀢𑁆𑀢𑀺𑀦𑀻, 𑀅𑀳𑁄𑀲𑀺𑀁 𑀧𑀼𑀩𑁆𑀩𑁂 𑀲𑀼𑀕𑀢𑀲𑁆𑀲 𑀲𑀸𑀯𑀺𑀓𑀸.

𑁩𑁧𑁪.

‘‘𑀏𑀢𑀸𑀤𑀺𑀲𑀁 𑀓𑀼𑀲𑀮𑀁 𑀚𑀻𑀯𑀮𑁄𑀓𑁂, 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦 𑀯𑀺𑀲𑁂𑀲𑀪𑀸𑀕𑀺𑀦𑀻;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸 𑀲𑀼𑀕𑀢𑀺𑀫𑁆𑀳𑀺 𑀆𑀕𑀢𑀸.

𑁩𑁧𑁫.

‘‘𑀯𑀺𑀫𑀸𑀦𑀧𑀸𑀲𑀸𑀤𑀯𑀭𑁂 𑀫𑀦𑁄𑀭𑀫𑁂, 𑀧𑀭𑀺𑀯𑀸𑀭𑀺𑀢𑀸 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦;

𑀲𑀬𑀁𑀧𑀪𑀸 𑀤𑁂𑀯𑀕𑀡𑀸 𑀭𑀫𑁂𑀦𑁆𑀢𑀺 𑀫𑀁, 𑀤𑀻𑀖𑀸𑀬𑀼𑀓𑀺𑀁 𑀤𑁂𑀯𑀯𑀺𑀫𑀸𑀦𑀫𑀸𑀕𑀢’’𑀦𑁆𑀢𑀺.

𑁩𑁦𑁭. 𑀢𑀢𑁆𑀣 𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂𑀢𑀺 𑀧𑀮𑁆𑀮𑀗𑁆𑀓𑀯𑀭𑁂 𑀉𑀢𑁆𑀢𑀫𑀧𑀮𑁆𑀮𑀗𑁆𑀓𑁂. 𑀢𑀁𑀬𑁂𑀯𑀲𑁆𑀲 𑀲𑁂𑀝𑁆𑀞𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀡𑀺𑀲𑁄𑀡𑁆𑀡𑀘𑀺𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁, 𑀯𑀺𑀯𑀺𑀥𑀭𑀢𑀦𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑁂𑀳𑀺 𑀫𑀡𑀻𑀳𑀺 𑀘𑁂𑀯 𑀲𑀼𑀯𑀡𑁆𑀡𑁂𑀦 𑀘 𑀯𑀺𑀘𑀺𑀢𑁆𑀢𑁂 ‘‘𑀢𑀢𑁆𑀣𑀸’’𑀢𑀺 ‘‘𑀲𑀬𑀦𑁂’’𑀢𑀺 𑀘 𑀯𑀼𑀢𑁆𑀢𑁂 𑀲𑀬𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑁂 𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂.

𑁩𑁦𑁮. 𑀢𑁂𑀢𑀺 𑀢𑀼𑀬𑁆𑀳𑀁 𑀲𑀫𑀦𑁆𑀢𑀢𑁄. ‘‘𑀧𑀫𑁄𑀤𑀬𑀦𑁆𑀢𑀻’’𑀢𑀺 𑀧𑀤𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀢’’𑀦𑁆𑀢𑀺 𑀯𑀺𑀪𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀸. 𑀧𑀫𑁄𑀤𑀬𑀦𑁆𑀢𑀻𑀢𑀺 𑀯𑀸 𑀧𑀫𑁄𑀤𑀦𑀁 𑀓𑀭𑁄𑀦𑁆𑀢𑀺, 𑀧𑀫𑁄𑀤𑀦𑀁 𑀢𑀼𑀬𑁆𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁦. 𑀤𑀳𑀭𑀸 𑀅𑀧𑀸𑀧𑀺𑀓𑀸𑀢𑀺 𑀤𑀳𑀭𑀸𑀧𑀺 𑀅𑀧𑀸𑀧𑀺𑀓𑀸. ‘‘𑀤𑀳𑀭𑀸𑀲𑀼 𑀧𑀸𑀧𑀺𑀓𑀸’’𑀢𑀺 𑀯𑀸 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. ‘‘𑀤𑀳𑀭𑀲𑁆𑀲𑀸𑀧𑀸𑀧𑀺𑀓𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀤𑀳𑀭𑀲𑁆𑀲 𑀲𑀸𑀫𑀺𑀓𑀲𑁆𑀲 𑀅𑀧𑀸𑀧𑀺𑀓𑀸, 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀦𑁂𑀦 𑀅𑀦𑀢𑀺𑀘𑀭𑀺𑀬𑀸𑀬 𑀘 𑀪𑀤𑁆𑀤𑀺𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀲𑀦𑁆𑀦𑀘𑀺𑀢𑁆𑀢𑀸’’𑀢𑀺𑀆𑀤𑀺. 𑀅𑀪𑀺𑀭𑀸𑀥𑀬𑀺𑀦𑁆𑀢𑀺 𑀆𑀭𑀸𑀥𑁂𑀲𑀺𑀁. 𑀭𑀢𑁆𑀢𑁄𑀢𑀺 𑀭𑀢𑁆𑀢𑀺𑀬𑀁.

𑁩𑁧𑁧. 𑀅𑀘𑁄𑀭𑀺𑀓𑀸𑀢𑀺 𑀘𑁄𑀭𑀺𑀬𑀭𑀳𑀺𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀭𑀢𑀸 𑀘 𑀘𑁄𑀭𑀺𑀬𑀸’’𑀢𑀺𑀧𑀺 𑀧𑀸𑀞𑁄, 𑀣𑁂𑀬𑁆𑀬𑀢𑁄 𑀘 𑀯𑀺𑀭𑀢𑀸𑀢𑀺 𑀅𑀢𑁆𑀣𑁄. 𑀲𑀁𑀲𑀼𑀤𑁆𑀥𑀓𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀢𑀸𑀬 𑀲𑀫𑁆𑀫𑀤𑁂𑀯 𑀲𑀼𑀤𑁆𑀥𑀓𑀸𑀬𑀸, 𑀢𑀢𑁄 𑀏𑀯 𑀲𑀼𑀘𑀺𑀩𑁆𑀭𑀳𑁆𑀫𑀘𑀸𑀭𑀺𑀦𑀻 𑀲𑀸𑀫𑀺𑀓𑀢𑁄 𑀅𑀜𑁆𑀜𑀢𑁆𑀣 𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀫𑀬𑀜𑁆𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫,

𑀅𑀫𑁆𑀳𑁂𑀧𑀺 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫,

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦𑀺 𑀫𑀺𑀬𑁆𑀬𑀭𑁂’’𑀢𑀺. (𑀚𑀸. 𑁧.𑁧𑁦.𑁯𑁭);

𑀅𑀣 𑀯𑀸 𑀲𑀼𑀘𑀺𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀢𑀺 𑀲𑀼𑀘𑀺𑀦𑁄 𑀲𑀼𑀤𑁆𑀥𑀲𑁆𑀲 𑀩𑁆𑀭𑀳𑁆𑀫𑀲𑁆𑀲 𑀲𑁂𑀝𑁆𑀞𑀲𑁆𑀲 𑀉𑀧𑁄𑀲𑀣𑀲𑀻𑀮𑀲𑁆𑀲, 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀸 𑀅𑀦𑀼𑀭𑀽𑀧𑀲𑁆𑀲 𑀧𑀼𑀩𑁆𑀩𑀪𑀸𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀲𑁂𑀦 𑀲𑀼𑀘𑀺𑀩𑁆𑀭𑀳𑁆𑀫𑀘𑀸𑀭𑀺𑀦𑀻.

𑁩𑁧𑁩. 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀻𑀢𑀺 𑀅𑀭𑀺𑀬𑀸𑀦𑀁 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀁 𑀘𑀭𑀡𑀲𑀻𑀮𑀸. 𑀇𑀫𑀜𑁆𑀘 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀁 𑀦𑀺𑀤𑁆𑀤𑁄𑀲𑀢𑀸𑀬 𑀅𑀭𑀺𑀬𑀁, 𑀅𑀝𑁆𑀞𑀗𑁆𑀕𑀯𑀭𑁂𑀳𑀺 𑀅𑀝𑁆𑀞𑀳𑀺 𑀉𑀢𑁆𑀢𑀫𑀗𑁆𑀕𑁂𑀳𑀺 𑀅𑀭𑀺𑀬𑀢𑁆𑀢𑀸 𑀏𑀯 𑀯𑀸 𑀅𑀭𑀺𑀬𑀝𑁆𑀞𑀗𑁆𑀕𑀯𑀭𑁂𑀳𑀺 𑀉𑀧𑁂𑀢𑀁 𑀆𑀭𑁄𑀕𑁆𑀬𑀝𑁆𑀞𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀘 𑀓𑀼𑀲𑀮𑀁 𑀲𑀼𑀔𑀯𑀺𑀧𑀸𑀓𑀢𑀸𑀬 𑀲𑀼𑀔𑀸𑀦𑀺𑀲𑀁𑀲𑀢𑀸𑀬 𑀘 𑀲𑀼𑀔𑀼𑀤𑁆𑀭𑀬𑀁 𑀉𑀧𑀸𑀯𑀲𑀺𑀦𑁆𑀢𑀺 𑀬𑁄𑀚𑀦𑀸.

𑁩𑁧𑁪. 𑀯𑀺𑀲𑁂𑀲𑀪𑀸𑀕𑀺𑀦𑀻𑀢𑀺 𑀯𑀺𑀲𑁂𑀲𑀲𑁆𑀲 𑀤𑀺𑀩𑁆𑀩𑀲𑁆𑀲 𑀲𑀫𑁆𑀧𑀢𑁆𑀢𑀺𑀪𑀯𑀲𑁆𑀲 𑀪𑀸𑀕𑀺𑀦𑀻. 𑀲𑀼𑀕𑀢𑀺𑀫𑁆𑀳𑀺 𑀆𑀕𑀢𑀸𑀢𑀺 𑀲𑀼𑀕𑀢𑀺𑀁 𑀆𑀕𑀢𑀸 𑀉𑀧𑀕𑀢𑀸, 𑀲𑀼𑀕𑀢𑀺𑀫𑁆𑀳𑀺 𑀯𑀸 𑀲𑀼𑀕𑀢𑀺𑀬𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀁 𑀆𑀕𑀢𑀸. ‘‘𑀲𑀼𑀕𑀢𑀺𑀜𑁆𑀳𑀺 𑀆𑀕𑀢𑀸’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀳𑁂𑀢𑀼𑀅𑀢𑁆𑀣𑁄 𑀯𑀸, 𑀬𑀲𑁆𑀫𑀸 𑀲𑀼𑀕𑀢𑀺𑀁 𑀆𑀕𑀢𑀸, 𑀢𑀲𑁆𑀫𑀸 𑀯𑀺𑀲𑁂𑀲𑀪𑀸𑀕𑀺𑀦𑀻𑀢𑀺 𑀬𑁄𑀚𑀦𑀸.

𑁩𑁧𑁫. 𑀯𑀺𑀫𑀸𑀦𑀧𑀸𑀲𑀸𑀤𑀯𑀭𑁂𑀢𑀺 𑀯𑀺𑀫𑀸𑀦𑁂𑀲𑀼 𑀉𑀢𑁆𑀢𑀫𑀧𑀸𑀲𑀸𑀤𑁂, 𑀯𑀺𑀫𑀸𑀦𑀲𑀗𑁆𑀔𑀸𑀢𑁂 𑀯𑀸 𑀅𑀕𑁆𑀕𑀧𑀸𑀲𑀸𑀤𑁂, 𑀯𑀺𑀫𑀸𑀦𑁂 𑀯𑀸 𑀯𑀺𑀕𑀢𑀫𑀸𑀦𑁂 𑀅𑀧𑁆𑀧𑀫𑀸𑀡𑁂 𑀫𑀳𑀦𑁆𑀢𑁂 𑀯𑀭𑀧𑀸𑀲𑀸𑀤𑁂 𑀧𑀭𑀺𑀯𑀸𑀭𑀺𑀢𑀸 𑀅𑀘𑁆𑀙𑀭𑀸𑀲𑀗𑁆𑀕𑀡𑁂𑀦 𑀲𑀬𑀁𑀧𑀪𑀸 𑀧𑀫𑁄𑀤𑀸𑀫𑀺, ‘‘𑀅𑀫𑁆𑀳𑀻’’𑀢𑀺 𑀯𑀸 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀤𑀻𑀖𑀸𑀬𑀼𑀓𑀺𑀦𑁆𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀤𑁂𑀯𑁂𑀳𑀺 𑀤𑀻𑀖𑀢𑀭𑀸𑀬𑀼𑀓𑀢𑀸𑀬 𑀢𑀢𑁆𑀭𑀽𑀧𑀧𑀦𑁆𑀦𑁂𑀳𑀺 𑀅𑀦𑀧𑁆𑀧𑀸𑀬𑀼𑀓𑀢𑀸𑀬 𑀘 𑀤𑀻𑀖𑀸𑀬𑀼𑀓𑀺𑀁 𑀫𑀁 𑀬𑀣𑀸𑀯𑀼𑀢𑁆𑀢𑀁 𑀤𑁂𑀯𑀯𑀺𑀫𑀸𑀦𑀫𑀸𑀕𑀢𑀁 𑀉𑀧𑀕𑀢𑀁 𑀤𑁂𑀯𑀕𑀡𑀸 𑀭𑀫𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀮𑁆𑀮𑀗𑁆𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀮𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀮𑀢𑀸 𑀘 𑀲𑀚𑁆𑀚𑀸 𑀧𑀯𑀭𑀸 𑀘 𑀤𑁂𑀯𑀢𑀸𑀢𑀺 𑀮𑀢𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀥𑀻𑀢𑀸 𑀮𑀢𑀸 𑀦𑀸𑀫 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑀻 𑀧𑀢𑀺𑀓𑀼𑀮𑀁 𑀕𑀢𑀸 𑀪𑀢𑁆𑀢𑀼 𑀲𑀲𑁆𑀲𑀼𑀲𑀲𑀼𑀭𑀸𑀦𑀜𑁆𑀘 𑀫𑀦𑀸𑀧𑀘𑀸𑀭𑀺𑀦𑀻 𑀧𑀺𑀬𑀯𑀸𑀤𑀺𑀦𑀻 𑀧𑀭𑀺𑀚𑀦𑀲𑁆𑀲 𑀲𑀗𑁆𑀕𑀳𑀓𑀼𑀲𑀮𑀸 𑀕𑁂𑀳𑁂 𑀓𑀼𑀝𑀼𑀫𑁆𑀩𑀪𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑀸 𑀅𑀓𑁆𑀓𑁄𑀥𑀦𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸 𑀉𑀧𑁄𑀲𑀣𑀭𑀓𑁆𑀔𑀡𑁂 𑀘 𑀅𑀧𑁆𑀧𑀫𑀢𑁆𑀢𑀸 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀮𑀢𑀸𑀢𑁆𑀯𑁂𑀯 𑀦𑀸𑀫𑁂𑀦. 𑀅𑀜𑁆𑀜𑀸𑀧𑀺 𑀢𑀲𑁆𑀲𑀸 𑀲𑀚𑁆𑀚𑀸, 𑀧𑀯𑀭𑀸, 𑀅𑀘𑁆𑀘𑀺𑀫𑀢𑀻, 𑀲𑀼𑀢𑀸𑀢𑀺 𑀘𑀢𑀲𑁆𑀲𑁄 𑀪𑀕𑀺𑀦𑀺𑀬𑁄 𑀅𑀳𑁂𑀲𑀼𑀁. 𑀢𑀸 𑀧𑀜𑁆𑀘𑀧𑀺 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀆𑀦𑁂𑀢𑁆𑀯𑀸 𑀦𑀸𑀝𑀓𑀺𑀢𑁆𑀣𑀺𑀪𑀸𑀯𑁂𑀦 𑀧𑀭𑀺𑀘𑀸𑀭𑀺𑀓𑀝𑁆𑀞𑀸𑀦𑁂 𑀞𑀧𑀺𑀢𑀸. 𑀮𑀢𑀸 𑀧𑀦𑀲𑁆𑀲 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀙𑁂𑀓𑀢𑀸𑀬 𑀇𑀝𑁆𑀞𑀢𑀭𑀸 𑀅𑀳𑁄𑀲𑀺.

𑀢𑀸𑀲𑀁 𑀏𑀓𑀢𑁄 𑀲𑀫𑀸𑀕𑀦𑁆𑀢𑁆𑀯𑀸 𑀲𑀼𑀔𑀦𑀺𑀲𑀚𑁆𑀚𑀸𑀬 𑀦𑀺𑀲𑀺𑀦𑁆𑀦𑀸𑀦𑀁 𑀲𑀗𑁆𑀕𑀻𑀢𑀦𑁂𑀧𑀼𑀜𑁆𑀜𑀁 𑀧𑀝𑀺𑀘𑁆𑀘 𑀯𑀺𑀯𑀸𑀤𑁄 𑀉𑀧𑁆𑀧𑀦𑁆𑀦𑁄. 𑀢𑀸 𑀲𑀩𑁆𑀩𑀸𑀧𑀺 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀢𑀸𑀢, 𑀓𑀢𑀫𑀸 𑀅𑀫𑁆𑀳𑀸𑀓𑀁 𑀦𑀘𑁆𑀘𑀸𑀤𑀻𑀲𑀼 𑀓𑀼𑀲𑀮𑀸’’𑀢𑀺? 𑀲𑁄 𑀏𑀯𑀫𑀸𑀳 ‘‘𑀕𑀘𑁆𑀙𑀣 𑀥𑀻𑀢𑀭𑁄 𑀅𑀦𑁄𑀢𑀢𑁆𑀢𑀤𑀳𑀢𑀻𑀭𑁂 𑀤𑁂𑀯𑀲𑀫𑀸𑀕𑀫𑁂 𑀲𑀗𑁆𑀕𑀻𑀢𑀁 𑀧𑀯𑀢𑁆𑀢𑁂𑀣, 𑀢𑀢𑁆𑀣 𑀯𑁄 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀸 𑀢𑀣𑀸 𑀅𑀓𑀁𑀲𑀼. 𑀢𑀢𑁆𑀣 𑀤𑁂𑀯𑀧𑀼𑀢𑁆𑀢𑀸 𑀮𑀢𑀸𑀬 𑀦𑀘𑁆𑀘𑀫𑀸𑀦𑀸𑀬 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀲𑀜𑁆𑀚𑀸𑀢𑀧𑀳𑀸𑀲𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀦𑀺𑀭𑀦𑁆𑀢𑀭𑀁 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑀸 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑁂 𑀘𑁂𑀮𑀼𑀓𑁆𑀔𑁂𑀧𑁂 𑀘 𑀧𑀯𑀢𑁆𑀢𑁂𑀦𑁆𑀢𑀸 𑀳𑀺𑀫𑀯𑀦𑁆𑀢𑀁 𑀓𑀫𑁆𑀧𑀬𑀫𑀸𑀦𑀸 𑀯𑀺𑀬 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀫𑀓𑀁𑀲𑀼. 𑀇𑀢𑀭𑀸𑀲𑀼 𑀧𑀦 𑀦𑀘𑁆𑀘𑀦𑁆𑀢𑀻𑀲𑀼 𑀲𑀺𑀲𑀺𑀭𑀓𑀸𑀮𑁂 𑀓𑁄𑀓𑀺𑀮𑀸 𑀯𑀺𑀬 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀏𑀯𑀁 𑀢𑀢𑁆𑀣 𑀲𑀗𑁆𑀕𑀻𑀢𑁂 𑀮𑀢𑀸𑀬 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀅𑀳𑁄𑀲𑀺.

𑀅𑀣 𑀢𑀸𑀲𑀁 𑀤𑁂𑀯𑀥𑀻𑀢𑀸𑀦𑀁 𑀲𑀼𑀢𑀸𑀬 𑀤𑁂𑀯𑀥𑀻𑀢𑀸𑀬 𑀏𑀢𑀤𑀳𑁄𑀲𑀺 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀬𑀁 𑀮𑀢𑀸 𑀅𑀫𑁆𑀳𑁂 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘, 𑀬𑀁𑀦𑀽𑀦𑀸𑀳𑀁 𑀮𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑀸 𑀢𑀁 𑀧𑀼𑀘𑁆𑀙𑀺. 𑀇𑀢𑀭𑀸𑀧𑀺 𑀢𑀲𑁆𑀲𑀸 𑀏𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀬𑀺𑀤𑀁 𑀲𑀩𑁆𑀩𑀁 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀸 𑀤𑁂𑀯𑀘𑀸𑀭𑀺𑀓𑀯𑀲𑁂𑀦 𑀉𑀧𑀕𑀢𑀲𑁆𑀲 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀢𑀫𑀢𑁆𑀣𑀁 𑀧𑀼𑀘𑁆𑀙𑀸𑀬 𑀫𑀽𑀮𑀓𑀸𑀭𑀡𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀆𑀭𑁄𑀘𑁂𑀦𑁆𑀢𑁄 𑁋

𑁩𑁧𑁬.

‘‘𑀮𑀢𑀸 𑀘 𑀲𑀚𑁆𑀚𑀸 𑀧𑀯𑀭𑀸 𑀘 𑀤𑁂𑀯𑀢𑀸, 𑀅𑀘𑁆𑀘𑀺𑀫𑀢𑀻 𑀭𑀸𑀚𑀯𑀭𑀲𑁆𑀲 𑀲𑀺𑀭𑀻𑀫𑀢𑁄;

𑀲𑀼𑀢𑀸 𑀘 𑀭𑀜𑁆𑀜𑁄 𑀯𑁂𑀲𑁆𑀲𑀯𑀡𑀲𑁆𑀲 𑀥𑀻𑀢𑀸, 𑀭𑀸𑀚𑀻𑀫𑀢𑀻 𑀥𑀫𑁆𑀫𑀕𑀼𑀡𑁂𑀳𑀺 𑀲𑁄𑀪𑀣.

𑁩𑁧𑁭.

‘‘𑀧𑀜𑁆𑀘𑁂𑀢𑁆𑀣 𑀦𑀸𑀭𑀺𑀬𑁄 𑀆𑀕𑀫𑀁𑀲𑀼 𑀦𑁆𑀳𑀸𑀬𑀺𑀢𑀼𑀁, 𑀲𑀻𑀢𑁄𑀤𑀓𑀁 𑀉𑀧𑁆𑀧𑀮𑀺𑀦𑀺𑀁 𑀲𑀺𑀯𑀁 𑀦𑀤𑀺𑀁;

𑀢𑀸 𑀢𑀢𑁆𑀣 𑀦𑁆𑀳𑀸𑀬𑀺𑀢𑁆𑀯𑀸 𑀭𑀫𑁂𑀢𑁆𑀯𑀸 𑀤𑁂𑀯𑀢𑀸, 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀲𑀼𑀢𑀸 𑀮𑀢𑀁 𑀩𑁆𑀭𑀯𑀺.

𑁩𑁧𑁮.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀉𑀧𑁆𑀧𑀮𑀫𑀸𑀮𑀥𑀸𑀭𑀺𑀦𑀺, 𑀆𑀯𑁂𑀴𑀺𑀦𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁂;

𑀢𑀺𑀫𑀺𑀭𑀢𑀫𑁆𑀩𑀓𑁆𑀔𑀺 𑀦𑀪𑁂𑀯 𑀲𑁄𑀪𑀦𑁂, 𑀤𑀻𑀖𑀸𑀬𑀼𑀓𑀻 𑀓𑁂𑀦 𑀓𑀢𑁄 𑀬𑀲𑁄 𑀢𑀯.

𑁩𑁧𑁯.

‘‘𑀓𑁂𑀦𑀸𑀲𑀺 𑀪𑀤𑁆𑀤𑁂 𑀧𑀢𑀺𑀦𑁄 𑀧𑀺𑀬𑀢𑀭𑀸, 𑀯𑀺𑀲𑀺𑀝𑁆𑀞𑀓𑀮𑁆𑀬𑀸𑀡𑀺𑀢𑀭𑀲𑁆𑀲𑀼 𑀭𑀽𑀧𑀢𑁄;

𑀧𑀤𑀓𑁆𑀔𑀺𑀡𑀸 𑀦𑀘𑁆𑀘𑀦𑀕𑀻𑀢𑀯𑀸𑀤𑀺𑀢𑁂, 𑀆𑀘𑀺𑀓𑁆𑀔 𑀦𑁄 𑀢𑁆𑀯𑀁 𑀦𑀭𑀦𑀸𑀭𑀺𑀧𑀼𑀘𑁆𑀙𑀺𑀢𑀸’’𑀢𑀺. 𑁋

𑀲𑀼𑀢𑀸𑀬 𑀧𑀼𑀘𑁆𑀙𑀸.

𑁩𑁨𑁦.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀉𑀴𑀸𑀭𑀪𑁄𑀕𑁂 𑀓𑀼𑀮𑁂 𑀲𑀼𑀡𑀺𑀲𑀸 𑀅𑀳𑁄𑀲𑀺𑀁;

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻, 𑀉𑀧𑁄𑀲𑀣𑁂 𑀅𑀧𑁆𑀧𑀫𑀢𑁆𑀢𑀸 𑀅𑀳𑁄𑀲𑀺𑀁.

𑁩𑁨𑁧.

‘‘𑀫𑀦𑀼𑀲𑁆𑀲𑀪𑀽𑀢𑀸 𑀤𑀳𑀭𑀸 𑀅𑀧𑀸𑀧𑀺𑀓𑀸, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀢𑀺𑀫𑀸𑀪𑀺𑀭𑀸𑀥𑀬𑀺𑀁;

𑀲𑀤𑁂𑀯𑀭𑀁 𑀲𑀲𑁆𑀲𑀲𑀼𑀭𑀁 𑀲𑀤𑀸𑀲𑀓𑀁, 𑀅𑀪𑀺𑀭𑀸𑀥𑀬𑀺𑀁 𑀢𑀫𑁆𑀳𑀺 𑀓𑀢𑁄 𑀬𑀲𑁄 𑀫𑀫.

𑁩𑁨𑁨.

‘‘𑀲𑀸𑀳𑀁 𑀢𑁂𑀦 𑀓𑀼𑀲𑀮𑁂𑀦 𑀓𑀫𑁆𑀫𑀼𑀦𑀸, 𑀘𑀢𑀼𑀩𑁆𑀪𑀺 𑀞𑀸𑀦𑁂𑀳𑀺 𑀯𑀺𑀲𑁂𑀲𑀫𑀚𑁆𑀛𑀕𑀸;

𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘, 𑀔𑀺𑀟𑁆𑀟𑀸𑀭𑀢𑀺𑀁 𑀧𑀘𑁆𑀘𑀦𑀼𑀪𑁄𑀫𑀦𑀧𑁆𑀧𑀓𑀁.

𑁩𑁨𑁩.

‘‘𑀲𑀼𑀢𑀁 𑀦𑀼 𑀢𑀁 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸, 𑀬𑀁 𑀦𑁄 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄;

𑀧𑀢𑀺𑀦𑁄 𑀓𑀺𑀭𑀫𑁆𑀳𑀸𑀓𑀁 𑀯𑀺𑀲𑀺𑀝𑁆𑀞 𑀦𑀸𑀭𑀻𑀦𑀁, 𑀕𑀢𑀻 𑀘 𑀢𑀸𑀲𑀁 𑀧𑀯𑀭𑀸 𑀘 𑀤𑁂𑀯𑀢𑀸.

𑁩𑁨𑁪.

‘‘𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀸𑀫 𑀲𑀩𑁆𑀩𑀸, 𑀧𑀢𑀺𑀩𑁆𑀩𑀢𑀸 𑀬𑀢𑁆𑀣 𑀪𑀯𑀦𑁆𑀢𑀺 𑀇𑀢𑁆𑀣𑀺𑀬𑁄;

𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀺𑀢𑁆𑀯𑀸 𑀲𑀩𑁆𑀩𑀸, 𑀮𑀘𑁆𑀙𑀸𑀫𑀲𑁂 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸.

𑁩𑁨𑁫.

‘‘𑀲𑀻𑀳𑁄 𑀬𑀣𑀸 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑁄, 𑀫𑀳𑀺𑀦𑁆𑀥𑀭𑀁 𑀧𑀩𑁆𑀩𑀢𑀫𑀸𑀯𑀲𑀺𑀢𑁆𑀯𑀸;

𑀧𑀲𑀬𑁆𑀳 𑀳𑀦𑁆𑀢𑁆𑀯𑀸 𑀇𑀢𑀭𑁂 𑀘𑀢𑀼𑀧𑁆𑀧𑀤𑁂, 𑀔𑀼𑀤𑁆𑀤𑁂 𑀫𑀺𑀕𑁂 𑀔𑀸𑀤𑀢𑀺 𑀫𑀁𑀲𑀪𑁄𑀚𑀦𑁄.

𑁩𑁨𑁬.

‘‘𑀢𑀣𑁂𑀯 𑀲𑀤𑁆𑀥𑀸 𑀇𑀥 𑀅𑀭𑀺𑀬𑀲𑀸𑀯𑀺𑀓𑀸, 𑀪𑀢𑁆𑀢𑀸𑀭𑀁 𑀦𑀺𑀲𑁆𑀲𑀸𑀬 𑀧𑀢𑀺𑀁 𑀅𑀦𑀼𑀩𑁆𑀩𑀢𑀸;

𑀓𑁄𑀥𑀁 𑀯𑀥𑀺𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀫𑀘𑁆𑀙𑀭𑀁, 𑀲𑀕𑁆𑀕𑀫𑁆𑀳𑀺 𑀲𑀸 𑀫𑁄𑀤𑀢𑀺 𑀥𑀫𑁆𑀫𑀘𑀸𑀭𑀺𑀦𑀻’’𑀢𑀺. 𑁋

𑀮𑀢𑀸𑀬 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀆𑀳.

𑁩𑁧𑁬. 𑀢𑀢𑁆𑀣 𑀮𑀢𑀸 𑀘 𑀲𑀚𑁆𑀚𑀸 𑀧𑀯𑀭𑀸 𑀅𑀘𑁆𑀘𑀺𑀫𑀢𑀻 𑀲𑀼𑀢𑀸𑀢𑀺 𑀢𑀸𑀲𑀁 𑀦𑀸𑀫𑀁. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀭𑀸𑀚𑀯𑀭𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀯𑀭𑀲𑁆𑀲 𑀲𑁂𑀝𑁆𑀞𑀲𑁆𑀲 𑀤𑁂𑀯𑀭𑀸𑀚𑀲𑁆𑀲. 𑀲𑀓𑁆𑀓𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀜𑁆𑀜𑁄𑀢𑀺 𑀫𑀳𑀸𑀭𑀸𑀚𑀲𑁆𑀲. 𑀢𑁂𑀦𑀸𑀳 ‘‘𑀯𑁂𑀲𑁆𑀲𑀯𑀡𑀲𑁆𑀲 𑀥𑀻𑀢𑀸’’𑀢𑀺, 𑀇𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁, 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀯𑀸, 𑀥𑀻𑀢𑀭𑁄𑀢𑀺 𑀅𑀢𑁆𑀣𑁄. 𑀭𑀸𑀚𑀢𑀺 𑀯𑀺𑀚𑁆𑀚𑁄𑀢𑀢𑀻𑀢𑀺 𑀭𑀸𑀚𑀻, 𑀭𑀸𑀚𑀻𑀢𑀺 𑀫𑀢𑀸 𑀧𑀜𑁆𑀜𑀸𑀢𑀸 𑀭𑀸𑀚𑀻𑀫𑀢𑀻, 𑀇𑀤𑀁 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀲𑁂𑀲𑀦𑀁. 𑀦𑀸𑀫𑀫𑁂𑀯 𑀏𑀢𑀁 𑀏𑀓𑀺𑀲𑁆𑀲𑀸 𑀤𑁂𑀯𑀢𑀸𑀬𑀸𑀢𑀺 𑀓𑁂𑀘𑀺, 𑀢𑁂𑀲𑀁 𑀫𑀢𑁂𑀦 ‘‘𑀧𑀯𑀭𑀸’’𑀢𑀺 𑀲𑀩𑁆𑀩𑀸𑀲𑀁 𑀯𑀺𑀲𑁂𑀲𑀦𑀫𑁂𑀯. 𑀥𑀫𑁆𑀫𑀕𑀼𑀡𑁂𑀳𑀻𑀢𑀺 𑀥𑀫𑁆𑀫𑀺𑀬𑁂𑀳𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀳𑀺 𑀕𑀼𑀡𑁂𑀳𑀺, 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀲𑁄𑀪𑀣𑀸𑀢𑀺 𑀯𑀺𑀭𑁄𑀘𑀣.

𑁩𑁧𑁭. 𑀧𑀜𑁆𑀘𑁂𑀢𑁆𑀣 𑀦𑀸𑀭𑀺𑀬𑁄𑀢𑀺 𑀧𑀜𑁆𑀘 𑀬𑀣𑀸𑀯𑀼𑀢𑁆𑀢𑀦𑀸𑀫𑀸 𑀤𑁂𑀯𑀥𑀻𑀢𑀭𑁄 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑀧𑀤𑁂𑀲𑁂. 𑀲𑀻𑀢𑁄𑀤𑀓𑀁 𑀉𑀧𑁆𑀧𑀮𑀺𑀦𑀺𑀁 𑀲𑀺𑀯𑀁 𑀦𑀤𑀺𑀦𑁆𑀢𑀺 𑀅𑀦𑁄𑀢𑀢𑁆𑀢𑀤𑀳𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀺𑀫𑀼𑀔𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸𑀢𑀺 𑀧𑀺𑀢𑀼 𑀯𑁂𑀲𑁆𑀲𑀯𑀡𑀲𑁆𑀲 𑀆𑀡𑀸𑀬 𑀤𑁂𑀯𑀲𑀫𑀸𑀕𑀫𑁂 𑀢𑀸𑀳𑀺 𑀓𑀢𑀲𑁆𑀲 𑀦𑀘𑁆𑀘𑀕𑀻𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀢𑀸 𑀮𑀢𑀁 𑀩𑁆𑀭𑀯𑀻𑀢𑀺 𑀲𑀼𑀢𑀸 𑀤𑁂𑀯𑀥𑀻𑀢𑀸 𑀮𑀢𑀁 𑀅𑀢𑁆𑀢𑀦𑁄 𑀪𑀕𑀺𑀦𑀺𑀁 𑀓𑀣𑁂𑀲𑀺. ‘‘𑀲𑀼𑀢𑀸 𑀮𑀢𑀁 𑀩𑁆𑀭𑀯𑀼’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀲𑀼𑀢𑀸 𑀥𑀻𑀢𑀭𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀮𑀢𑀁 𑀓𑀣𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁩𑁧𑁮. 𑀢𑀺𑀫𑀺𑀭𑀢𑀫𑁆𑀩𑀓𑁆𑀔𑀻𑀢𑀺 𑀦𑀺𑀘𑀼𑀮𑀓𑁂𑀲𑀭𑀪𑀸𑀲𑀲𑀤𑀺𑀲𑁂𑀳𑀺 𑀢𑀫𑁆𑀩𑀭𑀸𑀚𑀻𑀳𑀺 𑀲𑀫𑀦𑁆𑀦𑀸𑀕𑀢𑀓𑁆𑀔𑀺. 𑀦𑀪𑁂𑀯 𑀲𑁄𑀪𑀦𑁂𑀢𑀺 𑀦𑀪𑀁 𑀯𑀺𑀬 𑀲𑁄𑀪𑀫𑀸𑀦𑁂, 𑀲𑀭𑀤𑀲𑀫𑀬𑁂 𑀅𑀩𑁆𑀪𑀫𑀳𑀺𑀓𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀦𑀪𑀁 𑀯𑀺𑀬 𑀲𑀼𑀯𑀺𑀲𑀼𑀤𑁆𑀥𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀯𑀺𑀭𑀸𑀚𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀪𑁂𑀯𑀸𑀢𑀺 𑀦𑀪𑁂 𑀏𑀯, 𑀲𑀫𑀼𑀘𑁆𑀘𑀬𑀢𑁆𑀣𑁄 𑀏𑀯-𑀲𑀤𑁆𑀤𑁄, 𑀆𑀓𑀸𑀲𑀝𑁆𑀞𑀯𑀺𑀫𑀸𑀦𑁂𑀲𑀼 𑀳𑀺𑀫𑀯𑀦𑁆𑀢𑀬𑀼𑀕𑀦𑁆𑀥𑀭𑀸𑀤𑀺𑀪𑀽𑀫𑀺𑀧𑀝𑀺𑀩𑀤𑁆𑀥𑀝𑁆𑀞𑀸𑀦𑁂𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣𑁂𑀯 𑀲𑁄𑀪𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀓𑁂𑀦 𑀓𑀢𑁄𑀢𑀺 𑀓𑁂𑀦 𑀓𑀻𑀤𑀺𑀲𑁂𑀦 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄. 𑀬𑀲𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄 𑀘. 𑀓𑀺𑀢𑁆𑀢𑀺𑀲𑀤𑁆𑀤𑀕𑁆𑀕𑀳𑀡𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑀳𑁂𑀢𑀼𑀪𑀽𑀢𑀸 𑀕𑀼𑀡𑀸 𑀕𑀬𑁆𑀳𑀦𑁆𑀢𑀺.

𑁩𑁧𑁯. 𑀧𑀢𑀺𑀦𑁄 𑀧𑀺𑀬𑀢𑀭𑀸𑀢𑀺 𑀲𑀸𑀫𑀺𑀦𑁄 𑀧𑀺𑀬𑀢𑀭𑀸 𑀲𑀸𑀫𑀺𑀯𑀮𑁆𑀮𑀪𑀸. 𑀢𑁂𑀦𑀲𑁆𑀲𑀸 𑀲𑀼𑀪𑀕𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀺𑀝𑁆𑀞𑀓𑀮𑁆𑀬𑀸𑀡𑀺𑀢𑀭𑀲𑁆𑀲𑀽 𑀭𑀽𑀧𑀢𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀲𑀺𑀝𑁆𑀞𑀸 𑀉𑀢𑁆𑀢𑀫𑀸 𑀓𑀮𑁆𑀬𑀸𑀡𑀺𑀢𑀭𑀸 𑀲𑀼𑀦𑁆𑀤𑀭𑀢𑀭𑀸, 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀯𑀺𑀲𑀺𑀝𑁆𑀞𑀓𑀮𑁆𑀬𑀸𑀡𑀺𑀢𑀭𑀸𑀲𑀺 𑀭𑀽𑀧𑀢𑁄’’𑀢𑀺 𑀘 𑀧𑀞𑀦𑁆𑀢𑀺. 𑀧𑀤𑀓𑁆𑀔𑀺𑀡𑀸𑀢𑀺 𑀧𑀓𑀸𑀭𑁂𑀳𑀺, 𑀯𑀺𑀲𑁂𑀲𑁂𑀦 𑀯𑀸 𑀤𑀓𑁆𑀔𑀺𑀡𑀸 𑀓𑀼𑀲𑀮𑀸. 𑀦𑀘𑁆𑀘𑀦𑀕𑀻𑀢𑀯𑀸𑀤𑀺𑀢𑁂𑀢𑀺 𑀏𑀢𑁆𑀣 𑀦𑀘𑁆𑀘𑀦𑀸𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄 𑀓𑀢𑁄, 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘𑀸𑀢𑀺 𑀅𑀢𑁆𑀣𑁄. 𑀦𑀭𑀦𑀸𑀭𑀺𑀧𑀼𑀘𑁆𑀙𑀺𑀢𑀸𑀢𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀤𑁂𑀯𑀥𑀻𑀢𑀸𑀳𑀺 𑀘 ‘‘𑀓𑀳𑀁 𑀮𑀢𑀸, 𑀓𑀺𑀁 𑀓𑀭𑁄𑀢𑀺 𑀮𑀢𑀸’’𑀢𑀺 𑀭𑀽𑀧𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀺𑀧𑁆𑀧𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀼𑀘𑁆𑀙𑀺𑀢𑀸.

𑁩𑁨𑁧. 𑀦𑀺𑀘𑁆𑀘𑀁 𑀓𑀸𑀬𑁂𑀦 𑀅𑀲𑀁𑀲𑀝𑁆𑀞𑀢𑀸𑀬 𑀤𑁂𑀯𑁄 𑀯𑀺𑀬 𑀭𑀫𑁂𑀢𑀺, 𑀤𑀼𑀢𑀺𑀬𑁄 𑀯𑀭𑁄𑀢𑀺 𑀯𑀸 𑀤𑁂𑀯𑀭𑁄, 𑀪𑀢𑁆𑀢𑀼 𑀓𑀦𑀺𑀝𑁆𑀞𑀪𑀸𑀢𑀸, 𑀲𑀳 𑀤𑁂𑀯𑀭𑁂𑀦𑀸𑀢𑀺 𑀲𑀤𑁂𑀯𑀭𑀁. 𑀲𑀲𑁆𑀲𑀼 𑀘 𑀲𑀲𑀼𑀭𑁄 𑀘 𑀲𑀲𑀼𑀭𑀸, 𑀲𑀳 𑀲𑀲𑀼𑀭𑁂𑀳𑀻𑀢𑀺 𑀲𑀲𑁆𑀲𑀲𑀼𑀭𑀁. 𑀲𑀳 𑀤𑀸𑀲𑁂𑀳𑀺 𑀤𑀸𑀲𑀻𑀳𑀺 𑀘𑀸𑀢𑀺 𑀲𑀤𑀸𑀲𑀓𑀁 𑀧𑀢𑀺𑀫𑀸𑀪𑀺𑀭𑀸𑀥𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀳𑀺 𑀓𑀢𑁄𑀢𑀺 𑀢𑀫𑁆𑀳𑀺 𑀓𑀼𑀮𑁂, 𑀓𑀸𑀮𑁂 𑀯𑀸 𑀲𑀼𑀡𑀺𑀲𑀸𑀓𑀸𑀮𑁂 𑀓𑀢𑁄 𑀬𑀲𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀧𑀼𑀜𑁆𑀜𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀫𑀸𑀢𑀺 𑀇𑀤𑀁 ‘‘𑀓𑀢𑁄’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀫𑀬𑀸’’𑀢𑀺 𑀧𑀭𑀺𑀡𑀸𑀫𑁂𑀢𑀩𑁆𑀩𑀁.

𑁩𑁨𑁨. 𑀘𑀢𑀼𑀩𑁆𑀪𑀺 𑀞𑀸𑀦𑁂𑀳𑀻𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺, 𑀘𑀢𑀽𑀲𑀼 𑀯𑀸 𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼. 𑀯𑀺𑀲𑁂𑀲𑀫𑀚𑁆𑀛𑀕𑀸𑀢𑀺 𑀅𑀜𑁆𑀜𑀸𑀳𑀺 𑀅𑀢𑀺𑀲𑀬𑀁 𑀅𑀥𑀺𑀕𑀢𑀸. 𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘𑀸𑀢𑀺 ‘‘𑀘𑀢𑀽𑀳𑀺 𑀞𑀸𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁. 𑀆𑀬𑀼𑀆𑀤𑀬𑁄 𑀏𑀯 𑀳𑀺𑀲𑁆𑀲𑀸 𑀅𑀜𑁆𑀜𑀸𑀳𑀺 𑀯𑀺𑀲𑀺𑀝𑁆𑀞𑀲𑀪𑀸𑀯𑀢𑀸𑀬 𑀯𑀺𑀲𑁂𑀲𑀸 𑀢𑀲𑁆𑀲𑀸 𑀢𑀣𑀸 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀳𑁂𑀢𑀼𑀪𑀸𑀯𑀢𑁄 ‘‘𑀞𑀸𑀦’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀫𑀚𑁆𑀛𑀕𑀸. 𑀓𑀻𑀤𑀺𑀲𑀁? 𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀜𑁆𑀘 𑀩𑀮𑀜𑁆𑀘𑀸𑀢𑀺 𑀬𑁄𑀚𑀦𑀸.

𑁩𑁨𑁩. 𑀲𑀼𑀢𑀁 𑀦𑀼 𑀢𑀁 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸𑀢𑀺 𑀅𑀬𑀁 𑀮𑀢𑀸 𑀅𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀕𑀺𑀦𑀻 𑀬𑀁 𑀪𑀸𑀲𑀢𑀺, 𑀢𑀁 𑀢𑀼𑀫𑁆𑀳𑁂𑀳𑀺 𑀲𑀼𑀢𑀁 𑀦𑀼 𑀓𑀺𑀁 𑀅𑀲𑀼𑀢’’𑀦𑁆𑀢𑀺 𑀇𑀢𑀭𑀸 𑀢𑀺𑀲𑁆𑀲𑁄 𑀪𑀕𑀺𑀦𑀺𑀬𑁄 𑀧𑀼𑀘𑁆𑀙𑀢𑀺. 𑀬𑀁 𑀦𑁄𑀢𑀺 𑀬𑀁 𑀅𑀫𑁆𑀳𑀸𑀓𑀁 𑀲𑀁𑀲𑀬𑀺𑀢𑀁. 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀼𑀦 𑀦𑁄𑀢𑀺 𑀅𑀫𑁆𑀳𑀸𑀓𑀁, 𑀅𑀯𑀥𑀸𑀭𑀡𑁂 𑀯𑀸 ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑀯𑀺𑀬, 𑀢𑁂𑀦 𑀅𑀓𑀺𑀢𑁆𑀢𑀬𑀺𑀬𑁂𑀯, 𑀅𑀯𑀺𑀧𑀭𑀻𑀢𑀁 𑀩𑁆𑀬𑀸𑀓𑀸𑀲𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀦𑁄 𑀓𑀺𑀭𑀫𑁆𑀳𑀸𑀓𑀁 𑀯𑀺𑀲𑀺𑀝𑁆𑀞 𑀦𑀸𑀭𑀻𑀦𑀁, 𑀕𑀢𑀻 𑀘 𑀢𑀸𑀲𑀁 𑀧𑀯𑀭𑀸 𑀘 𑀤𑁂𑀯𑀢𑀸𑀢𑀺 𑀅𑀦𑀢𑁆𑀣𑀢𑁄 𑀧𑀸𑀮𑀦𑀢𑁄 𑀧𑀢𑀺𑀦𑁄 𑀲𑀸𑀫𑀺𑀓𑀸 𑀦𑀸 𑀅𑀫𑁆𑀳𑀸𑀓𑀁 𑀦𑀸𑀭𑀻𑀦𑀁 𑀇𑀢𑁆𑀣𑀻𑀦𑀁 𑀯𑀺𑀲𑀺𑀝𑁆𑀞𑀸 𑀕𑀢𑀺 𑀘 𑀢𑀸𑀲𑀁 𑀧𑀝𑀺𑀲𑀭𑀡𑀜𑁆𑀘, 𑀢𑀸𑀲𑀁 𑀫𑀸𑀢𑀼𑀕𑀸𑀫𑀸𑀦𑀁 𑀲𑀭𑀡𑀢𑁄 𑀧𑀯𑀭𑀸 𑀉𑀢𑁆𑀢𑀫𑀸 𑀤𑁂𑀯𑀢𑀸 𑀘 𑀲𑀫𑁆𑀫𑀤𑁂𑀯 𑀆𑀭𑀸𑀥𑀺𑀢𑀸 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑀸𑀢𑀺 𑀅𑀢𑁆𑀣𑁄.

𑁩𑁨𑁪. 𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀸𑀫 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸𑀯 𑀫𑀬𑀁 𑀧𑀢𑀻𑀲𑀼 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂𑀲𑀼 𑀧𑀼𑀩𑁆𑀩𑀼𑀝𑁆𑀞𑀸𑀦𑀸𑀤𑀺𑀓𑀁 𑀘𑀭𑀺𑀢𑀩𑁆𑀩𑀥𑀫𑁆𑀫𑀁 𑀧𑀘𑀭𑀸𑀫. 𑀬𑀢𑁆𑀣𑀸𑀢𑀺 𑀬𑀁 𑀦𑀺𑀫𑀺𑀢𑁆𑀢𑀁, 𑀬𑀲𑁆𑀫𑀺𑀁 𑀯𑀸 𑀧𑀢𑀻𑀲𑀼 𑀘𑀭𑀺𑀢𑀩𑁆𑀩𑀥𑀫𑁆𑀫𑁂 𑀘𑀭𑀺𑀬𑀫𑀸𑀦𑁂 𑀇𑀢𑁆𑀣𑀺𑀬𑁄 𑀧𑀢𑀺𑀩𑁆𑀩𑀢𑀸 𑀦𑀸𑀫 𑀪𑀯𑀦𑁆𑀢𑀺. 𑀮𑀘𑁆𑀙𑀸𑀫𑀲𑁂 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸𑀢𑀺 𑀅𑀬𑀁 𑀮𑀢𑀸 𑀬𑀁 𑀲𑀫𑁆𑀧𑀢𑁆𑀢𑀺𑀁 𑀏𑀢𑀭𑀳𑀺 𑀮𑀪𑀢𑀻𑀢𑀺 𑀪𑀸𑀲𑀢𑀺, 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀺𑀢𑁆𑀯𑀸𑀢𑀺 𑀮𑀪𑀺𑀲𑁆𑀲𑀸𑀫.

𑁩𑁨𑁫. 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑁄𑀢𑀺 𑀧𑀩𑁆𑀩𑀢𑀯𑀦𑀲𑀡𑁆𑀟𑀘𑀸𑀭𑀻. 𑀫𑀳𑀺𑀦𑁆𑀥𑀭𑀁 𑀧𑀩𑁆𑀩𑀢𑀫𑀸𑀯𑀲𑀺𑀢𑁆𑀯𑀸𑀢𑀺 𑀫𑀳𑀺𑀁 𑀥𑀸𑀭𑁂𑀢𑀻𑀢𑀺 𑀫𑀳𑀺𑀦𑁆𑀥𑀭𑀦𑀸𑀫𑀓𑀁 𑀧𑀩𑁆𑀩𑀢𑀁 𑀅𑀘𑀮𑀁 𑀆𑀯𑀲𑀺𑀢𑁆𑀯𑀸 𑀅𑀥𑀺𑀯𑀲𑀺𑀢𑁆𑀯𑀸, 𑀢𑀢𑁆𑀣 𑀯𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀆𑀯𑀲𑀺𑀢𑁆𑀯𑀸’’𑀢𑀺 𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀔𑀼𑀤𑁆𑀤𑁂𑀢𑀺 𑀩𑀮𑀯𑀲𑁂𑀦𑀦𑀺𑀳𑀻𑀦𑁂 𑀧𑀫𑀸𑀡𑀢𑁄 𑀧𑀦 𑀫𑀳𑀦𑁆𑀢𑁂 𑀳𑀢𑁆𑀣𑀺𑀆𑀤𑀺𑀓𑁂𑀧𑀺 𑀫𑀺𑀕𑁂 𑀲𑁄 𑀳𑀦𑁆𑀢𑀺𑀬𑁂𑀯.

𑁩𑁨𑁬. 𑀢𑀣𑁂𑀯𑀸𑀢𑀺 𑀕𑀸𑀣𑀸𑀬 𑀅𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀬𑀣𑀸 𑀲𑀻𑀳𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀕𑁄𑀘𑀭𑀝𑁆𑀞𑀸𑀦𑀪𑀽𑀢𑀁 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀬𑀣𑀺𑀘𑁆𑀙𑀺𑀢𑀫𑀢𑁆𑀣𑀁 𑀲𑀸𑀥𑁂𑀢𑀺, 𑀏𑀯𑀫𑁂𑀯 𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀪𑀭𑀡𑀢𑁄 𑀧𑁄𑀲𑀦𑀢𑁄 𑀪𑀢𑁆𑀢𑀸𑀭𑀁 𑀧𑀢𑀺𑀁 𑀲𑀸𑀫𑀺𑀓𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀻 𑀲𑀩𑁆𑀩𑀢𑁆𑀣𑀸𑀧𑀺 𑀧𑀢𑀺𑀅𑀦𑀼𑀓𑀽𑀮𑀢𑀸𑀲𑀗𑁆𑀔𑀸𑀢𑁂𑀦 𑀯𑀢𑁂𑀦 𑀢𑀁 𑀅𑀦𑀼𑀩𑁆𑀩𑀢𑀸 𑀧𑀭𑀺𑀚𑀦𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀓𑁄𑀥𑀁 𑀯𑀥𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀧𑀭𑀺𑀕𑁆𑀕𑀳𑀯𑀢𑁆𑀣𑀽𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀫𑀘𑁆𑀙𑁂𑀭𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀢𑀺𑀩𑁆𑀩𑀢𑀸𑀥𑀫𑁆𑀫𑀲𑁆𑀲 𑀘 𑀉𑀧𑀸𑀲𑀺𑀓𑀸𑀥𑀫𑁆𑀫𑀲𑁆𑀲 𑀘 𑀲𑀫𑁆𑀫𑀤𑁂𑀯 𑀘𑀭𑀡𑀢𑁄 𑀥𑀫𑁆𑀫𑀘𑀸𑀭𑀺𑀦𑀻 𑀲𑀸 𑀲𑀕𑁆𑀕𑀫𑁆𑀳𑀺 𑀤𑁂𑀯𑀮𑁄𑀓𑁂 𑀫𑁄𑀤𑀢𑀺, 𑀧𑀫𑁄𑀤𑀁 𑀆𑀧𑀚𑁆𑀚𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀮𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀕𑀼𑀢𑁆𑀢𑀺𑀮𑀯𑀺𑀫𑀸𑀦𑀯𑀡𑁆𑀡𑀦𑀸

𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀦𑁆𑀢𑀺 𑀕𑀼𑀢𑁆𑀢𑀺𑀮𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂𑀲𑀼 𑀙𑀢𑁆𑀢𑀺𑀁𑀲𑀸𑀬 𑀯𑀺𑀫𑀸𑀦𑁂𑀲𑀼 𑀙𑀢𑁆𑀢𑀺𑀁𑀲 𑀤𑁂𑀯𑀥𑀻𑀢𑀭𑁄 𑀧𑀘𑁆𑀘𑁂𑀓𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀫𑀳𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺𑀬𑁄 𑀤𑀺𑀲𑁆𑀯𑀸 𑀢𑀸𑀳𑀺 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺. 𑀢𑀸𑀧𑀺 𑀢𑀲𑁆𑀲 𑀧𑀼𑀘𑁆𑀙𑀸𑀦𑀦𑁆𑀢𑀭𑀁 ‘‘𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻’’𑀢𑀺𑀆𑀤𑀺𑀦𑀸 𑀩𑁆𑀬𑀸𑀓𑀭𑀺𑀁𑀲𑀼. 𑀅𑀣 𑀣𑁂𑀭𑁄 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀢𑀸 𑀤𑁂𑀯𑀢𑀸 𑀦 𑀓𑁂𑀯𑀮𑀁 𑀢𑀬𑀸 𑀏𑀯 𑀧𑀼𑀘𑁆𑀙𑀺𑀢𑀸 𑀏𑀯𑀁 𑀩𑁆𑀬𑀸𑀓𑀭𑀺𑀁𑀲𑀼, 𑀅𑀣 𑀔𑁄 𑀧𑀼𑀩𑁆𑀩𑁂 𑀫𑀬𑀸𑀧𑀺 𑀧𑀼𑀘𑁆𑀙𑀺𑀢𑀸 𑀏𑀯𑀫𑁂𑀯 𑀩𑁆𑀬𑀸𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀅𑀢𑁆𑀢𑀦𑁄 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑀁 𑀓𑀣𑁂𑀲𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀥𑀩𑁆𑀩𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀕𑀦𑁆𑀥𑀩𑁆𑀩𑀲𑀺𑀧𑁆𑀧𑁂 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑀢𑀸𑀬 𑀢𑀺𑀫𑁆𑀩𑀭𑀼𑀦𑀸𑀭𑀤𑀲𑀤𑀺𑀲𑁄 𑀲𑀩𑁆𑀩𑀤𑀺𑀲𑀸𑀲𑀼 𑀧𑀸𑀓𑀝𑁄 𑀧𑀜𑁆𑀜𑀸𑀢𑀸 𑀆𑀘𑀭𑀺𑀬𑁄 𑀅𑀳𑁄𑀲𑀺 𑀦𑀸𑀫𑁂𑀦 𑀕𑀼𑀢𑁆𑀢𑀺𑀮𑁄 𑀦𑀸𑀫. 𑀲𑁄 𑀅𑀦𑁆𑀥𑁂 𑀚𑀺𑀡𑁆𑀡𑁂 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺. 𑀢𑀲𑁆𑀲 𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀁 𑀲𑀼𑀢𑁆𑀯𑀸 𑀉𑀚𑁆𑀚𑁂𑀦𑀺𑀯𑀸𑀲𑀻 𑀫𑀼𑀲𑀺𑀮𑁄 𑀦𑀸𑀫 𑀕𑀦𑁆𑀥𑀩𑁆𑀩𑁄 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀆𑀳. 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀮𑀓𑁆𑀔𑀡𑀓𑀼𑀲𑀮𑀢𑀸𑀬 ‘‘𑀅𑀬𑀁 𑀧𑀼𑀭𑀺𑀲𑁄 𑀯𑀺𑀲𑀫𑀚𑁆𑀛𑀸𑀲𑀬𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀅𑀓𑀢𑀜𑁆𑀜𑀽 𑀪𑀯𑀺𑀲𑁆𑀲𑀢𑀺, 𑀦 𑀲𑀗𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀁 𑀑𑀓𑀸𑀲𑀁 𑀦𑀸𑀓𑀸𑀲𑀺. 𑀲𑁄 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑁂𑀳𑀺 𑀬𑀸𑀘𑀸𑀧𑁂𑀲𑀺. 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑁄 𑀫𑀸𑀢𑀸𑀧𑀺𑀢𑀽𑀳𑀺 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 ‘‘𑀕𑀭𑀼𑀯𑀘𑀦𑀁 𑀅𑀮𑀗𑁆𑀖𑀦𑀻𑀬’’𑀦𑁆𑀢𑀺 𑀢𑀲𑁆𑀲 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀕𑀢𑀫𑀘𑁆𑀙𑀭𑀺𑀬𑀢𑀸𑀬 𑀓𑀸𑀭𑀼𑀡𑀺𑀓𑀢𑀸𑀬 𑀘 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀅𑀓𑀢𑁆𑀯𑀸 𑀅𑀦𑀯𑀲𑁂𑀲𑀢𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀲𑀺.

𑀲𑁄𑀧𑀺 𑀫𑁂𑀥𑀸𑀯𑀺𑀢𑀸𑀬 𑀧𑀼𑀩𑁆𑀩𑁂𑀓𑀢𑀧𑀭𑀺𑀘𑀬𑀢𑀸𑀬 𑀅𑀓𑀼𑀲𑀻𑀢𑀢𑀸𑀬 𑀘 𑀦 𑀘𑀺𑀭𑀲𑁆𑀲𑁂𑀯 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑀸𑀭𑀸𑀡𑀲𑀻 𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀦𑀕𑀭𑀁, 𑀬𑀁𑀦𑀽𑀦𑀸𑀳𑀁 𑀇𑀥 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀲𑀺𑀧𑁆𑀧𑀁 𑀤𑀲𑁆𑀲𑁂𑀬𑁆𑀬𑀁, 𑀏𑀯𑀸𑀳𑀁 𑀆𑀘𑀭𑀺𑀬𑀢𑁄𑀧𑀺 𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀺 ‘‘𑀅𑀳𑀁 𑀭𑀜𑁆𑀜𑁄 𑀧𑀼𑀭𑀢𑁄 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀭𑀸𑀚𑀸𑀦𑀁 𑀫𑀁 𑀤𑀲𑁆𑀲𑁂𑀣𑀸’’𑀢𑀺. 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀫𑀫 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀧𑀢𑀺𑀝𑁆𑀞𑀁 𑀮𑀪𑀢𑀽’’𑀢𑀺 𑀓𑀭𑀼𑀡𑀸𑀬𑀫𑀸𑀦𑁄 𑀢𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚 𑀇𑀫𑀲𑁆𑀲 𑀫𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀻𑀡𑀸𑀬 𑀧𑀕𑀼𑀡𑀢𑀁 𑀧𑀲𑁆𑀲𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀲𑁆𑀲 𑀯𑀻𑀡𑀸𑀯𑀸𑀤𑀦𑀁 𑀲𑀼𑀢𑁆𑀯𑀸 𑀧𑀭𑀺𑀢𑀼𑀝𑁆𑀞𑁄 𑀢𑀁 𑀕𑀦𑁆𑀢𑀼𑀓𑀸𑀫𑀁 𑀦𑀺𑀯𑀸𑀭𑁂𑀢𑁆𑀯𑀸 ‘‘𑀫𑀫𑁂𑀯 𑀲𑀦𑁆𑀢𑀺𑀓𑁂 𑀯𑀲, 𑀆𑀘𑀭𑀺𑀬𑀲𑁆𑀲 𑀤𑀺𑀦𑁆𑀦𑀓𑁄𑀝𑁆𑀞𑀸𑀲𑀢𑁄 𑀉𑀧𑀟𑁆𑀠𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀼𑀲𑀺𑀮𑁄 ‘‘𑀦𑀸𑀳𑀁 𑀆𑀘𑀭𑀺𑀬𑀢𑁄 𑀳𑀸𑀬𑀸𑀫𑀺, 𑀲𑀫𑀫𑁂𑀯 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑀸 ‘‘𑀫𑀸 𑀏𑀯𑀁 𑀪𑀡𑀺, 𑀆𑀘𑀭𑀺𑀬𑁄 𑀦𑀸𑀫 𑀫𑀳𑀦𑁆𑀢𑁄, 𑀉𑀧𑀟𑁆𑀠𑀫𑁂𑀯 𑀢𑀼𑀬𑁆𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀫 𑀘 𑀆𑀘𑀭𑀺𑀬𑀲𑁆𑀲 𑀘 𑀲𑀺𑀧𑁆𑀧𑀁 𑀧𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀭𑀸𑀚𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀫 𑀘 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑀲𑁆𑀲 𑀘 𑀭𑀸𑀚𑀗𑁆𑀕𑀡𑁂 𑀲𑀺𑀧𑁆𑀧𑀤𑀲𑁆𑀲𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀧𑀲𑁆𑀲𑀦𑁆𑀢𑀽’’𑀢𑀺 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀉𑀕𑁆𑀖𑁄𑀲𑁂𑀲𑀺.

𑀫𑀳𑀸𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀢𑀭𑀼𑀡𑁄 𑀣𑀸𑀫𑀯𑀸, 𑀅𑀳𑀁 𑀧𑀦 𑀚𑀺𑀡𑁆𑀡𑁄 𑀤𑀼𑀩𑁆𑀩𑀮𑁄, 𑀬𑀤𑀺 𑀧𑀦 𑀫𑁂 𑀧𑀭𑀸𑀚𑀬𑁄 𑀪𑀯𑁂𑀬𑁆𑀬, 𑀫𑀢𑀁 𑀫𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑀁, 𑀢𑀲𑁆𑀫𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀭𑀜𑁆𑀜𑀁 𑀕𑀢𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀧𑀝𑀺𑀦𑀺𑀯𑀢𑁆𑀢𑀺. 𑀧𑀼𑀦 𑀫𑀭𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑀫𑀭𑀡𑀪𑀬𑁂𑀦 𑀧𑀝𑀺𑀦𑀺𑀯𑀢𑁆𑀢𑀺. 𑀏𑀯𑀁 𑀕𑀫𑀦𑀸𑀕𑀫𑀦𑀁 𑀓𑀭𑁄𑀦𑁆𑀢𑀲𑁆𑀲 𑀢𑀁 𑀞𑀸𑀦𑀁 𑀯𑀺𑀕𑀢𑀢𑀺𑀡𑀁 𑀅𑀳𑁄𑀲𑀺. 𑀅𑀣 𑀤𑁂𑀯𑀭𑀸𑀚𑀸 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀏𑀯𑀫𑀸𑀳 ‘‘𑀆𑀘𑀭𑀺𑀬, 𑀓𑀺𑀁 𑀓𑀭𑁄𑀲𑀻’’𑀢𑀺. 𑀫𑀳𑀸𑀲𑀢𑁆𑀢𑁄 𑁋

𑁩𑁨𑁭.

‘‘𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀁, 𑀭𑀸𑀫𑀡𑁂𑀬𑁆𑀬𑀁 𑀅𑀯𑀸𑀘𑀬𑀺𑀁;

𑀲𑁄 𑀫𑀁 𑀭𑀗𑁆𑀕𑀫𑁆𑀳𑀺 𑀅𑀯𑁆𑀳𑁂𑀢𑀺, 𑀲𑀭𑀡𑀁 𑀫𑁂 𑀳𑁄𑀳𑀺 𑀓𑁄𑀲𑀺𑀬𑀸’’𑀢𑀺. 𑁋

𑀅𑀢𑁆𑀢𑀦𑁄 𑀘𑀺𑀢𑁆𑀢𑀤𑀼𑀓𑁆𑀔𑀁 𑀧𑀯𑁂𑀤𑁂𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀤𑁂𑀯𑀭𑀸𑀚 𑀫𑀼𑀲𑀺𑀮𑀁 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑀁 𑀲𑀢𑁆𑀢𑀦𑁆𑀦𑀁 𑀢𑀦𑁆𑀢𑀻𑀦𑀁 𑀅𑀢𑁆𑀣𑀺𑀢𑀸𑀬 𑀙𑀚𑁆𑀚𑀸𑀤𑀺𑀲𑀢𑁆𑀢𑀯𑀺𑀥𑀲𑀭𑀤𑀻𑀧𑀦𑀢𑁄 𑀘 𑀲𑀢𑁆𑀢𑀢𑀦𑁆𑀢𑀺𑀁, 𑀢𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀬𑀣𑀸𑀭𑀳𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀲𑀼𑀢𑀺𑀪𑁂𑀤𑀸𑀦𑀁 𑀅𑀳𑀸𑀧𑀦𑀢𑁄 𑀲𑀼𑀝𑁆𑀞𑀼 𑀫𑀥𑀼𑀭𑀦𑁆𑀢𑀺 𑀲𑀼𑀫𑀥𑀼𑀭𑀁, 𑀬𑀣𑀸𑀥𑀺𑀕𑀢𑀸𑀦𑀁 𑀲𑀫𑀧𑀜𑁆𑀜𑀸𑀲𑀸𑀬 𑀫𑀼𑀘𑁆𑀙𑀦𑀸𑀦𑀁 𑀧𑀭𑀺𑀩𑁆𑀬𑀢𑁆𑀢𑀢𑀸𑀬 𑀲𑀭𑀲𑁆𑀲 𑀘 𑀯𑀻𑀡𑀸𑀬 𑀘 𑀅𑀜𑁆𑀜𑀫𑀜𑁆𑀜𑀲𑀁𑀲𑀦𑁆𑀤𑀦𑁂𑀦 𑀲𑀼𑀡𑀦𑁆𑀢𑀸𑀦𑀁 𑀅𑀢𑀺𑀯𑀺𑀬 𑀫𑀦𑁄𑀭𑀫𑀪𑀸𑀯𑀢𑁄 𑀭𑀸𑀫𑀡𑁂𑀬𑁆𑀬𑀁, 𑀲𑀭𑀕𑀢𑀸𑀤𑀺𑀯𑀺𑀪𑀸𑀕𑀢𑁄 𑀙𑀚𑁆𑀚𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀕𑀦𑁆𑀥𑀩𑁆𑀩𑀁 𑀅𑀳𑀸𑀧𑁂𑀢𑁆𑀯𑀸 𑀕𑀦𑁆𑀥𑀩𑁆𑀩𑀲𑀺𑀧𑁆𑀧𑀁 𑀅𑀯𑀸𑀘𑀬𑀺𑀦𑁆𑀢𑀺 𑀯𑀸𑀘𑁂𑀲𑀺𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁 𑀲𑀺𑀓𑁆𑀔𑀸𑀧𑁂𑀲𑀺𑀁. 𑀲𑁄 𑀫𑀼𑀲𑀺𑀮𑁄 𑀅𑀦𑁆𑀢𑁂𑀯𑀸𑀲𑀻 𑀲𑀫𑀸𑀦𑁄 𑀫𑀁 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀭𑀗𑁆𑀕𑀫𑁆𑀳𑀺 𑀭𑀗𑁆𑀕𑀫𑀡𑁆𑀟𑀮𑁂 𑀅𑀯𑁆𑀳𑁂𑀢𑀺 𑀲𑀸𑀭𑀫𑁆𑀪𑀯𑀲𑁂𑀦 𑀅𑀢𑁆𑀢𑀦𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀖𑀝𑁆𑀝𑀺𑀬𑀢𑀺, ‘‘𑀏𑀳𑀺 𑀲𑀺𑀧𑁆𑀧𑀁 𑀤𑀲𑁆𑀲𑁂𑀳𑀻’’𑀢𑀺 𑀫𑀁 𑀆𑀘𑀺𑀓𑁆𑀔𑀺, 𑀢𑀲𑁆𑀲 𑀫𑁂 𑀢𑁆𑀯𑀁 𑀓𑁄𑀲𑀺𑀬 𑀤𑁂𑀯𑀭𑀸𑀚 𑀲𑀭𑀡𑀁 𑀅𑀯𑀲𑁆𑀲𑀬𑁄 𑀳𑁄𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀫𑀸 𑀪𑀸𑀬𑀺 𑀆𑀘𑀭𑀺𑀬, 𑀅𑀳𑀁 𑀢𑁂 𑀲𑀭𑀡𑀁 𑀧𑀭𑀸𑀬𑀡’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

𑁩𑁨𑁮.

‘‘𑀅𑀳𑀁 𑀢𑁂 𑀲𑀭𑀡𑀁 𑀳𑁄𑀫𑀺, 𑀅𑀳𑀫𑀸𑀘𑀭𑀺𑀬𑀧𑀽𑀚𑀓𑁄;

𑀦 𑀢𑀁 𑀚𑀬𑀺𑀲𑁆𑀲𑀢𑀺 𑀲𑀺𑀲𑁆𑀲𑁄, 𑀲𑀺𑀲𑁆𑀲𑀫𑀸𑀘𑀭𑀺𑀬 𑀚𑁂𑀲𑁆𑀲𑀲𑀻’’𑀢𑀺. 𑁋

𑀆𑀳. 𑀲𑀓𑁆𑀓𑀲𑁆𑀲 𑀓𑀺𑀭 𑀤𑁂𑀯𑀭𑀜𑁆𑀜𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀫𑀳𑀸𑀲𑀢𑁆𑀢𑁄 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀅𑀳𑀫𑀸𑀘𑀭𑀺𑀬𑀧𑀽𑀚𑀓𑁄’’𑀢𑀺. 𑀅𑀳𑀁 𑀆𑀘𑀭𑀺𑀬𑀸𑀦𑀁 𑀧𑀽𑀚𑀓𑁄, 𑀦 𑀫𑀼𑀲𑀺𑀮𑁄 𑀯𑀺𑀬 𑀬𑀼𑀕𑀕𑁆𑀕𑀸𑀳𑀻, 𑀫𑀸𑀤𑀺𑀲𑁂𑀲𑀼 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀞𑀺𑀢𑁂𑀲𑀼 𑀢𑀸𑀤𑀺𑀲𑀲𑁆𑀲 𑀆𑀘𑀭𑀺𑀬𑀲𑁆𑀲 𑀓𑀣𑀁 𑀧𑀭𑀸𑀚𑀬𑁄, 𑀢𑀲𑁆𑀫𑀸 𑀦 𑀢𑀁 𑀚𑀬𑀺𑀲𑁆𑀲𑀢𑀺 𑀲𑀺𑀲𑁆𑀲𑁄, 𑀅𑀜𑁆𑀜𑀤𑀢𑁆𑀣𑀼 𑀲𑀺𑀲𑁆𑀲𑀁 𑀫𑀼𑀲𑀺𑀮𑀁 𑀆𑀘𑀭𑀺𑀬 𑀢𑁆𑀯𑀫𑁂𑀯 𑀚𑀬𑀺𑀲𑁆𑀲𑀲𑀺, 𑀲𑁄 𑀧𑀦 𑀧𑀭𑀸𑀚𑀺𑀢𑁄 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀅𑀳𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀓𑀘𑁆𑀙𑀸𑀫𑀡𑁆𑀟𑀮𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀯𑀺𑀲𑁆𑀲𑀢𑁆𑀣𑀸 𑀯𑀸𑀤𑁂𑀣𑀸’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀕𑀢𑁄.

𑀲𑀢𑁆𑀢𑀫𑁂 𑀧𑀦 𑀤𑀺𑀯𑀲𑁂 𑀭𑀸𑀚𑀸 𑀲𑀧𑀭𑀺𑀯𑀸𑀭𑁄 𑀭𑀸𑀚𑀲𑀪𑀸𑀬𑀁 𑀦𑀺𑀲𑀻𑀤𑀺. 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑁄 𑀘 𑀫𑀼𑀲𑀺𑀮𑁄 𑀘 𑀲𑀺𑀧𑁆𑀧𑀤𑀲𑁆𑀲𑀦𑀢𑁆𑀣𑀁 𑀲𑀚𑁆𑀚𑀸 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀮𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀻𑀡𑀸 𑀯𑀸𑀤𑀬𑀺𑀁𑀲𑀼. 𑀲𑀓𑁆𑀓𑁄 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑀮𑀺𑀓𑁆𑀔𑁂 𑀅𑀝𑁆𑀞𑀸𑀲𑀺. 𑀢𑀁 𑀫𑀳𑀸𑀲𑀢𑁆𑀢𑁄𑀯 𑀧𑀲𑁆𑀲𑀢𑀺, 𑀇𑀢𑀭𑁂 𑀧𑀦 𑀦 𑀧𑀲𑁆𑀲𑀦𑁆𑀢𑀺. 𑀧𑀭𑀺𑀲𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸𑀤𑀦𑁂 𑀲𑀫𑀘𑀺𑀢𑁆𑀢𑀸 𑀅𑀳𑁄𑀲𑀺. 𑀲𑀓𑁆𑀓𑁄 𑀕𑀼𑀢𑁆𑀢𑀺𑀮𑀁 ‘‘𑀏𑀓𑀁 𑀢𑀦𑁆𑀢𑀺𑀁 𑀙𑀺𑀦𑁆𑀤𑀸’’𑀢𑀺 𑀆𑀳. 𑀙𑀺𑀦𑁆𑀦𑀸𑀬𑀧𑀺 𑀢𑀦𑁆𑀢𑀺𑀬𑀸 𑀯𑀻𑀡𑀸 𑀢𑀣𑁂𑀯 𑀫𑀥𑀼𑀭𑀦𑀺𑀕𑁆𑀖𑁄𑀲𑀸 𑀅𑀳𑁄𑀲𑀺. 𑀏𑀯𑀁 ‘‘𑀤𑀼𑀢𑀺𑀬𑀁, 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁, 𑀙𑀝𑁆𑀞𑀁, 𑀲𑀢𑁆𑀢𑀫𑀁 𑀙𑀺𑀦𑁆𑀤𑀸’’𑀢𑀺 𑀆𑀳, 𑀢𑀸𑀲𑀼 𑀙𑀺𑀦𑁆𑀦𑀸𑀲𑀼𑀧𑀺 𑀯𑀻𑀡𑀸 𑀫𑀥𑀼𑀭𑀦𑀺𑀕𑁆𑀖𑁄𑀲𑀸𑀯 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀼𑀲𑀺𑀮𑁄 𑀧𑀭𑀸𑀚𑀺𑀢𑀪𑀽𑀢𑀭𑀽𑀧𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀳𑁄𑀲𑀺, 𑀧𑀭𑀺𑀲𑀸 𑀳𑀝𑁆𑀞𑀢𑀼𑀝𑁆𑀞𑀸 𑀘𑁂𑀮𑀼𑀓𑁆𑀔𑁂𑀧𑁂 𑀓𑀭𑁄𑀦𑁆𑀢𑀻 𑀕𑀼𑀢𑁆𑀢𑀺𑀮𑀲𑁆𑀲 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀭𑀸𑀚𑀸 𑀫𑀼𑀲𑀺𑀮𑀁 𑀲𑀪𑀸𑀬 𑀦𑀻𑀳𑀭𑀸𑀧𑁂𑀲𑀺, 𑀫𑀳𑀸𑀚𑀦𑁄 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀦𑁆𑀢𑁄 𑀫𑀼𑀲𑀺𑀮𑀁 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺.

𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀳𑀸𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀢𑀁 𑀤𑁂𑀯𑀢𑀸 ‘‘𑀫𑀳𑀸𑀭𑀸𑀚, 𑀓𑀼𑀳𑀺𑀁 𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀬𑀁 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀲𑀸𑀥𑀼 𑀦𑁄 𑀢𑀁 𑀇𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀸𑀢𑀮𑀺𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙 𑀯𑁂𑀚𑀬𑀦𑁆𑀢𑀭𑀣𑁂𑀦 𑀅𑀫𑁆𑀳𑀸𑀓𑀁 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑀁 𑀆𑀦𑁂𑀳𑀺, 𑀤𑁂𑀯𑀢𑀸 𑀢𑀁 𑀤𑀲𑁆𑀲𑀦𑀓𑀸𑀫𑀸’’𑀢𑀺, 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀓𑁆𑀓𑁄 𑀫𑀳𑀸𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀢𑁆𑀯𑀸 𑀏𑀯𑀫𑀸𑀳 ‘‘𑀆𑀘𑀭𑀺𑀬, 𑀯𑀻𑀡𑀁 𑀯𑀸𑀤𑀬, 𑀤𑁂𑀯𑀢𑀸 𑀲𑁄𑀢𑀼𑀓𑀸𑀫𑀸’’𑀢𑀺. ‘‘𑀫𑀬𑀁 𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄, 𑀯𑁂𑀢𑀦𑁂𑀦 𑀯𑀺𑀦𑀸 𑀲𑀺𑀧𑁆𑀧𑀁 𑀦 𑀤𑀲𑁆𑀲𑁂𑀫𑀸’’𑀢𑀺. ‘‘𑀓𑀻𑀤𑀺𑀲𑀁 𑀧𑀦 𑀯𑁂𑀢𑀦𑀁 𑀇𑀘𑁆𑀙𑀲𑀻’’𑀢𑀺. ‘‘𑀦𑀸𑀜𑁆𑀜𑁂𑀦 𑀫𑁂 𑀯𑁂𑀢𑀦𑁂𑀦 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀇𑀫𑀸𑀲𑀁 𑀧𑀦 𑀤𑁂𑀯𑀢𑀸𑀦𑀁 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂𑀓𑀢𑀓𑀼𑀲𑀮𑀓𑀣𑀦𑀫𑁂𑀯 𑀫𑁂 𑀯𑁂𑀢𑀦𑀁 𑀳𑁄𑀢𑀽’’𑀢𑀺 𑀆𑀳. 𑀢𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀫𑀳𑀸𑀲𑀢𑁆𑀢𑁄 𑀧𑀸𑀝𑁂𑀓𑁆𑀓𑀁 𑀢𑀸𑀳𑀺 𑀢𑀤𑀸 𑀧𑀝𑀺𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀢𑀲𑁆𑀲𑀸 𑀳𑁂𑀢𑀼𑀪𑀽𑀢𑀁 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀢𑀁 𑀲𑀼𑀘𑀭𑀺𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀬 𑀧𑀼𑀘𑁆𑀙𑀦𑁆𑀢𑁄 ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀺𑀕𑀸𑀣𑀸𑀳𑀺 𑀧𑀼𑀘𑁆𑀙𑀺. 𑀢𑀸𑀧𑀺 ‘‘𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻’’𑀢𑀺𑀆𑀤𑀺𑀦𑀸 𑀬𑀣𑀸 𑀏𑀢𑀭𑀳𑀺 𑀣𑁂𑀭𑀲𑁆𑀲, 𑀏𑀯𑀫𑁂𑀯 𑀢𑀲𑁆𑀲 𑀩𑁆𑀬𑀸𑀓𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁄𑀕𑁆𑀕𑀮𑁆𑀮𑀸𑀦 𑀢𑀸 𑀤𑁂𑀯𑀢𑀸 𑀦 𑀓𑁂𑀯𑀮𑀁 𑀢𑀬𑀸 𑀏𑀯 𑀧𑀼𑀘𑁆𑀙𑀺𑀢𑀸 𑀏𑀯𑀁 𑀩𑁆𑀬𑀸𑀓𑀭𑀺𑀁𑀲𑀼, 𑀅𑀣 𑀔𑁄 𑀧𑀼𑀩𑁆𑀩𑁂 𑀫𑀬𑀸𑀧𑀺 𑀧𑀼𑀘𑁆𑀙𑀺𑀢𑀸 𑀏𑀯𑀫𑁂𑀯 𑀩𑁆𑀬𑀸𑀓𑀭𑀺𑀁𑀲𑀽’’𑀢𑀺.

𑀢𑀸 𑀓𑀺𑀭 𑀇𑀢𑁆𑀣𑀺𑀬𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀸 𑀢𑀁 𑀢𑀁 𑀧𑀼𑀜𑁆𑀜𑀁 𑀅𑀓𑀁𑀲𑀼. 𑀢𑀢𑁆𑀣 𑀏𑀓𑀸 𑀇𑀢𑁆𑀣𑀻 𑀯𑀢𑁆𑀣𑀁 𑀅𑀤𑀸𑀲𑀺, 𑀏𑀓𑀸 𑀲𑀼𑀫𑀦𑀫𑀸𑀮𑀁, 𑀏𑀓𑀸 𑀕𑀦𑁆𑀥𑀁, 𑀏𑀓𑀸 𑀉𑀴𑀸𑀭𑀸𑀦𑀺 𑀨𑀮𑀸𑀦𑀺, 𑀏𑀓𑀸 𑀉𑀘𑁆𑀙𑀼𑀭𑀲𑀁, 𑀏𑀓𑀸 𑀪𑀕𑀯𑀢𑁄 𑀘𑁂𑀢𑀺𑀬𑁂 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀅𑀤𑀸𑀲𑀺, 𑀏𑀓𑀸 𑀉𑀧𑁄𑀲𑀣𑀁 𑀉𑀧𑀯𑀲𑀺, 𑀏𑀓𑀸 𑀉𑀧𑀓𑀝𑁆𑀞𑀸𑀬 𑀯𑁂𑀮𑀸𑀬 𑀦𑀸𑀯𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑀓𑀁 𑀅𑀤𑀸𑀲𑀺, 𑀏𑀓𑀸 𑀓𑁄𑀥𑀦𑀸𑀦𑀁 𑀲𑀲𑁆𑀲𑀼𑀲𑀲𑀼𑀭𑀸𑀦𑀁 𑀅𑀓𑁆𑀓𑁄𑀥𑀦𑀸 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺, 𑀏𑀓𑀸 𑀤𑀸𑀲𑀻 𑀳𑀼𑀢𑁆𑀯𑀸 𑀅𑀢𑀦𑁆𑀤𑀺𑀢𑀸𑀘𑀸𑀭𑀸 𑀅𑀳𑁄𑀲𑀺, 𑀏𑀓𑁄 𑀧𑀺𑀡𑁆𑀟𑀘𑀸𑀭𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀔𑀻𑀭𑀪𑀢𑁆𑀢𑀁 𑀅𑀤𑀸𑀲𑀺, 𑀏𑀓𑀸 𑀨𑀸𑀡𑀺𑀢𑀁 𑀅𑀤𑀸𑀲𑀺, 𑀏𑀓𑀸 𑀉𑀘𑁆𑀙𑀼𑀔𑀡𑁆𑀟𑀁 𑀅𑀤𑀸𑀲𑀺, 𑀏𑀓𑀸 𑀢𑀺𑀫𑁆𑀩𑀭𑀼𑀲𑀓𑀁 𑀅𑀤𑀸𑀲𑀺, 𑀏𑀓𑀸 𑀓𑀓𑁆𑀓𑀸𑀭𑀺𑀓𑀁 𑀅𑀤𑀸𑀲𑀺, 𑀏𑀓𑀸 𑀏𑀴𑀸𑀮𑀼𑀓𑀁 𑀅𑀤𑀸𑀲𑀺, 𑀏𑀓𑀸 𑀯𑀮𑁆𑀮𑀺𑀨𑀮𑀁 𑀅𑀤𑀸𑀲𑀺, 𑀏𑀓𑀸 𑀨𑀸𑀭𑀼𑀲𑀓𑀁 𑀅𑀤𑀸𑀲𑀺, 𑀏𑀓𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀅𑀤𑀸𑀲𑀺, 𑀏𑀓𑀸 𑀲𑀸𑀓𑀫𑀼𑀝𑁆𑀞𑀺𑀁 𑀅𑀤𑀸𑀲𑀺, 𑀏𑀓𑀸 𑀧𑀼𑀧𑁆𑀨𑀓𑀫𑀼𑀝𑁆𑀞𑀺𑀁 𑀅𑀤𑀸𑀲𑀺, 𑀏𑀓𑀸 𑀫𑀽𑀮𑀓𑀮𑀸𑀧𑀁 𑀅𑀤𑀸𑀲𑀺, 𑀏𑀓𑀸 𑀦𑀺𑀫𑁆𑀩𑀫𑀼𑀝𑁆𑀞𑀺𑀁 𑀅𑀤𑀸𑀲𑀺, 𑀏𑀓𑀸 𑀓𑀜𑁆𑀚𑀺𑀓𑀁 𑀅𑀤𑀸𑀲𑀺, 𑀏𑀓𑀸 𑀢𑀺𑀮𑀧𑀺𑀜𑁆𑀜𑀸𑀓𑀁 𑀅𑀤𑀸𑀲𑀺, 𑀏𑀓𑀸 𑀓𑀸𑀬𑀩𑀦𑁆𑀥𑀦𑀁 𑀅𑀤𑀸𑀲𑀺, 𑀏𑀓𑀸 𑀅𑀁𑀲𑀩𑀤𑁆𑀥𑀓𑀁 𑀅𑀤𑀸𑀲𑀺, 𑀏𑀓𑀸 𑀆𑀬𑁄𑀕𑀧𑀝𑁆𑀝𑀁 𑀅𑀤𑀸𑀲𑀺, 𑀏𑀓𑀸 𑀯𑀺𑀥𑀽𑀧𑀦𑀁, 𑀏𑀓𑀸 𑀢𑀸𑀮𑀯𑀡𑁆𑀝𑀁, 𑀏𑀓𑀸 𑀫𑁄𑀭𑀳𑀢𑁆𑀣𑀁, 𑀏𑀓𑀸 𑀙𑀢𑁆𑀢𑀁, 𑀏𑀓𑀸 𑀉𑀧𑀸𑀳𑀦𑀁, 𑀏𑀓𑀸 𑀧𑀽𑀯𑀁, 𑀏𑀓𑀸 𑀫𑁄𑀤𑀓𑀁, 𑀏𑀓𑀸 𑀲𑀓𑁆𑀔𑀮𑀺𑀓𑀁 𑀅𑀤𑀸𑀲𑀺. 𑀢𑀸 𑀏𑀓𑁂𑀓𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀧𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀯𑀺𑀭𑀸𑀚𑀫𑀸𑀦𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑁂𑀦 𑀧𑀼𑀘𑁆𑀙𑀺𑀢𑀸 ‘‘𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀓𑀢𑀓𑀼𑀲𑀮𑀁 𑀧𑀝𑀺𑀧𑀸𑀝𑀺𑀬𑀸 𑀩𑁆𑀬𑀸𑀓𑀭𑀺𑀁𑀲𑀼.

𑁩𑁨𑁯.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁩𑁩𑁦.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁩𑁩𑁧.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁩𑁩𑁨.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁩𑁩𑁩.

‘‘𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻, 𑀧𑀯𑀭𑀸 𑀳𑁄𑀢𑀺 𑀦𑀭𑁂𑀲𑀼 𑀦𑀸𑀭𑀻𑀲𑀼;

𑀏𑀯𑀁 𑀧𑀺𑀬𑀭𑀽𑀧𑀤𑀸𑀬𑀺𑀓𑀸 𑀫𑀦𑀸𑀧𑀁, 𑀤𑀺𑀩𑁆𑀩𑀁 𑀲𑀸 𑀮𑀪𑀢𑁂 𑀉𑀧𑁂𑀘𑁆𑀘 𑀞𑀸𑀦𑀁.

𑁩𑁩𑁪.

‘‘𑀢𑀲𑁆𑀲𑀸 𑀫𑁂 𑀧𑀲𑁆𑀲 𑀯𑀺𑀫𑀸𑀦𑀁, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻𑀳𑀫𑀲𑁆𑀫𑀺;

𑀅𑀘𑁆𑀙𑀭𑀸𑀲𑀳𑀲𑁆𑀲𑀲𑁆𑀲𑀸𑀳𑀁, 𑀧𑀯𑀭𑀸 𑀧𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀁.

𑁩𑁩𑁫.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁩𑁩𑁬.

‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

(𑀬𑀣𑀸 𑀘 𑀏𑀢𑁆𑀣, 𑀏𑀯𑀁 𑀉𑀧𑀭𑀺 𑀲𑀩𑁆𑀩𑀯𑀺𑀫𑀸𑀦𑁂𑀲𑀼 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.)

𑁩𑁪𑁧.

‘‘𑀧𑀼𑀧𑁆𑀨𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻, 𑀧𑀯𑀭𑀸 𑀳𑁄𑀢𑀺 𑀦𑀭𑁂𑀲𑀼 𑀦𑀸𑀭𑀻𑀲𑀼…𑀧𑁂….

𑁩𑁪𑁯.

‘‘𑀕𑀦𑁆𑀥𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻, 𑀧𑀯𑀭𑀸 𑀳𑁄𑀢𑀺 𑀦𑀭𑁂𑀲𑀼 𑀦𑀸𑀭𑀻𑀲𑀼…𑀧𑁂….

𑁩𑁫𑁭.

‘‘𑀨𑀮𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻…𑀧𑁂….

𑁩𑁬𑁫.

‘‘𑀭𑀲𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻…𑀧𑁂….

𑁩𑁭𑁩.

‘‘𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀅𑀳𑀫𑀤𑀸𑀲𑀺𑀁,𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀣𑀽𑀧𑀫𑁆𑀳𑀺…𑀧𑁂….

𑁩𑁮𑁧.

‘‘𑀪𑀺𑀓𑁆𑀔𑀽 𑀘 𑀅𑀳𑀁 𑀪𑀺𑀓𑁆𑀔𑀼𑀦𑀺𑀬𑁄 𑀘, 𑀅𑀤𑁆𑀤𑀲𑀸𑀲𑀺𑀁 𑀧𑀦𑁆𑀣𑀧𑀝𑀺𑀧𑀦𑁆𑀦𑁂;

𑀢𑁂𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀏𑀓𑀽𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁.

𑁩𑁮𑁨.

‘‘𑀢𑀲𑁆𑀲𑀸 𑀫𑁂 𑀧𑀲𑁆𑀲 𑀯𑀺𑀫𑀸𑀦𑀁…𑀧𑁂….

𑁩𑁮𑁯.

‘‘𑀉𑀤𑀓𑁂 𑀞𑀺𑀢𑀸 𑀉𑀤𑀓𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦…𑀧𑁂….

𑁩𑁯𑁭.

‘‘𑀲𑀲𑁆𑀲𑀼𑀜𑁆𑀘𑀸𑀳𑀁 𑀲𑀲𑀼𑀭𑀜𑁆𑀘, 𑀘𑀡𑁆𑀟𑀺𑀓𑁂 𑀓𑁄𑀥𑀦𑁂 𑀘 𑀨𑀭𑀼𑀲𑁂 𑀘;

𑀅𑀦𑀼𑀲𑀽𑀬𑀺𑀓𑀸 𑀉𑀧𑀝𑁆𑀞𑀸𑀲𑀺𑀁, 𑀅𑀧𑁆𑀧𑀫𑀢𑁆𑀢𑀸 𑀲𑀓𑁂𑀦 𑀲𑀻𑀮𑁂𑀦…𑀧𑁂….

𑁪𑁦𑁫.

‘‘𑀧𑀭𑀓𑀫𑁆𑀫𑀓𑀭𑀻 𑀆𑀲𑀺𑀁, 𑀅𑀢𑁆𑀣𑁂𑀦𑀸𑀢𑀦𑁆𑀤𑀺𑀢𑀸 𑀤𑀸𑀲𑀻;

𑀅𑀓𑁆𑀓𑁄𑀥𑀦𑀸𑀦𑀢𑀺𑀫𑀸𑀦𑀺𑀦𑀻, 𑀲𑀁𑀯𑀺𑀪𑀸𑀕𑀺𑀦𑀻 𑀓𑀓𑀲𑁆𑀲 𑀪𑀸𑀕𑀲𑁆𑀲…𑀧𑁂….

𑁪𑁧𑁩.

‘‘𑀔𑀻𑀭𑁄𑀤𑀦𑀁 𑀅𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲;

𑀏𑀯𑀁 𑀓𑀭𑀺𑀢𑁆𑀯𑀸 𑀓𑀫𑁆𑀫𑀁, 𑀲𑀼𑀕𑀢𑀺𑀁 𑀉𑀧𑀧𑀚𑁆𑀚 𑀫𑁄𑀤𑀸𑀫𑀺…𑀧𑁂….

𑁪𑁨𑁧.

‘‘𑀨𑀸𑀡𑀺𑀢𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁨𑁯.

‘‘𑀉𑀘𑁆𑀙𑀼𑀔𑀡𑁆𑀟𑀺𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁩𑁭.

‘‘𑀢𑀺𑀫𑁆𑀩𑀭𑀼𑀲𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁪𑁫.

‘‘𑀓𑀓𑁆𑀓𑀸𑀭𑀺𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁫𑁩.

‘‘𑀏𑀴𑀸𑀮𑀼𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁬𑁧.

‘‘𑀯𑀮𑁆𑀮𑀺𑀨𑀮𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁬𑁯.

‘‘𑀨𑀸𑀭𑀼𑀲𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁭𑁭.

‘‘𑀳𑀢𑁆𑀣𑀧𑁆𑀧𑀢𑀸𑀧𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁮𑁫.

‘‘𑀲𑀸𑀓𑀫𑀼𑀝𑁆𑀞𑀺𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁪𑁯𑁩.

‘‘𑀧𑀼𑀧𑁆𑀨𑀓𑀫𑀼𑀝𑁆𑀞𑀺𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁦𑁧.

‘‘𑀫𑀽𑀮𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁦𑁯. ‘‘𑀦𑀺𑀫𑁆𑀩𑀫𑀼𑀝𑁆𑀞𑀺𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁧𑁭. ‘‘𑀅𑀫𑁆𑀩𑀓𑀜𑁆𑀚𑀺𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁨𑁫. ‘‘𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁩𑁩. ‘‘𑀓𑀸𑀬𑀩𑀦𑁆𑀥𑀦𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁪𑁧. ‘‘𑀅𑀁𑀲𑀩𑀤𑁆𑀥𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁪𑁯. ‘‘𑀆𑀬𑁄𑀕𑀧𑀝𑁆𑀝𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁫𑁭. ‘‘𑀯𑀺𑀥𑀽𑀧𑀦𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁬𑁫. ‘‘𑀢𑀸𑀮𑀯𑀡𑁆𑀝𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁭𑁩. ‘‘𑀫𑁄𑀭𑀳𑀢𑁆𑀣𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁮𑁧. ‘‘𑀙𑀢𑁆𑀢𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁮𑁯. ‘‘𑀉𑀧𑀸𑀳𑀦𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁫𑁯𑁭. ‘‘𑀧𑀽𑀯𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁬𑁦𑁫. ‘‘𑀫𑁄𑀤𑀓𑀁 𑀅𑀳𑀫𑀤𑀸𑀲𑀺𑀁…𑀧𑁂….

𑁬𑁧𑁩. ‘‘𑀲𑀓𑁆𑀔𑀮𑀺𑀓𑀁 𑀅𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲…𑀧𑁂….

𑁬𑁧𑁪.

‘‘𑀢𑀲𑁆𑀲𑀸 𑀫𑁂 𑀧𑀲𑁆𑀲 𑀯𑀺𑀫𑀸𑀦𑀁, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻𑀳𑀫𑀲𑁆𑀫𑀺𑀁;

𑀅𑀘𑁆𑀙𑀭𑀸𑀲𑀳𑀲𑁆𑀲𑀲𑁆𑀲𑀸𑀳𑀁, 𑀧𑀯𑀭𑀸 𑀧𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀁.

𑁬𑁧𑁫. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀓𑀢𑀲𑀼𑀘𑀭𑀺𑀢𑁂 𑀩𑁆𑀬𑀸𑀓𑀢𑁂 𑀢𑀼𑀝𑁆𑀞𑀫𑀸𑀦𑀲𑁄 𑀲𑀫𑁆𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀲𑀼𑀘𑀭𑀺𑀢𑀘𑀭𑀡𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀁 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑀢𑀜𑁆𑀘 𑀧𑀯𑁂𑀤𑁂𑀦𑁆𑀢𑁄 𑀆𑀳 𑁋

𑁬𑁧𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀅𑀚𑁆𑀚, 𑀲𑀼𑀧𑁆𑀧𑀪𑀸𑀢𑀁 𑀲𑀼𑀳𑀼𑀝𑁆𑀞𑀺𑀢𑀁;

𑀬𑀁 𑀅𑀤𑁆𑀤𑀲𑀸𑀫𑀺 𑀤𑁂𑀯𑀢𑀸𑀬𑁄, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀺𑀬𑁄.

𑁬𑁧𑁮.

‘‘𑀇𑀫𑀸𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀜𑁆𑀜𑀫𑁂𑀦 𑀤𑀫𑁂𑀦 𑀘;

𑀲𑁆𑀯𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺.

𑁩𑁩𑁩. 𑀢𑀢𑁆𑀣 𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸𑀢𑀺 𑀯𑀢𑁆𑀣𑀸𑀦𑀁 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁, 𑀯𑀢𑁆𑀣𑁂𑀲𑀼 𑀯𑀸 𑀩𑀳𑀽𑀲𑀼 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑀁 𑀉𑀓𑁆𑀓𑀁𑀲𑀕𑀢𑀁 𑀧𑀯𑀭𑀁 𑀓𑁄𑀝𑀺𑀪𑀽𑀢𑀁 𑀯𑀢𑁆𑀣𑀁 𑀯𑀢𑁆𑀣𑀼𑀢𑁆𑀢𑀫𑀁, 𑀢𑀲𑁆𑀲 𑀤𑀸𑀬𑀺𑀓𑀸. ‘‘𑀧𑀼𑀧𑁆𑀨𑀼𑀢𑁆𑀢𑀫𑀤𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀺𑀬𑀭𑀽𑀧𑀤𑀸𑀬𑀺𑀓𑀸𑀢𑀺 𑀧𑀺𑀬𑀲𑀪𑀸𑀯𑀲𑁆𑀲 𑀧𑀺𑀬𑀚𑀸𑀢𑀺𑀓𑀲𑁆𑀲 𑀘 𑀯𑀢𑁆𑀣𑀼𑀦𑁄 𑀤𑀸𑀬𑀺𑀓𑀸. 𑀫𑀦𑀸𑀧𑀦𑁆𑀢𑀺 𑀫𑀦𑀯𑀟𑁆𑀠𑀦𑀓𑀁. 𑀤𑀺𑀩𑁆𑀩𑀦𑁆𑀢𑀺 𑀤𑀺𑀯𑀺 𑀪𑀯𑀢𑁆𑀢𑀸 𑀤𑀺𑀩𑁆𑀩𑀁. 𑀉𑀧𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸 𑀘𑁂𑀢𑁂𑀢𑁆𑀯𑀸, ‘‘𑀏𑀤𑀺𑀲𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀓𑀧𑁆𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀞𑀸𑀦𑀦𑁆𑀢𑀺 𑀯𑀺𑀫𑀸𑀦𑀸𑀤𑀺𑀓𑀁 𑀞𑀸𑀦𑀁, 𑀇𑀲𑁆𑀲𑀭𑀺𑀬𑀁 𑀯𑀸. ‘‘𑀫𑀦𑀸𑀧𑀸’’𑀢𑀺𑀧𑀺 𑀧𑀸𑀞𑁄, 𑀅𑀜𑁆𑀜𑁂𑀲𑀁 𑀫𑀦𑀯𑀟𑁆𑀠𑀦𑀓𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩𑁩𑁪. 𑀧𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀦𑁆𑀢𑀺 𑀯𑀢𑁆𑀣𑀼𑀢𑁆𑀢𑀫𑀤𑀸𑀦𑀲𑁆𑀲 𑀦𑀸𑀫 𑀇𑀤𑀫𑀻𑀤𑀺𑀲𑀁 𑀨𑀮𑀁 𑀧𑀲𑁆𑀲𑀸𑀢𑀺 𑀅𑀢𑁆𑀢𑀦𑀸 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀪𑀸𑀯𑁂𑀦𑁆𑀢𑀻 𑀯𑀤𑀢𑀺.

𑁩𑁪𑁧. 𑀧𑀼𑀧𑁆𑀨𑀼𑀢𑁆𑀢𑀫𑀤𑀸𑀬𑀺𑀓𑀸𑀢𑀺 𑀭𑀢𑀦𑀢𑁆𑀢𑀬𑀧𑀽𑀚𑀸𑀯𑀲𑁂𑀦 𑀧𑀼𑀧𑁆𑀨𑀼𑀢𑁆𑀢𑀫𑀤𑀸𑀬𑀺𑀓𑀸, 𑀢𑀣𑀸 𑀕𑀦𑁆𑀥𑀼𑀢𑁆𑀢𑀫𑀤𑀸𑀬𑀺𑀓𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀧𑀼𑀧𑁆𑀨𑀼𑀢𑁆𑀢𑀫𑀁 𑀲𑀼𑀫𑀦𑀧𑀼𑀧𑁆𑀨𑀸𑀤𑀺, 𑀕𑀦𑁆𑀥𑀼𑀢𑁆𑀢𑀫𑀁 𑀘𑀦𑁆𑀤𑀦𑀕𑀦𑁆𑀥𑀸𑀤𑀺, 𑀨𑀮𑀼𑀢𑁆𑀢𑀫𑀁 𑀧𑀦𑀲𑀨𑀮𑀸𑀤𑀺, 𑀭𑀲𑀼𑀢𑁆𑀢𑀫𑀁 𑀕𑁄𑀭𑀲𑀲𑀧𑁆𑀧𑀺𑀆𑀤𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁭𑁩. 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀦𑁆𑀢𑀺 𑀕𑀦𑁆𑀥𑁂𑀦 𑀧𑀜𑁆𑀘𑀗𑁆𑀕𑀼𑀮𑀺𑀓𑀤𑀸𑀦𑀁. 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀣𑀽𑀧𑀫𑁆𑀳𑀻𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂.

𑁩𑁮𑁧. 𑀧𑀦𑁆𑀣𑀧𑀝𑀺𑀧𑀦𑁆𑀦𑁂𑀢𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂. 𑀏𑀓𑀽𑀧𑁄𑀲𑀣𑀦𑁆𑀢𑀺 𑀏𑀓𑀤𑀺𑀯𑀲𑀁 𑀉𑀧𑁄𑀲𑀣𑀯𑀸𑀲𑀁.

𑁩𑁮𑁯. 𑀉𑀤𑀓𑀫𑀤𑀸𑀲𑀺𑀦𑁆𑀢𑀺 𑀫𑀼𑀔𑀯𑀺𑀓𑁆𑀔𑀸𑀮𑀦𑀢𑁆𑀣𑀁 𑀧𑀺𑀯𑀦𑀢𑁆𑀣𑀜𑁆𑀘 𑀉𑀤𑀓𑀁 𑀧𑀸𑀦𑀻𑀬𑀁 𑀅𑀤𑀸𑀲𑀺𑀁.

𑁩𑁯𑁭. 𑀘𑀡𑁆𑀟𑀺𑀓𑁂𑀢𑀺 𑀘𑀡𑁆𑀟𑁂. 𑀅𑀦𑀼𑀲𑀽𑀬𑀺𑀓𑀸𑀢𑀺 𑀉𑀲𑀽𑀬𑀸 𑀭𑀳𑀺𑀢𑀸.

𑁪𑁦𑁫. 𑀧𑀭𑀓𑀫𑁆𑀫𑀓𑀭𑀻𑀢𑀺 𑀧𑀭𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀸𑀭𑀺𑀦𑀻. 𑀅𑀢𑁆𑀣𑁂𑀦𑀸𑀢𑀺 𑀅𑀢𑁆𑀣𑀓𑀺𑀘𑁆𑀘𑁂𑀦. 𑀲𑀁𑀯𑀺𑀪𑀸𑀕𑀺𑀦𑀻 𑀲𑀓𑀲𑁆𑀲 𑀪𑀸𑀕𑀲𑁆𑀲𑀸𑀢𑀺 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀪𑀸𑀕𑀲𑁆𑀲 𑀲𑀁𑀯𑀺𑀪𑀚𑀦𑀲𑀻𑀮𑀸.

𑁪𑁧𑁩. 𑀔𑀻𑀭𑁄𑀤𑀦𑀦𑁆𑀢𑀺 𑀔𑀻𑀭𑀲𑀫𑁆𑀫𑀺𑀲𑁆𑀲𑀁 𑀑𑀤𑀦𑀁, 𑀔𑀻𑀭𑁂𑀦 𑀲𑀤𑁆𑀥𑀺𑀁 𑀑𑀤𑀦𑀁 𑀯𑀸.

𑁪𑁩𑁭. 𑀢𑀺𑀫𑁆𑀩𑀭𑀼𑀲𑀓𑀦𑁆𑀢𑀺 𑀢𑀺𑀡𑁆𑀟𑀼𑀓𑀨𑀮𑀁. 𑀢𑀺𑀧𑀼𑀲𑀲𑀤𑀺𑀲𑀸 𑀏𑀓𑀸 𑀯𑀮𑁆𑀮𑀺𑀚𑀸𑀢𑀺 𑀢𑀺𑀫𑁆𑀩𑀭𑀼𑀲𑀁, 𑀢𑀲𑁆𑀲 𑀨𑀮𑀁 𑀢𑀺𑀫𑁆𑀩𑀭𑀼𑀲𑀓𑀦𑁆𑀢𑀺 𑀯𑀤𑀦𑁆𑀢𑀺.

𑁪𑁪𑁫. 𑀓𑀓𑁆𑀓𑀸𑀭𑀺𑀓𑀦𑁆𑀢𑀺 𑀔𑀼𑀤𑁆𑀤𑀓𑁂𑀴𑀸𑀮𑀼𑀓𑀁, 𑀢𑀺𑀧𑀼𑀲𑀦𑁆𑀢𑀺 𑀘 𑀯𑀤𑀦𑁆𑀢𑀺.

𑁪𑁭𑁭. 𑀳𑀢𑁆𑀣𑀧𑁆𑀧𑀢𑀸𑀧𑀓𑀦𑁆𑀢𑀺 𑀫𑀦𑁆𑀤𑀸𑀫𑀼𑀔𑀺𑀁.

𑁫𑁧𑁭. 𑀅𑀫𑁆𑀩𑀓𑀜𑁆𑀚𑀺𑀓𑀦𑁆𑀢𑀺 𑀅𑀫𑁆𑀩𑀺𑀮𑀓𑀜𑁆𑀚𑀺𑀓𑀁.

𑁫𑁨𑁫. 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀦𑁆𑀢𑀺 𑀲𑀢𑁂𑀮𑀁 𑀢𑀺𑀮𑀧𑀺𑀜𑁆𑀜𑀸𑀓𑀁.

𑁫𑁫𑁭. 𑀯𑀺𑀥𑀽𑀧𑀦𑀦𑁆𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑀺𑀁.

𑁫𑁬𑁫. 𑀢𑀸𑀮𑀯𑀡𑁆𑀝𑀦𑁆𑀢𑀺 𑀢𑀸𑀮𑀧𑀢𑁆𑀢𑁂𑀳𑀺 𑀓𑀢𑀫𑀡𑁆𑀟𑀮𑀩𑀻𑀚𑀦𑀺𑀁.

𑁫𑁭𑁩. 𑀫𑁄𑀭𑀳𑀢𑁆𑀣𑀦𑁆𑀢𑀺 𑀫𑀬𑀽𑀭𑀧𑀺𑀜𑁆𑀙𑁂 𑀳𑀺 𑀓𑀢𑀁 𑀫𑀓𑀲𑀩𑀻𑀚𑀦𑀺𑀁.

𑁬𑁧𑁭. 𑀲𑁆𑀯𑀸𑀕𑀢𑀁 𑀯𑀢 𑀫𑁂𑀢𑀺 𑀫𑀬𑁆𑀳𑀁 𑀇𑀥𑀸𑀕𑀫𑀦𑀁 𑀲𑁄𑀪𑀦𑀁 𑀯𑀢 𑀅𑀳𑁄 𑀲𑀼𑀦𑁆𑀤𑀭𑀁. 𑀅𑀚𑁆𑀚 𑀲𑀼𑀧𑁆𑀧𑀪𑀸𑀢𑀁 𑀲𑀼𑀳𑀼𑀝𑁆𑀞𑀺𑀢𑀦𑁆𑀢𑀺 𑀅𑀚𑁆𑀚 𑀫𑀬𑁆𑀳𑀁 𑀭𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀧𑀪𑀸𑀢𑀁 𑀲𑀫𑁆𑀫𑀤𑁂𑀯 𑀯𑀺𑀪𑀸𑀬𑀦𑀁 𑀚𑀸𑀢𑀁, 𑀲𑀬𑀦𑀢𑁄 𑀉𑀝𑁆𑀞𑀸𑀦𑀫𑁆𑀧𑀺 𑀲𑀼𑀳𑀼𑀝𑁆𑀞𑀺𑀢𑀁 𑀲𑀼𑀝𑁆𑀞𑀼 𑀉𑀝𑁆𑀞𑀺𑀢𑀁. 𑀓𑀺𑀁 𑀓𑀸𑀭𑀡𑀸𑀢𑀺 𑀆𑀳 ‘‘𑀬𑀁 𑀅𑀤𑁆𑀤𑀲𑀸𑀫𑀺 𑀤𑁂𑀯𑀢𑀸𑀬𑁄’’𑀢𑀺𑀆𑀤𑀺.

𑁬𑁧𑁮. 𑀥𑀫𑁆𑀫𑀁 𑀲𑀼𑀢𑁆𑀯𑀸𑀢𑀺 𑀓𑀫𑁆𑀫𑀨𑀮𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀯𑀲𑁂𑀦 𑀢𑀼𑀫𑁆𑀳𑁂𑀳𑀺 𑀓𑀢𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸. 𑀓𑀸𑀳𑀸𑀫𑀻𑀢𑀺 𑀓𑀭𑀺𑀲𑁆𑀲𑀸𑀫𑀺. 𑀲𑀫𑀘𑀭𑀺𑀬𑀸𑀬𑀸𑀢𑀺 𑀓𑀸𑀬𑀲𑀫𑀸𑀘𑀸𑀭𑀺𑀓𑀲𑁆𑀲 𑀲𑀼𑀘𑀭𑀺𑀢𑀲𑁆𑀲 𑀘𑀭𑀡𑁂𑀦. 𑀲𑀜𑁆𑀜𑀫𑁂𑀦𑀸𑀢𑀺 𑀲𑀻𑀮𑀲𑀁𑀯𑀭𑁂𑀦. 𑀤𑀫𑁂𑀦𑀸𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀫𑁂𑀦. 𑀇𑀤𑀸𑀦𑀺 𑀢𑀲𑁆𑀲 𑀓𑀼𑀲𑀮𑀲𑁆𑀲 𑀅𑀢𑁆𑀢𑀦𑁄 𑀮𑁄𑀓𑀲𑁆𑀲 𑀘 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁆𑀯𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺 𑀯𑀼𑀢𑁆𑀢𑀁.

𑀏𑀯𑀫𑀬𑀁 𑀬𑀤𑀺𑀧𑀺 𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸𑀯𑀺𑀫𑀸𑀦𑀸𑀤𑀺𑀯𑀲𑁂𑀦 𑀙𑀢𑁆𑀢𑀺𑀁𑀲𑀯𑀺𑀫𑀸𑀦𑀲𑀗𑁆𑀕𑀳𑀸 𑀤𑁂𑀲𑀦𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀯𑀺𑀬 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑀲𑁆𑀲𑀸𑀧𑀺 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 ‘‘𑀕𑀼𑀢𑁆𑀢𑀺𑀮𑀯𑀺𑀫𑀸𑀦’’𑀦𑁆𑀢𑁆𑀯𑁂𑀯 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸, 𑀯𑀺𑀫𑀸𑀦𑀸𑀦𑀺 𑀧𑀦 𑀇𑀢𑁆𑀣𑀺𑀧𑀝𑀺𑀩𑀤𑁆𑀥𑀸𑀦𑀻𑀢𑀺 𑀇𑀢𑁆𑀣𑀺𑀯𑀺𑀫𑀸𑀦𑁂𑀬𑁂𑀯 𑀲𑀗𑁆𑀕𑀳𑀺𑀢𑀸𑀦𑀺. 𑀢𑀸 𑀧𑀦 𑀇𑀢𑁆𑀣𑀺𑀬𑁄 𑀓𑀲𑁆𑀲𑀧𑀲𑁆𑀲 𑀤𑀲𑀩𑀮𑀲𑁆𑀲 𑀓𑀸𑀮𑁂 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀘𑀭𑀡𑁂 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀘𑁂𑀢𑀦𑀸𑀯𑀲𑁂𑀦 𑀤𑀼𑀢𑀺𑀬𑀢𑁆𑀢𑀪𑀸𑀯𑀢𑁄 𑀧𑀝𑁆𑀞𑀸𑀬 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀏𑀯 𑀲𑀁𑀲𑀭𑀦𑁆𑀢𑀺𑀬𑁄 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀢𑁄 𑀓𑀸𑀮𑁂 𑀢𑀸𑀯𑀢𑀺𑀁𑀲𑀪𑀯𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀸, 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸 𑀓𑀫𑁆𑀫𑀲𑀭𑀺𑀓𑁆𑀔𑀢𑀸𑀬 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑁂𑀦 𑀧𑀼𑀘𑁆𑀙𑀺𑀢𑀓𑀸𑀮𑁂 𑀯𑀺𑀬 𑀩𑁆𑀬𑀸𑀓𑀭𑀺𑀁𑀲𑀽𑀢𑀺 𑀤𑀝𑁆𑀞𑀩𑁆𑀩𑀸.

𑀕𑀼𑀢𑁆𑀢𑀺𑀮𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀤𑁆𑀤𑀮𑁆𑀮𑀯𑀺𑀫𑀸𑀦𑀯𑀡𑁆𑀡𑀦𑀸

𑀤𑀤𑁆𑀤𑀮𑁆𑀮𑀫𑀸𑀦𑀸 𑀯𑀡𑁆𑀡𑁂𑀦𑀸𑀢𑀺 𑀤𑀤𑁆𑀤𑀮𑁆𑀮𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀦𑀸𑀮𑀓𑀕𑀸𑀫𑀓𑁂 𑀆𑀬𑀲𑁆𑀫𑀢𑁄 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀲𑁆𑀲 𑀅𑀜𑁆𑀜𑀢𑀭𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀤𑁆𑀯𑁂 𑀥𑀻𑀢𑀭𑁄 𑀅𑀳𑁂𑀲𑀼𑀁, 𑀏𑀓𑀸 𑀪𑀤𑁆𑀤𑀸 𑀦𑀸𑀫, 𑀇𑀢𑀭𑀸 𑀲𑀼𑀪𑀤𑁆𑀤𑀸 𑀦𑀸𑀫. 𑀢𑀸𑀲𑀼 𑀪𑀤𑁆𑀤𑀸 𑀧𑀢𑀺𑀓𑀼𑀮𑀁 𑀕𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀯𑀜𑁆𑀛𑀸 𑀘 𑀅𑀳𑁄𑀲𑀺. 𑀲𑀸 𑀲𑀸𑀫𑀺𑀓𑀁 𑀆𑀳 ‘‘𑀫𑀫 𑀓𑀦𑀺𑀝𑁆𑀞𑀸 𑀲𑀼𑀪𑀤𑁆𑀤𑀸 𑀦𑀸𑀫 𑀅𑀢𑁆𑀣𑀺, 𑀢𑀁 𑀆𑀦𑁂𑀳𑀺, 𑀲𑀘𑀲𑁆𑀲𑀸 𑀧𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀲𑁄 𑀫𑀫𑀧𑀺 𑀧𑀼𑀢𑁆𑀢𑁄 𑀲𑀺𑀬𑀸, 𑀅𑀬𑀜𑁆𑀘 𑀓𑀼𑀮𑀯𑀁𑀲𑁄 𑀦 𑀦𑀲𑁆𑀲𑁂𑀬𑁆𑀬𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺.

𑀅𑀣 𑀪𑀤𑁆𑀤𑀸 𑀲𑀼𑀪𑀤𑁆𑀤𑀁 𑀑𑀯𑀤𑀺 ‘‘𑀲𑀼𑀪𑀤𑁆𑀤𑁂, 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸 𑀥𑀫𑁆𑀫𑀘𑀭𑀺𑀬𑀸𑀬 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀺, 𑀏𑀯𑀁 𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀲𑀫𑁆𑀧𑀭𑀸𑀬𑀺𑀓𑁄 𑀘 𑀅𑀢𑁆𑀣𑁄 𑀳𑀢𑁆𑀣𑀕𑀢𑁄 𑀏𑀯 𑀳𑁄𑀢𑀻’’𑀢𑀺. 𑀲𑀸 𑀢𑀲𑁆𑀲𑀸 𑀑𑀯𑀸𑀤𑁂 𑀞𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀫𑀸𑀦𑀸 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀢𑁆𑀣𑁂𑀭𑀁 𑀅𑀢𑁆𑀢𑀝𑁆𑀞𑀫𑀁 𑀦𑀺𑀫𑀦𑁆𑀢𑁂𑀲𑀺. 𑀣𑁂𑀭𑁄 𑀲𑀼𑀪𑀤𑁆𑀤𑀸𑀬 𑀧𑀼𑀜𑁆𑀜𑀽𑀧𑀘𑀬𑀁 𑀆𑀓𑀗𑁆𑀔𑀦𑁆𑀢𑁄 𑀲𑀗𑁆𑀖𑀼𑀤𑁆𑀤𑁂𑀲𑀯𑀲𑁂𑀦 𑀲𑀢𑁆𑀢 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀢𑁆𑀣𑁂𑀭𑀁 𑀢𑁂 𑀘 𑀪𑀺𑀓𑁆𑀔𑀽 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺, 𑀣𑁂𑀭𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺. 𑀪𑀤𑁆𑀤𑀸 𑀧𑀦 𑀧𑀼𑀕𑁆𑀕𑀮𑁂𑀲𑀼 𑀤𑀸𑀦𑀸𑀦𑀺 𑀤𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀅𑀣 𑀲𑀼𑀪𑀤𑁆𑀤𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀅𑀳𑀁 𑀧𑀼𑀜𑁆𑀜𑁂𑀦 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀻 ‘‘𑀪𑀤𑁆𑀤𑀸𑀬 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀧𑀢𑁆𑀢𑀸, 𑀪𑀤𑁆𑀤𑀸 𑀦𑀼 𑀔𑁄 𑀓𑀳𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀲𑀓𑁆𑀓𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀺𑀲𑁆𑀯𑀸 𑀅𑀦𑀼𑀓𑀫𑁆𑀧𑀫𑀸𑀦𑀸 𑀢𑀲𑁆𑀲𑀸 𑀯𑀺𑀫𑀸𑀦𑀁 𑀧𑀸𑀯𑀺𑀲𑀺. 𑀅𑀣 𑀦𑀁 𑀪𑀤𑁆𑀤𑀸 𑁋

𑁬𑁧𑁯.

‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀯𑀡𑁆𑀡𑁂𑀦, 𑀬𑀲𑀲𑀸 𑀘 𑀬𑀲𑀲𑁆𑀲𑀺𑀦𑀻;

𑀲𑀩𑁆𑀩𑁂 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂, 𑀯𑀡𑁆𑀡𑁂𑀦 𑀅𑀢𑀺𑀭𑁄𑀘𑀲𑀺.

𑁬𑁨𑁦.

‘‘𑀤𑀲𑁆𑀲𑀦𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀇𑀤𑀁 𑀧𑀞𑀫𑀤𑀲𑁆𑀲𑀦𑀁;

𑀓𑀲𑁆𑀫𑀸 𑀓𑀸𑀬𑀸 𑀦𑀼 𑀆𑀕𑀫𑁆𑀫, 𑀦𑀸𑀫𑁂𑀦 𑀪𑀸𑀲𑀲𑁂 𑀫𑀫’’𑀦𑁆𑀢𑀺. 𑁋

𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺. 𑀲𑀸𑀧𑀺 𑀢𑀲𑁆𑀲𑀸 𑁋

𑁬𑁨𑁧.

‘‘𑀅𑀳𑀁 𑀪𑀤𑁆𑀤𑁂 𑀲𑀼𑀪𑀤𑁆𑀤𑀸𑀲𑀺𑀁, 𑀧𑀼𑀩𑁆𑀩𑁂 𑀫𑀸𑀦𑀼𑀲𑀓𑁂 𑀪𑀯𑁂;

𑀲𑀳𑀪𑀭𑀺𑀬𑀸 𑀘 𑀢𑁂 𑀆𑀲𑀺𑀁, 𑀪𑀕𑀺𑀦𑀻 𑀘 𑀓𑀦𑀺𑀝𑁆𑀞𑀺𑀓𑀸.

𑁬𑁨𑁨.

‘‘𑀲𑀸 𑀅𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀢𑀢𑁄 𑀘𑀼𑀢𑀸;

𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁, 𑀉𑀧𑀧𑀦𑁆𑀦𑀸 𑀲𑀳𑀩𑁆𑀬𑀢’’𑀦𑁆𑀢𑀺. 𑁋 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺;

𑁬𑁧𑁯-𑁨𑁦. 𑀢𑀢𑁆𑀣 𑀯𑀡𑁆𑀡𑁂𑀦𑀸𑀢𑀺 𑀯𑀡𑁆𑀡𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀤𑀲𑁆𑀲𑀦𑀁 𑀦𑀸𑀪𑀺𑀚𑀸𑀦𑀸𑀫𑀻𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀢𑀯 𑀤𑀲𑁆𑀲𑀦𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑁆𑀯𑀁 𑀫𑀬𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀤𑀁 𑀧𑀞𑀫𑀤𑀲𑁆𑀲𑀦’’𑀦𑁆𑀢𑀺. 𑀓𑀲𑁆𑀫𑀸 𑀓𑀸𑀬𑀸 𑀦𑀼 𑀆𑀕𑀫𑁆𑀫, 𑀦𑀸𑀫𑁂𑀦 𑀪𑀸𑀲𑀲𑁂 𑀫𑀫𑀦𑁆𑀢𑀺 𑀓𑀢𑀭𑀤𑁂𑀯𑀦𑀺𑀓𑀸𑀬𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀪𑀤𑁆𑀤𑁂’’𑀢𑀺 𑀦𑀸𑀫𑁂𑀦 𑀫𑀁 𑀆𑀮𑀧𑀲𑀺.

𑁬𑁨𑁧. 𑀅𑀳𑀁 𑀪𑀤𑁆𑀤𑁂𑀢𑀺 𑀏𑀢𑁆𑀣 𑀪𑀤𑁆𑀤𑁂𑀢𑀺 𑀆𑀮𑀧𑀦𑀁. 𑀲𑀼𑀪𑀤𑁆𑀤𑀸𑀲𑀺𑀦𑁆𑀢𑀺 𑀅𑀳𑀁 𑀲𑀼𑀪𑀤𑁆𑀤𑀸 𑀦𑀸𑀫 𑀢𑀯 𑀪𑀕𑀺𑀦𑀻 𑀓𑀦𑀺𑀝𑁆𑀞𑀺𑀓𑀸 𑀆𑀲𑀺𑀁 𑀅𑀳𑁄𑀲𑀺𑀁, 𑀢𑀢𑁆𑀣 𑀧𑀼𑀩𑁆𑀩𑁂 𑀫𑀸𑀦𑀼𑀲𑀓𑁂 𑀪𑀯𑁂 𑀲𑀳𑀪𑀭𑀺𑀬𑀸 𑀲𑀫𑀸𑀦𑀪𑀭𑀺𑀬𑀸 𑀢𑁂 𑀢𑀬𑀸 𑀏𑀓𑀲𑁆𑀲𑁂𑀯 𑀪𑀭𑀺𑀬𑀸, 𑀢𑀯 𑀧𑀢𑀺𑀦𑁄 𑀏𑀯 𑀪𑀭𑀺𑀬𑀸, 𑀆𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀦 𑀪𑀤𑁆𑀤𑀸 𑁋

𑁬𑁨𑁩.

‘‘𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸, 𑀢𑁂 𑀤𑁂𑀯𑁂 𑀬𑀦𑁆𑀢𑀺 𑀧𑀸𑀡𑀺𑀦𑁄;

𑀬𑁂𑀲𑀁 𑀢𑁆𑀯𑀁 𑀓𑀺𑀢𑁆𑀢𑀬𑀺𑀲𑁆𑀲𑀲𑀺, 𑀲𑀼𑀪𑀤𑁆𑀤𑁂 𑀚𑀸𑀢𑀺𑀫𑀢𑁆𑀢𑀦𑁄.

𑁬𑁨𑁪.

‘‘𑀅𑀣 𑀢𑁆𑀯𑀁 𑀓𑁂𑀦 𑀯𑀡𑁆𑀡𑁂𑀦, 𑀓𑁂𑀦 𑀯𑀸 𑀅𑀦𑀼𑀲𑀸𑀲𑀺𑀢𑀸;

𑀓𑀻𑀤𑀺𑀲𑁂𑀦𑁂𑀯 𑀤𑀸𑀦𑁂𑀦, 𑀲𑀼𑀩𑁆𑀩𑀢𑁂𑀦 𑀬𑀲𑀲𑁆𑀲𑀺𑀦𑀻.

𑁬𑁨𑁫.

‘‘𑀬𑀲𑀁 𑀏𑀢𑀸𑀤𑀺𑀲𑀁 𑀧𑀢𑁆𑀢𑀸, 𑀯𑀺𑀲𑁂𑀲𑀁 𑀯𑀺𑀧𑀼𑀮𑀫𑀚𑁆𑀛𑀕𑀸;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀢𑀻𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺. 𑀧𑀼𑀦 𑀲𑀼𑀪𑀤𑁆𑀤𑀸 𑁋

𑁬𑁨𑁬.

‘‘𑀅𑀝𑁆𑀞𑁂𑀯 𑀧𑀺𑀡𑁆𑀟𑀧𑀸𑀢𑀸𑀦𑀺, 𑀬𑀁 𑀤𑀸𑀦𑀁 𑀅𑀤𑀤𑀁 𑀧𑀼𑀭𑁂;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀲𑀗𑁆𑀖𑀲𑁆𑀲, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁬𑁨𑁭.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀩𑁆𑀬𑀸𑀓𑀸𑀲𑀺.

𑁬𑁨𑁩. 𑀢𑀢𑁆𑀣 𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸 𑀢𑁂 𑀤𑁂𑀯𑁂 𑀬𑀦𑁆𑀢𑀻𑀢𑀺 𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸 𑀫𑀳𑀸𑀧𑀼𑀜𑁆𑀜𑀸 𑀢𑁂 𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑁂 𑀬𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀕𑀘𑁆𑀙𑀦𑁆𑀢𑀺 𑀧𑀸𑀡𑀺𑀦𑁄 𑀲𑀢𑁆𑀢𑀸, 𑀬𑁂𑀲𑀁 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀅𑀦𑁆𑀢𑀭𑁂 𑀢𑁆𑀯𑀁 𑀅𑀢𑁆𑀢𑀦𑁄 𑀚𑀸𑀢𑀺𑀁 𑀓𑀺𑀢𑁆𑀢𑀬𑀺𑀲𑁆𑀲𑀲𑀺 𑀓𑀣𑁂𑀲𑀻𑀢𑀺 𑀬𑁄𑀚𑀦𑀸.

𑁬𑁨𑁪. 𑀓𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀓𑀻𑀤𑀺𑀲𑁂𑀦𑁂𑀯𑀸𑀢𑀺 𑀏𑀯𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀓𑀻𑀤𑀺𑀲𑁂𑀦 𑀘𑀸𑀢𑀺 𑀅𑀢𑁆𑀣𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀼𑀩𑁆𑀩𑀢𑁂𑀦𑀸𑀢𑀺 𑀲𑀼𑀦𑁆𑀤𑀭𑁂𑀦 𑀯𑀢𑁂𑀦, 𑀲𑀼𑀯𑀺𑀲𑀼𑀤𑁆𑀥𑁂𑀦 𑀲𑀻𑀮𑁂𑀦𑀸𑀢𑀺 𑀅𑀢𑁆𑀣𑁄.

𑁬𑁨𑁬. 𑀅𑀝𑁆𑀞𑁂𑀯 𑀧𑀺𑀡𑁆𑀟𑀧𑀸𑀢𑀸𑀦𑀻𑀢𑀺 𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀤𑀤𑀦𑁆𑀢𑀺 𑀅𑀤𑀸𑀲𑀺𑀁.

𑀏𑀯𑀁 𑀲𑀼𑀪𑀤𑁆𑀤𑀸𑀬 𑀓𑀣𑀺𑀢𑁂 𑀧𑀼𑀦 𑀪𑀤𑁆𑀤𑀸 𑁋

𑁬𑁨𑁯.

‘‘𑀅𑀳𑀁 𑀢𑀬𑀸 𑀩𑀳𑀼𑀢𑀭𑁂 𑀪𑀺𑀓𑁆𑀔𑀽, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄;

𑀢𑀧𑁆𑀧𑁂𑀲𑀺𑀁 𑀅𑀦𑁆𑀦𑀧𑀸𑀦𑁂𑀦, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁬𑁩𑁦.

‘‘𑀢𑀬𑀸 𑀩𑀳𑀼𑀢𑀭𑀁 𑀤𑀢𑁆𑀯𑀸, 𑀳𑀻𑀦𑀓𑀸𑀬𑀽𑀧𑀕𑀸 𑀅𑀳𑀁;

𑀓𑀣𑀁 𑀢𑁆𑀯𑀁 𑀅𑀧𑁆𑀧𑀢𑀭𑀁 𑀤𑀢𑁆𑀯𑀸, 𑀯𑀺𑀲𑁂𑀲𑀁 𑀯𑀺𑀧𑀼𑀮𑀫𑀚𑁆𑀛𑀕𑀸;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀧𑀼𑀘𑁆𑀙𑀺. 𑀢𑀢𑁆𑀣 𑀢𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀧𑀼𑀦 𑀲𑀼𑀪𑀤𑁆𑀤𑀸 𑁋

𑁬𑁩𑁧.

‘‘𑀫𑀦𑁄𑀪𑀸𑀯𑀦𑀻𑀬𑁄 𑀪𑀺𑀓𑁆𑀔𑀼, 𑀲𑀦𑁆𑀤𑀺𑀝𑁆𑀞𑁄 𑀫𑁂 𑀧𑀼𑀭𑁂 𑀅𑀳𑀼;

𑀢𑀸𑀳𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀲𑀺𑀁, 𑀭𑁂𑀯𑀢𑀁 𑀅𑀢𑁆𑀢𑀦𑀝𑁆𑀞𑀫𑀁.

𑁬𑁩𑁨.

‘‘𑀲𑁄 𑀫𑁂 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄, 𑀅𑀦𑀼𑀓𑀫𑁆𑀧𑀸𑀬 𑀭𑁂𑀯𑀢𑁄;

𑀲𑀗𑁆𑀖𑁂 𑀤𑁂𑀳𑀻𑀢𑀺 𑀫𑀁𑀯𑁄𑀘, 𑀢𑀲𑁆𑀲𑀸𑀳𑀁 𑀯𑀘𑀦𑀁 𑀓𑀭𑀺𑀁.

𑁬𑁩𑁩.

‘‘𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸, 𑀅𑀧𑁆𑀧𑀫𑁂𑀬𑁆𑀬𑁂 𑀧𑀢𑀺𑀝𑁆𑀞𑀺𑀢𑀸;

𑀧𑀼𑀕𑁆𑀕𑀮𑁂𑀲𑀼 𑀢𑀬𑀸 𑀤𑀺𑀦𑁆𑀦𑀁, 𑀦 𑀢𑀁 𑀢𑀯 𑀫𑀳𑀧𑁆𑀨𑀮’’𑀦𑁆𑀢𑀺. 𑁋

𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀓𑀣𑁂𑀲𑀺.

𑁬𑁩𑁧. 𑀢𑀢𑁆𑀣 𑀫𑀦𑁄𑀪𑀸𑀯𑀦𑀻𑀬𑁄𑀢𑀺 𑀫𑀦𑀯𑀟𑁆𑀠𑀦𑀓𑁄 𑀉𑀴𑀸𑀭𑀕𑀼𑀡𑀢𑀸𑀬 𑀲𑀫𑁆𑀪𑀸𑀯𑀦𑀻𑀬𑁄. 𑀲𑀦𑁆𑀤𑀺𑀝𑁆𑀞𑁄𑀢𑀺 𑀦𑀺𑀫𑀦𑁆𑀢𑀦𑀯𑀲𑁂𑀦 𑀩𑁄𑀥𑀺𑀢𑁄 𑀓𑀣𑀺𑀢𑁄. 𑀢𑁂𑀦𑀸𑀳 ‘‘𑀢𑀸𑀳𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀲𑀺𑀁, 𑀭𑁂𑀯𑀢𑀁 𑀅𑀢𑁆𑀢𑀦𑀝𑁆𑀞𑀫’’𑀦𑁆𑀢𑀺, 𑀢𑀁 𑀫𑀦𑁄𑀪𑀸𑀯𑀦𑀻𑀬𑀁 𑀅𑀬𑁆𑀬𑀁 𑀭𑁂𑀯𑀢𑀁 𑀅𑀢𑁆𑀢𑀦𑀝𑁆𑀞𑀫𑀁 𑀪𑀢𑁆𑀢𑁂𑀦 𑀅𑀳𑀁 𑀦𑀺𑀫𑀦𑁆𑀢𑁂𑀲𑀺𑀁.

𑁬𑁩𑁨-𑁩. 𑀲𑁄 𑀫𑁂 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀲𑁄 𑀅𑀬𑁆𑀬𑁄 𑀭𑁂𑀯𑀢𑁄 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀫𑀫 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄 𑀳𑀺𑀢𑁂𑀲𑀻. 𑀲𑀗𑁆𑀖𑁂 𑀤𑁂𑀳𑀻𑀢𑀺 𑀫𑀁𑀯𑁄𑀘𑀸𑀢𑀺 ‘‘𑀬𑀤𑀺 𑀢𑁆𑀯𑀁 𑀲𑀼𑀪𑀤𑁆𑀤𑁂 𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀢𑀼𑀓𑀸𑀫𑀸, 𑀬𑀲𑁆𑀫𑀸 𑀧𑀼𑀕𑁆𑀕𑀮𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀲𑀗𑁆𑀖𑀕𑀢𑀸 𑀏𑀯 𑀤𑀓𑁆𑀔𑀺𑀡𑀸 𑀫𑀳𑀧𑁆𑀨𑀮𑀢𑀭𑀸, 𑀢𑀲𑁆𑀫𑀸 𑀲𑀗𑁆𑀖𑁂 𑀤𑁂𑀳𑀺, 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑁂𑀳𑀻’’𑀢𑀺 𑀫𑀁 𑀅𑀪𑀸𑀲𑀺. 𑀢𑀦𑁆𑀢𑀺 𑀢𑀁 𑀤𑀸𑀦𑀁.

𑀏𑀯𑀁 𑀲𑀼𑀪𑀤𑁆𑀤𑀸𑀬 𑀯𑀼𑀢𑁆𑀢𑁂 𑀪𑀤𑁆𑀤𑀸 𑀢𑀫𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻 𑀉𑀢𑁆𑀢𑀭𑀺 𑀘 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀸 𑁋

𑁬𑁩𑁪.

‘‘𑀇𑀤𑀸𑀦𑁂𑀯𑀸𑀳𑀁 𑀚𑀸𑀦𑀸𑀫𑀺, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀲𑀸𑀳𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀲𑀗𑁆𑀖𑁂 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀲𑀼𑀪𑀤𑁆𑀤𑀸 𑀧𑀦 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀫𑁂𑀯 𑀕𑀢𑀸. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀩𑁆𑀩𑁂 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦 𑀅𑀪𑀺𑀪𑀼𑀬𑁆𑀬 𑀯𑀺𑀭𑁄𑀘𑀫𑀸𑀦𑀁 𑀲𑀼𑀪𑀤𑁆𑀤𑀁 𑀤𑁂𑀯𑀥𑀻𑀢𑀭𑀁 𑀤𑀺𑀲𑁆𑀯𑀸 𑀢𑀜𑁆𑀘 𑀢𑀸𑀲𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀢𑀸𑀯𑀤𑁂𑀯 𑀘 𑀲𑀼𑀪𑀤𑁆𑀤𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀢𑀁 ‘‘𑀅𑀬𑀁 𑀦𑀸𑀫𑀸’’𑀢𑀺 𑀅𑀚𑀸𑀦𑀦𑁆𑀢𑁄 𑁋

𑁬𑁩𑁫.

‘‘𑀓𑀸 𑀏𑀲𑀸 𑀤𑁂𑀯𑀢𑀸 𑀪𑀤𑁆𑀤𑁂, 𑀢𑀬𑀸 𑀫𑀦𑁆𑀢𑀬𑀢𑁂 𑀲𑀳;

𑀲𑀩𑁆𑀩𑁂 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂, 𑀯𑀡𑁆𑀡𑁂𑀦 𑀅𑀢𑀺𑀭𑁄𑀘𑀢𑀻’’𑀢𑀺. 𑁋

𑀪𑀤𑁆𑀤𑀁 𑀧𑀼𑀘𑁆𑀙𑀺. 𑀲𑀸𑀧𑀺𑀲𑁆𑀲 𑁋

𑁬𑁩𑁬.

‘‘𑀫𑀦𑀼𑀲𑁆𑀲𑀪𑀽𑀢𑀸 𑀤𑁂𑀯𑀺𑀦𑁆𑀤, 𑀧𑀼𑀩𑁆𑀩𑁂 𑀫𑀸𑀦𑀼𑀲𑀓𑁂 𑀪𑀯𑁂;

𑀲𑀳𑀪𑀭𑀺𑀬𑀸 𑀘 𑀫𑁂 𑀆𑀲𑀺, 𑀪𑀕𑀺𑀦𑀻 𑀘 𑀓𑀦𑀺𑀝𑁆𑀞𑀺𑀓𑀸,

𑀲𑀗𑁆𑀖𑁂 𑀤𑀸𑀦𑀸𑀦𑀺 𑀤𑀢𑁆𑀯𑀸𑀦, 𑀓𑀢𑀧𑀼𑀜𑁆𑀜𑀸 𑀯𑀺𑀭𑁄𑀘𑀢𑀻’’𑀢𑀺. 𑁋

𑀓𑀣𑁂𑀲𑀺. 𑀅𑀣 𑀲𑀓𑁆𑀓𑁄 𑀢𑀲𑁆𑀲𑀸 𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀫𑀳𑀧𑁆𑀨𑀮𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀁 𑀓𑀣𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁩𑁭.

‘‘𑀥𑀫𑁆𑀫𑁂𑀦 𑀧𑀼𑀩𑁆𑀩𑁂 𑀪𑀕𑀺𑀦𑀻, 𑀢𑀬𑀸 𑀪𑀤𑁆𑀤𑁂 𑀯𑀺𑀭𑁄𑀘𑀢𑀺;

𑀬𑀁 𑀲𑀗𑁆𑀖𑀫𑁆𑀳𑀺 𑀅𑀧𑁆𑀧𑀫𑁂𑀬𑁆𑀬𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀤𑀓𑁆𑀔𑀺𑀡𑀁.

𑁬𑁩𑁮.

‘‘𑀧𑀼𑀘𑁆𑀙𑀺𑀢𑁄 𑀳𑀺 𑀫𑀬𑀸 𑀩𑀼𑀤𑁆𑀥𑁄, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂;

𑀯𑀺𑀧𑀸𑀓𑀁 𑀲𑀁𑀯𑀺𑀪𑀸𑀕𑀲𑁆𑀲, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁩𑁯.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁪𑁦.

‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀸𑀦𑀁 𑀓𑀫𑁆𑀫𑀨𑀮𑀁 𑀲𑀓𑀁;

𑀯𑀺𑀧𑀸𑀓𑀁 𑀲𑀁𑀯𑀺𑀪𑀸𑀕𑀲𑁆𑀲, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁪𑁧.

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

𑁬𑁪𑁨.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁪𑁩.

‘‘𑀏𑀲𑁄 𑀳𑀺 𑀲𑀗𑁆𑀖𑁄 𑀯𑀺𑀧𑀼𑀮𑁄 𑀫𑀳𑀕𑁆𑀕𑀢𑁄, 𑀏𑀲𑀧𑁆𑀧𑀫𑁂𑀬𑁆𑀬𑁄 𑀉𑀤𑀥𑀻𑀯 𑀲𑀸𑀕𑀭𑁄;

𑀏𑀢𑁂 𑀳𑀺 𑀲𑁂𑀝𑁆𑀞𑀸 𑀦𑀭𑀯𑀻𑀭𑀲𑀸𑀯𑀓𑀸, 𑀧𑀪𑀗𑁆𑀓𑀭𑀸 𑀥𑀫𑁆𑀫𑀫𑀼𑀤𑀻𑀭𑀬𑀦𑁆𑀢𑀺.

𑁬𑁪𑁪.

‘‘𑀢𑁂𑀲𑀁 𑀲𑀼𑀤𑀺𑀦𑁆𑀦𑀁 𑀲𑀼𑀳𑀼𑀢𑀁 𑀲𑀼𑀬𑀺𑀝𑁆𑀞𑀁, 𑀬𑁂 𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲 𑀤𑀤𑀦𑁆𑀢𑀺 𑀤𑀸𑀦𑀁;

𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀧𑀢𑀺𑀝𑁆𑀞𑀺𑀢𑀸, 𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 𑀯𑀡𑁆𑀡𑀺𑀢𑀸.

𑁬𑁪𑁫.

‘‘𑀏𑀢𑀸𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸, 𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺.

𑁬𑁩𑁭. 𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀓𑀸𑀭𑀡𑁂𑀦 𑀜𑀸𑀬𑁂𑀦 𑀯𑀸. 𑀢𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀇𑀤𑀸𑀦𑀺 𑀢𑀁 ‘‘𑀥𑀫𑁆𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀬𑀁 𑀲𑀗𑁆𑀖𑀫𑁆𑀳𑀺 𑀅𑀧𑁆𑀧𑀫𑁂𑀬𑁆𑀬𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀤𑀓𑁆𑀔𑀺𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀫𑁂𑀬𑁆𑀬𑁂𑀢𑀺 𑀕𑀼𑀡𑀸𑀦𑀼𑀪𑀸𑀯𑀲𑁆𑀲 𑀅𑀢𑁆𑀢𑀦𑀺 𑀓𑀢𑀸𑀦𑀁 𑀓𑀸𑀭𑀸𑀦𑀁 𑀨𑀮𑀯𑀺𑀲𑁂𑀲𑀲𑁆𑀲 𑀘 𑀯𑀲𑁂𑀦 𑀧𑀫𑀺𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂.

𑁬𑁩𑁮-𑁯. 𑀅𑀬𑀜𑁆𑀘 𑀅𑀢𑁆𑀣𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘 𑀲𑀼𑀢𑁄, 𑀲𑀫𑁆𑀫𑀼𑀔𑀸 𑀘 𑀧𑀝𑀺𑀕𑁆𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀘𑁆𑀙𑀺𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀚𑀫𑀸𑀦𑀸𑀦𑀦𑁆𑀢𑀺 𑀤𑀤𑀦𑁆𑀢𑀸𑀦𑀁. 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀦𑁆𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀧𑀼𑀜𑁆𑀜𑀨𑀮𑀁 𑀆𑀓𑀗𑁆𑀔𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁. 𑀑𑀧𑀥𑀺𑀓𑀦𑁆𑀢𑀺 𑀉𑀧𑀥𑀺 𑀦𑀸𑀫 𑀔𑀦𑁆𑀥𑀸, 𑀉𑀧𑀥𑀺𑀲𑁆𑀲 𑀓𑀭𑀡𑀲𑀻𑀮𑀁, 𑀉𑀧𑀥𑀺𑀧𑀬𑁄𑀚𑀦𑀦𑁆𑀢𑀺 𑀯𑀸 𑀑𑀧𑀥𑀺𑀓𑀁, 𑀅𑀢𑁆𑀢𑀪𑀸𑀯𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀓𑀁.

𑁬𑁪𑁦. 𑀚𑀸𑀦𑀁 𑀓𑀫𑁆𑀫𑀨𑀮𑀁 𑀲𑀓𑀦𑁆𑀢𑀺 𑀲𑀢𑁆𑀢𑀸𑀦𑀁 𑀲𑀓𑀁 𑀲𑀓𑀁 𑀬𑀣𑀸𑀲𑀓𑀁 𑀧𑀼𑀜𑁆𑀜𑀁 𑀧𑀼𑀜𑁆𑀜𑀨𑀮𑀜𑁆𑀘 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀚𑀸𑀦𑀦𑁆𑀢𑁄. 𑀲𑀓𑀦𑁆𑀢𑀺 𑀯𑀸 𑀬𑀓𑀸𑀭𑀲𑁆𑀲 𑀓𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀬𑀁 𑀅𑀢𑁆𑀢𑀦𑀸𑀢𑀺 𑀅𑀢𑁆𑀣𑁄.

𑁬𑁪𑁧. 𑀧𑀝𑀺𑀧𑀦𑁆𑀦𑀸𑀢𑀺 𑀧𑀝𑀺𑀧𑀚𑁆𑀚𑀫𑀸𑀦𑀸, 𑀫𑀕𑁆𑀕𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀉𑀚𑀼𑀪𑀽𑀢𑁄𑀢𑀺 𑀉𑀚𑀼𑀧𑀝𑀺𑀧𑀢𑁆𑀢𑀺𑀬𑀸 𑀉𑀚𑀼𑀪𑀸𑀯𑀁 𑀧𑀢𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀚𑀸𑀢𑁄. 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄𑀢𑀺 𑀧𑀜𑁆𑀜𑀸𑀬 𑀲𑀻𑀮𑁂𑀦 𑀘 𑀲𑀫𑀸𑀳𑀺𑀢𑁄, 𑀤𑀺𑀝𑁆𑀞𑀺𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀸𑀬 𑀤𑀺𑀝𑁆𑀞𑀺𑀬𑀸 𑀅𑀭𑀺𑀬𑁂𑀦 𑀲𑀻𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀸𑀧𑀺𑀲𑁆𑀲 𑀧𑀭𑀫𑀢𑁆𑀣𑀲𑀗𑁆𑀖𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀗𑁆𑀖𑀝𑀺𑀢𑀢𑁆𑀢𑀸 𑀳𑀺 𑀲𑀗𑁆𑀖𑁄. 𑀅𑀣 𑀯𑀸 𑀲𑀫𑀸𑀳𑀺𑀢𑀁 𑀲𑀫𑀸𑀥𑀺, 𑀧𑀜𑁆𑀜𑀸 𑀲𑀻𑀮𑀁 𑀲𑀫𑀸𑀳𑀺𑀢𑀜𑁆𑀘 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄. 𑀢𑁂𑀦𑀲𑁆𑀲 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀢𑁆𑀢𑀬𑀲𑀫𑁆𑀧𑀦𑁆𑀦𑀢𑀸𑀬 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑁬𑁪𑁩. 𑀯𑀺𑀧𑀼𑀮𑁄 𑀫𑀳𑀕𑁆𑀕𑀢𑁄𑀢𑀺 𑀕𑀼𑀡𑁂𑀳𑀺 𑀫𑀳𑀢𑁆𑀢𑀁 𑀕𑀢𑁄𑀢𑀺 𑀫𑀳𑀕𑁆𑀕𑀢𑁄, 𑀢𑀢𑁄 𑀏𑀯 𑀅𑀢𑁆𑀢𑀦𑀺 𑀓𑀢𑀸𑀦𑀁 𑀓𑀸𑀭𑀸𑀦𑀁 𑀨𑀮𑀯𑁂𑀧𑀼𑀮𑁆𑀮𑀳𑁂𑀢𑀼𑀢𑀸𑀬 𑀯𑀺𑀧𑀼𑀮𑁄. 𑀉𑀤𑀥𑀻𑀯 𑀲𑀸𑀕𑀭𑁄𑀢𑀺 𑀬𑀣𑀸 𑀉𑀤𑀓𑀁 𑀏𑀢𑁆𑀣 𑀥𑀻𑀬𑀢𑀻𑀢𑀺 ‘‘𑀉𑀤𑀥𑀻’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀸𑀕𑀭𑁄, ‘‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻’’𑀢𑀺𑀆𑀤𑀺𑀦𑀸 𑀉𑀤𑀓𑀢𑁄 𑀅𑀧𑁆𑀧𑀫𑁂𑀬𑁆𑀬𑁄, 𑀏𑀯𑀫𑁂𑀲 𑀕𑀼𑀡𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁂 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂 𑀦𑀺𑀧𑀸𑀢𑁄, 𑀏𑀢𑁂 𑀏𑀯 𑀲𑁂𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸, 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪; 𑁫.𑁩𑁨).

𑀦𑀭𑀯𑀻𑀭𑀲𑀸𑀯𑀓𑀸𑀢𑀺 𑀦𑀭𑁂𑀲𑀼 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀲𑁆𑀲 𑀦𑀭𑀲𑁆𑀲 𑀲𑀸𑀯𑀓𑀸. 𑀧𑀪𑀗𑁆𑀓𑀭𑀸𑀢𑀺 𑀮𑁄𑀓𑀲𑁆𑀲 𑀜𑀸𑀡𑀸𑀮𑁄𑀓𑀓𑀭𑀸. 𑀥𑀫𑁆𑀫𑀫𑀼𑀤𑀻𑀭𑀬𑀦𑁆𑀢𑀻𑀢𑀺 𑀥𑀫𑁆𑀫𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀓𑀣𑀁? 𑀥𑀫𑁆𑀫𑀲𑀸𑀫𑀺𑀦𑀸 𑀳𑀺 𑀥𑀫𑁆𑀫𑀧𑀚𑁆𑀚𑁄𑀢𑁄 𑀅𑀭𑀺𑀬𑀲𑀗𑁆𑀖𑁂 𑀞𑀧𑀺𑀢𑁄.

𑁬𑁪𑁪. 𑀬𑁂 𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲 𑀤𑀤𑀦𑁆𑀢𑀺 𑀤𑀸𑀦𑀦𑁆𑀢𑀺 𑀬𑁂 𑀲𑀢𑁆𑀢𑀸 𑀅𑀭𑀺𑀬𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀲𑀫𑁆𑀫𑀼𑀢𑀺𑀲𑀗𑁆𑀖𑁂 𑀅𑀦𑁆𑀢𑀫𑀲𑁄 𑀕𑁄𑀢𑁆𑀭𑀪𑀼𑀧𑀼𑀕𑁆𑀕𑀮𑁂𑀲𑀼𑀧𑀺 𑀤𑀸𑀦𑀁 𑀤𑀤𑀦𑁆𑀢𑀺, 𑀢𑀁 𑀤𑀸𑀦𑀁 𑀲𑀁𑀯𑀺𑀪𑀸𑀕𑀯𑀲𑁂𑀦 𑀤𑀺𑀦𑁆𑀦𑀫𑁆𑀧𑀺 𑀲𑀼𑀤𑀺𑀦𑁆𑀦𑀁, 𑀆𑀳𑀼𑀦𑀧𑀸𑀳𑀼𑀦𑀯𑀲𑁂𑀦 𑀳𑀼𑀢𑀫𑁆𑀧𑀺 𑀲𑀼𑀳𑀼𑀢𑀁, 𑀫𑀳𑀸𑀬𑀸𑀕𑀯𑀲𑁂𑀦 𑀬𑀺𑀝𑁆𑀞𑀫𑁆𑀧𑀺 𑀲𑀼𑀬𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀧𑀢𑀺𑀝𑁆𑀞𑀺𑀢𑀸 𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 𑀯𑀡𑁆𑀡𑀺𑀢𑀸𑀢𑀺, 𑀮𑁄𑀓𑀯𑀺𑀤𑀽𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 ‘‘𑀦 𑀢𑁆𑀯𑁂𑀯𑀸𑀳𑀁, 𑀆𑀦𑀦𑁆𑀤, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀓𑁆𑀔𑀺𑀡𑀁 𑀫𑀳𑀧𑁆𑀨𑀮𑀢𑀭𑀁 𑀯𑀤𑀸𑀫𑀺 (𑀫. 𑀦𑀺. 𑁩.𑁩𑁮𑁦). 𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑀸𑀦𑀁, 𑀲𑀗𑁆𑀖𑁄 𑀯𑁂 𑀬𑀚𑀢𑀁 𑀫𑀼𑀔𑀁 (𑀫. 𑀦𑀺. 𑁨.𑁪𑁦𑁦; 𑀲𑀼. 𑀦𑀺. 𑁫𑁭𑁪; 𑀫𑀳𑀸𑀯. 𑁩𑁦𑁦). 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁭𑁪; 𑀲𑀁. 𑀦𑀺. 𑁫.𑁯𑁯𑁭) 𑀘 𑀆𑀤𑀺𑀦𑀸 𑀫𑀳𑀧𑁆𑀨𑀮𑀢𑀸 𑀯𑀡𑁆𑀡𑀺𑀢𑀸 𑀧𑀲𑀢𑁆𑀣𑀸 𑀣𑁄𑀫𑀺𑀢𑀸𑀢𑀺 𑀅𑀢𑁆𑀣𑁄.

𑁬𑁪𑁫. 𑀈𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸𑀢𑀺 𑀏𑀢𑀸𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀦𑀸 𑀓𑀢𑀁 𑀤𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑀸. 𑀯𑁂𑀤𑀚𑀸𑀢𑀸𑀢𑀺 𑀚𑀸𑀢𑀲𑁄𑀫𑀦𑀲𑁆𑀲𑀸. 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀦𑁆𑀢𑀺 𑀫𑀘𑁆𑀙𑁂𑀭𑀫𑁂𑀯 𑀘𑀺𑀢𑁆𑀢𑀲𑁆𑀲 𑀫𑀮𑀺𑀦𑀪𑀸𑀯𑀓𑀭𑀡𑀢𑁄 𑀫𑀘𑁆𑀙𑁂𑀭𑀫𑀮𑀁, 𑀅𑀣 𑀯𑀸 𑀫𑀘𑁆𑀙𑁂𑀭𑀜𑁆𑀘 𑀅𑀜𑁆𑀜𑀁 𑀇𑀲𑁆𑀲𑀸𑀮𑁄𑀪𑀤𑁄𑀲𑀸𑀤𑀺𑀫𑀮𑀜𑁆𑀘𑀸𑀢𑀺 𑀫𑀘𑁆𑀙𑁂𑀭𑀫𑀮𑀁. 𑀢𑀜𑁆𑀘 𑀅𑀯𑀺𑀚𑁆𑀚𑀸𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀧𑀮𑁆𑀮𑀸𑀲𑀸𑀤𑀻𑀳𑀺 𑀲𑀳 𑀫𑀽𑀮𑁂𑀳𑀻𑀢𑀺 𑀲𑀫𑀽𑀮𑀁 𑀯𑀺𑀦𑁂𑀬𑁆𑀬 𑀯𑀺𑀦𑀬𑀺𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀦𑀺𑀦𑁆𑀤𑀺𑀢𑁆𑀯𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀫𑀁 𑀧𑀦 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀺𑀦𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀘𑀺𑀓𑁆𑀔𑀺, 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺, 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺.

𑀤𑀤𑁆𑀤𑀮𑁆𑀮𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑁂𑀲𑀯𑀢𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀨𑀮𑀺𑀓𑀭𑀚𑀢𑀳𑁂𑀫𑀚𑀸𑀮𑀙𑀦𑁆𑀦𑀦𑁆𑀢𑀺 𑀧𑁂𑀲𑀯𑀢𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀫𑀕𑀥𑁂𑀲𑀼 𑀦𑀸𑀮𑀓𑀕𑀸𑀫𑁂 𑀏𑀓𑀲𑁆𑀫𑀺𑀁 𑀕𑀳𑀧𑀢𑀺𑀫𑀳𑀸𑀲𑀸𑀭𑀓𑀼𑀮𑁂 𑀧𑁂𑀲𑀯𑀢𑀻 𑀦𑀸𑀫 𑀓𑀼𑀮𑀲𑀼𑀡𑁆𑀳𑀸 𑀅𑀳𑁄𑀲𑀺. 𑀲𑀸 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂 𑀓𑀬𑀺𑀭𑀫𑀸𑀦𑁂 𑀤𑀸𑀭𑀺𑀓𑀸 𑀳𑀼𑀢𑁆𑀯𑀸 𑀫𑀸𑀢𑀭𑀸 𑀲𑀤𑁆𑀥𑀺𑀁 𑀘𑁂𑀢𑀺𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀓𑀺𑀁 𑀇𑀫𑁂, 𑀅𑀫𑁆𑀫, 𑀓𑀭𑁄𑀦𑁆𑀢𑀻’’𑀢𑀺? ‘‘𑀘𑁂𑀢𑀺𑀬𑀁 𑀓𑀸𑀢𑀼𑀁 𑀲𑀼𑀯𑀡𑁆𑀡𑀺𑀝𑁆𑀞𑀓𑀸 𑀓𑀭𑁄𑀦𑁆𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀤𑀸𑀭𑀺𑀓𑀸 𑀧𑀲𑀦𑁆𑀦𑀫𑀸𑀦𑀲𑀸 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀫𑀫 𑀕𑀻𑀯𑀸𑀬 𑀇𑀤𑀁 𑀲𑁄𑀯𑀡𑁆𑀡𑀫𑀬𑀁 𑀔𑀼𑀤𑁆𑀤𑀓𑀧𑀺𑀴𑀦𑁆𑀥𑀦𑀁 𑀅𑀢𑁆𑀣𑀺, 𑀇𑀫𑀸𑀳𑀁 𑀘𑁂𑀢𑀺𑀬𑀢𑁆𑀣𑀸𑀬 𑀤𑁂𑀫𑀻’’𑀢𑀺. 𑀫𑀸𑀢𑀸 ‘‘𑀲𑀸𑀥𑀼 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀕𑀻𑀯𑀢𑁄 𑀑𑀫𑀼𑀜𑁆𑀘𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀳𑀢𑁆𑀣𑁂 𑀅𑀤𑀸𑀲𑀺 ‘‘𑀇𑀤𑀁 𑀇𑀫𑀸𑀬 𑀤𑀸𑀭𑀺𑀓𑀸𑀬 𑀧𑀭𑀺𑀘𑁆𑀘𑀚𑀺𑀢𑀁, 𑀇𑀫𑀫𑁆𑀧𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀝𑁆𑀞𑀓𑀁 𑀓𑀭𑁄𑀳𑀻’’𑀢𑀺. 𑀲𑀼𑀯𑀡𑁆𑀡𑀓𑀸𑀭𑁄 𑀢𑀣𑀸 𑀅𑀓𑀸𑀲𑀺. 𑀲𑀸 𑀤𑀸𑀭𑀺𑀓𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀕𑀢𑀺𑀬𑀁𑀬𑁂𑀯 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑀻 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀦𑀸𑀮𑀓𑀕𑀸𑀫𑁂 𑀦𑀺𑀩𑁆𑀩𑀢𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀸 𑀚𑀸𑀢𑀸.

𑀲𑀸 𑀏𑀓𑀤𑀺𑀯𑀲𑀁 𑀫𑀸𑀢𑀭𑀸 𑀧𑁂𑀲𑀺𑀢𑀁 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀢𑁂𑀮𑀢𑁆𑀣𑀸𑀬 𑀅𑀜𑁆𑀜𑀢𑀭𑀁 𑀆𑀧𑀡𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀆𑀧𑀡𑁂 𑀅𑀜𑁆𑀜𑀢𑀭𑁄 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑁄 𑀧𑀺𑀢𑀭𑀸 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁 𑀩𑀳𑀼𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀫𑀼𑀢𑁆𑀢𑀸𑀫𑀡𑀺𑀭𑀢𑀦𑀸𑀦𑀺 𑀘 𑀕𑀳𑁂𑀢𑀼𑀁 𑀉𑀤𑁆𑀥𑀭𑀦𑁆𑀢𑁄 𑀆𑀧𑀡𑀺𑀓𑁄 𑀓𑀫𑁆𑀫𑀩𑀮𑁂𑀦 𑀓𑀣𑀮𑀧𑀸𑀲𑀸𑀡𑀲𑀓𑁆𑀔𑀭𑀭𑀽𑀧𑁂𑀦 𑀉𑀧𑀝𑁆𑀞𑀳𑀦𑁆𑀢𑀸𑀦𑀺 𑀤𑀺𑀲𑁆𑀯𑀸 𑀢𑀢𑁄 𑀏𑀓𑀤𑁂𑀲𑀁 ‘‘𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀯𑀲𑁂𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀻𑀫𑀁𑀲𑀺𑀢𑀼𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀅𑀣 𑀦𑀁 𑀲𑀸 𑀤𑀸𑀭𑀺𑀓𑀸 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀆𑀧𑀡𑁂 𑀭𑀢𑀦𑀸𑀦𑀺 𑀏𑀯𑀁 𑀞𑀧𑀺𑀢𑀸𑀦𑀺, 𑀦𑀦𑀼 𑀦𑀸𑀫 𑀲𑀫𑁆𑀫𑀤𑁂𑀯 𑀧𑀝𑀺𑀲𑀸𑀫𑁂𑀢𑀩𑁆𑀩𑀸𑀦𑀻’’𑀢𑀺 𑀆𑀳. 𑀆𑀧𑀡𑀺𑀓𑁄 𑀢𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀧𑀼𑀜𑁆𑀜𑀸 𑀅𑀬𑀁 𑀤𑀸𑀭𑀺𑀓𑀸, 𑀇𑀫𑀺𑀲𑁆𑀲𑀸 𑀯𑀲𑁂𑀦 𑀲𑀩𑁆𑀩𑀫𑀺𑀤𑀁 𑀳𑀺𑀭𑀜𑁆𑀜𑀸𑀤𑀺 𑀏𑀯 𑀳𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀯𑀺𑀦𑀺𑀬𑁄𑀕𑀁 𑀕𑀫𑀺𑀲𑁆𑀲𑀢𑀺, 𑀲𑀗𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲𑀸 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀁 𑀤𑀸𑀭𑀺𑀓𑀁 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲𑀢𑁆𑀣𑀸𑀬 𑀤𑁂𑀳𑀻’’𑀢𑀺 𑀯𑀸𑀭𑁂𑀢𑁆𑀯𑀸 𑀩𑀳𑀼𑀥𑀦𑀁 𑀤𑀢𑁆𑀯𑀸 𑀆𑀯𑀸𑀳𑀯𑀺𑀯𑀸𑀳𑀁 𑀓𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀦𑁂𑀲𑀺. 𑀅𑀣𑀲𑁆𑀲𑀸 𑀲𑀻𑀮𑀸𑀘𑀸𑀭𑀁 𑀜𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀓𑀺𑀁 𑀏𑀢𑁆𑀣 𑀧𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑀸𑀬 ‘‘𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑀡𑀺𑀫𑁂𑀯 𑀭𑀸𑀲𑀺𑀓𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀏𑀢𑀸𑀦𑀺 𑀅𑀫𑁆𑀳𑀸𑀓𑀁 𑀓𑀫𑁆𑀫𑀩𑀮𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀸𑀦𑀺 𑀢𑀯 𑀧𑀼𑀜𑁆𑀜𑀯𑀺𑀲𑁂𑀲𑁂𑀦 𑀧𑀼𑀦 𑀯𑀺𑀲𑁂𑀲𑀸𑀦𑀺 𑀚𑀸𑀢𑀸𑀦𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀩𑁆𑀩𑀁 𑀢𑁆𑀯𑀁𑀬𑁂𑀯 𑀯𑀺𑀘𑀸𑀭𑁂𑀳𑀺, 𑀢𑀬𑀸 𑀤𑀺𑀦𑁆𑀦𑀫𑁂𑀯 𑀫𑀬𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀧𑀪𑀼𑀢𑀺 𑀢𑀁 ‘‘𑀧𑁂𑀲𑀯𑀢𑀻’’𑀢𑀺 𑀯𑁄𑀳𑀭𑀺𑀁𑀲𑀼.

𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀓𑁆𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀬𑁆𑀳𑀁 𑀫𑀸𑀢𑀼𑀬𑀸 𑀭𑀽𑀧𑀲𑀸𑀭𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑁄𑀲𑀸𑀯𑀦𑀺𑀓𑀫𑀽𑀮𑀁 𑀤𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀆𑀡𑀸𑀬 𑀫𑀳𑀦𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁂𑀓𑁂𑀳𑀺 𑀣𑀼𑀢𑀺𑀲𑀳𑀲𑁆𑀲𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀸 𑀅𑀪𑀺𑀫𑀼𑀔𑁄𑀯 𑀅𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀦𑀸𑀮𑀓𑀕𑀸𑀫𑀁 𑀧𑀢𑁆𑀯𑀸 𑀫𑀸𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀚𑀸𑀢𑁄𑀯𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑀲𑁆𑀲 𑀲𑀭𑀻𑀭𑀲𑀓𑁆𑀓𑀸𑀭𑀓𑀭𑀡𑀯𑀲𑁂𑀦 𑀤𑁂𑀯𑀸 𑀘𑁂𑀯 𑀫𑀦𑀼𑀲𑁆𑀲𑀸 𑀘 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀼𑀁, 𑀅𑀕𑀭𑀼𑀘𑀦𑁆𑀤𑀦𑀸𑀤𑀻𑀳𑀺 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑀁 𑀘𑀺𑀢𑀓𑀫𑀓𑀁𑀲𑀼.

𑀧𑁂𑀲𑀯𑀢𑀻𑀧𑀺 𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 ‘‘𑀕𑀦𑁆𑀢𑀸 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀕𑀦𑁆𑀥𑀚𑀸𑀢𑁂𑀳𑀺 𑀘 𑀧𑀽𑀭𑀺𑀢𑀸𑀦𑀺 𑀘𑀗𑁆𑀓𑁄𑀝𑀓𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸 𑀲𑀲𑀼𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀢𑁆𑀯𑀁 𑀕𑀭𑀼𑀪𑀸𑀭𑀸, 𑀢𑀢𑁆𑀣 𑀘 𑀫𑀳𑀸𑀚𑀦𑀲𑀫𑁆𑀫𑀤𑁆𑀤𑁄, 𑀧𑀼𑀧𑁆𑀨𑀕𑀦𑁆𑀥𑀸𑀦𑀺 𑀧𑁂𑀲𑁂𑀢𑁆𑀯𑀸 𑀇𑀥𑁂𑀯 𑀳𑁄𑀳𑀻’’𑀢𑀺 𑀯𑀼𑀢𑁆𑀢𑀸𑀧𑀺 𑀲𑀤𑁆𑀥𑀸𑀚𑀸𑀢𑀸 ‘‘𑀬𑀤𑀺𑀧𑀺 𑀫𑁂 𑀢𑀢𑁆𑀣 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀲𑀺𑀬𑀸, 𑀕𑀦𑁆𑀢𑀸𑀯 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀧𑀭𑀺𑀯𑀸𑀭𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀓𑀢𑀜𑁆𑀚𑀮𑀻 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀣𑁂𑀭𑀁 𑀧𑀽𑀚𑁂𑀢𑀼𑀁 𑀆𑀕𑀢𑀸𑀦𑀁 𑀭𑀸𑀚𑀧𑀭𑀺𑀲𑀸𑀦𑀁 𑀳𑀢𑁆𑀣𑀻 𑀫𑀢𑁆𑀢𑁄 𑀳𑀼𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀉𑀧𑀕𑀜𑁆𑀙𑀺. 𑀢𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀪𑀻𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀧𑀮𑀸𑀬𑀦𑁆𑀢𑁂𑀲𑀼 𑀚𑀦𑀲𑀫𑁆𑀫𑀤𑁆𑀤𑁂𑀦 𑀧𑀢𑀺𑀢𑀁 𑀧𑁂𑀲𑀯𑀢𑀺𑀁 𑀫𑀳𑀸𑀚𑀦𑁄 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀲𑀸 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀣𑁂𑀭𑀕𑀢𑀸𑀬 𑀲𑀤𑁆𑀥𑀸𑀬 𑀲𑀫𑁆𑀧𑀦𑁆𑀦𑀘𑀺𑀢𑁆𑀢𑀸 𑀏𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀜𑁆𑀘𑀲𑁆𑀲𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺.

𑀲𑀸 𑀢𑀸𑀯𑀤𑁂𑀯 𑀅𑀢𑁆𑀢𑀦𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀻𑀤𑀺𑀲𑁂𑀦 𑀦𑀼 𑀔𑁄 𑀧𑀼𑀜𑁆𑀜𑁂𑀦 𑀫𑀬𑀸 𑀏𑀲𑀸 𑀮𑀤𑁆𑀥𑀸’’𑀢𑀺, 𑀢𑀲𑁆𑀲𑀸 𑀳𑁂𑀢𑀼𑀁 𑀉𑀧𑀥𑀸𑀭𑁂𑀦𑁆𑀢𑀻 𑀣𑁂𑀭𑀁 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸, 𑀭𑀢𑀦𑀢𑁆𑀢𑀬𑁂 𑀅𑀪𑀺𑀧𑁆𑀧𑀲𑀦𑁆𑀦𑀫𑀸𑀦𑀲𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀲𑀝𑁆𑀞𑀺𑀲𑀓𑀝𑀪𑀸𑀭𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀪𑀸𑀯𑀸 𑀲𑀼𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀘𑀦𑁆𑀤𑁄 𑀯𑀺𑀬 𑀘 𑀲𑀽𑀭𑀺𑀬𑁄 𑀯𑀺𑀬 𑀘 𑀤𑀲 𑀤𑀺𑀲𑀸 𑀑𑀪𑀸𑀲𑀬𑀫𑀸𑀦𑀸 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀢𑁄 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁄 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸 𑀇𑀫𑀺𑀲𑁆𑀲𑀸 𑀤𑁂𑀯𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑀼’’𑀦𑁆𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀢𑀸𑀬 𑀤𑁂𑀯𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯𑀲𑁆𑀲𑀸 𑀯𑀺𑀫𑀸𑀦𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋

𑁬𑁪𑁬.

‘‘𑀨𑀮𑀺𑀓𑀭𑀚𑀢𑀳𑁂𑀫𑀚𑀸𑀮𑀙𑀦𑁆𑀦𑀁, 𑀯𑀺𑀯𑀺𑀥𑀘𑀺𑀢𑁆𑀭𑀢𑀮𑀫𑀤𑁆𑀤𑀲𑀁 𑀲𑀼𑀭𑀫𑁆𑀫𑀁;

𑀩𑁆𑀬𑀫𑁆𑀳𑀁 𑀲𑀼𑀦𑀺𑀫𑁆𑀫𑀺𑀢𑀁 𑀢𑁄𑀭𑀡𑀽𑀧𑀧𑀦𑁆𑀦𑀁, 𑀭𑀼𑀘𑀓𑀼𑀧𑀓𑀺𑀡𑁆𑀡𑀫𑀺𑀤𑀁 𑀲𑀼𑀪𑀁 𑀯𑀺𑀫𑀸𑀦𑀁.

𑁬𑁪𑁭.

‘‘𑀪𑀸𑀢𑀺 𑀘 𑀤𑀲 𑀤𑀺𑀲𑀸 𑀦𑀪𑁂𑀯 𑀲𑀼𑀭𑀺𑀬𑁄, 𑀲𑀭𑀤𑁂 𑀢𑀫𑁄𑀦𑀼𑀤𑁄 𑀲𑀳𑀲𑁆𑀲𑀭𑀁𑀲𑀻;

𑀢𑀣𑀸 𑀢𑀧𑀢𑀺 𑀫𑀺𑀤𑀁 𑀢𑀯 𑀯𑀺𑀫𑀸𑀦𑀁, 𑀚𑀮𑀫𑀺𑀯 𑀥𑀽𑀫𑀲𑀺𑀔𑁄 𑀦𑀺𑀲𑁂 𑀦𑀪𑀕𑁆𑀕𑁂.

𑁬𑁪𑁮.

‘‘𑀫𑀼𑀲𑀢𑀻𑀯 𑀦𑀬𑀦𑀁 𑀲𑀢𑁂𑀭𑀢𑀸𑀯, 𑀆𑀓𑀸𑀲𑁂 𑀞𑀧𑀺𑀢𑀫𑀺𑀤𑀁 𑀫𑀦𑀼𑀜𑁆𑀜𑀁;

𑀯𑀻𑀡𑀸𑀫𑀼𑀭𑀚𑀲𑀫𑁆𑀫𑀢𑀸𑀴𑀖𑀼𑀝𑁆𑀞𑀁, 𑀇𑀤𑁆𑀥𑀁 𑀇𑀦𑁆𑀤𑀧𑀼𑀭𑀁 𑀬𑀣𑀸 𑀢𑀯𑁂𑀤𑀁.

𑁬𑁪𑁯.

‘‘𑀧𑀤𑀼𑀫𑀓𑀼𑀫𑀼𑀤𑀼𑀧𑁆𑀧𑀮𑀓𑀼𑀯𑀮𑀬𑀁, 𑀬𑁄𑀥𑀺𑀓𑀩𑀦𑁆𑀥𑀼𑀓𑀦𑁄𑀚𑀓𑀸 𑀘 𑀲𑀦𑁆𑀢𑀺;

𑀲𑀸𑀮𑀓𑀼𑀲𑀼𑀫𑀺𑀢𑀧𑀼𑀧𑁆𑀨𑀺𑀢𑀸 𑀅𑀲𑁄𑀓𑀸, 𑀯𑀺𑀯𑀺𑀥𑀤𑀼𑀫𑀕𑁆𑀕𑀲𑀼𑀕𑀦𑁆𑀥𑀲𑁂𑀯𑀺𑀢𑀫𑀺𑀤𑀁.

𑁬𑁫𑁦.

‘‘𑀲𑀴𑀮𑀮𑀩𑀼𑀚𑀪𑀼𑀚𑀓𑀲𑀁𑀬𑀼𑀢𑁆𑀢𑀸, 𑀓𑀼𑀲𑀓𑀲𑀼𑀨𑀼𑀮𑁆𑀮𑀺𑀢𑀮𑀢𑀸𑀯𑀮𑀫𑁆𑀩𑀺𑀦𑀻𑀳𑀺;

𑀫𑀡𑀺𑀚𑀸𑀮𑀲𑀤𑀺𑀲𑀸 𑀬𑀲𑀲𑁆𑀲𑀺𑀦𑀻, 𑀭𑀫𑁆𑀫𑀸 𑀧𑁄𑀓𑁆𑀔𑀭𑀡𑀻 𑀉𑀧𑀝𑁆𑀞𑀺𑀢𑀸 𑀢𑁂.

𑁬𑁫𑁧.

‘‘𑀉𑀤𑀓𑀭𑀼𑀳𑀸 𑀘 𑀬𑁂𑀢𑁆𑀣𑀺 𑀧𑀼𑀧𑁆𑀨𑀚𑀸𑀢𑀸, 𑀣𑀮𑀚𑀸 𑀬𑁂 𑀘 𑀲𑀦𑁆𑀢𑀺 𑀭𑀼𑀓𑁆𑀔𑀚𑀸𑀢𑀸;

𑀫𑀸𑀦𑀼𑀲𑀓𑀸𑀫𑀸𑀦𑀼𑀲𑁆𑀲𑀓𑀸 𑀘 𑀤𑀺𑀩𑁆𑀩𑀸, 𑀲𑀩𑁆𑀩𑁂 𑀢𑀼𑀬𑁆𑀳𑀁 𑀦𑀺𑀯𑁂𑀲𑀦𑀫𑁆𑀳𑀺 𑀚𑀸𑀢𑀸.

𑁬𑁫𑁨.

‘‘𑀓𑀺𑀲𑁆𑀲 𑀲𑀁𑀬𑀫𑀤𑀫𑀲𑁆𑀲𑀬𑀁 𑀯𑀺𑀧𑀸𑀓𑁄, 𑀓𑁂𑀦𑀸𑀲𑀺 𑀓𑀫𑁆𑀫𑀨𑀮𑁂𑀦𑀺𑀥𑀽𑀧𑀧𑀦𑁆𑀦𑀸;

𑀬𑀣𑀸 𑀘 𑀢𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦𑀁, 𑀢𑀤𑀦𑀼𑀧𑀤𑀁 𑀅𑀯𑀘𑀸𑀲𑀺𑀴𑀸𑀭𑀧𑀫𑁆𑀳𑁂’’𑀢𑀺.

𑁬𑁪𑁬. 𑀢𑀢𑁆𑀣 𑀨𑀮𑀺𑀓𑀭𑀚𑀢𑀳𑁂𑀫𑀚𑀸𑀮𑀙𑀦𑁆𑀦𑀦𑁆𑀢𑀺 𑀨𑀮𑀺𑀓𑀫𑀡𑀻𑀳𑀺 𑀭𑀚𑀢𑀳𑁂𑀫𑀚𑀸𑀮𑁂𑀳𑀺 𑀘 𑀙𑀸𑀤𑀺𑀢𑀁, 𑀨𑀮𑀺𑀓𑀫𑀡𑀺𑀫𑀬𑀸𑀳𑀺 𑀪𑀺𑀢𑁆𑀢𑀻𑀳𑀺 𑀭𑀚𑀢𑀳𑁂𑀫𑀫𑀬𑁂𑀳𑀺 𑀚𑀸𑀮𑁂𑀳𑀺 𑀘 𑀲𑀫𑀦𑁆𑀢𑀢𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀙𑀸𑀤𑀺𑀢𑀁, 𑀯𑀺𑀯𑀺𑀥𑀯𑀡𑁆𑀡𑀸𑀦𑀁 𑀯𑀺𑀘𑀺𑀢𑁆𑀢𑀲𑀦𑁆𑀦𑀺𑀯𑁂𑀲𑀸𑀦𑀜𑁆𑀘 𑀢𑀮𑀸𑀦𑀁 𑀪𑀽𑀫𑀻𑀦𑀁 𑀯𑀲𑁂𑀦 𑀯𑀺𑀯𑀺𑀥𑀘𑀺𑀢𑁆𑀭𑀢𑀮𑀁 𑀅𑀤𑁆𑀤𑀲𑀁 𑀧𑀲𑁆𑀲𑀺𑀁. 𑀲𑀼𑀭𑀫𑁆𑀫𑀦𑁆𑀢𑀺 𑀲𑀼𑀝𑁆𑀞𑀼 𑀭𑀫𑀡𑀻𑀬𑀁. 𑀯𑀺𑀳𑀭𑀺𑀢𑀼𑀓𑀸𑀫𑀸 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀩𑁆𑀬𑀫𑁆𑀳𑀁, 𑀪𑀯𑀦𑀁. 𑀢𑁄𑀭𑀡𑀽𑀧𑀧𑀦𑁆𑀦𑀦𑁆𑀢𑀺 𑀯𑀺𑀯𑀺𑀥𑀫𑀸𑀮𑀸𑀓𑀫𑁆𑀫𑀸𑀤𑀺𑀯𑀺𑀘𑀺𑀢𑁆𑀢𑁂𑀦 𑀲𑀢𑁆𑀢𑀭𑀢𑀦𑀫𑀬𑁂𑀦 𑀢𑁄𑀭𑀡𑁂𑀦 𑀉𑀧𑁂𑀢𑀁. 𑀢𑁄𑀭𑀡𑀦𑁆𑀢𑀺 𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀲𑀸𑀤𑀲𑁆𑀲 𑀦𑀸𑀫𑀁, 𑀢𑁂𑀦 𑀘 𑀅𑀦𑁂𑀓𑀪𑀽𑀫𑀓𑁂𑀦 𑀯𑀺𑀘𑀺𑀢𑁆𑀢𑀸𑀓𑀸𑀭𑁂𑀦 𑀢𑀁 𑀯𑀺𑀫𑀸𑀦𑀁 𑀉𑀧𑁂𑀢𑀁. 𑀭𑀼𑀘𑀓𑀼𑀧𑀢𑀺𑀡𑁆𑀡𑀦𑁆𑀢𑀺 𑀲𑀼𑀯𑀡𑁆𑀡𑀯𑀸𑀮𑀺𑀓𑀸𑀳𑀺 𑀑𑀓𑀺𑀡𑁆𑀡𑀗𑁆𑀕𑀡𑀁. 𑀯𑀸𑀮𑀺𑀓𑀲𑀤𑀺𑀲𑀸 𑀳𑀺 𑀲𑀼𑀯𑀡𑁆𑀡𑀔𑀡𑁆𑀟𑀸 𑀭𑀼𑀘𑀸 𑀦𑀸𑀫, 𑀭𑀼𑀘𑀫𑁂𑀯 𑀭𑀼𑀘𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀪𑀦𑁆𑀢𑀺 𑀲𑁄𑀪𑀢𑀺, 𑀲𑀼𑀝𑁆𑀞𑀼 𑀪𑀸𑀢𑀻𑀢𑀺 𑀯𑀸 𑀲𑀼𑀪𑀁. 𑀯𑀺𑀫𑀸𑀦𑀦𑁆𑀢𑀺 𑀯𑀺𑀲𑀺𑀝𑁆𑀞𑀫𑀸𑀦𑀁, 𑀧𑀫𑀸𑀡𑀢𑁄 𑀫𑀳𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁪𑁭. 𑀪𑀸𑀢𑀻𑀢𑀺 𑀚𑁄𑀢𑀢𑀺 𑀉𑀚𑁆𑀚𑀮𑀢𑀺. 𑀦𑀪𑁂𑀯 𑀲𑀼𑀭𑀺𑀬𑁄𑀢𑀺 𑀆𑀓𑀸𑀲𑁂 𑀆𑀤𑀺𑀘𑁆𑀘𑁄 𑀯𑀺𑀬. 𑀲𑀭𑀤𑁂𑀢𑀺 𑀲𑀭𑀤𑀲𑀫𑀬𑁂. 𑀢𑀫𑁄𑀦𑀼𑀤𑁄𑀢𑀺 𑀅𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑁄. 𑀢𑀣𑀸 𑀢𑀧𑀢𑀺 𑀫𑀺𑀤𑀦𑁆𑀢𑀺 𑀬𑀣𑀸 𑀲𑀭𑀤𑀓𑀸𑀮𑁂 𑀲𑀳𑀲𑁆𑀲𑀭𑀁𑀲𑀻 𑀲𑀽𑀭𑀺𑀬𑁄, 𑀢𑀣𑀸 𑀢𑀧𑀢𑀺 𑀤𑀺𑀩𑁆𑀩𑀢𑀺 𑀇𑀤𑀁 𑀢𑀯 𑀯𑀺𑀫𑀸𑀦𑀁, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀚𑀮𑀫𑀺𑀯 𑀥𑀽𑀫𑀲𑀺𑀔𑁄𑀢𑀺 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀯𑀺𑀬. 𑀅𑀕𑁆𑀕𑀺 𑀳𑀺 𑀢𑀲𑁆𑀲 𑀅𑀕𑁆𑀕𑀢𑁄 𑀥𑀽𑀫𑁄 𑀧𑀜𑁆𑀜𑀸𑀬𑀢𑀻𑀢𑀺 ‘‘𑀥𑀽𑀫𑀲𑀺𑀔𑁄 𑀥𑀽𑀫𑀓𑁂𑀢𑀽’’𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀺𑀲𑁂𑀢𑀺 𑀦𑀺𑀲𑀢𑀺, 𑀭𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀦𑀪𑀕𑁆𑀕𑁂𑀢𑀺 𑀦𑀪𑀓𑁄𑀝𑁆𑀞𑀸𑀲𑁂, 𑀆𑀓𑀸𑀲𑀧𑀤𑁂𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦𑀕𑀕𑁆𑀕𑁂’’𑀢𑀺 𑀯𑀸 𑀧𑀸𑀞𑁄, 𑀧𑀩𑁆𑀩𑀢𑀲𑀺𑀔𑀭𑁂𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑀯 𑀯𑀺𑀫𑀸𑀦𑀦𑁆𑀢𑀺 𑀬𑁄𑀚𑀦𑀸.

𑁬𑁪𑁮. 𑀫𑀼𑀲𑀢𑀻𑀯 𑀦𑀬𑀦𑀦𑁆𑀢𑀺 𑀅𑀢𑀺𑀯𑀺𑀬 𑀅𑀢𑁆𑀢𑀦𑁄 𑀧𑀪𑀲𑁆𑀲𑀭𑀢𑀸𑀬 𑀧𑀝𑀺𑀳𑀦𑀦𑁆𑀢𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀤𑁂𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀘𑀓𑁆𑀔𑀼𑀁 𑀫𑀼𑀲𑀢𑀺 𑀯𑀺𑀬. 𑀢𑁂𑀦𑀸𑀳 ‘‘𑀲𑀢𑁂𑀭𑀢𑀸𑀯𑀸’’𑀢𑀺, 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀻𑀡𑀸𑀫𑀼𑀭𑀚𑀲𑀫𑁆𑀫𑀢𑀸𑀴𑀖𑀼𑀝𑁆𑀞𑀦𑁆𑀢𑀺 𑀫𑀳𑀢𑀻𑀆𑀤𑀺𑀯𑀻𑀡𑀸𑀦𑀁 𑀪𑁂𑀭𑀺𑀆𑀤𑀺𑀧𑀝𑀳𑀸𑀦𑀁 𑀳𑀢𑁆𑀣𑀢𑀸𑀴𑀓𑀁𑀲𑀢𑀸𑀴𑀸𑀦𑀜𑁆𑀘 𑀲𑀤𑁆𑀤𑁂𑀳𑀺 𑀖𑁄𑀲𑀺𑀢𑀁 𑀏𑀓𑀦𑀺𑀦𑁆𑀦𑀸𑀤𑀁. 𑀇𑀤𑁆𑀥𑀦𑁆𑀢𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀤𑁂𑀯𑀥𑀻𑀢𑀸𑀳𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀫𑀺𑀤𑁆𑀥𑀁. 𑀇𑀦𑁆𑀤𑀧𑀼𑀭𑀁 𑀬𑀣𑀸𑀢𑀺 𑀲𑀼𑀤𑀲𑁆𑀲𑀦𑀦𑀕𑀭𑀁 𑀯𑀺𑀬.

𑁬𑁪𑁯. 𑀧𑀤𑀼𑀫𑀸𑀦𑀺 𑀘 𑀓𑀼𑀫𑀼𑀤𑀸𑀦𑀺 𑀘 𑀉𑀧𑁆𑀧𑀮𑀸𑀦𑀺 𑀘 𑀓𑀼𑀯𑀮𑀬𑀸𑀦𑀺 𑀘 𑀧𑀤𑀼𑀫𑀓𑀼𑀫𑀼𑀤𑀼𑀧𑁆𑀧𑀮𑀓𑀼𑀯𑀮𑀬𑀦𑁆𑀢𑀺 𑀏𑀓𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑀻𑀢𑀺 𑀯𑀘𑀦𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀤𑀼𑀫𑀕𑁆𑀕𑀳𑀡𑁂𑀦 𑀧𑀼𑀡𑁆𑀟𑀭𑀻𑀓𑀫𑁆𑀧𑀺 𑀕𑀳𑀺𑀢𑀁, 𑀓𑀼𑀫𑀼𑀤𑀕𑁆𑀕𑀳𑀡𑁂𑀦 𑀲𑁂𑀢𑀭𑀢𑁆𑀢𑀪𑁂𑀤𑀸𑀦𑀺 𑀲𑀩𑁆𑀩𑀸𑀦𑀺 𑀓𑀼𑀫𑀼𑀤𑀸𑀦𑀺, 𑀉𑀧𑁆𑀧𑀮𑀕𑁆𑀕𑀳𑀡𑁂𑀦 𑀭𑀢𑁆𑀢𑀉𑀧𑁆𑀧𑀮𑀁 𑀲𑀩𑁆𑀩𑀸 𑀯𑀸 𑀉𑀧𑁆𑀧𑀮𑀚𑀸𑀢𑀺, 𑀓𑀼𑀯𑀮𑀬𑀕𑁆𑀕𑀳𑀡𑁂𑀦 𑀦𑀻𑀮𑀼𑀧𑁆𑀧𑀮𑀫𑁂𑀯 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄𑀥𑀺𑀓𑀩𑀦𑁆𑀥𑀼𑀓𑀦𑁄𑀚𑀓𑀸 𑀘 𑀲𑀦𑁆𑀢𑀻𑀢𑀺 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀬𑁄𑀥𑀺𑀓𑀩𑀦𑁆𑀥𑀼𑀚𑀻𑀯𑀓𑀅𑀦𑁄𑀚𑀓𑀭𑀼𑀓𑁆𑀔𑀸 𑀘 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀅𑀦𑁄𑀚𑀓𑀸𑀧𑀺 𑀲𑀦𑁆𑀢𑀻’’𑀢𑀺 𑀧𑀸𑀞𑀁 𑀯𑀢𑁆𑀯𑀸 ‘‘𑀅𑀦𑁄𑀚𑀓𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀲𑀸𑀮𑀓𑀼𑀲𑀼𑀫𑀺𑀢𑀧𑀼𑀧𑁆𑀨𑀺𑀢𑀸 𑀅𑀲𑁄𑀓𑀸𑀢𑀺 𑀲𑀸𑀮𑀸 𑀓𑀼𑀲𑀼𑀫𑀺𑀢𑀸 𑀧𑀼𑀧𑁆𑀨𑀺𑀢𑀸 𑀅𑀲𑁄𑀓𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀯𑀺𑀥𑀤𑀼𑀫𑀕𑁆𑀕𑀲𑀼𑀕𑀦𑁆𑀥𑀲𑁂𑀯𑀺𑀢𑀫𑀺𑀤𑀦𑁆𑀢𑀺 𑀦𑀸𑀦𑀸𑀯𑀺𑀥𑀸𑀦𑀁 𑀉𑀢𑁆𑀢𑀫𑀭𑀼𑀓𑁆𑀔𑀸𑀦𑀁 𑀲𑁄𑀪𑀦𑁂𑀳𑀺 𑀕𑀦𑁆𑀥𑁂𑀳𑀺 𑀲𑁂𑀯𑀺𑀢𑀁 𑀧𑀭𑀺𑀪𑀸𑀯𑀺𑀢𑀁 𑀇𑀤𑀁 𑀢𑁂 𑀯𑀺𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁬𑁫𑁦. 𑀲𑀴𑀮𑀮𑀩𑀼𑀚𑀪𑀼𑀚𑀓𑀲𑀁𑀬𑀼𑀢𑁆𑀢𑀸𑀢𑀺 𑀢𑀻𑀭𑁂 𑀞𑀺𑀢𑁂𑀳𑀺 𑀲𑀴𑀮𑁂𑀳𑀺 𑀮𑀩𑀼𑀚𑁂𑀳𑀺 𑀪𑀼𑀚𑀓𑀭𑀼𑀓𑁆𑀔𑁂𑀳𑀺 𑀘 𑀲𑀳𑀺𑀢𑀸. 𑀪𑀼𑀚𑀓𑁄 𑀦𑀸𑀫 𑀏𑀓𑁄 𑀲𑀼𑀕𑀦𑁆𑀥𑀭𑀼𑀓𑁆𑀔𑁄 𑀤𑁂𑀯𑀮𑁄𑀓𑁂 𑀘 𑀕𑀦𑁆𑀥𑀫𑀸𑀤𑀦𑁂 𑀘 𑀅𑀢𑁆𑀣𑀺, 𑀅𑀜𑁆𑀜𑀢𑁆𑀣 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀓𑀼𑀲𑀓𑀲𑀼𑀨𑀼𑀮𑁆𑀮𑀺𑀢𑀮𑀢𑀸𑀯𑀮𑀫𑁆𑀩𑀺𑀦𑀻𑀳𑀻𑀢𑀺 𑀓𑀼𑀲𑀓𑁂𑀳𑀺 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀳𑀺 𑀢𑀺𑀡𑀚𑀸𑀢𑀻𑀳𑀺 𑀑𑀮𑀫𑁆𑀩𑀫𑀸𑀦𑀸𑀳𑀺 𑀲𑀦𑁆𑀢𑀸𑀦𑀓𑀯𑀮𑁆𑀮𑀺𑀆𑀤𑀻𑀳𑀺 𑀲𑀼𑀝𑁆𑀞𑀼 𑀓𑀼𑀲𑀼𑀫𑀺𑀢𑀮𑀢𑀸𑀳𑀺 𑀘 𑀲𑀁𑀬𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀫𑀡𑀺𑀚𑀸𑀮𑀲𑀤𑀺𑀲𑀸𑀢𑀺 𑀫𑀡𑀺𑀚𑀸𑀮𑀲𑀤𑀺𑀲𑀚𑀮𑀸. ‘‘𑀫𑀡𑀺𑀚𑀮𑀲𑀤𑀺𑀲𑀸’’𑀢𑀺𑀧𑀺 𑀧𑀸𑀴𑀺, 𑀫𑀡𑀺𑀲𑀤𑀺𑀲𑀚𑀮𑀸𑀢𑀺 𑀅𑀢𑁆𑀣𑁄. 𑀬𑀲𑀲𑁆𑀲𑀺𑀦𑀻𑀢𑀺 𑀤𑁂𑀯𑀢𑀸𑀬 𑀆𑀮𑀧𑀦𑀁. 𑀉𑀧𑀝𑁆𑀞𑀺𑀢𑀸 𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀸 𑀭𑀫𑀡𑀻𑀬𑀸 𑀧𑁄𑀓𑁆𑀔𑀭𑀡𑀻 𑀢𑀯 𑀯𑀺𑀫𑀸𑀦𑀲𑀫𑀻𑀧𑁂 𑀞𑀺𑀢𑀸.

𑁬𑁫𑁧. 𑀉𑀤𑀓𑀭𑀼𑀳𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀧𑀤𑀼𑀫𑀸𑀤𑀺𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑁂𑀢𑁆𑀣𑀻𑀢𑀺 𑀬𑁂 𑀅𑀢𑁆𑀣𑀺. 𑀣𑀮𑀚𑀸𑀢𑀺 𑀬𑁄𑀥𑀺𑀓𑀸𑀤𑀺𑀓𑀸. 𑀬𑁂 𑀘 𑀲𑀦𑁆𑀢𑀻𑀢𑀺 𑀬𑁂 𑀅𑀜𑁆𑀜𑁂𑀧𑀺 𑀭𑀼𑀓𑁆𑀔𑀚𑀸𑀢𑀸 𑀧𑀼𑀧𑁆𑀨𑀽𑀧𑀕𑀸 𑀘 𑀨𑀮𑀽𑀧𑀕𑀸 𑀘, 𑀢𑁂𑀧𑀺 𑀢𑀯 𑀯𑀺𑀫𑀸𑀦𑀲𑀫𑀻𑀧𑁂 𑀲𑀦𑁆𑀢𑀺𑀬𑁂𑀯.

𑁬𑁫𑁨. 𑀓𑀺𑀲𑁆𑀲 𑀲𑀁𑀬𑀫𑀤𑀫𑀲𑁆𑀲𑀬𑀁 𑀯𑀺𑀧𑀸𑀓𑁄𑀢𑀺 𑀓𑀸𑀬𑀲𑀁𑀬𑀫𑀸𑀤𑀻𑀲𑀼 𑀓𑀻𑀤𑀺𑀲𑀲𑁆𑀲 𑀲𑀁𑀬𑀫𑀲𑁆𑀲, 𑀇𑀦𑁆𑀤𑁆𑀭𑀺𑀬𑀤𑀫𑀦𑀸𑀤𑀻𑀲𑀼 𑀓𑀻𑀤𑀺𑀲𑀲𑁆𑀲 𑀤𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄. 𑀓𑁂𑀦𑀸𑀲𑀻𑀢𑀺 𑀅𑀜𑁆𑀜𑀫𑁂𑀯 𑀉𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀁, 𑀅𑀜𑁆𑀜𑀁 𑀉𑀧𑀪𑁄𑀕𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁 𑀳𑁄𑀢𑀻𑀢𑀺 ‘‘𑀓𑁂𑀦𑀸𑀲𑀺 𑀓𑀫𑁆𑀫𑀨𑀮𑁂𑀦𑀺𑀥𑀽𑀧𑀧𑀦𑁆𑀦𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀬𑀣𑀸 𑀘 𑀢𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦’’𑀦𑁆𑀢𑀺 𑀆𑀳. 𑀢𑀢𑁆𑀣 𑀓𑀫𑁆𑀫𑀨𑀮𑁂𑀦𑀸𑀢𑀺 𑀓𑀫𑁆𑀫𑀨𑀮𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀆𑀭𑀤𑁆𑀥𑁂𑀦𑀸𑀢𑀺 𑀯𑀘𑀦𑀲𑁂𑀲𑁄, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀢𑀤𑀦𑀼𑀧𑀤𑀁 𑀅𑀯𑀘𑀸𑀲𑀻𑀢𑀺 𑀢𑀁 𑀓𑀫𑁆𑀫𑀁 𑀫𑀬𑀸 𑀯𑀼𑀢𑁆𑀢𑀧𑀤𑀲𑁆𑀲 𑀅𑀦𑀼𑀧𑀤𑀁 𑀅𑀦𑀼𑀭𑀽𑀧𑀧𑀤𑀁 𑀓𑀢𑁆𑀯𑀸 𑀓𑀣𑁂𑀬𑁆𑀬𑀸𑀲𑀺. 𑀅𑀴𑀸𑀭𑀧𑀫𑁆𑀳𑁂𑀢𑀺 𑀩𑀳𑀮𑀲𑀁𑀳𑀢𑀧𑀔𑀼𑀫𑁂, 𑀕𑁄𑀧𑀔𑀼𑀫𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀤𑁂𑀯𑀢𑀸 𑀆𑀳 𑁋

𑁬𑁫𑁩.

‘‘𑀬𑀣𑀸 𑀘 𑀫𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦𑀁, 𑀓𑁄𑀜𑁆𑀘𑀫𑀬𑀽𑀭𑀘𑀓𑁄𑀭 𑀲𑀗𑁆𑀖𑀘𑀭𑀺𑀢𑀁;

𑀤𑀺𑀩𑁆𑀬𑀧𑀺𑀮𑀯𑀳𑀁𑀲𑀭𑀸𑀚𑀘𑀺𑀡𑁆𑀡𑀁, 𑀤𑀺𑀚𑀓𑀸𑀭𑀡𑁆𑀟𑀯𑀓𑁄𑀓𑀺𑀮𑀸𑀪𑀺𑀦𑀤𑀺𑀢𑀁.

𑁬𑁫𑁪.

‘‘𑀦𑀸𑀦𑀸𑀲𑀦𑁆𑀢𑀸𑀦𑀓𑀧𑀼𑀧𑁆𑀨𑀭𑀼𑀓𑁆𑀔𑀯𑀺𑀯𑀺𑀥𑀸, 𑀧𑀸𑀝𑀮𑀺𑀚𑀫𑁆𑀩𑀼𑀅𑀲𑁄𑀓𑀭𑀼𑀓𑁆𑀔𑀯𑀦𑁆𑀢𑀁;

𑀬𑀣𑀸 𑀘 𑀫𑁂 𑀅𑀥𑀺𑀕𑀢𑀫𑀺𑀤𑀁 𑀯𑀺𑀫𑀸𑀦𑀁, 𑀢𑀁 𑀢𑁂 𑀧𑀯𑁂𑀤𑀬𑀸𑀫𑀺 𑀲𑀼𑀡𑁄𑀳𑀺 𑀪𑀦𑁆𑀢𑁂.

𑁬𑁫𑁫.

‘‘𑀫𑀕𑀥𑀯𑀭𑀧𑀼𑀭𑀢𑁆𑀣𑀺𑀫𑁂𑀦, 𑀦𑀸𑀮𑀓𑀕𑀸𑀫𑁄 𑀦𑀸𑀫 𑀅𑀢𑁆𑀣𑀺 𑀪𑀦𑁆𑀢𑁂;

𑀢𑀢𑁆𑀣 𑀅𑀳𑁄𑀲𑀺𑀁 𑀧𑀼𑀭𑁂 𑀲𑀼𑀡𑀺𑀲𑀸, 𑀧𑁂𑀲𑀯𑀢𑀻𑀢𑀺 𑀢𑀢𑁆𑀣 𑀚𑀸𑀦𑀺𑀁𑀲𑀼 𑀫𑀫𑀁.

𑁬𑁫𑁬.

‘‘𑀲𑀸𑀳𑀫𑀧𑀘𑀺𑀢𑀢𑁆𑀣𑀥𑀫𑁆𑀫𑀓𑀼𑀲𑀮𑀁, 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁 𑀫𑀳𑀦𑁆𑀢𑀁;

𑀉𑀧𑀢𑀺𑀲𑁆𑀲𑀁 𑀦𑀺𑀩𑁆𑀩𑀼𑀢𑀫𑀧𑁆𑀧𑀫𑁂𑀬𑁆𑀬𑀁, 𑀫𑀼𑀤𑀺𑀢𑀫𑀦𑀸 𑀓𑀼𑀲𑀼𑀫𑁂𑀳𑀺 𑀅𑀩𑁆𑀪𑀼𑀓𑀺𑀭𑀺𑀁.

𑁬𑁫𑁭.

‘‘𑀧𑀭𑀫𑀕𑀢𑀺𑀕𑀢𑀜𑁆𑀘 𑀧𑀽𑀚𑀬𑀺𑀢𑁆𑀯𑀸, 𑀅𑀦𑁆𑀢𑀺𑀫𑀤𑁂𑀳𑀥𑀭𑀁 𑀇𑀲𑀺𑀁 𑀉𑀴𑀸𑀭𑀁;

𑀧𑀳𑀸𑀬 𑀫𑀸𑀦𑀼𑀲𑀓𑀁 𑀲𑀫𑀼𑀲𑁆𑀲𑀬𑀁, 𑀢𑀺𑀤𑀲𑀕𑀢𑀸 𑀇𑀥 𑀫𑀸𑀯𑀲𑀸𑀫𑀺 𑀞𑀸𑀦’’𑀦𑁆𑀢𑀺.

𑁬𑁫𑁩. 𑀢𑀢𑁆𑀣 𑀓𑁄𑀜𑁆𑀘𑀫𑀬𑀽𑀭𑀘𑀓𑁄𑀭𑀲𑀗𑁆𑀖𑀘𑀭𑀺𑀢𑀦𑁆𑀢𑀺 𑀲𑀸𑀭𑀲𑀲𑀺𑀔𑀡𑁆𑀟𑀺𑀓𑀼𑀫𑁆𑀪𑀓𑀸𑀭𑀓𑀼𑀓𑁆𑀓𑀼𑀝𑀕𑀡𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑀁. 𑀤𑀺𑀩𑁆𑀬𑀧𑀺𑀮𑀯𑀳𑀁𑀲𑀭𑀸𑀚𑀘𑀺𑀡𑁆𑀡𑀦𑁆𑀢𑀺 𑀉𑀤𑀓𑁂 𑀧𑀺𑀮𑀯𑀺𑀢𑁆𑀯𑀸 𑀯𑀺𑀘𑀭𑀡𑀢𑁄 ‘‘𑀧𑀺𑀮𑀯𑀸’’𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀉𑀤𑀓𑀲𑀓𑀼𑀡𑁂𑀳𑀺 𑀳𑀁𑀲𑀭𑀸𑀚𑁂𑀳𑀺 𑀘 𑀢𑀳𑀺𑀁 𑀢𑀳𑀺𑀁 𑀯𑀺𑀘𑀭𑀺𑀢𑀁. 𑀤𑀺𑀚𑀓𑀸𑀭𑀡𑁆𑀟𑀯𑀓𑁄𑀓𑀺𑀮𑀸𑀪𑀺𑀦𑀤𑀺𑀢𑀦𑁆𑀢𑀺 𑀓𑀸𑀭𑀡𑁆𑀟𑀯𑁂𑀳𑀺 𑀓𑀸𑀤𑀫𑁆𑀩𑁂𑀳𑀺 𑀓𑁄𑀓𑀺𑀮𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀤𑀺𑀚𑁂𑀳𑀺 𑀅𑀪𑀺𑀦𑀸𑀤𑀺𑀢𑀁.

𑁬𑁫𑁪. 𑀦𑀸𑀦𑀸𑀲𑀦𑁆𑀢𑀸𑀦𑀓𑀧𑀼𑀧𑁆𑀨𑀭𑀼𑀓𑁆𑀔𑀯𑀺𑀯𑀺𑀥𑀸𑀢𑀺 𑀦𑀸𑀦𑀸𑀯𑀺𑀥𑀲𑀸𑀔𑀸𑀧𑀲𑀸𑀔𑀯𑀦𑁆𑀢𑀸 𑀦𑀸𑀦𑀸𑀧𑀼𑀧𑁆𑀨𑀭𑀼𑀓𑁆𑀔𑀸 𑀦𑀸𑀦𑀸𑀲𑀦𑁆𑀢𑀸𑀦𑀓𑀧𑀼𑀧𑁆𑀨𑀭𑀼𑀓𑁆𑀔𑀸, 𑀢𑁂𑀳𑀺 𑀯𑀺𑀯𑀺𑀥𑀁 𑀘𑀺𑀢𑁆𑀢𑀸𑀓𑀸𑀭𑀁 𑀯𑀺𑀘𑀺𑀢𑁆𑀢𑀲𑀦𑁆𑀦𑀺𑀯𑁂𑀲𑀁 𑀦𑀸𑀦𑀸𑀲𑀦𑁆𑀢𑀸𑀦𑀓𑀧𑀼𑀧𑁆𑀨𑀭𑀼𑀓𑁆𑀔𑀯𑀺𑀯𑀺𑀥𑀸. ‘‘𑀯𑀺𑀯𑀺𑀥’’𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀯𑀺𑀥𑀸’’𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀢𑀸𑀦𑀓𑀸𑀢𑀺 𑀳𑀺 𑀓𑀸𑀫𑀯𑀮𑁆𑀮𑀺𑀬𑁄, 𑀦𑀸𑀦𑀸𑀯𑀺𑀥𑀧𑀼𑀧𑁆𑀨𑀭𑀼𑀓𑁆𑀔𑀸 𑀘 𑀯𑀺𑀯𑀺𑀥𑀸 𑀏𑀢𑁆𑀣 𑀲𑀦𑁆𑀢𑀺, 𑀢𑁂𑀳𑀺 𑀯𑀸 𑀯𑀺𑀯𑀺𑀥𑀦𑁆𑀢𑀺 𑀦𑀸𑀦𑀸𑀲𑀦𑁆𑀢𑀸𑀦𑀓𑀧𑀼𑀧𑁆𑀨𑀭𑀼𑀓𑁆𑀔𑀯𑀺𑀯𑀺𑀥𑀸. ‘‘𑀦𑀸𑀦𑀸𑀲𑀦𑁆𑀢𑀸𑀦𑀓𑀧𑀼𑀧𑁆𑀨𑀭𑀼𑀓𑁆𑀔𑀯𑀺𑀯𑀺𑀥𑀁, 𑀧𑀸𑀝𑀮𑀺𑀚𑀫𑁆𑀩𑀼𑀅𑀲𑁄𑀓𑀭𑀼𑀓𑁆𑀔𑀯𑀦𑁆𑀢’’𑀦𑁆𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺. 𑀢𑁂𑀳𑀺 ‘‘𑀧𑀼𑀧𑁆𑀨𑀭𑀼𑀓𑁆𑀔𑀸 𑀲𑀦𑁆𑀢𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀧𑀼𑀧𑁆𑀨𑀭𑀼𑀓𑁆𑀔𑀸’’𑀢𑀺 𑀯𑀸 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄, 𑀧𑀼𑀧𑁆𑀨𑀭𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁫𑁫. 𑀫𑀕𑀥𑀯𑀭𑀧𑀼𑀭𑀢𑁆𑀣𑀺𑀫𑁂𑀦𑀸𑀢𑀺 𑀫𑀕𑀥𑀯𑀭𑁂 𑀧𑀼𑀭𑀢𑁆𑀣𑀺𑀫𑁂𑀦, 𑀅𑀪𑀺𑀲𑀫𑁆𑀩𑁄𑀥𑀺𑀝𑁆𑀞𑀸𑀦𑀢𑀸𑀬 𑀉𑀢𑁆𑀢𑀫𑁂 𑀫𑀕𑀥𑀭𑀝𑁆𑀞𑁂 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬. 𑀢𑀢𑁆𑀣 𑀅𑀳𑁄𑀲𑀺𑀁 𑀧𑀼𑀭𑁂 𑀲𑀼𑀡𑀺𑀲𑀸𑀢𑀺 𑀧𑀼𑀩𑁆𑀩𑁂 𑀅𑀳𑀁 𑀢𑀲𑁆𑀫𑀺𑀁 𑀦𑀸𑀮𑀓𑀕𑀸𑀫𑁂 𑀏𑀓𑀲𑁆𑀫𑀺𑀁 𑀕𑀳𑀧𑀢𑀺𑀓𑀼𑀮𑁂 𑀲𑀼𑀡𑀺𑀲𑀸 𑀲𑀼𑀡𑁆𑀳𑀸 𑀅𑀳𑁄𑀲𑀺𑀁.

𑁬𑁫𑁬. 𑀲𑀸𑀢𑀺 𑀲𑀬𑀁. 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀓𑀼𑀲𑀮𑁄𑀢𑀺 𑀅𑀢𑁆𑀣𑀥𑀫𑁆𑀫𑀓𑀼𑀲𑀮𑁄, 𑀪𑀕𑀯𑀸. 𑀅𑀧𑀘𑀺𑀢𑁄 𑀅𑀢𑁆𑀣𑀥𑀫𑁆𑀫𑀓𑀼𑀲𑀮𑁄 𑀏𑀢𑁂𑀦𑀸𑀢𑀺 𑀅𑀧𑀘𑀺𑀢𑀢𑁆𑀣𑀥𑀫𑁆𑀫𑀓𑀼𑀲𑀮𑁄, 𑀥𑀫𑁆𑀫𑀲𑁂𑀦𑀸𑀧𑀢𑀺, 𑀢𑀁. 𑀅𑀧𑀘𑀺𑀢𑀁 𑀯𑀸 𑀅𑀧𑀘𑀬𑁄, 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑀅𑀢𑁆𑀣𑀥𑀫𑁆𑀫𑁂 𑀘 𑀓𑀼𑀲𑀮𑀁, 𑀅𑀧𑀘𑀺𑀢𑁂 𑀯𑀸 𑀧𑀽𑀚𑀦𑀻𑀬𑁂 𑀅𑀢𑁆𑀣𑁂 𑀥𑀫𑁆𑀫𑁂 𑀦𑀺𑀭𑁄𑀥𑁂 𑀫𑀕𑁆𑀕𑁂 𑀘 𑀓𑀼𑀲𑀮𑀁. 𑀫𑀳𑀦𑁆𑀢𑁂𑀳𑀺 𑀉𑀴𑀸𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑀁. 𑀓𑀼𑀲𑀼𑀫𑁂𑀳𑀻𑀢𑀺 𑀭𑀢𑀦𑀫𑀬𑁂𑀳𑀺 𑀇𑀢𑀭𑁂𑀳𑀺 𑀘 𑀓𑀼𑀲𑀼𑀫𑁂𑀳𑀺.

𑁬𑁫𑁭. 𑀧𑀭𑀫𑀕𑀢𑀺𑀕𑀢𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀁. 𑀲𑀫𑀼𑀲𑁆𑀲𑀬𑀦𑁆𑀢𑀺 𑀲𑀭𑀻𑀭𑀁. 𑀢𑀺𑀤𑀲𑀕𑀢𑀸𑀢𑀺 𑀢𑀺𑀤𑀲𑀪𑀯𑀦𑀁 𑀕𑀢𑀸, 𑀢𑀸𑀯𑀢𑀺𑀁𑀲𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀦𑁆𑀦𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂. 𑀆𑀯𑀲𑀸𑀫𑀺 𑀞𑀸𑀦𑀦𑁆𑀢𑀺 𑀇𑀫𑀁 𑀯𑀺𑀫𑀸𑀦𑀁 𑀅𑀥𑀺𑀯𑀲𑀸𑀫𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀆𑀬𑀲𑁆𑀫𑀢𑀸 𑀯𑀗𑁆𑀕𑀻𑀲𑁂𑀦 𑀤𑁂𑀯𑀢𑀸𑀬 𑀘 𑀓𑀣𑀺𑀢𑀓𑀣𑀸𑀫𑀕𑁆𑀕𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀧𑁂𑀲𑀯𑀢𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀮𑁆𑀮𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀻𑀢𑀯𑀢𑁆𑀣𑁂 𑀧𑀻𑀢𑀥𑀚𑁂𑀢𑀺 𑀫𑀮𑁆𑀮𑀺𑀓𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀫𑀸𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀺𑀦𑀬𑀦𑀸 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀭𑀸𑀚𑀽𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬 𑀓𑀬𑀺𑀭𑀫𑀸𑀦𑀸𑀬 𑀢𑀤𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀲𑀫𑀸𑀦𑀸 𑀩𑀦𑁆𑀥𑀼𑀮𑀫𑀮𑁆𑀮𑀲𑁆𑀲 𑀪𑀭𑀺𑀬𑀸 𑀫𑀮𑁆𑀮𑀭𑀸𑀚𑀧𑀼𑀢𑁆𑀢𑀻 𑀫𑀮𑁆𑀮𑀺𑀓𑀸 𑀦𑀸𑀫 𑀉𑀧𑀸𑀲𑀺𑀓𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀧𑀲𑀸𑀥𑀦𑀲𑀤𑀺𑀲𑀁 𑀅𑀢𑁆𑀢𑀦𑁄 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀕𑀦𑁆𑀥𑁄𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀕𑀦𑁆𑀥𑀫𑀸𑀮𑀸𑀤𑀺𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀽𑀚𑁂𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀫𑀮𑁆𑀮𑀺𑀓𑀸𑀯𑀢𑁆𑀣𑀼 𑀥𑀫𑁆𑀫𑀧𑀤𑀯𑀡𑁆𑀡𑀦𑀸𑀬𑀁 𑀆𑀕𑀢𑀫𑁂𑀯.

𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀢𑁂𑀦 𑀧𑀽𑀚𑀸𑀦𑀼𑀪𑀸𑀯𑁂𑀦 𑀅𑀲𑁆𑀲𑀸 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸 𑀉𑀴𑀸𑀭𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀅𑀳𑁄𑀲𑀺. 𑀯𑀢𑁆𑀣𑀸𑀮𑀗𑁆𑀓𑀸𑀭𑀯𑀺𑀫𑀸𑀦𑀸𑀦𑀺 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀸𑀦𑀺 𑀯𑀺𑀲𑁂𑀲𑀢𑁄 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑁄𑀪𑀸𑀲𑀸𑀦𑀺 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑀸𑀦𑀺 𑀲𑀩𑁆𑀩𑀸 𑀤𑀺𑀲𑀸 𑀆𑀲𑀺𑀜𑁆𑀘𑀫𑀸𑀦𑀸𑀯 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀧𑀺𑀜𑁆𑀚𑀭𑀸 𑀓𑀭𑁄𑀦𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀦𑀸𑀭𑀤𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀉𑀧𑀕𑀜𑁆𑀙𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀲𑁄 𑀢𑀁 𑁋

𑁬𑁫𑁮.

‘‘𑀧𑀻𑀢𑀯𑀢𑁆𑀣𑁂 𑀧𑀻𑀢𑀥𑀚𑁂, 𑀧𑀻𑀢𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀧𑀻𑀢𑀦𑁆𑀢𑀭𑀸𑀳𑀺 𑀯𑀕𑁆𑀕𑀽𑀳𑀺, 𑀅𑀧𑀺𑀴𑀦𑁆𑀥𑀸𑀯 𑀲𑁄𑀪𑀲𑀺.

𑁬𑁫𑁯.

‘‘𑀓𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑁂, 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑁂;

𑀳𑁂𑀫𑀚𑀸𑀮𑀓𑀲𑀜𑁆𑀙𑀦𑁆𑀦𑁂, 𑀦𑀸𑀦𑀸𑀭𑀢𑀦𑀫𑀸𑀮𑀺𑀦𑀻.

𑁬𑁬𑁦.

‘‘𑀲𑁄𑀯𑀡𑁆𑀡𑀫𑀬𑀸 𑀮𑁄𑀳𑀺𑀢𑀗𑁆𑀕𑀫𑀬𑀸 𑀘, 𑀫𑀼𑀢𑁆𑀢𑀸𑀫𑀬𑀸 𑀯𑁂𑀴𑀼𑀭𑀺𑀬𑀫𑀬𑀸 𑀘;

𑀫𑀲𑀸𑀭𑀕𑀮𑁆𑀮𑀸 𑀲𑀳𑀮𑁄𑀳𑀺𑀢𑀗𑁆𑀕𑀸, 𑀧𑀸𑀭𑁂𑀯𑀢𑀓𑁆𑀔𑀻𑀳𑀺 𑀫𑀡𑀻𑀳𑀺 𑀘𑀺𑀢𑁆𑀢𑀢𑀸.

𑁬𑁬𑁧.

‘‘𑀓𑁄𑀘𑀺 𑀓𑁄𑀘𑀺 𑀏𑀢𑁆𑀣 𑀫𑀬𑀽𑀭𑀲𑀼𑀲𑁆𑀲𑀭𑁄, 𑀳𑀁𑀲𑀲𑁆𑀲𑀭𑀜𑁆𑀜𑁄 𑀓𑀭𑀯𑀻𑀓𑀲𑀼𑀲𑁆𑀲𑀭𑁄;

𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺 𑀯𑀕𑁆𑀕𑀼𑀭𑀽𑀧𑁄, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁.

𑁬𑁬𑁨.

‘‘𑀭𑀣𑁄 𑀘 𑀢𑁂 𑀲𑀼𑀪𑁄 𑀯𑀕𑁆𑀕𑀼, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑁄;

𑀦𑀸𑀦𑀸𑀯𑀡𑁆𑀡𑀸𑀳𑀺 𑀥𑀸𑀢𑀽𑀳𑀺, 𑀲𑀼𑀯𑀺𑀪𑀢𑁆𑀢𑁄𑀯 𑀲𑁄𑀪𑀢𑀺.

𑁬𑁬𑁩.

‘‘𑀢𑀲𑁆𑀫𑀺𑀁 𑀭𑀣𑁂 𑀓𑀜𑁆𑀘𑀦𑀩𑀺𑀫𑁆𑀩𑀯𑀡𑁆𑀡𑁂, 𑀬𑀸 𑀢𑁆𑀯𑀁 𑀞𑀺𑀢𑀸 𑀪𑀸𑀲𑀲𑀺𑀫𑀁 𑀧𑀤𑁂𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋 𑀧𑀼𑀘𑁆𑀙𑀺;

𑁬𑁫𑁮. 𑀢𑀢𑁆𑀣 𑀧𑀻𑀢𑀯𑀢𑁆𑀣𑁂𑀢𑀺 𑀧𑀭𑀺𑀲𑀼𑀤𑁆𑀥𑀘𑀸𑀫𑀻𑀓𑀭𑀧𑀪𑀲𑁆𑀲𑀭𑀢𑀸𑀬 𑀧𑀻𑀢𑁄𑀪𑀸𑀲𑀦𑀺𑀯𑀸𑀲𑀦𑁂. 𑀧𑀻𑀢𑀥𑀚𑁂𑀢𑀺 𑀯𑀺𑀫𑀸𑀦𑀤𑁆𑀯𑀸𑀭𑁂 𑀭𑀣𑁂 𑀘 𑀲𑀫𑀼𑀲𑁆𑀲𑀺𑀢𑀳𑁂𑀫𑀫𑀬𑀯𑀺𑀧𑀼𑀮𑀓𑁂𑀢𑀼𑀪𑀸𑀯𑀢𑁄 𑀧𑀻𑀢𑁄𑀪𑀸𑀲𑀥𑀚𑁂. 𑀧𑀻𑀢𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂𑀢𑀺 𑀧𑀻𑀢𑁄𑀪𑀸𑀲𑁂𑀳𑀺 𑀆𑀪𑀭𑀡𑁂𑀳𑀺 𑀅𑀮𑀗𑁆𑀓𑀢𑁂. 𑀲𑀢𑀺𑀧𑀺 𑀅𑀮𑀗𑁆𑀓𑀸𑀭𑀸𑀦𑀁 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀯𑀺𑀯𑀺𑀥𑀭𑀢𑀦𑀯𑀺𑀘𑀺𑀢𑁆𑀢𑀪𑀸𑀯𑁂 𑀢𑀸𑀤𑀺𑀲𑀲𑀼𑀘𑀭𑀺𑀢𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀢𑀸𑀬 𑀧𑀦 𑀲𑀼𑀧𑀭𑀺𑀲𑀼𑀤𑁆𑀥𑀘𑀸𑀫𑀻𑀓𑀭𑀫𑀭𑀻𑀘𑀺𑀚𑀸𑀮𑀯𑀺𑀚𑁆𑀚𑁄𑀢𑀺𑀢𑀢𑁆𑀢𑀸 𑀯𑀺𑀲𑁂𑀲𑀢𑁄 𑀧𑀻𑀢𑀦𑀺𑀪𑀸𑀲𑀸𑀦𑀺 𑀢𑀲𑁆𑀲𑀸 𑀆𑀪𑀭𑀡𑀸𑀦𑀺 𑀅𑀳𑁂𑀲𑀼𑀁. 𑀧𑀻𑀢𑀦𑁆𑀢𑀭𑀸𑀳𑀻𑀢𑀺 𑀧𑀻𑀢𑀯𑀡𑁆𑀡𑁂𑀳𑀺 𑀉𑀢𑁆𑀢𑀭𑀺𑀬𑁂𑀳𑀺. ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁫𑁨𑁩-𑁫𑁨𑁪) 𑀦𑀺𑀯𑀸𑀲𑀦𑁂 𑀅𑀦𑁆𑀢𑀭𑀲𑀤𑁆𑀤𑁄 𑀆𑀕𑀢𑁄, 𑀇𑀥 𑀧𑀦 ‘‘𑀅𑀦𑁆𑀢𑀭𑀲𑀸𑀝𑀓𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀺𑀬𑁂 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀢𑀭𑀸 𑀉𑀢𑁆𑀢𑀭𑀺𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑁄 𑀉𑀧𑀲𑀁𑀩𑁆𑀬𑀸𑀦𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀸 𑀏𑀢𑁂. 𑀯𑀕𑁆𑀕𑀽𑀳𑀻𑀢𑀺 𑀲𑁄𑀪𑀦𑁂𑀳𑀺 𑀲𑀡𑁆𑀳𑀫𑀝𑁆𑀞𑁂𑀳𑀺. 𑀅𑀧𑀺𑀴𑀦𑁆𑀥𑀸𑀯 𑀲𑁄𑀪𑀲𑀻𑀢𑀺 𑀢𑁆𑀯𑀁 𑀇𑀫𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀅𑀦𑀮𑀗𑁆𑀓𑀢𑀸𑀧𑀺 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸𑀯 𑀲𑁄𑀪𑀲𑀺. 𑀢𑁂 𑀧𑀦 𑀅𑀮𑀗𑁆𑀓𑀸𑀭𑀸 𑀢𑀯 𑀲𑀭𑀻𑀭𑀁 𑀧𑀢𑁆𑀯𑀸 𑀲𑁄𑀪𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀮𑀗𑁆𑀓𑀢𑀸𑀧𑀺 𑀢𑁆𑀯𑀁 𑀅𑀮𑀗𑁆𑀓𑀢𑀲𑀤𑀺𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁫𑁯. 𑀓𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑁂𑀢𑀺 𑀓𑀸 𑀢𑁆𑀯𑀁 𑀓𑀢𑀭𑀤𑁂𑀯𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀲𑀼𑀯𑀡𑁆𑀡𑀫𑀬𑀧𑀭𑀺𑀳𑀸𑀭𑀓𑀥𑀭𑁂, 𑀲𑀼𑀯𑀡𑁆𑀡𑀫𑀬𑀓𑁂𑀬𑀽𑀭𑀥𑀭𑁂 𑀯𑀸. 𑀓𑀫𑁆𑀩𑀼𑀧𑀭𑀺𑀳𑀸𑀭𑀓𑀦𑁆𑀢𑀺 𑀘 𑀳𑀢𑁆𑀣𑀸𑀮𑀗𑁆𑀓𑀸𑀭𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀺, 𑀓𑀸𑀬𑀽𑀭𑀦𑁆𑀢𑀺 𑀪𑀼𑀚𑀸𑀮𑀗𑁆𑀓𑀸𑀭𑀯𑀺𑀲𑁂𑀲𑁄. 𑀅𑀣 𑀯𑀸 𑀓𑀫𑁆𑀩𑀽𑀢𑀺 𑀲𑀼𑀯𑀡𑁆𑀡𑀁, 𑀢𑀲𑁆𑀫𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑁂 𑀲𑀼𑀯𑀡𑁆𑀡𑀫𑀬𑀩𑀸𑀳𑀸𑀪𑀭𑀡𑀥𑀭𑁂𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑁂𑀢𑀺 𑀓𑀜𑁆𑀘𑀦𑀫𑀬𑀸𑀯𑁂𑀴𑀧𑀺𑀴𑀦𑁆𑀥𑀦𑀪𑀽𑀲𑀺𑀢𑁂. 𑀳𑁂𑀫𑀚𑀸𑀮𑀓𑀲𑀜𑁆𑀙𑀦𑁆𑀦𑁂𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑁂𑀦 𑀳𑁂𑀫𑀫𑀬𑁂𑀦 𑀚𑀸𑀮𑀓𑁂𑀦 𑀙𑀸𑀤𑀺𑀢𑀲𑀭𑀻𑀭𑁂. 𑀦𑀸𑀦𑀸𑀭𑀢𑀦𑀫𑀸𑀮𑀺𑀦𑀻𑀢𑀺 𑀦𑀓𑁆𑀔𑀢𑁆𑀢𑀫𑀸𑀮𑀸𑀬 𑀯𑀺𑀬 𑀓𑀸𑀴𑀧𑀓𑁆𑀔𑀭𑀢𑁆𑀢𑀺𑀬𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀸𑀳𑀺 𑀯𑀺𑀯𑀺𑀥𑀸𑀳𑀺 𑀭𑀢𑀦𑀸𑀯𑀮𑀻𑀳𑀺 𑀦𑀸𑀦𑀸𑀭𑀢𑀦𑀫𑀸𑀮𑀺𑀦𑀻 𑀓𑀸 𑀢𑁆𑀯𑀦𑁆𑀢𑀺 𑀧𑀼𑀘𑁆𑀙𑀢𑀺.

𑁬𑁬𑁦. 𑀲𑁄𑀯𑀡𑁆𑀡𑀫𑀬𑀸𑀢𑀺𑀆𑀤𑀺 𑀬𑀸𑀳𑀺 𑀭𑀢𑀦𑀫𑀸𑀮𑀸𑀳𑀺 𑀲𑀸 𑀤𑁂𑀯𑀢𑀸 𑀦𑀸𑀦𑀸𑀭𑀢𑀦𑀫𑀸𑀮𑀺𑀦𑀻𑀢𑀺 𑀯𑀼𑀢𑁆𑀢𑀸, 𑀢𑀸𑀲𑀁 𑀤𑀲𑁆𑀲𑀦𑀁. 𑀢𑀢𑁆𑀣 𑀲𑁄𑀯𑀡𑁆𑀡𑀫𑀬𑀸𑀢𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀫𑀬𑀸 𑀫𑀸𑀮𑀸. 𑀮𑁄𑀳𑀺𑀢𑀗𑁆𑀕𑀫𑀬𑀸𑀢𑀺 𑀧𑀤𑀼𑀫𑀭𑀸𑀕𑀸𑀤𑀺𑀭𑀢𑁆𑀢𑀫𑀡𑀺𑀫𑀬𑀸. 𑀫𑀲𑀸𑀭𑀕𑀮𑁆𑀮𑀸𑀢𑀺 𑀫𑀲𑀸𑀭𑀕𑀮𑁆𑀮𑀫𑀡𑀺𑀫𑀬𑀸. 𑀲𑀳𑀮𑁄𑀳𑀺𑀢𑀗𑁆𑀕𑀸𑀢𑀺 𑀮𑁄𑀳𑀺𑀢𑀗𑁆𑀕𑀫𑀡𑀺𑀫𑀬𑀸𑀳𑀺 𑀲𑀤𑁆𑀥𑀺𑀁 𑀓𑀩𑀭𑀫𑀡𑀺𑀫𑀬𑀸 𑀘𑁂𑀯 𑀮𑁄𑀳𑀺𑀢𑀗𑁆𑀕𑀲𑀗𑁆𑀔𑀸𑀢𑀭𑀢𑁆𑀢𑀫𑀡𑀺𑀫𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀧𑀸𑀭𑁂𑀯𑀢𑀓𑁆𑀔𑀻𑀳𑀺 𑀫𑀡𑀻𑀳𑀺 𑀘𑀺𑀢𑁆𑀢𑀢𑀸𑀢𑀺 𑀧𑀸𑀭𑁂𑀯𑀢𑀓𑁆𑀔𑀺𑀲𑀤𑀺𑀲𑁂𑀳𑀺 𑀫𑀡𑀻𑀳𑀺 𑀬𑀣𑀸𑀯𑀼𑀢𑁆𑀢𑀫𑀡𑀻𑀳𑀺 𑀘 𑀲𑀗𑁆𑀔𑀢𑀘𑀺𑀢𑁆𑀢𑀪𑀸𑀯𑀸 𑀇𑀫𑀸 𑀢𑀯 𑀓𑁂𑀲𑀳𑀢𑁆𑀣𑁂 𑀭𑀢𑀦𑀫𑀸𑀮𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁬𑁧. 𑀓𑁄𑀘𑀺 𑀓𑁄𑀘𑀻𑀢𑀺 𑀏𑀓𑀘𑁆𑀘𑁄 𑀏𑀓𑀘𑁆𑀘𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀫𑀸𑀮𑀸𑀤𑀸𑀫𑁂𑀲𑀼. 𑀫𑀬𑀽𑀭𑀲𑀼𑀲𑁆𑀲𑀭𑁄𑀢𑀺 𑀫𑀬𑀽𑀭𑁄 𑀯𑀺𑀬 𑀲𑀼𑀦𑁆𑀤𑀭𑀦𑀸𑀤𑁄. 𑀳𑀁𑀲𑀲𑁆𑀲𑀭𑀜𑁆𑀜𑁄𑀢𑀺 𑀳𑀁𑀲𑀲𑁆𑀲𑀭𑁄 𑀅𑀜𑁆𑀜𑁄, 𑀳𑀁𑀲𑀲𑀤𑀺𑀲𑀲𑁆𑀲𑀭𑁄 𑀅𑀧𑀭𑁄. 𑀓𑀭𑀯𑀻𑀓𑀲𑀼𑀲𑁆𑀲𑀭𑁄𑀢𑀺 𑀓𑀭𑀯𑀻𑀓𑁄 𑀯𑀺𑀬 𑀲𑁄𑀪𑀦𑀲𑁆𑀲𑀭𑁄. 𑀢𑁂𑀲𑀁 𑀫𑀸𑀮𑀸𑀤𑀸𑀫𑀸𑀦𑀁 𑀬𑀣𑀸 𑀫𑀬𑀽𑀭𑀲𑁆𑀲𑀭𑁄, 𑀳𑀁𑀲𑀲𑁆𑀲𑀭𑁄, 𑀓𑀭𑀯𑀻𑀓𑀲𑁆𑀲𑀭𑁄, 𑀏𑀯𑀁 𑀯𑀕𑁆𑀕𑀼𑀭𑀽𑀧𑁄 𑀫𑀥𑀼𑀭𑀸𑀓𑀸𑀭𑁄 𑀲𑀭𑁄 𑀲𑀼𑀬𑁆𑀬𑀢𑀺. 𑀓𑀺𑀫𑀺𑀯? 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁. 𑀬𑀣𑀸 𑀓𑀼𑀲𑀮𑁂𑀦 𑀯𑀸𑀤𑀺𑀢𑁂 𑀧𑀜𑁆𑀘𑀗𑁆𑀕𑀺𑀓𑁂 𑀢𑀽𑀭𑀺𑀬𑁂, 𑀏𑀯𑀁 𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺, 𑀯𑀕𑁆𑀕𑀼𑀭𑀽𑀧𑁄𑀢𑀺 𑀅𑀢𑁆𑀣𑁄. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁.

𑁬𑁬𑁨. 𑀦𑀸𑀦𑀸𑀯𑀡𑁆𑀡𑀸𑀳𑀺 𑀥𑀸𑀢𑀽𑀳𑀻𑀢𑀺 𑀅𑀦𑁂𑀓𑀭𑀽𑀧𑀸𑀳𑀺 𑀅𑀓𑁆𑀔𑀘𑀓𑁆𑀓𑀈𑀲𑀸𑀤𑀺𑀅𑀯𑀬𑀯𑀥𑀸𑀢𑀽𑀳𑀺. 𑀲𑀼𑀯𑀺𑀪𑀢𑁆𑀢𑁄𑀯 𑀲𑁄𑀪𑀢𑀻𑀢𑀺 𑀅𑀯𑀬𑀯𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀬𑀼𑀢𑁆𑀢𑀧𑁆𑀧𑀫𑀸𑀡𑀢𑀸𑀬 𑀯𑀺𑀪𑀢𑁆𑀢𑀺𑀯𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀯𑀺𑀪𑀢𑁆𑀢𑁄𑀯 𑀳𑀼𑀢𑁆𑀯𑀸 𑀯𑀺𑀭𑀸𑀚𑀢𑀺. 𑀅𑀣 𑀯𑀸 𑀲𑀼𑀯𑀺𑀪𑀢𑁆𑀢𑁄𑀯𑀸𑀢𑀺 𑀓𑁂𑀯𑀮𑀁 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄𑀧𑀺 𑀲𑀼𑀲𑀺𑀓𑁆𑀔𑀺𑀢𑁂𑀦 𑀲𑀺𑀧𑁆𑀧𑀸𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄𑀯 𑀯𑀺𑀭𑀘𑀺𑀢𑁄 𑀯𑀺𑀬 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄.

𑁬𑁬𑁩. 𑀓𑀜𑁆𑀘𑀦𑀩𑀺𑀫𑁆𑀩𑀯𑀡𑁆𑀡𑁂𑀢𑀺 𑀲𑀸𑀢𑀺𑀲𑀬𑀁 𑀧𑀻𑀢𑁄𑀪𑀸𑀲𑀢𑀸𑀬 𑀓𑀜𑁆𑀘𑀦𑀩𑀺𑀫𑁆𑀩𑀓𑀲𑀤𑀺𑀲𑁂 𑀢𑀲𑁆𑀫𑀺𑀁 𑀭𑀣𑁂. 𑀓𑀜𑁆𑀘𑀦𑀩𑀺𑀫𑁆𑀩𑀯𑀡𑁆𑀡𑁂𑀢𑀺 𑀯𑀸 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀆𑀮𑀧𑀦𑀁, 𑀕𑀦𑁆𑀥𑁄𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀭𑀲𑁂𑀦 𑀫𑀚𑁆𑀚𑀺𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀫𑀚𑁆𑀚𑀺𑀢𑀓𑀜𑁆𑀘𑀦𑀧𑀝𑀺𑀫𑀸𑀲𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀪𑀸𑀲𑀲𑀺𑀫𑀁 𑀧𑀤𑁂𑀲𑀦𑁆𑀢𑀺 𑀇𑀫𑀁 𑀲𑀓𑀮𑀫𑁆𑀧𑀺 𑀪𑀽𑀫𑀺𑀧𑀤𑁂𑀲𑀁 𑀪𑀸𑀲𑀬𑀲𑀺 𑀯𑀺𑀚𑁆𑀚𑁄𑀢𑀬𑀲𑀺.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸𑀧𑀺 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁬𑁬𑁪.

‘‘𑀲𑁄𑀯𑀡𑁆𑀡𑀚𑀸𑀮𑀁 𑀫𑀡𑀺𑀲𑁄𑀡𑁆𑀡𑀘𑀺𑀢𑁆𑀢𑀺𑀢𑀁, 𑀫𑀼𑀢𑁆𑀢𑀸𑀘𑀺𑀢𑀁 𑀳𑁂𑀫𑀚𑀸𑀮𑁂𑀦 𑀙𑀦𑁆𑀦𑀁;

𑀧𑀭𑀺𑀦𑀺𑀩𑁆𑀩𑀼𑀢𑁂 𑀕𑁄𑀢𑀫𑁂 𑀅𑀧𑁆𑀧𑀫𑁂𑀬𑁆𑀬𑁂, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀳𑀫𑀸𑀪𑀺𑀭𑁄𑀧𑀬𑀺𑀁.

𑁬𑁬𑁫.

‘‘𑀢𑀸𑀳𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀓𑀼𑀲𑀮𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀅𑀧𑁂𑀢𑀲𑁄𑀓𑀸 𑀲𑀼𑀔𑀺𑀢𑀸, 𑀲𑀫𑁆𑀧𑀫𑁄𑀤𑀸𑀫𑀦𑀸𑀫𑀬𑀸’’𑀢𑀺.

𑁬𑁬𑁪. 𑀢𑀢𑁆𑀣 𑀲𑁄𑀯𑀡𑁆𑀡𑀚𑀸𑀮𑀦𑁆𑀢𑀺 𑀲𑀭𑀻𑀭𑀧𑁆𑀧𑀫𑀸𑀡𑁂𑀦 𑀓𑀢𑀁 𑀲𑀼𑀯𑀡𑁆𑀡𑀫𑀬𑀁 𑀚𑀸𑀮𑀁. 𑀫𑀡𑀺𑀲𑁄𑀡𑁆𑀡𑀘𑀺𑀢𑁆𑀢𑀺𑀢𑀦𑁆𑀢𑀺 𑀲𑀻𑀲𑀸𑀤𑀺𑀝𑁆𑀞𑀸𑀦𑁂𑀲𑀼 𑀲𑀻𑀲𑀽𑀧𑀕𑀕𑀻𑀯𑀽𑀧𑀕𑀸𑀤𑀺𑀆𑀪𑀭𑀡𑀯𑀲𑁂𑀦 𑀦𑀸𑀦𑀸𑀯𑀺𑀥𑁂𑀳𑀺 𑀫𑀡𑀻𑀳𑀺 𑀘 𑀲𑀼𑀯𑀡𑁆𑀡𑁂𑀦 𑀘 𑀘𑀺𑀢𑁆𑀢𑀺𑀢𑀁. 𑀫𑀼𑀢𑁆𑀢𑀸𑀘𑀺𑀢𑀦𑁆𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀆𑀩𑀤𑁆𑀥𑀸𑀳𑀺 𑀫𑀼𑀢𑁆𑀢𑀸𑀯𑀮𑀻𑀳𑀺 𑀆𑀘𑀺𑀢𑀁. 𑀳𑁂𑀫𑀚𑀸𑀮𑁂𑀦 𑀙𑀦𑁆𑀦𑀦𑁆𑀢𑀺 𑀳𑁂𑀫𑀫𑀬𑁂𑀦 𑀧𑀪𑀸𑀚𑀸𑀮𑁂𑀦 𑀙𑀦𑁆𑀦𑀁. 𑀢𑀜𑁆𑀳𑀺 𑀦𑀸𑀦𑀸𑀯𑀺𑀥𑁂𑀳𑀺 𑀫𑀡𑀻𑀳𑀺 𑀘𑁂𑀯 𑀲𑀼𑀯𑀡𑁆𑀡𑁂𑀦 𑀘 𑀘𑀺𑀢𑁆𑀢𑀺𑀢𑀁 𑀫𑀼𑀢𑁆𑀢𑀸𑀯𑀮𑀻𑀳𑀺 𑀆𑀘𑀺𑀢𑀫𑁆𑀧𑀺 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲𑁂𑀯 𑀬𑁂𑀪𑀼𑀬𑁆𑀬𑀢𑀸𑀬 𑀤𑀺𑀯𑀸𑀓𑀭𑀓𑀺𑀭𑀡𑀲𑀫𑁆𑀨𑀲𑁆𑀲𑀢𑁄 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑁂𑀦 𑀳𑁂𑀫𑀫𑀬𑁂𑀦 𑀧𑀪𑀸𑀚𑀸𑀮𑁂𑀦 𑀲𑀜𑁆𑀙𑀸𑀤𑀺𑀢𑀁 𑀏𑀓𑁄𑀪𑀸𑀲𑀁 𑀳𑀼𑀢𑁆𑀯𑀸 𑀓𑀜𑁆𑀘𑀦𑀸𑀤𑀸𑀲𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁂. 𑀕𑁄𑀢𑀫𑁂𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀦𑀺𑀤𑁆𑀤𑀺𑀲𑀢𑀺. 𑀅𑀧𑁆𑀧𑀫𑁂𑀬𑁆𑀬𑁂𑀢𑀺 𑀕𑀼𑀡𑀸𑀦𑀼𑀪𑀸𑀯𑀢𑁄 𑀧𑀫𑀺𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂. 𑀧𑀲𑀦𑁆𑀦𑀘𑀺𑀢𑁆𑀢𑀸𑀢𑀺 𑀓𑀫𑁆𑀫𑀨𑀮𑀯𑀺𑀲𑀬𑀸𑀬 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀘 𑀲𑀤𑁆𑀥𑀸𑀬 𑀧𑀲𑀦𑁆𑀦𑀫𑀸𑀦𑀲𑀸. 𑀅𑀪𑀺𑀭𑁄𑀧𑀬𑀺𑀦𑁆𑀢𑀺 𑀧𑀽𑀚𑀸𑀯𑀲𑁂𑀦 𑀲𑀭𑀻𑀭𑁂 𑀭𑁄𑀧𑁂𑀲𑀺𑀁 𑀧𑀝𑀺𑀫𑀼𑀜𑁆𑀘𑀺𑀁.

𑁬𑁬𑁫. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀓𑀼𑀲𑀮𑀦𑁆𑀢𑀺 𑀓𑀼𑀘𑁆𑀙𑀺𑀢𑀲𑀮𑀦𑀸𑀤𑀺𑀅𑀢𑁆𑀣𑁂𑀦 𑀓𑀼𑀲𑀮𑀁. 𑀩𑀼𑀤𑁆𑀥𑀯𑀡𑁆𑀡𑀺𑀢𑀦𑁆𑀢𑀺 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁩𑁯; 𑀅. 𑀦𑀺. 𑁪.𑁩𑁪) 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀲𑀢𑁆𑀣𑀁. 𑀅𑀧𑁂𑀢𑀲𑁄𑀓𑀸𑀢𑀺 𑀲𑁄𑀓𑀳𑁂𑀢𑀽𑀦𑀁 𑀪𑁄𑀕𑀩𑁆𑀬𑀲𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀧𑀕𑀢𑀲𑁄𑀓𑀸. 𑀢𑁂𑀦 𑀘𑀺𑀢𑁆𑀢𑀤𑀼𑀓𑁆𑀔𑀸𑀪𑀸𑀯𑀫𑀸𑀳. 𑀲𑀼𑀔𑀺𑀢𑀸𑀢𑀺 𑀲𑀜𑁆𑀚𑀸𑀢𑀲𑀼𑀔𑀸 𑀲𑀼𑀔𑀧𑁆𑀧𑀢𑁆𑀢𑀸. 𑀏𑀢𑁂𑀦 𑀲𑀭𑀻𑀭𑀤𑀼𑀓𑁆𑀔𑀸𑀪𑀸𑀯𑀁 𑀯𑀤𑀢𑀺. 𑀘𑀺𑀢𑁆𑀢𑀤𑀼𑀓𑁆𑀔𑀸𑀪𑀸𑀯𑁂𑀦 𑀘𑀲𑁆𑀲𑀸 𑀧𑀫𑁄𑀤𑀸𑀧𑀢𑁆𑀢𑀺, 𑀲𑀭𑀻𑀭𑀤𑀼𑀓𑁆𑀔𑀸𑀪𑀸𑀯𑁂𑀦 𑀅𑀭𑁄𑀕𑀢𑀸. 𑀢𑁂𑀦𑀸𑀳 ‘‘𑀲𑀫𑁆𑀧𑀫𑁄𑀤𑀸𑀫𑀦𑀸𑀫𑀬𑀸’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀜𑁆𑀘 𑀅𑀢𑁆𑀣𑁄 𑀢𑀤𑀸 𑀅𑀢𑁆𑀢𑀦𑀸 𑀤𑁂𑀯𑀢𑀸𑀬 𑀘 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀗𑁆𑀕𑀻𑀢𑀺𑀓𑀸𑀮𑁂 𑀆𑀬𑀲𑁆𑀫𑀢𑀸 𑀦𑀸𑀭𑀤𑁂𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀸𑀦𑀁 𑀆𑀭𑁄𑀘𑀺𑀢𑁄, 𑀢𑁂 𑀘 𑀢𑀁 𑀢𑀣𑁂𑀯 𑀲𑀗𑁆𑀕𑀳𑀁 𑀆𑀭𑁄𑀧𑀬𑀺𑀁𑀲𑀽𑀢𑀺.

𑀫𑀮𑁆𑀮𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀲𑀸𑀮𑀓𑁆𑀔𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀓𑀸 𑀦𑀸𑀫 𑀢𑁆𑀯𑀁 𑀯𑀺𑀲𑀸𑀮𑀓𑁆𑀔𑀻𑀢𑀺 𑀯𑀺𑀲𑀸𑀮𑀓𑁆𑀔𑀺𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸 𑀪𑀕𑀯𑀢𑀸 𑀲𑀭𑀻𑀭𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑁂 𑀣𑀽𑀧𑁂 𑀘 𑀫𑀳𑁂 𑀘 𑀓𑀢𑁂 𑀭𑀸𑀚𑀕𑀳𑀯𑀸𑀲𑀺𑀦𑀻 𑀏𑀓𑀸 𑀫𑀸𑀮𑀸𑀓𑀸𑀭𑀥𑀻𑀢𑀸 𑀲𑀼𑀦𑀦𑁆𑀤𑀸 𑀦𑀸𑀫 𑀉𑀧𑀸𑀲𑀺𑀓𑀸 𑀅𑀭𑀺𑀬𑀲𑀸𑀯𑀺𑀓𑀸 𑀲𑁄𑀢𑀸𑀧𑀦𑁆𑀦𑀸 𑀧𑀺𑀢𑀼𑀁 𑀕𑁂𑀳𑀢𑁄 𑀧𑁂𑀲𑀺𑀢𑀁 𑀩𑀳𑀼𑀁 𑀫𑀸𑀮𑀜𑁆𑀘 𑀕𑀦𑁆𑀥𑀜𑁆𑀘 𑀧𑁂𑀲𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀘𑁂𑀢𑀺𑀬𑁂 𑀧𑀽𑀚𑀁 𑀓𑀸𑀭𑁂𑀲𑀺, 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀧𑀦 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀨𑀼𑀝𑁆𑀞𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀸 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀲𑀳 𑀘𑀺𑀢𑁆𑀢𑀮𑀢𑀸𑀯𑀦𑀁 𑀧𑀸𑀯𑀺𑀲𑀺. 𑀢𑀢𑁆𑀣 𑀘 𑀅𑀜𑁆𑀜𑀸𑀲𑀁 𑀤𑁂𑀯𑀢𑀸𑀦𑀁 𑀧𑀪𑀸 𑀧𑀼𑀧𑁆𑀨𑀸𑀤𑀻𑀦𑀁 𑀧𑀪𑀸𑀳𑀺 𑀧𑀝𑀺𑀳𑀢𑀸 𑀳𑀼𑀢𑁆𑀯𑀸 𑀯𑀺𑀘𑀺𑀢𑁆𑀢𑀯𑀡𑁆𑀡𑀸 𑀳𑁄𑀢𑀺, 𑀲𑀼𑀦𑀦𑁆𑀤𑀸𑀬 𑀧𑀦 𑀧𑀪𑀸 𑀢𑀸𑀳𑀺 𑀅𑀦𑀪𑀺𑀪𑀽𑀢𑀸 𑀲𑀪𑀸𑀯𑁂𑀦𑁂𑀯 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀸𑀬 𑀓𑀢𑀲𑀼𑀘𑀭𑀺𑀢𑀁 𑀜𑀸𑀢𑀼𑀓𑀸𑀫𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁬𑁬𑁬.

‘‘𑀓𑀸 𑀦𑀸𑀫 𑀢𑁆𑀯𑀁 𑀯𑀺𑀲𑀸𑀮𑀓𑁆𑀔𑀺, 𑀭𑀫𑁆𑀫𑁂 𑀘𑀺𑀢𑁆𑀢𑀮𑀢𑀸𑀯𑀦𑁂;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀲𑀺, 𑀦𑀸𑀭𑀻𑀕𑀡𑀧𑀼𑀭𑀓𑁆𑀔𑀢𑀸.

𑁬𑁬𑁭.

‘‘𑀬𑀤𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀧𑀯𑀺𑀲𑀦𑁆𑀢𑀺 𑀇𑀫𑀁 𑀯𑀦𑀁;

𑀲𑀬𑁄𑀕𑁆𑀕𑀸 𑀲𑀭𑀣𑀸 𑀲𑀩𑁆𑀩𑁂, 𑀘𑀺𑀢𑁆𑀭𑀸 𑀳𑁄𑀦𑁆𑀢𑀺 𑀇𑀥𑀸𑀕𑀢𑀸.

𑁬𑁬𑁮.

‘‘𑀢𑀼𑀬𑁆𑀳𑀜𑁆𑀘 𑀇𑀥 𑀧𑀢𑁆𑀢𑀸𑀬, 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑀺𑀬𑀸;

𑀓𑀸𑀬𑁂 𑀦 𑀤𑀺𑀲𑁆𑀲𑀢𑀻 𑀘𑀺𑀢𑁆𑀢𑀁, 𑀓𑁂𑀦 𑀭𑀽𑀧𑀁 𑀢𑀯𑁂𑀤𑀺𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁬𑁬. 𑀢𑀢𑁆𑀣 𑀓𑀸 𑀦𑀸𑀫 𑀢𑁆𑀯𑀦𑁆𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀸 𑀦𑀸𑀫 𑀓𑀻𑀤𑀺𑀲𑀻 𑀦𑀸𑀫 𑀢𑁆𑀯𑀁, 𑀬𑀢𑁆𑀣 𑀓𑀢𑁂𑀦 𑀲𑀼𑀘𑀭𑀺𑀢𑁂𑀦 𑀅𑀬𑀁 𑀢𑁂 𑀈𑀤𑀺𑀲𑀻 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑀸𑀮𑀓𑁆𑀔𑀻𑀢𑀺 𑀯𑀺𑀧𑀼𑀮𑀮𑁄𑀘𑀦𑁂.

𑁬𑁬𑁭. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀇𑀫𑀁 𑀯𑀦𑀦𑁆𑀢𑀺 𑀇𑀫𑀁 𑀘𑀺𑀢𑁆𑀢𑀮𑀢𑀸𑀦𑀸𑀫𑀓𑀁 𑀉𑀧𑀯𑀦𑀁. 𑀘𑀺𑀢𑁆𑀭𑀸 𑀳𑁄𑀦𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀮𑀢𑀸𑀯𑀦𑁂 𑀯𑀺𑀘𑀺𑀢𑁆𑀢𑀧𑀪𑀸𑀲𑀁𑀲𑀕𑁆𑀕𑁂𑀦 𑀅𑀢𑁆𑀢𑀦𑁄 𑀲𑀭𑀻𑀭𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀁 𑀧𑀓𑀢𑀺𑀑𑀪𑀸𑀲𑀢𑁄𑀧𑀺 𑀯𑀺𑀲𑀺𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀯𑀺𑀘𑀺𑀢𑁆𑀭𑀸𑀓𑀸𑀭𑀸 𑀳𑁄𑀦𑁆𑀢𑀺. 𑀇𑀥𑀸𑀕𑀢𑀸𑀢𑀺 𑀇𑀥 𑀆𑀕𑀢𑀸 𑀲𑀫𑁆𑀧𑀢𑁆𑀢𑀸, 𑀇𑀥 𑀯𑀸 𑀆𑀕𑀫𑀦𑀳𑁂𑀢𑀼.

𑁬𑁬𑁮. 𑀇𑀥 𑀧𑀢𑁆𑀢𑀸𑀬𑀸𑀢𑀺 𑀇𑀫𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀬 𑀉𑀧𑀕𑀢𑀸𑀬. 𑀓𑁂𑀦 𑀭𑀽𑀧𑀁 𑀢𑀯𑁂𑀤𑀺𑀲𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀯 𑀭𑀽𑀧𑀁 𑀲𑀭𑀻𑀭𑀁 𑀏𑀤𑀺𑀲𑀁 𑀏𑀯𑀭𑀽𑀧𑀁, 𑀘𑀺𑀢𑁆𑀢𑀮𑀢𑀸𑀯𑀦𑀲𑁆𑀲 𑀧𑀪𑀁 𑀅𑀪𑀺𑀪𑀯𑀦𑁆𑀢𑀁 𑀢𑀺𑀝𑁆𑀞𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀲𑀓𑁆𑀓𑁂𑀦 𑀧𑀼𑀝𑁆𑀞𑀸 𑀲𑀸 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁬𑁬𑁯.

‘‘𑀬𑁂𑀦 𑀓𑀫𑁆𑀫𑁂𑀦 𑀤𑁂𑀯𑀺𑀦𑁆𑀤, 𑀭𑀽𑀧𑀁 𑀫𑀬𑁆𑀳𑀁 𑀕𑀢𑀻 𑀘 𑀫𑁂;

𑀇𑀤𑁆𑀥𑀺 𑀘 𑀆𑀦𑀼𑀪𑀸𑀯𑁄 𑀘, 𑀢𑀁 𑀲𑀼𑀡𑁄𑀳𑀺 𑀧𑀼𑀭𑀺𑀦𑁆𑀤𑀤.

𑁬𑁭𑁦.

‘‘𑀅𑀳𑀁 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀲𑀼𑀦𑀦𑁆𑀤𑀸 𑀦𑀸𑀫𑀼𑀧𑀸𑀲𑀺𑀓𑀸;

𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀁𑀯𑀺𑀪𑀸𑀕𑀭𑀢𑀸 𑀲𑀤𑀸.

𑁬𑁭𑁧.

‘‘𑀅𑀘𑁆𑀙𑀸𑀤𑀦𑀜𑁆𑀘 𑀪𑀢𑁆𑀢𑀜𑁆𑀘, 𑀲𑁂𑀦𑀸𑀲𑀦𑀁 𑀧𑀤𑀻𑀧𑀺𑀬𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁬𑁭𑁨.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁬𑁭𑁩.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁬𑁭𑁪.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁬𑁭𑁫.

‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁬𑁭𑁬.

‘‘𑀢𑀲𑁆𑀲𑀸 𑀫𑁂 𑀜𑀸𑀢𑀺𑀓𑀼𑀮𑀸 𑀤𑀸𑀲𑀻, 𑀲𑀤𑀸 𑀫𑀸𑀮𑀸𑀪𑀺𑀳𑀸𑀭𑀢𑀺;

𑀢𑀸𑀳𑀁 𑀪𑀕𑀯𑀢𑁄 𑀣𑀽𑀧𑁂, 𑀲𑀩𑁆𑀩𑀫𑁂𑀯𑀸𑀪𑀺𑀭𑁄𑀧𑀬𑀺𑀁.

𑁬𑁭𑁭.

‘‘𑀉𑀧𑁄𑀲𑀣𑁂 𑀘𑀳𑀁 𑀕𑀦𑁆𑀢𑁆𑀯𑀸, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁;

𑀣𑀽𑀧𑀲𑁆𑀫𑀺𑀁 𑀅𑀪𑀺𑀭𑁄𑀧𑁂𑀲𑀺𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁬𑁭𑁮.

‘‘𑀢𑁂𑀦 𑀓𑀫𑁆𑀫𑁂𑀦 𑀤𑁂𑀯𑀺𑀦𑁆𑀤, 𑀭𑀽𑀧𑀁 𑀫𑀬𑁆𑀳𑀁 𑀕𑀢𑀻 𑀘 𑀫𑁂;

𑀇𑀤𑁆𑀥𑀺 𑀘 𑀆𑀦𑀼𑀪𑀸𑀯𑁄 𑀘, 𑀬𑀁 𑀫𑀸𑀮𑀁 𑀅𑀪𑀺𑀭𑁄𑀧𑀬𑀺𑀁.

𑁬𑁭𑁯.

‘‘𑀬𑀜𑁆𑀘 𑀲𑀻𑀮𑀯𑀢𑀻 𑀆𑀲𑀺𑀁, 𑀦 𑀢𑀁 𑀢𑀸𑀯 𑀯𑀺𑀧𑀘𑁆𑀘𑀢𑀺;

𑀆𑀲𑀸 𑀘 𑀧𑀦 𑀫𑁂 𑀤𑁂𑀯𑀺𑀦𑁆𑀤, 𑀲𑀓𑀤𑀸𑀕𑀸𑀫𑀺𑀦𑀻 𑀲𑀺𑀬’’𑀦𑁆𑀢𑀺.

𑁬𑁬𑁯. 𑀢𑀢𑁆𑀣 𑀕𑀢𑀻𑀢𑀺 𑀅𑀬𑀁 𑀤𑁂𑀯𑀕𑀢𑀺, 𑀦𑀺𑀩𑁆𑀩𑀢𑁆𑀢𑀺 𑀯𑀸. 𑀇𑀤𑁆𑀥𑀻𑀢𑀺 𑀅𑀬𑀁 𑀤𑁂𑀯𑀺𑀤𑁆𑀥𑀺, 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀁 𑀯𑀸. 𑀆𑀦𑀼𑀪𑀸𑀯𑁄𑀢𑀺 𑀧𑀪𑀸𑀯𑁄. 𑀧𑀼𑀭𑀺𑀦𑁆𑀤𑀤𑀸𑀢𑀺 𑀲𑀓𑁆𑀓𑀁 𑀆𑀮𑀧𑀢𑀺. 𑀲𑁄 𑀳𑀺 𑀧𑀼𑀭𑁂 𑀤𑀸𑀦𑀁 𑀅𑀤𑀸𑀲𑀻𑀢𑀺 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺 𑀯𑀼𑀘𑁆𑀘𑀢𑀺.

𑁬𑁭𑁬. 𑀜𑀸𑀢𑀺𑀓𑀼𑀮𑀸𑀢𑀺 𑀧𑀺𑀢𑀼 𑀕𑁂𑀳𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀤𑀸 𑀫𑀸𑀮𑀸𑀪𑀺𑀳𑀸𑀭𑀢𑀻𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀜𑀸𑀢𑀺𑀓𑀼𑀮𑀢𑁄 𑀤𑀸𑀲𑀺𑀬𑀸 𑀧𑀼𑀧𑁆𑀨𑀁 𑀫𑀬𑁆𑀳𑀁 𑀅𑀪𑀺𑀳𑀭𑀻𑀬𑀢𑀺. 𑀲𑀩𑁆𑀩𑀫𑁂𑀯𑀸𑀪𑀺𑀭𑁄𑀧𑀬𑀺𑀦𑁆𑀢𑀺 𑀫𑀬𑁆𑀳𑀁 𑀧𑀺𑀴𑀦𑁆𑀥𑀦𑀢𑁆𑀣𑀸𑀬 𑀧𑀺𑀢𑀼𑀕𑁂𑀳𑀢𑁄 𑀆𑀳𑀝𑀁 𑀫𑀸𑀮𑀁 𑀅𑀜𑁆𑀜𑀜𑁆𑀘 𑀕𑀦𑁆𑀥𑀸𑀤𑀺𑀁 𑀲𑀩𑁆𑀩𑀫𑁂𑀯 𑀅𑀢𑁆𑀢𑀦𑀸 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀣𑀽𑀧𑁂 𑀧𑀽𑀚𑀦𑀯𑀲𑁂𑀦 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑀁 𑀓𑀸𑀭𑁂𑀲𑀺𑀁.

𑁬𑁭𑁭-𑁮. 𑀉𑀧𑁄𑀲𑀣𑁂 𑀘𑀳𑀁 𑀕𑀦𑁆𑀢𑁆𑀯𑀸𑀢𑀺 𑀉𑀧𑁄𑀲𑀣𑀤𑀺𑀯𑀲𑁂 𑀅𑀳𑀫𑁂𑀯 𑀣𑀽𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸. 𑀬𑀁 𑀫𑀸𑀮𑀁 𑀅𑀪𑀺𑀭𑁄𑀧𑀬𑀺𑀦𑁆𑀢𑀺 𑀬𑀁 𑀢𑀤𑀸 𑀪𑀕𑀯𑀢𑁄 𑀣𑀽𑀧𑁂 𑀫𑀸𑀮𑀸𑀕𑀦𑁆𑀥𑀸𑀪𑀺𑀭𑁄𑀧𑀦𑀁 𑀓𑀢𑀁, 𑀢𑁂𑀦 𑀓𑀫𑁆𑀫𑁂𑀦𑀸𑀢𑀺 𑀬𑁄𑀚𑀦𑀸.

𑁬𑁭𑁯. 𑀦 𑀢𑀁 𑀢𑀸𑀯 𑀯𑀺𑀧𑀘𑁆𑀘𑀢𑀻𑀢𑀺 𑀬𑀁 𑀲𑀻𑀮𑀯𑀢𑀻 𑀆𑀲𑀺𑀁, 𑀢𑀁 𑀲𑀻𑀮𑀭𑀓𑁆𑀔𑀡𑀁 𑀢𑀁 𑀭𑀓𑁆𑀔𑀺𑀢𑀁 𑀲𑀻𑀮𑀁 𑀧𑀽𑀚𑀸𑀫𑀬𑀧𑀼𑀜𑁆𑀜𑀲𑁆𑀲 𑀩𑀮𑀯𑀪𑀸𑀯𑁂𑀦 𑀅𑀮𑀤𑁆𑀥𑁄𑀓𑀸𑀲𑀁 𑀦 𑀢𑀸𑀯 𑀯𑀺𑀧𑀘𑁆𑀘𑀢𑀺, 𑀦 𑀯𑀺𑀧𑀘𑁆𑀘𑀺𑀢𑀼𑀁 𑀆𑀭𑀤𑁆𑀥𑀁, 𑀅𑀧𑀭𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀢𑀲𑁆𑀲 𑀯𑀺𑀧𑀸𑀓𑁄𑀢𑀺 𑀅𑀢𑁆𑀣𑁄. 𑀆𑀲𑀸 𑀘 𑀧𑀦 𑀫𑁂 𑀤𑁂𑀯𑀺𑀦𑁆𑀤, 𑀲𑀓𑀤𑀸𑀕𑀸𑀫𑀺𑀦𑀻 𑀲𑀺𑀬𑀦𑁆𑀢𑀺 ‘‘𑀓𑀣𑀁 𑀦𑀼 𑀔𑁄 𑀅𑀳𑀁 𑀲𑀓𑀤𑀸𑀕𑀸𑀫𑀺𑀦𑀻 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀸 𑀘 𑀫𑁂 𑀤𑁂𑀯𑀺𑀦𑁆𑀤, 𑀅𑀭𑀺𑀬𑀥𑀫𑁆𑀫𑀯𑀺𑀲𑀬𑀸𑀯, 𑀦 𑀪𑀯𑀯𑀺𑀲𑁂𑀲𑀯𑀺𑀲𑀬𑀸. 𑀲𑀸 𑀧𑀦 𑀲𑀧𑁆𑀧𑀺𑀫𑀡𑁆𑀟𑀁 𑀇𑀘𑁆𑀙𑀢𑁄 𑀤𑀥𑀺𑀢𑁄 𑀧𑀘𑀺𑀢𑀁 𑀯𑀺𑀬 𑀅𑀦𑀺𑀧𑁆𑀨𑀸𑀤𑀺𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀫𑀁 𑀧𑀦 𑀅𑀢𑁆𑀣𑀁 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀢𑁆𑀢𑀦𑀸 𑀘 𑀢𑀸𑀬 𑀤𑁂𑀯𑀥𑀻𑀢𑀸𑀬 𑀘 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀢𑁆𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀲𑀗𑁆𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀲𑀗𑁆𑀕𑀸𑀳𑀓𑀸𑀦𑀁 𑀫𑀳𑀸𑀣𑁂𑀭𑀸𑀦𑀁 𑀆𑀭𑁄𑀘𑁂𑀲𑀺, 𑀢𑁂 𑀘 𑀢𑀁 𑀢𑀣𑁂𑀯 𑀲𑀗𑁆𑀕𑀻𑀢𑀺𑀁 𑀆𑀭𑁄𑀧𑀬𑀺𑀁𑀲𑀽𑀢𑀺.

𑀯𑀺𑀲𑀸𑀮𑀓𑁆𑀔𑀺𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀓𑁄𑀯𑀺𑀴𑀸𑀭𑁂𑀢𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀻 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀕𑁂𑀳𑀤𑁆𑀯𑀸𑀭𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀲𑀚𑁆𑀚𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀥𑀚𑀧𑀝𑀸𑀓𑀸𑀤𑀬𑁄 𑀉𑀲𑁆𑀲𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀸𑀦𑀺 𑀯𑀢𑁆𑀣𑀸𑀦𑀺 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀦𑀺 𑀘 𑀑𑀮𑀫𑁆𑀩𑁂𑀢𑁆𑀯𑀸 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑁂 𑀧𑀤𑁂𑀲𑁂 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺. 𑀅𑀣 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀡𑁆𑀟𑀧𑀁 𑀧𑀯𑀺𑀲𑀺𑀢𑁆𑀯𑀸 𑀲𑀳𑀲𑁆𑀲𑀭𑀁𑀲𑀻 𑀯𑀺𑀬 𑀅𑀡𑁆𑀡𑀯𑀓𑀼𑀘𑁆𑀙𑀺𑀁 𑀑𑀪𑀸𑀲𑀬𑀫𑀸𑀦𑁄 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀉𑀧𑀸𑀲𑀓𑁄 𑀕𑀦𑁆𑀥𑀧𑀼𑀧𑁆𑀨𑀥𑀽𑀫𑀤𑀻𑀧𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀓𑀝𑁆𑀞𑀳𑀸𑀭𑀺𑀓𑀸 𑀇𑀢𑁆𑀣𑀻 𑀅𑀦𑁆𑀥𑀯𑀦𑁂 𑀲𑀼𑀧𑀼𑀧𑁆𑀨𑀺𑀢𑀁 𑀅𑀲𑁄𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀲𑀧𑀮𑁆𑀮𑀯𑀗𑁆𑀓𑀼𑀭𑀸𑀦𑀺 𑀧𑀺𑀡𑁆𑀟𑀻𑀓𑀢𑀸𑀦𑀺 𑀩𑀳𑀽𑀦𑀺 𑀅𑀲𑁄𑀓𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀻, 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄 𑀢𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀼𑀧𑁆𑀨𑀲𑀦𑁆𑀣𑀭𑀁 𑀲𑀦𑁆𑀣𑀭𑀦𑁆𑀢𑀻, 𑀪𑀕𑀯𑀢𑁄 𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀅𑀕𑀫𑀸𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀬𑁂𑀪𑀼𑀬𑁆𑀬𑁂𑀦 𑀦𑀦𑁆𑀤𑀦𑀯𑀦𑁂 𑀦𑀘𑁆𑀘𑀦𑁆𑀢𑀻 𑀕𑀸𑀬𑀦𑁆𑀢𑀻 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀸𑀮𑀸 𑀕𑀦𑁆𑀣𑁂𑀦𑁆𑀢𑀻 𑀧𑀫𑁄𑀤𑀫𑀸𑀦𑀸 𑀓𑀻𑀴𑀦𑁆𑀢𑀻 𑀲𑀼𑀔𑀁 𑀅𑀦𑀼𑀪𑀯𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀢𑀸𑀬 𑀓𑀢𑀓𑀫𑁆𑀫𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁬𑁮𑁦.

‘‘𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀓𑁄𑀯𑀺𑀴𑀸𑀭𑁂, 𑀭𑀫𑀡𑀻𑀬𑁂 𑀫𑀦𑁄𑀭𑀫𑁂;

𑀤𑀺𑀩𑁆𑀩𑀫𑀸𑀮𑀁 𑀕𑀦𑁆𑀣𑀫𑀸𑀦𑀸, 𑀕𑀸𑀬𑀦𑁆𑀢𑀻 𑀲𑀫𑁆𑀧𑀫𑁄𑀤𑀲𑀺.

𑁬𑁮𑁧.

‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀯𑀦𑀻𑀬𑀸 𑀫𑀦𑁄𑀭𑀫𑀸.

𑁬𑁮𑁨.

‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

𑁬𑁮𑁩.

‘‘𑀯𑀺𑀯𑀢𑁆𑀢𑀫𑀸𑀦𑀸 𑀓𑀸𑀬𑁂𑀦, 𑀬𑀸 𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁬𑁮𑁪.

‘‘𑀯𑀝𑀁𑀲𑀓𑀸 𑀯𑀸𑀢𑀥𑀼𑀢𑀸, 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁬𑁮𑁫.

‘‘𑀬𑀸𑀧𑀺 𑀢𑁂 𑀲𑀺𑀭𑀲𑁆𑀫𑀺𑀁 𑀫𑀸𑀮𑀸, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸;

𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸, 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸.

𑁬𑁮𑁬.

‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁, 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁮𑁦. 𑀢𑀢𑁆𑀣 𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀓𑁄𑀯𑀺𑀴𑀸𑀭𑁂𑀢𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀦𑀸𑀫𑀓𑁂 𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑁂 𑀆𑀤𑀸𑀬 𑀤𑀺𑀩𑁆𑀩𑀫𑀸𑀮𑀁 𑀕𑀦𑁆𑀣𑀫𑀸𑀦𑀸𑀢𑀺 𑀬𑁄𑀚𑀦𑀸. 𑀬𑀜𑁆𑀳𑀺 𑀮𑁄𑀓𑀺𑀬𑀸 ‘‘𑀧𑀸𑀭𑀺𑀚𑀸𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀸𑀕𑀥𑀪𑀸𑀲𑀸𑀬 ‘‘𑀧𑀸𑀭𑀺𑀘𑁆𑀙𑀢𑁆𑀢𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁄𑀯𑀺𑀴𑀸𑀭𑁄𑀢𑀺 𑀘 𑀓𑁄𑀯𑀺𑀴𑀸𑀭𑀚𑀸𑀢𑀺𑀓𑁄, 𑀲𑁄 𑀘 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀤𑁂𑀯𑀮𑁄𑀓𑁂𑀧𑀺 𑀓𑁄𑀯𑀺𑀴𑀸𑀭𑁄, 𑀢𑀲𑁆𑀲𑀸𑀧𑀺 𑀚𑀸𑀢𑀻𑀢𑀺 𑀯𑀤𑀦𑁆𑀢𑀺.

𑁬𑁮𑁧. 𑀢𑀲𑁆𑀲𑀸 𑀧𑀦 𑀤𑁂𑀯𑀢𑀸𑀬 𑀦𑀘𑁆𑀘𑀦𑀓𑀸𑀮𑁂 𑀅𑀗𑁆𑀕𑀪𑀸𑀭𑀯𑀲𑁂𑀦 𑀲𑀭𑀻𑀭𑀢𑁄 𑀘 𑀧𑀺𑀴𑀦𑁆𑀥𑀦𑀢𑁄 𑀘 𑀅𑀢𑀺𑀯𑀺𑀬 𑀫𑀥𑀼𑀭𑁄 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺, 𑀕𑀦𑁆𑀥𑁄 𑀲𑀤𑀸 𑀲𑀩𑁆𑀩𑀸 𑀤𑀺𑀲𑀸𑀧𑀺 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀯𑀦𑀻𑀬𑀸𑀢𑀺 𑀲𑁄𑀢𑀼𑀁 𑀬𑀼𑀢𑁆𑀢𑀸, 𑀲𑀯𑀦𑀲𑁆𑀲 𑀯𑀸 𑀳𑀺𑀢𑀸, 𑀓𑀡𑁆𑀡𑀲𑀼𑀔𑀸𑀢𑀺 𑀅𑀢𑁆𑀣𑁄.

𑁬𑁮𑁩. 𑀯𑀺𑀯𑀢𑁆𑀢𑀫𑀸𑀦𑀸 𑀓𑀸𑀬𑁂𑀦𑀸𑀢𑀺 𑀢𑀯 𑀓𑀸𑀬𑁂𑀦 𑀲𑀭𑀻𑀭𑁂𑀦 𑀧𑀭𑀺𑀯𑀢𑁆𑀢𑀫𑀸𑀦𑁂𑀦, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀬𑀸 𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸𑀢𑀺 𑀬𑀸𑀦𑀺 𑀢𑁂 𑀓𑁂𑀲𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸𑀦𑀺, 𑀯𑀺𑀪𑀢𑁆𑀢𑀺𑀮𑁄𑀧𑁄 𑀘𑁂𑀢𑁆𑀣 𑀤𑀝𑁆𑀞𑀩𑁆𑀩𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀸.

𑁬𑁮𑁪. 𑀯𑀝𑀁𑀲𑀓𑀸𑀢𑀺 𑀭𑀢𑀦𑀫𑀬𑀸 𑀓𑀡𑁆𑀡𑀺𑀓𑀸 𑀯𑀝𑀁𑀲𑀓𑀸𑀢𑀺 𑀅𑀢𑁆𑀣𑁄. 𑀯𑀸𑀢𑀥𑀼𑀢𑀸𑀢𑀺 𑀫𑀦𑁆𑀤𑁂𑀦 𑀫𑀸𑀮𑀼𑀢𑁂𑀦 𑀥𑀽𑀧𑀬𑀫𑀸𑀦𑀸. 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸𑀢𑀺 𑀯𑀸𑀢𑁂𑀦 𑀲𑀫𑀦𑁆𑀢𑀢𑁄 𑀯𑀺𑀲𑁂𑀲𑀢𑁄 𑀓𑀫𑁆𑀧𑀺𑀢𑀸 𑀘𑀮𑀺𑀢𑀸. 𑀅𑀣 𑀯𑀸 𑀯𑀝𑀁𑀲𑀓𑀸 𑀯𑀸𑀢𑀥𑀼𑀢𑀸, 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸𑀢𑀺 𑀅𑀯𑀸𑀢𑁂𑀭𑀺𑀢𑀸𑀧𑀺 𑀯𑀸𑀢𑁂𑀭𑀺𑀢𑀸𑀧𑀺 𑀬𑁂 𑀢𑁂 𑀯𑀝𑀁𑀲𑀓𑀸 𑀓𑀫𑁆𑀧𑀺𑀢𑀸, 𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄𑀢𑀺 𑀅𑀢𑁆𑀣𑀬𑁄𑀚𑀦𑀸.

𑁬𑁮𑁫. 𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸𑀢𑀺 𑀢𑀲𑁆𑀲𑀸 𑀢𑁂 𑀲𑀺𑀭𑀲𑁆𑀫𑀺𑀁 𑀤𑀺𑀩𑁆𑀩𑀫𑀸𑀮𑀸𑀬 𑀕𑀦𑁆𑀥𑁄 𑀯𑀸𑀬𑀢𑀺 𑀲𑀩𑁆𑀩𑀸 𑀤𑀺𑀲𑀸. 𑀬𑀣𑀸 𑀓𑀺𑀁? 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸𑀢𑀺, 𑀬𑀣𑀸 𑀦𑀸𑀫 𑀫𑀜𑁆𑀚𑀽𑀲𑀓𑁄 𑀭𑀼𑀓𑁆𑀔𑁄 𑀲𑀼𑀧𑀼𑀧𑁆𑀨𑀺𑀢𑁄 𑀅𑀢𑁆𑀢𑀦𑁄 𑀕𑀦𑁆𑀥𑁂𑀦 𑀩𑀳𑀽𑀦𑀺 𑀬𑁄𑀚𑀦𑀸𑀦𑀺 𑀨𑀭𑀫𑀸𑀦𑁄 𑀲𑀩𑁆𑀩𑀸 𑀤𑀺𑀲𑀸 𑀯𑀸𑀬𑀢𑀺, 𑀏𑀯𑀁 𑀢𑀯 𑀲𑀺𑀭𑀲𑁆𑀫𑀺𑀁 𑀧𑀺𑀴𑀦𑁆𑀥𑀦𑀫𑀸𑀮𑀸𑀬 𑀕𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀭𑀼𑀓𑁆𑀔𑁄 𑀕𑀦𑁆𑀥𑀫𑀸𑀤𑀦𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀉𑀧𑁄𑀲𑀣𑀓𑀭𑀡𑀫𑀡𑁆𑀟𑀮𑀫𑀸𑀴𑀓𑀫𑀚𑁆𑀛𑁂 𑀢𑀺𑀝𑁆𑀞𑀢𑀺. 𑀬𑀢𑁆𑀢𑀓𑀸𑀦𑀺 𑀤𑁂𑀯𑀮𑁄𑀓𑁂 𑀘 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀲𑀼𑀭𑀪𑀺𑀓𑀼𑀲𑀼𑀫𑀸𑀦𑀺, 𑀢𑀸𑀦𑀺 𑀢𑀲𑁆𑀲 𑀲𑀸𑀔𑀕𑁆𑀕𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀦 𑀲𑁄 𑀅𑀢𑀺𑀯𑀺𑀬 𑀲𑀼𑀕𑀦𑁆𑀥𑁄 𑀳𑁄𑀢𑀺. 𑀏𑀯𑀁 𑀢𑀸𑀬 𑀤𑁂𑀯𑀢𑀸𑀬 𑀧𑀺𑀴𑀦𑁆𑀥𑀦𑀫𑀸𑀮𑀸𑀬 𑀕𑀦𑁆𑀥𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸’’𑀢𑀺.

𑁬𑁮𑁬. 𑀬𑀤𑀺𑀧𑀺 𑀢𑀲𑁆𑀲 𑀲𑀕𑁆𑀕𑀲𑁆𑀲 𑀙𑀨𑀲𑁆𑀲𑀸𑀬𑀢𑀦𑀺𑀓𑀪𑀸𑀯𑀢𑁄 𑀲𑀩𑁆𑀩𑀸𑀦𑀺𑀧𑀺 𑀢𑀢𑁆𑀣 𑀆𑀭𑀫𑁆𑀫𑀡𑀸𑀦𑀺 𑀧𑀺𑀬𑀭𑀽𑀧𑀸𑀦𑀺𑀬𑁂𑀯, 𑀕𑀦𑁆𑀥𑀭𑀽𑀧𑀸𑀦𑀁 𑀧𑀦 𑀲𑀯𑀺𑀲𑁂𑀲𑀸𑀦𑀁 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀮𑀸𑀪𑀺𑀪𑀸𑀯𑀢𑁄 ‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁, 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀣 𑀤𑁂𑀯𑀢𑀸 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁬𑁮𑁭.

‘‘𑀧𑀪𑀲𑁆𑀲𑀭𑀁 𑀅𑀘𑁆𑀘𑀺𑀫𑀦𑁆𑀢𑀁, 𑀯𑀡𑁆𑀡𑀕𑀦𑁆𑀥𑁂𑀦 𑀲𑀁𑀬𑀼𑀢𑀁;

𑀅𑀲𑁄𑀓𑀧𑀼𑀧𑁆𑀨𑀫𑀸𑀮𑀸𑀳𑀁, 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑀬𑀺𑀁.

𑁬𑁮𑁮.

‘‘𑀢𑀸𑀳𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀓𑀼𑀲𑀮𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀅𑀧𑁂𑀢𑀲𑁄𑀓𑀸 𑀲𑀼𑀔𑀺𑀢𑀸, 𑀲𑀫𑁆𑀧𑀫𑁄𑀤𑀸𑀫𑀦𑀸𑀫𑀬𑀸’’𑀢𑀺.

𑁬𑁮𑁭. 𑀢𑀢𑁆𑀣 𑀲𑀼𑀥𑁄𑀢𑀧𑀯𑀸𑀴𑀲𑀗𑁆𑀖𑀸𑀢𑀲𑀦𑁆𑀦𑀺𑀪𑀲𑁆𑀲 𑀓𑀺𑀜𑁆𑀚𑀓𑁆𑀔𑀓𑁂𑀲𑀭𑀲𑀫𑀼𑀤𑀸𑀬𑁂𑀦 𑀪𑀸𑀡𑀼𑀭𑀁𑀲𑀺𑀚𑀸𑀮𑀲𑁆𑀲 𑀯𑀺𑀬 𑀅𑀲𑁄𑀓𑀧𑀼𑀧𑁆𑀨𑀼𑀢𑁆𑀢𑀫𑀲𑁆𑀲 𑀢𑀤𑀸 𑀉𑀧𑀝𑁆𑀞𑀺𑀢𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀪𑀲𑁆𑀲𑀭𑀁 𑀅𑀘𑁆𑀘𑀺𑀫𑀦𑁆𑀢’’𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀸𑀬 𑀤𑁂𑀯𑀢𑀸𑀬 𑀅𑀢𑁆𑀢𑀦𑁄 𑀲𑀼𑀘𑀭𑀺𑀢𑀓𑀫𑁆𑀫𑁂 𑀓𑀣𑀺𑀢𑁂 𑀲𑀧𑀭𑀺𑀯𑀸𑀭𑀸𑀬 𑀢𑀲𑁆𑀲𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀪𑀕𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀤𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀢𑀢𑀺𑀬𑀲𑁆𑀲 𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀜𑁆𑀚𑀺𑀝𑁆𑀞𑀓𑀯𑀕𑁆𑀕𑁄

𑁧. 𑀫𑀜𑁆𑀚𑀺𑀝𑁆𑀞𑀓𑀯𑀺𑀫𑀸𑀦𑀯𑀡𑁆𑀡𑀦𑀸

𑀫𑀜𑁆𑀚𑀺𑀝𑁆𑀞𑀓𑀯𑀕𑁆𑀕𑁂 𑀫𑀜𑁆𑀚𑀺𑀝𑁆𑀞𑀓𑁂 𑀯𑀺𑀫𑀸𑀦𑀲𑁆𑀫𑀺𑀦𑁆𑀢𑀺 𑀫𑀜𑁆𑀚𑀺𑀝𑁆𑀞𑀓𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀦𑀦𑁆𑀢𑀭𑀯𑀺𑀫𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀡𑁆𑀟𑀧𑀁 𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀓𑀼𑀮𑀤𑀸𑀲𑀻 𑀅𑀦𑁆𑀥𑀯𑀦𑁂 𑀲𑀼𑀧𑀼𑀧𑁆𑀨𑀺𑀢𑀁 𑀲𑀸𑀮𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀳𑀻𑀭𑁂𑀳𑀺 𑀆𑀯𑀼𑀡𑀺𑀢𑁆𑀯𑀸 𑀯𑀝𑀁𑀲𑀓𑁂 𑀓𑀢𑁆𑀯𑀸 𑀧𑀼𑀦 𑀩𑀳𑀽𑀦𑀺 𑀫𑀼𑀢𑁆𑀢𑀧𑀼𑀧𑁆𑀨𑀸𑀦𑀺 𑀅𑀕𑁆𑀕𑀧𑀼𑀧𑁆𑀨𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀝𑁆𑀞𑀸. 𑀢𑀲𑁆𑀫𑀺𑀁 𑀫𑀡𑁆𑀟𑀧𑁂 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀓𑀼𑀘𑁆𑀙𑀺𑀁 𑀑𑀪𑀸𑀲𑀬𑀫𑀸𑀦𑀁 𑀩𑀸𑀮𑀲𑀽𑀭𑀺𑀬𑀁 𑀯𑀺𑀬 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁, 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀢𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀦𑁆𑀢𑀻 𑀯𑀝𑀁𑀲𑀓𑀸𑀦𑀺 𑀆𑀲𑀦𑀲𑁆𑀲 𑀲𑀫𑀦𑁆𑀢𑀢𑁄 𑀞𑀧𑁂𑀢𑁆𑀯𑀸 𑀇𑀢𑀭𑀸𑀦𑀺 𑀘 𑀧𑀼𑀧𑁆𑀨𑀸𑀦𑀺 𑀑𑀓𑀺𑀭𑀺𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁆𑀣 𑀢𑀲𑁆𑀲𑀸 𑀭𑀢𑁆𑀢𑀨𑀮𑀺𑀓𑀫𑀬𑀁 𑀯𑀺𑀫𑀸𑀦𑀁, 𑀢𑀲𑁆𑀲 𑀘 𑀧𑀼𑀭𑀢𑁄 𑀲𑀼𑀯𑀡𑁆𑀡𑀯𑀸𑀮𑀼𑀓𑀸𑀲𑀦𑁆𑀣𑀢𑀪𑀽𑀫𑀺𑀪𑀸𑀕𑀁 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑀸 𑀬𑀤𑀸 𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀮𑀯𑀦𑀁 𑀧𑀯𑀺𑀲𑀢𑀺, 𑀢𑀤𑀸 𑀲𑀸𑀮𑀲𑀸𑀔𑀸 𑀑𑀦𑀫𑀺𑀢𑁆𑀯𑀸 𑀢𑀲𑁆𑀲𑀸 𑀉𑀧𑀭𑀺 𑀓𑀼𑀲𑀼𑀫𑀸𑀦𑀺 𑀑𑀓𑀺𑀭𑀦𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀉𑀧𑀕𑀦𑁆𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺 𑁋

𑁬𑁮𑁯.

‘‘𑀫𑀜𑁆𑀚𑀺𑀝𑁆𑀞𑀓𑁂 𑀯𑀺𑀫𑀸𑀦𑀲𑁆𑀫𑀺𑀁, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑁂;

𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀽𑀭𑀺𑀬𑁂𑀦, 𑀭𑀫𑀲𑀺 𑀲𑀼𑀧𑁆𑀧𑀯𑀸𑀤𑀺𑀢𑁂.

𑁬𑁯𑁦.

‘‘𑀢𑀫𑁆𑀳𑀸 𑀯𑀺𑀫𑀸𑀦𑀸 𑀑𑀭𑀼𑀬𑁆𑀳, 𑀦𑀺𑀫𑁆𑀫𑀺𑀢𑀸 𑀭𑀢𑀦𑀸𑀫𑀬𑀸;

𑀑𑀕𑀸𑀳𑀲𑀺 𑀲𑀸𑀮𑀯𑀦𑀁, 𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁.

𑁬𑁯𑁧.

‘‘𑀬𑀲𑁆𑀲 𑀬𑀲𑁆𑀲𑁂𑀯 𑀲𑀸𑀮𑀲𑁆𑀲, 𑀫𑀽𑀮𑁂 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀲𑁄 𑀲𑁄 𑀫𑀼𑀜𑁆𑀘𑀢𑀺 𑀧𑀼𑀧𑁆𑀨𑀸𑀦𑀺, 𑀑𑀦𑀫𑀺𑀢𑁆𑀯𑀸 𑀤𑀼𑀫𑀼𑀢𑁆𑀢𑀫𑁄.

𑁬𑁯𑁨.

‘‘𑀯𑀸𑀢𑁂𑀭𑀺𑀢𑀁 𑀲𑀸𑀮𑀯𑀦𑀁, 𑀆𑀥𑀼𑀢𑀁 𑀤𑀺𑀚𑀲𑁂𑀯𑀺𑀢𑀁;

𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸, 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸.

𑁬𑁯𑁩.

‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁, 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁮𑁯. 𑀢𑀢𑁆𑀣 𑀫𑀜𑁆𑀚𑀺𑀝𑁆𑀞𑀓𑁂 𑀯𑀺𑀫𑀸𑀦𑀲𑁆𑀫𑀺𑀦𑁆𑀢𑀺 𑀭𑀢𑁆𑀢𑀨𑀮𑀺𑀓𑀫𑀬𑁂 𑀯𑀺𑀫𑀸𑀦𑁂. 𑀲𑀺𑀦𑁆𑀤𑀼𑀯𑀸𑀭𑀓𑀡𑀯𑀻𑀭𑀫𑀓𑀼𑀮𑀲𑀤𑀺𑀲𑀯𑀡𑁆𑀡𑀜𑁆𑀳𑀺 ‘‘𑀫𑀜𑁆𑀚𑀺𑀝𑁆𑀞𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑁂𑀢𑀺 𑀲𑀫𑀦𑁆𑀢𑀢𑁄 𑀯𑀺𑀧𑁆𑀧𑀓𑀺𑀡𑁆𑀡𑀸𑀳𑀺 𑀲𑀼𑀯𑀡𑁆𑀡𑀯𑀸𑀮𑀼𑀓𑀸𑀳𑀺 𑀲𑀦𑁆𑀣𑀢𑀪𑀽𑀫𑀺𑀪𑀸𑀕𑁂. 𑀭𑀫𑀲𑀺 𑀲𑀼𑀧𑁆𑀧𑀯𑀸𑀤𑀺𑀢𑁂𑀢𑀺 𑀲𑀼𑀝𑁆𑀞𑀼 𑀧𑀯𑀸𑀤𑀺𑀢𑁂𑀦 𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀽𑀭𑀺𑀬𑁂𑀦 𑀅𑀪𑀺𑀭𑀫𑀲𑀺.

𑁬𑁯𑁦. 𑀦𑀺𑀫𑀺𑀢𑁆𑀢𑀸 𑀭𑀢𑀦𑀸𑀫𑀬𑀸𑀢𑀺 𑀢𑀯 𑀲𑀼𑀘𑀭𑀺𑀢𑀲𑀺𑀧𑁆𑀧𑀺𑀦𑀸 𑀅𑀪𑀺𑀦𑀺𑀫𑁆𑀫𑀺𑀢𑀸 𑀭𑀢𑀦𑀫𑀬𑀸 𑀯𑀺𑀫𑀸𑀦𑀸. 𑀑𑀕𑀸𑀳𑀲𑀻𑀢𑀺 𑀧𑀯𑀺𑀲𑀲𑀺. 𑀲𑀩𑁆𑀩𑀓𑀸𑀮𑀺𑀓𑀦𑁆𑀢𑀺 𑀲𑀩𑁆𑀩𑀓𑀸𑀮𑁂 𑀲𑀼𑀔𑀁 𑀲𑀩𑁆𑀩𑀉𑀢𑀼𑀲𑀧𑁆𑀧𑀸𑀬𑀁, 𑀲𑀩𑁆𑀩𑀓𑀸𑀮𑁂 𑀧𑀼𑀧𑁆𑀨𑀦𑀓𑀁 𑀯𑀸.

𑁬𑁯𑁨. 𑀯𑀸𑀢𑁂𑀭𑀺𑀢𑀦𑁆𑀢𑀺 𑀬𑀣𑀸 𑀧𑀼𑀧𑁆𑀨𑀸𑀦𑀺 𑀑𑀓𑀺𑀭𑀦𑁆𑀢𑀺, 𑀏𑀯𑀁 𑀯𑀸𑀢𑁂𑀦 𑀈𑀭𑀺𑀢𑀁 𑀘𑀮𑀺𑀢𑀁. 𑀆𑀥𑀼𑀢𑀦𑁆𑀢𑀺 𑀫𑀦𑁆𑀤𑁂𑀦 𑀫𑀸𑀮𑀼𑀢𑁂𑀦 𑀲𑀡𑀺𑀓𑀲𑀡𑀺𑀓𑀁 𑀯𑀺𑀥𑀽𑀧𑀬𑀫𑀸𑀦𑀁. 𑀤𑀺𑀚𑀲𑁂𑀯𑀺𑀢𑀦𑁆𑀢𑀺 𑀫𑀬𑀽𑀭𑀓𑁄𑀓𑀺𑀮𑀸𑀤𑀺𑀲𑀓𑀼𑀡𑀲𑀗𑁆𑀖𑁂𑀳𑀺 𑀉𑀧𑀲𑁂𑀯𑀺𑀢𑀁.

𑀏𑀯𑀁 𑀣𑁂𑀭𑁂𑀦 𑀧𑀼𑀝𑁆𑀞𑀸 𑀲𑀸 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁬𑁯𑁪.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀤𑀸𑀲𑀻 𑀅𑀬𑀺𑀭𑀓𑀼𑀮𑁂 𑀅𑀳𑀼𑀁;

𑀩𑀼𑀤𑁆𑀥𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸𑀦, 𑀲𑀸𑀮𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀁.

𑁬𑁯𑁫.

‘‘𑀯𑀝𑀁𑀲𑀓𑀜𑁆𑀘 𑀲𑀼𑀓𑀢𑀁, 𑀲𑀸𑀮𑀧𑀼𑀧𑁆𑀨𑀫𑀬𑀁 𑀅𑀳𑀁;

𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑁂𑀲𑀺𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁬𑁯𑁬.

‘‘𑀢𑀸𑀳𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀓𑀼𑀲𑀮𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀅𑀧𑁂𑀢𑀲𑁄𑀓𑀸 𑀲𑀼𑀔𑀺𑀢𑀸, 𑀲𑀫𑁆𑀧𑀫𑁄𑀤𑀸𑀫𑀦𑀸𑀫𑀬𑀸’’𑀢𑀺.

𑁬𑁯𑁪-𑁫. 𑀢𑀢𑁆𑀣 𑀅𑀬𑀺𑀭𑀓𑀼𑀮𑁂𑀢𑀺 𑀅𑀬𑁆𑀬𑀓𑀼𑀮𑁂, 𑀲𑀸𑀫𑀺𑀓𑀕𑁂𑀳𑁂𑀢𑀺 𑀅𑀢𑁆𑀣𑁄. 𑀅𑀳𑀼𑀦𑁆𑀢𑀺 𑀅𑀳𑁄𑀲𑀺𑀁. 𑀑𑀓𑀺𑀭𑀺𑀦𑁆𑀢𑀺 𑀧𑀼𑀧𑁆𑀨𑁂𑀳𑀺 𑀯𑀺𑀧𑁆𑀧𑀓𑀺𑀭𑀺𑀁. 𑀉𑀧𑀦𑀸𑀫𑁂𑀲𑀺𑀦𑁆𑀢𑀺 𑀧𑀽𑀚𑀸𑀯𑀲𑁂𑀦 𑀉𑀧𑀦𑀸𑀫𑁂𑀲𑀺𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀧𑀭𑀺𑀯𑀸𑀭𑀸𑀬 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀦𑀺𑀯𑁂𑀤𑁂𑀲𑀺. 𑀪𑀕𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀫𑀜𑁆𑀚𑀺𑀝𑁆𑀞𑀓𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀪𑀲𑁆𑀲𑀭𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀪𑀲𑁆𑀲𑀭𑀯𑀭𑀯𑀡𑁆𑀡𑀦𑀺𑀪𑁂𑀢𑀺 𑀧𑀪𑀲𑁆𑀲𑀭𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂 𑀅𑀪𑀺𑀧𑁆𑀧𑀲𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲𑁂𑀓𑀸 𑀥𑀻𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀲𑀸𑀧𑀺 𑀣𑁂𑀭𑁂 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑀸 𑀳𑁄𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀁 𑀓𑀼𑀮𑀁 𑀉𑀧𑀲𑀗𑁆𑀓𑀫𑀺. 𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀣𑁂𑀭𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂 𑀲𑀼𑀫𑀦𑀫𑀸𑀮𑀸𑀬 𑀧𑀽𑀚𑁂𑀢𑁆𑀯𑀸 𑀫𑀥𑀼𑀭𑀁 𑀕𑀼𑀴𑀨𑀸𑀡𑀺𑀢𑀁 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀺, 𑀣𑁂𑀭𑁄 𑀅𑀦𑀼𑀫𑁄𑀤𑀺𑀢𑀼𑀓𑀸𑀫𑁄 𑀦𑀺𑀲𑀻𑀤𑀺. 𑀲𑀸 𑀖𑀭𑀸𑀯𑀸𑀲𑀲𑁆𑀲 𑀩𑀳𑀼𑀓𑀺𑀘𑁆𑀘𑀢𑀸𑀬 𑀅𑀦𑁄𑀓𑀸𑀲𑀢𑀁 𑀧𑀯𑁂𑀤𑁂𑀢𑁆𑀯𑀸 ‘‘𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑀤𑀳𑁂𑀯 𑀘 𑀲𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁬𑁯𑁭.

‘‘𑀧𑀪𑀲𑁆𑀲𑀭𑀯𑀭𑀯𑀡𑁆𑀡𑀦𑀺𑀪𑁂, 𑀲𑀼𑀭𑀢𑁆𑀢𑀯𑀢𑁆𑀣𑀯𑀲𑀦𑁂;

𑀫𑀳𑀺𑀤𑁆𑀥𑀺𑀓𑁂 𑀘𑀦𑁆𑀤𑀦𑀭𑀼𑀘𑀺𑀭𑀕𑀢𑁆𑀢𑁂,

𑀓𑀸 𑀢𑁆𑀯𑀁 𑀲𑀼𑀪𑁂 𑀤𑁂𑀯𑀢𑁂 𑀯𑀦𑁆𑀤𑀲𑁂 𑀫𑀫𑀁.

𑁬𑁯𑁮.

‘‘𑀧𑀮𑁆𑀮𑀗𑁆𑀓𑁄 𑀘 𑀢𑁂 𑀫𑀳𑀕𑁆𑀖𑁄, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑁄 𑀭𑀼𑀘𑀺𑀭𑁄;

𑀬𑀢𑁆𑀣 𑀢𑁆𑀯𑀁 𑀦𑀺𑀲𑀺𑀦𑁆𑀦𑀸 𑀯𑀺𑀭𑁄𑀘𑀲𑀺, 𑀤𑁂𑀯𑀭𑀸𑀚𑀸𑀭𑀺𑀯 𑀦𑀦𑁆𑀤𑀦𑁂 𑀯𑀦𑁂.

𑁬𑁯𑁯.

‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀲𑀼𑀘𑀭𑀺𑀢𑀫𑀸𑀘𑀭𑀻 𑀪𑀤𑁆𑀤𑁂, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁;

𑀅𑀦𑀼𑀪𑁄𑀲𑀺 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔;

𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁯𑁭. 𑀢𑀢𑁆𑀣 𑀧𑀪𑀲𑁆𑀲𑀭𑀯𑀭𑀯𑀡𑁆𑀡𑀦𑀺𑀪𑁂𑀢𑀺 𑀦𑀺𑀪𑀸𑀢𑀺 𑀤𑀺𑀩𑁆𑀩𑀢𑀻𑀢𑀺 𑀦𑀺𑀪𑀸, 𑀯𑀡𑁆𑀡𑁄𑀯 𑀦𑀺𑀪𑀸 𑀯𑀡𑁆𑀡𑀦𑀺𑀪𑀸, 𑀅𑀢𑀺𑀯𑀺𑀬 𑀑𑀪𑀸𑀲𑀦𑀢𑁄 𑀧𑀪𑀲𑁆𑀲𑀭𑀸 𑀙𑀯𑀺𑀤𑁄𑀲𑀸𑀪𑀸𑀯𑁂𑀦 𑀯𑀭𑀸 𑀉𑀢𑁆𑀢𑀫𑀸 𑀯𑀡𑁆𑀡𑀦𑀺𑀪𑀸 𑀏𑀢𑀺𑀲𑁆𑀲𑀸𑀢𑀺 𑀧𑀪𑀲𑁆𑀲𑀭𑀯𑀭𑀯𑀡𑁆𑀡𑀦𑀺𑀪𑀸. 𑀆𑀫𑀦𑁆𑀢𑀦𑀯𑀲𑁂𑀦 ‘‘𑀧𑀪𑀲𑁆𑀲𑀭𑀯𑀭𑀯𑀡𑁆𑀡𑀦𑀺𑀪𑁂’’𑀢𑀺 𑀯𑀼𑀢𑁆𑀢𑀁. 𑀲𑀼𑀭𑀢𑁆𑀢𑀯𑀢𑁆𑀣𑀯𑀲𑀦𑁂𑀢𑀺 𑀲𑀼𑀝𑁆𑀞𑀼 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑁂. 𑀘𑀦𑁆𑀤𑀦𑀭𑀼𑀘𑀺𑀭𑀕𑀢𑁆𑀢𑁂𑀢𑀺 𑀘𑀦𑁆𑀤𑀦𑀸𑀦𑀼𑀮𑀺𑀢𑁆𑀢𑀁 𑀯𑀺𑀬 𑀭𑀼𑀘𑀺𑀭𑀕𑀢𑁆𑀢𑁂, 𑀕𑁄𑀲𑀻𑀢𑀘𑀦𑁆𑀤𑀦𑁂𑀦 𑀩𑀳𑀮𑀢𑀭𑀸𑀦𑀼𑀮𑀺𑀢𑁆𑀢𑀁 𑀯𑀺𑀬 𑀲𑀼𑀭𑀢𑁆𑀢𑀫𑀦𑀼𑀜𑁆𑀜𑀲𑀭𑀻𑀭𑀸𑀯𑀬𑀯𑁂𑀢𑀺 𑀅𑀢𑁆𑀣𑁄, 𑀘𑀦𑁆𑀤𑀦𑀸𑀦𑀼𑀮𑁂𑀧𑁂𑀦 𑀯𑀸 𑀭𑀼𑀘𑀺𑀭𑀕𑀢𑁆𑀢𑁂.

𑀏𑀯𑀁 𑀣𑁂𑀭𑁂𑀦 𑀧𑀼𑀝𑁆𑀞𑀸 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁭𑁦𑁦.

‘‘𑀧𑀺𑀡𑁆𑀟𑀸𑀬 𑀢𑁂 𑀘𑀭𑀦𑁆𑀢𑀲𑁆𑀲, 𑀫𑀸𑀮𑀁 𑀨𑀸𑀡𑀺𑀢𑀜𑁆𑀘 𑀅𑀤𑀤𑀁 𑀪𑀦𑁆𑀢𑁂;

𑀢𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀯𑀺𑀧𑀸𑀓𑀁, 𑀅𑀦𑀼𑀪𑁄𑀫𑀺 𑀤𑁂𑀯𑀮𑁄𑀓𑀲𑁆𑀫𑀺𑀁.

𑁭𑁦𑁧.

‘‘𑀳𑁄𑀢𑀺 𑀘 𑀫𑁂 𑀅𑀦𑀼𑀢𑀸𑀧𑁄, 𑀅𑀧𑀭𑀤𑁆𑀥𑀁 𑀤𑀼𑀓𑁆𑀔𑀺𑀢𑀜𑁆𑀘 𑀫𑁂 𑀪𑀦𑁆𑀢𑁂;

𑀲𑀸𑀳𑀁 𑀥𑀫𑁆𑀫𑀁 𑀦𑀸𑀲𑁆𑀲𑁄𑀲𑀺𑀁, 𑀲𑀼𑀤𑁂𑀲𑀺𑀢𑀁 𑀥𑀫𑁆𑀫𑀭𑀸𑀚𑁂𑀦.

𑁭𑁦𑁨.

‘‘𑀢𑀁 𑀢𑀁 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂, 𑀬𑀲𑁆𑀲 𑀫𑁂 𑀅𑀦𑀼𑀓𑀫𑁆𑀧𑀺𑀬𑁄 𑀓𑁄𑀘𑀺;

𑀥𑀫𑁆𑀫𑁂𑀲𑀼 𑀢𑀁 𑀲𑀫𑀸𑀤𑀧𑁂𑀣, 𑀲𑀼𑀤𑁂𑀲𑀺𑀢𑀁 𑀥𑀫𑁆𑀫𑀭𑀸𑀚𑁂𑀦.

𑁭𑁦𑁩.

‘‘𑀬𑁂𑀲𑀁 𑀅𑀢𑁆𑀣𑀺 𑀲𑀤𑁆𑀥𑀸 𑀩𑀼𑀤𑁆𑀥𑁂, 𑀥𑀫𑁆𑀫𑁂 𑀘 𑀲𑀗𑁆𑀖𑀭𑀢𑀦𑁂;

𑀢𑁂 𑀫𑀁 𑀅𑀢𑀺𑀯𑀺𑀭𑁄𑀘𑀦𑁆𑀢𑀺, 𑀆𑀬𑀼𑀦𑀸 𑀬𑀲𑀲𑀸 𑀲𑀺𑀭𑀺𑀬𑀸.

𑁭𑁦𑁪.

‘‘𑀧𑀢𑀸𑀧𑁂𑀦 𑀯𑀡𑁆𑀡𑁂𑀦 𑀉𑀢𑁆𑀢𑀭𑀺𑀢𑀭𑀸, 𑀅𑀜𑁆𑀜𑁂 𑀫𑀳𑀺𑀤𑁆𑀥𑀺𑀓𑀢𑀭𑀸 𑀫𑀬𑀸 𑀤𑁂𑀯𑀸’’𑀢𑀺.

𑁭𑁦𑁦. 𑀢𑀢𑁆𑀣 𑀫𑀸𑀮𑀦𑁆𑀢𑀺 𑀲𑀼𑀫𑀦𑀧𑀼𑀧𑁆𑀨𑀁. 𑀨𑀸𑀡𑀺𑀢𑀦𑁆𑀢𑀺 𑀉𑀘𑁆𑀙𑀼𑀭𑀲𑀁 𑀕𑀳𑁂𑀢𑁆𑀯𑀸 𑀓𑀢𑀨𑀸𑀡𑀺𑀢𑀁.

𑁭𑁦𑁧. 𑀅𑀦𑀼𑀢𑀸𑀧𑁄𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀢𑀲𑁆𑀲 𑀓𑀸𑀭𑀡𑀫𑀸𑀳 ‘‘𑀅𑀧𑀭𑀤𑁆𑀥𑀁 𑀤𑀼𑀓𑁆𑀔𑀢𑀜𑁆𑀘 𑀫𑁂 𑀪𑀦𑁆𑀢𑁂’’𑀢𑀺. 𑀇𑀤𑀸𑀦𑀺 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀲𑀸𑀳𑀁 𑀥𑀫𑁆𑀫𑀁 𑀦𑀸𑀲𑁆𑀲𑁄𑀲𑀺’’𑀦𑁆𑀢𑀺, 𑀲𑀸 𑀅𑀳𑀁 𑀢𑀤𑀸 𑀢𑀯 𑀤𑁂𑀲𑁂𑀢𑀼𑀓𑀸𑀫𑀲𑁆𑀲 𑀥𑀫𑁆𑀫𑀁 𑀦 𑀲𑀼𑀡𑀺𑀁. 𑀓𑀻𑀤𑀺𑀲𑀁? 𑀲𑀼𑀤𑁂𑀲𑀺𑀢𑀁 𑀥𑀫𑁆𑀫𑀭𑀸𑀚𑁂𑀦𑀸𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀢𑀸𑀬 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀘 𑀲𑁆𑀯𑀸𑀔𑀸𑀢𑀦𑁆𑀢𑀺 𑀅𑀢𑁆𑀣𑁄.

𑁭𑁦𑁨. 𑀢𑀦𑁆𑀢𑀺 𑀢𑀲𑁆𑀫𑀸 𑀥𑀫𑁆𑀫𑀭𑀸𑀚𑁂𑀦 𑀲𑀼𑀤𑁂𑀲𑀺𑀢𑀢𑁆𑀢𑀸 𑀅𑀲𑀯𑀦𑀲𑁆𑀲 𑀘 𑀫𑀸𑀤𑀺𑀲𑀸𑀦𑀁 𑀅𑀦𑀼𑀢𑀸𑀧𑀳𑁂𑀢𑀼𑀪𑀸𑀯𑀢𑁄. 𑀢𑀦𑁆𑀢𑀺 𑀢𑀼𑀯𑀁, 𑀢𑀼𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀲𑀸𑀢𑀺 𑀬𑁄 𑀅𑀲𑁆𑀲. 𑀅𑀦𑀼𑀓𑀫𑁆𑀧𑀺𑀬𑁄𑀢𑀺 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑁄. 𑀓𑁄𑀘𑀻𑀢𑀺 𑀬𑁄 𑀓𑁄𑀘𑀺. 𑀥𑀫𑁆𑀫𑁂𑀲𑀽𑀢𑀺 𑀲𑀻𑀮𑀸𑀤𑀺𑀥𑀫𑁆𑀫𑁂𑀲𑀼. ‘‘𑀥𑀫𑁆𑀫𑁂 𑀳𑀻’’𑀢𑀺 𑀯𑀸 𑀧𑀸𑀞𑁄, 𑀲𑀸𑀲𑀦𑀥𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀯𑀸. 𑀢𑀦𑁆𑀢𑀺 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀧𑀼𑀕𑁆𑀕𑀮𑀁. 𑀲𑀼𑀤𑁂𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀤𑁂𑀲𑀺𑀢𑀁.

𑁭𑁦𑁩-𑁪. 𑀢𑁂 𑀫𑀁 𑀅𑀢𑀺𑀯𑀺𑀭𑁄𑀘𑀦𑁆𑀢𑀻𑀢𑀺 𑀢𑁂 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀸 𑀤𑁂𑀯𑀧𑀼𑀢𑁆𑀢𑀸 𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀭𑁄𑀘𑀦𑁆𑀢𑀺. 𑀧𑀢𑀸𑀧𑁂𑀦𑀸𑀢𑀺 𑀢𑁂𑀚𑀲𑀸 𑀆𑀦𑀼𑀪𑀸𑀯𑁂𑀦. 𑀅𑀜𑁆𑀜𑁂𑀢𑀺 𑀬𑁂 𑀅𑀜𑁆𑀜𑁂. 𑀫𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀯𑀡𑁆𑀡𑁂𑀦 𑀉𑀢𑁆𑀢𑀭𑀺𑀢𑀭𑀸 𑀫𑀳𑀺𑀤𑁆𑀥𑀺𑀓𑀢𑀭𑀸 𑀘 𑀤𑁂𑀯𑀸, 𑀢𑁂 𑀭𑀢𑀦𑀢𑁆𑀢𑀬𑁂 𑀅𑀪𑀺𑀧𑁆𑀧𑀲𑀦𑁆𑀦𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀪𑀲𑁆𑀲𑀭𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀸𑀕𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑀸 𑀫𑀡𑀺𑀓𑀜𑁆𑀘𑀦𑀸𑀘𑀺𑀢𑀦𑁆𑀢𑀺 𑀦𑀸𑀕𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑀻 𑀏𑀓𑀸 𑀉𑀧𑀸𑀲𑀺𑀓𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀢𑁆𑀣𑀬𑀼𑀕𑀁 𑀯𑀸𑀬𑀸𑀧𑁂𑀢𑁆𑀯𑀸 𑀲𑀼𑀧𑀭𑀺𑀥𑁄𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂 𑀪𑀕𑀯𑀸, 𑀇𑀫𑀁 𑀯𑀢𑁆𑀣𑀬𑀼𑀕𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀪𑀕𑀯𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸𑀯𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀦𑁆𑀦𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀯𑀮𑁆𑀮𑀪𑀸 𑀬𑀲𑀼𑀢𑁆𑀢𑀭𑀸 𑀦𑀸𑀫 𑀦𑀸𑀫𑁂𑀦. 𑀢𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑁄 𑀓𑀼𑀜𑁆𑀚𑀭𑀯𑀭𑁄 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀘 𑀔𑀦𑁆𑀥𑁂 𑀫𑀡𑀺𑀫𑀬𑁄 𑀫𑀡𑁆𑀟𑀧𑁄, 𑀫𑀚𑁆𑀛𑁂 𑀲𑀼𑀧𑀜𑁆𑀜𑀢𑁆𑀢𑀭𑀢𑀦𑀧𑀮𑁆𑀮𑀗𑁆𑀓𑁄 𑀦𑀺𑀩𑁆𑀩𑀢𑁆𑀢𑀺, 𑀤𑁆𑀯𑀻𑀲𑀼 𑀤𑀦𑁆𑀢𑁂𑀲𑀼 𑀘𑀲𑁆𑀲 𑀓𑀫𑀮𑀓𑀼𑀯𑀮𑀬𑀼𑀚𑁆𑀚𑀮𑀸 𑀭𑀫𑀡𑀻𑀬𑀸 𑀤𑁆𑀯𑁂 𑀧𑁄𑀓𑁆𑀔𑀭𑀡𑀺𑀬𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀢𑀢𑁆𑀣 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀞𑀺𑀢𑀸 𑀤𑁂𑀯𑀥𑀻𑀢𑀸 𑀧𑀕𑁆𑀕𑀳𑀺𑀢𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀸 𑀦𑀘𑁆𑀘𑀦𑁆𑀢𑀺 𑀘𑁂𑀯 𑀕𑀸𑀬𑀦𑁆𑀢𑀺 𑀘.

𑀲𑀢𑁆𑀣𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀦𑀸 𑀅𑀦𑀼𑀪𑀼𑀬𑁆𑀬𑀫𑀸𑀦𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲𑀸 𑀓𑀸𑀭𑀡𑀁 𑀉𑀧𑀥𑀸𑀭𑁂𑀦𑁆𑀢𑀻 ‘‘𑀲𑀢𑁆𑀣𑀼 𑀯𑀢𑁆𑀣𑀬𑀼𑀕𑀤𑀸𑀦𑀓𑀸𑀭𑀡’’𑀦𑁆𑀢𑀺 𑀜𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸 𑀪𑀕𑀯𑀢𑀺 𑀧𑀲𑀸𑀤𑀩𑀳𑀼𑀫𑀸𑀦𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀁 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀢𑁄 𑀅𑀦𑀼𑀜𑁆𑀜𑀸𑀬 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁭𑁦𑁫.

‘‘𑀅𑀮𑀗𑁆𑀓𑀢𑀸 𑀫𑀡𑀺𑀓𑀜𑁆𑀘𑀦𑀸𑀘𑀺𑀢𑀁, 𑀲𑁄𑀯𑀡𑁆𑀡𑀚𑀸𑀮𑀘𑀺𑀢𑀁 𑀫𑀳𑀦𑁆𑀢𑀁;

𑀅𑀪𑀺𑀭𑀼𑀬𑁆𑀳 𑀕𑀚𑀯𑀭𑀁 𑀲𑀼𑀓𑀧𑁆𑀧𑀺𑀢𑀁, 𑀇𑀥𑀸𑀕𑀫𑀸 𑀯𑁂𑀳𑀸𑀬𑀲𑀁 𑀅𑀦𑁆𑀢𑀮𑀺𑀓𑁆𑀔𑁂.

𑁭𑁦𑁬.

‘‘𑀦𑀸𑀕𑀲𑁆𑀲 𑀤𑀦𑁆𑀢𑁂𑀲𑀼 𑀤𑀼𑀯𑁂𑀲𑀼 𑀦𑀺𑀫𑁆𑀫𑀺𑀢𑀸, 𑀅𑀘𑁆𑀙𑁄𑀤𑀓𑀸 𑀧𑀤𑀼𑀫𑀺𑀦𑀺𑀬𑁄 𑀲𑀼𑀨𑀼𑀮𑁆𑀮𑀸;

𑀧𑀤𑀼𑀫𑁂𑀲𑀼 𑀘 𑀢𑀽𑀭𑀺𑀬𑀕𑀡𑀸 𑀧𑀪𑀺𑀚𑁆𑀚𑀭𑁂, 𑀇𑀫𑀸 𑀘 𑀦𑀘𑁆𑀘𑀦𑁆𑀢𑀺 𑀫𑀦𑁄𑀳𑀭𑀸𑀬𑁄.

𑁭𑁦𑁭.

‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸𑀲𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁭𑁦𑁫. 𑀢𑀢𑁆𑀣 𑀅𑀮𑀗𑁆𑀓𑀢𑀸𑀢𑀺 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸. 𑀫𑀡𑀺𑀓𑀜𑁆𑀘𑀦𑀸𑀘𑀺𑀢𑀦𑁆𑀢𑀺 𑀢𑁂𑀳𑀺 𑀤𑀺𑀩𑁆𑀩𑀫𑀸𑀦𑁂𑀳𑀺 𑀫𑀡𑀺𑀲𑀼𑀯𑀡𑁆𑀡𑁂𑀳𑀺 𑀆𑀘𑀺𑀢𑀁. 𑀲𑁄𑀯𑀡𑁆𑀡𑀚𑀸𑀮𑀘𑀺𑀢𑀦𑁆𑀢𑀺 𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑀁. 𑀫𑀳𑀦𑁆𑀢𑀦𑁆𑀢𑀺 𑀯𑀺𑀧𑀼𑀮𑀁. 𑀲𑀼𑀓𑀧𑁆𑀧𑀺𑀢𑀦𑁆𑀢𑀺 𑀕𑀫𑀦𑀲𑀦𑁆𑀦𑀸𑀳𑀯𑀲𑁂𑀦 𑀲𑀼𑀝𑁆𑀞𑀼 𑀲𑀦𑁆𑀦𑀤𑁆𑀥𑀁. 𑀯𑁂𑀳𑀸𑀬𑀲𑀦𑁆𑀢𑀺 𑀯𑁂𑀳𑀸𑀬𑀲𑀪𑀽𑀢𑁂 𑀳𑀢𑁆𑀣𑀺𑀧𑀺𑀝𑁆𑀞𑁂. 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀆𑀓𑀸𑀲𑁂, ‘‘𑀅𑀮𑀗𑁆𑀓𑀢𑀫𑀡𑀺𑀓𑀜𑁆𑀘𑀦𑀸𑀘𑀺𑀢’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀤𑁂𑀯𑀢𑁂, 𑀢𑁆𑀯𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀸 𑀅𑀮𑀗𑁆𑀓𑀢𑀫𑀡𑀺𑀓𑀜𑁆𑀘𑀦𑀸𑀘𑀺𑀢𑀁, 𑀅𑀢𑀺𑀯𑀺𑀬 𑀤𑀺𑀩𑁆𑀩𑀫𑀸𑀦𑁂𑀳𑀺 𑀫𑀡𑀻𑀳𑀺 𑀓𑀜𑁆𑀘𑀦𑁂𑀳𑀺 𑀘 𑀅𑀮𑀗𑁆𑀓𑀭𑀡𑀯𑀲𑁂𑀦 𑀔𑀘𑀺𑀢𑀁, 𑀳𑁂𑀫𑀚𑀸𑀮𑁂𑀳𑀺 𑀓𑀼𑀫𑁆𑀪𑀸𑀮𑀗𑁆𑀓𑀸𑀭𑀸𑀤𑀺𑀪𑁂𑀤𑁂𑀳𑀺 𑀳𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀘𑀺𑀢𑀁 𑀆𑀫𑀼𑀢𑁆𑀢𑀁 𑀫𑀳𑀦𑁆𑀢𑀁 𑀅𑀢𑀺𑀯𑀺𑀬 𑀩𑁆𑀭𑀳𑀦𑁆𑀢𑀁 𑀉𑀢𑁆𑀢𑀫𑀁 𑀕𑀚𑀁 𑀆𑀭𑀼𑀬𑁆𑀳 𑀳𑀢𑁆𑀣𑀺𑀧𑀺𑀝𑁆𑀞𑀺𑀬𑀸 𑀦𑀺𑀲𑀺𑀦𑁆𑀦𑀸 𑀆𑀓𑀸𑀲𑁂𑀦𑁂𑀯 𑀇𑀥 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑀸𑀢𑀺.

𑁭𑁦𑁬. 𑀦𑀸𑀕𑀲𑁆𑀲 𑀤𑀦𑁆𑀢𑁂𑀲𑀼 𑀤𑀼𑀯𑁂𑀲𑀼 𑀦𑀺𑀫𑁆𑀫𑀺𑀢𑀸𑀢𑀺 𑀏𑀭𑀸𑀯𑀡𑀲𑁆𑀲 𑀯𑀺𑀬 𑀦𑀸𑀕𑀭𑀸𑀚𑀲𑁆𑀲 𑀇𑀫𑀲𑁆𑀲 𑀤𑁆𑀯𑀻𑀲𑀼 𑀤𑀦𑁆𑀢𑁂𑀲𑀼 𑀤𑁆𑀯𑁂 𑀧𑁄𑀓𑁆𑀔𑀭𑀡𑀺𑀬𑁄 𑀲𑀼𑀘𑀭𑀺𑀢𑀲𑀺𑀧𑁆𑀧𑀺𑀦𑀸 𑀲𑀼𑀝𑁆𑀞𑀼 𑀯𑀺𑀭𑀘𑀺𑀢𑀸. 𑀢𑀽𑀭𑀺𑀬𑀕𑀡𑀸𑀢𑀺 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀫𑀽𑀳𑀸. 𑀧𑀪𑀺𑀚𑁆𑀚𑀭𑁂𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀮𑀬𑀪𑁂𑀤𑀸𑀦𑀁 𑀯𑀲𑁂𑀦 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺. ‘‘𑀧𑀯𑀚𑁆𑀚𑀭𑁂’’𑀢𑀺 𑀘 𑀧𑀞𑀦𑁆𑀢𑀺, 𑀧𑀓𑀸𑀭𑁂𑀳𑀺 𑀯𑀸𑀤𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀣𑁂𑀭𑁂𑀦 𑀧𑀼𑀝𑁆𑀞𑀸 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀯𑀺𑀲𑁆𑀲𑀚𑁆𑀚𑁂𑀲𑀺 𑁋

𑁭𑁦𑁮.

‘‘𑀩𑀸𑀭𑀸𑀡𑀲𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀩𑀼𑀤𑁆𑀥𑀲𑁆𑀲𑀳𑀁 𑀯𑀢𑁆𑀣𑀬𑀼𑀕𑀁 𑀅𑀤𑀸𑀲𑀺𑀁;

𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸 𑀙𑀫𑀸 𑀦𑀺𑀲𑀻𑀤𑀺𑀁, 𑀯𑀺𑀢𑁆𑀢𑀸 𑀘𑀳𑀁 𑀅𑀜𑁆𑀚𑀮𑀺𑀓𑀁 𑀅𑀓𑀸𑀲𑀺𑀁.

𑁭𑁦𑁯.

‘‘𑀩𑀼𑀤𑁆𑀥𑁄 𑀘 𑀫𑁂 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄, 𑀅𑀤𑁂𑀲𑀬𑀺 𑀲𑀫𑀼𑀤𑀬𑀤𑀼𑀓𑁆𑀔𑀦𑀺𑀘𑁆𑀘𑀢𑀁;

𑀅𑀲𑀗𑁆𑀔𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀲𑀲𑁆𑀲𑀢𑀁, 𑀫𑀕𑁆𑀕𑀁 𑀅𑀤𑁂𑀲𑀬𑀺 𑀬𑀢𑁄 𑀯𑀺𑀚𑀸𑀦𑀺𑀲𑀁.

𑁭𑁧𑁦.

‘‘𑀅𑀧𑁆𑀧𑀸𑀬𑀼𑀓𑀻 𑀓𑀸𑀮𑀓𑀢𑀸 𑀢𑀢𑁄 𑀘𑀼𑀢𑀸, 𑀉𑀧𑀧𑀦𑁆𑀦𑀸 𑀢𑀺𑀤𑀲𑀕𑀡𑀁 𑀬𑀲𑀲𑁆𑀲𑀺𑀦𑀻;

𑀲𑀓𑁆𑀓𑀲𑁆𑀲𑀳𑀁 𑀅𑀜𑁆𑀜𑀢𑀭𑀸 𑀧𑀚𑀸𑀧𑀢𑀺, 𑀬𑀲𑀼𑀢𑁆𑀢𑀭𑀸 𑀦𑀸𑀫 𑀤𑀺𑀲𑀸𑀲𑀼 𑀯𑀺𑀲𑁆𑀲𑀼𑀢𑀸’’𑀢𑀺.

𑁭𑁦𑁮-𑁯. 𑀢𑀢𑁆𑀣 𑀙𑀫𑀸𑀢𑀺 𑀪𑀽𑀫𑀺𑀬𑀁. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀯𑀺𑀢𑁆𑀢𑀸𑀢𑀺 𑀢𑀼𑀝𑁆𑀞𑀸. 𑀬𑀢𑁄𑀢𑀺 𑀬𑀢𑁄 𑀲𑀢𑁆𑀣𑀼 𑀲𑀸𑀫𑀼𑀓𑁆𑀓𑀁𑀲𑀺𑀓𑀥𑀫𑁆𑀫𑀤𑁂𑀲𑀦𑀢𑁄. 𑀯𑀺𑀚𑀸𑀦𑀺𑀲𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀁.

𑁭𑁧𑁦. 𑀅𑀧𑁆𑀧𑀸𑀬𑀼𑀓𑀻𑀢𑀺 ‘‘𑀈𑀤𑀺𑀲𑀁 𑀦𑀸𑀫 𑀉𑀴𑀸𑀭𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀦 𑀢𑀬𑀸 𑀏𑀢𑀲𑁆𑀫𑀺𑀁 𑀤𑀼𑀓𑁆𑀔𑀩𑀳𑀼𑀮𑁂 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀏𑀯𑀁 𑀞𑀸𑀢𑀩𑁆𑀩’’𑀦𑁆𑀢𑀺 𑀲𑀜𑁆𑀚𑀸𑀢𑀸𑀪𑀺𑀲𑀦𑁆𑀥𑀺𑀦𑀸 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀕𑀢𑁂𑀦 𑀓𑀫𑁆𑀫𑀼𑀦𑀸 𑀅𑀧𑁆𑀧𑀸𑀬𑀼𑀓𑀸 𑀲𑀫𑀸𑀦𑀸. 𑀅𑀜𑁆𑀜𑀢𑀭𑀸 𑀧𑀚𑀸𑀧𑀢𑀻𑀢𑀺 𑀲𑁄𑀴𑀲𑀲𑀳𑀲𑁆𑀲𑀸𑀦𑀁 𑀫𑀳𑁂𑀲𑀻𑀦𑀁 𑀅𑀜𑁆𑀜𑀢𑀭𑀸. 𑀤𑀺𑀲𑀸𑀲𑀼 𑀯𑀺𑀲𑁆𑀲𑀼𑀢𑀸𑀢𑀺 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀲𑀩𑁆𑀩𑀤𑀺𑀲𑀸𑀲𑀼 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀦𑀸𑀕𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀮𑁄𑀫𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀅𑀮𑁄𑀫𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀩𑀸𑀭𑀸𑀡𑀲𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀢𑁆𑀣𑁂𑀓𑀸 𑀅𑀮𑁄𑀫𑀸 𑀦𑀸𑀫 𑀤𑀼𑀕𑁆𑀕𑀢𑀺𑀢𑁆𑀣𑀻 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀜𑁆𑀜𑀁 𑀤𑀸𑀢𑀩𑁆𑀩𑀁 𑀅𑀧𑀲𑁆𑀲𑀦𑁆𑀢𑀻 ‘‘𑀈𑀤𑀺𑀲𑀫𑁆𑀧𑀺 𑀪𑀕𑀯𑀢𑁄 𑀤𑀺𑀦𑁆𑀦𑀁 𑀫𑀬𑁆𑀳𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑀁 𑀅𑀮𑁄𑀡𑀁 𑀲𑀼𑀓𑁆𑀔𑀓𑀼𑀫𑁆𑀫𑀸𑀲𑀁 𑀉𑀧𑀦𑁂𑀲𑀺, 𑀪𑀕𑀯𑀸 𑀧𑀝𑀺𑀕𑁆𑀕𑀳𑁂𑀲𑀺. 𑀲𑀸 𑀢𑀁 𑀤𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀲𑀺, 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋

𑁭𑁧𑁧.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂… 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀧𑀼𑀘𑁆𑀙𑀺. 𑀲𑀸𑀧𑀺 𑀢𑀲𑁆𑀲 𑀩𑁆𑀬𑀸𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑁋

𑁭𑁧𑁪.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋 𑀯𑀼𑀢𑁆𑀢𑀁;

𑁭𑁧𑁫.

‘‘𑀅𑀳𑀜𑁆𑀘 𑀩𑀸𑀭𑀸𑀡𑀲𑀺𑀬𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀅𑀤𑀸𑀲𑀺𑀁 𑀲𑀼𑀓𑁆𑀔𑀓𑀼𑀫𑁆𑀫𑀸𑀲𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁭𑁧𑁬.

‘‘𑀲𑀼𑀓𑁆𑀔𑀸𑀬 𑀅𑀮𑁄𑀡𑀺𑀓𑀸𑀬 𑀘, 𑀧𑀲𑁆𑀲 𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸;

𑀅𑀮𑁄𑀫𑀁 𑀲𑀼𑀔𑀺𑀢𑀁 𑀤𑀺𑀲𑁆𑀯𑀸, 𑀓𑁄 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀺.

𑁭𑁧𑁭.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂… 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁭𑁧𑁬. 𑀢𑀢𑁆𑀣 𑀅𑀮𑁄𑀫𑀁 𑀲𑀼𑀔𑀺𑀢𑀁 𑀤𑀺𑀲𑁆𑀯𑀸𑀢𑀺 𑀅𑀮𑁄𑀫𑀫𑁆𑀧𑀺 𑀦𑀸𑀫 𑀲𑀼𑀓𑁆𑀔𑀓𑀼𑀫𑁆𑀫𑀸𑀲𑀫𑀢𑁆𑀢𑀁 𑀤𑀢𑁆𑀯𑀸 𑀏𑀯𑀁 𑀤𑀺𑀩𑁆𑀩𑀲𑀼𑀔𑁂𑀦 𑀲𑀼𑀔𑀺𑀢𑀁 𑀤𑀺𑀲𑁆𑀯𑀸. 𑀓𑁄 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀻𑀢𑀺 𑀓𑁄 𑀦𑀸𑀫 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑁄 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀮𑁄𑀫𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀜𑁆𑀚𑀺𑀓𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑀜𑁆𑀚𑀺𑀓𑀤𑀸𑀬𑀺𑀓𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀅𑀦𑁆𑀥𑀓𑀯𑀺𑀦𑁆𑀤𑁂 𑀯𑀺𑀳𑀭𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀓𑀼𑀘𑁆𑀙𑀺𑀬𑀁 𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 ‘‘𑀕𑀘𑁆𑀙 𑀢𑁆𑀯𑀁 𑀆𑀦𑀦𑁆𑀤, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀫𑀬𑁆𑀳𑀁 𑀪𑁂𑀲𑀚𑁆𑀚𑀢𑁆𑀣𑀁 𑀓𑀜𑁆𑀚𑀺𑀓𑀁 𑀆𑀳𑀭𑀸’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀯𑁂𑀚𑁆𑀚𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀯𑁂𑀚𑁆𑀚𑀲𑁆𑀲 𑀪𑀭𑀺𑀬𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺 ‘‘𑀓𑀻𑀤𑀺𑀲𑁂𑀦 𑀯𑁄, 𑀪𑀦𑁆𑀢𑁂, 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁄’’𑀢𑀺. 𑀲𑀸 𑀓𑀺𑀭 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 ‘‘𑀪𑁂𑀲𑀚𑁆𑀚𑁂𑀦 𑀧𑀬𑁄𑀚𑀦𑁂 𑀲𑀢𑀺 𑀣𑁂𑀭𑁄 𑀇𑀥𑀸𑀕𑀘𑁆𑀙𑀢𑀺, 𑀦 𑀪𑀺𑀓𑁆𑀔𑀢𑁆𑀣’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀲𑀺. ‘‘𑀓𑀜𑁆𑀚𑀺𑀓𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀦 𑀬𑀺𑀤𑀁 𑀪𑁂𑀲𑀚𑁆𑀚𑀁 𑀫𑀬𑁆𑀳𑀁 𑀅𑀬𑁆𑀬𑀲𑁆𑀲, 𑀢𑀣𑀸 𑀳𑁂𑀲 𑀪𑀕𑀯𑀢𑁄 𑀧𑀢𑁆𑀢𑁄, 𑀳𑀦𑁆𑀤𑀸𑀳𑀁 𑀮𑁄𑀓𑀦𑀸𑀣𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀜𑁆𑀚𑀺𑀓𑀁 𑀲𑀫𑁆𑀧𑀸𑀤𑁂𑀫𑀻’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑀸 𑀩𑀤𑀭𑀬𑀽𑀲𑁂𑀦 𑀬𑀸𑀕𑀼𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀢𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑁂𑀦 𑀅𑀜𑁆𑀜𑀜𑁆𑀘 𑀪𑁄𑀚𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀧𑁂𑀲𑁂𑀲𑀺. 𑀢𑀁 𑀧𑀭𑀺𑀪𑀼𑀢𑁆𑀢𑀫𑀢𑁆𑀢𑀲𑁆𑀲𑁂𑀯 𑀪𑀕𑀯𑀢𑁄 𑀲𑁄 𑀆𑀩𑀸𑀥𑁄 𑀯𑀽𑀧𑀲𑀫𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀳𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀫𑁄𑀤𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀦 𑀯𑀺𑀘𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀢𑀸𑀬 𑀓𑀢𑀓𑀫𑁆𑀫𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁭𑁧𑁯.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦 …𑀧𑁂… 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑀸𑀧𑀺 𑀩𑁆𑀬𑀸𑀓𑀸𑀲𑀺.

𑁭𑁨𑁧.

‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁭𑁨𑁩.

‘‘𑀅𑀳𑀁 𑀅𑀦𑁆𑀥𑀓𑀯𑀺𑀦𑁆𑀤𑀫𑁆𑀳𑀺, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀅𑀤𑀸𑀲𑀺𑀁 𑀓𑁄𑀮𑀲𑀫𑁆𑀧𑀸𑀓𑀁, 𑀓𑀜𑁆𑀚𑀺𑀓𑀁 𑀢𑁂𑀮𑀥𑀽𑀧𑀺𑀢𑀁.

𑁭𑁨𑁪.

‘‘𑀧𑀺𑀧𑁆𑀨𑀮𑁆𑀬𑀸 𑀮𑀲𑀼𑀡𑁂𑀦 𑀘, 𑀫𑀺𑀲𑁆𑀲𑀁 𑀮𑀸𑀫𑀜𑁆𑀚𑀓𑁂𑀦 𑀘;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑀲𑁆𑀫𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁭𑁨𑁫.

‘‘𑀬𑀸 𑀫𑀳𑁂𑀲𑀺𑀢𑁆𑀢𑀁 𑀓𑀸𑀭𑁂𑀬𑁆𑀬, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀭𑀸𑀚𑀺𑀦𑁄;

𑀦𑀸𑀭𑀻 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀻, 𑀪𑀢𑁆𑀢𑀼 𑀘𑀸𑀦𑁄𑀫𑀤𑀲𑁆𑀲𑀺𑀓𑀸;

𑀏𑀓𑀲𑁆𑀲 𑀓𑀜𑁆𑀚𑀺𑀓𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁭𑁨𑁬.

‘‘𑀲𑀢𑀁 𑀦𑀺𑀓𑁆𑀔𑀸 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀓𑀜𑁆𑀚𑀺𑀓𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

𑁭𑁨𑁭.

‘‘𑀲𑀢𑀁 𑀳𑁂𑀫𑀯𑀢𑀸 𑀦𑀸𑀕𑀸, 𑀈𑀲𑀸𑀤𑀦𑁆𑀢𑀸 𑀉𑀭𑀽𑀴𑁆𑀳𑀯𑀸;

𑀲𑀼𑀯𑀡𑁆𑀡𑀓𑀘𑁆𑀙𑀸 𑀫𑀸𑀢𑀗𑁆𑀕𑀸, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸,

𑀏𑀓𑀲𑁆𑀲 𑀓𑀜𑁆𑀚𑀺𑀓𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

𑁭𑁨𑁮.

‘‘𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀁, 𑀇𑀲𑁆𑀲𑀭𑀁 𑀬𑁄𑀥 𑀓𑀸𑀭𑀬𑁂;

𑀏𑀓𑀲𑁆𑀲 𑀓𑀜𑁆𑀚𑀺𑀓𑀤𑀸𑀦𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑁭𑁨𑁩-𑁪. 𑀢𑀢𑁆𑀣 𑀅𑀤𑀸𑀲𑀺𑀁 𑀓𑁄𑀮𑀲𑀫𑁆𑀧𑀸𑀧𑀓𑀁, 𑀓𑀜𑁆𑀚𑀺𑀓𑀁 𑀢𑁂𑀮𑀥𑀽𑀧𑀺𑀢𑀦𑁆𑀢𑀺 𑀩𑀤𑀭𑀫𑁄𑀤𑀓𑀓𑀲𑀸𑀯𑁂 𑀘𑀢𑀼𑀕𑀼𑀡𑁄𑀤𑀓𑀲𑀫𑁄𑀤𑀺𑀢𑁂 𑀧𑀸𑀓𑁂𑀦 𑀘𑀢𑀼𑀢𑁆𑀣𑀪𑀸𑀕𑀸𑀯𑀲𑀺𑀝𑁆𑀞𑀁 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀢𑀁 𑀢𑀺𑀓𑀝𑀼𑀓𑀅𑀚𑀫𑁄𑀤𑀳𑀺𑀗𑁆𑀕𑀼𑀚𑀻𑀭𑀓𑀮𑀲𑀼𑀡𑀸𑀤𑀻𑀳𑀺 𑀓𑀝𑀼𑀓𑀪𑀡𑁆𑀟𑁂𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀼𑀥𑀽𑀧𑀺𑀢𑀁 𑀓𑀢𑁆𑀯𑀸 𑀮𑀸𑀫𑀜𑁆𑀚𑀕𑀦𑁆𑀥𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀪𑀕𑀯𑀢𑁄 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀤𑀸𑀲𑀺𑀁, 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀧𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑁋

‘‘𑀧𑀺𑀧𑁆𑀨𑀮𑁆𑀬𑀸 𑀮𑀲𑀼𑀡𑁂𑀦 𑀘, 𑀫𑀺𑀲𑁆𑀲𑀁 𑀮𑀸𑀫𑀜𑁆𑀚𑀓𑁂𑀦 𑀘;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑀲𑁆𑀫𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸’’𑀢𑀺.

𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀸𑀬 𑀤𑁂𑀯𑀢𑀸𑀬 𑀅𑀢𑁆𑀢𑀦𑀸 𑀲𑀫𑀼𑀧𑀘𑀺𑀢𑀲𑀼𑀘𑀭𑀺𑀢𑀓𑀫𑁆𑀫𑁂 𑀆𑀯𑀺𑀓𑀢𑁂 𑀲𑀧𑀭𑀺𑀯𑀸𑀭𑀸𑀬 𑀢𑀲𑁆𑀲𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀓𑀜𑁆𑀚𑀺𑀓𑀤𑀸𑀬𑀺𑀓𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀺𑀳𑀸𑀭𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀯𑀺𑀳𑀸𑀭𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀉𑀬𑁆𑀬𑀸𑀦𑁂 𑀯𑀺𑀘𑀭𑀡𑀢𑁆𑀣𑀁 𑀲𑀳𑀸𑀬𑀺𑀓𑀸𑀳𑀺 𑀧𑀭𑀺𑀚𑀦𑁂𑀦 𑀘 𑀉𑀲𑁆𑀲𑀸𑀳𑀺𑀢𑀸 𑀲𑀼𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀲𑀳𑀸𑀬𑀺𑀓𑀸𑀲𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀫𑀳𑀦𑁆𑀢𑁂𑀦 𑀇𑀲𑁆𑀲𑀭𑀺𑀬𑁂𑀦 𑀫𑀳𑀢𑀸 𑀧𑀭𑀺𑀘𑁆𑀙𑁂𑀤𑁂𑀦 𑀕𑁂𑀳𑀢𑁄 𑀦𑀺𑀓𑁆𑀔𑀫𑁆𑀫 𑀉𑀬𑁆𑀬𑀸𑀦𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑀻 𑀘𑀺𑀦𑁆𑀢𑁂𑀲𑀺 ‘‘𑀩𑀸𑀮𑀤𑀸𑀭𑀺𑀓𑀸𑀬 𑀯𑀺𑀬 𑀓𑀺𑀁 𑀫𑁂 𑀫𑁄𑀖𑀓𑀻𑀴𑀺𑀢𑁂𑀦, 𑀳𑀦𑁆𑀤𑀸𑀳𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀫𑀦𑁄𑀪𑀸𑀯𑀦𑀻𑀬𑁂 𑀘 𑀅𑀬𑁆𑀬𑁂 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀥𑀫𑁆𑀫𑀜𑁆𑀘 𑀲𑁄𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀢𑁆𑀯𑀸 𑀫𑀳𑀸𑀮𑀢𑀸𑀧𑀺𑀴𑀦𑁆𑀥𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀤𑀸𑀲𑀺𑀬𑀸 𑀳𑀢𑁆𑀣𑁂 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀲𑁆𑀲𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀫𑀦𑁄𑀪𑀸𑀯𑀦𑀻𑀬𑁂 𑀘 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀤𑀸𑀲𑀺𑀁 𑀆𑀳 ‘‘𑀳𑀦𑁆𑀤 𑀚𑁂 𑀆𑀪𑀭𑀡𑀁 𑀧𑀺𑀴𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀁 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀯𑀺𑀳𑀸𑀭𑁂 𑀞𑀧𑁂𑀢𑁆𑀯𑀸 𑀢𑀳𑀁 𑀢𑀳𑀁 𑀯𑀺𑀘𑀭𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀯𑀺𑀲𑁆𑀲𑀭𑀺𑀢𑁆𑀯𑀸 𑀕𑀢𑀢𑁆𑀢𑀸 ‘‘𑀯𑀺𑀲𑁆𑀲𑀭𑀺𑀢𑀁 𑀫𑀬𑀸, 𑀢𑀺𑀝𑁆𑀞 𑀅𑀬𑁆𑀬𑁂 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑀸 𑀅𑀳𑁄𑀲𑀺. 𑀯𑀺𑀲𑀸𑀔𑀸 ‘‘𑀲𑀘𑁂 𑀚𑁂 𑀯𑀺𑀳𑀸𑀭𑁂 𑀞𑀧𑁂𑀢𑁆𑀯𑀸 𑀯𑀺𑀲𑁆𑀲𑀭𑀺𑀢𑀁, 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲𑁂𑀯 𑀅𑀢𑁆𑀣𑀸𑀬 𑀢𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀯𑁂𑀤𑁂𑀦𑁆𑀢𑀻 ‘‘𑀯𑀺𑀳𑀸𑀭𑀁, 𑀪𑀦𑁆𑀢𑁂, 𑀓𑀸𑀭𑁂𑀲𑁆𑀲𑀸𑀫𑀺, 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀆𑀳. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀲𑀸 𑀢𑀁 𑀧𑀺𑀴𑀦𑁆𑀥𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀓𑁂𑀦 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀣𑀫𑁆𑀪𑀢𑀼𑀮𑀸𑀕𑁄𑀧𑀸𑀦𑀲𑀺𑀓𑀡𑁆𑀡𑀺𑀓𑀤𑁆𑀯𑀸𑀭𑀩𑀸𑀳𑀯𑀸𑀢𑀧𑀸𑀦 𑀲𑁄𑀧𑀸𑀦𑀸𑀤𑀺𑀕𑁂𑀳𑀸𑀯𑀬𑀯𑀁 𑀫𑀦𑁄𑀳𑀭𑀁 𑀲𑀼𑀯𑀺𑀓𑀧𑁆𑀧𑀺𑀢𑀓𑀝𑁆𑀞𑀓𑀫𑁆𑀫𑀭𑀫𑀡𑀻𑀬𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑀼𑀥𑀸𑀓𑀫𑁆𑀫𑀁 𑀫𑀦𑀼𑀜𑁆𑀜𑀁 𑀲𑀼𑀯𑀺𑀭𑀘𑀺𑀢𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺𑀘𑀺𑀢𑁆𑀢𑀓𑀫𑁆𑀫𑀯𑀺𑀘𑀺𑀢𑁆𑀢𑀁 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀫𑀡𑀺𑀓𑀼𑀝𑁆𑀝𑀺𑀫 𑀲𑀤𑀺𑀲𑀪𑀽𑀫𑀺𑀢𑀮𑀁 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀺, 𑀉𑀧𑀭𑀺𑀪𑀽𑀫𑀺𑀬𑀁 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀻𑀢𑀺 𑀕𑀩𑁆𑀪𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀲𑀦𑀸𑀦𑀼𑀘𑁆𑀙𑀯𑀺𑀓𑀁 𑀫𑀳𑀦𑁆𑀢𑀁 𑀧𑀸𑀲𑀸𑀤𑀁 𑀢𑀲𑁆𑀲 𑀧𑀭𑀺𑀯𑀸𑀭𑀧𑀸𑀲𑀸𑀤𑀲𑀳𑀲𑁆𑀲𑀜𑁆𑀘 𑀢𑁂𑀲𑀁 𑀧𑀭𑀺𑀯𑀸𑀭𑀪𑀸𑀯𑁂𑀦 𑀓𑀼𑀝𑀺𑀫𑀡𑁆𑀟𑀧𑀘𑀗𑁆𑀓𑀫𑀦𑀸𑀤𑀻𑀦𑀺 𑀘 𑀓𑀸𑀭𑁂𑀦𑁆𑀢𑀻 𑀦𑀯𑀳𑀺 𑀫𑀸𑀲𑁂𑀳𑀺 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀧𑀭𑀺𑀦𑀺𑀝𑁆𑀞𑀺𑀢𑁂 𑀘 𑀯𑀺𑀳𑀸𑀭𑁂 𑀦𑀯𑀳𑁂𑀯 𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀯𑀺𑀳𑀸𑀭𑀫𑀳𑀁 𑀓𑀸𑀭𑁂𑀦𑁆𑀢𑀻 𑀧𑀜𑁆𑀘𑀫𑀢𑁆𑀢𑁂𑀳𑀺 𑀲𑀳𑀸𑀬𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀳𑀸𑀬𑀺𑀓𑀸 𑀆𑀳 ‘‘𑀇𑀫𑀁 𑀏𑀯𑀭𑀽𑀧𑀁 𑀧𑀸𑀲𑀸𑀤𑀁 𑀓𑀸𑀭𑁂𑀦𑁆𑀢𑀺𑀬𑀸 𑀬𑀁 𑀫𑀬𑀸 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀢𑀁 𑀅𑀦𑀼𑀫𑁄𑀤𑀣, 𑀧𑀢𑁆𑀢𑀺𑀤𑀸𑀦𑀁 𑀯𑁄 𑀤𑀫𑁆𑀫𑀻’’𑀢𑀺. ‘‘𑀅𑀳𑁄 𑀲𑀸𑀥𑀼 𑀅𑀳𑁄 𑀲𑀸𑀥𑀽’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀩𑁆𑀩𑀸𑀧𑀺 𑀅𑀦𑀼𑀫𑁄𑀤𑀺𑀁𑀲𑀼.

𑀢𑀢𑁆𑀣 𑀅𑀜𑁆𑀜𑀢𑀭𑀸 𑀉𑀧𑀸𑀲𑀺𑀓𑀸 𑀯𑀺𑀲𑁂𑀲𑀢𑁄 𑀢𑀁 𑀧𑀢𑁆𑀢𑀺𑀤𑀸𑀦𑀁 𑀫𑀦𑀲𑀸𑀓𑀸𑀲𑀺. 𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀦𑁂𑀓𑀓𑀽𑀝𑀸𑀕𑀸𑀭𑀧𑀸𑀓𑀸𑀭𑀉𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀺𑀆𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀲𑁄𑀴𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀩𑁆𑀩𑁂𑀥𑀁 𑀅𑀢𑁆𑀢𑀦𑁄 𑀧𑀪𑀸𑀬 𑀬𑁄𑀚𑀦𑀲𑀢𑀁 𑀨𑀭𑀦𑁆𑀢𑀁 𑀆𑀓𑀸𑀲𑀘𑀸𑀭𑀺𑀁 𑀫𑀳𑀦𑁆𑀢𑀁 𑀯𑀺𑀫𑀸𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑀸 𑀕𑀘𑁆𑀙𑀦𑁆𑀢𑀻𑀧𑀺 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀲𑀳 𑀯𑀺𑀫𑀸𑀦𑁂𑀦 𑀕𑀘𑁆𑀙𑀢𑀺. 𑀯𑀺𑀲𑀸𑀔𑀸 𑀧𑀦 𑀫𑀳𑀸𑀉𑀧𑀸𑀲𑀺𑀓𑀸 𑀯𑀺𑀧𑀼𑀮𑀧𑀭𑀺𑀘𑁆𑀘𑀸𑀕𑀢𑀸𑀬 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀦𑀺𑀫𑁆𑀫𑀸𑀦𑀭𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀦𑀺𑀫𑁆𑀫𑀺𑀢𑀤𑁂𑀯𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀯𑀺𑀲𑀸𑀔𑀸𑀬 𑀲𑀳𑀸𑀬𑀺𑀓𑀁 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 𑁋

𑁭𑁨𑁯.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁭𑁩𑁦.

‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀯𑀦𑀻𑀬𑀸 𑀫𑀦𑁄𑀭𑀫𑀸.

𑁭𑁩𑁧.

‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

𑁭𑁩𑁨.

‘‘𑀯𑀺𑀯𑀢𑁆𑀢𑀫𑀸𑀦𑀸 𑀓𑀸𑀬𑁂𑀦, 𑀬𑀸 𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁭𑁩𑁩.

‘‘𑀯𑀝𑀁𑀲𑀓𑀸 𑀯𑀸𑀢𑀥𑀼𑀢𑀸, 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁭𑁩𑁪.

‘‘𑀬𑀸𑀧𑀺 𑀢𑁂 𑀲𑀺𑀭𑀲𑁆𑀫𑀺𑀁 𑀫𑀸𑀮𑀸, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸;

𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸, 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸.

𑁭𑁩𑁫.

‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁, 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺. 𑀲𑀸𑀧𑀺 𑀢𑀲𑁆𑀲 𑀏𑀯𑀁 𑀩𑁆𑀬𑀸𑀓𑀸𑀲𑀺 𑁋

𑁭𑁩𑁬.

‘‘𑀲𑀸𑀯𑀢𑁆𑀣𑀺𑀬𑀁 𑀫𑀬𑁆𑀳𑀁 𑀲𑀔𑀻 𑀪𑀤𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀸𑀭𑁂𑀲𑀺 𑀫𑀳𑀸𑀯𑀺𑀳𑀸𑀭𑀁;

𑀢𑀢𑁆𑀣𑀧𑁆𑀧𑀲𑀦𑁆𑀦𑀸 𑀅𑀳𑀫𑀸𑀦𑀼𑀫𑁄𑀤𑀺𑀁, 𑀤𑀺𑀲𑁆𑀯𑀸 𑀅𑀕𑀸𑀭𑀜𑁆𑀘 𑀧𑀺𑀬𑀜𑁆𑀘 𑀫𑁂𑀢𑀁.

𑁭𑁩𑁭.

‘‘𑀢𑀸𑀬𑁂𑀯 𑀫𑁂 𑀲𑀼𑀤𑁆𑀥𑀦𑀼𑀫𑁄𑀤𑀦𑀸𑀬, 𑀮𑀤𑁆𑀥𑀁 𑀯𑀺𑀫𑀸𑀦𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀁;

𑀲𑀫𑀦𑁆𑀢𑀢𑁄 𑀲𑁄𑀴𑀲𑀬𑁄𑀚𑀦𑀸𑀦𑀺, 𑀯𑁂𑀳𑀸𑀬𑀲𑀁 𑀕𑀘𑁆𑀙𑀢𑀺 𑀇𑀤𑁆𑀥𑀺𑀬𑀸 𑀫𑀫.

𑁭𑁩𑁮.

‘‘𑀓𑀽𑀝𑀸𑀕𑀸𑀭𑀸 𑀦𑀺𑀯𑁂𑀲𑀸 𑀫𑁂, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑀦𑁆𑀢𑀺, 𑀲𑀫𑀦𑁆𑀢𑀸 𑀲𑀢𑀬𑁄𑀚𑀦𑀁.

𑁭𑁩𑁯.

‘‘𑀧𑁄𑀓𑁆𑀔𑀭𑀜𑁆𑀜𑁄 𑀘 𑀫𑁂 𑀏𑀢𑁆𑀣, 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸;

𑀅𑀘𑁆𑀙𑁄𑀤𑀓𑀸 𑀯𑀺𑀧𑁆𑀧𑀲𑀦𑁆𑀦𑀸, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸.

𑁭𑁪𑁦.

‘‘𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸;

𑀲𑀼𑀭𑀪𑀻 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀸 𑀫𑀸𑀮𑀼𑀢𑁂𑀭𑀺𑀢𑀸.

𑁭𑁪𑁧.

‘‘𑀚𑀫𑁆𑀩𑀼𑀬𑁄 𑀧𑀦𑀲𑀸 𑀢𑀸𑀮𑀸, 𑀦𑀸𑀴𑀺𑀓𑁂𑀭𑀯𑀦𑀸𑀦𑀺 𑀘;

𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀚𑀸𑀢𑀸, 𑀦𑀸𑀦𑀸𑀭𑀼𑀓𑁆𑀔𑀸 𑀅𑀭𑁄𑀧𑀺𑀫𑀸.

𑁭𑁪𑁨.

‘‘𑀦𑀸𑀦𑀸𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑀁, 𑀅𑀘𑁆𑀙𑀭𑀸𑀕𑀡𑀖𑁄𑀲𑀺𑀢𑀁;

𑀬𑁄𑀧𑀺 𑀫𑀁 𑀲𑀼𑀧𑀺𑀦𑁂 𑀧𑀲𑁆𑀲𑁂, 𑀲𑁄𑀧𑀺 𑀯𑀺𑀢𑁆𑀢𑁄 𑀲𑀺𑀬𑀸 𑀦𑀭𑁄.

𑁭𑁪𑁩.

‘‘𑀏𑀢𑀸𑀤𑀺𑀲𑀁 𑀅𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀁, 𑀯𑀺𑀫𑀸𑀦𑀁 𑀲𑀩𑁆𑀩𑀲𑁄 𑀧𑀪𑀁;

𑀫𑀫 𑀓𑀫𑁆𑀫𑁂 𑀳𑀺 𑀦𑀺𑀩𑁆𑀩𑀢𑁆𑀢𑀁, 𑀅𑀮𑀁 𑀧𑀼𑀜𑁆𑀜𑀸𑀦𑀺 𑀓𑀸𑀢𑀯𑁂’’𑀢𑀺.

𑁭𑁩𑁬. 𑀢𑀢𑁆𑀣 𑀲𑀸𑀯𑀢𑁆𑀣𑀺𑀬𑀁 𑀫𑀬𑁆𑀳𑀁 𑀲𑀔𑀻 𑀪𑀤𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀸𑀭𑁂𑀲𑀺 𑀫𑀳𑀸𑀯𑀺𑀳𑀸𑀭𑀦𑁆𑀢𑀺 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥, 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀧𑀸𑀘𑀻𑀦𑀧𑀲𑁆𑀲𑁂 𑀫𑀬𑁆𑀳𑀁 𑀫𑀫 𑀲𑀓𑁆𑀔𑀻 𑀲𑀳𑀸𑀬𑀺𑀓𑀸 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸 𑀆𑀕𑀢𑀸𑀕𑀢𑀁 𑀘𑀸𑀢𑀼𑀤𑁆𑀤𑀺𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀦𑀯𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀧𑀼𑀩𑁆𑀩𑀸𑀭𑀸𑀫𑀁 𑀦𑀸𑀫 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀢𑁆𑀣𑀧𑁆𑀧𑀲𑀦𑁆𑀦𑀸 𑀅𑀳𑀫𑀸𑀦𑀼𑀫𑁄𑀤𑀺𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑀢𑀧𑀭𑀺𑀬𑁄𑀲𑀺𑀢𑁂 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀺𑀬𑀫𑀸𑀦𑁂 𑀢𑀸𑀬 𑀓𑀢𑁂 𑀧𑀢𑁆𑀢𑀺𑀤𑀸𑀦𑁂 ‘‘𑀅𑀳𑁄 𑀞𑀸𑀦𑁂 𑀯𑀢 𑀧𑀭𑀺𑀘𑁆𑀘𑀸𑀕𑁄 𑀓𑀢𑁄’’𑀢𑀺 𑀧𑀲𑀦𑁆𑀦𑀸 𑀭𑀢𑀦𑀢𑁆𑀢𑀬𑁂 𑀓𑀫𑁆𑀫𑀨𑀮𑁂 𑀘 𑀲𑀜𑁆𑀚𑀸𑀢𑀧𑀲𑀸𑀤𑀸 𑀅𑀳𑀁 𑀅𑀦𑀼𑀫𑁄𑀤𑀺𑀁. 𑀯𑀢𑁆𑀣𑀼𑀯𑀲𑁂𑀦 𑀢𑀲𑁆𑀲𑀸 𑀅𑀦𑀼𑀫𑁄𑀤𑀦𑀸𑀬 𑀉𑀴𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀲𑁆𑀯𑀸 𑀅𑀕𑀸𑀭𑀜𑁆𑀘 𑀧𑀺𑀬𑀜𑁆𑀘 𑀫𑁂𑀢’’𑀦𑁆𑀢𑀺 𑀆𑀳. 𑀲𑀳𑀲𑁆𑀲𑀕𑀩𑁆𑀪𑀁 𑀅𑀢𑀺𑀯𑀺𑀬 𑀭𑀫𑀡𑀻𑀬𑀁 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀢𑀜𑁆𑀘 𑀅𑀕𑀸𑀭𑀁 𑀫𑀳𑀦𑁆𑀢𑀁 𑀧𑀸𑀲𑀸𑀤𑀁 𑀧𑀺𑀬𑀜𑁆𑀘 𑀫𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀢𑀸𑀤𑀺𑀲𑀁 𑀫𑀳𑀦𑁆𑀢𑀁 𑀥𑀦𑀧𑀭𑀺𑀘𑁆𑀘𑀸𑀕𑀁 𑀤𑀺𑀲𑁆𑀯𑀸 𑀅𑀦𑀼𑀫𑁄𑀤𑀺𑀦𑁆𑀢𑀺 𑀬𑁄𑀚𑀦𑀸.

𑁭𑁩𑁭. 𑀢𑀸𑀬𑁂𑀯 𑀫𑁂 𑀲𑀼𑀤𑁆𑀥𑀦𑀼𑀫𑁄𑀤𑀦𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀸𑀪𑀸𑀯𑁂𑀦 𑀲𑀼𑀤𑁆𑀥𑀸𑀬 𑀓𑁂𑀯𑀮𑀸𑀬 𑀅𑀦𑀼𑀫𑁄𑀤𑀦𑀸𑀬𑁂𑀯. 𑀮𑀤𑁆𑀥𑀁 𑀯𑀺𑀫𑀸𑀦𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀈𑀤𑀺𑀲𑀲𑁆𑀲 𑀅𑀪𑀽𑀢𑀧𑀼𑀩𑁆𑀩𑀢𑀸𑀬 𑀅𑀩𑁆𑀪𑀼𑀢𑀁 𑀲𑀫𑀦𑁆𑀢𑀪𑀤𑁆𑀤𑀓𑀪𑀸𑀯𑁂𑀦 𑀅𑀢𑀺𑀯𑀺𑀬 𑀲𑀼𑀭𑀽𑀧𑀢𑀸𑀬 𑀘 𑀤𑀲𑁆𑀲𑀦𑁂𑀬𑁆𑀬𑀁 𑀇𑀫𑀁 𑀯𑀺𑀫𑀸𑀦𑀁 𑀮𑀤𑁆𑀥𑀁 𑀅𑀥𑀺𑀕𑀢𑀁. 𑀏𑀯𑀁 𑀢𑀲𑁆𑀲 𑀯𑀺𑀫𑀸𑀦𑀲𑁆𑀲 𑀅𑀪𑀺𑀭𑀽𑀧𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀫𑀸𑀡𑀫𑀳𑀢𑁆𑀢𑀁 𑀧𑀪𑀸𑀯𑀫𑀳𑀢𑁆𑀢𑀁 𑀉𑀧𑀪𑁄𑀕𑀯𑀢𑁆𑀣𑀼𑀫𑀳𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀦𑁆𑀢𑀢𑁄 𑀲𑁄𑀴𑀲𑀬𑁄𑀚𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑁆𑀥𑀺𑀬𑀸 𑀫𑀫𑀸𑀢𑀺 𑀫𑀫 𑀧𑀼𑀜𑁆𑀜𑀺𑀤𑁆𑀥𑀺𑀬𑀸.

𑁭𑁩𑁯. 𑀧𑁄𑀓𑁆𑀔𑀭𑀜𑁆𑀜𑁄𑀢𑀺 𑀧𑁄𑀓𑁆𑀔𑀭𑀡𑀺𑀬𑁄. 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸𑀢𑀺 𑀤𑀺𑀩𑁆𑀩𑀫𑀘𑁆𑀙𑁂𑀳𑀺 𑀉𑀧𑀲𑁂𑀯𑀺𑀢𑀸.

𑁭𑁪𑁦. 𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸𑀢𑀺 𑀲𑀢𑀧𑀢𑁆𑀢𑀲𑀳𑀲𑁆𑀲𑀧𑀢𑁆𑀢𑀸𑀤𑀺𑀪𑁂𑀤𑁂𑀳𑀺 𑀦𑀸𑀦𑀸𑀯𑀺𑀥𑁂𑀳𑀺 𑀭𑀢𑁆𑀢𑀧𑀤𑀼𑀫𑁂𑀳𑀺 𑀭𑀢𑁆𑀢𑀓𑀫𑀮𑁂𑀳𑀺 𑀘 𑀲𑀜𑁆𑀙𑀸𑀤𑀺𑀢𑀸. 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀲𑁂𑀢𑀓𑀫𑀮𑁂𑀳𑀺 𑀲𑀫𑀦𑁆𑀢𑀢𑁄 𑀅𑀯𑀢𑀢𑀸, 𑀦𑀸𑀦𑀸𑀭𑀼𑀓𑁆𑀔𑀸 𑀅𑀭𑁄𑀧𑀺𑀫𑀸 𑀲𑀼𑀭𑀪𑀻 𑀲𑀫𑁆𑀧𑀯𑀸𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁭𑁪𑁨. 𑀲𑁄𑀧𑀻𑀢𑀺 𑀲𑁄 𑀲𑀼𑀧𑀺𑀦𑀤𑀲𑁆𑀲𑀸𑀯𑀻𑀧𑀺. 𑀯𑀺𑀢𑁆𑀢𑁄𑀢𑀺 𑀢𑀼𑀝𑁆𑀞𑁄.

𑁭𑁪𑁩. 𑀲𑀩𑁆𑀩𑀲𑁄 𑀧𑀪𑀦𑁆𑀢𑀺 𑀲𑀫𑀦𑁆𑀢𑀢𑁄 𑀑𑀪𑀸𑀲𑀫𑀸𑀦𑀁. 𑀓𑀫𑁆𑀫𑁂 𑀳𑀻𑀢𑀺 𑀓𑀫𑁆𑀫𑀦𑀺𑀫𑀺𑀢𑁆𑀢𑀁. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑁂𑀢𑀦𑀸𑀦𑀁 𑀯𑀸 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀩𑀳𑀼𑀪𑀸𑀯𑀢𑁄 ‘‘𑀓𑀫𑁆𑀫𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁. 𑀓𑀸𑀢𑀯𑁂𑀢𑀺 𑀓𑀸𑀢𑀼𑀁.

𑀇𑀤𑀸𑀦𑀺 𑀣𑁂𑀭𑁄 𑀯𑀺𑀲𑀸𑀔𑀸𑀬 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑀼𑀓𑀸𑀫𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁪𑁪.

‘‘𑀢𑀸𑀬𑁂𑀯 𑀢𑁂 𑀲𑀼𑀤𑁆𑀥𑀦𑀼𑀫𑁄𑀤𑀦𑀸𑀬,

𑀮𑀤𑁆𑀥𑀁 𑀯𑀺𑀫𑀸𑀦𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀁;

𑀬𑀸 𑀘𑁂𑀯 𑀲𑀸 𑀤𑀸𑀦𑀫𑀤𑀸𑀲𑀺 𑀦𑀸𑀭𑀻,

𑀢𑀲𑁆𑀲𑀸 𑀕𑀢𑀺𑀁 𑀩𑁆𑀭𑀽𑀳𑀺 𑀓𑀼𑀳𑀺𑀁 𑀉𑀧𑁆𑀧𑀦𑁆𑀦𑀸 𑀲𑀸’’𑀢𑀺.

𑁭𑁪𑁪. 𑀢𑀢𑁆𑀣 𑀬𑀸 𑀘𑁂𑀯 𑀲𑀸 𑀤𑀸𑀦𑀫𑀤𑀸𑀲𑀺 𑀦𑀸𑀭𑀻𑀢𑀺 𑀬𑀲𑁆𑀲 𑀤𑀸𑀦𑀲𑁆𑀲 𑀅𑀦𑀼𑀫𑁄𑀤𑀦𑀸𑀬 𑀢𑁆𑀯𑀁 𑀈𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺, 𑀢𑀁 𑀤𑀸𑀦𑀁 𑀬𑀸 𑀘𑁂𑀯 𑀲𑀸 𑀦𑀸𑀭𑀻 𑀅𑀤𑀸𑀲𑀻𑀢𑀺 𑀯𑀺𑀲𑀸𑀔𑀁 𑀫𑀳𑀸𑀉𑀧𑀸𑀲𑀺𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀸𑀬 𑀏𑀯 𑀤𑁂𑀯𑀢𑀸𑀬 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀁 𑀓𑀣𑀸𑀧𑁂𑀢𑀼𑀓𑀸𑀫𑁄 𑀆𑀳 ‘‘𑀢𑀲𑁆𑀲𑀸 𑀕𑀢𑀺𑀁 𑀩𑁆𑀭𑀽𑀳𑀺 𑀓𑀼𑀳𑀺𑀁 𑀉𑀧𑁆𑀧𑀦𑁆𑀦𑀸 𑀲𑀸’’𑀢𑀺. 𑀢𑀲𑁆𑀲𑀸 𑀕𑀢𑀺𑀦𑁆𑀢𑀺 𑀢𑀸𑀬 𑀦𑀺𑀩𑁆𑀩𑀢𑁆𑀢𑀤𑁂𑀯𑀕𑀢𑀺𑀁.

𑀇𑀤𑀸𑀦𑀺 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

𑁭𑁪𑁫.

‘‘𑀬𑀸 𑀲𑀸 𑀅𑀳𑀼 𑀫𑀬𑁆𑀳𑀁 𑀲𑀔𑀻 𑀪𑀤𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀸𑀭𑁂𑀲𑀺 𑀫𑀳𑀸𑀯𑀺𑀳𑀸𑀭𑀁;

𑀯𑀺𑀜𑁆𑀜𑀸𑀢𑀥𑀫𑁆𑀫𑀸 𑀲𑀸 𑀅𑀤𑀸𑀲𑀺 𑀤𑀸𑀦𑀁, 𑀉𑀧𑁆𑀧𑀦𑁆𑀦𑀸 𑀦𑀺𑀫𑁆𑀫𑀸𑀦𑀭𑀢𑀻𑀲𑀼 𑀤𑁂𑀯𑁂𑀲𑀼.

𑁭𑁪𑁬.

‘‘𑀧𑀚𑀸𑀧𑀢𑀻 𑀢𑀲𑁆𑀲 𑀲𑀼𑀦𑀺𑀫𑁆𑀫𑀺𑀢𑀲𑁆𑀲,

𑀅𑀘𑀺𑀦𑁆𑀢𑀺𑀬𑁄 𑀓𑀫𑁆𑀫𑀯𑀺𑀧𑀸𑀓 𑀢𑀲𑁆𑀲𑀸;

𑀬𑀫𑁂𑀢𑀁 𑀧𑀼𑀘𑁆𑀙𑀲𑀺 ‘𑀓𑀼𑀳𑀺𑀁 𑀉𑀧𑁆𑀧𑀦𑁆𑀦𑀸 𑀲𑀸’𑀢𑀺,

𑀢𑀁 𑀢𑁂 𑀯𑀺𑀬𑀸𑀓𑀸𑀲𑀺𑀁 𑀅𑀦𑀜𑁆𑀜𑀣𑀸 𑀅𑀳’’𑀦𑁆𑀢𑀺.

𑁭𑁪𑁫. 𑀢𑀢𑁆𑀣 𑀯𑀺𑀜𑁆𑀜𑀸𑀢𑀥𑀫𑁆𑀫𑀸𑀢𑀺 𑀯𑀺𑀜𑁆𑀜𑀸𑀢𑀲𑀸𑀲𑀦𑀥𑀫𑁆𑀫𑀸, 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀢𑀺 𑀅𑀢𑁆𑀣𑁄.

𑁭𑁪𑁬. 𑀲𑀼𑀦𑀺𑀫𑁆𑀫𑀺𑀢𑀲𑁆𑀲𑀸𑀢𑀺 𑀲𑀼𑀦𑀺𑀫𑁆𑀫𑀺𑀢𑀲𑁆𑀲 𑀤𑁂𑀯𑀭𑀸𑀚𑀲𑁆𑀲. 𑀅𑀘𑀺𑀦𑁆𑀢𑀺𑀬𑁄 𑀓𑀫𑁆𑀫𑀯𑀺𑀧𑀸𑀓 𑀢𑀲𑁆𑀲𑀸𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲𑀸 𑀫𑀫 𑀲𑀔𑀺𑀬𑀸 𑀦𑀺𑀩𑁆𑀩𑀸𑀦𑀭𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀸𑀬 𑀓𑀫𑁆𑀫𑀯𑀺𑀧𑀸𑀓𑁄 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀽𑀢𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀅𑀘𑀺𑀦𑁆𑀢𑀺𑀬𑀸 𑀅𑀧𑁆𑀧𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀜𑁆𑀜𑀣𑀸𑀢𑀺 𑀅𑀯𑀺𑀧𑀭𑀻𑀢𑀁 𑀬𑀣𑀸𑀲𑀪𑀸𑀯𑀢𑁄. 𑀓𑀣𑀁 𑀧𑀦𑀸𑀬𑀁 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀁 𑀅𑀜𑁆𑀜𑀸𑀲𑀻𑀢𑀺? 𑀲𑀼𑀪𑀤𑁆𑀤𑀸 𑀯𑀺𑀬 𑀪𑀤𑁆𑀤𑀸𑀬, 𑀯𑀺𑀲𑀸𑀔𑀸𑀧𑀺 𑀤𑁂𑀯𑀥𑀻𑀢𑀸 𑀇𑀫𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀇𑀤𑀸𑀦𑀺 𑀤𑁂𑀯𑀥𑀻𑀢𑀸 𑀣𑁂𑀭𑀁 𑀅𑀜𑁆𑀜𑁂𑀲𑀫𑁆𑀧𑀺 𑀤𑀸𑀦𑀲𑀫𑀸𑀤𑀧𑀦𑁂 𑀦𑀺𑀬𑁄𑀚𑁂𑀦𑁆𑀢𑀻 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋

𑁭𑁪𑁭.

‘‘𑀢𑁂𑀦𑀳𑀜𑁆𑀜𑁂𑀧𑀺 𑀲𑀫𑀸𑀤𑀧𑁂𑀣, 𑀲𑀗𑁆𑀖𑀲𑁆𑀲 𑀤𑀸𑀦𑀸𑀦𑀺 𑀤𑀤𑀸𑀣 𑀯𑀺𑀢𑁆𑀢𑀸;

𑀥𑀫𑁆𑀫𑀜𑁆𑀘 𑀲𑀼𑀡𑀸𑀣 𑀧𑀲𑀦𑁆𑀦𑀫𑀸𑀦𑀲𑀸, 𑀲𑀼𑀤𑀼𑀮𑁆𑀮𑀪𑁄 𑀮𑀤𑁆𑀥𑁄 𑀫𑀦𑀼𑀲𑁆𑀲𑀮𑀸𑀪𑁄.

𑁭𑁪𑁮.

‘‘𑀬𑀁 𑀫𑀕𑁆𑀕𑀁 𑀫𑀕𑁆𑀕𑀸𑀥𑀺𑀧𑀢𑀻 𑀅𑀤𑁂𑀲𑀬𑀺, 𑀩𑁆𑀭𑀳𑁆𑀫𑀲𑁆𑀲𑀭𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄;

𑀲𑀗𑁆𑀖𑀲𑁆𑀲 𑀤𑀸𑀦𑀸𑀦𑀺 𑀤𑀤𑀸𑀣 𑀯𑀺𑀢𑁆𑀢𑀸, 𑀫𑀳𑀧𑁆𑀨𑀮𑀸 𑀬𑀢𑁆𑀣 𑀪𑀯𑀦𑁆𑀢𑀺 𑀤𑀓𑁆𑀔𑀺𑀡𑀸.

𑁭𑁪𑁯.

‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞 𑀲𑀢𑀁 𑀧𑀲𑀢𑁆𑀣𑀸, 𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺;

𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀲𑀼𑀕𑀢𑀲𑁆𑀲 𑀲𑀸𑀯𑀓𑀸, 𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺.

𑁭𑁫𑁦.

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

𑁭𑁫𑁧.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁭𑁫𑁨.

‘‘𑀏𑀲𑁄 𑀳𑀺 𑀲𑀗𑁆𑀖𑁄 𑀯𑀺𑀧𑀼𑀮𑁄 𑀫𑀳𑀕𑁆𑀕𑀢𑁄, 𑀏𑀲𑀧𑁆𑀧𑀫𑁂𑀬𑁆𑀬𑁄 𑀉𑀤𑀥𑀻𑀯 𑀲𑀸𑀕𑀭𑁄;

𑀏𑀢𑁂 𑀳𑀺 𑀲𑁂𑀝𑁆𑀞𑀸 𑀦𑀭𑀯𑀻𑀭𑀲𑀸𑀯𑀓𑀸, 𑀧𑀪𑀗𑁆𑀓𑀭𑀸 𑀥𑀫𑁆𑀫𑀫𑀼𑀤𑀻𑀭𑀬𑀦𑁆𑀢𑀺.

𑁭𑁫𑁩.

‘‘𑀢𑁂𑀲𑀁 𑀲𑀼𑀤𑀺𑀦𑁆𑀦𑀁 𑀲𑀼𑀳𑀼𑀢𑀁 𑀲𑀼𑀬𑀺𑀝𑁆𑀞𑀁, 𑀬𑁂 𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲 𑀤𑀤𑀦𑁆𑀢𑀺 𑀤𑀸𑀦𑀁;

𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀧𑀢𑀺𑀝𑁆𑀞𑀺𑀢𑀸, 𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 𑀯𑀡𑁆𑀡𑀺𑀢𑀸.

𑁭𑁫𑁪.

‘‘𑀏𑀢𑀸𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸, 𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺.

𑁭𑁪𑁭. 𑀢𑀢𑁆𑀣 𑀢𑁂𑀦𑀳𑀜𑁆𑀜𑁂𑀧𑀻𑀢𑀺 𑀢𑁂𑀦𑀳𑀺 𑀅𑀜𑁆𑀜𑁂𑀧𑀺. 𑀢𑁂𑀦𑀸𑀢𑀺 𑀘 𑀢𑁂𑀦 𑀓𑀸𑀭𑀡𑁂𑀦, 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀲𑀫𑀸𑀤𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑀫𑀸𑀤𑀧𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀲𑁆𑀲 𑀤𑀸𑀦𑀸𑀦𑀺 𑀤𑀤𑀸𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀳𑀺 𑀅𑀓𑁆𑀔𑀡𑁂𑀳𑀺 𑀯𑀚𑁆𑀚𑀺𑀢𑀁 𑀫𑀦𑀼𑀲𑁆𑀲𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀼𑀤𑀼𑀮𑁆𑀮𑀪𑁄 𑀮𑀤𑁆𑀥𑁄 𑀫𑀦𑀼𑀲𑁆𑀲𑀮𑀸𑀪𑁄’’𑀢𑀺. 𑀢𑀢𑁆𑀣 𑀅𑀝𑁆𑀞 𑀅𑀓𑁆𑀔𑀡𑀸 𑀦𑀸𑀫 𑀢𑀬𑁄 𑀅𑀧𑀸𑀬𑀸 𑀅𑀭𑀽𑀧𑀸 𑀅𑀲𑀜𑁆𑀜𑀲𑀢𑁆𑀢𑀸 𑀧𑀘𑁆𑀘𑀦𑁆𑀢𑀤𑁂𑀲𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑁂𑀓𑀮𑁆𑀮𑀁 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀢𑀸 𑀅𑀧𑀸𑀢𑀼𑀪𑀸𑀯𑁄 𑀩𑀼𑀤𑁆𑀥𑀲𑁆𑀲𑀸𑀢𑀺.

𑁭𑁪𑁮. 𑀬𑀁 𑀫𑀕𑁆𑀕𑀦𑁆𑀢𑀺 𑀬𑀁 𑀔𑁂𑀢𑁆𑀢𑀯𑀺𑀲𑁂𑀲𑁂 𑀓𑀢𑀁 𑀤𑀸𑀦𑀁, 𑀢𑀁 𑀏𑀓𑀦𑁆𑀢𑁂𑀦 𑀲𑀼𑀕𑀢𑀺𑀲𑀫𑁆𑀧𑀸𑀧𑀦𑀢𑁄 𑀲𑀼𑀕𑀢𑀺𑀕𑀸𑀫𑀺𑀫𑀕𑁆𑀕𑀁 𑀅𑀧𑀸𑀬𑀫𑀕𑁆𑀕𑀢𑁄 𑀚𑀕𑁆𑀖𑀫𑀕𑁆𑀕𑀸𑀤𑀺𑀢𑁄 𑀘 𑀅𑀢𑀺𑀯𑀺𑀬 𑀲𑁂𑀝𑁆𑀞𑀪𑀸𑀯𑁂𑀦 𑀫𑀕𑁆𑀕𑀸𑀥𑀺𑀧𑀦𑁆𑀢𑀺 𑀓𑀢𑁆𑀯𑀸. 𑀤𑀸𑀦𑀫𑁆𑀧𑀺 𑀳𑀺 𑀲𑀤𑁆𑀥𑀸𑀳𑀺𑀭𑀺𑀬𑁄 𑀯𑀺𑀬 ‘‘𑀤𑁂𑀯𑀮𑁄𑀓𑀕𑀸𑀫𑀺𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀲𑀤𑁆𑀥𑀸 𑀳𑀺𑀭𑀺𑀬𑀁 𑀓𑀼𑀲𑀮𑀜𑁆𑀘 𑀤𑀸𑀦𑀁, 𑀥𑀫𑁆𑀫𑀸 𑀏𑀢𑁂 𑀲𑀧𑁆𑀧𑀼𑀭𑀺𑀲𑀸𑀦𑀼𑀬𑀸𑀢𑀸;

𑀏𑀢𑀜𑁆𑀳𑀺 𑀫𑀕𑁆𑀕𑀁 𑀤𑀺𑀯𑀺𑀬𑀁 𑀯𑀤𑀦𑁆𑀢𑀺, 𑀏𑀢𑁂𑀦 𑀳𑀺 𑀕𑀘𑁆𑀙𑀢𑀺 𑀤𑁂𑀯𑀮𑁄𑀓’’𑀦𑁆𑀢𑀺.(𑀅. 𑀦𑀺. 𑁮.𑁩𑁨; 𑀓𑀣𑀸. 𑁪𑁮𑁦);

‘‘𑀫𑀕𑁆𑀕𑀸𑀥𑀺𑀧𑀢𑀻’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀥𑀺𑀧𑀢𑀺𑀪𑀽𑀢𑁄 𑀲𑀢𑁆𑀣𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀖𑀲𑁆𑀲 𑀤𑀸𑀦𑀸𑀦𑀺 𑀤𑀤𑀸𑀣𑀸𑀢𑀺𑀆𑀤𑀺𑀦𑀸 𑀧𑀼𑀦𑀧𑀺 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀤𑀸𑀦𑀲𑀁𑀯𑀺𑀪𑀸𑀕𑁂 𑀦𑀺𑀬𑁄𑀚𑁂𑀦𑁆𑀢𑀻 𑀆𑀳.

𑁭𑁪𑁯. 𑀇𑀤𑀸𑀦𑀺 𑀢𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀅𑀭𑀺𑀬𑀲𑀗𑁆𑀖𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑀻 ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞 𑀲𑀢𑀁 𑀧𑀲𑀢𑁆𑀣𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑁂𑀢𑀺 𑀅𑀦𑀺𑀬𑀫𑀺𑀢𑀦𑀺𑀤𑁆𑀤𑁂𑀲𑁄. 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀸. 𑀅𑀝𑁆𑀞𑀸𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂 𑀳𑀺 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸𑀢𑀺 𑀅𑀝𑁆𑀞 𑀳𑁄𑀦𑁆𑀢𑀺. 𑀲𑀢𑀁 𑀧𑀲𑀢𑁆𑀣𑀸𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀲𑁆𑀲𑀢𑁆𑀣𑀸. 𑀓𑀲𑁆𑀫𑀸? 𑀲𑀳𑀚𑀸𑀢𑀲𑀻𑀮𑀸𑀤𑀺𑀕𑀼𑀡𑀬𑁄𑀕𑀢𑁄. 𑀢𑁂𑀲𑀜𑁆𑀳𑀺 𑀘𑀫𑁆𑀧𑀓𑀩𑀓𑀼𑀮𑀓𑀼𑀲𑀼𑀫𑀸𑀤𑀻𑀦𑀁 𑀯𑀺𑀬 𑀲𑀳𑀚𑀸𑀢𑀯𑀡𑁆𑀡𑀕𑀦𑁆𑀥𑀸𑀤𑀬𑁄 𑀲𑀳𑀚𑀸𑀢𑀲𑀻𑀮𑀲𑀫𑀸𑀥𑀺𑀆𑀤𑀬𑁄 𑀕𑀼𑀡𑀸, 𑀢𑁂𑀦 𑀢𑁂 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀸𑀦𑀺 𑀯𑀺𑀬 𑀧𑀼𑀧𑁆𑀨𑀸𑀦𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀢𑀁 𑀧𑀺𑀬𑀸 𑀫𑀦𑀸𑀧𑀸 𑀧𑀸𑀲𑀁𑀲𑀺𑀬𑀸 𑀘 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞 𑀲𑀢𑀁 𑀧𑀲𑀢𑁆𑀣𑀸’’𑀢𑀺. 𑀢𑁂 𑀧𑀦 𑀲𑀗𑁆𑀔𑁂𑀧𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀁, 𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀦𑁆𑀢𑀺 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺 𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸’’𑀢𑀺. 𑀢𑁂𑀢𑀺 𑀧𑀼𑀩𑁆𑀩𑁂 𑀅𑀦𑀺𑀬𑀫𑀢𑁄 𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑀦𑀁. 𑀢𑁂 𑀳𑀺 𑀲𑀩𑁆𑀩𑁂𑀧𑀺 𑀓𑀫𑁆𑀫𑀁 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀤𑁂𑀬𑁆𑀬𑀥𑀫𑁆𑀫𑀲𑀗𑁆𑀔𑀸𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀲𑀸𑀥𑀦𑀢𑁄. 𑀲𑀼𑀕𑀢𑀲𑁆𑀲 𑀲𑀸𑀯𑀓𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀢𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸. 𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀻𑀢𑀺 𑀏𑀢𑁂𑀲𑀼 𑀲𑀼𑀕𑀢𑀲𑁆𑀲 𑀲𑀸𑀯𑀓𑁂𑀲𑀼 𑀅𑀧𑁆𑀧𑀓𑀸𑀦𑀺𑀧𑀺 𑀤𑀸𑀦𑀸𑀦𑀺 𑀤𑀺𑀦𑁆𑀦𑀸𑀦𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑀸 𑀫𑀳𑀧𑁆𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸, 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦).

𑁭𑁫𑁦. 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀇𑀥 𑀧𑀦 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀅𑀢𑁆𑀢𑀦𑀸 𑀤𑁂𑀯𑀢𑀸𑀬 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀯𑀺𑀳𑀸𑀭𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀢𑀼𑀭𑀺𑀢𑁆𑀣𑀺𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀘𑀢𑀼𑀭𑀺𑀢𑁆𑀣𑀺𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀢𑁄. 𑀲𑁄 𑀢𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂𑀲𑀼 𑀘𑀢𑀽𑀲𑀼 𑀯𑀺𑀫𑀸𑀦𑁂𑀲𑀼 𑀘𑀢𑀲𑁆𑀲𑁄 𑀤𑁂𑀯𑀥𑀻𑀢𑀭𑁄 𑀧𑀘𑁆𑀘𑁂𑀓𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺𑀬𑁄 𑀤𑀺𑀲𑁆𑀯𑀸 𑀢𑀸𑀳𑀺 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

𑁭𑁫𑁫. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂…𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺. 𑀢𑀸𑀧𑀺 𑀢𑀲𑁆𑀲 𑀧𑀼𑀘𑁆𑀙𑀸𑀦𑀦𑁆𑀢𑀭𑀁 𑀧𑀝𑀺𑀧𑀸𑀝𑀺𑀬𑀸 𑀩𑁆𑀬𑀸𑀓𑀭𑀺𑀁𑀲𑀼. 𑀢𑀁 𑀤𑀲𑁆𑀲𑁂𑀢𑀼𑀁 𑁋

𑁭𑁫𑁮. ‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂…𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

𑀢𑀸 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀲𑀺𑀓𑀸𑀦𑀸𑀫𑀓𑁂 𑀭𑀝𑁆𑀞𑁂 𑀧𑀡𑁆𑀡𑀓𑀢𑁂 𑀦𑀸𑀫 𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀯𑀬𑀧𑁆𑀧𑀢𑁆𑀢𑀸 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀧𑀢𑀺𑀓𑀼𑀮𑀁 𑀕𑀢𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑀺. 𑀢𑀸𑀲𑀼 𑀏𑀓𑀸 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀇𑀦𑁆𑀤𑀻𑀯𑀭𑀓𑀮𑀸𑀧𑀁 𑀅𑀤𑀸𑀲𑀺, 𑀅𑀧𑀭𑀸 𑀅𑀜𑁆𑀜𑀲𑁆𑀲 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀁 𑀅𑀤𑀸𑀲𑀺, 𑀅𑀧𑀭𑀸 𑀧𑀤𑀼𑀫𑀳𑀢𑁆𑀣𑀓𑀁 𑀅𑀤𑀸𑀲𑀺, 𑀅𑀧𑀭𑀸 𑀲𑀼𑀫𑀦𑀫𑀓𑀼𑀴𑀸𑀦𑀺 𑀅𑀤𑀸𑀲𑀺. 𑀢𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀢𑀸𑀲𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀁 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀢𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀧𑀭𑀸𑀧𑀭𑀁 𑀢𑀢𑁆𑀣𑁂𑀯 𑀲𑀁𑀲𑀭𑀦𑁆𑀢𑀺𑀬𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀦𑀬𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸. 𑀢𑀸𑀲𑀼 𑀏𑀓𑀸 𑀅𑀢𑁆𑀢𑀦𑀸 𑀓𑀢𑀁 𑀧𑀼𑀩𑁆𑀩𑀓𑀫𑁆𑀫𑀁 𑀣𑁂𑀭𑀲𑁆𑀲 𑀓𑀣𑁂𑀦𑁆𑀢𑀻 𑁋

𑁭𑁫𑁯.

‘‘𑀇𑀦𑁆𑀤𑀻𑀯𑀭𑀸𑀦𑀁 𑀳𑀢𑁆𑀣𑀓𑀁 𑀅𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲;

𑀏𑀲𑀺𑀓𑀸𑀦𑀁 𑀉𑀡𑁆𑀡𑀢𑀲𑁆𑀫𑀺𑀁, 𑀦𑀕𑀭𑀯𑀭𑁂 𑀧𑀡𑁆𑀡𑀓𑀢𑁂 𑀭𑀫𑁆𑀫𑁂.

𑁭𑁬𑁦.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀆𑀳. 𑀅𑀧𑀭𑀸 𑁋

𑁭𑁬𑁬.

‘‘𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀁 𑀅𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲;

𑀏𑀲𑀺𑀓𑀸𑀦𑀁 𑀉𑀡𑁆𑀡𑀢𑀲𑁆𑀫𑀺𑀁, 𑀦𑀕𑀭𑀯𑀭𑁂 𑀧𑀡𑁆𑀡𑀓𑀢𑁂 𑀭𑀫𑁆𑀫𑁂.

𑁭𑁬𑁭. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀆𑀳. 𑀅𑀧𑀭𑀸 𑁋

𑁭𑁭𑁩.

‘‘𑀑𑀤𑀸𑀢𑀫𑀽𑀮𑀓𑀁 𑀳𑀭𑀺𑀢𑀧𑀢𑁆𑀢𑀁, 𑀉𑀤𑀓𑀲𑁆𑀫𑀺𑀁 𑀲𑀭𑁂 𑀚𑀸𑀢𑀁 𑀅𑀳𑀫𑀤𑀸𑀲𑀺𑀁;

𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲, 𑀏𑀲𑀺𑀓𑀸𑀦𑀁 𑀉𑀡𑁆𑀡𑀢𑀲𑁆𑀫𑀺𑀁;

𑀦𑀕𑀭𑀯𑀭𑁂 𑀧𑀡𑁆𑀡𑀓𑀢𑁂 𑀭𑀫𑁆𑀫𑁂.

𑁭𑁭𑁪. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀆𑀳. 𑀅𑀧𑀭𑀸 𑁋

𑁭𑁮𑁦.

‘‘𑀅𑀳𑀁 𑀲𑀼𑀫𑀦𑀸 𑀲𑀼𑀫𑀦𑀲𑁆𑀲 𑀲𑀼𑀫𑀦𑀫𑀓𑀼𑀴𑀸𑀦𑀺, 𑀤𑀦𑁆𑀢𑀯𑀡𑁆𑀡𑀸𑀦𑀺 𑀅𑀳𑀫𑀤𑀸𑀲𑀺𑀁;

𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲, 𑀏𑀲𑀺𑀓𑀸𑀦𑀁 𑀉𑀡𑁆𑀡𑀢𑀲𑁆𑀫𑀺𑀁;

𑀦𑀕𑀭𑀯𑀭𑁂 𑀧𑀡𑁆𑀡𑀓𑀢𑁂 𑀭𑀫𑁆𑀫𑁂.

𑁭𑁮𑁧. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀆𑀳.

𑁭𑁫𑁯. 𑀢𑀢𑁆𑀣 𑀇𑀦𑁆𑀤𑀻𑀯𑀭𑀸𑀦𑀁 𑀳𑀢𑁆𑀣𑀓𑀦𑁆𑀢𑀺 𑀉𑀤𑁆𑀤𑀸𑀮𑀓𑀧𑀼𑀧𑁆𑀨𑀳𑀢𑁆𑀣𑀁 𑀯𑀸𑀢𑀖𑀸𑀢𑀓𑀧𑀼𑀧𑁆𑀨𑀓𑀮𑀸𑀧𑀁. 𑀏𑀲𑀺𑀓𑀸𑀦𑀦𑁆𑀢𑀺 𑀏𑀲𑀺𑀓𑀸𑀭𑀝𑁆𑀞𑀲𑁆𑀲. 𑀉𑀡𑁆𑀡𑀢𑀲𑁆𑀫𑀺𑀁 𑀦𑀕𑀭𑀯𑀭𑁂𑀢𑀺 𑀉𑀡𑁆𑀡𑀢𑁂 𑀪𑀽𑀫𑀺𑀧𑀤𑁂𑀲𑁂 𑀦𑀺𑀯𑀺𑀝𑁆𑀞𑁂 𑀫𑁂𑀖𑁄𑀤𑀭𑀁 𑀮𑀺𑀳𑀦𑁆𑀢𑁂𑀳𑀺 𑀯𑀺𑀬 𑀅𑀘𑁆𑀘𑀼𑀕𑁆𑀕𑀢𑁂𑀳𑀺 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀳𑀺 𑀉𑀡𑁆𑀡𑀢𑁂 𑀉𑀢𑁆𑀢𑀫𑀦𑀕𑀭𑁂. 𑀧𑀡𑁆𑀡𑀓𑀢𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂.

𑁭𑁬𑁬. 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀦𑁆𑀢𑀺 𑀓𑀼𑀯𑀮𑀬𑀓𑀮𑀸𑀧𑀁.

𑁭𑁭𑁩. 𑀑𑀤𑀸𑀢𑀫𑀽𑀮𑀓𑀦𑁆𑀢𑀺 𑀲𑁂𑀢𑀫𑀽𑀮𑀁, 𑀪𑀺𑀲𑀫𑀽𑀮𑀸𑀦𑀁 𑀥𑀯𑀮𑀢𑀸𑀬 𑀯𑀼𑀢𑁆𑀢𑀁, 𑀧𑀤𑀼𑀫𑀓𑀮𑀸𑀧𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀳𑀭𑀺𑀢𑀧𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀳𑀭𑀺𑀢𑀧𑀢𑁆𑀢𑀦𑁆𑀢𑀺 𑀦𑀻𑀮𑀧𑀢𑁆𑀢𑀁. 𑀅𑀯𑀺𑀚𑀳𑀺𑀢𑀫𑀓𑀼𑀴𑀧𑀢𑁆𑀢𑀲𑁆𑀲 𑀳𑀺 𑀧𑀤𑀼𑀫𑀲𑁆𑀲 𑀩𑀸𑀳𑀺𑀭𑀧𑀢𑁆𑀢𑀸𑀦𑀺 𑀳𑀭𑀺𑀢𑀯𑀡𑁆𑀡𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀉𑀤𑀓𑀲𑁆𑀫𑀺𑀁 𑀲𑀭𑁂 𑀚𑀸𑀢𑀦𑁆𑀢𑀺 𑀲𑀭𑁂 𑀉𑀤𑀓𑀫𑁆𑀳𑀺 𑀚𑀸𑀢𑀁, 𑀲𑀭𑁄𑀭𑀼𑀳𑀦𑁆𑀢𑀺 𑀅𑀢𑁆𑀣𑁄.

𑁭𑁮𑁦. 𑀲𑀼𑀫𑀦𑀸𑀢𑀺 𑀏𑀯𑀁𑀦𑀸𑀫𑀸. 𑀲𑀼𑀫𑀦𑀲𑁆𑀲𑀸𑀢𑀺 𑀲𑀼𑀦𑁆𑀤𑀭𑀘𑀺𑀢𑁆𑀢𑀲𑁆𑀲. 𑀲𑀼𑀫𑀦𑀫𑀓𑀼𑀴𑀸𑀦𑀻𑀢𑀺 𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨𑀫𑀓𑀼𑀴𑀸𑀦𑀺. 𑀤𑀦𑁆𑀢𑀯𑀡𑁆𑀡𑀸𑀦𑀻𑀢𑀺 𑀲𑀚𑁆𑀚𑀼𑀓𑀁 𑀉𑀮𑁆𑀮𑀺𑀔𑀺𑀢𑀳𑀢𑁆𑀣𑀺𑀤𑀦𑁆𑀢𑀲𑀤𑀺𑀲𑀯𑀡𑁆𑀡𑀸𑀦𑀺.

𑀏𑀯𑀁 𑀢𑀸𑀳𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑁂 𑀓𑀣𑀺𑀢𑁂 𑀣𑁂𑀭𑁄 𑀢𑀸𑀲𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀸 𑀲𑀩𑁆𑀩𑀸𑀧𑀺 𑀲𑀳𑀧𑀭𑀺𑀯𑀸𑀭𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀣𑁂𑀭𑁄 𑀢𑀁 𑀧𑀯𑀢𑁆𑀢𑀺𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀥𑀫𑁆𑀫𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀘𑀢𑀼𑀭𑀺𑀢𑁆𑀣𑀺𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀫𑁆𑀩𑀯𑀺𑀫𑀸𑀦𑀯𑀡𑁆𑀡𑀦𑀸

𑀤𑀺𑀩𑁆𑀩𑀁 𑀢𑁂 𑀅𑀫𑁆𑀩𑀯𑀦𑀁 𑀭𑀫𑁆𑀫𑀦𑁆𑀢𑀺 𑀅𑀫𑁆𑀩𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀸 𑀉𑀧𑀸𑀲𑀺𑀓𑀸 𑀆𑀯𑀸𑀲𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀁 𑀫𑀳𑀸𑀦𑀺𑀲𑀁𑀲𑀢𑀜𑁆𑀘 𑀲𑀼𑀢𑁆𑀯𑀸 𑀙𑀦𑁆𑀤𑀚𑀸𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀯𑀸𑀲𑀁 𑀓𑀸𑀭𑁂𑀢𑀼𑀓𑀸𑀫𑀸, 𑀇𑀘𑁆𑀙𑀸𑀫𑀺 𑀢𑀸𑀤𑀺𑀲𑀁 𑀑𑀓𑀸𑀲𑀁, 𑀆𑀘𑀺𑀓𑁆𑀔𑀢𑀽’’𑀢𑀺. 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺, 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀑𑀓𑀸𑀲𑀁 𑀤𑀲𑁆𑀲𑁂𑀲𑀼𑀁. 𑀲𑀸 𑀢𑀢𑁆𑀣 𑀭𑀫𑀡𑀻𑀬𑀁 𑀆𑀯𑀸𑀲𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀲𑀫𑀦𑁆𑀢𑀢𑁄 𑀅𑀫𑁆𑀩𑀭𑀼𑀓𑁆𑀔𑁂 𑀭𑁄𑀧𑁂𑀲𑀺. 𑀲𑁄 𑀆𑀯𑀸𑀲𑁄 𑀲𑀫𑀦𑁆𑀢𑀢𑁄 𑀅𑀫𑁆𑀩𑀧𑀦𑁆𑀢𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁄 𑀫𑀼𑀢𑁆𑀢𑀸𑀚𑀸𑀮𑀲𑀤𑀺𑀲𑀯𑀸𑀮𑀼𑀓𑀸𑀓𑀺𑀡𑁆𑀡𑀧𑀡𑁆𑀟𑀭𑀪𑀽𑀫𑀺𑀪𑀸𑀕𑁄 𑀅𑀢𑀺𑀯𑀺𑀬 𑀫𑀦𑁄𑀳𑀭𑁄 𑀅𑀳𑁄𑀲𑀺. 𑀲𑀸 𑀢𑀁 𑀯𑀺𑀳𑀸𑀭𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀢𑁆𑀣𑁂𑀳𑀺 𑀧𑀼𑀧𑁆𑀨𑀤𑀸𑀫𑀕𑀦𑁆𑀥𑀤𑀸𑀫𑀸𑀤𑀻𑀳𑀺 𑀘 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑁂𑀮𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑁂 𑀘 𑀅𑀳𑀢𑁂𑀳𑀺 𑀯𑀢𑁆𑀣𑁂𑀳𑀺 𑀯𑁂𑀞𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺.

𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀸 𑀫𑀳𑀦𑁆𑀢𑀁 𑀯𑀺𑀫𑀸𑀦𑀁 𑀧𑀸𑀢𑀼𑀭𑀳𑁄𑀲𑀺 𑀅𑀫𑁆𑀩𑀯𑀦𑀧𑀭𑀺𑀓𑁆𑀔𑀺𑀢𑁆𑀢𑀁. 𑀲𑀸 𑀢𑀢𑁆𑀣 𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀸𑀭𑀺𑀢𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺. 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀉𑀧𑀕𑀦𑁆𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁭𑁮𑁩.

‘‘𑀤𑀺𑀩𑁆𑀩𑀁 𑀢𑁂 𑀅𑀫𑁆𑀩𑀯𑀦𑀁 𑀭𑀫𑁆𑀫𑀁, 𑀧𑀸𑀲𑀸𑀤𑁂𑀢𑁆𑀣 𑀫𑀳𑀮𑁆𑀮𑀓𑁄;

𑀦𑀸𑀦𑀸𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑁄, 𑀅𑀘𑁆𑀙𑀭𑀸𑀕𑀡𑀖𑁄𑀲𑀺𑀢𑁄.

𑁭𑁮𑁪.

‘‘𑀧𑀤𑀻𑀧𑁄 𑀘𑁂𑀢𑁆𑀣 𑀚𑀮𑀢𑀺, 𑀦𑀺𑀘𑁆𑀘𑀁 𑀲𑁄𑀯𑀡𑁆𑀡𑀬𑁄 𑀫𑀳𑀸;

𑀤𑀼𑀲𑁆𑀲𑀨𑀮𑁂𑀳𑀺 𑀭𑀼𑀓𑁆𑀔𑁂𑀳𑀺, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑁄.

𑁭𑁮𑁫. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁭𑁮𑁭. ‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸…𑀧𑁂… 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁭𑁮𑁮.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀫𑀦𑀼𑀲𑁆𑀲𑀮𑁄𑀓𑁂;

𑀯𑀺𑀳𑀸𑀭𑀁 𑀲𑀗𑁆𑀖𑀲𑁆𑀲 𑀓𑀸𑀭𑁂𑀲𑀺𑀁, 𑀅𑀫𑁆𑀩𑁂𑀳𑀺 𑀧𑀭𑀺𑀯𑀸𑀭𑀺𑀢𑀁.

𑁭𑁮𑁯.

‘‘𑀧𑀭𑀺𑀬𑁄𑀲𑀺𑀢𑁂 𑀯𑀺𑀳𑀸𑀭𑁂, 𑀓𑀸𑀭𑁂𑀦𑁆𑀢𑁂 𑀦𑀺𑀝𑁆𑀞𑀺𑀢𑁂 𑀫𑀳𑁂;

𑀅𑀫𑁆𑀩𑁂𑀳𑀺 𑀙𑀸𑀤𑀬𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀲𑁆𑀲𑀫𑀬𑁂 𑀨𑀮𑁂.

𑁭𑁯𑁦.

‘‘𑀧𑀤𑀻𑀧𑀁 𑀢𑀢𑁆𑀣 𑀚𑀸𑀮𑁂𑀢𑁆𑀯𑀸, 𑀪𑁄𑀚𑀬𑀺𑀢𑁆𑀯𑀸 𑀕𑀡𑀼𑀢𑁆𑀢𑀫𑀁;

𑀦𑀺𑀬𑁆𑀬𑀸𑀤𑁂𑀲𑀺𑀁 𑀢𑀁 𑀲𑀗𑁆𑀖𑀲𑁆𑀲, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁭𑁯𑁧.

‘‘𑀢𑁂𑀦 𑀫𑁂 𑀅𑀫𑁆𑀩𑀯𑀦𑀁 𑀭𑀫𑁆𑀫𑀁, 𑀧𑀸𑀲𑀸𑀤𑁂𑀢𑁆𑀣 𑀫𑀳𑀮𑁆𑀮𑀓𑁄;

𑀦𑀸𑀦𑀸𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑁄, 𑀅𑀘𑁆𑀙𑀭𑀸𑀕𑀡𑀖𑁄𑀲𑀺𑀢𑁄.

𑁭𑁯𑁨.

‘‘𑀧𑀤𑀻𑀧𑁄 𑀘𑁂𑀢𑁆𑀣 𑀚𑀮𑀢𑀺, 𑀦𑀺𑀘𑁆𑀘𑀁 𑀲𑁄𑀯𑀡𑁆𑀡𑀬𑁄 𑀫𑀳𑀸;

𑀤𑀼𑀲𑁆𑀲𑀨𑀮𑁂𑀳𑀺 𑀭𑀼𑀓𑁆𑀔𑁂𑀳𑀺, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑁄.

𑁭𑁯𑁩.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀲𑀸 𑀤𑁂𑀯𑀢𑀸 𑀩𑁆𑀬𑀸𑀓𑀸𑀲𑀺.

𑁭𑁮𑁩. 𑀢𑀢𑁆𑀣 𑀫𑀳𑀮𑁆𑀮𑀓𑁄𑀢𑀺 𑀫𑀳𑀦𑁆𑀢𑁄 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀳𑀺 𑀉𑀩𑁆𑀩𑁂𑀥𑁂𑀦 𑀘 𑀯𑀺𑀧𑀼𑀮𑁄, 𑀉𑀴𑀸𑀭𑀢𑀫𑁄𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀭𑀸𑀕𑀡𑀖𑁄𑀲𑀺𑀢𑁄𑀢𑀺 𑀢𑀁 𑀧𑀫𑁄𑀤𑀺𑀢𑀼𑀁 𑀲𑀗𑁆𑀕𑀻𑀢𑀺𑀯𑀲𑁂𑀦 𑀘𑁂𑀯 𑀧𑀺𑀬𑀲𑀮𑁆𑀮𑀸𑀧𑀯𑀲𑁂𑀦 𑀘 𑀅𑀘𑁆𑀙𑀭𑀸𑀲𑀗𑁆𑀖𑁂𑀦 𑀲𑀫𑀼𑀕𑁆𑀖𑁄𑀲𑀺𑀢𑁄.

𑁭𑁮𑁪. 𑀧𑀤𑀻𑀧𑁄 𑀘𑁂𑀢𑁆𑀣 𑀚𑀮𑀢𑀻𑀢𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑀼𑀚𑁆𑀚𑀮𑀓𑀺𑀭𑀡𑀯𑀺𑀢𑀸𑀦𑁄 𑀭𑀢𑀦𑀧𑁆𑀧𑀤𑀻𑀧𑁄 𑀘 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀅𑀪𑀺𑀚𑀮𑀢𑀺. 𑀤𑀼𑀲𑁆𑀲𑀨𑀮𑁂𑀳𑀻𑀢𑀺 𑀤𑀼𑀲𑁆𑀲𑀸𑀦𑀺 𑀨𑀮𑀸𑀦𑀺 𑀏𑀢𑁂𑀲𑀦𑁆𑀢𑀺 𑀤𑀼𑀲𑁆𑀲𑀨𑀮𑀸. 𑀢𑁂𑀳𑀺 𑀲𑀫𑀼𑀕𑁆𑀕𑀺𑀭𑀺𑀬𑀫𑀸𑀦𑀤𑀺𑀩𑁆𑀩𑀯𑀢𑁆𑀣𑁂𑀳𑀻𑀢𑀺 𑀅𑀢𑁆𑀣𑁄.

𑁭𑁮𑁯. 𑀓𑀸𑀭𑁂𑀦𑁆𑀢𑁂 𑀦𑀺𑀝𑁆𑀞𑀺𑀢𑁂 𑀫𑀳𑁂𑀢𑀺 𑀓𑀢𑀧𑀭𑀺𑀬𑁄𑀲𑀺𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀫𑀳𑁂 𑀧𑀽𑀚𑀸𑀬 𑀓𑀭𑀻𑀬𑀫𑀸𑀦𑀸𑀬 𑀘. 𑀓𑀢𑁆𑀯𑀸 𑀤𑀼𑀲𑁆𑀲𑀫𑀬𑁂 𑀨𑀮𑁂𑀢𑀺 𑀤𑀼𑀲𑁆𑀲𑁂𑀬𑁂𑀯 𑀢𑁂𑀲𑀁 𑀅𑀫𑁆𑀩𑀸𑀦𑀁 𑀨𑀮𑀁 𑀓𑀢𑁆𑀯𑀸.

𑁭𑁯𑁦. 𑀕𑀡𑀼𑀢𑁆𑀢𑀫𑀦𑁆𑀢𑀺 𑀕𑀡𑀸𑀦𑀁 𑀉𑀢𑁆𑀢𑀫𑀁 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑀁. 𑀦𑀺𑀬𑁆𑀬𑀸𑀤𑁂𑀲𑀺𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺𑀁, 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀫𑁆𑀩𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀻𑀢𑀯𑀺𑀫𑀸𑀦𑀯𑀡𑁆𑀡𑀦𑀸

𑀧𑀻𑀢𑀯𑀢𑁆𑀣𑁂 𑀧𑀻𑀢𑀥𑀚𑁂𑀢𑀺 𑀧𑀻𑀢𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀣𑀽𑀧𑁂 𑀘 𑀫𑀳𑁂 𑀘 𑀓𑀢𑁂 𑀭𑀸𑀚𑀕𑀳𑀯𑀸𑀲𑀺𑀦𑀻 𑀅𑀜𑁆𑀜𑀢𑀭𑀸 𑀉𑀧𑀸𑀲𑀺𑀓𑀸 𑀧𑀸𑀢𑁄𑀯 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀸 ‘‘𑀲𑀢𑁆𑀣𑀼 𑀣𑀽𑀧𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀬𑀣𑀸𑀮𑀤𑁆𑀥𑀸𑀦𑀺 𑀘𑀢𑁆𑀢𑀸𑀭𑀺 𑀓𑁄𑀲𑀸𑀢𑀓𑀻𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀲𑀤𑁆𑀥𑀸𑀯𑁂𑀕𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑀸 𑀫𑀕𑁆𑀕𑀧𑀭𑀺𑀲𑁆𑀲𑀬𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀣𑀽𑀧𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. 𑀅𑀣 𑀦𑀁 𑀢𑀭𑀼𑀡𑀯𑀘𑁆𑀙𑀸 𑀕𑀸𑀯𑀻 𑀅𑀪𑀺𑀥𑀸𑀯𑀦𑁆𑀢𑀻 𑀯𑁂𑀕𑁂𑀦 𑀆𑀧𑀢𑀺𑀢𑁆𑀯𑀸 𑀲𑀺𑀗𑁆𑀕𑁂𑀦 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀲𑀸 𑀢𑀸𑀯𑀤𑁂𑀯 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀉𑀬𑁆𑀬𑀸𑀦𑀓𑀻𑀴𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸𑀦𑀁 𑀅𑀟𑁆𑀠𑀢𑀺𑀬𑀸𑀦𑀁 𑀦𑀸𑀝𑀓𑀓𑁄𑀝𑀻𑀦𑀁 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀲𑀭𑀻𑀭𑀧𑀪𑀸𑀬 𑀢𑀸 𑀲𑀩𑁆𑀩𑀸 𑀅𑀪𑀺𑀪𑀯𑀦𑁆𑀢𑀻 𑀲𑀳 𑀭𑀣𑁂𑀦 𑀧𑀸𑀢𑀼𑀭𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀫𑁆𑀳𑀺𑀢𑀘𑀺𑀢𑁆𑀢𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁄 ‘‘𑀓𑀻𑀤𑀺𑀲𑁂𑀦 𑀦𑀼 𑀔𑁄 𑀑𑀴𑀸𑀭𑀺𑀓𑁂𑀦 𑀓𑀫𑁆𑀫𑀼𑀦𑀸 𑀅𑀬𑀁 𑀏𑀤𑀺𑀲𑀺𑀁 𑀲𑀼𑀫𑀳𑀢𑀺𑀁 𑀤𑁂𑀯𑀺𑀤𑁆𑀥𑀺𑀫𑀼𑀧𑀸𑀕𑀢𑀸’’𑀢𑀺 𑀢𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺 𑁋

𑁭𑁯𑁫.

‘‘𑀧𑀻𑀢𑀯𑀢𑁆𑀣𑁂 𑀧𑀻𑀢𑀥𑀚𑁂, 𑀧𑀻𑀢𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀧𑀻𑀢𑀘𑀦𑁆𑀤𑀦𑀮𑀺𑀢𑁆𑀢𑀗𑁆𑀕𑁂, 𑀧𑀻𑀢𑀉𑀧𑁆𑀧𑀮𑀫𑀸𑀮𑀺𑀦𑀻.

𑁭𑁯𑁬.

‘‘𑀧𑀻𑀢𑀧𑀸𑀲𑀸𑀤𑀲𑀬𑀦𑁂, 𑀧𑀻𑀢𑀸𑀲𑀦𑁂 𑀧𑀻𑀢𑀪𑀸𑀚𑀦𑁂;

𑀧𑀻𑀢𑀙𑀢𑁆𑀢𑁂 𑀧𑀻𑀢𑀭𑀣𑁂, 𑀧𑀻𑀢𑀲𑁆𑀲𑁂 𑀧𑀻𑀢𑀩𑀻𑀚𑀦𑁂.

𑁭𑁯𑁭.

‘‘𑀓𑀺𑀁 𑀓𑀫𑁆𑀫𑀫𑀓𑀭𑀻 𑀪𑀤𑁆𑀤𑁂, 𑀧𑀼𑀩𑁆𑀩𑁂 𑀫𑀸𑀦𑀼𑀲𑀓𑁂 𑀪𑀯𑁂;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑀲𑀸𑀧𑀺𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁭𑁯𑁮.

‘‘𑀓𑁄𑀲𑀸𑀢𑀓𑀻 𑀦𑀸𑀫 𑀮𑀢𑀢𑁆𑀣𑀺 𑀪𑀦𑁆𑀢𑁂, 𑀢𑀺𑀢𑁆𑀢𑀺𑀓𑀸 𑀅𑀦𑀪𑀺𑀘𑁆𑀙𑀺𑀢𑀸;

𑀢𑀲𑁆𑀲𑀸 𑀘𑀢𑁆𑀢𑀸𑀭𑀺 𑀧𑀼𑀧𑁆𑀨𑀸𑀦𑀺, 𑀣𑀽𑀧𑀁 𑀅𑀪𑀺𑀳𑀭𑀺𑀁 𑀅𑀳𑀁.

𑁭𑁯𑁯.

‘‘𑀲𑀢𑁆𑀣𑀼 𑀲𑀭𑀻𑀭𑀫𑀼𑀤𑁆𑀤𑀺𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀦𑀸𑀲𑁆𑀲 𑀫𑀕𑁆𑀕𑀁 𑀅𑀯𑁂𑀓𑁆𑀔𑀺𑀲𑁆𑀲𑀁, 𑀦 𑀢𑀕𑁆𑀕𑀫𑀦𑀲𑀸 𑀲𑀢𑀻.

𑁮𑁦𑁦.

‘‘𑀢𑀢𑁄 𑀫𑀁 𑀅𑀯𑀥𑀻 𑀕𑀸𑀯𑀻, 𑀣𑀽𑀧𑀁 𑀅𑀧𑀢𑁆𑀢𑀫𑀸𑀦𑀲𑀁;

𑀢𑀜𑁆𑀘𑀸𑀳𑀁 𑀅𑀪𑀺𑀲𑀜𑁆𑀘𑁂𑀬𑁆𑀬𑀁, 𑀪𑀺𑀬𑁆𑀬𑁄 𑀦𑀽𑀦 𑀇𑀢𑁄 𑀲𑀺𑀬𑀸.

𑁮𑁦𑁧.

‘‘𑀢𑁂𑀦 𑀓𑀫𑁆𑀫𑁂𑀦 𑀤𑁂𑀯𑀺𑀦𑁆𑀤, 𑀫𑀖𑀯𑀸 𑀤𑁂𑀯𑀓𑀼𑀜𑁆𑀚𑀭;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀯 𑀲𑀳𑀩𑁆𑀬𑀫𑀸𑀕𑀢𑀸’’𑀢𑀺.

𑁭𑁯𑁫-𑁬. 𑀢𑀢𑁆𑀣 𑀧𑀻𑀢𑀘𑀦𑁆𑀤𑀦𑀮𑀺𑀢𑁆𑀢𑀗𑁆𑀕𑁂𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀘𑀦𑁆𑀤𑀦𑁂𑀦 𑀅𑀦𑀼𑀮𑀺𑀢𑁆𑀢𑀲𑀭𑀻𑀭𑁂. 𑀧𑀻𑀢𑀧𑀸𑀲𑀸𑀤𑀲𑀬𑀦𑁂𑀢𑀺 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑁂𑀦 𑀧𑀸𑀲𑀸𑀤𑁂𑀦 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀺𑀢𑁆𑀢𑁂𑀳𑀺 𑀲𑀬𑀦𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁂. 𑀏𑀯𑀁 𑀲𑀩𑁆𑀩𑀢𑁆𑀣 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀧𑀻𑀢𑀲𑀤𑁆𑀤𑁂𑀦 𑀲𑀼𑀯𑀡𑁆𑀡𑀫𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁭𑁯𑁮. 𑀮𑀢𑀢𑁆𑀣𑀻𑀢𑀺 𑀮𑀢𑀸 𑀅𑀢𑁆𑀣𑀺. 𑀪𑀦𑁆𑀢𑁂𑀢𑀺 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀕𑀸𑀭𑀯𑁂𑀦 𑀆𑀮𑀧𑀢𑀺. 𑀅𑀦𑀪𑀺𑀘𑁆𑀙𑀺𑀢𑀸𑀢𑀺 𑀦 𑀅𑀪𑀺𑀓𑀗𑁆𑀔𑀺𑀢𑀸.

𑁭𑁯𑁯. 𑀲𑀭𑀻𑀭𑀦𑁆𑀢𑀺 𑀲𑀭𑀻𑀭𑀪𑀽𑀢𑀁 𑀥𑀸𑀢𑀼𑀁. 𑀅𑀯𑀬𑀯𑁂 𑀘𑀸𑀬𑀁 𑀲𑀫𑀼𑀤𑀸𑀬𑀯𑁄𑀳𑀸𑀭𑁄 𑀬𑀣𑀸 ‘‘𑀧𑀝𑁄 𑀟𑀟𑁆𑀠𑁄, 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺 𑀘. 𑀅𑀲𑁆𑀲𑀸𑀢𑀺 𑀕𑁄𑀭𑀽𑀧𑀲𑁆𑀲. 𑀫𑀕𑁆𑀕𑀦𑁆𑀢𑀺 𑀆𑀕𑀫𑀦𑀫𑀕𑁆𑀕𑀁. 𑀦 𑀅𑀯𑁂𑀓𑁆𑀔𑀺𑀲𑁆𑀲𑀦𑁆𑀢𑀺 𑀦 𑀑𑀮𑁄𑀓𑀬𑀺𑀁. 𑀓𑀲𑁆𑀫𑀸? 𑀦 𑀢𑀕𑁆𑀕𑀫𑀦𑀲𑀸 𑀲𑀢𑀻𑀢𑀺, 𑀢𑀲𑁆𑀲𑀁 𑀕𑀸𑀯𑀺𑀬𑀁 𑀕𑀢𑀫𑀦𑀸 𑀞𑀧𑀺𑀢𑀫𑀦𑀸 𑀦 𑀳𑁄𑀦𑁆𑀢𑀻, 𑀅𑀜𑁆𑀜𑀤𑀢𑁆𑀣𑀼 𑀪𑀕𑀯𑀢𑁄 𑀣𑀽𑀧𑀕𑀢𑀫𑀦𑀸 𑀏𑀯 𑀲𑀫𑀸𑀦𑀸𑀢𑀺 𑀅𑀢𑁆𑀣𑁄. ‘‘𑀢𑀤𑀗𑁆𑀕𑀫𑀦𑀲𑀸 𑀲𑀢𑀻’’𑀢𑀺 𑀘 𑀧𑀸𑀞𑁄, 𑀢𑀤𑀗𑁆𑀕𑁂 𑀢𑀲𑁆𑀲 𑀪𑀕𑀯𑀢𑁄 𑀥𑀸𑀢𑀼𑀬𑀸 𑀅𑀗𑁆𑀕𑁂 𑀫𑀦𑁄 𑀏𑀢𑀺𑀲𑁆𑀲𑀸𑀢𑀺 𑀢𑀤𑀗𑁆𑀕𑀫𑀦𑀲𑀸. 𑀏𑀯𑀁𑀪𑀽𑀢𑀸 𑀅𑀳𑀁 𑀢𑀤𑀸 𑀢𑀲𑁆𑀲𑀸 𑀫𑀕𑁆𑀕𑀁 𑀦𑀸𑀯𑁂𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁮𑁦𑁦. 𑀣𑀽𑀧𑀁 𑀅𑀧𑀢𑁆𑀢𑀫𑀸𑀦𑀲𑀦𑁆𑀢𑀺 𑀣𑀽𑀧𑀁 𑀘𑁂𑀢𑀺𑀬𑀁 𑀅𑀲𑀫𑁆𑀧𑀢𑁆𑀢𑀅𑀚𑁆𑀛𑀸𑀲𑀬𑀁, 𑀫𑀦𑀲𑀺 𑀪𑀯𑁄𑀢𑀺 𑀳𑀺 𑀫𑀸𑀦𑀲𑁄, 𑀅𑀚𑁆𑀛𑀸𑀲𑀬𑁄 𑀫𑀦𑁄𑀭𑀣𑁄. ‘‘𑀣𑀽𑀧𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀫𑀦𑁄𑀭𑀣𑀲𑁆𑀲 𑀅𑀲𑀫𑁆𑀧𑀼𑀡𑁆𑀡𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀣𑀽𑀧𑀁 𑀘𑁂𑀢𑀺𑀬𑀁 𑀧𑀦 𑀧𑀼𑀧𑁆𑀨𑁂𑀳𑀺 𑀧𑀽𑀚𑀦𑀘𑀺𑀢𑁆𑀢𑀁 𑀲𑀺𑀤𑁆𑀥𑀫𑁂𑀯, 𑀬𑁂𑀦 𑀲𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦. 𑀢𑀜𑁆𑀘𑀸𑀳𑀁 𑀅𑀪𑀺𑀲𑀜𑁆𑀘𑁂𑀬𑁆𑀬𑀦𑁆𑀢𑀺 𑀢𑀜𑁆𑀘𑁂 𑀅𑀳𑀁 𑀅𑀪𑀺𑀲𑀜𑁆𑀘𑀺𑀦𑁂𑀬𑁆𑀬𑀁, 𑀧𑀼𑀧𑁆𑀨𑀧𑀽𑀚𑀦𑁂𑀦 𑀳𑀺 𑀧𑀼𑀜𑁆𑀜𑀁 𑀅𑀳𑀁 𑀣𑀽𑀧𑀁 𑀅𑀪𑀺𑀕𑀦𑁆𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀧𑀽𑀚𑀦𑁂𑀦 𑀲𑀫𑁆𑀫𑀤𑁂𑀯 𑀘𑀺𑀦𑁂𑀬𑁆𑀬𑀁 𑀉𑀧𑀘𑀺𑀦𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀬𑁆𑀬𑁄 𑀦𑀽𑀦 𑀇𑀢𑁄 𑀲𑀺𑀬𑀸𑀢𑀺 𑀇𑀢𑁄 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀢𑁄𑀧𑀺 𑀪𑀺𑀬𑁆𑀬𑁄 𑀉𑀧𑀭𑀺 𑀉𑀢𑁆𑀢𑀭𑀺𑀢𑀭𑀸 𑀲𑀫𑁆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀫𑀜𑁆𑀜𑁂𑀢𑀺 𑀅𑀢𑁆𑀣𑁄.

𑁮𑁦𑁧. 𑀫𑀖𑀯𑀸 𑀤𑁂𑀯𑀓𑀼𑀜𑁆𑀚𑀭𑀸𑀢𑀺 𑀆𑀮𑀧𑀦𑀁. 𑀢𑀢𑁆𑀣 𑀤𑁂𑀯𑀓𑀼𑀜𑁆𑀚𑀭𑀸𑀢𑀺 𑀲𑀩𑁆𑀩𑀩𑀮𑀧𑀭𑀓𑁆𑀓𑀫𑀸𑀤𑀺𑀯𑀺𑀲𑁂𑀲𑁂𑀳𑀺 𑀤𑁂𑀯𑁂𑀲𑀼 𑀓𑀼𑀜𑁆𑀚𑀭𑀲𑀤𑀺𑀲𑁄. 𑀲𑀳𑀩𑁆𑀬𑀦𑁆𑀢𑀺 𑀲𑀳𑀪𑀸𑀯𑀁.

𑁮𑁦𑁨.

‘‘𑀇𑀤𑀁 𑀲𑀼𑀢𑁆𑀯𑀸 𑀢𑀺𑀤𑀲𑀸𑀥𑀺𑀧𑀢𑀺, 𑀫𑀖𑀯𑀸 𑀤𑁂𑀯𑀓𑀼𑀜𑁆𑀚𑀭𑁄;

𑀢𑀸𑀯𑀢𑀺𑀁𑀲𑁂 𑀧𑀲𑀸𑀤𑁂𑀦𑁆𑀢𑁄, 𑀫𑀸𑀢𑀮𑀺𑀁 𑀏𑀢𑀤𑀩𑁆𑀭𑀯𑀻’’𑀢𑀺. 𑁋

𑀇𑀤𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑀯𑀘𑀦𑀁. 𑀢𑀢𑁄 𑀲𑀓𑁆𑀓𑁄 𑀫𑀸𑀢𑀮𑀺𑀧𑀫𑀼𑀔𑀲𑁆𑀲 𑀤𑁂𑀯𑀕𑀡𑀲𑁆𑀲 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋

𑁮𑁦𑁩.

‘‘𑀧𑀲𑁆𑀲 𑀫𑀸𑀢𑀮𑀺 𑀅𑀘𑁆𑀙𑁂𑀭𑀁, 𑀘𑀺𑀢𑁆𑀢𑀁 𑀓𑀫𑁆𑀫𑀨𑀮𑀁 𑀇𑀤𑀁;

𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀤𑁂𑀬𑁆𑀬𑀁, 𑀧𑀼𑀜𑁆𑀜𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁮𑁦𑁪.

‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸;

𑀢𑀣𑀸𑀕𑀢𑁂 𑀯𑀸 𑀲𑀫𑁆𑀩𑀼𑀤𑁆𑀥𑁂, 𑀅𑀣 𑀯𑀸 𑀢𑀲𑁆𑀲 𑀲𑀸𑀯𑀓𑁂.

𑁮𑁦𑁫.

‘‘𑀏𑀳𑀺 𑀫𑀸𑀢𑀮𑀺 𑀅𑀫𑁆𑀳𑁂𑀧𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀫𑀳𑁂𑀫𑀲𑁂;

𑀢𑀣𑀸𑀕𑀢𑀲𑁆𑀲 𑀥𑀸𑀢𑀼𑀬𑁄, 𑀲𑀼𑀔𑁄 𑀧𑀼𑀜𑁆𑀜𑀸𑀦𑀫𑀼𑀘𑁆𑀘𑀬𑁄.

𑁮𑁦𑁬.

‘‘𑀢𑀺𑀝𑁆𑀞𑀦𑁆𑀢𑁂 𑀦𑀺𑀩𑁆𑀩𑀼𑀢𑁂 𑀘𑀸𑀧𑀺, 𑀲𑀫𑁂 𑀘𑀺𑀢𑁆𑀢𑁂 𑀲𑀫𑀁 𑀨𑀮𑀁;

𑀘𑁂𑀢𑁄𑀧𑀡𑀺𑀥𑀺𑀳𑁂𑀢𑀼𑀳𑀺, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁.

𑁮𑁦𑁭.

‘‘𑀩𑀳𑀽𑀦𑀁 𑀯𑀢 𑀅𑀢𑁆𑀣𑀸𑀬, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀸;

𑀬𑀢𑁆𑀣 𑀓𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺 𑀤𑀸𑀬𑀓𑀸’’𑀢𑀺.

𑁮𑁦𑁨. 𑀢𑀢𑁆𑀣 𑀧𑀲𑀸𑀤𑁂𑀦𑁆𑀢𑁄𑀢𑀺 𑀧𑀲𑀦𑁆𑀦𑁂 𑀓𑀭𑁄𑀦𑁆𑀢𑁄, 𑀭𑀢𑀦𑀢𑁆𑀢𑀬𑁂 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁮𑁦𑁩. 𑀘𑀺𑀢𑁆𑀢𑀦𑁆𑀢𑀺 𑀯𑀺𑀘𑀺𑀢𑁆𑀢𑀁 𑀅𑀘𑀺𑀦𑁆𑀢𑁂𑀬𑁆𑀬𑀁. 𑀓𑀫𑁆𑀫𑀨𑀮𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀼𑀴𑀸𑀭𑀢𑁆𑀢𑁂𑀧𑀺 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀉𑀴𑀸𑀭𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀨𑀮𑀁 𑀧𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀤𑁂𑀬𑁆𑀬𑀁, 𑀧𑀼𑀜𑁆𑀜𑀁 𑀳𑁄𑀢𑀺 𑀫𑀳𑀧𑁆𑀨𑀮𑀦𑁆𑀢𑀺 𑀏𑀢𑁆𑀣 𑀓𑀢𑀦𑁆𑀢𑀺 𑀓𑀸𑀭𑀯𑀲𑁂𑀦 𑀲𑀓𑁆𑀓𑀸𑀭𑀯𑀲𑁂𑀦 𑀆𑀬𑀢𑀦𑁂 𑀯𑀺𑀦𑀺𑀬𑀼𑀢𑁆𑀢𑀁. 𑀤𑁂𑀬𑁆𑀬𑀦𑁆𑀢𑀺 𑀤𑀸𑀢𑀩𑁆𑀩𑀯𑀢𑁆𑀣𑀼𑀁. 𑀧𑀼𑀜𑁆𑀜𑀦𑁆𑀢𑀺 𑀢𑀣𑀸𑀧𑀯𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑀁.

𑁮𑁦𑁪. 𑀇𑀤𑀸𑀦𑀺 𑀬𑀢𑁆𑀣 𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀧𑀼𑀜𑁆𑀜𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀻’’𑀢𑀺 𑀕𑀸𑀣𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁮𑁦𑁫-𑁬. 𑀅𑀫𑁆𑀳𑁂𑀧𑀻𑀢𑀺 𑀫𑀬𑀫𑁆𑀧𑀺. 𑀫𑀳𑁂𑀫𑀲𑁂𑀢𑀺 𑀫𑀳𑀸𑀫𑀲𑁂 𑀧𑀽𑀚𑀸𑀫𑀲𑁂. 𑀘𑁂𑀢𑁄𑀧𑀡𑀺𑀥𑀺𑀳𑁂𑀢𑀼 𑀳𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀞𑀧𑀦𑀦𑀺𑀫𑀺𑀢𑁆𑀢𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀢𑀁 𑀫𑀸𑀢𑀸𑀧𑀺𑀢𑀸 𑀓𑀬𑀺𑀭𑀸, 𑀅𑀜𑁆𑀜𑁂 𑀯𑀸𑀧𑀺 𑀘 𑀜𑀸𑀢𑀓𑀸;

𑀲𑀫𑁆𑀫𑀸 𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺. (𑀥. 𑀧. 𑁪𑁩);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀉𑀬𑁆𑀬𑀸𑀦𑀓𑀻𑀴𑀸𑀬 𑀉𑀲𑁆𑀲𑀸𑀳𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑀸 𑀅𑀪𑀺𑀡𑁆𑀳𑀁 𑀧𑀽𑀚𑀦𑁂𑀬𑁆𑀬𑀝𑁆𑀞𑀸𑀦𑀪𑀽𑀢𑁂 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑁂 𑀲𑀢𑁆𑀢𑀸𑀳𑀁 𑀧𑀽𑀚𑀁 𑀅𑀓𑀸𑀲𑀺. 𑀅𑀣 𑀅𑀧𑀭𑁂𑀦 𑀲𑀫𑀬𑁂𑀦 𑀤𑁂𑀯𑀘𑀸𑀭𑀺𑀓𑀁 𑀕𑀢𑀲𑁆𑀲 𑀆𑀬𑀲𑁆𑀫𑀢𑁄 𑀦𑀸𑀭𑀤𑀢𑁆𑀣𑁂𑀭𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀕𑀸𑀣𑀸𑀳𑁂𑀯 𑀓𑀣𑁂𑀲𑀺, 𑀣𑁂𑀭𑁄 𑀥𑀫𑁆𑀫𑀲𑀗𑁆𑀕𑀸𑀳𑀓𑀸𑀦𑀁 𑀆𑀭𑁄𑀘𑁂𑀲𑀺, 𑀢𑁂 𑀢𑀣𑀸 𑀦𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀼𑀦𑁆𑀢𑀺.

𑀧𑀻𑀢𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀘𑁆𑀙𑀼𑀯𑀺𑀫𑀸𑀦𑀯𑀡𑁆𑀡𑀦𑀸

𑀑𑀪𑀸𑀲𑀬𑀺𑀢𑁆𑀯𑀸 𑀧𑀣𑀯𑀺𑀁 𑀲𑀤𑁂𑀯𑀓𑀦𑁆𑀢𑀺 𑀉𑀘𑁆𑀙𑀼𑀯𑀺𑀫𑀸𑀦𑀁. 𑀢𑀁 𑀳𑁂𑀝𑁆𑀞𑀸 𑀉𑀘𑁆𑀙𑀼𑀯𑀺𑀫𑀸𑀦𑁂𑀦 𑀧𑀸𑀴𑀺𑀢𑁄 𑀘 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀘 𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀢𑀢𑁆𑀣 𑀲𑀲𑁆𑀲𑀼 𑀲𑀼𑀡𑀺𑀲𑀁 𑀧𑀻𑀞𑀓𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑀺, 𑀇𑀥 𑀧𑀦 𑀮𑁂𑀟𑁆𑀟𑀼𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀯𑀢𑁆𑀣𑀼𑀦𑁄 𑀧𑀦 𑀪𑀺𑀦𑁆𑀦𑀢𑁆𑀢𑀸 𑀉𑀪𑀬𑀫𑁆𑀧𑀺 𑀯𑀺𑀲𑀼𑀁𑀬𑁂𑀯 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁦𑁮.

‘‘𑀑𑀪𑀸𑀲𑀬𑀺𑀢𑁆𑀯𑀸 𑀧𑀣𑀯𑀺𑀁 𑀲𑀤𑁂𑀯𑀓𑀁, 𑀅𑀢𑀺𑀭𑁄𑀘𑀲𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬;

𑀲𑀺𑀭𑀺𑀬𑀸 𑀘 𑀯𑀡𑁆𑀡𑁂𑀦 𑀬𑀲𑁂𑀦 𑀢𑁂𑀚𑀲𑀸, 𑀩𑁆𑀭𑀳𑁆𑀫𑀸𑀯 𑀤𑁂𑀯𑁂 𑀢𑀺𑀤𑀲𑁂 𑀲𑀳𑀺𑀦𑁆𑀤𑀓𑁂.

𑁮𑁦𑁯.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀉𑀧𑁆𑀧𑀮𑀫𑀸𑀮𑀥𑀸𑀭𑀺𑀦𑀻, 𑀆𑀯𑁂𑀴𑀺𑀦𑀻 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁂;

𑀅𑀮𑀗𑁆𑀓𑀢𑁂 𑀉𑀢𑁆𑀢𑀫𑀯𑀢𑁆𑀣𑀥𑀸𑀭𑀺𑀦𑀻, 𑀓𑀸 𑀢𑁆𑀯𑀁 𑀲𑀼𑀪𑁂 𑀤𑁂𑀯𑀢𑁂 𑀯𑀦𑁆𑀤𑀲𑁂 𑀫𑀫𑀁.

𑁮𑁧𑁦.

‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀓𑀫𑁆𑀫𑀫𑀓𑀸𑀲𑀺 𑀅𑀢𑁆𑀢𑀦𑀸, 𑀫𑀦𑀼𑀲𑁆𑀲𑀪𑀽𑀢𑀸 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀤𑀸𑀦𑀁 𑀲𑀼𑀘𑀺𑀡𑁆𑀡𑀁 𑀅𑀣 𑀲𑀻𑀮𑀲𑀜𑁆𑀜𑀫𑀁, 𑀓𑁂𑀦𑀼𑀧𑀧𑀦𑁆𑀦𑀸 𑀲𑀼𑀕𑀢𑀺𑀁 𑀬𑀲𑀲𑁆𑀲𑀺𑀦𑀻;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀼𑀘𑁆𑀙𑀺. 𑀢𑀢𑁄 𑀤𑁂𑀯𑀢𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁮𑁧𑁧.

‘‘𑀇𑀤𑀸𑀦𑀺 𑀪𑀦𑁆𑀢𑁂 𑀇𑀫𑀫𑁂𑀯 𑀕𑀸𑀫𑀁, 𑀧𑀺𑀡𑁆𑀟𑀸𑀬 𑀅𑀫𑁆𑀳𑀸𑀓𑀁 𑀖𑀭𑀁 𑀉𑀧𑀸𑀕𑀫𑀺;

𑀢𑀢𑁄 𑀢𑁂 𑀉𑀘𑁆𑀙𑀼𑀲𑁆𑀲 𑀅𑀤𑀸𑀲𑀺𑀁 𑀔𑀡𑁆𑀟𑀺𑀓𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀢𑀼𑀮𑀸𑀬 𑀧𑀻𑀢𑀺𑀬𑀸.

𑁮𑁧𑁨.

‘‘𑀲𑀲𑁆𑀲𑀼 𑀘 𑀧𑀘𑁆𑀙𑀸 𑀅𑀦𑀼𑀬𑀼𑀜𑁆𑀚𑀢𑁂 𑀫𑀫𑀁, 𑀓𑀳𑀁 𑀦𑀼 𑀉𑀘𑁆𑀙𑀼𑀁 𑀯𑀥𑀼𑀓𑁂 𑀅𑀯𑀸𑀓𑀺𑀭𑀺;

𑀦 𑀙𑀟𑁆𑀟𑀺𑀢𑀁 𑀦𑁄 𑀧𑀦 𑀔𑀸𑀤𑀺𑀢𑀁 𑀫𑀬𑀸, 𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀬𑀁 𑀅𑀤𑀸𑀲𑀳𑀁.

𑁮𑁧𑁩.

‘‘‘𑀢𑀼𑀬𑁆𑀳𑀁 𑀦𑁆𑀯𑀺𑀤𑀁 𑀇𑀲𑁆𑀲𑀭𑀺𑀬𑀁 𑀅𑀣𑁄 𑀫𑀫’, 𑀇𑀢𑀺𑀲𑁆𑀲𑀸 𑀲𑀲𑁆𑀲𑀼 𑀧𑀭𑀺𑀪𑀸𑀲𑀢𑁂 𑀫𑀫𑀁;

𑀮𑁂𑀟𑁆𑀟𑀼𑀁 𑀕𑀳𑁂𑀢𑁆𑀯𑀸 𑀧𑀳𑀸𑀭𑀁 𑀅𑀤𑀸𑀲𑀺 𑀫𑁂, 𑀢𑀢𑁄 𑀘𑀼𑀢𑀸 𑀓𑀸𑀮𑀓𑀢𑀸𑀫𑁆𑀳𑀺 𑀤𑁂𑀯𑀢𑀸.

𑁮𑁧𑁪.

‘‘𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸, 𑀲𑀼𑀔𑀜𑁆𑀘 𑀓𑀫𑁆𑀫𑀁 𑀅𑀦𑀼𑀪𑁄𑀫𑀺 𑀅𑀢𑁆𑀢𑀦𑀸;

𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀘𑀸𑀭𑀬𑀸𑀫𑀳𑀁, 𑀫𑁄𑀤𑀸𑀫𑀳𑀁 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺.

𑁮𑁧𑁫.

‘‘𑀢𑀤𑁂𑀯 𑀓𑀫𑁆𑀫𑀁 𑀓𑀼𑀲𑀮𑀁 𑀓𑀢𑀁 𑀫𑀬𑀸, 𑀲𑀼𑀔𑀜𑁆𑀘 𑀓𑀫𑁆𑀫𑀁 𑀅𑀦𑀼𑀪𑁄𑀫𑀺 𑀅𑀢𑁆𑀢𑀦𑀸;

𑀤𑁂𑀯𑀺𑀦𑁆𑀤𑀕𑀼𑀢𑁆𑀢𑀸 𑀢𑀺𑀤𑀲𑁂𑀳𑀺 𑀭𑀓𑁆𑀔𑀺𑀢𑀸, 𑀲𑀫𑀧𑁆𑀧𑀺𑀢𑀸 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺.

𑁮𑁧𑁬.

‘‘𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀨𑀮𑀁 𑀅𑀦