𑀅𑀝𑁆𑀞𑀓𑀣𑀸 > 𑀲𑀼𑀢𑁆𑀢𑀧𑀺𑀝𑀓 (𑀅𑀝𑁆𑀞𑀓𑀣𑀸) > 𑀔𑀼𑀤𑁆𑀤𑀓𑀦𑀺𑀓𑀸𑀬 (𑀅𑀝𑁆𑀞𑀓𑀣𑀸)

𑀢𑀢𑁆𑀣 ¶ 𑀧𑁂𑀢𑀯𑀢𑁆𑀣𑀽𑀢𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑀸𑀤𑀺𑀓𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀧𑁂𑀢𑀪𑀸𑀯𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁, 𑀢𑀲𑁆𑀲 𑀧𑀦 𑀧𑀓𑀸𑀲𑀦𑀯𑀲𑁂𑀦 𑀧𑀯𑀢𑁆𑀢𑁄 ‘‘𑀔𑁂𑀢𑁆𑀢𑀽𑀧𑀫𑀸 𑀅𑀭𑀳𑀦𑁆𑀢𑁄’’𑀢𑀺𑀆𑀤𑀺𑀓𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀇𑀥 ‘‘𑀧𑁂𑀢𑀯𑀢𑁆𑀣𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀢𑀬𑀺𑀤𑀁 𑀧𑁂𑀢𑀯𑀢𑁆𑀣𑀼 𑀓𑁂𑀦 𑀪𑀸𑀲𑀺𑀢𑀁, 𑀓𑀢𑁆𑀣 𑀪𑀸𑀲𑀺𑀢𑀁, 𑀓𑀤𑀸 𑀪𑀸𑀲𑀺𑀢𑀁, 𑀓𑀲𑁆𑀫𑀸 𑀘 𑀪𑀸𑀲𑀺𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀇𑀤𑀜𑁆𑀳𑀺 𑀧𑁂𑀢𑀯𑀢𑁆𑀣𑀼 𑀤𑀼𑀯𑀺𑀥𑁂𑀦 𑀧𑀯𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦, 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀘. 𑀢𑀢𑁆𑀣 𑀬𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀢𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀇𑀢𑀭𑀁 𑀦𑀸𑀭𑀤𑀢𑁆𑀣𑁂𑀭𑀸𑀤𑀻𑀳𑀺 𑀧𑀼𑀘𑁆𑀙𑀺𑀢𑀁 𑀢𑁂𑀳𑀺 𑀢𑁂𑀳𑀺 𑀧𑁂𑀢𑁂𑀳𑀺 𑀪𑀸𑀲𑀺𑀢𑀁. 𑀲𑀢𑁆𑀣𑀸 𑀧𑀦 𑀬𑀲𑁆𑀫𑀸 𑀦𑀸𑀭𑀤𑀢𑁆𑀣𑁂𑀭𑀸𑀤𑀻𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀆𑀭𑁄𑀘𑀺𑀢𑁂 𑀢𑀁 ¶ 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑁂𑀢𑀁 𑀧𑁂𑀢𑀯𑀢𑁆𑀣𑀼 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑀫𑁂𑀯 𑀦𑀸𑀫 𑀚𑀸𑀢𑀁. 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀳𑀺 𑀲𑀢𑁆𑀣𑀭𑀺 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀕𑀳𑀸𑀤𑀻𑀲𑀼 𑀯𑀺𑀳𑀭𑀦𑁆𑀢𑁂 𑀬𑁂𑀪𑀼𑀬𑁆𑀬𑁂𑀦 𑀢𑀸𑀬 𑀢𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀓𑀫𑁆𑀫𑀨𑀮𑀧𑀘𑁆𑀘𑀓𑁆𑀔𑀓𑀭𑀡𑀸𑀬 𑀢𑀁 𑀢𑀁 𑀧𑁂𑀢𑀯𑀢𑁆𑀣𑀼 𑀤𑁂𑀲𑀦𑀸𑀭𑀼𑀴𑁆𑀳𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 ‘‘𑀓𑁂𑀦 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀲𑀸𑀥𑀸𑀭𑀡𑀢𑁄 𑀯𑀺𑀲𑁆𑀲𑀚𑁆𑀚𑀦𑀸. 𑀅𑀲𑀸𑀥𑀸𑀭𑀡𑀢𑁄 𑀧𑀦 𑀢𑀲𑁆𑀲 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀫𑁂𑀯 𑀆𑀕𑀫𑀺𑀲𑁆𑀲𑀢𑀺.

𑀢𑀁 𑀧𑀦𑁂𑀢𑀁 𑀧𑁂𑀢𑀯𑀢𑁆𑀣𑀼 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀁, 𑀤𑀻𑀖𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀁, 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀲𑀼 𑀲𑀸𑀲𑀦𑀗𑁆𑀕𑁂𑀲𑀼 𑀕𑀸𑀣𑀸𑀲𑀗𑁆𑀕𑀳𑀁.

‘‘𑀤𑁆𑀯𑀸𑀲𑀻𑀢𑀺 ¶ 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭) 𑁋

𑀏𑀯𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀝𑀺𑀜𑁆𑀜𑀸𑀢𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀓𑀢𑀺𑀧𑀬𑀥𑀫𑁆𑀫𑀓𑁆𑀔𑀦𑁆𑀥𑀲𑀗𑁆𑀕𑀳𑀁, 𑀪𑀸𑀡𑀯𑀸𑀭𑀢𑁄 𑀘𑀢𑀼𑀪𑀸𑀡𑀯𑀸𑀭𑀫𑀢𑁆𑀢𑀁, 𑀯𑀕𑁆𑀕𑀢𑁄 𑁋 𑀉𑀭𑀕𑀯𑀕𑁆𑀕𑁄 𑀉𑀩𑁆𑀩𑀭𑀺𑀯𑀕𑁆𑀕𑁄 𑀘𑀽𑀴𑀯𑀕𑁆𑀕𑁄 𑀫𑀳𑀸𑀯𑀕𑁆𑀕𑁄𑀢𑀺 𑀘𑀢𑀼𑀯𑀕𑁆𑀕𑀲𑀗𑁆𑀕𑀳𑀁. 𑀢𑁂𑀲𑀼 𑀧𑀞𑀫𑀯𑀕𑁆𑀕𑁂 𑀤𑁆𑀯𑀸𑀤𑀲 𑀯𑀢𑁆𑀣𑀽𑀦𑀺, 𑀤𑀼𑀢𑀺𑀬𑀯𑀕𑁆𑀕𑁂 ¶ 𑀢𑁂𑀭𑀲 𑀯𑀢𑁆𑀣𑀽𑀦𑀺, 𑀢𑀢𑀺𑀬𑀯𑀕𑁆𑀕𑁂 𑀤𑀲 𑀯𑀢𑁆𑀣𑀽𑀦𑀺, 𑀘𑀢𑀼𑀢𑁆𑀣𑀯𑀕𑁆𑀕𑁂 𑀲𑁄𑀴𑀲 𑀯𑀢𑁆𑀣𑀽𑀦𑀻𑀢𑀺 𑀯𑀢𑁆𑀣𑀼𑀢𑁄 𑀏𑀓𑀧𑀜𑁆𑀜𑀸𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀁. 𑀢𑀲𑁆𑀲 𑀯𑀕𑁆𑀕𑁂𑀲𑀼 𑀉𑀭𑀕𑀯𑀕𑁆𑀕𑁄 𑀆𑀤𑀺, 𑀯𑀢𑁆𑀣𑀽𑀲𑀼 𑀔𑁂𑀢𑁆𑀢𑀽𑀧𑀫𑀧𑁂𑀢𑀯𑀢𑁆𑀣𑀼 𑀆𑀤𑀺, 𑀢𑀲𑁆𑀲𑀸𑀧𑀺 ‘‘𑀔𑁂𑀢𑁆𑀢𑀽𑀧𑀫𑀸 𑀅𑀭𑀳𑀦𑁆𑀢𑁄’’𑀢𑀺 𑀅𑀬𑀁 𑀕𑀸𑀣𑀸 𑀆𑀤𑀺.

𑁧. 𑀔𑁂𑀢𑁆𑀢𑀽𑀧𑀫𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀢𑀁 ¶ 𑀧𑀦𑁂𑀢𑀁 𑀯𑀢𑁆𑀣𑀼𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁄 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂 𑀅𑀜𑁆𑀜𑀢𑀭𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀭𑀸𑀚𑀕𑀳𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀅𑀦𑁂𑀓𑀓𑁄𑀝𑀺𑀥𑀦𑀲𑀦𑁆𑀦𑀺𑀘𑀬𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀲𑁆𑀲 𑀫𑀳𑀸𑀥𑀦𑀲𑀫𑁆𑀧𑀦𑁆𑀦𑀢𑀸𑀬 ‘‘𑀫𑀳𑀸𑀥𑀦𑀲𑁂𑀝𑁆𑀞𑀺’’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀏𑀓𑁄𑀯 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀧𑀺𑀬𑁄 𑀫𑀦𑀸𑀧𑁄. 𑀢𑀲𑁆𑀫𑀺𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀏𑀯𑀁 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀲𑁆𑀲 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀧𑀭𑀺𑀩𑁆𑀩𑀬𑀁 𑀓𑀭𑁄𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑁂𑀦𑀸𑀧𑀺 𑀅𑀬𑀁 𑀥𑀦𑀲𑀦𑁆𑀦𑀺𑀘𑀬𑁄 𑀧𑀭𑀺𑀓𑁆𑀔𑀬𑀁 𑀦 𑀕𑀫𑀺𑀲𑁆𑀲𑀢𑀺, 𑀓𑀺𑀁 𑀇𑀫𑀲𑁆𑀲 𑀲𑀺𑀧𑁆𑀧𑀼𑀕𑁆𑀕𑀳𑀡𑀧𑀭𑀺𑀲𑁆𑀲𑀫𑁂𑀦, 𑀅𑀓𑀺𑀮𑀦𑁆𑀢𑀓𑀸𑀬𑀘𑀺𑀢𑁆𑀢𑁄 𑀬𑀣𑀸𑀲𑀼𑀔𑀁 𑀪𑁄𑀕𑁂 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀲𑀺𑀧𑁆𑀧𑀁 𑀦 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀯𑀬𑀧𑁆𑀧𑀢𑁆𑀢𑁂 𑀧𑀦 𑀓𑀼𑀮𑀭𑀽𑀧𑀬𑁄𑀩𑁆𑀩𑀦𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀓𑀸𑀫𑀸𑀪𑀺𑀫𑀼𑀔𑀁 𑀥𑀫𑁆𑀫𑀲𑀜𑁆𑀜𑀸𑀯𑀺𑀫𑀼𑀔𑀁 𑀓𑀜𑁆𑀜𑀁 𑀆𑀦𑁂𑀲𑀼𑀁. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀦𑁆𑀢𑁄 𑀥𑀫𑁆𑀫𑁂 𑀘𑀺𑀢𑁆𑀢𑀫𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸, 𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑀼𑀭𑀼𑀚𑀦𑁂𑀲𑀼 𑀅𑀦𑀸𑀤𑀭𑁄 𑀳𑀼𑀢𑁆𑀯𑀸, 𑀥𑀼𑀢𑁆𑀢𑀚𑀦𑀧𑀭𑀺𑀯𑀼𑀢𑁄 𑀭𑀚𑁆𑀚𑀫𑀸𑀦𑁄 𑀧𑀜𑁆𑀘𑀓𑀸𑀫𑀕𑀼𑀡𑁂 𑀭𑀢𑁄 𑀕𑀺𑀤𑁆𑀥𑁄 𑀫𑁄𑀳𑁂𑀦 𑀅𑀦𑁆𑀥𑁄 𑀳𑀼𑀢𑁆𑀯𑀸 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀫𑀸𑀢𑀸𑀧𑀺𑀢𑀽𑀲𑀼 𑀓𑀸𑀮𑀓𑀢𑁂𑀲𑀼 𑀦𑀝𑀦𑀸𑀝𑀓𑀕𑀸𑀬𑀓𑀸𑀤𑀻𑀦𑀁 𑀬𑀣𑀺𑀘𑁆𑀙𑀺𑀢𑀁 𑀤𑁂𑀦𑁆𑀢𑁄 𑀥𑀦𑀁 𑀯𑀺𑀦𑀸𑀲𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 ¶ 𑀧𑀸𑀭𑀺𑀚𑀼𑀜𑁆𑀜𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸, 𑀇𑀡𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀧𑀼𑀦 𑀇𑀡𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀇𑀡𑀸𑀬𑀺𑀓𑁂𑀳𑀺 𑀘𑁄𑀤𑀺𑀬𑀫𑀸𑀦𑁄 𑀢𑁂𑀲𑀁 𑀅𑀢𑁆𑀢𑀦𑁄 𑀔𑁂𑀢𑁆𑀢𑀯𑀢𑁆𑀣𑀼𑀖𑀭𑀸𑀤𑀻𑀦𑀺 𑀤𑀢𑁆𑀯𑀸, 𑀓𑀧𑀸𑀮𑀳𑀢𑁆𑀣𑁄 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀦𑀸𑀣𑀲𑀸𑀮𑀸𑀬𑀁 𑀯𑀲𑀢𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀘𑁄𑀭𑀸 𑀲𑀫𑀸𑀕𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁 𑀢𑀼𑀬𑁆𑀳𑀁 𑀇𑀫𑀺𑀦𑀸 𑀤𑀼𑀚𑁆𑀚𑀻𑀯𑀺𑀢𑁂𑀦, 𑀢𑀭𑀼𑀡𑁄 𑀢𑁆𑀯𑀫𑀲𑀺 ¶ 𑀣𑀸𑀫𑀚𑀯𑀩𑀮𑀲𑀫𑁆𑀧𑀦𑁆𑀦𑁄, 𑀓𑀲𑁆𑀫𑀸 𑀳𑀢𑁆𑀣𑀧𑀸𑀤𑀯𑀺𑀓𑀮𑁄 𑀯𑀺𑀬 𑀅𑀘𑁆𑀙𑀲𑀺? 𑀏𑀳𑀺 𑀅𑀫𑁆𑀳𑁂𑀳𑀺 𑀲𑀳 𑀘𑁄𑀭𑀺𑀓𑀸𑀬 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀳𑀻’’𑀢𑀺. 𑀲𑁄 ‘‘𑀦𑀸𑀳𑀁 𑀘𑁄𑀭𑀺𑀓𑀁 𑀓𑀸𑀢𑀼𑀁 𑀚𑀸𑀦𑀸𑀫𑀻’’𑀢𑀺 𑀆𑀳. 𑀘𑁄𑀭𑀸 ‘‘𑀫𑀬𑀁 𑀢𑀁 𑀲𑀺𑀓𑁆𑀔𑀸𑀧𑁂𑀫, 𑀓𑁂𑀯𑀮𑀁 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀅𑀣 𑀢𑁂 𑀘𑁄𑀭𑀸 𑀢𑀲𑁆𑀲 𑀳𑀢𑁆𑀣𑁂 𑀫𑀳𑀦𑁆𑀢𑀁 𑀫𑀼𑀕𑁆𑀕𑀭𑀁 𑀤𑀢𑁆𑀯𑀸 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀖𑀭𑀁 𑀧𑀯𑀺𑀲𑀦𑁆𑀢𑁄 𑀢𑀁 𑀲𑀦𑁆𑀥𑀺𑀫𑀼𑀔𑁂 𑀞𑀧𑁂𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀲𑀘𑁂 𑀇𑀥 𑀅𑀜𑁆𑀜𑁄 𑀓𑁄𑀘𑀺 𑀆𑀕𑀘𑁆𑀙𑀢𑀺, 𑀢𑀁 𑀇𑀫𑀺𑀦𑀸 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀸𑀭𑁂𑀳𑀻’’𑀢𑀺. 𑀲𑁄 𑀅𑀦𑁆𑀥𑀩𑀸𑀮𑁄 𑀳𑀺𑀢𑀸𑀳𑀺𑀢𑀁 𑀅𑀚𑀸𑀦𑀦𑁆𑀢𑁄 𑀧𑀭𑁂𑀲𑀁 𑀆𑀕𑀫𑀦𑀫𑁂𑀯 𑀑𑀮𑁄𑀓𑁂𑀦𑁆𑀢𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺 ¶ . 𑀘𑁄𑀭𑀸 𑀧𑀦 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀕𑀬𑁆𑀳𑀽𑀧𑀕𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀖𑀭𑀫𑀦𑀼𑀲𑁆𑀲𑁂𑀳𑀺 𑀜𑀸𑀢𑀫𑀢𑁆𑀢𑀸𑀯 𑀇𑀢𑁄 𑀘𑀺𑀢𑁄 𑀘 𑀧𑀮𑀸𑀬𑀺𑀁𑀲𑀼. 𑀖𑀭𑀫𑀦𑀼𑀲𑁆𑀲𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀥𑀸𑀯𑀦𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑀸 𑀢𑀁 𑀧𑀼𑀭𑀺𑀲𑀁 𑀲𑀦𑁆𑀥𑀺𑀤𑁆𑀯𑀸𑀭𑁂 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀳𑀭𑁂 𑀤𑀼𑀝𑁆𑀞𑀘𑁄𑀭𑀸’’𑀢𑀺 𑀕𑀳𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀫𑀼𑀕𑁆𑀕𑀭𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁 𑁋 ‘‘𑀅𑀬𑀁, 𑀤𑁂𑀯, 𑀘𑁄𑀭𑁄 𑀲𑀦𑁆𑀥𑀺𑀲𑀼𑀔𑁂 𑀕𑀳𑀺𑀢𑁄’’𑀢𑀺. 𑀭𑀸𑀚𑀸 ‘‘𑀇𑀫𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀸𑀧𑁂𑀳𑀻’’𑀢𑀺 𑀦𑀕𑀭𑀕𑀼𑀢𑁆𑀢𑀺𑀓𑀁 𑀆𑀡𑀸𑀧𑁂𑀲𑀺. ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀦𑀕𑀭𑀕𑀼𑀢𑁆𑀢𑀺𑀓𑁄 𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀭𑀢𑁆𑀢𑀯𑀡𑁆𑀡𑀯𑀺𑀭𑀴𑀫𑀸𑀮𑀸𑀩𑀦𑁆𑀥𑀓𑀡𑁆𑀞𑀁 𑀇𑀝𑁆𑀞𑀓𑀘𑀼𑀡𑁆𑀡𑀫𑀓𑁆𑀔𑀺𑀢𑀲𑀻𑀲𑀁 𑀯𑀚𑁆𑀛𑀧𑀳𑀝𑀪𑁂𑀭𑀺𑀤𑁂𑀲𑀺𑀢𑀫𑀕𑁆𑀕𑀁 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀯𑀺𑀘𑀭𑀸𑀧𑁂𑀢𑁆𑀯𑀸 𑀓𑀲𑀸𑀳𑀺 𑀢𑀸𑀴𑁂𑀦𑁆𑀢𑁄 𑀆𑀖𑀸𑀢𑀦𑀸𑀪𑀺𑀫𑀼𑀔𑀁 𑀦𑁂𑀢𑀺. ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀯𑀺𑀮𑀼𑀫𑁆𑀧𑀫𑀸𑀦𑀓𑀘𑁄𑀭𑁄 𑀕𑀳𑀺𑀢𑁄’’𑀢𑀺 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀼𑀮𑀲𑀸 𑀦𑀸𑀫 𑀦𑀕𑀭𑀲𑁄𑀪𑀺𑀦𑀻 𑀧𑀸𑀲𑀸𑀤𑁂 𑀞𑀺𑀢𑀸 𑀯𑀸𑀢𑀧𑀸𑀦𑀦𑁆𑀢𑀭𑁂𑀦 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀢𑀣𑀸 𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑁂 𑀢𑁂𑀦 𑀓𑀢𑀧𑀭𑀺𑀘𑀬𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀤𑀸𑀦𑀺 𑀏𑀯𑀭𑀽𑀧𑀁 𑀅𑀦𑀢𑁆𑀣𑀁 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄’’𑀢𑀺 𑀢𑀲𑁆𑀲 𑀓𑀸𑀭𑀼𑀜𑁆𑀜𑀁 ¶ 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑁄𑀤𑀓𑁂 𑀧𑀸𑀦𑀻𑀬𑀜𑁆𑀘 𑀧𑁂𑀲𑁂𑀲𑀺. 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀘 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀢𑀸𑀯 𑀅𑀬𑁆𑀬𑁄 𑀆𑀕𑀫𑁂𑀢𑀼, 𑀬𑀸𑀯𑀸𑀬𑀁 ¶ 𑀧𑀼𑀭𑀺𑀲𑁄 𑀇𑀫𑁂 𑀫𑁄𑀤𑀓𑁂 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀢𑀻’’𑀢𑀺.

𑀅𑀣𑁂𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀩𑁆𑀬𑀲𑀦𑀧𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑁋 ‘‘𑀅𑀬𑀁 𑀧𑀼𑀭𑀺𑀲𑁄 𑀅𑀓𑀢𑀧𑀼𑀜𑁆𑀜𑁄 𑀓𑀢𑀧𑀸𑀧𑁄, 𑀢𑁂𑀦𑀸𑀬𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀫𑀬𑀺 𑀧𑀦 𑀕𑀢𑁂 𑀫𑁄𑀤𑀓𑁂 𑀘 𑀧𑀸𑀦𑀻𑀬𑀜𑁆𑀘 𑀤𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀲𑁆𑀲 𑀅𑀯𑀲𑁆𑀲𑀬𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀦𑀻𑀬𑀫𑁄𑀤𑀓𑁂𑀲𑀼 𑀉𑀧𑀦𑀻𑀬𑀫𑀸𑀦𑁂𑀲𑀼 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀓𑀺𑀁 𑀫𑁂 𑀇𑀤𑀸𑀦𑁂𑀯 𑀇𑀫𑁂𑀳𑀺 𑀫𑀸𑀭𑀺𑀬𑀫𑀸𑀦𑀲𑁆𑀲 𑀫𑁄𑀤𑀓𑁂𑀳𑀺 𑀔𑀸𑀤𑀺𑀢𑁂𑀳𑀺, 𑀇𑀤𑀁 𑀧𑀦 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀸𑀣𑁂𑀬𑁆𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑁄𑀤𑀓𑁂 𑀘 𑀧𑀸𑀦𑀻𑀬𑀜𑁆𑀘 𑀣𑁂𑀭𑀲𑁆𑀲 𑀤𑀸𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀧𑀲𑀸𑀤𑀲𑀁𑀯𑀟𑁆𑀠𑀦𑀢𑁆𑀣𑀁 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑁄𑀤𑀓𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀜𑁆𑀘 𑀧𑀺𑀯𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀲𑁄 𑀧𑀦 𑀧𑀼𑀭𑀺𑀲𑁄 𑀘𑁄𑀭𑀖𑀸𑀢𑀓𑁂𑀳𑀺 𑀆𑀖𑀸𑀢𑀦𑀁 𑀦𑁂𑀢𑁆𑀯𑀸 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀺𑀢𑁄 𑀅𑀦𑀼𑀢𑁆𑀢𑀭𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂 𑀓𑀢𑁂𑀦 𑀧𑀼𑀜𑁆𑀜𑁂𑀦 𑀉𑀴𑀸𑀭𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑁄𑀧𑀺 𑀬𑀲𑁆𑀫𑀸 ‘‘𑀲𑀼𑀮𑀲𑀁 𑀆𑀕𑀫𑁆𑀫 𑀫𑀬𑀸 𑀅𑀬𑀁 𑀤𑁂𑀬𑁆𑀬𑀥𑀫𑁆𑀫𑁄 𑀮𑀤𑁆𑀥𑁄’’𑀢𑀺 𑀲𑀼𑀮𑀲𑀸𑀬 𑀕𑀢𑁂𑀦 𑀲𑀺𑀦𑁂𑀳𑁂𑀦 𑀫𑀭𑀡𑀓𑀸𑀮𑁂 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀳𑀻𑀦𑀓𑀸𑀬𑀁 𑀉𑀧𑀧𑀚𑁆𑀚𑀦𑁆𑀢𑁄 𑀧𑀩𑁆𑀩𑀢𑀕𑀳𑀦𑀲𑀫𑁆𑀪𑀽𑀢𑁂 𑀲𑀦𑁆𑀤𑀘𑁆𑀙𑀸𑀬𑁂 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀲𑁄 ¶ 𑀓𑀺𑀭 𑀲𑀘𑁂 𑀧𑀞𑀫𑀯𑀬𑁂 𑀓𑀼𑀮𑀯𑀁𑀲𑀝𑁆𑀞𑀧𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀭𑀺𑀲𑁆𑀲, 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀲𑁂𑀝𑁆𑀞𑀻𑀦𑀁 𑀅𑀕𑁆𑀕𑁄 𑀅𑀪𑀯𑀺𑀲𑁆𑀲, 𑀫𑀚𑁆𑀛𑀺𑀫𑀯𑀬𑁂 𑀫𑀚𑁆𑀛𑀺𑀫𑁄, 𑀧𑀘𑁆𑀙𑀺𑀫𑀯𑀬𑁂 𑀧𑀘𑁆𑀙𑀺𑀫𑁄. 𑀲𑀘𑁂 𑀧𑀦 𑀧𑀞𑀫𑀯𑀬𑁂 𑀧𑀩𑁆𑀩𑀚𑀺𑀢𑁄 𑀅𑀪𑀯𑀺𑀲𑁆𑀲, 𑀅𑀭𑀳𑀸 𑀅𑀪𑀯𑀺𑀲𑁆𑀲, 𑀫𑀚𑁆𑀛𑀺𑀫𑀯𑀬𑁂 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻 𑀯𑀸 𑀅𑀪𑀯𑀺𑀲𑁆𑀲, 𑀧𑀘𑁆𑀙𑀺𑀫𑀯𑀬𑁂 𑀲𑁄𑀢𑀸𑀧𑀦𑁆𑀦𑁄 𑀅𑀪𑀯𑀺𑀲𑁆𑀲. 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀧𑀦 𑀇𑀢𑁆𑀣𑀺𑀥𑀼𑀢𑁆𑀢𑁄 𑀲𑀼𑀭𑀸𑀥𑀼𑀢𑁆𑀢𑁄 𑀤𑀼𑀘𑁆𑀘𑀭𑀺𑀢𑀦𑀺𑀭𑀢𑁄 𑀅𑀦𑀸𑀤𑀭𑀺𑀓𑁄 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀫𑀳𑀸𑀩𑁆𑀬𑀲𑀦𑀁 𑀧𑀢𑁆𑀢𑁄𑀢𑀺 𑀯𑀤𑀦𑁆𑀢𑀺.

𑀅𑀣 ¶ 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀼𑀮𑀲𑀁 𑀉𑀬𑁆𑀬𑀸𑀦𑀕𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀓𑀸𑀫𑀭𑀸𑀕𑁄 𑀅𑀦𑁆𑀥𑀓𑀸𑀭𑀁 𑀫𑀸𑀧𑁂𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀪𑀯𑀦𑀁 𑀦𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀢𑀸𑀬 ¶ 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀅𑀢𑁆𑀢𑀸𑀦𑀜𑁆𑀘𑀲𑁆𑀲𑀸 𑀆𑀭𑁄𑀘𑁂𑀲𑀺. 𑀢𑀲𑁆𑀲𑀸 𑀫𑀸𑀢𑀸 𑀢𑀁 𑀅𑀧𑀲𑁆𑀲𑀦𑁆𑀢𑀻 𑀭𑁄𑀤𑀫𑀸𑀦𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀅𑀬𑁆𑀬𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀢𑀲𑁆𑀲𑀸 𑀕𑀢𑀺𑀁 𑀚𑀸𑀦𑁂𑀬𑁆𑀬, 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀼 𑀅𑀬𑁆𑀬𑁄’’𑀢𑀺 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑁂 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺 𑀆𑀳. 𑀅𑀣 𑀲𑀼𑀮𑀲𑀸 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀅𑀯𑁄𑀘 𑁋 ‘‘𑀅𑀬𑀼𑀢𑁆𑀢𑀁 𑀫𑀬𑁆𑀳𑀁 𑀢𑀯 𑀪𑀯𑀦𑁂 𑀯𑀲𑀦𑁆𑀢𑀺𑀬𑀸, 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄, 𑀫𑀫 𑀫𑀸𑀢𑀸 𑀫𑀁 𑀅𑀧𑀲𑁆𑀲𑀦𑁆𑀢𑀻 𑀧𑀭𑀺𑀤𑁂𑀯𑀲𑁄𑀓𑀲𑀫𑀸𑀧𑀦𑁆𑀦𑀸 𑀪𑀯𑀺𑀲𑁆𑀲𑀢𑀺, 𑀲𑀸𑀥𑀼 𑀫𑀁, 𑀤𑁂𑀯, 𑀢𑀢𑁆𑀣𑁂𑀯 𑀦𑁂𑀳𑀻’’𑀢𑀺. 𑀲𑁄 𑀢𑀁 𑀦𑁂𑀢𑁆𑀯𑀸 𑀯𑁂𑀴𑀼𑀯𑀦𑁂 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀧𑁂𑀦𑁆𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀅𑀝𑁆𑀞𑀸𑀲𑀺.

𑀢𑀢𑁄 𑀫𑀳𑀸𑀚𑀦𑁄 𑀲𑀼𑀮𑀲𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀫 𑀲𑀼𑀮𑀲𑁂, 𑀢𑁆𑀯𑀁 𑀏𑀢𑁆𑀢𑀓𑀁 𑀤𑀺𑀯𑀲𑀁 𑀓𑀼𑀳𑀺𑀁 𑀕𑀢𑀸? 𑀢𑀯 𑀫𑀸𑀢𑀸 𑀢𑁆𑀯𑀁 𑀅𑀧𑀲𑁆𑀲𑀦𑁆𑀢𑀻 𑀧𑀭𑀺𑀤𑁂𑀯𑀲𑁄𑀓𑀲𑀫𑀸𑀧𑀦𑁆𑀦𑀸 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑀸 𑀯𑀺𑀬 𑀚𑀸𑀢𑀸’’𑀢𑀺. 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀫𑀳𑀸𑀚𑀦𑀲𑁆𑀲 𑀆𑀘𑀺𑀓𑁆𑀔𑀺. 𑀫𑀳𑀸𑀚𑀦𑁂𑀦 𑀘 ‘‘𑀓𑀣𑀁 𑀲𑁄 𑀧𑀼𑀭𑀺𑀲𑁄 𑀢𑀣𑀸𑀧𑀸𑀧𑀧𑀲𑀼𑀢𑁄 𑀅𑀓𑀢𑀓𑀼𑀲𑀮𑁄 𑀤𑁂𑀯𑀽𑀧𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀼𑀮𑀲𑀸 ‘‘𑀫𑀬𑀸 𑀤𑀸𑀧𑀺𑀢𑁂 𑀫𑁄𑀤𑀓𑁂 𑀧𑀸𑀦𑀻𑀬𑀜𑁆𑀘 𑀅𑀬𑁆𑀬𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀽𑀧𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀅𑀳𑁄𑀲𑀺 𑁋 ‘‘𑀅𑀭𑀳𑀦𑁆𑀢𑁄 𑀦𑀸𑀫 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀬𑁂𑀲𑀼 𑀅𑀧𑁆𑀧𑀓𑁄𑀧𑀺 𑀓𑀢𑁄 𑀓𑀸𑀭𑁄 𑀲𑀢𑁆𑀢𑀸𑀦𑀁 𑀤𑁂𑀯𑀽𑀧𑀧𑀢𑁆𑀢𑀺𑀁 𑀆𑀯𑀳𑀢𑀻’’𑀢𑀺 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀲𑀺. 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀪𑀕𑀯𑀸 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑁋

‘‘𑀔𑁂𑀢𑁆𑀢𑀽𑀧𑀫𑀸 𑀅𑀭𑀳𑀦𑁆𑀢𑁄, 𑀤𑀸𑀬𑀓𑀸 𑀓𑀲𑁆𑀲𑀓𑀽𑀧𑀫𑀸;

𑀩𑀻𑀚𑀽𑀧𑀫𑀁 𑀤𑁂𑀬𑁆𑀬𑀥𑀫𑁆𑀫𑀁, 𑀏𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

‘‘𑀏𑀢𑀁 ¶ ¶ 𑀩𑀻𑀚𑀁 𑀓𑀲𑀻 𑀔𑁂𑀢𑁆𑀢𑀁, 𑀧𑁂𑀢𑀸𑀦𑀁 𑀤𑀸𑀬𑀓𑀲𑁆𑀲 𑀘;

𑀢𑀁 𑀧𑁂𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀤𑀸𑀢𑀸 𑀧𑀼𑀜𑁆𑀜𑁂𑀦 𑀯𑀟𑁆𑀠𑀢𑀺.

‘‘𑀇𑀥𑁂𑀯 ¶ 𑀓𑀼𑀲𑀮𑀁 𑀓𑀢𑁆𑀯𑀸, 𑀧𑁂𑀢𑁂 𑀘 𑀧𑀝𑀺𑀧𑀽𑀚𑀺𑀬;

𑀲𑀕𑁆𑀕𑀜𑁆𑀘 𑀓𑀫𑀢𑀺𑀝𑁆𑀞𑀸𑀦𑀁, 𑀓𑀫𑁆𑀫𑀁 𑀓𑀢𑁆𑀯𑀸𑀦 𑀪𑀤𑁆𑀤𑀓’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑁧. 𑀢𑀢𑁆𑀣 𑀔𑁂𑀢𑁆𑀢𑀽𑀧𑀫𑀸𑀢𑀺 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀩𑀻𑀚𑀁 𑀢𑀸𑀬𑀢𑀺 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀭𑀓𑁆𑀔𑀢𑀻𑀢𑀺 𑀔𑁂𑀢𑁆𑀢𑀁, 𑀲𑀸𑀮𑀺𑀩𑀻𑀚𑀸𑀤𑀻𑀦𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀁. 𑀢𑀁 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀔𑁂𑀢𑁆𑀢𑀽𑀧𑀫𑀸, 𑀓𑁂𑀤𑀸𑀭𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀅𑀭𑀳𑀦𑁆𑀢𑁄𑀢𑀺 𑀔𑀻𑀡𑀸𑀲𑀯𑀸. 𑀢𑁂 𑀳𑀺 𑀓𑀺𑀮𑁂𑀲𑀸𑀭𑀻𑀦𑀁 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀢𑀢𑁄 𑀏𑀯 𑀆𑀭𑀓𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸 𑀘 ‘‘𑀅𑀭𑀳𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀔𑁂𑀢𑀜𑁆𑀳𑀺 𑀢𑀺𑀡𑀸𑀤𑀺𑀤𑁄𑀲𑀭𑀳𑀺𑀢𑀁 𑀲𑁆𑀯𑀸𑀪𑀺𑀲𑀗𑁆𑀔𑀢𑀩𑀻𑀚𑀫𑁆𑀳𑀺 𑀯𑀼𑀢𑁆𑀢𑁂 𑀉𑀢𑀼𑀲𑀮𑀺𑀮𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀽𑀧𑁂𑀢𑀁 𑀓𑀲𑁆𑀲𑀓𑀲𑁆𑀲 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀏𑀯𑀁 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑁄 𑀮𑁄𑀪𑀸𑀤𑀺𑀤𑁄𑀲𑀭𑀳𑀺𑀢𑁄 𑀲𑁆𑀯𑀸𑀪𑀺𑀲𑀗𑁆𑀔𑀢𑁂 𑀤𑁂𑀬𑁆𑀬𑀥𑀫𑁆𑀫𑀩𑀻𑀚𑁂 𑀯𑀼𑀢𑁆𑀢𑁂 𑀓𑀸𑀮𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁄 𑀤𑀸𑀬𑀓𑀲𑁆𑀲 𑀫𑀳𑀧𑁆𑀨𑀮𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀔𑁂𑀢𑁆𑀢𑀽𑀧𑀫𑀸 𑀅𑀭𑀳𑀦𑁆𑀢𑁄’’𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀅𑀬𑀁 𑀢𑀲𑁆𑀲 𑀲𑁂𑀔𑀸𑀤𑀻𑀦𑀫𑁆𑀧𑀺 𑀔𑁂𑀢𑁆𑀢𑀪𑀸𑀯𑀸𑀧𑀝𑀺𑀓𑁆𑀔𑁂𑀧𑀢𑁄.

𑀤𑀸𑀬𑀓𑀸𑀢𑀺 𑀘𑀻𑀯𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀤𑀸𑀢𑀸𑀭𑁄 𑀧𑀭𑀺𑀘𑁆𑀘𑀚𑀦𑀓𑀸, 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀮𑁄𑀪𑀸𑀤𑀻𑀦𑀁 𑀧𑀭𑀺𑀘𑁆𑀘𑀚𑀦𑀓𑀸 𑀙𑁂𑀤𑀦𑀓𑀸, 𑀢𑀢𑁄 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑁆𑀲 𑀲𑁄𑀥𑀓𑀸, 𑀭𑀓𑁆𑀔𑀓𑀸 𑀘𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀲𑀓𑀽𑀧𑀫𑀸𑀢𑀺 𑀓𑀲𑁆𑀲𑀓𑀲𑀤𑀺𑀲𑀸. 𑀬𑀣𑀸 𑀓𑀲𑁆𑀲𑀓𑁄 𑀲𑀸𑀮𑀺𑀔𑁂𑀢𑁆𑀢𑀸𑀤𑀻𑀦𑀺 𑀓𑀲𑀺𑀢𑁆𑀯𑀸 𑀬𑀣𑀸𑀓𑀸𑀮𑀜𑁆𑀘 𑀯𑀼𑀢𑁆𑀢𑀼𑀤𑀓𑀤𑀸𑀦𑀦𑀻𑀳𑀭𑀡𑀦𑀺𑀥𑀸𑀦𑀭𑀓𑁆𑀔𑀡𑀸𑀤𑀻𑀳𑀺 𑀅𑀧𑁆𑀧𑀫𑀚𑁆𑀚𑀦𑁆𑀢𑁄 𑀉𑀴𑀸𑀭𑀁 𑀯𑀺𑀧𑀼𑀮𑀜𑁆𑀘 𑀲𑀲𑁆𑀲𑀨𑀮𑀁 𑀧𑀝𑀺𑀮𑀪𑀢𑀺, 𑀏𑀯𑀁 𑀤𑀸𑀬𑀓𑁄𑀧𑀺 𑀅𑀭𑀳𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦 𑀧𑀸𑀭𑀺𑀘𑀭𑀺𑀬𑀸𑀬 𑀘 𑀅𑀧𑁆𑀧𑀫𑀚𑁆𑀚𑀦𑁆𑀢𑁄 𑀉𑀴𑀸𑀭𑀁 𑀯𑀺𑀧𑀼𑀮𑀜𑁆𑀘 𑀤𑀸𑀦𑀨𑀮𑀁 𑀧𑀝𑀺𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀸𑀬𑀓𑀸 𑀓𑀲𑁆𑀲𑀓𑀽𑀧𑀫𑀸’’𑀢𑀺.

𑀩𑀻𑀚𑀽𑀧𑀫𑀁 𑀤𑁂𑀬𑁆𑀬𑀥𑀫𑁆𑀫𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀩𑀻𑀚𑀲𑀤𑀺𑀲𑁄 𑀤𑁂𑀬𑁆𑀬𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀅𑀦𑁆𑀦𑀧𑀸𑀦𑀸𑀤𑀺𑀓𑀲𑁆𑀲 𑀳𑀺 𑀤𑀲𑀯𑀺𑀥𑀲𑁆𑀲 𑀤𑀸𑀢𑀩𑁆𑀩𑀯𑀢𑁆𑀣𑀼𑀦𑁄 𑀏𑀢𑀁 𑀦𑀸𑀫𑀁. 𑀏𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀦𑁆𑀢𑀺 𑀏𑀢𑀲𑁆𑀫𑀸 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀢𑁄 ¶ 𑀤𑀸𑀦𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘, 𑀘𑀺𑀭𑀢𑀭𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑀲𑁆𑀫𑀸 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀪𑀺𑀲𑀗𑁆𑀔𑀢𑀲𑁆𑀲 𑀅𑀦𑁆𑀦𑀧𑀸𑀦𑀸𑀤𑀺𑀯𑀢𑁆𑀣𑀼𑀦𑁄 𑀪𑀸𑀯𑁄, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸 ‘‘𑀩𑀻𑀚𑀽𑀧𑀫𑀁 𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀕𑁆𑀕𑀳𑀡𑀁 𑀓𑀢𑀁. 𑀢𑁂𑀦 𑀤𑁂𑀬𑁆𑀬𑀥𑀫𑁆𑀫𑀸𑀧𑀤𑁂𑀲𑁂𑀦 ¶ 𑀤𑁂𑀬𑁆𑀬𑀥𑀫𑁆𑀫𑀯𑀢𑁆𑀣𑀼𑀯𑀺𑀲𑀬𑀸𑀬 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬𑀬𑁂𑀯 𑀩𑀻𑀚𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀲𑀸 𑀳𑀺 𑀧𑀝𑀺𑀲𑀦𑁆𑀥𑀺𑀆𑀤𑀺𑀧𑁆𑀧𑀪𑁂𑀤𑀲𑁆𑀲 ¶ 𑀢𑀲𑁆𑀲 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀧𑁆𑀧𑀪𑁂𑀤𑀲𑁆𑀲 𑀘 𑀨𑀮𑀲𑁆𑀲 𑀦𑀺𑀧𑁆𑀨𑀸𑀤𑀺𑀓𑀸, 𑀦 𑀤𑁂𑀬𑁆𑀬𑀥𑀫𑁆𑀫𑁄𑀢𑀺.

𑁨. 𑀏𑀢𑀁 𑀩𑀻𑀚𑀁 𑀓𑀲𑀻 𑀔𑁂𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀩𑀻𑀚𑀁, 𑀬𑀣𑀸𑀯𑀼𑀢𑁆𑀢𑀜𑁆𑀘 𑀔𑁂𑀢𑁆𑀢𑀁, 𑀢𑀲𑁆𑀲 𑀩𑀻𑀚𑀲𑁆𑀲 𑀢𑀲𑁆𑀫𑀺𑀁 𑀔𑁂𑀢𑁆𑀢𑁂 𑀯𑀧𑀦𑀧𑀬𑁄𑀕𑀲𑀗𑁆𑀔𑀸𑀢𑀸 𑀓𑀲𑀺 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀢𑀬𑀁 𑀓𑁂𑀲𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑁂𑀢𑀸𑀦𑀁 𑀤𑀸𑀬𑀓𑀲𑁆𑀲 𑀘𑀸’’𑀢𑀺. 𑀬𑀤𑀺 𑀤𑀸𑀬𑀓𑁄 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀧𑁂𑀢𑀸𑀦𑀜𑁆𑀘 𑀤𑀸𑀬𑀓𑀲𑁆𑀲 𑀘, 𑀬𑀤𑀺 𑀦 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀤𑀸𑀬𑀓𑀲𑁆𑀲𑁂𑀯 𑀏𑀢𑀁 𑀩𑀻𑀚𑀁 𑀏𑀲𑀸 𑀓𑀲𑀺 𑀏𑀢𑀁 𑀔𑁂𑀢𑁆𑀢𑀁 𑀉𑀧𑀓𑀸𑀭𑀸𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀁 𑀉𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑁂𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀤𑀸𑀢𑀸 𑀧𑀼𑀜𑁆𑀜𑁂𑀦 𑀯𑀟𑁆𑀠𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀁 𑀧𑁂𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀤𑀸𑀬𑀓𑁂𑀦 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑁂 𑀤𑀺𑀦𑁆𑀦𑁂 𑀬𑀣𑀸𑀯𑀼𑀢𑁆𑀢𑀔𑁂𑀢𑁆𑀢𑀓𑀲𑀺𑀩𑀻𑀚𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀫𑁄𑀤𑀦𑀸𑀬 𑀘 𑀬𑀁 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺, 𑀢𑀁 𑀤𑀸𑀦𑀨𑀮𑀁 𑀧𑁂𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀤𑀸𑀢𑀸 𑀧𑀼𑀜𑁆𑀜𑁂𑀦 𑀯𑀟𑁆𑀠𑀢𑀻𑀢𑀺 𑀤𑀸𑀢𑀸 𑀧𑀦 𑀅𑀢𑁆𑀢𑀦𑁄 𑀤𑀸𑀦𑀫𑀬𑀧𑀼𑀜𑁆𑀜𑀦𑀺𑀫𑀺𑀢𑁆𑀢𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀧𑀼𑀜𑁆𑀜𑀨𑀮𑁂𑀦 𑀅𑀪𑀺𑀯𑀟𑁆𑀠𑀢𑀺. 𑀧𑀼𑀜𑁆𑀜𑀨𑀮𑀫𑁆𑀧𑀺 𑀳𑀺 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦) 𑀧𑀼𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩. 𑀇𑀥𑁂𑀯 𑀓𑀼𑀲𑀮𑀁 𑀓𑀢𑁆𑀯𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦 𑀓𑀼𑀲𑀮𑀁 𑀧𑁂𑀢𑀸𑀦𑀁 𑀉𑀤𑁆𑀤𑀺𑀲𑀦𑀯𑀲𑁂𑀦 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀥𑁂𑀯 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀧𑁂𑀢𑁂 𑀘 𑀧𑀝𑀺𑀧𑀽𑀚𑀺𑀬𑀸𑀢𑀺 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑁂𑀦 𑀲𑀫𑁆𑀫𑀸𑀦𑁂𑀢𑁆𑀯𑀸 𑀅𑀦𑀼𑀪𑀼𑀬𑁆𑀬𑀫𑀸𑀦𑀤𑀼𑀓𑁆𑀔𑀢𑁄 𑀢𑁂 𑀫𑁄𑀘𑁂𑀢𑁆𑀯𑀸. 𑀧𑁂𑀢𑁂 𑀳𑀺 𑀉𑀤𑁆𑀤𑀺𑀲𑁆𑀲 𑀤𑀺𑀬𑁆𑀬𑀫𑀸𑀦𑀁 𑀤𑀸𑀦𑀁 𑀢𑁂𑀲𑀁 𑀧𑀽𑀚𑀸 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀅𑀫𑁆𑀳𑀸𑀓𑀜𑁆𑀘 𑀓𑀢𑀸 𑀧𑀽𑀚𑀸’’𑀢𑀺 (𑀧𑁂. 𑀯. 𑁧𑁮), ‘‘𑀧𑁂𑀢𑀸𑀦𑀁 𑀧𑀽𑀚𑀸 𑀘 𑀓𑀢𑀸 𑀉𑀴𑀸𑀭𑀸’’𑀢𑀺 (𑀧𑁂. 𑀯. 𑁨𑁫) 𑀘. ‘‘𑀧𑁂𑀢𑁂 𑀘𑀸’’𑀢𑀺 𑀘-𑀲𑀤𑁆𑀤𑁂𑀦 ¶ ‘‘𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄, 𑀅𑀪𑀺𑀕𑀫𑀦𑀻𑀬𑁄 𑀘 𑀳𑁄𑀢𑀺 𑀯𑀺𑀲𑁆𑀲𑀸𑀲𑀦𑀻𑀬𑁄, 𑀪𑀸𑀯𑀦𑀻𑀬𑁄 𑀘 𑀳𑁄𑀢𑀺 𑀕𑀭𑀼𑀓𑀸𑀢𑀩𑁆𑀩𑁄, 𑀧𑀸𑀲𑀁𑀲𑁄 𑀘 𑀳𑁄𑀢𑀺 𑀓𑀺𑀢𑁆𑀢𑀦𑀻𑀬𑁄 𑀯𑀺𑀜𑁆𑀜𑀽𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀓𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀤𑀸𑀦𑀸𑀦𑀺𑀲𑀁𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀕𑁆𑀕𑀜𑁆𑀘 𑀓𑀫𑀢𑀺 𑀞𑀸𑀦𑀁, 𑀓𑀫𑁆𑀫𑀁 𑀓𑀢𑁆𑀯𑀸𑀦 𑀪𑀤𑁆𑀤𑀓𑀦𑁆𑀢𑀺 𑀓𑀮𑁆𑀬𑀸𑀡𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀆𑀬𑀼𑀆𑀤𑀻𑀳𑀺 𑀤𑀲𑀳𑀺 𑀞𑀸𑀦𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑀢𑁆𑀢𑀸 ‘‘𑀲𑀕𑁆𑀕’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀓𑀢𑀧𑀼𑀜𑁆𑀜𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑀸𑀦𑀁 𑀤𑁂𑀯𑀮𑁄𑀓𑀁 𑀓𑀫𑀢𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀉𑀧𑀕𑀘𑁆𑀙𑀢𑀺.

𑀏𑀢𑁆𑀣 ¶ 𑀘 ‘‘𑀓𑀼𑀲𑀮𑀁 𑀓𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀓𑀫𑁆𑀫𑀁 𑀓𑀢𑁆𑀯𑀸𑀦 𑀪𑀤𑁆𑀤𑀓’’𑀦𑁆𑀢𑀺 𑀯𑀘𑀦𑀁 ‘‘𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄 𑀯𑀺𑀬 𑀧𑀢𑁆𑀢𑀺𑀤𑀸𑀦𑀯𑀲𑁂𑀦 𑀤𑀸𑀦𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄𑀧𑀺 𑀤𑀸𑀦𑀫𑀬𑀓𑀼𑀲𑀮𑀓𑀫𑁆𑀫𑀫𑁂𑀯𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑁂𑀢𑀸𑀢𑀺 𑀅𑀭𑀳𑀦𑁆𑀢𑁄 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 ‘‘𑀧𑁂𑀢𑀸’’𑀢𑀺 𑀔𑀻𑀡𑀸𑀲𑀯𑀸𑀦𑀁 𑀆𑀕𑀢𑀝𑁆𑀞𑀸𑀦𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀩𑀻𑀚𑀸𑀤𑀺𑀪𑀸𑀯𑀲𑁆𑀲 𑀘 𑀤𑀸𑀬𑀓𑀲𑁆𑀲 𑀯𑀺𑀬 ¶ 𑀢𑁂𑀲𑀁 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸, 𑀧𑁂𑀢𑀬𑁄𑀦𑀺𑀓𑀸𑀦𑀁 𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀘. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀧𑀼𑀢𑁆𑀢𑀁 𑀲𑀼𑀮𑀲𑀜𑁆𑀘 𑀆𑀤𑀺𑀁 𑀓𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀔𑁂𑀢𑁆𑀢𑀽𑀧𑀫𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀽𑀓𑀭𑀫𑀼𑀔𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀓𑀸𑀬𑁄 𑀢𑁂 𑀲𑀩𑁆𑀩𑀲𑁄𑀯𑀡𑁆𑀡𑁄𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀲𑀽𑀓𑀭𑀫𑀼𑀔𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀏𑀓𑁄 𑀪𑀺𑀓𑁆𑀔𑀼 𑀓𑀸𑀬𑁂𑀦 ¶ 𑀲𑀜𑁆𑀜𑀢𑁄 𑀅𑀳𑁄𑀲𑀺, 𑀯𑀸𑀘𑀸𑀬 𑀅𑀲𑀜𑁆𑀜𑀢𑁄, 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄, 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀲𑀫𑀻𑀧𑁂 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀧𑀸𑀤𑁂 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑀸𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺, 𑀫𑀼𑀔𑀁 𑀲𑀽𑀓𑀭𑀫𑀼𑀔𑀲𑀤𑀺𑀲𑀁. 𑀅𑀣𑀸𑀬𑀲𑁆𑀫𑀸 𑀦𑀸𑀭𑀤𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀲𑀦𑁆𑀢𑁄 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀁 𑀧𑁂𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑀸𑀬𑁄 𑀢𑁂 𑀲𑀩𑁆𑀩𑀲𑁄𑀯𑀡𑁆𑀡𑁄, 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸;

𑀫𑀼𑀔𑀁 𑀢𑁂 𑀲𑀽𑀓𑀭𑀲𑁆𑀲𑁂𑀯, 𑀓𑀺𑀁 𑀓𑀫𑁆𑀫𑀫𑀓𑀭𑀻 𑀧𑀼𑀭𑁂’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀸𑀬𑁄 𑀢𑁂 𑀲𑀩𑁆𑀩𑀲𑁄𑀯𑀡𑁆𑀡𑁄𑀢𑀺 𑀢𑀯 𑀓𑀸𑀬𑁄 𑀤𑁂𑀳𑁄 𑀲𑀩𑁆𑀩𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀉𑀢𑁆𑀢𑀢𑁆𑀢𑀓𑀦𑀓𑀲𑀦𑁆𑀦𑀺𑀪𑁄. 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸𑀢𑀺 𑀢𑀲𑁆𑀲 𑀧𑀪𑀸𑀬 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀲𑀫𑀦𑁆𑀢𑀦𑁆𑀢𑁄 𑀑𑀪𑀸𑀲𑀢𑀺 𑀯𑀺𑀚𑁆𑀚𑁄𑀢𑀢𑀺. 𑀑𑀪𑀸𑀲𑀢𑁂𑀢𑀺 𑀯𑀸 𑀅𑀦𑁆𑀢𑁄𑀕𑀥𑀳𑁄𑀢𑀼𑀅𑀢𑁆𑀣𑀫𑀺𑀤𑀁 𑀧𑀤𑀦𑁆𑀢𑀺 ‘‘𑀢𑁂 𑀓𑀸𑀬𑁄 𑀲𑀩𑁆𑀩𑀲𑁄𑀯𑀡𑁆𑀡𑁄 𑀲𑀩𑁆𑀩𑀸 𑀤𑀺𑀲𑀸 𑀑𑀪𑀸𑀲𑁂𑀢𑀺 𑀯𑀺𑀚𑁆𑀚𑁄𑀢𑁂𑀢𑀻’’𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀼𑀔𑀁 ¶ 𑀢𑁂 𑀲𑀽𑀓𑀭𑀲𑁆𑀲𑁂𑀯𑀸𑀢𑀺 𑀫𑀼𑀔𑀁 𑀧𑀦 𑀢𑁂 𑀲𑀽𑀓𑀭𑀲𑁆𑀲 𑀯𑀺𑀬, 𑀲𑀽𑀓𑀭𑀫𑀼𑀔𑀲𑀤𑀺𑀲𑀁 𑀢𑀯 𑀫𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀫𑁆𑀫𑀫𑀓𑀭𑀻 𑀧𑀼𑀭𑁂𑀢𑀺 ‘‘𑀢𑁆𑀯𑀁 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀺𑀬𑀁 𑀓𑀻𑀤𑀺𑀲𑀁 𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀢𑀺.

𑀏𑀯𑀁 𑀣𑁂𑀭𑁂𑀦 𑀲𑁄 𑀧𑁂𑀢𑁄 𑀓𑀢𑀓𑀫𑁆𑀫𑀁 𑀧𑀼𑀝𑁆𑀞𑁄 𑀕𑀸𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑁋

‘‘𑀓𑀸𑀬𑁂𑀦 𑀲𑀜𑁆𑀜𑀢𑁄 𑀆𑀲𑀺𑀁, 𑀯𑀸𑀘𑀸𑀬𑀸𑀲𑀺𑀫𑀲𑀜𑁆𑀜𑀢𑁄;

𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀬𑀣𑀸 𑀧𑀲𑁆𑀲𑀲𑀺 𑀦𑀸𑀭𑀤𑀸’’𑀢𑀺. 𑁋

𑀆𑀳 ¶ . 𑀢𑀢𑁆𑀣 𑀓𑀸𑀬𑁂𑀦 𑀲𑀜𑁆𑀜𑀢𑁄 𑀆𑀲𑀺𑀦𑁆𑀢𑀺 𑀓𑀸𑀬𑀺𑀓𑁂𑀦 𑀲𑀁𑀬𑀫𑁂𑀦 𑀲𑀁𑀬𑀢𑁄 𑀓𑀸𑀬𑀤𑁆𑀯𑀸𑀭𑀺𑀓𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀅𑀳𑁄𑀲𑀺𑀁. 𑀯𑀸𑀘𑀸𑀬𑀸𑀲𑀺𑀫𑀲𑀜𑁆𑀜𑀢𑁄𑀢𑀺 ¶ 𑀯𑀸𑀘𑀸𑀬 𑀅𑀲𑀜𑁆𑀜𑀢𑁄 𑀯𑀸𑀘𑀲𑀺𑀓𑁂𑀦 𑀅𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺𑀁. 𑀢𑁂𑀦𑀸𑀢𑀺 𑀢𑁂𑀦 𑀉𑀪𑀬𑁂𑀦 𑀲𑀁𑀬𑀫𑁂𑀦 𑀅𑀲𑀁𑀬𑀫𑁂𑀦 𑀘. 𑀫𑁂𑀢𑀺 𑀫𑀬𑁆𑀳𑀁. 𑀏𑀢𑀸𑀤𑀺𑀲𑁄 𑀯𑀡𑁆𑀡𑁄𑀢𑀺 𑀏𑀤𑀺𑀲𑁄. 𑀬𑀣𑀸 𑀢𑁆𑀯𑀁, 𑀦𑀸𑀭𑀤, 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀲𑀺, 𑀏𑀯𑀭𑀽𑀧𑁄, 𑀓𑀸𑀬𑁂𑀦 𑀫𑀦𑀼𑀲𑁆𑀲𑀲𑀡𑁆𑀞𑀸𑀦𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀫𑀼𑀔𑁂𑀦 𑀲𑀽𑀓𑀭𑀲𑀤𑀺𑀲𑁄 𑀆𑀲𑀺𑀦𑁆𑀢𑀺 𑀬𑁄𑀚𑀦𑀸. 𑀯𑀡𑁆𑀡𑀲𑀤𑁆𑀤𑁄 𑀳𑀺 𑀇𑀥 𑀙𑀯𑀺𑀬𑀁 𑀲𑀡𑁆𑀞𑀸𑀦𑁂 𑀘 𑀤𑀝𑁆𑀞𑀩𑁆𑀩𑁄.

𑀏𑀯𑀁 𑀧𑁂𑀢𑁄 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑁄 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀫𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

‘‘𑀢𑀁 𑀢𑁆𑀬𑀸𑀳𑀁 𑀦𑀸𑀭𑀤 𑀩𑁆𑀭𑀽𑀫𑀺, 𑀲𑀸𑀫𑀁 𑀤𑀺𑀝𑁆𑀞𑀫𑀺𑀤𑀁 𑀢𑀬𑀸;

𑀫𑀸𑀓𑀸𑀲𑀺 𑀫𑀼𑀔𑀲𑀸 𑀧𑀸𑀧𑀁, 𑀫𑀸 𑀔𑁄 𑀲𑀽𑀓𑀭𑀫𑀼𑀔𑁄 𑀅𑀳𑀽’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀦𑁆𑀢𑀺 𑀢𑀲𑁆𑀫𑀸. 𑀢𑁆𑀬𑀸𑀳𑀦𑁆𑀢𑀺 𑀢𑁂 𑀅𑀳𑀁. 𑀦𑀸𑀭𑀤𑀸𑀢𑀺 𑀣𑁂𑀭𑀁 𑀆𑀮𑀧𑀢𑀺. 𑀩𑁆𑀭𑀽𑀫𑀻𑀢𑀺 𑀓𑀣𑁂𑀫𑀺. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀇𑀤𑀦𑁆𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀲𑁆𑀫𑀸, 𑀪𑀦𑁆𑀢𑁂 𑀦𑀸𑀭𑀤, 𑀇𑀤𑀁 𑀫𑀫 𑀲𑀭𑀻𑀭𑀁 𑀕𑀮𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀫𑀦𑀼𑀲𑁆𑀲𑀲𑀡𑁆𑀞𑀸𑀦𑀁, 𑀉𑀧𑀭𑀺 𑀲𑀽𑀓𑀭𑀲𑀡𑁆𑀞𑀸𑀦𑀁, 𑀢𑀬𑀸 𑀧𑀘𑁆𑀘𑀓𑁆𑀔𑀢𑁄𑀯 𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀢𑁂 𑀅𑀳𑀁 𑀑𑀯𑀸𑀤𑀯𑀲𑁂𑀦 𑀯𑀤𑀸𑀫𑀻𑀢𑀺. 𑀓𑀺𑀦𑁆𑀢𑀺 𑀘𑁂𑀢𑀺 𑀆𑀳 ‘‘𑀫𑀸𑀓𑀸𑀲𑀺 𑀫𑀼𑀔𑀲𑀸 𑀧𑀸𑀧𑀁, 𑀫𑀸 𑀔𑁄 𑀲𑀽𑀓𑀭𑀫𑀼𑀔𑁄 𑀅𑀳𑀽’’𑀢𑀺. 𑀢𑀢𑁆𑀣 𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀫𑀼𑀔𑀲𑀸𑀢𑀺 𑀫𑀼𑀔𑁂𑀦. 𑀔𑁄𑀢𑀺 𑀅𑀯𑀥𑀸𑀭𑀡𑁂, 𑀯𑀸𑀘𑀸𑀬 𑀧𑀸𑀧𑀓𑀫𑁆𑀫𑀁 𑀫𑀸𑀓𑀸𑀲𑀺 𑀫𑀸 𑀓𑀭𑁄𑀳𑀺. 𑀫𑀸 ¶ 𑀔𑁄 𑀲𑀽𑀓𑀭𑀫𑀼𑀔𑁄 𑀅𑀳𑀽𑀢𑀺 𑀅𑀳𑀁 𑀯𑀺𑀬 𑀲𑀽𑀓𑀭𑀫𑀼𑀔𑁄 𑀫𑀸 𑀅𑀳𑁄𑀲𑀺𑀬𑁂𑀯. 𑀲𑀘𑁂 𑀧𑀦 𑀢𑁆𑀯𑀁 𑀫𑀼𑀔𑀭𑁄 𑀳𑀼𑀢𑁆𑀯𑀸 𑀯𑀸𑀘𑀸𑀬 𑀧𑀸𑀧𑀁 𑀓𑀭𑁂𑀬𑁆𑀬𑀸𑀲𑀺, 𑀏𑀓𑀁𑀲𑁂𑀦 𑀲𑀽𑀓𑀭𑀫𑀼𑀔𑁄 𑀪𑀯𑁂𑀬𑁆𑀬𑀸𑀲𑀺, 𑀢𑀲𑁆𑀫𑀸 𑀫𑀸𑀓𑀸𑀲𑀺 𑀫𑀼𑀔𑀲𑀸 𑀧𑀸𑀧𑀦𑁆𑀢𑀺 𑀨𑀮𑀧𑀝𑀺𑀲𑁂𑀥𑀦𑀫𑀼𑀔𑁂𑀦𑀧𑀺 𑀳𑁂𑀢𑀼𑀫𑁂𑀯 𑀧𑀝𑀺𑀲𑁂𑀥𑁂𑀢𑀺.

𑀅𑀣𑀸𑀬𑀲𑁆𑀫𑀸 𑀦𑀸𑀭𑀤𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀢𑁆𑀣𑀼𑀦𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸, ‘‘𑀦𑀸𑀭𑀤, 𑀧𑀼𑀩𑁆𑀩𑁂𑀯 𑀫𑀬𑀸 ¶ 𑀲𑁄 𑀲𑀢𑁆𑀣𑁄 𑀤𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀆𑀤𑀻𑀦𑀯𑀁, 𑀯𑀘𑀻𑀲𑀼𑀘𑀭𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀲𑀽𑀓𑀭𑀫𑀼𑀔𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀽𑀢𑀺𑀫𑀼𑀔𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀤𑀺𑀩𑁆𑀩𑀁 ¶ 𑀲𑀼𑀪𑀁 𑀥𑀸𑀭𑁂𑀲𑀺 𑀯𑀡𑁆𑀡𑀥𑀸𑀢𑀼𑀦𑁆𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂 𑀅𑀜𑁆𑀜𑀢𑀭𑀁 𑀧𑀽𑀢𑀺𑀫𑀼𑀔𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀤𑁆𑀯𑁂 𑀓𑀼𑀮𑀧𑀼𑀢𑁆𑀢𑀸 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼. 𑀅𑀣 𑀅𑀜𑁆𑀜𑀢𑀭𑁄 𑀧𑀸𑀧𑀚𑁆𑀛𑀸𑀲𑀬𑁄 𑀧𑁂𑀲𑀼𑀜𑁆𑀜𑀸𑀪𑀺𑀭𑀢𑁄 𑀪𑀺𑀓𑁆𑀔𑀼 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀉𑀧𑀕𑀜𑁆𑀙𑀺. 𑀣𑁂𑀭𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀤𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀢𑀁 𑀕𑀳𑁂𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑁂 𑀤𑀺𑀲𑁆𑀯𑀸 𑀢𑁂𑀲𑀼 𑀣𑁂𑀭𑁂𑀲𑀼 𑀅𑀢𑀺𑀯𑀺𑀬 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀧𑀝𑀺𑀫𑀸𑀦𑁂𑀲𑀼𑀁. 𑀲𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀼𑀦𑁆𑀤𑀭𑁄 𑀯𑀢𑀸𑀬𑀁 𑀕𑁄𑀘𑀭𑀕𑀸𑀫𑁄, 𑀫𑀦𑀼𑀲𑁆𑀲𑀸 𑀘 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀧𑀡𑀻𑀢𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺, 𑀅𑀬𑀜𑁆𑀘 𑀯𑀺𑀳𑀸𑀭𑁄 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁄, 𑀲𑀓𑁆𑀓𑀸 𑀫𑁂 𑀇𑀥 𑀲𑀼𑀔𑁂𑀦 𑀯𑀲𑀺𑀢𑀼𑀁. 𑀇𑀫𑁂𑀲𑀼 𑀧𑀦 𑀪𑀺𑀓𑁆𑀔𑀽𑀲𑀼 𑀇𑀥 𑀯𑀲𑀦𑁆𑀢𑁂𑀲𑀼 𑀫𑀬𑁆𑀳𑀁 𑀨𑀸𑀲𑀼𑀯𑀺𑀳𑀸𑀭𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀯𑀸𑀲𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀳𑀦𑁆𑀤𑀸𑀳𑀁 𑀇𑀫𑁂 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀣𑀸 𑀦 𑀧𑀼𑀦 𑀇𑀥 𑀯𑀲𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀫𑀳𑀸𑀣𑁂𑀭𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑁂 𑀧𑁂𑀲𑀼𑀡𑀺𑀓𑁄 𑀪𑀺𑀓𑁆𑀔𑀼 𑀣𑁄𑀓𑀁 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀳𑀸𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑁂𑀦 ‘‘𑀓𑀺𑀁, 𑀆𑀯𑀼𑀲𑁄, 𑀯𑀺𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑁂𑀳𑀺, 𑀆𑀯𑀼𑀲𑁄’’𑀢𑀺 𑀣𑁂𑀭𑁂𑀦 𑀅𑀦𑀼𑀜𑁆𑀜𑀸𑀢𑁄 𑀆𑀳 𑁋 ‘‘𑀏𑀲𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 ¶ 𑀲𑀳𑀸𑀬𑀓𑀢𑁆𑀣𑁂𑀭𑁄 𑀲𑀫𑁆𑀫𑀼𑀔𑀸 𑀫𑀺𑀢𑁆𑀢𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀫𑁆𑀫𑀼𑀔𑀸 𑀲𑀧𑀢𑁆𑀢𑁄 𑀯𑀺𑀬 𑀉𑀧𑀯𑀤𑀢𑀻’’𑀢𑀺. ‘‘𑀓𑀺𑀁 𑀓𑀣𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀲𑀼𑀡𑀸𑀣, 𑀪𑀦𑁆𑀢𑁂, ‘𑀏𑀲𑁄 𑀫𑀳𑀸𑀣𑁂𑀭𑁄 𑀲𑀞𑁄 𑀫𑀸𑀬𑀸𑀯𑀻 𑀓𑀼𑀳𑀓𑁄 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀕𑀼𑀡𑀁 𑀓𑀣𑁂𑀢𑀻’’𑀢𑀺 𑀆𑀳. ‘‘𑀫𑀸, 𑀆𑀯𑀼𑀲𑁄, 𑀏𑀯𑀁 𑀪𑀡𑀺, 𑀦 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀫𑀁 𑀉𑀧𑀯𑀤𑀺𑀲𑁆𑀲𑀢𑀺, 𑀕𑀺𑀳𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀫 𑀲𑀪𑀸𑀯𑀁 𑀚𑀸𑀦𑀸𑀢𑀺 ‘𑀧𑁂𑀲𑀮𑁄 𑀓𑀮𑁆𑀬𑀸𑀡𑀲𑀻𑀮𑁄’’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀏𑀯𑀁 𑀘𑀺𑀦𑁆𑀢𑁂𑀣, 𑀢𑀁 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀫𑀬𑁆𑀳𑀁 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀯𑁂𑀭𑀁 𑀦𑀢𑁆𑀣𑀺, 𑀓𑀲𑁆𑀫𑀸 𑀅𑀳𑀁 𑀢𑁂𑀦 𑀅𑀯𑀼𑀢𑁆𑀢𑀁 ‘𑀯𑀼𑀢𑁆𑀢’𑀦𑁆𑀢𑀺 𑀯𑀤𑀸𑀫𑀺. 𑀳𑁄𑀢𑀼, 𑀓𑀸𑀮𑀦𑁆𑀢𑀭𑁂𑀦 𑀲𑀬𑀫𑁂𑀯 𑀚𑀸𑀦𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑁄𑀧𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑀤𑁄𑀲𑁂𑀦 𑀤𑁆𑀯𑁂𑀴𑁆𑀳𑀓𑀘𑀺𑀢𑁆𑀢𑁄 ‘‘𑀏𑀯𑀫𑁆𑀧𑀺 𑀲𑀺𑀬𑀸’’𑀢𑀺 𑀲𑀸𑀲𑀗𑁆𑀓𑀳𑀤𑀬𑁄 𑀳𑀼𑀢𑁆𑀯𑀸 𑀣𑁄𑀓𑀁 𑀲𑀺𑀣𑀺𑀮𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺. 𑀲𑁄 𑀩𑀸𑀮𑁄 𑀧𑀞𑀫𑀁 𑀫𑀳𑀸𑀣𑁂𑀭𑀁 𑀧𑀭𑀺𑀪𑀺𑀦𑁆𑀤𑀺𑀢𑁆𑀯𑀸 𑀇𑀢𑀭𑀫𑁆𑀧𑀺 𑀣𑁂𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀪𑀺𑀦𑁆𑀤𑀺. 𑀅𑀣 𑀢𑁂 𑀉𑀪𑁄𑀧𑀺 𑀣𑁂𑀭𑀸 𑀤𑀼𑀢𑀺𑀬𑀤𑀺𑀯𑀲𑁂 𑀅𑀜𑁆𑀜𑀫𑀜𑁆𑀜𑀁 𑀅𑀦𑀸𑀮𑀧𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀫𑀸𑀤𑀸𑀬 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 ¶ 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀫𑀻𑀘𑀺𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀯𑀺𑀪𑀸𑀢𑀸𑀬 𑀘 𑀭𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁 𑀅𑀕𑀫𑀁𑀲𑀼.

𑀧𑁂𑀲𑀼𑀡𑀺𑀓𑀁 𑀧𑀦 𑀪𑀺𑀓𑁆𑀔𑀼𑀁 𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀣𑁂𑀭𑀸 𑀓𑀼𑀳𑀺𑀁 𑀕𑀢𑀸’’𑀢𑀺? 𑀲𑁄 𑀆𑀳 𑁋 ‘‘𑀲𑀩𑁆𑀩𑀭𑀢𑁆𑀢𑀺𑀁 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀢𑁆𑀯𑀸 𑀫𑀬𑀸 ‘𑀫𑀸 𑀓𑀮𑀳𑀁 𑀓𑀭𑁄𑀣, 𑀲𑀫𑀕𑁆𑀕𑀸 𑀳𑁄𑀣, 𑀓𑀮𑀳𑁄 𑀦𑀸𑀫 𑀅𑀦𑀢𑁆𑀣𑀸𑀯𑀳𑁄 𑀆𑀬𑀢𑀺𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑁄 𑀅𑀓𑀼𑀲𑀮𑀲𑀁𑀯𑀢𑁆𑀢𑀦𑀺𑀓𑁄, 𑀧𑀼𑀭𑀺𑀫𑀓𑀸𑀧𑀺 𑀓𑀮𑀳𑁂𑀦 𑀫𑀳𑀢𑀸 𑀳𑀺𑀢𑀸 𑀧𑀭𑀺𑀪𑀝𑁆𑀞𑀸’𑀢𑀺𑀆𑀤𑀻𑀦𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 𑀫𑀫 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀸’’𑀢𑀺. 𑀢𑀢𑁄 𑀫𑀦𑀼𑀲𑁆𑀲𑀸 ‘‘𑀣𑁂𑀭𑀸 𑀢𑀸𑀯 𑀕𑀘𑁆𑀙𑀦𑁆𑀢𑀼, 𑀢𑀼𑀫𑁆𑀳𑁂 𑀧𑀦 𑀅𑀫𑁆𑀳𑀸𑀓𑀁 𑀅𑀦𑀼𑀓𑀫𑁆𑀧𑀸𑀬 𑀇𑀥𑁂𑀯 𑀅𑀦𑀼𑀓𑁆𑀓𑀡𑁆𑀞𑀺𑀢𑁆𑀯𑀸 𑀯𑀲𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀓𑀢𑀺𑀧𑀸𑀳𑁂𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀪𑀺𑀓𑁆𑀔𑀽 ¶ 𑀆𑀯𑀸𑀲𑀮𑁄𑀪𑁂𑀦 𑀧𑀭𑀺𑀪𑀺𑀦𑁆𑀦𑀸, 𑀩𑀳𑀼𑀁 𑀯𑀢 𑀫𑀬𑀸 𑀧𑀸𑀧𑀓𑀫𑁆𑀫𑀁 𑀧𑀲𑀼𑀢’’𑀦𑁆𑀢𑀺 ¶ 𑀩𑀮𑀯𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑁄 𑀲𑁄𑀓𑀯𑁂𑀕𑁂𑀦 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀦𑀘𑀺𑀭𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺.

𑀇𑀢𑀭𑁂 𑀤𑁆𑀯𑁂 𑀲𑀳𑀸𑀬𑀓𑀢𑁆𑀣𑁂𑀭𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀫𑀸𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀁 𑀪𑁂𑀤𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑀲𑁆𑀲 𑀅𑀪𑀽𑀢𑀪𑀸𑀯𑀁 𑀜𑀢𑁆𑀯𑀸 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑀫𑁂𑀯 𑀆𑀯𑀸𑀲𑀁 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑁆𑀯𑁂 𑀣𑁂𑀭𑁂 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀁𑀲𑀼. 𑀣𑁂𑀭𑀸 𑀘 𑀢𑀢𑁆𑀣𑁂𑀯 𑀯𑀲𑀦𑁆𑀢𑀸 𑀲𑀧𑁆𑀧𑀸𑀬𑀆𑀳𑀸𑀭𑀮𑀸𑀪𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀧𑁂𑀲𑀼𑀡𑀺𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀧𑀽𑀢𑀺𑀫𑀼𑀔𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑀸𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺, 𑀫𑀼𑀔𑀢𑁄 𑀧𑀦 𑀧𑀼𑀴𑀯𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀫𑀼𑀔𑀁 𑀔𑀸𑀤𑀦𑁆𑀢𑀺, 𑀢𑀲𑁆𑀲 𑀤𑀽𑀭𑀫𑁆𑀧𑀺 𑀑𑀓𑀸𑀲𑀁 𑀨𑀭𑀺𑀢𑁆𑀯𑀸 𑀤𑀼𑀕𑁆𑀕𑀦𑁆𑀥𑀁 𑀯𑀸𑀬𑀢𑀺. 𑀅𑀣𑀸𑀬𑀲𑁆𑀫𑀸 𑀦𑀸𑀭𑀤𑁄 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑁋

‘‘𑀤𑀺𑀩𑁆𑀩𑀁 𑀲𑀼𑀪𑀁 𑀥𑀸𑀭𑁂𑀲𑀺 𑀯𑀡𑁆𑀡𑀥𑀸𑀢𑀼𑀁, 𑀯𑁂𑀳𑀸𑀬𑀲𑀁 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂;

𑀫𑀼𑀔𑀜𑁆𑀘 𑀢𑁂 𑀓𑀺𑀫𑀬𑁄 𑀧𑀽𑀢𑀺𑀕𑀦𑁆𑀥𑀁, 𑀔𑀸𑀤𑀦𑁆𑀢𑀺 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀧𑀼𑀩𑁆𑀩𑁂’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀢𑀢𑁆𑀣 𑀤𑀺𑀩𑁆𑀩𑀦𑁆𑀢𑀺 𑀤𑀺𑀯𑀺 𑀪𑀯𑀁 𑀤𑁂𑀯𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀁. 𑀇𑀥 𑀧𑀦 𑀤𑀺𑀩𑁆𑀩𑀁 𑀯𑀺𑀬𑀸𑀢𑀺 𑀤𑀺𑀩𑁆𑀩𑀁. 𑀲𑀼𑀪𑀦𑁆𑀢𑀺 𑀲𑁄𑀪𑀦𑀁, 𑀲𑀼𑀦𑁆𑀤𑀭𑀪𑀸𑀯𑀁 𑀯𑀸. 𑀯𑀡𑁆𑀡𑀥𑀸𑀢𑀼𑀦𑁆𑀢𑀺 𑀙𑀯𑀺𑀯𑀡𑁆𑀡𑀁. 𑀥𑀸𑀭𑁂𑀲𑀻𑀢𑀺 𑀯𑀳𑀲𑀺 ¶ . 𑀯𑁂𑀳𑀸𑀬𑀲𑀁 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀯𑁂𑀳𑀸𑀬𑀲𑀲𑀜𑁆𑀜𑀺𑀢𑁂 𑀅𑀦𑁆𑀢𑀮𑀺𑀓𑁆𑀔𑁂 𑀢𑀺𑀝𑁆𑀞𑀲𑀺. 𑀓𑁂𑀘𑀺 𑀧𑀦 ‘‘𑀯𑀺𑀳𑀸𑀬𑀲𑀁 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀧𑀸𑀞𑀁 𑀯𑀢𑁆𑀯𑀸 𑀯𑀺𑀳𑀸𑀬𑀲𑀁 𑀑𑀪𑀸𑀲𑁂𑀦𑁆𑀢𑁄 𑀅𑀦𑁆𑀢𑀮𑀺𑀓𑁆𑀔𑁂 𑀢𑀺𑀝𑁆𑀞𑀲𑀻𑀢𑀺 𑀯𑀘𑀦𑀲𑁂𑀲𑁂𑀦 𑀅𑀢𑁆𑀣𑀁 ¶ 𑀯𑀤𑀦𑁆𑀢𑀺. 𑀧𑀽𑀢𑀺𑀕𑀦𑁆𑀥𑀦𑁆𑀢𑀺 𑀓𑀼𑀡𑀧𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀧𑀼𑀩𑁆𑀩𑁂𑀢𑀺 𑀧𑀭𑀫𑀤𑀼𑀕𑁆𑀕𑀦𑁆𑀥𑀁 𑀢𑁂 𑀫𑀼𑀔𑀁 𑀓𑀺𑀫𑀬𑁄 𑀔𑀸𑀤𑀦𑁆𑀢𑀺, 𑀓𑀸𑀬𑁄 𑀘 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀓𑀻𑀤𑀺𑀲𑀁 𑀦𑀸𑀫 𑀓𑀫𑁆𑀫𑀁 𑀏𑀯𑀭𑀽𑀧𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀁 𑀧𑀼𑀩𑁆𑀩𑁂 𑀢𑁆𑀯𑀁 𑀅𑀓𑀸𑀲𑀻𑀢𑀺 𑀧𑀼𑀘𑁆𑀙𑀺.

𑀏𑀯𑀁 ¶ 𑀣𑁂𑀭𑁂𑀦 𑀲𑁄 𑀧𑁂𑀢𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑁋

‘‘𑀲𑀫𑀡𑁄 𑀅𑀳𑀁 𑀧𑀸𑀧𑁄𑀢𑀺𑀤𑀼𑀝𑁆𑀞𑀯𑀸𑀘𑁄, 𑀢𑀧𑀲𑁆𑀲𑀺𑀭𑀽𑀧𑁄 𑀫𑀼𑀔𑀲𑀸 𑀅𑀲𑀜𑁆𑀜𑀢𑁄;

𑀮𑀤𑁆𑀥𑀸 𑀘 𑀫𑁂 𑀢𑀫𑀲𑀸 𑀯𑀡𑁆𑀡𑀥𑀸𑀢𑀼, 𑀫𑀼𑀔𑀜𑁆𑀘 𑀫𑁂 𑀧𑁂𑀲𑀼𑀡𑀺𑀬𑁂𑀦 𑀧𑀽𑀢𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀫𑀡𑁄 𑀅𑀳𑀁 𑀧𑀸𑀧𑁄𑀢𑀺 𑀅𑀳𑀁 𑀮𑀸𑀫𑀓𑁄 𑀲𑀫𑀡𑁄 𑀧𑀸𑀧𑀪𑀺𑀓𑁆𑀔𑀼 𑀅𑀳𑁄𑀲𑀺𑀁. 𑀅𑀢𑀺𑀤𑀼𑀝𑁆𑀞𑀯𑀸𑀘𑁄𑀢𑀺 𑀅𑀢𑀺𑀤𑀼𑀝𑁆𑀞𑀯𑀘𑀦𑁄, 𑀧𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀮𑀗𑁆𑀖𑀺𑀢𑁆𑀯𑀸 𑀯𑀢𑁆𑀢𑀸, 𑀧𑀭𑁂𑀲𑀁 𑀕𑀼𑀡𑀧𑀭𑀺𑀥𑀁𑀲𑀓𑀯𑀘𑀦𑁄𑀢𑀺 𑀅𑀢𑁆𑀣𑁄. ‘‘𑀅𑀢𑀺𑀤𑀼𑀓𑁆𑀔𑀯𑀸𑀘𑁄’’𑀢𑀺 𑀯𑀸 𑀧𑀸𑀞𑁄, 𑀅𑀢𑀺𑀯𑀺𑀬 𑀨𑀭𑀼𑀲𑀯𑀘𑀦𑁄 𑀫𑀼𑀲𑀸𑀯𑀸𑀤𑀧𑁂𑀲𑀼𑀜𑁆𑀜𑀸𑀤𑀺𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑀺𑀭𑀢𑁄. 𑀢𑀧𑀲𑁆𑀲𑀺𑀭𑀽𑀧𑁄𑀢𑀺 𑀲𑀫𑀡𑀧𑀢𑀺𑀭𑀽𑀧𑀓𑁄. 𑀫𑀼𑀔𑀲𑀸𑀢𑀺 𑀫𑀼𑀔𑁂𑀦. 𑀮𑀤𑁆𑀥𑀸𑀢𑀺 𑀧𑀝𑀺𑀮𑀤𑁆𑀥𑀸. 𑀘-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀫𑁂𑀢𑀺 𑀫𑀬𑀸. 𑀢𑀧𑀲𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀦. 𑀧𑁂𑀲𑀼𑀡𑀺𑀬𑁂𑀦𑀸𑀢𑀺 𑀧𑀺𑀲𑀼𑀡𑀯𑀸𑀘𑀸𑀬. 𑀧𑀼𑀢𑀻𑀢𑀺 𑀧𑀽𑀢𑀺𑀕𑀦𑁆𑀥𑀁.

𑀏𑀯𑀁 𑀲𑁄 𑀧𑁂𑀢𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀇𑀤𑀸𑀦𑀺 𑀣𑁂𑀭𑀲𑁆𑀲 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

‘‘𑀢𑀬𑀺𑀤𑀁 𑀢𑀬𑀸 𑀦𑀸𑀭𑀤 𑀲𑀸𑀫𑀁 𑀤𑀺𑀝𑁆𑀞𑀁,

𑀅𑀦𑀼𑀓𑀫𑁆𑀧𑀓𑀸 𑀬𑁂 𑀓𑀼𑀲𑀮𑀸 𑀯𑀤𑁂𑀬𑁆𑀬𑀼𑀁;

𑀫𑀸 𑀧𑁂𑀲𑀼𑀡𑀁 𑀫𑀸 𑀘 𑀫𑀼𑀲𑀸 𑀅𑀪𑀸𑀡𑀺,

𑀬𑀓𑁆𑀔𑁄 𑀢𑀼𑀯𑀁 𑀳𑁄𑀳𑀺𑀲𑀺 𑀓𑀸𑀫𑀓𑀸𑀫𑀻’’𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀢𑀬𑀺𑀤𑀦𑁆𑀢𑀺 𑀢𑀁 𑀇𑀤𑀁 𑀫𑀫 𑀭𑀽𑀧𑀁. 𑀅𑀦𑀼𑀓𑀫𑁆𑀧𑀓𑀸 𑀬𑁂 𑀓𑀼𑀲𑀮𑀸 𑀯𑀤𑁂𑀬𑁆𑀬𑀼𑀦𑁆𑀢𑀺 𑀬𑁂 𑀅𑀦𑀼𑀓𑀫𑁆𑀧𑀦𑀲𑀻𑀮𑀸 𑀓𑀸𑀭𑀼𑀡𑀺𑀓𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀓𑀼𑀲𑀮𑀸 𑀦𑀺𑀧𑀼𑀡𑀸 𑀩𑀼𑀤𑁆𑀥𑀸𑀤𑀬𑁄 𑀬𑀁 𑀯𑀤𑁂𑀬𑁆𑀬𑀼𑀁, 𑀢𑀤𑁂𑀯 𑀯𑀤𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀁 𑀑𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸 𑀧𑁂𑀲𑀼𑀡𑀁 𑀫𑀸 𑀘 𑀫𑀼𑀲𑀸 𑀅𑀪𑀸𑀡𑀺, 𑀬𑀓𑁆𑀔𑁄 𑀢𑀼𑀯𑀁 𑀳𑁄𑀳𑀺𑀲𑀺 𑀓𑀸𑀫𑀓𑀸𑀫𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑁂𑀲𑀼𑀡𑀁 𑀧𑀺𑀲𑀼𑀡𑀯𑀘𑀦𑀁 𑀫𑀼𑀲𑀸 𑀘 𑀫𑀸 𑀅𑀪𑀸𑀡𑀺 ¶ 𑀫𑀸 𑀓𑀣𑁂𑀳𑀺. 𑀬𑀤𑀺 𑀳𑀺 𑀢𑁆𑀯𑀁 𑀫𑀼𑀲𑀸𑀯𑀸𑀤𑀁 𑀧𑀺𑀲𑀼𑀡𑀯𑀸𑀘𑀜𑁆𑀘 𑀧𑀳𑀸𑀬 𑀯𑀸𑀘𑀸𑀬 𑀲𑀜𑁆𑀜𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀬𑀓𑁆𑀔𑁄 𑀯𑀸 𑀤𑁂𑀯𑁄 𑀯𑀸 𑀤𑁂𑀯𑀜𑁆𑀜𑀢𑀭𑁄 𑀯𑀸 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺, 𑀓𑀸𑀫𑀁 𑀓𑀸𑀫𑀺𑀢𑀩𑁆𑀩𑀁 𑀉𑀴𑀸𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 ¶ 𑀧𑀝𑀺𑀮𑀪𑀺𑀢𑁆𑀯𑀸 𑀢𑀢𑁆𑀣 𑀓𑀸𑀫𑀦𑀲𑀻𑀮𑁄 𑀬𑀣𑀸𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀘𑀭𑀡𑁂𑀦 𑀅𑀪𑀺𑀭𑀫𑀡𑀲𑀻𑀮𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀢𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀢𑁆𑀣𑀼 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀧𑀽𑀢𑀺𑀫𑀼𑀔𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀺𑀝𑁆𑀞𑀥𑀻𑀢𑀮𑀺𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀬𑀁 𑀓𑀺𑀜𑁆𑀘𑀸𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀕𑀳𑀧𑀢𑀺𑀦𑁄 𑀥𑀻𑀢𑀼 𑀥𑀻𑀢𑀸𑀬 𑀤𑀸𑀭𑀺𑀓𑀸𑀬 𑀥𑀸𑀢𑀺 𑀧𑀺𑀝𑁆𑀞𑀥𑀻𑀢𑀮𑀺𑀓𑀁 𑀅𑀤𑀸𑀲𑀺 ‘‘𑀅𑀬𑀁 𑀢𑁂 𑀥𑀻𑀢𑀸, 𑀇𑀫𑀁 𑀕𑀳𑁂𑀢𑁆𑀯𑀸 𑀓𑀻𑀴𑀲𑁆𑀲𑀽’’𑀢𑀺. 𑀲𑀸 𑀢𑀢𑁆𑀣 𑀥𑀻𑀢𑀼𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣𑀲𑁆𑀲𑀸 𑀏𑀓𑀤𑀺𑀯𑀲𑀁 𑀢𑀁 𑀕𑀳𑁂𑀢𑁆𑀯𑀸 𑀓𑀻𑀴𑀦𑁆𑀢𑀺𑀬𑀸 𑀧𑀫𑀸𑀤𑁂𑀦 𑀧𑀢𑀺𑀢𑁆𑀯𑀸 𑀪𑀺𑀚𑁆𑀚𑀺. 𑀢𑀢𑁄 𑀤𑀸𑀭𑀺𑀓𑀸 ‘‘𑀫𑀫 𑀥𑀻𑀢𑀸 𑀫𑀢𑀸’’𑀢𑀺 𑀧𑀭𑁄𑀤𑀺. 𑀢𑀁 𑀭𑁄𑀤𑀦𑁆𑀢𑀺𑀁 𑀓𑁄𑀘𑀺𑀧𑀺 𑀕𑁂𑀳𑀚𑀦𑁄 𑀲𑀜𑁆𑀜𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑀢𑁆𑀣𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀕𑁂𑀳𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀫𑀳𑀸𑀲𑁂𑀝𑁆𑀞𑀺 𑀘 𑀪𑀕𑀯𑀢𑁄 ¶ 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁄 𑀅𑀳𑁄𑀲𑀺. 𑀥𑀸𑀢𑀺 𑀢𑀁 𑀤𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀲𑁆𑀲𑀸𑀬𑀁 𑀤𑀸𑀭𑀺𑀓𑀸 𑀭𑁄𑀤𑀢𑀻’’𑀢𑀺 𑀆𑀳. 𑀥𑀸𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺 𑀢𑀁 𑀤𑀸𑀭𑀺𑀓𑀁 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀢𑀯 𑀥𑀻𑀢𑀼𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 𑁋 ‘‘𑀪𑀦𑁆𑀢𑁂, 𑀫𑀫 𑀦𑀢𑁆𑀢𑀼𑀥𑀻𑀢𑀭𑀁 𑀧𑀺𑀝𑁆𑀞𑀥𑀻𑀢𑀮𑀺𑀓𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄, 𑀢𑀁 𑀫𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑀸𑀢𑀦𑀸𑀬 𑀅𑀥𑀺𑀯𑀸𑀲𑁂𑀣𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀪𑀕𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁂𑀝𑁆𑀞𑀺𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋

‘‘𑀬𑀁 𑀓𑀺𑀜𑁆𑀘𑀸𑀭𑀫𑁆𑀫𑀡𑀁 𑀓𑀢𑁆𑀯𑀸, 𑀤𑀚𑁆𑀚𑀸 𑀤𑀸𑀦𑀁 𑀅𑀫𑀘𑁆𑀙𑀭𑀻;

𑀧𑀼𑀩𑁆𑀩𑀧𑁂𑀢𑁂 𑀘 𑀆𑀭𑀩𑁆𑀪, 𑀅𑀣 𑀯𑀸 𑀯𑀢𑁆𑀣𑀼𑀤𑁂𑀯𑀢𑀸.

‘‘𑀘𑀢𑁆𑀢𑀸𑀭𑁄 ¶ ¶ 𑀘 𑀫𑀳𑀸𑀭𑀸𑀚𑁂, 𑀮𑁄𑀓𑀧𑀸𑀮𑁂 𑀬𑀲𑀲𑁆𑀲𑀺𑀦𑁂;

𑀓𑀼𑀯𑁂𑀭𑀁 𑀥𑀢𑀭𑀝𑁆𑀞𑀜𑁆𑀘, 𑀯𑀺𑀭𑀽𑀧𑀓𑁆𑀔𑀁 𑀯𑀺𑀭𑀽𑀴𑁆𑀳𑀓𑀁;

𑀢𑁂 𑀘𑁂𑀯 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺, 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸.

‘‘𑀦 𑀳𑀺 𑀭𑀼𑀡𑁆𑀡𑀁 𑀯𑀸 𑀲𑁄𑀓𑁄 𑀯𑀸, 𑀬𑀸 𑀘𑀜𑁆𑀜𑀸 𑀧𑀭𑀺𑀤𑁂𑀯𑀦𑀸;

𑀦 𑀢𑀁 𑀧𑁂𑀢𑀲𑁆𑀲 𑀅𑀢𑁆𑀣𑀸𑀬, 𑀏𑀯𑀁 𑀢𑀺𑀝𑁆𑀞𑀦𑁆𑀢𑀺 𑀜𑀸𑀢𑀬𑁄.

‘‘𑀅𑀬𑀜𑁆𑀘 𑀔𑁄 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀲𑀗𑁆𑀖𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬𑀲𑁆𑀲, 𑀞𑀸𑀦𑀲𑁄 𑀉𑀧𑀓𑀧𑁆𑀧𑀢𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑁧𑁦. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀸𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀫𑀗𑁆𑀕𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀬𑀁 𑀓𑀺𑀜𑁆𑀘𑀺 𑀆𑀭𑀩𑁆𑀪 𑀉𑀤𑁆𑀤𑀺𑀲𑁆𑀲. 𑀤𑀚𑁆𑀚𑀸𑀢𑀺 𑀤𑀤𑁂𑀬𑁆𑀬. 𑀅𑀫𑀘𑁆𑀙𑀭𑀻𑀢𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀸𑀲𑀳𑀦𑀮𑀓𑁆𑀔𑀡𑀲𑁆𑀲 𑀫𑀘𑁆𑀙𑁂𑀭𑀲𑁆𑀲 𑀅𑀪𑀸𑀯𑀢𑁄 𑀅𑀫𑀘𑁆𑀙𑀭𑀻, 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀫𑀘𑁆𑀙𑀭𑀺𑀬𑀮𑁄𑀪𑀸𑀤𑀺𑀘𑀺𑀢𑁆𑀢𑀫𑀮𑀁 𑀤𑀽𑀭𑀢𑁄 𑀓𑀢𑁆𑀯𑀸 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑀧𑁂𑀢𑁂 𑀘 𑀆𑀭𑀩𑁆𑀪𑀸𑀢𑀺 𑀧𑀼𑀩𑁆𑀩𑀓𑁂𑀧𑀺 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲. 𑀯𑀢𑁆𑀣𑀼𑀤𑁂𑀯𑀢𑀸𑀢𑀺 𑀖𑀭𑀯𑀢𑁆𑀣𑀼𑀆𑀤𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀆𑀭𑀩𑁆𑀪𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀓𑁂 𑀬𑁂 𑀓𑁂𑀘𑀺 𑀆𑀭𑀩𑁆𑀪 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁧. 𑀢𑀢𑁆𑀣 𑀤𑁂𑀯𑁂𑀲𑀼 𑀢𑀸𑀯 𑀏𑀓𑀘𑁆𑀘𑁂 𑀧𑀸𑀓𑀝𑁂 𑀤𑁂𑀯𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑁂’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂 ¶ 𑀦𑀸𑀫𑀢𑁄 𑀕𑀡𑁆𑀳𑀦𑁆𑀢𑁄 ‘‘𑀓𑀼𑀯𑁂𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀯𑁂𑀭𑀦𑁆𑀢𑀺 𑀯𑁂𑀲𑁆𑀲𑀯𑀡𑀁. 𑀥𑀢𑀭𑀝𑁆𑀞𑀦𑁆𑀢𑀺𑀆𑀤𑀻𑀦𑀺 𑀲𑁂𑀲𑀸𑀦𑀁 𑀢𑀺𑀡𑁆𑀡𑀁 𑀮𑁄𑀓𑀧𑀸𑀮𑀸𑀦𑀁 𑀦𑀸𑀫𑀸𑀦𑀺. 𑀢𑁂 𑀘𑁂𑀯 𑀧𑀽𑀚𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑁂 𑀘 𑀫𑀳𑀸𑀭𑀸𑀚𑀸𑀦𑁄 𑀧𑀼𑀩𑁆𑀩𑀧𑁂𑀢𑀯𑀢𑁆𑀣𑀼𑀤𑁂𑀯𑀢𑀸𑀬𑁄 𑀘 𑀉𑀤𑁆𑀤𑀺𑀲𑀦𑀓𑀺𑀭𑀺𑀬𑀸𑀬 𑀧𑀝𑀺𑀫𑀸𑀦𑀺𑀓𑀸 𑀳𑁄𑀦𑁆𑀢𑀺. 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸𑀢𑀺 𑀬𑁂 𑀤𑀸𑀦𑀁 𑀤𑁂𑀦𑁆𑀢𑀺, 𑀢𑁂 𑀤𑀸𑀬𑀓𑀸 𑀘 𑀧𑀭𑁂𑀲𑀁 𑀉𑀤𑁆𑀤𑀺𑀲𑀦𑀫𑀢𑁆𑀢𑁂𑀦 𑀦 𑀦𑀺𑀧𑁆𑀨𑀮𑀸, 𑀅𑀢𑁆𑀢𑀦𑁄 𑀤𑀸𑀦𑀨𑀮𑀲𑁆𑀲 𑀪𑀸𑀕𑀺𑀦𑁄 𑀏𑀯 𑀳𑁄𑀦𑁆𑀢𑀺.

𑁧𑁨. 𑀇𑀤𑀸𑀦𑀺 ‘‘𑀬𑁂 𑀅𑀢𑁆𑀢𑀦𑁄 𑀜𑀸𑀢𑀻𑀦𑀁 𑀫𑀭𑀡𑁂𑀦 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀲𑁄𑀘𑀦𑁆𑀢𑀺, 𑀢𑁂𑀲𑀁 𑀢𑀁 𑀦𑀺𑀭𑀢𑁆𑀣𑀓𑀁, 𑀅𑀢𑁆𑀢𑀧𑀭𑀺𑀢𑀸𑀧𑀦𑀫𑀢𑁆𑀢𑀫𑁂𑀯𑀸’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀺 𑀭𑀼𑀡𑁆𑀡𑀁 𑀯𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀭𑀼𑀡𑁆𑀡𑀦𑁆𑀢𑀺 𑀭𑀼𑀤𑀺𑀢𑀁 𑀅𑀲𑁆𑀲𑀼𑀫𑁄𑀘𑀦𑀁 𑀦 𑀳𑀺 𑀓𑀸𑀢𑀩𑁆𑀩𑀦𑁆𑀢𑀺 ¶ 𑀯𑀘𑀦𑀲𑁂𑀲𑁄. 𑀲𑁄𑀓𑁄𑀢𑀺 𑀲𑁄𑀘𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑁄, 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀸 𑀘𑀜𑁆𑀜𑀸 𑀧𑀭𑀺𑀤𑁂𑀯𑀦𑀸𑀢𑀺 𑀬𑀸 𑀘 𑀭𑀼𑀡𑁆𑀡𑀲𑁄𑀓𑀢𑁄 𑀅𑀜𑁆𑀜𑀸 𑀧𑀭𑀺𑀤𑁂𑀯𑀦𑀸, ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀺𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑁄, 𑀲𑁄𑀧𑀺 𑀦 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄 ¶ . 𑀦 𑀢𑀁 𑀧𑁂𑀢𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀬𑀲𑁆𑀫𑀸 𑀭𑀼𑀡𑁆𑀡𑀁 𑀯𑀸 𑀲𑁄𑀓𑁄 𑀯𑀸 𑀧𑀭𑀺𑀤𑁂𑀯𑀦𑀸 𑀯𑀸𑀢𑀺 𑀲𑀩𑁆𑀩𑀫𑁆𑀧𑀺 𑀢𑀁 𑀧𑁂𑀢𑀲𑁆𑀲 𑀓𑀸𑀮𑀓𑀢𑀲𑁆𑀲 𑀅𑀢𑁆𑀣𑀸𑀬 𑀉𑀧𑀓𑀸𑀭𑀸𑀬 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀳𑀺 𑀢𑀁 𑀓𑀸𑀢𑀩𑁆𑀩𑀁, 𑀢𑀣𑀸𑀧𑀺 𑀏𑀯𑀁 𑀢𑀺𑀝𑁆𑀞𑀦𑁆𑀢𑀺 𑀜𑀸𑀢𑀬𑁄 𑀅𑀯𑀺𑀤𑁆𑀤𑀲𑀼𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩. 𑀏𑀯𑀁 𑀭𑀼𑀡𑁆𑀡𑀸𑀤𑀻𑀦𑀁 𑀦𑀺𑀭𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀸 𑀧𑀼𑀩𑁆𑀩𑀧𑁂𑀢𑀸𑀤𑀺𑀓𑁂 𑀆𑀭𑀩𑁆𑀪 𑀤𑀸𑀬𑀓𑁂𑀦 𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀢𑀲𑁆𑀲𑀸 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀜𑁆𑀘 𑀔𑁄 𑀤𑀓𑁆𑀔𑀺𑀡𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀬𑀦𑁆𑀢𑀺 𑀤𑀸𑀬𑀓𑁂𑀦 𑀢𑀁 𑀤𑀺𑀦𑁆𑀦𑀁 𑀤𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑁄 𑀯𑀤𑀢𑀺. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀬𑀣𑀸 𑀭𑀼𑀡𑁆𑀡𑀸𑀤𑀺 𑀧𑁂𑀢𑀲𑁆𑀲 𑀦 𑀓𑀲𑁆𑀲𑀘𑀺 𑀅𑀢𑁆𑀣𑀸𑀬 𑀳𑁄𑀢𑀺, 𑀦 𑀏𑀯𑀫𑀬𑀁, 𑀅𑀬𑀁 𑀧𑀦 𑀤𑀓𑁆𑀔𑀺𑀡𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬𑀲𑁆𑀲 𑀳𑁄𑀢𑀻𑀢𑀺 𑀯𑀓𑁆𑀔𑀫𑀸𑀦𑀫𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀔𑁄𑀢𑀺 𑀅𑀯𑀥𑀸𑀭𑀡𑁂. 𑀤𑀓𑁆𑀔𑀺𑀡𑀸𑀢𑀺 𑀤𑀸𑀦𑀁. 𑀲𑀗𑁆𑀖𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀢𑀺 𑀅𑀦𑀼𑀢𑁆𑀢𑀭𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 ¶ 𑀲𑀗𑁆𑀖𑁂 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀸. 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬𑀲𑁆𑀲𑀸𑀢𑀺 𑀅𑀲𑁆𑀲 𑀧𑁂𑀢𑀲𑁆𑀲 𑀘𑀺𑀭𑀓𑀸𑀮𑀁 𑀳𑀺𑀢𑀸𑀬 𑀅𑀢𑁆𑀣𑀸𑀬. 𑀞𑀸𑀦𑀲𑁄 𑀉𑀧𑀓𑀧𑁆𑀧𑀢𑀻𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀦𑀺𑀧𑁆𑀨𑀚𑁆𑀚𑀢𑀺, 𑀦 𑀓𑀸𑀮𑀦𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀢𑀢𑁆𑀣 𑀥𑀫𑁆𑀫𑀢𑀸 𑁋 𑀬𑀁 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑁂 𑀤𑀺𑀦𑁆𑀦𑁂 𑀧𑁂𑀢𑀸 𑀘𑁂 𑀅𑀦𑀼𑀫𑁄𑀤𑀦𑁆𑀢𑀺, 𑀢𑀸𑀯𑀤𑁂𑀯 𑀢𑀲𑁆𑀲 𑀨𑀮𑁂𑀦 𑀧𑁂𑀢𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑀸𑀪𑀺𑀭𑀢𑀫𑀸𑀦𑀲𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀧𑀼𑀦𑀤𑀺𑀯𑀲𑁂 𑀲𑁂𑀝𑁆𑀞𑀺𑀪𑀭𑀺𑀬𑀸 𑀅𑀯𑀲𑁂𑀲𑀸 𑀘 𑀜𑀸𑀢𑀓𑀸 𑀲𑁂𑀝𑁆𑀞𑀺𑀁 𑀅𑀦𑀼𑀯𑀢𑁆𑀢𑀦𑁆𑀢𑀸 𑀏𑀯𑀁 𑀢𑁂𑀫𑀸𑀲𑀫𑀢𑁆𑀢𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀁. 𑀅𑀣 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀫𑀸𑀲𑀫𑀢𑁆𑀢𑀁 𑀫𑀫 𑀖𑀭𑀁 𑀦𑀸𑀕𑀫𑀺𑀁𑀲𑀽’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀸𑀭𑀸 𑀢𑀲𑁆𑀫𑀺𑀁 𑀓𑀸𑀭𑀡𑁂 𑀓𑀣𑀺𑀢𑁂 𑀭𑀸𑀚𑀸𑀧𑀺 𑀲𑁂𑀝𑁆𑀞𑀺𑀁 𑀅𑀦𑀼𑀯𑀢𑁆𑀢𑀦𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀢𑀁 𑀤𑀺𑀲𑁆𑀯𑀸 𑀦𑀸𑀕𑀭𑀸 𑀭𑀸𑀚𑀸𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑀸 𑀫𑀸𑀲𑀫𑀢𑁆𑀢𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀁. 𑀏𑀯𑀁 𑀫𑀸𑀲𑀤𑁆𑀯𑀬𑀁 𑀧𑀺𑀝𑁆𑀞𑀥𑀻𑀢𑀮𑀺𑀓𑀫𑀽𑀮𑀓𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀦𑁆𑀢𑀺.

𑀧𑀺𑀝𑁆𑀞𑀥𑀻𑀢𑀮𑀺𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀢𑀺𑀭𑁄𑀓𑀼𑀝𑁆𑀝𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀢𑀺𑀭𑁄𑀓𑀼𑀝𑁆𑀝𑁂𑀲𑀼 ¶ 𑀢𑀺𑀝𑁆𑀞𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀧𑁂𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀓𑀣𑀸 𑁋 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀓𑀸𑀲𑀺 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀲𑀺𑀭𑀺𑀫𑀸 𑀦𑀸𑀫 𑀤𑁂𑀯𑀻. 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀨𑀼𑀲𑁆𑀲𑁄 𑀦𑀸𑀫 𑀩𑁄𑀥𑀺𑀲𑀢𑁆𑀢𑁄 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀚𑀬𑀲𑁂𑀦𑁄 𑀭𑀸𑀚𑀸 ‘‘𑀫𑀫 𑀧𑀼𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄, 𑀫𑀬𑁆𑀳𑀫𑁂𑀯 𑀩𑀼𑀤𑁆𑀥𑁄, 𑀫𑀬𑁆𑀳𑀁 𑀥𑀫𑁆𑀫𑁄, 𑀫𑀬𑁆𑀳𑀁 𑀲𑀗𑁆𑀖𑁄’’𑀢𑀺 𑀫𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀩𑁆𑀩𑀓𑀸𑀮𑀁 𑀲𑀬𑀫𑁂𑀯 𑀉𑀧𑀝𑁆𑀞𑀳𑀢𑀺, 𑀦 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀤𑁂𑀢𑀺.

𑀪𑀕𑀯𑀢𑁄 𑀓𑀦𑀺𑀝𑁆𑀞𑀪𑀸𑀢𑀭𑁄 𑀯𑁂𑀫𑀸𑀢𑀺𑀓𑀸 𑀢𑀬𑁄 𑀪𑀸𑀢𑀭𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀩𑀼𑀤𑁆𑀥𑀸 ¶ 𑀦𑀸𑀫 𑀲𑀩𑁆𑀩𑀮𑁄𑀓 𑀳𑀺𑀢𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀏𑀓𑀲𑁆𑀲𑁂𑀯 𑀅𑀢𑁆𑀣𑀸𑀬. 𑀅𑀫𑁆𑀳𑀸𑀓𑀜𑁆𑀘 𑀧𑀺𑀢𑀸 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀦 𑀤𑁂𑀢𑀺. 𑀓𑀣𑀁 𑀦𑀼 𑀔𑁄 𑀫𑀬𑀁 𑀮𑀪𑁂𑀬𑁆𑀬𑀸𑀫 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’’𑀢𑀺? 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀳𑀦𑁆𑀤 𑀫𑀬𑀁 𑀓𑀺𑀜𑁆𑀘𑀺 𑀉𑀧𑀸𑀬𑀁 𑀓𑀭𑁄𑀫𑀸’’𑀢𑀺. 𑀢𑁂 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀺𑀬 𑀓𑀸𑀭𑀸𑀧𑁂𑀲𑀼𑀁. 𑀢𑀢𑁄 𑀭𑀸𑀚𑀸 ‘‘𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀬𑁄𑀧𑀺 𑀧𑀼𑀢𑁆𑀢𑁂 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑀸. 𑀭𑀸𑀚𑀸 𑀢𑀼𑀝𑁆𑀞𑁄 𑀯𑀭𑀁 𑀅𑀤𑀸𑀲𑀺 ‘‘𑀬𑀁 𑀇𑀘𑁆𑀙𑀣, 𑀢𑀁 𑀕𑀡𑁆𑀳𑀣𑀸’’𑀢𑀺. 𑀢𑁂 ‘‘𑀫𑀬𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼𑀁 𑀇𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀏𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀢𑁂 ‘‘𑀫𑀬𑀁 𑀅𑀜𑁆𑀜𑁂𑀦 𑀅𑀦𑀢𑁆𑀣𑀺𑀓𑀸’’𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀢𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀬𑀸𑀘𑀺𑀁𑀲𑀼. 𑀭𑀸𑀚𑀸 𑀦 𑀅𑀤𑀸𑀲𑀺. 𑀏𑀯𑀁 ‘‘𑀙, 𑀧𑀜𑁆𑀘, 𑀘𑀢𑁆𑀢𑀸𑀭𑀺, 𑀢𑀻𑀡𑀺, 𑀤𑁆𑀯𑁂, 𑀏𑀓𑀁, 𑀲𑀢𑁆𑀢 𑀫𑀸𑀲𑁂, 𑀙, 𑀧𑀜𑁆𑀘, 𑀘𑀢𑁆𑀢𑀸𑀭𑁄’’𑀢𑀺 𑀯𑀢𑁆𑀯𑀸 𑀬𑀸𑀯 𑀢𑁂𑀫𑀸𑀲𑀁 𑀬𑀸𑀘𑀺𑀁𑀲𑀼. 𑀢𑀤𑀸 𑀭𑀸𑀚𑀸 ‘‘𑀕𑀡𑁆𑀳𑀣𑀸’’𑀢𑀺 𑀅𑀤𑀸𑀲𑀺.

𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀇𑀘𑁆𑀙𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀉𑀧𑀝𑁆𑀞𑀸𑀢𑀼𑀁, 𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀸𑀯𑀸𑀲’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀢𑁂 𑀢𑀬𑁄 𑀅𑀢𑁆𑀢𑀦𑁄 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑀲𑁆𑀲 𑀮𑁂𑀔𑀁 𑀧𑁂𑀲𑁂𑀲𑀼𑀁 ‘‘𑀇𑀫𑀁 𑀢𑁂𑀫𑀸𑀲𑀁 𑀅𑀫𑁆𑀳𑁂𑀳𑀺 𑀪𑀕𑀯𑀸 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀺𑀳𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀲𑀫𑁆𑀪𑀸𑀭𑀁 𑀲𑀫𑁆𑀧𑀸𑀤𑁂𑀳𑀻’’𑀢𑀺. 𑀲𑁄 𑀲𑀩𑁆𑀩𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀝𑀺𑀧𑁂𑀲𑁂𑀲𑀺. 𑀢𑁂 ¶ 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑀸 𑀳𑀼𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀳𑀺 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀫𑀸𑀦𑀸 𑀚𑀦𑀧𑀤𑀁 𑀦𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀯𑀲𑁆𑀲𑀁 𑀯𑀲𑀸𑀧𑁂𑀲𑀼𑀁.

𑀢𑁂𑀲𑀁 𑀪𑀡𑁆𑀟𑀸𑀕𑀸𑀭𑀺𑀓𑁄 𑀏𑀓𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀲𑀧𑀚𑀸𑀧𑀢𑀺𑀓𑁄 𑀲𑀤𑁆𑀥𑁄 𑀅𑀳𑁄𑀲𑀺 𑀧𑀲𑀦𑁆𑀦𑁄. 𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀯𑀢𑁆𑀢𑀁 𑀲𑀓𑁆𑀓𑀘𑁆𑀘𑀁 𑀅𑀤𑀸𑀲𑀺. 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀚𑀸𑀦𑀧𑀤𑁂𑀳𑀺 𑀏𑀓𑀸𑀤𑀲𑀫𑀢𑁆𑀢𑁂𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀓𑁆𑀓𑀘𑁆𑀘𑀫𑁂𑀯 𑀤𑀸𑀦𑀁 𑀧𑀯𑀢𑁆𑀢𑀸𑀧𑁂𑀲𑀺. 𑀢𑀢𑁆𑀣 𑀓𑁂𑀘𑀺 𑀚𑀸𑀦𑀧𑀤𑀸 𑀧𑀝𑀺𑀳𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀤𑁂𑀬𑁆𑀬𑀥𑀫𑁆𑀫𑀁 𑀅𑀢𑁆𑀢𑀦𑀸 𑀔𑀸𑀤𑀺𑀁𑀲𑀼, 𑀪𑀢𑁆𑀢𑀲𑀸𑀮𑀜𑁆𑀘 𑀅𑀕𑁆𑀕𑀺𑀦𑀸 𑀤𑀳𑀺𑀁𑀲𑀼. 𑀧𑀯𑀸𑀭𑀺𑀢𑀸 𑀭𑀸𑀚𑀧𑀼𑀢𑁆𑀢𑀸 𑀪𑀕𑀯𑀢𑁄 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ¶ 𑀪𑀕𑀯𑀦𑁆𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀫𑁂𑀯 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀭𑀸𑀚𑀧𑀼𑀢𑁆𑀢𑀸 𑀘 𑀚𑀦𑀧𑀤𑁂 ¶ 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀘 𑀪𑀡𑁆𑀟𑀸𑀕𑀸𑀭𑀺𑀓𑁄 𑀘 𑀅𑀦𑀼𑀧𑀼𑀩𑁆𑀩𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀕𑁆𑀕𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀧𑀝𑀺𑀳𑀢𑀘𑀺𑀢𑁆𑀢𑀸 𑀚𑀦𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀏𑀯𑀁 𑀢𑁂𑀲𑀁 𑀉𑀪𑀬𑁂𑀲𑀁 𑀚𑀦𑀸𑀦𑀁 𑀲𑀕𑁆𑀕𑀢𑁄 𑀲𑀕𑁆𑀕𑀁 𑀦𑀺𑀭𑀬𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑀸 𑀯𑀻𑀢𑀺𑀯𑀢𑁆𑀢𑀸.

𑀅𑀣 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑁂 𑀧𑀝𑀺𑀳𑀢𑀘𑀺𑀢𑁆𑀢𑀸 𑀚𑀦𑀸 𑀧𑁂𑀢𑁂𑀲𑀼 𑀉𑀧𑁆𑀧𑀦𑁆𑀦𑀸. 𑀢𑀤𑀸 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀧𑁂𑀢𑀸𑀦𑀁 𑀅𑀢𑁆𑀣𑀸𑀬 𑀤𑀸𑀦𑀁 𑀤𑀢𑁆𑀯𑀸 𑀉𑀤𑁆𑀤𑀺𑀲𑀦𑁆𑀢𑀺 ‘‘𑀇𑀤𑀁 𑀦𑁄 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺, 𑀢𑁂 𑀲𑀫𑁆𑀧𑀢𑁆𑀢𑀺𑀁 𑀮𑀪𑀦𑁆𑀢𑀺. 𑀅𑀣 𑀇𑀫𑁂𑀧𑀺 𑀧𑁂𑀢𑀸 𑀢𑀁 𑀤𑀺𑀲𑁆𑀯𑀸 𑀓𑀲𑁆𑀲𑀧𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀫𑀬𑀫𑁆𑀧𑀺 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺? 𑀪𑀕𑀯𑀸 𑀆𑀳 𑁋 ‘‘𑀇𑀤𑀸𑀦𑀺 𑀦 𑀮𑀪𑀣, 𑀅𑀦𑀸𑀕𑀢𑁂 𑀧𑀦 𑀕𑁄𑀢𑀫𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀺𑀫𑁆𑀩𑀺𑀲𑀸𑀭𑁄 𑀦𑀸𑀫 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀢𑀼𑀫𑁆𑀳𑀸𑀓𑀁 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀜𑀸𑀢𑀺 𑀅𑀳𑁄𑀲𑀺, 𑀲𑁄 𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀢𑀤𑀸 𑀮𑀪𑀺𑀲𑁆𑀲𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀢𑁂𑀲𑀁 𑀧𑁂𑀢𑀸𑀦𑀁 𑀢𑀁 𑀯𑀘𑀦𑀁 ‘‘𑀲𑁆𑀯𑁂 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺.

𑀢𑀢𑁄 ¶ 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀯𑀻𑀢𑀺𑀯𑀢𑁆𑀢𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀉𑀧𑁆𑀧𑀚𑁆𑀚𑀺. 𑀢𑁂𑀧𑀺 𑀢𑀬𑁄 𑀭𑀸𑀚𑀧𑀼𑀢𑁆𑀢𑀸 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀕𑀬𑀸𑀲𑀻𑀲𑁂 𑀢𑀬𑁄 𑀚𑀝𑀺𑀮𑀸 𑀅𑀳𑁂𑀲𑀼𑀁, 𑀚𑀦𑀧𑀤𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀅𑀳𑁄𑀲𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀺𑀲𑀸𑀔𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀳𑁄𑀲𑀺, 𑀢𑀲𑁆𑀲 𑀧𑀚𑀸𑀧𑀢𑀺 𑀥𑀫𑁆𑀫𑀤𑀺𑀦𑁆𑀦𑀸 𑀦𑀸𑀫 𑀲𑁂𑀝𑁆𑀞𑀺𑀥𑀻𑀢𑀸 𑀅𑀳𑁄𑀲𑀺, 𑀅𑀯𑀲𑁂𑀲𑀸 𑀧𑀦 𑀧𑀭𑀺𑀲𑀸 𑀭𑀜𑁆𑀜𑁄 𑀏𑀯 𑀧𑀭𑀺𑀯𑀸𑀭𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀆𑀕𑀫𑁆𑀫 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀳𑀲𑁆𑀲𑀧𑀭𑀺𑀯𑀸𑀭𑁂 𑀢𑀬𑁄 𑀚𑀝𑀺𑀮𑁂 𑀯𑀺𑀦𑁂𑀢𑁆𑀯𑀸 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀢𑀢𑁆𑀣 ¶ 𑀘 𑀢𑀤𑀳𑀼𑀧𑀲𑀗𑁆𑀓𑀫𑀦𑁆𑀢𑀁𑀬𑁂𑀯 𑀭𑀸𑀚𑀸𑀦𑀁 𑀩𑀺𑀫𑁆𑀩𑀺𑀲𑀸𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀤𑁆𑀥𑀺𑀁 𑀏𑀓𑀸𑀤𑀲𑀦𑀳𑀼𑀢𑁂𑀳𑀺 𑀅𑀗𑁆𑀕𑀫𑀕𑀥𑀯𑀸𑀲𑀻𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺. 𑀅𑀣 𑀭𑀜𑁆𑀜𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑀺𑀢𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀸𑀡𑀯𑀓𑀯𑀡𑁆𑀡𑁂𑀦 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁂𑀦 𑁋

‘‘𑀤𑀦𑁆𑀢𑁄 𑀤𑀦𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸’’𑀢𑀺. (𑀫𑀳𑀸𑀯. 𑁫𑁮) 𑁋

𑀏𑀯𑀫𑀸𑀤𑀻𑀳𑀺 ¶ 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺𑀬𑀫𑀸𑀦𑁄 𑀭𑀸𑀚𑀕𑀳𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀫𑀳𑀸𑀤𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂 𑀧𑀦 𑀧𑁂𑀢𑀸 ‘‘𑀇𑀤𑀸𑀦𑀺 𑀭𑀸𑀚𑀸 𑀤𑀸𑀦𑀁 𑀅𑀫𑁆𑀳𑀸𑀓𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀉𑀤𑁆𑀤𑀺𑀲𑀺𑀲𑁆𑀲𑀢𑀻’’𑀢𑀺 𑀆𑀲𑀸𑀬 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀭𑀸𑀚𑀸 𑀤𑀸𑀦𑀁 𑀤𑀢𑁆𑀯𑀸 ‘‘𑀓𑀢𑁆𑀣 𑀦𑀼 𑀔𑁄 𑀪𑀕𑀯𑀸 𑀯𑀺𑀳𑀭𑁂𑀬𑁆𑀬𑀸’’𑀢𑀺 𑀪𑀕𑀯𑀢𑁄 𑀯𑀺𑀳𑀸𑀭𑀝𑁆𑀞𑀸𑀦𑀫𑁂𑀯 𑀘𑀺𑀦𑁆𑀢𑁂𑀲𑀺, 𑀦 𑀢𑀁 𑀤𑀸𑀦𑀁 𑀓𑀲𑁆𑀲𑀘𑀺 𑀉𑀤𑁆𑀤𑀺𑀲𑀺. 𑀢𑀣𑀸 𑀢𑀁 𑀤𑀸𑀦𑀁 𑀅𑀮𑀪𑀦𑁆𑀢𑀸 𑀧𑁂𑀢𑀸 𑀙𑀺𑀦𑁆𑀦𑀸𑀲𑀸 𑀳𑀼𑀢𑁆𑀯𑀸 𑀭𑀢𑁆𑀢𑀺𑀬𑀁 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀅𑀢𑀺𑀯𑀺𑀬 𑀪𑀺𑀁𑀲𑀦𑀓𑀁 𑀯𑀺𑀲𑁆𑀲𑀭𑀫𑀓𑀁𑀲𑀼. 𑀭𑀸𑀚𑀸 𑀪𑀬𑀲𑀦𑁆𑀢𑀸𑀲𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀺𑀪𑀸𑀢𑀸𑀬 ¶ 𑀭𑀢𑁆𑀢𑀺𑀬𑀸 𑀪𑀕𑀯𑀢𑁄 𑀆𑀭𑁄𑀘𑁂𑀳𑀺 𑁋 ‘‘𑀏𑀯𑀭𑀽𑀧𑀁 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺𑀁, 𑀓𑀺𑀁 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀪𑀯𑀺𑀲𑁆𑀲𑀢𑀻’’𑀢𑀺? 𑀪𑀕𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀦 𑀢𑁂 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀺𑀘 𑀔𑁄 𑀲𑀦𑁆𑀢𑀺 𑀢𑁂 𑀧𑀼𑀭𑀸𑀡𑀜𑀸𑀢𑀓𑀸 𑀧𑁂𑀢𑁂𑀲𑀼 𑀉𑀧𑁆𑀧𑀦𑁆𑀦𑀸. 𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀫𑁂𑀯 𑀧𑀘𑁆𑀘𑀸𑀲𑀻𑀲𑀦𑁆𑀢𑀸 ‘𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀅𑀫𑁆𑀳𑀸𑀓𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀻’𑀢𑀺 𑀯𑀺𑀘𑀭𑀦𑁆𑀢𑀸 𑀢𑀬𑀸 𑀳𑀺𑀬𑁆𑀬𑁄 𑀤𑀸𑀦𑀁 𑀤𑀢𑁆𑀯𑀸 𑀦 𑀉𑀤𑁆𑀤𑀺𑀲𑀺𑀢𑀢𑁆𑀢𑀸 𑀙𑀺𑀦𑁆𑀦𑀸𑀲𑀸 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑀁 𑀯𑀺𑀲𑁆𑀲𑀭𑀫𑀓𑀁𑀲𑀽’’𑀢𑀺 𑀆𑀳. ‘‘𑀓𑀺𑀁 𑀇𑀤𑀸𑀦𑀺𑀧𑀺, 𑀪𑀦𑁆𑀢𑁂, 𑀤𑀺𑀦𑁆𑀦𑁂 𑀢𑁂 𑀮𑀪𑁂𑀬𑁆𑀬𑀼’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀕𑀯𑀸 𑀅𑀚𑁆𑀚𑀢𑀦𑀸𑀬 𑀤𑀸𑀦𑀁, 𑀢𑁂𑀲𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀭𑀸𑀚𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 ¶ . 𑀪𑀕𑀯𑀸 𑀭𑀸𑀚𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀢𑁂 𑀧𑁂𑀢𑀸 ‘‘𑀅𑀧𑀺 𑀦𑀸𑀫 𑀅𑀚𑁆𑀚 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀼 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀢𑀣𑀸 𑀅𑀓𑀸𑀲𑀺, 𑀬𑀣𑀸 𑀢𑁂 𑀲𑀩𑁆𑀩𑁂𑀯 𑀭𑀜𑁆𑀜𑁄 𑀆𑀧𑀸𑀣𑀁 𑀕𑀢𑀸 𑀅𑀳𑁂𑀲𑀼𑀁. 𑀭𑀸𑀚𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑁂𑀦𑁆𑀢𑁄 ‘‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀉𑀤𑁆𑀤𑀺𑀲𑀺. 𑀢𑀸𑀯𑀤𑁂𑀯 𑀧𑁂𑀢𑀸𑀦𑀁 𑀓𑀫𑀮𑀓𑀼𑀯𑀮𑀬𑀲𑀜𑁆𑀙𑀦𑁆𑀦𑀸 𑀧𑁄𑀓𑁆𑀔𑀭𑀡𑀺𑀬𑁄 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀓𑀺𑀮𑀫𑀣𑀧𑀺𑀧𑀸𑀲𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀳𑁂𑀲𑀼𑀁. 𑀭𑀸𑀚𑀸 𑀬𑀸𑀕𑀼𑀔𑀚𑁆𑀚𑀪𑁄𑀚𑁆𑀚𑀸𑀦𑀺 𑀤𑀢𑁆𑀯𑀸 𑀉𑀤𑁆𑀤𑀺𑀲𑀺. 𑀢𑁂𑀲𑀁 𑀢𑀗𑁆𑀔𑀡𑀜𑁆𑀜𑁂𑀯 𑀤𑀺𑀩𑁆𑀩𑀬𑀸𑀕𑀼𑀔𑀚𑁆𑀚𑀪𑁄𑀚𑁆𑀚𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀢𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀻𑀡𑀺𑀦𑁆𑀤𑁆𑀭𑀺𑀬𑀸 𑀅𑀳𑁂𑀲𑀼𑀁. 𑀅𑀣 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀤𑀢𑁆𑀯𑀸 𑀉𑀤𑁆𑀤𑀺𑀲𑀺. 𑀢𑁂𑀲𑀁 𑀤𑀺𑀩𑁆𑀩𑀯𑀢𑁆𑀣𑀧𑀸𑀲𑀸𑀤𑀧𑀘𑁆𑀘𑀢𑁆𑀣𑀭𑀡𑀲𑁂𑀬𑁆𑀬𑀸𑀤𑀺𑀅𑀮𑀗𑁆𑀓𑀸𑀭𑀯𑀺𑀥𑀬𑁄 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀸 𑀘 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺 𑀲𑀩𑁆𑀩𑀸𑀧𑀺 𑀬𑀣𑀸 𑀭𑀜𑁆𑀜𑁄 𑀧𑀸𑀓𑀝𑀸 𑀳𑁄𑀢𑀺, 𑀢𑀣𑀸 𑀪𑀕𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑀢𑁄 𑀪𑀕𑀯𑀸 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀅𑀦𑀼𑀫𑁄𑀤𑀦𑀢𑁆𑀣𑀁 𑀢𑀺𑀭𑁄𑀓𑀼𑀝𑁆𑀝𑀧𑁂𑀢𑀯𑀢𑁆𑀣𑀼𑀁 𑀅𑀪𑀸𑀲𑀺 𑁋

‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀺, 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀘;

𑀤𑁆𑀯𑀸𑀭𑀩𑀸𑀳𑀸𑀲𑀼 𑀢𑀺𑀝𑁆𑀞𑀦𑁆𑀢𑀺, 𑀆𑀕𑀦𑁆𑀢𑁆𑀯𑀸𑀦 𑀲𑀓𑀁 𑀖𑀭𑀁.

‘‘𑀧𑀳𑀽𑀢𑁂 ¶ 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀔𑀚𑁆𑀚𑀪𑁄𑀚𑁆𑀚𑁂 𑀉𑀧𑀝𑁆𑀞𑀺𑀢𑁂;

𑀦 𑀢𑁂𑀲𑀁 𑀓𑁄𑀘𑀺 𑀲𑀭𑀢𑀺, 𑀲𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸.

‘‘𑀏𑀯𑀁 ¶ 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀲𑀼𑀘𑀺𑀁 𑀧𑀡𑀻𑀢𑀁 𑀓𑀸𑀮𑁂𑀦, 𑀓𑀧𑁆𑀧𑀺𑀬𑀁 𑀧𑀸𑀦𑀪𑁄𑀚𑀦𑀁.

‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄;

𑀢𑁂 𑀘 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀜𑀸𑀢𑀺𑀧𑁂𑀢𑀸 𑀲𑀫𑀸𑀕𑀢𑀸;

𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀲𑀓𑁆𑀓𑀘𑁆𑀘𑀁 𑀅𑀦𑀼𑀫𑁄𑀤𑀭𑁂.

‘‘𑀘𑀺𑀭𑀁 𑀚𑀻𑀯𑀦𑁆𑀢𑀼 𑀦𑁄 𑀜𑀸𑀢𑀻, 𑀬𑁂𑀲𑀁 𑀳𑁂𑀢𑀼 𑀮𑀪𑀸𑀫𑀲𑁂;

𑀅𑀫𑁆𑀳𑀸𑀓𑀜𑁆𑀘 𑀓𑀢𑀸 𑀧𑀽𑀚𑀸, 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸.

‘‘𑀦 𑀳𑀺 𑀢𑀢𑁆𑀣 𑀓𑀲𑀺 𑀅𑀢𑁆𑀣𑀺, 𑀕𑁄𑀭𑀓𑁆𑀔𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀯𑀡𑀺𑀚𑁆𑀚𑀸 𑀢𑀸𑀤𑀺𑀲𑀻 𑀦𑀢𑁆𑀣𑀺, 𑀳𑀺𑀭𑀜𑁆𑀜𑁂𑀦 𑀓𑀬𑀸𑀓𑀬𑀁;

𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀕𑀢𑀸 𑀢𑀳𑀺𑀁.

‘‘𑀉𑀦𑁆𑀦𑀫𑁂 𑀉𑀤𑀓𑀁 𑀯𑀼𑀝𑁆𑀞𑀁, 𑀬𑀣𑀸 𑀦𑀺𑀦𑁆𑀦𑀁 𑀧𑀯𑀢𑁆𑀢𑀢𑀺;

𑀏𑀯𑀫𑁂𑀯 𑀇𑀢𑁄 𑀤𑀺𑀦𑁆𑀦𑀁, 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺.

‘‘𑀬𑀣𑀸 𑀯𑀸𑀭𑀺𑀯𑀳𑀸 𑀧𑀽𑀭𑀸, 𑀧𑀭𑀺𑀧𑀽𑀭𑁂𑀦𑁆𑀢𑀺 𑀲𑀸𑀕𑀭𑀁;

𑀏𑀯𑀫𑁂𑀯 ¶ 𑀇𑀢𑁄 𑀤𑀺𑀦𑁆𑀦𑀁, 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺.

‘‘𑀅𑀤𑀸𑀲𑀺 𑀫𑁂 𑀅𑀓𑀸𑀲𑀺 𑀫𑁂, 𑀜𑀸𑀢𑀺𑀫𑀺𑀢𑁆𑀢𑀸 𑀲𑀔𑀸 𑀘 𑀫𑁂;

𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀁.

‘‘𑀦 𑀳𑀺 𑀭𑀼𑀡𑁆𑀡𑀁 𑀯𑀸 𑀲𑁄𑀓𑁄 𑀯𑀸, 𑀬𑀸 𑀘𑀜𑁆𑀜𑀸 𑀧𑀭𑀺𑀤𑁂𑀯𑀦𑀸;

𑀦 𑀢𑀁 𑀧𑁂𑀢𑀸𑀦𑀫𑀢𑁆𑀣𑀸𑀬, 𑀏𑀯𑀁 𑀢𑀺𑀝𑁆𑀞𑀦𑁆𑀢𑀺 𑀜𑀸𑀢𑀬𑁄.

‘‘𑀅𑀬𑀜𑁆𑀘 ¶ 𑀔𑁄 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀲𑀗𑁆𑀖𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬𑀲𑁆𑀲, 𑀞𑀸𑀦𑀲𑁄 𑀉𑀧𑀓𑀧𑁆𑀧𑀢𑀺.

‘‘𑀲𑁄 𑀜𑀸𑀢𑀺𑀥𑀫𑁆𑀫𑁄 𑀘 𑀅𑀬𑀁 𑀦𑀺𑀤𑀲𑁆𑀲𑀺𑀢𑁄, 𑀧𑁂𑀢𑀸𑀦 𑀧𑀽𑀚𑀸 𑀘 𑀓𑀢𑀸 𑀉𑀴𑀸𑀭𑀸;

𑀩𑀮𑀜𑁆𑀘 𑀪𑀺𑀓𑁆𑀔𑀽𑀦𑀫𑀦𑀼𑀧𑁆𑀧𑀤𑀺𑀦𑁆𑀦𑀁, 𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀳𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺.

𑁧𑁪. 𑀢𑀢𑁆𑀣 ¶ 𑀢𑀺𑀭𑁄𑀓𑀼𑀝𑁆𑀝𑁂𑀲𑀽𑀢𑀺 𑀓𑀼𑀝𑁆𑀝𑀸𑀦𑀁 𑀧𑀭𑀪𑀸𑀕𑁂𑀲𑀼. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀦𑀺𑀲𑀚𑁆𑀚𑀸𑀤𑀺𑀧𑀝𑀺𑀓𑁆𑀔𑁂𑀧𑀢𑁄 𑀞𑀸𑀦𑀓𑀧𑁆𑀧𑀦𑀯𑀘𑀦𑀫𑁂𑀢𑀁, 𑀕𑁂𑀳𑀧𑀸𑀓𑀸𑀭𑀓𑀼𑀝𑁆𑀝𑀸𑀦𑀁 𑀤𑁆𑀯𑀸𑀭𑀢𑁄 𑀩𑀳𑀺 𑀏𑀯 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀘𑀸𑀢𑀺 𑀲𑀦𑁆𑀥𑀻𑀲𑀼 𑀘 𑀲𑀺𑀗𑁆𑀖𑀸𑀝𑀓𑁂𑀲𑀼 𑀘. 𑀲𑀦𑁆𑀥𑀻𑀢𑀺 𑀘𑀢𑀼𑀓𑁆𑀓𑁄𑀡𑀭𑀘𑁆𑀙𑀸, 𑀖𑀭𑀲𑀦𑁆𑀥𑀺𑀪𑀺𑀢𑁆𑀢𑀺𑀲𑀦𑁆𑀥𑀺𑀆𑀮𑁄𑀓𑀲𑀦𑁆𑀥𑀺𑀬𑁄𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀺𑀗𑁆𑀖𑀸𑀝𑀓𑀸𑀢𑀺 𑀢𑀺𑀓𑁄𑀡𑀭𑀘𑁆𑀙𑀸. 𑀤𑁆𑀯𑀸𑀭𑀩𑀸𑀳𑀸𑀲𑀼 𑀢𑀺𑀝𑁆𑀞𑀦𑁆𑀢𑀻𑀢𑀺 𑀦𑀕𑀭𑀤𑁆𑀯𑀸𑀭𑀖𑀭𑀤𑁆𑀯𑀸𑀭𑀸𑀦𑀁 𑀩𑀸𑀳𑀸 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀆𑀕𑀦𑁆𑀢𑁆𑀯𑀸𑀦 𑀲𑀓𑀁 𑀖𑀭𑀦𑁆𑀢𑀺 𑀲𑀓𑀖𑀭𑀁 𑀦𑀸𑀫 𑀧𑀼𑀩𑁆𑀩𑀜𑀸𑀢𑀺𑀖𑀭𑀫𑁆𑀧𑀺 𑀅𑀢𑁆𑀢𑀦𑀸 𑀲𑀸𑀫𑀺𑀪𑀸𑀯𑁂𑀦 𑀅𑀚𑁆𑀛𑀸𑀯𑀼𑀢𑁆𑀣𑀖𑀭𑀫𑁆𑀧𑀺, 𑀢𑀤𑀼𑀪𑀬𑀫𑁆𑀧𑀺 𑀢𑁂 𑀬𑀲𑁆𑀫𑀸 𑀲𑀓𑀖𑀭𑀲𑀜𑁆𑀜𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀕𑀦𑁆𑀢𑁆𑀯𑀸𑀦 𑀲𑀓𑀁 𑀖𑀭’’𑀦𑁆𑀢𑀺 𑀆𑀳.

𑁧𑁫. 𑀏𑀯𑀁 𑀪𑀕𑀯𑀸 𑀧𑀼𑀩𑁆𑀩𑁂 𑀅𑀦𑀚𑁆𑀛𑀸𑀯𑀼𑀢𑁆𑀣𑀧𑀼𑀩𑁆𑀩𑀫𑁆𑀧𑀺 𑀧𑀼𑀩𑁆𑀩𑀜𑀸𑀢𑀺𑀖𑀭𑀢𑁆𑀢𑀸 𑀩𑀺𑀫𑁆𑀩𑀺𑀲𑀸𑀭𑀦𑀺𑀯𑁂𑀲𑀦𑀁 𑀲𑀓𑀖𑀭𑀲𑀜𑁆𑀜𑀸𑀬 𑀆𑀕𑀦𑁆𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀼 𑀞𑀺𑀢𑁂 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀨𑀮𑀁 𑀅𑀦𑀼𑀪𑀯𑀦𑁆𑀢𑁂 𑀅𑀢𑀺𑀯𑀺𑀬 𑀤𑀼𑀤𑁆𑀤𑀲𑀺𑀓𑀯𑀺𑀭𑀽𑀧𑀪𑀬𑀸𑀦𑀓𑀤𑀲𑁆𑀲𑀦𑁂 𑀩𑀳𑀽 𑀧𑁂𑀢𑁂 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀭𑁄𑀓𑀼𑀝𑁆𑀝𑁂𑀲𑀼 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀢𑁂𑀳𑀺 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀸𑀭𑀼𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀻’’𑀢𑀺 𑀤𑀼𑀢𑀺𑀬𑀕𑀸𑀣𑀫𑀸𑀳.

𑀢𑀢𑁆𑀣 𑀧𑀳𑀽𑀢𑁂𑀢𑀺 𑀅𑀦𑀧𑁆𑀧𑀓𑁂 𑀩𑀳𑀼𑀫𑁆𑀳𑀺, 𑀬𑀸𑀯𑀤𑀢𑁆𑀣𑁂𑀢𑀺 𑀅𑀢𑁆𑀣𑁄 ¶ . 𑀩-𑀓𑀸𑀭𑀲𑁆𑀲 𑀳𑀺 𑀧-𑀓𑀸𑀭𑁄 𑀮𑀩𑁆𑀪𑀢𑀺 ‘‘𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮) 𑀯𑀺𑀬. 𑀓𑁂𑀘𑀺 𑀧𑀦 ‘‘𑀩𑀳𑀼𑀓𑁂’’𑀢𑀺 𑀧𑀞𑀦𑁆𑀢𑀺, 𑀲𑁄 𑀧𑀦 𑀧𑀫𑀸𑀤𑀧𑀸𑀞𑁄. 𑀅𑀦𑁆𑀦𑀧𑀸𑀦𑀫𑁆𑀳𑀻𑀢𑀺 𑀅𑀦𑁆𑀦𑁂 𑀘 𑀧𑀸𑀦𑁂 𑀘. 𑀔𑀚𑁆𑀚𑀪𑁄𑀚𑁆𑀚𑁂𑀢𑀺 𑀔𑀚𑁆𑀚𑁂 𑀘 𑀪𑁄𑀚𑁆𑀚𑁂 𑀘. 𑀏𑀢𑁂𑀦 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀆𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀉𑀧𑀝𑁆𑀞𑀺𑀢𑁂𑀢𑀺 𑀉𑀧𑀕𑀫𑁆𑀫 𑀞𑀺𑀢𑁂 𑀲𑀚𑁆𑀚𑀺𑀢𑁂, 𑀧𑀝𑀺𑀬𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀦 𑀢𑁂𑀲𑀁 𑀓𑁄𑀘𑀺 𑀲𑀭𑀢𑀺 𑀲𑀢𑁆𑀢𑀸𑀦𑀦𑁆𑀢𑀺 𑀢𑁂𑀲𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀓𑁄𑀘𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀧𑀼𑀢𑁆𑀢𑁄 𑀯𑀸 𑀦𑀢𑁆𑀢𑀸 𑀯𑀸 𑀦 𑀲𑀭𑀢𑀺. 𑀓𑀺𑀁 𑀓𑀸𑀭𑀡𑀸? 𑀓𑀫𑁆𑀫𑀧𑀘𑁆𑀘𑀬𑀸𑀢𑀺, 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀅𑀤𑀸𑀦𑀤𑀸𑀦𑀧𑀝𑀺𑀲𑁂𑀥𑀦𑀸𑀤𑀺𑀪𑁂𑀤𑀲𑁆𑀲 𑀓𑀤𑀭𑀺𑀬𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄. 𑀢𑀜𑁆𑀳𑀺 𑀓𑀫𑁆𑀫𑀁 𑀢𑁂𑀲𑀁 𑀜𑀸𑀢𑀻𑀦𑀁 𑀲𑀭𑀺𑀢𑀼𑀁 𑀦 𑀤𑁂𑀢𑀺.

𑁧𑁬. 𑀏𑀯𑀁 𑀪𑀕𑀯𑀸 𑀅𑀦𑀧𑁆𑀧𑀓𑁂𑀧𑀺 𑀅𑀦𑁆𑀦𑀧𑀸𑀦𑀸𑀤𑀺𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂 𑀜𑀸𑀢𑀻𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸𑀦𑀁 𑀧𑁂𑀢𑀸𑀦𑀁 ¶ 𑀓𑀫𑁆𑀫𑀨𑀮𑁂𑀦 𑀜𑀸𑀢𑀓𑀸𑀦𑀁 𑀅𑀦𑀼𑀲𑁆𑀲𑀭𑀡𑀫𑀢𑁆𑀢𑀲𑁆𑀲𑀸𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀇𑀤𑀸𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑀼𑀧𑀧𑀦𑁆𑀦𑁂 𑀜𑀸𑀢𑀓𑁂 𑀉𑀤𑁆𑀤𑀺𑀲𑁆𑀲 𑀭𑀜𑁆𑀜𑀸 𑀤𑀺𑀦𑁆𑀦𑀤𑀸𑀦𑀁 𑀧𑀲𑀁𑀲𑀦𑁆𑀢𑁄 ‘‘𑀏𑀯𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦’’𑀦𑁆𑀢𑀺 𑀢𑀢𑀺𑀬𑀕𑀸𑀣𑀫𑀸𑀳.

𑀢𑀢𑁆𑀣 𑀏𑀯𑀦𑁆𑀢𑀺 𑀉𑀧𑀫𑀸𑀯𑀘𑀦𑀁. 𑀢𑀲𑁆𑀲 𑀤𑁆𑀯𑀺𑀥𑀸 𑀲𑀫𑁆𑀩𑀦𑁆𑀥𑁄 𑁋 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸 𑀅𑀲𑀭𑀦𑁆𑀢𑁂𑀲𑀼𑀧𑀺 𑀓𑁂𑀲𑀼𑀘𑀺 𑀓𑁂𑀘𑀺 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀏𑀯𑀁 𑀅𑀦𑀼𑀓𑀫𑁆𑀧𑀓𑀸 𑀳𑁄𑀦𑁆𑀢𑀻𑀢𑀺 𑀘, 𑀫𑀳𑀸𑀭𑀸𑀚, 𑀬𑀣𑀸 𑀢𑀬𑀸 𑀤𑀺𑀦𑁆𑀦𑀁, 𑀏𑀯𑀁 𑀲𑀼𑀘𑀺𑀁 𑀧𑀡𑀻𑀢𑀁 𑀓𑀸𑀮𑁂𑀦 𑀓𑀧𑁆𑀧𑀺𑀬𑀁 𑀧𑀸𑀦𑀪𑁄𑀚𑀦𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸𑀢𑀺 𑀘. 𑀢𑀢𑁆𑀣 𑀤𑀤𑀦𑁆𑀢𑀻𑀢𑀺 𑀤𑁂𑀦𑁆𑀢𑀺 𑀉𑀤𑁆𑀤𑀺𑀲𑀦𑁆𑀢𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀜𑀸𑀢𑀻𑀦𑀦𑁆𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀫𑁆𑀩𑀦𑁆𑀥𑀸𑀦𑀁. 𑀬𑁂𑀢𑀺 𑀬𑁂 𑀓𑁂𑀘𑀺 𑀧𑀼𑀢𑁆𑀢𑀸𑀤𑀬𑁄. 𑀳𑁄𑀦𑁆𑀢𑀻𑀢𑀺 𑀪𑀯𑀦𑁆𑀢𑀺. 𑀅𑀦𑀼𑀓𑀫𑁆𑀧𑀓𑀸𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄. 𑀲𑀼𑀘𑀺𑀦𑁆𑀢𑀺 𑀲𑀼𑀤𑁆𑀥𑀁 𑀫𑀦𑁄𑀳𑀭𑀁 𑀥𑀫𑁆𑀫𑀺𑀓𑀜𑁆𑀘. 𑀧𑀡𑀻𑀢𑀦𑁆𑀢𑀺 𑀉𑀴𑀸𑀭𑀁. 𑀓𑀸𑀮𑁂𑀦𑀸𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀧𑀭𑀺𑀪𑁄𑀕𑀬𑁄𑀕𑁆𑀕𑀓𑀸𑀮𑁂𑀦, 𑀜𑀸𑀢𑀺𑀧𑁂𑀢𑀸𑀦𑀁 𑀯𑀸 𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀼 ¶ 𑀆𑀕𑀦𑁆𑀢𑁆𑀯𑀸 𑀞𑀺𑀢𑀓𑀸𑀮𑁂𑀦. 𑀓𑀧𑁆𑀧𑀺𑀬𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀁 𑀧𑀢𑀺𑀭𑀽𑀧𑀁 𑀅𑀭𑀺𑀬𑀸𑀦𑀁 𑀧𑀭𑀺𑀪𑁄𑀕𑀸𑀭𑀳𑀁. 𑀧𑀸𑀦𑀪𑁄𑀚𑀦𑀦𑁆𑀢𑀺 𑀧𑀸𑀦𑀜𑁆𑀘 𑀪𑁄𑀚𑀦𑀜𑁆𑀘, 𑀢𑀤𑀼𑀧𑀤𑁂𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑀁 𑀯𑀤𑀢𑀺.

𑁧𑁭. 𑀇𑀤𑀸𑀦𑀺 𑀬𑁂𑀦 𑀧𑀓𑀸𑀭𑁂𑀦 𑀢𑁂𑀲𑀁 𑀧𑁂𑀢𑀸𑀦𑀁 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’𑀢𑀺 𑀘𑀢𑀼𑀢𑁆𑀣𑀕𑀸𑀣𑀸𑀬 𑀧𑀼𑀩𑁆𑀩𑀟𑁆𑀠𑀁 𑀆𑀳. 𑀢𑀁 𑀢𑀢𑀺𑀬𑀕𑀸𑀣𑀸𑀬 𑀧𑀼𑀩𑁆𑀩𑀟𑁆𑀠𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑁋

‘‘𑀏𑀯𑀁 𑀤𑀤𑀦𑁆𑀢𑀺 𑀜𑀸𑀢𑀻𑀦𑀁, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’𑀢𑀺.

𑀢𑁂𑀦 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽𑀢𑀺 𑀏𑀯𑀁 𑀧𑀓𑀸𑀭𑁂𑀦 𑀤𑀤𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸’’𑀢𑀺 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁𑀲𑀤𑁆𑀤𑁂𑀦 𑀤𑀸𑀢𑀩𑁆𑀩𑀸𑀓𑀸𑀭𑀦𑀺𑀤𑀲𑁆𑀲𑀦𑀁 𑀓𑀢𑀁 𑀳𑁄𑀢𑀺.

𑀢𑀢𑁆𑀣 𑀇𑀤𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 ‘‘𑀬𑁂𑀳𑀺 𑀯𑁄 𑀅𑀭𑀺𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁬) 𑀯𑀺𑀬. 𑀜𑀸𑀢𑀻𑀦𑀁 𑀳𑁄𑀢𑀽𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀸𑀦𑀁 𑀜𑀸𑀢𑀓𑀸𑀦𑀁 𑀳𑁄𑀢𑀼. ‘‘𑀦𑁄 𑀜𑀸𑀢𑀻𑀦’’𑀦𑁆𑀢𑀺 𑀘 𑀧𑀞𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀜𑀸𑀢𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄𑀢𑀺 𑀢𑁂 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸 𑀜𑀸𑀢𑀬𑁄 𑀇𑀤𑀁 𑀨𑀮𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀸 𑀲𑀼𑀔𑀺𑀢𑀸 𑀲𑀼𑀔𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀼.

𑀬𑀲𑁆𑀫𑀸 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀜𑁆𑀜𑁂𑀦 𑀓𑀢𑀓𑀫𑁆𑀫𑀁 𑀦 𑀅𑀜𑁆𑀜𑀲𑁆𑀲 𑀨𑀮𑀤𑀁 𑀳𑁄𑀢𑀺 ¶ , 𑀓𑁂𑀯𑀮𑀁 𑀧𑀦 𑀢𑀣𑀸 𑀉𑀤𑁆𑀤𑀺𑀲𑁆𑀲 𑀤𑀻𑀬𑀫𑀸𑀦𑀁 𑀢𑀁 𑀯𑀢𑁆𑀣𑀼 𑀜𑀸𑀢𑀺𑀧𑁂𑀢𑀸𑀦𑀁 ¶ 𑀓𑀼𑀲𑀮𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀢𑁂𑀲𑀁 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀓𑀼𑀲𑀮𑀓𑀫𑁆𑀫𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀘 𑀢𑀢𑁆𑀣𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀢𑁂𑀢𑀺 𑀜𑀸𑀢𑀺𑀧𑁂𑀢𑀸. 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀤𑀸𑀦𑀁 𑀤𑀻𑀬𑀢𑀺, 𑀢𑀢𑁆𑀣. 𑀲𑀫𑀸𑀕𑀦𑁆𑀢𑁆𑀯𑀸𑀢𑀺 ‘‘𑀇𑀫𑁂 𑀦𑁄 𑀜𑀸𑀢𑀬𑁄 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀤𑀸𑀦𑀁 𑀉𑀤𑁆𑀤𑀺𑀲𑀦𑁆𑀢𑀻’’𑀢𑀺 𑀅𑀦𑀼𑀫𑁄𑀤𑀦𑀢𑁆𑀣𑀁 𑀢𑀢𑁆𑀣 𑀲𑀫𑀸𑀕𑀢𑀸 𑀳𑀼𑀢𑁆𑀯𑀸. 𑀧𑀳𑀽𑀢𑁂 𑀅𑀦𑁆𑀦𑀧𑀸𑀦𑀫𑁆𑀳𑀻𑀢𑀺 𑀅𑀢𑁆𑀢𑀦𑁄 𑀉𑀤𑁆𑀤𑀺𑀲𑁆𑀲 𑀤𑀻𑀬𑀫𑀸𑀦𑁂 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁. 𑀲𑀓𑁆𑀓𑀘𑁆𑀘𑀁 𑀅𑀦𑀼𑀫𑁄𑀤𑀭𑁂𑀢𑀺 𑀓𑀫𑁆𑀫𑀨𑀮𑀁 𑀅𑀪𑀺𑀲𑀤𑁆𑀤𑀳𑀦𑁆𑀢𑀸 𑀘𑀺𑀢𑁆𑀢𑀻𑀓𑀸𑀭𑀁 𑀅𑀯𑀺𑀚𑀳𑀦𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀇𑀤𑀁 𑀦𑁄 𑀤𑀸𑀦𑀁 ¶ 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀽’’𑀢𑀺 𑀫𑁄𑀤𑀦𑁆𑀢𑀺 𑀅𑀦𑀼𑀫𑁄𑀤𑀦𑁆𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑁄𑀦𑁆𑀢𑀺.

𑁧𑁮. 𑀘𑀺𑀭𑀁 𑀚𑀻𑀯𑀦𑁆𑀢𑀽𑀢𑀺 𑀘𑀺𑀭𑀁 𑀚𑀻𑀯𑀺𑀦𑁄 𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀼. 𑀦𑁄 𑀜𑀸𑀢𑀻𑀢𑀺 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸. 𑀬𑁂𑀲𑀁 𑀳𑁂𑀢𑀽𑀢𑀺 𑀬𑁂𑀲𑀁 𑀓𑀸𑀭𑀡𑀸 𑀬𑁂 𑀦𑀺𑀲𑁆𑀲𑀸𑀬. 𑀮𑀪𑀸𑀫𑀲𑁂𑀢𑀺 𑀈𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀸𑀫. 𑀇𑀤𑀜𑁆𑀳𑀺 𑀉𑀤𑁆𑀤𑀺𑀲𑀦𑁂𑀦 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸𑀦𑀁 𑀧𑁂𑀢𑀸𑀦𑀁 𑀅𑀢𑁆𑀢𑀦𑁄 𑀜𑀸𑀢𑀻𑀦𑀁 𑀣𑁄𑀫𑀦𑀸𑀓𑀸𑀭𑀤𑀲𑁆𑀲𑀦𑀁. 𑀧𑁂𑀢𑀸𑀦𑀜𑁆𑀳𑀺 𑀅𑀢𑁆𑀢𑀦𑁄 𑀅𑀦𑀼𑀫𑁄𑀤𑀦𑁂𑀦, 𑀤𑀸𑀬𑀓𑀸𑀦𑀁 𑀉𑀤𑁆𑀤𑀺𑀲𑀦𑁂𑀦, 𑀉𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀤𑀓𑁆𑀔𑀺𑀡𑀸 𑀢𑀗𑁆𑀔𑀡𑀜𑁆𑀜𑁂𑀯 𑀨𑀮𑀦𑀺𑀩𑁆𑀩𑀢𑁆𑀢𑀺𑀓𑀸 𑀳𑁄𑀢𑀺. 𑀢𑀢𑁆𑀣 𑀤𑀸𑀬𑀓𑀸 𑀯𑀺𑀲𑁂𑀲𑀳𑁂𑀢𑀼. 𑀢𑁂𑀦𑀸𑀳 ‘‘𑀬𑁂𑀲𑀁 𑀳𑁂𑀢𑀼 𑀮𑀪𑀸𑀫𑀲𑁂’’𑀢𑀺. 𑀅𑀫𑁆𑀳𑀸𑀓𑀜𑁆𑀘 𑀓𑀢𑀸 𑀧𑀽𑀚𑀸𑀢𑀺 ‘‘𑀇𑀤𑀁 𑀯𑁄 𑀜𑀸𑀢𑀻𑀦𑀁 𑀳𑁄𑀢𑀽’’𑀢𑀺 𑀏𑀯𑀁 𑀉𑀤𑁆𑀤𑀺𑀲𑀦𑁆𑀢𑁂𑀳𑀺 𑀤𑀸𑀬𑀓𑁂𑀳𑀺 𑀅𑀫𑁆𑀳𑀸𑀓𑀜𑁆𑀘 𑀧𑀽𑀚𑀸 𑀓𑀢𑀸, 𑀢𑁂 𑀤𑀸𑀬𑀓𑀸 𑀘 𑀅𑀦𑀺𑀧𑁆𑀨𑀮𑀸 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀧𑀭𑀺𑀘𑁆𑀘𑀸𑀕𑀫𑀬𑀁 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁 𑀢𑀲𑁆𑀲 𑀢𑀢𑁆𑀣𑁂𑀯 𑀨𑀮𑀤𑀸𑀦𑀢𑁄.

𑀏𑀢𑁆𑀣𑀸𑀳 𑁋 ‘‘𑀓𑀺𑀁 𑀧𑀦 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸 𑀏𑀯 𑀜𑀸𑀢𑀻 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑁄 𑀮𑀪𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀻’’𑀢𑀺? 𑀦 𑀘𑁂𑀢𑁆𑀣 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁, 𑀅𑀢𑁆𑀣𑀺 𑀪𑀕𑀯𑀢𑀸 𑀏𑀯𑀁 𑀩𑁆𑀬𑀸𑀓𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋-

‘‘𑀫𑀬𑀫𑀲𑁆𑀲𑀼, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀤𑀸𑀦𑀸𑀦𑀺 𑀤𑁂𑀫, 𑀧𑀼𑀜𑁆𑀜𑀸𑀦𑀺 𑀓𑀭𑁄𑀫 ‘𑀇𑀤𑀁 𑀤𑀸𑀦𑀁 𑀧𑁂𑀢𑀸𑀦𑀁 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀉𑀧𑀓𑀧𑁆𑀧𑀢𑀼, 𑀇𑀤𑀁 𑀤𑀸𑀦𑀁 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’𑀢𑀺. 𑀓𑀘𑁆𑀘𑀺 𑀢𑀁, 𑀪𑁄 𑀕𑁄𑀢𑀫, 𑀤𑀸𑀦𑀁 𑀧𑁂𑀢𑀸𑀦𑀁 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀉𑀧𑀓𑀧𑁆𑀧𑀢𑀺 ¶ , 𑀓𑀘𑁆𑀘𑀺 𑀢𑁂 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀞𑀸𑀦𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀉𑀧𑀓𑀧𑁆𑀧𑀢𑀺, 𑀦𑁄 𑀅𑀝𑁆𑀞𑀸𑀦𑁂𑀢𑀺.

‘‘𑀓𑀢𑀫𑀁 𑀧𑀦, 𑀪𑁄 𑀕𑁄𑀢𑀫, 𑀞𑀸𑀦𑀁, 𑀓𑀢𑀫𑀁 𑀅𑀝𑁆𑀞𑀸𑀦𑀦𑁆𑀢𑀺? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 ¶ 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀦𑁂𑀭𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀦 𑀉𑀧𑀓𑀧𑁆𑀧𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 ¶ 𑀉𑀧𑀧𑀚𑁆𑀚𑀢𑀺. 𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀦 𑀉𑀧𑀓𑀧𑁆𑀧𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺…𑀧𑁂… 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀤𑁂𑀯𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀦 𑀉𑀧𑀓𑀧𑁆𑀧𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀬𑀁 𑀯𑀸 𑀧𑀦𑀲𑁆𑀲 𑀇𑀢𑁄 𑀅𑀦𑀼𑀧𑀯𑁂𑀘𑁆𑀙𑁂𑀦𑁆𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀯𑀸, 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀢𑁂𑀦 𑀲𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀉𑀧𑀓𑀧𑁆𑀧𑀢𑀻’’𑀢𑀺.

‘‘𑀲𑀘𑁂 𑀧𑀦, 𑀪𑁄 𑀕𑁄𑀢𑀫, 𑀲𑁄 𑀧𑁂𑀢𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑁄 𑀢𑀁 𑀞𑀸𑀦𑀁 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺, 𑀓𑁄 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 ¶ ? ‘‘𑀅𑀜𑁆𑀜𑁂𑀧𑀺𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀢𑀁 𑀞𑀸𑀦𑀁 𑀉𑀧𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺.

‘‘𑀲𑀘𑁂 𑀧𑀦, 𑀪𑁄 𑀕𑁄𑀢𑀫, 𑀲𑁄 𑀘𑁂𑀯 𑀧𑁂𑀢𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑁄 𑀢𑀁 𑀞𑀸𑀦𑀁 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺, 𑀅𑀜𑁆𑀜𑁂𑀧𑀺𑀲𑁆𑀲 𑀧𑁂𑀢𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀢𑀁 𑀞𑀸𑀦𑀁 𑀅𑀦𑀼𑀧𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀓𑁄 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺? ‘‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀯𑀓𑀸𑀲𑁄, 𑀬𑀁 𑀢𑀁 𑀞𑀸𑀦𑀁 𑀯𑀺𑀯𑀺𑀢𑁆𑀢𑀁 𑀅𑀲𑁆𑀲 ¶ 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀬𑀤𑀺𑀤𑀁 𑀧𑁂𑀢𑁂𑀳𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺, 𑀅𑀧𑀺𑀘, 𑀩𑁆𑀭𑀸𑀳𑁆𑀫𑀡, 𑀤𑀸𑀬𑀓𑁄𑀧𑀺 𑀅𑀦𑀺𑀧𑁆𑀨𑀮𑁄’’𑀢𑀺 (𑀅. 𑀦𑀺. 𑁧𑁦.𑁧𑁭𑁭).

𑁧𑁯. 𑀇𑀤𑀸𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸𑀦𑀁 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀦𑁄 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀅𑀪𑀸𑀯𑀁 𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀦 𑀳𑀺 𑀢𑀢𑁆𑀣 𑀓𑀲𑀺 𑀅𑀢𑁆𑀣𑀻𑀢𑀺 𑀢𑀲𑁆𑀫𑀺𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀓𑀲𑀺 𑀦 𑀳𑀺 𑀅𑀢𑁆𑀣𑀺, 𑀬𑀁 𑀦𑀺𑀲𑁆𑀲𑀸𑀬 𑀧𑁂𑀢𑀸 𑀲𑀼𑀔𑁂𑀦 𑀚𑀻𑀯𑁂𑀬𑁆𑀬𑀼𑀁. 𑀕𑁄𑀭𑀓𑁆𑀔𑁂𑀢𑁆𑀣 𑀦 𑀯𑀺𑀚𑁆𑀚𑀢𑀻𑀢𑀺 𑀏𑀢𑁆𑀣 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦 𑀓𑁂𑀯𑀮𑀁 𑀓𑀲𑀺𑀬𑁂𑀯 𑀦𑀢𑁆𑀣𑀺, 𑀅𑀣 𑀔𑁄 𑀕𑁄𑀭𑀓𑁆𑀔𑀸𑀧𑀺 𑀦 𑀯𑀺𑀚𑁆𑀚𑀢𑀺, 𑀬𑀁 𑀦𑀺𑀲𑁆𑀲𑀸𑀬 ¶ 𑀢𑁂 𑀲𑀼𑀔𑁂𑀦 𑀚𑀻𑀯𑁂𑀬𑁆𑀬𑀼𑀁. 𑀯𑀡𑀺𑀚𑁆𑀚𑀸 𑀢𑀸𑀤𑀺𑀲𑀻 𑀦𑀢𑁆𑀣𑀻𑀢𑀺 𑀯𑀡𑀺𑀚𑁆𑀚𑀸𑀧𑀺 𑀢𑀸𑀤𑀺𑀲𑀻 𑀦𑀢𑁆𑀣𑀺, 𑀬𑀸 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼 𑀪𑀯𑁂𑀬𑁆𑀬. 𑀳𑀺𑀭𑀜𑁆𑀜𑁂𑀦 𑀓𑀬𑀸𑀓𑀬𑀦𑁆𑀢𑀺 𑀳𑀺𑀭𑀜𑁆𑀜𑁂𑀦 𑀓𑀬𑀯𑀺𑀓𑁆𑀓𑀬𑀫𑁆𑀧𑀺 𑀢𑀢𑁆𑀣 𑀢𑀸𑀤𑀺𑀲𑀁 𑀦𑀢𑁆𑀣𑀺, 𑀬𑀁 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼 𑀪𑀯𑁂𑀬𑁆𑀬. 𑀇𑀢𑁂 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀕𑀢𑀸 𑀢𑀳𑀺𑀦𑁆𑀢𑀺 𑀓𑁂𑀯𑀮𑀁 𑀧𑀦 𑀇𑀢𑁄 𑀜𑀸𑀢𑀻𑀳𑀺 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀯𑀸 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀦𑁆𑀢𑀺. 𑀧𑁂𑀢𑀸𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀸 𑀲𑀢𑁆𑀢𑀸. 𑀓𑀸𑀮𑀕𑀢𑀸𑀢𑀺 𑀅𑀢𑁆𑀢𑀦𑁄 𑀫𑀭𑀡𑀓𑀸𑀮𑁂𑀦 𑀕𑀢𑀸. ‘‘𑀓𑀸𑀮𑀓𑀢𑀸’’𑀢𑀺 𑀯𑀸 𑀧𑀸𑀞𑁄, 𑀓𑀢𑀓𑀸𑀮𑀸 𑀓𑀢𑀫𑀭𑀡𑀸 𑀫𑀭𑀡𑀁 𑀲𑀫𑁆𑀧𑀢𑁆𑀢𑀸. 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑁂𑀢𑁆𑀢𑀺𑀯𑀺𑀲𑀬𑁂.

𑁨𑁦-𑁨𑁧. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀳𑀺 𑀧𑀓𑀸𑀲𑁂𑀢𑀼𑀁 ‘‘𑀉𑀦𑁆𑀦𑀫𑁂 𑀉𑀤𑀓𑀁 𑀯𑀼𑀝𑁆𑀞’’𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀉𑀦𑁆𑀦𑀫𑁂 𑀣𑀮𑁂 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀫𑁂𑀖𑁂𑀳𑀺 𑀅𑀪𑀺𑀯𑀼𑀝𑁆𑀞𑀁 𑀉𑀤𑀓𑀁 𑀬𑀣𑀸 𑀦𑀺𑀦𑁆𑀦𑀁 𑀧𑀯𑀢𑁆𑀢𑀢𑀺, 𑀬𑁄 𑀪𑀽𑀫𑀺𑀪𑀸𑀕𑁄 𑀦𑀺𑀦𑁆𑀦𑁄 𑀑𑀡𑀢𑁄, 𑀢𑀁 𑀉𑀧𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀇𑀢𑁄 𑀤𑀺𑀦𑁆𑀦𑀁 𑀤𑀸𑀦𑀁 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺 ¶ , 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀦𑀺𑀬𑀼𑀚𑁆𑀚𑀢𑀺. 𑀦𑀺𑀦𑁆𑀦𑀫𑀺𑀯 𑀳𑀺 𑀉𑀤𑀓𑀧𑁆𑀧𑀯𑀢𑁆𑀢𑀺𑀬𑀸 𑀞𑀸𑀦𑀁 𑀧𑁂𑀢𑀮𑁄𑀓𑁄 𑀤𑀸𑀦𑀽𑀧𑀓𑀧𑁆𑀧𑀦𑀸𑀬. 𑀬𑀣𑀸𑀳 𑁋 ‘‘𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁, 𑀬𑀢𑁆𑀣 𑀞𑀺𑀢𑀲𑁆𑀲 𑀢𑀁 𑀤𑀸𑀦𑀁 𑀉𑀧𑀓𑀧𑁆𑀧𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁭𑁭). 𑀬𑀣𑀸 𑀘 𑀓𑀦𑁆𑀤𑀭𑀧𑀤𑀭𑀲𑀸𑀔𑀧𑀲𑀸𑀔𑀓𑀼𑀲𑁄𑀩𑁆𑀪𑀫𑀳𑀸𑀲𑁄𑀩𑁆𑀪𑁂 𑀳𑀺 𑀑𑀕𑀮𑀺𑀢𑁂𑀦 𑀉𑀤𑀓𑁂𑀦 𑀯𑀸𑀭𑀺𑀯𑀳𑀸 𑀫𑀳𑀸𑀦𑀚𑁆𑀚𑁄 𑀧𑀽𑀭𑀸 𑀳𑀼𑀢𑁆𑀯𑀸 𑀲𑀸𑀕𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀏𑀯𑀁 𑀇𑀢𑁄 𑀤𑀺𑀦𑁆𑀦𑀤𑀸𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀻𑀢𑀺.

𑁨𑁨. 𑀬𑀲𑁆𑀫𑀸 𑀧𑁂𑀢𑀸 ‘‘𑀇𑀢𑁄 𑀓𑀺𑀜𑁆𑀘𑀺 𑀮𑀪𑀸𑀫𑀸’’𑀢𑀺 𑀆𑀲𑀸𑀪𑀺𑀪𑀽𑀢𑀸 𑀜𑀸𑀢𑀺𑀖𑀭𑀁 𑀆𑀕𑀦𑁆𑀢𑁆𑀯𑀸𑀧𑀺 ‘‘𑀇𑀤𑀁 𑀦𑀸𑀫 𑀦𑁄 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀇𑀫𑀸𑀦𑀺 𑀅𑀦𑀼𑀲𑁆𑀲𑀭𑀡𑀯𑀢𑁆𑀣𑀽𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑁄 𑀓𑀼𑀮𑀧𑀼𑀢𑁆𑀢𑁄 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀸𑀲𑀺 𑀫𑁂’’𑀢𑀺 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 ¶ 𑁋 𑀇𑀤𑀁 𑀦𑀸𑀫 𑀫𑁂 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀅𑀤𑀸𑀲𑀺, 𑀇𑀤𑀁 𑀦𑀸𑀫 𑀫𑁂 𑀓𑀺𑀘𑁆𑀘𑀁 𑀅𑀢𑁆𑀢𑀦𑀸𑀬𑁂𑀯 𑀬𑁄𑀕𑀁 𑀆𑀧𑀚𑁆𑀚𑀦𑁆𑀢𑁄 𑀅𑀓𑀸𑀲𑀺, ‘‘𑀅𑀲𑀼𑀓𑁄 𑀫𑁂 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀲𑀫𑁆𑀩𑀦𑁆𑀥𑀢𑁆𑀢𑀸 𑀜𑀸𑀢𑀺, 𑀲𑀺𑀦𑁂𑀳𑀯𑀲𑁂𑀦 ¶ 𑀢𑀸𑀡𑀲𑀫𑀢𑁆𑀣𑀢𑀸𑀬 𑀫𑀺𑀢𑁆𑀢𑁄, 𑀅𑀲𑀼𑀓𑁄 𑀫𑁂 𑀲𑀳𑀧𑀁𑀲𑀼𑀓𑀻𑀴𑀓𑀲𑀳𑀸𑀬𑁄 𑀲𑀔𑀸’’𑀢𑀺 𑀘 𑀏𑀢𑀁 𑀲𑀩𑁆𑀩𑀫𑀦𑀼𑀲𑁆𑀲𑀭𑀦𑁆𑀢𑁄 𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸 𑀤𑀸𑀦𑀁 𑀦𑀺𑀬𑁆𑀬𑀸𑀢𑁂𑀬𑁆𑀬. ‘‘𑀤𑀓𑁆𑀔𑀺𑀡𑀸 𑀤𑀚𑁆𑀚𑀸’’𑀢𑀺 𑀯𑀸 𑀧𑀸𑀞𑁄, 𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀸 𑀤𑀸𑀢𑀩𑁆𑀩𑀸, 𑀢𑁂𑀦 ‘‘𑀅𑀤𑀸𑀲𑀺 𑀫𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀁 𑀅𑀦𑀼𑀲𑁆𑀲𑀭𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁.

𑁨𑁩-𑁨𑁪. 𑀬𑁂 𑀧𑀦 𑀲𑀢𑁆𑀢𑀸 𑀜𑀸𑀢𑀺𑀫𑀭𑀡𑁂𑀦 𑀭𑀼𑀡𑁆𑀡𑀲𑁄𑀓𑀸𑀤𑀺𑀧𑀭𑀸 𑀏𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀦 𑀢𑁂𑀲𑀁 𑀅𑀢𑁆𑀣𑀸𑀬 𑀓𑀺𑀜𑁆𑀘𑀺 𑀤𑁂𑀦𑁆𑀢𑀺, 𑀢𑁂𑀲𑀁 𑀢𑀁 𑀭𑀼𑀡𑁆𑀡𑀲𑁄𑀓𑀸𑀤𑀺 𑀓𑁂𑀯𑀮𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀁 𑀦 𑀧𑁂𑀢𑀸𑀦𑀁 𑀓𑀜𑁆𑀘𑀺 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑀺 𑀭𑀼𑀡𑁆𑀡𑀁 𑀯𑀸’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀫𑀕𑀥𑀭𑀸𑀚𑁂𑀦 𑀤𑀺𑀦𑁆𑀦𑀤𑀓𑁆𑀔𑀺𑀡𑀸𑀬 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀘 𑀔𑁄’’𑀢𑀺 𑀕𑀸𑀣𑀫𑀸𑀳. 𑀢𑁂𑀲𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑁨𑁫. 𑀇𑀤𑀸𑀦𑀺 𑀬𑀲𑁆𑀫𑀸 𑀇𑀫𑀁 𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑁂𑀦 𑀭𑀜𑁆𑀜𑀸 𑀜𑀸𑀢𑀻𑀦𑀁 𑀜𑀸𑀢𑀻𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑁂𑀦 𑀜𑀸𑀢𑀺𑀥𑀫𑁆𑀫𑁄 𑀦𑀺𑀤𑀲𑁆𑀲𑀺𑀢𑁄, 𑀩𑀳𑀼𑀚𑀦𑀲𑁆𑀲 𑀧𑀸𑀓𑀝𑁄 𑀓𑀢𑁄, 𑀦𑀺𑀤𑀲𑁆𑀲𑀦𑀁 𑀧𑀸𑀓𑀝𑀁 𑀓𑀢𑀁 ‘‘𑀢𑀼𑀫𑁆𑀳𑁂𑀳𑀺𑀧𑀺 𑀏𑀯𑀫𑁂𑀯 𑀜𑀸𑀢𑀻𑀲𑀼 𑀜𑀸𑀢𑀺𑀥𑀫𑁆𑀫𑁄 𑀧𑀭𑀺𑀧𑀽𑀭𑁂𑀢𑀩𑁆𑀩𑁄’’𑀢𑀺. 𑀢𑁂 𑀘 𑀧𑁂𑀢𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀫𑁂𑀦𑁆𑀢𑁂𑀦 𑀧𑁂𑀢𑀸𑀦𑀁 𑀧𑀽𑀚𑀸 𑀓𑀢𑀸 𑀉𑀴𑀸𑀭𑀸 ¶ , 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑁆𑀦𑀧𑀸𑀦𑀸𑀤𑀻𑀳𑀺 𑀲𑀦𑁆𑀢𑀧𑁆𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀽𑀦𑀁 𑀩𑀮𑀁 𑀅𑀦𑀼𑀧𑁆𑀧𑀤𑀺𑀦𑁆𑀦𑀁, 𑀅𑀦𑀼𑀓𑀫𑁆𑀧𑀸𑀤𑀺𑀕𑀼𑀡𑀧𑀭𑀺𑀯𑀸𑀭𑀜𑁆𑀘 𑀘𑀸𑀕𑀘𑁂𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦 𑀅𑀦𑀧𑁆𑀧𑀓𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀢𑀲𑁆𑀫𑀸 𑀪𑀕𑀯𑀸 𑀇𑀫𑁂𑀳𑀺 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀺 𑀭𑀸𑀚𑀸𑀦𑀁 𑀲𑀫𑁆𑀧𑀳𑀁𑀲𑁂𑀦𑁆𑀢𑁄 ‘‘𑀲𑁄 𑀜𑀸𑀢𑀺𑀥𑀫𑁆𑀫𑁄’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳.

𑀢𑀢𑁆𑀣 𑀜𑀸𑀢𑀺𑀥𑀫𑁆𑀫𑁄𑀢𑀺 𑀜𑀸𑀢𑀻𑀳𑀺 𑀜𑀸𑀢𑀻𑀦𑀁 𑀓𑀢𑁆𑀢𑀩𑁆𑀩𑀓𑀭𑀡𑀁. 𑀉𑀴𑀸𑀭𑀸𑀢𑀺 𑀨𑀻𑀢𑀸 𑀲𑀫𑀺𑀤𑁆𑀥𑀸. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀧𑀲𑀼𑀢𑀦𑁆𑀢𑀺 𑀉𑀧𑀘𑀺𑀢𑀁. 𑀏𑀢𑁆𑀣 𑀘 ‘‘𑀲𑁄 𑀜𑀸𑀢𑀺𑀥𑀫𑁆𑀫𑁄 𑀘 𑀅𑀬𑀁 𑀦𑀺𑀤𑀲𑁆𑀲𑀺𑀢𑁄’’𑀢𑀺 𑀏𑀢𑁂𑀦 𑀪𑀕𑀯𑀸 𑀭𑀸𑀚𑀸𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺. 𑀜𑀸𑀢𑀺𑀥𑀫𑁆𑀫𑀤𑀲𑁆𑀲𑀦𑀜𑁆𑀳𑁂𑀢𑁆𑀣 𑀲𑀦𑁆𑀤𑀲𑁆𑀲𑀦𑀁. ‘‘𑀧𑁂𑀢𑀸𑀦 𑀧𑀽𑀚𑀸 𑀘 𑀓𑀢𑀸 𑀉𑀴𑀸𑀭𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀤𑀧𑁂𑀲𑀺. ‘‘𑀉𑀴𑀸𑀭𑀸’’𑀢𑀺 𑀧𑀲𑀁𑀲𑀦𑀜𑁆𑀳𑁂𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀧𑀽𑀚𑀸𑀓𑀭𑀡𑁂 𑀲𑀫𑀸𑀤𑀧𑀦𑀁. ‘‘𑀩𑀮𑀜𑁆𑀘 𑀪𑀺𑀓𑁆𑀔𑀽𑀦𑀫𑀦𑀼𑀧𑁆𑀧𑀤𑀺𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀼𑀢𑁆𑀢𑁂𑀚𑁂𑀲𑀺. 𑀪𑀺𑀓𑁆𑀔𑀽𑀦𑀁 𑀩𑀮𑀸𑀦𑀼𑀧𑁆𑀧𑀤𑀸𑀦𑀜𑁆𑀳𑁂𑀢𑁆𑀣 𑀏𑀯𑀁𑀯𑀺𑀥𑀸𑀦𑀁 𑀩𑀮𑀸𑀦𑀼𑀧𑁆𑀧𑀤𑀸𑀦𑁂 𑀉𑀲𑁆𑀲𑀸𑀳𑀯𑀟𑁆𑀠𑀦𑁂𑀦 ¶ 𑀲𑀫𑀼𑀢𑁆𑀢𑁂𑀚𑀦𑀁. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀧𑀳𑀁𑀲𑁂𑀲𑀺. 𑀧𑀼𑀜𑁆𑀜𑀧𑀲𑀯𑀦𑀓𑀺𑀢𑁆𑀢𑀦𑀜𑁆𑀳𑁂𑀢𑁆𑀣 𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀕𑀼𑀡𑀲𑀁𑀯𑀡𑁆𑀡𑀦𑀪𑀸𑀯𑁂𑀦 𑀲𑀫𑁆𑀧𑀳𑀁𑀲𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀢𑁆𑀢𑀺𑀆𑀤𑀻𑀦𑀯𑀲𑀁𑀯𑀡𑁆𑀡𑀦𑁂𑀦 𑀲𑀁𑀯𑀺𑀕𑁆𑀕𑀳𑀤𑀬𑀸𑀦𑀁 𑀬𑁄𑀦𑀺𑀲𑁄 𑀧𑀤𑀳𑀢𑀁 ¶ 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀤𑀫𑁂𑀯 𑀢𑀺𑀭𑁄𑀓𑀼𑀝𑁆𑀝𑀤𑁂𑀲𑀦𑀁 𑀤𑁂𑀲𑁂𑀲𑀺. 𑀏𑀯𑀁 𑀬𑀸𑀯 𑀲𑀢𑁆𑀢 𑀤𑀺𑀯𑀲𑀸 𑀢𑀸𑀤𑀺𑀲𑁄𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀢𑀺𑀭𑁄𑀓𑀼𑀝𑁆𑀝𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀜𑁆𑀘𑀧𑀼𑀢𑁆𑀢𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀧𑀜𑁆𑀘𑀧𑀼𑀢𑁆𑀢𑀔𑀸𑀤𑀓𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀕𑀸𑀫𑀓𑁂 𑀅𑀜𑁆𑀜𑀢𑀭𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀪𑀭𑀺𑀬𑀸 𑀯𑀜𑁆𑀛𑀸 𑀅𑀳𑁄𑀲𑀺. 𑀢𑀲𑁆𑀲 𑀜𑀸𑀢𑀓𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑀯 𑀧𑀚𑀸𑀧𑀢𑀺 𑀯𑀜𑁆𑀛𑀸, 𑀅𑀜𑁆𑀜𑀁 𑀢𑁂 𑀓𑀜𑁆𑀜𑀁 𑀆𑀦𑁂𑀫𑀸’’𑀢𑀺. 𑀲𑁄 𑀢𑀲𑁆𑀲𑁄 𑀪𑀭𑀺𑀬𑀸𑀬 𑀲𑀺𑀦𑁂𑀳𑁂𑀦 𑀦 𑀇𑀘𑁆𑀙𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀸𑀫𑀺𑀓𑀁 𑀏𑀯𑀫𑀸𑀳 ¶ 𑁋 ‘‘𑀲𑀸𑀫𑀺, 𑀅𑀳𑀁 𑀯𑀜𑁆𑀛𑀸, 𑀅𑀜𑁆𑀜𑀸 𑀓𑀜𑁆𑀜𑀸 𑀆𑀦𑁂𑀢𑀩𑁆𑀩𑀸, 𑀫𑀸 𑀢𑁂 𑀓𑀼𑀮𑀯𑀁𑀲𑁄 𑀉𑀧𑀘𑁆𑀙𑀺𑀚𑁆𑀚𑀻’’𑀢𑀺. 𑀲𑁄 𑀢𑀸𑀬 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀅𑀜𑁆𑀜𑀁 𑀓𑀜𑁆𑀜𑀁 𑀆𑀦𑁂𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀯𑀜𑁆𑀛𑀺𑀢𑁆𑀣𑀻 𑁋 ‘‘𑀅𑀬𑀁 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀇𑀫𑀲𑁆𑀲 𑀕𑁂𑀳𑀲𑁆𑀲 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀲𑁆𑀲𑀸𑀧𑀓𑀢𑀸 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀽𑀧𑀸𑀬𑀁 𑀧𑀭𑀺𑀬𑁂𑀲𑀦𑁆𑀢𑀻 𑀅𑀜𑁆𑀜𑀢𑀭𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀅𑀦𑁆𑀦𑀧𑀸𑀦𑀸𑀤𑀻𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀸𑀬 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀤𑀸𑀧𑁂𑀲𑀺. 𑀲𑀸 𑀕𑀩𑁆𑀪𑁂 𑀧𑀢𑀺𑀢𑁂 𑀅𑀢𑁆𑀢𑀦𑁄 𑀫𑀸𑀢𑀼𑀬𑀸 𑀆𑀭𑁄𑀘𑁂𑀲𑀺, 𑀫𑀸𑀢𑀸 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀫𑀢𑁆𑀣𑀁 𑀦𑀺𑀯𑁂𑀤𑁂𑀲𑀺. 𑀢𑁂 𑀯𑀜𑁆𑀛𑀺𑀢𑁆𑀣𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑀬𑀸 𑀇𑀫𑀺𑀲𑁆𑀲𑀸 𑀕𑀩𑁆𑀪𑁄 𑀧𑀸𑀢𑀺𑀢𑁄’’𑀢𑀺? ‘‘𑀦𑀸𑀳𑀁 𑀧𑀸𑀢𑁂𑀫𑀻’’𑀢𑀺. ‘‘𑀲𑀘𑁂 𑀢𑀬𑀸 𑀕𑀩𑁆𑀪𑁄 𑀦 𑀧𑀸𑀢𑀺𑀢𑁄, 𑀲𑀧𑀣𑀁 𑀓𑀭𑁄𑀳𑀻’’𑀢𑀺 ¶ . ‘‘𑀲𑀘𑁂 𑀫𑀬𑀸 𑀕𑀩𑁆𑀪𑁄 𑀧𑀸𑀢𑀺𑀢𑁄, 𑀤𑀼𑀕𑁆𑀕𑀢𑀺𑀧𑀭𑀸𑀬𑀡𑀸 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀲𑀸𑀬𑀁 𑀧𑀸𑀢𑀁 𑀧𑀜𑁆𑀘 𑀧𑀜𑁆𑀘 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑁂𑀬𑁆𑀬𑀁, 𑀦𑀺𑀘𑁆𑀘𑀁 𑀤𑀼𑀕𑁆𑀕𑀦𑁆𑀥𑀸 𑀫𑀓𑁆𑀔𑀺𑀓𑀸𑀧𑀭𑀺𑀓𑀺𑀡𑁆𑀡𑀸 𑀘 𑀪𑀯𑁂𑀬𑁆𑀬’’𑀦𑁆𑀢𑀺 𑀫𑀼𑀲𑀸 𑀯𑀢𑁆𑀯𑀸 𑀲𑀧𑀣𑀁 𑀅𑀓𑀸𑀲𑀺. 𑀲𑀸 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀤𑀼𑀩𑁆𑀩𑀡𑁆𑀡𑀭𑀽𑀧𑀸 𑀧𑁂𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀢𑀤𑀸 𑀚𑀦𑀧𑀤𑁂 𑀯𑀼𑀢𑁆𑀣𑀯𑀲𑁆𑀲𑀸 𑀅𑀝𑁆𑀞 𑀣𑁂𑀭𑀸 𑀲𑀢𑁆𑀣𑀼 𑀤𑀲𑁆𑀲𑀦𑀢𑁆𑀣𑀁 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁂 𑀅𑀭𑀜𑁆𑀜𑀝𑁆𑀞𑀸𑀦𑁂 𑀯𑀸𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀅𑀣 𑀲𑀸 𑀧𑁂𑀢𑀻 𑀣𑁂𑀭𑀸𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀢𑀁 𑀧𑁂𑀢𑀺𑀁 𑁋

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀤𑀼𑀕𑁆𑀕𑀦𑁆𑀥𑀸 𑀧𑀽𑀢𑀺 𑀯𑀸𑀬𑀲𑀺;

𑀫𑀓𑁆𑀔𑀺𑀓𑀸𑀳𑀺 𑀧𑀭𑀺𑀓𑀺𑀡𑁆𑀡𑀸, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺. 𑁋

𑀕𑀸𑀣𑀸𑀬 𑀧𑀝𑀺𑀧𑀼𑀘𑁆𑀙𑀺. 𑀢𑀢𑁆𑀣 𑀦𑀕𑁆𑀕𑀸𑀢𑀺 𑀦𑀺𑀘𑁆𑀘𑁄𑀴𑀸. 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀡𑀯𑀺𑀭𑀽𑀧𑀸 𑀅𑀢𑀺𑀯𑀺𑀬 𑀩𑀻𑀪𑀘𑁆𑀙𑀭𑀽𑀧𑁂𑀦 ¶ 𑀲𑀫𑀦𑁆𑀦𑀸𑀕𑀢𑀸 𑀅𑀲𑀺. 𑀤𑀼𑀕𑁆𑀕𑀦𑁆𑀥𑀸𑀢𑀺 𑀅𑀦𑀺𑀝𑁆𑀞𑀕𑀦𑁆𑀥𑀸. 𑀧𑀽𑀢𑀺 𑀯𑀸𑀬𑀲𑀻𑀢𑀺 𑀲𑀭𑀻𑀭𑀢𑁄 𑀓𑀼𑀡𑀧𑀕𑀦𑁆𑀥𑀁 𑀯𑀸𑀬𑀲𑀺. 𑀫𑀓𑁆𑀔𑀺𑀓𑀸𑀳𑀺 𑀧𑀭𑀺𑀓𑀺𑀡𑁆𑀡𑀸𑀢𑀺 𑀦𑀻𑀮𑀫𑀓𑁆𑀔𑀺𑀓𑀸𑀳𑀺 𑀲𑀫𑀦𑁆𑀢𑀢𑁄 𑀆𑀓𑀺𑀡𑁆𑀡𑀸. 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻𑀢𑀺 𑀓𑀸 𑀦𑀸𑀫 𑀏𑀯𑀭𑀽𑀧𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀺𑀝𑁆𑀞𑀲𑀺, 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀲𑀻𑀢𑀺 𑀅𑀢𑁆𑀣𑁄.

𑀅𑀣 𑀲𑀸 𑀧𑁂𑀢𑀻 𑀫𑀳𑀸𑀣𑁂𑀭𑁂𑀦 𑀏𑀯𑀁 𑀧𑀼𑀝𑁆𑀞𑀸 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀦𑁆𑀢𑀻 𑀲𑀢𑁆𑀢𑀸𑀦𑀁 𑀲𑀁𑀯𑁂𑀕𑀁 𑀚𑀦𑁂𑀦𑁆𑀢𑀻 𑁋

‘‘𑀅𑀳𑀁 ¶ 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀓𑀸𑀮𑁂𑀦 𑀧𑀜𑁆𑀘 𑀧𑀼𑀢𑁆𑀢𑀸𑀦𑀺, 𑀲𑀸𑀬𑀁 𑀧𑀜𑁆𑀘 𑀧𑀼𑀦𑀸𑀧𑀭𑁂;

𑀯𑀺𑀚𑀸𑀬𑀺𑀢𑁆𑀯𑀸𑀦 𑀔𑀸𑀤𑀸𑀫𑀺, 𑀢𑁂𑀧𑀺 𑀦𑀸 𑀳𑁄𑀦𑁆𑀢𑀺 𑀫𑁂 𑀅𑀮𑀁.

‘‘𑀧𑀭𑀺𑀟𑀬𑁆𑀳𑀢𑀺 ¶ 𑀥𑀽𑀫𑀸𑀬𑀢𑀺, 𑀔𑀼𑀤𑀸𑀬 𑀳𑀤𑀬𑀁 𑀫𑀫;

𑀧𑀸𑀦𑀻𑀬𑀁 𑀦 𑀮𑀪𑁂 𑀧𑀸𑀢𑀼𑀁, 𑀧𑀲𑁆𑀲 𑀫𑀁 𑀩𑁆𑀬𑀲𑀦𑀁 𑀕𑀢’’𑀦𑁆𑀢𑀺. 𑁋

𑁨𑁭. 𑀢𑀢𑁆𑀣 𑀪𑀤𑀦𑁆𑀢𑁂𑀢𑀺 𑀣𑁂𑀭𑀁 𑀕𑀸𑀭𑀯𑁂𑀦 𑀆𑀮𑀧𑀢𑀺. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀕𑁆𑀕𑀢𑀺𑀁 𑀕𑀢𑀸. 𑀬𑀫𑀮𑁄𑀓𑀺𑀓𑀸𑀢𑀺 ‘‘𑀬𑀫𑀮𑁄𑀓𑁄’’𑀢𑀺 𑀮𑀤𑁆𑀥𑀦𑀸𑀫𑁂 𑀧𑁂𑀢𑀮𑁄𑀓𑁂 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀯𑀺𑀤𑀺𑀢𑀸. 𑀇𑀢𑁄 𑀕𑀢𑀸𑀢𑀺 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀧𑁂𑀢𑀮𑁄𑀓𑀁 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀢𑀸, 𑀉𑀧𑀧𑀦𑁆𑀦𑀸𑀢𑀺 𑀅𑀢𑁆𑀣𑁄.

𑁨𑁮. 𑀓𑀸𑀮𑁂𑀦𑀸𑀢𑀺 𑀭𑀢𑁆𑀢𑀺𑀬𑀸 𑀯𑀺𑀪𑀸𑀢𑀓𑀸𑀮𑁂. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀓𑀭𑀡𑀯𑀘𑀦𑀁. 𑀧𑀜𑁆𑀘 𑀧𑀼𑀢𑁆𑀢𑀸𑀦𑀻𑀢𑀺 𑀧𑀜𑁆𑀘 𑀧𑀼𑀢𑁆𑀢𑁂. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀲𑀸𑀬𑀁 𑀧𑀜𑁆𑀘 𑀧𑀼𑀦𑀸𑀧𑀭𑁂𑀢𑀺 𑀲𑀸𑀬𑀦𑁆𑀳𑀓𑀸𑀮𑁂 𑀧𑀼𑀦 𑀅𑀧𑀭𑁂 𑀧𑀜𑁆𑀘 𑀧𑀼𑀢𑁆𑀢𑁂 𑀔𑀸𑀤𑀸𑀫𑀻𑀢𑀺 𑀬𑁄𑀚𑀦𑀸. 𑀯𑀺𑀚𑀸𑀬𑀺𑀢𑁆𑀯𑀸𑀦𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀲 𑀤𑀲 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸. 𑀢𑁂𑀧𑀺 𑀦𑀸 𑀳𑁄𑀦𑁆𑀢𑀺 𑀫𑁂 𑀅𑀮𑀦𑁆𑀢𑀺 𑀢𑁂𑀧𑀺 𑀤𑀲𑀧𑀼𑀢𑁆𑀢𑀸 𑀏𑀓𑀤𑀺𑀯𑀲𑀁 𑀫𑀬𑁆𑀳𑀁 𑀔𑀼𑀤𑀸𑀬 𑀧𑀝𑀺𑀖𑀸𑀢𑀸𑀬 𑀅𑀳𑀁 𑀧𑀭𑀺𑀬𑀢𑁆𑀢𑀸 𑀦 𑀳𑁄𑀦𑁆𑀢𑀺. 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀳𑁂𑀢𑁆𑀣 𑀦𑀸-𑀇𑀢𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁨𑁯. 𑀧𑀭𑀺𑀟𑀬𑁆𑀳𑀢𑀺 𑀥𑀽𑀫𑀸𑀬𑀢𑀺 𑀔𑀼𑀤𑀸𑀬 𑀳𑀤𑀬𑀁 𑀫𑀫𑀸𑀢𑀺 𑀔𑀼𑀤𑀸𑀬 𑀚𑀺𑀖𑀘𑁆𑀙𑀸𑀬 𑀩𑀸𑀥𑀺𑀬𑀫𑀸𑀦𑀸𑀬 𑀫𑀫 𑀳𑀤𑀬𑀧𑀤𑁂𑀲𑁄 𑀉𑀤𑀭𑀕𑁆𑀕𑀺𑀦𑀸 𑀧𑀭𑀺𑀲𑀫𑀦𑁆𑀢𑀢𑁄 𑀛𑀸𑀬𑀢𑀺 𑀥𑀽𑀫𑀸𑀬𑀢𑀺 𑀲𑀦𑁆𑀢𑀧𑁆𑀧𑀢𑀺. 𑀧𑀸𑀦𑀻𑀬𑀁 𑀦 𑀮𑀪𑁂 𑀧𑀸𑀢𑀼𑀦𑁆𑀢𑀺 𑀧𑀺𑀧𑀸𑀲𑀸𑀪𑀺𑀪𑀽𑀢𑀸 ¶ 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀻 𑀧𑀸𑀦𑀻𑀬𑀫𑁆𑀧𑀺 𑀧𑀸𑀢𑀼𑀁 𑀦 𑀮𑀪𑀸𑀫𑀺. 𑀧𑀲𑁆𑀲 𑀫𑀁 𑀩𑁆𑀬𑀲𑀦𑀁 𑀕𑀢𑀦𑁆𑀢𑀺 𑀧𑁂𑀢𑀽𑀧𑀧𑀢𑁆𑀢𑀺𑀬𑀸 𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡𑀜𑁆𑀘 𑀇𑀫𑀁 𑀈𑀤𑀺𑀲𑀁 𑀩𑁆𑀬𑀲𑀦𑀁 𑀉𑀧𑀕𑀢𑀁 𑀫𑀁 𑀧𑀲𑁆𑀲, 𑀪𑀦𑁆𑀢𑁂𑀢𑀺 𑀅𑀢𑁆𑀢𑀦𑀸 𑀅𑀦𑀼𑀪𑀯𑀺𑀬𑀫𑀸𑀦𑀁 𑀤𑀼𑀓𑁆𑀔𑀁 𑀣𑁂𑀭𑀲𑁆𑀲 𑀧𑀯𑁂𑀤𑁂𑀲𑀺.

𑀢𑀁 ¶ 𑀲𑀼𑀢𑁆𑀯𑀸 𑀣𑁂𑀭𑁄 𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀲𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁. 𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦𑀸𑀢𑀺 𑀓𑀻𑀤𑀺𑀲𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦, 𑀓𑀺𑀁 𑀧𑀸𑀡𑀸𑀢𑀺𑀧𑀸𑀢𑀲𑁆𑀲, 𑀉𑀤𑀸𑀳𑀼 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀓𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺.

𑀅𑀣 ¶ 𑀲𑀸 𑀧𑁂𑀢𑀻 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀣𑁂𑀭𑀲𑁆𑀲 𑀓𑀣𑁂𑀦𑁆𑀢𑀻 𑁋

‘‘𑀲𑀧𑀢𑀻 𑀫𑁂 𑀕𑀩𑁆𑀪𑀺𑀦𑀻 𑀆𑀲𑀺, 𑀢𑀲𑁆𑀲𑀸 𑀧𑀸𑀧𑀁 𑀅𑀘𑁂𑀢𑀬𑀺𑀁;

𑀲𑀸𑀳𑀁 𑀧𑀤𑀼𑀝𑁆𑀞𑀫𑀦𑀲𑀸, 𑀅𑀓𑀭𑀺𑀁 𑀕𑀩𑁆𑀪𑀧𑀸𑀢𑀦𑀁.

‘‘𑀢𑀲𑁆𑀲 𑀤𑁆𑀯𑁂𑀫𑀸𑀲𑀺𑀓𑁄 𑀕𑀩𑁆𑀪𑁄, 𑀮𑁄𑀳𑀺𑀢𑀜𑁆𑀜𑁂𑀯 𑀧𑀕𑁆𑀖𑀭𑀺;

𑀢𑀤𑀲𑁆𑀲𑀸 𑀫𑀸𑀢𑀸 𑀓𑀼𑀧𑀺𑀢𑀸, 𑀫𑀬𑁆𑀳𑀁 𑀜𑀸𑀢𑀻 𑀲𑀫𑀸𑀦𑀬𑀺;

𑀲𑀧𑀣𑀜𑁆𑀘 𑀫𑀁 𑀅𑀓𑀸𑀭𑁂𑀲𑀺, 𑀧𑀭𑀺𑀪𑀸𑀲𑀸𑀧𑀬𑀻 𑀘 𑀫𑀁.

‘‘𑀲𑀸𑀳𑀁 𑀖𑁄𑀭𑀜𑁆𑀘 𑀲𑀧𑀣𑀁, 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺𑀲𑀁;

‘𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀺, 𑀲𑀘𑁂 𑀢𑀁 𑀧𑀓𑀢𑀁 𑀫𑀬𑀸’.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦, 𑀫𑀼𑀲𑀸𑀯𑀸𑀤𑀲𑁆𑀲 𑀘𑀽𑀪𑀬𑀁;

𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀺, 𑀧𑀼𑀩𑁆𑀩𑀮𑁄𑀳𑀺𑀢𑀫𑀓𑁆𑀔𑀺𑀢𑀸’’𑀢𑀺. 𑁋 𑀕𑀸𑀣𑀸𑀬𑁄 𑀅𑀪𑀸𑀲𑀺;

𑁩𑁧-𑁩𑁨. 𑀢𑀢𑁆𑀣 𑀲𑀧𑀢𑀻𑀢𑀺 𑀲𑀫𑀸𑀦𑀧𑀢𑀺𑀓𑀸 𑀇𑀢𑁆𑀣𑀻 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸 𑀧𑀸𑀧𑀁 𑀅𑀘𑁂𑀢𑀬𑀺𑀦𑁆𑀢𑀺 𑀢𑀲𑁆𑀲 𑀲𑀧𑀢𑀺𑀬𑀸 𑀧𑀸𑀧𑀁 𑀮𑀼𑀤𑁆𑀤𑀓𑀁 𑀓𑀫𑁆𑀫𑀁 𑀅𑀘𑁂𑀢𑀬𑀺𑀁. 𑀧𑀤𑀼𑀝𑁆𑀞𑀫𑀦𑀲𑀸𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀸, 𑀧𑀤𑀼𑀝𑁆𑀞𑁂𑀦 𑀯𑀸 𑀫𑀦𑀲𑀸. 𑀤𑁆𑀯𑁂𑀫𑀸𑀲𑀺𑀓𑁄𑀢𑀺 𑀤𑁆𑀯𑁂𑀫𑀸𑀲𑀚𑀸𑀢𑁄 𑀧𑀢𑀺𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀤𑁆𑀯𑁂𑀫𑀸𑀲𑀺𑀓𑀸. 𑀮𑁄𑀳𑀺𑀢𑀜𑁆𑀜𑁂𑀯 𑀧𑀕𑁆𑀖𑀭𑀻𑀢𑀺 𑀯𑀺𑀧𑀚𑁆𑀚𑀫𑀸𑀦𑁄 𑀭𑀼𑀳𑀺𑀭𑀜𑁆𑀜𑁂𑀯 𑀳𑀼𑀢𑁆𑀯𑀸 𑀯𑀺𑀲𑁆𑀲𑀦𑁆𑀤𑀺. 𑀢𑀤𑀲𑁆𑀲𑀸 𑀫𑀸𑀢𑀸 𑀓𑀼𑀧𑀺𑀢𑀸, 𑀫𑀬𑁆𑀳𑀁 𑀜𑀸𑀢𑀻 𑀲𑀫𑀸𑀦𑀬𑀻𑀢𑀺 𑀢𑀤𑀸 𑀅𑀲𑁆𑀲𑀸 𑀲𑀧𑀢𑀺𑀬𑀸 ¶ 𑀫𑀸𑀢𑀸 𑀫𑀬𑁆𑀳𑀁 𑀓𑀼𑀧𑀺𑀢𑀸 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀲𑀫𑁄𑀥𑀸𑀦𑁂𑀲𑀺. ‘‘𑀢𑀢𑀲𑁆𑀲𑀸’’𑀢𑀺 𑀯𑀸 𑀧𑀸𑀞𑁄, 𑀢𑀢𑁄 𑀅𑀲𑁆𑀲𑀸𑀢𑀺 𑀧𑀤𑀯𑀺𑀪𑀸𑀕𑁄.

𑁩𑁩-𑁩𑁪. 𑀲𑀧𑀣𑀦𑁆𑀢𑀺 ¶ 𑀲𑀧𑀦𑀁. 𑀧𑀭𑀺𑀪𑀸𑀲𑀸𑀧𑀬𑀻𑀢𑀺 𑀪𑀬𑁂𑀦 𑀢𑀚𑁆𑀚𑀸𑀧𑁂𑀲𑀺. 𑀲𑀧𑀣𑀁 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺𑀲𑀦𑁆𑀢𑀺 ‘‘𑀲𑀘𑁂 𑀢𑀁 𑀫𑀬𑀸 𑀓𑀢𑀁, 𑀈𑀤𑀺𑀲𑀻 𑀪𑀯𑁂𑀬𑁆𑀬’’𑀦𑁆𑀢𑀺 𑀓𑀢𑀫𑁂𑀯 𑀧𑀸𑀧𑀁 𑀅𑀓𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 𑀫𑀼𑀲𑀸𑀯𑀸𑀤𑀁 𑀅𑀪𑀽𑀢𑀁 𑀲𑀧𑀣𑀁 𑀅𑀪𑀸𑀲𑀺𑀁. 𑀫𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀺, 𑀲𑀘𑁂𑀢𑀁 𑀧𑀓𑀢𑀁 𑀫𑀬𑀸𑀢𑀺 ¶ 𑀇𑀤𑀁 𑀢𑀤𑀸 𑀲𑀧𑀣𑀲𑁆𑀲 𑀓𑀢𑀸𑀓𑀸𑀭𑀤𑀲𑁆𑀲𑀦𑀁. 𑀬𑀤𑀺 𑀏𑀢𑀁 𑀕𑀩𑁆𑀪𑀧𑀸𑀢𑀦𑀧𑀸𑀧𑀁 𑀫𑀬𑀸 𑀓𑀢𑀁, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀁 𑀫𑀬𑁆𑀳𑀁 𑀧𑀼𑀢𑁆𑀢𑀫𑀁𑀲𑀸𑀦𑀺𑀬𑁂𑀯 𑀔𑀸𑀤𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲 𑀕𑀩𑁆𑀪𑀧𑀸𑀢𑀦𑀯𑀲𑁂𑀦 𑀧𑀓𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲. 𑀫𑀼𑀲𑀸𑀯𑀸𑀤𑀲𑁆𑀲 𑀘𑀸𑀢𑀺 𑀫𑀼𑀲𑀸𑀯𑀸𑀤𑀓𑀫𑁆𑀫𑀲𑁆𑀲 𑀘. 𑀉𑀪𑀬𑀦𑁆𑀢𑀺 𑀉𑀪𑀬𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀉𑀪𑀬𑁂𑀦 𑀯𑀺𑀧𑀸𑀓𑁂𑀦. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀧𑀼𑀩𑁆𑀩𑀮𑁄𑀳𑀺𑀢𑀫𑀓𑁆𑀔𑀺𑀢𑀸𑀢𑀺 𑀧𑀲𑀯𑀦𑀯𑀲𑁂𑀦 𑀧𑀭𑀺𑀪𑀺𑀚𑁆𑀚𑀦𑀯𑀲𑁂𑀦 𑀘 𑀧𑀼𑀩𑁆𑀩𑁂𑀦 𑀘 𑀮𑁄𑀳𑀺𑀢𑁂𑀦 𑀘 𑀫𑀓𑁆𑀔𑀺𑀢𑀸 𑀳𑀼𑀢𑁆𑀯𑀸 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀻𑀢𑀺 𑀬𑁄𑀚𑀦𑀸.

𑀏𑀯𑀁 𑀲𑀸 𑀧𑁂𑀢𑀻 𑀅𑀢𑁆𑀢𑀦𑁄 𑀓𑀫𑁆𑀫𑀯𑀺𑀧𑀸𑀓𑀁 𑀧𑀯𑁂𑀤𑁂𑀢𑁆𑀯𑀸 𑀧𑀼𑀦 𑀣𑁂𑀭𑁂 𑀏𑀯𑀫𑀸𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀅𑀲𑀼𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀪𑀭𑀺𑀬𑀸 𑀇𑀲𑁆𑀲𑀸𑀧𑀓𑀢𑀸 𑀳𑀼𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀏𑀯𑀁 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸. 𑀲𑀸𑀥𑀼, 𑀪𑀦𑁆𑀢𑁂, 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑀁 𑀕𑀘𑁆𑀙𑀣, 𑀲𑁄 𑀢𑀼𑀫𑁆𑀳𑀸𑀓𑀁 𑀤𑀸𑀦𑀁 𑀤𑀲𑁆𑀲𑀢𑀺, 𑀢𑀁 𑀤𑀓𑁆𑀔𑀺𑀡𑀁 𑀫𑀬𑁆𑀳𑀁 𑀉𑀤𑁆𑀤𑀺𑀲𑀸𑀧𑁂𑀬𑁆𑀬𑀸𑀣, 𑀏𑀯𑀁 𑀫𑁂 𑀇𑀢𑁄 𑀧𑁂𑀢𑀮𑁄𑀓𑀢𑁄 𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺. 𑀣𑁂𑀭𑀸 𑀢𑀁 𑀲𑀼𑀢𑁆𑀯𑀸 𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑀸 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑀸 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀓𑀼𑀝𑀫𑁆𑀩𑀺𑀓𑁄 𑀣𑁂𑀭𑁂 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀣𑁂𑀭𑁂 𑀆𑀲𑀦𑁂𑀲𑀼 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀆𑀳𑀸𑀭𑁂𑀦 𑀪𑁄𑀚𑁂𑀢𑀼𑀁 𑀆𑀭𑀪𑀺. 𑀣𑁂𑀭𑀸 𑀢𑀁 𑀧𑀯𑀢𑁆𑀢𑀺𑀁 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀤𑀸𑀦𑀁 𑀢𑀲𑁆𑀲𑀸 𑀧𑁂𑀢𑀺𑀬𑀸 𑀉𑀤𑁆𑀤𑀺𑀲𑀸𑀧𑁂𑀲𑀼𑀁. 𑀢𑀗𑁆𑀔𑀡𑀜𑁆𑀜𑁂𑀯 𑀘 𑀲𑀸 𑀧𑁂𑀢𑀻 𑀢𑀢𑁄 𑀤𑀼𑀓𑁆𑀔𑀢𑁄 𑀅𑀧𑁂𑀢𑀸 𑀉𑀴𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀭𑀢𑁆𑀢𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀅𑀣 𑀣𑁂𑀭𑀸 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀘 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀫𑀳𑀸𑀚𑀦𑁄 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀇𑀲𑁆𑀲𑀸𑀫𑀘𑁆𑀙𑁂𑀭𑀢𑁄 𑀧𑀝𑀺𑀯𑀺𑀭𑀫𑀺. 𑀏𑀯𑀁 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀧𑀼𑀢𑁆𑀢𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀧𑀼𑀢𑁆𑀢𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑀸 ¶ ¶ ¶ 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀲𑀢𑁆𑀢𑀧𑀼𑀢𑁆𑀢𑀔𑀸𑀤𑀓𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁 𑁋 𑀧𑀞𑀫𑀯𑀬𑁂 𑀞𑀺𑀢𑀸 𑀭𑀽𑀧𑀲𑀫𑁆𑀧𑀦𑁆𑀦𑀸 𑀲𑀻𑀮𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑁂𑀲𑀁 𑀫𑀸𑀢𑀸 ‘‘𑀧𑀼𑀢𑁆𑀢𑀯𑀢𑀻 𑀅𑀳’’𑀦𑁆𑀢𑀺 𑀧𑀼𑀢𑁆𑀢𑀩𑀮𑁂𑀦 𑀪𑀢𑁆𑀢𑀸𑀭𑀁 𑀅𑀢𑀺𑀫𑀜𑁆𑀜𑀢𑀺. 𑀲𑁄 𑀪𑀭𑀺𑀬𑀸𑀬 𑀅𑀯𑀫𑀸𑀦𑀺𑀢𑁄 𑀦𑀺𑀩𑁆𑀩𑀺𑀦𑁆𑀦𑀫𑀸𑀦𑀲𑁄 𑀅𑀜𑁆𑀜𑀁 𑀓𑀜𑁆𑀜𑀁 𑀆𑀦𑁂𑀲𑀺. 𑀲𑀸 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀅𑀣𑀲𑁆𑀲 𑀚𑁂𑀝𑁆𑀞𑀪𑀭𑀺𑀬𑀸 𑀇𑀲𑁆𑀲𑀸𑀧𑀓𑀢𑀸 𑀅𑀜𑁆𑀜𑀢𑀭𑀁 𑀯𑁂𑀚𑁆𑀚𑀁 𑀆𑀫𑀺𑀲𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲𑀸 𑀢𑁂𑀫𑀸𑀲𑀺𑀓𑀁 𑀕𑀩𑁆𑀪𑀁 𑀧𑀸𑀢𑁂𑀲𑀺. 𑀅𑀣 𑀲𑀸 𑀜𑀸𑀢𑀻𑀳𑀺 𑀘 𑀪𑀢𑁆𑀢𑀸𑀭𑀸 𑀘 ‘‘𑀢𑀬𑀸 𑀇𑀫𑀺𑀲𑁆𑀲𑀸 𑀕𑀩𑁆𑀪𑁄 𑀧𑀸𑀢𑀺𑀢𑁄’’𑀢𑀺 𑀧𑀼𑀝𑁆𑀞𑀸 ‘‘𑀦𑀸𑀳𑀁 𑀧𑀸𑀢𑁂𑀫𑀻’’𑀢𑀺 𑀫𑀼𑀲𑀸 𑀯𑀢𑁆𑀯𑀸 𑀢𑁂𑀳𑀺 𑀅𑀲𑀤𑁆𑀤𑀳𑀦𑁆𑀢𑁂𑀳𑀺 ‘‘𑀲𑀧𑀣𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑀸 ‘‘𑀲𑀸𑀬𑀁 𑀧𑀸𑀢𑀁 𑀲𑀢𑁆𑀢 𑀲𑀢𑁆𑀢 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀺, 𑀦𑀺𑀘𑁆𑀘𑀁 𑀤𑀼𑀕𑁆𑀕𑀦𑁆𑀥𑀸 𑀘 𑀫𑀓𑁆𑀔𑀺𑀓𑀸𑀧𑀭𑀺𑀓𑀺𑀡𑁆𑀡𑀸 𑀘 𑀪𑀯𑁂𑀬𑁆𑀬’’𑀦𑁆𑀢𑀺 𑀲𑀧𑀣𑀁 𑀅𑀓𑀸𑀲𑀺.

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲 𑀕𑀩𑁆𑀪𑀧𑀸𑀢𑀦𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀲 𑀘 𑀨𑀮𑁂𑀦𑁂𑀯 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀢𑁆𑀢𑀦𑀬𑁂𑀦 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀻 𑀢𑀲𑁆𑀲𑁂𑀯 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀯𑀺𑀘𑀭𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀕𑀸𑀫𑀓𑀸𑀯𑀸𑀲𑁂 𑀯𑀼𑀢𑁆𑀣𑀯𑀲𑁆𑀲𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀭𑀢𑁆𑀢𑀺𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀅𑀣 𑀲𑀸 𑀧𑁂𑀢𑀻 𑀢𑁂𑀲𑀁 𑀣𑁂𑀭𑀸𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀢𑀁 𑀫𑀳𑀸𑀣𑁂𑀭𑁄 𑀕𑀸𑀣𑀸𑀬 𑀧𑀼𑀘𑁆𑀙𑀺 𑁋

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀤𑀼𑀕𑁆𑀕𑀦𑁆𑀥𑀸 𑀧𑀽𑀢𑀺 𑀯𑀸𑀬𑀲𑀺;

𑀫𑀓𑁆𑀔𑀺𑀓𑀸𑀳𑀺 𑀧𑀭𑀺𑀓𑀺𑀡𑁆𑀡𑀸, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺.

𑀲𑀸 𑀣𑁂𑀭𑁂𑀦 𑀧𑀼𑀝𑁆𑀞𑀸 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺 𑁋

‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀓𑀸𑀮𑁂𑀦 𑀲𑀢𑁆𑀢 𑀧𑀼𑀢𑁆𑀢𑀸𑀦𑀺, 𑀲𑀸𑀬𑀁 𑀲𑀢𑁆𑀢 𑀧𑀼𑀦𑀸𑀧𑀭𑁂;

𑀯𑀺𑀚𑀸𑀬𑀺𑀢𑁆𑀯𑀸𑀦 𑀔𑀸𑀤𑀸𑀫𑀺, 𑀢𑁂𑀧𑀺 𑀦𑀸 𑀳𑁄𑀦𑁆𑀢𑀺 𑀫𑁂 𑀅𑀮𑀁.

‘‘𑀧𑀭𑀺𑀟𑀬𑁆𑀳𑀢𑀺 ¶ ¶ ¶ 𑀥𑀽𑀫𑀸𑀬𑀢𑀺, 𑀔𑀼𑀤𑀸𑀬 𑀳𑀤𑀬𑀁 𑀫𑀫;

𑀦𑀺𑀩𑁆𑀩𑀼𑀢𑀺𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀕𑁆𑀕𑀺𑀤𑀟𑁆𑀠𑀸𑀯 𑀆𑀢𑀧𑁂’’𑀢𑀺.

𑁩𑁮. 𑀢𑀢𑁆𑀣 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀤𑀼𑀓𑁆𑀔𑀲𑁆𑀲 𑀯𑀽𑀧𑀲𑀫𑀁. 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀦 𑀮𑀪𑀸𑀫𑀺. 𑀅𑀕𑁆𑀕𑀺𑀤𑀟𑁆𑀠𑀸𑀯 𑀆𑀢𑀧𑁂𑀢𑀺 𑀅𑀢𑀺𑀉𑀡𑁆𑀳𑀆𑀢𑀧𑁂 𑀅𑀕𑁆𑀕𑀺𑀦𑀸 𑀟𑀬𑁆𑀳𑀫𑀸𑀦𑀸 𑀯𑀺𑀬 𑀦𑀺𑀩𑁆𑀩𑀼𑀢𑀺𑀁 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀬𑁄𑀚𑀦𑀸.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀣𑁂𑀭𑁄 𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀲𑀻’’𑀢𑀺. 𑁋 𑀕𑀸𑀣𑀫𑀸𑀳;

𑀅𑀣 𑀲𑀸 𑀧𑁂𑀢𑀻 𑀅𑀢𑁆𑀢𑀦𑁄 𑀧𑁂𑀢𑀮𑁄𑀓𑀽𑀧𑀧𑀢𑁆𑀢𑀺𑀜𑁆𑀘 𑀧𑀼𑀢𑁆𑀢𑀫𑀁𑀲𑀔𑀸𑀤𑀦𑀓𑀸𑀭𑀡𑀜𑁆𑀘 𑀓𑀣𑁂𑀦𑁆𑀢𑀻 𑁋

‘‘𑀅𑀳𑀽 𑀫𑀬𑁆𑀳𑀁 𑀤𑀼𑀯𑁂 𑀧𑀼𑀢𑁆𑀢𑀸, 𑀉𑀪𑁄 𑀲𑀫𑁆𑀧𑀢𑁆𑀢𑀬𑁄𑀩𑁆𑀩𑀦𑀸;

𑀲𑀸𑀳𑀁 𑀧𑀼𑀢𑁆𑀢𑀩𑀮𑀽𑀧𑁂𑀢𑀸, 𑀲𑀸𑀫𑀺𑀓𑀁 𑀅𑀢𑀺𑀫𑀜𑁆𑀜𑀺𑀲𑀁.

‘‘𑀢𑀢𑁄 𑀫𑁂 𑀲𑀸𑀫𑀺𑀓𑁄 𑀓𑀼𑀤𑁆𑀥𑁄, 𑀲𑀧𑀢𑀺𑀁 𑀫𑀬𑁆𑀳𑀫𑀸𑀦𑀬𑀺;

𑀲𑀸 𑀘 𑀕𑀩𑁆𑀪𑀁 𑀅𑀮𑀪𑀺𑀢𑁆𑀣, 𑀢𑀲𑁆𑀲𑀸 𑀧𑀸𑀧𑀁 𑀅𑀘𑁂𑀢𑀬𑀺𑀁.

‘‘𑀲𑀸𑀳𑀁 𑀧𑀤𑀼𑀝𑁆𑀞𑀫𑀦𑀲𑀸, 𑀅𑀓𑀭𑀺𑀁 𑀕𑀩𑁆𑀪𑀧𑀸𑀢𑀦𑀁;

𑀢𑀲𑁆𑀲 𑀢𑁂𑀫𑀸𑀲𑀺𑀓𑁄 𑀕𑀩𑁆𑀪𑁄, 𑀧𑀽𑀢𑀺𑀮𑁄𑀳𑀺𑀢𑀓𑁄 𑀧𑀢𑀺.

‘‘𑀢𑀤𑀲𑁆𑀲𑀸 𑀫𑀸𑀢𑀸 𑀓𑀼𑀧𑀺𑀢𑀸, 𑀫𑀬𑁆𑀳𑀁 𑀜𑀸𑀢𑀻 𑀲𑀫𑀸𑀦𑀬𑀺;

𑀲𑀧𑀣𑀜𑁆𑀘 𑀫𑀁 𑀓𑀸𑀭𑁂𑀲𑀺, 𑀧𑀭𑀺𑀪𑀸𑀲𑀸𑀧𑀬𑀻 𑀘 𑀫𑀁.

‘‘𑀲𑀸𑀳𑀁 𑀖𑁄𑀭𑀜𑁆𑀘 𑀲𑀧𑀣𑀁, 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺𑀲𑀁;

‘𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀺, 𑀲𑀘𑁂 𑀢𑀁 𑀧𑀓𑀢𑀁 𑀫𑀬𑀸’.

‘‘𑀢𑀲𑁆𑀲 ¶ 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦, 𑀫𑀼𑀲𑀸𑀯𑀸𑀤𑀲𑁆𑀲 𑀘𑀽𑀪𑀬𑀁;

𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀸𑀫𑀺, 𑀧𑀼𑀩𑁆𑀩𑀮𑁄𑀳𑀺𑀢𑀫𑀓𑁆𑀔𑀺𑀢𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑁪𑁦-𑁪𑁫. 𑀢𑀢𑁆𑀣 ¶ 𑀧𑀼𑀢𑁆𑀢𑀩𑀮𑀽𑀧𑁂𑀢𑀸𑀢𑀺 𑀧𑀼𑀢𑁆𑀢𑀩𑀮𑁂𑀦 𑀉𑀧𑁂𑀢𑀸, 𑀧𑀼𑀢𑁆𑀢𑀸𑀦𑀁 𑀯𑀲𑁂𑀦 𑀮𑀤𑁆𑀥𑀩𑀮𑀸. 𑀅𑀢𑀺𑀫𑀜𑁆𑀜𑀺𑀲𑀦𑁆𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀺𑀁 𑀅𑀯𑀫𑀜𑁆𑀜𑀺𑀁. 𑀧𑀽𑀢𑀺𑀮𑁄𑀳𑀺𑀢𑀓𑁄 𑀧𑀢𑀻𑀢𑀺 𑀓𑀼𑀡𑀧𑀮𑁄𑀳𑀺𑀢𑀁 𑀳𑀼𑀢𑁆𑀯𑀸 𑀕𑀩𑁆𑀪𑁄 𑀧𑀭𑀺𑀧𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯. 𑀢𑀢𑁆𑀣 𑀅𑀝𑁆𑀞 𑀣𑁂𑀭𑀸, 𑀇𑀥 𑀲𑀫𑁆𑀩𑀳𑀼𑀮𑀸. 𑀢𑀢𑁆𑀣 𑀧𑀜𑁆𑀘 𑀧𑀼𑀢𑁆𑀢𑀸, 𑀇𑀥 𑀲𑀢𑁆𑀢𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺.

𑀲𑀢𑁆𑀢𑀧𑀼𑀢𑁆𑀢𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀸𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀁 ¶ 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄 𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀢𑀧𑀺𑀢𑀺𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀺𑀢𑀼 𑀫𑀭𑀡𑁂𑀦 𑀲𑁄𑀓𑀲𑀦𑁆𑀢𑀢𑁆𑀢𑀳𑀤𑀬𑁄 𑀭𑁄𑀤𑀫𑀸𑀦𑁄 𑀉𑀫𑁆𑀫𑀢𑁆𑀢𑀓𑁄 𑀧𑀺𑀬 𑀯𑀺𑀘𑀭𑀦𑁆𑀢𑁄 𑀬𑀁 𑀬𑀁 𑀧𑀲𑁆𑀲𑀢𑀺, 𑀢𑀁 𑀢𑀁 𑀧𑀼𑀘𑁆𑀙𑀢𑀺 𑁋 ‘‘𑀅𑀧𑀺 𑀫𑁂 𑀧𑀺𑀢𑀭𑀁 𑀧𑀲𑁆𑀲𑀺𑀢𑁆𑀣𑀸’’𑀢𑀺? 𑀦 𑀓𑁄𑀘𑀺 𑀢𑀲𑁆𑀲 𑀲𑁄𑀓𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀔𑀺. 𑀢𑀲𑁆𑀲 𑀧𑀦 𑀳𑀤𑀬𑁂 𑀖𑀝𑁂 𑀧𑀤𑀻𑀧𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀧𑀚𑁆𑀚𑀮𑀢𑀺.

𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀅𑀢𑀻𑀢𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀲𑁄𑀓𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀘𑁆𑀙𑀸𑀲𑀫𑀡𑀁 𑀅𑀦𑀸𑀤𑀸𑀬 𑀢𑀲𑁆𑀲 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀲𑀢𑁆𑀣𑀭𑀺 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀲𑀬𑀁 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁, 𑀪𑀦𑁆𑀢𑁂, 𑀫𑀬𑁆𑀳𑀁 𑀧𑀺𑀢𑀼 𑀕𑀢𑀝𑁆𑀞𑀸𑀦𑀁 𑀚𑀸𑀦𑀸𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸, ‘‘𑀉𑀧𑀸𑀲𑀓, 𑀓𑀺𑀁 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀺𑀢𑀭𑀁 𑀧𑀼𑀘𑁆𑀙𑀲𑀺, 𑀉𑀤𑀸𑀳𑀼 𑀅𑀢𑀻𑀢𑁂’’𑀢𑀺 𑀆𑀳. 𑀲𑁄 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀩𑀳𑀽 𑀓𑀺𑀭 𑀫𑀬𑁆𑀳𑀁 𑀧𑀺𑀢𑀭𑁄’’𑀢𑀺 𑀢𑀦𑀼𑀪𑀽𑀢𑀲𑁄𑀓𑁄 𑀣𑁄𑀓𑀁 𑀫𑀚𑁆𑀛𑀢𑁆𑀢𑀢𑀁 𑀧𑀝𑀺𑀮𑀪𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀲𑁄𑀓𑀯𑀺𑀦𑁄𑀤𑀦𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸 𑀅𑀧𑀕𑀢𑀲𑁄𑀓𑀁 𑀓𑀮𑁆𑀮𑀘𑀺𑀢𑁆𑀢𑀁 𑀯𑀺𑀤𑀺𑀢𑁆𑀯𑀸 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀅𑀣 ¶ 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀧𑀲𑁆𑀲𑀣, 𑀆𑀯𑀼𑀲𑁄, 𑀩𑀼𑀤𑁆𑀥𑀸𑀦𑀼𑀪𑀸𑀯𑀁, 𑀢𑀣𑀸 𑀲𑁄𑀓𑀧𑀭𑀺𑀤𑁂𑀯𑀲𑀫𑀸𑀧𑀦𑁆𑀦𑁄 𑀉𑀧𑀸𑀲𑀓𑁄 𑀔𑀡𑁂𑀦𑁂𑀯 𑀪𑀕𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀺𑀦𑀻𑀢𑁄’’𑀢𑀺. 𑀲𑀢𑁆𑀣𑀸 ¶ 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑀬𑀸 𑀇𑀫𑀲𑁆𑀲 𑀲𑁄𑀓𑁄 𑀅𑀧𑀦𑀻𑀢𑁄, 𑀧𑀼𑀩𑁆𑀩𑁂𑀧𑀺 𑀅𑀧𑀦𑀻𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀕𑀳𑀧𑀢𑀺𑀓𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀺𑀢𑀼 𑀫𑀭𑀡𑁂𑀦 𑀲𑁄𑀓𑀧𑀭𑀺𑀤𑁂𑀯𑀲𑀫𑀸𑀧𑀦𑁆𑀦𑁄 ¶ 𑀅𑀲𑁆𑀲𑀼𑀫𑀼𑀔𑁄 𑀭𑀢𑁆𑀢𑀓𑁆𑀔𑁄 𑀓𑀦𑁆𑀤𑀦𑁆𑀢𑁄 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀼𑀚𑀸𑀢𑁄 𑀦𑀸𑀫 𑀓𑀼𑀫𑀸𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀧𑀺𑀢𑀼𑀲𑁄𑀓𑀯𑀺𑀦𑀬𑀦𑀽𑀧𑀸𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀩𑀳𑀺𑀦𑀕𑀭𑁂 𑀏𑀓𑀁 𑀫𑀢𑀕𑁄𑀡𑀁 𑀤𑀺𑀲𑁆𑀯𑀸 𑀢𑀺𑀡𑀜𑁆𑀘 𑀧𑀸𑀦𑀻𑀬𑀜𑁆𑀘 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 ‘‘𑀔𑀸𑀤, 𑀔𑀸𑀤, 𑀧𑀺𑀯, 𑀧𑀺𑀯𑀸’’𑀢𑀺 𑀯𑀤𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀆𑀕𑀢𑀸𑀕𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀲𑀼𑀚𑀸𑀢, 𑀓𑀺𑀁 𑀉𑀫𑁆𑀫𑀢𑁆𑀢𑀓𑁄𑀲𑀺, 𑀬𑁄 𑀢𑁆𑀯𑀁 𑀫𑀢𑀲𑁆𑀲 𑀕𑁄𑀡𑀲𑁆𑀲 𑀢𑀺𑀡𑁄𑀤𑀓𑀁 𑀉𑀧𑀦𑁂𑀲𑀻’’𑀢𑀺 𑀯𑀤𑀦𑁆𑀢𑀺? 𑀲𑁄 𑀦 𑀓𑀺𑀜𑁆𑀘𑀺 𑀧𑀝𑀺𑀯𑀤𑀢𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄, 𑀫𑀢𑀕𑁄𑀡𑀲𑁆𑀲 𑀢𑀺𑀡𑁄𑀤𑀓𑀁 𑀤𑁂𑀢𑀻’’𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀘 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀺𑀢𑀭𑀁 𑀆𑀭𑀩𑁆𑀪 𑀞𑀺𑀢𑁄 𑀲𑁄𑀓𑁄 𑀅𑀧𑀕𑀢𑁄. 𑀲𑁄 ‘‘𑀫𑀬𑁆𑀳𑀁 𑀓𑀺𑀭 𑀧𑀼𑀢𑁆𑀢𑁄 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄’’𑀢𑀺 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 ‘‘𑀦𑀦𑀼 𑀢𑁆𑀯𑀁, 𑀢𑀸𑀢 𑀲𑀼𑀚𑀸𑀢, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄, 𑀓𑀲𑁆𑀫𑀸 𑀫𑀢𑀕𑁄𑀡𑀲𑁆𑀲 𑀢𑀺𑀡𑁄𑀤𑀓𑀁 𑀤𑁂𑀲𑀻’’𑀢𑀺 𑀘𑁄𑀤𑁂𑀦𑁆𑀢𑁄 𑁋

‘‘𑀓𑀺𑀁 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀮𑀸𑀬𑀺𑀢𑁆𑀯𑀸 𑀳𑀭𑀺𑀢𑀁 𑀢𑀺𑀡𑀁;

𑀔𑀸𑀤 𑀔𑀸𑀤𑀸𑀢𑀺 𑀮𑀧𑀲𑀺, 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯𑀁.

‘‘𑀦 𑀳𑀺 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀫𑀢𑁄 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂;

𑀢𑁆𑀯𑀁𑀲𑀺 𑀩𑀸𑀮𑁄 𑀘 𑀤𑀼𑀫𑁆𑀫𑁂𑀥𑁄, 𑀬𑀣𑀸 𑀢𑀜𑁆𑀜𑁄𑀯 𑀤𑀼𑀫𑁆𑀫𑀢𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑀺𑀁 𑀦𑀽𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀉𑀫𑁆𑀫𑀢𑁆𑀢𑀭𑀽𑀧𑁄𑀯𑀸𑀢𑀺 𑀉𑀫𑁆𑀫𑀢𑁆𑀢𑀓𑀲𑀪𑀸𑀯𑁄 𑀯𑀺𑀬 𑀘𑀺𑀢𑁆𑀢𑀓𑁆𑀔𑁂𑀧𑀁 𑀧𑀢𑁆𑀢𑁄 𑀯𑀺𑀬. 𑀮𑀸𑀬𑀺𑀢𑁆𑀯𑀸𑀢𑀺 ¶ 𑀮𑀯𑀺𑀢𑁆𑀯𑀸. 𑀳𑀭𑀺𑀢𑀁 𑀢𑀺𑀡𑀦𑁆𑀢𑀺 𑀅𑀮𑁆𑀮𑀢𑀺𑀡𑀁. 𑀮𑀧𑀲𑀺 𑀯𑀺𑀮𑀧𑀲𑀺. 𑀕𑀢𑀲𑀢𑁆𑀢𑀦𑁆𑀢𑀺 𑀯𑀺𑀕𑀢𑀚𑀻𑀯𑀺𑀢𑀁. 𑀚𑀭𑀕𑁆𑀕𑀯𑀦𑁆𑀢𑀺 𑀩𑀮𑀺𑀩𑀤𑁆𑀤𑀁 ¶ 𑀚𑀺𑀡𑁆𑀡𑀕𑁄𑀡𑀁. 𑀅𑀦𑁆𑀦𑁂𑀦 𑀧𑀸𑀦𑁂𑀦𑀸𑀢𑀺 𑀢𑀬𑀸 𑀤𑀺𑀦𑁆𑀦𑁂𑀦 𑀳𑀭𑀺𑀢𑀢𑀺𑀡𑁂𑀦 𑀯𑀸 𑀧𑀸𑀦𑀻𑀬𑁂𑀦 𑀯𑀸. 𑀫𑀢𑁄 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂𑀢𑀺 𑀓𑀸𑀮𑀓𑀢𑁄 𑀕𑁄𑀡𑁄 𑀮𑀤𑁆𑀥𑀚𑀻𑀯𑀺𑀢𑁄 𑀳𑀼𑀢𑁆𑀯𑀸 𑀦 𑀳𑀺 𑀲𑀫𑀼𑀝𑁆𑀞𑀳𑁂𑀬𑁆𑀬. 𑀢𑁆𑀯𑀁𑀲𑀺 𑀩𑀸𑀮𑁄 𑀘 𑀤𑀼𑀫𑁆𑀫𑁂𑀥𑁄𑀢𑀺 𑀢𑁆𑀯𑀁 𑀩𑀸𑀮𑁆𑀬𑀬𑁄𑀕𑀢𑁄 𑀩𑀸𑀮𑁄, 𑀫𑁂𑀥𑀸𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀤𑀼𑀫𑁆𑀫𑁂𑀥𑁄 𑀅𑀲𑀺. 𑀬𑀣𑀸 𑀢𑀜𑁆𑀜𑁄𑀯 𑀤𑀼𑀫𑁆𑀫𑀢𑀻𑀢𑀺 𑀬𑀣𑀸 𑀢𑀁 𑀅𑀜𑁆𑀜𑁄𑀧𑀺 𑀦𑀺𑀧𑁆𑀧𑀜𑁆𑀜𑁄 𑀯𑀺𑀧𑁆𑀧𑀮𑀧𑁂𑀬𑁆𑀬, 𑀏𑀯𑀁 𑀢𑁆𑀯𑀁 𑀦𑀺𑀭𑀢𑁆𑀣𑀓𑀁 𑀯𑀺𑀧𑁆𑀧𑀮𑀧𑀲𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑀢𑀁 ¶ 𑀲𑀼𑀢𑁆𑀯𑀸 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑁄 𑁋

‘‘𑀇𑀫𑁂 𑀧𑀸𑀤𑀸 𑀇𑀤𑀁 𑀲𑀻𑀲𑀁, 𑀅𑀬𑀁 𑀓𑀸𑀬𑁄 𑀲𑀯𑀸𑀮𑀥𑀺;

𑀦𑁂𑀢𑁆𑀢𑀸 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀅𑀬𑀁 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂.

‘‘𑀦𑀸𑀬𑁆𑀬𑀓𑀲𑁆𑀲 𑀳𑀢𑁆𑀣𑀧𑀸𑀤𑀸, 𑀓𑀸𑀬𑁄 𑀲𑀻𑀲𑀜𑁆𑀘 𑀤𑀺𑀲𑁆𑀲𑀢𑀺;

𑀭𑀼𑀤𑀁 𑀫𑀢𑁆𑀢𑀺𑀓𑀣𑀽𑀧𑀲𑁆𑀫𑀺𑀁, 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀁 𑀅𑀪𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀇𑀫𑀲𑁆𑀲 𑀕𑁄𑀡𑀲𑁆𑀲 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀸𑀤𑀸, 𑀇𑀤𑀁 𑀲𑀻𑀲𑀁, 𑀲𑀳 𑀯𑀸𑀮𑀥𑀺𑀦𑀸 𑀯𑀢𑁆𑀢𑀢𑀻𑀢𑀺 𑀲𑀯𑀸𑀮𑀥𑀺 𑀅𑀬𑀁 𑀓𑀸𑀬𑁄. 𑀇𑀫𑀸𑀦𑀺 𑀘 𑀦𑁂𑀢𑁆𑀢𑀸 𑀦𑀬𑀦𑀸𑀦𑀺 𑀬𑀣𑀸 𑀫𑀭𑀡𑀢𑁄 𑀧𑀼𑀩𑁆𑀩𑁂, 𑀢𑀣𑁂𑀯 𑀅𑀪𑀺𑀦𑁆𑀦𑀲𑀡𑁆𑀞𑀸𑀦𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀅𑀬𑀁 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂𑀢𑀺 𑀇𑀫𑀲𑁆𑀫𑀸 𑀓𑀸𑀭𑀡𑀸 𑀅𑀬𑀁 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂𑀬𑁆𑀬 𑀲𑀫𑀼𑀢𑁆𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀫𑀫 𑀘𑀺𑀢𑁆𑀢𑀁 𑀪𑀯𑁂𑀬𑁆𑀬. ‘‘𑀫𑀜𑁆𑀜𑁂 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀕𑁄𑀡𑁄 𑀲𑀳𑀲𑀸𑀧𑀺 𑀓𑀸𑀬𑀁 𑀲𑀫𑀼𑀝𑁆𑀞𑀳𑁂𑀬𑁆𑀬𑀸𑀢𑀺 𑀅𑀳𑀁 𑀫𑀜𑁆𑀜𑁂𑀬𑁆𑀬𑀁, 𑀏𑀯𑀁 𑀫𑁂 𑀫𑀜𑁆𑀜𑀦𑀸 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑁆𑀬𑀓𑀲𑁆𑀲 ¶ 𑀧𑀦 𑀫𑀬𑁆𑀳𑀁 𑀧𑀺𑀢𑀸𑀫𑀳𑀲𑁆𑀲 𑀦 𑀳𑀢𑁆𑀣𑀧𑀸𑀤𑀸 𑀓𑀸𑀬𑁄 𑀲𑀻𑀲𑀁 𑀤𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀧𑀦 𑀢𑀲𑁆𑀲 𑀅𑀝𑁆𑀞𑀺𑀓𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑁂 𑀫𑀢𑁆𑀢𑀺𑀓𑀸𑀫𑀬𑁂 𑀣𑀽𑀧𑁂 𑀭𑀼𑀤𑀦𑁆𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦, 𑀢𑀸𑀢, 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀺 𑀦𑀺𑀧𑁆𑀧𑀜𑁆𑀜𑁄, 𑀪𑀺𑀚𑁆𑀚𑀦𑀥𑀫𑁆𑀫𑀸 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀯𑀺𑀚𑀸𑀦𑀢𑀁 𑀓𑀸 𑀧𑀭𑀺𑀤𑁂𑀯𑀦𑀸𑀢𑀺 𑀧𑀺𑀢𑀼 𑀥𑀫𑁆𑀫𑀁 𑀓𑀣𑁂𑀲𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀸 ‘‘𑀫𑀫 𑀫𑀼𑀢𑁆𑀢𑁄 𑀧𑀡𑁆𑀟𑀺𑀢𑁄 𑀫𑀁 𑀲𑀜𑁆𑀜𑀸𑀧𑁂𑀢𑀼𑀁 𑀇𑀫𑀁 𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢 𑀲𑀼𑀚𑀸𑀢, ‘𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸’𑀢𑀺 𑀅𑀜𑁆𑀜𑀸𑀢𑀫𑁂𑀢𑀁, 𑀇𑀢𑁄 𑀧𑀝𑁆𑀞𑀸𑀬 𑀦 𑀲𑁄𑀘𑀺𑀲𑁆𑀲𑀸𑀫𑀺, 𑀲𑁄𑀓𑀳𑀭𑀡𑀲𑀫𑀢𑁆𑀣𑁂𑀦 𑀦𑀸𑀫 𑀫𑁂𑀥𑀸𑀯𑀺𑀦𑀸 𑀢𑀸𑀤𑀺𑀲𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀢𑁆𑀢𑀁 𑀧𑀲𑀁𑀲𑀦𑁆𑀢𑁄 𑁋

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀺𑀢𑀼𑀲𑁄𑀓𑀁 𑀅𑀧𑀸𑀦𑀼𑀤𑀺.

‘‘𑀲𑁆𑀯𑀸𑀳𑀁 ¶ 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯.

‘‘𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀯𑀺𑀦𑀺𑀯𑀢𑁆𑀢𑀬𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀆𑀤𑀺𑀢𑁆𑀢𑀦𑁆𑀢𑀺 𑀲𑁄𑀓𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁 𑀚𑀮𑀺𑀢𑀁. 𑀲𑀦𑁆𑀢𑀦𑁆𑀢𑀺 𑀲𑀫𑀸𑀦𑀁. 𑀧𑀸𑀯𑀓𑀦𑁆𑀢𑀺 𑀅𑀕𑁆𑀕𑀺. 𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀦𑁆𑀢𑀺 𑀉𑀤𑀓𑁂𑀦 𑀅𑀯𑀲𑀺𑀜𑁆𑀘𑀦𑁆𑀢𑁄 𑀯𑀺𑀬. 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀦𑁆𑀢𑀺 𑀲𑀩𑁆𑀩𑀁 𑀫𑁂 𑀘𑀺𑀢𑁆𑀢𑀤𑀭𑀣𑀁 𑀦𑀺𑀩𑁆𑀩𑀸𑀧𑁂𑀲𑀺. 𑀅𑀩𑁆𑀩𑀳𑀻 𑀯𑀢𑀸𑀢𑀺 𑀦𑀻𑀳𑀭𑀺 𑀯𑀢. 𑀲𑀮𑁆𑀮𑀦𑁆𑀢𑀺 𑀲𑁄𑀓𑀲𑀮𑁆𑀮𑀁. 𑀳𑀤𑀬𑀦𑀺𑀲𑁆𑀲𑀺𑀢𑀦𑁆𑀢𑀺 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀲𑀮𑁆𑀮𑀪𑀽𑀢𑀁. 𑀲𑁄𑀓𑀧𑀭𑁂𑀢𑀲𑁆𑀲𑀸𑀢𑀺 𑀲𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲. 𑀧𑀺𑀢𑀼𑀲𑁄𑀓𑀦𑁆𑀢𑀺 𑀧𑀺𑀢𑀭𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀲𑁄𑀓𑀁. 𑀅𑀧𑀸𑀦𑀼𑀤𑀻𑀢𑀺 𑀅𑀧𑀦𑁂𑀲𑀺. 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯𑀸𑀢𑀺, 𑀓𑀼𑀫𑀸𑀭, 𑀢𑀯 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀧𑀦 𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺. 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸𑀢𑀺 𑀬𑀣𑀸 𑀅𑀬𑀁 𑀲𑀼𑀚𑀸𑀢𑁄 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀲𑁄𑀓𑀢𑁄 𑀯𑀺𑀦𑀺𑀯𑀢𑁆𑀢𑁂𑀲𑀺, 𑀏𑀯𑀁 𑀅𑀜𑁆𑀜𑁂𑀧𑀺 𑀬𑁂 𑀅𑀦𑀼𑀓𑀫𑁆𑀧𑀓𑀸 𑀅𑀦𑀼𑀕𑁆𑀕𑀡𑁆𑀳𑀲𑀻𑀮𑀸 ¶ 𑀳𑁄𑀦𑁆𑀢𑀺, 𑀢𑁂 𑀲𑀧𑁆𑀧𑀜𑁆𑀜𑀸 𑀏𑀯𑀁 𑀓𑀭𑁄𑀦𑁆𑀢𑀺 𑀧𑀺𑀢𑀽𑀦𑀁 𑀅𑀜𑁆𑀜𑁂𑀲𑀜𑁆𑀘 𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀫𑀸𑀡𑀯𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀺𑀢𑀸 𑀅𑀧𑀕𑀢𑀲𑁄𑀓𑁄 𑀳𑀼𑀢𑁆𑀯𑀸 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀓𑀫𑁆𑀫𑀦𑁆𑀢𑁂 𑀧𑀯𑀢𑁆𑀢𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀲𑀼𑀚𑀸𑀢𑁄 𑀮𑁄𑀓𑀦𑀸𑀣𑁄 𑀅𑀳𑁄𑀲𑀻𑀢𑀺.

𑀕𑁄𑀡𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀸𑀧𑁂𑀲𑀓𑀸𑀭𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀕𑀽𑀣𑀜𑁆𑀘 ¶ 𑀫𑀼𑀢𑁆𑀢𑀁 𑀭𑀼𑀳𑀺𑀭𑀜𑁆𑀘 𑀧𑀼𑀩𑁆𑀩𑀦𑁆𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀧𑁂𑀲𑀓𑀸𑀭𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀤𑁆𑀯𑀸𑀤𑀲𑀫𑀢𑁆𑀢𑀸 𑀓𑀺𑀭 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀲𑀦𑀬𑁄𑀕𑁆𑀕𑀝𑁆𑀞𑀸𑀦𑀁 𑀯𑀻𑀫𑀁𑀲𑀦𑁆𑀢𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀅𑀜𑁆𑀜𑀢𑀭𑀁 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀭𑀫𑀡𑀻𑀬𑀁 𑀅𑀭𑀜𑁆𑀜𑀸𑀬𑀢𑀦𑀁 𑀢𑀲𑁆𑀲 𑀘 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑁄𑀘𑀭𑀕𑀸𑀫𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀏𑀓𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣 𑀏𑀓𑀸𑀤𑀲 𑀧𑁂𑀲𑀓𑀸𑀭𑀸 𑀧𑀝𑀺𑀯𑀲𑀦𑁆𑀢𑀺, 𑀢𑁂 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸 ¶ 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀧𑀡𑀻𑀢𑁂𑀦 𑀆𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀆𑀳𑀁𑀲𑀼 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺? ‘‘𑀬𑀢𑁆𑀣 𑀅𑀫𑁆𑀳𑀸𑀓𑀁 𑀨𑀸𑀲𑀼𑀓𑀁, 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑀤𑀺 𑀏𑀯𑀁, 𑀪𑀦𑁆𑀢𑁂, 𑀇𑀥𑁂𑀯 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀲𑁆𑀲𑀽𑀧𑀕𑀫𑀦𑀁 𑀬𑀸𑀘𑀺𑀁𑀲𑀼. 𑀪𑀺𑀓𑁆𑀔𑀽 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀉𑀧𑀸𑀲𑀓𑀸 𑀢𑁂𑀲𑀁 𑀢𑀢𑁆𑀣 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑁄 𑀓𑀸𑀭𑁂𑀢𑁆𑀯𑀸 𑀅𑀤𑀁𑀲𑀼. 𑀪𑀺𑀓𑁆𑀔𑀽 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼.

𑀢𑀢𑁆𑀣 𑀚𑁂𑀝𑁆𑀞𑀓𑀧𑁂𑀲𑀓𑀸𑀭𑁄 𑀤𑁆𑀯𑁂 𑀪𑀺𑀓𑁆𑀔𑀽 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺, 𑀇𑀢𑀭𑁂 𑀏𑀓𑁂𑀓𑀁 𑀪𑀺𑀓𑁆𑀔𑀼𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀚𑁂𑀝𑁆𑀞𑀓𑀧𑁂𑀲𑀓𑀸𑀭𑀲𑁆𑀲 𑀪𑀭𑀺𑀬𑀸 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀘𑁆𑀙𑀭𑀺𑀦𑀻 𑀪𑀺𑀓𑁆𑀔𑀽 𑀦 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸𑀬𑁂𑀯 𑀓𑀦𑀺𑀝𑁆𑀞𑀪𑀕𑀺𑀦𑀺𑀁 𑀆𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀇𑀲𑁆𑀲𑀭𑀺𑀬𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑀸 𑀲𑀤𑁆𑀥𑀸 ¶ 𑀧𑀲𑀦𑁆𑀦𑀸 𑀳𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑀺𑀓𑁆𑀔𑀽 𑀧𑀝𑀺𑀚𑀕𑁆𑀕𑀺. 𑀢𑁂 𑀲𑀩𑁆𑀩𑁂 𑀧𑁂𑀲𑀓𑀸𑀭𑁄 𑀯𑀲𑁆𑀲𑀁 𑀯𑀼𑀢𑁆𑀣𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑁂𑀓𑀲𑁆𑀲 𑀏𑀓𑁂𑀓𑀁 𑀲𑀸𑀝𑀓𑀫𑀤𑀁𑀲𑀼. 𑀢𑀢𑁆𑀣 𑀫𑀘𑁆𑀙𑀭𑀺𑀦𑀻 𑀚𑁂𑀝𑁆𑀞𑀧𑁂𑀲𑀓𑀸𑀭𑀲𑁆𑀲 𑀪𑀭𑀺𑀬𑀸 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀧𑀭𑀺𑀪𑀸𑀲𑀺 𑁋 ‘‘𑀬𑀁 𑀢𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀤𑀸𑀦𑀁 𑀤𑀺𑀦𑁆𑀦𑀁 𑀅𑀦𑁆𑀦𑀧𑀸𑀦𑀁, 𑀢𑀁 𑀢𑁂 𑀧𑀭𑀮𑁄𑀓𑁂 𑀕𑀽𑀣𑀫𑀼𑀢𑁆𑀢𑀁 𑀧𑀼𑀩𑁆𑀩𑀮𑁄𑀳𑀺𑀢𑀜𑁆𑀘 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀼, 𑀲𑀸𑀝𑀓𑀸 𑀘 𑀚𑀮𑀺𑀢𑀸 𑀅𑀬𑁄𑀫𑀬𑀧𑀝𑁆𑀝𑀸 𑀳𑁄𑀦𑁆𑀢𑀽’’𑀢𑀺.

𑀢𑀢𑁆𑀣 𑀚𑁂𑀝𑁆𑀞𑀧𑁂𑀲𑀓𑀸𑀭𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀯𑀺𑀜𑁆𑀛𑀸𑀝𑀯𑀺𑀬𑀁 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀦 𑀓𑀤𑀭𑀺𑀬𑀸 𑀪𑀭𑀺𑀬𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀧𑁂𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀢𑀲𑁆𑀲 𑀪𑀽𑀫𑀤𑁂𑀯𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀅𑀳𑀁, 𑀲𑀸𑀫𑀺, 𑀦𑀺𑀘𑁆𑀘𑁄𑀴𑀸 𑀅𑀢𑀺𑀯𑀺𑀬 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀯𑀺𑀘𑀭𑀸𑀫𑀺, 𑀤𑁂𑀳𑀺 𑀫𑁂 𑀯𑀢𑁆𑀣𑀁 𑀅𑀦𑁆𑀦𑀧𑀸𑀦𑀜𑁆𑀘𑀸’’𑀢𑀺. 𑀲𑁄 𑀢𑀲𑁆𑀲𑀸 𑀤𑀺𑀩𑁆𑀩𑀁 𑀉𑀴𑀸𑀭𑀁 𑀅𑀦𑁆𑀦𑀧𑀸𑀦𑀁 𑀉𑀧𑀦𑁂𑀲𑀺. 𑀢𑀁 𑀢𑀸𑀬 𑀕𑀳𑀺𑀢𑀫𑀢𑁆𑀢𑀫𑁂𑀯 𑀕𑀽𑀣𑀫𑀼𑀢𑁆𑀢𑀁 𑀧𑀼𑀩𑁆𑀩𑀮𑁄𑀳𑀺𑀢𑀜𑁆𑀘 𑀲𑀫𑁆𑀧𑀚𑁆𑀚𑀢𑀺, 𑀲𑀸𑀝𑀓𑀜𑁆𑀘 𑀤𑀺𑀦𑁆𑀦𑀁 𑀢𑀸𑀬 𑀧𑀭𑀺𑀤𑀳𑀺𑀢𑀁 𑀧𑀚𑁆𑀚𑀮𑀺𑀢𑀁 𑀅𑀬𑁄𑀫𑀬𑀧𑀝𑁆𑀝𑀁 𑀳𑁄𑀢𑀺. 𑀲𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑀻 𑀯𑀺𑀘𑀭𑀢𑀺.

𑀢𑁂𑀦 ¶ 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑀼𑀢𑁆𑀣𑀯𑀲𑁆𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀫𑀳𑀢𑀸 𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀯𑀺𑀜𑁆𑀛𑀸𑀝𑀯𑀺𑀁 𑀧𑀝𑀺𑀧𑀚𑁆𑀚𑀺. 𑀲𑀢𑁆𑀣𑀺𑀓𑀸 𑀭𑀢𑁆𑀢𑀺𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸 𑀯𑀦𑁂 𑀲𑀦𑁆𑀤𑀘𑁆𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀧𑀤𑁂𑀲𑀁 𑀤𑀺𑀲𑁆𑀯𑀸 𑀬𑀸𑀦𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀁𑀲𑀼. 𑀪𑀺𑀓𑁆𑀔𑀼 𑀧𑀦 𑀯𑀺𑀯𑁂𑀓𑀓𑀸𑀫𑀢𑀸𑀬 𑀣𑁄𑀓𑀁 𑀅𑀧𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀲𑀦𑁆𑀤𑀘𑁆𑀙𑀸𑀬𑀲𑁆𑀲 𑀯𑀦𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀧𑀦𑁆𑀦𑁄 𑀭𑀢𑁆𑀢𑀺𑀬𑀁 𑀫𑀕𑁆𑀕𑀕𑀫𑀦𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑀓𑀸𑀬𑁄 𑀦𑀺𑀤𑁆𑀤𑀁 𑀉𑀧𑀕𑀜𑁆𑀙𑀺. 𑀲𑀢𑁆𑀣𑀺𑀓𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀲𑁄 𑀪𑀺𑀓𑁆𑀔𑀼 𑀦 𑀧𑀝𑀺𑀩𑀼𑀚𑁆𑀛𑀺. 𑀅𑀣 𑀲𑀸𑀬𑀦𑁆𑀳𑀲𑀫𑀬𑁂 𑀉𑀝𑁆𑀞𑀳𑀺𑀢𑁆𑀯𑀸 𑀢𑁂 𑀅𑀧𑀲𑁆𑀲𑀦𑁆𑀢𑁄 ¶ 𑀅𑀜𑁆𑀜𑀢𑀭𑀁 𑀓𑀼𑀫𑁆𑀫𑀕𑁆𑀕𑀁 ¶ 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀭𑀽𑀧𑁂𑀦 𑀉𑀧𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀧𑀸𑀤𑀩𑁆𑀪𑀜𑁆𑀚𑀦𑀸𑀤𑀻𑀦𑀺 𑀤𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑀸 𑀧𑁂𑀢𑀻 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀳𑀺 𑀫𑁂, 𑀲𑀸𑀫𑀺, 𑀅𑀦𑁆𑀦𑀧𑀸𑀦𑀁 𑀲𑀸𑀝𑀓𑀜𑁆𑀘𑀸’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀢𑀸𑀦𑀺 𑀅𑀤𑀸𑀲𑀺. 𑀢𑀸𑀦𑀺 𑀘 𑀢𑀸𑀬 𑀕𑀳𑀺𑀢𑀫𑀢𑁆𑀢𑀸𑀦𑀺 𑀕𑀽𑀣𑀫𑀼𑀢𑁆𑀢𑀧𑀼𑀩𑁆𑀩𑀮𑁄𑀳𑀺𑀢𑀧𑀚𑁆𑀚𑀮𑀺𑀢𑀅𑀬𑁄𑀧𑀝𑁆𑀝𑀸𑀬𑁂𑀯 𑀅𑀳𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀢𑀁 𑀤𑁂𑀯𑀧𑀼𑀢𑁆𑀢𑀁 𑁋

‘‘𑀕𑀽𑀣𑀜𑁆𑀘 𑀫𑀼𑀢𑁆𑀢𑀁 𑀭𑀼𑀳𑀺𑀭𑀜𑁆𑀘 𑀧𑀼𑀩𑁆𑀩𑀁, 𑀧𑀭𑀺𑀪𑀼𑀜𑁆𑀚𑀢𑀺 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀅𑀬𑀁 𑀦𑀼 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀦𑀸𑀭𑀻, 𑀬𑀸 𑀲𑀩𑁆𑀩𑀤𑀸 𑀮𑁄𑀳𑀺𑀢𑀧𑀼𑀩𑁆𑀩𑀪𑀓𑁆𑀔𑀸.

‘‘𑀦𑀯𑀸𑀦𑀺 𑀯𑀢𑁆𑀣𑀸𑀦𑀺 𑀲𑀼𑀪𑀸𑀦𑀺 𑀘𑁂𑀯, 𑀫𑀼𑀤𑀽𑀦𑀺 𑀲𑀼𑀤𑁆𑀥𑀸𑀦𑀺 𑀘 𑀮𑁄𑀫𑀲𑀸𑀦𑀺;

𑀤𑀺𑀦𑁆𑀦𑀸𑀦𑀺 𑀫𑀺𑀲𑁆𑀲𑀸 𑀓𑀺𑀢𑀓𑀸 𑀪𑀯𑀦𑁆𑀢𑀺, 𑀅𑀬𑀁 𑀦𑀼 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀦𑀸𑀭𑀻’’𑀢𑀺. 𑁋

𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺. 𑀢𑀢𑁆𑀣 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄𑀢𑀺 𑀓𑀻𑀤𑀺𑀲𑀲𑁆𑀲 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀬𑀁 𑀏𑀲𑀸 𑀇𑀤𑀸𑀦𑀺 𑀧𑀘𑁆𑀘𑀦𑀼𑀪𑀯𑀢𑀻𑀢𑀺. 𑀅𑀬𑀁 𑀦𑀼 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀦𑀸𑀭𑀻𑀢𑀺 𑀅𑀬𑀁 𑀇𑀢𑁆𑀣𑀻 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀧𑀼𑀩𑁆𑀩𑁂 𑀅𑀓𑀸𑀲𑀺. 𑀬𑀸 𑀲𑀩𑁆𑀩𑀤𑀸 𑀮𑁄𑀳𑀺𑀢𑀧𑀼𑀩𑁆𑀩𑀪𑀓𑁆𑀔𑀸𑀢𑀺 𑀬𑀸 𑀲𑀩𑁆𑀩𑀓𑀸𑀮𑀁 𑀭𑀼𑀳𑀺𑀭𑀧𑀼𑀩𑁆𑀩𑀫𑁂𑀯 𑀪𑀓𑁆𑀔𑀢𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀦𑀯𑀸𑀦𑀻𑀢𑀺 𑀧𑀘𑁆𑀘𑀕𑁆𑀖𑀸𑀦𑀺 𑀢𑀸𑀯𑀤𑁂𑀯 𑀧𑀸𑀢𑀼𑀪𑀽𑀢𑀸𑀦𑀺. 𑀲𑀼𑀪𑀸𑀦𑀻𑀢𑀺 𑀲𑀼𑀦𑁆𑀤𑀭𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺. 𑀫𑀼𑀤𑀽𑀦𑀻𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺. 𑀲𑀼𑀤𑁆𑀥𑀸𑀦𑀻𑀢𑀺 𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀸𑀦𑀺. 𑀮𑁄𑀫𑀲𑀸𑀦𑀻𑀢𑀺 𑀲𑀮𑁄𑀫𑀓𑀸𑀦𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 ¶ , 𑀲𑀼𑀦𑁆𑀤𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀤𑀺𑀦𑁆𑀦𑀸𑀦𑀺 𑀫𑀺𑀲𑁆𑀲𑀸 𑀓𑀺𑀢𑀓𑀸 𑀪𑀯𑀦𑁆𑀢𑀻𑀢𑀺 𑀓𑀺𑀢𑀓𑀓𑀡𑁆𑀝𑀓𑀲𑀤𑀺𑀲𑀸𑀦𑀺 𑀮𑁄𑀳𑀧𑀝𑁆𑀝𑀲𑀤𑀺𑀲𑀸𑀦𑀺 𑀪𑀯𑀦𑁆𑀢𑀺. ‘‘𑀓𑀻𑀝𑀓𑀸 𑀪𑀯𑀦𑁆𑀢𑀻’’𑀢𑀺 𑀯𑀸 𑀧𑀸𑀞𑁄, 𑀔𑀸𑀤𑀓𑀧𑀸𑀡𑀓𑀯𑀡𑁆𑀡𑀸𑀦𑀺 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀝𑁆𑀞𑁄 𑀢𑀸𑀬 𑀧𑀼𑀭𑀺𑀫𑀚𑀸𑀢𑀺𑀬𑀸 𑀓𑀢𑀓𑀫𑁆𑀫𑀁 𑀧𑀓𑀸𑀲𑁂𑀦𑁆𑀢𑁄 𑁋

‘‘𑀪𑀭𑀺𑀬𑀸 𑀫𑀫𑁂𑀲𑀸 𑀅𑀳𑀼 𑀪𑀤𑀦𑁆𑀢𑁂, 𑀅𑀤𑀸𑀬𑀺𑀓𑀸 𑀫𑀘𑁆𑀙𑀭𑀺𑀦𑀻 𑀓𑀤𑀭𑀺𑀬𑀸;

𑀲𑀸 𑀫𑀁 𑀤𑀤𑀦𑁆𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁, 𑀅𑀓𑁆𑀓𑁄𑀲𑀢𑀺 𑀘 𑀧𑀭𑀺𑀪𑀸𑀲𑀢𑀺 𑀘.

‘‘𑀕𑀽𑀣𑀜𑁆𑀘 ¶ 𑀫𑀼𑀢𑁆𑀢𑀁 𑀭𑀼𑀳𑀺𑀭𑀜𑁆𑀘 𑀧𑀼𑀩𑁆𑀩𑀁, 𑀧𑀭𑀺𑀪𑀼𑀜𑁆𑀚 𑀢𑁆𑀯𑀁 𑀅𑀲𑀼𑀘𑀺𑀁 𑀲𑀩𑁆𑀩𑀓𑀸𑀮𑀁;

𑀏𑀢𑀁 𑀢𑁂 𑀧𑀭𑀮𑁄𑀓𑀲𑁆𑀫𑀺𑀁 𑀳𑁄𑀢𑀼, 𑀯𑀢𑁆𑀣𑀸 𑀘 𑀢𑁂 𑀓𑀺𑀢𑀓𑀲𑀫𑀸 𑀪𑀯𑀦𑁆𑀢𑀼;

𑀏𑀢𑀸𑀤𑀺𑀲𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀇𑀥𑀸𑀕𑀢𑀸 𑀘𑀺𑀭𑀭𑀢𑁆𑀢𑀸𑀬 𑀔𑀸𑀤𑀢𑀻’’𑀢𑀺. 𑁋

𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀅𑀤𑀸𑀬𑀺𑀓𑀸𑀢𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺𑀧𑀺 𑀅𑀤𑀸𑀦𑀲𑀻𑀮𑀸. 𑀫𑀘𑁆𑀙𑀭𑀺𑀦𑀻 𑀓𑀤𑀭𑀺𑀬𑀸𑀢𑀺 𑀧𑀞𑀫𑀁 𑀫𑀘𑁆𑀙𑁂𑀭𑀫𑀮𑀲𑁆𑀲 𑀲𑀪𑀸𑀯𑁂𑀦 𑀫𑀘𑁆𑀙𑀭𑀺𑀦𑀻, 𑀢𑀸𑀬 𑀘 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀦𑀢𑀸𑀬 𑀣𑀤𑁆𑀥𑀫𑀘𑁆𑀙𑀭𑀺𑀦𑀻, 𑀢𑀸𑀬 𑀓𑀤𑀭𑀺𑀬𑀸 𑀅𑀳𑀽𑀢𑀺 𑀬𑁄𑀚𑀦𑀸. 𑀇𑀤𑀸𑀦𑀺 𑀢𑀲𑁆𑀲𑀸 𑀢𑀫𑁂𑀯 𑀓𑀤𑀭𑀺𑀬𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸 𑀫𑀁 𑀤𑀤𑀦𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀬𑀣𑀸𑀯𑀼𑀢𑁆𑀢𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀘𑀭𑀺𑀢𑁆𑀯𑀸. 𑀇𑀥𑀸𑀕𑀢𑀸𑀢𑀺 𑀇𑀫𑀁 𑀧𑁂𑀢𑀮𑁄𑀓𑀁 𑀆𑀕𑀢𑀸, 𑀧𑁂𑀢𑀢𑁆𑀢𑀪𑀸𑀯𑀁 𑀉𑀧𑀕𑀢𑀸. 𑀘𑀺𑀭𑀭𑀢𑁆𑀢𑀸𑀬 𑀔𑀸𑀤𑀢𑀻𑀢𑀺 𑀘𑀺𑀭𑀓𑀸𑀮𑀁 𑀕𑀽𑀣𑀸𑀤𑀺𑀫𑁂𑀯 𑀔𑀸𑀤𑀢𑀺. 𑀢𑀲𑁆𑀲𑀸 𑀳𑀺 𑀬𑁂𑀦𑀸𑀓𑀸𑀭𑁂𑀦 𑀅𑀓𑁆𑀓𑀼𑀝𑁆𑀞𑀁, 𑀢𑁂𑀦𑁂𑀯𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀨𑀮𑀁. 𑀬𑀁 𑀉𑀤𑁆𑀤𑀺𑀲𑁆𑀲 𑀅𑀓𑁆𑀓𑀼𑀝𑁆𑀞𑀁, 𑀢𑀢𑁄 𑀅𑀜𑁆𑀜𑀢𑁆𑀣 𑀧𑀣𑀯𑀺𑀬𑀁 𑀓𑀫𑀦𑁆𑀢𑀓𑀲𑀗𑁆𑀔𑀸𑀢𑁂 𑀫𑀢𑁆𑀣𑀓𑁂 𑀅𑀲𑀦𑀺𑀧𑀸𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀢𑀢𑀺.

𑀏𑀯𑀁 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀸𑀬 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀢𑀁 𑀪𑀺𑀓𑁆𑀔𑀼𑀁 𑀆𑀳 𑁋 ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀓𑁄𑀘𑀺 𑀉𑀧𑀸𑀬𑁄 𑀇𑀫𑀁 𑀧𑁂𑀢𑀮𑁄𑀓𑀢𑁄 𑀫𑁄𑀘𑁂𑀢𑀼’’𑀦𑁆𑀢𑀺 ¶ ? ‘‘𑀅𑀢𑁆𑀣𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀓𑀣𑁂𑀣, 𑀪𑀦𑁆𑀢𑁂’’𑀢𑀺. 𑀬𑀤𑀺 ¶ 𑀪𑀕𑀯𑀢𑁄 𑀅𑀭𑀺𑀬𑀲𑀗𑁆𑀖𑀲𑁆𑀲 𑀘 𑀏𑀓𑀲𑁆𑀲𑁂𑀯 𑀯𑀸 𑀪𑀺𑀓𑁆𑀔𑀼𑀦𑁄 𑀤𑀸𑀦𑀁 𑀤𑀢𑁆𑀯𑀸 𑀇𑀫𑀺𑀲𑁆𑀲𑀸 𑀉𑀤𑁆𑀤𑀺𑀲𑀺𑀬𑀢𑀺, 𑀅𑀬𑀜𑁆𑀘 𑀢𑀁 𑀅𑀦𑀼𑀫𑁄𑀤𑀢𑀺, 𑀏𑀯𑀫𑁂𑀢𑀺𑀲𑁆𑀲𑀸 𑀇𑀢𑁄 𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀡𑀻𑀢𑀁 𑀅𑀦𑁆𑀦𑀧𑀸𑀦𑀁 𑀤𑀢𑁆𑀯𑀸 𑀢𑀁 𑀤𑀓𑁆𑀔𑀺𑀡𑀁 𑀢𑀲𑁆𑀲𑀸 𑀧𑁂𑀢𑀺𑀬𑀸 𑀆𑀤𑀺𑀲𑀺. 𑀢𑀸𑀯𑀤𑁂𑀯 𑀲𑀸 𑀧𑁂𑀢𑀻 𑀲𑀼𑀳𑀺𑀢𑀸 𑀧𑀻𑀡𑀺𑀦𑁆𑀤𑁆𑀭𑀺𑀬𑀸 𑀤𑀺𑀩𑁆𑀩𑀸𑀳𑀸𑀭𑀲𑁆𑀲 𑀢𑀺𑀢𑁆𑀢𑀸 𑀅𑀳𑁄𑀲𑀺. 𑀧𑀼𑀦 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑁂 𑀤𑀺𑀩𑁆𑀩𑀲𑀸𑀝𑀓𑀬𑀼𑀕𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀤𑀢𑁆𑀯𑀸 𑀢𑀜𑁆𑀘 𑀤𑀓𑁆𑀔𑀺𑀡𑀁 𑀧𑁂𑀢𑀺𑀬𑀸 𑀆𑀤𑀺𑀲𑀺. 𑀢𑀸𑀯𑀤𑁂𑀯 𑀘 𑀲𑀸 𑀤𑀺𑀩𑁆𑀩𑀯𑀢𑁆𑀣𑀦𑀺𑀯𑀢𑁆𑀣𑀸 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀸 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀸 𑀅𑀳𑁄𑀲𑀺. 𑀲𑁄 𑀘 𑀪𑀺𑀓𑁆𑀔𑀼 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀇𑀤𑁆𑀥𑀺𑀬𑀸 𑀢𑀤𑀳𑁂𑀯 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀲𑀸𑀝𑀓𑀬𑀼𑀕𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀪𑀕𑀯𑀸𑀧𑀺 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀫𑀳𑀸𑀧𑁂𑀲𑀓𑀸𑀭𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀔𑀮𑁆𑀮𑀸𑀝𑀺𑀬𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀓𑀸 ¶ 𑀦𑀼 𑀅𑀦𑁆𑀢𑁄𑀯𑀺𑀫𑀸𑀦𑀲𑁆𑀫𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀔𑀮𑁆𑀮𑀸𑀝𑀺𑀬𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀸 𑀭𑀽𑀧𑀽𑀧𑀚𑀻𑀯𑀺𑀦𑀻 𑀇𑀢𑁆𑀣𑀻 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀅𑀢𑀺𑀫𑀦𑁄𑀳𑀭𑀓𑁂𑀲𑀓𑀮𑀸𑀧𑀻 𑀅𑀳𑁄𑀲𑀺. 𑀢𑀲𑁆𑀲𑀸 𑀳𑀺 𑀓𑁂𑀲𑀸 𑀦𑀻𑀮𑀸 𑀤𑀻𑀖𑀸 𑀢𑀦𑀽 𑀫𑀼𑀤𑀽 𑀲𑀺𑀦𑀺𑀤𑁆𑀥𑀸 𑀯𑁂𑀮𑁆𑀮𑀺𑀢𑀕𑁆𑀕𑀸 𑀤𑁆𑀯𑀺𑀳𑀢𑁆𑀣𑀕𑀬𑁆𑀳𑀸 𑀯𑀺𑀲𑀝𑁆𑀞𑀸 𑀬𑀸𑀯 𑀫𑁂𑀔𑀮𑀸 𑀓𑀮𑀸𑀧𑀸 𑀑𑀮𑀫𑁆𑀩𑀦𑁆𑀢𑀺. 𑀢𑀁 𑀢𑀲𑁆𑀲𑀸 𑀓𑁂𑀲𑀲𑁄𑀪𑀁 𑀤𑀺𑀲𑁆𑀯𑀸 𑀢𑀭𑀼𑀡𑀚𑀦𑁄 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀲𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀅𑀣𑀲𑁆𑀲𑀸 𑀢𑀁 𑀓𑁂𑀲𑀲𑁄𑀪𑀁 𑀅𑀲𑀳𑀫𑀸𑀦𑀸 𑀇𑀲𑁆𑀲𑀸𑀧𑀓𑀢𑀸 𑀓𑀢𑀺𑀧𑀬𑀸 𑀇𑀢𑁆𑀣𑀺𑀬𑁄 𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲𑀸 𑀏𑀯 𑀧𑀭𑀺𑀘𑀸𑀭𑀺𑀓𑀤𑀸𑀲𑀺𑀁 𑀆𑀫𑀺𑀲𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀢𑀸𑀬 𑀢𑀲𑁆𑀲𑀸 𑀓𑁂𑀲𑀽𑀧𑀧𑀸𑀢𑀦𑀁 𑀪𑁂𑀲𑀚𑁆𑀚𑀁 𑀤𑀸𑀧𑁂𑀲𑀼𑀁. 𑀲𑀸 𑀓𑀺𑀭 𑀤𑀸𑀲𑀻 𑀢𑀁 𑀪𑁂𑀲𑀚𑁆𑀚𑀁 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑁂𑀦 𑀲𑀤𑁆𑀥𑀺𑀁 𑀧𑀬𑁄𑀚𑁂𑀢𑁆𑀯𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀦𑁆𑀳𑀸𑀦𑀓𑀸𑀮𑁂 𑀢𑀲𑁆𑀲𑀸 𑀅𑀤𑀸𑀲𑀺 ¶ . 𑀲𑀸 𑀢𑁂𑀦 𑀓𑁂𑀲𑀫𑀽𑀮𑁂𑀲𑀼 𑀢𑁂𑀫𑁂𑀢𑁆𑀯𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺 ¶ , 𑀦𑀺𑀫𑀼𑀚𑁆𑀚𑀦𑀫𑀢𑁆𑀢𑁂𑀬𑁂𑀯 𑀓𑁂𑀲𑀸 𑀲𑀫𑀽𑀮𑀸 𑀧𑀭𑀺𑀧𑀢𑀺𑀁𑀲𑀼, 𑀲𑀻𑀲𑀁 𑀘𑀲𑁆𑀲𑀸 𑀢𑀺𑀢𑁆𑀢𑀓𑀮𑀸𑀩𑀼𑀲𑀤𑀺𑀲𑀁 𑀅𑀳𑁄𑀲𑀺. 𑀅𑀣 𑀲𑀸 𑀲𑀩𑁆𑀩𑀲𑁄 𑀯𑀺𑀮𑀽𑀦𑀓𑁂𑀲𑀸 𑀮𑀼𑀜𑁆𑀘𑀺𑀢𑀫𑀢𑁆𑀣𑀓𑀸 𑀓𑀧𑁄𑀢𑀻 𑀯𑀺𑀬 𑀯𑀺𑀭𑀽𑀧𑀸 𑀳𑀼𑀢𑁆𑀯𑀸 𑀮𑀚𑁆𑀚𑀸𑀬 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀢𑁆𑀣𑁂𑀦 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀩𑀳𑀺𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀻 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀅𑀧𑀕𑀢𑀮𑀚𑁆𑀚𑀸 𑀢𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀺𑀮𑀸𑀦𑀺 𑀧𑀻𑀴𑁂𑀢𑁆𑀯𑀸 𑀢𑁂𑀮𑀯𑀡𑀺𑀚𑁆𑀚𑀁 𑀲𑀼𑀭𑀸𑀯𑀡𑀺𑀚𑁆𑀚𑀜𑁆𑀘 𑀓𑀭𑁄𑀦𑁆𑀢𑀻 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀤𑁆𑀯𑀻𑀲𑀼 𑀢𑀻𑀲𑀼 𑀫𑀦𑀼𑀲𑁆𑀲𑁂𑀲𑀼 𑀲𑀼𑀭𑀸𑀫𑀢𑁆𑀢𑁂𑀲𑀼 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁂𑀲𑀼 𑀲𑀺𑀣𑀺𑀮𑀪𑀽𑀢𑀸𑀦𑀺 𑀢𑁂𑀲𑀁 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀺 𑀅𑀯𑀳𑀭𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀸 𑀏𑀓𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀢𑁆𑀢𑀦𑁄 𑀖𑀭𑀁 𑀦𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑁂𑀮𑀲𑀁𑀲𑀝𑁆𑀞𑀁 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀁 𑀧𑀺𑀜𑁆𑀜𑀸𑀓𑀫𑀤𑀸𑀲𑀺. 𑀲𑁄 𑀢𑀲𑁆𑀲𑀸 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀲𑀸 𑀧𑀲𑀦𑁆𑀦𑀫𑀸𑀦𑀲𑀸 𑀉𑀧𑀭𑀺 𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀲𑁄 𑀘 𑀣𑁂𑀭𑁄 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀧𑀳𑀁𑀲𑁂𑀦𑁆𑀢𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀘 𑀇𑀢𑁆𑀣𑀻 𑀅𑀦𑀼𑀫𑁄𑀤𑀦𑀓𑀸𑀮𑁂𑀬𑁂𑀯 ‘‘𑀫𑀬𑁆𑀳𑀁 𑀓𑁂𑀲𑀸 𑀤𑀻𑀖𑀸 𑀢𑀦𑀽 𑀲𑀺𑀦𑀺𑀤𑁆𑀥𑀸 𑀫𑀼𑀤𑀽 𑀯𑁂𑀮𑁆𑀮𑀺𑀢𑀕𑁆𑀕𑀸 𑀳𑁄𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀫𑀓𑀸𑀲𑀺.

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀫𑀺𑀲𑁆𑀲𑀓𑀓𑀫𑁆𑀫𑀲𑁆𑀲 𑀨𑀮𑁂𑀦 𑀲𑀫𑀼𑀤𑁆𑀤𑀫𑀚𑁆𑀛𑁂 𑀓𑀦𑀓𑀯𑀺𑀫𑀸𑀦𑁂 𑀏𑀓𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀓𑁂𑀲𑀸 𑀧𑀢𑁆𑀣𑀺𑀢𑀸𑀓𑀸𑀭𑀸𑀬𑁂𑀯 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀫𑀦𑀼𑀲𑁆𑀲𑀸𑀦𑀁 𑀲𑀸𑀝𑀓𑀸𑀯𑀳𑀭𑀡𑁂𑀦 𑀧𑀦 𑀦𑀕𑁆𑀕𑀸 𑀅𑀳𑁄𑀲𑀺. 𑀲𑀸 𑀢𑀲𑁆𑀫𑀺𑀁 𑀓𑀦𑀓𑀯𑀺𑀫𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀕𑁆𑀕𑀸𑀯 𑀳𑀼𑀢𑁆𑀯𑀸 𑀯𑀻𑀢𑀺𑀦𑀸𑀫𑁂𑀲𑀺. 𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 ¶ 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀲𑀢𑁆𑀢𑀲𑀢𑀸 𑀯𑀸𑀡𑀺𑀚𑀸 𑀲𑀼𑀯𑀡𑁆𑀡𑀪𑀽𑀫𑀺𑀁 𑀉𑀤𑁆𑀤𑀺𑀲𑁆𑀲 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀑𑀢𑀭𑀺𑀁𑀲𑀼. 𑀢𑁂𑀳𑀺 𑀆𑀭𑀼𑀴𑁆𑀳𑀸 𑀦𑀸𑀯𑀸 𑀯𑀺𑀲𑀫𑀯𑀸𑀢𑀯𑁂𑀕𑀼𑀓𑁆𑀔𑀺𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑀻 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀅𑀣 𑀲𑀸 𑀯𑀺𑀫𑀸𑀦𑀧𑁂𑀢𑀻 𑀲𑀳 𑀯𑀺𑀫𑀸𑀦𑁂𑀦 𑀢𑁂𑀲𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀚𑁂𑀝𑁆𑀞𑀯𑀸𑀡𑀺𑀚𑁄 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑀸 ¶ 𑀦𑀼 𑀅𑀦𑁆𑀢𑁄𑀯𑀺𑀫𑀸𑀦𑀲𑁆𑀫𑀺𑀁, 𑀢𑀺𑀝𑁆𑀞𑀦𑁆𑀢𑀻 𑀦𑀽𑀧𑀦𑀺𑀓𑁆𑀔𑀫𑀺;

𑀉𑀧𑀦𑀺𑀓𑁆𑀔𑀫𑀲𑁆𑀲𑀼 𑀪𑀤𑁆𑀤𑁂, 𑀧𑀲𑁆𑀲𑀸𑀫 𑀢𑀁 𑀩𑀳𑀺𑀝𑁆𑀞𑀺𑀢’’𑀦𑁆𑀢𑀺. 𑁋

𑀕𑀸𑀣𑀫𑀸𑀳 ¶ . 𑀢𑀢𑁆𑀣 𑀓𑀸 𑀦𑀼 𑀅𑀦𑁆𑀢𑁄𑀯𑀺𑀫𑀸𑀦𑀲𑁆𑀫𑀺𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀯𑀺𑀫𑀸𑀦𑀲𑁆𑀲 𑀅𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑁂 𑀢𑀺𑀝𑁆𑀞𑀦𑁆𑀢𑀻 𑀓𑀸 𑀦𑀼 𑀢𑁆𑀯𑀁, 𑀓𑀺𑀁 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀉𑀤𑀸𑀳𑀼 𑀅𑀫𑀦𑀼𑀲𑁆𑀲𑀺𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀦𑀽𑀧𑀦𑀺𑀓𑁆𑀔𑀫𑀻𑀢𑀺 𑀯𑀺𑀫𑀸𑀦𑀢𑁄 𑀦 𑀦𑀺𑀓𑁆𑀔𑀫𑀺. 𑀉𑀧𑀦𑀺𑀓𑁆𑀔𑀫𑀲𑁆𑀲𑀼, 𑀪𑀤𑁆𑀤𑁂, 𑀧𑀲𑁆𑀲𑀸𑀫 𑀢𑀁 𑀩𑀳𑀺𑀝𑁆𑀞𑀺𑀢𑀦𑁆𑀢𑀺, 𑀪𑀤𑁆𑀤𑁂, 𑀢𑀁 𑀫𑀬𑀁 𑀩𑀳𑀺 𑀞𑀺𑀢𑀁 𑀧𑀲𑁆𑀲𑀸𑀫 𑀤𑀝𑁆𑀞𑀼𑀓𑀸𑀫𑀫𑁆𑀳𑀸, 𑀢𑀲𑁆𑀫𑀸 𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀫𑀲𑁆𑀲𑀼. ‘‘𑀉𑀧𑀦𑀺𑀓𑁆𑀔𑀫𑀲𑁆𑀲𑀼 𑀪𑀤𑁆𑀤𑀦𑁆𑀢𑁂’’𑀢𑀺 𑀯𑀸 𑀧𑀸𑀞𑁄, 𑀪𑀤𑁆𑀤𑀁 𑀢𑁂 𑀅𑀢𑁆𑀣𑀽𑀢𑀺 𑀅𑀢𑁆𑀣𑁄.

𑀅𑀣𑀲𑁆𑀲 𑀲𑀸 𑀅𑀢𑁆𑀢𑀦𑁄 𑀩𑀳𑀺 𑀦𑀺𑀓𑁆𑀔𑀫𑀺𑀲𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀧𑀓𑀸𑀲𑁂𑀦𑁆𑀢𑀻 𑁋

‘‘𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀦𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑀼𑀁 𑀩𑀳𑀺;

𑀓𑁂𑀲𑁂𑀳𑀫𑁆𑀳𑀺 𑀧𑀝𑀺𑀘𑁆𑀙𑀦𑁆𑀦𑀸, 𑀧𑀼𑀜𑁆𑀜𑀁 𑀫𑁂 𑀅𑀧𑁆𑀧𑀓𑀁 𑀓𑀢’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀝𑁆𑀝𑀻𑀬𑀸𑀫𑀻𑀢𑀺 𑀦𑀕𑁆𑀕𑀸 𑀳𑀼𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀝𑁆𑀝𑀺𑀓𑀸 𑀤𑀼𑀓𑁆𑀔𑀺𑀢𑀸 𑀅𑀫𑁆𑀳𑀺. 𑀳𑀭𑀸𑀬𑀸𑀫𑀻𑀢𑀺 𑀮𑀚𑁆𑀚𑀸𑀫𑀺. 𑀓𑁂𑀲𑁂𑀳𑀫𑁆𑀳𑀺 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀓𑁂𑀲𑁂𑀳𑀺 𑀅𑀫𑁆𑀳𑀺 𑀅𑀳𑀁 𑀧𑀝𑀺𑀘𑁆𑀙𑀸𑀤𑀺𑀢𑀸 𑀧𑀸𑀭𑀼𑀢𑀲𑀭𑀻𑀭𑀸. 𑀧𑀼𑀜𑁆𑀜𑀁 𑀫𑁂 𑀅𑀧𑁆𑀧𑀓𑀁 𑀓𑀢𑀦𑁆𑀢𑀺 𑀅𑀧𑁆𑀧𑀓𑀁 𑀧𑀭𑀺𑀢𑁆𑀢𑀁 𑀫𑀬𑀸 𑀓𑀼𑀲𑀮𑀓𑀫𑁆𑀫𑀁 𑀓𑀢𑀁, 𑀧𑀺𑀜𑁆𑀜𑀸𑀓𑀤𑀸𑀦𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣𑀲𑁆𑀲𑀸 𑀯𑀸𑀡𑀺𑀚𑁄 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀲𑀸𑀝𑀓𑀁 𑀤𑀸𑀢𑀼𑀓𑀸𑀫𑁄 𑁋-

‘‘𑀳𑀦𑁆𑀤𑀼𑀢𑁆𑀢𑀭𑀻𑀬𑀁 𑀤𑀤𑀸𑀫𑀺 𑀢𑁂, 𑀇𑀤𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑀬;

𑀇𑀤𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀳𑀺 𑀦𑀺𑀓𑁆𑀔𑀫 𑀲𑁄𑀪𑀦𑁂;

𑀉𑀧𑀦𑀺𑀓𑁆𑀔𑀫𑀲𑁆𑀲𑀼 𑀪𑀤𑁆𑀤𑁂, 𑀧𑀲𑁆𑀲𑀸𑀫 𑀢𑀁 𑀩𑀳𑀺𑀝𑁆𑀞𑀺𑀢’’𑀦𑁆𑀢𑀺. 𑁋

𑀕𑀸𑀣𑀫𑀸𑀳 ¶ . 𑀢𑀢𑁆𑀣 ¶ 𑀳𑀦𑁆𑀤𑀸𑀢𑀺 𑀕𑀡𑁆𑀳. 𑀉𑀢𑁆𑀢𑀭𑀻𑀬𑀦𑁆𑀢𑀺 𑀉𑀧𑀲𑀁𑀩𑁆𑀬𑀸𑀦𑀁 𑀉𑀢𑁆𑀢𑀭𑀺𑀲𑀸𑀝𑀓𑀦𑁆𑀢𑀺 𑀅𑀢𑁆𑀣𑁄. 𑀤𑀤𑀸𑀫𑀺 𑀢𑁂𑀢𑀺 𑀢𑀼𑀬𑁆𑀳𑀁 𑀤𑀤𑀸𑀫𑀺. 𑀇𑀤𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑀬𑀸𑀢𑀺 𑀇𑀤𑀁 𑀫𑀫 𑀉𑀢𑁆𑀢𑀭𑀺𑀲𑀸𑀝𑀓𑀁 𑀢𑁆𑀯𑀁 𑀦𑀺𑀯𑀸𑀲𑁂𑀳𑀺. 𑀲𑁄𑀪𑀦𑁂𑀢𑀺 𑀲𑀼𑀦𑁆𑀤𑀭𑀭𑀽𑀧𑁂.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀲𑀸𑀝𑀓𑀁 𑀢𑀲𑁆𑀲𑀸 𑀉𑀧𑀦𑁂𑀲𑀺, 𑀲𑀸 𑀢𑀣𑀸 𑀤𑀺𑀬𑁆𑀬𑀫𑀸𑀦𑀲𑁆𑀲 𑀅𑀢𑁆𑀢𑀦𑁄 𑀅𑀦𑀼𑀧𑀓𑀧𑁆𑀧𑀦𑀻𑀬𑀢𑀜𑁆𑀘, 𑀬𑀣𑀸 𑀤𑀺𑀬𑁆𑀬𑀫𑀸𑀦𑀁 𑀉𑀧𑀓𑀧𑁆𑀧𑀢𑀺, 𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑀻 𑁋

‘‘𑀳𑀢𑁆𑀣𑁂𑀦 𑀳𑀢𑁆𑀣𑁂 𑀢𑁂 𑀤𑀺𑀦𑁆𑀦𑀁, 𑀦 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀺;

𑀏𑀲𑁂𑀢𑁆𑀣𑀼𑀧𑀸𑀲𑀓𑁄 𑀲𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄.

‘‘𑀏𑀢𑀁 𑀅𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲;

𑀢𑀣𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳 ¶ . 𑀢𑀢𑁆𑀣 𑀳𑀢𑁆𑀣𑁂𑀦 𑀳𑀢𑁆𑀣𑁂 𑀢𑁂 𑀤𑀺𑀦𑁆𑀦𑀁, 𑀦 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀻𑀢𑀺, 𑀫𑀸𑀭𑀺𑀲, 𑀢𑀯 𑀳𑀢𑁆𑀣𑁂𑀦 𑀫𑀫 𑀳𑀢𑁆𑀣𑁂 𑀢𑀬𑀸 𑀤𑀺𑀦𑁆𑀦𑀁 𑀦 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀺 𑀦 𑀯𑀺𑀦𑀺𑀬𑀼𑀚𑁆𑀚𑀢𑀺, 𑀉𑀧𑀪𑁄𑀕𑀬𑁄𑀕𑁆𑀕𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲𑁂𑀢𑁆𑀣𑀼𑀧𑀸𑀲𑀓𑁄 𑀲𑀤𑁆𑀥𑁄𑀢𑀺 𑀏𑀲𑁄 𑀭𑀢𑀦𑀢𑁆𑀢𑀬𑀁 𑀉𑀤𑁆𑀤𑀺𑀲𑁆𑀲 𑀲𑀭𑀡𑀕𑀫𑀦𑁂𑀦 𑀉𑀧𑀸𑀲𑀓𑁄 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁆𑀥𑁄 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀚𑀦𑀲𑀫𑀽𑀳𑁂 𑀅𑀢𑁆𑀣𑀺. 𑀏𑀢𑀁 𑀅𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲𑀸𑀢𑀺 𑀏𑀢𑀁 𑀉𑀧𑀸𑀲𑀓𑀁 𑀫𑀫 𑀤𑀺𑀬𑁆𑀬𑀫𑀸𑀦𑀁 𑀲𑀸𑀝𑀓𑀁 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀢𑀁 𑀤𑀓𑁆𑀔𑀺𑀡𑀁 𑀫𑀬𑁆𑀳𑀁 𑀆𑀤𑀺𑀲 𑀧𑀢𑁆𑀢𑀺𑀤𑀸𑀦𑀁 𑀤𑁂𑀳𑀺. 𑀢𑀣𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀦𑁆𑀢𑀺 𑀢𑀣𑀸 𑀓𑀢𑁂 𑀅𑀳𑀁 𑀲𑀼𑀔𑀺𑀢𑀸 𑀤𑀺𑀩𑁆𑀩𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀔𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀯𑀸𑀡𑀺𑀚𑀸 𑀢𑀁 𑀉𑀧𑀸𑀲𑀓𑀁 𑀦𑁆𑀳𑀸𑀧𑁂𑀢𑁆𑀯𑀸 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀯𑀢𑁆𑀣𑀬𑀼𑀕𑁂𑀦 𑀅𑀘𑁆𑀙𑀸𑀤𑁂𑀲𑀼𑀁. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀢𑀜𑁆𑀘 𑀢𑁂 𑀦𑁆𑀳𑀸𑀧𑀬𑀺𑀢𑁆𑀯𑀸𑀦, 𑀯𑀺𑀮𑀺𑀫𑁆𑀧𑁂𑀢𑁆𑀯𑀸𑀦 𑀯𑀸𑀡𑀺𑀚𑀸;

𑀯𑀢𑁆𑀣𑁂𑀳𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀼𑀁.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂 ¶ , 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

‘‘𑀢𑀢𑁄 ¶ 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀳𑀲𑀦𑁆𑀢𑀻 𑀯𑀺𑀫𑀸𑀦𑀸 𑀦𑀺𑀓𑁆𑀔𑀫𑀺, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮’’𑀦𑁆𑀢𑀺. 𑁋

𑁬𑁩. 𑀢𑀢𑁆𑀣 𑀢𑀦𑁆𑀢𑀺 𑀢𑀁 𑀉𑀧𑀸𑀲𑀓𑀁. 𑀘-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀢𑁂𑀢𑀺 𑀢𑁂 𑀯𑀸𑀡𑀺𑀚𑀸𑀢𑀺 𑀬𑁄𑀚𑀦𑀸. 𑀯𑀺𑀮𑀺𑀫𑁆𑀧𑁂𑀢𑁆𑀯𑀸𑀦𑀸𑀢𑀺 𑀉𑀢𑁆𑀢𑀫𑁂𑀦 𑀕𑀦𑁆𑀥𑁂𑀦 𑀯𑀺𑀮𑀺𑀫𑁆𑀧𑁂𑀢𑁆𑀯𑀸. 𑀯𑀢𑁆𑀣𑁂𑀳𑀘𑁆𑀙𑀸𑀤𑀬𑀺𑀢𑁆𑀯𑀸𑀦𑀸𑀢𑀺 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀲𑀩𑁆𑀬𑀜𑁆𑀚𑀦𑀁 𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀦𑀺𑀯𑀸𑀲𑀦𑀁 𑀉𑀢𑁆𑀢𑀭𑀻𑀬𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀲𑀼𑀁, 𑀤𑁆𑀯𑁂 𑀯𑀢𑁆𑀣𑀸𑀦𑀺 𑀅𑀤𑀁𑀲𑀽𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀼𑀦𑁆𑀢𑀺 𑀢𑀲𑁆𑀲𑀸 𑀧𑁂𑀢𑀺𑀬𑀸 𑀢𑀁 𑀤𑀓𑁆𑀔𑀺𑀡𑀁 𑀆𑀤𑀺𑀲𑀺𑀁𑀲𑀼.

𑁬𑁪. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂𑀢𑀺 𑀅𑀦𑀽-𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀸𑀬 𑀉𑀤𑁆𑀤𑀺𑀝𑁆𑀞𑀲𑀫𑀦𑀦𑁆𑀢𑀭𑀫𑁂𑀯. 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣𑀸𑀢𑀺 𑀢𑀲𑁆𑀲𑀸 𑀧𑁂𑀢𑀺𑀬𑀸 𑀯𑀺𑀧𑀸𑀓𑁄 𑀤𑀓𑁆𑀔𑀺𑀡𑀸𑀬 ¶ 𑀨𑀮𑀁 𑀉𑀧𑁆𑀧𑀚𑁆𑀚𑀺. 𑀓𑀻𑀤𑀺𑀲𑁄𑀢𑀺 𑀧𑁂𑀢𑀻 𑀆𑀳 𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀦𑁆𑀢𑀺. 𑀦𑀸𑀦𑀧𑁆𑀧𑀓𑀸𑀭𑀁 𑀤𑀺𑀩𑁆𑀩𑀪𑁄𑀚𑀦𑀲𑀤𑀺𑀲𑀁 𑀪𑁄𑀚𑀦𑀜𑁆𑀘 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀲𑀫𑀼𑀚𑁆𑀚𑀮𑀁 𑀤𑀺𑀩𑁆𑀩𑀯𑀢𑁆𑀣𑀲𑀤𑀺𑀲𑀁 𑀯𑀢𑁆𑀣𑀜𑁆𑀘 𑀅𑀦𑁂𑀓𑀯𑀺𑀥𑀁 𑀧𑀸𑀦𑀓𑀜𑁆𑀘 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀈𑀤𑀺𑀲𑀁 𑀨𑀮𑀁 𑀉𑀤𑀧𑀚𑁆𑀚𑀣𑀸𑀢𑀺 𑀬𑁄𑀚𑀦𑀸.

𑁬𑁫. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀪𑁄𑀚𑀦𑀸𑀤𑀺𑀧𑀝𑀺𑀮𑀸𑀪𑀢𑁄 𑀧𑀘𑁆𑀙𑀸. 𑀲𑀼𑀤𑁆𑀥𑀸𑀢𑀺 𑀦𑁆𑀳𑀸𑀦𑁂𑀦 𑀲𑀼𑀤𑁆𑀥𑀲𑀭𑀻𑀭𑀸. 𑀲𑀼𑀘𑀺𑀯𑀲𑀦𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸. 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻𑀢𑀺 𑀓𑀸𑀲𑀺𑀓𑀯𑀢𑁆𑀣𑀢𑁄𑀧𑀺 𑀉𑀢𑁆𑀢𑀫𑀯𑀢𑁆𑀣𑀥𑀸𑀭𑀺𑀦𑀻. 𑀳𑀲𑀦𑁆𑀢𑀻𑀢𑀺 ‘‘𑀧𑀲𑁆𑀲𑀣 𑀢𑀸𑀯 𑀢𑀼𑀫𑁆𑀳𑀸𑀓𑀁 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀯𑀺𑀲𑁂𑀲’’𑀦𑁆𑀢𑀺 𑀧𑀓𑀸𑀲𑀦𑀯𑀲𑁂𑀦 𑀳𑀲𑀫𑀸𑀦𑀸 𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀫𑀺.

𑀅𑀣 𑀢𑁂 𑀯𑀸𑀡𑀺𑀚𑀸 𑀏𑀯𑀁 𑀧𑀘𑁆𑀘𑀓𑁆𑀔𑀢𑁄 𑀧𑀼𑀜𑁆𑀜𑀨𑀮𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀢𑀲𑁆𑀫𑀺𑀁 𑀉𑀧𑀸𑀲𑀓𑁂 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸 𑀓𑀢𑀜𑁆𑀚𑀮𑀻 𑀢𑀁 𑀧𑀬𑀺𑀭𑀼𑀧𑀸𑀲𑀺𑀁𑀲𑀼. 𑀲𑁄𑀧𑀺 𑀢𑁂 𑀥𑀫𑁆𑀫𑀓𑀣𑀸𑀬 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀸𑀤𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂 𑀢𑀸𑀬 𑀯𑀺𑀫𑀸𑀦𑀧𑁂𑀢𑀺𑀬𑀸 𑀓𑀢𑀓𑀫𑁆𑀫𑀁 𑁋

‘‘𑀲𑀼𑀘𑀺𑀢𑁆𑀢𑀭𑀽𑀧𑀁 ¶ 𑀭𑀼𑀘𑀺𑀭𑀁, 𑀯𑀺𑀫𑀸𑀦𑀁 𑀢𑁂 𑀧𑀪𑀸𑀲𑀢𑀺;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺. 𑁋

𑀇𑀫𑀸𑀬 ¶ 𑀕𑀸𑀣𑀸𑀬 𑀧𑀼𑀘𑁆𑀙𑀺𑀁𑀲𑀼. 𑀢𑀢𑁆𑀣 𑀲𑀼𑀘𑀺𑀢𑁆𑀢𑀭𑀽𑀧𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑀲𑁂𑀦 𑀘𑁂𑀯 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺𑀯𑀲𑁂𑀦 𑀘 𑀲𑀼𑀝𑁆𑀞𑀼 𑀯𑀺𑀳𑀺𑀢𑀘𑀺𑀢𑁆𑀢𑀭𑀽𑀧𑀁. 𑀭𑀼𑀘𑀺𑀭𑀦𑁆𑀢𑀺 𑀭𑀫𑀡𑀻𑀬𑀁 𑀤𑀲𑁆𑀲𑀦𑀻𑀬𑀁. 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀦𑁆𑀢𑀺 𑀓𑀻𑀤𑀺𑀲𑀲𑁆𑀲 𑀓𑀫𑁆𑀫𑀲𑁆𑀲, 𑀓𑀺𑀁 𑀤𑀸𑀦𑀫𑀬𑀲𑁆𑀲 𑀉𑀤𑀸𑀳𑀼 𑀲𑀻𑀮𑀫𑀬𑀲𑁆𑀲 𑀇𑀤𑀁 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑀲𑀸 𑀢𑁂𑀳𑀺 𑀏𑀯𑀁 𑀧𑀼𑀝𑁆𑀞𑀸 ‘‘𑀫𑀬𑀸 𑀓𑀢𑀲𑁆𑀲 𑀧𑀭𑀺𑀢𑁆𑀢𑀓𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲 𑀢𑀸𑀯 𑀇𑀤𑀁 𑀨𑀮𑀁, 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀧𑀦 𑀆𑀬𑀢𑀺𑀁 𑀦𑀺𑀭𑀬𑁂 𑀏𑀤𑀺𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀤𑀼𑀪𑀬𑀁 𑀆𑀘𑀺𑀓𑁆𑀔𑀦𑁆𑀢𑀻 𑁋

‘‘𑀪𑀺𑀓𑁆𑀔𑀼𑀦𑁄 𑀘𑀭𑀫𑀸𑀦𑀲𑁆𑀲, 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀁 𑀅𑀳𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀯𑀺𑀧𑀸𑀓𑀁 𑀤𑀻𑀖𑀫𑀦𑁆𑀢𑀭𑀁;

𑀅𑀦𑀼𑀪𑁄𑀫𑀺 𑀯𑀺𑀫𑀸𑀦𑀲𑁆𑀫𑀺𑀁, 𑀢𑀜𑁆𑀘 𑀤𑀸𑀦𑀺 𑀧𑀭𑀺𑀢𑁆𑀢𑀓𑀁.

‘‘𑀉𑀤𑁆𑀥𑀁 ¶ 𑀘𑀢𑀽𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺;

𑀏𑀓𑀦𑁆𑀢𑀓𑀝𑀼𑀓𑀁 𑀖𑁄𑀭𑀁, 𑀦𑀺𑀭𑀬𑀁 𑀧𑀧𑀢𑀺𑀲𑁆𑀲𑀳𑀁.

‘‘𑀘𑀢𑀼𑀓𑁆𑀓𑀡𑁆𑀡𑀁 𑀘𑀢𑀼𑀤𑁆𑀯𑀸𑀭𑀁, 𑀯𑀺𑀪𑀢𑁆𑀢𑀁 𑀪𑀸𑀕𑀲𑁄 𑀫𑀺𑀢𑀁;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

‘‘𑀢𑀢𑁆𑀣𑀸𑀳𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀤𑀼𑀓𑁆𑀔𑀁 𑀯𑁂𑀤𑀺𑀲𑁆𑀲 𑀯𑁂𑀤𑀦𑀁;

𑀨𑀮𑀜𑁆𑀘 𑀧𑀸𑀧𑀓𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲’’𑀦𑁆𑀢𑀺. 𑁋 𑀕𑀸𑀣𑀸𑀬𑁄 𑀅𑀪𑀸𑀲𑀺;

𑁬𑁭. 𑀢𑀢𑁆𑀣 𑀪𑀺𑀓𑁆𑀔𑀼𑀦𑁄 𑀘𑀭𑀫𑀸𑀦𑀲𑁆𑀲𑀸𑀢𑀺 𑀅𑀜𑁆𑀜𑀢𑀭𑀲𑁆𑀲 𑀪𑀺𑀦𑁆𑀦𑀓𑀺𑀮𑁂𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀲𑁆𑀲. 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀦𑁆𑀢𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀢𑁂𑀮𑀁 𑀧𑀺𑀜𑁆𑀜𑀸𑀓𑀁. 𑀉𑀚𑀼𑀪𑀽𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀚𑀺𑀫𑁆𑀳𑀯𑀗𑁆𑀓𑀓𑀼𑀝𑀺𑀮𑀪𑀸𑀯𑀓𑀭𑀸𑀦𑀁 ¶ 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 ¶ 𑀉𑀚𑀼𑀪𑀸𑀯𑀧𑁆𑀧𑀢𑁆𑀢𑀲𑁆𑀲. 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀲𑀼𑀝𑁆𑀞𑀼 𑀧𑀲𑀦𑁆𑀦𑁂𑀦 𑀘𑀺𑀢𑁆𑀢𑁂𑀦.

𑁬𑁮-𑁬𑁯. 𑀤𑀻𑀖𑀫𑀦𑁆𑀢𑀭𑀦𑁆𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀤𑀻𑀖𑀅𑀦𑁆𑀢𑀭𑀁 𑀤𑀻𑀖𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀤𑀸𑀦𑀺 𑀧𑀭𑀺𑀢𑁆𑀢𑀓𑀦𑁆𑀢𑀺 𑀢𑀜𑁆𑀘 𑀧𑀼𑀜𑁆𑀜𑀨𑀮𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑀢𑁆𑀢𑀸 𑀓𑀫𑁆𑀫𑀲𑁆𑀲 𑀇𑀤𑀸𑀦𑀺 𑀧𑀭𑀺𑀢𑁆𑀢𑀓𑀁 𑀅𑀧𑁆𑀧𑀸𑀯𑀲𑁂𑀲𑀁, 𑀦 𑀘𑀺𑀭𑁂𑀦𑁂𑀯 𑀇𑀢𑁄 𑀘𑀯𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀤𑁆𑀥𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀉𑀤𑁆𑀥𑀁 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀧𑀜𑁆𑀘𑀫𑁂 𑀫𑀸𑀲𑁂 𑀫𑀫 𑀓𑀸𑀮𑀁𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀦𑁆𑀢𑀓𑀝𑀼𑀓𑀦𑁆𑀢𑀺 𑀏𑀓𑀦𑁆𑀢𑁂𑀦𑁂𑀯 𑀅𑀦𑀺𑀝𑁆𑀞𑀙𑀨𑀲𑁆𑀲𑀸𑀬𑀢𑀦𑀺𑀓𑀪𑀸𑀯𑀢𑁄 𑀏𑀓𑀦𑁆𑀢𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀖𑁄𑀭𑀦𑁆𑀢𑀺 𑀤𑀸𑀭𑀼𑀡𑀁. 𑀦𑀺𑀭𑀬𑀦𑁆𑀢𑀺 𑀦𑀢𑁆𑀣𑀺 𑀏𑀢𑁆𑀣 𑀅𑀬𑁄 𑀲𑀼𑀔𑀦𑁆𑀢𑀺 𑀓𑀢𑁆𑀯𑀸 ‘‘𑀦𑀺𑀭𑀬’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀦𑀭𑀓𑀁. 𑀧𑀧𑀢𑀺𑀲𑁆𑀲𑀳𑀦𑁆𑀢𑀺 𑀧𑀧𑀳𑀺𑀲𑁆𑀲𑀸𑀫𑀺 𑀅𑀳𑀁.

𑁭𑁦. ‘‘𑀦𑀺𑀭𑀬’’𑀦𑁆𑀢𑀺 𑀘𑁂𑀢𑁆𑀣 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀓𑁆𑀓𑀡𑁆𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀓𑁆𑀓𑀡𑁆𑀡𑀦𑁆𑀢𑀺 𑀘𑀢𑀼𑀓𑁆𑀓𑁄𑀡𑀁. 𑀘𑀢𑀼𑀤𑁆𑀯𑀸𑀭𑀦𑁆𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀬𑀼𑀢𑁆𑀢𑀁. 𑀯𑀺𑀪𑀢𑁆𑀢𑀦𑁆𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀁.

𑀪𑀸𑀕𑀲𑁄𑀢𑀺 ¶ 𑀪𑀸𑀕𑀢𑁄. 𑀫𑀺𑀢𑀦𑁆𑀢𑀺 𑀢𑀼𑀮𑀺𑀢𑀁. 𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀦𑁆𑀢𑀺 𑀅𑀬𑁄𑀫𑀬𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁. 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀬𑁄𑀧𑀝𑀮𑁂𑀦𑁂𑀯 𑀉𑀧𑀭𑀺 𑀧𑀺𑀳𑀺𑀢𑀁.

𑁭𑁧-𑁭𑁨. 𑀢𑁂𑀚𑀲𑀸 𑀬𑀼𑀢𑀸𑀢𑀺 𑀲𑀫𑀦𑁆𑀢𑀢𑁄 𑀲𑀫𑀼𑀝𑁆𑀞𑀺𑀢𑀚𑀸𑀮𑁂𑀦 𑀫𑀳𑀢𑀸 𑀅𑀕𑁆𑀕𑀺𑀦𑀸 𑀦𑀺𑀭𑀦𑁆𑀢𑀭𑀁 𑀲𑀫𑀸𑀬𑀼𑀢𑀚𑀸𑀮𑀸. 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀦𑁆𑀢𑀺 𑀏𑀯𑀁 𑀧𑀦 𑀲𑀫𑀦𑁆𑀢𑀸 𑀩𑀳𑀺 𑀲𑀩𑁆𑀩𑀤𑀺𑀲𑀸𑀲𑀼 𑀬𑁄𑀚𑀦𑀲𑀢𑀁 𑀬𑁄𑀚𑀦𑀸𑀦𑀁 𑀲𑀢𑀁. 𑀲𑀩𑁆𑀩𑀤𑀸𑀢𑀺 𑀲𑀩𑁆𑀩𑀓𑀸𑀮𑀁. 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀳𑀸𑀦𑀺𑀭𑀬𑁂. 𑀯𑁂𑀤𑀺𑀲𑁆𑀲𑀦𑁆𑀢𑀺 𑀯𑁂𑀤𑀺𑀲𑁆𑀲𑀸𑀫𑀺 𑀅𑀦𑀼𑀪𑀯𑀺𑀲𑁆𑀲𑀸𑀫𑀺. 𑀨𑀮𑀜𑁆𑀘 𑀧𑀸𑀧𑀓𑀫𑁆𑀫𑀲𑁆𑀲𑀸𑀢𑀺 𑀇𑀤𑀁 𑀈𑀤𑀺𑀲𑀁 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀫𑀳𑀸 𑀏𑀯𑀁 𑀓𑀢𑀲𑁆𑀲 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑀸𑀬 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀨𑀮𑁂 𑀆𑀬𑀢𑀺𑀁 𑀦𑁂𑀭𑀬𑀺𑀓𑀪𑀬𑁂 𑀘 𑀧𑀓𑀸𑀲𑀺𑀢𑁂 ¶ 𑀲𑁄 𑀉𑀧𑀸𑀲𑀓𑁄 𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 ‘‘𑀳𑀦𑁆𑀤𑀲𑁆𑀲𑀸𑀳𑀁 𑀧𑀢𑀺𑀝𑁆𑀞𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀤𑁂𑀯𑀢𑁂, 𑀢𑁆𑀯𑀁 𑀫𑀬𑁆𑀳𑀁 𑀏𑀓𑀲𑁆𑀲 𑀤𑀸𑀦𑀯𑀲𑁂𑀦 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀸 𑀉𑀝𑁆𑀞𑀸𑀭𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀚𑀸𑀢𑀸, 𑀇𑀤𑀸𑀦𑀺 𑀧𑀦 𑀇𑀫𑁂𑀲𑀁 𑀉𑀧𑀸𑀲𑀓𑀸𑀦𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀼 𑀘 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀦𑀺𑀭𑀬𑀽𑀧𑀧𑀢𑁆𑀢𑀺𑀢𑁄 𑀫𑀼𑀘𑁆𑀘𑀺𑀲𑁆𑀲𑀲𑀻’’𑀢𑀺. 𑀲𑀸 𑀧𑁂𑀢𑀻 𑀳𑀝𑁆𑀞𑀢𑀼𑀝𑁆𑀞𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑁂 𑀤𑀺𑀩𑁆𑀩𑁂𑀦 𑀅𑀦𑁆𑀦𑀧𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀤𑀺𑀩𑁆𑀩𑀸𑀦𑀺 𑀯𑀢𑁆𑀣𑀸𑀦𑀺 𑀦𑀸𑀦𑀸𑀯𑀺𑀥𑀸𑀦𑀺 ¶ 𑀭𑀢𑀦𑀸𑀦𑀺 𑀘 𑀅𑀤𑀸𑀲𑀺, 𑀪𑀕𑀯𑀦𑁆𑀢𑀜𑁆𑀘 𑀉𑀤𑁆𑀤𑀺𑀲𑁆𑀲 𑀤𑀺𑀩𑁆𑀩𑀁 𑀤𑀼𑀲𑁆𑀲𑀬𑀼𑀕𑀁 𑀢𑁂𑀲𑀁 𑀳𑀢𑁆𑀣𑁂 𑀤𑀢𑁆𑀯𑀸 ‘‘𑀅𑀜𑁆𑀜𑀢𑀭𑀸, 𑀪𑀦𑁆𑀢𑁂, 𑀯𑀺𑀫𑀸𑀦𑀧𑁂𑀢𑀻 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻𑀢𑀺 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀫𑀫 𑀯𑀘𑀦𑁂𑀦 𑀯𑀦𑁆𑀤𑀣𑀸’’𑀢𑀺 𑀯𑀦𑁆𑀤𑀦𑀜𑁆𑀘 𑀧𑁂𑀲𑁂𑀲𑀺, 𑀢𑀜𑁆𑀘 𑀦𑀸𑀯𑀁 𑀅𑀢𑁆𑀢𑀦𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑁂𑀳𑀺 𑀇𑀘𑁆𑀙𑀺𑀢𑀧𑀝𑁆𑀝𑀦𑀁 𑀢𑀁 𑀤𑀺𑀯𑀲𑀫𑁂𑀯 𑀉𑀧𑀦𑁂𑀲𑀺.

𑀅𑀣 𑀢𑁂 𑀯𑀸𑀡𑀺𑀚𑀸 𑀢𑀢𑁄 𑀧𑀝𑁆𑀝𑀦𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀼 𑀢𑀁 𑀤𑀼𑀲𑁆𑀲𑀬𑀼𑀕𑀁 𑀤𑀢𑁆𑀯𑀸 𑀯𑀦𑁆𑀤𑀦𑀜𑁆𑀘 𑀦𑀺𑀯𑁂𑀤𑁂𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸. 𑀢𑁂 𑀧𑀦 𑀉𑀧𑀸𑀲𑀓𑀸 𑀤𑀼𑀢𑀺𑀬𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀺𑀁𑀲𑀼. 𑀲𑀸 𑀘 𑀢𑀢𑁄 𑀧𑁂𑀢𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀯𑀺𑀯𑀺𑀥𑀭𑀢𑀦𑀯𑀺𑀚𑁆𑀚𑁄𑀢𑀺𑀢𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀓𑀦𑀓𑀯𑀺𑀫𑀸𑀦𑁂 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀦𑀺𑀩𑁆𑀩𑀢𑁆𑀢𑀻𑀢𑀺.

𑀔𑀮𑁆𑀮𑀸𑀝𑀺𑀬𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀭𑀢𑁄𑀯 ¶ 𑀲𑁂𑀢𑁂𑀦 𑀧𑀮𑁂𑀢𑀺 𑀳𑀢𑁆𑀣𑀺𑀦𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀧𑁂𑀢𑁂 𑀆𑀭𑀫𑁆𑀪 𑀯𑀼𑀢𑁆𑀢𑀁. 𑀆𑀬𑀲𑁆𑀫𑀸 𑀓𑀺𑀭 𑀲𑀁𑀓𑀺𑀘𑁆𑀘𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄 𑀢𑀺𑀁𑀲𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ¶ 𑀲𑀤𑁆𑀥𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀲𑀦𑁆𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀦𑁆𑀦𑀁 𑀘𑁄𑀭𑀲𑀢𑀸𑀦𑀁 𑀳𑀢𑁆𑀣𑀢𑁄 𑀆𑀕𑀢𑀁 𑀫𑀭𑀡𑀫𑁆𑀧𑀺 𑀩𑀸𑀳𑀺𑀢𑁆𑀯𑀸 𑀢𑁂 𑀘 𑀘𑁄𑀭𑁂 𑀤𑀫𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣𑀸𑀬𑀲𑁆𑀫𑀸 𑀲𑀁𑀓𑀺𑀘𑁆𑀘𑁄 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀢𑀦𑁂 𑀯𑀺𑀳𑀸𑀲𑀺. 𑀫𑀦𑀼𑀲𑁆𑀲𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀯𑀻𑀣𑀺𑀧𑀝𑀺𑀧𑀸𑀝𑀺𑀬𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀆𑀕𑀦𑁆𑀢𑀼𑀓𑀤𑀸𑀦𑀁 𑀅𑀤𑀁𑀲𑀼. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀫𑀦𑀼𑀲𑁆𑀲𑁂 𑀦𑀺𑀘𑁆𑀘𑀪𑀢𑁆𑀢𑁂 𑀲𑀫𑀸𑀤𑀧𑁂𑀲𑀺, 𑀢𑁂 𑀬𑀣𑀸𑀩𑀮𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀼𑀁.

𑀢𑁂𑀦 𑀘 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑀸 𑀏𑀓𑀸 𑀘 𑀥𑀻𑀢𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀚𑁂𑀝𑁆𑀞𑀧𑀼𑀢𑁆𑀢𑁄 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀫𑀺𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀆𑀬𑀲𑁆𑀫𑀸 𑀲𑀁𑀓𑀺𑀘𑁆𑀘𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀫𑀼𑀤𑀼𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑁄 𑀉𑀧𑀸𑀲𑀓𑁄 𑀆𑀳 𑁋 ‘‘𑀢𑁆𑀯𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀘𑁆𑀘𑀪𑀢𑁆𑀢𑀁 𑀤𑁂𑀳𑀻’’𑀢𑀺 ¶ . ‘‘𑀅𑀦𑀸𑀘𑀺𑀡𑁆𑀡𑀁 𑀅𑀫𑁆𑀳𑀸𑀓𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀦𑀺𑀘𑁆𑀘𑀪𑀢𑁆𑀢𑀤𑀸𑀦𑀁, 𑀢𑀲𑁆𑀫𑀸 𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀫𑀬𑁆𑀳𑀫𑁆𑀧𑀺 𑀪𑀢𑁆𑀢𑀁 𑀦 𑀤𑀲𑁆𑀲𑀲𑀻’’𑀢𑀺? ‘‘𑀓𑀣𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀬𑀤𑀺 𑀏𑀯𑀁 𑀬𑀁 𑀫𑀬𑁆𑀳𑀁 𑀤𑁂𑀲𑀺, 𑀢𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀦𑁂𑀢𑁆𑀯𑀸 𑀪𑁄𑀚𑁂𑀲𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀥𑀫𑁆𑀫𑀜𑁆𑀘 𑀲𑀼𑀡𑀺𑀢𑁆𑀯𑀸 𑀢𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀧𑀼𑀜𑁆𑀜𑀓𑀫𑁆𑀫𑀭𑀢𑀸 𑀘 𑀅𑀳𑁂𑀲𑀼𑀁. 𑀏𑀯𑀁 𑀢𑁂 𑀢𑀬𑁄 𑀚𑀦𑀸 𑀬𑀣𑀸𑀯𑀺𑀪𑀯𑀁 𑀤𑀸𑀦𑀸𑀦𑀺 𑀤𑁂𑀦𑁆𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑀺𑀁𑀲𑀼 𑀕𑀭𑀼𑀁 𑀓𑀭𑀺𑀁𑀲𑀼 𑀫𑀸𑀦𑁂𑀲𑀼𑀁 𑀧𑀽𑀚𑁂𑀲𑀼𑀁. 𑀫𑀸𑀢𑀸𑀧𑀺𑀢𑀭𑁄 𑀧𑀦 𑀦𑁂𑀲𑀁 𑀅𑀲𑁆𑀲𑀤𑁆𑀥𑀸 ¶ 𑀅𑀧𑁆𑀧𑀲𑀦𑁆𑀦𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀕𑀸𑀭𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀦𑀸𑀤𑀭𑀸 𑀅𑀘𑁆𑀙𑀦𑁆𑀤𑀺𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀥𑀻𑀢𑀭𑀁 𑀤𑀸𑀭𑀺𑀓𑀁 𑀫𑀸𑀢𑀼𑀮𑀧𑀼𑀢𑁆𑀢𑀲𑁆𑀲𑀢𑁆𑀣𑀸𑀬 ¶ 𑀜𑀸𑀢𑀓𑀸 𑀯𑀸𑀭𑁂𑀲𑀼𑀁. 𑀲𑁄 𑀘 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀘𑁆𑀘𑀁 𑀅𑀢𑁆𑀢𑀦𑁄 𑀫𑀸𑀢𑀼-𑀕𑁂𑀳𑀁 𑀪𑀼𑀜𑁆𑀚𑀺𑀢𑀼𑀁 𑀕𑀘𑁆𑀙𑀢𑀺. 𑀢𑀁 𑀫𑀸𑀢𑀸 𑀅𑀢𑁆𑀢𑀦𑁄 𑀪𑀸𑀢𑀼-𑀥𑀻𑀢𑀸𑀬 𑀤𑀸𑀭𑀺𑀓𑀸𑀬 𑀧𑀮𑁄𑀪𑁂𑀢𑀺. 𑀢𑁂𑀦 𑀲𑁄 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀉𑀧𑀲𑀗𑁆𑀕𑀫𑀺𑀢𑁆𑀯𑀸 𑀆𑀳 𑁋 ‘‘𑀉𑀧𑁆𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀅𑀦𑀼𑀚𑀸𑀦𑀸𑀣 𑀫’’𑀦𑁆𑀢𑀺. 𑀉𑀧𑀚𑁆𑀛𑀸𑀬𑁄 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀲𑀸𑀫𑀡𑁂𑀭, 𑀫𑀸𑀲𑀫𑀢𑁆𑀢𑀁 𑀆𑀕𑀫𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀫𑀸𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀢𑀣𑁂𑀯 𑀆𑀭𑁄𑀘𑁂𑀲𑀺. 𑀉𑀧𑀚𑁆𑀛𑀸𑀬𑁄 𑀧𑀼𑀦 ‘‘𑀅𑀟𑁆𑀠𑀫𑀸𑀲𑀁 𑀆𑀕𑀫𑁂𑀳𑀻’’𑀢𑀺 𑀆𑀳. 𑀅𑀟𑁆𑀠𑀫𑀸𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀢𑀣𑁂𑀯 𑀯𑀼𑀢𑁆𑀢𑁂 𑀧𑀼𑀦 ‘‘𑀲𑀢𑁆𑀢𑀸𑀳𑀁 𑀆𑀕𑀫𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀅𑀣 𑀢𑀲𑁆𑀫𑀺𑀁 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀲𑀸𑀫𑀡𑁂𑀭𑀲𑁆𑀲 𑀫𑀸𑀢𑀼𑀮𑀸𑀦𑀺𑀬𑀸 𑀕𑁂𑀳𑀁 𑀯𑀺𑀦𑀝𑁆𑀞𑀘𑁆𑀙𑀤𑀦𑀁 𑀚𑀺𑀡𑁆𑀡𑀁 𑀤𑀼𑀩𑁆𑀩𑀮𑀓𑀼𑀝𑁆𑀝𑀁 𑀯𑀸𑀢𑀯𑀲𑁆𑀲𑀸𑀪𑀺𑀳𑀢𑀁 𑀧𑀭𑀺𑀧𑀢𑀺. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀻 𑀤𑁆𑀯𑁂 𑀧𑀼𑀢𑁆𑀢𑀸 𑀖𑀻𑀢𑀸 𑀘 𑀕𑁂𑀳𑁂𑀦 𑀅𑀚𑁆𑀛𑁄𑀢𑁆𑀣𑀝𑀸 𑀓𑀸𑀮𑀫𑀓𑀁𑀲𑀼. 𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀻 𑀘 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀤𑁆𑀯𑁂 𑀧𑀼𑀢𑁆𑀢𑀸 𑀥𑀻𑀢𑀸 𑀘 𑀪𑀼𑀫𑁆𑀫𑀤𑁂𑀯𑁂𑀲𑀼. 𑀢𑁂𑀲𑀼 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀺𑀬𑀸𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀓𑀦𑀺𑀝𑁆𑀞𑀲𑁆𑀲 𑀅𑀲𑁆𑀲𑀢𑀭𑀻𑀭𑀣𑁄, 𑀥𑀻𑀢𑀸𑀬 𑀲𑀼𑀯𑀡𑁆𑀡𑀲𑀺𑀯𑀺𑀓𑀸. 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀅𑀬𑁄𑀫𑀼𑀕𑁆𑀕𑀭𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀓𑁄𑀝𑁂𑀦𑁆𑀢𑀺, 𑀅𑀪𑀺𑀳𑀢𑀝𑁆𑀞𑀸𑀦𑁂𑀲𑀼 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀖𑀝𑀧𑁆𑀧𑀫𑀸𑀡𑀸 𑀕𑀡𑁆𑀟𑀸 𑀉𑀝𑁆𑀞𑀳𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀧𑀘𑀺𑀢𑁆𑀯𑀸 𑀧𑀭𑀺𑀪𑁂𑀤𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑀡𑁆𑀟𑁂 𑀨𑀸𑀮𑁂𑀢𑁆𑀯𑀸 𑀓𑁄𑀥𑀸𑀪𑀺𑀪𑀽𑀢𑀸 𑀦𑀺𑀓𑁆𑀓𑀭𑀼𑀡𑀸 𑀨𑀭𑀼𑀲𑀯𑀘𑀦𑁂𑀳𑀺 𑀢𑀚𑁆𑀚𑁂𑀦𑁆𑀢𑀸 𑀧𑀼𑀩𑁆𑀩𑀮𑁄𑀳𑀺𑀢𑀁 𑀧𑀺𑀯𑀦𑁆𑀢𑀺, 𑀦 𑀘 𑀢𑀺𑀢𑁆𑀢𑀺𑀁 𑀧𑀝𑀺𑀮𑀪𑀦𑁆𑀢𑀺.

𑀅𑀣 𑀲𑀸𑀫𑀡𑁂𑀭𑁄 𑀉𑀓𑁆𑀓𑀡𑁆𑀞𑀸𑀪𑀺𑀪𑀽𑀢𑁄 𑀉𑀧𑀚𑁆𑀛𑀸𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑀸 𑀧𑀝𑀺𑀜𑁆𑀜𑀸𑀢𑀤𑀺𑀯𑀲𑀸 𑀯𑀻𑀢𑀺𑀯𑀢𑁆𑀢𑀸, 𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀅𑀦𑀼𑀚𑀸𑀦𑀸𑀣 𑀫’’𑀦𑁆𑀢𑀺. 𑀅𑀣 𑀦𑀁 𑀉𑀧𑀚𑁆𑀛𑀸𑀬𑁄 ‘‘𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀓𑀸𑀮𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀬 𑀏𑀳𑀻’’𑀢𑀺 𑀯𑀢𑁆𑀯𑀸 𑀇𑀲𑀺𑀧𑀢𑀦𑀯𑀺𑀳𑀸𑀭𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑁂 𑀤𑁆𑀯𑁂 𑀤𑁂𑀯𑀧𑀼𑀢𑁆𑀢𑀸 𑀲𑀤𑁆𑀥𑀺𑀁 𑀪𑀕𑀺𑀦𑀺𑀬𑀸 𑀢𑁂𑀦𑁂𑀯 𑀫𑀕𑁆𑀕𑁂𑀦 ¶ 𑀬𑀓𑁆𑀔𑀲𑀫𑀸𑀕𑀫𑀁 𑀲𑀫𑁆𑀪𑀸𑀯𑁂𑀢𑀼𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀫𑀼𑀕𑁆𑀕𑀭𑀳𑀢𑁆𑀣𑀸 𑀨𑀭𑀼𑀲𑀯𑀸𑀘𑀸 ¶ 𑀓𑀸𑀴𑀭𑀽𑀧𑀸 𑀆𑀓𑀼𑀮𑀸𑀓𑀼𑀮𑀮𑀽𑀔𑀧𑀢𑀺𑀢𑀓𑁂𑀲𑀪𑀸𑀭𑀸 𑀅𑀕𑁆𑀕𑀺𑀤𑀟𑁆𑀠𑀢𑀸𑀮𑀓𑁆𑀔𑀦𑁆𑀥𑀲𑀤𑀺𑀲𑀸 ¶ 𑀯𑀺𑀕𑀮𑀺𑀢𑀧𑀼𑀩𑁆𑀩𑀮𑁄𑀳𑀺𑀢𑀸 𑀯𑀮𑀺𑀢𑀕𑀢𑁆𑀢𑀸 𑀅𑀢𑀺𑀯𑀺𑀬 𑀚𑁂𑀕𑀼𑀘𑁆𑀙𑀩𑀻𑀪𑀘𑁆𑀙𑀤𑀲𑁆𑀲𑀦𑀸 𑀢𑁂 𑀅𑀦𑀼𑀩𑀦𑁆𑀥𑀦𑁆𑀢𑀺.

𑀅𑀣𑀸𑀬𑀲𑁆𑀫𑀸 𑀲𑀁𑀓𑀺𑀘𑁆𑀘𑁄 𑀬𑀣𑀸 𑀲𑁄 𑀲𑀸𑀫𑀡𑁂𑀭𑁄 𑀢𑁂 𑀲𑀩𑁆𑀩𑁂 𑀕𑀘𑁆𑀙𑀦𑁆𑀢𑁂 𑀧𑀲𑁆𑀲𑀢𑀺, 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀸𑀫𑀡𑁂𑀭𑀁 𑀆𑀳 𑁋 ‘‘𑀧𑀲𑁆𑀲𑀲𑀺 𑀢𑁆𑀯𑀁, 𑀲𑀸𑀫𑀡𑁂𑀭, 𑀇𑀫𑁂 𑀕𑀘𑁆𑀙𑀦𑁆𑀢𑁂’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀧𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀇𑀫𑁂𑀳𑀺 𑀓𑀢𑀓𑀫𑁆𑀫𑀁 𑀧𑀝𑀺𑀧𑀼𑀘𑁆𑀙𑀸’’𑀢𑀺. 𑀲𑁄 𑀳𑀢𑁆𑀣𑀺𑀬𑀸𑀦𑀸𑀤𑀻𑀳𑀺 𑀕𑀘𑁆𑀙𑀦𑁆𑀢𑁂 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀧𑀼𑀘𑁆𑀙𑀺. 𑀢𑁂 𑀆𑀳𑀁𑀲𑀼 𑁋 ‘‘𑀬𑁂 𑀧𑀘𑁆𑀙𑀢𑁄 𑀧𑁂𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀧𑀝𑀺𑀧𑀼𑀘𑁆𑀙𑀸’’𑀢𑀺. 𑀲𑀸𑀫𑀡𑁂𑀭𑁄 𑀢𑁂 𑀧𑁂𑀢𑁂 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀭𑀢𑁄𑀯 𑀲𑁂𑀢𑁂𑀦 𑀧𑀮𑁂𑀢𑀺 𑀳𑀢𑁆𑀣𑀺𑀦𑀸, 𑀫𑀚𑁆𑀛𑁂 𑀧𑀦 𑀅𑀲𑁆𑀲𑀢𑀭𑀻𑀭𑀣𑁂𑀦;

𑀧𑀘𑁆𑀙𑀸 𑀘 𑀓𑀜𑁆𑀜𑀸 𑀲𑀺𑀯𑀺𑀓𑀸𑀬 𑀦𑀻𑀬𑀢𑀺, 𑀑𑀪𑀸𑀲𑀬𑀦𑁆𑀢𑀻 𑀤𑀲 𑀲𑀩𑁆𑀩𑀲𑁄 𑀤𑀺𑀲𑀸.

‘‘𑀢𑀼𑀫𑁆𑀳𑁂 𑀧𑀦 𑀫𑀼𑀕𑁆𑀕𑀭𑀳𑀢𑁆𑀣𑀧𑀸𑀡𑀺𑀦𑁄, 𑀭𑀼𑀤𑀁𑀫𑀼𑀔𑀸 𑀙𑀺𑀦𑁆𑀦𑀧𑀪𑀺𑀦𑁆𑀦𑀕𑀢𑁆𑀢𑀸;

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀢𑁆𑀣 𑀧𑀸𑀧𑀁, 𑀬𑁂𑀦𑀜𑁆𑀜𑀫𑀜𑁆𑀜𑀲𑁆𑀲 𑀧𑀺𑀯𑀸𑀣 𑀮𑁄𑀳𑀺𑀢’’𑀦𑁆𑀢𑀺.

𑀢𑀢𑁆𑀣 𑀧𑀼𑀭𑀢𑁄𑀢𑀺 𑀲𑀩𑁆𑀩𑀧𑀞𑀫𑀁. 𑀲𑁂𑀢𑁂𑀦𑀸𑀢𑀺 𑀧𑀡𑁆𑀟𑀭𑁂𑀦. 𑀧𑀮𑁂𑀢𑀻𑀢𑀺 𑀕𑀘𑁆𑀙𑀢𑀺. 𑀫𑀚𑁆𑀛𑁂 𑀧𑀦𑀸𑀢𑀺 𑀳𑀢𑁆𑀣𑀺𑀁 𑀆𑀭𑀼𑀴𑁆𑀳𑀲𑁆𑀲 𑀲𑀺𑀯𑀺𑀓𑀁 𑀆𑀭𑀼𑀴𑁆𑀳𑀸𑀬 𑀘 𑀅𑀦𑁆𑀢𑀭𑁂. 𑀅𑀲𑁆𑀲𑀢𑀭𑀻𑀭𑀣𑁂𑀦𑀸𑀢𑀺 𑀅𑀲𑁆𑀲𑀢𑀭𑀻𑀬𑀼𑀢𑁆𑀢𑁂𑀦 𑀭𑀣𑁂𑀦 𑀧𑀮𑁂𑀢𑀻𑀢𑀺 𑀬𑁄𑀚𑀦𑀸. 𑀦𑀻𑀬𑀢𑀻𑀢𑀺 𑀯𑀳𑀻𑀬𑀢𑀺. 𑀑𑀪𑀸𑀲𑀬𑀦𑁆𑀢𑀻 𑀤𑀲 𑀲𑀩𑁆𑀩𑀲𑁄 𑀤𑀺𑀲𑀸𑀢𑀺 𑀲𑀩𑁆𑀩𑀢𑁄 𑀲𑀫𑀦𑁆𑀢𑀢𑁄 𑀲𑀩𑁆𑀩𑀸 𑀤𑀲 𑀤𑀺𑀲𑀸 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀳𑀺 𑀯𑀢𑁆𑀣𑀸𑀪𑀭𑀡𑀸𑀤𑀺𑀧𑁆𑀧𑀪𑀸𑀳𑀺 𑀘 𑀯𑀺𑀚𑁆𑀚𑁄𑀢𑀬𑀫𑀸𑀦𑀸. 𑀫𑀼𑀕𑁆𑀕𑀭𑀳𑀢𑁆𑀣𑀧𑀸𑀡𑀺𑀦𑁄𑀢𑀺 𑀫𑀼𑀕𑁆𑀕𑀭𑀸 𑀳𑀢𑁆𑀣𑀲𑀗𑁆𑀔𑀸𑀢𑁂𑀲𑀼 𑀧𑀸𑀡𑀻𑀲𑀼 𑀬𑁂𑀲𑀁 𑀢𑁂 𑀫𑀼𑀕𑁆𑀕𑀭𑀳𑀢𑁆𑀣𑀧𑀸𑀡𑀺𑀦𑁄, 𑀪𑀽𑀫𑀺𑀲𑀡𑁆𑀳𑀓𑀭𑀡𑀻𑀬𑀸𑀤𑀻𑀲𑀼 𑀧𑀸𑀡𑀺𑀯𑁄𑀳𑀸𑀭𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 𑀳𑀢𑁆𑀣𑀲𑀤𑁆𑀤𑁂𑀦 𑀧𑀸𑀡𑀺 𑀏𑀯 𑀯𑀺𑀲𑁂𑀲𑀺𑀢𑁄. 𑀙𑀺𑀦𑁆𑀦𑀧𑀪𑀺𑀦𑁆𑀦𑀕𑀢𑁆𑀢𑀸𑀢𑀺 𑀫𑀼𑀕𑁆𑀕𑀭𑀧𑁆𑀧𑀳𑀸𑀭𑁂𑀦 𑀢𑀢𑁆𑀣 𑀢𑀢𑁆𑀣 𑀙𑀺𑀦𑁆𑀦𑀧𑀪𑀺𑀦𑁆𑀦𑀲𑀭𑀻𑀭𑀸. 𑀧𑀺𑀯𑀸𑀣𑀸𑀢𑀺 𑀧𑀺𑀯𑀣.

𑀏𑀯𑀁 ¶ 𑀲𑀸𑀫𑀡𑁂𑀭𑁂𑀦 𑀧𑀼𑀝𑁆𑀞𑀸 𑀢𑁂 𑀧𑁂𑀢𑀸 𑀲𑀩𑁆𑀩𑀁 𑀢𑀁

𑀧𑀯𑀢𑁆𑀢𑀺𑀁 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺𑀁𑀲𑀼 𑁋

‘‘𑀧𑀼𑀭𑀢𑁄𑀯 ¶ 𑀬𑁄 𑀕𑀘𑁆𑀙𑀢𑀺 𑀓𑀼𑀜𑁆𑀚𑀭𑁂𑀦, 𑀲𑁂𑀢𑁂𑀦 𑀦𑀸𑀕𑁂𑀦 𑀘𑀢𑀼𑀓𑁆𑀓𑀫𑁂𑀦;

𑀅𑀫𑁆𑀳𑀸𑀓 𑀧𑀼𑀢𑁆𑀢𑁄 𑀅𑀳𑀼 𑀚𑁂𑀝𑁆𑀞𑀓𑁄 𑀲𑁄, 𑀤𑀸𑀦𑀸𑀦𑀺 𑀤𑀢𑁆𑀯𑀸𑀦 𑀲𑀼𑀔𑀻 𑀧𑀫𑁄𑀤𑀢𑀺.

‘‘𑀬𑁄 ¶ 𑀬𑁄 𑀫𑀚𑁆𑀛𑁂 𑀅𑀲𑁆𑀲𑀢𑀭𑀻𑀭𑀣𑁂𑀦, 𑀘𑀢𑀼𑀩𑁆𑀪𑀺 𑀬𑀼𑀢𑁆𑀢𑁂𑀦 𑀲𑀼𑀯𑀕𑁆𑀕𑀺𑀢𑁂𑀦;

𑀅𑀫𑁆𑀳𑀸𑀓 𑀧𑀼𑀢𑁆𑀢𑁄 𑀅𑀳𑀼 𑀫𑀚𑁆𑀛𑀺𑀫𑁄 𑀲𑁄, 𑀅𑀫𑀘𑁆𑀙𑀭𑀻 𑀤𑀸𑀦𑀧𑀢𑀻 𑀯𑀺𑀭𑁄𑀘𑀢𑀺.

‘‘𑀬𑀸 𑀲𑀸 𑀘 𑀧𑀘𑁆𑀙𑀸 𑀲𑀺𑀯𑀺𑀓𑀸𑀬 𑀦𑀻𑀬𑀢𑀺, 𑀦𑀸𑀭𑀻 𑀲𑀧𑀜𑁆𑀜𑀸 𑀫𑀺𑀕𑀫𑀦𑁆𑀤𑀮𑁄𑀘𑀦𑀸;

𑀅𑀫𑁆𑀳𑀸𑀓 𑀥𑀻𑀢𑀸 𑀅𑀳𑀼 𑀲𑀸 𑀓𑀦𑀺𑀝𑁆𑀞𑀺𑀓𑀸, 𑀪𑀸𑀕𑀟𑁆𑀠𑀪𑀸𑀕𑁂𑀦 𑀲𑀼𑀔𑀻 𑀧𑀫𑁄𑀤𑀢𑀺.

‘‘𑀏𑀢𑁂 𑀘 𑀤𑀸𑀦𑀸𑀦𑀺 𑀅𑀤𑀁𑀲𑀼 𑀧𑀼𑀩𑁆𑀩𑁂, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀫𑀬𑀁 𑀧𑀦 𑀫𑀘𑁆𑀙𑀭𑀻𑀦𑁄 𑀅𑀳𑀼𑀫𑁆𑀳, 𑀧𑀭𑀺𑀪𑀸𑀲𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀏𑀢𑁂 𑀘 𑀤𑀢𑁆𑀯𑀸 𑀧𑀭𑀺𑀘𑀸𑀭𑀬𑀦𑁆𑀢𑀺, 𑀫𑀬𑀜𑁆𑀘 𑀲𑀼𑀲𑁆𑀲𑀸𑀫 𑀦𑀴𑁄𑀯 𑀙𑀺𑀦𑁆𑀦𑁄’’𑀢𑀺.

𑁭𑁫. 𑀢𑀢𑁆𑀣 𑀧𑀼𑀭𑀢𑁄𑀯 𑀬𑁄 𑀕𑀘𑁆𑀙𑀢𑀻𑀢𑀺 𑀇𑀫𑁂𑀲𑀁 𑀕𑀘𑁆𑀙𑀦𑁆𑀢𑀸𑀦𑀁 𑀬𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺. ‘‘𑀬𑁄𑀲𑁄 𑀧𑀼𑀭𑀢𑁄 𑀕𑀘𑁆𑀙𑀢𑀻’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲 𑀬𑁄 𑀏𑀲𑁄 𑀧𑀼𑀭𑀢𑁄 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀜𑁆𑀚𑀭𑁂𑀦𑀸𑀢𑀺 𑀓𑀼𑀁 𑀧𑀣𑀯𑀺𑀁 𑀚𑀻𑀭𑀬𑀢𑀺, 𑀓𑀼𑀜𑁆𑀚𑁂𑀲𑀼 𑀯𑀸 𑀭𑀫𑀢𑀺 𑀘𑀭𑀢𑀻𑀢𑀺 ‘‘𑀓𑀼𑀜𑁆𑀚𑀭𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀳𑀢𑁆𑀣𑀺𑀦𑀸. 𑀦𑀸𑀕𑁂𑀦𑀸𑀢𑀺, 𑀦𑀸𑀲𑁆𑀲 𑀅𑀕𑀫𑀦𑀻𑀬𑀁 𑀅𑀦𑀪𑀺𑀪𑀯𑀦𑀻𑀬𑀁 𑀅𑀢𑁆𑀣𑀻𑀢𑀺 𑀦𑀸𑀕𑀸, 𑀢𑁂𑀦 𑀦𑀸𑀕𑁂𑀦. 𑀘𑀢𑀼𑀓𑁆𑀓𑀫𑁂𑀦𑀸𑀢𑀺 𑀘𑀢𑀼𑀧𑁆𑀧𑀤𑁂𑀦. 𑀚𑁂𑀝𑁆𑀞𑀓𑁄𑀢𑀺 𑀧𑀼𑀩𑁆𑀩𑀚𑁄.

𑁭𑁬-𑁭𑁭. 𑀘𑀢𑀼𑀩𑁆𑀪𑀻𑀢𑀺 𑀘𑀢𑀽𑀳𑀺 𑀅𑀲𑁆𑀲𑀢𑀭𑀻𑀳𑀺. 𑀲𑀼𑀯𑀕𑁆𑀕𑀺𑀢𑁂𑀦𑀸𑀢𑀺 𑀲𑀼𑀦𑁆𑀤𑀭𑀕𑀫𑀦𑁂𑀦 𑀘𑀸𑀢𑀼𑀭𑀕𑀫𑀦𑁂𑀦. 𑀫𑀺𑀕𑀫𑀦𑁆𑀤𑀮𑁄𑀘𑀦𑀸𑀢𑀺 𑀫𑀺𑀕𑀻 𑀯𑀺𑀬 𑀫𑀦𑁆𑀤𑀓𑁆𑀔𑀺𑀓𑀸. 𑀪𑀸𑀕𑀟𑁆𑀠𑀪𑀸𑀕𑁂𑀦𑀸𑀢𑀺 ¶ 𑀪𑀸𑀕𑀲𑁆𑀲 𑀅𑀟𑁆𑀠𑀪𑀸𑀕𑁂𑀦, 𑀅𑀢𑁆𑀢𑀦𑀸 𑀮𑀤𑁆𑀥𑀓𑁄𑀝𑁆𑀞𑀸𑀲𑀢𑁄 𑀅𑀟𑁆𑀠𑀪𑀸𑀕𑀤𑀸𑀦𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀲𑀼𑀔𑀻𑀢𑀺 𑀲𑀼𑀔𑀺𑀦𑀻. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁.

𑁭𑁮. 𑀧𑀭𑀺𑀪𑀸𑀲𑀓𑀸𑀢𑀺 ¶ 𑀅𑀓𑁆𑀓𑁄𑀲𑀓𑀸. 𑀧𑀭𑀺𑀘𑀸𑀭𑀬𑀦𑁆𑀢𑀻𑀢𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀢𑁆𑀢𑀦𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀇𑀢𑁄 𑀘𑀺𑀢𑁄 𑀘 𑀬𑀣𑀸𑀲𑀼𑀔𑀁 𑀘𑀸𑀭𑁂𑀦𑁆𑀢𑀺, 𑀧𑀭𑀺𑀚𑀦𑁂𑀳𑀺 𑀯𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀦𑀺𑀲𑁆𑀲𑀦𑁆𑀤𑁂𑀦 𑀧𑀭𑀺𑀘𑀭𑀺𑀬𑀁 𑀓𑀸𑀭𑁂𑀦𑁆𑀢𑀺. 𑀫𑀬𑀜𑁆𑀘 𑀲𑀼𑀲𑁆𑀲𑀸𑀫 𑀦𑀴𑁄𑀯 𑀙𑀺𑀦𑁆𑀦𑁄𑀢𑀺 𑀫𑀬𑀁 𑀧𑀦 𑀙𑀺𑀦𑁆𑀦𑁄 𑀆𑀢𑀧𑁂 𑀔𑀺𑀢𑁆𑀢𑁄 𑀦𑀴𑁄 𑀯𑀺𑀬 𑀲𑀼𑀲𑁆𑀲𑀸𑀫, 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀅𑀜𑁆𑀜𑀫𑀜𑁆𑀜𑀁 𑀤𑀡𑁆𑀟𑀸𑀪𑀺𑀖𑀸𑀢𑁂𑀳𑀺 𑀘 𑀲𑀼𑀓𑁆𑀔𑀸 𑀯𑀺𑀲𑀼𑀓𑁆𑀔𑀸 𑀪𑀯𑀸𑀫𑀸𑀢𑀺.

𑀏𑀯𑀁 𑀅𑀢𑁆𑀢𑀦𑁄 𑀧𑀸𑀧𑀁 𑀲𑀫𑁆𑀧𑀯𑁂𑀤𑁂𑀢𑁆𑀯𑀸 ‘‘𑀫𑀬𑀁 𑀢𑀼𑀬𑁆𑀳𑀁 𑀫𑀸𑀢𑀼𑀮𑀫𑀸𑀢𑀼𑀮𑀸𑀦𑀺𑀬𑁄’’𑀢𑀺 𑀆𑀘𑀺𑀓𑁆𑀔𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑀸𑀫𑀡𑁂𑀭𑁄 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 ‘‘𑀏𑀯𑀭𑀽𑀧𑀸𑀦𑀁 𑀓𑀺𑀩𑁆𑀩𑀺𑀲𑀓𑀸𑀭𑀻𑀦𑀁 𑀓𑀣𑀁 𑀦𑀼 𑀔𑁄 𑀪𑁄𑀚𑀦𑀸𑀦𑀺 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑀺𑀁 ¶ 𑀢𑀼𑀫𑁆𑀳𑀸𑀓𑀁 𑀪𑁄𑀚𑀦𑀁 𑀓𑀺𑀁 𑀲𑀬𑀸𑀦𑀁, 𑀓𑀣𑀜𑁆𑀘 𑀬𑀸𑀧𑁂𑀣 𑀲𑀼𑀧𑀸𑀧𑀥𑀫𑁆𑀫𑀺𑀦𑁄;

𑀧𑀳𑀽𑀢𑀪𑁄𑀕𑁂𑀲𑀼 𑀅𑀦𑀧𑁆𑀧𑀓𑁂𑀲𑀼, 𑀲𑀼𑀔𑀁 𑀯𑀺𑀭𑀸𑀥𑀸𑀬 𑀤𑀼𑀓𑁆𑀔𑀚𑁆𑀚 𑀧𑀢𑁆𑀢𑀸’’𑀢𑀺. 𑁋

𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀪𑁄𑀚𑀦𑀦𑁆𑀢𑀺 𑀓𑀻𑀤𑀺𑀲𑀁 𑀢𑀼𑀫𑁆𑀳𑀸𑀓𑀁 𑀪𑁄𑀚𑀦𑀁? 𑀓𑀺𑀁 𑀲𑀬𑀸𑀦𑀦𑁆𑀢𑀺 𑀓𑀻𑀤𑀺𑀲𑀁 𑀲𑀬𑀦𑀁? ‘‘𑀓𑀺𑀁 𑀲𑀬𑀸𑀦𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀓𑀻𑀤𑀺𑀲𑀸 𑀲𑀬𑀦𑀸, 𑀓𑀻𑀤𑀺𑀲𑁂 𑀲𑀬𑀦𑁂 𑀲𑀬𑀣𑀸𑀢𑀺 𑀅𑀢𑁆𑀣𑁄. 𑀓𑀣𑀜𑁆𑀘 𑀬𑀸𑀧𑁂𑀣𑀸𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀬𑀸𑀧𑁂𑀣, ‘‘𑀓𑀣𑀁 𑀯𑁄 𑀬𑀸𑀧𑁂𑀣𑀸’’𑀢𑀺𑀧𑀺 𑀧𑀸𑀞𑁄, 𑀓𑀣𑀁 𑀢𑀼𑀫𑁆𑀳𑁂 𑀬𑀸𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀲𑀼𑀧𑀸𑀧𑀥𑀫𑁆𑀫𑀺𑀦𑁄𑀢𑀺 𑀲𑀼𑀝𑁆𑀞𑀼 𑀅𑀢𑀺𑀯𑀺𑀬 𑀧𑀸𑀧𑀥𑀫𑁆𑀫𑀸. 𑀧𑀳𑀽𑀢𑀪𑁄𑀕𑁂𑀲𑀽𑀢𑀺 𑀅𑀧𑀭𑀺𑀬𑀦𑁆𑀢𑁂𑀲𑀼 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀲𑀦𑁆𑀢𑁂𑀲𑀼. 𑀅𑀦𑀧𑁆𑀧𑀓𑁂𑀲𑀽𑀢𑀺 𑀦 𑀅𑀧𑁆𑀧𑀓𑁂𑀲𑀼 𑀩𑀳𑀽𑀲𑀼. 𑀲𑀼𑀔𑀁 𑀯𑀺𑀭𑀸𑀥𑀸𑀬𑀸𑀢𑀺 𑀲𑀼𑀔𑀳𑁂𑀢𑀼𑀦𑁄 𑀧𑀼𑀜𑁆𑀜𑀲𑁆𑀲 𑀅𑀓𑀭𑀡𑁂𑀦 ¶ 𑀲𑀼𑀔𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀺𑀭𑀸𑀥𑁂𑀢𑁆𑀯𑀸. ‘‘𑀲𑀼𑀔𑀲𑁆𑀲 𑀯𑀺𑀭𑀸𑀥𑁂𑀦𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀤𑀼𑀓𑁆𑀔𑀚𑁆𑀚 𑀧𑀢𑁆𑀢𑀸𑀢𑀺 𑀅𑀚𑁆𑀚 𑀇𑀤𑀸𑀦𑀺 𑀇𑀤𑀁 𑀧𑁂𑀢𑀬𑁄𑀦𑀺𑀧𑀭𑀺𑀬𑀸𑀧𑀦𑁆𑀦𑀁 𑀤𑀼𑀓𑁆𑀔𑀁 𑀅𑀦𑀼𑀧𑁆𑀧𑀢𑁆𑀢𑀸𑀢𑀺.

𑀏𑀯𑀁 𑀲𑀸𑀫𑀡𑁂𑀭𑁂𑀦 𑀧𑀼𑀝𑁆𑀞𑀸 𑀧𑁂𑀢𑀸 𑀢𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸 𑁋

‘‘𑀅𑀜𑁆𑀜𑀫𑀜𑁆𑀜𑀁 𑀯𑀥𑀺𑀢𑁆𑀯𑀸𑀦, 𑀧𑀺𑀯𑀸𑀫 𑀧𑀼𑀩𑁆𑀩𑀮𑁄𑀳𑀺𑀢𑀁;

𑀩𑀳𑀼𑀁 𑀯𑀺𑀢𑁆𑀯𑀸 𑀦 𑀥𑀸𑀢𑀸 𑀳𑁄𑀫, 𑀦𑀘𑁆𑀙𑀸𑀤𑀺𑀫𑁆𑀳𑀲𑁂 𑀫𑀬𑀁.

‘‘𑀇𑀘𑁆𑀘𑁂𑀯 ¶ 𑀫𑀘𑁆𑀘𑀸 𑀧𑀭𑀺𑀤𑁂𑀯𑀬𑀦𑁆𑀢𑀺, 𑀅𑀤𑀸𑀬𑀓𑀸 𑀧𑁂𑀘𑁆𑀘 𑀬𑀫𑀲𑁆𑀲 𑀞𑀸𑀬𑀺𑀦𑁄;

𑀬𑁂 𑀢𑁂 𑀯𑀺𑀤𑀺𑀘𑁆𑀘 𑀅𑀥𑀺𑀕𑀫𑁆𑀫 𑀪𑁄𑀕𑁂, 𑀦 𑀪𑀼𑀜𑁆𑀚𑀭𑁂 𑀦𑀸𑀧𑀺 𑀓𑀭𑁄𑀦𑁆𑀢𑀺 𑀧𑀼𑀜𑁆𑀜𑀁.

‘‘𑀢𑁂 𑀔𑀼𑀧𑁆𑀧𑀺𑀧𑀸𑀲𑀽𑀧𑀕𑀢𑀸 𑀧𑀭𑀢𑁆𑀣, 𑀧𑀘𑁆𑀙𑀸 𑀘𑀺𑀭𑀁 𑀛𑀸𑀬𑀭𑁂 𑀟𑀬𑁆𑀳𑀫𑀸𑀦𑀸;

𑀓𑀫𑁆𑀫𑀸𑀦𑀺 𑀓𑀢𑁆𑀯𑀸𑀦 𑀤𑀼𑀔𑀼𑀤𑁆𑀭𑀸𑀦𑀺, 𑀅𑀦𑀼𑀪𑁄𑀦𑁆𑀢𑀺 𑀤𑀼𑀓𑁆𑀔𑀁 𑀓𑀝𑀼𑀓𑀧𑁆𑀨𑀮𑀸𑀦𑀺.

‘‘𑀇𑀢𑁆𑀢𑀭𑀜𑁆𑀳𑀺 𑀥𑀦𑀁 𑀥𑀜𑁆𑀜𑀁, 𑀇𑀢𑁆𑀢𑀭𑀁 𑀇𑀥 𑀚𑀻𑀯𑀺𑀢𑀁;

𑀇𑀢𑁆𑀢𑀭𑀁 𑀇𑀢𑁆𑀢𑀭𑀢𑁄 𑀜𑀢𑁆𑀯𑀸, 𑀤𑀻𑀧𑀁 𑀓𑀬𑀺𑀭𑀸𑀣 𑀧𑀡𑁆𑀟𑀺𑀢𑁄.

‘‘𑀬𑁂 𑀢𑁂 𑀏𑀯𑀁 𑀧𑀚𑀸𑀦𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀢𑁂 𑀤𑀸𑀦𑁂 𑀦𑀧𑁆𑀧𑀫𑀚𑁆𑀚𑀦𑁆𑀢𑀺, 𑀲𑀼𑀢𑁆𑀯𑀸 𑀅𑀭𑀳𑀢𑀁 𑀯𑀘𑁄’’𑀢𑀺. 𑁋

𑁮𑁦-𑁮𑁧. 𑀢𑀢𑁆𑀣 ¶ 𑀦 𑀥𑀸𑀢𑀸 𑀳𑁄𑀫𑀸𑀢𑀺 𑀥𑀸𑀢𑀸 𑀲𑀼𑀳𑀺𑀢𑀸 𑀢𑀺𑀢𑁆𑀢𑀸 𑀦 𑀳𑁄𑀫. 𑀦𑀘𑁆𑀙𑀸𑀤𑀺𑀫𑁆𑀳𑀲𑁂𑀢𑀺 𑀦 𑀭𑀼𑀘𑁆𑀘𑀸𑀫, 𑀦 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀫, 𑀦 𑀢𑀁 𑀫𑀬𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀺𑀯𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀇𑀘𑁆𑀘𑁂𑀯𑀸𑀢𑀺 𑀏𑀯𑀫𑁂𑀯. 𑀫𑀘𑁆𑀘𑀸 𑀧𑀭𑀺𑀤𑁂𑀯𑀬𑀦𑁆𑀢𑀻𑀢𑀺 𑀫𑀬𑀁 𑀯𑀺𑀬 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀓𑀢𑀓𑀺𑀩𑁆𑀩𑀺𑀲𑀸 𑀧𑀭𑀺𑀤𑁂𑀯𑀦𑁆𑀢𑀺 𑀓𑀦𑁆𑀤𑀦𑁆𑀢𑀺. 𑀅𑀤𑀸𑀬𑀓𑀸𑀢𑀺 𑀅𑀤𑀸𑀦𑀲𑀻𑀮𑀸 𑀫𑀘𑁆𑀙𑀭𑀺𑀦𑁄. 𑀬𑀫𑀲𑁆𑀲 𑀞𑀸𑀬𑀺𑀦𑁄𑀢𑀺 𑀬𑀫𑀮𑁄𑀓𑀲𑀜𑁆𑀜𑀺𑀢𑁂 𑀬𑀫𑀲𑁆𑀲 𑀞𑀸𑀦𑁂 𑀧𑁂𑀢𑁆𑀢𑀺𑀯𑀺𑀲𑀬𑁂 𑀞𑀸𑀦𑀲𑀻𑀮𑀸 ¶ . 𑀬𑁂 𑀢𑁂 𑀯𑀺𑀤𑀺𑀘𑁆𑀘 𑀅𑀥𑀺𑀕𑀫𑁆𑀫𑀪𑁄𑀕𑁂𑀢𑀺 𑀬𑁂 𑀢𑁂 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀲𑁂𑀲𑀯𑀺𑀥𑀸𑀬𑀓𑁂 𑀪𑁄𑀕𑁂 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸. 𑀦 𑀪𑀼𑀜𑁆𑀚𑀭𑁂 𑀦𑀸𑀧𑀺 𑀓𑀭𑁄𑀦𑁆𑀢𑀺 𑀧𑀼𑀜𑁆𑀜𑀦𑁆𑀢𑀺 𑀅𑀫𑁆𑀳𑁂 𑀯𑀺𑀬 𑀲𑀬𑀫𑁆𑀧𑀺 𑀦 𑀪𑀼𑀜𑁆𑀚𑀦𑁆𑀢𑀺, 𑀧𑀭𑁂𑀲𑀁 𑀤𑁂𑀦𑁆𑀢𑀸 𑀤𑀸𑀦𑀫𑀬𑀁 𑀧𑀼𑀜𑁆𑀜𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺.

𑁮𑁨. 𑀢𑁂 𑀔𑀼𑀧𑁆𑀧𑀺𑀧𑀸𑀲𑀽𑀧𑀕𑀢𑀸 𑀧𑀭𑀢𑁆𑀣𑀸𑀢𑀺 𑀢𑁂 𑀲𑀢𑁆𑀢𑀸 𑀧𑀭𑀢𑁆𑀣 𑀧𑀭𑀮𑁄𑀓𑁂 𑀧𑁂𑀢𑁆𑀢𑀺𑀯𑀺𑀲𑀬𑁂 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸. 𑀘𑀺𑀭𑀁 𑀛𑀸𑀬𑀭𑁂 𑀟𑀬𑁆𑀳𑀫𑀸𑀦𑀸𑀢𑀺 𑀔𑀼𑀤𑀸𑀤𑀺𑀳𑁂𑀢𑀼𑀓𑁂𑀦 𑀤𑀼𑀓𑁆𑀔𑀕𑁆𑀕𑀺𑀦𑀸 ‘‘𑀅𑀓𑀢𑀁 𑀯𑀢 𑀅𑀫𑁆𑀳𑁂𑀳𑀺 𑀓𑀼𑀲𑀮𑀁, 𑀓𑀢𑀁 𑀧𑀸𑀧’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀫𑀸𑀦𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑀕𑁆𑀕𑀺𑀦𑀸 𑀧𑀭𑀺𑀟𑀬𑁆𑀳𑀫𑀸𑀦𑀸 𑀛𑀸𑀬𑀦𑁆𑀢𑀺, 𑀅𑀦𑀼𑀢𑁆𑀣𑀼𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀔𑀼𑀤𑁆𑀭𑀸𑀦𑀻𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀺. 𑀅𑀦𑀼𑀪𑁄𑀦𑁆𑀢𑀺 𑀤𑀼𑀓𑁆𑀔𑀁 𑀓𑀝𑀼𑀓𑀧𑁆𑀨𑀮𑀸𑀦𑀻𑀢𑀺 𑀅𑀦𑀺𑀝𑁆𑀞𑀨𑀮𑀸𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀘𑀺𑀭𑀓𑀸𑀮𑀁 𑀤𑀼𑀓𑁆𑀔𑀁 𑀆𑀧𑀸𑀬𑀺𑀓𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺.

𑁮𑁩-𑁮𑁪. 𑀇𑀢𑁆𑀢𑀭𑀦𑁆𑀢𑀺 ¶ 𑀦 𑀘𑀺𑀭𑀓𑀸𑀮𑀝𑁆𑀞𑀸𑀬𑀻, 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀇𑀢𑁆𑀢𑀭𑀁 𑀇𑀥 𑀚𑀻𑀯𑀺𑀢𑀦𑁆𑀢𑀺 𑀇𑀥 𑀫𑀦𑀼𑀲𑁆𑀲𑀮𑁄𑀓𑁂 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀫𑁆𑀧𑀺 𑀇𑀢𑁆𑀢𑀭𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀓𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 (𑀤𑀻. 𑀦𑀺. 𑁨.𑁯𑁧; 𑀲𑀁. 𑀦𑀺. 𑁧.𑁧𑁪𑁫; 𑀅. 𑀦𑀺. 𑁭.𑁭𑁪). 𑀇𑀢𑁆𑀢𑀭𑀁 𑀇𑀢𑁆𑀢𑀭𑀢𑁄 𑀜𑀢𑁆𑀯𑀸𑀢𑀺 𑀥𑀦𑀥𑀜𑁆𑀜𑀸𑀤𑀺𑀉𑀧𑀓𑀭𑀡𑀁 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀜𑁆𑀘 𑀇𑀢𑁆𑀢𑀭𑀁 𑀧𑀭𑀺𑀢𑁆𑀢𑀁 𑀔𑀡𑀺𑀓𑀁 𑀦 𑀘𑀺𑀭𑀲𑁆𑀲𑀦𑁆𑀢𑀺 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀤𑀻𑀧𑀁 𑀓𑀬𑀺𑀭𑀸𑀣 𑀧𑀡𑁆𑀟𑀺𑀢𑁄𑀢𑀺 𑀲𑀧𑀜𑁆𑀜𑁄 𑀧𑀼𑀭𑀺𑀲𑁄 𑀤𑀻𑀧𑀁 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀧𑀭𑀮𑁄𑀓𑁂 𑀳𑀺𑀢𑀲𑀼𑀔𑀸𑀥𑀺𑀝𑁆𑀞𑀸𑀦𑀁 𑀓𑀭𑁂𑀬𑁆𑀬. 𑀬𑁂 𑀢𑁂 𑀏𑀯𑀁 𑀧𑀚𑀸𑀦𑀦𑁆𑀢𑀻𑀢𑀺 𑀬𑁂 𑀢𑁂 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑀸𑀦𑀁 𑀪𑁄𑀕𑀸𑀦𑀁 𑀚𑀻𑀯𑀺𑀢𑀲𑁆𑀲 𑀘 𑀇𑀢𑁆𑀢𑀭𑀪𑀸𑀯𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀺, 𑀢𑁂 𑀤𑀸𑀦𑁂 𑀲𑀩𑁆𑀩𑀓𑀸𑀮𑀁 𑀦𑀧𑁆𑀧𑀫𑀚𑁆𑀚𑀦𑁆𑀢𑀺. 𑀲𑀼𑀢𑁆𑀯𑀸 𑀅𑀭𑀳𑀢𑀁 𑀯𑀘𑁄𑀢𑀺 𑀅𑀭𑀳𑀢𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀼𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀏𑀯𑀁 𑀢𑁂 𑀧𑁂𑀢𑀸 𑀲𑀸𑀫𑀡𑁂𑀭𑁂𑀦 𑀧𑀼𑀝𑁆𑀞𑀸 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀫𑀬𑀁 𑀢𑀼𑀬𑁆𑀳𑀁 𑀫𑀸𑀢𑀼𑀮𑀫𑀸𑀢𑀼𑀮𑀸𑀦𑀺𑀬𑁄’’𑀢𑀺 𑀧𑀯𑁂𑀤𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀲𑀸𑀫𑀡𑁂𑀭𑁄 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀉𑀓𑁆𑀓𑀡𑁆𑀞𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁, 𑀪𑀦𑁆𑀢𑁂, 𑀅𑀦𑀼𑀓𑀫𑁆𑀧𑀓𑁂𑀦 ¶ 𑀓𑀭𑀡𑀻𑀬𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀢𑀁 𑀫𑁂 𑀢𑀼𑀫𑁆𑀳𑁂𑀳𑀺 𑀓𑀢𑀁, 𑀫𑀳𑀢𑀸 𑀯𑀢𑀫𑁆𑀳𑀺 𑀅𑀦𑀢𑁆𑀣𑀧𑀸𑀢𑀢𑁄 𑀭𑀓𑁆𑀔𑀺𑀢𑁄, 𑀦 𑀤𑀸𑀦𑀺 𑀫𑁂 ¶ 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀅𑀪𑀺𑀭𑀫𑀺𑀲𑁆𑀲𑀸𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂’’𑀢𑀺. 𑀅𑀣𑀸𑀬𑀲𑁆𑀫𑀸 𑀲𑀁𑀓𑀺𑀘𑁆𑀘𑁄 𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀆𑀬𑀲𑁆𑀫𑀸 𑀧𑀦 𑀲𑀁𑀓𑀺𑀘𑁆𑀘𑁄 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀦𑀸𑀕𑀧𑁂𑀢𑀯𑀢𑁆𑀣𑀼𑀯𑀡𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀼𑀢𑁆𑀢𑀫𑀭𑀡𑀳𑁂𑀢𑀼 𑀧𑀭𑀺𑀤𑁂𑀯𑀲𑁄𑀓𑀲𑀫𑀸𑀧𑀦𑁆𑀦𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑁂𑀳𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀅𑀣 ¶ 𑀲𑀢𑁆𑀣𑀸 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀉𑀧𑀸𑀲𑀓𑁄 𑀘 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀲𑀻𑀖𑀁 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀉𑀧𑀸𑀲𑀓𑁄𑀧𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀁 𑀪𑀕𑀯𑀸 ‘‘𑀓𑀺𑀁, 𑀉𑀧𑀸𑀲𑀓, 𑀲𑁄𑀓𑀧𑀭𑁂𑀢𑁄 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀆𑀳. ‘‘𑀆𑀫, 𑀪𑀕𑀯𑀸, 𑀧𑀺𑀬𑁄 𑀫𑁂 𑀧𑀼𑀢𑁆𑀢𑁄 𑀓𑀸𑀮𑀓𑀢𑁄, 𑀢𑁂𑀦𑀸𑀳𑀁 𑀲𑁄𑀘𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑁄𑀓𑀯𑀺𑀦𑁄𑀤𑀦𑀁 𑀓𑀭𑁄𑀦𑁆𑀢𑁄 𑀉𑀭𑀕𑀚𑀸𑀢𑀓𑀁 (𑀚𑀸. 𑁧.𑁫.𑁧𑁯 𑀆𑀤𑀬𑁄) 𑀓𑀣𑁂𑀲𑀺.

𑀅𑀢𑀻𑀢𑁂 𑀓𑀺𑀭 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀬𑀁 𑀥𑀫𑁆𑀫𑀧𑀸𑀮𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀓𑀼𑀮𑀁 𑀅𑀳𑁄𑀲𑀺. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀻 𑀧𑀼𑀢𑁆𑀢𑁄 𑀥𑀻𑀢𑀸 𑀲𑀼𑀡𑀺𑀲𑀸 𑀤𑀸𑀲𑀻𑀢𑀺 𑀇𑀫𑁂 𑀲𑀩𑁆𑀩𑁂𑀧𑀺 𑀫𑀭𑀡𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀪𑀺𑀭𑀢𑀸 ¶ 𑀅𑀳𑁂𑀲𑀼𑀁. 𑀢𑁂𑀲𑀼 𑀬𑁄 𑀕𑁂𑀳𑀢𑁄 𑀦𑀺𑀓𑁆𑀔𑀫𑀢𑀺, 𑀲𑁄 𑀲𑁂𑀲𑀚𑀦𑁂 𑀑𑀯𑀤𑀺𑀢𑁆𑀯𑀸 𑀦𑀺𑀭𑀧𑁂𑀓𑁆𑀔𑁄𑀯 𑀦𑀺𑀓𑁆𑀔𑀫𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀖𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀓𑀲𑀢𑀺. 𑀧𑀼𑀢𑁆𑀢𑁄 𑀲𑀼𑀓𑁆𑀔𑀢𑀺𑀡𑀧𑀡𑁆𑀡𑀓𑀝𑁆𑀞𑀸𑀦𑀺 𑀆𑀮𑀺𑀫𑁆𑀧𑁂𑀢𑀺. 𑀢𑀢𑁆𑀣𑁂𑀓𑁄 𑀓𑀡𑁆𑀳𑀲𑀧𑁆𑀧𑁄 𑀟𑀸𑀳𑀪𑀬𑁂𑀦 𑀭𑀼𑀓𑁆𑀔𑀲𑀼𑀲𑀺𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀁 𑀟𑀁𑀲𑀺. 𑀲𑁄 𑀯𑀺𑀲𑀯𑁂𑀕𑁂𑀦 𑀫𑀼𑀘𑁆𑀙𑀺𑀢𑁄 𑀢𑀢𑁆𑀣𑁂𑀯 𑀧𑀭𑀺𑀧𑀢𑀺𑀢𑁆𑀯𑀸 𑀓𑀸𑀮𑀓𑀢𑁄, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑀁 𑀫𑀢𑀁 𑀤𑀺𑀲𑁆𑀯𑀸 𑀓𑀫𑁆𑀫𑀦𑁆𑀢𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑀁 𑀏𑀓𑀁 𑀧𑀼𑀭𑀺𑀲𑀁 𑀏𑀯𑀫𑀸𑀳 𑁋 ‘‘𑀲𑀫𑁆𑀫, 𑀫𑀫 𑀖𑀭𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀏𑀯𑀁 𑀯𑀤𑁂𑀳𑀺 ‘𑀦𑁆𑀳𑀸𑀬𑀺𑀢𑁆𑀯𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀏𑀓𑀲𑁆𑀲 𑀪𑀢𑁆𑀢𑀁 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 𑀢𑀼𑀭𑀺𑀢𑀁 𑀆𑀕𑀘𑁆𑀙𑀢𑀽’𑀢𑀺’’. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀣𑀸 𑀆𑀭𑁄𑀘𑁂𑀲𑀺, 𑀕𑁂𑀳𑀚𑀦𑁄𑀧𑀺 𑀢𑀣𑀸 𑀅𑀓𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀦𑁆𑀳𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀧𑀼𑀢𑁆𑀢𑀲𑁆𑀲 𑀲𑀭𑀻𑀭𑀁 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀤𑀸𑀭𑀼𑀓𑁆𑀔𑀦𑁆𑀥𑀁 𑀟𑀳𑀦𑁆𑀢𑁄 𑀯𑀺𑀬 𑀦𑀺𑀲𑁆𑀲𑁄𑀓𑁄 𑀦𑀺𑀲𑁆𑀲𑀦𑁆𑀢𑀸𑀧𑁄 𑀅𑀦𑀺𑀘𑁆𑀘𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀅𑀝𑁆𑀞𑀸𑀲𑀺.

𑀅𑀣 ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀘 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀁 𑀓𑀢𑀧𑀼𑀜𑁆𑀜𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀢𑀭𑀁 𑀜𑀸𑀢𑀓𑁂 𑀘 𑀅𑀦𑀼𑀓𑀫𑁆𑀧𑀫𑀸𑀦𑁄 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 ¶ 𑀜𑀸𑀢𑀓𑁂 𑀅𑀲𑁄𑀘𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄, 𑀫𑀺𑀕𑀁 𑀛𑀸𑀧𑁂𑀣, 𑀅𑀫𑁆𑀳𑀸𑀓𑀁 𑀫𑀁𑀲𑀁 𑀤𑁂𑀣, 𑀙𑀸𑀢𑁄𑀫𑁆𑀳𑀻’’𑀢𑀺 𑀆𑀳. ‘‘𑀦 𑀫𑀺𑀕𑁄, 𑀫𑀦𑀼𑀲𑁆𑀲𑁄 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀆𑀳. ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀧𑀘𑁆𑀘𑀢𑁆𑀣𑀺𑀓𑁄 𑀏𑀲𑁄’’𑀢𑀺? ‘‘𑀦 𑀧𑀘𑁆𑀘𑀢𑁆𑀣𑀺𑀓𑁄, 𑀉𑀭𑁂 𑀚𑀸𑀢𑁄 𑀑𑀭𑀲𑁄 𑀫𑀳𑀸𑀕𑀼𑀡𑀯𑀦𑁆𑀢𑁄 𑀢𑀭𑀼𑀡𑀧𑀼𑀢𑁆𑀢𑁄’’𑀢𑀺 𑀆𑀳. ‘‘𑀓𑀺𑀫𑀢𑁆𑀣𑀁 𑀢𑀼𑀫𑁆𑀳𑁂 𑀢𑀣𑀸𑀭𑀽𑀧𑁂 𑀕𑀼𑀡𑀯𑀢𑀺 𑀢𑀭𑀼𑀡𑀧𑀼𑀢𑁆𑀢𑁂 𑀫𑀢𑁂 𑀦 𑀲𑁄𑀘𑀣𑀸’’𑀢𑀺? 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀅𑀲𑁄𑀘𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑁋

‘‘𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀁 𑀢𑀦𑀼𑀁;

𑀏𑀯𑀁 𑀲𑀭𑀻𑀭𑁂 𑀦𑀺𑀩𑁆𑀪𑁄𑀕𑁂, 𑀧𑁂𑀢𑁂 𑀓𑀸𑀮𑀓𑀢𑁂 𑀲𑀢𑀺.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋

𑁮𑁫-𑁮𑁬. 𑀢𑀢𑁆𑀣 ¶ 𑀉𑀭𑀕𑁄𑀢𑀺 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄. 𑀲𑀧𑁆𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀘𑀁 𑀚𑀺𑀡𑁆𑀡𑀦𑁆𑀢𑀺 𑀚𑀚𑁆𑀚𑀭𑀪𑀸𑀯𑁂𑀦 𑀚𑀺𑀡𑁆𑀡𑀁 𑀧𑀼𑀭𑀸𑀡𑀁 𑀅𑀢𑁆𑀢𑀦𑁄 𑀢𑀘𑀁 𑀦𑀺𑀫𑁆𑀫𑁄𑀓𑀁. 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀁 𑀢𑀦𑀼𑀦𑁆𑀢𑀺 𑀬𑀣𑀸 𑀉𑀭𑀕𑁄 𑀅𑀢𑁆𑀢𑀦𑁄 𑀚𑀺𑀡𑁆𑀡𑀢𑀘𑀁 𑀭𑀼𑀓𑁆𑀔𑀦𑁆𑀢𑀭𑁂 𑀯𑀸 𑀓𑀝𑁆𑀞𑀦𑁆𑀢𑀭𑁂 𑀯𑀸 𑀫𑀽𑀮𑀦𑁆𑀢𑀭𑁂 𑀯𑀸 𑀧𑀸𑀲𑀸𑀡𑀦𑁆𑀢𑀭𑁂 𑀯𑀸 𑀓𑀜𑁆𑀘𑀼𑀓𑀁 𑀑𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀲𑀭𑀻𑀭𑀢𑁄 𑀑𑀫𑀼𑀜𑁆𑀘𑀺𑀢𑁆𑀯𑀸 𑀧𑀳𑀸𑀬 𑀙𑀟𑁆𑀟𑁂𑀢𑁆𑀯𑀸 𑀬𑀣𑀸𑀓𑀸𑀫𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑁄 𑀲𑀢𑁆𑀢𑁄 𑀧𑁄𑀭𑀸𑀡𑀲𑁆𑀲 𑀓𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀚𑀚𑁆𑀚𑀭𑀻𑀪𑀽𑀢𑀁 𑀲𑀁 𑀢𑀦𑀼𑀁 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀬𑀣𑀸𑀓𑀫𑁆𑀫𑀁 𑀕𑀘𑁆𑀙𑀢𑀺, 𑀧𑀼𑀦𑀩𑁆𑀪𑀯𑀯𑀲𑁂𑀦 𑀉𑀧𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀟𑀬𑁆𑀳𑀫𑀸𑀦𑀁 𑀧𑀼𑀢𑁆𑀢𑀲𑁆𑀲 𑀲𑀭𑀻𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀲𑀭𑀻𑀭𑁂 𑀦𑀺𑀩𑁆𑀪𑁄𑀕𑁂𑀢𑀺 𑀅𑀲𑁆𑀲 𑀯𑀺𑀬 𑀅𑀜𑁆𑀜𑁂𑀲𑀫𑁆𑀧𑀺 𑀓𑀸𑀬𑁂 𑀏𑀯𑀁 𑀪𑁄𑀕𑀯𑀺𑀭𑀳𑀺𑀢𑁂 𑀦𑀺𑀭𑀢𑁆𑀣𑀓𑁂 𑀚𑀸𑀢𑁂. 𑀧𑁂𑀢𑁂𑀢𑀺 𑀆𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀢𑁄 𑀅𑀧𑀕𑀢𑁂. 𑀓𑀸𑀮𑀓𑀢𑁂 𑀲𑀢𑀻𑀢𑀺 𑀫𑀢𑁂 𑀚𑀸𑀢𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀟𑀬𑁆𑀳𑀫𑀸𑀦𑁄 𑀓𑀸𑀬𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑀢𑁆𑀢𑀸 𑀟𑀸𑀳𑀤𑀼𑀓𑁆𑀔𑀁 𑀯𑀺𑀬 𑀜𑀸𑀢𑀻𑀦𑀁 𑀭𑀼𑀤𑀺𑀢𑀁 𑀧𑀭𑀺𑀤𑁂𑀯𑀺𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀏𑀢𑀁 𑀫𑀫 𑀧𑀼𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀦 𑀭𑁄𑀤𑀸𑀫𑀺. 𑀕𑀢𑁄 𑀲𑁄 ¶ 𑀢𑀲𑁆𑀲 𑀬𑀸 𑀕𑀢𑀻𑀢𑀺 𑀬𑀤𑀺 𑀫𑀢𑀲𑀢𑁆𑀢𑀸 𑀦 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀫𑀢𑀲𑁆𑀲 𑀧𑀦 𑀓𑀢𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀬𑀸 𑀕𑀢𑀺 𑀧𑀸𑀝𑀺𑀓𑀗𑁆𑀔𑀸, 𑀢𑀁 ¶ 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀯 𑀕𑀢𑁄, 𑀲𑁄 𑀦 𑀧𑀼𑀭𑀺𑀫𑀜𑀸𑀢𑀻𑀦𑀁 𑀭𑀼𑀤𑀺𑀢𑀁 𑀧𑀭𑀺𑀤𑁂𑀯𑀺𑀢𑀁 𑀯𑀸 𑀧𑀘𑁆𑀘𑀸𑀲𑀻𑀲𑀢𑀺, 𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀧𑀼𑀭𑀺𑀫𑀜𑀸𑀢𑀻𑀦𑀁 𑀭𑀼𑀤𑀺𑀢𑁂𑀦 𑀓𑀸𑀘𑀺 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀦 𑀅𑀢𑁆𑀢𑀦𑁄 𑀅𑀲𑁄𑀘𑀦𑀓𑀸𑀭𑀡𑁂 𑀓𑀣𑀺𑀢𑁂 𑀧𑀭𑀺𑀬𑀸𑀬𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑁂 𑀧𑀓𑀸𑀲𑀺𑀢𑁂 𑀩𑁆𑀭𑀸𑀳𑁆𑀫𑀡𑀭𑀽𑀧𑁄 𑀲𑀓𑁆𑀓𑁄 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀫𑀢𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀣𑀜𑁆𑀜𑀁 𑀧𑀸𑀬𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀲𑀡𑁆𑀞𑀧𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑁄 𑀧𑀼𑀢𑁆𑀢𑁄 𑀫𑁂, 𑀲𑀸𑀫𑀻’’𑀢𑀺. ‘‘𑀬𑀤𑀺 𑀏𑀯𑀁 𑀧𑀺𑀢𑀸 𑀢𑀸𑀯 𑀧𑀼𑀭𑀺𑀲𑀪𑀸𑀯𑁂𑀦 𑀫𑀸 𑀭𑁄𑀤𑀢𑀼, 𑀫𑀸𑀢𑀼 𑀦𑀸𑀫 𑀳𑀤𑀬𑀁 𑀫𑀼𑀤𑀼𑀓𑀁, 𑀢𑁆𑀯𑀁 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀢𑀁 𑀲𑀼𑀢𑁆𑀯𑀸 𑀲𑀸 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

‘‘𑀅𑀦𑀩𑁆𑀪𑀺𑀢𑁄 ¶ 𑀢𑀢𑁄 𑀆𑀕𑀸, 𑀦𑀸𑀦𑀼𑀜𑁆𑀜𑀸𑀢𑁄 𑀇𑀢𑁄 𑀕𑀢𑁄;

𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀅𑀦𑀩𑁆𑀪𑀺𑀢𑁄𑀢𑀺 𑀅𑀦𑀯𑁆𑀳𑀸𑀢𑁄, ‘‘𑀏𑀳𑀺 𑀫𑀬𑁆𑀳𑀁 𑀧𑀼𑀢𑁆𑀢𑀪𑀸𑀯𑀁 𑀉𑀧𑀕𑀘𑁆𑀙𑀸’’𑀢𑀺 𑀏𑀯𑀁 𑀅𑀧𑀓𑁆𑀓𑁄𑀲𑀺𑀢𑁄. 𑀢𑀢𑁄𑀢𑀺 𑀬𑀢𑁆𑀣 𑀧𑀼𑀩𑁆𑀩𑁂 𑀞𑀺𑀢𑁄, 𑀢𑀢𑁄 𑀧𑀭𑀮𑁄𑀓𑀢𑁄. 𑀆𑀕𑀸𑀢𑀺 𑀆𑀕𑀜𑁆𑀙𑀺. 𑀦𑀸𑀦𑀼𑀜𑁆𑀜𑀸𑀢𑁄𑀢𑀺 𑀅𑀦𑀦𑀼𑀫𑀢𑁄, ‘‘𑀕𑀘𑁆𑀙, 𑀢𑀸𑀢, 𑀧𑀭𑀮𑁄𑀓’’𑀦𑁆𑀢𑀺 𑀏𑀯𑀁 𑀅𑀫𑁆𑀳𑁂𑀳𑀺 𑀅𑀯𑀺𑀲𑁆𑀲𑀝𑁆𑀞𑁄. 𑀇𑀢𑁄𑀢𑀺 𑀇𑀥𑀮𑁄𑀓𑀢𑁄. 𑀕𑀢𑁄𑀢𑀺 𑀅𑀧𑀕𑀢𑁄. 𑀬𑀣𑀸𑀕𑀢𑁄𑀢𑀺 𑀬𑁂𑀦𑀸𑀓𑀸𑀭𑁂𑀦 𑀆𑀕𑀢𑁄, 𑀅𑀫𑁆𑀳𑁂𑀳𑀺 𑀅𑀦𑀩𑁆𑀪𑀺𑀢𑁄 𑀏𑀯 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀕𑀢𑁄𑀢𑀺 𑀢𑁂𑀦𑁂𑀯𑀸𑀓𑀸𑀭𑁂𑀦 𑀕𑀢𑁄. 𑀬𑀣𑀸 𑀲𑀓𑁂𑀦𑁂𑀯 𑀓𑀫𑁆𑀫𑀼𑀦𑀸 𑀆𑀕𑀢𑁄, 𑀢𑀣𑀸 𑀲𑀓𑁂𑀦𑁂𑀯 𑀓𑀫𑁆𑀫𑀼𑀦𑀸 𑀕𑀢𑁄𑀢𑀺. 𑀏𑀢𑁂𑀦 𑀓𑀫𑁆𑀫𑀲𑁆𑀲𑀓𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸𑀢𑀺 𑀏𑀯𑀁 𑀅𑀯𑀲𑀯𑀢𑁆𑀢𑀺𑀓𑁂 𑀲𑀁𑀲𑀸𑀭𑀧𑀯𑀢𑁆𑀢𑁂 𑀫𑀭𑀡𑀁 𑀧𑀝𑀺𑀘𑁆𑀘 𑀓𑀸 𑀦𑀸𑀫 𑀧𑀭𑀺𑀤𑁂𑀯𑀦𑀸, 𑀅𑀬𑀼𑀢𑁆𑀢𑀸 𑀲𑀸 𑀧𑀜𑁆𑀜𑀯𑀢𑀸 𑀅𑀓𑀭𑀡𑀻𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀪𑀕𑀺𑀦𑀺𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀪𑀸𑀢𑀸 𑀫𑁂, 𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀪𑀕𑀺𑀦𑀺𑀬𑁄 𑀦𑀸𑀫 𑀪𑀸𑀢𑀽𑀲𑀼 𑀲𑀺𑀦𑁂𑀳𑀸, 𑀢𑁆𑀯𑀁 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀲𑀸𑀧𑀺 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

‘‘𑀲𑀘𑁂 ¶ ¶ 𑀭𑁄𑀤𑁂 𑀓𑀺𑀲𑁆𑀲 𑀅𑀲𑁆𑀲𑀁, 𑀢𑀢𑁆𑀣 𑀫𑁂 𑀓𑀺𑀁 𑀨𑀮𑀁 𑀲𑀺𑀬𑀸;

𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁, 𑀪𑀺𑀬𑁆𑀬𑁄 𑀦𑁄 𑀅𑀭𑀢𑀻 𑀲𑀺𑀬𑀸.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀲𑀘𑁂 𑀭𑁄𑀤𑁂 𑀓𑀺𑀲𑀸 𑀅𑀲𑁆𑀲𑀦𑁆𑀢𑀺 𑀬𑀤𑀺 𑀅𑀳𑀁 𑀭𑁄𑀤𑁂𑀬𑁆𑀬𑀁, 𑀓𑀺𑀲𑀸 𑀧𑀭𑀺𑀲𑀼𑀓𑁆𑀔𑀲𑀭𑀻𑀭𑀸 𑀪𑀯𑁂𑀬𑁆𑀬𑀁. 𑀢𑀢𑁆𑀣 𑀫𑁂 𑀓𑀺𑀁 𑀨𑀮𑀁 𑀲𑀺𑀬𑀸𑀢𑀺 𑀢𑀲𑁆𑀫𑀺𑀁 𑀫𑀬𑁆𑀳𑀁 𑀪𑀸𑀢𑀼 𑀫𑀭𑀡𑀦𑀺𑀫𑀺𑀢𑁆𑀢𑁂 𑀭𑁄𑀤𑀦𑁂 𑀓𑀺𑀁 𑀦𑀸𑀫 𑀨𑀮𑀁, 𑀓𑁄 𑀆𑀦𑀺𑀲𑀁𑀲𑁄 𑀪𑀯𑁂𑀬𑁆𑀬? 𑀦 𑀢𑁂𑀦 𑀫𑀬𑁆𑀳𑀁 𑀪𑀸𑀢𑀺𑀓𑁄 ¶ 𑀆𑀕𑀘𑁆𑀙𑁂𑀬𑁆𑀬, 𑀦𑀸𑀧𑀺 𑀲𑁄 𑀢𑁂𑀦 𑀲𑀼𑀕𑀢𑀺𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁, 𑀪𑀺𑀬𑁆𑀬𑁄 𑀦𑁄 𑀅𑀭𑀢𑀻 𑀲𑀺𑀬𑀸𑀢𑀺 𑀅𑀫𑁆𑀳𑀸𑀓𑀁 𑀜𑀸𑀢𑀻𑀦𑀁 𑀫𑀺𑀢𑁆𑀢𑀸𑀦𑀁 𑀲𑀼𑀳𑀤𑀬𑀸𑀦𑀜𑁆𑀘 𑀫𑀫 𑀲𑁄𑀘𑀦𑁂𑀦 𑀪𑀸𑀢𑀼𑀫𑀭𑀡𑀤𑀼𑀓𑁆𑀔𑀢𑁄 𑀪𑀺𑀬𑁆𑀬𑁄𑀧𑀺 𑀅𑀭𑀢𑀺 𑀤𑀼𑀓𑁆𑀔𑀫𑁂𑀯 𑀲𑀺𑀬𑀸𑀢𑀺.

𑀏𑀯𑀁 𑀪𑀕𑀺𑀦𑀺𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀁 𑀧𑀼𑀘𑁆𑀙𑀺 𑁋 ‘‘𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀪𑀢𑁆𑀢𑀸 𑀫𑁂, 𑀲𑀸𑀫𑀻’’𑀢𑀺. ‘‘𑀪𑀤𑁆𑀤𑁂, 𑀇𑀢𑁆𑀣𑀺𑀬𑁄 𑀦𑀸𑀫 𑀪𑀢𑁆𑀢𑀭𑀺 𑀲𑀺𑀦𑁂𑀳𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀜𑁆𑀘 𑀫𑀢𑁂 𑀯𑀺𑀥𑀯𑀸 𑀅𑀦𑀸𑀣𑀸 𑀳𑁄𑀦𑁆𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀦 𑀭𑁄𑀤𑀲𑀻’’𑀢𑀺? 𑀲𑀸𑀧𑀺 𑀅𑀢𑁆𑀢𑀦𑁄 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

‘‘𑀬𑀣𑀸𑀧𑀺 𑀤𑀸𑀭𑀓𑁄 𑀘𑀦𑁆𑀤𑀁, 𑀕𑀘𑁆𑀙𑀦𑁆𑀢𑀫𑀦𑀼𑀭𑁄𑀤𑀢𑀺;

𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑀢𑀢𑁆𑀣 𑀤𑀸𑀭𑀓𑁄𑀢𑀺 𑀩𑀸𑀮𑀤𑀸𑀭𑀓𑁄. 𑀘𑀦𑁆𑀤𑀦𑁆𑀢𑀺 𑀘𑀦𑁆𑀤𑀫𑀡𑁆𑀟𑀮𑀁. 𑀕𑀘𑁆𑀙𑀦𑁆𑀢𑀦𑁆𑀢𑀺 𑀦𑀪𑀁 𑀅𑀩𑁆𑀪𑀼𑀲𑁆𑀲𑀼𑀓𑁆𑀓𑀫𑀸𑀦𑀁. 𑀅𑀦𑀼𑀭𑁄𑀤𑀢𑀻𑀢𑀺 ‘‘𑀫𑀬𑁆𑀳𑀁 𑀭𑀣𑀘𑀓𑁆𑀓𑀁 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀅𑀦𑀼𑀭𑁄𑀤𑀢𑀺. 𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀦𑁆𑀢𑀺 𑀬𑁄 𑀧𑁂𑀢𑀁 𑀫𑀢𑀁 𑀅𑀦𑀼𑀲𑁄𑀘𑀢𑀺, 𑀢𑀲𑁆𑀲𑁂𑀢𑀁 𑀅𑀦𑀼𑀲𑁄𑀘𑀦𑀁 𑀏𑀯𑀁𑀲𑀫𑁆𑀧𑀤𑀁 𑀏𑀯𑀭𑀽𑀧𑀁, 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀘𑀦𑁆𑀤𑀲𑁆𑀲 𑀕𑀳𑁂𑀢𑀼𑀓𑀸𑀫𑀢𑀸𑀲𑀤𑀺𑀲𑀁 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀇𑀘𑁆𑀙𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀢𑀲𑁆𑀲 𑀪𑀭𑀺𑀬𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀸𑀲𑀺𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀅𑀬𑁆𑀬𑁄 𑀫𑁂, 𑀲𑀸𑀫𑀻’’𑀢𑀺. ‘‘𑀬𑀤𑀺 𑀏𑀯𑀁 𑀢𑁂𑀦 𑀢𑁆𑀯𑀁 𑀧𑁄𑀣𑁂𑀢𑁆𑀯𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 ¶ 𑀓𑀸𑀭𑀺𑀢𑀸 𑀪𑀯𑀺𑀲𑁆𑀲𑀲𑀺, 𑀢𑀲𑁆𑀫𑀸 ¶ 𑀫𑀜𑁆𑀜𑁂 ‘𑀲𑀼𑀫𑀼𑀢𑁆𑀢𑀸𑀳𑀁 𑀢𑁂𑀦𑀸’𑀢𑀺 𑀦 𑀭𑁄𑀤𑀲𑀻’’𑀢𑀺? ‘‘𑀲𑀸𑀫𑀺, 𑀫𑀸 𑀫𑀁 𑀏𑀯𑀁 𑀅𑀯𑀘, 𑀦 𑀘𑁂𑀢𑀁 𑀅𑀦𑀼𑀘𑁆𑀙𑀯𑀺𑀓𑀁 ¶ , 𑀅𑀢𑀺𑀯𑀺𑀬 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀲𑀫𑁆𑀧𑀦𑁆𑀦𑁄 𑀬𑀼𑀢𑁆𑀢𑀯𑀸𑀤𑀻 𑀫𑀬𑁆𑀳𑀁 𑀅𑀬𑁆𑀬𑀧𑀼𑀢𑁆𑀢𑁄 𑀉𑀭𑁂 𑀲𑀁𑀯𑀟𑁆𑀠𑀧𑀼𑀢𑁆𑀢𑁄 𑀯𑀺𑀬 𑀅𑀳𑁄𑀲𑀻’’𑀢𑀺. 𑀅𑀣 ‘‘𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀲𑀸𑀧𑀺 𑀅𑀢𑁆𑀢𑀦𑁄 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

‘‘𑀬𑀣𑀸𑀧𑀺 𑀩𑁆𑀭𑀳𑁆𑀫𑁂 𑀉𑀤𑀓𑀼𑀫𑁆𑀪𑁄, 𑀪𑀺𑀦𑁆𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑁄;

𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀭𑁄𑀤𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀬𑀣𑀸𑀧𑀺 𑀩𑁆𑀭𑀳𑁆𑀫𑁂 𑀉𑀤𑀓𑀼𑀩𑁆𑀪𑁄, 𑀪𑀺𑀦𑁆𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑁄𑀢𑀺 𑀩𑁆𑀭𑀸𑀳𑁆𑀫𑀡 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑀖𑀝𑁄 𑀫𑀼𑀕𑁆𑀕𑀭𑀧𑁆𑀧𑀳𑀸𑀭𑀸𑀤𑀺𑀦𑀸 𑀪𑀺𑀦𑁆𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑁄 𑀧𑀼𑀦 𑀧𑀸𑀓𑀢𑀺𑀓𑁄 𑀦 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀓𑁆𑀓𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀲𑀫𑁆𑀫𑀤𑁂𑀯 𑀢𑀼𑀫𑁆𑀳𑁂𑀳𑀺 𑀫𑀭𑀡𑀲𑁆𑀲𑀢𑀺 𑀪𑀸𑀯𑀺𑀢𑀸, 𑀇𑀢𑁄 𑀧𑀝𑁆𑀞𑀸𑀬 𑀦 𑀢𑀼𑀫𑁆𑀳𑁂𑀳𑀺 𑀓𑀲𑀺𑀆𑀤𑀺𑀓𑀭𑀡𑀓𑀺𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀢𑁂𑀲𑀁 𑀕𑁂𑀳𑀁 𑀲𑀢𑁆𑀢𑀭𑀢𑀦𑀪𑀭𑀺𑀢𑀁 𑀓𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸 𑀤𑀸𑀦𑀁 𑀤𑁂𑀣, 𑀲𑀻𑀮𑀁 𑀭𑀓𑁆𑀔𑀣, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀅𑀢𑁆𑀢𑀸𑀦𑀜𑁆𑀘 𑀢𑁂𑀲𑀁 𑀦𑀺𑀯𑁂𑀤𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀚𑀸𑀢𑀓𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑁄𑀓𑀲𑀮𑁆𑀮𑀁 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀉𑀧𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀉𑀭𑀕𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀁

𑀤𑁆𑀯𑀸𑀤𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲

𑀧𑀞𑀫𑀲𑁆𑀲 𑀉𑀭𑀕𑀯𑀕𑁆𑀕𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀲𑀁𑀲𑀸𑀭𑀫𑁄𑀘𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑀸 ¶ ¶ ¶ 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀫𑀕𑀥𑀭𑀝𑁆𑀞𑁂 𑀇𑀝𑁆𑀞𑀓𑀯𑀢𑀻𑀦𑀸𑀫𑀓𑁂 𑀕𑀸𑀫𑁂 𑀅𑀜𑁆𑀜𑀢𑀭𑀁 𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀫𑀕𑀥𑀭𑀝𑁆𑀞𑁂 𑀓𑀺𑀭 𑀇𑀝𑁆𑀞𑀓𑀯𑀢𑀻 𑀘 𑀤𑀻𑀖𑀭𑀸𑀚𑀺 𑀘𑀸𑀢𑀺 𑀤𑁆𑀯𑁂 𑀕𑀸𑀫𑀓𑀸 𑀅𑀳𑁂𑀲𑀼𑀁, 𑀢𑀢𑁆𑀣 𑀩𑀳𑀽 𑀲𑀁𑀲𑀸𑀭𑀫𑁄𑀘𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀧𑀝𑀺𑀯𑀲𑀦𑁆𑀢𑀺. 𑀅𑀢𑀻𑀢𑁂 𑀘 𑀓𑀸𑀮𑁂 𑀧𑀜𑁆𑀘𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀫𑀢𑁆𑀣𑀓𑁂 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀢𑀢𑁆𑀣𑁂𑀯 𑀇𑀝𑁆𑀞𑀓𑀯𑀢𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀁𑀲𑀸𑀭𑀫𑁄𑀘𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀩𑀳𑀽 𑀓𑀻𑀝𑀧𑀝𑀗𑁆𑀕𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺.

𑀲𑀸 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀧𑀼𑀦𑀧𑀺 𑀇𑀝𑁆𑀞𑀓𑀯𑀢𑀺𑀬𑀁𑀬𑁂𑀯 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀁𑀲𑀸𑀭𑀫𑁄𑀘𑀓𑀓𑀼𑀮𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀬𑀤𑀸 𑀲𑀢𑁆𑀢𑀝𑁆𑀞𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀅𑀜𑁆𑀜𑀸𑀳𑀺 𑀤𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀭𑀣𑀺𑀓𑀸𑀬 𑀓𑀻𑀴𑀦𑀲𑀫𑀢𑁆𑀣𑀸 𑀅𑀳𑁄𑀲𑀺, 𑀢𑀤𑀸 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑀫𑁂𑀯 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀅𑀭𑀼𑀡𑀯𑀢𑀻𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀤𑁆𑀯𑀸𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀢𑀲𑁆𑀲 𑀕𑀸𑀫𑀲𑁆𑀲 𑀤𑁆𑀯𑀸𑀭𑀲𑀫𑀻𑀧𑁂𑀦 𑀫𑀕𑁆𑀕𑁂𑀦 𑀅𑀢𑀺𑀓𑁆𑀓𑀫𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑀳𑀽 𑀕𑀸𑀫𑀤𑀸𑀭𑀺𑀓𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑀲𑀫𑀻𑀧𑁂 𑀓𑀻𑀴𑀦𑁆𑀢𑀺𑀬𑁄 𑀧𑀲𑀦𑁆𑀦𑀫𑀸𑀦𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀣𑁂𑀭𑀁 𑀅𑀜𑁆𑀜𑁂 𑀘 𑀪𑀺𑀓𑁆𑀔𑀽 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀁𑀲𑀼. 𑀲𑀸 𑀧𑀦𑁂𑀲𑀸 𑀅𑀲𑁆𑀲𑀤𑁆𑀥𑀓𑀼𑀮𑀲𑁆𑀲 𑀥𑀻𑀢𑀸 𑀘𑀺𑀭𑀓𑀸𑀮𑀁 𑀅𑀧𑀭𑀺𑀘𑀺𑀢𑀓𑀼𑀲𑀮𑀢𑀸𑀬 𑀲𑀸𑀥𑀼𑀚𑀦𑀸𑀘𑀸𑀭𑀯𑀺𑀭𑀳𑀺𑀢𑀸 𑀅𑀦𑀸𑀤𑀭𑀸 𑀅𑀮𑀓𑁆𑀔𑀺𑀓𑀸 𑀯𑀺𑀬 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀢𑀲𑁆𑀲𑀸 𑀧𑀼𑀩𑁆𑀩𑀘𑀭𑀺𑀢𑀁 𑀇𑀤𑀸𑀦𑀺 𑀘 𑀲𑀁𑀲𑀸𑀭𑀫𑁄𑀘𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑀁 𑀆𑀬𑀢𑀺𑀜𑁆𑀘 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀢𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀫𑀁 𑀯𑀦𑁆𑀤𑀺𑀲𑁆𑀲𑀢𑀺, 𑀦𑀺𑀭𑀬𑁂 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀫𑀫𑀁𑀬𑁂𑀯 𑀦𑀺𑀲𑁆𑀲𑀸𑀬 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 ¶ 𑀢𑀸 𑀤𑀸𑀭𑀺𑀓𑀸𑀬𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀪𑀺𑀓𑁆𑀔𑀽 𑀯𑀦𑁆𑀤𑀣, 𑀅𑀬𑀁 𑀧𑀦 𑀤𑀸𑀭𑀺𑀓𑀸 𑀅𑀮𑀓𑁆𑀔𑀺𑀓𑀸 𑀯𑀺𑀬 𑀞𑀺𑀢𑀸’’𑀢𑀺. 𑀅𑀣 𑀦𑀁 𑀢𑀸 𑀤𑀸𑀭𑀺𑀓𑀸 𑀳𑀢𑁆𑀣𑁂𑀲𑀼 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀩𑀮𑀓𑁆𑀓𑀸𑀭𑁂𑀦 𑀣𑁂𑀭𑀲𑁆𑀲 𑀧𑀸𑀤𑁂 𑀯𑀦𑁆𑀤𑀸𑀧𑁂𑀲𑀼𑀁.

𑀲𑀸 ¶ 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀬𑀧𑁆𑀧𑀢𑁆𑀢𑀸 𑀤𑀻𑀖𑀭𑀸𑀚𑀺𑀬𑀁 𑀲𑀁𑀲𑀸𑀭𑀫𑁄𑀘𑀓𑀓𑀼𑀮𑁂 𑀅𑀜𑁆𑀜𑀢𑀭𑀲𑁆𑀲 𑀓𑀼𑀫𑀸𑀭𑀲𑁆𑀲 𑀤𑀺𑀦𑁆𑀦𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀳𑀼𑀢𑁆𑀯𑀸 𑀓𑀸𑀮𑀓𑀢𑀸 𑀧𑁂𑀢𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑀸 ¶ 𑀅𑀢𑀺𑀯𑀺𑀬 𑀩𑀻𑀪𑀘𑁆𑀙𑀤𑀲𑁆𑀲𑀦𑀸 𑀯𑀺𑀘𑀭𑀦𑁆𑀢𑀻 𑀭𑀢𑁆𑀢𑀺𑀬𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀣𑁂𑀭𑁄 𑁋

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺. 𑁋

𑀕𑀸𑀣𑀸𑀬 𑀧𑀼𑀘𑁆𑀙𑀺. 𑀢𑀢𑁆𑀣 𑀥𑀫𑀦𑀺𑀲𑀦𑁆𑀣𑀢𑀸𑀢𑀺 𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀢𑀸𑀬 𑀲𑀺𑀭𑀸𑀚𑀸𑀮𑁂𑀳𑀺 𑀧𑀢𑁆𑀣𑀢𑀕𑀢𑁆𑀢𑀸. 𑀉𑀧𑁆𑀨𑀸𑀲𑀼𑀮𑀺𑀓𑁂𑀢𑀺 𑀉𑀕𑁆𑀕𑀢𑀨𑀸𑀲𑀼𑀮𑀺𑀓𑁂. 𑀓𑀺𑀲𑀺𑀓𑁂𑀢𑀺 𑀓𑀺𑀲𑀲𑀭𑀻𑀭𑁂. 𑀧𑀼𑀩𑁆𑀩𑁂𑀧𑀺 ‘‘𑀓𑀺𑀲𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀓𑀺𑀲𑀺𑀓𑁂’’𑀢𑀺 𑀯𑀘𑀦𑀁 𑀅𑀝𑁆𑀞𑀺𑀘𑀫𑁆𑀫𑀦𑁆𑀳𑀸𑀭𑀼𑀫𑀢𑁆𑀢𑀲𑀭𑀻𑀭𑀢𑀸𑀬 𑀅𑀢𑀺𑀯𑀺𑀬 𑀓𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀁 𑀲𑀼𑀢𑁆𑀯𑀸 𑀧𑁂𑀢𑀻 𑀅𑀢𑁆𑀢𑀸𑀦𑀁 𑀧𑀯𑁂𑀤𑁂𑀦𑁆𑀢𑀻 𑁋

‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋 𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀣𑁂𑀭𑁂𑀦 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀓𑀢𑀓𑀫𑁆𑀫𑀁 𑀧𑀼𑀝𑁆𑀞𑀸 ‘‘𑀅𑀤𑀸𑀦𑀲𑀻𑀮𑀸 𑀫𑀘𑁆𑀙𑀭𑀺𑀦𑀻 𑀳𑀼𑀢𑁆𑀯𑀸 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀯𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑀻 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀦𑀼𑀓𑀫𑁆𑀧𑀓𑀸 ¶ ¶ 𑀫𑀬𑁆𑀳𑀁 𑀦𑀸𑀳𑁂𑀲𑀼𑀁 𑀪𑀦𑁆𑀢𑁂, 𑀧𑀺𑀢𑀸 𑀘 𑀫𑀸𑀢𑀸 𑀅𑀣𑀯𑀸𑀧𑀺 𑀜𑀸𑀢𑀓𑀸;

𑀬𑁂 𑀫𑀁 𑀦𑀺𑀬𑁄𑀚𑁂𑀬𑁆𑀬𑀼𑀁 𑀤𑀤𑀸𑀳𑀺 𑀤𑀸𑀦𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁.

‘‘𑀇𑀢𑁄 𑀅𑀳𑀁 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘, 𑀬𑀁 𑀏𑀯𑀭𑀽𑀧𑀸 𑀯𑀺𑀘𑀭𑀸𑀫𑀺 𑀦𑀕𑁆𑀕𑀸;

𑀔𑀼𑀤𑀸𑀬 𑀢𑀡𑁆𑀳𑀸𑀬 𑀘 𑀔𑀚𑁆𑀚𑀫𑀸𑀦𑀸, 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀁.

‘‘𑀯𑀦𑁆𑀤𑀸𑀫𑀺 ¶ 𑀢𑀁 𑀅𑀬𑁆𑀬 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀅𑀦𑀼𑀓𑀫𑁆𑀧 𑀫𑀁 𑀯𑀻𑀭 𑀫𑀳𑀸𑀦𑀼𑀪𑀸𑀯;

𑀤𑀢𑁆𑀯𑀸 𑀘 𑀫𑁂 𑀆𑀤𑀺𑀲 𑀬𑀜𑁆𑀳𑀺 𑀓𑀺𑀜𑁆𑀘𑀺, 𑀫𑁄𑀘𑁂𑀳𑀺 𑀫𑀁 𑀤𑀼𑀕𑁆𑀕𑀢𑀺𑀬𑀸 𑀪𑀤𑀦𑁆𑀢𑁂’’𑀢𑀺.

𑁯𑁮. 𑀢𑀢𑁆𑀣 𑀅𑀦𑀼𑀓𑀫𑁆𑀧𑀓𑀸𑀢𑀺 𑀲𑀫𑁆𑀧𑀭𑀸𑀬𑀺𑀓𑁂𑀦 𑀅𑀢𑁆𑀣𑁂𑀦 𑀅𑀦𑀼𑀕𑁆𑀕𑀡𑁆𑀳𑀓𑀸. 𑀪𑀦𑁆𑀢𑁂𑀢𑀺 𑀣𑁂𑀭𑀁 𑀆𑀮𑀧𑀢𑀺. 𑀬𑁂 𑀫𑀁 𑀦𑀺𑀬𑁄𑀚𑁂𑀬𑁆𑀬𑀼𑀦𑁆𑀢𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀅𑀣 𑀯𑀸 𑀜𑀸𑀢𑀓𑀸 𑀏𑀤𑀺𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀳𑀺 𑀤𑀸𑀦’’𑀦𑁆𑀢𑀺 𑀬𑁂 𑀫𑀁 𑀦𑀺𑀬𑁄𑀚𑁂𑀬𑁆𑀬𑀼𑀁, 𑀢𑀸𑀤𑀺𑀲𑀸 𑀅𑀦𑀼𑀓𑀫𑁆𑀧𑀓𑀸 𑀫𑀬𑁆𑀳𑀁 𑀦𑀸𑀳𑁂𑀲𑀼𑀦𑁆𑀢𑀺 𑀬𑁄𑀚𑀦𑀸.

𑁯𑁯. 𑀇𑀢𑁄 𑀅𑀳𑀁 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘, 𑀬𑀁 𑀏𑀯𑀭𑀽𑀧𑀸 𑀯𑀺𑀘𑀭𑀸𑀫𑀺 𑀦𑀕𑁆𑀕𑀸𑀢𑀺 𑀇𑀤𑀁 𑀲𑀸 𑀧𑁂𑀢𑀻 𑀇𑀢𑁄 𑀢𑀢𑀺𑀬𑀸𑀬 𑀚𑀸𑀢𑀺𑀬𑀸 𑀅𑀢𑁆𑀢𑀦𑁄 𑀧𑁂𑀢𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀇𑀤𑀸𑀦𑀺𑀧𑀺 𑀢𑀣𑀸 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀯𑀺𑀘𑀭𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳. 𑀢𑀢𑁆𑀣 𑀬𑀦𑁆𑀢𑀺 𑀬𑀲𑁆𑀫𑀸, 𑀤𑀸𑀦𑀸𑀤𑀻𑀦𑀁 𑀧𑀼𑀜𑁆𑀜𑀸𑀦𑀁 𑀅𑀓𑀢𑀢𑁆𑀢𑀸 𑀏𑀯𑀭𑀽𑀧𑀸 𑀦𑀕𑁆𑀕𑀸 𑀧𑁂𑀢𑀻 𑀳𑀼𑀢𑁆𑀯𑀸 𑀇𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀲𑀢𑀸𑀦𑀺 𑀧𑀜𑁆𑀘 𑀯𑀺𑀘𑀭𑀸𑀫𑀻𑀢𑀺 𑀬𑁄𑀚𑀦𑀸. 𑀢𑀡𑁆𑀳𑀸𑀬𑀸𑀢𑀺 𑀧𑀺𑀧𑀸𑀲𑀸𑀬. 𑀔𑀚𑁆𑀚𑀫𑀸𑀦𑀸𑀢𑀺 𑀔𑀸𑀤𑀺𑀬𑀫𑀸𑀦𑀸, 𑀩𑀸𑀥𑀺𑀬𑀫𑀸𑀦𑀸𑀢𑀺 𑀅𑀢𑁆𑀣𑁄.

𑁧𑁦𑁦. 𑀯𑀦𑁆𑀤𑀸𑀫𑀺 𑀢𑀁 𑀅𑀬𑁆𑀬 𑀧𑀲𑀦𑁆𑀦𑀘𑀺𑀢𑁆𑀢𑀸𑀢𑀺 𑀅𑀬𑁆𑀬, 𑀢𑀫𑀳𑀁 𑀧𑀲𑀦𑁆𑀦𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀯𑀦𑁆𑀤𑀸𑀫𑀺, 𑀏𑀢𑁆𑀢𑀓𑀫𑁂𑀯 𑀧𑀼𑀜𑁆𑀜𑀁 𑀇𑀤𑀸𑀦𑀺 𑀫𑀬𑀸 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀼𑀓𑀫𑁆𑀧 𑀫𑀦𑁆𑀢𑀺 𑀅𑀦𑀼𑀕𑁆𑀕𑀡𑁆𑀳 ¶ 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀤𑁆𑀤𑀬𑀁 𑀓𑀭𑁄𑀳𑀺. 𑀤𑀢𑁆𑀯𑀸 𑀘 𑀫𑁂 𑀆𑀤𑀺𑀲 𑀬𑀜𑁆𑀳𑀺 𑀓𑀺𑀜𑁆𑀘𑀻𑀢𑀺 𑀓𑀺𑀜𑁆𑀘𑀺𑀤𑁂𑀯 𑀤𑁂𑀬𑁆𑀬𑀥𑀫𑁆𑀫𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀢𑁆𑀯𑀸 𑀢𑀁 𑀤𑀓𑁆𑀔𑀺𑀡𑀁 𑀫𑀬𑁆𑀳𑀁 𑀆𑀤𑀺𑀲, 𑀢𑁂𑀦 𑀫𑁂 𑀇𑀢𑁄 𑀧𑁂𑀢𑀬𑁄𑀦𑀺𑀢𑁄 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀫𑁄𑀘𑁂𑀳𑀺 𑀫𑀁 𑀤𑀼𑀕𑁆𑀕𑀢𑀺𑀬𑀸 𑀪𑀤𑀦𑁆𑀢𑁂’’𑀢𑀺.

𑀏𑀯𑀁 𑀧𑁂𑀢𑀺𑀬𑀸 𑀯𑀼𑀢𑁆𑀢𑁂 𑀬𑀣𑀸 𑀲𑁄 𑀣𑁂𑀭𑁄 𑀧𑀝𑀺𑀧𑀚𑁆𑀚𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀢𑀺𑀲𑁆𑀲𑁄 𑀕𑀸𑀣𑀸 𑀯𑀼𑀢𑁆𑀢𑀸 𑁋

‘‘𑀲𑀸𑀥𑀽𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀲𑀸𑀭𑀺𑀧𑀼𑀢𑁆𑀢𑁄𑀦𑀼𑀓𑀫𑁆𑀧𑀓𑁄;

𑀪𑀺𑀓𑁆𑀔𑀽𑀦𑀁 𑀆𑀮𑁄𑀧𑀁 𑀤𑀢𑁆𑀯𑀸, 𑀧𑀸𑀡𑀺𑀫𑀢𑁆𑀢𑀜𑁆𑀘 𑀘𑁄𑀴𑀓𑀁;

𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀁, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀺.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂 ¶ , 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

‘‘𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀲𑀸𑀭𑀺𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀻’’𑀢𑀺.

𑁧𑁦𑁧-𑁧𑁦𑁩. 𑀢𑀢𑁆𑀣 ¶ 𑀪𑀺𑀓𑁆𑀔𑀽𑀦𑀦𑁆𑀢𑀺 𑀪𑀺𑀓𑁆𑀔𑀼𑀦𑁄, 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. ‘‘𑀆𑀮𑁄𑀧𑀁 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀆𑀮𑁄𑀧𑀦𑁆𑀢𑀺 𑀓𑀩𑀴𑀁, 𑀏𑀓𑀸𑀮𑁄𑀧𑀫𑀢𑁆𑀢𑀁 𑀪𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀡𑀺𑀫𑀢𑁆𑀢𑀜𑁆𑀘 𑀘𑁄𑀴𑀓𑀦𑁆𑀢𑀺 𑀏𑀓𑀳𑀢𑁆𑀣𑀧𑁆𑀧𑀫𑀸𑀡𑀁 𑀘𑁄𑀴𑀔𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀦𑁆𑀢𑀺 𑀏𑀓𑀣𑀸𑀮𑀓𑀧𑀽𑀭𑀡𑀫𑀢𑁆𑀢𑀁 𑀉𑀤𑀓𑀁. 𑀲𑁂𑀲𑀁 𑀔𑀮𑁆𑀮𑀸𑀝𑀺𑀬𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀁 𑀧𑁂𑀢𑀺𑀁 𑀧𑀻𑀡𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀲𑀼𑀤𑁆𑀥𑀙𑀯𑀺𑀯𑀡𑁆𑀡𑀁 𑀤𑀺𑀩𑁆𑀩𑀯𑀢𑁆𑀣𑀸𑀪𑀭𑀡𑀸𑀮𑀗𑁆𑀓𑀸𑀭𑀁 𑀲𑀫𑀦𑁆𑀢𑀢𑁄 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑁂𑀦𑁆𑀢𑀺𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀓𑀫𑁆𑀫𑀨𑀮𑀁 𑀢𑀸𑀬 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 ¶ 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁪. 𑀢𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀫𑀦𑀸𑀧𑁂𑀦, 𑀅𑀪𑀺𑀭𑀽𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦. 𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸𑀧𑀺 𑀤𑀲 𑀤𑀺𑀲𑀸 𑀚𑁄𑀢𑁂𑀦𑁆𑀢𑀻 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑀻. 𑀬𑀣𑀸 𑀓𑀺𑀦𑁆𑀢𑀺 𑀆𑀳 ‘‘𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸’’𑀢𑀺. 𑀉𑀲𑁆𑀲𑀦𑁆𑀦𑀸 𑀧𑀪𑀸 𑀏𑀢𑀸𑀬 𑀥𑀻𑀬𑀢𑀺, 𑀑𑀲𑀥𑀸𑀦𑀁 𑀯𑀸 ¶ 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸𑀢𑀺 𑀓𑀢𑁆𑀯𑀸 ‘‘𑀑𑀲𑀥𑀻’’𑀢𑀺 𑀮𑀤𑁆𑀥𑀦𑀸𑀫𑀸 𑀢𑀸𑀭𑀓𑀸 𑀬𑀣𑀸 𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀓𑀼𑀭𑀼𑀫𑀸𑀦𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀢𑁆𑀯𑀁 𑀲𑀩𑁆𑀩𑀤𑀺𑀲𑀸 𑀑𑀪𑀸𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁫. 𑀓𑁂𑀦𑀸𑀢𑀺 𑀓𑀺𑀁-𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁. 𑀳𑁂𑀢𑀼𑀅𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁, 𑀓𑁂𑀦 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀢𑀯. 𑀏𑀢𑀸𑀤𑀺𑀲𑁄𑀢𑀺 𑀏𑀤𑀺𑀲𑁄, 𑀏𑀢𑀭𑀳𑀺 𑀬𑀣𑀸𑀤𑀺𑀲𑁆𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀻𑀢𑀺 𑀓𑁂𑀦 𑀧𑀼𑀜𑁆𑀜𑀯𑀺𑀲𑁂𑀲𑁂𑀦 𑀇𑀥 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀸𑀦𑀺 𑀢𑀬𑀸 𑀮𑀩𑁆𑀪𑀫𑀸𑀦𑀁 𑀲𑀼𑀘𑀭𑀺𑀢𑀨𑀮𑀁 𑀇𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀪𑁄𑀕𑀸𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀯𑀢𑁆𑀣𑀸𑀪𑀭𑀡𑀸𑀤𑀺𑀯𑀺𑀢𑁆𑀢𑀽𑀧𑀓𑀭𑀡𑀯𑀺𑀲𑁂𑀲𑀸. 𑀬𑁂 𑀓𑁂𑀘𑀻𑀢𑀺 𑀪𑁄𑀕𑁂 𑀅𑀦𑀯𑀲𑁂𑀲𑀢𑁄 𑀩𑁆𑀬𑀸𑀧𑁂𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀢𑀺 ¶ . 𑀅𑀦𑀯𑀲𑁂𑀲𑀩𑁆𑀬𑀸𑀧𑀓𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸’’𑀢𑀺. 𑀫𑀦𑀲𑁄 𑀧𑀺𑀬𑀸𑀢𑀺 𑀫𑀦𑀲𑀸 𑀧𑀺𑀬𑀸𑀬𑀺𑀢𑀩𑁆𑀩𑀸, 𑀫𑀦𑀸𑀧𑀺𑀬𑀸𑀢𑀺 𑀅𑀢𑁆𑀣𑁄.

𑁧𑁦𑁬. 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀁 𑀓𑀭𑁄𑀫𑀺, 𑀜𑀸𑀢𑀼𑀁 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑁆𑀯𑀁. 𑀤𑁂𑀯𑀻𑀢𑀺 𑀤𑀺𑀩𑁆𑀩𑀸𑀦𑀪𑀸𑀯𑀲𑀫𑀗𑁆𑀕𑀺𑀢𑀸𑀬, 𑀤𑁂𑀯𑀺. 𑀢𑁂𑀦𑀸𑀳 ‘‘𑀫𑀳𑀸𑀦𑀼𑀪𑀸𑀯𑁂’’𑀢𑀺. 𑀫𑀦𑀼𑀲𑁆𑀲𑀪𑀽𑀢𑀸𑀢𑀺 𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑀸 𑀫𑀦𑀼𑀲𑁆𑀲𑀪𑀸𑀯𑀁 𑀧𑀢𑁆𑀢𑀸. 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀬𑀫𑁂𑀢𑀸𑀬𑀁 𑀕𑀸𑀣𑀸𑀦𑀁 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀧𑀼𑀦 𑀣𑁂𑀭𑁂𑀦 𑀧𑀼𑀝𑁆𑀞𑀸 𑀧𑁂𑀢𑀻 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀓𑀸𑀭𑀡𑀁 𑀧𑀓𑀸𑀲𑁂𑀦𑁆𑀢𑀻 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀉𑀧𑁆𑀧𑀡𑁆𑀟𑀼𑀓𑀺𑀁 𑀓𑀺𑀲𑀁 𑀙𑀸𑀢𑀁, 𑀦𑀕𑁆𑀕𑀁 𑀲𑀫𑁆𑀧𑀢𑀺𑀢𑀘𑁆𑀙𑀯𑀺𑀁;

𑀫𑀼𑀦𑀺 𑀓𑀸𑀭𑀼𑀡𑀺𑀓𑁄 𑀮𑁄𑀓𑁂, 𑀢𑀁 𑀫𑀁 𑀅𑀤𑁆𑀤𑀓𑁆𑀔𑀺 𑀤𑀼𑀕𑁆𑀕𑀢𑀁.

‘‘𑀪𑀺𑀓𑁆𑀔𑀽𑀦𑀁 𑀆𑀮𑁄𑀧𑀁 𑀤𑀢𑁆𑀯𑀸, 𑀧𑀸𑀡𑀺𑀫𑀢𑁆𑀢𑀜𑁆𑀘 𑀘𑁄𑀴𑀓𑀁;

𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀁, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲𑀺.

‘‘𑀆𑀮𑁄𑀧𑀲𑁆𑀲 𑀨𑀮𑀁 𑀧𑀲𑁆𑀲, 𑀪𑀢𑁆𑀢𑀁 𑀯𑀲𑁆𑀲𑀲𑀢𑀁 𑀤𑀲;

𑀪𑀼𑀜𑁆𑀚𑀸𑀫𑀺 𑀓𑀸𑀫𑀓𑀸𑀫𑀺𑀦𑀻, 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀁.

‘‘𑀧𑀸𑀡𑀺𑀫𑀢𑁆𑀢𑀲𑁆𑀲 ¶ 𑀘𑁄𑀴𑀲𑁆𑀲, 𑀯𑀺𑀧𑀸𑀓𑀁 𑀧𑀲𑁆𑀲 𑀬𑀸𑀤𑀺𑀲𑀁;

𑀬𑀸𑀯𑀢𑀸 𑀦𑀦𑁆𑀤𑀭𑀸𑀚𑀲𑁆𑀲, 𑀯𑀺𑀚𑀺𑀢𑀲𑁆𑀫𑀺𑀁 𑀧𑀝𑀺𑀘𑁆𑀙𑀤𑀸.

‘‘𑀢𑀢𑁄 𑀩𑀳𑀼𑀢𑀭𑀸 𑀪𑀦𑁆𑀢𑁂, 𑀯𑀢𑁆𑀣𑀸𑀦𑀘𑁆𑀙𑀸𑀤𑀦𑀸𑀦𑀺 𑀫𑁂;

𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀻𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘.

‘‘𑀯𑀺𑀧𑀼𑀮𑀸 𑀘 𑀫𑀳𑀕𑁆𑀖𑀸 𑀘, 𑀢𑁂𑀧𑀸𑀓𑀸𑀲𑁂𑀯𑀮𑀫𑁆𑀩𑀭𑁂;

𑀲𑀸𑀳𑀁 𑀢𑀁 𑀧𑀭𑀺𑀤𑀳𑀸𑀫𑀺, 𑀬𑀁 𑀬𑀜𑁆𑀳𑀺 𑀫𑀦𑀲𑁄 𑀧𑀺𑀬𑀁.

‘‘𑀣𑀸𑀮𑀓𑀲𑁆𑀲 ¶ 𑀘 𑀧𑀸𑀦𑀻𑀬𑀁, 𑀯𑀺𑀧𑀸𑀓𑀁 𑀧𑀲𑁆𑀲 𑀬𑀸𑀤𑀺𑀲𑀁;

𑀕𑀫𑁆𑀪𑀻𑀭𑀸 𑀘𑀢𑀼𑀭𑀲𑁆𑀲𑀸 𑀘, 𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀦𑀺𑀫𑁆𑀫𑀺𑀢𑀸.

‘‘𑀲𑁂𑀢𑁄𑀤𑀓𑀸 𑀲𑀼𑀧𑁆𑀧𑀢𑀺𑀢𑁆𑀣𑀸, 𑀲𑀻𑀢𑀸 𑀅𑀧𑁆𑀧𑀝𑀺𑀕𑀦𑁆𑀥𑀺𑀬𑀸;

𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀯𑀸𑀭𑀺𑀓𑀺𑀜𑁆𑀚𑀓𑁆𑀔𑀧𑀽𑀭𑀺𑀢𑀸.

‘‘𑀲𑀸𑀳𑀁 𑀭𑀫𑀸𑀫𑀺 𑀓𑀻𑀴𑀸𑀫𑀺, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺.

𑁧𑁦𑁭. 𑀢𑀢𑁆𑀣 𑀉𑀧𑁆𑀧𑀡𑁆𑀟𑀼𑀓𑀺𑀦𑁆𑀢𑀺 𑀉𑀧𑁆𑀧𑀡𑁆𑀟𑀼𑀓𑀚𑀸𑀢𑀁. 𑀙𑀸𑀢𑀦𑁆𑀢𑀺 𑀩𑀼𑀪𑀼𑀓𑁆𑀔𑀺𑀢𑀁 𑀔𑀼𑀤𑀸𑀬 𑀅𑀪𑀺𑀪𑀽𑀢𑀁. 𑀲𑀫𑁆𑀧𑀢𑀺𑀢𑀘𑁆𑀙𑀯𑀺𑀦𑁆𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀲𑀭𑀻𑀭𑀘𑁆𑀙𑀯𑀺𑀁. 𑀮𑁄𑀓𑁂𑀢𑀺 𑀇𑀤𑀁 ‘‘𑀓𑀸𑀭𑀼𑀡𑀺𑀓𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀭𑀼𑀡𑀸𑀬 𑀯𑀺𑀲𑀬𑀤𑀲𑁆𑀲𑀦𑀁. 𑀢𑀁 𑀫𑀦𑁆𑀢𑀺 𑀢𑀸𑀤𑀺𑀲𑀁 𑀫𑀫𑀁, 𑀯𑀼𑀢𑁆𑀢𑀦𑀬𑁂𑀦 𑀏𑀓𑀦𑁆𑀢𑀢𑁄 𑀓𑀭𑀼𑀡𑀝𑁆𑀞𑀸𑀦𑀺𑀬𑀁 𑀫𑀁. 𑀤𑀼𑀕𑁆𑀕𑀢𑀦𑁆𑀢𑀺 𑀤𑀼𑀕𑁆𑀕𑀢𑀺𑀁 𑀕𑀢𑀁.

𑁧𑁦𑁮-𑁧𑁦𑁯. 𑀪𑀺𑀓𑁆𑀔𑀽𑀦𑀁 𑀆𑀮𑁄𑀧𑀁 𑀤𑀢𑁆𑀯𑀸𑀢𑀺𑀆𑀤𑀺 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀓𑀭𑀼𑀡𑀸𑀬 𑀓𑀢𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 ¶ 𑀪𑀢𑁆𑀢𑀦𑁆𑀢𑀺 𑀑𑀤𑀦𑀁, 𑀤𑀺𑀩𑁆𑀩𑀪𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀲𑀢𑀁 𑀤𑀲𑀸𑀢𑀺 𑀤𑀲 𑀯𑀲𑁆𑀲𑀲𑀢𑀸𑀦𑀺, 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀪𑀼𑀜𑁆𑀚𑀸𑀫𑀺 𑀓𑀸𑀫𑀓𑀸𑀫𑀺𑀦𑀻, 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀜𑁆𑀜𑁂𑀳𑀺𑀧𑀺 𑀓𑀸𑀫𑁂𑀢𑀩𑁆𑀩𑀓𑀸𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀁 𑀪𑀢𑁆𑀢𑀁 𑀪𑀼𑀜𑁆𑀚𑀸𑀫𑀻𑀢𑀺 𑀬𑁄𑀚𑀦𑀸.

𑁧𑁧𑁦. 𑀘𑁄𑀴𑀲𑁆𑀲𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀢𑀩𑁆𑀩𑀺𑀲𑀬𑀁 𑀤𑀸𑀦𑀫𑀬𑀁 𑀧𑀼𑀜𑁆𑀜𑀫𑁂𑀯 𑀤𑀲𑁆𑀲𑁂𑀢𑀺. 𑀯𑀺𑀧𑀸𑀓𑀁 𑀧𑀲𑁆𑀲 𑀬𑀸𑀤𑀺𑀲𑀦𑁆𑀢𑀺 𑀢𑀲𑁆𑀲 𑀘𑁄𑀴𑀤𑀸𑀦𑀲𑁆𑀲 𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀨𑀮𑀁 𑀧𑀲𑁆𑀲, 𑀪𑀦𑁆𑀢𑁂. 𑀢𑀁 𑀧𑀦 𑀬𑀸𑀤𑀺𑀲𑀁 𑀬𑀣𑀸𑀭𑀽𑀧𑀁, 𑀓𑀺𑀦𑁆𑀢𑀺 𑀘𑁂𑀢𑀺 𑀆𑀳 ‘‘𑀬𑀸𑀯𑀢𑀸 𑀦𑀦𑁆𑀤𑀭𑀸𑀚𑀲𑁆𑀲𑀸’’𑀢𑀺𑀆𑀤𑀺.

𑀢𑀢𑁆𑀣 ¶ 𑀓𑁄𑀬𑀁 𑀦𑀦𑁆𑀤𑀭𑀸𑀚𑀸 𑀦𑀸𑀫? 𑀅𑀢𑀻𑀢𑁂 𑀓𑀺𑀭 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀭𑀜𑁆𑀜𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 𑀯𑀺𑀘𑀭𑀦𑁆𑀢𑁄 𑀅𑀭𑀜𑁆𑀜𑀝𑁆𑀞𑀸𑀦𑁂 𑀅𑀜𑁆𑀜𑀢𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀤𑁆𑀤𑀲. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀦𑀼𑀯𑀸𑀢𑁂 𑀅𑀧𑁆𑀧𑀳𑁄𑀦𑁆𑀢𑁂 𑀲𑀁𑀳𑀭𑀺𑀢𑁆𑀯𑀸𑀯 𑀞𑀧𑁂𑀢𑀼𑀁 𑀆𑀭𑀤𑁆𑀥𑁄. 𑀲𑁄 𑀓𑀼𑀝𑀼𑀫𑁆𑀩𑀺𑀓𑁄 𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀬 𑀓𑀺𑀜𑁆𑀘𑀺 𑀅𑀯𑀼𑀢𑁆𑀢𑁂𑀧𑀺 ‘‘𑀘𑀻𑀯𑀭𑀤𑀼𑀲𑁆𑀲𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 ¶ 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀯𑀸𑀢𑀁 𑀆𑀭𑁄𑀧𑁂𑀦𑁆𑀢𑁄 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀸𑀭𑀼𑀧𑀺. 𑀲𑁄 𑀓𑀼𑀝𑀼𑀫𑁆𑀩𑀺𑀓𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑁂 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀢𑀲𑁆𑀫𑀺𑀁 𑀕𑀸𑀫𑁂 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀅𑀳𑁄𑀲𑀺. 𑀲𑁄 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀲𑀸𑀝𑀓𑀁 𑀫𑁂 𑀤𑁂𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀲𑀼𑀥𑁄𑀢𑀯𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. ‘‘𑀅𑀫𑁆𑀫, 𑀣𑀽𑀮𑀁 𑀇𑀤’’𑀦𑁆𑀢𑀺. 𑀅𑀜𑁆𑀜𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀬𑀸𑀤𑀺𑀲𑁂 𑀕𑁂𑀳𑁂 𑀫𑀬𑀁 𑀚𑀸𑀢𑀸, 𑀦𑀢𑁆𑀣𑀺 𑀦𑁄 𑀇𑀢𑁄 𑀲𑀼𑀔𑀼𑀫𑀢𑀭𑀲𑁆𑀲 𑀯𑀢𑁆𑀣𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀼𑀜𑁆𑀜’’𑀦𑁆𑀢𑀺. ‘‘𑀮𑀪𑀦𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀕𑀘𑁆𑀙, 𑀧𑀼𑀢𑁆𑀢, 𑀅𑀳𑀁 𑀅𑀚𑁆𑀚𑁂𑀯 𑀢𑀼𑀬𑁆𑀳𑀁 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀚𑁆𑀚𑀧𑀝𑀺𑀮𑀸𑀪𑀁 ¶ 𑀇𑀘𑁆𑀙𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀅𑀫𑁆𑀫𑀸’’𑀢𑀺 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀕𑀘𑁆𑀙, 𑀢𑀸𑀢𑀸’’𑀢𑀺. 𑀏𑀯𑀁 𑀓𑀺𑀭𑀲𑁆𑀲𑀸 𑀘𑀺𑀢𑁆𑀢𑀁 𑀅𑀳𑁄𑀲𑀺 𑁋 ‘‘𑀓𑀳𑀁 𑀕𑀫𑀺𑀲𑁆𑀲𑀢𑀺, 𑀇𑀥 𑀯𑀸 𑀏𑀢𑁆𑀣 𑀯𑀸 𑀕𑁂𑀳𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀦 𑀧𑀼𑀜𑁆𑀜𑀦𑀺𑀬𑀸𑀫𑁂𑀦 𑀘𑁄𑀤𑀺𑀬𑀫𑀸𑀦𑁄 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑁄 𑀘 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀸𑀮𑀓𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺.

𑀅𑀫𑀘𑁆𑀘𑀸 𑀘 𑀧𑀼𑀭𑁄𑀳𑀺𑀢𑁄 𑀘 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀭𑀜𑁆𑀜𑁄 𑀏𑀓𑀸 𑀥𑀻𑀢𑀸 𑀅𑀢𑁆𑀣𑀺, 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀭𑀸𑀚𑀓𑀁 𑀭𑀚𑁆𑀚𑀁 𑀦 𑀢𑀺𑀝𑁆𑀞𑀢𑀺, 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀫𑀸’’𑀢𑀺. 𑀢𑁂 𑀓𑀼𑀫𑀼𑀤𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀧𑁆𑀧𑀫𑀼𑀔𑀁 𑀧𑀜𑁆𑀘𑀯𑀺𑀥𑀁 𑀭𑀸𑀚𑀓𑀓𑀼𑀥𑀪𑀡𑁆𑀟𑀁 𑀭𑀣𑀲𑁆𑀫𑀺𑀁𑀬𑁂𑀯 𑀞𑀧𑁂𑀢𑁆𑀯𑀸 𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀢𑁄 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀭𑀣𑁄 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀓𑁆𑀔𑁄 𑀅𑀳𑁄𑀲𑀺. ‘‘𑀧𑀭𑀺𑀘𑀬𑁂𑀦 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺 ¶ , 𑀦𑀺𑀯𑀢𑁆𑀢𑁂𑀫𑀸’’𑀢𑀺 𑀓𑁂𑀘𑀺 𑀆𑀳𑀁𑀲𑀼. 𑀧𑀼𑀭𑁄𑀳𑀺𑀢𑁄 ‘‘𑀫𑀸 𑀦𑀺𑀯𑀢𑁆𑀢𑀬𑀺𑀢𑁆𑀣𑀸’’𑀢𑀺 𑀆𑀳. 𑀭𑀣𑁄 𑀓𑀼𑀫𑀸𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀭𑁄𑀳𑀦𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀧𑀼𑀭𑁄𑀳𑀺𑀢𑁄 𑀧𑀸𑀭𑀼𑀧𑀦𑀓𑀡𑁆𑀡𑀁 𑀅𑀧𑀦𑁂𑀢𑁆𑀯𑀸 𑀧𑀸𑀤𑀢𑀮𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀢𑀺𑀝𑁆𑀞𑀢𑀼 𑀅𑀬𑀁 𑀤𑀻𑀧𑁄, 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀏𑀓𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀣, 𑀧𑀼𑀦𑀧𑀺 𑀧𑀕𑁆𑀕𑀡𑁆𑀳𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺.

𑀅𑀣 𑀓𑀼𑀫𑀸𑀭𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀓𑁂𑀦 𑀓𑀫𑁆𑀫𑁂𑀦 𑀆𑀕𑀢𑀢𑁆𑀣, 𑀢𑀸𑀢𑀸’’𑀢𑀺 𑀆𑀳. ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀓𑀳’’𑀦𑁆𑀢𑀺? ‘‘𑀤𑀺𑀯𑀗𑁆𑀕𑀢𑁄, 𑀲𑀸𑀫𑀻’’𑀢𑀺. ‘‘𑀓𑀢𑀺 ¶ 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺? ‘‘𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺. ‘‘𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀦𑀢𑁆𑀣𑀻’’𑀢𑀺? ‘‘𑀥𑀻𑀢𑀸 𑀅𑀢𑁆𑀣𑀺, 𑀤𑁂𑀯, 𑀧𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺 𑀓𑀭𑀺𑀲𑁆𑀲𑀸𑀫𑀺 𑀭𑀚𑁆𑀚’’𑀦𑁆𑀢𑀺. 𑀢𑁂 𑀢𑀸𑀯𑀤𑁂𑀯 𑀅𑀪𑀺𑀲𑁂𑀓𑀫𑀡𑁆𑀟𑀧𑀁 𑀓𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀆𑀦𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼.

𑀅𑀣𑀲𑁆𑀲 𑀓𑀢𑀸𑀪𑀺𑀲𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀯𑀢𑁆𑀣𑀁 𑀉𑀧𑀦𑁂𑀲𑀼𑀁. 𑀲𑁄 ‘‘𑀓𑀺𑀫𑀺𑀤𑀁, 𑀢𑀸𑀢𑀸’’𑀢𑀺 𑀆𑀳. ‘‘𑀦𑀺𑀯𑀸𑀲𑀦𑀯𑀢𑁆𑀣𑀁, 𑀤𑁂𑀯𑀸’’𑀢𑀺. ‘‘𑀦𑀦𑀼, 𑀢𑀸𑀢𑀸, 𑀣𑀽𑀮’’𑀦𑁆𑀢𑀺? ‘‘𑀫𑀦𑀼𑀲𑁆𑀲𑀸𑀦𑀁 ¶ 𑀧𑀭𑀺𑀪𑁄𑀕𑀯𑀢𑁆𑀣𑁂𑀲𑀼 𑀇𑀢𑁄 𑀲𑀼𑀔𑀼𑀫𑀢𑀭𑀁 𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀦𑀺𑀯𑀸𑀲𑁂𑀲𑀻’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀦 𑀫𑀜𑁆𑀜𑁂 𑀧𑀼𑀜𑁆𑀜𑀯𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁯𑁧) 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀆𑀳𑀭𑀣, 𑀮𑀪𑀺𑀲𑁆𑀲𑀸𑀫𑀺 𑀯𑀢𑁆𑀣’’𑀦𑁆𑀢𑀺. 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀆𑀳𑀭𑀺𑀁𑀲𑀼. 𑀲𑁄 𑀉𑀝𑁆𑀞𑀸𑀬 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀤𑀓𑀁 𑀆𑀤𑀸𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀢𑀤𑀸 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀧𑀼𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀸𑀬 𑀧𑀘𑁆𑀙𑀺𑀫𑀸𑀬 𑀉𑀢𑁆𑀢𑀭𑀸𑀬𑀸𑀢𑀺 𑀏𑀯𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀅𑀝𑁆𑀞 𑀅𑀝𑁆𑀞 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀲𑁄𑀴𑀲 𑀲𑁄𑀴𑀲 𑀓𑀢𑁆𑀯𑀸 𑀘𑀢𑀼𑀲𑀝𑁆𑀞𑀺 𑀓𑀫𑁆𑀫𑀭𑀼𑀓𑁆𑀔𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑁄 𑀏𑀓𑀁 𑀤𑀺𑀩𑁆𑀩𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀦𑀦𑁆𑀤𑀭𑀜𑁆𑀜𑁄 𑀯𑀺𑀚𑀺𑀢𑁂 𑀲𑀼𑀢𑁆𑀢𑀓𑀦𑁆𑀢𑀺𑀓𑀸 𑀇𑀢𑁆𑀣𑀺𑀬𑁄 𑀫𑀸 𑀲𑀼𑀢𑁆𑀢𑀁 𑀓𑀦𑁆𑀢𑀺𑀁𑀲𑀽𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀤𑁂𑀯𑀻 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀢𑀧𑀲𑁆𑀲𑀻’’𑀢𑀺 𑀓𑀸𑀭𑀼𑀜𑁆𑀜𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. ‘‘𑀓𑀺𑀫𑀺𑀤𑀁, 𑀤𑁂𑀯𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀅𑀢𑀺𑀫𑀳𑀢𑀻 ¶ 𑀢𑁂, 𑀤𑁂𑀯, 𑀲𑀫𑁆𑀧𑀢𑁆𑀢𑀺. 𑀅𑀢𑀻𑀢𑁂 𑀅𑀤𑁆𑀥𑀦𑀺 𑀓𑀮𑁆𑀬𑀸𑀡𑀁 𑀅𑀓𑀢𑁆𑀣, 𑀇𑀤𑀸𑀦𑀺 𑀅𑀦𑀸𑀕𑀢𑀲𑁆𑀲 𑀅𑀢𑁆𑀣𑀸𑀬 𑀓𑀼𑀲𑀮𑀁 𑀦 𑀓𑀭𑁄𑀣𑀸’’𑀢𑀺 𑀆𑀳. ‘‘𑀓𑀲𑁆𑀲 𑀤𑁂𑀫? 𑀲𑀻𑀮𑀯𑀦𑁆𑀢𑁄 𑀦𑀢𑁆𑀣𑀻’’𑀢𑀺. ‘‘𑀅𑀲𑀼𑀜𑁆𑀜𑁄, 𑀤𑁂𑀯, 𑀚𑀫𑁆𑀩𑀼𑀤𑀻𑀧𑁄 𑀅𑀭𑀳𑀦𑁆𑀢𑁂𑀳𑀺, 𑀢𑀼𑀫𑁆𑀳𑁂 𑀤𑀸𑀦𑀫𑁂𑀯 𑀲𑀚𑁆𑀚𑁂𑀣, 𑀅𑀳𑀁 𑀅𑀭𑀳𑀦𑁆𑀢𑁂 𑀮𑀘𑁆𑀙𑀸𑀫𑀻’’𑀢𑀺 𑀆𑀳. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀫𑀳𑀸𑀭𑀳𑀁 𑀤𑀸𑀦𑀁 𑀲𑀚𑁆𑀚𑀸𑀧𑁂𑀲𑀺. 𑀤𑁂𑀯𑀻 ‘‘𑀲𑀘𑁂 𑀇𑀫𑀺𑀲𑁆𑀲𑀸𑀬 𑀤𑀺𑀲𑀸𑀬 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀇𑀥𑀸𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀦𑀺𑀧𑀦𑁆𑀦𑀫𑀢𑁆𑀢𑀸𑀬 𑀏𑀯 𑀤𑁂𑀯𑀺𑀬𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑀸𑀦𑀁 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀚𑁂𑀝𑁆𑀞𑀓𑁄 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀸𑀢𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀸𑀭𑀺𑀲𑀸 𑀦𑀦𑁆𑀤𑀭𑀸𑀚𑀸 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑁂𑀢𑀺, 𑀅𑀥𑀺𑀯𑀸𑀲𑁂𑀣 𑀢𑀲𑁆𑀲𑀸’’𑀢𑀺. 𑀢𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀸𑀯𑀤𑁂𑀯 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀑𑀢𑀭𑀺𑀁𑀲𑀼. 𑀫𑀦𑀼𑀲𑁆𑀲𑀸 ¶ ‘‘𑀧𑀜𑁆𑀘𑀲𑀢𑀸, 𑀤𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀆𑀕𑀢𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀤𑁆𑀥𑀺𑀁 𑀤𑁂𑀯𑀺𑀬𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁆𑀣 𑀢𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲, 𑀤𑁂𑀯𑀻 𑀲𑀗𑁆𑀖𑀦𑀯𑀓𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀬𑁆𑀬𑀸, 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺, 𑀫𑀬𑀁 𑀧𑀼𑀜𑁆𑀜𑁂𑀦 𑀦 𑀳𑀸𑀬𑀺𑀲𑁆𑀲𑀸𑀫, 𑀅𑀫𑁆𑀳𑀸𑀓𑀁 𑀇𑀥 𑀦𑀺𑀯𑀸𑀲𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀯𑀸𑀲𑀝𑁆𑀞𑀸𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀲𑀸𑀥𑀼𑀓𑀻𑀴𑀺𑀢𑀁 𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑀤𑀸𑀭𑀼𑀆𑀤𑀻𑀳𑀺 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀸𑀦𑀫𑁆𑀧𑀺 𑀦𑀸𑀫 𑀫𑀳𑀸𑀦𑀼𑀪𑀸𑀯𑀸𑀦𑀁 𑀫𑀳𑁂𑀲𑀻𑀦𑀁 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀤𑀺𑀲𑀸𑀦’’𑀦𑁆𑀢𑀺 𑀲𑀁𑀯𑁂𑀕𑀚𑀸𑀢𑁄 𑀚𑁂𑀝𑁆𑀞𑀧𑀼𑀢𑁆𑀢𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀤𑁂𑀯𑀻𑀧𑀺 ‘‘𑀭𑀜𑁆𑀜𑁂 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑀺. 𑀤𑁆𑀯𑁂𑀧𑀺 𑀉𑀬𑁆𑀬𑀸𑀦𑁂 𑀯𑀲𑀦𑁆𑀢𑀸 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑁄 𑀓𑀺𑀭 𑀦𑀦𑁆𑀤𑀭𑀸𑀚𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀫𑀳𑀸𑀲𑀸𑀯𑀓𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀳𑁄𑀲𑀻, 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀦𑀸𑀫.

𑀅𑀬𑀁 𑀧𑀦 𑀦𑀦𑁆𑀤𑀭𑀸𑀚𑀸 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀬𑀁 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀧𑀭𑀺𑀤𑀳𑀦𑁆𑀢𑁄 𑀲𑀩𑁆𑀩𑀫𑁂𑀯 𑀅𑀢𑁆𑀢𑀦𑁄 𑀯𑀺𑀚𑀺𑀢𑀁 𑀉𑀢𑁆𑀢𑀭𑀓𑀼𑀭𑀼𑀲𑀤𑀺𑀲𑀁 𑀓𑀭𑁄𑀦𑁆𑀢𑁄 𑀆𑀕𑀢𑀸𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 ¶ 𑀤𑀺𑀩𑁆𑀩𑀤𑀼𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀢𑀬𑀺𑀤𑀁 𑀤𑀺𑀩𑁆𑀩𑀯𑀢𑁆𑀣𑀲𑀫𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀲𑀸 𑀧𑁂𑀢𑀻 𑀆𑀳 ‘‘𑀬𑀸𑀯𑀢𑀸 𑀦𑀦𑁆𑀤𑀭𑀸𑀚𑀲𑁆𑀲, 𑀯𑀺𑀚𑀺𑀢𑀲𑁆𑀫𑀺𑀁 𑀧𑀝𑀺𑀘𑁆𑀙𑀤𑀸’’𑀢𑀺. 𑀢𑀢𑁆𑀣 𑀯𑀺𑀚𑀺𑀢𑀲𑁆𑀫𑀺𑀦𑁆𑀢𑀺 𑀭𑀝𑁆𑀞𑁂. 𑀧𑀝𑀺𑀘𑁆𑀙𑀤𑀸𑀢𑀺 𑀯𑀢𑁆𑀣𑀸𑀦𑀺. 𑀢𑀸𑀦𑀺 𑀳𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺 𑀏𑀢𑁂𑀳𑀻𑀢𑀺 ‘‘𑀧𑀝𑀺𑀘𑁆𑀙𑀤𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁧𑁧𑁧. 𑀇𑀤𑀸𑀦𑀺 𑀲𑀸 𑀧𑁂𑀢𑀻 ‘‘𑀦𑀦𑁆𑀤𑀭𑀸𑀚𑀲𑀫𑀺𑀤𑁆𑀥𑀺𑀢𑁄𑀧𑀺 𑀏𑀢𑀭𑀳𑀺 𑀫𑀬𑁆𑀳𑀁 𑀲𑀫𑀺𑀤𑁆𑀥𑀺 𑀯𑀺𑀧𑀼𑀮𑀢𑀭𑀸’’𑀢𑀺 𑀤𑀲𑁆𑀲𑁂𑀦𑁆𑀢𑀻 ‘‘𑀢𑀢𑁄 𑀩𑀳𑀼𑀢𑀭𑀸, 𑀪𑀦𑁆𑀢𑁂, 𑀯𑀢𑁆𑀣𑀸𑀦𑀘𑁆𑀙𑀸𑀤𑀦𑀸𑀦𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁄𑀢𑀺 𑀦𑀦𑁆𑀤𑀭𑀸𑀚𑀲𑁆𑀲 𑀧𑀭𑀺𑀕𑁆𑀕𑀳𑀪𑀽𑀢𑀯𑀢𑁆𑀣𑀢𑁄𑀧𑀺 𑀩𑀳𑀼𑀢𑀭𑀸𑀦𑀺 𑀫𑀬𑁆𑀳𑀁 𑀯𑀢𑁆𑀣𑀘𑁆𑀙𑀸𑀤𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀸𑀦𑀘𑁆𑀙𑀸𑀤𑀦𑀸𑀦𑀻𑀢𑀺 𑀦𑀺𑀯𑀸𑀲𑀦𑀯𑀢𑁆𑀣𑀸𑀦𑀺 𑀘𑁂𑀯 𑀧𑀸𑀭𑀼𑀧𑀦𑀯𑀢𑁆𑀣𑀸𑀦𑀺 𑀘 ¶ . 𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀻𑀬𑀸𑀦𑀻𑀢𑀺 𑀓𑁄𑀲𑁂𑀬𑁆𑀬𑀸𑀦𑀺 𑀘𑁂𑀯 𑀓𑀫𑁆𑀩𑀮𑀸𑀦𑀺 𑀘. 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀻𑀢𑀺 𑀔𑁄𑀫𑀯𑀢𑁆𑀣𑀸𑀦𑀺 𑀘𑁂𑀯 𑀓𑀧𑁆𑀧𑀸𑀲𑀫𑀬𑀯𑀢𑁆𑀣𑀸𑀦𑀺 𑀘.

𑁧𑁧𑁨. 𑀯𑀺𑀧𑀼𑀮𑀸𑀢𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀯𑀺𑀧𑀼𑀮𑀸. 𑀫𑀳𑀕𑁆𑀖𑀸𑀢𑀺 𑀫𑀳𑀕𑁆𑀖𑀯𑀲𑁂𑀦 𑀫𑀳𑀦𑁆𑀢𑀸 𑀫𑀳𑀸𑀭𑀳𑀸. 𑀆𑀓𑀸𑀲𑁂𑀯𑀮𑀫𑁆𑀩𑀭𑁂𑀢𑀺 𑀆𑀓𑀸𑀲𑁂𑀬𑁂𑀯 𑀑𑀮𑀫𑁆𑀩𑀫𑀸𑀦𑀸 𑀢𑀺𑀝𑁆𑀞𑀦𑁆𑀢𑀺. 𑀬𑀁 𑀬𑀜𑁆𑀳𑀺 𑀫𑀦𑀲𑁄 𑀧𑀺𑀬𑀦𑁆𑀢𑀺 𑀬𑀁 𑀬𑀁 𑀫𑀬𑁆𑀳𑀁 𑀫𑀦𑀲𑁄 𑀧𑀺𑀬𑀁, 𑀢𑀁 𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀤𑀳𑀸𑀫𑀺 𑀧𑀸𑀭𑀼𑀧𑀸𑀫𑀺 𑀘𑀸𑀢𑀺 𑀬𑁄𑀚𑀦𑀸.

𑁧𑁧𑁩. 𑀣𑀸𑀮𑀓𑀲𑁆𑀲 𑀘 𑀧𑀸𑀦𑀻𑀬𑀁, 𑀯𑀺𑀧𑀸𑀓𑀁 𑀧𑀲𑁆𑀲 𑀬𑀸𑀤𑀺𑀲𑀦𑁆𑀢𑀺 𑀣𑀸𑀮𑀓𑀧𑀽𑀭𑀡𑀫𑀢𑁆𑀢𑀁 𑀧𑀸𑀦𑀻𑀬𑀁 𑀤𑀺𑀦𑁆𑀦𑀁 𑀅𑀦𑀼𑀫𑁄𑀤𑀺𑀢𑀁 ¶ , 𑀢𑀲𑁆𑀲 𑀧𑀦 𑀯𑀺𑀧𑀸𑀓𑀁 𑀬𑀸𑀤𑀺𑀲𑀁 𑀬𑀸𑀯 𑀫𑀳𑀦𑁆𑀢𑀁 𑀧𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑀻 ‘‘𑀕𑀫𑁆𑀪𑀻𑀭𑀸 𑀘𑀢𑀼𑀭𑀲𑁆𑀲𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀫𑁆𑀪𑀻𑀭𑀸𑀢𑀺 𑀅𑀕𑀸𑀥𑀸. 𑀘𑀢𑀼𑀭𑀲𑁆𑀲𑀸𑀢𑀺 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑀸. 𑀧𑁄𑀓𑁆𑀔𑀭𑀜𑁆𑀜𑁄𑀢𑀺 𑀧𑁄𑀓𑁆𑀔𑀭𑀡𑀺𑀬𑁄. 𑀲𑀼𑀦𑀺𑀫𑁆𑀫𑀺𑀢𑀸𑀢𑀺 𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑁂𑀯 𑀲𑀼𑀝𑁆𑀞𑀼 𑀦𑀺𑀫𑁆𑀫𑀺𑀢𑀸.

𑁧𑁧𑁪. 𑀲𑁂𑀢𑁄𑀤𑀓𑀸𑀢𑀺 𑀲𑁂𑀢𑀉𑀤𑀓𑀸 𑀲𑁂𑀢𑀯𑀸𑀮𑀼𑀓𑀲𑀫𑁆𑀧𑀭𑀺𑀓𑀺𑀡𑁆𑀡𑀸. 𑀲𑀼𑀧𑁆𑀧𑀢𑀺𑀢𑁆𑀣𑀸𑀢𑀺 𑀲𑀼𑀦𑁆𑀤𑀭𑀢𑀺𑀢𑁆𑀣𑀸. 𑀲𑀻𑀢𑀸𑀢𑀺 𑀲𑀻𑀢𑀮𑁄𑀤𑀓𑀸. 𑀅𑀧𑁆𑀧𑀝𑀺𑀕𑀦𑁆𑀥𑀺𑀬𑀸𑀢𑀺 𑀧𑀝𑀺𑀓𑀽𑀮𑀕𑀦𑁆𑀥𑀭𑀳𑀺𑀢𑀸 𑀲𑀼𑀭𑀪𑀺𑀕𑀦𑁆𑀥𑀸. 𑀯𑀸𑀭𑀺𑀓𑀺𑀜𑁆𑀚𑀓𑁆𑀔𑀧𑀽𑀭𑀺𑀢𑀸𑀢𑀺 𑀓𑀫𑀮𑀓𑀼𑀯𑀮𑀬𑀸𑀤𑀻𑀦𑀁 𑀓𑁂𑀲𑀭𑀲𑀜𑁆𑀙𑀦𑁆𑀦𑁂𑀦 𑀯𑀸𑀭𑀺𑀦𑀸 𑀧𑀭𑀺𑀧𑀼𑀡𑁆𑀡𑀸.

𑁧𑁧𑁫. 𑀲𑀸𑀳𑀦𑁆𑀢𑀺 𑀲𑀸 𑀅𑀳𑀁. 𑀭𑀫𑀸𑀫𑀻𑀢𑀺 𑀭𑀢𑀺𑀁 𑀯𑀺𑀦𑁆𑀤𑀸𑀫𑀺. 𑀓𑀻𑀴𑀸𑀫𑀻𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀘𑀸𑀭𑁂𑀫𑀺. 𑀫𑁄𑀤𑀸𑀫𑀻𑀢𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀼𑀤𑀺𑀢𑀸 𑀳𑁄𑀫𑀺. 𑀅𑀓𑀼𑀢𑁄𑀪𑀬𑀸𑀢𑀺 𑀓𑀼𑀢𑁄𑀘𑀺𑀧𑀺 𑀅𑀲𑀜𑁆𑀚𑀸𑀢𑀪𑀬𑀸, 𑀲𑁂𑀭𑀻 𑀲𑀼𑀔𑀯𑀺𑀳𑀸𑀭𑀺𑀦𑀻 𑀳𑁄𑀫𑀺 ¶ . 𑀪𑀦𑁆𑀢𑁂, 𑀯𑀦𑁆𑀤𑀺𑀢𑀼𑀫𑀸𑀕𑀢𑀸𑀢𑀺, 𑀪𑀦𑁆𑀢𑁂, 𑀇𑀫𑀺𑀲𑁆𑀲𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑀲𑁆𑀲 𑀓𑀸𑀭𑀡𑀪𑀽𑀢𑀁 𑀢𑁆𑀯𑀁 𑀯𑀦𑁆𑀤𑀺𑀢𑀼𑀁 𑀆𑀕𑀢𑀸 𑀉𑀧𑀕𑀢𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯.

𑀏𑀯𑀁 𑀢𑀸𑀬 𑀧𑁂𑀢𑀺𑀬𑀸 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀇𑀝𑁆𑀞𑀓𑀯𑀢𑀺𑀬𑀁 𑀤𑀻𑀖𑀭𑀸𑀚𑀺𑀬𑀦𑁆𑀢𑀺 𑀕𑀸𑀫𑀤𑁆𑀯𑀬𑀯𑀸𑀲𑀺𑀓𑁂𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀇𑀫𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀦𑁆𑀢𑁄 𑀲𑀁𑀯𑁂𑀚𑁂𑀢𑁆𑀯𑀸 𑀲𑀁𑀲𑀸𑀭𑀫𑁄𑀘𑀦𑀧𑀸𑀧𑀓𑀫𑁆𑀫𑀢𑁄 𑀫𑁄𑀘𑁂𑀢𑁆𑀯𑀸 𑀉𑀧𑀸𑀲𑀓𑀪𑀸𑀯𑁂 ¶ 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀸 𑀧𑀯𑀢𑁆𑀢𑀺 𑀪𑀺𑀓𑁆𑀔𑀽𑀲𑀼 𑀧𑀸𑀓𑀝𑀸 𑀚𑀸𑀢𑀸. 𑀢𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀲𑀁𑀲𑀸𑀭𑀫𑁄𑀘𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀇𑀢𑁄 𑀧𑀜𑁆𑀘𑀫𑀸𑀬 𑀚𑀸𑀢𑀺𑀬𑀸 𑀫𑀸𑀢𑀼𑀪𑀽𑀢𑀁 𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀓𑀧𑁆𑀧𑀺𑀦𑁄 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀭𑀦𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀑𑀧𑀸𑀦𑀪𑀽𑀢𑁄 𑀅𑀦𑁆𑀦𑀧𑀸𑀦𑀯𑀢𑁆𑀣𑀲𑀬𑀦𑀸𑀤𑀻𑀦𑀺 𑀤𑁂𑀢𑀺. 𑀤𑁂𑀦𑁆𑀢𑁄 𑀘 𑀆𑀕𑀢𑀸𑀕𑀢𑀸𑀦𑀁 𑀬𑀣𑀸𑀓𑀸𑀮𑀁 𑀬𑀣𑀸𑀭𑀳𑀜𑁆𑀘 𑀧𑀸𑀤𑁄𑀤𑀓𑀧𑀸𑀤𑀩𑁆𑀪𑀜𑁆𑀚𑀦𑀸𑀤𑀺𑀤𑀸𑀦𑀸𑀦𑀼𑀧𑀼𑀩𑁆𑀩𑀓𑀁 ¶ 𑀲𑀩𑁆𑀩𑀸𑀪𑀺𑀤𑁂𑀬𑁆𑀬𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀪𑀺𑀓𑁆𑀔𑀽 𑀅𑀦𑁆𑀦𑀧𑀸𑀦𑀸𑀤𑀺𑀦𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀢𑀺. 𑀲𑁄 𑀤𑁂𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑁄𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑀁 𑀇𑀫𑀁 𑀤𑀸𑀦𑀯𑀺𑀥𑀺𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑀻 𑀲𑀓𑁆𑀓𑀘𑁆𑀘𑀁 𑀅𑀦𑀼𑀧𑀢𑀺𑀝𑁆𑀞𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀏𑀯 𑀢𑀸𑀯 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀁 𑀤𑀸𑀦𑀯𑀺𑀥𑀺𑀁 𑀧𑀘𑁆𑀙𑀺𑀦𑁆𑀤𑀺, 𑀅𑀤𑁆𑀥𑀺𑀓𑀸𑀦𑀁 𑀧𑀦 𑀦𑀺𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑀸𑀦𑀁 𑀕𑁂𑀳𑀧𑀺𑀝𑁆𑀞𑀺𑀢𑁄 𑀙𑀟𑁆𑀟𑀺𑀢𑀁 𑀚𑀭𑀲𑀸𑀮𑀁 𑀤𑀲𑁆𑀲𑁂𑀲𑀺 ‘‘𑀏𑀢𑁆𑀣 𑀯𑀲𑀣𑀸’’𑀢𑀺. 𑀅𑀦𑁆𑀦𑀧𑀸𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀢𑀢𑁆𑀣 𑀅𑀤𑁆𑀥𑀺𑀓𑁂𑀲𑀼 𑀆𑀕𑀢𑁂𑀲𑀼 ‘‘𑀕𑀽𑀣𑀁 𑀔𑀸𑀤𑀣, 𑀫𑀼𑀢𑁆𑀢𑀁 𑀧𑀺𑀯𑀣, 𑀮𑁄𑀳𑀺𑀢𑀁 𑀧𑀺𑀯𑀣 ¶ , 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼 𑀫𑀢𑁆𑀣𑀮𑀼𑀗𑁆𑀕𑀁 𑀔𑀸𑀤𑀣𑀸’’𑀢𑀺 𑀬𑀁 𑀬𑀁 𑀅𑀲𑀼𑀘𑀺 𑀚𑁂𑀕𑀼𑀘𑁆𑀙𑀁, 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀝𑁆𑀞𑀼𑀭𑀁 𑀯𑀤𑀢𑀺.

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀓𑀫𑁆𑀫𑀸𑀦𑀼𑀪𑀸𑀯𑀼𑀓𑁆𑀔𑀺𑀢𑁆𑀢𑀸 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀼𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻 ¶ 𑀧𑀼𑀭𑀺𑀫𑀚𑀸𑀢𑀺𑀲𑀫𑁆𑀩𑀦𑁆𑀥𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑀸 𑀢𑀲𑁆𑀲 𑀯𑀺𑀳𑀸𑀭𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺, 𑀢𑀲𑁆𑀲 𑀯𑀺𑀳𑀸𑀭𑀤𑁆𑀯𑀸𑀭𑀤𑁂𑀯𑀢𑀸𑀬𑁄 𑀯𑀺𑀳𑀸𑀭𑀧𑁆𑀧𑀯𑁂𑀲𑀦𑀁 𑀦𑀺𑀯𑀸𑀭𑁂𑀲𑀼𑀁. 𑀲𑀸 𑀓𑀺𑀭 𑀇𑀢𑁄 𑀧𑀜𑁆𑀘𑀫𑀸𑀬 𑀚𑀸𑀢𑀺𑀬𑀸 𑀣𑁂𑀭𑀲𑁆𑀲 𑀫𑀸𑀢𑀼𑀪𑀽𑀢𑀧𑀼𑀩𑁆𑀩𑀸, 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀅𑀳𑀁 𑀅𑀬𑁆𑀬𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀇𑀢𑁄 𑀧𑀜𑁆𑀘𑀫𑀸𑀬 𑀚𑀸𑀢𑀻𑀬𑀸 𑀫𑀸𑀢𑀸, 𑀤𑁂𑀣 𑀫𑁂 𑀤𑁆𑀯𑀸𑀭𑀧𑁆𑀧𑀯𑁂𑀲𑀦𑀁 𑀣𑁂𑀭𑀁 𑀤𑀝𑁆𑀞𑀼’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀢𑀸 𑀢𑀲𑁆𑀲𑀸 𑀧𑀯𑁂𑀲𑀦𑀁 𑀅𑀦𑀼𑀚𑀸𑀦𑀺𑀁𑀲𑀼. 𑀲𑀸 𑀧𑀯𑀺𑀲𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀼𑀢𑁆𑀯𑀸 𑁋

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺. 𑁋

𑀕𑀸𑀣𑀸𑀬 𑀧𑀼𑀘𑁆𑀙𑀺. 𑀲𑀸 𑀣𑁂𑀭𑁂𑀦 𑀧𑀼𑀝𑁆𑀞𑀸 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀻 𑁋

‘‘𑀅𑀳𑀁 𑀢𑁂 𑀲𑀓𑀺𑀬𑀸 𑀫𑀸𑀢𑀸, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀼;

𑀉𑀧𑀧𑀦𑁆𑀦𑀸 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸.

‘‘𑀙𑀟𑁆𑀟𑀺𑀢𑀁 𑀔𑀺𑀧𑀺𑀢𑀁 𑀔𑁂𑀴𑀁, 𑀲𑀺𑀗𑁆𑀖𑀸𑀡𑀺𑀓𑀁 𑀲𑀺𑀮𑁂𑀲𑀼𑀫𑀁;

𑀯𑀲𑀜𑁆𑀘 𑀟𑀬𑁆𑀳𑀫𑀸𑀦𑀸𑀦𑀁, 𑀯𑀺𑀚𑀸𑀢𑀸𑀦𑀜𑁆𑀘 𑀮𑁄𑀳𑀺𑀢𑀁.

‘‘𑀯𑀡𑀺𑀓𑀸𑀦𑀜𑁆𑀘 ¶ 𑀬𑀁 𑀖𑀸𑀦-𑀲𑀻𑀲𑀘𑁆𑀙𑀺𑀦𑁆𑀦𑀸𑀦 𑀮𑁄𑀳𑀺𑀢𑀁;

𑀔𑀼𑀤𑀸𑀧𑀭𑁂𑀢𑀸 𑀪𑀼𑀜𑁆𑀚𑀸𑀫𑀺, 𑀇𑀘𑁆𑀙𑀺𑀧𑀼𑀭𑀺𑀲𑀦𑀺𑀲𑁆𑀲𑀺𑀢𑀁.

‘‘𑀧𑀼𑀩𑁆𑀩𑀮𑁄𑀳𑀺𑀢𑀁 𑀪𑀓𑁆𑀔𑀸𑀫𑀺, 𑀧𑀲𑀽𑀦𑀁 𑀫𑀸𑀦𑀼𑀲𑀸𑀦 𑀘;

𑀅𑀮𑁂𑀡𑀸 𑀅𑀦𑀕𑀸𑀭𑀸 𑀘, 𑀦𑀻𑀮𑀫𑀜𑁆𑀘𑀧𑀭𑀸𑀬𑀡𑀸.

‘‘𑀤𑁂𑀳𑀺 𑀧𑀼𑀢𑁆𑀢𑀓 𑀫𑁂 𑀤𑀸𑀦𑀁, 𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀸𑀳𑀺 𑀫𑁂;

𑀅𑀧𑁆𑀧𑁂𑀯 𑀦𑀸𑀫 𑀫𑀼𑀘𑁆𑀘𑁂𑀬𑁆𑀬𑀁, 𑀧𑀼𑀩𑁆𑀩𑀮𑁄𑀳𑀺𑀢𑀪𑁄𑀚𑀦𑀸’’𑀢𑀺. 𑁋 𑀧𑀜𑁆𑀘𑀕𑀸𑀣𑀸 𑀅𑀪𑀸𑀲𑀺;

𑁧𑁧𑁭. 𑀢𑀢𑁆𑀣 ¶ 𑀅𑀳𑀁 𑀢𑁂 𑀲𑀓𑀺𑀬𑀸 𑀫𑀸𑀢𑀸𑀢𑀺 𑀅𑀳𑀁 𑀢𑀼𑀬𑁆𑀳𑀁 𑀚𑀦𑀦𑀺𑀪𑀸𑀯𑀢𑁄 𑀲𑀓𑀺𑀬𑀸 𑀫𑀸𑀢𑀸. 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀽𑀢𑀺 𑀫𑀸𑀢𑀸 𑀳𑁄𑀦𑁆𑀢𑀻𑀧𑀺 𑀦 𑀇𑀫𑀺𑀲𑁆𑀲𑀁 𑀚𑀸𑀢𑀺𑀬𑀁, 𑀅𑀣 𑀔𑁄 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀼, 𑀇𑀢𑁄 𑀧𑀜𑁆𑀘𑀫𑀺𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀧𑀦𑁆𑀦𑀸 𑀧𑁂𑀢𑁆𑀢𑀺𑀯𑀺𑀲𑀬𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑁂𑀢𑀮𑁄𑀓𑀁 𑀉𑀧𑀕𑀢𑀸. 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸𑀢𑀺 ¶ 𑀔𑀼𑀤𑀸𑀬 𑀘 𑀧𑀺𑀧𑀸𑀲𑀸𑀬 𑀘 𑀅𑀪𑀺𑀪𑀽𑀢𑀸, 𑀦𑀺𑀭𑀦𑁆𑀢𑀭𑀁 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀳𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀸𑀢𑀺 𑀅𑀢𑁆𑀣𑁄.

𑁧𑁧𑁮-𑁧𑁧𑁯. 𑀙𑀟𑁆𑀟𑀺𑀢𑀦𑁆𑀢𑀺 𑀉𑀘𑁆𑀙𑀺𑀝𑁆𑀞𑀓𑀁, 𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀔𑀺𑀧𑀺𑀢𑀦𑁆𑀢𑀺 𑀔𑀺𑀧𑀺𑀢𑁂𑀦 𑀲𑀤𑁆𑀥𑀺𑀁 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀫𑀮𑀁. 𑀔𑁂𑀴𑀦𑁆𑀢𑀺 𑀦𑀺𑀝𑁆𑀞𑀼𑀪𑀁. 𑀲𑀺𑀗𑁆𑀖𑀸𑀡𑀺𑀓𑀦𑁆𑀢𑀺 𑀫𑀢𑁆𑀣𑀮𑀼𑀗𑁆𑀕𑀢𑁄 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀦𑀸𑀲𑀺𑀓𑀸𑀬 𑀦𑀺𑀓𑁆𑀔𑀦𑁆𑀢𑀫𑀮𑀁. 𑀲𑀺𑀮𑁂𑀲𑀼𑀫𑀦𑁆𑀢𑀺 𑀲𑁂𑀫𑁆𑀳𑀁. 𑀯𑀲𑀜𑁆𑀘 𑀟𑀬𑁆𑀳𑀫𑀸𑀦𑀸𑀦𑀦𑁆𑀢𑀺 𑀘𑀺𑀢𑀓𑀲𑁆𑀫𑀺𑀁 𑀟𑀬𑁆𑀳𑀫𑀸𑀦𑀸𑀦𑀁 𑀓𑀴𑁂𑀯𑀭𑀸𑀦𑀁 𑀯𑀲𑀸𑀢𑁂𑀮𑀜𑁆𑀘. 𑀯𑀺𑀚𑀸𑀢𑀸𑀦𑀜𑁆𑀘 𑀮𑁄𑀳𑀺𑀢𑀦𑁆𑀢𑀺 𑀧𑀲𑀽𑀢𑀸𑀦𑀁 𑀇𑀢𑁆𑀣𑀻𑀦𑀁 𑀮𑁄𑀳𑀺𑀢𑀁, 𑀕𑀩𑁆𑀪𑀫𑀮𑀁 𑀘-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀡𑀺𑀓𑀸𑀦𑀦𑁆𑀢𑀺 𑀲𑀜𑁆𑀚𑀸𑀢𑀯𑀡𑀸𑀦𑀁. 𑀬𑀦𑁆𑀢𑀺 𑀬𑀁 𑀮𑁄𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀖𑀸𑀦𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀦𑁆𑀢𑀺 𑀖𑀸𑀦𑀘𑁆𑀙𑀺𑀦𑁆𑀦𑀸𑀦𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀜𑁆𑀘 𑀬𑀁 𑀮𑁄𑀳𑀺𑀢𑀁, 𑀢𑀁 𑀪𑀼𑀜𑁆𑀚𑀸𑀫𑀻𑀢𑀺 𑀬𑁄𑀚𑀦𑀸. 𑀤𑁂𑀲𑀦𑀸𑀲𑀻𑀲𑀫𑁂𑀢𑀁 ‘‘𑀖𑀸𑀦𑀲𑀻𑀲𑀘𑁆𑀙𑀺𑀦𑁆𑀦𑀸𑀦’’𑀦𑁆𑀢𑀺, 𑀬𑀲𑁆𑀫𑀸 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑀺𑀦𑁆𑀦𑀸𑀦𑀫𑁆𑀧𑀺 𑀮𑁄𑀳𑀺𑀢𑀁 𑀪𑀼𑀜𑁆𑀚𑀸𑀫𑀺𑀬𑁂𑀯. 𑀢𑀣𑀸 ‘‘𑀯𑀡𑀺𑀓𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀢𑁂𑀲𑀫𑁆𑀧𑀺 𑀮𑁄𑀳𑀺𑀢𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀔𑀼𑀤𑀸𑀧𑀭𑁂𑀢𑀸𑀢𑀺 𑀚𑀺𑀖𑀘𑁆𑀙𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸. 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀲𑀭𑀻𑀭𑀦𑀺𑀲𑁆𑀲𑀺𑀢𑀁 𑀬𑀣𑀸𑀯𑀼𑀢𑁆𑀢𑀁 𑀅𑀜𑁆𑀜𑀜𑁆𑀘 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀼𑀧𑀼𑀩𑁆𑀩𑀸𑀤𑀺𑀓𑀁 𑀧𑀭𑀺𑀪𑀼𑀜𑁆𑀚𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁨𑁦-𑁧𑁨𑁧. 𑀧𑀲𑀽𑀦𑀦𑁆𑀢𑀺 𑀅𑀚𑀕𑁄𑀫𑀳𑀺𑀁𑀲𑀸𑀤𑀻𑀦𑀁. 𑀅𑀮𑁂𑀡𑀸𑀢𑀺 𑀅𑀲𑀭𑀡𑀸. 𑀅𑀦𑀕𑀸𑀭𑀸𑀢𑀺 𑀅𑀦𑀸𑀯𑀸𑀲𑀸. 𑀦𑀻𑀮𑀫𑀜𑁆𑀘𑀧𑀭𑀸𑀬𑀡𑀸𑀢𑀺 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀫𑀮𑀫𑀜𑁆𑀘𑀲𑀬𑀦𑀸. 𑀅𑀣 𑀯𑀸 𑀦𑀻𑀮𑀸𑀢𑀺 𑀙𑀸𑀭𑀺𑀓𑀗𑁆𑀕𑀸𑀭𑀩𑀳𑀼𑀮𑀸 𑀲𑀼𑀲𑀸𑀦𑀪𑀽𑀫𑀺 𑀅𑀥𑀺𑀧𑁆𑀧𑁂𑀢𑀸, 𑀢𑀁𑀬𑁂𑀯 𑀫𑀜𑁆𑀘𑀁 𑀯𑀺𑀬 𑀅𑀥𑀺𑀲𑀬𑀦𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀯𑀸𑀤𑀺𑀲𑀸𑀳𑀺 ¶ 𑀫𑁂𑀢𑀺 𑀬𑀣𑀸 𑀤𑀺𑀦𑁆𑀦𑀁 𑀤𑀓𑁆𑀔𑀺𑀡𑀁 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀺, 𑀢𑀣𑀸 𑀉𑀤𑁆𑀤𑀺𑀲 𑀧𑀢𑁆𑀢𑀺𑀤𑀸𑀦𑀁 𑀤𑁂𑀳𑀺. 𑀅𑀧𑁆𑀧𑁂𑀯 𑀦𑀸𑀫 𑀫𑀼𑀘𑁆𑀘𑁂𑀬𑁆𑀬𑀁, 𑀧𑀼𑀩𑁆𑀩𑀮𑁄𑀳𑀺𑀢𑀪𑁄𑀚𑀦𑀸𑀢𑀺 𑀢𑀯 𑀉𑀤𑁆𑀤𑀺𑀲𑀦𑁂𑀦 𑀏𑀢𑀲𑁆𑀫𑀸 𑀧𑀼𑀩𑁆𑀩𑀮𑁄𑀳𑀺𑀢𑀪𑁄𑀚𑀦𑀸 𑀧𑁂𑀢𑀚𑀻𑀯𑀺𑀓𑀸 𑀅𑀧𑀺 𑀦𑀸𑀫 𑀫𑀼𑀘𑁆𑀘𑁂𑀬𑁆𑀬𑀁.

𑀢𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀤𑀼𑀢𑀺𑀬𑀤𑀺𑀯𑀲𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀸𑀤𑀺𑀓𑁂 𑀢𑀬𑁄 𑀣𑁂𑀭𑁂 𑀆𑀫𑀦𑁆𑀢𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑁂 ¶ ¶ 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀣𑁂𑀭𑁂 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺 𑀆𑀕𑀫𑀦𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀜𑁆𑀜𑀸𑀢𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀣𑁂𑀭𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑀓𑀫𑁆𑀫𑀺𑀓𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀡𑀸𑀧𑁂𑀲𑀺 ‘‘𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀯𑀺𑀯𑀺𑀢𑁆𑀢𑁂 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀘𑀢𑀲𑁆𑀲𑁄 𑀓𑀼𑀝𑀺𑀬𑁄 𑀓𑀸𑀭𑁂𑀳𑀻’’𑀢𑀺. 𑀅𑀦𑁆𑀢𑁂𑀧𑀼𑀭𑁂 𑀘 𑀧𑀳𑁄𑀦𑀓𑀯𑀺𑀲𑁂𑀲𑀯𑀲𑁂𑀦 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀘𑀢𑀲𑁆𑀲𑁄 𑀓𑀼𑀝𑀺𑀬𑁄 𑀧𑀝𑀺𑀘𑁆𑀙𑀸𑀧𑁂𑀲𑀺, 𑀲𑀬𑀜𑁆𑀘 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀓𑀸𑀲𑀺. 𑀦𑀺𑀝𑁆𑀞𑀺𑀢𑀸𑀲𑀼 𑀓𑀼𑀝𑀺𑀓𑀸𑀲𑀼 𑀲𑀩𑁆𑀩𑀁 𑀩𑀮𑀺𑀓𑀭𑀡𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀅𑀦𑁆𑀦𑀧𑀸𑀦𑀯𑀢𑁆𑀣𑀸𑀤𑀻𑀦𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀘 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀢𑀁 𑀲𑀩𑁆𑀩𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀅𑀣 𑀣𑁂𑀭𑁄 𑀢𑀁 𑀧𑁂𑀢𑀺𑀁 𑀉𑀤𑁆𑀤𑀺𑀲𑁆𑀲 𑀢𑀁 𑀲𑀩𑁆𑀩𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀲𑀸 𑀧𑁂𑀢𑀻 𑀢𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀸 𑀘 𑀳𑀼𑀢𑁆𑀯𑀸 𑀅𑀧𑀭𑀤𑀺𑀯𑀲𑁂 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀣𑁂𑀭𑁄 𑀧𑀝𑀺𑀧𑀼𑀘𑁆𑀙𑀺, 𑀲𑀸 𑀅𑀢𑁆𑀢𑀦𑁄 𑀧𑁂𑀢𑀽𑀧𑀧𑀢𑁆𑀢𑀺𑀁 𑀧𑀼𑀦 𑀤𑁂𑀯𑀽𑀧𑀧𑀢𑁆𑀢𑀺𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀫𑀸𑀢𑀼𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀧𑀢𑀺𑀲𑁆𑀲𑁄𑀦𑀼𑀓𑀫𑁆𑀧𑀓𑁄;

𑀆𑀫𑀦𑁆𑀢𑀬𑀺 𑀫𑁄𑀕𑁆𑀕𑀮𑁆𑀮𑀸𑀦𑀁, 𑀅𑀦𑀼𑀭𑀼𑀤𑁆𑀥𑀜𑁆𑀘 𑀓𑀧𑁆𑀧𑀺𑀦𑀁.

‘‘𑀘𑀢𑀲𑁆𑀲𑁄 𑀓𑀼𑀝𑀺𑀬𑁄 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀓𑀼𑀝𑀺𑀬𑁄 𑀅𑀦𑁆𑀦𑀧𑀸𑀦𑀜𑁆𑀘, 𑀫𑀸𑀢𑀼 𑀤𑀓𑁆𑀔𑀺𑀡𑀫𑀸𑀤𑀺𑀲𑀻.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀁 𑀧𑀸𑀦𑀻𑀬𑀁 𑀯𑀢𑁆𑀣𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

‘‘𑀢𑀢𑁄 ¶ 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀓𑁄𑀮𑀺𑀓𑀁 𑀉𑀧𑀲𑀗𑁆𑀓𑀫𑀻’’𑀢𑀺.

𑁧𑁨𑁩. 𑀢𑀢𑁆𑀣 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸𑀢𑀺 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀤𑀸𑀲𑀺, 𑀦𑀺𑀬𑁆𑀬𑀸𑀤𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 ¶ 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀅𑀣𑀸𑀬𑀲𑁆𑀫𑀸 ¶ 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑁂𑀢𑀺𑀁 𑁋

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀼𑀘𑁆𑀙𑀺;

𑁧𑁨𑁯-𑁧𑁩𑁩. 𑀅𑀣 𑀲𑀸 ‘‘𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸𑀳𑀁 𑀫𑀸𑀢𑀸’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀢𑁆𑀢𑀸𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀫𑀢𑁆𑀢𑀁 𑀦𑀸𑀫 𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀓𑀼𑀝𑀼𑀫𑁆𑀩𑀺𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀳𑁄𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀓𑁄𑀥𑀦𑀸 𑀯𑀜𑁆𑀛𑀸 𑀘 𑀅𑀳𑁄𑀲𑀺 𑀦𑀸𑀫𑁂𑀦 𑀫𑀢𑁆𑀢𑀸 𑀦𑀸𑀫. 𑀅𑀣 𑀲𑁄 𑀓𑀼𑀝𑀼𑀫𑁆𑀩𑀺𑀓𑁄 𑀓𑀼𑀮𑀯𑀁𑀲𑀽𑀧𑀘𑁆𑀙𑁂𑀤𑀦𑀪𑀬𑁂𑀦 𑀲𑀤𑀺𑀲𑀓𑀼𑀮𑀢𑁄 𑀢𑀺𑀲𑁆𑀲𑀁 𑀦𑀸𑀫 𑀅𑀜𑁆𑀜𑀁 𑀓𑀜𑁆𑀜𑀁 𑀆𑀦𑁂𑀲𑀺. 𑀲𑀸 𑀅𑀳𑁄𑀲𑀺 𑀲𑀤𑁆𑀥𑀸 𑀧𑀲𑀦𑁆𑀦𑀸 ¶ 𑀲𑀸𑀫𑀺𑀦𑁄 𑀘 𑀧𑀺𑀬𑀸 𑀫𑀦𑀸𑀧𑀸, 𑀲𑀸 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀺𑀦𑀻 𑀳𑀼𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀪𑀽𑀢𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀕𑁂𑀳𑀲𑁆𑀲𑀸𑀫𑀺𑀦𑀻 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺, 𑀯𑀜𑁆𑀛𑀸 𑀧𑀦 𑀢𑀁 𑀉𑀲𑀽𑀬𑀢𑀺.

𑀢𑀸 𑀉𑀪𑁄𑀧𑀺 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀅𑀮𑁆𑀮𑀓𑁂𑀲𑀸 𑀅𑀝𑁆𑀞𑀁𑀲𑀼, 𑀓𑀼𑀝𑀼𑀫𑁆𑀩𑀺𑀓𑁄 𑀕𑀼𑀡𑀯𑀲𑁂𑀦 𑀢𑀺𑀲𑁆𑀲𑀸𑀬 𑀆𑀩𑀤𑁆𑀥𑀲𑀺𑀦𑁂𑀳𑁄 𑀫𑀦𑀼𑀜𑁆𑀜𑁂𑀦 𑀳𑀤𑀬𑁂𑀦 𑀢𑀸𑀬 ¶ 𑀲𑀤𑁆𑀥𑀺𑀁 𑀩𑀳𑀼𑀁 𑀲𑀮𑁆𑀮𑀧𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀅𑀲𑀳𑀫𑀸𑀦𑀸 𑀫𑀢𑁆𑀢𑀸 𑀇𑀲𑁆𑀲𑀸𑀧𑀓𑀢𑀸 𑀕𑁂𑀳𑁂 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀁 𑀲𑀗𑁆𑀓𑀸𑀭𑀁 𑀢𑀺𑀲𑁆𑀲𑀸𑀬 𑀫𑀢𑁆𑀣𑀓𑁂 𑀑𑀓𑀺𑀭𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀩𑀮𑁂𑀦 𑀧𑀜𑁆𑀘𑀯𑀺𑀥𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺. 𑀢𑀁 𑀧𑀦 ¶ 𑀤𑀼𑀓𑁆𑀔𑀁 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀸 𑀧𑁂𑀢𑀻 𑀲𑀜𑁆𑀛𑀸𑀬 𑀯𑀻𑀢𑀺𑀯𑀢𑁆𑀢𑀸𑀬 𑀕𑁂𑀳𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀦𑁆𑀳𑀸𑀬𑀦𑁆𑀢𑀺𑀬𑀸 𑀢𑀺𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀢𑀺𑀲𑁆𑀲𑀸 𑁋

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺. 𑁋

𑀕𑀸𑀣𑀸𑀬 𑀧𑀝𑀺𑀧𑀼𑀘𑁆𑀙𑀺. 𑀇𑀢𑀭𑀸 𑁋

‘‘𑀅𑀳𑀁 𑀫𑀢𑁆𑀢𑀸 𑀢𑀼𑀯𑀁 𑀢𑀺𑀲𑁆𑀲𑀸, 𑀲𑀧𑀢𑁆𑀢𑀻 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀢𑀢𑁆𑀣 𑀅𑀳𑀁 𑀫𑀢𑁆𑀢𑀸 𑀢𑀼𑀯𑀁 𑀢𑀺𑀲𑁆𑀲𑀸𑀢𑀺 𑀅𑀳𑀁 𑀫𑀢𑁆𑀢𑀸 𑀦𑀸𑀫, 𑀢𑀼𑀯𑀁 𑀢𑀺𑀲𑁆𑀲𑀸 𑀦𑀸𑀫. 𑀧𑀼𑀭𑁂𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂. 𑀢𑁂𑀢𑀺 𑀢𑀼𑀬𑁆𑀳𑀁 𑀲𑀧𑀢𑁆𑀢𑀻 𑀅𑀳𑀼𑀁, 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀦 𑀢𑀺𑀲𑁆𑀲𑀸 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀧𑀼𑀦 𑀇𑀢𑀭𑀸 𑁋

‘‘𑀘𑀡𑁆𑀟𑀻 𑀘 𑀨𑀭𑀼𑀲𑀸 𑀘𑀸𑀲𑀺𑀁, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑀸;

𑀢𑀸𑀳𑀁 𑀤𑀼𑀭𑀼𑀢𑁆𑀢𑀁 𑀯𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 ¶ 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀢𑀢𑁆𑀣 𑀘𑀡𑁆𑀟𑀻𑀢𑀺 𑀓𑁄𑀥𑀦𑀸. 𑀨𑀭𑀼𑀲𑀸𑀢𑀺 𑀨𑀭𑀼𑀲𑀯𑀘𑀦𑀸. 𑀆𑀲𑀺𑀦𑁆𑀢𑀺 𑀅𑀳𑁄𑀲𑀺𑀁. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀤𑀼𑀭𑀼𑀢𑁆𑀢𑀦𑁆𑀢𑀺 𑀤𑀼𑀩𑁆𑀪𑀸𑀲𑀺𑀢𑀁 𑀦𑀺𑀭𑀢𑁆𑀣𑀓𑀯𑀘𑀦𑀁. 𑀇𑀢𑁄 𑀧𑀭𑀫𑁆𑀧𑀺 𑀢𑀸𑀲𑀁 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦𑁂𑀯 𑀕𑀸𑀣𑀸 𑀧𑀯𑀢𑁆𑀢𑀸 𑁋

‘‘𑀲𑀩𑁆𑀩𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀬𑀣𑀸 𑀢𑁆𑀯𑀁 𑀘𑀡𑁆𑀟𑀺𑀓𑀸 𑀅𑀳𑀼;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀧𑀁𑀲𑀼𑀓𑀼𑀦𑁆𑀣𑀺𑀢𑀸.

‘‘𑀲𑀻𑀲𑀁𑀦𑁆𑀳𑀸𑀢𑀸 ¶ 𑀢𑀼𑀯𑀁 𑀆𑀲𑀺, 𑀲𑀼𑀘𑀺𑀯𑀢𑁆𑀣𑀸 𑀅𑀮𑀗𑁆𑀓𑀢𑀸;

𑀅𑀳𑀜𑁆𑀘 𑀔𑁄 𑀅𑀥𑀺𑀫𑀢𑁆𑀢𑀁, 𑀲𑀫𑀮𑀗𑁆𑀓𑀢𑀢𑀭𑀸 𑀢𑀬𑀸.

‘‘𑀢𑀲𑁆𑀲𑀸 𑀫𑁂 𑀧𑁂𑀓𑁆𑀔𑀫𑀸𑀦𑀸𑀬, 𑀲𑀸𑀫𑀺𑀓𑁂𑀦 𑀲𑀫𑀦𑁆𑀢𑀬𑀺;

𑀢𑀢𑁄 𑀫𑁂 𑀇𑀲𑁆𑀲𑀸 𑀯𑀺𑀧𑀼𑀮𑀸, 𑀓𑁄𑀥𑁄 𑀫𑁂 𑀲𑀫𑀚𑀸𑀬𑀣.

‘‘𑀢𑀢𑁄 ¶ 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸𑀦, 𑀧𑀁𑀲𑀼𑀦𑀸 𑀢𑀜𑁆𑀳𑀺 𑀑𑀓𑀺𑀭𑀺𑀁;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀧𑀁𑀲𑀼𑀓𑀼𑀦𑁆𑀣𑀺𑀢𑀸.

‘‘𑀲𑀩𑁆𑀩𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀧𑀁𑀲𑀼𑀦𑀸 𑀫𑀁 𑀢𑁆𑀯𑀫𑁄𑀓𑀺𑀭𑀺;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦 𑀔𑀚𑁆𑀚𑀲𑀺 𑀓𑀘𑁆𑀙𑀼𑀬𑀸.

‘‘𑀪𑁂𑀲𑀚𑁆𑀚𑀳𑀸𑀭𑀻 𑀉𑀪𑀬𑁄, 𑀯𑀦𑀦𑁆𑀢𑀁 𑀅𑀕𑀫𑀺𑀫𑁆𑀳𑀲𑁂;

𑀢𑁆𑀯𑀜𑁆𑀘 𑀪𑁂𑀲𑀚𑁆𑀚𑀫𑀸𑀳𑀭𑀺, 𑀅𑀳𑀜𑁆𑀘 𑀓𑀧𑀺𑀓𑀘𑁆𑀙𑀼𑀦𑁄.

‘‘𑀢𑀲𑁆𑀲𑀸 𑀢𑁆𑀬𑀸𑀚𑀸𑀦𑀫𑀸𑀦𑀸𑀬, 𑀲𑁂𑀬𑁆𑀬𑀁 𑀢𑁆𑀬𑀸𑀳𑀁 𑀲𑀫𑁄𑀓𑀺𑀭𑀺𑀁;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦 𑀔𑀚𑁆𑀚𑀸𑀫𑀺 𑀓𑀘𑁆𑀙𑀼𑀬𑀸.

‘‘𑀲𑀩𑁆𑀩𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀲𑁂𑀬𑁆𑀬𑀁 𑀫𑁂 𑀢𑁆𑀯𑀁 𑀲𑀫𑁄𑀓𑀺𑀭𑀺;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀦𑀕𑁆𑀕𑀺𑀬𑀸 𑀢𑀼𑀯𑀁.

‘‘𑀲𑀳𑀸𑀬𑀸𑀦𑀁 ¶ 𑀲𑀫𑀬𑁄 𑀆𑀲𑀺, 𑀜𑀸𑀢𑀻𑀦𑀁 𑀲𑀫𑀺𑀢𑀻 𑀅𑀳𑀼;

𑀢𑁆𑀯𑀜𑁆𑀘 𑀆𑀫𑀦𑁆𑀢𑀺𑀢𑀸 𑀆𑀲𑀺, 𑀲𑀲𑀸𑀫𑀺𑀦𑀻 𑀦𑁄 𑀘 𑀔𑁄𑀳𑀁.

‘‘𑀢𑀲𑁆𑀲𑀸 𑀢𑁆𑀬𑀸𑀚𑀸𑀦𑀫𑀸𑀦𑀸𑀬, 𑀤𑀼𑀲𑁆𑀲𑀁 𑀢𑁆𑀬𑀸𑀳𑀁 𑀅𑀧𑀸𑀦𑀼𑀤𑀺𑀁;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀦𑀕𑁆𑀕𑀺𑀬𑀸 𑀅𑀳𑀁.

‘‘𑀲𑀩𑁆𑀩𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀤𑀼𑀲𑁆𑀲𑀁 𑀫𑁂 𑀢𑁆𑀯𑀁 𑀅𑀧𑀸𑀦𑀼𑀤𑀺;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀕𑀽𑀣𑀕𑀦𑁆𑀥𑀺𑀦𑀻.

‘‘𑀢𑀯 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘, 𑀧𑀘𑁆𑀘𑀕𑁆𑀖𑀜𑁆𑀘 𑀯𑀺𑀮𑁂𑀧𑀦𑀁;

𑀕𑀽𑀣𑀓𑀽𑀧𑁂 𑀅𑀢𑀸𑀭𑁂𑀲𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀕𑀽𑀣𑀕𑀦𑁆𑀥𑀺𑀦𑀻.

‘‘𑀲𑀩𑁆𑀩𑀁 ¶ 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀢𑀬𑀸;

𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀺, 𑀓𑁂𑀦𑀸𑀲𑀺 𑀤𑀼𑀕𑁆𑀕𑀢𑀸 𑀢𑀼𑀯𑀁.

‘‘𑀉𑀪𑀺𑀦𑁆𑀦𑀁 𑀲𑀫𑀓𑀁 𑀆𑀲𑀺, 𑀬𑀁 𑀕𑁂𑀳𑁂 𑀯𑀺𑀚𑁆𑀚𑀢𑁂 𑀥𑀦𑀁;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀦𑀫𑁆𑀳𑀺 𑀤𑀼𑀕𑁆𑀕𑀢𑀸 𑀅𑀳𑀁.

‘‘𑀢𑀤𑁂𑀯 𑀫𑀁 𑀢𑁆𑀯𑀁 𑀅𑀯𑀘, 𑀧𑀸𑀧𑀓𑀫𑁆𑀫𑀁 𑀦𑀺𑀲𑁂𑀯𑀲𑀺;

𑀦 𑀳𑀺 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀲𑀼𑀮𑀪𑀸 𑀳𑁄𑀢𑀺 𑀲𑀼𑀕𑁆𑀕𑀢𑀺.

‘‘𑀯𑀸𑀫𑀢𑁄 𑀫𑀁 𑀢𑁆𑀯𑀁 𑀧𑀘𑁆𑀘𑁂𑀲𑀺, 𑀅𑀣𑁄𑀧𑀺 𑀫𑀁 𑀉𑀲𑀽𑀬𑀲𑀺;

𑀧𑀲𑁆𑀲 𑀧𑀸𑀧𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀬𑀸𑀤𑀺𑀲𑁄.

‘‘𑀢𑁂 ¶ 𑀖𑀭𑀸 𑀢𑀸 𑀘 𑀤𑀸𑀲𑀺𑀬𑁄, 𑀢𑀸𑀦𑁂𑀯𑀸𑀪𑀭𑀡𑀸𑀦𑀺𑀫𑁂;

𑀢𑁂 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀦 𑀪𑁄𑀕𑀸 𑀳𑁄𑀦𑁆𑀢𑀺 𑀲𑀲𑁆𑀲𑀢𑀸.

‘‘𑀇𑀤𑀸𑀦𑀺 ¶ 𑀪𑀽𑀢𑀲𑁆𑀲 𑀧𑀺𑀢𑀸, 𑀆𑀧𑀡𑀸 𑀕𑁂𑀳𑀫𑁂𑀳𑀺𑀢𑀺;

𑀅𑀧𑁆𑀧𑁂𑀯 𑀢𑁂 𑀤𑀤𑁂 𑀓𑀺𑀜𑁆𑀘𑀺, 𑀫𑀸 𑀲𑀼 𑀢𑀸𑀯 𑀇𑀢𑁄 𑀅𑀕𑀸.

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀫𑁆𑀳𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀓𑁄𑀧𑀻𑀦𑀫𑁂𑀢𑀁 𑀇𑀢𑁆𑀣𑀻𑀦𑀁, 𑀫𑀸 𑀫𑀁 𑀪𑀽𑀢𑀧𑀺𑀢𑀸𑀤𑁆𑀤𑀲.

‘‘𑀳𑀦𑁆𑀤 𑀓𑀺𑀁 𑀯𑀸 𑀢𑁆𑀬𑀸𑀳𑀁 𑀤𑀫𑁆𑀫𑀺, 𑀓𑀺𑀁 𑀯𑀸 𑀢𑁂𑀘 𑀓𑀭𑁄𑀫𑀳𑀁;

𑀬𑁂𑀦 𑀢𑁆𑀯𑀁 𑀲𑀼𑀔𑀺𑀢𑀸 𑀅𑀲𑁆𑀲, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

‘‘𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄, 𑀘𑀢𑁆𑀢𑀸𑀭𑁄 𑀧𑀦 𑀧𑀼𑀕𑁆𑀕𑀮𑁂;

𑀅𑀝𑁆𑀞 𑀪𑀺𑀓𑁆𑀔𑀽 𑀪𑁄𑀚𑀬𑀺𑀢𑁆𑀯𑀸, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲;

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

‘‘𑀲𑀸𑀥𑀽𑀢𑀺 𑀲𑀸 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀪𑁄𑀚𑀬𑀺𑀢𑁆𑀯𑀸𑀝𑁆𑀞 𑀪𑀺𑀓𑁆𑀔𑀯𑁄;

𑀯𑀢𑁆𑀣𑁂𑀳𑀘𑁆𑀙𑀸𑀤𑀬𑀺𑀢𑁆𑀯𑀸𑀦, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

‘‘𑀢𑀢𑁄 ¶ 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀲𑀧𑀢𑁆𑀢𑀺𑀁 𑀉𑀧𑀲𑀗𑁆𑀓𑀫𑀺.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀻 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻𑀢𑀺.

‘‘𑀅𑀳𑀁 ¶ 𑀫𑀢𑁆𑀢𑀸 𑀢𑀼𑀯𑀁 𑀢𑀺𑀲𑁆𑀲𑀸, 𑀲𑀧𑀢𑁆𑀢𑀻 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀢𑀯 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀘𑀺𑀭𑀁 𑀚𑀻𑀯𑀸𑀳𑀺 𑀪𑀕𑀺𑀦𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀅𑀲𑁄𑀓𑀁 𑀯𑀺𑀭𑀚𑀁 𑀞𑀸𑀦𑀁, 𑀆𑀯𑀸𑀲𑀁 𑀯𑀲𑀯𑀢𑁆𑀢𑀺𑀦𑀁.

‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀤𑀸𑀦𑀁 𑀤𑀢𑁆𑀯𑀸𑀦 𑀲𑁄𑀪𑀦𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦’’𑀦𑁆𑀢𑀺.

𑁧𑁩𑁮. 𑀢𑀢𑁆𑀣 ¶ 𑀲𑀩𑁆𑀩𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀬𑀣𑀸 𑀢𑁆𑀯𑀁 𑀘𑀡𑁆𑀟𑀺𑀓𑀸 𑀅𑀳𑀽𑀢𑀺 ‘‘𑀘𑀡𑁆𑀟𑀻 𑀘 𑀨𑀭𑀼𑀲𑀸 𑀘𑀸𑀲𑀺’’𑀦𑁆𑀢𑀺 𑀬𑀁 𑀢𑀬𑀸 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺, 𑀬𑀣𑀸 𑀢𑁆𑀯𑀁 𑀘𑀡𑁆𑀟𑀺𑀓𑀸 𑀓𑁄𑀥𑀦𑀸 𑀨𑀭𑀼𑀲𑀯𑀘𑀦𑀸 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑀸 𑀘 𑀅𑀳𑁄𑀲𑀺. 𑀅𑀜𑁆𑀜𑀜𑁆𑀘 𑀔𑁄 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀅𑀜𑁆𑀜𑀁 𑀧𑀼𑀦 𑀢𑀁 𑀇𑀤𑀸𑀦𑀺 𑀧𑀼𑀘𑁆𑀙𑀸𑀫𑀺. 𑀓𑁂𑀦𑀸𑀲𑀺 𑀧𑀁𑀲𑀼𑀓𑀼𑀦𑁆𑀣𑀺𑀢𑀸𑀢𑀺 𑀓𑁂𑀦 𑀓𑀫𑁆𑀫𑁂𑀦 𑀲𑀗𑁆𑀓𑀸𑀭𑀧𑀁𑀲𑀽𑀢𑀺 𑀑𑀕𑀼𑀡𑁆𑀞𑀺𑀢𑀸 𑀲𑀩𑁆𑀩𑀲𑁄 𑀑𑀓𑀺𑀡𑁆𑀡𑀲𑀭𑀻𑀭𑀸 𑀅𑀳𑀽𑀢𑀺 𑀅𑀢𑁆𑀣𑁄.

𑁧𑁩𑁯-𑁪𑁦. 𑀲𑀻𑀲𑀁𑀦𑁆𑀳𑀸𑀢𑀸𑀢𑀺 𑀲𑀲𑀻𑀲𑀁 𑀦𑁆𑀳𑀸𑀢𑀸. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀓𑀢𑀭𑀁. 𑀲𑀫𑀮𑀗𑁆𑀓𑀢𑀢𑀭𑀸𑀢𑀺 𑀲𑀫𑁆𑀫𑀸 𑀅𑀢𑀺𑀲𑀬𑁂𑀦 𑀅𑀮𑀗𑁆𑀓𑀢𑀸. ‘‘𑀅𑀥𑀺𑀫𑀢𑁆𑀢𑀸’’𑀢𑀺 𑀯𑀸 𑀧𑀸𑀞𑁄, 𑀅𑀢𑀺𑀯𑀺𑀬 𑀫𑀢𑁆𑀢𑀸 𑀫𑀸𑀦𑀫𑀤𑀫𑀢𑁆𑀢𑀸, 𑀫𑀸𑀦𑀦𑀺𑀲𑁆𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀬𑀸𑀢𑀺 𑀪𑁄𑀢𑀺𑀬𑀸 ¶ . 𑀲𑀸𑀫𑀺𑀓𑁂𑀦 𑀲𑀫𑀦𑁆𑀢𑀬𑀻𑀢𑀺 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀅𑀮𑁆𑀮𑁄𑀧𑀲𑀮𑁆𑀮𑀸𑀧𑀯𑀲𑁂𑀦 𑀓𑀣𑁂𑀲𑀺.

𑁧𑁪𑁨-𑁧𑁪𑁪. 𑀔𑀚𑁆𑀚𑀲𑀺 𑀓𑀘𑁆𑀙𑀼𑀬𑀸𑀢𑀺 𑀓𑀘𑁆𑀙𑀼𑀭𑁄𑀕𑁂𑀦 𑀔𑀸𑀤𑀻𑀬𑀲𑀺, 𑀩𑀸𑀥𑀻𑀬𑀲𑀻𑀢𑀺 𑀅𑀢𑁆𑀣𑁄. 𑀪𑁂𑀲𑀚𑁆𑀚𑀳𑀸𑀭𑀻𑀢𑀺 𑀪𑁂𑀲𑀚𑁆𑀚𑀳𑀸𑀭𑀺𑀦𑀺𑀬𑁄 𑀑𑀲𑀥𑀳𑀸𑀭𑀺𑀓𑀸𑀬𑁄. 𑀉𑀪𑀬𑁄𑀢𑀺 𑀤𑀼𑀯𑁂, 𑀢𑁆𑀯𑀜𑁆𑀘 𑀅𑀳𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀯𑀦𑀦𑁆𑀢𑀦𑁆𑀢𑀺 𑀯𑀦𑀁. 𑀢𑁆𑀯𑀜𑁆𑀘 𑀪𑁂𑀲𑀚𑁆𑀚𑀫𑀸𑀳𑀭𑀻𑀢𑀺 𑀢𑁆𑀯𑀁 𑀯𑁂𑀚𑁆𑀚𑁂𑀳𑀺 𑀯𑀼𑀢𑁆𑀢𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀸𑀯𑀳𑀁 𑀪𑁂𑀲𑀚𑁆𑀚𑀁 𑀆𑀳𑀭𑀺. 𑀅𑀳𑀜𑁆𑀘 𑀓𑀧𑀺𑀓𑀘𑁆𑀙𑀼𑀦𑁄𑀢𑀺 𑀅𑀳𑀁 𑀧𑀦 𑀓𑀧𑀺𑀓𑀘𑁆𑀙𑀼𑀨𑀮𑀸𑀦𑀺 𑀤𑀼𑀨𑀲𑁆𑀲𑀨𑀮𑀸𑀦𑀺 𑀆𑀳𑀭𑀺𑀁. 𑀓𑀧𑀺𑀓𑀘𑁆𑀙𑀽𑀢𑀺 𑀯𑀸 𑀲𑀬𑀁𑀪𑀽𑀢𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀬𑀁𑀪𑀽𑀢𑀸𑀬 𑀧𑀢𑁆𑀢𑀨𑀮𑀸𑀦𑀺 𑀆𑀳𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀁 𑀢𑁆𑀬𑀸𑀳𑀁 𑀲𑀫𑁄𑀓𑀺𑀭𑀺𑀦𑁆𑀢𑀺 𑀢𑀯 𑀲𑁂𑀬𑁆𑀬𑀁 𑀅𑀳𑀁 𑀓𑀧𑀺𑀓𑀘𑁆𑀙𑀼𑀨𑀮𑀧𑀢𑁆𑀢𑁂𑀳𑀺 𑀲𑀫𑀦𑁆𑀢𑀢𑁄 𑀅𑀯𑀓𑀺𑀭𑀺𑀁.

𑁧𑁪𑁬-𑁧𑁪𑁭. 𑀲𑀳𑀸𑀬𑀸𑀦𑀦𑁆𑀢𑀺 𑀫𑀺𑀢𑁆𑀢𑀸𑀦𑀁. 𑀲𑀫𑀬𑁄𑀢𑀺 𑀲𑀫𑀸𑀕𑀫𑁄. 𑀜𑀸𑀢𑀻𑀦𑀦𑁆𑀢𑀺 𑀩𑀦𑁆𑀥𑀽𑀦𑀁. 𑀲𑀫𑀺𑀢𑀻𑀢𑀺 ¶ 𑀲𑀦𑁆𑀦𑀺𑀧𑀸𑀢𑁄. 𑀆𑀫𑀦𑁆𑀢𑀺𑀢𑀸𑀢𑀺 𑀫𑀗𑁆𑀕𑀮𑀓𑀺𑀭𑀺𑀬𑀸𑀯𑀲𑁂𑀦 𑀦𑀺𑀫𑀦𑁆𑀢𑀺𑀢𑀸. 𑀲𑀲𑀸𑀫𑀺𑀦𑀻𑀢𑀺 𑀲𑀪𑀢𑁆𑀢𑀺𑀓𑀸, 𑀲𑀳 𑀪𑀢𑁆𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀦𑁄 𑀘 𑀔𑁄𑀳𑀦𑁆𑀢𑀺 𑀦𑁄 𑀘 𑀔𑁄 𑀅𑀳𑀁 𑀆𑀫𑀦𑁆𑀢𑀺𑀢𑀸 𑀆𑀲𑀺𑀦𑁆𑀢𑀺 𑀬𑁄𑀚𑀦𑀸. 𑀤𑀼𑀲𑁆𑀲𑀁 𑀢𑁆𑀬𑀸𑀳𑀦𑁆𑀢𑀺 𑀤𑀼𑀲𑁆𑀲𑀁 𑀢𑁂 𑀅𑀳𑀁. 𑀅𑀧𑀸𑀦𑀼𑀤𑀺𑀦𑁆𑀢𑀺 𑀘𑁄𑀭𑀺𑀓𑀸𑀬 𑀅𑀯𑀳𑀭𑀺𑀁 𑀅𑀕𑁆𑀕𑀳𑁄𑀲𑀺𑀁.

𑁧𑁪𑁯. 𑀧𑀘𑁆𑀘𑀕𑁆𑀖𑀦𑁆𑀢𑀺 ¶ 𑀅𑀪𑀺𑀦𑀯𑀁, 𑀫𑀳𑀕𑁆𑀖𑀁 𑀯𑀸. 𑀅𑀢𑀸𑀭𑁂𑀲𑀺𑀦𑁆𑀢𑀺 𑀔𑀺𑀧𑀺𑀁. 𑀕𑀽𑀣𑀕𑀦𑁆𑀥𑀺𑀦𑀻𑀢𑀺 𑀕𑀽𑀣𑀕𑀦𑁆𑀥𑀕𑀦𑁆𑀥𑀺𑀦𑀻 𑀓𑀭𑀻𑀲𑀯𑀸𑀬𑀺𑀦𑀻.

𑁧𑁫𑁧. 𑀬𑀁 𑀕𑁂𑀳𑁂 𑀯𑀺𑀚𑁆𑀚𑀢𑁂 𑀥𑀦𑀦𑁆𑀢𑀺 𑀬𑀁 𑀕𑁂𑀳𑁂 𑀥𑀦𑀁 𑀉𑀧𑀮𑀩𑁆𑀪𑀢𑀺, 𑀢𑀁 𑀢𑀼𑀬𑁆𑀳𑀁 𑀫𑀬𑁆𑀳𑀜𑁆𑀘𑀸𑀢𑀺 𑀅𑀫𑁆𑀳𑀸𑀓𑀁 𑀉𑀪𑀺𑀦𑁆𑀦 𑀲𑀫𑀓𑀁 𑀢𑀼𑀮𑁆𑀬𑀫𑁂𑀯 𑀆𑀲𑀺. 𑀲𑀦𑁆𑀢𑁂𑀲𑀽𑀢𑀺 𑀯𑀺𑀚𑁆𑀚𑀫𑀸𑀦𑁂𑀲𑀼. 𑀤𑀻𑀧𑀦𑁆𑀢𑀺 𑀧𑀢𑀺𑀝𑁆𑀞𑀁, 𑀧𑀼𑀜𑁆𑀜𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁧𑁫𑁨. 𑀏𑀯𑀁 𑀲𑀸 𑀧𑁂𑀢𑀻 𑀢𑀺𑀲𑁆𑀲𑀸𑀬 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀓𑀢𑁆𑀣𑁂𑀢𑁆𑀯𑀸 𑀧𑀼𑀦 𑀧𑀼𑀩𑁆𑀩𑁂 𑀢𑀲𑁆𑀲𑀸 𑀯𑀘𑀦𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀅𑀧𑀭𑀸𑀥𑀁 𑀧𑀓𑀸𑀲𑁂𑀦𑁆𑀢𑀻 ‘‘𑀢𑀤𑁂𑀯 𑀫𑀁 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀤𑁂𑀯𑀸𑀢𑀺 𑀢𑀤𑀸 𑀏𑀯, 𑀫𑀬𑁆𑀳𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀓𑀸𑀮𑁂𑀬𑁂𑀯. 𑀢𑀣𑁂𑀯𑀸𑀢𑀺 𑀯𑀸 𑀧𑀸𑀞𑁄, 𑀬𑀣𑀸 𑀏𑀢𑀭𑀳𑀺 𑀚𑀸𑀢𑀁, 𑀢𑀁 𑀢𑀣𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺, 𑀢𑁆𑀯𑀦𑁆𑀢𑀺 𑀢𑀺𑀲𑁆𑀲𑀁. 𑀅𑀯𑀘𑀸𑀢𑀺 𑀅𑀪𑀡𑀺. 𑀬𑀣𑀸 𑀧𑀦 𑀅𑀯𑀘, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀧𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀸𑀧𑀓𑀫𑁆𑀫𑀸𑀦𑀻’’𑀢𑀺 ¶ 𑀧𑀸𑀴𑀺. ‘‘𑀢𑁆𑀯𑀁 𑀧𑀸𑀧𑀓𑀫𑁆𑀫𑀸𑀦𑀺𑀬𑁂𑀯 𑀓𑀭𑁄𑀲𑀺, 𑀧𑀸𑀧𑁂𑀳𑀺 𑀧𑀦 𑀓𑀫𑁆𑀫𑁂𑀳𑀺 𑀲𑀼𑀕𑀢𑀺 𑀲𑀼𑀮𑀪𑀸 𑀦 𑀳𑁄𑀢𑀺, 𑀅𑀣 𑀔𑁄 𑀤𑀼𑀕𑁆𑀕𑀢𑀺 𑀏𑀯 𑀲𑀼𑀮𑀪𑀸’’𑀢𑀺 𑀬𑀣𑀸 𑀫𑀁 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀯𑀘 𑀑𑀯𑀤𑀺, 𑀢𑀁 𑀢𑀣𑁂𑀯𑀸𑀢𑀺 𑀯𑀤𑀢𑀺.

𑁧𑁫𑁩. 𑀢𑀁 𑀲𑀼𑀢𑁆𑀯𑀸 𑀢𑀺𑀲𑁆𑀲𑀸 ‘‘𑀯𑀸𑀫𑀢𑁄 𑀫𑀁 𑀢𑁆𑀯𑀁 𑀧𑀘𑁆𑀘𑁂𑀲𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀆𑀳. 𑀢𑀢𑁆𑀣 𑀯𑀸𑀫𑀢𑁄 𑀫𑀁 𑀢𑁆𑀯𑀁 𑀧𑀘𑁆𑀘𑁂𑀲𑀻𑀢𑀺 𑀯𑀺𑀮𑁄𑀫𑀢𑁄 𑀫𑀁 𑀢𑁆𑀯𑀁 𑀅𑀥𑀺𑀕𑀘𑁆𑀙𑀲𑀺, 𑀢𑀼𑀬𑁆𑀳𑀁 𑀳𑀺𑀢𑁂𑀲𑀺𑀫𑁆𑀧𑀺 𑀯𑀺𑀧𑀘𑁆𑀘𑀦𑀻𑀓𑀓𑀸𑀭𑀺𑀦𑀺𑀁 𑀓𑀢𑁆𑀯𑀸 𑀫𑀁 𑀕𑀡𑁆𑀳𑀸𑀲𑀺. 𑀫𑀁 𑀉𑀲𑀽𑀬𑀲𑀻𑀢𑀺 𑀫𑀬𑁆𑀳𑀁 𑀉𑀲𑀽𑀬𑀲𑀺, 𑀫𑀬𑀺 𑀇𑀲𑁆𑀲𑀁 𑀓𑀭𑁄𑀲𑀺. 𑀧𑀲𑁆𑀲 𑀧𑀸𑀧𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀬𑀸𑀤𑀺𑀲𑁄𑀢𑀺 𑀧𑀸𑀧𑀓𑀸𑀦𑀁 𑀦𑀸𑀫 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀬𑀸𑀤𑀺𑀲𑁄 𑀬𑀣𑀸 𑀖𑁄𑀭𑀢𑀭𑁄, 𑀢𑀁 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀸𑀢𑀺 𑀯𑀤𑀢𑀺.

𑁧𑁫𑁪. 𑀢𑁂 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀻𑀢𑀺 𑀢𑁂 𑀖𑀭𑁂 𑀤𑀸𑀲𑀺𑀬𑁄 𑀆𑀪𑀭𑀡𑀸𑀦𑀺 𑀘 𑀇𑀫𑀸𑀦𑀺 𑀢𑀬𑀸 𑀧𑀼𑀩𑁆𑀩𑁂 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀇𑀤𑀸𑀦𑀺 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. ‘‘𑀇𑀫𑁂’’𑀢𑀺 𑀳𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀦 𑀪𑁄𑀕𑀸 𑀳𑁄𑀦𑁆𑀢𑀺 𑀲𑀲𑁆𑀲𑀢𑀸𑀢𑀺 𑀪𑁄𑀕𑀸 𑀦𑀸𑀫𑁂𑀢𑁂 𑀦 𑀲𑀲𑁆𑀲𑀢𑀸 𑀅𑀦𑀯𑀝𑁆𑀞𑀺𑀢𑀸 𑀢𑀸𑀯𑀓𑀸𑀮𑀺𑀓𑀸 𑀫𑀳𑀸𑀬𑀕𑀫𑀦𑀻𑀬𑀸, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀤𑀻𑀦𑀺 𑀦 𑀓𑀢𑁆𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁫𑁫. 𑀇𑀤𑀸𑀦𑀺 ¶ ¶ 𑀪𑀽𑀢𑀲𑁆𑀲 𑀧𑀺𑀢𑀸𑀢𑀺 𑀇𑀤𑀸𑀦𑁂𑀯 𑀪𑀽𑀢𑀲𑁆𑀲 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀧𑀺𑀢𑀸 𑀓𑀼𑀝𑀼𑀫𑁆𑀩𑀺𑀓𑁄. 𑀆𑀧𑀡𑀸𑀢𑀺 𑀆𑀧𑀡𑀢𑁄 𑀇𑀫𑀁 𑀕𑁂𑀳𑀁 𑀏𑀳𑀺𑀢𑀺 𑀆𑀕𑀫𑀺𑀲𑁆𑀲𑀢𑀺. 𑀅𑀧𑁆𑀧𑁂𑀯 𑀢𑁂 𑀤𑀤𑁂 𑀓𑀺𑀜𑁆𑀘𑀻𑀢𑀺 𑀕𑁂𑀳𑀁 𑀆𑀕𑀢𑁄 𑀓𑀼𑀝𑀼𑀫𑁆𑀩𑀺𑀓𑁄 𑀢𑀼𑀬𑁆𑀳𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀅𑀧𑀺 𑀦𑀸𑀫 𑀤𑀤𑁂𑀬𑁆𑀬. 𑀫𑀸 𑀲𑀼 𑀢𑀸𑀯 𑀇𑀢𑁄 𑀅𑀕𑀸𑀢𑀺 𑀇𑀢𑁄 𑀕𑁂𑀳𑀲𑁆𑀲 𑀧𑀘𑁆𑀙𑀸 𑀯𑀢𑁆𑀣𑀼𑀢𑁄 𑀫𑀸 𑀢𑀸𑀯 𑀅𑀕𑀫𑀸𑀲𑀻𑀢𑀺 𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑀸 𑀆𑀳.

𑁧𑁫𑁬. 𑀢𑀁 𑀲𑀼𑀢𑁆𑀯𑀸 𑀧𑁂𑀢𑀻 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀓𑀸𑀲𑁂𑀦𑁆𑀢𑀻 ‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀫𑁆𑀳𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑁄𑀧𑀻𑀦𑀫𑁂𑀢𑀁 𑀇𑀢𑁆𑀣𑀻𑀦𑀦𑁆𑀢𑀺 𑀏𑀢𑀁 𑀦𑀕𑁆𑀕𑀤𑀼𑀩𑁆𑀩𑀡𑁆𑀡𑀢𑀸𑀤𑀺𑀓𑀁 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀢𑀸𑀬 𑀇𑀢𑁆𑀣𑀻𑀦𑀁 𑀓𑁄𑀧𑀻𑀦𑀁 𑀭𑀼𑀦𑁆𑀥𑀦𑀻𑀬𑀁. 𑀫𑀸 𑀫𑀁 𑀪𑀽𑀢𑀧𑀺𑀢𑀸𑀤𑁆𑀤𑀲𑀸𑀢𑀺 𑀢𑀲𑁆𑀫𑀸 𑀪𑀽𑀢𑀲𑁆𑀲 𑀧𑀺𑀢𑀸 𑀓𑀼𑀝𑀼𑀫𑁆𑀩𑀺𑀓𑁄 𑀫𑀁 𑀫𑀸 𑀅𑀤𑁆𑀤𑀓𑁆𑀔𑀻𑀢𑀺 𑀮𑀚𑁆𑀚𑀫𑀸𑀦𑀸 𑀯𑀤𑀢𑀺.

𑁧𑁫𑁭. 𑀢𑀁 ¶ 𑀲𑀼𑀢𑁆𑀯𑀸 𑀢𑀺𑀲𑁆𑀲𑀸 𑀲𑀜𑁆𑀚𑀸𑀢𑀦𑀼𑀤𑁆𑀤𑀬𑀸 ‘‘𑀳𑀦𑁆𑀤 𑀓𑀺𑀁 𑀯𑀸 𑀢𑁆𑀬𑀸𑀳𑀁 𑀤𑀫𑁆𑀫𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀳𑀦𑁆𑀤𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀯𑀸 𑀢𑁆𑀬𑀸𑀳𑀁 𑀤𑀫𑁆𑀫𑀻𑀢𑀺 𑀓𑀺𑀁 𑀢𑁂 𑀅𑀳𑀁 𑀤𑀫𑁆𑀫𑀺, 𑀓𑀺𑀁 𑀯𑀢𑁆𑀣𑀁 𑀤𑀲𑁆𑀲𑀸𑀫𑀺, 𑀉𑀤𑀸𑀳𑀼 𑀪𑀢𑁆𑀢𑀦𑁆𑀢𑀺. 𑀓𑀺𑀁 𑀯𑀸 𑀢𑁂𑀥 𑀓𑀭𑁄𑀫𑀳𑀦𑁆𑀢𑀺 𑀓𑀺𑀁 𑀯𑀸 𑀅𑀜𑁆𑀜𑀁 𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀉𑀧𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀺.

𑁧𑁫𑁮. 𑀢𑀁 𑀲𑀼𑀢𑁆𑀯𑀸 𑀧𑁂𑀢𑀻 ‘‘𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄, 𑀘𑀢𑁆𑀢𑀸𑀭𑁄 𑀧𑀦 𑀧𑀼𑀕𑁆𑀕𑀮𑁂𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀲𑀗𑁆𑀖𑀯𑀲𑁂𑀦 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽, 𑀧𑀼𑀕𑁆𑀕𑀮𑀯𑀲𑁂𑀦 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽𑀢𑀺 𑀏𑀯𑀁 𑀅𑀝𑁆𑀞 𑀪𑀺𑀓𑁆𑀔𑀽 𑀬𑀣𑀸𑀭𑀼𑀘𑀺𑀁 𑀪𑁄𑀚𑁂𑀢𑁆𑀯𑀸 𑀢𑀁 𑀤𑀓𑁆𑀔𑀺𑀡𑀁 𑀫𑀫 𑀆𑀤𑀺𑀲, 𑀫𑀬𑁆𑀳𑀁 𑀧𑀢𑁆𑀢𑀺𑀤𑀸𑀦𑀁 𑀤𑁂𑀳𑀺. 𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀦𑁆𑀢𑀺 𑀬𑀤𑀸 𑀢𑁆𑀯𑀁 𑀤𑀓𑁆𑀔𑀺𑀡𑀁 𑀫𑀫 𑀉𑀤𑁆𑀤𑀺𑀲𑀺𑀲𑁆𑀲𑀲𑀺, 𑀢𑀤𑀸 𑀅𑀳𑀁 𑀲𑀼𑀔𑀺𑀢𑀸 𑀲𑀼𑀔𑀧𑁆𑀧𑀢𑁆𑀢𑀸 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁫𑁯-𑁧𑁬𑁧. 𑀢𑀁 𑀲𑀼𑀢𑁆𑀯𑀸 𑀢𑀺𑀲𑁆𑀲𑀸 𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀅𑀝𑁆𑀞 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀺, 𑀲𑀸 𑀢𑀸𑀯𑀤𑁂𑀯 𑀧𑀝𑀺𑀮𑀤𑁆𑀥𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀓𑀸 𑀧𑀼𑀦 𑀢𑀺𑀲𑁆𑀲𑀸𑀬 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 ‘‘𑀲𑀸𑀥𑀽𑀢𑀺 𑀲𑀸 𑀧𑀝𑀺𑀲𑁆𑀲𑀼𑀢𑁆𑀯𑀸’’𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀞𑀧𑀺𑀢𑀸.

𑁧𑁬𑁨-𑁧𑁬𑁭. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀞𑀺𑀢𑀁 𑀧𑀦 𑀦𑀁 𑀢𑀺𑀲𑁆𑀲𑀸 ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀳𑀺 ¶ 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺. 𑀇𑀢𑀭𑀸 ‘‘𑀅𑀳𑀁 𑀫𑀢𑁆𑀢𑀸’’𑀢𑀺 𑀕𑀸𑀣𑀸𑀬 𑀅𑀢𑁆𑀢𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀘𑀺𑀭𑀁 𑀚𑀻𑀯𑀸𑀳𑀻’’𑀢𑀺 𑀕𑀸𑀣𑀸𑀬 𑀢𑀲𑁆𑀲𑀸 𑀅𑀦𑀼𑀫𑁄𑀤𑀦𑀁 𑀤𑀢𑁆𑀯𑀸 ‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦𑀸’’𑀢𑀺 𑀕𑀸𑀣𑀸𑀬 ¶ 𑀑𑀯𑀸𑀤𑀁 𑀅𑀤𑀸𑀲𑀺. 𑀢𑀢𑁆𑀣 𑀢𑀯 𑀤𑀺𑀦𑁆𑀦𑁂𑀦𑀸𑀢𑀺 𑀢𑀬𑀸 𑀤𑀺𑀦𑁆𑀦𑁂𑀦. 𑀅𑀲𑁄𑀓𑀁 𑀯𑀺𑀭𑀚𑀁 𑀞𑀸𑀦𑀦𑁆𑀢𑀺 𑀲𑁄𑀓𑀸𑀪𑀸𑀯𑁂𑀦 𑀅𑀲𑁄𑀓𑀁, 𑀲𑁂𑀤𑀚𑀮𑁆𑀮𑀺𑀓𑀸𑀦𑀁 𑀧𑀦 𑀅𑀪𑀸𑀯𑁂𑀦 𑀯𑀺𑀭𑀚𑀁 𑀤𑀺𑀩𑁆𑀩𑀝𑁆𑀞𑀸𑀦𑀁, 𑀲𑀩𑁆𑀩𑀫𑁂𑀢𑀁 𑀤𑁂𑀯𑀮𑁄𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀆𑀯𑀸𑀲𑀦𑁆𑀢𑀺 𑀞𑀸𑀦𑀁. 𑀯𑀲𑀯𑀢𑁆𑀢𑀺𑀦𑀦𑁆𑀢𑀺 𑀤𑀺𑀩𑁆𑀩𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀦𑁆𑀢𑀸𑀦𑀁. 𑀲𑀫𑀽𑀮𑀦𑁆𑀢𑀺 𑀲𑀮𑁄𑀪𑀤𑁄𑀲𑀁. 𑀮𑁄𑀪𑀤𑁄𑀲𑀸 𑀳𑀺 𑀫𑀘𑁆𑀙𑀭𑀺𑀬𑀲𑁆𑀲 𑀫𑀽𑀮𑀁 𑀦𑀸𑀫. 𑀅𑀦𑀺𑀦𑁆𑀤𑀺𑀢𑀸𑀢𑀺 𑀅𑀕𑀭𑀳𑀺𑀢𑀸 𑀧𑀸𑀲𑀁𑀲𑀸, 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑀢𑁆𑀢𑀸 ‘‘𑀲𑀕𑁆𑀕’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀤𑀺𑀩𑁆𑀩𑀝𑁆𑀞𑀸𑀦𑀁 𑀉𑀧𑁂𑀳𑀺, 𑀲𑀼𑀕𑀢𑀺𑀧𑀭𑀸𑀬𑀡𑀸 𑀳𑁄𑀳𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀣 ¶ 𑀢𑀺𑀲𑁆𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀆𑀭𑁄𑀘𑁂𑀲𑀺, 𑀓𑀼𑀝𑀼𑀫𑁆𑀩𑀺𑀓𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺, 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀸𑀤𑀺𑀫𑀮𑀁 𑀤𑀸𑀦𑀲𑀻𑀮𑀸𑀤𑀺𑀭𑀢𑁄 𑀲𑀼𑀕𑀢𑀺𑀧𑀭𑀸𑀬𑀡𑁄 𑀅𑀳𑁄𑀲𑀻𑀢𑀺.

𑀫𑀢𑁆𑀢𑀸𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀦𑁆𑀤𑀸𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀓𑀸𑀴𑀻 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀦𑀦𑁆𑀤𑀁 𑀦𑀸𑀫 𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀦𑀦𑁆𑀤𑀺𑀲𑁂𑀦𑁄 𑀦𑀸𑀫 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄. 𑀪𑀭𑀺𑀬𑀸 𑀧𑀦𑀲𑁆𑀲 𑀦𑀦𑁆𑀤𑀸 𑀦𑀸𑀫 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀫𑀘𑁆𑀙𑀭𑀺𑀦𑀻 𑀘𑀡𑁆𑀟𑀻 𑀨𑀭𑀼𑀲𑀯𑀘𑀦𑀸 𑀲𑀸𑀫𑀺𑀓𑁂 𑀅𑀕𑀸𑀭𑀯𑀸 𑀅𑀕𑁆𑀕𑀢𑀺𑀲𑁆𑀲𑀸 𑀲𑀲𑁆𑀲𑀼𑀁 𑀘𑁄𑀭𑀺𑀯𑀸𑀤𑁂𑀦 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀯𑀺𑀘𑀭𑀦𑁆𑀢𑀻 𑀏𑀓𑀤𑀺𑀯𑀲𑀁 ¶ 𑀦𑀦𑁆𑀤𑀺𑀲𑁂𑀦𑀲𑁆𑀲 𑀉𑀧𑀸𑀲𑀓𑀲𑁆𑀲 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑁋

‘‘𑀓𑀸𑀴𑀻 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀨𑀭𑀼𑀲𑀸 𑀪𑀻𑀭𑀼𑀤𑀲𑁆𑀲𑀦𑀸;

𑀧𑀺𑀗𑁆𑀕𑀮𑀸𑀲𑀺 𑀓𑀴𑀸𑀭𑀸𑀲𑀺, 𑀦 𑀢𑀁 𑀫𑀜𑁆𑀜𑀸𑀫𑀺 𑀫𑀸𑀦𑀼𑀲𑀺’’𑀦𑁆𑀢𑀺. 𑁋

𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺. 𑀢𑀢𑁆𑀣 𑀓𑀸𑀴𑀻𑀢𑀺 𑀓𑀸𑀴𑀯𑀡𑁆𑀡𑀸, 𑀛𑀸𑀫𑀗𑁆𑀕𑀸𑀭𑀲𑀤𑀺𑀲𑁄 𑀳𑀺𑀲𑁆𑀲𑀸 𑀯𑀡𑁆𑀡𑁄 𑀅𑀳𑁄𑀲𑀺. 𑀨𑀭𑀼𑀲𑀸𑀢𑀺 𑀔𑀭𑀕𑀢𑁆𑀢𑀸. 𑀪𑀻𑀭𑀼𑀤𑀲𑁆𑀲𑀦𑀸𑀢𑀺 𑀪𑀬𑀸𑀦𑀓𑀤𑀲𑁆𑀲𑀦𑀸 𑀲𑀧𑁆𑀧𑀝𑀺𑀪𑀬𑀸𑀓𑀸𑀭𑀸. ‘‘𑀪𑀸𑀭𑀼𑀤𑀲𑁆𑀲𑀦𑀸’’𑀢𑀺 𑀯𑀸 𑀧𑀸𑀞𑁄, 𑀪𑀸𑀭𑀺𑀬𑀤𑀲𑁆𑀲𑀦𑀸, 𑀤𑀼𑀩𑁆𑀩𑀡𑁆𑀡𑀢𑀸𑀤𑀺𑀦𑀸 𑀤𑀼𑀤𑁆𑀤𑀲𑀺𑀓𑀸𑀢𑀺 𑀅𑀢𑁆𑀣𑁄. 𑀧𑀺𑀗𑁆𑀕𑀮𑀸𑀢𑀺 𑀧𑀺𑀗𑁆𑀕𑀮𑀮𑁄𑀘𑀦𑀸. 𑀓𑀴𑀸𑀭𑀸𑀢𑀺 𑀓𑀴𑀸𑀭𑀤𑀦𑁆𑀢𑀸. 𑀦 𑀢𑀁 𑀫𑀜𑁆𑀜𑀸𑀫𑀺 𑀫𑀸𑀦𑀼𑀲𑀺𑀦𑁆𑀢𑀺 𑀅𑀳𑀁 𑀢𑀁 𑀫𑀸𑀦𑀼𑀲𑀺𑀦𑁆𑀢𑀺 𑀦 𑀫𑀜𑁆𑀜𑀸𑀫𑀺, 𑀧𑁂𑀢𑀺𑀫𑁂𑀯 𑀘 𑀢𑀁 𑀫𑀜𑁆𑀜𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀲𑀼𑀢𑁆𑀯𑀸 𑀧𑁂𑀢𑀻 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀦𑁆𑀢𑀻 𑁋

‘‘𑀅𑀳𑀁 ¶ 𑀦𑀦𑁆𑀤𑀸 𑀦𑀦𑁆𑀤𑀺𑀲𑁂𑀦, 𑀪𑀭𑀺𑀬𑀸 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀫𑀸𑀳 ¶ . 𑀢𑀢𑁆𑀣 𑀅𑀳𑀁 𑀦𑀦𑁆𑀤𑀸 𑀦𑀦𑁆𑀤𑀺𑀲𑁂𑀦𑀸𑀢𑀺 𑀲𑀸𑀫𑀺 𑀦𑀦𑁆𑀤𑀺𑀲𑁂𑀦 𑀅𑀳𑀁 𑀦𑀦𑁆𑀤𑀸 𑀦𑀸𑀫. 𑀪𑀭𑀺𑀬𑀸 𑀢𑁂 𑀧𑀼𑀭𑁂 𑀅𑀳𑀼𑀦𑁆𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁 𑀢𑀼𑀬𑁆𑀳𑀁 𑀪𑀭𑀺𑀬𑀸 𑀅𑀳𑁄𑀲𑀺𑀁. 𑀇𑀢𑁄 𑀧𑀭𑀁 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀼𑀘𑁆𑀙𑀸. 𑀅𑀣𑀲𑁆𑀲 𑀲𑀸 𑁋

‘‘𑀘𑀡𑁆𑀟𑀻 𑀘 𑀨𑀭𑀼𑀲𑀸 𑀘𑀸𑀲𑀺𑀁, 𑀢𑀬𑀺 𑀘𑀸𑀧𑀺 𑀅𑀕𑀸𑀭𑀯𑀸;

𑀢𑀸𑀳𑀁 𑀤𑀼𑀭𑀼𑀢𑁆𑀢𑀁 𑀯𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

‘‘𑀳𑀦𑁆𑀤𑀼𑀢𑁆𑀢𑀭𑀻𑀬𑀁 𑀤𑀤𑀸𑀫𑀺 𑀢𑁂, 𑀇𑀫𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑀬;

𑀇𑀫𑀁 𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀳𑀺 𑀦𑁂𑀲𑁆𑀲𑀸𑀫𑀺 𑀢𑀁 𑀖𑀭𑀁.

‘‘𑀯𑀢𑁆𑀣𑀜𑁆𑀘 ¶ 𑀅𑀦𑁆𑀦𑀧𑀸𑀦𑀜𑁆𑀘, 𑀮𑀘𑁆𑀙𑀲𑀺 𑀢𑁆𑀯𑀁 𑀖𑀭𑀁 𑀕𑀢𑀸;

𑀧𑀼𑀢𑁆𑀢𑁂 𑀘 𑀢𑁂 𑀧𑀲𑁆𑀲𑀺𑀲𑁆𑀲𑀲𑀺, 𑀲𑀼𑀡𑀺𑀲𑀸𑀬𑁄 𑀘 𑀤𑀓𑁆𑀔𑀲𑀻’’𑀢𑀺. 𑁋 𑀅𑀣𑀲𑁆𑀲 𑀲𑀸 𑁋

‘‘𑀳𑀢𑁆𑀣𑁂𑀦 𑀳𑀢𑁆𑀣𑁂 𑀢𑁂 𑀤𑀺𑀦𑁆𑀦𑀁, 𑀦 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀺;

𑀪𑀺𑀓𑁆𑀔𑀽 𑀘 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀯𑀻𑀢𑀭𑀸𑀕𑁂 𑀩𑀳𑀼𑀲𑁆𑀲𑀼𑀢𑁂.

‘‘𑀢𑀧𑁆𑀧𑁂𑀳𑀺 𑀅𑀦𑁆𑀦𑀧𑀸𑀦𑁂𑀦, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲;

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺. 𑁋

‘‘𑀲𑀸𑀥𑀽𑀢𑀺 ¶ 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀤𑀸𑀦𑀁 𑀯𑀺𑀧𑀼𑀮𑀫𑀸𑀓𑀺𑀭𑀺;

𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀙𑀢𑁆𑀢𑀁 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘, 𑀯𑀺𑀯𑀺𑀥𑀸 𑀘 𑀉𑀧𑀸𑀳𑀦𑀸.

‘‘𑀪𑀺𑀓𑁆𑀔𑀽 𑀘 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀯𑀻𑀢𑀭𑀸𑀕𑁂 𑀩𑀳𑀼𑀲𑁆𑀲𑀼𑀢𑁂;

𑀢𑀧𑁆𑀧𑁂𑀢𑁆𑀯𑀸 𑀅𑀦𑁆𑀦𑀧𑀸𑀦𑁂𑀦, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂 ¶ , 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑁄𑀚𑀦𑀘𑁆𑀙𑀸𑀤𑀦𑀧𑀸𑀦𑀻𑀬𑀁, 𑀤𑀓𑁆𑀔𑀺𑀡𑀸𑀬 𑀇𑀤𑀁 𑀨𑀮𑀁.

‘‘𑀢𑀢𑁄 𑀲𑀼𑀤𑁆𑀥𑀸 𑀲𑀼𑀘𑀺𑀯𑀲𑀦𑀸, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀻;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀲𑀸𑀫𑀺𑀓𑀁 𑀉𑀧𑀲𑀗𑁆𑀓𑀫𑀻’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀸. 𑀢𑀢𑁄 𑀧𑀭𑀁 𑁋

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

‘‘𑀅𑀳𑀁 𑀦𑀦𑁆𑀤𑀸 𑀦𑀦𑁆𑀤𑀺𑀲𑁂𑀦, 𑀪𑀭𑀺𑀬𑀸 𑀢𑁂 𑀧𑀼𑀭𑁂 𑀅𑀳𑀼𑀁;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀢𑀯 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀘𑀺𑀭𑀁 𑀚𑀻𑀯 𑀕𑀳𑀧𑀢𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀅𑀲𑁄𑀓𑀁 ¶ ¶ 𑀯𑀺𑀭𑀚𑀁 𑀔𑁂𑀫𑀁, 𑀆𑀯𑀸𑀲𑀁 𑀯𑀲𑀯𑀢𑁆𑀢𑀺𑀦𑀁.

‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀤𑀸𑀦𑀁 𑀤𑀢𑁆𑀯𑀸 𑀕𑀳𑀧𑀢𑀺;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦’’𑀦𑁆𑀢𑀺. 𑁋

𑀉𑀧𑀸𑀲𑀓𑀲𑁆𑀲 𑀘 𑀧𑁂𑀢𑀺𑀬𑀸 𑀘 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸.

𑁧𑁭𑁬. 𑀢𑀢𑁆𑀣 𑀤𑀸𑀦𑀁 𑀯𑀺𑀧𑀼𑀮𑀫𑀸𑀓𑀺𑀭𑀻𑀢𑀺 𑀉𑀓𑁆𑀔𑀺𑀡𑁂𑀬𑁆𑀬𑀔𑁂𑀢𑁆𑀢𑁂 𑀤𑁂𑀬𑁆𑀬𑀥𑀫𑁆𑀫𑀩𑀻𑀚𑀁 𑀯𑀺𑀧𑁆𑀧𑀓𑀺𑀭𑀦𑁆𑀢𑁄 𑀯𑀺𑀬 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑁂𑀲𑀁 𑀅𑀦𑀦𑁆𑀢𑀭𑀯𑀢𑁆𑀣𑀼𑀲𑀤𑀺𑀲𑀫𑁂𑀯.

𑀏𑀯𑀁 𑀲𑀸 𑀅𑀢𑁆𑀢𑀦𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀢𑀲𑁆𑀲𑀸 𑀘 𑀓𑀸𑀭𑀡𑀁 𑀦𑀦𑁆𑀤𑀺𑀲𑁂𑀦𑀲𑁆𑀲 𑀯𑀺𑀪𑀸𑀯𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀉𑀧𑀸𑀲𑀓𑁄 𑀢𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 ¶ , 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀦𑀦𑁆𑀤𑀸𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀝𑁆𑀞𑀓𑀼𑀡𑁆𑀟𑀮𑀻𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀫𑀝𑁆𑀞𑀓𑀼𑀡𑁆𑀟𑀮𑀺𑀤𑁂𑀯𑀧𑀼𑀢𑁆𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸𑀬𑀁 𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸𑀬 (𑀯𑀺. 𑀯. 𑀅𑀝𑁆𑀞. 𑁧𑁨𑁦𑁬 𑀫𑀝𑁆𑀞𑀓𑀼𑀡𑁆𑀟𑀮𑀻𑀯𑀺𑀫𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀫𑀝𑁆𑀞𑀓𑀼𑀡𑁆𑀟𑀮𑀻𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀺𑀫𑀸𑀦𑀤𑁂𑀯𑀢𑀸𑀪𑀸𑀯𑀢𑁄 𑀢𑀲𑁆𑀲 𑀯𑀢𑁆𑀣𑀼 𑀬𑀤𑀺𑀧𑀺 𑀯𑀺𑀫𑀸𑀦𑀯𑀢𑁆𑀣𑀼𑀧𑀸𑀴𑀺𑀬𑀁 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀁, 𑀬𑀲𑁆𑀫𑀸 𑀧𑀦 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀅𑀤𑀺𑀦𑁆𑀦𑀧𑀼𑀩𑁆𑀩𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀲𑁄𑀓𑁂𑀦 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀁 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀭𑁄𑀤𑀦𑁆𑀢𑀲𑁆𑀲 𑀲𑁄𑀓𑀳𑀭𑀡𑀢𑁆𑀣𑀁 𑀅𑀢𑁆𑀢𑀦𑁄 𑀤𑁂𑀯𑀭𑀽𑀧𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀓𑀸𑀭𑁂𑀦 𑀧𑁂𑀢𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀢𑁄 𑀅𑀧𑁂𑀢𑀢𑁆𑀢𑀸 𑀧𑁂𑀢𑀧𑀭𑀺𑀬𑀸𑀬𑁄𑀧𑀺 𑀮𑀩𑁆𑀪𑀢𑀺 𑀏𑀯𑀸𑀢𑀺 𑀢𑀲𑁆𑀲 𑀯𑀢𑁆𑀣𑀼 𑀧𑁂𑀢𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀝𑁆𑀞𑀓𑀼𑀡𑁆𑀟𑀮𑀻𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀝𑁆𑀞𑁂𑀳𑀺 ¶ ¶ 𑀓𑀡𑁆𑀳 𑀓𑀺𑀁 𑀲𑁂𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀢𑀧𑀼𑀢𑁆𑀢𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀲𑁄 𑀢𑁂𑀦 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄 𑀦 𑀦𑁆𑀳𑀸𑀬𑀢𑀺, 𑀦 𑀪𑀼𑀜𑁆𑀚𑀢𑀺, 𑀦 𑀓𑀫𑁆𑀫𑀦𑁆𑀢𑁂 𑀯𑀺𑀘𑀸𑀭𑁂𑀢𑀺, 𑀦 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀓𑁂𑀯𑀮𑀁, ‘‘𑀢𑀸𑀢 𑀧𑀺𑀬𑀧𑀼𑀢𑁆𑀢𑀓, 𑀫𑀁 𑀑𑀳𑀸𑀬 𑀓𑀳𑀁 𑀧𑀞𑀫𑀢𑀭𑀁 𑀕𑀢𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀯𑀺𑀧𑁆𑀧𑀮𑀧𑀢𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 ¶ 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀢𑀲𑁆𑀲 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 𑀉𑀧𑀸𑀲𑀓𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀅𑀣𑀲𑁆𑀲 𑀕𑁂𑀳𑀚𑀦𑁄 𑀕𑁂𑀳𑀤𑁆𑀯𑀸𑀭𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀧𑀸𑀲𑀓𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀦𑁂𑀲𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀉𑀧𑀸𑀲𑀓, 𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂, ‘‘𑀉𑀧𑀸𑀲𑀓, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀢𑀧𑀼𑀢𑁆𑀢𑀁 𑀦𑀸𑀦𑀼𑀲𑁄𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀤𑁆𑀯𑀸𑀭𑀯𑀢𑀻𑀦𑀕𑀭𑁂 𑀤𑀲 𑀪𑀸𑀢𑀺𑀓𑀭𑀸𑀚𑀸𑀦𑁄 𑀅𑀳𑁂𑀲𑀼𑀁 𑁋 𑀯𑀸𑀲𑀼𑀤𑁂𑀯𑁄 𑀩𑀮𑀤𑁂𑀯𑁄 𑀘𑀦𑁆𑀤𑀤𑁂𑀯𑀸 𑀲𑀽𑀭𑀺𑀬𑀤𑁂𑀯𑁄 𑀅𑀕𑁆𑀕𑀺𑀤𑁂𑀯𑁄 𑀯𑀭𑀼𑀡𑀤𑁂𑀯𑁄 𑀅𑀚𑁆𑀚𑀼𑀦𑁄 𑀧𑀚𑁆𑀚𑀼𑀦𑁄 𑀖𑀝𑀧𑀡𑁆𑀟𑀺𑀢𑁄 𑀅𑀗𑁆𑀓𑀼𑀭𑁄 𑀘𑀸𑀢𑀺. 𑀢𑁂𑀲𑀼 𑀯𑀸𑀲𑀼𑀤𑁂𑀯𑀫𑀳𑀸𑀭𑀸𑀚𑀲𑁆𑀲 𑀧𑀺𑀬𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀢𑁂𑀦 𑀭𑀸𑀚𑀸 𑀲𑁄𑀓𑀧𑀭𑁂𑀢𑁄 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀫𑀜𑁆𑀘𑀲𑁆𑀲 𑀅𑀝𑀦𑀺𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑁆𑀧𑀮𑀧𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀖𑀝𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀓𑁄𑀘𑀺 𑀫𑀫 𑀪𑀸𑀢𑀼 𑀲𑁄𑀓𑀁 𑀧𑀭𑀺𑀳𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀉𑀧𑀸𑀬𑁂𑀦𑀲𑁆𑀲 𑀲𑁄𑀓𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀉𑀫𑁆𑀫𑀢𑁆𑀢𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀲𑀲𑀁 𑀫𑁂 𑀤𑁂𑀣, 𑀲𑀲𑀁 𑀫𑁂 𑀤𑁂𑀣𑀸’’𑀢𑀺 𑀆𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀲𑀓𑀮𑀦𑀕𑀭𑀁 𑀯𑀺𑀘𑀭𑀺. ‘‘𑀖𑀝𑀧𑀡𑁆𑀟𑀺𑀢𑁄 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄’’𑀢𑀺 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀭𑁄𑀳𑀺𑀡𑁂𑀬𑁆𑀬𑁄 𑀦𑀸𑀫 𑀅𑀫𑀘𑁆𑀘𑁄 𑀯𑀸𑀲𑀼𑀤𑁂𑀯𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 ¶ 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑁋

‘‘𑀉𑀝𑁆𑀞𑁂𑀳𑀺 𑀓𑀡𑁆𑀳 𑀓𑀺𑀁 𑀲𑁂𑀲𑀺, 𑀓𑁄 𑀅𑀢𑁆𑀣𑁄 𑀲𑀼𑀧𑀦𑁂𑀦 𑀢𑁂;

𑀬𑁄 𑀘 𑀢𑀼𑀬𑁆𑀳𑀁 𑀲𑀓𑁄 𑀪𑀸𑀢𑀸, 𑀳𑀤𑀬𑀁 𑀘𑀓𑁆𑀔𑀼 𑀘 𑀤𑀓𑁆𑀔𑀺𑀡𑀁;

𑀢𑀲𑁆𑀲 𑀯𑀸𑀢𑀸 𑀩𑀮𑀻𑀬𑀦𑁆𑀢𑀺, 𑀲𑀲𑀁 𑀚𑀧𑁆𑀧𑀢𑀺 𑀓𑁂𑀲𑀯𑀸’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑁨𑁦𑁭. 𑀢𑀢𑁆𑀣 𑀓𑀡𑁆𑀳𑀸𑀢𑀺 𑀯𑀸𑀲𑀼𑀤𑁂𑀯𑀁 𑀕𑁄𑀢𑁆𑀢𑁂𑀦𑀸𑀮𑀧𑀢𑀺. 𑀓𑁄 𑀅𑀢𑁆𑀣𑁄 𑀲𑀼𑀧𑀦𑁂𑀦 𑀢𑁂𑀢𑀺 𑀲𑀼𑀧𑀦𑁂𑀦 𑀢𑀼𑀬𑁆𑀳𑀁 𑀓𑀸 ¶ 𑀦𑀸𑀫 𑀯𑀟𑁆𑀠𑀺. 𑀲𑀓𑁄 𑀪𑀸𑀢𑀸𑀢𑀺 𑀲𑁄𑀤𑀭𑀺𑀬𑁄 𑀪𑀸𑀢𑀸. 𑀳𑀤𑀬𑀁 𑀘𑀓𑁆𑀔𑀼 𑀘 𑀤𑀓𑁆𑀔𑀺𑀡𑀦𑁆𑀢𑀺 𑀳𑀤𑀬𑁂𑀦 𑀘𑁂𑀯 𑀤𑀓𑁆𑀔𑀺𑀡𑀘𑀓𑁆𑀔𑀼𑀦𑀸 𑀘 𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀯𑀸𑀢𑀸 𑀩𑀮𑀻𑀬𑀦𑁆𑀢𑀻𑀢𑀺 𑀢𑀲𑁆𑀲 𑀅𑀧𑀭𑀸𑀧𑀭𑀁 ¶ 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀫𑁆𑀫𑀸𑀤𑀯𑀸𑀢𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀲𑀲𑀁 𑀚𑀧𑁆𑀧𑀢𑀻𑀢𑀺 ‘‘𑀲𑀲𑀁 𑀫𑁂 𑀤𑁂𑀣𑀸’’𑀢𑀺 𑀯𑀺𑀧𑁆𑀧𑀮𑀧𑀢𑀺. 𑀓𑁂𑀲𑀯𑀸𑀢𑀺 𑀲𑁄 𑀓𑀺𑀭 𑀓𑁂𑀲𑀸𑀦𑀁 𑀲𑁄𑀪𑀦𑀸𑀦𑀁 𑀅𑀢𑁆𑀣𑀺𑀢𑀸𑀬 ‘‘𑀓𑁂𑀲𑀯𑁄’’𑀢𑀺 𑀯𑁄𑀳𑀭𑀻𑀬𑀢𑀺. 𑀢𑁂𑀦 𑀦𑀁 𑀦𑀸𑀫𑁂𑀦 𑀆𑀮𑀧𑀢𑀺.

𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀬𑀦𑀢𑁄 𑀉𑀝𑁆𑀞𑀺𑀢𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑁋

‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑁄𑀳𑀺𑀡𑁂𑀬𑁆𑀬𑀲𑁆𑀲 𑀓𑁂𑀲𑀯𑁄;

𑀢𑀭𑀫𑀸𑀦𑀭𑀽𑀧𑁄 𑀯𑀼𑀝𑁆𑀞𑀸𑀲𑀺, 𑀪𑀸𑀢𑀼 𑀲𑁄𑀓𑁂𑀦 𑀅𑀝𑁆𑀝𑀺𑀢𑁄’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑀭𑀸𑀚𑀸 𑀉𑀝𑁆𑀞𑀸𑀬 𑀲𑀻𑀖𑀁 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀖𑀝𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀪𑁄𑀲𑀼 𑀳𑀢𑁆𑀣𑁂𑀲𑀼 𑀦𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑁋

‘‘𑀓𑀺𑀁 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀓𑁂𑀯𑀮𑀁 𑀤𑁆𑀯𑀸𑀭𑀓𑀁 𑀇𑀫𑀁;

𑀲𑀲𑁄 𑀲𑀲𑁄𑀢𑀺 𑀮𑀧𑀲𑀺, 𑀓𑀻𑀤𑀺𑀲𑀁 𑀲𑀲𑀫𑀺𑀘𑁆𑀙𑀲𑀺.

‘‘𑀲𑁄𑀯𑀡𑁆𑀡𑀫𑀬𑀁 𑀫𑀡𑀺𑀫𑀬𑀁, 𑀮𑁄𑀳𑀫𑀬𑀁 𑀅𑀣 𑀭𑀽𑀧𑀺𑀬𑀫𑀬𑀁;

𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀫𑀬𑀁, 𑀓𑀸𑀭𑀬𑀺𑀲𑁆𑀲𑀸𑀫𑀺 𑀢𑁂 𑀲𑀲𑀁.

‘‘𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀲𑀲𑀓𑀸, 𑀅𑀭𑀜𑁆𑀜𑀯𑀦𑀕𑁄𑀘𑀭𑀸;

𑀢𑁂𑀧𑀺 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀓𑀻𑀤𑀺𑀲𑀁 𑀲𑀲𑀫𑀺𑀘𑁆𑀙𑀲𑀻’’𑀢𑀺. 𑁋

𑁨𑁦𑁯-𑁨𑁧𑁧. 𑀢𑀢𑁆𑀣 ¶ 𑀉𑀫𑁆𑀫𑀢𑁆𑀢𑀭𑀽𑀧𑁄𑀯𑀸𑀢𑀺 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬. 𑀓𑁂𑀯𑀮𑀦𑁆𑀢𑀺 𑀲𑀓𑀮𑀁. 𑀤𑁆𑀯𑀸𑀭𑀓𑀦𑁆𑀢𑀺 𑀤𑁆𑀯𑀸𑀭𑀯𑀢𑀻𑀦𑀕𑀭𑀁 𑀯𑀺𑀘𑀭𑀦𑁆𑀢𑁄. 𑀲𑀲𑁄 𑀲𑀲𑁄𑀢𑀺 𑀮𑀧𑀲𑀻𑀢𑀺 𑀲𑀲𑁄 𑀲𑀲𑁄𑀢𑀺 𑀯𑀺𑀮𑀧𑀲𑀺. 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁. 𑀮𑁄𑀳𑀫𑀬𑀦𑁆𑀢𑀺 𑀢𑀫𑁆𑀩𑀮𑁄𑀳𑀫𑀬𑀁. 𑀭𑀽𑀧𑀺𑀬𑀫𑀬𑀦𑁆𑀢𑀺 𑀭𑀚𑀢𑀫𑀬𑀁. 𑀬𑀁 𑀇𑀘𑁆𑀙𑀲𑀺 𑀢𑀁 𑀯𑀤𑁂𑀳𑀺, 𑀅𑀣 𑀓𑁂𑀦 𑀲𑁄𑀘𑀲𑀺. 𑀅𑀜𑁆𑀜𑁂𑀧𑀺 𑀅𑀭𑀜𑁆𑀜𑁂 𑀯𑀦𑀕𑁄𑀘𑀭𑀸 𑀲𑀲𑀓𑀸 𑀅𑀢𑁆𑀣𑀺, 𑀢𑁂 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀯𑀤, 𑀪𑀤𑁆𑀭𑀫𑀼𑀔 ¶ , 𑀓𑀻𑀤𑀺𑀲𑀁 𑀲𑀲𑀫𑀺𑀘𑁆𑀙𑀲𑀻𑀢𑀺 𑀖𑀝𑀧𑀡𑁆𑀟𑀺𑀢𑀁 ‘‘𑀲𑀲𑁂𑀦 𑀅𑀢𑁆𑀣𑀺𑀓𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀲𑀲𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀖𑀝𑀧𑀡𑁆𑀟𑀺𑀢𑁄 𑁋

‘‘𑀦𑀸𑀳𑀫𑁂𑀢𑁂 ¶ 𑀲𑀲𑁂 𑀇𑀘𑁆𑀙𑁂, 𑀬𑁂 𑀲𑀲𑀸 𑀧𑀣𑀯𑀺𑀲𑁆𑀲𑀺𑀢𑀸;

𑀘𑀦𑁆𑀤𑀢𑁄 𑀲𑀲𑀫𑀺𑀘𑁆𑀙𑀸𑀫𑀺, 𑀢𑀁 𑀫𑁂 𑀑𑀳𑀭 𑀓𑁂𑀲𑀯𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀑𑀳𑀭𑀸𑀢𑀺 𑀑𑀳𑀸𑀭𑁂𑀳𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀫𑁂 𑀪𑀸𑀢𑀸 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑁋

‘‘𑀲𑁄 𑀦𑀽𑀦 𑀫𑀥𑀼𑀭𑀁 𑀜𑀸𑀢𑀺, 𑀚𑀻𑀯𑀺𑀢𑀁 𑀯𑀺𑀚𑀳𑀺𑀲𑁆𑀲𑀲𑀺;

𑀅𑀧𑀢𑁆𑀣𑀺𑀬𑀁 𑀧𑀢𑁆𑀣𑀬𑀲𑀺, 𑀘𑀦𑁆𑀤𑀢𑁄 𑀲𑀲𑀫𑀺𑀘𑁆𑀙𑀲𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀜𑀸𑀢𑀻𑀢𑀺 𑀓𑀦𑀺𑀝𑁆𑀞𑀁 𑀆𑀮𑀧𑀢𑀺. 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀫𑀬𑁆𑀳𑀁 𑀧𑀺𑀬𑀜𑀸𑀢𑀺 𑀬𑀁 𑀅𑀢𑀺𑀫𑀥𑀼𑀭𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁, 𑀢𑀁 𑀯𑀺𑀚𑀳𑀺𑀲𑁆𑀲𑀲𑀺 𑀫𑀜𑁆𑀜𑁂, 𑀬𑁄 𑀅𑀧𑀢𑁆𑀣𑀬𑀺𑀢𑀩𑁆𑀩𑀁 𑀧𑀢𑁆𑀣𑁂𑀲𑀻𑀢𑀺.

𑀖𑀝𑀧𑀡𑁆𑀟𑀺𑀢𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀞𑀢𑁆𑀯𑀸 ‘‘𑀪𑀸𑀢𑀺𑀓, 𑀢𑁆𑀯𑀁 𑀘𑀦𑁆𑀤𑀢𑁄 𑀲𑀲𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀢𑀁 𑀅𑀮𑀪𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀚𑀸𑀦𑀦𑁆𑀢𑁄 𑀓𑀲𑁆𑀫𑀸 𑀫𑀢𑀁 𑀧𑀼𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀅𑀦𑀼𑀲𑁄𑀘𑀲𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑁋

‘‘𑀏𑀯𑀁 ¶ 𑀘𑁂 𑀓𑀡𑁆𑀳 𑀚𑀸𑀦𑀸𑀲𑀺, 𑀬𑀣𑀜𑁆𑀜𑀫𑀦𑀼𑀲𑀸𑀲𑀲𑀺;

𑀓𑀲𑁆𑀫𑀸 𑀧𑀼𑀭𑁂 𑀫𑀢𑀁 𑀧𑀼𑀢𑁆𑀢𑀁, 𑀅𑀚𑁆𑀚𑀸𑀧𑀺 𑀫𑀦𑀼𑀲𑁄𑀘𑀲𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀯𑀁 𑀘𑁂, 𑀓𑀡𑁆𑀳, 𑀚𑀸𑀦𑀸𑀲𑀻𑀢𑀺, 𑀪𑀸𑀢𑀺𑀓, 𑀓𑀡𑁆𑀳𑀦𑀸𑀫𑀓 𑀫𑀳𑀸𑀭𑀸𑀚, ‘‘𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼 𑀦𑀸𑀫 𑀦 𑀧𑀢𑁆𑀣𑁂𑀢𑀩𑁆𑀩’’𑀦𑁆𑀢𑀺 𑀬𑀤𑀺 𑀏𑀯𑀁 𑀚𑀸𑀦𑀸𑀲𑀺. 𑀬𑀣𑀜𑁆𑀜𑀦𑁆𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄𑀯 𑀬𑀣𑀸 𑀅𑀜𑁆𑀜𑀁 𑀅𑀦𑀼𑀲𑀸𑀲𑀲𑀺, 𑀢𑀣𑀸 𑀅𑀓𑀢𑁆𑀯𑀸. 𑀓𑀲𑁆𑀫𑀸 𑀧𑀼𑀭𑁂 𑀫𑀢𑀁 𑀧𑀼𑀢𑁆𑀢𑀦𑁆𑀢𑀺 𑀅𑀣 𑀓𑀲𑁆𑀫𑀸 𑀇𑀢𑁄 𑀘𑀢𑀼𑀫𑀸𑀲𑀫𑀢𑁆𑀣𑀓𑁂 𑀫𑀢𑀁 𑀧𑀼𑀢𑁆𑀢𑀁 𑀅𑀚𑁆𑀚𑀸𑀧𑀺 𑀅𑀦𑀼𑀲𑁄𑀘𑀲𑀻𑀢𑀺.

𑀏𑀯𑀁 𑀲𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑀓𑁄𑀯 ‘‘𑀅𑀳𑀁 𑀢𑀸𑀯 𑀏𑀯𑀁 𑀧𑀜𑁆𑀜𑀸𑀬𑀫𑀸𑀦𑀁 𑀧𑀢𑁆𑀣𑁂𑀫𑀺, 𑀢𑁆𑀯𑀁 𑀧𑀦 𑀅𑀧𑀜𑁆𑀜𑀸𑀬𑀫𑀸𑀦𑀲𑁆𑀲𑀢𑁆𑀣𑀸𑀬 𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

‘‘𑀦 ¶ 𑀬𑀁 𑀮𑀩𑁆𑀪𑀸 𑀫𑀦𑀼𑀲𑁆𑀲𑁂𑀦, 𑀅𑀫𑀦𑀼𑀲𑁆𑀲𑁂𑀦 𑀯𑀸 𑀧𑀦;

𑀚𑀸𑀢𑁄 𑀫𑁂 𑀫𑀸 𑀫𑀭𑀺 𑀧𑀼𑀢𑁆𑀢𑁄, 𑀓𑀼𑀢𑁄 𑀮𑀩𑁆𑀪𑀸 𑀅𑀮𑀩𑁆𑀪𑀺𑀬𑀁.

‘‘𑀦 ¶ 𑀫𑀦𑁆𑀢𑀸 𑀫𑀽𑀮𑀪𑁂𑀲𑀚𑁆𑀚𑀸, 𑀑𑀲𑀥𑁂𑀳𑀺 𑀥𑀦𑁂𑀦 𑀯𑀸;

𑀲𑀓𑁆𑀓𑀸 𑀆𑀦𑀬𑀺𑀢𑀼𑀁 𑀓𑀡𑁆𑀳, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑁨𑁧𑁫. 𑀢𑀢𑁆𑀣 𑀬𑀦𑁆𑀢𑀺, 𑀪𑀸𑀢𑀺𑀓, 𑀬𑀁 ‘‘𑀏𑀯𑀁 𑀚𑀸𑀢𑁄 𑀫𑁂 𑀧𑀼𑀢𑁆𑀢𑁄 𑀫𑀸 𑀫𑀭𑀻’’𑀢𑀺 𑀫𑀦𑀼𑀲𑁆𑀲𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀧𑀦 𑀦 𑀮𑀩𑁆𑀪𑀸 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀁 𑀢𑁆𑀯𑀁 𑀧𑀢𑁆𑀣𑁂𑀲𑀺, 𑀢𑀁 𑀧𑀦𑁂𑀢𑀁 𑀓𑀼𑀢𑁄 𑀮𑀩𑁆𑀪𑀸, 𑀓𑁂𑀦 𑀓𑀸𑀭𑀡𑁂𑀦 𑀮𑀤𑁆𑀥𑀼𑀁 𑀲𑀓𑁆𑀓𑀸. 𑀬𑀲𑁆𑀫𑀸 𑀅𑀮𑀩𑁆𑀪𑀺𑀬𑀁 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼 𑀦𑀸𑀫𑁂𑀢𑀦𑁆𑀢𑀺 𑀅𑀢𑁆𑀣𑁄.

𑁨𑁧𑁬. 𑀫𑀦𑁆𑀢𑀸𑀢𑀺 𑀫𑀦𑁆𑀢𑀧𑁆𑀧𑀬𑁄𑀕𑁂𑀦. 𑀫𑀽𑀮𑀪𑁂𑀲𑀚𑁆𑀚𑀸𑀢𑀺 𑀫𑀽𑀮𑀪𑁂𑀲𑀚𑁆𑀚𑁂𑀦. 𑀑𑀲𑀥𑁂𑀳𑀻𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀑𑀲𑀥𑁂𑀳𑀺. 𑀥𑀦𑁂𑀦 𑀯𑀸𑀢𑀺 𑀓𑁄𑀝𑀺𑀲𑀢𑀲𑀗𑁆𑀔𑁂𑀦 𑀥𑀦𑁂𑀦 𑀯𑀸𑀧𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀺, 𑀢𑀁 𑀏𑀢𑁂𑀳𑀺 𑀫𑀦𑁆𑀢𑀧𑁆𑀧𑀬𑁄𑀕𑀸𑀤𑀻𑀳𑀺𑀧𑀺 𑀆𑀦𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺.

𑀧𑀼𑀦 𑀖𑀝𑀧𑀡𑁆𑀟𑀺𑀢𑁄 ‘‘𑀪𑀸𑀢𑀺𑀓, 𑀇𑀤𑀁 𑀫𑀭𑀡𑀁 𑀦𑀸𑀫 𑀥𑀦𑁂𑀦 𑀯𑀸 𑀚𑀸𑀢𑀺𑀬𑀸 𑀯𑀸 𑀯𑀺𑀚𑁆𑀚𑀸𑀬 𑀯𑀸 𑀲𑀻𑀮𑁂𑀦 𑀯𑀸 𑀪𑀸𑀯𑀦𑀸𑀬 𑀯𑀸 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀫𑀳𑀤𑁆𑀥𑀦𑀸 ¶ 𑀫𑀳𑀸𑀪𑁄𑀕𑀸, 𑀭𑀝𑁆𑀞𑀯𑀦𑁆𑀢𑁄𑀧𑀺 𑀔𑀢𑁆𑀢𑀺𑀬𑀸;

𑀧𑀳𑀽𑀢𑀥𑀦𑀥𑀜𑁆𑀜𑀸𑀲𑁂, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑁆𑀲𑀸;

𑀏𑀢𑁂 𑀘𑀜𑁆𑀜𑁂 𑀘 𑀚𑀸𑀢𑀺𑀬𑀸, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

‘‘𑀬𑁂 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀙𑀴𑀗𑁆𑀕𑀁 𑀩𑁆𑀭𑀳𑁆𑀫𑀘𑀺𑀦𑁆𑀢𑀺𑀢𑀁;

𑀏𑀢𑁂 𑀘𑀜𑁆𑀜𑁂 𑀘 𑀯𑀺𑀚𑁆𑀚𑀸𑀬, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸.

‘‘𑀇𑀲𑀬𑁄 𑀯𑀸𑀧𑀺 𑀬𑁂 𑀲𑀦𑁆𑀢𑀸, 𑀲𑀜𑁆𑀜𑀢𑀢𑁆𑀢𑀸 𑀢𑀧𑀲𑁆𑀲𑀺𑀦𑁄;

𑀲𑀭𑀻𑀭𑀁 𑀢𑁂𑀧𑀺 𑀓𑀸𑀮𑁂𑀦, 𑀯𑀺𑀚𑀳𑀦𑁆𑀢𑀺 𑀢𑀧𑀲𑁆𑀲𑀺𑀦𑁄.

‘‘𑀪𑀸𑀯𑀺𑀢𑀢𑁆𑀢𑀸 ¶ 𑀅𑀭𑀳𑀦𑁆𑀢𑁄, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀦𑀺𑀓𑁆𑀔𑀺𑀧𑀦𑁆𑀢𑀺 𑀇𑀫𑀁 𑀤𑁂𑀳𑀁, 𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀬𑀸’’𑀢𑀺. 𑁋

𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑁨𑁧𑁭. 𑀢𑀢𑁆𑀣 ¶ 𑀫𑀳𑀤𑁆𑀥𑀦𑀸𑀢𑀺 𑀦𑀺𑀥𑀸𑀦𑀕𑀢𑀲𑁆𑀲𑁂𑀯 𑀫𑀳𑀢𑁄 𑀥𑀦𑀲𑁆𑀲 𑀅𑀢𑁆𑀣𑀺𑀢𑀸𑀬 𑀩𑀳𑀼𑀥𑀦𑀸. 𑀫𑀳𑀸𑀪𑁄𑀕𑀸𑀢𑀺 𑀤𑁂𑀯𑀪𑁄𑀕𑀲𑀤𑀺𑀲𑀸𑀬 𑀫𑀳𑀢𑀺𑀬𑀸 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀭𑀝𑁆𑀞𑀯𑀦𑁆𑀢𑁄𑀢𑀺 𑀲𑀓𑀮𑀭𑀝𑁆𑀞𑀯𑀦𑁆𑀢𑁄. 𑀧𑀳𑀽𑀢𑀥𑀦𑀥𑀜𑁆𑀜𑀸𑀲𑁂𑀢𑀺 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀯𑀸 𑀲𑀁𑀯𑀘𑁆𑀙𑀭𑀸𑀦𑀁 𑀅𑀢𑁆𑀣𑀸𑀬 𑀦𑀺𑀤𑀳𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀲𑁆𑀲 𑀦𑀺𑀘𑁆𑀘𑀧𑀭𑀺𑀩𑁆𑀩𑀬𑀪𑀽𑀢𑀲𑁆𑀲 𑀥𑀦𑀥𑀜𑁆𑀜𑀲𑁆𑀲 𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀥𑀦𑀥𑀜𑁆𑀜𑀸. 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸𑀢𑀺 𑀢𑁂𑀧𑀺 𑀏𑀯𑀁 𑀫𑀳𑀸𑀯𑀺𑀪𑀯𑀸 𑀫𑀦𑁆𑀥𑀸𑀢𑀼𑀫𑀳𑀸𑀲𑀼𑀤𑀲𑁆𑀲𑀦𑀸𑀤𑀬𑁄 𑀔𑀢𑁆𑀢𑀺𑀬𑀸 𑀅𑀚𑀭𑀸𑀫𑀭𑀸 𑀦𑀸𑀳𑁂𑀲𑀼𑀁, 𑀅𑀜𑁆𑀜𑀤𑀢𑁆𑀣𑀼 𑀫𑀭𑀡𑀫𑀼𑀔𑀫𑁂𑀯 𑀅𑀦𑀼𑀧𑀯𑀺𑀝𑁆𑀞𑀸𑀢𑀺 𑀅𑀢𑁆𑀣𑁄.

𑁨𑁧𑁮. 𑀏𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀔𑀢𑁆𑀢𑀺𑀬𑀸𑀤𑀬𑁄. 𑀅𑀜𑁆𑀜𑁂𑀢𑀺 𑀅𑀜𑁆𑀜𑀢𑀭𑀸 𑀏𑀯𑀁𑀪𑀽𑀢𑀸 𑀅𑀫𑁆𑀩𑀝𑁆𑀞𑀸𑀤𑀬𑁄. 𑀚𑀸𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀦𑀺𑀫𑀺𑀢𑁆𑀢𑀁 𑀅𑀚𑀭𑀸𑀫𑀭𑀸 𑀦𑀸𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁨𑁧𑁯. 𑀫𑀦𑁆𑀢𑀦𑁆𑀢𑀺 𑀯𑁂𑀤𑀁. 𑀧𑀭𑀺𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀚𑁆𑀛𑀸𑀬𑀦𑁆𑀢𑀺 𑀯𑀸𑀘𑁂𑀦𑁆𑀢𑀺 𑀘. 𑀅𑀣 𑀯𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀻𑀢𑀺 𑀯𑁂𑀤𑀁 𑀅𑀦𑀼𑀧𑀭𑀺𑀯𑀢𑁆𑀢𑁂𑀦𑁆𑀢𑀸 𑀳𑁄𑀫𑀁 𑀓𑀭𑁄𑀦𑁆𑀢𑀸 𑀚𑀧𑀦𑁆𑀢𑀺. 𑀙𑀴𑀗𑁆𑀕𑀦𑁆𑀢𑀺 𑀲𑀺𑀓𑁆𑀔𑀸𑀓𑀧𑁆𑀧𑀦𑀺𑀭𑀼𑀢𑁆𑀢𑀺𑀩𑁆𑀬𑀸𑀓𑀭𑀡𑀚𑁄𑀢𑀺𑀲𑀢𑁆𑀣𑀙𑀦𑁆𑀤𑁄𑀯𑀺𑀘𑀺𑀢𑀺𑀲𑀗𑁆𑀔𑀸𑀢𑁂𑀳𑀺 𑀙𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑀁. 𑀩𑁆𑀭𑀳𑁆𑀫𑀘𑀺𑀦𑁆𑀢𑀺𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀫𑀢𑁆𑀣𑀸𑀬 𑀩𑁆𑀭𑀳𑁆𑀫𑀦𑀸 ¶ 𑀘𑀺𑀦𑁆𑀢𑀺𑀢𑀁 𑀓𑀣𑀺𑀢𑀁. 𑀯𑀺𑀚𑁆𑀚𑀸𑀬𑀸𑀢𑀺 𑀩𑁆𑀭𑀳𑁆𑀫𑀲𑀤𑀺𑀲𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀢𑁂𑀧𑀺 𑀦𑁄 𑀅𑀚𑀭𑀸𑀫𑀭𑀸𑀢𑀺 𑀅𑀢𑁆𑀣𑁄.

𑁨𑁨𑁦-𑁨𑁨𑁧. 𑀇𑀲𑀬𑁄𑀢𑀺 𑀬𑀫𑀦𑀺𑀬𑀫𑀸𑀤𑀻𑀦𑀁 𑀧𑀝𑀺𑀓𑀽𑀮𑀲𑀜𑁆𑀜𑀸𑀤𑀻𑀦𑀜𑁆𑀘 𑀏𑀲𑀦𑀝𑁆𑀞𑁂𑀦 𑀇𑀲𑀬𑁄. 𑀲𑀦𑁆𑀢𑀸𑀢𑀺 𑀓𑀸𑀬𑀯𑀸𑀘𑀸𑀳𑀺 𑀲𑀦𑁆𑀢𑀲𑀪𑀸𑀯𑀸. 𑀲𑀜𑁆𑀜𑀢𑀢𑁆𑀢𑀸𑀢𑀺 𑀭𑀸𑀕𑀸𑀤𑀻𑀦𑀁 𑀲𑀁𑀬𑀫𑁂𑀦 𑀲𑀁𑀬𑀢𑀘𑀺𑀢𑁆𑀢𑀸. 𑀓𑀸𑀬𑀢𑀧𑀦𑀲𑀗𑁆𑀔𑀸𑀢𑁄 𑀢𑀧𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀺𑀦𑁄. 𑀧𑀼𑀦 𑀢𑀧𑀲𑁆𑀲𑀺𑀦𑁄𑀢𑀺 𑀲𑀁𑀯𑀭𑀓𑀸. 𑀢𑁂𑀦 𑀏𑀯𑀁 𑀢𑀧𑀦𑀺𑀲𑁆𑀲𑀺𑀢𑀓𑀸 𑀳𑀼𑀢𑁆𑀯𑀸 𑀲𑀭𑀻𑀭𑁂𑀦 𑀘 𑀯𑀺𑀫𑁄𑀓𑁆𑀔𑀁 𑀧𑀢𑁆𑀢𑀼𑀓𑀸𑀫𑀸𑀧𑀺 𑀲𑀁𑀯𑀭𑀓𑀸 𑀲𑀭𑀻𑀭𑀁 𑀯𑀺𑀚𑀳𑀦𑁆𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀇𑀲𑀬𑁄𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀏𑀲𑀦𑀝𑁆𑀞𑁂𑀦 𑀇𑀲𑀬𑁄, 𑀢𑀤𑀢𑁆𑀣𑀁 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀯𑀽𑀧𑀲𑀫𑁂𑀦 𑀲𑀦𑁆𑀢𑀸, 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀲𑀁𑀬𑀫𑁂𑀦 𑀲𑀜𑁆𑀜𑀢𑀢𑁆𑀢𑀸, 𑀲𑀫𑁆𑀫𑀧𑁆𑀧𑀥𑀸𑀦𑀬𑁄𑀕𑀢𑁄 𑀯𑀻𑀭𑀺𑀬𑀢𑀸𑀧𑁂𑀦 𑀢𑀧𑀲𑁆𑀲𑀺𑀦𑁄, 𑀲𑀧𑁆𑀧𑀬𑁄𑀕𑀸 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀧𑀦𑁂𑀦 𑀢𑀧𑀲𑁆𑀲𑀺𑀦𑁄𑀢𑀺 ¶ 𑀬𑁄𑀚𑁂𑀢𑀩𑁆𑀩𑀁. 𑀪𑀸𑀯𑀺𑀢𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀪𑀸𑀯𑀺𑀢𑀘𑀺𑀢𑁆𑀢𑀸.

𑀏𑀯𑀁 ¶ 𑀖𑀝𑀧𑀡𑁆𑀟𑀺𑀢𑁂𑀦 𑀥𑀫𑁆𑀫𑁂 𑀓𑀣𑀺𑀢𑁂 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀧𑀕𑀢𑀲𑁄𑀓𑀲𑀮𑁆𑀮𑁄 𑀧𑀲𑀦𑁆𑀦𑀫𑀸𑀦𑀲𑁄 𑀖𑀝𑀧𑀡𑁆𑀟𑀺𑀢𑀁 𑀧𑀲𑀁𑀲𑀦𑁆𑀢𑁄 𑁋

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀝𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

‘‘𑀲𑁆𑀯𑀸𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀪𑀸𑀢𑀺𑀓.

‘‘𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀦𑀺𑀯𑀢𑁆𑀢𑀬𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀖𑀝𑁄 𑀚𑁂𑀝𑁆𑀞𑀁𑀯 𑀪𑀸𑀢𑀭𑀁.

‘‘𑀬𑀲𑁆𑀲 ¶ 𑀏𑀢𑀸𑀤𑀺𑀲𑀸 𑀳𑁄𑀦𑁆𑀢𑀺, 𑀅𑀫𑀘𑁆𑀘𑀸 𑀧𑀭𑀺𑀘𑀸𑀭𑀓𑀸;

𑀲𑀼𑀪𑀸𑀲𑀺𑀢𑁂𑀦 𑀅𑀦𑁆𑀯𑁂𑀦𑁆𑀢𑀺, 𑀖𑀝𑁄 𑀚𑁂𑀝𑁆𑀞𑀁𑀯 𑀪𑀸𑀢𑀭’’𑀦𑁆𑀢𑀺. 𑁋 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺;

𑁨𑁨𑁫. 𑀢𑀢𑁆𑀣 𑀖𑀝𑁄 𑀚𑁂𑀝𑁆𑀞𑀁𑀯 𑀪𑀸𑀢𑀭𑀦𑁆𑀢𑀺 𑀬𑀣𑀸 𑀖𑀝𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀚𑁂𑀝𑁆𑀞𑀪𑀸𑀢𑀭𑀁 𑀫𑀢𑀧𑀼𑀢𑁆𑀢𑀲𑁄𑀓𑀸𑀪𑀺𑀪𑀽𑀢𑀁 𑀅𑀢𑁆𑀢𑀦𑁄 𑀉𑀧𑀸𑀬𑀓𑁄𑀲𑀮𑁆𑀮𑁂𑀦 𑀘𑁂𑀯 𑀥𑀫𑁆𑀫𑀓𑀣𑀸𑀬 𑀘 𑀢𑀢𑁄 𑀧𑀼𑀢𑁆𑀢𑀲𑁄𑀓𑀢𑁄 𑀯𑀺𑀦𑀺𑀯𑀢𑁆𑀢𑀬𑀺, 𑀏𑀯𑀁 𑀅𑀜𑁆𑀜𑁂𑀧𑀺 𑀲𑀧𑁆𑀧𑀜𑁆𑀜𑀸 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸, 𑀢𑁂 𑀜𑀸𑀢𑀻𑀦𑀁 𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁨𑁬. 𑀬𑀲𑁆𑀲 𑀏𑀢𑀸𑀤𑀺𑀲𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀬𑁂𑀦 𑀓𑀸𑀭𑀡𑁂𑀦 𑀧𑀼𑀢𑁆𑀢𑀲𑁄𑀓𑀧𑀭𑁂𑀢𑀁 𑀭𑀸𑀚𑀸𑀦𑀁 𑀯𑀸𑀲𑀼𑀤𑁂𑀯𑀁 𑀖𑀝𑀧𑀡𑁆𑀟𑀺𑀢𑁄 𑀲𑁄𑀓𑀳𑀭𑀡𑀢𑁆𑀣𑀸𑀬 𑀲𑀼𑀪𑀸𑀲𑀺𑀢𑁂𑀦 𑀅𑀦𑁆𑀯𑁂𑀲𑀺 𑀅𑀦𑀼𑀏𑀲𑀺, 𑀬𑀲𑁆𑀲 𑀅𑀜𑁆𑀜𑀲𑁆𑀲𑀸𑀧𑀺 𑀏𑀢𑀸𑀤𑀺𑀲𑀸 𑀧𑀡𑁆𑀟𑀺𑀢𑀸 𑀅𑀫𑀘𑁆𑀘𑀸 𑀧𑀝𑀺𑀮𑀤𑁆𑀥𑀸 𑀅𑀲𑁆𑀲𑀼, 𑀢𑀲𑁆𑀲 𑀓𑀼𑀢𑁄 𑀲𑁄𑀓𑁄𑀢𑀺! 𑀲𑁂𑀲𑀕𑀸𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯𑀸𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀉𑀧𑀸𑀲𑀓, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 ¶ 𑀧𑀼𑀢𑁆𑀢𑀲𑁄𑀓𑀁 𑀳𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀓𑀡𑁆𑀳𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀦𑀧𑀸𑀮𑀲𑁂𑀝𑁆𑀞𑀺𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑁄 𑀤𑀼𑀩𑁆𑀩𑀡𑁆𑀡𑀭𑀽𑀧𑁄𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀥𑀦𑀧𑀸𑀮𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀩𑀼𑀤𑁆𑀥𑁂 𑀧𑀡𑁆𑀡𑀭𑀝𑁆𑀞𑁂 𑀏𑀭𑀓𑀘𑁆𑀙𑀦𑀕𑀭𑁂 𑀥𑀦𑀧𑀸𑀮𑀓𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀳𑁄𑀲𑀺 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀓𑀤𑀭𑀺𑀬𑁄 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄. 𑀢𑀲𑁆𑀲 𑀓𑀺𑀭𑀺𑀬𑀸 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀫𑀭𑀼𑀓𑀦𑁆𑀢𑀸𑀭𑁂 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑁄 𑀓𑀸𑀬𑁄 𑀅𑀳𑁄𑀲𑀺, 𑀲𑀫𑀼𑀝𑁆𑀞𑀺𑀢𑀘𑁆𑀙𑀯𑀺 𑀨𑀭𑀼𑀲𑁄, 𑀯𑀺𑀭𑀽𑀧𑀓𑁂𑀲𑁄, 𑀪𑀬𑀸𑀦𑀓𑁄, 𑀤𑀼𑀩𑁆𑀩𑀡𑁆𑀡𑁄 𑀅𑀢𑀺𑀯𑀺𑀬 𑀯𑀺𑀭𑀽𑀧𑁄 𑀩𑀻𑀪𑀘𑁆𑀙𑀤𑀲𑁆𑀲𑀦𑁄. 𑀲𑁄 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀪𑀢𑁆𑀢𑀲𑀺𑀢𑁆𑀣𑀁 𑀯𑀸 𑀉𑀤𑀓𑀩𑀺𑀦𑁆𑀤𑀼𑀁 𑀯𑀸 𑀅𑀮𑀪𑀦𑁆𑀢𑁄 𑀯𑀺𑀲𑀼𑀓𑁆𑀔𑀓𑀡𑁆𑀞𑁄𑀝𑁆𑀞𑀚𑀺𑀯𑁆𑀳𑁄 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀇𑀢𑁄 𑀘𑀺𑀢𑁄 𑀘 ¶ 𑀧𑀭𑀺𑀩𑁆𑀪𑀫𑀢𑀺.

𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀪𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀢𑁆𑀢𑀭𑀸𑀧𑀣𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀪𑀡𑁆𑀟𑀁 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀫𑀸𑀦𑀸 𑀲𑀸𑀬𑀦𑁆𑀳𑀲𑀫𑀬𑁂 𑀅𑀜𑁆𑀜𑀢𑀭𑀁 𑀲𑀼𑀓𑁆𑀔𑀦𑀤𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀢𑁆𑀣 𑀬𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀭𑀢𑁆𑀢𑀺𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀅𑀣 𑀲𑁄 𑀧𑁂𑀢𑁄 𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀧𑀸𑀦𑀻𑀬𑀲𑁆𑀲𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀧𑀸𑀦𑀻𑀬𑀁 𑀅𑀮𑀪𑀺𑀢𑁆𑀯𑀸 𑀯𑀺𑀕𑀢𑀸𑀲𑁄 𑀙𑀺𑀦𑁆𑀦𑀫𑀽𑀮𑁄 𑀯𑀺𑀬 𑀢𑀸𑀮𑁄 𑀙𑀺𑀦𑁆𑀦𑀧𑀸𑀤𑁄 𑀧𑀢𑀺. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑀸 𑁋

‘‘𑀦𑀕𑁆𑀕𑁄 𑀤𑀼𑀩𑁆𑀩𑀡𑁆𑀡𑀭𑀽𑀧𑁄𑀲𑀺, 𑀓𑀺𑀲𑁄 𑀥𑀫𑀦𑀺𑀲𑀦𑁆𑀣𑀢𑁄;

𑀉𑀧𑁆𑀨𑀸𑀲𑀼𑀮𑀺𑀓𑁄 𑀓𑀺𑀲𑀺𑀓𑁄, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲𑀸’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀧𑀼𑀘𑁆𑀙𑀺𑀁𑀲𑀼. 𑀢𑀢𑁄 𑀧𑁂𑀢𑁄 𑁋

‘‘𑀅𑀳𑀁 ¶ 𑀪𑀤𑀦𑁆𑀢𑁂 𑀧𑁂𑀢𑁄𑀫𑁆𑀳𑀺, 𑀤𑀼𑀕𑁆𑀕𑀢𑁄 𑀬𑀫𑀮𑁄𑀓𑀺𑀓𑁄;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄’’𑀢𑀺. 𑁋

𑀅𑀢𑁆𑀢𑀸𑀦𑀁 ¶ 𑀆𑀯𑀺𑀓𑀢𑁆𑀯𑀸 𑀧𑀼𑀦 𑀢𑁂𑀳𑀺 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄’’𑀢𑀺. 𑁋

𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀅𑀢𑀻𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀸𑀕𑀢𑀜𑁆𑀘 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀢𑁂𑀲𑀜𑁆𑀘 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

‘‘𑀦𑀕𑀭𑀁 𑀅𑀢𑁆𑀣𑀺 𑀧𑀡𑁆𑀡𑀸𑀦𑀁, 𑀏𑀭𑀓𑀘𑁆𑀙𑀦𑁆𑀢𑀺 𑀯𑀺𑀲𑁆𑀲𑀼𑀢𑀁;

𑀢𑀢𑁆𑀣 𑀲𑁂𑀝𑁆𑀞𑀺 𑀧𑀼𑀭𑁂 𑀆𑀲𑀺𑀁, 𑀥𑀦𑀧𑀸𑀮𑁄𑀢𑀺 𑀫𑀁 𑀯𑀺𑀤𑀽.

‘‘𑀅𑀲𑀻𑀢𑀺 𑀲𑀓𑀝𑀯𑀸𑀳𑀸𑀦𑀁, 𑀳𑀺𑀭𑀜𑁆𑀜𑀲𑁆𑀲 𑀅𑀳𑁄𑀲𑀺 𑀫𑁂;

𑀧𑀳𑀽𑀢𑀁 𑀫𑁂 𑀚𑀸𑀢𑀭𑀽𑀧𑀁, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.

‘‘𑀢𑀸𑀯 𑀫𑀳𑀤𑁆𑀥𑀦𑀲𑁆𑀲𑀸𑀧𑀺, 𑀦 𑀫𑁂 𑀤𑀸𑀢𑀼𑀁 𑀧𑀺𑀬𑀁 𑀅𑀳𑀼;

𑀧𑀺𑀤𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀪𑀼𑀜𑁆𑀚𑀺𑀁, 𑀫𑀸 𑀫𑀁 𑀬𑀸𑀘𑀦𑀓𑀸𑀤𑁆𑀤𑀲𑀼𑀁.

‘‘𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀘𑀸𑀲𑀺𑀁, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄;

𑀤𑀤𑀦𑁆𑀢𑀸𑀦𑀁 𑀓𑀭𑁄𑀦𑁆𑀢𑀸𑀦𑀁, 𑀯𑀸𑀭𑀬𑀺𑀲𑁆𑀲𑀁 𑀩𑀳𑀽 𑀚𑀦𑁂.

‘‘𑀯𑀺𑀧𑀸𑀓𑁄 ¶ 𑀦𑀢𑁆𑀣𑀺 𑀤𑀸𑀦𑀲𑁆𑀲, 𑀲𑀁𑀬𑀫𑀲𑁆𑀲 𑀓𑀼𑀢𑁄 𑀨𑀮𑀁;

𑀧𑁄𑀓𑁆𑀔𑀭𑀜𑁆𑀜𑁄𑀤𑀧𑀸𑀦𑀸𑀦𑀺, 𑀆𑀭𑀸𑀫𑀸𑀦𑀺 𑀘 𑀭𑁄𑀧𑀺𑀢𑁂;

𑀧𑀧𑀸𑀬𑁄 𑀘 𑀯𑀺𑀦𑀸𑀲𑁂𑀲𑀺𑀁, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘.

‘‘𑀲𑁆𑀯𑀸𑀳𑀁 𑀅𑀓𑀢𑀓𑀮𑁆𑀬𑀸𑀡𑁄, 𑀓𑀢𑀧𑀸𑀧𑁄 𑀢𑀢𑁄 𑀘𑀼𑀢𑁄;

𑀉𑀧𑀧𑀦𑁆𑀦𑁄 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑁄.

‘‘𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺, 𑀬𑀢𑁄 𑀓𑀸𑀮𑀗𑁆𑀓𑀢𑁄 𑀅𑀳𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀪𑀼𑀢𑁆𑀢𑀁 𑀯𑀸, 𑀧𑀻𑀢𑀁 𑀯𑀸 𑀧𑀦 𑀧𑀸𑀦𑀺𑀬𑀁.

‘‘𑀬𑁄 ¶ 𑀲𑀁𑀬𑀫𑁄 𑀲𑁄 𑀯𑀺𑀦𑀸𑀲𑁄, 𑀬𑁄 𑀯𑀺𑀦𑀸𑀲𑁄 𑀲𑁄 𑀲𑀁𑀬𑀫𑁄;

𑀧𑁂𑀢𑀸 𑀳𑀺 𑀓𑀺𑀭 𑀚𑀸𑀦𑀦𑁆𑀢𑀺, 𑀬𑁄 𑀲𑀁𑀬𑀫𑁄 𑀲𑁄 𑀯𑀺𑀦𑀸𑀲𑁄.

‘‘𑀅𑀳𑀁 ¶ 𑀧𑀼𑀭𑁂 𑀲𑀁𑀬𑀫𑀺𑀲𑁆𑀲𑀁, 𑀦𑀸𑀤𑀸𑀲𑀺𑀁 𑀩𑀳𑀼𑀓𑁂 𑀥𑀦𑁂;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄;

𑀲𑁆𑀯𑀸𑀳𑀁 𑀧𑀘𑁆𑀙𑀸𑀦𑀼𑀢𑀧𑁆𑀧𑀸𑀫𑀺, 𑀅𑀢𑁆𑀢𑀓𑀫𑁆𑀫𑀨𑀮𑀽𑀧𑀕𑁄.

‘‘𑀉𑀤𑁆𑀥𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺;

𑀏𑀓𑀦𑁆𑀢𑀓𑀝𑀼𑀓𑀁 𑀖𑁄𑀭𑀁, 𑀦𑀺𑀭𑀬𑀁 𑀧𑀧𑀢𑀺𑀲𑁆𑀲𑀳𑀁.

‘‘𑀘𑀢𑀼𑀓𑁆𑀓𑀡𑁆𑀡𑀁 𑀘𑀢𑀼𑀤𑁆𑀯𑀸𑀭𑀁, 𑀯𑀺𑀪𑀢𑁆𑀢𑀁 𑀪𑀸𑀕𑀲𑁄 𑀫𑀺𑀢𑀁;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

‘‘𑀢𑀢𑁆𑀣𑀸𑀳𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀤𑀼𑀓𑁆𑀔𑀁 𑀯𑁂𑀤𑀺𑀲𑁆𑀲 𑀯𑁂𑀤𑀦𑀁;

𑀨𑀮𑀁 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲𑀁.

‘‘𑀢𑀁 𑀯𑀸 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 𑀢𑀁 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀣 𑀓𑀭𑁄𑀣 𑀯𑀸;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁆𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑀁.

‘‘𑀫𑀢𑁆𑀢𑁂𑀬𑁆𑀬𑀸 𑀳𑁄𑀣 𑀧𑁂𑀢𑁆𑀢𑁂𑀬𑁆𑀬𑀸, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸;

𑀲𑀸𑀫𑀜𑁆𑀜𑀸 𑀳𑁄𑀣 𑀩𑁆𑀭𑀳𑁆𑀫𑀜𑁆𑀜𑀸, 𑀏𑀯𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀣𑀸’’𑀢𑀺. 𑁋

𑁨𑁩𑁦-𑁨𑁩𑁧. 𑀢𑀢𑁆𑀣 ¶ 𑀧𑀡𑁆𑀡𑀸𑀦𑀦𑁆𑀢𑀺 𑀧𑀡𑁆𑀡𑀸𑀦𑀸𑀫𑀭𑀝𑁆𑀞𑀲𑁆𑀲 𑀏𑀯𑀁𑀦𑀸𑀫𑀓𑀸𑀦𑀁 𑀭𑀸𑀚𑀽𑀦𑀁. 𑀏𑀭𑀓𑀘𑁆𑀙𑀦𑁆𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀦𑀸𑀫𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂. 𑀧𑀼𑀭𑁂𑀢𑀺 𑀧𑀼𑀩𑁆𑀩𑁂 𑀅𑀢𑀻𑀢𑀢𑁆𑀢𑀪𑀸𑀯𑁂 ¶ . 𑀥𑀦𑀧𑀸𑀮𑁄𑀢𑀺 𑀫𑀁 𑀯𑀺𑀤𑀽𑀢𑀺 ‘‘𑀥𑀦𑀧𑀸𑀮𑀲𑁂𑀝𑁆𑀞𑀻’’𑀢𑀺 𑀫𑀁 𑀚𑀸𑀦𑀦𑁆𑀢𑀺. 𑀢𑀬𑀺𑀤𑀁 𑀦𑀸𑀫𑀁 𑀢𑀤𑀸 𑀫𑀬𑁆𑀳𑀁 𑀅𑀢𑁆𑀣𑀸𑀦𑀼𑀕𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀻𑀢𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀲𑀻𑀢𑀺 𑀲𑀓𑀝𑀯𑀸𑀳𑀸𑀦𑀦𑁆𑀢𑀺 𑀯𑀻𑀲𑀢𑀺𑀔𑀸𑀭𑀺𑀓𑁄 𑀯𑀸𑀳𑁄, 𑀬𑁄 𑀲𑀓𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀁 𑀲𑀓𑀝𑀯𑀸𑀳𑀸𑀦𑀁 𑀅𑀲𑀻𑀢𑀺 𑀳𑀺𑀭𑀜𑁆𑀜𑀲𑁆𑀲 𑀢𑀣𑀸 𑀓𑀳𑀸𑀧𑀡𑀲𑁆𑀲 𑀘 𑀫𑁂 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀧𑀳𑀽𑀢𑀁 𑀫𑁂 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀫𑁆𑀧𑀺 𑀧𑀳𑀽𑀢𑀁 𑀅𑀦𑁂𑀓𑀪𑀸𑀭𑀧𑀭𑀺𑀫𑀸𑀡𑀁 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁨-𑁨𑁩𑁩. 𑀦 ¶ 𑀫𑁂 𑀤𑀸𑀢𑀼𑀁 𑀧𑀺𑀬𑀁 𑀅𑀳𑀽𑀢𑀺 𑀤𑀸𑀦𑀁 𑀤𑀸𑀢𑀼𑀁 𑀫𑀬𑁆𑀳𑀁 𑀧𑀺𑀬𑀁 𑀦𑀸𑀳𑁄𑀲𑀺. 𑀫𑀸 𑀫𑀁 𑀬𑀸𑀘𑀦𑀓𑀸𑀤𑁆𑀤𑀲𑀼𑀦𑁆𑀢𑀺 ‘‘𑀬𑀸𑀘𑀓𑀸 𑀫𑀸 𑀫𑀁 𑀧𑀲𑁆𑀲𑀺𑀁𑀲𑀽’’𑀢𑀺 𑀧𑀺𑀤𑀳𑀺𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑀁 𑀪𑀼𑀜𑁆𑀚𑀸𑀫𑀺. 𑀓𑀤𑀭𑀺𑀬𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀻. 𑀧𑀭𑀺𑀪𑀸𑀲𑀓𑁄𑀢𑀺 𑀤𑀸𑀦𑀁 𑀤𑁂𑀦𑁆𑀢𑁂 𑀤𑀺𑀲𑁆𑀯𑀸 𑀪𑀬𑁂𑀦 𑀲𑀦𑁆𑀢𑀚𑁆𑀚𑀓𑁄. 𑀤𑀤𑀦𑁆𑀢𑀸𑀦𑀁 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀤𑀸𑀦𑀸𑀦𑀺 𑀤𑀤𑀦𑁆𑀢𑁂 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁂. 𑀩𑀳𑀽 𑀚𑀦𑁂𑀢𑀺 𑀩𑀳𑀽 𑀲𑀢𑁆𑀢𑁂. 𑀤𑀤𑀦𑁆𑀢𑀸𑀦𑀁 𑀯𑀸 𑀓𑀭𑁄𑀦𑁆𑀢𑀸𑀦𑀁 𑀯𑀸 𑀲𑀫𑀼𑀤𑀸𑀬𑀪𑀽𑀢𑀁 𑀩𑀳𑀼𑀁 𑀚𑀦𑀁 𑀧𑀼𑀜𑁆𑀜𑀓𑀫𑁆𑀫𑀢𑁄 𑀯𑀸𑀭𑀬𑀺𑀲𑁆𑀲𑀁 𑀦𑀺𑀯𑀸𑀭𑁂𑀲𑀺𑀁.

𑁨𑁩𑁪-𑁨𑁩𑁬. 𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲𑀸𑀢𑀺𑀆𑀤𑀺 𑀤𑀸𑀦𑀸𑀤𑀻𑀦𑀁 𑀦𑀺𑀯𑀸𑀭𑀡𑁂 𑀓𑀸𑀭𑀡𑀤𑀲𑁆𑀲𑀦𑀁. 𑀢𑀢𑁆𑀣 𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲𑀸𑀢𑀺 𑀤𑀸𑀦𑀓𑀫𑁆𑀫𑀲𑁆𑀲 𑀨𑀮𑀁 𑀦𑀸𑀫 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀼𑀜𑁆𑀜𑀁 𑀧𑀼𑀜𑁆𑀜𑀦𑁆𑀢𑀺 𑀥𑀦𑀯𑀺𑀦𑀸𑀲𑁄 𑀏𑀯𑀸𑀢𑀺 𑀤𑀻𑀧𑁂𑀢𑀺. 𑀲𑀁𑀬𑀫𑀲𑁆𑀲𑀸𑀢𑀺 𑀲𑀻𑀮𑀲𑀁𑀬𑀫𑀲𑁆𑀲. 𑀓𑀼𑀢𑁄 𑀨𑀮𑀦𑁆𑀢𑀺 𑀓𑀼𑀢𑁄 𑀦𑀸𑀫 𑀨𑀮𑀁 𑀮𑀩𑁆𑀪𑀢𑀺, 𑀦𑀺𑀭𑀢𑁆𑀣𑀓𑀫𑁂𑀯 𑀲𑀻𑀮𑀭𑀓𑁆𑀔𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀭𑀸𑀫𑀸𑀦𑀻𑀢𑀺 𑀆𑀭𑀸𑀫𑀽𑀧𑀯𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀧𑀸𑀬𑁄𑀢𑀺 𑀧𑀸𑀦𑀻𑀬𑀲𑀸𑀮𑀸. 𑀤𑀼𑀕𑁆𑀕𑁂𑀢𑀺 𑀉𑀤𑀓𑀘𑀺𑀓𑁆𑀔𑀮𑁆𑀮𑀸𑀦𑀁 𑀯𑀲𑁂𑀦 𑀤𑀼𑀕𑁆𑀕𑀫𑀝𑁆𑀞𑀸𑀦𑀸𑀦𑀺. 𑀲𑀗𑁆𑀓𑀫𑀦𑀸𑀦𑀻𑀢𑀺 𑀲𑁂𑀢𑀼𑀬𑁄. 𑀢𑀢𑁄 𑀘𑀼𑀢𑁄𑀢𑀺 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑁄. 𑀧𑀜𑁆𑀘𑀧𑀡𑁆𑀡𑀸𑀲𑀸𑀢𑀺 𑀧𑀜𑁆𑀘𑀧𑀜𑁆𑀜𑀸𑀲. 𑀬𑀢𑁄 𑀓𑀸𑀮𑀗𑁆𑀓𑀢𑁄 𑀅𑀳𑀦𑁆𑀢𑀺 𑀬𑀤𑀸 𑀓𑀸𑀮𑀓𑀢𑀸 𑀅𑀳𑀁, 𑀢𑀢𑁄 𑀧𑀝𑁆𑀞𑀸𑀬. 𑀦𑀸𑀪𑀺𑀚𑀸𑀦𑀸𑀫𑀻𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀪𑀼𑀢𑁆𑀢𑀁 𑀯𑀸 𑀧𑀻𑀢𑀁 𑀯𑀸 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀫𑀺.

𑁨𑁩𑁭-𑁩𑁮. 𑀬𑁄 𑀲𑀁𑀬𑀫𑁄 𑀲𑁄 𑀯𑀺𑀦𑀸𑀲𑁄𑀢𑀺 𑀮𑁄𑀪𑀸𑀤𑀺𑀯𑀲𑁂𑀦 𑀬𑀁 𑀲𑀁𑀬𑀫𑀦𑀁 𑀓𑀲𑁆𑀲𑀘𑀺 𑀅𑀤𑀸𑀦𑀁, 𑀲𑁄 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 ¶ 𑀯𑀺𑀦𑀸𑀲𑁄 𑀦𑀸𑀫 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀧𑁂𑀢𑀸𑀦𑀁 𑀫𑀳𑀸𑀩𑁆𑀬𑀲𑀦𑀲𑁆𑀲 𑀳𑁂𑀢𑀼𑀪𑀸𑀯𑀢𑁄. ‘‘𑀬𑁄 𑀯𑀺𑀦𑀸𑀲𑁄 𑀲𑁄 𑀲𑀁𑀬𑀫𑁄’’𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀦𑁆𑀢𑀺𑀓𑀪𑀸𑀯𑀁 𑀯𑀤𑀢𑀺. 𑀧𑁂𑀢𑀸 𑀳𑀺 𑀓𑀺𑀭 𑀚𑀸𑀦𑀦𑁆𑀢𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑁂. ‘‘𑀲𑀁𑀬𑀫𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑀭𑀺𑀘𑁆𑀘𑀸𑀕𑁄 𑀯𑀺𑀦𑀸𑀲𑀳𑁂𑀢𑀽’’𑀢𑀺 𑀇𑀫𑀫𑀢𑁆𑀣𑀁 𑀧𑁂𑀢𑀸 𑀏𑀯 𑀓𑀺𑀭 𑀚𑀸𑀦𑀦𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀼𑀬𑁆𑀬𑀫𑀸𑀦𑀢𑁆𑀢𑀸, 𑀦 𑀫𑀦𑀼𑀲𑁆𑀲𑀸𑀢𑀺. 𑀦𑀬𑀺𑀤𑀁 𑀬𑀼𑀢𑁆𑀢𑀁 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀧𑁂𑀢𑀸𑀦𑀁 𑀯𑀺𑀬 𑀔𑀼𑀧𑁆𑀧𑀺𑀧𑀸𑀲𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀸𑀦𑀁 𑀤𑀺𑀲𑁆𑀲𑀫𑀸𑀦𑀢𑁆𑀢𑀸. 𑀧𑁂𑀢𑀸 𑀧𑀦 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀢𑀓𑀫𑁆𑀫𑀲𑁆𑀲 𑀧𑀸𑀓𑀝𑀪𑀸𑀯𑀢𑁄 𑀢𑀫𑀢𑁆𑀣𑀁 𑀲𑀼𑀝𑁆𑀞𑀼𑀢𑀭𑀁 𑀚𑀸𑀦𑀦𑁆𑀢𑀺. 𑀢𑁂𑀦𑀸𑀳 ¶ 𑁋 ‘‘𑀅𑀳𑀁 𑀧𑀼𑀭𑁂 𑀲𑀁𑀬𑀫𑀺𑀲𑁆𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀲𑀁𑀬𑀫𑀺𑀲𑁆𑀲𑀦𑁆𑀢𑀺 𑀲𑀬𑀫𑁆𑀧𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀢𑁄 𑀲𑀁𑀬𑀫𑀦𑀁 𑀲𑀗𑁆𑀓𑁄𑀘𑀁 𑀅𑀓𑀸𑀲𑀺𑀁. 𑀩𑀳𑀼𑀓𑁂 𑀥𑀦𑁂𑀢𑀺 𑀫𑀳𑀦𑁆𑀢𑁂 𑀥𑀦𑁂 𑀯𑀺𑀚𑁆𑀚𑀫𑀸𑀦𑁂.

𑁨𑁪𑁩. 𑀢𑀦𑁆𑀢𑀺 ¶ 𑀢𑀲𑁆𑀫𑀸. 𑀯𑁄𑀢𑀺 𑀢𑀼𑀫𑁆𑀳𑁂. 𑀪𑀤𑁆𑀤𑀁 𑀯𑁄𑀢𑀺 𑀪𑀤𑁆𑀤𑀁 𑀓𑀮𑁆𑀬𑀸𑀡𑀁 𑀲𑀼𑀦𑁆𑀤𑀭𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀽𑀢𑀺 𑀯𑀘𑀦𑀲𑁂𑀲𑁄. 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸𑀢𑀺 𑀬𑀸𑀯𑀦𑁆𑀢𑁄 𑀬𑀸𑀯𑀢𑀓𑀸 𑀏𑀢𑁆𑀣 𑀲𑀫𑀸𑀕𑀢𑀸, 𑀢𑁂 𑀲𑀩𑁆𑀩𑁂 𑀫𑀫 𑀯𑀘𑀦𑀁 𑀲𑀼𑀡𑀸𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀯𑀻𑀢𑀺 𑀧𑀓𑀸𑀲𑀦𑀁 𑀧𑀭𑁂𑀲𑀁 𑀧𑀸𑀓𑀝𑀯𑀲𑁂𑀦. 𑀭𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀅𑀧𑀸𑀓𑀝𑀯𑀲𑁂𑀦. 𑀆𑀯𑀺 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀫𑀼𑀲𑀸𑀯𑀸𑀤𑀸𑀤𑀺𑀓𑀸𑀬𑀯𑀘𑀻𑀧𑀬𑁄𑀕𑀯𑀲𑁂𑀦, 𑀬𑀤𑀺 𑀯𑀸 𑀭𑀳𑁄 𑀅𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀧𑀸𑀧𑀓𑀁 𑀮𑀸𑀫𑀓𑀁 𑀅𑀓𑀼𑀲𑀮𑀓𑀫𑁆𑀫𑀁 𑀫𑀸𑀓𑀢𑁆𑀣 𑀫𑀸 𑀓𑀭𑀺𑀢𑁆𑀣.

𑁨𑁪𑁪. 𑀲𑀘𑁂 𑀢𑀁 𑀧𑀸𑀧𑀓𑀁 𑀓𑀫𑁆𑀫𑀦𑁆𑀢𑀺 𑀅𑀣 𑀧𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀆𑀬𑀢𑀺𑀁 𑀓𑀭𑀺𑀲𑁆𑀲𑀣, 𑀏𑀢𑀭𑀳𑀺 𑀯𑀸 𑀓𑀭𑁄𑀣, 𑀦𑀺𑀭𑀬𑀸𑀤𑀻𑀲𑀼 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀘 𑀅𑀧𑁆𑀧𑀸𑀬𑀼𑀓𑀢𑀸𑀤𑀺𑀯𑀲𑁂𑀦 𑀢𑀲𑁆𑀲 𑀨𑀮𑀪𑀽𑀢𑀸 𑀤𑀼𑀓𑁆𑀔𑀢𑁄 𑀧𑀫𑀼𑀢𑁆𑀢𑀺 𑀧𑀫𑁄𑀓𑁆𑀔𑁄 𑀦𑀸𑀫 𑀦𑀢𑁆𑀣𑀺. 𑀉𑀧𑁆𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀫𑁄𑀓𑁆𑀔𑁄 𑀦𑀢𑁆𑀣𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀉𑀧𑁂𑀘𑁆𑀘𑀸’’𑀢𑀺𑀧𑀺 𑀧𑀸𑀴𑀺, 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀧𑀮𑀸𑀬𑀦𑁆𑀢𑁂 𑀢𑀼𑀫𑁆𑀳𑁂 𑀅𑀦𑀼𑀩𑀦𑁆𑀥𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀉𑀧𑁂𑀘𑁆𑀘 𑀲𑀜𑁆𑀘𑀺𑀘𑁆𑀘 𑀧𑀮𑀸𑀬𑀦𑁆𑀢𑀸𑀦𑀫𑁆𑀧𑀺 ¶ 𑀢𑀼𑀫𑁆𑀳𑀸𑀓𑀁 𑀢𑀢𑁄 𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀕𑀢𑀺𑀓𑀸𑀮𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀧𑀦 𑀲𑀢𑀺 𑀯𑀺𑀧𑀘𑁆𑀘𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑁋

‘‘𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸’’𑀢𑀺. (𑀥. 𑀧. 𑁧𑁨𑁭; 𑀫𑀺. 𑀧. 𑁪.𑁨.𑁪) 𑁋

𑁨𑁪𑁫. 𑀫𑀢𑁆𑀢𑁂𑀬𑁆𑀬𑀸𑀢𑀺 𑀫𑀸𑀢𑀼𑀳𑀺𑀢𑀸. 𑀳𑁄𑀣𑀸𑀢𑀺 𑀢𑁂𑀲𑀁 𑀉𑀧𑀝𑁆𑀞𑀸𑀦𑀸𑀤𑀻𑀦𑀺 𑀓𑀭𑁄𑀣. 𑀢𑀣𑀸 𑀧𑁂𑀢𑁆𑀢𑁂𑀬𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸𑀢𑀺 𑀓𑀼𑀮𑁂 𑀚𑁂𑀝𑁆𑀞𑀓𑀸𑀦𑀁 𑀅𑀧𑀘𑀸𑀬𑀦𑀓𑀭𑀸. 𑀲𑀸𑀫𑀜𑁆𑀜𑀸𑀢𑀺 𑀲𑀫𑀡𑀧𑀽𑀚𑀓𑀸. 𑀢𑀣𑀸 𑀩𑁆𑀭𑀳𑁆𑀫𑀜𑁆𑀜𑀸𑀢𑀺 𑀩𑀸𑀳𑀺𑀢𑀧𑀸𑀧𑀧𑀽𑀚𑀓𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀣𑀸𑀢𑀺 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀦𑀬𑁂𑀦 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀣𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀔𑀮𑁆𑀮𑀸𑀝𑀺𑀬𑀧𑁂𑀢𑀯𑀢𑁆𑀣𑀼𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑁂 ¶ ¶ 𑀯𑀸𑀡𑀺𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑀸 𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑀸 𑀪𑀸𑀚𑀦𑁂𑀳𑀺 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀢𑀁 𑀲𑀬𑀸𑀧𑁂𑀢𑁆𑀯𑀸 𑀫𑀼𑀔𑁂 𑀆𑀲𑀺𑀜𑁆𑀘𑀺𑀁𑀲𑀼. 𑀢𑀢𑁄 𑀫𑀳𑀸𑀚𑀦𑁂𑀦 𑀩𑀳𑀼𑀯𑁂𑀮𑀁 𑀆𑀲𑀺𑀢𑁆𑀢𑀁 𑀉𑀤𑀓𑀁 𑀢𑀲𑁆𑀲 𑀧𑁂𑀢𑀲𑁆𑀲 𑀧𑀸𑀧𑀩𑀮𑁂𑀦 𑀅𑀥𑁄𑀕𑀴𑀁 𑀦 𑀑𑀢𑀺𑀡𑁆𑀡𑀁, 𑀓𑀼𑀢𑁄 𑀧𑀺𑀧𑀸𑀲𑀁 𑀧𑀝𑀺𑀯𑀺𑀦𑁂𑀲𑁆𑀲𑀢𑀺. 𑀢𑁂 𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀅𑀧𑀺 𑀢𑁂 𑀓𑀸𑀘𑀺 𑀅𑀲𑁆𑀲𑀸𑀲𑀫𑀢𑁆𑀢𑀸 𑀮𑀤𑁆𑀥𑀸’’𑀢𑀺. 𑀲𑁄 𑀆𑀳 𑁋 ‘‘𑀬𑀤𑀺 𑀫𑁂 𑀏𑀢𑁆𑀢𑀓𑁂𑀳𑀺 𑀚𑀦𑁂𑀳𑀺 𑀏𑀢𑁆𑀢𑀓𑀁 𑀯𑁂𑀮𑀁 𑀆𑀲𑀺𑀜𑁆𑀘𑀫𑀸𑀦𑀁 𑀉𑀤𑀓𑀁 𑀏𑀓𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀧𑀭𑀕𑀴𑀁 𑀧𑀯𑀺𑀝𑁆𑀞𑀁, 𑀇𑀢𑁄 𑀧𑁂𑀢𑀬𑁄𑀦𑀺𑀢𑁄 𑀫𑁄𑀓𑁆𑀔𑁄 𑀫𑀸 𑀳𑁄𑀢𑀽’’𑀢𑀺. 𑀅𑀣 𑀢𑁂 𑀯𑀸𑀡𑀺𑀚𑀸 𑀢𑀁 𑀲𑀼𑀢𑁆𑀯𑀸 𑀅𑀢𑀺𑀯𑀺𑀬 𑀲𑀁𑀯𑁂𑀕𑀚𑀸𑀢𑀸 ‘‘𑀅𑀢𑁆𑀣𑀺 𑀧𑀦 𑀓𑁄𑀘𑀺 𑀉𑀧𑀸𑀬𑁄 𑀧𑀺𑀧𑀸𑀲𑀸𑀯𑀽𑀧𑀲𑀫𑀸𑀬𑀸’’𑀢𑀺 ¶ 𑀆𑀳𑀁𑀲𑀼. 𑀲𑁄 𑀆𑀳 𑁋 ‘‘𑀇𑀫𑀲𑁆𑀫𑀺𑀁 𑀧𑀸𑀧𑀓𑀫𑁆𑀫𑁂 𑀔𑀻𑀡𑁂 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀸𑀦𑀁 𑀯𑀸 𑀤𑀸𑀦𑁂 𑀤𑀺𑀦𑁆𑀦𑁂 𑀫𑀫 𑀤𑀸𑀦𑀫𑀼𑀤𑁆𑀤𑀺𑀲𑀺𑀲𑁆𑀲𑀢𑀺, 𑀅𑀳𑀁 𑀇𑀢𑁄 𑀧𑁂𑀢𑀢𑁆𑀢𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀯𑀸𑀡𑀺𑀚𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀲𑀭𑀡𑀸𑀦𑀺 𑀲𑀻𑀮𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀢𑀲𑁆𑀲 𑀧𑁂𑀢𑀲𑁆𑀲 𑀤𑀓𑁆𑀔𑀺𑀡𑀁 𑀆𑀤𑀺𑀲𑀺𑀁𑀲𑀼. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑁄 𑀘 𑀮𑁄𑀪𑀸𑀤𑀺𑀫𑀘𑁆𑀙𑁂𑀭𑀫𑀮𑀁 𑀧𑀳𑀸𑀬 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀥𑀦𑀧𑀸𑀮𑀲𑁂𑀝𑁆𑀞𑀺𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀘𑀽𑀴𑀲𑁂𑀝𑁆𑀞𑀺𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑁄 𑀓𑀺𑀲𑁄 𑀧𑀩𑁆𑀩𑀚𑀺𑀢𑁄𑀲𑀺, 𑀪𑀦𑁆𑀢𑁂𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀘𑀽𑀴𑀲𑁂𑀝𑁆𑀞𑀺𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀏𑀓𑁄 𑀕𑀳𑀧𑀢𑀺 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀫𑀘𑁆𑀙𑀭𑀻 𑀓𑀤𑀭𑀺𑀬𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀦𑀸𑀤𑀭𑁄 𑀘𑀽𑀴𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀓𑀸𑀬𑁄 𑀅𑀧𑀕𑀢𑀫𑀁𑀲𑀮𑁄𑀳𑀺𑀢𑁄 𑀅𑀝𑁆𑀞𑀺𑀦𑁆𑀳𑀸𑀭𑀼𑀘𑀫𑁆𑀫𑀫𑀢𑁆𑀢𑁄 𑀫𑀼𑀡𑁆𑀟𑁄 𑀅𑀧𑁂𑀢𑀯𑀢𑁆𑀣𑁄 𑀅𑀳𑁄𑀲𑀺. 𑀥𑀻𑀢𑀸 𑀧𑀦𑀲𑁆𑀲 𑀅𑀦𑀼𑀮𑀸 𑀅𑀦𑁆𑀥𑀓𑀯𑀺𑀦𑁆𑀤𑁂 𑀲𑀸𑀫𑀺𑀓𑀲𑁆𑀲 𑀕𑁂𑀳𑁂 𑀯𑀲𑀦𑁆𑀢𑀻 𑀧𑀺𑀢𑀭𑀁 𑀉𑀤𑁆𑀤𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑁂 𑀪𑁄𑀚𑁂𑀢𑀼𑀓𑀸𑀫𑀸 𑀢𑀡𑁆𑀟𑀼𑀮𑀸𑀤𑀻𑀦𑀺 𑀤𑀸𑀦𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀲𑀺. 𑀢𑀁 𑀜𑀢𑁆𑀯𑀸 𑀧𑁂𑀢𑁄 𑀆𑀲𑀸𑀬 𑀆𑀓𑀸𑀲𑁂𑀦 𑀢𑀢𑁆𑀣 𑀕𑀘𑁆𑀙𑀦𑁆𑀢𑁄 𑀭𑀸𑀚𑀕𑀳𑀁 𑀲𑀫𑁆𑀧𑀸𑀧𑀼𑀡𑀺. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀤𑁂𑀯𑀤𑀢𑁆𑀢𑁂𑀦 ¶ 𑀉𑀬𑁆𑀬𑁄𑀚𑀺𑀢𑁄 𑀧𑀺𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀢𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀤𑀼𑀲𑁆𑀲𑀼𑀧𑀺𑀦𑁂𑀦 𑀘 𑀦𑀺𑀤𑁆𑀤𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀘𑀗𑁆𑀓𑀫𑀦𑁆𑀢𑁄 𑀢𑀁 𑀧𑁂𑀢𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀧𑀼𑀘𑁆𑀙𑀺 𑁋

‘‘𑀦𑀕𑁆𑀕𑁄 ¶ 𑀓𑀺𑀲𑁄 𑀧𑀩𑁆𑀩𑀚𑀺𑀢𑁄𑀲𑀺 𑀪𑀦𑁆𑀢𑁂, 𑀭𑀢𑁆𑀢𑀺𑀁 𑀓𑀼𑀳𑀺𑀁 𑀕𑀘𑁆𑀙𑀲𑀺 𑀓𑀺𑀲𑁆𑀲𑀳𑁂𑀢𑀼;

𑀆𑀘𑀺𑀓𑁆𑀔 𑀫𑁂 𑀢𑀁 𑀅𑀧𑀺 𑀲𑀓𑁆𑀓𑀼𑀡𑁂𑀫𑀼, 𑀲𑀩𑁆𑀩𑁂𑀦 𑀯𑀺𑀢𑁆𑀢𑀁 𑀧𑀝𑀺𑀧𑀸𑀤𑀬𑁂 𑀢𑀼𑀯’’𑀦𑁆𑀢𑀺.

𑀢𑀢𑁆𑀣 ¶ 𑀧𑀩𑁆𑀩𑀚𑀺𑀢𑁄𑀢𑀺 𑀲𑀫𑀡𑁄. 𑀭𑀸𑀚𑀸 𑀓𑀺𑀭 𑀢𑀁 𑀦𑀕𑁆𑀕𑀢𑁆𑀢𑀸 𑀫𑀼𑀡𑁆𑀟𑀢𑁆𑀢𑀸 𑀘 ‘‘𑀦𑀕𑁆𑀕𑁄 𑀲𑀫𑀡𑁄 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 ‘‘𑀦𑀕𑁆𑀕𑁄 𑀓𑀺𑀲𑁄 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺𑀆𑀤𑀺𑀫𑀸𑀳. 𑀓𑀺𑀲𑁆𑀲𑀳𑁂𑀢𑀽𑀢𑀺 𑀓𑀺𑀦𑁆𑀦𑀺𑀫𑀺𑀢𑁆𑀢𑀁. 𑀲𑀩𑁆𑀩𑁂𑀦 𑀯𑀺𑀢𑁆𑀢𑀁 𑀧𑀝𑀺𑀧𑀸𑀤𑀬𑁂 𑀢𑀼𑀯𑀦𑁆𑀢𑀺 𑀯𑀺𑀢𑁆𑀢𑀺𑀬𑀸 𑀉𑀧𑀓𑀭𑀡𑀪𑀽𑀢𑀁 𑀯𑀺𑀢𑁆𑀢𑀁 𑀲𑀩𑁆𑀩𑁂𑀦 𑀪𑁄𑀕𑁂𑀦 𑀢𑀼𑀬𑁆𑀳𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁, 𑀲𑀩𑁆𑀩𑁂𑀦 𑀯𑀸 𑀉𑀲𑁆𑀲𑀸𑀳𑁂𑀦 𑀧𑀝𑀺𑀧𑀸𑀤𑁂𑀬𑁆𑀬𑀁 𑀲𑀫𑁆𑀧𑀸𑀤𑁂𑀬𑁆𑀬𑀁. 𑀢𑀣𑀸 𑀓𑀸𑀢𑀼𑀁 𑀫𑀬𑀁 𑀅𑀧𑁆𑀧𑁂𑀯 𑀦𑀸𑀫 𑀲𑀓𑁆𑀓𑀼𑀡𑁂𑀬𑁆𑀬𑀸𑀫, 𑀢𑀲𑁆𑀫𑀸 𑀆𑀘𑀺𑀓𑁆𑀔 𑀫𑁂 𑀢𑀁, 𑀏𑀢𑀁 𑀢𑀯 𑀆𑀕𑀫𑀦𑀓𑀸𑀭𑀡𑀁 𑀫𑀬𑁆𑀳𑀁 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀧𑁂𑀢𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀓𑀣𑁂𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀩𑀸𑀭𑀸𑀡𑀲𑀻 𑀦𑀕𑀭𑀁 𑀤𑀽𑀭𑀖𑀼𑀝𑁆𑀞𑀁, 𑀢𑀢𑁆𑀣𑀸𑀳𑀁 𑀕𑀳𑀧𑀢𑀺 𑀅𑀟𑁆𑀠𑀓𑁄 𑀅𑀳𑀼 𑀤𑀻𑀦𑁄;

𑀅𑀤𑀸𑀢𑀸 𑀕𑁂𑀥𑀺𑀢𑀫𑀦𑁄 𑀆𑀫𑀺𑀲𑀲𑁆𑀫𑀺𑀁, 𑀤𑀼𑀲𑁆𑀲𑀻𑀮𑁆𑀬𑁂𑀦 𑀬𑀫𑀯𑀺𑀲𑀬𑀫𑁆𑀳𑀺 𑀧𑀢𑁆𑀢𑁄.

‘‘𑀲𑁄 𑀲𑀽𑀘𑀺𑀓𑀸𑀬 𑀓𑀺𑀮𑀫𑀺𑀢𑁄 𑀢𑁂𑀳𑀺,

𑀢𑁂𑀦𑁂𑀯 𑀜𑀸𑀢𑀻𑀲𑀼 𑀬𑀸𑀫𑀺 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼;

𑀅𑀤𑀸𑀦𑀲𑀻𑀮𑀸 𑀦 𑀘 𑀲𑀤𑁆𑀤𑀳𑀦𑁆𑀢𑀺,

‘𑀤𑀸𑀦𑀨𑀮𑀁 𑀳𑁄𑀢𑀺 𑀧𑀭𑀫𑁆𑀳𑀺 𑀮𑁄𑀓𑁂’.

‘‘𑀥𑀻𑀢𑀸 𑀘 𑀫𑀬𑁆𑀳𑀁 𑀮𑀧𑀢𑁂 𑀅𑀪𑀺𑀓𑁆𑀔𑀡𑀁, 𑀤𑀲𑁆𑀲𑀸𑀫𑀺 𑀤𑀸𑀦𑀁 𑀧𑀺𑀢𑀽𑀦𑀁 𑀧𑀺𑀢𑀸𑀫𑀳𑀸𑀦𑀁;

𑀢𑀫𑀼𑀧𑀓𑁆𑀔𑀝𑀁 ¶ 𑀧𑀭𑀺𑀯𑀺𑀲𑀬𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸, 𑀬𑀸𑀫𑀺 𑀅𑀳𑀁 𑀅𑀦𑁆𑀥𑀓𑀯𑀺𑀦𑁆𑀤𑀁 𑀪𑀼𑀢𑁆𑀢𑀼’’𑀦𑁆𑀢𑀺.

𑁨𑁪𑁭. 𑀢𑀢𑁆𑀣 ¶ 𑀤𑀽𑀭𑀖𑀼𑀝𑁆𑀞𑀦𑁆𑀢𑀺 𑀤𑀽𑀭𑀢𑁄 𑀏𑀯 𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦 𑀖𑁄𑀲𑀺𑀢𑀁, 𑀲𑀩𑁆𑀩𑀢𑁆𑀣 𑀯𑀺𑀲𑁆𑀲𑀼𑀢𑀁 𑀧𑀸𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀅𑀟𑁆𑀠𑀓𑁄𑀢𑀺 𑀅𑀟𑁆𑀠𑁄 𑀫𑀳𑀸𑀯𑀺𑀪𑀯𑁄. 𑀤𑀻𑀦𑁄𑀢𑀺 𑀦𑀺𑀳𑀻𑀦𑀘𑀺𑀢𑁆𑀢𑁄 𑀅𑀤𑀸𑀦𑀚𑁆𑀛𑀸𑀲𑀬𑁄. 𑀢𑁂𑀦𑀸𑀳 ‘‘𑀅𑀤𑀸𑀢𑀸’’𑀢𑀺. 𑀕𑁂𑀥𑀺𑀢𑀫𑀦𑁄 𑀆𑀫𑀺𑀲𑀲𑁆𑀫𑀺𑀦𑁆𑀢𑀺 𑀓𑀸𑀫𑀸𑀫𑀺𑀲𑁂 𑀮𑀕𑁆𑀕𑀘𑀺𑀢𑁆𑀢𑁄 𑀕𑁂𑀥𑀁 𑀆𑀧𑀦𑁆𑀦𑁄. 𑀤𑀼𑀲𑁆𑀲𑀻𑀮𑁆𑀬𑁂𑀦 𑀬𑀫𑀯𑀺𑀲𑀬𑀫𑁆𑀳𑀺 𑀧𑀢𑁆𑀢𑁄𑀢𑀺 𑀅𑀢𑁆𑀢𑀦𑀸 𑀓𑀢𑁂𑀦 𑀤𑀼𑀲𑁆𑀲𑀻𑀮𑀓𑀫𑁆𑀫𑀼𑀦𑀸 𑀬𑀫𑀯𑀺𑀲𑀬𑀁 𑀧𑁂𑀢𑀮𑁄𑀓𑀁 𑀧𑀢𑁆𑀢𑁄 𑀅𑀫𑁆𑀳𑀺.

𑁨𑁪𑁮. 𑀲𑁄 𑀲𑀽𑀘𑀺𑀓𑀸𑀬 𑀓𑀺𑀮𑀫𑀺𑀢𑁄𑀢𑀺 𑀲𑁄 𑀅𑀳𑀁 𑀯𑀺𑀚𑁆𑀛𑀦𑀝𑁆𑀞𑁂𑀦 𑀲𑀽𑀘𑀺𑀲𑀤𑀺𑀲𑀢𑀸𑀬 ‘‘𑀲𑀽𑀘𑀺𑀓𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀚𑀺𑀖𑀘𑁆𑀙𑀸𑀬 𑀓𑀺𑀮𑀫𑀺𑀢𑁄 𑀦𑀺𑀭𑀦𑁆𑀢𑀭𑀁 𑀯𑀺𑀚𑁆𑀛𑀫𑀸𑀦𑁄. ‘‘𑀓𑀺𑀮𑀫𑀣𑁄’’𑀢𑀺 𑀇𑀘𑁆𑀘𑁂𑀯 𑀯𑀸 𑀧𑀸𑀞𑁄. 𑀢𑁂𑀳𑀻𑀢𑀺 ‘‘𑀤𑀻𑀦𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀳𑀺 𑀧𑀸𑀧𑀓𑀫𑁆𑀫𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺. 𑀢𑀲𑁆𑀲 𑀳𑀺 𑀧𑁂𑀢𑀲𑁆𑀲 ¶ 𑀢𑀸𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀅𑀢𑀺𑀯𑀺𑀬 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀢𑁂𑀦𑁂𑀯𑀸𑀢𑀺 𑀢𑁂𑀦𑁂𑀯 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑁂𑀦. 𑀜𑀸𑀢𑀻𑀲𑀼 𑀬𑀸𑀫𑀻𑀢𑀺 𑀜𑀸𑀢𑀻𑀦𑀁 𑀲𑀫𑀻𑀧𑀁 𑀬𑀸𑀫𑀺 𑀕𑀘𑁆𑀙𑀸𑀫𑀺. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀽𑀢𑀺 𑀆𑀫𑀺𑀲𑀲𑁆𑀲 𑀓𑀺𑀜𑁆𑀘𑀺𑀓𑁆𑀔𑀦𑀺𑀫𑀺𑀢𑁆𑀢𑀁, 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀧𑀢𑁆𑀣𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀤𑀸𑀦𑀲𑀻𑀮𑀸 𑀦 𑀘 𑀲𑀤𑁆𑀤𑀳𑀦𑁆𑀢𑀺, ‘𑀤𑀸𑀦𑀨𑀮𑀁 𑀳𑁄𑀢𑀺 𑀧𑀭𑀫𑁆𑀳𑀺 𑀮𑁄𑀓𑁂’𑀢𑀺 𑀬𑀣𑀸 𑀅𑀳𑀁, 𑀢𑀣𑀸 𑀏𑀯𑀁 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀅𑀤𑀸𑀦𑀲𑀻𑀮𑀸 ‘‘𑀤𑀸𑀦𑀲𑁆𑀲 𑀨𑀮𑀁 𑀏𑀓𑀁𑀲𑁂𑀦 𑀧𑀭𑀮𑁄𑀓𑁂 𑀳𑁄𑀢𑀻’’𑀢𑀺 𑀦 𑀘 𑀲𑀤𑁆𑀤𑀳𑀦𑁆𑀢𑀺. 𑀬𑀢𑁄 𑀅𑀳𑀁 𑀯𑀺𑀬 𑀢𑁂𑀧𑀺 𑀧𑁂𑀢𑀸 𑀳𑀼𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁪𑁯. 𑀮𑀧𑀢𑁂𑀢𑀺 𑀓𑀣𑁂𑀢𑀺. 𑀅𑀪𑀺𑀓𑁆𑀔𑀡𑀦𑁆𑀢𑀺 𑀅𑀪𑀺𑀡𑁆𑀳𑀁 𑀩𑀳𑀼𑀲𑁄. 𑀓𑀺𑀦𑁆𑀢𑀺 𑀮𑀧𑀢𑀻𑀢𑀺 𑀆𑀳 ‘‘𑀤𑀲𑁆𑀲𑀸𑀫𑀺 𑀤𑀸𑀦𑀁 𑀧𑀺𑀢𑀽𑀦𑀁 𑀧𑀺𑀢𑀸𑀫𑀳𑀸𑀦’’𑀦𑁆𑀢𑀺. 𑀢𑀢𑁆𑀣 𑀧𑀺𑀢𑀽𑀦𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁, 𑀘𑀽𑀴𑀧𑀺𑀢𑀼𑀫𑀳𑀸𑀧𑀺𑀢𑀽𑀦𑀁 𑀯𑀸. 𑀧𑀺𑀢𑀸𑀫𑀳𑀸𑀦𑀦𑁆𑀢𑀺 𑀅𑀬𑁆𑀬𑀓𑀧𑀬𑁆𑀬𑀓𑀸𑀦𑀁. 𑀉𑀧𑀓𑁆𑀔𑀝𑀦𑁆𑀢𑀺 𑀲𑀚𑁆𑀚𑀺𑀢𑀁. 𑀧𑀭𑀺𑀯𑀺𑀲𑀬𑀦𑁆𑀢𑀻𑀢𑀺 𑀪𑁄𑀚𑀬𑀦𑁆𑀢𑀺. 𑀅𑀦𑁆𑀥𑀓𑀯𑀺𑀦𑁆𑀤𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀦𑀕𑀭𑀁. 𑀪𑀼𑀢𑁆𑀢𑀼𑀦𑁆𑀢𑀺 𑀪𑀼𑀜𑁆𑀚𑀺𑀢𑀼𑀁. 𑀢𑀢𑁄 ¶ 𑀧𑀭𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀯𑀼𑀢𑁆𑀢𑀸 𑁋

‘‘𑀢𑀫𑀯𑁄𑀘 𑀭𑀸𑀚𑀸 ‘𑀅𑀦𑀼𑀪𑀯𑀺𑀬𑀸𑀦 𑀢𑀫𑁆𑀧𑀺,

𑀏𑀬𑁆𑀬𑀸𑀲𑀺 𑀔𑀺𑀧𑁆𑀧𑀁 𑀅𑀳𑀫𑀧𑀺 𑀓𑀲𑁆𑀲𑀁 𑀧𑀽𑀚𑀁;

𑀆𑀘𑀺𑀓𑁆𑀔 𑀫𑁂 𑀢𑀁 𑀬𑀤𑀺 𑀅𑀢𑁆𑀣𑀺 𑀳𑁂𑀢𑀼,

𑀲𑀤𑁆𑀥𑀸𑀬𑀺𑀢𑀁 𑀳𑁂𑀢𑀼𑀯𑀘𑁄 𑀲𑀼𑀡𑁄𑀫’.

‘‘𑀢𑀣𑀸𑀢𑀺 ¶ 𑀯𑀢𑁆𑀯𑀸 𑀅𑀕𑀫𑀸𑀲𑀺 𑀢𑀢𑁆𑀣, 𑀪𑀼𑀜𑁆𑀚𑀺𑀁𑀲𑀼 𑀪𑀢𑁆𑀢𑀁 𑀦 𑀘 𑀤𑀓𑁆𑀔𑀺𑀡𑀸𑀭𑀳𑀸;

𑀧𑀘𑁆𑀘𑀸𑀕𑀫𑀺 𑀭𑀸𑀚𑀕𑀳𑀁 𑀧𑀼𑀦𑀸𑀧𑀭𑀁, 𑀧𑀸𑀢𑀼𑀭𑀳𑁄𑀲𑀺 𑀧𑀼𑀭𑀢𑁄 𑀚𑀦𑀸𑀥𑀺𑀧𑀲𑁆𑀲.

‘‘𑀤𑀺𑀲𑁆𑀯𑀸𑀦 𑀧𑁂𑀢𑀁 𑀧𑀼𑀦𑀤𑁂𑀯 𑀆𑀕𑀢𑀁, 𑀭𑀸𑀚𑀸 𑀅𑀯𑁄𑀘 ‘𑀅𑀳𑀫𑀧𑀺 𑀓𑀺𑀁 𑀤𑀤𑀸𑀫𑀺;

𑀆𑀘𑀺𑀓𑁆𑀔 𑀫𑁂 𑀢𑀁 𑀬𑀤𑀺 𑀅𑀢𑁆𑀣𑀺 𑀳𑁂𑀢𑀼, 𑀬𑁂𑀦 𑀢𑀼𑀯𑀁 𑀘𑀺𑀭𑀢𑀭𑀁 𑀧𑀻𑀡𑀺𑀢𑁄 𑀲𑀺𑀬𑀸’.

‘‘𑀩𑀼𑀤𑁆𑀥𑀜𑁆𑀘 𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀬𑀸𑀦 𑀭𑀸𑀚, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀘 𑀘𑀻𑀯𑀭𑁂𑀦;

𑀢𑀁 𑀤𑀓𑁆𑀔𑀺𑀡𑀁 𑀆𑀤𑀺𑀲 𑀫𑁂 𑀳𑀺𑀢𑀸𑀬, 𑀏𑀯𑀁 𑀅𑀳𑀁 𑀘𑀺𑀭𑀢𑀭𑀁 𑀧𑀻𑀡𑀺𑀢𑁄 𑀲𑀺𑀬𑀸.

‘‘𑀢𑀢𑁄 𑀘 𑀭𑀸𑀚𑀸 𑀦𑀺𑀧𑀢𑀺𑀢𑁆𑀯𑀸 𑀢𑀸𑀯𑀤𑁂, 𑀤𑀸𑀦𑀁 𑀲𑀳𑀢𑁆𑀣𑀸 𑀅𑀢𑀼𑀮𑀁 𑀤𑀤𑀺𑀢𑁆𑀯𑀸 𑀲𑀗𑁆𑀖𑁂;

𑀆𑀭𑁄𑀘𑁂𑀲𑀺 𑀧𑀓𑀢𑀁 𑀢𑀣𑀸𑀕𑀢𑀲𑁆𑀲, 𑀢𑀲𑁆𑀲 𑀘 𑀧𑁂𑀢𑀲𑁆𑀲 𑀤𑀓𑁆𑀔𑀺𑀡𑀁 𑀆𑀤𑀺𑀲𑀺𑀢𑁆𑀣.

‘‘𑀲𑁄 ¶ 𑀧𑀽𑀚𑀺𑀢𑁄 𑀅𑀢𑀺𑀯𑀺𑀬 𑀲𑁄𑀪𑀫𑀸𑀦𑁄, 𑀧𑀸𑀢𑀼𑀭𑀳𑁄𑀲𑀺 𑀧𑀼𑀭𑀢𑁄 𑀚𑀦𑀸𑀥𑀺𑀧𑀲𑁆𑀲;

𑀬𑀓𑁆𑀔𑁄𑀳𑀫𑀲𑁆𑀫𑀺 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑁄, 𑀦 𑀫𑀬𑁆𑀳𑀫𑀢𑁆𑀣𑀺 𑀲𑀫𑀸 𑀲𑀤𑀺𑀲𑀸 𑀫𑀸𑀦𑀼𑀲𑀸.

‘‘𑀧𑀲𑁆𑀲𑀸𑀦𑀼𑀪𑀸𑀯𑀁 𑀅𑀧𑀭𑀺𑀫𑀺𑀢𑀁 𑀫𑀫𑀬𑀺𑀤𑀁, 𑀢𑀬𑀸𑀦𑀼𑀤𑀺𑀝𑁆𑀞𑀁 𑀅𑀢𑀼𑀮𑀁 𑀤𑀢𑁆𑀯𑀸 𑀲𑀗𑁆𑀖𑁂;

𑀲𑀦𑁆𑀢𑀧𑁆𑀧𑀺𑀢𑁄 ¶ 𑀲𑀢𑀢𑀁 𑀲𑀤𑀸 𑀩𑀳𑀽𑀳𑀺, 𑀬𑀸𑀫𑀺 𑀅𑀳𑀁 𑀲𑀼𑀔𑀺𑀢𑁄 𑀫𑀦𑀼𑀲𑁆𑀲𑀤𑁂𑀯𑀸’’𑀢𑀺.

𑁨𑁫𑁦. 𑀢𑀢𑁆𑀣 𑀢𑀫𑀯𑁄𑀘 𑀭𑀸𑀚𑀸𑀢𑀺 𑀢𑀁 𑀧𑁂𑀢𑀁 𑀢𑀣𑀸 𑀯𑀢𑁆𑀯𑀸 𑀞𑀺𑀢𑀁 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀯𑁄𑀘. 𑀅𑀦𑀼𑀪𑀯𑀺𑀬𑀸𑀦 𑀢𑀫𑁆𑀧𑀻𑀢𑀺 𑀢𑀁 𑀢𑀯 𑀥𑀻𑀢𑀼𑀬𑀸 𑀉𑀧𑀓𑁆𑀔𑀝𑀁 𑀤𑀸𑀦𑀫𑁆𑀧𑀺 𑀅𑀦𑀼𑀪𑀯𑀺𑀢𑁆𑀯𑀸. 𑀏𑀬𑁆𑀬𑀸𑀲𑀻𑀢𑀺 𑀆𑀕𑀘𑁆𑀙𑁂𑀬𑁆𑀬𑀸𑀲𑀺. 𑀓𑀲𑁆𑀲𑀦𑁆𑀢𑀺 𑀓𑀭𑀺𑀲𑁆𑀲𑀸𑀫𑀺. 𑀆𑀘𑀺𑀓𑁆𑀔 ¶ 𑀫𑁂 𑀢𑀁 𑀬𑀤𑀺 𑀅𑀢𑁆𑀣𑀺 𑀳𑁂𑀢𑀽𑀢𑀺 𑀲𑀘𑁂 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀁 𑀓𑀸𑀭𑀡𑀁 𑀫𑀬𑁆𑀳𑀁 𑀆𑀘𑀺𑀓𑁆𑀔 𑀓𑀣𑁂𑀳𑀺. 𑀲𑀤𑁆𑀥𑀸𑀬𑀺𑀢𑀦𑁆𑀢𑀺 𑀲𑀤𑁆𑀥𑀸𑀬𑀺𑀢𑀩𑁆𑀩𑀁. 𑀳𑁂𑀢𑀼𑀯𑀘𑁄𑀢𑀺 𑀳𑁂𑀢𑀼𑀬𑀼𑀢𑁆𑀢𑀯𑀘𑀦𑀁, ‘‘𑀅𑀫𑀼𑀓𑀲𑁆𑀫𑀺𑀁 𑀞𑀸𑀦𑁂 𑀅𑀲𑀼𑀓𑁂𑀦 𑀧𑀓𑀸𑀭𑁂𑀦 𑀤𑀸𑀦𑁂 𑀓𑀢𑁂 𑀫𑀬𑁆𑀳𑀁 𑀉𑀧𑀓𑀧𑁆𑀧𑀢𑀻’’𑀢𑀺 𑀲𑀓𑀸𑀭𑀡𑀁 𑀯𑀘𑀦𑀁 𑀯𑀤𑀸𑀢𑀺 𑀅𑀢𑁆𑀣𑁄.

𑁨𑁫𑁧. 𑀢𑀣𑀸𑀢𑀺 𑀯𑀢𑁆𑀯𑀸𑀢𑀺 𑀲𑀸𑀥𑀽𑀢𑀺 𑀯𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀦𑁆𑀥𑀓𑀯𑀺𑀦𑁆𑀤𑁂 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑁂. 𑀪𑀼𑀜𑁆𑀚𑀺𑀁𑀲𑀼 𑀪𑀢𑁆𑀢𑀁 𑀦 𑀘 𑀤𑀓𑁆𑀔𑀺𑀡𑀸𑀭𑀳𑀸𑀢𑀺 𑀪𑀢𑁆𑀢𑀁 𑀪𑀼𑀜𑁆𑀚𑀺𑀁𑀲𑀼 𑀤𑀼𑀲𑁆𑀲𑀻𑀮𑀩𑁆𑀭𑀸𑀳𑁆𑀫𑀡𑀸, 𑀦 𑀘 𑀧𑀦 𑀤𑀓𑁆𑀔𑀺𑀡𑀸𑀭𑀳𑀸 𑀲𑀻𑀮𑀯𑀦𑁆𑀢𑁄 𑀪𑀼𑀜𑁆𑀚𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀧𑀼𑀦𑀸𑀧𑀭𑀦𑁆𑀢𑀺 𑀧𑀼𑀦 𑀅𑀧𑀭𑀁 𑀯𑀸𑀭𑀁 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀫𑀺.

𑁨𑁫𑁨. 𑀓𑀺𑀁 𑀤𑀤𑀸𑀫𑀻𑀢𑀺 ‘‘𑀓𑀻𑀤𑀺𑀲𑀁 𑀢𑁂 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸 𑀧𑁂𑀢𑀁 𑀧𑀼𑀘𑁆𑀙𑀺. 𑀬𑁂𑀦 𑀢𑀼𑀯𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁. 𑀘𑀺𑀭𑀢𑀭𑀦𑁆𑀢𑀺 𑀘𑀺𑀭𑀓𑀸𑀮𑀁. 𑀧𑀻𑀡𑀺𑀢𑁄𑀢𑀺 𑀢𑀺𑀢𑁆𑀢𑁄 𑀲𑀺𑀬𑀸, 𑀢𑀁 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄.

𑁨𑁫𑁩. 𑀧𑀭𑀺𑀯𑀺𑀲𑀺𑀬𑀸𑀦𑀸𑀢𑀺 𑀪𑁄𑀚𑁂𑀢𑁆𑀯𑀸. 𑀭𑀸𑀚𑀸𑀢𑀺 𑀅𑀚𑀸𑀢𑀲𑀢𑁆𑀢𑀼𑀁 𑀆𑀮𑀧𑀢𑀺. 𑀫𑁂 𑀳𑀺𑀢𑀸𑀬𑀸𑀢𑀺 𑀫𑀬𑁆𑀳𑀁 𑀳𑀺𑀢𑀢𑁆𑀣𑀸𑀬 𑀧𑁂𑀢𑀢𑁆𑀢𑀪𑀸𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸.

𑁨𑁫𑁪. 𑀢𑀢𑁄𑀢𑀺 𑀢𑀲𑁆𑀫𑀸 𑀢𑁂𑀦 𑀯𑀘𑀦𑁂𑀦, 𑀢𑀢𑁄 𑀯𑀸 𑀧𑀸𑀲𑀸𑀤𑀢𑁄. 𑀦𑀺𑀧𑀢𑀺𑀢𑁆𑀯𑀸𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀢𑀸𑀯𑀤𑁂𑀢𑀺 𑀢𑀤𑀸 𑀏𑀯 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬. 𑀬𑀫𑁆𑀳𑀺 𑀧𑁂𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺, 𑀢𑀲𑁆𑀫𑀺𑀁 𑀧𑀼𑀭𑁂𑀪𑀢𑁆𑀢𑁂 𑀏𑀯 𑀤𑀸𑀦𑀁 𑀅𑀤𑀸𑀲𑀺 ¶ . 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀅𑀢𑀼𑀮𑀦𑁆𑀢𑀺 𑀅𑀧𑁆𑀧𑀫𑀸𑀡𑀁 𑀉𑀴𑀸𑀭𑀁 𑀧𑀡𑀻𑀢𑀁. 𑀤𑀢𑁆𑀯𑀸 𑀲𑀗𑁆𑀖𑁂𑀢𑀺 𑀲𑀗𑁆𑀖𑀲𑁆𑀲 𑀤𑀢𑁆𑀯𑀸. 𑀆𑀭𑁄𑀘𑁂𑀲𑀺 𑀧𑀓𑀢𑀁 𑀢𑀣𑀸𑀕𑀢𑀲𑁆𑀲𑀸𑀢𑀺 ‘‘𑀇𑀤𑀁, 𑀪𑀦𑁆𑀢𑁂, 𑀤𑀸𑀦𑀁 𑀅𑀜𑁆𑀜𑀢𑀭𑀁 𑀧𑁂𑀢𑀁 𑀲𑀦𑁆𑀥𑀸𑀬 𑀧𑀓𑀢’’𑀦𑁆𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀆𑀭𑁄𑀘𑁂𑀢𑁆𑀯𑀸 ¶ 𑀘 𑀬𑀣𑀸 𑀢𑀁 𑀤𑀸𑀦𑀁 𑀢𑀲𑁆𑀲 𑀉𑀧𑀓𑀧𑁆𑀧𑀢𑀺, 𑀏𑀯𑀁 𑀢𑀲𑁆𑀲 𑀘 𑀧𑁂𑀢𑀲𑁆𑀲 𑀤𑀓𑁆𑀔𑀺𑀡𑀁 𑀆𑀤𑀺𑀲𑀺𑀢𑁆𑀣 𑀆𑀤𑀺𑀲𑀺.

𑁨𑁫𑁫. 𑀲𑁄𑀢𑀺 𑀲𑁄 𑀧𑁂𑀢𑁄. 𑀧𑀽𑀚𑀺𑀢𑁄𑀢𑀺 𑀤𑀓𑁆𑀔𑀺𑀡𑀸𑀬 𑀤𑀺𑀬𑁆𑀬𑀫𑀸𑀦𑀸𑀬 𑀧𑀽𑀚𑀺𑀢𑁄. 𑀅𑀢𑀺𑀯𑀺𑀬 𑀲𑁄𑀪𑀫𑀸𑀦𑁄𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀅𑀢𑀺𑀯𑀺𑀬 𑀯𑀺𑀭𑁄𑀘𑀫𑀸𑀦𑁄. 𑀧𑀸𑀢𑀼𑀭𑀳𑁄𑀲𑀻𑀢𑀺 𑀧𑀸𑀢𑀼𑀪𑀯𑀺, 𑀭𑀜𑁆𑀜𑁄 𑀧𑀼𑀭𑀢𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀬𑀓𑁆𑀔𑁄𑀳𑀫𑀲𑁆𑀫𑀻𑀢𑀺 𑀧𑁂𑀢𑀢𑁆𑀢𑀪𑀸𑀯𑀢𑁄 𑀫𑀼𑀢𑁆𑀢𑁄 𑀬𑀓𑁆𑀔𑁄 𑀅𑀳𑀁 𑀚𑀸𑀢𑁄 𑀤𑁂𑀯𑀪𑀸𑀯𑀁 𑀧𑀢𑁆𑀢𑁄𑀲𑁆𑀫𑀺. 𑀦 𑀫𑀬𑁆𑀳𑀫𑀢𑁆𑀣𑀺 𑀲𑀫𑀸 𑀲𑀤𑀺𑀲𑀸 𑀫𑀸𑀦𑀼𑀲𑀸𑀢𑀺 𑀫𑀬𑁆𑀳𑀁 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀸 𑀯𑀸 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑀺𑀲𑀸 𑀯𑀸 𑀫𑀦𑀼𑀲𑁆𑀲𑀸 𑀦 𑀲𑀦𑁆𑀢𑀺.

𑁨𑁫𑁬. 𑀧𑀲𑁆𑀲𑀸𑀦𑀼𑀪𑀸𑀯𑀁 ¶ 𑀅𑀧𑀭𑀺𑀫𑀺𑀢𑀁 𑀫𑀫𑀬𑀺𑀤𑀦𑁆𑀢𑀺 ‘‘𑀫𑀫 𑀇𑀤𑀁 𑀅𑀧𑀭𑀺𑀫𑀸𑀡𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑀁 𑀧𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀓𑁆𑀔𑀢𑁄 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑁄 𑀯𑀤𑀢𑀺. 𑀢𑀬𑀸𑀦𑀼𑀤𑀺𑀝𑁆𑀞𑀁 𑀅𑀢𑀼𑀮𑀁 𑀤𑀢𑁆𑀯𑀸 𑀲𑀗𑁆𑀖𑁂𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀢𑀼𑀮𑀁 𑀉𑀴𑀸𑀭𑀁 𑀤𑀸𑀦𑀁 𑀤𑀢𑁆𑀯𑀸 𑀫𑀬𑁆𑀳𑀁 𑀅𑀦𑀼𑀓𑀫𑁆𑀧𑀸𑀬 𑀢𑀬𑀸 𑀅𑀦𑀼𑀤𑀺𑀝𑁆𑀞𑀁. 𑀲𑀦𑁆𑀢𑀧𑁆𑀧𑀺𑀢𑁄 𑀲𑀢𑀢𑀁 𑀲𑀤𑀸 𑀩𑀳𑀽𑀳𑀻𑀢𑀺 𑀅𑀦𑁆𑀦𑀧𑀸𑀦𑀯𑀢𑁆𑀣𑀸𑀤𑀻𑀳𑀺 𑀩𑀳𑀽𑀳𑀺 𑀤𑁂𑀬𑁆𑀬𑀥𑀫𑁆𑀫𑁂𑀳𑀺 𑀅𑀭𑀺𑀬𑀲𑀗𑁆𑀖𑀁 𑀲𑀦𑁆𑀢𑀧𑁆𑀧𑁂𑀦𑁆𑀢𑁂𑀦 𑀢𑀬𑀸 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀬𑀸𑀯𑀚𑀻𑀯𑀁 𑀢𑀢𑁆𑀣𑀸𑀧𑀺 𑀲𑀢𑀢𑀁 𑀦𑀺𑀭𑀦𑁆𑀢𑀭𑀁 𑀅𑀳𑀁 𑀲𑀦𑁆𑀢𑀧𑁆𑀧𑀺𑀢𑁄 𑀧𑀻𑀡𑀺𑀢𑁄. 𑀬𑀸𑀫𑀺 𑀅𑀳𑀁 𑀲𑀼𑀔𑀺𑀢𑁄 𑀫𑀦𑀼𑀲𑁆𑀲𑀤𑁂𑀯𑀸𑀢𑀺 ‘‘𑀢𑀲𑁆𑀫𑀸 𑀅𑀳𑀁 𑀇𑀤𑀸𑀦𑀺 𑀲𑀼𑀔𑀺𑀢𑁄 𑀫𑀦𑀼𑀲𑁆𑀲𑀤𑁂𑀯 𑀫𑀳𑀸𑀭𑀸𑀚 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀬𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺.

𑀏𑀯𑀁 ¶ 𑀧𑁂𑀢𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀢𑁂 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀢𑀫𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺, 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀫𑀘𑁆𑀙𑁂𑀭𑀫𑀮𑀁 𑀧𑀳𑀸𑀬 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀘𑀽𑀴𑀸𑀲𑁂𑀝𑁆𑀞𑀺𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀬𑀲𑁆𑀲 𑀅𑀢𑁆𑀣𑀸𑀬 𑀕𑀘𑁆𑀙𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀗𑁆𑀓𑀼𑀭𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀗𑁆𑀓𑀼𑀭𑁄 𑀧𑁂𑀢𑁄 𑀦 𑀳𑁄𑀢𑀺, 𑀢𑀲𑁆𑀲 𑀧𑀦 𑀘𑀭𑀺𑀢𑀁 𑀬𑀲𑁆𑀫𑀸 𑀧𑁂𑀢𑀲𑀫𑁆𑀩𑀦𑁆𑀥𑀁, 𑀢𑀲𑁆𑀫𑀸 𑀢𑀁 ‘‘𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀬𑁂 𑀢𑁂 𑀉𑀢𑁆𑀢𑀭𑀫𑀥𑀼𑀭𑀸𑀥𑀺𑀧𑀢𑀺𑀦𑁄 𑀭𑀜𑁆𑀜𑁄 𑀫𑀳𑀸𑀲𑀸𑀕𑀭𑀲𑁆𑀲 𑀧𑀼𑀢𑁆𑀢𑀁 𑀉𑀧𑀲𑀸𑀕𑀭𑀁 𑀧𑀝𑀺𑀘𑁆𑀘 ¶ 𑀉𑀢𑁆𑀢𑀭𑀸𑀧𑀣𑁂 𑀓𑀁𑀲𑀪𑁄𑀕𑁂 𑀅𑀲𑀺𑀢𑀜𑁆𑀚𑀦𑀦𑀕𑀭𑁂 𑀫𑀳𑀸𑀓𑀁𑀲𑀲𑁆𑀲 𑀥𑀻𑀢𑀼𑀬𑀸 𑀤𑁂𑀯𑀕𑀩𑁆𑀪𑀸𑀬 𑀓𑀼𑀘𑁆𑀙𑀺𑀬𑀁 𑀉𑀧𑁆𑀧𑀦𑁆𑀦𑀸 𑀅𑀜𑁆𑀚𑀦𑀤𑁂𑀯𑀻 𑀯𑀸𑀲𑀼𑀤𑁂𑀯𑁄 𑀩𑀮𑀤𑁂𑀯𑁄 𑀘𑀦𑁆𑀤𑀤𑁂𑀯𑁄 𑀲𑀽𑀭𑀺𑀬𑀤𑁂𑀯𑁄 𑀅𑀕𑁆𑀕𑀺𑀤𑁂𑀯𑁄 𑀯𑀭𑀼𑀡𑀤𑁂𑀯𑁄 𑀅𑀚𑁆𑀚𑀼𑀦𑁄 𑀧𑀚𑁆𑀚𑀼𑀦𑁄 𑀖𑀝𑀧𑀡𑁆𑀟𑀺𑀢𑁄 𑀅𑀗𑁆𑀓𑀼𑀭𑁄 𑀘𑀸𑀢𑀺 𑀯𑀸𑀲𑀼𑀤𑁂𑀯𑀸𑀤𑀬𑁄 𑀤𑀲 𑀪𑀸𑀢𑀺𑀓𑀸𑀢𑀺 𑀏𑀓𑀸𑀤𑀲 𑀔𑀢𑁆𑀢𑀺𑀬𑀸 𑀅𑀳𑁂𑀲𑀼𑀁, 𑀢𑁂𑀲𑀼 𑀯𑀸𑀲𑀼𑀤𑁂𑀯𑀸𑀤𑀬𑁄 𑀪𑀸𑀢𑀭𑁄 𑀅𑀲𑀺𑀢𑀜𑁆𑀚𑀦𑀦𑀕𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀤𑁆𑀯𑀸𑀭𑀯𑀢𑀻𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀘𑀓𑁆𑀓𑁂𑀦 ¶ 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀯𑀢𑀺𑀬𑀁 𑀯𑀲𑀫𑀸𑀦𑀸 𑀭𑀚𑁆𑀚𑀁 𑀤𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀯𑀺𑀪𑀚𑀺𑀁𑀲𑀼. 𑀪𑀕𑀺𑀦𑀺𑀁 𑀧𑀦 𑀅𑀜𑁆𑀚𑀦𑀤𑁂𑀯𑀺𑀁 𑀦 𑀲𑀭𑀺𑀁𑀲𑀼. 𑀧𑀼𑀦 𑀲𑀭𑀺𑀢𑁆𑀯𑀸 ‘‘𑀏𑀓𑀸𑀤𑀲 𑀓𑁄𑀝𑁆𑀞𑀸𑀲𑁂 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀲𑀩𑁆𑀩𑀓𑀦𑀺𑀝𑁆𑀞𑁄 𑀅𑀗𑁆𑀓𑀼𑀭𑁄 ‘‘𑀫𑀫 𑀓𑁄𑀝𑁆𑀞𑀸𑀲𑀁 𑀢𑀲𑁆𑀲𑀸 𑀤𑁂𑀣, 𑀅𑀳𑀁 𑀯𑁄𑀳𑀸𑀭𑀁 𑀓𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀦𑀧𑀤𑁂𑀲𑀼 𑀲𑀼𑀗𑁆𑀓𑀁 𑀫𑀬𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀓𑁄𑀝𑁆𑀞𑀸𑀬𑀁 𑀪𑀕𑀺𑀦𑀺𑀬𑀸 𑀤𑀢𑁆𑀯𑀸 𑀦𑀯 𑀭𑀸𑀚𑀸𑀦𑁄 𑀤𑁆𑀯𑀸𑀭𑀯𑀢𑀺𑀬𑀁 𑀯𑀲𑀺𑀁𑀲𑀼.

𑀅𑀗𑁆𑀓𑀼𑀭𑁄 𑀧𑀦 𑀯𑀡𑀺𑀚𑁆𑀚𑀁 𑀓𑀭𑁄𑀦𑁆𑀢𑁄 𑀦𑀺𑀘𑁆𑀘𑀓𑀸𑀮𑀁 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀢𑀲𑁆𑀲 𑀧𑀦𑁂𑀓𑁄 𑀤𑀸𑀲𑁄 ¶ 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀢𑁆𑀣𑀓𑀸𑀫𑁄 𑀅𑀳𑁄𑀲𑀺. 𑀅𑀗𑁆𑀓𑀼𑀭𑁄 𑀧𑀲𑀦𑁆𑀦𑀫𑀸𑀦𑀲𑁄 𑀢𑀲𑁆𑀲 𑀏𑀓𑀁 𑀓𑀼𑀮𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀧𑀼𑀢𑁆𑀢𑁂 𑀕𑀩𑁆𑀪𑀕𑀢𑁂𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀅𑀗𑁆𑀓𑀼𑀭𑁄 𑀢𑀲𑁆𑀫𑀺𑀁 𑀚𑀸𑀢𑁂 𑀢𑀲𑁆𑀲 𑀧𑀺𑀢𑀼𑀦𑁄 𑀤𑀺𑀦𑁆𑀦𑀁 𑀪𑀢𑁆𑀢𑀯𑁂𑀢𑀦𑀁 𑀢𑀲𑁆𑀲 𑀅𑀤𑀸𑀲𑀺. 𑀅𑀣 𑀢𑀲𑁆𑀫𑀺𑀁 𑀤𑀸𑀭𑀓𑁂 𑀯𑀬𑀧𑁆𑀧𑀢𑁆𑀢𑁂 ‘‘𑀤𑀸𑀲𑁄 𑀦 𑀤𑀸𑀲𑁄’’𑀢𑀺 𑀭𑀸𑀚𑀓𑀼𑀮𑁂 𑀯𑀺𑀦𑀺𑀘𑁆𑀙𑀬𑁄 𑀉𑀧𑁆𑀧𑀚𑁆𑀚𑀺. 𑀢𑀁 𑀲𑀼𑀢𑁆𑀯𑀸 𑀅𑀜𑁆𑀚𑀦𑀤𑁂𑀯𑀻 𑀥𑁂𑀦𑀽𑀧𑀫𑀁 𑀯𑀢𑁆𑀯𑀸 ‘‘𑀫𑀸𑀢𑀼 𑀪𑀼𑀚𑀺𑀲𑁆𑀲𑀸𑀬 𑀧𑀼𑀢𑁆𑀢𑁄𑀧𑀺 𑀪𑀼𑀚𑀺𑀲𑁆𑀲𑁄 𑀏𑀯𑀸’’𑀢𑀺 𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀲𑀺.

𑀤𑀸𑀭𑀓𑁄 𑀧𑀦 𑀮𑀚𑁆𑀚𑀸𑀬 𑀢𑀢𑁆𑀣 𑀯𑀲𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀭𑁄𑀭𑀼𑀯𑀦𑀕𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀅𑀜𑁆𑀜𑀢𑀭𑀲𑁆𑀲 𑀢𑀼𑀦𑁆𑀦𑀯𑀸𑀬𑀲𑁆𑀲 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀢𑀼𑀦𑁆𑀦𑀯𑀸𑀬𑀲𑀺𑀧𑁆𑀧𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦 𑀲𑀫𑀬𑁂𑀦 𑀭𑁄𑀭𑀼𑀯𑀦𑀕𑀭𑁂 𑀅𑀲𑀬𑁆𑀳𑀫𑀳𑀸𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺. 𑀲𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀲𑁄 𑀢𑀼𑀦𑁆𑀦𑀯𑀸𑀬𑁄 𑀲𑁂𑀝𑁆𑀞𑀺𑀦𑁄 𑀖𑀭𑀁 𑀅𑀚𑀸𑀦𑀦𑁆𑀢𑀸𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑀼𑀢𑁆𑀯𑀸 𑀅𑀲𑀬𑁆𑀳𑀲𑁂𑀝𑁆𑀞𑀺𑀦𑁄 𑀦𑀺𑀯𑁂𑀲𑀦𑀁 𑀤𑀓𑁆𑀔𑀺𑀡𑀩𑀸𑀳𑀼𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 ‘‘𑀏𑀢𑁆𑀣 𑀕𑀦𑁆𑀢𑁆𑀯𑀸 𑀮𑀤𑁆𑀥𑀩𑁆𑀩𑀁 𑀮𑀪𑀦𑁆𑀢𑀽’’𑀢𑀺. 𑀢𑀲𑁆𑀲 𑀓𑀫𑁆𑀫𑀁 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀁.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀫𑀭𑀼𑀪𑀽𑀫𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀪𑀼𑀫𑁆𑀫𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀳𑀢𑁆𑀣𑁄 𑀲𑀩𑁆𑀩𑀓𑀸𑀫𑀤𑀤𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀭𑁄𑀭𑀼𑀯𑁂 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀅𑀲𑀬𑁆𑀳𑀲𑁂𑀝𑁆𑀞𑀺𑀦𑁄 𑀤𑀸𑀦𑁂 𑀩𑁆𑀬𑀸𑀯𑀝𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀦𑀸𑀤𑀭𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀘 ¶ 𑀓𑀢𑀓𑀫𑁆𑀫𑀁 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀁. 𑀅𑀲𑀬𑁆𑀳𑀫𑀳𑀸𑀲𑁂𑀝𑁆𑀞𑀺 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀲𑀳𑀩𑁆𑀬𑀢𑀁 𑀉𑀧𑀕𑀢𑁄.

𑀅𑀣 ¶ 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀗𑁆𑀓𑀼𑀭𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺, 𑀅𑀜𑁆𑀜𑀢𑀭𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀻𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀲𑀓𑀝𑀲𑀳𑀲𑁆𑀲𑁂𑀦 𑀪𑀡𑁆𑀟𑀁 𑀆𑀤𑀸𑀬 𑀫𑀭𑀼𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀫𑀕𑁆𑀕𑀫𑀽𑀴𑁆𑀳𑀸 𑀳𑀼𑀢𑁆𑀯𑀸 𑀩𑀳𑀼𑀁 𑀤𑀺𑀯𑀲𑀁 𑀢𑀢𑁆𑀣𑁂𑀯 𑀯𑀺𑀘𑀭𑀦𑁆𑀢𑀸 𑀧𑀭𑀺𑀓𑁆𑀔𑀻𑀡𑀢𑀺𑀡𑁄𑀤𑀓𑀸𑀳𑀸𑀭𑀸 𑀅𑀳𑁂𑀲𑀼𑀁. 𑀅𑀗𑁆𑀓𑀼𑀭𑁄 𑀅𑀲𑁆𑀲𑀤𑀽𑀢𑁂𑀳𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀧𑀸𑀦𑀺𑀬𑀁 𑀫𑀕𑁆𑀕𑀸𑀧𑁂𑀲𑀺. 𑀅𑀣 𑀲𑁄 𑀓𑀸𑀫𑀤𑀤𑀳𑀢𑁆𑀣𑁄 𑀬𑀓𑁆𑀔𑁄 𑀢𑀁 𑀢𑁂𑀲𑀁 𑀩𑁆𑀬𑀲𑀦𑀧𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀅𑀗𑁆𑀓𑀼𑀭𑁂𑀦 𑀧𑀼𑀩𑁆𑀩𑁂 ¶ 𑀅𑀢𑁆𑀢𑀦𑁄 𑀓𑀢𑀁 𑀉𑀧𑀓𑀸𑀭𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀳𑀦𑁆𑀤 𑀤𑀸𑀦𑀺 𑀇𑀫𑀲𑁆𑀲 𑀫𑀬𑀸 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀢𑁆𑀢𑀦𑁄 𑀯𑀲𑀦𑀯𑀝𑀭𑀼𑀓𑁆𑀔𑀁 𑀤𑀲𑁆𑀲𑁂𑀲𑀺. 𑀲𑁄 𑀓𑀺𑀭 𑀯𑀝𑀭𑀼𑀓𑁆𑀔𑁄 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑁄 𑀖𑀦𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄 𑀅𑀦𑁂𑀓𑀲𑀳𑀲𑁆𑀲𑀧𑀸𑀭𑁄𑀳𑁄 𑀆𑀬𑀸𑀫𑁂𑀦 𑀯𑀺𑀢𑁆𑀣𑀸𑀭𑁂𑀦 𑀉𑀩𑁆𑀩𑁂𑀥𑁂𑀦 𑀘 𑀬𑁄𑀚𑀦𑀧𑀭𑀺𑀫𑀸𑀡𑁄 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀅𑀗𑁆𑀓𑀼𑀭𑁄 𑀳𑀝𑁆𑀞𑀢𑀼𑀝𑁆𑀞𑁄 𑀢𑀲𑁆𑀲 𑀳𑁂𑀝𑁆𑀞𑀸 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀸𑀧𑁂𑀲𑀺. 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀧𑀸𑀦𑀻𑀬𑁂𑀦 𑀲𑀩𑁆𑀩𑀁 𑀚𑀦𑀁 𑀲𑀦𑁆𑀢𑀧𑁆𑀧𑁂𑀲𑀺. 𑀢𑀢𑁄 𑀬𑁄 𑀬𑁄 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲 𑀢𑀁 𑀢𑀁 𑀅𑀤𑀸𑀲𑀺.

𑀏𑀯𑀁 𑀢𑀲𑁆𑀫𑀺𑀁 𑀫𑀳𑀸𑀚𑀦𑁂 𑀦𑀸𑀦𑀸𑀯𑀺𑀥𑁂𑀦 𑀅𑀦𑁆𑀦𑀧𑀸𑀦𑀸𑀤𑀺𑀦𑀸 𑀬𑀣𑀸𑀓𑀸𑀫𑀁 𑀲𑀦𑁆𑀢𑀧𑁆𑀧𑀺𑀢𑁂 𑀧𑀘𑁆𑀙𑀸 𑀯𑀽𑀧𑀲𑀦𑁆𑀢𑁂 𑀫𑀕𑁆𑀕𑀧𑀭𑀺𑀲𑁆𑀲𑀫𑁂 𑀲𑁄 𑀩𑁆𑀭𑀸𑀳𑁆𑀫𑀡𑀯𑀸𑀡𑀺𑀚𑁄 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀥𑀦𑀮𑀸𑀪𑀸𑀬 𑀇𑀢𑁄 𑀓𑀫𑁆𑀩𑁄𑀚𑀁 𑀕𑀦𑁆𑀢𑁆𑀯𑀸 𑀫𑀬𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀇𑀫𑀫𑁂𑀯 𑀧𑀦 𑀬𑀓𑁆𑀔𑀁 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀕𑀳𑁂𑀢𑁆𑀯𑀸 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀦𑀕𑀭𑀫𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀅𑀗𑁆𑀓𑀼𑀭𑀲𑁆𑀲 𑀓𑀣𑁂𑀦𑁆𑀢𑁄 𑁋

‘‘𑀬𑀲𑁆𑀲 𑀅𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀓𑀫𑁆𑀩𑁄𑀚𑀁 𑀥𑀦𑀳𑀸𑀭𑀓𑀸;

𑀅𑀬𑀁 𑀓𑀸𑀫𑀤𑀤𑁄 𑀬𑀓𑁆𑀔𑁄, 𑀇𑀫𑀁 𑀬𑀓𑁆𑀔𑀁 𑀦𑀬𑀸𑀫𑀲𑁂.

‘‘𑀇𑀫𑀁 𑀬𑀓𑁆𑀔𑀁 𑀕𑀳𑁂𑀢𑁆𑀯𑀸𑀦, 𑀲𑀸𑀥𑀼𑀓𑁂𑀦 𑀧𑀲𑀬𑁆𑀳 𑀯𑀸;

𑀬𑀸𑀦𑀁 𑀆𑀭𑁄𑀧𑀬𑀺𑀢𑁆𑀯𑀸𑀦, 𑀔𑀺𑀧𑁆𑀧𑀁 𑀕𑀘𑁆𑀙𑀸𑀫 𑀤𑁆𑀯𑀸𑀭𑀓’’𑀦𑁆𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀬𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀓𑀸𑀭𑀡𑀸. 𑀓𑀫𑁆𑀩𑁄𑀚𑀦𑁆𑀢𑀺 𑀓𑀫𑁆𑀩𑁄𑀚𑀭𑀝𑁆𑀞𑀁. 𑀥𑀦𑀳𑀸𑀭𑀓𑀸𑀢𑀺 𑀪𑀡𑁆𑀟𑀯𑀺𑀓𑁆𑀓𑀬𑁂𑀦 𑀮𑀤𑁆𑀥𑀥𑀦𑀳𑀸𑀭𑀺𑀦𑁄. 𑀓𑀸𑀫𑀤𑀤𑁄𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀬𑀓𑁄. 𑀬𑀓𑁆𑀔𑁄𑀢𑀺 𑀤𑁂𑀯𑀧𑀼𑀢𑁆𑀢𑁄. 𑀦𑀬𑀸𑀫𑀲𑁂𑀢𑀺 𑀦𑀬𑀺𑀲𑁆𑀲𑀸𑀫 ¶ . 𑀲𑀸𑀥𑀼𑀓𑁂𑀦𑀸𑀢𑀺 𑀬𑀸𑀘𑀦𑁂𑀦. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀩𑀮𑀓𑁆𑀓𑀸𑀭𑁂𑀦, 𑀬𑀸𑀦𑀦𑁆𑀢𑀺 𑀲𑀼𑀔𑀬𑀸𑀦𑀁 ¶ . 𑀤𑁆𑀯𑀸𑀭𑀓𑀦𑁆𑀢𑀺 𑀤𑁆𑀯𑀸𑀭𑀯𑀢𑀻𑀦𑀕𑀭𑀁. 𑀅𑀬𑀁 𑀳𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀤𑀢𑁆𑀣𑀁 𑀫𑀬𑀁 𑀇𑀢𑁄 𑀓𑀫𑁆𑀩𑁄𑀚𑀁 𑀕𑀦𑁆𑀢𑀼𑀓𑀸𑀫𑀸, 𑀢𑁂𑀦 𑀕𑀫𑀦𑁂𑀦 𑀲𑀸𑀥𑁂𑀢𑀩𑁆𑀩𑁄 𑀅𑀢𑁆𑀣𑁄 𑀇𑀥𑁂𑀯 𑀲𑀺𑀚𑁆𑀛𑀢𑀺. 𑀅𑀬𑀜𑁆𑀳𑀺 𑀬𑀓𑁆𑀔𑁄 𑀓𑀸𑀫𑀤𑀤𑁄, 𑀢𑀲𑁆𑀫𑀸 ¶ 𑀇𑀫𑀁 𑀬𑀓𑁆𑀔𑀁 𑀬𑀸𑀘𑀺𑀢𑁆𑀯𑀸 𑀢𑀲𑁆𑀲 𑀅𑀦𑀼𑀫𑀢𑀺𑀬𑀸 𑀯𑀸, 𑀲𑀘𑁂 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺, 𑀩𑀮𑀓𑁆𑀓𑀸𑀭𑁂𑀦 𑀯𑀸 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀬𑀸𑀦𑁂 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀇𑀢𑁄𑀬𑁂𑀯 𑀔𑀺𑀧𑁆𑀧𑀁 𑀤𑁆𑀯𑀸𑀭𑀯𑀢𑀻𑀦𑀕𑀭𑀁 𑀕𑀘𑁆𑀙𑀸𑀫𑀸𑀢𑀺.

𑀏𑀯𑀁 𑀧𑀦 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑁄 𑀅𑀗𑁆𑀓𑀼𑀭𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀞𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑁋

‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀦 𑀪𑀜𑁆𑀚𑁂𑀬𑁆𑀬𑀸𑀢𑀺 𑀦 𑀙𑀺𑀦𑁆𑀤𑁂𑀬𑁆𑀬. 𑀫𑀺𑀢𑁆𑀢𑀤𑀼𑀩𑁆𑀪𑁄𑀢𑀺 𑀫𑀺𑀢𑁆𑀢𑁂𑀲𑀼 𑀤𑀼𑀩𑁆𑀪𑀦𑀁 𑀢𑁂𑀲𑀁 𑀅𑀦𑀢𑁆𑀣𑀼𑀧𑁆𑀧𑀸𑀤𑀦𑀁. 𑀧𑀸𑀧𑀓𑁄𑀢𑀺 𑀅𑀪𑀤𑁆𑀤𑀓𑁄 𑀫𑀺𑀢𑁆𑀢𑀤𑀼𑀩𑁆𑀪𑁄. 𑀬𑁄 𑀳𑀺 𑀲𑀻𑀢𑀘𑁆𑀙𑀸𑀬𑁄 𑀭𑀼𑀓𑁆𑀔𑁄 𑀖𑀫𑁆𑀫𑀸𑀪𑀺𑀢𑀢𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀓𑁄, 𑀢𑀲𑁆𑀲𑀸𑀧𑀺 𑀦𑀸𑀫 𑀧𑀸𑀧𑀓𑀁 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁, 𑀓𑀺𑀫𑀗𑁆𑀓𑀁 𑀧𑀦 𑀲𑀢𑁆𑀢𑀪𑀽𑀢𑁂𑀲𑀼. 𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀲𑀧𑁆𑀧𑀼𑀭𑀺𑀲𑁄 𑀧𑀼𑀩𑁆𑀩𑀓𑀸𑀭𑀻 𑀅𑀫𑁆𑀳𑀸𑀓𑀁 𑀤𑀼𑀓𑁆𑀔𑀧𑀦𑀽𑀤𑀓𑁄 𑀩𑀳𑀽𑀧𑀓𑀸𑀭𑁄, 𑀦 𑀢𑀲𑁆𑀲 𑀓𑀺𑀜𑁆𑀘𑀺 𑀅𑀦𑀢𑁆𑀣𑀁 𑀘𑀺𑀦𑁆𑀢𑁂𑀢𑀩𑁆𑀩𑀁, 𑀅𑀜𑁆𑀜𑀤𑀢𑁆𑀣𑀼 𑀲𑁄 𑀧𑀽𑀚𑁂𑀢𑀩𑁆𑀩𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸 ‘‘𑀅𑀢𑁆𑀣𑀲𑁆𑀲 𑀫𑀽𑀮𑀁 𑀦𑀺𑀓𑀢𑀺𑀯𑀺𑀦𑀬𑁄’’𑀢𑀺 𑀦𑀻𑀢𑀺𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀅𑀗𑁆𑀓𑀼𑀭𑀲𑁆𑀲 𑀧𑀝𑀺𑀮𑁄𑀫𑀧𑀓𑁆𑀔𑁂 𑀞𑀢𑁆𑀯𑀸 𑁋

‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀔𑀦𑁆𑀥𑀫𑁆𑀧𑀺 𑀢𑀲𑁆𑀲 𑀙𑀺𑀦𑁆𑀤𑁂𑀬𑁆𑀬, 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸𑀢𑀺 𑀢𑀸𑀤𑀺𑀲𑁂𑀦 𑀤𑀩𑁆𑀩𑀲𑀫𑁆𑀪𑀸𑀭𑁂𑀦 𑀲𑀘𑁂 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑀫𑁆𑀧𑀺 𑀙𑀺𑀦𑁆𑀤𑁂𑀬𑁆𑀬, 𑀓𑀺𑀫𑀗𑁆𑀕𑀁 𑀧𑀦 𑀲𑀸𑀔𑀸𑀤𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 ¶ 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑁂 𑀅𑀗𑁆𑀓𑀼𑀭𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀁𑀬𑁂𑀯 𑀧𑀕𑁆𑀕𑀡𑁆𑀳𑀦𑁆𑀢𑁄 𑁋

‘‘𑀬𑀲𑁆𑀲 ¶ 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀧𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄’’𑀢𑀺. 𑁋

𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀦 𑀢𑀲𑁆𑀲 𑀧𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀏𑀓𑀧𑀡𑁆𑀡𑀫𑀢𑁆𑀢𑀫𑁆𑀧𑀺 𑀦 𑀧𑀸𑀢𑁂𑀬𑁆𑀬, 𑀧𑀕𑁂𑀯 𑀲𑀸𑀔𑀸𑀤𑀺𑀓𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀦𑀧𑀺 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑁋

‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀲𑀫𑀽𑀮𑀫𑁆𑀧𑀺 𑀢𑀁 𑀅𑀩𑁆𑀩𑀼𑀳𑁂, 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀫𑀽𑀮𑀫𑁆𑀧𑀺 𑀢𑀁 𑀅𑀩𑁆𑀩𑀼𑀳𑁂𑀢𑀺 𑀢𑀁 𑀢𑀢𑁆𑀣 𑀲𑀫𑀽𑀮𑀫𑁆𑀧𑀺 𑀲𑀳 𑀫𑀽𑀮𑁂𑀦𑀧𑀺 𑀅𑀩𑁆𑀩𑀼𑀳𑁂𑀬𑁆𑀬, 𑀉𑀤𑁆𑀥𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑁂 𑀧𑀼𑀦 𑀅𑀗𑁆𑀓𑀼𑀭𑁄 𑀢𑀁 𑀦𑀻𑀢𑀺𑀁 𑀦𑀺𑀭𑀢𑁆𑀣𑀓𑀁 𑀓𑀸𑀢𑀼𑀓𑀸𑀫𑁄 𑁋

‘‘𑀬𑀲𑁆𑀲𑁂𑀓𑀭𑀢𑁆𑀢𑀺𑀫𑁆𑀧𑀺 𑀖𑀭𑁂 𑀯𑀲𑁂𑀬𑁆𑀬, 𑀬𑀢𑁆𑀣𑀦𑁆𑀦𑀧𑀸𑀦𑀁 𑀧𑀼𑀭𑀺𑀲𑁄 𑀮𑀪𑁂𑀣;

𑀦 𑀢𑀲𑁆𑀲 𑀧𑀸𑀧𑀁 𑀫𑀦𑀲𑀸𑀧𑀺 𑀘𑀺𑀦𑁆𑀢𑀬𑁂, 𑀓𑀢𑀜𑁆𑀜𑀼𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸.

‘‘𑀬𑀲𑁆𑀲𑁂𑀓𑀭𑀢𑁆𑀢𑀺𑀫𑁆𑀧𑀺 𑀖𑀭𑁂 𑀯𑀲𑁂𑀬𑁆𑀬, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀺𑀢𑁄 𑀲𑀺𑀬𑀸;

𑀦 𑀢𑀲𑁆𑀲 𑀧𑀸𑀧𑀁 𑀫𑀦𑀲𑀸𑀧𑀺 𑀘𑀺𑀦𑁆𑀢𑀬𑁂, 𑀅𑀤𑀼𑀩𑁆𑀪𑀧𑀸𑀡𑀻 𑀤𑀳𑀢𑁂 𑀫𑀺𑀢𑁆𑀢𑀤𑀼𑀩𑁆𑀪𑀺𑀁.

‘‘𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀧𑀘𑁆𑀙𑀸 𑀧𑀸𑀧𑁂𑀦 𑀳𑀺𑀁𑀲𑀢𑀺;

𑀅𑀮𑁆𑀮𑀧𑀸𑀡𑀺𑀳𑀢𑁄 𑀧𑁄𑀲𑁄, 𑀦 𑀲𑁄 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺. 𑁋

𑁨𑁬𑁩. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀏𑀓𑀭𑀢𑁆𑀢𑀺𑀫𑁆𑀧𑀻𑀢𑀺 𑀏𑀓𑀭𑀢𑁆𑀢𑀺𑀫𑀢𑁆𑀢𑀫𑁆𑀧𑀺 𑀓𑁂𑀯𑀮𑀁 𑀕𑁂𑀳𑁂 𑀯𑀲𑁂𑀬𑁆𑀬. 𑀬𑀢𑁆𑀣𑀦𑁆𑀦𑀧𑀸𑀦𑀁 𑀧𑀼𑀭𑀺𑀲𑁄 𑀮𑀪𑁂𑀣𑀸𑀢𑀺 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑁄𑀘𑀺 𑀧𑀼𑀭𑀺𑀲𑁄 𑀅𑀦𑁆𑀦𑀧𑀸𑀦𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀪𑁄𑀚𑀦𑀁 ¶ 𑀯𑀸 𑀮𑀪𑁂𑀬𑁆𑀬. 𑀦 𑀢𑀲𑁆𑀲 ¶ 𑀧𑀸𑀧𑀁 𑀫𑀦𑀲𑀸𑀧𑀺 𑀘𑀺𑀦𑁆𑀢𑀬𑁂𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀪𑀤𑁆𑀤𑀓𑀁 𑀅𑀦𑀢𑁆𑀣𑀁 ¶ 𑀫𑀦𑀲𑀸𑀧𑀺 𑀦 𑀘𑀺𑀦𑁆𑀢𑁂𑀬𑁆𑀬 𑀦 𑀧𑀺𑀳𑁂𑀬𑁆𑀬, 𑀧𑀕𑁂𑀯 𑀓𑀸𑀬𑀯𑀸𑀘𑀸𑀳𑀺. 𑀓𑀲𑁆𑀫𑀸𑀢𑀺 𑀘𑁂? 𑀓𑀢𑀜𑁆𑀜𑀼𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸𑀢𑀺 𑀓𑀢𑀜𑁆𑀜𑀼𑀢𑀸 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑁂𑀳𑀺 𑀧𑀲𑀁𑀲𑀺𑀢𑀸.

𑁨𑁬𑁪. 𑀉𑀧𑀝𑁆𑀞𑀺𑀢𑁄𑀢𑀺 𑀧𑀬𑀺𑀭𑀼𑀧𑀸𑀲𑀺𑀢𑁄 ‘‘𑀇𑀤𑀁 𑀕𑀡𑁆𑀳 𑀇𑀤𑀁 𑀪𑀼𑀜𑁆𑀚𑀸’’𑀢𑀺 𑀅𑀦𑁆𑀦𑀧𑀸𑀦𑀸𑀤𑀺𑀦𑀸 𑀉𑀧𑀝𑁆𑀞𑀺𑀢𑁄. 𑀅𑀤𑀼𑀩𑁆𑀪𑀧𑀸𑀡𑀻𑀢𑀺 𑀅𑀳𑀺𑀁𑀲𑀓𑀳𑀢𑁆𑀣𑁄 𑀳𑀢𑁆𑀣𑀲𑀁𑀬𑀢𑁄. 𑀤𑀳𑀢𑁂 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑁆𑀢𑀺 𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀧𑀼𑀕𑁆𑀕𑀮𑀁 𑀤𑀳𑀢𑀺 𑀯𑀺𑀦𑀸𑀲𑁂𑀢𑀺, 𑀅𑀧𑁆𑀧𑀤𑀼𑀝𑁆𑀞𑁂 𑀳𑀺𑀢𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂 𑀧𑀼𑀕𑁆𑀕𑀮𑁂 𑀧𑀭𑁂𑀦 𑀓𑀢𑁄 𑀅𑀧𑀭𑀸𑀥𑁄 𑀅𑀯𑀺𑀲𑁂𑀲𑁂𑀦 𑀢𑀲𑁆𑀲𑁂𑀯 𑀅𑀦𑀢𑁆𑀣𑀸𑀯𑀳𑁄, 𑀅𑀧𑁆𑀧𑀤𑀼𑀝𑁆𑀞𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀢𑁄 𑀢𑀁 𑀤𑀳𑀢𑀺 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’𑀢𑀺. (𑀥. 𑀧. 𑁧𑁨𑁫; 𑀚𑀸. 𑁧.𑁫.𑁯𑁪; 𑀲𑀁. 𑀦𑀺. 𑁧.𑁨𑁨);

𑁨𑁬𑁫. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀓𑁂𑀦𑀘𑀺 𑀲𑀸𑀥𑀼𑀦𑀸 𑀓𑀢𑀪𑀤𑁆𑀤𑀓𑁄 𑀓𑀢𑀽𑀧𑀓𑀸𑀭𑁄. 𑀧𑀘𑁆𑀙𑀸 𑀧𑀸𑀧𑁂𑀦 𑀳𑀺𑀁𑀲𑀢𑀻𑀢𑀺 𑀢𑀁 𑀧𑀼𑀩𑁆𑀩𑀓𑀸𑀭𑀺𑀦𑀁 𑀅𑀧𑀭𑀪𑀸𑀕𑁂 𑀧𑀸𑀧𑁂𑀦 𑀅𑀪𑀤𑁆𑀤𑀓𑁂𑀦 𑀅𑀦𑀢𑁆𑀣𑀓𑁂𑀦 𑀩𑀸𑀥𑀢𑀺. 𑀅𑀮𑁆𑀮𑀧𑀸𑀡𑀺𑀳𑀢𑁄 𑀧𑁄𑀲𑁄𑀢𑀺 𑀅𑀮𑁆𑀮𑀧𑀸𑀡𑀺𑀦𑀸 𑀉𑀧𑀓𑀸𑀭𑀓𑀺𑀭𑀺𑀬𑀸𑀬 𑀅𑀮𑁆𑀮𑀧𑀸𑀡𑀺𑀦𑀸 𑀥𑁄𑀢𑀳𑀢𑁆𑀣𑁂𑀦 𑀧𑀼𑀩𑁆𑀩𑀓𑀸𑀭𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀳𑀢𑁄 𑀩𑀸𑀥𑀺𑀢𑁄, 𑀢𑀲𑁆𑀲 𑀯𑀸 𑀧𑀼𑀩𑁆𑀩𑀓𑀸𑀭𑀺𑀦𑁄 𑀩𑀸𑀥𑀦𑁂𑀦 𑀳𑀢𑁄 𑀅𑀮𑁆𑀮𑀧𑀸𑀡𑀺𑀳𑀢𑁄 𑀦𑀸𑀫, 𑀅𑀓𑀢𑀜𑁆𑀜𑀼𑀧𑀼𑀕𑁆𑀕𑀮𑁄. 𑀦 𑀲𑁄 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑁄 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀇𑀝𑁆𑀞𑀸𑀦𑀺 𑀦 𑀧𑀲𑁆𑀲𑀢𑀺, 𑀦 𑀯𑀺𑀦𑁆𑀤𑀢𑀺, 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀁 𑀧𑀕𑁆𑀕𑀡𑁆𑀳𑀦𑁆𑀢𑁂𑀦 𑀅𑀗𑁆𑀓𑀼𑀭𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀯𑀼𑀢𑁆𑀢𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀦𑀺𑀭𑀼𑀢𑁆𑀢𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀬𑀓𑁆𑀔𑁄 𑀧𑀦 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀘𑀦𑀧𑀝𑀺𑀯𑀘𑀦𑀸𑀦𑀺 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸𑀧𑀺 ‘‘𑀳𑁄𑀢𑀼 𑀇𑀫𑀲𑁆𑀲 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀢𑁆𑀢𑀩𑁆𑀩𑀁 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀓𑁂𑀦𑀘𑀺 𑀅𑀦𑀪𑀺𑀪𑀯𑀦𑀻𑀬𑀢𑀫𑁂𑀯 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀦𑀸𑀳𑀁 ¶ 𑀤𑁂𑀯𑁂𑀦 𑀯𑀸 𑀫𑀦𑀼𑀲𑁆𑀲𑁂𑀦 𑀯𑀸, 𑀇𑀲𑁆𑀲𑀭𑀺𑀬𑁂𑀦 𑀯𑀸 𑀳𑀁 𑀲𑀼𑀧𑁆𑀧𑀲𑀬𑁆𑀳𑁄;

𑀬𑀓𑁆𑀔𑁄𑀳𑀫𑀲𑁆𑀫𑀺 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑁄, 𑀤𑀽𑀭𑀗𑁆𑀕𑀫𑁄 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀤𑁂𑀯𑁂𑀦 𑀯𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀤𑁂𑀯𑁂𑀦 𑀯𑀸. 𑀫𑀦𑀼𑀲𑁆𑀲𑁂𑀦 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀲𑁆𑀲𑀭𑀺𑀬𑁂𑀦 ¶ 𑀯𑀸𑀢𑀺 𑀤𑁂𑀯𑀺𑀲𑁆𑀲𑀭𑀺𑀬𑁂𑀦 𑀯𑀸 𑀫𑀦𑀼𑀲𑁆𑀲𑀺𑀲𑁆𑀲𑀭𑀺𑀬𑁂𑀦 𑀯𑀸. 𑀢𑀢𑁆𑀣 𑀤𑁂𑀯𑀺𑀲𑁆𑀲𑀭𑀺𑀬𑀁 𑀦𑀸𑀫 𑀘𑀢𑀼𑀫𑀳𑀸𑀭𑀸𑀚𑀺𑀓𑀲𑀓𑁆𑀓𑀲𑀼𑀬𑀸𑀫𑀸𑀤𑀻𑀦𑀁 𑀤𑁂𑀯𑀺𑀤𑁆𑀥𑀺, 𑀫𑀦𑀼𑀲𑁆𑀲𑀺𑀲𑁆𑀲𑀭𑀺𑀬𑀁 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀧𑀼𑀜𑁆𑀜𑀺𑀤𑁆𑀥𑀺. 𑀢𑀲𑁆𑀫𑀸 𑀇𑀲𑁆𑀲𑀭𑀺𑀬𑀕𑁆𑀕𑀳𑀡𑁂𑀦 𑀫𑀳𑀸𑀦𑀼𑀪𑀸𑀯𑁂 𑀤𑁂𑀯𑀫𑀦𑀼𑀲𑁆𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀳𑀸𑀦𑀼𑀪𑀸𑀯𑀸𑀧𑀺 𑀳𑀺 𑀤𑁂𑀯𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑀽𑀧𑀢𑁆𑀣𑀫𑁆𑀪𑀺𑀢𑁂 𑀫𑀦𑀼𑀲𑁆𑀲𑁂𑀧𑀺 𑀅𑀲𑀢𑀺 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀁 𑀅𑀪𑀺𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀕𑁂𑀯 𑀇𑀢𑀭𑁂. 𑀳𑀦𑁆𑀢𑀺 𑀅𑀲𑀳𑀦𑁂 𑀦𑀺𑀧𑀸𑀢𑁄. 𑀦 𑀲𑀼𑀧𑁆𑀧𑀲𑀬𑁆𑀳𑁄𑀢𑀺 𑀅𑀧𑁆𑀧𑀥𑀁𑀲𑀺𑀬𑁄. 𑀬𑀓𑁆𑀔𑁄𑀳𑀫𑀲𑁆𑀫𑀺 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑁂𑀦 𑀅𑀳𑀁 𑀬𑀓𑁆𑀔𑀢𑁆𑀢𑀁 𑀉𑀧𑀕𑀢𑁄 𑀅𑀲𑁆𑀫𑀺, 𑀬𑀓𑁆𑀔𑁄𑀯 𑀲𑀫𑀸𑀦𑁄 𑀦 𑀬𑁄 𑀯𑀸 𑀲𑁄 𑀯𑀸, 𑀅𑀣 𑀔𑁄 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑁄 𑀧𑀭𑀫𑀸𑀬 𑀉𑀢𑁆𑀢𑀫𑀸𑀬 𑀬𑀓𑁆𑀔𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀤𑀽𑀭𑀗𑁆𑀕𑀫𑁄𑀢𑀺 𑀔𑀡𑁂𑀦𑁂𑀯 𑀤𑀽𑀭𑀫𑁆𑀧𑀺 𑀞𑀸𑀦𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄. 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀭𑀻𑀭𑀩𑀮𑁂𑀦 𑀘 𑀉𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀫𑀦𑁆𑀢𑀧𑁆𑀧𑀬𑁄𑀕𑀸𑀤𑀻𑀳𑀺 𑀅𑀢𑁆𑀢𑀦𑁄 𑀅𑀦𑀪𑀺𑀪𑀯𑀦𑀻𑀬𑀢𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀭𑀽𑀧𑀲𑀫𑁆𑀧𑀦𑁆𑀦𑁄 𑀳𑀺 𑀧𑀭𑁂𑀲𑀁 𑀩𑀳𑀼𑀫𑀸𑀦𑀺𑀢𑁄 𑀳𑁄𑀢𑀺, 𑀭𑀽𑀧𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 ¶ 𑀯𑀺𑀲𑀪𑀸𑀕𑀯𑀢𑁆𑀣𑀼𑀦𑀸𑀧𑀺 𑀅𑀦𑀸𑀓𑀟𑁆𑀠𑀦𑀺𑀬𑁄𑀯𑀸𑀢𑀺 𑀯𑀡𑁆𑀡𑀲𑀫𑁆𑀧𑀤𑀸 𑀅𑀦𑀪𑀺𑀪𑀯𑀦𑀻𑀬𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀸.

𑀇𑀢𑁄 𑀧𑀭𑀁 𑀅𑀗𑁆𑀓𑀼𑀭𑀲𑁆𑀲 𑀘 𑀤𑁂𑀯𑀧𑀼𑀢𑁆𑀢𑀲𑁆𑀲 𑀘 𑀯𑀘𑀦𑀧𑀝𑀺𑀯𑀘𑀦𑀓𑀣𑀸 𑀳𑁄𑀢𑀺 𑁋

‘‘𑀧𑀸𑀡𑀺 𑀢𑁂 𑀲𑀩𑁆𑀩𑀲𑁄𑀯𑀡𑁆𑀡𑁄, 𑀧𑀜𑁆𑀘𑀥𑀸𑀭𑁄 𑀫𑀥𑀼𑀲𑁆𑀲𑀯𑁄;

𑀦𑀸𑀦𑀸𑀭𑀲𑀸 𑀧𑀕𑁆𑀖𑀭𑀦𑁆𑀢𑀺, 𑀫𑀜𑁆𑀜𑁂𑀳𑀁 𑀢𑀁 𑀧𑀼𑀭𑀺𑀦𑁆𑀤𑀤𑀁.

‘‘𑀦𑀸𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀧𑁂𑀢𑀁 𑀫𑀁 𑀅𑀗𑁆𑀓𑀼𑀭 𑀚𑀸𑀦𑀸𑀳𑀺, 𑀭𑁄𑀭𑀼𑀯𑀫𑁆𑀳𑀸 𑀇𑀥𑀸𑀕𑀢𑀁.

‘‘𑀓𑀺𑀁𑀲𑀻𑀮𑁄 𑀓𑀺𑀁𑀲𑀫𑀸𑀘𑀸𑀭𑁄, 𑀭𑁄𑀭𑀼𑀯𑀲𑁆𑀫𑀺𑀁 𑀧𑀼𑀭𑁂 𑀢𑀼𑀯𑀁;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

‘‘𑀢𑀼𑀦𑁆𑀦𑀯𑀸𑀬𑁄 ¶ 𑀧𑀼𑀭𑁂 𑀆𑀲𑀺𑀁, 𑀭𑁄𑀭𑀼𑀯𑀲𑁆𑀫𑀺𑀁 𑀢𑀤𑀸 𑀅𑀳𑀁;

𑀲𑀼𑀓𑀺𑀘𑁆𑀙𑀯𑀼𑀢𑁆𑀢𑀺 𑀓𑀧𑀡𑁄, 𑀦 𑀫𑁂 𑀯𑀺𑀚𑁆𑀚𑀢𑀺 𑀤𑀸𑀢𑀯𑁂.

‘‘𑀦𑀺𑀯𑁂𑀲𑀦𑀜𑁆𑀘 𑀫𑁂 𑀆𑀲𑀺, 𑀅𑀲𑀬𑁆𑀳𑀲𑁆𑀲 𑀉𑀧𑀦𑁆𑀢𑀺𑀓𑁂;

𑀲𑀤𑁆𑀥𑀲𑁆𑀲 𑀤𑀸𑀦𑀧𑀢𑀺𑀦𑁄, 𑀓𑀢𑀧𑀼𑀜𑁆𑀜𑀲𑁆𑀲 𑀮𑀚𑁆𑀚𑀺𑀦𑁄.

‘‘𑀢𑀢𑁆𑀣 ¶ 𑀬𑀸𑀘𑀦𑀓𑀸𑀬𑀦𑁆𑀢𑀺, 𑀦𑀸𑀦𑀸𑀕𑁄𑀢𑁆𑀢𑀸 𑀯𑀦𑀺𑀩𑁆𑀩𑀓𑀸;

𑀢𑁂 𑀘 𑀫𑀁 𑀢𑀢𑁆𑀣 𑀧𑀼𑀘𑁆𑀙𑀦𑁆𑀢𑀺, 𑀅𑀲𑀬𑁆𑀳𑀲𑁆𑀲 𑀦𑀺𑀯𑁂𑀲𑀦𑀁.

‘‘𑀓𑀢𑁆𑀣 𑀕𑀘𑁆𑀙𑀸𑀫 𑀪𑀤𑁆𑀤𑀁 𑀯𑁄, 𑀓𑀢𑁆𑀣 𑀤𑀸𑀦𑀁 𑀧𑀤𑀻𑀬𑀢𑀺;

𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀅𑀓𑁆𑀔𑀸𑀫𑀺, 𑀅𑀲𑀬𑁆𑀳𑀲𑁆𑀲 𑀦𑀺𑀯𑁂𑀲𑀦𑀁.

‘‘𑀧𑀕𑁆𑀕𑀬𑁆𑀳 𑀤𑀓𑁆𑀔𑀺𑀡𑀁 𑀩𑀸𑀳𑀼𑀁, 𑀏𑀢𑁆𑀣 𑀕𑀘𑁆𑀙𑀣 𑀪𑀤𑁆𑀤𑀁 𑀯𑁄;

𑀏𑀢𑁆𑀣 𑀤𑀸𑀦𑀁 𑀧𑀤𑀻𑀬𑀢𑀺, 𑀅𑀲𑀬𑁆𑀳𑀲𑁆𑀲 𑀦𑀺𑀯𑁂𑀲𑀦𑁂.

‘‘𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

‘‘𑀦 𑀓𑀺𑀭 𑀢𑁆𑀯𑀁 𑀅𑀤𑀸 𑀤𑀸𑀦𑀁, 𑀲𑀓𑀧𑀸𑀡𑀻𑀳𑀺 𑀓𑀲𑁆𑀲𑀘𑀺;

𑀧𑀭𑀲𑁆𑀲 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄, 𑀧𑀸𑀡𑀺𑀁 𑀧𑀕𑁆𑀕𑀬𑁆𑀳 𑀧𑀸𑀯𑀤𑀺.

‘‘𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

‘‘𑀬𑁄 𑀲𑁄 𑀤𑀸𑀦𑀫𑀤𑀸 𑀪𑀦𑁆𑀢𑁂, 𑀧𑀲𑀦𑁆𑀦𑁄 𑀲𑀓𑀧𑀸𑀡𑀺𑀪𑀺;

𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀓𑀺𑀁 𑀦𑀼 𑀲𑁄 𑀤𑀺𑀲𑀢𑀁 𑀕𑀢𑁄.

‘‘𑀦𑀸𑀳𑀁 𑀧𑀚𑀸𑀦𑀸𑀫𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲 𑀕𑀢𑀺𑀁 𑀆𑀕𑀢𑀺𑀁 𑀯𑀸;

𑀲𑀼𑀢𑀜𑁆𑀘 ¶ 𑀫𑁂 𑀯𑁂𑀲𑁆𑀲𑀯𑀡𑀲𑁆𑀲 𑀲𑀦𑁆𑀢𑀺𑀓𑁂, 𑀲𑀓𑁆𑀓𑀲𑁆𑀲 𑀲𑀳𑀩𑁆𑀬𑀢𑀁 𑀕𑀢𑁄 𑀅𑀲𑀬𑁆𑀳𑁄.

‘‘𑀅𑀮𑀫𑁂𑀯 𑀓𑀸𑀢𑀼𑀁 𑀓𑀮𑁆𑀬𑀸𑀡𑀁, 𑀤𑀸𑀦𑀁 𑀤𑀸𑀢𑀼𑀁 𑀬𑀣𑀸𑀭𑀳𑀁;

𑀧𑀸𑀡𑀺𑀁 𑀓𑀸𑀫𑀤𑀤𑀁 𑀤𑀺𑀲𑁆𑀯𑀸, 𑀓𑁄 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀺.

‘‘𑀲𑁄 ¶ 𑀳𑀺 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀁;

𑀤𑀸𑀦𑀁 𑀧𑀝𑁆𑀞𑀧𑀬𑀺𑀲𑁆𑀲𑀸𑀫𑀺, 𑀬𑀁 𑀫𑀫𑀲𑁆𑀲 𑀲𑀼𑀔𑀸𑀯𑀳𑀁.

‘‘𑀤𑀲𑁆𑀲𑀸𑀫𑀦𑁆𑀦𑀜𑁆𑀘 ¶ 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘𑀸’’𑀢𑀺. 𑁋

𑀧𑀦𑁆𑀦𑀭𑀲 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑀳𑁄𑀦𑁆𑀢𑀺.

𑁨𑁬𑁭. 𑀢𑀢𑁆𑀣 𑀧𑀸𑀡𑀺 𑀢𑁂𑀢𑀺 𑀢𑀯 𑀤𑀓𑁆𑀔𑀺𑀡𑀳𑀢𑁆𑀣𑁄. 𑀲𑀩𑁆𑀩𑀲𑁄𑀯𑀡𑁆𑀡𑁄𑀢𑀺 𑀲𑀩𑁆𑀩𑀲𑁄 𑀲𑀼𑀯𑀡𑁆𑀡𑀯𑀡𑁆𑀡𑁄. 𑀧𑀜𑁆𑀘𑀥𑀸𑀭𑁄𑀢𑀺 𑀧𑀜𑁆𑀘𑀳𑀺 𑀅𑀗𑁆𑀕𑀼𑀮𑀻𑀳𑀺 𑀧𑀭𑁂𑀳𑀺 𑀓𑀸𑀫𑀺𑀢𑀯𑀢𑁆𑀣𑀽𑀦𑀁 𑀥𑀸𑀭𑀸 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀧𑀜𑁆𑀘𑀥𑀸𑀭𑁄. 𑀫𑀥𑀼𑀲𑁆𑀲𑀯𑁄𑀢𑀺 𑀫𑀥𑀼𑀭𑀭𑀲𑀯𑀺𑀲𑁆𑀲𑀦𑁆𑀤𑀓𑁄. 𑀢𑁂𑀦𑀸𑀳 ‘‘𑀦𑀸𑀦𑀸𑀭𑀲𑀸 𑀧𑀕𑁆𑀖𑀭𑀦𑁆𑀢𑀻’’𑀢𑀺, 𑀫𑀥𑀼𑀭𑀓𑀝𑀼𑀓𑀓𑀲𑀸𑀯𑀸𑀤𑀺𑀪𑁂𑀤𑀸 𑀦𑀸𑀦𑀸𑀯𑀺𑀥𑀸 𑀭𑀲𑀸 𑀯𑀺𑀲𑁆𑀲𑀦𑁆𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀓𑁆𑀔𑀲𑁆𑀲 𑀳𑀺 𑀓𑀸𑀫𑀤𑀤𑁂 𑀫𑀥𑀼𑀭𑀸𑀤𑀺𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀯𑀺𑀯𑀺𑀥𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀳𑀢𑁆𑀣𑁂 𑀯𑀺𑀲𑁆𑀲𑀚𑁆𑀚𑀦𑁆𑀢𑁂 𑀫𑀥𑀼𑀭𑀸𑀤𑀺𑀭𑀲𑀸 𑀧𑀕𑁆𑀖𑀭𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀜𑁆𑀜𑁂𑀳𑀁 𑀢𑀁 𑀧𑀼𑀭𑀺𑀦𑁆𑀤𑀤𑀦𑁆𑀢𑀺 𑀫𑀜𑁆𑀜𑁂 𑀅𑀳𑀁 𑀢𑀁 𑀧𑀼𑀭𑀺𑀦𑁆𑀤𑀤𑀁 𑀲𑀓𑁆𑀓𑀁, ‘‘𑀏𑀯𑀁𑀫𑀳𑀸𑀦𑀼𑀪𑀸𑀯𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸’’𑀢𑀺 𑀢𑀁 𑀅𑀳𑀁 𑀫𑀜𑁆𑀜𑀸𑀫𑀻𑀢𑀺 𑀅𑀢𑁆𑀣𑁄.

𑁨𑁬𑁮. 𑀦𑀸𑀫𑁆𑀳𑀺 𑀤𑁂𑀯𑁄𑀢𑀺 𑀯𑁂𑀲𑁆𑀲𑀯𑀡𑀸𑀤𑀺𑀓𑁄 𑀧𑀸𑀓𑀝𑀤𑁂𑀯𑁄 𑀦 𑀳𑁄𑀫𑀺. 𑀦 𑀕𑀦𑁆𑀥𑀩𑁆𑀩𑁄𑀢𑀺 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀤𑁂𑀯𑁄𑀧𑀺 𑀦 𑀳𑁄𑀫𑀺. 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀧𑀼𑀭𑁂 𑀤𑀸𑀦𑀲𑁆𑀲 𑀧𑀝𑁆𑀞𑀧𑀺𑀢𑀢𑁆𑀢𑀸 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀧𑀺 𑀦 𑀳𑁄𑀫𑀺. 𑀓𑀢𑀭𑁄 𑀧𑀦 𑀅𑀳𑁄𑀲𑀻𑀢𑀺 𑀆𑀳 ‘‘𑀧𑁂𑀢𑀁 𑀫𑀁 𑀅𑀗𑁆𑀓𑀼𑀭 𑀚𑀸𑀦𑀸𑀳𑀻’’𑀢𑀺𑀆𑀤𑀺. 𑀅𑀗𑁆𑀓𑀼𑀭𑀧𑁂𑀢𑀽𑀧𑀧𑀢𑁆𑀢𑀺𑀓𑀁 𑀫𑀁 𑀚𑀸𑀦𑀸𑀳𑀺, ‘‘𑀅𑀜𑁆𑀜𑀢𑀭𑁄 𑀧𑁂𑀢𑀫𑀳𑀺𑀤𑁆𑀥𑀺𑀓𑁄’’𑀢𑀺 𑀫𑀁 𑀉𑀧𑀥𑀸𑀭𑁂𑀳𑀺. 𑀭𑁄𑀭𑀼𑀯𑀫𑁆𑀳𑀸 𑀇𑀥𑀸𑀕𑀢𑀦𑁆𑀢𑀺 𑀭𑁄𑀭𑀼𑀯𑀦𑀕𑀭𑀢𑁄 𑀘𑀯𑀺𑀢𑁆𑀯𑀸 𑀫𑀭𑀼𑀓𑀦𑁆𑀢𑀸𑀭𑁂 𑀇𑀥 𑀇𑀫𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀉𑀧𑀧𑀚𑁆𑀚𑀦𑀯𑀲𑁂𑀦 𑀆𑀕𑀢𑀁, 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁨𑁬𑁯. 𑀓𑀺𑀁𑀲𑀻𑀮𑁄 𑀓𑀺𑀁𑀲𑀫𑀸𑀘𑀸𑀭𑁄, 𑀭𑁄𑀭𑀼𑀯𑀲𑁆𑀫𑀺𑀁 𑀧𑀼𑀭𑁂 𑀢𑀼𑀯𑀦𑁆𑀢𑀺 𑀧𑀼𑀩𑁆𑀩𑁂 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀭𑁄𑀭𑀼𑀯𑀦𑀕𑀭𑁂 𑀯𑀲𑀦𑁆𑀢𑁄 𑀢𑁆𑀯𑀁 𑀓𑀺𑀁𑀲𑀻𑀮𑁄 ¶ 𑀓𑀺𑀁𑀲𑀫𑀸𑀘𑀸𑀭𑁄 𑀅𑀳𑁄𑀲𑀺, 𑀧𑀸𑀧𑀢𑁄 𑀦𑀺𑀯𑀢𑁆𑀢𑀦𑀮𑀓𑁆𑀔𑀡𑀁 𑀓𑀻𑀤𑀺𑀲𑀁 𑀲𑀻𑀮𑀁 𑀲𑀫𑀸𑀤𑀸𑀬 𑀲𑀁𑀯𑀢𑁆𑀢𑀺𑀢𑀧𑀼𑀜𑁆𑀜𑀓𑀺𑀭𑀺𑀬𑀸𑀮𑀓𑁆𑀔𑀡𑁂𑀦 𑀲𑀫𑀸𑀘𑀸𑀭𑁂𑀦 𑀓𑀺𑀁𑀲𑀫𑀸𑀘𑀸𑀭𑁄, 𑀤𑀸𑀦𑀸𑀤𑀻𑀲𑀼 𑀓𑀼𑀲𑀮𑀲𑀫𑀸𑀘𑀸𑀭𑁂𑀲𑀼 𑀓𑀻𑀤𑀺𑀲𑁄 𑀲𑀫𑀸𑀘𑀸𑀭𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 ¶ , 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻𑀢𑀺 𑀓𑀻𑀤𑀺𑀲𑁂𑀦 𑀲𑁂𑀝𑁆𑀞𑀘𑀭𑀺𑀬𑁂𑀦 𑀇𑀤𑀁 𑀏𑀯𑀭𑀽𑀧𑀁 𑀢𑀯 𑀳𑀢𑁆𑀣𑁂𑀲𑀼 𑀧𑀼𑀜𑁆𑀜𑀨𑀮𑀁 𑀇𑀤𑀸𑀦𑀺 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀁 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀨𑀮𑀜𑁆𑀳𑀺 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀧𑀼𑀜𑁆𑀜’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣𑀸 𑀳𑀺 𑀢𑀁 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦) 𑀧𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁭𑁦. 𑀢𑀼𑀦𑁆𑀦𑀯𑀸𑀬𑁄𑀢𑀺 ¶ 𑀢𑀼𑀦𑁆𑀦𑀓𑀸𑀭𑁄. 𑀲𑀼𑀓𑀺𑀘𑁆𑀙𑀯𑀼𑀢𑁆𑀢𑀻𑀢𑀺 𑀲𑀼𑀝𑁆𑀞𑀼 𑀓𑀺𑀘𑁆𑀙𑀧𑀼𑀢𑁆𑀢𑀺𑀓𑁄 𑀅𑀢𑀺𑀯𑀺𑀬 𑀤𑀼𑀓𑁆𑀔𑀚𑀻𑀯𑀺𑀓𑁄. 𑀓𑀧𑀡𑁄𑀢𑀺 𑀯𑀭𑀸𑀓𑁄, 𑀤𑀻𑀦𑁄𑀢𑀺 𑀅𑀢𑁆𑀣𑁄. 𑀦 𑀫𑁂 𑀯𑀺𑀚𑁆𑀚𑀢𑀺 𑀤𑀸𑀢𑀯𑁂𑀢𑀺 𑀅𑀤𑁆𑀥𑀺𑀓𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀢𑀼𑀁 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀫𑀬𑁆𑀳𑀁 𑀦𑀢𑁆𑀣𑀺, 𑀘𑀺𑀢𑁆𑀢𑀁 𑀧𑀦 𑀫𑁂 𑀤𑀸𑀦𑀁 𑀤𑀺𑀦𑁆𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁧. 𑀦𑀺𑀯𑁂𑀲𑀦𑀦𑁆𑀢𑀺 𑀖𑀭𑀁, 𑀓𑀫𑁆𑀫𑀓𑀭𑀡𑀲𑀸𑀮𑀸 𑀯𑀸. 𑀅𑀲𑀬𑁆𑀳𑀲𑁆𑀲 𑀉𑀧𑀦𑁆𑀢𑀺𑀓𑁂𑀢𑀺 𑀅𑀲𑀬𑁆𑀳𑀲𑁆𑀲 𑀫𑀳𑀸𑀲𑁂𑀝𑁆𑀞𑀺𑀦𑁄 𑀕𑁂𑀳𑀲𑁆𑀲 𑀲𑀫𑀻𑀧𑁂. 𑀲𑀤𑁆𑀥𑀲𑁆𑀲𑀸𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀤𑀸𑀦𑀧𑀢𑀺𑀦𑁄𑀢𑀺 𑀤𑀸𑀦𑁂 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀧𑀭𑀺𑀘𑁆𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀮𑁄𑀪𑀲𑁆𑀲 𑀘 𑀅𑀪𑀺𑀪𑀯𑁂𑀦 𑀧𑀢𑀺𑀪𑀽𑀢𑀲𑁆𑀲. 𑀓𑀢𑀧𑀼𑀜𑁆𑀜𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀓𑀢𑀲𑀼𑀘𑀭𑀺𑀢𑀓𑀫𑁆𑀫𑀲𑁆𑀲. 𑀮𑀚𑁆𑀚𑀺𑀦𑁄𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀲𑀪𑀸𑀯𑀲𑁆𑀲.

𑁨𑁭𑁨. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀫 𑀦𑀺𑀯𑁂𑀲𑀦𑁂. 𑀬𑀸𑀘𑀦𑀓𑀸𑀬𑀦𑁆𑀢𑀻𑀢𑀺 𑀬𑀸𑀘𑀦𑀓𑀸 𑀚𑀦𑀸 𑀅𑀲𑀬𑁆𑀳𑀲𑁂𑀝𑁆𑀞𑀺𑀁 𑀓𑀺𑀜𑁆𑀘𑀺 𑀬𑀸𑀘𑀺𑀢𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀺. 𑀦𑀸𑀦𑀸𑀕𑁄𑀢𑁆𑀢𑀸𑀢𑀺 𑀦𑀸𑀦𑀸𑀯𑀺𑀥𑀕𑁄𑀢𑁆𑀢𑀸𑀧𑀤𑁂𑀲𑀸. 𑀯𑀦𑀺𑀩𑁆𑀩𑀓𑀸𑀢𑀺 𑀯𑀡𑁆𑀡𑀤𑀻𑀧𑀓𑀸, 𑀬𑁂 𑀤𑀸𑀬𑀓𑀲𑁆𑀲 𑀧𑀼𑀜𑁆𑀜𑀨𑀮𑀸𑀤𑀺𑀜𑁆𑀘 𑀕𑀼𑀡𑀓𑀺𑀢𑁆𑀢𑀦𑀸𑀤𑀺𑀫𑀼𑀔𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀺𑀓𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑁂 𑀘 𑀫𑀁 𑀢𑀢𑁆𑀣 𑀧𑀼𑀘𑁆𑀙𑀦𑁆𑀢𑀻𑀢𑀺 𑀢𑀢𑁆𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑁂 𑀬𑀸𑀘𑀓𑀸𑀤𑀬𑁄 𑀫𑀁 𑀅𑀲𑀬𑁆𑀳𑀲𑁂𑀝𑁆𑀞𑀺𑀦𑁄 𑀦𑀺𑀯𑁂𑀲𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀤𑁆𑀯𑀬𑀁 ¶ 𑀇𑀘𑁆𑀙𑀦𑁆𑀢𑀺.

𑁨𑁭𑁩. 𑀓𑀢𑁆𑀣 𑀕𑀘𑁆𑀙𑀸𑀫 𑀪𑀤𑁆𑀤𑀁 𑀯𑁄, 𑀓𑀢𑁆𑀣 𑀤𑀸𑀦𑀁 𑀧𑀤𑀻𑀬𑀢𑀻𑀢𑀺 𑀢𑁂𑀲𑀁 𑀧𑀼𑀘𑁆𑀙𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀬𑀁 𑀧𑁂𑀢𑁆𑀣 𑀅𑀢𑁆𑀣𑁄 𑁋 𑀪𑀤𑁆𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼, 𑀫𑀬𑀁 ‘‘𑀅𑀲𑀬𑁆𑀳𑀫𑀳𑀸𑀲𑁂𑀝𑁆𑀞𑀺𑀦𑀸 𑀤𑀸𑀦𑀁 𑀧𑀤𑀻𑀬𑀢𑀻’’𑀢𑀺 𑀲𑀼𑀢𑁆𑀯𑀸 𑀆𑀕𑀢𑀸, 𑀓𑀢𑁆𑀣 𑀤𑀸𑀦𑀁 𑀧𑀤𑀻𑀬𑀢𑀺, 𑀓𑀢𑁆𑀣 𑀯𑀸 𑀫𑀬𑀁 𑀕𑀘𑁆𑀙𑀸𑀫, 𑀓𑀢𑁆𑀣 𑀕𑀢𑁂𑀦 𑀤𑀸𑀦𑀁 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀅𑀓𑁆𑀔𑀸𑀫𑀻𑀢𑀺 𑀏𑀯𑀁 𑀢𑁂𑀳𑀺 𑀅𑀤𑁆𑀥𑀺𑀓𑀚𑀦𑁂𑀳𑀺 𑀮𑀪𑀦𑀝𑁆𑀞𑀸𑀦𑀁 𑀧𑀼𑀝𑁆𑀞𑁄 ¶ ‘‘𑀅𑀳𑀁 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀢𑀸𑀬 𑀇𑀤𑀸𑀦𑀺 𑀈𑀤𑀺𑀲𑀸𑀦𑀁 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀅𑀲𑀫𑀢𑁆𑀣𑁄 𑀚𑀸𑀢𑁄, 𑀤𑀸𑀦𑀕𑁆𑀕𑀁 𑀧𑀦 𑀇𑀫𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀮𑀸𑀪𑀲𑁆𑀲 𑀉𑀧𑀸𑀬𑀸𑀘𑀺𑀓𑁆𑀔𑀡𑁂𑀦 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀏𑀢𑁆𑀢𑀓𑁂𑀦𑀧𑀺 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀸𑀫𑀻’’𑀢𑀺 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀓𑁆𑀔𑀺𑀡𑀁 𑀩𑀸𑀳𑀼𑀁 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀅𑀲𑀬𑁆𑀳𑀲𑁂𑀝𑁆𑀞𑀺𑀲𑁆𑀲 𑀦𑀺𑀯𑁂𑀲𑀦𑀁 𑀅𑀓𑁆𑀔𑀸𑀫𑀺. 𑀢𑁂𑀦𑀸𑀳 ‘‘𑀧𑀕𑁆𑀕𑀬𑁆𑀳 𑀤𑀓𑁆𑀔𑀺𑀡𑀁 𑀩𑀸𑀳𑀼’’𑀦𑁆𑀢𑀺𑀆𑀤𑀺.

𑁨𑁭𑁪. 𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄𑀢𑀺 𑀢𑁂𑀦 𑀧𑀭𑀤𑀸𑀦𑀧𑀓𑀸𑀲𑀦𑁂𑀦 𑀧𑀭𑁂𑀦 𑀓𑀢𑀲𑁆𑀲 𑀤𑀸𑀦𑀲𑁆𑀲 𑀲𑀓𑁆𑀓𑀘𑁆𑀘𑀁 𑀅𑀦𑀼𑀫𑁄𑀤𑀦𑀫𑀢𑁆𑀢𑁂𑀦 𑀳𑁂𑀢𑀼𑀦𑀸 𑀇𑀤𑀸𑀦𑀺 𑀫𑀬𑁆𑀳𑀁 𑀳𑀢𑁆𑀣𑁄 𑀓𑀧𑁆𑀧𑀭𑀼𑀓𑁆𑀔𑁄 𑀯𑀺𑀬 𑀲𑀦𑁆𑀢𑀸𑀦𑀓𑀮𑀢𑀸 𑀯𑀺𑀬 𑀘 𑀓𑀸𑀫𑀤𑀼𑀳𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀬𑀻 𑀓𑀸𑀫𑀤𑀤𑁄 𑀳𑁄𑀢𑀺. 𑀓𑀸𑀫𑀤𑀤𑁄 𑀘 𑀳𑁄𑀦𑁆𑀢𑁄 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄 𑀇𑀝𑁆𑀞𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦𑀓𑁄 𑀚𑀸𑀢𑁄.

𑁨𑁭𑁬. 𑀦 ¶ 𑀓𑀺𑀭 𑀢𑁆𑀯𑀁 𑀅𑀤𑀸 𑀤𑀸𑀦𑀦𑁆𑀢𑀺 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁆𑀯𑀁 𑀓𑀺𑀭 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦 𑀧𑀭𑀺𑀘𑁆𑀘𑀚𑀺, 𑀲𑀓𑀧𑀸𑀡𑀻𑀳𑀺 𑀲𑀳𑀢𑁆𑀣𑁂𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀓𑀺𑀜𑁆𑀘𑀺 𑀤𑀸𑀦𑀁 𑀦 𑀅𑀤𑀸𑀲𑀺. 𑀧𑀭𑀲𑁆𑀲 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄𑀢𑀺 𑀓𑁂𑀯𑀮𑀁 𑀧𑀦 𑀧𑀭𑁂𑀦 𑀓𑀢𑀁 𑀧𑀭𑀲𑁆𑀲 𑀤𑀸𑀦𑀁 ‘‘𑀅𑀳𑁄 𑀤𑀸𑀦𑀁 𑀧𑀯𑀢𑁆𑀢𑁂𑀲𑀻’’𑀢𑀺 𑀅𑀦𑀼𑀫𑁄𑀤𑀫𑀸𑀦𑁄𑀬𑁂𑀯 𑀯𑀺𑀳𑀸𑀲𑀺.

𑁨𑁭𑁭. 𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄𑀢𑀺 𑀢𑁂𑀦 𑀢𑀼𑀬𑁆𑀳𑀁 𑀧𑀸𑀡𑀺 𑀏𑀯𑀁 𑀓𑀸𑀫𑀤𑀤𑁄, 𑀅𑀳𑁄 𑀅𑀘𑁆𑀙𑀭𑀺𑀬𑀸 𑀯𑀢 𑀧𑀼𑀜𑁆𑀜𑀸𑀦𑀁 𑀕𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁮. 𑀬𑁄 𑀲𑁄 𑀤𑀸𑀦𑀫𑀤𑀸, 𑀪𑀦𑁆𑀢𑁂, 𑀧𑀲𑀦𑁆𑀦𑁄 𑀲𑀓𑀧𑀸𑀡𑀺𑀪𑀻𑀢𑀺 𑀤𑁂𑀯𑀧𑀼𑀢𑁆𑀢𑀁 𑀕𑀸𑀭𑀯𑁂𑀦 𑀆𑀮𑀧𑀢𑀺. 𑀪𑀦𑁆𑀢𑁂, 𑀧𑀭𑁂𑀦 ¶ 𑀓𑀢𑀲𑁆𑀲 𑀤𑀸𑀦𑀸𑀦𑀼𑀫𑁄𑀤𑀓𑀲𑁆𑀲 𑀢𑀸𑀯 𑀢𑀼𑀬𑁆𑀳𑀁 𑀈𑀤𑀺𑀲𑀁 𑀨𑀮𑀁 𑀏𑀯𑀭𑀽𑀧𑁄 𑀆𑀦𑀼𑀪𑀸𑀯𑁄, 𑀬𑁄 𑀧𑀦 𑀲𑁄 𑀅𑀲𑀬𑁆𑀳𑀫𑀳𑀸𑀲𑁂𑀝𑁆𑀞𑀺 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀲𑀳𑀢𑁆𑀣𑁂𑀳𑀺 𑀢𑀤𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀦𑁆𑀢𑀺 𑀲𑁄 𑀇𑀥 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀧𑀳𑀸𑀬. 𑀓𑀺𑀦𑁆𑀢𑀺 𑀓𑀢𑀭𑀁. 𑀦𑀼 𑀲𑁄𑀢𑀺 𑀦𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀤𑀺𑀲𑀢𑀁 𑀕𑀢𑁄𑀢𑀺 𑀤𑀺𑀲𑀁 𑀞𑀸𑀦𑀁 𑀕𑀢𑁄, 𑀓𑀻𑀤𑀺𑀲𑀻 𑀢𑀲𑁆𑀲 𑀕𑀢𑁄 𑀦𑀺𑀧𑁆𑀨𑀢𑁆𑀢𑀻𑀢𑀺 𑀅𑀲𑀬𑁆𑀳𑀲𑁂𑀝𑁆𑀞𑀺𑀦𑁄 𑀅𑀪𑀺𑀲𑀫𑁆𑀧𑀭𑀸𑀬𑀁 𑀧𑀼𑀘𑁆𑀙𑀺.

𑁨𑁭𑁯. 𑀅𑀲𑀬𑁆𑀳𑀲𑀸𑀳𑀺𑀦𑁄𑀢𑀺 𑀅𑀜𑁆𑀜𑁂𑀳𑀺 𑀫𑀘𑁆𑀙𑀭𑀻𑀳𑀺 𑀮𑁄𑀪𑀸𑀪𑀺𑀪𑀽𑀢𑁂𑀳𑀺 𑀲𑀳𑀺𑀢𑀼𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀧𑀭𑀺𑀘𑁆𑀘𑀸𑀕𑀸𑀤𑀺𑀯𑀺𑀪𑀸𑀕𑀲𑁆𑀲 𑀲𑀧𑁆𑀧𑀼𑀭𑀺𑀲𑀥𑀼𑀭𑀲𑁆𑀲 𑀲𑀳𑀦𑀢𑁄 ¶ 𑀅𑀲𑀬𑁆𑀳𑀲𑀸𑀳𑀺𑀦𑁄. 𑀅𑀗𑁆𑀕𑀻𑀭𑀲𑀲𑁆𑀲𑀸𑀢𑀺 𑀅𑀗𑁆𑀕𑀢𑁄 𑀦𑀺𑀓𑁆𑀔𑀫𑀦𑀓𑀚𑀼𑀢𑀺𑀲𑁆𑀲. 𑀭𑀲𑁄𑀢𑀺 𑀳𑀺 𑀚𑀼𑀢𑀺𑀬𑀸 𑀅𑀥𑀺𑀯𑀘𑀦𑀁. 𑀢𑀲𑁆𑀲 𑀓𑀺𑀭 𑀬𑀸𑀘𑀓𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺, 𑀢𑀁 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀏𑀯𑀫𑀸𑀳. 𑀕𑀢𑀺𑀁 𑀆𑀕𑀢𑀺𑀁 𑀯𑀸𑀢𑀺 𑀢𑀲𑁆𑀲 ‘‘𑀅𑀲𑀼𑀓𑀁 𑀦𑀸𑀫 𑀕𑀢𑀺𑀁, 𑀇𑀢𑁄 𑀕𑀢𑁄’’𑀢𑀺 𑀕𑀢𑀺𑀁 𑀯𑀸 ‘‘𑀢𑀢𑁄 𑀯𑀸 𑀧𑀦 𑀅𑀲𑀼𑀓𑀲𑁆𑀫𑀺𑀁 𑀓𑀸𑀮𑁂 𑀇𑀥𑀸𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀕𑀢𑀺𑀁 𑀯𑀸 𑀦𑀸𑀳𑀁 𑀚𑀸𑀦𑀸𑀫𑀺, 𑀅𑀯𑀺𑀲𑀬𑁄 𑀏𑀲 𑀫𑀬𑁆𑀳𑀁. 𑀲𑀼𑀢𑀜𑁆𑀘 𑀫𑁂 𑀯𑁂𑀲𑁆𑀲𑀯𑀡𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀧𑀺𑀘 𑀔𑁄 𑀉𑀧𑀝𑁆𑀞𑀸𑀦𑀁 𑀕𑀢𑁂𑀦 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀲𑀼𑀢𑀫𑁂𑀢𑀁 𑀫𑀬𑀸. 𑀲𑀓𑁆𑀓𑀲𑁆𑀲 𑀲𑀳𑀩𑁆𑀬𑀢𑀁 𑀕𑀢𑁄 𑀅𑀲𑀬𑁆𑀳𑁄𑀢𑀺 𑀅𑀲𑀬𑁆𑀳𑀲𑁂𑀝𑁆𑀞𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀳𑀩𑁆𑀬𑀢𑀁 𑀕𑀢𑁄 𑀅𑀳𑁄𑀲𑀺, 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁮𑁦. 𑀅𑀮𑀫𑁂𑀯 𑀓𑀸𑀢𑀼𑀁 𑀓𑀮𑁆𑀬𑀸𑀡𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀓𑀮𑁆𑀬𑀸𑀡𑀁 𑀓𑀼𑀲𑀮𑀁 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀬𑀼𑀢𑁆𑀢𑀫𑁂𑀯 𑀧𑀢𑀺𑀭𑀽𑀧𑀫𑁂𑀯. 𑀢𑀢𑁆𑀣 𑀧𑀦 𑀬𑀁 𑀲𑀩𑁆𑀩𑀲𑀸𑀥𑀸𑀭𑀡𑀁 𑀲𑀼𑀓𑀢𑀢𑀭𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀁 𑀤𑀸𑀢𑀼𑀁 𑀬𑀣𑀸𑀭𑀳’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀯𑀺𑀪𑀯𑀩𑀮𑀸𑀦𑀼𑀭𑀽𑀧𑀁 𑀤𑀸𑀦𑀁 𑀤𑀸𑀢𑀼𑀁 𑀅𑀮𑀫𑁂𑀯. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀸𑀡𑀺𑀁 𑀓𑀸𑀫𑀤𑀤𑀁 𑀤𑀺𑀲𑁆𑀯𑀸’’𑀢𑀺. 𑀬𑀢𑁆𑀭 𑀳𑀺 𑀦𑀸𑀫 𑀧𑀭𑀓𑀢𑀧𑀼𑀜𑁆𑀜𑀸𑀦𑀼𑀫𑁄𑀤𑀦𑀧𑀼𑀩𑁆𑀩𑀓𑁂𑀦 𑀤𑀸𑀦𑀧𑀢𑀺𑀦𑀺𑀯𑁂𑀲𑀦𑀫𑀕𑁆𑀕𑀸𑀘𑀺𑀓𑁆𑀔𑀡𑀫𑀢𑁆𑀢𑁂𑀦 𑀅𑀬𑀁 ¶ 𑀳𑀢𑁆𑀣𑁄 𑀓𑀸𑀫𑀤𑀤𑁄 𑀤𑀺𑀝𑁆𑀞𑁄, 𑀇𑀫𑀁 𑀤𑀺𑀲𑁆𑀯𑀸. 𑀓𑁄 ¶ 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀻𑀢𑀺 𑀫𑀸𑀤𑀺𑀲𑁄 𑀓𑁄 𑀦𑀸𑀫 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀻𑀢𑀺.

𑁨𑁮𑁧. 𑀏𑀯𑀁 𑀅𑀦𑀺𑀬𑀫𑀯𑀲𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀆𑀤𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀺 𑀢𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀳𑀺 𑀦𑀽𑀦𑀸’’𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀳𑀁. 𑀳𑀻𑀢𑀺 𑀅𑀯𑀥𑀸𑀭𑀡𑁂 𑀦𑀺𑀧𑀸𑀢𑁄, 𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑁂. 𑀇𑀢𑁄 𑀕𑀦𑁆𑀢𑁆𑀯𑀸𑀢𑀺 𑀇𑀢𑁄 𑀫𑀭𑀼𑀪𑀽𑀫𑀺𑀢𑁄 𑀅𑀧𑀕𑀦𑁆𑀢𑁆𑀯𑀸. 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀦𑁆𑀢𑀺 𑀤𑁆𑀯𑀸𑀭𑀯𑀢𑀻𑀦𑀕𑀭𑀁 𑀅𑀦𑀼𑀧𑀸𑀧𑀼𑀡𑀺𑀢𑁆𑀯𑀸. 𑀧𑀝𑁆𑀞𑀧𑀬𑀺𑀲𑁆𑀲𑀸𑀫𑀻𑀢𑀺 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀺.

𑀏𑀯𑀁 𑀅𑀗𑁆𑀓𑀼𑀭𑁂𑀦 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀬 𑀓𑀢𑀸𑀬 𑀬𑀓𑁆𑀔𑁄 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀫𑀸𑀭𑀺𑀲, 𑀢𑁆𑀯𑀁 𑀯𑀺𑀲𑁆𑀲𑀢𑁆𑀣𑁄 𑀤𑀸𑀦𑀁 𑀤𑁂𑀳𑀺, 𑀅𑀳𑀁 𑀧𑀦 𑀢𑁂 𑀲𑀳𑀸𑀬𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀺, 𑀬𑁂𑀦 𑀢𑁂 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀢𑀺, 𑀢𑁂𑀦 𑀧𑀓𑀸𑀭𑁂𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀤𑀸𑀦𑀓𑀺𑀭𑀺𑀬𑀸𑀬 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡 𑀯𑀸𑀡𑀺𑀚, 𑀢𑁆𑀯𑀁 𑀓𑀺𑀭 𑀫𑀸𑀤𑀺𑀲𑁂 𑀩𑀮𑀓𑁆𑀓𑀸𑀭𑁂𑀦 𑀦𑁂𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺 𑀢𑀲𑁆𑀲 ¶ 𑀪𑀡𑁆𑀟𑀫𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀢𑀁 𑀬𑀓𑁆𑀔𑀯𑀺𑀪𑀺𑀁𑀲𑀓𑀸𑀬 𑀪𑀺𑀁𑀲𑀸𑀧𑁂𑀦𑁆𑀢𑁄 𑀲𑀦𑁆𑀢𑀚𑁆𑀚𑁂𑀲𑀺. 𑀅𑀣 𑀦𑀁 𑀅𑀗𑁆𑀓𑀼𑀭𑁄 𑀦𑀸𑀦𑀧𑁆𑀧𑀓𑀸𑀭𑀁 𑀬𑀸𑀘𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀔𑀫𑀸𑀧𑁂𑀦𑁆𑀢𑁄 𑀧𑀲𑀸𑀤𑁂𑀢𑁆𑀯𑀸 𑀲𑀩𑁆𑀩𑀪𑀡𑁆𑀟𑀁 𑀧𑀸𑀓𑀢𑀺𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀉𑀧𑀕𑀢𑀸𑀬 𑀬𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀅𑀢𑀺𑀯𑀺𑀬 𑀩𑀻𑀪𑀘𑁆𑀙𑀤𑀲𑁆𑀲𑀦𑀁 𑀧𑁂𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑁂𑀦 𑀢𑁂 𑀅𑀗𑁆𑀕𑀼𑀮𑀻 𑀓𑀼𑀡𑀸, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁;

𑀅𑀓𑁆𑀔𑀻𑀦𑀺 𑀘 𑀧𑀕𑁆𑀖𑀭𑀦𑁆𑀢𑀺, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀢𑀬𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀼𑀡𑀸𑀢𑀺 𑀓𑀼𑀡𑀺𑀓𑀸 𑀧𑀝𑀺𑀓𑀼𑀡𑀺𑀓𑀸 𑀅𑀦𑀼𑀚𑀼𑀪𑀽𑀢𑀸. 𑀓𑀼𑀡𑀮𑀻𑀓𑀢𑀦𑁆𑀢𑀺 𑀫𑀼𑀔𑀯𑀺𑀓𑀸𑀭𑁂𑀦 𑀯𑀺𑀓𑀼𑀡𑀺𑀢𑀁 𑀲𑀁𑀓𑀼𑀡𑀺𑀢𑀁. 𑀧𑀕𑁆𑀖𑀭𑀦𑁆𑀢𑀻𑀢𑀺 𑀅𑀲𑀼𑀘𑀺𑀁 𑀯𑀺𑀲𑁆𑀲𑀦𑁆𑀤𑀦𑁆𑀢𑀺.

‘‘𑀅𑀗𑁆𑀕𑀻𑀭𑀲𑀲𑁆𑀲 ¶ 𑀕𑀳𑀧𑀢𑀺𑀦𑁄, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀢𑀲𑁆𑀲𑀸𑀳𑀁 𑀤𑀸𑀦𑀯𑀺𑀲𑁆𑀲𑀕𑁆𑀕𑁂, 𑀤𑀸𑀦𑁂 𑀅𑀥𑀺𑀓𑀢𑁄 𑀅𑀳𑀼𑀁.

‘‘𑀢𑀢𑁆𑀣 ¶ 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸, 𑀆𑀕𑀢𑁂 𑀪𑁄𑀚𑀦𑀢𑁆𑀣𑀺𑀓𑁂;

𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫, 𑀅𑀓𑀸𑀲𑀺𑀁 𑀓𑀼𑀡𑀮𑀺𑀁 𑀫𑀼𑀔𑀁.

‘‘𑀢𑁂𑀦 𑀫𑁂 𑀅𑀗𑁆𑀕𑀼𑀮𑀻 𑀓𑀼𑀡𑀸, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁;

𑀅𑀓𑁆𑀔𑀻𑀦𑀺 𑀫𑁂 𑀧𑀕𑁆𑀖𑀭𑀦𑁆𑀢𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸’’𑀢𑀺. 𑁋

𑁨𑁮𑁪. 𑀢𑀢𑁆𑀣 ‘‘𑀅𑀗𑁆𑀕𑀻𑀭𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀲𑀬𑁆𑀳𑀲𑁂𑀝𑁆𑀞𑀺𑀁 𑀓𑀺𑀢𑁆𑀢𑁂𑀢𑀺. 𑀖𑀭𑀫𑁂𑀲𑀺𑀦𑁄𑀢𑀺 𑀖𑀭𑀫𑀸𑀯𑀲𑀦𑁆𑀢𑀲𑁆𑀲 𑀕𑀳𑀝𑁆𑀞𑀲𑁆𑀲. 𑀤𑀸𑀦𑀯𑀺𑀲𑁆𑀲𑀕𑁆𑀕𑁂𑀢𑀺 𑀤𑀸𑀦𑀕𑁆𑀕𑁂 𑀧𑀭𑀺𑀘𑁆𑀘𑀸𑀕𑀝𑁆𑀞𑀸𑀦𑁂. 𑀤𑀸𑀦𑁂 𑀅𑀥𑀺𑀓𑀢𑁄 𑀅𑀳𑀼𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀚𑀦𑁂 𑀤𑀸𑀦𑀸𑀥𑀺𑀓𑀸𑀭𑁂 𑀅𑀥𑀺𑀓𑀢𑁄 𑀞𑀧𑀺𑀢𑁄 𑀅𑀳𑁄𑀲𑀺𑀁.

𑁨𑁮𑁫. 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫𑀸𑀢𑀺 𑀬𑀸𑀘𑀦𑀓𑁂 𑀪𑁄𑀚𑀦𑀢𑁆𑀣𑀺𑀓𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀤𑀸𑀦𑀩𑁆𑀬𑀸𑀯𑀝𑁂𑀦 𑀤𑀸𑀦𑀕𑁆𑀕𑀢𑁄 𑀅𑀦𑀧𑀓𑁆𑀓𑀫𑁆𑀫 𑀬𑀣𑀸𑀞𑀸𑀦𑁂𑀬𑁂𑀯 𑀞𑀢𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 ¶ 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁂𑀦 𑀲𑀳𑀢𑁆𑀣𑁂𑀦 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀧𑀭𑁂𑀳𑀺 𑀯𑀸 𑀧𑀢𑀺𑀭𑀽𑀧𑁂𑀳𑀺 𑀤𑀸𑀧𑁂𑀢𑀩𑁆𑀩𑀁, 𑀅𑀳𑀁 𑀧𑀦 𑀢𑀣𑀸 𑀅𑀓𑀢𑁆𑀯𑀸 𑀬𑀸𑀘𑀦𑀓𑁂 𑀆𑀕𑀘𑁆𑀙𑀦𑁆𑀢𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀦𑁆𑀢𑁄 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀅𑀓𑀸𑀲𑀺𑀁 𑀓𑀼𑀡𑀮𑀺𑀁 𑀫𑀼𑀔𑀦𑁆𑀢𑀺 𑀯𑀺𑀓𑀼𑀡𑀺𑀢𑀁 𑀲𑀗𑁆𑀓𑀼𑀘𑀺𑀢𑀁 𑀫𑀼𑀔𑀁 𑀅𑀓𑀸𑀲𑀺𑀁.

𑁨𑁮𑁬. 𑀢𑁂𑀦𑀸𑀢𑀺 𑀬𑀲𑁆𑀫𑀸 𑀢𑀤𑀸𑀳𑀁 𑀲𑀸𑀫𑀺𑀦𑀸 𑀤𑀸𑀦𑀸𑀥𑀺𑀓𑀸𑀭𑁂 𑀦𑀺𑀬𑀼𑀢𑁆𑀢𑁄 𑀲𑀫𑀸𑀦𑁄 𑀤𑀸𑀦𑀓𑀸𑀮𑁂 𑀉𑀧𑀝𑁆𑀞𑀺𑀢𑁂 𑀫𑀘𑁆𑀙𑀭𑀺𑀬𑀸𑀧𑀓𑀢𑁄 𑀤𑀸𑀦𑀕𑁆𑀕𑀢𑁄 𑀅𑀧𑀓𑁆𑀓𑀫𑀦𑁆𑀢𑁄 𑀧𑀸𑀤𑁂𑀳𑀺 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀺𑀁, 𑀲𑀳𑀢𑁆𑀣𑁂𑀳𑀺 𑀤𑀸𑀢𑀩𑁆𑀩𑁂 𑀢𑀣𑀸 𑀅𑀓𑀢𑁆𑀯𑀸 𑀳𑀢𑁆𑀣𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀺𑀁, 𑀧𑀲𑀦𑁆𑀦𑀫𑀼𑀔𑁂𑀦 𑀪𑀯𑀺𑀢𑀩𑁆𑀩𑁂 𑀫𑀼𑀔𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀺𑀁, 𑀧𑀺𑀬𑀘𑀓𑁆𑀔𑀽𑀳𑀺 𑀑𑀮𑁄𑀓𑁂𑀢𑀩𑁆𑀩𑁂 𑀘𑀓𑁆𑀔𑀼𑀓𑀸𑀮𑀼𑀲𑀺𑀬𑀁 𑀉𑀧𑁆𑀧𑀸𑀤𑁂𑀲𑀺𑀁, 𑀢𑀲𑁆𑀫𑀸 𑀳𑀢𑁆𑀣𑀗𑁆𑀕𑀼𑀮𑀺𑀬𑁄 𑀘 ¶ 𑀧𑀸𑀤𑀗𑁆𑀕𑀼𑀮𑀺𑀬𑁄 𑀘 𑀓𑀼𑀡𑀺𑀢𑀸 𑀚𑀸𑀢𑀸, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁 𑀯𑀺𑀭𑀽𑀧𑀭𑀽𑀧𑀁 𑀲𑀗𑁆𑀓𑀼𑀘𑀺𑀢𑀁, 𑀅𑀓𑁆𑀔𑀻𑀦𑀺 𑀅𑀲𑀼𑀘𑀻𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀸𑀦𑀺 𑀅𑀲𑁆𑀲𑀽𑀦𑀺 𑀧𑀕𑁆𑀖𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑁂𑀦 𑀫𑁂 𑀅𑀗𑁆𑀕𑀼𑀮𑀻 𑀓𑀼𑀡𑀸, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁;

𑀅𑀓𑁆𑀔𑀻𑀦𑀺 𑀫𑁂 𑀧𑀕𑁆𑀖𑀭𑀦𑁆𑀢𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀗𑁆𑀓𑀼𑀭𑁄 𑀧𑁂𑀢𑀁 𑀕𑀭𑀳𑀦𑁆𑀢𑁄 𑁋

‘‘𑀥𑀫𑁆𑀫𑁂𑀦 ¶ 𑀢𑁂 𑀓𑀸𑀧𑀼𑀭𑀺𑀲, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁;

𑀅𑀓𑁆𑀔𑀻𑀦𑀺 𑀘 𑀧𑀕𑁆𑀖𑀭𑀦𑁆𑀢𑀺, 𑀬𑀁 𑀢𑀁 𑀧𑀭𑀲𑁆𑀲 𑀤𑀸𑀦𑀲𑁆𑀲;

𑀅𑀓𑀸𑀲𑀺 𑀓𑀼𑀡𑀮𑀺𑀁 𑀫𑀼𑀔’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀬𑀼𑀢𑁆𑀢𑁂𑀦𑁂𑀯 𑀓𑀸𑀭𑀡𑁂𑀦. 𑀢𑁂𑀢𑀺 𑀢𑀯. 𑀓𑀸𑀧𑀼𑀭𑀺𑀲𑀸𑀢𑀺 𑀮𑀸𑀫𑀓𑀧𑀼𑀭𑀺𑀲. 𑀬𑀦𑁆𑀢𑀺 𑀬𑀲𑁆𑀫𑀸. 𑀧𑀭𑀲𑁆𑀲 𑀤𑀸𑀦𑀲𑁆𑀲𑀸𑀢𑀺 𑀧𑀭𑀲𑁆𑀲 𑀤𑀸𑀦𑀲𑁆𑀫𑀺𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀧𑀼𑀦 𑀅𑀗𑁆𑀓𑀼𑀭𑁄 𑀢𑀁 𑀤𑀸𑀦𑀧𑀢𑀺𑀁 𑀲𑁂𑀝𑁆𑀞𑀺𑀁 𑀕𑀭𑀳𑀦𑁆𑀢𑁄 𑁋

‘‘𑀓𑀣𑀜𑁆𑀳𑀺 𑀤𑀸𑀦𑀁 𑀤𑀤𑀫𑀸𑀦𑁄, 𑀓𑀭𑁂𑀬𑁆𑀬 𑀧𑀭𑀧𑀢𑁆𑀢𑀺𑀬𑀁;

𑀅𑀦𑁆𑀦𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀤𑀸𑀦𑀁 𑀤𑀤𑀦𑁆𑀢𑁄 𑀧𑀼𑀭𑀺𑀲𑁄 𑀓𑀣𑀜𑁆𑀳𑀺 𑀦𑀸𑀫 𑀢𑀁 𑀧𑀭𑀧𑀢𑁆𑀢𑀺𑀬𑀁 𑀧𑀭𑁂𑀦 𑀧𑀸𑀧𑁂𑀢𑀩𑁆𑀩𑀁 𑀲𑀸𑀥𑁂𑀢𑀩𑁆𑀩𑀁 𑀓𑀭𑁂𑀬𑁆𑀬, 𑀅𑀢𑁆𑀢𑀧𑀘𑁆𑀘𑀓𑁆𑀔𑀫𑁂𑀯 𑀓𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 ¶ 𑀤𑀤𑁂𑀬𑁆𑀬, 𑀲𑀬𑀁 𑀯𑀸 𑀢𑀢𑁆𑀣 𑀩𑁆𑀬𑀸𑀯𑀝𑁄 𑀪𑀯𑁂𑀬𑁆𑀬, 𑀅𑀜𑁆𑀜𑀣𑀸 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑁄 𑀅𑀝𑁆𑀞𑀸𑀦𑁂 𑀯𑀺𑀤𑁆𑀥𑀁𑀲𑀺𑀬𑁂𑀣, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀘 𑀤𑀸𑀦𑁂𑀦 𑀧𑀭𑀺𑀳𑀸𑀬𑁂𑀬𑁆𑀬𑀼𑀦𑁆𑀢𑀺.

𑀏𑀯𑀁 ¶ 𑀢𑀁 𑀕𑀭𑀳𑀺𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀲𑁄 𑀳𑀺 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀁;

𑀤𑀸𑀦𑀁 𑀧𑀝𑁆𑀞𑀧𑀬𑀺𑀲𑁆𑀲𑀸𑀫𑀺, 𑀬𑀁 𑀫𑀫𑀲𑁆𑀲 𑀲𑀼𑀔𑀸𑀯𑀳𑀁.

‘‘𑀤𑀲𑁆𑀲𑀸𑀫𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘𑀸’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

‘‘𑀢𑀢𑁄 𑀳𑀺 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀁;

𑀤𑀸𑀦𑀁 𑀧𑀝𑁆𑀞𑀧𑀬𑀺 𑀅𑀗𑁆𑀓𑀼𑀭𑁄, 𑀬𑀁𑀢𑀼𑀫𑀲𑁆𑀲 𑀲𑀼𑀔𑀸𑀯𑀳𑀁.

‘‘𑀅𑀤𑀸 ¶ 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀓𑁄 𑀙𑀸𑀢𑁄 𑀓𑁄 𑀘 𑀢𑀲𑀺𑀢𑁄, 𑀓𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺;

𑀓𑀲𑁆𑀲 𑀲𑀦𑁆𑀢𑀸𑀦𑀺 𑀬𑁄𑀕𑁆𑀕𑀸𑀦𑀺, 𑀇𑀢𑁄 𑀬𑁄𑀚𑁂𑀦𑁆𑀢𑀼 𑀯𑀸𑀳𑀦𑀁.

‘‘𑀓𑁄 𑀙𑀢𑁆𑀢𑀺𑀘𑁆𑀙𑀢𑀺 𑀕𑀦𑁆𑀥𑀜𑁆𑀘, 𑀓𑁄 𑀫𑀸𑀮𑀁 𑀓𑁄 𑀉𑀧𑀸𑀳𑀦𑀁;

𑀇𑀢𑀺𑀲𑁆𑀲𑀼 𑀢𑀢𑁆𑀣 𑀖𑁄𑀲𑁂𑀦𑁆𑀢𑀺, 𑀓𑀧𑁆𑀧𑀓𑀸 𑀲𑀽𑀤𑀫𑀸𑀕𑀥𑀸;

𑀲𑀤𑀸 𑀲𑀸𑀬𑀜𑁆𑀘 𑀧𑀸𑀢𑁄 𑀘, 𑀅𑀗𑁆𑀕𑀼𑀭𑀲𑁆𑀲 𑀦𑀺𑀯𑁂𑀲𑀦𑁂’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀗𑁆𑀕𑀼𑀭𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸.

𑁨𑁯𑁧. 𑀢𑀢𑁆𑀣 𑀢𑀢𑁄𑀢𑀺 𑀫𑀭𑀼𑀓𑀦𑁆𑀢𑀸𑀭𑀢𑁄. 𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸. 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀦𑁆𑀢𑀺 𑀤𑁆𑀯𑀸𑀭𑀯𑀢𑀻𑀦𑀕𑀭𑀁 𑀅𑀦𑀼𑀧𑀸𑀧𑀼𑀡𑀺𑀢𑁆𑀯𑀸. 𑀤𑀸𑀦𑀁 𑀧𑀝𑁆𑀞𑀧𑀬𑀺 𑀅𑀗𑁆𑀕𑀼𑀭𑁄𑀢𑀺 𑀬𑀓𑁆𑀔𑁂𑀦 𑀧𑀭𑀺𑀧𑀽𑀭𑀺𑀢𑀲𑀓𑀮𑀓𑁄𑀝𑁆𑀞𑀸𑀕𑀸𑀭𑁄 𑀲𑀩𑁆𑀩𑀧𑀸𑀣𑁂𑀬𑁆𑀬𑀓𑀁 𑀫𑀳𑀸𑀤𑀸𑀦𑀁 𑀲𑁄 𑀅𑀗𑁆𑀕𑀼𑀭𑁄 𑀧𑀝𑁆𑀞𑀧𑁂𑀲𑀺. 𑀬𑀁𑀢𑀼𑀫𑀲𑁆𑀲 𑀲𑀼𑀔𑀸𑀯𑀳𑀦𑁆𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁.

𑁨𑁯𑁩. 𑀓𑁄 ¶ 𑀙𑀸𑀢𑁄𑀢𑀺 𑀓𑁄 𑀚𑀺𑀖𑀘𑁆𑀙𑀺𑀢𑁄, 𑀲𑁄 𑀆𑀕𑀦𑁆𑀢𑁆𑀯𑀸 𑀬𑀣𑀸𑀭𑀼𑀘𑀺 𑀪𑀼𑀜𑁆𑀚𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀲𑀺𑀢𑁄𑀢𑀺 ¶ 𑀧𑀺𑀧𑀸𑀲𑀺𑀢𑁄. 𑀧𑀭𑀺𑀤𑀳𑀺𑀲𑁆𑀲𑀢𑀻𑀢𑀺 𑀦𑀺𑀯𑀸𑀲𑁂𑀲𑁆𑀲𑀢𑀺 𑀧𑀸𑀭𑀼𑀧𑀺𑀲𑁆𑀲𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀸𑀦𑀻𑀢𑀺 𑀧𑀭𑀺𑀲𑁆𑀲𑀫𑀧𑁆𑀧𑀢𑁆𑀢𑀸𑀦𑀺. 𑀬𑁄𑀕𑁆𑀕𑀸𑀦𑀻𑀢𑀺 𑀭𑀣𑀯𑀸𑀳𑀦𑀸𑀦𑀺. 𑀇𑀢𑁄 𑀬𑁄𑀚𑁂𑀦𑁆𑀢𑀼 𑀯𑀸𑀳𑀦𑀦𑁆𑀢𑀺 𑀇𑀢𑁄 𑀬𑁄𑀕𑁆𑀕𑀲𑀫𑀽𑀳𑀢𑁄 𑀬𑀣𑀸𑀭𑀼𑀘𑀺𑀢𑀁 𑀕𑀳𑁂𑀢𑁆𑀯𑀸 𑀯𑀸𑀳𑀦𑀁 𑀬𑁄𑀚𑁂𑀦𑁆𑀢𑀼.

𑁨𑁯𑁪. 𑀓𑁄 𑀙𑀢𑁆𑀢𑀺𑀘𑁆𑀙𑀢𑀻𑀢𑀺 𑀓𑁄 𑀓𑀺𑀮𑀜𑁆𑀚𑀙𑀢𑁆𑀢𑀸𑀤𑀺𑀪𑁂𑀤𑀁 𑀙𑀢𑁆𑀢𑀁 𑀇𑀘𑁆𑀙𑀢𑀺, 𑀲𑁄 𑀕𑀡𑁆𑀳𑀸𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑀦𑁆𑀥𑀦𑁆𑀢𑀺 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑀸𑀤𑀺𑀓𑀁 𑀕𑀦𑁆𑀥𑀁. 𑀫𑀸𑀮𑀦𑁆𑀢𑀺 𑀕𑀦𑁆𑀣𑀺𑀢𑀸𑀕𑀦𑁆𑀣𑀺𑀢𑀪𑁂𑀤𑀁 𑀧𑀼𑀧𑁆𑀨𑀁. 𑀉𑀧𑀸𑀳𑀦𑀦𑁆𑀢𑀺 𑀔𑀮𑁆𑀮𑀩𑀤𑁆𑀥𑀸𑀤𑀺𑀪𑁂𑀤𑀁 𑀉𑀧𑀸𑀳𑀦𑀁. 𑀇𑀢𑀺𑀲𑁆𑀲𑀽𑀢𑀺 𑀏𑀢𑁆𑀣 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀢𑀺 𑀏𑀯𑀁 ‘‘𑀓𑁄 𑀙𑀸𑀢𑁄, 𑀓𑁄 𑀢𑀲𑀺𑀢𑁄’’𑀢𑀺𑀆𑀤𑀺𑀦𑀸𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀓𑀸𑀢𑀺 𑀦𑁆𑀳𑀸𑀧𑀺𑀢𑀓𑀸. 𑀲𑀽𑀤𑀸𑀢𑀺 𑀪𑀢𑁆𑀢𑀓𑀸𑀭𑀓𑀸. 𑀫𑀸𑀕𑀥𑀸𑀢𑀺 𑀕𑀦𑁆𑀥𑀺𑀦𑁄. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀸𑀬𑀜𑁆𑀘 𑀧𑀸𑀢𑁄 𑀘 𑀢𑀢𑁆𑀣 𑀅𑀗𑁆𑀕𑀼𑀭𑀲𑁆𑀲 𑀦𑀺𑀯𑁂𑀲𑀦𑁂 𑀖𑁄𑀲𑁂𑀦𑁆𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀁 ¶ 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀺𑀢𑁆𑀢𑀺𑀪𑀸𑀯𑀢𑁄 𑀅𑀢𑁆𑀣𑀺𑀓𑀚𑀦𑁂𑀳𑀺 𑀧𑀯𑀺𑀯𑀺𑀢𑁆𑀢𑀁 𑀯𑀺𑀭𑀴𑀁 𑀤𑀸𑀦𑀕𑁆𑀕𑀁 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀅𑀗𑁆𑀓𑀼𑀭𑁄 𑀤𑀸𑀦𑁂 𑀉𑀴𑀸𑀭𑀚𑁆𑀛𑀸𑀲𑀬𑀢𑀸𑀬 𑀅𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀤𑀸𑀦𑁂 𑀦𑀺𑀬𑀼𑀢𑁆𑀢𑀁 𑀲𑀺𑀦𑁆𑀥𑀓𑀁 𑀦𑀸𑀫 𑀫𑀸𑀡𑀯𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋

‘‘𑀲𑀼𑀔𑀁 𑀲𑀼𑀧𑀢𑀺 𑀅𑀗𑁆𑀓𑀼𑀭𑁄, 𑀇𑀢𑀺 𑀚𑀸𑀦𑀸𑀢𑀺 𑀫𑀁 𑀚𑀦𑁄;

𑀤𑀼𑀓𑁆𑀔𑀁 𑀲𑀼𑀧𑀸𑀫𑀺 𑀲𑀺𑀦𑁆𑀥𑀓, 𑀬𑀁 𑀦 𑀧𑀲𑁆𑀲𑀸𑀫𑀺 𑀬𑀸𑀘𑀓𑁂.

‘‘𑀲𑀼𑀔𑀁 𑀲𑀼𑀧𑀢𑀺 𑀅𑀗𑁆𑀓𑀼𑀭𑁄, 𑀇𑀢𑀺 𑀚𑀸𑀦𑀸𑀢𑀺 𑀫𑀁 𑀚𑀦𑁄;

𑀤𑀼𑀓𑁆𑀔𑀁 𑀲𑀼𑀧𑀸𑀫𑀺 𑀲𑀺𑀦𑁆𑀥𑀓, 𑀅𑀧𑁆𑀧𑀓𑁂 𑀲𑀼 𑀯𑀦𑀺𑀩𑁆𑀩𑀓𑁂’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀲𑀼𑀔𑀁 𑀲𑀼𑀧𑀢𑀺 𑀅𑀗𑁆𑀓𑀼𑀭𑁄, 𑀇𑀢𑀺 𑀚𑀸𑀦𑀸𑀢𑀺 𑀫𑀁 𑀚𑀦𑁄𑀢𑀺 ‘‘𑀅𑀗𑁆𑀓𑀼𑀭𑁄 𑀭𑀸𑀚𑀸 𑀬𑀲𑀪𑁄𑀕𑀲𑀫𑀧𑁆𑀧𑀺𑀢𑁄 𑀤𑀸𑀦𑀧𑀢𑀺 𑀅𑀢𑁆𑀢𑀦𑁄 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑁂𑀦𑁂𑀯 ¶ 𑀦𑀺𑀤𑁆𑀤𑀁 𑀉𑀧𑀕𑀘𑁆𑀙𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀢𑀺. 𑀤𑀼𑀓𑁆𑀔𑀁 𑀲𑀼𑀧𑀸𑀫𑀺 𑀲𑀺𑀦𑁆𑀥𑀓𑀸𑀢𑀺 𑀅𑀳𑀁 𑀧𑀦 𑀲𑀺𑀦𑁆𑀥𑀓 𑀤𑀼𑀓𑁆𑀔𑀫𑁂𑀯 𑀲𑀼𑀧𑀸𑀫𑀺. 𑀓𑀲𑁆𑀫𑀸? 𑀬𑀁 𑀦 𑀧𑀲𑁆𑀲𑀸𑀫𑀺 𑀬𑀸𑀘𑀓𑁂𑀢𑀺, 𑀬𑀲𑁆𑀫𑀸 𑀫𑀫 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 ¶ 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂 𑀩𑀳𑀽 𑀬𑀸𑀘𑀓𑁂 𑀦 𑀧𑀲𑁆𑀲𑀸𑀫𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀓𑁂 𑀲𑀼 𑀯𑀦𑀺𑀩𑁆𑀩𑀓𑁂𑀢𑀺 𑀯𑀦𑀺𑀩𑁆𑀩𑀓𑀚𑀦𑁂 𑀅𑀧𑁆𑀧𑀓𑁂 𑀓𑀢𑀺𑀧𑀬𑁂 𑀚𑀸𑀢𑁂 𑀤𑀼𑀓𑁆𑀔𑀁 𑀲𑀼𑀧𑀸𑀫𑀻𑀢𑀺 𑀬𑁄𑀚𑀦𑀸. 𑀲𑀽𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀧𑁆𑀧𑀓𑁂 𑀯𑀦𑀺𑀩𑁆𑀩𑀓𑀚𑀦𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀲𑀺𑀦𑁆𑀥𑀓𑁄 𑀢𑀲𑁆𑀲 𑀉𑀴𑀸𑀭𑀁 𑀤𑀸𑀦𑀸𑀥𑀺𑀫𑀼𑀢𑁆𑀢𑀺𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀓𑀸𑀫𑁄 𑁋

‘‘𑀲𑀓𑁆𑀓𑁄 𑀘𑁂 𑀢𑁂 𑀯𑀭𑀁 𑀤𑀚𑁆𑀚𑀸, 𑀢𑀸𑀯𑀢𑀺𑀁𑀲𑀸𑀦𑀫𑀺𑀲𑁆𑀲𑀭𑁄;

𑀓𑀺𑀲𑁆𑀲 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀯𑀭𑀫𑀸𑀦𑁄 𑀯𑀭𑀁 𑀯𑀭𑁂’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀩𑁆𑀩𑀲𑁆𑀲 𑀘 𑀮𑁄𑀓𑀲𑁆𑀲 𑀇𑀲𑁆𑀲𑀭𑁄 𑀲𑀓𑁆𑀓𑁄 ‘‘𑀯𑀭𑀁 𑀯𑀭𑀲𑁆𑀲𑀼, 𑀅𑀗𑁆𑀓𑀼𑀭, 𑀬𑀁𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀺𑀢’’𑀦𑁆𑀢𑀺 𑀢𑀼𑀬𑁆𑀳𑀁 𑀯𑀭𑀁 𑀤𑀚𑁆𑀚𑀸 𑀤𑀤𑁂𑀬𑁆𑀬 𑀘𑁂, 𑀯𑀭𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄 𑀓𑀺𑀲𑁆𑀲 𑀓𑀻𑀤𑀺𑀲𑀁 𑀯𑀭𑀁 𑀯𑀭𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀅𑀣 𑀅𑀗𑁆𑀓𑀼𑀭𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀬𑀸𑀣𑀸𑀯𑀢𑁄 𑀧𑀯𑁂𑀤𑁂𑀦𑁆𑀢𑁄 𑁋

‘‘𑀲𑀓𑁆𑀓𑁄 ¶ 𑀘𑁂 𑀫𑁂 𑀯𑀭𑀁 𑀤𑀚𑁆𑀚𑀸, 𑀢𑀸𑀯𑀢𑀺𑀁𑀲𑀸𑀦𑀫𑀺𑀲𑁆𑀲𑀭𑁄;

𑀓𑀸𑀮𑀼𑀝𑁆𑀞𑀺𑀢𑀲𑁆𑀲 𑀫𑁂 𑀲𑀢𑁄, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀁, 𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸.

‘‘𑀤𑀤𑀢𑁄 𑀫𑁂 𑀦 𑀔𑀻𑀬𑁂𑀣, 𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀁;

𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀁, 𑀏𑀢𑀁 𑀲𑀓𑁆𑀓𑀁 𑀯𑀭𑀁 𑀯𑀭𑁂’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑁨𑁯𑁮. 𑀢𑀢𑁆𑀣 𑀓𑀸𑀮𑀼𑀝𑁆𑀞𑀺𑀢𑀲𑁆𑀲 𑀫𑁂 𑀲𑀢𑁄𑀢𑀺 𑀓𑀸𑀮𑁂 𑀧𑀸𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀢𑁆𑀣𑀺𑀓𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀅𑀧𑀘𑀸𑀬𑀦𑀧𑀸𑀭𑀺𑀘𑀭𑀺𑀬𑀸𑀤𑀺𑀯𑀲𑁂𑀦 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀲𑁆𑀲 ¶ 𑀫𑁂 𑀲𑀫𑀸𑀦𑀲𑁆𑀲. 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀻𑀢𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀁. 𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀦𑁆𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀆𑀳𑀸𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸𑀢𑀺 𑀬𑀸𑀘𑀓𑀸 𑀘 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀪𑀯𑁂𑀬𑁆𑀬𑀼𑀁.

𑁨𑁯𑁯. 𑀤𑀤𑀢𑁄 ¶ 𑀫𑁂 𑀦 𑀔𑀻𑀬𑁂𑀣𑀸𑀢𑀺 𑀆𑀕𑀢𑀸𑀕𑀢𑀸𑀦𑀁 𑀤𑀸𑀦𑀁 𑀤𑀤𑀢𑁄 𑀘 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀔𑀻𑀬𑁂𑀣, 𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑁂𑀬𑁆𑀬. 𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀦𑁆𑀢𑀺 𑀢𑀜𑁆𑀘 𑀤𑀸𑀦𑀁 𑀤𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀧𑁆𑀧𑀲𑀸𑀤𑀓𑀁 𑀤𑀺𑀲𑁆𑀯𑀸 𑀢𑁂𑀦 𑀅𑀳𑀁 𑀧𑀘𑁆𑀙𑀸 𑀦𑀸𑀦𑀼𑀢𑀧𑁂𑀬𑁆𑀬𑀁. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀦𑁆𑀢𑀺 𑀤𑀤𑀫𑀸𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀁, 𑀧𑀲𑀦𑁆𑀦𑀘𑀺𑀢𑁆𑀢𑁄𑀬𑁂𑀯 𑀳𑀼𑀢𑁆𑀯𑀸 𑀤𑀤𑁂𑀬𑁆𑀬𑀁. 𑀏𑀢𑀁 𑀲𑀓𑁆𑀓𑀁 𑀯𑀭𑀁 𑀯𑀭𑁂𑀢𑀺 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀭𑁄𑀕𑁆𑀬𑀲𑀫𑁆𑀧𑀤𑀸, 𑀤𑁂𑀬𑁆𑀬𑀥𑀫𑁆𑀫𑀲𑀫𑁆𑀧𑀤𑀸, 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀤𑀸, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑀭𑀺𑀫𑀺𑀢𑀲𑀫𑁆𑀧𑀤𑀸, 𑀤𑀸𑀬𑀓𑀲𑀫𑁆𑀧𑀤𑀸𑀢𑀺 𑀏𑀢𑀁 𑀧𑀜𑁆𑀘𑀯𑀺𑀥𑀁 𑀯𑀭𑀁 𑀯𑀭𑁂𑀬𑁆𑀬𑀁. 𑀏𑀢𑁆𑀣 𑀘 ‘‘𑀓𑀸𑀮𑀼𑀝𑁆𑀞𑀺𑀢𑀲𑁆𑀲 𑀫𑁂 𑀲𑀢𑁄’’𑀢𑀺 𑀏𑀢𑁂𑀦 𑀆𑀭𑁄𑀕𑁆𑀬𑀲𑀫𑁆𑀧𑀤𑀸, ‘‘𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀏𑀢𑁂𑀦 𑀤𑁂𑀬𑁆𑀬𑀥𑀫𑁆𑀫𑀲𑀫𑁆𑀧𑀤𑀸, ‘‘𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸’’𑀢𑀺 𑀏𑀢𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀤𑀸, ‘‘𑀤𑀤𑀢𑁄 𑀫𑁂 𑀦 𑀔𑀻𑀬𑁂𑀣𑀸’’𑀢𑀺 𑀏𑀢𑁂𑀦 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑀭𑀺𑀫𑀺𑀢𑀲𑀫𑁆𑀧𑀤𑀸, ‘‘𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀁, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬’’𑀦𑁆𑀢𑀺 𑀏𑀢𑁂𑀳𑀺 𑀤𑀸𑀬𑀓𑀲𑀫𑁆𑀧𑀤𑀸𑀢𑀺 𑀇𑀫𑁂 𑀧𑀜𑁆𑀘 𑀅𑀢𑁆𑀣𑀸 𑀯𑀭𑀪𑀸𑀯𑁂𑀦 𑀇𑀘𑁆𑀙𑀺𑀢𑀸. 𑀢𑁂 𑀘 𑀔𑁄 𑀤𑀸𑀦𑀫𑀬𑀧𑀼𑀜𑁆𑀜𑀲𑁆𑀲 𑀬𑀸𑀯𑀤𑁂𑀯 𑀉𑀴𑀸𑀭𑀪𑀸𑀯𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀅𑀗𑁆𑀓𑀼𑀭𑁂𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂 𑀧𑀯𑁂𑀤𑀺𑀢𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀦𑀻𑀢𑀺𑀲𑀢𑁆𑀣𑁂 𑀓𑀢𑀧𑀭𑀺𑀘𑀬𑁄 𑀲𑁄𑀦𑀓𑁄 𑀦𑀸𑀫 𑀏𑀓𑁄 𑀧𑀼𑀭𑀺𑀲𑁄 𑀢𑀁 𑀅𑀢𑀺𑀤𑀸𑀦𑀢𑁄 𑀯𑀺𑀘𑁆𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑁋

‘‘𑀦 𑀲𑀩𑁆𑀩𑀯𑀺𑀢𑁆𑀢𑀸𑀦𑀺 𑀧𑀭𑁂 𑀧𑀯𑁂𑀘𑁆𑀙𑁂, 𑀤𑀤𑁂𑀬𑁆𑀬 𑀤𑀸𑀦𑀜𑁆𑀘 𑀥𑀦𑀜𑁆𑀘 𑀭𑀓𑁆𑀔𑁂;

𑀢𑀲𑁆𑀫𑀸 𑀳𑀺 𑀤𑀸𑀦𑀸 𑀥𑀦𑀫𑁂𑀯 𑀲𑁂𑀬𑁆𑀬𑁄, 𑀅𑀢𑀺𑀧𑁆𑀧𑀤𑀸𑀦𑁂𑀦 𑀓𑀼𑀮𑀸 𑀦 𑀳𑁄𑀦𑁆𑀢𑀺.

‘‘𑀅𑀤𑀸𑀦𑀫𑀢𑀺𑀤𑀸𑀦𑀜𑁆𑀘 ¶ 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸,

𑀢𑀲𑁆𑀫𑀸 ¶ 𑀳𑀺 𑀤𑀸𑀦𑀸 𑀥𑀦𑀫𑁂𑀯 𑀲𑁂𑀬𑁆𑀬𑁄,

𑀲𑀫𑁂𑀦 𑀯𑀢𑁆𑀢𑁂𑀬𑁆𑀬 𑀲 𑀥𑀻𑀭𑀥𑀫𑁆𑀫𑁄’’𑀢𑀺. 𑁋

𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀲𑀺𑀦𑁆𑀥𑀓𑁄 𑀏𑀯𑀁 𑀧𑀼𑀦𑀧𑀺 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 ‘‘𑀦 𑀲𑀩𑁆𑀩𑀯𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀧𑀭𑁂.

𑁩𑁦𑁦. 𑀢𑀢𑁆𑀣 𑀲𑀩𑁆𑀩𑀯𑀺𑀢𑁆𑀢𑀸𑀦𑀻𑀢𑀺 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀧𑁆𑀧𑀪𑁂𑀤𑀸𑀦𑀺 𑀲𑀩𑁆𑀩𑀸𑀦𑀺 𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀺, 𑀥𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀭𑁂𑀢𑀺 𑀧𑀭𑀫𑁆𑀳𑀺, 𑀧𑀭𑀲𑁆𑀲𑀸𑀢𑀺 𑀅𑀢𑁆𑀣𑁄 ¶ . 𑀦 𑀧𑀯𑁂𑀘𑁆𑀙𑁂𑀢𑀺 𑀦 𑀤𑀤𑁂𑀬𑁆𑀬, ‘‘𑀤𑀓𑁆𑀔𑀺𑀡𑁂𑀬𑁆𑀬𑀸 𑀮𑀤𑁆𑀥𑀸’’𑀢𑀺 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀧𑀭𑀺𑀘𑁆𑀘𑀸𑀕𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀤𑀤𑁂𑀬𑁆𑀬 𑀤𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑀸𑀦𑀥𑀫𑁆𑀫𑁄 𑀦 𑀓𑀸𑀢𑀩𑁆𑀩𑁄, 𑀅𑀣 𑀔𑁄 𑀅𑀢𑁆𑀢𑀦𑁄 𑀆𑀬𑀜𑁆𑀘 𑀯𑀬𑀜𑁆𑀘 𑀚𑀸𑀦𑀺𑀢𑁆𑀯𑀸 𑀯𑀺𑀪𑀯𑀸𑀦𑀼𑀭𑀽𑀧𑀁 𑀤𑀸𑀦𑀜𑁆𑀘 𑀤𑀤𑁂𑀬𑁆𑀬. 𑀥𑀦𑀜𑁆𑀘 𑀭𑀓𑁆𑀔𑁂𑀢𑀺 𑀅𑀮𑀤𑁆𑀥𑀮𑀸𑀪𑀮𑀤𑁆𑀥𑀧𑀭𑀺𑀭𑀓𑁆𑀔𑀡𑀭𑀓𑁆𑀔𑀺𑀢𑀲𑀫𑁆𑀩𑀦𑁆𑀥𑀯𑀲𑁂𑀦 𑀥𑀦𑀁 𑀧𑀭𑀺𑀧𑀸𑀮𑁂𑀬𑁆𑀬.

‘‘𑀏𑀓𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬, 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂;

𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬, 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀯𑀼𑀢𑁆𑀢𑀯𑀺𑀥𑀺𑀦𑀸 𑀯𑀸 𑀥𑀦𑀁 𑀭𑀓𑁆𑀔𑁂𑀬𑁆𑀬 𑀢𑀫𑁆𑀫𑀽𑀮𑀓𑀢𑁆𑀢𑀸 𑀤𑀸𑀦𑀲𑁆𑀲. 𑀢𑀬𑁄𑀧𑀺 𑀫𑀕𑁆𑀕𑀸 𑀅𑀜𑁆𑀜𑀫𑀜𑁆𑀜𑀯𑀺𑀲𑁄𑀥𑀦𑁂𑀦 𑀧𑀝𑀺𑀲𑁂𑀯𑀺𑀢𑀩𑁆𑀩𑀸𑀢𑀺 𑀳𑀺 𑀦𑀻𑀢𑀺𑀘𑀺𑀦𑁆𑀢𑀓𑀸. 𑀢𑀲𑁆𑀫𑀸 𑀳𑀻𑀢𑀺 𑀬𑀲𑁆𑀫𑀸 𑀥𑀦𑀜𑁆𑀘 𑀭𑀓𑁆𑀔𑀦𑁆𑀢𑁄 𑀤𑀸𑀦𑀜𑁆𑀘 𑀓𑀭𑁄𑀦𑁆𑀢𑁄 𑀉𑀪𑀬𑀮𑁄𑀓𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀥𑀦𑀫𑀽𑀮𑀓𑀜𑁆𑀘 𑀤𑀸𑀦𑀁, 𑀢𑀲𑁆𑀫𑀸 𑀤𑀸𑀦𑀢𑁄 𑀥𑀦𑀫𑁂𑀯 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄𑀢𑀺 𑀅𑀢𑀺𑀤𑀸𑀦𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀢𑀺𑀧𑁆𑀧𑀤𑀸𑀦𑁂𑀦 𑀓𑀼𑀮𑀸 𑀦 𑀳𑁄𑀦𑁆𑀢𑀻’’𑀢𑀺, 𑀥𑀦𑀲𑁆𑀲 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀤𑀸𑀦𑀲𑁆𑀲 𑀢𑀁 𑀦𑀺𑀲𑁆𑀲𑀸𑀬 𑀅𑀢𑀺𑀧𑁆𑀧𑀤𑀸𑀦𑀧𑀲𑀗𑁆𑀕𑁂𑀦 𑀓𑀼𑀮𑀸𑀦𑀺 𑀦 𑀳𑁄𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁦𑁧. 𑀇𑀤𑀸𑀦𑀺 𑀯𑀺𑀜𑁆𑀜𑀽𑀦𑀁 𑀧𑀲𑀁𑀲𑀺𑀢𑀫𑁂𑀯𑀢𑁆𑀣𑀁 ¶ 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 ‘‘𑀅𑀤𑀸𑀦𑀫𑀢𑀺𑀤𑀸𑀦𑀜𑁆𑀘𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀤𑀸𑀦𑀫𑀢𑀺𑀤𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀬𑀧𑀺 𑀢𑀡𑁆𑀟𑀼𑀮𑀫𑀼𑀝𑁆𑀞𑀺𑀬𑀸𑀧𑀺 𑀅𑀤𑀸𑀦𑀁, 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀘𑁆𑀘𑀸𑀕𑀲𑀗𑁆𑀔𑀸𑀢𑀁 𑀅𑀢𑀺𑀤𑀸𑀦𑀜𑁆𑀘 𑀧𑀡𑁆𑀟𑀺𑀢𑀸 𑀩𑀼𑀤𑁆𑀥𑀺𑀫𑀦𑁆𑀢𑁄 𑀲𑀧𑀜𑁆𑀜𑀚𑀸𑀢𑀺𑀓𑀸 𑀦𑀧𑁆𑀧𑀲𑀁𑀲𑀦𑁆𑀢𑀺 𑀦 𑀯𑀡𑁆𑀡𑀬𑀦𑁆𑀢𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀤𑀸𑀦𑁂𑀦 𑀳𑀺 𑀲𑀫𑁆𑀧𑀭𑀸𑀬𑀺𑀓𑀢𑁄 𑀅𑀢𑁆𑀣𑀢𑁄 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺. 𑀅𑀢𑀺𑀤𑀸𑀦𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀧𑀯𑁂𑀡𑀻 𑀦 𑀧𑀯𑀢𑁆𑀢𑀢𑀺. 𑀲𑀫𑁂𑀦 𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀯𑀺𑀲𑀫𑁂𑀦 ¶ 𑀮𑁄𑀓𑀺𑀬𑀲𑀭𑀺𑀓𑁆𑀔𑀓𑁂𑀦 𑀲𑀫𑀸𑀳𑀺𑀢𑁂𑀦 𑀫𑀚𑁆𑀛𑀺𑀫𑁂𑀦 𑀜𑀸𑀬𑁂𑀦 𑀧𑀯𑀢𑁆𑀢𑁂𑀬𑁆𑀬. 𑀲 𑀥𑀻𑀭𑀥𑀫𑁆𑀫𑁄𑀢𑀺 𑀬𑀸 𑀬𑀣𑀸𑀯𑀼𑀢𑁆𑀢𑀸 𑀤𑀸𑀦𑀸𑀤𑀸𑀦𑀧𑁆𑀧𑀯𑀢𑁆𑀢𑀺, 𑀲𑁄 𑀥𑀻𑀭𑀸𑀦𑀁 𑀥𑀺𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀦𑀻𑀢𑀺𑀦𑀬𑀓𑀼𑀲𑀮𑀸𑀦𑀁 𑀥𑀫𑁆𑀫𑁄, 𑀢𑁂𑀳𑀺 𑀕𑀢𑀫𑀕𑁆𑀕𑁄𑀢𑀺 𑀤𑀻𑀧𑁂𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀅𑀗𑁆𑀓𑀼𑀭𑁄 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑁋

‘‘𑀅𑀳𑁄 𑀯𑀢 𑀭𑁂 𑀅𑀳𑀫𑁂𑀯 𑀤𑀚𑁆𑀚𑀁, 𑀲𑀦𑁆𑀢𑁄 𑀘 𑀫𑀁 𑀲𑀧𑁆𑀧𑀼𑀭𑀺𑀲𑀸 𑀪𑀚𑁂𑀬𑁆𑀬𑀼𑀁;

𑀫𑁂𑀖𑁄𑀯 𑀦𑀺𑀦𑁆𑀦𑀸𑀦𑀺 𑀧𑀭𑀺𑀧𑀽𑀭𑀬𑀦𑁆𑀢𑁄, 𑀲𑀦𑁆𑀢𑀧𑁆𑀧𑀬𑁂 𑀲𑀩𑁆𑀩𑀯𑀦𑀺𑀩𑁆𑀩𑀓𑀸𑀦𑀁.

‘‘𑀬𑀲𑁆𑀲 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸, 𑀫𑀼𑀔𑀯𑀡𑁆𑀡𑁄 𑀧𑀲𑀻𑀤𑀢𑀺;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀁 𑀖𑀭𑀁 𑀯𑀲𑀢𑁄 𑀲𑀼𑀔𑀁.

‘‘𑀬𑀲𑁆𑀲 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸, 𑀫𑀼𑀔𑀯𑀡𑁆𑀡𑁄 𑀧𑀲𑀻𑀤𑀢𑀺;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸.

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸’’𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀧𑀓𑀸𑀲𑁂𑀲𑀺.

𑁩𑁦𑁨. 𑀢𑀢𑁆𑀣 𑀅𑀳𑁄 𑀯𑀢𑀸𑀢𑀺 𑀲𑀸𑀥𑀼 𑀯𑀢. 𑀭𑁂𑀢𑀺 𑀆𑀮𑀧𑀦𑀁. 𑀅𑀳𑀫𑁂𑀯 𑀤𑀚𑁆𑀚𑀦𑁆𑀢𑀺 𑀅𑀳𑀁 𑀤𑀚𑁆𑀚𑀫𑁂𑀯. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 ¶ 𑁋 𑀫𑀸𑀡𑀯, ‘‘𑀤𑀸𑀦𑀸 𑀥𑀦𑀫𑁂𑀯 𑀲𑁂𑀬𑁆𑀬𑁄’’𑀢𑀺 𑀬𑀤𑀺 𑀅𑀬𑀁 𑀦𑀻𑀢𑀺𑀓𑀼𑀲𑀮𑀸𑀦𑀁 𑀯𑀸𑀤𑁄 𑀢𑀯 𑀳𑁄𑀢𑀼, 𑀓𑀸𑀫𑀁 𑀅𑀳𑀁 𑀤𑀚𑁆𑀚𑀫𑁂𑀯. 𑀲𑀦𑁆𑀢𑁄 𑀘 𑀫𑀁 𑀲𑀧𑁆𑀧𑀼𑀭𑀺𑀲𑀸 𑀪𑀚𑁂𑀬𑁆𑀬𑀼𑀦𑁆𑀢𑀺 𑀢𑀲𑁆𑀫𑀺𑀜𑁆𑀘 𑀤𑀸𑀦𑁂 𑀲𑀦𑁆𑀢𑁄 𑀉𑀧𑀲𑀦𑁆𑀢𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑀸 𑀲𑀧𑁆𑀧𑀼𑀭𑀺𑀲𑀸 𑀲𑀸𑀥𑀯𑁄 𑀫𑀁 𑀪𑀚𑁂𑀬𑁆𑀬𑀼𑀁 𑀉𑀧𑀕𑀘𑁆𑀙𑁂𑀬𑁆𑀬𑀼𑀁. 𑀫𑁂𑀖𑁄𑀯 𑀦𑀺𑀦𑁆𑀦𑀸𑀦𑀺 𑀧𑀭𑀺𑀧𑀽𑀭𑀬𑀦𑁆𑀢𑁄𑀢𑀺 𑀅𑀳𑀁 𑀅𑀪𑀺𑀧𑁆𑀧𑀯𑀲𑁆𑀲𑀦𑁆𑀢𑁄 𑀫𑀳𑀸𑀫𑁂𑀖𑁄 𑀯𑀺𑀬 𑀦𑀺𑀦𑁆𑀦𑀸𑀦𑀺 𑀦𑀺𑀦𑁆𑀦𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑁂𑀲𑀁 𑀯𑀦𑀺𑀩𑁆𑀩𑀓𑀸𑀦𑀁 𑀅𑀥𑀺𑀧𑁆𑀧𑀸𑀬𑁂 𑀧𑀭𑀺𑀧𑀽𑀭𑀬𑀦𑁆𑀢𑁄 𑀅𑀳𑁄 𑀯𑀢 𑀢𑁂 𑀲𑀦𑁆𑀢𑀧𑁆𑀧𑁂𑀬𑁆𑀬𑀦𑁆𑀢𑀺.

𑁩𑁦𑁩. 𑀬𑀲𑁆𑀲 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀖𑀭𑀫𑁂𑀲𑀺𑀦𑁄 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸 ‘‘𑀧𑀞𑀫𑀁 𑀢𑀸𑀯 𑀉𑀧𑀝𑁆𑀞𑀺𑀢𑀁 𑀯𑀢 𑀫𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢’’𑀦𑁆𑀢𑀺 𑀲𑀤𑁆𑀥𑀸𑀚𑀸𑀢𑀲𑁆𑀲 𑀫𑀼𑀔𑀯𑀡𑁆𑀡𑁄 𑀧𑀲𑀻𑀤𑀢𑀺, 𑀬𑀣𑀸𑀯𑀺𑀪𑀯𑀁 𑀧𑀦 𑀢𑁂𑀲𑀁 ¶ 𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀕𑀳𑀺𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀢𑀦𑁆𑀢𑀺 𑀬𑀤𑁂𑀢𑁆𑀣 𑀬𑀸𑀘𑀓𑀸𑀦𑀁 𑀤𑀲𑁆𑀲𑀦𑀁 ¶ , 𑀢𑁂𑀦 𑀘 𑀤𑀺𑀲𑁆𑀯𑀸 𑀘𑀺𑀢𑁆𑀢𑀲𑁆𑀲 𑀧𑀲𑀸𑀤𑀦𑀁, 𑀬𑀣𑀸𑀭𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀘 𑀅𑀢𑁆𑀢𑀫𑀦𑀢𑀸.

𑁩𑁦𑁪. 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸𑀢𑀺 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀢𑁆𑀢𑀺 𑀧𑀸𑀭𑀺𑀧𑀽𑀭𑀺, 𑀦𑀺𑀧𑁆𑀨𑀢𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁦𑁫. 𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄𑀢𑀺 ‘‘𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀤𑀸𑀦𑀁 𑀅𑀦𑀼𑀕𑀸𑀫𑀺𑀓𑀁 𑀦𑀺𑀥𑀸𑀦𑀁 𑀦𑀺𑀥𑁂𑀲𑁆𑀲𑀸𑀫𑀻’’𑀢𑀺 𑀫𑀼𑀜𑁆𑀘𑀦𑀘𑁂𑀢𑀦𑀸𑀬 𑀧𑀼𑀩𑁆𑀩𑁂 𑀏𑀯 𑀤𑀸𑀦𑀽𑀧𑀓𑀭𑀡𑀲𑁆𑀲 𑀲𑀫𑁆𑀧𑀸𑀤𑀦𑀢𑁄 𑀧𑀝𑁆𑀞𑀸𑀬 𑀲𑀼𑀫𑀦𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀯𑁂𑀬𑁆𑀬. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂𑀢𑀺 𑀤𑀤𑀦𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑀁 𑀤𑀓𑁆𑀔𑀺𑀡𑁂𑀬𑁆𑀬𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 ‘‘𑀅𑀲𑀸𑀭𑀢𑁄 𑀥𑀦𑀢𑁄 𑀲𑀸𑀭𑀸𑀤𑀸𑀦𑀁 𑀓𑀭𑁄𑀫𑀻’’𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬. 𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 ‘‘𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀁 𑀦𑀸𑀫 𑀫𑀬𑀸 𑀅𑀦𑀼𑀝𑁆𑀞𑀺𑀢𑀁, 𑀅𑀳𑁄 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑀫𑀦𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀺. 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸𑀢𑀺 𑀬𑀸 ¶ 𑀅𑀬𑀁 𑀧𑀼𑀩𑁆𑀩𑀘𑁂𑀢𑀦𑀸 𑀫𑀼𑀜𑁆𑀚𑀘𑁂𑀢𑀦𑀸 𑀅𑀧𑀭𑀘𑁂𑀢𑀦𑀸𑀢𑀺 𑀇𑀫𑁂𑀲𑀁 𑀓𑀫𑁆𑀫𑀨𑀮𑀲𑀤𑁆𑀥𑀸𑀦𑀼𑀕𑀢𑀸𑀦𑀁 𑀲𑁄𑀫𑀦𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸𑀦𑀁 𑀢𑀺𑀲𑁆𑀲𑀦𑁆𑀦𑀁 𑀘𑁂𑀢𑀦𑀸𑀦𑀁 𑀧𑀸𑀭𑀺𑀧𑀽𑀭𑀺, 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸 𑀤𑀸𑀦𑀲𑁆𑀲 𑀲𑀫𑁆𑀧𑀢𑁆𑀢𑀺, 𑀦 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀅𑀗𑁆𑀓𑀼𑀭𑁄 𑀅𑀢𑁆𑀢𑀦𑁄 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀧𑀓𑀸𑀲𑁂𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀪𑀺𑀯𑀟𑁆𑀠𑀫𑀸𑀦𑀤𑀸𑀦𑀚𑁆𑀛𑀸𑀲𑀬𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀢𑁂𑀦 𑀢𑀤𑀸 𑀲𑀩𑁆𑀩𑀭𑀚𑁆𑀚𑀸𑀦𑀺 𑀉𑀦𑁆𑀦𑀗𑁆𑀕𑀮𑀸𑀦𑀺 𑀓𑀢𑁆𑀯𑀸 𑀫𑀳𑀸𑀤𑀸𑀦𑁂 𑀤𑀺𑀬𑁆𑀬𑀫𑀸𑀦𑁂 𑀧𑀝𑀺𑀮𑀤𑁆𑀥𑀲𑀩𑁆𑀩𑀽𑀧𑀓𑀭𑀡𑀸 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀫𑁆𑀫𑀦𑁆𑀢𑁂 𑀧𑀳𑀸𑀬 𑀬𑀣𑀸𑀲𑀼𑀔𑀁 𑀯𑀺𑀘𑀭𑀺𑀁𑀲𑀼, 𑀢𑁂𑀦 𑀭𑀸𑀚𑀽𑀦𑀁 𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀧𑀭𑀺𑀓𑁆𑀔𑀬𑀁 𑀅𑀕𑀫𑀁𑀲𑀼. 𑀢𑀢𑁄 𑀭𑀸𑀚𑀸𑀦𑁄 𑀅𑀗𑁆𑀓𑀼𑀭𑀲𑁆𑀲 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑁄𑀢𑁄 𑀤𑀸𑀦𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀆𑀬𑀲𑁆𑀲 𑀯𑀺𑀦𑀸𑀲𑁄 𑀅𑀳𑁄𑀲𑀺, 𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀧𑀭𑀺𑀓𑁆𑀔𑀬𑀁 𑀕𑀢𑀸𑀦𑀺, 𑀢𑀢𑁆𑀣 𑀬𑀼𑀢𑁆𑀢𑀫𑀢𑁆𑀢𑀁 𑀜𑀸𑀢𑀩𑁆𑀩’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀗𑁆𑀓𑀼𑀭𑁄 𑀤𑀓𑁆𑀔𑀺𑀡𑀸𑀧𑀣𑀁 𑀕𑀦𑁆𑀢𑁆𑀯𑀸 𑀤𑀫𑀺𑀴𑀯𑀺𑀲𑀬𑁂 𑀲𑀫𑀼𑀤𑁆𑀤𑀲𑁆𑀲 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀫𑀳𑀢𑀺𑀬𑁄 𑀅𑀦𑁂𑀓𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 ¶ 𑀫𑀭𑀡𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀤𑀸𑀦𑀯𑀺𑀪𑀽𑀢𑀺𑀜𑁆𑀘 𑀲𑀕𑁆𑀕𑀽𑀧𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀲𑀝𑁆𑀞𑀺 𑀯𑀸𑀳𑀲𑀳𑀲𑁆𑀲𑀸𑀦𑀺, 𑀅𑀗𑁆𑀓𑀼𑀭𑀲𑁆𑀲 𑀦𑀺𑀯𑁂𑀲𑀦𑁂;

𑀪𑁄𑀚𑀦𑀁 𑀤𑀻𑀬𑀢𑁂 𑀦𑀺𑀘𑁆𑀘𑀁, 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀚𑀦𑁆𑀢𑀼𑀦𑁄.

‘‘𑀢𑀺𑀲𑀳𑀲𑁆𑀲𑀸𑀦𑀺 ¶ 𑀲𑀽𑀤𑀸 𑀳𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀅𑀗𑁆𑀓𑀼𑀭𑀁 𑀉𑀧𑀚𑀻𑀯𑀦𑁆𑀢𑀺, 𑀤𑀸𑀦𑁂 𑀬𑀜𑁆𑀜𑀲𑁆𑀲 𑀯𑀸𑀯𑀝𑀸.

‘‘𑀲𑀝𑁆𑀞𑀺 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀅𑀗𑁆𑀓𑀼𑀭𑀲𑁆𑀲 𑀫𑀳𑀸𑀤𑀸𑀦𑁂, 𑀓𑀝𑁆𑀞𑀁 𑀨𑀸𑀮𑁂𑀦𑁆𑀢𑀺 𑀫𑀸𑀡𑀯𑀸.

‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺 ¶ , 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀅𑀗𑁆𑀓𑀼𑀭𑀲𑁆𑀲 𑀫𑀳𑀸𑀤𑀸𑀦𑁂, 𑀯𑀺𑀥𑀸 𑀧𑀺𑀡𑁆𑀟𑁂𑀦𑁆𑀢𑀺 𑀦𑀸𑀭𑀺𑀬𑁄.

‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀅𑀗𑁆𑀓𑀼𑀭𑀲𑁆𑀲 𑀫𑀳𑀸𑀤𑀸𑀦𑁂, 𑀤𑀩𑁆𑀩𑀺𑀕𑀸𑀳𑀸 𑀉𑀧𑀝𑁆𑀞𑀺𑀢𑀸.

‘‘𑀩𑀳𑀼𑀁 𑀩𑀳𑀽𑀦𑀁 𑀧𑀸𑀤𑀸𑀲𑀺, 𑀘𑀺𑀭𑀁 𑀧𑀸𑀤𑀸𑀲𑀺 𑀔𑀢𑁆𑀢𑀺𑀬𑁄;

𑀲𑀓𑁆𑀓𑀘𑁆𑀘𑀜𑁆𑀘 𑀲𑀳𑀢𑁆𑀣𑀸 𑀘, 𑀘𑀺𑀢𑁆𑀢𑀻𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁.

‘‘𑀩𑀳𑀽 𑀫𑀸𑀲𑁂 𑀘 𑀧𑀓𑁆𑀔𑁂 𑀘, 𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀺 𑀘;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀅𑀗𑁆𑀓𑀼𑀭𑁄 𑀤𑀻𑀖𑀫𑀦𑁆𑀢𑀭𑀁.

‘‘𑀏𑀯𑀁 𑀤𑀢𑁆𑀯𑀸 𑀬𑀚𑀺𑀢𑁆𑀯𑀸 𑀘, 𑀅𑀗𑁆𑀓𑀼𑀭𑁄 𑀤𑀻𑀖𑀫𑀦𑁆𑀢𑀭𑀁;

𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀽’’𑀢𑀺. 𑁋 𑀕𑀸𑀣𑀸 𑀆𑀳𑀁𑀲𑀼;

𑁩𑁦𑁬. 𑀢𑀣 𑀲𑀝𑁆𑀞𑀺 𑀯𑀸𑀳𑀲𑀳𑀲𑁆𑀲𑀸𑀦𑀻𑀢𑀺 𑀯𑀸𑀳𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀕𑀦𑁆𑀥𑀲𑀸𑀮𑀺𑀢𑀡𑁆𑀟𑀼𑀮𑀸𑀤𑀺𑀧𑀽𑀭𑀺𑀢𑀯𑀸𑀳𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺. 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀤𑀸𑀦𑀸𑀥𑀺𑀫𑀼𑀢𑁆𑀢𑀲𑁆𑀲 𑀅𑀗𑁆𑀓𑀼𑀭𑀲𑁆𑀲 𑀦𑀺𑀯𑁂𑀲𑀦𑁂 𑀦𑀺𑀘𑁆𑀘𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀚𑀦𑁆𑀢𑀼𑀦𑁄 𑀲𑀢𑁆𑀢𑀓𑀸𑀬𑀲𑁆𑀲 𑀪𑁄𑀚𑀦𑀁 𑀤𑀻𑀬𑀢𑁂𑀢𑀺 𑀬𑁄𑀚𑀦𑀸.

𑁩𑁦𑁭-𑁮. 𑀢𑀺𑀲𑀳𑀲𑁆𑀲𑀸𑀦𑀺 𑀲𑀽𑀤𑀸 𑀳𑀻𑀢𑀺 𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀲𑀽𑀤𑀸 𑀪𑀢𑁆𑀢𑀓𑀸𑀭𑀓𑀸. 𑀢𑁂 𑀘 𑀔𑁄 𑀧𑀦 𑀧𑀥𑀸𑀦𑀪𑀽𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀢𑁂𑀲𑀼 𑀏𑀓𑀫𑁂𑀓𑀲𑁆𑀲 𑀧𑀦 ¶ 𑀯𑀘𑀦𑀓𑀭𑀸 𑀅𑀦𑁂𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀢𑀺𑀲𑀳𑀲𑁆𑀲𑀸𑀦𑀺 𑀲𑀽𑀤𑀸𑀦’’𑀦𑁆𑀢𑀺 𑀘 𑀧𑀞𑀦𑁆𑀢𑀺. 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀢𑀺 𑀦𑀸𑀦𑀸𑀫𑀡𑀺𑀯𑀺𑀘𑀺𑀢𑁆𑀢𑀓𑀼𑀡𑁆𑀟𑀮𑀥𑀭𑀸. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀆𑀫𑀼𑀢𑁆𑀢𑀓𑀝𑀓𑀓𑀝𑀺𑀲𑀼𑀢𑁆𑀢𑀸𑀤𑀺𑀆𑀪𑀭𑀡𑀸𑀧𑀺 𑀢𑁂 𑀅𑀳𑁂𑀲𑀼𑀁. 𑀅𑀗𑁆𑀓𑀼𑀭𑀁 𑀉𑀧𑀚𑀻𑀯𑀦𑁆𑀢𑀻𑀢𑀺 𑀢𑀁 𑀉𑀧𑀦𑀺𑀲𑁆𑀲𑀸𑀬 ¶ 𑀚𑀻𑀯𑀦𑁆𑀢𑀺, 𑀢𑀧𑁆𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀸𑀦𑁂 𑀬𑀜𑁆𑀜𑀲𑁆𑀲 𑀯𑀸𑀯𑀝𑀸𑀢𑀺 ¶ 𑀫𑀳𑀸𑀬𑀸𑀕𑀲𑀜𑁆𑀜𑀺𑀢𑀲𑁆𑀲 𑀬𑀜𑁆𑀜𑀲𑁆𑀲 𑀤𑀸𑀦𑁂 𑀬𑀚𑀦𑁂 𑀯𑀸𑀯𑀝𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑀸. 𑀓𑀝𑁆𑀞𑀁 𑀨𑀸𑀮𑁂𑀦𑁆𑀢𑀺 𑀫𑀸𑀡𑀯𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀆𑀳𑀸𑀭𑀯𑀺𑀲𑁂𑀲𑀸𑀦𑀁 𑀧𑀘𑀦𑀸𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀢𑀭𑀼𑀡𑀫𑀦𑀼𑀲𑁆𑀲𑀸 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑀺 𑀯𑀺𑀤𑀸𑀮𑁂𑀦𑁆𑀢𑀺.

𑁩𑁦𑁯. 𑀯𑀺𑀥𑀸𑀢𑀺 𑀯𑀺𑀥𑀸𑀢𑀩𑁆𑀩𑀸𑀦𑀺 𑀪𑁄𑀚𑀦𑀬𑁄𑀕𑁆𑀕𑀸𑀦𑀺 𑀓𑀝𑀼𑀓𑀪𑀡𑁆𑀟𑀸𑀦𑀺. 𑀧𑀺𑀡𑁆𑀟𑁂𑀦𑁆𑀢𑀻𑀢𑀺 𑀧𑀺𑀲𑀦𑀯𑀲𑁂𑀦 𑀧𑀬𑁄𑀚𑁂𑀦𑁆𑀢𑀺.

𑁩𑁧𑁦. 𑀤𑀩𑁆𑀩𑀺𑀕𑀸𑀳𑀸𑀢𑀺 𑀓𑀝𑀘𑁆𑀙𑀼𑀕𑀸𑀳𑀺𑀓𑀸. 𑀉𑀧𑀝𑁆𑀞𑀺𑀢𑀸𑀢𑀺 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀸 𑀳𑁄𑀦𑁆𑀢𑀺.

𑁩𑁧𑁧. 𑀩𑀳𑀼𑀦𑁆𑀢𑀺 𑀫𑀳𑀦𑁆𑀢𑀁 𑀧𑀳𑀽𑀢𑀺𑀓𑀁. 𑀩𑀳𑀽𑀦𑀦𑁆𑀢𑀺 𑀅𑀦𑁂𑀓𑁂𑀲𑀁. 𑀧𑀸𑀤𑀸𑀲𑀻𑀢𑀺 𑀧𑀓𑀸𑀭𑁂𑀳𑀺 𑀅𑀤𑀸𑀲𑀺. 𑀘𑀻𑀭𑀦𑁆𑀢𑀺 𑀘𑀺𑀭𑀓𑀸𑀮𑀁. 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀳𑀺 𑀫𑀦𑀼𑀲𑁆𑀲𑁂𑀲𑀼 𑀲𑁄 𑀉𑀧𑁆𑀧𑀦𑁆𑀦𑁄. 𑀩𑀳𑀼𑀁 𑀩𑀳𑀽𑀦𑀁 𑀘𑀺𑀭𑀓𑀸𑀮𑀜𑁆𑀘 𑀤𑁂𑀦𑁆𑀢𑁄 𑀬𑀣𑀸 𑀅𑀤𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑀘𑁆𑀘𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀸𑀤𑀭𑀁, 𑀅𑀦𑀧𑀯𑀺𑀤𑁆𑀥𑀁 𑀅𑀦𑀯𑀜𑁆𑀜𑀸𑀢𑀁 𑀓𑀢𑁆𑀯𑀸. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦, 𑀦 𑀆𑀡𑀸𑀧𑀦𑀫𑀢𑁆𑀢𑁂𑀦. 𑀘𑀺𑀢𑁆𑀢𑀻𑀓𑀢𑁆𑀯𑀸𑀢𑀺 𑀕𑀸𑀭𑀯𑀩𑀳𑀼𑀫𑀸𑀦𑀬𑁄𑀕𑁂𑀦 𑀘𑀺𑀢𑁆𑀢𑁂𑀦 𑀓𑀭𑀺𑀢𑁆𑀯𑀸 𑀧𑀽𑀚𑁂𑀢𑁆𑀯𑀸. 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀩𑀳𑀼𑀲𑁄 𑀦 𑀏𑀓𑀯𑀸𑀭𑀁, 𑀓𑀢𑀺𑀧𑀬𑀯𑀸𑀭𑁂 𑀯𑀸 𑀅𑀓𑀢𑁆𑀯𑀸 𑀅𑀦𑁂𑀓𑀯𑀸𑀭𑀁 𑀧𑀸𑀤𑀸𑀲𑀻𑀢𑀺 𑀬𑁄𑀚𑀦𑀸.

𑁩𑁧𑁨. 𑀇𑀤𑀸𑀦𑀺 𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀩𑀳𑀽 𑀫𑀸𑀲𑁂 𑀘𑀸’’𑀢𑀺 𑀕𑀸𑀣𑀫𑀸𑀳𑀁𑀲𑀼. 𑀢𑀢𑁆𑀣 𑀩𑀳𑀽 𑀫𑀸𑀲𑁂𑀢𑀺 𑀘𑀺𑀢𑁆𑀢𑀫𑀸𑀲𑀸𑀤𑀺𑀓𑁂 𑀩𑀳𑀽 𑀅𑀦𑁂𑀓𑁂 𑀫𑀸𑀲𑁂. 𑀧𑀓𑁆𑀔𑁂𑀢𑀺 𑀓𑀡𑁆𑀳𑀲𑀼𑀓𑁆𑀓𑀪𑁂𑀤𑁂 𑀩𑀳𑀽 𑀧𑀓𑁆𑀔𑁂. 𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀺 𑀘𑀸𑀢𑀺 𑀯𑀲𑀦𑁆𑀢𑀕𑀺𑀫𑁆𑀳𑀸𑀤𑀺𑀓𑁂 𑀩𑀳𑀽 𑀉𑀢𑀽 𑀘 𑀲𑀁𑀯𑀘𑁆𑀙𑀭𑀸𑀦𑀺 𑀘, 𑀲𑀩𑁆𑀩𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀤𑀻𑀖𑀫𑀦𑁆𑀢𑀭𑀦𑁆𑀢𑀺 𑀤𑀻𑀖𑀓𑀸𑀮𑀫𑀦𑁆𑀢𑀭𑀁. 𑀏𑀢𑁆𑀣 𑀘 ‘‘𑀘𑀺𑀭𑀁 𑀧𑀸𑀤𑀸𑀲𑀻’’𑀢𑀺 𑀘𑀺𑀭𑀓𑀸𑀮𑀁 𑀤𑀸𑀦𑀲𑁆𑀲 𑀧𑀯𑀢𑁆𑀢𑀺𑀢𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀦𑀺𑀭𑀦𑁆𑀢𑀭𑀫𑁂𑀯 ¶ 𑀧𑀯𑀢𑁆𑀢𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀽 𑀫𑀸𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁧𑁩. 𑀏𑀯𑀦𑁆𑀢𑀺 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀤𑀢𑁆𑀯𑀸 𑀬𑀚𑀺𑀢𑁆𑀯𑀸 𑀘𑀸𑀢𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀓𑁂𑀲𑀜𑁆𑀘𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀏𑀓𑀘𑁆𑀘𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀤𑀢𑁆𑀯𑀸, 𑀧𑀼𑀦 ‘‘𑀩𑀳𑀼𑀁 𑀩𑀳𑀽𑀦𑀁 𑀧𑀸𑀤𑀸𑀲𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀺𑀓𑀸𑀦𑀁 𑀲𑀩𑁆𑀩𑁂𑀲𑀁 𑀬𑀣𑀸𑀓𑀸𑀫𑀁 𑀤𑁂𑀦𑁆𑀢𑁄 𑀫𑀳𑀸𑀬𑀸𑀕𑀯𑀲𑁂𑀦 𑀬𑀚𑀺𑀢𑁆𑀯𑀸. 𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁 ¶ , 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀽𑀢𑀺 𑀲𑁄 𑀅𑀗𑁆𑀓𑀼𑀭𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀫𑀦𑀼𑀲𑁆𑀲𑀢𑁆𑀣𑀪𑀸𑀯𑀁 𑀧𑀳𑀸𑀬 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀢𑀸𑀯𑀢𑀺𑀁𑀲𑀤𑁂𑀯𑀦𑀺𑀓𑀸𑀬𑀽𑀧𑀕𑁄 𑀅𑀳𑁄𑀲𑀺.

𑀏𑀯𑀁 𑀢𑀲𑁆𑀫𑀺𑀁 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀇𑀦𑁆𑀤𑀓𑁄 𑀦𑀸𑀫 𑀫𑀸𑀡𑀯𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀧𑀲𑀦𑁆𑀦𑀫𑀸𑀦𑀲𑁄 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀸𑀧𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀔𑁂𑀢𑁆𑀢𑀕𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑀸𑀯𑀢𑀺𑀁𑀲𑁂𑀲𑀼 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀤𑀺𑀩𑁆𑀩𑁂𑀳𑀺 𑀭𑀽𑀧𑀸𑀤𑀻𑀳𑀺 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀗𑁆𑀓𑀼𑀭𑀁 𑀤𑁂𑀯𑀧𑀼𑀢𑁆𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀭𑁄𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀅𑀦𑀼𑀭𑀼𑀤𑁆𑀥𑀲𑁆𑀲 𑀇𑀦𑁆𑀤𑀓𑁄;

𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀼.

‘‘𑀤𑀲𑀳𑀺 𑀞𑀸𑀦𑁂𑀳𑀺 𑀅𑀗𑁆𑀓𑀼𑀭𑀁, 𑀇𑀦𑁆𑀤𑀓𑁄 𑀅𑀢𑀺𑀭𑁄𑀘𑀢𑀺;

𑀭𑀽𑀧𑁂 𑀲𑀤𑁆𑀤𑁂 𑀭𑀲𑁂 𑀕𑀦𑁆𑀥𑁂, 𑀨𑁄𑀝𑁆𑀞𑀩𑁆𑀩𑁂 𑀘 𑀫𑀦𑁄𑀭𑀫𑁂.

‘‘𑀆𑀬𑀼𑀦𑀸 𑀬𑀲𑀲𑀸 𑀘𑁂𑀯, 𑀯𑀡𑁆𑀡𑁂𑀦 𑀘 𑀲𑀼𑀔𑁂𑀦 𑀘;

𑀆𑀥𑀺𑀧𑀘𑁆𑀘𑁂𑀦 𑀅𑀗𑁆𑀓𑀼𑀭𑀁, 𑀇𑀦𑁆𑀤𑀓𑁄 𑀅𑀢𑀺𑀭𑁄𑀘𑀢𑀻’’𑀢𑀺.

𑁩𑁧𑁪-𑁫. 𑀢𑀢𑁆𑀣 𑀭𑀽𑀧𑁂𑀢𑀺 𑀭𑀽𑀧𑀳𑁂𑀢𑀼, 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀤𑁂𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀬𑀼𑀦𑀸𑀢𑀺 𑀚𑀻𑀯𑀺𑀢𑁂𑀦. 𑀦𑀦𑀼 𑀘 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀁 𑀯𑀼𑀢𑁆𑀢𑀁. 𑀲𑀘𑁆𑀘𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀬𑁂𑀪𑀼𑀬𑁆𑀬𑀯𑀲𑁂𑀦. 𑀢𑀣𑀸 𑀳𑀺 𑀏𑀓𑀘𑁆𑀘𑀸𑀦𑀁 𑀤𑁂𑀯𑀸𑀦𑀁 𑀬𑁄𑀕𑀯𑀺𑀧𑀢𑁆𑀢𑀺𑀆𑀤𑀺𑀦𑀸 𑀅𑀦𑁆𑀢𑀭𑀸𑀫𑀭𑀡𑀁 𑀳𑁄𑀢𑀺𑀬𑁂𑀯. 𑀇𑀦𑁆𑀤𑀓𑁄 𑀧𑀦 𑀢𑀺𑀲𑁆𑀲𑁄 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑁂𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀬𑀼𑀦𑀸 𑀅𑀢𑀺𑀭𑁄𑀘𑀢𑀻’’𑀢𑀺. 𑀬𑀲𑀲𑀸𑀢𑀺 𑀫𑀳𑀢𑀺𑀬𑀸 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 ¶ . 𑀯𑀡𑁆𑀡𑁂𑀦𑀸𑀢𑀺 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸. 𑀯𑀡𑁆𑀡𑀥𑀸𑀢𑀼𑀲𑀫𑁆𑀧𑀤𑀸 𑀧𑀦 ‘‘𑀭𑀽𑀧𑁂’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀸𑀬𑁂𑀯. 𑀆𑀥𑀺𑀧𑀘𑁆𑀘𑁂𑀦𑀸𑀢𑀺 𑀇𑀲𑁆𑀲𑀭𑀺𑀬𑁂𑀦.

𑀏𑀯𑀁 𑀅𑀗𑁆𑀓𑀼𑀭𑁂 𑀘 𑀇𑀦𑁆𑀤𑀓𑁂 𑀘 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁂𑀲𑀼 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 ¶ 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑀺𑀧𑀤𑀯𑀺𑀓𑁆𑀓𑀫𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 ¶ 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀤𑀲𑀳𑀺 𑀮𑁄𑀓𑀥𑀸𑀢𑀽𑀳𑀺 𑀲𑀦𑁆𑀦𑀺𑀧𑀢𑀺𑀢𑀸𑀬 𑀤𑁂𑀯𑀩𑁆𑀭𑀳𑁆𑀫𑀧𑀭𑀺𑀲𑀸𑀬 𑀚𑀼𑀢𑀺𑀁 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀅𑀪𑀺𑀪𑀯𑀦𑁆𑀢𑁄 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦𑀺𑀲𑀺𑀦𑁆𑀦𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀇𑀦𑁆𑀤𑀓𑀁, 𑀤𑁆𑀯𑀸𑀤𑀲𑀬𑁄𑀚𑀦𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀁 𑀅𑀗𑁆𑀓𑀼𑀭𑀜𑁆𑀘 𑀤𑀺𑀲𑁆𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀯𑀺𑀪𑀸𑀯𑀦𑀢𑁆𑀣𑀁 𑁋

‘‘𑀫𑀳𑀸𑀤𑀸𑀦𑀁 𑀢𑀬𑀸 𑀤𑀺𑀦𑁆𑀦𑀁, 𑀅𑀗𑁆𑀓𑀼𑀭 𑀤𑀻𑀖𑀫𑀦𑁆𑀢𑀭𑀁;

𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄𑀲𑀺, 𑀆𑀕𑀘𑁆𑀙 𑀫𑀫 𑀲𑀦𑁆𑀢𑀺𑀓𑁂’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀁 𑀲𑀼𑀢𑁆𑀯𑀸 𑀅𑀗𑁆𑀓𑀼𑀭𑁄 ‘‘𑀪𑀕𑀯𑀸 𑀫𑀬𑀸 𑀘𑀺𑀭𑀓𑀸𑀮𑀁 𑀩𑀳𑀼𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀫𑁆𑀧𑀺 𑀫𑀳𑀸𑀤𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑁂𑀦 𑀅𑀔𑁂𑀢𑁆𑀢𑁂 𑀯𑀼𑀢𑁆𑀢𑀩𑀻𑀚𑀁 𑀯𑀺𑀬 𑀦 𑀉𑀴𑀸𑀭𑀨𑀮𑀁 𑀅𑀳𑁄𑀲𑀺, 𑀇𑀦𑁆𑀤𑀓𑀲𑁆𑀲 𑀧𑀦 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀸𑀦𑀫𑁆𑀧𑀺 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀔𑁂𑀢𑁆𑀢𑁂 𑀯𑀼𑀢𑁆𑀢𑀩𑀻𑀚𑀁 𑀯𑀺𑀬 𑀅𑀢𑀺𑀯𑀺𑀬 𑀉𑀴𑀸𑀭𑀨𑀮𑀁 𑀚𑀸𑀢’’𑀦𑁆𑀢𑀺 𑀆𑀳. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀢𑀸𑀯𑀢𑀺𑀁𑀲𑁂 𑀬𑀤𑀸 𑀩𑀼𑀤𑁆𑀥𑁄, 𑀲𑀺𑀮𑀸𑀬𑀁 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀧𑀸𑀭𑀺𑀘𑁆𑀙𑀢𑁆𑀢𑀬𑀫𑀽𑀮𑀫𑁆𑀳𑀺, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

‘‘𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀦 𑀤𑁂𑀯𑀢𑀸;

𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀯𑀲𑀦𑁆𑀢𑀁 𑀦𑀕𑀫𑀼𑀤𑁆𑀥𑀦𑀺.

‘‘𑀦 𑀓𑁄𑀘𑀺 𑀤𑁂𑀯𑁄 𑀯𑀡𑁆𑀡𑁂𑀦, 𑀲𑀫𑁆𑀩𑀼𑀤𑁆𑀥𑀁 𑀅𑀢𑀺𑀭𑁄𑀘𑀢𑀺;

𑀲𑀩𑁆𑀩𑁂 𑀤𑁂𑀯𑁂 𑀅𑀢𑀺𑀓𑁆𑀓𑀫𑁆𑀫, 𑀲𑀫𑁆𑀩𑀼𑀤𑁆𑀥𑁄𑀯 𑀯𑀺𑀭𑁄𑀘𑀢𑀺.

‘‘𑀬𑁄𑀚𑀦𑀸𑀦𑀺 ¶ 𑀤𑀲 𑀤𑁆𑀯𑁂 𑀘, 𑀅𑀗𑁆𑀓𑀼𑀭𑁄𑀬𑀁 𑀢𑀤𑀸 𑀅𑀳𑀼;

𑀅𑀯𑀺𑀤𑀽𑀭𑁂𑀯 𑀩𑀼𑀤𑁆𑀥𑀲𑁆𑀲, 𑀇𑀦𑁆𑀤𑀓𑁄 𑀅𑀢𑀺𑀭𑁄𑀘𑀢𑀺.

‘‘𑀑𑀮𑁄𑀓𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀅𑀗𑁆𑀓𑀼𑀭𑀜𑁆𑀘𑀸𑀧𑀺 𑀇𑀦𑁆𑀤𑀓𑀁;

𑀤𑀓𑁆𑀔𑀺𑀡𑁂𑀬𑁆𑀬𑀁 𑀲𑀫𑁆𑀪𑀸𑀯𑁂𑀦𑁆𑀢𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀫𑀳𑀸𑀤𑀸𑀦𑀁 ¶ 𑀢𑀬𑀸 𑀤𑀺𑀦𑁆𑀦𑀁, 𑀅𑀗𑁆𑀓𑀼𑀭𑀁 𑀤𑀻𑀖𑀫𑀦𑁆𑀢𑀭𑀁;

𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄𑀲𑀺, 𑀆𑀕𑀘𑁆𑀙 𑀫𑀫 𑀲𑀦𑁆𑀢𑀺𑀓𑁂.

‘‘𑀘𑁄𑀤𑀺𑀢𑁄 ¶ 𑀪𑀸𑀯𑀺𑀢𑀢𑁆𑀢𑁂𑀦, 𑀅𑀗𑁆𑀓𑀼𑀭𑁄 𑀇𑀤𑀫𑀩𑁆𑀭𑀯𑀺;

𑀓𑀺𑀁 𑀫𑀬𑁆𑀳𑀁 𑀢𑁂𑀦 𑀤𑀸𑀦𑁂𑀦, 𑀤𑀓𑁆𑀔𑀺𑀡𑁂𑀬𑁆𑀬𑁂𑀦 𑀲𑀼𑀜𑁆𑀜𑀢𑀁.

‘‘𑀅𑀬𑀁 𑀲𑁄 𑀇𑀦𑁆𑀤𑀓𑁄 𑀬𑀓𑁆𑀔𑁄, 𑀤𑀚𑁆𑀚𑀸 𑀤𑀸𑀦𑀁 𑀧𑀭𑀺𑀢𑁆𑀢𑀓𑀁;

𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀺, 𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸.

‘‘𑀉𑀚𑁆𑀚𑀗𑁆𑀕𑀮𑁂 𑀬𑀣𑀸 𑀔𑁂𑀢𑁆𑀢𑁂, 𑀩𑀻𑀚𑀁 𑀩𑀳𑀼𑀫𑁆𑀧𑀺 𑀭𑁄𑀧𑀺𑀢𑀁;

𑀦 𑀯𑀺𑀧𑀼𑀮𑀁 𑀨𑀮𑀁 𑀳𑁄𑀢𑀺, 𑀦𑀧𑀺 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

‘‘𑀢𑀣𑁂𑀯 𑀤𑀸𑀦𑀁 𑀩𑀳𑀼𑀓𑀁, 𑀤𑀼𑀲𑁆𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀁;

𑀦 𑀯𑀺𑀧𑀼𑀮𑀁 𑀨𑀮𑀁 𑀳𑁄𑀢𑀺, 𑀦𑀧𑀺 𑀢𑁄𑀲𑁂𑀢𑀺 𑀤𑀸𑀬𑀓𑀁.

‘‘𑀬𑀣𑀸𑀧𑀺 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸 𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀲𑀺 𑀓𑀲𑁆𑀲𑀓𑀁.

‘‘𑀢𑀣𑁂𑀯 𑀲𑀻𑀮𑀯𑀦𑁆𑀢𑁂𑀲𑀼, 𑀕𑀼𑀡𑀯𑀦𑁆𑀢𑁂𑀲𑀼 𑀢𑀸𑀤𑀺𑀲𑀼;

𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀓𑀸𑀭𑀁, 𑀧𑀼𑀜𑁆𑀜𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺. 𑁋 𑀕𑀸𑀣𑀸𑀬𑁄 𑀅𑀯𑁄𑀘𑀼𑀁;

𑁩𑁧𑁭. 𑀢𑀢𑁆𑀣 𑀢𑀸𑀯𑀢𑀺𑀁𑀲𑁂𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂. 𑀲𑀺𑀮𑀸𑀬𑀁 𑀧𑀡𑁆𑀟𑀼𑀓𑀫𑁆𑀩𑀮𑁂𑀢𑀺 𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀓𑁂 𑀲𑀺𑀮𑀸𑀲𑀦𑁂 𑀧𑀼𑀭𑀺𑀲𑀼𑀢𑁆𑀢𑀫𑁄 𑀩𑀼𑀤𑁆𑀥𑁄 𑀬𑀤𑀸 𑀯𑀺𑀳𑀸𑀲𑀻𑀢𑀺 𑀬𑁄𑀚𑀦𑀸.

𑁩𑁧𑁮. 𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀦 𑀤𑁂𑀯𑀢𑀸𑀢𑀺 𑀚𑀸𑀢𑀺𑀔𑁂𑀢𑁆𑀢𑀲𑀜𑁆𑀜𑀺𑀢𑁂𑀲𑀼 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑀢𑀸 𑀩𑁆𑀭𑀳𑁆𑀫𑀤𑁂𑀯𑀢𑀸 𑀘 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀬𑀺𑀭𑀼𑀧𑀸𑀲𑀦𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀜𑁆𑀘 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀯𑀲𑀦𑁆𑀢𑀁 𑀦𑀕𑀫𑀼𑀤𑁆𑀥𑀦𑀻’’𑀢𑀺, 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀻𑀢𑀺 𑀅𑀢𑁆𑀣𑁄.

𑁩𑁨𑁦. 𑀬𑁄𑀚𑀦𑀸𑀦𑀺 ¶ ¶ 𑀤𑀲 𑀤𑁆𑀯𑁂 𑀘, 𑀅𑀗𑁆𑀓𑀼𑀭𑁄𑀬𑀁 𑀢𑀤𑀸 𑀅𑀳𑀽𑀢𑀺 𑀅𑀬𑀁 𑀬𑀣𑀸𑀯𑀼𑀢𑁆𑀢𑀘𑀭𑀺𑀢𑁄 𑀅𑀗𑁆𑀓𑀼𑀭𑁄 𑀢𑀤𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀓𑀸𑀮𑁂 𑀤𑀲 𑀤𑁆𑀯𑁂 𑀬𑁄𑀚𑀦𑀸𑀦𑀺 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀅𑀳𑀼. 𑀲𑀢𑁆𑀣𑀼 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀦𑁆𑀢𑀭𑁂 𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁩𑁨𑁩. 𑀘𑁄𑀤𑀺𑀢𑁄 ¶ 𑀪𑀸𑀯𑀺𑀢𑀢𑁆𑀢𑁂𑀦𑀸𑀢𑀺 𑀧𑀸𑀭𑀫𑀺𑀧𑀭𑀺𑀪𑀸𑀯𑀺𑀢𑀸𑀬 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑀺𑀢𑀢𑁆𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄. 𑀓𑀺𑀁 𑀫𑀬𑁆𑀳𑀁 𑀢𑁂𑀦𑀸𑀢𑀺𑀆𑀤𑀺𑀓𑀸 𑀲𑀢𑁆𑀣𑀼 𑀧𑀝𑀺𑀯𑀘𑀦𑀯𑀲𑁂𑀦 𑀅𑀗𑁆𑀓𑀼𑀭𑁂𑀦 𑀯𑀼𑀢𑁆𑀢𑀕𑀸𑀣𑀸. 𑀤𑀓𑁆𑀔𑀺𑀡𑁂𑀬𑁆𑀬𑁂𑀦 𑀲𑀼𑀜𑁆𑀜𑀢𑀦𑁆𑀢𑀺 𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑁂𑀦 𑀲𑀼𑀜𑁆𑀜𑀢𑀁 𑀭𑀺𑀢𑁆𑀢𑀓𑀁 𑀯𑀺𑀭𑀳𑀺𑀢𑀁 𑀢𑀤𑀸 𑀫𑀫 𑀤𑀸𑀦𑀁, 𑀢𑀲𑁆𑀫𑀸 ‘‘𑀓𑀺𑀁 𑀫𑀬𑁆𑀳𑀁 𑀢𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀤𑀸𑀦𑀧𑀼𑀜𑁆𑀜𑀁 𑀳𑀻𑀴𑁂𑀦𑁆𑀢𑁄 𑀯𑀤𑀢𑀺.

𑁩𑁨𑁪. 𑀬𑀓𑁆𑀔𑁄𑀢𑀺 𑀤𑁂𑀯𑀧𑀼𑀢𑁆𑀢𑁄. 𑀤𑀚𑁆𑀚𑀸𑀢𑀺 𑀤𑀢𑁆𑀯𑀸. 𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀻𑀢𑀺 𑀅𑀢𑁆𑀢𑀦𑀸 𑀫𑀸𑀤𑀺𑀲𑁂𑀳𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀳𑀻𑀢𑀺 𑀯𑀸 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀫𑁆𑀳𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀺𑀦𑁆𑀢𑀺 𑀆𑀳 ‘‘𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸’’𑀢𑀺.

𑁩𑁨𑁫-𑁬. 𑀉𑀚𑁆𑀚𑀗𑁆𑀕𑀮𑁂𑀢𑀺 𑀅𑀢𑀺𑀯𑀺𑀬 𑀣𑀤𑁆𑀥𑀪𑀽𑀫𑀺𑀪𑀸𑀕𑁂. ‘‘𑀊𑀲𑀭𑁂’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀭𑁄𑀧𑀺𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀧𑀺𑀢𑁆𑀯𑀸 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀧𑀼𑀦 𑀭𑁄𑀧𑀺𑀢𑀁. 𑀦𑀧𑀺 𑀢𑁄𑀲𑁂𑀢𑀻𑀢𑀺 𑀦 𑀦𑀦𑁆𑀤𑀬𑀢𑀺, 𑀅𑀧𑁆𑀧𑀨𑀮𑀢𑀸𑀬 𑀯𑀸 𑀢𑀼𑀝𑁆𑀞𑀺𑀁 𑀦 𑀚𑀦𑁂𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀉𑀚𑁆𑀚𑀗𑁆𑀕𑀮𑁂 𑀔𑁂𑀢𑁆𑀢𑁂 𑀩𑀳𑀼𑀫𑁆𑀧𑀺 𑀩𑀻𑀚𑀁 𑀭𑁄𑀧𑀺𑀢𑀁 𑀯𑀺𑀧𑀼𑀮𑀨𑀮𑀁 𑀉𑀴𑀸𑀭𑀨𑀮𑀁 𑀦 𑀳𑁄𑀢𑀺, 𑀢𑀢𑁄 𑀏𑀯 𑀓𑀲𑁆𑀲𑀓𑀁 𑀦 𑀢𑁄𑀲𑁂𑀢𑀺, 𑀢𑀣𑀸 𑀤𑀼𑀲𑁆𑀲𑀻𑀮𑁂𑀲𑀼 𑀲𑀻𑀮𑀯𑀺𑀭𑀳𑀺𑀢𑁂𑀲𑀼 𑀩𑀳𑀼𑀓𑀫𑁆𑀧𑀺 𑀤𑀸𑀦𑀁 𑀧𑀢𑀺𑀝𑁆𑀞𑀸𑀧𑀺𑀢𑀁 𑀯𑀺𑀧𑀼𑀮𑀨𑀮𑀁 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺, 𑀢𑀢𑁄 𑀏𑀯 𑀤𑀸𑀬𑀓𑀁 𑀦 𑀢𑁄𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁩𑁨𑁭-𑁮. 𑀬𑀣𑀸𑀧𑀺 𑀪𑀤𑁆𑀤𑀓𑁂𑀢𑀺 𑀕𑀸𑀣𑀸𑀤𑁆𑀯𑀬𑀲𑁆𑀲 𑀯𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀫𑁆𑀫𑀸 𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂𑀢𑀺 𑀯𑀼𑀝𑁆𑀞𑀺𑀥𑀸𑀭𑀁 𑀲𑀫𑁆𑀫𑀤𑁂𑀯 𑀧𑀯𑀢𑁆𑀢𑁂𑀦𑁆𑀢𑁂, 𑀅𑀦𑁆𑀯𑀟𑁆𑀠𑀫𑀸𑀲𑀁 𑀅𑀦𑀼𑀤𑀲𑀸𑀳𑀁 𑀅𑀦𑀼𑀧𑀜𑁆𑀘𑀸𑀳𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀕𑀼𑀡𑀯𑀦𑁆𑀢𑁂𑀲𑀽𑀢𑀺 𑀛𑀸𑀦𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀲𑀼. 𑀢𑀸𑀤𑀺𑀲𑀽𑀢𑀺 𑀇𑀝𑁆𑀞𑀸𑀤𑀻𑀲𑀼 ¶ 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑁂𑀲𑀼. 𑀓𑀸𑀭𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀉𑀧𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑁄 𑀉𑀧𑀓𑀸𑀭𑁄𑀢𑀺 𑀆𑀳 ‘‘𑀧𑀼𑀜𑁆𑀜’’𑀦𑁆𑀢𑀺.

‘‘𑀯𑀺𑀘𑁂𑀬𑁆𑀬 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀯𑀺𑀘𑁂𑀬𑁆𑀬 𑀤𑀸𑀦𑀁 𑀤𑀢𑁆𑀯𑀸𑀦, 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺 𑀤𑀸𑀬𑀓𑀸.

‘‘𑀯𑀺𑀘𑁂𑀬𑁆𑀬 ¶ 𑀤𑀸𑀦𑀁 𑀲𑀼𑀕𑀢𑀧𑁆𑀧𑀲𑀝𑁆𑀞𑀁, 𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀇𑀥 𑀚𑀻𑀯𑀮𑁄𑀓𑁂;

𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺, 𑀩𑀻𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀬𑀣𑀸 𑀲𑀼𑀔𑁂𑀢𑁆𑀢𑁂’’𑀢𑀺. 𑁋

𑀅𑀬𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸 𑀕𑀸𑀣𑀸.

𑁩𑁨𑁯. 𑀢𑀢𑁆𑀣 ¶ 𑀯𑀺𑀘𑁂𑀬𑁆𑀬𑀸𑀢𑀺 𑀯𑀺𑀘𑀺𑀦𑀺𑀢𑁆𑀯𑀸, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀬𑀺𑀤𑀁 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼 𑀲𑀢𑁆𑀣𑀸𑀭𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀧𑀼𑀭𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀯𑀺𑀪𑀸𑀯𑀦𑀢𑁆𑀣𑀁 ‘‘𑀫𑀳𑀸𑀤𑀸𑀦𑀁 𑀢𑀬𑀸 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀲𑀫𑀼𑀝𑁆𑀞𑀸𑀧𑀺𑀢𑀁, 𑀢𑀢𑁆𑀣 𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀤𑁂𑀯𑀤𑁂𑀯𑁄 𑀤𑁂𑀯𑀮𑁄𑀓𑀢𑁄 𑀲𑀗𑁆𑀓𑀲𑁆𑀲𑀦𑀕𑀭𑀁 𑀑𑀢𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀯𑀺𑀪𑀸𑀯𑀦𑀢𑁆𑀣𑀫𑁂𑀯 ‘‘𑀬𑀲𑁆𑀲 𑀅𑀢𑁆𑀣𑀸𑀬 𑀕𑀘𑁆𑀙𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀤𑁂𑀲𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀣𑀸𑀬 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀢𑁂𑀲𑀁 𑀅𑀦𑁂𑀓𑀓𑁄𑀝𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀢𑁆𑀢𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀤𑀺𑀯𑀸𑀯𑀺𑀳𑀸𑀭𑀕𑀢𑀁 𑀪𑀺𑀓𑁆𑀔𑀼𑀦𑁆𑀢𑀺 𑀇𑀤𑀁 𑀉𑀢𑁆𑀢𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀸 𑀧𑀯𑀢𑁆𑀢𑀺𑀢𑀸𑀬 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀤𑁆𑀯𑀸𑀤𑀲𑀳𑀺 ¶ 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀓𑁄𑀲𑀫𑁆𑀩𑀺𑀬𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀅𑀜𑁆𑀜𑀢𑀭𑁄 𑀅𑀫𑀘𑁆𑀘𑁄 𑀓𑀸𑀮𑀫𑀓𑀸𑀲𑀺, 𑀢𑁂𑀦 𑀘 𑀧𑀼𑀩𑁆𑀩𑁂 𑀦𑀕𑀭𑁂 𑀓𑀫𑁆𑀫𑀦𑁆𑀢𑀸 𑀅𑀥𑀺𑀝𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀅𑀣 𑀭𑀸𑀚𑀸 𑀢𑀲𑁆𑀲 𑀧𑀼𑀢𑁆𑀢𑀁 𑀉𑀢𑁆𑀢𑀭𑀁 𑀦𑀸𑀫 𑀫𑀸𑀡𑀯𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑁆𑀯𑀜𑁆𑀘 𑀧𑀺𑀢𑀭𑀸 𑀅𑀥𑀺𑀝𑁆𑀞𑀺𑀢𑁂 𑀓𑀫𑁆𑀫𑀦𑁆𑀢𑁂 𑀲𑀫𑀦𑀼𑀲𑀸𑀲𑀸’’𑀢𑀺 𑀢𑁂𑀦 𑀞𑀺𑀢𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑁄 𑀘 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀦𑀕𑀭𑀧𑀝𑀺𑀲𑀗𑁆𑀔𑀭𑀡𑀺𑀬𑀸𑀦𑀁 𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀯𑀟𑁆𑀠𑀓𑀺𑀬𑁄 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀕𑀢𑁄. 𑀢𑀢𑁆𑀣 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀧𑀁𑀲𑀼𑀓𑀽𑀮𑀘𑀻𑀯𑀭𑀥𑀭𑀁 𑀯𑀺𑀯𑀺𑀢𑁆𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀯𑀦𑁆𑀤𑀺𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀥𑀫𑁆𑀫𑀁 ¶ 𑀲𑀼𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀣𑁂𑀭𑀁 𑀦𑀺𑀫𑀦𑁆𑀢𑁂𑀲𑀺 𑁋 ‘‘𑀅𑀥𑀺𑀯𑀸𑀲𑁂𑀣 𑀫𑁂, 𑀪𑀦𑁆𑀢𑁂, 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀳𑀺 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀣𑁂𑀭𑁄 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀲𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀲𑀁 𑀉𑀧𑀸𑀲𑀓𑀸𑀦𑀁 𑀆𑀘𑀺𑀓𑁆𑀔𑀺 𑁋 ‘‘𑀣𑁂𑀭𑁄 𑀫𑀬𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑁄, 𑀢𑀼𑀫𑁆𑀳𑁂𑀳𑀺𑀧𑀺 𑀫𑀫 𑀤𑀸𑀦𑀕𑁆𑀕𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀓𑀸𑀮𑀲𑁆𑀲𑁂𑀯 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀳𑀺 𑀆𑀕𑀘𑁆𑀙𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀲𑀺. 𑀅𑀣 𑀫𑀳𑀸𑀭𑀳𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀅𑀢𑁆𑀣𑀢𑁂𑀲𑀼 𑀆𑀲𑀦𑁂𑀲𑀼 𑀣𑁂𑀭𑁂 𑀘 𑀪𑀺𑀓𑁆𑀔𑀽𑀲𑀼 𑀘 𑀦𑀺𑀲𑀺𑀦𑁆𑀦𑁂𑀲𑀼 𑀕𑀦𑁆𑀥𑀧𑀼𑀧𑁆𑀨𑀥𑀽𑀧𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀧𑀡𑀻𑀢𑁂𑀦 𑀅𑀦𑁆𑀦𑀧𑀸𑀦𑁂𑀦 𑀢𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀓𑀢𑀜𑁆𑀚𑀮𑀻 𑀅𑀦𑀼𑀫𑁄𑀤𑀦𑀁 𑀲𑀼𑀡𑀺𑀢𑁆𑀯𑀸 𑀓𑀢𑀪𑀢𑁆𑀢𑀸𑀦𑀼𑀫𑁄𑀤𑀦𑁂 𑀣𑁂𑀭𑁂 𑀕𑀘𑁆𑀙𑀦𑁆𑀢𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀕𑀘𑁆𑀙𑀦𑁆𑀢𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀦𑀺𑀘𑁆𑀘𑀁 𑀫𑀫 𑀕𑁂𑀳𑀁 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀬𑀸𑀘𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀥𑀺𑀯𑀸𑀲𑀦𑀁 𑀜𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀏𑀯𑀁 𑀲𑁄 𑀣𑁂𑀭𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 ¶ 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀯𑀺𑀳𑀸𑀭𑀜𑁆𑀘 𑀓𑀸𑀭𑁂𑀲𑀺, 𑀲𑀩𑁆𑀩𑁂 𑀘 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑁂 𑀅𑀓𑀸𑀲𑀺.

𑀫𑀸𑀢𑀸 𑀧𑀦𑀲𑁆𑀲 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀏𑀯𑀁 𑀧𑀭𑀺𑀪𑀸𑀲𑀺 𑁋 ‘‘𑀬𑀁 𑀢𑁆𑀯𑀁 𑀫𑀫 𑀅𑀦𑀺𑀘𑁆𑀙𑀦𑁆𑀢𑀺𑀬𑀸 𑀏𑀯 𑀲𑀫𑀡𑀸𑀦𑀁 𑀅𑀦𑁆𑀦𑀧𑀸𑀦𑀁 𑀤𑁂𑀲𑀺, 𑀢𑀁 𑀢𑁂 𑀧𑀭𑀮𑁄𑀓𑁂 𑀮𑁄𑀳𑀺𑀢𑀁 𑀲𑀫𑁆𑀧𑀚𑁆𑀚𑀢𑀽’’𑀢𑀺. 𑀏𑀓𑀁 𑀧𑀦 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑀁 𑀯𑀺𑀳𑀸𑀭𑀫𑀳𑀤𑀺𑀯𑀲𑁂 𑀤𑀺𑀬𑁆𑀬𑀫𑀸𑀦𑀁 𑀅𑀦𑀼𑀚𑀸𑀦𑀺. 𑀲𑀸 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑀬𑁄𑀦𑀺𑀬𑀁 𑀉𑀧𑁆𑀧𑀚𑁆𑀚𑀺, 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑀤𑀸𑀦𑀸𑀦𑀼𑀫𑁄𑀤𑀦𑁂𑀦 𑀧𑀦𑀲𑁆𑀲𑀸 𑀓𑁂𑀲𑀸 𑀦𑀻𑀮𑀸 𑀲𑀺𑀦𑀺𑀤𑁆𑀥𑀸 𑀯𑁂𑀮𑁆𑀮𑀺𑀢𑀕𑁆𑀕𑀸 𑀲𑀼𑀔𑀼𑀫𑀸 𑀤𑀻𑀖𑀸 𑀘 𑀅𑀳𑁂𑀲𑀼𑀁. 𑀲𑀸 𑀬𑀤𑀸 𑀕𑀗𑁆𑀕𑀸𑀦𑀤𑀺𑀁 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀑𑀢𑀭𑀢𑀺, 𑀢𑀤𑀸 𑀦𑀤𑀻 𑀮𑁄𑀳𑀺𑀢𑀧𑀽𑀭𑀸 𑀳𑁄𑀢𑀺. 𑀲𑀸 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀯𑀺𑀘𑀭𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀁 𑀕𑀗𑁆𑀕𑀸𑀬 𑀢𑀻𑀭𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑁂𑀲𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀦𑀻𑀬𑀁 𑀬𑀸𑀘𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀤𑀺𑀯𑀸𑀯𑀺𑀳𑀸𑀭𑀕𑀢𑀁 𑀪𑀺𑀓𑁆𑀔𑀼𑀁, 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑀓𑀁;

𑀢𑀁 𑀧𑁂𑀢𑀻 𑀉𑀧𑀲𑀗𑁆𑀓𑀫𑁆𑀫, 𑀤𑀼𑀩𑁆𑀩𑀡𑁆𑀡𑀸 𑀪𑀻𑀭𑀼𑀤𑀲𑁆𑀲𑀦𑀸.

‘‘𑀓𑁂𑀲𑀸 ¶ ¶ 𑀘𑀲𑁆𑀲𑀸 𑀅𑀢𑀺𑀤𑀻𑀖𑀸, 𑀬𑀸𑀯𑀪𑀽𑀫𑀸𑀯𑀮𑀫𑁆𑀩𑀭𑁂;

𑀓𑁂𑀲𑁂𑀳𑀺 𑀲𑀸 𑀧𑀝𑀺𑀘𑁆𑀙𑀦𑁆𑀦𑀸, 𑀲𑀫𑀡𑀁 𑀏𑀢𑀤𑀩𑁆𑀭𑀯𑀻’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀇𑀥 𑀆𑀤𑀺𑀢𑁄 𑀞𑀧𑀺𑀢𑀸.

𑀢𑀢𑁆𑀣 𑀪𑀻𑀭𑀼𑀤𑀲𑁆𑀲𑀦𑀸𑀢𑀺 𑀪𑀬𑀸𑀦𑀓𑀤𑀲𑁆𑀲𑀦𑀸. ‘‘𑀭𑀼𑀤𑁆𑀤𑀤𑀲𑁆𑀲𑀦𑀸’’𑀢𑀺 𑀯𑀸 𑀧𑀸𑀞𑁄, 𑀩𑀻𑀪𑀘𑁆𑀙𑀪𑀸𑀭𑀺𑀬𑀤𑀲𑁆𑀲𑀦𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀪𑀽𑀫𑀸𑀯𑀮𑀫𑁆𑀩𑀭𑁂𑀢𑀺 𑀬𑀸𑀯 𑀪𑀽𑀫𑀺, 𑀢𑀸𑀯 𑀑𑀮𑀫𑁆𑀩𑀦𑁆𑀢𑀺. 𑀧𑀼𑀩𑁆𑀩𑁂 ‘‘𑀪𑀺𑀓𑁆𑀔𑀼’’𑀦𑁆𑀢𑀺 𑀘 𑀧𑀘𑁆𑀙𑀸 ‘‘𑀲𑀫𑀡’’𑀦𑁆𑀢𑀺 𑀘 𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀸 𑀧𑀦 𑀧𑁂𑀢𑀻 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀦𑀻𑀬𑀁 𑀬𑀸𑀘𑀦𑁆𑀢𑀻 𑁋

‘‘𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺, 𑀬𑀢𑁄 𑀓𑀸𑀮𑀓𑀢𑀸 𑀅𑀳𑀁;

𑀦𑀸𑀪𑀺𑀚𑀸𑀦𑀸𑀫𑀺 ¶ 𑀪𑀼𑀢𑁆𑀢𑀁 𑀯𑀸, 𑀧𑀻𑀢𑀁 𑀯𑀸 𑀧𑀦 𑀧𑀸𑀦𑀺𑀬𑀁;

𑀤𑁂𑀳𑀺 𑀢𑁆𑀯𑀁 𑀧𑀸𑀦𑀺𑀬𑀁 𑀪𑀦𑁆𑀢𑁂, 𑀢𑀲𑀺𑀢𑀸 𑀧𑀸𑀦𑀺𑀬𑀸𑀬 𑀫𑁂’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑁩𑁩𑁩. 𑀢𑀢𑁆𑀣 𑀦𑀸𑀪𑀺𑀚𑀸𑀦𑀸𑀫𑀺 𑀪𑀼𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀤𑀻𑀖𑀫𑀦𑁆𑀢𑀭𑁂 𑀓𑀸𑀮𑁂 𑀪𑁄𑀚𑀦𑀁 𑀪𑀼𑀢𑁆𑀢𑀁 𑀯𑀸 𑀧𑀸𑀦𑀻𑀬𑀁 𑀧𑀻𑀢𑀁 𑀯𑀸 𑀦𑀸𑀪𑀺𑀚𑀸𑀦𑀸𑀫𑀺, 𑀦 𑀪𑀼𑀢𑁆𑀢𑀁 𑀦 𑀧𑀻𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀲𑀺𑀢𑀸𑀢𑀺 𑀧𑀺𑀧𑀸𑀲𑀺𑀢𑀸. 𑀧𑀸𑀦𑀺𑀬𑀸𑀬𑀸𑀢𑀺 𑀧𑀸𑀦𑀻𑀬𑀢𑁆𑀣𑀸𑀬 𑀆𑀳𑀺𑀡𑁆𑀟𑀦𑁆𑀢𑀺𑀬𑀸 𑀫𑁂 𑀧𑀸𑀦𑀻𑀬𑀁 𑀤𑁂𑀳𑀺, 𑀪𑀦𑁆𑀢𑁂𑀢𑀺 𑀬𑁄𑀚𑀦𑀸.

‘‘𑀅𑀬𑀁 𑀲𑀻𑀢𑁄𑀤𑀺𑀓𑀸 𑀕𑀗𑁆𑀕𑀸, 𑀳𑀺𑀫𑀯𑀦𑁆𑀢𑀢𑁄 𑀲𑀦𑁆𑀤𑀢𑀺;

𑀧𑀺𑀯 𑀏𑀢𑁆𑀢𑁄 𑀕𑀳𑁂𑀢𑁆𑀯𑀸𑀦, 𑀓𑀺𑀁 𑀫𑀁 𑀬𑀸𑀘𑀲𑀺 𑀧𑀸𑀦𑀺𑀬𑀁.

‘‘𑀲𑀘𑀸𑀳𑀁 𑀪𑀦𑁆𑀢𑁂 𑀕𑀗𑁆𑀕𑀸𑀬, 𑀲𑀬𑀁 𑀕𑀡𑁆𑀳𑀸𑀫𑀺 𑀧𑀸𑀦𑀺𑀬𑀁;

𑀮𑁄𑀳𑀺𑀢𑀁 𑀫𑁂 𑀧𑀭𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀬𑀸𑀘𑀸𑀫𑀺 𑀧𑀸𑀦𑀺𑀬𑀁.

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀕𑀗𑁆𑀕𑀸 𑀢𑁂 𑀳𑁄𑀢𑀺 𑀮𑁄𑀳𑀺𑀢𑀁.

‘‘𑀧𑀼𑀢𑁆𑀢𑁄 ¶ 𑀫𑁂 𑀉𑀢𑁆𑀢𑀭𑁄 𑀦𑀸𑀫, 𑀲𑀤𑁆𑀥𑁄 𑀆𑀲𑀺 𑀉𑀧𑀸𑀲𑀓𑁄;

𑀲𑁄 𑀘 𑀫𑀬𑁆𑀳𑀁 𑀅𑀓𑀸𑀫𑀸𑀬, 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀢𑀺.

‘‘𑀘𑀻𑀯𑀭𑀁 ¶ 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀢𑀫𑀳𑀁 𑀧𑀭𑀺𑀪𑀸𑀲𑀸𑀫𑀺, 𑀫𑀘𑁆𑀙𑁂𑀭𑁂𑀦 𑀉𑀧𑀤𑁆𑀤𑀼𑀢𑀸.

‘‘𑀬𑀁 𑀢𑁆𑀯𑀁 𑀫𑀬𑁆𑀳𑀁 𑀅𑀓𑀸𑀫𑀸𑀬, 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀲𑀺;

𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁.

‘‘𑀏𑀢𑀁 𑀢𑁂 𑀧𑀭𑀮𑁄𑀓𑀲𑁆𑀫𑀺𑀁, 𑀮𑁄𑀳𑀺𑀢𑀁 𑀳𑁄𑀢𑀼 𑀉𑀢𑁆𑀢𑀭;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀕𑀗𑁆𑀕𑀸 𑀫𑁂 𑀳𑁄𑀢𑀺 𑀮𑁄𑀳𑀺𑀢’’𑀦𑁆𑀢𑀺. 𑁋

𑀇𑀫𑀸 𑀣𑁂𑀭𑀲𑁆𑀲 𑀘 𑀧𑁂𑀢𑀺𑀬𑀸 𑀘 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸.

𑁩𑁩𑁪. 𑀢𑀢𑁆𑀣 𑀳𑀺𑀫𑀯𑀦𑁆𑀢𑀢𑁄𑀢𑀺 𑀫𑀳𑀢𑁄 𑀳𑀺𑀫𑀲𑁆𑀲 𑀅𑀢𑁆𑀣𑀺𑀢𑀸𑀬 ‘‘𑀳𑀺𑀫𑀯𑀸’’𑀢𑀺 𑀮𑀤𑁆𑀥𑀦𑀸𑀫𑀢𑁄 𑀧𑀩𑁆𑀩𑀢𑀭𑀸𑀚𑀢𑁄. 𑀲𑀦𑁆𑀤𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀏𑀢𑁆𑀢𑁄𑀢𑀺 𑀇𑀢𑁄 𑀫𑀳𑀸𑀕𑀗𑁆𑀕𑀸𑀢𑁄. 𑀓𑀺𑀦𑁆𑀢𑀺 𑀓𑀲𑁆𑀫𑀸 𑀫𑀁 𑀬𑀸𑀘𑀲𑀺 𑀧𑀸𑀦𑀻𑀬𑀁, 𑀕𑀗𑁆𑀕𑀸𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀧𑀺𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁩𑁩𑁫. 𑀮𑁄𑀳𑀺𑀢𑀁 ¶ 𑀫𑁂 𑀧𑀭𑀺𑀯𑀢𑁆𑀢𑀢𑀻𑀢𑀺 𑀉𑀤𑀓𑀁 𑀲𑀦𑁆𑀤𑀫𑀸𑀦𑀁 𑀫𑀬𑁆𑀳𑀁 𑀧𑀸𑀧𑀓𑀫𑁆𑀫𑀨𑀮𑁂𑀦 𑀮𑁄𑀳𑀺𑀢𑀁 𑀳𑀼𑀢𑁆𑀯𑀸 𑀧𑀭𑀺𑀯𑀢𑁆𑀢𑀢𑀺 𑀧𑀭𑀺𑀡𑀫𑀢𑀺, 𑀢𑀸𑀬 𑀕𑀳𑀺𑀢𑀫𑀢𑁆𑀢𑀁 𑀉𑀤𑀓𑀁 𑀮𑁄𑀳𑀺𑀢𑀁 𑀚𑀸𑀬𑀢𑀺.

𑁩𑁩𑁭-𑁪𑁦. 𑀫𑀬𑁆𑀳𑀁 𑀅𑀓𑀸𑀫𑀸𑀬𑀸𑀢𑀺 𑀫𑀫 𑀅𑀦𑀺𑀘𑁆𑀙𑀦𑁆𑀢𑀺𑀬𑀸. 𑀧𑀯𑁂𑀘𑁆𑀙𑀢𑀻𑀢𑀺 𑀤𑁂𑀢𑀺. 𑀧𑀘𑁆𑀘𑀬𑀦𑁆𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀁. 𑀏𑀢𑀦𑁆𑀢𑀺 𑀬𑀁 𑀏𑀢𑀁 𑀘𑀻𑀯𑀭𑀸𑀤𑀺𑀓𑀁 𑀧𑀘𑁆𑀘𑀬𑀚𑀸𑀢𑀁 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀲𑀺 𑀤𑁂𑀲𑀺, 𑀏𑀢𑀁 𑀢𑁂 𑀧𑀭𑀮𑁄𑀓𑀲𑁆𑀫𑀺𑀁 𑀮𑁄𑀳𑀺𑀢𑀁 𑀳𑁄𑀢𑀼 𑀉𑀢𑁆𑀢𑀭𑀸𑀢𑀺 𑀅𑀪𑀺𑀲𑀧𑀦𑀯𑀲𑁂𑀦 𑀓𑀢𑀁 𑀧𑀸𑀧𑀓𑀫𑁆𑀫𑀁, 𑀢𑀲𑁆𑀲 𑀯𑀺𑀧𑀸𑀓𑁂𑀦𑀸𑀢𑀺 𑀬𑁄𑀚𑀦𑀸.

𑀅𑀣𑀸𑀬𑀲𑁆𑀫𑀸 𑀭𑁂𑀯𑀢𑁄 𑀢𑀁 𑀧𑁂𑀢𑀺𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀦𑀻𑀬𑀁 𑀅𑀤𑀸𑀲𑀺, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑀤𑀸𑀲𑀺, 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀧𑀁𑀲𑀼𑀓𑀽𑀮𑀁 𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀪𑀺𑀲𑀺𑀜𑁆𑀘 𑀘𑀺𑀫𑀺𑀮𑀺𑀓𑀜𑁆𑀘 𑀓𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀤𑀸𑀲𑀺, 𑀢𑁂𑀦 𑀘𑀲𑁆𑀲𑀸 𑀧𑁂𑀢𑀺𑀬𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀳𑁂𑀲𑀼𑀁. 𑀲𑀸 𑀣𑁂𑀭𑀲𑁆𑀲 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀣𑁂𑀭𑀲𑁆𑀲 𑀤𑀲𑁆𑀲𑁂𑀲𑀺. 𑀣𑁂𑀭𑁄 𑀢𑀁 𑀧𑀯𑀢𑁆𑀢𑀺𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀧𑀓𑀸𑀲𑁂𑀢𑁆𑀯𑀸 𑀥𑀫𑁆𑀫𑀓𑀣𑀁 ¶ 𑀓𑀣𑁂𑀲𑀺. 𑀢𑁂𑀦 𑀫𑀳𑀸𑀚𑀦𑁄 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁄 𑀳𑀼𑀢𑁆𑀯𑀸 𑀤𑀸𑀦𑀲𑀻𑀮𑀸𑀤𑀺𑀓𑀼𑀲𑀮𑀥𑀫𑁆𑀫𑀸𑀪𑀺𑀭𑀢𑁄 𑀅𑀳𑁄𑀲𑀻𑀢𑀺. 𑀇𑀤𑀁 𑀧𑀦 𑀧𑁂𑀢𑀯𑀢𑁆𑀣𑀼 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀢𑁆𑀢𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀳𑀁 𑀧𑀼𑀭𑁂 𑀧𑀩𑁆𑀩𑀚𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀇𑀤𑀁 𑀲𑀼𑀢𑁆𑀢𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀅𑀫𑁆𑀳𑀸𑀓𑀁 𑀲𑀢𑁆𑀣𑀭𑀺 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀅𑀜𑁆𑀜𑀢𑀭𑁄 𑀤𑀸𑀭𑀓𑁄 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺. 𑀢𑀲𑁆𑀲 𑀫𑀸𑀢𑀸 𑀢𑀲𑁆𑀫𑀺𑀁 𑀯𑀬𑀧𑁆𑀧𑀢𑁆𑀢𑁂 𑀢𑀲𑁆𑀲𑀢𑁆𑀣𑀸𑀬 𑀲𑀫𑀸𑀦𑀓𑀼𑀮𑀢𑁄 𑀅𑀜𑁆𑀜𑀢𑀭𑀁 𑀓𑀼𑀮𑀥𑀻𑀢𑀭𑀁 𑀆𑀦𑁂𑀲𑀺. 𑀯𑀺𑀯𑀸𑀳𑀤𑀺𑀯𑀲𑁂𑀬𑁂𑀯 𑀘 𑀲𑁄 𑀓𑀼𑀫𑀸𑀭𑁄 𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀦𑁆𑀳𑀸𑀬𑀺𑀢𑀼𑀁 𑀕𑀢𑁄 𑀅𑀳𑀺𑀦𑀸 𑀤𑀝𑁆𑀞𑁄 𑀓𑀸𑀮𑀫𑀓𑀸𑀲𑀺, ‘‘𑀬𑀓𑁆𑀔𑀕𑀸𑀳𑁂𑀦𑀸’’𑀢𑀺𑀧𑀺 ¶ 𑀯𑀤𑀦𑁆𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀦𑁂𑀦 𑀩𑀳𑀼𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀞𑀺𑀢𑁄𑀧𑀺 𑀢𑀲𑁆𑀲𑀸 𑀤𑀸𑀭𑀺𑀓𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀯𑀺𑀫𑀸𑀦𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀫𑀳𑀺𑀤𑁆𑀥𑀺𑀓𑁄 𑀧𑀦 𑀅𑀳𑁄𑀲𑀺 𑀫𑀳𑀸𑀦𑀼𑀪𑀸𑀯𑁄.

𑀅𑀣 𑀲𑁄 𑀢𑀁 𑀤𑀸𑀭𑀺𑀓𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀦𑁂𑀢𑀼𑀓𑀸𑀫𑁄 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀏𑀲𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀓𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀇𑀥 𑀅𑀪𑀺𑀭𑀫𑁂𑀬𑁆𑀬𑀸’’𑀢𑀺 𑀢𑀲𑁆𑀲𑀸 𑀤𑀺𑀩𑁆𑀩𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀪𑀯𑀦𑀳𑁂𑀢𑀼𑀁 𑀯𑀻𑀫𑀁𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀭𑀽𑀧𑁂𑀦 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀲𑀼𑀢𑁆𑀢𑀓𑁂𑀦 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀆𑀳. ‘‘𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀫𑀺, 𑀉𑀧𑀸𑀲𑀓𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀲𑀼𑀢𑁆𑀢𑀪𑀺𑀓𑁆𑀔𑀁 𑀘𑀭𑀣𑀸’’𑀢𑀺 𑀢𑀲𑁆𑀲𑀸 𑀤𑀸𑀭𑀺𑀓𑀸𑀬 𑀕𑁂𑀳𑀁 𑀤𑀲𑁆𑀲𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀅𑀣 𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀢𑀢𑁆𑀣 𑀞𑀺𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 ‘‘𑀲𑀼𑀢𑁆𑀢𑀓𑁂𑀦 𑀫𑁂 𑀅𑀬𑁆𑀬𑁄 𑀅𑀢𑁆𑀣𑀺𑀓𑁄’’𑀢𑀺 𑀜𑀢𑁆𑀯𑀸 𑀏𑀓𑀁 𑀲𑀼𑀢𑁆𑀢𑀕𑀼𑀴𑀁 𑀅𑀤𑀸𑀲𑀺. 𑀅𑀣 𑀲𑁄 𑀅𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀭𑀽𑀧𑁂𑀦 𑀢𑀲𑁆𑀲 𑀤𑀸𑀭𑀺𑀓𑀸𑀬 𑀖𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀫𑀸𑀢𑀭𑀁 𑀬𑀸𑀘𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀢𑀲𑁆𑀲𑀸 𑀫𑀸𑀢𑀼𑀬𑀸 𑀅𑀦𑀼𑀕𑁆𑀕𑀳𑀢𑁆𑀣𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀲𑀩𑁆𑀩𑀪𑀸𑀚𑀦𑀸𑀦𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀉𑀧𑀭𑀺 𑀦𑀸𑀫𑀁 𑀮𑀺𑀔𑀺 ‘‘𑀇𑀤𑀁 𑀤𑁂𑀯𑀤𑀢𑁆𑀢𑀺𑀬𑀁 𑀥𑀦𑀁 𑀦 𑀓𑁂𑀦𑀘𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺, 𑀢𑀜𑁆𑀘 𑀤𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀯𑀺𑀫𑀸𑀦𑀁 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀫𑀸𑀢𑀸 𑀧𑀳𑀽𑀢𑀁 𑀥𑀦𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀓𑀧𑀡𑀤𑁆𑀥𑀺𑀓𑀸𑀤𑀺𑀦𑀜𑁆𑀘 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀘 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀻 ‘‘𑀫𑀫 𑀥𑀻𑀢𑀸 𑀆𑀕𑀘𑁆𑀙𑀢𑀺 𑀘𑁂, 𑀇𑀤𑀁 𑀥𑀦𑀁 𑀤𑀲𑁆𑀲𑁂𑀣𑀸’’𑀢𑀺 𑀜𑀸𑀢𑀓𑀸𑀦𑀁 𑀓𑀣𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺.

𑀢𑀢𑁄 ¶ 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀅𑀘𑁆𑀘𑀬𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀢𑁂𑀦 𑀅𑀫𑀦𑀼𑀲𑁆𑀲𑁂𑀦 𑀲𑀤𑁆𑀥𑀺𑀁 𑀯𑀲𑀦𑁆𑀢𑀺𑀬𑀸 𑀉𑀓𑁆𑀓𑀡𑁆𑀞𑀸 𑀉𑀧𑁆𑀧𑀚𑁆𑀚𑀺. 𑀲𑀸 𑀢𑀁 ‘‘𑀲𑀸𑀥𑀼, 𑀅𑀬𑁆𑀬𑀧𑀼𑀢𑁆𑀢, 𑀫𑀁 𑀲𑀓𑀜𑁆𑀜𑁂𑀯 𑀕𑁂𑀳𑀁 𑀧𑀝𑀺𑀦𑁂𑀳𑀻’’𑀢𑀺 𑀯𑀤𑀦𑁆𑀢𑀻 𑁋

‘‘𑀅𑀳𑀁 𑀧𑀼𑀭𑁂 𑀧𑀩𑁆𑀩𑀚𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄,

𑀲𑀼𑀢𑁆𑀢𑀁 𑀅𑀤𑀸𑀲𑀺𑀁 𑀉𑀧𑀲𑀗𑁆𑀓𑀫𑁆𑀫 𑀬𑀸𑀘𑀺𑀢𑀸;

𑀢𑀲𑁆𑀲 𑀯𑀺𑀧𑀸𑀓𑁄 ¶ 𑀯𑀺𑀧𑀼𑀮𑀨𑀮𑀽𑀧𑀮𑀩𑁆𑀪𑀢𑀺,

𑀩𑀳𑀼𑀓𑀸 𑀘 𑀫𑁂 𑀉𑀧𑁆𑀧𑀚𑁆𑀚𑀭𑁂 𑀯𑀢𑁆𑀣𑀓𑁄𑀝𑀺𑀬𑁄.

‘‘𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀭𑀫𑀺𑀢𑀁 𑀯𑀺𑀫𑀸𑀦𑀁, 𑀅𑀦𑁂𑀓𑀘𑀺𑀢𑁆𑀢𑀁 𑀦𑀭𑀦𑀸𑀭𑀺𑀲𑁂𑀯𑀺𑀢𑀁;

𑀲𑀸𑀳𑀁 𑀪𑀼𑀜𑁆𑀚𑀸𑀫𑀺 𑀘 𑀧𑀸𑀭𑀼𑀧𑀸𑀫𑀺 𑀘, 𑀧𑀳𑀽𑀢𑀯𑀺𑀢𑁆𑀢𑀸 𑀦 𑀘 𑀢𑀸𑀯 𑀔𑀻𑀬𑀢𑀺.

‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀫𑀦𑁆𑀯𑀬𑀸, 𑀲𑀼𑀔𑀜𑁆𑀘 𑀲𑀸𑀢𑀜𑁆𑀘 𑀇𑀥𑀽𑀧𑀮𑀩𑁆𑀪𑀢𑀺;

𑀲𑀸𑀳𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑁂𑀯 𑀫𑀸𑀦𑀼𑀲𑀁, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀦𑀬𑀬𑁆𑀬𑀧𑀼𑀢𑁆𑀢 𑀫’’𑀦𑁆𑀢𑀺. 𑁋

𑁩𑁪𑁧. 𑀢𑀢𑁆𑀣 ‘‘𑀧𑀩𑁆𑀩𑀚𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺 𑀇𑀤𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀤𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀓𑀸𑀫𑀸𑀤𑀺𑀫𑀮𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀅𑀦𑀯𑀲𑁂𑀲𑀢𑁄 𑀧𑀩𑁆𑀩𑀸𑀚𑀺𑀢𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 ‘‘𑀧𑀩𑁆𑀩𑀚𑀺𑀢𑁄’’𑀢𑀺, 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 ‘‘𑀪𑀺𑀓𑁆𑀔𑀽’’𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀲𑀼𑀢𑁆𑀢𑀦𑁆𑀢𑀺 𑀓𑀧𑁆𑀧𑀸𑀲𑀺𑀬𑀲𑀼𑀢𑁆𑀢𑀁. 𑀉𑀧𑀲𑀗𑁆𑀓𑀫𑁆𑀫𑀸𑀢𑀺 𑀫𑀬𑁆𑀳𑀁 𑀕𑁂𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸. 𑀬𑀸𑀘𑀺𑀢𑀸𑀢𑀺 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 (𑀚𑀸. 𑁧.𑁭.𑁫𑁯) 𑀏𑀯𑀁 𑀯𑀼𑀢𑁆𑀢𑀸𑀬 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀧𑀬𑁄𑀕𑀲𑀗𑁆𑀔𑀸𑀢𑀸𑀬 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 ¶ 𑀬𑀸𑀘𑀺𑀢𑀸. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀼𑀢𑁆𑀢𑀤𑀸𑀦𑀲𑁆𑀲. 𑀯𑀺𑀧𑀸𑀓𑁄 𑀯𑀺𑀧𑀼𑀮𑀨𑀮𑀽𑀧𑀮𑀩𑁆𑀪𑀢𑀻𑀢𑀺 𑀯𑀺𑀧𑀼𑀮𑀨𑀮𑁄 𑀉𑀴𑀸𑀭𑀉𑀤𑀬𑁄 𑀫𑀳𑀸𑀉𑀤𑀬𑁄 𑀯𑀺𑀧𑀸𑀓𑁄 𑀏𑀢𑀭𑀳𑀺 𑀉𑀧𑀮𑀩𑁆𑀪𑀢𑀺 𑀧𑀘𑁆𑀘𑀦𑀼𑀪𑀯𑀻𑀬𑀢𑀺. 𑀩𑀳𑀼𑀓𑀸𑀢𑀺 𑀅𑀦𑁂𑀓𑀸. 𑀯𑀢𑁆𑀣𑀓𑁄𑀝𑀺𑀬𑁄𑀢𑀺 𑀯𑀢𑁆𑀣𑀸𑀦𑀁 𑀓𑁄𑀝𑀺𑀬𑁄, 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑀪𑁂𑀤𑀸𑀦𑀺 𑀯𑀢𑁆𑀣𑀸𑀦𑀻𑀢𑀺 𑀅𑀢𑁆𑀣𑁄.

𑁩𑁪𑁨. 𑀅𑀦𑁂𑀓𑀘𑀺𑀢𑁆𑀢𑀦𑁆𑀢𑀺 ¶ 𑀦𑀸𑀦𑀸𑀯𑀺𑀥𑀘𑀺𑀢𑁆𑀢𑀓𑀫𑁆𑀫𑀁, 𑀅𑀦𑁂𑀓𑁂𑀳𑀺 𑀯𑀸 𑀫𑀼𑀢𑁆𑀢𑀸𑀫𑀡𑀺𑀆𑀤𑀻𑀳𑀺 𑀭𑀢𑀦𑁂𑀳𑀺 𑀯𑀺𑀘𑀺𑀢𑁆𑀢𑀭𑀽𑀧𑀁. 𑀦𑀭𑀦𑀸𑀭𑀺𑀲𑁂𑀯𑀺𑀢𑀦𑁆𑀢𑀺 𑀧𑀭𑀺𑀘𑀸𑀭𑀓𑀪𑀽𑀢𑁂𑀳𑀺 𑀦𑀭𑁂𑀳𑀺 𑀦𑀸𑀭𑀻𑀳𑀺 𑀘 𑀉𑀧𑀲𑁂𑀯𑀺𑀢𑀁. 𑀲𑀸𑀳𑀁 𑀪𑀼𑀜𑁆𑀚𑀸𑀫𑀻𑀢𑀺 ¶ 𑀲𑀸 𑀅𑀳𑀁 𑀢𑀁 𑀯𑀺𑀫𑀸𑀦𑀁 𑀧𑀭𑀺𑀪𑀼𑀜𑁆𑀚𑀸𑀫𑀺. 𑀧𑀸𑀭𑀼𑀧𑀸𑀫𑀻𑀢𑀺 𑀅𑀦𑁂𑀓𑀸𑀲𑀼 𑀯𑀢𑁆𑀣𑀓𑁄𑀝𑀻𑀲𑀼 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀦𑀺𑀯𑀸𑀲𑁂𑀫𑀺 𑀘𑁂𑀯 𑀧𑀭𑀺𑀤𑀳𑀸𑀫𑀺 𑀘. 𑀧𑀳𑀽𑀢𑀯𑀺𑀢𑁆𑀢𑀸𑀢𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸. 𑀦 𑀘 𑀢𑀸𑀯 𑀔𑀻𑀬𑀢𑀻𑀢𑀺 𑀢𑀜𑁆𑀘 𑀯𑀺𑀢𑁆𑀢𑀁 𑀦 𑀔𑀻𑀬𑀢𑀺, 𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺.

𑁩𑁪𑁩. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀫𑀦𑁆𑀯𑀬𑀸𑀢𑀺 𑀢𑀲𑁆𑀲𑁂𑀯 𑀲𑀼𑀢𑁆𑀢𑀤𑀸𑀦𑀫𑀬𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀅𑀦𑁆𑀯𑀬𑀸 𑀧𑀘𑁆𑀘𑀬𑀸 𑀳𑁂𑀢𑀼𑀪𑀸𑀯𑁂𑀦 𑀯𑀺𑀧𑀸𑀓𑀪𑀽𑀢𑀁 𑀲𑀼𑀔𑀁, 𑀇𑀝𑁆𑀞𑀫𑀥𑀼𑀭𑀲𑀗𑁆𑀔𑀸𑀢𑀁 𑀲𑀸𑀢𑀜𑁆𑀘 𑀇𑀥 𑀇𑀫𑀲𑁆𑀫𑀺𑀁 𑀯𑀺𑀫𑀸𑀦𑁂 𑀉𑀧𑀮𑀩𑁆𑀪𑀢𑀺. 𑀕𑀦𑁆𑀢𑁆𑀯𑀸 𑀧𑀼𑀦𑀤𑁂𑀯 𑀫𑀸𑀦𑀼𑀲𑀦𑁆𑀢𑀺 𑀧𑀼𑀦 𑀏𑀯 𑀫𑀦𑀼𑀲𑁆𑀲𑀮𑁄𑀓𑀁 𑀉𑀧𑀕𑀦𑁆𑀢𑁆𑀯𑀸. 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀻𑀢𑀺 𑀫𑀬𑁆𑀳𑀁 𑀲𑀼𑀔𑀯𑀺𑀲𑁂𑀲𑀦𑀺𑀧𑁆𑀨𑀸𑀤𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀬𑁂𑀲𑀁 𑀯𑀸 𑀫𑀬𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀬𑀬𑁆𑀬𑀧𑀼𑀢𑁆𑀢 𑀫𑀦𑁆𑀢𑀺, 𑀅𑀬𑁆𑀬𑀧𑀼𑀢𑁆𑀢, 𑀫𑀁 𑀫𑀦𑀼𑀲𑁆𑀲𑀮𑁄𑀓𑀁 𑀦𑀬, 𑀦𑁂𑀳𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀲𑁄 𑀅𑀫𑀦𑀼𑀲𑁆𑀲𑁄 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀅𑀦𑀼𑀓𑀫𑁆𑀧𑀸𑀬 𑀕𑀫𑀦𑀁 𑀅𑀦𑀺𑀘𑁆𑀙𑀦𑁆𑀢𑁄 𑁋

‘‘𑀲𑀢𑁆𑀢 𑀢𑀼𑀯𑀁 𑀯𑀲𑁆𑀲𑀲𑀢𑀸 𑀇𑀥𑀸𑀕𑀢𑀸,

𑀚𑀺𑀡𑁆𑀡𑀸 𑀘 𑀯𑀼𑀟𑁆𑀠𑀸 𑀘 𑀢𑀳𑀺𑀁 𑀪𑀯𑀺𑀲𑁆𑀲𑀲𑀺;

𑀲𑀩𑁆𑀩𑁂𑀯 𑀢𑁂 𑀓𑀸𑀮𑀓𑀢𑀸 𑀘 𑀜𑀸𑀢𑀓𑀸,

𑀓𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦 𑀇𑀢𑁄 𑀓𑀭𑀺𑀲𑁆𑀲𑀲𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀢𑁆𑀢𑀸𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀦𑀺𑀲𑁆𑀲𑀓𑁆𑀓𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀯𑀲𑁆𑀲𑀲𑀢𑀸𑀢𑀺 𑀯𑀲𑁆𑀲𑀲𑀢𑀢𑁄, 𑀲𑀢𑁆𑀢𑀳𑀺 𑀯𑀲𑁆𑀲𑀲𑀢𑁂𑀳𑀺 𑀉𑀤𑁆𑀥𑀁 𑀢𑀼𑀯𑀁 𑀇𑀥𑀸𑀕𑀢𑀸 𑀇𑀫𑀁 𑀯𑀺𑀫𑀸𑀦𑀁 𑀆𑀕𑀢𑀸, 𑀇𑀥𑀸𑀕𑀢𑀸𑀬 𑀢𑀼𑀬𑁆𑀳𑀁 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 ¶ 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀚𑀺𑀡𑁆𑀡𑀸 𑀘 ¶ 𑀯𑀼𑀟𑁆𑀠𑀸 𑀘 𑀢𑀳𑀺𑀁 𑀪𑀯𑀺𑀲𑁆𑀲𑀲𑀻𑀢𑀺 𑀇𑀥 𑀤𑀺𑀩𑁆𑀩𑁂𑀳𑀺 𑀉𑀢𑀼𑀆𑀳𑀸𑀭𑁂𑀳𑀺 𑀉𑀧𑀣𑀫𑁆𑀪𑀺𑀢𑀢𑁆𑀢𑀪𑀸𑀯𑀸 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀳𑀭𑀸𑀓𑀸𑀭𑁂𑀦𑁂𑀯 𑀞𑀺𑀢𑀸. 𑀇𑀢𑁄 𑀧𑀦 𑀕𑀢𑀸 𑀓𑀫𑁆𑀫𑀲𑁆𑀲 𑀘 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀫𑀦𑀼𑀲𑁆𑀲𑀸𑀦𑀜𑁆𑀘 𑀉𑀢𑀼𑀆𑀳𑀸𑀭𑀯𑀲𑁂𑀦 𑀚𑀭𑀸𑀚𑀺𑀡𑁆𑀡𑀸 𑀯𑀬𑁄𑀯𑀼𑀟𑁆𑀠𑀸 𑀘 𑀢𑀳𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀪𑀯𑀺𑀲𑁆𑀲𑀲𑀺. 𑀓𑀺𑀦𑁆𑀢𑀺? 𑀲𑀩𑁆𑀩𑁂𑀯 𑀢𑁂 𑀓𑀸𑀮𑀓𑀢𑀸 𑀘 𑀜𑀸𑀢𑀓𑀸𑀢𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀕𑀢𑀢𑁆𑀢𑀸 𑀢𑀯 𑀜𑀸𑀢𑀬𑁄𑀧𑀺 𑀲𑀩𑁆𑀩𑁂 𑀏𑀯 𑀫𑀢𑀸, 𑀢𑀲𑁆𑀫𑀸 𑀇𑀢𑁄 𑀤𑁂𑀯𑀮𑁄𑀓𑀢𑁄 𑀢𑀢𑁆𑀣 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀅𑀯𑀲𑁂𑀲𑀫𑁆𑀧𑀺 𑀆𑀬𑀼𑀜𑁆𑀘 𑀇𑀥𑁂𑀯 𑀔𑁂𑀧𑁂𑀳𑀺, 𑀇𑀥 𑀯𑀲𑀸𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀢𑁂𑀦 𑀯𑀼𑀢𑁆𑀢𑀸 𑀲𑀸 𑀢𑀲𑁆𑀲 𑀯𑀘𑀦𑀁 𑀅𑀲𑀤𑁆𑀤𑀳𑀦𑁆𑀢𑀻 𑀧𑀼𑀦𑀤𑁂𑀯 𑁋

‘‘𑀲𑀢𑁆𑀢𑁂𑀯 ¶ 𑀯𑀲𑁆𑀲𑀸𑀦𑀺 𑀇𑀥𑀸𑀕𑀢𑀸𑀬 𑀫𑁂, 𑀤𑀺𑀩𑁆𑀩𑀜𑁆𑀘 𑀲𑀼𑀔𑀜𑁆𑀘 𑀲𑀫𑀧𑁆𑀧𑀺𑀢𑀸𑀬;

𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀢𑁆𑀢𑁂𑀯 𑀯𑀲𑁆𑀲𑀸𑀦𑀺 𑀇𑀥𑀸𑀕𑀢𑀸𑀬 𑀫𑁂𑀢𑀺, 𑀅𑀬𑁆𑀬𑀧𑀼𑀢𑁆𑀢, 𑀫𑀬𑁆𑀳𑀁 𑀇𑀥𑀸𑀕𑀢𑀸𑀬 𑀲𑀢𑁆𑀢𑁂𑀯 𑀯𑀲𑁆𑀲𑀸𑀦𑀺 𑀫𑀜𑁆𑀜𑁂 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀤𑀺𑀩𑁆𑀩𑀲𑀼𑀔𑀲𑀫𑀧𑁆𑀧𑀺𑀢𑀸𑀬 𑀩𑀳𑀼𑀫𑁆𑀧𑀺 𑀓𑀸𑀮𑀁 𑀕𑀢𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑀻 𑀏𑀯𑀫𑀸𑀳.

𑀏𑀯𑀁 𑀧𑀦 𑀢𑀸𑀬 𑀯𑀼𑀢𑁆𑀢𑁄 𑀲𑁄 𑀯𑀺𑀫𑀸𑀦𑀧𑁂𑀢𑁄 𑀦𑀸𑀦𑀧𑁆𑀧𑀓𑀸𑀭𑀁 𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 ‘‘𑀢𑁆𑀯𑀁 𑀇𑀤𑀸𑀦𑀺 𑀲𑀢𑁆𑀢𑀸𑀳𑀢𑁄 𑀉𑀢𑁆𑀢𑀭𑀺 𑀢𑀢𑁆𑀣 𑀦 𑀚𑀻𑀯𑀺𑀲𑁆𑀲𑀲𑀺, 𑀫𑀸𑀢𑀼𑀬𑀸 𑀢𑁂 𑀦𑀺𑀓𑁆𑀔𑀺𑀢𑁆𑀢𑀁 𑀫𑀬𑀸 𑀤𑀺𑀦𑁆𑀦𑀁 𑀥𑀦𑀁 𑀅𑀢𑁆𑀣𑀺, 𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀢𑁆𑀯𑀸 𑀇𑀥𑁂𑀯 𑀉𑀧𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 ‘‘𑀇𑀥𑀸𑀕𑀢𑁂 𑀅𑀜𑁆𑀜𑁂𑀧𑀺 𑀚𑀦𑁂 ‘𑀬𑀣𑀸𑀩𑀮𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣𑀸’𑀢𑀺 𑀑𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑁄 ¶ 𑀢𑀁 𑀕𑀳𑁂𑀢𑁆𑀯𑀸𑀦 𑀧𑀲𑀬𑁆𑀳 𑀩𑀸𑀳𑀸𑀬𑀁, 𑀧𑀘𑁆𑀘𑀸𑀦𑀬𑀺𑀢𑁆𑀯𑀸𑀦 𑀣𑁂𑀭𑀺𑀁 𑀲𑀼𑀤𑀼𑀩𑁆𑀩𑀮𑀁;

𑀯𑀚𑁆𑀚𑁂𑀲𑀺 ‘𑀅𑀜𑁆𑀜𑀫𑁆𑀧𑀺 𑀚𑀦𑀁 𑀇𑀥𑀸𑀕𑀢𑀁, 𑀓𑀭𑁄𑀣 𑀧𑀼𑀜𑁆𑀜𑀸𑀦𑀺 𑀲𑀼𑀔𑀽𑀧𑀮𑀩𑁆𑀪𑀢𑀻’’’𑀢𑀺.

𑀢𑀢𑁆𑀣 𑀲𑁄𑀢𑀺 𑀲𑁄 𑀯𑀺𑀫𑀸𑀦𑀧𑁂𑀢𑁄. 𑀢𑀦𑁆𑀢𑀺 𑀢𑀁 𑀇𑀢𑁆𑀣𑀺𑀁. 𑀕𑀳𑁂𑀢𑁆𑀯𑀸𑀦 𑀧𑀲𑀬𑁆𑀳 𑀩𑀸𑀳𑀸𑀬𑀦𑁆𑀢𑀺 𑀧𑀲𑀬𑁆𑀳 𑀦𑁂𑀢𑀸 𑀯𑀺𑀬 𑀩𑀸𑀳𑀸𑀬𑀁 𑀢𑀁 𑀕𑀳𑁂𑀢𑁆𑀯𑀸. 𑀧𑀘𑁆𑀘𑀸𑀦𑀬𑀺𑀢𑁆𑀯𑀸𑀦𑀸𑀢𑀺 ¶ 𑀢𑀲𑁆𑀲𑀸 𑀚𑀸𑀢𑀲𑀁𑀯𑀼𑀟𑁆𑀠𑀕𑀸𑀫𑀁 𑀧𑀼𑀦𑀤𑁂𑀯 𑀆𑀦𑀬𑀺𑀢𑁆𑀯𑀸. 𑀣𑁂𑀭𑀺𑀦𑁆𑀢𑀺 𑀣𑀸𑀯𑀭𑀺𑀁, 𑀚𑀺𑀡𑁆𑀡𑀁 𑀯𑀼𑀟𑁆𑀠𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀤𑀼𑀩𑁆𑀩𑀮𑀦𑁆𑀢𑀺 𑀚𑀭𑀸𑀚𑀺𑀡𑁆𑀡𑀢𑀸𑀬 𑀏𑀯 𑀲𑀼𑀝𑁆𑀞𑀼 𑀤𑀼𑀩𑁆𑀩𑀮𑀁. 𑀲𑀸 𑀓𑀺𑀭 𑀢𑀢𑁄 𑀯𑀺𑀫𑀸𑀦𑀢𑁄 𑀅𑀧𑀕𑀫𑀦𑀲𑀫𑀦𑀦𑁆𑀢𑀭𑀫𑁂𑀯 𑀚𑀺𑀡𑁆𑀡𑀸 𑀯𑀼𑀟𑁆𑀠𑀸 𑀫𑀳𑀮𑁆𑀮𑀺𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀯𑀚𑁆𑀚𑁂𑀲𑀻𑀢𑀺 𑀯𑀤𑁂𑀬𑁆𑀬𑀸𑀲𑀺. 𑀯𑀢𑁆𑀢𑀩𑁆𑀩𑀯𑀘𑀦𑀸𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀫𑁆𑀧𑀺 𑀚𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀪𑀤𑁆𑀤𑁂, 𑀢𑁆𑀯𑀫𑁆𑀧𑀺 𑀧𑀼𑀜𑁆𑀜𑀁 𑀓𑀭𑁂𑀬𑁆𑀬𑀸𑀲𑀺, 𑀅𑀜𑁆𑀜𑀫𑁆𑀧𑀺 𑀚𑀦𑀁 𑀇𑀥 𑀢𑀯 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀁 ‘‘𑀪𑀤𑁆𑀭𑀫𑀼𑀔𑀸, 𑀆𑀤𑀺𑀢𑁆𑀢𑀁 𑀲𑀻𑀲𑀁 𑀯𑀸 𑀘𑁂𑀮𑀁 𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀤𑀸𑀦𑀲𑀻𑀮𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣𑀸𑀢𑀺, 𑀓𑀢𑁂 𑀘 𑀧𑀼𑀜𑁆𑀜𑁂 𑀏𑀓𑀁𑀲𑁂𑀦𑁂𑀯 𑀢𑀲𑁆𑀲 𑀨𑀮𑀪𑀽𑀢𑀁 𑀲𑀼𑀔𑀁 𑀉𑀧𑀮𑀩𑁆𑀪𑀢𑀺, 𑀦 𑀏𑀢𑁆𑀣 𑀲𑀁𑀲𑀬𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀤𑁂𑀬𑁆𑀬𑀸𑀲𑀺 𑀑𑀯𑀤𑁂𑀬𑁆𑀬𑀸𑀲𑀻𑀢𑀺.

𑀏𑀯𑀜𑁆𑀘 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀲𑀸 𑀇𑀢𑁆𑀣𑀻 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑁂𑀳𑀺 𑀦𑀺𑀬𑁆𑀬𑀸𑀤𑀺𑀢𑀥𑀦𑀁 𑀕𑀳𑁂𑀢𑁆𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀤𑁂𑀦𑁆𑀢𑀻 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸𑀕𑀢𑀸𑀦𑀁 𑁋

‘‘𑀤𑀺𑀝𑁆𑀞𑀸 ¶ 𑀫𑀬𑀸 𑀅𑀓𑀢𑁂𑀦 𑀲𑀸𑀥𑀼𑀦𑀸, 𑀧𑁂𑀢𑀸 𑀯𑀺𑀳𑀜𑁆𑀜𑀦𑁆𑀢𑀺 𑀢𑀣𑁂𑀯 𑀫𑀦𑀼𑀲𑁆𑀲𑀸;

𑀓𑀫𑁆𑀫𑀜𑁆𑀘 ¶ 𑀓𑀢𑁆𑀯𑀸 𑀲𑀼𑀔𑀯𑁂𑀤𑀦𑀻𑀬𑀁, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀲𑀼𑀔𑁂 𑀞𑀺𑀢𑀸 𑀧𑀚𑀸’’𑀢𑀺. 𑁋

𑀢𑀢𑁆𑀣 𑀅𑀓𑀢𑁂𑀦𑀸𑀢𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑁂𑀦 𑀅𑀢𑁆𑀢𑀦𑀸 𑀅𑀦𑀼𑀧𑀘𑀺𑀢𑁂𑀦. 𑀲𑀸𑀥𑀼𑀦𑀸𑀢𑀺 𑀓𑀼𑀲𑀮𑀓𑀫𑁆𑀫𑁂𑀦, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀯𑀺𑀳𑀜𑁆𑀜𑀦𑁆𑀢𑀻𑀢𑀺 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺 𑀲𑀼𑀔𑀯𑀺𑀧𑀸𑀓𑀁 𑀧𑀼𑀜𑁆𑀜𑀓𑀫𑁆𑀫𑀁. 𑀲𑀼𑀔𑁂 𑀞𑀺𑀢𑀸𑀢𑀺 𑀲𑀼𑀔𑁂 𑀧𑀢𑀺𑀝𑁆𑀞𑀺𑀢𑀸. ‘‘𑀲𑀼𑀔𑁂𑀥𑀺𑀢𑀸’’𑀢𑀺 𑀯𑀸 𑀧𑀸𑀞𑁄, 𑀲𑀼𑀔𑁂𑀦 𑀅𑀪𑀺𑀯𑀼𑀟𑁆𑀠𑀸 𑀨𑀻𑀢𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀧𑁂𑀢𑀸 𑀢𑀣𑁂𑀯 𑀫𑀦𑀼𑀲𑁆𑀲𑀸 𑀅𑀓𑀢𑁂𑀦 𑀓𑀼𑀲𑀮𑁂𑀦, 𑀓𑀢𑁂𑀦 𑀘 𑀅𑀓𑀼𑀲𑀮𑁂𑀦 𑀯𑀺𑀳𑀜𑁆𑀜𑀫𑀸𑀦𑀸 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀦𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀤𑀺𑀝𑁆𑀞𑀸 𑀫𑀬𑀸. 𑀲𑀼𑀔𑀯𑁂𑀤𑀦𑀻𑀬𑀁 𑀧𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂𑀦 𑀓𑀢𑁂𑀦 𑀓𑀼𑀲𑀮𑀓𑀫𑁆𑀫𑁂𑀦, 𑀅𑀓𑀢𑁂𑀦 𑀘 𑀅𑀓𑀼𑀲𑀮𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀧𑀭𑀺𑀬𑀸𑀧𑀦𑁆𑀦𑀸 𑀧𑀚𑀸 𑀲𑀼𑀔𑁂 𑀞𑀺𑀢𑀸 𑀤𑀺𑀝𑁆𑀞𑀸 𑀫𑀬𑀸, 𑀅𑀢𑁆𑀢𑀧𑀘𑁆𑀘𑀓𑁆𑀔𑀫𑁂𑀢𑀁, 𑀢𑀲𑁆𑀫𑀸 𑀧𑀸𑀧𑀁 𑀤𑀽𑀭𑀢𑁄𑀯 𑀧𑀭𑀺𑀯𑀚𑁆𑀚𑁂𑀦𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀳𑁄𑀣𑀸𑀢𑀺.

𑀏𑀯𑀁 𑀧𑀦 𑀑𑀯𑀸𑀤𑀁 𑀤𑁂𑀦𑁆𑀢𑀻 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 ¶ 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀯𑀺𑀲𑁂𑀲𑀢𑁄 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀧𑀯𑀢𑁆𑀢𑀺𑀢𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀁 𑀫𑀳𑀸𑀦𑀺𑀲𑀁𑀲𑀢𑀜𑁆𑀘 𑀧𑀓𑀸𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁄 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀲𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀓𑀡𑁆𑀡𑀫𑀼𑀡𑁆𑀟𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀲𑁄𑀡𑁆𑀡𑀲𑁄𑀧𑀸𑀦𑀨𑀮𑀓𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀓𑀡𑁆𑀡𑀫𑀼𑀡𑁆𑀟𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 ¶ 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀫𑀺𑀮𑀦𑀕𑀭𑁂 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀘𑁆𑀙𑀦𑁆𑀤𑁄 𑀳𑀼𑀢𑁆𑀯𑀸 𑀆𑀭𑀸𑀫𑀭𑁄𑀧𑀦𑀲𑁂𑀢𑀼𑀩𑀦𑁆𑀥𑀦𑀘𑀗𑁆𑀓𑀫𑀦𑀓𑀭𑀡𑀸𑀤𑀻𑀲𑀼 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀧𑀲𑀼𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀸𑀮𑁂𑀦 𑀓𑀸𑀮𑀁 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑁂𑀲𑀁 𑀪𑀭𑀺𑀬𑀸𑀬𑁄𑀧𑀺 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀓𑀸𑀮𑁂𑀦 𑀓𑀸𑀮𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺𑀬𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀆𑀭𑀸𑀫𑀲𑀪𑀸𑀤𑀻𑀲𑀼 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀓𑀢𑀺𑀧𑀬𑀸 𑀥𑀼𑀢𑁆𑀢𑀸 𑀏𑀓𑀺𑀲𑁆𑀲𑀸 𑀲𑀪𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀢𑀸𑀲𑀼 𑀢𑀢𑁆𑀣 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀢𑀸𑀲𑀼 𑀢𑀸𑀲𑀁 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀢𑀸𑀲𑀁 𑀲𑀻𑀮𑀸𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑀢𑀁 𑀜𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀓𑁄 𑀏𑀢𑀸𑀲𑀼 𑀏𑀓𑀺𑀲𑁆𑀲𑀸𑀧𑀺 𑀲𑀻𑀮𑀪𑁂𑀤𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺. 𑀢𑀢𑁆𑀣 𑀅𑀜𑁆𑀜𑀢𑀭𑁄 ‘‘𑀅𑀳𑀁 𑀲𑀫𑀢𑁆𑀣𑁄’’𑀢𑀺 𑀆𑀳. 𑀢𑁂 𑀢𑁂𑀦 ‘‘𑀲𑀳𑀲𑁆𑀲𑁂𑀦 𑀅𑀩𑁆𑀪𑀼𑀢𑀁 𑀓𑀭𑁄𑀫𑀸’’𑀢𑀺 𑀅𑀩𑁆𑀪𑀼𑀢𑀁 𑀅𑀓𑀁𑀲𑀼. 𑀲𑁄 𑀅𑀦𑁂𑀓𑁂𑀳𑀺 𑀉𑀧𑀸𑀬𑁂𑀳𑀺 𑀯𑀸𑀬𑀫𑀫𑀸𑀦𑁄 𑀢𑀸𑀲𑀼 𑀲𑀪𑀁 𑀆𑀕𑀢𑀸𑀲𑀼 𑀲𑀼𑀫𑀼𑀜𑁆𑀘𑀺𑀢𑀁 𑀲𑀢𑁆𑀢𑀢𑀦𑁆𑀢𑀺𑀁 𑀫𑀥𑀼𑀭𑀲𑁆𑀲𑀭𑀁 𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀫𑀥𑀼𑀭𑁂𑀦𑁂𑀯 𑀲𑀭𑁂𑀦 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀕𑀻𑀢𑀸𑀦𑀺 𑀕𑀸𑀬𑀦𑁆𑀢𑁄 𑀕𑀻𑀢𑀲𑀤𑁆𑀤𑁂𑀦 𑀢𑀸𑀲𑀼 𑀅𑀜𑁆𑀜𑀢𑀭𑀁 𑀇𑀢𑁆𑀣𑀺𑀁 𑀲𑀻𑀮𑀪𑁂𑀤𑀁 𑀧𑀸𑀧𑁂𑀦𑁆𑀢𑁄 𑀅𑀢𑀺𑀘𑀸𑀭𑀺𑀦𑀺𑀁 𑀓𑀢𑁆𑀯𑀸 𑀢𑁂 𑀥𑀼𑀢𑁆𑀢𑁂 𑀲𑀳𑀲𑁆𑀲𑀁 𑀧𑀭𑀸𑀚𑁂𑀲𑀺. 𑀢𑁂 𑀲𑀳𑀲𑁆𑀲𑀧𑀭𑀸𑀚𑀺𑀢𑀸 𑀢𑀲𑁆𑀲𑀸 𑀲𑀸𑀫𑀺𑀓𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀸𑀫𑀺𑀓𑁄 𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀢𑁆𑀯𑀁 𑀏𑀯𑀭𑀽𑀧𑀸, 𑀬𑀣𑀸 𑀢𑁂 ¶ 𑀧𑀼𑀭𑀺𑀲𑀸 𑀅𑀯𑁄𑀘𑀼’’𑀦𑁆𑀢𑀺. 𑀲𑀸 ‘‘𑀦𑀸𑀳𑀁 𑀈𑀤𑀺𑀲𑀁 𑀚𑀸𑀦𑀸𑀫𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀲𑀤𑁆𑀤𑀳𑀦𑁆𑀢𑁂 𑀲𑀫𑀻𑀧𑁂 𑀞𑀺𑀢𑀁 𑀲𑀼𑀦𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀧𑀣𑀁 𑀅𑀓𑀸𑀲𑀺 ‘‘𑀲𑀘𑁂 𑀫𑀬𑀸 𑀢𑀸𑀤𑀺𑀲𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀅𑀬𑀁 𑀙𑀺𑀦𑁆𑀦𑀓𑀡𑁆𑀡𑁄 𑀓𑀸𑀴𑀲𑀼𑀦𑀔𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀚𑀸𑀢𑀁 𑀫𑀁 ¶ 𑀔𑀸𑀤𑀢𑀽’’𑀢𑀺. 𑀇𑀢𑀭𑀸𑀧𑀺 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀢𑀁 𑀇𑀢𑁆𑀣𑀺𑀁 𑀅𑀢𑀺𑀘𑀸𑀭𑀺𑀦𑀺𑀁 𑀚𑀸𑀦𑀦𑁆𑀢𑀻 𑀓𑀺𑀁 𑀅𑀬𑀁 𑀢𑀣𑀸𑀭𑀽𑀧𑀁 𑀧𑀸𑀧𑀁 𑀅𑀓𑀸𑀲𑀺, 𑀉𑀤𑀸𑀳𑀼 𑀦𑀸𑀓𑀸𑀲𑀻’’𑀢𑀺 𑀘𑁄𑀤𑀺𑀢𑀸 ‘‘𑀦 𑀫𑀬𑀁 𑀏𑀯𑀭𑀽𑀧𑀁 𑀚𑀸𑀦𑀸𑀫𑀸’’𑀢𑀺 𑀫𑀼𑀲𑀸 𑀯𑀢𑁆𑀯𑀸 ‘‘𑀲𑀘𑁂 𑀫𑀬𑀁 𑀚𑀸𑀦𑀸𑀫, 𑀪𑀯𑁂 𑀪𑀯𑁂 𑀏𑀢𑀺𑀲𑁆𑀲𑀸𑀬𑁂𑀯 𑀤𑀸𑀲𑀺𑀬𑁄 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀲𑀧𑀣𑀁 𑀅𑀓𑀁𑀲𑀼.

𑀅𑀣 𑀲𑀸 𑀅𑀢𑀺𑀘𑀸𑀭𑀺𑀦𑀻 𑀇𑀢𑁆𑀣𑀻 𑀢𑁂𑀦𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀟𑀬𑁆𑀳𑀫𑀸𑀦𑀳𑀤𑀬𑀸 𑀲𑀼𑀲𑁆𑀲𑀺𑀢𑁆𑀯𑀸 𑀦 𑀘𑀺𑀭𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀳𑀺𑀫𑀯𑀢𑀺 𑀧𑀩𑁆𑀩𑀢𑀭𑀸𑀚𑁂 𑀲𑀢𑁆𑀢𑀦𑁆𑀦𑀁 𑀫𑀳𑀸𑀲𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀓𑀡𑁆𑀡𑀫𑀼𑀡𑁆𑀟𑀤𑀳𑀲𑁆𑀲 𑀢𑀻𑀭𑁂 𑀯𑀺𑀫𑀸𑀦𑀧𑁂𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀯𑀺𑀫𑀸𑀦𑀲𑀸𑀫𑀦𑁆𑀢𑀸 𑀘𑀲𑁆𑀲𑀸 𑀓𑀫𑁆𑀫𑀯𑀺𑀧𑀸𑀓𑀸𑀦𑀼𑀪𑀯𑀦𑀬𑁄𑀕𑁆𑀕𑀸 𑀏𑀓𑀸 𑀧𑁄𑀓𑁆𑀔𑀭𑀡𑀻 𑀦𑀺𑀩𑁆𑀩𑀢𑁆𑀢𑀺. 𑀲𑁂𑀲𑀸 𑀘 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀧𑀣𑀓𑀫𑁆𑀫𑀯𑀲𑁂𑀦 𑀢𑀲𑁆𑀲𑀸𑀬𑁂𑀯 𑀤𑀸𑀲𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀸 𑀢𑀢𑁆𑀣 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀨𑀮𑁂𑀦 𑀤𑀺𑀯𑀲𑀪𑀸𑀕𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑁂 𑀧𑀸𑀧𑀓𑀫𑁆𑀫𑀩𑀮𑀲𑀜𑁆𑀘𑁄𑀤𑀺𑀢𑀸 𑀲𑀬𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀢𑀻𑀭𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀕𑀢𑀁 𑀕𑀚𑀧𑁄𑀢𑀓𑀧𑁆𑀧𑀫𑀸𑀡𑁄 𑀏𑀓𑁄 𑀓𑀸𑀴𑀲𑀼𑀦𑀔𑁄 𑀪𑁂𑀭𑀯𑀭𑀽𑀧𑁄 𑀙𑀺𑀦𑁆𑀦𑀓𑀡𑁆𑀡𑁄 𑀢𑀺𑀔𑀺𑀡𑀸𑀬𑀢𑀓𑀣𑀺𑀦𑀤𑀸𑀞𑁄 𑀲𑀼𑀯𑀺𑀧𑁆𑀨𑀼𑀮𑀺𑀢𑀔𑀤𑀺𑀭𑀗𑁆𑀕𑀸𑀭𑀧𑀼𑀜𑁆𑀚𑀲𑀤𑀺𑀲𑀦𑀬𑀦𑁄 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀯𑀺𑀚𑁆𑀚𑀼𑀮𑀢𑀸𑀲𑀗𑁆𑀖𑀸𑀢𑀲𑀤𑀺𑀲𑀚𑀺𑀯𑁆𑀳𑁄 𑀓𑀣𑀺𑀦𑀢𑀺𑀔𑀺𑀡𑀦𑀔𑁄 𑀔𑀭𑀸𑀬𑀢𑀤𑀼𑀩𑁆𑀩𑀡𑁆𑀡𑀮𑁄𑀫𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀪𑀽𑀫𑀺𑀬𑀁 𑀦𑀺𑀧𑀸𑀢𑁂𑀢𑁆𑀯𑀸 𑀅𑀢𑀺𑀲𑀬𑀚𑀺𑀖𑀘𑁆𑀙𑀸𑀪𑀺𑀪𑀽𑀢𑁄 𑀯𑀺𑀬 𑀧𑀲𑀬𑁆𑀳 𑀔𑀸𑀤𑀦𑁆𑀢𑁄 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑀢𑁆𑀢𑀁 𑀓𑀢𑁆𑀯𑀸 𑀤𑀦𑁆𑀢𑁂𑀳𑀺 𑀕𑀳𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑀁 𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀲𑀸 𑀘 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀲𑀫𑀦𑀦𑁆𑀢𑀭𑀫𑁂𑀯 𑀧𑀓𑀢𑀺𑀭𑀽𑀧𑀥𑀸𑀭𑀺𑀦𑀻 𑀳𑀼𑀢𑁆𑀯𑀸 𑀯𑀺𑀫𑀸𑀦𑀁 𑀅𑀪𑀺𑀭𑀼𑀬𑁆𑀳 𑀲𑀬𑀦𑁂 𑀦𑀺𑀧𑀚𑁆𑀚𑀢𑀺. 𑀇𑀢𑀭𑀸 𑀧𑀦 𑀢𑀲𑁆𑀲𑀸 𑀤𑀸𑀲𑀩𑁆𑀬𑀫𑁂𑀯 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺. 𑀏𑀯𑀁 𑀢𑀸𑀲𑀁 𑀢𑀢𑁆𑀣 𑀯𑀲𑀦𑁆𑀢𑀻𑀦𑀁 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺.

𑀅𑀣 ¶ 𑀢𑀸𑀲𑀁 𑀧𑀼𑀭𑀺𑀲𑁂𑀳𑀺 𑀯𑀺𑀦𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻𑀦𑀁 𑀉𑀓𑁆𑀓𑀡𑁆𑀞𑀸 𑀅𑀳𑁂𑀲𑀼𑀁. 𑀢𑀢𑁆𑀣 𑀘 𑀓𑀡𑁆𑀡𑀫𑀼𑀡𑁆𑀟𑀤𑀳𑀢𑁄 𑀦𑀺𑀕𑁆𑀕𑀢𑀸 𑀧𑀩𑁆𑀩𑀢𑀯𑀺𑀯𑀭𑁂𑀦 𑀆𑀕𑀦𑁆𑀢𑁆𑀯𑀸 𑀕𑀗𑁆𑀕𑀁 𑀦𑀤𑀺𑀁 𑀅𑀦𑀼𑀧𑀯𑀺𑀝𑁆𑀞𑀸 𑀏𑀓𑀸 𑀦𑀤𑀻 𑀅𑀢𑁆𑀣𑀺. 𑀢𑀸𑀲𑀜𑁆𑀘 𑀯𑀲𑀦𑀝𑁆𑀞𑀸𑀦𑀲𑀫𑀻𑀧𑁂 ¶ 𑀏𑀓𑁄 𑀤𑀺𑀩𑁆𑀩𑀨𑀮𑁂𑀳𑀺 𑀅𑀫𑁆𑀩𑀭𑀼𑀓𑁆𑀔𑁂𑀳𑀺 𑀧𑀦𑀲𑀮𑀩𑀼𑀚𑀸𑀤𑀻𑀳𑀺 𑀘 𑀉𑀧𑀲𑁄𑀪𑀺𑀢𑁄 𑀆𑀭𑀸𑀫𑀲𑀤𑀺𑀲𑁄 𑀅𑀭𑀜𑁆𑀜𑀧𑁆𑀧𑀤𑁂𑀲𑁄 𑀅𑀢𑁆𑀣𑀺. 𑀢𑀸 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀳𑀦𑁆𑀤, 𑀫𑀬𑀁 𑀇𑀫𑀸𑀦𑀺 𑀅𑀫𑁆𑀩𑀨𑀮𑀸𑀦𑀺 𑀇𑀫𑀺𑀲𑁆𑀲𑀸 𑀦𑀤𑀺𑀬𑀸 𑀧𑀓𑁆𑀔𑀺𑀧𑀺𑀲𑁆𑀲𑀸𑀫, 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀨𑀮𑀁 𑀤𑀺𑀲𑁆𑀯𑀸 𑀨𑀮𑀮𑁄𑀪𑁂𑀦 ¶ 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀇𑀥𑀸𑀕𑀘𑁆𑀙𑁂𑀬𑁆𑀬, 𑀢𑁂𑀦 𑀲𑀤𑁆𑀥𑀺𑀁 𑀭𑀫𑀺𑀲𑁆𑀲𑀸𑀫𑀸𑀢𑀺. 𑀢𑀸 𑀢𑀣𑀸 𑀅𑀓𑀁𑀲𑀼. 𑀢𑀸𑀳𑀺 𑀧𑀦 𑀧𑀓𑁆𑀔𑀺𑀢𑁆𑀢𑀸𑀦𑀺 𑀅𑀫𑁆𑀩𑀨𑀮𑀸𑀦𑀺 𑀓𑀸𑀦𑀺𑀘𑀺 𑀢𑀸𑀧𑀲𑀸 𑀕𑀡𑁆𑀳𑀺𑀁𑀲𑀼, 𑀓𑀸𑀦𑀺𑀘𑀺 𑀯𑀦𑀘𑀭𑀓𑀸, 𑀓𑀸𑀦𑀺𑀘𑀺 𑀓𑀸𑀓𑀸 𑀯𑀺𑀮𑀼𑀚𑁆𑀚𑀺𑀁𑀲𑀼, 𑀓𑀸𑀦𑀺𑀘𑀺 𑀢𑀻𑀭𑁂 𑀮𑀕𑁆𑀕𑀺𑀁𑀲𑀼. 𑀏𑀓𑀁 𑀧𑀦 𑀕𑀗𑁆𑀕𑀸𑀬 𑀲𑁄𑀢𑀁 𑀧𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀩𑀸𑀭𑀸𑀡𑀲𑀺𑀁 𑀲𑀫𑁆𑀧𑀸𑀧𑀼𑀡𑀺.

𑀢𑁂𑀦 𑀘 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀭𑀸𑀚𑀸 𑀮𑁄𑀳𑀚𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑁂 𑀕𑀗𑁆𑀕𑀸𑀚𑀮𑁂 𑀦𑁆𑀳𑀸𑀬𑀢𑀺. 𑀅𑀣 𑀢𑀁 𑀨𑀮𑀁 𑀦𑀤𑀺𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀆𑀕𑀦𑁆𑀢𑁆𑀯𑀸 𑀮𑁄𑀳𑀚𑀸𑀮𑁂 𑀮𑀕𑁆𑀕𑀺. 𑀢𑀁 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀫𑀳𑀦𑁆𑀢𑀁 𑀤𑀺𑀩𑁆𑀩𑀁 𑀅𑀫𑁆𑀩𑀨𑀮𑀁 𑀤𑀺𑀲𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀭𑀜𑁆𑀜𑁄 𑀉𑀧𑀦𑁂𑀲𑀼𑀁. 𑀭𑀸𑀚𑀸 𑀢𑀲𑁆𑀲 𑀏𑀓𑀤𑁂𑀲𑀁 𑀕𑀳𑁂𑀢𑁆𑀯𑀸 𑀯𑀻𑀫𑀁𑀲𑀦𑀢𑁆𑀣𑀸𑀬 𑀏𑀓𑀲𑁆𑀲 𑀩𑀦𑁆𑀥𑀦𑀸𑀕𑀸𑀭𑁂 𑀞𑀧𑀺𑀢𑀲𑁆𑀲 𑀯𑀚𑁆𑀛𑀘𑁄𑀭𑀲𑁆𑀲 𑀔𑀸𑀤𑀺𑀢𑀼𑀁 𑀅𑀤𑀸𑀲𑀺. 𑀲𑁄 𑀢𑀁 𑀔𑀸𑀤𑀺𑀢𑁆𑀯𑀸 ‘‘𑀤𑁂𑀯, 𑀫𑀬𑀸 𑀏𑀯𑀭𑀽𑀧𑀁 𑀦 𑀔𑀸𑀤𑀺𑀢𑀧𑀼𑀩𑁆𑀩𑀁, 𑀤𑀺𑀩𑁆𑀩𑀫𑀺𑀤𑀁 𑀫𑀜𑁆𑀜𑁂 𑀅𑀫𑁆𑀩𑀨𑀮’’𑀦𑁆𑀢𑀺 𑀆𑀳. 𑀭𑀸𑀚𑀸 𑀧𑀼𑀦𑀧𑀺 𑀢𑀲𑁆𑀲 𑀏𑀓𑀁 𑀔𑀡𑁆𑀟𑀁 𑀅𑀤𑀸𑀲𑀺. 𑀲𑁄 𑀢𑀁 𑀔𑀸𑀤𑀺𑀢𑁆𑀯𑀸 𑀯𑀺𑀕𑀢𑀯𑀮𑀺𑀢𑀧𑀮𑀺𑀢𑁄 𑀅𑀢𑀺𑀯𑀺𑀬 𑀫𑀦𑁄𑀳𑀭𑀭𑀽𑀧𑁄 𑀬𑁄𑀩𑁆𑀩𑀦𑁂 𑀞𑀺𑀢𑁄 𑀯𑀺𑀬 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁄 𑀢𑀁 𑀅𑀫𑁆𑀩𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀭𑀻𑀭𑁂 𑀯𑀺𑀲𑁂𑀲𑀁 𑀮𑀪𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀢𑁆𑀣 𑀏𑀯𑀭𑀽𑀧𑀸𑀦𑀺 𑀤𑀺𑀩𑁆𑀩𑀅𑀫𑁆𑀩𑀨𑀮𑀸𑀦𑀺 𑀲𑀁𑀯𑀺𑀚𑁆𑀚𑀦𑁆𑀢𑀻’’𑀢𑀺? 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀺𑀫𑀯𑀦𑁆𑀢𑁂 𑀓𑀺𑀭, 𑀤𑁂𑀯, 𑀧𑀩𑁆𑀩𑀢𑀭𑀸𑀚𑁂’’𑀢𑀺. ‘‘𑀲𑀓𑁆𑀓𑀸 𑀧𑀦 𑀢𑀸𑀦𑀺 𑀆𑀦𑁂𑀢𑀼’’𑀦𑁆𑀢𑀺? ‘‘𑀯𑀦𑀘𑀭𑀓𑀸, 𑀤𑁂𑀯, 𑀚𑀸𑀦𑀦𑁆𑀢𑀻’’𑀢𑀺.

𑀭𑀸𑀚𑀸 𑀯𑀦𑀘𑀭𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑁂𑀳𑀺 𑀲𑀫𑁆𑀫𑀦𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀲𑁆𑀲 𑀏𑀓𑀲𑁆𑀲 𑀯𑀦𑀘𑀭𑀓𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺 𑁋 ‘‘𑀕𑀘𑁆𑀙 ¶ , 𑀲𑀻𑀖𑀁 𑀢𑀁 𑀫𑁂 𑀅𑀫𑁆𑀩𑀨𑀮𑀁 𑀆𑀦𑁂𑀳𑀻’’𑀢𑀺. 𑀲𑁄 𑀢𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀧𑀼𑀢𑁆𑀢𑀤𑀸𑀭𑀲𑁆𑀲 𑀤𑀢𑁆𑀯𑀸 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸 𑀧𑀝𑀺𑀕𑀗𑁆𑀕𑀁 𑀓𑀡𑁆𑀡𑀫𑀼𑀡𑁆𑀟𑀤𑀳𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀡𑁆𑀡𑀫𑀼𑀡𑁆𑀟𑀤𑀳𑀢𑁄 𑀑𑀭𑀁 𑀲𑀝𑁆𑀞𑀺𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀏𑀓𑀁 𑀢𑀸𑀧𑀲𑀁 𑀤𑀺𑀲𑁆𑀯𑀸 𑀢𑁂𑀦 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀧𑀼𑀦 𑀢𑀺𑀁𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀏𑀓𑀁 𑀢𑀸𑀧𑀲𑀁 𑀤𑀺𑀲𑁆𑀯𑀸, 𑀢𑁂𑀦 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀧𑀼𑀦 𑀧𑀦𑁆𑀦𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀞𑀸𑀦𑁂 𑀅𑀜𑁆𑀜𑀁 𑀢𑀸𑀧𑀲𑀁 𑀤𑀺𑀲𑁆𑀯𑀸, 𑀢𑀲𑁆𑀲 𑀅𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀲𑀺. 𑀢𑀸𑀧𑀲𑁄 𑀢𑀁 𑀅𑀦𑀼𑀲𑀸𑀲𑀺 𑁋 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀫𑀳𑀸𑀕𑀗𑁆𑀕𑀁 𑀧𑀳𑀸𑀬 𑀇𑀫𑀁 𑀔𑀼𑀤𑁆𑀤𑀓𑀦𑀤𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀲𑁄𑀢𑀁 𑀕𑀘𑁆𑀙𑀦𑁆𑀢𑁄 𑀬𑀤𑀸 𑀧𑀩𑁆𑀩𑀢𑀯𑀺𑀯𑀭𑀁 𑀧𑀲𑁆𑀲𑀲𑀺, 𑀢𑀤𑀸 𑀭𑀢𑁆𑀢𑀺𑀬𑀁 𑀉𑀓𑁆𑀓𑀁 𑀕𑀳𑁂𑀢𑁆𑀯𑀸 𑀧𑀯𑀺𑀲𑁂𑀬𑁆𑀬𑀸𑀲𑀺. 𑀅𑀬𑀜𑁆𑀘 ¶ 𑀦𑀤𑀻 𑀭𑀢𑁆𑀢𑀺𑀬𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀢𑁂𑀦 ¶ 𑀢𑁂 𑀕𑀫𑀦𑀬𑁄𑀕𑁆𑀕𑀸 𑀳𑁄𑀢𑀺, 𑀓𑀢𑀺𑀧𑀬𑀬𑁄𑀚𑀦𑀸𑀢𑀺𑀓𑁆𑀓𑀫𑁂𑀦 𑀢𑁂 𑀅𑀫𑁆𑀩𑁂 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀉𑀤𑀬𑀦𑁆𑀢𑁂 𑀲𑀽𑀭𑀺𑀬𑁂 𑀯𑀺𑀯𑀺𑀥𑀭𑀢𑀦𑀭𑀁𑀲𑀺𑀚𑀸𑀮𑀧𑀚𑁆𑀚𑁄𑀢𑀺𑀢𑀪𑀽𑀫𑀺𑀪𑀸𑀕𑀁 𑀨𑀮𑀪𑀸𑀭𑀸𑀯𑀦𑀢𑀲𑀸𑀔𑀸𑀯𑀺𑀢𑀸𑀦𑀢𑀭𑀼𑀕𑀡𑁄𑀧𑀲𑁄𑀪𑀺𑀢𑀁 𑀦𑀸𑀦𑀸𑀯𑀺𑀥𑀯𑀺𑀳𑀗𑁆𑀕𑀕𑀡𑀽𑀧𑀓𑀽𑀚𑀺𑀢𑀁 𑀅𑀢𑀺𑀯𑀺𑀬 𑀫𑀦𑁄𑀳𑀭𑀁 𑀅𑀫𑁆𑀩𑀯𑀦𑀁 𑀲𑀫𑁆𑀧𑀸𑀧𑀼𑀡𑀺.

𑀅𑀣 𑀦𑀁 𑀢𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑁄 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀏𑀲 𑀫𑀫 𑀧𑀭𑀺𑀕𑁆𑀕𑀳𑁄, 𑀏𑀲 𑀫𑀫 𑀧𑀭𑀺𑀕𑁆𑀕𑀳𑁄’’𑀢𑀺 𑀉𑀧𑀥𑀸𑀯𑀺𑀁𑀲𑀼. 𑀲𑁄 𑀧𑀦 𑀢𑀸𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑀼𑀁 𑀬𑁄𑀕𑁆𑀕𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀅𑀓𑀢𑀢𑁆𑀢𑀸 𑀢𑀸 𑀤𑀺𑀲𑁆𑀯𑀸𑀯 𑀪𑀻𑀢𑁄 𑀯𑀺𑀭𑀯𑀦𑁆𑀢𑁄 𑀧𑀮𑀸𑀬𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀢𑀸 𑀇𑀢𑁆𑀣𑀺𑀬𑁄 𑀤𑀝𑁆𑀞𑀼𑀁 𑀅𑀫𑁆𑀩𑀨𑀮𑀸𑀦𑀺 𑀘 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑁄 𑀭𑀚𑁆𑀚𑀪𑀸𑀭𑀁 𑀅𑀫𑀘𑁆𑀘𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀫𑀺𑀕𑀯𑀸𑀧𑀤𑁂𑀲𑁂𑀦 𑀲𑀦𑁆𑀦𑀤𑁆𑀥𑀥𑀦𑀼𑀓𑀮𑀸𑀧𑁄 𑀔𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀓𑀢𑀺𑀧𑀬𑀫𑀦𑀼𑀲𑁆𑀲𑀧𑀭𑀺𑀯𑀸𑀭𑁄 𑀢𑁂𑀦𑁂𑀯 𑀯𑀦𑀘𑀭𑀓𑁂𑀦 𑀤𑀲𑁆𑀲𑀺𑀢𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀓𑀢𑀺𑀧𑀬𑀬𑁄𑀚𑀦𑀦𑁆𑀢𑀭𑁂 𑀞𑀸𑀦𑁂 𑀫𑀦𑀼𑀲𑁆𑀲𑁂𑀧𑀺 𑀞𑀧𑁂𑀢𑁆𑀯𑀸 𑀯𑀦𑀘𑀭𑀓𑀫𑁂𑀯 𑀕𑀳𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀢𑀢𑁄 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀉𑀤𑀬𑀦𑁆𑀢𑁂 ¶ 𑀤𑀺𑀯𑀸𑀓𑀭𑁂 𑀅𑀫𑁆𑀩𑀯𑀦𑀁 𑀧𑀸𑀯𑀺𑀲𑀺. 𑀅𑀣 𑀦𑀁 𑀢𑀸 𑀇𑀢𑁆𑀣𑀺𑀬𑁄 𑀅𑀪𑀺𑀦𑀯𑀉𑀧𑁆𑀧𑀦𑁆𑀦𑀫𑀺𑀯 𑀤𑁂𑀯𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸’’𑀢𑀺 𑀜𑀢𑁆𑀯𑀸 𑀲𑀜𑁆𑀚𑀸𑀢𑀲𑀺𑀦𑁂𑀳𑀩𑀳𑀼𑀫𑀸𑀦𑀸 𑀲𑀓𑁆𑀓𑀘𑁆𑀘𑀁 𑀦𑁆𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀁 𑀓𑀢𑁆𑀯𑀸 𑀯𑀺𑀫𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀁 𑀤𑀺𑀩𑁆𑀩𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀢𑀲𑁆𑀲 𑀇𑀘𑁆𑀙𑀸𑀦𑀼𑀭𑀽𑀧𑀁 𑀧𑀬𑀺𑀭𑀼𑀧𑀸𑀲𑀺𑀁𑀲𑀼.

𑀅𑀣 𑀤𑀺𑀬𑀟𑁆𑀠𑀯𑀲𑁆𑀲𑀲𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀭𑀸𑀚𑀸 𑀅𑀟𑁆𑀠𑀭𑀢𑁆𑀢𑀺𑀲𑀫𑀬𑁂 𑀉𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀢𑀁 𑀅𑀢𑀺𑀘𑀸𑀭𑀺𑀦𑀺𑀁 𑀧𑁂𑀢𑀺𑀁 𑀧𑁄𑀓𑁆𑀔𑀭𑀡𑀺𑀢𑀻𑀭𑀁 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀲𑀸 𑀇𑀫𑀸𑀬 𑀯𑁂𑀮𑀸𑀬 𑀕𑀘𑁆𑀙𑀢𑀻’’𑀢𑀺 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀅𑀦𑀼𑀩𑀦𑁆𑀥𑀺. 𑀅𑀣 𑀦𑀁 𑀢𑀢𑁆𑀣 𑀕𑀢𑀁 𑀲𑀼𑀦𑀔𑁂𑀦 𑀔𑀚𑁆𑀚𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀢𑀬𑁄 𑀘 𑀤𑀺𑀯𑀲𑁂 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀏𑀲𑁄 𑀏𑀢𑀺𑀲𑁆𑀲𑀸 𑀧𑀘𑁆𑀘𑀸𑀫𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀲𑀺𑀢𑁂𑀦 𑀉𑀲𑀼𑀦𑀸 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀢𑀜𑁆𑀘 𑀇𑀢𑁆𑀣𑀺𑀁 𑀧𑁄𑀣𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀑𑀢𑀸𑀭𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀧𑀼𑀭𑀺𑀫𑀭𑀽𑀧𑀁 𑀤𑀺𑀲𑁆𑀯𑀸 𑁋

‘‘𑀲𑁄𑀡𑁆𑀡𑀲𑁄𑀧𑀸𑀦𑀨𑀮𑀓𑀸 ¶ , 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸;

𑀢𑀢𑁆𑀣 𑀲𑁄𑀕𑀦𑁆𑀥𑀺𑀬𑀸 𑀯𑀕𑁆𑀕𑀽, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

‘‘𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀸;

𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸.

‘‘𑀲𑀼𑀭𑀪𑀺𑀁 ¶ 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀸 𑀫𑀸𑀮𑀼𑀢𑁂𑀭𑀺𑀢𑀸;

𑀳𑀁𑀲𑀓𑁄𑀜𑁆𑀘𑀸𑀪𑀺𑀭𑀼𑀤𑀸 𑀘, 𑀘𑀓𑁆𑀓𑀯𑀓𑁆𑀓𑀸𑀪𑀺𑀓𑀽𑀚𑀺𑀢𑀸.

‘‘𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀦𑀸𑀦𑀸𑀲𑀭𑀕𑀡𑀸𑀬𑀼𑀢𑀸;

𑀦𑀸𑀦𑀸𑀨𑀮𑀥𑀭𑀸 𑀭𑀼𑀓𑁆𑀔𑀸, 𑀦𑀸𑀦𑀸𑀧𑀼𑀧𑁆𑀨𑀥𑀭𑀸 𑀯𑀦𑀸.

‘‘𑀦 ¶ 𑀫𑀦𑀼𑀲𑁆𑀲𑁂𑀲𑀼 𑀈𑀤𑀺𑀲𑀁, 𑀦𑀕𑀭𑀁 𑀬𑀸𑀤𑀺𑀲𑀁 𑀇𑀤𑀁;

𑀧𑀸𑀲𑀸𑀤𑀸 𑀩𑀳𑀼𑀓𑀸 𑀢𑀼𑀬𑁆𑀳𑀁, 𑀲𑁄𑀯𑀡𑁆𑀡𑀭𑀽𑀧𑀺𑀬𑀸𑀫𑀬𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑁂𑀦𑁆𑀢𑀺, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

‘‘𑀧𑀜𑁆𑀘 𑀤𑀸𑀲𑀺𑀲𑀢𑀸 𑀢𑀼𑀬𑁆𑀳𑀁, 𑀬𑀸 𑀢𑁂𑀫𑀸 𑀧𑀭𑀺𑀘𑀸𑀭𑀺𑀓𑀸;

𑀢𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸, 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑀸.

‘‘𑀧𑀮𑁆𑀮𑀗𑁆𑀓𑀸 𑀩𑀳𑀼𑀓𑀸 𑀢𑀼𑀬𑁆𑀳𑀁, 𑀲𑁄𑀯𑀡𑁆𑀡𑀭𑀽𑀧𑀺𑀬𑀸𑀫𑀬𑀸;

𑀓𑀤𑀮𑀺𑀫𑀺𑀕𑀲𑀜𑁆𑀙𑀦𑁆𑀦𑀸, 𑀲𑀚𑁆𑀚𑀸 𑀕𑁄𑀦𑀓𑀲𑀦𑁆𑀣𑀢𑀸.

‘‘𑀬𑀢𑁆𑀣 𑀢𑀼𑀯𑀁 𑀯𑀸𑀲𑀽𑀧𑀕𑀢𑀸, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻;

𑀲𑀫𑁆𑀧𑀢𑁆𑀢𑀸𑀬𑀟𑁆𑀠𑀭𑀢𑁆𑀢𑀸𑀬, 𑀢𑀢𑁄 𑀉𑀝𑁆𑀞𑀸𑀬 𑀕𑀘𑁆𑀙𑀲𑀺.

‘‘𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀦𑁆𑀢𑁆𑀯𑀸𑀦, 𑀧𑁄𑀓𑁆𑀔𑀭𑀜𑁆𑀜𑀸 𑀲𑀫𑀦𑁆𑀢𑀢𑁄;

𑀢𑀲𑁆𑀲𑀸 𑀢𑀻𑀭𑁂 𑀢𑀼𑀯𑀁 𑀞𑀸𑀲𑀺, 𑀳𑀭𑀺𑀢𑁂 𑀲𑀤𑁆𑀤𑀮𑁂 𑀲𑀼𑀪𑁂.

‘‘𑀢𑀢𑁄 𑀢𑁂 𑀓𑀡𑁆𑀡𑀫𑀼𑀡𑁆𑀟𑁄 𑀲𑀼𑀦𑀔𑁄, 𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀺;

𑀬𑀤𑀸 𑀘 𑀔𑀸𑀬𑀺𑀢𑀸 𑀆𑀲𑀺, 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸 𑀓𑀢𑀸;

𑀑𑀕𑀸𑀳𑀲𑀺 𑀧𑁄𑀓𑁆𑀔𑀭𑀡𑀺𑀁, 𑀳𑁄𑀢𑀺 𑀓𑀸𑀬𑁄 𑀬𑀣𑀸 𑀧𑀼𑀭𑁂.

‘‘𑀢𑀢𑁄 𑀢𑁆𑀯𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀻, 𑀲𑀼𑀘𑀸𑀭𑀼 𑀧𑀺𑀬𑀤𑀲𑁆𑀲𑀦𑀸;

𑀯𑀢𑁆𑀣𑁂𑀦 𑀧𑀸𑀭𑀼𑀧𑀺𑀢𑁆𑀯𑀸𑀦, 𑀆𑀬𑀸𑀲𑀺 𑀫𑀫 𑀲𑀦𑁆𑀢𑀺𑀓𑀁.

‘‘𑀓𑀺𑀁 ¶ ¶ 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀓𑀡𑁆𑀡𑀫𑀼𑀡𑁆𑀟𑁄 𑀲𑀼𑀦𑀔𑁄 𑀢𑀯;

𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀻’’𑀢𑀺. 𑁋

𑀤𑁆𑀯𑀸𑀤𑀲𑀳𑀺 𑀕𑀸𑀣𑀸𑀳𑀺 𑀢𑀁 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀧𑀝𑀺𑀧𑀼𑀘𑁆𑀙𑀺.

𑁩𑁪𑁮. 𑀢𑀢𑁆𑀣 𑀲𑁄𑀡𑁆𑀡𑀲𑁄𑀧𑀸𑀦𑀨𑀮𑀓𑀸𑀢𑀺 𑀲𑀼𑀯𑀡𑁆𑀡𑀫𑀬𑀲𑁄𑀧𑀸𑀦𑀨𑀮𑀓𑀸. 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸𑀢𑀺 𑀲𑀫𑀦𑁆𑀢𑀢𑁄 𑀲𑀼𑀯𑀡𑁆𑀡𑀫𑀬𑀸𑀳𑀺 𑀯𑀸𑀮𑀼𑀓𑀸𑀳𑀺 𑀲𑀦𑁆𑀣𑀢𑀸. 𑀢𑀢𑁆𑀣𑀸𑀢𑀺 𑀧𑁄𑀓𑁆𑀔𑀭𑀡𑀺𑀬𑀁. 𑀲𑁄𑀕𑀦𑁆𑀥𑀺𑀬𑀸𑀢𑀺 𑀲𑁄𑀕𑀦𑁆𑀥𑀺𑀓𑀸. 𑀯𑀕𑁆𑀕𑀽𑀢𑀺 𑀲𑀼𑀦𑁆𑀤𑀭𑀸 𑀭𑀼𑀘𑀺𑀭𑀸. 𑀲𑀼𑀘𑀺𑀕𑀦𑁆𑀥𑀸𑀢𑀺 𑀫𑀦𑀼𑀜𑁆𑀜𑀕𑀦𑁆𑀥𑀸.

𑁩𑁪𑁯. 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀸𑀢𑀺 𑀦𑀸𑀦𑀸𑀯𑀺𑀥𑀲𑀼𑀭𑀪𑀺𑀕𑀦𑁆𑀥𑀯𑀲𑁂𑀦 𑀕𑀦𑁆𑀥𑀯𑀸𑀬𑀼𑀦𑀸 𑀲𑀫𑀦𑁆𑀢𑀢𑁄 𑀏𑀭𑀺𑀢𑀸. 𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸𑀢𑀺 ¶ 𑀦𑀸𑀦𑀸𑀯𑀺𑀥𑀭𑀢𑁆𑀢𑀧𑀤𑀼𑀫𑀲𑀜𑁆𑀙𑀸𑀤𑀺𑀢𑀲𑀮𑀺𑀮𑀢𑀮𑀸. 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸𑀢𑀺 𑀲𑁂𑀢𑀧𑀤𑀼𑀫𑁂𑀳𑀺 𑀘 𑀲𑀫𑁄𑀓𑀺𑀡𑁆𑀡𑀸.

𑁩𑁫𑁦. 𑀲𑀼𑀭𑀪𑀺𑀁 𑀲𑀫𑁆𑀧𑀯𑀸𑀬𑀦𑁆𑀢𑀻𑀢𑀺 𑀲𑀫𑁆𑀫𑀤𑁂𑀯 𑀲𑀼𑀕𑀦𑁆𑀥𑀁 𑀯𑀸𑀬𑀢𑀺 𑀧𑁄𑀓𑁆𑀔𑀭𑀡𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀁𑀲𑀓𑁄𑀜𑁆𑀘𑀸𑀪𑀺𑀭𑀼𑀤𑀸𑀢𑀺 𑀳𑀁𑀲𑁂𑀳𑀺 𑀘 𑀓𑁄𑀜𑁆𑀘𑁂𑀳𑀺 𑀘 𑀅𑀪𑀺𑀦𑀸𑀤𑀺𑀢𑀸.

𑁩𑁫𑁧. 𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸𑀢𑀺 𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸. 𑀦𑀸𑀦𑀸𑀲𑀭𑀕𑀡𑀸𑀬𑀼𑀢𑀸𑀢𑀺 𑀦𑀸𑀦𑀸𑀯𑀺𑀥𑀯𑀺𑀳𑀗𑁆𑀕𑀫𑀸𑀪𑀺𑀭𑀼𑀤𑀲𑀫𑀽𑀳𑀬𑀼𑀢𑁆𑀢𑀸. 𑀦𑀸𑀦𑀸𑀨𑀮𑀥𑀭𑀸𑀢𑀺 𑀦𑀸𑀦𑀸𑀯𑀺𑀥𑀨𑀮𑀥𑀸𑀭𑀺𑀦𑁄 𑀲𑀩𑁆𑀩𑀓𑀸𑀮𑀁 𑀯𑀺𑀯𑀺𑀥𑀨𑀮𑀪𑀸𑀭𑀦𑀫𑀺𑀢𑀲𑀸𑀔𑀢𑁆𑀢𑀸. 𑀦𑀸𑀦𑀸𑀧𑀼𑀧𑁆𑀨𑀥𑀭𑀸 𑀯𑀦𑀸𑀢𑀺 𑀦𑀸𑀦𑀸𑀯𑀺𑀥𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀬𑀺𑀓𑀸𑀦𑀺 𑀯𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑀺 ‘‘𑀯𑀦𑀸’’𑀢𑀺 𑀯𑀼𑀢𑁆𑀢𑀁.

𑁩𑁫𑁨. 𑀦 𑀫𑀦𑀼𑀲𑁆𑀲𑁂𑀲𑀼 𑀈𑀤𑀺𑀲𑀁 𑀦𑀕𑀭𑀦𑁆𑀢𑀺 𑀬𑀸𑀤𑀺𑀲𑀁 𑀢𑀯 𑀇𑀤𑀁 𑀦𑀕𑀭𑀁, 𑀈𑀤𑀺𑀲𑀁 𑀫𑀦𑀼𑀲𑁆𑀲𑁂𑀲𑀼 𑀦𑀢𑁆𑀣𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀺𑀬𑀫𑀬𑀸𑀢𑀺 𑀭𑀚𑀢𑀫𑀬𑀸. 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀫𑀸𑀦𑀸. 𑀆𑀪𑁂𑀦𑁆𑀢𑀻𑀢𑀺 𑀲𑁄𑀪𑀬𑀦𑁆𑀢𑀺. 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸𑀢𑀺 𑀲𑀫𑀦𑁆𑀢𑀢𑁄 𑀘𑀢𑀲𑁆𑀲𑁄𑀧𑀺 𑀤𑀺𑀲𑀸𑀬𑁄.

𑁩𑁫𑁩. 𑀬𑀸 𑀢𑁂𑀫𑀸𑀢𑀺 𑀬𑀸 𑀢𑁂 𑀇𑀫𑀸. 𑀧𑀭𑀺𑀘𑀸𑀭𑀺𑀓𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀸𑀭𑀺𑀦𑀺𑀬𑁄. 𑀢𑀸𑀢𑀺 𑀢𑀸 𑀧𑀭𑀺𑀘𑀸𑀭𑀺𑀓𑀸𑀬𑁄. 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸𑀢𑀺 𑀲𑀗𑁆𑀔𑀯𑀮𑀬𑀓𑀸𑀬𑀽𑀭𑀯𑀺𑀪𑀽𑀲𑀺𑀢𑀸. 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑀸𑀢𑀺 𑀲𑀼𑀯𑀡𑁆𑀡𑀯𑀝𑀁𑀲𑀓𑀲𑀫𑀮𑀗𑁆𑀓𑀢𑀓𑁂𑀲𑀳𑀢𑁆𑀣𑀸.

𑁩𑁫𑁪. 𑀓𑀤𑀮𑀺𑀫𑀺𑀕𑀲𑀜𑁆𑀙𑀦𑁆𑀦𑀸𑀢𑀺 ¶ ¶ 𑀓𑀤𑀮𑀺𑀫𑀺𑀕𑀘𑀫𑁆𑀫𑀧𑀘𑁆𑀘𑀢𑁆𑀣𑀭𑀡𑀢𑁆𑀣𑀢𑀸. 𑀲𑀚𑁆𑀚𑀸𑀢𑀺 𑀲𑀚𑁆𑀚𑀺𑀢𑀸 𑀲𑀬𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀸. 𑀕𑁄𑀦𑀓𑀲𑀦𑁆𑀣𑀢𑀸𑀢𑀺 𑀤𑀻𑀖𑀮𑁄𑀫𑀓𑁂𑀦 𑀓𑁄𑀚𑀯𑁂𑀦 𑀲𑀦𑁆𑀣𑀢𑀸.

𑁩𑁫𑁫. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂. 𑀯𑀸𑀲𑀽𑀧𑀕𑀢𑀸𑀢𑀺 𑀯𑀸𑀲𑀁 𑀉𑀧𑀕𑀢𑀸, 𑀲𑀬𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀢𑁆𑀢𑀸𑀬𑀟𑁆𑀠𑀭𑀢𑁆𑀢𑀸𑀬𑀸𑀢𑀺 𑀅𑀟𑁆𑀠𑀭𑀢𑁆𑀢𑀺𑀬𑀸 𑀉𑀧𑀕𑀢𑀸𑀬. 𑀢𑀢𑁄𑀢𑀺 𑀧𑀮𑁆𑀮𑀗𑁆𑀓𑀢𑁄.

𑁩𑁫𑁬. 𑀧𑁄𑀓𑁆𑀔𑀭𑀜𑁆𑀜𑀸𑀢𑀺 𑀧𑁄𑀓𑁆𑀔𑀭𑀡𑀺𑀬𑀸. 𑀳𑀭𑀺𑀢𑁂𑀢𑀺 ¶ 𑀦𑀻𑀮𑁂. 𑀲𑀤𑁆𑀤𑀮𑁂𑀢𑀺 𑀢𑀭𑀼𑀡𑀢𑀺𑀡𑀲𑀜𑁆𑀙𑀦𑁆𑀦𑁂. 𑀲𑀼𑀪𑁂𑀢𑀺 𑀲𑀼𑀤𑁆𑀥𑁂. 𑀲𑀼𑀪𑁂𑀢𑀺 𑀯𑀸 𑀢𑀲𑁆𑀲𑀸 𑀆𑀮𑀧𑀦𑀁. 𑀪𑀤𑁆𑀤𑁂, 𑀲𑀫𑀦𑁆𑀢𑀢𑁄 𑀳𑀭𑀺𑀢𑁂 𑀲𑀤𑁆𑀤𑀮𑁂 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀢𑁆𑀯𑀁 𑀕𑀦𑁆𑀢𑁆𑀯𑀸𑀦 𑀞𑀸𑀲𑀺 𑀢𑀺𑀝𑁆𑀞𑀲𑀻𑀢𑀺 𑀬𑁄𑀚𑀦𑀸.

𑁩𑁫𑁭. 𑀓𑀡𑁆𑀡𑀫𑀼𑀡𑁆𑀟𑁄𑀢𑀺 𑀔𑀡𑁆𑀟𑀺𑀢𑀓𑀡𑁆𑀡𑁄 𑀙𑀺𑀦𑁆𑀦𑀓𑀡𑁆𑀡𑁄. 𑀔𑀸𑀬𑀺𑀢𑀸 𑀆𑀲𑀻𑀢𑀺 𑀔𑀸𑀤𑀺𑀢𑀸 𑀅𑀳𑁄𑀲𑀺. 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸 𑀓𑀢𑀸𑀢𑀺 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑀢𑁆𑀢𑀸 𑀓𑀢𑀸. 𑀬𑀣𑀸 𑀧𑀼𑀭𑁂𑀢𑀺 𑀲𑀼𑀦𑀔𑁂𑀦 𑀔𑀸𑀤𑀦𑀢𑁄 𑀧𑀼𑀩𑁆𑀩𑁂 𑀯𑀺𑀬.

𑁩𑁫𑁮. 𑀢𑀢𑁄𑀢𑀺 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑀦𑀢𑁄 𑀧𑀘𑁆𑀙𑀸. 𑀅𑀗𑁆𑀕𑀧𑀘𑁆𑀘𑀗𑁆𑀕𑀻𑀢𑀺 𑀧𑀭𑀺𑀧𑀼𑀡𑁆𑀡𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀯𑀢𑀻. 𑀲𑀼𑀘𑀸𑀭𑀽𑀢𑀺 𑀲𑀼𑀝𑁆𑀞𑀼 𑀫𑀦𑁄𑀭𑀫𑀸. 𑀧𑀺𑀬𑀤𑀲𑁆𑀲𑀦𑀸𑀢𑀺 𑀤𑀲𑁆𑀲𑀦𑀻𑀬𑀸. 𑀆𑀬𑀸𑀲𑀻𑀢𑀺 𑀆𑀕𑀘𑁆𑀙𑀲𑀺.

𑀏𑀯𑀁 𑀢𑁂𑀦 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑀸 𑀲𑀸 𑀧𑁂𑀢𑀻 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀢𑀲𑁆𑀲 𑀓𑀣𑁂𑀦𑁆𑀢𑀻 𑁋

‘‘𑀓𑀺𑀫𑀺𑀮𑀸𑀬𑀁 𑀕𑀳𑀧𑀢𑀺, 𑀲𑀤𑁆𑀥𑁄 𑀆𑀲𑀺 𑀉𑀧𑀸𑀲𑀓𑁄;

𑀢𑀲𑁆𑀲𑀸𑀳𑀁 𑀪𑀭𑀺𑀬𑀸 𑀆𑀲𑀺𑀁, 𑀤𑀼𑀲𑁆𑀲𑀻𑀮𑀸 𑀅𑀢𑀺𑀘𑀸𑀭𑀺𑀦𑀻.

‘‘𑀲𑁄 𑀫𑀁 𑀅𑀢𑀺𑀘𑀭𑀫𑀸𑀦𑀸𑀬, 𑀲𑀸𑀫𑀺𑀓𑁄 𑀏𑀢𑀤𑀩𑁆𑀭𑀯𑀺;

‘𑀦𑁂𑀢𑀁 𑀢𑀁 𑀙𑀦𑁆𑀦𑀁 𑀧𑀢𑀺𑀭𑀽𑀧𑀁, 𑀬𑀁 𑀢𑁆𑀯𑀁 𑀅𑀢𑀺𑀘𑀭𑀸𑀲𑀺 𑀫𑀁’.

‘‘𑀲𑀸𑀳𑀁 𑀖𑁄𑀭𑀜𑁆𑀘 𑀲𑀧𑀣𑀁, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀺𑀲𑀁;

‘𑀦𑀸𑀳𑀁 𑀢𑀁 𑀅𑀢𑀺𑀘𑀭𑀸𑀫𑀺, 𑀓𑀸𑀬𑁂𑀦 𑀉𑀤 𑀘𑁂𑀢𑀲𑀸.

‘‘‘𑀲𑀘𑀸𑀳𑀁 ¶ ¶ 𑀢𑀁 𑀅𑀢𑀺𑀘𑀭𑀸𑀫𑀺, 𑀓𑀸𑀬𑁂𑀦 𑀉𑀤 𑀘𑁂𑀢𑀲𑀸;

𑀓𑀡𑁆𑀡𑀫𑀼𑀡𑁆𑀟𑁄𑀬𑀁 𑀲𑀼𑀦𑀔𑁄, 𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀼’.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁, 𑀫𑀼𑀲𑀸𑀯𑀸𑀤𑀲𑁆𑀲 𑀘𑀽𑀪𑀬𑀁;

𑀲𑀢𑁆𑀢𑁂𑀯 𑀯𑀲𑁆𑀲𑀲𑀢𑀸𑀦𑀺, 𑀅𑀦𑀼𑀪𑀽𑀢𑀁 𑀬𑀢𑁄 𑀳𑀺 𑀫𑁂;

𑀓𑀡𑁆𑀡𑀫𑀼𑀡𑁆𑀟𑁄 𑀘 𑀲𑀼𑀦𑀔𑁄, 𑀅𑀗𑁆𑀕𑀫𑀗𑁆𑀕𑀸𑀦𑀺 𑀔𑀸𑀤𑀢𑀻’’𑀢𑀺. 𑁋 𑀧𑀜𑁆𑀘 𑀕𑀸𑀣𑀸 𑀆𑀳;

𑁩𑁬𑁦-𑁧. 𑀢𑀢𑁆𑀣 ¶ 𑀓𑀺𑀫𑀺𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀅𑀢𑀺𑀘𑀸𑀭𑀺𑀦𑀻𑀢𑀺 𑀪𑀭𑀺𑀬𑀸 𑀳𑀺 𑀧𑀢𑀺𑀁 𑀅𑀢𑀺𑀓𑁆𑀓𑀫𑁆𑀫 𑀘𑀭𑀡𑀢𑁄 ‘‘𑀅𑀢𑀺𑀘𑀸𑀭𑀺𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀢𑀺𑀘𑀭𑀫𑀸𑀦𑀸𑀬 𑀫𑀬𑀺 𑀲𑁄 𑀲𑀸𑀫𑀺𑀓𑁄 𑀫𑀁 𑀏𑀢𑀤𑀩𑁆𑀭𑀯𑀻𑀢𑀺 𑀬𑁄𑀚𑀦𑀸. 𑀦𑁂𑀢𑀁 𑀙𑀦𑁆𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀦𑁂𑀢𑀁 𑀙𑀦𑁆𑀦𑀦𑁆𑀢𑀺 𑀦 𑀏𑀢𑀁 𑀬𑀼𑀢𑁆𑀢𑀁. 𑀦 𑀧𑀢𑀺𑀭𑀽𑀧𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀅𑀢𑀺𑀘𑀭𑀸𑀲𑀻𑀢𑀺 𑀅𑀢𑀺𑀘𑀭𑀲𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑀁 𑀫𑀁 𑀢𑁆𑀯𑀁 𑀅𑀢𑀺𑀘𑀭𑀲𑀺, 𑀢𑀢𑁆𑀣 𑀬𑀁 𑀅𑀢𑀺𑀘𑀭𑀡𑀁, 𑀦𑁂𑀢𑀁 𑀙𑀦𑁆𑀦𑀁 𑀦𑁂𑀢𑀁 𑀧𑀢𑀺𑀭𑀽𑀧𑀦𑁆𑀢𑀺 𑀅𑀢𑁆𑀣𑁄.

𑁩𑁬𑁨-𑁪. 𑀖𑁄𑀭𑀦𑁆𑀢𑀺 𑀤𑀸𑀭𑀼𑀡𑀁. 𑀲𑀧𑀣𑀦𑁆𑀢𑀺 𑀲𑀧𑀦𑀁. 𑀪𑀸𑀲𑀺𑀲𑀦𑁆𑀢𑀺 𑀅𑀪𑀸𑀲𑀺𑀁. 𑀲𑀘𑀸𑀳𑀦𑁆𑀢𑀺 𑀲𑀘𑁂 𑀅𑀳𑀁. 𑀢𑀦𑁆𑀢𑀺 𑀢𑁆𑀯𑀁. 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀲𑁆𑀲. 𑀫𑀼𑀲𑀸𑀯𑀸𑀤𑀲𑁆𑀲 𑀘𑀸𑀢𑀺 ‘‘𑀦𑀸𑀳𑀁 𑀢𑀁 𑀅𑀢𑀺𑀘𑀭𑀸𑀫𑀻’’𑀢𑀺 𑀯𑀼𑀢𑁆𑀢𑀫𑀼𑀲𑀸𑀯𑀸𑀤𑀲𑁆𑀲 𑀘. 𑀉𑀪𑀬𑀦𑁆𑀢𑀺 𑀉𑀪𑀬𑀲𑁆𑀲 𑀯𑀺𑀧𑀸𑀓𑀁. 𑀅𑀦𑀼𑀪𑀽𑀢𑀦𑁆𑀢𑀺 𑀅𑀦𑀼𑀪𑀽𑀬𑀫𑀸𑀦𑀁 𑀫𑀬𑀸𑀢𑀺 𑀅𑀢𑁆𑀣𑁄. 𑀬𑀢𑁄𑀢𑀺 𑀬𑀢𑁄 𑀧𑀸𑀧𑀓𑀫𑁆𑀫𑀢𑁄.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂𑀦 𑀅𑀢𑁆𑀢𑀦𑁄 𑀓𑀢𑀁 𑀉𑀧𑀓𑀸𑀭𑀁 𑀓𑀺𑀢𑁆𑀢𑁂𑀦𑁆𑀢𑀻 𑁋

‘‘𑀢𑁆𑀯𑀜𑁆𑀘 𑀤𑁂𑀯 𑀩𑀳𑀼𑀓𑀸𑀭𑁄, 𑀅𑀢𑁆𑀣𑀸𑀬 𑀫𑁂 𑀇𑀥𑀸𑀕𑀢𑁄;

𑀲𑀼𑀫𑀼𑀢𑁆𑀢𑀸𑀳𑀁 𑀓𑀡𑁆𑀡𑀫𑀼𑀡𑁆𑀟𑀲𑁆𑀲, 𑀅𑀲𑁄𑀓𑀸 𑀅𑀓𑀼𑀢𑁄𑀪𑀬𑀸.

‘‘𑀢𑀸𑀳𑀁 𑀤𑁂𑀯 𑀦𑀫𑀲𑁆𑀲𑀸𑀫𑀺, 𑀬𑀸𑀘𑀸𑀫𑀺 𑀧𑀜𑁆𑀚𑀮𑀻𑀓𑀢𑀸;

𑀪𑀼𑀜𑁆𑀚 𑀅𑀫𑀸𑀦𑀼𑀲𑁂 𑀓𑀸𑀫𑁂, 𑀭𑀫 𑀤𑁂𑀯 𑀫𑀬𑀸 𑀲𑀳𑀸’’𑀢𑀺. 𑁋

𑀤𑁆𑀯𑁂 𑀕𑀸𑀣𑀸 𑀆𑀳. 𑀢𑀢𑁆𑀣 𑀤𑁂𑀯𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀓𑀡𑁆𑀡𑀫𑀼𑀡𑁆𑀟𑀲𑁆𑀲𑀸𑀢𑀺 𑀓𑀡𑁆𑀡𑀫𑀼𑀡𑁆𑀟𑀢𑁄. 𑀦𑀺𑀲𑁆𑀲𑀓𑁆𑀓𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀅𑀣 𑀭𑀸𑀚𑀸 𑀢𑀢𑁆𑀣 𑀯𑀸𑀲𑁂𑀦 𑀦𑀺𑀩𑁆𑀩𑀺𑀦𑁆𑀦𑀫𑀸𑀦𑀲𑁄 𑀕𑀫𑀦𑀚𑁆𑀛𑀸𑀲𑀬𑀁 𑀧𑀓𑀸𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 ¶ 𑀧𑁂𑀢𑀻 𑀭𑀜𑁆𑀜𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀢𑀢𑁆𑀣𑁂𑀯𑀲𑁆𑀲 ¶ 𑀯𑀸𑀲𑀁 𑀬𑀸𑀘𑀦𑁆𑀢𑀻 ‘‘𑀢𑀸𑀳𑀁, 𑀤𑁂𑀯, 𑀦𑀫𑀲𑁆𑀲𑀸𑀫𑀻’’𑀢𑀺 𑀕𑀸𑀣𑀫𑀸𑀳.

𑀧𑀼𑀦 ¶ 𑀭𑀸𑀚𑀸 𑀏𑀓𑀁𑀲𑁂𑀦 𑀦𑀕𑀭𑀁 𑀕𑀦𑁆𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀯𑁂𑀤𑁂𑀦𑁆𑀢𑁄 𑁋

‘‘𑀪𑀼𑀢𑁆𑀢𑀸 𑀅𑀫𑀸𑀦𑀼𑀲𑀸 𑀓𑀸𑀫𑀸, 𑀭𑀫𑀺𑀢𑁄𑀫𑁆𑀳𑀺 𑀢𑀬𑀸 𑀲𑀳;

𑀢𑀸𑀳𑀁 𑀲𑀼𑀪𑀕𑁂 𑀬𑀸𑀘𑀸𑀫𑀺, 𑀔𑀺𑀧𑁆𑀧𑀁 𑀧𑀝𑀺𑀦𑀬𑀸𑀳𑀺 𑀫’’𑀦𑁆𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀲𑀼𑀪𑀕𑁂𑀢𑀺 𑀲𑀼𑀪𑀕𑀬𑀼𑀢𑁆𑀢𑁂. 𑀧𑀝𑀺𑀦𑀬𑀸𑀳𑀺 𑀫𑀦𑁆𑀢𑀺 𑀫𑀬𑁆𑀳𑀁 𑀦𑀕𑀭𑀫𑁂𑀯 𑀫𑀁 𑀧𑀝𑀺𑀦𑁂𑀳𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀅𑀣 𑀲𑀸 𑀯𑀺𑀫𑀸𑀦𑀧𑁂𑀢𑀻 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀯𑀺𑀬𑁄𑀕𑀁 𑀅𑀲𑀳𑀫𑀸𑀦𑀸 𑀲𑁄𑀓𑀸𑀢𑀼𑀭𑀢𑀸𑀬 𑀩𑁆𑀬𑀸𑀓𑀼𑀮𑀳𑀤𑀬𑀸 𑀯𑁂𑀥𑀫𑀸𑀦𑀲𑀭𑀻𑀭𑀸 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀆𑀬𑀸𑀘𑀺𑀢𑁆𑀯𑀸𑀧𑀺 𑀢𑀁 𑀢𑀢𑁆𑀣 𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀩𑀳𑀽𑀳𑀺 𑀫𑀳𑀸𑀭𑀳𑁂𑀳𑀺 𑀭𑀢𑀦𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀸𑀦𑀁 𑀦𑀕𑀭𑀁 𑀦𑁂𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀭𑀸𑀚𑀸 𑀧𑀦 𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀩𑁆𑀩𑀢𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀇𑀢𑁆𑀣𑀺𑀁 𑀲𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸 𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀲𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀣𑁂𑀭𑀲𑁆𑀲 𑀓𑀣𑁂𑀲𑀺. 𑀣𑁂𑀭𑁄 𑀢𑀸𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀧𑀯𑀢𑁆𑀢𑀺𑀁 𑀣𑁂𑀭𑁄 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑁄 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀧𑀸𑀧𑀢𑁄 𑀑𑀭𑀫𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀻𑀢𑀺.

𑀓𑀡𑁆𑀡𑀫𑀼𑀡𑁆𑀟𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀠𑀼𑀩𑁆𑀩𑀭𑀺𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀳𑀼 𑀭𑀸𑀚𑀸 𑀩𑁆𑀭𑀳𑁆𑀫𑀤𑀢𑁆𑀢𑁄𑀢𑀺 𑀇𑀤𑀁 𑀉𑀩𑁆𑀩𑀭𑀺𑀧𑁂𑀢𑀯𑀢𑁆𑀣𑀼𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀉𑀧𑀸𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺 ¶ . 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀸𑀬 𑀉𑀧𑀸𑀲𑀺𑀓𑀸𑀬 𑀲𑀸𑀫𑀺𑀓𑁄 𑀓𑀸𑀮𑀫𑀓𑀸𑀲𑀺. 𑀲𑀸 𑀧𑀢𑀺𑀯𑀺𑀬𑁄𑀕𑀤𑀼𑀓𑁆𑀔𑀸𑀢𑀼𑀭𑀸 𑀲𑁄𑀘𑀦𑁆𑀢𑀻 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀭𑁄𑀤𑀢𑀺. 𑀪𑀕𑀯𑀸 𑀢𑀲𑁆𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀼𑀢𑁆𑀯𑀸 ¶ 𑀢𑀲𑁆𑀲𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 ¶ 𑀦𑀺𑀲𑀻𑀤𑀺. 𑀉𑀧𑀸𑀲𑀺𑀓𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁, 𑀉𑀧𑀸𑀲𑀺𑀓𑁂, 𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀕𑀯𑀸, 𑀧𑀺𑀬𑀯𑀺𑀧𑁆𑀧𑀬𑁄𑀕𑁂𑀦 𑀲𑁄𑀘𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸 𑀲𑁄𑀓𑀁 𑀅𑀧𑀦𑁂𑀢𑀼𑀓𑀸𑀫𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀧𑀜𑁆𑀘𑀸𑀮𑀭𑀝𑁆𑀞𑁂 𑀓𑀧𑀺𑀮𑀦𑀕𑀭𑁂 𑀘𑀽𑀴𑀦𑀻𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀧𑀚𑀸𑀬 𑀳𑀺𑀢𑀓𑀭𑀡𑀦𑀺𑀭𑀢𑁄 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀫𑀸𑀦𑁄 𑀓𑀤𑀸𑀘𑀺 ‘‘𑀅𑀢𑁆𑀢𑀦𑁄 𑀭𑀚𑁆𑀚𑁂 𑀓𑀺𑀁 𑀯𑀤𑀦𑁆𑀢𑀻’’𑀢𑀺 𑀲𑁄𑀢𑀼𑀓𑀸𑀫𑁄 𑀢𑀼𑀦𑁆𑀦𑀯𑀸𑀬𑀯𑁂𑀲𑀁 𑀕𑀳𑁂𑀢𑁆𑀯𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀢𑁄 𑀕𑀸𑀫𑀁 𑀚𑀦𑀧𑀤𑀢𑁄 𑀚𑀦𑀧𑀤𑀁 𑀯𑀺𑀘𑀭𑀺𑀢𑁆𑀯𑀸 𑀲𑀩𑁆𑀩𑀭𑀚𑁆𑀚𑀁 𑀅𑀓𑀡𑁆𑀝𑀓𑀁 𑀅𑀦𑀼𑀧𑀧𑀻𑀴𑀁 𑀫𑀦𑀼𑀲𑁆𑀲𑁂 𑀲𑀫𑁆𑀫𑁄𑀤𑀫𑀸𑀦𑁂 𑀅𑀧𑀸𑀭𑀼𑀢𑀖𑀭𑁂 𑀫𑀜𑁆𑀜𑁂 𑀯𑀺𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀦𑀕𑀭𑀸𑀪𑀺𑀫𑀼𑀔𑁄 𑀆𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑁂 𑀏𑀓𑀺𑀲𑁆𑀲𑀸 𑀯𑀺𑀥𑀯𑀸𑀬 𑀤𑀼𑀕𑁆𑀕𑀢𑀺𑀢𑁆𑀣𑀺𑀬𑀸 𑀕𑁂𑀳𑀁 𑀧𑀸𑀯𑀺𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀓𑁄 𑀦𑀼 𑀢𑁆𑀯𑀁, 𑀅𑀬𑁆𑀬𑁄, 𑀓𑀼𑀢𑁄 𑀯𑀸 𑀆𑀕𑀢𑁄𑀲𑀻’’𑀢𑀺? ‘‘𑀅𑀳𑀁 𑀢𑀼𑀦𑁆𑀦𑀯𑀸𑀬𑁄, 𑀪𑀤𑁆𑀤𑁂, 𑀪𑀢𑀺𑀬𑀸 𑀢𑀼𑀦𑁆𑀦𑀯𑀸𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀸𑀫𑀺. 𑀬𑀤𑀺 𑀢𑀼𑀫𑁆𑀳𑀸𑀓𑀁 𑀢𑀼𑀦𑁆𑀦𑀯𑀸𑀬𑀓𑀫𑁆𑀫𑀁 𑀅𑀢𑁆𑀣𑀺, 𑀪𑀢𑁆𑀢𑀜𑁆𑀘 𑀯𑁂𑀢𑀦𑀜𑁆𑀘 𑀤𑁂𑀣, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺. ‘‘𑀦𑀢𑁆𑀣𑀫𑁆𑀳𑀸𑀓𑀁 𑀓𑀫𑁆𑀫𑀁 𑀪𑀢𑁆𑀢𑀯𑁂𑀢𑀦𑀁 𑀯𑀸, 𑀅𑀜𑁆𑀜𑁂𑀲𑀁 𑀓𑀭𑁄𑀳𑀺, 𑀅𑀬𑁆𑀬𑀸’’𑀢𑀺. 𑀲𑁄 𑀢𑀢𑁆𑀣 𑀓𑀢𑀺𑀧𑀸𑀳𑀁 𑀯𑀲𑀦𑁆𑀢𑁄 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀢𑀲𑁆𑀲𑀸 𑀥𑀻𑀢𑀭𑀁 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀆𑀳 𑁋 ‘‘𑀅𑀬𑀁 𑀤𑀸𑀭𑀺𑀓𑀸 𑀓𑀺𑀁 𑀓𑁂𑀦𑀘𑀺 𑀓𑀢𑀧𑀭𑀺𑀕𑁆𑀕𑀳𑀸, 𑀉𑀤𑀸𑀳𑀼 𑀅𑀓𑀢𑀧𑀭𑀺𑀕𑁆𑀕𑀳𑀸. 𑀲𑀘𑁂 𑀧𑀦 𑀓𑁂𑀦𑀘𑀺 𑀅𑀓𑀢𑀧𑀭𑀺𑀕𑁆𑀕𑀳𑀸, 𑀇𑀫𑀁 𑀫𑀬𑁆𑀳𑀁 𑀤𑁂𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀼𑀔𑁂𑀦 𑀚𑀻𑀯𑀦𑀽𑀧𑀸𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺. ‘‘𑀲𑀸𑀥𑀼, 𑀅𑀬𑁆𑀬𑀸’’𑀢𑀺 𑀲𑀸 𑀢𑀲𑁆𑀲 𑀢𑀁 𑀅𑀤𑀸𑀲𑀺.

𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀢𑀲𑁆𑀲𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀅𑀳𑀁 𑀓𑀢𑀺𑀧𑀸𑀳𑁂𑀦𑁂𑀯 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺. 𑀪𑀤𑁆𑀤𑁂 ¶ , 𑀢𑁆𑀯𑀁 𑀫𑀸 𑀉𑀓𑁆𑀓𑀡𑁆𑀞𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀦𑁆𑀢𑁆𑀯𑀸, 𑀦𑀕𑀭𑀲𑁆𑀲 𑀘 𑀢𑀲𑁆𑀲 𑀕𑀸𑀫𑀲𑁆𑀲 𑀘 𑀅𑀦𑁆𑀢𑀭𑁂 𑀫𑀕𑁆𑀕𑀁 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀤𑀸𑀭𑀺𑀓𑀁 𑀓𑀳𑀸𑀧𑀡𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀓𑀮𑀲𑁂𑀳𑀺 𑀦𑁆𑀳𑀸𑀧𑁂𑀢𑁆𑀯𑀸 ‘‘𑀉𑀩𑁆𑀩𑀭𑀻’’𑀢𑀺 𑀦𑀸𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀜𑁆𑀘 𑀕𑀸𑀫𑀁 𑀢𑀲𑁆𑀲𑀸 𑀜𑀸𑀢𑀻𑀦𑀁 𑀤𑀢𑁆𑀯𑀸 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀢𑀁 𑀦𑀕𑀭𑀁 𑀆𑀦𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀫𑀸𑀦𑁄 𑀬𑀸𑀯𑀚𑀻𑀯𑀁 𑀭𑀚𑁆𑀚𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 ¶ 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀓𑀢𑁂 𑀘 𑀢𑀲𑁆𑀫𑀺𑀁, 𑀓𑀢𑁂 𑀘 𑀲𑀭𑀻𑀭𑀓𑀺𑀘𑁆𑀘𑁂 𑀉𑀩𑁆𑀩𑀭𑀻 𑀧𑀢𑀺𑀯𑀺𑀬𑁄𑀕𑁂𑀦 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀳𑀤𑀬𑀸 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀩𑀳𑀽 𑀤𑀺𑀯𑀲𑁂 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀭𑀜𑁆𑀜𑁄 𑀕𑀼𑀡𑁂 𑀓𑀺𑀢𑁆𑀢𑁂𑀢𑁆𑀯𑀸 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑀸 𑀯𑀺𑀬 𑀓𑀦𑁆𑀤𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑀆𑀴𑀸𑀳𑀦𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺.

𑀢𑁂𑀦 ¶ 𑀘 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀥𑀺𑀕𑀢𑀚𑁆𑀛𑀸𑀦𑀸𑀪𑀺𑀜𑁆𑀜𑁄 𑀳𑀺𑀫𑀯𑀦𑁆𑀢𑀲𑁆𑀲 𑀲𑀸𑀫𑀦𑁆𑀢𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀭𑀦𑁆𑀢𑁄 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀁 𑀉𑀩𑁆𑀩𑀭𑀺𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀢𑀢𑁆𑀣 𑀞𑀺𑀢𑁂 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀲𑀺𑀤𑀁 𑀆𑀴𑀸𑀳𑀦𑀁, 𑀓𑀲𑁆𑀲𑀢𑁆𑀣𑀸𑀬 𑀘𑀸𑀬𑀁 𑀇𑀢𑁆𑀣𑀻 ‘𑀩𑁆𑀭𑀳𑁆𑀫𑀤𑀢𑁆𑀢, 𑀩𑁆𑀭𑀳𑁆𑀫𑀤𑀢𑁆𑀢𑀸’𑀢𑀺 𑀓𑀦𑁆𑀤𑀦𑁆𑀢𑀻 𑀧𑀭𑀺𑀤𑁂𑀯𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀧𑀜𑁆𑀘𑀸𑀮𑀸𑀦𑀁 𑀭𑀸𑀚𑀸, 𑀲𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀓𑀸𑀮𑀫𑀓𑀸𑀲𑀺, 𑀢𑀲𑁆𑀲𑀺𑀤𑀁 𑀆𑀴𑀸𑀳𑀦𑀁, 𑀢𑀲𑁆𑀲 𑀅𑀬𑀁 𑀅𑀕𑁆𑀕𑀫𑀳𑁂𑀲𑀻 𑀉𑀩𑁆𑀩𑀭𑀻 𑀦𑀸𑀫 ‘𑀩𑁆𑀭𑀳𑁆𑀫𑀤𑀢𑁆𑀢, 𑀩𑁆𑀭𑀳𑁆𑀫𑀤𑀢𑁆𑀢𑀸’𑀢𑀺 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑀻 𑀧𑀭𑀺𑀤𑁂𑀯𑀢𑀻’’𑀢𑀺 𑀆𑀳𑀁𑀲𑀼. 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀅𑀳𑀼 𑀭𑀸𑀚𑀸 𑀩𑁆𑀭𑀳𑁆𑀫𑀤𑀢𑁆𑀢𑁄, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑁄;

𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑀸, 𑀭𑀸𑀚𑀸 𑀓𑀸𑀮𑀫𑀓𑁆𑀭𑀼𑀩𑁆𑀩𑀣.

‘‘𑀢𑀲𑁆𑀲 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸, 𑀪𑀭𑀺𑀬𑀸 𑀓𑀦𑁆𑀤𑀢𑀺 𑀉𑀩𑁆𑀩𑀭𑀺;

𑀩𑁆𑀭𑀳𑁆𑀫𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀓𑀦𑁆𑀤𑀢𑀺.

‘‘𑀇𑀲𑀺 ¶ 𑀘 𑀢𑀢𑁆𑀣 𑀆𑀕𑀘𑁆𑀙𑀺, 𑀲𑀫𑁆𑀧𑀦𑁆𑀦𑀘𑀭𑀡𑁄 𑀫𑀼𑀦𑀺;

𑀲𑁄 𑀘 𑀢𑀢𑁆𑀣 𑀅𑀧𑀼𑀘𑁆𑀙𑀺𑀢𑁆𑀣, 𑀬𑁂 𑀢𑀢𑁆𑀣 𑀲𑀼 𑀲𑀫𑀸𑀕𑀢𑀸.

‘‘‘𑀓𑀲𑁆𑀲 𑀇𑀤𑀁 𑀆𑀴𑀸𑀳𑀦𑀁, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀁;

𑀓𑀲𑁆𑀲𑀸𑀬𑀁 𑀓𑀦𑁆𑀤𑀢𑀺 𑀪𑀭𑀺𑀬𑀸, 𑀇𑀢𑁄 𑀤𑀽𑀭𑀕𑀢𑀁 𑀧𑀢𑀺𑀁;

𑀩𑁆𑀭𑀳𑁆𑀫𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀓𑀦𑁆𑀤𑀢𑀺’.

‘‘𑀢𑁂 𑀘 𑀢𑀢𑁆𑀣 𑀯𑀺𑀬𑀸𑀓𑀁𑀲𑀼, 𑀬𑁂 𑀢𑀢𑁆𑀣 𑀲𑀼 𑀲𑀫𑀸𑀕𑀢𑀸;

𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀤𑁆𑀤𑀦𑁆𑀢𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀫𑀸𑀭𑀺𑀲.

‘‘𑀢𑀲𑁆𑀲 ¶ 𑀇𑀤𑀁 𑀆𑀴𑀸𑀳𑀦𑀁, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀁;

𑀢𑀲𑁆𑀲𑀸𑀬𑀁 𑀓𑀦𑁆𑀤𑀢𑀺 𑀪𑀭𑀺𑀬𑀸, 𑀇𑀢𑁄 𑀤𑀽𑀭𑀕𑀢𑀁 𑀧𑀢𑀺𑀁;

𑀩𑁆𑀭𑀳𑁆𑀫𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀓𑀦𑁆𑀤𑀢𑀻’’𑀢𑀺. 𑁋 𑀙 𑀕𑀸𑀣𑀸 𑀞𑀧𑁂𑀲𑀼𑀁;

𑁩𑁬𑁮-𑁯. 𑀢𑀢𑁆𑀣 ¶ 𑀅𑀳𑀽𑀢𑀺 𑀅𑀳𑁄𑀲𑀺. 𑀧𑀜𑁆𑀘𑀸𑀮𑀸𑀦𑀦𑁆𑀢𑀺 𑀧𑀜𑁆𑀘𑀸𑀮𑀭𑀝𑁆𑀞𑀯𑀸𑀲𑀻𑀦𑀁, 𑀧𑀜𑁆𑀘𑀸𑀮𑀭𑀝𑁆𑀞𑀲𑁆𑀲𑁂𑀯 𑀯𑀸. 𑀏𑀓𑁄𑀧𑀺 𑀳𑀺 𑀚𑀦𑀧𑀤𑁄 𑀚𑀦𑀧𑀤𑀺𑀓𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀯𑀲𑁂𑀦 𑀭𑀼𑀴𑁆𑀳𑀺𑀬𑀸 ‘‘𑀧𑀜𑁆𑀘𑀸𑀮𑀸𑀦’’𑀦𑁆𑀢𑀺 𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺. 𑀭𑀣𑁂𑀲𑀪𑁄𑀢𑀺 𑀭𑀣𑁂𑀲𑀼 𑀉𑀲𑀪𑀲𑀤𑀺𑀲𑁄, 𑀫𑀳𑀸𑀭𑀣𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀆𑀴𑀸𑀳𑀦𑀦𑁆𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀲𑀭𑀻𑀭𑀲𑁆𑀲 𑀤𑀟𑁆𑀠𑀝𑁆𑀞𑀸𑀦𑀁.

𑁩𑁭𑁦. 𑀇𑀲𑀻𑀢𑀺 𑀛𑀸𑀦𑀸𑀤𑀻𑀦𑀁 𑀕𑀼𑀡𑀸𑀦𑀁 𑀏𑀲𑀦𑀝𑁆𑀞𑁂𑀦 𑀇𑀲𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀩𑁆𑀩𑀭𑀺𑀬𑀸 𑀞𑀺𑀢𑀝𑁆𑀞𑀸𑀦𑁂, 𑀲𑀼𑀲𑀸𑀦𑁂𑀢𑀺 𑀅𑀢𑁆𑀣𑁄. 𑀆𑀕𑀘𑁆𑀙𑀻𑀢𑀺 𑀅𑀕𑀫𑀸𑀲𑀺. 𑀲𑀫𑁆𑀧𑀦𑁆𑀦𑀘𑀭𑀡𑁄𑀢𑀺 𑀲𑀻𑀮𑀲𑀫𑁆𑀧𑀤𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀤𑁆𑀥𑀸𑀤𑀬𑁄 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀛𑀸𑀦𑀸𑀦𑀻𑀢𑀺 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀘𑀭𑀡𑀲𑀗𑁆𑀔𑀸𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀫𑀼𑀦𑀻𑀢𑀺 𑀅𑀢𑁆𑀢𑀳𑀺𑀢𑀜𑁆𑀘 𑀧𑀭𑀳𑀺𑀢𑀜𑁆𑀘 𑀫𑀼𑀦𑀸𑀢𑀺 𑀚𑀸𑀦𑀸𑀢𑀻𑀢𑀺 𑀫𑀼𑀦𑀺. 𑀲𑁄 𑀘 𑀢𑀢𑁆𑀣 𑀅𑀧𑀼𑀘𑁆𑀙𑀺𑀢𑁆𑀣𑀸𑀢𑀺 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁂 𑀚𑀦𑁂 𑀧𑀝𑀺𑀧𑀼𑀘𑁆𑀙𑀺. 𑀬𑁂 𑀢𑀢𑁆𑀣 𑀲𑀼 𑀲𑀫𑀸𑀕𑀢𑀸𑀢𑀺 𑀬𑁂 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀲𑀼𑀲𑀸𑀦𑁂 𑀲𑀫𑀸𑀕𑀢𑀸. 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀬𑁂 𑀢𑀢𑁆𑀣𑀸𑀲𑀼𑀁 𑀲𑀫𑀸𑀕𑀢𑀸’’𑀢𑀺 𑀯𑀸 𑀧𑀸𑀞𑁄. 𑀆𑀲𑀼𑀦𑁆𑀢𑀺 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁩𑁭𑁧. 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀦𑁆𑀢𑀺 ¶ 𑀦𑀸𑀦𑀸𑀯𑀺𑀥𑁂𑀳𑀺 𑀕𑀦𑁆𑀥𑁂𑀳𑀺 𑀲𑀫𑀦𑁆𑀢𑀢𑁄 𑀏𑀭𑀺𑀢𑀁 𑀉𑀧𑀯𑀸𑀲𑀺𑀢𑀁. 𑀇𑀢𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑀢𑁄. 𑀤𑀽𑀭𑀕𑀢𑀦𑁆𑀢𑀺 𑀧𑀭𑀮𑁄𑀓𑀁 𑀕𑀢𑀢𑁆𑀢𑀸 𑀯𑀤𑀢𑀺. 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀓𑀦𑁆𑀤𑀢𑀻𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀏𑀯𑀁 𑀦𑀸𑀫𑀲𑀁𑀓𑀺𑀢𑁆𑀢𑀦𑀁 𑀓𑀢𑁆𑀯𑀸 𑀧𑀭𑀺𑀤𑁂𑀯𑀦𑀯𑀲𑁂𑀦 𑀅𑀯𑁆𑀳𑀸𑀬𑀢𑀺.

𑁩𑁭𑁨-𑁩. 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀤𑁆𑀤𑀦𑁆𑀢𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀫𑀸𑀭𑀺𑀲𑀸𑀢𑀺 𑀫𑀸𑀭𑀺𑀲, 𑀦𑀺𑀭𑀸𑀫𑀬𑀓𑀸𑀬𑀘𑀺𑀢𑁆𑀢 𑀫𑀳𑀸𑀫𑀼𑀦𑀺 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀇𑀤𑀁 𑀆𑀴𑀸𑀳𑀦𑀁, 𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀅𑀬𑀁 𑀪𑀭𑀺𑀬𑀸, 𑀪𑀤𑁆𑀤𑀁 𑀢𑁂 𑀢𑀲𑁆𑀲 𑀘 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀤𑁆𑀤𑀁 𑀳𑁄𑀢𑀼, 𑀢𑀸𑀤𑀺𑀲𑀸𑀦𑀁 𑀫𑀳𑁂𑀲𑀻𑀦𑀁 𑀳𑀺𑀢𑀸𑀦𑀼𑀘𑀺𑀦𑁆𑀢𑀦𑁂𑀦 𑀧𑀭𑀮𑁄𑀓𑁂 𑀞𑀺𑀢𑀸𑀦𑀫𑁆𑀧𑀺 𑀳𑀺𑀢𑀲𑀼𑀔𑀁 𑀳𑁄𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 ¶ 𑀲𑁄 𑀢𑀸𑀧𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀉𑀩𑁆𑀩𑀭𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑁄𑀓𑀯𑀺𑀦𑁄𑀤𑀦𑀢𑁆𑀣𑀁 𑁋

‘‘𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲𑀦𑀸𑀫𑀓𑀸;

𑀇𑀫𑀲𑁆𑀫𑀺𑀁 𑀆𑀴𑀸𑀳𑀦𑁂 𑀤𑀟𑁆𑀠𑀸, 𑀢𑁂𑀲𑀁 𑀓𑀫𑀦𑀼𑀲𑁄𑀘𑀲𑀻’’𑀢𑀺. 𑁋

𑀕𑀸𑀣𑀫𑀸𑀳 ¶ . 𑀢𑀢𑁆𑀣 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀙𑀲𑀳𑀲𑁆𑀲𑀸𑀥𑀺𑀓𑀅𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸. 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲𑀦𑀸𑀫𑀓𑀸𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑁄𑀢𑀺 𑀏𑀯𑀁𑀦𑀸𑀫𑀓𑀸. 𑀢𑁂𑀲𑀁 𑀓𑀫𑀦𑀼𑀲𑁄𑀘𑀲𑀻𑀢𑀺 𑀢𑁂𑀲𑀁 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸𑀢𑀸𑀦𑀁 𑀩𑁆𑀭𑀳𑁆𑀫𑀤𑀢𑁆𑀢𑀸𑀦𑀁 𑀓𑀢𑀫𑀁 𑀩𑁆𑀭𑀳𑁆𑀫𑀤𑀢𑁆𑀢𑀁 𑀢𑁆𑀯𑀁 𑀅𑀦𑀼𑀲𑁄𑀘𑀲𑀺, 𑀓𑀢𑀫𑀁 𑀧𑀝𑀺𑀘𑁆𑀘 𑀢𑁂 𑀲𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺 𑀧𑀼𑀘𑁆𑀙𑀺.

𑀏𑀯𑀁 𑀧𑀦 𑀢𑁂𑀦 𑀇𑀲𑀺𑀦𑀸 𑀧𑀼𑀘𑁆𑀙𑀺𑀢𑀸 𑀉𑀩𑁆𑀩𑀭𑀻 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀩𑁆𑀭𑀳𑁆𑀫𑀤𑀢𑁆𑀢𑀁 𑀆𑀘𑀺𑀓𑁆𑀔𑀦𑁆𑀢𑀻 𑁋

‘‘𑀬𑁄 𑀭𑀸𑀚𑀸 𑀘𑀽𑀴𑀦𑀻𑀧𑀼𑀢𑁆𑀢𑁄, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑁄;

𑀢𑀁 𑀪𑀦𑁆𑀢𑁂 𑀅𑀦𑀼𑀲𑁄𑀘𑀸𑀫𑀺, 𑀪𑀢𑁆𑀢𑀸𑀭𑀁 𑀲𑀩𑁆𑀩𑀓𑀸𑀫𑀤’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀘𑀽𑀴𑀦𑀻𑀧𑀼𑀢𑁆𑀢𑁄𑀢𑀺 𑀏𑀯𑀁𑀦𑀸𑀫𑀲𑁆𑀲 𑀭𑀜𑁆𑀜𑁄 𑀧𑀼𑀢𑁆𑀢𑁄. 𑀲𑀩𑁆𑀩𑀓𑀸𑀫𑀤𑀦𑁆𑀢𑀺 ¶ 𑀫𑀬𑁆𑀳𑀁 𑀲𑀩𑁆𑀩𑀲𑁆𑀲 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀲𑁆𑀲 𑀤𑀸𑀢𑀸𑀭𑀁, 𑀲𑀩𑁆𑀩𑁂𑀲𑀁 𑀯𑀸 𑀲𑀢𑁆𑀢𑀸𑀦𑀁 𑀇𑀘𑁆𑀙𑀺𑀢𑀤𑀸𑀬𑀓𑀁.

𑀏𑀯𑀁 𑀉𑀩𑁆𑀩𑀭𑀺𑀬𑀸 𑀯𑀼𑀢𑁆𑀢𑁂 𑀧𑀼𑀦 𑀢𑀸𑀧𑀲𑁄 𑁋

‘‘𑀲𑀩𑁆𑀩𑁂𑀯𑀸𑀳𑁂𑀲𑀼𑀁 𑀭𑀸𑀚𑀸𑀦𑁄, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲𑀦𑀸𑀫𑀓𑀸;

𑀲𑀩𑁆𑀩𑁂𑀯 𑀘𑀽𑀴𑀦𑀻𑀧𑀼𑀢𑁆𑀢𑀸, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑀸.

‘‘𑀲𑀩𑁆𑀩𑁂𑀲𑀁 𑀅𑀦𑀼𑀧𑀼𑀩𑁆𑀩𑁂𑀦, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺;

𑀓𑀲𑁆𑀫𑀸 𑀧𑀼𑀭𑀺𑀫𑀓𑁂 𑀳𑀺𑀢𑁆𑀯𑀸, 𑀧𑀘𑁆𑀙𑀺𑀫𑀁 𑀅𑀦𑀼𑀲𑁄𑀘𑀲𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑁩𑁭𑁬. 𑀢𑀢𑁆𑀣 𑀲𑀩𑁆𑀩𑁂𑀯𑀸𑀳𑁂𑀲𑀼𑀦𑁆𑀢𑀺 𑀲𑀩𑁆𑀩𑁂𑀯 𑀢𑁂 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸 𑀭𑀸𑀚𑀸𑀦𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀦𑀸𑀫𑀓𑀸 𑀘𑀽𑀴𑀦𑀻𑀧𑀼𑀢𑁆𑀢𑀸 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑀸𑀯 𑀅𑀳𑁂𑀲𑀼𑀁. 𑀇𑀫𑁂 𑀭𑀸𑀚𑀪𑀸𑀯𑀸𑀤𑀬𑁄 𑀯𑀺𑀲𑁂𑀲𑀸 𑀢𑁂𑀲𑀼 𑀏𑀓𑀲𑁆𑀲𑀸𑀧𑀺 𑀦𑀸𑀳𑁂𑀲𑀼𑀁.

𑁩𑁭𑁭. 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀻𑀢𑀺 𑀢𑁆𑀯𑀜𑁆𑀘 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑀁 𑀅𑀓𑀸𑀲𑀺, 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸𑀢𑀺 𑀕𑀼𑀡𑀢𑁄 𑀘 𑀲𑀸𑀫𑀺𑀓𑀪𑀸𑀯𑀢𑁄 ¶ 𑀘 𑀅𑀯𑀺𑀲𑀺𑀝𑁆𑀞𑁂𑀲𑀼 𑀏𑀢𑁆𑀢𑀓𑁂𑀲𑀼 𑀚𑀦𑁂𑀲𑀼 𑀧𑀼𑀭𑀺𑀫𑀓𑁂 𑀭𑀸𑀚𑀸𑀦𑁄 𑀧𑀳𑀸𑀬 𑀧𑀘𑁆𑀙𑀺𑀫𑀁 𑀏𑀓𑀁𑀫𑁂𑀯 𑀓𑀲𑁆𑀫𑀸 𑀓𑁂𑀦 𑀓𑀸𑀭𑀡𑁂𑀦 𑀅𑀦𑀼𑀲𑁄𑀘𑀲𑀻𑀢𑀺 𑀧𑀼𑀘𑁆𑀙𑀺.

𑀢𑀁 ¶ 𑀲𑀼𑀢𑁆𑀯𑀸 𑀉𑀩𑁆𑀩𑀭𑀻 𑀲𑀁𑀯𑁂𑀕𑀚𑀸𑀢𑀸 𑀧𑀼𑀦 𑀢𑀸𑀧𑀲𑀁 𑁋

‘‘𑀆𑀢𑀼𑀫𑁂 𑀇𑀢𑁆𑀣𑀺𑀪𑀽𑀢𑀸𑀬, 𑀤𑀻𑀖𑀭𑀢𑁆𑀢𑀸𑀬 𑀫𑀸𑀭𑀺𑀲;

𑀬𑀲𑁆𑀲𑀸 𑀫𑁂 𑀇𑀢𑁆𑀣𑀺𑀪𑀽𑀢𑀸𑀬, 𑀲𑀁𑀲𑀸𑀭𑁂 𑀩𑀳𑀼𑀪𑀸𑀲𑀲𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀆𑀢𑀼𑀫𑁂𑀢𑀺 𑀅𑀢𑁆𑀢𑀦𑀺. 𑀇𑀢𑁆𑀣𑀺𑀪𑀽𑀢𑀸𑀬𑀸𑀢𑀺 𑀇𑀢𑁆𑀣𑀺𑀪𑀸𑀯𑀁 𑀉𑀧𑀕𑀢𑀸𑀬. 𑀤𑀻𑀖𑀭𑀢𑁆𑀢𑀸𑀬𑀸𑀢𑀺 𑀤𑀻𑀖𑀭𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀢𑁆𑀣𑀺𑀪𑀽𑀢𑀸𑀬 𑀅𑀢𑁆𑀢𑀦𑀺 𑀲𑀩𑁆𑀩𑀓𑀸𑀮𑀁 𑀇𑀢𑁆𑀣𑀻𑀬𑁂𑀯 𑀳𑁄𑀢𑀺, 𑀉𑀤𑀸𑀳𑀼 𑀧𑀼𑀭𑀺𑀲𑀪𑀸𑀯𑀫𑁆𑀧𑀺 𑀉𑀧𑀕𑀘𑁆𑀙𑀢𑀻𑀢𑀺. 𑀬𑀲𑁆𑀲𑀸 𑀫𑁂 𑀇𑀢𑁆𑀣𑀺𑀪𑀽𑀢𑀸𑀬𑀸𑀢𑀺 𑀬𑀲𑁆𑀲𑀸 𑀫𑀬𑁆𑀳𑀁 𑀇𑀢𑁆𑀣𑀺𑀪𑀽𑀢𑀸𑀬 𑀏𑀯𑀁 𑀢𑀸𑀯 𑀩𑀳𑀼𑀲𑀁𑀲𑀸𑀭𑁂 𑀫𑀳𑁂𑀲𑀺𑀪𑀸𑀯𑀁 𑀫𑀳𑀸𑀫𑀼𑀦𑀺 𑀢𑁆𑀯𑀁 𑀪𑀸𑀲𑀲𑀺 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀆𑀳𑀼 𑀫𑁂 𑀇𑀢𑁆𑀣𑀺𑀪𑀽𑀢𑀸𑀬𑀸’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀆𑀢𑀺 𑀅𑀦𑀼𑀲𑁆𑀲𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀆𑀳𑀼 𑀫𑁂𑀢𑀺 𑀲𑀬𑀁 𑀅𑀦𑀼𑀲𑁆𑀲𑀭𑀺𑀢𑀁 𑀅𑀜𑁆𑀜𑀸𑀢𑀫𑀺𑀤𑀁 𑀫𑀬𑀸, 𑀇𑀢𑁆𑀣𑀺𑀪𑀽𑀢𑀸𑀬 𑀇𑀢𑁆𑀣𑀺𑀪𑀸𑀯𑀁 𑀉𑀧𑀕𑀢𑀸𑀬 𑀏𑀯𑀁 𑀫𑀬𑁆𑀳𑀁 ¶ 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺 𑀅𑀳𑁄𑀲𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀬𑀲𑁆𑀲𑀸 𑀫𑁂 𑀇𑀢𑁆𑀣𑀺𑀪𑀽𑀢𑀸𑀬 𑀲𑀩𑁆𑀩𑁂𑀲𑀁 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺, 𑀓𑀺𑀁 𑀢𑁆𑀯𑀁, 𑀫𑀳𑀸𑀫𑀼𑀦𑀺, 𑀲𑀁𑀲𑀸𑀭𑁂 𑀩𑀳𑀼𑀁 𑀪𑀸𑀲𑀲𑀻𑀢𑀺 𑀬𑁄𑀚𑀦𑀸.

𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀅𑀬𑀁 𑀦𑀺𑀬𑀫𑁄 𑀲𑀁𑀲𑀸𑀭𑁂 𑀦𑀢𑁆𑀣𑀺 ‘‘𑀇𑀢𑁆𑀣𑀻 𑀇𑀢𑁆𑀣𑀻𑀬𑁂𑀯 𑀳𑁄𑀢𑀺, 𑀧𑀼𑀭𑀺𑀲𑁄 𑀧𑀼𑀭𑀺𑀲𑁄 𑀏𑀯𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀅𑀳𑀼 𑀇𑀢𑁆𑀣𑀻 𑀅𑀳𑀼 𑀧𑀼𑀭𑀺𑀲𑁄, 𑀧𑀲𑀼𑀬𑁄𑀦𑀺𑀫𑁆𑀧𑀺 𑀆𑀕𑀫𑀸;

𑀏𑀯𑀫𑁂𑀢𑀁 𑀅𑀢𑀻𑀢𑀸𑀦𑀁, 𑀧𑀭𑀺𑀬𑀦𑁆𑀢𑁄 𑀦 𑀤𑀺𑀲𑁆𑀲𑀢𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀳𑀼 𑀇𑀢𑁆𑀣𑀻 𑀅𑀳𑀼 𑀧𑀼𑀭𑀺𑀲𑁄𑀢𑀺 𑀢𑁆𑀯𑀁 𑀓𑀤𑀸𑀘𑀺 𑀇𑀢𑁆𑀣𑀻𑀧𑀺 𑀅𑀳𑁄𑀲𑀺, 𑀓𑀤𑀸𑀘𑀺 𑀧𑀼𑀭𑀺𑀲𑁄𑀧𑀺 𑀅𑀳𑁄𑀲𑀺. 𑀦 𑀓𑁂𑀯𑀮𑀁 𑀇𑀢𑁆𑀣𑀺𑀧𑀼𑀭𑀺𑀲𑀪𑀸𑀯𑀫𑁂𑀯, 𑀅𑀣 𑀔𑁄 𑀧𑀲𑀼 𑀬𑁄𑀦𑀺𑀫𑁆𑀧𑀺 𑀅𑀕𑀫𑀸𑀲𑀺, 𑀓𑀤𑀸𑀘𑀺 𑀧𑀲𑀼𑀪𑀸𑀯𑀫𑁆𑀧𑀺 𑀅𑀕𑀫𑀸𑀲𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀫𑁆𑀧𑀺 𑀉𑀧𑀕𑀢𑀸 𑀅𑀳𑁄𑀲𑀺. 𑀏𑀯𑀫𑁂𑀢𑀁 𑀅𑀢𑀻𑀢𑀸𑀦𑀁, 𑀧𑀭𑀺𑀬𑀦𑁆𑀢𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀁 𑀏𑀢𑀁 𑀇𑀢𑁆𑀣𑀺𑀪𑀸𑀯𑀁 𑀧𑀼𑀭𑀺𑀲𑀪𑀸𑀯𑀁 𑀢𑀺𑀭𑀘𑁆𑀙𑀸𑀦𑀸𑀤𑀺𑀪𑀸𑀯𑀜𑁆𑀘 𑀉𑀧𑀕𑀢𑀸𑀦𑀁 𑀅𑀢𑀻𑀢𑀸𑀦𑀁 𑀅𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀬𑀦𑁆𑀢𑁄 𑀜𑀸𑀡𑀘𑀓𑁆𑀔𑀼𑀦𑀸 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀧𑀲𑁆𑀲𑀦𑁆𑀢𑀸𑀦𑀫𑁆𑀧𑀺 𑀦 𑀤𑀺𑀲𑁆𑀲𑀢𑀺. 𑀦 𑀓𑁂𑀯𑀮𑀁 𑀢𑀯𑁂𑀯, 𑀅𑀣 𑀔𑁄 𑀲𑀩𑁆𑀩𑁂𑀲𑀫𑁆𑀧𑀺 ¶ 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑀲𑁆𑀲 𑀧𑀭𑀺𑀬𑀦𑁆𑀢𑁄 𑀦 𑀤𑀺𑀲𑁆𑀲𑀢𑁂𑀯 𑀦 𑀧𑀜𑁆𑀜𑀸𑀬𑀢𑁂𑀯. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 ¶ 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪).

𑀏𑀯𑀁 𑀢𑁂𑀦 𑀢𑀸𑀧𑀲𑁂𑀦 𑀲𑀁𑀲𑀸𑀭𑀲𑁆𑀲 𑀅𑀧𑀭𑀺𑀬𑀦𑁆𑀢𑀢𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀘 𑀯𑀺𑀪𑀸𑀯𑁂𑀦𑁆𑀢𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀁𑀲𑀸𑀭𑁂 𑀲𑀁𑀯𑀺𑀕𑁆𑀕𑀳𑀤𑀬𑀸 𑀥𑀫𑁆𑀫𑁂 𑀘 𑀧𑀲𑀦𑁆𑀦𑀫𑀸𑀦𑀲𑀸 𑀯𑀺𑀕𑀢𑀲𑁄𑀓𑀲𑀮𑁆𑀮𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀲𑁄𑀓𑀯𑀺𑀕𑀫𑀦𑀜𑁆𑀘 𑀧𑀓𑀸𑀲𑁂𑀦𑁆𑀢𑀻 𑁋

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

‘‘𑀅𑀩𑁆𑀩𑀳𑀻 ¶ 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀸𑀬, 𑀧𑀢𑀺𑀲𑁄𑀓𑀁 𑀅𑀧𑀸𑀦𑀼𑀤𑀺.

‘‘𑀲𑀸𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀲𑁆𑀫𑀺, 𑀲𑀻𑀢𑀺𑀪𑀽𑀢𑀸𑀲𑁆𑀫𑀺 𑀦𑀺𑀩𑁆𑀩𑀼𑀢𑀸;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸 𑀫𑀳𑀸𑀫𑀼𑀦𑀻’’𑀢𑀺. 𑁋

𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀸𑀲𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀇𑀤𑀸𑀦𑀺 𑀲𑀁𑀯𑀺𑀕𑁆𑀕𑀳𑀤𑀬𑀸𑀬 𑀉𑀩𑁆𑀩𑀭𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 𑁋

‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀫𑀡𑀲𑁆𑀲 𑀲𑀼𑀪𑀸𑀲𑀺𑀢𑀁;

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬, 𑀧𑀩𑁆𑀩𑀚𑀺 𑀅𑀦𑀕𑀸𑀭𑀺𑀬𑀁.

‘‘𑀲𑀸 𑀘 𑀧𑀩𑁆𑀩𑀚𑀺𑀢𑀸 𑀲𑀦𑁆𑀢𑀸, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁;

𑀫𑁂𑀢𑁆𑀢𑀘𑀺𑀢𑁆𑀢𑀁 𑀆𑀪𑀸𑀯𑁂𑀲𑀺, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸.

‘‘𑀕𑀸𑀫𑀸 𑀕𑀸𑀫𑀁 𑀯𑀺𑀘𑀭𑀦𑁆𑀢𑀻, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀉𑀭𑀼𑀯𑁂𑀴𑀸 𑀦𑀸𑀫 𑀲𑁄 𑀕𑀸𑀫𑁄, 𑀬𑀢𑁆𑀣 𑀓𑀸𑀮𑀫𑀓𑁆𑀭𑀼𑀩𑁆𑀩𑀣.

‘‘𑀫𑁂𑀢𑁆𑀢𑀘𑀺𑀢𑁆𑀢𑀁 ¶ 𑀆𑀪𑀸𑀯𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸;

𑀇𑀢𑁆𑀣𑀺𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀸 𑀅𑀳𑀽’’𑀢𑀺. 𑁋 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺;

𑁩𑁮𑁩-𑁪. 𑀢𑀢𑁆𑀣 ¶ 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑀸𑀧𑀲𑀲𑁆𑀲. 𑀲𑀼𑀪𑀸𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀁, 𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀚𑀺𑀢𑀸 𑀲𑀦𑁆𑀢𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸 𑀲𑀫𑀸𑀦𑀸, 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸 𑀳𑀼𑀢𑁆𑀯𑀸 𑀲𑀦𑁆𑀢𑀓𑀸𑀬𑀯𑀸𑀘𑀸. 𑀫𑁂𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁 𑀘𑀺𑀢𑁆𑀢𑀁. 𑀘𑀺𑀢𑁆𑀢𑀲𑀻𑀲𑁂𑀦 𑀫𑁂𑀢𑁆𑀢𑀚𑁆𑀛𑀸𑀦𑀁 𑀯𑀤𑀢𑀺. 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸𑀢𑀺 𑀢𑀜𑁆𑀘 𑀲𑀸 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀦𑁆𑀢𑀻 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀲𑀺, 𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀤𑀺𑀅𑀢𑁆𑀣𑀁. 𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀤𑀺𑀓𑁂 𑀪𑀸𑀯𑁂𑀦𑁆𑀢𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸 𑀬𑀸𑀯𑀤𑁂𑀯 𑀪𑀯𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀫𑁂𑀯 𑀪𑀸𑀯𑁂𑀲𑀼𑀁.

𑁩𑁮𑁫-𑁬. 𑀕𑀸𑀫𑀸 ¶ 𑀕𑀸𑀫𑀦𑁆𑀢𑀺 𑀕𑀸𑀫𑀢𑁄 𑀅𑀜𑁆𑀜𑀁 𑀕𑀸𑀫𑀁. 𑀆𑀪𑀸𑀯𑁂𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸. ‘‘𑀅𑀪𑀸𑀯𑁂𑀢𑁆𑀯𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀢𑁆𑀣𑀺𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀇𑀢𑁆𑀣𑀺𑀪𑀸𑀯𑁂 𑀘𑀺𑀢𑁆𑀢𑀁 𑀅𑀚𑁆𑀛𑀸𑀲𑀬𑀁 𑀅𑀪𑀺𑀭𑀼𑀘𑀺𑀁 𑀯𑀺𑀭𑀸𑀚𑁂𑀢𑁆𑀯𑀸 𑀇𑀢𑁆𑀣𑀺𑀪𑀸𑀯𑁂 𑀯𑀺𑀭𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸. 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀕𑀫𑀦𑀓𑀸 𑀅𑀳𑁄𑀲𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀉𑀧𑀭𑀺 𑀘𑀢𑀼𑀲𑀘𑁆𑀘𑀤𑁂𑀲𑀦𑀁 𑀅𑀓𑀸𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀸 𑀉𑀧𑀸𑀲𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀘 𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀉𑀩𑁆𑀩𑀭𑀺𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀁

𑀢𑁂𑀭𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲

𑀤𑀼𑀢𑀺𑀬𑀲𑁆𑀲 𑀉𑀩𑁆𑀩𑀭𑀺𑀯𑀕𑁆𑀕𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀅𑀪𑀺𑀚𑁆𑀚𑀫𑀸𑀦𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀪𑀺𑀚𑁆𑀚𑀫𑀸𑀦𑁂 ¶ ¶ 𑀯𑀸𑀭𑀺𑀫𑁆𑀳𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀮𑀼𑀤𑁆𑀤𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀧𑀭𑀤𑀺𑀲𑀸𑀪𑀸𑀕𑁂 𑀧𑀸𑀭𑀕𑀗𑁆𑀕𑀸𑀬 𑀯𑀸𑀲𑀪𑀕𑀸𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀼𑀦𑁆𑀤𑀝𑁆𑀞𑀺𑀮𑀦𑀸𑀫𑀓𑁂 𑀕𑀸𑀫𑁂 𑀏𑀓𑁄 𑀮𑀼𑀤𑁆𑀤𑀓𑁄 𑀅𑀳𑁄𑀲𑀺. 𑀲𑁄 𑀅𑀭𑀜𑁆𑀜𑁂 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀯𑀭𑀫𑀁𑀲𑀁 𑀅𑀗𑁆𑀕𑀸𑀭𑁂 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀅𑀯𑀲𑁂𑀲𑀁 𑀧𑀡𑁆𑀡𑀧𑀼𑀝𑁂 𑀩𑀦𑁆𑀥𑀺𑀢𑁆𑀯𑀸 𑀓𑀸𑀚𑁂𑀦 𑀕𑀳𑁂𑀢𑁆𑀯𑀸 𑀕𑀸𑀫𑀁 𑀆𑀕𑀘𑁆𑀙𑀢𑀺. 𑀢𑀁 𑀩𑀸𑀮𑀤𑀸𑀭𑀓𑀸 𑀕𑀸𑀫𑀤𑁆𑀯𑀸𑀭𑁂 𑀤𑀺𑀲𑁆𑀯𑀸 ‘‘𑀫𑀁𑀲𑀁 𑀫𑁂 𑀤𑁂𑀳𑀺, 𑀫𑀁𑀲𑀁 𑀫𑁂 𑀤𑁂𑀳𑀻’’𑀢𑀺 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀉𑀧𑀥𑀸𑀯𑀦𑁆𑀢𑀺. 𑀲𑁄 𑀢𑁂𑀲𑀁 𑀣𑁄𑀓𑀁 𑀣𑁄𑀓𑀁 𑀫𑀁𑀲𑀁 𑀤𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀁𑀲𑀁 𑀅𑀮𑀪𑀺𑀢𑁆𑀯𑀸 ¶ 𑀉𑀤𑁆𑀤𑀸𑀮𑀓𑀧𑀼𑀧𑁆𑀨𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀩𑀳𑀼𑀜𑁆𑀘 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀕𑀸𑀫𑀁 𑀕𑀘𑁆𑀙𑀦𑁆𑀢𑀁 𑀢𑀁 𑀤𑀸𑀭𑀓𑀸 𑀕𑀸𑀫𑀤𑁆𑀯𑀸𑀭𑁂 𑀤𑀺𑀲𑁆𑀯𑀸 ‘‘𑀫𑀁𑀲𑀁 𑀫𑁂 𑀤𑁂𑀳𑀺, 𑀫𑀁𑀲𑀁 𑀫𑁂 𑀤𑁂𑀳𑀻’’𑀢𑀺 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀉𑀧𑀥𑀸𑀯𑀺𑀁𑀲𑀼. 𑀲𑁄 𑀢𑁂𑀲𑀁 𑀏𑀓𑁂𑀓𑀁 𑀧𑀼𑀧𑁆𑀨𑀫𑀜𑁆𑀚𑀭𑀺𑀁 𑀅𑀤𑀸𑀲𑀺.

𑀅𑀣 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑁄 𑀦𑀕𑁆𑀕𑁄 𑀯𑀺𑀭𑀽𑀧𑀭𑀽𑀧𑁄 𑀪𑀬𑀸𑀦𑀓𑀤𑀲𑁆𑀲𑀦𑁄 𑀲𑀼𑀧𑀺𑀦𑁂𑀧𑀺 𑀅𑀦𑁆𑀦𑀧𑀸𑀦𑀁 𑀅𑀚𑀸𑀦𑀦𑁆𑀢𑁄 𑀲𑀻𑀲𑁂 𑀆𑀩𑀦𑁆𑀥𑀺𑀢𑀉𑀤𑁆𑀤𑀸𑀮𑀓𑀓𑀼𑀲𑀼𑀫𑀫𑀸𑀮𑀸𑀓𑀮𑀸𑀧𑁄 ‘‘𑀘𑀼𑀦𑁆𑀤𑀝𑁆𑀞𑀺𑀮𑀸𑀬𑀁 𑀜𑀸𑀢𑀓𑀸𑀦𑀁 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀕𑀗𑁆𑀕𑀸𑀬 𑀉𑀤𑀓𑁂 𑀅𑀪𑀺𑀚𑁆𑀚𑀫𑀸𑀦𑁂 𑀧𑀝𑀺𑀲𑁄𑀢𑀁 𑀧𑀤𑀲𑀸 𑀕𑀘𑁆𑀙𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀓𑁄𑀮𑀺𑀬𑁄 𑀦𑀸𑀫 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀫𑀳𑀸𑀫𑀢𑁆𑀢𑁄 𑀓𑀼𑀧𑀺𑀢𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀯𑀸𑀭𑀩𑀮𑀁 𑀣𑀮𑀧𑀣𑁂𑀦 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀅𑀦𑀼𑀲𑁄𑀢𑀁 𑀦𑀸𑀯𑀸𑀬 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀧𑁂𑀢𑀁 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀅𑀪𑀺𑀚𑁆𑀚𑀫𑀸𑀦𑁂 𑀯𑀸𑀭𑀺𑀫𑁆𑀳𑀺, 𑀕𑀗𑁆𑀕𑀸𑀬 𑀇𑀥 𑀕𑀘𑁆𑀙𑀲𑀺;

𑀦𑀕𑁆𑀕𑁄 𑀧𑀼𑀩𑁆𑀩𑀤𑁆𑀥𑀧𑁂𑀢𑁄𑀯, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑁄;

𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀺 𑀧𑁂𑀢, 𑀓𑀢𑁆𑀣 𑀯𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀪𑀺𑀚𑁆𑀚𑀫𑀸𑀦𑁂𑀢𑀺 𑀧𑀤𑀦𑀺𑀓𑁆𑀔𑁂𑀧𑁂𑀦 𑀅𑀪𑀺𑀚𑁆𑀚𑀫𑀸𑀦𑁂 𑀲𑀗𑁆𑀖𑀸𑀢𑁂, 𑀯𑀸𑀭𑀺𑀫𑁆𑀳𑀺 𑀕𑀗𑁆𑀕𑀸𑀬𑀸𑀢𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀉𑀤𑀓𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀧𑀼𑀩𑁆𑀩𑀤𑁆𑀥𑀧𑁂𑀢𑁄𑀯𑀸𑀢𑀺 𑀓𑀸𑀬𑀲𑁆𑀲 𑀧𑀼𑀭𑀺𑀫𑀤𑁆𑀥𑁂𑀦 𑀅𑀧𑁂𑀢𑁄 𑀯𑀺𑀬 𑀅𑀧𑁂𑀢𑀬𑁄𑀦𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 ¶ 𑀯𑀺𑀬. 𑀓𑀣𑀁? 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑁄𑀢𑀺, 𑀫𑀸𑀮𑀸𑀳𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀅𑀮𑀗𑁆𑀓𑀢𑀲𑀻𑀲𑀕𑁆𑀕𑁄𑀢𑀺 ¶ 𑀅𑀢𑁆𑀣𑁄. 𑀓𑀢𑁆𑀣 𑀯𑀸𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀓𑀢𑀭𑀲𑁆𑀫𑀺𑀁 𑀕𑀸𑀫𑁂 𑀤𑁂𑀲𑁂 𑀯𑀸 𑀢𑀼𑀬𑁆𑀳𑀁 𑀦𑀺𑀯𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀁 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀁 𑀢𑀤𑀸 𑀢𑁂𑀦 𑀧𑁂𑀢𑁂𑀦 𑀓𑁄𑀮𑀺𑀬𑁂𑀦 𑀘 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀘𑀼𑀦𑁆𑀤𑀝𑁆𑀞𑀺𑀮𑀁 ¶ 𑀕𑀫𑀺𑀲𑁆𑀲𑀸𑀫𑀺, 𑀧𑁂𑀢𑁄 𑀲𑁄 𑀇𑀢𑀺 𑀪𑀸𑀲𑀢𑀺;

𑀅𑀦𑁆𑀢𑀭𑁂 𑀯𑀸𑀲𑀪𑀕𑀸𑀫𑀁, 𑀩𑀸𑀭𑀸𑀡𑀲𑀺𑀜𑁆𑀘 𑀲𑀦𑁆𑀢𑀺𑀓𑁂.

‘‘𑀢𑀜𑁆𑀘 𑀤𑀺𑀲𑁆𑀯𑀸 𑀫𑀳𑀸𑀫𑀢𑁆𑀢𑁄, 𑀓𑁄𑀮𑀺𑀬𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀢𑁆𑀢𑀼𑀁 𑀪𑀢𑁆𑀢𑀜𑁆𑀘 𑀧𑁂𑀢𑀲𑁆𑀲, 𑀧𑀻𑀢𑀓𑀜𑁆𑀘 𑀬𑀼𑀕𑀁 𑀅𑀤𑀸.

‘‘𑀦𑀸𑀯𑀸𑀬 𑀢𑀺𑀝𑁆𑀞𑀫𑀸𑀦𑀸𑀬, 𑀓𑀧𑁆𑀧𑀓𑀲𑁆𑀲 𑀅𑀤𑀸𑀧𑀬𑀺;

𑀓𑀧𑁆𑀧𑀓𑀲𑁆𑀲 𑀧𑀤𑀺𑀦𑁆𑀦𑀫𑁆𑀳𑀺, 𑀞𑀸𑀦𑁂 𑀧𑁂𑀢𑀲𑁆𑀲 𑀤𑀺𑀲𑁆𑀲𑀣.

‘‘𑀢𑀢𑁄 𑀲𑀼𑀯𑀢𑁆𑀣𑀯𑀲𑀦𑁄, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑁄;

𑀞𑀸𑀦𑁂 𑀞𑀺𑀢𑀲𑁆𑀲 𑀧𑁂𑀢𑀲𑁆𑀲, 𑀤𑀓𑁆𑀔𑀺𑀡𑀸 𑀉𑀧𑀓𑀧𑁆𑀧𑀣;

𑀢𑀲𑁆𑀫𑀸 𑀤𑀚𑁆𑀚𑁂𑀣 𑀧𑁂𑀢𑀸𑀦𑀁, 𑀅𑀦𑀼𑀓𑀫𑁆𑀧𑀸𑀬 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. 𑁋 𑀕𑀸𑀣𑀸𑀬𑁄 𑀅𑀯𑁄𑀘𑀼𑀁;

𑁩𑁮𑁮. 𑀢𑀢𑁆𑀣 𑀘𑀼𑀦𑁆𑀤𑀝𑁆𑀞𑀺𑀮𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀕𑀸𑀫𑀁. 𑀅𑀦𑁆𑀢𑀭𑁂 𑀯𑀸𑀲𑀪𑀕𑀸𑀫𑀁, 𑀩𑀸𑀭𑀸𑀡𑀲𑀺𑀜𑁆𑀘 𑀲𑀦𑁆𑀢𑀺𑀓𑁂𑀢𑀺 𑀯𑀸𑀲𑀪𑀕𑀸𑀫𑀲𑁆𑀲 𑀘 𑀩𑀸𑀭𑀸𑀡𑀲𑀺𑀬𑀸 𑀘 𑀯𑁂𑀫𑀚𑁆𑀛𑁂. 𑀅𑀦𑁆𑀢𑀭𑀸-𑀲𑀤𑁆𑀤𑀬𑁄𑀕𑁂𑀦 𑀳𑁂𑀢𑀁 𑀲𑀸𑀫𑁆𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀩𑀸𑀭𑀸𑀡𑀲𑀺𑀬𑀸 𑀲𑀦𑁆𑀢𑀺𑀓𑁂 𑀳𑀺 𑀲𑁄 𑀕𑀸𑀫𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀦𑁆𑀢𑀭𑁂 𑀯𑀸𑀲𑀪𑀕𑀸𑀫𑀲𑁆𑀲 𑀘 𑀩𑀸𑀭𑀸𑀡𑀲𑀺𑀬𑀸 𑀘 𑀬𑁄 𑀘𑀼𑀦𑁆𑀤𑀝𑁆𑀞𑀺𑀮𑀦𑀸𑀫𑀓𑁄 𑀕𑀸𑀫𑁄 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂, 𑀢𑀁 𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻𑀢𑀺.

𑁩𑁮𑁯. 𑀓𑁄𑀮𑀺𑀬𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄𑀢𑀺 𑀓𑁄𑀮𑀺𑀬𑁄𑀢𑀺 𑀏𑀯𑀁𑀧𑀓𑀸𑀲𑀺𑀢𑀦𑀸𑀫𑁄. 𑀲𑀢𑁆𑀢𑀼𑀁 𑀪𑀢𑁆𑀢𑀜𑁆𑀘𑀸𑀢𑀺 𑀲𑀢𑁆𑀢𑀼𑀜𑁆𑀘𑁂𑀯 𑀪𑀢𑁆𑀢𑀜𑁆𑀘. 𑀧𑀻𑀢𑀓𑀜𑁆𑀘 𑀬𑀼𑀕𑀁 𑀅𑀤𑀸𑀢𑀺 𑀧𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀏𑀓𑀁 𑀯𑀢𑁆𑀣𑀬𑀼𑀕𑀜𑁆𑀘 𑀅𑀤𑀸𑀲𑀺.

𑁩𑁯𑁦. 𑀓𑀤𑀸 𑀅𑀤𑀸𑀲𑀻𑀢𑀺 𑀘𑁂 𑀆𑀳 𑀦𑀸𑀯𑀸𑀬 𑀢𑀺𑀝𑁆𑀞𑀫𑀸𑀦𑀸𑀬. 𑀓𑀧𑁆𑀧𑀓𑀲𑁆𑀲 𑀅𑀤𑀸𑀧𑀬𑀻𑀢𑀺 𑀕𑀘𑁆𑀙𑀦𑁆𑀢𑀺𑀁 𑀦𑀸𑀯𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀏𑀓𑀲𑁆𑀲 𑀦𑁆𑀳𑀸𑀧𑀺𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀤𑀸𑀧𑁂𑀲𑀺 ¶ , 𑀤𑀺𑀦𑁆𑀦𑀫𑁆𑀳𑀺 𑀯𑀢𑁆𑀣𑀬𑀼𑀕𑁂𑀢𑀺 𑀬𑁄𑀚𑀦𑀸. 𑀞𑀸𑀦𑁂𑀢𑀺 𑀞𑀸𑀦𑀲𑁄 𑀢𑀗𑁆𑀔𑀡𑀜𑁆𑀜𑁂𑀯. 𑀧𑁂𑀢𑀲𑁆𑀲 𑀤𑀺𑀲𑁆𑀲𑀣𑀸𑀢𑀺 𑀧𑁂𑀢𑀲𑁆𑀲 𑀲𑀭𑀻𑀭𑁂 𑀧𑀜𑁆𑀜𑀸𑀬𑀺𑀢𑁆𑀣, 𑀢𑀲𑁆𑀲 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀢𑁆𑀣𑀁 ¶ 𑀲𑀫𑁆𑀧𑀚𑁆𑀚𑀺. 𑀢𑁂𑀦𑀸𑀳 ‘‘𑀢𑀢𑁄 𑀲𑀼𑀯𑀢𑁆𑀣𑀯𑀲𑀦𑁄, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑁄’’𑀢𑀺, 𑀲𑀼𑀯𑀢𑁆𑀣𑀯𑀲𑀦𑁄 ¶ 𑀫𑀸𑀮𑀸𑀪𑀭𑀡𑁂𑀳𑀺 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄. 𑀞𑀸𑀦𑁂 𑀞𑀺𑀢𑀲𑁆𑀲 𑀧𑁂𑀢𑀲𑁆𑀲, 𑀤𑀓𑁆𑀔𑀺𑀡𑀸 𑀉𑀧𑀓𑀧𑁆𑀧𑀣𑀸𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀝𑁆𑀞𑀸𑀦𑁂 𑀞𑀺𑀢𑀸 𑀧𑀦𑁂𑀲𑀸 𑀤𑀓𑁆𑀔𑀺𑀡𑀸 𑀢𑀲𑁆𑀲 𑀧𑁂𑀢𑀲𑁆𑀲 𑀬𑀲𑁆𑀫𑀸 𑀉𑀧𑀓𑀧𑁆𑀧𑀢𑀺, 𑀯𑀺𑀦𑀺𑀬𑁄𑀕𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀸 𑀤𑀚𑁆𑀚𑁂𑀣 𑀧𑁂𑀢𑀸𑀦𑀁, 𑀅𑀦𑀼𑀓𑀫𑁆𑀧𑀸𑀬 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀧𑁂𑀢𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀤𑀓𑁆𑀔𑀺𑀡𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀣 𑀲𑁄 𑀓𑁄𑀮𑀺𑀬𑀫𑀳𑀸𑀫𑀢𑁆𑀢𑁄 𑀢𑀁 𑀧𑁂𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀤𑀸𑀦𑀯𑀺𑀥𑀺𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀦𑀼𑀲𑁄𑀢𑀁 𑀆𑀕𑀦𑁆𑀢𑁆𑀯𑀸 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀩𑀸𑀭𑀸𑀡𑀲𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀪𑀕𑀯𑀸 𑀘 𑀢𑁂𑀲𑀁 𑀅𑀦𑀼𑀕𑁆𑀕𑀳𑀢𑁆𑀣𑀁 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀅𑀝𑁆𑀞𑀸𑀲𑀺. 𑀓𑁄𑀮𑀺𑀬𑀫𑀳𑀸𑀫𑀢𑁆𑀢𑁄𑀧𑀺 𑀦𑀸𑀯𑀸𑀢𑁄 𑀑𑀢𑀭𑀺𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀲𑀺 𑁋 ‘‘𑀅𑀥𑀺𑀯𑀸𑀲𑁂𑀣 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀲𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀯𑀤𑁂𑀯 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀫𑀳𑀦𑁆𑀢𑀁 𑀲𑀸𑀔𑀸𑀫𑀡𑁆𑀟𑀧𑀁 𑀉𑀧𑀭𑀺 𑀘𑀢𑀽𑀲𑀼 𑀘 𑀧𑀲𑁆𑀲𑁂𑀲𑀼 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀯𑀺𑀯𑀺𑀥𑀯𑀲𑀦𑀲𑀫𑀮𑀗𑁆𑀓𑀢𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀪𑀕𑀯𑀢𑁄 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂.

𑀅𑀣 𑀲𑁄 𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁂𑀝𑁆𑀞𑀸 𑀅𑀢𑁆𑀢𑀦𑁄 𑀯𑀼𑀢𑁆𑀢𑀯𑀘𑀦𑀁 𑀧𑁂𑀢𑀲𑁆𑀲 𑀘 𑀧𑀝𑀺𑀯𑀘𑀦𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀘𑀺𑀦𑁆𑀢𑀺𑀢𑀲𑀫𑀦𑀦𑁆𑀢𑀭𑀫𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑀜𑁆𑀘𑁄𑀤𑀺𑀢𑁄 𑀲𑀼𑀯𑀡𑁆𑀡𑀳𑀁𑀲𑀕𑀡𑁄 𑀯𑀺𑀬 𑀥𑀢𑀭𑀝𑁆𑀞𑀳𑀁𑀲𑀭𑀸𑀚𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀥𑀫𑁆𑀫𑀭𑀸𑀚𑀁 𑀲𑀫𑁆𑀧𑀭𑀺𑀯𑀸𑀭𑁂𑀲𑀺. 𑀢𑀸𑀯𑀤𑁂𑀯 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺 ‘‘𑀉𑀴𑀸𑀭𑀸 𑀥𑀫𑁆𑀫𑀤𑁂𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀫𑀳𑀸𑀫𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀦𑁆𑀢𑀧𑁆𑀧𑁂𑀲𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀫𑀳𑀸𑀚𑀦𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 ‘‘𑀩𑀸𑀭𑀸𑀡𑀲𑀺𑀲𑀫𑀻𑀧𑀕𑀸𑀫𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑀩𑁆𑀩𑁂 𑀘 𑀢𑁂 𑀇𑀤𑁆𑀥𑀺𑀩𑀮𑁂𑀦 𑀫𑀳𑀸𑀚𑀦𑀸 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀉𑀴𑀸𑀭𑁂 𑀘𑀲𑁆𑀲 𑀧𑁂𑀢𑁂 𑀧𑀸𑀓𑀝𑁂 𑀅𑀓𑀸𑀲𑀺. 𑀢𑁂𑀲𑀼 𑀓𑁂𑀘𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑀺𑀮𑁄𑀢𑀺𑀓𑀔𑀡𑁆𑀟𑀥𑀭𑀸, 𑀓𑁂𑀘𑀺 ¶ 𑀅𑀢𑁆𑀢𑀦𑁄 𑀓𑁂𑀲𑁂𑀳𑁂𑀯 ¶ 𑀧𑀝𑀺𑀘𑁆𑀙𑀸𑀤𑀺𑀢𑀓𑁄𑀧𑀺𑀦𑀸, 𑀓𑁂𑀘𑀺 𑀦𑀕𑁆𑀕𑀸 𑀬𑀣𑀸𑀚𑀸𑀢𑀭𑀽𑀧𑀸 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀢𑀘𑀧𑀭𑀺𑀬𑁄𑀦𑀤𑁆𑀥𑀸 𑀅𑀝𑁆𑀞𑀺𑀫𑀢𑁆𑀢𑀲𑀭𑀻𑀭𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑀸 𑀫𑀳𑀸𑀚𑀦𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀧𑀜𑁆𑀜𑀸𑀬𑀺𑀁𑀲𑀼.

𑀅𑀣 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺, 𑀬𑀣𑀸 𑀢𑁂 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀫𑀳𑀸𑀚𑀦𑀲𑁆𑀲 𑀧𑀯𑁂𑀤𑁂𑀲𑀼𑀁. 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀲𑀸𑀢𑀼𑀦𑁆𑀦𑀯𑀲𑀦𑀸 ¶ 𑀏𑀓𑁂, 𑀅𑀜𑁆𑀜𑁂 𑀓𑁂𑀲𑀦𑀺𑀯𑀸𑀲𑀦𑀸;

𑀧𑁂𑀢𑀸 𑀪𑀢𑁆𑀢𑀸𑀬 𑀕𑀘𑁆𑀙𑀦𑁆𑀢𑀺, 𑀧𑀓𑁆𑀓𑀫𑀦𑁆𑀢𑀺 𑀤𑀺𑀲𑁄𑀤𑀺𑀲𑀁.

‘‘𑀤𑀽𑀭𑁂 𑀏𑀓𑁂 𑀧𑀥𑀸𑀯𑀺𑀢𑁆𑀯𑀸, 𑀅𑀮𑀤𑁆𑀥𑀸𑀯 𑀦𑀺𑀯𑀢𑁆𑀢𑀭𑁂;

𑀙𑀸𑀢𑀸 𑀧𑀫𑀼𑀘𑁆𑀙𑀺𑀢𑀸 𑀪𑀦𑁆𑀢𑀸, 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸.

‘‘𑀓𑁂𑀘𑀺 𑀢𑀢𑁆𑀣 𑀧𑀧𑀢𑀺𑀢𑁆𑀯𑀸, 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸;

𑀧𑀼𑀩𑁆𑀩𑁂 𑀅𑀓𑀢𑀓𑀮𑁆𑀬𑀸𑀡𑀸, 𑀅𑀕𑁆𑀕𑀺𑀤𑀟𑁆𑀠𑀸𑀯 𑀆𑀢𑀧𑁂.

‘‘𑀫𑀬𑀁 𑀧𑀼𑀩𑁆𑀩𑁂 𑀧𑀸𑀧𑀥𑀫𑁆𑀫𑀸, 𑀖𑀭𑀡𑀻 𑀓𑀼𑀮𑀫𑀸𑀢𑀭𑁄;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

‘‘𑀧𑀳𑀽𑀢𑀁 𑀅𑀦𑁆𑀦𑀧𑀸𑀦𑀫𑁆𑀧𑀺, 𑀅𑀧𑀺𑀲𑁆𑀲𑀼 𑀅𑀯𑀓𑀺𑀭𑀻𑀬𑀢𑀺;

𑀲𑀫𑁆𑀫𑀕𑁆𑀕𑀢𑁂 𑀧𑀩𑁆𑀩𑀚𑀺𑀢𑁂, 𑀦 𑀘 𑀓𑀺𑀜𑁆𑀘𑀺 𑀅𑀤𑀫𑁆𑀳𑀲𑁂.

‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸, 𑀲𑀸𑀤𑀼𑀓𑀸𑀫𑀸 𑀫𑀳𑀕𑁆𑀖𑀲𑀸;

𑀆𑀮𑁄𑀧𑀧𑀺𑀡𑁆𑀟𑀤𑀸𑀢𑀸𑀭𑁄, 𑀧𑀝𑀺𑀕𑁆𑀕𑀳𑁂 𑀧𑀭𑀺𑀪𑀸𑀲𑀺𑀫𑁆𑀳𑀲𑁂.

‘‘𑀢𑁂 𑀖𑀭𑀸 𑀢𑀸 𑀘 𑀤𑀸𑀲𑀺𑀬𑁄, 𑀢𑀸𑀦𑁂𑀯𑀸𑀪𑀭𑀡𑀸𑀦𑀺 𑀦𑁄;

𑀢𑁂 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀫𑀬𑀁 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑁄.

‘‘𑀯𑁂𑀡𑀻 𑀯𑀸 𑀅𑀯𑀜𑁆𑀜𑀸 𑀳𑁄𑀦𑁆𑀢𑀺, 𑀭𑀣𑀓𑀸𑀭𑀻 𑀘 𑀤𑀼𑀩𑁆𑀪𑀺𑀓𑀸;

𑀘𑀡𑁆𑀟𑀸𑀮𑀻 𑀓𑀧𑀡𑀸 𑀳𑁄𑀦𑁆𑀢𑀺, 𑀓𑀧𑁆𑀧𑀓𑀸 𑀘 𑀧𑀼𑀦𑀧𑁆𑀧𑀼𑀦𑀁.

‘‘𑀬𑀸𑀦𑀺 ¶ 𑀬𑀸𑀦𑀺 𑀦𑀺𑀳𑀻𑀦𑀸𑀦𑀺, 𑀓𑀼𑀮𑀸𑀦𑀺 𑀓𑀧𑀡𑀸𑀦𑀺 𑀘;

𑀢𑁂𑀲𑀼 𑀢𑁂𑀲𑁆𑀯𑁂𑀯 𑀚𑀸𑀬𑀦𑁆𑀢𑀺, 𑀏𑀲𑀸 𑀫𑀘𑁆𑀙𑀭𑀺𑀦𑁄 𑀕𑀢𑀺.

‘‘𑀧𑀼𑀩𑁆𑀩𑁂 ¶ 𑀘 𑀓𑀢𑀓𑀮𑁆𑀬𑀸𑀡𑀸, 𑀤𑀸𑀬𑀓𑀸 𑀯𑀻𑀢𑀫𑀘𑁆𑀙𑀭𑀸;

𑀲𑀕𑁆𑀕𑀁 𑀢𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀑𑀪𑀸𑀲𑁂𑀦𑁆𑀢𑀺 𑀘 𑀦𑀦𑁆𑀤𑀦𑀁.

‘‘𑀯𑁂𑀚𑀬𑀦𑁆𑀢𑁂 ¶ 𑀘 𑀧𑀸𑀲𑀸𑀤𑁂, 𑀭𑀫𑀺𑀢𑁆𑀯𑀸 𑀓𑀸𑀫𑀓𑀸𑀫𑀺𑀦𑁄;

𑀉𑀘𑁆𑀘𑀸𑀓𑀼𑀮𑁂𑀲𑀼 𑀚𑀸𑀬𑀦𑁆𑀢𑀺, 𑀲𑀪𑁄𑀕𑁂𑀲𑀼 𑀢𑀢𑁄 𑀘𑀼𑀢𑀸.

‘‘𑀓𑀽𑀝𑀸𑀕𑀸𑀭𑁂 𑀘 𑀧𑀸𑀲𑀸𑀤𑁂, 𑀧𑀮𑁆𑀮𑀗𑁆𑀓𑁂 𑀧𑁄𑀦𑀓𑀢𑁆𑀣𑀢𑁂;

𑀩𑀻𑀚𑀺𑀢𑀗𑁆𑀕𑀸 𑀫𑁄𑀭𑀳𑀢𑁆𑀣𑁂𑀳𑀺, 𑀓𑀼𑀮𑁂 𑀚𑀸𑀢𑀸 𑀬𑀲𑀲𑁆𑀲𑀺𑀦𑁄.

‘‘𑀅𑀗𑁆𑀓𑀢𑁄 𑀅𑀗𑁆𑀓𑀁 𑀕𑀘𑁆𑀙𑀦𑁆𑀢𑀺, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑀸;

𑀥𑀸𑀢𑀺𑀬𑁄 𑀉𑀧𑀢𑀺𑀝𑁆𑀞𑀦𑁆𑀢𑀺, 𑀲𑀸𑀬𑀁 𑀧𑀸𑀢𑀁 𑀲𑀼𑀔𑁂𑀲𑀺𑀦𑁄.

‘‘𑀦𑀬𑀺𑀤𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀓𑀢𑀧𑀼𑀜𑁆𑀜𑀸𑀦𑀫𑁂𑀯𑀺𑀤𑀁;

𑀅𑀲𑁄𑀓𑀁 𑀦𑀦𑁆𑀤𑀦𑀁 𑀭𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀫𑀳𑀸𑀯𑀦𑀁.

‘‘𑀲𑀼𑀔𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀦𑀢𑁆𑀣𑀺 𑀧𑀭𑀢𑁆𑀣 𑀘;

𑀲𑀼𑀔𑀜𑁆𑀘 𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀘𑁂𑀯 𑀧𑀭𑀢𑁆𑀣 𑀘.

‘‘𑀢𑁂𑀲𑀁 𑀲𑀳𑀩𑁆𑀬𑀓𑀸𑀫𑀸𑀦𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁;

𑀓𑀢𑀧𑀼𑀜𑁆𑀜𑀸 𑀳𑀺 𑀫𑁄𑀤𑀦𑁆𑀢𑀺, 𑀲𑀕𑁆𑀕𑁂 𑀪𑁄𑀕𑀲𑀫𑀗𑁆𑀕𑀺𑀦𑁄’’𑀢𑀺. 𑁋 𑀕𑀸𑀣𑀸𑀬𑁄 𑀅𑀯𑁄𑀘𑀼𑀁;

𑁩𑁯𑁨. 𑀢𑀢𑁆𑀣 𑀲𑀸𑀢𑀼𑀦𑁆𑀦𑀯𑀲𑀦𑀸𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑀺𑀮𑁄𑀢𑀺𑀓𑀔𑀡𑁆𑀟𑀦𑀺𑀯𑀸𑀲𑀦𑀸. 𑀏𑀓𑁂𑀢𑀺 𑀏𑀓𑀘𑁆𑀘𑁂. 𑀓𑁂𑀲𑀦𑀺𑀯𑀸𑀲𑀦𑀸𑀢𑀺 𑀓𑁂𑀲𑁂𑀳𑁂𑀯 𑀧𑀝𑀺𑀘𑁆𑀙𑀸𑀤𑀺𑀢𑀓𑁄𑀧𑀺𑀦𑀸. 𑀪𑀢𑁆𑀢𑀸𑀬 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀢𑁄 𑀕𑀢𑀸 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀓𑀺𑀜𑁆𑀘𑀺 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀯𑀸 𑀯𑀫𑀺𑀢𑀪𑀢𑁆𑀢𑀁 𑀯𑀸 𑀕𑀩𑁆𑀪𑀫𑀮𑀸𑀤𑀺𑀓𑀁 𑀯𑀸 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀓𑀢𑁆𑀣𑀘𑀺𑀤𑁂𑀯 𑀅𑀝𑁆𑀞𑀢𑁆𑀯𑀸 𑀖𑀸𑀲𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺. 𑀧𑀓𑁆𑀓𑀫𑀦𑁆𑀢𑀺 𑀤𑀺𑀲𑁄𑀤𑀺𑀲𑀦𑁆𑀢𑀺 𑀤𑀺𑀲𑀢𑁄 𑀤𑀺𑀲𑀁 𑀅𑀦𑁂𑀓𑀬𑁄𑀚𑀦𑀦𑁆𑀢𑀭𑀺𑀓𑀁 𑀞𑀸𑀦𑀁 𑀧𑀓𑁆𑀓𑀫𑀦𑁆𑀢𑀺.

𑁩𑁯𑁩. 𑀤𑀽𑀭𑁂𑀢𑀺 𑀤𑀽𑀭𑁂𑀯 𑀞𑀸𑀦𑁂. 𑀏𑀓𑁂𑀢𑀺 𑀏𑀓𑀘𑁆𑀘𑁂 𑀧𑁂𑀢𑀸. 𑀧𑀥𑀸𑀯𑀺𑀢𑁆𑀯𑀸𑀢𑀺 𑀖𑀸𑀲𑀢𑁆𑀣𑀸𑀬 𑀉𑀧𑀥𑀸𑀯𑀺𑀢𑁆𑀯𑀸. 𑀅𑀮𑀤𑁆𑀥𑀸𑀯 𑀦𑀺𑀯𑀢𑁆𑀢𑀭𑁂𑀢𑀺 ¶ 𑀓𑀺𑀜𑁆𑀘𑀺 𑀖𑀸𑀲𑀁 𑀯𑀸 𑀧𑀸𑀦𑀻𑀬𑀁 𑀯𑀸 𑀅𑀮𑀪𑀺𑀢𑁆𑀯𑀸 𑀏𑀯 𑀦𑀺𑀯𑀢𑁆𑀢𑀦𑁆𑀢𑀺. 𑀧𑀫𑀼𑀘𑁆𑀙𑀺𑀢𑀸𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑁂𑀦 𑀲𑀜𑁆𑀚𑀸𑀢𑀫𑀼𑀘𑁆𑀙𑀸. 𑀪𑀦𑁆𑀢𑀸𑀢𑀺 ¶ 𑀧𑀭𑀺𑀩𑁆𑀪𑀫𑀦𑁆𑀢𑀸. 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸𑀢𑀺 𑀢𑀸𑀬 𑀏𑀯 𑀫𑀼𑀘𑁆𑀙𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀞𑀢𑁆𑀯𑀸 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸 𑀯𑀺𑀬 𑀯𑀺𑀲𑁆𑀲𑀼𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀢𑀸.

𑁩𑁯𑁪. 𑀢𑀢𑁆𑀣𑀸𑀢𑀺 ¶ 𑀕𑀢𑀝𑁆𑀞𑀸𑀦𑁂. 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸𑀢𑀺 𑀧𑀧𑀸𑀢𑁂 𑀧𑀢𑀺𑀢𑀸 𑀯𑀺𑀬 𑀚𑀺𑀖𑀘𑁆𑀙𑀸𑀤𑀺𑀤𑀼𑀓𑁆𑀔𑁂𑀦 𑀞𑀸𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁂𑀦 𑀪𑀽𑀫𑀺𑀬𑀁 𑀧𑀢𑀺𑀢𑀸, 𑀢𑀢𑁆𑀣 𑀯𑀸 𑀕𑀢𑀝𑁆𑀞𑀸𑀦𑁂 𑀖𑀸𑀲𑀸𑀤𑀻𑀦𑀁 𑀅𑀮𑀸𑀪𑁂𑀦 𑀙𑀺𑀦𑁆𑀦𑀸𑀲𑀸 𑀳𑀼𑀢𑁆𑀯𑀸 𑀓𑁂𑀦𑀘𑀺 𑀧𑀝𑀺𑀫𑀼𑀔𑀁 𑀲𑀼𑀫𑁆𑀪𑀺𑀢𑀸 𑀧𑁄𑀣𑀺𑀢𑀸 𑀯𑀺𑀬 𑀪𑀽𑀫𑀺𑀬𑀁 𑀧𑀢𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀅𑀓𑀢𑀓𑀮𑁆𑀬𑀸𑀡𑀸𑀢𑀺 𑀧𑀼𑀭𑀺𑀫𑀪𑀯𑁂 𑀅𑀓𑀢𑀓𑀼𑀲𑀮𑀸. 𑀅𑀕𑁆𑀕𑀺𑀤𑀟𑁆𑀠𑀸𑀯 𑀆𑀢𑀧𑁂𑀢𑀺 𑀦𑀺𑀤𑀸𑀖𑀓𑀸𑀮𑁂 𑀆𑀢𑀧𑀝𑁆𑀞𑀸𑀦𑁂 𑀅𑀕𑁆𑀕𑀺𑀦𑀸 𑀤𑀟𑁆𑀠𑀸 𑀯𑀺𑀬, 𑀔𑀼𑀧𑁆𑀧𑀺𑀧𑀸𑀲𑀕𑁆𑀕𑀺𑀦𑀸 𑀟𑀬𑁆𑀳𑀫𑀸𑀦𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁯𑁫. 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑀪𑀯𑁂. 𑀧𑀸𑀧𑀥𑀫𑁆𑀫𑀸𑀢𑀺 𑀇𑀲𑁆𑀲𑀼𑀓𑀻𑀫𑀘𑁆𑀙𑀭𑀻𑀆𑀤𑀺𑀪𑀸𑀯𑁂𑀦 𑀮𑀸𑀫𑀓𑀲𑀪𑀸𑀯𑀸. 𑀖𑀭𑀡𑀻𑀢𑀺 𑀖𑀭𑀲𑀸𑀫𑀺𑀦𑀺𑀬𑁄. 𑀓𑀼𑀮𑀫𑀸𑀢𑀭𑁄𑀢𑀺 𑀓𑀼𑀮𑀤𑀸𑀭𑀓𑀸𑀦𑀁 𑀫𑀸𑀢𑀭𑁄, 𑀓𑀼𑀮𑀧𑀼𑀭𑀺𑀲𑀸𑀦𑀁 𑀯𑀸 𑀫𑀸𑀢𑀭𑁄. 𑀤𑀻𑀧𑀦𑁆𑀢𑀺 𑀧𑀢𑀺𑀝𑁆𑀞𑀁, 𑀧𑀼𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀲𑀢𑁆𑀢𑀸𑀦𑀁 𑀲𑀼𑀕𑀢𑀻𑀲𑀼 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 ‘‘𑀧𑀢𑀺𑀝𑁆𑀞𑀸’’𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀓𑀫𑁆𑀳𑀸𑀢𑀺 𑀦 𑀓𑀭𑀺𑀫𑁆𑀳.

𑁩𑁯𑁬. 𑀧𑀳𑀽𑀢𑀦𑁆𑀢𑀺 𑀩𑀳𑀼𑀁. 𑀅𑀦𑁆𑀦𑀧𑀸𑀦𑀫𑁆𑀧𑀻𑀢𑀺 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘. 𑀅𑀧𑀺𑀲𑁆𑀲𑀼 𑀅𑀯𑀓𑀺𑀭𑀻𑀬𑀢𑀻𑀢𑀺 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀧𑀺 𑀅𑀯𑀓𑀺𑀭𑀻𑀬𑀢𑀺 𑀙𑀝𑁆𑀝𑀻𑀬𑀢𑀺. 𑀲𑀫𑁆𑀫𑀕𑁆𑀕𑀢𑁂𑀢𑀺 𑀲𑀫𑁆𑀫𑀸 𑀕𑀢𑁂 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁂 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀬. 𑀧𑀩𑁆𑀩𑀚𑀺𑀢𑁂𑀢𑀺 𑀧𑀩𑁆𑀩𑀚𑀺𑀢𑀸𑀬. 𑀲𑀫𑁆𑀧𑀤𑀸𑀦𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁. 𑀲𑀫𑁆𑀫𑀕𑁆𑀕𑀢𑁂 𑀯𑀸 𑀧𑀩𑁆𑀩𑀚𑀺𑀢𑁂 𑀲𑀢𑀺 𑀮𑀩𑁆𑀪𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀦 𑀘 𑀓𑀺𑀜𑁆𑀘𑀺 𑀅𑀤𑀫𑁆𑀳𑀲𑁂𑀢𑀺 ‘‘𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀤𑁂𑀬𑁆𑀬𑀥𑀫𑁆𑀫𑀁 𑀦𑀸𑀤𑀫𑁆𑀳𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑀸 𑀯𑀤𑀦𑁆𑀢𑀺.

𑁩𑁯𑁭. 𑀅𑀓𑀫𑁆𑀫𑀓𑀸𑀫𑀸𑀢𑀺 𑀲𑀸𑀥𑀽𑀢𑀺 𑀅𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀅𑀓𑀼𑀲𑀮𑀁 𑀓𑀸𑀫𑁂𑀦𑁆𑀢𑀻𑀢𑀺 𑀅𑀓𑀫𑁆𑀫𑀓𑀸𑀫𑀸, 𑀲𑀸𑀥𑀽𑀳𑀺 𑀯𑀸 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀓𑀸𑀫𑁂𑀦𑁆𑀢𑀻𑀢𑀺 𑀓𑀫𑁆𑀫𑀓𑀸𑀫𑀸, 𑀦 𑀓𑀫𑁆𑀫𑀓𑀸𑀫𑀸𑀢𑀺 𑀅𑀓𑀫𑁆𑀫𑀓𑀸𑀫𑀸 ¶ , 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀮𑀲𑀸𑀢𑀺 𑀓𑀼𑀲𑀻𑀢𑀸 𑀓𑀼𑀲𑀮𑀓𑀫𑁆𑀫𑀓𑀭𑀡𑁂 𑀦𑀺𑀩𑁆𑀩𑀻𑀭𑀺𑀬𑀸. 𑀲𑀸𑀤𑀼𑀓𑀸𑀫𑀸𑀢𑀺 𑀲𑀸𑀢𑀫𑀥𑀼𑀭𑀯𑀢𑁆𑀣𑀼𑀧𑀺𑀬𑀸. 𑀫𑀳𑀕𑁆𑀖𑀲𑀸𑀢𑀺 𑀫𑀳𑀸𑀪𑁄𑀚𑀦𑀸, 𑀉𑀪𑀬𑁂𑀦𑀸𑀧𑀺 𑀲𑀼𑀦𑁆𑀤𑀭𑀜𑁆𑀘 𑀫𑀥𑀼𑀭𑀜𑁆𑀘 𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 𑀅𑀢𑁆𑀣𑀺𑀓𑀸𑀦𑀁 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀲𑀬𑀫𑁂𑀯 𑀪𑀼𑀜𑁆𑀚𑀺𑀢𑀸𑀭𑁄𑀢𑀺 ¶ 𑀤𑀲𑁆𑀲𑁂𑀢𑀺. 𑀆𑀮𑁄𑀧𑀧𑀺𑀡𑁆𑀟𑀤𑀸𑀢𑀸𑀭𑁄𑀢𑀺 𑀆𑀮𑁄𑀧𑀫𑀢𑁆𑀢𑀲𑁆𑀲𑀧𑀺 𑀪𑁄𑀚𑀦𑀧𑀺𑀡𑁆𑀟𑀲𑁆𑀲 𑀤𑀸𑀬𑀓𑀸. 𑀧𑀝𑀺𑀕𑁆𑀕𑀳𑁂𑀢𑀺 𑀢𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑀓𑁂. 𑀧𑀭𑀺𑀪𑀸𑀲𑀺𑀫𑁆𑀳𑀲𑁂𑀢𑀺 𑀧𑀭𑀺𑀪𑀯𑀁 𑀓𑀭𑁄𑀦𑁆𑀢𑀸 𑀪𑀸𑀲𑀺𑀫𑁆𑀳, 𑀅𑀯𑀫𑀜𑁆𑀜𑀺𑀫𑁆𑀳 𑀉𑀧𑁆𑀧𑀡𑁆𑀟𑀺𑀫𑁆𑀳𑀸 𑀘𑀸𑀢𑀺 𑀅𑀢𑁆𑀣𑁄.

𑁩𑁯𑁮. 𑀢𑁂 𑀖𑀭𑀸𑀢𑀺 𑀬𑀢𑁆𑀣 𑀫𑀬𑀁 𑀧𑀼𑀩𑁆𑀩𑁂 ‘‘𑀅𑀫𑁆𑀳𑀸𑀓𑀁 𑀖𑀭’’𑀦𑁆𑀢𑀺 𑀫𑀫𑀢𑁆𑀢𑀁 𑀅𑀓𑀭𑀺𑀫𑁆𑀳𑀸, 𑀢𑀸𑀦𑀺 𑀖𑀭𑀸𑀦𑀺 𑀬𑀣𑀸𑀞𑀺𑀢𑀸𑀦𑀺, 𑀇𑀤𑀸𑀦𑀺 𑀦𑁄 𑀦 𑀓𑀺𑀜𑁆𑀘𑀺 𑀉𑀧𑀓𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸 𑀘 𑀤𑀸𑀲𑀺𑀬𑁄 𑀢𑀸𑀦𑁂𑀯𑀸𑀪𑀭𑀡𑀸𑀦𑀺 𑀦𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀢𑁂𑀢𑀺 𑀢𑁂 𑀖𑀭𑀸𑀤𑀺𑀓𑁂. 𑀅𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑀺 ¶ , 𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀯𑀺𑀦𑀺𑀬𑁄𑀕𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀬𑀁 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑁄𑀢𑀺 𑀫𑀬𑀁 𑀧𑀦 𑀧𑀼𑀩𑁆𑀩𑁂 𑀓𑁂𑀯𑀮𑀁 𑀓𑀻𑀴𑀦𑀧𑁆𑀧𑀲𑀼𑀢𑀸 𑀳𑀼𑀢𑁆𑀯𑀸 𑀲𑀸𑀧𑀢𑁂𑀬𑁆𑀬𑀁 𑀧𑀳𑀸𑀬 𑀕𑀫𑀦𑀻𑀬𑀁 𑀅𑀦𑀼𑀕𑀸𑀫𑀺𑀓𑀁 𑀓𑀸𑀢𑀼𑀁 𑀅𑀚𑀸𑀦𑀦𑁆𑀢𑀸 𑀇𑀤𑀸𑀦𑀺 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑁄 𑀪𑀯𑀸𑀫𑀸𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀦𑁆𑀢𑀸 𑀯𑀤𑀦𑁆𑀢𑀺.

𑁩𑁯𑁯. 𑀇𑀤𑀸𑀦𑀺 𑀬𑀲𑁆𑀫𑀸 𑀧𑁂𑀢𑀬𑁄𑀦𑀺𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀲𑀢𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀳𑀻𑀦𑀚𑀸𑀢𑀺𑀓𑀸 𑀓𑀧𑀡𑀯𑀼𑀢𑁆𑀢𑀺𑀦𑁄𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑁂𑀡𑀺𑀯𑀸’’𑀢𑀺𑀆𑀤𑀺𑀦𑀸 𑀤𑁆𑀯𑁂 𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀯𑁂𑀡𑀺𑀯𑀸𑀢𑀺 𑀯𑁂𑀦𑀚𑀸𑀢𑀺𑀓𑀸, 𑀯𑀺𑀮𑀻𑀯𑀓𑀸𑀭𑀸 𑀦𑀴𑀓𑀸𑀭𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀅𑀯𑀜𑁆𑀜𑀸𑀢𑀺 𑀅𑀯𑀜𑁆𑀜𑁂𑀬𑁆𑀬𑀸, 𑀅𑀯𑀚𑀸𑀦𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀫𑁆𑀪𑀦𑀸’’𑀢𑀺 𑀯𑀸 𑀧𑀸𑀞𑁄, 𑀧𑀭𑁂𑀳𑀺 𑀩𑀸𑀥𑀦𑀻𑀬𑀸𑀢𑀺 𑀅𑀢𑁆𑀣𑁄. 𑀭𑀣𑀓𑀸𑀭𑀻𑀢𑀺 𑀘𑀫𑁆𑀫𑀓𑀸𑀭𑀺𑀦𑁄. 𑀤𑀼𑀩𑁆𑀪𑀺𑀓𑀸𑀢𑀺 𑀫𑀺𑀢𑁆𑀢𑀤𑀼𑀩𑁆𑀪𑀺𑀓𑀸 𑀫𑀺𑀢𑁆𑀢𑀸𑀦𑀁 𑀩𑀸𑀥𑀺𑀓𑀸. 𑀘𑀡𑁆𑀟𑀸𑀮𑀻𑀢𑀺 𑀘𑀡𑁆𑀟𑀸𑀮𑀚𑀸𑀢𑀺𑀓𑀸. 𑀓𑀧𑀡𑀸𑀢𑀺 𑀯𑀦𑀺𑀩𑁆𑀩𑀓𑀸 𑀅𑀢𑀺𑀯𑀺𑀬 𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑀸 ¶ . 𑀓𑀧𑁆𑀧𑀓𑀸𑀢𑀺 𑀓𑀧𑁆𑀧𑀓𑀚𑀸𑀢𑀺𑀓𑀸, 𑀲𑀩𑁆𑀩𑀢𑁆𑀣 ‘‘𑀳𑁄𑀦𑁆𑀢𑀺 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 𑀬𑁄𑀚𑀦𑀸, 𑀅𑀧𑀭𑀸𑀧𑀭𑀫𑁆𑀧𑀺 𑀇𑀫𑁂𑀲𑀼 𑀦𑀺𑀳𑀻𑀦𑀓𑀼𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁦𑁦. 𑀢𑁂𑀲𑀼 𑀢𑁂𑀲𑁆𑀯𑁂𑀯 𑀚𑀸𑀬𑀦𑁆𑀢𑀻𑀢𑀺 𑀬𑀸𑀦𑀺 𑀬𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀦𑁂𑀲𑀸𑀤𑀧𑀼𑀓𑁆𑀓𑀼𑀲𑀓𑀼𑀮𑀸𑀤𑀻𑀦𑀺 𑀓𑀧𑀡𑀸𑀦𑀺 𑀅𑀢𑀺𑀯𑀺𑀬 𑀯𑀫𑁆𑀪𑀦𑀺𑀬𑀸𑀦𑀺 𑀧𑀭𑀫𑀤𑀼𑀕𑁆𑀕𑀢𑀸𑀦𑀺 𑀘, 𑀢𑁂𑀲𑀼 𑀢𑁂𑀲𑀼 𑀏𑀯 𑀦𑀺𑀳𑀻𑀦𑀓𑀼𑀮𑁂𑀲𑀼 𑀫𑀘𑁆𑀙𑀭𑀺𑀬𑀫𑀮𑁂𑀦 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀲𑀸 𑀫𑀘𑁆𑀙𑀭𑀺𑀦𑁄 𑀕𑀢𑀻’’𑀢𑀺.

𑁪𑁦𑁧. 𑀏𑀯𑀁 ¶ 𑀅𑀓𑀢𑀧𑀼𑀜𑁆𑀜𑀸𑀦𑀁 𑀲𑀢𑁆𑀢𑀸𑀦𑀁 𑀕𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀢𑀧𑀼𑀜𑁆𑀜𑀸𑀦𑀁 𑀕𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀘 𑀓𑀢𑀓𑀮𑁆𑀬𑀸𑀡𑀸’’𑀢𑀺 𑀲𑀢𑁆𑀢 𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀕𑁆𑀕𑀁 𑀢𑁂 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀬𑁂 𑀧𑀼𑀩𑁆𑀩𑁂 𑀧𑀼𑀭𑀺𑀫𑀚𑀸𑀢𑀺𑀬𑀁 𑀓𑀢𑀓𑀮𑁆𑀬𑀸𑀡𑀸 𑀤𑀸𑀬𑀓𑀸 𑀤𑀸𑀦𑀧𑀼𑀜𑁆𑀜𑀸𑀪𑀺𑀭𑀢𑀸 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀸, 𑀢𑁂 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀕𑁆𑀕𑀁 𑀤𑁂𑀯𑀮𑁄𑀓𑀁 𑀧𑀭𑀺𑀧𑀽𑀭𑁂𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀑𑀪𑀸𑀲𑁂𑀦𑁆𑀢𑀺 𑀘 𑀦𑀦𑁆𑀤𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀧𑀭𑀺𑀧𑀽𑀭𑁂𑀦𑁆𑀢𑀺𑀬𑁂𑀯, 𑀅𑀣 𑀔𑁄 𑀓𑀧𑁆𑀧𑀭𑀼𑀓𑁆𑀔𑀸𑀤𑀻𑀦𑀁 𑀧𑀪𑀸𑀳𑀺 𑀲𑀪𑀸𑀯𑁂𑀦𑁂𑀯 𑀑𑀪𑀸𑀲𑀫𑀸𑀦𑀫𑁆𑀧𑀺 𑀦𑀦𑁆𑀤𑀦𑀯𑀦𑀁 𑀅𑀢𑁆𑀢𑀦𑁄 𑀯𑀢𑁆𑀣𑀸𑀪𑀭𑀡𑀚𑀼𑀢𑀻𑀳𑀺 𑀲𑀭𑀻𑀭𑀧𑁆𑀧𑀪𑀸𑀬 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀘𑁂𑀯 𑀑𑀪𑀸𑀲𑁂𑀢𑁆𑀯𑀸 𑀘 𑀚𑁄𑀢𑁂𑀦𑁆𑀢𑀺.

𑁪𑁦𑁨. 𑀓𑀸𑀫𑀓𑀸𑀫𑀺𑀦𑁄𑀢𑀺 𑀬𑀣𑀺𑀘𑁆𑀙𑀺𑀢𑁂𑀲𑀼 𑀓𑀸𑀫𑀕𑀼𑀡𑁂𑀲𑀼 𑀬𑀣𑀸𑀓𑀸𑀫𑀁 𑀧𑀭𑀺𑀪𑁄𑀕𑀯𑀦𑁆𑀢𑁄. 𑀉𑀘𑁆𑀘𑀸𑀓𑀼𑀮𑁂𑀲𑀽𑀢𑀺 𑀉𑀘𑁆𑀘𑁂𑀲𑀼 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀓𑀼𑀮𑁂𑀲𑀼. 𑀲𑀪𑁄𑀕𑁂𑀲𑀽𑀢𑀺 𑀫𑀳𑀸𑀯𑀺𑀪𑀯𑁂𑀲𑀼. 𑀢𑀢𑁄 𑀘𑀼𑀢𑀸𑀢𑀺 𑀢𑀢𑁄 𑀤𑁂𑀯𑀮𑁄𑀓𑀢𑁄 𑀘𑀼𑀢𑀸.

𑁪𑁦𑁩. 𑀓𑀽𑀝𑀸𑀕𑀸𑀭𑁂 ¶ 𑀘 𑀧𑀸𑀲𑀸𑀤𑁂𑀢𑀺 𑀓𑀽𑀝𑀸𑀕𑀸𑀭𑁂 𑀘 𑀧𑀸𑀲𑀸𑀤𑁂 𑀘. 𑀩𑀻𑀚𑀺𑀢𑀗𑁆𑀕𑀸𑀢𑀺 𑀩𑀻𑀚𑀺𑀬𑀫𑀸𑀦𑀤𑁂𑀳𑀸. 𑀫𑁄𑀭𑀳𑀢𑁆𑀣𑁂𑀳𑀻𑀢𑀺 𑀫𑁄𑀭𑀧𑀺𑀜𑁆𑀙𑀧𑀝𑀺𑀫𑀡𑁆𑀟𑀺𑀢𑀩𑀻𑀚𑀦𑀻𑀳𑀢𑁆𑀣𑁂𑀳𑀺. 𑀬𑀲𑀲𑁆𑀲𑀺𑀦𑁄𑀢𑀺 𑀧𑀭𑀺𑀯𑀸𑀭𑀯𑀦𑁆𑀢𑁄 𑀭𑀫𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁪. 𑀅𑀗𑁆𑀓𑀢𑁄 𑀅𑀗𑁆𑀓𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀸𑀭𑀓𑀓𑀸𑀮𑁂𑀧𑀺 𑀜𑀸𑀢𑀻𑀦𑀁 𑀥𑀸𑀢𑀻𑀦𑀜𑁆𑀘 𑀅𑀗𑁆𑀓𑀝𑁆𑀞𑀸𑀦𑀢𑁄 𑀅𑀗𑁆𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀦𑁆𑀢𑀺, 𑀦 𑀪𑀽𑀫𑀺𑀢𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀢𑀺𑀝𑁆𑀞𑀦𑁆𑀢𑀻𑀢𑀺 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀲𑀼𑀔𑁂𑀲𑀺𑀦𑁄𑀢𑀺 𑀲𑀼𑀔𑀫𑀺𑀘𑁆𑀙𑀦𑁆𑀢𑀸, ‘‘𑀫𑀸 𑀲𑀻𑀢𑀁 ¶ 𑀯𑀸 𑀉𑀡𑁆𑀳𑀁 𑀯𑀸’’𑀢𑀺 𑀅𑀧𑁆𑀧𑀓𑀫𑁆𑀧𑀺 𑀤𑀼𑀓𑁆𑀔𑀁 𑀧𑀭𑀺𑀳𑀭𑀦𑁆𑀢𑀸 𑀉𑀧𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁫. 𑀦𑀬𑀺𑀤𑀁 𑀅𑀓𑀢𑀧𑀼𑀜𑁆𑀜𑀸𑀦𑀦𑁆𑀢𑀺 𑀇𑀤𑀁 𑀲𑁄𑀓𑀯𑀢𑁆𑀣𑀼𑀅𑀪𑀸𑀯𑀢𑁄 𑀅𑀲𑁄𑀓𑀁 𑀭𑀫𑁆𑀫𑀁 𑀭𑀫𑀡𑀻𑀬𑀁 𑀢𑀺𑀤𑀲𑀸𑀦𑀁 𑀢𑀸𑀯𑀢𑀺𑀁𑀲𑀤𑁂𑀯𑀸𑀦𑀁 𑀫𑀳𑀸𑀯𑀦𑀁 𑀫𑀳𑀸𑀉𑀧𑀯𑀦𑀪𑀽𑀢𑀁 𑀦𑀦𑁆𑀤𑀦𑀁 𑀦𑀦𑁆𑀤𑀦𑀯𑀦𑀁 𑀅𑀓𑀢𑀧𑀼𑀜𑁆𑀜𑀸𑀦𑀁 𑀦 𑀳𑁄𑀢𑀺, 𑀢𑁂𑀳𑀺 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑁪𑁦𑁬. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀯𑀺𑀲𑁂𑀲𑀢𑁄 𑀧𑀼𑀜𑁆𑀜𑀁 𑀓𑀭𑀻𑀬𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳. 𑀇𑀥𑀸𑀢𑀺 𑀯𑀸 𑀤𑀺𑀝𑁆𑀞𑀥𑀫𑁆𑀫𑁂. 𑀧𑀭𑀢𑁆𑀣𑀸𑀢𑀺 𑀲𑀫𑁆𑀧𑀭𑀸𑀬𑁂.

𑁪𑁦𑁭. 𑀢𑁂𑀲𑀦𑁆𑀢𑀺 𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀤𑁂𑀯𑁂𑀳𑀺. 𑀲𑀳𑀩𑁆𑀬𑀓𑀸𑀫𑀸𑀦𑀦𑁆𑀢𑀺 𑀲𑀳𑀪𑀸𑀯𑀁 𑀇𑀘𑁆𑀙𑀦𑁆𑀢𑁂𑀳𑀺. 𑀪𑁄𑀕𑀲𑀫𑀗𑁆𑀕𑀺𑀦𑁄𑀢𑀺 𑀪𑁄𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀤𑀺𑀩𑁆𑀩𑁂𑀳𑀺 ¶ 𑀧𑀜𑁆𑀘𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀫𑁄𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀏𑀯𑀁 𑀢𑁂𑀳𑀺 𑀧𑁂𑀢𑁂𑀳𑀺 𑀲𑀸𑀥𑀸𑀭𑀡𑀢𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀘 𑀕𑀢𑀺𑀬𑀸 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀘 𑀕𑀢𑀺𑀬𑀸 𑀧𑀯𑁂𑀤𑀺𑀢𑀸𑀬 𑀲𑀁𑀯𑀺𑀕𑁆𑀕𑀫𑀦𑀲𑁆𑀲 𑀓𑁄𑀴𑀺𑀬𑀸𑀫𑀘𑁆𑀘𑀧𑀫𑀼𑀔𑀲𑁆𑀲 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀪𑀕𑀯𑀸 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀅𑀪𑀺𑀚𑁆𑀚𑀫𑀸𑀦𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀡𑀯𑀸𑀲𑀺𑀢𑁆𑀣𑁂𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀓𑀼𑀡𑁆𑀟𑀺𑀦𑀸𑀕𑀭𑀺𑀬𑁄 𑀣𑁂𑀭𑁄𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀢𑁄 𑀲𑀸𑀡𑀯𑀸𑀲𑀺𑀢𑁆𑀣𑁂𑀭𑀲𑁆𑀲 𑀜𑀸𑀢𑀺𑀧𑁂𑀢𑁂 ¶ 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀓𑀺𑀢𑀯𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁄 𑀲𑀼𑀦𑁂𑀢𑁆𑀢𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀬𑁆𑀳𑀁 𑀅𑀜𑁆𑀚𑀮𑀺𑀁 ¶ 𑀅𑀓𑀢𑁆𑀯𑀸 𑀅𑀬𑀁 𑀫𑀼𑀡𑁆𑀟𑀓𑁄 𑀕𑀘𑁆𑀙𑀢𑀻’’𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀢𑀭𑀺𑀢𑁆𑀯𑀸 ‘‘𑀓𑀘𑁆𑀘𑀺 𑀢𑁂 𑀧𑀺𑀡𑁆𑀟𑀧𑀸𑀢𑁄 𑀮𑀤𑁆𑀥𑁄’’𑀢𑀺 𑀆𑀮𑀧𑀦𑁆𑀢𑁄 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀢𑁂𑀢𑁆𑀯𑀸 𑀪𑀺𑀦𑁆𑀤𑀺. 𑀅𑀣 𑀦𑀁 𑀲𑀩𑁆𑀩𑀢𑁆𑀣 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀺𑀓𑀸𑀭𑀁 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑁄𑀫𑀦𑀲𑁆𑀲𑀦𑀺𑀧𑀸𑀢𑀧𑀲𑀦𑁆𑀦𑀘𑀺𑀢𑁆𑀢𑀫𑁂𑀯 𑀑𑀮𑁄𑀓𑁂𑀦𑁆𑀢𑀁 𑀅𑀝𑁆𑀞𑀸𑀦𑀸𑀖𑀸𑀢𑁂𑀦 𑀤𑀽𑀲𑀺𑀢𑀘𑀺𑀢𑁆𑀢𑁄 ‘‘𑀓𑀺𑀁 𑀫𑀁 𑀓𑀺𑀢𑀯𑀲𑁆𑀲 𑀭𑀜𑁆𑀜𑁄 𑀧𑀼𑀢𑁆𑀢𑀁 𑀦 𑀚𑀸𑀦𑀸𑀲𑀺, 𑀢𑁆𑀯𑀁 𑀑𑀮𑁄𑀓𑀬𑀦𑁆𑀢𑁄 𑀫𑀬𑁆𑀳𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀅𑀯𑀳𑀲𑀦𑁆𑀢𑁄 𑀧𑀓𑁆𑀓𑀸𑀫𑀺. 𑀧𑀓𑁆𑀓𑀦𑁆𑀢𑀫𑀢𑁆𑀢𑀲𑁆𑀲𑁂𑀯 𑀘𑀲𑁆𑀲 𑀦𑀭𑀓𑀕𑁆𑀕𑀺𑀤𑀸𑀳𑀧𑀝𑀺𑀪𑀸𑀕𑁄 𑀩𑀮𑀯𑀲𑀭𑀻𑀭𑀤𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑁂𑀦 𑀫𑀳𑀸𑀲𑀦𑁆𑀢𑀸𑀧𑁂𑀦𑀸𑀪𑀺𑀪𑀽𑀢𑀓𑀸𑀬𑁄 𑀅𑀢𑀺𑀩𑀸𑀴𑁆𑀳𑀁 𑀤𑀼𑀓𑁆𑀔𑀯𑁂𑀤𑀦𑀸𑀪𑀺𑀢𑀼𑀦𑁆𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀻𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀲𑁄 𑀢𑀢𑁆𑀣 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀯𑀸𑀫𑀧𑀲𑁆𑀲𑁂𑀦 𑀉𑀢𑁆𑀢𑀸𑀦𑁄 𑀅𑀯𑀓𑀼𑀚𑁆𑀚𑁄𑀢𑀺 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 ¶ 𑀘𑀼𑀢𑁄 𑀧𑁂𑀢𑁂𑀲𑀼 𑀅𑀧𑀺𑀭𑀺𑀫𑀺𑀢𑀓𑀸𑀮𑀁 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀡𑁆𑀟𑀺𑀦𑀕𑀭𑀲𑁆𑀲 𑀲𑀫𑀻𑀧𑁂 𑀓𑁂𑀯𑀝𑁆𑀝𑀕𑀸𑀫𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀲𑁄 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀯𑀬𑀧𑁆𑀧𑀢𑁆𑀢𑁄𑀧𑀺 𑀧𑀸𑀧𑀪𑀬𑁂𑀦 𑀜𑀸𑀢𑀓𑁂𑀳𑀺𑀧𑀺 𑀲𑀤𑁆𑀥𑀺𑀁 𑀫𑀘𑁆𑀙𑀩𑀦𑁆𑀥𑀦𑀢𑁆𑀣𑀁 𑀦 𑀕𑀘𑁆𑀙𑀢𑀺. 𑀢𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀫𑀘𑁆𑀙𑁂 𑀖𑀸𑀢𑁂𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀦𑀺𑀮𑀻𑀬𑀢𑀺, 𑀕𑀢𑁄 𑀘 𑀚𑀸𑀮𑀁 𑀪𑀺𑀦𑁆𑀤𑀢𑀺, 𑀚𑀻𑀯𑀦𑁆𑀢𑁂 𑀯𑀸 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀉𑀤𑀓𑁂 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀁 𑀅𑀭𑁄𑀘𑀦𑁆𑀢𑀸 𑀜𑀸𑀢𑀓𑀸 𑀕𑁂𑀳𑀢𑁄 𑀢𑀁 𑀦𑀻𑀳𑀭𑀺𑀁𑀲𑀼. 𑀏𑀓𑁄 𑀧𑀦𑀲𑁆𑀲 𑀪𑀸𑀢𑀸 𑀲𑀺𑀦𑁂𑀳𑀩𑀤𑁆𑀥𑀳𑀤𑀬𑁄 𑀅𑀳𑁄𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀼𑀡𑁆𑀟𑀺𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀲𑀸𑀡𑀧𑀩𑁆𑀩𑀢𑁂 𑀯𑀺𑀳𑀭𑀢𑀺. 𑀅𑀣 𑀲𑁄 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 𑀜𑀸𑀢𑀓𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑁄 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀧𑀢𑁆𑀢𑁄 𑀪𑁄𑀚𑀦𑀯𑁂𑀮𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀣𑁂𑀭𑁄 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑁄𑀚𑀦𑁂𑀦 𑀅𑀢𑁆𑀣𑀺𑀓𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲 𑀪𑀢𑁆𑀢𑀁 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀩𑁆𑀩𑀁 𑀢𑀁 ¶ 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀥𑀫𑁆𑀫𑀓𑀣𑀸𑀬 𑀧𑀲𑀦𑁆𑀦𑀫𑀸𑀦𑀲𑀁 𑀜𑀢𑁆𑀯𑀸 ‘‘𑀧𑀩𑁆𑀩𑀚𑀺𑀲𑁆𑀲𑀲𑀺, 𑀆𑀯𑀼𑀲𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀆𑀦𑀦𑁆𑀤, 𑀇𑀫𑀁 𑀲𑀸𑀫𑀡𑁂𑀭𑀁 𑀅𑀦𑀼𑀓𑀫𑁆𑀧𑁂𑀬𑁆𑀬𑀸𑀲𑀻’’𑀢𑀺. 𑀲𑁄 𑀘 𑀅𑀓𑀢𑀓𑀼𑀲𑀮𑀢𑁆𑀢𑀸 𑀅𑀧𑁆𑀧𑀮𑀸𑀪𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀸𑀦𑀻𑀬𑀖𑀝𑀸𑀦𑀁 𑀧𑀭𑀺𑀧𑀽𑀭𑀡𑁂 𑀦𑀺𑀬𑁄𑀚𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀉𑀧𑀸𑀲𑀓𑀸 𑀢𑀲𑁆𑀲 𑀩𑀳𑀽𑀦𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺 𑀧𑀝𑁆𑀞𑀧𑁂𑀲𑀼𑀁.

𑀲𑁄 ¶ 𑀅𑀧𑀭𑁂𑀦 𑀲𑀫𑀬𑁂𑀦 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀣𑁂𑀭𑁄 𑀳𑀼𑀢𑁆𑀯𑀸 𑀤𑁆𑀯𑀸𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀸𑀡𑀧𑀩𑁆𑀩𑀢𑁂 𑀯𑀲𑀺. 𑀢𑀲𑁆𑀲 𑀧𑀦 𑀜𑀸𑀢𑀓𑀸 𑀧𑀜𑁆𑀘𑀲𑀢𑀫𑀢𑁆𑀢𑀸 𑀅𑀦𑀼𑀧𑀘𑀺𑀢𑀓𑀼𑀲𑀮𑀓𑀫𑁆𑀫𑀸 𑀉𑀧𑀘𑀺𑀢𑀫𑀘𑁆𑀙𑁂𑀭𑀸𑀤𑀺𑀧𑀸𑀧𑀥𑀫𑁆𑀫𑀸 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀲𑁆𑀲 𑀧𑀦 𑀫𑀸𑀢𑀸𑀧𑀺𑀢𑀭𑁄 ‘‘𑀏𑀲 𑀅𑀫𑁆𑀳𑁂𑀳𑀺 𑀧𑀼𑀩𑁆𑀩𑁂 𑀕𑁂𑀳𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑁄’’𑀢𑀺 𑀲𑀸𑀭𑀚𑁆𑀚𑀫𑀸𑀦𑀸 𑀢𑀁 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀫𑀺𑀁 𑀩𑀤𑁆𑀥𑀲𑀺𑀦𑁂𑀳𑀁 𑀪𑀸𑀢𑀺𑀓𑀁 𑀧𑁂𑀲𑁂𑀲𑀼𑀁. 𑀲𑁄 𑀣𑁂𑀭𑀲𑁆𑀲 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑀫𑀬𑁂 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀜𑁆𑀚𑀮𑀻 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ¶ ‘‘𑀫𑀸𑀢𑀸 𑀧𑀺𑀢𑀸 𑀘 𑀢𑁂, 𑀪𑀦𑁆𑀢𑁂’’𑀢𑀺𑀆𑀤𑀺𑀕𑀸𑀣𑀸 𑀅𑀯𑁄𑀘. 𑀓𑀼𑀡𑁆𑀟𑀺𑀦𑀸𑀕𑀭𑀺𑀬𑁄 𑀣𑁂𑀭𑁄𑀢𑀺𑀆𑀤𑀬𑁄 𑀧𑀦 𑀆𑀤𑀺𑀢𑁄 𑀧𑀜𑁆𑀘 𑀕𑀸𑀣𑀸 𑀢𑀸𑀲𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀞𑀧𑀺𑀢𑀸.

‘‘𑀓𑀼𑀡𑁆𑀟𑀺𑀦𑀸𑀕𑀭𑀺𑀬𑁄 𑀣𑁂𑀭𑁄, 𑀲𑀸𑀡𑀯𑀸𑀲𑀺𑀦𑀺𑀯𑀸𑀲𑀺𑀓𑁄;

𑀧𑁄𑀝𑁆𑀞𑀧𑀸𑀤𑁄𑀢𑀺 𑀦𑀸𑀫𑁂𑀦, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄.

‘‘𑀢𑀲𑁆𑀲 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀢𑁂 𑀤𑀼𑀕𑁆𑀕𑀢𑀸 𑀲𑀽𑀘𑀺𑀓𑀝𑁆𑀝𑀸, 𑀓𑀺𑀮𑀦𑁆𑀢𑀸 𑀦𑀕𑁆𑀕𑀺𑀦𑁄 𑀓𑀺𑀲𑀸;

𑀉𑀢𑁆𑀢𑀲𑀦𑁆𑀢𑀸 𑀫𑀳𑀢𑁆𑀢𑀸𑀲𑀸, 𑀦 𑀤𑀲𑁆𑀲𑁂𑀦𑁆𑀢𑀺 𑀓𑀼𑀭𑀽𑀭𑀺𑀦𑁄.

‘‘𑀢𑀲𑁆𑀲 ¶ 𑀪𑀸𑀢𑀸 𑀯𑀺𑀢𑀭𑀺𑀢𑁆𑀯𑀸, 𑀦𑀕𑁆𑀕𑁄 𑀏𑀓𑀧𑀣𑁂𑀓𑀓𑁄;

𑀘𑀢𑀼𑀓𑀼𑀡𑁆𑀟𑀺𑀓𑁄 𑀪𑀯𑀺𑀢𑁆𑀯𑀸𑀦, 𑀣𑁂𑀭𑀲𑁆𑀲 𑀤𑀲𑁆𑀲𑀬𑀻𑀢𑀼𑀫𑀁.

‘‘𑀣𑁂𑀭𑁄 𑀘𑀸𑀫𑀦𑀲𑀺𑀓𑀢𑁆𑀯𑀸, 𑀢𑀼𑀡𑁆𑀳𑀻𑀪𑀽𑀢𑁄 𑀅𑀢𑀺𑀓𑁆𑀓𑀫𑀺;

𑀲𑁄 𑀘 𑀯𑀺𑀜𑁆𑀜𑀸𑀧𑀬𑀻 𑀣𑁂𑀭𑀁, ‘𑀪𑀸𑀢𑀸 𑀧𑁂𑀢𑀕𑀢𑁄 𑀅𑀳𑀁’.

‘‘𑀫𑀸𑀢𑀸 𑀧𑀺𑀢𑀸 𑀘 𑀢𑁂 𑀪𑀦𑁆𑀢𑁂, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀢𑁂𑀦 𑀤𑀼𑀕𑁆𑀕𑀢𑀸 𑀲𑀽𑀘𑀺𑀓𑀝𑁆𑀝𑀸, 𑀓𑀺𑀮𑀦𑁆𑀢𑀸 𑀦𑀕𑁆𑀕𑀺𑀦𑁄 𑀓𑀺𑀲𑀸;

𑀉𑀢𑁆𑀢𑀲𑀦𑁆𑀢𑀸 𑀫𑀳𑀢𑁆𑀢𑀸𑀲𑀸, 𑀦 𑀤𑀲𑁆𑀲𑁂𑀦𑁆𑀢𑀺 𑀓𑀼𑀭𑀽𑀭𑀺𑀦𑁄.

‘‘𑀅𑀦𑀼𑀓𑀫𑁆𑀧𑀲𑁆𑀲𑀼 ¶ 𑀓𑀸𑀭𑀼𑀡𑀺𑀓𑁄, 𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀸𑀳𑀺 𑀦𑁄;

𑀢𑀯 𑀤𑀺𑀦𑁆𑀦𑁂𑀦 𑀤𑀸𑀦𑁂𑀦, 𑀬𑀸𑀧𑁂𑀲𑁆𑀲𑀦𑁆𑀢𑀺 𑀓𑀼𑀭𑀽𑀭𑀺𑀦𑁄’’𑀢𑀺.

𑁪𑁦𑁮-𑁯. 𑀢𑀢𑁆𑀣 𑀓𑀼𑀡𑁆𑀟𑀺𑀦𑀸𑀕𑀭𑀺𑀬𑁄 𑀣𑁂𑀭𑁄𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂 𑀚𑀸𑀢𑀲𑀁𑀯𑀟𑁆𑀠𑀢𑁆𑀣𑁂𑀭𑁄, ‘‘𑀓𑀼𑀡𑁆𑀟𑀺𑀓𑀦𑀕𑀭𑁄 𑀣𑁂𑀭𑁄’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀲𑀸𑀡𑀯𑀸𑀲𑀺𑀦𑀺𑀯𑀸𑀲𑀺𑀓𑁄𑀢𑀺 𑀲𑀸𑀡𑀧𑀩𑁆𑀩𑀢𑀯𑀸𑀲𑀻. 𑀧𑁄𑀝𑁆𑀞𑀧𑀸𑀤𑁄𑀢𑀺 𑀦𑀸𑀫𑁂𑀦𑀸𑀢𑀺 𑀦𑀸𑀫𑁂𑀦 𑀧𑁄𑀝𑁆𑀞𑀧𑀸𑀤𑁄 𑀦𑀸𑀫. 𑀲𑀫𑀡𑁄𑀢𑀺 𑀲𑀫𑀺𑀢𑀧𑀸𑀧𑁄. 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑀺𑀢𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑁄, 𑀅𑀭𑀳𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀸𑀡𑀯𑀸𑀲𑀺𑀢𑁆𑀣𑁂𑀭𑀲𑁆𑀲. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀕𑁆𑀕𑀢𑀺𑀕𑀢𑀸.

𑁪𑁧𑁦. 𑀲𑀽𑀘𑀺𑀓𑀝𑁆𑀝𑀸𑀢𑀺 ¶ 𑀧𑀽𑀢𑀺𑀦𑀸 𑀮𑀽𑀔𑀕𑀢𑁆𑀢𑀸 𑀅𑀝𑁆𑀝𑀓𑀸, 𑀲𑀽𑀘𑀺𑀓𑀸𑀢𑀺 𑀮𑀤𑁆𑀥𑀦𑀸𑀫𑀸𑀬 𑀔𑀼𑀧𑁆𑀧𑀺𑀧𑀸𑀲𑀸𑀬 𑀅𑀝𑁆𑀝𑀸 𑀧𑀻𑀴𑀺𑀢𑀸. ‘‘𑀲𑀽𑀘𑀺𑀓𑀡𑁆𑀞𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀲𑀽𑀘𑀺𑀙𑀺𑀤𑁆𑀤𑀲𑀤𑀺𑀲𑀫𑀼𑀔𑀤𑁆𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀓𑀺𑀮𑀦𑁆𑀢𑀸𑀢𑀺 𑀓𑀺𑀮𑀦𑁆𑀢𑀓𑀸𑀬𑀘𑀺𑀢𑁆𑀢𑀸. 𑀦𑀕𑁆𑀕𑀺𑀦𑁄𑀢𑀺 𑀦𑀕𑁆𑀕𑀭𑀽𑀧𑀸 𑀦𑀺𑀘𑁆𑀘𑁄𑀴𑀸. 𑀓𑀺𑀲𑀸𑀢𑀺 𑀅𑀝𑁆𑀞𑀺𑀢𑁆𑀢𑀘𑀫𑀢𑁆𑀢𑀲𑀭𑀻𑀭𑀢𑀸𑀬 𑀓𑀺𑀲𑀤𑁂𑀳𑀸. 𑀉𑀢𑁆𑀢𑀲𑀦𑁆𑀢𑀸𑀢𑀺 ‘‘𑀅𑀬𑀁 𑀲𑀫𑀡𑁄 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄’’𑀢𑀺 𑀑𑀢𑁆𑀢𑀧𑁆𑀧𑁂𑀦 𑀉𑀢𑁆𑀭𑀸𑀲𑀁 𑀆𑀧𑀚𑁆𑀚𑀦𑁆𑀢𑀸 ¶ . 𑀫𑀳𑀢𑁆𑀢𑀸𑀲𑀸𑀢𑀺 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀧𑀝𑀺𑀘𑁆𑀘 𑀲𑀜𑁆𑀚𑀸𑀢𑀫𑀳𑀸𑀪𑀬𑀸. 𑀦 𑀤𑀲𑁆𑀲𑁂𑀦𑁆𑀢𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀦𑁆𑀢𑀺, 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺. 𑀓𑀼𑀭𑀽𑀭𑀺𑀦𑁄𑀢𑀺 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑀸.

𑁪𑁧𑁧. 𑀢𑀲𑁆𑀲 𑀪𑀸𑀢𑀸𑀢𑀺 𑀲𑀸𑀡𑀯𑀸𑀲𑀺𑀢𑁆𑀣𑁂𑀭𑀲𑁆𑀲 𑀪𑀸𑀢𑀸. 𑀯𑀺𑀢𑀭𑀺𑀢𑁆𑀯𑀸𑀢𑀺 𑀯𑀺𑀢𑀺𑀡𑁆𑀡𑁄 𑀳𑀼𑀢𑁆𑀯𑀸, 𑀑𑀢𑁆𑀢𑀧𑁆𑀧𑀲𑀦𑁆𑀢𑀸𑀲𑀪𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀢𑀼𑀭𑀺𑀢𑁆𑀯𑀸𑀢𑀺 𑀯𑀸 𑀧𑀸𑀞𑁄, 𑀢𑀼𑀭𑀺𑀢𑁄 𑀳𑀼𑀢𑁆𑀯𑀸, 𑀢𑀭𑀫𑀸𑀦𑀭𑀽𑀧𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀧𑀣𑁂𑀢𑀺 𑀏𑀓𑀧𑀤𑀺𑀓𑀫𑀕𑁆𑀕𑁂. 𑀏𑀓𑀓𑁄𑀢𑀺 𑀏𑀓𑀺𑀓𑁄 𑀅𑀤𑀼𑀢𑀺𑀬𑁄. 𑀘𑀢𑀼𑀓𑀼𑀡𑁆𑀟𑀺𑀓𑁄 𑀪𑀯𑀺𑀢𑁆𑀯𑀸𑀦𑀸𑀢𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀓𑀼𑀡𑁆𑀟𑁂𑀢𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀻𑀢𑀺 𑀘𑀢𑀼𑀓𑀼𑀡𑁆𑀟𑀺𑀓𑁄, 𑀤𑁆𑀯𑀻𑀳𑀺 𑀚𑀸𑀡𑀽𑀳𑀺 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀕𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑁄 𑀘, 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀏𑀯𑀁 𑀧𑀼𑀭𑀢𑁄 𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀸 𑀳𑁄𑀢𑀻𑀢𑀺 𑀢𑀣𑀸 𑀅𑀓𑀸𑀲𑀺. 𑀣𑁂𑀭𑀲𑁆𑀲 𑀤𑀲𑁆𑀲𑀬𑀻𑀢𑀼𑀫𑀦𑁆𑀢𑀺 𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀬𑀺 𑀤𑀲𑁆𑀲𑁂𑀲𑀺.

𑁪𑁧𑁨. 𑀅𑀫𑀦𑀲𑀺𑀓𑀢𑁆𑀯𑀸𑀢𑀺 ‘‘𑀅𑀬𑀁 𑀦𑀸𑀫 𑀏𑀲𑁄’’𑀢𑀺 𑀏𑀯𑀁 𑀫𑀦𑀲𑀺 𑀅𑀓𑀭𑀺𑀢𑁆𑀯𑀸 𑀅𑀦𑀸𑀯𑀚𑁆𑀚𑁂𑀢𑁆𑀯𑀸. 𑀲𑁄 𑀘𑀸𑀢𑀺 𑀲𑁄 𑀧𑁂𑀢𑁄. 𑀪𑀸𑀢𑀸 𑀧𑁂𑀢𑀕𑀢𑁄 𑀅𑀳𑀦𑁆𑀢𑀺 ‘‘𑀅𑀳𑀁 𑀅𑀢𑀻𑀢𑀢𑁆𑀢𑀪𑀸𑀯𑁂 𑀪𑀸𑀢𑀸, 𑀇𑀤𑀸𑀦𑀺 𑀧𑁂𑀢𑀪𑀽𑀢𑁄 𑀇𑀥𑀸𑀕𑀢𑁄’’𑀢𑀺 𑀯𑀢𑁆𑀯𑀸 𑀯𑀺𑀜𑁆𑀜𑀸𑀧𑀬𑀺 𑀣𑁂𑀭𑀦𑁆𑀢𑀺 𑀬𑁄𑀚𑀦𑀸.

𑁪𑁧𑁩-𑁫. 𑀬𑀣𑀸 𑀧𑀦 𑀯𑀺𑀜𑁆𑀜𑀸𑀧𑀬𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀸 𑀧𑀺𑀢𑀸 𑀘𑀸’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀫𑀸𑀢𑀸 𑀧𑀺𑀢𑀸 𑀘 𑀢𑁂𑀢𑀺 𑀢𑀯 𑀫𑀸𑀢𑀸 𑀘 𑀧𑀺𑀢𑀸 𑀘. 𑀅𑀦𑀼𑀓𑀫𑁆𑀧𑀲𑁆𑀲𑀽𑀢𑀺 𑀅𑀦𑀼𑀕𑁆𑀕𑀡𑁆𑀳 𑀅𑀦𑀼𑀤𑀬𑀁 ¶ 𑀓𑀭𑁄𑀳𑀺. 𑀅𑀦𑁆𑀯𑀸𑀤𑀺𑀲𑀸𑀳𑀻𑀢𑀺 𑀆𑀤𑀺𑀲. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀢𑀯 𑀤𑀺𑀦𑁆𑀦𑁂𑀦𑀸𑀢𑀺 𑀢𑀬𑀸 𑀤𑀺𑀦𑁆𑀦𑁂𑀦.

𑀢𑀁 ¶ 𑀲𑀼𑀢𑁆𑀯𑀸 𑀣𑁂𑀭𑁄 𑀬𑀣𑀸 𑀧𑀝𑀺𑀧𑀚𑁆𑀚𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑁋

‘‘𑀣𑁂𑀭𑁄 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬, 𑀪𑀺𑀓𑁆𑀔𑀽 𑀅𑀜𑁆𑀜𑁂 𑀘 𑀤𑁆𑀯𑀸𑀤𑀲;

𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀸𑀭𑀡𑀸.

‘‘𑀣𑁂𑀭𑁄 𑀲𑀩𑁆𑀩𑁂𑀯 𑀢𑁂 𑀆𑀳, 𑀬𑀣𑀸𑀮𑀤𑁆𑀥𑀁 𑀤𑀤𑀸𑀣 𑀫𑁂;

𑀲𑀗𑁆𑀖𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀦𑀼𑀓𑀫𑁆𑀧𑀸𑀬 𑀜𑀸𑀢𑀺𑀦𑀁.

‘‘𑀦𑀺𑀬𑁆𑀬𑀸𑀤𑀬𑀺𑀁𑀲𑀼 ¶ 𑀣𑁂𑀭𑀲𑁆𑀲, 𑀣𑁂𑀭𑁄 𑀲𑀗𑁆𑀖𑀁 𑀦𑀺𑀫𑀦𑁆𑀢𑀬𑀺;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀺 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀪𑁄𑀚𑀦𑀁 𑀉𑀤𑀧𑀚𑁆𑀚𑀣;

𑀲𑀼𑀘𑀺𑀁 𑀧𑀡𑀻𑀢𑀁 𑀲𑀫𑁆𑀧𑀦𑁆𑀦𑀁, 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀁.

‘‘𑀢𑀢𑁄 𑀉𑀤𑁆𑀤𑀲𑁆𑀲𑀬𑀻 𑀪𑀸𑀢𑀸, 𑀯𑀡𑁆𑀡𑀯𑀸 𑀩𑀮𑀯𑀸 𑀲𑀼𑀔𑀻;

𑀧𑀳𑀽𑀢𑀁 𑀪𑁄𑀚𑀦𑀁 𑀪𑀦𑁆𑀢𑁂, 𑀧𑀲𑁆𑀲 𑀦𑀕𑁆𑀕𑀸𑀫𑁆𑀳𑀲𑁂 𑀫𑀬𑀁;

𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀯𑀢𑁆𑀣𑀁 𑀮𑀪𑀸𑀫𑀲𑁂.

‘‘𑀣𑁂𑀭𑁄 𑀲𑀗𑁆𑀓𑀸𑀭𑀓𑀽𑀝𑀫𑁆𑀳𑀸, 𑀉𑀘𑁆𑀘𑀺𑀦𑀺𑀢𑁆𑀯𑀸𑀦 𑀦𑀦𑁆𑀢𑀓𑁂;

𑀧𑀺𑀮𑁄𑀢𑀺𑀓𑀁 𑀧𑀝𑀁 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸.

‘‘𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀢𑁆𑀣𑀸𑀦𑀺 𑀉𑀤𑀧𑀚𑁆𑀚𑀺𑀲𑀼𑀁;

𑀢𑀢𑁄 𑀲𑀼𑀯𑀢𑁆𑀣𑀯𑀲𑀦𑁄, 𑀣𑁂𑀭𑀲𑁆𑀲 𑀤𑀲𑁆𑀲𑀬𑀻𑀢𑀼𑀫𑀁.

‘‘𑀬𑀸𑀯𑀢𑀸 ¶ 𑀦𑀦𑁆𑀤𑀭𑀸𑀚𑀲𑁆𑀲, 𑀯𑀺𑀚𑀺𑀢𑀲𑁆𑀫𑀺𑀁 𑀧𑀝𑀺𑀘𑁆𑀙𑀤𑀸;

𑀢𑀢𑁄 𑀩𑀳𑀼𑀢𑀭𑀸 𑀪𑀦𑁆𑀢𑁂, 𑀯𑀢𑁆𑀣𑀸𑀦𑀘𑁆𑀙𑀸𑀤𑀦𑀸𑀦𑀺 𑀦𑁄.

‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀻𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀯𑀺𑀧𑀼𑀮𑀸 𑀘 𑀫𑀳𑀕𑁆𑀖𑀸 𑀘, 𑀢𑁂𑀧𑀸𑀓𑀸𑀲𑁂𑀯𑀮𑀫𑁆𑀩𑀭𑁂.

‘‘𑀢𑁂 ¶ 𑀫𑀬𑀁 𑀧𑀭𑀺𑀤𑀳𑀸𑀫, 𑀬𑀁 𑀬𑀜𑁆𑀳𑀺 𑀫𑀦𑀲𑁄 𑀧𑀺𑀬𑀁;

𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀕𑁂𑀳𑀁 𑀮𑀪𑀸𑀫𑀲𑁂.

‘‘𑀣𑁂𑀭𑁄 ¶ 𑀧𑀡𑁆𑀡𑀓𑀼𑀝𑀺𑀁 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀤𑀢𑁆𑀯𑀸 𑀘 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀖𑀭𑀸𑀦𑀺 𑀉𑀤𑀧𑀚𑁆𑀚𑀺𑀲𑀼𑀁;

𑀓𑀽𑀝𑀸𑀕𑀸𑀭𑀦𑀺𑀯𑁂𑀲𑀦𑀸, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸.

‘‘𑀦 𑀫𑀦𑀼𑀲𑁆𑀲𑁂𑀲𑀼 𑀈𑀤𑀺𑀲𑀸, 𑀬𑀸𑀤𑀺𑀲𑀸 𑀦𑁄 𑀖𑀭𑀸 𑀇𑀥;

𑀅𑀧𑀺 𑀤𑀺𑀩𑁆𑀩𑁂𑀲𑀼 𑀬𑀸𑀤𑀺𑀲𑀸, 𑀢𑀸𑀤𑀺𑀲𑀸 𑀦𑁄 𑀖𑀭𑀸 𑀇𑀥.

‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑁂𑀦𑁆𑀢𑀺, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀧𑀸𑀦𑀻𑀬𑀁 𑀮𑀪𑀸𑀫𑀲𑁂.

‘‘𑀣𑁂𑀭𑁄 𑀓𑀭𑀡𑀁 𑀧𑀽𑀭𑁂𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀧𑀸𑀦𑀻𑀬𑀁 𑀉𑀤𑀧𑀚𑁆𑀚𑀣;

𑀕𑀫𑁆𑀪𑀻𑀭𑀸 𑀘𑀢𑀼𑀭𑀲𑁆𑀲𑀸 𑀘, 𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀦𑀺𑀫𑁆𑀫𑀺𑀢𑀸.

‘‘𑀲𑀻𑀢𑁄𑀤𑀺𑀓𑀸 ¶ 𑀲𑀼𑀧𑁆𑀧𑀢𑀺𑀢𑁆𑀣𑀸, 𑀲𑀻𑀢𑀸 𑀅𑀧𑁆𑀧𑀝𑀺𑀕𑀦𑁆𑀥𑀺𑀬𑀸;

𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀯𑀸𑀭𑀺𑀓𑀺𑀜𑁆𑀚𑀓𑁆𑀔𑀧𑀽𑀭𑀺𑀢𑀸.

‘‘𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀣𑁂𑀭𑀲𑁆𑀲 𑀧𑀝𑀺𑀤𑀲𑁆𑀲𑀬𑀼𑀁;

𑀧𑀳𑀽𑀢𑀁 𑀧𑀸𑀦𑀻𑀬𑀁 𑀪𑀦𑁆𑀢𑁂, 𑀧𑀸𑀤𑀸 𑀤𑀼𑀓𑁆𑀔𑀸 𑀨𑀮𑀦𑁆𑀢𑀺 𑀦𑁄.

‘‘𑀆𑀳𑀺𑀡𑁆𑀟𑀫𑀸𑀦𑀸 𑀔𑀜𑁆𑀚𑀸𑀫, 𑀲𑀓𑁆𑀔𑀭𑁂 𑀓𑀼𑀲𑀓𑀡𑁆𑀝𑀓𑁂;

𑀢𑀣𑀸 𑀪𑀦𑁆𑀢𑁂 𑀧𑀭𑀓𑁆𑀓𑀫, 𑀬𑀣𑀸 𑀬𑀸𑀦𑀁 𑀮𑀪𑀸𑀫𑀲𑁂.

‘‘𑀣𑁂𑀭𑁄 𑀲𑀺𑀧𑀸𑀝𑀺𑀓𑀁 𑀮𑀤𑁆𑀥𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸;

𑀤𑀢𑁆𑀯𑀸 𑀅𑀦𑁆𑀯𑀸𑀤𑀺𑀲𑀻 𑀣𑁂𑀭𑁄, 𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄;

‘𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂 ¶ , 𑀧𑁂𑀢𑀸 𑀭𑀣𑁂𑀦 𑀫𑀸𑀕𑀫𑀼𑀁;

𑀅𑀦𑀼𑀓𑀫𑁆𑀧𑀺𑀢𑀫𑁆𑀳 𑀪𑀤𑀦𑁆𑀢𑁂, 𑀪𑀢𑁆𑀢𑁂𑀦𑀘𑁆𑀙𑀸𑀤𑀦𑁂𑀦 𑀘.

‘‘𑀖𑀭𑁂𑀦 ¶ 𑀧𑀸𑀦𑀻𑀬𑀤𑀸𑀦𑁂𑀦, 𑀬𑀸𑀦𑀤𑀸𑀦𑁂𑀦 𑀘𑀽𑀪𑀬𑀁;

𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁 𑀮𑁄𑀓𑁂, 𑀪𑀦𑁆𑀢𑁂 𑀯𑀦𑁆𑀤𑀺𑀢𑀼𑀫𑀸𑀕𑀢𑀸’’𑀢𑀺. 𑁋 𑀕𑀸𑀣𑀸𑀬𑁄 𑀆𑀳𑀁𑀲𑀼;

𑁪𑁧𑁬-𑁭. 𑀢𑀢𑁆𑀣 𑀣𑁂𑀭𑁄 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬𑀸𑀢𑀺 𑀣𑁂𑀭𑁄 𑀧𑀺𑀡𑁆𑀟𑀸𑀧𑀸𑀢𑀘𑀸𑀭𑀺𑀓𑀸𑀬 𑀘𑀭𑀺𑀢𑁆𑀯𑀸. 𑀪𑀺𑀓𑁆𑀔𑀽 𑀅𑀜𑁆𑀜𑁂 𑀘 𑀤𑁆𑀯𑀸𑀤𑀲𑀸𑀢𑀺 𑀣𑁂𑀭𑁂𑀦 𑀲𑀳 𑀯𑀲𑀦𑁆𑀢𑀸 𑀅𑀜𑁆𑀜𑁂 𑀘 𑀤𑁆𑀯𑀸𑀤𑀲 𑀪𑀺𑀓𑁆𑀔𑀽 𑀏𑀓𑀚𑁆𑀛𑀁 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀓𑀲𑁆𑀫𑀸𑀢𑀺 𑀘𑁂? 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀸𑀭𑀡𑀸𑀢𑀺 𑀪𑀢𑁆𑀢𑀓𑀺𑀘𑁆𑀘𑀓𑀸𑀭𑀡𑀸 𑀪𑀼𑀜𑁆𑀚𑀦𑀦𑀺𑀫𑀺𑀢𑁆𑀢𑀁. 𑀢𑁂𑀢𑀺 𑀢𑁂 𑀪𑀺𑀓𑁆𑀔𑀽. 𑀬𑀣𑀸𑀮𑀤𑁆𑀥𑀦𑁆𑀢𑀺 𑀬𑀁 𑀬𑀁 𑀮𑀤𑁆𑀥𑀁. 𑀤𑀤𑀸𑀣𑀸𑀢𑀺 𑀤𑁂𑀣.

𑁪𑁧𑁮. 𑀦𑀺𑀬𑁆𑀬𑀸𑀤𑀬𑀺𑀁𑀲𑀽𑀢𑀺 𑀅𑀤𑀁𑀲𑀼. 𑀲𑀗𑁆𑀖𑀁 𑀦𑀺𑀫𑀦𑁆𑀢𑀬𑀻𑀢𑀺 𑀢𑁂 𑀏𑀯 𑀤𑁆𑀯𑀸𑀤𑀲 𑀪𑀺𑀓𑁆𑀔𑀽 𑀲𑀗𑁆𑀖𑀼𑀤𑁆𑀤𑁂𑀲𑀯𑀲𑁂𑀦 𑀢𑀁 𑀪𑀢𑁆𑀢𑀁 𑀤𑀸𑀢𑀼𑀁 𑀦𑀺𑀫𑀦𑁆𑀢𑁂𑀲𑀺. 𑀅𑀦𑁆𑀯𑀸𑀤𑀺𑀲𑀻𑀢𑀺 𑀆𑀤𑀺𑀲𑀺. 𑀢𑀢𑁆𑀣 𑀬𑁂𑀲𑀁 𑀅𑀦𑁆𑀯𑀸𑀤𑀺𑀲𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀼 𑀧𑀺𑀢𑀼 𑀘 𑀪𑀸𑀢𑀼𑀦𑁄, 𑀇𑀤𑀁 𑀫𑁂 𑀜𑀸𑀢𑀻𑀦𑀁 𑀳𑁄𑀢𑀼, 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀜𑀸𑀢𑀬𑁄’’𑀢𑀺 𑀯𑀼𑀢𑁆𑀢𑀁.

𑁪𑁧𑁯. 𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂𑀢𑀺 𑀉𑀤𑁆𑀤𑀺𑀝𑁆𑀞𑀲𑀫𑀦𑀦𑁆𑀢𑀭𑀫𑁂𑀯. 𑀪𑁄𑀚𑀦𑀁 𑀉𑀤𑀧𑀚𑁆𑀚𑀣𑀸𑀢𑀺 𑀢𑁂𑀲𑀁 𑀧𑁂𑀢𑀸𑀦𑀁 𑀪𑁄𑀚𑀦𑀁 ¶ 𑀉𑀧𑁆𑀧𑀚𑁆𑀚𑀺. 𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀲𑀼𑀘𑀺’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀦𑁂𑀓𑀭𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀦𑀸𑀦𑀸𑀭𑀲𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀬𑀼𑀢𑁆𑀢𑀁, 𑀅𑀣 𑀯𑀸 𑀅𑀦𑁂𑀓𑀭𑀲𑀁 𑀅𑀦𑁂𑀓𑀩𑁆𑀬𑀜𑁆𑀚𑀦𑀜𑁆𑀘. 𑀢𑀢𑁄𑀢𑀺 𑀪𑁄𑀚𑀦𑀮𑀸𑀪𑀢𑁄 𑀧𑀘𑁆𑀙𑀸.

𑁪𑁨𑁦. 𑀉𑀤𑁆𑀤𑀲𑁆𑀲𑀬𑀻 𑀪𑀸𑀢𑀸𑀢𑀺 𑀪𑀸𑀢𑀺𑀓𑀪𑀽𑀢𑁄 𑀧𑁂𑀢𑁄 𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀯𑀡𑁆𑀡𑀯𑀸 𑀩𑀮𑀯𑀸 𑀲𑀼𑀔𑀻𑀢𑀺 𑀢𑁂𑀦 𑀪𑁄𑀚𑀦𑀮𑀸𑀪𑁂𑀦 𑀢𑀸𑀯𑀤𑁂𑀯 𑀭𑀽𑀧𑀲𑀫𑁆𑀧𑀦𑁆𑀦𑁄 𑀩𑀮𑀲𑀫𑁆𑀧𑀦𑁆𑀦𑁄 𑀲𑀼𑀔𑀺𑀢𑁄𑀯 𑀳𑀼𑀢𑁆𑀯𑀸. 𑀧𑀳𑀽𑀢𑀁 𑀪𑁄𑀚𑀦𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀢𑀯 𑀤𑀸𑀦𑀸𑀦𑀼𑀪𑀸𑀯𑁂𑀦 𑀧𑀳𑀽𑀢𑀁 𑀅𑀦𑀧𑁆𑀧𑀓𑀁 𑀪𑁄𑀚𑀦𑀁 𑀅𑀫𑁆𑀳𑁂𑀳𑀺 𑀮𑀤𑁆𑀥𑀁. 𑀧𑀲𑁆𑀲 𑀦𑀕𑁆𑀕𑀸𑀫𑁆𑀳𑀲𑁂𑀢𑀺 𑀑𑀮𑁄𑀓𑁂𑀳𑀺, 𑀦𑀕𑁆𑀕𑀺𑀓𑀸 𑀧𑀦 𑀅𑀫𑁆𑀳, 𑀢𑀲𑁆𑀫𑀸 𑀢𑀣𑀸, 𑀪𑀦𑁆𑀢𑁂, 𑀧𑀭𑀓𑁆𑀓𑀫 𑀧𑀬𑁄𑀕𑀁 𑀓𑀭𑁄𑀳𑀺. 𑀬𑀣𑀸 𑀯𑀢𑁆𑀣𑀁 𑀮𑀪𑀸𑀫𑀲𑁂𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀬𑀸𑀤𑀺𑀲𑁂𑀦 𑀧𑀬𑁄𑀕𑁂𑀦 ¶ 𑀲𑀩𑁆𑀩𑁂𑀯 𑀫𑀬𑀁 𑀯𑀢𑁆𑀣𑀸𑀦𑀺 𑀮𑀪𑁂𑀬𑁆𑀬𑀸𑀫, 𑀢𑀣𑀸 𑀯𑀸𑀬𑀫𑀣𑀸𑀢𑀺 𑀅𑀢𑁆𑀣𑁄.

𑁪𑁨𑁧. 𑀲𑀗𑁆𑀓𑀸𑀭𑀓𑀽𑀝𑀫𑁆𑀳𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑁄. 𑀉𑀘𑁆𑀘𑀺𑀦𑀺𑀢𑁆𑀯𑀸𑀦𑀸𑀢𑀺 𑀕𑀯𑁂𑀲𑀦𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀦𑀦𑁆𑀢𑀓𑁂𑀢𑀺 𑀙𑀺𑀦𑁆𑀦𑀧𑀭𑀺𑀬𑀦𑁆𑀢𑁂 𑀙𑀟𑁆𑀟𑀺𑀢𑀤𑀼𑀲𑁆𑀲𑀔𑀡𑁆𑀟𑁂 ¶ . 𑀢𑁂 𑀧𑀦 𑀬𑀲𑁆𑀫𑀸 𑀔𑀡𑁆𑀟𑀪𑀽𑀢𑀸 𑀧𑀺𑀮𑁄𑀢𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀸𑀳𑀺 𑀘 𑀣𑁂𑀭𑁄 𑀘𑀻𑀯𑀭𑀁 𑀓𑀢𑁆𑀯𑀸 𑀲𑀗𑁆𑀖𑀲𑁆𑀲 𑀅𑀤𑀸𑀲𑀺, 𑀢𑀲𑁆𑀫𑀸 𑀆𑀳 ‘‘𑀧𑀺𑀮𑁄𑀢𑀺𑀓𑀁 𑀧𑀝𑀁 𑀓𑀢𑁆𑀯𑀸, 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸’’𑀢𑀺. 𑀢𑀢𑁆𑀣 𑀲𑀗𑁆𑀖𑁂 𑀘𑀸𑀢𑀼𑀤𑁆𑀤𑀺𑀲𑁂 𑀅𑀤𑀸𑀢𑀺 𑀘𑀢𑀽𑀳𑀺𑀧𑀺 𑀤𑀺𑀲𑀸𑀳𑀺 𑀆𑀕𑀢𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀲𑀫𑁆𑀧𑀤𑀸𑀦𑀢𑁆𑀣𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁.

𑁪𑁨𑁩-𑁪. 𑀲𑀼𑀯𑀢𑁆𑀣𑀯𑀲𑀦𑁄𑀢𑀺 𑀲𑀼𑀦𑁆𑀤𑀭𑀯𑀢𑁆𑀣𑀯𑀲𑀦𑁄. 𑀣𑁂𑀭𑀲𑁆𑀲 𑀤𑀲𑁆𑀲𑀬𑀻𑀢𑀼𑀫𑀦𑁆𑀢𑀺 𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑀬𑀺 𑀤𑀲𑁆𑀲𑁂𑀲𑀺, 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀝𑀺𑀘𑁆𑀙𑀸𑀤𑀬𑀢𑀺 𑀏𑀢𑁆𑀣𑀸𑀢𑀺 𑀧𑀝𑀺𑀘𑁆𑀙𑀤𑀸.

𑁪𑁨𑁮-𑁯. 𑀓𑀽𑀝𑀸𑀕𑀸𑀭𑀦𑀺𑀯𑁂𑀲𑀦𑀸𑀢𑀺 𑀓𑀽𑀝𑀸𑀕𑀸𑀭𑀪𑀽𑀢𑀸 𑀢𑀤𑀜𑁆𑀜𑀦𑀺𑀯𑁂𑀲𑀦𑀲𑀗𑁆𑀔𑀸𑀢𑀸 𑀘 𑀖𑀭𑀸. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀪𑀢𑁆𑀢𑀸𑀢𑀺 𑀲𑀫𑀘𑀢𑀼𑀭𑀲𑁆𑀲𑀆𑀬𑀢𑀯𑀝𑁆𑀝𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀪𑀸𑀕𑀲𑁄 𑀫𑀺𑀢𑀸𑀢𑀺 𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑁂𑀢𑀮𑁄𑀓𑁂. 𑀅𑀧𑀺 𑀤𑀺𑀩𑁆𑀩𑁂𑀲𑀽𑀢𑀺 𑀅𑀧𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀤𑁂𑀯𑀮𑁄𑀓𑁂𑀲𑀽𑀢𑀺 𑀅𑀢𑁆𑀣𑁄.

𑁪𑁩𑁧. 𑀓𑀭𑀡𑀦𑁆𑀢𑀺 𑀥𑀫𑀓𑀭𑀡𑀁. 𑀧𑀽𑀭𑁂𑀢𑁆𑀯𑀸𑀢𑀺 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸. 𑀯𑀸𑀭𑀺𑀓𑀺𑀜𑁆𑀚𑀓𑁆𑀔𑀧𑀽𑀭𑀺𑀢𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀸𑀭𑀺𑀫𑀢𑁆𑀣𑀓𑁂 𑀧𑀤𑀼𑀫𑀼𑀧𑁆𑀧𑀮𑀸𑀤𑀻𑀦𑀁 𑀓𑁂𑀲𑀭𑀪𑀸𑀭𑁂𑀳𑀺 𑀲𑀜𑁆𑀙𑀸𑀤𑀺𑀢𑀯𑀲𑁂𑀦 𑀧𑀽𑀭𑀺𑀢𑀸. 𑀨𑀮𑀦𑁆𑀢𑀻𑀢𑀺 𑀧𑀼𑀧𑁆𑀨𑀦𑁆𑀢𑀺, 𑀧𑀡𑁆𑀳𑀺𑀓𑀧𑀭𑀺𑀬𑀦𑁆𑀢𑀸𑀤𑀻𑀲𑀼 𑀯𑀺𑀤𑀸𑀮𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁪𑁩𑁫-𑁬. 𑀆𑀳𑀺𑀡𑁆𑀟𑀫𑀸𑀦𑀸𑀢𑀺 𑀯𑀺𑀘𑀭𑀫𑀸𑀦𑀸. 𑀔𑀜𑁆𑀚𑀸𑀫𑀸𑀢𑀺 𑀔𑀜𑁆𑀚𑀦𑀯𑀲𑁂𑀦 ¶ 𑀕𑀘𑁆𑀙𑀸𑀫. 𑀲𑀓𑁆𑀔𑀭𑁂 𑀓𑀼𑀲𑀓𑀡𑁆𑀝𑀓𑁂𑀢𑀺 ¶ 𑀲𑀓𑁆𑀔𑀭𑀯𑀢𑀺 𑀓𑀼𑀲𑀓𑀡𑁆𑀝𑀓𑀯𑀢𑀺 𑀘 𑀪𑀽𑀫𑀺𑀪𑀸𑀕𑁂, 𑀲𑀓𑁆𑀔𑀭𑁂 𑀓𑀼𑀲𑀓𑀡𑁆𑀝𑀓𑁂 𑀘 𑀅𑀓𑁆𑀓𑀫𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀸𑀦𑀦𑁆𑀢𑀺 𑀭𑀣𑀯𑀬𑁆𑀳𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀬𑀸𑀦𑀁. 𑀲𑀺𑀧𑀸𑀝𑀺𑀓𑀦𑁆𑀢𑀺 𑀏𑀓𑀧𑀝𑀮𑀉𑀧𑀸𑀳𑀦𑀁.

𑁪𑁩𑁭-𑁮. 𑀭𑀣𑁂𑀦 𑀫𑀸𑀕𑀫𑀼𑀦𑁆𑀢𑀺 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀭𑀣𑁂𑀦 𑀆𑀕𑀫𑀁𑀲𑀼. 𑀉𑀪𑀬𑀦𑁆𑀢𑀺 𑀉𑀪𑀬𑁂𑀦 𑀤𑀸𑀦𑁂𑀦, 𑀬𑀸𑀦𑀤𑀸𑀦𑁂𑀦 𑀘𑁂𑀯 𑀪𑀢𑁆𑀢𑀸𑀤𑀺𑀘𑀢𑀼𑀧𑀘𑁆𑀘𑀬𑀤𑀸𑀦𑁂𑀦 𑀘. 𑀧𑀸𑀦𑀻𑀬𑀤𑀸𑀦𑁂𑀦 𑀳𑁂𑀢𑁆𑀣 𑀪𑁂𑀲𑀚𑁆𑀚𑀤𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀣𑁂𑀭𑁄 ¶ 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 ‘‘𑀬𑀣𑀸 𑀇𑀫𑁂 𑀏𑀢𑀭𑀳𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀇𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑁂 𑀅𑀢𑁆𑀢𑀪𑀸𑀯𑁂 𑀧𑁂𑀢𑁄 𑀳𑀼𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀲𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀦𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀲𑀸𑀡𑀯𑀸𑀲𑀺𑀢𑁆𑀣𑁂𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀭𑀣𑀓𑀸𑀭𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀲𑀼𑀯𑀺𑀪𑀢𑁆𑀢𑀯𑀺𑀘𑀺𑀢𑁆𑀭𑀪𑀺𑀢𑁆𑀢𑀺𑀣𑀫𑁆𑀪𑀲𑁄𑀧𑀸𑀦𑀪𑀽𑀫𑀺𑀢𑀮𑀁 𑀅𑀢𑀺𑀯𑀺𑀬 𑀤𑀲𑁆𑀲𑀦𑀻𑀬𑀁 𑀏𑀓𑀁 𑀆𑀯𑀸𑀲𑀁 𑀓𑀢𑁆𑀯𑀸 𑀢𑀢𑁆𑀣 𑀪𑀺𑀓𑁆𑀔𑀽 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀆𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀯𑀲𑁂𑀦 𑀳𑀺𑀫𑀯𑀢𑀺 𑀧𑀩𑁆𑀩𑀢𑀭𑀸𑀚𑁂 𑀭𑀣𑀓𑀸𑀭𑀤𑀳𑀁 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀧𑁂𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀲𑀗𑁆𑀖𑀲𑁆𑀲 𑀆𑀯𑀸𑀲𑀤𑀸𑀦𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑀭𑀢𑀦𑀫𑀬𑀁 𑀉𑀴𑀸𑀭𑀁 𑀅𑀢𑀺𑀯𑀺𑀬 𑀲𑀫𑀦𑁆𑀢𑀢𑁄 𑀧𑀸𑀲𑀸𑀤𑀺𑀓𑀁 𑀫𑀦𑁄𑀳𑀭𑀁 𑀭𑀫𑀡𑀻𑀬𑀁 𑀧𑁄𑀓𑁆𑀔𑀭𑀡𑀺𑀬𑀁 ¶ 𑀦𑀦𑁆𑀤𑀦𑀯𑀦𑀲𑀤𑀺𑀲𑀁 𑀉𑀧𑀲𑁄𑀪𑀺𑀢𑀁 𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀲𑀬𑀜𑁆𑀘 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀅𑀳𑁄𑀲𑀺.

𑀲𑀸 𑀢𑀢𑁆𑀣 𑀧𑀼𑀭𑀺𑀲𑁂𑀳𑀺 𑀯𑀺𑀦𑀸𑀯 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀯𑀺𑀳𑀭𑀢𑀺. 𑀢𑀲𑁆𑀲𑀸 𑀢𑀢𑁆𑀣 𑀤𑀻𑀖𑀭𑀢𑁆𑀢𑀁 𑀦𑀺𑀧𑁆𑀧𑀼𑀭𑀺𑀲𑀸𑀬 𑀯𑀲𑀦𑁆𑀢𑀺𑀬𑀸 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸. 𑀲𑀸 𑀉𑀓𑁆𑀓𑀡𑁆𑀞𑀺𑀢𑀸 𑀳𑀼𑀢𑁆𑀯𑀸 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀸𑀦𑀺 𑀅𑀫𑁆𑀩𑀧𑀓𑁆𑀓𑀸𑀦𑀺 𑀦𑀤𑀺𑀬𑀁 𑀧𑀓𑁆𑀔𑀺𑀧𑀢𑀺. 𑀲𑀩𑁆𑀩𑀁 𑀓𑀡𑁆𑀡𑀫𑀼𑀡𑁆𑀟𑀧𑁂𑀢𑀺𑀯𑀢𑁆𑀣𑀼𑀲𑁆𑀫𑀺𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀫𑀸𑀡𑀯𑁄 𑀕𑀗𑁆𑀕𑀸𑀬 𑀢𑁂𑀲𑀼 𑀏𑀓𑀁 𑀅𑀫𑁆𑀩𑀨𑀮𑀁 𑀤𑀺𑀲𑁆𑀯𑀸 ¶ 𑀢𑀲𑁆𑀲 𑀧𑀪𑀯𑀁 𑀕𑀯𑁂𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀤𑀺𑀁 𑀤𑀺𑀲𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀁 𑀕𑀢𑁄. 𑀲𑀸 𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 ¶ 𑀦𑁂𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀻 𑀦𑀺𑀲𑀻𑀤𑀺. 𑀲𑁄 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀯𑀺𑀫𑀸𑀦𑀫𑀸𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀁;

𑀢𑀢𑁆𑀣𑀘𑁆𑀙𑀲𑀺 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀧𑀣𑀤𑁆𑀥𑀦𑀺 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄.

‘‘𑀯𑀡𑁆𑀡𑁄 𑀘 𑀢𑁂 𑀓𑀦𑀓𑀲𑁆𑀲 𑀲𑀦𑁆𑀦𑀺𑀪𑁄, 𑀉𑀢𑁆𑀢𑀢𑁆𑀢𑀭𑀽𑀧𑁄 𑀪𑀼𑀲 𑀤𑀲𑁆𑀲𑀦𑁂𑀬𑁆𑀬𑁄;

𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂 𑀅𑀢𑀼𑀮𑁂 𑀦𑀺𑀲𑀺𑀦𑁆𑀦𑀸, 𑀏𑀓𑀸 𑀢𑀼𑀯𑀁 𑀦𑀢𑁆𑀣𑀺 𑀘 𑀢𑀼𑀬𑁆𑀳 𑀲𑀸𑀫𑀺𑀓𑁄.

‘‘𑀇𑀫𑀸 𑀘 𑀢𑁂 𑀧𑁄𑀓𑁆𑀔𑀭𑀡𑀻 𑀲𑀫𑀦𑁆𑀢𑀸, 𑀧𑀳𑀽𑀢𑀫𑀮𑁆𑀬𑀸 𑀩𑀳𑀼𑀧𑀼𑀡𑁆𑀟𑀭𑀻𑀓𑀸;

𑀲𑀼𑀯𑀡𑁆𑀡𑀘𑀼𑀡𑁆𑀡𑁂𑀳𑀺 𑀲𑀫𑀦𑁆𑀢𑀫𑁄𑀢𑁆𑀣𑀢𑀸, 𑀦 𑀢𑀢𑁆𑀣 𑀧𑀗𑁆𑀓𑁄 𑀧𑀡𑀓𑁄 𑀘 𑀯𑀺𑀚𑁆𑀚𑀢𑀺.

‘‘𑀳𑀁𑀲𑀸 𑀘𑀺𑀫𑁂 𑀤𑀲𑁆𑀲𑀦𑀻𑀬𑀸 𑀫𑀦𑁄𑀭𑀫𑀸, 𑀉𑀤𑀓𑀲𑁆𑀫𑀺𑀫𑀦𑀼𑀧𑀭𑀺𑀬𑀦𑁆𑀢𑀺 ¶ 𑀲𑀩𑁆𑀩𑀤𑀸;

𑀲𑀫𑀬𑁆𑀬 𑀯𑀕𑁆𑀕𑀽𑀧𑀦𑀤𑀦𑁆𑀢𑀺 𑀲𑀩𑁆𑀩𑁂, 𑀩𑀺𑀦𑁆𑀤𑀼𑀲𑁆𑀲𑀭𑀸 𑀤𑀼𑀦𑁆𑀤𑀼𑀪𑀻𑀦𑀁𑀯 𑀖𑁄𑀲𑁄.

‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀬𑀲𑀲𑀸 𑀬𑀲𑀲𑁆𑀲𑀺𑀦𑀻, 𑀦𑀸𑀯𑀸𑀬 𑀘 𑀢𑁆𑀯𑀁 𑀅𑀯𑀮𑀫𑁆𑀩 𑀢𑀺𑀝𑁆𑀞𑀲𑀺;

𑀆𑀴𑀸𑀭𑀧𑀫𑁆𑀳𑁂 𑀳𑀲𑀺𑀢𑁂 𑀧𑀺𑀬𑀁𑀯𑀤𑁂, 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀺 𑀪𑀼𑀲𑀁 𑀯𑀺𑀭𑁄𑀘𑀲𑀺.

‘‘𑀇𑀤𑀁 𑀯𑀺𑀫𑀸𑀦𑀁 𑀯𑀺𑀭𑀚𑀁 𑀲𑀫𑁂 𑀞𑀺𑀢𑀁, 𑀉𑀬𑁆𑀬𑀸𑀦𑀯𑀦𑁆𑀢𑀁 𑀭𑀢𑀺𑀦𑀦𑁆𑀤𑀺𑀯𑀟𑁆𑀠𑀦𑀁;

𑀇𑀘𑁆𑀙𑀸𑀫𑀳𑀁 𑀦𑀸𑀭𑀺 𑀅𑀦𑁄𑀫𑀤𑀲𑁆𑀲𑀦𑁂, 𑀢𑀬𑀸 𑀲𑀳 𑀦𑀦𑁆𑀤𑀦𑁂 𑀇𑀥 𑀫𑁄𑀤𑀺𑀢𑀼’’𑀦𑁆𑀢𑀺. 𑁋

𑁪𑁩𑁯. 𑀢𑀢𑁆𑀣 ¶ 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂. 𑀅𑀘𑁆𑀙𑀲𑀻𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑀸𑀮𑁂 𑀦𑀺𑀲𑀻𑀤𑀲𑀺. 𑀤𑁂𑀯𑀻𑀢𑀺 𑀢𑀁 𑀆𑀮𑀧𑀢𑀺. 𑀫𑀳𑀸𑀦𑀼𑀪𑀸𑀯𑁂𑀢𑀺 𑀫𑀳𑀢𑀸 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀧𑀣𑀤𑁆𑀥𑀦𑀻𑀢𑀺 𑀅𑀢𑁆𑀢𑀦𑁄 𑀧𑀣𑀪𑀽𑀢𑁂 𑀅𑀤𑁆𑀥𑀦𑀺, 𑀕𑀕𑀦𑀢𑀮𑀫𑀕𑁆𑀕𑁂𑀢𑀺 𑀅𑀢𑁆𑀣𑁄. 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄𑀢𑀺 𑀧𑀼𑀡𑁆𑀡𑀫𑀸𑀲𑀺𑀬𑀁 𑀧𑀭𑀺𑀧𑀼𑀡𑁆𑀡𑀫𑀡𑁆𑀟𑀮𑁄 𑀘𑀦𑁆𑀤𑁄 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀸𑀢𑀺 𑀅𑀢𑁆𑀣𑁄.

𑁪𑁪𑁦. 𑀯𑀡𑁆𑀡𑁄 ¶ 𑀘 𑀢𑁂 𑀓𑀦𑀓𑀲𑁆𑀲 𑀲𑀦𑁆𑀦𑀺𑀪𑁄𑀢𑀺 𑀢𑀯 𑀯𑀡𑁆𑀡𑁄 𑀘 𑀉𑀢𑁆𑀢𑀢𑁆𑀢𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑁂𑀦 𑀲𑀤𑀺𑀲𑁄 𑀅𑀢𑀺𑀯𑀺𑀬 𑀫𑀦𑁄𑀳𑀭𑁄. 𑀢𑁂𑀦𑀸𑀳 ‘‘𑀉𑀢𑁆𑀢𑀢𑁆𑀢𑀭𑀽𑀧𑁄 𑀪𑀼𑀲 𑀤𑀲𑁆𑀲𑀦𑁂𑀬𑁆𑀬𑁄’’𑀢𑀺. 𑀅𑀢𑀼𑀮𑁂𑀢𑀺 𑀫𑀳𑀸𑀭𑀳𑁂. 𑀅𑀢𑀼𑀮𑁂𑀢𑀺 𑀯𑀸 𑀤𑁂𑀯𑀢𑀸𑀬 𑀆𑀮𑀧𑀦𑀁, 𑀅𑀲𑀤𑀺𑀲𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀘 𑀢𑀼𑀬𑁆𑀳 𑀲𑀸𑀫𑀺𑀓𑁄𑀢𑀺 𑀢𑀼𑀬𑁆𑀳𑀁 𑀲𑀸𑀫𑀺𑀓𑁄 𑀘 𑀦𑀢𑁆𑀣𑀺.

𑁪𑁪𑁧. 𑀧𑀳𑀽𑀢𑀫𑀮𑁆𑀬𑀸𑀢𑀺 𑀓𑀫𑀮𑀓𑀼𑀯𑀮𑀬𑀸𑀤𑀺𑀩𑀳𑀼𑀯𑀺𑀥𑀓𑀼𑀲𑀼𑀫𑀯𑀢𑀺𑀬𑁄 ¶ . 𑀲𑀼𑀯𑀡𑁆𑀡𑀘𑀼𑀡𑁆𑀡𑁂𑀳𑀻𑀢𑀺 𑀲𑀼𑀯𑀡𑁆𑀡𑀯𑀸𑀮𑀼𑀓𑀸𑀳𑀺. 𑀲𑀫𑀦𑁆𑀢𑀫𑁄𑀢𑁆𑀣𑀢𑀸𑀢𑀺 𑀲𑀫𑀦𑁆𑀢𑀢𑁄 𑀑𑀓𑀺𑀡𑁆𑀡𑀸. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀼. 𑀧𑀗𑁆𑀓𑁄 𑀧𑀡𑀓𑁄 𑀘𑀸𑀢𑀺 𑀓𑀤𑁆𑀤𑀫𑁄 𑀯𑀸 𑀉𑀤𑀓𑀧𑀺𑀘𑁆𑀙𑀺𑀮𑁆𑀮𑁄 𑀯𑀸 𑀦 𑀯𑀺𑀚𑁆𑀚𑀢𑀺.

𑁪𑁪𑁨. 𑀳𑀁𑀲𑀸 𑀘𑀺𑀫𑁂 𑀤𑀲𑁆𑀲𑀦𑀻𑀬𑀸 𑀫𑀦𑁄𑀭𑀫𑀸𑀢𑀺 𑀇𑀫𑁂 𑀳𑀁𑀲𑀸 𑀘 𑀤𑀲𑁆𑀲𑀦𑀲𑀼𑀔𑀸 𑀫𑀦𑁄𑀭𑀫𑀸 𑀘. 𑀅𑀦𑀼𑀧𑀭𑀺𑀬𑀦𑁆𑀢𑀻𑀢𑀺 𑀅𑀦𑀼𑀯𑀺𑀘𑀭𑀦𑁆𑀢𑀺. 𑀲𑀩𑁆𑀩𑀤𑀸𑀢𑀺 𑀲𑀩𑁆𑀩𑁂𑀲𑀼 𑀉𑀢𑀽𑀲𑀼. 𑀲𑀫𑀬𑁆𑀬𑀸𑀢𑀺 𑀲𑀗𑁆𑀕𑀫𑁆𑀫. 𑀯𑀕𑁆𑀕𑀽𑀢𑀺 𑀫𑀥𑀼𑀭𑀁. 𑀉𑀧𑀦𑀤𑀦𑁆𑀢𑀻𑀢𑀺 𑀯𑀺𑀓𑀽𑀚𑀦𑁆𑀢𑀺. 𑀩𑀺𑀦𑁆𑀤𑀼𑀲𑁆𑀲𑀭𑀸𑀢𑀺 𑀅𑀯𑀺𑀲𑀝𑀲𑁆𑀲𑀭𑀸 𑀲𑀫𑁆𑀧𑀺𑀡𑁆𑀟𑀺𑀢𑀲𑁆𑀲𑀭𑀸. 𑀤𑀼𑀦𑁆𑀤𑀼𑀪𑀻𑀦𑀁𑀯 𑀖𑁄𑀲𑁄𑀢𑀺 𑀯𑀕𑁆𑀕𑀼𑀩𑀺𑀦𑁆𑀤𑀼𑀲𑁆𑀲𑀭𑀪𑀸𑀯𑁂𑀦 𑀤𑀼𑀦𑁆𑀤𑀼𑀪𑀻𑀦𑀁 𑀯𑀺𑀬 𑀢𑀯 𑀧𑁄𑀓𑁆𑀔𑀭𑀡𑀺𑀬𑀁 𑀳𑀁𑀲𑀸𑀦𑀁 𑀖𑁄𑀲𑁄𑀢𑀺 𑀅𑀢𑁆𑀣𑁄.

𑁪𑁪𑁩. 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀅𑀢𑀺𑀯𑀺𑀬 𑀅𑀪𑀺𑀚𑀮𑀦𑁆𑀢𑀻. 𑀬𑀲𑀲𑀸𑀢𑀺 𑀤𑁂𑀯𑀺𑀤𑁆𑀥𑀺𑀬𑀸. 𑀦𑀸𑀯𑀸𑀬𑀸𑀢𑀺 𑀤𑁄𑀡𑀺𑀬𑀁. 𑀧𑁄𑀓𑁆𑀔𑀭𑀡𑀺𑀬𑀜𑁆𑀳𑀺 𑀧𑀤𑀼𑀫𑀺𑀦𑀺𑀬𑀁 𑀲𑀼𑀯𑀡𑁆𑀡𑀦𑀸𑀯𑀸𑀬 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑀺𑀁 𑀧𑁂𑀢𑀺𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳. 𑀅𑀯𑀮𑀫𑁆𑀩𑀸𑀢𑀺 𑀅𑀯𑀮𑀫𑁆𑀩𑀺𑀢𑁆𑀯𑀸 𑀅𑀧𑀲𑁆𑀲𑁂𑀦𑀁 𑀅𑀧𑀲𑁆𑀲𑀸𑀬. 𑀢𑀺𑀝𑁆𑀞𑀲𑀻𑀢𑀺 𑀇𑀤𑀁 𑀞𑀸𑀦𑀲𑀤𑁆𑀤𑀲𑁆𑀲 𑀕𑀢𑀺𑀦𑀺𑀯𑀢𑁆𑀢𑀺 𑀅𑀢𑁆𑀣𑀢𑁆𑀢𑀸 𑀕𑀢𑀺𑀬𑀸 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. ‘‘𑀦𑀺𑀲𑀚𑁆𑀚𑀲𑀻’’𑀢𑀺 𑀯𑀸 𑀧𑀸𑀞𑁄, 𑀦𑀺𑀲𑀻𑀤𑀲𑀺𑀘𑁆𑀘𑁂𑀯𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀴𑀸𑀭𑀧𑀫𑁆𑀳𑁂𑀢𑀺 𑀯𑁂𑀮𑁆𑀮𑀺𑀢𑀤𑀻𑀖𑀦𑀻𑀮𑀧𑀔𑀼𑀫𑁂. 𑀳𑀲𑀺𑀢𑁂𑀢𑀺 𑀳𑀲𑀺𑀢𑀫𑀳𑀸𑀳𑀲𑀺𑀢𑀫𑀼𑀔𑁂. 𑀧𑀺𑀬𑀁𑀯𑀤𑁂𑀢𑀺 𑀧𑀺𑀬𑀪𑀸𑀡𑀺𑀦𑀻. 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀻𑀢𑀺 𑀲𑀩𑁆𑀩𑁂𑀳𑀺 𑀅𑀗𑁆𑀕𑁂𑀳𑀺 𑀲𑀼𑀦𑁆𑀤𑀭𑁂, 𑀲𑁄𑀪𑀦𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻𑀢𑀺 𑀅𑀢𑁆𑀣𑁄. 𑀯𑀺𑀭𑁄𑀘𑀲𑀻𑀢𑀺 𑀯𑀺𑀭𑀸𑀚𑁂𑀲𑀺.

𑁪𑁪𑁪. 𑀯𑀺𑀭𑀚𑀦𑁆𑀢𑀺 ¶ 𑀯𑀺𑀕𑀢𑀭𑀚𑀁 𑀦𑀺𑀤𑁆𑀤𑁄𑀲𑀁. 𑀲𑀫𑁂 𑀞𑀺𑀢𑀦𑁆𑀢𑀺 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀞𑀺𑀢𑀁, 𑀘𑀢𑀼𑀭𑀲𑁆𑀲𑀲𑁄𑀪𑀺𑀢𑀢𑀸𑀬 𑀯𑀸 𑀲𑀫𑀪𑀸𑀕𑁂 𑀞𑀺𑀢𑀁, 𑀲𑀫𑀦𑁆𑀢𑀪𑀤𑁆𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀉𑀬𑁆𑀬𑀸𑀦𑀯𑀦𑁆𑀢𑀦𑁆𑀢𑀺 𑀦𑀦𑁆𑀤𑀦𑀯𑀦𑀲𑀳𑀺𑀢𑀁. 𑀭𑀢𑀺𑀦𑀦𑁆𑀤𑀺𑀯𑀟𑁆𑀠𑀦𑀦𑁆𑀢𑀺 𑀭𑀢𑀺𑀜𑁆𑀘 ¶ 𑀦𑀦𑁆𑀤𑀺𑀜𑁆𑀘 𑀯𑀟𑁆𑀠𑁂𑀢𑀻𑀢𑀺 𑀭𑀢𑀺𑀦𑀦𑁆𑀤𑀺𑀯𑀟𑁆𑀠𑀦𑀁, 𑀲𑀼𑀔𑀲𑁆𑀲 𑀘 𑀧𑀻𑀢𑀺𑀬𑀸 𑀘 𑀲𑀁𑀯𑀟𑁆𑀠𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀭𑀻𑀢𑀺 𑀢𑀲𑁆𑀲𑀸 𑀆𑀮𑀧𑀦𑀁. 𑀅𑀦𑁄𑀫𑀤𑀲𑁆𑀲𑀦𑁂𑀢𑀺 𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀅𑀦𑀺𑀦𑁆𑀤𑀺𑀢𑀤𑀲𑁆𑀲𑀦𑁂. 𑀦𑀦𑁆𑀤𑀦𑁂𑀢𑀺 𑀦𑀦𑁆𑀤𑀦𑀓𑀭𑁂. 𑀇𑀥𑀸𑀢𑀺 𑀦𑀦𑁆𑀤𑀦𑀯𑀦𑁂, 𑀯𑀺𑀫𑀸𑀦𑁂 𑀯𑀸. 𑀫𑁄𑀤𑀺𑀢𑀼𑀦𑁆𑀢𑀺 𑀅𑀪𑀺𑀭𑀫𑀺𑀢𑀼𑀁 𑀇𑀘𑁆𑀙𑀸𑀫𑀻𑀢𑀺 𑀬𑁄𑀚𑀦𑀸.

𑀏𑀯𑀁 ¶ 𑀢𑁂𑀦 𑀫𑀸𑀡𑀯𑁂𑀦 𑀯𑀼𑀢𑁆𑀢𑁂 𑀲𑀸 𑀯𑀺𑀫𑀸𑀦𑀧𑁂𑀢𑀺𑀤𑁂𑀯𑀢𑀸 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀻 𑁋

‘‘𑀓𑀭𑁄𑀳𑀺 𑀓𑀫𑁆𑀫𑀁 𑀇𑀥 𑀯𑁂𑀤𑀦𑀻𑀬𑀁, 𑀘𑀺𑀢𑁆𑀢𑀜𑁆𑀘 𑀢𑁂 𑀇𑀥 𑀦𑀺𑀳𑀺𑀢𑀁 𑀪𑀯𑀢𑀼;

𑀓𑀢𑁆𑀯𑀸𑀦 𑀓𑀫𑁆𑀫𑀁 𑀇𑀥 𑀯𑁂𑀤𑀦𑀻𑀬𑀁, 𑀏𑀯𑀁 𑀫𑀫𑀁 𑀮𑀘𑁆𑀙𑀲𑀺 𑀓𑀸𑀫𑀓𑀸𑀫𑀺𑀦𑀺’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀭𑁄𑀳𑀺 𑀓𑀫𑁆𑀫𑀁 𑀇𑀥 𑀯𑁂𑀤𑀦𑀻𑀬𑀦𑁆𑀢𑀺 𑀇𑀥 𑀇𑀫𑀲𑁆𑀫𑀺𑀁 𑀤𑀺𑀩𑁆𑀩𑀝𑁆𑀞𑀸𑀦𑁂 𑀯𑀺𑀧𑀘𑁆𑀘𑀦𑀓𑀁 𑀯𑀺𑀧𑀸𑀓𑀤𑀸𑀬𑀓𑀁 𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀳𑀺 𑀧𑀲𑀯𑁂𑀬𑁆𑀬𑀸𑀲𑀺. 𑀇𑀥 𑀦𑀺𑀳𑀺𑀢𑀦𑁆𑀢𑀺 𑀇𑀥𑀽𑀧𑀦𑀻𑀢𑀁, ‘‘𑀇𑀥 𑀦𑀺𑀦𑁆𑀦’’𑀦𑁆𑀢𑀺 𑀯𑀸 𑀧𑀸𑀞𑁄, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀦𑁆𑀦𑀁 𑀧𑁄𑀡𑀁 𑀧𑀩𑁆𑀪𑀸𑀭𑀁 𑀢𑀯 𑀘𑀺𑀢𑁆𑀢𑀁 𑀪𑀯𑀢𑀼 𑀳𑁄𑀢𑀼. 𑀫𑀫𑀦𑁆𑀢𑀺 𑀫𑀁. 𑀮𑀘𑁆𑀙𑀲𑀻𑀢𑀺 𑀮𑀪𑀺𑀲𑁆𑀲𑀲𑀺.

𑀲𑁄 𑀫𑀸𑀡𑀯𑁄 𑀢𑀲𑁆𑀲𑀸 𑀯𑀺𑀫𑀸𑀦𑀧𑁂𑀢𑀺𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑀧𑀣𑀁 𑀕𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑀸𑀬 𑀢𑀚𑁆𑀚𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺 𑀢𑀲𑁆𑀲𑀸 𑀧𑁂𑀢𑀺𑀬𑀸 𑀲𑀳𑀩𑁆𑀬𑀢𑀁. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀲𑀸𑀥𑀽𑀢𑀺 𑀲𑁄 𑀢𑀲𑁆𑀲𑀸 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸,

𑀅𑀓𑀸𑀲𑀺 𑀓𑀫𑁆𑀫𑀁 𑀢𑀳𑀺𑀁 𑀯𑁂𑀤𑀦𑀻𑀬𑀁;

𑀓𑀢𑁆𑀯𑀸𑀦 𑀓𑀫𑁆𑀫𑀁 𑀢𑀳𑀺𑀁 𑀯𑁂𑀤𑀦𑀻𑀬𑀁,

𑀉𑀧𑀧𑀚𑁆𑀚𑀺 𑀲𑁄 𑀫𑀸𑀡𑀯𑁄 𑀢𑀲𑁆𑀲𑀸 𑀲𑀳𑀩𑁆𑀬𑀢’’𑀦𑁆𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳𑀁𑀲𑀼. 𑀢𑀢𑁆𑀣 ¶ 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑁂 𑀦𑀺𑀧𑀸𑀢𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸 𑀯𑀺𑀫𑀸𑀦𑀧𑁂𑀢𑀺𑀬𑀸. 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸. 𑀢𑀳𑀺𑀁 𑀯𑁂𑀤𑀦𑀻𑀬𑀦𑁆𑀢𑀺 ¶ 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀢𑀸𑀬 𑀲𑀤𑁆𑀥𑀺𑀁 𑀯𑁂𑀤𑀺𑀢𑀩𑁆𑀩𑀲𑀼𑀔𑀯𑀺𑀧𑀸𑀓𑀁 𑀓𑀼𑀲𑀮𑀓𑀫𑁆𑀫𑀁. 𑀲𑀳𑀩𑁆𑀬𑀢𑀦𑁆𑀢𑀺 𑀲𑀳𑀪𑀸𑀯𑀁. 𑀲𑁄 𑀫𑀸𑀡𑀯𑁄 𑀢𑀲𑁆𑀲𑀸 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀏𑀯𑀁 𑀢𑁂𑀲𑀼 𑀢𑀢𑁆𑀣 𑀘𑀺𑀭𑀓𑀸𑀮𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁂𑀲𑀼 𑀧𑀼𑀭𑀺𑀲𑁄 𑀓𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀬𑁂𑀦 𑀓𑀸𑀮𑀫𑀓𑀸𑀲𑀺, 𑀇𑀢𑁆𑀣𑀻 𑀧𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑁂𑀦 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀲𑀺. 𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀓𑁆𑀓𑀫𑁂𑀦 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀓𑀤𑀺𑀯𑀲𑀁 𑀧𑀩𑁆𑀩𑀢𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀯𑀺𑀫𑀸𑀦𑀜𑁆𑀘 𑀯𑀺𑀫𑀸𑀦𑀧𑁂𑀢𑀺𑀜𑁆𑀘 𑀤𑀺𑀲𑁆𑀯𑀸 ‘‘𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭’’𑀦𑁆𑀢𑀺𑀆𑀤𑀺𑀓𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺. 𑀲𑀸 𑀘𑀲𑁆𑀲 ¶ 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀤𑀸𑀦𑀸𑀤𑀺𑀧𑀼𑀜𑁆𑀜𑀥𑀫𑁆𑀫𑀦𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀭𑀣𑀓𑀸𑀭𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀼𑀲𑀸𑀦𑀺 𑀏𑀓𑁄 𑀲𑀸𑀮𑀺𑀁 𑀧𑀼𑀦𑀸𑀧𑀭𑁄𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀘𑀢𑁆𑀢𑀸𑀭𑁄 𑀧𑁂𑀢𑁂 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑁄 𑀓𑀽𑀝𑀯𑀸𑀡𑀺𑀚𑁄 𑀓𑀽𑀝𑀫𑀸𑀦𑀸𑀤𑀻𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀲𑀸𑀮𑀺𑀧𑀮𑀸𑀧𑁂 𑀕𑀳𑁂𑀢𑁆𑀯𑀸 𑀢𑀫𑁆𑀩𑀫𑀢𑁆𑀢𑀺𑀓𑀸𑀬 𑀧𑀭𑀺𑀪𑀸𑀯𑁂𑀢𑁆𑀯𑀸 𑀕𑀭𑀼𑀢𑀭𑁂 𑀓𑀢𑁆𑀯𑀸 𑀭𑀢𑁆𑀢𑀲𑀸𑀮𑀺𑀳𑀺 𑀲𑀤𑁆𑀥𑀺𑀁 𑀫𑀺𑀲𑁆𑀲𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺. 𑀢𑀲𑁆𑀲 𑀧𑀼𑀢𑁆𑀢𑁄 ‘‘𑀖𑀭𑀁 𑀆𑀕𑀢𑀸𑀦𑀁 𑀫𑀫 𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁 𑀲𑀫𑁆𑀫𑀸𑀦𑀁 𑀦 𑀓𑀭𑁄𑀢𑀻’’𑀢𑀺 𑀓𑀼𑀧𑀺𑀢𑁄 𑀬𑀼𑀕𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀫𑀸𑀢𑀼𑀲𑀻𑀲𑁂 𑀧𑀳𑀸𑀭𑀫𑀤𑀸𑀲𑀺. 𑀢𑀲𑁆𑀲 𑀲𑀼𑀡𑀺𑀲𑀸 ¶ 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀬 𑀞𑀧𑀺𑀢𑀫𑀁𑀲𑀁 𑀘𑁄𑀭𑀺𑀓𑀸𑀬 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀢𑁂𑀳𑀺 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸 ‘‘𑀲𑀘𑁂 𑀫𑀬𑀸 𑀢𑀁 𑀫𑀁𑀲𑀁 𑀔𑀸𑀤𑀺𑀢𑀁, 𑀪𑀯𑁂 𑀪𑀯𑁂 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀫𑀁𑀲𑀁 𑀓𑀦𑁆𑀢𑀺𑀢𑁆𑀯𑀸 𑀔𑀸𑀤𑁂𑀬𑁆𑀬’’𑀦𑁆𑀢𑀺 𑀲𑀧𑀣𑀫𑀓𑀸𑀲𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀓𑀺𑀜𑁆𑀘𑀺𑀤𑁂𑀯 𑀉𑀧𑀓𑀭𑀡𑀁 𑀬𑀸𑀘𑀦𑁆𑀢𑀸𑀦𑀁 ‘‘𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀸 ‘‘𑀲𑀘𑁂 𑀲𑀦𑁆𑀢𑀁 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺, 𑀚𑀸𑀢𑀚𑀸𑀢𑀝𑁆𑀞𑀸𑀦𑁂 𑀕𑀽𑀣𑀪𑀓𑁆𑀔𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀫𑀼𑀲𑀸𑀯𑀸𑀤𑁂𑀦 𑀲𑀧𑀣𑀫𑀓𑀸𑀲𑀺.

𑀢𑁂 ¶ 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀯𑀺𑀜𑁆𑀛𑀸𑀝𑀯𑀺𑀬𑀁 𑀧𑁂𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀓𑀽𑀝𑀯𑀸𑀡𑀺𑀚𑁄 𑀓𑀫𑁆𑀫𑀨𑀮𑁂𑀦 𑀧𑀚𑁆𑀚𑀮𑀦𑁆𑀢𑀁 𑀪𑀼𑀲𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀢𑁆𑀣𑀓𑁂 𑀆𑀓𑀺𑀭𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀅𑀬𑁄𑀫𑀬𑁂𑀳𑀺 𑀫𑀼𑀕𑁆𑀕𑀭𑁂𑀳𑀺 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀻𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀢𑀲𑁆𑀲 𑀲𑀼𑀡𑀺𑀲𑀸 𑀓𑀫𑁆𑀫𑀨𑀮𑁂𑀦 𑀲𑀼𑀦𑀺𑀲𑀺𑀢𑁂𑀳𑀺 𑀅𑀢𑀺𑀯𑀺𑀬 𑀯𑀺𑀧𑀼𑀮𑀸𑀬𑀢𑁂𑀳𑀺 𑀦𑀔𑁂𑀳𑀺 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀓𑀦𑁆𑀢𑀺𑀢𑁆𑀯𑀸 𑀔𑀸𑀤𑀦𑁆𑀢𑀻 𑀅𑀧𑀭𑀺𑀫𑀺𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺, 𑀢𑀲𑁆𑀲 𑀪𑀭𑀺𑀬𑀸𑀬 𑀲𑀼𑀕𑀦𑁆𑀥𑀁 𑀲𑀼𑀯𑀺𑀲𑀼𑀤𑁆𑀥𑀁 𑀅𑀧𑀕𑀢𑀓𑀸𑀴𑀓𑀁 𑀲𑀸𑀮𑀺𑀪𑀢𑁆𑀢𑀁 𑀉𑀧𑀦𑀻𑀢𑀫𑀢𑁆𑀢𑀫𑁂𑀯 𑀦𑀸𑀦𑀸𑀯𑀺𑀥𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀧𑀭𑀫𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀁 𑀕𑀽𑀣𑀁 𑀲𑀫𑁆𑀧𑀚𑁆𑀚𑀢𑀺, 𑀢𑀁 𑀲𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻 𑀫𑀳𑀸𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑀏𑀯𑀁 𑀢𑁂𑀲𑀼 𑀘𑀢𑀽𑀲𑀼 𑀚𑀦𑁂𑀲𑀼 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂𑀲𑀼 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑀸𑀦𑁄 𑀧𑀩𑁆𑀩𑀢𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀢𑀁 𑀞𑀸𑀦𑀁 𑀕𑀢𑁄. 𑀢𑁂 𑀧𑁂𑀢𑁂 𑀤𑀺𑀲𑁆𑀯𑀸 𑁋

‘‘𑀪𑀼𑀲𑀸𑀦𑀺 ¶ 𑀏𑀓𑁄 𑀲𑀸𑀮𑀺𑀁 𑀧𑀼𑀦𑀸𑀧𑀭𑁄, 𑀅𑀬𑀜𑁆𑀘 𑀦𑀸𑀭𑀻 𑀲𑀓𑀫𑀁𑀲𑀮𑁄𑀳𑀺𑀢𑀁;

𑀢𑀼𑀯𑀜𑁆𑀘 𑀕𑀽𑀣𑀁 𑀅𑀲𑀼𑀘𑀺𑀁 𑀅𑀓𑀦𑁆𑀢𑀁, 𑀧𑀭𑀺𑀪𑀼𑀜𑁆𑀚𑀲𑀺 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀢𑁂𑀳𑀺 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀢𑀢𑁆𑀣 𑀪𑀼𑀲𑀸𑀦𑀻𑀢𑀺 𑀧𑀮𑀸𑀧𑀸𑀦𑀺. 𑀏𑀓𑁄𑀢𑀺 𑀏𑀓𑀓𑁄. 𑀲𑀸𑀮𑀺𑀦𑁆𑀢𑀺 𑀲𑀸𑀮𑀺𑀦𑁄. 𑀲𑀸𑀫𑀺𑀅𑀢𑁆𑀣𑁂 𑀳𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀲𑀸𑀮𑀺𑀦𑁄 𑀧𑀮𑀸𑀧𑀸𑀦𑀺 ¶ 𑀧𑀚𑁆𑀚𑀮𑀦𑁆𑀢𑀸𑀦𑀺 𑀅𑀢𑁆𑀢𑀦𑁄 𑀲𑀻𑀲𑁂 𑀅𑀯𑀓𑀺𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀦𑀸𑀧𑀭𑁄𑀢𑀺 𑀧𑀼𑀦 𑀅𑀧𑀭𑁄. 𑀬𑁄 𑀳𑀺 𑀲𑁄 𑀫𑀸𑀢𑀼𑀲𑀻𑀲𑀁 𑀧𑀳𑀭𑀺, 𑀲𑁄 𑀅𑀬𑁄𑀫𑀼𑀕𑁆𑀕𑀭𑁂𑀳𑀺 𑀅𑀢𑁆𑀢𑀦𑁄 𑀲𑀻𑀲𑀁 𑀧𑀳𑀭𑀺𑀢𑁆𑀯𑀸 𑀲𑀻𑀲𑀪𑁂𑀤𑀁 𑀧𑀸𑀧𑀼𑀡𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀓𑀫𑀁𑀲𑀮𑁄𑀳𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀫𑀁𑀲𑀁 𑀮𑁄𑀳𑀺𑀢𑀜𑁆𑀘 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀅𑀓𑀦𑁆𑀢𑀦𑁆𑀢𑀺 𑀅𑀫𑀦𑀸𑀧𑀁 𑀚𑁂𑀕𑀼𑀘𑁆𑀙𑀁. 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄𑀢𑀺 𑀓𑀢𑀫𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀇𑀤𑀁 𑀨𑀮𑀁, 𑀬𑀁 𑀇𑀤𑀸𑀦𑀺 𑀢𑀼𑀫𑁆𑀳𑁂𑀳𑀺 𑀧𑀘𑁆𑀘𑀦𑀼𑀪𑀯𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀣𑁂𑀭𑁂𑀦 𑀢𑁂𑀳𑀺 𑀓𑀢𑀓𑀫𑁆𑀫𑁂 𑀧𑀼𑀘𑁆𑀙𑀺𑀢𑁂 𑀓𑀽𑀝𑀯𑀸𑀡𑀺𑀚𑀲𑁆𑀲 𑀪𑀭𑀺𑀬𑀸 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀓𑀢𑀓𑀫𑁆𑀫𑀁 𑀆𑀘𑀺𑀓𑁆𑀔𑀦𑁆𑀢𑀻 𑁋

‘‘𑀅𑀬𑀁 ¶ 𑀧𑀼𑀭𑁂 𑀫𑀸𑀢𑀭𑀁 𑀳𑀺𑀁𑀲𑀢𑀺, 𑀅𑀬𑀁 𑀧𑀦 𑀓𑀽𑀝𑀯𑀸𑀡𑀺𑀚𑁄;

𑀅𑀬𑀁 𑀫𑀁𑀲𑀸𑀦𑀺 𑀔𑀸𑀤𑀺𑀢𑁆𑀯𑀸, 𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀺.

‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀅𑀕𑀸𑀭𑀺𑀦𑀻 𑀲𑀩𑁆𑀩𑀓𑀼𑀮𑀲𑁆𑀲 𑀇𑀲𑁆𑀲𑀭𑀸;

𑀲𑀦𑁆𑀢𑁂𑀲𑀼 𑀧𑀭𑀺𑀕𑀼𑀳𑀸𑀫𑀺, 𑀫𑀸 𑀘 𑀓𑀺𑀜𑁆𑀘𑀺 𑀇𑀢𑁄 𑀅𑀤𑀁.

‘‘𑀫𑀼𑀲𑀸𑀯𑀸𑀤𑁂𑀦 𑀙𑀸𑀤𑁂𑀫𑀺, 𑀦𑀢𑁆𑀣𑀺 𑀏𑀢𑀁 𑀫𑀫 𑀕𑁂𑀳𑁂;

𑀲𑀘𑁂 𑀲𑀦𑁆𑀢𑀁 𑀦𑀺𑀕𑀼𑀳𑀸𑀫𑀺, 𑀕𑀽𑀣𑁄 𑀫𑁂 𑀳𑁄𑀢𑀼 𑀪𑁄𑀚𑀦𑀁.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦, 𑀫𑀼𑀲𑀸𑀯𑀸𑀤𑀲𑁆𑀲 𑀘𑀽𑀪𑀬𑀁;

𑀲𑀼𑀕𑀦𑁆𑀥𑀁 𑀲𑀸𑀮𑀺𑀦𑁄 𑀪𑀢𑁆𑀢𑀁, 𑀕𑀽𑀣𑀁 𑀫𑁂 𑀧𑀭𑀺𑀯𑀢𑁆𑀢𑀢𑀺.

‘‘𑀅𑀯𑀜𑁆𑀛𑀸𑀦𑀺 𑀘 𑀓𑀫𑁆𑀫𑀸𑀦𑀺, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺;

𑀤𑀼𑀕𑁆𑀕𑀦𑁆𑀥𑀁 𑀓𑀺𑀫𑀺𑀦𑀁 𑀫𑀻𑀴𑁆𑀳𑀁, 𑀪𑀼𑀜𑁆𑀚𑀸𑀫𑀺 𑀘 𑀧𑀺𑀯𑀸𑀫𑀺 𑀘𑀸’’𑀢𑀺. 𑁋 𑀕𑀸𑀣𑀸 𑀅𑀪𑀸𑀲𑀺;

𑁪𑁪𑁮. 𑀢𑀢𑁆𑀣 ¶ 𑀅𑀬𑀦𑁆𑀢𑀺 𑀧𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑀺 𑀯𑀤𑀢𑀺. 𑀳𑀺𑀁𑀲𑀢𑀻𑀢𑀺 𑀣𑀸𑀫𑁂𑀦 𑀧𑀭𑀺𑀩𑀸𑀥𑁂𑀢𑀺, 𑀫𑀼𑀕𑁆𑀕𑀭𑁂𑀦 𑀧𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀓𑀽𑀝𑀯𑀸𑀡𑀺𑀚𑁄𑀢𑀺 𑀔𑀮𑀯𑀸𑀡𑀺𑀚𑁄, 𑀯𑀜𑁆𑀘𑀦𑀸𑀬 𑀯𑀡𑀺𑀚𑁆𑀚𑀓𑀸𑀭𑀓𑁄𑀢𑀺 𑀅𑀢𑁆𑀣𑁄 ¶ . 𑀫𑀁𑀲𑀸𑀦𑀺 𑀔𑀸𑀤𑀺𑀢𑁆𑀯𑀸𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 ‘‘𑀦 𑀔𑀸𑀤𑀸𑀫𑀻’’𑀢𑀺 𑀫𑀼𑀲𑀸𑀯𑀸𑀤𑁂𑀦 𑀢𑁂 𑀯𑀜𑁆𑀘𑁂𑀢𑀺.

𑁪𑁪𑁯-𑁫𑁦. 𑀅𑀕𑀸𑀭𑀺𑀦𑀻𑀢𑀺 𑀕𑁂𑀳𑀲𑀸𑀫𑀺𑀦𑀻. 𑀲𑀦𑁆𑀢𑁂𑀲𑀽𑀢𑀺 𑀯𑀺𑀚𑁆𑀚𑀫𑀸𑀦𑁂𑀲𑁆𑀯𑁂𑀯 𑀧𑀭𑁂𑀳𑀺 𑀬𑀸𑀘𑀺𑀢𑀉𑀧𑀓𑀭𑀡𑁂𑀲𑀼. 𑀧𑀭𑀺𑀕𑀼𑀳𑀸𑀫𑀻𑀢𑀺 𑀧𑀝𑀺𑀘𑁆𑀙𑀸𑀤𑁂𑀲𑀺𑀁. 𑀓𑀸𑀮𑀯𑀺𑀧𑀮𑁆𑀮𑀸𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀫𑀸 𑀘 𑀓𑀺𑀜𑁆𑀘𑀺 𑀇𑀢𑁄 𑀅𑀤𑀦𑁆𑀢𑀺 𑀇𑀢𑁄 𑀫𑀫 𑀲𑀦𑁆𑀢𑀓𑀢𑁄 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀢𑁆𑀣𑀺𑀓𑀲𑁆𑀲 𑀧𑀭𑀲𑁆𑀲 𑀦 𑀅𑀤𑀸𑀲𑀺𑀁. 𑀙𑀸𑀤𑁂𑀫𑀺𑀢𑀺 ‘‘𑀦𑀢𑁆𑀣𑀺 𑀏𑀢𑀁 𑀫𑀫 𑀕𑁂𑀳𑁂’’𑀢𑀺 𑀫𑀼𑀲𑀸𑀯𑀸𑀤𑁂𑀦 𑀙𑀸𑀤𑁂𑀲𑀺𑀁.

𑁪𑁫𑁧-𑁨. 𑀕𑀽𑀣𑀁 𑀫𑁂 𑀧𑀭𑀺𑀯𑀢𑁆𑀢𑀢𑀻𑀢𑀺 𑀲𑀼𑀕𑀦𑁆𑀥𑀁 𑀲𑀸𑀮𑀺𑀪𑀢𑁆𑀢𑀁 𑀫𑀬𑁆𑀳𑀁 𑀓𑀫𑁆𑀫𑀯𑀲𑁂𑀦 𑀕𑀽𑀣𑀪𑀸𑀯𑁂𑀦 𑀧𑀭𑀺𑀯𑀢𑁆𑀢𑀢𑀺 𑀧𑀭𑀺𑀡𑀫𑀢𑀺. 𑀅𑀯𑀜𑁆𑀛𑀸𑀦𑀻𑀢𑀺 𑀅𑀫𑁄𑀖𑀸𑀦𑀺 𑀅𑀦𑀺𑀧𑁆𑀨𑀮𑀸𑀦𑀺. 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀻𑀢𑀺 𑀬𑀣𑀽𑀧𑀘𑀺𑀢𑀁 𑀓𑀫𑁆𑀫𑀁 𑀨𑀮𑀁 𑀅𑀤𑀢𑁆𑀯𑀸 𑀦 𑀳𑀺 𑀯𑀺𑀦𑀲𑁆𑀲𑀢𑀺. 𑀓𑀺𑀫𑀺𑀦𑀦𑁆𑀢𑀺 ¶ 𑀓𑀺𑀫𑀺𑀯𑀦𑁆𑀢𑀁 𑀲𑀜𑁆𑀚𑀸𑀢𑀓𑀺𑀫𑀺𑀓𑀼𑀮𑀁. 𑀫𑀻𑀴𑁆𑀳𑀦𑁆𑀢𑀺 𑀕𑀽𑀣𑀁. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀏𑀯𑀁 𑀣𑁂𑀭𑁄 𑀢𑀲𑁆𑀲𑀸 𑀧𑁂𑀢𑀺𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀪𑀼𑀲𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀘𑁆𑀙𑁂𑀭𑀭𑀽𑀧𑀁 𑀲𑀼𑀕𑀢𑀲𑁆𑀲 𑀜𑀸𑀡𑀦𑁆𑀢𑀺 𑀇𑀤𑀁 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀩𑀳𑀽 𑀉𑀧𑀸𑀲𑀓𑀸 𑀥𑀫𑁆𑀫𑀕𑀡𑀸 𑀳𑀼𑀢𑁆𑀯𑀸 𑀦𑀕𑀭𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀢𑁆𑀣𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀭𑀳𑀯𑀭𑀧𑀘𑁆𑀘𑀢𑁆𑀣𑀭𑀡𑀢𑁆𑀣𑀢𑁂𑀲𑀼 𑀆𑀲𑀦𑁂𑀲𑀼 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 ¶ 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑀢𑀭𑁄 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀧𑀼𑀭𑀺𑀲𑁄 𑀢𑀁 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑁄 𑀏𑀯𑀫𑀸𑀳 𑁋 ‘‘𑀯𑀭𑀫𑁂𑀢𑀁 𑀲𑀩𑁆𑀩𑀁 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑀺𑀢𑀁, 𑀦 𑀢𑁆𑀯𑁂𑀯 𑀇𑀫𑁂𑀲𑀁 𑀫𑀼𑀡𑁆𑀟𑀓𑀸𑀦𑀁 𑀤𑀺𑀦𑁆𑀦’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 ‘‘𑀪𑀸𑀭𑀺𑀬𑀁 𑀯𑀢 𑀇𑀫𑀺𑀦𑀸 𑀧𑀼𑀭𑀺𑀲𑁂𑀦 𑀧𑀸𑀧𑀁 𑀧𑀲𑀼𑀢𑀁, 𑀬𑁂𑀦 𑀏𑀯𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀧𑀭𑀤𑁆𑀥’’𑀦𑁆𑀢𑀺 𑀢𑀫𑀢𑁆𑀣𑀁 𑀢𑀲𑁆𑀲 𑀫𑀸𑀢𑀼𑀬𑀸 𑀆𑀭𑁄𑀘𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑁆𑀯𑀁 𑀲𑀲𑀸𑀯𑀓𑀲𑀗𑁆𑀖𑀁 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀼𑀢𑁆𑀢𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑀻 𑀲𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀢𑁆𑀢𑁂𑀦 𑀓𑀢𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀻 𑀔𑀫𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀢𑁆𑀢𑀸𑀳𑀁 𑀬𑀸𑀕𑀼𑀤𑀸𑀦𑁂𑀦 𑀧𑀽𑀚𑀁 𑀅𑀓𑀸𑀲𑀺. 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀓𑀺𑀮𑀺𑀝𑁆𑀞𑀓𑀫𑁆𑀫𑀽𑀧𑀚𑀻𑀯𑀺𑀦𑀺𑀬𑀸 𑀕𑀡𑀺𑀓𑀸𑀬 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀘 𑀦𑀁 𑀚𑀸𑀢𑀫𑀢𑁆𑀢𑀁𑀬𑁂𑀯 ‘‘𑀤𑀸𑀭𑀓𑁄’’𑀢𑀺 𑀜𑀢𑁆𑀯𑀸 𑀲𑀼𑀲𑀸𑀦𑁂 𑀙𑀟𑁆𑀟𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦𑁂𑀯 𑀕𑀳𑀺𑀢𑀸𑀭𑀓𑁆𑀔𑁄 𑀓𑁂𑀦𑀘𑀺 𑀅𑀦𑀼𑀧𑀤𑁆𑀤𑀼𑀢𑁄 𑀫𑀸𑀢𑀼-𑀅𑀗𑁆𑀓𑁂 𑀯𑀺𑀬 𑀲𑀼𑀔𑀁 𑀲𑀼𑀧𑀺. 𑀤𑁂𑀯𑀢𑀸 𑀢𑀲𑁆𑀲 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀽𑀢𑀺 𑀘 𑀯𑀤𑀦𑁆𑀢𑀺.

𑀅𑀣 ¶ 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀤𑀸𑀭𑀓𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀤𑀺𑀲𑁆𑀯𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀺𑀯𑀣𑀺𑀓𑀁 𑀅𑀕𑀫𑀸𑀲𑀺. ‘‘𑀲𑀢𑁆𑀣𑀸 𑀇𑀥𑀸𑀕𑀢𑁄, 𑀓𑀸𑀭𑀡𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺. 𑀪𑀕𑀯𑀸 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 ‘‘𑀦𑀸𑀬𑀁 𑀤𑀸𑀭𑀓𑁄 𑀑𑀜𑁆𑀜𑀸𑀢𑀩𑁆𑀩𑁄, 𑀬𑀤𑀺𑀧𑀺 𑀇𑀤𑀸𑀦𑀺 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑁄 𑀅𑀦𑀸𑀣𑁄 𑀞𑀺𑀢𑁄, 𑀆𑀬𑀢𑀺𑀁 𑀧𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀉𑀴𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑀺𑀦𑀸 𑀧𑀼𑀭𑀺𑀫𑀚𑀸𑀢𑀺𑀬𑀁 𑀓𑀢𑀁 𑀓𑀫𑁆𑀫’’𑀦𑁆𑀢𑀺 𑀧𑀼𑀝𑁆𑀞𑁄 𑁋

‘‘𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀧𑀽𑀚𑀁 𑀅𑀓𑀸𑀲𑀺 𑀚𑀦𑀢𑀸 𑀉𑀴𑀸𑀭𑀁;

𑀢𑀢𑁆𑀭𑀲𑁆𑀲 𑀘𑀺𑀢𑁆𑀢𑀲𑁆𑀲𑀳𑀼 𑀅𑀜𑁆𑀜𑀣𑀢𑁆𑀢𑀁, 𑀯𑀸𑀘𑀁 𑀅𑀪𑀸𑀲𑀺 𑀨𑀭𑀼𑀲𑀁 𑀅𑀲𑀩𑁆𑀪’’𑀦𑁆𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀤𑀸𑀭𑀓𑁂𑀦 𑀓𑀢𑀓𑀫𑁆𑀫𑀁 𑀆𑀬𑀢𑀺𑀁 𑀧𑀢𑁆𑀢𑀩𑁆𑀩𑀁 𑀲𑀫𑁆𑀧𑀢𑁆𑀢𑀺𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀉𑀧𑀭𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀁 𑀅𑀓𑀸𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 ¶ 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀢𑀜𑁆𑀘 𑀤𑀸𑀭𑀓𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸𑀯 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄’’𑀢𑀺 𑀅𑀕𑁆𑀕𑀳𑁂𑀲𑀺. 𑀪𑀕𑀯𑀸 ‘‘𑀏𑀢𑁆𑀢𑀓𑁂𑀦 𑀅𑀬𑀁 𑀤𑀸𑀭𑀓𑁄 𑀭𑀓𑁆𑀔𑀺𑀢𑁄, 𑀫𑀳𑀸𑀚𑀦𑀲𑁆𑀲 𑀘 𑀅𑀦𑀼𑀕𑁆𑀕𑀳𑁄 𑀓𑀢𑁄’’𑀢𑀺 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀓𑀼𑀝𑀼𑀫𑁆𑀩𑀺𑀓𑁂 𑀓𑀸𑀮𑀓𑀢𑁂 𑀢𑁂𑀦 𑀦𑀺𑀬𑁆𑀬𑀸𑀤𑀺𑀢𑀁 𑀥𑀦𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀦𑁆𑀢𑁄 𑀢𑀲𑁆𑀫𑀺𑀁 𑀦𑀕𑀭𑁂𑀬𑁂𑀯 𑀫𑀳𑀸𑀯𑀺𑀪𑀯𑁄 𑀕𑀳𑀧𑀢𑀺 𑀳𑀼𑀢𑁆𑀯𑀸 𑀤𑀸𑀦𑀸𑀤𑀺𑀦𑀺𑀭𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀦𑀽𑀦 𑀲𑀢𑁆𑀣𑀸 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀓𑁄, 𑀲𑁄𑀧𑀺 𑀦𑀸𑀫 𑀤𑀸𑀭𑀓𑁄 𑀢𑀤𑀸 𑀅𑀦𑀸𑀣𑁄 𑀞𑀺𑀢𑁄 𑀏𑀢𑀭𑀳𑀺 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑀯𑀢𑀺, 𑀉𑀴𑀸𑀭𑀸𑀦𑀺 𑀘 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀏𑀢𑁆𑀢𑀓𑀸𑀯 𑀲𑀫𑁆𑀧𑀢𑁆𑀢𑀺, 𑀅𑀣 𑀔𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀫𑀳𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀜𑁆𑀘 ¶ 𑀧𑀝𑀺𑀮𑀪𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀘 𑀫𑀳𑀸𑀚𑀦𑁄 ¶ 𑀘 ‘‘𑀇𑀤𑀁 𑀓𑀺𑀭 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀤𑀻𑀖𑀤𑀲𑁆𑀲𑀻 𑀪𑀕𑀯𑀸 𑀚𑀸𑀢𑀫𑀢𑁆𑀢𑀲𑁆𑀲𑁂𑀯𑀲𑁆𑀲 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀲𑁆𑀲 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀗𑁆𑀕𑀳𑀁 𑀅𑀓𑀸𑀲𑀻’’𑀢𑀺 𑀲𑀢𑁆𑀣𑀼 𑀜𑀸𑀡𑀯𑀺𑀲𑁂𑀲𑀁 𑀣𑁄𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀓𑀣𑁂𑀲𑀼𑀁. 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀅𑀘𑁆𑀙𑁂𑀭𑀭𑀽𑀧𑀁 𑀲𑀼𑀕𑀢𑀲𑁆𑀲 𑀜𑀸𑀡𑀁, 𑀲𑀢𑁆𑀣𑀸 𑀬𑀣𑀸 𑀧𑀼𑀕𑁆𑀕𑀮𑀁 𑀩𑁆𑀬𑀸𑀓𑀸𑀲𑀺;

𑀉𑀲𑁆𑀲𑀦𑁆𑀦𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂.

‘‘𑀅𑀬𑀁 𑀓𑀼𑀫𑀸𑀭𑁄 𑀲𑀻𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑁄, 𑀅𑀗𑁆𑀕𑀼𑀝𑁆𑀞𑀲𑁆𑀦𑁂𑀳𑁂𑀦 𑀬𑀸𑀧𑁂𑀢𑀺 𑀭𑀢𑁆𑀢𑀺𑀁;

𑀦 𑀬𑀓𑁆𑀔𑀪𑀽𑀢𑀸 𑀦 𑀲𑀭𑀻𑀲𑀧𑀸 𑀯𑀸, 𑀯𑀺𑀳𑁂𑀞𑀬𑁂𑀬𑁆𑀬𑀼𑀁 𑀓𑀢𑀧𑀼𑀜𑁆𑀜𑀁 𑀓𑀼𑀫𑀸𑀭𑀁.

‘‘𑀲𑀼𑀦𑀔𑀸𑀧𑀺𑀫𑀲𑁆𑀲 𑀧𑀮𑀺𑀳𑀺𑀁𑀲𑀼 𑀧𑀸𑀤𑁂, 𑀥𑀗𑁆𑀓𑀸 𑀲𑀺𑀗𑁆𑀕𑀸𑀮𑀸 𑀧𑀭𑀺𑀯𑀢𑁆𑀢𑀬𑀦𑁆𑀢𑀺;

𑀕𑀩𑁆𑀪𑀸𑀲𑀬𑀁 ¶ 𑀧𑀓𑁆𑀔𑀺𑀕𑀡𑀸 𑀳𑀭𑀦𑁆𑀢𑀺, 𑀓𑀸𑀓𑀸 𑀧𑀦 𑀅𑀓𑁆𑀔𑀺𑀫𑀮𑀁 𑀳𑀭𑀦𑁆𑀢𑀺.

‘‘𑀦𑀬𑀺𑀫𑀲𑁆𑀲 𑀭𑀓𑁆𑀔𑀁 𑀯𑀺𑀤𑀳𑀺𑀁𑀲𑀼 𑀓𑁂𑀘𑀺, 𑀦 𑀑𑀲𑀥𑀁 𑀲𑀸𑀲𑀧𑀥𑀽𑀧𑀦𑀁 𑀯𑀸;

𑀦𑀓𑁆𑀔𑀢𑁆𑀢𑀬𑁄𑀕𑀫𑁆𑀧𑀺 𑀦 𑀅𑀕𑁆𑀕𑀳𑁂𑀲𑀼𑀁, 𑀦 𑀲𑀩𑁆𑀩𑀥𑀜𑁆𑀜𑀸𑀦𑀺𑀧𑀺 𑀆𑀓𑀺𑀭𑀺𑀁𑀲𑀼.

‘‘𑀏𑀢𑀸𑀤𑀺𑀲𑀁 𑀉𑀢𑁆𑀢𑀫𑀓𑀺𑀘𑁆𑀙𑀧𑀢𑁆𑀢𑀁, 𑀭𑀢𑁆𑀢𑀸𑀪𑀢𑀁 𑀲𑀻𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁;

𑀦𑁄𑀦𑀻𑀢𑀧𑀺𑀡𑁆𑀟𑀁𑀯 𑀧𑀯𑁂𑀥𑀫𑀸𑀦𑀁, 𑀲𑀲𑀁𑀲𑀬𑀁 𑀚𑀻𑀯𑀺𑀢𑀲𑀸𑀯𑀲𑁂𑀲𑀁.

‘‘𑀢𑀫𑀤𑁆𑀤𑀲𑀸 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄, 𑀤𑀺𑀲𑁆𑀯𑀸 𑀘 𑀢𑀁 𑀩𑁆𑀬𑀸𑀓𑀭𑀺 𑀪𑀽𑀭𑀺𑀧𑀜𑁆𑀜𑁄;

‘𑀅𑀬𑀁 𑀓𑀼𑀫𑀸𑀭𑁄 𑀦𑀕𑀭𑀲𑁆𑀲𑀺𑀫𑀲𑁆𑀲, 𑀅𑀕𑁆𑀕𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀺 𑀪𑁄𑀕𑀢𑁄 𑀘’.

‘‘𑀓𑀺𑀲𑁆𑀲 ¶ 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀏𑀢𑀸𑀤𑀺𑀲𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀁 𑀢𑀸𑀤𑀺𑀲𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀢𑀺𑀤𑁆𑀥𑀺’’𑀦𑁆𑀢𑀺. 𑁋

𑁪𑁫𑁩. 𑀢𑀢𑁆𑀣 𑀅𑀘𑁆𑀙𑁂𑀭𑀭𑀽𑀧𑀦𑁆𑀢𑀺 𑀅𑀘𑁆𑀙𑀭𑀺𑀬𑀲𑀪𑀸𑀯𑀁. 𑀲𑀼𑀕𑀢𑀲𑁆𑀲 𑀜𑀸𑀡𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 ¶ 𑀜𑀸𑀡𑀁, 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀺𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀪𑀽𑀢𑀁 𑀓𑀣𑀁 𑀜𑀸𑀡𑀦𑁆𑀢𑀺 𑀆𑀳 ‘‘𑀲𑀢𑁆𑀣𑀸 𑀬𑀣𑀸 𑀧𑀼𑀕𑁆𑀕𑀮𑀁 𑀩𑁆𑀬𑀸𑀓𑀸𑀲𑀻’’𑀢𑀺. 𑀢𑁂𑀦 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀏𑀯 𑀜𑀸𑀡𑀲𑁆𑀲 𑀅𑀘𑁆𑀙𑀭𑀺𑀬𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀩𑁆𑀬𑀸𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀲𑁆𑀲𑀦𑁆𑀦𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀉𑀲𑁆𑀲𑀦𑁆𑀦𑀓𑀼𑀲𑀮𑀥𑀫𑁆𑀫𑀸𑀧𑀺 𑀇𑀥𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑀸 𑀮𑀤𑁆𑀥𑀧𑀘𑁆𑀘𑀬𑀲𑁆𑀲 ¶ 𑀅𑀧𑀼𑀜𑁆𑀜𑀲𑁆𑀲 𑀯𑀲𑁂𑀦 𑀚𑀸𑀢𑀺𑀆𑀤𑀺𑀦𑀸 𑀦𑀺𑀳𑀻𑀦𑀸 𑀪𑀯𑀦𑁆𑀢𑀺, 𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀺 𑀅𑀧𑁆𑀧𑀢𑀭𑀧𑀼𑀜𑁆𑀜𑀥𑀫𑁆𑀫𑀸𑀧𑀺 𑀏𑀓𑁂 𑀲𑀢𑁆𑀢𑀸 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀫𑀳𑀸𑀚𑀼𑀢𑀺𑀓𑀢𑀸𑀬 𑀉𑀴𑀸𑀭𑀸 𑀪𑀯𑀦𑁆𑀢𑀻𑀢𑀺.

𑁪𑁫𑁪. 𑀲𑀻𑀯𑀣𑀺𑀓𑀸𑀬𑀸𑀢𑀺 𑀲𑀼𑀲𑀸𑀦𑁂. 𑀅𑀗𑁆𑀕𑀼𑀝𑁆𑀞𑀲𑁆𑀦𑁂𑀳𑁂𑀦𑀸𑀢𑀺 𑀅𑀗𑁆𑀕𑀼𑀝𑁆𑀞𑀢𑁄 𑀧𑀯𑀢𑁆𑀢𑀲𑁆𑀦𑁂𑀳𑁂𑀦, 𑀤𑁂𑀯𑀢𑀸𑀬 𑀅𑀗𑁆𑀕𑀼𑀝𑁆𑀞𑀢𑁄 𑀧𑀕𑁆𑀖𑀭𑀺𑀢𑀔𑀻𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀬𑀓𑁆𑀔𑀪𑀽𑀢𑀸 𑀦 𑀲𑀭𑀻𑀲𑀧𑀸 𑀯𑀸𑀢𑀺 𑀧𑀺𑀲𑀸𑀘𑀪𑀽𑀢𑀸 𑀯𑀸 𑀬𑀓𑁆𑀔𑀪𑀽𑀢𑀸 𑀯𑀸 𑀲𑀭𑀻𑀲𑀧𑀸 𑀯𑀸 𑀬𑁂 𑀓𑁂𑀘𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀯𑀸 𑀦 𑀯𑀺𑀳𑁂𑀞𑀬𑁂𑀬𑁆𑀬𑀼𑀁 𑀦 𑀩𑀸𑀥𑁂𑀬𑁆𑀬𑀼𑀁.

𑁪𑁫𑁫. 𑀧𑀮𑀺𑀳𑀺𑀁𑀲𑀼 𑀧𑀸𑀤𑁂𑀢𑀺 𑀅𑀢𑁆𑀢𑀦𑁄 𑀚𑀺𑀯𑁆𑀳𑀸𑀬 𑀧𑀸𑀤𑁂 𑀮𑀺𑀳𑀺𑀲𑀼𑀁. 𑀥𑀗𑁆𑀓𑀸𑀢𑀺 𑀓𑀸𑀓𑀸. 𑀧𑀭𑀺𑀯𑀢𑁆𑀢𑀬𑀦𑁆𑀢𑀻𑀢𑀺 ‘‘𑀫𑀸 𑀦𑀁 𑀓𑀼𑀫𑀸𑀭𑀁 𑀓𑁂𑀘𑀺 𑀯𑀺𑀳𑁂𑀞𑁂𑀬𑁆𑀬𑀼’’𑀦𑁆𑀢𑀺 𑀭𑀓𑁆𑀔𑀦𑁆𑀢𑀸 𑀦𑀺𑀭𑁄𑀕𑀪𑀸𑀯𑀚𑀸𑀦𑀦𑀢𑁆𑀣𑀁 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀕𑀩𑁆𑀪𑀸𑀲𑀬𑀦𑁆𑀢𑀺 𑀕𑀩𑁆𑀪𑀫𑀮𑀁. 𑀧𑀓𑁆𑀔𑀺𑀕𑀡𑀸𑀢𑀺 𑀕𑀺𑀚𑁆𑀛𑀓𑀼𑀮𑀮𑀸𑀤𑀬𑁄 𑀲𑀓𑀼𑀡𑀕𑀡𑀸. 𑀳𑀭𑀦𑁆𑀢𑀻𑀢𑀺 𑀅𑀧𑀦𑁂𑀦𑁆𑀢𑀺. 𑀅𑀓𑁆𑀔𑀺𑀫𑀮𑀦𑁆𑀢𑀺 𑀅𑀓𑁆𑀔𑀺𑀕𑀽𑀣𑀁.

𑁪𑁫𑁬. 𑀓𑁂𑀘𑀻𑀢𑀺 ¶ 𑀓𑁂𑀘𑀺 𑀫𑀦𑀼𑀲𑁆𑀲𑀸, 𑀅𑀫𑀦𑀼𑀲𑁆𑀲𑀸 𑀧𑀦 𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀑𑀲𑀥𑀦𑁆𑀢𑀺 𑀢𑀤𑀸 𑀆𑀬𑀢𑀺𑀜𑁆𑀘 𑀆𑀭𑁄𑀕𑁆𑀬𑀸𑀯𑀳𑀁 𑀅𑀕𑀤𑀁. 𑀲𑀸𑀲𑀧𑀥𑀽𑀧𑀦𑀁 𑀯𑀸𑀢𑀺 𑀬𑀁 𑀚𑀸𑀢𑀲𑁆𑀲 𑀤𑀸𑀭𑀓𑀲𑁆𑀲 𑀭𑀓𑁆𑀔𑀡𑀢𑁆𑀣𑀁 𑀲𑀸𑀲𑀧𑁂𑀦 𑀥𑀽𑀧𑀦𑀁 𑀓𑀭𑁄𑀦𑁆𑀢𑀺, 𑀢𑀫𑁆𑀧𑀺 𑀢𑀲𑁆𑀲 𑀓𑀭𑁄𑀦𑁆𑀢𑀸 𑀦𑀸𑀳𑁂𑀲𑀼𑀦𑁆𑀢𑀺 𑀤𑀻𑀧𑁂𑀦𑁆𑀢𑀺. 𑀦𑀓𑁆𑀔𑀢𑁆𑀢𑀬𑁄𑀕𑀫𑁆𑀧𑀺 𑀦 𑀅𑀕𑁆𑀕𑀳𑁂𑀲𑀼𑀦𑁆𑀢𑀺 𑀦𑀓𑁆𑀔𑀢𑁆𑀢𑀬𑀼𑀢𑁆𑀢𑀫𑁆𑀧𑀺 𑀦 𑀕𑀡𑁆𑀳𑀺𑀁𑀲𑀼. ‘‘𑀅𑀲𑀼𑀓𑀫𑁆𑀳𑀺 𑀦𑀓𑁆𑀔𑀢𑁆𑀢𑁂 𑀢𑀺𑀣𑀺𑀫𑁆𑀳𑀺 𑀫𑀼𑀳𑀼𑀢𑁆𑀢𑁂 𑀅𑀬𑀁 𑀚𑀸𑀢𑁄’’𑀢𑀺 𑀏𑀯𑀁 𑀚𑀸𑀢𑀓𑀫𑁆𑀫𑀫𑁆𑀧𑀺𑀲𑁆𑀲 𑀦 𑀓𑁂𑀘𑀺 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀦 𑀲𑀩𑁆𑀩𑀥𑀜𑁆𑀜𑀸𑀦𑀺𑀧𑀺 𑀆𑀓𑀺𑀭𑀺𑀁𑀲𑀽𑀢𑀺 𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀸 𑀅𑀕𑀤𑀯𑀲𑁂𑀦 𑀬𑀁 𑀲𑀸𑀲𑀧𑀢𑁂𑀮𑀫𑀺𑀲𑁆𑀲𑀺𑀢𑀁 𑀲𑀸𑀮𑀺𑀆𑀤𑀺𑀥𑀜𑁆𑀜𑀁 𑀆𑀓𑀺𑀭𑀦𑁆𑀢𑀺, 𑀢𑀫𑁆𑀧𑀺𑀲𑁆𑀲 𑀦𑀸𑀓𑀁𑀲𑀽𑀢𑀺 𑀅𑀢𑁆𑀣𑁄.

𑁪𑁫𑁭. 𑀏𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 ¶ . 𑀉𑀢𑁆𑀢𑀫𑀓𑀺𑀘𑁆𑀙𑀧𑀢𑁆𑀢𑀦𑁆𑀢𑀺 𑀧𑀭𑀫𑀓𑀺𑀘𑁆𑀙𑀁 𑀆𑀧𑀦𑁆𑀦𑀁 𑀅𑀢𑀺𑀯𑀺𑀬 𑀤𑀼𑀓𑁆𑀔𑀧𑁆𑀧𑀢𑁆𑀢𑀁. 𑀭𑀢𑁆𑀢𑀸𑀪𑀢𑀦𑁆𑀢𑀺 𑀭𑀢𑁆𑀢𑀺𑀬𑀁 𑀆𑀪𑀢𑀁. 𑀦𑁄𑀦𑀻𑀢𑀧𑀺𑀡𑁆𑀟𑀁 𑀯𑀺𑀬𑀸𑀢𑀺 𑀦𑀯𑀦𑀻𑀢𑀧𑀺𑀡𑁆𑀟𑀲𑀤𑀺𑀲𑀁, 𑀫𑀁𑀲𑀧𑁂𑀲𑀺𑀫𑀢𑁆𑀢𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀧𑀯𑁂𑀥𑀫𑀸𑀦𑀦𑁆𑀢𑀺 𑀤𑀼𑀩𑁆𑀩𑀮𑀪𑀸𑀯𑁂𑀦 𑀧𑀓𑀫𑁆𑀧𑀫𑀸𑀦𑀁. 𑀲𑀲𑀁𑀲𑀬𑀦𑁆𑀢𑀺 ‘‘𑀚𑀻𑀯𑀢𑀺 𑀦𑀼 𑀔𑁄 𑀦 𑀦𑀼 𑀔𑁄 𑀚𑀻𑀯𑀢𑀻’’𑀢𑀺 𑀲𑀁𑀲𑀬𑀺𑀢𑀢𑀸𑀬 𑀲𑀁𑀲𑀬𑀯𑀦𑁆𑀢𑀁. 𑀚𑀻𑀯𑀺𑀢𑀲𑀸𑀯𑀲𑁂𑀲𑀦𑁆𑀢𑀺 𑀚𑀻𑀯𑀺𑀢𑀝𑁆𑀞𑀺𑀢𑀺𑀬𑀸 𑀳𑁂𑀢𑀼𑀪𑀽𑀢𑀸𑀦𑀁 ¶ 𑀲𑀸𑀥𑀦𑀸𑀦𑀁 𑀅𑀪𑀸𑀯𑁂𑀦 𑀓𑁂𑀯𑀮𑀁 𑀚𑀻𑀯𑀺𑀢𑀫𑀢𑁆𑀢𑀸𑀯𑀲𑁂𑀲𑀓𑀁.

𑁪𑁫𑁮. 𑀅𑀕𑁆𑀕𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀺 𑀪𑁄𑀕𑀢𑁄 𑀘𑀸𑀢𑀺 𑀪𑁄𑀕𑀦𑀺𑀫𑀺𑀢𑁆𑀢𑀁 𑀪𑁄𑀕𑀲𑁆𑀲 𑀯𑀲𑁂𑀦 𑀅𑀕𑁆𑀕𑀓𑀼𑀮𑀺𑀓𑁄 𑀲𑁂𑀝𑁆𑀞𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁪𑁫𑁯. ‘‘𑀓𑀺𑀲𑁆𑀲 𑀯𑀢’’𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀞𑀺𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀢𑁂𑀦 𑀓𑀢𑀓𑀫𑁆𑀫𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀸. 𑀲𑀸 𑀘 𑀔𑁄 𑀲𑀺𑀯𑀣𑀺𑀓𑀸𑀬 𑀲𑀦𑁆𑀦𑀺𑀧𑀢𑀺𑀢𑁂𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀺𑀲𑁆𑀲𑀸𑀢𑀺 𑀓𑀺𑀁 𑀅𑀲𑁆𑀲. 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀧𑀼𑀦 𑀓𑀺𑀲𑁆𑀲𑀸𑀢𑀺 𑀓𑀻𑀤𑀺𑀲𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀯𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀸𑀢𑀺 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀢𑀸𑀤𑀺𑀲𑀦𑁆𑀢𑀺 𑀕𑀡𑀺𑀓𑀸𑀬 𑀓𑀼𑀘𑁆𑀙𑀺𑀬𑀸 𑀦𑀺𑀩𑁆𑀩𑀢𑁆𑀢𑀦𑀁, 𑀲𑀼𑀲𑀸𑀦𑁂 𑀙𑀟𑁆𑀟𑀦𑀦𑁆𑀢𑀺 𑀏𑀯𑀭𑀽𑀧𑀁. 𑀩𑁆𑀬𑀲𑀦𑀦𑁆𑀢𑀺 𑀅𑀦𑀢𑁆𑀣𑀁. 𑀢𑀸𑀤𑀺𑀲𑀦𑁆𑀢𑀺 𑀢𑀣𑀸𑀭𑀽𑀧𑀁, ‘‘𑀅𑀗𑁆𑀕𑀼𑀝𑁆𑀞𑀲𑁆𑀦𑁂𑀳𑁂𑀦 𑀬𑀸𑀧𑁂𑀢𑀺 𑀭𑀢𑁆𑀢𑀺’’𑀦𑁆𑀢𑀺𑀆𑀤𑀺𑀦𑀸, ‘‘𑀅𑀬𑀁 𑀓𑀼𑀫𑀸𑀭𑁄 𑀦𑀕𑀭𑀲𑁆𑀲𑀺𑀫𑀲𑁆𑀲 𑀅𑀕𑁆𑀕𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀦𑁆𑀢𑀺 𑀤𑁂𑀯𑀺𑀤𑁆𑀥𑀺𑀁, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀧𑀼𑀝𑁆𑀞𑁄 𑀪𑀕𑀯𑀸 𑀬𑀣𑀸 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀩𑀼𑀤𑁆𑀥𑀧𑀫𑀼𑀔𑀲𑁆𑀲 ¶ 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀧𑀽𑀚𑀁 𑀅𑀓𑀸𑀲𑀺 𑀚𑀦𑀢𑀸 𑀉𑀴𑀸𑀭𑀁;

𑀢𑀢𑁆𑀭𑀲𑁆𑀲 𑀘𑀺𑀢𑁆𑀢𑀲𑁆𑀲𑀳𑀼 𑀅𑀜𑁆𑀜𑀣𑀢𑁆𑀢𑀁, 𑀯𑀸𑀘𑀁 𑀅𑀪𑀸𑀲𑀺 𑀨𑀭𑀼𑀲𑀁 𑀅𑀲𑀩𑁆𑀪𑀁.

‘‘𑀲𑁄 𑀢𑀁 𑀯𑀺𑀢𑀓𑁆𑀓𑀁 𑀧𑀯𑀺𑀦𑁄𑀤𑀬𑀺𑀢𑁆𑀯𑀸, 𑀧𑀻𑀢𑀺𑀁 𑀧𑀲𑀸𑀤𑀁 𑀧𑀝𑀺𑀮𑀤𑁆𑀥𑀸 𑀧𑀘𑁆𑀙𑀸;

𑀢𑀣𑀸𑀕𑀢𑀁 ¶ 𑀚𑁂𑀢𑀯𑀦𑁂 𑀯𑀲𑀦𑁆𑀢𑀁, 𑀬𑀸𑀕𑀼𑀬𑀸 𑀉𑀧𑀝𑁆𑀞𑀸𑀲𑀺 𑀲𑀢𑁆𑀢𑀭𑀢𑁆𑀢𑀁.

‘‘𑀢𑀲𑁆𑀲 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀏𑀢𑀸𑀤𑀺𑀲𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀁 𑀢𑀸𑀤𑀺𑀲𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀢𑀺𑀤𑁆𑀥𑀺𑀁.

‘‘𑀞𑀢𑁆𑀯𑀸𑀦 𑀲𑁄 𑀯𑀲𑁆𑀲𑀲𑀢𑀁 𑀇𑀥𑁂𑀯, 𑀲𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀲𑀳𑀩𑁆𑀬𑀢𑀁 𑀕𑀘𑁆𑀙𑀢𑀺 𑀯𑀸𑀲𑀯𑀲𑁆𑀲𑀸’’𑀢𑀺. 𑁋

𑁪𑁬𑁦. 𑀢𑀢𑁆𑀣 ¶ 𑀚𑀦𑀢𑀸𑀢𑀺 𑀚𑀦𑀲𑀫𑀽𑀳𑁄, 𑀉𑀧𑀸𑀲𑀓𑀕𑀡𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀧𑀽𑀚𑀸𑀬𑀁. 𑀅𑀲𑁆𑀲𑀸𑀢𑀺 𑀢𑀲𑁆𑀲 𑀤𑀸𑀭𑀓𑀲𑁆𑀲. 𑀘𑀺𑀢𑁆𑀢𑀲𑁆𑀲𑀳𑀼 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀧𑀼𑀭𑀺𑀫𑀪𑀯𑀲𑁆𑀫𑀺𑀁 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄 𑀅𑀦𑀸𑀤𑀭𑁄 𑀅𑀕𑀸𑀭𑀯𑁄 𑀅𑀧𑀘𑁆𑀘𑀬𑁄 𑀅𑀳𑁄𑀲𑀺. 𑀅𑀲𑀩𑁆𑀪𑀦𑁆𑀢𑀺 𑀲𑀸𑀥𑀼𑀲𑀪𑀸𑀬 𑀲𑀸𑀯𑁂𑀢𑀼𑀁 𑀅𑀬𑀼𑀢𑁆𑀢𑀁 𑀨𑀭𑀼𑀲𑀁 𑀯𑀸𑀘𑀁 𑀅𑀪𑀸𑀲𑀺.

𑁪𑁬𑁧. 𑀲𑁄𑀢𑀺 𑀲𑁄 𑀅𑀬𑀁. 𑀢𑀁 𑀯𑀺𑀢𑀓𑁆𑀓𑀦𑁆𑀢𑀺 𑀢𑀁 𑀧𑀸𑀧𑀓𑀁 𑀯𑀺𑀢𑀓𑁆𑀓𑀁. 𑀧𑀯𑀺𑀦𑁄𑀤𑀬𑀺𑀢𑁆𑀯𑀸𑀢𑀺 𑀫𑀸𑀢𑀭𑀸 𑀓𑀢𑀸𑀬 𑀲𑀜𑁆𑀜𑀢𑁆𑀢𑀺𑀬𑀸 𑀯𑀽𑀧𑀲𑀫𑁂𑀢𑁆𑀯𑀸. 𑀧𑀻𑀢𑀺𑀁 𑀧𑀲𑀸𑀤𑀁 𑀧𑀝𑀺𑀮𑀤𑁆𑀥𑀸𑀢𑀺 𑀧𑀻𑀢𑀺𑀁 𑀧𑀲𑀸𑀤𑀜𑁆𑀘 𑀧𑀝𑀺𑀮𑀪𑀺𑀢𑁆𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀬𑀸𑀕𑀼𑀬𑀸 𑀉𑀧𑀝𑁆𑀞𑀸𑀲𑀻𑀢𑀺 𑀬𑀸𑀕𑀼𑀤𑀸𑀦𑁂𑀦 𑀉𑀧𑀝𑁆𑀞𑀳𑀺. 𑀲𑀢𑁆𑀢𑀭𑀢𑁆𑀢𑀦𑁆𑀢𑀺 𑀲𑀢𑁆𑀢𑀤𑀺𑀯𑀲𑀁.

𑁪𑁬𑁨. 𑀢𑀲𑁆𑀲 ¶ 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀢𑀁 𑀫𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀧𑀲𑀸𑀤𑀦𑀁 𑀤𑀸𑀦𑀜𑁆𑀘 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀢𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁪𑁬𑁩. 𑀞𑀢𑁆𑀯𑀸𑀦𑀸𑀢𑀺 𑀬𑀸𑀯 𑀆𑀬𑀼𑀧𑀭𑀺𑀬𑁄𑀲𑀸𑀦𑀸 𑀇𑀥𑁂𑀯 𑀫𑀦𑀼𑀲𑁆𑀲𑀮𑁄𑀓𑁂 𑀞𑀢𑁆𑀯𑀸. 𑀅𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑁂. 𑀲𑀳𑀩𑁆𑀬𑀢𑀁 𑀕𑀘𑁆𑀙𑀢𑀺 𑀯𑀸𑀲𑀯𑀲𑁆𑀲𑀸𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 ¶ 𑀧𑀼𑀢𑁆𑀢𑀪𑀸𑀯𑁂𑀦 𑀲𑀳𑀪𑀸𑀯𑀁 𑀕𑀫𑀺𑀲𑁆𑀲𑀢𑀺. 𑀅𑀦𑀸𑀕𑀢𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀘𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁂𑀭𑀺𑀡𑀻𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑁂𑀭𑀺𑀡𑀻𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀓𑀼𑀭𑀼𑀭𑀝𑁆𑀞𑁂 𑀓𑀺𑀭 𑀳𑀢𑁆𑀣𑀺𑀦𑀺𑀧𑀼𑀭𑁂 𑀲𑁂𑀭𑀺𑀡𑀻 𑀦𑀸𑀫 𑀏𑀓𑀸 𑀭𑀽𑀧𑀽𑀧𑀚𑀻𑀯𑀺𑀦𑀻 𑀅𑀳𑁄𑀲𑀺. 𑀢𑀢𑁆𑀣 𑀘 𑀉𑀧𑁄𑀲𑀣𑀓𑀭𑀡𑀢𑁆𑀣𑀸𑀬 𑀢𑀢𑁄 𑀢𑀢𑁄 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀧𑀼𑀦 𑀫𑀳𑀸𑀪𑀺𑀓𑁆𑀔𑀼𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀁 𑀲𑀧𑁆𑀧𑀺𑀦𑀯𑀦𑀻𑀢𑀫𑀥𑀼𑀆𑀤𑀺𑀜𑁆𑀘 𑀩𑀳𑀼𑀁 𑀤𑀸𑀦𑀽𑀧𑀓𑀭𑀡𑀁 𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀁. 𑀢𑁂𑀦 𑀘 𑀲𑀫𑀬𑁂𑀦 𑀲𑀸 𑀕𑀡𑀺𑀓𑀸 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 ‘‘𑀏𑀳𑀺 𑀢𑀸𑀯 𑀇𑀤𑀁 𑀤𑀸𑀦𑀁 𑀅𑀦𑀼𑀫𑁄𑀤𑀸𑀳𑀻’’𑀢𑀺 𑀉𑀲𑁆𑀲𑀸𑀳𑀺𑀢𑀸𑀧𑀺 ‘‘𑀓𑀺𑀁 𑀢𑁂𑀦 𑀫𑀼𑀡𑁆𑀟𑀓𑀸𑀦𑀁 𑀲𑀫𑀡𑀸𑀦𑀁 𑀤𑀺𑀦𑁆𑀦𑁂𑀦𑀸’’𑀢𑀺 𑀅𑀧𑁆𑀧𑀲𑀸𑀤𑀫𑁂𑀯 𑀦𑁂𑀲𑀁 𑀲𑀫𑁆𑀧𑀯𑁂𑀤𑁂𑀲𑀺, 𑀓𑀼𑀢𑁄 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀧𑀭𑀺𑀘𑁆𑀘𑀸𑀕𑁄.

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀧𑀘𑁆𑀘𑀦𑁆𑀢𑀦𑀕𑀭𑀲𑁆𑀲 𑀧𑀭𑀺𑀔𑀸𑀧𑀺𑀝𑁆𑀞𑁂 𑀧𑁂𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀳𑀢𑁆𑀣𑀺𑀦𑀺𑀧𑀼𑀭𑀯𑀸𑀲𑀻 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀯𑀡𑀺𑀚𑁆𑀚𑀸𑀬 𑀢𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 ¶ 𑀧𑀭𑀺𑀔𑀸𑀧𑀺𑀝𑁆𑀞𑀁 𑀕𑀢𑁄 𑀢𑀸𑀤𑀺𑀲𑁂𑀦 𑀧𑀬𑁄𑀚𑀦𑁂𑀦. 𑀲𑀸 𑀢𑀢𑁆𑀣 𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀦𑀕𑁆𑀕𑀸 𑀅𑀝𑁆𑀞𑀺𑀢𑁆𑀢𑀘𑀫𑀢𑁆𑀢𑀸𑀯𑀲𑁂𑀲𑀲𑀭𑀻𑀭𑀸 𑀅𑀢𑀺𑀯𑀺𑀬 𑀩𑀻𑀪𑀘𑁆𑀙𑀤𑀲𑁆𑀲𑀦𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑁋

‘‘𑀦𑀕𑁆𑀕𑀸 ¶ 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀲𑀺, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑁂 𑀓𑀺𑀲𑀺𑀓𑁂, 𑀓𑀸 𑀦𑀼 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀻’’𑀢𑀺. 𑁋

𑀕𑀸𑀣𑀸𑀬 𑀧𑀼𑀘𑁆𑀙𑀺. 𑀲𑀸𑀧𑀺𑀲𑁆𑀲 𑁋

‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑀻𑀫𑁆𑀳𑀺, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀲𑀺. 𑀧𑀼𑀦 𑀢𑁂𑀦 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑀸 𑁋

‘‘𑀅𑀦𑀸𑀯𑀝𑁂𑀲𑀼 ¶ 𑀢𑀺𑀢𑁆𑀣𑁂𑀲𑀼, 𑀯𑀺𑀘𑀺𑀦𑀺𑀁 𑀅𑀟𑁆𑀠𑀫𑀸𑀲𑀓𑀁;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄.

‘‘𑀦𑀤𑀺𑀁 𑀉𑀧𑁂𑀫𑀺 𑀢𑀲𑀺𑀢𑀸, 𑀭𑀺𑀢𑁆𑀢𑀓𑀸 𑀧𑀭𑀺𑀯𑀢𑁆𑀢𑀢𑀺;

𑀙𑀸𑀬𑀁 𑀉𑀧𑁂𑀫𑀺 𑀉𑀡𑁆𑀳𑁂𑀲𑀼, 𑀆𑀢𑀧𑁄 𑀧𑀭𑀺𑀯𑀢𑁆𑀢𑀢𑀺.

‘‘𑀅𑀕𑁆𑀕𑀺𑀯𑀡𑁆𑀡𑁄 𑀘 𑀫𑁂 𑀯𑀸𑀢𑁄, 𑀟𑀳𑀦𑁆𑀢𑁄 𑀉𑀧𑀯𑀸𑀬𑀢𑀺;

𑀏𑀢𑀜𑁆𑀘 𑀪𑀦𑁆𑀢𑁂 𑀅𑀭𑀳𑀸𑀫𑀺, 𑀅𑀜𑁆𑀜𑀜𑁆𑀘 𑀧𑀸𑀧𑀓𑀁 𑀢𑀢𑁄.

‘‘𑀕𑀦𑁆𑀢𑁆𑀯𑀸𑀦 ¶ 𑀳𑀢𑁆𑀣𑀺𑀦𑀺𑀁 𑀧𑀼𑀭𑀁, 𑀯𑀚𑁆𑀚𑁂𑀲𑀺 𑀫𑀬𑁆𑀳 𑀫𑀸𑀢𑀭𑀁;

‘𑀥𑀻𑀢𑀸 𑀘 𑀢𑁂 𑀫𑀬𑀸 𑀤𑀺𑀝𑁆𑀞𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’.

‘‘𑀅𑀢𑁆𑀣𑀺 𑀫𑁂 𑀏𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀁, 𑀅𑀦𑀓𑁆𑀔𑀸𑀢𑀜𑁆𑀘 𑀢𑀁 𑀫𑀬𑀸;

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀳𑁂𑀝𑁆𑀞𑀢𑁄.

‘‘𑀢𑀢𑁄 𑀫𑁂 𑀤𑀸𑀦𑀁 𑀤𑀤𑀢𑀼, 𑀢𑀲𑁆𑀲𑀸 𑀘 𑀳𑁄𑀢𑀼 𑀚𑀻𑀯𑀺𑀓𑀸;

𑀤𑀸𑀦𑀁 𑀤𑀢𑁆𑀯𑀸 𑀘 𑀫𑁂 𑀫𑀸𑀢𑀸, 𑀤𑀓𑁆𑀔𑀺𑀡𑀁 𑀅𑀦𑀼𑀤𑀺𑀘𑁆𑀙𑀢𑀼;

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’’𑀢𑀺. 𑁋

𑀇𑀫𑀸𑀳𑀺 ¶ 𑀙𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀜𑁆𑀘𑁂𑀯 𑀧𑀼𑀦 𑀢𑁂𑀦 𑀅𑀢𑁆𑀢𑀦𑁄 𑀓𑀸𑀢𑀩𑁆𑀩𑀁 𑀅𑀢𑁆𑀣𑀜𑁆𑀘 𑀆𑀘𑀺𑀓𑁆𑀔𑀺.

𑁪𑁬𑁭. 𑀢𑀢𑁆𑀣 𑀅𑀦𑀸𑀯𑀝𑁂𑀲𑀼 𑀢𑀺𑀢𑁆𑀣𑁂𑀲𑀽𑀢𑀺 𑀓𑁂𑀦𑀘𑀺 𑀅𑀦𑀺𑀯𑀸𑀭𑀺𑀢𑁂𑀲𑀼 𑀦𑀤𑀻𑀢𑀴𑀸𑀓𑀸𑀤𑀻𑀦𑀁 𑀢𑀺𑀢𑁆𑀣𑀧𑀤𑁂𑀲𑁂𑀲𑀼, 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀦𑁆𑀳𑀸𑀬𑀦𑁆𑀢𑀺, 𑀉𑀤𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼. 𑀯𑀺𑀘𑀺𑀦𑀺𑀁 𑀅𑀟𑁆𑀠𑀫𑀸𑀲𑀓𑀦𑁆𑀢𑀺 ‘‘𑀫𑀦𑀼𑀲𑁆𑀲𑁂𑀳𑀺 𑀞𑀧𑁂𑀢𑁆𑀯𑀸 𑀯𑀺𑀲𑁆𑀲𑀭𑀺𑀢𑀁 𑀅𑀧𑀺𑀦𑀸𑀫𑁂𑀢𑁆𑀣 𑀓𑀺𑀜𑁆𑀘𑀺 𑀮𑀪𑁂𑀬𑁆𑀬’’𑀦𑁆𑀢𑀺 𑀮𑁄𑀪𑀸𑀪𑀺𑀪𑀽𑀢𑀸 𑀅𑀟𑁆𑀠𑀫𑀸𑀲𑀓𑀫𑀢𑁆𑀢𑀫𑁆𑀧𑀺 𑀯𑀺𑀘𑀺𑀦𑀺𑀁 𑀕𑀯𑁂𑀲𑀺𑀁. 𑀅𑀣 𑀯𑀸 𑀅𑀦𑀸𑀯𑀝𑁂𑀲𑀼 𑀢𑀺𑀢𑁆𑀣𑁂𑀲𑀽𑀢𑀺 𑀉𑀧𑀲𑀗𑁆𑀓𑀫𑀦𑁂𑀦 𑀓𑁂𑀦𑀘𑀺 𑀅𑀦𑀺𑀯𑀸𑀭𑀺𑀢𑁂𑀲𑀼 𑀲𑀢𑁆𑀢𑀸𑀦𑀁 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀺𑀬𑀸 𑀓𑀸𑀭𑀡𑀪𑀸𑀯𑁂𑀦 𑀢𑀺𑀢𑁆𑀣𑀪𑀽𑀢𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼. 𑀯𑀺𑀘𑀺𑀦𑀺𑀁 𑀅𑀟𑁆𑀠𑀫𑀸𑀲𑀓𑀦𑁆𑀢𑀺 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑁂𑀦𑁆𑀢𑀻 𑀅𑀟𑁆𑀠𑀫𑀸𑀲𑀓𑀫𑁆𑀧𑀺 𑀯𑀺𑀲𑁂𑀲𑁂𑀦 𑀘𑀺𑀦𑀺𑀁, 𑀦 𑀲𑀜𑁆𑀘𑀺𑀦𑀺𑀁 𑀧𑀼𑀜𑁆𑀜𑀁. 𑀢𑁂𑀦𑀸𑀳 ‘‘𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄’’𑀢𑀺.

𑁪𑁬𑁮. 𑀢𑀲𑀺𑀢𑀸𑀢𑀺 𑀧𑀺𑀧𑀸𑀲𑀺𑀢𑀸. 𑀭𑀺𑀢𑁆𑀢𑀓𑀸𑀢𑀺 𑀓𑀸𑀓𑀧𑁂𑀬𑁆𑀬𑀸 𑀲𑀦𑁆𑀤𑀫𑀸𑀦𑀸𑀧𑀺 𑀦𑀤𑀻 𑀫𑀫 𑀧𑀸𑀧𑀓𑀫𑁆𑀫𑁂𑀦 𑀉𑀤𑀓𑁂𑀦 𑀭𑀺𑀢𑁆𑀢𑀸 𑀢𑀼𑀘𑁆𑀙𑀸 𑀯𑀸𑀮𑀺𑀓𑀫𑀢𑁆𑀢𑀸 ¶ 𑀳𑀼𑀢𑁆𑀯𑀸 𑀧𑀭𑀺𑀯𑀢𑁆𑀢𑀢𑀺. 𑀉𑀡𑁆𑀳𑁂𑀲𑀽𑀢𑀺 𑀉𑀡𑁆𑀳𑀲𑀫𑀬𑁂𑀲𑀼. 𑀆𑀢𑀧𑁄 𑀧𑀭𑀺𑀯𑀢𑁆𑀢𑀢𑀻𑀢𑀺 𑀙𑀸𑀬𑀸𑀝𑁆𑀞𑀸𑀦𑀁 𑀫𑀬𑀺 𑀉𑀧𑀕𑀢𑀸𑀬 𑀆𑀢𑀧𑁄 𑀲𑀫𑁆𑀧𑀚𑁆𑀚𑀢𑀺.

𑁪𑁬𑁯-𑁭𑁦. 𑀅𑀕𑁆𑀕𑀺𑀯𑀡𑁆𑀡𑁄𑀢𑀺 𑀲𑀫𑁆𑀨𑀲𑁆𑀲𑁂𑀦 𑀅𑀕𑁆𑀕𑀺𑀲𑀤𑀺𑀲𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀟𑀳𑀦𑁆𑀢𑁄 𑀉𑀧𑀯𑀸𑀬𑀢𑀻’’𑀢𑀺. 𑀏𑀢𑀜𑁆𑀘, 𑀪𑀦𑁆𑀢𑁂, 𑀅𑀭𑀳𑀸𑀫𑀻𑀢𑀺, 𑀪𑀦𑁆𑀢𑁂𑀢𑀺 𑀢𑀁 𑀉𑀧𑀸𑀲𑀓𑀁 𑀕𑀭𑀼𑀓𑀸𑀭𑁂𑀦 𑀯𑀤𑀢𑀺. 𑀪𑀦𑁆𑀢𑁂, 𑀏𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀁 𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀁, 𑀅𑀜𑁆𑀜𑀜𑁆𑀘 𑀢𑀢𑁄 𑀧𑀸𑀧𑀓𑀁 𑀤𑀸𑀭𑀼𑀡𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼𑀁 𑀅𑀭𑀳𑀸𑀫𑀺 𑀢𑀚𑁆𑀚𑀲𑁆𑀲 ¶ 𑀧𑀸𑀧𑀲𑁆𑀲 𑀓𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀚𑁆𑀚𑁂𑀲𑀻𑀢𑀺 𑀯𑀤𑁂𑀬𑁆𑀬𑀸𑀲𑀺.

𑁪𑁭𑁧-𑁭𑁨. 𑀏𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀁, 𑀅𑀦𑀓𑁆𑀔𑀸𑀢𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀏𑀢𑁆𑀣 𑀦𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀅𑀦𑀸𑀘𑀺𑀓𑁆𑀔𑀺𑀢𑀁. 𑀇𑀤𑀸𑀦𑀺 𑀢𑀲𑁆𑀲 𑀧𑀭𑀺𑀫𑀸𑀡𑀁 𑀞𑀧𑀺𑀢𑀝𑁆𑀞𑀸𑀦𑀜𑁆𑀘 𑀤𑀲𑁆𑀲𑁂𑀦𑁆𑀢𑀻 ‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀳𑁂𑀝𑁆𑀞𑀢𑁄’’𑀢𑀺 𑀆𑀳. 𑀢𑀢𑁆𑀣 𑀧𑀮𑁆𑀮𑀗𑁆𑀓𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀲𑀬𑀦𑀧𑀮𑁆𑀮𑀗𑁆𑀓𑀲𑁆𑀲. 𑀢𑀢𑁄𑀢𑀺 𑀦𑀺𑀳𑀺𑀢𑀥𑀦𑀢𑁄 𑀏𑀓𑀤𑁂𑀲𑀁 𑀕𑀳𑁂𑀢𑁆𑀯𑀸 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑁂𑀢𑀼. 𑀢𑀲𑁆𑀲𑀸𑀢𑀺 𑀫𑀬𑁆𑀳𑀁 𑀫𑀸𑀢𑀼𑀬𑀸.

𑀏𑀯𑀁 ¶ 𑀢𑀸𑀬 𑀧𑁂𑀢𑀺𑀬𑀸 𑀯𑀼𑀢𑁆𑀢𑁂 𑀲𑁄 𑀉𑀧𑀸𑀲𑀓𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀳𑀢𑁆𑀣𑀺𑀦𑀺𑀧𑀼𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀫𑀸𑀢𑀼𑀬𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑁋

𑀲𑀸𑀥𑀽𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀕𑀦𑁆𑀢𑁆𑀯𑀸𑀦 𑀳𑀢𑁆𑀣𑀺𑀦𑀺𑀁 𑀧𑀼𑀭𑀁;

‘‘𑀥𑀻𑀢𑀸 𑀘 𑀢𑁂 𑀫𑀬𑀸 𑀤𑀺𑀝𑁆𑀞𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘𑀲𑀸 𑀫𑀁 𑀢𑀢𑁆𑀣 𑀲𑀫𑀸𑀤𑀧𑁂𑀲𑀺, 𑀯𑀚𑁆𑀚𑁂𑀲𑀺 𑀫𑀬𑁆𑀳 𑀫𑀸𑀢𑀭𑀁;

‘𑀥𑀻𑀢𑀸 𑀘 𑀢𑁂 𑀫𑀬𑀸 𑀤𑀺𑀝𑁆𑀞𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸.

‘‘‘𑀅𑀢𑁆𑀣𑀺 𑀘 𑀫𑁂 𑀏𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀁, 𑀅𑀦𑀓𑁆𑀔𑀸𑀢𑀜𑁆𑀘 𑀢𑀁 𑀫𑀬𑀸;

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀳𑁂𑀝𑁆𑀞𑀢𑁄.

‘‘‘𑀢𑀢𑁄 ¶ 𑀫𑁂 𑀤𑀸𑀦𑀁 𑀤𑀤𑀢𑀼, 𑀢𑀲𑁆𑀲𑀸 𑀘 𑀳𑁄𑀢𑀼 𑀚𑀻𑀯𑀺𑀓𑀸;

𑀤𑀸𑀦𑀁 𑀤𑀢𑁆𑀯𑀸 𑀘 𑀫𑁂 𑀫𑀸𑀢𑀸, 𑀤𑀓𑁆𑀔𑀺𑀡𑀁 𑀅𑀦𑀼𑀤𑀺𑀘𑁆𑀙𑀢𑀼;

𑀢𑀤𑀸𑀳𑀁 𑀲𑀼𑀔𑀺𑀢𑀸 𑀳𑁂𑀲𑁆𑀲𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻’.

‘‘𑀢𑀢𑁄 𑀳𑀺 𑀲𑀸 𑀤𑀸𑀦𑀫𑀤𑀸, 𑀢𑀲𑁆𑀲𑀸 𑀤𑀓𑁆𑀔𑀺𑀡𑀫𑀸𑀤𑀺𑀲𑀻;

𑀧𑁂𑀢𑀻 𑀘 𑀲𑀼𑀔𑀺𑀢𑀸 𑀆𑀲𑀺, 𑀢𑀲𑁆𑀲𑀸 𑀘𑀸𑀲𑀺 𑀲𑀼𑀚𑀻𑀯𑀺𑀓𑀸’’𑀢𑀺. 𑁋

𑀲𑀗𑁆𑀕𑀻𑀢𑀺𑀓𑀸𑀭𑀸 ¶ 𑀆𑀳𑀁𑀲𑀼. 𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀫𑀸𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀢𑀲𑁆𑀲𑀸 𑀆𑀤𑀺𑀲𑀺. 𑀢𑁂𑀦 𑀲𑀸 𑀧𑀝𑀺𑀮𑀤𑁆𑀥𑀽𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀸 𑀫𑀸𑀢𑀼 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀺, 𑀫𑀸𑀢𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺, 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀲𑁂𑀭𑀺𑀡𑀻𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀺𑀕𑀮𑀼𑀤𑁆𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀦𑀭𑀦𑀸𑀭𑀺𑀧𑀼𑀭𑀓𑁆𑀔𑀢𑁄 ¶ 𑀬𑀼𑀯𑀸𑀢𑀺 𑀇𑀤𑀁 𑀪𑀕𑀯𑀢𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀫𑀺𑀕𑀮𑀼𑀤𑁆𑀤𑀓𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀭𑀸𑀚𑀕𑀳𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀮𑀼𑀤𑁆𑀤𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲𑁂𑀓𑁄 𑀉𑀧𑀸𑀲𑀓𑁄 𑀫𑀺𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀢𑀁 𑀲𑀩𑁆𑀩𑀓𑀸𑀮𑀁 𑀧𑀸𑀧𑀢𑁄 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀏𑀳𑀺, 𑀲𑀫𑁆𑀫, 𑀭𑀢𑁆𑀢𑀺𑀬𑀁 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀳𑀻’’𑀢𑀺 𑀭𑀢𑁆𑀢𑀺𑀬𑀁 𑀧𑀼𑀜𑁆𑀜𑁂 𑀲𑀫𑀸𑀤𑀧𑁂𑀲𑀺. 𑀲𑁄 𑀭𑀢𑁆𑀢𑀺𑀬𑀁 𑀯𑀺𑀭𑀫𑀺𑀢𑁆𑀯𑀸 𑀤𑀺𑀯𑀸 𑀏𑀯 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀭𑀸𑀚𑀕𑀳𑀲𑀫𑀻𑀧𑁂 𑀯𑁂𑀫𑀸𑀦𑀺𑀓𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀤𑀺𑀯𑀲𑀪𑀸𑀕𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀭𑀢𑁆𑀢𑀺𑀬𑀁 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀆𑀬𑀲𑁆𑀫𑀸 𑀦𑀸𑀭𑀤𑁄 𑁋

‘‘𑀦𑀭𑀦𑀸𑀭𑀺𑀧𑀼𑀭𑀓𑁆𑀔𑀢𑁄 ¶ 𑀬𑀼𑀯𑀸, 𑀭𑀚𑀦𑀻𑀬𑁂𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑁄𑀪𑀲𑀺;

𑀤𑀺𑀯𑀲𑀁 𑀅𑀦𑀼𑀪𑁄𑀲𑀺 𑀓𑀸𑀭𑀡𑀁, 𑀓𑀺𑀫𑀓𑀸𑀲𑀺 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀧𑀼𑀘𑁆𑀙𑀺. 𑀢𑀢𑁆𑀣 𑀦𑀭𑀦𑀸𑀭𑀺𑀧𑀼𑀭𑀓𑁆𑀔𑀢𑁄𑀢𑀺 𑀧𑀭𑀺𑀘𑀸𑀭𑀓𑀪𑀽𑀢𑁂𑀳𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀤𑁂𑀯𑀥𑀻𑀢𑀸𑀳𑀺 𑀘 𑀧𑀼𑀭𑀓𑁆𑀔𑀢𑁄 𑀧𑀬𑀺𑀭𑀼𑀧𑀸𑀲𑀺𑀢𑁄. 𑀬𑀼𑀯𑀸𑀢𑀺 𑀢𑀭𑀼𑀡𑁄. 𑀭𑀚𑀦𑀻𑀬𑁂𑀳𑀻𑀢𑀺 𑀓𑀫𑀦𑀻𑀬𑁂𑀳𑀺 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁂𑀳𑀺. 𑀓𑀸𑀫𑀕𑀼𑀡𑁂𑀳𑀻𑀢𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺. 𑀲𑁄𑀪𑀲𑀻𑀢𑀺 𑀲𑀫𑀗𑁆𑀕𑀺𑀪𑀸𑀯𑁂𑀦 𑀯𑀺𑀭𑁄𑀘𑀲𑀺 𑀭𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀤𑀺𑀯𑀲𑀁 𑀅𑀦𑀼𑀪𑁄𑀲𑀺 𑀓𑀸𑀭𑀡’’𑀦𑁆𑀢𑀺, 𑀤𑀺𑀯𑀲𑀪𑀸𑀕𑁂 𑀧𑀦 𑀦𑀸𑀦𑀧𑁆𑀧𑀓𑀸𑀭𑀁 𑀓𑀸𑀭𑀡𑀁 𑀖𑀸𑀢𑀦𑀁 𑀧𑀘𑁆𑀘𑀦𑀼𑀪𑀯𑀲𑀺. 𑀭𑀚𑀦𑀻𑀢𑀺 𑀯𑀸 𑀭𑀢𑁆𑀢𑀻𑀲𑀼. 𑀬𑁂𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀺𑀫𑀓𑀸𑀲𑀺 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸𑀢𑀺 𑀏𑀯𑀁 𑀲𑀼𑀔𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀬𑀁 𑀓𑀺𑀁 𑀦𑀸𑀫 𑀓𑀫𑁆𑀫𑀁 𑀇𑀢𑁄 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸 𑀢𑁆𑀯𑀁 𑀅𑀓𑀢𑁆𑀣, 𑀢𑀁 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄 ¶ .

𑀢𑀁 𑀲𑀼𑀢𑁆𑀯𑀸 𑀧𑁂𑀢𑁄 𑀣𑁂𑀭𑀲𑁆𑀲 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀅𑀳𑀁 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀭𑀫𑀡𑀻𑀬𑁂 𑀕𑀺𑀭𑀺𑀩𑁆𑀩𑀚𑁂;

𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀮𑁄𑀳𑀺𑀢𑀧𑀸𑀡𑀺 𑀤𑀸𑀭𑀼𑀡𑁄.

‘‘𑀅𑀯𑀺𑀭𑁄𑀥𑀓𑀭𑁂𑀲𑀼 ¶ 𑀧𑀸𑀡𑀺𑀲𑀼, 𑀧𑀼𑀣𑀼𑀲𑀢𑁆𑀢𑁂𑀲𑀼 𑀧𑀤𑀼𑀝𑁆𑀞𑀫𑀸𑀦𑀲𑁄;

𑀯𑀺𑀘𑀭𑀺𑀁 𑀅𑀢𑀺𑀤𑀸𑀭𑀼𑀡𑁄 𑀲𑀤𑀸, 𑀧𑀭𑀳𑀺𑀁𑀲𑀸𑀬 𑀭𑀢𑁄 𑀅𑀲𑀜𑁆𑀜𑀢𑁄.

‘‘𑀢𑀲𑁆𑀲 𑀫𑁂 𑀲𑀳𑀸𑀬𑁄 𑀲𑀼𑀳𑀤𑀬𑁄, 𑀲𑀤𑁆𑀥𑁄 𑀆𑀲𑀺 𑀉𑀧𑀸𑀲𑀓𑁄;

𑀲𑁄𑀧𑀺 𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑁄, 𑀦𑀺𑀯𑀸𑀭𑁂𑀲𑀺 𑀧𑀼𑀦𑀧𑁆𑀧𑀼𑀦𑀁.

‘‘‘𑀫𑀸𑀓𑀸𑀲𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀫𑀸 𑀢𑀸𑀢 𑀤𑀼𑀕𑁆𑀕𑀢𑀺𑀁 𑀅𑀕𑀸;

𑀲𑀘𑁂 𑀇𑀘𑁆𑀙𑀲𑀺 𑀧𑁂𑀘𑁆𑀘 𑀲𑀼𑀔𑀁, 𑀯𑀺𑀭𑀫 𑀧𑀸𑀡𑀯𑀥𑀸 𑀅𑀲𑀁𑀬𑀫𑀸.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀼𑀔𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄;

𑀦𑀸𑀓𑀸𑀲𑀺𑀁 𑀲𑀓𑀮𑀸𑀦𑀼𑀲𑀸𑀲𑀦𑀺𑀁, 𑀘𑀺𑀭𑀧𑀸𑀧𑀸𑀪𑀺𑀭𑀢𑁄 𑀅𑀩𑀼𑀤𑁆𑀥𑀺𑀫𑀸.

‘‘𑀲𑁄 𑀫𑀁 𑀧𑀼𑀦 𑀪𑀽𑀭𑀺𑀲𑀼𑀫𑁂𑀥𑀲𑁄, 𑀅𑀦𑀼𑀓𑀫𑁆𑀧𑀸𑀬 𑀲𑀁𑀬𑀫𑁂 𑀦𑀺𑀯𑁂𑀲𑀬𑀺;

𑀲𑀘𑁂 𑀤𑀺𑀯𑀸 𑀳𑀦𑀲𑀺 𑀧𑀸𑀡𑀺𑀦𑁄, 𑀅𑀣 𑀢𑁂 𑀭𑀢𑁆𑀢𑀺𑀁 𑀪𑀯𑀢𑀼 𑀲𑀁𑀬𑀫𑁄.

‘‘𑀲𑁆𑀯𑀸𑀳𑀁 ¶ 𑀤𑀺𑀯𑀸 𑀳𑀦𑀺𑀢𑁆𑀯𑀸 𑀧𑀸𑀡𑀺𑀦𑁄, 𑀯𑀺𑀭𑀢𑁄 𑀭𑀢𑁆𑀢𑀺𑀫𑀳𑁄𑀲𑀺 𑀲𑀜𑁆𑀜𑀢𑁄;

𑀭𑀢𑁆𑀢𑀸𑀳𑀁 𑀧𑀭𑀺𑀘𑀸𑀭𑁂𑀫𑀺, 𑀤𑀺𑀯𑀸 𑀔𑀚𑁆𑀚𑀸𑀫𑀺 𑀤𑀼𑀕𑁆𑀕𑀢𑁄.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀅𑀦𑀼𑀪𑁄𑀫𑀺 𑀭𑀢𑁆𑀢𑀺𑀁 𑀅𑀫𑀸𑀦𑀼𑀲𑀺𑀁;

𑀤𑀺𑀯𑀸 𑀧𑀝𑀺𑀳𑀢𑀸𑀯 𑀓𑀼𑀓𑁆𑀓𑀼𑀭𑀸, 𑀉𑀧𑀥𑀸𑀯𑀦𑁆𑀢𑀺 𑀲𑀫𑀦𑁆𑀢𑀸 𑀔𑀸𑀤𑀺𑀢𑀼𑀁.

‘‘𑀬𑁂 ¶ 𑀘 𑀢𑁂 𑀲𑀢𑀢𑀸𑀦𑀼𑀬𑁄𑀕𑀺𑀦𑁄, 𑀥𑀼𑀯𑀁 𑀧𑀬𑀼𑀢𑁆𑀢𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂;

𑀫𑀜𑁆𑀜𑀸𑀫𑀺 𑀢𑁂 𑀅𑀫𑀢𑀫𑁂𑀯 𑀓𑁂𑀯𑀮𑀁, 𑀅𑀥𑀺𑀕𑀘𑁆𑀙𑀦𑁆𑀢𑀺 𑀧𑀤𑀁 𑀅𑀲𑀗𑁆𑀔𑀢’’𑀦𑁆𑀢𑀺. 𑁋

𑁪𑁭𑁯-𑁮𑁦. 𑀢𑀢𑁆𑀣 ¶ 𑀮𑀼𑀤𑁆𑀤𑁄𑀢𑀺 𑀤𑀸𑀭𑀼𑀡𑁄. 𑀮𑁄𑀳𑀺𑀢𑀧𑀸𑀡𑀻𑀢𑀺 𑀅𑀪𑀺𑀡𑁆𑀳𑀁 𑀧𑀸𑀡𑀖𑀸𑀢𑁂𑀦 𑀮𑁄𑀳𑀺𑀢𑀫𑀓𑁆𑀔𑀺𑀢𑀧𑀸𑀡𑀻. 𑀤𑀸𑀭𑀼𑀡𑁄𑀢𑀺 𑀔𑀭𑁄, 𑀲𑀢𑁆𑀢𑀸𑀦𑀁 𑀳𑀺𑀁𑀲𑀦𑀓𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀭𑁄𑀥𑀓𑀭𑁂𑀲𑀽𑀢𑀺 𑀓𑁂𑀦𑀘𑀺 𑀯𑀺𑀭𑁄𑀥𑀁 𑀅𑀓𑀭𑁄𑀦𑁆𑀢𑁂𑀲𑀼 𑀫𑀺𑀕𑀲𑀓𑀼𑀡𑀸𑀤𑀻𑀲𑀼.

𑁪𑁮𑁨-𑁮𑁩. 𑀅𑀲𑀁𑀬𑀫𑀸𑀢𑀺 𑀅𑀲𑀁𑀯𑀭𑀸 𑀤𑀼𑀲𑁆𑀲𑀻𑀮𑁆𑀬𑀸. 𑀲𑀓𑀮𑀸𑀦𑀼𑀲𑀸𑀲𑀦𑀺𑀦𑁆𑀢𑀺 𑀲𑀩𑁆𑀩𑀁 𑀅𑀦𑀼𑀲𑀸𑀲𑀦𑀺𑀁, 𑀲𑀩𑁆𑀩𑀓𑀸𑀮𑀁 𑀧𑀸𑀡𑀸𑀢𑀺𑀧𑀸𑀢𑀢𑁄 𑀧𑀝𑀺𑀯𑀺𑀭𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀭𑀧𑀸𑀧𑀸𑀪𑀺𑀭𑀢𑁄𑀢𑀺 𑀘𑀺𑀭𑀓𑀸𑀮𑀁 𑀧𑀸𑀧𑁂 𑀅𑀪𑀺𑀭𑀢𑁄.

𑁪𑁮𑁪. 𑀲𑀁𑀬𑀫𑁂𑀢𑀺 𑀲𑀼𑀘𑀭𑀺𑀢𑁂. 𑀦𑀺𑀯𑁂𑀲𑀬𑀻𑀳𑀺 𑀦𑀺𑀯𑁂𑀲𑁂𑀲𑀺. 𑀲𑀘𑁂 𑀤𑀺𑀯𑀸 𑀳𑀦𑀲𑀺 𑀧𑀸𑀡𑀺𑀦𑁄, 𑀅𑀣 𑀢𑁂 𑀭𑀢𑁆𑀢𑀺𑀁 𑀪𑀯𑀢𑀼 𑀲𑀁𑀬𑀫𑁄𑀢𑀺 𑀦𑀺𑀯𑁂𑀲𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀲𑁄 𑀓𑀺𑀭 𑀲𑀮𑁆𑀮𑀧𑀸𑀲𑀲𑀚𑁆𑀚𑀦𑀸𑀤𑀺𑀦𑀸 𑀭𑀢𑁆𑀢𑀺𑀬𑀫𑁆𑀧𑀺 𑀧𑀸𑀡𑀯𑀥𑀁 𑀅𑀦𑀼𑀬𑀼𑀢𑁆𑀢𑁄 𑀅𑀳𑁄𑀲𑀺.

𑁪𑁮𑁫. 𑀤𑀺𑀯𑀸 𑀔𑀚𑁆𑀚𑀸𑀫𑀺 𑀤𑀼𑀕𑁆𑀕𑀢𑁄𑀢𑀺 𑀇𑀤𑀸𑀦𑀺 𑀤𑀼𑀕𑁆𑀕𑀢𑀺𑀁 𑀕𑀢𑁄 𑀫𑀳𑀸𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀤𑀺𑀯𑀲𑀪𑀸𑀕𑁂 𑀔𑀸𑀤𑀺𑀬𑀸𑀫𑀺. 𑀢𑀲𑁆𑀲 𑀓𑀺𑀭 𑀤𑀺𑀯𑀸 𑀲𑀼𑀦𑀔𑁂𑀳𑀺 𑀫𑀺𑀕𑀸𑀦𑀁 𑀔𑀸𑀤𑀸𑀧𑀺𑀢𑀢𑁆𑀢𑀸 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀨𑀮𑀁 𑀳𑁄𑀢𑀺, 𑀤𑀺𑀯𑀲𑀪𑀸𑀕𑁂 𑀫𑀳𑀦𑁆𑀢𑀸 𑀲𑀼𑀦𑀔𑀸 𑀉𑀧𑀥𑀸𑀯𑀺𑀢𑁆𑀯𑀸 𑀅𑀝𑁆𑀞𑀺𑀲𑀗𑁆𑀖𑀸𑀢𑀫𑀢𑁆𑀢𑀸𑀯𑀲𑁂𑀲𑀁 𑀲𑀭𑀻𑀭𑀁 𑀓𑀭𑁄𑀦𑁆𑀢𑀺. 𑀭𑀢𑁆𑀢𑀺𑀬𑀸 𑀧𑀦 𑀉𑀧𑀕𑀢𑀸𑀬 𑀢𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀲𑁆𑀲 ¶ 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀅𑀦𑀼𑀪𑁄𑀫𑀺 𑀭𑀢𑁆𑀢𑀺𑀁 𑀅𑀫𑀸𑀦𑀼𑀲𑀺𑀁;

𑀤𑀺𑀯𑀸 𑀧𑀝𑀺𑀳𑀢𑀸𑀯 𑀓𑀼𑀓𑁆𑀓𑀼𑀭𑀸, 𑀉𑀧𑀥𑀸𑀯𑀦𑁆𑀢𑀺 𑀲𑀫𑀦𑁆𑀢𑀸 𑀔𑀸𑀤𑀺𑀢𑀼’’𑀦𑁆𑀢𑀺.

𑀢𑀢𑁆𑀣 𑀧𑀝𑀺𑀳𑀢𑀸𑀢𑀺 𑀧𑀝𑀺𑀳𑀢𑀘𑀺𑀢𑁆𑀢𑀸 𑀩𑀤𑁆𑀥𑀸𑀖𑀸𑀢𑀸 𑀯𑀺𑀬 𑀳𑀼𑀢𑁆𑀯𑀸. 𑀲𑀫𑀦𑁆𑀢𑀸 𑀔𑀸𑀤𑀺𑀢𑀼𑀦𑁆𑀢𑀺 𑀫𑀫 𑀲𑀭𑀻𑀭𑀁 𑀲𑀫𑀦𑁆𑀢𑀢𑁄 𑀔𑀸𑀤𑀺𑀢𑀼𑀁 𑀉𑀧𑀥𑀸𑀯𑀦𑁆𑀢𑀺. 𑀇𑀤𑀜𑁆𑀘 𑀦𑁂𑀲𑀁 𑀅𑀢𑀺𑀯𑀺𑀬 𑀅𑀢𑁆𑀢𑀦𑁄 𑀪𑀬𑀸𑀯𑀳𑀁 𑀉𑀧𑀕𑀫𑀦𑀓𑀸𑀮𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂 𑀧𑀦 𑀉𑀧𑀥𑀸𑀯𑀺𑀢𑁆𑀯𑀸 𑀅𑀝𑁆𑀞𑀺𑀫𑀢𑁆𑀢𑀸𑀯𑀲𑁂𑀲𑀁 𑀲𑀭𑀻𑀭𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑁪𑁮𑁭. 𑀬𑁂 𑀘 𑀢𑁂 𑀲𑀢𑀢𑀸𑀦𑀼𑀬𑁄𑀕𑀺𑀦𑁄𑀢𑀺 𑀑𑀲𑀸𑀦𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀳𑀫𑁆𑀧𑀺 𑀦𑀸𑀫 𑀭𑀢𑁆𑀢𑀺𑀬𑀁 ¶ 𑀧𑀸𑀡𑀯𑀥𑀫𑀢𑁆𑀢𑀢𑁄 𑀯𑀺𑀭𑀢𑁄 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 ¶ 𑀅𑀦𑀼𑀪𑀯𑀸𑀫𑀺. 𑀬𑁂 𑀧𑀦 𑀢𑁂 𑀧𑀼𑀭𑀺𑀲𑀸 𑀲𑀼𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀅𑀥𑀺𑀲𑀻𑀮𑀸𑀤𑀺𑀓𑁂 𑀥𑀼𑀯𑀁 𑀧𑀬𑀼𑀢𑁆𑀢𑀸 𑀤𑀴𑁆𑀳𑀁 𑀧𑀬𑀼𑀢𑁆𑀢𑀸 𑀲𑀢𑀢𑀁 𑀲𑀩𑁆𑀩𑀓𑀸𑀮𑀁 𑀅𑀦𑀼𑀬𑁄𑀕𑀯𑀦𑁆𑀢𑀸, 𑀢𑁂 𑀧𑀼𑀜𑁆𑀜𑀯𑀦𑁆𑀢𑁄 𑀓𑁂𑀯𑀮𑀁 𑀮𑁄𑀓𑀺𑀬𑀲𑀼𑀔𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 ‘‘𑀅𑀲𑀗𑁆𑀔𑀢𑀁 𑀧𑀤’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀅𑀫𑀢𑀫𑁂𑀯 𑀅𑀥𑀺𑀕𑀘𑁆𑀙𑀦𑁆𑀢𑀺 𑀫𑀜𑁆𑀜𑁂, 𑀦𑀢𑁆𑀣𑀺 𑀢𑁂𑀲𑀁 𑀢𑀤𑀥𑀺𑀕𑀫𑁂 𑀓𑁄𑀘𑀺 𑀯𑀺𑀩𑀦𑁆𑀥𑁄𑀢𑀺.

𑀏𑀯𑀁 𑀢𑁂𑀦 𑀧𑁂𑀢𑁂𑀦 𑀯𑀼𑀢𑁆𑀢𑁂 𑀣𑁂𑀭𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀺𑀕𑀮𑀼𑀤𑁆𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀢𑀺𑀬𑀫𑀺𑀕𑀮𑀼𑀤𑁆𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀓𑀽𑀝𑀸𑀕𑀸𑀭𑁂 𑀘 𑀧𑀸𑀲𑀸𑀤𑁂𑀢𑀺 𑀇𑀤𑀁 𑀪𑀕𑀯𑀢𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀧𑀭𑀁 𑀫𑀺𑀕𑀮𑀼𑀤𑁆𑀤𑀓𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀭𑀸𑀚𑀕𑀳𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀫𑀸𑀕𑀯𑀺𑀓𑁄 𑀫𑀸𑀡𑀯𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 𑀪𑁄𑀕𑀲𑀼𑀔𑀁 𑀧𑀳𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀺𑀕𑁂 𑀳𑀦𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀲𑁆𑀲 𑀲𑀳𑀸𑀬𑀪𑀽𑀢𑁄 𑀏𑀓𑁄 𑀉𑀧𑀸𑀲𑀓𑁄 𑀅𑀦𑀼𑀤𑁆𑀤𑀬𑀁 𑀧𑀝𑀺𑀘𑁆𑀘 𑁋 ‘‘𑀲𑀸𑀥𑀼, 𑀲𑀫𑁆𑀫, 𑀧𑀸𑀡𑀸𑀢𑀺𑀧𑀸𑀢𑀢𑁄 𑀯𑀺𑀭𑀫𑀸𑀳𑀺, 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁄 ¶ 𑀢𑀁 𑀅𑀦𑀸𑀤𑀺𑀬𑀺. 𑀅𑀣 𑀲𑁄 𑀉𑀧𑀸𑀲𑀓𑁄 𑀅𑀜𑁆𑀜𑀢𑀭𑀁 𑀅𑀢𑁆𑀢𑀦𑁄 𑀫𑀦𑁄𑀪𑀸𑀯𑀦𑀻𑀬𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀬𑀸𑀘𑀺 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀲𑀼𑀓𑀧𑀼𑀭𑀺𑀲𑀲𑁆𑀲 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀣, 𑀬𑀣𑀸 𑀲𑁄 𑀧𑀸𑀡𑀸𑀢𑀺𑀧𑀸𑀢𑀢𑁄 𑀯𑀺𑀭𑀫𑁂𑀬𑁆𑀬𑀸’’𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑁄 𑀣𑁂𑀭𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀫𑀸𑀕𑀯𑀺𑀓𑁄 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀣𑁂𑀭𑁄 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀲𑁄𑀧𑀺 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀲 𑀣𑁂𑀭𑁄 𑀧𑀸𑀡𑀸𑀢𑀺𑀧𑀸𑀢𑁂 𑀆𑀤𑀻𑀦𑀯𑀁, 𑀢𑀢𑁄 𑀯𑀺𑀭𑀢𑀺𑀬𑀸 𑀆𑀦𑀺𑀲𑀁𑀲𑀜𑁆𑀘 𑀧𑀓𑀸𑀲𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸𑀧𑀺 𑀢𑀢𑁄 𑀯𑀺𑀭𑀫𑀺𑀢𑀼𑀁 𑀦 𑀇𑀘𑁆𑀙𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀘𑁂, 𑀢𑁆𑀯𑀁 𑀆𑀯𑀼𑀲𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀭𑀢𑁆𑀢𑀺𑀫𑁆𑀧𑀺 𑀢𑀸𑀯 𑀯𑀺𑀭𑀫𑀲𑁆𑀲𑀽’’𑀢𑀺, 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂, 𑀯𑀺𑀭𑀫𑀸𑀫𑀺 𑀭𑀢𑁆𑀢𑀺’’𑀦𑁆𑀢𑀺 𑀢𑀢𑁄 𑀯𑀺𑀭𑀫𑀺. 𑀲𑁂𑀲𑀁 𑀅𑀦𑀦𑁆𑀢𑀭𑀯𑀢𑁆𑀣𑀼𑀲𑀤𑀺𑀲𑀁. 𑀕𑀸𑀣𑀸𑀲𑀼 𑀧𑀦 𑁋

‘‘𑀓𑀽𑀝𑀸𑀕𑀸𑀭𑁂 ¶ 𑀘 𑀧𑀸𑀲𑀸𑀤𑁂, 𑀧𑀮𑁆𑀮𑀗𑁆𑀓𑁂 𑀕𑁄𑀦𑀓𑀢𑁆𑀣𑀢𑁂;

𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦, 𑀭𑀫𑀲𑀺 𑀲𑀼𑀧𑁆𑀧𑀯𑀸𑀤𑀺𑀢𑁂.

‘‘𑀢𑀢𑁄 ¶ 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀅𑀧𑀯𑀺𑀤𑁆𑀥𑁄 𑀲𑀼𑀲𑀸𑀦𑀲𑁆𑀫𑀺𑀁, 𑀩𑀳𑀼𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀻’’𑀢𑀺. 𑁋

𑀢𑀻𑀳𑀺 𑀕𑀸𑀣𑀸𑀳𑀺 𑀦𑀸𑀭𑀤𑀢𑁆𑀣𑁂𑀭𑁄 𑀦𑀁 𑀧𑀝𑀺𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀧𑁂𑀢𑁄 𑁋

‘‘𑀅𑀳𑀁 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀭𑀫𑀡𑀻𑀬𑁂 𑀕𑀺𑀭𑀺𑀩𑁆𑀩𑀚𑁂;

𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀮𑀼𑀤𑁆𑀤𑁄 𑀘𑀸𑀲𑀺𑀫𑀲𑀜𑁆𑀜𑀢𑁄.

‘‘𑀢𑀲𑁆𑀲 𑀫𑁂 𑀲𑀳𑀸𑀬𑁄 𑀲𑀼𑀳𑀤𑀬𑁄, 𑀲𑀤𑁆𑀥𑁄 𑀆𑀲𑀺 𑀉𑀧𑀸𑀲𑀓𑁄;

𑀢𑀲𑁆𑀲 ¶ 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼, 𑀆𑀲𑀺 𑀕𑁄𑀢𑀫𑀲𑀸𑀯𑀓𑁄;

𑀲𑁄𑀧𑀺 𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑁄, 𑀦𑀺𑀯𑀸𑀭𑁂𑀲𑀺 𑀧𑀼𑀦𑀧𑁆𑀧𑀼𑀦𑀁.

‘‘‘𑀫𑀸𑀓𑀸𑀲𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀫𑀸 𑀢𑀸𑀢 𑀤𑀼𑀕𑁆𑀕𑀢𑀺𑀁 𑀅𑀕𑀸;

𑀲𑀘𑁂 𑀇𑀘𑁆𑀙𑀲𑀺 𑀧𑁂𑀘𑁆𑀘 𑀲𑀼𑀔𑀁, 𑀯𑀺𑀭𑀫 𑀧𑀸𑀡𑀯𑀥𑀸 𑀅𑀲𑀁𑀬𑀫𑀸’.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀼𑀔𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄;

𑀦𑀸𑀓𑀸𑀲𑀺𑀁 𑀲𑀓𑀮𑀸𑀦𑀼𑀲𑀸𑀲𑀦𑀺𑀁, 𑀘𑀺𑀭𑀧𑀸𑀧𑀸𑀪𑀺𑀭𑀢𑁄 𑀅𑀩𑀼𑀤𑁆𑀥𑀺𑀫𑀸.

‘‘𑀲𑁄 𑀫𑀁 𑀧𑀼𑀦 𑀪𑀽𑀭𑀺𑀲𑀼𑀫𑁂𑀥𑀲𑁄, 𑀅𑀦𑀼𑀓𑀫𑁆𑀧𑀸𑀬 𑀲𑀁𑀬𑀫𑁂 𑀦𑀺𑀯𑁂𑀲𑀬𑀺;

‘𑀲𑀘𑁂 𑀤𑀺𑀯𑀸 𑀳𑀦𑀲𑀺 𑀧𑀸𑀡𑀺𑀦𑁄, 𑀅𑀣 𑀢𑁂 𑀭𑀢𑁆𑀢𑀺𑀁 𑀪𑀯𑀢𑀼 𑀲𑀁𑀬𑀫𑁄’.

‘‘𑀲𑁆𑀯𑀸𑀳𑀁 𑀤𑀺𑀯𑀸 𑀳𑀦𑀺𑀢𑁆𑀯𑀸 𑀧𑀸𑀡𑀺𑀦𑁄, 𑀯𑀺𑀭𑀢𑁄 𑀭𑀢𑁆𑀢𑀺𑀫𑀳𑁄𑀲𑀺 𑀲𑀜𑁆𑀜𑀢𑁄;

𑀭𑀢𑁆𑀢𑀸𑀳𑀁 𑀧𑀭𑀺𑀘𑀸𑀭𑁂𑀫𑀺, 𑀤𑀺𑀯𑀸 𑀔𑀚𑁆𑀚𑀸𑀫𑀺 𑀤𑀼𑀕𑁆𑀕𑀢𑁄.

‘‘𑀢𑀲𑁆𑀲 ¶ 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀅𑀦𑀼𑀪𑁄𑀫𑀺 𑀭𑀢𑁆𑀢𑀺𑀁 𑀅𑀫𑀸𑀦𑀼𑀲𑀺𑀁;

𑀤𑀺𑀯𑀸 𑀧𑀝𑀺𑀳𑀢𑀸𑀯 𑀓𑀼𑀓𑁆𑀓𑀼𑀭𑀸, 𑀉𑀧𑀥𑀸𑀯𑀦𑁆𑀢𑀺 𑀲𑀫𑀦𑁆𑀢𑀸 𑀔𑀸𑀤𑀺𑀢𑀼𑀁.

‘‘𑀬𑁂 ¶ 𑀘 𑀢𑁂 𑀲𑀢𑀢𑀸𑀦𑀼𑀬𑁄𑀕𑀺𑀦𑁄, 𑀥𑀼𑀯𑀁 𑀧𑀬𑀼𑀢𑁆𑀢𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂;

𑀫𑀜𑁆𑀜𑀸𑀫𑀺 𑀢𑁂 𑀅𑀫𑀢𑀫𑁂𑀯 𑀓𑁂𑀯𑀮𑀁, 𑀅𑀥𑀺𑀕𑀘𑁆𑀙𑀦𑁆𑀢𑀺 𑀧𑀤𑀁 𑀅𑀲𑀗𑁆𑀔𑀢’’𑀦𑁆𑀢𑀺. 𑁋

𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺. 𑀢𑀸𑀲𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄𑀯.

𑀤𑀼𑀢𑀺𑀬𑀫𑀺𑀕𑀮𑀼𑀤𑁆𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀫𑀸𑀮𑀻 𑀓𑀺𑀭𑀺𑀝𑀻 𑀓𑀸𑀬𑀽𑀭𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀢𑀤𑀸 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸 𑀫𑀸𑀲𑀲𑁆𑀲 𑀙𑀲𑀼 𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀢𑀁 𑀅𑀦𑀼𑀯𑀢𑁆𑀢𑀦𑁆𑀢𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸𑀕𑀢𑁂 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀢𑀺 𑁋 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄, 𑀉𑀤𑀸𑀳𑀼 𑀦 𑀉𑀧𑀯𑀼𑀢𑁆𑀣𑁄’’𑀢𑀺? 𑀢𑀢𑁆𑀭𑁂𑀓𑁄 𑀅𑀥𑀺𑀓𑀭𑀡𑁂 𑀦𑀺𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀧𑀺𑀲𑀼𑀡𑀯𑀸𑀘𑁄 𑀦𑁂𑀓𑀢𑀺𑀓𑁄 𑀮𑀜𑁆𑀚𑀕𑀸𑀳𑀓𑁄 ‘‘𑀦 𑀉𑀧𑀯𑀼𑀢𑁆𑀣𑁄𑀫𑁆𑀳𑀻’’𑀢𑀺 𑀯𑀢𑁆𑀢𑀼𑀁 𑀅𑀲𑀳𑀦𑁆𑀢𑁄 ‘‘𑀉𑀧𑀯𑀼𑀢𑁆𑀣𑁄𑀫𑁆𑀳𑀺, 𑀤𑁂𑀯𑀸’’𑀢𑀺 𑀆𑀳. 𑀅𑀣 𑀦𑀁 𑀭𑀸𑀚𑀲𑀫𑀻𑀧𑀢𑁄 𑀦𑀺𑀓𑁆𑀔𑀦𑁆𑀢𑀁 𑀲𑀳𑀸𑀬𑁄 𑀆𑀳 𑁋 ‘‘𑀓𑀺𑀁, 𑀲𑀫𑁆𑀫, 𑀅𑀚𑁆𑀚 𑀢𑀬𑀸 𑀉𑀧𑀯𑀼𑀢𑁆𑀣𑁄’’𑀢𑀺? ‘‘𑀪𑀬𑁂𑀦𑀸𑀳𑀁, 𑀲𑀫𑁆𑀫, 𑀭𑀜𑁆𑀜𑁄 𑀲𑀫𑁆𑀫𑀼𑀔𑀸 𑀏𑀯𑀁 𑀅𑀯𑁄𑀘𑀁, 𑀦𑀸𑀳𑀁 𑀉𑀧𑁄𑀲𑀣𑀺𑀓𑁄’’𑀢𑀺.

𑀅𑀣 𑀦𑀁 𑀲𑀳𑀸𑀬𑁄 𑀆𑀳 𑁋 ‘‘𑀬𑀤𑀺 𑀏𑀯𑀁 𑀉𑀧𑀟𑁆𑀠𑀼𑀧𑁄𑀲𑀣𑁄𑀧𑀺 𑀢𑀸𑀯 𑀢𑁂 𑀅𑀚𑁆𑀚 𑀳𑁄𑀢𑀼, 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀸𑀳𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀪𑀼𑀢𑁆𑀯𑀸𑀯 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀭𑀢𑁆𑀢𑀺𑀬𑀁 𑀯𑀸𑀲𑀽𑀧𑀕𑀢𑁄 𑀭𑀺𑀢𑁆𑀢𑀸𑀲𑀬𑀲𑀫𑁆𑀪𑀽𑀢𑁂𑀦 ¶ 𑀩𑀮𑀯𑀯𑀸𑀢𑀳𑁂𑀢𑀼𑀓𑁂𑀦 𑀲𑀽𑀮𑁂𑀦 𑀉𑀧𑀘𑁆𑀙𑀺𑀦𑁆𑀦𑀸𑀬𑀼𑀲𑀗𑁆𑀔𑀸𑀭𑁄 𑀘𑀼𑀢𑀺𑀅𑀦𑀦𑁆𑀢𑀭𑀁 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀯𑁂𑀫𑀸𑀦𑀺𑀓𑀧𑁂𑀢𑁄 ¶ 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀳𑀺 𑀏𑀓𑀭𑀢𑁆𑀢𑀺𑀁 𑀉𑀧𑁄𑀲𑀣𑀭𑀓𑁆𑀔𑀡𑀫𑀢𑁆𑀢𑁂𑀦 𑀯𑀺𑀫𑀸𑀦𑀁 𑀧𑀝𑀺𑀮𑀪𑀺 𑀤𑀲𑀓𑀜𑁆𑀜𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀫𑀳𑀢𑀺𑀜𑁆𑀘 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁. 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀢𑀸𑀬 𑀧𑀦 𑀧𑁂𑀲𑀼𑀡𑀺𑀓𑀢𑀸𑀬 𑀘 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀲𑀬𑀫𑁂𑀯 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀔𑀸𑀤𑀢𑀺. 𑀢𑀁 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀕𑀺𑀚𑁆𑀚𑀓𑀽𑀝𑀢𑁄 𑀑𑀢𑀭𑀦𑁆𑀢𑁄 𑀤𑀺𑀲𑁆𑀯𑀸 𑁋

‘‘𑀫𑀸𑀮𑀻 𑀓𑀺𑀭𑀺𑀝𑀻 𑀓𑀸𑀬𑀽𑀭𑀻, 𑀕𑀢𑁆𑀢𑀸 𑀢𑁂 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄𑀲𑀺, 𑀲𑀽𑀭𑀺𑀬𑀯𑀡𑁆𑀡𑁄𑀯 𑀲𑁄𑀪𑀲𑀺.

‘‘𑀅𑀫𑀸𑀦𑀼𑀲𑀸 ¶ 𑀧𑀸𑀭𑀺𑀲𑀚𑁆𑀚𑀸, 𑀬𑁂 𑀢𑁂𑀫𑁂 𑀧𑀭𑀺𑀘𑀸𑀭𑀓𑀸;

𑀤𑀲 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀬𑀸 𑀢𑁂𑀫𑀸 𑀧𑀭𑀺𑀘𑀸𑀭𑀺𑀓𑀸;

𑀢𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸, 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑀸.

‘‘𑀫𑀳𑀸𑀦𑀼𑀪𑀸𑀯𑁄𑀲𑀺 𑀢𑀼𑀯𑀁, 𑀮𑁄𑀫𑀳𑀁𑀲𑀦𑀭𑀽𑀧𑀯𑀸;

𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄, 𑀲𑀸𑀫𑀁 𑀉𑀓𑁆𑀓𑀘𑁆𑀘 𑀔𑀸𑀤𑀲𑀺.

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄;

‘‘𑀅𑀢𑁆𑀢𑀦𑁄𑀳𑀁 𑀅𑀦𑀢𑁆𑀣𑀸𑀬, 𑀚𑀻𑀯𑀮𑁄𑀓𑁂 𑀅𑀘𑀸𑀭𑀺𑀲𑀁;

𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑁂𑀦, 𑀦𑀺𑀓𑀢𑀺𑀯𑀜𑁆𑀘𑀦𑀸𑀬 𑀘.

‘‘𑀢𑀢𑁆𑀣𑀸𑀳𑀁 𑀧𑀭𑀺𑀲𑀁 𑀕𑀦𑁆𑀢𑁆𑀯𑀸, 𑀲𑀘𑁆𑀘𑀓𑀸𑀮𑁂 𑀉𑀧𑀝𑁆𑀞𑀺𑀢𑁂;

𑀅𑀢𑁆𑀣𑀁 𑀥𑀫𑁆𑀫𑀁 𑀦𑀺𑀭𑀸𑀓𑀢𑁆𑀯𑀸, 𑀅𑀥𑀫𑁆𑀫𑀫𑀦𑀼𑀯𑀢𑁆𑀢𑀺𑀲𑀁.

‘‘𑀏𑀯𑀁 𑀲𑁄 𑀔𑀸𑀤𑀢𑀢𑁆𑀢𑀸𑀦𑀁, 𑀬𑁄 𑀳𑁄𑀢𑀺 𑀧𑀺𑀝𑁆𑀞𑀺𑀫𑀁𑀲𑀺𑀓𑁄;

𑀬𑀣𑀸𑀳𑀁 𑀅𑀚𑁆𑀚 𑀔𑀸𑀤𑀸𑀫𑀺, 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄.

‘‘𑀢𑀬𑀺𑀤𑀁 ¶ 𑀢𑀬𑀸 𑀦𑀸𑀭𑀤 𑀲𑀸𑀫𑀁 𑀤𑀺𑀝𑁆𑀞𑀁, 𑀅𑀦𑀼𑀓𑀫𑁆𑀧𑀓𑀸 𑀬𑁂 𑀓𑀼𑀲𑀮𑀸 𑀯𑀤𑁂𑀬𑁆𑀬𑀼𑀁;

𑀫𑀸 𑀧𑁂𑀲𑀼𑀡𑀁 𑀫𑀸 𑀘 𑀫𑀼𑀲𑀸 𑀅𑀪𑀸𑀡𑀺, 𑀫𑀸 𑀔𑁄𑀲𑀺 𑀧𑀺𑀝𑁆𑀞𑀺𑀫𑀁𑀲𑀺𑀓𑁄 𑀢𑀼𑀯’’𑀦𑁆𑀢𑀺. 𑁋

𑀣𑁂𑀭𑁄 ¶ 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺, 𑀲𑁄𑀧𑀺 𑀢𑀲𑁆𑀲 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀏𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁪𑁯𑁯. 𑀢𑀢𑁆𑀣 𑀫𑀸𑀮𑀻𑀢𑀺 𑀫𑀸𑀮𑀥𑀸𑀭𑀻, 𑀤𑀺𑀩𑁆𑀩𑀧𑀼𑀧𑁆𑀨𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀭𑀺𑀝𑀻𑀢𑀺 𑀯𑁂𑀞𑀺𑀢𑀲𑀻𑀲𑁄. 𑀓𑀸𑀬𑀽𑀭𑀻𑀢𑀺 𑀓𑁂𑀬𑀽𑀭𑀯𑀸, 𑀩𑀸𑀳𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄𑀢𑀺 𑀅𑀢𑁆𑀣𑁄. 𑀕𑀢𑁆𑀢𑀸𑀢𑀺 𑀲𑀭𑀻𑀭𑀸𑀯𑀬𑀯𑀸. 𑀘𑀦𑁆𑀤𑀦𑀼𑀲𑁆𑀲𑀤𑀸𑀢𑀺 𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑀸. 𑀲𑀽𑀭𑀺𑀬𑀯𑀡𑁆𑀡𑁄𑀯 𑀲𑁄𑀪𑀲𑀻𑀢𑀺 𑀩𑀸𑀮𑀲𑀽𑀭𑀺𑀬𑀲𑀤𑀺𑀲𑀯𑀡𑁆𑀡𑁄 𑀏𑀯 𑀳𑀼𑀢𑁆𑀯𑀸 𑀯𑀺𑀭𑁄𑀘𑀲𑀺. ‘‘𑀅𑀭𑀡𑀯𑀡𑁆𑀡𑀻 𑀧𑀪𑀸𑀲𑀲𑀻’’𑀢𑀺𑀧𑀺 𑀧𑀸𑀴𑀺, 𑀅𑀭𑀡𑀦𑁆𑀢𑀺 𑀅𑀭𑀡𑀺𑀬𑁂𑀳𑀺 𑀤𑁂𑀯𑁂𑀳𑀺 𑀲𑀤𑀺𑀲𑀯𑀡𑁆𑀡𑁄 𑀅𑀭𑀺𑀬𑀸𑀯𑀓𑀸𑀲𑁄𑀢𑀺 ¶ 𑀅𑀢𑁆𑀣𑁄.

𑁫𑁦𑁦. 𑀧𑀸𑀭𑀺𑀲𑀚𑁆𑀚𑀸𑀢𑀺 𑀧𑀭𑀺𑀲𑀧𑀭𑀺𑀬𑀸𑀧𑀦𑁆𑀦𑀸, 𑀉𑀧𑀝𑁆𑀞𑀸𑀓𑀸𑀢𑀺 𑀅𑀢𑁆𑀣𑁄. 𑀢𑀼𑀯𑀦𑁆𑀢𑀺 𑀢𑁆𑀯𑀁. 𑀮𑁄𑀫𑀳𑀁𑀲𑀦𑀭𑀽𑀧𑀯𑀸𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀮𑁄𑀫𑀳𑀁𑀲𑀚𑀦𑀦𑀭𑀽𑀧𑀬𑀼𑀢𑁆𑀢𑁄. 𑀫𑀳𑀸𑀦𑀼𑀪𑀸𑀯𑀢𑀸𑀲𑀫𑀗𑁆𑀕𑀺𑀢𑀸𑀬 𑀳𑁂𑀢𑀁 𑀯𑀼𑀢𑁆𑀢𑀁. 𑀉𑀓𑁆𑀓𑀘𑁆𑀘𑀸𑀢𑀺 𑀉𑀓𑁆𑀓𑀦𑁆𑀢𑀺𑀢𑁆𑀯𑀸, 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁫𑁦𑁩. 𑀅𑀘𑀸𑀭𑀺𑀲𑀦𑁆𑀢𑀺 𑀅𑀘𑀭𑀺𑀁 𑀧𑀝𑀺𑀧𑀚𑁆𑀚𑀺𑀁. 𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑁂𑀦𑀸𑀢𑀺 𑀧𑁂𑀲𑀼𑀜𑁆𑀜𑁂𑀦 𑀘𑁂𑀯 𑀫𑀼𑀲𑀸𑀯𑀸𑀤𑁂𑀦 𑀘. 𑀦𑀺𑀓𑀢𑀺𑀯𑀜𑁆𑀘𑀦𑀸𑀬 𑀘𑀸𑀢𑀺 𑀦𑀺𑀓𑀢𑀺𑀬𑀸 𑀯𑀜𑁆𑀘𑀦𑀸𑀬 𑀘 𑀧𑀢𑀺𑀭𑀽𑀧𑀤𑀲𑁆𑀲𑀦𑁂𑀦 𑀧𑀭𑁂𑀲𑀁 𑀯𑀺𑀓𑀸𑀭𑁂𑀦 𑀯𑀜𑁆𑀘𑀦𑀸𑀬 𑀘.

𑁫𑁦𑁪. 𑀲𑀘𑁆𑀘𑀓𑀸𑀮𑁂𑀢𑀺 𑀲𑀘𑁆𑀘𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑀓𑀸𑀮𑁂. 𑀅𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀁 𑀳𑀺𑀢𑀁. 𑀥𑀫𑁆𑀫𑀦𑁆𑀢𑀺 𑀓𑀸𑀭𑀡𑀁 𑀜𑀸𑀬𑀁. 𑀦𑀺𑀭𑀸𑀓𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑁆𑀯𑀸 𑀧𑀳𑀸𑀬. 𑀲𑁄𑀢𑀺 𑀬𑁄 𑀧𑁂𑀲𑀼𑀜𑁆𑀜𑀸𑀤𑀺𑀁 𑀆𑀘𑀭𑀢𑀺, 𑀲𑁄 𑀲𑀢𑁆𑀢𑁄. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀥𑀸𑀢𑀼𑀯𑀺𑀯𑀡𑁆𑀡𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 ¶ 𑀢𑀺𑀝𑁆𑀞𑀦𑁆𑀢𑁄𑀢𑀺 𑀇𑀤𑀁 𑀥𑀸𑀢𑀼𑀯𑀺𑀯𑀡𑁆𑀡𑀧𑁂𑀢𑀯𑀢𑁆𑀣𑀼. 𑀪𑀕𑀯𑀢𑀺 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀯𑀺𑀪𑀸𑀕𑁂 𑀘 𑀓𑀢𑁂 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀢𑁆𑀢𑀦𑀸 𑀮𑀤𑁆𑀥𑀥𑀸𑀢𑀼𑀪𑀸𑀕𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀫𑀸𑀲𑁂 𑀲𑀢𑁆𑀢 𑀘 𑀤𑀺𑀯𑀲𑁂 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄 𑀉𑀴𑀸𑀭𑀧𑀽𑀚𑀁 𑀧𑀯𑀢𑁆𑀢𑁂𑀲𑀺. 𑀢𑀢𑁆𑀣 𑀅𑀲𑀗𑁆𑀔𑁂𑀬𑁆𑀬𑀸 𑀅𑀧𑁆𑀧𑀫𑁂𑀬𑁆𑀬𑀸 𑀫𑀦𑀼𑀲𑁆𑀲𑀸 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀢𑁆𑀯𑀸 ¶ 𑀲𑀕𑁆𑀕𑀽𑀧𑀕𑀸 𑀅𑀳𑁂𑀲𑀼𑀁, 𑀙𑀴𑀸𑀲𑀻𑀢𑀺𑀫𑀢𑁆𑀢𑀸𑀦𑀺 𑀧𑀦 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀘𑀺𑀭𑀓𑀸𑀮𑀪𑀸𑀯𑀺𑀢𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀘 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸 𑀧𑀲𑀸𑀤𑀦𑀻𑀬𑁂𑀧𑀺 𑀞𑀸𑀦𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀸𑀦𑀺 𑀧𑀤𑁄𑀲𑁂𑀢𑁆𑀯𑀸 𑀧𑁂𑀢𑁂𑀲𑀼 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀲𑁆𑀲 𑀯𑀺𑀪𑀯𑀲𑀫𑁆𑀧𑀦𑁆𑀦𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀪𑀭𑀺𑀬𑀸 𑀥𑀻𑀢𑀸 𑀲𑀼𑀡𑀺𑀲𑀸 𑀘 𑀧𑀲𑀦𑁆𑀦𑀘𑀺𑀢𑁆𑀢𑀸 ‘‘𑀥𑀸𑀢𑀼𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀥𑀸𑀢𑀼𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀆𑀭𑀤𑁆𑀥𑀸. 𑀲𑁄 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀓𑀺𑀁 𑀅𑀝𑁆𑀞𑀺𑀓𑀸𑀦𑀁 𑀧𑀽𑀚𑀦𑁂𑀦𑀸’’𑀢𑀺 𑀢𑀸 𑀧𑀭𑀺𑀪𑀸𑀲𑁂𑀢𑁆𑀯𑀸 𑀥𑀸𑀢𑀼𑀧𑀽𑀚𑀁 𑀯𑀺𑀯𑀡𑁆𑀡𑁂𑀲𑀺. 𑀢𑀸𑀧𑀺 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀸𑀢𑀼𑀧𑀽𑀚𑀁 𑀓𑀢𑁆𑀯𑀸 𑀕𑁂𑀳𑀁 𑀆𑀕𑀢𑀸 𑀢𑀸𑀤𑀺𑀲𑁂𑀦 𑀭𑁄𑀕𑁂𑀦 𑀅𑀪𑀺𑀪𑀽𑀢𑀸 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑁄 𑀧𑀦 𑀓𑁄𑀥𑁂𑀦 𑀅𑀪𑀺𑀪𑀽𑀢𑁄 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀦 𑀧𑀸𑀧𑀓𑀫𑁆𑀫𑁂𑀦 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀸𑀬 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺, 𑀬𑀣𑀸 𑀫𑀦𑀼𑀲𑁆𑀲𑀸 𑀢𑁂 𑀧𑁂𑀢𑁂 𑀢𑀸 𑀘 𑀤𑁂𑀯𑀢𑀸𑀬𑁄 𑀧𑀲𑁆𑀲𑀦𑁆𑀢𑀺. 𑀢𑀣𑀸 𑀧𑀦 𑀓𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀞𑀺𑀢𑁄 𑀢𑀁 𑀥𑀸𑀢𑀼𑀯𑀺𑀯𑀡𑁆𑀡𑀓𑀁 𑀧𑁂𑀢𑀁 𑀢𑀻𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺. 𑀢𑀲𑁆𑀲 𑀲𑁄 𑀧𑁂𑀢𑁄 𑀩𑁆𑀬𑀸𑀓𑀸𑀲𑀺 𑁋

‘‘𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀢𑀺𑀝𑁆𑀞𑀦𑁆𑀢𑁄, 𑀤𑀼𑀕𑁆𑀕𑀦𑁆𑀥𑁄 𑀧𑀽𑀢𑀺 𑀯𑀸𑀬𑀲𑀺;

𑀫𑀼𑀔𑀜𑁆𑀘 𑀢𑁂 𑀓𑀺𑀫𑀬𑁄 𑀧𑀽𑀢𑀺𑀕𑀦𑁆𑀥𑀁, 𑀔𑀸𑀤𑀦𑁆𑀢𑀺 𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀧𑀼𑀩𑁆𑀩𑁂.

‘‘𑀢𑀢𑁄 𑀲𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁;

𑀔𑀸𑀭𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸, 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀻’’𑀢𑀺.

‘‘𑀅𑀳𑀁 ¶ 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀭𑀫𑀡𑀻𑀬𑁂 𑀕𑀺𑀭𑀺𑀩𑁆𑀩𑀚𑁂;

𑀇𑀲𑁆𑀲𑀭𑁄 𑀥𑀦𑀥𑀜𑁆𑀜𑀲𑁆𑀲, 𑀲𑀼𑀧𑀳𑀽𑀢𑀲𑁆𑀲 𑀫𑀸𑀭𑀺𑀲.

‘‘𑀢𑀲𑁆𑀲𑀸𑀬𑀁 𑀫𑁂 𑀪𑀭𑀺𑀬𑀸 𑀘, 𑀥𑀻𑀢𑀸 𑀘 𑀲𑀼𑀡𑀺𑀲𑀸 𑀘 𑀫𑁂;

𑀢𑀸 𑀫𑀸𑀮𑀁 𑀉𑀧𑁆𑀧𑀮𑀜𑁆𑀘𑀸𑀧𑀺, 𑀧𑀘𑁆𑀘𑀕𑁆𑀖𑀜𑁆𑀘 𑀯𑀺𑀮𑁂𑀧𑀦𑀁;

𑀣𑀽𑀧𑀁 𑀳𑀭𑀦𑁆𑀢𑀺𑀬𑁄 𑀯𑀸𑀭𑁂𑀲𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸.

‘‘𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 ¶ , 𑀫𑀬𑀁 𑀧𑀘𑁆𑀘𑀢𑁆𑀢𑀯𑁂𑀤𑀦𑀸;

𑀣𑀽𑀧𑀧𑀽𑀚𑀁 𑀯𑀺𑀯𑀡𑁆𑀡𑁂𑀢𑁆𑀯𑀸, 𑀧𑀘𑁆𑀘𑀸𑀫 𑀦𑀺𑀭𑀬𑁂 𑀪𑀼𑀲𑀁.

‘‘𑀬𑁂 𑀘 𑀔𑁄 𑀣𑀽𑀧𑀧𑀽𑀚𑀸𑀬, 𑀯𑀢𑁆𑀢𑀦𑁆𑀢𑁂 𑀅𑀭𑀳𑀢𑁄 𑀫𑀳𑁂;

𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑀺, 𑀯𑀺𑀯𑁂𑀘𑀬𑁂𑀣 𑀦𑁂 𑀢𑀢𑁄.

‘‘𑀇𑀫𑀸 𑀘 𑀧𑀲𑁆𑀲 𑀅𑀬𑀦𑁆𑀢𑀺𑀬𑁄, 𑀫𑀸𑀮𑀥𑀸𑀭𑀻 𑀅𑀮𑀗𑁆𑀓𑀢𑀸;

𑀫𑀸𑀮𑀸𑀯𑀺𑀧𑀸𑀓𑀁𑀦𑀼𑀪𑁄𑀦𑁆𑀢𑀺𑀬𑁄, 𑀲𑀫𑀺𑀤𑁆𑀥𑀸 𑀘 𑀢𑀸 𑀬𑀲𑀲𑁆𑀲𑀺𑀦𑀺𑀬𑁄.

‘‘𑀢𑀜𑁆𑀘 ¶ 𑀤𑀺𑀲𑁆𑀯𑀸𑀦 𑀅𑀘𑁆𑀙𑁂𑀭𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀦𑀫𑁄 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀯𑀦𑁆𑀤𑀦𑁆𑀢𑀺 𑀢𑀁 𑀫𑀳𑀸𑀫𑀼𑀦𑀺𑀁.

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀣𑀽𑀧𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑁄 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺.

𑁫𑁦𑁭-𑁮. 𑀢𑀢𑁆𑀣 𑀤𑀼𑀕𑁆𑀕𑀦𑁆𑀥𑁄𑀢𑀺 𑀅𑀦𑀺𑀝𑁆𑀞𑀕𑀦𑁆𑀥𑁄, 𑀓𑀼𑀡𑀧𑀕𑀦𑁆𑀥𑀕𑀦𑁆𑀥𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀽𑀢𑀺 𑀯𑀸𑀬𑀲𑀻’’𑀢𑀺. 𑀢𑀢𑁄𑀢𑀺 𑀤𑀼𑀕𑁆𑀕𑀦𑁆𑀥𑀯𑀸𑀬𑀦𑀢𑁄 𑀓𑀺𑀫𑀻𑀳𑀺 𑀔𑀸𑀬𑀺𑀢𑀩𑁆𑀩𑀢𑁄 𑀘 𑀉𑀧𑀭𑀺. 𑀲𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀓𑀫𑁆𑀫𑀲𑀜𑁆𑀘𑁄𑀤𑀺𑀢𑀸 𑀲𑀢𑁆𑀢𑀸 𑀦𑀺𑀲𑀺𑀢𑀥𑀸𑀭𑀁 𑀲𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀯𑀡𑀫𑀼𑀔𑀁 𑀅𑀯𑀓𑀦𑁆𑀢𑀦𑁆𑀢𑀺. 𑀔𑀸𑀭𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸, 𑀑𑀓𑁆𑀓𑀦𑁆𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀅𑀯𑀓𑀦𑁆𑀢𑀺𑀢𑀝𑁆𑀞𑀸𑀦𑁂 𑀔𑀸𑀭𑁄𑀤𑀓𑁂𑀦 𑀆𑀲𑀺𑀜𑁆𑀘𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀫𑁆𑀧𑀺 𑀅𑀯𑀓𑀦𑁆𑀢𑀦𑁆𑀢𑀺.

𑁫𑁧𑁦. 𑀇𑀲𑁆𑀲𑀭𑁄 𑀥𑀦𑀥𑀜𑁆𑀜𑀲𑁆𑀲, 𑀲𑀼𑀧𑀳𑀽𑀢𑀲𑁆𑀲𑀸𑀢𑀺 𑀅𑀢𑀺𑀯𑀺𑀬 𑀧𑀳𑀽𑀢𑀲𑁆𑀲 ¶ 𑀥𑀦𑀲𑁆𑀲 𑀥𑀜𑁆𑀜𑀲𑁆𑀲 𑀘 𑀇𑀲𑁆𑀲𑀭𑁄 𑀲𑀸𑀫𑀻, 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄𑀢𑀺 𑀅𑀢𑁆𑀣𑁄.

𑁫𑁧𑁧. 𑀢𑀲𑁆𑀲𑀸𑀬𑀁 𑀫𑁂 𑀪𑀭𑀺𑀬𑀸 𑀘, 𑀥𑀻𑀢𑀸 𑀘 𑀲𑀼𑀡𑀺𑀲𑀸 𑀘𑀸𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀅𑀬𑀁 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀪𑀭𑀺𑀬𑀸, 𑀅𑀬𑀁 𑀥𑀻𑀢𑀸, 𑀅𑀬𑀁 𑀲𑀼𑀡𑀺𑀲𑀸. 𑀢𑀸 𑀤𑁂𑀯𑀪𑀽𑀢𑀸 𑀆𑀓𑀸𑀲𑁂 𑀞𑀺𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀯𑀤𑀢𑀺. 𑀧𑀘𑁆𑀘𑀕𑁆𑀖𑀦𑁆𑀢𑀺 𑀅𑀪𑀺𑀦𑀯𑀁. 𑀣𑀽𑀧𑀁 𑀳𑀭𑀦𑁆𑀢𑀺𑀬𑁄 𑀯𑀸𑀭𑁂𑀲𑀺𑀦𑁆𑀢𑀺 𑀣𑀽𑀧𑀁 𑀧𑀽𑀚𑁂𑀢𑀼𑀁 𑀉𑀧𑀦𑁂𑀦𑁆𑀢𑀺𑀬𑁄 𑀥𑀸𑀢𑀼𑀁 𑀯𑀺𑀯𑀡𑁆𑀡𑁂𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀺𑀁. 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸𑀢𑀺 𑀢𑀁 𑀥𑀸𑀢𑀼𑀯𑀺𑀯𑀡𑁆𑀡𑀦𑀧𑀸𑀧𑀁 𑀓𑀢𑀁 𑀲𑀫𑀸𑀘𑀭𑀺𑀢𑀁 𑀫𑀬𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀧𑁆𑀧𑀢𑁆𑀢𑁄 𑀯𑀤𑀢𑀺.

𑁫𑁧𑁨. 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 ¶ 𑀙𑀲𑀳𑀲𑁆𑀲𑀸𑀥𑀺𑀓𑀸 𑀅𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀸. 𑀫𑀬𑀦𑁆𑀢𑀺 𑀢𑁂 𑀧𑁂𑀢𑁂 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀧𑀘𑁆𑀘𑀢𑁆𑀢𑀯𑁂𑀤𑀦𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀼𑀪𑀼𑀬𑁆𑀬𑀫𑀸𑀦𑀤𑀼𑀓𑁆𑀔𑀯𑁂𑀤𑀦𑀸. 𑀦𑀺𑀭𑀬𑁂𑀢𑀺 𑀩𑀮𑀤𑀼𑀓𑁆𑀔𑀢𑀸𑀬 𑀧𑁂𑀢𑁆𑀢𑀺𑀯𑀺𑀲𑀬𑀁 𑀦𑀺𑀭𑀬𑀲𑀤𑀺𑀲𑀁 𑀓𑀢𑁆𑀯𑀸 𑀆𑀳.

𑁫𑁧𑁩. 𑀬𑁂 𑀘 𑀔𑁄 𑀣𑀽𑀧𑀧𑀽𑀚𑀸𑀬, 𑀯𑀢𑁆𑀢𑀦𑁆𑀢𑁂 𑀅𑀭𑀳𑀢𑁄 𑀫𑀳𑁂𑀢𑀺 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀣𑀽𑀧𑀁 𑀉𑀤𑁆𑀤𑀺𑀲𑁆𑀲 𑀧𑀽𑀚𑀸𑀫𑀳𑁂 𑀧𑀯𑀢𑁆𑀢𑀫𑀸𑀦𑁂 𑀅𑀳𑀁 𑀯𑀺𑀬 𑀬𑁂 𑀣𑀽𑀧𑀧𑀽𑀚𑀸𑀬 𑀆𑀤𑀻𑀦𑀯𑀁 𑀤𑁄𑀲𑀁 𑀧𑀓𑀸𑀲𑁂𑀦𑁆𑀢𑀺. 𑀢𑁂 𑀧𑀼𑀕𑁆𑀕𑀮𑁂 𑀢𑀢𑁄 𑀧𑀼𑀜𑁆𑀜𑀢𑁄 𑀯𑀺𑀯𑁂𑀘𑀬𑁂𑀣 𑀯𑀺𑀯𑁂𑀘𑀸𑀧𑀬𑁂𑀣, 𑀧𑀭𑀺𑀩𑀸𑀳𑀺𑀭𑁂 𑀚𑀦𑀬𑁂𑀣𑀸𑀢𑀺 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀫𑀳𑀸𑀚𑀸𑀦𑀺𑀬𑀢𑀁 𑀯𑀺𑀪𑀸𑀯𑁂𑀢𑀺.

𑁫𑁧𑁪. 𑀆𑀬𑀦𑁆𑀢𑀺𑀬𑁄𑀢𑀺 ¶ 𑀆𑀓𑀸𑀲𑁂𑀦 𑀆𑀕𑀘𑁆𑀙𑀦𑁆𑀢𑀺𑀬𑁄. 𑀫𑀸𑀮𑀸𑀯𑀺𑀧𑀸𑀓𑀦𑁆𑀢𑀺 𑀣𑀽𑀧𑁂 𑀓𑀢𑀫𑀸𑀮𑀸𑀧𑀽𑀚𑀸𑀬 𑀯𑀺𑀧𑀸𑀓𑀁 𑀨𑀮𑀁. 𑀲𑀫𑀺𑀤𑁆𑀥𑀸𑀢𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀺𑀤𑁆𑀥𑀸. 𑀢𑀸 𑀬𑀲𑀲𑁆𑀲𑀺𑀦𑀺𑀬𑁄𑀢𑀺 𑀢𑀸 𑀧𑀭𑀺𑀯𑀸𑀭𑀯𑀦𑁆𑀢𑀺𑀬𑁄.

𑁫𑁧𑁫. 𑀢𑀜𑁆𑀘 𑀤𑀺𑀲𑁆𑀯𑀸𑀦𑀸𑀢𑀺 𑀢𑀲𑁆𑀲 𑀅𑀢𑀺𑀧𑀭𑀺𑀢𑁆𑀢𑀲𑁆𑀲 𑀧𑀽𑀚𑀸𑀧𑀼𑀜𑁆𑀜𑀲𑁆𑀲 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁 𑀅𑀢𑀺𑀉𑀴𑀸𑀭𑀁 𑀯𑀺𑀧𑀸𑀓𑀯𑀺𑀲𑁂𑀲𑀁 𑀤𑀺𑀲𑁆𑀯𑀸. 𑀦𑀫𑁄 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀯𑀦𑁆𑀤𑀦𑁆𑀢𑀺 𑀢𑀁 𑀫𑀳𑀸𑀫𑀼𑀦𑀺𑀦𑁆𑀢𑀺, 𑀪𑀦𑁆𑀢𑁂 𑀓𑀲𑁆𑀲𑀧, 𑀇𑀫𑀸 𑀇𑀢𑁆𑀣𑀺𑀬𑁄 𑀢𑀁 𑀉𑀢𑁆𑀢𑀫𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑀁 𑀯𑀦𑁆𑀤𑀦𑁆𑀢𑀺 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦𑀫𑁄 𑀓𑀭𑁄𑀦𑁆𑀢𑀺 𑀦𑀫𑀓𑁆𑀓𑀸𑀭𑀜𑁆𑀘 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁫𑁧𑁬. 𑀅𑀣 ¶ 𑀲𑁄 𑀧𑁂𑀢𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀲𑀁𑀯𑁂𑀕𑀸𑀦𑀼𑀭𑀽𑀧𑀁 𑀆𑀬𑀢𑀺𑀁 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀳𑀁 𑀦𑀽𑀦𑀸’’𑀢𑀺 𑀕𑀸𑀣𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀏𑀯𑀁 𑀧𑁂𑀢𑁂𑀦 𑀯𑀼𑀢𑁆𑀢𑁄 𑀫𑀳𑀸𑀓𑀲𑁆𑀲𑀧𑁄 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀥𑀸𑀢𑀼𑀯𑀺𑀯𑀡𑁆𑀡𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀁

𑀢𑀢𑀺𑀬𑀲𑁆𑀲 𑀘𑀽𑀴𑀯𑀕𑁆𑀕𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀅𑀫𑁆𑀩𑀲𑀓𑁆𑀓𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀯𑁂𑀲𑀸𑀮𑀻 ¶ ¶ 𑀦𑀸𑀫 𑀦𑀕𑀭𑀢𑁆𑀣𑀺 𑀯𑀚𑁆𑀚𑀻𑀦𑀦𑁆𑀢𑀺 𑀇𑀤𑀁 𑀅𑀫𑁆𑀩𑀲𑀓𑁆𑀓𑀭𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀫𑁆𑀩𑀲𑀓𑁆𑀓𑀭𑁄 𑀦𑀸𑀫 𑀮𑀺𑀘𑁆𑀙𑀯𑀺𑀭𑀸𑀚𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀦𑀢𑁆𑀣𑀺𑀓𑀯𑀸𑀤𑁄 𑀯𑁂𑀲𑀸𑀮𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀯𑁂𑀲𑀸𑀮𑀺𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀲 𑀯𑀸𑀡𑀺𑀚𑀲𑁆𑀲 𑀆𑀧𑀡𑀲𑀫𑀻𑀧𑁂 𑀘𑀺𑀓𑁆𑀔𑀮𑁆𑀮𑀁 𑀳𑁄𑀢𑀺, 𑀢𑀢𑁆𑀣 𑀩𑀳𑀽 𑀚𑀦𑀸 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀦𑁆𑀢𑀸 𑀓𑀺𑀮𑀫𑀦𑁆𑀢𑀺, 𑀓𑁂𑀘𑀺 𑀓𑀤𑁆𑀤𑀫𑁂𑀦 𑀮𑀺𑀫𑁆𑀧𑀦𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀯𑀸𑀡𑀺𑀚𑁄 ‘‘𑀫𑀸 𑀇𑀫𑁂 𑀫𑀦𑀼𑀲𑁆𑀲𑀸 𑀓𑀮𑀮𑀁 𑀅𑀓𑁆𑀓𑀫𑀺𑀁𑀲𑀽’’𑀢𑀺 𑀅𑀧𑀕𑀢𑀤𑀼𑀕𑁆𑀕𑀦𑁆𑀥𑀁 𑀲𑀗𑁆𑀔𑀯𑀡𑁆𑀡𑀧𑀝𑀺𑀪𑀸𑀕𑀁 𑀕𑁄𑀲𑀻𑀲𑀝𑁆𑀞𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀸𑀧𑁂𑀲𑀺. 𑀧𑀓𑀢𑀺𑀬𑀸 𑀘 𑀲𑀻𑀮𑀯𑀸 𑀅𑀳𑁄𑀲𑀺 𑀅𑀓𑁆𑀓𑁄𑀥𑀦𑁄 𑀲𑀡𑁆𑀳𑀯𑀸𑀘𑁄, 𑀧𑀭𑁂𑀲𑀜𑁆𑀘 𑀬𑀣𑀸𑀪𑀽𑀢𑀁 𑀕𑀼𑀡𑀁 𑀓𑀺𑀢𑁆𑀢𑁂𑀢𑀺.

𑀲𑁄 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀦𑁆𑀳𑀸𑀬𑀦𑁆𑀢𑀲𑁆𑀲 𑀧𑀫𑀸𑀤𑁂𑀦 𑀅𑀦𑁄𑀮𑁄𑀓𑁂𑀦𑁆𑀢𑀲𑁆𑀲 𑀦𑀺𑀯𑀸𑀲𑀦𑀯𑀢𑁆𑀣𑀁 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀅𑀧𑀦𑀺𑀥𑀸𑀬 𑀢𑀁 𑀤𑀼𑀓𑁆𑀔𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀸𑀕𑀺𑀦𑁂𑀬𑁆𑀬𑁄 𑀧𑀦𑀲𑁆𑀲 𑀘𑁄𑀭𑀺𑀓𑀸𑀬 𑀧𑀭𑀕𑁂𑀳𑀢𑁄 𑀪𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲𑁂𑀯 𑀆𑀧𑀡𑁂 𑀦𑀺𑀓𑁆𑀔𑀺𑀧𑀺. 𑀪𑀡𑁆𑀟𑀲𑀸𑀫𑀺𑀓𑀸 𑀯𑀻𑀫𑀁𑀲𑀦𑁆𑀢𑀸 𑀪𑀡𑁆𑀟𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀁 𑀢𑀜𑁆𑀘 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀇𑀫𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀣, 𑀪𑀸𑀕𑀺𑀦𑁂𑀬𑁆𑀬𑀁 𑀧𑀦𑀲𑁆𑀲 𑀲𑀽𑀮𑁂 𑀆𑀭𑁄𑀧𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀢𑀣𑀸 𑀅𑀓𑀁𑀲𑀼. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀲𑁄 𑀕𑁄𑀲𑀻𑀲𑁂𑀦 𑀲𑁂𑀢𑀼𑀦𑁄 𑀓𑀢𑀢𑁆𑀢𑀸 𑀲𑁂𑀢𑀯𑀡𑁆𑀡𑀁 ¶ 𑀤𑀺𑀩𑁆𑀩𑀁 𑀫𑀦𑁄𑀚𑀯𑀁 𑀅𑀲𑁆𑀲𑀸𑀚𑀸𑀦𑀻𑀬𑀁 𑀧𑀝𑀺𑀮𑀪𑀺, 𑀕𑀼𑀡𑀯𑀦𑁆𑀢𑀸𑀦𑀁 𑀯𑀡𑁆𑀡𑀓𑀣𑀦𑁂𑀦 𑀢𑀲𑁆𑀲 𑀕𑀢𑁆𑀢𑀢𑁄 𑀤𑀺𑀩𑁆𑀩𑀕𑀦𑁆𑀥𑁄 𑀯𑀸𑀬𑀢𑀺, 𑀲𑀸𑀝𑀓𑀲𑁆𑀲 𑀧𑀦 𑀅𑀧𑀦𑀺𑀳𑀺𑀢𑀢𑁆𑀢𑀸 𑀦𑀕𑁆𑀕𑁄 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀑𑀮𑁄𑀓𑁂𑀦𑁆𑀢𑁄 𑀢𑀤𑀦𑀼𑀲𑀸𑀭𑁂𑀦 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀲𑀽𑀮𑁂 𑀆𑀭𑁄𑀧𑀺𑀢𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀘𑁄𑀤𑀺𑀬𑀫𑀸𑀦𑁄 𑀫𑀦𑁄𑀚𑀯𑀁 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀺𑀲𑀫𑀬𑁂 𑀢𑀲𑁆𑀲 𑀲𑀽𑀮𑀸 𑀭𑁄𑀧𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀺𑀢𑁄 ‘‘𑀚𑀻𑀯, 𑀪𑁄, 𑀚𑀻𑀯𑀺𑀢𑀫𑁂𑀯 𑀲𑁂𑀬𑁆𑀬𑁄’’𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀤𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀫𑁆𑀩𑀲𑀓𑁆𑀓𑀭𑁄 𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑁂𑀳𑁂 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀭𑀸𑀚𑀯𑀺𑀪𑀽𑀢𑀺𑀁 𑀧𑀲𑁆𑀲𑀦𑁆𑀢𑀺𑀁 ¶ 𑀏𑀓𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 ‘‘𑀇𑀫𑀁 𑀖𑀭𑀁 𑀇𑀫𑀜𑁆𑀘 𑀇𑀢𑁆𑀣𑀺𑀁 𑀉𑀧𑀥𑀸𑀭𑁂𑀳𑀻’’𑀢𑀺 𑀲𑀜𑁆𑀜𑀁 𑀤𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 ¶ 𑀅𑀢𑁆𑀢𑀦𑁄 𑀭𑀸𑀚𑀕𑁂𑀳𑀁 𑀧𑀯𑀺𑀝𑁆𑀞𑁄 𑀢𑀁 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂, 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀲𑀸𑀫𑀺𑀓𑀪𑀸𑀯𑀁 𑀯𑀸 𑀅𑀲𑀸𑀫𑀺𑀓𑀪𑀸𑀯𑀁 𑀯𑀸 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀭𑀺𑀕𑁆𑀕𑀳𑀡𑀽𑀧𑀸𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀢𑀲𑁆𑀲𑀸 𑀲𑀸𑀫𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀳𑀺, 𑀪𑀡𑁂, 𑀫𑀁 𑀉𑀧𑀝𑁆𑀞𑀸𑀳𑀻’’𑀢𑀺 𑀆𑀳. 𑀲𑁄 𑀅𑀦𑀺𑀘𑁆𑀙𑀦𑁆𑀢𑁄𑀧𑀺 ‘‘𑀭𑀸𑀚𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀓𑀭𑁄𑀦𑁆𑀢𑁂 𑀫𑀬𑀺 𑀭𑀸𑀚𑀤𑀡𑁆𑀟𑀁 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀭𑀸𑀚𑀼𑀧𑀝𑁆𑀞𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀭𑀸𑀚𑀸𑀧𑀺 𑀢𑀲𑁆𑀲 𑀪𑀢𑁆𑀢𑀯𑁂𑀢𑀦𑀁 𑀤𑀸𑀧𑁂𑀢𑁆𑀯𑀸 𑀓𑀢𑀺𑀧𑀬𑀤𑀺𑀯𑀲𑀸𑀢𑀺𑀓𑁆𑀓𑀫𑁂𑀦 𑀧𑀸𑀢𑁄𑀯 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀏𑀯𑀫𑀸𑀳 𑁋 ‘‘𑀕𑀘𑁆𑀙, 𑀪𑀡𑁂, 𑀅𑀫𑀼𑀫𑁆𑀳𑀺 𑀞𑀸𑀦𑁂 𑀏𑀓𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺, 𑀢𑀢𑁄 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁 𑀭𑀢𑁆𑀢𑀼𑀧𑁆𑀧𑀮𑀸𑀦𑀺 𑀘 𑀆𑀦𑁂𑀳𑀺, 𑀲𑀘𑁂 𑀅𑀚𑁆𑀚𑁂𑀯 𑀦𑀸𑀕𑀘𑁆𑀙𑁂𑀬𑁆𑀬𑀸𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺. 𑀢𑀲𑁆𑀫𑀺𑀜𑁆𑀘 𑀕𑀢𑁂 𑀤𑁆𑀯𑀸𑀭𑀧𑀸𑀮𑀁 𑀆𑀳 𑁋 ‘‘𑀅𑀚𑁆𑀚 𑀅𑀦𑀢𑁆𑀣𑀗𑁆𑀕𑀢𑁂 𑀏𑀯 𑀲𑀽𑀭𑀺𑀬𑁂 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀣𑀓𑁂𑀢𑀩𑁆𑀩𑀸𑀦𑀻’’𑀢𑀺.

𑀲𑀸 𑀘 𑀧𑁄𑀓𑁆𑀔𑀭𑀡𑀻 𑀯𑁂𑀲𑀸𑀮𑀺𑀬𑀸 𑀢𑀺𑀬𑁄𑀚𑀦𑀫𑀢𑁆𑀣𑀓𑁂 𑀳𑁄𑀢𑀺, 𑀢𑀣𑀸𑀧𑀺 𑀲𑁄 𑀧𑀼𑀭𑀺𑀲𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀯𑀸𑀢𑀯𑁂𑀕𑁂𑀦 𑀧𑀼𑀩𑁆𑀩𑀡𑁆𑀳𑁂𑀬𑁂𑀯 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀲𑀫𑁆𑀧𑀸𑀧𑀼𑀡𑀺. ‘‘𑀲𑀸 𑀘 𑀧𑁄𑀓𑁆𑀔𑀭𑀡𑀻 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸’’𑀢𑀺 𑀧𑀕𑁂𑀯 𑀲𑀼𑀢𑀢𑁆𑀢𑀸 𑀪𑀬𑁂𑀦 𑀲𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀓𑁄𑀘𑀺 𑀧𑀭𑀺𑀲𑁆𑀲𑀬𑁄’’𑀢𑀺 𑀲𑀫𑀦𑁆𑀢𑀢𑁄 ¶ 𑀅𑀦𑀼𑀧𑀭𑀺𑀬𑀸𑀬𑀢𑀺. 𑀢𑀁 𑀤𑀺𑀲𑁆𑀯𑀸 𑀧𑁄𑀓𑁆𑀔𑀭𑀡𑀺𑀧𑀸𑀮𑀓𑁄 𑀅𑀫𑀦𑀼𑀲𑁆𑀲𑁄 𑀓𑀭𑀼𑀡𑀸𑀬𑀫𑀸𑀦𑀭𑀽𑀧𑁄 𑀫𑀦𑀼𑀲𑁆𑀲𑀭𑀽𑀧𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁, 𑀪𑁄 𑀧𑀼𑀭𑀺𑀲, 𑀇𑀥𑀸𑀕𑀢𑁄𑀲𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀲𑁄 ‘‘𑀬𑀤𑀺 𑀏𑀯𑀁 𑀬𑀸𑀯𑀤𑀢𑁆𑀣𑀁 𑀕𑀡𑁆𑀳𑀸𑀳𑀻’’𑀢𑀺 𑀅𑀢𑁆𑀢𑀦𑁄 𑀤𑀺𑀩𑁆𑀩𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺.

𑀲𑁄 𑀢𑀢𑁆𑀣 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁 𑀭𑀢𑁆𑀢𑀼𑀧𑁆𑀧𑀮𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀲𑀽𑀭𑀺𑀬𑁂 𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀁 𑀤𑀺𑀲𑁆𑀯𑀸 𑀤𑁆𑀯𑀸𑀭𑀧𑀸𑀮𑁄 𑀢𑀲𑁆𑀲 𑀯𑀺𑀭𑀯𑀦𑁆𑀢𑀲𑁆𑀲𑁂𑀯 𑀤𑁆𑀯𑀸𑀭𑀁 𑀣𑀓𑁂𑀲𑀺. 𑀲𑁄 𑀣𑀓𑀺𑀢𑁂 𑀤𑁆𑀯𑀸𑀭𑁂 𑀧𑀯𑁂𑀲𑀦𑀁 𑀅𑀮𑀪𑀦𑁆𑀢𑁄 𑀤𑁆𑀯𑀸𑀭𑀲𑀫𑀻𑀧𑁂 𑀲𑀽𑀮𑁂 𑀆𑀭𑁄𑀧𑀺𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀏𑀢𑁂 𑀫𑀬𑀺 𑀅𑀦𑀢𑁆𑀣𑀗𑁆𑀕𑀢𑁂 𑀏𑀯 𑀲𑀽𑀭𑀺𑀬𑁂 𑀆𑀕𑀢𑁂 𑀯𑀺𑀭𑀯𑀦𑁆𑀢𑁂 𑀏𑀯𑀁 𑀤𑁆𑀯𑀸𑀭𑀁 𑀣𑀓𑁂𑀲𑀼𑀁. ‘𑀅𑀳𑀁 𑀓𑀸𑀮𑁂𑀬𑁂𑀯 𑀆𑀕𑀢𑁄, 𑀫𑀫 𑀤𑀸𑀲𑁄 𑀦𑀢𑁆𑀣𑀻’𑀢𑀺 𑀢𑀬𑀸𑀧𑀺 𑀜𑀸𑀢𑀁 𑀳𑁄𑀢𑀽’’𑀢𑀺 ¶ 𑀲𑀓𑁆𑀔𑀺𑀫𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑁄 𑀆𑀳 ‘‘𑀅𑀳𑀁 𑀲𑀽𑀮𑁂 𑀆𑀯𑀼𑀢𑁄 𑀯𑀚𑁆𑀛𑁄 𑀫𑀭𑀡𑀸𑀪𑀺𑀫𑀼𑀔𑁄, 𑀓𑀣𑀁 𑀢𑀯 𑀲𑀓𑁆𑀔𑀺 𑀳𑁄𑀫𑀺. 𑀏𑀓𑁄 𑀧𑀦𑁂𑀢𑁆𑀣 𑀧𑁂𑀢𑁄 𑀫𑀳𑀺𑀤𑁆𑀥𑀺𑀓𑁄 𑀫𑀫 𑀲𑀫𑀻𑀧𑀁 𑀆𑀕𑀫𑀺𑀲𑁆𑀲𑀢𑀺, 𑀢𑀁 𑀲𑀓𑁆𑀔𑀺𑀁 𑀓𑀭𑁄𑀳𑀻’’𑀢𑀺. ‘‘𑀓𑀣𑀁 𑀧𑀦 𑀲𑁄 𑀫𑀬𑀸 𑀤𑀝𑁆𑀞𑀩𑁆𑀩𑁄’’𑀢𑀺? 𑀇𑀥𑁂𑀯 𑀢𑁆𑀯𑀁 𑀢𑀺𑀝𑁆𑀞, ‘‘𑀲𑀬𑀫𑁂𑀯 𑀤𑀓𑁆𑀔𑀺𑀲𑁆𑀲𑀲𑀻’’𑀢𑀺. 𑀲𑁄 𑀢𑀢𑁆𑀣 𑀞𑀺𑀢𑁄 𑀫𑀚𑁆𑀛𑀺𑀫𑀬𑀸𑀫𑁂 𑀢𑀁 𑀧𑁂𑀢𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀲𑀓𑁆𑀔𑀺𑀁 𑀅𑀓𑀸𑀲𑀺. 𑀯𑀺𑀪𑀸𑀢𑀸𑀬 𑀘 𑀭𑀢𑁆𑀢𑀺𑀬𑀸 𑀭𑀜𑁆𑀜𑀸 ‘‘𑀫𑀫 𑀆𑀡𑀸 𑀢𑀬𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀢𑀲𑁆𑀫𑀸 𑀭𑀸𑀚𑀤𑀡𑁆𑀟𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂, 𑀤𑁂𑀯, 𑀫𑀬𑀸 𑀢𑀯 𑀆𑀡𑀸 𑀦𑀸𑀢𑀺𑀓𑁆𑀓𑀦𑁆𑀢𑀸, 𑀅𑀦𑀢𑁆𑀣𑀗𑁆𑀕𑀢𑁂 𑀏𑀯 𑀲𑀽𑀭𑀺𑀬𑁂 𑀅𑀳𑀁 𑀇𑀥𑀸𑀕𑀢𑁄𑀢𑀺. 𑀢𑀢𑁆𑀣 𑀓𑁄 𑀢𑁂 𑀲𑀓𑁆𑀔𑀻𑀢𑀺? 𑀲𑁄 ¶ 𑀢𑀲𑁆𑀲 𑀲𑀽𑀮𑀸𑀯𑀼𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑀦𑁆𑀢𑀁 𑀦𑀕𑁆𑀕𑀧𑁂𑀢𑀁 ‘‘𑀲𑀓𑁆𑀔𑀻’’𑀢𑀺 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 ‘‘𑀓𑀣𑀫𑁂𑀢𑀁 𑀅𑀫𑁆𑀳𑁂𑀳𑀺 𑀲𑀤𑁆𑀥𑀸𑀢𑀩𑁆𑀩’’𑀦𑁆𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑁂 ‘‘𑀅𑀚𑁆𑀚 𑀭𑀢𑁆𑀢𑀺𑀬𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀸𑀢𑀩𑁆𑀩𑀁 𑀧𑀼𑀭𑀺𑀲𑀁 𑀫𑀬𑀸 𑀲𑀤𑁆𑀥𑀺𑀁 𑀧𑁂𑀲𑁂𑀣𑀸’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀬𑀫𑁂𑀯 𑀢𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀞𑀺𑀢𑁄 𑀧𑁂𑀢𑁂𑀦 𑀘 𑀢𑀢𑁆𑀣𑀸𑀕𑀦𑁆𑀢𑁆𑀯𑀸 ‘‘𑀚𑀻𑀯, 𑀪𑁄, 𑀚𑀻𑀯𑀺𑀢𑀫𑁂𑀯 𑀲𑁂𑀬𑁆𑀬𑁄’’𑀢𑀺 𑀯𑀼𑀢𑁆𑀢𑁂 𑀢𑀁 ‘‘𑀲𑁂𑀬𑁆𑀬𑀸 𑀦𑀺𑀲𑀚𑁆𑀚𑀸 𑀦𑀬𑀺𑀫𑀲𑁆𑀲 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀧𑀝𑀺𑀧𑀼𑀘𑁆𑀙𑀺. 𑀇𑀤𑀸𑀦𑀺 𑀆𑀤𑀺𑀢𑁄 𑀧𑀦 ‘‘𑀯𑁂𑀲𑀸𑀮𑀺 𑀦𑀸𑀫 𑀦𑀕𑀭𑀢𑁆𑀣𑀺 𑀯𑀚𑁆𑀚𑀻𑀦’’𑀦𑁆𑀢𑀺 𑀕𑀸𑀣𑀸 𑀢𑀸𑀲𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸 𑁋

‘‘𑀯𑁂𑀲𑀸𑀮𑀻 ¶ 𑀦𑀸𑀫 𑀦𑀕𑀭𑀢𑁆𑀣𑀺 𑀯𑀚𑁆𑀚𑀻𑀦𑀁, 𑀢𑀢𑁆𑀣 𑀅𑀳𑀼 𑀮𑀺𑀘𑁆𑀙𑀯𑀺 𑀅𑀫𑁆𑀩𑀲𑀓𑁆𑀓𑀭𑁄;

𑀤𑀺𑀲𑁆𑀯𑀸𑀦 𑀧𑁂𑀢𑀁 𑀦𑀕𑀭𑀲𑁆𑀲 𑀩𑀸𑀳𑀺𑀭𑀁, 𑀢𑀢𑁆𑀣𑁂𑀯 𑀧𑀼𑀘𑁆𑀙𑀺𑀢𑁆𑀣 𑀢𑀁 𑀓𑀸𑀭𑀡𑀢𑁆𑀣𑀺𑀓𑁄.

‘‘𑀲𑁂𑀬𑁆𑀬𑀸 𑀦𑀺𑀲𑀚𑁆𑀚𑀸 𑀦𑀬𑀺𑀫𑀲𑁆𑀲 𑀅𑀢𑁆𑀣𑀺, 𑀅𑀪𑀺𑀓𑁆𑀓𑀫𑁄 𑀦𑀢𑁆𑀣𑀺 𑀧𑀝𑀺𑀓𑁆𑀓𑀫𑁄 𑀘;

𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀯𑀢𑁆𑀣𑀪𑁄𑀕𑀸, 𑀧𑀭𑀺𑀘𑀸𑀭𑀡𑀸 𑀲𑀸𑀧𑀺 𑀇𑀫𑀲𑁆𑀲 𑀦𑀢𑁆𑀣𑀺.

‘‘𑀬𑁂 𑀜𑀸𑀢𑀓𑀸 𑀤𑀺𑀝𑁆𑀞𑀲𑀼𑀢𑀸 𑀲𑀼𑀳𑀚𑁆𑀚𑀸, 𑀅𑀦𑀼𑀓𑀫𑁆𑀧𑀓𑀸 𑀬𑀲𑁆𑀲 𑀅𑀳𑁂𑀲𑀼𑀁 𑀧𑀼𑀩𑁆𑀩𑁂;

𑀤𑀝𑁆𑀞𑀼𑀫𑁆𑀧𑀺 𑀢𑁂 𑀤𑀸𑀦𑀺 𑀦 𑀢𑀁 𑀮𑀪𑀦𑁆𑀢𑀺, 𑀯𑀺𑀭𑀸𑀚𑀺𑀢𑀢𑁄 𑀳𑀺 𑀚𑀦𑁂𑀦 𑀢𑁂𑀦.

‘‘𑀦 ¶ 𑀑𑀕𑁆𑀕𑀢𑀢𑁆𑀢𑀲𑁆𑀲 𑀪𑀯𑀦𑁆𑀢𑀺 𑀫𑀺𑀢𑁆𑀢𑀸, 𑀚𑀳𑀦𑁆𑀢𑀺 𑀫𑀺𑀢𑁆𑀢𑀸 𑀯𑀺𑀓𑀮𑀁 𑀯𑀺𑀤𑀺𑀢𑁆𑀯𑀸;

𑀅𑀢𑁆𑀣𑀜𑁆𑀘 𑀤𑀺𑀲𑁆𑀯𑀸 𑀧𑀭𑀺𑀯𑀸𑀭𑀬𑀦𑁆𑀢𑀺, 𑀩𑀳𑀽 𑀫𑀺𑀢𑁆𑀢𑀸 𑀉𑀕𑁆𑀕𑀢𑀢𑁆𑀢𑀲𑁆𑀲 𑀳𑁄𑀦𑁆𑀢𑀺.

‘‘𑀦𑀺𑀳𑀻𑀦𑀢𑁆𑀢𑁄 𑀲𑀩𑁆𑀩𑀪𑁄𑀕𑁂𑀳𑀺 𑀓𑀺𑀘𑁆𑀙𑁄, 𑀲𑀫𑁆𑀫𑀓𑁆𑀔𑀺𑀢𑁄 𑀲𑀫𑁆𑀧𑀭𑀺𑀪𑀺𑀦𑁆𑀦𑀕𑀢𑁆𑀢𑁄;

𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀯 𑀧𑀮𑀺𑀫𑁆𑀧𑀫𑀸𑀦𑀸, 𑀅𑀚𑁆𑀚 𑀲𑀼𑀯𑁂 𑀚𑀻𑀯𑀺𑀢𑀲𑁆𑀲𑀽𑀧𑀭𑁄𑀥𑁄.

‘‘𑀏𑀢𑀸𑀤𑀺𑀲𑀁 𑀉𑀢𑁆𑀢𑀫𑀓𑀺𑀘𑁆𑀙𑀧𑁆𑀧𑀢𑁆𑀢𑀁,

𑀉𑀢𑁆𑀢𑀸𑀲𑀺𑀢𑀁 𑀧𑀼𑀘𑀺𑀫𑀦𑁆𑀤𑀲𑁆𑀲 𑀲𑀽𑀮𑁂;

𑀅𑀣 𑀢𑁆𑀯𑀁 𑀓𑁂𑀦 𑀯𑀡𑁆𑀡𑁂𑀦 𑀯𑀤𑁂𑀲𑀺 𑀬𑀓𑁆𑀔,

‘𑀚𑀻𑀯 𑀪𑁄 𑀚𑀻𑀯𑀺𑀢𑀫𑁂𑀯 𑀲𑁂𑀬𑁆𑀬𑁄’’’𑀢𑀺.

𑁫𑁧𑁭. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀯𑁂𑀲𑀸𑀮𑀺𑀬𑀁. 𑀦𑀕𑀭𑀲𑁆𑀲 𑀩𑀸𑀳𑀺𑀭𑀦𑁆𑀢𑀺 𑀦𑀕𑀭𑀲𑁆𑀲 𑀩𑀳𑀺 𑀪𑀯𑀁, 𑀯𑁂𑀲𑀸𑀮𑀺𑀦𑀕𑀭𑀲𑁆𑀲 𑀩𑀳𑀺 𑀏𑀯 ¶ 𑀚𑀸𑀢𑀁 𑀧𑀯𑀢𑁆𑀢𑀁 𑀲𑀫𑁆𑀩𑀦𑁆𑀥𑀁. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀢𑀁 𑀧𑀲𑁆𑀲𑀺, 𑀢𑀢𑁆𑀣𑁂𑀯 𑀞𑀸𑀦𑁂. 𑀢𑀦𑁆𑀢𑀺 ¶ 𑀢𑀁 𑀧𑁂𑀢𑀁. 𑀓𑀸𑀭𑀡𑀢𑁆𑀣𑀺𑀓𑁄𑀢𑀺 ‘‘𑀚𑀻𑀯, 𑀪𑁄, 𑀚𑀻𑀯𑀺𑀢𑀫𑁂𑀯 𑀲𑁂𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀅𑀢𑁆𑀣𑀲𑁆𑀲 𑀓𑀸𑀭𑀡𑁂𑀦 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸.

𑁫𑁧𑁮. 𑀲𑁂𑀬𑁆𑀬𑀸 𑀦𑀺𑀲𑀚𑁆𑀚𑀸 𑀦𑀬𑀺𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀺𑀝𑁆𑀞𑀺𑀧𑀲𑀸𑀭𑀡𑀮𑀓𑁆𑀔𑀡𑀸 𑀲𑁂𑀬𑁆𑀬𑀸, 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑀮𑀓𑁆𑀔𑀡𑀸 𑀦𑀺𑀲𑀚𑁆𑀚𑀸 𑀘 𑀇𑀫𑀲𑁆𑀲 𑀲𑀽𑀮𑁂 𑀆𑀭𑁄𑀧𑀺𑀢𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀺. 𑀅𑀪𑀺𑀓𑁆𑀓𑀫𑁄 𑀦𑀢𑁆𑀣𑀺 𑀧𑀝𑀺𑀓𑁆𑀓𑀫𑁄 𑀘𑀸𑀢𑀺 𑀅𑀪𑀺𑀓𑁆𑀓𑀫𑀸𑀤𑀺𑀮𑀓𑁆𑀔𑀡𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀕𑀫𑀦𑀁 𑀇𑀫𑀲𑁆𑀲 𑀦𑀢𑁆𑀣𑀺. 𑀧𑀭𑀺𑀘𑀸𑀭𑀺𑀓𑀸 𑀲𑀸𑀧𑀻𑀢𑀺 𑀬𑀸 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀯𑀢𑁆𑀣𑀧𑀭𑀺𑀪𑁄𑀕𑀸𑀤𑀺𑀮𑀓𑁆𑀔𑀡𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀘𑀸𑀭𑀡𑀸, 𑀲𑀸𑀧𑀺 𑀇𑀫𑀲𑁆𑀲 𑀦𑀢𑁆𑀣𑀺. ‘‘𑀧𑀭𑀺𑀳𑀭𑀡𑀸 𑀲𑀸𑀧𑀻’’𑀢𑀺 𑀯𑀸 𑀧𑀸𑀞𑁄, 𑀅𑀲𑀺𑀢𑀸𑀤𑀺𑀧𑀭𑀺𑀪𑁄𑀕𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀳𑀭𑀡𑀸, 𑀲𑀸𑀧𑀺 𑀇𑀫𑀲𑁆𑀲 𑀦𑀢𑁆𑀣𑀺 𑀯𑀺𑀕𑀢𑀚𑀻𑀯𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀘𑀸𑀭𑀡𑀸 𑀲𑀸𑀧𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺.

𑁫𑁧𑁯. 𑀤𑀺𑀝𑁆𑀞𑀲𑀼𑀢𑀸 𑀲𑀼𑀳𑀚𑁆𑀚𑀸, 𑀅𑀦𑀼𑀓𑀫𑁆𑀧𑀓𑀸 𑀬𑀲𑁆𑀲 𑀅𑀳𑁂𑀲𑀼𑀁 𑀧𑀼𑀩𑁆𑀩𑁂𑀢𑀺 𑀲𑀦𑁆𑀤𑀺𑀝𑁆𑀞𑀲𑀳𑀸𑀬𑀸 𑀘𑁂𑀯 𑀅𑀤𑀺𑀝𑁆𑀞𑀲𑀳𑀸𑀬𑀸 𑀘 𑀬𑀲𑁆𑀲 𑀫𑀺𑀢𑁆𑀢𑀸 𑀅𑀦𑀼𑀤𑁆𑀤𑀬𑀸𑀯𑀦𑁆𑀢𑁄 𑀬𑁂 ¶ 𑀅𑀲𑁆𑀲 𑀇𑀫𑀲𑁆𑀲 𑀧𑀼𑀩𑁆𑀩𑁂 𑀅𑀳𑁂𑀲𑀼𑀁. 𑀤𑀝𑁆𑀞𑀼𑀫𑁆𑀧𑀻𑀢𑀺 𑀧𑀲𑁆𑀲𑀺𑀢𑀼𑀫𑁆𑀧𑀺 𑀦 𑀮𑀪𑀦𑁆𑀢𑀺, 𑀓𑀼𑀢𑁄 𑀲𑀳 𑀯𑀲𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀭𑀸𑀚𑀺𑀢𑀢𑁆𑀢𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑀲𑀪𑀸𑀯𑁄. 𑀚𑀦𑁂𑀦 𑀢𑁂𑀦𑀸𑀢𑀺 𑀢𑁂𑀦 𑀜𑀸𑀢𑀺𑀆𑀤𑀺𑀚𑀦𑁂𑀦.

𑁫𑁨𑁦. 𑀦 𑀑𑀕𑁆𑀕𑀢𑀢𑁆𑀢𑀲𑁆𑀲 𑀪𑀯𑀦𑁆𑀢𑀺 𑀫𑀺𑀢𑁆𑀢𑀸𑀢𑀺 𑀅𑀧𑀕𑀢𑀯𑀺𑀜𑁆𑀜𑀸𑀡𑀲𑁆𑀲 𑀫𑀢𑀲𑁆𑀲 𑀫𑀺𑀢𑁆𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺 𑀢𑀲𑁆𑀲 𑀫𑀺𑀢𑁆𑀢𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀚𑀳𑀦𑁆𑀢𑀺 𑀫𑀺𑀢𑁆𑀢𑀸 𑀯𑀺𑀓𑀮𑀁 𑀯𑀺𑀤𑀺𑀢𑁆𑀯𑀸𑀢𑀺 𑀫𑀢𑁄 𑀢𑀸𑀯 𑀢𑀺𑀝𑁆𑀞𑀢𑀼, 𑀚𑀻𑀯𑀦𑁆𑀢𑀫𑁆𑀧𑀺 𑀪𑁄𑀕𑀯𑀺𑀓𑀮𑀁 𑀧𑀼𑀭𑀺𑀲𑀁 𑀯𑀺𑀤𑀺𑀢𑁆𑀯𑀸 ‘‘𑀦 𑀇𑀢𑁄 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕’’𑀦𑁆𑀢𑀺 𑀫𑀺𑀢𑁆𑀢𑀸 𑀧𑀚𑀳𑀦𑁆𑀢𑀺. 𑀅𑀢𑁆𑀣𑀜𑁆𑀘 𑀤𑀺𑀲𑁆𑀯𑀸 𑀧𑀭𑀺𑀯𑀸𑀭𑀬𑀦𑁆𑀢𑀻𑀢𑀺 𑀢𑀲𑁆𑀲 𑀧𑀦 𑀲𑀦𑁆𑀢𑀓𑀁 𑀅𑀢𑁆𑀣𑀁 𑀥𑀦𑀁 𑀤𑀺𑀲𑁆𑀯𑀸 𑀧𑀺𑀬𑀯𑀸𑀤𑀺𑀦𑁄 𑀫𑀼𑀔𑀼𑀮𑁆𑀮𑁄𑀓𑀺𑀓𑀸 𑀳𑀼𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀩𑀳𑀽 𑀫𑀺𑀢𑁆𑀢𑀸 𑀉𑀕𑁆𑀕𑀢𑀢𑁆𑀢𑀲𑁆𑀲 𑀳𑁄𑀦𑁆𑀢𑀻𑀢𑀺 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 ¶ 𑀉𑀕𑁆𑀕𑀢𑀲𑀪𑀸𑀯𑀲𑁆𑀲 𑀲𑀫𑀺𑀤𑁆𑀥𑀲𑁆𑀲 𑀩𑀳𑀽 𑀅𑀦𑁂𑀓𑀸 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀬𑀁 𑀮𑁄𑀓𑀺𑀬𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑁫𑁨𑁧. 𑀦𑀺𑀳𑀻𑀦𑀢𑁆𑀢𑁄 𑀲𑀩𑁆𑀩𑀪𑁄𑀕𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀽𑀳𑀺 𑀧𑀭𑀺𑀳𑀻𑀦𑀢𑁆𑀢𑁄. 𑀓𑀺𑀘𑁆𑀙𑁄𑀢𑀺 𑀤𑀼𑀓𑁆𑀔𑀺𑀢𑁄. 𑀲𑀫𑁆𑀫𑀓𑁆𑀔𑀺𑀢𑁄𑀢𑀺 𑀭𑀼𑀳𑀺𑀭𑁂𑀳𑀺 𑀲𑀫𑁆𑀫𑀓𑁆𑀔𑀺𑀢𑀲𑀭𑀻𑀭𑁄. 𑀲𑀫𑁆𑀧𑀭𑀺𑀪𑀺𑀦𑁆𑀦𑀕𑀢𑁆𑀢𑁄𑀢𑀺 𑀲𑀽𑀮𑁂𑀦 𑀅𑀩𑁆𑀪𑀦𑁆𑀢𑀭𑁂 𑀯𑀺𑀤𑀸𑀮𑀺𑀢𑀕𑀢𑁆𑀢𑁄. 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀯 𑀧𑀮𑀺𑀫𑁆𑀧𑀫𑀸𑀦𑁄𑀢𑀺 𑀢𑀺𑀡𑀕𑁆𑀕𑁂 𑀮𑀺𑀫𑁆𑀧𑀫𑀸𑀦𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀲𑀤𑀺𑀲𑁄. 𑀅𑀚𑁆𑀚 𑀲𑀼𑀯𑁂𑀢𑀺 𑀅𑀚𑁆𑀚 𑀯𑀸 𑀲𑀼𑀯𑁂 𑀯𑀸 𑀇𑀫𑀲𑁆𑀲 𑀦𑀸𑀫 𑀧𑀼𑀭𑀺𑀲𑀲𑁆𑀲 𑀚𑀻𑀯𑀺𑀢𑀲𑁆𑀲 𑀉𑀧𑀭𑁄𑀥𑁄 𑀦𑀺𑀭𑁄𑀥𑁄, 𑀢𑀢𑁄 𑀉𑀤𑁆𑀥𑀁 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑁫𑁨𑁨. 𑀉𑀢𑁆𑀢𑀸𑀲𑀺𑀢𑀦𑁆𑀢𑀺 𑀆𑀯𑀼𑀢𑀁 𑀆𑀭𑁄𑀧𑀺𑀢𑀁. 𑀧𑀼𑀘𑀺𑀫𑀦𑁆𑀤𑀲𑁆𑀲 𑀲𑀽𑀮𑁂𑀢𑀺 𑀦𑀺𑀫𑁆𑀩𑀭𑀼𑀓𑁆𑀔𑀲𑁆𑀲 𑀤𑀡𑁆𑀟𑁂𑀦 𑀓𑀢𑀲𑀽𑀮𑁂 ¶ . 𑀓𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀚𑀻𑀯, 𑀪𑁄, 𑀚𑀻𑀯𑀺𑀢𑀫𑁂𑀯 𑀲𑁂𑀬𑁆𑀬𑁄𑀢𑀺, 𑀪𑁄 𑀧𑀼𑀭𑀺𑀲, 𑀚𑀻𑀯. 𑀓𑀲𑁆𑀫𑀸? 𑀲𑀽𑀮𑀁 𑀆𑀭𑁄𑀧𑀺𑀢𑀲𑁆𑀲𑀸𑀧𑀺 𑀳𑀺 𑀢𑁂 𑀇𑀥 𑀚𑀻𑀯𑀺𑀢𑀫𑁂𑀯 𑀇𑀢𑁄 𑀘𑀼𑀢𑀲𑁆𑀲 𑀚𑀻𑀯𑀺𑀢𑀢𑁄 𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄𑀢𑀺.

𑀏𑀯𑀁 𑀢𑁂𑀦 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑁄 𑀲𑁄 𑀧𑁂𑀢𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑁄 𑁋

‘‘𑀲𑀸𑀮𑁄𑀳𑀺𑀢𑁄 𑀏𑀲 𑀅𑀳𑁄𑀲𑀺 𑀫𑀬𑁆𑀳𑀁, 𑀅𑀳𑀁 𑀲𑀭𑀸𑀫𑀺 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀤𑀺𑀲𑁆𑀯𑀸 𑀘 𑀫𑁂 𑀓𑀸𑀭𑀼𑀜𑁆𑀜𑀫𑀳𑁄𑀲𑀺 𑀭𑀸𑀚, 𑀫𑀸 𑀧𑀸𑀧𑀥𑀫𑁆𑀫𑁄 𑀦𑀺𑀭𑀬𑀁 𑀧𑀢𑀸𑀬𑀁.

‘‘𑀇𑀢𑁄 ¶ 𑀘𑀼𑀢𑁄 𑀮𑀺𑀘𑁆𑀙𑀯𑀺 𑀏𑀲 𑀧𑁄𑀲𑁄, 𑀲𑀢𑁆𑀣𑀼𑀲𑁆𑀲𑀤𑀁 𑀦𑀺𑀭𑀬𑀁 𑀖𑁄𑀭𑀭𑀽𑀧𑀁;

𑀉𑀧𑀧𑀚𑁆𑀚𑀢𑀺 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻, 𑀫𑀳𑀸𑀪𑀺𑀢𑀸𑀧𑀁 𑀓𑀝𑀼𑀓𑀁 𑀪𑀬𑀸𑀦𑀓𑀁.

‘‘𑀅𑀦𑁂𑀓𑀪𑀸𑀕𑁂𑀦 𑀕𑀼𑀡𑁂𑀦 𑀲𑁂𑀬𑁆𑀬𑁄, 𑀅𑀬𑀫𑁂𑀯 𑀲𑀽𑀮𑁄 𑀦𑀺𑀭𑀬𑁂𑀦 𑀢𑁂𑀦;

𑀏𑀓𑀦𑁆𑀢𑀤𑀼𑀓𑁆𑀔𑀁 𑀓𑀝𑀼𑀓𑀁 𑀪𑀬𑀸𑀦𑀓𑀁, 𑀏𑀓𑀦𑁆𑀢𑀢𑀺𑀩𑁆𑀩𑀁 𑀦𑀺𑀭𑀬𑀁 𑀧𑀢𑀸𑀬𑀁.

‘‘𑀇𑀤𑀜𑁆𑀘 ¶ 𑀲𑀼𑀢𑁆𑀯𑀸 𑀯𑀘𑀦𑀁 𑀫𑀫𑁂𑀲𑁄, 𑀤𑀼𑀓𑁆𑀔𑀽𑀧𑀦𑀻𑀢𑁄 𑀯𑀺𑀚𑀳𑁂𑀬𑁆𑀬 𑀧𑀸𑀡𑀁;

𑀢𑀲𑁆𑀫𑀸 𑀅𑀳𑀁 𑀲𑀦𑁆𑀢𑀺𑀓𑁂 𑀦 𑀪𑀡𑀸𑀫𑀺, 𑀫𑀸 𑀫𑁂𑀓𑀢𑁄 𑀚𑀻𑀯𑀺𑀢𑀲𑁆𑀲𑀽𑀧𑀭𑁄𑀥𑁄’’𑀢𑀺. 𑁋

𑁫𑁨𑁩. 𑀢𑀢𑁆𑀣 𑀲𑀸𑀮𑁄𑀳𑀺𑀢𑁄 𑀲𑀫𑀸𑀦𑀮𑁄𑀳𑀺𑀢𑁄 𑀬𑁄𑀦𑀺𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀩𑀦𑁆𑀥𑁄, 𑀜𑀸𑀢𑀓𑁄𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂. 𑀫𑀸 𑀧𑀸𑀧𑀥𑀫𑁆𑀫𑁄 𑀦𑀺𑀭𑀬𑀁 𑀧𑀢𑀸𑀬𑀦𑁆𑀢𑀺 𑀅𑀬𑀁 𑀧𑀸𑀧𑀥𑀫𑁆𑀫𑁄 𑀧𑀼𑀭𑀺𑀲𑁄 𑀦𑀺𑀭𑀬𑀁 𑀫𑀸 𑀧𑀢𑀺, 𑀫𑀸 𑀦𑀺𑀭𑀬𑀁 𑀉𑀧𑀧𑀚𑁆𑀚𑀻𑀢𑀺 𑀇𑀫𑀁 𑀤𑀺𑀲𑁆𑀯𑀸 𑀫𑁂 𑀓𑀸𑀭𑀼𑀜𑁆𑀜𑀁 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸.

𑁫𑁨𑁪. 𑀲𑀢𑁆𑀢𑀼𑀲𑁆𑀲𑀤𑀦𑁆𑀢𑀺 𑀧𑀸𑀧𑀓𑀸𑀭𑀻𑀳𑀺 𑀲𑀢𑁆𑀢𑁂𑀳𑀺 𑀉𑀲𑁆𑀲𑀦𑁆𑀦𑀁, 𑀅𑀣 𑀯𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁, 𑀫𑀼𑀔𑁂 𑀢𑀢𑁆𑀢𑀮𑁄𑀳𑀲𑁂𑀘𑀦𑀁, 𑀅𑀗𑁆𑀕𑀸𑀭𑀧𑀩𑁆𑀩𑀢𑀸𑀭𑁄𑀧𑀦𑀁, 𑀮𑁄𑀳𑀓𑀼𑀫𑁆𑀪𑀺𑀧𑀓𑁆𑀔𑁂𑀧𑀦𑀁, 𑀅𑀲𑀺𑀧𑀢𑁆𑀢𑀯𑀦𑀧𑁆𑀧𑀯𑁂𑀲𑀦𑀁, 𑀯𑁂𑀢𑁆𑀢𑀭𑀡𑀺𑀬𑀁 𑀲𑀫𑁄𑀢𑀭𑀡𑀁, 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑁂𑀧𑁄𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀻𑀳𑀺 𑀤𑀸𑀭𑀼𑀡𑀓𑀸𑀭𑀡𑁂𑀳𑀺 𑀉𑀲𑁆𑀲𑀦𑁆𑀦𑀁, 𑀉𑀧𑀭𑀽𑀧𑀭𑀺 𑀦𑀺𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀪𑀺𑀢𑀸𑀧𑀦𑁆𑀢𑀺 𑀫𑀳𑀸𑀤𑀼𑀓𑁆𑀔𑀁, 𑀫𑀳𑀸𑀅𑀕𑁆𑀕𑀺𑀲𑀦𑁆𑀢𑀸𑀧𑀁 𑀯𑀸. 𑀓𑀝𑀼𑀓𑀦𑁆𑀢𑀺 𑀅𑀦𑀺𑀝𑁆𑀞𑀁. 𑀪𑀬𑀸𑀦𑀓𑀦𑁆𑀢𑀺 𑀪𑀬𑀚𑀦𑀓𑀁.

𑁫𑁨𑁫. 𑀅𑀦𑁂𑀓𑀪𑀸𑀕𑁂𑀦 ¶ 𑀕𑀼𑀡𑁂𑀦𑀸𑀢𑀺 𑀅𑀦𑁂𑀓𑀓𑁄𑀝𑁆𑀞𑀸𑀲𑁂𑀦 𑀆𑀦𑀺𑀲𑀁𑀲𑁂𑀦. 𑀅𑀬𑀫𑁂𑀯 𑀲𑀽𑀮𑁄 𑀦𑀺𑀭𑀬𑁂𑀦 𑀢𑁂𑀦𑀸𑀢𑀺 𑀢𑀢𑁄 𑀇𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀢𑁄 𑀦𑀺𑀭𑀬𑀢𑁄 𑀅𑀬𑀫𑁂𑀯 𑀲𑀽𑀮𑁄 𑀲𑁂𑀬𑁆𑀬𑁄𑀢𑀺. 𑀦𑀺𑀲𑁆𑀲𑀓𑁆𑀓𑁂 𑀳𑀺 ¶ 𑀇𑀤𑀁 𑀓𑀭𑀡𑀯𑀘𑀦𑀁. 𑀏𑀓𑀦𑁆𑀢 𑀢𑀺𑀩𑁆𑀩𑀦𑁆𑀢𑀺 𑀏𑀓𑀦𑁆𑀢𑁂𑀦𑁂𑀯 𑀢𑀺𑀔𑀺𑀡𑀤𑀼𑀓𑁆𑀔𑀁, 𑀦𑀺𑀬𑀢𑀫𑀳𑀸𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄.

𑁫𑁨𑁬. 𑀇𑀤𑀜𑁆𑀘 𑀲𑀼𑀢𑁆𑀯𑀸 𑀯𑀘𑀦𑀁 𑀫𑀫𑁂𑀲𑁄𑀢𑀺 ‘‘𑀇𑀢𑁄 𑀘𑀼𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀲𑁄 𑀧𑀼𑀭𑀺𑀲𑁄 𑀤𑀼𑀓𑁆𑀔𑀽𑀧𑀦𑀻𑀢𑁄 𑀫𑀫 𑀯𑀘𑀦𑁂𑀦 𑀦𑀺𑀭𑀬𑀤𑀼𑀓𑁆𑀔𑀁 𑀉𑀧𑀦𑀻𑀢𑁄 𑀯𑀺𑀬 𑀳𑀼𑀢𑁆𑀯𑀸. 𑀯𑀺𑀚𑀳𑁂𑀬𑁆𑀬 𑀧𑀸𑀡𑀦𑁆𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑁂𑀬𑁆𑀬. 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀫𑀸 𑀫𑁂𑀓𑀢𑁄𑀢𑀺 ‘‘𑀫𑀬𑀸 𑀏𑀓𑀢𑁄 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀻𑀯𑀺𑀢𑀲𑁆𑀲 𑀉𑀧𑀭𑁄𑀥𑁄 𑀫𑀸 𑀳𑁄𑀢𑀽’’𑀢𑀺 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀇𑀤𑀁 𑀯𑀘𑀦𑀁 𑀅𑀳𑀁 𑀦 𑀪𑀡𑀸𑀫𑀺, 𑀅𑀣 𑀔𑁄 ¶ ‘‘𑀚𑀻𑀯, 𑀪𑁄, 𑀚𑀻𑀯𑀺𑀢𑀫𑁂𑀯 𑀲𑁂𑀬𑁆𑀬𑁄’’𑀢𑀺 𑀇𑀤𑀫𑁂𑀯 𑀪𑀡𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀧𑁂𑀢𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀧𑀓𑀸𑀲𑀺𑀢𑁂 𑀧𑀼𑀦 𑀭𑀸𑀚𑀸 𑀧𑁂𑀢𑀲𑁆𑀲 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑀼𑀁 𑀑𑀓𑀸𑀲𑀁 𑀓𑀭𑁄𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀜𑁆𑀜𑀸𑀢𑁄 𑀏𑀲𑁄 𑀧𑀼𑀭𑀺𑀲𑀲𑁆𑀲 𑀅𑀢𑁆𑀣𑁄, 𑀅𑀜𑁆𑀜𑀫𑁆𑀧𑀺 𑀇𑀘𑁆𑀙𑀸𑀫𑀲𑁂 𑀧𑀼𑀘𑁆𑀙𑀺𑀢𑀼𑀁 𑀢𑀼𑀯𑀁;

𑀑𑀓𑀸𑀲𑀓𑀫𑁆𑀫𑀁 𑀲𑀘𑁂 𑀦𑁄 𑀓𑀭𑁄𑀲𑀺, 𑀧𑀼𑀘𑁆𑀙𑀸𑀫 𑀢𑀁 𑀦𑁄 𑀦 𑀘 𑀓𑀼𑀚𑁆𑀛𑀺𑀢𑀩𑁆𑀩’’𑀦𑁆𑀢𑀺.

‘‘𑀅𑀤𑁆𑀥𑀸 𑀧𑀝𑀺𑀜𑁆𑀜𑀸 𑀫𑁂 𑀢𑀤𑀸 𑀅𑀳𑀼, 𑀦𑀸𑀘𑀺𑀓𑁆𑀔𑀡𑀸 𑀅𑀧𑁆𑀧𑀲𑀦𑁆𑀦𑀲𑁆𑀲 𑀳𑁄𑀢𑀺;

𑀅𑀓𑀸𑀫𑀸 𑀲𑀤𑁆𑀥𑁂𑀬𑁆𑀬𑀯𑀘𑁄𑀢𑀺 𑀓𑀢𑁆𑀯𑀸, 𑀧𑀼𑀘𑁆𑀙𑀲𑁆𑀲𑀼 𑀫𑀁 𑀓𑀸𑀫𑀁 𑀬𑀣𑀸 𑀯𑀺𑀲𑀬𑁆𑀳’’𑀦𑁆𑀢𑀺. 𑁋

𑀇𑀫𑀸 𑀭𑀜𑁆𑀜𑁄 𑀧𑁂𑀢𑀲𑁆𑀲 𑀘 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸.

𑁫𑁨𑁭. 𑀢𑀢𑁆𑀣 𑀅𑀜𑁆𑀜𑀸𑀢𑁄𑀢𑀺 𑀅𑀯𑀕𑀢𑁄. 𑀇𑀘𑁆𑀙𑀸𑀫𑀲𑁂𑀢𑀺 𑀇𑀘𑁆𑀙𑀸𑀫. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀦 𑀘 𑀓𑀼𑀚𑁆𑀛𑀺𑀢𑀩𑁆𑀩𑀦𑁆𑀢𑀺 ‘‘𑀇𑀫𑁂 𑀫𑀦𑀼𑀲𑁆𑀲𑀸 𑀬𑀁𑀓𑀺𑀜𑁆𑀘𑀺 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀓𑁄𑀥𑁄 𑀦 𑀓𑀸𑀢𑀩𑁆𑀩𑁄.

𑁫𑁨𑁮. 𑀅𑀤𑁆𑀥𑀸𑀢𑀺 𑀏𑀓𑀁𑀲𑁂𑀦. 𑀧𑀝𑀺𑀜𑁆𑀜𑀸 𑀫𑁂𑀢𑀺 𑀜𑀸𑀡𑀯𑀲𑁂𑀦 𑀫𑀬𑁆𑀳𑀁 ‘‘𑀧𑀼𑀘𑁆𑀙𑀲𑁆𑀲𑀽’’𑀢𑀺 𑀧𑀝𑀺𑀜𑁆𑀜𑀸, 𑀑𑀓𑀸𑀲𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀸 𑀅𑀳𑀽𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 ¶ 𑀧𑀞𑀫𑀤𑀲𑁆𑀲𑀦𑁂 𑀅𑀳𑁄𑀲𑀺. 𑀦𑀸𑀘𑀺𑀓𑁆𑀔𑀡𑀸 𑀅𑀧𑁆𑀧𑀲𑀦𑁆𑀦𑀲𑁆𑀲 𑀳𑁄𑀢𑀻𑀢𑀺 𑀅𑀓𑀣𑀦𑀸 𑀅𑀧𑁆𑀧𑀲𑀦𑁆𑀦𑀲𑁆𑀲 𑀳𑁄𑀢𑀺. 𑀧𑀲𑀦𑁆𑀦𑁄 𑀏𑀯 𑀳𑀺 𑀧𑀲𑀦𑁆𑀦𑀲𑁆𑀲 𑀓𑀺𑀜𑁆𑀘𑀺 𑀓𑀣𑁂𑀢𑀺. 𑀢𑁆𑀯𑀁 𑀧𑀦 𑀢𑀤𑀸 𑀫𑀬𑀺 𑀅𑀧𑁆𑀧𑀲𑀦𑁆𑀦𑁄, 𑀅𑀳𑀜𑁆𑀘 𑀢𑀬𑀺, 𑀢𑁂𑀦 𑀧𑀝𑀺𑀚𑀸𑀦𑀺𑀢𑁆𑀯𑀸 𑀓𑀣𑁂𑀢𑀼𑀓𑀸𑀫𑁄 𑀦𑀸𑀳𑁄𑀲𑀺. 𑀇𑀤𑀸𑀦𑀺 𑀧𑀦𑀸𑀳𑀁 𑀢𑀼𑀬𑁆𑀳𑀁 𑀅𑀓𑀸𑀫𑀸 𑀲𑀤𑁆𑀥𑁂𑀬𑁆𑀬𑀯𑀘𑁄 𑀅𑀓𑀸𑀫𑁄 𑀏𑀯 𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑁄 𑀇𑀢𑀺 𑀓𑀢𑁆𑀯𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 ¶ . 𑀧𑀼𑀘𑁆𑀙𑀲𑁆𑀲𑀼 ¶ 𑀫𑀁 𑀓𑀸𑀫𑀁 𑀬𑀣𑀸 𑀯𑀺𑀲𑀬𑁆𑀳𑀦𑁆𑀢𑀺 𑀢𑁆𑀯𑀁 𑀬𑀣𑀸 𑀇𑀘𑁆𑀙𑀲𑀺, 𑀢𑀫𑀢𑁆𑀣𑀁 𑀫𑀁 𑀧𑀼𑀘𑁆𑀙𑀲𑁆𑀲𑀼. 𑀅𑀳𑀁 𑀧𑀦 𑀬𑀣𑀸 𑀯𑀺𑀲𑀬𑁆𑀳𑀁 𑀬𑀣𑀸 𑀫𑀬𑁆𑀳𑀁 𑀲𑀳𑀺𑀢𑀼𑀁 𑀲𑀓𑁆𑀓𑀸, 𑀢𑀣𑀸 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀧𑁂𑀢𑁂𑀦 𑀧𑀼𑀘𑁆𑀙𑀦𑀸𑀬 𑀑𑀓𑀸𑀲𑁂 𑀓𑀢𑁂 𑀭𑀸𑀚𑀸 𑁋

‘‘𑀬𑀁 𑀓𑀺𑀜𑁆𑀘𑀳𑀁 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀲𑀸𑀫𑀺,

𑀲𑀩𑁆𑀩𑀫𑁆𑀧𑀺 𑀢𑀸𑀳𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀁;

𑀤𑀺𑀲𑁆𑀯𑀸𑀯 𑀢𑀁 𑀦𑁄𑀧𑀺 𑀘𑁂 𑀲𑀤𑁆𑀤𑀳𑁂𑀬𑁆𑀬𑀁,

𑀓𑀭𑁂𑀬𑁆𑀬𑀸𑀲𑀺 𑀫𑁂 𑀬𑀓𑁆𑀔 𑀦𑀺𑀬𑀲𑁆𑀲𑀓𑀫𑁆𑀫’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀬𑀁 𑀓𑀺𑀜𑁆𑀘𑀺𑀤𑁂𑀯 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀢𑀣𑁂𑀯 𑀅𑀳𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀁, 𑀢𑀁 𑀧𑀦 𑀤𑀺𑀲𑁆𑀯𑀸𑀯 𑀢𑀁 𑀯𑀘𑀦𑀁 𑀦𑁄𑀧𑀺 𑀘𑁂 𑀲𑀤𑁆𑀤𑀳𑁂𑀬𑁆𑀬𑀁. 𑀬𑀓𑁆𑀔, 𑀫𑀬𑁆𑀳𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀺𑀕𑁆𑀕𑀳𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀲𑀻𑀢𑀺. 𑀅𑀣 𑀯𑀸 𑀬𑀁 𑀓𑀺𑀜𑁆𑀘𑀳𑀁 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀬𑀁 𑀓𑀺𑀜𑁆𑀘𑀺𑀤𑁂𑀯 𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀲𑁆𑀲𑀸𑀫𑀺 𑀅𑀘𑀓𑁆𑀔𑀼𑀕𑁄𑀘𑀭𑀲𑁆𑀲 𑀅𑀤𑀲𑁆𑀲𑀦𑀢𑁄. 𑀲𑀩𑁆𑀩𑀫𑁆𑀧𑀺 𑀢𑀸𑀳𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀢𑁂 𑀅𑀳𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀅𑀜𑁆𑀜𑀁 𑀯𑀸 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀁. 𑀢𑀸𑀤𑀺𑀲𑁄 𑀳𑀺 𑀫𑀬𑁆𑀳𑀁 𑀢𑀬𑀺 𑀅𑀪𑀺𑀧𑁆𑀧𑀲𑀸𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀙𑀺𑀫𑀧𑀤𑀲𑁆𑀲 𑀧𑀦 𑀬𑀣𑀸𑀯𑀼𑀢𑁆𑀢𑁄𑀯 𑀅𑀢𑁆𑀣𑁄.

‘‘𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀸 𑀢𑀯 𑀫𑁂𑀲𑀸 𑀳𑁄𑀢𑀼, 𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀮𑀪 𑀲𑀼𑀧𑁆𑀧𑀲𑀸𑀤𑀁;

𑀅𑀜𑁆𑀜𑀢𑁆𑀣𑀺𑀓𑁄 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀬𑀁 𑀢𑁂 𑀲𑀼𑀢𑀁 𑀅𑀲𑀼𑀢𑀜𑁆𑀘𑀸𑀧𑀺 𑀥𑀫𑁆𑀫𑀁;

𑀲𑀩𑁆𑀩𑀫𑁆𑀧𑀺 𑀅𑀓𑁆𑀔𑀺𑀲𑁆𑀲𑀁 𑀬𑀣𑀸 𑀧𑀚𑀸𑀦’’𑀦𑁆𑀢𑀺. 𑁋 𑀕𑀸𑀣𑀫𑀸𑀳 ¶ ; 𑀇𑀢𑁄 𑀧𑀭𑀁 𑁋

‘‘𑀲𑁂𑀢𑁂𑀦 ¶ 𑀅𑀲𑁆𑀲𑁂𑀦 𑀅𑀮𑀗𑁆𑀓𑀢𑁂𑀦, 𑀉𑀧𑀬𑀸𑀲𑀺 𑀲𑀽𑀮𑀸𑀯𑀼𑀢𑀓𑀲𑁆𑀲 𑀲𑀦𑁆𑀢𑀺𑀓𑁂;

𑀬𑀸𑀦𑀁 𑀇𑀤𑀁 𑀅𑀩𑁆𑀪𑀼𑀢𑀁 𑀤𑀲𑁆𑀲𑀦𑁂𑀬𑁆𑀬𑀁, 𑀓𑀺𑀲𑁆𑀲𑁂𑀢𑀁 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄𑀢𑀺.

‘‘𑀯𑁂𑀲𑀸𑀮𑀺𑀬𑀸 𑀦𑀕𑀭𑀲𑁆𑀲 𑀫𑀚𑁆𑀛𑁂, 𑀘𑀺𑀓𑁆𑀔𑀮𑁆𑀮𑀫𑀕𑁆𑀕𑁂 𑀦𑀭𑀓𑀁 𑀅𑀳𑁄𑀲𑀺;

𑀕𑁄𑀲𑀻𑀲𑀫𑁂𑀓𑀸𑀳𑀁 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑁂𑀢𑀁 𑀕𑀳𑁂𑀢𑁆𑀯𑀸 𑀦𑀭𑀓𑀲𑁆𑀫𑀺𑀁 𑀦𑀺𑀓𑁆𑀔𑀺𑀧𑀺𑀁.

‘‘𑀏𑀢𑀲𑁆𑀫𑀺𑀁 ¶ 𑀧𑀸𑀤𑀸𑀦𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸, 𑀫𑀬𑀜𑁆𑀘 𑀅𑀜𑁆𑀜𑁂 𑀘 𑀅𑀢𑀺𑀓𑁆𑀓𑀫𑀺𑀫𑁆𑀳𑀸;

𑀬𑀸𑀦𑀁 𑀇𑀤𑀁 𑀅𑀩𑁆𑀪𑀼𑀢𑀁 𑀤𑀲𑁆𑀲𑀦𑁂𑀬𑁆𑀬𑀁, 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄𑀢𑀺.

‘‘𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀺, 𑀕𑀦𑁆𑀥𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀯𑀸𑀬𑀢𑀺;

𑀬𑀓𑁆𑀔𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀦𑀕𑁆𑀕𑁄 𑀘𑀸𑀲𑀺 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄𑀢𑀺.

‘‘𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺 𑀚𑀦𑀁 𑀉𑀧𑁂𑀫𑀺;

𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀤𑀺𑀩𑁆𑀩𑁄 𑀫𑁂 𑀯𑀡𑁆𑀡𑁄 𑀲𑀢𑀢𑀁 𑀧𑀪𑀸𑀲𑀢𑀺.

‘‘𑀬𑀲𑀜𑁆𑀘 𑀓𑀺𑀢𑁆𑀢𑀺𑀜𑁆𑀘 𑀥𑀫𑁆𑀫𑁂 𑀞𑀺𑀢𑀸𑀦𑀁, 𑀤𑀺𑀲𑁆𑀯𑀸𑀦 𑀫𑀦𑁆𑀢𑁂𑀫𑀺 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀤𑀺𑀩𑁆𑀩𑁄 𑀫𑁂 𑀕𑀦𑁆𑀥𑁄 𑀲𑀢𑀢𑀁 𑀧𑀯𑀸𑀬𑀢𑀺.

‘‘𑀲𑀳𑀸𑀬𑀸𑀦𑀁 ¶ 𑀢𑀺𑀢𑁆𑀣𑀲𑁆𑀫𑀺𑀁 𑀦𑁆𑀳𑀸𑀬𑀦𑁆𑀢𑀸𑀦𑀁, 𑀣𑀮𑁂 𑀕𑀳𑁂𑀢𑁆𑀯𑀸 𑀦𑀺𑀤𑀳𑀺𑀲𑁆𑀲 𑀤𑀼𑀲𑁆𑀲𑀁;

𑀔𑀺𑀟𑁆𑀟𑀢𑁆𑀣𑀺𑀓𑁄 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀢𑁂𑀦𑀫𑁆𑀳𑀺 𑀦𑀕𑁆𑀕𑁄 𑀓𑀲𑀺𑀭𑀸 𑀘 𑀯𑀼𑀢𑁆𑀢𑀻𑀢𑀺.

‘‘𑀬𑁄 ¶ 𑀓𑀻𑀴𑀫𑀸𑀦𑁄 𑀧𑀓𑀭𑁄𑀢𑀺 𑀧𑀸𑀧𑀁, 𑀢𑀲𑁆𑀲𑁂𑀤𑀺𑀲𑀁 𑀓𑀫𑁆𑀫𑀯𑀺𑀧𑀸𑀓𑀫𑀸𑀳𑀼;

𑀅𑀓𑀻𑀴𑀫𑀸𑀦𑁄 𑀧𑀦 𑀬𑁄 𑀓𑀭𑁄𑀢𑀺, 𑀓𑀺𑀁 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀫𑀸𑀳𑀽𑀢𑀺.

‘‘𑀬𑁂 𑀤𑀼𑀝𑁆𑀞𑀲𑀗𑁆𑀓𑀧𑁆𑀧𑀫𑀦𑀸 𑀫𑀦𑀼𑀲𑁆𑀲𑀸, 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀲𑀁𑀓𑀺𑀮𑀺𑀝𑁆𑀞𑀸;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀅𑀲𑀁𑀲𑀬𑀁 𑀢𑁂 𑀦𑀺𑀭𑀬𑀁 𑀉𑀧𑁂𑀦𑁆𑀢𑀺.

‘‘𑀅𑀧𑀭𑁂 𑀧𑀦 𑀲𑀼𑀕𑀢𑀺𑀫𑀸𑀲𑀫𑀸𑀦𑀸, 𑀤𑀸𑀦𑁂 𑀭𑀢𑀸 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑀸;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀅𑀲𑀁𑀲𑀬𑀁 𑀢𑁂 𑀲𑀼𑀕𑀢𑀺𑀁 𑀉𑀧𑁂𑀦𑁆𑀢𑀻’’𑀢𑀺. 𑁋

𑀢𑁂𑀲𑀁 𑀉𑀪𑀺𑀦𑁆𑀦𑀁 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑀳𑁄𑀦𑁆𑀢𑀺.

𑁫𑁩𑁦. 𑀢𑀢𑁆𑀣 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀸 𑀢𑀯 𑀫𑁂𑀲𑀸 𑀳𑁄𑀢𑀽𑀢𑀺 ‘‘𑀲𑀩𑁆𑀩𑀫𑁆𑀧𑀺 𑀢𑀸𑀳𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬’’𑀦𑁆𑀢𑀺 𑀢𑀯 𑀏𑀲𑀸 𑀧𑀝𑀺𑀜𑁆𑀜𑀸 𑀫𑀬𑁆𑀳𑀁 𑀲𑀘𑁆𑀘𑀁 𑀳𑁄𑀢𑀼. 𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀮𑀪 𑀲𑀼𑀧𑁆𑀧𑀲𑀸𑀤𑀦𑁆𑀢𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀼𑀦𑁆𑀤𑀭𑀁 𑀧𑀲𑀸𑀤𑀁 𑀮𑀪𑀲𑁆𑀲𑀼. 𑀅𑀜𑁆𑀜𑀢𑁆𑀣𑀺𑀓𑁄𑀢𑀺 𑀆𑀚𑀸𑀦𑀦𑀢𑁆𑀣𑀺𑀓𑁄. 𑀬𑀣𑀸 𑀧𑀚𑀸𑀦𑀦𑁆𑀢𑀺 𑀬𑀣𑀸 𑀅𑀜𑁆𑀜𑁄𑀧𑀺 ¶ 𑀧𑀚𑀸𑀦𑀦𑁆𑀢𑁄, ‘‘𑀬𑀣𑀸𑀧𑀺 𑀜𑀸𑀢’’𑀦𑁆𑀢𑀺 𑀯𑀸 𑀫𑀬𑀸 𑀬𑀣𑀸 𑀜𑀸𑀢𑀦𑁆𑀢𑀺 𑀅𑀢𑁆𑀣𑁄.

𑁫𑁩𑁧. 𑀓𑀺𑀲𑁆𑀲𑁂𑀢𑀁 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄𑀢𑀺 𑀓𑀺𑀲𑁆𑀲𑁂𑀢𑀁 𑀓𑀺𑀲𑁆𑀲 𑀦𑀸𑀫 𑀏𑀢𑀁, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄. 𑀏𑀢𑀦𑁆𑀢𑀺 𑀯𑀸 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀬𑁄𑀚𑀦𑀸. ‘‘𑀓𑀺𑀲𑁆𑀲 𑀢𑁂’’𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺.

𑁫𑁩𑁨-𑁩𑁩. 𑀘𑀺𑀓𑁆𑀔𑀮𑁆𑀮𑀫𑀕𑁆𑀕𑁂𑀢𑀺 ¶ 𑀘𑀺𑀓𑁆𑀔𑀮𑁆𑀮𑀯𑀢𑀺 𑀧𑀣𑀫𑁆𑀳𑀺. 𑀦𑀭𑀓𑀦𑁆𑀢𑀺 𑀆𑀯𑀸𑀝𑀁. 𑀏𑀓𑀸𑀳𑀦𑁆𑀢𑀺 𑀏𑀓𑀁 𑀅𑀳𑀁. 𑀦𑀭𑀓𑀲𑁆𑀫𑀺𑀁 𑀦𑀺𑀓𑁆𑀔𑀺𑀧𑀺𑀦𑁆𑀢𑀺 𑀬𑀣𑀸 𑀓𑀤𑁆𑀤𑀫𑁄 𑀦 𑀅𑀓𑁆𑀓𑀫𑀻𑀬𑀢𑀺, 𑀏𑀯𑀁 𑀢𑀲𑁆𑀫𑀺𑀁 𑀘𑀺𑀓𑁆𑀔𑀮𑁆𑀮𑀸𑀯𑀸𑀝𑁂 𑀞𑀧𑁂𑀲𑀺𑀁. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀕𑁄𑀲𑀻𑀲𑁂𑀦 𑀲𑁂𑀢𑀼𑀓𑀭𑀡𑀲𑁆𑀲.

𑁫𑁩𑁬-𑁭. 𑀥𑀫𑁆𑀫𑁂 𑀞𑀺𑀢𑀸𑀦𑀦𑁆𑀢𑀺 𑀥𑀫𑁆𑀫𑀘𑀸𑀭𑀻𑀦𑀁 𑀲𑀫𑀘𑀸𑀭𑀻𑀦𑀁. 𑀫𑀦𑁆𑀢𑁂𑀫𑀻𑀢𑀺 𑀓𑀣𑁂𑀫𑀺 𑀓𑀺𑀢𑁆𑀢𑀬𑀸𑀫𑀺. 𑀔𑀺𑀟𑁆𑀟𑀢𑁆𑀣𑀺𑀓𑁄𑀢𑀺 ¶ 𑀳𑀲𑀸𑀥𑀺𑀧𑁆𑀧𑀸𑀬𑁄. 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀤𑀼𑀲𑁆𑀲𑀲𑀸𑀫𑀺𑀓𑁂 𑀦 𑀤𑀽𑀲𑀺𑀢𑀘𑀺𑀢𑁆𑀢𑁄, 𑀦 𑀅𑀯𑀳𑀭𑀡𑀸𑀥𑀺𑀧𑁆𑀧𑀸𑀬𑁄 𑀦𑀸𑀧𑀺 𑀯𑀺𑀦𑀸𑀲𑀸𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀣𑁄.

𑁫𑁩𑁮. 𑀅𑀓𑀻𑀴𑀫𑀸𑀦𑁄𑀢𑀺 𑀅𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁄, 𑀮𑁄𑀪𑀸𑀤𑀻𑀳𑀺 𑀤𑀽𑀲𑀺𑀢𑀘𑀺𑀢𑁆𑀢𑁄. 𑀓𑀺𑀁 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀫𑀸𑀳𑀽𑀢𑀺 𑀢𑀲𑁆𑀲 𑀢𑀣𑀸 𑀓𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀓𑀻𑀯 𑀓𑀝𑀼𑀓𑀁 𑀤𑀼𑀓𑁆𑀔𑀯𑀺𑀧𑀸𑀓𑀁 𑀧𑀡𑁆𑀟𑀺𑀢𑀸 𑀆𑀳𑀼.

𑁫𑁩𑁯-𑁪𑁦. 𑀤𑀼𑀝𑁆𑀞𑀲𑀗𑁆𑀓𑀧𑁆𑀧𑀫𑀦𑀸𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦 𑀤𑀽𑀲𑀺𑀢𑀫𑀦𑁄𑀯𑀺𑀢𑀓𑁆𑀓𑀸, 𑀏𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑀫𑀸𑀳. 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀓𑀸𑀬𑀯𑀸𑀘𑀸𑀳𑀺 𑀫𑀮𑀺𑀦𑀸. 𑀆𑀲𑀫𑀸𑀦𑀸𑀢𑀺 𑀆𑀲𑀻𑀲𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸.

𑀏𑀯𑀁 𑀧𑁂𑀢𑁂𑀦 𑀲𑀗𑁆𑀔𑁂𑀧𑁂𑀦𑁂𑀯 𑀓𑀫𑁆𑀫𑀨𑀮𑁂𑀲𑀼 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑁂𑀲𑀼 𑀢𑀁 𑀅𑀲𑀤𑁆𑀤𑀳𑀦𑁆𑀢𑁄 𑀭𑀸𑀚𑀸 𑁋

‘‘𑀢𑀁 𑀓𑀺𑀦𑁆𑀢𑀺 𑀚𑀸𑀦𑁂𑀬𑁆𑀬𑀫𑀳𑀁 𑀅𑀯𑁂𑀘𑁆𑀘, 𑀓𑀮𑁆𑀬𑀸𑀡𑀧𑀸𑀧𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀓𑀺𑀁 𑀯𑀸𑀳𑀁 𑀤𑀺𑀲𑁆𑀯𑀸 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀁, 𑀓𑁄 𑀯𑀸𑀧𑀺 𑀫𑀁 𑀲𑀤𑁆𑀤𑀳𑀸𑀧𑁂𑀬𑁆𑀬 𑀏𑀢’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀁 𑀓𑀺𑀦𑁆𑀢𑀺 𑀚𑀸𑀦𑁂𑀬𑁆𑀬𑀫𑀳𑀁 𑀅𑀯𑁂𑀘𑁆𑀘𑀸𑀢𑀺 𑀬𑁄𑀬𑀁 𑀢𑀬𑀸 ‘‘𑀬𑁂 𑀤𑀼𑀝𑁆𑀞𑀲𑀗𑁆𑀓𑀧𑁆𑀧𑀫𑀦𑀸 𑀫𑀦𑀼𑀲𑁆𑀲𑀸, 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀲𑀁𑀓𑀺𑀮𑀺𑀝𑁆𑀞𑀸’’𑀢𑀺𑀆𑀤𑀺𑀦𑀸. ‘‘𑀅𑀧𑀭𑁂 𑀧𑀦 𑀲𑀼𑀕𑀢𑀺𑀫𑀸𑀲𑀫𑀸𑀦𑀸’’𑀢𑀺𑀆𑀤𑀺𑀦𑀸 𑀘 𑀓𑀮𑁆𑀬𑀸𑀡𑀲𑁆𑀲 𑀧𑀸𑀧𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀁 𑀓𑀺𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀅𑀯𑁂𑀘𑁆𑀘 ¶ ¶ 𑀅𑀧𑀭𑀧𑀘𑁆𑀘𑀬𑀪𑀸𑀯𑁂𑀦 𑀲𑀤𑁆𑀤𑀳𑁂𑀬𑁆𑀬𑀁. 𑀓𑀺𑀁 𑀯𑀸𑀳𑀁 𑀤𑀺𑀲𑁆𑀯𑀸 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀦𑁆𑀢𑀺 𑀓𑀻𑀤𑀺𑀲𑀁 𑀯𑀸 𑀧𑀦𑀸𑀳𑀁 𑀧𑀘𑁆𑀘𑀓𑁆𑀔𑀪𑀽𑀢𑀁 𑀦𑀺𑀤𑀲𑁆𑀲𑀦𑀁 𑀤𑀺𑀲𑁆𑀯𑀸 𑀧𑀝𑀺𑀲𑀤𑁆𑀤𑀳𑁂𑀬𑁆𑀬𑀁. 𑀓𑁄 𑀯𑀸𑀧𑀺 𑀫𑀁 𑀲𑀤𑁆𑀤𑀳𑀸𑀧𑁂𑀬𑁆𑀬 𑀏𑀢𑀦𑁆𑀢𑀺 𑀓𑁄 𑀯𑀸 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀧𑀡𑁆𑀟𑀺𑀢𑁄 𑀏𑀢𑀫𑀢𑁆𑀣𑀁 𑀫𑀁 𑀲𑀤𑁆𑀤𑀳𑀸𑀧𑁂𑀬𑁆𑀬, 𑀢𑀁 𑀓𑀣𑁂𑀳𑀻𑀢𑀺 ¶ 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀧𑁂𑀢𑁄 𑀓𑀸𑀭𑀡𑁂𑀦 𑀢𑀫𑀢𑁆𑀣𑀁 𑀢𑀲𑁆𑀲 𑀧𑀓𑀸𑀲𑁂𑀦𑁆𑀢𑁄 𑁋

‘‘𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀅𑀪𑀺𑀲𑀤𑁆𑀤𑀳𑀲𑁆𑀲𑀼, 𑀓𑀮𑁆𑀬𑀸𑀡𑀧𑀸𑀧𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀓𑀮𑁆𑀬𑀸𑀡𑀧𑀸𑀧𑁂 𑀉𑀪𑀬𑁂 𑀅𑀲𑀦𑁆𑀢𑁂, 𑀲𑀺𑀬𑀸 𑀦𑀼 𑀲𑀢𑁆𑀢𑀸 𑀲𑀼𑀕𑀢𑀸 𑀤𑀼𑀕𑁆𑀕𑀢𑀸 𑀯𑀸.

‘‘𑀦𑁄 𑀘𑁂𑀢𑁆𑀣 𑀓𑀫𑁆𑀫𑀸𑀦𑀺 𑀓𑀭𑁂𑀬𑁆𑀬𑀼𑀁 𑀫𑀘𑁆𑀘𑀸, 𑀓𑀮𑁆𑀬𑀸𑀡𑀧𑀸𑀧𑀸𑀦𑀺 𑀫𑀦𑀼𑀲𑁆𑀲𑀮𑁄𑀓𑁂;

𑀦𑀸𑀳𑁂𑀲𑀼𑀁 𑀲𑀢𑁆𑀢𑀸 𑀲𑀼𑀕𑀢𑀸 𑀤𑀼𑀕𑁆𑀕𑀢𑀸 𑀯𑀸, 𑀳𑀻𑀦𑀸 𑀧𑀡𑀻𑀢𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂.

‘‘𑀬𑀲𑁆𑀫𑀸 𑀘 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀫𑀘𑁆𑀘𑀸, 𑀓𑀮𑁆𑀬𑀸𑀡𑀧𑀸𑀧𑀸𑀦𑀺 𑀫𑀦𑀼𑀲𑁆𑀲𑀮𑁄𑀓𑁂;

𑀢𑀲𑁆𑀫𑀸 𑀳𑀺 𑀲𑀢𑁆𑀢𑀸 𑀲𑀼𑀕𑀢𑀸 𑀤𑀼𑀕𑁆𑀕𑀢𑀸 𑀯𑀸, 𑀳𑀻𑀦𑀸 𑀧𑀡𑀻𑀢𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂.

‘‘𑀤𑁆𑀯𑀬𑀚𑁆𑀚 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀫𑀸𑀳𑀼, 𑀲𑀼𑀔𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀯𑁂𑀤𑀦𑀻𑀬𑀁;

𑀢𑀸 𑀤𑁂𑀯𑀢𑀸𑀬𑁄 𑀧𑀭𑀺𑀘𑀸𑀭𑀬𑀦𑁆𑀢𑀺, 𑀧𑀘𑁆𑀘𑁂𑀦𑁆𑀢𑀺 𑀩𑀸𑀮𑀸 𑀤𑁆𑀯𑀬𑀢𑀁 𑀅𑀧𑀲𑁆𑀲𑀺𑀦𑁄’’𑀢𑀺. 𑁋

𑁫𑁪𑁨. 𑀢𑀢𑁆𑀣 𑀤𑀺𑀲𑁆𑀯𑀸 𑀘𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸𑀧𑀺. 𑀲𑀼𑀢𑁆𑀯𑀸𑀢𑀺 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀦𑀬𑀁 𑀦𑁂𑀦𑁆𑀢𑁄 𑀅𑀦𑀼𑀫𑀺𑀦𑀦𑁆𑀢𑁄. 𑀓𑀮𑁆𑀬𑀸𑀡𑀧𑀸𑀧𑀲𑁆𑀲𑀸𑀢𑀺 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀘 𑀓𑀫𑁆𑀫𑀲𑁆𑀲 𑀅𑀬𑀁 𑀲𑀼𑀔𑁄 𑀅𑀬𑀁 𑀤𑀼𑀓𑁆𑀔𑁄 𑀘 𑀯𑀺𑀧𑀸𑀓𑁄𑀢𑀺 𑀅𑀪𑀺𑀲𑀤𑁆𑀤𑀳𑀲𑁆𑀲𑀼. 𑀉𑀪𑀬𑁂 𑀅𑀲𑀦𑁆𑀢𑁂𑀢𑀺 𑀓𑀮𑁆𑀬𑀸𑀡𑁂 𑀧𑀸𑀧𑁂 𑀘𑀸𑀢𑀺 𑀤𑀼𑀯𑀺𑀥𑁂 𑀓𑀫𑁆𑀫𑁂 𑀅𑀯𑀺𑀚𑁆𑀚𑀫𑀸𑀦𑁂. 𑀲𑀺𑀬𑀸 𑀦𑀼 𑀲𑀢𑁆𑀢𑀸 𑀲𑀼𑀕𑀢𑀸 𑀤𑀼𑀕𑁆𑀕𑀢𑀸 𑀯𑀸𑀢𑀺 ‘‘𑀇𑀫𑁂 𑀲𑀢𑁆𑀢𑀸 ¶ 𑀲𑀼𑀕𑀢𑀺𑀁 𑀕𑀢𑀸 𑀤𑀼𑀕𑁆𑀕𑀢𑀺𑀁 𑀕𑀢𑀸 𑀯𑀸, 𑀲𑀼𑀕𑀢𑀺𑀬𑀁 𑀯𑀸 𑀅𑀟𑁆𑀠𑀸 𑀤𑀼𑀕𑁆𑀕𑀢𑀺𑀬𑀁 𑀤𑀮𑀺𑀤𑁆𑀤𑀸 𑀯𑀸’’𑀢𑀺 𑀅𑀬𑀫𑀢𑁆𑀣𑁄 𑀓𑀺𑀁 𑀦𑀼 𑀲𑀺𑀬𑀸 𑀓𑀣𑀁 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁫𑁪𑁩-𑁪. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 ‘‘𑀦𑁄 ¶ 𑀘𑁂𑀢𑁆𑀣 𑀓𑀫𑁆𑀫𑀸𑀦𑀻’’𑀢𑀺 𑀘 ‘‘𑀬𑀲𑁆𑀫𑀸 𑀘 𑀓𑀫𑁆𑀫𑀸𑀦𑀻’’𑀢𑀺 𑀘 𑀕𑀸𑀣𑀸𑀤𑁆𑀯𑀬𑁂𑀦 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀳𑀻𑀦𑀸 𑀧𑀡𑀻𑀢𑀸𑀢𑀺 𑀓𑀼𑀮𑀭𑀽𑀧𑀸𑀭𑁄𑀕𑁆𑀬𑀧𑀭𑀺𑀯𑀸𑀭𑀸𑀤𑀻𑀳𑀺 ¶ 𑀳𑀻𑀦𑀸 𑀉𑀴𑀸𑀭𑀸 𑀘.

𑁫𑁪𑁫. 𑀤𑁆𑀯𑀬𑀚𑁆𑀚 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀫𑀸𑀳𑀽𑀢𑀺 𑀤𑁆𑀯𑀬𑀁 𑀤𑀼𑀯𑀺𑀥𑀁 𑀅𑀚𑁆𑀚 𑀇𑀤𑀸𑀦𑀺 𑀓𑀫𑁆𑀫𑀸𑀦𑀁 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀸𑀦𑀁 𑀯𑀺𑀧𑀸𑀓𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀓𑀺𑀁 𑀢𑀦𑁆𑀢𑀺 𑀆𑀳 ‘‘𑀲𑀼𑀔𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀯𑁂𑀤𑀦𑀻𑀬’’𑀦𑁆𑀢𑀺, 𑀇𑀝𑁆𑀞𑀲𑁆𑀲 𑀘 𑀅𑀦𑀺𑀝𑁆𑀞𑀲𑁆𑀲 𑀘 𑀅𑀦𑀼𑀪𑀯𑀦𑀬𑁄𑀕𑁆𑀕𑀁. 𑀢𑀸 𑀤𑁂𑀯𑀢𑀸𑀬𑁄 𑀧𑀭𑀺𑀘𑀸𑀭𑀬𑀦𑁆𑀢𑀻𑀢𑀺 𑀬𑁂 𑀉𑀓𑁆𑀓𑀁𑀲𑀯𑀲𑁂𑀦 𑀲𑀼𑀔𑀯𑁂𑀤𑀦𑀻𑀬𑀁 𑀯𑀺𑀧𑀸𑀓𑀁 𑀧𑀝𑀺𑀮𑀪𑀦𑁆𑀢𑀺, 𑀢𑁂 𑀤𑁂𑀯𑀮𑁄𑀓𑁂 𑀢𑀸 𑀤𑁂𑀯𑀢𑀸 𑀳𑀼𑀢𑁆𑀯𑀸 𑀤𑀺𑀩𑁆𑀩𑀲𑀼𑀔𑀲𑀫𑀧𑁆𑀧𑀺𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀘𑀸𑀭𑁂𑀦𑁆𑀢𑀺. 𑀧𑀘𑁆𑀘𑁂𑀦𑁆𑀢𑀺 𑀩𑀸𑀮𑀸 𑀤𑁆𑀯𑀬𑀢𑀁 𑀅𑀧𑀲𑁆𑀲𑀺𑀦𑁄𑀢𑀺 𑀬𑁂 𑀩𑀸𑀮𑀸 𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘𑀸𑀢𑀺 𑀤𑁆𑀯𑀬𑀁 𑀅𑀧𑀲𑁆𑀲𑀦𑁆𑀢𑀸 𑀅𑀲𑀤𑁆𑀤𑀳𑀦𑁆𑀢𑀸, 𑀢𑁂 𑀧𑀸𑀧𑀧𑁆𑀧𑀲𑀼𑀢𑀸 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑀸 𑀦𑀺𑀭𑀬𑀸𑀤𑀻𑀲𑀼 𑀓𑀫𑁆𑀫𑀼𑀦𑀸 𑀧𑀘𑁆𑀘𑁂𑀦𑁆𑀢𑀺 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺.

𑀏𑀯𑀁 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀦𑁆𑀢𑁄 𑀧𑀦 𑀢𑁆𑀯𑀁 𑀓𑀲𑁆𑀫𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀲𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑁋

‘‘𑀦 𑀫𑀢𑁆𑀣𑀺 𑀓𑀫𑁆𑀫𑀸𑀦𑀺 𑀲𑀬𑀁𑀓𑀢𑀸𑀦𑀺, 𑀤𑀢𑁆𑀯𑀸𑀧𑀺 𑀫𑁂 𑀦𑀢𑁆𑀣𑀺 𑀬𑁄 𑀆𑀤𑀺𑀲𑁂𑀬𑁆𑀬;

𑀅𑀘𑁆𑀙𑀸𑀤𑀦𑀁 𑀲𑀬𑀦𑀫𑀣𑀦𑁆𑀦𑀧𑀸𑀦𑀁, 𑀢𑁂𑀦𑀫𑁆𑀳𑀺 𑀦𑀕𑁆𑀕𑁄 𑀓𑀲𑀺𑀭𑀸 𑀘 𑀯𑀼𑀢𑁆𑀢𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀦 𑀫𑀢𑁆𑀣𑀺 𑀓𑀫𑁆𑀫𑀸𑀦𑀺 𑀲𑀬𑀁𑀓𑀢𑀸𑀦𑀻𑀢𑀺 𑀬𑀲𑁆𑀫𑀸 𑀲𑀬𑀁 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀫𑀫 𑀦𑀢𑁆𑀣𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀇𑀤𑀸𑀦𑀺 𑀅𑀘𑁆𑀙𑀸𑀤𑀦𑀸𑀤𑀻𑀦𑀺 𑀮𑀪𑁂𑀬𑁆𑀬𑀁. 𑀤𑀢𑁆𑀯𑀸𑀧𑀺 𑀫𑁂 𑀦𑀢𑁆𑀣𑀺 𑀬𑁄 𑀆𑀤𑀺𑀲𑁂𑀬𑁆𑀬𑀸𑀢𑀺 𑀬𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀤𑀢𑁆𑀯𑀸 ‘‘𑀅𑀲𑀼𑀓𑀲𑁆𑀲 𑀧𑁂𑀢𑀲𑁆𑀲 𑀳𑁄𑀢𑀽’’𑀢𑀺 𑀫𑁂 𑀆𑀤𑀺𑀲𑁂𑀬𑁆𑀬 𑀉𑀤𑁆𑀤𑀺𑀲𑁂𑀬𑁆𑀬, 𑀲𑁄 𑀦𑀢𑁆𑀣𑀺. 𑀢𑁂𑀦𑀫𑁆𑀳𑀺 𑀦𑀕𑁆𑀕𑁄 𑀓𑀲𑀺𑀭𑀸 𑀘 𑀯𑀼𑀢𑁆𑀢𑀻𑀢𑀺 𑀢𑁂𑀦 𑀤𑀼𑀯𑀺𑀥𑁂𑀦𑀸𑀧𑀺 𑀓𑀸𑀭𑀡𑁂𑀦 𑀇𑀤𑀸𑀦𑀺 𑀦𑀕𑁆𑀕𑁄 ¶ 𑀦𑀺𑀘𑁆𑀘𑁄𑀴𑁄 𑀅𑀫𑁆𑀳𑀺, 𑀓𑀲𑀺𑀭𑀸 𑀤𑀼𑀓𑁆𑀔𑀸 𑀘 𑀯𑀼𑀢𑁆𑀢𑀺 𑀚𑀻𑀯𑀺𑀓𑀸 𑀳𑁄𑀢𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀅𑀘𑁆𑀙𑀸𑀤𑀦𑀸𑀤𑀺𑀮𑀸𑀪𑀁 𑀆𑀓𑀗𑁆𑀔𑀦𑁆𑀢𑁄 𑁋

‘‘𑀲𑀺𑀬𑀸 𑀦𑀼 𑀔𑁄 𑀓𑀸𑀭𑀡𑀁 𑀓𑀺𑀜𑁆𑀘𑀺 𑀬𑀓𑁆𑀔, 𑀅𑀘𑁆𑀙𑀸𑀤𑀦𑀁 𑀬𑁂𑀦 𑀢𑀼𑀯𑀁 𑀮𑀪𑁂𑀣;

𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀬𑀤𑀢𑁆𑀣𑀺 𑀳𑁂𑀢𑀼, 𑀲𑀤𑁆𑀥𑀸𑀬𑀺𑀓𑀁 𑀳𑁂𑀢𑀼𑀯𑀘𑁄 𑀲𑀼𑀡𑁄𑀫𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀬𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀅𑀘𑁆𑀙𑀸𑀤𑀦𑀁 𑀮𑀪𑁂𑀣 𑀮𑀪𑁂𑀬𑁆𑀬𑀸𑀲𑀺, 𑀓𑀺𑀜𑁆𑀘𑀺 𑀢𑀁 𑀓𑀸𑀭𑀡𑀁 𑀲𑀺𑀬𑀸 𑀦𑀼 𑀔𑁄 𑀪𑀯𑁂𑀬𑁆𑀬 𑀦𑀼 𑀔𑁄𑀢𑀺 𑀅𑀢𑁆𑀣𑁄. 𑀬𑀤𑀢𑁆𑀣𑀻𑀢𑀺 𑀬𑀤𑀺 𑀅𑀢𑁆𑀣𑀺.

𑀅𑀣𑀲𑁆𑀲 ¶ 𑀧𑁂𑀢𑁄 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀓𑀧𑁆𑀧𑀺𑀢𑀓𑁄 𑀦𑀸𑀫 𑀇𑀥𑀢𑁆𑀣𑀺 𑀪𑀺𑀓𑁆𑀔𑀼, 𑀛𑀸𑀬𑀻 𑀲𑀼𑀲𑀻𑀮𑁄 𑀅𑀭𑀳𑀸 𑀯𑀺𑀫𑀼𑀢𑁆𑀢𑁄;

𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀁𑀯𑀼𑀢𑀧𑀸𑀢𑀺𑀫𑁄𑀓𑁆𑀔𑁄, 𑀲𑀻𑀢𑀺𑀪𑀽𑀢𑁄 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑀢𑁆𑀢𑁄.

‘‘𑀲𑀔𑀺𑀮𑁄 𑀯𑀤𑀜𑁆𑀜𑀽 𑀲𑀼𑀯𑀘𑁄 𑀲𑀼𑀫𑀼𑀔𑁄, 𑀲𑁆𑀯𑀸𑀕𑀫𑁄 𑀲𑀼𑀧𑁆𑀧𑀝𑀺𑀫𑀼𑀢𑁆𑀢𑀓𑁄 𑀘;

𑀧𑀼𑀜𑁆𑀜𑀲𑁆𑀲 𑀔𑁂𑀢𑁆𑀢𑀁 𑀅𑀭𑀡𑀯𑀺𑀳𑀸𑀭𑀻, 𑀤𑁂𑀯𑀫𑀦𑀼𑀲𑁆𑀲𑀸𑀦𑀜𑁆𑀘 𑀤𑀓𑁆𑀔𑀺𑀡𑁂𑀬𑁆𑀬𑁄.

‘‘𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀫𑀼𑀢𑁆𑀢𑁄 𑀯𑀺𑀲𑀮𑁆𑀮𑁄 𑀅𑀫𑀫𑁄 𑀅𑀯𑀗𑁆𑀓𑁄;

𑀦𑀺𑀭𑀽𑀧𑀥𑀻 𑀲𑀩𑁆𑀩𑀧𑀧𑀜𑁆𑀘𑀔𑀻𑀡𑁄, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑁄 𑀚𑀼𑀢𑀺𑀫𑀸.

‘‘𑀅𑀧𑁆𑀧𑀜𑁆𑀜𑀸𑀢𑁄 𑀤𑀺𑀲𑁆𑀯𑀸𑀧𑀺 𑀦 𑀘 𑀲𑀼𑀚𑀸𑀦𑁄, 𑀫𑀼𑀦𑀻𑀢𑀺 𑀦𑀁 𑀯𑀚𑁆𑀚𑀺𑀲𑀼 𑀯𑁄𑀳𑀭𑀦𑁆𑀢𑀺;

𑀚𑀸𑀦𑀦𑁆𑀢𑀺 𑀢𑀁 𑀬𑀓𑁆𑀔𑀪𑀽𑀢𑀸 𑀅𑀦𑁂𑀚𑀁, 𑀓𑀮𑁆𑀬𑀸𑀡𑀥𑀫𑁆𑀫𑀁 𑀯𑀺𑀘𑀭𑀦𑁆𑀢𑀁 𑀮𑁄𑀓𑁂.

‘‘𑀢𑀲𑁆𑀲 ¶ ¶ 𑀢𑀼𑀯𑀁 𑀏𑀓𑀬𑀼𑀕𑀁 𑀤𑀼𑀯𑁂 𑀯𑀸, 𑀫𑀫𑀼𑀤𑁆𑀤𑀺𑀲𑀺𑀢𑁆𑀯𑀸𑀦 𑀲𑀘𑁂 𑀤𑀤𑁂𑀣;

𑀧𑀝𑀺𑀕𑁆𑀕𑀳𑀻𑀢𑀸𑀦𑀺 𑀘 𑀢𑀸𑀦𑀺 𑀅𑀲𑁆𑀲𑀼, 𑀫𑀫𑀜𑁆𑀘 𑀧𑀲𑁆𑀲𑁂𑀣 𑀲𑀦𑁆𑀦𑀤𑁆𑀥𑀤𑀼𑀲𑁆𑀲’’𑀦𑁆𑀢𑀺. 𑁋

𑁫𑁪𑁮. 𑀢𑀢𑁆𑀣 𑀓𑀧𑁆𑀧𑀺𑀢𑀢𑁄 𑀦𑀸𑀫𑀸𑀢𑀺 𑀚𑀝𑀺𑀮𑀲𑀳𑀲𑁆𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀉𑀧𑀚𑁆𑀛𑀸𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀯𑁂𑀲𑀸𑀮𑀺𑀬𑀸 𑀲𑀫𑀻𑀧𑁂. 𑀛𑀸𑀬𑀻𑀢𑀺 𑀅𑀕𑁆𑀕𑀨𑀮𑀛𑀸𑀦𑁂𑀦 𑀛𑀸𑀬𑀻. 𑀲𑀻𑀢𑀺𑀪𑀽𑀢𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑁂𑀦 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑁄. 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑀢𑁆𑀢𑁄𑀢𑀺 𑀉𑀢𑁆𑀢𑀫𑀁 𑀅𑀕𑁆𑀕𑀨𑀮𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀢𑁆𑀢𑁄.

𑁫𑁪𑁯. 𑀲𑀔𑀺𑀮𑁄𑀢𑀺 𑀫𑀼𑀤𑀼. 𑀲𑀼𑀯𑀘𑁄𑀢𑀺 𑀲𑀼𑀩𑁆𑀩𑀘𑁄. 𑀲𑁆𑀯𑀸𑀕𑀫𑁄𑀢𑀺 𑀲𑀼𑀝𑁆𑀞𑀼 𑀆𑀕𑀢𑀸𑀕𑀫𑁄. 𑀲𑀼𑀧𑁆𑀧𑀝𑀺𑀫𑀼𑀢𑁆𑀢𑀓𑁄𑀢𑀺 𑀲𑀼𑀝𑁆𑀞𑀼 𑀧𑀝𑀺𑀫𑀼𑀢𑁆𑀢𑀓𑀯𑀸𑀘𑁄, 𑀫𑀼𑀢𑁆𑀢𑀪𑀸𑀡𑀻𑀢𑀺 𑀅𑀢𑁆𑀣𑁄. 𑀅𑀭𑀡𑀯𑀺𑀳𑀸𑀭𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻.

𑁫𑁫𑁦. 𑀲𑀦𑁆𑀢𑁄𑀢𑀺 𑀉𑀧𑀲𑀦𑁆𑀢𑀓𑀺𑀮𑁂𑀲𑁄. 𑀯𑀺𑀥𑀽𑀫𑁄𑀢𑀺 𑀯𑀺𑀕𑀢𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀥𑀽𑀫𑁄. 𑀅𑀦𑀻𑀖𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀦𑀺𑀭𑀸𑀲𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀫𑀼𑀢𑁆𑀢𑁄𑀢𑀺 𑀲𑀩𑁆𑀩𑀪𑀯𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀯𑀺𑀲𑀮𑁆𑀮𑁄𑀢𑀺 𑀯𑀻𑀢𑀭𑀸𑀕𑀸𑀤𑀺𑀲𑀮𑁆𑀮𑁄. 𑀅𑀫𑀫𑁄𑀢𑀺 ¶ 𑀫𑀫𑀁𑀓𑀸𑀭𑀯𑀺𑀭𑀳𑀺𑀢𑁄. 𑀅𑀯𑀗𑁆𑀓𑁄𑀢𑀺 𑀓𑀸𑀬𑀯𑀗𑁆𑀓𑀸𑀤𑀺𑀯𑀗𑁆𑀓𑀯𑀺𑀭𑀳𑀺𑀢𑁄. 𑀦𑀺𑀭𑀽𑀧𑀥𑀻𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀉𑀧𑀥𑀺𑀧𑁆𑀧𑀳𑀸𑀬𑀻. 𑀲𑀩𑁆𑀩𑀧𑀧𑀜𑁆𑀘𑀔𑀻𑀡𑁄𑀢𑀺 𑀧𑀭𑀺𑀓𑁆𑀔𑀻𑀡𑀢𑀡𑁆𑀳𑀸𑀤𑀺𑀧𑀧𑀜𑁆𑀘𑁄. 𑀚𑀼𑀢𑀺𑀫𑀸𑀢𑀺 𑀅𑀦𑀼𑀢𑁆𑀢𑀭𑀸𑀬 𑀜𑀸𑀡𑀚𑀼𑀢𑀺𑀬𑀸 𑀚𑀼𑀢𑀺𑀫𑀸. 𑀅𑀧𑁆𑀧𑀜𑁆𑀜𑀸𑀢𑁄𑀢𑀺 𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀬 𑀧𑀝𑀺𑀘𑁆𑀙𑀦𑁆𑀦𑀕𑀼𑀡𑀢𑀸𑀬 𑀘 𑀦 𑀧𑀸𑀓𑀝𑁄.

𑁫𑁫𑁧. 𑀤𑀺𑀲𑁆𑀯𑀸𑀧𑀺 𑀦 𑀘 𑀲𑀼𑀚𑀸𑀦𑁄𑀢𑀺 𑀕𑀫𑁆𑀪𑀻𑀭𑀪𑀸𑀯𑁂𑀦 𑀤𑀺𑀲𑁆𑀯𑀸𑀧𑀺 ‘‘𑀏𑀯𑀁𑀲𑀻𑀮𑁄, 𑀏𑀯𑀁𑀥𑀫𑁆𑀫𑁄, 𑀏𑀯𑀁𑀧𑀜𑁆𑀜𑁄’’𑀢𑀺 𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄. 𑀚𑀸𑀦𑀦𑁆𑀢𑀺 𑀢𑀁 𑀬𑀓𑁆𑀔𑀪𑀽𑀢𑀸 𑀅𑀦𑁂𑀚𑀦𑁆𑀢𑀺 𑀬𑀓𑁆𑀔𑀪𑀽𑀢𑀸 𑀘 𑀅𑀦𑁂𑀚𑀁 𑀦𑀺𑀢𑁆𑀢𑀡𑁆𑀳𑀁 ‘‘𑀅𑀭𑀳𑀸’’𑀢𑀺 𑀢𑀁 𑀚𑀸𑀦𑀦𑁆𑀢𑀺. 𑀓𑀮𑁆𑀬𑀸𑀡𑀥𑀫𑁆𑀫𑀦𑁆𑀢𑀺 𑀲𑀼𑀦𑁆𑀤𑀭𑀲𑀻𑀮𑀸𑀤𑀺𑀕𑀼𑀡𑀁.

𑁫𑁫𑁨. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀓𑀧𑁆𑀧𑀺𑀢𑀓𑀫𑀳𑀸𑀣𑁂𑀭𑀲𑁆𑀲. 𑀏𑀓𑀬𑀼𑀕𑀦𑁆𑀢𑀺 𑀏𑀓𑀁 𑀯𑀢𑁆𑀣𑀬𑀼𑀕𑀁. 𑀤𑀼𑀯𑁂 𑀯𑀸𑀢𑀺 𑀤𑁆𑀯𑁂 𑀯𑀸 𑀯𑀢𑁆𑀣𑀬𑀼𑀕𑀸𑀦𑀺. 𑀫𑀫𑀼𑀤𑁆𑀤𑀺𑀲𑀺𑀢𑁆𑀯𑀸𑀦𑀸𑀢𑀺 𑀫𑀫𑀁 𑀉𑀤𑁆𑀤𑀺𑀲𑀺𑀢𑁆𑀯𑀸. 𑀧𑀝𑀺𑀕𑁆𑀕𑀳𑀻𑀢𑀸𑀦𑀺 𑀘 ¶ 𑀢𑀸𑀦𑀺 𑀅𑀲𑁆𑀲𑀽𑀢𑀺 𑀢𑀸𑀦𑀺 𑀯𑀢𑁆𑀣𑀬𑀼𑀕𑀸𑀦𑀺 𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀘 𑀅𑀲𑁆𑀲𑀼 ¶ 𑀪𑀯𑁂𑀬𑁆𑀬𑀼𑀁. 𑀲𑀦𑁆𑀦𑀤𑁆𑀥𑀤𑀼𑀲𑁆𑀲𑀦𑁆𑀢𑀺 𑀤𑀼𑀲𑁆𑀲𑁂𑀦 𑀓𑀢𑀲𑀦𑁆𑀦𑀸𑀳𑀁, 𑀮𑀤𑁆𑀥𑀯𑀢𑁆𑀣𑀁 𑀦𑀺𑀯𑀢𑁆𑀣𑀧𑀸𑀭𑀼𑀢𑀤𑀼𑀲𑁆𑀲𑀦𑁆𑀢𑀺 𑀅𑀢𑁆𑀣𑁄.

‘‘𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀫𑀡𑀁 𑀯𑀲𑀦𑁆𑀢𑀁, 𑀕𑀦𑁆𑀢𑁆𑀯𑀸𑀦 𑀧𑀲𑁆𑀲𑁂𑀫𑀼 𑀫𑀬𑀁 𑀇𑀤𑀸𑀦𑀺;

𑀬𑁄 𑀫𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀜𑁆𑀘, 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 𑀯𑀺𑀦𑁄𑀤𑀬𑁂𑀬𑁆𑀬𑀸’’𑀢𑀺. 𑁋

𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺. 𑀢𑀢𑁆𑀣 𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀓𑀢𑀭𑀲𑁆𑀫𑀺𑀁 𑀧𑀤𑁂𑀲𑁂. 𑀬𑁄 𑀫𑀚𑁆𑀚𑀸𑀢𑀺 𑀬𑁄 𑀅𑀚𑁆𑀚, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

‘‘𑀏𑀲𑁄 𑀦𑀺𑀲𑀺𑀦𑁆𑀦𑁄 𑀓𑀧𑀺𑀦𑀘𑁆𑀘𑀦𑀸𑀬𑀁, 𑀧𑀭𑀺𑀯𑀸𑀭𑀺𑀢𑁄 𑀤𑁂𑀯𑀢𑀸𑀳𑀺 𑀩𑀳𑀽𑀳𑀺;

𑀥𑀫𑁆𑀫𑀺𑀁 𑀓𑀣𑀁 𑀪𑀸𑀲𑀢𑀺 𑀲𑀘𑁆𑀘𑀦𑀸𑀫𑁄, 𑀲𑀓𑀲𑁆𑀫𑀺𑀫𑀸𑀘𑁂𑀭𑀓𑁂 𑀅𑀧𑁆𑀧𑀫𑀢𑁆𑀢𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀧𑀺𑀦𑀘𑁆𑀘𑀦𑀸𑀬𑀦𑁆𑀢𑀺 𑀓𑀧𑀻𑀦𑀁 𑀯𑀸𑀦𑀭𑀸𑀦𑀁 𑀦𑀘𑁆𑀘𑀦𑁂𑀦 ‘‘𑀓𑀧𑀺𑀦𑀘𑁆𑀘𑀦𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀧𑀤𑁂𑀲𑁂. 𑀲𑀘𑁆𑀘𑀦𑀸𑀫𑁄𑀢𑀺 𑀛𑀸𑀬𑀻 𑀲𑀼𑀲𑀻𑀮𑁄 𑀅𑀭𑀳𑀸 𑀯𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀳𑀺 𑀕𑀼𑀡𑀦𑀸𑀫𑁂𑀳𑀺 𑀬𑀸𑀣𑀸𑀯𑀦𑀸𑀫𑁄 𑀅𑀯𑀺𑀧𑀭𑀻𑀢𑀦𑀸𑀫𑁄 ¶ .

𑀏𑀯𑀁 𑀧𑁂𑀢𑁂𑀦 𑀯𑀼𑀢𑁆𑀢𑁂 𑀭𑀸𑀚𑀸 𑀢𑀸𑀯𑀤𑁂𑀯 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑁋

‘‘𑀢𑀣𑀸𑀳𑀁 𑀓𑀲𑁆𑀲𑀸𑀫𑀺 𑀕𑀦𑁆𑀢𑁆𑀯𑀸 𑀇𑀤𑀸𑀦𑀺, 𑀅𑀘𑁆𑀙𑀸𑀤𑀬𑀺𑀲𑁆𑀲𑀁 𑀲𑀫𑀡𑀁 𑀬𑀼𑀕𑁂𑀦;

𑀧𑀝𑀺𑀕𑁆𑀕𑀳𑀻𑀢𑀸𑀦𑀺 𑀘 𑀢𑀸𑀦𑀺 𑀅𑀲𑁆𑀲𑀼, 𑀢𑀼𑀯𑀜𑁆𑀘 𑀧𑀲𑁆𑀲𑁂𑀫𑀼 𑀲𑀦𑁆𑀦𑀤𑁆𑀥𑀤𑀼𑀲𑁆𑀲’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀓𑀲𑁆𑀲𑀸𑀫𑀻𑀢𑀺 𑀓𑀭𑀺𑀲𑁆𑀲𑀸𑀫𑀺.

𑀅𑀣 𑀧𑁂𑀢𑁄 ‘‘𑀤𑁂𑀯𑀢𑀸𑀦𑀁 𑀣𑁂𑀭𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀦𑀸𑀬𑀁 𑀉𑀧𑀲𑀗𑁆𑀓𑀫𑀦𑀓𑀸𑀮𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀫𑀸 ¶ 𑀅𑀓𑁆𑀔𑀡𑁂 𑀧𑀩𑁆𑀩𑀚𑀺𑀢𑀁 𑀉𑀧𑀸𑀕𑀫𑀺, 𑀲𑀸𑀥𑀼 𑀯𑁄 𑀮𑀺𑀘𑁆𑀙𑀯𑀺 𑀦𑁂𑀲 𑀥𑀫𑁆𑀫𑁄;

𑀢𑀢𑁄 𑀘 𑀓𑀸𑀮𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀢𑀢𑁆𑀣𑁂𑀯 𑀧𑀲𑁆𑀲𑀸𑀳𑀺 𑀭𑀳𑁄 𑀦𑀺𑀲𑀺𑀦𑁆𑀦’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀸𑀥𑀽𑀢𑀺 𑀆𑀬𑀸𑀘𑀦𑁂 𑀦𑀺𑀧𑀸𑀢𑁄. 𑀯𑁄 𑀮𑀺𑀘𑁆𑀙𑀯𑀺 𑀦𑁂𑀲 𑀥𑀫𑁆𑀫𑁄𑀢𑀺, 𑀮𑀺𑀘𑁆𑀙𑀯𑀺𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀭𑀸𑀚𑀽𑀦𑀁 𑀏𑀲 𑀥𑀫𑁆𑀫𑁄 𑀦 𑀳𑁄𑀢𑀺, 𑀬𑀁 𑀅𑀓𑀸𑀮𑁂 𑀉𑀧𑀲𑀗𑁆𑀓𑀫𑀦𑀁. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂.

𑀏𑀯𑀁 𑀧𑁂𑀢𑁂𑀦 𑀯𑀼𑀢𑁆𑀢𑁂 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀫𑁂𑀯 𑀕𑀦𑁆𑀢𑁆𑀯𑀸 𑀧𑀼𑀦 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀅𑀝𑁆𑀞 𑀯𑀢𑁆𑀣𑀼𑀬𑀼𑀕𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀇𑀫𑀸𑀦𑀺, 𑀪𑀦𑁆𑀢𑁂, 𑀅𑀝𑁆𑀞 𑀯𑀢𑁆𑀣𑀬𑀼𑀕𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀸’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 ‘‘𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀢𑁆𑀯𑀁 𑀅𑀤𑀸𑀦𑀲𑀻𑀮𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀳𑁂𑀞𑀦𑀚𑀸𑀢𑀺𑀓𑁄𑀯 𑀓𑀣𑀁 𑀧𑀡𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀤𑀸𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀧𑁂𑀢𑁂𑀦 𑀲𑀫𑀸𑀕𑀫𑀁, 𑀢𑁂𑀦 𑀘 𑀅𑀢𑁆𑀢𑀦𑀸 𑀘 𑀓𑀣𑀺𑀢𑀁 𑀲𑀩𑁆𑀩𑀁 𑀣𑁂𑀭𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀧𑁂𑀢𑀲𑁆𑀲 𑀉𑀤𑁆𑀤𑀺𑀲𑀺. 𑀢𑁂𑀦 𑀧𑁂𑀢𑁄 𑀤𑀺𑀩𑁆𑀩𑀯𑀢𑁆𑀣𑀥𑀭𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀅𑀲𑁆𑀲𑀸𑀭𑀼𑀴𑁆𑀳𑁄 𑀣𑁂𑀭𑀲𑁆𑀲 𑀘 𑀭𑀜𑁆𑀜𑁄 𑀘 𑀧𑀼𑀭𑀢𑁄 𑀧𑀸𑀢𑀼𑀪𑀯𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀧𑀘𑁆𑀘𑀓𑁆𑀔𑀢𑁄 𑀯𑀢 𑀫𑀬𑀸 𑀓𑀫𑁆𑀫𑀨𑀮𑀁 𑀤𑀺𑀝𑁆𑀞𑀁, 𑀦 𑀤𑀸𑀦𑀸𑀳𑀁 𑀧𑀸𑀧𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀼𑀜𑁆𑀜𑀫𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀧𑁂𑀢𑁂𑀦 𑀲𑀓𑁆𑀔𑀺𑀁 𑀅𑀓𑀸𑀲𑀺. 𑀲𑁄 𑀘 𑀧𑁂𑀢𑁄 ‘‘𑀲𑀘𑁂, 𑀢𑁆𑀯𑀁 𑀮𑀺𑀘𑁆𑀙𑀯𑀺𑀭𑀸𑀚, 𑀇𑀢𑁄 𑀧𑀝𑁆𑀞𑀸𑀬 𑀅𑀥𑀫𑁆𑀫𑀁 𑀧𑀳𑀸𑀬 𑀥𑀫𑁆𑀫𑀁 𑀘𑀭𑀲𑀺, 𑀏𑀯𑀸𑀳𑀁 𑀢𑀯 𑀲𑀓𑁆𑀔𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀲𑀦𑁆𑀢𑀺𑀓𑀜𑁆𑀘 𑀢𑁂 𑀆𑀕𑀫𑀺𑀲𑁆𑀲𑀸𑀫𑀺, 𑀲𑀽𑀮𑀸𑀯𑀼𑀢𑀜𑁆𑀘 𑀧𑀼𑀭𑀺𑀲𑀁 𑀲𑀻𑀖𑀁 𑀲𑀽𑀮𑀢𑁄 𑀫𑁄𑀘𑁂𑀳𑀺, 𑀏𑀯𑀁 𑀲𑁄 𑀚𑀻𑀯𑀺𑀢𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀁 𑀘𑀭𑀦𑁆𑀢𑁄 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀺, 𑀣𑁂𑀭𑀜𑁆𑀘 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 ¶ 𑀧𑀼𑀜𑁆𑀜𑀸𑀦𑀺 ¶ 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀕𑀢𑁄.

𑀅𑀣 𑀭𑀸𑀚𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑁂 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀲𑀽𑀮𑀢𑁄 𑀫𑁄𑀘𑁂𑀢𑁆𑀯𑀸 ‘‘𑀇𑀫𑀁 𑀅𑀭𑁄𑀕𑀁 𑀓𑀭𑁄𑀣𑀸’’𑀢𑀺 𑀢𑀺𑀓𑀺𑀘𑁆𑀙𑀓𑁂 𑀆𑀡𑀸𑀧𑁂𑀲𑀺. 𑀣𑁂𑀭𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀦𑀺𑀭𑀬𑀕𑀸𑀫𑀺𑀓𑀫𑁆𑀫𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀦𑀺𑀭𑀬𑀢𑁄 𑀫𑀼𑀢𑁆𑀢𑀻’’𑀢𑀺. 𑀲𑀺𑀬𑀸, 𑀫𑀳𑀸𑀭𑀸𑀚, 𑀲𑀘𑁂 𑀉𑀴𑀸𑀭𑀁 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀫𑀼𑀘𑁆𑀘𑀢𑀻𑀢𑀺 ¶ 𑀯𑀢𑁆𑀯𑀸 𑀣𑁂𑀭𑁄 𑀭𑀸𑀚𑀸𑀦𑀁 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑁄 𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀺, 𑀲𑀽𑀮𑀸𑀯𑀼𑀢𑁄 𑀧𑀦 𑀧𑀼𑀭𑀺𑀲𑁄 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀢𑀣𑀸𑀢𑀺 𑀯𑀢𑁆𑀯𑀸 𑀅𑀕𑀫𑀸𑀲𑀺 𑀢𑀢𑁆𑀣, 𑀧𑀭𑀺𑀯𑀸𑀭𑀺𑀢𑁄 𑀤𑀸𑀲𑀕𑀡𑁂𑀦 𑀮𑀺𑀘𑁆𑀙𑀯𑀺;

𑀲𑁄 𑀢𑀁 𑀦𑀕𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀸𑀲𑀽𑀧𑀕𑀘𑁆𑀙𑀺𑀢𑁆𑀣 𑀲𑀓𑁂 𑀦𑀺𑀯𑁂𑀲𑀦𑁂.

‘‘𑀢𑀢𑁄 𑀘 𑀓𑀸𑀮𑁂 𑀕𑀺𑀳𑀺𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸,

𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘 𑀔𑀡𑀁 𑀮𑀪𑀺𑀢𑁆𑀯𑀸;

𑀯𑀺𑀘𑁂𑀬𑁆𑀬 𑀧𑁂𑀴𑀸𑀢𑁄 𑀘 𑀬𑀼𑀕𑀸𑀦𑀺 𑀅𑀝𑁆𑀞,

𑀕𑀸𑀳𑀸𑀧𑀬𑀻 𑀤𑀸𑀲𑀕𑀡𑁂𑀦 𑀮𑀺𑀘𑁆𑀙𑀯𑀺.

‘‘𑀲𑁄 𑀢𑀁 𑀧𑀤𑁂𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀢𑀁 𑀅𑀤𑁆𑀤𑀲 𑀲𑀫𑀡𑀁 𑀲𑀦𑁆𑀢𑀘𑀺𑀢𑁆𑀢𑀁;

𑀧𑀝𑀺𑀓𑁆𑀓𑀦𑁆𑀢𑀁 𑀕𑁄𑀘𑀭𑀢𑁄 𑀦𑀺𑀯𑀢𑁆𑀢𑀁, 𑀲𑀻𑀢𑀺𑀪𑀽𑀢𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁.

‘‘𑀢𑀫𑁂𑀦𑀫𑀯𑁄𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀅𑀧𑁆𑀧𑀸𑀩𑀸𑀥𑀁 𑀨𑀸𑀲𑀼𑀯𑀺𑀳𑀸𑀭𑀜𑁆𑀘 𑀧𑀼𑀘𑁆𑀙𑀺;

𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀳𑀁 𑀪𑀤𑀦𑁆𑀢𑁂, 𑀚𑀸𑀦𑀦𑁆𑀢𑀺 𑀫𑀁 𑀮𑀺𑀘𑁆𑀙𑀯𑀺 𑀅𑀫𑁆𑀩𑀲𑀓𑁆𑀓𑀭𑁄.

‘‘𑀇𑀫𑀸𑀦𑀺 ¶ 𑀫𑁂 𑀅𑀝𑁆𑀞 𑀬𑀼𑀕𑀸 𑀲𑀼𑀪𑀸𑀦𑀺, 𑀧𑀝𑀺𑀕𑁆𑀕𑀡𑁆𑀳 𑀪𑀦𑁆𑀢𑁂 𑀧𑀤𑀤𑀸𑀫𑀺 𑀢𑀼𑀬𑁆𑀳𑀁;

𑀢𑁂𑀦𑁂𑀯 𑀅𑀢𑁆𑀣𑁂𑀦 𑀇𑀥𑀸𑀕𑀢𑁄𑀲𑁆𑀫𑀺, 𑀬𑀣𑀸 𑀅𑀳𑀁 𑀅𑀢𑁆𑀢𑀫𑀦𑁄 𑀪𑀯𑁂𑀬𑁆𑀬𑀦𑁆𑀢𑀺.

‘‘𑀤𑀽𑀭𑀢𑁄𑀯 𑀲𑀫𑀡𑀸 𑀩𑁆𑀭𑀸𑀳𑁆𑀫𑀡𑀸 𑀘, 𑀦𑀺𑀯𑁂𑀲𑀦𑀁 𑀢𑁂 𑀧𑀭𑀺𑀯𑀚𑁆𑀚𑀬𑀦𑁆𑀢𑀺;

𑀧𑀢𑁆𑀢𑀸𑀦𑀺 𑀪𑀺𑀚𑁆𑀚𑀦𑁆𑀢𑀺 𑀘 𑀢𑁂 𑀦𑀺𑀯𑁂𑀲𑀦𑁂, 𑀲𑀗𑁆𑀖𑀸𑀝𑀺𑀬𑁄 𑀘𑀸𑀧𑀺 𑀯𑀺𑀤𑀸𑀮𑀬𑀦𑁆𑀢𑀺.

‘‘𑀅𑀣𑀸𑀧𑀭𑁂 ¶ ¶ 𑀧𑀸𑀤𑀓𑀼𑀞𑀸𑀭𑀺𑀓𑀸𑀳𑀺, 𑀅𑀯𑀁𑀲𑀺𑀭𑀸 𑀲𑀫𑀡𑀸 𑀧𑀸𑀢𑀬𑀦𑁆𑀢𑀺;

𑀏𑀢𑀸𑀤𑀺𑀲𑀁 𑀧𑀩𑁆𑀩𑀚𑀺𑀢𑀸 𑀯𑀺𑀳𑁂𑀲𑀁, 𑀢𑀬𑀸 𑀓𑀢𑀁 𑀲𑀫𑀡𑀸 𑀧𑀸𑀧𑀼𑀡𑀦𑁆𑀢𑀺.

‘‘𑀢𑀺𑀡𑁂𑀦 𑀢𑁂𑀮𑀫𑁆𑀧𑀺 𑀦 𑀢𑁆𑀯𑀁 𑀅𑀤𑀸𑀲𑀺, 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀫𑁆𑀧𑀺 𑀦 𑀧𑀸𑀯𑀤𑀸𑀲𑀺;

𑀅𑀦𑁆𑀥𑀲𑁆𑀲 𑀤𑀡𑁆𑀟𑀁 𑀲𑀬𑀫𑀸𑀤𑀺𑀬𑀸𑀲𑀺, 𑀏𑀢𑀸𑀤𑀺𑀲𑁄 𑀓𑀤𑀭𑀺𑀬𑁄 𑀅𑀲𑀁𑀯𑀼𑀢𑁄 𑀢𑀼𑀯𑀁;

𑀅𑀣 𑀢𑁆𑀯𑀁 𑀓𑁂𑀦 𑀯𑀡𑁆𑀡𑁂𑀦 𑀓𑀺𑀫𑁂𑀯 𑀤𑀺𑀲𑁆𑀯𑀸, 𑀅𑀫𑁆𑀳𑁂𑀳𑀺 𑀲𑀳 𑀲𑀁𑀯𑀺𑀪𑀸𑀕𑀁 𑀓𑀭𑁄𑀲𑀻𑀢𑀺.

‘‘𑀧𑀘𑁆𑀘𑁂𑀫𑀺 𑀪𑀦𑁆𑀢𑁂 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀯𑀺𑀳𑁂𑀲𑀬𑀺𑀁 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘;

𑀔𑀺𑀟𑁆𑀟𑀢𑁆𑀣𑀺𑀓𑁄 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀏𑀢𑀫𑁆𑀧𑀺 𑀫𑁂 𑀤𑀼𑀓𑁆𑀓𑀝𑀫𑁂𑀯 𑀪𑀦𑁆𑀢𑁂.

𑀔𑀺𑀟𑁆𑀟𑀸𑀬 𑀬𑀓𑁆𑀔𑁄 𑀧𑀲𑀯𑀺𑀢𑁆𑀯𑀸 𑀧𑀸𑀧𑀁, 𑀯𑁂𑀤𑁂𑀢𑀺 𑀤𑀼𑀓𑁆𑀔𑀁 𑀅𑀲𑀫𑀢𑁆𑀢𑀪𑁄𑀕𑀻;

𑀤𑀳𑀭𑁄 ¶ 𑀬𑀼𑀯𑀸 𑀦𑀕𑁆𑀕𑀦𑀺𑀬𑀲𑁆𑀲 𑀪𑀸𑀕𑀻, 𑀓𑀺𑀁 𑀲𑀼 𑀢𑀢𑁄 𑀤𑀼𑀓𑁆𑀔𑀢𑀭𑀲𑁆𑀲 𑀳𑁄𑀢𑀺.

‘‘𑀢𑀁 𑀤𑀺𑀲𑁆𑀯𑀸 𑀲𑀁𑀯𑁂𑀕𑀫𑀮𑀢𑁆𑀣𑀁 𑀪𑀦𑁆𑀢𑁂, 𑀢𑀧𑁆𑀧𑀘𑁆𑀘𑀬𑀸 𑀯𑀸𑀧𑀺 𑀤𑀤𑀸𑀫𑀺 𑀤𑀸𑀦𑀁;

𑀧𑀝𑀺𑀕𑁆𑀕𑀡𑁆𑀳 𑀪𑀦𑁆𑀢𑁂 𑀯𑀢𑁆𑀣𑀬𑀼𑀕𑀸𑀦𑀺 𑀅𑀝𑁆𑀞, 𑀬𑀓𑁆𑀔𑀲𑁆𑀲𑀺𑀫𑀸 𑀕𑀘𑁆𑀙𑀦𑁆𑀢𑀼 𑀤𑀓𑁆𑀔𑀺𑀡𑀸𑀬𑁄𑀢𑀺.

‘‘𑀅𑀤𑁆𑀥𑀸 𑀳𑀺 𑀤𑀸𑀦𑀁 𑀩𑀳𑀼𑀥𑀸 𑀧𑀲𑀢𑁆𑀣𑀁, 𑀤𑀤𑀢𑁄 𑀘 𑀢𑁂 𑀅𑀓𑁆𑀔𑀬𑀥𑀫𑁆𑀫𑀫𑀢𑁆𑀣𑀼;

𑀧𑀝𑀺𑀕𑀡𑁆𑀳𑀸𑀫𑀺 𑀢𑁂 𑀯𑀢𑁆𑀣𑀬𑀼𑀕𑀸𑀦𑀺 𑀅𑀝𑁆𑀞, 𑀬𑀓𑁆𑀔𑀲𑁆𑀲𑀺𑀫𑀸 𑀕𑀘𑁆𑀙𑀦𑁆𑀢𑀼 𑀤𑀓𑁆𑀔𑀺𑀡𑀸𑀬𑁄𑀢𑀺.

‘‘𑀢𑀢𑁄 ¶ 𑀳𑀺 𑀲𑁄 𑀆𑀘𑀫𑀬𑀺𑀢𑁆𑀯𑀸 𑀮𑀺𑀘𑁆𑀙𑀯𑀺, 𑀣𑁂𑀭𑀲𑁆𑀲 𑀤𑀢𑁆𑀯𑀸𑀦 𑀬𑀼𑀕𑀸𑀦𑀺 𑀅𑀝𑁆𑀞;

𑀧𑀝𑀺𑀕𑁆𑀕𑀳𑀻𑀢𑀸𑀦𑀺 𑀘 𑀢𑀸𑀦𑀺 𑀅𑀲𑁆𑀲𑀼, 𑀬𑀓𑁆𑀔𑀜𑁆𑀘 𑀧𑀲𑁆𑀲𑁂𑀣 𑀲𑀦𑁆𑀦𑀤𑁆𑀥𑀤𑀼𑀲𑁆𑀲𑀁.

‘‘𑀢𑀫𑀤𑁆𑀤𑀲𑀸 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀁, 𑀆𑀚𑀜𑁆𑀜𑀫𑀸𑀭𑀽𑀴𑁆𑀳𑀫𑀼𑀴𑀸𑀭𑀯𑀡𑁆𑀡𑀁;

𑀅𑀮𑀗𑁆𑀓𑀢𑀁 𑀲𑀸𑀥𑀼𑀦𑀺𑀯𑀢𑁆𑀣𑀤𑀼𑀲𑁆𑀲𑀁, 𑀧𑀭𑀺𑀯𑀸𑀭𑀺𑀢𑀁 𑀬𑀓𑁆𑀔𑀫𑀳𑀺𑀤𑁆𑀥𑀺𑀧𑀢𑁆𑀢𑀁.

‘‘𑀲𑁄 𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄, 𑀧𑀳𑀝𑁆𑀞𑀘𑀺𑀢𑁆𑀢𑁄 𑀘 𑀲𑀼𑀪𑀕𑁆𑀕𑀭𑀽𑀧𑁄;

𑀓𑀫𑁆𑀫𑀜𑁆𑀘 𑀤𑀺𑀲𑁆𑀯𑀸𑀦 𑀫𑀳𑀸𑀯𑀺𑀧𑀸𑀓𑀁, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀘𑀓𑁆𑀔𑀼𑀦𑀸 𑀲𑀘𑁆𑀙𑀺𑀓𑀢𑁆𑀯𑀸.

‘‘𑀢𑀫𑁂𑀦𑀫𑀯𑁄𑀘 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀤𑀲𑁆𑀲𑀸𑀫𑀺 𑀤𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀦 𑀘𑀸𑀧𑀺 𑀫𑁂 𑀓𑀺𑀜𑁆𑀘𑀺 𑀅𑀤𑁂𑀬𑁆𑀬𑀫𑀢𑁆𑀣𑀺, 𑀢𑀼𑀯𑀜𑁆𑀘 𑀫𑁂 𑀬𑀓𑁆𑀔 𑀩𑀳𑀽𑀧𑀓𑀸𑀭𑁄𑀢𑀺.

‘‘𑀢𑀼𑀯𑀜𑁆𑀘 𑀫𑁂 𑀮𑀺𑀘𑁆𑀙𑀯𑀺 𑀏𑀓𑀤𑁂𑀲𑀁, 𑀅𑀤𑀸𑀲𑀺 𑀤𑀸𑀦𑀸𑀦𑀺 𑀅𑀫𑁄𑀖𑀫𑁂𑀢𑀁;

𑀲𑁆𑀯𑀸𑀳𑀁 ¶ 𑀓𑀭𑀺𑀲𑁆𑀲𑀸𑀫𑀺 𑀢𑀬𑀸𑀯 𑀲𑀓𑁆𑀔𑀺𑀁, 𑀅𑀫𑀸𑀦𑀼𑀲𑁄 𑀫𑀸𑀦𑀼𑀲𑀓𑁂𑀦 𑀲𑀤𑁆𑀥𑀺𑀦𑁆𑀢𑀺.

‘‘𑀕𑀢𑀻 𑀘 𑀩𑀦𑁆𑀥𑀽 𑀘 𑀧𑀭𑀸𑀬𑀡𑀜𑁆𑀘, 𑀫𑀺𑀢𑁆𑀢𑁄 𑀫𑀫𑀸𑀲𑀺 𑀅𑀣 𑀤𑁂𑀯𑀢𑀸 𑀫𑁂;

𑀬𑀸𑀘𑀸𑀫𑀺 𑀢𑀁 𑀧𑀜𑁆𑀚𑀮𑀺𑀓𑁄 𑀪𑀯𑀺𑀢𑁆𑀯𑀸, 𑀇𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀧𑀼𑀦𑀧𑀺 𑀤𑀝𑁆𑀞𑀼𑀦𑁆𑀢𑀺.

‘‘𑀲𑀘𑁂 𑀢𑀼𑀯𑀁 𑀅𑀲𑁆𑀲𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀓𑀤𑀭𑀺𑀬𑀭𑀽𑀧𑁄 𑀯𑀺𑀧𑁆𑀧𑀝𑀺𑀧𑀦𑁆𑀦𑀘𑀺𑀢𑁆𑀢𑁄;

𑀢𑁆𑀯𑀁 𑀦𑁂𑀯 𑀫𑀁 𑀮𑀘𑁆𑀙𑀲𑀺 𑀤𑀲𑁆𑀲𑀦𑀸𑀬, 𑀤𑀺𑀲𑁆𑀯𑀸 𑀘 𑀢𑀁 𑀦𑁄𑀧𑀺 𑀘 𑀆𑀮𑀧𑀺𑀲𑁆𑀲𑀁.

‘‘𑀲𑀘𑁂 ¶ 𑀧𑀦 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺 𑀥𑀫𑁆𑀫𑀕𑀸𑀭𑀯𑁄, 𑀤𑀸𑀦𑁂 𑀭𑀢𑁄 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑁄;

𑀑𑀧𑀸𑀦𑀪𑀽𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁, 𑀏𑀯𑀁 𑀫𑀫𑀁 𑀮𑀘𑁆𑀙𑀲𑀺 𑀤𑀲𑁆𑀲𑀦𑀸𑀬.

‘‘𑀤𑀺𑀲𑁆𑀯𑀸 𑀘 𑀢𑀁 𑀆𑀮𑀧𑀺𑀲𑁆𑀲𑀁 𑀪𑀤𑀦𑁆𑀢𑁂, 𑀇𑀫𑀜𑁆𑀘 𑀲𑀽𑀮𑀢𑁄 𑀮𑀳𑀼𑀁 𑀧𑀫𑀼𑀜𑁆𑀘;

𑀬𑀢𑁄𑀦𑀺𑀤𑀸𑀦𑀁 𑀅𑀓𑀭𑀺𑀫𑁆𑀳 𑀲𑀓𑁆𑀔𑀺𑀁, 𑀫𑀜𑁆𑀜𑀸𑀫𑀺 𑀲𑀽𑀮𑀸𑀯𑀼𑀢𑀓𑀲𑁆𑀲 𑀓𑀸𑀭𑀡𑀸.

‘‘𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀓𑀭𑀺𑀫𑁆𑀳 𑀲𑀓𑁆𑀔𑀺𑀁, 𑀅𑀬𑀜𑁆𑀘 𑀲𑀽𑀮𑀢𑁄 𑀮𑀳𑀼𑀁 𑀧𑀫𑀼𑀢𑁆𑀢𑁄;

𑀲𑀓𑁆𑀓𑀘𑁆𑀘 𑀥𑀫𑁆𑀫𑀸𑀦𑀺 𑀲𑀫𑀸𑀘𑀭𑀦𑁆𑀢𑁄, 𑀫𑀼𑀘𑁆𑀘𑁂𑀬𑁆𑀬 𑀲𑁄 𑀦𑀺𑀭𑀬𑀸 𑀘 𑀢𑀫𑁆𑀳𑀸;

𑀓𑀫𑁆𑀫𑀁 𑀲𑀺𑀬𑀸 𑀅𑀜𑁆𑀜𑀢𑁆𑀭 𑀯𑁂𑀤𑀦𑀻𑀬𑀁.

‘‘𑀓𑀧𑁆𑀧𑀺𑀢𑀓𑀜𑁆𑀘 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀢𑁂𑀦𑁂𑀯 𑀲𑀳 𑀲𑀁𑀯𑀺𑀪𑀚𑀺𑀢𑁆𑀯𑀸 𑀓𑀸𑀮𑁂;

𑀲𑀬𑀁 𑀫𑀼𑀔𑁂𑀦𑀽𑀧𑀦𑀺𑀲𑀚𑁆𑀚 𑀧𑀼𑀘𑁆𑀙, 𑀲𑁄 𑀢𑁂 𑀅𑀓𑁆𑀔𑀺𑀲𑁆𑀲𑀢𑀺 𑀏𑀢𑀫𑀢𑁆𑀣𑀁.

‘‘𑀢𑀫𑁂𑀯 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀧𑀼𑀘𑁆𑀙𑀲𑁆𑀲𑀼 𑀅𑀜𑁆𑀜𑀢𑁆𑀣𑀺𑀓𑁄 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑁄;

𑀲𑁄 𑀢𑁂 𑀲𑀼𑀢𑀁 𑀅𑀲𑀼𑀢𑀜𑁆𑀘𑀸𑀧𑀺 𑀥𑀫𑁆𑀫𑀁, 𑀲𑀩𑁆𑀩𑀫𑁆𑀧𑀺 𑀅𑀓𑁆𑀔𑀺𑀲𑁆𑀲𑀢𑀺 𑀬𑀣𑀸 𑀧𑀚𑀸𑀦𑀦𑁆𑀢𑀺.

‘‘𑀲𑁄 ¶ 𑀢𑀢𑁆𑀣 𑀭𑀳𑀲𑁆𑀲𑀁 𑀲𑀫𑀼𑀮𑁆𑀮𑀧𑀺𑀢𑁆𑀯𑀸, 𑀲𑀓𑁆𑀔𑀺𑀁 𑀓𑀭𑀺𑀢𑁆𑀯𑀸𑀦 𑀅𑀫𑀸𑀦𑀼𑀲𑁂𑀦;

𑀧𑀓𑁆𑀓𑀸𑀫𑀺 𑀲𑁄 𑀮𑀺𑀘𑁆𑀙𑀯𑀺𑀦𑀁 𑀲𑀓𑀸𑀲𑀁, 𑀅𑀣 𑀩𑁆𑀭𑀯𑀺 𑀧𑀭𑀺𑀲𑀁 𑀲𑀦𑁆𑀦𑀺𑀲𑀺𑀦𑁆𑀦𑀁.

‘‘‘𑀲𑀼𑀡𑀦𑁆𑀢𑀼 ¶ 𑀪𑁄𑀦𑁆𑀢𑁄 𑀫𑀫 𑀏𑀓𑀯𑀸𑀓𑁆𑀬𑀁, 𑀯𑀭𑀁 𑀯𑀭𑀺𑀲𑁆𑀲𑀁 𑀮𑀪𑀺𑀲𑁆𑀲𑀸𑀫𑀺 𑀅𑀢𑁆𑀣𑀁;

𑀲𑀽𑀮𑀸𑀯𑀼𑀢𑁄 𑀧𑀼𑀭𑀺𑀲𑁄 𑀮𑀼𑀤𑁆𑀤𑀓𑀫𑁆𑀫𑁄, 𑀧𑀡𑀺𑀳𑀺𑀢𑀤𑀡𑁆𑀟𑁄 𑀅𑀦𑀼𑀲𑀢𑁆𑀢𑀭𑀽𑀧𑁄.

‘‘‘𑀏𑀢𑁆𑀢𑀸𑀯𑀢𑀸 𑀯𑀻𑀲𑀢𑀺𑀭𑀢𑁆𑀢𑀺𑀫𑀢𑁆𑀢𑀸, 𑀬𑀢𑁄 𑀆𑀯𑀼𑀢𑁄 𑀦𑁂𑀯 𑀚𑀻𑀯𑀢𑀺 𑀦 𑀫𑀢𑁄;

𑀢𑀸𑀳𑀁 𑀫𑁄𑀘𑀬𑀺𑀲𑁆𑀲𑀸𑀫𑀺 𑀤𑀸𑀦𑀺, 𑀬𑀣𑀸𑀫𑀢𑀺𑀁 𑀅𑀦𑀼𑀚𑀸𑀦𑀸𑀢𑀼 𑀲𑀗𑁆𑀖𑁄’𑀢𑀺.

‘‘‘𑀏𑀢𑀜𑁆𑀘 𑀅𑀜𑁆𑀜𑀜𑁆𑀘 𑀮𑀳𑀼𑀁 𑀧𑀫𑀼𑀜𑁆𑀘, 𑀓𑁄 𑀢𑀁 𑀯𑀤𑁂𑀣 𑀢𑀣𑀸 𑀓𑀭𑁄𑀦𑁆𑀢𑀁;

𑀬𑀣𑀸 𑀧𑀚𑀸𑀦𑀸𑀲𑀺 𑀢𑀣𑀸 𑀓𑀭𑁄𑀳𑀺, 𑀬𑀣𑀸𑀫𑀢𑀺𑀁 𑀅𑀦𑀼𑀚𑀸𑀦𑀸𑀢𑀺 𑀲𑀗𑁆𑀖𑁄’𑀢𑀺.

‘‘𑀲𑁄 ¶ 𑀢𑀁 𑀧𑀤𑁂𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀲𑀽𑀮𑀸𑀯𑀼𑀢𑀁 𑀫𑁄𑀘𑀬𑀺 𑀔𑀺𑀧𑁆𑀧𑀫𑁂𑀯;

𑀫𑀸 𑀪𑀸𑀬𑀺 𑀲𑀫𑁆𑀫𑀸𑀢𑀺 𑀘 𑀢𑀁 𑀅𑀯𑁄𑀘, 𑀢𑀺𑀓𑀺𑀘𑁆𑀙𑀓𑀸𑀦𑀜𑁆𑀘 𑀉𑀧𑀝𑁆𑀞𑀧𑁂𑀲𑀺.

‘‘𑀓𑀧𑁆𑀧𑀺𑀢𑀓𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀢𑁂𑀦𑁂𑀯 𑀲𑀳 𑀲𑀁𑀯𑀺𑀪𑀚𑀺𑀢𑁆𑀯𑀸 𑀓𑀸𑀮𑁂;

𑀲𑀬𑀁 𑀫𑀼𑀔𑁂𑀦𑀽𑀧𑀦𑀺𑀲𑀚𑁆𑀚 𑀮𑀺𑀘𑁆𑀙𑀯𑀺, 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀣 𑀦𑀁 𑀓𑀸𑀭𑀡𑀢𑁆𑀣𑀺𑀓𑁄.

‘‘𑀲𑀽𑀮𑀸𑀯𑀼𑀢𑁄 𑀧𑀼𑀭𑀺𑀲𑁄 𑀮𑀼𑀤𑁆𑀤𑀓𑀫𑁆𑀫𑁄, 𑀧𑀡𑀻𑀢𑀤𑀡𑁆𑀟𑁄 𑀅𑀦𑀼𑀲𑀢𑁆𑀢𑀭𑀽𑀧𑁄;

𑀏𑀢𑁆𑀢𑀸𑀯𑀢𑀸 𑀯𑀻𑀲𑀢𑀺𑀭𑀢𑁆𑀢𑀺𑀫𑀢𑁆𑀢𑀸, 𑀬𑀢𑁄 𑀆𑀯𑀼𑀢𑁄 𑀦𑁂𑀯 𑀚𑀻𑀯𑀢𑀺 𑀦 𑀫𑀢𑁄.

‘‘𑀲𑁄 𑀫𑁄𑀘𑀺𑀢𑁄 𑀕𑀦𑁆𑀢𑁆𑀯𑀸 𑀫𑀬𑀸 𑀇𑀤𑀸𑀦𑀺, 𑀏𑀢𑀲𑁆𑀲 𑀬𑀓𑁆𑀔𑀲𑁆𑀲 𑀯𑀘𑁄 𑀳𑀺 𑀪𑀦𑁆𑀢𑁂;

𑀲𑀺𑀬𑀸 𑀦𑀼 𑀔𑁄 𑀓𑀸𑀭𑀡𑀁 𑀓𑀺𑀜𑁆𑀘𑀺𑀤𑁂𑀯, 𑀬𑁂𑀦 𑀲𑁄 𑀦𑀺𑀭𑀬𑀁 𑀦𑁄 𑀯𑀚𑁂𑀬𑁆𑀬.

‘‘𑀆𑀘𑀺𑀓𑁆𑀔 ¶ 𑀪𑀦𑁆𑀢𑁂 𑀬𑀤𑀺 𑀅𑀢𑁆𑀣𑀺 𑀳𑁂𑀢𑀼, 𑀲𑀤𑁆𑀥𑀸𑀬𑀺𑀓𑀁 𑀳𑁂𑀢𑀼𑀯𑀘𑁄 𑀲𑀼𑀡𑁄𑀫;

𑀦 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀯𑀺𑀦𑀸𑀲𑀫𑀢𑁆𑀣𑀺, 𑀅𑀯𑁂𑀤𑀬𑀺𑀢𑁆𑀯𑀸 𑀇𑀥 𑀩𑁆𑀬𑀦𑁆𑀢𑀺𑀪𑀸𑀯𑁄𑀢𑀺.

‘‘𑀲𑀘𑁂 𑀲 𑀥𑀫𑁆𑀫𑀸𑀦𑀺 𑀲𑀫𑀸𑀘𑀭𑁂𑀬𑁆𑀬, 𑀲𑀓𑁆𑀓𑀘𑁆𑀘 𑀭𑀢𑁆𑀢𑀺𑀦𑁆𑀤𑀺𑀯𑀫𑀧𑁆𑀧𑀫𑀢𑁆𑀢𑁄;

𑀫𑀼𑀘𑁆𑀘𑁂𑀬𑁆𑀬 𑀲𑁄 𑀦𑀺𑀭𑀬𑀸 𑀘 𑀢𑀫𑁆𑀳𑀸, 𑀓𑀫𑁆𑀫𑀁 𑀲𑀺𑀬𑀸 𑀅𑀜𑁆𑀜𑀢𑁆𑀭 𑀯𑁂𑀤𑀦𑀻𑀬𑀦𑁆𑀢𑀺.

‘‘𑀅𑀜𑁆𑀜𑀸𑀢𑁄 ¶ 𑀏𑀲𑁄 𑀧𑀼𑀭𑀺𑀲𑀲𑁆𑀲 𑀅𑀢𑁆𑀣𑁄, 𑀫𑀫𑀫𑁆𑀧𑀺 𑀤𑀸𑀦𑀺 𑀅𑀦𑀼𑀓𑀫𑁆𑀧 𑀪𑀦𑁆𑀢𑁂;

𑀅𑀦𑀼𑀲𑀸𑀲 𑀫𑀁 𑀑𑀯𑀤 𑀪𑀽𑀭𑀺𑀧𑀜𑁆𑀜, 𑀬𑀣𑀸 𑀅𑀳𑀁 𑀦𑁄 𑀦𑀺𑀭𑀬𑀁 𑀯𑀚𑁂𑀬𑁆𑀬𑀦𑁆𑀢𑀺.

‘‘𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀳𑀺, 𑀥𑀫𑁆𑀫𑀜𑁆𑀘 ¶ 𑀲𑀗𑁆𑀖𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀢𑀣𑁂𑀯 𑀲𑀺𑀓𑁆𑀔𑀸𑀬 𑀧𑀤𑀸𑀦𑀺 𑀧𑀜𑁆𑀘, 𑀅𑀔𑀡𑁆𑀟𑀨𑀼𑀮𑁆𑀮𑀸𑀦𑀺 𑀲𑀫𑀸𑀤𑀺𑀬𑀲𑁆𑀲𑀼.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀲𑁆𑀲𑀼 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀅𑀫𑀚𑁆𑀚𑀧𑁄 𑀫𑀸 𑀘 𑀫𑀼𑀲𑀸 𑀅𑀪𑀸𑀡𑀻, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀢𑀺 𑀢𑀼𑀝𑁆𑀞𑁄;

𑀇𑀫𑀜𑁆𑀘 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀯𑀭𑁂𑀦𑀼𑀧𑁂𑀢𑀁, 𑀲𑀫𑀸𑀤𑀺𑀬𑀸𑀳𑀺 𑀓𑀼𑀲𑀮𑀁 𑀲𑀼𑀔𑀼𑀤𑁆𑀭𑀬𑀁.

‘‘𑀘𑀻𑀯𑀭𑀁 ¶ 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀤𑀤𑀸𑀳𑀺 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀪𑀺𑀓𑁆𑀔𑀽𑀧𑀺 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀯𑀻𑀢𑀭𑀸𑀕𑁂 𑀩𑀳𑀼𑀲𑁆𑀲𑀼𑀢𑁂;

𑀢𑀧𑁆𑀧𑁂𑀳𑀺 𑀅𑀦𑁆𑀦𑀧𑀸𑀦𑁂𑀦, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺.

‘‘𑀏𑀯𑀜𑁆𑀘 ¶ 𑀥𑀫𑁆𑀫𑀸𑀦𑀺 𑀲𑀫𑀸𑀘𑀭𑀦𑁆𑀢𑁄, 𑀲𑀓𑁆𑀓𑀘𑁆𑀘 𑀭𑀢𑁆𑀢𑀺𑀦𑁆𑀤𑀺𑀯𑀫𑀧𑁆𑀧𑀫𑀢𑁆𑀢𑁄;

𑀫𑀼𑀜𑁆𑀘 𑀢𑀼𑀯𑀁 𑀦𑀺𑀭𑀬𑀸 𑀘 𑀢𑀫𑁆𑀳𑀸, 𑀓𑀫𑁆𑀫𑀁 𑀲𑀺𑀬𑀸 𑀅𑀜𑁆𑀜𑀢𑁆𑀭 𑀯𑁂𑀤𑀦𑀻𑀬𑀦𑁆𑀢𑀺.

‘‘𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀫𑀺, 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀢𑀣𑁂𑀯 𑀲𑀺𑀓𑁆𑀔𑀸𑀬 𑀧𑀤𑀸𑀦𑀺 𑀧𑀜𑁆𑀘, 𑀅𑀔𑀡𑁆𑀟𑀨𑀼𑀮𑁆𑀮𑀸𑀦𑀺 𑀲𑀫𑀸𑀤𑀺𑀬𑀸𑀫𑀺.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄;

𑀇𑀫𑀜𑁆𑀘 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀯𑀭𑁂𑀦𑀼𑀧𑁂𑀢𑀁, 𑀲𑀫𑀸𑀤𑀺𑀬𑀸𑀫𑀺 𑀓𑀼𑀲𑀮𑀁 𑀲𑀼𑀔𑀼𑀤𑁆𑀭𑀬𑀁.

‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

‘‘𑀪𑀺𑀓𑁆𑀔𑀽 ¶ 𑀘 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀯𑀻𑀢𑀭𑀸𑀕𑁂 𑀩𑀳𑀼𑀲𑁆𑀲𑀼𑀢𑁂;

𑀤𑀤𑀸𑀫𑀺 𑀦 𑀯𑀺𑀓𑀫𑁆𑀧𑀸𑀫𑀺, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀭𑀢𑁄𑀢𑀺.

‘‘𑀏𑀢𑀸𑀤𑀺𑀲𑁄 𑀮𑀺𑀘𑁆𑀙𑀯𑀺 𑀅𑀫𑁆𑀩𑀲𑀓𑁆𑀓𑀭𑁄, 𑀯𑁂𑀲𑀸𑀮𑀺𑀬𑀁 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄;

𑀲𑀤𑁆𑀥𑁄 𑀫𑀼𑀤𑀽 𑀓𑀸𑀭𑀓𑀭𑁄 𑀘 𑀪𑀺𑀓𑁆𑀔𑀼, 𑀲𑀗𑁆𑀖𑀜𑁆𑀘 𑀲𑀓𑁆𑀓𑀘𑁆𑀘 𑀢𑀤𑀸 𑀉𑀧𑀝𑁆𑀞𑀳𑀺.

‘‘𑀲𑀽𑀮𑀸𑀯𑀼𑀢𑁄 𑀘 𑀅𑀭𑁄𑀕𑁄 𑀳𑀼𑀢𑁆𑀯𑀸, 𑀲𑁂𑀭𑀻 𑀲𑀼𑀔𑀻 𑀧𑀩𑁆𑀩𑀚𑁆𑀚𑀁 𑀉𑀧𑀸𑀕𑀫𑀺;

𑀪𑀺𑀓𑁆𑀔𑀼𑀜𑁆𑀘 𑀆𑀕𑀫𑁆𑀫 𑀓𑀧𑁆𑀧𑀺𑀢𑀓𑀼𑀢𑁆𑀢𑀫𑀁, 𑀉𑀪𑁄𑀧𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀅𑀚𑁆𑀛𑀕𑀼𑀁.

‘‘𑀏𑀢𑀸𑀤𑀺𑀲𑀸 ¶ 𑀲𑀧𑁆𑀧𑀼𑀭𑀺𑀲𑀸𑀦 𑀲𑁂𑀯𑀦𑀸, 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀲𑀢𑀁 𑀯𑀺𑀚𑀸𑀦𑀢𑀁;

𑀲𑀽𑀮𑀸𑀯𑀼𑀢𑁄 𑀅𑀕𑁆𑀕𑀨𑀮𑀁 𑀅𑀨𑀲𑁆𑀲𑀬𑀺, 𑀨𑀮𑀁 𑀓𑀦𑀺𑀝𑁆𑀞𑀁 𑀧𑀦 𑀅𑀫𑁆𑀩𑀲𑀓𑁆𑀓𑀭𑁄’’𑀢𑀺. 𑁋

𑁫𑁫𑁭-𑁫𑁬𑁦. 𑀢𑀢𑁆𑀣 𑀯𑀸𑀲𑀽𑀧𑀕𑀘𑁆𑀙𑀺𑀢𑁆𑀣𑀸𑀢𑀺 𑀯𑀸𑀲𑀁 𑀉𑀧𑀕𑀘𑁆𑀙𑀺. 𑀕𑀺𑀳𑀺𑀓𑀺𑀘𑁆𑀘𑀸𑀦𑀻𑀢𑀺 𑀕𑁂𑀳𑀁 𑀆𑀯𑀲𑀦𑁆𑀢𑁂𑀦 𑀓𑀸𑀢𑀩𑁆𑀩𑀓𑀼𑀝𑀼𑀫𑁆𑀩𑀓𑀺𑀘𑁆𑀘𑀸𑀦𑀺. 𑀯𑀺𑀘𑁂𑀬𑁆𑀬𑀸𑀢𑀺 𑀲𑀼𑀦𑁆𑀤𑀭𑀯𑀢𑁆𑀣𑀕𑀳𑀡𑀢𑁆𑀣𑀁 𑀯𑀺𑀘𑀺𑀦𑀺𑀢𑁆𑀯𑀸. 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑀁. 𑀢𑁂𑀦𑀸𑀳 ‘‘𑀕𑁄𑀘𑀭𑀢𑁄 𑀦𑀺𑀯𑀢𑁆𑀢’’𑀦𑁆𑀢𑀺. 𑀅𑀯𑁄𑀘𑀸𑀢𑀺 ‘‘𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀳𑀁, 𑀪𑀤𑀦𑁆𑀢𑁂’’𑀢𑀺𑀆𑀤𑀺𑀓𑀁 𑀅𑀯𑁄𑀘.

𑁫𑁬𑁨-𑁩. 𑀯𑀺𑀤𑀸𑀮𑀬𑀦𑁆𑀢𑀻𑀢𑀺 𑀯𑀺𑀨𑀸𑀮𑀬𑀦𑁆𑀢𑀺. 𑀧𑀸𑀤𑀓𑀼𑀞𑀸𑀭𑀺𑀓𑀸𑀳𑀻𑀢𑀺 𑀧𑀸𑀤𑀲𑀗𑁆𑀔𑀸𑀢𑀸𑀳𑀺 𑀓𑀼𑀞𑀸𑀭𑀻𑀳𑀺. 𑀧𑀸𑀢𑀬𑀦𑁆𑀢𑀻𑀢𑀺 𑀧𑀭𑀺𑀧𑀸𑀢𑀬𑀦𑁆𑀢𑀺.

𑁫𑁬𑁪. 𑀢𑀺𑀡𑁂𑀦𑀸𑀢𑀺 ¶ 𑀢𑀺𑀡𑀕𑁆𑀕𑁂𑀦𑀸𑀧𑀺. 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀫𑁆𑀧𑀺 𑀦 𑀧𑀸𑀯𑀤𑀸𑀲𑀻𑀢𑀺 𑀫𑀕𑁆𑀕𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀫𑁆𑀧𑀺 𑀢𑁆𑀯𑀁 𑀦 𑀓𑀣𑀬𑀲𑀺 ‘‘𑀏𑀯𑀸𑀬𑀁 𑀧𑀼𑀭𑀺𑀲𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀢𑀽’’𑀢𑀺. 𑀓𑁂𑀴𑀻𑀲𑀻𑀮𑁄 𑀳𑀺 𑀅𑀬𑀁 𑀭𑀸𑀚𑀸. 𑀲𑀬𑀫𑀸𑀤𑀺𑀬𑀸𑀲𑀻𑀢𑀺 𑀅𑀦𑁆𑀥𑀲𑁆𑀲 𑀳𑀢𑁆𑀣𑀢𑁄 𑀬𑀝𑁆𑀞𑀺𑀁 𑀲𑀬𑀫𑁂𑀯 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀲𑀺. 𑀲𑀁𑀯𑀺𑀪𑀸𑀕𑀁 𑀓𑀭𑁄𑀲𑀻𑀢𑀺 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀏𑀓𑀘𑁆𑀘𑀸𑀦𑀺 𑀤𑀢𑁆𑀯𑀸 𑀲𑀁𑀯𑀺𑀪𑀚𑀲𑀺.

𑁫𑁬𑁫. 𑀧𑀘𑁆𑀘𑁂𑀫𑀺, 𑀪𑀦𑁆𑀢𑁂, 𑀬𑀁 𑀢𑁆𑀯𑀁 𑀯𑀤𑁂𑀲𑀻𑀢𑀺 ‘‘𑀪𑀦𑁆𑀢𑁂, 𑀢𑁆𑀯𑀁 𑀧𑀢𑁆𑀢𑀸𑀦𑀺 𑀪𑀺𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀬𑀁 𑀯𑀤𑁂𑀲𑀺, 𑀢𑀁 𑀧𑀝𑀺𑀚𑀸𑀦𑀸𑀫𑀺, 𑀲𑀩𑁆𑀩𑀫𑁂𑀯𑁂𑀢𑀁 𑀫𑀬𑀸 𑀓𑀢𑀁 𑀓𑀸𑀭𑀸𑀧𑀺𑀢𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀫𑁆𑀧𑀻𑀢𑀺 𑀏𑀢𑀁 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦 ¶ 𑀓𑀢𑀫𑁆𑀧𑀺.

𑁫𑁬𑁬-𑁭. 𑀔𑀺𑀟𑁆𑀟𑀸𑀢𑀺 𑀔𑀺𑀟𑁆𑀟𑀸𑀬. 𑀧𑀲𑀯𑀺𑀢𑁆𑀯𑀸𑀢𑀺 𑀉𑀧𑀘𑀺𑀦𑀺𑀢𑁆𑀯𑀸. 𑀯𑁂𑀤𑁂𑀢𑀻𑀢𑀺 𑀅𑀦𑀼𑀪𑀯𑀢𑀺. 𑀅𑀲𑀫𑀢𑁆𑀢𑀪𑁄𑀕𑀻𑀢𑀺 𑀅𑀧𑀭𑀺𑀧𑀼𑀡𑁆𑀡𑀪𑁄𑀕𑁄. 𑀢𑀫𑁂𑀯 𑀅𑀧𑀭𑀺𑀧𑀼𑀡𑁆𑀡𑀪𑁄𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀳𑀭𑁄 𑀬𑀼𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀕𑁆𑀕𑀦𑀺𑀬𑀲𑁆𑀲𑀸𑀢𑀺 𑀦𑀕𑁆𑀕𑀪𑀸𑀯𑀲𑁆𑀲. 𑀓𑀺𑀁 𑀲𑀼 𑀢𑀢𑁄 𑀤𑀼𑀓𑁆𑀔𑀢𑀭𑀲𑁆𑀲 𑀳𑁄𑀢𑀻𑀢𑀺 𑀓𑀺𑀁 𑀲𑀼 𑀦𑀸𑀫 𑀢𑀢𑁄 𑀦𑀕𑁆𑀕𑀪𑀸𑀯𑀢𑁄 𑀤𑀼𑀓𑁆𑀔𑀢𑀭𑀁 𑀅𑀲𑁆𑀲 𑀧𑁂𑀢𑀲𑁆𑀲 𑀳𑁄𑀢𑀺. 𑀬𑀓𑁆𑀔𑀲𑁆𑀲𑀺𑀫𑀸 𑀕𑀘𑁆𑀙𑀦𑁆𑀢𑀼 𑀤𑀓𑁆𑀔𑀺𑀡𑀸𑀬𑁄𑀢𑀺 𑀇𑀫𑀸 𑀫𑀬𑀸 𑀤𑀺𑀬𑁆𑀬𑀫𑀸𑀦𑀯𑀢𑁆𑀣𑀤𑀓𑁆𑀔𑀺𑀡𑀸𑀬𑁄 𑀧𑁂𑀢𑀲𑁆𑀲 𑀉𑀧𑀓𑀧𑁆𑀧𑀦𑁆𑀢𑀼.

𑁫𑁬𑁮-𑁭𑁨. 𑀩𑀳𑀼𑀥𑀸 ¶ 𑀧𑀲𑀢𑁆𑀣𑀦𑁆𑀢𑀺 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀁. 𑀅𑀓𑁆𑀔𑀬𑀥𑀫𑁆𑀫𑀫𑀢𑁆𑀣𑀽𑀢𑀺 𑀅𑀧𑀭𑀺𑀓𑁆𑀔𑀬𑀥𑀫𑁆𑀫𑀁 𑀳𑁄𑀢𑀼. 𑀆𑀘𑀫𑀬𑀺𑀢𑁆𑀯𑀸𑀢𑀺 𑀳𑀢𑁆𑀣𑀧𑀸𑀤𑀥𑁄𑀯𑀦𑀧𑀼𑀩𑁆𑀩𑀓𑀁 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸. 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀦𑁆𑀢𑀺 𑀲𑀸𑀭𑀪𑀽𑀢𑀘𑀦𑁆𑀤𑀦𑀮𑀺𑀢𑁆𑀢𑀁. 𑀉𑀴𑀸𑀭𑀯𑀡𑁆𑀡𑀦𑁆𑀢𑀺 𑀲𑁂𑀝𑁆𑀞𑀭𑀽𑀧𑀁. 𑀧𑀭𑀺𑀯𑀸𑀭𑀺𑀢𑀦𑁆𑀢𑀺 𑀅𑀦𑀼𑀓𑀼𑀮𑀯𑀼𑀢𑁆𑀢𑀺𑀦𑀸 𑀧𑀭𑀺𑀚𑀦𑁂𑀦 𑀧𑀭𑀺𑀯𑀸𑀭𑀺𑀢𑀁. 𑀬𑀓𑁆𑀔𑀫𑀳𑀺𑀤𑁆𑀥𑀺𑀧𑀢𑁆𑀢𑀦𑁆𑀢𑀺 𑀫𑀳𑀢𑀺𑀁 𑀬𑀓𑁆𑀔𑀺𑀤𑁆𑀥𑀺𑀁, 𑀤𑁂𑀯𑀺𑀤𑁆𑀥𑀺𑀁 𑀧𑀢𑁆𑀯𑀸 𑀞𑀺𑀢𑀁. 𑀢𑀫𑁂𑀦𑀫𑀯𑁄𑀘𑀸𑀢𑀺 𑀢𑀫𑁂𑀦𑀁 𑀅𑀯𑁄𑀘.

𑁫𑁭𑁩. 𑀏𑀓𑀤𑁂𑀲𑀁 𑀅𑀤𑀸𑀲𑀻𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀤𑁂𑀲𑀪𑀽𑀢𑀁 𑀯𑀢𑁆𑀣𑀤𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀓𑁆𑀔𑀺𑀦𑁆𑀢𑀺 𑀲𑀓𑁆𑀔𑀺𑀪𑀸𑀯𑀁.

𑁫𑁭𑁪. 𑀫𑀫𑀸𑀲𑀻𑀢𑀺 ¶ 𑀫𑁂 𑀆𑀲𑀺. 𑀤𑁂𑀯𑀢𑀸 𑀫𑁂𑀢𑀺 𑀫𑀬𑁆𑀳𑀁 𑀤𑁂𑀯𑀢𑀸 𑀆𑀲𑀻𑀢𑀺 𑀬𑁄𑀚𑀦𑀸.

𑁫𑁭𑁫-𑁭. 𑀯𑀺𑀧𑁆𑀧𑀝𑀺𑀧𑀦𑁆𑀦𑀘𑀺𑀢𑁆𑀢𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀝𑀺𑀧𑀦𑁆𑀦𑀫𑀸𑀦𑀲𑁄, 𑀥𑀫𑁆𑀫𑀺𑀬𑀁 𑀧𑀝𑀺𑀧𑀤𑀁 𑀧𑀳𑀸𑀬 𑀅𑀥𑀫𑁆𑀫𑀺𑀬𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀬𑀦𑁆𑀦𑀺𑀫𑀺𑀢𑁆𑀢𑀁 𑀬𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑀦𑀳𑁂𑀢𑀼.

𑁫𑁭𑁯. 𑀲𑀁𑀯𑀺𑀪𑀚𑀺𑀢𑁆𑀯𑀸𑀢𑀺 𑀤𑀸𑀦𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸. 𑀲𑀬𑀁 𑀫𑀼𑀔𑁂𑀦𑀽𑀧𑀦𑀺𑀲𑀚𑁆𑀚 𑀧𑀼𑀘𑁆𑀙𑀸𑀢𑀺 𑀅𑀜𑁆𑀜𑁂 𑀧𑀼𑀭𑀺𑀲𑁂 𑀅𑀧𑁂𑀲𑁂𑀢𑁆𑀯𑀸 𑀉𑀧𑀺𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀫𑀼𑀔𑁂𑀦𑁂𑀯 𑀧𑀼𑀘𑁆𑀙.

𑁫𑁮𑁧-𑁩. 𑀲𑀦𑁆𑀦𑀺𑀲𑀺𑀦𑁆𑀦𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀯𑀲𑁂𑀦 𑀦𑀺𑀲𑀺𑀦𑁆𑀦𑀁. 𑀮𑀪𑀺𑀲𑁆𑀲𑀸𑀫𑀺 𑀅𑀢𑁆𑀣𑀦𑁆𑀢𑀺 𑀫𑀬𑀸 𑀇𑀘𑁆𑀙𑀺𑀢𑀫𑁆𑀧𑀺 𑀅𑀢𑁆𑀣𑀁 𑀮𑀪𑀺𑀲𑁆𑀲𑀸𑀫𑀺. 𑀧𑀡𑀺𑀳𑀺𑀢𑀤𑀡𑁆𑀟𑁄𑀢𑀺 𑀞𑀧𑀺𑀢𑀲𑀭𑀻𑀭𑀤𑀡𑁆𑀟𑁄. 𑀅𑀦𑀼𑀲𑀢𑁆𑀢𑀭𑀽𑀧𑁄𑀢𑀺 𑀭𑀸𑀚𑀺𑀦𑀺 𑀅𑀦𑀼𑀲𑀢𑁆𑀢𑀲𑀪𑀸𑀯𑁄. 𑀯𑀻𑀲𑀢𑀺𑀭𑀢𑁆𑀢𑀺𑀫𑀢𑁆𑀢𑀸𑀢𑀺 𑀯𑀻𑀲𑀢𑀺𑀫𑀢𑁆𑀢𑀸 𑀭𑀢𑁆𑀢𑀺𑀬𑁄 𑀅𑀢𑀺𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀬𑀣𑀸𑀫𑀢𑀺𑀦𑁆𑀢𑀺 𑀫𑀬𑁆𑀳𑀁 𑀬𑀣𑀸𑀭𑀼𑀘𑀺.

𑁫𑁮𑁪. 𑀏𑀢𑀜𑁆𑀘 ¶ 𑀅𑀜𑁆𑀜𑀜𑁆𑀘𑀸𑀢𑀺 𑀏𑀢𑀁 𑀲𑀽𑀮𑁂 𑀆𑀯𑀼𑀢𑀁 𑀧𑀼𑀭𑀺𑀲𑀁 𑀅𑀜𑁆𑀜𑀜𑁆𑀘 𑀬𑀲𑁆𑀲 𑀭𑀸𑀚𑀸𑀡𑀸 𑀧𑀡𑀺𑀳𑀺𑀢𑀸, 𑀢𑀜𑁆𑀘. 𑀮𑀳𑀼𑀁 𑀧𑀫𑀼𑀜𑁆𑀘𑀸𑀢𑀺 𑀲𑀻𑀖𑀁 𑀫𑁄𑀘𑁂𑀳𑀺. 𑀓𑁄 𑀢𑀁 𑀯𑀤𑁂𑀣 𑀢𑀣𑀸 𑀓𑀭𑁄𑀦𑁆𑀢𑀦𑁆𑀢𑀺 𑀢𑀣𑀸 𑀥𑀫𑁆𑀫𑀺𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀢𑀁 𑀇𑀫𑀲𑁆𑀫𑀺𑀁 𑀯𑀚𑁆𑀚𑀺𑀭𑀝𑁆𑀞𑁂 𑀓𑁄 𑀦𑀸𑀫 ‘‘𑀦 𑀧𑀫𑁄𑀘𑁂𑀳𑀻’’𑀢𑀺 𑀯𑀤𑁂𑀬𑁆𑀬, 𑀏𑀯𑀁 𑀯𑀢𑁆𑀢𑀼𑀁 𑀓𑁄𑀘𑀺𑀧𑀺 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑁫𑁮𑁫. 𑀢𑀺𑀓𑀺𑀘𑁆𑀙𑀓𑀸𑀦𑀜𑁆𑀘𑀸𑀢𑀺 ¶ 𑀢𑀺𑀓𑀺𑀘𑁆𑀙𑀓𑁂 𑀘.

𑁫𑁮𑁮. 𑀬𑀓𑁆𑀔𑀲𑁆𑀲 𑀯𑀘𑁄𑀢𑀺 𑀧𑁂𑀢𑀲𑁆𑀲 𑀯𑀘𑀦𑀁, 𑀢𑀲𑁆𑀲, 𑀪𑀦𑁆𑀢𑁂, 𑀧𑁂𑀢𑀲𑁆𑀲 𑀯𑀘𑀦𑁂𑀦 𑀏𑀯𑀫𑀓𑀸𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁫𑁯𑁦. 𑀥𑀫𑁆𑀫𑀸𑀦𑀻𑀢𑀺 𑀧𑀼𑀩𑁆𑀩𑁂 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑁂 𑀧𑀼𑀜𑁆𑀜𑀥𑀫𑁆𑀫𑁂. 𑀓𑀫𑁆𑀫𑀁 𑀲𑀺𑀬𑀸 𑀅𑀜𑁆𑀜𑀢𑁆𑀭 𑀯𑁂𑀤𑀦𑀻𑀬𑀦𑁆𑀢𑀺 𑀬𑀁 𑀢𑀲𑁆𑀫𑀺𑀁 𑀧𑀸𑀧𑀓𑀫𑁆𑀫𑁂 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀢𑀁 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀬𑀁 𑀧𑀦 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁, 𑀢𑀁 𑀅𑀜𑁆𑀜𑀢𑁆𑀭 𑀅𑀧𑀭𑀧𑀭𑀺𑀬𑀸𑀬𑁂 𑀯𑁂𑀤𑀬𑀺𑀢𑀩𑁆𑀩𑀨𑀮𑀁 𑀳𑁄𑀢𑀺 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁫𑁯𑁩. 𑀇𑀫𑀜𑁆𑀘𑀸𑀢𑀺 ¶ 𑀅𑀢𑁆𑀢𑀦𑀸 𑀯𑀼𑀘𑁆𑀘𑀫𑀸𑀦𑀁 𑀢𑀸𑀬 𑀆𑀲𑀦𑁆𑀦𑀁 𑀧𑀘𑁆𑀘𑀓𑁆𑀔𑀁 𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀯𑀭𑁂𑀦𑀼𑀧𑁂𑀢𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀁, 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀉𑀧𑁂𑀢𑀁 𑀬𑀼𑀢𑁆𑀢𑀁 𑀉𑀢𑁆𑀢𑀫𑀁 𑀉𑀧𑁄𑀲𑀣𑀲𑀻𑀮𑀁. 𑀓𑀼𑀲𑀮𑀦𑁆𑀢𑀺 𑀅𑀦𑀯𑀚𑁆𑀚𑀁. 𑀲𑀼𑀔𑀼𑀤𑁆𑀭𑀬𑀦𑁆𑀢𑀺 𑀲𑀼𑀔𑀯𑀺𑀧𑀸𑀓𑀁.

𑁫𑁯𑁫. 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀲𑀓𑀺𑀤𑁂𑀯 𑀧𑀼𑀜𑁆𑀜𑀁 𑀓𑀢𑁆𑀯𑀸 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀅𑀧𑀭𑀺𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀼𑀘𑀭𑀺𑀢𑀁 𑀧𑀽𑀭𑁂𑀦𑁆𑀢𑀲𑁆𑀲 𑀲𑀩𑁆𑀩𑀓𑀸𑀮𑀁 𑀧𑀼𑀜𑁆𑀜𑀁 𑀅𑀪𑀺𑀯𑀟𑁆𑀠𑀢𑀺, 𑀅𑀧𑀭𑀸𑀧𑀭𑀁 𑀯𑀸 𑀲𑀼𑀘𑀭𑀺𑀢𑀁 𑀧𑀽𑀭𑁂𑀦𑁆𑀢𑀲𑁆𑀲 𑀧𑀼𑀜𑁆𑀜𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀨𑀮𑀁 𑀉𑀧𑀭𑀽𑀧𑀭𑀺 𑀯𑀟𑁆𑀠𑀢𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄.

𑁫𑁯𑁭. 𑀏𑀯𑀁 𑀣𑁂𑀭𑁂𑀦 𑀯𑀼𑀢𑁆𑀢𑁂 𑀭𑀸𑀚𑀸 𑀅𑀧𑀸𑀬𑀤𑀼𑀓𑁆𑀔𑀢𑁄 𑀉𑀢𑁆𑀭𑀲𑁆𑀢𑀘𑀺𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀼𑀜𑁆𑀜𑀥𑀫𑁆𑀫𑁂 𑀘 𑀅𑀪𑀺𑀯𑀟𑁆𑀠𑀫𑀸𑀦𑀧𑀲𑀸𑀤𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀭𑀡𑀸𑀦𑀺 𑀲𑀻𑀮𑀸𑀦𑀺 𑀘 𑀲𑀫𑀸𑀤𑀺𑀬𑀦𑁆𑀢𑁄 ‘‘𑀅𑀚𑁆𑀚𑁂𑀯 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀫𑀻’’𑀢𑀺𑀆𑀤𑀺𑀫𑀸𑀳.

𑁬𑁦𑁧. 𑀢𑀢𑁆𑀣 𑀏𑀢𑀸𑀤𑀺𑀲𑁄𑀢𑀺 𑀏𑀤𑀺𑀲𑁄 𑀬𑀣𑀸𑀯𑀼𑀢𑁆𑀢𑀭𑀽𑀧𑁄. 𑀯𑁂𑀲𑀸𑀮𑀺𑀬𑀁 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄𑀢𑀺 𑀯𑁂𑀲𑀸𑀮𑀺𑀬𑀁 𑀅𑀦𑁂𑀓𑀲𑀳𑀲𑁆𑀲𑁂𑀲𑀼 𑀉𑀧𑀸𑀲𑀓𑁂𑀲𑀼 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀳𑀼𑀢𑁆𑀯𑀸. 𑀲𑀤𑁆𑀥𑁄𑀢𑀺𑀆𑀤𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦 ¶ 𑀢𑀲𑁆𑀲 𑀧𑀼𑀭𑀺𑀫𑀪𑀸𑀯𑀢𑁄 𑀅𑀜𑁆𑀜𑀸𑀤𑀺𑀲𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀳𑀺 𑀲𑁄 𑀅𑀲𑁆𑀲𑀤𑁆𑀥𑁄 𑀓𑀓𑁆𑀔𑀴𑁄 𑀪𑀺𑀓𑁆𑀔𑀽𑀦𑀁 𑀅𑀓𑁆𑀓𑁄𑀲𑀓𑀸𑀭𑀓𑁄 𑀲𑀗𑁆𑀖𑀲𑁆𑀲 𑀘 𑀅𑀦𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀇𑀤𑀸𑀦𑀺 𑀧𑀦 𑀲𑀤𑁆𑀥𑁄 𑀫𑀼𑀤𑀼𑀓𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀲𑀓𑁆𑀓𑀘𑁆𑀘𑀁 𑀢𑀤𑀸 𑀉𑀧𑀝𑁆𑀞𑀳𑀻𑀢𑀺. 𑀢𑀢𑁆𑀢 𑀓𑀸𑀭𑀓𑀭𑁄𑀢𑀺 𑀉𑀧𑀓𑀸𑀭𑀓𑀸𑀭𑀻.

𑁬𑁦𑁨. 𑀉𑀪𑁄𑀧𑀻𑀢𑀺 ¶ 𑀤𑁆𑀯𑁂𑀧𑀺 𑀲𑀽𑀮𑀸𑀯𑀼𑀢𑁄 𑀭𑀸𑀚𑀸 𑀘. 𑀲𑀸𑀫𑀜𑁆𑀜𑀨𑀮𑀸𑀦𑀺 𑀅𑀚𑁆𑀛𑀕𑀼𑀦𑁆𑀢𑀺 𑀬𑀣𑀸𑀭𑀳𑀁 𑀲𑀸𑀫𑀜𑁆𑀜𑀨𑀮𑀸𑀦𑀺 𑀅𑀥𑀺𑀕𑀘𑁆𑀙𑀺𑀁𑀲𑀼. 𑀢𑀬𑀺𑀤𑀁 𑀬𑀣𑀸𑀭𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀽𑀮𑀸𑀯𑀼𑀢𑁄 𑀅𑀕𑁆𑀕𑀨𑀮𑀁 𑀅𑀨𑀲𑁆𑀲𑀬𑀺, 𑀨𑀮𑀁 𑀓𑀦𑀺𑀝𑁆𑀞𑀁 𑀧𑀦 𑀅𑀫𑁆𑀩𑀲𑀓𑁆𑀓𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀨𑀮𑀁 𑀓𑀦𑀺𑀝𑁆𑀞𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀦𑁆𑀥𑀸𑀬𑀸𑀳. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 𑀭𑀜𑁆𑀜𑀸 𑀧𑁂𑀢𑁂𑀦 𑀅𑀢𑁆𑀢𑀦𑀸 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀆𑀬𑀲𑁆𑀫𑀸 𑀓𑀧𑁆𑀧𑀺𑀢𑀓𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀲𑀸𑀯𑀢𑁆𑀣𑀺𑀁 𑀕𑀢𑁄 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 ¶ . 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀅𑀫𑁆𑀩𑀲𑀓𑁆𑀓𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑁂𑀭𑀻𑀲𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁬𑁦𑁪-𑁫𑁭. 𑀲𑀼𑀡𑁄𑀣 𑀬𑀓𑁆𑀔𑀲𑁆𑀲 𑀯𑀸𑀡𑀺𑀚𑀸𑀦𑀜𑁆𑀘𑀸𑀢𑀺 𑀇𑀤𑀁 𑀲𑁂𑀭𑀻𑀲𑀓𑀧𑁂𑀢𑀯𑀢𑁆𑀣𑀼. 𑀢𑀁 𑀬𑀲𑁆𑀫𑀸 𑀲𑁂𑀭𑀻𑀲𑀓𑀯𑀺𑀫𑀸𑀦𑀯𑀢𑁆𑀣𑀼𑀦𑀸 𑀦𑀺𑀩𑁆𑀩𑀺𑀲𑁂𑀲𑀁, 𑀢𑀲𑁆𑀫𑀸 𑀢𑀢𑁆𑀣 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀕𑀸𑀣𑀸𑀲𑀼 𑀘 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸𑀬𑀁 (𑀯𑀺. 𑀯. 𑀅𑀝𑁆𑀞. 𑁧𑁨𑁨𑁭 𑀲𑁂𑀭𑀻𑀲𑀓𑀯𑀺𑀫𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑁂𑀭𑀻𑀲𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀦𑁆𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀭𑀸𑀚𑀸 𑀧𑀺𑀗𑁆𑀕𑀮𑀓𑁄 𑀦𑀸𑀫𑀸𑀢𑀺 𑀇𑀤𑀁 𑀦𑀦𑁆𑀤𑀓𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀢𑀤𑁆𑀯𑀬𑀲𑁆𑀲 𑀅𑀘𑁆𑀘𑀬𑁂𑀦 𑀲𑀼𑀭𑀝𑁆𑀞𑀯𑀺𑀲𑀬𑁂 𑀧𑀺𑀗𑁆𑀕𑀮𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀲𑁂𑀦𑀸𑀧𑀢𑀺 𑀦𑀦𑁆𑀤𑀓𑁄 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀻 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀫𑀺𑀘𑁆𑀙𑀸𑀕𑀸𑀳𑀁 𑀧𑀕𑁆𑀕𑀬𑁆𑀳 𑀯𑀺𑀘𑀭𑀺. 𑀢𑀲𑁆𑀲 𑀥𑀻𑀢𑀸 𑀉𑀢𑁆𑀢𑀭𑀸 𑀦𑀸𑀫 𑀉𑀧𑀸𑀲𑀺𑀓𑀸 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀤𑀺𑀦𑁆𑀦𑀸 𑀅𑀳𑁄𑀲𑀺. 𑀦𑀦𑁆𑀤𑀓𑁄 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀯𑀺𑀜𑁆𑀛𑀸𑀝𑀯𑀺𑀬𑀁 𑀫𑀳𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀯𑁂𑀫𑀸𑀦𑀺𑀓𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀉𑀢𑁆𑀢𑀭𑀸 𑀲𑀼𑀘𑀺𑀲𑀻𑀢𑀮𑀕𑀦𑁆𑀥𑁄𑀤𑀓𑀧𑀽𑀭𑀺𑀢𑀁 ¶ 𑀧𑀸𑀦𑀻𑀬𑀖𑀝𑀁 𑀓𑀼𑀫𑁆𑀫𑀸𑀲𑀸𑀪𑀺𑀲𑀗𑁆𑀔𑀢𑁂𑀳𑀺 ¶ 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑁂𑀳𑀺 𑀧𑀽𑀯𑁂𑀳𑀺 𑀧𑀭𑀺𑀧𑀼𑀡𑁆𑀡𑀲𑀭𑀸𑀯𑀓𑀜𑁆𑀘 𑀅𑀜𑁆𑀜𑀢𑀭𑀲𑁆𑀲 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 ‘‘𑀅𑀬𑀁 𑀤𑀓𑁆𑀔𑀺𑀡𑀸 𑀫𑀬𑁆𑀳𑀁 𑀧𑀺𑀢𑀼 𑀉𑀧𑀓𑀧𑁆𑀧𑀢𑀽’’𑀢𑀺 𑀉𑀤𑁆𑀤𑀺𑀲𑀺, 𑀢𑀲𑁆𑀲 𑀢𑁂𑀦 𑀤𑀸𑀦𑁂𑀦 𑀤𑀺𑀩𑁆𑀩𑀧𑀸𑀦𑀻𑀬𑀁 𑀅𑀧𑀭𑀺𑀫𑀺𑀢𑀸 𑀘 𑀧𑀽𑀯𑀸 𑀧𑀸𑀢𑀼𑀪𑀯𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀸𑀧𑀓𑀁 𑀯𑀢 𑀫𑀬𑀸 𑀓𑀢𑀁, 𑀬𑀁 𑀫𑀳𑀸𑀚𑀦𑁄 ‘𑀦𑀢𑁆𑀣𑀺 𑀤𑀺𑀦𑁆𑀦’𑀦𑁆𑀢𑀺𑀆𑀤𑀺𑀦𑀸 𑀫𑀺𑀘𑁆𑀙𑀸𑀕𑀸𑀳𑀁 𑀕𑀸𑀳𑀺𑀢𑁄. 𑀇𑀤𑀸𑀦𑀺 𑀧𑀦 𑀧𑀺𑀗𑁆𑀕𑀮𑁄 𑀭𑀸𑀚𑀸 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀸𑀢𑀼𑀁 𑀕𑀢𑁄, 𑀲𑁄 𑀢𑀁 𑀢𑀲𑁆𑀲 𑀤𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺. 𑀦 𑀘𑀺𑀭𑁂𑀦𑁂𑀯 𑀘 𑀧𑀺𑀗𑁆𑀕𑀮𑁄 𑀭𑀸𑀚𑀸 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 ¶ 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀅𑀣 𑀲𑁄 𑀧𑁂𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀢𑀁 𑀫𑀕𑁆𑀕𑀁 𑀦𑀺𑀫𑁆𑀫𑀺𑀦𑀺. 𑀭𑀸𑀚𑀸 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂 𑀲𑀫𑀬𑁂 𑀢𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀢𑀺. 𑀢𑀲𑁆𑀲 𑀕𑀙𑀦𑁆𑀢𑀲𑁆𑀲 𑀧𑀼𑀭𑀢𑁄 𑀫𑀕𑁆𑀕𑁄 𑀤𑀺𑀲𑁆𑀲𑀢𑀺, 𑀧𑀺𑀝𑁆𑀞𑀺𑀢𑁄 𑀧𑀦𑀲𑁆𑀲 𑀅𑀦𑁆𑀢𑀭𑀥𑀸𑀬𑀢𑀺. 𑀲𑀩𑁆𑀩𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀫𑀕𑁆𑀕𑀁 𑀅𑀦𑁆𑀢𑀭𑀳𑀺𑀢𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀯𑀺𑀲𑁆𑀲𑀭𑀁 𑀯𑀺𑀭𑀯𑀦𑁆𑀢𑁄 𑀥𑀸𑀯𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀪𑀻𑀢𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀢𑁆𑀯𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀑𑀮𑁄𑀓𑁂𑀦𑁆𑀢𑁄 𑀧𑁂𑀢𑀲𑁆𑀲 𑀯𑀲𑀦𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀤𑀪𑀺𑀫𑀼𑀔𑁄 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀅𑀣𑀸𑀦𑀼𑀓𑁆𑀓𑀫𑁂𑀦 𑀭𑀜𑁆𑀜𑁂 𑀢𑀁 𑀞𑀸𑀦𑀁 𑀧𑀢𑁆𑀢𑁂 𑀧𑁂𑀢𑁄 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀧𑀽𑀯𑁂 𑀘 𑀧𑀸𑀦𑀻𑀬𑀜𑁆𑀘 𑀤𑀸𑀧𑁂𑀲𑀺. 𑀭𑀸𑀚𑀸 𑀲𑀧𑀭𑀺𑀚𑀦𑁄 𑀦𑁆𑀳𑀢𑁆𑀯𑀸 𑀧𑀽𑀯𑁂 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀫𑀕𑁆𑀕𑀓𑀺𑀮𑀫𑀣𑁄 ‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑁂𑀢𑀁 𑀧𑀼𑀘𑁆𑀙𑀺. 𑀧𑁂𑀢𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀢𑁄 𑀯𑀺𑀫𑁄𑀘𑁂𑀢𑁆𑀯𑀸 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

‘‘𑀭𑀸𑀚𑀸 𑀧𑀺𑀗𑁆𑀕𑀮𑀓𑁄 𑀦𑀸𑀫, 𑀲𑀼𑀭𑀝𑁆𑀞𑀸𑀦𑀁 𑀅𑀥𑀺𑀧𑀢𑀺 𑀅𑀳𑀼;

𑀫𑁄𑀭𑀺𑀬𑀸𑀦𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, 𑀲𑀼𑀭𑀝𑁆𑀞𑀁 𑀧𑀼𑀦𑀭𑀸𑀕𑀫𑀸.

‘‘𑀉𑀡𑁆𑀳𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀭𑀸𑀚𑀸 𑀧𑀗𑁆𑀓𑀁 𑀉𑀧𑀸𑀕𑀫𑀺;

𑀅𑀤𑁆𑀤𑀲 𑀫𑀕𑁆𑀕𑀁 𑀭𑀫𑀡𑀻𑀬𑀁, 𑀧𑁂𑀢𑀸𑀦𑀁 𑀢𑀁 𑀯𑀡𑁆𑀡𑀼𑀧𑀣𑀁.

𑁬𑁬𑁦. 𑀲𑀸𑀭𑀣𑀺𑀁 ¶ 𑀆𑀫𑀦𑁆𑀢𑀬𑀻 𑀭𑀸𑀚𑀸 𑁋

‘‘‘𑀅𑀬𑀁 𑀫𑀕𑁆𑀕𑁄 𑀭𑀫𑀡𑀻𑀬𑁄, 𑀔𑁂𑀫𑁄 𑀲𑁄𑀯𑀢𑁆𑀣𑀺𑀓𑁄 𑀲𑀺𑀯𑁄;

𑀇𑀫𑀺𑀦𑀸 𑀲𑀸𑀭𑀣𑀺 𑀬𑀸𑀫, 𑀲𑀼𑀭𑀝𑁆𑀞𑀸𑀦𑀁 𑀲𑀦𑁆𑀢𑀺𑀓𑁂 𑀇𑀢𑁄’.

‘‘𑀢𑁂𑀦 ¶ 𑀧𑀸𑀬𑀸𑀲𑀺 𑀲𑁄𑀭𑀝𑁆𑀞𑁄, 𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸;

𑀉𑀩𑁆𑀩𑀺𑀕𑁆𑀕𑀭𑀽𑀧𑁄 𑀧𑀼𑀭𑀺𑀲𑁄, 𑀲𑁄𑀭𑀝𑁆𑀞𑀁 𑀏𑀢𑀤𑀩𑁆𑀭𑀯𑀺.

‘‘‘𑀓𑀼𑀫𑁆𑀫𑀕𑁆𑀕𑀁 ¶ 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀪𑀺𑀁𑀲𑀦𑀁 𑀮𑁄𑀫𑀳𑀁𑀲𑀦𑀁;

𑀧𑀼𑀭𑀢𑁄 𑀤𑀺𑀲𑁆𑀲𑀢𑀺 𑀫𑀕𑁆𑀕𑁄, 𑀧𑀘𑁆𑀙𑀢𑁄 𑀘 𑀦 𑀤𑀺𑀲𑁆𑀲𑀢𑀺.

‘‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀬𑀫𑀧𑀼𑀭𑀺𑀲𑀸𑀦 𑀲𑀦𑁆𑀢𑀺𑀓𑁂;

𑀅𑀫𑀸𑀦𑀼𑀲𑁄 𑀯𑀸𑀬𑀢𑀺 𑀕𑀦𑁆𑀥𑁄, 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀤𑀸𑀭𑀼𑀡𑁄’.

‘‘𑀲𑀁𑀯𑀺𑀕𑁆𑀕𑁄 𑀭𑀸𑀚𑀸 𑀲𑁄𑀭𑀝𑁆𑀞𑁄, 𑀲𑀸𑀭𑀣𑀺𑀁 𑀏𑀢𑀤𑀩𑁆𑀭𑀯𑀺;

‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀪𑀺𑀁𑀲𑀦𑀁 𑀮𑁄𑀫𑀳𑀁𑀲𑀦𑀁;

𑀧𑀼𑀭𑀢𑁄 𑀤𑀺𑀲𑁆𑀲𑀢𑀺 𑀫𑀕𑁆𑀕𑁄, 𑀧𑀘𑁆𑀙𑀢𑁄 𑀘 𑀦 𑀤𑀺𑀲𑁆𑀲𑀢𑀺.

‘‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀬𑀫𑀧𑀼𑀭𑀺𑀲𑀸𑀦 𑀲𑀦𑁆𑀢𑀺𑀓𑁂;

𑀅𑀫𑀸𑀦𑀼𑀲𑁄 𑀯𑀸𑀬𑀢𑀺 𑀕𑀦𑁆𑀥𑁄, 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀤𑀸𑀭𑀼𑀡𑁄’.

‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀲𑀫𑀸𑀭𑀼𑀬𑁆𑀳, 𑀑𑀮𑁄𑀓𑁂𑀦𑁆𑀢𑁄 𑀘𑀢𑀼𑀤𑁆𑀤𑀺𑀲𑀸;

𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀁 𑀭𑀫𑀡𑀻𑀬𑀁, 𑀧𑀸𑀤𑀧𑀁 𑀙𑀸𑀬𑀸𑀲𑀫𑁆𑀧𑀦𑁆𑀦𑀁;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑀁, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑀁.

‘‘𑀲𑀸𑀭𑀣𑀺𑀁 𑀆𑀫𑀦𑁆𑀢𑀬𑀻 𑀭𑀸𑀚𑀸, ‘𑀓𑀺𑀁 𑀏𑀲𑁄 𑀤𑀺𑀲𑁆𑀲𑀢𑀺 𑀩𑁆𑀭𑀳𑀸;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑁄, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑁄’.

‘‘𑀦𑀺𑀕𑁆𑀭𑁄𑀥𑁄 𑀲𑁄 𑀫𑀳𑀸𑀭𑀸𑀚, 𑀧𑀸𑀤𑀧𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑁄, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑁄.

‘‘𑀢𑁂𑀦 𑀧𑀸𑀬𑀸𑀲𑀺 𑀲𑁄𑀭𑀝𑁆𑀞𑁄, 𑀬𑁂𑀦 𑀲𑁄 𑀤𑀺𑀲𑁆𑀲𑀢𑁂 𑀩𑁆𑀭𑀳𑀸;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑁄, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑁄.

‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 ¶ ¶ 𑀑𑀭𑀼𑀬𑁆𑀳, 𑀭𑀸𑀚𑀸 𑀭𑀼𑀓𑁆𑀔𑀁 𑀉𑀧𑀸𑀕𑀫𑀺;

𑀦𑀺𑀲𑀻𑀤𑀺 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑁆𑀚𑀦𑁄;

𑀧𑀽𑀭𑀁 𑀧𑀸𑀦𑀻𑀬𑀲𑀭𑀓𑀁, 𑀧𑀽𑀯𑁂 𑀯𑀺𑀢𑁆𑀢𑁂 𑀘 𑀅𑀤𑁆𑀤𑀲.

‘‘𑀧𑀼𑀭𑀺𑀲𑁄 𑀘 𑀤𑁂𑀯𑀯𑀡𑁆𑀡𑀻, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑁄;

𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁, 𑀲𑁄𑀭𑀝𑁆𑀞𑀁 𑀏𑀢𑀤𑀩𑁆𑀭𑀯𑀺.

‘‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀧𑀺𑀯𑀢𑀼 𑀤𑁂𑀯𑁄 𑀧𑀸𑀦𑀻𑀬𑀁, 𑀧𑀽𑀯𑁂 𑀔𑀸𑀤 𑀅𑀭𑀺𑀦𑁆𑀤𑀫’.

‘‘𑀧𑀺𑀯𑀺𑀢𑁆𑀯𑀸 𑀭𑀸𑀚𑀸 𑀧𑀸𑀦𑀻𑀬𑀁, 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑁆𑀚𑀦𑁄;

𑀧𑀽𑀯𑁂 𑀔𑀸𑀤𑀺𑀢𑁆𑀯𑀸 𑀧𑀺𑀢𑁆𑀯𑀸 𑀘, 𑀲𑁄𑀭𑀝𑁆𑀞𑁄 𑀏𑀢𑀤𑀩𑁆𑀭𑀯𑀺.

‘‘𑀤𑁂𑀯𑀢𑀸 ¶ 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀅𑀚𑀸𑀦𑀦𑁆𑀢𑀸 𑀢𑀁 𑀧𑀼𑀘𑁆𑀙𑀸𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀦𑁆𑀢𑀺.

‘‘𑀦𑀸𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀧𑁂𑀢𑁄 𑀅𑀳𑀁 𑀫𑀳𑀸𑀭𑀸𑀚, 𑀲𑀼𑀭𑀝𑁆𑀞𑀸 𑀇𑀥 𑀫𑀸𑀕𑀢𑁄𑀢𑀺.

‘‘𑀓𑀺𑀁𑀲𑀻𑀮𑁄 𑀓𑀺𑀁𑀲𑀫𑀸𑀘𑀸𑀭𑁄, 𑀲𑀼𑀭𑀝𑁆𑀞𑀲𑁆𑀫𑀺𑀁 𑀧𑀼𑀭𑁂 𑀢𑀼𑀯𑀁;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀆𑀦𑀼𑀪𑀸𑀯𑁄 𑀅𑀬𑀁 𑀢𑀯𑀸𑀢𑀺.

‘‘𑀢𑀁 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚, 𑀅𑀭𑀺𑀦𑁆𑀤𑀫 𑀭𑀝𑁆𑀞𑀯𑀟𑁆𑀠𑀦;

𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀘, 𑀩𑁆𑀭𑀸𑀳𑁆𑀫𑀡𑁄 𑀘 𑀧𑀼𑀭𑁄𑀳𑀺𑀢𑁄.

‘‘𑀲𑀼𑀭𑀝𑁆𑀞𑀲𑁆𑀫𑀺𑀁 𑀅𑀳𑀁 𑀤𑁂𑀯, 𑀧𑀼𑀭𑀺𑀲𑁄 𑀧𑀸𑀧𑀘𑁂𑀢𑀲𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀤𑀼𑀲𑁆𑀲𑀻𑀮𑁄, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄.

‘‘𑀤𑀤𑀦𑁆𑀢𑀸𑀦𑀁 ¶ 𑀓𑀭𑁄𑀦𑁆𑀢𑀸𑀦𑀁, 𑀯𑀸𑀭𑀬𑀺𑀲𑁆𑀲𑀁 𑀩𑀳𑀼𑀚𑁆𑀚𑀦𑀁;

𑀅𑀜𑁆𑀜𑁂𑀲𑀁 𑀤𑀤𑀫𑀸𑀦𑀸𑀦𑀁, 𑀅𑀦𑁆𑀢𑀭𑀸𑀬𑀓𑀭𑁄 𑀅𑀳𑀁.

‘‘𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲, 𑀲𑀁𑀬𑀫𑀲𑁆𑀲 𑀓𑀼𑀢𑁄 𑀨𑀮𑀁;

𑀦𑀢𑁆𑀣𑀺 𑀆𑀘𑀭𑀺𑀬𑁄 𑀦𑀸𑀫, 𑀅𑀤𑀦𑁆𑀢𑀁 𑀓𑁄 𑀤𑀫𑁂𑀲𑁆𑀲𑀢𑀺.

‘‘𑀲𑀫𑀢𑀼𑀮𑁆𑀬𑀸𑀦𑀺 ¶ 𑀪𑀽𑀢𑀸𑀦𑀺, 𑀓𑀼𑀢𑁄 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑁄;

𑀦𑀢𑁆𑀣𑀺 𑀩𑀮𑀁 𑀯𑀻𑀭𑀺𑀬𑀁 𑀯𑀸, 𑀓𑀼𑀢𑁄 𑀉𑀝𑁆𑀞𑀸𑀦𑀧𑁄𑀭𑀺𑀲𑀁.

‘‘𑀦𑀢𑁆𑀣𑀺 𑀤𑀸𑀦𑀨𑀮𑀁 𑀦𑀸𑀫, 𑀦 𑀯𑀺𑀲𑁄𑀥𑁂𑀢𑀺 𑀯𑁂𑀭𑀺𑀦𑀁;

𑀮𑀤𑁆𑀥𑁂𑀬𑁆𑀬𑀁 𑀮𑀪𑀢𑁂 𑀫𑀘𑁆𑀘𑁄, 𑀦𑀺𑀬𑀢𑀺𑀧𑀭𑀺𑀡𑀸𑀫𑀚𑀁.

‘‘𑀦𑀢𑁆𑀣𑀺 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀮𑁄𑀓𑁄 𑀦𑀢𑁆𑀣𑀺 𑀇𑀢𑁄 𑀧𑀭𑀁;

𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀳𑀼𑀢𑀁, 𑀲𑀼𑀦𑀺𑀳𑀺𑀢𑀁 𑀦 𑀯𑀺𑀚𑁆𑀚𑀢𑀺.

‘‘𑀬𑁄𑀧𑀺 𑀳𑀦𑁂𑀬𑁆𑀬 𑀧𑀼𑀭𑀺𑀲𑀁, 𑀧𑀭𑀲𑁆𑀲 𑀙𑀺𑀦𑁆𑀤𑀢𑁂 𑀲𑀺𑀭𑀁;

𑀦 𑀓𑁄𑀘𑀺 𑀓𑀜𑁆𑀘𑀺 𑀳𑀦𑀢𑀺, 𑀲𑀢𑁆𑀢𑀦𑁆𑀦𑀁 𑀯𑀺𑀯𑀭𑀫𑀦𑁆𑀢𑀭𑁂.

‘‘𑀅𑀘𑁆𑀙𑁂𑀚𑁆𑀚𑀸𑀪𑁂𑀚𑁆𑀚𑁄 𑀳𑀺 𑀚𑀻𑀯𑁄, 𑀅𑀝𑁆𑀞𑀁𑀲𑁄 𑀕𑀼𑀴𑀧𑀭𑀺𑀫𑀡𑁆𑀟𑀮𑁄;

𑀬𑁄𑀚𑀦𑀸𑀦𑀁 𑀲𑀢𑀁 𑀧𑀜𑁆𑀘, 𑀓𑁄 𑀚𑀻𑀯𑀁 𑀙𑁂𑀢𑁆𑀢𑀼𑀫𑀭𑀳𑀢𑀺.

‘‘𑀬𑀣𑀸 ¶ 𑀲𑀼𑀢𑁆𑀢𑀕𑀼𑀴𑁂 𑀔𑀺𑀢𑁆𑀢𑁂, 𑀦𑀺𑀩𑁆𑀩𑁂𑀞𑁂𑀦𑁆𑀢𑀁 𑀧𑀮𑀸𑀬𑀢𑀺;

𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄, 𑀦𑀺𑀩𑁆𑀩𑁂𑀞𑁂𑀦𑁆𑀢𑁄 𑀧𑀮𑀸𑀬𑀢𑀺.

‘‘𑀬𑀣𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫, 𑀅𑀜𑁆𑀜𑀁 𑀕𑀸𑀫𑀁 𑀧𑀯𑀺𑀲𑀢𑀺;

𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄, 𑀅𑀜𑁆𑀜𑀁 𑀩𑁄𑀦𑁆𑀤𑀺𑀁 𑀧𑀯𑀺𑀲𑀢𑀺.

‘‘𑀬𑀣𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑁆𑀫, 𑀅𑀜𑁆𑀜𑀁 𑀕𑁂𑀳𑀁 𑀧𑀯𑀺𑀲𑀢𑀺;

𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄, 𑀅𑀜𑁆𑀜𑀁 𑀩𑁄𑀦𑁆𑀤𑀺𑀁 𑀧𑀯𑀺𑀲𑀢𑀺.

‘‘𑀘𑀼𑀮𑁆𑀮𑀸𑀲𑀻𑀢𑀺 ¶ 𑀫𑀳𑀸𑀓𑀧𑁆𑀧𑀺𑀦𑁄, 𑀲𑀢𑀲𑀳𑀲𑁆𑀲𑀸𑀦𑀺 𑀳𑀺;

𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸, 𑀲𑀁𑀲𑀸𑀭𑀁 𑀔𑁂𑀧𑀬𑀺𑀢𑁆𑀯𑀸𑀦;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀭𑁂.

‘‘𑀫𑀺𑀢𑀸𑀦𑀺 𑀲𑀼𑀔𑀤𑀼𑀓𑁆𑀔𑀸𑀦𑀺, 𑀤𑁄𑀡𑁂𑀳𑀺 𑀧𑀺𑀝𑀓𑁂𑀳𑀺 𑀘;

𑀚𑀺𑀦𑁄 𑀲𑀩𑁆𑀩𑀁 𑀧𑀚𑀸𑀦𑀸𑀢𑀺, 𑀲𑀫𑁆𑀫𑀽𑀴𑁆𑀳𑀸 𑀇𑀢𑀭𑀸 𑀧𑀚𑀸.

‘‘𑀏𑀯𑀁𑀤𑀺𑀝𑁆𑀞𑀺 𑀧𑀼𑀭𑁂 𑀆𑀲𑀺𑀁, 𑀲𑀫𑁆𑀫𑀽𑀴𑁆𑀳𑁄 𑀫𑁄𑀳𑀧𑀸𑀭𑀼𑀢𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀤𑀼𑀲𑁆𑀲𑀻𑀮𑁄, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄.

‘‘𑀑𑀭𑀁 ¶ 𑀫𑁂 𑀙𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺;

𑀏𑀓𑀦𑁆𑀢𑀓𑀝𑀼𑀓𑀁 𑀖𑁄𑀭𑀁, 𑀦𑀺𑀭𑀬𑀁 𑀧𑀧𑀢𑀺𑀲𑁆𑀲𑀳𑀁.

‘‘𑀘𑀢𑀼𑀓𑁆𑀓𑀡𑁆𑀡𑀁 𑀘𑀢𑀼𑀤𑁆𑀯𑀸𑀭𑀁, 𑀯𑀺𑀪𑀢𑁆𑀢𑀁 𑀪𑀸𑀕𑀲𑁄 𑀫𑀺𑀢𑀁;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

‘‘𑀯𑀲𑁆𑀲𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀢𑀸𑀯𑀤𑁂;

𑀮𑀓𑁆𑀔𑁄 𑀏𑀲𑁄 𑀫𑀳𑀸𑀭𑀸𑀚, 𑀲𑀢𑀪𑀸𑀕𑀯𑀲𑁆𑀲𑀓𑁄𑀝𑀺𑀬𑁄.

‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀧𑀘𑁆𑀘𑀭𑁂 𑀚𑀦𑀸;

𑀫𑀺𑀘𑁆𑀙𑀸𑀤𑀺𑀝𑁆𑀞𑀻 𑀘 𑀤𑀼𑀲𑁆𑀲𑀻𑀮𑀸, 𑀬𑁂 𑀘 𑀅𑀭𑀺𑀬𑀽𑀧𑀯𑀸𑀤𑀺𑀦𑁄.

‘‘𑀢𑀢𑁆𑀣𑀸𑀳𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀤𑀼𑀓𑁆𑀔𑀁 𑀯𑁂𑀤𑀺𑀲𑁆𑀲 𑀯𑁂𑀤𑀦𑀁;

𑀨𑀮𑀁 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲𑀁.

‘‘𑀢𑀁 ¶ ¶ 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚, 𑀅𑀭𑀺𑀦𑁆𑀤𑀫 𑀭𑀝𑁆𑀞𑀯𑀟𑁆𑀠𑀦;

𑀥𑀻𑀢𑀸 𑀫𑀬𑁆𑀳𑀁 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

‘‘𑀓𑀭𑁄𑀢𑀺 𑀪𑀤𑁆𑀤𑀓𑀁 𑀓𑀫𑁆𑀫𑀁, 𑀲𑀻𑀮𑁂𑀲𑀼𑀧𑁄𑀲𑀣𑁂 𑀭𑀢𑀸;

𑀲𑀜𑁆𑀜𑀢𑀸 𑀲𑀁𑀯𑀺𑀪𑀸𑀕𑀻 𑀘, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸.

‘‘𑀅𑀔𑀡𑁆𑀟𑀓𑀸𑀭𑀻 𑀲𑀺𑀓𑁆𑀔𑀸𑀬, 𑀲𑀼𑀡𑁆𑀳𑀸 𑀧𑀭𑀓𑀼𑀮𑁂𑀲𑀼 𑀘;

𑀉𑀧𑀸𑀲𑀺𑀓𑀸 𑀲𑀓𑁆𑀬𑀫𑀼𑀦𑀺𑀦𑁄, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄.

‘‘𑀪𑀺𑀓𑁆𑀔𑀼 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺;

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀲𑀢𑀺𑀫𑀸, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄.

‘‘𑀲𑀧𑀤𑀸𑀦𑀁 𑀘𑀭𑀫𑀸𑀦𑁄, 𑀅𑀕𑀫𑀸 𑀢𑀁 𑀦𑀺𑀯𑁂𑀲𑀦𑀁;

𑀢𑀫𑀤𑁆𑀤𑀲 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

‘‘𑀧𑀽𑀭𑀁 𑀧𑀸𑀦𑀻𑀬𑀲𑀭𑀓𑀁, 𑀧𑀽𑀯𑁂 𑀯𑀺𑀢𑁆𑀢𑁂 𑀘 𑀲𑀸 𑀅𑀤𑀸;

𑀧𑀺𑀢𑀸 𑀫𑁂 𑀓𑀸𑀮𑀓𑀢𑁄 𑀪𑀦𑁆𑀢𑁂, 𑀢𑀲𑁆𑀲𑁂𑀢𑀁 𑀉𑀧𑀓𑀧𑁆𑀧𑀢𑀼.

‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂 ¶ , 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑀼𑀜𑁆𑀚𑀸𑀫𑀺 𑀓𑀸𑀫𑀓𑀸𑀫𑀻𑀳𑀁, 𑀭𑀸𑀚𑀸 𑀯𑁂𑀲𑁆𑀲𑀯𑀡𑁄 𑀬𑀣𑀸.

‘‘𑀢𑀁 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚, 𑀅𑀭𑀺𑀦𑁆𑀤𑀫 𑀭𑀝𑁆𑀞𑀯𑀟𑁆𑀠𑀦;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀯𑀼𑀘𑁆𑀘𑀢𑀺;

𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙, 𑀲𑀧𑀼𑀢𑁆𑀢𑀤𑀸𑀭𑁄 𑀅𑀭𑀺𑀦𑁆𑀤𑀫.

‘‘𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦, 𑀨𑀼𑀲𑀦𑁆𑀢𑀺 𑀅𑀫𑀢𑀁 𑀧𑀤𑀁;

𑀢𑀁 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙, 𑀲𑀧𑀼𑀢𑁆𑀢𑀤𑀸𑀭𑁄 𑀅𑀭𑀺𑀦𑁆𑀤𑀫.

‘‘𑀘𑀢𑁆𑀢𑀸𑀭𑁄 ¶ 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄;

𑀢𑀁 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙, 𑀲𑀧𑀼𑀢𑁆𑀢𑀤𑀸𑀭𑁄 𑀅𑀭𑀺𑀦𑁆𑀤𑀫.

𑀅𑀫𑀚𑁆𑀚𑀧𑁄 ¶ 𑀫𑀸 𑀘 𑀫𑀼𑀲𑀸 𑀅𑀪𑀸𑀡𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀳𑀺 𑀢𑀼𑀝𑁆𑀞𑁄𑀢𑀺.

‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑁄𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑀼𑀬𑁆𑀳𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫.

‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀅𑀦𑀼𑀢𑁆𑀢𑀭𑀁;

𑀲𑀗𑁆𑀖𑀜𑁆𑀘 𑀦𑀭𑀤𑁂𑀯𑀲𑁆𑀲, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄.

‘‘𑀑𑀨𑀼𑀡𑀸𑀫𑀺 𑀫𑀳𑀸𑀯𑀸𑀢𑁂, 𑀦𑀤𑀺𑀬𑀸 𑀲𑀻𑀖𑀕𑀸𑀫𑀺𑀬𑀸;

𑀯𑀫𑀸𑀫𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀭𑀢𑁄.

‘‘𑀇𑀤𑀁 ¶ 𑀯𑀢𑁆𑀯𑀸𑀦 𑀲𑁄𑀭𑀝𑁆𑀞𑁄, 𑀯𑀺𑀭𑀫𑀺𑀢𑁆𑀯𑀸 𑀧𑀸𑀧𑀤𑀲𑁆𑀲𑀦𑀸;

𑀦𑀫𑁄 𑀪𑀕𑀯𑀢𑁄 𑀓𑀢𑁆𑀯𑀸, 𑀧𑀸𑀫𑁄𑀓𑁆𑀔𑁄 𑀭𑀣𑀫𑀸𑀭𑀼𑀳𑀻’’𑀢𑀺. 𑁋 𑀕𑀸𑀣𑀸𑀬𑁄 𑀅𑀯𑁄𑀘𑀼𑀁;

𑁬𑁫𑁮-𑁯. 𑀢𑀢𑁆𑀣 𑀭𑀸𑀚𑀸 𑀧𑀺𑀗𑁆𑀕𑀮𑀓𑁄 𑀦𑀸𑀫, 𑀲𑀼𑀭𑀝𑁆𑀞𑀸𑀦𑀁 𑀅𑀥𑀺𑀧𑀢𑀺 𑀅𑀳𑀽𑀢𑀺 𑀧𑀺𑀗𑁆𑀕𑀮𑀘𑀓𑁆𑀔𑀼𑀢𑀸𑀬 ‘‘𑀧𑀺𑀗𑁆𑀕𑀮𑁄’’𑀢𑀺 𑀧𑀸𑀓𑀝𑀦𑀸𑀫𑁄 𑀲𑀼𑀭𑀝𑁆𑀞𑀤𑁂𑀲𑀲𑁆𑀲 𑀇𑀲𑁆𑀲𑀭𑁄 𑀭𑀸𑀚𑀸 𑀅𑀳𑁄𑀲𑀺. 𑀫𑁄𑀭𑀺𑀬𑀸𑀦𑀦𑁆𑀢𑀺 𑀫𑁄𑀭𑀺𑀬𑀭𑀸𑀚𑀽𑀦𑀁, 𑀥𑀫𑁆𑀫𑀸𑀲𑁄𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀼𑀭𑀝𑁆𑀞𑀁 𑀧𑀼𑀦𑀭𑀸𑀕𑀫𑀸𑀢𑀺 𑀲𑀼𑀭𑀝𑁆𑀞𑀲𑁆𑀲 𑀯𑀺𑀲𑀬𑀁 𑀉𑀤𑁆𑀤𑀺𑀲𑁆𑀲 𑀲𑀼𑀭𑀝𑁆𑀞𑀕𑀸𑀫𑀺𑀫𑀕𑁆𑀕𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀧𑀗𑁆𑀓𑀦𑁆𑀢𑀺 𑀫𑀼𑀤𑀼𑀪𑀽𑀫𑀺𑀁. 𑀯𑀡𑁆𑀡𑀼𑀧𑀣𑀦𑁆𑀢𑀺 𑀧𑁂𑀢𑁂𑀦 𑀦𑀺𑀫𑁆𑀫𑀺𑀢𑀁 𑀫𑀭𑀽𑀪𑀽𑀫𑀺𑀫𑀕𑁆𑀕𑀁.

𑁬𑁬𑁦. 𑀔𑁂𑀫𑁄𑀢𑀺 𑀦𑀺𑀩𑁆𑀪𑀬𑁄. 𑀲𑁄𑀯𑀢𑁆𑀣𑀺𑀓𑁄𑀢𑀺 𑀲𑁄𑀢𑁆𑀣𑀺𑀪𑀸𑀯𑀸𑀯𑀳𑁄. 𑀲𑀺𑀯𑁄𑀢𑀺 𑀅𑀦𑀼𑀧𑀤𑁆𑀤𑀯𑁄. 𑀲𑀼𑀭𑀝𑁆𑀞𑀸𑀦𑀁 𑀲𑀦𑁆𑀢𑀺𑀓𑁂 𑀇𑀢𑁄𑀢𑀺 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀸 𑀫𑀬𑀁 𑀲𑀼𑀭𑀝𑁆𑀞𑀯𑀺𑀲𑀬𑀲𑁆𑀲 𑀲𑀫𑀻𑀧𑁂𑀬𑁂𑀯.

𑁬𑁬𑁧-𑁨. 𑀲𑁄𑀭𑀝𑁆𑀞𑁄𑀢𑀺 ¶ 𑀲𑀼𑀭𑀝𑁆𑀞𑀸𑀥𑀺𑀧𑀢𑀺. 𑀉𑀩𑁆𑀩𑀺𑀕𑁆𑀕𑀭𑀽𑀧𑁄𑀢𑀺 𑀉𑀢𑁆𑀭𑀲𑁆𑀢𑀲𑀪𑀸𑀯𑁄. 𑀪𑀺𑀁𑀲𑀦𑀦𑁆𑀢𑀺 𑀪𑀬𑀚𑀦𑀦𑀁 ¶ . 𑀮𑁄𑀫𑀳𑀁𑀲𑀦𑀦𑁆𑀢𑀺 𑀪𑀺𑀁𑀲𑀦𑀓𑀪𑀸𑀯𑁂𑀦 𑀮𑁄𑀫𑀸𑀦𑀁 𑀳𑀁𑀲𑀸𑀧𑀦𑀁.

𑁬𑁬𑁩. 𑀬𑀫𑀧𑀼𑀭𑀺𑀲𑀸𑀦 𑀲𑀦𑁆𑀢𑀺𑀓𑁂𑀢𑀺 𑀧𑁂𑀢𑀸𑀦𑀁 𑀲𑀫𑀻𑀧𑁂 𑀯𑀢𑁆𑀢𑀸𑀫. 𑀅𑀫𑀸𑀦𑀼𑀲𑁄 𑀯𑀸𑀬𑀢𑀺 𑀕𑀦𑁆𑀥𑁄𑀢𑀺 𑀧𑁂𑀢𑀸𑀦𑀁 𑀲𑀭𑀻𑀭𑀕𑀦𑁆𑀥𑁄 𑀯𑀸𑀬𑀢𑀺. 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀤𑀸𑀭𑀼𑀡𑁄𑀢𑀺 𑀧𑀘𑁆𑀘𑁂𑀓𑀦𑀺𑀭𑀬𑁂𑀲𑀼 𑀓𑀸𑀭𑀡𑀁 𑀓𑀸𑀭𑀺𑀬𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀖𑁄𑀭𑀢𑀭𑁄 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺.

𑁬𑁬𑁬. 𑀧𑀸𑀤𑀧𑀦𑁆𑀢𑀺 𑀧𑀸𑀤𑀲𑀤𑀺𑀲𑁂𑀳𑀺 𑀫𑀽𑀮𑀸𑀯𑀬𑀯𑁂𑀳𑀺 𑀉𑀤𑀓𑀲𑁆𑀲 𑀧𑀺𑀯𑀦𑀢𑁄 ‘‘𑀧𑀸𑀤𑀧𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀢𑀭𑀼𑀁. 𑀙𑀸𑀬𑀸𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀧𑀦𑁆𑀦𑀘𑁆𑀙𑀸𑀬𑀁. 𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑀦𑁆𑀢𑀺 𑀯𑀡𑁆𑀡𑁂𑀦 𑀦𑀻𑀮𑀫𑁂𑀖𑀲𑀤𑀺𑀲𑀁. 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑀦𑁆𑀢𑀺 𑀫𑁂𑀖𑀯𑀡𑁆𑀡𑀲𑀡𑁆𑀞𑀸𑀦𑀁 𑀳𑀼𑀢𑁆𑀯𑀸 𑀔𑀸𑀬𑀫𑀸𑀦𑀁.

𑁬𑁭𑁦. 𑀧𑀽𑀭𑀁 𑀧𑀸𑀦𑀻𑀬𑀲𑀭𑀓𑀦𑁆𑀢𑀺 𑀧𑀸𑀦𑀻𑀬𑁂𑀦 𑀧𑀼𑀡𑁆𑀡𑀁 𑀧𑀸𑀦𑀻𑀬𑀪𑀸𑀚𑀦𑀁. 𑀧𑀽𑀯𑁂𑀢𑀺 𑀔𑀚𑁆𑀚𑀓𑁂. 𑀯𑀺𑀢𑁆𑀢𑁂𑀢𑀺 𑀯𑀺𑀢𑁆𑀢𑀺𑀚𑀦𑀦𑁂 𑀫𑀥𑀼𑀭𑁂 𑀫𑀦𑀼𑀜𑁆𑀜𑁂 𑀢𑀳𑀺𑀁 𑀢𑀳𑀺𑀁 𑀲𑀭𑀸𑀯𑁂 𑀧𑀽𑀭𑁂𑀢𑁆𑀯𑀸 𑀞𑀧𑀺𑀢𑀧𑀽𑀯𑁂 𑀅𑀤𑁆𑀤𑀲.

𑁬𑁭𑁨. 𑀅𑀣𑁄 ¶ 𑀢𑁂 𑀅𑀤𑀼𑀭𑀸𑀕𑀢𑀦𑁆𑀢𑀺 𑀏𑀢𑁆𑀣 𑀅𑀣𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸, 𑀫𑀳𑀸𑀭𑀸𑀚, 𑀢𑁂 𑀆𑀕𑀢𑀁 𑀤𑀼𑀭𑀸𑀕𑀢𑀁 𑀦 𑀳𑁄𑀢𑀺, 𑀅𑀣 𑀔𑁄 𑀲𑁆𑀯𑀸𑀕𑀢𑀫𑁂𑀯𑀸𑀢𑀺 𑀫𑀬𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀭𑀺𑀦𑁆𑀤𑀫𑀸𑀢𑀺 𑀅𑀭𑀻𑀦𑀁 𑀤𑀫𑀦𑀲𑀻𑀮.

𑁬𑁭𑁭. 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸𑀢𑀺 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀘 𑀯𑀘𑀦𑀁 𑀲𑀼𑀡𑀦𑁆𑀢𑀼, 𑀩𑁆𑀭𑀸𑀳𑁆𑀫𑀡𑁄 𑀘 𑀢𑀼𑀬𑁆𑀳𑀁 𑀧𑀼𑀭𑁄𑀳𑀺𑀢𑁄 𑀢𑀁 𑀲𑀼𑀡𑀸𑀢𑀽𑀢𑀺 𑀬𑁄𑀚𑀦𑀸.

𑁬𑁭𑁮. 𑀲𑀼𑀭𑀝𑁆𑀞𑀲𑁆𑀫𑀺𑀁 𑀅𑀳𑀦𑁆𑀢𑀺 𑀲𑀼𑀭𑀝𑁆𑀞𑀤𑁂𑀲𑁂 𑀅𑀳𑀁. 𑀤𑁂𑀯𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀬𑀸 𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀓𑀤𑀭𑀺𑀬𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀻. 𑀧𑀭𑀺𑀪𑀸𑀲𑀓𑁄𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀓𑁆𑀓𑁄𑀲𑀓𑁄.

𑁬𑁭𑁯. 𑀯𑀸𑀭𑀬𑀺𑀲𑁆𑀲𑀦𑁆𑀢𑀺 𑀯𑀸𑀭𑁂𑀲𑀺𑀁. 𑀅𑀦𑁆𑀢𑀭𑀸𑀬𑀓𑀭𑁄 𑀅𑀳𑀦𑁆𑀢𑀺 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁 𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑀼𑀢𑁆𑀯𑀸 𑀅𑀜𑁆𑀜𑁂𑀲𑀜𑁆𑀘 𑀧𑀭𑁂𑀲𑀁 𑀤𑀸𑀦𑀁 𑀤𑀤𑀫𑀸𑀦𑀸𑀦𑀁 𑀤𑀸𑀦𑀫𑀬𑀧𑀼𑀜𑁆𑀜𑀢𑁄 𑀅𑀳𑀁 𑀩𑀳𑀼𑀚𑀦𑀁 𑀯𑀸𑀭𑀬𑀺𑀲𑁆𑀲𑀁 𑀯𑀸𑀭𑁂𑀲𑀺𑀦𑁆𑀢𑀺 𑀬𑁄𑀚𑀦𑀸.

𑁬𑁮𑁦. 𑀯𑀺𑀧𑀸𑀓𑁄 ¶ 𑀦𑀢𑁆𑀣𑀺 𑀤𑀸𑀦𑀲𑁆𑀲𑀸𑀢𑀺𑀆𑀤𑀺 𑀯𑀸𑀭𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲𑀸𑀢𑀺 𑀤𑀸𑀦𑀁 𑀤𑀤𑀢𑁄 𑀢𑀲𑁆𑀲 𑀯𑀺𑀧𑀸𑀓𑁄 ¶ 𑀆𑀬𑀢𑀺𑀁 𑀧𑀢𑁆𑀢𑀩𑁆𑀩𑀨𑀮𑀁 𑀦𑀢𑁆𑀣𑀻𑀢𑀺 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺. 𑀲𑀁𑀬𑀫𑀲𑁆𑀲 𑀓𑀼𑀢𑁄 𑀨𑀮𑀦𑁆𑀢𑀺 𑀲𑀻𑀮𑀲𑁆𑀲 𑀧𑀦 𑀓𑀼𑀢𑁄 𑀦𑀸𑀫 𑀨𑀮𑀁, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀢𑁆𑀣𑀺 𑀆𑀘𑀭𑀺𑀬𑁄 𑀦𑀸𑀫𑀸𑀢𑀺 𑀆𑀘𑀸𑀭𑀲𑀫𑀸𑀘𑀸𑀭𑀲𑀺𑀓𑁆𑀔𑀸𑀧𑀓𑁄 𑀆𑀘𑀭𑀺𑀬𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺. 𑀲𑀪𑀸𑀯𑀢𑁄 𑀏𑀯 𑀳𑀺 𑀲𑀢𑁆𑀢𑀸 𑀤𑀦𑁆𑀢𑀸 𑀯𑀸 𑀅𑀤𑀦𑁆𑀢𑀸 𑀯𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀤𑀦𑁆𑀢𑀁 𑀓𑁄 𑀤𑀫𑁂𑀲𑁆𑀲𑀢𑀻’’𑀢𑀺.

𑁬𑁮𑁧. 𑀲𑀫𑀢𑀼𑀮𑁆𑀬𑀸𑀦𑀺 𑀪𑀽𑀢𑀸𑀦𑀻𑀢𑀺 𑀇𑀫𑁂 𑀲𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀲𑀫𑀸, 𑀢𑀲𑁆𑀫𑀸 𑀚𑁂𑀝𑁆𑀞𑁄 𑀏𑀯 𑀦𑀢𑁆𑀣𑀺, 𑀓𑀼𑀢𑁄 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑁄, 𑀚𑁂𑀝𑁆𑀞𑀸𑀧𑀘𑀸𑀬𑀦𑀧𑀼𑀜𑁆𑀜𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀩𑀮𑀦𑁆𑀢𑀺 𑀬𑀫𑁆𑀳𑀺 𑀅𑀢𑁆𑀢𑀦𑁄 𑀩𑀮𑁂 𑀧𑀢𑀺𑀝𑁆𑀞𑀺𑀢𑀸 𑀲𑀢𑁆𑀢𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯𑀅𑀭𑀳𑀢𑁆𑀢𑀁 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀦𑁆𑀢𑀺, 𑀢𑀁 𑀯𑀻𑀭𑀺𑀬𑀩𑀮𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀯𑀻𑀭𑀺𑀬𑀁 𑀯𑀸 𑀦𑀢𑁆𑀣𑀺 𑀓𑀼𑀢𑁄 𑀉𑀝𑁆𑀞𑀸𑀦𑀧𑁄𑀭𑀺𑀲𑀦𑁆𑀢𑀺 𑀇𑀤𑀁 𑀦𑁄 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀓𑀸𑀭𑁂𑀦 𑀧𑀯𑀢𑁆𑀢𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁.

𑁬𑁮𑁨. 𑀦𑀢𑁆𑀣𑀺 ¶ 𑀤𑀸𑀦𑀨𑀮𑀁 𑀦𑀸𑀫𑀸𑀢𑀺 𑀤𑀸𑀦𑀲𑁆𑀲 𑀨𑀮𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄 𑀪𑀲𑁆𑀫𑀦𑀺𑀳𑀺𑀢𑀁 𑀯𑀺𑀬 𑀦𑀺𑀧𑁆𑀨𑀮𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀦 𑀯𑀺𑀲𑁄𑀥𑁂𑀢𑀺 𑀯𑁂𑀭𑀺𑀦𑀦𑁆𑀢𑀺 𑀏𑀢𑁆𑀣 𑀯𑁂𑀭𑀺𑀦𑀦𑁆𑀢𑀺 𑀯𑁂𑀭𑀯𑀦𑁆𑀢𑀁 𑀯𑁂𑀭𑀸𑀦𑀁 𑀯𑀲𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀯𑀲𑁂𑀦 𑀘 𑀓𑀢𑀧𑀸𑀧𑀁 𑀧𑀼𑀕𑁆𑀕𑀮𑀁 𑀤𑀸𑀦𑀲𑀻𑀮𑀸𑀤𑀺𑀯𑀢𑀢𑁄 𑀦 𑀯𑀺𑀲𑁄𑀥𑁂𑀢𑀺, 𑀓𑀤𑀸𑀘𑀺𑀧𑀺 𑀲𑀼𑀤𑁆𑀥𑀁 𑀦 𑀓𑀭𑁄𑀢𑀺. 𑀧𑀼𑀩𑁆𑀩𑁂 ‘‘𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲𑀸’’𑀢𑀺𑀆𑀤𑀺 𑀤𑀸𑀦𑀸𑀤𑀺𑀢𑁄 𑀅𑀢𑁆𑀢𑀦𑁄 𑀧𑀭𑁂𑀲𑀁 𑀦𑀺𑀯𑀸𑀭𑀺𑀢𑀸𑀓𑀸𑀭𑀤𑀲𑁆𑀲𑀦𑀁, ‘‘𑀦𑀢𑁆𑀣𑀺 𑀤𑀸𑀦𑀨𑀮𑀁 𑀦𑀸𑀫𑀸’’𑀢𑀺𑀆𑀤𑀺 𑀧𑀦 𑀅𑀢𑁆𑀣𑀦𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑀤𑁆𑀥𑁂𑀬𑁆𑀬𑀦𑁆𑀢𑀺 𑀮𑀤𑁆𑀥𑀩𑁆𑀩𑀁. 𑀓𑀣𑀁 𑀧𑀦 𑀮𑀤𑁆𑀥𑀩𑁆𑀩𑀦𑁆𑀢𑀺 𑀆𑀳 ‘‘𑀦𑀺𑀬𑀢𑀺𑀧𑀭𑀺𑀡𑀸𑀫𑀚’’𑀦𑁆𑀢𑀺. 𑀅𑀬𑀁 𑀲𑀢𑁆𑀢𑁄 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀮𑀪𑀦𑁆𑀢𑁄 𑀦𑀺𑀬𑀢𑀺𑀯𑀺𑀧𑀭𑀺𑀡𑀸𑀫𑀯𑀲𑁂𑀦𑁂𑀯 𑀮𑀪𑀢𑀺, 𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸, 𑀦 𑀇𑀲𑁆𑀲𑀭𑀸𑀤𑀺𑀦𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁮𑁩. 𑀦𑀢𑁆𑀣𑀺 ¶ 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸𑀢𑀺 𑀫𑀸𑀢𑀸𑀤𑀻𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀮𑁄𑀓𑁄 𑀦𑀢𑁆𑀣𑀺 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀇𑀥𑀮𑁄𑀓𑀢𑁄 𑀧𑀭𑀮𑁄𑀓𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀦𑁆𑀦𑀦𑁆𑀢𑀺 𑀫𑀳𑀸𑀤𑀸𑀦𑀁. 𑀳𑀼𑀢𑀦𑁆𑀢𑀺 𑀧𑀳𑁂𑀦𑀓𑀲𑀓𑁆𑀓𑀸𑀭𑁄, 𑀢𑀤𑀼𑀪𑀬𑀫𑁆𑀧𑀺 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀼𑀦𑀺𑀳𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀦𑀺𑀳𑀺𑀢𑀁. 𑀦 𑀯𑀺𑀚𑁆𑀚𑀢𑀻𑀢𑀺 𑀬𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀦𑀸𑀫 ‘‘𑀅𑀦𑀼𑀕𑀸𑀫𑀺𑀓𑀦𑀺𑀥𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀯𑀺𑀚𑁆𑀚𑀢𑀺. 𑀢𑁂𑀲𑀁 𑀢𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁮𑁪. 𑀦 𑀓𑁄𑀘𑀺 𑀓𑀜𑁆𑀘𑀺 𑀳𑀦𑀢𑀻𑀢𑀺 𑀬𑁄 𑀧𑀼𑀭𑀺𑀲𑁄 𑀧𑀭𑀁 𑀧𑀼𑀭𑀺𑀲𑀁 𑀳𑀦𑁂𑀬𑁆𑀬, 𑀧𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀻𑀲𑀁 ¶ 𑀙𑀺𑀦𑁆𑀤𑁂𑀬𑁆𑀬, 𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀦 𑀓𑁄𑀘𑀺 𑀓𑀜𑁆𑀘𑀺 𑀳𑀦𑀢𑀺, 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀙𑀺𑀤𑁆𑀤𑀪𑀸𑀯𑀢𑁄 𑀳𑀦𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀓𑀣𑀁 𑀲𑀢𑁆𑀣𑀧𑀳𑀸𑀭𑁄𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀯𑀺𑀯𑀭𑀫𑀦𑁆𑀢𑀭𑁂’’𑀢𑀺. 𑀧𑀣𑀯𑀻𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀯𑀺𑀯𑀭𑀪𑀽𑀢𑁂 𑀅𑀦𑁆𑀢𑀭𑁂 𑀙𑀺𑀤𑁆𑀤𑁂 𑀲𑀢𑁆𑀣𑀁 𑀧𑀯𑀺𑀲𑀢𑀺, 𑀢𑁂𑀦 𑀲𑀢𑁆𑀢𑀸 𑀅𑀲𑀺𑀆𑀤𑀻𑀳𑀺 𑀧𑀳𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀚𑀻𑀯𑁄 𑀯𑀺𑀬 𑀧𑀦 𑀲𑁂𑀲𑀓𑀸𑀬𑀸𑀧𑀺 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀦 𑀙𑀺𑀚𑁆𑀚𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁮𑁫. 𑀅𑀘𑁆𑀙𑁂𑀚𑁆𑀚𑀸𑀪𑁂𑀚𑁆𑀚𑁄 𑀳𑀺 𑀚𑀻𑀯𑁄𑀢𑀺 𑀅𑀬𑀁 𑀲𑀢𑁆𑀢𑀸𑀦𑀁 𑀚𑀻𑀯𑁄 𑀲𑀢𑁆𑀣𑀸𑀤𑀻𑀳𑀺 𑀦 𑀙𑀺𑀦𑁆𑀤𑀺𑀢𑀩𑁆𑀩𑁄 𑀦 𑀪𑀺𑀦𑁆𑀤𑀺𑀢𑀩𑁆𑀩𑁄 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸. 𑀅𑀝𑁆𑀞𑀁𑀲𑁄 𑀕𑀼𑀴𑀧𑀭𑀺𑀫𑀡𑁆𑀟𑀮𑁄𑀢𑀺 𑀲𑁄 𑀧𑀦 𑀚𑀻𑀯𑁄 𑀓𑀤𑀸𑀘𑀺 𑀅𑀝𑁆𑀞𑀁𑀲𑁄 𑀳𑁄𑀢𑀺 𑀓𑀤𑀸𑀘𑀺 𑀕𑀼𑀴𑀧𑀭𑀺𑀫𑀡𑁆𑀟𑀮𑁄 ¶ . 𑀬𑁄𑀚𑀦𑀸𑀦𑀁 𑀲𑀢𑀁 𑀧𑀜𑁆𑀘𑀸𑀢𑀺 𑀓𑁂𑀯𑀮𑀻𑀪𑀸𑀯𑀁 𑀧𑀢𑁆𑀢𑁄 𑀧𑀜𑁆𑀘𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀳𑁄𑀢𑀺. 𑀓𑁄 𑀚𑀻𑀯𑀁 𑀙𑁂𑀢𑁆𑀢𑀼𑀫𑀭𑀳𑀢𑀻𑀢𑀺 𑀦𑀺𑀘𑁆𑀘𑀁 𑀦𑀺𑀩𑁆𑀩𑀺𑀓𑀸𑀭𑀁 𑀚𑀻𑀯𑀁 𑀓𑁄 𑀦𑀸𑀫 𑀲𑀢𑁆𑀣𑀸𑀤𑀻𑀳𑀺 𑀙𑀺𑀦𑁆𑀤𑀺𑀢𑀼𑀁 𑀅𑀭𑀳𑀢𑀺, 𑀦 𑀲𑁄 𑀓𑁂𑀦𑀘𑀺 𑀯𑀺𑀓𑁄𑀧𑀦𑁂𑀬𑁆𑀬𑁄𑀢𑀺 𑀯𑀤𑀢𑀺.

𑁬𑁮𑁬. 𑀲𑀼𑀢𑁆𑀢𑀕𑀼𑀴𑁂𑀢𑀺 𑀯𑁂𑀞𑁂𑀢𑁆𑀯𑀸 𑀓𑀢𑀲𑀼𑀢𑁆𑀢𑀕𑀼𑀴𑁂. 𑀔𑀺𑀢𑁆𑀢𑁂𑀢𑀺 𑀦𑀺𑀩𑁆𑀩𑁂𑀞𑀦𑀯𑀲𑁂𑀦 𑀔𑀺𑀢𑁆𑀢𑁂. 𑀦𑀺𑀩𑁆𑀩𑁂𑀞𑁂𑀦𑁆𑀢𑀁 𑀧𑀮𑀸𑀬𑀢𑀻𑀢𑀺 𑀧𑀩𑁆𑀩𑀢𑁂 𑀯𑀸 𑀭𑀼𑀓𑁆𑀔𑀕𑁆𑀕𑁂 𑀯𑀸 𑀞𑀢𑁆𑀯𑀸 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀁 𑀔𑀺𑀢𑁆𑀢𑀁 𑀲𑀼𑀢𑁆𑀢𑀕𑀼𑀴𑀁 ¶ 𑀦𑀺𑀩𑁆𑀩𑁂𑀞𑁂𑀦𑁆𑀢𑀫𑁂𑀯 𑀕𑀘𑁆𑀙𑀢𑀺, 𑀲𑀼𑀢𑁆𑀢𑁂 𑀔𑀻𑀡𑁂 𑀦 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀢𑀁 𑀲𑀼𑀢𑁆𑀢𑀕𑀼𑀴𑀁 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀁 𑀕𑀘𑁆𑀙𑀢𑀺, 𑀲𑀼𑀢𑁆𑀢𑁂 𑀔𑀻𑀡𑁂 𑀦 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀲𑁄 𑀚𑀻𑀯𑁄 ‘‘𑀘𑀼𑀮𑁆𑀮𑀸𑀲𑀻𑀢𑀺 𑀫𑀳𑀸𑀓𑀧𑁆𑀧𑀺𑀦𑁄 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀓𑀸𑀮𑀫𑁂𑀯 𑀅𑀢𑁆𑀢𑀪𑀸𑀯𑀕𑀼𑀴𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑁄 𑀧𑀮𑀸𑀬𑀢𑀺 𑀧𑀯𑀢𑁆𑀢𑀢𑀺, 𑀢𑀢𑁄 𑀉𑀤𑁆𑀥𑀁 𑀦 𑀧𑀯𑀢𑁆𑀢𑀢𑀺.

𑁬𑁮𑁭. 𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄𑀢𑀺 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀕𑀸𑀫𑀁 𑀧𑀯𑀺𑀲𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦, 𑀏𑀯𑀫𑁂𑀯 𑀲𑁄 𑀚𑀻𑀯𑁄 𑀇𑀢𑁄 𑀲𑀭𑀻𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀁 𑀅𑀧𑀭𑀁 𑀲𑀭𑀻𑀭𑀁 𑀦𑀺𑀬𑀢𑀯𑀲𑁂𑀦 𑀧𑀯𑀺𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑁄𑀦𑁆𑀤𑀺𑀦𑁆𑀢𑀺 𑀓𑀸𑀬𑀁.

𑁬𑁮𑁯. 𑀘𑀼𑀮𑁆𑀮𑀸𑀲𑀻𑀢𑀻𑀢𑀺 𑀘𑀢𑀼𑀭𑀸𑀲𑀻𑀢𑀺. 𑀫𑀳𑀸𑀓𑀧𑁆𑀧𑀺𑀦𑁄𑀢𑀺 𑀫𑀳𑀸𑀓𑀧𑁆𑀧𑀸𑀦𑀁. 𑀢𑀢𑁆𑀣 ‘‘𑀏𑀓𑀫𑁆𑀳𑀸 𑀫𑀳𑀸𑀲𑀭𑀸 𑀅𑀦𑁄𑀢𑀢𑁆𑀢𑀸𑀤𑀺𑀢𑁄 𑀯𑀲𑁆𑀲𑀲𑀢𑁂 𑀯𑀲𑁆𑀲𑀲𑀢𑁂 𑀓𑀼𑀲𑀕𑁆𑀕𑁂𑀦 𑀏𑀓𑁂𑀓𑀁 𑀉𑀤𑀓𑀩𑀺𑀦𑁆𑀤𑀼𑀁 𑀦𑀻𑀳𑀭𑀦𑁆𑀢𑁂 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀢𑀫𑁆𑀳𑀺 𑀲𑀭𑁂 𑀦𑀺𑀭𑀼𑀤𑀓𑁂 𑀚𑀸𑀢𑁂 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀏𑀯𑀭𑀽𑀧𑀸𑀦𑀁 𑀫𑀳𑀸𑀓𑀧𑁆𑀧𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀲𑀁𑀲𑀸𑀭𑀲𑁆𑀲 𑀧𑀭𑀺𑀫𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸𑀢𑀺 𑀬𑁂 𑀅𑀦𑁆𑀥𑀩𑀸𑀮𑀸, 𑀬𑁂 𑀘 𑀲𑀧𑁆𑀧𑀜𑁆𑀜𑀸, 𑀲𑀩𑁆𑀩𑁂𑀧𑀺 𑀢𑁂. 𑀲𑀁𑀲𑀸𑀭𑀁 𑀔𑁂𑀧𑀬𑀺𑀢𑁆𑀯𑀸𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀲𑀁𑀲𑀸𑀭𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀔𑁂𑀧𑁂𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀭𑁂𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀧𑀡𑁆𑀟𑀺𑀢𑀸𑀧𑀺 𑀅𑀦𑁆𑀢𑀭𑀸 𑀲𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀩𑀸𑀮𑀸𑀧𑀺 𑀢𑀢𑁄 𑀉𑀤𑁆𑀥𑀁 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀺.

𑁬𑁯𑁦. 𑀫𑀺𑀢𑀸𑀦𑀺 ¶ 𑀲𑀼𑀔𑀤𑀼𑀓𑁆𑀔𑀸𑀦𑀺, 𑀤𑁄𑀡𑁂𑀳𑀺 𑀧𑀺𑀝𑀓𑁂𑀳𑀺 𑀘𑀸𑀢𑀺 𑀲𑀢𑁆𑀢𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀦𑀺 𑀦𑀸𑀫 𑀤𑁄𑀡𑁂𑀳𑀺 𑀧𑀺𑀝𑀓𑁂𑀳𑀺 𑀫𑀸𑀦𑀪𑀸𑀚𑀦𑁂𑀳𑀺 𑀫𑀺𑀢𑀸𑀦𑀺 𑀯𑀺𑀬 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦𑁂𑀯 ¶ 𑀧𑀭𑀺𑀫𑀺𑀢𑀢𑁆𑀢𑀸 𑀧𑀘𑁆𑀘𑁂𑀓𑀜𑁆𑀘 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀸𑀦𑀺 𑀦𑀺𑀬𑀢𑀺𑀧𑀭𑀺𑀡𑀸𑀫𑀚𑀸𑀦𑀺 𑀧𑀭𑀺𑀫𑀺𑀢𑀸𑀦𑀺. 𑀢𑀬𑀺𑀤𑀁 𑀚𑀺𑀦𑁄 𑀲𑀩𑁆𑀩𑀁 𑀧𑀚𑀸𑀦𑀸𑀢𑀺 𑀚𑀺𑀦𑀪𑀽𑀫𑀺𑀬𑀁 𑀞𑀺𑀢𑁄 𑀓𑁂𑀯𑀮𑀁 𑀧𑀚𑀸𑀦𑀸𑀢𑀺 𑀲𑀁𑀲𑀸𑀭𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀲𑀁𑀲𑀸𑀭𑁂 ¶ 𑀧𑀦 𑀧𑀭𑀺𑀩𑁆𑀪𑀫𑀢𑀺 𑀲𑀫𑁆𑀫𑀽𑀴𑁆𑀳𑀸𑀬𑀁 𑀇𑀢𑀭𑀸 𑀧𑀚𑀸.

𑁬𑁯𑁧. 𑀏𑀯𑀁𑀤𑀺𑀝𑁆𑀞𑀺 𑀧𑀼𑀭𑁂 𑀆𑀲𑀺𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄 𑀧𑀼𑀩𑁆𑀩𑁂𑀯 𑀅𑀳𑀁 𑀅𑀳𑁄𑀲𑀺𑀁. 𑀲𑀫𑁆𑀫𑀽𑀴𑁆𑀳𑁄 𑀫𑁄𑀳𑀧𑀸𑀭𑀼𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀳𑁂𑀢𑀼𑀪𑀽𑀢𑁂𑀦 𑀲𑀫𑁆𑀫𑁄𑀳𑁂𑀦 𑀲𑀫𑁆𑀫𑀽𑀴𑁆𑀳𑁄, 𑀢𑀁𑀲𑀳𑀚𑀸𑀢𑁂𑀦 𑀧𑀦 𑀫𑁄𑀳𑁂𑀦 𑀧𑀸𑀭𑀼𑀢𑁄, 𑀧𑀝𑀺𑀘𑁆𑀙𑀸𑀤𑀺𑀢𑀓𑀼𑀲𑀮𑀩𑀻𑀚𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁯𑁨. 𑀏𑀯𑀁 𑀧𑀼𑀩𑁆𑀩𑁂 𑀬𑀸 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀸 𑀧𑀸𑀧𑀤𑀺𑀝𑁆𑀞𑀺, 𑀢𑀲𑁆𑀲𑀸 𑀯𑀲𑁂𑀦 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀆𑀬𑀢𑀺𑀁 𑀅𑀦𑀼𑀪𑀯𑀺𑀢𑀩𑁆𑀩𑀁 𑀢𑀲𑁆𑀲 𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀭𑀁 𑀫𑁂 𑀙𑀳𑀺 𑀫𑀸𑀲𑁂𑀳𑀻’’𑀢𑀺𑀆𑀤𑀺𑀫𑀸𑀳.

𑁬𑁯𑁫-𑁭. 𑀢𑀢𑁆𑀣 𑀯𑀲𑁆𑀲𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀲𑁆𑀲𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀯𑀲𑁆𑀲𑁂𑀲𑀼 𑀲𑀢𑀲𑀳𑀲𑁆𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀢𑀸𑀯𑀤𑁂𑀢𑀺 𑀬𑀤𑀸 𑀏𑀢𑁆𑀢𑀓𑁄 𑀓𑀸𑀮𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀢𑀸𑀯𑀤𑁂𑀯 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀇𑀥 𑀧𑀘𑁆𑀘𑀦𑁆𑀢𑀸𑀦𑀁 𑀯𑁄 𑀫𑀸𑀭𑀺𑀲𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀓𑀸𑀮𑁄 𑀅𑀢𑀻𑀢𑁄’’𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀦𑀺𑀭𑀬𑁂 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺. 𑀮𑀓𑁆𑀔𑁄 𑀏𑀲𑁄, 𑀫𑀳𑀸𑀭𑀸𑀚, 𑀲𑀢𑀪𑀸𑀕𑀯𑀲𑁆𑀲𑀓𑁄𑀝𑀺𑀬𑁄𑀢𑀺 𑀲𑀢𑀪𑀸𑀕𑀸 𑀲𑀢𑀓𑁄𑀝𑁆𑀞𑀸𑀲𑀸 𑀯𑀲𑁆𑀲𑀓𑁄𑀝𑀺𑀬𑁄, 𑀫𑀳𑀸𑀭𑀸𑀚, 𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀬𑀼𑀦𑁄 𑀏𑀲𑁄 𑀮𑀓𑁆𑀔𑁄 𑀏𑀲𑁄 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑀲𑀤𑀲𑀓𑀁 𑀲𑀢𑀁 𑀦𑀸𑀫, 𑀤𑀲 𑀲𑀢𑀸𑀦𑀺 𑀲𑀳𑀲𑁆𑀲𑀁 𑀦𑀸𑀫, 𑀤𑀲𑀤𑀲𑀲𑀳𑀲𑁆𑀲𑀸𑀦𑀺 𑀲𑀢𑀲𑀳𑀲𑁆𑀲𑀁 𑀦𑀸𑀫, 𑀲𑀢𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀦𑀸𑀫, 𑀢𑀸𑀲𑀁 𑀓𑁄𑀝𑀻𑀦𑀁 𑀯𑀲𑁂𑀦 𑀲𑀢𑀲𑀳𑀲𑁆𑀲𑀯𑀲𑁆𑀲𑀓𑁄𑀝𑀺𑀬𑁄 𑀲𑀢𑀪𑀸𑀕𑀸 𑀯𑀲𑁆𑀲𑀓𑁄𑀝𑀺𑀬𑁄. 𑀲𑀸 𑀘 𑀔𑁄 𑀦𑁂𑀭𑀬𑀺𑀓𑀸𑀦𑀁𑀬𑁂𑀯 𑀯𑀲𑁆𑀲𑀕𑀡𑀦𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀫𑀦𑀼𑀲𑁆𑀲𑀸𑀦𑀁, 𑀤𑁂𑀯𑀸𑀦𑀁 𑀯𑀸. 𑀈𑀤𑀺𑀲𑀸𑀦𑀺 𑀅𑀦𑁂𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀦𑁂𑀭𑀬𑀺𑀓𑀸𑀦𑀁 𑀆𑀬𑀼. 𑀢𑁂𑀦𑀸𑀳 ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀧𑀘𑁆𑀘𑀭𑁂 𑀚𑀦𑀸’’𑀢𑀺. 𑀬𑀸𑀤𑀺𑀲𑁂𑀦 𑀧𑀦 𑀧𑀸𑀧𑁂𑀦 𑀲𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂𑀲𑀼 𑀧𑀘𑁆𑀘𑀦𑁆𑀢𑀺 ¶ , 𑀢𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀻 𑀘 𑀤𑀼𑀲𑁆𑀲𑀻𑀮𑀸, 𑀬𑁂 𑀘 𑀅𑀭𑀺𑀬𑀽𑀧𑀯𑀸𑀤𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀯𑁂𑀤𑀺𑀲𑁆𑀲𑀦𑁆𑀢𑀺 𑀅𑀦𑀼𑀪𑀯𑀺𑀲𑁆𑀲𑀁.

𑁬𑁯𑁮-𑁭𑁦𑁬. 𑀏𑀯𑀁 𑀆𑀬𑀢𑀺𑀁 𑀅𑀢𑁆𑀢𑀦𑀸 𑀅𑀦𑀼𑀪𑀯𑀺𑀢𑀩𑁆𑀩𑀁 𑀧𑀸𑀧𑀨𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑁂𑀦 𑀢𑁂 ¶ 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 ¶ , 𑀆𑀦𑀼𑀪𑀸𑀯𑁄 𑀅𑀬𑀁 𑀢𑀯𑀸’’𑀢𑀺 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀲𑀭𑀡𑁂𑀲𑀼 𑀘𑁂𑀯 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 ‘‘𑀢𑀁 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑁂𑀲𑀼𑀧𑁄𑀲𑀣𑁂 𑀭𑀢𑀸𑀢𑀺 𑀦𑀺𑀘𑁆𑀘𑀲𑀻𑀮𑁂𑀲𑀼 𑀘 𑀉𑀧𑁄𑀲𑀣𑀲𑀻𑀮𑁂𑀲𑀼 𑀘 𑀅𑀪𑀺𑀭𑀢𑀸. 𑀅𑀤𑀸𑀢𑀺 𑀅𑀤𑀸𑀲𑀺. 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀅𑀫𑀢𑀧𑀤𑀜𑁆𑀘.

𑁭𑁦𑁯-𑁧𑁨. 𑀏𑀯𑀁 𑀧𑁂𑀢𑁂𑀦 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀲𑀫𑀸𑀤𑀧𑀺𑀢𑁄 𑀭𑀸𑀚𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑁂𑀦 𑀅𑀢𑁆𑀢𑀦𑁄 𑀓𑀢𑀁 𑀉𑀧𑀓𑀸𑀭𑀁 𑀢𑀸𑀯 𑀓𑀺𑀢𑁆𑀢𑁂𑀢𑁆𑀯𑀸 𑀲𑀭𑀡𑀸𑀤𑀻𑀲𑀼 𑀧𑀢𑀺𑀝𑁆𑀞𑀳𑀦𑁆𑀢𑁄 ‘‘𑀅𑀢𑁆𑀣𑀓𑀸𑀫𑁄’’𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀯𑀢𑁆𑀯𑀸 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀕𑀳𑀺𑀢𑀸𑀬 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀑𑀨𑀼𑀡𑀸𑀫𑀻’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀑𑀨𑀼𑀡𑀸𑀫𑀺 𑀫𑀳𑀸𑀯𑀸𑀢𑁂𑀢𑀺 𑀫𑀳𑀦𑁆𑀢𑁂 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀪𑀼𑀲𑀁 𑀯𑀺𑀬 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀁, 𑀬𑀓𑁆𑀔, 𑀢𑀯 𑀥𑀫𑁆𑀫𑀤𑁂𑀲𑀦𑀸𑀯𑀸𑀢𑁂 𑀑𑀨𑀼𑀡𑀸𑀫𑀺 𑀦𑀺𑀤𑁆𑀥𑀼𑀦𑀸𑀫𑀺. 𑀦𑀤𑀺𑀬𑀸 𑀯𑀸 𑀲𑀻𑀖𑀕𑀸𑀫𑀺𑀬𑀸𑀢𑀺 𑀲𑀻𑀖𑀲𑁄𑀢𑀸𑀬 𑀫𑀳𑀸𑀦𑀤𑀺𑀬𑀸 𑀯𑀸 𑀢𑀺𑀡𑀓𑀝𑁆𑀞𑀧𑀡𑁆𑀡𑀓𑀲𑀝𑀁 𑀯𑀺𑀬 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀧𑀯𑀸𑀳𑁂𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀫𑀸𑀫𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀦𑁆𑀢𑀺 𑀫𑀫 𑀫𑀦𑁄𑀫𑀼𑀔𑀕𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀉𑀘𑁆𑀙𑀟𑁆𑀟𑀬𑀸𑀫𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀭𑀢𑁄’’𑀢𑀺. 𑀬𑀲𑁆𑀫𑀸 𑀏𑀓𑀁𑀲𑁂𑀦 𑀅𑀫𑀢𑀸𑀯𑀳𑁂 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀸𑀲𑀦𑁂 𑀭𑀢𑁄 𑀅𑀪𑀺𑀭𑀢𑁄, 𑀢𑀲𑁆𑀫𑀸 𑀢𑀁 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀯𑀺𑀲𑀁 𑀯𑀫𑀸𑀫𑀻𑀢𑀺 𑀬𑁄𑀚𑀦𑀸.

𑁭𑁧𑁩. 𑀢𑀺 𑀑𑀲𑀸𑀦𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸. 𑀢𑀢𑁆𑀣 𑀧𑀸𑀫𑁄𑀓𑁆𑀔𑁄𑀢𑀺 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸. 𑀭𑀣𑀫𑀸𑀭𑀼𑀳𑀻𑀢𑀺 𑀭𑀸𑀚𑀸 𑀕𑀫𑀦𑀲𑀚𑁆𑀚𑀁 𑀅𑀢𑁆𑀢𑀦𑁄 𑀭𑀸𑀚𑀭𑀣𑀁 𑀅𑀪𑀺𑀭𑀼𑀳𑀺, 𑀆𑀭𑀼𑀬𑁆𑀳 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀢𑀁 𑀤𑀺𑀯𑀲𑀫𑁂𑀯 𑀅𑀢𑁆𑀢𑀦𑁄 𑀦𑀕𑀭𑀁 𑀧𑀢𑁆𑀯𑀸 𑀭𑀸𑀚𑀪𑀯𑀦𑀁 𑀧𑀸𑀯𑀺𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀫𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺, 𑀪𑀺𑀓𑁆𑀔𑀽 ¶ 𑀢𑀁 𑀣𑁂𑀭𑀸𑀦𑀁 𑀆𑀭𑁄𑀘𑁂𑀲𑀼𑀁, 𑀣𑁂𑀭𑀸 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀼𑀁.

𑀦𑀦𑁆𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑁂𑀯𑀢𑀻𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁭𑁧𑁪-𑁩𑁬. 𑀉𑀝𑁆𑀞𑁂𑀳𑀺 ¶ , 𑀭𑁂𑀯𑀢𑁂, 𑀲𑀼𑀧𑀸𑀧𑀥𑀫𑁆𑀫𑁂𑀢𑀺 𑀇𑀤𑀁 𑀭𑁂𑀯𑀢𑀻𑀧𑁂𑀢𑀯𑀢𑁆𑀣𑀼. 𑀢𑀁 𑀬𑀲𑁆𑀫𑀸 𑀭𑁂𑀯𑀢𑀻𑀯𑀺𑀫𑀸𑀦𑀯𑀢𑁆𑀣𑀼𑀦𑀸 𑀦𑀺𑀩𑁆𑀩𑀺𑀲𑁂𑀲𑀁, 𑀢𑀲𑁆𑀫𑀸 𑀬𑀤𑁂𑀢𑁆𑀣 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀕𑀸𑀣𑀸𑀲𑀼 𑀘 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸𑀬𑀁 (𑀯𑀺. 𑀯. 𑀅𑀝𑁆𑀞. 𑁮𑁬𑁦 𑀭𑁂𑀯𑀢𑀻𑀯𑀺𑀫𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀦𑀬𑁂𑀦𑁂𑀯 ¶ 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀦𑀦𑁆𑀤𑀺𑀬𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀲𑁂𑀦 𑀯𑀺𑀫𑀸𑀦𑀯𑀢𑁆𑀣𑀼𑀧𑀸𑀴𑀺𑀬𑀁 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀫𑁆𑀧𑀺 𑀭𑁂𑀯𑀢𑀻𑀧𑀝𑀺𑀩𑀤𑁆𑀥𑀸𑀬 𑀕𑀸𑀣𑀸𑀬 𑀯𑀲𑁂𑀦 ‘‘𑀭𑁂𑀯𑀢𑀻𑀧𑁂𑀢𑀯𑀢𑁆𑀣𑀼’’𑀦𑁆𑀢𑀺 𑀧𑁂𑀢𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀭𑁂𑀯𑀢𑀻𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀘𑁆𑀙𑀼𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀇𑀤𑀁 𑀫𑀫 𑀉𑀘𑁆𑀙𑀼𑀯𑀦𑀁 𑀫𑀳𑀦𑁆𑀢𑀦𑁆𑀢𑀺 𑀇𑀤𑀁 𑀉𑀘𑁆𑀙𑀼𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀉𑀘𑁆𑀙𑀼𑀓𑀮𑀸𑀧𑀁 𑀔𑀦𑁆𑀥𑁂 𑀓𑀢𑁆𑀯𑀸 𑀏𑀓𑀁 𑀉𑀘𑁆𑀙𑀼𑀁 𑀔𑀸𑀤𑀦𑁆𑀢𑁄 𑀕𑀘𑁆𑀙𑀢𑀺. 𑀅𑀣 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀩𑀸𑀮𑀤𑀸𑀭𑀓𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀢𑀺. 𑀤𑀸𑀭𑀓𑁄 𑀉𑀘𑁆𑀙𑀼𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀤𑁂𑀳𑀻’’𑀢𑀺 𑀧𑀭𑁄𑀤𑀢𑀺. 𑀉𑀧𑀸𑀲𑀓𑁄 𑀤𑀸𑀭𑀓𑀁 𑀧𑀭𑁄𑀤𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀸𑀧𑀫𑀓𑀸𑀲𑀺. 𑀲𑁄 𑀧𑀦 𑀧𑀼𑀭𑀺𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦 𑀓𑀺𑀜𑁆𑀘𑀺 𑀆𑀮𑀧𑀺, 𑀤𑀸𑀭𑀓𑀲𑁆𑀲 𑀉𑀘𑁆𑀙𑀼𑀔𑀡𑁆𑀟𑀫𑁆𑀧𑀺 𑀦𑀸𑀤𑀸𑀲𑀺. 𑀉𑀧𑀸𑀲𑀓𑁄 𑀢𑀁 𑀤𑀸𑀭𑀓𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀁 𑀤𑀸𑀭𑀓𑁄 𑀅𑀢𑀺𑀯𑀺𑀬 𑀭𑁄𑀤𑀢𑀺, 𑀇𑀫𑀲𑁆𑀲 𑀏𑀓𑀁 𑀉𑀘𑁆𑀙𑀼𑀔𑀡𑁆𑀟𑀁 𑀤𑁂𑀳𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑁄 𑀧𑀼𑀭𑀺𑀲𑁄 𑀅𑀲𑀳𑀦𑁆𑀢𑁄 𑀧𑀝𑀺𑀳𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀸𑀤𑀭𑀯𑀲𑁂𑀦 𑀏𑀓𑀁 𑀉𑀘𑁆𑀙𑀼𑀮𑀝𑁆𑀞𑀺𑀁 𑀧𑀺𑀝𑁆𑀞𑀺𑀢𑁄 𑀔𑀺𑀧𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀘𑀺𑀭𑀁 𑀧𑀭𑀺𑀪𑀸𑀯𑀺𑀢𑀲𑁆𑀲 𑀮𑁄𑀪𑀲𑁆𑀲 𑀯𑀲𑁂𑀦 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀨𑀮𑀁 𑀦𑀸𑀫 ¶ 𑀲𑀓𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀳𑁄𑀢𑀻𑀢𑀺 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀅𑀯𑀢𑁆𑀣𑀭𑀦𑁆𑀢𑀁 𑀅𑀜𑁆𑀚𑀦𑀯𑀡𑁆𑀡𑀁 𑀫𑀼𑀲𑀮𑀤𑀡𑁆𑀟𑀧𑀭𑀺𑀫𑀸𑀡𑁂𑀳𑀺 𑀉𑀘𑁆𑀙𑀽𑀳𑀺 𑀖𑀦𑀲𑀜𑁆𑀙𑀦𑁆𑀦𑀁 𑀫𑀳𑀦𑁆𑀢𑀁 𑀉𑀘𑁆𑀙𑀼𑀯𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀔𑀸𑀤𑀺𑀢𑀼𑀓𑀸𑀫𑀢𑀸𑀬 ‘‘𑀉𑀘𑁆𑀙𑀼𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀕𑀢𑀫𑀢𑁆𑀢𑁂 𑀢𑀁 𑀉𑀘𑁆𑀙𑀽 𑀅𑀪𑀺𑀳𑀦𑀦𑁆𑀢𑀺, 𑀲𑁄 𑀢𑁂𑀦 𑀧𑀼𑀘𑁆𑀙𑀺𑀢𑁄 𑀧𑀢𑀢𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀁 𑀧𑁂𑀢𑀁 𑀅𑀤𑁆𑀤𑀲. 𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺 𑁋

‘‘𑀇𑀤𑀁 𑀫𑀫 𑀉𑀘𑁆𑀙𑀼𑀯𑀦𑀁 𑀫𑀳𑀦𑁆𑀢𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀧𑀼𑀜𑁆𑀜𑀨𑀮𑀁 𑀅𑀦𑀧𑁆𑀧𑀓𑀁;

𑀢𑀁 𑀤𑀸𑀦𑀺 𑀫𑁂 𑀦 𑀧𑀭𑀺𑀪𑁄𑀕𑀫𑁂𑀢𑀺, 𑀆𑀘𑀺𑀓𑁆𑀔 𑀪𑀦𑁆𑀢𑁂 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

‘‘𑀳𑀜𑁆𑀜𑀸𑀫𑀺 ¶ 𑀔𑀚𑁆𑀚𑀸𑀫𑀺 𑀘 𑀯𑀸𑀬𑀫𑀸𑀫𑀺, 𑀧𑀭𑀺𑀲𑀓𑁆𑀓𑀸𑀫𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀓𑀺𑀜𑁆𑀘𑀺;

𑀲𑁆𑀯𑀸𑀳𑀁 𑀙𑀺𑀦𑁆𑀦𑀣𑀸𑀫𑁄 𑀓𑀧𑀡𑁄 𑀮𑀸𑀮𑀧𑀸𑀫𑀺, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

‘‘𑀯𑀺𑀖𑀸𑀢𑁄 𑀘𑀸𑀳𑀁 𑀧𑀭𑀺𑀧𑀢𑀸𑀫𑀺 𑀙𑀫𑀸𑀬𑀁,

𑀧𑀭𑀺𑀯𑀢𑁆𑀢𑀸𑀫𑀺 𑀯𑀸𑀭𑀺𑀘𑀭𑁄𑀯 𑀖𑀫𑁆𑀫𑁂;

𑀭𑀼𑀤𑀢𑁄 𑀘 𑀫𑁂 𑀅𑀲𑁆𑀲𑀼𑀓𑀸 𑀦𑀺𑀕𑁆𑀕𑀮𑀦𑁆𑀢𑀺,

𑀆𑀘𑀺𑀓𑁆𑀔 𑀪𑀦𑁆𑀢𑁂 𑀓𑀺𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

‘‘𑀙𑀸𑀢𑁄 𑀓𑀺𑀮𑀦𑁆𑀢𑁄 𑀘 𑀧𑀺𑀧𑀸𑀲𑀺𑀢𑁄 𑀘, 𑀲𑀦𑁆𑀢𑀲𑁆𑀲𑀺𑀢𑁄 𑀲𑀸𑀢𑀲𑀼𑀔𑀁 𑀦 𑀯𑀺𑀦𑁆𑀤𑁂;

𑀧𑀼𑀘𑁆𑀙𑀸𑀫𑀺 𑀢𑀁 𑀏𑀢𑀫𑀢𑁆𑀣𑀁 𑀪𑀤𑀦𑁆𑀢𑁂, 𑀓𑀣𑀁 𑀦𑀼 𑀉𑀘𑁆𑀙𑀼𑀧𑀭𑀺𑀪𑁄𑀕𑀁 𑀮𑀪𑁂𑀬𑁆𑀬’’𑀦𑁆𑀢𑀺.

‘‘𑀧𑀼𑀭𑁂 ¶ 𑀢𑀼𑀯𑀁 𑀓𑀫𑁆𑀫𑀫𑀓𑀸𑀲𑀺 𑀅𑀢𑁆𑀢𑀦𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀅𑀳𑀜𑁆𑀘 𑀢𑀁 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀢𑁆𑀯𑀁 𑀏𑀢𑀫𑀢𑁆𑀣𑀁 𑀯𑀺𑀚𑀸𑀦.

‘‘𑀉𑀘𑁆𑀙𑀼𑀁 𑀢𑀼𑀯𑀁 𑀔𑀸𑀤𑀫𑀸𑀦𑁄 𑀧𑀬𑀸𑀢𑁄, 𑀧𑀼𑀭𑀺𑀲𑁄 𑀘 𑀢𑁂 𑀧𑀺𑀝𑁆𑀞𑀺𑀢𑁄 𑀅𑀦𑁆𑀯𑀕𑀘𑁆𑀙𑀺;

𑀲𑁄 𑀘 𑀢𑀁 𑀧𑀘𑁆𑀘𑀸𑀲𑀦𑁆𑀢𑁄 𑀓𑀣𑁂𑀲𑀺, 𑀢𑀲𑁆𑀲 𑀢𑀼𑀯𑀁 𑀦 𑀓𑀺𑀜𑁆𑀘𑀺 𑀆𑀮𑀧𑀺𑀢𑁆𑀣.

‘‘𑀲𑁄 ¶ 𑀘 𑀢𑀁 𑀅𑀪𑀡𑀦𑁆𑀢𑀁 𑀅𑀬𑀸𑀘𑀺, 𑀤𑁂𑀳𑀬𑁆𑀬 𑀉𑀘𑁆𑀙𑀼𑀦𑁆𑀢𑀺 𑀘 𑀢𑀁 𑀅𑀯𑁄𑀘;

𑀢𑀲𑁆𑀲 𑀢𑀼𑀯𑀁 𑀧𑀺𑀝𑁆𑀞𑀺𑀢𑁄 𑀉𑀘𑁆𑀙𑀼𑀁 𑀅𑀤𑀸𑀲𑀺, 𑀢𑀲𑁆𑀲𑁂𑀢𑀁 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

‘‘𑀇𑀗𑁆𑀖 𑀢𑁆𑀯𑀁 𑀕𑀦𑁆𑀢𑁆𑀯𑀸𑀦 𑀧𑀺𑀝𑁆𑀞𑀺𑀢𑁄 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀕𑀳𑁂𑀢𑁆𑀯𑀸𑀦 𑀢𑀁 𑀔𑀸𑀤𑀲𑁆𑀲𑀼 𑀬𑀸𑀯𑀤𑀢𑁆𑀣𑀁;

𑀢𑁂𑀦𑁂𑀯 𑀢𑁆𑀯𑀁 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀲𑀺, 𑀳𑀝𑁆𑀞𑁄 𑀘𑀼𑀤𑀕𑁆𑀕𑁄 𑀘 𑀧𑀫𑁄𑀤𑀺𑀢𑁄 𑀘𑀸𑀢𑀺.

‘‘𑀕𑀦𑁆𑀢𑁆𑀯𑀸𑀦 𑀲𑁄 𑀧𑀺𑀝𑁆𑀞𑀺𑀢𑁄 𑀅𑀕𑁆𑀕𑀳𑁂𑀲𑀺, 𑀕𑀳𑁂𑀢𑁆𑀯𑀸𑀦 𑀢𑀁 𑀔𑀸𑀤𑀺 𑀬𑀸𑀯𑀤𑀢𑁆𑀣𑀁;

𑀢𑁂𑀦𑁂𑀯 𑀲𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺, 𑀳𑀝𑁆𑀞𑁄 𑀘𑀼𑀤𑀕𑁆𑀕𑁄 𑀘 𑀧𑀫𑁄𑀤𑀺𑀢𑁄 𑀘𑀸’’𑀢𑀺. 𑁋

𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑀧𑁂𑀢𑁂𑀦 𑀣𑁂𑀭𑁂𑀦 𑀘 𑀯𑀼𑀢𑁆𑀢𑀸.

𑁭𑁩𑁭-𑁮. 𑀢𑀢𑁆𑀣 𑀓𑀺𑀲𑁆𑀲𑀸𑀢𑀺 𑀓𑀻𑀤𑀺𑀲𑀲𑁆𑀲, 𑀓𑀫𑁆𑀫𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀜𑁆𑀜𑀸𑀫𑀻𑀢𑀺 𑀯𑀺𑀳𑀜𑁆𑀜𑀸𑀫𑀺 ¶ 𑀯𑀺𑀖𑀸𑀢𑀁 𑀆𑀧𑀚𑁆𑀚𑀸𑀫𑀺. 𑀯𑀺𑀳𑀜𑁆𑀜𑀸𑀫𑀻𑀢𑀺 𑀯𑀸 𑀯𑀺𑀩𑀸𑀥𑀺𑀬𑀸𑀫𑀺, 𑀯𑀺𑀲𑁂𑀲𑀢𑁄 𑀧𑀻𑀴𑀺𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀔𑀚𑁆𑀚𑀸𑀫𑀻𑀢𑀺 𑀔𑀸𑀤𑀺𑀬𑀸𑀫𑀺, 𑀅𑀲𑀺𑀧𑀢𑁆𑀢𑀲𑀤𑀺𑀲𑁂𑀳𑀺 𑀦𑀺𑀲𑀺𑀢𑁂𑀳𑀺 𑀔𑀸𑀤𑀦𑁆𑀢𑁂𑀳𑀺 𑀯𑀺𑀬 𑀉𑀘𑁆𑀙𑀼𑀧𑀢𑁆𑀢𑁂𑀳𑀺 𑀓𑀦𑁆𑀢𑀺𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀯𑀸𑀬𑀫𑀸𑀫𑀻𑀢𑀺 𑀉𑀘𑁆𑀙𑀼𑀁 𑀔𑀸𑀤𑀺𑀢𑀼𑀁 𑀯𑀸𑀬𑀸𑀫𑀁 𑀓𑀭𑁄𑀫𑀺. 𑀧𑀭𑀺𑀲𑀓𑁆𑀓𑀸𑀫𑀻𑀢𑀺 𑀧𑀬𑁄𑀕𑀁 𑀓𑀭𑁄𑀫𑀺. 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀉𑀘𑁆𑀙𑀼𑀭𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀉𑀘𑁆𑀙𑀼𑀁 𑀔𑀸𑀤𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀙𑀺𑀦𑁆𑀦𑀣𑀸𑀫𑁄𑀢𑀺 𑀙𑀺𑀦𑁆𑀦𑀲𑀳𑁄 𑀉𑀧𑀘𑁆𑀙𑀺𑀦𑁆𑀦𑀣𑀸𑀫𑁄, 𑀧𑀭𑀺𑀓𑁆𑀔𑀻𑀡𑀩𑀮𑁄𑀢𑀺 𑀅𑀢𑁆𑀣𑁄. 𑀓𑀧𑀡𑁄𑀢𑀺 ¶ 𑀤𑀻𑀦𑁄. 𑀮𑀸𑀮𑀧𑀸𑀫𑀻𑀢𑀺 𑀤𑀼𑀓𑁆𑀔𑁂𑀦 𑀅𑀝𑁆𑀝𑀺𑀢𑁄 𑀅𑀢𑀺𑀯𑀺𑀬 𑀯𑀺𑀮𑀧𑀸𑀫𑀺.

𑁭𑁩𑁯. 𑀯𑀺𑀖𑀸𑀢𑁄𑀢𑀺 𑀯𑀺𑀖𑀸𑀢𑀯𑀸, 𑀯𑀺𑀳𑀢𑀩𑀮𑁄 𑀯𑀸. 𑀧𑀭𑀺𑀧𑀢𑀸𑀫𑀺 𑀙𑀫𑀸𑀬𑀦𑁆𑀢𑀺 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀧𑀧𑀢𑀸𑀫𑀺. 𑀧𑀭𑀺𑀯𑀢𑁆𑀢𑀸𑀫𑀻𑀢𑀺 𑀧𑀭𑀺𑀩𑁆𑀪𑀫𑀸𑀫𑀺. 𑀯𑀸𑀭𑀺𑀘𑀭𑁄𑀯𑀸𑀢𑀺 𑀫𑀘𑁆𑀙𑁄 𑀯𑀺𑀬. 𑀖𑀫𑁆𑀫𑁂𑀢𑀺 𑀖𑀫𑁆𑀫𑀲𑀦𑁆𑀢𑀢𑁆𑀢𑁂 𑀣𑀮𑁂.

𑁭𑁪𑁦-𑁪. 𑀲𑀦𑁆𑀢𑀲𑁆𑀲𑀺𑀢𑁄𑀢𑀺 𑀑𑀝𑁆𑀞𑀓𑀡𑁆𑀞𑀢𑀸𑀮𑀽𑀦𑀁 𑀲𑁄𑀲𑀧𑁆𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀢𑀲𑀺𑀢𑁄. 𑀲𑀸𑀢𑀲𑀼𑀔𑀦𑁆𑀢𑀺 𑀲𑀸𑀢𑀪𑀽𑀢𑀁 𑀲𑀼𑀔𑀁. 𑀦 𑀯𑀺𑀦𑁆𑀤𑁂𑀢𑀺 𑀦 𑀮𑀪𑀸𑀫𑀺. 𑀢𑀦𑁆𑀢𑀺 ¶ 𑀢𑀼𑀯𑀁. 𑀯𑀺𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀳𑀺. 𑀧𑀬𑀸𑀢𑁄𑀢𑀺 𑀕𑀦𑁆𑀢𑀼𑀁 𑀆𑀭𑀤𑁆𑀥𑁄. 𑀅𑀦𑁆𑀯𑀕𑀘𑁆𑀙𑀻𑀢𑀺 𑀅𑀦𑀼𑀩𑀦𑁆𑀥𑀺. 𑀧𑀘𑁆𑀘𑀸𑀲𑀦𑁆𑀢𑁄𑀢𑀺 𑀧𑀘𑁆𑀘𑀸𑀲𑀻𑀲𑀫𑀸𑀦𑁄. 𑀢𑀲𑁆𑀲𑁂𑀢𑀁 𑀓𑀫𑁆𑀫𑀲𑁆𑀲𑀸𑀢𑀺 𑀏𑀢𑁆𑀣 𑀏𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀺𑀝𑁆𑀞𑀺𑀢𑁄 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀧𑀲𑁆𑀲𑁂𑀦𑁂𑀯 𑀉𑀘𑁆𑀙𑀼𑀁 𑀕𑀡𑁆𑀳𑁂𑀬𑁆𑀬𑀸𑀲𑀺. 𑀧𑀫𑁄𑀤𑀺𑀢𑁄𑀢𑀺 𑀧𑀫𑀼𑀤𑀺𑀢𑁄.

𑁭𑁪𑁫. 𑀕𑀳𑁂𑀢𑁆𑀯𑀸𑀦 𑀢𑀁 𑀔𑀸𑀤𑀺 𑀬𑀸𑀯𑀤𑀢𑁆𑀣𑀦𑁆𑀢𑀺 𑀣𑁂𑀭𑁂𑀦 𑀆𑀡𑀢𑁆𑀢𑀺𑀦𑀺𑀬𑀸𑀫𑁂𑀦 𑀉𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀬𑀣𑀸𑀭𑀼𑀘𑀺 𑀔𑀸𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀉𑀘𑁆𑀙𑀼𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀉𑀧𑀦𑁂𑀲𑀺, 𑀣𑁂𑀭𑁄 𑀢𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀢𑁂𑀦𑁂𑀯 𑀢𑀁 𑀉𑀘𑁆𑀙𑀼𑀓𑀮𑀸𑀧𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀅𑀤𑀸𑀲𑀺, 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺, 𑀧𑁂𑀢𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀺𑀢𑁆𑀯𑀸 𑀕𑀢𑁄, 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸𑀲𑀼𑀔𑀁 𑀉𑀘𑁆𑀙𑀼𑀁 𑀧𑀭𑀺𑀪𑀼𑀜𑁆𑀚𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀲𑀸 𑀧𑀦𑁂𑀲𑀸 𑀧𑁂𑀢𑀲𑁆𑀲 𑀧𑀯𑀢𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀧𑀸𑀓𑀝𑀸 𑀅𑀳𑁄𑀲𑀺. 𑀅𑀣 𑀫𑀦𑀼𑀲𑁆𑀲𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 𑀫𑀘𑁆𑀙𑁂𑀭𑀫𑀮𑀢𑁄 𑀧𑀝𑀺𑀯𑀺𑀭𑀢𑀸 𑀅𑀳𑁂𑀲𑀼𑀦𑁆𑀢𑀺.

𑀉𑀘𑁆𑀙𑀼𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀲𑀸𑀯𑀢𑁆𑀣𑀺 ¶ ¶ 𑀦𑀸𑀫 𑀦𑀕𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀧𑁂𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀓𑁄𑀲𑀮𑀭𑀜𑁆𑀜𑁄 𑀤𑁆𑀯𑁂 𑀧𑀼𑀢𑁆𑀢𑀸 𑀧𑀸𑀲𑀸𑀤𑀺𑀓𑀸 𑀧𑀞𑀫𑀯𑀬𑁂 𑀞𑀺𑀢𑀸 𑀬𑁄𑀩𑁆𑀩𑀦𑀫𑀤𑀫𑀢𑁆𑀢𑀸 𑀧𑀭𑀤𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀭𑀺𑀔𑀸𑀧𑀺𑀝𑁆𑀞𑁂 𑀧𑁂𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀭𑀢𑁆𑀢𑀺𑀬𑀁 𑀪𑁂𑀭𑀯𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑀸 ‘‘𑀏𑀯𑀁 𑀓𑀢𑁂 𑀇𑀤𑀁 𑀅𑀯𑀫𑀗𑁆𑀕𑀮𑀁 𑀯𑀽𑀧𑀲𑀫𑁆𑀫𑀢𑀻’’𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀉𑀧𑀸𑀲𑀓𑀸 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀯𑀦𑁂𑀦 𑀢𑀼𑀫𑁆𑀳𑀸𑀓𑀁 𑀦 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑁋

‘‘𑀲𑀸𑀯𑀢𑁆𑀣𑀺 ¶ 𑀦𑀸𑀫 𑀦𑀕𑀭𑀁, 𑀳𑀺𑀫𑀯𑀦𑁆𑀢𑀲𑁆𑀲 𑀧𑀲𑁆𑀲𑀢𑁄;

𑀢𑀢𑁆𑀣 𑀆𑀲𑀼𑀁 𑀤𑁆𑀯𑁂 𑀓𑀼𑀫𑀸𑀭𑀸, 𑀭𑀸𑀚𑀧𑀼𑀢𑁆𑀢𑀸𑀢𑀺 𑀫𑁂 𑀲𑀼𑀢𑀁.

‘‘𑀲𑀫𑁆𑀫𑀢𑁆𑀢𑀸 𑀭𑀚𑀦𑀻𑀬𑁂𑀲𑀼, 𑀓𑀸𑀫𑀲𑁆𑀲𑀸𑀤𑀸𑀪𑀺𑀦𑀦𑁆𑀤𑀺𑀦𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁂 𑀕𑀺𑀤𑁆𑀥𑀸, 𑀦 𑀢𑁂 𑀧𑀲𑁆𑀲𑀺𑀁𑀲𑀼𑀦𑀸𑀕𑀢𑀁.

‘‘𑀢𑁂 𑀘𑀼𑀢𑀸 𑀘 𑀫𑀦𑀼𑀲𑁆𑀲𑀢𑁆𑀢𑀸, 𑀧𑀭𑀮𑁄𑀓𑀁 𑀇𑀢𑁄 𑀕𑀢𑀸;

𑀢𑁂𑀥 𑀖𑁄𑀲𑁂𑀦𑁆𑀢𑁆𑀬𑀤𑀺𑀲𑁆𑀲𑀦𑁆𑀢𑀸, 𑀧𑀼𑀩𑁆𑀩𑁂 𑀤𑀼𑀓𑁆𑀓𑀝𑀫𑀢𑁆𑀢𑀦𑁄.

‘‘𑀩𑀳𑀽𑀲𑀼 𑀯𑀢 𑀲𑀦𑁆𑀢𑁂𑀲𑀼, 𑀤𑁂𑀬𑁆𑀬𑀥𑀫𑁆𑀫𑁂 𑀉𑀧𑀝𑁆𑀞𑀺𑀢𑁂;

𑀦𑀸𑀲𑀓𑁆𑀔𑀺𑀫𑁆𑀳𑀸 𑀘 𑀅𑀢𑁆𑀢𑀸𑀦𑀁, 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀲𑀼𑀔𑀸𑀯𑀳𑀁.

‘‘𑀓𑀺𑀁 𑀢𑀢𑁄 𑀧𑀸𑀧𑀓𑀁 𑀅𑀲𑁆𑀲, 𑀬𑀁 𑀦𑁄 𑀭𑀸𑀚𑀓𑀼𑀮𑀸 𑀘𑀼𑀢𑀸;

𑀉𑀧𑀧𑀦𑁆𑀦𑀸 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸.

‘‘𑀲𑀸𑀫𑀺𑀦𑁄 𑀇𑀥 𑀳𑀼𑀢𑁆𑀯𑀸𑀦, 𑀳𑁄𑀦𑁆𑀢𑀺 𑀅𑀲𑀸𑀫𑀺𑀦𑁄 𑀢𑀳𑀺𑀁;

𑀪𑀫𑀦𑁆𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀬, 𑀫𑀦𑀼𑀲𑁆𑀲𑀸 𑀉𑀦𑁆𑀦𑀢𑁄𑀦𑀢𑀸.

‘‘𑀏𑀢𑀫𑀸𑀤𑀻𑀦𑀯𑀁 ¶ 𑀜𑀢𑁆𑀯𑀸, 𑀇𑀲𑁆𑀲𑀭𑀫𑀤𑀲𑀫𑁆𑀪𑀯𑀁;

𑀧𑀳𑀸𑀬 ¶ 𑀇𑀲𑁆𑀲𑀭𑀫𑀤𑀁, 𑀪𑀯𑁂 𑀲𑀕𑁆𑀕𑀕𑀢𑁄 𑀦𑀭𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺 𑁋 𑀕𑀸𑀣𑀸 𑀅𑀪𑀸𑀲𑀺;

𑁭𑁪𑁬. 𑀢𑀢𑁆𑀣 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀤𑀺𑀝𑁆𑀞𑀫𑁂𑀯, 𑀅𑀣 𑀔𑁄 𑀮𑁄𑀓𑁂 𑀧𑀸𑀓𑀝𑀪𑀸𑀯𑁂𑀦 𑀏𑀯𑀁 𑀫𑀬𑀸 𑀲𑀼𑀢𑀦𑁆𑀢𑀺 𑀅𑀢𑁆𑀣𑁄.

𑁭𑁪𑁭. 𑀓𑀸𑀫𑀲𑁆𑀲𑀸𑀤𑀸𑀪𑀺𑀦𑀦𑁆𑀤𑀺𑀦𑁄𑀢𑀺 𑀓𑀸𑀫𑀕𑀼𑀡𑁂𑀲𑀼 𑀅𑀲𑁆𑀲𑀸𑀤𑀯𑀲𑁂𑀦 𑀅𑀪𑀺𑀦𑀦𑁆𑀤𑀦𑀲𑀻𑀮𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁂 𑀕𑀺𑀤𑁆𑀥𑀸𑀢𑀺 𑀯𑀢𑁆𑀢𑀫𑀸𑀦𑀲𑀼𑀔𑀫𑀢𑁆𑀢𑁂 𑀕𑀺𑀤𑁆𑀥𑀸 𑀕𑀣𑀺𑀢𑀸 𑀳𑀼𑀢𑁆𑀯𑀸. 𑀦 𑀢𑁂 𑀧𑀲𑁆𑀲𑀺𑀁𑀲𑀼𑀦𑀸𑀕𑀢𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀅𑀦𑀸𑀕𑀢𑀁 𑀆𑀬𑀢𑀺𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀮𑀤𑁆𑀥𑀩𑁆𑀩𑀁 𑀲𑀼𑀔𑀁 𑀢𑁂 𑀦 𑀘𑀺𑀦𑁆𑀢𑁂𑀲𑀼𑀁.

𑁭𑁪𑁮. 𑀢𑁂𑀥 𑀖𑁄𑀲𑁂𑀦𑁆𑀢𑁆𑀬𑀤𑀺𑀲𑁆𑀲𑀦𑁆𑀢𑀸𑀢𑀺 𑀢𑁂 𑀧𑀼𑀩𑁆𑀩𑁂 𑀭𑀸𑀚𑀧𑀼𑀢𑁆𑀢𑀪𑀽𑀢𑀸 𑀧𑁂𑀢𑀸 𑀇𑀥 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀸 𑀖𑁄𑀲𑁂𑀦𑁆𑀢𑀺 𑀓𑀦𑁆𑀤𑀦𑁆𑀢𑀺. 𑀓𑀺𑀁 𑀓𑀦𑁆𑀤𑀦𑁆𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀤𑀼𑀓𑁆𑀓𑀝𑀫𑀢𑁆𑀢𑀦𑁄’’𑀢𑀺.

𑁭𑁪𑁯. 𑀇𑀤𑀸𑀦𑀺 ¶ 𑀢𑁂𑀲𑀁 𑀓𑀦𑁆𑀤𑀦𑀲𑁆𑀲 𑀓𑀸𑀭𑀡𑀁 𑀳𑁂𑀢𑀼𑀢𑁄 𑀘 𑀨𑀮𑀢𑁄 𑀘 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀽𑀲𑀼 𑀯𑀢 𑀲𑀦𑁆𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀩𑀳𑀽𑀲𑀼 𑀯𑀢 𑀲𑀦𑁆𑀢𑁂𑀲𑀽𑀢𑀺 𑀅𑀦𑁂𑀓𑁂𑀲𑀼 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼. 𑀤𑁂𑀬𑁆𑀬𑀥𑀫𑁆𑀫𑁂 𑀉𑀧𑀝𑁆𑀞𑀺𑀢𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀤𑀸𑀢𑀩𑁆𑀩𑀤𑁂𑀬𑁆𑀬𑀥𑀫𑁆𑀫𑁂𑀧𑀺 𑀲𑀫𑀻𑀧𑁂 𑀞𑀺𑀢𑁂, 𑀮𑀩𑁆𑀪𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀁 𑀲𑀼𑀔𑀸𑀯𑀳𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀆𑀬𑀢𑀺𑀁 𑀲𑀼𑀔𑀸𑀯𑀳𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑁄𑀢𑁆𑀣𑀺𑀁 𑀦𑀺𑀭𑀼𑀧𑀤𑁆𑀤𑀯𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀫𑁆𑀳𑀸 𑀯𑀢𑀸𑀢𑀺 𑀬𑁄𑀚𑀦𑀸.

𑁭𑁫𑁦. 𑀓𑀺𑀁 𑀢𑀢𑁄 𑀧𑀸𑀧𑀓𑀁 𑀅𑀲𑁆𑀲𑀸𑀢𑀺 𑀢𑀢𑁄 𑀧𑀸𑀧𑀓𑀁 𑀮𑀸𑀫𑀓𑀁 𑀦𑀸𑀫 𑀓𑀺𑀁 𑀅𑀜𑁆𑀜𑀁 𑀅𑀲𑁆𑀲 𑀲𑀺𑀬𑀸. 𑀬𑀁 𑀦𑁄 𑀭𑀸𑀚𑀓𑀼𑀮𑀸 𑀘𑀼𑀢𑀸𑀢𑀺 𑀬𑁂𑀦 𑀧𑀸𑀧𑀓𑀫𑁆𑀫𑁂𑀦 𑀫𑀬𑀁 𑀭𑀸𑀚𑀓𑀼𑀮𑀢𑁄 𑀘𑀼𑀢𑀸 𑀇𑀥 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀦𑁆𑀦𑀸 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑀸 𑀯𑀺𑀘𑀭𑀸𑀫𑀸𑀢𑀺 𑀅𑀢𑁆𑀣𑁄.

𑁭𑁫𑁧. 𑀲𑀸𑀫𑀺𑀦𑁄 𑀇𑀥 𑀳𑀼𑀢𑁆𑀯𑀸𑀦𑀸𑀢𑀺 𑀇𑀥 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑀼𑀩𑁆𑀩𑁂 𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀢𑀳𑀺𑀁 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀳𑁄𑀦𑁆𑀢𑀺 𑀅𑀲𑁆𑀲𑀸𑀫𑀺𑀦𑁄. 𑀫𑀦𑀼𑀲𑁆𑀲𑀸 𑀉𑀦𑁆𑀦𑀢𑁄𑀦𑀢𑀸𑀢𑀺 𑀫𑀦𑀼𑀲𑁆𑀲𑀓𑀸𑀮𑁂 𑀲𑀸𑀫𑀺𑀦𑁄 ¶ 𑀳𑀼𑀢𑁆𑀯𑀸 𑀓𑀸𑀮𑀓𑀢𑀸 𑀓𑀫𑁆𑀫𑀯𑀲𑁂𑀦 𑀑𑀦𑀢𑀸 ¶ 𑀪𑀫𑀦𑁆𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀬, 𑀧𑀲𑁆𑀲 𑀲𑀁𑀲𑀸𑀭𑀧𑀓𑀢𑀺𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁭𑁫𑁨. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀇𑀲𑁆𑀲𑀭𑀫𑀤𑀲𑀫𑁆𑀪𑀯𑀦𑁆𑀢𑀺 𑀏𑀢𑀁 𑀇𑀲𑁆𑀲𑀭𑀺𑀬𑀫𑀤𑀯𑀲𑁂𑀦 𑀲𑀫𑁆𑀪𑀽𑀢𑀁 𑀅𑀧𑀸𑀬𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀆𑀤𑀻𑀦𑀯𑀁 𑀤𑁄𑀲𑀁 𑀜𑀢𑁆𑀯𑀸 𑀧𑀳𑀸𑀬 𑀇𑀲𑁆𑀲𑀭𑀺𑀬𑀫𑀤𑀁 𑀧𑀼𑀜𑁆𑀜𑀧𑁆𑀧𑀲𑀼𑀢𑁄 𑀳𑀼𑀢𑁆𑀯𑀸. 𑀪𑀯𑁂 𑀲𑀕𑁆𑀕𑀕𑀢𑁄 𑀦𑀭𑁄𑀢𑀺 𑀲𑀕𑁆𑀕𑀁 𑀤𑁂𑀯𑀮𑁄𑀓𑀁 𑀕𑀢𑁄𑀬𑁂𑀯 𑀪𑀯𑁂𑀬𑁆𑀬.

𑀇𑀢𑀺 𑀲𑀢𑁆𑀣𑀸 𑀢𑁂𑀲𑀁 𑀧𑁂𑀢𑀸𑀦𑀁 𑀧𑀯𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀓𑀢𑀁 𑀤𑀸𑀦𑀁 𑀢𑁂𑀲𑀁 𑀧𑁂𑀢𑀸𑀦𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀭𑀸𑀚𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀧𑀼𑀩𑁆𑀩𑁂 ¶ 𑀓𑀢𑀸𑀦𑀁 𑀓𑀫𑁆𑀫𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀧𑀼𑀢𑁆𑀢𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀣 𑀬𑁄 𑀲𑁄 𑀅𑀢𑀻𑀢𑁂 𑀓𑀺𑀢𑀯𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀅𑀢𑀻𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀧𑁂𑀢𑁂𑀲𑀼 𑀉𑀧𑁆𑀧𑀦𑁆𑀦𑁄. 𑀲𑁄 𑀇𑀥 ‘‘𑀭𑀸𑀚𑀧𑀼𑀢𑁆𑀢𑀧𑁂𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀲𑀸𑀡𑀯𑀸𑀲𑀺𑀧𑁂𑀢𑀯𑀢𑁆𑀣𑀼𑀫𑁆𑀳𑀺 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀲𑀢𑁆𑀣𑀸 𑀳𑀺 𑀢𑀤𑀸 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀜𑀸𑀢𑀺𑀧𑁂𑀢𑀸𑀦𑀁 𑀧𑀯𑀢𑁆𑀢𑀺𑀬𑀸 𑀓𑀣𑀺𑀢𑀸𑀬 ‘‘𑀦 𑀓𑁂𑀯𑀮𑀁 𑀢𑀯 𑀜𑀸𑀢𑀓𑀸𑀬𑁂𑀯, 𑀅𑀣 𑀔𑁄 𑀢𑁆𑀯𑀫𑁆𑀧𑀺 𑀇𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑁂 𑀅𑀢𑁆𑀢𑀪𑀸𑀯𑁂 𑀧𑁂𑀢𑁄 𑀳𑀼𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑁋

‘‘𑀧𑀼𑀩𑁆𑀩𑁂 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑁄 𑀫𑀣𑀬𑁂 𑀫𑀦𑀁;

𑀭𑀽𑀧𑁂 𑀲𑀤𑁆𑀤𑁂 𑀭𑀲𑁂 𑀕𑀦𑁆𑀥𑁂, 𑀨𑁄𑀝𑁆𑀞𑀩𑁆𑀩𑁂 𑀘 𑀫𑀦𑁄𑀭𑀫𑁂.

‘‘𑀇𑀘𑁆𑀘𑀁 𑀕𑀻𑀢𑀁 𑀭𑀢𑀺𑀁 𑀔𑀺𑀟𑁆𑀟𑀁, 𑀅𑀦𑀼𑀪𑀼𑀢𑁆𑀯𑀸 𑀅𑀦𑀧𑁆𑀧𑀓𑀁;

𑀉𑀬𑁆𑀬𑀸𑀦𑁂 𑀧𑀭𑀺𑀘𑀭𑀺𑀢𑁆𑀯𑀸, 𑀧𑀯𑀺𑀲𑀦𑁆𑀢𑁄 𑀕𑀺𑀭𑀺𑀩𑁆𑀩𑀚𑀁.

‘‘𑀇𑀲𑀺𑀁 ¶ ¶ 𑀲𑀼𑀦𑁂𑀢𑁆𑀢𑀫𑀤𑁆𑀤𑀓𑁆𑀔𑀺, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀅𑀧𑁆𑀧𑀺𑀘𑁆𑀙𑀁 𑀳𑀺𑀭𑀺𑀲𑀫𑁆𑀧𑀦𑁆𑀦𑀁, 𑀉𑀜𑁆𑀙𑁂 𑀧𑀢𑁆𑀢𑀕𑀢𑁂 𑀭𑀢𑀁.

‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳, 𑀮𑀤𑁆𑀥𑀸 𑀪𑀦𑁆𑀢𑁂𑀢𑀺 𑀘𑀸𑀩𑁆𑀭𑀯𑀺;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀉𑀘𑁆𑀘𑀁 𑀧𑀕𑁆𑀕𑀬𑁆𑀳 𑀔𑀢𑁆𑀢𑀺𑀬𑁄.

‘‘𑀣𑀡𑁆𑀟𑀺𑀮𑁂 𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸, 𑀳𑀲𑀫𑀸𑀦𑁄 𑀅𑀧𑀓𑁆𑀓𑀫𑀺;

𑀭𑀜𑁆𑀜𑁄 𑀓𑀺𑀢𑀯𑀲𑁆𑀲𑀸𑀳𑀁 𑀧𑀼𑀢𑁆𑀢𑁄, 𑀓𑀺𑀁 𑀫𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀺.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀭𑀼𑀲𑀲𑁆𑀲, 𑀯𑀺𑀧𑀸𑀓𑁄 𑀓𑀝𑀼𑀓𑁄 𑀅𑀳𑀼;

𑀬𑀁 𑀭𑀸𑀚𑀧𑀼𑀢𑁆𑀢𑁄 𑀯𑁂𑀤𑁂𑀲𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑁄.

‘‘𑀙𑀴𑁂𑀯 𑀘𑀢𑀼𑀭𑀸𑀲𑀻𑀢𑀺, 𑀯𑀲𑁆𑀲𑀸𑀦𑀺 𑀦𑀳𑀼𑀢𑀸𑀦𑀺 𑀘;

𑀪𑀼𑀲𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀺𑀢𑁆𑀣𑁄, 𑀦𑀺𑀭𑀬𑁂 𑀓𑀢𑀓𑀺𑀩𑁆𑀩𑀺𑀲𑁄.

‘‘𑀉𑀢𑁆𑀢𑀸𑀦𑁄𑀧𑀺 ¶ 𑀘 𑀧𑀘𑁆𑀘𑀺𑀢𑁆𑀣, 𑀦𑀺𑀓𑀼𑀚𑁆𑀚𑁄 𑀯𑀸𑀫𑀤𑀓𑁆𑀔𑀺𑀡𑁄;

𑀉𑀤𑁆𑀥𑀁𑀧𑀸𑀤𑁄 𑀞𑀺𑀢𑁄 𑀘𑁂𑀯, 𑀘𑀺𑀭𑀁 𑀩𑀸𑀮𑁄 𑀅𑀧𑀘𑁆𑀘𑀣.

‘‘𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀽𑀕𑀸𑀦𑀺 𑀦𑀳𑀼𑀢𑀸𑀦𑀺 𑀘;

𑀪𑀼𑀲𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀺𑀢𑁆𑀣𑁄, 𑀦𑀺𑀭𑀬𑁂 𑀓𑀢𑀓𑀺𑀩𑁆𑀩𑀺𑀲𑁄.

‘‘𑀏𑀢𑀸𑀤𑀺𑀲𑀁 𑀔𑁄 𑀓𑀝𑀼𑀓𑀁, 𑀅𑀧𑁆𑀧𑀤𑀼𑀝𑁆𑀞𑀧𑁆𑀧𑀤𑁄𑀲𑀺𑀦𑀁;

𑀧𑀘𑁆𑀘𑀦𑁆𑀢𑀺 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀇𑀲𑀺𑀫𑀸𑀲𑀚𑁆𑀚 𑀲𑀼𑀩𑁆𑀩𑀢𑀁.

‘‘𑀲𑁄 𑀢𑀢𑁆𑀣 𑀩𑀳𑀼𑀯𑀲𑁆𑀲𑀸𑀦𑀺, 𑀯𑁂𑀤𑀬𑀺𑀢𑁆𑀯𑀸 𑀩𑀳𑀼𑀁 𑀤𑀼𑀔𑀁;

𑀔𑀼𑀧𑁆𑀧𑀺𑀧𑀸𑀲𑀳𑀢𑁄 𑀦𑀸𑀫, 𑀧𑁂𑀢𑁄 𑀆𑀲𑀺 𑀢𑀢𑁄 𑀘𑀼𑀢𑁄.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀇𑀲𑁆𑀲𑀭𑀫𑀤𑀲𑀫𑁆𑀪𑀯𑀁;

𑀧𑀳𑀸𑀬 𑀇𑀲𑁆𑀲𑀭𑀫𑀤𑀁, 𑀦𑀺𑀯𑀸𑀢𑀫𑀦𑀼𑀯𑀢𑁆𑀢𑀬𑁂.

‘‘𑀤𑀺𑀝𑁆𑀞𑁂𑀯 ¶ 𑀥𑀫𑁆𑀫𑁂 𑀧𑀸𑀲𑀁𑀲𑁄, 𑀬𑁄 𑀩𑀼𑀤𑁆𑀥𑁂𑀲𑀼 𑀲𑀕𑀸𑀭𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺. 𑁋

𑁭𑁫𑁩. 𑀢𑀢𑁆𑀣 𑀧𑀼𑀩𑁆𑀩𑁂 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁, 𑀯𑀺𑀧𑀸𑀓𑁄 𑀫𑀣𑀬𑁂 𑀫𑀦𑀦𑁆𑀢𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀓𑀢𑀸𑀦𑀁 𑀅𑀓𑀼𑀲𑀮𑀓𑀫𑁆𑀫𑀸𑀦𑀁 𑀨𑀮𑀁 𑀉𑀴𑀸𑀭𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀦𑁆𑀥𑀩𑀸𑀮𑀸𑀦𑀁 𑀘𑀺𑀢𑁆𑀢𑀁 𑀫𑀣𑀬𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬, 𑀧𑀭𑁂𑀲𑀁 𑀅𑀦𑀢𑁆𑀣𑀓𑀭𑀡𑀫𑀼𑀔𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 ¶ 𑀢𑀁 𑀘𑀺𑀢𑁆𑀢𑀫𑀣𑀦𑀁 𑀯𑀺𑀲𑀬𑁂𑀦 𑀲𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑁂 𑀲𑀤𑁆𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑁂𑀢𑀺 𑀭𑀽𑀧𑀳𑁂𑀢𑀼, 𑀬𑀣𑀺𑀘𑁆𑀙𑀺𑀢𑀲𑁆𑀲 𑀫𑀦𑀸𑀧𑀺𑀬𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀤𑁂𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁭𑁫𑁪. 𑀏𑀯𑀁 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀅𑀲𑀸𑀥𑀸𑀭𑀡𑀢𑁄 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀘𑁆𑀘𑀁 𑀕𑀻𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀺𑀦𑁆𑀢𑀺 𑀓𑀸𑀫𑀭𑀢𑀺𑀁. 𑀔𑀺𑀟𑁆𑀟𑀦𑁆𑀢𑀺 𑀲𑀳𑀸𑀬𑀓𑀸𑀤𑀻𑀳𑀺 𑀓𑁂𑀴𑀺𑀁. 𑀕𑀺𑀭𑀺𑀩𑁆𑀩𑀚𑀦𑁆𑀢𑀺 𑀭𑀸𑀚𑀕𑀳𑀁.

𑁭𑁫𑁫. 𑀇𑀲𑀺𑀦𑁆𑀢𑀺 ¶ 𑀅𑀲𑁂𑀓𑁆𑀔𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀦𑀝𑁆𑀞𑁂𑀦 𑀇𑀲𑀺𑀁. 𑀲𑀼𑀦𑁂𑀢𑁆𑀢𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁. 𑀅𑀢𑁆𑀢𑀤𑀦𑁆𑀢𑀦𑁆𑀢𑀺 𑀉𑀢𑁆𑀢𑀫𑁂𑀦 𑀤𑀫𑀣𑁂𑀦 𑀤𑀫𑀺𑀢𑀘𑀺𑀢𑁆𑀢𑀁. 𑀲𑀫𑀸𑀳𑀺𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁. 𑀉𑀜𑁆𑀙𑁂 𑀧𑀢𑁆𑀢𑀕𑀢𑁂 𑀭𑀢𑀦𑁆𑀢𑀺 𑀉𑀜𑁆𑀙𑁂𑀦 𑀪𑀺𑀓𑁆𑀔𑀸𑀘𑀸𑀭𑁂𑀦 𑀮𑀤𑁆𑀥𑁂 𑀧𑀢𑁆𑀢𑀕𑀢𑁂 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂 𑀆𑀳𑀸𑀭𑁂 𑀭𑀢𑀁 𑀲𑀦𑁆𑀢𑀼𑀝𑁆𑀞𑀁.

𑁭𑁫𑁬. 𑀮𑀤𑁆𑀥𑀸, 𑀪𑀦𑁆𑀢𑁂𑀢𑀺 𑀘𑀸𑀩𑁆𑀭𑀯𑀻𑀢𑀺 ‘‘𑀅𑀧𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀸 𑀮𑀤𑁆𑀥𑀸’’𑀢𑀺 𑀯𑀺𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀓𑀣𑁂𑀲𑀺. 𑀉𑀘𑁆𑀘𑀁 𑀧𑀕𑁆𑀕𑀬𑁆𑀳𑀸𑀢𑀺 𑀉𑀘𑁆𑀘𑀢𑀭𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸.

𑁭𑁫𑁭. 𑀣𑀡𑁆𑀟𑀺𑀮𑁂 𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀔𑀭𑀓𑀞𑀺𑀦𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀔𑀺𑀧𑀦𑁆𑀢𑁄 𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸. 𑀅𑀧𑀓𑁆𑀓𑀫𑀻𑀢𑀺 𑀣𑁄𑀓𑀁 𑀅𑀧𑀲𑀓𑁆𑀓𑀺. 𑀅𑀧𑀲𑀓𑁆𑀓𑀦𑁆𑀢𑁄 𑀘 ‘‘𑀅𑀓𑀸𑀭𑀡𑁂𑀦𑁂𑀯 𑀅𑀦𑁆𑀥𑀩𑀸𑀮𑁄 𑀫𑀳𑀦𑁆𑀢𑀁 𑀅𑀦𑀢𑁆𑀣𑀁 𑀅𑀢𑁆𑀢𑀦𑁄 𑀅𑀓𑀸𑀲𑀻’’𑀢𑀺 𑀓𑀭𑀼𑀡𑀸𑀬𑀦𑀯𑀲𑁂𑀦 𑀑𑀮𑁄𑀓𑁂𑀦𑁆𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀭𑀸𑀚𑀧𑀼𑀢𑁆𑀢𑁄 𑀆𑀳 ‘‘𑀭𑀜𑁆𑀜𑁄 𑀓𑀺𑀢𑀯𑀲𑁆𑀲𑀸𑀳𑀁 𑀧𑀼𑀢𑁆𑀢𑁄, 𑀓𑀺𑀁 𑀫𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻’’𑀢𑀺.

𑁭𑁫𑁮. 𑀨𑀭𑀼𑀲𑀲𑁆𑀲𑀸𑀢𑀺 ¶ 𑀤𑀸𑀭𑀼𑀡𑀲𑁆𑀲. 𑀓𑀝𑀼𑀓𑁄𑀢𑀺 𑀅𑀦𑀺𑀝𑁆𑀞𑁄. 𑀬𑀦𑁆𑀢𑀺 𑀬𑀁 𑀯𑀺𑀧𑀸𑀓𑀁. 𑀲𑀫𑀧𑁆𑀧𑀺𑀢𑁄𑀢𑀺 𑀅𑀮𑁆𑀮𑀻𑀦𑁄.

𑁭𑁫𑁯. 𑀙𑀴𑁂𑀯 𑀘𑀢𑀼𑀭𑀸𑀲𑀻𑀢𑀺, 𑀯𑀲𑁆𑀲𑀸𑀦𑀺 𑀦𑀳𑀼𑀢𑀸𑀦𑀺 𑀘𑀸𑀢𑀺 𑀉𑀢𑁆𑀢𑀸𑀦𑁄 𑀦𑀺𑀧𑀦𑁆𑀦𑁄 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀓𑀼𑀚𑁆𑀚𑁄, 𑀯𑀸𑀫𑀧𑀲𑁆𑀲𑁂𑀦, 𑀤𑀓𑁆𑀔𑀺𑀡𑀧𑀲𑁆𑀲𑁂𑀦, 𑀉𑀤𑁆𑀥𑀁𑀧𑀸𑀤𑁄, 𑀑𑀮𑀫𑁆𑀩𑀺𑀓𑁄, 𑀬𑀣𑀸𑀞𑀺𑀢𑁄 𑀘𑀸𑀢𑀺 𑀏𑀯𑀁 𑀙 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 𑁋

‘‘𑀉𑀢𑁆𑀢𑀸𑀦𑁄𑀧𑀺 𑀘 𑀧𑀘𑁆𑀘𑀺𑀢𑁆𑀣, 𑀦𑀺𑀓𑀼𑀚𑁆𑀚𑁄 𑀯𑀸𑀫𑀤𑀓𑁆𑀔𑀺𑀡𑁄;

𑀉𑀤𑁆𑀥𑀁𑀧𑀸𑀤𑁄 𑀞𑀺𑀢𑁄 𑀘𑁂𑀯, 𑀘𑀺𑀭𑀁 𑀩𑀸𑀮𑁄 𑀅𑀧𑀘𑁆𑀘𑀣𑀸’’𑀢𑀺.

𑀢𑀸𑀦𑀺 ¶ 𑀧𑀦 𑀯𑀲𑁆𑀲𑀸𑀦𑀺 𑀬𑀲𑁆𑀫𑀸 𑀅𑀦𑁂𑀓𑀸𑀦𑀺 𑀦𑀳𑀼𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀳𑀼𑀢𑀸𑀦𑀻’’𑀢𑀺. 𑀪𑀼𑀲𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀺𑀢𑁆𑀣𑁄𑀢𑀺 𑀅𑀢𑀺𑀯𑀺𑀬 𑀤𑀼𑀓𑁆𑀔𑀁 𑀧𑀸𑀧𑀼𑀡𑀺.

𑁭𑁬𑁧. 𑀧𑀽𑀕𑀸𑀦𑀻𑀢𑀺 𑀯𑀲𑁆𑀲𑀲𑀫𑀽𑀳𑁂, 𑀇𑀥 𑀧𑀼𑀭𑀺𑀫𑀕𑀸𑀣𑀸𑀬 𑀘 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑁭𑁬𑁨. 𑀏𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁. 𑀓𑀝𑀼𑀓𑀦𑁆𑀢𑀺 𑀅𑀢𑀺𑀤𑀼𑀓𑁆𑀔𑀁, 𑀪𑀸𑀯𑀦𑀧𑀁𑀲𑀓𑀦𑀺𑀤𑁆𑀤𑁂𑀲𑁄𑀬𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀧𑁆𑀧𑀤𑀼𑀝𑁆𑀞𑀧𑁆𑀧𑀤𑁄𑀲𑀺𑀦𑀁 𑀇𑀲𑀺𑀁 𑀲𑀼𑀩𑁆𑀩𑀢𑀁 𑀆𑀲𑀚𑁆𑀚 𑀆𑀲𑀸𑀤𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀦𑁆𑀢𑀸 𑀧𑀼𑀕𑁆𑀕𑀮𑀸 𑀏𑀯𑀭𑀽𑀧𑀁 𑀓𑀝𑀼𑀓𑀁 𑀅𑀢𑀺𑀯𑀺𑀬 𑀤𑀼𑀓𑁆𑀔𑀁 𑀧𑀘𑁆𑀘𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁭𑁬𑁩. 𑀲𑁄𑀢𑀺 ¶ 𑀲𑁄 𑀭𑀸𑀚𑀧𑀼𑀢𑁆𑀢𑀧𑁂𑀢𑁄. 𑀢𑀢𑁆𑀣𑀸𑀢𑀺 𑀦𑀺𑀭𑀬𑁂. 𑀯𑁂𑀤𑀬𑀺𑀢𑁆𑀯𑀸𑀢𑀺 𑀅𑀦𑀼𑀪𑀯𑀺𑀢𑁆𑀯𑀸. 𑀦𑀸𑀫𑀸𑀢𑀺 𑀩𑁆𑀬𑀢𑁆𑀢𑀧𑀸𑀓𑀝𑀪𑀸𑀯𑁂𑀦. 𑀢𑀢𑁄 𑀘𑀼𑀢𑁄𑀢𑀺 𑀦𑀺𑀭𑀬𑀢𑁄 𑀘𑀼𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀪𑀕𑀯𑀸 𑀭𑀸𑀚𑀧𑀼𑀢𑁆𑀢𑀧𑁂𑀢𑀓𑀣𑀸𑀬 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀁 𑀫𑀳𑀸𑀚𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀉𑀧𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀲𑀫𑁆𑀧𑀸𑀧𑀼𑀡𑀺𑀁𑀲𑀽𑀢𑀺.

𑀭𑀸𑀚𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀽𑀣𑀔𑀸𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀕𑀽𑀣𑀓𑀽𑀧𑀢𑁄 ¶ ¶ 𑀉𑀕𑁆𑀕𑀦𑁆𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀏𑀓𑀁 𑀕𑀽𑀣𑀔𑀸𑀤𑀓𑀧𑁂𑀢𑀁 𑀆𑀭𑀫𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀦𑀸𑀦𑀸𑀚𑀦𑀧𑀤𑀢𑁄 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀧𑀝𑀺𑀯𑀲𑀺𑀁𑀲𑀼. 𑀢𑁂 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀡𑀻𑀢𑁂𑀦 𑀧𑀘𑁆𑀘𑀬𑁂𑀦 𑀉𑀧𑀝𑁆𑀞𑀳𑀺𑀁𑀲𑀼. 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼 𑀢𑀁 𑀅𑀲𑀳𑀫𑀸𑀦𑁄 𑀇𑀲𑁆𑀲𑀸𑀧𑀓𑀢𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑁄𑀲𑀁 𑀯𑀤𑀦𑁆𑀢𑁄 𑀓𑀼𑀝𑀼𑀫𑁆𑀩𑀺𑀓𑀁 𑀉𑀚𑁆𑀛𑀸𑀧𑁂𑀲𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑁂 𑀪𑀺𑀓𑁆𑀔𑀽 𑀓𑀼𑀮𑀽𑀧𑀓𑀜𑁆𑀘 𑀧𑀭𑀺𑀪𑀯𑀦𑁆𑀢𑁄 𑀧𑀭𑀺𑀪𑀸𑀲𑀺. 𑀅𑀣 𑀓𑀼𑀮𑀽𑀧𑀓𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀯𑀘𑁆𑀘𑀓𑀼𑀝𑀺𑀬𑀁 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀓𑀼𑀝𑀼𑀫𑁆𑀩𑀺𑀓𑁄 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀉𑀧𑀭𑀺 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀕𑀽𑀣𑀓𑀽𑀧𑀢𑁄 𑀉𑀕𑁆𑀕𑀦𑁆𑀢𑁆𑀯𑀸, 𑀓𑁄 𑀦 𑀤𑀻𑀦𑁄 𑀧𑀢𑀺𑀝𑁆𑀞𑀲𑀺;

𑀦𑀺𑀲𑁆𑀲𑀁𑀲𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑁄, 𑀓𑀺𑀁 𑀦𑀼 𑀲𑀤𑁆𑀤𑀳𑀲𑁂 𑀢𑀼𑀯’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀁 𑀲𑀼𑀢𑁆𑀯𑀸 𑀧𑁂𑀢𑁄 𑁋

‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑁄𑀫𑁆𑀳𑀺, 𑀤𑀼𑀕𑁆𑀕𑀢𑁄 𑀬𑀫𑀮𑁄𑀓𑀺𑀓𑁄;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄’’𑀢𑀺. 𑁋

𑀕𑀸𑀣𑀸𑀬 ¶ 𑀅𑀢𑁆𑀢𑀸𑀦𑀁 𑀆𑀘𑀺𑀓𑁆𑀔𑀺. 𑀅𑀣 𑀦𑀁 𑀣𑁂𑀭𑁄 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀻’’𑀢𑀺. 𑁋

𑀕𑀸𑀣𑀸𑀬 𑀢𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀲𑁄 𑀧𑁂𑀢𑁄 𑁋

‘‘𑀅𑀳𑀼 𑀆𑀯𑀸𑀲𑀺𑀓𑁄 𑀫𑀬𑁆𑀳𑀁, 𑀇𑀲𑁆𑀲𑀼𑀓𑀻 𑀓𑀼𑀮𑀫𑀘𑁆𑀙𑀭𑀻;

𑀅𑀚𑁆𑀛𑀸𑀲𑀺𑀢𑁄 𑀫𑀬𑁆𑀳𑀁 𑀖𑀭𑁂, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄.

‘‘𑀢𑀲𑁆𑀲𑀸𑀳𑀁 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀓𑁆𑀔𑀯𑁄 𑀧𑀭𑀺𑀪𑀸𑀲𑀺𑀲𑀁;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄’’𑀢𑀺. 𑁋

𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀓𑀣𑁂𑀲𑀺.

𑁭𑁬𑁯. 𑀢𑀢𑁆𑀣 𑀅𑀳𑀼 𑀆𑀯𑀸𑀲𑀺𑀓𑁄 𑀫𑀬𑁆𑀳𑀦𑁆𑀢𑀺 𑀫𑀬𑁆𑀳𑀁 𑀆𑀯𑀸𑀲𑁂 𑀫𑀬𑀸 𑀓𑀢𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑁄 𑀦𑀺𑀩𑀤𑁆𑀥𑀯𑀲𑀦𑀓𑁄 𑀅𑀳𑁄𑀲𑀺. 𑀅𑀚𑁆𑀛𑀸𑀲𑀺𑀢𑁄 𑀫𑀬𑁆𑀳𑀁 𑀖𑀭𑁂𑀢𑀺 𑀓𑀼𑀮𑀽𑀧𑀓𑀪𑀸𑀯𑁂𑀦 𑀫𑀫 𑀕𑁂𑀳𑁂 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄.

𑁭𑁭𑁦. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀲𑁆𑀲. 𑀪𑀺𑀓𑁆𑀔𑀯𑁄𑀢𑀺 𑀪𑀺𑀓𑁆𑀔𑀽. 𑀧𑀭𑀺𑀪𑀸𑀲𑀺𑀲𑀦𑁆𑀢𑀺 𑀅𑀓𑁆𑀓𑁄𑀲𑀺𑀁. 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀧𑁂𑀢𑀬𑁄𑀦𑀺𑀁 𑀉𑀧𑀕𑀢𑁄 𑀧𑁂𑀢𑀪𑀽𑀢𑁄.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀇𑀢𑀭𑀲𑁆𑀲 𑀕𑀢𑀺𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀯𑀡𑁆𑀡𑁂𑀦, 𑀬𑁄 𑀢𑁂 𑀆𑀲𑀺 𑀓𑀼𑀮𑀽𑀧𑀓𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀓𑀺𑀁 𑀦𑀼 𑀧𑁂𑀘𑁆𑀘 𑀕𑀢𑀺𑀁 𑀕𑀢𑁄’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀫𑀺𑀢𑁆𑀢𑀯𑀡𑁆𑀡𑁂𑀦𑀸𑀢𑀺 𑀫𑀺𑀢𑁆𑀢𑀧𑀝𑀺𑀭𑀽𑀧𑁂𑀦 𑀫𑀺𑀢𑁆𑀢𑀧𑀝𑀺𑀭𑀽𑀧𑀢𑀸𑀬.

𑀧𑀼𑀦 𑀧𑁂𑀢𑁄 𑀣𑁂𑀭𑀲𑁆𑀲 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀢𑀲𑁆𑀲𑁂𑀯𑀸𑀳𑀁 𑀧𑀸𑀧𑀓𑀫𑁆𑀫𑀲𑁆𑀲, 𑀲𑀻𑀲𑁂 𑀢𑀺𑀝𑁆𑀞𑀸𑀫𑀺 𑀫𑀢𑁆𑀣𑀓𑁂;

𑀲𑁄 𑀘 𑀧𑀭𑀯𑀺𑀲𑀬𑀁 𑀧𑀢𑁆𑀢𑁄, 𑀫𑀫𑁂𑀯 𑀧𑀭𑀺𑀘𑀸𑀭𑀓𑁄.

‘‘𑀬𑀁 ¶ 𑀪𑀤𑀦𑁆𑀢𑁂 𑀳𑀤𑀦𑁆𑀢𑀜𑁆𑀜𑁂, 𑀏𑀢𑀁 𑀫𑁂 𑀳𑁄𑀢𑀺 𑀪𑁄𑀚𑀦𑀁;

𑀅𑀳𑀜𑁆𑀘 𑀔𑁄 𑀬𑀁 𑀳𑀤𑀸𑀫𑀺, 𑀏𑀢𑀁 𑀲𑁄 𑀉𑀧𑀚𑀻𑀯𑀢𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑁭𑁭𑁨. 𑀢𑀢𑁆𑀣 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲𑁂𑀯 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀪𑀽𑀢𑀲𑁆𑀲 𑀧𑁂𑀢𑀲𑁆𑀲. 𑀧𑀸𑀧𑀓𑀫𑁆𑀫𑀲𑁆𑀲𑀸𑀢𑀺 𑀧𑀸𑀧𑀲𑀫𑀸𑀘𑀸𑀭𑀲𑁆𑀲. 𑀲𑀻𑀲𑁂 𑀢𑀺𑀝𑁆𑀞𑀸𑀫𑀺 𑀫𑀢𑁆𑀣𑀓𑁂𑀢𑀺 𑀲𑀻𑀲𑁂 𑀢𑀺𑀝𑁆𑀞𑀸𑀫𑀺, 𑀢𑀺𑀝𑁆𑀞𑀦𑁆𑀢𑁄 𑀘 𑀫𑀢𑁆𑀣𑀓𑁂 𑀏𑀯 ¶ 𑀢𑀺𑀝𑁆𑀞𑀸𑀫𑀺, 𑀦 𑀲𑀻𑀲𑀧𑁆𑀧𑀫𑀸𑀡𑁂 𑀆𑀓𑀸𑀲𑁂𑀢𑀺 𑀅𑀢𑁆𑀣𑁄. 𑀧𑀭𑀯𑀺𑀲𑀬𑀁 𑀧𑀢𑁆𑀢𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑀁 𑀉𑀧𑀸𑀤𑀸𑀬 𑀧𑀭𑀯𑀺𑀲𑀬𑀪𑀽𑀢𑀁 𑀧𑁂𑀢𑁆𑀢𑀺𑀯𑀺𑀲𑀬𑀁 𑀧𑀢𑁆𑀢𑁄. 𑀫𑀫𑁂𑀯𑀸𑀢𑀺 𑀫𑀬𑁆𑀳𑀁 𑀏𑀯 𑀧𑀭𑀺𑀘𑀸𑀭𑀓𑁄 𑀅𑀳𑁄𑀲𑀻𑀢𑀺 𑀯𑀘𑀦𑀲𑁂𑀲𑁄.

𑁭𑁭𑁩. 𑀬𑀁 𑀪𑀤𑀦𑁆𑀢𑁂 𑀳𑀤𑀦𑁆𑀢𑀜𑁆𑀜𑁂𑀢𑀺 𑀪𑀤𑀦𑁆𑀢𑁂, 𑀅𑀬𑁆𑀬 𑀫𑀳𑀸𑀫𑁄𑀕𑁆𑀕𑀮𑀸𑀦, 𑀢𑀲𑁆𑀲𑀁 𑀯𑀘𑁆𑀘𑀓𑀼𑀝𑀺𑀬𑀁 𑀬𑀁 𑀅𑀜𑁆𑀜𑁂 𑀉𑀳𑀤𑀦𑁆𑀢𑀺 𑀯𑀘𑁆𑀘𑀁 𑀑𑀲𑁆𑀲𑀚𑀦𑁆𑀢𑀺. 𑀏𑀢𑀁 𑀫𑁂 𑀳𑁄𑀢𑀺 𑀪𑁄𑀚𑀦𑀦𑁆𑀢𑀺 𑀏𑀢𑀁 𑀯𑀘𑁆𑀘𑀁 𑀫𑀬𑁆𑀳𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀪𑁄𑀚𑀦𑀁 𑀳𑁄𑀢𑀺. 𑀬𑀁 𑀳𑀤𑀸𑀫𑀻𑀢𑀺 𑀢𑀁 𑀧𑀦 𑀯𑀘𑁆𑀘𑀁 𑀔𑀸𑀤𑀺𑀢𑁆𑀯𑀸 𑀬𑀫𑁆𑀧𑀳𑀁 𑀯𑀘𑁆𑀘𑀁 𑀓𑀭𑁄𑀫𑀺. 𑀏𑀢𑀁 𑀲𑁄 𑀉𑀧𑀚𑀻𑀯𑀢𑀻𑀢𑀺 𑀏𑀢𑀁 𑀫𑀫 𑀯𑀘𑁆𑀘𑀁 𑀲𑁄 𑀓𑀼𑀮𑀽𑀧𑀓𑀧𑁂𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀔𑀸𑀤𑀦𑀯𑀲𑁂𑀦 𑀉𑀧𑀚𑀻𑀯𑀢𑀺, 𑀅𑀢𑁆𑀢𑀪𑀸𑀯𑀁 𑀬𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀲𑀼 𑀓𑀼𑀝𑀼𑀫𑁆𑀩𑀺𑀓𑁄 𑀧𑁂𑀲𑀮𑁂 𑀪𑀺𑀓𑁆𑀔𑀽 ‘‘𑀏𑀯𑀁 𑀆𑀳𑀸𑀭𑀧𑀭𑀺𑀪𑁄𑀕𑀢𑁄 𑀯𑀭𑀁 𑀢𑀼𑀫𑁆𑀳𑀸𑀓𑀁 𑀕𑀽𑀣𑀔𑀸𑀤𑀦’’𑀦𑁆𑀢𑀺 𑀅𑀓𑁆𑀓𑁄𑀲𑀺. 𑀓𑀼𑀮𑀽𑀧𑀓𑁄 𑀧𑀦 𑀓𑀼𑀝𑀼𑀫𑁆𑀩𑀺𑀓𑀫𑁆𑀧𑀺 𑀢𑀣𑀸𑀯𑀘𑀦𑁂 𑀲𑀫𑀸𑀤𑀧𑁂𑀢𑁆𑀯𑀸 𑀲𑀬𑀁 𑀢𑀣𑀸 𑀅𑀓𑁆𑀓𑁄𑀲𑀺, 𑀢𑁂𑀦𑀲𑁆𑀲 𑀢𑀢𑁄𑀧𑀺 𑀧𑀝𑀺𑀓𑀼𑀝𑁆𑀞𑀢𑀭𑀸 𑀚𑀻𑀯𑀺𑀓𑀸 𑀅𑀳𑁄𑀲𑀺. 𑀆𑀬𑀲𑁆𑀫𑀸 ¶ 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀉𑀧𑀯𑀸𑀤𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀕𑀽𑀣𑀔𑀸𑀤𑀓𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀕𑀽𑀣𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑁭𑁭𑁪-𑁮𑁧. 𑀕𑀽𑀣𑀓𑀽𑀧𑀢𑁄 ¶ 𑀉𑀕𑁆𑀕𑀦𑁆𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀕𑀽𑀣𑀔𑀸𑀤𑀓𑀧𑁂𑀢𑀺𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀯𑀢𑁆𑀣𑀼 𑀅𑀦𑀦𑁆𑀢𑀭𑀯𑀢𑁆𑀣𑀼𑀲𑀤𑀺𑀲𑀁. 𑀢𑀢𑁆𑀣 𑀉𑀧𑀸𑀲𑀓𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄𑀢𑀺 𑀉𑀧𑀸𑀲𑀓𑀲𑁆𑀲 𑀯𑀲𑁂𑀦 𑀆𑀕𑀢𑀁, 𑀇𑀥 𑀧𑀦 𑀉𑀧𑀸𑀲𑀺𑀓𑀸𑀬𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀢𑁆𑀣𑀼𑀲𑁆𑀫𑀺𑀁 𑀕𑀸𑀣𑀸𑀲𑀼 𑀘 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀕𑀽𑀣𑀔𑀸𑀤𑀓𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀸𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀕𑁆𑀕𑀸 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀢𑁆𑀣𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀧𑁂𑀢𑁂 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀲𑀫𑁆𑀩𑀳𑀼𑀮𑀸 𑀫𑀦𑀼𑀲𑁆𑀲𑀸 𑀕𑀡𑀪𑀽𑀢𑀸 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀤𑀸𑀦𑀸𑀤𑀺𑀲𑀼𑀘𑀭𑀺𑀢𑀯𑀺𑀫𑀼𑀔𑀸 𑀳𑀼𑀢𑁆𑀯𑀸 𑀘𑀺𑀭𑀁 𑀚𑀻𑀯𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀕𑀭𑀲𑁆𑀲 𑀲𑀫𑀻𑀧𑁂 𑀧𑁂𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 ¶ . 𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑁂𑀢𑁂 𑀤𑀺𑀲𑁆𑀯𑀸 𑁋

‘‘𑀦𑀕𑁆𑀕𑀸 𑀤𑀼𑀩𑁆𑀩𑀡𑀭𑀽𑀧𑀸𑀢𑁆𑀣, 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀸;

𑀉𑀧𑁆𑀨𑀸𑀲𑀼𑀮𑀺𑀓𑀸 𑀓𑀺𑀲𑀺𑀓𑀸, 𑀓𑁂 𑀦𑀼 𑀢𑀼𑀫𑁆𑀳𑁂𑀢𑁆𑀣 𑀫𑀸𑀭𑀺𑀲𑀸’’𑀢𑀺. 𑁋

𑀕𑀸𑀣𑀸𑀬 𑀧𑀼𑀘𑁆𑀙𑀺. 𑀢𑀢𑁆𑀣 𑀤𑀼𑀩𑁆𑀩𑀡𑁆𑀡𑀭𑀽𑀧𑀸𑀢𑁆𑀣𑀸𑀢𑀺 𑀤𑀼𑀩𑁆𑀩𑀡𑁆𑀡𑀲𑀭𑀻𑀭𑀸 𑀳𑁄𑀣. 𑀓𑁂 𑀦𑀼 𑀢𑀼𑀫𑁆𑀳𑁂𑀢𑁆𑀣𑀸𑀢𑀺 𑀢𑀼𑀫𑁆𑀳𑁂 𑀓𑁂 𑀦𑀼 𑀦𑀸𑀫 𑀪𑀯𑀣. 𑀫𑀸𑀭𑀺𑀲𑀸𑀢𑀺 𑀢𑁂 𑀅𑀢𑁆𑀢𑀦𑁄 𑀲𑀸𑀭𑀼𑀧𑁆𑀧𑀯𑀲𑁂𑀦 𑀆𑀮𑀧𑀢𑀺.

‘‘𑀫𑀬𑀁 ¶ 𑀪𑀤𑀦𑁆𑀢𑁂 𑀧𑁂𑀢𑀫𑁆𑀳𑀸, 𑀤𑀼𑀕𑁆𑀕𑀢𑀸 𑀬𑀫𑀮𑁄𑀓𑀺𑀓𑀸;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 𑀅𑀢𑁆𑀢𑀦𑁄 𑀧𑁂𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀧𑀼𑀦 𑀣𑁂𑀭𑁂𑀦 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑀸’’𑀢𑀺. 𑁋

𑀕𑀸𑀣𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑀸 𑁋

‘‘𑀅𑀦𑀸𑀯𑀝𑁂𑀲𑀼 ¶ 𑀢𑀺𑀢𑁆𑀣𑁂𑀲𑀼, 𑀯𑀺𑀘𑀺𑀦𑀺𑀫𑁆𑀳𑀤𑁆𑀥𑀫𑀸𑀲𑀓𑀁;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

‘‘𑀦𑀤𑀺𑀁 𑀉𑀧𑁂𑀫 𑀢𑀲𑀺𑀢𑀸, 𑀭𑀺𑀢𑁆𑀢𑀓𑀸 𑀧𑀭𑀺𑀯𑀢𑁆𑀢𑀢𑀺;

𑀙𑀸𑀬𑀁 𑀉𑀧𑁂𑀫 𑀉𑀡𑁆𑀳𑁂𑀲𑀼, 𑀆𑀢𑀧𑁄 𑀧𑀭𑀺𑀯𑀢𑁆𑀢𑀢𑀺.

‘‘𑀅𑀕𑁆𑀕𑀺𑀯𑀡𑁆𑀡𑁄 𑀘 𑀦𑁄 𑀯𑀸𑀢𑁄, 𑀟𑀳𑀦𑁆𑀢𑁄 𑀉𑀧𑀯𑀸𑀬𑀢𑀺;

𑀏𑀢𑀜𑁆𑀘 𑀪𑀦𑁆𑀢𑁂 𑀅𑀭𑀳𑀸𑀫, 𑀅𑀜𑁆𑀜𑀜𑁆𑀘 𑀧𑀸𑀧𑀓𑀁 𑀢𑀢𑁄.

‘‘𑀅𑀧𑀺 ¶ 𑀬𑁄𑀚𑀦𑀸𑀦𑀺 𑀕𑀘𑁆𑀙𑀸𑀫, 𑀙𑀸𑀢𑀸 𑀆𑀳𑀸𑀭𑀕𑁂𑀥𑀺𑀦𑁄;

𑀅𑀮𑀤𑁆𑀥𑀸𑀯 𑀦𑀺𑀯𑀢𑁆𑀢𑀸𑀫, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

‘‘𑀙𑀸𑀢𑀸 𑀧𑀫𑀼𑀘𑁆𑀙𑀺𑀢𑀸 𑀪𑀦𑁆𑀢𑀸, 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸;

𑀉𑀢𑁆𑀢𑀸𑀦𑀸 𑀧𑀝𑀺𑀓𑀺𑀭𑀸𑀫, 𑀅𑀯𑀓𑀼𑀚𑁆𑀚𑀸 𑀧𑀢𑀸𑀫𑀲𑁂.

‘‘𑀢𑁂 𑀘 𑀢𑀢𑁆𑀣𑁂𑀯 𑀧𑀢𑀺𑀢𑀸, 𑀪𑀽𑀫𑀺𑀬𑀁 𑀧𑀝𑀺𑀲𑀼𑀫𑁆𑀪𑀺𑀢𑀸;

𑀉𑀭𑀁 𑀲𑀻𑀲𑀜𑁆𑀘 𑀖𑀝𑁆𑀝𑁂𑀫, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

‘‘𑀏𑀢𑀜𑁆𑀘 𑀪𑀦𑁆𑀢𑁂 𑀅𑀭𑀳𑀸𑀫, 𑀅𑀜𑁆𑀜𑀜𑁆𑀘 𑀧𑀸𑀧𑀓𑀁 𑀢𑀢𑁄;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

‘‘𑀢𑁂 𑀳𑀺 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀓𑀸𑀳𑀸𑀫 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. 𑁋

𑁭𑁮𑁮. 𑀢𑀢𑁆𑀣 𑀅𑀧𑀺 𑀬𑁄𑀚𑀦𑀸𑀦𑀺 𑀕𑀘𑁆𑀙𑀸𑀫𑀸𑀢𑀺 𑀅𑀦𑁂𑀓𑀸𑀦𑀺𑀧𑀺 𑀬𑁄𑀚𑀦𑀸𑀦𑀺 𑀕𑀘𑁆𑀙𑀸𑀫. 𑀓𑀣𑀁? 𑀙𑀸𑀢𑀸 𑀆𑀳𑀸𑀭𑀕𑁂𑀥𑀺𑀦𑁄𑀢𑀺 ¶ , 𑀘𑀺𑀭𑀓𑀸𑀮𑀁 𑀚𑀺𑀖𑀘𑁆𑀙𑀸𑀬 𑀚𑀺𑀖𑀘𑁆𑀙𑀺𑀢𑀸 𑀆𑀳𑀸𑀭𑁂 𑀕𑀺𑀤𑁆𑀥𑀸 𑀅𑀪𑀺𑀕𑀺𑀚𑁆𑀛𑀦𑁆𑀢𑀸 𑀳𑀼𑀢𑁆𑀯𑀸, 𑀏𑀯𑀁 𑀕𑀦𑁆𑀢𑁆𑀯𑀸𑀧𑀺 𑀓𑀺𑀜𑁆𑀘𑀺 𑀆𑀳𑀸𑀭𑀁 𑀅𑀮𑀤𑁆𑀥𑀸𑀬𑁂𑀯 𑀦𑀺𑀯𑀢𑁆𑀢𑀸𑀫. 𑀅𑀧𑁆𑀧𑀧𑀼𑀜𑁆𑀜𑀢𑀸𑀢𑀺 𑀅𑀧𑀼𑀜𑁆𑀜𑀢𑀸 𑀅𑀓𑀢𑀓𑀮𑁆𑀬𑀸𑀡𑀢𑀸.

𑁭𑁮𑁯. 𑀉𑀢𑁆𑀢𑀸𑀦𑀸 ¶ 𑀧𑀝𑀺𑀓𑀺𑀭𑀸𑀫𑀸𑀢𑀺 𑀓𑀤𑀸𑀘𑀺 𑀉𑀢𑁆𑀢𑀸𑀦𑀸 𑀳𑀼𑀢𑁆𑀯𑀸 𑀯𑀺𑀓𑀺𑀭𑀺𑀬𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸 𑀯𑀺𑀬 𑀯𑀢𑁆𑀢𑀸𑀫. 𑀅𑀯𑀓𑀼𑀚𑁆𑀚𑀸 𑀧𑀢𑀸𑀫𑀲𑁂𑀢𑀺 𑀓𑀤𑀸𑀘𑀺 𑀅𑀯𑀓𑀼𑀚𑁆𑀚𑀸 𑀳𑀼𑀢𑁆𑀯𑀸 𑀧𑀢𑀸𑀫.

𑁭𑁯𑁦. 𑀢𑁂 𑀘𑀸𑀢𑀺 𑀢𑁂 𑀫𑀬𑀁. 𑀉𑀭𑀁 𑀲𑀻𑀲𑀜𑁆𑀘 𑀖𑀝𑁆𑀝𑁂𑀫𑀸𑀢𑀺 𑀅𑀯𑀓𑀼𑀚𑁆𑀚𑀸 𑀳𑀼𑀢𑁆𑀯𑀸 𑀧𑀢𑀺𑀢𑀸 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑁂𑀥𑀦𑁆𑀢𑀸 𑀯𑁂𑀤𑀦𑀸𑀧𑁆𑀧𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀭𑀁 𑀲𑀻𑀲𑀜𑁆𑀘 𑀧𑀝𑀺𑀖𑀁𑀲𑀸𑀫. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀣𑁂𑀭𑁄 ¶ 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀫𑀘𑁆𑀙𑁂𑀭𑀫𑀮𑀁 𑀧𑀳𑀸𑀬 𑀤𑀸𑀦𑀸𑀤𑀺𑀲𑀼𑀘𑀭𑀺𑀢𑀦𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀕𑀡𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀸𑀝𑀮𑀺𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀤𑀺𑀝𑁆𑀞𑀸 𑀢𑀬𑀸 𑀦𑀺𑀭𑀬𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀯𑀺𑀫𑀸𑀦𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀺𑀭 𑀧𑀸𑀝𑀮𑀺𑀧𑀼𑀢𑁆𑀢𑀯𑀸𑀲𑀺𑀦𑁄 𑀘 𑀩𑀳𑀽 𑀯𑀸𑀡𑀺𑀚𑀸 𑀦𑀸𑀯𑀸𑀬 𑀲𑀼𑀯𑀡𑁆𑀡𑀪𑀽𑀫𑀺𑀁 𑀅𑀕𑀫𑀺𑀁𑀲𑀼. 𑀢𑀢𑁆𑀣𑁂𑀓𑁄 𑀉𑀧𑀸𑀲𑀓𑁄 𑀆𑀩𑀸𑀥𑀺𑀓𑁄 𑀫𑀸𑀢𑀼𑀕𑀸𑀫𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀲𑁄 𑀓𑀢𑀓𑀼𑀲𑀮𑁄𑀧𑀺 𑀤𑁂𑀯𑀮𑁄𑀓𑀁 𑀅𑀦𑀼𑀧𑀧𑀚𑁆𑀚𑀺𑀢𑁆𑀯𑀸 𑀇𑀢𑁆𑀣𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀲𑀫𑀼𑀤𑁆𑀤𑀫𑀚𑁆𑀛𑁂 𑀯𑀺𑀫𑀸𑀦𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀬𑀲𑁆𑀲𑀁 𑀧𑀦 𑀲𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀲𑀸 𑀇𑀢𑁆𑀣𑀻 𑀲𑀼𑀯𑀡𑁆𑀡𑀪𑀽𑀫𑀺𑀕𑀸𑀫𑀺𑀦𑀺𑀁 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀕𑀘𑁆𑀙𑀢𑀺. 𑀅𑀣 𑀔𑁄 𑀲𑁄 𑀧𑁂𑀢𑁄 𑀢𑀁 𑀇𑀢𑁆𑀣𑀺𑀁 𑀕𑀳𑁂𑀢𑀼𑀓𑀸𑀫𑁄 𑀦𑀸𑀯𑀸𑀬 𑀕𑀫𑀦𑀁 𑀉𑀧𑀭𑀼𑀦𑁆𑀥𑀺. 𑀅𑀣 𑀯𑀸𑀡𑀺𑀚𑀸 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀬𑀁 𑀦𑀸𑀯𑀸 𑀦 ¶ 𑀕𑀘𑁆𑀙𑀢𑀻’’𑀢𑀺 𑀯𑀻𑀫𑀁𑀲𑀦𑁆𑀢𑀸 𑀓𑀸𑀴𑀓𑀡𑁆𑀡𑀺𑀲𑀮𑀸𑀓𑀁 𑀯𑀺𑀘𑀸𑀭𑁂𑀲𑀼𑀁. 𑀅𑀫𑀦𑀼𑀲𑁆𑀲𑀺𑀤𑁆𑀥𑀺𑀬𑀸 𑀬𑀸𑀯𑀢𑀢𑀺𑀬𑀁 𑀢𑀲𑁆𑀲𑀸 𑀏𑀯 𑀇𑀢𑁆𑀣𑀺𑀬𑀸 𑀧𑀸𑀧𑀼𑀡𑀺, 𑀬𑀲𑁆𑀲𑀁 𑀲𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑀸 𑀯𑁂𑀴𑀼𑀓𑀮𑀸𑀧𑀁 𑀲𑀫𑀼𑀤𑁆𑀤𑁂 𑀑𑀢𑀸𑀭𑁂𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀢𑀁 𑀇𑀢𑁆𑀣𑀺𑀁 𑀑𑀢𑀸𑀭𑁂𑀲𑀼𑀁. 𑀇𑀢𑁆𑀣𑀺𑀬𑀸 𑀑𑀢𑀸𑀭𑀺𑀢𑀫𑀢𑁆𑀢𑀸𑀬 𑀦𑀸𑀯𑀸 𑀯𑁂𑀕𑁂𑀦 𑀲𑀼𑀯𑀡𑁆𑀡𑀪𑀽𑀫𑀺𑀁 𑀅𑀪𑀺𑀫𑀼𑀔𑀸 𑀧𑀸𑀬𑀸𑀲𑀺. 𑀅𑀫𑀦𑀼𑀲𑁆𑀲𑁄 𑀢𑀁 𑀇𑀢𑁆𑀣𑀺𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺.

𑀲𑀸 ¶ 𑀏𑀓𑀁 𑀲𑀁𑀯𑀘𑁆𑀙𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸 𑀢𑀁 𑀧𑁂𑀢𑀁 𑀬𑀸𑀘𑀦𑁆𑀢𑀻 𑀆𑀳 𑁋 ‘‘𑀅𑀳𑀁 𑀇𑀥 𑀯𑀲𑀦𑁆𑀢𑀻 𑀫𑀬𑁆𑀳𑀁 𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀓𑀸𑀢𑀼𑀁 𑀦 𑀮𑀪𑀸𑀫𑀺, 𑀲𑀸𑀥𑀼, 𑀫𑀸𑀭𑀺𑀲, 𑀫𑀁 𑀧𑀸𑀝𑀮𑀺𑀧𑀼𑀢𑁆𑀢𑀫𑁂𑀯 𑀦𑁂𑀳𑀻’’𑀢𑀺. 𑀲𑁄 𑀢𑀸𑀬 𑀬𑀸𑀘𑀺𑀢𑁄 𑁋

‘‘𑀤𑀺𑀝𑁆𑀞𑀸 𑀢𑀬𑀸 𑀦𑀺𑀭𑀬𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀧𑁂𑀢𑀸 𑀅𑀲𑀼𑀭𑀸 𑀅𑀣𑀯𑀸𑀧𑀺 𑀫𑀸𑀦𑀼𑀲𑀸 𑀤𑁂𑀯𑀸;

𑀲𑀬𑀫𑀤𑁆𑀤𑀲 𑀓𑀫𑁆𑀫𑀯𑀺𑀧𑀸𑀓𑀫𑀢𑁆𑀢𑀦𑁄, 𑀦𑁂𑀲𑁆𑀲𑀸𑀫𑀺 𑀢𑀁 𑀧𑀸𑀝𑀮𑀺𑀧𑀼𑀢𑁆𑀢𑀫𑀓𑁆𑀔𑀢𑀁;

𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀼𑀲𑀮𑀁 𑀓𑀭𑁄𑀳𑀺 𑀓𑀫𑁆𑀫’’𑀦𑁆𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀸 𑀢𑀬𑀸 𑀦𑀺𑀭𑀬𑀸𑀢𑀺 𑀏𑀓𑀘𑁆𑀘𑁂 𑀧𑀘𑁆𑀘𑁂𑀓𑀦𑀺𑀭𑀬𑀸𑀧𑀺 𑀢𑀬𑀸 𑀤𑀺𑀝𑁆𑀞𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀢𑀺 𑀫𑀳𑀸𑀦𑀼𑀪𑀸𑀯𑀸 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀢𑀺𑀭𑀘𑁆𑀙𑀸𑀦𑀸𑀧𑀺 𑀤𑀺𑀝𑁆𑀞𑀸 𑀢𑀬𑀸𑀢𑀺 𑀬𑁄𑀚𑀦𑀸. 𑀧𑁂𑀢𑀸𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀪𑁂𑀤𑀸 𑀧𑁂𑀢𑀸. 𑀅𑀲𑀼𑀭𑀸𑀢𑀺 𑀓𑀸𑀮𑀓𑀜𑁆𑀘𑀺𑀓𑀸𑀤𑀺𑀪𑁂𑀤𑀸 𑀅𑀲𑀼𑀭𑀸. 𑀤𑁂𑀯𑀸𑀢𑀺 𑀏𑀓𑀘𑁆𑀘𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸. 𑀲𑁄 𑀓𑀺𑀭 ¶ 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀦𑀺𑀭𑀬𑀸𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀢𑁂𑀦 𑀏𑀯𑀫𑀸𑀳. 𑀲𑀬𑀫𑀤𑁆𑀤𑀲 𑀓𑀫𑁆𑀫𑀯𑀺𑀧𑀸𑀓𑀫𑀢𑁆𑀢𑀦𑁄𑀢𑀺 𑀦𑀺𑀭𑀬𑀸𑀤𑀺𑀓𑁂 𑀯𑀺𑀲𑁂𑀲𑀢𑁄 𑀕𑀦𑁆𑀢𑁆𑀯𑀸 𑀧𑀲𑁆𑀲𑀦𑁆𑀢𑀻 𑀲𑀬𑀫𑁂𑀯 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀘𑁆𑀘𑀓𑁆𑀔𑀢𑁄 𑀅𑀤𑁆𑀤𑀲 𑀅𑀤𑀓𑁆𑀔𑀺. 𑀦𑁂𑀲𑁆𑀲𑀸𑀫𑀺 𑀢𑀁 𑀧𑀸𑀝𑀮𑀺𑀧𑀼𑀢𑁆𑀢𑀫𑀓𑁆𑀔𑀢𑀦𑁆𑀢𑀺 𑀇𑀤𑀸𑀦𑀸𑀳𑀁 𑀢𑀁 𑀅𑀓𑁆𑀔𑀢𑀁 𑀓𑁂𑀦𑀘𑀺 𑀅𑀧𑀭𑀺𑀓𑁆𑀔𑀢𑀁 𑀫𑀦𑀼𑀲𑁆𑀲𑀭𑀽𑀧𑁂𑀦𑁂𑀯 𑀧𑀸𑀝𑀮𑀺𑀧𑀼𑀢𑁆𑀢𑀁 𑀦𑀬𑀺𑀲𑁆𑀲𑀸𑀫𑀺. 𑀢𑁆𑀯𑀁 𑀧𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀼𑀲𑀮𑀁 𑀓𑀭𑁄𑀳𑀺 𑀓𑀫𑁆𑀫𑀁, 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀢𑁆𑀢𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀧𑀼𑀜𑁆𑀜𑀦𑀺𑀭𑀢𑀸 𑀳𑁄𑀳𑀻𑀢𑀺 𑀅𑀢𑁆𑀣𑁄.

𑀅𑀣 ¶ 𑀲𑀸 𑀇𑀢𑁆𑀣𑀻 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑀸 𑁋

‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑁄𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑀼𑀬𑁆𑀳𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫.

‘‘𑀤𑀺𑀝𑁆𑀞𑀸 𑀫𑀬𑀸 𑀦𑀺𑀭𑀬𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀧𑁂𑀢𑀸 𑀅𑀲𑀼𑀭𑀸 𑀅𑀣𑀯𑀸𑀧𑀺 𑀫𑀸𑀦𑀼𑀲𑀸 𑀤𑁂𑀯𑀸;

𑀲𑀬𑀫𑀤𑁆𑀤𑀲𑀁 𑀓𑀫𑁆𑀫𑀯𑀺𑀧𑀸𑀓𑀫𑀢𑁆𑀢𑀦𑁄, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺. 𑁋

𑀅𑀣 ¶ 𑀲𑁄 𑀧𑁂𑀢𑁄 𑀢𑀁 𑀇𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀲𑁆𑀲 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣𑀲𑁆𑀲𑀸 𑀜𑀸𑀢𑀺𑀫𑀺𑀢𑁆𑀢𑀸𑀤𑀬𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀧𑀼𑀩𑁆𑀩𑁂 𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀢𑁆𑀢𑀸 𑀫𑀢𑀸𑀢𑀺 𑀅𑀲𑁆𑀲𑀼𑀫𑁆𑀳. 𑀲𑀸 𑀅𑀬𑀁 𑀤𑀺𑀝𑁆𑀞𑀸 𑀯𑀢, 𑀪𑁄, 𑀲𑁄𑀢𑁆𑀣𑀺𑀦𑀸 𑀆𑀕𑀢𑀸’’𑀢𑀺 𑀅𑀪𑀺𑀦𑀦𑁆𑀤𑀫𑀸𑀦𑀸 𑀲𑀫𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀸 𑀢𑁂𑀲𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀅𑀦𑀼𑀪𑀽𑀢𑀜𑁆𑀘 𑀲𑀩𑁆𑀩𑀁 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄𑀧𑀺 𑀔𑁄 𑀢𑁂 𑀯𑀸𑀡𑀺𑀚𑀸 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀉𑀧𑀕𑀢𑀓𑀸𑀮𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀲𑀁𑀯𑁂𑀕𑀚𑀸𑀢𑁄 𑀤𑀸𑀦𑀸𑀤𑀺𑀓𑀼𑀲𑀮𑀥𑀫𑁆𑀫𑀦𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀧𑀸𑀝𑀮𑀺𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀅𑀫𑁆𑀩𑀯𑀦𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀬𑀜𑁆𑀘 𑀢𑁂 𑀧𑁄𑀓𑁆𑀔𑀭𑀡𑀻 𑀲𑀼𑀭𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀅𑀫𑁆𑀩𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁 ¶ . 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀕𑀳𑀧𑀢𑀺 𑀧𑀭𑀺𑀓𑁆𑀔𑀻𑀡𑀪𑁄𑀕𑁄 𑀅𑀳𑁄𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀓𑀸𑀮𑀫𑀓𑀸𑀲𑀺, 𑀏𑀓𑀸 𑀥𑀻𑀢𑀸𑀬𑁂𑀯 𑀳𑁄𑀢𑀺. 𑀲𑁄 𑀢𑀁 𑀅𑀢𑁆𑀢𑀦𑁄 𑀫𑀺𑀢𑁆𑀢𑀲𑁆𑀲 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀇𑀡𑀯𑀲𑁂𑀦 𑀕𑀳𑀺𑀢𑁂𑀦 𑀓𑀳𑀸𑀧𑀡𑀲𑀢𑁂𑀦 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀯𑀡𑀺𑀚𑁆𑀚𑀸𑀬 𑀕𑀢𑁄, 𑀦 𑀘𑀺𑀭𑁂𑀦𑁂𑀯 𑀫𑀽𑀮𑁂𑀦 𑀲𑀳 𑀉𑀤𑀬𑀪𑀽𑀢𑀸𑀦𑀺 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺 𑀮𑀪𑀺𑀢𑁆𑀯𑀸 𑀲𑀢𑁆𑀣𑁂𑀦 𑀲𑀳 𑀧𑀝𑀺𑀦𑀺𑀯𑀢𑁆𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 ¶ 𑀘𑁄𑀭𑀸 𑀧𑀭𑀺𑀬𑀼𑀝𑁆𑀞𑀸𑀬 𑀲𑀢𑁆𑀣𑀁 𑀧𑀸𑀧𑀼𑀡𑀺𑀁𑀲𑀼, 𑀲𑀢𑁆𑀣𑀺𑀓𑀸 𑀇𑀢𑁄 𑀘𑀺𑀢𑁄 𑀘 𑀧𑀮𑀸𑀬𑀺𑀁𑀲𑀼. 𑀲𑁄 𑀧𑀦 𑀕𑀳𑀧𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀘𑁆𑀙𑁂 𑀓𑀳𑀸𑀧𑀡𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀦𑀺𑀮𑀻𑀬𑀺. 𑀘𑁄𑀭𑀸 𑀢𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀲𑁄 𑀥𑀦𑀮𑁄𑀪𑁂𑀦 𑀢𑀢𑁆𑀣𑁂𑀯 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀯𑀸𑀡𑀺𑀚𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀥𑀻𑀢𑀼𑀬𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑀸 𑀧𑀺𑀢𑀼 𑀫𑀭𑀡𑁂𑀦 𑀆𑀚𑀻𑀯𑀺𑀓𑀸𑀪𑀬𑁂𑀦 𑀘 𑀅𑀢𑀺𑀯𑀺𑀬 𑀲𑀜𑁆𑀚𑀸𑀢𑀤𑁄𑀫𑀦𑀲𑁆𑀲𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑀺. 𑀅𑀣 𑀦𑀁 𑀲𑁄 𑀧𑀺𑀢𑀼 𑀲𑀳𑀸𑀬𑁄 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀬𑀣𑀸 𑀦𑀸𑀫 𑀓𑀼𑀮𑀸𑀮𑀪𑀸𑀚𑀦𑀁 𑀲𑀩𑁆𑀩𑀁 𑀪𑁂𑀤𑀦𑀧𑀭𑀺𑀬𑀦𑁆𑀢𑀁, 𑀏𑀯𑀫𑁂𑀯 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀪𑁂𑀤𑀦𑀧𑀭𑀺𑀬𑀦𑁆𑀢𑀁. 𑀫𑀭𑀡𑀁 ¶ 𑀦𑀸𑀫 𑀲𑀩𑁆𑀩𑀲𑀸𑀥𑀸𑀭𑀡𑀁 𑀅𑀧𑁆𑀧𑀝𑀺𑀓𑀸𑀭𑀜𑁆𑀘, 𑀢𑀲𑁆𑀫𑀸 𑀫𑀸 𑀢𑁆𑀯𑀁 𑀧𑀺𑀢𑀭𑀺 𑀅𑀢𑀺𑀩𑀸𑀴𑁆𑀳𑀁 𑀲𑁄𑀘𑀺, 𑀫𑀸 𑀧𑀭𑀺𑀤𑁂𑀯𑀺, 𑀅𑀳𑀁 𑀢𑁂 𑀧𑀺𑀢𑀸, 𑀢𑁆𑀯𑀁 𑀫𑀬𑁆𑀳𑀁 𑀥𑀻𑀢𑀸, 𑀅𑀳𑀁 𑀢𑀯 𑀧𑀺𑀢𑀼 𑀓𑀺𑀘𑁆𑀘𑀁 𑀓𑀭𑁄𑀫𑀺, 𑀢𑁆𑀯𑀁 𑀧𑀺𑀢𑀼𑀦𑁄 𑀕𑁂𑀳𑁂 𑀯𑀺𑀬 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀅𑀯𑀺𑀫𑀦𑀸 𑀅𑀪𑀺𑀭𑀫𑀲𑁆𑀲𑀽’’𑀢𑀺 𑀯𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀲𑀺. 𑀲𑀸 𑀢𑀲𑁆𑀲 𑀯𑀘𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑁄𑀓𑀸 𑀧𑀺𑀢𑀭𑀺 𑀯𑀺𑀬 𑀢𑀲𑁆𑀫𑀺𑀁 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸 𑀅𑀢𑁆𑀢𑀦𑁄 𑀓𑀧𑀡𑀪𑀸𑀯𑁂𑀦 𑀢𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀸𑀭𑀺𑀦𑀻 𑀳𑀼𑀢𑁆𑀯𑀸 𑀯𑀢𑁆𑀢𑀫𑀸𑀦𑀸 𑀧𑀺𑀢𑀭𑀁 𑀉𑀤𑁆𑀤𑀺𑀲𑁆𑀲 𑀫𑀢𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑀸 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀯𑀡𑁆𑀡𑀸𑀦𑀺 𑀲𑀼𑀧𑀭𑀺𑀧𑀓𑁆𑀓𑀸𑀦𑀺 𑀫𑀥𑀼𑀭𑀸𑀦𑀺 𑀅𑀫𑁆𑀩𑀨𑀮𑀸𑀦𑀺 𑀓𑀁𑀲𑀧𑀸𑀢𑀺𑀬𑀁 𑀞𑀧𑁂𑀢𑁆𑀯𑀸 𑀬𑀸𑀕𑀼𑀁 𑀅𑀫𑁆𑀩𑀨𑀮𑀸𑀦𑀺 𑀘 𑀤𑀸𑀲𑀺𑀬𑀸 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀕𑀯𑀸 𑀫𑀬𑁆𑀳𑀁 𑀤𑀓𑁆𑀔𑀺𑀡𑀸𑀬 𑀧𑀝𑀺𑀕𑁆𑀕𑀳𑀡𑁂𑀦 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺. 𑀲𑀢𑁆𑀣𑀸 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀢𑀲𑁆𑀲𑀸 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀦𑀺𑀲𑀚𑁆𑀚𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀸 𑀳𑀝𑁆𑀞𑀢𑀼𑀝𑁆𑀞𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀅𑀢𑁆𑀢𑀦𑀸 𑀉𑀧𑀦𑀻𑀢𑀁 𑀲𑀼𑀯𑀺𑀲𑀼𑀤𑁆𑀥𑀯𑀢𑁆𑀣𑀁 𑀅𑀢𑁆𑀣𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂.

𑀅𑀣 ¶ 𑀲𑀸 𑀪𑀕𑀯𑀢𑁄 𑀬𑀸𑀕𑀼𑀁 𑀉𑀧𑀦𑀸𑀫𑁂𑀲𑀺, 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀬𑀸𑀕𑀼𑀁. 𑀅𑀣 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀽𑀦𑀫𑁆𑀧𑀺 𑀬𑀸𑀕𑀼𑀁 𑀤𑀢𑁆𑀯𑀸 𑀧𑀼𑀦 𑀥𑁄𑀢𑀳𑀢𑁆𑀣𑀸 𑀅𑀫𑁆𑀩𑀨𑀮𑀸𑀦𑀺 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺, 𑀪𑀕𑀯𑀸 𑀢𑀸𑀦𑀺 𑀧𑀭𑀺𑀪𑀼𑀜𑁆𑀚𑀺. 𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 ¶ 𑁋 ‘‘𑀬𑀸 𑀫𑁂, 𑀪𑀦𑁆𑀢𑁂, 𑀧𑀘𑁆𑀘𑀢𑁆𑀣𑀭𑀡𑀬𑀸𑀕𑀼𑀅𑀫𑁆𑀩𑀨𑀮𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀤𑀓𑁆𑀔𑀺𑀡𑀸, 𑀲𑀸 𑀫𑁂 𑀧𑀺𑀢𑀭𑀁 𑀧𑀸𑀧𑀼𑀡𑀸𑀢𑀽’’𑀢𑀺. 𑀪𑀕𑀯𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀸𑀬 𑀤𑀓𑁆𑀔𑀺𑀡𑀸𑀬 𑀲𑀫𑀼𑀤𑁆𑀤𑀺𑀝𑁆𑀞𑀫𑀢𑁆𑀢𑀸𑀬 𑀲𑁄 𑀧𑁂𑀢𑁄 𑀅𑀫𑁆𑀩𑀯𑀦𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀧𑁄𑀓𑁆𑀔𑀭𑀡𑀺𑀬𑁄 𑀫𑀳𑀢𑀺𑀜𑁆𑀘 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺.

𑀅𑀣 𑀢𑁂 𑀯𑀸𑀡𑀺𑀚𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀡𑀺𑀚𑁆𑀚𑀸𑀬 𑀕𑀘𑁆𑀙𑀦𑁆𑀢𑀸 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀧𑀼𑀩𑁆𑀩𑁂 𑀯𑀲𑀺𑀢𑀝𑁆𑀞𑀸𑀦𑁂 𑀏𑀓𑀭𑀢𑁆𑀢𑀺𑀁 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑁂 𑀤𑀺𑀲𑁆𑀯𑀸 𑀲𑁄 𑀯𑀺𑀫𑀸𑀦𑀧𑁂𑀢𑁄 𑀉𑀬𑁆𑀬𑀸𑀦𑀯𑀺𑀫𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀢𑁂 𑀯𑀸𑀡𑀺𑀚𑀸 𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑀸 𑁋

‘‘𑀅𑀬𑀜𑁆𑀘 𑀢𑁂 𑀧𑁄𑀓𑁆𑀔𑀭𑀡𑀻 𑀲𑀼𑀭𑀫𑁆𑀫𑀸, 𑀲𑀫𑀸 𑀲𑀼𑀢𑀺𑀢𑁆𑀣𑀸 𑀘 𑀫𑀳𑁄𑀤𑀓𑀸 𑀘;

𑀲𑀼𑀧𑀼𑀧𑁆𑀨𑀺𑀢𑀸 𑀪𑀫𑀭𑀕𑀡𑀸𑀦𑀼𑀓𑀺𑀡𑁆𑀡𑀸, 𑀓𑀣𑀁 𑀢𑀬𑀸 𑀮𑀤𑁆𑀥𑀸 𑀅𑀬𑀁 𑀫𑀦𑀼𑀜𑁆𑀜𑀸.

‘‘𑀇𑀤𑀜𑁆𑀘 ¶ 𑀢𑁂 𑀅𑀫𑁆𑀩𑀯𑀦𑀁 𑀲𑀼𑀭𑀫𑁆𑀫𑀁, 𑀲𑀩𑁆𑀩𑁄𑀢𑀼𑀓𑀁 𑀥𑀸𑀭𑀬𑀢𑁂 𑀨𑀮𑀸𑀦𑀺;

𑀲𑀼𑀧𑀼𑀧𑁆𑀨𑀺𑀢𑀁 𑀪𑀫𑀭𑀕𑀡𑀸𑀦𑀼𑀓𑀺𑀡𑁆𑀡𑀁, 𑀓𑀣𑀁 𑀢𑀬𑀸 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦’’𑀦𑁆𑀢𑀺. 𑁋

𑁭𑁯𑁬. 𑀢𑀢𑁆𑀣 𑀲𑀼𑀭𑀫𑁆𑀫𑀸𑀢𑀺 𑀲𑀼𑀝𑁆𑀞𑀼 𑀭𑀫𑀡𑀻𑀬𑀸. 𑀲𑀫𑀸𑀢𑀺 𑀲𑀫𑀢𑀮𑀸. 𑀲𑀼𑀢𑀺𑀢𑁆𑀣𑀸𑀢𑀺 𑀭𑀢𑀦𑀫𑀬𑀲𑁄𑀧𑀸𑀦𑀢𑀸𑀬 𑀲𑀼𑀦𑁆𑀤𑀭𑀢𑀺𑀢𑁆𑀣𑀸. 𑀫𑀳𑁄𑀤𑀓𑀸𑀢𑀺 𑀩𑀳𑀼𑀚𑀮𑀸.

𑁭𑁯𑁭. 𑀲𑀩𑁆𑀩𑁄𑀢𑀼𑀓𑀦𑁆𑀢𑀺 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀸𑀤𑀻𑀳𑀺 𑀲𑀩𑁆𑀩𑁂𑀲𑀼 𑀉𑀢𑀽𑀲𑀼 𑀲𑀼𑀔𑀸𑀯𑀳𑀁. 𑀢𑁂𑀦𑀸𑀳 ‘‘𑀥𑀸𑀭𑀬𑀢𑁂 𑀨𑀮𑀸𑀦𑀻’’𑀢𑀺. 𑀲𑀼𑀧𑀼𑀧𑁆𑀨𑀺𑀢𑀦𑁆𑀢𑀺 𑀦𑀺𑀘𑁆𑀘𑀁 𑀲𑀼𑀧𑀼𑀧𑁆𑀨𑀺𑀢𑀁.

𑀢𑀁 𑀲𑀼𑀢𑁆𑀯𑀸 𑀧𑁂𑀢𑁄 𑀧𑁄𑀓𑁆𑀔𑀭𑀡𑀺𑀆𑀤𑀻𑀦𑀁 𑀧𑀝𑀺𑀮𑀸𑀪𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀅𑀫𑁆𑀩𑀧𑀓𑁆𑀓𑀁 𑀤𑀓𑀁 𑀬𑀸𑀕𑀼, 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸;

𑀥𑀻𑀢𑀸𑀬 𑀤𑀺𑀦𑁆𑀦𑀤𑀸𑀦𑁂𑀦, 𑀢𑁂𑀦 𑀫𑁂 𑀇𑀥 𑀮𑀩𑁆𑀪𑀢𑀻’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀢𑁂𑀦 𑀫𑁂 𑀇𑀥 𑀮𑀩𑁆𑀪𑀢𑀻𑀢𑀺 𑀬𑀁 𑀢𑀁 𑀪𑀕𑀯𑀢𑁄 𑀪𑀺𑀓𑁆𑀔𑀽𑀦𑀜𑁆𑀘 𑀅𑀫𑁆𑀩𑀧𑀓𑁆𑀓𑀁 𑀉𑀤𑀓𑀁 𑀬𑀸𑀕𑀼𑀜𑁆𑀘 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀤𑁂𑀦𑁆𑀢𑀺𑀬𑀸 𑀫𑀬𑁆𑀳𑀁 𑀥𑀻𑀢𑀸𑀬 𑀤𑀺𑀦𑁆𑀦𑀁 𑀤𑀸𑀦𑀁, 𑀢𑁂𑀦 𑀫𑁂 𑀥𑀻𑀢𑀸𑀬 𑀤𑀺𑀦𑁆𑀦𑀤𑀸𑀦𑁂𑀦 𑀇𑀥 𑀇𑀫𑀲𑁆𑀫𑀺𑀁 𑀤𑀺𑀩𑁆𑀩𑁂 𑀅𑀫𑁆𑀩𑀯𑀦𑁂 𑀲𑀩𑁆𑀩𑁄𑀢𑀼𑀓𑀁 𑀅𑀫𑁆𑀩𑀧𑀓𑁆𑀓𑀁, 𑀇𑀫𑀺𑀲𑁆𑀲𑀸 𑀤𑀺𑀩𑁆𑀩𑀸𑀬 𑀫𑀦𑀼𑀜𑁆𑀜𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀤𑀺𑀩𑁆𑀩𑀁 𑀉𑀤𑀓𑀁, 𑀬𑀸𑀕𑀼𑀬𑀸 𑀅𑀢𑁆𑀣𑀭𑀡𑀲𑁆𑀲 𑀘 𑀤𑀸𑀦𑁂𑀦 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀻𑀲𑀼 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸 𑀇𑀥 𑀮𑀩𑁆𑀪𑀢𑀺, 𑀲𑀫𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀲𑁄 𑀧𑁂𑀢𑁄 𑀢𑁂 𑀯𑀸𑀡𑀺𑀚𑁂 𑀦𑁂𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀢𑁄 𑀉𑀧𑀟𑁆𑀠𑀁 𑀢𑀼𑀫𑁆𑀳𑁂 𑀕𑀡𑁆𑀳𑀣, 𑀉𑀧𑀟𑁆𑀠𑀁 𑀫𑀬𑀸 𑀕𑀳𑀺𑀢𑀁 𑀇𑀡𑀁 𑀲𑁄𑀥𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀢𑀽𑀢𑀺 𑀫𑀬𑁆𑀳𑀁 𑀥𑀻𑀢𑀸𑀬 𑀤𑁂𑀣𑀸’’𑀢𑀺 𑀆𑀳. 𑀯𑀸𑀡𑀺𑀚𑀸 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀢𑀲𑁆𑀲 𑀥𑀻𑀢𑀸𑀬 𑀓𑀣𑁂𑀢𑁆𑀯𑀸 𑀢𑁂𑀦 𑀅𑀢𑁆𑀢𑀦𑁄 𑀤𑀺𑀦𑁆𑀦𑀪𑀸𑀕𑀫𑁆𑀧𑀺 𑀢𑀲𑁆𑀲𑀸 𑀏𑀯 𑀅𑀤𑀁𑀲𑀼. 𑀲𑀸 𑀓𑀳𑀸𑀧𑀡𑀲𑀢𑀁 𑀥𑀦𑀺𑀓𑀸𑀦𑀁 𑀤𑀢𑁆𑀯𑀸 𑀇𑀢𑀭𑀁 𑀅𑀢𑁆𑀢𑀦𑁄 𑀧𑀺𑀢𑀼 𑀲𑀳𑀸𑀬𑀲𑁆𑀲 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀤𑀢𑁆𑀯𑀸 𑀲𑀬𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀺 𑀦𑀺𑀯𑀲𑀢𑀺. 𑀲𑁄 ‘‘𑀇𑀤𑀁 𑀲𑀩𑁆𑀩𑀁 𑀢𑀼𑀬𑁆𑀳𑀁𑀬𑁂𑀯 𑀳𑁄𑀢𑀽’’𑀢𑀺 ¶ 𑀢𑀲𑁆𑀲𑀸𑀬𑁂𑀯 𑀧𑀝𑀺𑀤𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀖𑀭𑀲𑀸𑀫𑀺𑀦𑀺𑀁 𑀅𑀓𑀸𑀲𑀺.

𑀲𑀸 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀁 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀢𑀁 𑀉𑀧𑀮𑀸𑀮𑁂𑀦𑁆𑀢𑀻 𑁋

‘‘𑀲𑀦𑁆𑀤𑀺𑀝𑁆𑀞𑀺𑀓𑀁 𑀓𑀫𑁆𑀫𑀁 𑀏𑀯𑀁 𑀧𑀲𑁆𑀲𑀣, 𑀤𑀸𑀦𑀲𑁆𑀲 𑀤𑀫𑀲𑁆𑀲 𑀲𑀁𑀬𑀫𑀲𑁆𑀲 𑀯𑀺𑀧𑀸𑀓𑀁;

𑀤𑀸𑀲𑀻 𑀅𑀳𑀁 𑀅𑀬𑁆𑀬𑀓𑀼𑀮𑁂𑀲𑀼 𑀳𑀼𑀢𑁆𑀯𑀸, 𑀲𑀼𑀡𑀺𑀲𑀸 𑀳𑁄𑀫𑀺 𑀅𑀕𑀸𑀭𑀲𑁆𑀲 𑀇𑀲𑁆𑀲𑀭𑀸’’𑀢𑀺. 𑁋

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀢𑀲𑁆𑀲𑀸 𑀜𑀸𑀡𑀧𑀭𑀺𑀧𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀞𑀺𑀢𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀅𑀲𑀸𑀢𑀁 𑀲𑀸𑀢𑀭𑀽𑀧𑁂𑀦, 𑀧𑀺𑀬𑀭𑀽𑀧𑁂𑀦 𑀅𑀧𑁆𑀧𑀺𑀬𑀁;

𑀤𑀼𑀓𑁆𑀔𑀁 𑀲𑀼𑀔𑀲𑁆𑀲 𑀭𑀽𑀧𑁂𑀦, 𑀧𑀫𑀢𑁆𑀢𑀁 𑀅𑀢𑀺𑀯𑀢𑁆𑀢𑀢𑀻’’𑀢𑀺. (𑀉𑀤𑀸. 𑁧𑁮; 𑀚𑀸. 𑁧.𑁧.𑁧𑁦𑁦) 𑁋

𑀇𑀫𑀁 𑀕𑀸𑀣𑀫𑀸𑀳. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸. 𑀲𑀸 𑀤𑀼𑀢𑀺𑀬𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ¶ 𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀅𑀫𑁆𑀩𑀯𑀦𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀅𑀓𑁆𑀔𑀭𑀼𑀓𑁆𑀔𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀬𑀁 𑀤𑀤𑀸𑀢𑀺 𑀦 𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀅𑀓𑁆𑀔𑀤𑀸𑀬𑀓𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 ¶ 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑁄 𑀲𑀸𑀯𑀢𑁆𑀣𑀺𑀯𑀸𑀲𑀻 𑀉𑀧𑀸𑀲𑀓𑁄 𑀲𑀓𑀝𑁂𑀳𑀺 𑀪𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀯𑀡𑀺𑀚𑁆𑀚𑀸𑀬 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀝𑀺𑀪𑀡𑁆𑀟𑀁 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀉𑀤𑁆𑀤𑀺𑀲𑁆𑀲 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀲 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀝𑀯𑀺𑀬𑀁 𑀏𑀓𑀲𑁆𑀲 𑀲𑀓𑀝𑀲𑁆𑀲 𑀅𑀓𑁆𑀔𑁄 𑀪𑀺𑀚𑁆𑀚𑀺. 𑀅𑀣 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀭𑀼𑀓𑁆𑀔𑀕𑀳𑀡𑀢𑁆𑀣𑀁 𑀓𑀼𑀞𑀸𑀭𑀺𑀨𑀭𑀲𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 ¶ 𑀢𑀁 𑀉𑀧𑀸𑀲𑀓𑀁 𑀅𑀓𑁆𑀔𑀪𑀜𑁆𑀚𑀦𑁂𑀦 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀯𑀸𑀡𑀺𑀚𑁄 𑀅𑀓𑁆𑀔𑀪𑀜𑁆𑀚𑀦𑁂𑀦 𑀅𑀝𑀯𑀺𑀬𑀁 𑀓𑀺𑀮𑀫𑀢𑀻’’𑀢𑀺 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀭𑀼𑀓𑁆𑀔𑀤𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑀴𑁆𑀳𑀁 𑀅𑀓𑁆𑀔𑀁 𑀓𑀢𑁆𑀯𑀸 𑀲𑀓𑀝𑁂 𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀝𑀯𑀺𑀧𑀤𑁂𑀲𑁂 𑀪𑀼𑀫𑁆𑀫𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀭𑀢𑁆𑀢𑀺𑀬𑀁 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀞𑀢𑁆𑀯𑀸 𑁋

‘‘𑀬𑀁 𑀤𑀤𑀸𑀢𑀺 𑀦 𑀢𑀁 𑀳𑁄𑀢𑀺, 𑀤𑁂𑀣𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀉𑀪𑀬𑀁 𑀢𑀭𑀢𑀺;

𑀉𑀪𑀬𑀁 𑀢𑁂𑀦 𑀤𑀸𑀦𑁂𑀦 𑀕𑀘𑁆𑀙𑀢𑀺, 𑀚𑀸𑀕𑀭𑀣 𑀫𑀸 𑀧𑀫𑀚𑁆𑀚𑀣𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀁 𑀤𑀤𑀸𑀢𑀺 𑀦 𑀢𑀁 𑀳𑁄𑀢𑀻𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀸𑀬𑀓𑁄 𑀤𑁂𑀢𑀺, 𑀦 𑀢𑀤𑁂𑀯 𑀧𑀭𑀮𑁄𑀓𑁂 𑀢𑀲𑁆𑀲 𑀤𑀸𑀦𑀲𑁆𑀲 𑀨𑀮𑀪𑀸𑀯𑁂𑀦 𑀳𑁄𑀢𑀺, 𑀅𑀣 𑀔𑁄 𑀅𑀜𑁆𑀜𑀁 𑀩𑀳𑀼𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀨𑀮𑀁 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀤𑁂𑀣𑁂𑀯 𑀤𑀸𑀦𑀦𑁆𑀢𑀺 𑀬𑀣𑀸 𑀢𑀣𑀸 𑀤𑀸𑀦𑀁 𑀤𑁂𑀣 𑀏𑀯. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀤𑀢𑁆𑀯𑀸 𑀉𑀪𑀬𑀁 𑀢𑀭𑀢𑀻’’𑀢𑀺 ¶ , 𑀤𑀸𑀦𑀁 𑀤𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀅𑀦𑀢𑁆𑀣𑀜𑁆𑀘 𑀅𑀢𑀺𑀓𑁆𑀓𑀫𑀢𑀺. 𑀉𑀪𑀬𑀁 𑀢𑁂𑀦 𑀤𑀸𑀦𑁂𑀦 𑀕𑀘𑁆𑀙𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀲𑀼𑀔𑀁 𑀢𑁂𑀦 𑀤𑀸𑀦𑁂𑀦 𑀉𑀧𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀲𑀼𑀔𑀯𑀲𑁂𑀦𑀸𑀧𑀺 𑀅𑀬𑀫𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄. 𑀚𑀸𑀕𑀭𑀣 𑀫𑀸 𑀧𑀫𑀚𑁆𑀚𑀣𑀸𑀢𑀺 𑀏𑀯𑀁 𑀉𑀪𑀬𑀸𑀦𑀢𑁆𑀣𑀦𑀺𑀯𑀸𑀭𑀡𑀁 𑀉𑀪𑀬𑀳𑀺𑀢𑀲𑀸𑀥𑀦𑀁 𑀤𑀸𑀦𑀁 𑀲𑀫𑁆𑀧𑀸𑀤𑁂𑀢𑀼𑀁 𑀚𑀸𑀕𑀭𑀣, 𑀤𑀸𑀦𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣 𑀘 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸𑀢𑀺 𑀅𑀢𑁆𑀣𑁄. 𑀆𑀤𑀭𑀤𑀲𑁆𑀲𑀦𑀢𑁆𑀣𑀁 𑀘𑁂𑀢𑁆𑀣 𑀆𑀫𑁂𑀟𑀺𑀢𑀯𑀲𑁂𑀦 𑀯𑀼𑀢𑁆𑀢𑀁.

𑀯𑀸𑀡𑀺𑀚𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀢𑀻𑀭𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀅𑀓𑁆𑀔𑀭𑀼𑀓𑁆𑀔𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀪𑁄𑀕𑀲𑀁𑀳𑀭𑀡𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀫𑀬𑀁 ¶ ¶ 𑀪𑁄𑀕𑁂 𑀲𑀁𑀳𑀭𑀺𑀫𑁆𑀳𑀸𑀢𑀺 𑀇𑀤𑀁 𑀪𑁄𑀕𑀲𑀁𑀳𑀭𑀡𑀧𑁂𑀢𑀺𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀭𑀸𑀚𑀕𑀳𑁂 𑀓𑀺𑀭 𑀘𑀢𑀲𑁆𑀲𑁄 𑀇𑀢𑁆𑀣𑀺𑀬𑁄 𑀫𑀸𑀦𑀓𑀽𑀝𑀸𑀤𑀺𑀯𑀲𑁂𑀦 𑀲𑀧𑁆𑀧𑀺𑀫𑀥𑀼𑀢𑁂𑀮𑀥𑀜𑁆𑀜𑀸𑀤𑀻𑀳𑀺 𑀯𑁄𑀳𑀸𑀭𑀁 𑀓𑀢𑁆𑀯𑀸 𑀅𑀬𑁄𑀦𑀺𑀲𑁄 𑀪𑁄𑀕𑁂 𑀲𑀁𑀳𑀭𑀺𑀢𑁆𑀯𑀸 𑀚𑀻𑀯𑀦𑁆𑀢𑀺. 𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑀳𑀺𑀦𑀕𑀭𑁂 𑀧𑀭𑀺𑀔𑀸𑀧𑀺𑀝𑁆𑀞𑁂 𑀧𑁂𑀢𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀸 𑀭𑀢𑁆𑀢𑀺𑀬𑀁 𑀤𑀼𑀓𑁆𑀔𑀸𑀪𑀺𑀪𑀽𑀢𑀸 𑁋

‘‘𑀫𑀬𑀁 𑀪𑁄𑀕𑁂 𑀲𑀁𑀳𑀭𑀺𑀫𑁆𑀳𑀸, 𑀲𑀫𑁂𑀦 𑀯𑀺𑀲𑀫𑁂𑀦 𑀘;

𑀢𑁂 𑀅𑀜𑁆𑀜𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀫𑀬𑀁 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑀻’’𑀢𑀺. 𑁋

𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄 𑀪𑁂𑀭𑀯𑁂𑀦 𑀫𑀳𑀸𑀲𑀤𑁆𑀤𑁂𑀦 𑀯𑀺𑀭𑀯𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀢𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀦𑀺𑀯𑁂𑀤𑁂𑀲𑀼𑀁. 𑀪𑀕𑀯𑀸 ‘‘𑀉𑀧𑀸𑀲𑀓𑀸 𑀢𑁂𑀦 ¶ 𑀯𑁄 𑀲𑀤𑁆𑀤𑁂𑀦 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺, 𑀘𑀢𑀲𑁆𑀲𑁄 𑀧𑀦 𑀧𑁂𑀢𑀺𑀬𑁄 𑀤𑀼𑀓𑁆𑀔𑀸𑀪𑀺𑀪𑀽𑀢𑀸 𑀅𑀢𑁆𑀢𑀦𑀸 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀭𑀺𑀤𑁂𑀯𑀦𑀯𑀲𑁂𑀦 𑀯𑀺𑀲𑁆𑀲𑀭𑁂𑀦 𑀯𑀺𑀭𑀯𑀦𑁆𑀢𑀺𑀬𑁄 𑁋

‘‘𑀫𑀬𑀁 𑀪𑁄𑀕𑁂 𑀲𑀁𑀳𑀭𑀺𑀫𑁆𑀳𑀸, 𑀲𑀫𑁂𑀦 𑀯𑀺𑀲𑀫𑁂𑀦 𑀘;

𑀢𑁂 𑀅𑀜𑁆𑀜𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀫𑀬𑀁 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑀻’’𑀢𑀺. 𑁋

𑀢𑀢𑁆𑀣 𑀪𑁄𑀕𑁂𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀯𑀢𑁆𑀣𑀸𑀪𑀭𑀡𑀸𑀤𑀺𑀓𑁂 𑀯𑀺𑀢𑁆𑀢𑀽𑀧𑀓𑀭𑀡𑀯𑀺𑀲𑁂𑀲𑁂. 𑀲𑀁𑀳𑀭𑀺𑀫𑁆𑀳𑀸𑀢𑀺 𑀫𑀘𑁆𑀙𑁂𑀭𑀫𑀮𑁂𑀦 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀲𑀜𑁆𑀘𑀺𑀦𑀺𑀫𑁆𑀳. 𑀲𑀫𑁂𑀦 𑀯𑀺𑀲𑀫𑁂𑀦 𑀘𑀸𑀢𑀺 𑀜𑀸𑀬𑁂𑀦 𑀘 𑀅𑀜𑁆𑀜𑀸𑀬𑁂𑀦 𑀘, 𑀜𑀸𑀬𑀧𑀢𑀺𑀭𑀽𑀧𑀓𑁂𑀦 𑀯𑀸 𑀅𑀜𑁆𑀜𑀸𑀬𑁂𑀦 𑀢𑁂 𑀪𑁄𑀕𑁂 𑀅𑀫𑁆𑀳𑁂𑀳𑀺 𑀲𑀁𑀳𑀭𑀺𑀢𑁂 𑀇𑀤𑀸𑀦𑀺 𑀅𑀜𑁆𑀜𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀫𑀬𑀁 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑀻𑀢𑀺 𑀫𑀬𑀁 𑀧𑀦 𑀓𑀲𑁆𑀲𑀘𑀺𑀧𑀺 𑀲𑀼𑀘𑀭𑀺𑀢𑀲𑁆𑀲 𑀅𑀓𑀢𑀢𑁆𑀢𑀸 𑀤𑀼𑀘𑁆𑀘𑀭𑀺𑀢𑀲𑁆𑀲 𑀘 𑀓𑀢𑀢𑁆𑀢𑀸 𑀏𑀢𑀭𑀳𑀺 𑀧𑁂𑀢𑀬𑁄𑀦𑀺𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀫𑀳𑀢𑁄 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀦𑀺𑀬𑁄 𑀪𑀯𑀸𑀫, 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫𑀸𑀢𑀺 𑀅𑀢𑁆𑀣𑁄.

𑀏𑀯𑀁 ¶ ¶ 𑀪𑀕𑀯𑀸 𑀢𑀸𑀳𑀺 𑀧𑁂𑀢𑀻𑀳𑀺 𑀯𑀼𑀢𑁆𑀢𑀁 𑀕𑀸𑀣𑀁 𑀯𑀢𑁆𑀯𑀸 𑀢𑀸𑀲𑀁 𑀧𑀯𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀧𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀪𑁄𑀕𑀲𑀁𑀳𑀭𑀡𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀲𑁂𑀝𑁆𑀞𑀺𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀇𑀤𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀫𑀳𑀢𑀺𑀬𑀸 𑀭𑀸𑀚𑀺𑀤𑁆𑀥𑀺𑀬𑀸 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑁂𑀳𑁂 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀭𑀸𑀚𑀯𑀺𑀪𑀽𑀢𑀺𑀁 𑀑𑀮𑁄𑀓𑁂𑀦𑁆𑀢𑀺𑀁 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀁 𑀏𑀓𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑁂 𑀆𑀭𑀫𑁆𑀫𑀡𑁂 𑀲𑀳𑀲𑀸 𑀲𑀫𑀼𑀧𑁆𑀧𑀦𑁆𑀦𑁂𑀦 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀲𑀢𑀺𑀧𑀺 𑀓𑀼𑀮𑀭𑀽𑀧𑀸𑀘𑀸𑀭𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑁆𑀧𑀦𑁆𑀦𑁂 ¶ 𑀅𑀦𑁆𑀢𑁂𑀧𑀼𑀭𑀚𑀦𑁂 𑀲𑀪𑀸𑀯𑀮𑀳𑀼𑀓𑀲𑁆𑀲 𑀧𑀦 𑀤𑀼𑀤𑁆𑀤𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀢𑀲𑁆𑀲𑀁 𑀇𑀢𑁆𑀣𑀺𑀬𑀁 𑀧𑀝𑀺𑀩𑀤𑁆𑀥𑀫𑀸𑀦𑀲𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 ‘‘𑀇𑀫𑀁 𑀧𑀸𑀲𑀸𑀤𑀁 𑀇𑀫𑀜𑁆𑀘 𑀇𑀢𑁆𑀣𑀺𑀁 𑀉𑀧𑀥𑀸𑀭𑁂𑀳𑀻’’𑀢𑀺 𑀲𑀜𑁆𑀜𑀁 𑀤𑀢𑁆𑀯𑀸 𑀭𑀸𑀚𑀕𑁂𑀳𑀁 𑀧𑀯𑀺𑀝𑁆𑀞𑁄. 𑀅𑀜𑁆𑀜𑀁 𑀲𑀩𑁆𑀩𑀁 𑀅𑀫𑁆𑀩𑀲𑀓𑁆𑀓𑀭𑀧𑁂𑀢𑀯𑀢𑁆𑀣𑀼𑀫𑁆𑀳𑀺 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀥 𑀧𑀼𑀭𑀺𑀲𑁄 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀆𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀣𑀓𑀺𑀢𑁂 𑀅𑀢𑁆𑀢𑀦𑀸 𑀆𑀦𑀻𑀢𑀁 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁 𑀉𑀧𑁆𑀧𑀮𑀸𑀦𑀺 𑀘 𑀦𑀕𑀭𑀤𑁆𑀯𑀸𑀭𑀓𑀯𑀸𑀝𑁂 𑀮𑀕𑁆𑀕𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀦 𑀲𑀺𑀭𑀺𑀲𑀬𑀦𑁂 𑀯𑀸𑀲𑀽𑀧𑀕𑀢𑁄 𑀫𑀚𑁆𑀛𑀺𑀫𑀬𑀸𑀫𑁂 𑀲-𑀇𑀢𑀺 𑀦-𑀇𑀢𑀺 𑀤𑀼-𑀇𑀢𑀺 𑀲𑁄-𑀇𑀢𑀺 𑀘 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀓𑁆𑀔𑀭𑀸𑀦𑀺 𑀫𑀳𑀢𑀸 𑀓𑀡𑁆𑀞𑁂𑀦 𑀉𑀘𑁆𑀘𑀸𑀭𑀺𑀢𑀸𑀦𑀺 𑀯𑀺𑀬 𑀯𑀺𑀲𑁆𑀲𑀭𑀯𑀲𑁂𑀦 𑀅𑀲𑁆𑀲𑁄𑀲𑀺. 𑀢𑀸𑀦𑀺 𑀓𑀺𑀭 𑀅𑀢𑀻𑀢𑁂 𑀓𑀸𑀮𑁂 𑀲𑀸𑀯𑀢𑁆𑀣𑀺𑀯𑀸𑀲𑀻𑀳𑀺 𑀘𑀢𑀽𑀳𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺 𑀪𑁄𑀕𑀫𑀤𑀫𑀢𑁆𑀢𑁂𑀳𑀺 𑀬𑁄𑀩𑁆𑀩𑀦𑀓𑀸𑀮𑁂 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀯𑀲𑁂𑀦 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀦𑀕𑀭𑀲𑁆𑀲 𑀲𑀫𑀻𑀧𑁂 𑀮𑁄𑀳𑀓𑀼𑀫𑁆𑀪𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀘𑁆𑀘𑀫𑀸𑀦𑁂𑀳𑀺 𑀮𑁄𑀳𑀓𑀼𑀫𑁆𑀪𑀺𑀬𑀸 𑀫𑀼𑀔𑀯𑀝𑁆𑀝𑀺𑀁 𑀧𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀣𑀼𑀓𑀸𑀫𑁂𑀳𑀺 𑀉𑀘𑁆𑀘𑀸𑀭𑀺𑀢𑀸𑀦𑀁 𑀢𑀸𑀲𑀁 𑀕𑀸𑀣𑀸𑀦𑀁 𑀆𑀤𑀺𑀅𑀓𑁆𑀔𑀭𑀸𑀦𑀺 ¶ , 𑀢𑁂 𑀧𑀞𑀫𑀓𑁆𑀔𑀭𑀫𑁂𑀯 𑀯𑀢𑁆𑀯𑀸 𑀯𑁂𑀤𑀦𑀸𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀁 𑀑𑀢𑀭𑀺𑀁𑀲𑀼.

𑀭𑀸𑀚𑀸 𑀧𑀦 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀢𑀁 𑀭𑀢𑁆𑀢𑀸𑀯𑀲𑁂𑀲𑀁 𑀤𑀼𑀓𑁆𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀧𑀼𑀭𑁄𑀳𑀺𑀢𑁄 𑀭𑀸𑀚𑀸𑀦𑀁 ¶ 𑀪𑀻𑀢𑀢𑀲𑀺𑀢𑀁 𑀜𑀢𑁆𑀯𑀸 𑀮𑀸𑀪𑀕𑀺𑀤𑁆𑀥𑁄 ‘‘𑀉𑀧𑁆𑀧𑀦𑁆𑀦𑁄 𑀔𑁄 𑀅𑀬𑀁 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀮𑀸𑀪𑀼𑀧𑁆𑀧𑀸𑀤𑀦𑀼𑀧𑀸𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀳𑀸 𑀯𑀢𑀸𑀬𑀁 𑀉𑀧𑀤𑁆𑀤𑀯𑁄 𑀉𑀧𑁆𑀧𑀦𑁆𑀦𑁄, 𑀲𑀩𑁆𑀩𑀘𑀢𑀼𑀓𑁆𑀓𑀁 𑀬𑀜𑁆𑀜𑀁 𑀬𑀚𑀸𑀳𑀻’’𑀢𑀺 𑀆𑀳. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 ‘‘𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑀲𑁆𑀲 𑀉𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀣𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀭𑀸𑀚𑀸𑀦𑀁 𑀏𑀯𑀫𑀸𑀳 𑁋 ‘‘𑀓𑀲𑁆𑀫𑀸, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀦𑁂𑀓𑀧𑀸𑀡𑀯𑀥𑀳𑀺𑀁𑀲𑀦𑀓𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑁄𑀲𑀺, 𑀦𑀦𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁄 𑀪𑀕𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑁄? 𑀬𑀣𑀸 ¶ 𑀘 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀭𑀸𑀚𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 ‘‘𑀦, 𑀫𑀳𑀸𑀭𑀸𑀚, 𑀢𑀢𑁄𑀦𑀺𑀤𑀸𑀦𑀁 𑀢𑀼𑀬𑁆𑀳𑀁 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄’’𑀢𑀺 𑀯𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀢𑁂𑀳𑀺 𑀧𑀘𑁆𑀘𑁂𑀓𑀁 𑀉𑀘𑁆𑀘𑀸𑀭𑁂𑀢𑀼𑀁 𑀆𑀭𑀤𑁆𑀥𑀕𑀸𑀣𑀸𑀬𑁄 𑁋

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

‘‘𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀢𑀣𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀢𑀼𑀬𑁆𑀳𑀁 𑀫𑀬𑁆𑀳𑀜𑁆𑀘 𑀫𑀸𑀭𑀺𑀲𑀸.

‘‘𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳, 𑀬𑁂 𑀲𑀦𑁆𑀢𑁂 𑀦 𑀤𑀤𑀫𑁆𑀳𑀲𑁂;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. 𑁋

𑁮𑁦𑁨. 𑀢𑀢𑁆𑀣 ¶ 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀲𑁆𑀲𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺. 𑀢𑀲𑁆𑀫𑀺𑀁 𑀓𑀺𑀭 𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁄 𑀅𑀥𑁄 𑀑𑀕𑀘𑁆𑀙𑀦𑁆𑀢𑁄 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀳𑁂𑀝𑁆𑀞𑀺𑀫𑀢𑀮𑀁 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀉𑀤𑁆𑀥𑀁 𑀉𑀕𑁆𑀕𑀘𑁆𑀙𑀦𑁆𑀢𑁄𑀧𑀺 𑀢𑀺𑀁𑀲𑀸𑀬 𑀏𑀯 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀫𑀼𑀔𑀯𑀝𑁆𑀝𑀺𑀧𑀤𑁂𑀲𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀲𑁄 ‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄’’𑀢𑀺 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑁄 𑀲-𑀇𑀢𑀺 𑀯𑀢𑁆𑀯𑀸 𑀅𑀥𑀺𑀫𑀢𑁆𑀢𑀯𑁂𑀤𑀦𑀸𑀧𑁆𑀧𑀢𑁆𑀢𑁄 ¶ 𑀳𑀼𑀢𑁆𑀯𑀸 𑀅𑀥𑁄𑀫𑀼𑀔𑁄 𑀧𑀢𑀺. 𑀪𑀕𑀯𑀸 𑀧𑀦 𑀢𑀁 𑀭𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀏𑀲 𑀦𑀬𑁄 𑀲𑁂𑀲𑀕𑀸𑀣𑀸𑀲𑀼𑀧𑀺. 𑀢𑀢𑁆𑀣 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁 𑀅𑀫𑁆𑀳𑀸𑀓𑀁 𑀓𑀤𑀸 𑀦𑀼 𑀔𑁄 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀪𑀯𑀺𑀲𑁆𑀲𑀢𑀺.

𑁮𑁦𑁩. 𑀢𑀣𑀸 𑀳𑀻𑀢𑀺 𑀬𑀣𑀸 𑀢𑀼𑀬𑁆𑀳𑀁 𑀫𑀬𑁆𑀳𑀜𑁆𑀘 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀢𑁆𑀣𑀺 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀧𑀸𑀧𑀓𑀁 𑀓𑀫𑁆𑀫𑀁 𑀧𑀓𑀢𑀁 𑀢𑀬𑀸 𑀫𑀬𑀸 𑀘𑀸𑀢𑀺 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

𑁮𑁦𑁪. 𑀤𑀼𑀚𑁆𑀚𑀻𑀯𑀺𑀢𑀦𑁆𑀢𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀚𑀻𑀯𑀺𑀢𑀁. 𑀬𑁂 𑀲𑀦𑁆𑀢𑁂𑀢𑀺 𑀬𑁂 𑀫𑀬𑀁 𑀲𑀦𑁆𑀢𑁂 𑀯𑀺𑀚𑁆𑀚𑀫𑀸𑀦𑁂 𑀤𑁂𑀬𑁆𑀬𑀥𑀫𑁆𑀫𑁂. 𑀦 𑀤𑀤𑀫𑁆𑀳𑀲𑁂𑀢𑀺 ¶ 𑀦 𑀅𑀤𑀫𑁆𑀳. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄’’𑀢𑀺 𑀯𑀼𑀢𑁆𑀢𑀁.

𑁮𑁦𑁫. 𑀲𑁄𑀳𑀦𑁆𑀢𑀺 𑀲𑁄 𑀅𑀳𑀁. 𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑁂 𑀦𑀺𑀧𑀸𑀢𑁄. 𑀇𑀢𑁄𑀢𑀺 𑀇𑀫𑀲𑁆𑀫𑀸 𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸. 𑀕𑀦𑁆𑀢𑁆𑀯𑀸𑀢𑀺 𑀅𑀧𑀕𑀦𑁆𑀢𑁆𑀯𑀸. 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀦𑁆𑀢𑀺 𑀫𑀦𑀼𑀲𑁆𑀲𑀬𑁄𑀦𑀺𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀮𑀪𑀺𑀢𑁆𑀯𑀸. 𑀯𑀤𑀜𑁆𑀜𑀽𑀢𑀺 𑀧𑀭𑀺𑀘𑁆𑀘𑀸𑀕𑀲𑀻𑀮𑁄, 𑀬𑀸𑀘𑀓𑀸𑀦𑀁 𑀯𑀸 𑀯𑀘𑀦𑀜𑁆𑀜𑀽. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄. 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀦𑁆𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀧𑀫𑀸𑀤𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀩𑀳𑀼𑀁 𑀧𑀳𑀽𑀢𑀁 𑀓𑀼𑀲𑀮𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀉𑀧𑀘𑀺𑀦𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸𑀬𑁄 𑀯𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀫𑀢𑁆𑀢𑀺𑀓𑀸𑀭𑀢𑁆𑀢𑀼𑀧𑁆𑀧𑀮𑀳𑀸𑀭𑀓𑁄 𑀧𑀼𑀭𑀺𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀭𑀸𑀚𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀧𑀭𑀧𑀭𑀺𑀕𑁆𑀕𑀳𑁂 𑀅𑀪𑀺𑀚𑁆𑀛𑀁 𑀧𑀳𑀸𑀬 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄 𑀅𑀳𑁄𑀲𑀻𑀢𑀺.

𑀲𑁂𑀝𑁆𑀞𑀺𑀧𑀼𑀢𑁆𑀢𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀲𑀝𑁆𑀞𑀺𑀓𑀽𑀝𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀓𑀺𑀁 ¶ 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯𑀸𑀢𑀺 𑀇𑀤𑀁 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀢𑀭𑀁 𑀧𑁂𑀢𑀁 𑀆𑀭𑀩𑁆𑀪 𑀯𑀼𑀢𑁆𑀢𑀁. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀦𑀕𑀭𑁂 𑀅𑀜𑁆𑀜𑀢𑀭𑁄 𑀧𑀻𑀞𑀲𑀧𑁆𑀧𑀻 𑀲𑀸𑀮𑀺𑀢𑁆𑀢𑀓𑀧𑀬𑁄𑀕𑁂 𑀓𑀼𑀲𑀮𑁄, 𑀢𑀳𑀺𑀁 𑀲𑀓𑁆𑀔𑀭𑀔𑀺𑀧𑀦𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀦𑀕𑀭𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀓𑁆𑀔𑀭𑀧𑀳𑀸𑀭𑁂𑀳𑀺 𑀳𑀢𑁆𑀣𑀺𑀅𑀲𑁆𑀲𑀫𑀦𑀼𑀲𑁆𑀲𑀭𑀣𑀓𑀽𑀝𑀸𑀕𑀸𑀭𑀥𑀚𑀧𑀼𑀡𑁆𑀡𑀖𑀝𑀸𑀤𑀺𑀭𑀽𑀧𑀸𑀦𑀺 𑀦𑀺𑀕𑁆𑀭𑁄𑀥𑀧𑀢𑁆𑀢𑁂𑀲𑀼 𑀤𑀲𑁆𑀲𑁂𑀢𑀺. 𑀦𑀕𑀭𑀤𑀸𑀭𑀓𑀸 𑀅𑀢𑁆𑀢𑀦𑁄 𑀓𑀻𑀴𑀦𑀢𑁆𑀣𑀸𑀬 ¶ 𑀫𑀸𑀬𑀓𑀟𑁆𑀠𑀫𑀸𑀲𑀓𑀸𑀤𑀻𑀦𑀺 𑀤𑀢𑁆𑀯𑀸 𑀬𑀣𑀸𑀭𑀼𑀘𑀺 𑀢𑀸𑀦𑀺 𑀲𑀺𑀧𑁆𑀧𑀸𑀦𑀺 𑀓𑀸𑀭𑀸𑀧𑁂𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀦𑀺𑀕𑁆𑀭𑁄𑀥𑀫𑀽𑀮𑀁 𑀉𑀧𑀕𑀢𑁄 𑀦𑀺𑀕𑁆𑀭𑁄𑀥𑀧𑀢𑁆𑀢𑁂𑀲𑀼 𑀳𑀢𑁆𑀣𑀺𑀭𑀽𑀧𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑀭𑀽𑀧𑀯𑀺𑀪𑀢𑁆𑀢𑀺𑀬𑁄 𑀅𑀧𑁆𑀧𑀺𑀢𑀸 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑁂𑀦 𑀦𑀼 𑀔𑁄 𑀇𑀫𑁂𑀲𑀼 𑀦𑀺𑀕𑁆𑀭𑁄𑀥𑀧𑀢𑁆𑀢𑁂𑀲𑀼 𑀏𑀯𑀁 𑀦𑀸𑀦𑀸𑀯𑀺𑀥𑀭𑀽𑀧𑀯𑀺𑀪𑀢𑁆𑀢𑀺𑀬𑁄 𑀓𑀢𑀸’’𑀢𑀺? 𑀫𑀦𑀼𑀲𑁆𑀲𑀸 𑀢𑀁 𑀧𑀻𑀞𑀲𑀧𑁆𑀧𑀺𑀁 𑀤𑀲𑁆𑀲𑁂𑀲𑀼𑀁 ‘‘𑀤𑁂𑀯, 𑀇𑀫𑀺𑀦𑀸 𑀓𑀢𑀸’’𑀢𑀺 ¶ . 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀓𑁆𑀓𑀸 𑀦𑀼 𑀔𑁄, 𑀪𑀡𑁂, 𑀫𑀬𑀸 𑀤𑀲𑁆𑀲𑀺𑀢𑀲𑁆𑀲 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀣𑁂𑀦𑁆𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀓𑀼𑀘𑁆𑀙𑀺𑀬𑀁 𑀅𑀚𑀮𑀡𑁆𑀟𑀺𑀓𑀸𑀳𑀺 𑀧𑀽𑀭𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀁 𑀅𑀢𑁆𑀢𑀦𑁄 𑀭𑀸𑀚𑀪𑀯𑀦𑀁 𑀦𑁂𑀢𑁆𑀯𑀸 𑀩𑀳𑀼𑀪𑀸𑀡𑀺𑀓𑁂 𑀧𑀼𑀭𑁄𑀳𑀺𑀢𑁂 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑁄 𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀦 𑀲𑀳 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀲𑀸𑀡𑀺𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀫𑀸𑀦𑁄 𑀧𑀻𑀞𑀲𑀧𑁆𑀧𑀺𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀧𑀻𑀞𑀲𑀧𑁆𑀧𑀻 𑀦𑀸𑀴𑀺𑀫𑀢𑁆𑀢𑀸 𑀅𑀚𑀮𑀡𑁆𑀟𑀺𑀓𑀸 𑀆𑀤𑀸𑀬𑀸𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀓𑀸𑀭𑀁 𑀜𑀢𑁆𑀯𑀸 𑀧𑀼𑀭𑁄𑀳𑀺𑀢𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀢𑁂𑀦 𑀫𑀼𑀔𑁂 𑀯𑀺𑀯𑀝𑁂 𑀲𑀸𑀡𑀺𑀧𑀸𑀓𑀸𑀭𑀯𑀺𑀯𑀭𑁂𑀦 𑀏𑀓𑁂𑀓𑀁 𑀅𑀚𑀮𑀡𑁆𑀟𑀺𑀓𑀁 𑀢𑀲𑁆𑀲 𑀕𑀮𑀫𑀽𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀮𑀚𑁆𑀚𑀸𑀬 𑀉𑀕𑁆𑀕𑀺𑀮𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀩𑁆𑀩𑀸 𑀅𑀚𑁆𑀛𑁄𑀳𑀭𑀺. 𑀅𑀣 𑀦𑀁 𑀭𑀸𑀚𑀸 𑀅𑀚𑀮𑀡𑁆𑀟𑀺𑀓𑀸𑀳𑀺 𑀧𑀽𑀭𑀺𑀢𑁄𑀤𑀭𑀁 𑀯𑀺𑀲𑁆𑀲𑀚𑁆𑀚𑀺 𑁋 ‘‘𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀮𑀤𑁆𑀥𑀁 𑀢𑀬𑀸 𑀩𑀳𑀼𑀪𑀸𑀡𑀺𑀢𑀸𑀬 𑀨𑀮𑀁, 𑀫𑀤𑁆𑀤𑀦𑀨𑀮𑀧𑀺𑀬𑀗𑁆𑀕𑀼𑀢𑀘𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑀁 𑀧𑀸𑀦𑀓𑀁 𑀧𑀺𑀯𑀺𑀢𑁆𑀯𑀸 𑀉𑀘𑁆𑀙𑀟𑁆𑀟𑁂𑀳𑀺, 𑀏𑀯𑀁 𑀢𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀘 𑀧𑀻𑀞𑀲𑀧𑁆𑀧𑀺𑀲𑁆𑀲 𑀢𑁂𑀦 𑀓𑀫𑁆𑀫𑁂𑀦 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀘𑀼𑀤𑁆𑀤𑀲 𑀕𑀸𑀫𑁂 𑀅𑀤𑀸𑀲𑀺. 𑀲𑁄 𑀕𑀸𑀫𑁂 𑀮𑀪𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀦𑁆𑀢𑁄 𑀧𑀻𑀡𑁂𑀦𑁆𑀢𑁄 𑀧𑀭𑀺𑀚𑀦𑀫𑁆𑀧𑀺 𑀲𑀼𑀔𑁂𑀦𑁆𑀢𑁄 𑀧𑀻𑀡𑁂𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀓𑀺𑀜𑁆𑀘𑀺 𑀤𑁂𑀦𑁆𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀅𑀢𑁆𑀣𑀁 𑀅𑀳𑀸𑀧𑁂𑀦𑁆𑀢𑁄 𑀲𑀼𑀔𑁂𑀦𑁂𑀯 𑀚𑀻𑀯𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑀸𑀦𑀁 𑀪𑀢𑁆𑀢𑀯𑁂𑀢𑀦𑀁 𑀤𑁂𑀢𑀺.

𑀅𑀣𑁂𑀓𑁄 ¶ 𑀧𑀼𑀭𑀺𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀸𑀥𑀼, 𑀆𑀘𑀭𑀺𑀬, 𑀫𑀫𑁆𑀧𑀺 𑀏𑀢𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀳𑀺, 𑀫𑀬𑁆𑀳𑀁 𑀧𑀦 𑀅𑀮𑀁 𑀪𑀢𑁆𑀢𑀯𑁂𑀢𑀦𑁂𑀦𑀸’’𑀢𑀺. 𑀲𑁄 𑀢𑀁 𑀧𑀼𑀭𑀺𑀲𑀁 𑀢𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀲𑀺. 𑀲𑁄 𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑁄 𑀲𑀺𑀧𑁆𑀧𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀕𑀦𑁆𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀼𑀦𑁂𑀢𑁆𑀢𑀲𑁆𑀲 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀓𑁆𑀔𑀭𑀸𑀪𑀺𑀖𑀸𑀢𑁂𑀦 𑀲𑀻𑀲𑀁 𑀪𑀺𑀦𑁆𑀤𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣𑁂𑀯 𑀕𑀗𑁆𑀕𑀸𑀢𑀻𑀭𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀫𑀦𑀼𑀲𑁆𑀲𑀸 ¶ 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀢𑀢𑁆𑀣𑁂𑀯 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀲𑁄 𑀓𑀸𑀮𑀓𑀢𑁄 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀭𑀺𑀓𑁆𑀔𑀓𑁂𑀦 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑀫𑁆𑀫𑀯𑁂𑀕𑀼𑀓𑁆𑀔𑀺𑀢𑁆𑀢𑀸𑀦𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀲𑀸𑀬𑀦𑁆𑀳𑀲𑀫𑀬𑀜𑁆𑀘 𑀲𑀝𑁆𑀞𑀺 𑀅𑀬𑁄𑀓𑀽𑀝𑀲𑀳𑀲𑁆𑀲𑀸𑀦𑀺 𑀫𑀢𑁆𑀣𑀓𑁂 𑀦𑀺𑀧𑀢𑀦𑁆𑀢𑀺. 𑀲𑁄 𑀙𑀺𑀦𑁆𑀦𑀪𑀺𑀦𑁆𑀦𑀲𑀻𑀲𑁄 ¶ 𑀅𑀥𑀺𑀫𑀢𑁆𑀢𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀪𑀽𑀫𑀺𑀬𑀁 𑀦𑀺𑀧𑀢𑀢𑀺, 𑀅𑀬𑁄𑀓𑀽𑀝𑁂𑀲𑀼 𑀧𑀦 𑀅𑀧𑀕𑀢𑀫𑀢𑁆𑀢𑁂𑀲𑀼 𑀧𑀝𑀺𑀧𑀸𑀓𑀢𑀺𑀓𑀲𑀺𑀭𑁄 𑀢𑀺𑀝𑁆𑀞𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀸 𑀑𑀢𑀭𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑁋

‘‘𑀓𑀺𑀁 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀫𑀺𑀕𑁄 𑀪𑀦𑁆𑀢𑁄𑀯 𑀥𑀸𑀯𑀲𑀺;

𑀦𑀺𑀲𑁆𑀲𑀁𑀲𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑁄, 𑀓𑀺𑀁 𑀦𑀼 𑀲𑀤𑁆𑀤𑀸𑀬𑀲𑁂 𑀢𑀼𑀯’’𑀦𑁆𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀧𑀼𑀘𑁆𑀙𑀺. 𑀢𑀢𑁆𑀣 𑀉𑀫𑁆𑀫𑀢𑁆𑀢𑀭𑀽𑀧𑁄𑀯𑀸𑀢𑀺 𑀉𑀫𑁆𑀫𑀢𑁆𑀢𑀓𑀲𑀪𑀸𑀯𑁄 𑀯𑀺𑀬 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑁄 𑀯𑀺𑀬. 𑀫𑀺𑀕𑁄 𑀪𑀦𑁆𑀢𑁄𑀯 𑀥𑀸𑀯𑀲𑀻𑀢𑀺 𑀪𑀦𑁆𑀢𑀫𑀺𑀕𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀲𑀺. 𑀲𑁄 𑀳𑀺 𑀢𑁂𑀲𑀼 𑀅𑀬𑁄𑀓𑀽𑀝𑁂𑀲𑀼 𑀦𑀺𑀧𑀢𑀦𑁆𑀢𑁂𑀲𑀼 𑀧𑀭𑀺𑀢𑁆𑀢𑀸𑀡𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀦 𑀲𑀺𑀬𑀸 𑀦𑀼 𑀔𑁄 𑀏𑀯𑀁 𑀧𑀳𑀸𑀭𑁄’’𑀢𑀺 𑀇𑀢𑁄𑀧𑀺 𑀏𑀢𑁆𑀢𑁄𑀧𑀺 𑀧𑀮𑀸𑀬𑀢𑀺. 𑀢𑁂 𑀧𑀦 𑀓𑀫𑁆𑀫𑀯𑁂𑀕𑀼𑀓𑁆𑀔𑀺𑀢𑁆𑀢𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀲𑁆𑀲 𑀫𑀢𑁆𑀣𑀓𑁂𑀬𑁂𑀯 𑀦𑀺𑀧𑀢𑀦𑁆𑀢𑀺. 𑀓𑀺𑀁 𑀦𑀼 𑀲𑀤𑁆𑀤𑀸𑀬𑀲𑁂 𑀢𑀼𑀯𑀦𑁆𑀢𑀺 𑀓𑀺𑀁 𑀦𑀼 𑀔𑁄 𑀢𑀼𑀯𑀁 𑀲𑀤𑁆𑀤𑀁 𑀓𑀭𑁄𑀲𑀺, 𑀅𑀢𑀺𑀯𑀺𑀬 𑀯𑀺𑀲𑁆𑀲𑀭𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀺.

‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑁄𑀫𑁆𑀳𑀺, 𑀤𑀼𑀕𑁆𑀕𑀢𑁄 𑀬𑀫𑀮𑁄𑀓𑀺𑀓𑁄;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄.

‘‘𑀲𑀝𑁆𑀞𑀺 ¶ ¶ 𑀓𑀽𑀝𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀲𑀻𑀲𑁂 𑀫𑀬𑁆𑀳𑀁 𑀦𑀺𑀧𑀢𑀦𑁆𑀢𑀺, 𑀢𑁂 𑀪𑀺𑀦𑁆𑀤𑀦𑁆𑀢𑀺 𑀘 𑀫𑀢𑁆𑀣𑀓’’𑀦𑁆𑀢𑀺. 𑁋

𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀢𑀢𑁆𑀣 𑀲𑀝𑁆𑀞𑀺 𑀓𑀽𑀝𑀲𑀳𑀲𑁆𑀲𑀸𑀦𑀻𑀢𑀺 𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀅𑀬𑁄𑀓𑀽𑀝𑀲𑀳𑀲𑁆𑀲𑀸𑀦𑀺. 𑀧𑀭𑀺𑀧𑀼𑀡𑁆𑀡𑀸𑀦𑀻𑀢𑀺 𑀅𑀦𑀽𑀦𑀸𑀦𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀪𑀸𑀕𑀢𑁄. 𑀢𑀲𑁆𑀲 𑀓𑀺𑀭 𑀲𑀝𑁆𑀞𑀺𑀬𑀸 𑀅𑀬𑁄𑀓𑀽𑀝𑀲𑀳𑀲𑁆𑀲𑀸𑀦𑀁 𑀧𑀢𑀦𑀧𑁆𑀧𑀳𑁄𑀦𑀓𑀁 𑀫𑀳𑀦𑁆𑀢𑀁 𑀧𑀩𑁆𑀩𑀢𑀓𑀽𑀝𑀧𑁆𑀧𑀫𑀸𑀡𑀁 𑀲𑀻𑀲𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀢𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑀼𑀤𑀦𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀅𑀲𑁂𑀲𑁂𑀢𑁆𑀯𑀸 𑀢𑀸𑀦𑀺 𑀓𑀽𑀝𑀸𑀦𑀺 𑀧𑀢𑀦𑁆𑀢𑀸𑀦𑀺 𑀫𑀢𑁆𑀣𑀓𑀁 𑀪𑀺𑀦𑁆𑀤𑀦𑁆𑀢𑀺, 𑀢𑁂𑀦 𑀲𑁄 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑁄 𑀲𑀻𑀲𑁂 𑀫𑀬𑁆𑀳𑀁 𑀦𑀺𑀧𑀢𑀦𑁆𑀢𑀺, 𑀢𑁂 𑀪𑀺𑀦𑁆𑀤𑀦𑁆𑀢𑀺 𑀘 𑀫𑀢𑁆𑀣𑀓’’𑀦𑁆𑀢𑀺.

𑀅𑀣 ¶ 𑀦𑀁 𑀣𑁂𑀭𑁄 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

‘‘𑀲𑀝𑁆𑀞𑀺 𑀓𑀽𑀝𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀲𑀻𑀲𑁂 𑀢𑀼𑀬𑁆𑀳𑀁 𑀦𑀺𑀧𑀢𑀦𑁆𑀢𑀺, 𑀢𑁂 𑀪𑀺𑀦𑁆𑀤𑀦𑁆𑀢𑀺 𑀘 𑀫𑀢𑁆𑀣𑀓’’𑀦𑁆𑀢𑀺. 𑁋

𑀢𑀲𑁆𑀲 𑀧𑁂𑀢𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀼𑀦𑁂𑀢𑁆𑀢𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀦𑀺𑀲𑀺𑀦𑁆𑀦𑀁 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀛𑀸𑀬𑀦𑁆𑀢𑀁 𑀅𑀓𑀼𑀢𑁄𑀪𑀬𑀁.

‘‘𑀲𑀸𑀮𑀺𑀢𑁆𑀢𑀓𑀧𑁆𑀧𑀳𑀸𑀭𑁂𑀦, 𑀪𑀺𑀦𑁆𑀤𑀺𑀲𑁆𑀲𑀁 𑀢𑀲𑁆𑀲 𑀫𑀢𑁆𑀣𑀓𑀁;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀺𑀲𑀁.

‘‘𑀲𑀝𑁆𑀞𑀺 𑀓𑀽𑀝𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀲𑀻𑀲𑁂 𑀫𑀬𑁆𑀳𑀁 𑀦𑀺𑀧𑀢𑀦𑁆𑀢𑀺, 𑀢𑁂 𑀪𑀺𑀦𑁆𑀤𑀦𑁆𑀢𑀺 𑀘 𑀫𑀢𑁆𑀣𑀓’’𑀦𑁆𑀢𑀺. 𑁋

𑁮𑁧𑁧. 𑀢𑀢𑁆𑀣 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁. 𑀲𑀼𑀦𑁂𑀢𑁆𑀢𑀦𑁆𑀢𑀺 𑀏𑀯𑀁𑀦𑀸𑀫𑀓𑀁. 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑀺𑀢𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀁.

𑁮𑁧𑁨-𑁧𑁩. 𑀲𑀸𑀮𑀺𑀢𑁆𑀢𑀓𑀧𑁆𑀧𑀳𑀸𑀭𑁂𑀦𑀸𑀢𑀺 ¶ 𑀲𑀸𑀮𑀺𑀢𑁆𑀢𑀓𑀁 𑀯𑀼𑀘𑁆𑀘𑀢𑀺 𑀥𑀦𑀼𑀓𑁂𑀦, 𑀅𑀗𑁆𑀕𑀼𑀮𑀻𑀳𑀺 𑀏𑀯 𑀯𑀸 𑀲𑀓𑁆𑀔𑀭𑀔𑀺𑀧𑀦𑀧𑀬𑁄𑀕𑁄. 𑀢𑀣𑀸 𑀳𑀺 𑀲𑀓𑁆𑀔𑀭𑀸𑀬 𑀧𑀳𑀸𑀭𑁂𑀦𑀸𑀢𑀺 𑀯𑀸 𑀧𑀸𑀞𑁄. 𑀪𑀺𑀦𑁆𑀤𑀺𑀲𑁆𑀲𑀦𑁆𑀢𑀺 𑀪𑀺𑀦𑁆𑀤𑀺𑀁.

𑀢𑀁 ¶ ¶ 𑀲𑀼𑀢𑁆𑀯𑀸 𑀣𑁂𑀭𑁄 ‘‘𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀸𑀦𑀼𑀭𑀽𑀧𑀫𑁂𑀯 𑀇𑀤𑀸𑀦𑀺 𑀧𑀼𑀭𑀸𑀡𑀓𑀫𑁆𑀫𑀲𑁆𑀲 𑀇𑀤𑀁 𑀨𑀮𑀁 𑀧𑀝𑀺𑀮𑀪𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

𑀲𑀝𑁆𑀞𑀺 𑀓𑀽𑀝𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀲𑀻𑀲𑁂 𑀢𑀼𑀬𑁆𑀳𑀁 𑀦𑀺𑀧𑀢𑀦𑁆𑀢𑀺, 𑀢𑁂 𑀪𑀺𑀦𑁆𑀤𑀦𑁆𑀢𑀺 𑀘 𑀫𑀢𑁆𑀣𑀓’’𑀦𑁆𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀅𑀦𑀼𑀭𑀽𑀧𑀓𑀸𑀭𑀡𑁂𑀦. 𑀢𑁂𑀢𑀺 𑀢𑀯, 𑀢𑀲𑁆𑀫𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀧𑀭𑀚𑁆𑀛𑀦𑁆𑀢𑁂𑀦 𑀢𑀬𑀸 𑀓𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀫𑁂𑀯𑁂𑀢𑀁 𑀨𑀮𑀁 𑀢𑀼𑀬𑁆𑀳𑀁 𑀉𑀧𑀦𑀻𑀢𑀁. 𑀢𑀲𑁆𑀫𑀸 𑀓𑁂𑀦𑀘𑀺 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀅𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀧𑀺 𑀅𑀧𑁆𑀧𑀝𑀺𑀩𑀸𑀳𑀦𑀻𑀬𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀢𑁄 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀕𑀼𑀡𑀸𑀦𑀼𑀪𑀸𑀯𑀁 𑀓𑀫𑁆𑀫𑀸𑀦𑀜𑁆𑀘 𑀅𑀯𑀜𑁆𑀛𑀢𑀁 𑀧𑀓𑀸𑀲𑁂𑀲𑀺, 𑀫𑀳𑀸𑀚𑀦𑁄 𑀲𑀁𑀯𑁂𑀕𑀚𑀸𑀢𑁄 𑀳𑀼𑀢𑁆𑀯𑀸 𑀧𑀸𑀧𑀁 𑀧𑀳𑀸𑀬 𑀤𑀸𑀦𑀸𑀤𑀺𑀧𑀼𑀜𑁆𑀜𑀦𑀺𑀭𑀢𑁄 𑀅𑀳𑁄𑀲𑀻𑀢𑀺.

𑀲𑀝𑁆𑀞𑀺𑀓𑀽𑀝𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀁

𑀲𑁄𑀴𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲

𑀘𑀢𑀼𑀢𑁆𑀣𑀲𑁆𑀲 𑀫𑀳𑀸𑀯𑀕𑁆𑀕𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑁂 𑀢𑁂 𑀧𑁂𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀸, 𑀲𑀢𑁆𑀢𑀸 𑀤𑀼𑀓𑁆𑀓𑀝𑀓𑀸𑀭𑀺𑀦𑁄;

𑀬𑁂𑀳𑀺 𑀓𑀫𑁆𑀫𑁂𑀳𑀺 𑀢𑁂𑀲𑀁 𑀢𑀁, 𑀧𑀸𑀧𑀓𑀁 𑀓𑀝𑀼𑀓𑀧𑁆𑀨𑀮𑀁.

𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀸𑀯𑁂𑀦𑁆𑀢𑀻, 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀳𑀺 𑀘;

𑀬𑀸 ¶ 𑀤𑁂𑀲𑀦𑀸𑀦𑀺𑀬𑀸𑀫𑁂𑀦, 𑀲𑀢𑀁 𑀲𑀁𑀯𑁂𑀕𑀯𑀟𑁆𑀠𑀦𑀻.

𑀬𑀁 𑀓𑀣𑀸𑀯𑀢𑁆𑀣𑀼𑀓𑀼𑀲𑀮𑀸, 𑀲𑀼𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸;

𑀧𑁂𑀢𑀯𑀢𑁆𑀣𑀽𑀢𑀺 𑀦𑀸𑀫𑁂𑀦, 𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑁂𑀲𑀬𑁄.

𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁;

𑀦𑀺𑀲𑁆𑀲𑀸𑀬 𑀬𑀸 𑀲𑀫𑀸𑀭𑀤𑁆𑀥𑀸, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸.

𑀬𑀸 𑀢𑀢𑁆𑀣 𑀧𑀭𑀫𑀢𑁆𑀣𑀸𑀦𑀁, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀧𑀓𑀸𑀲𑀦𑀸 𑀧𑀭𑀫𑀢𑁆𑀣-𑀤𑀻𑀧𑀦𑀻 𑀦𑀸𑀫 𑀦𑀸𑀫𑀢𑁄.

𑀲𑀫𑁆𑀧𑀢𑁆𑀢𑀸 𑀧𑀭𑀺𑀦𑀺𑀝𑁆𑀞𑀸𑀦𑀁, 𑀅𑀦𑀸𑀓𑀼𑀮𑀯𑀺𑀦𑀺𑀘𑁆𑀙𑀬𑀸;

𑀲𑀸 𑀧𑀦𑁆𑀦𑀭𑀲𑀫𑀢𑁆𑀢𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄.

𑀇𑀢𑀺 𑀢𑀁 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀢𑀁 𑀅𑀥𑀺𑀕𑀢𑀁 𑀫𑀬𑀸;

𑀧𑀼𑀜𑁆𑀜𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑀑𑀕𑀸𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸;

𑀲𑀩𑁆𑀩𑁂𑀧𑀺 𑀤𑁂𑀳𑀺𑀦𑁄 𑀳𑁄𑀦𑁆𑀢𑀼, 𑀯𑀺𑀫𑀼𑀢𑁆𑀢𑀺𑀭𑀲𑀪𑀸𑀕𑀺𑀦𑁄.

𑀘𑀺𑀭𑀁 ¶ 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀦𑀺𑀘𑁆𑀘𑀁, 𑀳𑁄𑀦𑁆𑀢𑀼 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄.

𑀲𑀫𑁆𑀫𑀸 ¶ 𑀯𑀲𑁆𑀲𑀢𑀼 𑀓𑀸𑀮𑁂𑀦, 𑀤𑁂𑀯𑁄𑀧𑀺 𑀚𑀕𑀢𑀻𑀧𑀢𑀺;

𑀲𑀤𑁆𑀥𑀫𑁆𑀫𑀦𑀺𑀭𑀢𑁄 𑀮𑁄𑀓𑀁, 𑀥𑀫𑁆𑀫𑁂𑀦𑁂𑀯 𑀧𑀲𑀸𑀲𑀢𑀽𑀢𑀺.

𑀇𑀢𑀺 𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀺𑀦𑀸 𑀫𑀼𑀦𑀺𑀯𑀭𑀬𑀢𑀺𑀦𑀸

𑀪𑀤𑀦𑁆𑀢𑁂𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑁂𑀦 𑀓𑀢𑀸 𑀧𑁂𑀢𑀯𑀢𑁆𑀣𑀼𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑁂𑀢𑀯𑀢𑁆𑀣𑀼-𑀅𑀝𑁆𑀞𑀓𑀣𑀸 𑀲𑀫𑀢𑁆𑀢𑀸.