📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀣𑁂𑀭𑀕𑀸𑀣𑀸-𑀅𑀝𑁆𑀞𑀓𑀣𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑁪. 𑀘𑀢𑀼𑀓𑁆𑀓𑀦𑀺𑀧𑀸𑀢𑁄

𑁧. 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑀸𑀢𑀺𑀆𑀤𑀺𑀓𑀸 ¶ ¶ 𑀆𑀬𑀲𑁆𑀫𑀢𑁄 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀕𑀺𑀫𑁆𑀳𑀲𑀫𑀬𑁂 𑀲𑀽𑀭𑀺𑀬𑀸𑀢𑀧𑀲𑀦𑁆𑀢𑀢𑁆𑀢𑀸𑀬 ¶ 𑀪𑀽𑀫𑀺𑀬𑀸 𑀕𑀘𑁆𑀙𑀦𑁆𑀢𑀁 𑀲𑀢𑁆𑀣𑀸𑀭𑀁 ¶ 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀙𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀕𑀲𑀫𑀸𑀮𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀜𑀸𑀢𑀺𑀲𑀫𑀸𑀕𑀫𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀮𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀅𑀜𑁆𑀜𑀢𑀭𑀁 𑀦𑀘𑁆𑀘𑀓𑀺𑀁 𑀫𑀳𑀸𑀧𑀣𑁂 𑀢𑀽𑀭𑀺𑀬𑁂𑀲𑀼 𑀯𑀚𑁆𑀚𑀦𑁆𑀢𑁂𑀲𑀼 𑀦𑀘𑁆𑀘𑀦𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀓𑀭𑀚𑀓𑀸𑀬𑀲𑁆𑀲 𑀢𑀣𑀸 𑀢𑀣𑀸 𑀧𑀭𑀺𑀯𑀢𑁆𑀢𑀺, 𑀅𑀳𑁄 𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁬.𑁩𑁭-𑁪𑁮) 𑁋

‘‘𑀅𑀗𑁆𑀕𑀸𑀭𑀚𑀸𑀢𑀸 𑀧𑀣𑀯𑀻, 𑀓𑀼𑀓𑁆𑀓𑀼𑀴𑀸𑀦𑀼𑀕𑀢𑀸 𑀫𑀳𑀻;

𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸, 𑀅𑀩𑁆𑀪𑁄𑀓𑀸𑀲𑀫𑁆𑀳𑀺 𑀘𑀗𑁆𑀓𑀫𑀺.

‘‘𑀧𑀡𑁆𑀟𑀭𑀁 ¶ 𑀙𑀢𑁆𑀢𑀫𑀸𑀤𑀸𑀬, 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀳𑀁;

𑀢𑀢𑁆𑀣 𑀤𑀺𑀲𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀯𑀺𑀢𑁆𑀢𑀺 𑀫𑁂 𑀉𑀧𑀧𑀚𑁆𑀚𑀣.

‘‘𑀫𑀭𑀻𑀘𑀺𑀬𑁄𑀢𑁆𑀣𑀝𑀸 𑀪𑀽𑀫𑀺, 𑀅𑀗𑁆𑀕𑀸𑀭𑀸𑀯 𑀫𑀳𑀻 𑀅𑀬𑀁;

𑀉𑀧𑀳𑀦𑁆𑀢𑀺 𑀫𑀳𑀸𑀯𑀸𑀢𑀸, 𑀲𑀭𑀻𑀭𑀲𑁆𑀲𑀸𑀲𑀼𑀔𑁂𑀧𑀦𑀸.

‘‘𑀲𑀻𑀢𑀁 𑀉𑀡𑁆𑀳𑀁 𑀯𑀺𑀳𑀦𑀦𑁆𑀢𑀁, 𑀯𑀸𑀢𑀸𑀢𑀧𑀦𑀺𑀯𑀸𑀭𑀡𑀁;

𑀧𑀝𑀺𑀕𑁆𑀕𑀡𑁆𑀳 𑀇𑀫𑀁 𑀙𑀢𑁆𑀢𑀁, 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀬𑀲𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀝𑀺𑀕𑁆𑀕𑀡𑁆𑀳𑀺 𑀢𑀤𑀸 𑀚𑀺𑀦𑁄.

‘‘𑀢𑀺𑀁𑀲𑀓𑀧𑁆𑀧𑀸𑀦𑀺 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀲𑀼𑀓𑀢𑀫𑀢𑁆𑀢𑀦𑁄.

‘‘𑀅𑀬𑀁 𑀫𑁂 𑀧𑀘𑁆𑀙𑀺𑀫𑀸 𑀚𑀸𑀢𑀺, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀫𑁂, 𑀲𑀩𑁆𑀩𑀓𑀸𑀮𑀁 𑀥𑀭𑀻𑀬𑀢𑀺.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀙𑀢𑁆𑀢𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀙𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑁋

𑁨𑁬𑁭.

‘‘𑀅𑀮𑀗𑁆𑀓𑀢𑀸 ¶ 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀫𑀚𑁆𑀛𑁂 𑀫𑀳𑀸𑀧𑀣𑁂 𑀦𑀸𑀭𑀻, 𑀢𑀽𑀭𑀺𑀬𑁂 𑀦𑀘𑁆𑀘𑀢𑀺 𑀦𑀝𑁆𑀝𑀓𑀻.

𑁨𑁬𑁮.

‘‘𑀧𑀺𑀡𑁆𑀟𑀺𑀓𑀸𑀬 𑀧𑀯𑀺𑀝𑁆𑀞𑁄𑀳𑀁, 𑀕𑀘𑁆𑀙𑀦𑁆𑀢𑁄 𑀦𑀁 𑀉𑀤𑀺𑀓𑁆𑀔𑀺𑀲𑀁;

𑀅𑀮𑀗𑁆𑀓𑀢𑀁 𑀲𑀼𑀯𑀲𑀦𑀁, 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀁.

𑁨𑁬𑁯.

‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁨𑁭𑁦.

‘‘𑀢𑀢𑁄 ¶ 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀅𑀮𑀗𑁆𑀓𑀢𑀸𑀢𑀺 𑀳𑀢𑁆𑀣𑀽𑀧𑀕𑀸𑀤𑀺𑀆𑀪𑀭𑀡𑁂𑀳𑀺 𑀅𑀮𑀗𑁆𑀓𑀢𑀕𑀢𑁆𑀢𑀸. 𑀲𑀼𑀯𑀲𑀦𑀸𑀢𑀺 𑀲𑀼𑀦𑁆𑀤𑀭𑀯𑀲𑀦𑀸 𑀲𑁄𑀪𑀦𑀯𑀢𑁆𑀣𑀦𑀺𑀯𑀢𑁆𑀣𑀸. 𑀫𑀸𑀮𑀺𑀦𑀻𑀢𑀺 𑀫𑀸𑀮𑀸𑀥𑀸𑀭𑀺𑀦𑀻 𑀧𑀺𑀴𑀦𑁆𑀥𑀺𑀢𑀧𑀼𑀧𑁆𑀨𑀫𑀸𑀮𑀸. 𑀘𑀦𑁆𑀤𑀦𑀼𑀲𑁆𑀲𑀤𑀸𑀢𑀺 𑀘𑀦𑁆𑀤𑀦𑀸𑀦𑀼𑀮𑁂𑀧𑀮𑀺𑀢𑁆𑀢𑀲𑀭𑀻𑀭𑀸. 𑀫𑀚𑁆𑀛𑁂 𑀫𑀳𑀸𑀧𑀣𑁂 𑀦𑀸𑀭𑀻, 𑀢𑀽𑀭𑀺𑀬𑁂 𑀦𑀘𑁆𑀘𑀢𑀺 𑀦𑀝𑁆𑀝𑀓𑀻𑀢𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑁂 𑀏𑀓𑀸 𑀦𑀸𑀭𑀻 𑀦𑀝𑁆𑀝𑀓𑀻 𑀦𑀸𑀝𑀓𑀺𑀢𑁆𑀣𑀻 𑀦𑀕𑀭𑀯𑀻𑀣𑀺𑀬𑀸 𑀫𑀚𑁆𑀛𑁂 𑀧𑀜𑁆𑀘𑀗𑁆𑀕𑀺𑀓𑁂 𑀢𑀽𑀭𑀺𑀬𑁂 𑀯𑀚𑁆𑀚𑀦𑁆𑀢𑁂 𑀦𑀘𑁆𑀘𑀢𑀺, 𑀬𑀣𑀸𑀧𑀝𑁆𑀞𑀧𑀺𑀢𑀁 𑀦𑀘𑁆𑀘𑀁 𑀓𑀭𑁄𑀢𑀺.

𑀧𑀺𑀡𑁆𑀟𑀺𑀓𑀸𑀬𑀸𑀢𑀺 𑀪𑀺𑀓𑁆𑀔𑀸𑀬. 𑀧𑀯𑀺𑀝𑁆𑀞𑁄𑀳𑀦𑁆𑀢𑀺 𑀦𑀕𑀭𑀁 𑀧𑀯𑀺𑀝𑁆𑀞𑁄 𑀅𑀳𑀁. 𑀕𑀘𑁆𑀙𑀦𑁆𑀢𑁄 𑀦𑀁 𑀉𑀤𑀺𑀓𑁆𑀔𑀺𑀲𑀦𑁆𑀢𑀺 𑀦𑀕𑀭𑀯𑀻𑀣𑀺𑀬𑀁 𑀕𑀘𑁆𑀙𑀦𑁆𑀢𑁄 𑀧𑀭𑀺𑀲𑁆𑀲𑀬𑀧𑀭𑀺𑀳𑀭𑀡𑀢𑁆𑀣𑀁 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀦𑀝𑁆𑀝𑀓𑀺𑀁 𑀑𑀮𑁄𑀓𑁂𑀲𑀺𑀁. 𑀓𑀺𑀁 𑀯𑀺𑀬? 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀦𑁆𑀢𑀺 𑀬𑀣𑀸 𑀫𑀘𑁆𑀘𑀼𑀲𑁆𑀲 𑀫𑀘𑁆𑀘𑀼𑀭𑀸𑀚𑀲𑁆𑀲 𑀧𑀸𑀲𑀪𑀽𑀢𑁄 𑀭𑀽𑀧𑀸𑀤𑀺𑀓𑁄 𑀑𑀟𑁆𑀟𑀺𑀢𑁄 𑀮𑁄𑀓𑁂 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀞𑀺𑀢𑁄 𑀏𑀓𑀁𑀲𑁂𑀦 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑁄, 𑀏𑀯𑀁 ¶ 𑀲𑀸𑀧𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀸𑀦𑀁 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸𑀦𑀁 𑀏𑀓𑀁𑀲𑀢𑁄 𑀅𑀦𑀢𑁆𑀣𑀸𑀯𑀳𑀸𑀢𑀺 𑀫𑀘𑁆𑀘𑀼𑀧𑀸𑀲𑀲𑀤𑀺𑀲𑀻 𑀯𑀼𑀢𑁆𑀢𑀸.

𑀢𑀢𑁄𑀢𑀺 𑀢𑀲𑁆𑀫𑀸 𑀫𑀘𑁆𑀘𑀼𑀧𑀸𑀲𑀲𑀤𑀺𑀲𑀢𑁆𑀢𑀸. 𑀫𑁂𑀢𑀺 𑀫𑀬𑁆𑀳𑀁. 𑀫𑀦𑀲𑀻𑀓𑀸𑀭𑁄 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣𑀸𑀢𑀺 ‘‘𑀅𑀬𑀁 𑀅𑀝𑁆𑀞𑀺𑀲𑀗𑁆𑀖𑀸𑀢𑁄 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑁄 𑀫𑀁𑀲𑁂𑀦 𑀅𑀦𑀼𑀧𑀮𑀺𑀢𑁆𑀢𑁄 𑀙𑀯𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑁄 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄 𑀈𑀤𑀺𑀲𑁂 𑀯𑀺𑀓𑀸𑀭𑁂 𑀤𑀲𑁆𑀲𑁂𑀢𑀻’’𑀢𑀺 𑀏𑀯𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀽𑀢𑀺 𑀏𑀯𑀁 𑀓𑀸𑀬𑀲𑁆𑀲 𑀲𑀪𑀸𑀯𑀽𑀧𑀥𑀸𑀭𑀡𑀫𑀼𑀔𑁂𑀦 𑀢𑀲𑁆𑀲 𑀘 𑀢𑀁𑀦𑀺𑀲𑁆𑀲𑀺𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀉𑀤𑀬𑀩𑁆𑀩𑀬𑀁 𑀲𑀭𑀲𑀧𑀪𑀗𑁆𑀕𑀼𑀢𑀜𑁆𑀘 𑀫𑀦𑀲𑀺 𑀓𑀭𑁄𑀢𑁄 𑀢𑁂𑀲𑀼 𑀘 𑀬𑀓𑁆𑀔𑀭𑀓𑁆𑀔𑀲𑀸𑀤𑀻𑀲𑀼 𑀯𑀺𑀬 𑀪𑀬𑀢𑁄 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀢𑀢𑁆𑀣 𑀫𑁂 𑀅𑀦𑁂𑀓𑀸𑀓𑀸𑀭𑀆𑀤𑀻𑀦𑀯𑁄 𑀤𑁄𑀲𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀘 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑁄. 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀦𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀦𑀼𑀪𑀸𑀯𑀲𑀺𑀤𑁆𑀥𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀫𑀫 𑀳𑀤𑀬𑁂 𑀲𑀡𑁆𑀞𑀸𑀲𑀺, 𑀫𑀼𑀳𑀼𑀢𑁆𑀢𑀫𑁆𑀧𑀺 ¶ 𑀢𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀕𑀳𑀡𑁂 𑀘𑀺𑀢𑁆𑀢𑀁 𑀦𑀸𑀳𑁄𑀲𑀺, 𑀅𑀜𑁆𑀜𑀤𑀢𑁆𑀣𑀼 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸𑀤𑀺𑀯𑀲𑁂𑀦 𑀢𑀢𑁆𑀣 𑀉𑀤𑀸𑀲𑀻𑀦𑀫𑁂𑀯 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁄𑀢𑀺 ¶ 𑀯𑀺𑀧𑀲𑁆𑀲𑀦𑀸𑀜𑀸𑀡𑀢𑁄 𑀧𑀭𑀁. 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂𑀢𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀬 𑀯𑀢𑁆𑀢𑀫𑀸𑀦𑀸𑀬 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀫𑀫 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀅𑀳𑁄𑀲𑀺. 𑀏𑀢𑁂𑀦 𑀨𑀮𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀓𑀺𑀮𑁂𑀲𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀪𑀕𑀼𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀳𑀁 𑀫𑀺𑀤𑁆𑀥𑁂𑀦𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀪𑀕𑀼𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀥𑀸𑀢𑀼𑀬𑁄 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀫𑁆𑀫𑀸𑀦𑀭𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀪𑀕𑀽𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀅𑀦𑀼𑀭𑀼𑀤𑁆𑀥𑀓𑀺𑀫𑀺𑀮𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀩𑀸𑀮𑀓𑀮𑁄𑀡𑀓𑀕𑀸𑀫𑁂 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀁 𑀯𑀺𑀦𑁄𑀤𑁂𑀢𑀼𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑁆𑀫 𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀦𑁆𑀢𑁄 𑀧𑀧𑀢𑀺𑀢𑁆𑀯𑀸 ¶ 𑀢𑀤𑁂𑀯 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁬.𑁪𑁯-𑁫𑁭) 𑁋

‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀧𑀤𑀼𑀫𑀼𑀢𑁆𑀢𑀭𑁂 𑀫𑀳𑀸𑀬𑀲𑁂;

𑀧𑀼𑀧𑁆𑀨𑀯𑀝𑀁𑀲𑀓𑁂 𑀓𑀢𑁆𑀯𑀸, 𑀲𑀭𑀻𑀭𑀫𑀪𑀺𑀭𑁄𑀧𑀬𑀺𑀁.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀺𑀫𑁆𑀫𑀸𑀦𑀁 𑀅𑀕𑀫𑀸𑀲𑀳𑀁;

𑀤𑁂𑀯𑀮𑁄𑀓𑀕𑀢𑁄 𑀲𑀦𑁆𑀢𑁄, 𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀸𑀫𑀳𑀁.

‘‘𑀅𑀫𑁆𑀩𑀭𑀸 𑀧𑀼𑀧𑁆𑀨𑀯𑀲𑁆𑀲𑁄 𑀫𑁂, 𑀲𑀩𑁆𑀩𑀓𑀸𑀮𑀁 𑀧𑀯𑀲𑁆𑀲𑀢𑀺;

𑀲𑀁𑀲𑀭𑀸𑀫𑀺 𑀫𑀦𑀼𑀲𑁆𑀲𑁂 𑀘𑁂, 𑀭𑀸𑀚𑀸 𑀳𑁄𑀫𑀺 𑀫𑀳𑀸𑀬𑀲𑁄.

‘‘𑀢𑀳𑀺𑀁 𑀓𑀼𑀲𑀼𑀫𑀯𑀲𑁆𑀲𑁄 𑀫𑁂, 𑀅𑀪𑀺𑀯𑀲𑁆𑀲𑀢𑀺 𑀲𑀩𑁆𑀩𑀤𑀸;

𑀢𑀲𑁆𑀲𑁂𑀯 𑀧𑀼𑀧𑁆𑀨𑀧𑀽𑀚𑀸𑀬, 𑀯𑀸𑀳𑀲𑀸 𑀲𑀩𑁆𑀩𑀤𑀲𑁆𑀲𑀺𑀦𑁄.

‘‘𑀅𑀬𑀁 ¶ 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀧𑀼𑀧𑁆𑀨𑀯𑀲𑁆𑀲𑁄 𑀫𑁂, 𑀅𑀪𑀺𑀯𑀲𑁆𑀲𑀢𑀺 𑀲𑀩𑁆𑀩𑀤𑀸.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑁂𑀳𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀲𑀢𑁆𑀣𑀸𑀭𑀸 𑀏𑀓𑀯𑀺𑀳𑀸𑀭𑀁 𑀅𑀦𑀼𑀫𑁄𑀤𑀺𑀢𑀼𑀁 𑀉𑀧𑀕𑀢𑁂𑀦 𑁋 ‘‘𑀓𑀘𑁆𑀘𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀲𑀻’’𑀢𑀺 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀁 𑀦𑀺𑀯𑁂𑀤𑁂𑀦𑁆𑀢𑁄 𑁋

𑁨𑁭𑁧.

‘‘𑀅𑀳𑀁 𑀫𑀺𑀤𑁆𑀥𑁂𑀦 𑀧𑀓𑀢𑁄, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀦𑁆𑀢𑁄, 𑀢𑀢𑁆𑀣𑁂𑀯 𑀧𑀧𑀢𑀺𑀁 𑀙𑀫𑀸.

𑁨𑁭𑁨.

‘‘𑀕𑀢𑁆𑀢𑀸𑀦𑀺 𑀧𑀭𑀺𑀫𑀚𑁆𑀚𑀺𑀢𑁆𑀯𑀸, 𑀧𑀼𑀦𑀧𑀸𑀭𑀼𑀬𑁆𑀳 𑀘𑀗𑁆𑀓𑀫𑀁;

𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀁 𑀲𑁄𑀳𑀁, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄.

𑁨𑁭𑁩.

‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁨𑁭𑁪.

‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀫𑀺𑀤𑁆𑀥𑁂𑀦 𑀧𑀓𑀢𑁄𑀢𑀺 𑀓𑀸𑀬𑀸𑀮𑀲𑀺𑀬𑀲𑀗𑁆𑀔𑀸𑀢𑁂𑀦 𑀅𑀲𑀢𑁆𑀢𑀺𑀯𑀺𑀖𑀸𑀢𑀲𑀪𑀸𑀯𑁂𑀦 𑀫𑀺𑀤𑁆𑀥𑁂𑀦 𑀅𑀪𑀺𑀪𑀽𑀢𑁄. 𑀯𑀺𑀳𑀸𑀭𑀸𑀢𑀺 𑀲𑁂𑀦𑀸𑀲𑀦𑀢𑁄. 𑀉𑀧𑀦𑀺𑀓𑁆𑀔𑀫𑀺𑀦𑁆𑀢𑀺 𑀘𑀗𑁆𑀓𑀫𑀺𑀢𑀼𑀁 𑀦𑀺𑀓𑁆𑀔𑀫𑀺𑀁. 𑀢𑀢𑁆𑀣𑁂𑀯 𑀧𑀧𑀢𑀺𑀁 𑀙𑀫𑀸𑀢𑀺 𑀢𑀢𑁆𑀣𑁂𑀯 𑀘𑀗𑁆𑀓𑀫𑀲𑁄𑀧𑀸𑀦𑁂 𑀦𑀺𑀤𑁆𑀤𑀸𑀪𑀺𑀪𑀽𑀢𑀢𑀸𑀬 𑀪𑀽𑀫𑀺𑀬𑀁 𑀦𑀺𑀧𑀢𑀺𑀁. 𑀕𑀢𑁆𑀢𑀸𑀦𑀺 𑀧𑀭𑀺𑀫𑀚𑁆𑀚𑀺𑀢𑁆𑀯𑀸𑀢𑀺 𑀪𑀽𑀫𑀺𑀬𑀁 𑀧𑀢𑀦𑁂𑀦 𑀧𑀁𑀲𑀼𑀓𑀺𑀢𑀸𑀦𑀺 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑀸𑀦𑀺 𑀅𑀦𑀼𑀫𑀚𑁆𑀚𑀺𑀢𑁆𑀯𑀸. 𑀧𑀼𑀦𑀧𑀸𑀭𑀼𑀬𑁆𑀳 𑀘𑀗𑁆𑀓𑀫𑀦𑁆𑀢𑀺 ‘‘𑀧𑀢𑀺𑀢𑁄 𑀤𑀸𑀦𑀸𑀳’’𑀦𑁆𑀢𑀺 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦𑀧𑀺 𑀘𑀗𑁆𑀓𑀫𑀝𑁆𑀞𑀸𑀦𑀁 𑀆𑀭𑀼𑀳𑀺𑀢𑁆𑀯𑀸. 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑁂 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑁂𑀦 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀘𑀗𑁆𑀓𑀫𑀺𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀤𑀫𑁂𑀯 𑀘 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀺.

𑀪𑀕𑀼𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀪𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀭𑁂 ¶ ¶ 𑀘𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀪𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀯𑀸𑀯𑀺𑀳𑀸𑀭𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀉𑀧𑀸𑀳𑀦𑀁 ¶ 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀢𑀺𑀝𑁆𑀞𑀺𑀢𑁂 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀙𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀲𑀢𑁆𑀢𑀫𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀢𑀭𑁂 𑀆𑀳 𑁋 ‘‘𑀫𑀬𑀁 𑀧𑀺𑀡𑁆𑀟𑀧𑀸𑀢𑀸𑀬 𑀕𑀘𑁆𑀙𑀦𑁆𑀢𑁄 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑀸 𑀳𑁄𑀫, 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑁂𑀦 𑀘 𑀦 𑀲𑀓𑁆𑀓𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑀼𑀁, 𑀧𑀼𑀣𑀼𑀚𑁆𑀚𑀦𑀓𑀸𑀮𑀗𑁆𑀓𑀺𑀭𑀺𑀬𑀸 𑀘 𑀤𑀼𑀓𑁆𑀔𑀸. 𑀳𑀦𑁆𑀤, 𑀫𑀬𑀁 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼.

𑀅𑀣 𑀦𑁂𑀲𑀁 𑀫𑀳𑀸𑀣𑁂𑀭𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀤𑀳𑁂𑀯 𑀙𑀴𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀉𑀧𑀦𑁂𑀲𑀺. 𑀇𑀢𑀭𑁂 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀓𑀢𑀓𑀺𑀘𑁆𑀘𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀧𑀧𑀜𑁆𑀘𑁄, 𑀲𑀫𑀡𑀥𑀫𑁆𑀫𑀫𑁂𑀯 𑀫𑀬𑀁 𑀓𑀭𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺𑀁𑀲𑀼. 𑀣𑁂𑀭𑁄 𑀦𑁂 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀕𑀫𑀸𑀲𑀺.

𑀢𑀢𑁄 𑀦𑁂𑀲𑀁 𑀏𑀓𑁄 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀅𑀪𑀺𑀜𑁆𑀜𑀸𑀧𑀭𑀺𑀯𑀸𑀭𑀁 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀢𑀣𑁂𑀯 𑀯𑀢𑁆𑀯𑀸 𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀅𑀕𑀫𑀸𑀲𑀺. 𑀢𑁂𑀲𑀼 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀦𑀸𑀕𑀸𑀫𑀻 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀇𑀢𑀭𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑀗𑁆𑀓𑀺𑀭𑀺𑀬𑀫𑁂𑀯 𑀓𑀢𑁆𑀯𑀸 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀏𑀓𑁄 𑀫𑀮𑁆𑀮𑀭𑀸𑀚𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀏𑀓𑁄 𑀕𑀦𑁆𑀥𑀸𑀭𑀭𑀸𑀚𑀓𑀼𑀮𑁂, 𑀏𑀓𑁄 𑀩𑀸𑀳𑀺𑀭𑀭𑀝𑁆𑀞𑁂, 𑀏𑀓𑁄 𑀭𑀸𑀚𑀕𑀳𑁂 𑀏𑀓𑀺𑀲𑁆𑀲𑀸 𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀇𑀢𑀭𑁄 𑀅𑀜𑁆𑀜𑀢𑀭𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑀸 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀥𑀻𑀢𑀸, 𑀦𑀁 𑀫𑀸𑀢𑀸𑀧𑀺𑀢𑀭𑁄 𑁋 ‘‘𑀅𑀫𑁆𑀳𑀸𑀓𑀁 𑀥𑀻𑀢𑀸 𑀲𑀫𑀬𑀦𑁆𑀢𑀭𑀁 𑀚𑀸𑀦𑀸𑀢𑀽’’𑀢𑀺 𑀏𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀺𑀬𑁆𑀬𑀸𑀤𑀬𑀺𑀁𑀲𑀼. 𑀅𑀣𑁂𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀸𑀬 𑀲𑀤𑁆𑀥𑀺𑀁 𑀯𑀺𑀧𑁆𑀧𑀝𑀺𑀧𑀚𑁆𑀚𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀢𑀁 𑀕𑀩𑁆𑀪𑀺𑀦𑀺𑀁 𑀤𑀺𑀲𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦𑀺𑀓𑁆𑀓𑀟𑁆𑀠𑀺𑀁𑀲𑀼. 𑀲𑀸 𑀅𑀜𑁆𑀜𑀢𑁆𑀣 ¶ 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀪𑀸𑀬𑀁 𑀯𑀺𑀚𑀸𑀬𑀺. 𑀢𑁂𑀦𑀲𑁆𑀲 𑀲𑀪𑀺𑀬𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀦𑀸𑀲𑀢𑁆𑀣𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 ¶ 𑀫𑀳𑀸𑀯𑀸𑀤𑀻 𑀳𑀼𑀢𑁆𑀯𑀸 𑀯𑀸𑀤𑀧𑁆𑀧𑀲𑀼𑀢𑁄 𑀯𑀺𑀘𑀭𑀦𑁆𑀢𑁄 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀫𑀸𑀢𑀼𑀬𑀸 𑀇𑀢𑁆𑀣𑀺𑀪𑀸𑀯𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀸𑀬 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀤𑀺𑀦𑁆𑀦𑁂 𑀯𑀻𑀲𑀢𑀺𑀧𑀜𑁆𑀳𑁂 𑀕𑀳𑁂𑀢𑁆𑀯𑀸 𑀢𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺. 𑀢𑁂 𑀘𑀲𑁆𑀲 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑀁 𑀩𑁆𑀬𑀸𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀼. 𑀦𑀺. 𑀅𑀝𑁆𑀞. 𑁨. 𑀲𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸) 𑀧𑀦 ¶ ‘‘𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸 𑀢𑁂 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀤𑀸𑀲𑀻’’𑀢𑀺 𑀆𑀕𑀢𑀁.

𑀬𑀤𑀸 𑀧𑀦 𑀪𑀕𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀆𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀸𑀲𑀺, 𑀢𑀤𑀸 𑀲𑀪𑀺𑀬𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀢𑀲𑁆𑀲 𑀢𑁂 𑀧𑀜𑁆𑀳𑁂 𑀩𑁆𑀬𑀸𑀓𑀸𑀲𑀻𑀢𑀺 𑀲𑀩𑁆𑀩𑀁 𑀲𑀪𑀺𑀬𑀲𑀼𑀢𑁆𑀢𑁂 (𑀲𑀼. 𑀦𑀺. 𑀲𑀪𑀺𑀬𑀲𑀼𑀢𑁆𑀢𑀁) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀲𑀪𑀺𑀬𑁄 𑀧𑀦 𑀪𑀕𑀯𑀢𑀸 𑀢𑁂𑀲𑀼 𑀧𑀜𑁆𑀳𑁂𑀲𑀼 𑀩𑁆𑀬𑀸𑀓𑀢𑁂𑀲𑀼 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁬.𑁨𑁭-𑁩𑁧) 𑁋

‘‘𑀓𑀓𑀼𑀲𑀦𑁆𑀥𑀲𑁆𑀲 𑀫𑀼𑀦𑀺𑀦𑁄, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄;

𑀤𑀺𑀯𑀸𑀯𑀺𑀳𑀸𑀭𑀁 𑀯𑀚𑀢𑁄, 𑀅𑀓𑁆𑀓𑀫𑀦𑀫𑀤𑀸𑀲𑀳𑀁.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀓𑁆𑀓𑀫𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀤𑁂𑀯𑀤𑀢𑁆𑀢𑁂 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑁂 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

𑁨𑁭𑁫.

‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁨𑁭𑁬.

‘‘𑀬𑀤𑀸 𑀘 𑀅𑀯𑀺𑀚𑀸𑀦𑀦𑁆𑀢𑀸, 𑀇𑀭𑀺𑀬𑀦𑁆𑀢𑁆𑀬𑀫𑀭𑀸 𑀯𑀺𑀬;

𑀯𑀺𑀚𑀸𑀦𑀦𑁆𑀢𑀺 𑀘 𑀬𑁂 𑀥𑀫𑁆𑀫𑀁, 𑀆𑀢𑀼𑀭𑁂𑀲𑀼 𑀅𑀦𑀸𑀢𑀼𑀭𑀸.

𑁨𑁭𑁭.

‘‘𑀬𑀁 ¶ 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀯𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦 𑀢𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁨𑁭𑁮.

‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀦𑀽𑀧𑀮𑀩𑁆𑀪𑀢𑀺;

𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸, 𑀦𑀪𑀁 𑀧𑀼𑀣𑀯𑀺𑀬𑀸 𑀬𑀣𑀸’’𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀢𑁆𑀣 ¶ 𑀧𑀭𑁂𑀢𑀺 𑀧𑀡𑁆𑀟𑀺𑀢𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂 𑁋 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 ‘‘𑀥𑀫𑁆𑀫𑀁 𑀅𑀥𑀫𑁆𑀫𑁄’’𑀢𑀺𑀆𑀤𑀺𑀪𑁂𑀤𑀓𑀭𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀯𑀺𑀯𑀸𑀤𑀧𑁆𑀧𑀲𑀼𑀢𑀸 𑀧𑀭𑁂 𑀦𑀸𑀫. 𑀢𑁂 𑀢𑀢𑁆𑀣 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀸 ‘‘𑀫𑀬𑀁 𑀬𑀫𑀸𑀫𑀲𑁂 𑀉𑀧𑀭𑀫𑀸𑀫 𑀦𑀲𑁆𑀲𑀸𑀫 𑀲𑀢𑀢𑀁 𑀲𑀫𑀺𑀢𑀁 𑀫𑀘𑁆𑀘𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀦 𑀚𑀸𑀦𑀦𑁆𑀢𑀺. 𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀻𑀢𑀺 𑀬𑁂 𑀢𑀢𑁆𑀣 𑀧𑀡𑁆𑀟𑀺𑀢𑀸 𑁋 ‘‘𑀫𑀬𑀁 𑀫𑀘𑁆𑀘𑀼𑀲𑀫𑀻𑀧𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀺𑀚𑀸𑀦𑀦𑁆𑀢𑀺. 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸𑀢𑀺 𑀏𑀯𑀜𑁆𑀳𑀺 𑀢𑁂 𑀚𑀸𑀦𑀦𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑁂𑀥𑀕𑀸𑀦𑀁 𑀓𑀮𑀳𑀸𑀦𑀁 𑀯𑀽𑀧𑀲𑀫𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀅𑀣 𑀦𑁂𑀲𑀁 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂 𑀫𑁂𑀥𑀕𑀸 𑀲𑀫𑁆𑀫𑀦𑁆𑀢𑀺. 𑀅𑀣 𑀯𑀸 𑀧𑀭𑁂 𑀘𑀸𑀢𑀺 𑀬𑁂 𑀲𑀢𑁆𑀣𑀼 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀸 𑀅𑀕𑁆𑀕𑀳𑀡𑁂𑀦 𑀲𑀸𑀲𑀦𑀢𑁄 𑀩𑀸𑀳𑀺𑀭𑀢𑀸𑀬 𑀧𑀭𑁂, 𑀢𑁂 𑀬𑀸𑀯 ‘‘𑀫𑀬𑀁 𑀫𑀺𑀘𑁆𑀙𑀸𑀕𑀸𑀳𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣 𑀇𑀥 𑀮𑁄𑀓𑁂 ¶ 𑀲𑀸𑀲𑀦𑀲𑁆𑀲 𑀧𑀝𑀺𑀦𑀺𑀕𑁆𑀕𑀸𑀳𑁂𑀦 𑀬𑀫𑀸𑀫𑀲𑁂 𑀯𑀸𑀬𑀫𑀸𑀫𑀸’’𑀢𑀺 𑀦 𑀯𑀺𑀚𑀸𑀦𑀦𑁆𑀢𑀺, 𑀢𑀸𑀯 𑀯𑀺𑀯𑀸𑀤𑀸 𑀦 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀬𑀤𑀸 𑀧𑀦 𑀢𑀲𑁆𑀲 𑀕𑀸𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀬𑁂 𑀘 𑀢𑀢𑁆𑀣 𑀢𑁂𑀲𑀼 𑀯𑀺𑀯𑀸𑀤𑀧𑁆𑀧𑀲𑀼𑀢𑁂𑀲𑀼 𑀅𑀥𑀫𑁆𑀫𑀥𑀫𑁆𑀫𑀸𑀤𑀺𑀓𑁂 𑀅𑀥𑀫𑁆𑀫𑀥𑀫𑁆𑀫𑀸𑀤𑀺𑀢𑁄 𑀬𑀣𑀸𑀪𑀽𑀢𑀁 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀢𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑁂 𑀦𑀺𑀲𑁆𑀲𑀸𑀬 𑀯𑀺𑀯𑀸𑀤𑀲𑀗𑁆𑀔𑀸𑀢𑀸 𑀫𑁂𑀥𑀕𑀸 𑀲𑀫𑁆𑀫𑀦𑁆𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀅𑀯𑀺𑀚𑀸𑀦𑀦𑁆𑀢𑀸𑀢𑀺 𑀯𑀺𑀯𑀸𑀤𑀲𑁆𑀲 𑀯𑀽𑀧𑀲𑀫𑀽𑀧𑀸𑀬𑀁, 𑀥𑀫𑁆𑀫𑀸𑀥𑀫𑁆𑀫𑁂 𑀯𑀸 𑀬𑀸𑀣𑀸𑀯𑀢𑁄 𑀅𑀚𑀸𑀦𑀦𑁆𑀢𑀸. 𑀇𑀭𑀺𑀬𑀦𑁆𑀢𑁆𑀬𑀫𑀭𑀸 𑀯𑀺𑀬𑀸𑀢𑀺 𑀅𑀫𑀭𑀸 𑀯𑀺𑀬 𑀚𑀭𑀸𑀫𑀭𑀡𑀁 𑀅𑀢𑀺𑀓𑁆𑀓𑀦𑁆𑀢𑀸 𑀯𑀺𑀬 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀘𑀸 𑀳𑀼𑀢𑁆𑀯𑀸 𑀯𑀢𑁆𑀢𑀦𑁆𑀢𑀺 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀢𑀤𑀸 𑀯𑀺𑀯𑀸𑀤𑁄 𑀦 𑀯𑀽𑀧𑀲𑀫𑁆𑀫𑀢𑁂𑀯. 𑀯𑀺𑀚𑀸𑀦𑀦𑁆𑀢𑀺 𑀘 𑀬𑁂 𑀥𑀫𑁆𑀫𑀁, 𑀆𑀢𑀼𑀭𑁂𑀲𑀼 𑀅𑀦𑀸𑀢𑀼𑀭𑀸𑀢𑀺 𑀬𑁂 𑀧𑀦 𑀲𑀢𑁆𑀣𑀼 𑀲𑀸𑀲𑀦𑀥𑀫𑁆𑀫𑀁 𑀬𑀣𑀸𑀪𑀽𑀢𑀁 𑀚𑀸𑀦𑀦𑁆𑀢𑀺, 𑀢𑁂 𑀓𑀺𑀮𑁂𑀲𑀭𑁄𑀕𑁂𑀦 𑀆𑀢𑀼𑀭𑁂𑀲𑀼 𑀲𑀢𑁆𑀢𑁂𑀲𑀼 𑀅𑀦𑀸𑀢𑀼𑀭𑀸 𑀦𑀺𑀓𑁆𑀓𑀺𑀮𑁂𑀲𑀸 𑀅𑀦𑀻𑀖𑀸 𑀯𑀺𑀳𑀭𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀯𑀺𑀯𑀸𑀤𑁄 𑀅𑀘𑁆𑀘𑀦𑁆𑀢𑀫𑁂𑀯 𑀯𑀽𑀧𑀲𑀫𑁆𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀁 ¶ 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀦𑁆𑀢𑀺 𑀑𑀮𑀺𑀬𑀺𑀢𑁆𑀯𑀸 𑀓𑀭𑀡𑁂𑀦 𑀲𑀺𑀣𑀺𑀮𑀕𑀸𑀳𑀁 𑀓𑀢𑁆𑀯𑀸 𑀲𑀸𑀣𑀮𑀺𑀪𑀸𑀯𑁂𑀦 𑀓𑀢𑀁 𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀓𑀫𑁆𑀫𑀁. 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀯𑁂𑀲𑀻𑀆𑀤𑀺𑀓𑁂 𑀅𑀕𑁄𑀘𑀭𑁂 𑀘𑀭𑀡𑁂𑀦, 𑀓𑀼𑀳𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑁂𑀦 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀯𑀢𑀲𑀫𑀸𑀤𑀸𑀦𑀁. 𑀲𑀗𑁆𑀓𑀲𑁆𑀲𑀭𑀦𑁆𑀢𑀺 𑀲𑀗𑁆𑀓𑀸𑀳𑀺 𑀲𑀭𑀺𑀢𑀩𑁆𑀩𑀁, 𑀯𑀺𑀳𑀸𑀭𑁂 𑀓𑀺𑀜𑁆𑀘𑀺 𑀅𑀲𑀸𑀭𑀼𑀧𑁆𑀧𑀁 𑀲𑀼𑀢𑁆𑀯𑀸 𑁋 ‘‘𑀦𑀽𑀦 𑀅𑀲𑀼𑀓𑁂𑀦 𑀓𑀢’’𑀦𑁆𑀢𑀺 𑀧𑀭𑁂𑀳𑀺 𑀅𑀲𑀗𑁆𑀓𑀺𑀢𑀩𑁆𑀩𑀁, 𑀉𑀧𑁄𑀲𑀣𑀓𑀺𑀘𑁆𑀘𑀸𑀤𑀻𑀲𑀼 𑀅𑀜𑁆𑀜𑀢𑀭𑀓𑀺𑀘𑁆𑀘𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀫𑁆𑀧𑀺 𑀲𑀗𑁆𑀖𑀁 𑀤𑀺𑀲𑁆𑀯𑀸, ‘‘𑀅𑀤𑁆𑀥𑀸 𑀇𑀫𑁂 𑀫𑀫 𑀘𑀭𑀺𑀬𑀁 𑀜𑀢𑁆𑀯𑀸 𑀫𑀁 𑀉𑀓𑁆𑀔𑀺𑀧𑀺𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀢𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀸 𑀆𑀲𑀗𑁆𑀓𑀸𑀳𑀺 𑀲𑀭𑀺𑀢𑀁 𑀉𑀲𑀗𑁆𑀓𑀺𑀢𑀁 𑀧𑀭𑀺𑀲𑀗𑁆𑀓𑀺𑀢𑀁. 𑀦 𑀢𑀁 𑀳𑁄𑀢𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑀡𑀥𑀫𑁆𑀫𑀓𑀭𑀡𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺. 𑀢𑀲𑁆𑀲 𑀅𑀫𑀳𑀧𑁆𑀨𑀮𑀪𑀸𑀯𑁂𑀦𑁂𑀯 𑀧𑀘𑁆𑀘𑀬𑀤𑀸𑀬𑀓𑀸𑀦𑀫𑁆𑀧𑀺𑀲𑁆𑀲 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄 𑀘 𑀯𑀺𑀯𑀸𑀤𑀲𑁆𑀲 𑀅𑀯𑀲𑀭𑁄 𑀏𑀯 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀸𑀭𑀯𑁄 ¶ 𑀦𑀽𑀧𑀮𑀩𑁆𑀪𑀢𑀻𑀢𑀺 𑀅𑀦𑀼𑀲𑀸𑀲𑀦𑀺𑀬𑀸 𑀅𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀪𑀸𑀯𑁂𑀦 𑀕𑀭𑀼𑀓𑀸𑀢𑀩𑁆𑀩𑁂𑀲𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀕𑀸𑀭𑀯𑁄 𑀕𑀭𑀼𑀓𑀭𑀡𑀁 𑀦 𑀯𑀺𑀚𑁆𑀚𑀢𑀺. 𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀢𑁄𑀧𑀺 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀢𑁄𑀧𑀺 𑀤𑀽𑀭𑁂 𑀳𑁄𑀢𑀺, 𑀦 𑀳𑀺 𑀢𑀁 𑀕𑀭𑀽 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀲𑀺𑀓𑁆𑀔𑀺𑀬𑀫𑀸𑀦𑁄 𑀅𑀦𑀸𑀤𑀺𑀬𑀦𑁆𑀢𑁄 𑀦 𑀧𑀝𑀺𑀧𑀚𑁆𑀚𑀢𑀺, 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄 𑀓𑀼𑀢𑁄 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀻𑀢𑀺. 𑀢𑁂𑀦𑀸𑀳 𑁋 ‘‘𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸’’𑀢𑀺. 𑀬𑀣𑀸 𑀓𑀺𑀁? ‘‘𑀦𑀪𑀁 𑀧𑀼𑀣𑀯𑀺𑀬𑀸 𑀬𑀣𑀸’’𑀢𑀺 𑀬𑀣𑀸 𑀦𑀪𑀁 𑀆𑀓𑀸𑀲𑀁 𑀧𑀼𑀣𑀯𑀺𑀬𑀸 𑀧𑀣𑀯𑀻𑀥𑀸𑀢𑀼𑀬𑀸 𑀲𑀪𑀸𑀯𑀢𑁄 𑀤𑀽𑀭𑁂. 𑀦 𑀓𑀤𑀸𑀘𑀺 𑀲𑀫𑁆𑀫𑀺𑀲𑁆𑀲𑀪𑀸𑀯𑁄. 𑀢𑁂𑀦𑁂𑀯𑀸𑀳 𑁋

‘‘𑀦𑀪𑀜𑁆𑀘 ¶ 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;

𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀲𑀢𑀜𑁆𑀘 𑀥𑀫𑁆𑀫𑁄 𑀅𑀲𑀢𑀜𑁆𑀘 𑀭𑀸𑀚𑀸’’𑀢𑀺.(𑀚𑀸. 𑁨.𑁨𑁧.𑁪𑁧𑁪);

𑀲𑀪𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀦𑁆𑀤𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀥𑀺𑀭𑀢𑁆𑀣𑀽𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑁂𑀦 𑀯𑀢𑁆𑀣𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀧𑀡𑀺𑀥𑀸𑀦𑀫𑀓𑀸𑀲𑀺, 𑀲𑀢𑁆𑀣𑀼 𑀩𑁄𑀥𑀺𑀭𑀼𑀓𑁆𑀔𑁂 𑀧𑀤𑀻𑀧𑀧𑀽𑀚𑀜𑁆𑀘 𑀧𑀯𑀢𑁆𑀢𑁂𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀭𑀯𑀺𑀓𑀲𑀓𑀼𑀡𑁄 𑀳𑀼𑀢𑁆𑀯𑀸 𑀫𑀥𑀼𑀭𑀓𑀽𑀚𑀺𑀢𑀁 𑀓𑀽𑀚𑀦𑁆𑀢𑁄 𑀲𑀢𑁆𑀣𑀸𑀭𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀫𑀬𑀽𑀭𑁄 𑀳𑀼𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀲𑀦𑀕𑀼𑀳𑀸𑀬 𑀤𑁆𑀯𑀸𑀭𑁂 𑀧𑀲𑀦𑁆𑀦𑀫𑀸𑀦𑀲𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀺𑀓𑁆𑀔𑀢𑁆𑀢𑀼𑀁 𑀫𑀥𑀼𑀭𑀯𑀲𑁆𑀲𑀺𑀢𑀁 𑀯𑀲𑁆𑀲𑀺, 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀦𑁆𑀤𑀓𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁬.𑁨𑁨-𑁨𑁬) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 ¶ 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀢𑀬𑁄 𑀉𑀓𑁆𑀓𑁂 𑀅𑀥𑀸𑀭𑀬𑀺𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀲𑁄𑀳𑀁 𑀉𑀓𑁆𑀓𑀫𑀥𑀸𑀭𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀓𑁆𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀲𑀢𑁆𑀣𑀸𑀭𑀸 𑀪𑀺𑀓𑁆𑀔𑀼𑀦𑀻𑀦𑀁 𑀑𑀯𑀸𑀤𑁂 𑀆𑀡𑀢𑁆𑀢𑁄 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀧𑀜𑁆𑀘 𑀪𑀺𑀓𑁆𑀔𑀼𑀦𑀺𑀲𑀢𑀸𑀦𑀺 𑀏𑀓𑁄𑀯𑀸𑀤𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺. 𑀢𑁂𑀦 𑀦𑀁 𑀪𑀕𑀯𑀸 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀣𑁂𑀭𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀅𑀜𑁆𑀜𑀢𑀭𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀇𑀢𑁆𑀣𑀻 𑀓𑀺𑀮𑁂𑀲𑀯𑀲𑁂𑀦 𑀑𑀮𑁄𑀓𑁂𑀢𑁆𑀯𑀸 𑀳𑀲𑀺. 𑀣𑁂𑀭𑁄 𑀢𑀲𑁆𑀲𑀸 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀲𑀭𑀻𑀭𑀲𑁆𑀲 𑀧𑀝𑀺𑀓𑁆𑀓𑀽𑀮𑀯𑀺𑀪𑀸𑀯𑀦𑀫𑀼𑀔𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

𑁨𑁭𑁯.

‘‘𑀥𑀺𑀭𑀢𑁆𑀣𑀼 𑀧𑀽𑀭𑁂 𑀤𑀼𑀕𑁆𑀕𑀦𑁆𑀥𑁂, 𑀫𑀸𑀭𑀧𑀓𑁆𑀔𑁂 𑀅𑀯𑀲𑁆𑀲𑀼𑀢𑁂;

𑀦𑀯𑀲𑁄𑀢𑀸𑀦𑀺 𑀢𑁂 𑀓𑀸𑀬𑁂, 𑀬𑀸𑀦𑀺 𑀲𑀦𑁆𑀤𑀦𑁆𑀢𑀺 𑀲𑀩𑁆𑀩𑀤𑀸.

𑁨𑁮𑁦.

‘‘𑀫𑀸 ¶ ¶ 𑀧𑀼𑀭𑀸𑀡𑀁 𑀅𑀫𑀜𑁆𑀜𑀺𑀢𑁆𑀣𑁄, 𑀫𑀸𑀲𑀸𑀤𑁂𑀲𑀺 𑀢𑀣𑀸𑀕𑀢𑁂;

𑀲𑀕𑁆𑀕𑁂𑀧𑀺 𑀢𑁂 𑀦 𑀭𑀚𑁆𑀚𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀦𑀼𑀲𑁂.

𑁨𑁮𑁧.

‘‘𑀬𑁂 𑀘 𑀔𑁄 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀤𑀼𑀫𑁆𑀫𑀦𑁆𑀢𑀻 𑀫𑁄𑀳𑀧𑀸𑀭𑀼𑀢𑀸;

𑀢𑀸𑀤𑀺𑀲𑀸 𑀢𑀢𑁆𑀣 𑀭𑀚𑁆𑀚𑀦𑁆𑀢𑀺, 𑀫𑀸𑀭𑀔𑀺𑀢𑁆𑀢𑀫𑁆𑀳𑀺 𑀩𑀦𑁆𑀥𑀦𑁂.

𑁨𑁮𑁨.

‘‘𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀢𑀸𑀤𑀻 𑀢𑀢𑁆𑀣 𑀦 𑀭𑀚𑁆𑀚𑀦𑁆𑀢𑀺, 𑀙𑀺𑀦𑁆𑀦𑀲𑀼𑀢𑁆𑀢𑀸 𑀅𑀩𑀦𑁆𑀥𑀦𑀸’’𑀢𑀺. 𑁋 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀥𑀻𑀢𑀺 𑀚𑀺𑀕𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀭𑀢𑁆𑀣𑀽𑀢𑀺 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀥𑀻 𑀅𑀢𑁆𑀣𑀼 𑀢𑀁 𑀚𑀺𑀕𑀼𑀘𑁆𑀙𑀸𑀫𑀺 𑀢𑀯 𑀥𑀺𑀓𑁆𑀓𑀸𑀭𑁄 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀧𑀽𑀭𑁂𑀢𑀺𑀆𑀤𑀻𑀦𑀺 𑀢𑀲𑁆𑀲𑀸 𑀥𑀺𑀓𑁆𑀓𑀸𑀢𑀩𑁆𑀩𑀪𑀸𑀯𑀤𑀻𑀧𑀦𑀸𑀦𑀺 𑀆𑀫𑀦𑁆𑀢𑀦𑀯𑀘𑀦𑀸𑀦𑀺. 𑀧𑀽𑀭𑁂𑀢𑀺 𑀅𑀢𑀺𑀯𑀺𑀬 𑀚𑁂𑀕𑀼𑀘𑁆𑀙𑁂𑀳𑀺 𑀦𑀸𑀦𑀸𑀓𑀼𑀡𑀧𑁂𑀳𑀺 𑀦𑀸𑀦𑀸𑀯𑀺𑀥𑀅𑀲𑀼𑀘𑀻𑀳𑀺 𑀲𑀫𑁆𑀧𑀼𑀡𑁆𑀡𑁂. 𑀤𑀼𑀕𑁆𑀕𑀦𑁆𑀥𑁂𑀢𑀺 𑀓𑀼𑀡𑀧𑀧𑀽𑀭𑀺𑀢𑀢𑁆𑀢𑀸 𑀏𑀯 𑀲𑀪𑀸𑀯𑀤𑀼𑀕𑁆𑀕𑀦𑁆𑀥𑁂. 𑀫𑀸𑀭𑀧𑀓𑁆𑀔𑁂𑀢𑀺 𑀬𑀲𑁆𑀫𑀸 𑀯𑀺𑀲𑀪𑀸𑀕𑀯𑀢𑁆𑀣𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀦𑀺𑀫𑀺𑀢𑁆𑀢𑀢𑀸𑀬 𑀓𑀺𑀮𑁂𑀲𑀫𑀸𑀭𑀁 𑀯𑀟𑁆𑀠𑁂𑀢𑀺, 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀘 𑀑𑀢𑀸𑀭𑀁 𑀧𑀯𑀺𑀝𑁆𑀞𑀁 𑀤𑁂𑀢𑀺. 𑀢𑀲𑁆𑀫𑀸 𑀫𑀸𑀭𑀲𑁆𑀲 𑀧𑀓𑁆𑀔𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀭𑀧𑀓𑁆𑀔𑁂’’𑀢𑀺. 𑀅𑀯𑀲𑁆𑀲𑀼𑀢𑁂𑀢𑀺 𑀲𑀩𑁆𑀩𑀓𑀸𑀮𑀁 𑀓𑀺𑀮𑁂𑀲𑀸𑀯𑀲𑁆𑀲𑀯𑀦𑁂𑀦 𑀢𑀳𑀺𑀁 𑀢𑀳𑀺𑀁 𑀅𑀲𑀼𑀘𑀺𑀦𑀺𑀲𑁆𑀲𑀦𑁆𑀤𑀦𑁂𑀦 𑀘 𑀅𑀯𑀲𑁆𑀲𑀼𑀢𑁂. 𑀇𑀤𑀸𑀦𑀺𑀲𑁆𑀲𑀸 𑀦𑀯𑀲𑁄𑀢𑀸𑀦𑀺 𑀢𑁂 𑀓𑀸𑀬𑁂, 𑀬𑀸𑀦𑀺 𑀲𑀦𑁆𑀤𑀦𑁆𑀢𑀺 𑀲𑀩𑁆𑀩𑀤𑀸𑀢𑀺 ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁯𑁯) 𑀯𑀼𑀢𑁆𑀢𑀁 𑀅𑀲𑀼𑀘𑀺𑀦𑁄 𑀅𑀯𑀲𑁆𑀲𑀯𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺.

𑀏𑀯𑀁 ¶ 𑀧𑀦 𑀦𑀯𑀙𑀺𑀤𑁆𑀤𑀁 𑀥𑀼𑀯𑀲𑁆𑀲𑀯𑀁 𑀅𑀲𑀼𑀘𑀺𑀪𑀭𑀺𑀢𑀁 𑀓𑀸𑀬𑀁 𑀬𑀣𑀸𑀪𑀽𑀢𑀁 𑀚𑀸𑀦𑀦𑁆𑀢𑀻 𑀫𑀸 𑀧𑀼𑀭𑀸𑀡𑀁 𑀅𑀫𑀜𑁆𑀜𑀺𑀢𑁆𑀣𑁄𑀢𑀺 𑀧𑀼𑀭𑀸𑀡𑀁 𑀅𑀚𑀸𑀦𑀦𑀓𑀸𑀮𑁂 𑀧𑀯𑀢𑁆𑀢𑀁 𑀳𑀲𑀺𑀢𑀮𑀧𑀺𑀢𑀁 𑀓𑀻𑀴𑀺𑀢𑀁 𑀫𑀸 𑀫𑀜𑁆𑀜𑀺, ‘‘𑀇𑀤𑀸𑀦𑀺𑀧𑀺 𑀏𑀯𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀸 𑀘𑀺𑀦𑁆𑀢𑁂𑀳𑀺. 𑀫𑀸𑀲𑀸𑀤𑁂𑀲𑀺 𑀢𑀣𑀸𑀕𑀢𑁂𑀢𑀺 𑀬𑀣𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀼𑀭𑀺𑀫𑀓𑀸 𑀩𑀼𑀤𑁆𑀥𑀲𑀸𑀯𑀓𑀸 𑀆𑀕𑀢𑀸, 𑀬𑀣𑀸 𑀯𑀸 𑀢𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀕𑀢𑀸 𑀧𑀝𑀺𑀧𑀦𑁆𑀦𑀸, 𑀬𑀣𑀸 𑀘 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀢𑀣𑀮𑀓𑁆𑀔𑀡𑀁 𑀢𑀣𑀥𑀫𑁆𑀫𑁂 𑀘 𑀅𑀭𑀺𑀬𑀲𑀘𑁆𑀘𑀸𑀦𑀺 𑀆𑀕𑀢𑀸 𑀅𑀥𑀺𑀕𑀢𑀸 𑀅𑀯𑀩𑀼𑀤𑁆𑀥𑀸, 𑀢𑀣𑀸 𑀇𑀫𑁂𑀧𑀻𑀢𑀺 𑀏𑀯𑀁 𑀢𑀣𑀸 𑀆𑀕𑀫𑀦𑀸𑀤𑀺𑀅𑀢𑁆𑀣𑁂𑀦 𑀢𑀣𑀸𑀕𑀢𑁂 𑀅𑀭𑀺𑀬𑀲𑀸𑀯𑀓𑁂 𑀧𑀓𑀢𑀺𑀲𑀢𑁆𑀢𑁂 𑀯𑀺𑀬 𑀅𑀯𑀜𑁆𑀜𑀸𑀬 𑀓𑀺𑀮𑁂𑀲𑀯𑀲𑁂𑀦 𑀘 ¶ 𑀉𑀧𑀲𑀗𑁆𑀓𑀫𑀫𑀸𑀦𑀸 𑀫𑀸𑀲𑀸𑀤𑁂𑀲𑀺. 𑀅𑀦𑀸𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀫𑀸𑀳. 𑀲𑀕𑁆𑀕𑁂𑀧𑀺 𑀢𑁂 𑀦 𑀭𑀚𑁆𑀚𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀦𑀼𑀲𑁂𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦𑀸𑀧𑀺 𑀅𑀓𑁆𑀔𑀸𑀦𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑀼𑀔𑁂 𑀲𑀕𑁆𑀕𑁂𑀧𑀺 𑀢𑁂 𑀲𑀸𑀯𑀓𑀩𑀼𑀤𑁆𑀥𑀸 𑀦 𑀭𑀚𑁆𑀚𑀦𑁆𑀢𑀺, 𑀲𑀗𑁆𑀔𑀸𑀭𑁂𑀲𑀼 𑀆𑀤𑀻𑀦𑀯𑀲𑁆𑀲 𑀲𑀼𑀧𑀭𑀺𑀤𑀺𑀝𑁆𑀞𑀢𑁆𑀢𑀸 𑀭𑀸𑀕𑀁 𑀦 𑀚𑀦𑁂𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀻𑀴𑁆𑀳𑀭𑀸𑀲𑀺𑀲𑀤𑀺𑀲𑁂 𑀫𑀸𑀦𑀼𑀲𑁂 𑀓𑀸𑀫𑀕𑀼𑀡𑁂, 𑀢𑀢𑁆𑀣 𑀦 𑀭𑀚𑁆𑀚𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀬𑁂 𑀘 𑀔𑁄𑀢𑀺 𑀬𑁂 𑀧𑀦 𑀩𑀸𑀮𑁆𑀬𑀧𑁆𑀧𑀬𑁄𑀕𑀢𑁄 𑀩𑀸𑀮𑀸, 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀤𑀼𑀫𑁆𑀫𑁂𑀥𑀸, 𑀅𑀲𑀼𑀪𑁂 𑀲𑀼𑀪𑀸𑀦𑀼𑀧𑀲𑁆𑀲𑀦𑁂𑀦 𑀤𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀬 𑀤𑀼𑀫𑁆𑀫𑀦𑁆𑀢𑀻, 𑀫𑁄𑀳𑁂𑀦 𑀅𑀜𑁆𑀜𑀸𑀡𑁂𑀦 𑀲𑀩𑁆𑀩𑀲𑁄 𑀧𑀝𑀺𑀘𑁆𑀙𑀸𑀤𑀺𑀢𑀘𑀺𑀢𑁆𑀢𑀢𑀸𑀬 𑀫𑁄𑀳𑀧𑀸𑀭𑀼𑀢𑀸 ¶ 𑀢𑀸𑀤𑀺𑀲𑀸 𑀢𑀣𑀸𑀭𑀽𑀧𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸, 𑀢𑀢𑁆𑀣 𑀢𑀲𑁆𑀫𑀺𑀁 𑀇𑀢𑁆𑀣𑀺𑀲𑀜𑁆𑀜𑀺𑀢𑁂, 𑀫𑀸𑀭𑀔𑀺𑀢𑁆𑀢𑀫𑁆𑀳𑀺 𑀩𑀦𑁆𑀥𑀦𑁂 𑀫𑀸𑀭𑁂𑀦 𑀑𑀟𑁆𑀟𑀺𑀢𑁂 𑀫𑀸𑀭𑀧𑀸𑀲𑁂, 𑀭𑀚𑁆𑀚𑀦𑁆𑀢𑀺 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀧𑀦𑁆𑀦𑀸 𑀢𑀺𑀝𑁆𑀞𑀦𑁆𑀢𑀺.

𑀯𑀺𑀭𑀸𑀚𑀺𑀢𑀸𑀢𑀺 𑀬𑁂𑀲𑀁 𑀧𑀦 𑀔𑀻𑀡𑀸𑀲𑀯𑀸𑀦𑀁 𑀢𑁂𑀮𑀜𑁆𑀚𑀦𑀭𑀸𑀕𑁄 𑀯𑀺𑀬 𑀤𑀼𑀫𑁆𑀫𑁄𑀘𑀦𑀻𑀬𑀲𑀪𑀸𑀯𑁄 𑀭𑀸𑀕𑁄 𑀲𑀧𑀢𑁆𑀢𑁄 𑀯𑀺𑀬 𑀮𑀤𑁆𑀥𑁄𑀓𑀸𑀲𑁄 𑀤𑀼𑀲𑁆𑀲𑀦𑀲𑀪𑀸𑀯𑁄 𑀤𑁄𑀲𑁄 𑀅𑀜𑁆𑀜𑀸𑀡𑀲𑀪𑀸𑀯𑀸 𑀅𑀯𑀺𑀚𑁆𑀚𑀸 𑀘 𑀅𑀭𑀺𑀬𑀫𑀕𑁆𑀕𑀯𑀺𑀭𑀸𑀕𑁂𑀦 𑀲𑀩𑁆𑀩𑀲𑁄 𑀯𑀺𑀭𑀸𑀚𑀺𑀢𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀢𑀸𑀤𑀺𑀲𑀸 𑀅𑀕𑁆𑀕𑀫𑀕𑁆𑀕𑀲𑀢𑁆𑀣𑁂𑀦 𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀲𑀼𑀢𑁆𑀢𑀸 𑀢𑀢𑁄 𑀏𑀯 𑀓𑀢𑁆𑀣𑀘𑀺𑀧𑀺 𑀩𑀦𑁆𑀥𑀦𑀸𑀪𑀸𑀯𑀢𑁄 𑀅𑀩𑀦𑁆𑀥𑀦𑀸 𑀢𑀢𑁆𑀣 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀫𑀸𑀭𑀧𑀸𑀲𑁂 𑀦 𑀭𑀚𑁆𑀚𑀦𑁆𑀢𑀺. 𑀏𑀯𑀁 𑀣𑁂𑀭𑁄 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀕𑀢𑁄.

𑀦𑀦𑁆𑀤𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀚𑀫𑁆𑀩𑀼𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀜𑁆𑀘𑀧𑀜𑁆𑀜𑀸𑀲𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀚𑀫𑁆𑀩𑀼𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀲𑀤𑁆𑀤𑀳𑀦𑁆𑀢𑁄 𑀩𑁄𑀥𑀺𑀭𑀼𑀓𑁆𑀔𑀁 𑀯𑀦𑁆𑀤𑀺𑀢𑁆𑀯𑀸 𑀩𑀻𑀚𑀦𑁂𑀦 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀜𑁆𑀜𑀢𑀭𑁂𑀦 𑀉𑀧𑀸𑀲𑀓𑁂𑀦 𑀓𑀸𑀭𑀺𑀢𑁂 𑀆𑀭𑀸𑀫𑁂 𑀆𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺 𑀢𑁂𑀦 ¶ 𑀉𑀧𑀝𑁆𑀞𑀻𑀬𑀫𑀸𑀦𑁄. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀮𑀽𑀔𑀘𑀻𑀯𑀭𑀥𑀭𑁄 𑀓𑁂𑀲𑁄𑀳𑀭𑀡𑀢𑁆𑀣𑀁 𑀅𑀭𑀜𑁆𑀜𑀢𑁄 𑀕𑀸𑀫𑀸𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺, 𑀢𑀁 𑀤𑀺𑀲𑁆𑀯𑀸 𑀲𑁄 𑀉𑀧𑀸𑀲𑀓𑁄 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀓𑀧𑁆𑀧𑀓𑁂𑀦 𑀓𑁂𑀲𑀫𑀲𑁆𑀲𑀽𑀦𑀺 𑀑𑀳𑀸𑀭𑀸𑀧𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀲𑀼𑀦𑁆𑀤𑀭𑀸𑀦𑀺 𑀘𑀻𑀯𑀭𑀸𑀦𑀺 𑀤𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣𑀸’’𑀢𑀺 𑀯𑀲𑀸𑀧𑁂𑀢𑀺. 𑀢𑀁 𑀤𑀺𑀲𑁆𑀯𑀸 𑀆𑀯𑀸𑀲𑀺𑀓𑁄 𑀇𑀲𑁆𑀲𑀸𑀫𑀘𑁆𑀙𑁂𑀭𑀧𑀓𑀢𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀆𑀳 𑁋 ‘‘𑀯𑀭𑀁 𑀢𑁂, 𑀪𑀺𑀓𑁆𑀔𑀼, 𑀇𑀫𑀺𑀦𑀸 𑀧𑀸𑀧𑀼𑀧𑀸𑀲𑀓𑁂𑀦 𑀉𑀧𑀝𑁆𑀞𑀻𑀬𑀫𑀸𑀦𑀲𑁆𑀲 𑀏𑀯𑀁 𑀇𑀥 𑀯𑀲𑀦𑀢𑁄 𑀅𑀗𑁆𑀕𑀼𑀮𑀻𑀳𑀺 𑀓𑁂𑀲𑁂 𑀮𑀼𑀜𑁆𑀘𑀺𑀢𑁆𑀯𑀸 𑀅𑀘𑁂𑀮𑀲𑁆𑀲 𑀲𑀢𑁄 𑀕𑀽𑀣𑀫𑀼𑀢𑁆𑀢𑀸𑀳𑀸𑀭𑀚𑀻𑀯𑀦’’𑀦𑁆𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀸𑀯𑀤𑁂𑀯 𑀯𑀘𑁆𑀘𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀬𑀸𑀲𑀁 𑀯𑀟𑁆𑀠𑁂𑀦𑁆𑀢𑁄 𑀯𑀺𑀬 𑀳𑀢𑁆𑀣𑁂𑀦 𑀕𑀽𑀣𑀁 𑀯𑀟𑁆𑀠𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺, 𑀫𑀼𑀢𑁆𑀢𑀜𑁆𑀘 𑀧𑀺𑀯𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀮𑀗𑁆𑀓𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀼𑀦 𑀕𑀽𑀣𑀫𑀼𑀢𑁆𑀢𑀸𑀳𑀸𑀭𑁄 𑀯𑀲𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑁄𑀧𑀺 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀦𑀺𑀕𑀡𑁆𑀞𑁄 𑀳𑀼𑀢𑁆𑀯𑀸 𑀕𑀽𑀣𑀪𑀓𑁆𑀔𑁄 𑀅𑀳𑁄𑀲𑀺.

𑀧𑀼𑀦 ¶ 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀦𑀼𑀲𑁆𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑁄𑀧𑀺 𑀅𑀭𑀺𑀬𑀽𑀧𑀯𑀸𑀤𑀩𑀮𑁂𑀦 𑀤𑀼𑀕𑁆𑀕𑀢𑀓𑀽𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀣𑀜𑁆𑀜𑀁 𑀯𑀸 𑀔𑀻𑀭𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀧𑀸𑀬𑀫𑀸𑀦𑁄, 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀫𑀼𑀢𑁆𑀢𑀫𑁂𑀯 𑀧𑀺𑀯𑀢𑀺, 𑀑𑀤𑀦𑀁 𑀪𑁄𑀚𑀺𑀬𑀫𑀸𑀦𑁄, 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀕𑀽𑀣𑀫𑁂𑀯 𑀔𑀸𑀤𑀢𑀺, 𑀏𑀯𑀁 𑀕𑀽𑀣𑀫𑀼𑀢𑁆𑀢𑀧𑀭𑀺𑀪𑁄𑀕𑁂𑀦 𑀯𑀟𑁆𑀠𑀦𑁆𑀢𑁄 𑀯𑀬𑀧𑁆𑀧𑀢𑁆𑀢𑁄𑀧𑀺 𑀢𑀤𑁂𑀯 𑀧𑀭𑀺𑀪𑀼𑀜𑁆𑀚𑀢𑀺. 𑀫𑀦𑀼𑀲𑁆𑀲𑀸 𑀢𑀢𑁄 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀭𑀺𑀘𑁆𑀘𑀚𑀺𑀁𑀲𑀼. 𑀲𑁄 𑀜𑀸𑀢𑀓𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑁄 𑀦𑀕𑁆𑀕𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀦𑁆𑀳𑀸𑀬𑀢𑀺, 𑀭𑀚𑁄𑀚𑀮𑁆𑀮𑀥𑀭𑁄 𑀓𑁂𑀲𑀫𑀲𑁆𑀲𑀽𑀦𑀺 𑀮𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁂 𑀇𑀭𑀺𑀬𑀸𑀧𑀣𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀢𑀺, 𑀦𑀺𑀫𑀦𑁆𑀢𑀦𑀁 𑀦 𑀲𑀸𑀤𑀺𑀬𑀢𑀺, 𑀫𑀸𑀲𑁄𑀧𑀯𑀸𑀲𑀁 𑀅𑀥𑀺𑀝𑁆𑀞𑀸𑀬 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀫𑀸𑀲𑁂 𑀫𑀸𑀲𑁂 𑀏𑀓𑀯𑀸𑀭𑀁 𑀓𑀼𑀲𑀕𑁆𑀕𑁂𑀦 𑀕𑀳𑁂𑀢𑁆𑀯𑀸 𑀤𑀺𑀯𑀸 𑀚𑀺𑀯𑁆𑀳𑀕𑁆𑀕𑁂𑀦 𑀮𑁂𑀳𑀢𑀺, 𑀭𑀢𑁆𑀢𑀺𑀬𑀁 𑀧𑀦 ‘‘𑀅𑀮𑁆𑀮𑀕𑀽𑀣𑀁 𑀲𑀧𑁆𑀧𑀸𑀡𑀓’’𑀦𑁆𑀢𑀺 𑀅𑀔𑀸𑀤𑀺𑀢𑁆𑀯𑀸 𑀲𑀼𑀓𑁆𑀔𑀕𑀽𑀣𑀫𑁂𑀯 𑀔𑀸𑀤𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀧𑀜𑁆𑀘𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺 𑀫𑀳𑀸𑀚𑀦𑁄 ‘‘𑀫𑀳𑀸𑀢𑀧𑁄 𑀧𑀭𑀫𑀧𑁆𑀧𑀺𑀘𑁆𑀙𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀅𑀳𑁄𑀲𑀺.

𑀅𑀣 𑀪𑀕𑀯𑀸 𑀢𑀲𑁆𑀲 𑀳𑀤𑀬𑀩𑁆𑀪𑀦𑁆𑀢𑀭𑁂 𑀖𑀝𑁂 𑀧𑀤𑀻𑀧𑀁 𑀯𑀺𑀬 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀧𑀚𑁆𑀚𑀮𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁂𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀮𑀤𑁆𑀥𑀽𑀧𑀲𑀫𑁆𑀧𑀤𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀫𑁆𑀫𑀧𑀤𑁂 ¶ ‘‘𑀫𑀸𑀲𑁂 𑀫𑀸𑀲𑁂 𑀓𑀼𑀲𑀕𑁆𑀕𑁂𑀦𑀸’’𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬 (𑀥. 𑀧. 𑀅𑀝𑁆𑀞. 𑁧.𑀚𑀫𑁆𑀩𑀼𑀓𑀢𑁆𑀣𑁂𑀭𑀯𑀢𑁆𑀣𑀼) 𑀯𑀼𑀢𑁆𑀢𑀦𑀬𑁂𑀦 ¶ 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀳𑀢𑁆𑀢𑁂 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 ‘‘𑀆𑀤𑀺𑀢𑁄 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀦𑀺𑀲𑁆𑀲𑀸𑀬 𑀲𑀸𑀯𑀓𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

𑁨𑁮𑁩.

‘‘𑀧𑀜𑁆𑀘𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺, 𑀭𑀚𑁄𑀚𑀮𑁆𑀮𑀫𑀥𑀸𑀭𑀬𑀺𑀁;

𑀪𑀼𑀜𑁆𑀚𑀦𑁆𑀢𑁄 𑀫𑀸𑀲𑀺𑀓𑀁 𑀪𑀢𑁆𑀢𑀁, 𑀓𑁂𑀲𑀫𑀲𑁆𑀲𑀼𑀁 𑀅𑀮𑁄𑀘𑀬𑀺𑀁.

𑁨𑁮𑁪.

‘‘𑀏𑀓𑀧𑀸𑀤𑁂𑀦 𑀅𑀝𑁆𑀞𑀸𑀲𑀺𑀁, 𑀆𑀲𑀦𑀁 𑀧𑀭𑀺𑀯𑀚𑁆𑀚𑀬𑀺𑀁;

𑀲𑀼𑀓𑁆𑀔𑀕𑀽𑀣𑀸𑀦𑀺 𑀘 𑀔𑀸𑀤𑀺𑀁, 𑀉𑀤𑁆𑀤𑁂𑀲𑀜𑁆𑀘 𑀦 𑀲𑀸𑀤𑀺𑀬𑀺𑀁.

𑁨𑁮𑁫.

‘‘𑀏𑀢𑀸𑀤𑀺𑀲𑀁 𑀓𑀭𑀺𑀢𑁆𑀯𑀸𑀦, 𑀩𑀳𑀼𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑀁;

𑀯𑀼𑀬𑁆𑀳𑀫𑀸𑀦𑁄 𑀫𑀳𑁄𑀖𑁂𑀦, 𑀩𑀼𑀤𑁆𑀥𑀁 𑀲𑀭𑀡𑀫𑀸𑀕𑀫𑀁.

𑁨𑁮𑁬.

‘‘𑀲𑀭𑀡𑀕𑀫𑀦𑀁 𑀧𑀲𑁆𑀲, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀧𑀜𑁆𑀘𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺, 𑀭𑀚𑁄𑀚𑀮𑁆𑀮𑀫𑀥𑀸𑀭𑀬𑀺𑀦𑁆𑀢𑀺 𑀦𑀕𑁆𑀕𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀦𑁆𑀳𑀸𑀦𑀧𑀝𑀺𑀓𑁆𑀔𑁂𑀧𑀢𑁄 𑀧𑀜𑁆𑀘𑀸𑀥𑀺𑀓𑀸𑀦𑀺 𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀲𑀭𑀻𑀭𑁂 𑀮𑀕𑁆𑀕𑀁 𑀆𑀕𑀦𑁆𑀢𑀼𑀓𑀭𑁂𑀡𑀼𑀲𑀗𑁆𑀔𑀸𑀢𑀁 𑀭𑀚𑁄, 𑀲𑀭𑀻𑀭𑀫𑀮𑀲𑀗𑁆𑀔𑀸𑀢𑀁 𑀚𑀮𑁆𑀮𑀜𑁆𑀘 𑀓𑀸𑀬𑁂𑀦 𑀥𑀸𑀭𑁂𑀲𑀺𑀁. 𑀪𑀼𑀜𑁆𑀚𑀦𑁆𑀢𑁄 𑀫𑀸𑀲𑀺𑀓𑀁 𑀪𑀢𑁆𑀢𑀦𑁆𑀢𑀺 𑀭𑀢𑁆𑀢𑀺𑀬𑀁 𑀕𑀽𑀣𑀁 𑀔𑀸𑀤𑀦𑁆𑀢𑁄 𑀮𑁄𑀓𑀯𑀜𑁆𑀘𑀦𑀢𑁆𑀣𑀁 𑀫𑀸𑀲𑁄𑀧𑀯𑀸𑀲𑀺𑀓𑁄 𑀦𑀸𑀫 𑀳𑀼𑀢𑁆𑀯𑀸 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀫𑀸𑀲𑁂 𑀫𑀸𑀲𑁂 𑀏𑀓𑀯𑀸𑀭𑀁 𑀚𑀺𑀯𑁆𑀳𑀕𑁆𑀕𑁂 𑀧𑀞𑀦𑀯𑀲𑁂𑀦 𑀪𑀼𑀜𑁆𑀚𑀦𑁆𑀢𑁄 𑀅𑀮𑁄𑀘𑀬𑀺𑀦𑁆𑀢𑀺 𑀢𑀸𑀤𑀺𑀲𑀘𑁆𑀙𑀸𑀭𑀺𑀓𑀸𑀧𑀓𑁆𑀔𑁂𑀧𑁂𑀦 𑀲𑀺𑀣𑀺𑀮𑀫𑀽𑀮𑀁 𑀓𑁂𑀲𑀫𑀲𑁆𑀲𑀼𑀁 𑀅𑀗𑁆𑀕𑀼𑀮𑀻𑀳𑀺 𑀮𑀼𑀜𑁆𑀘𑀸𑀧𑁂𑀲𑀺𑀁.

𑀏𑀓𑀧𑀸𑀤𑁂𑀦 ¶ 𑀅𑀝𑁆𑀞𑀸𑀲𑀺𑀁, 𑀆𑀲𑀦𑀁 𑀧𑀭𑀺𑀯𑀚𑁆𑀚𑀬𑀺𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀆𑀲𑀦𑀁 𑀦𑀺𑀲𑀚𑁆𑀚𑀁 𑀧𑀭𑀺𑀯𑀚𑁆𑀚𑁂𑀲𑀺𑀁, 𑀢𑀺𑀝𑁆𑀞𑀦𑁆𑀢𑁄 𑀘 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑁂𑀦𑁂𑀯 𑀧𑀸𑀤𑁂𑀦 𑀅𑀝𑁆𑀞𑀸𑀲𑀺𑀁. 𑀉𑀤𑁆𑀤𑁂𑀲𑀦𑁆𑀢𑀺 𑀦𑀺𑀫𑀦𑁆𑀢𑀦𑀁. 𑀉𑀤𑀺𑀲𑁆𑀲𑀓𑀢𑀦𑁆𑀢𑀺 𑀓𑁂𑀘𑀺. 𑀦 𑀲𑀸𑀤𑀺𑀬𑀺𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁 𑀧𑀝𑀺𑀓𑁆𑀔𑀺𑀧𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀢𑀸𑀤𑀺𑀲𑀁 𑀓𑀭𑀺𑀢𑁆𑀯𑀸𑀦, 𑀩𑀳𑀼𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑀦𑁆𑀢𑀺 𑀏𑀢𑀸𑀤𑀺𑀲𑀁 𑀏𑀯𑀭𑀽𑀧𑀁 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀓𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑀁 𑀩𑀳𑀼𑀁 𑀧𑀸𑀧𑀓𑀫𑁆𑀫𑀁 𑀧𑀼𑀭𑀺𑀫𑀚𑀸𑀢𑀻𑀲𑀼 𑀇𑀥 𑀘 𑀓𑀢𑁆𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀯𑀼𑀬𑁆𑀳𑀫𑀸𑀦𑁄 ¶ 𑀫𑀳𑁄𑀖𑁂𑀦𑀸𑀢𑀺 𑀓𑀸𑀫𑁄𑀖𑀸𑀤𑀺𑀦𑀸 𑀫𑀳𑀢𑀸 𑀑𑀖𑁂𑀦 𑀯𑀺𑀲𑁂𑀲𑀢𑁄 𑀤𑀺𑀝𑁆𑀞𑁄𑀖𑁂𑀦 𑀅𑀧𑀸𑀬𑀲𑀫𑀼𑀤𑁆𑀤𑀁 𑀧𑀢𑀺𑀆𑀓𑀟𑁆𑀠𑀺𑀬𑀫𑀸𑀦𑁄, 𑀩𑀼𑀤𑁆𑀥𑀁 𑀲𑀭𑀡𑀫𑀸𑀕𑀫𑀦𑁆𑀢𑀺 𑀢𑀸𑀤𑀺𑀲𑁂𑀦 𑀧𑀼𑀜𑁆𑀜𑀓𑀫𑁆𑀫𑀘𑁆𑀙𑀺𑀤𑁆𑀤𑁂𑀦 𑀓𑀺𑀘𑁆𑀙𑁂𑀦 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀧𑀼𑀜𑁆𑀜𑀩𑀮𑁂𑀦 𑀩𑀼𑀤𑁆𑀥𑀁 ‘‘𑀲𑀭𑀡’’𑀦𑁆𑀢𑀺 𑀆𑀕𑀫𑀸𑀲𑀺𑀁, ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀅𑀯𑁂𑀘𑁆𑀘𑀧𑀲𑀸𑀤𑁂𑀦 𑀲𑀢𑁆𑀣𑀭𑀺 𑀧𑀲𑀻𑀤𑀺𑀁. 𑀲𑀭𑀡𑀕𑀫𑀦𑀁 𑀧𑀲𑁆𑀲, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀦𑁆𑀢𑀺 𑀆𑀬𑀢𑀦𑀕𑀢𑀁 𑀫𑀫 𑀲𑀭𑀡𑀕𑀫𑀦𑀁 𑀧𑀲𑁆𑀲, 𑀧𑀲𑁆𑀲 𑀲𑀸𑀲𑀦𑀥𑀫𑁆𑀫𑀲𑁆𑀲 ¶ 𑀘 𑀲𑀼𑀥𑀫𑁆𑀫𑀢𑀁 𑀬𑁄𑀳𑀁 𑀢𑀣𑀸𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄𑀧𑀺 𑀏𑀓𑁄𑀯𑀸𑀤𑁂𑀦𑁂𑀯 𑀲𑀢𑁆𑀣𑀸𑀭𑀸 𑀏𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀧𑀸𑀧𑀺𑀢𑁄. ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀢𑁂𑀦𑀸𑀳 (𑀅𑀧. 𑀣𑁂𑀭 𑁨.𑁪𑁬.𑁧𑁭-𑁨𑁧) 𑁋

‘‘𑀢𑀺𑀲𑁆𑀲𑀲𑁆𑀲𑀸𑀳𑀁 𑀪𑀕𑀯𑀢𑁄, 𑀩𑁄𑀥𑀺𑀭𑀼𑀓𑁆𑀔𑀫𑀯𑀦𑁆𑀤𑀺𑀬𑀁;

𑀧𑀕𑁆𑀕𑀬𑁆𑀳 𑀩𑀻𑀚𑀦𑀺𑀁 𑀢𑀢𑁆𑀣, 𑀲𑀻𑀳𑀸𑀲𑀦𑀫𑀩𑀻𑀚𑀳𑀁.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀲𑀻𑀳𑀸𑀲𑀦𑀫𑀩𑀻𑀚𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀻𑀚𑀦𑀸𑀬 𑀇𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀚𑀫𑁆𑀩𑀼𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁂𑀦𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑁆𑀯𑀸𑀕𑀢𑀁 𑀯𑀢𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑁂𑀦𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀫𑁄𑀭𑀳𑀢𑁆𑀣𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀪𑀕𑀺𑀦𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀲𑁂𑀦𑀓𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀚𑁆𑀚𑀸𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀖𑀭𑀸𑀯𑀸𑀲𑀁 𑀯𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀫𑀳𑀸𑀚𑀦𑁄 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀨𑀕𑁆𑀕𑀼𑀦𑀫𑀸𑀲𑁂 𑀉𑀢𑁆𑀢𑀭𑀨𑀕𑁆𑀕𑀼𑀦𑀦𑀓𑁆𑀔𑀢𑁆𑀢𑁂 𑀉𑀲𑁆𑀲𑀯𑀁 𑀅𑀦𑀼𑀪𑀯𑀦𑁆𑀢𑁄 𑀕𑀬𑀸𑀬𑀁 𑀢𑀺𑀢𑁆𑀣𑀸𑀪𑀺𑀲𑁂𑀓𑀁 𑀓𑀭𑁄𑀢𑀺. 𑀢𑁂𑀦 𑀢𑀁 𑀉𑀲𑁆𑀲𑀯𑀁 ¶ ‘‘𑀕𑀬𑀸𑀨𑀕𑁆𑀕𑀽’’𑀢𑀺 𑀯𑀤𑀦𑁆𑀢𑀺. 𑀅𑀣 𑀪𑀕𑀯𑀸 𑀢𑀸𑀤𑀺𑀲𑁂 𑀉𑀲𑁆𑀲𑀯𑀤𑀺𑀯𑀲𑁂 𑀯𑁂𑀦𑁂𑀬𑁆𑀬𑀸𑀦𑀼𑀓𑀫𑁆𑀧𑀸𑀬 𑀕𑀬𑀸𑀢𑀺𑀢𑁆𑀣𑀲𑀫𑀻𑀧𑁂 𑀯𑀺𑀳𑀭𑀢𑀺, 𑀫𑀳𑀸𑀚𑀦𑁄𑀧𑀺 𑀢𑀺𑀢𑁆𑀣𑀸𑀪𑀺𑀲𑁂𑀓𑀸𑀥𑀺𑀧𑁆𑀧𑀸𑀬𑁂𑀦 𑀢𑀢𑁄 ¶ 𑀢𑀢𑁄 𑀢𑀁 𑀞𑀸𑀦𑀁 𑀉𑀧𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀦𑀓𑁄𑀧𑀺 𑀢𑀺𑀢𑁆𑀣𑀸𑀪𑀺𑀲𑁂𑀓𑀢𑁆𑀣𑀁 𑀢𑀁 𑀞𑀸𑀦𑀁 𑀉𑀧𑀕𑀢𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁬.𑁯-𑁧𑁬) 𑁋

‘‘𑀫𑁄𑀭𑀳𑀢𑁆𑀣𑀁 ¶ 𑀕𑀳𑁂𑀢𑁆𑀯𑀸𑀦, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀫𑁄𑀭𑀳𑀢𑁆𑀣𑀫𑀤𑀸𑀲𑀳𑀁.

‘‘𑀇𑀫𑀺𑀦𑀸 𑀫𑁄𑀭𑀳𑀢𑁆𑀣𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀦𑀺𑀩𑁆𑀩𑀸𑀬𑀺𑀁𑀲𑀼 𑀢𑀬𑁄 𑀅𑀕𑁆𑀕𑀻, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁.

‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀤𑀢𑁆𑀯𑀸𑀦𑀳𑀁 𑀫𑁄𑀭𑀳𑀢𑁆𑀣𑀁, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁.

‘‘𑀢𑀺𑀬𑀕𑁆𑀕𑀻 𑀦𑀺𑀩𑁆𑀩𑀼𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑁄𑀭𑀳𑀢𑁆𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀉𑀤𑀸𑀦𑀯𑀲𑁂𑀦 𑁋

𑁨𑁮𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀕𑀬𑀸𑀬𑀁 𑀕𑀬𑀨𑀕𑁆𑀕𑀼𑀬𑀸;

𑀬𑀁 𑀅𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁.

𑁨𑁮𑁮.

‘‘𑀫𑀳𑀧𑁆𑀧𑀪𑀁 𑀕𑀡𑀸𑀘𑀭𑀺𑀬𑀁, 𑀅𑀕𑁆𑀕𑀧𑀢𑁆𑀢𑀁 𑀯𑀺𑀦𑀸𑀬𑀓𑀁;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀚𑀺𑀦𑀁 𑀅𑀢𑀼𑀮𑀤𑀲𑁆𑀲𑀦𑀁.

𑁨𑁮𑁯.

‘‘𑀫𑀳𑀸𑀦𑀸𑀕𑀁 𑀫𑀳𑀸𑀯𑀻𑀭𑀁, 𑀫𑀳𑀸𑀚𑀼𑀢𑀺𑀫𑀦𑀸𑀲𑀯𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀁, 𑀲𑀢𑁆𑀣𑀸𑀭𑀫𑀓𑀼𑀢𑁄𑀪𑀬𑀁.

𑁨𑁯𑁦.

‘‘𑀘𑀺𑀭𑀲𑀗𑁆𑀓𑀺𑀮𑀺𑀝𑁆𑀞𑀁 ¶ 𑀯𑀢 𑀫𑀁, 𑀤𑀺𑀝𑁆𑀞𑀺𑀲𑀦𑁆𑀤𑀸𑀦𑀩𑀦𑁆𑀥𑀺𑀢𑀁;

𑀯𑀺𑀫𑁄𑀘𑀬𑀺 𑀲𑁄 𑀪𑀕𑀯𑀸, 𑀲𑀩𑁆𑀩𑀕𑀦𑁆𑀣𑁂𑀳𑀺 𑀲𑁂𑀦𑀓’’𑀦𑁆𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀻𑀢𑀺 𑀫𑀬𑀸 𑀲𑀼𑀝𑁆𑀞𑀼 𑀆𑀕𑀢𑀁 𑀯𑀢 𑀆𑀲𑀺. 𑀫𑀫 𑀯𑀸 𑀲𑀼𑀦𑁆𑀤𑀭𑀁 𑀯𑀢 𑀆𑀕𑀫𑀦𑀁 𑀆𑀲𑀺. 𑀕𑀬𑀸𑀬𑀦𑁆𑀢𑀺 𑀕𑀬𑀸𑀢𑀺𑀢𑁆𑀣𑀲𑀫𑀻𑀧𑁂. 𑀕𑀬𑀨𑀕𑁆𑀕𑀼𑀬𑀸𑀢𑀺 ‘‘𑀕𑀬𑀸𑀨𑀕𑁆𑀕𑀽’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀨𑀕𑁆𑀕𑀼𑀦𑀫𑀸𑀲𑀲𑁆𑀲 𑀉𑀢𑁆𑀢𑀭𑀨𑀕𑁆𑀕𑀼𑀦𑀻𑀦𑀓𑁆𑀔𑀢𑁆𑀢𑁂. ‘‘𑀬’’𑀦𑁆𑀢𑀺𑀆𑀤𑀺 𑀲𑁆𑀯𑀸𑀕𑀢𑀪𑀸𑀯𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀁. 𑀢𑀢𑁆𑀣 𑀬𑀦𑁆𑀢𑀺 𑀬𑀲𑁆𑀫𑀸. 𑀅𑀤𑁆𑀤𑀲𑀸𑀲𑀺𑀦𑁆𑀢𑀺 𑀅𑀤𑁆𑀤𑀓𑁆𑀔𑀺𑀁. 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀩𑀼𑀤𑁆𑀥𑀁. 𑀤𑁂𑀲𑁂𑀦𑁆𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀅𑀕𑁆𑀕𑀁 𑀲𑀩𑁆𑀩𑀲𑁂𑀝𑁆𑀞𑀁 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀁 𑀥𑀫𑁆𑀫𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀪𑀸𑀲𑀦𑁆𑀢𑀁.

𑀫𑀳𑀧𑁆𑀧𑀪𑀦𑁆𑀢𑀺 𑀫𑀳𑀢𑀺𑀬𑀸 𑀲𑀭𑀻𑀭𑀧𑁆𑀧𑀪𑀸𑀬 𑀜𑀸𑀡𑀧𑁆𑀧𑀪𑀸𑀬 𑀘 𑀲𑀫𑀦𑁆𑀦𑀸𑀕𑀢𑀁. 𑀕𑀡𑀸𑀘𑀭𑀺𑀬𑀦𑁆𑀢𑀺 𑀪𑀺𑀓𑁆𑀔𑀼𑀧𑀭𑀺𑀲𑀸𑀤𑀻𑀦𑀁 𑀕𑀡𑀸𑀦𑀁 𑀉𑀢𑁆𑀢𑀫𑁂𑀦 𑀤𑀫𑀣𑁂𑀦 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀕𑀡𑀸𑀘𑀭𑀺𑀬𑀁. 𑀅𑀕𑁆𑀕𑀪𑀽𑀢𑀸𑀦𑀁 𑀲𑀻𑀮𑀸𑀤𑀻𑀦𑀁 ¶ 𑀕𑀼𑀡𑀸𑀦𑀁 𑀅𑀥𑀺𑀕𑀫𑁂𑀦 𑀅𑀕𑁆𑀕𑀧𑁆𑀧𑀢𑁆𑀢𑀁. 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀦𑀁 𑀧𑀭𑀫𑁂𑀦 𑀯𑀺𑀦𑀬𑁂𑀦 𑀯𑀺𑀦𑀬𑀦𑀢𑁄, 𑀲𑀬𑀁 𑀦𑀸𑀬𑀓𑀭𑀳𑀺𑀢𑀢𑁆𑀢𑀸 𑀘 𑀯𑀺𑀦𑀸𑀬𑀓𑀁. 𑀓𑁂𑀦𑀘𑀺 𑀅𑀦𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀲𑀓𑀮𑀁 𑀮𑁄𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀢𑁆𑀢𑀸, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀫𑀸𑀭𑀸𑀦𑀁 𑀚𑀺𑀢𑀢𑁆𑀢𑀸 𑀘 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀚𑀺𑀦𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀚𑀺𑀦𑀁, 𑀩𑀸𑀢𑁆𑀢𑀺𑀁𑀲𑀯𑀭𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑀥𑀫𑁆𑀫𑀓𑀸𑀬𑀢𑀸𑀬 𑀘 ¶ 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀅𑀧𑀭𑀺𑀫𑁂𑀬𑁆𑀬𑀤𑀲𑁆𑀲𑀦𑀢𑀸𑀬 𑀅𑀲𑀤𑀺𑀲𑀤𑀲𑁆𑀲𑀦𑀢𑀸𑀬 𑀘 𑀅𑀢𑀼𑀮𑀤𑀲𑁆𑀲𑀦𑀁.

𑀕𑀢𑀺𑀩𑀮𑀧𑀭𑀓𑁆𑀓𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀕𑀲𑀤𑀺𑀲𑀢𑁆𑀢𑀸, 𑀦𑀸𑀕𑁂𑀲𑀼𑀧𑀺 𑀔𑀻𑀡𑀸𑀲𑀯𑁂𑀲𑀼 𑀫𑀳𑀸𑀦𑀼𑀪𑀸𑀯𑀢𑀸𑀬 𑀘 𑀫𑀳𑀸𑀦𑀸𑀕𑀁. 𑀫𑀸𑀭𑀲𑁂𑀦𑀸𑀯𑀺𑀫𑀣𑀦𑀢𑁄 𑀫𑀳𑀸𑀯𑀺𑀓𑁆𑀓𑀦𑁆𑀢𑀢𑀸𑀬 𑀘 𑀫𑀳𑀸𑀯𑀻𑀭𑀁. 𑀫𑀳𑀸𑀚𑀼𑀢𑀺𑀦𑁆𑀢𑀺 𑀫𑀳𑀸𑀧𑀢𑀸𑀧𑀁 𑀫𑀳𑀸𑀢𑁂𑀚𑀦𑁆𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸𑀢𑀺 𑀅𑀦𑀸𑀲𑀯𑀁. 𑀲𑀩𑁆𑀩𑁂 𑀆𑀲𑀯𑀸 𑀲𑀯𑀸𑀲𑀦𑀸 𑀧𑀭𑀺𑀓𑁆𑀔𑀻𑀡𑀸 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀁. 𑀓𑀸𑀫𑀁 𑀲𑀸𑀯𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀔𑀻𑀡𑀸𑀲𑀯𑀸𑀯, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀏𑀯 𑀧𑀦 𑀲𑀯𑀸𑀲𑀦𑁂 𑀆𑀲𑀯𑁂 𑀔𑁂𑀧𑁂𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀸𑀲𑀯’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑁂 𑀆𑀲𑀯𑀸 𑀲𑀯𑀸𑀲𑀦𑀸 𑀧𑀭𑀺𑀓𑁆𑀔𑀻𑀡𑀸 𑀏𑀢𑀲𑁆𑀲𑀸𑀢𑀺 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡’’𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸𑀭𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀢𑀸𑀬 𑀓𑀼𑀢𑁄𑀘𑀺𑀧𑀺 ¶ 𑀪𑀬𑀸𑀪𑀸𑀯𑀢𑁄 𑀅𑀓𑀼𑀢𑁄𑀪𑀬𑀁, 𑀏𑀯𑀭𑀽𑀧𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀬𑀁 𑀬𑀲𑁆𑀫𑀸 𑀅𑀤𑁆𑀤𑀲𑀸𑀲𑀺𑀁, 𑀢𑀲𑁆𑀫𑀸 𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀻𑀢𑀺 𑀬𑁄𑀚𑀦𑀸.

𑀇𑀤𑀸𑀦𑀺 𑀲𑀢𑁆𑀣𑀼 𑀤𑀲𑁆𑀲𑀦𑁂𑀦 𑀅𑀢𑁆𑀢𑀦𑀸 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀓𑀜𑁆𑀚𑀺𑀬𑀧𑀼𑀡𑁆𑀡𑀮𑀸𑀩𑀼 𑀯𑀺𑀬 𑀢𑀓𑁆𑀓𑀪𑀭𑀺𑀢𑀘𑀸𑀝𑀺 𑀯𑀺𑀬 𑀯𑀲𑀸𑀧𑀻𑀢𑀧𑀺𑀮𑁄𑀢𑀺𑀓𑀸 𑀯𑀺𑀬 𑀘 𑀲𑀁𑀓𑀺𑀮𑁂𑀲𑀯𑀢𑁆𑀣𑀽𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀘𑀺𑀭𑀓𑀸𑀮𑀁 𑀲𑀁𑀓𑀺𑀮𑀺𑀝𑁆𑀞𑀁. 𑀕𑀤𑁆𑀤𑀼𑀮𑀩𑀦𑁆𑀥𑀺𑀢𑀁 𑀯𑀺𑀬 𑀣𑀫𑁆𑀪𑁂 𑀲𑀸𑀭𑀫𑁂𑀬𑀁 𑀲𑀓𑁆𑀓𑀸𑀬𑀣𑀫𑁆𑀪𑁂 𑀤𑀺𑀝𑁆𑀞𑀺𑀲𑀦𑁆𑀤𑀸𑀦𑁂𑀦, 𑀤𑀺𑀝𑁆𑀞𑀺𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀁 𑀩𑀤𑁆𑀥𑀁, 𑀢𑀢𑁄 𑀯𑀺𑀫𑁄𑀘𑁂𑀦𑁆𑀢𑁄 𑀘 𑀅𑀪𑀺𑀚𑁆𑀛𑀸𑀤𑀻𑀳𑀺 𑀲𑀩𑁆𑀩𑀕𑀦𑁆𑀣𑁂 𑀳𑀺 𑀫𑀁 𑀲𑁂𑀦𑀓𑀁 𑀅𑀭𑀺𑀬𑀫𑀕𑁆𑀕𑀳𑀢𑁆𑀣𑁂𑀦, 𑀯𑀺𑀫𑁄𑀘𑀬𑀺 𑀯𑀢 𑀲𑁄 𑀪𑀕𑀯𑀸 𑀫𑀬𑁆𑀳𑀁 𑀲𑀢𑁆𑀣𑀸𑀢𑀺 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀸𑀤𑀁 𑀧𑀯𑁂𑀤𑁂𑀢𑀺.

𑀲𑁂𑀦𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀫𑁆𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑁄 𑀤𑀦𑁆𑀥𑀓𑀸𑀮𑁂𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀫𑁆𑀪𑀽𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 ¶ 𑀢𑀻𑀭𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄. 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀯𑀦𑁆𑀤𑀺𑀢𑁆𑀯𑀸 𑀓𑀢𑀜𑁆𑀚𑀮𑀻 𑀅𑀚𑁆𑀚𑀼𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀫𑁆𑀪𑀽𑀢𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀙𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 ¶ 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁨.𑁨𑁮-𑁩𑁬) 𑁋

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑁄 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀕𑀳𑁂𑀢𑁆𑀯𑀸 𑀅𑀚𑁆𑀚𑀼𑀦𑀁 𑀧𑀼𑀧𑁆𑀨𑀁, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀙𑀢𑁆𑀢𑀺𑀲𑀓𑁆𑀔𑀢𑁆𑀢𑀼𑀁 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀤𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀫𑀳𑀸𑀭𑀚𑁆𑀚𑀫𑀓𑀸𑀭𑀬𑀺𑀁.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀼𑀔𑁂𑀢𑁆𑀢𑁂 𑀯𑀧𑁆𑀧𑀺𑀢𑀁 𑀩𑀻𑀚𑀁, 𑀲𑀬𑀫𑁆𑀪𑀼𑀫𑁆𑀳𑀺 𑀅𑀳𑁄 𑀫𑀫.

‘‘𑀓𑀼𑀲𑀮𑀁 𑀯𑀺𑀚𑁆𑀚𑀢𑁂 𑀫𑀬𑁆𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀧𑀽𑀚𑀸𑀭𑀳𑁄 𑀅𑀳𑀁 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑁄 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑁂𑀲𑀼 𑀯𑀚𑁆𑀚𑀺𑀧𑀼𑀢𑁆𑀢𑀓𑁂𑀲𑀼 𑀤𑀲 𑀯𑀢𑁆𑀣𑀽𑀦𑀺 𑀧𑀕𑁆𑀕𑀬𑁆𑀳 𑀞𑀺𑀢𑁂𑀲𑀼 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁂𑀦 𑀬𑀲𑀢𑁆𑀣𑁂𑀭𑁂𑀦 𑀉𑀲𑁆𑀲𑀸𑀳𑀺𑀢𑁂𑀳𑀺 𑀲𑀢𑁆𑀢𑀲𑀢𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀢𑀁 𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀧𑀕𑁆𑀕𑀡𑁆𑀳𑀦𑁆𑀢𑁂𑀳𑀺 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀢𑁂 𑀢𑁂𑀲𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀉𑀤𑁆𑀥𑀫𑁆𑀫𑀉𑀩𑁆𑀩𑀺𑀦𑀬𑀤𑀻𑀧𑀦𑁂 𑀥𑀫𑁆𑀫𑀲𑀁𑀯𑁂𑀕𑁂𑀦 𑀣𑁂𑀭𑁄 𑁋

𑁨𑁯𑁧.

‘‘𑀬𑁄 𑀤𑀦𑁆𑀥𑀓𑀸𑀮𑁂 𑀢𑀭𑀢𑀺, 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀬𑁂;

𑀅𑀬𑁄𑀦𑀺𑀲𑀁𑀯𑀺𑀥𑀸𑀦𑁂𑀦, 𑀩𑀸𑀮𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁨𑁯𑁨.

‘‘𑀢𑀲𑁆𑀲𑀢𑁆𑀣𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸;

𑀆𑀬𑀲𑀓𑁆𑀬𑀜𑁆𑀘 𑀧𑀧𑁆𑀧𑁄𑀢𑀺, 𑀫𑀺𑀢𑁆𑀢𑁂𑀳𑀺 𑀘 𑀯𑀺𑀭𑀼𑀚𑁆𑀛𑀢𑀺.

𑁨𑁯𑁩.

‘‘𑀬𑁄 ¶ 𑀤𑀦𑁆𑀥𑀓𑀸𑀮𑁂 𑀤𑀦𑁆𑀥𑁂𑀢𑀺, 𑀢𑀭𑀡𑀻𑀬𑁂 𑀘 𑀢𑀸𑀭𑀬𑁂;

𑀬𑁄𑀦𑀺𑀲𑁄 𑀲𑀁𑀯𑀺𑀥𑀸𑀦𑁂𑀦, 𑀲𑀼𑀔𑀁 𑀧𑀧𑁆𑀧𑁄𑀢𑀺 𑀧𑀡𑁆𑀟𑀺𑀢𑁄.

𑁨𑁯𑁪.

‘‘𑀢𑀲𑁆𑀲𑀢𑁆𑀣𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸;

𑀬𑀲𑁄 𑀓𑀺𑀢𑁆𑀢𑀺𑀜𑁆𑀘 𑀧𑀧𑁆𑀧𑁄𑀢𑀺, 𑀫𑀺𑀢𑁆𑀢𑁂𑀳𑀺 𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀪𑀡𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀬𑁄 𑀤𑀦𑁆𑀥𑀓𑀸𑀮𑁂 𑀢𑀭𑀢𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀯𑀢𑁆𑀣𑀼𑀲𑁆𑀫𑀺𑀁 𑁋 ‘‘𑀓𑀧𑁆𑀧𑀢𑀺 𑀦𑀼 𑀔𑁄, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀬𑀸𑀯 𑀯𑀺𑀬𑀢𑁆𑀢𑀁 𑀯𑀺𑀦𑀬𑀥𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀓𑀼𑀓𑁆𑀓𑀼𑀘𑁆𑀘𑀁 𑀦 𑀯𑀺𑀦𑁄𑀤𑁂𑀢𑀺, 𑀢𑀸𑀯 𑀤𑀦𑁆𑀥𑀓𑀸𑀮𑁂 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀤𑀦𑁆𑀥𑀸𑀬𑀺𑀢𑀩𑁆𑀩𑀲𑀫𑀬𑁂 𑀢𑀭𑀢𑀺 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺. 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀬𑁂𑀢𑀺 𑀕𑀳𑀝𑁆𑀞𑀲𑁆𑀲 𑀢𑀸𑀯 𑀲𑀭𑀡𑀕𑀫𑀦𑀲𑀻𑀮𑀲𑀫𑀸𑀤𑀸𑀦𑀸𑀤𑀺𑀓𑁂, 𑀧𑀩𑁆𑀩𑀚𑀺𑀢𑀲𑁆𑀲 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑀸𑀤𑀺𑀓𑁂 ¶ 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁂 𑀘 𑀢𑀭𑀺𑀢𑀩𑁆𑀩𑁂 𑀲𑀫𑁆𑀧𑀢𑁆𑀢𑁂 𑀲𑀻𑀖𑀁 𑀢𑀁 𑀓𑀺𑀘𑁆𑀘𑀁 𑀅𑀦𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑁋 ‘‘𑀆𑀕𑀫𑀦𑀫𑀸𑀲𑁂 𑀧𑀓𑁆𑀔𑁂 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀦𑁆𑀥𑀸𑀬𑁂𑀬𑁆𑀬, 𑀢𑀁 𑀓𑀺𑀘𑁆𑀘𑀁 𑀅𑀓𑀭𑁄𑀦𑁆𑀢𑁄𑀯 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀬𑁆𑀬. 𑀅𑀬𑁄𑀦𑀺𑀲𑀁𑀯𑀺𑀥𑀸𑀦𑁂𑀦𑀸𑀢𑀺 𑀏𑀯𑀁 𑀤𑀦𑁆𑀥𑀸𑀬𑀺𑀢𑀩𑁆𑀩𑁂 𑀢𑀭𑀦𑁆𑀢𑁄 𑀢𑀭𑀺𑀢𑀩𑁆𑀩𑁂 𑀘 𑀤𑀦𑁆𑀥𑀸𑀬𑀦𑁆𑀢𑁄 𑀅𑀦𑀼𑀧𑀸𑀬𑀲𑀁𑀯𑀺𑀥𑀸𑀦𑁂𑀦 𑀉𑀧𑀸𑀬𑀲𑀁𑀯𑀺𑀥𑀸𑀦𑀸𑀪𑀸𑀯𑁂𑀦 𑀩𑀸𑀮𑁄, 𑀫𑀦𑁆𑀤𑀩𑀼𑀤𑁆𑀥𑀺𑀓𑁄 𑀧𑀼𑀕𑁆𑀕𑀮𑁄, 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀁 𑀅𑀦𑀢𑁆𑀣𑀁 𑀧𑀸𑀧𑀼𑀡𑀸𑀢𑀺.

𑀢𑀲𑁆𑀲𑀢𑁆𑀣𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀢𑀲𑁆𑀲 𑀢𑀣𑀸𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀸 𑀅𑀢𑁆𑀣𑀸 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀺𑀫𑀸 𑀯𑀺𑀬, 𑀧𑀭𑀺𑀳𑀸𑀬𑀦𑁆𑀢𑀺 𑀤𑀺𑀯𑀲𑁂 ¶ 𑀤𑀺𑀯𑀲𑁂 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀦𑁆𑀢𑀺. ‘‘𑀅𑀲𑀼𑀓𑁄 𑀧𑀼𑀕𑁆𑀕𑀮𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄’’𑀢𑀺𑀆𑀤𑀺𑀦𑀸. 𑀆𑀬𑀲𑀓𑁆𑀬𑀁 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀢𑀁 𑀧𑀧𑁆𑀧𑁄𑀢𑀺 𑀧𑀸𑀧𑀼𑀡𑀸𑀢𑀺. 𑀫𑀺𑀢𑁆𑀢𑁂𑀳𑀺 𑀘 𑀯𑀺𑀭𑀼𑀚𑁆𑀛𑀢𑀻𑀢𑀺 ‘‘𑀏𑀯𑀁 𑀧𑀝𑀺𑀧𑀚𑁆𑀚, 𑀫𑀸 𑀏𑀯𑀁 𑀧𑀝𑀺𑀧𑀚𑁆𑀚𑀸’’𑀢𑀺 𑀑𑀯𑀸𑀤𑀤𑀸𑀬𑀓𑁂𑀳𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀳𑀺 ‘‘𑀅𑀯𑀘𑀦𑀻𑀬𑀸 𑀫𑀬’’𑀦𑁆𑀢𑀺 𑀑𑀯𑀸𑀤𑀲𑁆𑀲 𑀅𑀦𑀸𑀤𑀸𑀦𑁂𑀦𑁂𑀯 𑀯𑀺𑀭𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺.

𑀲𑁂𑀲𑀕𑀸𑀣𑀸𑀤𑁆𑀯𑀬𑀲𑁆𑀲 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦𑁂𑀢𑁆𑀣 𑁋 ‘‘𑀢𑀭𑀢𑀺 𑀤𑀦𑁆𑀥𑀬𑁂’’𑀢𑀺𑀧𑀤𑀸𑀦𑀁 𑀅𑀢𑁆𑀣𑀪𑀸𑀯𑁂𑀦 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑁂 𑀉𑀤𑁆𑀥𑀭𑀦𑁆𑀢𑀺. 𑀢𑀁 𑀧𑀘𑁆𑀙𑀺𑀫𑀕𑀸𑀣𑀸𑀲𑀼 𑀬𑀼𑀚𑁆𑀚𑀢𑀺. 𑀧𑀼𑀭𑀺𑀫𑀸 𑀳𑀺 𑀤𑁆𑀯𑁂 𑀕𑀸𑀣𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀭𑀺𑀢𑀩𑁆𑀩𑀁 𑀲𑀫𑀡𑀥𑀫𑁆𑀫𑀁 𑀅𑀓𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀦𑀺𑀓𑁆𑀓𑀟𑁆𑀠𑀺𑀢𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀲𑀦𑁆𑀥𑀸𑀬 𑀣𑁂𑀭𑁂𑀦 𑀯𑀼𑀢𑁆𑀢𑀸. 𑀧𑀘𑁆𑀙𑀺𑀫𑀸 𑀧𑀦 𑀅𑀢𑁆𑀢𑀲𑀤𑀺𑀲𑁂 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁂 𑀲𑀓𑀢𑁆𑀣𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀞𑀺𑀢𑁂𑀢𑀺.

𑀲𑀫𑁆𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀭𑀸𑀳𑀼𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀉𑀪𑀬𑁂𑀦𑀸𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ¶ 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀲𑁂𑀦𑀸𑀲𑀦𑀯𑀺𑀲𑁄𑀥𑀦𑀯𑀺𑀚𑁆𑀚𑁄𑀢𑀦𑀸𑀤𑀺𑀓𑀁 𑀉𑀴𑀸𑀭𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀧𑀡𑀺𑀥𑀸𑀦𑀫𑀓𑀸𑀲𑀺. 𑀲𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀁 𑀧𑀝𑀺𑀘𑁆𑀘 𑀬𑀲𑁄𑀥𑀭𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀭𑀸𑀳𑀼𑀮𑁄𑀢𑀺 𑀮𑀤𑁆𑀥𑀦𑀸𑀫𑁄 𑀫𑀳𑀢𑀸 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀺, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁 𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁦𑁫) 𑀆𑀕𑀢𑀫𑁂𑀯. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀼𑀮𑀤𑁆𑀥𑁄𑀯𑀸𑀤𑁄 𑀧𑀭𑀺𑀧𑀓𑁆𑀓𑀜𑀸𑀡𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁨.𑁬𑁮-𑁮𑁫) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀢𑁆𑀢𑀪𑀽𑀫𑀫𑁆𑀳𑀺 𑀧𑀸𑀲𑀸𑀤𑁂, 𑀆𑀤𑀸𑀲𑀁 𑀲𑀦𑁆𑀣𑀭𑀺𑀁 𑀅𑀳𑀁.

‘‘𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀧𑀭𑀺𑀓𑀺𑀡𑁆𑀡𑁄 𑀫𑀳𑀸𑀫𑀼𑀦𑀺;

𑀉𑀧𑀸𑀕𑀫𑀺 𑀕𑀦𑁆𑀥𑀓𑀼𑀝𑀺𑀁, 𑀤𑁆𑀯𑀺𑀧𑀤𑀺𑀦𑁆𑀤𑁄 𑀦𑀭𑀸𑀲𑀪𑁄.

‘‘𑀯𑀺𑀭𑁄𑀘𑁂𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀁, 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀬𑁂𑀦𑀸𑀬𑀁 𑀚𑁄𑀢𑀺𑀢𑀸 𑀲𑁂𑀬𑁆𑀬𑀸, 𑀆𑀤𑀸𑀲𑁄𑀯 𑀲𑀼𑀲𑀦𑁆𑀣𑀢𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

‘‘𑀲𑁄𑀡𑁆𑀡𑀫𑀬𑀸 𑀭𑀽𑀧𑀺𑀫𑀬𑀸, 𑀅𑀣𑁄 𑀯𑁂𑀴𑀼𑀭𑀺𑀬𑀸𑀫𑀬𑀸;

𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺 𑀧𑀸𑀲𑀸𑀤𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀘𑀢𑀼𑀲𑀝𑁆𑀞𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀪𑀯𑀺𑀲𑁆𑀲𑀢𑀺 𑀅𑀦𑀦𑁆𑀢𑀭𑀸.

‘‘𑀏𑀓𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀯𑀺𑀫𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

‘‘𑀦𑀕𑀭𑀁 𑀭𑁂𑀡𑀼𑀯𑀢𑀻 𑀦𑀸𑀫, 𑀇𑀝𑁆𑀞𑀓𑀸𑀳𑀺 𑀲𑀼𑀫𑀸𑀧𑀺𑀢𑀁;

𑀆𑀬𑀸𑀫𑀢𑁄 𑀢𑀻𑀡𑀺 𑀲𑀢𑀁, 𑀘𑀢𑀼𑀭𑀲𑁆𑀲𑀲𑀫𑀸𑀬𑀼𑀢𑀁.

‘‘𑀲𑀼𑀤𑀲𑁆𑀲𑀦𑁄 𑀦𑀸𑀫 𑀧𑀸𑀲𑀸𑀤𑁄, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑁄;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑁄, 𑀲𑀢𑁆𑀢𑀭𑀢𑀦𑀪𑀽𑀲𑀺𑀢𑁄.

‘‘𑀤𑀲𑀲𑀤𑁆𑀤𑀸𑀯𑀺𑀯𑀺𑀢𑁆𑀢𑀁 ¶ 𑀢𑀁, 𑀯𑀺𑀚𑁆𑀚𑀸𑀥𑀭𑀲𑀫𑀸𑀓𑀼𑀮𑀁;

𑀲𑀼𑀤𑀲𑁆𑀲𑀦𑀁𑀯 𑀦𑀕𑀭𑀁, 𑀤𑁂𑀯𑀢𑀸𑀦𑀁 𑀪𑀯𑀺𑀲𑁆𑀲𑀢𑀺.

‘‘𑀧𑀪𑀸 ¶ 𑀦𑀺𑀕𑁆𑀕𑀘𑁆𑀙𑀢𑁂 𑀢𑀲𑁆𑀲, 𑀉𑀕𑁆𑀕𑀘𑁆𑀙𑀦𑁆𑀢𑁂𑀯 𑀲𑀽𑀭𑀺𑀬𑁂;

𑀯𑀺𑀭𑁄𑀘𑁂𑀲𑁆𑀲𑀢𑀺 𑀢𑀁 𑀦𑀺𑀘𑁆𑀘𑀁, 𑀲𑀫𑀦𑁆𑀢𑀸 𑀅𑀝𑁆𑀞𑀬𑁄𑀚𑀦𑀁.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀼𑀲𑀺𑀢𑀸 𑀲𑁄 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀅𑀢𑁆𑀭𑀚𑁄 𑀲𑁄 𑀪𑀯𑀺𑀲𑁆𑀲𑀢𑀺.

‘‘𑀲𑀘𑁂𑀯𑀲𑁂𑀬𑁆𑀬 𑀅𑀕𑀸𑀭𑀁, 𑀘𑀓𑁆𑀓𑀯𑀢𑁆𑀢𑀻 𑀪𑀯𑁂𑀬𑁆𑀬 𑀲𑁄;

𑀅𑀝𑁆𑀞𑀸𑀦𑀫𑁂𑀢𑀁 𑀬𑀁 𑀢𑀸𑀤𑀻, 𑀅𑀕𑀸𑀭𑁂 𑀭𑀢𑀺𑀫𑀚𑁆𑀛𑀕𑀸.

‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀸𑀭𑀫𑁆𑀳𑀸, 𑀧𑀩𑁆𑀩𑀚𑀺𑀲𑁆𑀲𑀢𑀺 𑀲𑀼𑀩𑁆𑀩𑀢𑁄;

𑀭𑀸𑀳𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀅𑀭𑀳𑀸 𑀲𑁄 𑀪𑀯𑀺𑀲𑁆𑀲𑀢𑀺.

‘‘𑀓𑀺𑀓𑀻𑀯 𑀅𑀡𑁆𑀟𑀁 𑀭𑀓𑁆𑀔𑁂𑀬𑁆𑀬, 𑀘𑀸𑀫𑀭𑀻 𑀯𑀺𑀬 𑀯𑀸𑀮𑀥𑀺𑀁;

𑀦𑀺𑀧𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀫𑀫𑀁 𑀭𑀓𑁆𑀔𑀺 𑀫𑀳𑀸𑀫𑀼𑀦𑀺.

‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁨𑁯𑁫.

‘‘𑀉𑀪𑀬𑁂𑀦𑁂𑀯 ¶ 𑀲𑀫𑁆𑀧𑀦𑁆𑀦𑁄, 𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽;

𑀬𑀜𑁆𑀘𑀫𑁆𑀳𑀺 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲, 𑀬𑀜𑁆𑀘 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸.

𑁨𑁯𑁬.

‘‘𑀬𑀜𑁆𑀘 𑀫𑁂 𑀆𑀲𑀯𑀸 𑀔𑀻𑀡𑀸, 𑀬𑀜𑁆𑀘 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄;

𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀢𑁂𑀯𑀺𑀚𑁆𑀚𑁄 𑀅𑀫𑀢𑀤𑁆𑀤𑀲𑁄.

𑁨𑁯𑁭.

‘‘𑀓𑀸𑀫𑀦𑁆𑀥𑀸 𑀚𑀸𑀮𑀧𑀘𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂.

𑁨𑁯𑁮.

‘‘𑀢𑀁 ¶ 𑀓𑀸𑀫𑀁 𑀅𑀳𑀫𑀼𑀚𑁆𑀛𑀺𑀢𑁆𑀯𑀸, 𑀙𑁂𑀢𑁆𑀯𑀸 𑀫𑀸𑀭𑀲𑁆𑀲 𑀩𑀦𑁆𑀥𑀦𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀪𑀬𑁂𑀦𑁂𑀯 𑀲𑀫𑁆𑀧𑀦𑁆𑀦𑁄𑀢𑀺 𑀚𑀸𑀢𑀺𑀲𑀫𑁆𑀧𑀤𑀸, 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀸𑀢𑀺 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽𑀢𑀺 ‘‘𑀭𑀸𑀳𑀼𑀮𑀪𑀤𑁆𑀤𑁄’’𑀢𑀺 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀜𑁆𑀚𑀸𑀦𑀦𑁆𑀢𑀺. 𑀢𑀲𑁆𑀲 𑀳𑀺 ¶ 𑀚𑀸𑀢𑀲𑀸𑀲𑀦𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀁 𑀉𑀧𑀸𑀤𑀸𑀬 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀭𑀸𑀳𑀼𑀮𑁄’’𑀢𑀺 𑀦𑀸𑀫𑀁 𑀕𑀡𑁆𑀳𑀺. 𑀢𑀢𑁆𑀣 𑀆𑀤𑀺𑀢𑁄 𑀧𑀺𑀢𑀭𑀸 𑀯𑀼𑀢𑁆𑀢𑀧𑀭𑀺𑀬𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀆𑀳 𑁋 ‘‘𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽’’𑀢𑀺. 𑀪𑀤𑁆𑀤𑁄𑀢𑀺 𑀘 𑀧𑀲𑀁𑀲𑀸𑀯𑀘𑀦𑀫𑁂𑀢𑀁.

𑀇𑀤𑀸𑀦𑀺 𑀢𑀁 𑀉𑀪𑀬𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀜𑁆𑀘𑀫𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀦𑁆𑀢𑀺 𑀬𑀲𑁆𑀫𑀸. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀅𑀫𑁆𑀳𑀺 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀑𑀭𑀲𑀧𑀼𑀢𑁆𑀢𑁄 𑀅𑀫𑁆𑀳𑀺. 𑀥𑀫𑁆𑀫𑁂𑀲𑀽𑀢𑀺 𑀮𑁄𑀓𑀺𑀬𑁂𑀲𑀼 𑀮𑁄𑀓𑀼𑀢𑁆𑀢𑀭𑁂𑀲𑀼 𑀘 𑀥𑀫𑁆𑀫𑁂𑀲𑀼, 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀫𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀸 𑀘 𑀅𑀫𑁆𑀳𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀼𑀦 𑀅𑀧𑀭𑀸𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀅𑀢𑁆𑀢𑀦𑀺 𑀉𑀪𑀬𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑀜𑁆𑀘 𑀫𑁂 𑀆𑀲𑀯𑀸 𑀔𑀻𑀡𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀤𑀓𑁆𑀔𑀺𑀡𑁂𑀬𑁆𑀬𑁄𑀢𑀺 𑀤𑀓𑁆𑀔𑀺𑀡𑀸𑀭𑀳𑁄. 𑀅𑀫𑀢𑀤𑁆𑀤𑀲𑁄𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀤𑀲𑁆𑀲𑀸𑀯𑀻. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀤𑀸𑀦𑀺 𑀬𑀸𑀬 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂𑀦 𑀲𑀢𑁆𑀢𑀓𑀸𑀬𑁄 𑀓𑀼𑀫𑀺𑀦𑁂 𑀩𑀦𑁆𑀥𑀫𑀘𑁆𑀙𑀸 𑀯𑀺𑀬 𑀲𑀁𑀲𑀸𑀭𑁂 𑀧𑀭𑀺𑀯𑀢𑁆𑀢𑀢𑀺, 𑀢𑀁 𑀉𑀪𑀬𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀦𑁆𑀥𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑀸𑀫𑁂𑀳𑀺 𑀓𑀸𑀫𑁂𑀲𑀼 𑀯𑀸 𑀅𑀦𑁆𑀥𑀸𑀢𑀺 𑀓𑀸𑀫𑀦𑁆𑀥𑀸. ‘‘𑀙𑀦𑁆𑀤𑁄 𑀭𑀸𑀕𑁄’’𑀢𑀺𑀆𑀤𑀺𑀯𑀺𑀪𑀸𑀕𑁂𑀳𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮) 𑀓𑀺𑀮𑁂𑀲𑀓𑀸𑀫𑁂𑀳𑀺 𑀭𑀽𑀧𑀸𑀤𑀻𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀅𑀦𑁆𑀥𑀻𑀓𑀢𑀸. 𑀚𑀸𑀮𑀧𑀘𑁆𑀙𑀦𑁆𑀦𑀸𑀢𑀺 𑀲𑀓𑀮𑀁 𑀪𑀯𑀢𑁆𑀢𑀬𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂𑀦 𑀯𑀺𑀲𑀢𑁆𑀢𑀺𑀓𑀸𑀚𑀸𑀮𑁂𑀦 𑀧𑀓𑀸𑀭𑀢𑁄 𑀙𑀦𑁆𑀦𑀸 𑀧𑀮𑀺𑀕𑀼𑀡𑁆𑀞𑀺𑀢𑀸. 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸𑀢𑀺 𑀢𑀢𑁄 𑀏𑀯 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀙𑀤𑀦𑁂𑀦 𑀙𑀸𑀤𑀺𑀢𑀸 𑀦𑀺𑀯𑀼𑀢𑀸 𑀲𑀩𑁆𑀩𑀲𑁄 𑀧𑀝𑀺𑀓𑀼𑀚𑁆𑀚𑀺𑀢𑀸. 𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂𑀢𑀺 𑀓𑀼𑀫𑀺𑀦𑀸𑀫𑀼𑀔𑁂 𑀫𑀘𑁆𑀙𑀩𑀦𑁆𑀥𑀸𑀦𑀁 𑀫𑀘𑁆𑀙𑀧𑀲𑀺𑀩𑁆𑀩𑀓𑀫𑀼𑀔𑁂 𑀩𑀤𑁆𑀥𑀸 𑀫𑀘𑁆𑀙𑀸 𑀯𑀺𑀬 𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀫𑀸𑀭𑁂𑀦 ¶ 𑀬𑁂𑀦 ¶ 𑀓𑀸𑀫𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀇𑀫𑁂 𑀲𑀢𑁆𑀢𑀸 𑀢𑀢𑁄 𑀦 𑀦𑀺𑀕𑀘𑁆𑀙𑀦𑁆𑀢𑀺 𑀅𑀦𑁆𑀢𑁄𑀩𑀦𑁆𑀥𑀦𑀕𑀢𑀸𑀯 𑀳𑁄𑀦𑁆𑀢𑀺.

𑀢𑀁 𑀢𑀣𑀸𑀭𑀽𑀧𑀁 𑀓𑀸𑀫𑀁 𑀩𑀦𑁆𑀥𑀦𑀪𑀽𑀢𑀁 𑀉𑀚𑁆𑀛𑀺𑀢𑁆𑀯𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀸 𑀧𑀳𑀸𑀬 𑀓𑀺𑀮𑁂𑀲𑀫𑀸𑀭𑀲𑁆𑀲 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀧𑀼𑀦 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀅𑀦𑀯𑀲𑁂𑀲𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀏𑀯 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀫𑀽𑀮𑁂𑀦 𑀲𑀫𑀽𑀮𑀁, 𑀓𑀸𑀫𑀢𑀡𑁆𑀳𑀸𑀤𑀺𑀓𑀁 𑀢𑀡𑁆𑀳𑀁 𑀅𑀩𑁆𑀩𑀼𑀬𑁆𑀳 𑀉𑀤𑁆𑀥𑀭𑀺𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀪𑀸𑀯𑀢𑁄, 𑀲𑀻𑀢𑀺𑀪𑀽𑀢𑁄 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀼𑀢𑁄, 𑀅𑀳𑀁 𑀅𑀲𑁆𑀫𑀺 𑀳𑁄𑀫𑀻𑀢𑀺 𑀅𑀢𑁆𑀣𑁄.

𑀭𑀸𑀳𑀼𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀘𑀦𑁆𑀤𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀚𑀸𑀢𑀭𑀽𑀧𑁂𑀦𑀸𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀘𑀦𑁆𑀤𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀩𑁆𑀩𑀢𑀦𑁆𑀢𑀭𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀼𑀝𑀚𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀦𑁆𑀤𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀏𑀓𑀁 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀲𑀸𑀯𑀢𑁆𑀣𑀺𑀁 𑀆𑀕𑀢𑁄 𑀲𑀼𑀲𑀸𑀦𑁂 𑀯𑀲𑀢𑀺. 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀤𑀸𑀭𑀓𑀁 𑀆𑀤𑀸𑀬 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺 𑁋 ‘‘𑀇𑀢𑁆𑀣𑀺𑀓𑀼𑀢𑁆𑀢𑀸𑀤𑀻𑀳𑀺 𑀦𑀁 𑀧𑀮𑁄𑀪𑁂𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺𑀲𑁆𑀲𑀸 𑀅𑀯𑀺𑀲𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀬𑀣𑀸𑀭𑀤𑁆𑀥𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁨.𑁩𑁭-𑁪𑁩) 𑁋

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ , 𑀯𑀲𑀮𑁄 𑀦𑀸𑀫 𑀧𑀩𑁆𑀩𑀢𑁄;

𑀩𑀼𑀤𑁆𑀥𑁄 𑀲𑀼𑀤𑀲𑁆𑀲𑀦𑁄 𑀦𑀸𑀫, 𑀯𑀲𑀢𑁂 𑀧𑀩𑁆𑀩𑀢𑀦𑁆𑀢𑀭𑁂.

‘‘𑀧𑀼𑀧𑁆𑀨𑀁 𑀳𑁂𑀫𑀯𑀦𑁆𑀢𑀁 𑀫𑀬𑁆𑀳, 𑀯𑁂𑀳𑀸𑀲𑀁 𑀅𑀕𑀫𑀸𑀲𑀳𑀁;

𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

‘‘𑀧𑀼𑀧𑁆𑀨𑀁 𑀓𑀼𑀝𑀚𑀫𑀸𑀤𑀸𑀬, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀙𑀴𑀪𑀺𑀜𑁆𑀜𑁄 𑀧𑀦 𑀳𑀼𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀢𑀲𑁆𑀲𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀁 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀯𑀲𑀺𑀢𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀳𑀸𑀬𑀪𑀺𑀓𑁆𑀔𑀽𑀳𑀺 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀓𑀘𑁆𑀘𑀺 𑀢𑀬𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀤𑁆𑀥𑀸𑀦𑀻’’𑀢𑀺 𑀧𑀼𑀝𑁆𑀞𑁄 𑁋

𑁨𑁯𑁯.

‘‘𑀚𑀸𑀢𑀭𑀽𑀧𑁂𑀦 𑀲𑀜𑁆𑀙𑀦𑁆𑀦𑀸, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸;

𑀅𑀗𑁆𑀓𑁂𑀦 𑀧𑀼𑀢𑁆𑀢𑀫𑀸𑀤𑀸𑀬, 𑀪𑀭𑀺𑀬𑀸 𑀫𑀁 𑀉𑀧𑀸𑀕𑀫𑀺.

𑁩𑁦𑁦.

‘‘𑀢𑀜𑁆𑀘 ¶ ¶ 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀲𑀓𑀧𑀼𑀢𑁆𑀢𑀲𑁆𑀲 𑀫𑀸𑀢𑀭𑀁;

𑀅𑀮𑀗𑁆𑀓𑀢𑀁 𑀲𑀼𑀯𑀲𑀦𑀁, 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀁.

𑁩𑁦𑁧.

‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁩𑁦𑁨.

‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀚𑀸𑀢𑀭𑀽𑀧𑁂𑀦 𑀲𑀜𑁆𑀙𑀦𑁆𑀦𑀸𑀢𑀺 𑀚𑀸𑀢𑀭𑀽𑀧𑀫𑀬𑁂𑀦 𑀲𑀻𑀲𑀽𑀧𑀕𑀸𑀤𑀺𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀡𑀯𑀲𑁂𑀦 𑀧𑀝𑀺𑀘𑁆𑀙𑀸𑀤𑀺𑀢𑀲𑀭𑀻𑀭𑀸, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸𑀢𑀺 𑀬𑀣𑀸𑀭𑀳𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 𑀅𑀢𑁆𑀢𑀦𑁄 𑀤𑀸𑀲𑀺𑀕𑀡𑁂𑀦 ¶ 𑀧𑀼𑀭𑀢𑁄 𑀓𑀢𑀸 𑀧𑀭𑀺𑀯𑀸𑀭𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀗𑁆𑀓𑁂𑀦 𑀧𑀼𑀢𑁆𑀢𑀫𑀸𑀤𑀸𑀬𑀸𑀢𑀺 ‘‘𑀅𑀧𑀺 𑀦𑀸𑀫 𑀧𑀼𑀢𑁆𑀢𑀫𑁆𑀧𑀺 𑀤𑀺𑀲𑁆𑀯𑀸 𑀕𑁂𑀳𑀲𑁆𑀲𑀺𑀢𑀲𑀸𑀢𑁄 𑀪𑀯𑁂𑀬𑁆𑀬𑀸’’𑀢𑀺 𑀧𑀼𑀢𑁆𑀢𑀁 𑀅𑀢𑁆𑀢𑀦𑁄 𑀅𑀗𑁆𑀓𑁂𑀦 𑀕𑀳𑁂𑀢𑁆𑀯𑀸.

𑀆𑀬𑀦𑁆𑀢𑀺𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀺𑀁. 𑀲𑀓𑀧𑀼𑀢𑁆𑀢𑀲𑁆𑀲 𑀫𑀸𑀢𑀭𑀦𑁆𑀢𑀺 𑀫𑀫 𑀑𑀭𑀲𑀧𑀼𑀢𑁆𑀢𑀲𑁆𑀲 𑀚𑀦𑀦𑀺𑀁, 𑀫𑀬𑁆𑀳𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑀺𑀤𑀁 𑀣𑁂𑀭𑁄 𑀅𑀢𑁆𑀢𑀦𑁄 𑀓𑀸𑀫𑀭𑀸𑀕𑀲𑀫𑀼𑀘𑁆𑀙𑁂𑀤𑀁 𑀩𑀳𑀼𑀫𑀜𑁆𑀜𑀦𑁆𑀢𑁄 𑀯𑀤𑀢𑀺. 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣𑀸𑀢𑀺 ‘‘𑀏𑀯𑀭𑀽𑀧𑀸𑀧𑀺 𑀦𑀸𑀫 𑀲𑀫𑁆𑀧𑀢𑁆𑀢𑀺 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑁂𑀳𑀺 𑀅𑀪𑀺𑀪𑀼𑀬𑁆𑀬𑀢𑀺, 𑀅𑀳𑁄 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀅𑀥𑀼𑀯𑀸 𑀅𑀦𑀲𑁆𑀲𑀸𑀲𑀺𑀓𑀸’’𑀢𑀺 𑀏𑀯𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀦𑁆𑀤𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀥𑀫𑁆𑀫𑀺𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀥𑀫𑁆𑀫𑁄 𑀳𑀯𑁂𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀥𑀫𑁆𑀫𑀺𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀺𑀕𑀮𑀼𑀤𑁆𑀤𑀓𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑀸𑀬𑀢𑀦𑁂 𑀤𑁂𑀯𑀧𑀭𑀺𑀲𑀸𑀬 𑀲𑀢𑁆𑀣𑀼 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀤𑁂𑀲𑀦𑀸𑀬 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀮𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀥𑀫𑁆𑀫𑀺𑀓𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀚𑁂𑀢𑀯𑀦𑀧𑀝𑀺𑀕𑁆𑀕𑀳𑀡𑁂 𑀮𑀤𑁆𑀥𑀧𑁆𑀧𑀲𑀸𑀤𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀆𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 ¶ 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀸𑀯𑀢𑁆𑀢𑁂𑀲𑀼 𑀉𑀚𑁆𑀛𑀸𑀦𑀩𑀳𑀼𑀮𑁄 𑀅𑀓𑁆𑀔𑀫𑁄 𑀅𑀳𑁄𑀲𑀺. 𑀢𑁂𑀦 𑀪𑀺𑀓𑁆𑀔𑀽 𑀢𑀁 𑀯𑀺𑀳𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀏𑀓𑀓𑁄𑀯 𑀅𑀳𑁄𑀲𑀺. 𑀯𑀺𑀳𑀸𑀭𑀲𑀸𑀫𑀺𑀓𑁄 𑀉𑀧𑀸𑀲𑀓𑁄 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑁂𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑁋 ‘‘𑀦𑀸𑀬𑀁 𑀇𑀤𑀸𑀦𑁂𑀯 𑀅𑀓𑁆𑀔𑀫𑁄, 𑀧𑀼𑀩𑁆𑀩𑁂𑀧𑀺 𑀅𑀓𑁆𑀔𑀫𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀭𑀼𑀓𑁆𑀔𑀥𑀫𑁆𑀫𑀁 (𑀚𑀸. 𑁧.𑁧.𑁭𑁪) 𑀓𑀣𑁂𑀢𑁆𑀯𑀸 𑀉𑀧𑀭𑀺 𑀢𑀲𑁆𑀲 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

𑁩𑁦𑁩.

‘‘𑀥𑀫𑁆𑀫𑁄 ¶ ¶ 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻.

𑁩𑁦𑁪.

‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺𑀁.

𑁩𑁦𑁫.

‘‘𑀢𑀲𑁆𑀫𑀸 𑀳𑀺 𑀥𑀫𑁆𑀫𑁂𑀲𑀼 𑀓𑀭𑁂𑀬𑁆𑀬 𑀙𑀦𑁆𑀤𑀁, 𑀇𑀢𑀺 𑀫𑁄𑀤𑀫𑀸𑀦𑁄 𑀲𑀼𑀕𑀢𑁂𑀦 𑀢𑀸𑀤𑀺𑀦𑀸;

𑀥𑀫𑁆𑀫𑁂 𑀞𑀺𑀢𑀸 𑀲𑀼𑀕𑀢𑀯𑀭𑀲𑁆𑀲 𑀲𑀸𑀯𑀓𑀸, 𑀦𑀻𑀬𑀦𑁆𑀢𑀺 𑀥𑀻𑀭𑀸 𑀲𑀭𑀡𑀯𑀭𑀕𑁆𑀕𑀕𑀸𑀫𑀺𑀦𑁄.

𑁩𑁦𑁬.

‘‘𑀯𑀺𑀧𑁆𑀨𑁄𑀝𑀺𑀢𑁄 𑀕𑀡𑁆𑀟𑀫𑀽𑀮𑁄, 𑀢𑀡𑁆𑀳𑀸𑀚𑀸𑀮𑁄 𑀲𑀫𑀽𑀳𑀢𑁄;

𑀲𑁄 𑀔𑀻𑀡𑀲𑀁𑀲𑀸𑀭𑁄 𑀦 𑀘𑀢𑁆𑀣𑀺 𑀓𑀺𑀜𑁆𑀘𑀦𑀁,

𑀘𑀦𑁆𑀤𑁄 𑀬𑀣𑀸 𑀤𑁄𑀲𑀺𑀦𑀸 𑀧𑀼𑀡𑁆𑀡𑀫𑀸𑀲𑀺𑀬’’𑀦𑁆𑀢𑀺. 𑁋 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀥𑀫𑁆𑀫𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀲𑀼𑀘𑀭𑀺𑀢𑀥𑀫𑁆𑀫𑁄. 𑀭𑀓𑁆𑀔𑀢𑀻𑀢𑀺 𑀅𑀧𑀸𑀬𑀤𑀼𑀓𑁆𑀔𑀢𑁄 𑀭𑀓𑁆𑀔𑀢𑀺, 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀘 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀽𑀢𑁄 𑀭𑀓𑁆𑀔𑀢𑀺𑀬𑁂𑀯. 𑀥𑀫𑁆𑀫𑀘𑀸𑀭𑀺𑀦𑁆𑀢𑀺 𑀢𑀁 𑀥𑀫𑁆𑀫𑀁 𑀘𑀭𑀦𑁆𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑀁. 𑀲𑀼𑀘𑀺𑀡𑁆𑀡𑁄𑀢𑀺 𑀲𑀼𑀝𑁆𑀞𑀼 𑀘𑀺𑀡𑁆𑀡𑁄 𑀓𑀫𑁆𑀫𑀨𑀮𑀸𑀦𑀺 𑀲𑀤𑁆𑀤𑀳𑀺𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀘𑀺𑀢𑁆𑀢𑀻𑀓𑀢𑁆𑀯𑀸 𑀉𑀧𑀘𑀺𑀢𑁄. 𑀲𑀼𑀔𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀁. 𑀢𑀢𑁆𑀣 𑀮𑁄𑀓𑀺𑀬𑀁 𑀢𑀸𑀯 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁄 𑀥𑀫𑁆𑀫𑁄 𑀬𑀣𑀸𑀲𑀓𑀁 𑀲𑀼𑀔𑀁 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂 𑀆𑀯𑀳𑀢𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀇𑀢𑀭𑀁 𑀧𑀦 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑁂 𑀞𑀢𑁆𑀯𑀸 𑀘𑀺𑀡𑁆𑀡𑁄 𑀧𑀭𑀫𑁆𑀧𑀭𑀸𑀬 𑀆𑀯𑀳𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀅𑀦𑀼𑀧𑀦𑀺𑀲𑁆𑀲𑀬𑀲𑁆𑀲 𑀢𑀤𑀪𑀸𑀯𑀢𑁄. 𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻𑀢𑀺 𑀥𑀫𑁆𑀫𑀘𑀸𑀭𑀻 𑀧𑀼𑀕𑁆𑀕𑀮𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂 𑀢𑀁𑀦𑀺𑀫𑀺𑀢𑁆𑀢𑀁 𑀤𑀼𑀕𑁆𑀕𑀢𑀺𑀁 𑀦 𑀕𑀘𑁆𑀙𑀢𑀻𑀢𑀺 𑀏𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂 𑀆𑀦𑀺𑀲𑀁𑀲𑁄 𑀉𑀤𑁆𑀭𑀬𑁄𑀢𑀺 𑀅𑀢𑁆𑀣𑁄.

𑀬𑀲𑁆𑀫𑀸 ¶ 𑀥𑀫𑁆𑀫𑁂𑀦𑁂𑀯 𑀲𑀼𑀕𑀢𑀺𑀕𑀫𑀦𑀁, 𑀅𑀥𑀫𑁆𑀫𑁂𑀦𑁂𑀯 𑀘 𑀤𑀼𑀕𑁆𑀕𑀢𑀺𑀕𑀫𑀦𑀁, 𑀢𑀲𑁆𑀫𑀸 ‘‘𑀥𑀫𑁆𑀫𑁄 𑀅𑀥𑀫𑁆𑀫𑁄’’𑀢𑀺 𑀇𑀫𑁂 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀨𑀮𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀺 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀥𑀫𑁆𑀫𑁄𑀢𑀺 𑀥𑀫𑁆𑀫𑀧𑀝𑀺𑀧𑀓𑁆𑀔𑁄 𑀤𑀼𑀘𑁆𑀘𑀭𑀺𑀢𑀁. 𑀲𑀫𑀯𑀺𑀧𑀸𑀓𑀺𑀦𑁄𑀢𑀺 𑀲𑀤𑀺𑀲𑀯𑀺𑀧𑀸𑀓𑀸 𑀲𑀫𑀸𑀦𑀨𑀮𑀸.

𑀢𑀲𑁆𑀫𑀸𑀢𑀺 ¶ 𑀬𑀲𑁆𑀫𑀸 𑀥𑀫𑁆𑀫𑀸𑀥𑀫𑁆𑀫𑀸𑀦𑀁 𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀯𑀺𑀧𑀸𑀓𑀪𑁂𑀤𑁄, 𑀢𑀲𑁆𑀫𑀸. 𑀙𑀦𑁆𑀤𑀦𑁆𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁. 𑀇𑀢𑀺 𑀫𑁄𑀤𑀫𑀸𑀦𑁄 𑀲𑀼𑀕𑀢𑁂𑀦 𑀢𑀸𑀤𑀺𑀦𑀸𑀢𑀺 𑀇𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀑𑀯𑀸𑀤𑀤𑀸𑀦𑁂𑀦 𑀲𑀼𑀕𑀢𑁂𑀦 𑀲𑀫𑁆𑀫𑀕𑁆𑀕𑀢𑁂𑀦 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀦 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀦𑀸𑀫𑀯𑀢𑀸 𑀳𑁂𑀢𑀼𑀪𑀽𑀢𑁂𑀦 𑀫𑁄𑀤𑀫𑀸𑀦𑁄 ¶ 𑀢𑀼𑀝𑁆𑀞𑀺𑀁 𑀆𑀧𑀚𑁆𑀚𑀫𑀸𑀦𑁄 𑀥𑀫𑁆𑀫𑁂𑀲𑀼 𑀙𑀦𑁆𑀤𑀁 𑀓𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑁂 𑀞𑀺𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀲𑀼𑀕𑀢𑀲𑁆𑀲 𑀯𑀭𑀲𑁆𑀲 𑀲𑀼𑀕𑀢𑁂𑀲𑀼 𑀘 𑀯𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸 𑀢𑀲𑁆𑀲 𑀥𑀫𑁆𑀫𑁂 𑀞𑀺𑀢𑀸 𑀥𑀻𑀭𑀸 𑀅𑀢𑀺𑀯𑀺𑀬 𑀅𑀕𑁆𑀕𑀪𑀽𑀢𑀲𑀭𑀡𑀕𑀸𑀫𑀺𑀦𑁄 𑀢𑁂𑀦𑁂𑀯 𑀲𑀭𑀡𑀕𑀫𑀦𑀲𑀗𑁆𑀔𑀸𑀢𑁂 𑀥𑀫𑁆𑀫𑁂 𑀞𑀺𑀢𑀪𑀸𑀯𑁂𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄𑀧𑀺 𑀦𑀻𑀬𑀦𑁆𑀢𑀺 𑀦𑀺𑀲𑁆𑀲𑀭𑀦𑁆𑀢𑀺, 𑀢𑀲𑁆𑀫𑀸 𑀳𑀺 𑀥𑀫𑁆𑀫𑁂𑀲𑀼 𑀓𑀭𑁂𑀬𑁆𑀬 𑀙𑀦𑁆𑀤𑀦𑁆𑀢𑀺.

𑀏𑀯𑀁 𑀲𑀢𑁆𑀣𑀸𑀭𑀸 𑀢𑀻𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁨.𑁪𑁪-𑁫𑁦) 𑁋

‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀯𑀺𑀧𑀺𑀦𑁂 𑀅𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

‘‘𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁;

𑀅𑀲𑁆𑀲𑁄𑀲𑀺𑀁 𑀫𑀥𑀼𑀭𑀁 𑀥𑀫𑁆𑀫𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

‘‘𑀖𑁄𑀲𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀅𑀲𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑁂;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀉𑀢𑁆𑀢𑀭𑀺𑀁 𑀤𑀼𑀢𑁆𑀢𑀭𑀁 𑀪𑀯𑀁.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀖𑁄𑀲𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀢𑀣𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀁 𑀯𑀺𑀲𑁂𑀲𑀁 𑀲𑀢𑁆𑀣𑀼 𑀦𑀺𑀯𑁂𑀤𑁂𑀦𑁆𑀢𑁄 𑀘𑀭𑀺𑀫𑀕𑀸𑀣𑀸𑀬 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 ¶ 𑀯𑀺𑀧𑁆𑀨𑁄𑀝𑀺𑀢𑁄𑀢𑀺 𑀯𑀺𑀥𑀼𑀢𑁄, 𑀫𑀕𑁆𑀕𑀜𑀸𑀡𑁂𑀦 𑀧𑀝𑀺𑀦𑀺𑀲𑁆𑀲𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀕𑀡𑁆𑀟𑀫𑀽𑀮𑁄𑀢𑀺 𑀅𑀯𑀺𑀚𑁆𑀚𑀸. 𑀲𑀸 𑀳𑀺 𑀕𑀡𑁆𑀟𑀢𑀺 𑀲𑀯𑀢𑀺. ‘‘𑀕𑀡𑁆𑀟𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁦𑁩; 𑀅. 𑀦𑀺. 𑁬.𑁨𑁩; 𑁮.𑁫𑁬; 𑁯.𑁧𑁫; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁩𑁭) 𑀏𑀯𑀁 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀫𑀽𑀮𑀬𑁄𑀕𑀢𑁄, 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄, 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀓𑁆𑀓𑀧𑀪𑀺𑀚𑁆𑀚𑀦𑀢𑁄 𑀘, 𑀕𑀡𑁆𑀟𑀸𑀪𑀺𑀥𑀸𑀦𑀲𑁆𑀲 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑁆𑀲 ¶ 𑀫𑀽𑀮𑀁 𑀓𑀸𑀭𑀡𑀁 𑀢𑀡𑁆𑀳𑀸𑀚𑀸𑀮𑁄 𑀲𑀫𑀽𑀳𑀢𑁄𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑁄 𑀚𑀸𑀮𑁄 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑁄. 𑀲𑁄 𑀔𑀻𑀡𑀲𑀁𑀲𑀸𑀭𑁄 𑀦 𑀘𑀢𑁆𑀣𑀺 𑀓𑀺𑀜𑁆𑀘𑀦𑀦𑁆𑀢𑀺 𑀲𑁄 𑀅𑀳𑀁 𑀏𑀯𑀁 𑀧𑀳𑀻𑀦𑀢𑀡𑁆𑀳𑀸𑀯𑀺𑀚𑁆𑀚𑀢𑀸𑀬 𑀧𑀭𑀺𑀓𑁆𑀔𑀻𑀡𑀲𑀁𑀲𑀸𑀭𑁄 𑀧𑀳𑀻𑀦𑀪𑀯𑀫𑀽𑀮𑀢𑁆𑀢𑀸 𑀏𑀯 𑀦 𑀘𑀢𑁆𑀣𑀺, 𑀦 𑀘 𑀉𑀧𑀮𑀩𑁆𑀪𑀢𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁. 𑀘𑀦𑁆𑀤𑁄 𑀬𑀣𑀸 𑀤𑁄𑀲𑀺𑀦𑀸 𑀧𑀼𑀡𑁆𑀡𑀫𑀸𑀲𑀺𑀬𑀦𑁆𑀢𑀺 𑀬𑀣𑀸 𑀦𑀸𑀫 𑀘𑀦𑁆𑀤𑁄 𑀅𑀩𑁆𑀪𑀫𑀳𑀺𑀓𑀸𑀤𑀺𑀤𑁄𑀲𑀭𑀳𑀺𑀢𑁄 𑀧𑀼𑀡𑁆𑀡𑀫𑀸𑀲𑀺𑀬𑀁 𑀧𑀭𑀺𑀧𑀼𑀡𑁆𑀡𑀓𑀸𑀮𑁂 𑀏𑀯𑀁 𑀅𑀳𑀫𑁆𑀧𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀅𑀧𑁂𑀢𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑁄 𑀧𑀭𑀺𑀧𑀼𑀡𑁆𑀡𑀥𑀫𑁆𑀫𑀓𑁄𑀝𑁆𑀞𑀸𑀲𑁄 𑀅𑀳𑁄𑀲𑀺𑀦𑁆𑀢𑀺.

𑀥𑀫𑁆𑀫𑀺𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑀧𑁆𑀧𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀤𑀸 ¶ 𑀩𑀮𑀸𑀓𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀧𑁆𑀧𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀫𑀳𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀲𑀫𑁆𑀪𑀯𑀲𑁆𑀲 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀩𑁆𑀪𑁄𑀓𑀸𑀲𑁂 𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀲𑀺𑀦𑁆𑀦𑀲𑁆𑀲 𑀫𑀳𑀦𑁆𑀢𑀁 𑀧𑀤𑀼𑀫𑀁 𑀕𑀳𑁂𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀥𑀸𑀭𑁂𑀦𑁆𑀢𑁄 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀧𑁆𑀧𑀓𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀚𑀓𑀭𑀡𑀺𑀬𑀸 ¶ 𑀦𑀸𑀫 𑀦𑀤𑀺𑀬𑀸 𑀢𑀻𑀭𑁂 𑀮𑁂𑀡𑀕𑀺𑀭𑀺𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁨.𑁭𑁮-𑁮𑁩) 𑁋

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀭𑁄𑀫𑀲𑁄 𑀦𑀸𑀫 𑀧𑀩𑁆𑀩𑀢𑁄;

𑀩𑀼𑀤𑁆𑀥𑁄𑀧𑀺 𑀲𑀫𑁆𑀪𑀯𑁄 𑀦𑀸𑀫, 𑀅𑀩𑁆𑀪𑁄𑀓𑀸𑀲𑁂 𑀯𑀲𑀻 𑀢𑀤𑀸.

‘‘𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀧𑀤𑀼𑀫𑀁 𑀥𑀸𑀭𑀬𑀺𑀁 𑀅𑀳𑀁;

𑀏𑀓𑀸𑀳𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀪𑀯𑀦𑀁 𑀧𑀼𑀦𑀭𑀸𑀕𑀫𑀺𑀁.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀲𑀸𑀯𑀢𑁆𑀣𑀺𑀁 𑀆𑀕𑀢𑁄 𑀜𑀸𑀢𑀻𑀳𑀺 𑀉𑀧𑀝𑁆𑀞𑀻𑀬𑀫𑀸𑀦𑁄 𑀢𑀢𑁆𑀣 𑀓𑀢𑀺𑀧𑀸𑀳𑀁 ¶ 𑀯𑀲𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀜𑀸𑀢𑀓𑁂 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀫𑁂𑀯 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀁 𑀜𑀸𑀢𑀓𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣, 𑀫𑀬𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀞𑀺𑀢𑁄 𑀅𑀢𑁆𑀢𑀦𑀸 𑀯𑀲𑀺𑀢𑀝𑁆𑀞𑀸𑀦𑀓𑀺𑀢𑁆𑀢𑀦𑀸𑀧𑀤𑁂𑀲𑁂𑀦 𑀯𑀺𑀯𑁂𑀓𑀸𑀪𑀺𑀭𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁩𑁦𑁭.

‘‘𑀬𑀤𑀸 𑀩𑀮𑀸𑀓𑀸 𑀲𑀼𑀘𑀺𑀧𑀡𑁆𑀟𑀭𑀘𑁆𑀙𑀤𑀸, 𑀓𑀸𑀴𑀲𑁆𑀲 𑀫𑁂𑀖𑀲𑁆𑀲 𑀪𑀬𑁂𑀦 𑀢𑀚𑁆𑀚𑀺𑀢𑀸;

𑀧𑀮𑁂𑀳𑀺𑀢𑀺 𑀆𑀮𑀬𑀫𑀸𑀮𑀬𑁂𑀲𑀺𑀦𑀻, 𑀢𑀤𑀸 𑀦𑀤𑀻 𑀅𑀚𑀓𑀭𑀡𑀻 𑀭𑀫𑁂𑀢𑀺 𑀫𑀁.

𑁩𑁦𑁮.

‘‘𑀬𑀤𑀸 𑀩𑀮𑀸𑀓𑀸 𑀲𑀼𑀯𑀺𑀲𑀼𑀤𑁆𑀥𑀧𑀡𑁆𑀟𑀭𑀸, 𑀓𑀸𑀴𑀲𑁆𑀲 𑀫𑁂𑀖𑀲𑁆𑀲 𑀪𑀬𑁂𑀦 𑀢𑀚𑁆𑀚𑀺𑀢𑀸;

𑀧𑀭𑀺𑀬𑁂𑀲𑀢𑀺 𑀮𑁂𑀡𑀫𑀮𑁂𑀡𑀤𑀲𑁆𑀲𑀺𑀦𑀻, 𑀢𑀤𑀸 𑀦𑀤𑀻 𑀅𑀚𑀓𑀭𑀡𑀻 𑀭𑀫𑁂𑀢𑀺 𑀫𑀁.

𑁩𑁦𑁯.

‘‘𑀓𑀁 𑀦𑀼 𑀢𑀢𑁆𑀣 𑀦 𑀭𑀫𑁂𑀦𑁆𑀢𑀺, 𑀚𑀫𑁆𑀩𑀼𑀬𑁄 𑀉𑀪𑀢𑁄 𑀢𑀳𑀺𑀁;

𑀲𑁄𑀪𑁂𑀦𑁆𑀢𑀻 𑀆𑀧𑀕𑀸𑀓𑀽𑀮𑀁, 𑀫𑀫 𑀮𑁂𑀡𑀲𑁆𑀲 𑀧𑀘𑁆𑀙𑀢𑁄.

𑁩𑁧𑁦.

‘‘𑀢𑀸𑀫𑀢𑀫𑀤𑀲𑀗𑁆𑀖𑀲𑀼𑀧𑁆𑀧𑀳𑀻𑀦𑀸 ¶ ¶ , 𑀪𑁂𑀓𑀸 𑀫𑀦𑁆𑀤𑀯𑀢𑀻 𑀧𑀦𑀸𑀤𑀬𑀦𑁆𑀢𑀺;

𑀦𑀸𑀚𑁆𑀚 𑀕𑀺𑀭𑀺𑀦𑀤𑀻𑀳𑀺 𑀯𑀺𑀧𑁆𑀧𑀯𑀸𑀲𑀲𑀫𑀬𑁄,

𑀔𑁂𑀫𑀸 𑀅𑀚𑀓𑀭𑀡𑀻 𑀲𑀺𑀯𑀸 𑀲𑀼𑀭𑀫𑁆𑀫𑀸’’𑀢𑀺. 𑁋 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀩𑀮𑀸𑀓𑀸𑀢𑀺 𑀩𑀮𑀸𑀓𑀸𑀲𑀓𑀼𑀡𑀺𑀓𑀸. 𑀲𑀼𑀘𑀺𑀧𑀡𑁆𑀟𑀭𑀘𑁆𑀙𑀤𑀸𑀢𑀺 𑀲𑀼𑀘𑀺𑀲𑀼𑀤𑁆𑀥𑀥𑀯𑀮𑀧𑀓𑁆𑀔𑀸. 𑀓𑀸𑀴𑀲𑁆𑀲 𑀫𑁂𑀖𑀲𑁆𑀲 𑀪𑀬𑁂𑀦 𑀢𑀚𑁆𑀚𑀺𑀢𑀸𑀢𑀺 𑀚𑀮𑀪𑀸𑀭𑀪𑀭𑀺𑀢𑀢𑀸𑀬 𑀓𑀸𑀴𑀲𑁆𑀲 𑀅𑀜𑁆𑀚𑀦𑀕𑀺𑀭𑀺𑀲𑀦𑁆𑀦𑀺𑀓𑀸𑀲𑀲𑁆𑀲 𑀧𑀸𑀯𑀼𑀲𑁆𑀲𑀓𑀫𑁂𑀖𑀲𑁆𑀲 𑀕𑀚𑁆𑀚𑀢𑁄 𑀯𑀼𑀝𑁆𑀞𑀺𑀪𑀬𑁂𑀦 𑀦𑀺𑀩𑁆𑀩𑀺𑀚𑁆𑀚𑀺𑀢𑀸 𑀪𑀺𑀁𑀲𑀸𑀧𑀺𑀢𑀸. 𑀧𑀮𑁂𑀳𑀺𑀢𑀻𑀢𑀺 𑀕𑁄𑀘𑀭𑀪𑀽𑀫𑀺𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺. 𑀆𑀮𑀬𑀦𑁆𑀢𑀺 𑀦𑀺𑀮𑀬𑀁 𑀅𑀢𑁆𑀢𑀦𑁄 𑀓𑀼𑀮𑀸𑀯𑀓𑀁. 𑀆𑀮𑀬𑁂𑀲𑀺𑀦𑀻𑀢𑀺 𑀢𑀢𑁆𑀣 𑀆𑀮𑀬𑀦𑀁 𑀦𑀺𑀮𑀻𑀬𑀦𑀫𑁂𑀯 𑀇𑀘𑁆𑀙𑀦𑁆𑀢𑀻. 𑀢𑀤𑀸 𑀦𑀤𑀻 𑀅𑀚𑀓𑀭𑀡𑀻 𑀭𑀫𑁂𑀢𑀺 𑀫𑀦𑁆𑀢𑀺 𑀢𑀲𑁆𑀫𑀺𑀁 𑀧𑀸𑀯𑀼𑀲𑁆𑀲𑀓𑀓𑀸𑀮𑁂 𑀅𑀚𑀓𑀭𑀡𑀻𑀦𑀸𑀫𑀺𑀓𑀸 𑀦𑀤𑀻 𑀦𑀯𑁄𑀤𑀓𑀲𑁆𑀲 𑀧𑀽𑀭𑀸 𑀳𑀸𑀭𑀳𑀸𑀭𑀺𑀦𑀻 𑀓𑀼𑀮𑀗𑁆𑀓𑀲𑀸 𑀫𑀁 𑀭𑀫𑁂𑀢𑀺 𑀫𑀫 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻𑀢𑀺 𑀉𑀢𑀼𑀧𑀤𑁂𑀲𑀯𑀺𑀲𑁂𑀲𑀓𑀺𑀢𑁆𑀢𑀦𑀸𑀧𑀤𑁂𑀲𑁂𑀦 𑀯𑀺𑀯𑁂𑀓𑀸𑀪𑀺𑀭𑀢𑀺𑀁 𑀧𑀓𑀸𑀲𑁂𑀲𑀺.

𑀲𑀼𑀯𑀺𑀲𑀼𑀤𑁆𑀥𑀧𑀡𑁆𑀟𑀭𑀸𑀢𑀺 𑀲𑀼𑀝𑁆𑀞𑀼 𑀯𑀺𑀲𑀼𑀤𑁆𑀥𑀧𑀡𑁆𑀟𑀭𑀯𑀡𑁆𑀡𑀸, 𑀅𑀲𑀫𑁆𑀫𑀺𑀲𑁆𑀲𑀯𑀡𑁆𑀡𑀸 𑀲𑀩𑁆𑀩𑀲𑁂𑀢𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀬𑁂𑀲𑀢𑀻𑀢𑀺 𑀫𑀕𑁆𑀕𑀢𑀺. 𑀮𑁂𑀡𑀦𑁆𑀢𑀺 𑀯𑀲𑀦𑀝𑁆𑀞𑀸𑀦𑀁. 𑀅𑀮𑁂𑀡𑀤𑀲𑁆𑀲𑀺𑀦𑀻𑀢𑀺 𑀯𑀲𑀦𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑀻. 𑀧𑀼𑀩𑁆𑀩𑁂 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑁂𑀦 𑀅𑀮𑁂𑀡𑀤𑀲𑁆𑀲𑀺𑀦𑀻, 𑀇𑀤𑀸𑀦𑀺 𑀧𑀸𑀯𑀼𑀲𑁆𑀲𑀓𑀓𑀸𑀮𑁂 𑀫𑁂𑀖𑀕𑀚𑁆𑀚𑀺𑀢𑁂𑀦 𑀆𑀳𑀺𑀢𑀕𑀩𑁆𑀪𑀸 𑀧𑀭𑀺𑀬𑁂𑀲𑀢𑀺 𑀮𑁂𑀡𑀦𑁆𑀢𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁 𑀓𑀼𑀮𑀸𑀯𑀓𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀓𑀁 𑀦𑀼 𑀢𑀢𑁆𑀣…𑀧𑁂… 𑀧𑀘𑁆𑀙𑀢𑁄𑀢𑀺 𑀫𑀫 𑀯𑀲𑀦𑀓𑀫𑀳𑀸𑀮𑁂𑀡𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀸𑀪𑀸𑀕𑁂 𑀆𑀧𑀕𑀸𑀓𑀽𑀮𑀁 𑀅𑀚𑀓𑀭𑀡𑀻𑀦𑀤𑀺𑀬𑀸 𑀉𑀪𑀢𑁄𑀢𑀻𑀭𑀁 𑀢𑀳𑀺𑀁 𑀢𑀳𑀺𑀁 𑀇𑀢𑁄 𑀘𑀺𑀢𑁄 𑀘 𑀲𑁄𑀪𑁂𑀦𑁆𑀢𑀺𑀬𑁄 𑀦𑀺𑀘𑁆𑀘𑀓𑀸𑀮𑀁 𑀨𑀮𑀪𑀸𑀭𑀦𑀫𑀺𑀢𑀲𑀸𑀔𑀸 ¶ 𑀲𑀺𑀦𑀺𑀤𑁆𑀥𑀧𑀡𑁆𑀡𑀘𑁆𑀙𑀸𑀬𑀸 𑀚𑀫𑁆𑀩𑀼𑀬𑁄 𑀢𑀢𑁆𑀣 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀁 𑀦𑀸𑀫 𑀲𑀢𑁆𑀢𑀁 𑀦 𑀭𑀫𑁂𑀦𑁆𑀢𑀺 𑀦𑀼, 𑀲𑀩𑁆𑀩𑀁 𑀭𑀫𑁂𑀦𑁆𑀢𑀺𑀬𑁂𑀯.

𑀢𑀸𑀫𑀢𑀫𑀤𑀲𑀗𑁆𑀖𑀲𑀼𑀧𑁆𑀧𑀳𑀻𑀦𑀸𑀢𑀺 ¶ 𑀅𑀫𑀢𑀁 𑀯𑀼𑀘𑁆𑀘𑀢𑀺 𑀅𑀕𑀤𑀁, 𑀢𑁂𑀦 𑀫𑀚𑁆𑀚𑀦𑁆𑀢𑀻𑀢𑀺 𑀅𑀫𑀢𑀫𑀤𑀸, 𑀲𑀧𑁆𑀧𑀸, 𑀢𑁂𑀲𑀁 𑀲𑀗𑁆𑀖𑁄 𑀅𑀫𑀢𑀫𑀤𑀲𑀗𑁆𑀖𑁄, 𑀢𑀢𑁄 𑀲𑀼𑀝𑁆𑀞𑀼 𑀧𑀳𑀻𑀦𑀸 𑀅𑀧𑀕𑀢𑀸. 𑀪𑁂𑀓𑀸 𑀫𑀡𑁆𑀟𑀽𑀓𑀺𑀬𑁄, 𑀫𑀦𑁆𑀤𑀯𑀢𑀻 𑀲𑀭𑀯𑀢𑀺𑀬𑁄, 𑀧𑀦𑀸𑀤𑀬𑀦𑁆𑀢𑀺 𑀢𑀁 𑀞𑀸𑀦𑀁 𑀫𑀥𑀼𑀭𑁂𑀦 𑀯𑀲𑁆𑀲𑀺𑀢𑁂𑀦 𑀦𑀺𑀦𑁆𑀦𑀸𑀤𑀬𑀦𑁆𑀢𑀺. 𑀦𑀸𑀚𑁆𑀚 ¶ 𑀕𑀺𑀭𑀺𑀦𑀤𑀻𑀳𑀺 𑀯𑀺𑀧𑁆𑀧𑀯𑀸𑀲𑀲𑀫𑀬𑁄𑀢𑀺 𑀅𑀚𑁆𑀚 𑀏𑀢𑀭𑀳𑀺 𑀅𑀜𑁆𑀜𑀸𑀳𑀺𑀧𑀺 𑀧𑀩𑁆𑀩𑀢𑁂𑀬𑁆𑀬𑀸𑀳𑀺 𑀦𑀤𑀻𑀳𑀺 𑀯𑀺𑀧𑁆𑀧𑀯𑀸𑀲𑀲𑀫𑀬𑁄 𑀦 𑀳𑁄𑀢𑀺, 𑀯𑀺𑀲𑁂𑀲𑀢𑁄 𑀧𑀦 𑀯𑀸𑀴𑀫𑀘𑁆𑀙𑀲𑀼𑀲𑀼𑀫𑀸𑀭𑀸𑀤𑀺𑀯𑀺𑀭𑀳𑀺𑀢𑀢𑁄 𑀔𑁂𑀫𑀸 𑀅𑀚𑀓𑀭𑀡𑀻 𑀦𑀤𑀻. 𑀲𑀼𑀦𑁆𑀤𑀭𑀢𑀮𑀢𑀺𑀢𑁆𑀣𑀧𑀼𑀮𑀺𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀺𑀯𑀸. 𑀲𑀼𑀝𑁆𑀞𑀼 𑀭𑀫𑁆𑀫𑀸 𑀭𑀫𑀡𑀻𑀬𑀸, 𑀢𑀲𑁆𑀫𑀸 𑀢𑀢𑁆𑀣𑁂𑀯 𑀫𑁂 𑀫𑀦𑁄 𑀭𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀧𑀦 𑀯𑀢𑁆𑀯𑀸 𑀜𑀸𑀢𑀓𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀼𑀜𑁆𑀜𑀸𑀕𑀸𑀭𑀸𑀪𑀺𑀭𑀢𑀺𑀤𑀻𑀧𑀦𑁂𑀦 𑀇𑀤𑀫𑁂𑀯 𑀘 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻𑀢𑀺.

𑀲𑀧𑁆𑀧𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀫𑀼𑀤𑀺𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀩𑁆𑀩𑀚𑀺𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀼𑀤𑀺𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀏𑀓𑀁 𑀫𑀜𑁆𑀘𑀫𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀮𑀭𑀝𑁆𑀞𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀼𑀤𑀺𑀢𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑀁 𑀓𑀼𑀮𑀁 𑀭𑀜𑁆𑀜𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀮𑀺𑀩𑀼𑀤𑁆𑀥𑀁 𑀅𑀳𑁄𑀲𑀺. 𑀫𑀼𑀤𑀺𑀢𑁄 𑀭𑀸𑀚𑀪𑀬𑀸𑀪𑀻𑀢𑁄 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀅𑀜𑁆𑀜𑀢𑀭𑀲𑁆𑀲 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀉𑀧𑀕𑀘𑁆𑀙𑀺. 𑀣𑁂𑀭𑁄 𑀢𑀲𑁆𑀲 𑀪𑀻𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀲𑀺. 𑀲𑁄 ‘‘𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄, 𑀪𑀦𑁆𑀢𑁂, 𑀓𑀸𑀮𑁂𑀦 𑀇𑀤𑀁 𑀫𑁂 𑀪𑀬𑀁 𑀯𑀽𑀧𑀲𑀫𑁂𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀢𑁆𑀢𑀝𑁆𑀞𑀫𑀸𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 𑁋 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣 𑀫’’𑀦𑁆𑀢𑀺 𑀚𑀻𑀯𑀺𑀢𑀭𑀓𑁆𑀔𑀡𑀢𑁆𑀣𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀪𑀬𑁂 𑀯𑀽𑀧𑀲𑀦𑁆𑀢𑁂𑀧𑀺 𑀲𑀫𑀡𑀥𑀫𑁆𑀫𑀁𑀬𑁂𑀯 ¶ ¶ 𑀭𑁄𑀘𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑁋 ‘‘𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀇𑀫𑀲𑁆𑀫𑀸 𑀯𑀲𑀦𑀕𑀩𑁆𑀪𑀸 𑀩𑀳𑀺 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁩𑁬.𑁩𑁦-𑁩𑁩) 𑁋

‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀏𑀓𑀁 𑀫𑀜𑁆𑀘𑀁 𑀫𑀬𑀸 𑀤𑀺𑀦𑁆𑀦𑀁, 𑀧𑀲𑀦𑁆𑀦𑁂𑀦 𑀲𑀧𑀸𑀡𑀺𑀦𑀸.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀤𑀺𑀩𑁆𑀩𑀬𑀸𑀦𑀁 𑀲𑀫𑀚𑁆𑀛𑀕𑀁;

𑀢𑁂𑀦 𑀫𑀜𑁆𑀘𑀓𑀤𑀸𑀦𑁂𑀦, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀜𑁆𑀘𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀜𑁆𑀘𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀲𑀳𑀸𑀬𑀪𑀺𑀓𑁆𑀔𑀽𑀳𑀺 𑀅𑀥𑀺𑀕𑀢𑀁 𑀧𑀼𑀘𑁆𑀙𑀺𑀢𑁄 𑀅𑀢𑁆𑀢𑀦𑁄 𑀧𑀝𑀺𑀧𑀦𑁆𑀦𑀸𑀓𑀸𑀭𑀁 𑀓𑀣𑁂𑀦𑁆𑀢𑁄 𑁋

𑁩𑁧𑁧.

‘‘𑀧𑀩𑁆𑀩𑀚𑀺𑀁 ¶ 𑀚𑀻𑀯𑀺𑀓𑀢𑁆𑀣𑁄𑀳𑀁, 𑀮𑀤𑁆𑀥𑀸𑀦 𑀉𑀧𑀲𑀫𑁆𑀧𑀤𑀁;

𑀢𑀢𑁄 𑀲𑀤𑁆𑀥𑀁 𑀧𑀝𑀺𑀮𑀪𑀺𑀁, 𑀤𑀴𑁆𑀳𑀯𑀻𑀭𑀺𑀬𑁄 𑀧𑀭𑀓𑁆𑀓𑀫𑀺𑀁.

𑁩𑁧𑁨.

‘‘𑀓𑀸𑀫𑀁 𑀪𑀺𑀚𑁆𑀚𑀢𑀼𑀬𑀁 𑀓𑀸𑀬𑁄, 𑀫𑀁𑀲𑀧𑁂𑀲𑀻 𑀯𑀺𑀲𑀻𑀬𑀭𑀼𑀁;

𑀉𑀪𑁄 𑀚𑀡𑁆𑀡𑀼𑀓𑀲𑀦𑁆𑀥𑀻𑀳𑀺, 𑀚𑀗𑁆𑀖𑀸𑀬𑁄 𑀧𑀧𑀢𑀦𑁆𑀢𑀼 𑀫𑁂.

𑁩𑁧𑁩.

‘‘𑀦𑀸𑀲𑀺𑀲𑁆𑀲𑀁 𑀦 𑀧𑀺𑀯𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀸 𑀘 𑀦 𑀦𑀺𑀓𑁆𑀔𑀫𑁂;

𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀁, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂.

𑁩𑁧𑁪.

‘‘𑀢𑀲𑁆𑀲 𑀫𑁂𑀯𑀁 𑀯𑀺𑀳𑀭𑀢𑁄, 𑀧𑀲𑁆𑀲 𑀯𑀻𑀭𑀺𑀬𑀧𑀭𑀓𑁆𑀓𑀫𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀚𑀻𑀯𑀺𑀓𑀢𑁆𑀣𑁄𑀢𑀺 𑀚𑀻𑀯𑀺𑀓𑀸𑀬 𑀅𑀢𑁆𑀣𑀺𑀓𑁄 𑀚𑀻𑀯𑀺𑀓𑀧𑁆𑀧𑀬𑁄𑀚𑀦𑁄. ‘‘𑀏𑀢𑁆𑀣 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀩𑁆𑀪𑀬𑁄 𑀲𑀼𑀔𑁂𑀦 𑀅𑀓𑀺𑀮𑀫𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀚𑀻𑀯𑀺𑀓𑀢𑁆𑀣𑀸𑀬 𑀧𑀩𑁆𑀩𑀚𑀺𑀦𑁆𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀸𑀦 𑀉𑀧𑀲𑀫𑁆𑀧𑀤𑀦𑁆𑀢𑀺 𑀧𑀞𑀫𑀁 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸𑀬𑀁 𑀞𑀺𑀢𑁄 ¶ 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸. 𑀢𑀢𑁄 𑀲𑀤𑁆𑀥𑀁 𑀧𑀝𑀺𑀮𑀪𑀺𑀦𑁆𑀢𑀺 𑀢𑀢𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑁄 𑀤𑁆𑀯𑁂 𑀫𑀸𑀢𑀺𑀓𑀸, 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸, 𑀏𑀓𑀘𑁆𑀘𑀁 𑀲𑀼𑀢𑁆𑀢𑀁, 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁, 𑀯𑀺𑀧𑀲𑁆𑀲𑀦𑀸𑀯𑀺𑀥𑀺𑀜𑁆𑀘 𑀉𑀕𑁆𑀕𑀡𑁆𑀳𑀦𑁆𑀢𑁄 𑀩𑀼𑀤𑁆𑀥𑀸𑀤𑀻𑀦𑀁 𑀫𑀳𑀸𑀦𑀼𑀪𑀸𑀯𑀢𑀁 ¶ 𑀤𑀺𑀲𑁆𑀯𑀸 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀭𑀢𑀦𑀢𑁆𑀢𑀬𑁂 𑀲𑀤𑁆𑀥𑀁 𑀧𑀝𑀺𑀮𑀪𑀺𑀁. 𑀤𑀴𑁆𑀳𑀯𑀻𑀭𑀺𑀬𑁄 𑀧𑀭𑀓𑁆𑀓𑀫𑀺𑀦𑁆𑀢𑀺 𑀏𑀯𑀁 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀘𑁆𑀘𑀧𑀝𑀺𑀯𑁂𑀥𑀸𑀬 𑀤𑀴𑁆𑀳𑀯𑀻𑀭𑀺𑀬𑁄 𑀣𑀺𑀭𑀯𑀻𑀭𑀺𑀬𑁄 𑀳𑀼𑀢𑁆𑀯𑀸 𑀧𑀭𑀓𑁆𑀓𑀫𑀺𑀁, 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀲𑀫𑁆𑀫𑀤𑁂𑀯 𑀧𑀤𑀳𑀺𑀁.

𑀬𑀣𑀸 𑀧𑀦 𑀧𑀭𑀓𑁆𑀓𑀫𑀺𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀫𑀦𑁆𑀢𑀺 𑀬𑀣𑀸𑀓𑀸𑀫𑀁 𑀏𑀓𑀁𑀲𑀢𑁄 𑀯𑀸 𑀪𑀺𑀚𑁆𑀚𑀢𑀼. 𑀅𑀬𑀁 𑀓𑀸𑀬𑁄𑀢𑀺 𑀅𑀬𑀁 𑀫𑀫 𑀧𑀽𑀢𑀺𑀓𑀸𑀬𑁄, 𑀇𑀫𑀺𑀦𑀸 𑀯𑀻𑀭𑀺𑀬𑀧𑀢𑀸𑀧𑁂𑀦 𑀪𑀺𑀚𑁆𑀚𑀢𑀺 𑀘𑁂, 𑀪𑀺𑀚𑁆𑀚𑀢𑀼 𑀙𑀺𑀦𑁆𑀦𑀪𑀺𑀦𑁆𑀦𑀁 𑀳𑁄𑀢𑀼. 𑀫𑀁𑀲𑀧𑁂𑀲𑀻 𑀯𑀺𑀲𑀻𑀬𑀭𑀼𑀦𑁆𑀢𑀺 𑀇𑀫𑀺𑀦𑀸 𑀤𑀴𑁆𑀳𑀧𑀭𑀓𑁆𑀓𑀫𑁂𑀦 𑀇𑀫𑀲𑁆𑀫𑀸 𑀓𑀸𑀬𑀸 𑀫𑀁𑀲𑀧𑁂𑀲𑀺𑀬𑁄 𑀯𑀺𑀲𑀻𑀬𑀦𑁆𑀢𑀺 𑀘𑁂, 𑀯𑀺𑀲𑀻𑀬𑀦𑁆𑀢𑀼 𑀇𑀢𑁄 𑀘𑀺𑀢𑁄 𑀯𑀺𑀤𑁆𑀥𑀁𑀲𑀦𑁆𑀢𑀼. 𑀉𑀪𑁄 𑀚𑀡𑁆𑀡𑀼𑀓𑀲𑀦𑁆𑀥𑀻𑀳𑀺, 𑀚𑀗𑁆𑀖𑀸𑀬𑁄 𑀧𑀧𑀢𑀦𑁆𑀢𑀼 𑀫𑁂𑀢𑀺 𑀉𑀪𑁄𑀳𑀺 𑀚𑀡𑁆𑀡𑀼𑀓𑀲𑀦𑁆𑀥𑀻𑀳𑀺 𑀲𑀳 𑀫𑀫 𑀉𑀪𑁄 𑀚𑀗𑁆𑀖𑀸𑀬𑁄 𑀲𑀢𑁆𑀣𑀺𑀬𑁄 𑀊𑀭𑀼𑀩𑀦𑁆𑀥𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀧𑀢𑀦𑁆𑀢𑀼. ‘‘𑀫’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀼𑀤𑀺𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀧𑀸𑀢𑁄

𑁧. 𑀭𑀸𑀚𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀜𑁆𑀘𑀓𑀦𑀺𑀧𑀸𑀢𑁂 ¶ ¶ 𑀪𑀺𑀓𑁆𑀔𑀼 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀭𑀸𑀚𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄, 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑁄, 𑀇𑀢𑁄 𑀘𑀢𑀼𑀤𑁆𑀤𑀲𑁂 𑀓𑀧𑁆𑀧𑁂 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 ¶ 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀏𑀓𑀤𑀺𑀯𑀲𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀯𑀦𑀦𑁆𑀢𑀁 𑀉𑀧𑀕𑀢𑁄 𑀢𑀢𑁆𑀣 𑀅𑀜𑁆𑀜𑀢𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀧𑀭𑀺𑀲𑀼𑀤𑁆𑀥𑀁 𑀅𑀫𑁆𑀩𑀸𑀝𑀓𑀨𑀮𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑀢𑁆𑀣𑀯𑀸𑀳𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀫𑀳𑀸𑀭𑀸𑀚𑀁 𑀯𑁂𑀲𑁆𑀲𑀯𑀡𑀁 𑀆𑀭𑀸𑀥𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀪𑀸𑀯𑀢𑁄 𑀫𑀸𑀢𑀸𑀧𑀺𑀢𑀭𑁄 𑀭𑀸𑀚𑀤𑀢𑁆𑀢𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀡𑁆𑀟𑀁 𑀆𑀤𑀸𑀬 𑀯𑀸𑀡𑀺𑀚𑁆𑀚𑀯𑀲𑁂𑀦 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀸 𑀕𑀡𑀺𑀓𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀭𑀫𑀲𑁄𑀪𑀕𑁆𑀕𑀬𑁄𑀕𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀳𑀲𑁆𑀲𑀁 𑀮𑀪𑀢𑀺. 𑀅𑀣 𑀲𑁄 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀲𑁆𑀲𑀸 𑀕𑀡𑀺𑀓𑀸𑀬 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀁𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀁 𑀥𑀦𑀁 𑀔𑁂𑀧𑁂𑀢𑁆𑀯𑀸 𑀤𑀼𑀕𑁆𑀕𑀢𑁄 𑀳𑀼𑀢𑁆𑀯𑀸 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑀁 𑀅𑀕𑀫𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀢𑁆𑀣𑀸 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀼𑀲𑀸𑀦𑁂 𑀯𑀲𑀢𑀺. 𑀢𑀤𑀸 𑀅𑀜𑁆𑀜𑀢𑀭𑁄𑀧𑀺 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀸𑀬 𑀕𑀡𑀺𑀓𑀸𑀬 𑀲𑀳 𑀯𑀲𑀢𑀺. 𑀲𑀸 𑀘 𑀕𑀡𑀺𑀓𑀸 𑀢𑀲𑁆𑀲 𑀳𑀢𑁆𑀣𑁂 𑀫𑀳𑀕𑁆𑀖𑀭𑀢𑀦𑀁 𑀤𑀺𑀲𑁆𑀯𑀸 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀥𑀼𑀢𑁆𑀢𑀧𑀼𑀭𑀺𑀲𑁂𑀳𑀺 𑀢𑀁 𑀫𑀸𑀭𑀸𑀧𑁂𑀢𑁆𑀯𑀸 𑀢𑀁 𑀭𑀢𑀦𑀁 𑀕𑀡𑁆𑀳𑀺. 𑀅𑀣 𑀢𑀲𑁆𑀲 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀲𑁆𑀲 𑀫𑀦𑀼𑀲𑁆𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀑𑀘𑀭𑀓𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀼𑀁. 𑀢𑁂 𑀭𑀢𑁆𑀢𑀺𑀬𑀁 𑀢𑀲𑁆𑀲𑀸 𑀕𑀡𑀺𑀓𑀸𑀬 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀙𑀯𑀺𑀆𑀤𑀻𑀦𑀺 𑀅𑀦𑀼𑀧𑀳𑀘𑁆𑀘𑁂𑀯 𑀢𑀁 𑀫𑀸𑀭𑁂𑀢𑁆𑀯𑀸 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑁂𑀲𑀼𑀁. 𑀭𑀸𑀚𑀤𑀢𑁆𑀢𑀢𑁆𑀣𑁂𑀭𑁄 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀼𑀁 𑀲𑀼𑀲𑀸𑀦𑁂 𑀯𑀺𑀘𑀭𑀦𑁆𑀢𑁄 𑀢𑀲𑁆𑀲𑀸 𑀕𑀡𑀺𑀓𑀸𑀬 𑀓𑀴𑁂𑀯𑀭𑀁 ¶ 𑀧𑀝𑀺𑀓𑁆𑀓𑀼𑀮𑀢𑁄 𑀫𑀦𑀲𑀺 𑀓𑀸𑀢𑀼𑀁 𑀉𑀧𑀕𑀢𑁄 𑀓𑀢𑀺𑀧𑀬𑀯𑀸𑀭𑁂 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀢𑁆𑀯𑀸 𑀅𑀘𑀺𑀭𑀫𑀢𑀪𑀸𑀯𑀢𑁄 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀅𑀦𑀼𑀧𑀳𑀢𑀙𑀯𑀺𑀢𑀸𑀬 𑀯𑀺𑀲𑀪𑀸𑀕𑀯𑀢𑁆𑀣𑀼𑀢𑀸𑀬 𑀘 𑀅𑀬𑁄𑀦𑀺𑀲𑁄 ¶ 𑀫𑀦𑀲𑀺𑀓𑀭𑁄𑀦𑁆𑀢𑁄, 𑀢𑀢𑁆𑀣 𑀓𑀸𑀫𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀁𑀯𑀺𑀕𑁆𑀕𑀢𑀭𑀫𑀸𑀦𑀲𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀅𑀧𑀲𑀓𑁆𑀓𑀺𑀢𑁆𑀯𑀸 𑀆𑀤𑀺𑀢𑁄 𑀉𑀧𑀝𑁆𑀞𑀺𑀢𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀸𑀯𑀤𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁫𑁫-𑁫𑁯) 𑁋

‘‘𑀯𑀺𑀧𑀺𑀦𑁂 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀅𑀫𑁆𑀩𑀸𑀝𑀓𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑁋

𑁩𑁧𑁫.

‘‘𑀪𑀺𑀓𑁆𑀔𑀼 ¶ 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸, 𑀅𑀤𑁆𑀤𑀲 𑀇𑀢𑁆𑀣𑀺𑀫𑀼𑀚𑁆𑀛𑀺𑀢𑀁;

𑀅𑀧𑀯𑀺𑀤𑁆𑀥𑀁 𑀲𑀼𑀲𑀸𑀦𑀲𑁆𑀫𑀺𑀁, 𑀔𑀚𑁆𑀚𑀦𑁆𑀢𑀺𑀁 𑀓𑀺𑀫𑀺𑀳𑀻 𑀨𑀼𑀝𑀁.

𑁩𑁧𑁬.

‘‘𑀬𑀜𑁆𑀳𑀺 𑀏𑀓𑁂 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀫𑀢𑀁 𑀤𑀺𑀲𑁆𑀯𑀸𑀦 𑀧𑀸𑀧𑀓𑀁;

𑀓𑀸𑀫𑀭𑀸𑀕𑁄 𑀧𑀸𑀢𑀼𑀭𑀳𑀼, 𑀅𑀦𑁆𑀥𑁄𑀯 𑀲𑀯𑀢𑀻 𑀅𑀳𑀼𑀁.

𑁩𑁧𑁭.

‘‘𑀑𑀭𑀁 𑀑𑀤𑀦𑀧𑀸𑀓𑀫𑁆𑀳𑀸, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺𑀁;

𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀳𑀁, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁩𑁧𑁮.

‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁩𑁧𑁯.

‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀪𑀺𑀓𑁆𑀔𑀼 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸𑀢𑀺 𑀲𑀁𑀲𑀸𑀭𑁂 𑀪𑀬𑀲𑁆𑀲 𑀇𑀓𑁆𑀔𑀦𑀢𑁄 𑀪𑀺𑀓𑁆𑀔𑀼, 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀁 𑀆𑀫𑀓𑀲𑀼𑀲𑀸𑀦𑀁 𑀉𑀧𑀕𑀦𑁆𑀢𑁆𑀯𑀸. ‘‘𑀪𑀺𑀓𑁆𑀔𑀽’’𑀢𑀺 𑀘𑁂𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀲𑀬𑀁 𑀯𑀤𑀢𑀺. 𑀇𑀢𑁆𑀣𑀺𑀦𑁆𑀢𑀺 𑀣𑀻𑀬𑀢𑀺 𑀏𑀢𑁆𑀣 𑀲𑀼𑀓𑁆𑀓𑀲𑁄𑀡𑀺𑀢𑀁 𑀲𑀢𑁆𑀢𑀲𑀦𑁆𑀢𑀸𑀦𑀪𑀸𑀯𑁂𑀦 𑀲𑀁𑀳𑀜𑁆𑀜𑀢𑀻𑀢𑀺 𑀣𑀻, 𑀫𑀸𑀢𑀼𑀕𑀸𑀫𑁄. 𑀏𑀯𑀜𑁆𑀘 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀯𑀲𑁂𑀦 ‘‘𑀇𑀢𑁆𑀣𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀯𑀜𑁆𑀛𑀸𑀤𑀻𑀲𑀼 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀘 𑀢𑀩𑁆𑀩𑁄𑀳𑀸𑀭𑁄. ‘‘𑀇𑀢𑁆𑀣𑀻’’𑀢𑀺 𑀇𑀢𑁆𑀣𑀺𑀓𑀴𑁂𑀯𑀭𑀁 𑀯𑀤𑀢𑀺. 𑀉𑀚𑁆𑀛𑀺𑀢𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀁 𑀉𑀚𑁆𑀛𑀦𑀺𑀬𑀢𑁆𑀢𑀸 𑀏𑀯 𑀅𑀧𑀯𑀺𑀤𑁆𑀥𑀁 𑀅𑀦𑀧𑁂𑀓𑁆𑀔𑀪𑀸𑀯𑁂𑀦 𑀔𑀺𑀢𑁆𑀢𑀁. 𑀔𑀚𑁆𑀚𑀦𑁆𑀢𑀺𑀁 𑀓𑀺𑀫𑀺𑀳𑀻 𑀨𑀼𑀝𑀦𑁆𑀢𑀺 𑀓𑀺𑀫𑀻𑀳𑀺 𑀧𑀽𑀭𑀺𑀢𑀁 𑀳𑀼𑀢𑁆𑀯𑀸 𑀔𑀚𑁆𑀚𑀫𑀸𑀦𑀁.

𑀬𑀜𑁆𑀳𑀺 ¶ 𑀏𑀓𑁂 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀫𑀢𑀁 𑀤𑀺𑀲𑁆𑀯𑀸𑀦 𑀧𑀸𑀧𑀓𑀦𑁆𑀢𑀺 𑀬𑀁 𑀅𑀧𑀕𑀢𑀸𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀢𑀸𑀬 𑀫𑀢𑀁 𑀓𑀴𑁂𑀯𑀭𑀁 𑀧𑀸𑀧𑀓𑀁 𑀦𑀺𑀳𑀻𑀦𑀁 𑀮𑀸𑀫𑀓𑀁 𑀏𑀓𑁂 𑀘𑁄𑀓𑁆𑀔𑀚𑀸𑀢𑀺𑀓𑀸 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀺. 𑀓𑀸𑀫𑀭𑀸𑀕𑁄 𑀧𑀸𑀢𑀼𑀭𑀳𑀽𑀢𑀺 𑀢𑀲𑁆𑀫𑀺𑀁 𑀓𑀼𑀡𑀧𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀩𑀮𑀯𑀢𑀸𑀬 𑀓𑀸𑀫𑀭𑀸𑀕𑁄 𑀫𑀬𑁆𑀳𑀁 𑀧𑀸𑀢𑀼𑀭𑀳𑁄𑀲𑀺 𑀉𑀧𑁆𑀧𑀚𑁆𑀚𑀺. 𑀅𑀦𑁆𑀥𑁄𑀯 𑀲𑀯𑀢𑀻 𑀅𑀳𑀼𑀦𑁆𑀢𑀺 𑀢𑀲𑁆𑀫𑀺𑀁 𑀓𑀴𑁂𑀯𑀭𑁂 𑀦𑀯𑀳𑀺 𑀤𑁆𑀯𑀸𑀭𑁂𑀳𑀺 𑀅𑀲𑀼𑀘𑀺𑀁 𑀲𑀯𑀢𑀺 𑀲𑀦𑁆𑀤𑀦𑁆𑀢𑁂 𑀅𑀲𑀼𑀘𑀺𑀪𑀸𑀯𑀲𑁆𑀲 𑀅𑀤𑀲𑁆𑀲𑀦𑁂𑀦 𑀅𑀦𑁆𑀥𑁄 𑀯𑀺𑀬 𑀅𑀳𑁄𑀲𑀺𑀁. 𑀢𑁂𑀦𑀸𑀳 𑁋

‘‘𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺 𑀘.

‘‘𑀓𑀸𑀫𑀘𑁆𑀙𑀦𑁆𑀤𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀦𑁆𑀥𑀓𑀭𑀡𑁄 𑀅𑀘𑀓𑁆𑀔𑀼𑀓𑀭𑀡𑁄’’𑀢𑀺 𑀘 𑀆𑀤𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀢𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 ‘‘𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀅𑀯𑀲𑀯𑀢𑁆𑀢𑀺 𑀓𑀺𑀮𑁂𑀲𑀲𑁆𑀲 𑀯𑀸 𑀯𑀲𑀯𑀢𑁆𑀢𑀻’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀅𑀦𑁆𑀥𑁄𑀯 𑀅𑀲𑀢𑀺 𑀅𑀳𑀼’’𑀦𑁆𑀢𑀺 𑀧𑀸𑀴𑀺𑀁 ¶ 𑀯𑀢𑁆𑀯𑀸 ‘‘𑀓𑀸𑀫𑀭𑀸𑀕𑁂𑀦 𑀅𑀦𑁆𑀥𑁄 𑀏𑀯 𑀳𑀼𑀢𑁆𑀯𑀸 𑀲𑀢𑀺𑀭𑀳𑀺𑀢𑁄 𑀅𑀳𑁄𑀲𑀺’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀤𑀼𑀪𑀬𑀁 𑀧𑀦 𑀧𑀸𑀴𑀺𑀬𑀁 𑀦𑀢𑁆𑀣𑀺.

𑀑𑀭𑀁 𑀑𑀤𑀦𑀧𑀸𑀓𑀫𑁆𑀳𑀸𑀢𑀺 𑀑𑀤𑀦𑀧𑀸𑀓𑀢𑁄 𑀑𑀭𑀁, 𑀬𑀸𑀯𑀢𑀸 𑀓𑀸𑀮𑁂𑀦 𑀲𑀼𑀧𑀭𑀺𑀥𑁄𑀢𑀢𑀺𑀦𑁆𑀢𑀢𑀡𑁆𑀟𑀼𑀮𑀦𑀸𑀴𑀺𑀬𑀸 𑀑𑀤𑀦𑀁 𑀧𑀘𑀢𑀺, 𑀢𑀢𑁄 𑀑𑀭𑀫𑁂𑀯 𑀓𑀸𑀮𑀁, 𑀢𑀢𑁄𑀧𑀺 𑀮𑀳𑀼𑀓𑀸𑀮𑁂𑀦 𑀭𑀸𑀕𑀁 𑀯𑀺𑀦𑁄𑀤𑁂𑀦𑁆𑀢𑁄, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀲𑁆𑀲 𑀫𑁂 𑀭𑀸𑀕𑁄 𑀉𑀧𑁆𑀧𑀚𑁆𑀚𑀺, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺𑀁 𑀅𑀧𑀲𑀓𑁆𑀓𑀺𑀁. 𑀅𑀧𑀓𑁆𑀓𑀦𑁆𑀢𑁄𑀯 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀳𑀁 𑀲𑀫𑀡𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀢𑀺𑀧𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦 𑀲𑀢𑀺𑀫𑀸, 𑀲𑀫𑁆𑀫𑀤𑁂𑀯 𑀥𑀫𑁆𑀫𑀲𑀪𑀸𑀯𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑁄 ¶ 𑀘 𑀳𑀼𑀢𑁆𑀯𑀸 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁, 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺𑀁. 𑀦𑀺𑀲𑀺𑀦𑁆𑀦𑀲𑁆𑀲 𑀘 𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣𑀸𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀭𑀸𑀚𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀬𑁄𑀕𑁂𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀪𑀽𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀫𑀸𑀲𑁂 𑀫𑀸𑀲𑁂 𑀅𑀝𑁆𑀞𑀓𑁆𑀔𑀢𑁆𑀢𑀼𑀁 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀦 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀁 ¶ 𑀑𑀧𑀼𑀜𑁆𑀚𑀸𑀧𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀕𑀦𑁆𑀥𑀲𑀭𑀻𑀭𑁄 𑀳𑀼𑀢𑁆𑀯𑀸, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑀭𑀝𑁆𑀞𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀪𑀽𑀢𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀺𑀢𑁆𑀣𑀺𑀬𑁂𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀮𑀪𑀦𑁆𑀢𑁄, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀉𑀧𑀢𑀺𑀲𑁆𑀲𑀓𑁄𑀮𑀺𑀢𑀲𑁂𑀮𑀸𑀤𑀺𑀓𑁂 𑀩𑀳𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀫𑀜𑁆𑀜𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁂 𑀤𑀺𑀲𑁆𑀯𑀸 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀭𑀸𑀥𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀯𑁂𑀓𑀯𑀸𑀲𑀁 𑀯𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁫.𑁨𑁭𑁨-𑁩𑁦𑁮) 𑁋

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀯𑀼𑀢𑁄, 𑀭𑀁𑀲𑀺𑀚𑀸𑀮𑀲𑀫𑁄𑀢𑁆𑀣𑀝𑁄.

‘‘𑀅𑀲𑁆𑀲𑀸𑀲𑁂𑀢𑀸 𑀬𑀣𑀸 𑀘𑀦𑁆𑀤𑁄, 𑀲𑀽𑀭𑀺𑀬𑁄𑀯 𑀧𑀪𑀗𑁆𑀓𑀭𑁄;

𑀦𑀺𑀩𑁆𑀩𑀸𑀧𑁂𑀢𑀸 𑀬𑀣𑀸 𑀫𑁂𑀖𑁄, 𑀲𑀸𑀕𑀭𑁄𑀯 𑀕𑀼𑀡𑀸𑀓𑀭𑁄.

‘‘𑀥𑀭𑀡𑀻𑀭𑀺𑀯 ¶ 𑀲𑀻𑀮𑁂𑀦, 𑀳𑀺𑀫𑀯𑀸𑀯 𑀲𑀫𑀸𑀥𑀺𑀦𑀸;

𑀆𑀓𑀸𑀲𑁄 𑀯𑀺𑀬 𑀧𑀜𑁆𑀜𑀸𑀬, 𑀅𑀲𑀗𑁆𑀕𑁄 𑀅𑀦𑀺𑀮𑁄 𑀬𑀣𑀸.

‘‘𑀢𑀤𑀸𑀳𑀁 𑀩𑀸𑀭𑀸𑀡𑀲𑀺𑀬𑀁, 𑀉𑀧𑀧𑀦𑁆𑀦𑁄 𑀫𑀳𑀸𑀓𑀼𑀮𑁂;

𑀧𑀳𑀽𑀢𑀥𑀦𑀥𑀜𑁆𑀜𑀲𑁆𑀫𑀺𑀁, 𑀦𑀸𑀦𑀸𑀭𑀢𑀦𑀲𑀜𑁆𑀘𑀬𑁂.

‘‘𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀦𑀺𑀲𑀺𑀦𑁆𑀦𑀁 𑀮𑁄𑀓𑀦𑀸𑀬𑀓𑀁;

𑀉𑀧𑁂𑀘𑁆𑀘 𑀥𑀫𑁆𑀫𑀫𑀲𑁆𑀲𑁄𑀲𑀺𑀁, 𑀅𑀫𑀢𑀁𑀯 𑀫𑀦𑁄𑀳𑀭𑀁.

‘‘𑀤𑁆𑀯𑀢𑁆𑀢𑀺𑀁𑀲𑀮𑀓𑁆𑀔𑀡𑀥𑀭𑁄, 𑀲𑀦𑀓𑁆𑀔𑀢𑁆𑀢𑁄𑀯 𑀘𑀦𑁆𑀤𑀺𑀫𑀸;

𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

‘‘𑀭𑀁𑀲𑀺𑀚𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑁄, 𑀤𑀺𑀢𑁆𑀢𑁄𑀯 𑀓𑀦𑀓𑀸𑀘𑀮𑁄;

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀯𑀼𑀢𑁄, 𑀲𑀢𑀭𑀁𑀲𑀻 𑀤𑀺𑀯𑀸𑀓𑀭𑁄.

‘‘𑀲𑁄𑀡𑁆𑀡𑀸𑀦𑀦𑁄 𑀚𑀺𑀦𑀯𑀭𑁄, 𑀲𑀫𑀡𑀻𑀯 𑀲𑀺𑀮𑀼𑀘𑁆𑀘𑀬𑁄;

𑀓𑀭𑀼𑀡𑀸𑀧𑀼𑀡𑁆𑀡𑀳𑀤𑀬𑁄, 𑀕𑀼𑀡𑁂𑀦 𑀯𑀺𑀬 𑀲𑀸𑀕𑀭𑁄.

‘‘𑀮𑁄𑀓𑀯𑀺𑀲𑁆𑀲𑀼𑀢𑀓𑀺𑀢𑁆𑀢𑀺 𑀘, 𑀲𑀺𑀦𑁂𑀭𑀽𑀯 𑀦𑀕𑀼𑀢𑁆𑀢𑀫𑁄;

𑀬𑀲𑀲𑀸 𑀯𑀺𑀢𑁆𑀣𑀢𑁄 𑀯𑀻𑀭𑁄, 𑀆𑀓𑀸𑀲𑀲𑀤𑀺𑀲𑁄 𑀫𑀼𑀦𑀺.

‘‘𑀅𑀲𑀗𑁆𑀕𑀘𑀺𑀢𑁆𑀢𑁄 𑀲𑀩𑁆𑀩𑀢𑁆𑀣, 𑀅𑀦𑀺𑀮𑁄 𑀯𑀺𑀬 𑀦𑀸𑀬𑀓𑁄;

𑀧𑀢𑀺𑀝𑁆𑀞𑀸 𑀲𑀩𑁆𑀩𑀪𑀽𑀢𑀸𑀦𑀁, 𑀫𑀳𑀻𑀯 𑀫𑀼𑀦𑀺𑀲𑀢𑁆𑀢𑀫𑁄.

‘‘𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸;

𑀓𑀼𑀯𑀸𑀤𑀕𑀘𑁆𑀙𑀤𑀳𑀦𑁄, 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀲𑁄𑀪𑀢𑀺.

‘‘𑀅𑀕𑀤𑁄 ¶ 𑀯𑀺𑀬 𑀲𑀩𑁆𑀩𑀢𑁆𑀣, 𑀓𑀺𑀮𑁂𑀲𑀯𑀺𑀲𑀦𑀸𑀲𑀓𑁄;

𑀕𑀦𑁆𑀥𑀫𑀸𑀤𑀦𑀲𑁂𑀮𑁄𑀯, 𑀕𑀼𑀡𑀕𑀦𑁆𑀥𑀯𑀺𑀪𑀽𑀲𑀺𑀢𑁄.

‘‘𑀕𑀼𑀡𑀸𑀦𑀁 𑀆𑀓𑀭𑁄 𑀯𑀻𑀭𑁄, 𑀭𑀢𑀦𑀸𑀦𑀁𑀯 𑀲𑀸𑀕𑀭𑁄;

𑀲𑀺𑀦𑁆𑀥𑀽𑀯 𑀯𑀦𑀭𑀸𑀚𑀻𑀦𑀁, 𑀓𑀺𑀮𑁂𑀲𑀫𑀮𑀳𑀸𑀭𑀓𑁄.

‘‘𑀯𑀺𑀚𑀬𑀻𑀯 𑀫𑀳𑀸𑀬𑁄𑀥𑁄, 𑀫𑀸𑀭𑀲𑁂𑀦𑀸𑀯𑀫𑀤𑁆𑀤𑀦𑁄;

𑀘𑀓𑁆𑀓𑀯𑀢𑁆𑀢𑀻𑀯 𑀲𑁄 𑀭𑀸𑀚𑀸, 𑀩𑁄𑀚𑁆𑀛𑀗𑁆𑀕𑀭𑀢𑀦𑀺𑀲𑁆𑀲𑀭𑁄.

‘‘𑀫𑀳𑀸𑀪𑀺𑀲𑀓𑁆𑀓𑀲𑀗𑁆𑀓𑀸𑀲𑁄, 𑀤𑁄𑀲𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀓𑁄;

𑀲𑀮𑁆𑀮𑀓𑀢𑁆𑀢𑁄 𑀬𑀣𑀸 𑀯𑁂𑀚𑁆𑀚𑁄, 𑀤𑀺𑀝𑁆𑀞𑀺𑀕𑀡𑁆𑀟𑀯𑀺𑀨𑀸𑀮𑀓𑁄.

‘‘𑀲𑁄 ¶ 𑀢𑀤𑀸 𑀮𑁄𑀓𑀧𑀚𑁆𑀚𑁄𑀢𑁄, 𑀲𑀦𑀭𑀸𑀫𑀭𑀲𑀓𑁆𑀓𑀢𑁄;

𑀧𑀭𑀺𑀲𑀸𑀲𑀼 𑀦𑀭𑀸𑀤𑀺𑀘𑁆𑀘𑁄, 𑀥𑀫𑁆𑀫𑀁 𑀤𑁂𑀲𑀬𑀢𑁂 𑀚𑀺𑀦𑁄.

‘‘𑀤𑀸𑀦𑀁 𑀤𑀢𑁆𑀯𑀸 𑀫𑀳𑀸𑀪𑁄𑀕𑁄, 𑀲𑀻𑀮𑁂𑀦 𑀲𑀼𑀕𑀢𑀽𑀧𑀕𑁄;

𑀪𑀸𑀯𑀦𑀸𑀬 𑀘 𑀦𑀺𑀩𑁆𑀩𑀸𑀢𑀺, 𑀇𑀘𑁆𑀘𑁂𑀯𑀫𑀦𑀼𑀲𑀸𑀲𑀣.

‘‘𑀤𑁂𑀲𑀦𑀁 𑀢𑀁 𑀫𑀳𑀲𑁆𑀲𑀸𑀤𑀁, 𑀆𑀤𑀺𑀫𑀚𑁆𑀛𑀦𑁆𑀢𑀲𑁄𑀪𑀦𑀁;

𑀲𑀼𑀡𑀦𑁆𑀢𑀺 𑀧𑀭𑀺𑀲𑀸 𑀲𑀩𑁆𑀩𑀸, 𑀅𑀫𑀢𑀁𑀯 𑀫𑀳𑀸𑀭𑀲𑀁.

‘‘𑀲𑀼𑀢𑁆𑀯𑀸 𑀲𑀼𑀫𑀥𑀼𑀭𑀁 𑀥𑀫𑁆𑀫𑀁, 𑀧𑀲𑀦𑁆𑀦𑁄 𑀚𑀺𑀦𑀲𑀸𑀲𑀦𑁂;

𑀲𑀼𑀕𑀢𑀁 𑀲𑀭𑀡𑀁 𑀕𑀦𑁆𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀦𑀫𑀲𑁆𑀲𑀳𑀁.

‘‘𑀫𑀼𑀦𑀺𑀦𑁄 𑀕𑀦𑁆𑀥𑀓𑀼𑀝𑀺𑀬𑀸, 𑀑𑀧𑀼𑀜𑁆𑀚𑁂𑀲𑀺𑀁 𑀢𑀤𑀸 𑀫𑀳𑀺𑀁;

𑀘𑀢𑀼𑀚𑁆𑀚𑀸𑀢𑁂𑀦 𑀕𑀦𑁆𑀥𑁂𑀦, 𑀫𑀸𑀲𑁂 𑀅𑀝𑁆𑀞 𑀤𑀺𑀦𑁂𑀲𑁆𑀯𑀳𑀁.

‘‘𑀧𑀡𑀺𑀥𑀸𑀬 𑀲𑀼𑀕𑀦𑁆𑀥𑀢𑁆𑀢𑀁, 𑀲𑀭𑀻𑀭𑀯𑀺𑀲𑁆𑀲𑀕𑀦𑁆𑀥𑀺𑀦𑁄;

𑀢𑀤𑀸 𑀚𑀺𑀦𑁄 𑀯𑀺𑀬𑀸𑀓𑀸𑀲𑀺, 𑀲𑀼𑀕𑀦𑁆𑀥𑀢𑀦𑀼𑀮𑀸𑀪𑀺𑀢𑀁.

‘‘𑀬𑁄 𑀬𑀁 𑀕𑀦𑁆𑀥𑀓𑀼𑀝𑀺𑀪𑀽𑀫𑀺𑀁, 𑀕𑀦𑁆𑀥𑁂𑀦𑁄𑀧𑀼𑀜𑁆𑀚𑀢𑁂 𑀲𑀓𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀉𑀧𑀧𑀦𑁆𑀦𑁄 𑀢𑀳𑀺𑀁 𑀢𑀳𑀺𑀁.

‘‘𑀲𑀼𑀕𑀦𑁆𑀥𑀤𑁂𑀳𑁄 𑀲𑀩𑁆𑀩𑀢𑁆𑀣, 𑀪𑀯𑀺𑀲𑁆𑀲𑀢𑀺 𑀅𑀬𑀁 𑀦𑀭𑁄;

𑀕𑀼𑀡𑀕𑀦𑁆𑀥𑀬𑀼𑀢𑁆𑀢𑁄 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀯𑀺𑀧𑁆𑀧𑀓𑀼𑀮𑁂 𑀅𑀳𑀁;

𑀕𑀩𑁆𑀪𑀁 𑀫𑁂 𑀯𑀲𑀢𑁄 𑀫𑀸𑀢𑀸, 𑀤𑁂𑀳𑁂𑀦𑀸𑀲𑀺 𑀲𑀼𑀕𑀦𑁆𑀥𑀺𑀢𑀸.

‘‘𑀬𑀤𑀸 𑀘 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸, 𑀦𑀺𑀓𑁆𑀔𑀫𑀸𑀫𑀺 𑀢𑀤𑀸 𑀧𑀼𑀭𑀻;

𑀲𑀸𑀯𑀢𑁆𑀣𑀺 𑀲𑀩𑁆𑀩𑀕𑀦𑁆𑀥𑁂𑀳𑀺, 𑀯𑀸𑀲𑀺𑀢𑀸 𑀯𑀺𑀬 𑀯𑀸𑀬𑀣.

‘‘𑀧𑀼𑀧𑁆𑀨𑀯𑀲𑁆𑀲𑀜𑁆𑀘 𑀲𑀼𑀭𑀪𑀺, 𑀤𑀺𑀩𑁆𑀩𑀕𑀦𑁆𑀥𑀁 𑀫𑀦𑁄𑀭𑀫𑀁;

𑀥𑀽𑀧𑀸𑀦𑀺 𑀘 𑀫𑀳𑀕𑁆𑀖𑀸𑀦𑀺, 𑀉𑀧𑀯𑀸𑀬𑀺𑀁𑀲𑀼 𑀢𑀸𑀯𑀤𑁂.

‘‘𑀤𑁂𑀯𑀸 ¶ 𑀘 𑀲𑀩𑁆𑀩𑀕𑀦𑁆𑀥𑁂𑀳𑀺, 𑀥𑀽𑀧𑀧𑀼𑀧𑁆𑀨𑁂𑀳𑀺 𑀢𑀁 𑀖𑀭𑀁;

𑀯𑀸𑀲𑀬𑀺𑀁𑀲𑀼 𑀲𑀼𑀕𑀦𑁆𑀥𑁂𑀦, 𑀬𑀲𑁆𑀫𑀺𑀁 𑀚𑀸𑀢𑁄 𑀅𑀳𑀁 𑀖𑀭𑁂.

‘‘𑀬𑀤𑀸 ¶ 𑀘 𑀢𑀭𑀼𑀡𑁄 𑀪𑀤𑁆𑀤𑁄, 𑀧𑀞𑀫𑁂 𑀬𑁄𑀩𑁆𑀩𑀦𑁂 𑀞𑀺𑀢𑁄;

𑀢𑀤𑀸 𑀲𑁂𑀮𑀁 𑀲𑀧𑀭𑀺𑀲𑀁, 𑀯𑀺𑀦𑁂𑀢𑁆𑀯𑀸 𑀦𑀭𑀲𑀸𑀭𑀣𑀺.

‘‘𑀢𑁂𑀳𑀺 𑀲𑀩𑁆𑀩𑁂𑀳𑀺 𑀧𑀭𑀺𑀯𑀼𑀢𑁄, 𑀲𑀸𑀯𑀢𑁆𑀣𑀺𑀧𑀼𑀭𑀫𑀸𑀕𑀢𑁄;

𑀢𑀤𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀢𑀁, 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

‘‘𑀲𑀻𑀮𑀁 𑀲𑀫𑀸𑀥𑀺𑀧𑀜𑁆𑀜𑀜𑁆𑀘, 𑀯𑀺𑀫𑀼𑀢𑁆𑀢𑀺𑀜𑁆𑀘 𑀅𑀦𑀼𑀢𑁆𑀢𑀭𑀁;

𑀪𑀸𑀯𑁂𑀢𑁆𑀯𑀸 𑀘𑀢𑀼𑀭𑁄 𑀥𑀫𑁆𑀫𑁂, 𑀧𑀸𑀧𑀼𑀡𑀺𑀁 𑀆𑀲𑀯𑀓𑁆𑀔𑀬𑀁.

‘‘𑀬𑀤𑀸 𑀧𑀩𑁆𑀩𑀚𑀺𑀢𑁄 𑀘𑀸𑀳𑀁, 𑀬𑀤𑀸 𑀘 𑀅𑀭𑀳𑀸 𑀅𑀳𑀼𑀁;

𑀦𑀺𑀩𑁆𑀩𑀸𑀬𑀺𑀲𑁆𑀲𑀁 𑀬𑀤𑀸 𑀘𑀸𑀳𑀁, 𑀕𑀦𑁆𑀥𑀯𑀲𑁆𑀲𑁄 𑀢𑀤𑀸 𑀅𑀳𑀼.

‘‘𑀲𑀭𑀻𑀭𑀕𑀦𑁆𑀥𑁄 𑀘 𑀲𑀤𑀸𑀢𑀺𑀲𑁂𑀢𑀺 𑀫𑁂, 𑀫𑀳𑀸𑀭𑀳𑀁 𑀘𑀦𑁆𑀤𑀦𑀘𑀫𑁆𑀧𑀓𑀼𑀧𑁆𑀧𑀮𑀁;

𑀢𑀣𑁂𑀯 𑀕𑀦𑁆𑀥𑁂 𑀇𑀢𑀭𑁂 𑀘 𑀲𑀩𑁆𑀩𑀲𑁄, 𑀧𑀲𑀬𑁆𑀳 𑀯𑀸𑀬𑀸𑀫𑀺 𑀢𑀢𑁄 𑀢𑀳𑀺𑀁 𑀢𑀳𑀺𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀢𑀺𑀢𑁆𑀣𑀺𑀬𑁂𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀤𑀼𑀓𑁆𑀔𑀁, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀢𑁆𑀢𑀁 𑀛𑀸𑀦𑀸𑀤𑀺𑀲𑀼𑀔𑀜𑁆𑀘 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁩𑁨𑁦.

‘‘𑀅𑀬𑁄𑀕𑁂 ¶ 𑀬𑀼𑀜𑁆𑀚𑀫𑀢𑁆𑀢𑀸𑀦𑀁, 𑀧𑀼𑀭𑀺𑀲𑁄 𑀓𑀺𑀘𑁆𑀘𑀫𑀺𑀘𑁆𑀙𑀓𑁄;

𑀘𑀭𑀁 𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀢𑀁 𑀫𑁂 𑀤𑀼𑀩𑁆𑀪𑀕𑀮𑀓𑁆𑀔𑀡𑀁.

𑁩𑁨𑁧.

‘‘𑀅𑀩𑁆𑀩𑀽𑀴𑁆𑀳𑀁 𑀅𑀖𑀕𑀢𑀁 𑀯𑀺𑀚𑀺𑀢𑀁, 𑀏𑀓𑀜𑁆𑀘𑁂 𑀑𑀲𑁆𑀲𑀚𑁂𑀬𑁆𑀬 𑀓𑀮𑀻𑀯 𑀲𑀺𑀬𑀸;

𑀲𑀩𑁆𑀩𑀸𑀦𑀺𑀧𑀺 𑀘𑁂 𑀑𑀲𑁆𑀲𑀚𑁂𑀬𑁆𑀬 𑀅𑀦𑁆𑀥𑁄𑀯 𑀲𑀺𑀬𑀸, 𑀲𑀫𑀯𑀺𑀲𑀫𑀲𑁆𑀲 𑀅𑀤𑀲𑁆𑀲𑀦𑀢𑁄.

𑁩𑁨𑁨.

‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁩𑁨𑁩.

‘‘𑀬𑀣𑀸𑀧𑀺 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀅𑀕𑀦𑁆𑀥𑀓𑀁;

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀅𑀨𑀮𑀸 𑀳𑁄𑀢𑀺 𑀅𑀓𑀼𑀩𑁆𑀩𑀢𑁄.

𑁩𑁨𑁪.

‘‘𑀬𑀣𑀸𑀧𑀺 ¶ 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀲𑀼𑀕𑀦𑁆𑀥𑀓𑀁;

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀲𑀨𑀮𑀸 𑀳𑁄𑀢𑀺 𑀓𑀼𑀩𑁆𑀩𑀢𑁄’’𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀬𑁄𑀕𑁂𑀢𑀺 𑀅𑀬𑀼𑀜𑁆𑀚𑀺𑀢𑀩𑁆𑀩𑁂 𑀅𑀲𑁂𑀯𑀺𑀢𑀩𑁆𑀩𑁂 𑀅𑀦𑁆𑀢𑀤𑁆𑀯𑀬𑁂. 𑀇𑀥 𑀧𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀼𑀜𑁆𑀚𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀬𑀼𑀜𑁆𑀚𑀦𑁆𑀢𑁄 𑀬𑁄𑀚𑁂𑀦𑁆𑀢𑁄 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄. 𑀓𑀺𑀘𑁆𑀘𑀫𑀺𑀘𑁆𑀙𑀓𑁄𑀢𑀺 ¶ 𑀉𑀪𑀬𑀳𑀺𑀢𑀸𑀯𑀳𑀁 𑀓𑀺𑀘𑁆𑀘𑀁 𑀇𑀘𑁆𑀙𑀦𑁆𑀢𑁄, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀬𑁄𑀕𑁂 𑀘𑀭𑀁 𑀘𑀭𑀦𑁆𑀢𑁄 𑀘𑁂 𑀪𑀯𑁂𑀬𑁆𑀬. 𑀦𑀸𑀥𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀁 𑀳𑀺𑀢𑀲𑀼𑀔𑀁 𑀦 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀜𑀸𑀬𑁄. 𑀢𑀲𑁆𑀫𑀸 𑀬𑀁 𑀅𑀳𑀁 𑀢𑀺𑀢𑁆𑀣𑀺𑀬𑀫𑀢𑀯𑀜𑁆𑀘𑀺𑀢𑁄 𑀅𑀬𑁄𑀕𑁂 𑀬𑀼𑀜𑁆𑀚𑀺𑀁, 𑀢𑀁 𑀫𑁂 𑀤𑀼𑀩𑁆𑀪𑀕𑀮𑀓𑁆𑀔𑀡𑀁 𑀅𑀧𑀼𑀜𑁆𑀜𑀲𑀪𑀸𑀯𑁄. ‘‘𑀧𑀼𑀭𑀺𑀫𑀓𑀫𑁆𑀫𑀩𑁆𑀬𑀸𑀫𑁄𑀳𑀺𑀢𑁄 𑀅𑀬𑁄𑀕𑁂 𑀬𑀼𑀜𑁆𑀚𑀺’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀩𑁆𑀩𑀽𑀴𑁆𑀳𑀁 𑀅𑀖𑀕𑀢𑀁 𑀯𑀺𑀚𑀺𑀢𑀦𑁆𑀢𑀺 𑀯𑀺𑀩𑀸𑀥𑀦𑀲𑀪𑀸𑀯𑀢𑀸𑀬 𑀅𑀖𑀸 𑀦𑀸𑀫 𑀭𑀸𑀕𑀸𑀤𑀬𑁄, 𑀅𑀖𑀸𑀦𑀺 𑀏𑀯 𑀅𑀖𑀕𑀢𑀁, 𑀅𑀖𑀕𑀢𑀸𑀦𑀁 𑀯𑀺𑀚𑀺𑀢𑀁 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺, 𑀢𑁂𑀲𑀁 𑀯𑀺𑀚𑀬𑁄 𑀓𑀼𑀲𑀮𑀥𑀫𑁆𑀫𑀸𑀪𑀺𑀪𑀯𑁄. ‘‘𑀅𑀖𑀕𑀢𑀁 𑀯𑀺𑀚𑀺𑀢’’𑀦𑁆𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀁 𑀅𑀩𑁆𑀩𑀽𑀴𑁆𑀳𑀁 𑀅𑀦𑀼𑀤𑁆𑀥𑀢𑀁 𑀬𑁂𑀦, 𑀢𑀁 𑀅𑀩𑁆𑀩𑀽𑀴𑁆𑀳𑀸𑀖𑀕𑀢𑀁 𑀯𑀺𑀚𑀺𑀢𑀁 𑀓𑀢𑁆𑀯𑀸 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸, 𑀓𑀺𑀮𑁂𑀲𑁂 𑀅𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀜𑁆𑀘𑁂 𑀑𑀲𑁆𑀲𑀚𑁂𑀬𑁆𑀬𑀸𑀢𑀺 𑀅𑀤𑀼𑀢𑀺𑀬𑀢𑀸𑀬 𑀧𑀥𑀸𑀦𑀢𑀸𑀬 𑀘 𑀏𑀓𑀁 𑀅𑀧𑁆𑀧𑀫𑀸𑀤𑀁 𑀲𑀫𑁆𑀫𑀸𑀧𑀬𑁄𑀕𑀫𑁂𑀯 𑀯𑀸 𑀑𑀲𑁆𑀲𑀚𑁂𑀬𑁆𑀬 𑀧𑀭𑀺𑀘𑁆𑀘𑀚𑁂𑀬𑁆𑀬 𑀘𑁂. 𑀓𑀮𑀻𑀯 𑀲𑁄 𑀧𑀼𑀕𑁆𑀕𑀮𑁄 𑀓𑀸𑀴𑀓𑀡𑁆𑀡𑀻 𑀯𑀺𑀬 𑀲𑀺𑀬𑀸. 𑀲𑀩𑁆𑀩𑀸𑀦𑀺𑀧𑀺 𑀘𑁂 𑀑𑀲𑁆𑀲𑀚𑁂𑀬𑁆𑀬𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀧𑀸𑀘𑀓𑀸𑀦𑀺 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀑𑀲𑁆𑀲𑀚𑁂𑀬𑁆𑀬 𑀘𑁂, 𑀅𑀪𑀸𑀯𑀦𑀸𑀬 𑀙𑀟𑁆𑀟𑁂𑀬𑁆𑀬 𑀘𑁂, 𑀅𑀦𑁆𑀥𑁄𑀯 𑀲𑀺𑀬𑀸 𑀲𑀫𑀯𑀺𑀲𑀫𑀲𑁆𑀲 𑀅𑀤𑀲𑁆𑀲𑀦𑀢𑁄.

𑀬𑀣𑀸𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀭𑀼𑀘𑀺𑀭𑀦𑁆𑀢𑀺 𑀲𑁄𑀪𑀦𑀁. 𑀯𑀡𑁆𑀡𑀯𑀦𑁆𑀢𑀦𑁆𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑀁. 𑀅𑀕𑀦𑁆𑀥𑀓𑀦𑁆𑀢𑀺 𑀕𑀦𑁆𑀥𑀭𑀳𑀺𑀢𑀁 𑀧𑀸𑀮𑀺𑀪𑀤𑁆𑀤𑀓𑀕𑀺𑀭𑀺𑀓𑀡𑁆𑀡𑀺𑀓𑀚𑀬𑀲𑀼𑀫𑀦𑀸𑀤𑀺𑀪𑁂𑀤𑀁. 𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀢𑀺 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 𑀦𑀸𑀫 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑀧𑀼𑀧𑁆𑀨𑀲𑀤𑀺𑀲𑀁. 𑀬𑀣𑀸 𑀳𑀺 𑀅𑀕𑀦𑁆𑀥𑀓𑀁 𑀧𑀼𑀧𑁆𑀨𑀁 ¶ 𑀥𑀸𑀭𑁂𑀦𑁆𑀢𑀲𑁆𑀲 𑀲𑀭𑀻𑀭𑁂 𑀕𑀦𑁆𑀥𑁄 𑀦 𑀨𑀭𑀢𑀺, 𑀏𑀯𑀁 𑀏𑀢𑀫𑁆𑀧𑀺 𑀬𑁄 𑀲𑀓𑁆𑀓𑀘𑁆𑀘𑀲𑀯𑀦𑀸𑀤𑀻𑀳𑀺 ¶ 𑀘 𑀲𑀫𑀸𑀘𑀭𑀢𑀺, 𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀅𑀲𑀫𑀸𑀘𑀭𑀦𑁆𑀢𑀲𑁆𑀲 𑀬𑀁 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁, 𑀢𑀁 𑀅𑀓𑀼𑀩𑁆𑀩𑀢𑁄 𑀲𑀼𑀢𑀕𑀦𑁆𑀥𑀁 𑀧𑀝𑀺𑀧𑀢𑁆𑀢𑀺𑀕𑀦𑁆𑀥𑀜𑁆𑀘 𑀦 𑀆𑀯𑀳𑀢𑀺 𑀅𑀨𑀮𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀅𑀨𑀮𑀸 𑀳𑁄𑀢𑀺 𑀅𑀓𑀼𑀩𑁆𑀩𑀢𑁄’’𑀢𑀺.

𑀲𑀼𑀕𑀦𑁆𑀥𑀓𑀦𑁆𑀢𑀺 𑀲𑀼𑀫𑀦𑀘𑀫𑁆𑀧𑀓𑀦𑀻𑀮𑀼𑀧𑁆𑀧𑀮𑀧𑀼𑀧𑁆𑀨𑀸𑀤𑀺𑀪𑁂𑀤𑀁. 𑀏𑀯𑀦𑁆𑀢𑀺 𑀬𑀣𑀸 𑀢𑀁 𑀧𑀼𑀧𑁆𑀨𑀁 𑀥𑀸𑀭𑁂𑀦𑁆𑀢𑀲𑁆𑀲 𑀲𑀭𑀻𑀭𑁂 𑀕𑀦𑁆𑀥𑁄 𑀨𑀭𑀢𑀺, 𑀏𑀯𑀁 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀲𑀗𑁆𑀔𑀸𑀢𑀸 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀧𑀺 𑀬𑁄 𑀲𑀓𑁆𑀓𑀘𑁆𑀘𑀲𑀯𑀦𑀸𑀤𑀻𑀳𑀺 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺, 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀨𑀮𑀸 𑀳𑁄𑀢𑀺, 𑀲𑀼𑀢𑀕𑀦𑁆𑀥𑀧𑀝𑀺𑀧𑀢𑁆𑀢𑀺𑀕𑀦𑁆𑀥𑀸𑀦𑀁 𑀆𑀯𑀳𑀦𑀢𑁄 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀢𑀲𑁆𑀫𑀸 𑀬𑀣𑁄𑀯𑀸𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀘 𑀪𑀯𑁂𑀬𑁆𑀬𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀼𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀯𑀲𑁆𑀲𑀢𑀺 ¶ 𑀤𑁂𑀯𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀧𑀼𑀢𑁆𑀢𑁂 𑀘 𑀓𑀸𑀮𑀗𑁆𑀓𑀢𑁂 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀲𑀢𑁆𑀣𑀸𑀭𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑁄𑀓𑀲𑀮𑁆𑀮𑁂 𑀅𑀩𑁆𑀩𑀽𑀴𑁆𑀳𑁂 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀅𑀪𑀺𑀢𑁆𑀣𑀯𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀕𑀺𑀭𑀺𑀫𑀸𑀦𑀦𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀭𑀸𑀚𑀕𑀳𑀕𑀫𑀦𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀢𑀺𑀧𑀬𑀁 𑀤𑀺𑀯𑀲𑀁 𑀕𑀸𑀫𑀓𑀸𑀯𑀸𑀲𑁂 𑀯𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀸 𑀢𑀲𑁆𑀲 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣, 𑀅𑀳𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀸𑀫𑀻’’𑀢𑀺 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀕𑀢𑁄 ¶ 𑀩𑀳𑀼𑀓𑀺𑀘𑁆𑀘𑀢𑀸𑀬 𑀦 𑀲𑀭𑀺. ‘‘𑀣𑁂𑀭𑁄 𑀅𑀩𑁆𑀪𑁄𑀓𑀸𑀲𑁂 𑀯𑀲𑀢𑀻’’𑀢𑀺 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀢𑁂𑀫𑀦𑀪𑀬𑁂𑀦 𑀯𑀲𑁆𑀲𑀁 𑀯𑀸𑀭𑁂𑀲𑀼𑀁. 𑀭𑀸𑀚𑀸 𑀅𑀯𑀲𑁆𑀲𑀦𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀣𑁂𑀭𑀲𑁆𑀲 𑀓𑀼𑀝𑀺𑀓𑀁 𑀓𑀸𑀭𑀸𑀧𑁂𑀲𑀺. 𑀣𑁂𑀭𑁄 𑀓𑀼𑀝𑀺𑀓𑀸𑀬𑀁 𑀯𑀲𑀦𑁆𑀢𑁄 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀮𑀸𑀪𑁂𑀦 𑀲𑀫𑀸𑀥𑀸𑀦𑀁 ¶ 𑀮𑀪𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁪𑁦.𑁪𑁧𑁯-𑁪𑁪𑁮) 𑁋

‘‘𑀪𑀭𑀺𑀬𑀸 𑀫𑁂 𑀓𑀸𑀮𑀗𑁆𑀓𑀢𑀸, 𑀧𑀼𑀢𑁆𑀢𑁄 𑀲𑀺𑀯𑀣𑀺𑀓𑀁 𑀕𑀢𑁄;

𑀫𑀸𑀢𑀸 𑀧𑀺𑀢𑀸 𑀫𑀢𑀸 𑀪𑀸𑀢𑀸, 𑀏𑀓𑀘𑀺𑀢𑀫𑁆𑀳𑀺 𑀟𑀬𑁆𑀳𑀭𑁂.

‘‘𑀢𑁂𑀦 𑀲𑁄𑀓𑁂𑀦 𑀲𑀦𑁆𑀢𑀢𑁆𑀢𑁄, 𑀓𑀺𑀲𑁄 𑀧𑀡𑁆𑀟𑀼 𑀅𑀳𑁄𑀲𑀳𑀁;

𑀘𑀺𑀢𑁆𑀢𑀓𑁆𑀔𑁂𑀧𑁄 𑀘 𑀫𑁂 𑀆𑀲𑀺, 𑀢𑁂𑀦 𑀲𑁄𑀓𑁂𑀦 𑀅𑀝𑁆𑀝𑀺𑀢𑁄.

‘‘𑀲𑁄𑀓𑀲𑀮𑁆𑀮𑀧𑀭𑁂𑀢𑁄𑀳𑀁, 𑀯𑀦𑀦𑁆𑀢𑀫𑀼𑀧𑀲𑀗𑁆𑀓𑀫𑀺𑀁;

𑀧𑀯𑀢𑁆𑀢𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀭𑀼𑀓𑁆𑀔𑀫𑀽𑀮𑁂 𑀯𑀲𑀸𑀫𑀳𑀁.

‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀚𑀺𑀦𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀜𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

‘‘𑀧𑀤𑀲𑀤𑁆𑀤𑀁 ¶ 𑀲𑀼𑀡𑀺𑀢𑁆𑀯𑀸𑀦, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀕𑁆𑀕𑀳𑁂𑀢𑁆𑀯𑀸𑀦𑀳𑀁 𑀲𑀻𑀲𑀁, 𑀉𑀮𑁆𑀮𑁄𑀓𑁂𑀲𑀺𑀁 𑀫𑀳𑀸𑀫𑀼𑀦𑀺𑀁.

‘‘𑀉𑀧𑀸𑀕𑀢𑁂 𑀫𑀳𑀸𑀯𑀻𑀭𑁂, 𑀧𑀻𑀢𑀺 𑀫𑁂 𑀉𑀤𑀧𑀚𑁆𑀚𑀣;

𑀢𑀤𑀸𑀲𑀺𑀫𑁂𑀓𑀕𑁆𑀕𑀫𑀦𑁄, 𑀤𑀺𑀲𑁆𑀯𑀸 𑀢𑀁 𑀮𑁄𑀓𑀦𑀸𑀬𑀓𑀁.

‘‘𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸𑀦, 𑀧𑀡𑁆𑀡𑀫𑀼𑀝𑁆𑀞𑀺𑀫𑀤𑀸𑀲𑀳𑀁;

𑀦𑀺𑀲𑀻𑀤𑀺 𑀪𑀕𑀯𑀸 𑀢𑀢𑁆𑀣, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

‘‘𑀦𑀺𑀲𑀚𑁆𑀚 𑀢𑀢𑁆𑀣 𑀪𑀕𑀯𑀸, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄;

𑀥𑀫𑁆𑀫𑀁 𑀫𑁂 𑀓𑀣𑀬𑀻 𑀩𑀼𑀤𑁆𑀥𑁄, 𑀲𑁄𑀓𑀲𑀮𑁆𑀮𑀯𑀺𑀦𑁄𑀤𑀦𑀁.

‘‘𑀅𑀦𑀯𑁆𑀳𑀺𑀢𑀸 𑀢𑀢𑁄 𑀆𑀕𑀼𑀁, 𑀅𑀦𑀦𑀼𑀜𑁆𑀜𑀸𑀢𑀸 𑀇𑀢𑁄 𑀕𑀢𑀸;

𑀬𑀣𑀸𑀕𑀢𑀸 𑀢𑀣𑀸 𑀕𑀢𑀸, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

‘‘𑀬𑀣𑀸𑀧𑀺 𑀧𑀣𑀺𑀓𑀸 𑀲𑀢𑁆𑀢𑀸, 𑀯𑀲𑁆𑀲𑀫𑀸𑀦𑀸𑀬 𑀯𑀼𑀝𑁆𑀞𑀺𑀬𑀸;

𑀲𑀪𑀡𑁆𑀟𑀸 𑀉𑀧𑀕𑀘𑁆𑀙𑀦𑁆𑀢𑀺, 𑀯𑀲𑁆𑀲𑀲𑁆𑀲𑀸𑀧𑀢𑀦𑀸𑀬 𑀢𑁂.

‘‘𑀯𑀲𑁆𑀲𑁂 ¶ 𑀘 𑀢𑁂 𑀑𑀭𑀫𑀺𑀢𑁂, 𑀲𑀫𑁆𑀧𑀬𑀦𑁆𑀢𑀺 𑀬𑀤𑀺𑀘𑁆𑀙𑀓𑀁;

𑀏𑀯𑀁 𑀫𑀸𑀢𑀸 𑀧𑀺𑀢𑀸 𑀢𑀼𑀬𑁆𑀳𑀁, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

‘‘𑀆𑀕𑀦𑁆𑀢𑀼𑀓𑀸 𑀧𑀸𑀳𑀼𑀦𑀓𑀸, 𑀘𑀮𑀺𑀢𑁂𑀭𑀺𑀢𑀓𑀫𑁆𑀧𑀺𑀢𑀸;

𑀏𑀯𑀁 𑀫𑀸𑀢𑀸 𑀧𑀺𑀢𑀸 𑀢𑀼𑀬𑁆𑀳𑀁, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

‘‘𑀬𑀣𑀸𑀧𑀺 𑀉𑀭𑀕𑁄 𑀚𑀺𑀡𑁆𑀡𑀁, 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀁 𑀢𑀘𑀁;

𑀏𑀯𑀁 𑀫𑀸𑀢𑀸 𑀧𑀺𑀢𑀸 𑀢𑀼𑀬𑁆𑀳𑀁, 𑀲𑀁 𑀢𑀦𑀼𑀁 𑀇𑀥 𑀳𑀻𑀬𑀭𑁂.

‘‘𑀩𑀼𑀤𑁆𑀥𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀲𑁄𑀓𑀲𑀮𑁆𑀮𑀁 𑀯𑀺𑀯𑀚𑁆𑀚𑀬𑀺𑀁;

𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀯𑀦𑁆𑀤𑀳𑀁.

‘‘𑀯𑀦𑁆𑀤𑀺𑀢𑁆𑀯𑀸𑀦 𑀫𑀳𑀸𑀦𑀸𑀕𑀁, 𑀧𑀽𑀚𑀬𑀺𑀁 𑀕𑀺𑀭𑀺𑀫𑀜𑁆𑀚𑀭𑀺𑀁;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀁, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁.

‘‘𑀧𑀽𑀚𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀅𑀦𑀼𑀲𑁆𑀲𑀭𑀁 𑀕𑀼𑀡𑀕𑁆𑀕𑀸𑀦𑀺, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

‘‘𑀦𑀺𑀢𑁆𑀢𑀺𑀡𑁆𑀡𑁄𑀲𑀺 𑀫𑀳𑀸𑀯𑀻𑀭, 𑀲𑀩𑁆𑀩𑀜𑁆𑀜𑀼 𑀮𑁄𑀓𑀦𑀸𑀬𑀓;

𑀲𑀩𑁆𑀩𑁂 𑀲𑀢𑁆𑀢𑁂 𑀉𑀤𑁆𑀥𑀭𑀲𑀺, 𑀜𑀸𑀡𑁂𑀦 𑀢𑁆𑀯𑀁 𑀫𑀳𑀸𑀫𑀼𑀦𑁂.

‘‘𑀯𑀺𑀫𑀢𑀺𑀁 𑀤𑁆𑀯𑁂𑀴𑁆𑀳𑀓𑀁 𑀯𑀸𑀧𑀺, 𑀲𑀜𑁆𑀙𑀺𑀦𑁆𑀤𑀲𑀺 𑀫𑀳𑀸𑀫𑀼𑀦𑁂;

𑀧𑀝𑀺𑀧𑀸𑀤𑁂𑀲𑀺 𑀫𑁂 𑀫𑀕𑁆𑀕𑀁, 𑀢𑀯 𑀜𑀸𑀡𑁂𑀦 𑀘𑀓𑁆𑀔𑀼𑀫.

‘‘𑀅𑀭𑀳𑀸 𑀯𑀲𑀺𑀧𑀢𑁆𑀢𑀸 𑀘, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀥𑀻𑀭𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀸𑀯𑀤𑁂.

‘‘𑀧𑀝𑀺𑀧𑀦𑁆𑀦𑀸 𑀘 𑀲𑁂𑀔𑀸 𑀘, 𑀨𑀮𑀝𑁆𑀞𑀸 𑀲𑀦𑁆𑀢𑀺 𑀲𑀸𑀯𑀓𑀸;

𑀲𑀼𑀭𑁄𑀤𑀬𑁂𑀯 𑀧𑀤𑀼𑀫𑀸, 𑀧𑀼𑀧𑁆𑀨𑀦𑁆𑀢𑀺 𑀢𑀯 𑀲𑀸𑀯𑀓𑀸.

‘‘𑀫𑀳𑀸𑀲𑀫𑀼𑀤𑁆𑀤𑁄𑀯𑀓𑁆𑀔𑁄𑀪𑁄 ¶ , 𑀅𑀢𑀼𑀮𑁄𑀧𑀺 𑀤𑀼𑀭𑀼𑀢𑁆𑀢𑀭𑁄;

𑀏𑀯𑀁 𑀜𑀸𑀡𑁂𑀦 𑀲𑀫𑁆𑀧𑀦𑁆𑀦𑁄, 𑀅𑀧𑁆𑀧𑀫𑁂𑀬𑁆𑀬𑁄𑀲𑀺 𑀘𑀓𑁆𑀔𑀼𑀫.

‘‘𑀯𑀦𑁆𑀤𑀺𑀢𑁆𑀯𑀸𑀳𑀁 𑀮𑁄𑀓𑀚𑀺𑀦𑀁, 𑀘𑀓𑁆𑀔𑀼𑀫𑀦𑁆𑀢𑀁 𑀫𑀳𑀸𑀬𑀲𑀁;

𑀧𑀼𑀣𑀼𑀤𑀺𑀲𑀸 𑀦𑀫𑀲𑁆𑀲𑀦𑁆𑀢𑁄, 𑀧𑀝𑀺𑀓𑀼𑀝𑀺𑀓𑁄 𑀆𑀕𑀜𑁆𑀙𑀳𑀁.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄;

𑀑𑀓𑁆𑀓𑀫𑀺𑀁 𑀫𑀸𑀢𑀼𑀬𑀸 𑀓𑀼𑀘𑁆𑀙𑀺𑀁, 𑀲𑀦𑁆𑀥𑀸𑀯𑀦𑁆𑀢𑁄 𑀪𑀯𑀸𑀪𑀯𑁂.

‘‘𑀅𑀕𑀸𑀭𑀸 ¶ 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀛𑀸𑀬𑀻, 𑀧𑀝𑀺𑀲𑀮𑁆𑀮𑀸𑀦𑀕𑁄𑀘𑀭𑁄.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀢𑁄𑀲𑀬𑀺𑀢𑁆𑀯𑀸 𑀫𑀳𑀸𑀫𑀼𑀦𑀺𑀁;

𑀘𑀦𑁆𑀤𑁄𑀯𑀩𑁆𑀪𑀖𑀦𑀸 𑀫𑀼𑀢𑁆𑀢𑁄, 𑀯𑀺𑀘𑀭𑀸𑀫𑀺 𑀅𑀳𑀁 𑀲𑀤𑀸.

‘‘𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀫𑁆𑀳𑀺, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀳𑀝𑁆𑀞𑀢𑀼𑀝𑁆𑀞𑁂 𑀯𑀺𑀬 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀧𑀭𑀺 𑀢𑀁 𑀯𑀲𑁆𑀲𑀦𑁂 𑀦𑀺𑀬𑁄𑀚𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁩𑁨𑁫.

‘‘𑀯𑀲𑁆𑀲𑀢𑀺 𑀤𑁂𑀯𑁄 𑀬𑀣𑀸𑀲𑀼𑀕𑀻𑀢𑀁, 𑀙𑀦𑁆𑀦𑀸 𑀫𑁂 𑀓𑀼𑀝𑀺𑀓𑀸 𑀲𑀼𑀔𑀸 𑀦𑀺𑀯𑀸𑀢𑀸;

𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀽𑀧𑀲𑀦𑁆𑀢𑁄, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯.

𑁩𑁨𑁬.

‘‘𑀯𑀲𑁆𑀲𑀢𑀺 𑀤𑁂𑀯𑁄 𑀬𑀣𑀸𑀲𑀼𑀕𑀻𑀢𑀁, 𑀙𑀦𑁆𑀦𑀸 𑀫𑁂 𑀓𑀼𑀝𑀺𑀓𑀸 𑀲𑀼𑀔𑀸 𑀦𑀺𑀯𑀸𑀢𑀸;

𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀲𑀦𑁆𑀢𑀘𑀺𑀢𑁆𑀢𑁄, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯.

𑁩𑁨𑁭.

‘‘𑀯𑀲𑁆𑀲𑀢𑀺 𑀤𑁂𑀯𑁄…𑀧𑁂… 𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀻𑀢𑀭𑀸𑀕𑁄…𑀧𑁂….

𑁩𑁨𑁮.

‘‘𑀯𑀲𑁆𑀲𑀢𑀺 𑀤𑁂𑀯𑁄…𑀧𑁂… 𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀻𑀢𑀤𑁄𑀲𑁄…𑀧𑁂….

𑁩𑁨𑁯.

‘‘𑀯𑀲𑁆𑀲𑀢𑀺 𑀤𑁂𑀯𑁄…𑀧𑁂… 𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀻𑀢𑀫𑁄𑀳𑁄;

𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺. 𑁋 𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 ¶ 𑀬𑀣𑀸𑀲𑀼𑀕𑀻𑀢𑀦𑁆𑀢𑀺 𑀲𑀼𑀕𑀻𑀢𑀸𑀦𑀼𑀭𑀽𑀧𑀁, 𑀲𑀼𑀦𑁆𑀤𑀭𑀲𑁆𑀲 𑀅𑀢𑁆𑀢𑀦𑁄 𑀫𑁂𑀖𑀕𑀻𑀢𑀲𑁆𑀲 𑀅𑀦𑀼𑀭𑀽𑀧𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀯𑀮𑀸𑀳𑀓𑁄 𑀳𑀺 𑀬𑀣𑀸 𑀅𑀕𑀚𑁆𑀚𑀦𑁆𑀢𑁄 𑀓𑁂𑀯𑀮𑀁 𑀯𑀲𑁆𑀲𑀦𑁆𑀢𑁄 𑀦 𑀲𑁄𑀪𑀢𑀺, 𑀏𑀯𑀁 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀣𑀦𑀬𑀦𑁆𑀢𑁄 𑀕𑀚𑁆𑀚𑀦𑁆𑀢𑁄 𑀯𑀺𑀚𑁆𑀚𑀼𑀮𑁆𑀮𑀢𑀸 𑀦𑀺𑀘𑁆𑀙𑀸𑀭𑁂𑀦𑁆𑀢𑁄𑀧𑀺 𑀅𑀯𑀲𑁆𑀲𑀦𑁆𑀢𑁄 𑀦 𑀲𑁄𑀪𑀢𑀺, 𑀢𑀣𑀸𑀪𑀽𑀢𑁄 𑀧𑀦 𑀳𑀼𑀢𑁆𑀯𑀸 𑀯𑀲𑁆𑀲𑀦𑁆𑀢𑁄 𑀲𑁄𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀲𑁆𑀲𑀢𑀺 𑀤𑁂𑀯𑁄 𑀬𑀣𑀸𑀲𑀼𑀕𑀻𑀢’’𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀅𑀪𑀺𑀢𑁆𑀣𑀦𑀬, 𑀧𑀚𑁆𑀚𑀼𑀦𑁆𑀦’’ ¶ , (𑀘𑀭𑀺𑀬𑀸. 𑁩.𑁮𑁯; 𑀚𑀸. 𑁧.𑁧.𑁭𑁫) ‘‘𑀕𑀚𑁆𑀚𑀺𑀢𑀸 𑀘𑁂𑀯 𑀯𑀲𑁆𑀲𑀺𑀢𑀸 𑀘𑀸’’𑀢𑀺 (𑀅. 𑀦𑀺. 𑁪.𑁧𑁦𑁧; 𑀧𑀼. 𑀧. 𑁧𑁫𑁭) 𑀘. 𑀢𑀲𑁆𑀲𑀁 𑀯𑀺𑀳𑀭𑀸𑀫𑀻𑀢𑀺 𑀢𑀲𑁆𑀲𑀁 𑀓𑀼𑀝𑀺𑀓𑀸𑀬𑀁 𑀅𑀭𑀺𑀬𑀯𑀺𑀳𑀸𑀭𑀕𑀩𑁆𑀪𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀸𑀫𑀺. 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄𑀢𑀺 𑀅𑀕𑁆𑀕𑀨𑀮𑀲𑀫𑀸𑀥𑀺𑀦𑀸 𑀲𑀫𑁆𑀫𑀤𑁂𑀯 𑀉𑀧𑀲𑀦𑁆𑀢𑀫𑀸𑀦𑀲𑁄.

𑀏𑀯𑀁 𑀣𑁂𑀭𑀲𑁆𑀲 𑀅𑀦𑁂𑀓𑀯𑀸𑀭𑀁 𑀓𑀢𑀁 𑀉𑀬𑁆𑀬𑁄𑀚𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑁄 𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀧𑀽𑀭𑁂𑀦𑁆𑀢𑁄 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀺.

𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀁 𑀧𑀢𑁆𑀣𑀬𑀸𑀦𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀧𑀜𑁆𑀘𑀦𑀯𑀼𑀢𑁂 𑀓𑀧𑁆𑀧𑁂 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀩𑁆𑀬𑀸𑀥𑀺𑀢𑀁 𑀤𑀺𑀲𑁆𑀯𑀸 𑀳𑀭𑀻𑀢𑀓𑀁 𑀅𑀤𑀸𑀲𑀺 ¶ . 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀮𑀭𑀝𑁆𑀞𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀫𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀲𑀼𑀔𑁂𑀦 𑀯𑀟𑁆𑀠𑀺. 𑀢𑀲𑁆𑀲 𑀧𑀦 𑀫𑀸𑀢𑀼𑀮𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀲𑀼𑀫𑀦𑁂 𑀯𑀬𑀧𑁆𑀧𑀢𑁆𑀢𑁂 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘𑀭𑀺𑀢𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀢𑀢𑁆𑀣 𑀬𑁄𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀅𑀣𑀲𑁆𑀲 𑀣𑁂𑀭𑁄 𑀯𑀺𑀧𑀲𑁆𑀲𑀦𑀸𑀯𑀺𑀥𑀺𑀁 𑀆𑀘𑀺𑀓𑁆𑀔𑀺. 𑀲𑁄 𑀘 𑀦𑀘𑀺𑀭𑁂𑀦𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁬𑁦-𑁭𑁧) 𑁋

‘‘𑀳𑀭𑀻𑀢𑀓𑀁 𑀆𑀫𑀮𑀓𑀁, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀁;

𑀓𑁄𑀮𑀁 𑀪𑀮𑁆𑀮𑀸𑀢𑀓𑀁 𑀩𑀺𑀮𑁆𑀮𑀁, 𑀲𑀬𑀫𑁂𑀯 𑀳𑀭𑀸𑀫𑀳𑀁.

‘‘𑀤𑀺𑀲𑁆𑀯𑀸𑀦 ¶ 𑀧𑀩𑁆𑀪𑀸𑀭𑀕𑀢𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀫𑀼𑀦𑀺𑀁;

𑀆𑀩𑀸𑀥𑁂𑀦 𑀆𑀧𑀻𑀴𑁂𑀦𑁆𑀢𑀁, 𑀅𑀤𑀼𑀢𑀻𑀬𑀁 𑀫𑀳𑀸𑀫𑀼𑀦𑀺𑀁.

‘‘𑀳𑀭𑀻𑀢𑀓𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁;

𑀔𑀸𑀤𑀫𑀢𑁆𑀢𑀫𑁆𑀳𑀺 𑀪𑁂𑀲𑀚𑁆𑀚𑁂, 𑀩𑁆𑀬𑀸𑀥𑀺 𑀧𑀲𑁆𑀲𑀫𑁆𑀪𑀺 𑀢𑀸𑀯𑀤𑁂.

‘‘𑀧𑀳𑀻𑀦𑀤𑀭𑀣𑁄 𑀩𑀼𑀤𑁆𑀥𑁄, 𑀅𑀦𑀼𑀫𑁄𑀤𑀫𑀓𑀸𑀲𑀺 𑀫𑁂;

𑀪𑁂𑀲𑀚𑁆𑀚𑀤𑀸𑀦𑁂𑀦𑀺𑀫𑀺𑀦𑀸, 𑀩𑁆𑀬𑀸𑀥𑀺𑀯𑀽𑀧𑀲𑀫𑁂𑀦 𑀘.

‘‘𑀤𑁂𑀯𑀪𑀽𑀢𑁄 ¶ 𑀫𑀦𑀼𑀲𑁆𑀲𑁄 𑀯𑀸, 𑀚𑀸𑀢𑁄 𑀯𑀸 𑀅𑀜𑁆𑀜𑀚𑀸𑀢𑀺𑀬𑀸;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑁄𑀢𑀼, 𑀫𑀸 𑀘 𑀢𑁂 𑀩𑁆𑀬𑀸𑀥𑀺𑀫𑀸𑀕𑀫𑀸.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

‘‘𑀬𑀢𑁄 𑀳𑀭𑀻𑀢𑀓𑀁 𑀤𑀺𑀦𑁆𑀦𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀇𑀫𑀁 𑀚𑀸𑀢𑀺𑀁 𑀉𑀧𑀸𑀤𑀸𑀬, 𑀩𑁆𑀬𑀸𑀥𑀺 𑀫𑁂 𑀦𑀼𑀧𑀧𑀚𑁆𑀚𑀣.

‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀪𑁂𑀲𑀚𑁆𑀚𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑁂 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀏𑀓𑀤𑀺𑀯𑀲𑀁 𑀫𑀸𑀢𑀼𑀮𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀁 𑀣𑁂𑀭𑁄 𑀅𑀥𑀺𑀕𑀫𑀁 𑀧𑀼𑀘𑁆𑀙𑀺, 𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁩𑁩𑁦.

‘‘𑀬𑀁 𑀧𑀢𑁆𑀣𑀬𑀸𑀦𑁄 𑀥𑀫𑁆𑀫𑁂𑀲𑀼, 𑀉𑀧𑀚𑁆𑀛𑀸𑀬𑁄 𑀅𑀦𑀼𑀕𑁆𑀕𑀳𑀺;

𑀅𑀫𑀢𑀁 𑀅𑀪𑀺𑀓𑀗𑁆𑀔𑀦𑁆𑀢𑀁, 𑀓𑀢𑀁 𑀓𑀢𑁆𑀢𑀩𑁆𑀩𑀓𑀁 𑀫𑀬𑀸.

𑁩𑁩𑁧.

‘‘𑀅𑀦𑀼𑀧𑁆𑀧𑀢𑁆𑀢𑁄 𑀲𑀘𑁆𑀙𑀺𑀓𑀢𑁄, 𑀲𑀬𑀁 𑀥𑀫𑁆𑀫𑁄 𑀅𑀦𑀻𑀢𑀺𑀳𑁄;

𑀯𑀺𑀲𑀼𑀤𑁆𑀥𑀜𑀸𑀡𑁄 𑀦𑀺𑀓𑁆𑀓𑀗𑁆𑀔𑁄, 𑀩𑁆𑀬𑀸𑀓𑀭𑁄𑀫𑀺 𑀢𑀯𑀦𑁆𑀢𑀺𑀓𑁂.

𑁩𑁩𑁨.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀤𑀢𑁆𑀣𑁄 𑀫𑁂 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁩𑁩.

‘‘𑀅𑀧𑁆𑀧𑀫𑀢𑁆𑀢𑀲𑁆𑀲 ¶ 𑀫𑁂 𑀲𑀺𑀓𑁆𑀔𑀸, 𑀲𑀼𑀲𑁆𑀲𑀼𑀢𑀸 𑀢𑀯 𑀲𑀸𑀲𑀦𑁂;

𑀲𑀩𑁆𑀩𑁂 𑀫𑁂 𑀆𑀲𑀯𑀸 𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁩𑁩𑁪.

‘‘𑀅𑀦𑀼𑀲𑀸𑀲𑀺 𑀫𑀁 𑀅𑀭𑀺𑀬𑀯𑀢𑀸, 𑀅𑀦𑀼𑀓𑀫𑁆𑀧𑀺 𑀅𑀦𑀼𑀕𑁆𑀕𑀳𑀺;

𑀅𑀫𑁄𑀖𑁄 𑀢𑀼𑀬𑁆𑀳𑀫𑁄𑀯𑀸𑀤𑁄, 𑀅𑀦𑁆𑀢𑁂𑀯𑀸𑀲𑀺𑀫𑁆𑀳𑀺 𑀲𑀺𑀓𑁆𑀔𑀺𑀢𑁄’’𑀢𑀺. 𑁋

𑀇𑀫𑀸𑀳𑀺 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀬𑀁 𑀧𑀢𑁆𑀣𑀬𑀸𑀦𑁄 𑀥𑀫𑁆𑀫𑁂𑀲𑀼, 𑀉𑀧𑀚𑁆𑀛𑀸𑀬𑁄 𑀅𑀦𑀼𑀕𑁆𑀕𑀳𑀺. 𑀅𑀫𑀢𑀁 𑀅𑀪𑀺𑀓𑀗𑁆𑀔𑀦𑁆𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼 𑀬𑀁 𑀥𑀫𑁆𑀫𑀁 𑀫𑀬𑁆𑀳𑀁 𑀧𑀢𑁆𑀣𑀬𑀦𑁆𑀢𑁄 𑀆𑀓𑀗𑁆𑀔𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀓𑀗𑁆𑀔𑀦𑁆𑀢𑀁 𑀫𑀁 𑀑𑀯𑀸𑀤𑀤𑀸𑀦𑀯𑀲𑁂𑀦 𑀅𑀦𑀼𑀕𑁆𑀕𑀡𑁆𑀳𑀺. 𑀓𑀢𑀁 𑀓𑀢𑁆𑀢𑀩𑁆𑀩𑀓𑀁 𑀫𑀬𑀸𑀢𑀺 𑀢𑀲𑁆𑀲 𑀅𑀥𑀺𑀕𑀫𑀢𑁆𑀣𑀁 𑀓𑀢𑁆𑀢𑀩𑁆𑀩𑀁 𑀧𑀭𑀺𑀜𑁆𑀜𑀸𑀤𑀺𑀲𑁄𑀴𑀲𑀯𑀺𑀥𑀁 𑀓𑀺𑀘𑁆𑀘𑀁 𑀓𑀢𑀁 𑀦𑀺𑀝𑁆𑀞𑀸𑀧𑀺𑀢𑀁 𑀫𑀬𑀸.

𑀢𑀢𑁄 ¶ 𑀏𑀯 𑀅𑀦𑀼𑀧𑁆𑀧𑀢𑁆𑀢𑁄 𑀅𑀥𑀺𑀕𑀢𑁄 𑀘𑀢𑀼𑀩𑁆𑀩𑀺𑀥𑁄𑀧𑀺 𑀫𑀕𑁆𑀕𑀥𑀫𑁆𑀫𑁄 𑀲𑀘𑁆𑀙𑀺𑀓𑀢𑁄. 𑀲𑀬𑀁 𑀥𑀫𑁆𑀫𑁄 𑀅𑀦𑀻𑀢𑀺𑀳𑁄𑀢𑀺 𑀲𑀬𑀁 𑀅𑀢𑁆𑀢𑀦𑀸𑀬𑁂𑀯 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀨𑀮𑀥𑀫𑁆𑀫𑁄 𑀘 𑀅𑀦𑀻𑀢𑀺𑀳𑁄 𑀅𑀲𑀦𑁆𑀤𑀺𑀤𑁆𑀥𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑁄 𑀓𑀢𑁄, ‘‘𑀇𑀢𑀺𑀳, 𑀇𑀢𑀺 𑀓𑀺𑀭𑀸’’𑀢𑀺 𑀧𑀯𑀢𑁆𑀢𑀺𑀬𑀸 𑀇𑀢𑀺𑀳𑀲𑀗𑁆𑀔𑀸𑀢𑀁 𑀲𑀁𑀲𑀬𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄𑀬𑁂𑀯 𑀅𑀭𑀺𑀬𑀫𑀕𑁆𑀕𑁄 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀯𑀺𑀲𑀼𑀤𑁆𑀥𑀜𑀸𑀡𑁄 𑀦𑀺𑀓𑁆𑀓𑀗𑁆𑀔𑁄’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀲𑀼𑀤𑁆𑀥𑀜𑀸𑀡𑁄𑀢𑀺 𑀲𑀩𑁆𑀩𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀜𑀸𑀡𑁄. 𑀢𑀯𑀦𑁆𑀢𑀺𑀓𑁂𑀢𑀺 𑀢𑀯 𑀲𑀫𑀻𑀧𑁂.

𑀲𑀤𑀢𑁆𑀣𑁄𑀢𑀺 𑀅𑀭𑀳𑀢𑁆𑀢𑀁. 𑀲𑀺𑀓𑁆𑀔𑀸𑀢𑀺 ¶ 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄. 𑀲𑀼𑀲𑁆𑀲𑀼𑀢𑀸𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀲𑁆𑀲 𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑀲𑁆𑀲 𑀘 𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀲𑀼𑀝𑁆𑀞𑀼 𑀲𑀼𑀢𑀸. 𑀢𑀯 𑀲𑀸𑀲𑀦𑁂𑀢𑀺 𑀢𑀯 𑀑𑀯𑀸𑀤𑁂 𑀅𑀦𑀼𑀲𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲.

𑀅𑀭𑀺𑀬𑀯𑀢𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀺𑀯𑀢𑀲𑀫𑀸𑀤𑀸𑀦𑁂𑀦. 𑀅𑀦𑁆𑀢𑁂𑀯𑀸𑀲𑀺𑀫𑁆𑀳𑀺 𑀲𑀺𑀓𑁆𑀔𑀺𑀢𑁄𑀢𑀺 𑀢𑀼𑀬𑁆𑀳𑀁 𑀲𑀫𑀻𑀧𑁂 𑀘𑀺𑀡𑁆𑀡𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀢𑀸𑀬 𑀅𑀦𑁆𑀢𑁂𑀯𑀸𑀲𑀻 𑀲𑀺𑀓𑁆𑀔𑀺𑀢𑀯𑀸 𑀲𑀺𑀓𑁆𑀔𑀺𑀢𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑁄 𑀅𑀫𑁆𑀳𑀻𑀢𑀺.

𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀟𑁆𑀠𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀸𑀥𑀽 ¶ 𑀳𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀯𑀟𑁆𑀠𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀸𑀭𑀼𑀓𑀘𑁆𑀙𑀦𑀕𑀭𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀟𑁆𑀠𑁄𑀢𑀺 𑀮𑀤𑁆𑀥𑀦𑀸𑀫𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀢𑀺. 𑀅𑀣𑀲𑁆𑀲 𑀫𑀸𑀢𑀸 𑀲𑀁𑀲𑀸𑀭𑁂 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀧𑀼𑀢𑁆𑀢𑀁 𑀜𑀸𑀢𑀻𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀼𑀢𑁆𑀢𑀫𑁆𑀧𑀺 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀁 𑀯𑁂𑀴𑀼𑀤𑀦𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀳𑀼𑀢𑁆𑀯𑀸 𑀕𑀦𑁆𑀣𑀥𑀼𑀭𑀁 𑀯𑀳𑀦𑁆𑀢𑁄 𑀏𑀓𑀤𑀺𑀯𑀲𑀁 ‘‘𑀏𑀓𑀓𑁄 𑀲𑀦𑁆𑀢𑀭𑀼𑀢𑁆𑀢𑀭𑁄𑀯 𑀫𑀸𑀢𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀸𑀢𑀸 ‘‘𑀓𑀲𑁆𑀫𑀸 𑀢𑁆𑀯𑀁 𑀏𑀓𑀓𑁄 𑀲𑀦𑁆𑀢𑀭𑀼𑀢𑁆𑀢𑀭𑁄𑀯 𑀇𑀥𑀸𑀕𑀢𑁄’’𑀢𑀺 𑀘𑁄𑀤𑁂𑀲𑀺. 𑀲𑁄 𑀫𑀸𑀢𑀭𑀸 𑀘𑁄𑀤𑀺𑀬𑀫𑀸𑀦𑁄 ‘‘𑀅𑀬𑀼𑀢𑁆𑀢𑀁 𑀫𑀬𑀸 𑀓𑀢’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀸𑀢𑀼 𑀑𑀯𑀸𑀤𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁩𑁩𑁫.

‘‘𑀲𑀸𑀥𑀽 ¶ 𑀳𑀺 𑀓𑀺𑀭 𑀫𑁂 𑀫𑀸𑀢𑀸, 𑀧𑀢𑁄𑀤𑀁 𑀉𑀧𑀤𑀁𑀲𑀬𑀺;

𑀬𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀦𑀼𑀲𑀺𑀝𑁆𑀞𑁄 𑀚𑀦𑁂𑀢𑁆𑀢𑀺𑀬𑀸;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩𑁩𑁬.

‘‘𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀢𑁂𑀯𑀺𑀚𑁆𑀚𑁄 𑀅𑀫𑀢𑀤𑁆𑀤𑀲𑁄;

𑀚𑁂𑀢𑁆𑀯𑀸 𑀦𑀫𑀼𑀘𑀺𑀦𑁄 𑀲𑁂𑀦𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁩𑁭.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑁂 𑀫𑁂 𑀯𑀺𑀚𑁆𑀚𑀺𑀁𑀲𑀼 𑀆𑀲𑀯𑀸;

𑀲𑀩𑁆𑀩𑁂 𑀅𑀲𑁂𑀲𑀸 𑀉𑀘𑁆𑀙𑀺𑀦𑁆𑀦𑀸, 𑀦 𑀘 𑀉𑀧𑁆𑀧𑀚𑁆𑀚𑀭𑁂 𑀧𑀼𑀦.

𑁩𑁩𑁮.

‘‘𑀯𑀺𑀲𑀸𑀭𑀤𑀸 𑀔𑁄 𑀪𑀕𑀺𑀦𑀻, 𑀏𑀯𑀫𑀢𑁆𑀣𑀁 𑀅𑀪𑀸𑀲𑀬𑀺;

𑀅𑀧𑀺𑀳𑀸 𑀦𑀽𑀦 𑀫𑀬𑀺𑀧𑀺, 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀺.

𑁩𑁩𑁯.

‘‘𑀧𑀭𑀺𑀬𑀦𑁆𑀢𑀓𑀢𑀁 𑀤𑀼𑀓𑁆𑀔𑀁, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 ¶ ¶ 𑀲𑀸𑀥𑀽 𑀳𑀺 𑀓𑀺𑀭 𑀫𑁂 𑀫𑀸𑀢𑀸, 𑀧𑀢𑁄𑀤𑀁 𑀉𑀧𑀤𑀁𑀲𑀬𑀻𑀢𑀺 𑀲𑀸𑀥𑀼 𑀯𑀢 𑀫𑀸𑀢𑀸 𑀫𑀬𑁆𑀳𑀁 𑀑𑀯𑀸𑀤𑀲𑀗𑁆𑀔𑀸𑀢𑀁 𑀧𑀢𑁄𑀤𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀫𑁂 𑀯𑀻𑀭𑀺𑀬𑀁 𑀉𑀢𑁆𑀢𑁂𑀚𑁂𑀦𑁆𑀢𑀻 𑀉𑀢𑁆𑀢𑀫𑀗𑁆𑀕𑁂 𑀧𑀜𑁆𑀜𑀸𑀲𑀻𑀲𑁂 𑀯𑀺𑀚𑁆𑀛𑀺. 𑀬𑀲𑁆𑀲𑀸𑀢𑀺 𑀬𑀲𑁆𑀲𑀸 𑀫𑁂 𑀫𑀸𑀢𑀼𑀬𑀸. 𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀬𑁄𑀚𑀦𑀸 𑁋 𑀚𑀦𑁂𑀢𑁆𑀢𑀺𑀬𑀸 𑀫𑁂 𑀅𑀦𑀼𑀲𑀺𑀝𑁆𑀞𑁄 𑀬𑀲𑁆𑀲𑀸 𑀅𑀦𑀼𑀲𑀸𑀲𑀦𑀻𑀪𑀽𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀳𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀉𑀢𑁆𑀢𑀫𑀁 𑀅𑀕𑁆𑀕𑀨𑀮𑀁 𑀲𑀫𑁆𑀩𑁄𑀥𑀺𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄.

𑀢𑀢𑁄 𑀏𑀯 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺 𑀅𑀭𑀳𑀸 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀢𑀸𑀬 𑀤𑀓𑁆𑀔𑀺𑀡𑁂𑀬𑁆𑀬𑁄 𑀤𑀓𑁆𑀔𑀺𑀡𑀸𑀭𑀳𑁄 𑀅𑀫𑁆𑀳𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀺𑀯𑀺𑀚𑁆𑀚𑀸𑀢𑁆𑀢𑀬𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀢𑁂𑀯𑀺𑀚𑁆𑀚𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀢𑀢𑁆𑀢𑀸 𑀅𑀫𑀢𑀤𑁆𑀤𑀲𑁄 𑀦𑀫𑀼𑀘𑀺𑀦𑁄 𑀫𑀸𑀭𑀲𑁆𑀲 𑀲𑁂𑀦𑀁 𑀓𑀺𑀮𑁂𑀲𑀯𑀸𑀳𑀺𑀦𑀺𑀁 𑀩𑁄𑀥𑀺𑀧𑀓𑁆𑀔𑀺𑀬𑀲𑁂𑀦𑀸𑀬 𑀚𑀺𑀦𑀺𑀢𑁆𑀯𑀸 𑀢𑀲𑁆𑀲 𑀚𑀺𑀢𑀢𑁆𑀢𑀸𑀬𑁂𑀯 𑀅𑀦𑀸𑀲𑀯𑁄 𑀲𑀼𑀔𑀁 𑀯𑀺𑀳𑀭𑀸𑀫𑀻𑀢𑀺.

𑀇𑀤𑀸𑀦𑀺 ‘‘𑀅𑀦𑀸𑀲𑀯𑁄’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀅𑀚𑁆𑀛𑀢𑁆𑀢𑀜𑁆𑀘𑀸’’ 𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀚𑁆𑀛𑀢𑁆𑀢𑀁 𑀅𑀚𑁆𑀛𑀢𑁆𑀢𑀯𑀢𑁆𑀣𑀼𑀓𑀸 𑀘 𑀩𑀳𑀺𑀤𑁆𑀥𑀸 𑀩𑀳𑀺𑀤𑁆𑀥𑀯𑀢𑁆𑀣𑀼𑀓𑀸 𑀘 𑀆𑀲𑀯𑀸 𑀬𑁂 𑀫𑀬𑁆𑀳𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀢𑁄 𑀧𑀼𑀩𑁆𑀩𑁂 𑀯𑀺𑀚𑁆𑀚𑀺𑀁𑀲𑀼 𑀉𑀧𑀮𑀩𑁆𑀪𑀺𑀁𑀲𑀼, 𑀢𑁂 𑀲𑀩𑁆𑀩𑁂 𑀅𑀦𑀯𑀲𑁂𑀲𑀸 𑀉𑀘𑁆𑀙𑀺𑀦𑁆𑀦𑀸 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸 𑀧𑀳𑀻𑀦𑀸 𑀧𑀼𑀦 𑀤𑀸𑀦𑀺 𑀓𑀤𑀸𑀘𑀺𑀧𑀺 𑀦 𑀘 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺𑀬𑁂𑀯𑀸𑀢𑀺.

𑀇𑀤𑀸𑀦𑀺 𑀫𑀸𑀢𑀼 𑀯𑀘𑀦𑀁 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀅𑀭𑀳𑀢𑁆𑀢𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀫𑀸𑀢𑀭𑀁 𑀣𑁄𑀫𑁂𑀦𑁆𑀢𑁄 ‘‘𑀯𑀺𑀲𑀸𑀭𑀤𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀲𑀸𑀭𑀤𑀸 𑀔𑁄𑀢𑀺 𑀏𑀓𑀁𑀲𑁂𑀦 𑀯𑀺𑀕𑀢𑀲𑀸𑀭𑀚𑁆𑀚𑀸. 𑀏𑀯𑀁 𑀫𑀸𑀢𑀼 𑀅𑀢𑁆𑀢𑀦𑁄 ¶ 𑀘 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀲𑀢𑁆𑀣𑀼 𑀑𑀭𑀲𑀧𑀼𑀢𑁆𑀢𑀪𑀸𑀯𑀁 𑀉𑀮𑁆𑀮𑀧𑁂𑀦𑁆𑀢𑁄 𑀫𑀸𑀢𑀭𑀁 ‘‘𑀪𑀕𑀺𑀦𑀻’’𑀢𑀺 𑀆𑀳. 𑀏𑀢𑀫𑀢𑁆𑀣𑀁 𑀅𑀪𑀸𑀲𑀬𑀻𑀢𑀺 𑀏𑀢𑀁 𑀫𑀫 𑀑𑀯𑀸𑀤𑀪𑀽𑀢𑀁 𑀅𑀢𑁆𑀣𑀁 𑀅𑀪𑀡𑀺. 𑀏𑀯𑀁 𑀧𑀦 𑀫𑀁 𑀑𑀯𑀤𑀦𑁆𑀢𑀻 𑀦 𑀓𑁂𑀯𑀮𑀁 𑀯𑀺𑀲𑀸𑀭𑀤𑀸 𑀏𑀯, 𑀅𑀣 𑀔𑁄 𑀅𑀧𑀺𑀳𑀸 𑀦𑀽𑀦 𑀫𑀬𑀺𑀧𑀺 𑀢𑀯 𑀧𑀼𑀢𑁆𑀢𑀓𑁂𑀧𑀺 𑀅𑀧𑀺𑀳𑀸 𑀅𑀲𑀦𑁆𑀣𑀯𑀸 𑀫𑀜𑁆𑀜𑁂, 𑀓𑀺𑀁 𑀯𑀸 𑀏𑀢𑁂𑀦 𑀧𑀭𑀺𑀓𑀧𑁆𑀧𑀦𑁂𑀦? 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀺 𑀅𑀯𑀺𑀚𑁆𑀚𑀸𑀤𑀺𑀓𑁄 𑀯𑀦𑀣𑁄 𑀢𑀯 𑀲𑀦𑁆𑀢𑀸𑀦𑁂 𑀦𑀢𑁆𑀣𑁂𑀯, 𑀬𑀸 𑀫𑀁 𑀪𑀯𑀓𑁆𑀔𑀬𑁂 𑀦𑀺𑀬𑁄𑀚𑁂𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 ‘‘𑀢𑀬𑀸 𑀦𑀺𑀬𑁄𑀚𑀺𑀢𑀸𑀓𑀸𑀭𑁂𑀦𑁂𑀯 𑀫𑀬𑀸 𑀧𑀝𑀺𑀧𑀦𑁆𑀦’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀬𑀦𑁆𑀢𑀓𑀢’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳, 𑀢𑀲𑁆𑀲𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯.

𑀯𑀟𑁆𑀠𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀢𑁆𑀣𑀸𑀬 ¶ 𑀯𑀢 𑀫𑁂𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 ¶ 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀢𑁆𑀢𑀦𑀸 𑀭𑁄𑀧𑀺𑀢𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀧𑀞𑀫𑀼𑀧𑁆𑀧𑀦𑁆𑀦𑀁 𑀫𑀦𑁄𑀲𑀺𑀮𑀸𑀯𑀡𑁆𑀡𑀁 𑀏𑀓𑀁 𑀅𑀫𑁆𑀩𑀨𑀮𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀯𑀬𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀅𑀦𑀺𑀘𑁆𑀙𑀦𑁆𑀢𑁄 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀳𑀺 𑀢𑀸𑀧𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀦𑀤𑀻𑀢𑀻𑀭𑁂 𑀯𑀲𑀦𑀢𑁄 𑀳𑀺𑀲𑁆𑀲 𑀓𑀲𑁆𑀲𑀧𑀕𑁄𑀢𑁆𑀢𑀢𑀸𑀬 𑀘 𑀦𑀤𑀻𑀓𑀲𑁆𑀲𑀧𑁄𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀢𑀲𑁆𑀲 𑀪𑀕𑀯𑀸 𑀲𑀧𑀭𑀺𑀲𑀲𑁆𑀲 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀢𑀁 𑀲𑀩𑁆𑀩𑀁 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁬-𑁩𑁯) 𑀆𑀕𑀢𑀫𑁂𑀯. 𑀲𑁄 𑀪𑀕𑀯𑀢𑁄 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 (𑀫𑀳𑀸𑀯. 𑁫𑁪; 𑀲𑀁. 𑀦𑀺. 𑁪.𑁨𑁮) 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁮𑁧-𑁮𑁭) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀲𑁆𑀲, 𑀥𑀸𑀭𑀢𑁄 𑀉𑀢𑁆𑀢𑀫𑀁 𑀬𑀲𑀁.

‘‘𑀅𑀕𑁆𑀕𑀨𑀮𑀁 ¶ 𑀕𑀳𑁂𑀢𑁆𑀯𑀸𑀦, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀻𑀭𑀲𑁆𑀲, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀕𑁆𑀕𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑁂 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀓𑀺𑀢𑁆𑀢𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁩𑁪𑁦.

‘‘𑀅𑀢𑁆𑀣𑀸𑀬 ¶ 𑀯𑀢 𑀫𑁂 𑀩𑀼𑀤𑁆𑀥𑁄, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀅𑀕𑀸;

𑀬𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀯𑀚𑁆𑀚𑀬𑀺𑀁.

𑁩𑁪𑁧.

‘‘𑀬𑀚𑀺𑀁 𑀉𑀘𑁆𑀘𑀸𑀯𑀘𑁂 𑀬𑀜𑁆𑀜𑁂, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀚𑀼𑀳𑀺𑀁 𑀅𑀳𑀁;

𑀏𑀲𑀸 𑀲𑀼𑀤𑁆𑀥𑀻𑀢𑀺 𑀫𑀜𑁆𑀜𑀦𑁆𑀢𑁄, 𑀅𑀦𑁆𑀥𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄.

𑁩𑁪𑁨.

‘‘𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑁄, 𑀧𑀭𑀸𑀫𑀸𑀲𑁂𑀦 𑀫𑁄𑀳𑀺𑀢𑁄;

𑀅𑀲𑀼𑀤𑁆𑀥𑀺𑀁 𑀫𑀜𑁆𑀜𑀺𑀲𑀁 𑀲𑀼𑀤𑁆𑀥𑀺𑀁, 𑀅𑀦𑁆𑀥𑀪𑀽𑀢𑁄 𑀅𑀯𑀺𑀤𑁆𑀤𑀲𑀼.

𑁩𑁪𑁩.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀦𑀸 𑀫𑁂, 𑀪𑀯𑀸 𑀲𑀩𑁆𑀩𑁂 𑀯𑀺𑀤𑀸𑀮𑀺𑀢𑀸;

𑀚𑀼𑀳𑀸𑀫𑀺 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀁, 𑀦𑀫𑀲𑁆𑀲𑀸𑀫𑀺 𑀢𑀣𑀸𑀕𑀢𑀁.

𑁩𑁪𑁪.

‘‘𑀫𑁄𑀳𑀸 𑀲𑀩𑁆𑀩𑁂 𑀧𑀳𑀻𑀦𑀸 𑀫𑁂, 𑀪𑀯𑀢𑀡𑁆𑀳𑀸 𑀧𑀤𑀸𑀮𑀺𑀢𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀢𑁆𑀣𑀸𑀬 𑀯𑀢 𑀫𑁂𑀢𑀺 𑀫𑀬𑁆𑀳𑀁 𑀅𑀢𑁆𑀣𑀸𑀬 𑀯𑀢 𑀳𑀺𑀢𑀸𑀬 𑀯𑀢. 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄. 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀅𑀕𑀸𑀢𑀺 𑀦𑁂𑀭𑀜𑁆𑀚𑀭𑀸𑀲𑀗𑁆𑀔𑀸𑀢𑀁 𑀦𑀤𑀺𑀁 𑀅𑀕𑀜𑁆𑀙𑀺, 𑀢𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀘 𑀫𑀫 𑀪𑀸𑀢𑀼 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀅𑀲𑁆𑀲𑀫𑀁 𑀉𑀧𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀲𑁆𑀲𑀸𑀳’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄. 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦𑀸𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀮𑀪𑀺𑀢𑁆𑀯𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀯𑀚𑁆𑀚𑀬𑀺𑀦𑁆𑀢𑀺 ¶ ‘‘𑀬𑀜𑁆𑀜𑀸𑀤𑀻𑀳𑀺 𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀯𑀺𑀧𑀭𑀻𑀢𑀤𑀲𑁆𑀲𑀦𑀁 𑀧𑀚𑀳𑀺𑀁.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 ¶ 𑀯𑀺𑀯𑀚𑁆𑀚𑀬𑀺𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀚𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀚𑀺𑀁 𑀉𑀘𑁆𑀘𑀸𑀯𑀘𑁂 𑀬𑀜𑁆𑀜𑁂𑀢𑀺 𑀧𑀸𑀓𑀝𑀬𑀜𑁆𑀜𑁂 𑀲𑁄𑀫𑀬𑀸𑀕𑀯𑀸𑀚𑀧𑁂𑀬𑁆𑀬𑀸𑀤𑀺𑀓𑁂 𑀦𑀸𑀦𑀸𑀯𑀺𑀥𑁂 𑀬𑀜𑁆𑀜𑁂 𑀬𑀚𑀺𑀁. 𑀅𑀕𑁆𑀕𑀺𑀳𑀼𑀢𑁆𑀢𑀁 𑀚𑀼𑀳𑀺𑀁 𑀅𑀳𑀦𑁆𑀢𑀺 𑀢𑁂𑀲𑀁 𑀬𑀜𑁆𑀜𑀸𑀦𑀁 𑀬𑀚𑀦𑀯𑀲𑁂𑀦 𑀆𑀳𑀼𑀢𑀺𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀁. 𑀏𑀲𑀸 𑀲𑀼𑀤𑁆𑀥𑀻𑀢𑀺 𑀫𑀜𑁆𑀜𑀦𑁆𑀢𑁄𑀢𑀺 𑀏𑀲𑀸 𑀬𑀜𑁆𑀜𑀓𑀺𑀭𑀺𑀬𑀸 𑀅𑀕𑁆𑀕𑀺𑀧𑀸𑀭𑀺𑀘𑀭𑀺𑀬𑀸 𑀲𑀼𑀤𑁆𑀥𑀺𑀳𑁂𑀢𑀼𑀪𑀸𑀯𑀢𑁄 𑀲𑀼𑀤𑁆𑀥𑀺 ‘‘𑀏𑀯𑀁 𑀫𑁂 𑀲𑀁𑀲𑀸𑀭𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄. 𑀅𑀦𑁆𑀥𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀯𑁂𑀓𑀮𑁆𑀮𑁂𑀦 𑀅𑀯𑀺𑀚𑁆𑀚𑀦𑁆𑀥𑀢𑀸𑀬 𑀅𑀦𑁆𑀥𑀪𑀽𑀢𑁄 𑀧𑀼𑀣𑀼𑀚𑁆𑀚𑀦𑁄 𑀳𑀼𑀢𑁆𑀯𑀸 𑀯𑀦𑀕𑀳𑀦𑀧𑀩𑁆𑀩𑀢𑀕𑀳𑀦𑀸𑀤𑀻𑀦𑀺 𑀯𑀺𑀬 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀬𑁂𑀯 𑀕𑀳𑀦𑀁 𑀤𑀺𑀝𑁆𑀞𑀺𑀕𑀳𑀦𑀁 ¶ , 𑀢𑀁 𑀧𑀓𑁆𑀔𑀦𑁆𑀤𑁄 𑀅𑀦𑀼𑀧𑀯𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑁄. 𑀧𑀭𑀸𑀫𑀸𑀲𑁂𑀦𑀸𑀢𑀺 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀧𑀭𑀸𑀫𑀲𑀦𑀢𑁄 𑀧𑀭𑀸𑀫𑀸𑀲𑀲𑀗𑁆𑀔𑀸𑀢𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦. 𑀫𑁄𑀳𑀺𑀢𑁄𑀢𑀺 𑀫𑀽𑀴𑁆𑀳𑀪𑀸𑀯𑀁 𑀧𑀸𑀧𑀺𑀢𑁄. 𑀅𑀲𑀼𑀤𑁆𑀥𑀺𑀁 𑀫𑀜𑁆𑀜𑀺𑀲𑀁 𑀲𑀼𑀤𑁆𑀥𑀺𑀦𑁆𑀢𑀺 𑀅𑀲𑀼𑀤𑁆𑀥𑀺𑀁 𑀫𑀕𑁆𑀕𑀁 ‘‘𑀲𑀼𑀤𑁆𑀥𑀺𑀁 𑀫𑀕𑁆𑀕’’𑀦𑁆𑀢𑀺 𑀫𑀜𑁆𑀜𑀺𑀲𑀁 𑀫𑀜𑁆𑀜𑀺𑀁. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀦𑁆𑀥𑀪𑀽𑀢𑁄 𑀅𑀯𑀺𑀤𑁆𑀤𑀲𑀽’’𑀢𑀺. 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀪𑀽𑀢𑁄, 𑀢𑀢𑁄 𑀏𑀯 𑀥𑀫𑁆𑀫𑀸𑀥𑀫𑁆𑀫𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀜𑁆𑀘 𑀅𑀯𑀺𑀤𑁆𑀯𑀸, 𑀢𑀲𑁆𑀫𑀸 𑀢𑀣𑀸 𑀫𑀜𑁆𑀜𑀺𑀦𑁆𑀢𑀺 𑀅𑀢𑁆𑀣𑁄.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀦𑀸 𑀫𑁂𑀢𑀺 𑀏𑀯𑀁𑀪𑀽𑀢𑀲𑁆𑀲 𑀧𑀦 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀘𑀢𑀼𑀲𑀘𑁆𑀘𑀕𑀩𑁆𑀪𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀩𑁆𑀩𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀫𑀬𑁆𑀳𑀁 𑀧𑀳𑀻𑀦𑀸. 𑀪𑀯𑀸𑀢𑀺 𑀓𑀸𑀫𑀪𑀯𑀸𑀤𑀬𑁄 𑀲𑀩𑁆𑀩𑁂𑀧𑀺 𑀪𑀯𑀸 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀯𑀺𑀤𑀸𑀮𑀺𑀢𑀸 𑀯𑀺𑀤𑁆𑀥𑀁𑀲𑀺𑀢𑀸. 𑀚𑀼𑀳𑀸𑀫𑀺 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀦𑁆𑀢𑀺 𑀆𑀳𑀯𑀦𑀻𑀬𑀸𑀤𑀺𑀓𑁂 𑀅𑀕𑁆𑀕𑀻 𑀙𑀟𑁆𑀟𑁂𑀢𑁆𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀲𑀩𑁆𑀩𑀲𑁆𑀲 𑀘 𑀧𑀸𑀧𑀲𑁆𑀲 𑀤𑀳𑀦𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀚𑀼𑀳𑀸𑀫𑀺 𑀧𑀭𑀺𑀘𑀭𑀸𑀫𑀺. 𑀢𑀬𑀺𑀤𑀁 𑀫𑀬𑁆𑀳𑀁 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀧𑀭𑀺𑀘𑀭𑀡𑀁 𑀤𑀥𑀺𑀦𑀯𑀦𑀻𑀢𑀫𑀣𑀺𑀢𑀲𑀧𑁆𑀧𑀺𑀆𑀤𑀺𑀦𑀺𑀭𑀧𑁂𑀓𑁆𑀔𑀁 𑀲𑀢𑁆𑀣𑀼 𑀦𑀫𑀲𑁆𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀦𑀫𑀲𑁆𑀲𑀸𑀫𑀺 𑀢𑀣𑀸𑀕𑀢’’𑀦𑁆𑀢𑀺. 𑀅𑀣 𑀯𑀸 𑀚𑀼𑀳𑀸𑀫𑀺 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀦𑁆𑀢𑀺 𑀤𑀸𑀬𑀓𑀸𑀦𑀁 𑀤𑀓𑁆𑀔𑀺𑀡𑀸𑀬 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀧𑀸𑀧𑀲𑁆𑀲 𑀘 𑀤𑀳𑀦𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀪𑀽𑀢𑀁 𑀅𑀢𑁆𑀢𑀸𑀦𑀁 𑀚𑀼𑀳𑀸𑀫𑀺 𑀧𑀭𑀺𑀘𑀭𑀸𑀫𑀺 𑀢𑀣𑀸 𑀓𑀢𑁆𑀯𑀸 𑀧𑀭𑀺𑀘𑀭𑀸𑀫𑀺, 𑀢𑀣𑀸 𑀓𑀢𑁆𑀯𑀸 𑀧𑀭𑀺𑀳𑀭𑀸𑀫𑀺. 𑀧𑀼𑀩𑁆𑀩𑁂 𑀅𑀕𑁆𑀕𑀺𑀤𑁂𑀯𑀁 𑀦𑀫𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀧𑀦 𑀦𑀫𑀲𑁆𑀲𑀸𑀫𑀺 𑀢𑀣𑀸𑀕𑀢𑀦𑁆𑀢𑀺.

𑀫𑁄𑀳𑀸 𑀲𑀩𑁆𑀩𑁂 𑀧𑀳𑀻𑀦𑀸 𑀫𑁂𑀢𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀸𑀤𑀺𑀪𑁂𑀤𑀸 𑀲𑀩𑁆𑀩𑁂 𑀫𑁄𑀳𑀸 𑀫𑀬𑁆𑀳𑀁 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀢𑀢𑁄 𑀏𑀯 ‘‘𑀪𑀯𑀢𑀡𑁆𑀳𑀸 𑀧𑀤𑀸𑀮𑀺𑀢𑀸. 𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 𑀢𑀻𑀲𑀼 𑀧𑀤𑁂𑀲𑀼 𑀫𑁂-𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄.

𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀸𑀢𑁄 ¶ ¶ 𑀫𑀚𑁆𑀛𑀦𑁆𑀳𑀺𑀓𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 ¶ 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀯𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀢𑀲𑁆𑀲 𑀅𑀲𑁆𑀲𑀫𑀲𑀫𑀻𑀧𑁂𑀦 𑀕𑀘𑁆𑀙𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀯𑁂𑀮𑀁 𑀑𑀮𑁄𑀓𑁂𑀢𑁆𑀯𑀸 𑀫𑀦𑁄𑀳𑀭𑀸𑀦𑀺 𑀓𑁄𑀮𑀨𑀮𑀸𑀦𑀺 𑀲𑀢𑁆𑀣𑀼 𑀉𑀧𑀦𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑀻𑀳𑀺 𑀢𑀸𑀧𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀬𑀸𑀬𑀁 𑀯𑀺𑀳𑀭𑀢𑀺. 𑀕𑀬𑀸𑀬𑀁 𑀯𑀲𑀦𑀢𑁄 𑀳𑀺𑀲𑁆𑀲 𑀓𑀲𑁆𑀲𑀧𑀕𑁄𑀢𑁆𑀢𑀢𑀸𑀬 𑀘 𑀕𑀬𑀸𑀓𑀲𑁆𑀲𑀧𑁄𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀲𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀁 𑀤𑀢𑁆𑀯𑀸 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 (𑀫𑀳𑀸𑀯. 𑁫𑁪) 𑀑𑀯𑀤𑀺𑀬𑀫𑀸𑀦𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁫.𑁮-𑁧𑁪) 𑁋

‘‘𑀅𑀚𑀺𑀦𑁂𑀦 𑀦𑀺𑀯𑀢𑁆𑀣𑁄𑀳𑀁, 𑀯𑀸𑀓𑀘𑀻𑀭𑀥𑀭𑁄 𑀢𑀤𑀸;

𑀔𑀸𑀭𑀺𑀬𑀸 𑀧𑀽𑀭𑀬𑀺𑀢𑁆𑀯𑀸𑀦𑀁, 𑀓𑁄𑀮𑀁𑀳𑀸𑀲𑀺𑀁 𑀫𑀫𑀲𑁆𑀲𑀫𑀁.

‘‘𑀢𑀫𑁆𑀳𑀺 𑀓𑀸𑀮𑁂 𑀲𑀺𑀔𑀻 𑀩𑀼𑀤𑁆𑀥𑁄, 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀳𑀼;

𑀫𑀫𑀲𑁆𑀲𑀫𑀁 𑀉𑀧𑀕𑀘𑁆𑀙𑀺, 𑀚𑀸𑀦𑀦𑁆𑀢𑁄 𑀲𑀩𑁆𑀩𑀓𑀸𑀮𑀺𑀓𑀁.

‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸𑀦 𑀘 𑀲𑀼𑀩𑁆𑀩𑀢𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀓𑁄𑀮𑀁 𑀩𑀼𑀤𑁆𑀥𑀲𑁆𑀲𑀤𑀸𑀲𑀳𑀁.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑁄𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑁂 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀸𑀧𑀧𑀯𑀸𑀳𑀦𑀓𑀺𑀢𑁆𑀢𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁩𑁪𑁫.

‘‘𑀧𑀸𑀢𑁄 𑀫𑀚𑁆𑀛𑀦𑁆𑀳𑀺𑀓𑀁 𑀲𑀸𑀬𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀤𑀺𑀯𑀲𑀲𑁆𑀲𑀳𑀁;

𑀑𑀢𑀭𑀺𑀁 𑀉𑀤𑀓𑀁 𑀲𑁄𑀳𑀁, 𑀕𑀬𑀸𑀬 𑀕𑀬𑀨𑀕𑁆𑀕𑀼𑀬𑀸.

𑁩𑁪𑁬.

‘‘𑀬𑀁 ¶ 𑀫𑀬𑀸 𑀧𑀓𑀢𑀁 𑀧𑀸𑀧𑀁, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀢𑀁 𑀤𑀸𑀦𑀻𑀥 𑀧𑀯𑀸𑀳𑁂𑀫𑀺, 𑀏𑀯𑀁𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼𑀁.

𑁩𑁪𑁭.

‘‘𑀲𑀼𑀢𑁆𑀯𑀸 ¶ 𑀲𑀼𑀪𑀸𑀲𑀺𑀢𑀁 𑀯𑀸𑀘𑀁, 𑀥𑀫𑁆𑀫𑀢𑁆𑀣𑀲𑀳𑀺𑀢𑀁 𑀧𑀤𑀁;

𑀢𑀣𑀁 𑀬𑀸𑀣𑀸𑀯𑀓𑀁 𑀅𑀢𑁆𑀣𑀁, 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀲𑀁.

𑁩𑁪𑁮.

‘‘𑀦𑀺𑀦𑁆𑀳𑀸𑀢𑀲𑀩𑁆𑀩𑀧𑀸𑀧𑁄𑀫𑁆𑀳𑀺, 𑀦𑀺𑀫𑁆𑀫𑀮𑁄 𑀧𑀬𑀢𑁄 𑀲𑀼𑀘𑀺;

𑀲𑀼𑀤𑁆𑀥𑁄 𑀲𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲 𑀑𑀭𑀲𑁄.

𑁩𑁪𑁯.

‘‘𑀑𑀕𑀬𑁆𑀳𑀝𑁆𑀞𑀗𑁆𑀕𑀺𑀓𑀁 𑀲𑁄𑀢𑀁, 𑀲𑀩𑁆𑀩𑀧𑀸𑀧𑀁 𑀧𑀯𑀸𑀳𑀬𑀺𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀕𑀫𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀸𑀢𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀁, 𑀫𑀚𑁆𑀛𑀦𑁆𑀳𑀺𑀓𑀁 ¶ 𑀫𑀚𑁆𑀛𑀦𑁆𑀳𑀯𑁂𑀮𑀸𑀬𑀁, 𑀲𑀸𑀬𑀁 𑀲𑀸𑀬𑀦𑁆𑀳𑀯𑁂𑀮𑀸𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀢𑀬𑁄 𑀯𑀸𑀭𑁂 𑀅𑀳𑀁 𑀉𑀤𑀓𑀁 𑀑𑀢𑀭𑀺𑀁 𑀑𑀕𑀸𑀳𑀺𑀁. 𑀑𑀢𑀭𑀦𑁆𑀢𑁄 𑀘 𑀲𑁄𑀳𑀁 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀬𑀤𑀸 𑀯𑀸 𑀢𑀤𑀸 𑀯𑀸 𑀑𑀢𑀭𑀺𑀁, 𑀅𑀣 𑀔𑁄 𑀕𑀬𑀸𑀬 𑀫𑀳𑀸𑀚𑀦𑀲𑁆𑀲 ‘‘𑀧𑀸𑀧𑀧𑀯𑀸𑀳𑀦’’𑀦𑁆𑀢𑀺 𑀅𑀪𑀺𑀲𑀫𑁆𑀫𑀢𑁂 𑀕𑀬𑀸𑀢𑀺𑀢𑁆𑀣𑁂, 𑀕𑀬𑀨𑀕𑁆𑀕𑀼𑀬𑀸 𑀕𑀬𑀸𑀨𑀕𑁆𑀕𑀼𑀦𑀸𑀫𑀓𑁂 𑀨𑀕𑁆𑀕𑀼𑀦𑀻𑀫𑀸𑀲𑀲𑁆𑀲 𑀉𑀢𑁆𑀢𑀭𑀨𑀕𑁆𑀕𑀼𑀦𑀻𑀦𑀓𑁆𑀔𑀢𑁆𑀢𑁂 𑀅𑀦𑀼𑀲𑀁𑀯𑀘𑁆𑀙𑀭𑀁 𑀉𑀤𑀓𑁄𑀭𑁄𑀳𑀦𑀫𑀦𑀼𑀬𑀼𑀢𑁆𑀢𑁄 𑀅𑀳𑁄𑀲𑀺𑀦𑁆𑀢𑀺.

𑀇𑀤𑀸𑀦𑀺 𑀢𑀤𑀸 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀉𑀤𑀓𑁄𑀭𑁄𑀳𑀦𑀫𑀦𑀼𑀬𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀫𑀬𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 ‘‘𑀬𑀁 𑀫𑀬𑀸 𑀧𑀼𑀩𑁆𑀩𑁂 𑀇𑀢𑁄 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀼 𑀧𑀸𑀧𑀓𑀫𑁆𑀫𑀁 𑀉𑀧𑀘𑀺𑀢𑀁. 𑀢𑀁 𑀇𑀤𑀸𑀦𑀺 𑀇𑀥 𑀕𑀬𑀸𑀢𑀺𑀢𑁆𑀣𑁂 𑀇𑀫𑀺𑀲𑁆𑀲𑀸 𑀘 𑀕𑀬𑀸𑀨𑀕𑁆𑀕𑀼𑀬𑀸 𑀇𑀫𑀺𑀦𑀸 𑀉𑀤𑀓𑁄𑀭𑁄𑀳𑀦𑁂𑀦 𑀧𑀯𑀸𑀳𑁂𑀫𑀺 𑀅𑀧𑀦𑁂𑀫𑀺 𑀯𑀺𑀓𑁆𑀔𑀸𑀮𑁂𑀫𑀻’’𑀢𑀺. 𑀧𑀼𑀭𑁂 𑀲𑀢𑁆𑀣𑀼 𑀲𑀸𑀲𑀦𑀼𑀧𑀕𑀫𑀦𑀢𑁄 𑀧𑀼𑀩𑁆𑀩𑁂 𑀏𑀯𑀁𑀤𑀺𑀝𑁆𑀞𑀺 𑀏𑀯𑀭𑀽𑀧𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑀅𑀳𑀼𑀁 𑀅𑀳𑁄𑀲𑀺𑀁.

𑀥𑀫𑁆𑀫𑀢𑁆𑀣𑀲𑀳𑀺𑀢𑀁 𑀧𑀤𑀦𑁆𑀢𑀺 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄. 𑀥𑀫𑁆𑀫𑁂𑀦 𑀘 𑀅𑀢𑁆𑀣𑁂𑀦 𑀘 𑀲𑀳𑀺𑀢𑀓𑁄𑀝𑁆𑀞𑀸𑀲𑀁, 𑀆𑀤𑀺𑀢𑁄 𑀫𑀚𑁆𑀛𑀢𑁄 𑀧𑀭𑀺𑀬𑁄𑀲𑀸𑀦𑀢𑁄 𑀘 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀅𑀢𑁆𑀣𑀽𑀧𑀲𑀁𑀳𑀺𑀢𑀁 𑀲𑀼𑀝𑁆𑀞𑀼 𑀏𑀓𑀦𑁆𑀢𑁂𑀦 𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀪𑀸𑀲𑀺𑀢𑀁 𑀯𑀸𑀘𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀯𑀘𑀦𑀁 𑀲𑀼𑀢𑁆𑀯𑀸 𑀢𑁂𑀦 𑀧𑀓𑀸𑀲𑀺𑀢𑀁 𑀧𑀭𑀫𑀢𑁆𑀣𑀪𑀸𑀯𑁂𑀦 𑀢𑀘𑁆𑀙𑀪𑀸𑀯𑀢𑁄 𑀢𑀣𑀁 𑀬𑀣𑀸𑀭𑀳𑀁 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀉𑀧𑀸𑀬𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 𑀬𑀸𑀣𑀸𑀯𑀓𑀁 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑀁 𑀬𑁄𑀦𑀺𑀲𑁄 𑀉𑀧𑀸𑀬𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀲𑀁 ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄 ¶ , 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺 𑀧𑀢𑀺𑀅𑀯𑁂𑀓𑁆𑀔𑀺𑀁, 𑀜𑀸𑀡𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀅𑀢𑁆𑀣𑁄.

𑀦𑀺𑀦𑁆𑀳𑀸𑀢𑀲𑀩𑁆𑀩𑀧𑀸𑀧𑁄𑀫𑁆𑀳𑀻𑀢𑀺 𑀏𑀯𑀁 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀢𑁆𑀢𑀸 𑀏𑀯 𑀅𑀭𑀺𑀬𑀫𑀕𑁆𑀕𑀚𑀮𑁂𑀦 𑀯𑀺𑀓𑁆𑀔𑀸𑀮𑀺𑀢𑀲𑀩𑁆𑀩𑀧𑀸𑀧𑁄 𑀅𑀫𑁆𑀳𑀺. 𑀢𑀢𑁄 𑀏𑀯 𑀭𑀸𑀕𑀫𑀮𑀸𑀤𑀻𑀦𑀁 𑀅𑀪𑀸𑀯𑁂𑀦 𑀦𑀺𑀫𑁆𑀫𑀮𑀢𑁆𑀢𑀸 𑀦𑀺𑀫𑁆𑀫𑀮𑁄. 𑀢𑀢𑁄 𑀏𑀯 ¶ 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸𑀬 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀢𑀸𑀬 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀢𑀸𑀬 𑀧𑀬𑀢𑁄 𑀲𑀼𑀘𑀺 𑀲𑀼𑀤𑁆𑀥𑁄. 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀺𑀬𑀸 𑀲𑀼𑀤𑁆𑀥𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀸𑀬𑀲𑁆𑀲 𑀆𑀤𑀺𑀬𑀦𑀢𑁄 𑀤𑀸𑀬𑀸𑀤𑁄. 𑀢𑀲𑁆𑀲𑁂𑀯 𑀤𑁂𑀲𑀦𑀸𑀜𑀸𑀡𑀲𑀫𑀼𑀝𑁆𑀞𑀸𑀦𑀉𑀭𑁄𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀑𑀭𑀲𑁄 𑀧𑀼𑀢𑁆𑀢𑁄 𑀅𑀫𑁆𑀳𑀻𑀢𑀺 𑀬𑁄𑀚𑀦𑀸.

𑀧𑀼𑀦𑀧𑀺 𑀅𑀢𑁆𑀢𑀦𑁄 𑀧𑀭𑀫𑀢𑁆𑀣𑀢𑁄 𑀦𑁆𑀳𑀸𑀢𑀓𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀑𑀕𑀬𑁆𑀳𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀑𑀕𑀬𑁆𑀳𑀸𑀢𑀺 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀅𑀝𑁆𑀞𑀗𑁆𑀕𑀺𑀓𑀁 𑀲𑁄𑀢𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀅𑀝𑁆𑀞𑀗𑁆𑀕𑀲𑀫𑁄𑀥𑀸𑀦𑀪𑀽𑀢𑀁 𑀫𑀕𑁆𑀕𑀲𑁄𑀢𑀁. 𑀲𑀩𑁆𑀩𑀧𑀸𑀧𑀁 𑀧𑀯𑀸𑀳𑀬𑀺𑀦𑁆𑀢𑀺 𑀅𑀦𑀯𑀲𑁂𑀲𑀁 𑀧𑀸𑀧𑀫𑀮𑀁 𑀧𑀓𑁆𑀔𑀸𑀮𑁂𑀲𑀺𑀁, 𑀅𑀭𑀺𑀬𑀫𑀕𑁆𑀕𑀚𑀮𑀧𑀯𑀸𑀳𑀦𑁂𑀦 𑀧𑀭𑀫𑀢𑁆𑀣𑀦𑁆𑀳𑀸𑀢𑀓𑁄 𑀅𑀳𑁄𑀲𑀺𑀁. 𑀢𑀢𑁄 𑀏𑀯 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀕𑀫𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀓𑁆𑀓𑀮𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺.

𑀲𑁄𑀧𑀺 ¶ 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀯𑀓𑁆𑀓𑀮𑀻𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀭𑀽𑀧𑀓𑀸𑀬𑀲𑁆𑀲 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀢𑀺𑀢𑁆𑀢𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀭𑀢𑀺. ‘‘𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀦𑀺𑀘𑁆𑀘𑀓𑀸𑀮𑀁 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀪𑁄𑀚𑀦𑀯𑁂𑀮𑀁 𑀲𑀭𑀻𑀭𑀓𑀺𑀘𑁆𑀘𑀓𑀸𑀮𑀜𑁆𑀘 𑀲𑁂𑀲𑀓𑀸𑀮𑁂 𑀬𑀢𑁆𑀣 𑀞𑀺𑀢𑁂𑀦 𑀲𑀓𑁆𑀓𑀸 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁, 𑀢𑀢𑁆𑀣 𑀞𑀺𑀢𑁄 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀧𑀳𑀸𑀬 𑀪𑀕𑀯𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑁄𑀯 𑀯𑀺𑀳𑀭𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑁄 𑀩𑀳𑀼𑀓𑀸𑀮𑀁 𑀢𑀲𑁆𑀫𑀺𑀁 𑀭𑀽𑀧𑀤𑀲𑁆𑀲𑀦𑁂𑀦𑁂𑀯 𑀯𑀺𑀘𑀭𑀦𑁆𑀢𑁂 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 ¶ ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦? 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀺. 𑀬𑁄 𑀫𑀁 𑀧𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺. 𑀥𑀫𑁆𑀫𑀜𑁆𑀳𑀺, 𑀯𑀓𑁆𑀓𑀮𑀺, 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀺, 𑀫𑀁 𑀧𑀲𑁆𑀲𑀦𑁆𑀢𑁄 𑀥𑀫𑁆𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭) 𑀆𑀳.

𑀲𑀢𑁆𑀣𑀭𑀺 𑀏𑀯𑀁 𑀯𑀤𑀦𑁆𑀢𑁂𑀧𑀺 𑀣𑁂𑀭𑁄 𑀲𑀢𑁆𑀣𑀼 𑀤𑀲𑁆𑀲𑀦𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁄 𑀲𑀢𑁆𑀣𑀸 ‘‘𑀦𑀸𑀬𑀁 𑀪𑀺𑀓𑁆𑀔𑀼 𑀲𑀁𑀯𑁂𑀕𑀁 𑀅𑀮𑀪𑀺𑀢𑁆𑀯𑀸 𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 ‘‘𑀅𑀧𑁂𑀳𑀺, 𑀯𑀓𑁆𑀓𑀮𑀻’’𑀢𑀺 𑀣𑁂𑀭𑀁 𑀧𑀡𑀸𑀫𑁂𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀧𑀡𑀸𑀫𑀺𑀢𑁄 𑀲𑀫𑁆𑀫𑀼𑀔𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦, 𑀬𑁄𑀳𑀁 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀦 𑀮𑀪𑀸𑀫𑀻’’𑀢𑀺 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑁂 𑀧𑀧𑀸𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀺. 𑀲𑀢𑁆𑀣𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀫𑀫 𑀲𑀦𑁆𑀢𑀺𑀓𑀸 𑀅𑀲𑁆𑀲𑀸𑀲𑀁 𑀅𑀮𑀪𑀦𑁆𑀢𑁄 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀦𑀸𑀲𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀼𑀁 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑁋

‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁩𑁮𑁧) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀏𑀳𑀺, 𑀯𑀓𑁆𑀓𑀮𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀣𑁂𑀭𑁄 ‘‘𑀤𑀲𑀩𑀮𑁄 𑀫𑁂 𑀤𑀺𑀝𑁆𑀞𑁄, ‘𑀏𑀳𑀻’𑀢𑀺 𑀅𑀯𑁆𑀳𑀸𑀦𑀫𑁆𑀧𑀺 𑀮𑀤𑁆𑀥’’𑀦𑁆𑀢𑀺 𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ¶ ‘‘𑀓𑀼𑀢𑁄 𑀆𑀕𑀘𑁆𑀙𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀕𑀫𑀦𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀦𑁆𑀢𑁄 𑀧𑀞𑀫𑀧𑀸𑀤𑁂𑀦 𑀧𑀩𑁆𑀩𑀢𑁂 𑀞𑀺𑀢𑁄𑀬𑁂𑀯 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀕𑀸𑀣𑀁 ¶ 𑀆𑀯𑀚𑁆𑀚𑁂𑀦𑁆𑀢𑁄 𑀆𑀓𑀸𑀲𑁂𑀬𑁂𑀯 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁮) 𑀥𑀫𑁆𑀫𑀧𑀤𑀯𑀡𑁆𑀡𑀦𑀸𑀬𑀜𑁆𑀘 (𑀥. 𑀧. 𑀅𑀝𑁆𑀞. 𑁨.𑁩𑁮𑁧) 𑀆𑀕𑀢𑀁.

𑀇𑀥 𑀧𑀦 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀻’’𑀢𑀺𑀆𑀤𑀺𑀦𑀸 𑀲𑀢𑁆𑀣𑀸𑀭𑀸 𑀑𑀯𑀤𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀢𑀲𑁆𑀲 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑀢𑁄 𑀏𑀯 𑀯𑀺𑀧𑀲𑁆𑀲𑀦𑀸 𑀯𑀻𑀣𑀺𑀁 𑀦 𑀑𑀢𑀭𑀢𑀺, 𑀪𑀕𑀯𑀸 𑀢𑀁 𑀜𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀤𑀸𑀲𑀺. 𑀧𑀼𑀦 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀬𑁂𑀯, 𑀅𑀣𑀲𑁆𑀲 𑀆𑀳𑀸𑀭𑀯𑁂𑀓𑀮𑁆𑀮𑁂𑀦 𑀯𑀸𑀢𑀸𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀢𑀁 𑀯𑀸𑀢𑀸𑀩𑀸𑀥𑁂𑀦 𑀧𑀻𑀴𑀺𑀬𑀫𑀸𑀦𑀁 𑀜𑀢𑁆𑀯𑀸 𑀪𑀕𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑁋

𑁩𑁫𑁦.

‘‘𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄 𑀢𑁆𑀯𑀁, 𑀯𑀺𑀳𑀭𑀁 𑀓𑀸𑀦𑀦𑁂 𑀯𑀦𑁂;

𑀧𑀯𑀺𑀤𑁆𑀥𑀕𑁄𑀘𑀭𑁂 𑀮𑀽𑀔𑁂, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻’’𑀢𑀺. 𑁋

𑀆𑀳. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑁋

𑁩𑁫𑁧.

‘‘𑀧𑀻𑀢𑀺𑀲𑀼𑀔𑁂𑀦 ¶ 𑀯𑀺𑀧𑀼𑀮𑁂𑀦, 𑀨𑀭𑀫𑀸𑀦𑁄 𑀲𑀫𑀼𑀲𑁆𑀲𑀬𑀁;

𑀮𑀽𑀔𑀫𑁆𑀧𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁩𑁫𑁨.

‘‘𑀪𑀸𑀯𑁂𑀦𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀩𑁄𑀚𑁆𑀛𑀗𑁆𑀕𑀸𑀦𑀺 𑀘 𑀪𑀸𑀯𑁂𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁩𑁫𑁩.

‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂;

𑀲𑀫𑀕𑁆𑀕𑁂 𑀲𑀳𑀺𑀢𑁂 𑀤𑀺𑀲𑁆𑀯𑀸, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁩𑁫𑁪.

‘‘𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀫𑁆𑀩𑀼𑀤𑁆𑀥𑀁, 𑀅𑀕𑁆𑀕𑀁 𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀅𑀢𑀦𑁆𑀤𑀺𑀢𑁄 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄𑀢𑀺 𑀯𑀸𑀢𑀸𑀩𑀸𑀥𑁂𑀦 𑀅𑀲𑁂𑀭𑀺𑀪𑀸𑀯𑀁 𑀉𑀧𑀦𑀻𑀢𑁄, 𑀯𑀸𑀢𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁄. 𑀢𑁆𑀯𑀦𑁆𑀢𑀺 𑀣𑁂𑀭𑀁 𑀆𑀮𑀧𑀢𑀺. 𑀯𑀺𑀳𑀭𑀦𑁆𑀢𑀺 𑀢𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑁄. 𑀓𑀸𑀦𑀦𑁂 𑀯𑀦𑁂𑀢𑀺 𑀓𑀸𑀦𑀦𑀪𑀽𑀢𑁂 𑀯𑀦𑁂, 𑀫𑀳𑀸𑀅𑀭𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀧𑀯𑀺𑀤𑁆𑀥𑀕𑁄𑀘𑀭𑁂𑀢𑀺 𑀯𑀺𑀲𑁆𑀲𑀝𑁆𑀞𑀕𑁄𑀘𑀭𑁂 𑀤𑀼𑀮𑁆𑀮𑀪𑀧𑀘𑁆𑀘𑀬𑁂. 𑀯𑀸𑀢𑀭𑁄𑀕𑀲𑁆𑀲 𑀲𑀧𑁆𑀧𑀸𑀬𑀸𑀦𑀁 𑀲𑀧𑁆𑀧𑀺𑀆𑀤𑀺𑀪𑁂𑀲𑀚𑁆𑀚𑀸𑀦𑀁 𑀅𑀪𑀸𑀯𑁂𑀦 𑀨𑀭𑀼𑀲𑀪𑀽𑀫𑀺𑀪𑀸𑀕𑀢𑀸𑀬 𑀘 𑀮𑀽𑀔𑁂 𑀮𑀽𑀔𑀝𑁆𑀞𑀸𑀦𑁂. 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻𑀢𑀺 𑀪𑀺𑀓𑁆𑀔𑀼 𑀢𑁆𑀯𑀁 𑀓𑀣𑀁 𑀯𑀺𑀳𑀭𑀺𑀲𑁆𑀲𑀲𑀻𑀢𑀺 𑀪𑀕𑀯𑀸 𑀧𑀼𑀘𑁆𑀙𑀺.

𑀢𑀁 ¶ 𑀲𑀼𑀢𑁆𑀯𑀸 𑀣𑁂𑀭𑁄 𑀦𑀺𑀭𑀸𑀫𑀺𑀲𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀤𑀺𑀦𑀸 𑀅𑀢𑁆𑀢𑀦𑁄 𑀲𑀼𑀔𑀯𑀺𑀳𑀸𑀭𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀧𑀻𑀢𑀺𑀲𑀼𑀔𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀻𑀢𑀺𑀲𑀼𑀔𑁂𑀦𑀸𑀢𑀺 𑀉𑀩𑁆𑀩𑁂𑀕𑀮𑀓𑁆𑀔𑀡𑀸𑀬 𑀨𑀭𑀡𑀮𑀓𑁆𑀔𑀡𑀸𑀬 𑀘 ¶ 𑀧𑀻𑀢𑀺𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀼𑀔𑁂𑀦 𑀘. 𑀢𑁂𑀦𑀸𑀳 ‘‘𑀯𑀺𑀧𑀼𑀮𑁂𑀦𑀸’’𑀢𑀺 𑀉𑀴𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀨𑀭𑀫𑀸𑀦𑁄 𑀲𑀫𑀼𑀲𑁆𑀲𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑀻𑀢𑀺𑀲𑀼𑀔𑀲𑀫𑀼𑀝𑁆𑀞𑀺𑀢𑁂𑀳𑀺 𑀧𑀡𑀻𑀢𑁂𑀳𑀺 𑀭𑀽𑀧𑁂𑀳𑀺 𑀲𑀓𑀮𑀁 𑀓𑀸𑀬𑀁 𑀨𑀭𑀸𑀧𑁂𑀦𑁆𑀢𑁄 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀓𑀭𑁄𑀦𑁆𑀢𑁄. 𑀮𑀽𑀔𑀫𑁆𑀧𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑁄𑀢𑀺 𑀅𑀭𑀜𑁆𑀜𑀸𑀯𑀸𑀲𑀚𑀦𑀺𑀢𑀁 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀳𑁂𑀢𑀼𑀓𑀁 𑀤𑀼𑀲𑁆𑀲𑀳𑀫𑁆𑀧𑀺 𑀧𑀘𑁆𑀘𑀬𑀮𑀽𑀔𑀁 𑀅𑀪𑀺𑀪𑀯𑀦𑁆𑀢𑁄 𑀅𑀥𑀺𑀯𑀸𑀲𑁂𑀦𑁆𑀢𑁄. 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂𑀢𑀺 𑀛𑀸𑀦𑀲𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀲𑀼𑀔𑁂𑀦 𑀘 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺’’𑀦𑁆𑀢𑀺 (𑀧𑀸𑀭𑀸. 𑁧𑁧).

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺 𑀘. (𑀥. 𑀧. 𑁩𑁭𑁪);

𑀪𑀸𑀯𑁂𑀦𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑁂𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀉𑀧𑁆𑀧𑀸𑀤𑁂𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀘. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀏𑀯 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀩𑀮𑀸𑀦𑀻𑀢𑀺 𑀢𑀣𑀸 𑀲𑀤𑁆𑀥𑀸𑀤𑀻𑀦𑀺 ¶ 𑀧𑀜𑁆𑀘 𑀩𑀮𑀸𑀦𑀺. 𑀩𑁄𑀚𑁆𑀛𑀗𑁆𑀕𑀸𑀦𑀻𑀢𑀺 𑀢𑀣𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀦𑀺. 𑀘-𑀲𑀤𑁆𑀤𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀫𑀕𑁆𑀕𑀗𑁆𑀕𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀤𑀯𑀺𑀦𑀸𑀪𑀸𑀯𑀢𑁄 𑀳𑀺 𑀢𑀕𑁆𑀕𑀳𑀡𑁂𑀦𑁂𑀯 𑀢𑁂𑀲𑀁 𑀕𑀳𑀡𑀁 𑀳𑁄𑀢𑀺. 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀬𑀣𑀸𑀯𑀼𑀢𑁆𑀢𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀲𑀼𑀔𑁂𑀦 𑀢𑀤𑀥𑀺𑀕𑀫𑀲𑀺𑀤𑁆𑀥𑁂𑀦 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀺𑀳𑀭𑀺𑀲𑁆𑀲𑀸𑀫𑀺.

𑀆𑀭𑀤𑁆𑀥𑀯𑀻𑀭𑀺𑀬𑁂𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀲𑁂𑀦 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁂. 𑀧𑀳𑀺𑀢𑀢𑁆𑀢𑁂𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺𑀧𑁂𑀲𑀺𑀢𑀘𑀺𑀢𑁆𑀢𑁂. 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂𑀢𑀺 𑀲𑀩𑁆𑀩𑀓𑀸𑀮𑀁 𑀅𑀲𑀺𑀣𑀺𑀮𑀯𑀻𑀭𑀺𑀬𑁂. 𑀅𑀯𑀺𑀯𑀸𑀤𑀯𑀲𑁂𑀦 𑀓𑀸𑀬𑀲𑀸𑀫𑀕𑁆𑀕𑀺𑀤𑀸𑀦𑀯𑀲𑁂𑀦 𑀘 𑀲𑀫𑀕𑁆𑀕𑁂. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀳𑀺𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀤𑀺𑀲𑁆𑀯𑀸. 𑀏𑀢𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀢𑀸𑀬, 𑀅𑀕𑁆𑀕𑀁 𑀉𑀢𑁆𑀢𑀫𑁂𑀦 𑀤𑀫𑀣𑁂𑀦 𑀤𑀦𑁆𑀢𑀁, 𑀅𑀦𑀼𑀢𑁆𑀢𑀭𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁 𑀅𑀢𑀦𑁆𑀤𑀺𑀢𑁄 𑀅𑀦𑀮𑀲𑁄 𑀳𑀼𑀢𑁆𑀯𑀸, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀩𑁆𑀩𑀓𑀸𑀮𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀲𑁆𑀲𑀭𑀦𑁆𑀢𑁄 𑀯𑀺𑀳𑀭𑀺𑀲𑁆𑀲𑀸𑀫𑀺. 𑀏𑀢𑁂𑀦 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀬 ¶ 𑀬𑀼𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑁂𑀦 𑀲𑀩𑁆𑀩𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀫𑀸𑀳, 𑀧𑀼𑀭𑀺𑀫𑁂𑀦 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀁.

𑀏𑀯𑀁 𑀧𑀦 𑀯𑀢𑁆𑀯𑀸 𑀣𑁂𑀭𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁪.𑁨𑁮-𑁬𑁫) 𑁋

‘‘𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄;

𑀅𑀦𑁄𑀫𑀦𑀸𑀫𑁄 𑀅𑀫𑀺𑀢𑁄, 𑀦𑀸𑀫𑁂𑀦 𑀧𑀤𑀼𑀫𑀼𑀢𑁆𑀢𑀭𑁄.

‘‘𑀧𑀤𑀼𑀫𑀸𑀓𑀸𑀭𑀯𑀤𑀦𑁄, 𑀧𑀤𑀼𑀫𑀸𑀫𑀮𑀲𑀼𑀘𑁆𑀙𑀯𑀻;

𑀮𑁄𑀓𑁂𑀦𑀸𑀦𑀼𑀧𑀮𑀺𑀢𑁆𑀢𑁄𑀯, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

‘‘𑀯𑀻𑀭𑁄 𑀧𑀤𑀼𑀫𑀧𑀢𑁆𑀢𑀓𑁆𑀔𑁄, 𑀓𑀦𑁆𑀢𑁄 𑀘 𑀧𑀤𑀼𑀫𑀁 𑀬𑀣𑀸;

𑀧𑀤𑀼𑀫𑀼𑀢𑁆𑀢𑀭𑀕𑀦𑁆𑀥𑁄𑀯, 𑀢𑀲𑁆𑀫𑀸 𑀲𑁄 𑀧𑀤𑀼𑀫𑀼𑀢𑁆𑀢𑀭𑁄.

‘‘𑀮𑁄𑀓𑀚𑁂𑀝𑁆𑀞𑁄 𑀘 𑀦𑀺𑀫𑁆𑀫𑀸𑀦𑁄, 𑀅𑀦𑁆𑀥𑀸𑀦𑀁 𑀦𑀬𑀦𑀽𑀧𑀫𑁄;

𑀲𑀦𑁆𑀢𑀯𑁂𑀲𑁄 𑀕𑀼𑀡𑀦𑀺𑀥𑀺, 𑀓𑀭𑀼𑀡𑀸𑀫𑀢𑀺𑀲𑀸𑀕𑀭𑁄.

‘‘𑀲 𑀓𑀤𑀸𑀘𑀺 𑀫𑀳𑀸𑀯𑀻𑀭𑁄, 𑀩𑁆𑀭𑀳𑁆𑀫𑀸𑀲𑀼𑀭𑀲𑀼𑀭𑀘𑁆𑀘𑀺𑀢𑁄;

𑀲𑀤𑁂𑀯𑀫𑀦𑀼𑀚𑀸𑀓𑀺𑀡𑁆𑀡𑁂, 𑀚𑀦𑀫𑀚𑁆𑀛𑁂 𑀚𑀺𑀦𑀼𑀢𑁆𑀢𑀫𑁄.

‘‘𑀯𑀤𑀦𑁂𑀦 𑀲𑀼𑀕𑀦𑁆𑀥𑁂𑀦, 𑀫𑀥𑀼𑀭𑁂𑀦 𑀭𑀼𑀢𑁂𑀦 𑀘;

𑀭𑀜𑁆𑀚𑀬𑀁 𑀧𑀭𑀺𑀲𑀁 𑀲𑀩𑁆𑀩𑀁, 𑀲𑀦𑁆𑀣𑀯𑀻 𑀲𑀸𑀯𑀓𑀁 𑀲𑀓𑀁.

‘‘𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀲𑀼𑀫𑀢𑀺, 𑀫𑀫 𑀤𑀲𑁆𑀲𑀦𑀮𑀸𑀮𑀲𑁄;

𑀦𑀢𑁆𑀣𑀺 𑀏𑀢𑀸𑀤𑀺𑀲𑁄 𑀅𑀜𑁆𑀜𑁄, 𑀬𑀣𑀸𑀬𑀁 𑀪𑀺𑀓𑁆𑀔𑀼 𑀯𑀓𑁆𑀓𑀮𑀺.

‘‘𑀢𑀤𑀸𑀳𑀁 ¶ 𑀳𑀁𑀲𑀯𑀢𑀺𑀬𑀁, 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀢𑁆𑀭𑀚𑁄;

𑀳𑀼𑀢𑁆𑀯𑀸 𑀲𑀼𑀢𑁆𑀯𑀸 𑀘 𑀢𑀁 𑀯𑀸𑀓𑁆𑀬𑀁, 𑀢𑀁 𑀞𑀸𑀦𑀫𑀪𑀺𑀭𑁄𑀘𑀬𑀺𑀁.

‘‘𑀲𑀲𑀸𑀯𑀓𑀁 𑀢𑀁 𑀯𑀺𑀫𑀮𑀁, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀢𑁆𑀢𑀸𑀳𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀤𑀼𑀲𑁆𑀲𑁂𑀳𑀘𑁆𑀙𑀸𑀤𑀬𑀺𑀁 𑀢𑀤𑀸.

‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀢𑀲𑁆𑀲, 𑀅𑀦𑀦𑁆𑀢𑀕𑀼𑀡𑀲𑀸𑀕𑀭𑁂;

𑀦𑀺𑀫𑀼𑀕𑁆𑀕𑁄 𑀧𑀻𑀢𑀺𑀲𑀫𑁆𑀧𑀼𑀡𑁆𑀡𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀬𑁄 𑀲𑁄 𑀢𑀬𑀸 𑀲𑀦𑁆𑀣𑀯𑀺𑀢𑁄, 𑀇𑀢𑁄 𑀲𑀢𑁆𑀢𑀫𑀓𑁂 𑀫𑀼𑀦𑀺;

𑀪𑀺𑀓𑁆𑀔𑀼 𑀲𑀤𑁆𑀥𑀸𑀯𑀢𑀁 𑀅𑀕𑁆𑀕𑁄, 𑀢𑀸𑀤𑀺𑀲𑁄 𑀳𑁄𑀫𑀳𑀁 𑀫𑀼𑀦𑁂.

‘‘𑀏𑀯𑀁 ¶ 𑀯𑀼𑀢𑁆𑀢𑁂 𑀫𑀳𑀸𑀯𑀻𑀭𑁄, 𑀅𑀦𑀸𑀯𑀭𑀡𑀤𑀲𑁆𑀲𑀦𑁄;

𑀇𑀫𑀁 𑀯𑀸𑀓𑁆𑀬𑀁 𑀉𑀤𑀻𑀭𑁂𑀲𑀺, 𑀧𑀭𑀺𑀲𑀸𑀬 𑀫𑀳𑀸𑀫𑀼𑀦𑀺.

‘‘𑀧𑀲𑁆𑀲𑀣𑁂𑀢𑀁 𑀫𑀸𑀡𑀯𑀓𑀁, 𑀧𑀻𑀢𑀫𑀝𑁆𑀞𑀦𑀺𑀯𑀸𑀲𑀦𑀁;

𑀳𑁂𑀫𑀬𑀜𑁆𑀜𑁄𑀧𑀘𑀺𑀢𑀗𑁆𑀕𑀁, 𑀚𑀦𑀦𑁂𑀢𑁆𑀢𑀫𑀦𑁄𑀳𑀭𑀁.

‘‘𑀏𑀲𑁄 𑀅𑀦𑀸𑀕𑀢𑀤𑁆𑀥𑀸𑀦𑁂, 𑀕𑁄𑀢𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀅𑀕𑁆𑀕𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁, 𑀲𑀸𑀯𑀓𑁄𑀬𑀁 𑀪𑀯𑀺𑀲𑁆𑀲𑀢𑀺.

‘‘𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀲𑀩𑁆𑀩𑀲𑀦𑁆𑀢𑀸𑀧𑀯𑀚𑁆𑀚𑀺𑀢𑁄;

𑀲𑀩𑁆𑀩𑀪𑁄𑀕𑀧𑀭𑀺𑀩𑁆𑀬𑀽𑀴𑁆𑀳𑁄, 𑀲𑀼𑀔𑀺𑀢𑁄 𑀲𑀁𑀲𑀭𑀺𑀲𑁆𑀲𑀢𑀺.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀯𑀓𑁆𑀓𑀮𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀢𑁂𑀦 𑀓𑀫𑁆𑀫𑀯𑀺𑀲𑁂𑀲𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑀼𑀢𑁆𑀯𑀸, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀚𑀸𑀢𑁄, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀁.

‘‘𑀦𑁄𑀦𑀻𑀢𑀲𑀼𑀔𑀼𑀫𑀸𑀮𑀁 𑀫𑀁, 𑀚𑀸𑀢𑀧𑀮𑁆𑀮𑀯𑀓𑁄𑀫𑀮𑀁;

𑀫𑀦𑁆𑀤𑀁 𑀉𑀢𑁆𑀢𑀸𑀦𑀲𑀬𑀦𑀁, 𑀧𑀺𑀲𑀸𑀘𑀪𑀬𑀢𑀚𑁆𑀚𑀺𑀢𑀸.

‘‘𑀧𑀸𑀤𑀫𑀽𑀮𑁂 𑀫𑀳𑁂𑀲𑀺𑀲𑁆𑀲, 𑀲𑀸𑀬𑁂𑀲𑀼𑀁 𑀤𑀻𑀦𑀫𑀸𑀦𑀲𑀸;

𑀇𑀫𑀁 𑀤𑀤𑀸𑀫 𑀢𑁂 𑀦𑀸𑀣, 𑀲𑀭𑀡𑀁 𑀳𑁄𑀳𑀺 𑀦𑀸𑀬𑀓.

‘‘𑀢𑀤𑀸 𑀧𑀝𑀺𑀕𑁆𑀕𑀳𑀺 𑀲𑁄 𑀫𑀁, 𑀪𑀻𑀢𑀸𑀦𑀁 𑀲𑀭𑀡𑁄 𑀫𑀼𑀦𑀺;

𑀚𑀸𑀮𑀺𑀦𑀸 𑀘𑀓𑁆𑀓𑀗𑁆𑀓𑀺𑀢𑁂𑀦, 𑀫𑀼𑀤𑀼𑀓𑁄𑀫𑀮𑀧𑀸𑀡𑀺𑀦𑀸.

‘‘𑀢𑀤𑀸 𑀧𑀪𑀼𑀢𑀺 𑀢𑁂𑀦𑀸𑀳𑀁, 𑀅𑀭𑀓𑁆𑀔𑁂𑀬𑁆𑀬𑁂𑀦 𑀭𑀓𑁆𑀔𑀺𑀢𑁄;

𑀲𑀩𑁆𑀩𑀯𑁂𑀭𑀯𑀺𑀦𑀺𑀫𑀼𑀢𑁆𑀢𑁄, 𑀲𑀼𑀔𑁂𑀦 𑀧𑀭𑀺𑀯𑀼𑀤𑁆𑀥𑀺𑀢𑁄.

‘‘𑀲𑀼𑀕𑀢𑁂𑀦 ¶ 𑀯𑀺𑀦𑀸 𑀪𑀽𑀢𑁄, 𑀉𑀓𑁆𑀓𑀡𑁆𑀞𑀸𑀫𑀺 𑀫𑀼𑀳𑀼𑀢𑁆𑀢𑀓𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀲𑀩𑁆𑀩𑀧𑀸𑀭𑀫𑀺𑀲𑀫𑁆𑀪𑀽𑀢𑀁 ¶ , 𑀦𑀻𑀮𑀓𑁆𑀔𑀺𑀦𑀬𑀦𑀁 𑀯𑀭𑀁;

𑀭𑀽𑀧𑀁 𑀲𑀩𑁆𑀩𑀲𑀼𑀪𑀸𑀓𑀺𑀡𑁆𑀡𑀁, 𑀅𑀢𑀺𑀢𑁆𑀢𑁄 𑀯𑀺𑀳𑀭𑀸𑀫𑀳𑀁.

‘‘𑀩𑀼𑀤𑁆𑀥𑀭𑀽𑀧𑀭𑀢𑀺𑀁 𑀜𑀢𑁆𑀯𑀸, 𑀢𑀤𑀸 𑀑𑀯𑀤𑀺 𑀫𑀁 𑀚𑀺𑀦𑁄;

𑀅𑀮𑀁 𑀯𑀓𑁆𑀓𑀮𑀺 𑀓𑀺𑀁 𑀭𑀽𑀧𑁂, 𑀭𑀫𑀲𑁂 𑀩𑀸𑀮𑀦𑀦𑁆𑀤𑀺𑀢𑁂.

‘‘𑀬𑁄 𑀳𑀺 𑀧𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑀁, 𑀲𑁄 𑀫𑀁 𑀧𑀲𑁆𑀲𑀢𑀺 𑀧𑀡𑁆𑀟𑀺𑀢𑁄;

𑀅𑀧𑀲𑁆𑀲𑀫𑀸𑀦𑁄 𑀲𑀤𑁆𑀥𑀫𑁆𑀫𑀁, 𑀫𑀁 𑀧𑀲𑁆𑀲𑀫𑁆𑀧𑀺 𑀦 𑀧𑀲𑁆𑀲𑀢𑀺.

‘‘𑀅𑀦𑀦𑁆𑀢𑀸𑀤𑀻𑀦𑀯𑁄 𑀓𑀸𑀬𑁄, 𑀯𑀺𑀲𑀭𑀼𑀓𑁆𑀔𑀲𑀫𑀽𑀧𑀫𑁄;

𑀆𑀯𑀸𑀲𑁄 𑀲𑀩𑁆𑀩𑀭𑁄𑀕𑀸𑀦𑀁, 𑀧𑀼𑀜𑁆𑀚𑁄 𑀤𑀼𑀓𑁆𑀔𑀲𑁆𑀲 𑀓𑁂𑀯𑀮𑁄.

‘‘𑀦𑀺𑀩𑁆𑀩𑀺𑀦𑁆𑀤𑀺𑀬 𑀢𑀢𑁄 𑀭𑀽𑀧𑁂, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀦𑀁, 𑀲𑀼𑀔𑁂𑀦𑀦𑁆𑀢𑀁 𑀕𑀫𑀺𑀲𑁆𑀲𑀲𑀺.

‘‘𑀏𑀯𑀁 𑀢𑁂𑀦𑀸𑀦𑀼𑀲𑀺𑀝𑁆𑀞𑁄𑀳𑀁, 𑀦𑀸𑀬𑀓𑁂𑀦 𑀳𑀺𑀢𑁂𑀲𑀺𑀦𑀸;

𑀕𑀺𑀚𑁆𑀛𑀓𑀽𑀝𑀁 𑀲𑀫𑀸𑀭𑀼𑀬𑁆𑀳, 𑀛𑀸𑀬𑀸𑀫𑀺 𑀕𑀺𑀭𑀺𑀓𑀦𑁆𑀤𑀭𑁂.

‘‘𑀞𑀺𑀢𑁄 𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀅𑀲𑁆𑀲𑀸𑀲𑀬𑀺 𑀫𑀳𑀸𑀫𑀼𑀦𑀺;

𑀯𑀓𑁆𑀓𑀮𑀻𑀢𑀺 𑀚𑀺𑀦𑁄 𑀯𑀸𑀘𑀁, 𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀅𑀳𑀁.

‘‘𑀧𑀓𑁆𑀔𑀦𑁆𑀤𑀺𑀁 𑀲𑁂𑀮𑀧𑀩𑁆𑀪𑀸𑀭𑁂, 𑀅𑀦𑁂𑀓𑀲𑀢𑀧𑁄𑀭𑀺𑀲𑁂;

𑀢𑀤𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦, 𑀲𑀼𑀔𑁂𑀦𑁂𑀯 𑀫𑀳𑀺𑀁 𑀕𑀢𑁄.

‘‘𑀧𑀼𑀦𑁄𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀢𑀫𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀲𑀼𑀫𑀳𑀸𑀧𑀭𑀺𑀲𑀫𑀚𑁆𑀛𑁂, 𑀢𑀤𑀸 𑀫𑀁 𑀘𑀭𑀡𑀦𑁆𑀢𑀕𑁄;

𑀅𑀕𑁆𑀕𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁, 𑀧𑀜𑁆𑀜𑀧𑁂𑀲𑀺 𑀫𑀳𑀸𑀫𑀢𑀺.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 ¶ 𑀧𑀦 𑀧𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄𑀧𑀺 𑀣𑁂𑀭𑁄 𑀇𑀫𑀸 𑀏𑀯 𑀕𑀸𑀣𑀸 𑀅𑀪𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀯𑀓𑁆𑀓𑀮𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀚𑀺𑀢𑀲𑁂𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀑𑀮𑀕𑁆𑀕𑁂𑀲𑁆𑀲𑀸𑀫𑀻𑀢𑀺𑀆𑀤𑀺𑀓𑀸 ¶ ¶ 𑀆𑀬𑀲𑁆𑀫𑀢𑁄 𑀯𑀺𑀚𑀺𑀢𑀲𑁂𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀲𑀦𑁆𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺. 𑀲𑁄 𑀪𑀕𑀯𑀢𑁄 𑀫𑀦𑁄𑀳𑀭𑀸𑀦𑀺 𑀫𑀥𑀼𑀭𑀸𑀦𑀺 𑀨𑀮𑀸𑀦𑀺 𑀉𑀧𑀦𑁂𑀲𑀺, 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀮𑀭𑀝𑁆𑀞𑁂 𑀳𑀢𑁆𑀣𑀸𑀘𑀭𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀚𑀺𑀢𑀲𑁂𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀫𑀸𑀢𑀼𑀮𑀸 𑀲𑁂𑀦𑁄 𑀘 𑀉𑀧𑀲𑁂𑀦𑁄 𑀘𑀸𑀢𑀺 𑀤𑁆𑀯𑁂 𑀳𑀢𑁆𑀣𑀸𑀘𑀭𑀺𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀲𑀥𑀼𑀭𑀁 𑀧𑀽𑀭𑁂𑀦𑁆𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀯𑀺𑀚𑀺𑀢𑀲𑁂𑀦𑁄𑀧𑀺 𑀳𑀢𑁆𑀣𑀺𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑁂 𑀅𑀮𑀕𑁆𑀕𑀫𑀸𑀦𑀲𑁄 𑀲𑀢𑁆𑀣𑀼 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀫𑀸𑀢𑀼𑀮𑀢𑁆𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀲𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀮𑀗𑁆𑀖𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀦𑀸𑀦𑀸𑀭𑀫𑁆𑀫𑀡𑁂 𑀯𑀺𑀥𑀸𑀯𑀦𑁆𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀑𑀯𑀤𑀦𑁆𑀢𑁄 𑁋

𑁩𑁫𑁫.

‘‘𑀑𑀮𑀕𑁆𑀕𑁂𑀲𑁆𑀲𑀸𑀫𑀺 𑀢𑁂 𑀘𑀺𑀢𑁆𑀢, 𑀆𑀡𑀺𑀤𑁆𑀯𑀸𑀭𑁂𑀯 𑀳𑀢𑁆𑀣𑀺𑀦𑀁;

𑀦 𑀢𑀁 𑀧𑀸𑀧𑁂 𑀦𑀺𑀬𑁄𑀚𑁂𑀲𑁆𑀲𑀁, 𑀓𑀸𑀫𑀚𑀸𑀮𑀁 𑀲𑀭𑀻𑀭𑀚𑀁.

𑁩𑁫𑁬.

‘‘𑀢𑁆𑀯𑀁 𑀑𑀮𑀕𑁆𑀕𑁄 𑀦 𑀕𑀘𑁆𑀙𑀲𑀺, 𑀤𑁆𑀯𑀸𑀭𑀯𑀺𑀯𑀭𑀁 𑀕𑀚𑁄𑀯 𑀅𑀮𑀪𑀦𑁆𑀢𑁄;

𑀦 𑀘 𑀘𑀺𑀢𑁆𑀢𑀓𑀮𑀺 𑀧𑀼𑀦𑀧𑁆𑀧𑀼𑀦𑀁, 𑀧𑀲𑀓𑁆𑀓 𑀧𑀸𑀧𑀭𑀢𑁄 𑀘𑀭𑀺𑀲𑁆𑀲𑀲𑀺.

𑁩𑁫𑁭.

‘‘𑀬𑀣𑀸 𑀓𑀼𑀜𑁆𑀚𑀭𑀁 𑀅𑀤𑀦𑁆𑀢𑀁, 𑀦𑀯𑀕𑁆𑀕𑀳𑀫𑀗𑁆𑀓𑀼𑀲𑀕𑁆𑀕𑀳𑁄;

𑀩𑀮𑀯𑀸 𑀆𑀯𑀢𑁆𑀢𑁂𑀢𑀺 𑀅𑀓𑀸𑀫𑀁, 𑀏𑀯𑀁 𑀆𑀯𑀢𑁆𑀢𑀬𑀺𑀲𑁆𑀲𑀁 𑀢𑀁.

𑁩𑁫𑁮.

‘‘𑀬𑀣𑀸 𑀯𑀭𑀳𑀬𑀤𑀫𑀓𑀼𑀲𑀮𑁄, 𑀲𑀸𑀭𑀣𑀺𑀧𑀯𑀭𑁄 𑀤𑀫𑁂𑀢𑀺 𑀆𑀚𑀜𑁆𑀜𑀁;

𑀏𑀯𑀁 𑀤𑀫𑀬𑀺𑀲𑁆𑀲𑀁 𑀢𑀁, 𑀧𑀢𑀺𑀝𑁆𑀞𑀺𑀢𑁄 𑀧𑀜𑁆𑀘𑀲𑀼 𑀩𑀮𑁂𑀲𑀼.

𑁩𑁫𑁯.

‘‘𑀲𑀢𑀺𑀬𑀸 ¶ ¶ 𑀢𑀁 𑀦𑀺𑀩𑀦𑁆𑀥𑀺𑀲𑁆𑀲𑀁, 𑀧𑀬𑀼𑀢𑁆𑀢𑁄 𑀢𑁂 𑀤𑀫𑁂𑀲𑁆𑀲𑀸𑀫𑀺;

𑀯𑀻𑀭𑀺𑀬𑀥𑀼𑀭𑀦𑀺𑀕𑁆𑀕𑀳𑀺𑀢𑁄, 𑀦 𑀬𑀺𑀢𑁄 𑀤𑀽𑀭𑀁 𑀕𑀫𑀺𑀲𑁆𑀲𑀲𑁂 𑀘𑀺𑀢𑁆𑀢𑀸’’𑀢𑀺. 𑁋

𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀑𑀮𑀕𑁆𑀕𑁂𑀲𑁆𑀲𑀸𑀫𑀻𑀢𑀺 𑀲𑀁𑀯𑀭𑀺𑀲𑁆𑀲𑀸𑀫𑀺 𑀦𑀺𑀯𑀸𑀭𑁂𑀲𑁆𑀲𑀸𑀫𑀺. 𑀢𑁂𑀢𑀺 𑀢𑀁. 𑀉𑀧𑀬𑁄𑀕𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁 ¶ . 𑀢𑁂 𑀕𑀫𑀦𑀦𑁆𑀢𑀺 𑀯𑀸 𑀯𑀘𑀦𑀲𑁂𑀲𑁄. 𑀳𑀢𑁆𑀣𑀺𑀦𑀦𑁆𑀢𑀺 𑀘 𑀳𑀢𑁆𑀣𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀆𑀮𑀧𑀢𑀺. 𑀬𑀣𑀸 𑀢𑀁 𑀯𑀸𑀭𑁂𑀢𑀼𑀓𑀸𑀫𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀡𑀺𑀤𑁆𑀯𑀸𑀭𑁂𑀯 𑀳𑀢𑁆𑀣𑀺𑀦’’𑀦𑁆𑀢𑀺 𑀆𑀳. 𑀆𑀡𑀺𑀤𑁆𑀯𑀸𑀭𑀁 𑀦𑀸𑀫 𑀧𑀸𑀓𑀸𑀭𑀩𑀤𑁆𑀥𑀲𑁆𑀲 𑀦𑀕𑀭𑀲𑁆𑀲 𑀔𑀼𑀤𑁆𑀤𑀓𑀤𑁆𑀯𑀸𑀭𑀁, 𑀬𑀁 𑀖𑀝𑀺𑀓𑀸𑀙𑀺𑀤𑁆𑀤𑁂 𑀆𑀡𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑁂 𑀬𑀦𑁆𑀢𑁂𑀦 𑀯𑀺𑀦𑀸 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑁂𑀳𑀺𑀧𑀺 𑀯𑀺𑀯𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑁂𑀦 𑀫𑀦𑀼𑀲𑁆𑀲𑀕𑀯𑀲𑁆𑀲𑀫𑀳𑀺𑀁𑀲𑀸𑀤𑀬𑁄 𑀦 𑀦𑀺𑀕𑁆𑀕𑀦𑁆𑀢𑀼𑀁 𑀲𑀓𑁆𑀓𑀸. 𑀦𑀕𑀭𑀢𑁄 𑀩𑀳𑀺 𑀦𑀺𑀕𑁆𑀕𑀦𑁆𑀢𑀼𑀓𑀸𑀫𑀫𑁆𑀧𑀺 𑀳𑀢𑁆𑀣𑀺𑀁 𑀬𑀢𑁄 𑀧𑀮𑁄𑀪𑁂𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑁄 𑀕𑀫𑀦𑀁 𑀦𑀺𑀯𑀸𑀭𑁂𑀲𑀺. 𑀅𑀣 𑀯𑀸 𑀆𑀡𑀺𑀤𑁆𑀯𑀸𑀭𑀁 𑀦𑀸𑀫 𑀧𑀮𑀺𑀖𑀤𑁆𑀯𑀸𑀭𑀁. 𑀢𑀢𑁆𑀣 𑀳𑀺 𑀢𑀺𑀭𑀺𑀬𑀁 𑀧𑀮𑀺𑀖𑀁 𑀞𑀧𑁂𑀢𑁆𑀯𑀸 𑀭𑀼𑀓𑁆𑀔𑀲𑀽𑀘𑀺𑀲𑀗𑁆𑀔𑀸𑀢𑀁 𑀆𑀡𑀺𑀁 𑀧𑀮𑀺𑀖𑀲𑀻𑀲𑁂 𑀆𑀯𑀼𑀡𑀦𑁆𑀢𑀺. 𑀧𑀸𑀧𑁂𑀢𑀺 𑀭𑀽𑀧𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀅𑀪𑀺𑀚𑁆𑀛𑀸𑀤𑀺𑀧𑀸𑀧𑀥𑀫𑁆𑀫𑁂 𑀢𑀁 𑀦 𑀦𑀺𑀬𑁄𑀚𑁂𑀲𑁆𑀲𑀁 𑀦 𑀦𑀺𑀬𑁄𑀚𑀺𑀲𑁆𑀲𑀸𑀫𑀺. 𑀓𑀸𑀫𑀚𑀸𑀮𑀸𑀢𑀺 𑀓𑀸𑀫𑀲𑁆𑀲 𑀚𑀸𑀮𑀪𑀽𑀢𑀁. 𑀬𑀣𑀸 𑀳𑀺 𑀫𑀘𑁆𑀙𑀩𑀦𑁆𑀥𑀫𑀺𑀕𑀮𑀼𑀤𑁆𑀤𑀸𑀦𑀁 𑀚𑀸𑀮𑀁 𑀦𑀸𑀫 𑀫𑀘𑁆𑀙𑀸𑀤𑀻𑀦𑀁 𑀢𑁂𑀲𑀁 𑀬𑀣𑀸𑀓𑀸𑀫𑀓𑀸𑀭𑀲𑀸𑀥𑀦𑀁, 𑀏𑀯𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀦𑀼𑀧𑀸𑀢𑀺𑀢𑀁 𑀘𑀺𑀢𑁆𑀢𑀁 𑀫𑀸𑀭𑀲𑁆𑀲 𑀓𑀸𑀫𑀓𑀸𑀭𑀲𑀸𑀥𑀦𑀁. 𑀢𑁂𑀦 𑀳𑀺 𑀲𑁄 𑀲𑀢𑁆𑀢𑁂 𑀅𑀦𑀢𑁆𑀣𑁂𑀲𑀼 𑀧𑀸𑀢𑁂𑀢𑀺. 𑀲𑀭𑀻𑀭𑀚𑀸𑀢𑀺 𑀲𑀭𑀻𑀭𑁂𑀲𑀼 𑀉𑀧𑁆𑀧𑀚𑁆𑀚𑀦𑀓. 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀳𑀺 𑀘𑀺𑀢𑁆𑀢𑀁 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 ‘‘𑀲𑀭𑀻𑀭𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑁆𑀯𑀁 𑀑𑀮𑀕𑁆𑀕𑁄 𑀦 𑀕𑀘𑁆𑀙𑀲𑀻𑀢𑀺 𑀢𑁆𑀯𑀁, 𑀘𑀺𑀢𑁆𑀢𑀓𑀮𑀺, 𑀫𑀬𑀸 𑀲𑀢𑀺𑀧𑀜𑁆𑀜𑀸𑀧𑀢𑁄𑀤𑀅𑀗𑁆𑀓𑀼𑀲𑁂𑀳𑀺 𑀯𑀸𑀭𑀺𑀢𑁄 𑀦 𑀤𑀸𑀦𑀺 𑀬𑀣𑀸𑀭𑀼𑀘𑀺𑀁 𑀕𑀫𑀺𑀲𑁆𑀲𑀲𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀬𑀣𑀸𑀓𑀸𑀫𑀁 𑀯𑀢𑁆𑀢𑀺𑀢𑀼𑀁 𑀦 𑀮𑀪𑀺𑀲𑁆𑀲𑀲𑀺. 𑀬𑀣𑀸 𑀓𑀺𑀁? 𑀤𑁆𑀯𑀸𑀭𑀯𑀺𑀯𑀭𑀁 𑀕𑀚𑁄𑀯 𑀅𑀮𑀪𑀦𑁆𑀢𑁄 𑀦𑀕𑀭𑀢𑁄 𑀕𑀚𑀦𑀺𑀭𑁄𑀥𑀢𑁄 𑀯𑀸 𑀦𑀺𑀕𑁆𑀕𑀫𑀦𑀸𑀬 𑀤𑁆𑀯𑀸𑀭𑀯𑀺𑀯𑀭𑀓𑀁 𑀅𑀮𑀪𑀫𑀸𑀦𑁄 𑀳𑀢𑁆𑀣𑀻 𑀯𑀺𑀬. 𑀘𑀺𑀢𑁆𑀢𑀓𑀮𑀻𑀢𑀺 𑀘𑀺𑀢𑁆𑀢𑀓𑀸𑀴𑀓𑀡𑁆𑀡𑀺. 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀅𑀧𑀭𑀸𑀧𑀭𑀁. 𑀧𑀲𑀓𑁆𑀓𑀸𑀢𑀺 𑀲𑀭𑀡𑀲𑀫𑁆𑀧𑀲𑁆𑀲𑀸𑀲𑀯𑀲𑁂𑀦. 𑀧𑀸𑀧𑀭𑀢𑁄𑀢𑀺 𑀧𑀸𑀧𑀓𑀫𑁆𑀫𑀦𑀺𑀭𑀢𑁄 𑀧𑀼𑀩𑁆𑀩𑁂 𑀯𑀺𑀬 𑀇𑀤𑀸𑀦𑀺 𑀦 𑀘𑀭𑀺𑀲𑁆𑀲𑀲𑀺 𑀢𑀣𑀸 𑀘𑀭𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀅𑀤𑀦𑁆𑀢𑀦𑁆𑀢𑀺 ¶ 𑀅𑀤𑀫𑀺𑀢𑀁 𑀳𑀢𑁆𑀣𑀺𑀲𑀺𑀓𑁆𑀔𑀁 𑀅𑀲𑀺𑀓𑁆𑀔𑀺𑀢𑀁. 𑀦𑀯𑀕𑁆𑀕𑀳𑀦𑁆𑀢𑀺 𑀅𑀘𑀺𑀭𑀕𑀳𑀺𑀢𑀁. 𑀅𑀗𑁆𑀓𑀼𑀲𑀕𑁆𑀕𑀳𑁄𑀢𑀺 𑀳𑀢𑁆𑀣𑀸𑀘𑀭𑀺𑀬𑁄. 𑀩𑀮𑀯𑀸𑀢𑀺 𑀓𑀸𑀬𑀩𑀮𑁂𑀦 𑀜𑀸𑀡𑀩𑀮𑁂𑀦 𑀘 𑀩𑀮𑀯𑀸. 𑀆𑀯𑀢𑁆𑀢𑁂𑀢𑀺 𑀅𑀓𑀸𑀫𑀦𑁆𑀢𑀺 𑀅𑀦𑀺𑀘𑁆𑀙𑀦𑁆𑀢𑀫𑁂𑀯 𑀦𑀺𑀲𑁂𑀥𑀦𑀢𑁄 𑀦𑀺𑀯𑀢𑁆𑀢𑁂𑀢𑀺. 𑀏𑀯𑀁 𑀆𑀯𑀢𑁆𑀢𑀬𑀺𑀲𑁆𑀲𑀦𑁆𑀢𑀺 𑀬𑀣𑀸 𑀬𑀣𑀸𑀯𑀼𑀢𑁆𑀢𑀁 𑀳𑀢𑁆𑀣𑀺𑀁 𑀳𑀢𑁆𑀣𑀸𑀘𑀭𑀺𑀬𑁄, 𑀏𑀯𑀁 𑀢𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀓𑀮𑀺𑀁 𑀤𑀼𑀘𑁆𑀘𑀭𑀺𑀢𑀦𑀺𑀲𑁂𑀥𑀦𑀢𑁄 𑀦𑀺𑀯𑀢𑁆𑀢𑀬𑀺𑀲𑁆𑀲𑀸𑀫𑀺.

𑀯𑀭𑀳𑀬𑀤𑀫𑀓𑀼𑀲𑀮𑁄𑀢𑀺 ¶ 𑀉𑀢𑁆𑀢𑀫𑀸𑀦𑀁 𑀅𑀲𑁆𑀲𑀤𑀫𑁆𑀫𑀸𑀦𑀁 𑀤𑀫𑀦𑁂 𑀓𑀼𑀲𑀮𑁄. 𑀢𑀢𑁄 𑀏𑀯 𑀲𑀸𑀭𑀣𑀺𑀧𑀯𑀭𑁄 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀻𑀲𑀼 𑀯𑀺𑀲𑀺𑀝𑁆𑀞𑁄 𑀤𑀫𑁂𑀢𑀺 𑀆𑀚𑀜𑁆𑀜𑀁 𑀆𑀚𑀸𑀦𑀻𑀬𑀁 𑀅𑀲𑁆𑀲𑀤𑀫𑁆𑀫𑀁 𑀤𑁂𑀲𑀓𑀸𑀮𑀸𑀦𑀼𑀭𑀽𑀧𑀁 𑀲𑀡𑁆𑀳𑀨𑀭𑀼𑀲𑁂𑀳𑀺 𑀤𑀫𑁂𑀢𑀺 𑀯𑀺𑀦𑁂𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀭𑁄𑀢𑀺. 𑀧𑀢𑀺𑀝𑁆𑀞𑀺𑀢𑁄 𑀧𑀜𑁆𑀘𑀲𑀼 𑀩𑀮𑁂𑀲𑀽𑀢𑀺 𑀲𑀤𑁆𑀥𑀸𑀤𑀻𑀲𑀼 𑀧𑀜𑁆𑀘𑀲𑀼 𑀩𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀦𑀺𑀲𑁂𑀥𑀦𑀢𑁄 𑀢𑀁 𑀤𑀫𑀬𑀺𑀲𑁆𑀲𑀁 𑀤𑀫𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀲𑀢𑀺𑀬𑀸 ¶ 𑀢𑀁 𑀦𑀺𑀩𑀦𑁆𑀥𑀺𑀲𑁆𑀲𑀦𑁆𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀢𑁄 𑀩𑀳𑀺 𑀕𑀦𑁆𑀢𑀼𑀁 𑀅𑀤𑁂𑀦𑁆𑀢𑁄 𑀲𑀢𑀺𑀬𑁄𑀢𑁆𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀣𑀫𑁆𑀪𑁂, 𑀘𑀺𑀢𑁆𑀢𑀓𑀮𑀺, 𑀢𑀁 𑀦𑀺𑀩𑀦𑁆𑀥𑀺𑀲𑁆𑀲𑀸𑀫𑀺 𑀦𑀺𑀬𑀫𑁂𑀲𑁆𑀲𑀸𑀫𑀺. 𑀧𑀬𑀼𑀢𑁆𑀢𑁄 𑀢𑁂 𑀤𑀫𑁂𑀲𑁆𑀲𑀸𑀫𑀻𑀢𑀺 𑀢𑀢𑁆𑀣 𑀦𑀺𑀩𑀦𑁆𑀥𑀦𑁆𑀢𑁄 𑀏𑀯 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑁂 𑀤𑀫𑁂𑀲𑁆𑀲𑀸𑀫𑀺, 𑀲𑀁𑀓𑀺𑀮𑁂𑀲𑀫𑀮𑀢𑁄 𑀢𑀁 𑀯𑀺𑀲𑁄𑀥𑁂𑀲𑁆𑀲𑀸𑀫𑀺. 𑀯𑀻𑀭𑀺𑀬𑀥𑀼𑀭𑀦𑀺𑀕𑁆𑀕𑀳𑀺𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑁄 𑀙𑁂𑀓𑁂𑀦 𑀲𑀼𑀲𑀸𑀭𑀣𑀺𑀦𑀸 𑀬𑀼𑀕𑁂 𑀬𑁄𑀚𑀺𑀢𑁄 𑀬𑀼𑀕𑀦𑀺𑀕𑁆𑀕𑀳𑀺𑀢𑁄 𑀬𑀼𑀕𑀦𑁆𑀢𑀭𑀕𑀢𑁄 𑀢𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀘𑀺𑀢𑁆𑀢, 𑀫𑀫 𑀯𑀻𑀭𑀺𑀬𑀥𑀼𑀭𑁂 𑀦𑀺𑀕𑁆𑀕𑀳𑀺𑀢𑁄 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀬 𑀅𑀜𑁆𑀜𑀣𑀸 𑀯𑀢𑁆𑀢𑀺𑀢𑀼𑀁 𑀅𑀮𑀪𑀦𑁆𑀢𑁄 𑀇𑀢𑁄 𑀕𑁄𑀘𑀭𑀚𑁆𑀛𑀢𑁆𑀢𑀢𑁄 𑀤𑀽𑀭𑀁 𑀩𑀳𑀺 𑀦 𑀕𑀫𑀺𑀲𑁆𑀲𑀲𑀺. 𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑀲𑁆𑀲 𑀳𑀺 𑀓𑀫𑁆𑀫𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀆𑀲𑀦𑁆𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀤𑀽𑀭𑀫𑁂𑀯𑀸𑀢𑀺 𑀏𑀯𑀁 𑀣𑁂𑀭𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁫.𑁨𑁨-𑁩𑁦) 𑁋

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁;

𑀯𑀺𑀧𑀺𑀦𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀁, 𑀲𑀸𑀮𑀭𑀸𑀚𑀁𑀯 𑀨𑀼𑀮𑁆𑀮𑀺𑀢𑀁.

‘‘𑀢𑀺𑀡𑀢𑁆𑀣𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀬𑀸𑀘𑀳𑀁;

𑀅𑀦𑀼𑀓𑀫𑁆𑀧𑀢𑀼 𑀫𑀁 𑀩𑀼𑀤𑁆𑀥𑁄, 𑀪𑀺𑀓𑁆𑀔𑀁 𑀇𑀘𑁆𑀙𑀸𑀫𑀺 𑀤𑀸𑀢𑀯𑁂.

‘‘𑀅𑀦𑀼𑀓𑀫𑁆𑀧𑀓𑁄 ¶ 𑀓𑀸𑀭𑀼𑀡𑀺𑀓𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀑𑀭𑀽𑀳𑀺 𑀫𑀫 𑀅𑀲𑁆𑀲𑀫𑁂.

‘‘𑀑𑀭𑁄𑀳𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀦𑀺𑀲𑀻𑀤𑀺 𑀧𑀡𑁆𑀡𑀲𑀦𑁆𑀣𑀭𑁂;

𑀪𑀮𑁆𑀮𑀸𑀢𑀓𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

‘‘𑀫𑀫 𑀦𑀺𑀚𑁆𑀛𑀸𑀬𑀫𑀸𑀦𑀲𑁆𑀲, 𑀧𑀭𑀺𑀪𑀼𑀜𑁆𑀚𑀺 𑀢𑀤𑀸 𑀚𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀪𑀺𑀯𑀦𑁆𑀤𑀺𑀁 𑀢𑀤𑀸 𑀚𑀺𑀦𑀁.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄𑀧𑀺 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀯𑀺𑀚𑀺𑀢𑀲𑁂𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀬𑀲𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀬𑀲𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺. 𑀢𑀣𑀸 𑀳𑁂𑀲 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀚𑁆𑀚𑀸𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀪𑀺𑀢𑁆𑀣𑀯𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀮𑁆𑀮𑀭𑀝𑁆𑀞𑁂 𑀫𑀮𑁆𑀮𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀬𑀲𑀤𑀢𑁆𑀢𑁄𑀢𑀺 𑀮𑀤𑁆𑀥𑀦𑀸𑀫𑁄, 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀺𑀢𑁆𑀯𑀸 𑀲𑀪𑀺𑀬𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁𑀬𑁂𑀯 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀬𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀪𑀺𑀬𑁂𑀦 𑀧𑀼𑀝𑁆𑀞𑀧𑀜𑁆𑀳𑁂𑀲𑀼 ¶ 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁂𑀲𑀼 𑀲𑀬𑀁 𑀑𑀢𑀸𑀭𑀸𑀧𑁂𑀓𑁆𑀔𑁄 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀲𑀪𑀺𑀬𑀲𑀼𑀢𑁆𑀢𑀤𑁂𑀲𑀦𑀸𑀯𑀲𑀸𑀦𑁂 (𑀲𑀼. 𑀦𑀺. 𑀲𑀪𑀺𑀬𑀲𑀼𑀢𑁆𑀢) 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

𑁩𑁬𑁦.

‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 ¶ 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸, 𑀦𑀪𑀲𑁄 𑀧𑀣𑀯𑀻 𑀬𑀣𑀸.

𑁩𑁬𑁧.

‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀧𑀭𑀺𑀳𑀸𑀬𑀢𑀺 𑀲𑀤𑁆𑀥𑀫𑁆𑀫𑀸, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑁩𑁬𑁨.

‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀧𑀭𑀺𑀲𑀼𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑁂, 𑀫𑀘𑁆𑀙𑁄 𑀅𑀧𑁆𑀧𑁄𑀤𑀓𑁂 𑀬𑀣𑀸.

𑁩𑁬𑁩.

‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀦 𑀯𑀺𑀭𑀽𑀳𑀢𑀺 𑀲𑀤𑁆𑀥𑀫𑁆𑀫𑁂, 𑀔𑁂𑀢𑁆𑀢𑁂 𑀩𑀻𑀚𑀁𑀯 𑀧𑀽𑀢𑀺𑀓𑀁.

𑁩𑁬𑁪.

‘‘𑀬𑁄 𑀘 𑀢𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀓𑀼𑀧𑁆𑀧𑀢𑀁;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀧𑀭𑀺𑀦𑀺𑀩𑁆𑀩𑀸𑀢𑀺𑀦𑀸𑀲𑀯𑁄’’𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄𑀢𑀺 𑀲𑀸𑀭𑀫𑁆𑀪𑀘𑀺𑀢𑁆𑀢𑁄, 𑀤𑁄𑀲𑀸𑀭𑁄𑀧𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀤𑀼𑀫𑁆𑀫𑁂𑀥𑁄𑀢𑀺 𑀦𑀺𑀧𑁆𑀧𑀜𑁆𑀜𑁄. 𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸𑀢𑀺 𑀲𑁄 𑀢𑀸𑀤𑀺𑀲𑁄 𑀧𑀼𑀕𑁆𑀕𑀮𑁄 𑀦𑀪𑀲𑁄 𑀯𑀺𑀬 𑀧𑀣𑀯𑀻 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀢𑁄𑀧𑀺 𑀤𑀽𑀭𑁂 𑀳𑁄𑀢𑀺, 𑀧𑀕𑁂𑀯 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀢𑁄. ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁮) 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀓𑀼𑀢𑁄 𑀲𑀦𑁆𑀢𑀦𑀺𑀧𑀼𑀡𑁄 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄.

𑀧𑀭𑀺𑀳𑀸𑀬𑀢𑀺 𑀲𑀤𑁆𑀥𑀫𑁆𑀫𑀸𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀢𑁄 𑀧𑀼𑀩𑁆𑀩𑀪𑀸𑀕𑀺𑀬𑀲𑀤𑁆𑀥𑀸𑀤𑀺𑀲𑀤𑁆𑀥𑀫𑁆𑀫𑀢𑁄𑀧𑀺 𑀦𑀺𑀳𑀻𑀬𑀢𑀺. 𑀧𑀭𑀺𑀲𑀼𑀲𑁆𑀲𑀢𑀻𑀢𑀺 𑀯𑀺𑀲𑀼𑀲𑁆𑀲𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀧𑀻𑀡𑀦𑀭𑀲𑀲𑁆𑀲 𑀧𑀻𑀢𑀺𑀧𑀸𑀫𑁄𑀚𑁆𑀚𑀸𑀤𑀺𑀓𑀼𑀲𑀮𑀥𑀫𑁆𑀫𑀲𑁆𑀲𑀸𑀪𑀸𑀯𑀢𑁄. 𑀦 𑀯𑀺𑀭𑀽𑀳𑀢𑀻𑀢𑀺 ¶ 𑀯𑀺𑀭𑀽𑀴𑁆𑀳𑀺𑀁 𑀯𑀼𑀤𑁆𑀥𑀺𑀁 𑀦 𑀧𑀸𑀧𑀼𑀡𑀸𑀢𑀺. 𑀧𑀽𑀢𑀺𑀓𑀦𑁆𑀢𑀺 𑀕𑁄𑀫𑀬𑀮𑁂𑀧𑀤𑀸𑀦𑀸𑀤𑀺𑀅𑀪𑀸𑀯𑁂𑀦 𑀧𑀽𑀢𑀺𑀪𑀸𑀯𑀁 𑀧𑀢𑁆𑀢𑀁.

𑀢𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁, 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀔𑁂𑀧𑁂𑀢𑁆𑀯𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀅𑀓𑀼𑀧𑁆𑀧𑀢𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀧𑀧𑁆𑀧𑀼𑀬𑁆𑀬𑀸𑀢𑀺 𑀧𑀸𑀧𑀼𑀡𑀺𑀢𑁆𑀯𑀸. 𑀧𑀭𑀫𑀁 𑀲𑀦𑁆𑀢𑀺𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁. 𑀢𑀤𑀥𑀺𑀕𑀫𑁄 ¶ 𑀘𑀲𑁆𑀲 𑀓𑁂𑀯𑀮𑀁 𑀓𑀸𑀮𑀸𑀕𑀫𑀦𑀫𑁂𑀯, 𑀦 𑀓𑁄𑀘𑀺𑀯𑀺𑀥𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀭𑀺𑀦𑀺𑀩𑁆𑀩𑀸𑀢𑀺𑀦𑀸𑀲𑀯𑁄’’𑀢𑀺.

𑀏𑀯𑀁 𑀲𑀢𑁆𑀣𑀸𑀭𑀸 𑀑𑀯𑀤𑀺𑀢𑁄 𑀲𑀁𑀯𑁂𑀕𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁩𑁫-𑁪𑁩) 𑁋

‘‘𑀓𑀡𑀺𑀓𑀸𑀭𑀁𑀯 ¶ 𑀚𑀮𑀺𑀢𑀁, 𑀤𑀻𑀧𑀭𑀼𑀓𑁆𑀔𑀁𑀯 𑀚𑁄𑀢𑀺𑀢𑀁;

𑀓𑀜𑁆𑀘𑀦𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀅𑀤𑁆𑀤𑀲𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

‘‘𑀓𑀫𑀡𑁆𑀟𑀮𑀼𑀁 𑀞𑀧𑁂𑀢𑁆𑀯𑀸𑀦, 𑀯𑀸𑀓𑀘𑀻𑀭𑀜𑁆𑀘 𑀓𑀼𑀡𑁆𑀟𑀺𑀓𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀁 𑀅𑀳𑀁.

‘‘𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀁, 𑀫𑁄𑀳𑀚𑀸𑀮𑀲𑀫𑀸𑀓𑀼𑀮𑀁;

𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸𑀦, 𑀦𑀺𑀢𑁆𑀢𑀺𑀡𑁆𑀡𑁄𑀲𑀺 𑀫𑀳𑀸𑀫𑀼𑀦𑀺.

‘‘𑀲𑀫𑀼𑀤𑁆𑀥𑀭𑀲𑀺𑀫𑀁 𑀮𑁄𑀓𑀁, 𑀲𑀩𑁆𑀩𑀸𑀯𑀦𑁆𑀢𑀫𑀦𑀼𑀢𑁆𑀢𑀭𑀁;

𑀜𑀸𑀡𑁂 𑀢𑁂 𑀉𑀧𑀫𑀸 𑀦𑀢𑁆𑀣𑀺, 𑀬𑀸𑀯𑀢𑀸 𑀚𑀕𑀢𑁄 𑀕𑀢𑀺.

‘‘𑀢𑁂𑀦 𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀽, 𑀇𑀢𑀺 𑀩𑀼𑀤𑁆𑀥𑁄 𑀧𑀯𑀼𑀘𑁆𑀘𑀢𑀺;

𑀯𑀦𑁆𑀤𑀸𑀫𑀺 𑀢𑀁 𑀫𑀳𑀸𑀯𑀻𑀭𑀁, 𑀲𑀩𑁆𑀩𑀜𑁆𑀜𑀼𑀢𑀫𑀦𑀸𑀯𑀭𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀢𑁆𑀣𑀯𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄𑀧𑀺 𑀣𑁂𑀭𑁄 𑀇𑀫𑀸 𑀏𑀯 𑀕𑀸𑀣𑀸 𑀅𑀪𑀸𑀲𑀺.

𑀬𑀲𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑁄𑀡𑀓𑀼𑀝𑀺𑀓𑀡𑁆𑀡𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀉𑀧𑀲𑀫𑁆𑀧𑀤𑀸 ¶ 𑀘 𑀫𑁂 𑀮𑀤𑁆𑀥𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀉𑀴𑀸𑀭𑀸𑀬 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑀁 𑀫𑀳𑀢𑀺𑀬𑀸 ¶ 𑀩𑀼𑀤𑁆𑀥𑀮𑀻𑀴𑀸𑀬 𑀫𑀳𑀦𑁆𑀢𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀲𑁄 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀸𑀦𑀺 𑀧𑀽𑀭𑁂𑀦𑁆𑀢𑁄 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀲𑀺𑀩𑁆𑀩𑀺𑀢𑁆𑀯𑀸 𑀅𑀤𑀸𑀲𑀺. 𑀧𑀼𑀦 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀩𑀸𑀭𑀸𑀡𑀲𑀺𑀬𑀁 𑀢𑀼𑀦𑁆𑀦𑀯𑀸𑀬𑁄 𑀳𑀼𑀢𑁆𑀯𑀸 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑀻𑀯𑀭𑀓𑁄𑀝𑀺𑀁 𑀙𑀺𑀦𑁆𑀦𑀁 𑀖𑀝𑁂𑀢𑁆𑀯𑀸 𑀅𑀤𑀸𑀲𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀯𑀦𑁆𑀢𑀺𑀭𑀝𑁆𑀞𑁂 𑀓𑀼𑀭𑀭𑀖𑀭𑁂 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄𑀡𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀓𑁄𑀝𑀺𑀅𑀕𑁆𑀖𑀦𑀓𑀲𑁆𑀲 𑀓𑀡𑁆𑀡𑀧𑀺𑀴𑀦𑁆𑀥𑀦𑀲𑁆𑀲 𑀥𑀸𑀭𑀡𑁂𑀦 ‘‘𑀓𑁄𑀝𑀺𑀓𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀓𑀼𑀝𑀺𑀓𑀡𑁆𑀡𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣.

𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑁂 𑀫𑀳𑀸𑀓𑀘𑁆𑀘𑀸𑀦𑁂 𑀓𑀼𑀮𑀖𑀭𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀢𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺. 𑀲𑁄 𑀅𑀧𑀭𑀪𑀸𑀕𑁂 𑀲𑀁𑀲𑀸𑀭𑁂 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀤𑀲𑀯𑀕𑁆𑀕𑀁 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀓𑀢𑀺𑀧𑀬𑀓𑀸𑀮𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸, 𑀣𑁂𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀲𑀸𑀯𑀢𑁆𑀣𑀺𑀁 𑀉𑀧𑀕𑀢𑁄, 𑀲𑀢𑁆𑀣𑀸𑀭𑀸 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀸𑀲𑀁 𑀮𑀪𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀅𑀚𑁆𑀛𑀺𑀝𑁆𑀞𑁄 𑀲𑁄𑀴𑀲𑀅𑀝𑁆𑀞𑀓𑀯𑀕𑁆𑀕𑀺𑀬𑀸𑀦𑀁 ¶ 𑀉𑀲𑁆𑀲𑀸𑀭𑀡𑁂𑀦 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀪𑀸𑀲𑀺𑀢𑀸𑀬 ‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂’’𑀢𑀺 (𑀉𑀤𑀸. 𑁪𑁬; 𑀫𑀳𑀸𑀯. 𑁨𑁫𑁮) 𑀉𑀤𑀸𑀦𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁨𑁬-𑁩𑁪) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀦𑀕𑀭𑀁 𑀧𑀸𑀯𑀺𑀲𑀻 𑀢𑀤𑀸.

‘‘𑀦𑀕𑀭𑀁 ¶ 𑀧𑀯𑀺𑀲𑀦𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀭𑀢𑀦𑀸𑀦𑀺 𑀧𑀚𑁆𑀚𑁄𑀢𑀺𑀁𑀲𑀼, 𑀦𑀺𑀕𑁆𑀖𑁄𑀲𑁄 𑀆𑀲𑀺 𑀢𑀸𑀯𑀤𑁂.

‘‘𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀪𑁂𑀭𑀻 𑀯𑀚𑁆𑀚𑀼𑀫𑀖𑀝𑁆𑀝𑀺𑀢𑀸;

𑀲𑀬𑀁 𑀯𑀻𑀡𑀸 𑀧𑀯𑀚𑁆𑀚𑀦𑁆𑀢𑀺, 𑀩𑀼𑀤𑁆𑀥𑀲𑁆𑀲 𑀧𑀯𑀺𑀲𑀢𑁄 𑀧𑀼𑀭𑀁.

‘‘𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀫𑀲𑁆𑀲𑀸𑀫𑀺, 𑀧𑀤𑀼𑀫𑀼𑀢𑁆𑀢𑀭𑀫𑀳𑀸𑀫𑀼𑀦𑀺𑀁;

𑀧𑀸𑀝𑀺𑀳𑀻𑀭𑀜𑁆𑀘 𑀧𑀲𑁆𑀲𑀺𑀢𑁆𑀯𑀸, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼 𑀲𑀫𑁆𑀧𑀤𑀸;

𑀅𑀘𑁂𑀢𑀦𑀸𑀧𑀺 𑀢𑀽𑀭𑀺𑀬𑀸, 𑀲𑀬𑀫𑁂𑀯 𑀧𑀯𑀚𑁆𑀚𑀭𑁂.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑁂 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑁂𑀦 𑀆𑀘𑀺𑀓𑁆𑀔𑀺𑀢𑀦𑀺𑀬𑀸𑀫𑁂𑀦 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀸, 𑀥𑀼𑀯𑀦𑁆𑀳𑀸𑀦𑀁, 𑀘𑀫𑁆𑀫𑀢𑁆𑀣𑀭𑀡𑀁, 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁, 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄𑀢𑀺 𑀧𑀜𑁆𑀘 𑀯𑀭𑁂 𑀬𑀸𑀘𑀺𑀢𑁆𑀯𑀸 𑀢𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀮𑀪𑀺𑀢𑁆𑀯𑀸 𑀧𑀼𑀦𑀤𑁂𑀯 𑀅𑀢𑁆𑀢𑀦𑁄 𑀯𑀲𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁬) 𑀧𑀦 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻’’𑀢𑀺 𑀯𑀼𑀢𑁆𑀢𑀁.

𑀲𑁄 𑀅𑀧𑀭𑀪𑀸𑀕𑁂 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀉𑀤𑀸𑀦𑀯𑀲𑁂𑀦 𑁋

𑁩𑁬𑁫.

‘‘𑀉𑀧𑀲𑀫𑁆𑀧𑀤𑀸 𑀘 𑀫𑁂 𑀮𑀤𑁆𑀥𑀸, 𑀯𑀺𑀫𑀼𑀢𑁆𑀢𑁄 𑀘𑀫𑁆𑀳𑀺 𑀅𑀦𑀸𑀲𑀯𑁄;

𑀲𑁄 𑀘 𑀫𑁂 𑀪𑀕𑀯𑀸 𑀤𑀺𑀝𑁆𑀞𑁄, 𑀯𑀺𑀳𑀸𑀭𑁂 𑀘 𑀲𑀳𑀸𑀯𑀲𑀺𑀁.

𑁩𑁬𑁬.

‘‘𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀕𑀯𑀸, 𑀅𑀩𑁆𑀪𑁄𑀓𑀸𑀲𑁂𑀢𑀺𑀦𑀸𑀫𑀬𑀺;

𑀯𑀺𑀳𑀸𑀭𑀓𑀼𑀲𑀮𑁄 𑀲𑀢𑁆𑀣𑀸, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀢𑀤𑀸.

𑁩𑁬𑁭.

‘‘𑀲𑀦𑁆𑀣𑀭𑀺𑀢𑁆𑀯𑀸𑀦 ¶ 𑀲𑀗𑁆𑀖𑀸𑀝𑀺𑀁, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀕𑁄𑀢𑀫𑁄;

𑀲𑀻𑀳𑁄 𑀲𑁂𑀮𑀕𑀼𑀳𑀸𑀬𑀁𑀯, 𑀧𑀳𑀻𑀦𑀪𑀬𑀪𑁂𑀭𑀯𑁄.

𑁩𑁬𑁮.

‘‘𑀢𑀢𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄;

𑀲𑁄𑀡𑁄 𑀅𑀪𑀸𑀲𑀺 𑀲𑀤𑁆𑀥𑀫𑁆𑀫𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸.

𑁩𑁬𑁯.

‘‘𑀧𑀜𑁆𑀘𑀓𑁆𑀔𑀦𑁆𑀥𑁂 ¶ 𑀧𑀭𑀺𑀜𑁆𑀜𑀸𑀬, 𑀪𑀸𑀯𑀬𑀺𑀢𑁆𑀯𑀸𑀦 𑀅𑀜𑁆𑀚𑀲𑀁;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄’’𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀧𑀲𑀫𑁆𑀧𑀤𑀸 𑀘 𑀫𑁂 𑀮𑀤𑁆𑀥𑀸𑀢𑀺 𑀬𑀸 𑀲𑀸 𑀓𑀺𑀘𑁆𑀙𑁂𑀦 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀸 𑀉𑀧𑀲𑀫𑁆𑀧𑀤𑀸. 𑀬𑀸 𑀘 𑀧𑀦 𑀯𑀭𑀤𑀸𑀦𑀯𑀲𑁂𑀦 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀲𑀢𑁆𑀣𑀸𑀭𑀸 𑀅𑀦𑀼𑀜𑁆𑀜𑀸𑀢𑀸 𑀉𑀧𑀲𑀫𑁆𑀧𑀤𑀸, 𑀢𑀤𑀼𑀪𑀬𑀁 𑀲𑀦𑁆𑀥𑀸𑀬𑀸𑀳. 𑀘-𑀲𑀤𑁆𑀤𑁄 ¶ 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀇𑀢𑀭𑁂𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀮𑀤𑁆𑀥𑀯𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀫𑀼𑀢𑁆𑀢𑁄 𑀘𑀫𑁆𑀳𑀺 𑀅𑀦𑀸𑀲𑀯𑁄𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀲𑀓𑀮𑀓𑀺𑀮𑁂𑀲𑀯𑀢𑁆𑀣𑀼𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄 𑀘 𑀅𑀫𑁆𑀳𑀺. 𑀢𑀢𑁄 𑀏𑀯 𑀓𑀸𑀫𑀸𑀲𑀯𑀸𑀤𑀻𑀳𑀺 𑀅𑀦𑀸𑀲𑀯𑁄 𑀅𑀫𑁆𑀳𑀻𑀢𑀺 𑀬𑁄𑀚𑀦𑀸. 𑀲𑁄 𑀘 𑀫𑁂 𑀪𑀕𑀯𑀸 𑀤𑀺𑀝𑁆𑀞𑁄𑀢𑀺 𑀬𑀤𑀢𑁆𑀣𑀁 𑀅𑀳𑀁 𑀅𑀯𑀦𑁆𑀢𑀺𑀭𑀝𑁆𑀞𑀢𑁄 𑀲𑀸𑀯𑀢𑁆𑀣𑀺𑀁 𑀕𑀢𑁄, 𑀲𑁄 𑀘 𑀪𑀕𑀯𑀸 𑀫𑀬𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑁄 𑀤𑀺𑀝𑁆𑀞𑁄. 𑀯𑀺𑀳𑀸𑀭𑁂 𑀘 𑀲𑀳𑀸𑀯𑀲𑀺𑀦𑁆𑀢𑀺 𑀦 𑀓𑁂𑀯𑀮𑀁 𑀢𑀲𑁆𑀲 𑀪𑀕𑀯𑀢𑁄 𑀤𑀲𑁆𑀲𑀦𑀫𑁂𑀯 𑀫𑀬𑀸 𑀮𑀤𑁆𑀥𑀁, 𑀅𑀣 𑀔𑁄 𑀯𑀺𑀳𑀸𑀭𑁂 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀬𑀁 𑀲𑀢𑁆𑀣𑀸𑀭𑀸 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀸𑀲𑁂𑀦𑁆𑀢𑁂𑀦 𑀲𑀳 𑀅𑀯𑀲𑀺𑀁. ‘‘𑀯𑀺𑀳𑀸𑀭𑁂𑀢𑀺 𑀯𑀺𑀳𑀸𑀭𑀲𑀫𑀻𑀧𑁂’’𑀢𑀺 𑀓𑁂𑀘𑀺.

𑀩𑀳𑀼𑀤𑁂𑀯 𑀭𑀢𑁆𑀢𑀺𑀦𑁆𑀢𑀺 𑀧𑀞𑀫𑀁 𑀬𑀸𑀫𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀲𑁄𑀥𑀦𑀯𑀲𑁂𑀦 𑀘, 𑀫𑀚𑁆𑀛𑀺𑀫𑀁 𑀬𑀸𑀫𑀁 𑀤𑁂𑀯𑀸𑀦𑀁 𑀩𑁆𑀭𑀳𑁆𑀫𑀽𑀦𑀜𑁆𑀘 𑀓𑀗𑁆𑀔𑀘𑁆𑀙𑁂𑀤𑀦𑀯𑀲𑁂𑀦 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀅𑀢𑀺𑀦𑀸𑀫𑀬𑀺 𑀯𑀻𑀢𑀺𑀦𑀸𑀫𑁂𑀲𑀺. 𑀯𑀺𑀳𑀸𑀭𑀓𑀼𑀲𑀮𑁄𑀢𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀆𑀦𑁂𑀜𑁆𑀚𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀓𑀼𑀲𑀮𑁄. 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 𑀅𑀢𑀺𑀯𑁂𑀮𑀁 𑀦𑀺𑀲𑀚𑁆𑀚𑀘𑀗𑁆𑀓𑀫𑁂𑀳𑀺 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺.

𑀲𑀦𑁆𑀣𑀭𑀺𑀢𑁆𑀯𑀸𑀦 𑀲𑀗𑁆𑀖𑀸𑀝𑀺𑀁, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻𑀢𑀺 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀸𑀳 ‘‘𑀕𑁄𑀢𑀫𑁄 𑀲𑀻𑀳𑁄 𑀲𑁂𑀮𑀕𑀼𑀳𑀸𑀬𑀁𑀯 𑀧𑀳𑀻𑀦𑀪𑀬𑀪𑁂𑀭𑀯𑁄’’𑀢𑀺. 𑀢𑀢𑁆𑀣 𑀕𑁄𑀢𑀫𑁄𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀓𑀺𑀢𑁆𑀢𑁂𑀢𑀺. 𑀲𑀻𑀳𑁄 𑀲𑁂𑀮𑀕𑀼𑀳𑀸𑀬𑀁𑀯𑀸𑀢𑀺 𑀲𑁂𑀮𑀲𑁆𑀲 𑀧𑀩𑁆𑀩𑀢𑀲𑁆𑀲 𑀕𑀼𑀳𑀸𑀬𑀁. 𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀢𑁂𑀚𑀼𑀲𑁆𑀲𑀤𑀢𑀸𑀬 𑀧𑀳𑀻𑀦𑀪𑀬𑀪𑁂𑀭𑀯𑁄 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 ¶ 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺, 𑀏𑀯𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀮𑁄𑀫𑀳𑀁𑀲𑀦𑀙𑀫𑁆𑀪𑀺𑀢𑀢𑁆𑀢𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀳𑀻𑀦𑀪𑀬𑀪𑁂𑀭𑀯𑁄 𑀕𑁄𑀢𑀫𑁄 𑀪𑀕𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻𑀢𑀺 𑀅𑀢𑁆𑀣𑁄.

𑀢𑀢𑁄𑀢𑀺 𑀧𑀘𑁆𑀙𑀸, 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 ‘‘𑀧𑀝𑀺𑀪𑀸𑀢𑀼 𑀢𑀁 𑀪𑀺𑀓𑁆𑀔𑀼 𑀥𑀫𑁆𑀫𑁄 𑀪𑀸𑀲𑀺𑀢𑀼’’𑀦𑁆𑀢𑀺 (𑀉𑀤𑀸. 𑁪𑁬) 𑀲𑀢𑁆𑀣𑀸𑀭𑀸 𑀅𑀚𑁆𑀛𑁂𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄𑀢𑀺 𑀲𑀼𑀦𑁆𑀤𑀭𑀯𑀘𑀻𑀓𑀭𑀡𑁄, 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀯𑀘𑀦𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀲𑁄𑀡𑁄 𑀅𑀪𑀸𑀲𑀺 𑀲𑀤𑁆𑀥𑀫𑁆𑀫𑀦𑁆𑀢𑀺 𑀲𑁄𑀴𑀲 𑀅𑀝𑁆𑀞𑀓𑀯𑀕𑁆𑀕𑀺𑀬𑀲𑀼𑀢𑁆𑀢𑀸𑀦𑀺 ¶ 𑀲𑁄𑀡𑁄 𑀓𑀼𑀝𑀺𑀓𑀡𑁆𑀡𑁄, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸, 𑀧𑀘𑁆𑀘𑀓𑁆𑀔𑀢𑁄 𑀅𑀪𑀸𑀲𑀻𑀢𑀺 𑀣𑁂𑀭𑁄 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀅𑀯𑁄𑀘.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀬𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀢𑀻𑀳𑀺𑀧𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸 𑀢𑁂 𑀧𑀭𑀺𑀚𑀸𑀦𑀦𑁆𑀢𑁄𑀬𑁂𑀯, 𑀅𑀜𑁆𑀚𑀲𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀺𑀢𑁆𑀯𑀸, 𑀧𑀭𑀫𑀁 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀧𑀧𑁆𑀧𑀼𑀬𑁆𑀬 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑁄 𑀅𑀦𑀸𑀲𑀯𑁄. 𑀢𑀢𑁄 𑀏𑀯 𑀇𑀤𑀸𑀦𑀺 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀯𑀲𑁂𑀦 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺.

𑀲𑁄𑀡𑀓𑀼𑀝𑀺𑀓𑀡𑁆𑀡𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀓𑁄𑀲𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑁄 ¶ 𑀏𑀯 𑀕𑀭𑀽𑀦𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀉𑀘𑁆𑀙𑀼𑀔𑀡𑁆𑀟𑀺𑀓𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀓𑁄𑀲𑀺𑀬𑁄𑀢𑀺𑀲𑁆𑀲 𑀕𑁄𑀢𑁆𑀢𑀯𑀲𑁂𑀦 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀅𑀪𑀺𑀡𑁆𑀳𑀁 𑀉𑀧𑀲𑀗𑁆𑀓𑀫𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀲𑁄 𑀢𑁂𑀦 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁪𑁪-𑁪𑁯) 𑁋

‘‘𑀦𑀕𑀭𑁂 ¶ 𑀩𑀦𑁆𑀥𑀼𑀫𑀢𑀺𑀬𑀸, 𑀤𑁆𑀯𑀸𑀭𑀧𑀸𑀮𑁄 𑀅𑀳𑁄𑀲𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

‘‘𑀉𑀘𑁆𑀙𑀼𑀔𑀡𑁆𑀟𑀺𑀓𑀫𑀸𑀤𑀸𑀬 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀉𑀘𑁆𑀙𑀼𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀘𑁆𑀙𑀼𑀔𑀡𑁆𑀟𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀕𑀭𑀼𑀯𑀸𑀲𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀜𑁆𑀘 𑀧𑀲𑀁𑀲𑀦𑁆𑀢𑁄 𑁋

𑁩𑁭𑁦.

‘‘𑀬𑁄 𑀯𑁂 𑀕𑀭𑀽𑀦𑀁 𑀯𑀘𑀦𑀜𑁆𑀜𑀼 𑀥𑀻𑀭𑁄, 𑀯𑀲𑁂 𑀘 𑀢𑀫𑁆𑀳𑀺 𑀚𑀦𑀬𑁂𑀣 𑀧𑁂𑀫𑀁;

𑀲𑁄 𑀪𑀢𑁆𑀢𑀺𑀫𑀸 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁧.

‘‘𑀬𑀁 𑀆𑀧𑀤𑀸 𑀉𑀧𑁆𑀧𑀢𑀺𑀢𑀸 𑀉𑀴𑀸𑀭𑀸, 𑀦𑀓𑁆𑀔𑀫𑁆𑀪𑀬𑀦𑁆𑀢𑁂 𑀧𑀝𑀺𑀲𑀗𑁆𑀔𑀬𑀦𑁆𑀢𑀁;

𑀲𑁄 𑀣𑀸𑀫𑀯𑀸 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁨.

‘‘𑀬𑁄 𑀯𑁂 𑀲𑀫𑀼𑀤𑁆𑀤𑁄𑀯 𑀞𑀺𑀢𑁄 𑀅𑀦𑁂𑀚𑁄, 𑀕𑀫𑁆𑀪𑀻𑀭𑀧𑀜𑁆𑀜𑁄 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀻;

𑀅𑀲𑀁𑀳𑀸𑀭𑀺𑀬𑁄 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁩.

‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀘 𑀳𑁄𑀢𑀺, 𑀥𑀫𑁆𑀫𑀲𑁆𑀲 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀲𑁄 𑀢𑀸𑀤𑀺𑀲𑁄 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁪.

‘‘𑀅𑀢𑁆𑀣𑀜𑁆𑀘 ¶ 𑀬𑁄 𑀚𑀸𑀦𑀸𑀢𑀺 𑀪𑀸𑀲𑀺𑀢𑀲𑁆𑀲,

𑀅𑀢𑁆𑀣𑀜𑁆𑀘 𑀜𑀢𑁆𑀯𑀸𑀦 𑀢𑀣𑀸 𑀓𑀭𑁄𑀢𑀺;

𑀅𑀢𑁆𑀣𑀦𑁆𑀢𑀭𑁄 𑀦𑀸𑀫 𑀲 𑀳𑁄𑀢𑀺 𑀧𑀡𑁆𑀟𑀺𑀢𑁄,

𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲𑀸’’𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀬𑁄𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀬𑁄 𑀓𑁄𑀘𑀺. 𑀯𑁂𑀢𑀺 𑀩𑁆𑀬𑀢𑁆𑀢𑀁. 𑀕𑀭𑀽𑀦𑀦𑁆𑀢𑀺 𑀲𑀻𑀮𑀸𑀤𑀺𑀕𑀭𑀼𑀕𑀼𑀡𑀬𑀼𑀢𑁆𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁. 𑀯𑀘𑀦𑀜𑁆𑀜𑀽𑀢𑀺 𑀢𑁂𑀲𑀁 𑀅𑀦𑀼𑀲𑀸𑀲𑀦𑀻𑀯𑀘𑀦𑀁 𑀚𑀸𑀦𑀦𑁆𑀢𑁄, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀘 𑀢𑀲𑁆𑀲 𑀨𑀮𑀁 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀻𑀭𑁄𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑁄. 𑀯𑀲𑁂 𑀘 𑀢𑀫𑁆𑀳𑀺 𑀚𑀦𑀬𑁂𑀣 𑀧𑁂𑀫𑀦𑁆𑀢𑀺 𑀢𑀲𑁆𑀫𑀺𑀁 𑀕𑀭𑀽𑀦𑀁 𑀯𑀘𑀦𑁂 𑀑𑀯𑀸𑀤𑁂 𑀯𑀲𑁂𑀬𑁆𑀬 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀯𑀢𑀸𑀳𑀁 𑀑𑀯𑀸𑀤𑁂𑀦 𑀇𑀫𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀯𑀻𑀢𑀺𑀯𑀢𑁆𑀢𑁄’’𑀢𑀺 𑀢𑀢𑁆𑀣 𑀚𑀦𑀬𑁂𑀣 𑀧𑁂𑀫𑀁 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀇𑀤𑀜𑁆𑀳𑀺 𑀤𑁆𑀯𑀬𑀁 ‘‘𑀕𑀭𑀽𑀦𑀁 𑀯𑀘𑀦𑀜𑁆𑀜𑀼 𑀥𑀻𑀭𑁄’’𑀢𑀺 𑀧𑀤𑀤𑁆𑀯𑀬𑁂𑀦 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀲𑁄𑀢𑀺 𑀬𑁄 𑀕𑀭𑀽𑀦𑀁 𑀯𑀘𑀦𑀜𑁆𑀜𑀽 𑀥𑀻𑀭𑁄, 𑀲𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀢𑀢𑁆𑀣 𑀪𑀢𑁆𑀢𑀺𑀫𑀸 𑀘 𑀦𑀸𑀫 𑀳𑁄𑀢𑀺, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀢𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀢𑁄 𑀧𑀡𑁆𑀟𑀺𑀢𑁄 𑀘 𑀦𑀸𑀫 𑀳𑁄𑀢𑀺. 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲𑀸𑀢𑀺 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀘 𑀢𑀸𑀬 𑀏𑀯 𑀧𑀝𑀺𑀧𑀢𑁆𑀢𑀺𑀬𑀸 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀚𑀸𑀦𑀦𑀳𑁂𑀢𑀼 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀸𑀢𑁆𑀢𑀬𑀸𑀤𑀺𑀯𑀲𑁂𑀦 ‘‘𑀢𑁂𑀯𑀺𑀚𑁆𑀚𑁄, 𑀙𑀴𑀪𑀺𑀜𑁆𑀜𑁄, 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄’’𑀢𑀺 𑀯𑀺𑀲𑁂𑀲𑀺 𑀯𑀺𑀲𑁂𑀲𑀯𑀸 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑀬𑀦𑁆𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀡𑀢𑁄 ‘‘𑀆𑀧𑀤𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀸 𑀲𑁄𑀢𑀼𑀡𑁆𑀳𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘𑁂𑀯 𑀭𑀸𑀕𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘 𑀉𑀧𑁆𑀧𑀢𑀺𑀢𑀸 𑀉𑀧𑁆𑀧𑀦𑁆𑀦𑀸, 𑀉𑀴𑀸𑀭𑀸 𑀩𑀮𑀯𑀦𑁆𑀢𑁄𑀧𑀺 𑀦𑀓𑁆𑀔𑀫𑁆𑀪𑀬𑀦𑁆𑀢𑁂 𑀦 𑀓𑀺𑀜𑁆𑀘𑀺 𑀘𑀸𑀮𑁂𑀦𑁆𑀢𑀺. 𑀓𑀲𑁆𑀫𑀸? 𑀧𑀝𑀺𑀲𑀗𑁆𑀔𑀬𑀦𑁆𑀢𑀦𑁆𑀢𑀺 𑀧𑀝𑀺𑀲𑀗𑁆𑀔𑀸𑀬𑀫𑀸𑀦𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑁂 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀬𑁄 𑀤𑀴𑁆𑀳𑀢𑀭𑀸𑀳𑀺 𑀆𑀧𑀤𑀸𑀳𑀺𑀧𑀺 𑀅𑀓𑁆𑀔𑀫𑁆𑀪𑀦𑀻𑀬𑁄, 𑀲𑁄 𑀣𑀸𑀫𑀯𑀸 𑀥𑀺𑀢𑀺𑀫𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀦𑀸𑀫 𑀳𑁄𑀢𑀺. 𑀅𑀦𑀯𑀲𑁂𑀲𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀅𑀪𑀺𑀪𑀯𑀦𑀓𑀧𑀜𑁆𑀜𑀸𑀩𑀮𑀲𑀫𑀗𑁆𑀕𑀺𑀢𑀸𑀬 𑀧𑀡𑁆𑀟𑀺𑀢𑁄 𑀘 𑀦𑀸𑀫 𑀳𑁄𑀢𑀺. 𑀢𑀣𑀸𑀪𑀽𑀢𑁄 𑀘 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲𑀸𑀢𑀺 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀲𑀫𑀼𑀤𑁆𑀤𑁄𑀯 ¶ 𑀞𑀺𑀢𑁄𑀢𑀺 𑀲𑀫𑀼𑀤𑁆𑀤𑁄 𑀯𑀺𑀬 𑀞𑀺𑀢𑀲𑀪𑀸𑀯𑁄. 𑀬𑀣𑀸 𑀳𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀲𑀺𑀦𑁂𑀭𑀼𑀧𑀸𑀤𑀲𑀫𑀻𑀧𑁂 𑀫𑀳𑀸𑀲𑀫𑀼𑀤𑁆𑀤𑁄 𑀅𑀝𑁆𑀞𑀳𑀺𑀧𑀺 𑀤𑀺𑀲𑀸𑀳𑀺 𑀉𑀝𑁆𑀞𑀺𑀢𑁂𑀳𑀺 𑀧𑀓𑀢𑀺𑀯𑀸𑀢𑁂𑀳𑀺 𑀅𑀦𑀺𑀜𑁆𑀚𑀦𑀢𑁄 𑀞𑀺𑀢𑁄 𑀅𑀦𑁂𑀚𑁄 𑀕𑀫𑁆𑀪𑀻𑀭𑁄 𑀘, 𑀏𑀯𑀁 𑀓𑀺𑀮𑁂𑀲𑀯𑀸𑀢𑁂𑀳𑀺 𑀢𑀺𑀢𑁆𑀣𑀺𑀬𑀯𑀸𑀤𑀯𑀸𑀢𑁂𑀳𑀺 𑀘 𑀅𑀓𑀫𑁆𑀧𑀦𑀻𑀬𑀢𑁄 𑀞𑀺𑀢𑁄 𑀅𑀦𑁂𑀚𑁄. 𑀕𑀫𑁆𑀪𑀻𑀭𑀲𑁆𑀲 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀅𑀮𑀤𑁆𑀥𑀕𑀸𑀥𑀲𑁆𑀲 𑀦𑀺𑀧𑀼𑀡𑀲𑁆𑀲 𑀲𑀼𑀔𑀼𑀫𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀅𑀢𑁆𑀣𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑁂𑀦 𑀕𑀫𑁆𑀪𑀻𑀭𑀧𑀜𑁆𑀜𑁄 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀻. 𑀅𑀲𑀁𑀳𑀸𑀭𑀺𑀬𑁄 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄 𑀲𑁄 𑀢𑀸𑀤𑀺𑀲𑁄 𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑁂𑀳𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀤𑀻𑀲𑀼 𑀯𑀸 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀢𑀸𑀬 𑀅𑀲𑀁𑀳𑀸𑀭𑀺𑀬𑁄 𑀦𑀸𑀫 𑀳𑁄𑀢𑀺, 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀧𑀡𑁆𑀟𑀺𑀢𑁄 𑀘 𑀦𑀸𑀫 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀩𑀳𑀼𑀲𑁆𑀲𑀼𑀢𑁄𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑁄, 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀩𑀳𑀼𑀁 𑀲𑀼𑀢𑀁 𑀏𑀢𑀲𑁆𑀲𑀸𑀢𑀺 𑀩𑀳𑀼𑀲𑁆𑀲𑀼𑀢𑁄. 𑀢𑀫𑁂𑀯 𑀥𑀫𑁆𑀫𑀁 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀁 𑀯𑀺𑀬 𑀅𑀯𑀺𑀦𑀲𑁆𑀲𑀦𑁆𑀢𑀫𑁂𑀯 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀭𑁄 ¶ 𑀘 𑀳𑁄𑀢𑀺. 𑀥𑀫𑁆𑀫𑀲𑁆𑀲 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀬𑀣𑀸𑀲𑀼𑀢𑀲𑁆𑀲 𑀬𑀣𑀸𑀧𑀭𑀺𑀬𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀁 𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀥𑀼𑀢𑀗𑁆𑀕𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀘𑀭𑀢𑀺 𑀧𑀝𑀺𑀧𑀚𑁆𑀚𑀢𑀻𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻 𑀳𑁄𑀢𑀺, ‘‘𑀅𑀚𑁆𑀚 𑀅𑀚𑁆𑀚𑁂𑀯𑀸’’𑀢𑀺 𑀧𑀝𑀺𑀯𑁂𑀥𑀁 𑀆𑀓𑀗𑁆𑀔𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀢𑀸𑀤𑀺𑀲𑁄 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀬𑀁 𑀕𑀭𑀼𑀁 𑀦𑀺𑀲𑁆𑀲𑀸𑀬 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀘𑀸𑀭𑀻 𑀳𑁄𑀢𑀺. 𑀲𑁄 𑀘 𑀢𑀸𑀤𑀺𑀲𑁄 𑀢𑁂𑀦 𑀕𑀭𑀼𑀦𑀸 𑀲𑀤𑀺𑀲𑁄 𑀧𑀡𑁆𑀟𑀺𑀢𑁄 𑀦𑀸𑀫 𑀳𑁄𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀲𑀤𑀺𑀲𑀪𑀸𑀯𑀢𑁄. 𑀢𑀣𑀸𑀪𑀽𑀢𑁄 𑀧𑀦 𑀲𑁄 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲, 𑀢𑀁 𑀯𑀼𑀢𑁆𑀢𑀢𑁆𑀣𑀁𑀯.

𑀅𑀢𑁆𑀣𑀜𑁆𑀘 𑀬𑁄 𑀚𑀸𑀦𑀸𑀢𑀺 𑀪𑀸𑀲𑀺𑀢𑀲𑁆𑀲𑀸𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 ¶ 𑀅𑀢𑁆𑀣𑀁 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀧𑀦 ‘‘𑀇𑀥 𑀲𑀻𑀮𑀁 𑀯𑀼𑀢𑁆𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀜𑁆𑀘 𑀜𑀢𑁆𑀯𑀸𑀦 𑀢𑀣𑀸 𑀓𑀭𑁄𑀢𑀺 𑀬𑀣𑀸 𑀲𑀢𑁆𑀣𑀸𑀭𑀸 𑀅𑀦𑀼𑀲𑀺𑀝𑁆𑀞𑀁, 𑀢𑀣𑀸 𑀧𑀝𑀺𑀧𑀚𑁆𑀚𑀢𑀺. 𑀅𑀢𑁆𑀣𑀦𑁆𑀢𑀭𑁄 𑀦𑀸𑀫 𑀲 𑀳𑁄𑀢𑀺 𑀧𑀡𑁆𑀟𑀺𑀢𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀦𑁆𑀢𑀭𑁄 𑀅𑀢𑁆𑀣𑀓𑀸𑀭𑀡𑀸 𑀲𑀻𑀮𑀸𑀤𑀺𑀅𑀢𑁆𑀣𑀚𑀸𑀦𑀦𑀫𑀢𑁆𑀢𑀫𑁂𑀯 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀧𑀡𑁆𑀟𑀺𑀢𑁄 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀢𑁆𑀣 ¶ 𑀘 𑀧𑀞𑀫𑀕𑀸𑀣𑀸𑀬 ‘‘𑀬𑁄 𑀯𑁂 𑀕𑀭𑀽𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀤𑁆𑀥𑀽𑀧𑀦𑀺𑀲𑁆𑀲𑀬𑁄 𑀯𑀺𑀲𑁂𑀲𑀪𑀸𑀯𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑀕𑀸𑀣𑀸𑀬 ‘‘𑀬𑀁 𑀆𑀧𑀤𑀸’’𑀢𑀺 𑀆𑀤𑀺𑀦𑀸 𑀯𑀻𑀭𑀺𑀬𑀽𑀧𑀦𑀺𑀲𑁆𑀲𑀬𑁄, 𑀢𑀢𑀺𑀬𑀕𑀸𑀣𑀸𑀬 ‘‘𑀬𑁄 𑀯𑁂 𑀲𑀫𑀼𑀤𑁆𑀤𑁄𑀯 𑀞𑀺𑀢𑁄’’𑀢𑀺𑀆𑀤𑀺𑀦𑀸 𑀲𑀫𑀸𑀥𑀽𑀧𑀦𑀺𑀲𑁆𑀲𑀬𑁄, 𑀘𑀢𑀼𑀢𑁆𑀣𑀕𑀸𑀣𑀸𑀬 ‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺𑀆𑀤𑀺𑀦𑀸 𑀲𑀢𑀽𑀧𑀦𑀺𑀲𑁆𑀲𑀬𑁄, 𑀧𑀜𑁆𑀘𑀫𑀕𑀸𑀣𑀸𑀬 ‘‘𑀅𑀢𑁆𑀣𑀜𑁆𑀘 𑀬𑁄 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀽𑀧𑀦𑀺𑀲𑁆𑀲𑀬𑁄 𑀯𑀺𑀲𑁂𑀲𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑁄𑀲𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀧𑀸𑀢𑁄

𑁧. 𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀙𑀓𑁆𑀓𑀦𑀺𑀧𑀸𑀢𑁂 ¶ ¶ 𑀤𑀺𑀲𑁆𑀯𑀸𑀦 𑀧𑀸𑀝𑀺𑀳𑀻𑀭𑀸𑀦𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸, 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀫𑀳𑀸𑀧𑀭𑀺𑀲𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀫𑀓𑀸𑀲𑀺. 𑀪𑀕𑀯𑀸 𑀘𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸, ‘‘𑀅𑀦𑀸𑀕𑀢𑁂 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀫𑀳𑀸𑀧𑀭𑀺𑀲𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀲𑁄 ¶ 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀯𑁂𑀫𑀸𑀢𑀺𑀓𑀓𑀦𑀺𑀝𑁆𑀞𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀜𑁆𑀜𑁂𑀧𑀺𑀲𑁆𑀲 𑀤𑁆𑀯𑁂 𑀓𑀦𑀺𑀝𑁆𑀞𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀢𑁂 𑀢𑀬𑁄𑀧𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀧𑀭𑀫𑀸𑀬 𑀧𑀽𑀚𑀸𑀬 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀪𑀸𑀢𑀭𑁄 𑀳𑀼𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀦𑀺𑀩𑁆𑀩𑀢𑁆𑀢𑀸 𑀕𑁄𑀢𑁆𑀢𑀯𑀲𑁂𑀦 𑀢𑀬𑁄𑀧𑀺 𑀓𑀲𑁆𑀲𑀧𑀸 𑀏𑀯 𑀦𑀸𑀫 𑀚𑀸𑀢𑀸. 𑀢𑁂 𑀯𑀬𑀧𑁆𑀧𑀢𑁆𑀢𑀸 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀢𑁂𑀲𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑁄, 𑀫𑀚𑁆𑀛𑀺𑀫𑀲𑁆𑀲 𑀢𑀻𑀡𑀺, 𑀓𑀦𑀺𑀝𑁆𑀞𑀲𑁆𑀲 𑀤𑁆𑀯𑁂. 𑀢𑁂 𑀅𑀢𑁆𑀢𑀦𑁄 𑀕𑀦𑁆𑀣𑁂 𑀲𑀸𑀭𑀁 𑀑𑀮𑁄𑀓𑁂𑀦𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯 𑀅𑀢𑁆𑀣𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀁 𑀭𑁄𑀘𑁂𑀲𑀼𑀁. 𑀢𑁂𑀲𑀼 𑀚𑁂𑀝𑁆𑀞𑀪𑀸𑀢𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄 𑀫𑀳𑀸𑀕𑀗𑁆𑀕𑀸𑀦𑀤𑀻𑀯𑀗𑁆𑀓𑁂 𑀧𑀩𑁆𑀩𑀚𑀺𑀢𑁄 𑀦𑀤𑀻𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄, 𑀕𑀬𑀸𑀲𑀻𑀲𑁂 𑀧𑀩𑁆𑀩𑀚𑀺𑀢𑁄 𑀕𑀬𑀸𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄.

𑀏𑀯𑀁 𑀢𑁂𑀲𑀼 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀩𑀳𑀽𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀅𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀲𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀜𑁆𑀜𑀸𑀲 𑀲𑀳𑀸𑀬𑀓𑁂 𑀯𑀺𑀦𑁂𑀢𑁆𑀯𑀸 𑀲𑀝𑁆𑀞𑀺 𑀅𑀭𑀳𑀦𑁆𑀢𑁂 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, 𑀪𑀤𑁆𑀤𑀯𑀕𑁆𑀕𑀺𑀬𑁂 𑀯𑀺𑀦𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 ¶ 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀦𑀢𑁆𑀣𑀸𑀬 𑀅𑀕𑁆𑀬𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ¶ , 𑀢𑀢𑁆𑀣 𑀓𑀢𑀦𑀸𑀕𑀤𑀫𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀲𑀳𑀲𑁆𑀲𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀲𑀧𑀭𑀺𑀲𑀁 𑀯𑀺𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 𑀇𑀢𑀭𑁂𑀧𑀺 𑀤𑁆𑀯𑁂 𑀪𑀸𑀢𑀭𑁄 𑀲𑀧𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀲𑀩𑁆𑀩𑁂𑀯 𑀏𑀳𑀺𑀪𑀺𑀓𑁆𑀔𑀽 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀢𑀁 𑀲𑀫𑀡𑀲𑀳𑀲𑁆𑀲𑀁 𑀆𑀤𑀸𑀬 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀲𑀩𑁆𑀩𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁪.𑁨𑁫𑁧-𑁨𑁯𑁫) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺.

‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄 𑀲𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀲𑀫𑁆𑀫𑀢𑁄;

𑀉𑀧𑁂𑀘𑁆𑀘 𑀮𑁄𑀓𑀧𑀚𑁆𑀚𑁄𑀢𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁.

‘‘𑀢𑀤𑀸 𑀫𑀳𑀸𑀧𑀭𑀺𑀲𑀢𑀺𑀁, 𑀫𑀳𑀸𑀧𑀭𑀺𑀲𑀲𑀸𑀯𑀓𑀁;

𑀞𑀧𑁂𑀦𑁆𑀢𑀁 𑀏𑀢𑀤𑀕𑁆𑀕𑀫𑁆𑀳𑀺, 𑀲𑀼𑀢𑁆𑀯𑀸𑀦 𑀫𑀼𑀤𑀺𑀢𑁄 𑀅𑀳𑀁.

‘‘𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀚𑀺𑀦𑀁;

𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀳𑀲𑁆𑀲𑁂𑀦, 𑀲𑀳𑀤𑀸𑀦𑀫𑀤𑀸𑀲𑀳𑀁.

‘‘𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀅𑀪𑀺𑀯𑀸𑀤𑀺𑀬 𑀦𑀸𑀬𑀓𑀁;

𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀢𑀬𑀺 ¶ 𑀲𑀤𑁆𑀥𑀸𑀬 𑀫𑁂 𑀯𑀻𑀭, 𑀅𑀥𑀺𑀓𑀸𑀭𑀕𑀼𑀡𑁂𑀦 𑀘;

𑀧𑀭𑀺𑀲𑀸 𑀫𑀳𑀢𑀻 𑀳𑁄𑀢𑀼, 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀳𑀺𑀁 𑀢𑀳𑀺𑀁.

‘‘𑀢𑀤𑀸 ¶ 𑀅𑀯𑁄𑀘 𑀧𑀭𑀺𑀲𑀁, 𑀕𑀚𑀕𑀚𑁆𑀚𑀺𑀢𑀲𑀼𑀲𑁆𑀲𑀭𑁄;

𑀓𑀭𑀯𑀻𑀓𑀭𑀼𑀢𑁄 𑀲𑀢𑁆𑀣𑀸, 𑀏𑀢𑀁 𑀧𑀲𑁆𑀲𑀣 𑀩𑁆𑀭𑀸𑀳𑁆𑀫𑀡𑀁.

‘‘𑀳𑁂𑀫𑀯𑀡𑁆𑀡𑀁 𑀫𑀳𑀸𑀩𑀸𑀳𑀼𑀁, 𑀓𑀫𑀮𑀸𑀦𑀦𑀮𑁄𑀘𑀦𑀁;

𑀉𑀤𑀕𑁆𑀕𑀢𑀦𑀼𑀚𑀁 𑀳𑀝𑁆𑀞𑀁, 𑀲𑀤𑁆𑀥𑀯𑀦𑁆𑀢𑀁 𑀕𑀼𑀡𑁂 𑀫𑀫.

‘‘𑀏𑀲 𑀧𑀢𑁆𑀣𑀬𑀢𑁂 𑀞𑀸𑀦𑀁, 𑀲𑀻𑀳𑀖𑁄𑀲𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀇𑀢𑁄 𑀤𑁆𑀯𑁂𑀦𑀯𑀼𑀢𑁂 𑀓𑀧𑁆𑀧𑁂, 𑀅𑀳𑀼 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀅𑀦𑀽𑀧𑀫𑁄 𑀅𑀲𑀤𑀺𑀲𑁄, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

‘‘𑀲𑁄 𑀘 𑀲𑀩𑁆𑀩𑀁 𑀢𑀫𑀁 𑀳𑀦𑁆𑀢𑁆𑀯𑀸, 𑀯𑀺𑀚𑀝𑁂𑀢𑁆𑀯𑀸 𑀫𑀳𑀸𑀚𑀝𑀁;

𑀯𑀲𑁆𑀲𑀢𑁂 𑀅𑀫𑀢𑀁 𑀯𑀼𑀝𑁆𑀞𑀺𑀁, 𑀢𑀧𑁆𑀧𑀬𑀦𑁆𑀢𑁄 𑀲𑀤𑁂𑀯𑀓𑀁.

‘‘𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀁, 𑀭𑀸𑀚𑀸𑀧𑀘𑁆𑀘𑀸 𑀅𑀳𑀼𑀫𑁆𑀳𑀲𑁂;

𑀪𑀸𑀢𑀭𑁄𑀫𑁆𑀳 𑀢𑀬𑁄 𑀲𑀩𑁆𑀩𑁂, 𑀲𑀁𑀯𑀺𑀲𑀝𑁆𑀞𑀸𑀯 𑀭𑀸𑀚𑀺𑀦𑁄.

‘‘𑀯𑀻𑀭𑀗𑁆𑀕𑀭𑀽𑀧𑀸 𑀩𑀮𑀺𑀦𑁄, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀸;

𑀢𑀤𑀸 𑀓𑀼𑀧𑀺𑀢𑀧𑀘𑁆𑀘𑀦𑁆𑀢𑁄, 𑀅𑀫𑁆𑀳𑁂 𑀆𑀳 𑀫𑀳𑀻𑀧𑀢𑀺.

‘‘𑀏𑀣 𑀕𑀦𑁆𑀢𑁆𑀯𑀸𑀦 𑀧𑀘𑁆𑀘𑀦𑁆𑀢𑀁, 𑀲𑁄𑀥𑁂𑀢𑁆𑀯𑀸 𑀅𑀝𑁆𑀝𑀯𑀻𑀩𑀮𑀁;

𑀔𑁂𑀫𑀁 𑀯𑀺𑀚𑀺𑀭𑀺𑀢𑀁 𑀓𑀢𑁆𑀯𑀸, 𑀧𑀼𑀦 𑀤𑁂𑀣𑀸𑀢𑀺 𑀪𑀸𑀲𑀣.

‘‘𑀢𑀢𑁄 ¶ 𑀫𑀬𑀁 𑀅𑀯𑁄𑀘𑀼𑀫𑁆𑀳, 𑀬𑀤𑀺 𑀤𑁂𑀬𑁆𑀬𑀸𑀲𑀺 𑀦𑀸𑀬𑀓𑀁;

𑀉𑀧𑀝𑁆𑀞𑀸𑀦𑀸𑀬 𑀅𑀫𑁆𑀳𑀸𑀓𑀁, 𑀲𑀸𑀥𑀬𑀺𑀲𑁆𑀲𑀸𑀫 𑀯𑁄 𑀢𑀢𑁄.

‘‘𑀢𑀢𑁄 𑀫𑀬𑀁 𑀮𑀤𑁆𑀥𑀯𑀭𑀸, 𑀪𑀽𑀫𑀺𑀧𑀸𑀮𑁂𑀦 𑀧𑁂𑀲𑀺𑀢𑀸;

𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑀁 𑀧𑀘𑁆𑀘𑀦𑁆𑀢𑀁, 𑀓𑀢𑁆𑀯𑀸 𑀧𑀼𑀦𑀭𑀼𑀧𑁂𑀘𑁆𑀘 𑀢𑀁.

‘‘𑀬𑀸𑀘𑀺𑀢𑁆𑀯𑀸 ¶ 𑀲𑀢𑁆𑀣𑀼𑀧𑀝𑁆𑀞𑀸𑀦𑀁, 𑀭𑀸𑀚𑀸𑀦𑀁 𑀮𑁄𑀓𑀦𑀸𑀬𑀓𑀁;

𑀫𑀼𑀦𑀺𑀯𑀻𑀭𑀁 𑀮𑀪𑀺𑀢𑁆𑀯𑀸𑀦, 𑀬𑀸𑀯𑀚𑀻𑀯𑀁 𑀬𑀚𑀺𑀫𑁆𑀳 𑀢𑀁.

‘‘𑀫𑀳𑀕𑁆𑀖𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀧𑀡𑀻𑀢𑀸𑀦𑀺 𑀭𑀲𑀸𑀦𑀺 𑀘;

𑀲𑁂𑀦𑀸𑀲𑀦𑀸𑀦𑀺 𑀭𑀫𑁆𑀫𑀸𑀦𑀺, 𑀪𑁂𑀲𑀚𑁆𑀚𑀸𑀦𑀺 𑀳𑀺𑀢𑀸𑀦𑀺 𑀘.

‘‘𑀤𑀢𑁆𑀯𑀸 𑀲𑀲𑀗𑁆𑀖𑀫𑀼𑀦𑀺𑀦𑁄, 𑀥𑀫𑁆𑀫𑁂𑀦𑀼𑀧𑁆𑀧𑀸𑀤𑀺𑀢𑀸𑀦𑀺 𑀦𑁄;

𑀲𑀻𑀮𑀯𑀦𑁆𑀢𑁄 𑀓𑀸𑀭𑀼𑀡𑀺𑀓𑀸, 𑀪𑀸𑀯𑀦𑀸𑀬𑀼𑀢𑁆𑀢𑀫𑀸𑀦𑀲𑀸.

‘‘𑀲𑀤𑁆𑀥𑀸 𑀧𑀭𑀺𑀘𑀭𑀺𑀢𑁆𑀯𑀸𑀦, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀦𑀸𑀬𑀓𑀁;

𑀦𑀺𑀩𑁆𑀩𑀼𑀢𑁂 𑀢𑀫𑁆𑀳𑀺 𑀮𑁄𑀓𑀕𑁆𑀕𑁂, 𑀧𑀽𑀚𑀁 𑀓𑀢𑁆𑀯𑀸 𑀬𑀣𑀸𑀩𑀮𑀁.

‘‘𑀢𑀢𑁄 𑀘𑀼𑀢𑀸 𑀲𑀦𑁆𑀢𑀼𑀲𑀺𑀢𑀁, 𑀕𑀢𑀸 𑀢𑀢𑁆𑀣 𑀫𑀳𑀸𑀲𑀼𑀔𑀁;

𑀅𑀦𑀼𑀪𑀽𑀢𑀸 𑀫𑀬𑀁 𑀲𑀩𑁆𑀩𑁂, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀫𑀸𑀬𑀸𑀓𑀸𑀭𑁄 𑀬𑀣𑀸 𑀭𑀗𑁆𑀕𑁂, 𑀤𑀲𑁆𑀲𑁂𑀲𑀺 𑀯𑀺𑀓𑀢𑀺𑀁 𑀩𑀳𑀼𑀁;

𑀢𑀣𑀸 𑀪𑀯𑁂 𑀪𑀫𑀦𑁆𑀢𑁄𑀳𑀁, 𑀯𑀺𑀤𑁂𑀳𑀸𑀥𑀺𑀧𑀢𑀻 𑀅𑀳𑀼𑀁.

‘‘𑀕𑀼𑀡𑀸𑀘𑁂𑀮𑀲𑁆𑀲 𑀯𑀸𑀓𑁆𑀬𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑀸𑀲𑀬𑁄;

𑀦𑀭𑀓𑀁 𑀫𑀕𑁆𑀕𑀫𑀸𑀭𑀽𑀴𑁆𑀳𑁄, 𑀭𑀼𑀘𑀸𑀬 𑀫𑀫 𑀥𑀻𑀢𑀼𑀬𑀸.

‘‘𑀑𑀯𑀸𑀤𑀁 𑀦𑀸𑀤𑀺𑀬𑀺𑀢𑁆𑀯𑀸𑀦, 𑀩𑁆𑀭𑀳𑁆𑀫𑀼𑀦𑀸 𑀦𑀸𑀭𑀤𑁂𑀦𑀳𑀁;

𑀩𑀳𑀼𑀥𑀸 𑀲𑀁𑀲𑀺𑀢𑁄 𑀲𑀦𑁆𑀢𑁄, 𑀤𑀺𑀝𑁆𑀞𑀺𑀁 𑀳𑀺𑀢𑁆𑀯𑀸𑀦 𑀧𑀸𑀧𑀺𑀓𑀁.

‘‘𑀧𑀽𑀭𑀬𑀺𑀢𑁆𑀯𑀸 𑀯𑀺𑀲𑁂𑀲𑁂𑀦, 𑀤𑀲 𑀓𑀫𑁆𑀫𑀧𑀣𑀸𑀦𑀺𑀳𑀁;

𑀳𑀺𑀢𑁆𑀯𑀸𑀦 𑀤𑁂𑀳𑀫𑀕𑀫𑀺𑀁, 𑀲𑀕𑁆𑀕𑀁 𑀲𑀪𑀯𑀦𑀁 𑀬𑀣𑀸.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀅𑀳𑁄𑀲𑀳𑀁;

𑀩𑀸𑀭𑀸𑀡𑀲𑀺𑀬𑀁 𑀨𑀻𑀢𑀸𑀬𑀁, 𑀚𑀸𑀢𑁄 𑀯𑀺𑀧𑁆𑀧𑀫𑀳𑀸𑀓𑀼𑀮𑁂.

‘‘𑀫𑀘𑁆𑀘𑀼𑀩𑁆𑀬𑀸𑀥𑀺𑀚𑀭𑀸𑀪𑀻𑀢𑁄, 𑀑𑀕𑀸𑀳𑁂𑀢𑁆𑀯𑀸 𑀫𑀳𑀸𑀯𑀦𑀁;

𑀦𑀺𑀩𑁆𑀩𑀸𑀦𑀁 𑀧𑀤𑀫𑁂𑀲𑀦𑁆𑀢𑁄, 𑀚𑀝𑀺𑀮𑁂𑀲𑀼 𑀧𑀭𑀺𑀩𑁆𑀩𑀚𑀺𑀁.

‘‘𑀢𑀤𑀸 𑀤𑁆𑀯𑁂 𑀪𑀸𑀢𑀭𑁄 𑀫𑀬𑁆𑀳𑀁, 𑀧𑀩𑁆𑀩𑀚𑀺𑀁𑀲𑀼 𑀫𑀬𑀸 𑀲𑀳;

𑀉𑀭𑀼𑀯𑁂𑀮𑀸𑀬𑀁 𑀫𑀸𑀧𑁂𑀢𑁆𑀯𑀸, 𑀅𑀲𑁆𑀲𑀫𑀁 𑀦𑀺𑀯𑀲𑀺𑀁 𑀅𑀳𑀁.

‘‘𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀭𑀼𑀯𑁂𑀮𑀦𑀺𑀯𑀸𑀲𑀺𑀓𑁄;

𑀢𑀢𑁄 𑀫𑁂 𑀆𑀲𑀺 𑀧𑀜𑁆𑀜𑀢𑁆𑀢𑀺, 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀇𑀢𑀺.

‘‘𑀦𑀤𑀻𑀲𑀓𑀸𑀲𑁂 ¶ 𑀪𑀸𑀢𑀸 𑀫𑁂, 𑀦𑀤𑀻𑀓𑀲𑁆𑀲𑀧𑀲𑀯𑁆𑀳𑀬𑁄;

𑀆𑀲𑀻 𑀲𑀓𑀸𑀲𑀦𑀸𑀫𑁂𑀦, 𑀕𑀬𑀸𑀬𑀁 𑀕𑀬𑀸𑀓𑀲𑁆𑀲𑀧𑁄.

‘‘𑀤𑁆𑀯𑁂 𑀲𑀢𑀸𑀦𑀺 𑀓𑀦𑀺𑀝𑁆𑀞𑀲𑁆𑀲, 𑀢𑀻𑀡𑀺, 𑀫𑀚𑁆𑀛𑀲𑁆𑀲 𑀪𑀸𑀢𑀼𑀦𑁄;

𑀫𑀫 𑀧𑀜𑁆𑀘 𑀲𑀢𑀸𑀦𑀽𑀦𑀸, 𑀲𑀺𑀲𑁆𑀲𑀸 𑀲𑀩𑁆𑀩𑁂 𑀫𑀫𑀸𑀦𑀼𑀕𑀸.

‘‘𑀢𑀤𑀸 𑀉𑀧𑁂𑀘𑁆𑀘 𑀫𑀁 𑀩𑀼𑀤𑁆𑀥𑁄, 𑀓𑀢𑁆𑀯𑀸𑀦 𑀯𑀺𑀯𑀺𑀥𑀸𑀦𑀺 𑀫𑁂;

𑀧𑀸𑀝𑀺𑀳𑀻𑀭𑀸𑀦𑀺 𑀮𑁄𑀓𑀕𑁆𑀕𑁄, 𑀯𑀺𑀦𑁂𑀲𑀺 𑀦𑀭𑀲𑀸𑀭𑀣𑀺.

‘‘𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀦, 𑀅𑀳𑁄𑀲𑀺𑀁 𑀏𑀳𑀺𑀪𑀺𑀓𑁆𑀔𑀼𑀓𑁄;

𑀢𑁂𑀳𑁂𑀯 𑀲𑀳 𑀲𑀩𑁆𑀩𑁂𑀳𑀺, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀢𑁂 𑀘𑁂𑀯𑀜𑁆𑀜𑁂 𑀘 𑀩𑀳𑀯𑁄, 𑀲𑀺𑀲𑁆𑀲𑀸 𑀫𑀁 𑀧𑀭𑀺𑀯𑀸𑀭𑀬𑀼𑀁;

𑀪𑀸𑀲𑀺𑀢𑀼𑀜𑁆𑀘 𑀲𑀫𑀢𑁆𑀣𑁄𑀳𑀁, 𑀢𑀢𑁄 𑀫𑀁 𑀇𑀲𑀺𑀲𑀢𑁆𑀢𑀫𑁄.

‘‘𑀫𑀳𑀸𑀧𑀭𑀺𑀲𑀪𑀸𑀯𑀲𑁆𑀫𑀺𑀁, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀅𑀳𑁄 𑀩𑀼𑀤𑁆𑀥𑁂 𑀓𑀢𑀁 𑀓𑀸𑀭𑀁, 𑀲𑀨𑀮𑀁 𑀫𑁂 𑀅𑀚𑀸𑀬𑀣.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑁋

𑁩𑁭𑁫.

‘‘𑀤𑀺𑀲𑁆𑀯𑀸𑀦 ¶ 𑀧𑀸𑀝𑀺𑀳𑀻𑀭𑀸𑀦𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀦 𑀢𑀸𑀯𑀸𑀳𑀁 𑀧𑀡𑀺𑀧𑀢𑀺𑀁, 𑀇𑀲𑁆𑀲𑀸𑀫𑀸𑀦𑁂𑀦 𑀯𑀜𑁆𑀘𑀺𑀢𑁄.

𑁩𑁭𑁬.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀘𑁄𑀤𑁂𑀲𑀺 𑀦𑀭𑀲𑀸𑀭𑀣𑀺;

𑀢𑀢𑁄 𑀫𑁂 𑀆𑀲𑀺 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑁩𑁭𑁭.

‘‘𑀧𑀼𑀩𑁆𑀩𑁂 ¶ 𑀚𑀝𑀺𑀮𑀪𑀽𑀢𑀲𑁆𑀲, 𑀬𑀸 𑀫𑁂 𑀲𑀺𑀤𑁆𑀥𑀺 𑀧𑀭𑀺𑀢𑁆𑀢𑀺𑀓𑀸;

𑀢𑀸𑀳𑀁 𑀢𑀤𑀸 𑀦𑀺𑀭𑀸𑀓𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀸𑀲𑀦𑁂.

𑁩𑁭𑁮.

‘‘𑀧𑀼𑀩𑁆𑀩𑁂 𑀬𑀜𑁆𑀜𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀓𑀸𑀫𑀥𑀸𑀢𑀼𑀧𑀼𑀭𑀓𑁆𑀔𑀢𑁄;

𑀧𑀘𑁆𑀙𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀫𑁄𑀳𑀜𑁆𑀘𑀸𑀧𑀺 𑀲𑀫𑀽𑀳𑀦𑀺𑀁.

𑁩𑁭𑁯.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀇𑀤𑁆𑀥𑀺𑀫𑀸 𑀧𑀭𑀘𑀺𑀢𑁆𑀢𑀜𑁆𑀜𑀽, 𑀤𑀺𑀩𑁆𑀩𑀲𑁄𑀢𑀜𑁆𑀘 𑀧𑀸𑀧𑀼𑀡𑀺𑀁.

𑁩𑁮𑁦.

‘‘𑀬𑀲𑁆𑀲 ¶ 𑀘𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺. 𑁋

𑀇𑀫𑀸 𑀙 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀤𑀺𑀲𑁆𑀯𑀸𑀦 𑀧𑀸𑀝𑀺𑀳𑀻𑀭𑀸𑀦𑀻𑀢𑀺 𑀦𑀸𑀕𑀭𑀸𑀚𑀤𑀫𑀦𑀸𑀤𑀻𑀦𑀺 𑀅𑀟𑁆𑀠𑀼𑀟𑁆𑀠𑀲𑀳𑀲𑁆𑀲𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀺𑀲𑁆𑀯𑀸. ‘‘𑀧𑀸𑀝𑀺𑀳𑀻𑀭𑀁, 𑀧𑀸𑀝𑀺𑀳𑁂𑀭𑀁, 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀬𑀲𑀲𑁆𑀲𑀺𑀦𑁄’’𑀢𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀬𑀣𑀸𑀪𑀼𑀘𑁆𑀘𑀁 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲. 𑀦 𑀢𑀸𑀯𑀸𑀳𑀁 𑀧𑀡𑀺𑀧𑀢𑀺𑀦𑁆𑀢𑀺 𑀬𑀸𑀯 𑀫𑀁 𑀪𑀕𑀯𑀸 ‘‘𑀦𑁂𑀯 𑀔𑁄 𑀢𑁆𑀯𑀁, 𑀓𑀲𑁆𑀲𑀧, 𑀅𑀭𑀳𑀸, 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀫𑀸𑀧𑀦𑁆𑀦𑁄, 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺 𑀦 𑀢𑀚𑁆𑀚𑁂𑀲𑀺, 𑀢𑀸𑀯 𑀅𑀳𑀁 𑀦 𑀧𑀡𑀺𑀧𑀸𑀢𑀦𑀁 𑀅𑀓𑀸𑀲𑀺𑀁. 𑀓𑀺𑀁𑀓𑀸𑀭𑀡𑀸? 𑀇𑀲𑁆𑀲𑀸𑀫𑀸𑀦𑁂𑀦 𑀯𑀜𑁆𑀘𑀺𑀢𑁄, ‘‘𑀇𑀫𑀲𑁆𑀲 𑀫𑀬𑀺 𑀲𑀸𑀯𑀓𑀢𑁆𑀢𑀁 𑀉𑀧𑀕𑀢𑁂 𑀫𑀫 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀏𑀯 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀭𑀲𑀫𑁆𑀧𑀢𑁆𑀢𑀺𑀅𑀲𑀳𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀘𑁂𑀯, ‘‘𑀅𑀳𑀁 𑀕𑀡𑀧𑀸𑀫𑁄𑀓𑁆𑀔𑁄 𑀩𑀳𑀼𑀚𑀦𑀲𑀫𑁆𑀫𑀢𑁄’’𑀢𑀺 𑀏𑀯𑀁 𑀅𑀩𑁆𑀪𑀼𑀦𑁆𑀦𑀢𑀺𑀮𑀓𑁆𑀔𑀡𑁂𑀦 𑀫𑀸𑀦𑁂𑀦 𑀘 𑀯𑀜𑁆𑀘𑀺𑀢𑁄, 𑀧𑀮𑀫𑁆𑀪𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸𑀢𑀺 𑀫𑀬𑁆𑀳𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀚𑀸𑀦𑀺𑀢𑁆𑀯𑀸, 𑀬𑀁 𑀬𑀁 𑀪𑀕𑀯𑀸 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀺, 𑀢𑀁 𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸𑀧𑀺 ‘‘𑀦 𑀢𑁆𑀯𑁂𑀯 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀁 𑀚𑀸𑀦𑀦𑁆𑀢𑁄𑀧𑀺 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀸 𑀦𑁂𑀭𑀜𑁆𑀚𑀭𑀸𑀬 𑀫𑀚𑁆𑀛𑁂 𑀲𑀫𑀦𑁆𑀢𑀢𑁄 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀺𑀢𑁆𑀯𑀸 𑀢𑁂𑀦 𑀆𑀪𑀢𑀦𑀸𑀯𑀸𑀬 𑀞𑀺𑀢𑁄 𑀢𑀤𑀸𑀧𑀺 ‘‘𑀫𑀳𑀺𑀤𑁆𑀥𑀺𑀓𑁄’’𑀢𑀺𑀆𑀤𑀺𑀓𑀁 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 ‘‘𑀦 𑀢𑁆𑀯𑁂𑀯 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺 𑀧𑀯𑀢𑁆𑀢𑀺𑀢𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀘𑁄𑀤𑁂𑀲𑀺 𑀦𑀭𑀲𑀸𑀭𑀣𑀻𑀢𑀺 𑀢𑀤𑀸 𑀫𑁂 ¶ 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 ‘‘𑀦𑁂𑀯 𑀔𑁄 𑀢𑁆𑀯𑀁 𑀅𑀭𑀳𑀸’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀫𑀁 𑀘𑁄𑀤𑁂𑀲𑀺 𑀦𑀺𑀕𑁆𑀕𑀡𑁆𑀳𑀺. 𑀢𑀢𑁄 𑀫𑁂 𑀆𑀲𑀺 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄𑀢𑀺 𑀢𑀢𑁄 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀸𑀳𑁂𑀢𑀼 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀪𑀽𑀢𑀧𑀼𑀩𑁆𑀩𑀢𑀸𑀬 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀮𑁄𑀫𑀳𑀁𑀲𑀦𑁄 ‘‘𑀅𑀦𑀭𑀳𑀸𑀯 𑀲𑀫𑀸𑀦𑁄 ‘𑀅𑀭𑀳𑀸’𑀢𑀺 ¶ 𑀫𑀜𑁆𑀜𑀺’’𑀦𑁆𑀢𑀺 𑀲𑀁𑀯𑁂𑀕𑁄 𑀲𑀳𑁄𑀢𑁆𑀢𑀧𑁆𑀧𑁄 𑀜𑀸𑀡𑀼𑀧𑁆𑀧𑀸𑀤𑁄 𑀫𑀬𑁆𑀳𑀁 𑀅𑀳𑁄𑀲𑀺.

𑀚𑀝𑀺𑀮𑀪𑀽𑀢𑀲𑁆𑀲𑀸𑀢𑀺 ¶ 𑀢𑀸𑀧𑀲𑀪𑀽𑀢𑀲𑁆𑀲. 𑀲𑀺𑀤𑁆𑀥𑀻𑀢𑀺 𑀮𑀸𑀪𑀲𑀓𑁆𑀓𑀸𑀭𑀲𑀫𑀺𑀤𑁆𑀥𑀺. 𑀧𑀭𑀺𑀢𑁆𑀢𑀺𑀓𑀸𑀢𑀺 𑀅𑀧𑁆𑀧𑀫𑀢𑁆𑀢𑀺𑀓𑀸. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀢𑀤𑀸𑀢𑀺 𑀪𑀕𑀯𑀢𑁄 𑀘𑁄𑀤𑀦𑀸𑀬 𑀲𑀁𑀯𑁂𑀕𑀼𑀧𑁆𑀧𑀢𑁆𑀢𑀺𑀓𑀸𑀮𑁂. 𑀦𑀺𑀭𑀸𑀓𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸, 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀇𑀤𑁆𑀥𑀻𑀢𑀺 𑀪𑀸𑀯𑀦𑀸𑀫𑀬𑀇𑀤𑁆𑀥𑀻’’𑀢𑀺 𑀯𑀤𑀦𑁆𑀢𑀺. 𑀢𑀤𑀬𑀼𑀢𑁆𑀢𑀁 𑀢𑀤𑀸 𑀢𑀲𑁆𑀲 𑀅𑀛𑀸𑀦𑀮𑀸𑀪𑀻𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑀸𑀫𑀥𑀸𑀢𑀼𑀧𑀼𑀭𑀓𑁆𑀔𑀢𑁄’’𑀢𑀺.

𑀬𑀜𑁆𑀜𑁂𑀦 𑀲𑀦𑁆𑀢𑀼𑀝𑁆𑀞𑁄𑀢𑀺 ‘‘𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀲𑀕𑁆𑀕𑀲𑀼𑀔𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀺, 𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀬𑀜𑁆𑀜𑀬𑀚𑀦𑁂𑀦 𑀲𑀦𑁆𑀢𑀼𑀝𑁆𑀞𑁄 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀲𑀜𑁆𑀜𑀻. 𑀓𑀸𑀫𑀥𑀸𑀢𑀼𑀧𑀼𑀭𑀓𑁆𑀔𑀢𑁄𑀢𑀺 𑀓𑀸𑀫𑀲𑀼𑀕𑀢𑀺𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀢𑀡𑁆𑀳𑁄 𑀬𑀜𑁆𑀜𑀬𑀚𑀦𑁂𑀦 𑀓𑀸𑀫𑀮𑁄𑀓𑀁 𑀧𑀼𑀭𑀓𑁆𑀔𑀢𑁆𑀯𑀸 𑀞𑀺𑀢𑁄. 𑀲𑁄 𑀘𑁂 𑀬𑀜𑁆𑀜𑁄 𑀧𑀸𑀡𑀸𑀢𑀺𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀺, 𑀦 𑀢𑁂𑀦 𑀲𑀼𑀕𑀢𑀺𑀁 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀦 𑀳𑀺 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑁄 𑀓𑀦𑁆𑀢𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀬𑀸 𑀧𑀦 𑀢𑀢𑁆𑀣 𑀤𑀸𑀦𑀸𑀤𑀺𑀓𑀼𑀲𑀮𑀘𑁂𑀢𑀦𑀸, 𑀢𑀸𑀬 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀲𑀼𑀕𑀢𑀺𑀁 𑀕𑀘𑁆𑀙𑁂𑀬𑁆𑀬. 𑀧𑀘𑁆𑀙𑀸𑀢𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀢𑁄 𑀧𑀘𑁆𑀙𑀸 𑀲𑀢𑁆𑀣𑀼 𑀑𑀯𑀸𑀤𑁂𑀦 𑀢𑀸𑀧𑀲𑀮𑀤𑁆𑀥𑀺𑀁 𑀧𑀳𑀸𑀬 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀓𑀸𑀮𑁂. 𑀲𑀫𑀽𑀳𑀦𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀫𑁄𑀳𑀜𑁆𑀘 𑀅𑀦𑀯𑀲𑁂𑀲𑀢𑁄 𑀲𑀫𑀼𑀕𑁆𑀖𑀸𑀢𑁂𑀲𑀺𑀁.

𑀬𑀲𑁆𑀫𑀸 𑀧𑀦𑀸𑀬𑀁 𑀣𑁂𑀭𑁄 𑀅𑀭𑀺𑀬𑀫𑀕𑁆𑀕𑁂𑀦 𑀭𑀸𑀕𑀸𑀤𑀬𑁄 𑀲𑀫𑀽𑀳𑀦𑀦𑁆𑀢𑁄𑀬𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀁 𑀅𑀢𑁆𑀢𑀦𑁄 𑀙𑀴𑀪𑀺𑀜𑁆𑀜𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀻𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂 𑀔𑀦𑁆𑀥𑀧𑀝𑀺𑀩𑀤𑁆𑀥𑁂 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀺. 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀯𑀺𑀲𑁄𑀥𑀺𑀢𑀁, 𑀧𑀓𑀢𑀺𑀘𑀓𑁆𑀔𑀼𑀦𑀸 𑀆𑀧𑀸𑀣𑀕𑀢𑀁 𑀧𑀓𑀢𑀺𑀭𑀽𑀧𑀁 𑀯𑀺𑀬 𑀤𑀺𑀩𑁆𑀩𑀁 𑀫𑀸𑀦𑀼𑀲𑀫𑁆𑀧𑀺 𑀤𑀽𑀭𑀁 𑀢𑀺𑀭𑁄𑀝𑁆𑀞𑀺𑀢𑀁 𑀅𑀢𑀺𑀲𑀼𑀔𑀼𑀫𑀜𑁆𑀘 𑀭𑀽𑀧𑀁 𑀯𑀺𑀪𑀸𑀯𑁂𑀢𑀼𑀁 𑀲𑀫𑀢𑁆𑀣𑀜𑀸𑀡𑀁 𑀪𑀸𑀯𑀦𑀸𑀬 𑀫𑀬𑀸 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀫𑀸𑀢𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀆𑀤𑀻𑀳𑀺 𑀇𑀤𑁆𑀥𑀻𑀳𑀺 𑀇𑀤𑁆𑀥𑀺𑀫𑀸, 𑀇𑀤𑁆𑀥𑀺𑀯𑀺𑀥𑀜𑀸𑀡𑀮𑀸𑀪𑀻𑀢𑀺 𑀅𑀢𑁆𑀣𑁄. 𑀲𑀭𑀸𑀕𑀸𑀤𑀺𑀪𑁂𑀤𑀲𑁆𑀲 𑀧𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀚𑀸𑀦𑀦𑀢𑁄 𑀧𑀭𑀘𑀺𑀢𑁆𑀢𑀜𑁆𑀜𑀽, 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀩𑁆𑀩𑀲𑁄𑀢𑀜𑁆𑀘 𑀧𑀸𑀧𑀼𑀡𑀺𑀦𑁆𑀢𑀺 𑀤𑀺𑀩𑁆𑀩𑀲𑁄𑀢𑀜𑀸𑀡𑀜𑁆𑀘 𑀧𑀝𑀺𑀮𑀪𑀺𑀁.

𑀲𑁄 ¶ 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄𑀢𑀺 𑀬𑁄 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀔𑀬𑀪𑀽𑀢𑁄 𑀔𑀬𑁂𑀦 ¶ 𑀯𑀸 𑀮𑀤𑁆𑀥𑀩𑁆𑀩𑁄, 𑀲𑁄 𑀲𑀤𑀢𑁆𑀣𑁄 𑀧𑀭𑀫𑀢𑁆𑀣𑁄 𑀘 𑀫𑀬𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀥𑀺𑀕𑀢𑁄𑀢𑀺. 𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀢𑁂𑀓𑀺𑀘𑁆𑀙𑀓𑀸𑀭𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀢𑀺𑀳𑀺𑀢𑀸 ¶ 𑀯𑀻𑀳𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀢𑁂𑀓𑀺𑀘𑁆𑀙𑀓𑀸𑀭𑀺𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀯𑁂𑀚𑁆𑀚𑀲𑀢𑁆𑀣𑁂 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄. 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑀁 𑀅𑀲𑁄𑀓𑀁 𑀦𑀸𑀫 𑀣𑁂𑀭𑀁 𑀩𑁆𑀬𑀸𑀥𑀺𑀢𑀁 𑀅𑀭𑁄𑀕𑀫𑀓𑀸𑀲𑀺, 𑀅𑀜𑁆𑀜𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀭𑁄𑀕𑀸𑀪𑀺𑀪𑀽𑀢𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀪𑁂𑀲𑀚𑁆𑀚𑀁 𑀲𑀁𑀯𑀺𑀤𑀳𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀼𑀩𑀼𑀤𑁆𑀥𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀢𑀺𑀓𑀺𑀘𑁆𑀙𑀓𑁂𑀳𑀺 𑀕𑀩𑁆𑀪𑀓𑀸𑀮𑁂 𑀧𑀭𑀺𑀲𑁆𑀲𑀬𑀁 𑀅𑀧𑀳𑀭𑀺𑀢𑁆𑀯𑀸 𑀧𑀭𑀺𑀧𑀸𑀮𑀺𑀢𑀢𑀸𑀬 𑀢𑁂𑀓𑀺𑀘𑁆𑀙𑀓𑀸𑀭𑀻𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀓𑀼𑀮𑀸𑀦𑀼𑀭𑀽𑀧𑀸𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀲𑀺𑀧𑁆𑀧𑀸𑀦𑀺 𑀘 𑀲𑀺𑀓𑁆𑀔𑀦𑁆𑀢𑁄 𑀯𑀟𑁆𑀠𑀢𑀺. 𑀢𑀤𑀸 𑀘𑀸𑀡𑀓𑁆𑀓𑁄 𑀲𑀼𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀓𑀺𑀭𑀺𑀬𑀸𑀲𑀼 𑀉𑀧𑀸𑀬𑀓𑁄𑀲𑀮𑁆𑀮𑀜𑁆𑀘 𑀤𑀺𑀲𑁆𑀯𑀸, ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀧𑀢𑀺𑀝𑁆𑀞𑀁 𑀮𑀪𑀦𑁆𑀢𑁄 𑀫𑀁 𑀅𑀪𑀺𑀪𑀯𑁂𑀬𑁆𑀬𑀸’’𑀢𑀺 𑀇𑀲𑁆𑀲𑀸𑀧𑀓𑀢𑁄 𑀭𑀜𑁆𑀜𑀸 𑀘𑀦𑁆𑀤𑀕𑀼𑀢𑁆𑀢𑁂𑀦 𑀢𑀁 𑀩𑀦𑁆𑀥𑀦𑀸𑀕𑀸𑀭𑁂 𑀔𑀺𑀧𑀸𑀧𑁂𑀲𑀺. 𑀢𑁂𑀓𑀺𑀘𑁆𑀙𑀓𑀸𑀭𑀻 𑀧𑀺𑀢𑀼 𑀩𑀦𑁆𑀥𑀦𑀸𑀕𑀸𑀭𑀧𑁆𑀧𑀯𑁂𑀲𑀦𑀁 𑀲𑀼𑀢𑁆𑀯𑀸 𑀪𑀻𑀢𑁄 𑀧𑀮𑀸𑀬𑀺𑀢𑁆𑀯𑀸 𑀲𑀸𑀡𑀯𑀸𑀲𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀁𑀯𑁂𑀕𑀓𑀸𑀭𑀡𑀁 𑀣𑁂𑀭𑀲𑁆𑀲 𑀓𑀣𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑁄 𑀦𑁂𑀲𑀚𑁆𑀚𑀺𑀓𑁄 𑀘 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺, 𑀲𑀻𑀢𑀼𑀡𑁆𑀳𑀁 𑀅𑀕𑀡𑁂𑀦𑁆𑀢𑁄 ¶ 𑀲𑀫𑀡𑀥𑀫𑁆𑀫𑀫𑁂𑀯 𑀓𑀭𑁄𑀢𑀺, 𑀯𑀺𑀲𑁂𑀲𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀦 𑀇𑀫𑀲𑁆𑀲 𑀫𑀫 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀺𑀓𑁆𑀔𑁂𑀧𑀁 𑀓𑀸𑀢𑀼𑀓𑀸𑀫𑁄 𑀲𑀲𑁆𑀲𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀓𑀸𑀮𑁂 𑀔𑁂𑀢𑁆𑀢𑀕𑁄𑀧𑀓𑀯𑀡𑁆𑀡𑁂𑀦 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀦𑀺𑀧𑁆𑀧𑀡𑁆𑀟𑁂𑀦𑁆𑀢𑁄 𑁋

𑁩𑁮𑁧.

‘‘𑀅𑀢𑀺𑀳𑀺𑀢𑀸 𑀯𑀻𑀳𑀺, 𑀔𑀮𑀕𑀢𑀸 𑀲𑀸𑀮𑀻;

𑀦 𑀘 𑀮𑀪𑁂 𑀧𑀺𑀡𑁆𑀟𑀁, 𑀓𑀣𑀫𑀳𑀁 𑀓𑀲𑁆𑀲’’𑀦𑁆𑀢𑀺. 𑁋 𑀆𑀳; 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑁋

𑁩𑁮𑁨.

‘‘𑀩𑀼𑀤𑁆𑀥𑀫𑀧𑁆𑀧𑀫𑁂𑀬𑁆𑀬𑀁 ¶ 𑀅𑀦𑀼𑀲𑁆𑀲𑀭 𑀧𑀲𑀦𑁆𑀦𑁄, 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄 𑀳𑁄𑀳𑀺𑀲𑀺 𑀲𑀢𑀢𑀫𑀼𑀤𑀕𑁆𑀕𑁄.

𑁩𑁮𑁩.

‘‘𑀥𑀫𑁆𑀫𑀫𑀧𑁆𑀧𑀫𑁂𑀬𑁆𑀬𑀁 ¶ …𑀧𑁂… 𑀲𑀢𑀢𑀫𑀼𑀤𑀕𑁆𑀕𑁄.

𑁩𑁮𑁪.

‘‘𑀲𑀗𑁆𑀖𑀫𑀧𑁆𑀧𑀫𑁂𑀬𑁆𑀬𑀁…𑀧𑁂… 𑀲𑀢𑀢𑀫𑀼𑀤𑀕𑁆𑀕𑁄’’𑀢𑀺. 𑁋 𑀆𑀳; 𑀢𑀁 𑀲𑀼𑀢𑁆𑀯𑀸 𑀫𑀸𑀭𑁄 𑁋

𑁩𑁮𑁫.

‘‘𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀲𑀺, 𑀲𑀻𑀢𑀸 𑀳𑁂𑀫𑀦𑁆𑀢𑀺𑀓𑀸 𑀇𑀫𑀸 𑀭𑀢𑁆𑀬𑁄;

𑀫𑀸 𑀲𑀻𑀢𑁂𑀦 𑀧𑀭𑁂𑀢𑁄 𑀯𑀺𑀳𑀜𑁆𑀜𑀺𑀢𑁆𑀣𑁄, 𑀧𑀯𑀺𑀲 𑀢𑁆𑀯𑀁 𑀯𑀺𑀳𑀸𑀭𑀁 𑀨𑀼𑀲𑀺𑀢𑀕𑁆𑀕𑀴’’𑀦𑁆𑀢𑀺. 𑁋

𑀆𑀳. 𑀅𑀣 𑀣𑁂𑀭𑁄 𑁋

𑁩𑁮𑁬.

‘‘𑀨𑀼𑀲𑀺𑀲𑁆𑀲𑀁 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀢𑀸𑀳𑀺 𑀘 𑀲𑀼𑀔𑀺𑀢𑁄 𑀯𑀺𑀳𑀭𑀺𑀲𑁆𑀲𑀁;

𑀦𑀸𑀳𑀁 𑀲𑀻𑀢𑁂𑀦 𑀯𑀺𑀳𑀜𑁆𑀜𑀺𑀲𑁆𑀲𑀁, 𑀅𑀦𑀺𑀜𑁆𑀚𑀺𑀢𑁄 𑀯𑀺𑀳𑀭𑀦𑁆𑀢𑁄’’𑀢𑀺. 𑁋 𑀆𑀳;

𑀢𑀢𑁆𑀣 𑀅𑀢𑀺𑀳𑀺𑀢𑀸 𑀯𑀻𑀳𑀻𑀢𑀺 𑀯𑀻𑀳𑀬𑁄 𑀓𑁄𑀝𑁆𑀞𑀸𑀕𑀸𑀭𑀁 𑀅𑀢𑀺𑀦𑁂𑀢𑁆𑀯𑀸 𑀞𑀧𑀺𑀢𑀸, 𑀢𑀢𑁆𑀣 𑀧𑀝𑀺𑀲𑀸𑀫𑀺𑀢𑀸 𑀔𑀮𑀢𑁄 𑀯𑀸 𑀖𑀭𑀁 𑀉𑀧𑀦𑀻𑀢𑀸𑀢𑀺 𑀅𑀢𑁆𑀣𑁄. 𑀯𑀻𑀳𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀇𑀢𑀭𑀫𑁆𑀧𑀺 𑀥𑀜𑁆𑀜𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀮𑀻 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀯𑀻𑀳𑀺𑀢𑁄 ¶ 𑀧𑀘𑁆𑀙𑀸 𑀧𑀘𑁆𑀘𑀦𑁆𑀢𑀻𑀢𑀺 𑀆𑀳. 𑀔𑀮𑀕𑀢𑀸 𑀲𑀸𑀮𑀻𑀢𑀺 𑀔𑀮𑀁 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑀁 𑀕𑀢𑀸, 𑀢𑀢𑁆𑀣 𑀭𑀸𑀲𑀺𑀯𑀲𑁂𑀦 𑀫𑀤𑁆𑀤𑀦𑀘𑀸𑀯𑀦𑀸𑀤𑀺𑀯𑀲𑁂𑀦 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀥𑀸𑀦𑀥𑀜𑁆𑀜𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀢𑁆𑀣 𑀲𑀸𑀮𑀻𑀦𑀁 𑀯𑀺𑀲𑀼𑀁 𑀕𑀳𑀡𑀁, 𑀉𑀪𑀬𑁂𑀦𑀧𑀺 𑀕𑀸𑀫𑁂, 𑀕𑀸𑀫𑀢𑁄 𑀩𑀳𑀺 𑀘 𑀥𑀜𑁆𑀜𑀁 𑀧𑀭𑀺𑀧𑀼𑀡𑁆𑀡𑀁 𑀞𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀮𑀪𑁂 𑀧𑀺𑀡𑁆𑀟𑀦𑁆𑀢𑀺 𑀏𑀯𑀁 𑀲𑀼𑀮𑀪𑀥𑀜𑁆𑀜𑁂 𑀲𑀼𑀪𑀺𑀓𑁆𑀔𑀓𑀸𑀮𑁂 𑀅𑀳𑀁 𑀧𑀺𑀡𑁆𑀟𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀺. 𑀇𑀤𑀸𑀦𑀺 𑀓𑀣𑀫𑀳𑀁 𑀓𑀲𑁆𑀲𑀦𑁆𑀢𑀺 𑀅𑀳𑀁 𑀓𑀣𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀚𑀻𑀯𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀳𑀸𑀲𑀓𑁂𑀴𑀺𑀁 𑀅𑀓𑀸𑀲𑀺.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 ‘‘𑀅𑀬𑀁 𑀯𑀭𑀸𑀓𑁄 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀫𑀬𑁆𑀳𑀁 𑀧𑀓𑀸𑀲𑁂𑀲𑀺, 𑀫𑀬𑀸 𑀧𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀑𑀯𑀤𑀺𑀢𑀩𑁆𑀩𑁄, 𑀦 𑀫𑀬𑀸 𑀓𑀺𑀜𑁆𑀘𑀺 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀣𑀼𑀢𑁆𑀢𑀬𑀸𑀦𑀼𑀲𑁆𑀲𑀢𑀺𑀬𑀁 𑀅𑀢𑁆𑀢𑀸𑀦𑀁 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀩𑀼𑀤𑁆𑀥𑀫𑀧𑁆𑀧𑀫𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀩𑀼𑀤𑁆𑀥𑀫𑀧𑁆𑀧𑀫𑁂𑀬𑁆𑀬𑀁 𑀅𑀦𑀼𑀲𑁆𑀲𑀭 𑀧𑀲𑀦𑁆𑀦𑁄𑀢𑀺 𑀲𑀯𑀸𑀲𑀦𑀸𑀬 𑀅𑀯𑀺𑀚𑁆𑀚𑀸𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑁂𑀦, 𑀩𑀼𑀤𑁆𑀥𑀺𑀬𑀸 𑀘 𑀯𑀺𑀓𑀲𑀺𑀢𑀪𑀸𑀯𑁂𑀦 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀫𑀸𑀡𑀓𑀭𑀸𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑀸 𑀅𑀧𑀭𑀺𑀫𑀸𑀡𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀅𑀧𑁆𑀧𑀫𑁂𑀬𑁆𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀢𑀸𑀬 𑀘 𑀅𑀧𑁆𑀧𑀫𑁂𑀬𑁆𑀬𑀁. 𑀑𑀓𑀧𑁆𑀧𑀦𑀮𑀓𑁆𑀔𑀡𑁂𑀦 𑀅𑀪𑀺𑀧𑁆𑀧𑀲𑀸𑀤𑁂𑀦 𑀧𑀲𑀦𑁆𑀦𑁄, 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁭𑁪; 𑀲𑀁. 𑀦𑀺. 𑁫.𑁯𑁯𑁭) 𑀅𑀦𑀼𑀲𑁆𑀲𑀭 𑀅𑀦𑀼 𑀅𑀦𑀼 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀲𑀢𑀺𑀁 𑀧𑀯𑀢𑁆𑀢𑁂𑀳𑀺, 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄 𑀳𑁄𑀳𑀺𑀲𑀺. 𑀲𑀢𑀢𑀫𑀼𑀤𑀕𑁆𑀕𑁄𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑁄𑀯 𑀨𑀭𑀡𑀮𑀓𑁆𑀔𑀡𑀸𑀬 𑀧𑀻𑀢𑀺𑀬𑀸 𑀲𑀢𑀢𑀁 𑀲𑀩𑁆𑀩𑀤𑀸 𑀨𑀼𑀝𑀲𑀭𑀻𑀭𑁄 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑁂𑀳𑀺 𑀅𑀚𑁆𑀛𑁄𑀢𑁆𑀣𑀝𑀲𑀭𑀻𑀭𑁄 𑀉𑀩𑁆𑀩𑁂𑀕𑀧𑀻𑀢𑀺𑀬𑀸 ¶ 𑀉𑀤𑀕𑁆𑀕𑁄 𑀓𑀸𑀬𑀁 𑀉𑀤𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑀁 𑀮𑀗𑁆𑀖𑀺𑀢𑀼𑀁 𑀲𑀫𑀢𑁆𑀣𑁄 𑀘 𑀪𑀯𑁂𑀬𑁆𑀬𑀸𑀲𑀺, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬𑀸𑀲𑀺. 𑀬𑀢𑁄 𑀲𑀻𑀢𑀼𑀡𑁆𑀳𑁂𑀳𑀺 𑀯𑀺𑀬 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀳𑀺𑀧𑀺 𑀅𑀦𑀪𑀺𑀪𑀽𑀢𑁄 𑀳𑁄𑀳𑀺𑀲𑀻𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀦𑁆𑀢𑀺 ¶ 𑀅𑀭𑀺𑀬𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁. 𑀲𑀗𑁆𑀖𑀦𑁆𑀢𑀺 𑀅𑀭𑀺𑀬𑀁 𑀧𑀭𑀫𑀢𑁆𑀣𑀲𑀗𑁆𑀖𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀦𑀼𑀲𑁆𑀲𑀭𑀸𑀢𑀺 𑀧𑀦𑁂𑀢𑁆𑀣 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀁, ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀁 𑀣𑁂𑀭𑁂𑀦 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂 𑀦𑀺𑀬𑁄𑀚𑀦𑀯𑀲𑁂𑀦 𑀅𑀢𑁆𑀢𑀦𑀺 𑀑𑀯𑀤𑀺𑀢𑁂 𑀧𑀼𑀦 𑀫𑀸𑀭𑁄 𑀯𑀺𑀯𑁂𑀓𑀯𑀸𑀲𑀢𑁄 𑀦𑀁 𑀯𑀺𑀯𑁂𑀘𑁂𑀢𑀼𑀓𑀸𑀫𑁄 𑀳𑀺𑀢𑁂𑀲𑀻𑀪𑀸𑀯𑀁 ¶ 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀲𑀻’’𑀢𑀺 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀩𑁆𑀪𑁄𑀓𑀸𑀲𑁂 𑀓𑁂𑀦𑀘𑀺 𑀅𑀧𑀝𑀺𑀘𑁆𑀙𑀦𑁆𑀦𑁂 𑀯𑀺𑀯𑀝𑀗𑁆𑀕𑀡𑁂 𑀯𑀺𑀳𑀭𑀲𑀺 𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀲𑀺. 𑀳𑁂𑀫𑀦𑁆𑀢𑀺𑀓𑀸 𑀳𑀺𑀫𑀧𑀸𑀢𑀲𑀫𑀬𑁂 𑀧𑀭𑀺𑀬𑀸𑀧𑀦𑁆𑀦𑀸 𑀇𑀫𑀸 𑀲𑀻𑀢𑀸 𑀭𑀢𑁆𑀢𑀺𑀬𑁄 𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀲𑀻𑀢𑁂𑀦 𑀧𑀭𑁂𑀢𑁄 𑀅𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀫𑀸 𑀯𑀺𑀳𑀜𑁆𑀜𑀺𑀢𑁆𑀣𑁄 𑀯𑀺𑀖𑀸𑀢𑀁 𑀫𑀸 𑀆𑀧𑀚𑁆𑀚𑀺 𑀫𑀸 𑀓𑀺𑀮𑀫𑀺. 𑀨𑀼𑀲𑀺𑀢𑀕𑁆𑀕𑀴𑀁 𑀧𑀺𑀳𑀺𑀢𑀓𑀯𑀸𑀝𑀁 𑀲𑁂𑀦𑀸𑀲𑀦𑀁 𑀧𑀯𑀺𑀲, 𑀏𑀯𑀁 𑀢𑁂 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 ‘‘𑀦 𑀫𑀬𑁆𑀳𑀁 𑀲𑁂𑀦𑀸𑀲𑀦𑀧𑀭𑀺𑀬𑁂𑀲𑀦𑀸𑀬 𑀧𑀬𑁄𑀚𑀦𑀁, 𑀏𑀢𑁆𑀣𑁂𑀯𑀸𑀳𑀁 𑀲𑀼𑀔𑀯𑀺𑀳𑀸𑀭𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀨𑀼𑀲𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀙𑀝𑁆𑀞𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀨𑀼𑀲𑀺𑀲𑁆𑀲𑀁 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄𑀢𑀺 𑀅𑀧𑁆𑀧𑀫𑀸𑀡𑀕𑁄𑀘𑀭𑀢𑀸𑀬 ‘‘𑀅𑀧𑁆𑀧𑀫𑀜𑁆𑀜𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀨𑀼𑀲𑀺𑀲𑁆𑀲𑀁 𑀨𑀼𑀲𑀺𑀲𑁆𑀲𑀸𑀫𑀺, 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀺. 𑀢𑀸𑀳𑀺 𑀘 𑀲𑀼𑀔𑀺𑀢𑁄 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀢𑀸𑀳𑀺 𑀅𑀧𑁆𑀧𑀫𑀜𑁆𑀜𑀸𑀳𑀺 𑀲𑀼𑀔𑀺𑀢𑁄 𑀲𑀜𑁆𑀚𑀸𑀢𑀲𑀼𑀔𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀁 𑀘𑀢𑁆𑀢𑀸𑀭𑁄𑀧𑀺 𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀲𑁆𑀲𑀸𑀫𑀻𑀢𑀺. 𑀢𑁂𑀦 𑀫𑀬𑁆𑀳𑀁 𑀲𑀩𑁆𑀩𑀓𑀸𑀮𑁂 𑀲𑀼𑀔𑀫𑁂𑀯, 𑀦 𑀤𑀼𑀓𑁆𑀔𑀁. 𑀬𑀢𑁄 𑀦𑀸𑀳𑀁 𑀲𑀻𑀢𑁂𑀦 𑀯𑀺𑀳𑀜𑁆𑀜𑀺𑀲𑁆𑀲𑀁 𑀅𑀦𑁆𑀢𑀭𑀝𑁆𑀞𑀓𑁂𑀧𑀺 𑀳𑀺𑀫𑀧𑀸𑀢𑀲𑀫𑀬𑁂 𑀅𑀳𑀁 𑀲𑀻𑀢𑁂𑀦 𑀦 𑀓𑀺𑀮𑀫𑀺𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀅𑀦𑀺𑀜𑁆𑀚𑀺𑀢𑁄 𑀯𑀺𑀳𑀭𑀦𑁆𑀢𑁄 𑀘𑀺𑀢𑁆𑀢𑀲𑁆𑀲 𑀇𑀜𑁆𑀚𑀺𑀢𑀓𑀸𑀭𑀡𑀸𑀦𑀁 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀺𑀜𑁆𑀚𑀦𑀸𑀬 𑀘 𑀅𑀪𑀸𑀯𑀢𑁄 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦𑁂𑀯 𑀲𑀼𑀔𑀺𑀢𑁄 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀣𑁂𑀭𑁄 𑀇𑀫𑀁 𑀕𑀸𑀣𑀁 𑀯𑀤𑀦𑁆𑀢𑁄𑀬𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧𑁮.𑁩𑁯-𑁪𑁪) 𑁋

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀯𑁂𑀚𑁆𑀚𑁄 𑀆𑀲𑀺𑀁 𑀲𑀼𑀲𑀺𑀓𑁆𑀔𑀺𑀢𑁄;

𑀆𑀢𑀼𑀭𑀸𑀦𑀁 𑀲𑀤𑀼𑀓𑁆𑀔𑀸𑀦𑀁, 𑀫𑀳𑀸𑀚𑀦𑀲𑀼𑀔𑀸𑀯𑀳𑁄.

‘‘𑀩𑁆𑀬𑀸𑀥𑀺𑀢𑀁 𑀲𑀫𑀡𑀁 𑀤𑀺𑀲𑁆𑀯𑀸, 𑀲𑀻𑀮𑀯𑀦𑁆𑀢𑀁 𑀫𑀳𑀸𑀚𑀼𑀢𑀺𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀪𑁂𑀲𑀚𑁆𑀚𑀫𑀤𑀤𑀺𑀁 𑀢𑀤𑀸.

‘‘𑀅𑀭𑁄𑀕𑁄 𑀆𑀲𑀺 𑀢𑁂𑀦𑁂𑀯, 𑀲𑀫𑀡𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀅𑀲𑁄𑀓𑁄 𑀦𑀸𑀫 𑀦𑀸𑀫𑁂𑀦, 𑀉𑀧𑀝𑁆𑀞𑀸𑀓𑁄 𑀯𑀺𑀧𑀲𑁆𑀲𑀺𑀦𑁄.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀑𑀲𑀥𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

‘‘𑀇𑀢𑁄 ¶ 𑀘 𑀅𑀝𑁆𑀞𑀫𑁂 𑀓𑀧𑁆𑀧𑁂, 𑀲𑀩𑁆𑀩𑁄𑀲𑀥𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀧𑁆𑀨𑀮𑁄.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀏𑀢𑁆𑀣 𑀘 𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀓𑀸𑀮𑁂 𑀇𑀫𑀲𑁆𑀲 𑀣𑁂𑀭𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀇𑀫𑀸 𑀕𑀸𑀣𑀸 𑀲𑀗𑁆𑀕𑀻𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀓𑀺𑀘𑁆𑀙𑀓𑀸𑀭𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀦𑀸𑀕𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀽𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 ¶ 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀓𑀓𑀼𑀲𑀦𑁆𑀥𑀁 𑀪𑀕𑀯𑀦𑁆𑀢𑀁 𑀅𑀭𑀜𑁆𑀜𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀛𑀸𑀦𑀲𑀼𑀔𑁂𑀦 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑀲𑁆𑀲 𑀤𑀸𑀴𑀺𑀫𑀨𑀮𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀓𑁂𑀢𑁂 𑀫𑀥𑀼𑀯𑀸𑀲𑁂𑀝𑁆𑀞𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀫𑀳𑀸𑀦𑀸𑀕𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑀺 𑀲𑀸𑀓𑁂𑀢𑁂 𑀅𑀜𑁆𑀚𑀦𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀢𑁄 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁫.𑁧-𑁭) 𑁋

‘‘𑀓𑀓𑀼𑀲𑀦𑁆𑀥𑁄 𑀫𑀳𑀸𑀯𑀻𑀭𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀲𑁄, 𑀅𑀕𑀫𑀸𑀲𑀺 𑀯𑀦𑀦𑁆𑀢𑀭𑀁.

‘‘𑀩𑀻𑀚𑀫𑀺𑀜𑁆𑀚𑀁 𑀕𑀳𑁂𑀢𑁆𑀯𑀸𑀦, 𑀮𑀢𑀸𑀬 𑀆𑀯𑀼𑀡𑀺𑀁 𑀅𑀳𑀁;

𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀛𑀸𑀬𑀢𑁂 𑀧𑀩𑁆𑀩𑀢𑀦𑁆𑀢𑀭𑁂.

‘‘𑀤𑀺𑀲𑁆𑀯𑀸𑀦𑀳𑀁 𑀤𑁂𑀯𑀤𑁂𑀯𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀻𑀭𑀲𑁆𑀲, 𑀩𑀻𑀚𑀫𑀺𑀜𑁆𑀚𑀫𑀤𑀸𑀲𑀳𑀁.

‘‘𑀇𑀫𑀲𑁆𑀫𑀺𑀁𑀬𑁂𑀯 ¶ 𑀓𑀧𑁆𑀧𑀫𑁆𑀳𑀺, 𑀬𑀁 𑀫𑀺𑀜𑁆𑀚𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀻𑀚𑀫𑀺𑀜𑁆𑀚𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑁄 𑀣𑁂𑀭𑁄 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀕𑀸𑀭𑀯𑀁 𑀅𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀑𑀯𑀸𑀤𑀤𑀸𑀦𑀯𑀲𑁂𑀦 𑁋

𑁩𑁮𑁭.

‘‘𑀬𑀲𑁆𑀲 ¶ 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀦𑀽𑀧𑀮𑀩𑁆𑀪𑀢𑀺;

𑀧𑀭𑀺𑀳𑀸𑀬𑀢𑀺 𑀲𑀤𑁆𑀥𑀫𑁆𑀫𑀸, 𑀫𑀘𑁆𑀙𑁄 𑀅𑀧𑁆𑀧𑁄𑀤𑀓𑁂 𑀬𑀣𑀸.

𑁩𑁮𑁮.

‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀦𑀽𑀧𑀮𑀩𑁆𑀪𑀢𑀺;

𑀦 𑀯𑀺𑀭𑀽𑀳𑀢𑀺 𑀲𑀤𑁆𑀥𑀫𑁆𑀫𑁂, 𑀔𑁂𑀢𑁆𑀢𑁂 𑀩𑀻𑀚𑀁𑀯 𑀧𑀽𑀢𑀺𑀓𑀁.

𑁩𑁮𑁯.

‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀦𑀽𑀧𑀮𑀩𑁆𑀪𑀢𑀺;

𑀆𑀭𑀓𑀸 𑀳𑁄𑀢𑀺 𑀦𑀺𑀩𑁆𑀩𑀸𑀦𑀸, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀲𑀦𑁂.

𑁩𑁯𑁦.

‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀉𑀧𑀮𑀩𑁆𑀪𑀢𑀺;

𑀦 𑀯𑀺𑀳𑀸𑀬𑀢𑀺 𑀲𑀤𑁆𑀥𑀫𑁆𑀫𑀸, 𑀫𑀘𑁆𑀙𑁄 𑀩𑀯𑁆𑀳𑁄𑀤𑀓𑁂 𑀬𑀣𑀸.

𑁩𑁯𑁧.

‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀉𑀧𑀮𑀩𑁆𑀪𑀢𑀺;

𑀲𑁄 𑀯𑀺𑀭𑀽𑀳𑀢𑀺 𑀲𑀤𑁆𑀥𑀫𑁆𑀫𑁂, 𑀔𑁂𑀢𑁆𑀢𑁂 𑀩𑀻𑀚𑀁𑀯 𑀪𑀤𑁆𑀤𑀓𑀁.

𑁩𑁯𑁨.

‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀉𑀧𑀮𑀩𑁆𑀪𑀢𑀺;

𑀲𑀦𑁆𑀢𑀺𑀓𑁂 𑀳𑁄𑀢𑀺 𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀲𑀦𑁂’’𑀢𑀺. 𑁋

𑀇𑀫𑀸 𑀙 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀽𑀢𑀺 𑀲𑀫𑀸𑀦𑀁 𑀩𑁆𑀭𑀳𑁆𑀫𑀁 𑀲𑀻𑀮𑀸𑀤𑀺𑀥𑀫𑁆𑀫𑀁 𑀘𑀭𑀦𑁆𑀢𑀻𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄, 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑀸 𑀲𑀳𑀥𑀫𑁆𑀫𑀺𑀓𑀸, 𑀢𑁂𑀲𑀼. 𑀕𑀸𑀭𑀯𑁄𑀢𑀺 𑀕𑀭𑀼𑀪𑀸𑀯𑁄 𑀲𑀻𑀮𑀸𑀤𑀺𑀕𑀼𑀡𑀦𑀺𑀫𑀺𑀢𑁆𑀢𑀁 𑀕𑀭𑀼𑀓𑀭𑀡𑀁. 𑀦𑀽𑀧𑀮𑀩𑁆𑀪𑀢𑀻𑀢𑀺 𑀦 𑀯𑀺𑀚𑁆𑀚𑀢𑀺 𑀦 𑀧𑀯𑀢𑁆𑀢𑀢𑀺, 𑀦 𑀉𑀧𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀸𑀧𑀦𑀢𑁄 𑀓𑀺𑀮𑁂𑀲𑀓𑁆𑀔𑀬𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀭𑀸𑀚𑀲𑁆𑀲𑀸𑀢𑀺 𑀲𑀢𑁆𑀣𑀼𑀦𑁄. 𑀲𑀢𑁆𑀣𑀸 𑀳𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀬𑀣𑀸𑀭𑀳𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀥𑀫𑁆𑀫𑁂𑀦 𑀭𑀜𑁆𑀚𑁂𑀢𑀺 𑀢𑁄𑀲𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀏𑀢𑁆𑀣 𑀘 ‘‘𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀲𑀦𑁂’’𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀥𑀫𑁆𑀫𑀭𑀸𑀚𑀲𑁆𑀲𑁂𑀯 𑀲𑀸𑀲𑀦𑁂 ¶ , 𑀦 𑀅𑀜𑁆𑀜𑀢𑁆𑀣. 𑀢𑀢𑁆𑀣 𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 ¶ 𑀕𑀸𑀭𑀯𑀭𑀳𑀺𑀢𑁄, 𑀲𑁄 𑀬𑀣𑀸 𑀦𑀺𑀩𑁆𑀩𑀸𑀦𑀸 𑀆𑀭𑀓𑀸 𑀳𑁄𑀢𑀺, 𑀢𑀣𑀸 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀲𑀦𑀢𑁄𑀧𑀺 𑀆𑀭𑀓𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀩𑀯𑁆𑀳𑁄𑀤𑀓𑁂𑀢𑀺 𑀩𑀳𑀼𑀉𑀤𑀓𑁂. 𑀲𑀦𑁆𑀢𑀺𑀓𑁂 𑀳𑁄𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀻𑀧𑁂 𑀏𑀯 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀸 𑀏𑀯 𑀘 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀳𑁂𑀲𑀼𑀁.

𑀫𑀳𑀸𑀦𑀸𑀕𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀼𑀮𑁆𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀓𑀼𑀮𑁆𑀮𑁄 𑀲𑀺𑀯𑀣𑀺𑀓𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀓𑀼𑀮𑁆𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 ¶ 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀼𑀮𑁆𑀮𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺. 𑀲𑁄 𑀘 𑀭𑀸𑀕𑀘𑀭𑀺𑀢𑀢𑁆𑀢𑀸 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑁄 𑀳𑁄𑀢𑀺. 𑀢𑁂𑀦𑀲𑁆𑀲 𑀅𑀪𑀺𑀓𑁆𑀔𑀡𑀁 𑀓𑀺𑀮𑁂𑀲𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸, ‘‘𑀓𑀼𑀮𑁆𑀮, 𑀢𑀬𑀸 𑀅𑀪𑀺𑀡𑁆𑀳𑀁 𑀲𑀼𑀲𑀸𑀦𑁂 𑀘𑀸𑀭𑀺𑀓𑀸 𑀘𑀭𑀺𑀢𑀩𑁆𑀩𑀸’’𑀢𑀺 𑀆𑀳. 𑀲𑁄 𑀲𑀼𑀲𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀺 𑀢𑀸𑀦𑀺 𑀢𑀸𑀦𑀺 𑀅𑀲𑀼𑀪𑀸𑀦𑀺 𑀤𑀺𑀲𑁆𑀯𑀸 𑀢𑀁 𑀫𑀼𑀳𑀼𑀢𑁆𑀢𑀁 𑀅𑀲𑀼𑀪𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀲𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀓𑀸𑀫𑀭𑀸𑀕𑁂𑀦 𑀅𑀪𑀺𑀪𑀼𑀬𑁆𑀬𑀢𑀺. 𑀧𑀼𑀦 𑀪𑀕𑀯𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀏𑀓𑀤𑀺𑀯𑀲𑀁 𑀢𑀲𑁆𑀲 𑀲𑀼𑀲𑀸𑀦𑀝𑁆𑀞𑀸𑀦𑀁 𑀕𑀢𑀓𑀸𑀮𑁂 𑀏𑀓𑀁 𑀢𑀭𑀼𑀡𑀺𑀢𑁆𑀣𑀺𑀭𑀽𑀧𑀁 𑀅𑀥𑀼𑀦𑀸 𑀫𑀢𑀁 𑀅𑀯𑀺𑀦𑀝𑁆𑀞𑀘𑁆𑀙𑀯𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀢𑀁 𑀤𑀺𑀝𑁆𑀞𑀫𑀢𑁆𑀢𑀲𑁆𑀲 𑀚𑀻𑀯𑀫𑀸𑀦𑀯𑀺𑀲𑀪𑀸𑀕𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬 𑀲𑀳𑀲𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀦𑀁 𑀲𑀢𑁆𑀣𑀸 𑀢𑀲𑁆𑀲 𑀧𑁂𑀓𑁆𑀔𑀦𑁆𑀢𑀲𑁆𑀲𑁂𑀯 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀫𑀸𑀦𑀸𑀲𑀼𑀘𑀺𑀁 𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀅𑀢𑀺𑀯𑀺𑀬 𑀩𑀻𑀪𑀘𑁆𑀙𑀁 𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑁆𑀓𑀽𑀮𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀧𑁂𑀓𑁆𑀔𑀦𑁆𑀢𑁄 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀲𑀢𑀺𑀁 𑀚𑀦𑁂𑀦𑁆𑀢𑁄 𑁋

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀓𑀼𑀮𑁆𑀮 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢’’𑀦𑁆𑀢𑀺. 𑁋

𑀆𑀳 ¶ . 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀲𑀫𑁆𑀫𑀤𑁂𑀯 𑀲𑀭𑀻𑀭𑀲𑀪𑀸𑀯𑀁 𑀉𑀧𑀥𑀸𑀭𑁂𑀦𑁆𑀢𑁄 𑀅𑀲𑀼𑀪𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀢𑁆𑀣 𑀧𑀞𑀫𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑁋

𑁩𑁯𑁩.

‘‘𑀓𑀼𑀮𑁆𑀮𑁄 ¶ 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸, 𑀅𑀤𑁆𑀤𑀲 𑀇𑀢𑁆𑀣𑀺𑀫𑀼𑀚𑁆𑀛𑀺𑀢𑀁;

𑀅𑀧𑀯𑀺𑀤𑁆𑀥𑀁 𑀲𑀼𑀲𑀸𑀦𑀲𑁆𑀫𑀺𑀁, 𑀔𑀚𑁆𑀚𑀦𑁆𑀢𑀺𑀁 𑀓𑀺𑀫𑀺𑀳𑀻 𑀨𑀼𑀝𑀁.

𑁩𑁯𑁪.

‘‘𑀆𑀢𑀼𑀭𑀁…𑀧𑁂… 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

𑁩𑁯𑁫.

‘‘𑀥𑀫𑁆𑀫𑀸𑀤𑀸𑀲𑀁 𑀕𑀳𑁂𑀢𑁆𑀯𑀸𑀦, 𑀜𑀸𑀡𑀤𑀲𑁆𑀲𑀦𑀧𑀢𑁆𑀢𑀺𑀬𑀸;

𑀧𑀘𑁆𑀘𑀯𑁂𑀓𑁆𑀔𑀺𑀁 𑀇𑀫𑀁 𑀓𑀸𑀬𑀁, 𑀢𑀼𑀘𑁆𑀙𑀁 𑀲𑀦𑁆𑀢𑀭𑀩𑀸𑀳𑀺𑀭𑀁.

𑁩𑁯𑁬.

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄.

𑁩𑁯𑁭.

‘‘𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸;

𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂.

𑁩𑁯𑁮.

‘‘𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦, 𑀦 𑀭𑀢𑀻 𑀳𑁄𑀢𑀺 𑀢𑀸𑀤𑀺𑀲𑀻;

𑀬𑀣𑀸 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺. 𑁋

𑀉𑀤𑀸𑀦𑀯𑀲𑁂𑀦 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀓𑀼𑀮𑁆𑀮𑁄𑀢𑀺 𑀅𑀢𑁆𑀢𑀸𑀦𑀫𑁂𑀯 𑀣𑁂𑀭𑁄 𑀧𑀭𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

𑀆𑀢𑀼𑀭𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀤𑀼𑀓𑁆𑀔𑁂𑀳𑀺 𑀅𑀪𑀺𑀡𑁆𑀳𑀁 𑀧𑀝𑀺𑀧𑀻𑀴𑀺𑀢𑀁. 𑀅𑀲𑀼𑀘𑀺𑀦𑁆𑀢𑀺 𑀲𑀼𑀘𑀺𑀭𑀳𑀺𑀢𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑁆𑀓𑀽𑀮𑀁. 𑀧𑀽𑀢𑀺𑀦𑁆𑀢𑀺 𑀤𑀼𑀕𑁆𑀕𑀦𑁆𑀥𑀁. 𑀧𑀲𑁆𑀲𑀸𑀢𑀺 𑀲𑀪𑀸𑀯𑀢𑁄 𑀑𑀮𑁄𑀓𑁂𑀳𑀺. 𑀓𑀼𑀮𑁆𑀮𑀸𑀢𑀺 𑀑𑀯𑀸𑀤𑀓𑀸𑀮𑁂 𑀪𑀕𑀯𑀸 𑀣𑁂𑀭𑀁 𑀆𑀮𑀧𑀢𑀺. 𑀉𑀤𑀸𑀦𑀓𑀸𑀮𑁂 𑀧𑀦 𑀣𑁂𑀭𑁄 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀯𑀤𑀢𑀺. 𑀲𑀫𑀼𑀲𑁆𑀲𑀬𑀦𑁆𑀢𑀺 𑀲𑀭𑀻𑀭𑀁. 𑀉𑀕𑁆𑀖𑀭𑀦𑁆𑀢𑀦𑁆𑀢𑀺 𑀉𑀤𑁆𑀥𑀁 𑀯𑀡𑀫𑀼𑀔𑁂𑀳𑀺 𑀅𑀲𑀼𑀘𑀺𑀁 𑀲𑀯𑀦𑁆𑀢𑀁. 𑀧𑀕𑁆𑀖𑀭𑀦𑁆𑀢𑀦𑁆𑀢𑀺 𑀅𑀥𑁄 𑀯𑀡𑀫𑀼𑀔𑁂𑀳𑀺 𑀲𑀫𑀦𑁆𑀢𑀢𑁄 𑀘 𑀅𑀲𑀼𑀘𑀺𑀁 𑀲𑀯𑀦𑁆𑀢𑀁. 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀦𑁆𑀢𑀺 𑀩𑀸𑀮𑁂𑀳𑀺 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁂𑀳𑀺 𑀤𑀺𑀝𑁆𑀞𑀺𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀳𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀦𑀦𑁆𑀤𑀺𑀢𑀁.

𑀥𑀫𑁆𑀫𑀸𑀤𑀸𑀲𑀦𑁆𑀢𑀺 𑀥𑀫𑁆𑀫𑀫𑀬𑀁 𑀆𑀤𑀸𑀲𑀁. 𑀬𑀣𑀸 𑀳𑀺 𑀲𑀢𑁆𑀢𑀸 𑀅𑀤𑀸𑀲𑁂𑀦 𑀅𑀢𑁆𑀢𑀦𑁄 𑀫𑀼𑀔𑁂 𑀓𑀸𑀬𑁂 𑀯𑀸 𑀕𑀼𑀡𑀤𑁄𑀲𑁂 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀬𑁂𑀦 𑀅𑀢𑁆𑀢𑀪𑀸𑀯𑁂 ¶ 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀧𑀲𑁆𑀲𑀢𑀺, 𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀇𑀥 ‘‘𑀥𑀫𑁆𑀫𑀸𑀤𑀸𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀘𑀓𑁆𑀔𑀼𑀲𑁆𑀲 𑀅𑀥𑀺𑀕𑀫𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀧𑀘𑁆𑀘𑀯𑁂𑀓𑁆𑀔𑀺𑀁 𑀇𑀫𑀁 𑀓𑀸𑀬𑀦𑁆𑀢𑀺 𑀇𑀫𑀁 𑀓𑀭𑀚𑀓𑀸𑀬𑀁 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀢𑀼𑀘𑁆𑀙𑀁 𑀅𑀢𑁆𑀢𑀧𑀭𑀲𑀦𑁆𑀢𑀸𑀦𑀸𑀦𑀁 𑀯𑀺𑀪𑀸𑀕𑀢𑁄 𑀲𑀦𑁆𑀢𑀭𑀩𑀸𑀳𑀺𑀭𑀁 𑀜𑀸𑀡𑀘𑀓𑁆𑀔𑀼𑀦𑀸 𑀧𑀢𑀺𑀅𑀯𑁂𑀓𑁆𑀔𑀺𑀁 𑀧𑀲𑁆𑀲𑀺𑀁.

𑀬𑀣𑀸 𑀧𑀦 𑀧𑀘𑁆𑀘𑀯𑁂𑀓𑁆𑀔𑀺𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀇𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀦𑁆𑀢𑀺 𑀬𑀣𑀸 𑀇𑀤𑀁 𑀫𑀬𑁆𑀳𑀁 𑀲𑀭𑀻𑀭𑀲𑀗𑁆𑀔𑀸𑀢𑀁 𑀅𑀲𑀼𑀪𑀁 𑀆𑀬𑀼𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀧𑀕𑀫𑀸 𑀦𑀸𑀦𑀸𑀯𑀺𑀥𑀁 𑀫𑀸𑀬𑁄𑀧𑀫𑀁 𑀓𑀺𑀭𑀺𑀬𑀁 𑀤𑀲𑁆𑀲𑁂𑀢𑀺, 𑀢𑀣𑀸𑀯 𑀏𑀢𑀁 𑀫𑀢𑀲𑀭𑀻𑀭𑀁 𑀧𑀼𑀩𑁆𑀩𑁂 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀧𑀕𑀫𑀸 𑀅𑀳𑁄𑀲𑀺. 𑀬𑀣𑀸 𑀏𑀢𑀁 𑀏𑀢𑀭𑀳𑀺 𑀫𑀢𑀲𑀭𑀻𑀭𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀧𑀕𑀫𑀸 𑀦 𑀓𑀺𑀜𑁆𑀘𑀺 𑀓𑀺𑀭𑀺𑀬𑀁 𑀤𑀲𑁆𑀲𑁂𑀢𑀺, 𑀢𑀣𑀸 𑀇𑀤𑀁 𑀫𑀫 𑀲𑀭𑀻𑀭𑀫𑁆𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀧𑀕𑀫𑀸 𑀦𑀲𑁆𑀲𑀢𑁂𑀯𑀸𑀢𑀺. 𑀬𑀣𑀸 𑀘 𑀇𑀤𑀁 𑀫𑀫 𑀲𑀭𑀻𑀭𑀁 𑀏𑀢𑀭𑀳𑀺 𑀲𑀼𑀲𑀸𑀦𑁂 𑀦 𑀫𑀢𑀁 𑀦 𑀲𑀬𑀺𑀢𑀁, 𑀦 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀁 𑀉𑀧𑀕𑀢𑀁, 𑀢𑀣𑀸 𑀏𑀢𑀁 𑀏𑀢𑀭𑀳𑀺 𑀫𑀢𑀲𑀭𑀻𑀭𑀫𑁆𑀧𑀺 𑀧𑀼𑀩𑁆𑀩𑁂 ¶ 𑀅𑀳𑁄𑀲𑀺. 𑀬𑀣𑀸 𑀧𑀦𑁂𑀢𑀁 𑀏𑀢𑀭𑀳𑀺 𑀫𑀢𑀲𑀭𑀻𑀭𑀁 𑀲𑀼𑀲𑀸𑀦𑁂 𑀲𑀬𑀺𑀢𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀁 𑀉𑀧𑀕𑀢𑀁, 𑀢𑀣𑀸 𑀇𑀤𑀁 𑀫𑀫 𑀲𑀭𑀻𑀭𑀫𑁆𑀧𑀺 𑀪𑀯𑀺𑀲𑁆𑀲𑀢𑀺. 𑀅𑀣 𑀯𑀸 𑀬𑀣𑀸 𑀇𑀤𑀁 𑀫𑀫 𑀲𑀭𑀻𑀭𑀁 𑀅𑀲𑀼𑀘𑀺 𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑁆𑀓𑀽𑀮𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀢𑀣𑀸 𑀏𑀢𑀁 𑀫𑀢𑀲𑀭𑀻𑀭𑀫𑁆𑀧𑀺. 𑀬𑀣𑀸 𑀯𑀸 𑀏𑀢𑀁 𑀫𑀢𑀲𑀭𑀻𑀭𑀁 𑀅𑀲𑀼𑀘𑀺𑀆𑀤𑀺𑀲𑀪𑀸𑀯𑀜𑁆𑀘𑁂𑀯 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀜𑁆𑀘, 𑀢𑀣𑀸 𑀇𑀤𑀁 𑀫𑀫 𑀲𑀭𑀻𑀭𑀫𑁆𑀧𑀺. 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀦𑁆𑀢𑀺 𑀬𑀣𑀸 𑀦𑀸𑀪𑀺𑀢𑁄 𑀅𑀥𑁄 𑀳𑁂𑀝𑁆𑀞𑀸 𑀅𑀬𑀁 𑀓𑀸𑀬𑁄 𑀅𑀲𑀼𑀘𑀺 𑀤𑀼𑀕𑁆𑀕𑀦𑁆𑀥𑁄 𑀚𑁂𑀕𑀼𑀘𑁆𑀙𑁄 𑀧𑀝𑀺𑀓𑁆𑀓𑀽𑀮𑁄 𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀅𑀦𑀢𑁆𑀢𑀸 𑀘, 𑀢𑀣𑀸 𑀉𑀤𑁆𑀥𑀁 𑀦𑀸𑀪𑀺𑀢𑁄 𑀉𑀧𑀭𑀺 𑀅𑀲𑀼𑀘𑀺𑀆𑀤𑀺𑀲𑀪𑀸𑀯𑁄 𑀘. 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄𑀢𑀺 𑀬𑀣𑀸 𑀘 𑀦𑀸𑀪𑀺𑀢𑁄, 𑀉𑀤𑁆𑀥𑀁 𑀅𑀲𑀼𑀘𑀺𑀆𑀤𑀺𑀲𑀪𑀸𑀯𑁄, 𑀢𑀣𑀸 𑀅𑀥𑁄 𑀦𑀸𑀪𑀺𑀢𑁄 𑀳𑁂𑀝𑁆𑀞𑀸𑀧𑀺.

𑀬𑀣𑀸 ¶ 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸 𑀅𑀬𑀁 𑀓𑀸𑀬𑁄 𑀤𑀺𑀯𑀸 ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁯𑁯) 𑀅𑀲𑀼𑀘𑀺 𑀧𑀕𑁆𑀖𑀭𑀢𑀺, 𑀢𑀣𑀸 𑀭𑀢𑁆𑀢𑀺𑀫𑁆𑀧𑀺. 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸𑀢𑀺 𑀬𑀣𑀸 𑀘 𑀭𑀢𑁆𑀢𑀺𑀁 𑀅𑀬𑀁 𑀓𑀸𑀬𑁄 𑀅𑀲𑀼𑀘𑀺 𑀧𑀕𑁆𑀖𑀭𑀢𑀺, 𑀢𑀣𑀸 𑀤𑀺𑀯𑀸𑀧𑀺, 𑀦𑀬𑀺𑀫𑀲𑁆𑀲 𑀓𑀸𑀮𑀯𑀺𑀪𑀸𑀕𑁂𑀦 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀅𑀬𑀁 𑀓𑀸𑀬𑁄 𑀧𑀼𑀭𑁂 𑀧𑀼𑀩𑁆𑀩𑁂 𑀢𑀭𑀼𑀡𑀓𑀸𑀮𑁂 𑀅𑀲𑀼𑀘𑀺 𑀤𑀼𑀕𑁆𑀕𑀦𑁆𑀥𑁄 𑀚𑁂𑀕𑀼𑀘𑁆𑀙𑁄 𑀧𑀝𑀺𑀓𑁆𑀓𑀽𑀮𑁄, 𑀢𑀣𑀸 𑀘 𑀧𑀘𑁆𑀙𑀸 𑀚𑀺𑀡𑁆𑀡𑀓𑀸𑀮𑁂. 𑀬𑀣𑀸 𑀘 𑀧𑀘𑁆𑀙𑀸 𑀚𑀺𑀡𑁆𑀡𑀓𑀸𑀮𑁂 𑀅𑀲𑀼𑀘𑀺𑀆𑀤𑀺𑀲𑀪𑀸𑀯𑁄, 𑀢𑀣𑀸 𑀧𑀼𑀭𑁂 𑀢𑀭𑀼𑀡𑀓𑀸𑀮𑁂𑀧𑀺 ¶ . 𑀬𑀣𑀸 𑀯𑀸 𑀧𑀼𑀭𑁂 𑀅𑀢𑀻𑀢𑀓𑀸𑀮𑁂 𑀲𑀯𑀺𑀜𑁆𑀜𑀸𑀡𑀓𑀸𑀮𑁂 𑀅𑀲𑀼𑀘𑀺𑀆𑀤𑀺𑀲𑀪𑀸𑀯𑁄 𑀘 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑁄 𑀘, 𑀢𑀣𑀸 𑀧𑀘𑁆𑀙𑀸 𑀅𑀦𑀸𑀕𑀢𑀓𑀸𑀮𑁂 𑀅𑀯𑀺𑀜𑁆𑀜𑀸𑀡𑀓𑀸𑀮𑁂𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦𑀸𑀢𑀺 ‘‘𑀆𑀢𑀢𑀁 𑀯𑀺𑀢𑀢𑀁 𑀆𑀢𑀢𑀯𑀺𑀢𑀢𑀁 𑀖𑀦𑀁 𑀲𑀼𑀲𑀻𑀭’’𑀦𑁆𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀺𑀓𑁂𑀦 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀢𑀼𑀭𑀺𑀬𑁂𑀦 𑀧𑀭𑀺𑀘𑀭𑀺𑀬𑀫𑀸𑀦𑀲𑁆𑀲 𑀓𑀸𑀫𑀲𑀼𑀔𑀲𑀫𑀗𑁆𑀕𑀺𑀦𑁄 𑀇𑀲𑁆𑀲𑀭𑀚𑀦𑀲𑁆𑀲 𑀢𑀸𑀤𑀺𑀲𑀻 𑀢𑀣𑀸𑀭𑀽𑀧𑀸 𑀭𑀢𑀺 𑀲𑀼𑀔𑀲𑁆𑀲𑀸𑀤𑁄 𑀦 𑀳𑁄𑀢𑀺. 𑀬𑀣𑀸 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀪𑀸𑀯𑁂𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀬𑀸𑀤𑀺𑀲𑀸 𑀥𑀫𑁆𑀫𑀭𑀢𑀺, 𑀢𑀲𑁆𑀲𑀸 𑀓𑀮𑀫𑁆𑀧𑀺 𑀓𑀸𑀫𑀭𑀢𑀺 𑀦 𑀉𑀧𑁂𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀇𑀫𑀸 𑀏𑀯 𑀘 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀕𑀸𑀣𑀸𑀧𑀺 𑀅𑀳𑁂𑀲𑀼𑀁.

𑀓𑀼𑀮𑁆𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀫𑀦𑀼𑀚𑀲𑁆𑀲𑀸𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀸𑀲𑀦𑀺𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀫𑀸𑀢𑀸 𑀫𑀸𑀮𑀼𑀓𑁆𑀬𑀸 𑀦𑀸𑀫, 𑀢𑀲𑁆𑀲𑀸 𑀯𑀲𑁂𑀦 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀲𑁄 𑀜𑀸𑀢𑀻𑀲𑀼 𑀅𑀦𑀼𑀓𑀫𑁆𑀧𑀸𑀬 𑀜𑀸𑀢𑀺𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀁 𑀜𑀸𑀢𑀓𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀥𑀦𑁂𑀦 𑀧𑀮𑁄𑀪𑁂𑀢𑀼𑀓𑀸𑀫𑀸 𑀫𑀳𑀦𑁆𑀢𑀁 𑀥𑀦𑀭𑀸𑀲𑀺𑀁 ¶ 𑀧𑀼𑀭𑀢𑁄 𑀉𑀧𑀝𑁆𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀥𑀦𑀁 𑀢𑀯 𑀲𑀦𑁆𑀢𑀓𑀁, 𑀯𑀺𑀩𑁆𑀪𑀫𑀺𑀢𑁆𑀯𑀸 𑀇𑀫𑀺𑀦𑀸 𑀥𑀦𑁂𑀦 𑀧𑀼𑀢𑁆𑀢𑀤𑀸𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀳𑀻’’𑀢𑀺 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀆𑀓𑀸𑀲𑁂 𑀞𑀢𑁆𑀯𑀸 𑁋

𑁩𑁯𑁯.

‘‘𑀫𑀦𑀼𑀚𑀲𑁆𑀲 𑀧𑀫𑀢𑁆𑀢𑀘𑀸𑀭𑀺𑀦𑁄, 𑀢𑀡𑁆𑀳𑀸 𑀯𑀟𑁆𑀠𑀢𑀺 𑀫𑀸𑀮𑀼𑀯𑀸 𑀯𑀺𑀬;

𑀲𑁄 𑀧𑁆𑀮𑀯𑀢𑀻 𑀳𑀼𑀭𑀸 𑀳𑀼𑀭𑀁, 𑀨𑀮𑀫𑀺𑀘𑁆𑀙𑀁𑀯 𑀯𑀦𑀲𑁆𑀫𑀺 𑀯𑀸𑀦𑀭𑁄.

𑁪𑁦𑁦.

‘‘𑀬𑀁 𑀏𑀲𑀸 𑀲𑀳𑀢𑁂 𑀚𑀫𑁆𑀫𑀻, 𑀢𑀡𑁆𑀳𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸;

𑀲𑁄𑀓𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀅𑀪𑀺𑀯𑀝𑁆𑀞𑀁𑀯 𑀩𑀻𑀭𑀡𑀁.

𑁪𑁦𑁧.

‘‘𑀬𑁄 𑀘𑁂𑀢𑀁 𑀲𑀳𑀢𑁂 𑀚𑀫𑁆𑀫𑀺𑀁, 𑀢𑀡𑁆𑀳𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀲𑁄𑀓𑀸 𑀢𑀫𑁆𑀳𑀸 𑀧𑀧𑀢𑀦𑁆𑀢𑀺, 𑀉𑀤𑀩𑀺𑀦𑁆𑀤𑀽𑀯 𑀧𑁄𑀓𑁆𑀔𑀭𑀸.

𑁪𑁦𑁨.

‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀢𑀡𑁆𑀳𑀸𑀬 𑀫𑀽𑀮𑀁 𑀔𑀡𑀣, 𑀉𑀲𑀻𑀭𑀢𑁆𑀣𑁄𑀯 𑀩𑀻𑀭𑀡𑀁;

𑀫𑀸 𑀯𑁄 𑀦𑀴𑀁𑀯 𑀲𑁄𑀢𑁄𑀯, 𑀫𑀸𑀭𑁄 𑀪𑀜𑁆𑀚𑀺 𑀧𑀼𑀦𑀧𑁆𑀧𑀼𑀦𑀁.

𑁪𑁦𑁩.

‘‘𑀓𑀭𑁄𑀣 𑀩𑀼𑀤𑁆𑀥𑀯𑀘𑀦𑀁, 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸.

𑁪𑁦𑁪.

‘‘𑀧𑀫𑀸𑀤𑁄 𑀭𑀚𑁄 𑀧𑀫𑀸𑀤𑁄, 𑀧𑀫𑀸𑀤𑀸𑀦𑀼𑀧𑀢𑀺𑀢𑁄 𑀭𑀚𑁄;

𑀅𑀧𑁆𑀧𑀫𑀸𑀤𑁂𑀦 𑀯𑀺𑀚𑁆𑀚𑀸𑀬, 𑀅𑀩𑁆𑀩𑀳𑁂 𑀲𑀮𑁆𑀮𑀫𑀢𑁆𑀢𑀦𑁄’’𑀢𑀺. 𑁋

𑀇𑀫𑀸𑀳𑀺 𑀙𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀢𑀢𑁆𑀣 𑀫𑀦𑀼𑀚𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀧𑀫𑀢𑁆𑀢𑀘𑀸𑀭𑀺𑀦𑁄𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀧𑀫𑀸𑀤𑁂𑀦 𑀧𑀫𑀢𑁆𑀢𑀘𑀸𑀭𑀺𑀲𑁆𑀲, 𑀦𑁂𑀯 𑀛𑀸𑀦𑀁, 𑀦 𑀯𑀺𑀧𑀲𑁆𑀲𑀦𑀸 ¶ , 𑀦 𑀫𑀕𑁆𑀕𑀨𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀬𑀣𑀸 𑀧𑀦 𑀭𑀼𑀓𑁆𑀔𑀁 𑀲𑀁𑀲𑀺𑀩𑁆𑀩𑀦𑁆𑀢𑀻 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻 𑀢𑀲𑁆𑀲 𑀯𑀺𑀦𑀸𑀲𑀸𑀬 𑀫𑀸𑀮𑀼𑀯𑀸 𑀮𑀢𑀸 𑀯𑀟𑁆𑀠𑀢𑀺, 𑀏𑀯𑀫𑀲𑁆𑀲 𑀙 𑀤𑁆𑀯𑀸𑀭𑀸𑀦𑀺 𑀦𑀺𑀲𑁆𑀲𑀸𑀬 𑀭𑀽𑀧𑀸𑀤𑀻𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑀡𑁆𑀳𑀸 𑀯𑀟𑁆𑀠𑀢𑀺. 𑀯𑀟𑁆𑀠𑀫𑀸𑀦𑀸𑀯 𑀬𑀣𑀸 𑀫𑀸𑀮𑀼𑀯𑀸 𑀮𑀢𑀸 𑀅𑀢𑁆𑀢𑀦𑁄 𑀅𑀧𑀲𑁆𑀲𑀬𑀪𑀽𑀢𑀁 𑀭𑀼𑀓𑁆𑀔𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀸𑀢𑁂𑀢𑀺, 𑀏𑀯𑀁 𑀢𑀡𑁆𑀳𑀸𑀯𑀲𑀺𑀓𑀁 𑀧𑀼𑀕𑁆𑀕𑀮𑀁 𑀅𑀧𑀸𑀬𑁂 𑀦𑀺𑀧𑀸𑀢𑁂𑀢𑀺. 𑀲𑁄 𑀧𑁆𑀮𑀯𑀢𑀻𑀢𑀺 𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀧𑀼𑀕𑁆𑀕𑀮𑁄 𑀅𑀧𑀭𑀸𑀧𑀭𑀁 𑀪𑀯𑀸𑀪𑀯𑁂 𑀉𑀧𑁆𑀮𑀯𑀢𑀺 𑀥𑀸𑀯𑀢𑀺. 𑀬𑀣𑀸 𑀓𑀺𑀁? 𑀨𑀮𑀫𑀺𑀘𑁆𑀙𑀁𑀯 𑀯𑀦𑀲𑁆𑀫𑀺 𑀯𑀸𑀦𑀭𑁄 𑀬𑀣𑀸 𑀭𑀼𑀓𑁆𑀔𑀨𑀮𑀁 𑀇𑀘𑁆𑀙𑀦𑁆𑀢𑁄 𑀯𑀸𑀦𑀭𑁄 𑀯𑀦𑀲𑁆𑀫𑀺𑀁 𑀥𑀸𑀯𑀦𑁆𑀢𑁄 𑀭𑀼𑀓𑁆𑀔𑀲𑁆𑀲 𑀏𑀓𑀁 𑀲𑀸𑀔𑀁 𑀕𑀡𑁆𑀳𑀸𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀦𑁆𑀢𑀺 ‘‘𑀲𑀸𑀔𑀁 ¶ 𑀅𑀮𑀪𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 ¶ 𑀦𑀸𑀧𑀚𑁆𑀚𑀢𑀺; 𑀏𑀯𑀫𑁂𑀯 𑀢𑀡𑁆𑀳𑀸𑀯𑀲𑀺𑀓𑁄 𑀧𑀼𑀕𑁆𑀕𑀮𑁄 𑀳𑀼𑀭𑀸 𑀳𑀼𑀭𑀁 𑀥𑀸𑀯𑀦𑁆𑀢𑁄 ‘‘𑀆𑀭𑀫𑁆𑀫𑀡𑀁 𑀅𑀮𑀪𑀺𑀢𑁆𑀯𑀸 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀺𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀦𑀸𑀧𑀚𑁆𑀚𑀢𑀺.

𑀬𑀦𑁆𑀢𑀺 𑀬𑀁 𑀧𑀼𑀕𑁆𑀕𑀮𑀁. 𑀏𑀲𑀸 𑀮𑀸𑀫𑀓𑀪𑀸𑀯𑁂𑀦 𑀚𑀫𑁆𑀫𑀻 𑀯𑀺𑀲𑀸𑀳𑀸𑀭𑀢𑀸𑀬 𑀯𑀺𑀲𑀫𑀽𑀮𑀢𑀸𑀬 𑀯𑀺𑀲𑀨𑀮𑀢𑀸𑀬 𑀯𑀺𑀲𑀧𑀭𑀺𑀪𑁄𑀕𑀢𑀸𑀬 𑀭𑀽𑀧𑀸𑀤𑀻𑀲𑀼 𑀯𑀺𑀲𑀢𑁆𑀢𑀢𑀸𑀬 𑀆𑀲𑀢𑁆𑀢𑀢𑀸𑀬 𑀘 𑀯𑀺𑀲𑀢𑁆𑀢𑀺𑀓𑀸𑀢𑀺 𑀲𑀗𑁆𑀔𑀁 𑀕𑀢𑀸 𑀙𑀤𑁆𑀯𑀸𑀭𑀺𑀓𑀸 𑀢𑀡𑁆𑀳𑀸 𑀲𑀳𑀢𑁂 𑀅𑀪𑀺𑀪𑀯𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀬𑀣𑀸 𑀦𑀸𑀫 𑀯𑀦𑁂 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀅𑀪𑀺𑀯𑀝𑁆𑀞𑀁 𑀩𑀻𑀭𑀡𑀁 𑀩𑀻𑀭𑀡𑀢𑀺𑀡𑀁 𑀯𑀟𑁆𑀠𑀢𑀺, 𑀏𑀯𑀁 𑀯𑀝𑁆𑀝𑀫𑀽𑀮𑀓𑀸 𑀲𑁄𑀓𑀸 𑀅𑀪𑀺𑀯𑀟𑁆𑀠𑀦𑁆𑀢𑀺 𑀯𑀼𑀤𑁆𑀥𑀺𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀬𑁄 𑀘𑁂𑀢𑀁…𑀧𑁂… 𑀤𑀼𑀭𑀘𑁆𑀘𑀬𑀦𑁆𑀢𑀺 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀧𑀚𑀳𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀤𑀼𑀭𑀘𑁆𑀘𑀬𑀁 𑀢𑀡𑁆𑀳𑀁 𑀲𑀳𑀢𑁂 𑀅𑀪𑀺𑀪𑀯𑀢𑀺, 𑀢𑀫𑁆𑀳𑀸 𑀧𑀼𑀕𑁆𑀕𑀮𑀸 𑀯𑀝𑁆𑀝𑀫𑀽𑀮𑀓𑀸 𑀲𑁄𑀓𑀸 𑀧𑀧𑀢𑀦𑁆𑀢𑀺. 𑀬𑀣𑀸 𑀦𑀸𑀫 𑀧𑁄𑀓𑁆𑀔𑀭𑁂 𑀧𑀤𑀼𑀫𑀧𑀢𑁆𑀢𑁂 𑀧𑀢𑀺𑀢𑀁 𑀉𑀤𑀩𑀺𑀦𑁆𑀤𑀼 𑀦 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀁 𑀦 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀁 𑀯𑁄 𑀯𑀤𑀸𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀢𑀼𑀫𑁆𑀳𑁂 𑀯𑀤𑀸𑀫𑀺. 𑀪𑀤𑁆𑀤𑀁 𑀯𑁄𑀢𑀺 𑀪𑀤𑁆𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼, 𑀫𑀸 𑀢𑀡𑁆𑀳𑀁 𑀅𑀦𑀼𑀯𑀢𑁆𑀢𑀧𑀼𑀕𑁆𑀕𑀮𑁄 𑀯𑀺𑀬 𑀯𑀺𑀪𑀯𑀁 𑀅𑀦𑀢𑁆𑀣𑀁 𑀧𑀸𑀧𑀼𑀡𑀸𑀣𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀬𑀢𑁆𑀢𑀓𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀢𑀢𑁆𑀢𑀓𑀸. 𑀓𑀺𑀁 𑀯𑀤𑀲𑀻𑀢𑀺 𑀘𑁂? 𑀢𑀡𑁆𑀳𑀸𑀬 𑀫𑀽𑀮𑀁 𑀔𑀡𑀣 𑀇𑀫𑀺𑀲𑁆𑀲𑀸 𑀙𑀤𑁆𑀯𑀸𑀭𑀺𑀓𑀢𑀡𑁆𑀳𑀸𑀬 𑀫𑀽𑀮𑀁 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀕𑁆𑀕𑀳𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀓𑀼𑀤𑀸𑀮𑁂𑀦 𑀔𑀡𑀣 𑀲𑀫𑀼𑀘𑁆𑀙𑀺𑀦𑁆𑀤𑀣. 𑀓𑀺𑀁 𑀯𑀺𑀬𑀸𑀢𑀺? 𑀉𑀲𑀻𑀭𑀢𑁆𑀣𑁄𑀯 𑀩𑀻𑀭𑀡𑀁 𑀬𑀣𑀸 𑀉𑀲𑀻𑀭𑁂𑀦 𑀅𑀢𑁆𑀣𑀺𑀓𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑁂𑀦 𑀓𑀼𑀤𑀸𑀮𑁂𑀦 𑀩𑀻𑀭𑀡𑀸𑀧𑀭𑀦𑀸𑀫𑀁 𑀉𑀲𑀻𑀭𑀁 𑀦𑀸𑀫 𑀢𑀺𑀡𑀁 𑀔𑀡𑀢𑀺, 𑀏𑀯𑀫𑀲𑁆𑀲 𑀫𑀽𑀮𑀁 𑀔𑀡𑀣𑀸𑀢𑀺 𑀅𑀢𑁆𑀣𑁄. 𑀫𑀸 𑀯𑁄 𑀦𑀴𑀁𑀯 𑀲𑁄𑀢𑁄𑀯, 𑀫𑀸𑀭𑁄 𑀪𑀜𑁆𑀚𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀢𑀼𑀫𑁆𑀳𑁂 𑀦𑀤𑀻𑀢𑀻𑀭𑁂 𑀚𑀸𑀢𑀁 𑀦𑀴𑀁 𑀫𑀳𑀸𑀯𑁂𑀕𑁂𑀦 𑀆𑀕𑀢𑁄 𑀦𑀤𑀻𑀲𑁄𑀢𑁄 𑀯𑀺𑀬 𑀓𑀺𑀮𑁂𑀲𑀫𑀸𑀭𑁄 𑀫𑀘𑁆𑀘𑀼𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 𑀘 𑀧𑀼𑀦𑀧𑁆𑀧𑀼𑀦𑀁 𑀫𑀸 𑀪𑀜𑁆𑀚𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸 𑀓𑀭𑁄𑀣 𑀩𑀼𑀤𑁆𑀥𑀯𑀘𑀦𑀁 ‘‘𑀛𑀸𑀬𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁧𑁫) 𑀯𑀼𑀢𑁆𑀢𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀓𑀭𑁄𑀣, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑁆𑀧𑀸𑀤𑁂𑀣. 𑀔𑀡𑁄 𑀯𑁄 𑀫𑀸 ¶ 𑀉𑀧𑀘𑁆𑀘𑀕𑀸𑀢𑀺 𑀬𑁄 𑀳𑀺 𑀩𑀼𑀤𑁆𑀥𑀯𑀘𑀦𑀁 𑀦 𑀓𑀭𑁄𑀢𑀺, 𑀢𑀁 ¶ 𑀧𑀼𑀕𑁆𑀕𑀮𑀁 𑀅𑀬𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁂 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁄 𑀲𑀫𑁆𑀫𑀤𑀺𑀝𑁆𑀞𑀺𑀬𑀸 𑀧𑀝𑀺𑀮𑀤𑁆𑀥𑀓𑁆𑀔𑀡𑁄 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀯𑁂𑀓𑀮𑁆𑀮𑀓𑁆𑀔𑀡𑁄𑀢𑀺 𑀲𑀩𑁆𑀩𑁄𑀧𑀺 𑀔𑀡𑁄 𑀅𑀢𑀺𑀓𑁆𑀓𑀫𑀢𑀺, 𑀲𑁄 𑀔𑀡𑁄 𑀫𑀸 𑀢𑀼𑀫𑁆𑀳𑁂 𑀅𑀢𑀺𑀓𑁆𑀓𑀫𑀢𑀼. 𑀔𑀡𑀸𑀢𑀻𑀢𑀸𑀢𑀺 𑀬𑁂 𑀳𑀺 𑀢𑀁 𑀔𑀡𑀁 𑀅𑀢𑀻𑀢𑀸, 𑀬𑁂 𑀯𑀸 𑀧𑀼𑀕𑁆𑀕𑀮𑁂 𑀲𑁄 𑀔𑀡𑁄 𑀅𑀢𑀻𑀢𑁄, 𑀢𑁂 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀘𑀺𑀭𑀓𑀸𑀮𑀁 𑀲𑁄𑀘𑀦𑁆𑀢𑀺.

𑀧𑀫𑀸𑀤𑁄 𑀭𑀚𑁄𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁄 𑀧𑀫𑀸𑀤𑁄, 𑀲𑀁𑀓𑀺𑀮𑁂𑀲𑀲𑀪𑀸𑀯𑀢𑁆𑀢𑀸 𑀭𑀸𑀕𑀭𑀚𑀸𑀤𑀺𑀫𑀺𑀲𑁆𑀲𑀢𑀸𑀬 ¶ 𑀘 𑀭𑀚𑁄. 𑀧𑀫𑀸𑀤𑀸𑀦𑀼𑀧𑀢𑀺𑀢𑁄 𑀭𑀚𑁄𑀢𑀺 𑀬𑁄 𑀳𑀺 𑀓𑁄𑀘𑀺 𑀭𑀚𑁄 𑀦𑀸𑀫 𑀭𑀸𑀕𑀸𑀤𑀺𑀓𑁄, 𑀲𑁄 𑀲𑀩𑁆𑀩𑁄 𑀧𑀫𑀸𑀤𑀸𑀦𑀼𑀧𑀢𑀺𑀢𑁄 𑀧𑀫𑀸𑀤𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀅𑀧𑁆𑀧𑀫𑀸𑀤𑁂𑀦𑀸𑀢𑀺 𑀅𑀧𑁆𑀧𑀫𑀚𑁆𑀚𑀦𑁂𑀦 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀸. 𑀯𑀺𑀚𑁆𑀚𑀸𑀬𑀸𑀢𑀺 𑀅𑀕𑁆𑀕𑀫𑀕𑁆𑀕𑀯𑀺𑀚𑁆𑀚𑀸𑀬. 𑀅𑀩𑁆𑀩𑀳𑁂 𑀲𑀮𑁆𑀮𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀳𑀤𑀬𑀦𑀺𑀲𑁆𑀲𑀺𑀢𑀁 𑀭𑀸𑀕𑀸𑀤𑀺𑀲𑀮𑁆𑀮𑀁 𑀉𑀤𑁆𑀥𑀭𑁂𑀬𑁆𑀬 𑀲𑀫𑀽𑀳𑀦𑁂𑀬𑁆𑀬𑀸𑀢𑀺.

𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀧𑁆𑀧𑀤𑀸𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀡𑁆𑀡𑀯𑀻𑀲𑀢𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀧𑁆𑀧𑀤𑀸𑀲𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀲𑀧𑁆𑀧𑀤𑀸𑀲𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀜𑀸𑀢𑀺𑀲𑀫𑀸𑀕𑀫𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀺𑀮𑁂𑀲𑀸𑀪𑀺𑀪𑀯𑁂𑀦 𑀘𑁂𑀢𑁄𑀲𑀫𑀸𑀥𑀺𑀁 𑀅𑀮𑀪𑀦𑁆𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀧𑀘𑁆𑀙𑀸 𑀲𑀢𑁆𑀣𑀁 𑀆𑀳𑀭𑀦𑁆𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁦𑁫.

‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀬𑀢𑁄 𑀧𑀩𑁆𑀩𑀚𑀺𑀢𑁄 𑀅𑀳𑀁;

𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺, 𑀘𑁂𑀢𑁄𑀲𑀦𑁆𑀢𑀺𑀫𑀦𑀚𑁆𑀛𑀕𑀁.

𑁪𑁦𑁬.

‘‘𑀅𑀮𑀤𑁆𑀥𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀁, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑁄;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁.

𑁪𑁦𑁭.

‘‘𑀲𑀢𑁆𑀣𑀁 ¶ 𑀯𑀸 𑀆𑀳𑀭𑀺𑀲𑁆𑀲𑀸𑀫𑀺, 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦 𑀫𑁂;

𑀓𑀣𑀜𑁆𑀳𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀁, 𑀓𑀸𑀮𑀁 𑀓𑀼𑀩𑁆𑀩𑁂𑀣 𑀫𑀸𑀤𑀺𑀲𑁄.

𑁪𑁦𑁮.

‘‘𑀢𑀤𑀸𑀳𑀁 ¶ 𑀔𑀼𑀭𑀫𑀸𑀤𑀸𑀬, 𑀫𑀜𑁆𑀘𑀓𑀫𑁆𑀳𑀺 𑀉𑀧𑀸𑀯𑀺𑀲𑀺𑀁;

𑀧𑀭𑀺𑀦𑀻𑀢𑁄 𑀔𑀼𑀭𑁄 𑀆𑀲𑀺, 𑀥𑀫𑀦𑀺𑀁 𑀙𑁂𑀢𑁆𑀢𑀼𑀫𑀢𑁆𑀢𑀦𑁄.

𑁪𑁦𑁯.

‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁪𑁧𑁦.

‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀧𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀬𑀢𑁄 𑀧𑀩𑁆𑀩𑀚𑀺𑀢𑁄 𑀅𑀳𑀦𑁆𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀧𑀩𑁆𑀩𑀚𑀺𑀢𑁄 𑀢𑀸𑀦𑀺𑀫𑀸𑀦𑀺 𑀧𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀦𑀺. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺, 𑀘𑁂𑀢𑁄𑀲𑀦𑁆𑀢𑀺𑀫𑀦𑀚𑁆𑀛𑀕𑀦𑁆𑀢𑀺 𑀲𑁄𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀼𑀮𑀺𑀨𑁄𑀝𑀦𑀫𑀢𑁆𑀢𑀫𑁆𑀧𑀺 𑀔𑀡𑀁 𑀘𑁂𑀢𑁄𑀲𑀦𑁆𑀢𑀺𑀁 𑀘𑁂𑀢𑀲𑁄 𑀲𑀫𑀸𑀥𑀸𑀦𑀁 𑀦 𑀮𑀪𑀺𑀁.

𑀏𑀯𑀁 𑀧𑀦 𑀅𑀮𑀤𑁆𑀥𑀸 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁, 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑁄’’𑀢𑀺. 𑀢𑀢𑁆𑀣 𑀅𑀝𑁆𑀝𑀺𑀢𑁄𑀢𑀺 𑀧𑀻𑀴𑀺𑀢𑁄, 𑀅𑀪𑀺𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄𑀢𑀺 ‘‘𑀇𑀤𑀫𑀺𑀥 𑀅𑀢𑀺𑀯𑀺𑀬 𑀅𑀬𑀼𑀢𑁆𑀢𑀁 𑀯𑀢𑁆𑀢𑀢𑀺, 𑀬𑀤𑀸𑀳𑀁 𑀦𑀺𑀬𑁆𑀬𑀸𑀦𑀺𑀓𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀓𑀺𑀮𑁂𑀲𑀧𑀗𑁆𑀓𑀢𑁄 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀉𑀤𑁆𑀥𑀁𑀫𑀼𑀔𑁄 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀫𑀸𑀦𑁄. 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀦𑁆𑀢𑀺 𑀯𑀲𑀦𑀓𑀯𑀺𑀳𑀸𑀭𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄.

𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀦𑀺𑀓𑁆𑀔𑀦𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀣𑀁 𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑁆𑀣𑀁 𑀯𑀸 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀢𑁂𑀦 ‘‘𑀭𑀼𑀓𑁆𑀔𑀸 𑀯𑀸 𑀧𑀧𑀢𑀺𑀲𑁆𑀲𑀸𑀫𑀺, 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀓𑁂 𑀫𑀭𑀡𑀧𑁆𑀧𑀓𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀺𑀓𑁆𑀔𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀁. 𑀧𑀘𑁆𑀘𑀓𑁆𑀔𑀦𑁆𑀢𑀺 𑀧𑀘𑁆𑀘𑀸𑀘𑀺𑀓𑁆𑀔𑀦𑁆𑀢𑁄 𑀧𑀭𑀺𑀘𑁆𑀘𑀚𑀦𑁆𑀢𑁄. ‘‘𑀧𑀘𑁆𑀘𑀓𑁆𑀔𑀸’’𑀢𑀺𑀧𑀺 𑀧𑀸𑀴𑀺, 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀮𑀦𑁆𑀢𑀺 𑀫𑀭𑀡𑀁. 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀳𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀫𑀭𑀡𑀁 𑀦𑀸𑀫. 𑀬𑀣𑀸𑀳 𑀪𑀕𑀯𑀸 𑁋 ‘‘𑀫𑀭𑀡𑀜𑁆𑀳𑁂𑀢𑀁 ¶ , 𑀪𑀺𑀓𑁆𑀔𑀯𑁂, 𑀬𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁩.𑁬𑁩). ‘‘𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸’’𑀢𑀺 𑀧𑀦 𑀧𑀸𑀞𑁂 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀓𑀸𑀮𑀁 𑀓𑀭𑁂𑀬𑁆𑀬, 𑀲𑀺𑀓𑁆𑀔𑀸𑀲𑀫𑀗𑁆𑀕𑀻 𑀏𑀯 𑀧𑀦 𑀳𑀼𑀢𑁆𑀯𑀸 𑀓𑀸𑀮𑀁 𑀓𑀭𑁂𑀬𑁆𑀬? 𑀢𑀲𑁆𑀫𑀸 𑀲𑀢𑁆𑀣𑀁 𑀯𑀸 𑀆𑀳𑀭𑀺𑀲𑁆𑀲𑀸𑀫𑀺, 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦 𑀫𑁂𑀢𑀺 𑀬𑁄𑀚𑀦𑀸.

𑀢𑀤𑀸𑀳𑀦𑁆𑀢𑀺 𑀬𑀤𑀸 𑀓𑀺𑀮𑁂𑀲𑀸𑀪𑀺𑀪𑀯𑁂𑀦 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀚𑀻𑀯𑀺𑀢𑁂 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀢𑀤𑀸. 𑀔𑀼𑀭𑀦𑁆𑀢𑀺 𑀦𑀺𑀲𑀺𑀢𑀔𑀼𑀭𑀁, 𑀔𑀼𑀭𑀲𑀤𑀺𑀲𑀁 𑀯𑀸 𑀲𑀢𑁆𑀣𑀓𑀁. 𑀫𑀜𑁆𑀘𑀓𑀫𑁆𑀳𑀺 𑀉𑀧𑀸𑀯𑀺𑀲𑀺𑀦𑁆𑀢𑀺 𑀧𑀭𑁂𑀲𑀁 𑀦𑀺𑀯𑀸𑀭𑀡𑀪𑀬𑁂𑀦 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀻𑀤𑀺𑀁. 𑀧𑀭𑀺𑀦𑀻𑀢𑁄𑀢𑀺 𑀉𑀧𑀦𑀻𑀢𑁄, 𑀕𑀮𑁂 𑀞𑀧𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑀦𑀺𑀦𑁆𑀢𑀺 ‘‘𑀓𑀡𑁆𑀞𑁂 𑀥𑀫𑀦𑀺𑀁, 𑀓𑀡𑁆𑀞𑀥𑀫𑀦𑀺𑀁 𑀕𑀮𑀯𑀮𑀬’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀙𑁂𑀢𑁆𑀢𑀼𑀦𑁆𑀢𑀺 𑀙𑀺𑀦𑁆𑀤𑀺𑀢𑀼𑀁.

𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣𑀸𑀢𑀺 ‘‘𑀬𑀤𑀸𑀳𑀁 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀡𑁆𑀞𑁂 𑀥𑀫𑀦𑀺𑀁 𑀙𑀺𑀦𑁆𑀤𑀺𑀢𑀼𑀁 𑀔𑀼𑀭𑀁 𑀉𑀧𑀦𑁂𑀲𑀺𑀁, 𑀢𑀢𑁄 𑀧𑀭𑀁 ‘‘𑀅𑀭𑁄𑀕𑀁 𑀦𑀼 𑀔𑁄 𑀫𑁂 𑀲𑀻𑀮’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀓𑁆𑀔𑀡𑁆𑀟𑀁 𑀅𑀘𑁆𑀙𑀺𑀤𑁆𑀤𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 ¶ 𑀲𑀻𑀮𑀁 𑀤𑀺𑀲𑁆𑀯𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀺, 𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀦𑀺𑀭𑀸𑀫𑀺𑀲𑀁 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀳𑀺𑀢𑀢𑀸𑀬 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 ¶ 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀅𑀣 𑀯𑀸 𑀢𑀢𑁄𑀢𑀺 𑀓𑀡𑁆𑀞𑁂 𑀔𑀼𑀭𑀲𑁆𑀲 𑀉𑀧𑀦𑀬𑀢𑁄 𑀯𑀡𑁂 𑀚𑀸𑀢𑁂 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀇𑀤𑀸𑀦𑀺 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀲𑀧𑁆𑀧𑀤𑀸𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑀸𑀢𑀺𑀬𑀸𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀉𑀝𑁆𑀞𑁂𑀳𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀓𑀸𑀢𑀺𑀬𑀸𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀓𑁄𑀲𑀺𑀬𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀫𑀸𑀢𑀼𑀕𑁄𑀢𑁆𑀢𑀯𑀲𑁂𑀦 𑀧𑀦 𑀓𑀸𑀢𑀺𑀬𑀸𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀲𑀸𑀫𑀜𑁆𑀜𑀓𑀸𑀦𑀺𑀢𑁆𑀣𑁂𑀭𑀲𑁆𑀲 𑀕𑀺𑀳𑀺𑀲𑀳𑀸𑀬𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀭𑀢𑁆𑀢𑀺𑀁 ‘‘𑀦𑀺𑀤𑁆𑀤𑀸𑀪𑀺𑀪𑀯𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀘𑀗𑁆𑀓𑀫𑀁 𑀆𑀭𑀼𑀳𑀺. 𑀲𑁄 𑀘𑀗𑁆𑀓𑀫𑀦𑁆𑀢𑁄 𑀦𑀺𑀤𑁆𑀤𑀸𑀬 𑀅𑀪𑀺𑀪𑀽𑀢𑁄 𑀧𑀘𑀮𑀸𑀬𑀫𑀸𑀦𑁄 𑀧𑀭𑀺𑀧𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀦𑀺𑀧𑀚𑁆𑀚𑀺, 𑀲𑀢𑁆𑀣𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀬𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀓𑀸𑀢𑀺𑀬𑀸𑀦𑀸’’𑀢𑀺 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

𑁪𑁧𑁧.

‘‘𑀉𑀝𑁆𑀞𑁂𑀳𑀺 𑀦𑀺𑀲𑀻𑀤 𑀓𑀸𑀢𑀺𑀬𑀸𑀦, 𑀫𑀸 𑀦𑀺𑀤𑁆𑀤𑀸𑀩𑀳𑀼𑀮𑁄 𑀅𑀳𑀼 𑀚𑀸𑀕𑀭𑀲𑁆𑀲𑀼;

𑀫𑀸 𑀢𑀁 𑀅𑀮𑀲𑀁 𑀧𑀫𑀢𑁆𑀢𑀩𑀦𑁆𑀥𑀼, 𑀓𑀽𑀝𑁂𑀦𑁂𑀯 𑀚𑀺𑀦𑀸𑀢𑀼 𑀫𑀘𑁆𑀘𑀼𑀭𑀸𑀚𑀸.

𑁪𑁧𑁨.

‘‘𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑀯𑁂𑀕𑁄, 𑀏𑀯𑀁 𑀚𑀸𑀢𑀺𑀚𑀭𑀸𑀢𑀺 𑀯𑀢𑁆𑀢𑀢𑁂 𑀢𑀁;

𑀲𑁄 𑀓𑀭𑁄𑀳𑀺 𑀲𑀼𑀤𑀻𑀧𑀫𑀢𑁆𑀢𑀦𑁄 𑀢𑁆𑀯𑀁, 𑀦 𑀳𑀺 𑀢𑀸𑀡𑀁 𑀢𑀯 𑀯𑀺𑀚𑁆𑀚𑀢𑁂𑀯 𑀅𑀜𑁆𑀜𑀁.

𑁪𑁧𑁩.

‘‘𑀲𑀢𑁆𑀣𑀸 𑀳𑀺 𑀯𑀺𑀚𑁂𑀲𑀺 𑀫𑀕𑁆𑀕𑀫𑁂𑀢𑀁, 𑀲𑀗𑁆𑀕𑀸 𑀚𑀸𑀢𑀺𑀚𑀭𑀸𑀪𑀬𑀸 𑀅𑀢𑀻𑀢𑀁;

𑀧𑀼𑀩𑁆𑀩𑀸𑀧𑀭𑀭𑀢𑁆𑀢𑀫𑀧𑁆𑀧𑀫𑀢𑁆𑀢𑁄, 𑀅𑀦𑀼𑀬𑀼𑀜𑁆𑀚𑀲𑁆𑀲𑀼 𑀤𑀴𑁆𑀳𑀁 𑀓𑀭𑁄𑀳𑀺 𑀬𑁄𑀕𑀁.

𑁪𑁧𑁪.

‘‘𑀧𑀼𑀭𑀺𑀫𑀸𑀦𑀺 𑀧𑀫𑀼𑀜𑁆𑀘 𑀩𑀦𑁆𑀥𑀦𑀸𑀦𑀺, 𑀲𑀗𑁆𑀖𑀸𑀝𑀺𑀔𑀼𑀭𑀫𑀼𑀡𑁆𑀟𑀪𑀺𑀓𑁆𑀔𑀪𑁄𑀚𑀻;

𑀫𑀸 ¶ 𑀔𑀺𑀟𑁆𑀟𑀸𑀭𑀢𑀺𑀜𑁆𑀘 𑀫𑀸 𑀦𑀺𑀤𑁆𑀤𑀁, 𑀅𑀦𑀼𑀬𑀼𑀜𑁆𑀚𑀺𑀢𑁆𑀣 𑀛𑀸𑀬 𑀓𑀸𑀢𑀺𑀬𑀸𑀦.

𑁪𑁧𑁫.

‘‘𑀛𑀸𑀬𑀸𑀳𑀺 𑀚𑀺𑀦𑀸𑀳𑀺 𑀓𑀸𑀢𑀺𑀬𑀸𑀦, 𑀬𑁄𑀕𑀓𑁆𑀔𑁂𑀫𑀧𑀣𑁂𑀲𑀼 𑀓𑁄𑀯𑀺𑀤𑁄𑀲𑀺;

𑀧𑀧𑁆𑀧𑀼𑀬𑁆𑀬 𑀅𑀦𑀼𑀢𑁆𑀢𑀭𑀁 𑀯𑀺𑀲𑀼𑀤𑁆𑀥𑀺𑀁, 𑀧𑀭𑀺𑀦𑀺𑀩𑁆𑀩𑀸𑀳𑀺𑀲𑀺 𑀯𑀸𑀭𑀺𑀦𑀸𑀯 𑀚𑁄𑀢𑀺.

𑁪𑁧𑁬.

‘‘𑀧𑀚𑁆𑀚𑁄𑀢𑀓𑀭𑁄 ¶ ¶ 𑀧𑀭𑀺𑀢𑁆𑀢𑀭𑀁𑀲𑁄, 𑀯𑀸𑀢𑁂𑀦 𑀯𑀺𑀦𑀫𑁆𑀬𑀢𑁂 𑀮𑀢𑀸𑀯;

𑀏𑀯𑀫𑁆𑀧𑀺 𑀢𑀼𑀯𑀁 𑀅𑀦𑀸𑀤𑀺𑀬𑀸𑀦𑁄, 𑀫𑀸𑀭𑀁 𑀇𑀦𑁆𑀤𑀲𑀕𑁄𑀢𑁆𑀢 𑀦𑀺𑀤𑁆𑀥𑀼𑀦𑀸𑀳𑀺;

𑀲𑁄 𑀯𑁂𑀤𑀬𑀺𑀢𑀸𑀲𑀼 𑀯𑀻𑀢𑀭𑀸𑀕𑁄, 𑀓𑀸𑀮𑀁 𑀓𑀗𑁆𑀔 𑀇𑀥𑁂𑀯 𑀲𑀻𑀢𑀺𑀪𑀽𑀢𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀝𑁆𑀞𑁂𑀳𑀻𑀢𑀺 𑀦𑀺𑀤𑁆𑀤𑀽𑀧𑀕𑀫𑀦𑀢𑁄 𑀉𑀝𑁆𑀞𑀳𑀦𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀓𑀭𑁄𑀳𑀺. 𑀬𑀲𑁆𑀫𑀸 𑀦𑀺𑀧𑀚𑁆𑀚𑀸 𑀦𑀸𑀫 𑀓𑁄𑀲𑀚𑁆𑀚𑀧𑀓𑁆𑀔𑀺𑀬𑀸, 𑀢𑀲𑁆𑀫𑀸 𑀫𑀸 𑀲𑀬𑀺. 𑀦𑀺𑀲𑀻𑀤𑀸𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀻𑀤. 𑀓𑀸𑀢𑀺𑀬𑀸𑀦𑀸𑀢𑀺 𑀢𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀫𑀸 𑀦𑀺𑀤𑁆𑀤𑀸𑀩𑀳𑀼𑀮𑁄 𑀅𑀳𑀽𑀢𑀺 𑀦𑀺𑀤𑁆𑀤𑀸𑀩𑀳𑀼𑀮𑁄 𑀦𑀺𑀤𑁆𑀤𑀸𑀪𑀺𑀪𑀽𑀢𑁄 𑀫𑀸 𑀅𑀳𑀼. 𑀚𑀸𑀕𑀭𑀲𑁆𑀲𑀽𑀢𑀺 𑀚𑀸𑀕𑀭, 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀳𑁄𑀳𑀺. 𑀫𑀸 𑀢𑀁 𑀅𑀮𑀲𑀦𑁆𑀢𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑀁 𑀢𑀁 𑀅𑀮𑀲𑀁 𑀓𑀼𑀲𑀻𑀢𑀁 𑀧𑀫𑀢𑁆𑀢𑀩𑀦𑁆𑀥𑀼 𑀫𑀘𑁆𑀘𑀼𑀭𑀸𑀚𑀸 𑀓𑀽𑀝𑁂𑀦𑁂𑀯 𑀅𑀤𑁆𑀤𑀼𑀳𑀦𑁂𑀦 𑀯𑀺𑀬 𑀦𑁂𑀲𑀸𑀤𑁄 𑀫𑀺𑀕𑀁 𑀯𑀸 𑀧𑀓𑁆𑀔𑀺𑀁 𑀯𑀸 𑀚𑀭𑀸𑀭𑁄𑀕𑁂𑀳𑀺 𑀫𑀸 𑀚𑀺𑀦𑀸𑀢𑀼 𑀫𑀸 𑀅𑀪𑀺𑀪𑀯𑀢𑀼, 𑀫𑀸 𑀅𑀚𑁆𑀛𑁄𑀢𑁆𑀣𑀭𑀢𑀽𑀢𑀺 𑀅𑀢𑁆𑀣𑁄.

𑀲𑁂𑀬𑁆𑀬𑀣𑀸𑀧𑀻𑀢𑀺 𑀲𑁂𑀬𑁆𑀬𑀣𑀸 𑀅𑀧𑀺. 𑀫𑀳𑀸𑀲𑀫𑀼𑀤𑁆𑀤𑀯𑁂𑀕𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀫𑀺𑀯𑁂𑀕𑁄. 𑀏𑀯𑀦𑁆𑀢𑀺 𑀬𑀣𑀸 𑀦𑀸𑀫 𑀫𑀳𑀸𑀲𑀫𑀼𑀤𑁆𑀤𑀊𑀫𑀺𑀯𑁂𑀕𑁄 𑀉𑀧𑀭𑀽𑀧𑀭𑀺 𑀉𑀝𑁆𑀞𑀳𑀦𑁆𑀢𑁄 𑀢𑀁 𑀅𑀪𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀧𑀼𑀭𑀺𑀲𑀁 𑀅𑀪𑀺𑀪𑀯𑀢𑀺, 𑀏𑀯𑀁 𑀚𑀸𑀢𑀺 𑀚𑀭𑀸 𑀘 𑀓𑁄𑀲𑀚𑁆𑀚𑀸𑀪𑀺𑀪𑀽𑀢𑀁 𑀢𑀁 𑀅𑀢𑀺𑀯𑀢𑁆𑀢𑀢𑁂 𑀉𑀧𑀭𑀽𑀧𑀭𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀲𑁄 𑀓𑀭𑁄𑀳𑀻𑀢𑀺 𑀲𑁄 𑀢𑁆𑀯𑀁, 𑀓𑀸𑀢𑀺𑀬𑀸𑀦, 𑀘𑀢𑀽𑀳𑀺 𑀑𑀖𑁂𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑀁 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑀁 𑀲𑀼𑀤𑀻𑀧𑀁 𑀅𑀢𑁆𑀢𑀦𑁄 𑀓𑀭𑁄𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀳𑀺. 𑀦 𑀳𑀺 𑀢𑀸𑀡𑀁 𑀢𑀯 𑀯𑀺𑀚𑁆𑀚𑀢𑁂𑀯 𑀅𑀜𑁆𑀜𑀦𑁆𑀢𑀺 𑀳𑀻𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀢𑀢𑁄 𑀅𑀕𑁆𑀕𑀨𑀮𑀢𑁄 𑀅𑀜𑁆𑀜𑀁 𑀢𑀯 𑀢𑀸𑀡𑀁 𑀦𑀸𑀫 𑀇𑀥 𑀯𑀸 𑀳𑀼𑀭𑀁 𑀯𑀸 𑀦 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀁 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀁 𑀲𑀼𑀤𑀻𑀧𑀁 𑀓𑀭𑁄𑀳𑀻𑀢𑀺.

𑀲𑀢𑁆𑀣𑀸 𑀳𑀺 𑀯𑀺𑀚𑁂𑀲𑀺 𑀫𑀕𑁆𑀕𑀫𑁂𑀢𑀦𑁆𑀢𑀺 𑀬𑀁 𑀲𑀸𑀥𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀬𑀢𑁄 𑀧𑀭𑀸𑀚𑀺𑀢𑀸 𑀧𑀼𑀣𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸, 𑀢𑀤𑁂𑀢𑀁 𑀢𑀲𑁆𑀲 𑀲𑀼𑀤𑀻𑀧𑀲𑁆𑀲 𑀓𑀸𑀭𑀡𑀪𑀽𑀢𑀁 𑀧𑀜𑁆𑀘𑀯𑀺𑀥𑀲𑀗𑁆𑀕𑀢𑁄 𑀚𑀸𑀢𑀺𑀆𑀤𑀺𑀪𑀬𑀢𑁄 𑀘 𑀅𑀢𑀻𑀢𑀁 𑀅𑀭𑀺𑀬𑀫𑀕𑁆𑀕𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀤𑀺𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀢𑀼𑀬𑁆𑀳𑀁 𑀲𑀢𑁆𑀣𑀸 𑀯𑀺𑀚𑁂𑀲𑀺 𑀲𑀸𑀥𑁂𑀲𑀺. 𑀬𑀲𑁆𑀫𑀸 𑀲𑀢𑁆𑀣𑀼 𑀲𑀦𑁆𑀢𑀓𑀁 ¶ 𑀦𑀸𑀫 𑀲𑀸𑀯𑀓𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 ¶ , 𑀅𑀧𑁆𑀧𑀫𑀢𑁆𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀅𑀦𑀼𑀬𑀼𑀜𑁆𑀚 𑀬𑁄𑀕𑀁 𑀪𑀸𑀯𑀦𑀁 𑀤𑀴𑁆𑀳𑀜𑁆𑀘 𑀓𑀭𑁄𑀳𑀺.

𑀧𑀼𑀭𑀺𑀫𑀸𑀦𑀺 𑀧𑀫𑀼𑀜𑁆𑀘 𑀩𑀦𑁆𑀥𑀦𑀸𑀦𑀻𑀢𑀺 𑀧𑀼𑀭𑀺𑀫𑀓𑀸𑀦𑀺 𑀕𑀺𑀳𑀺𑀓𑀸𑀮𑁂 𑀆𑀩𑀤𑁆𑀥𑀸𑀦𑀺 𑀕𑀺𑀳𑀺𑀩𑀦𑁆𑀥𑀦𑀸𑀦𑀺 𑀓𑀸𑀫𑀕𑀼𑀡𑀩𑀦𑁆𑀥𑀦𑀸𑀦𑀺 𑀧𑀫𑀼𑀜𑁆𑀘 𑀯𑀺𑀲𑁆𑀲𑀚𑁆𑀚𑁂𑀳𑀺, 𑀢𑀢𑁆𑀣 𑀅𑀦𑀧𑁂𑀓𑁆𑀔𑁄 𑀳𑁄𑀳𑀺. 𑀲𑀗𑁆𑀖𑀸𑀝𑀺𑀔𑀼𑀭𑀫𑀼𑀡𑁆𑀟𑀪𑀺𑀓𑁆𑀔𑀪𑁄𑀚𑀻𑀢𑀺 𑀲𑀗𑁆𑀖𑀸𑀝𑀺𑀥𑀸𑀭𑀻 ¶ 𑀔𑀼𑀭𑁂𑀦 𑀓𑀢𑀲𑀺𑀭𑀫𑀼𑀡𑁆𑀟𑁄 𑀪𑀺𑀓𑁆𑀔𑀸𑀳𑀸𑀭𑀪𑁄𑀚𑀻, 𑀢𑀺𑀯𑀺𑀥𑀫𑁆𑀧𑁂𑀢𑀁 𑀧𑀼𑀭𑀺𑀫𑀩𑀦𑁆𑀥𑀦𑀧𑀫𑁄𑀓𑁆𑀔𑀲𑁆𑀲 𑀔𑀺𑀟𑁆𑀟𑀸𑀭𑀢𑀺𑀦𑀺𑀤𑁆𑀤𑀸𑀦𑀦𑀼𑀬𑁄𑀕𑀲𑁆𑀲 𑀘 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀢𑁆𑀯𑀁 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁄 𑀫𑀼𑀡𑁆𑀟𑁄 𑀪𑀺𑀓𑁆𑀔𑀸𑀳𑀸𑀭𑁄 𑀚𑀻𑀯𑀢𑀺, 𑀢𑀲𑁆𑀫𑀸 𑀢𑁂 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑁄 𑀔𑀺𑀟𑁆𑀟𑀸𑀭𑀢𑀺𑀦𑀺𑀤𑁆𑀤𑀸𑀦𑀼𑀬𑁄𑀕𑁄 𑀘 𑀦 𑀬𑀼𑀢𑁆𑀢𑁄𑀢𑀺 𑀢𑀢𑁄 𑀧𑀼𑀭𑀺𑀫𑀸𑀦𑀺 𑀧𑀫𑀼𑀜𑁆𑀘 𑀩𑀦𑁆𑀥𑀦𑀸𑀦𑀺 𑀔𑀺𑀟𑁆𑀟𑀸𑀭𑀢𑀺𑀁 𑀦𑀺𑀤𑁆𑀤𑀜𑁆𑀘 𑀫𑀸𑀦𑀼𑀬𑀼𑀜𑁆𑀚𑀺𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀛𑀸𑀬𑀸𑀢𑀺 𑀛𑀸𑀬𑀲𑁆𑀲𑀼 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀦𑀼𑀬𑀼𑀜𑁆𑀚.

𑀢𑀁 𑀧𑀦 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀬𑁂𑀦 𑀛𑀸𑀦𑁂𑀦 𑀛𑀸𑀬𑀢𑁄 𑀓𑀺𑀮𑁂𑀲𑀸 𑀲𑀩𑁆𑀩𑀲𑁄 𑀚𑀺𑀢𑀸 𑀳𑁄𑀦𑁆𑀢𑀺, 𑀢𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀦𑀼𑀬𑀼𑀜𑁆𑀚𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀛𑀸𑀬𑀸𑀳𑀺 𑀚𑀺𑀦𑀸𑀳𑀻’’𑀢𑀺 𑀆𑀳. 𑀬𑁄𑀕𑀓𑁆𑀔𑁂𑀫𑀧𑀣𑁂𑀲𑀼 𑀓𑁄𑀯𑀺𑀤𑁄𑀲𑀻𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀣𑀪𑀽𑀢𑁂𑀲𑀼 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀓𑀼𑀲𑀮𑁄 𑀙𑁂𑀓𑁄 𑀅𑀲𑀺, 𑀢𑀲𑁆𑀫𑀸 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄 𑀅𑀦𑀼𑀢𑁆𑀢𑀭𑀁 𑀉𑀢𑁆𑀢𑀭𑀭𑀳𑀺𑀢𑀁, 𑀯𑀺𑀲𑀼𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀧𑀧𑁆𑀧𑀼𑀬𑁆𑀬 𑀧𑀸𑀧𑀼𑀡𑀺𑀢𑁆𑀯𑀸 𑀧𑀦 𑀢𑁆𑀯𑀁 𑀧𑀭𑀺𑀦𑀺𑀩𑁆𑀩𑀸𑀳𑀺𑀲𑀺. 𑀯𑀸𑀭𑀺𑀦𑀸𑀯 𑀚𑁄𑀢𑀻𑀢𑀺 𑀫𑀳𑀢𑀸 𑀲𑀮𑀺𑀮𑀯𑀼𑀝𑁆𑀞𑀺𑀦𑀺𑀧𑀸𑀢𑁂𑀦 𑀅𑀕𑁆𑀕𑀺𑀔𑀦𑁆𑀥𑁄 𑀯𑀺𑀬 𑀅𑀭𑀺𑀬𑀫𑀕𑁆𑀕𑀯𑀼𑀝𑁆𑀞𑀺𑀦𑀺𑀧𑀸𑀢𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺.

𑀧𑀚𑁆𑀚𑁄𑀢𑀓𑀭𑁄𑀢𑀺 𑀧𑀚𑁆𑀚𑁄𑀢𑀺𑀁 𑀓𑀭𑁄 𑀧𑀤𑀻𑀧𑁄. 𑀧𑀭𑀺𑀢𑁆𑀢𑀭𑀁𑀲𑁄𑀢𑀺 𑀔𑀼𑀤𑁆𑀤𑀓𑀘𑁆𑀘𑀺𑀓𑁄. 𑀯𑀺𑀦𑀫𑁆𑀬𑀢𑁂𑀢𑀺 𑀯𑀺𑀦𑀫𑀻𑀬𑀢𑀺 𑀅𑀧𑀦𑀺𑀬𑁆𑀬𑀢𑀺. 𑀮𑀢𑀸𑀯𑀸𑀢𑀺 𑀯𑀮𑁆𑀮𑀺 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀝𑁆𑀝𑀺𑀆𑀤𑀺𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀧𑀭𑀺𑀢𑁆𑀢𑀭𑀁𑀲𑁄 𑀫𑀦𑁆𑀤𑀧𑀪𑁄 𑀧𑀤𑀻𑀧𑁄 𑀅𑀧𑁆𑀧𑀺𑀓𑀸 𑀮𑀢𑀸 𑀯𑀸 𑀯𑀸𑀢𑁂𑀦 𑀯𑀺𑀥𑀫𑀺𑀬𑁆𑀬𑀢𑀺 𑀯𑀺𑀤𑁆𑀥𑀁𑀲𑀺𑀬𑁆𑀬𑀢𑀺, 𑀏𑀯𑀁 𑀢𑀼𑀯𑀫𑁆𑀧𑀺. 𑀓𑁄𑀲𑀺𑀬𑀕𑁄𑀢𑁆𑀢𑀢𑀸𑀬, 𑀇𑀦𑁆𑀤𑀲𑀕𑁄𑀢𑁆𑀢, 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀁. 𑀫𑀸𑀭𑀁 𑀢𑀲𑁆𑀲 𑀯𑀲𑁂 𑀅𑀦𑀸𑀯𑀢𑁆𑀢𑀦𑀸 𑀅𑀦𑀼𑀧𑀸𑀤𑀸𑀦𑀢𑁄 𑀘 𑀅𑀦𑀸𑀤𑀺𑀬𑀸𑀦𑁄, 𑀦𑀺𑀤𑁆𑀥𑀼𑀦𑀸𑀳𑀺 𑀯𑀺𑀥𑀫𑁂𑀳𑀺 𑀯𑀺𑀤𑁆𑀥𑀁𑀲𑁂𑀳𑀺. 𑀏𑀯𑀁 𑀧𑀦 𑀯𑀺𑀤𑁆𑀥𑀁𑀲𑀫𑀸𑀦𑁄 𑀲𑁄 𑀢𑁆𑀯𑀁 𑀯𑁂𑀤𑀬𑀺𑀢𑀸𑀲𑀼 𑀲𑀩𑁆𑀩𑀸𑀲𑀼 𑀯𑁂𑀤𑀦𑀸𑀲𑀼 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑁄 𑀇𑀥𑁂𑀯 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀲𑀻𑀢𑀺𑀪𑀽𑀢𑁄 𑀦𑀺𑀩𑁆𑀩𑀼𑀢𑁄 𑀅𑀢𑁆𑀢𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀓𑀗𑁆𑀔 𑀆𑀕𑀫𑁂𑀳𑀻𑀢𑀺 ¶ . 𑀏𑀯𑀁 𑀲𑀢𑁆𑀣𑀸𑀭𑀸 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀦𑀸𑀬 𑀓𑀢𑀸𑀬 𑀣𑁂𑀭𑁄 𑀤𑁂𑀲𑀦𑀸𑀯𑀲𑀸𑀦𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀸 𑀏𑀯 𑀇𑀫𑀸 𑀕𑀸𑀣𑀸 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀜𑁆𑀘 𑀚𑀸𑀢𑀸.

𑀓𑀸𑀢𑀺𑀬𑀸𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀺𑀕𑀚𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀼𑀤𑁂𑀲𑀺𑀢𑁄𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀫𑀺𑀕𑀚𑀸𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀲𑀸𑀔𑀸𑀬 ¶ 𑀫𑀳𑀸𑀉𑀧𑀸𑀲𑀺𑀓𑀸𑀬 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀫𑀺𑀕𑀚𑀸𑀮𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀪𑀺𑀡𑁆𑀳𑀲𑁄 𑀥𑀫𑁆𑀫𑀲𑁆𑀲𑀯𑀦𑁂𑀦 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁧𑁭.

‘‘𑀲𑀼𑀤𑁂𑀲𑀺𑀢𑁄 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑁄, 𑀲𑀩𑁆𑀩𑀯𑀝𑁆𑀝𑀯𑀺𑀦𑀸𑀲𑀦𑁄.

𑁪𑁧𑁮.

‘‘𑀦𑀺𑀬𑁆𑀬𑀸𑀦𑀺𑀓𑁄 𑀉𑀢𑁆𑀢𑀭𑀡𑁄, 𑀢𑀡𑁆𑀳𑀸𑀫𑀽𑀮𑀯𑀺𑀲𑁄𑀲𑀦𑁄;

𑀯𑀺𑀲𑀫𑀽𑀮𑀁 𑀆𑀖𑀸𑀢𑀦𑀁, 𑀙𑁂𑀢𑁆𑀯𑀸 𑀧𑀸𑀧𑁂𑀢𑀺 𑀦𑀺𑀩𑁆𑀩𑀼𑀢𑀺𑀁.

𑁪𑁧𑁯.

‘‘𑀅𑀜𑁆𑀜𑀸𑀡𑀫𑀽𑀮𑀪𑁂𑀤𑀸𑀬, 𑀓𑀫𑁆𑀫𑀬𑀦𑁆𑀢𑀯𑀺𑀖𑀸𑀝𑀦𑁄;

𑀯𑀺𑀜𑁆𑀜𑀸𑀡𑀸𑀦𑀁 𑀧𑀭𑀺𑀕𑁆𑀕𑀳𑁂, 𑀜𑀸𑀡𑀯𑀚𑀺𑀭𑀦𑀺𑀧𑀸𑀢𑀦𑁄.

𑁪𑁨𑁦.

‘‘𑀯𑁂𑀤𑀦𑀸𑀦𑀁 𑀯𑀺𑀜𑁆𑀜𑀸𑀧𑀦𑁄, 𑀉𑀧𑀸𑀤𑀸𑀦𑀧𑁆𑀧𑀫𑁄𑀘𑀦𑁄;

𑀪𑀯𑀁 𑀅𑀗𑁆𑀕𑀸𑀭𑀓𑀸𑀲𑀼𑀁𑀯, 𑀜𑀸𑀡𑁂𑀦 𑀅𑀦𑀼𑀧𑀲𑁆𑀲𑀦𑁄.

𑁪𑁨𑁧.

‘‘𑀫𑀳𑀸𑀭𑀲𑁄 𑀲𑀼𑀕𑀫𑁆𑀪𑀻𑀭𑁄, 𑀚𑀭𑀸𑀫𑀘𑁆𑀘𑀼𑀦𑀺𑀯𑀸𑀭𑀡𑁄;

𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀤𑀼𑀓𑁆𑀔𑀽𑀧𑀲𑀫𑀦𑁄 𑀲𑀺𑀯𑁄.

𑁪𑁨𑁨.

‘‘𑀓𑀫𑁆𑀫𑀁 𑀓𑀫𑁆𑀫𑀦𑁆𑀢𑀺 𑀜𑀢𑁆𑀯𑀸𑀦, 𑀯𑀺𑀧𑀸𑀓𑀜𑁆𑀘 𑀯𑀺𑀧𑀸𑀓𑀢𑁄;

𑀧𑀝𑀺𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁, 𑀬𑀣𑀸𑀯𑀸𑀮𑁄𑀓𑀤𑀲𑁆𑀲𑀦𑁄;

𑀫𑀳𑀸𑀔𑁂𑀫𑀗𑁆𑀕𑀫𑁄 𑀲𑀦𑁆𑀢𑁄, 𑀧𑀭𑀺𑀬𑁄𑀲𑀸𑀦𑀪𑀤𑁆𑀤𑀓𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 ¶ 𑀲𑀼𑀤𑁂𑀲𑀺𑀢𑁄𑀢𑀺 𑀲𑀼𑀝𑁆𑀞𑀼 𑀤𑁂𑀲𑀺𑀢𑁄, 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑀦𑀯𑀲𑁂𑀦 𑀤𑁂𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀤𑁂𑀲𑀺𑀢𑁄𑀢𑀺 𑀲𑀫𑁆𑀫𑀸 𑀤𑁂𑀲𑀺𑀢𑁄, 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀦𑀁 𑀢𑀤𑀼𑀪𑀬𑀳𑁂𑀢𑀽𑀦𑀜𑁆𑀘 𑀅𑀯𑀺𑀧𑀭𑀻𑀢𑀢𑁄 𑀧𑀓𑀸𑀲𑀦𑀯𑀲𑁂𑀦 𑀪𑀸𑀲𑀺𑀢𑁄 𑀲𑁆𑀯𑀸𑀔𑁆𑀬𑀸𑀢𑁄𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀫𑀢𑀸𑀢𑀺 𑀫𑀁𑀲𑀘𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀼, 𑀧𑀜𑁆𑀜𑀸𑀘𑀓𑁆𑀔𑀼, 𑀩𑀼𑀤𑁆𑀥𑀘𑀓𑁆𑀔𑀼, 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑀸. 𑀩𑀼𑀤𑁆𑀥𑁂𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦. 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺 𑀆𑀤𑀺𑀘𑁆𑀘𑀕𑁄𑀢𑁆𑀢𑁂𑀦. 𑀤𑀼𑀯𑀺𑀥𑁄 𑀳𑀺 𑀮𑁄𑀓𑁂 𑀔𑀢𑁆𑀢𑀺𑀬𑀯𑀁𑀲𑁄 𑁋 𑀆𑀤𑀺𑀘𑁆𑀘𑀯𑀁𑀲𑁄, 𑀲𑁄𑀫𑀯𑀁𑀲𑁄𑀢𑀺. 𑀢𑀢𑁆𑀣 𑀆𑀤𑀺𑀘𑁆𑀘𑀯𑀁𑀲𑁄, 𑀑𑀓𑁆𑀓𑀸𑀓𑀭𑀸𑀚𑀯𑀁𑀲𑁄𑀢𑀺 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁄 𑀲𑀜𑁆𑀚𑀸𑀢𑀢𑀸𑀬 𑀲𑀸𑀓𑀺𑀬𑀸 𑀆𑀤𑀺𑀘𑁆𑀘𑀕𑁄𑀢𑁆𑀢𑀸𑀢𑀺 𑀪𑀕𑀯𑀸 ‘‘𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀆𑀤𑀺𑀘𑁆𑀘𑀲𑁆𑀲 𑀩𑀦𑁆𑀥𑀽𑀢𑀺𑀧𑀺 𑀪𑀕𑀯𑀸 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀪𑀸𑀯𑀢𑁄 𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑁄 𑀢𑀢𑁄 𑀏𑀯 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀯𑀺𑀦𑀸𑀲𑀦𑀢𑁄 𑀯𑀺𑀤𑁆𑀥𑀁𑀲𑀦𑀢𑁄 𑀲𑀩𑁆𑀩𑀯𑀝𑁆𑀝𑀯𑀺𑀦𑀸𑀲𑀦𑁄, 𑀲𑀁𑀲𑀸𑀭𑀘𑀸𑀭𑀓𑀢𑁄 ¶ 𑀦𑀺𑀬𑁆𑀬𑀸𑀦𑀢𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀫𑀼𑀢𑁆𑀢𑀭𑀡𑀝𑁆𑀞𑁂𑀦 𑀉𑀢𑁆𑀢𑀭𑀡𑁄, 𑀓𑀸𑀫𑀢𑀡𑁆𑀳𑀸𑀤𑀻𑀦𑀁 𑀲𑀩𑁆𑀩𑀢𑀡𑁆𑀳𑀸𑀦𑀁 𑀫𑀽𑀮𑀁 𑀅𑀯𑀺𑀚𑁆𑀚𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀜𑁆𑀘 𑀯𑀺𑀲𑁄𑀲𑁂𑀢𑀺 𑀲𑀼𑀓𑁆𑀔𑀸𑀧𑁂𑀢𑀻𑀢𑀺 𑀢𑀡𑁆𑀳𑀸𑀫𑀽𑀮𑀯𑀺𑀲𑁄𑀲𑀦𑁄, 𑀢𑀺𑀡𑁆𑀡𑀫𑁆𑀧𑀺 𑀯𑁂𑀤𑀸𑀦𑀁 𑀲𑀫𑁆𑀧𑀝𑀺𑀯𑁂𑀥𑀲𑁆𑀲 ¶ 𑀯𑀺𑀤𑁆𑀥𑀁𑀲𑀦𑀢𑁄 𑀯𑀺𑀲𑀲𑁆𑀲 𑀤𑀼𑀓𑁆𑀔𑀲𑁆𑀲 𑀓𑀸𑀭𑀡𑀢𑁆𑀢𑀸 𑀯𑀺𑀲𑀫𑀽𑀮𑀁, 𑀲𑀢𑁆𑀢𑀸𑀦𑀁 𑀩𑁆𑀬𑀲𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀆𑀖𑀸𑀢𑀦𑀁 𑀓𑀫𑁆𑀫𑀁 𑀓𑀺𑀮𑁂𑀲𑀁 𑀯𑀸 𑀙𑁂𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑀺.

𑀅𑀜𑁆𑀜𑀸𑀡𑀲𑁆𑀲 𑀫𑀽𑀮𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀆𑀲𑀯𑀸 𑀘 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀪𑁂𑀤𑀸𑀬 𑀯𑀚𑀺𑀭𑀽𑀧𑀫𑀜𑀸𑀡𑁂𑀦 𑀪𑀺𑀦𑁆𑀤𑀦𑀢𑁆𑀣𑀸𑀬. 𑀅𑀣 𑀯𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁨𑁨𑁫-𑁨𑁨𑁬; 𑀲𑀁. 𑀦𑀺. 𑁨.𑁧) 𑀅𑀜𑁆𑀜𑀸𑀡𑀁 𑀫𑀽𑀮𑀁 𑀏𑀢𑀲𑁆𑀲𑀸𑀢𑀺 𑀅𑀜𑁆𑀜𑀸𑀡𑀫𑀽𑀮𑀁, 𑀪𑀯𑀘𑀓𑁆𑀓𑀁, 𑀢𑀲𑁆𑀲 𑀫𑀕𑁆𑀕𑀜𑀸𑀡𑀯𑀚𑀺𑀭𑁂𑀦 𑀧𑀤𑀸𑀮𑀦𑀢𑁆𑀣𑀁 𑀤𑁂𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀫𑀬𑀦𑁆𑀢𑀯𑀺𑀖𑀸𑀝𑀦𑁄𑀢𑀺 𑀓𑀫𑁆𑀫𑀖𑀝𑀺𑀢𑀲𑁆𑀲 𑀅𑀢𑁆𑀢𑀪𑀸𑀯𑀬𑀦𑁆𑀢𑀲𑁆𑀲 𑀯𑀺𑀤𑁆𑀥𑀁𑀲𑀦𑁄. 𑀯𑀺𑀜𑁆𑀜𑀸𑀡𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀬𑀣𑀸𑀲𑀓𑀓𑀫𑁆𑀫𑀼𑀦𑀸 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂 𑀉𑀧𑀝𑁆𑀞𑀺𑀢𑁂𑀢𑀺 𑀯𑀘𑀦𑀲𑁂𑀲𑁄. 𑀢𑀢𑁆𑀣 𑀢𑀢𑁆𑀣 𑀳𑀺 𑀪𑀯𑁂 𑀧𑀝𑀺𑀲𑀦𑁆𑀥𑀺𑀬𑀸 𑀕𑀳𑀺𑀢𑀸𑀬 𑀢𑀁𑀢𑀁𑀪𑀯𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀜𑀸𑀡𑀯𑀚𑀺𑀭𑀦𑀺𑀧𑀸𑀢𑀦𑁄𑀢𑀺 𑀜𑀸𑀡𑀯𑀚𑀺𑀭𑀲𑁆𑀲 ¶ 𑀦𑀺𑀧𑀸𑀢𑁄, 𑀜𑀸𑀡𑀯𑀚𑀺𑀭𑀁 𑀦𑀺𑀧𑀸𑀢𑁂𑀢𑁆𑀯𑀸 𑀢𑁂𑀲𑀁 𑀧𑀤𑀸𑀮𑁂𑀢𑀸. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀢𑁆𑀢𑀫𑀪𑀯𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺 𑀪𑀺𑀦𑁆𑀤𑀢𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀯𑁂𑀤𑀦𑀸𑀦𑀁 𑀯𑀺𑀜𑁆𑀜𑀸𑀧𑀦𑁄𑀢𑀺 𑀲𑀼𑀔𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀬𑀣𑀸𑀓𑁆𑀓𑀫𑀁 𑀤𑀼𑀓𑁆𑀔𑀲𑀮𑁆𑀮𑀸𑀦𑀺𑀘𑁆𑀘𑀯𑀲𑁂𑀦 𑀬𑀸𑀣𑀸𑀯𑀢𑁄 𑀧𑀯𑁂𑀤𑀓𑁄. 𑀉𑀧𑀸𑀤𑀸𑀦𑀧𑁆𑀧𑀫𑁄𑀘𑀦𑁄𑀢𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀳𑀺 𑀘𑀢𑀽𑀳𑀺𑀧𑀺 𑀉𑀧𑀸𑀤𑀸𑀦𑁂𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀺𑀫𑁄𑀘𑀓𑁄. 𑀪𑀯𑀁 𑀅𑀗𑁆𑀕𑀸𑀭𑀓𑀸𑀲𑀼𑀁𑀯, 𑀜𑀸𑀡𑁂𑀦 𑀅𑀦𑀼𑀧𑀲𑁆𑀲𑀦𑁄𑀢𑀺 𑀓𑀸𑀫𑀪𑀯𑀸𑀤𑀺𑀦𑀯𑀯𑀺𑀥𑀫𑁆𑀧𑀺 𑀪𑀯𑀁 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀪𑀸𑀯𑀢𑁄 𑀲𑀸𑀥𑀺𑀓𑀧𑁄𑀭𑀺𑀲𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀯𑀺𑀬 𑀫𑀕𑁆𑀕𑀜𑀸𑀡𑁂𑀦 𑀅𑀦𑀼𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀸.

𑀲𑀦𑁆𑀢𑀧𑀡𑀻𑀢𑀪𑀸𑀯𑀢𑁄 𑀅𑀢𑀺𑀢𑁆𑀢𑀺𑀓𑀭𑀝𑁆𑀞𑁂𑀦 𑀫𑀳𑀸𑀭𑀲𑁄 𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀯𑀸 𑀫𑀳𑀸𑀓𑀺𑀘𑁆𑀘𑀢𑀸𑀬 𑀲𑀸𑀫𑀜𑁆𑀜𑀨𑀮𑀯𑀲𑁂𑀦 𑀫𑀳𑀸𑀲𑀫𑁆𑀧𑀢𑁆𑀢𑀺𑀢𑀸𑀬 𑀘 𑀫𑀳𑀸𑀭𑀲𑁄, 𑀅𑀦𑀼𑀧𑀘𑀺𑀢𑀲𑀫𑁆𑀪𑀸𑀭𑁂𑀳𑀺 𑀤𑀼𑀭𑀯𑀕𑀸𑀳𑀢𑀸𑀬 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀢𑀸𑀬 𑀘 𑀲𑀼𑀝𑁆𑀞𑀼 𑀕𑀫𑁆𑀪𑀻𑀭𑁄 𑀚𑀭𑀸𑀫𑀘𑁆𑀘𑀼𑀦𑀺𑀯𑀸𑀭𑀡𑁄, 𑀆𑀬𑀢𑀺𑀁 𑀪𑀯𑀸𑀪𑀺𑀦𑀺𑀧𑁆𑀨𑀢𑁆𑀢𑀺𑀬𑀸 𑀦𑀺𑀯𑀢𑁆𑀢𑀦𑁂𑀦 𑀚𑀭𑀸𑀬 𑀫𑀘𑁆𑀘𑀼𑀦𑁄 𑀘 𑀧𑀝𑀺𑀲𑁂𑀥𑀓𑁄. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀁 𑀥𑀫𑁆𑀫𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑀺 𑀢𑀲𑁆𑀲 𑀓𑀢𑀺𑀧𑀬𑁂 𑀕𑀼𑀡𑁂 𑀯𑀺𑀪𑀸𑀯𑁂𑀢𑀼𑀁 ‘‘𑀤𑀼𑀓𑁆𑀔𑀽𑀧𑀲𑀫𑀦𑁄 𑀲𑀺𑀯𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀢𑀸𑀬 𑀅𑀝𑁆𑀞𑀗𑁆𑀕𑀺𑀓𑁄, 𑀦𑀺𑀩𑁆𑀩𑀸𑀦𑀕𑀯𑁂𑀲𑀦𑀝𑁆𑀞𑁂𑀦 𑀫𑀕𑁆𑀕𑁄 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀯𑀽𑀧𑀲𑀫𑀦𑀝𑁆𑀞𑁂𑀦 ¶ 𑀤𑀼𑀓𑁆𑀔𑀯𑀽𑀧𑀲𑀫𑀦𑁄, 𑀔𑁂𑀫𑀝𑁆𑀞𑁂𑀦 𑀲𑀺𑀯𑁄.

𑀬𑀣𑀸 𑀇𑀢𑁄 𑀩𑀸𑀳𑀺𑀭𑀓𑀲𑀫𑀬𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀯𑁂𑀤𑀺𑀢𑀢𑁆𑀢𑀸 𑀓𑀫𑁆𑀫𑀯𑀺𑀧𑀸𑀓𑁄 𑀯𑀺𑀧𑀮𑁆𑀮𑀸𑀲𑁄 𑀲𑀺𑀬𑀸𑀢𑀺 𑀏𑀯𑀁 𑀅𑀯𑀺𑀧𑀮𑁆𑀮𑀸𑀲𑁂𑀢𑁆𑀯𑀸 𑀧𑀝𑀺𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀫𑁆𑀫𑀁 𑀓𑀫𑁆𑀫𑀦𑁆𑀢𑀺 𑀯𑀺𑀧𑀸𑀓𑀜𑁆𑀘 𑀯𑀺𑀧𑀸𑀓𑀢𑁄 ¶ 𑀜𑀢𑁆𑀯𑀸𑀦 𑀧𑀼𑀩𑁆𑀩𑀪𑀸𑀕𑀜𑀸𑀡𑁂𑀦 𑀚𑀸𑀦𑀦𑀳𑁂𑀢𑀼 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀸𑀳𑀸𑀦𑀁 𑀯𑀺𑀥𑀫𑀦𑁂𑀦 𑀬𑀸𑀣𑀸𑀯𑀢𑁄 𑀆𑀮𑁄𑀓𑀤𑀲𑁆𑀲𑀦𑁄 𑀢𑀓𑁆𑀓𑀭𑀲𑁆𑀲 𑀮𑁄𑀓𑀼𑀢𑁆𑀢𑀭𑀜𑀸𑀡𑀸𑀮𑁄𑀓𑀲𑁆𑀲 𑀤𑀲𑁆𑀲𑀦𑁄. 𑀓𑁂𑀦𑀘𑀺 𑀓𑀜𑁆𑀘𑀺 𑀓𑀤𑀸𑀘𑀺𑀧𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀫𑀳𑀸𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀲𑀢𑁆𑀢𑁂 𑀕𑀫𑁂𑀢𑀺 𑀘𑀸𑀢𑀺 𑀫𑀳𑀸𑀔𑁂𑀫𑀗𑁆𑀕𑀫𑁄, 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁄 𑀲𑀦𑁆𑀢𑁄, 𑀅𑀓𑀼𑀧𑁆𑀧𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀸𑀧𑀦𑁂𑀦 𑀧𑀭𑀺𑀬𑁄𑀲𑀸𑀦𑀪𑀤𑁆𑀤𑀓𑁄 𑀲𑀼𑀤𑁂𑀲𑀺𑀢𑁄 𑀘𑀓𑁆𑀔𑀼𑀫𑀢𑀸𑀢𑀺 𑀬𑁄𑀚𑀦𑀸.

𑀏𑀯𑀁 ¶ 𑀣𑁂𑀭𑁄 𑀦𑀸𑀦𑀸𑀦𑀬𑁂𑀳𑀺 𑀅𑀭𑀺𑀬𑀥𑀫𑁆𑀫𑀁 𑀧𑀲𑀁𑀲𑀦𑁆𑀢𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀕𑀢𑀪𑀸𑀯𑀁 𑀅𑀜𑁆𑀜𑀸𑀧𑀤𑁂𑀲𑁂𑀦 𑀧𑀓𑀸𑀲𑁂𑀲𑀺.

𑀫𑀺𑀕𑀚𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀚𑁂𑀦𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀚𑀸𑀢𑀺𑀫𑀤𑁂𑀦 𑀫𑀢𑁆𑀢𑁄𑀳𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀚𑁂𑀦𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀚𑁂𑀦𑁆𑀢𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀚𑀸𑀢𑀺𑀫𑀤𑁂𑀦 𑀪𑁄𑀕𑀇𑀲𑁆𑀲𑀭𑀺𑀬𑀭𑀽𑀧𑀫𑀤𑁂𑀦 𑀘 𑀫𑀢𑁆𑀢𑁄 𑀅𑀜𑁆𑀜𑁂 𑀳𑀻𑀴𑁂𑀦𑁆𑀢𑁄 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀫𑁆𑀧𑀺 𑀅𑀧𑀘𑀺𑀢𑀺𑀁 𑀅𑀓𑀭𑁄𑀦𑁆𑀢𑁄 𑀫𑀸𑀦𑀣𑀤𑁆𑀥𑁄 𑀯𑀺𑀘𑀭𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑁄 ‘‘𑀲𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀧𑀞𑀫𑀁 𑀆𑀮𑀧𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀆𑀮𑀧𑀺𑀲𑁆𑀲𑀸𑀫𑀺; 𑀦𑁄 𑀘𑁂, 𑀦𑀸𑀮𑀧𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀪𑀕𑀯𑀢𑀺 𑀧𑀞𑀫𑀁 𑀅𑀦𑀸𑀮𑀧𑀦𑁆𑀢𑁂 𑀲𑀬𑀫𑁆𑀧𑀺 𑀫𑀸𑀦𑁂𑀦 𑀅𑀦𑀸𑀮𑀧𑀺𑀢𑁆𑀯𑀸 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀢𑀁 𑀪𑀕𑀯𑀸 𑁋

‘‘𑀦 𑀫𑀸𑀦𑀁 𑀩𑁆𑀭𑀸𑀳𑁆𑀫𑀡 𑀲𑀸𑀥𑀼, 𑀅𑀢𑁆𑀣𑀺𑀓𑀲𑁆𑀲𑀻𑀥 𑀩𑁆𑀭𑀸𑀳𑁆𑀫𑀡;

𑀬𑁂𑀦 𑀅𑀢𑁆𑀣𑁂𑀦 𑀆𑀕𑀘𑁆𑀙𑀺, 𑀢𑀫𑁂𑀯𑀫𑀦𑀼𑀩𑁆𑀭𑀽𑀳𑀬𑁂’’𑀢𑀺. (𑀲𑀁. 𑀦𑀺. 𑁧.𑁨𑁦𑁧) 𑁋

𑀕𑀸𑀣𑀸𑀬 ¶ 𑀅𑀚𑁆𑀛𑀪𑀸𑀲𑀺. 𑀲𑁄 ‘‘𑀘𑀺𑀢𑁆𑀢𑀁 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀸𑀢𑀻’’𑀢𑀺 𑀅𑀪𑀺𑀧𑁆𑀧𑀲𑀦𑁆𑀦𑁄 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀧𑀭𑀫𑀦𑀺𑀧𑀘𑁆𑀘𑀸𑀓𑀸𑀭𑀁 𑀓𑀢𑁆𑀯𑀸 𑁋

‘‘𑀓𑁂𑀲𑀼 𑀦 𑀫𑀸𑀦𑀁 𑀓𑀬𑀺𑀭𑀸𑀣, 𑀓𑁂𑀲𑀼 𑀘𑀲𑁆𑀲 𑀲𑀕𑀸𑀭𑀯𑁄;

𑀓𑁆𑀬𑀲𑁆𑀲 𑀅𑀧𑀘𑀺𑀢𑀸 𑀅𑀲𑁆𑀲𑀼, 𑀓𑁆𑀬𑀲𑁆𑀲𑀼 𑀲𑀸𑀥𑀼 𑀲𑀼𑀧𑀽𑀚𑀺𑀢𑀸’’𑀢𑀺. 𑁋

𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑁋

‘‘𑀫𑀸𑀢𑀭𑀺 ¶ 𑀧𑀺𑀢𑀭𑀺 𑀘𑀸𑀧𑀺, 𑀅𑀣𑁄 𑀚𑁂𑀝𑁆𑀞𑀫𑁆𑀳𑀺 𑀪𑀸𑀢𑀭𑀺;

𑀆𑀘𑀭𑀺𑀬𑁂 𑀘𑀢𑀼𑀢𑁆𑀣𑀫𑁆𑀳𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀘.

‘‘𑀢𑁂𑀲𑀼 ¶ 𑀦 𑀫𑀸𑀦𑀁 𑀓𑀬𑀺𑀭𑀸𑀣, 𑀢𑁂𑀲𑀼 𑀅𑀲𑁆𑀲 𑀲𑀕𑀸𑀭𑀯𑁄;

𑀓𑁆𑀬𑀲𑁆𑀲 𑀅𑀧𑀘𑀺𑀢𑀸 𑀅𑀲𑁆𑀲𑀼, 𑀢𑁆𑀬𑀲𑁆𑀲𑀼 𑀲𑀸𑀥𑀼 𑀲𑀼𑀧𑀽𑀚𑀺𑀢𑀸.

‘‘𑀅𑀭𑀳𑀦𑁆𑀢𑁂 𑀲𑀻𑀢𑀺𑀪𑀽𑀢𑁂, 𑀓𑀢𑀓𑀺𑀘𑁆𑀘𑁂 𑀅𑀦𑀸𑀲𑀯𑁂;

𑀦𑀺𑀳𑀘𑁆𑀘 𑀫𑀸𑀦𑀁 𑀅𑀢𑁆𑀣𑀤𑁆𑀥𑁄, 𑀢𑁂 𑀦𑀫𑀲𑁆𑀲𑁂 𑀅𑀦𑀼𑀢𑁆𑀢𑀭𑁂’’𑀢𑀺. (𑀲𑀁. 𑀦𑀺. 𑁧.𑁨𑁦𑁧) 𑁋

𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀢𑀸𑀬 𑀤𑁂𑀲𑀦𑀸𑀬 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁨𑁩.

‘‘𑀚𑀸𑀢𑀺𑀫𑀤𑁂𑀦 𑀫𑀢𑁆𑀢𑁄𑀳𑀁, 𑀪𑁄𑀕𑀇𑀲𑁆𑀲𑀭𑀺𑀬𑁂𑀦 𑀘;

𑀲𑀡𑁆𑀞𑀸𑀦𑀯𑀡𑁆𑀡𑀭𑀽𑀧𑁂𑀦, 𑀫𑀤𑀫𑀢𑁆𑀢𑁄 𑀅𑀘𑀸𑀭𑀺𑀳𑀁.

𑁪𑁨𑁪.

‘‘𑀦𑀸𑀢𑁆𑀢𑀦𑁄 𑀲𑀫𑀓𑀁 𑀓𑀜𑁆𑀘𑀺, 𑀅𑀢𑀺𑀭𑁂𑀓𑀜𑁆𑀘 𑀫𑀜𑁆𑀜𑀺𑀲𑀁;

𑀅𑀢𑀺𑀫𑀸𑀦𑀳𑀢𑁄 𑀩𑀸𑀮𑁄, 𑀧𑀢𑁆𑀣𑀤𑁆𑀥𑁄 𑀉𑀲𑁆𑀲𑀺𑀢𑀤𑁆𑀥𑀚𑁄.

𑁪𑁨𑁫.

‘‘𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀅𑀜𑁆𑀜𑁂𑀧𑀺 𑀕𑀭𑀼𑀲𑀫𑁆𑀫𑀢𑁂;

𑀦 𑀓𑀜𑁆𑀘𑀺 𑀅𑀪𑀺𑀯𑀸𑀤𑁂𑀲𑀺𑀁, 𑀫𑀸𑀦𑀢𑁆𑀣𑀤𑁆𑀥𑁄 𑀅𑀦𑀸𑀤𑀭𑁄.

𑁪𑁨𑁬.

‘‘𑀤𑀺𑀲𑁆𑀯𑀸 𑀯𑀺𑀦𑀸𑀬𑀓𑀁 𑀅𑀕𑁆𑀕𑀁, 𑀲𑀸𑀭𑀣𑀻𑀦𑀁 𑀯𑀭𑀼𑀢𑁆𑀢𑀫𑀁;

𑀢𑀧𑀦𑁆𑀢𑀫𑀺𑀯 𑀆𑀤𑀺𑀘𑁆𑀘𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁪𑁨𑁭.

‘‘𑀫𑀸𑀦𑀁 𑀫𑀤𑀜𑁆𑀘 𑀙𑀟𑁆𑀟𑁂𑀢𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀲𑀺𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁪𑁨𑁮.

‘‘𑀅𑀢𑀺𑀫𑀸𑀦𑁄 𑀘 𑀑𑀫𑀸𑀦𑁄, 𑀧𑀳𑀻𑀦𑀸 𑀲𑀼𑀲𑀫𑀽𑀳𑀢𑀸;

𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀲𑀩𑁆𑀩𑁂 𑀫𑀸𑀦𑀯𑀺𑀥𑀸 𑀳𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀚𑀸𑀢𑀺𑀫𑀤𑁂𑀦 𑀫𑀢𑁆𑀢𑁄𑀳𑀦𑁆𑀢𑀺 𑀅𑀳𑀁 𑀉𑀤𑀺𑀘𑁆𑀘𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, ‘‘𑀦 𑀫𑀸𑀤𑀺𑀲𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀅𑀜𑁆𑀜𑁄 𑀅𑀢𑁆𑀣𑀻’’𑀢𑀺 𑀓𑀼𑀮𑀫𑀸𑀦𑁂𑀦 𑀫𑀢𑁆𑀢𑁄 𑀫𑀸𑀦𑀣𑀤𑁆𑀥𑁄 𑀅𑀘𑀸𑀭𑀺𑀦𑁆𑀢𑀺 𑀬𑁄𑀚𑀦𑀸. 𑀪𑁄𑀕𑀇𑀲𑁆𑀲𑀭𑀺𑀬𑁂𑀦 𑀘𑀸𑀢𑀺 𑀯𑀺𑀪𑀯𑁂𑀦 𑀆𑀥𑀺𑀧𑀘𑁆𑀘𑁂𑀦 𑀘 𑀳𑁂𑀢𑀼𑀪𑀽𑀢𑁂𑀦 𑀪𑁄𑀕𑀲𑀫𑁆𑀧𑀤𑀜𑁆𑀘 𑀇𑀲𑁆𑀲𑀭𑀺𑀬𑀲𑀫𑁆𑀧𑀤𑀜𑁆𑀘 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀫𑀤𑁂𑀦 𑀫𑀢𑁆𑀢𑁄 𑀅𑀳𑀁 𑀅𑀘𑀸𑀭𑀺𑀦𑁆𑀢𑀺 𑀬𑁄𑀚𑀦𑀸. 𑀲𑀡𑁆𑀞𑀸𑀦𑀯𑀡𑁆𑀡𑀭𑀽𑀧𑁂𑀦𑀸𑀢𑀺 𑀲𑀡𑁆𑀞𑀸𑀦𑀁 ¶ 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺, 𑀯𑀡𑁆𑀡𑁄 ¶ 𑀑𑀤𑀸𑀢𑀲𑀸𑀫𑀢𑀸𑀤𑀺𑀙𑀯𑀺𑀲𑀫𑁆𑀧𑀢𑁆𑀢𑀺, 𑀭𑀽𑀧𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑁄𑀪𑀸. 𑀇𑀥𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀤𑀫𑀢𑁆𑀢𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑁂𑀦𑀧𑀺 𑀫𑀤𑁂𑀦 𑀫𑀢𑁆𑀢𑁄.

𑀦𑀸𑀢𑁆𑀢𑀦𑁄 ¶ 𑀲𑀫𑀓𑀁 𑀓𑀜𑁆𑀘𑀻𑀢𑀺 𑀅𑀢𑁆𑀢𑀦𑁄 𑀲𑀫𑀓𑀁 𑀲𑀤𑀺𑀲𑀁 𑀚𑀸𑀢𑀺𑀆𑀤𑀻𑀳𑀺 𑀲𑀫𑀸𑀦𑀁 𑀅𑀢𑀺𑀭𑁂𑀓𑀁 𑀯𑀸 𑀓𑀜𑁆𑀘𑀺 𑀦 𑀫𑀜𑁆𑀜𑀺𑀲𑀁 𑀦 𑀫𑀜𑁆𑀜𑀺𑀁, 𑀫𑀬𑀸 𑀲𑀫𑀸𑀦𑀫𑁆𑀧𑀺 𑀦 𑀫𑀜𑁆𑀜𑀺𑀁, 𑀓𑀼𑀢𑁄 𑀅𑀥𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑀺𑀫𑀸𑀦𑀳𑀢𑁄 𑀩𑀸𑀮𑁄𑀢𑀺 𑀩𑀸𑀮𑁄 𑀅𑀳𑀁 𑀢𑀢𑁄 𑀩𑀸𑀮𑀪𑀸𑀯𑀢𑁄 𑀅𑀢𑀺𑀫𑀸𑀦𑁂𑀦 𑀔𑀢𑀽𑀧𑀳𑀢𑀓𑀼𑀲𑀮𑀸𑀘𑀸𑀭𑁄, 𑀢𑀢𑁄 𑀏𑀯 𑀧𑀢𑁆𑀣𑀤𑁆𑀥𑁄 𑀉𑀲𑁆𑀲𑀺𑀢𑀤𑁆𑀥𑀚𑁄 𑀣𑀫𑁆𑀪𑀯𑀲𑁂𑀦 𑀕𑀭𑀽𑀦𑀫𑁆𑀧𑀺 𑀦𑀺𑀧𑀘𑁆𑀘𑀓𑀸𑀭𑀲𑁆𑀲 𑀅𑀓𑀭𑀡𑀢𑁄 𑀪𑀼𑀲𑀁 𑀣𑀤𑁆𑀥𑁄 𑀅𑀦𑁄𑀦𑀫𑀦𑀣𑀤𑁆𑀥𑀚𑀸𑀢𑁄 𑀉𑀲𑁆𑀲𑀺𑀢𑀫𑀸𑀦𑀤𑁆𑀥𑀚𑁄.

𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀫𑀸𑀢𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑁂𑀢𑀺 𑀚𑁂𑀝𑁆𑀞𑀪𑀸𑀢𑀼𑀆𑀤𑀺𑀓𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀘. 𑀕𑀭𑀼𑀲𑀫𑁆𑀫𑀢𑁂𑀢𑀺 𑀕𑀭𑀽𑀢𑀺 𑀲𑀫𑁆𑀫𑀢𑁂 𑀕𑀭𑀼𑀝𑁆𑀞𑀸𑀦𑀺𑀬𑁂. 𑀅𑀦𑀸𑀤𑀭𑁄𑀢𑀺 𑀆𑀤𑀭𑀭𑀳𑀺𑀢𑁄.

𑀤𑀺𑀲𑁆𑀯𑀸 𑀯𑀺𑀦𑀸𑀬𑀓𑀁 𑀅𑀕𑁆𑀕𑀦𑁆𑀢𑀺 𑀏𑀯𑀁 𑀫𑀸𑀦𑀣𑀤𑁆𑀥𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁄 𑀲𑀬𑀫𑁆𑀪𑀼𑀢𑀸𑀬 𑀦𑀸𑀬𑀓𑀪𑀸𑀯𑀢𑁄 𑀘 𑀯𑀺𑀦𑀸𑀬𑀓𑀁. 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑁂𑀝𑁆𑀞𑀪𑀸𑀯𑀢𑁄 𑀅𑀕𑁆𑀕𑀁. 𑀧𑀼𑀭𑀺𑀲𑀤𑀫𑁆𑀫𑀸𑀦𑀁 𑀅𑀘𑁆𑀘𑀦𑁆𑀢𑀢𑀸𑀬 𑀤𑀫𑀦𑀢𑁄 𑀲𑀸𑀭𑀣𑀻𑀦𑀁 𑀯𑀭𑀼𑀢𑁆𑀢𑀫𑀁, 𑀅𑀢𑀺𑀯𑀺𑀬 𑀉𑀢𑁆𑀢𑀫𑀁 𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀑𑀪𑀸𑀲𑁂𑀦 𑀆𑀤𑀺𑀘𑁆𑀘𑀫𑀺𑀯 𑀢𑀧𑀦𑁆𑀢𑀁, 𑀑𑀪𑀸𑀲𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀦𑁆𑀢𑀚𑁆𑀚𑀺𑀢𑁄 ‘‘𑀅𑀳𑀫𑁂𑀯 𑀲𑁂𑀝𑁆𑀞𑁄, 𑀅𑀜𑁆𑀜𑁂 𑀳𑀻𑀦𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀁 𑀪𑁄𑀕𑀫𑀤𑀸𑀤𑀺𑀫𑀤𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀧𑀳𑀸𑀬 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀲𑀺𑀦𑁆𑀢𑀺 𑀬𑁄𑀚𑀦𑀸. 𑀓𑀣𑀁 𑀧𑀦𑀸𑀬𑀁 𑀫𑀸𑀦𑀣𑀤𑁆𑀥𑁄 𑀲𑀫𑀸𑀦𑁄 𑀲𑀢𑁆𑀣𑀼 𑀤𑀲𑁆𑀲𑀦𑀫𑀢𑁆𑀢𑁂𑀦 𑀫𑀸𑀦𑀁 𑀧𑀳𑀸𑀲𑀻𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀢𑁆𑀣𑀼 𑀤𑀲𑁆𑀲𑀦𑀫𑀢𑁆𑀢𑁂𑀦 𑀫𑀸𑀦𑀁 𑀦 𑀧𑀳𑀸𑀲𑀺 ‘‘𑀦 𑀫𑀸𑀦𑀁, 𑀩𑁆𑀭𑀸𑀳𑁆𑀫𑀡, 𑀲𑀸𑀥𑀽’’𑀢𑀺𑀆𑀤𑀺𑀓𑀸𑀬 𑀧𑀦 𑀤𑁂𑀲𑀦𑀸𑀬 𑀫𑀸𑀦𑀁 𑀧𑀳𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀸𑀦𑀁 𑀫𑀤𑀜𑁆𑀘 𑀙𑀟𑁆𑀟𑁂𑀢𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸. 𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀲𑀺’’𑀦𑁆𑀢𑀺. 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸𑀢𑀺 𑀘 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀅𑀳𑀫𑁂𑀯 ¶ 𑀲𑁂𑀝𑁆𑀞𑁄’’𑀢𑀺 𑀧𑀯𑀢𑁆𑀢𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄. ‘‘𑀇𑀫𑁂 𑀧𑀦 𑀦𑀺𑀳𑀻𑀦𑀸’’𑀢𑀺 𑀅𑀜𑁆𑀜𑁂 𑀳𑀻𑀦𑀢𑁄 𑀤𑀳𑀦𑁆𑀢𑀲𑁆𑀲 𑀫𑀸𑀦𑁄 ‘‘𑀑𑀫𑀸𑀦𑁄’’𑀢𑀺 𑀯𑀤𑀦𑁆𑀢𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀧𑀦 𑀅𑀜𑁆𑀜𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀢𑁄 𑀤𑀳𑀦𑁆𑀢𑀲𑁆𑀲 𑀧𑀯𑀢𑁆𑀢𑁄 𑀲𑁂𑀬𑁆𑀬𑀫𑀸𑀦𑁄 𑀅𑀢𑀺𑀫𑀸𑀦𑁄. ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑁄 𑀳𑀻𑀦𑀫𑀸𑀦𑁄 𑀑𑀫𑀸𑀦𑁄. 𑀧𑀳𑀻𑀦𑀸 𑀲𑀼𑀲𑀫𑀽𑀳𑀢𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀧𑀳𑀻𑀦𑀸 𑀳𑀼𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑁂𑀦 𑀲𑀼𑀝𑁆𑀞𑀼 𑀲𑀫𑀼𑀕𑁆𑀖𑀸𑀝𑀺𑀢𑀸. 𑀅𑀲𑁆𑀫𑀺𑀫𑀸𑀦𑁄𑀢𑀺 ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀔𑀦𑁆𑀥𑁂 ‘‘𑀅𑀳’’𑀦𑁆𑀢𑀺 ¶ 𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄. 𑀲𑀩𑁆𑀩𑁂𑀢𑀺 𑀦 𑀓𑁂𑀯𑀮𑀁 𑀅𑀢𑀺𑀫𑀸𑀦𑀑𑀫𑀸𑀦𑀅𑀲𑁆𑀫𑀺𑀫𑀸𑀦𑀸 𑀏𑀯, 𑀅𑀣 𑀔𑁄 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑀫𑀸𑀦𑀸𑀤𑀬𑁄 𑀦𑀯𑀯𑀺𑀥𑀸 𑀅𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀸 𑀘 𑀲𑀩𑁆𑀩𑁂 𑀫𑀸𑀦𑀯𑀺𑀥𑀸 𑀫𑀸𑀦𑀓𑁄𑀝𑁆𑀞𑀸𑀲𑀸 𑀳𑀢𑀸 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑀸𑀢𑀺.

𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀚𑁂𑀦𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀤𑀸 ¶ 𑀦𑀯𑁄 𑀧𑀩𑁆𑀩𑀚𑀺𑀢𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀸𑀮𑀸𑀓𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀺𑀔𑀺𑀁 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀫𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑁄 𑀘 𑀉𑀧𑀸𑀲𑀓𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑀲𑁆𑀲 𑀘 𑀢𑀢𑁄 𑀧𑀼𑀩𑁆𑀩𑁂 𑀚𑀸𑀢𑀸𑀚𑀸𑀢𑀸 𑀤𑀸𑀭𑀓𑀸 𑀫𑀭𑀺𑀁𑀲𑀼. 𑀢𑁂𑀦 𑀲𑁄 ‘‘𑀲𑀘𑀸𑀳𑀁 𑀇𑀤𑀸𑀦𑀺 𑀏𑀓𑀁 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀅𑀬𑁆𑀬𑀲𑁆𑀲 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀲𑁄 𑀘 𑀤𑀲𑀫𑀸𑀲𑀘𑁆𑀘𑀬𑁂𑀦 𑀚𑀸𑀢𑁄 𑀅𑀭𑁄𑀕𑁄𑀬𑁂𑀯 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑁂𑀦𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀅𑀳𑁄𑀲𑀺, 𑀢𑀁 𑀧𑀺𑀢𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁄 𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀣𑁂𑀭𑀁 𑀉𑀧𑀝𑁆𑀞𑀳𑀦𑁆𑀢𑁄 ‘‘𑀧𑀸𑀦𑀻𑀬𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀖𑀝𑀁 𑀆𑀤𑀸𑀬 𑀇𑀤𑁆𑀥𑀺𑀬𑀸 𑀅𑀦𑁄𑀢𑀢𑁆𑀢𑀤𑀳𑀁 𑀅𑀕𑀫𑀸𑀲𑀺. 𑀅𑀣𑁂𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀦𑀸𑀕𑀭𑀸𑀚𑀸 𑀅𑀦𑁄𑀢𑀢𑁆𑀢𑀤𑀳𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀉𑀧𑀭𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀢𑁆𑀯𑀸 𑀲𑀼𑀫𑀦𑀲𑁆𑀲 𑀧𑀸𑀦𑀻𑀬𑀁 𑀕𑀳𑁂𑀢𑀼𑀁 𑀑𑀓𑀸𑀲𑀁 𑀦 𑀤𑁂𑀢𑀺. 𑀲𑀼𑀫𑀦𑁄 𑀕𑀭𑀼𑀴𑀭𑀽𑀧𑀁 𑀕𑀳𑁂𑀢𑁆𑀯𑀸 𑀢𑀁 𑀦𑀸𑀕𑀭𑀸𑀚𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀉𑀤𑁆𑀤𑀺𑀲𑁆𑀲 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺. 𑀢𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀲𑀸𑀭𑀺𑀧𑀼𑀢𑁆𑀢, 𑀇𑀫𑀁 𑀧𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀢𑀲𑁆𑀲 𑀕𑀼𑀡𑁂 𑀅𑀪𑀸𑀲𑀺. 𑀅𑀣 𑀲𑀼𑀫𑀦𑀢𑁆𑀣𑁂𑀭𑁄 𑁋

𑁪𑁨𑁯.

‘‘𑀬𑀤𑀸 𑀦𑀯𑁄 𑀧𑀩𑁆𑀩𑀚𑀺𑀢𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄;

𑀇𑀤𑁆𑀥𑀺𑀬𑀸 𑀅𑀪𑀺𑀪𑁄𑀢𑁆𑀯𑀸𑀦, 𑀧𑀦𑁆𑀦𑀕𑀺𑀦𑁆𑀤𑀁 𑀫𑀳𑀺𑀤𑁆𑀥𑀺𑀓𑀁.

𑁪𑁩𑁦.

‘‘𑀉𑀧𑀚𑁆𑀛𑀸𑀬𑀲𑁆𑀲 𑀉𑀤𑀓𑀁, 𑀅𑀦𑁄𑀢𑀢𑁆𑀢𑀸 𑀫𑀳𑀸𑀲𑀭𑀸;

𑀆𑀳𑀭𑀸𑀫𑀺 𑀢𑀢𑁄 𑀤𑀺𑀲𑁆𑀯𑀸, 𑀫𑀁 𑀲𑀢𑁆𑀣𑀸 𑀏𑀢𑀤𑀩𑁆𑀭𑀯𑀺.

𑁪𑁩𑁧.

‘‘𑀲𑀸𑀭𑀺𑀧𑀼𑀢𑁆𑀢 𑀇𑀫𑀁 𑀧𑀲𑁆𑀲, 𑀆𑀕𑀘𑁆𑀙𑀦𑁆𑀢𑀁 𑀓𑀼𑀫𑀸𑀭𑀓𑀁;

𑀉𑀤𑀓𑀓𑀼𑀫𑁆𑀪𑀫𑀸𑀤𑀸𑀬, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁.

𑁪𑁩𑁨.

‘‘𑀧𑀸𑀲𑀸𑀤𑀺𑀓𑁂𑀦 ¶ 𑀯𑀢𑁆𑀢𑁂𑀦, 𑀓𑀮𑁆𑀬𑀸𑀡𑀇𑀭𑀺𑀬𑀸𑀧𑀣𑁄;

𑀲𑀸𑀫𑀡𑁂𑀭𑁄𑀦𑀼𑀭𑀼𑀤𑁆𑀥𑀲𑁆𑀲, 𑀇𑀤𑁆𑀥𑀺𑀬𑀸 𑀘 𑀯𑀺𑀲𑀸𑀭𑀤𑁄.

𑁪𑁩𑁩.

‘‘𑀆𑀚𑀸𑀦𑀻𑀬𑁂𑀦 𑀆𑀚𑀜𑁆𑀜𑁄, 𑀲𑀸𑀥𑀼𑀦𑀸 𑀲𑀸𑀥𑀼𑀓𑀸𑀭𑀺𑀢𑁄;

𑀯𑀺𑀦𑀻𑀢𑁄 𑀅𑀦𑀼𑀭𑀼𑀤𑁆𑀥𑁂𑀦, 𑀓𑀢𑀓𑀺𑀘𑁆𑀘𑁂𑀦 𑀲𑀺𑀓𑁆𑀔𑀺𑀢𑁄.

𑁪𑁩𑁪.

‘‘𑀲𑁄 ¶ 𑀧𑀢𑁆𑀯𑀸 𑀧𑀭𑀫𑀁 𑀲𑀦𑁆𑀢𑀺𑀁, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀓𑀼𑀧𑁆𑀧𑀢𑀁;

𑀲𑀸𑀫𑀡𑁂𑀭𑁄 𑀲 𑀲𑀼𑀫𑀦𑁄, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀇𑀘𑁆𑀙𑀢𑀻’’𑀢𑀺. 𑁋

𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀯𑀲𑁂𑀦 𑀙 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀆𑀤𑀺𑀢𑁄 𑀤𑁆𑀯𑁂 𑀕𑀸𑀣𑀸 𑀲𑀼𑀫𑀦𑀢𑁆𑀣𑁂𑀭𑁂𑀦𑁂𑀯 𑀪𑀸𑀲𑀺𑀢𑀸, 𑀇𑀢𑀭𑀸 𑀘𑀢𑀲𑁆𑀲𑁄 𑀢𑀁 𑀧𑀲𑀁𑀲𑀦𑁆𑀢𑁂𑀦 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑀸. 𑀢𑀸 𑀲𑀩𑁆𑀩𑀸 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀲𑀼𑀫𑀦𑀢𑁆𑀣𑁂𑀭𑁄 𑀧𑀘𑁆𑀙𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀯𑀲𑁂𑀦 𑀅𑀪𑀸𑀲𑀺. 𑀢𑀢𑁆𑀣 𑀧𑀦𑁆𑀦𑀕𑀺𑀦𑁆𑀤𑀦𑁆𑀢𑀺 𑀦𑀸𑀕𑀭𑀸𑀚𑀁. 𑀢𑀢𑁄𑀢𑀺 𑀢𑀢𑁆𑀣, 𑀬𑀤𑀸 𑀦𑀯𑁄 𑀧𑀩𑁆𑀩𑀚𑀺𑀢𑁄 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄 𑀇𑀤𑁆𑀥𑀺𑀩𑀮𑁂𑀦 𑀫𑀳𑀺𑀤𑁆𑀥𑀺𑀓𑀁 𑀦𑀸𑀕𑀭𑀸𑀚𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀢𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀸𑀦𑀻𑀬𑀁 𑀆𑀳𑀭𑀸𑀫𑀺, 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄.

𑀫𑀁 ¶ 𑀉𑀤𑁆𑀤𑀺𑀲𑁆𑀲 𑀫𑀬𑁆𑀳𑀁 𑀲𑀢𑁆𑀣𑀸 𑀏𑀢𑀤𑀩𑁆𑀭𑀯𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀸𑀭𑀺𑀧𑀼𑀢𑁆𑀢, 𑀇𑀫𑀁 𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀦𑁆𑀢𑀺 𑀯𑀺𑀲𑀬𑀚𑁆𑀛𑀢𑁆𑀢𑀪𑀽𑀢𑁂𑀦 𑀅𑀕𑁆𑀕𑀨𑀮𑀲𑀫𑀸𑀥𑀺𑀦𑀸 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀁.

𑀧𑀸𑀲𑀸𑀤𑀺𑀓𑁂𑀦 𑀯𑀢𑁆𑀢𑁂𑀦𑀸𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀧𑀲𑀸𑀤𑀸𑀯𑀳𑁂𑀦 𑀆𑀘𑀸𑀭𑀯𑀢𑁆𑀢𑁂𑀦, 𑀓𑀭𑀡𑀢𑁆𑀣𑁂 𑀇𑀤𑀁 𑀓𑀭𑀡𑀯𑀘𑀦𑀁. 𑀓𑀮𑁆𑀬𑀸𑀡𑀇𑀭𑀺𑀬𑀸𑀧𑀣𑁄𑀢𑀺 𑀲𑀫𑁆𑀧𑀦𑁆𑀦𑀺𑀭𑀺𑀬𑀸𑀧𑀣𑁄. 𑀧𑀸𑀲𑀸𑀤𑀺𑀓𑁂𑀦 𑀯𑀢𑁆𑀢𑁂𑀦𑀸𑀢𑀺 𑀯𑀸 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀲𑀫𑀡𑀲𑁆𑀲 𑀪𑀸𑀯𑁄 𑀲𑀸𑀫𑀡𑁆𑀬𑀁, 𑀲𑀸𑀫𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀢𑁆𑀣𑀁 𑀈𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀸𑀫𑀡𑁂𑀭𑁄, 𑀲𑀫𑀡𑀼𑀤𑁆𑀤𑁂𑀲𑁄. 𑀇𑀤𑁆𑀥𑀺𑀬𑀸 𑀘 𑀯𑀺𑀲𑀸𑀭𑀤𑁄𑀢𑀺 𑀇𑀤𑁆𑀥𑀺𑀬𑀫𑁆𑀧𑀺 𑀩𑁆𑀬𑀢𑁆𑀢𑁄 𑀲𑀼𑀓𑀼𑀲𑀮𑁄. 𑀆𑀚𑀸𑀦𑀻𑀬𑁂𑀦𑀸𑀢𑀺 𑀧𑀼𑀭𑀺𑀲𑀸𑀚𑀸𑀦𑀻𑀬𑁂𑀦. 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀦𑀁 𑀲𑀸𑀥𑀦𑀢𑁄 𑀲𑀸𑀥𑀼𑀦𑀸 𑀓𑀢𑀓𑀺𑀘𑁆𑀘𑁂𑀦 𑀅𑀦𑀼𑀭𑀼𑀤𑁆𑀥𑁂𑀦 𑀲𑀸𑀥𑀼 𑀉𑀪𑀬𑀳𑀺𑀢𑀲𑀸𑀥𑀓𑁄, 𑀲𑀼𑀝𑁆𑀞𑀼 𑀯𑀸 𑀆𑀚𑀜𑁆𑀜𑁄 𑀓𑀸𑀭𑀺𑀢𑁄 𑀤𑀫𑀺𑀢𑁄. 𑀅𑀕𑁆𑀕𑀯𑀺𑀚𑁆𑀚𑀸𑀬 𑀯𑀺𑀦𑀻𑀢𑁄 𑀅𑀲𑁂𑀓𑁆𑀔𑀪𑀸𑀯𑀸𑀧𑀸𑀤𑀦𑁂𑀦 𑀲𑀺𑀓𑁆𑀔𑀺𑀢𑁄 𑀲𑀺𑀓𑁆𑀔𑀸𑀧𑀺𑀢𑁄𑀢𑀺 𑀅𑀢𑁆𑀣𑁄.

𑀲𑁄 𑀲𑀸𑀫𑀡𑁂𑀭𑁄 𑀲𑀼𑀫𑀦𑁄 𑀧𑀭𑀫𑀁 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀥𑀺𑀕𑀦𑁆𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀅𑀓𑀼𑀧𑁆𑀧𑀢𑀁 𑀅𑀭𑀳𑀢𑁆𑀢𑀨𑀮𑀁 𑀅𑀧𑁆𑀧𑀺𑀘𑁆𑀙𑀪𑀸𑀯𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀕𑀢𑀢𑁆𑀢𑀸 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀫𑀁 ‘‘𑀅𑀬𑀁 𑀔𑀻𑀡𑀸𑀲𑀯𑁄’’𑀢𑀺 𑀯𑀸 ‘‘𑀙𑀴𑀪𑀺𑀜𑁆𑀜𑁄’’𑀢𑀺 𑀯𑀸 𑀓𑁄𑀘𑀺𑀧𑀺 𑀫𑀸 𑀚𑀸𑀦𑁂𑀬𑁆𑀬𑀸𑀢𑀺 𑀇𑀘𑁆𑀙𑀢𑀺 𑀅𑀪𑀺𑀓𑀗𑁆𑀔𑀢𑀻𑀢𑀺.

𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀦𑁆𑀳𑀸𑀢𑀓𑀫𑀼𑀦𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄𑀢𑀺𑀆𑀤𑀺𑀓𑀸 ¶ ¶ 𑀆𑀬𑀲𑁆𑀫𑀢𑁄 𑀦𑁆𑀳𑀸𑀢𑀓𑀫𑀼𑀦𑀺𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀻𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀦𑁆𑀳𑀸𑀢𑀓𑀮𑀓𑁆𑀔𑀡𑀬𑁄𑀕𑁂𑀦 𑀦𑁆𑀳𑀸𑀢𑀓𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑁂 𑀞𑀸𑀦𑁂 𑀅𑀭𑀜𑁆𑀜𑀸𑀬𑀢𑀦𑁂 𑀦𑀻𑀯𑀸𑀭𑁂𑀳𑀺 𑀬𑀸𑀧𑁂𑀦𑁆𑀢𑁄 𑀅𑀕𑁆𑀕𑀺𑀁 𑀧𑀭𑀺𑀘𑀸𑀭𑀬𑀫𑀸𑀦𑁄 𑀯𑀲𑀢𑀺. 𑀢𑀲𑁆𑀲 𑀲𑀢𑁆𑀣𑀸 𑀖𑀝𑁂 𑀯𑀺𑀬 𑀧𑀤𑀻𑀧𑀁 𑀳𑀤𑀬𑀩𑁆𑀪𑀦𑁆𑀢𑀭𑁂 𑀧𑀚𑁆𑀚𑀮𑀦𑁆𑀢𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀅𑀲𑁆𑀲𑀫𑀧𑀤𑀁 𑀅𑀕𑀫𑀸𑀲𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀅𑀢𑁆𑀢𑀦𑁄 ¶ 𑀉𑀧𑀓𑀧𑁆𑀧𑀦𑀦𑀺𑀬𑀸𑀫𑁂𑀦 𑀆𑀳𑀸𑀭𑀁 𑀉𑀧𑀦𑁂𑀲𑀺. 𑀢𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀏𑀯𑀁 𑀢𑀬𑁄 𑀤𑀺𑀯𑀲𑁂 𑀤𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑁂 ‘‘𑀪𑀕𑀯𑀸 𑀢𑀼𑀫𑁆𑀳𑁂 𑀧𑀭𑀫𑀲𑀼𑀔𑀼𑀫𑀸𑀮𑀸, 𑀓𑀣𑀁 𑀇𑀫𑀺𑀦𑀸 𑀆𑀳𑀸𑀭𑁂𑀦 𑀬𑀸𑀧𑁂𑀣𑀸’’𑀢𑀺 𑀆𑀳. 𑀢𑀲𑁆𑀲 𑀲𑀢𑁆𑀣𑀸 𑀅𑀭𑀺𑀬𑀲𑀦𑁆𑀢𑁄𑀲𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀸𑀧𑀲𑁄 𑀢𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀪𑀕𑀯𑀸 𑀢𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀕𑀢𑁄. 𑀲𑁄 𑀧𑀦 𑀢𑀢𑁆𑀣𑁂𑀯 𑀯𑀺𑀳𑀭𑀦𑁆𑀢𑁄 𑀅𑀧𑀭𑀪𑀸𑀕𑁂 𑀯𑀸𑀢𑀸𑀩𑀸𑀥𑁂𑀦 𑀉𑀧𑀤𑁆𑀤𑀼𑀢𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀼𑀔𑁂𑀦 𑀢𑀲𑁆𑀲 𑀯𑀺𑀳𑀸𑀭𑀁 𑀧𑀼𑀘𑁆𑀙𑀦𑁆𑀢𑁄 𑁋

𑁪𑁩𑁫.

‘‘𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄 𑀢𑁆𑀯𑀁, 𑀯𑀺𑀳𑀭𑀁 𑀓𑀸𑀦𑀦𑁂 𑀯𑀦𑁂;

𑀧𑀯𑀺𑀤𑁆𑀥𑀕𑁄𑀘𑀭𑁂 𑀮𑀽𑀔𑁂, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻’’𑀢𑀺. 𑁋 𑀕𑀸𑀣𑀫𑀸𑀳; 𑀅𑀣 𑀣𑁂𑀭𑁄 𑁋

𑁪𑁩𑁬.

‘‘𑀧𑀻𑀢𑀺𑀲𑀼𑀔𑁂𑀦 𑀯𑀺𑀧𑀼𑀮𑁂𑀦, 𑀨𑀭𑀺𑀢𑁆𑀯𑀸𑀦 𑀲𑀫𑀼𑀲𑁆𑀲𑀬𑀁;

𑀮𑀽𑀔𑀫𑁆𑀧𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁪𑁩𑁭.

‘‘𑀪𑀸𑀯𑁂𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀛𑀸𑀦𑀲𑁄𑀔𑀼𑀫𑁆𑀫𑀲𑀫𑁆𑀧𑀦𑁆𑀦𑁄, 𑀯𑀺𑀳𑀭𑀺𑀲𑁆𑀲𑀁 𑀅𑀦𑀸𑀲𑀯𑁄.

𑁪𑁩𑁮.

‘‘𑀯𑀺𑀧𑁆𑀧𑀫𑀼𑀢𑁆𑀢𑀁 𑀓𑀺𑀮𑁂𑀲𑁂𑀳𑀺, 𑀲𑀼𑀤𑁆𑀥𑀘𑀺𑀢𑁆𑀢𑀁 𑀅𑀦𑀸𑀯𑀺𑀮𑀁;

𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀁 𑀅𑀦𑀸𑀲𑀯𑁄.

𑁪𑁩𑁯.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑁂 𑀫𑁂 𑀯𑀺𑀚𑁆𑀚𑀺𑀁𑀲𑀼 𑀆𑀲𑀯𑀸;

𑀲𑀩𑁆𑀩𑁂 𑀅𑀲𑁂𑀲𑀸 𑀉𑀘𑁆𑀙𑀺𑀦𑁆𑀦𑀸, 𑀦 𑀘 𑀉𑀧𑁆𑀧𑀚𑁆𑀚𑀭𑁂 𑀧𑀼𑀦.

𑁪𑁪𑁦.

‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸;

𑀤𑀼𑀓𑁆𑀔𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀇𑀫𑀸𑀳𑀺 𑀲𑁂𑀲𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀲𑀢𑁆𑀣𑀼 𑀧𑀯𑁂𑀤𑁂𑀲𑀺.

𑀢𑀢𑁆𑀣 ¶ 𑀛𑀸𑀦𑀲𑁄𑀔𑀼𑀫𑁆𑀫𑀲𑀫𑁆𑀧𑀦𑁆𑀦𑁄𑀢𑀺 𑀛𑀸𑀦𑀲𑀼𑀔𑀼𑀫𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀛𑀸𑀦𑀲𑀼𑀔𑀼𑀫𑀁 𑀦𑀸𑀫 𑀅𑀭𑀽𑀧𑀚𑁆𑀛𑀸𑀦𑀁, 𑀢𑀲𑁆𑀫𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀅𑀢𑁆𑀢𑀦𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀧𑀭𑁂 𑀧𑀦𑀸𑀳𑀼 𑁋 ‘‘𑀲𑁄𑀔𑀼𑀫𑁆𑀫𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀨𑀮𑁂𑀲𑀼 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 ¶ 𑀅𑀥𑀺𑀧𑁆𑀧𑁂𑀢𑀸, 𑀢𑀢𑁄 𑀛𑀸𑀦𑀕𑁆𑀕𑀳𑀡𑁂𑀦 ¶ 𑀅𑀢𑁆𑀢𑀦𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀢𑀁 𑀯𑀺𑀪𑀸𑀯𑁂𑀢𑀻’’𑀢𑀺. 𑀯𑀺𑀧𑁆𑀧𑀫𑀼𑀢𑁆𑀢𑀁 𑀓𑀺𑀮𑁂𑀲𑁂𑀳𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀬𑀸 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀁, 𑀢𑀢𑁄 𑀏𑀯 𑀲𑀼𑀤𑁆𑀥𑀘𑀺𑀢𑁆𑀢𑀁, 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀢𑀸𑀬 𑀅𑀦𑀸𑀯𑀺𑀮𑀁, 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀫𑁂𑀯 𑀯𑀤𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀫𑁂𑀯 𑀘 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻𑀢𑀺.

𑀦𑁆𑀳𑀸𑀢𑀓𑀫𑀼𑀦𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀩𑁆𑀭𑀳𑁆𑀫𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀓𑁆𑀓𑁄𑀥𑀲𑁆𑀲𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀩𑁆𑀭𑀳𑁆𑀫𑀤𑀢𑁆𑀢𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀚𑁂𑀢𑀯𑀦𑀫𑀳𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑀁 𑀏𑀓𑀤𑀺𑀯𑀲𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀅𑀓𑁆𑀓𑁄𑀲𑀺. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸𑀧𑀺 𑀢𑀼𑀡𑁆𑀳𑀻𑀪𑀽𑀢𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺𑀬𑁂𑀯, 𑀩𑁆𑀭𑀸𑀳𑁆𑀫𑀡𑁄 𑀧𑀼𑀦𑀧𑀺 𑀅𑀓𑁆𑀓𑁄𑀲𑀺𑀬𑁂𑀯. 𑀫𑀦𑀼𑀲𑁆𑀲𑀸 𑀏𑀯𑀁 𑀅𑀓𑁆𑀓𑁄𑀲𑀦𑁆𑀢𑀫𑁆𑀧𑀺 𑀦𑀁 ‘‘𑀅𑀬𑀁 𑀣𑁂𑀭𑁄 𑀦 𑀓𑀺𑀜𑁆𑀘𑀺 𑀪𑀡𑀢𑀻’’𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

𑁪𑁪𑁧.

‘‘𑀅𑀓𑁆𑀓𑁄𑀥𑀲𑁆𑀲 𑀓𑀼𑀢𑁄 𑀓𑁄𑀥𑁄, 𑀤𑀦𑁆𑀢𑀲𑁆𑀲 𑀲𑀫𑀚𑀻𑀯𑀺𑀦𑁄;

𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁪𑁪𑁨.

‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

𑁪𑁪𑁩.

‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺.

𑁪𑁪𑁪.

‘‘𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀁 𑀢𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀚𑀦𑀸 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸. (𑀲𑀁. 𑀦𑀺. 𑁧.𑁧𑁮𑁯);

𑁪𑁪𑁫.

‘‘𑀉𑀧𑁆𑀧𑀚𑁆𑀚𑁂 ¶ ¶ ¶ 𑀢𑁂 𑀲𑀘𑁂 𑀓𑁄𑀥𑁄, 𑀆𑀯𑀚𑁆𑀚 𑀓𑀓𑀘𑀽𑀧𑀫𑀁;

𑀉𑀧𑁆𑀧𑀚𑁆𑀚𑁂 𑀘𑁂 𑀭𑀲𑁂 𑀢𑀡𑁆𑀳𑀸, 𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀲𑀭.

𑁪𑁪𑁬.

‘‘𑀲𑀘𑁂 𑀥𑀸𑀯𑀢𑀺 𑀘𑀺𑀢𑁆𑀢𑀁 𑀢𑁂, 𑀓𑀸𑀫𑁂𑀲𑀼 𑀘 𑀪𑀯𑁂𑀲𑀼 𑀘;

𑀔𑀺𑀧𑁆𑀧𑀁 𑀦𑀺𑀕𑁆𑀕𑀡𑁆𑀳 𑀲𑀢𑀺𑀬𑀸, 𑀓𑀺𑀝𑁆𑀞𑀸𑀤𑀁 𑀯𑀺𑀬 𑀤𑀼𑀧𑁆𑀧𑀲𑀼’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀓𑁆𑀓𑁄𑀥𑀲𑁆𑀲𑀸𑀢𑀺 𑀓𑁄𑀥𑀭𑀳𑀺𑀢𑀲𑁆𑀲 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀓𑁄𑀥𑀲𑁆𑀲. 𑀓𑀼𑀢𑁄 𑀓𑁄𑀥𑁄𑀢𑀺 𑀓𑀼𑀢𑁄 𑀦𑀸𑀫 𑀳𑁂𑀢𑀼 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀲𑁆𑀲𑀸𑀢𑀺 𑀉𑀢𑁆𑀢𑀫𑁂𑀦 𑀤𑀫𑁂𑀦 𑀅𑀕𑁆𑀕𑀫𑀕𑁆𑀕𑀤𑀫𑀣𑁂𑀦 𑀤𑀦𑁆𑀢𑀲𑁆𑀲. 𑀲𑀫𑀚𑀻𑀯𑀺𑀦𑁄𑀢𑀺 𑀓𑀸𑀬𑀯𑀺𑀲𑀫𑀸𑀤𑀻𑀦𑀺 𑀲𑀩𑁆𑀩𑀲𑁄 𑀧𑀳𑀸𑀬 𑀓𑀸𑀬𑀲𑀫𑀸𑀤𑀻𑀦𑀁 𑀯𑀲𑁂𑀦 𑀲𑀫𑀁 𑀚𑀻𑀯𑀦𑁆𑀢𑀲𑁆𑀲 𑀲𑀢𑁆𑀢𑀝𑁆𑀞𑀸𑀦𑀺𑀬𑁂𑀦 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑁆𑀫𑀤𑁂𑀯 𑀯𑀢𑁆𑀢𑀦𑁆𑀢𑀲𑁆𑀲. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀲𑀫𑁆𑀫𑀸 𑀅𑀜𑁆𑀜𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀓𑁂 𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀲𑀩𑁆𑀩𑀸𑀲𑀯𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲. 𑀢𑀢𑁄 𑀏𑀯 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑀲𑁆𑀲. 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀦𑁄 𑀔𑀻𑀡𑀸𑀲𑀯𑀲𑁆𑀲 𑀓𑀼𑀢𑁄 𑀓𑁄𑀥𑁄𑀢𑀺 𑀅𑀜𑁆𑀜𑀸𑀧𑀤𑁂𑀲𑁂𑀦 𑀣𑁂𑀭𑁄 𑀅𑀢𑁆𑀢𑀦𑁄 𑀓𑁄𑀥𑀸𑀪𑀸𑀯𑀁 𑀢𑀲𑁆𑀲 𑀘 𑀓𑀸𑀭𑀡𑀸𑀦𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀓𑁄𑀥𑁂 𑀅𑀓𑁄𑀥𑁂 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 ‘‘𑀢𑀲𑁆𑀲𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀉𑀧𑀭𑀺 𑀓𑀼𑀤𑁆𑀥𑀁 𑀓𑀼𑀧𑀺𑀢𑀁 𑀧𑀼𑀕𑁆𑀕𑀮𑀁 𑀧𑀝𑀺𑀓𑀼𑀚𑁆𑀛𑀢𑀺, 𑀢𑀲𑁆𑀲𑁂𑀯 𑀢𑁂𑀦 𑀧𑀝𑀺𑀓𑀼𑀚𑁆𑀛𑀦𑀧𑀘𑁆𑀘𑀓𑁆𑀓𑁄𑀲𑀦𑀧𑀝𑀺𑀧𑁆𑀧𑀳𑀭𑀡𑀸𑀤𑀺𑀦𑀸 𑀧𑀸𑀧𑀺𑀬𑁄 𑀇𑀥𑀮𑁄𑀓𑁂 𑀯𑀺𑀜𑁆𑀜𑀽𑀕𑀭𑀳𑀸𑀤𑀺𑀯𑀲𑁂𑀦 𑀧𑀭𑀮𑁄𑀓𑁂 𑀦𑀺𑀭𑀬𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀅𑀪𑀤𑁆𑀤𑀓𑀢𑀭𑀁 𑀅𑀓𑀮𑁆𑀬𑀸𑀡𑀢𑀭𑀁 𑀳𑁄𑀢𑀺. 𑀓𑀼𑀚𑁆𑀛𑀦𑁂𑀦 𑀧𑀦 𑀅𑀓𑀼𑀤𑁆𑀥𑀲𑁆𑀲 𑀧𑀸𑀧𑀁 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘‘𑀬𑁄 𑀅𑀓𑀼𑀤𑁆𑀥𑀁 𑀧𑀝𑀺𑀓𑀼𑀤𑁆𑀥𑀁 𑀆𑀭𑀩𑁆𑀪 𑀓𑀼𑀚𑁆𑀛𑀢𑀻’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄𑀢𑀺 𑀬𑁄 𑀧𑀦 𑀓𑀼𑀤𑁆𑀥𑀁 𑀧𑀼𑀕𑁆𑀕𑀮𑀁 ‘‘𑀅𑀬𑀁 𑀓𑀼𑀤𑁆𑀥𑁄 𑀓𑁄𑀥𑀧𑀭𑁂𑀢𑁄’’𑀢𑀺 𑀜𑀢𑁆𑀯𑀸 𑀦 𑀧𑀝𑀺𑀓𑀼𑀚𑁆𑀛𑀢𑀺 𑀔𑀫𑀢𑀺, 𑀲𑁄 𑀤𑀼𑀚𑁆𑀚𑀬𑀁 𑀓𑀺𑀮𑁂𑀲𑀲𑀗𑁆𑀕𑀸𑀫𑀁 𑀚𑁂𑀢𑀺 𑀦𑀸𑀫. 𑀦 𑀓𑁂𑀯𑀮𑀜𑁆𑀘𑀲𑁆𑀲 𑀓𑀺𑀮𑁂𑀲𑀲𑀗𑁆𑀕𑀸𑀫𑀚𑀬𑁄 𑀏𑀯, 𑀅𑀣 𑀔𑁄 𑀉𑀪𑀬𑀳𑀺𑀢𑀧𑀝𑀺𑀧𑀢𑁆𑀢𑀺𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀪𑀺𑀦𑁆𑀦𑀫𑀢𑁆𑀣𑀁…𑀧𑁂… 𑀉𑀧𑀲𑀫𑁆𑀫𑀢𑀻’’𑀢𑀺. 𑀬𑁄 𑀧𑀭𑀁 𑀧𑀼𑀕𑁆𑀕𑀮𑀁 𑀲𑀗𑁆𑀓𑀼𑀧𑀺𑀢𑀁 𑀓𑀼𑀤𑁆𑀥𑀁 ‘‘𑀓𑁄𑀥𑀧𑀭𑁂𑀢𑁄’’𑀢𑀺 𑀜𑀢𑁆𑀯𑀸 𑀢𑀁 𑀫𑁂𑀢𑁆𑀢𑀸𑀬𑀦𑁆𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑁄 𑀯𑀸 𑀲𑀢𑁄 ¶ 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺 𑀔𑀫𑀢𑀺 𑀦 𑀧𑀝𑀺𑀧𑁆𑀨𑀭𑀢𑀺. 𑀲𑁄 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀉𑀪𑀬𑀮𑁄𑀓𑀲𑀼𑀔𑀸𑀯𑀳𑀁 𑀅𑀢𑁆𑀣𑀁 𑀳𑀺𑀢𑀁 𑀘𑀭𑀢𑀺.

𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀁 𑀢𑀦𑁆𑀢𑀺 𑀢𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀓𑁄𑀥𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀸𑀬 𑀢𑀺𑀓𑀺𑀘𑁆𑀙𑀦𑁆𑀢𑀁 𑀔𑀫𑀦𑁆𑀢𑀁 𑀧𑀼𑀕𑁆𑀕𑀮𑀁 𑀬𑁂 𑀚𑀦𑀸 𑀥𑀫𑁆𑀫𑀲𑁆𑀲 𑀅𑀭𑀺𑀬𑀸𑀘𑀸𑀭𑀥𑀫𑁆𑀫𑁂 𑀅𑀓𑀼𑀲𑀮𑀸, 𑀢𑁂 𑀩𑀸𑀮𑀸 ‘‘𑀅𑀬𑀁 𑀅𑀯𑀺𑀤𑁆𑀤𑀲𑀼 𑀬𑁄 𑀅𑀢𑁆𑀢𑀸𑀦𑀁 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀧𑀳𑀭𑀦𑁆𑀢𑀲𑁆𑀲 𑀓𑀺𑀜𑁆𑀘𑀺 𑀦 𑀓𑀭𑁄𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀺 ¶ , 𑀢𑀁 𑀢𑁂𑀲𑀁 𑀅𑀬𑁄𑀦𑀺𑀲𑁄 𑀫𑀜𑁆𑀜𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀺𑀓𑀺𑀘𑁆𑀙𑀦’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀺𑀓𑀺𑀘𑁆𑀙𑀦𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀣𑁂𑀭𑁂𑀦 𑀯𑀼𑀘𑁆𑀘𑀫𑀸𑀦𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀓𑁆𑀓𑁄𑀲𑀓𑀩𑁆𑀭𑀸𑀳𑁆𑀫𑀡𑁄 𑀲𑀁𑀯𑀺𑀕𑁆𑀕𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘 𑀳𑀼𑀢𑁆𑀯𑀸 𑀣𑁂𑀭𑀁 𑀔𑀫𑀸𑀧𑁂𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀣𑁂𑀭𑁄 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀦𑁆𑀢𑁄 ‘‘𑀇𑀫𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀸 𑀬𑀼𑀢𑁆𑀢𑀸’’𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀓𑁄𑀥𑀧𑀭𑀺𑀬𑀼𑀝𑁆𑀞𑀸𑀦𑀸𑀤𑀻𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀚𑁆𑀚𑁂 𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑁂 𑀢𑁂 𑀲𑀘𑁂𑀢𑀺 𑀲𑀘𑁂 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀘𑀺𑀭𑀧𑀭𑀺𑀘𑀬𑁄 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀯𑀽𑀧𑀲𑀫𑀸𑀬 𑁋

‘‘𑀉𑀪𑀢𑁄𑀤𑀡𑁆𑀟𑀓𑁂𑀦 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀓𑀓𑀘𑁂𑀦 𑀘𑁄𑀭𑀸 𑀑𑀘𑀭𑀓𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀑𑀓𑀦𑁆𑀢𑁂𑀬𑁆𑀬𑀼𑀁, 𑀢𑀢𑁆𑀭𑀸𑀧𑀺 𑀬𑁄 𑀫𑀦𑁄 𑀧𑀤𑀽𑀲𑁂𑀬𑁆𑀬, 𑀦 𑀫𑁂 𑀲𑁄 𑀢𑁂𑀦 𑀲𑀸𑀲𑀦𑀓𑀭𑁄’’𑀢𑀺 (𑀫. 𑀦𑀺. 𑁧.𑁨𑁩𑁨) 𑁋

𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀁 𑀓𑀓𑀘𑀽𑀧𑀫𑀁 𑀑𑀯𑀸𑀤𑀁 𑀆𑀯𑀚𑁆𑀚𑁂𑀳𑀺. 𑀉𑀧𑁆𑀧𑀚𑁆𑀚𑁂 𑀘𑁂 𑀭𑀲𑁂 𑀢𑀡𑁆𑀳𑀸𑀢𑀺 𑀲𑀘𑁂 𑀢𑁂 𑀫𑀥𑀼𑀭𑀸𑀤𑀺𑀪𑁂𑀤𑁂 𑀭𑀲𑁂 𑀢𑀡𑁆𑀳𑀸 𑀅𑀪𑀺𑀮𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀯𑀽𑀧𑀲𑀫𑀸𑀬 𑁋

‘‘𑀧𑀼𑀢𑁆𑀢𑀫𑀁𑀲𑀁 𑀚𑀸𑀬𑀫𑁆𑀧𑀢𑀺𑀓𑀸 𑀬𑀣𑀸 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀫𑁂𑀯 𑀔𑀸𑀤𑀺𑀁𑀲𑀼, 𑀦 𑀭𑀲𑀢𑀡𑁆𑀳𑀸𑀬 𑀏𑀯𑀁 𑀓𑀼𑀮𑀧𑀼𑀢𑁆𑀢𑁄𑀧𑀺 𑀧𑀩𑁆𑀩𑀚𑀺𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺…𑀧𑁂… 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺 (𑀲𑀁. 𑀦𑀺. 𑁨.𑁬𑁩 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑁋

𑀏𑀯𑀁 𑀯𑀼𑀢𑁆𑀢𑀁 𑀧𑀼𑀢𑁆𑀢𑀫𑀁𑀲𑀽𑀧𑀫𑁄𑀯𑀸𑀤𑀁 𑀲𑀭 𑀅𑀦𑀼𑀲𑁆𑀲𑀭.

𑀲𑀘𑁂 𑀥𑀸𑀯𑀢𑀺 𑀢𑁂 𑀘𑀺𑀢𑁆𑀢𑀦𑁆𑀢𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑁄 𑀢𑀯 𑀘𑀺𑀢𑁆𑀢𑀁 𑀓𑀸𑀫𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑀯𑀲𑁂𑀦, 𑀓𑀸𑀫𑀪𑀯𑀸𑀤𑀻𑀲𑀼 𑀪𑀯𑁂𑀲𑀼 𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀲𑀘𑁂 𑀥𑀸𑀯𑀢𑀺 𑀲𑀭𑀢𑀺 𑀚𑀯𑀢𑀺. 𑀔𑀺𑀧𑁆𑀧𑀁 𑀦𑀺𑀕𑁆𑀕𑀡𑁆𑀳 𑀲𑀢𑀺𑀬𑀸, 𑀓𑀺𑀝𑁆𑀞𑀸𑀤𑀁 ¶ 𑀯𑀺𑀬 𑀤𑀼𑀧𑁆𑀧𑀲𑀼𑀦𑁆𑀢𑀺 𑀢𑀣𑀸 𑀥𑀸𑀯𑀺𑀢𑀼𑀁 𑀅𑀤𑁂𑀦𑁆𑀢𑁄 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀓𑀺𑀝𑁆𑀞𑀸𑀤𑀁 𑀲𑀲𑁆𑀲𑀔𑀸𑀤𑀓𑀁 𑀤𑀼𑀧𑁆𑀧𑀲𑀼𑀁 𑀤𑀼𑀝𑁆𑀞𑀕𑁄𑀡𑀁 𑀬𑁄𑀢𑁆𑀢𑁂𑀦 𑀣𑀫𑁆𑀪𑁂 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺, 𑀏𑀯𑀁 𑀲𑀢𑀺𑀬𑀸 𑀲𑀢𑀺𑀬𑁄𑀢𑁆𑀢𑁂𑀦 𑀲𑀫𑁆𑀫𑀸𑀥𑀺𑀣𑀫𑁆𑀪𑁂 𑀩𑀦𑁆𑀥𑀦𑁆𑀢𑁄 𑀔𑀺𑀧𑁆𑀧𑀁 𑀲𑀻𑀖𑀫𑁂𑀯 𑀦𑀺𑀕𑁆𑀕𑀡𑁆𑀳, 𑀬𑀣𑀸 𑀓𑀺𑀮𑁂𑀲𑀯𑀺𑀕𑀫𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑀁 𑀳𑁄𑀢𑀺, 𑀢𑀣𑀸 𑀤𑀫𑁂𑀳𑀻𑀢𑀺. 𑀓𑁂𑀘𑀺 𑀧𑀦 ‘‘𑀣𑁂𑀭𑁄 𑀧𑀼𑀣𑀼𑀚𑁆𑀚𑀦𑁄𑀯 𑀳𑀼𑀢𑁆𑀯𑀸 𑀅𑀓𑁆𑀓𑁄𑀲𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀅𑀭𑀺𑀬𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑁄 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀸𑀦𑀁 𑀑𑀯𑀤𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀇𑀫𑀸𑀬𑁂𑀯 𑀕𑀸𑀣𑀸 𑀅𑀪𑀸𑀲𑀻’’𑀢𑀺 𑀯𑀤𑀦𑁆𑀢𑀺.

𑀩𑁆𑀭𑀳𑁆𑀫𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀲𑀺𑀭𑀺𑀫𑀡𑁆𑀟𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀲𑀺𑀭𑀺𑀫𑀡𑁆𑀟𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀁𑀲𑀼𑀫𑀸𑀭𑀕𑀺𑀭𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 ¶ 𑀲𑀺𑀭𑀺𑀫𑀡𑁆𑀟𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀪𑁂𑀲𑀓𑀮𑀸𑀯𑀦𑁂 𑀪𑀕𑀯𑀢𑀺 𑀯𑀺𑀳𑀭𑀦𑁆𑀢𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀦𑀺𑀤𑀸𑀦𑀼𑀤𑁆𑀤𑁂𑀲𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀉𑀧𑀥𑀸𑀭𑁂𑀦𑁆𑀢𑁄 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀅𑀦𑀸𑀯𑀺𑀓𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀉𑀧𑀭𑀽𑀧𑀭𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺, 𑀢𑁂𑀦𑀲𑁆𑀲 𑀦 𑀨𑀸𑀲𑀼 𑀳𑁄𑀢𑀺, 𑀆𑀯𑀺𑀓𑀢𑁆𑀯𑀸 𑀧𑀦 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀦𑁆𑀢𑀲𑁆𑀲 𑀨𑀸𑀲𑀼 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀅𑀳𑁄 𑀲𑀢𑁆𑀣𑀼 𑀲𑀸𑀲𑀦𑀁 𑀲𑀼𑀯𑀺𑀲𑀼𑀤𑁆𑀥’’𑀦𑁆𑀢𑀺 𑀮𑀤𑁆𑀥𑀧𑁆𑀧𑀲𑀸𑀤𑁄 𑀢𑀣𑀸 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑁂𑀦𑁆𑀢𑁄 𑁋

𑁪𑁪𑁭.

‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀺.

𑁪𑁪𑁮.

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 ¶ 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄 𑀲𑀤𑀸. (𑀲𑀁. 𑀦𑀺. 𑁧.𑁬𑁬);

𑁪𑁪𑁯.

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀧𑀭𑀺𑀓𑁆𑀔𑀺𑀢𑁆𑀢𑁄 𑀚𑀭𑀸𑀬 𑀘;

𑀳𑀜𑁆𑀜𑀢𑀺 𑀦𑀺𑀘𑁆𑀘𑀫𑀢𑁆𑀢𑀸𑀡𑁄, 𑀧𑀢𑁆𑀢𑀤𑀡𑁆𑀟𑁄𑀯 𑀢𑀓𑁆𑀓𑀭𑁄.

𑁪𑁫𑁦.

‘‘𑀆𑀕𑀘𑁆𑀙𑀦𑁆𑀢𑀕𑁆𑀕𑀺𑀔𑀦𑁆𑀥𑀸𑀯, 𑀫𑀘𑁆𑀘𑀼 𑀩𑁆𑀬𑀸𑀥𑀺 𑀚𑀭𑀸 𑀢𑀬𑁄;

𑀧𑀘𑁆𑀘𑀼𑀕𑁆𑀕𑀦𑁆𑀢𑀼𑀁 𑀩𑀮𑀁 𑀦𑀢𑁆𑀣𑀺, 𑀚𑀯𑁄 𑀦𑀢𑁆𑀣𑀺 𑀧𑀮𑀸𑀬𑀺𑀢𑀼𑀁.

𑁪𑁫𑁧.

‘‘𑀅𑀫𑁄𑀖𑀁 𑀤𑀺𑀯𑀲𑀁 𑀓𑀬𑀺𑀭𑀸, 𑀅𑀧𑁆𑀧𑁂𑀦 𑀩𑀳𑀼𑀓𑁂𑀦 𑀯𑀸;

𑀬𑀁 𑀬𑀁 𑀯𑀺𑀚𑀳𑀢𑁂 𑀭𑀢𑁆𑀢𑀺𑀁, 𑀢𑀤𑀽𑀦𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑁪𑁫𑁨.

‘‘𑀘𑀭𑀢𑁄 𑀢𑀺𑀝𑁆𑀞𑀢𑁄 𑀯𑀸𑀧𑀺, 𑀆𑀲𑀻𑀦𑀲𑀬𑀦𑀲𑁆𑀲 𑀯𑀸;

𑀉𑀧𑁂𑀢𑀺 𑀘𑀭𑀺𑀫𑀸 𑀭𑀢𑁆𑀢𑀺, 𑀦 𑀢𑁂 𑀓𑀸𑀮𑁄 𑀧𑀫𑀚𑁆𑀚𑀺𑀢𑀼’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀙𑀦𑁆𑀦𑀦𑁆𑀢𑀺 𑀙𑀸𑀤𑀺𑀢𑀁 𑀬𑀣𑀸𑀪𑀽𑀢𑀁 𑀅𑀯𑀺𑀯𑀝𑀁 𑀅𑀧𑁆𑀧𑀓𑀸𑀲𑀺𑀢𑀁 𑀤𑀼𑀘𑁆𑀘𑀭𑀺𑀢𑀁. 𑀅𑀢𑀺𑀯𑀲𑁆𑀲𑀢𑀻𑀢𑀺 𑀆𑀧𑀢𑁆𑀢𑀺𑀯𑀲𑁆𑀲𑀜𑁆𑀘𑁂𑀯 𑀓𑀺𑀮𑁂𑀲𑀯𑀲𑁆𑀲𑀜𑁆𑀘 𑀅𑀢𑀺𑀯𑀺𑀬 𑀯𑀲𑁆𑀲𑀢𑀺. 𑀆𑀧𑀢𑁆𑀢𑀺𑀬𑀸 𑀳𑀺 𑀙𑀸𑀤𑀦𑀁 𑀅𑀮𑀚𑁆𑀚𑀺𑀪𑀸𑀯𑀸𑀤𑀺𑀦𑀸 ¶ 𑀢𑀸𑀤𑀺𑀲𑁄𑀯, 𑀙𑀸𑀤𑀦𑁂𑀦 𑀢𑀢𑁄 𑀅𑀜𑁆𑀜𑀣𑀸𑀯 𑀧𑀼𑀦𑀧𑀺 𑀢𑀣𑀸𑀭𑀽𑀧𑀁 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀙𑀸𑀤𑀦𑀁 𑀯𑀲𑁆𑀲𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀯𑀺𑀯𑀝𑀦𑁆𑀢𑀺 𑀧𑀓𑀸𑀲𑀺𑀢𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀢𑀻𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀦 𑀯𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀲𑁆𑀲𑀦𑀜𑁆𑀘𑁂𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁄𑀥𑀺𑀢𑀢𑁆𑀢𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺, 𑀙𑀦𑁆𑀦𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑁆𑀲 𑀆𑀧𑀢𑁆𑀢𑀺𑀯𑀲𑁆𑀲𑀸𑀤𑀻𑀦𑀁 𑀅𑀢𑀺𑀯𑀲𑁆𑀲𑀦𑀢𑁄 𑀯𑀺𑀯𑀝𑀲𑁆𑀲 𑀘 𑀅𑀯𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀙𑀦𑁆𑀦𑀁 𑀯𑀺𑀯𑀭𑁂𑀣𑀸𑀢𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑁂𑀦 𑀙𑀸𑀤𑀦𑀸𑀥𑀺𑀧𑁆𑀧𑀸𑀬𑁂 𑀉𑀧𑁆𑀧𑀦𑁆𑀦𑁂𑀧𑀺 𑀢𑀁 ¶ 𑀅𑀦𑀦𑀼𑀯𑀢𑁆𑀢𑀺𑀢𑁆𑀯𑀸 𑀯𑀺𑀯𑀭𑁂𑀣 𑀆𑀯𑀺𑀓𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁂𑀬𑁆𑀬. 𑀏𑀯𑀦𑁆𑀢𑀺 𑀯𑀺𑀯𑀭𑀡𑁂𑀦 𑀬𑀣𑀸𑀥𑀫𑁆𑀫𑀁 𑀧𑀝𑀺𑀧𑀢𑁆𑀢𑀺𑀬𑀸. 𑀢𑀦𑁆𑀢𑀺 𑀢𑀁 𑀙𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀁. 𑀦𑀸𑀢𑀺𑀯𑀲𑁆𑀲𑀢𑀺 𑀆𑀧𑀢𑁆𑀢𑀺𑀯𑀲𑁆𑀲𑀁 𑀓𑀺𑀮𑁂𑀲𑀯𑀲𑁆𑀲𑀜𑁆𑀘 𑀦 𑀯𑀲𑁆𑀲𑀢𑀺, 𑀲𑀼𑀤𑁆𑀥𑀦𑁆𑀢𑁂 𑀧𑀼𑀕𑁆𑀕𑀮𑀁 𑀧𑀢𑀺𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 ¶ ‘‘𑀏𑀓𑀁𑀲𑁂𑀦 𑀲𑀻𑀖𑀁𑀬𑁂𑀯 𑀘 𑀅𑀢𑁆𑀢𑀸 𑀲𑁄𑀥𑁂𑀢𑀩𑁆𑀩𑁄, 𑀅𑀧𑁆𑀧𑀫𑀸𑀤𑁄 𑀓𑀸𑀢𑀩𑁆𑀩𑁄’’𑀢𑀺 𑀢𑀲𑁆𑀲 𑀓𑀸𑀭𑀡𑀁 𑀲𑀁𑀯𑁂𑀕𑀯𑀢𑁆𑀣𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄𑀢𑀺 𑀅𑀬𑀁 𑀲𑀩𑁆𑀩𑁄𑀧𑀺 𑀲𑀢𑁆𑀢𑀮𑁄𑀓𑁄 𑀘𑁄𑀭𑁄 𑀯𑀺𑀬 𑀘𑁄𑀭𑀖𑀸𑀢𑀓𑁂𑀦, 𑀲𑀩𑁆𑀩𑀯𑀝𑁆𑀝𑀦𑀺𑀧𑀸𑀢𑀺𑀦𑀸 𑀫𑀘𑁆𑀘𑀼𑀦𑀸 𑀫𑀭𑀡𑁂𑀦 𑀅𑀪𑀺𑀳𑀢𑁄, 𑀦 𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀘𑁆𑀘𑀢𑀺. 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄𑀢𑀺 𑀅𑀬𑀁 𑀮𑁄𑀓𑁄 𑀉𑀧𑁆𑀧𑀸𑀤𑀢𑁄 𑀉𑀤𑁆𑀥𑀁 𑀫𑀭𑀡𑀽𑀧𑀦𑀬𑀦𑀭𑀲𑀸𑀬 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄 𑀅𑀚𑁆𑀛𑁄𑀢𑁆𑀣𑀝𑁄, 𑀚𑀭𑀸𑀲𑀗𑁆𑀖𑀸𑀢𑀧𑀭𑀺𑀫𑀼𑀓𑁆𑀓𑁄𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄𑀢𑀺 𑀲𑀭𑀻𑀭𑀲𑁆𑀲 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑁂𑀦 𑀯𑀺𑀲𑀧𑀻𑀢𑀔𑀼𑀭𑀧𑁆𑀧𑁂𑀦 𑀯𑀺𑀬 𑀉𑀧𑀸𑀤𑀸𑀦𑀮𑀓𑁆𑀔𑀡𑁂𑀦 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀳𑀤𑀬𑀩𑁆𑀪𑀦𑁆𑀢𑀭𑁂 𑀑𑀕𑀸𑀴𑁆𑀳𑁄. 𑀢𑀡𑁆𑀳𑀸 𑀳𑀺 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄 𑀢𑀼𑀤𑀦𑀢𑁄 𑀤𑀼𑀭𑀼𑀤𑁆𑀥𑀸𑀭𑀢𑁄 𑀘 ‘‘𑀲𑀮𑁆𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄𑀢𑀺 𑀆𑀭𑀫𑁆𑀫𑀡𑀸𑀪𑀺𑀧𑀢𑁆𑀣𑀦𑀮𑀓𑁆𑀔𑀡𑀸𑀬 𑀇𑀘𑁆𑀙𑀸𑀬 𑀲𑀦𑁆𑀢𑀸𑀧𑀺𑀢𑁄. 𑀢𑀁 𑀯𑀺𑀲𑀬𑀁 𑀇𑀘𑁆𑀙𑀦𑁆𑀢𑁄 𑀳𑀺 𑀧𑀼𑀕𑁆𑀕𑀮𑁄 𑀬𑀤𑀺𑀘𑁆𑀙𑀺𑀢𑀁 𑀯𑀺𑀲𑀬𑀁 𑀮𑀪𑀦𑁆𑀢𑁄 𑀯𑀸 𑀅𑀮𑀪𑀦𑁆𑀢𑁄 𑀯𑀸 𑀢𑀸𑀬 𑀏𑀯 𑀅𑀦𑀼𑀤𑀳𑀦𑀮𑀓𑁆𑀔𑀡𑀸𑀬 𑀇𑀘𑁆𑀙𑀸𑀬 𑀲𑀦𑁆𑀢𑀢𑁆𑀢𑁄 𑀧𑀭𑀺𑀴𑀸𑀳𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁, 𑀇𑀤𑀜𑁆𑀘 𑀧𑀤𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁.

𑀧𑀭𑀺𑀓𑁆𑀔𑀺𑀢𑁆𑀢𑁄 𑀚𑀭𑀸𑀬 𑀘𑀸𑀢𑀺 𑀦 𑀓𑁂𑀯𑀮𑀁 𑀫𑀘𑁆𑀘𑀼𑀦𑀸 𑀅𑀩𑁆𑀪𑀸𑀳𑀢𑁄𑀬𑁂𑀯, 𑀅𑀣 𑀔𑁄 𑀚𑀭𑀸𑀬 𑀘 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀚𑀭𑀸𑀬 𑀲𑀫𑀯𑀭𑀼𑀤𑁆𑀥𑁄 𑀚𑀭𑀸𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁄, 𑀦 𑀢𑀁 𑀲𑀫𑀢𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄. 𑀳𑀜𑁆𑀜𑀢𑀺 𑀦𑀺𑀘𑁆𑀘𑀫𑀢𑁆𑀢𑀸𑀡𑁄𑀢𑀺 𑀅𑀢𑀸𑀡𑁄 𑀅𑀲𑀭𑀡𑁄 𑀳𑀼𑀢𑁆𑀯𑀸 𑀦𑀺𑀘𑁆𑀘𑀓𑀸𑀮𑀁 𑀚𑀭𑀸𑀫𑀭𑀡𑁂𑀳𑀺 𑀳𑀜𑁆𑀜𑀢𑀺 𑀯𑀺𑀩𑀸𑀥𑀻𑀬𑀢𑀺. 𑀬𑀣𑀸 𑀓𑀺𑀁? 𑀧𑀢𑁆𑀢𑀤𑀡𑁆𑀟𑁄𑀯 𑀢𑀓𑁆𑀓𑀭𑁄 𑀬𑀣𑀸 𑀢𑀓𑁆𑀓𑀭𑁄 𑀘𑁄𑀭𑁄 𑀓𑀢𑀸𑀧𑀭𑀸𑀥𑁄 𑀯𑀚𑁆𑀛𑀧𑁆𑀧𑀢𑁆𑀢𑁄 𑀅𑀢𑀸𑀡𑁄 𑀭𑀸𑀚𑀸𑀡𑀸𑀬 𑀳𑀜𑁆𑀜𑀢𑀺, 𑀏𑀯𑀫𑀬𑀁 𑀮𑁄𑀓𑁄 𑀚𑀭𑀸𑀫𑀭𑀡𑁂𑀳𑀻𑀢𑀺 𑀤𑀲𑁆𑀲𑁂𑀢𑀺.

𑀆𑀕𑀘𑁆𑀙𑀦𑁆𑀢𑀕𑁆𑀕𑀺𑀔𑀦𑁆𑀥𑀸𑀯𑀸𑀢𑀺 𑀫𑀳𑀸𑀯𑀦𑁂 𑀟𑀬𑁆𑀳𑀫𑀸𑀦𑁂 𑀢𑀁 𑀅𑀪𑀺𑀪𑀯𑀦𑁆𑀢𑀸 𑀫𑀳𑀦𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀯𑀺𑀬 𑀫𑀘𑁆𑀘𑀼 𑀩𑁆𑀬𑀸𑀥𑀺 𑀚𑀭𑀸𑀢𑀺 𑀇𑀫𑁂 𑀢𑀬𑁄 𑀅𑀦𑀼𑀤𑀳𑀦𑀝𑁆𑀞𑁂𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀇𑀫𑀁 𑀲𑀢𑁆𑀢𑀮𑁄𑀓𑀁 𑀅𑀪𑀺𑀪𑀯𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀺 ¶ , 𑀢𑁂𑀲𑀁 𑀧𑀦 𑀧𑀝𑀺𑀩𑀮𑁄 𑀳𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑀼𑀁 𑀅𑀪𑀺𑀪𑀯𑀺𑀢𑀼𑀁 𑀩𑀮𑀁 𑀉𑀲𑁆𑀲𑀸𑀳𑁄 𑀦𑀢𑁆𑀣𑀺, 𑀇𑀫𑀲𑁆𑀲 𑀮𑁄𑀓𑀲𑁆𑀲, 𑀚𑀯𑁄 𑀦𑀢𑁆𑀣𑀺 𑀧𑀮𑀸𑀬𑀺𑀢𑀼𑀁 𑀚𑀯𑀦𑁆𑀢𑁂𑀲𑀼, 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀲𑀼. 𑀬𑀢𑁆𑀣 𑀢𑁂 𑀦𑀸𑀪𑀺𑀪𑀯𑀦𑁆𑀢𑀺, 𑀧𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀮𑀸𑀬𑀺𑀢𑀼𑀫𑁆𑀧𑀺 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀚𑀗𑁆𑀖𑀸𑀚𑀯𑁄 𑀦𑀢𑁆𑀣𑀺, 𑀏𑀯𑀁 ¶ 𑀅𑀢𑁆𑀢𑀦𑀸 𑀅𑀲𑀫𑀢𑁆𑀣𑁄 𑀫𑀸𑀬𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀅𑀧𑁆𑀧𑀝𑀺𑀓𑀸𑀭𑁂 𑀢𑀺𑀯𑀺𑀥𑁂 𑀩𑀮𑀯𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑁂 𑀦𑀺𑀘𑁆𑀘𑀼𑀧𑀝𑁆𑀞𑀺𑀢𑁂 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀘𑁂? 𑀅𑀫𑁄𑀖𑀁 ¶ 𑀤𑀺𑀯𑀲𑀁 𑀓𑀬𑀺𑀭𑀸, 𑀅𑀧𑁆𑀧𑁂𑀦 𑀩𑀳𑀼𑀓𑁂𑀦 𑀯𑀸𑀢𑀺 𑀅𑀧𑁆𑀧𑁂𑀦 𑀅𑀦𑁆𑀢𑀫𑀲𑁄 𑀕𑀤𑁆𑀤𑀽𑀳𑀦𑀫𑀢𑁆𑀢𑀫𑁆𑀧𑀺 𑀓𑀸𑀮𑀁 𑀧𑀯𑀢𑁆𑀢𑀺𑀢𑁂𑀦 𑀩𑀳𑀼𑀓𑁂𑀦 𑀯𑀸 𑀲𑀓𑀮𑀁 𑀅𑀳𑁄𑀭𑀢𑁆𑀢𑀁 𑀧𑀯𑀢𑁆𑀢𑀺𑀢𑁂𑀦 𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑁂𑀦 𑀅𑀫𑁄𑀖𑀁 𑀅𑀯𑀜𑁆𑀛𑀁 𑀤𑀺𑀯𑀲𑀁 𑀓𑀭𑁂𑀬𑁆𑀬, 𑀬𑀲𑁆𑀫𑀸 𑀬𑀁 𑀬𑀁 𑀯𑀺𑀚𑀳𑀢𑁂 𑀭𑀢𑁆𑀢𑀺𑀁, 𑀢𑀤𑀽𑀦𑀁 𑀢𑀲𑁆𑀲 𑀚𑀻𑀯𑀺𑀢𑀁 𑀅𑀬𑀁 𑀲𑀢𑁆𑀢𑁄 𑀬𑀁 𑀬𑀁 𑀭𑀢𑁆𑀢𑀺𑀁 𑀯𑀺𑀚𑀳𑀢𑀺 𑀦𑀸𑀲𑁂𑀢𑀺 𑀔𑁂𑀧𑁂𑀢𑀺, 𑀢𑀤𑀽𑀦𑀁 𑀢𑁂𑀦 𑀊𑀦𑀁 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀚𑀻𑀯𑀺𑀢𑀁 𑀳𑁄𑀢𑀺. 𑀏𑀢𑁂𑀦 𑀭𑀢𑁆𑀢𑀺𑀓𑁆𑀔𑀬𑁄 𑀦𑀸𑀫 𑀚𑀻𑀯𑀺𑀢𑀓𑁆𑀔𑀬𑁄 𑀢𑀲𑁆𑀲 𑀅𑀦𑀺𑀯𑀢𑁆𑀢𑀦𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑁋

‘‘𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺. (𑀚𑀸. 𑁧.𑁧𑁫.𑁩𑁬𑁩);

𑀦 𑀓𑁂𑀯𑀮𑀁 𑀭𑀢𑁆𑀢𑀺𑀯𑀲𑁂𑀦𑁂𑀯, 𑀅𑀣 𑀔𑁄 𑀇𑀭𑀺𑀬𑀸𑀧𑀣𑀯𑀲𑁂𑀦𑀸𑀧𑀺 𑀚𑀻𑀯𑀺𑀢𑀓𑁆𑀔𑀬𑁄 𑀉𑀧𑀥𑀸𑀭𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀘𑀭𑀢𑁄’’𑀢𑀺𑀆𑀤𑀺. 𑀘𑀭𑀢𑁄𑀢𑀺 𑀕𑀘𑁆𑀙𑀦𑁆𑀢𑀲𑁆𑀲. 𑀢𑀺𑀝𑁆𑀞𑀢𑁄𑀢𑀺 𑀞𑀺𑀢𑀁 𑀓𑀧𑁆𑀧𑁂𑀦𑁆𑀢𑀲𑁆𑀲. 𑀆𑀲𑀻𑀦𑀲𑀬𑀦𑀲𑁆𑀲 𑀯𑀸𑀢𑀺 𑀆𑀲𑀻𑀦𑀲𑁆𑀲 𑀲𑀬𑀦𑀲𑁆𑀲 𑀯𑀸, 𑀦𑀺𑀲𑀺𑀦𑁆𑀦𑀲𑁆𑀲 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. ‘‘𑀆𑀲𑀻𑀤𑀦’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀢𑁆𑀣 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀉𑀧𑁂𑀢𑀺 𑀘𑀭𑀺𑀫𑀸 𑀭𑀢𑁆𑀢𑀻𑀢𑀺 𑀘𑀭𑀺𑀫𑀓𑀘𑀺𑀢𑁆𑀢𑀲𑀳𑀺𑀢𑀸 𑀭𑀢𑁆𑀢𑀺 𑀉𑀧𑀕𑀘𑁆𑀙𑀢𑀺, 𑀭𑀢𑁆𑀢𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁. 𑀕𑀫𑀦𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀇𑀭𑀺𑀬𑀸𑀧𑀣𑁂𑀦 𑀲𑀫𑀗𑁆𑀕𑀻𑀪𑀽𑀢𑀲𑁆𑀲 𑀘𑀭𑀺𑀫𑀓𑀸𑀮𑁄𑀬𑁂𑀯, 𑀢𑁂𑀦𑁂𑀯𑀲𑁆𑀲 𑀇𑀭𑀺𑀬𑀸𑀧𑀣𑀓𑁆𑀔𑀡𑀸 𑀚𑀻𑀯𑀺𑀢𑀁 𑀔𑁂𑀧𑁂𑀢𑁆𑀯𑀸 𑀏𑀯 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂 𑀓𑀸𑀮𑁄 𑀧𑀫𑀚𑁆𑀚𑀺𑀢𑀼𑀁 𑀦𑀸𑀬𑀁 𑀢𑀼𑀬𑁆𑀳𑀁 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑀼𑀁 𑀓𑀸𑀮𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀫𑀭𑀡𑀁 𑀦 𑀳𑁄𑀢𑀻’’𑀢𑀺 𑀅𑀯𑀺𑀤𑀺𑀢𑀢𑁆𑀢𑀸. 𑀯𑀼𑀢𑁆𑀢𑀁 𑀳𑀺 𑁋

‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢𑀁, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢𑀁;

𑀓𑀲𑀺𑀭𑀜𑁆𑀘 𑀧𑀭𑀺𑀢𑁆𑀢𑀜𑁆𑀘, 𑀢𑀜𑁆𑀘 𑀤𑀼𑀓𑁆𑀔𑁂𑀦 𑀲𑀁𑀬𑀼𑀢’’𑀦𑁆𑀢𑀺. (𑀲𑀼. 𑀦𑀺. 𑁫𑁭𑁯);

𑀢𑀲𑁆𑀫𑀸 𑀏𑀯𑀁 𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀦𑀼𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀺𑀭𑀺𑀫𑀡𑁆𑀟𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀤𑁆𑀯𑀺𑀧𑀸𑀤𑀓𑁄𑀢𑀺𑀆𑀤𑀺𑀓𑀸 ¶ ¶ 𑀆𑀬𑀲𑁆𑀫𑀢𑁄 𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀲𑁄𑀥𑁂𑀢𑁆𑀯𑀸 𑀧𑀝𑀺𑀧𑀸𑀓𑀢𑀺𑀓𑀁 𑀞𑀧𑁂𑀦𑁆𑀢𑀁 𑀏𑀓𑀁 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀩𑁆𑀩𑀼𑀤𑀁 𑀲𑁄𑀥𑁂𑀢𑁆𑀯𑀸 𑀧𑀝𑀺𑀧𑀸𑀓𑀢𑀺𑀓𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 ¶ 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀯 𑀪𑀕𑀯𑀢𑀺 𑀯𑁂𑀲𑀸𑀮𑀺𑀬𑀁 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑀓𑀸𑀫𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀜𑀸𑀢𑀓𑁂𑀳𑀺 𑀤𑀸𑀭𑀧𑀭𑀺𑀕𑁆𑀕𑀳𑀁 𑀓𑀸𑀭𑀺𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀯𑁂𑀲𑀸𑀮𑀺𑀁 𑀉𑀧𑀕𑀢𑁄 𑀜𑀸𑀢𑀺𑀖𑀭𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀦𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀧𑀢𑀺𑀯𑀺𑀬𑁄𑀕𑀤𑀼𑀓𑁆𑀔𑀺𑀢𑀸 𑀓𑀺𑀲𑀸 𑀤𑀼𑀩𑁆𑀩𑀡𑁆𑀡𑀸 𑀅𑀦𑀮𑀗𑁆𑀓𑀢𑀸 𑀓𑀺𑀮𑀺𑀝𑁆𑀞𑀯𑀢𑁆𑀣𑀦𑀺𑀯𑀲𑀦𑀸 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀓𑀭𑀼𑀡𑀸𑀧𑀼𑀭𑀲𑁆𑀲𑀭𑀁 𑀫𑁂𑀢𑁆𑀢𑀁 𑀉𑀧𑀝𑁆𑀞𑀸𑀧𑀬𑀢𑁄 𑀅𑀦𑀼𑀪𑀽𑀢𑀸𑀭𑀫𑁆𑀫𑀡𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀲𑀳𑀲𑀸 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀺.

𑀲𑁄 𑀢𑁂𑀦 𑀓𑀲𑀸𑀳𑀺 𑀢𑀸𑀴𑀺𑀢𑁄 𑀆𑀚𑀸𑀦𑀻𑀬𑁄 𑀯𑀺𑀬 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀢𑀸𑀯𑀤𑁂𑀯 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸, 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸, 𑀢𑀢𑁆𑀣 𑀧𑀝𑀺𑀮𑀤𑁆𑀥𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸, 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀲𑀲𑀼𑀭𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀥𑀻𑀢𑀭𑀁 𑀆𑀤𑀸𑀬 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀦𑀁 𑀉𑀧𑁆𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁄 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀢𑀲𑁆𑀲𑀸 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀪𑀸𑀯𑀁 𑀲𑀩𑁆𑀩𑀢𑁆𑀣 𑀘 𑀅𑀦𑀼𑀧𑀮𑀺𑀢𑁆𑀢𑀢𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁪𑁫𑁩.

‘‘𑀤𑁆𑀯𑀺𑀧𑀸𑀤𑀓𑁄𑀬𑀁 𑀅𑀲𑀼𑀘𑀺, 𑀤𑀼𑀕𑁆𑀕𑀦𑁆𑀥𑁄 𑀧𑀭𑀺𑀳𑀻𑀭𑀢𑀺;

𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑁄, 𑀯𑀺𑀲𑁆𑀲𑀯𑀦𑁆𑀢𑁄 𑀢𑀢𑁄 𑀢𑀢𑁄.

𑁪𑁫𑁪.

‘‘𑀫𑀺𑀕𑀁 𑀦𑀺𑀮𑀻𑀦𑀁 𑀓𑀽𑀝𑁂𑀦, 𑀩𑀴𑀺𑀲𑁂𑀦𑁂𑀯 𑀅𑀫𑁆𑀩𑀼𑀚𑀁;

𑀯𑀸𑀦𑀭𑀁 𑀯𑀺𑀬 𑀮𑁂𑀧𑁂𑀦, 𑀩𑀸𑀥𑀬𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀁.

𑁪𑁫𑁫.

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀧𑀜𑁆𑀘 𑀓𑀸𑀫𑀕𑀼𑀡𑀸 𑀏𑀢𑁂, 𑀇𑀢𑁆𑀣𑀺𑀭𑀽𑀧𑀲𑁆𑀫𑀺 𑀤𑀺𑀲𑁆𑀲𑀭𑁂.

𑁪𑁫𑁬.

‘‘𑀬𑁂 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀭𑀢𑁆𑀢𑀘𑀺𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸;

𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀁 𑀖𑁄𑀭𑀁, 𑀆𑀘𑀺𑀦𑀦𑁆𑀢𑀺 𑀧𑀼𑀦𑀩𑁆𑀪𑀯𑀁.

𑁪𑁫𑁭.

‘‘𑀬𑁄 ¶ ¶ 𑀘𑁂𑀢𑀸 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑁪𑁫𑁮.

‘‘𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀦𑀺𑀲𑁆𑀲𑀝𑁄 𑀲𑀩𑁆𑀩𑀓𑀸𑀫𑁂𑀳𑀺, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀤𑁆𑀯𑀺𑀧𑀸𑀤𑀓𑁄𑀢𑀺 𑀬𑀤𑀺𑀧𑀺 𑀅𑀧𑀸𑀤𑀓𑀸𑀤𑀬𑁄𑀧𑀺 𑀓𑀸𑀬𑀸 𑀅𑀲𑀼𑀘𑀻𑀬𑁂𑀯, 𑀅𑀥𑀺𑀓𑀸𑀭𑀯𑀲𑁂𑀦 𑀧𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀅𑀜𑁆𑀜𑁂 𑀅𑀲𑀼𑀘𑀺𑀪𑀽𑀢𑀸𑀧𑀺 𑀓𑀸𑀬𑀸 𑀮𑁄𑀡𑀫𑁆𑀩𑀺𑀮𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀪𑁄𑀚𑀦𑁂𑀧𑀺 𑀉𑀧𑀦𑀻𑀬𑀦𑁆𑀢𑀺, 𑀦 𑀧𑀦 𑀫𑀦𑀼𑀲𑁆𑀲𑀓𑀸𑀬𑁄, 𑀢𑀲𑁆𑀫𑀸 𑀅𑀲𑀼𑀘𑀺𑀢𑀭𑀲𑀪𑀸𑀯𑀫𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀺𑀧𑀸𑀤𑀓𑁄’’𑀢𑀺 𑀆𑀳. 𑀅𑀬𑀦𑁆𑀢𑀺 𑀢𑀤𑀸 𑀉𑀧𑀝𑁆𑀞𑀺𑀢𑀁 𑀇𑀢𑁆𑀣𑀺𑀭𑀽𑀧𑀁 ¶ 𑀲𑀦𑁆𑀥𑀸𑀬𑀸𑀳. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀺 𑀏𑀯, 𑀦 𑀏𑀢𑁆𑀣 𑀓𑀺𑀜𑁆𑀘𑀺𑀧𑀺 𑀲𑀼𑀘𑀻𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑀦𑁆𑀥𑁄 𑀧𑀭𑀺𑀳𑀻𑀭𑀢𑀻𑀢𑀺 𑀤𑀼𑀕𑁆𑀕𑀦𑁆𑀥𑁄 𑀲𑀫𑀸𑀦𑁄 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀲𑀗𑁆𑀔𑀭𑀺𑀢𑁆𑀯𑀸 𑀧𑀭𑀺𑀳𑀭𑀻𑀬𑀢𑀺. 𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑁄𑀢𑀺 𑀓𑁂𑀲𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀓𑀼𑀡𑀧𑀪𑀭𑀺𑀢𑁄. 𑀯𑀺𑀲𑁆𑀲𑀯𑀦𑁆𑀢𑁄 𑀢𑀢𑁄 𑀢𑀢𑁄𑀢𑀺 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺𑀲𑁆𑀲 𑀚𑁂𑀕𑀼𑀘𑁆𑀙𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀯𑀸𑀬𑀫𑀦𑁆𑀢𑀸𑀦𑀫𑁆𑀧𑀺 𑀢𑀁 𑀯𑀸𑀬𑀸𑀫𑀁 𑀦𑀺𑀧𑁆𑀨𑀮𑀁 𑀓𑀢𑁆𑀯𑀸 𑀦𑀯𑀳𑀺 𑀤𑁆𑀯𑀸𑀭𑁂𑀳𑀺 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺 𑀮𑁄𑀫𑀓𑀽𑀧𑁂𑀳𑀺 𑀘 𑀲𑁂𑀤𑀚𑀮𑁆𑀮𑀺𑀓𑀁 ‘𑀯𑀺𑀲𑁆𑀲𑀯𑀦𑁆𑀢𑁄𑀬𑁂𑀯 𑀧𑀭𑀺𑀳𑀻𑀭𑀢𑀻’𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀚𑁂𑀕𑀼𑀘𑁆𑀙𑁄𑀧𑀺 𑀲𑀫𑀸𑀦𑁄 𑀘𑀸𑀬𑀁 𑀓𑀸𑀬𑁄 𑀓𑀽𑀝𑀸𑀤𑀻𑀳𑀺 𑀯𑀺𑀬 𑀫𑀺𑀕𑀸𑀤𑀺𑀓𑁂 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀳𑀺 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁂 𑀯𑀜𑁆𑀘𑁂𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀕’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀺𑀕𑀁 𑀦𑀺𑀮𑀻𑀦𑀁 𑀓𑀽𑀝𑁂𑀦𑀸𑀢𑀺 𑀧𑀸𑀲𑀯𑀸𑀓𑀭𑀸𑀤𑀺𑀦𑀸 𑀓𑀽𑀝𑁂𑀦 𑀦𑀺𑀮𑀻𑀦𑀁, 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀫𑀺𑀕𑀁 𑀯𑀺𑀬 𑀦𑁂𑀲𑀸𑀤𑁄. 𑀯𑀓𑁆𑀔𑀫𑀸𑀦𑁄 𑀳𑀺 𑀇𑀯-𑀲𑀤𑁆𑀤𑁄 𑀇𑀥𑀸𑀧𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀩𑀴𑀺𑀲𑁂𑀦𑁂𑀯 𑀅𑀫𑁆𑀩𑀼𑀚𑀦𑁆𑀢𑀺 𑀅𑀫𑁆𑀩𑀼𑀚𑀁 𑀫𑀘𑁆𑀙𑀁 𑀆𑀫𑀺𑀲𑀩𑀤𑁆𑀥𑁂𑀦 𑀩𑀴𑀺𑀲𑁂𑀦 𑀯𑀺𑀬 𑀩𑀸𑀴𑀺𑀲𑀺𑀓𑁄. 𑀯𑀸𑀦𑀭𑀁 𑀯𑀺𑀬 𑀮𑁂𑀧𑁂𑀦𑀸𑀢𑀺 𑀭𑀼𑀓𑁆𑀔𑀲𑀺𑀮𑀸𑀤𑀻𑀲𑀼 𑀧𑀓𑁆𑀔𑀺𑀢𑁆𑀢𑁂𑀦 𑀫𑀓𑁆𑀓𑀝𑀮𑁂𑀧𑁂𑀦 𑀫𑀓𑁆𑀓𑀝𑀁 𑀯𑀺𑀬 𑀫𑀺𑀕𑀮𑀼𑀤𑁆𑀤𑁄 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀁 𑀯𑀜𑁆𑀘𑁂𑀦𑁆𑀢𑁄 𑀩𑀸𑀥𑁂𑀦𑁆𑀢𑀻𑀢𑀺.

𑀓𑁂 𑀧𑀦 𑀩𑀸𑀥𑁂𑀦𑁆𑀢𑀻𑀢𑀺 𑀆𑀳. ‘‘𑀭𑀽𑀧𑀸 𑀲𑀤𑁆𑀤𑀸’’𑀢𑀺𑀆𑀤𑀺. 𑀭𑀽𑀧𑀸𑀤𑀬𑁄 𑀳𑀺 𑀧𑀜𑁆𑀘 𑀓𑀸𑀫𑀓𑁄𑀝𑁆𑀞𑀸𑀲𑀸 𑀯𑀺𑀲𑁂𑀲𑀢𑁄 𑀯𑀺𑀲𑀪𑀸𑀕𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀸 𑀯𑀺𑀧𑀮𑁆𑀮𑀸𑀲𑀽𑀧𑀦𑀺𑀲𑁆𑀲𑀬𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀁 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸𑀦𑀁 𑀫𑀦𑁄 𑀭𑀫𑁂𑀦𑁆𑀢𑁄 𑀓𑀺𑀮𑁂𑀲𑀯𑀢𑁆𑀣𑀼𑀢𑀸𑀬 𑀅𑀦𑀢𑁆𑀣𑀸𑀯𑀳𑀪𑀸𑀯𑀢𑁄 𑀢𑁂 𑀩𑀸𑀥𑁂𑀦𑁆𑀢𑀺 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀽𑀧𑀸 𑀲𑀤𑁆𑀤𑀸…𑀧𑁂… 𑀇𑀢𑁆𑀣𑀺𑀭𑀽𑀧𑀲𑁆𑀫𑀺 𑀤𑀺𑀲𑁆𑀲𑀭𑁂’’𑀢𑀺.

𑀇𑀢𑁆𑀣𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 ¶ 𑀅𑀥𑀺𑀓𑀸𑀭𑀯𑀲𑁂𑀦 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀬𑁂 𑀏𑀢𑀸 𑀉𑀧𑀲𑁂𑀯𑀦𑁆𑀢𑀻’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀧𑀼𑀣𑀼𑀚𑁆𑀚𑀦𑀸 𑀏𑀢𑀸 𑀇𑀢𑁆𑀣𑀺𑀬𑁄 𑀭𑀢𑁆𑀢𑀘𑀺𑀢𑁆𑀢𑀸 𑀭𑀸𑀕𑀸𑀪𑀺𑀪𑀽𑀢𑀘𑀺𑀢𑁆𑀢𑀸 𑀉𑀧𑀪𑁄𑀕𑀯𑀢𑁆𑀣𑀼𑀲𑀜𑁆𑀜𑀸𑀬 ¶ 𑀉𑀧𑀲𑁂𑀯𑀦𑁆𑀢𑀺. 𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀁 𑀖𑁄𑀭𑀦𑁆𑀢𑀺 𑀢𑁂 𑀚𑀸𑀢𑀺𑀆𑀤𑀻𑀳𑀺 𑀦𑀺𑀭𑀬𑀸𑀤𑀻𑀳𑀺 𑀘 𑀖𑁄𑀭𑀁, 𑀪𑀬𑀸𑀦𑀓𑀁, 𑀅𑀦𑁆𑀥𑀩𑀸𑀮𑁂𑀳𑀺 𑀅𑀪𑀺𑀭𑀫𑀺𑀢𑀩𑁆𑀩𑀢𑁄 𑀓𑀝𑀲𑀺𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀫𑀭𑀡𑀸𑀤𑀺𑀦𑀸 𑀯𑀟𑁆𑀠𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀆𑀘𑀺𑀦𑀦𑁆𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑀬𑁄 𑀘𑁂𑀢𑀸𑀢𑀺 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀏𑀢𑀸 𑀇𑀢𑁆𑀣𑀺𑀬𑁄 𑀢𑀢𑁆𑀣 𑀙𑀦𑁆𑀤𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀲𑀧𑁆𑀧𑀲𑁆𑀲 𑀲𑀺𑀭𑀁 𑀯𑀺𑀬 𑀧𑀭𑀺𑀯𑀚𑁆𑀚𑁂𑀢𑀺, 𑀲𑁄 𑀲𑀩𑁆𑀩𑀁 𑀮𑁄𑀓𑀁 𑀯𑀺𑀲𑀚𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀲𑀢𑁄 𑀳𑀼𑀢𑁆𑀯𑀸 𑀲𑀫𑀢𑀺𑀯𑀢𑁆𑀢𑀢𑀺.

𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸𑀢𑀺 ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁧𑁭; 𑀘𑀽𑀴𑀯. 𑁬𑁫; 𑀫. 𑀦𑀺. 𑁧.𑁨𑁩𑁪) 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀲𑀼 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀆𑀤𑀻𑀦𑀯𑀁, 𑀤𑁄𑀲𑀁, 𑀤𑀺𑀲𑁆𑀯𑀸. 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺 𑀓𑀸𑀫𑁂𑀳𑀺 𑀪𑀯𑁂𑀳𑀺 𑀘 𑀦𑀺𑀓𑁆𑀔𑀦𑁆𑀢𑀪𑀸𑀯𑀢𑁄 𑀦𑁂𑀓𑁆𑀔𑀫𑁆𑀫𑀁, 𑀧𑀩𑁆𑀩𑀚𑁆𑀚𑀁 ¶ , 𑀦𑀺𑀩𑁆𑀩𑀸𑀦𑀜𑁆𑀘, 𑀔𑁂𑀫𑀢𑁄, 𑀅𑀦𑀼𑀧𑀤𑁆𑀤𑀯𑀢𑁄, 𑀤𑀝𑁆𑀞𑀼, 𑀤𑀺𑀲𑁆𑀯𑀸. 𑀲𑀩𑁆𑀩𑀓𑀸𑀫𑁂𑀳𑀺𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀳𑀺 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄. 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸, 𑀢𑁂𑀳𑀺 𑀘 𑀣𑁂𑀭𑁄 𑀯𑀺𑀲𑀁𑀬𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

𑀏𑀯𑀁 𑀣𑁂𑀭𑁄 𑀆𑀤𑀺𑀢𑁄 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀙𑀝𑁆𑀞𑀕𑀸𑀣𑀸𑀬 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀲𑀼𑀭𑁄 ‘‘𑀅𑀬𑀁 𑀲𑀩𑁆𑀩𑀢𑁆𑀣 𑀅𑀦𑀼𑀧𑀮𑀺𑀢𑁆𑀢𑁄, 𑀦 𑀲𑀓𑁆𑀓𑀸 𑀇𑀫𑀁 𑀓𑀸𑀫𑁂𑀲𑀼 𑀧𑀢𑀸𑀭𑁂𑀢𑀼’’𑀦𑁆𑀢𑀺 𑀬𑀣𑀸𑀕𑀢𑀫𑀕𑁆𑀕𑁂𑀦𑁂𑀯 𑀕𑀢𑁄. 𑀣𑁂𑀭𑁄𑀧𑀺 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀉𑀧𑀲𑀫𑁆𑀧𑀤𑀸𑀬 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀧𑀣𑀩𑁆𑀬𑀸 𑀣𑁂𑀭𑁄 𑀳𑀼𑀢𑁆𑀯𑀸, 𑀯𑁂𑀲𑀸𑀮𑀺𑀓𑁂𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑁂𑀳𑀺 𑀉𑀧𑁆𑀧𑀸𑀤𑀺𑀢𑀁 𑀲𑀸𑀲𑀦𑀲𑁆𑀲 𑀅𑀩𑁆𑀩𑀼𑀤𑀁 𑀲𑁄𑀥𑁂𑀢𑁆𑀯𑀸, 𑀤𑀼𑀢𑀺𑀬𑀁 𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀥𑀫𑁆𑀫𑀸𑀲𑁄𑀓𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀓𑀁 𑀅𑀩𑁆𑀩𑀼𑀤𑀁 𑀲𑁄𑀥𑁂𑀳𑀻’’𑀢𑀺 𑀢𑀺𑀲𑁆𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀆𑀡𑀸𑀧𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀧𑀸𑀢𑁄

𑁧. 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀢𑁆𑀢𑀓𑀦𑀺𑀧𑀸𑀢𑁂 ¶ ¶ 𑀅𑀮𑀗𑁆𑀓𑀢𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀲𑁆𑀲 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀫𑀼𑀤𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀧𑀦 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀧𑀞𑀫𑀯𑀬𑁂 𑀞𑀺𑀢𑁄 𑀪𑀕𑀯𑀢𑁄 𑀭𑀸𑀚𑀕𑀳𑀧𑁆𑀧𑀯𑁂𑀲𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸, 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀧𑀩𑁆𑀩𑀚𑀺𑀢𑁆𑀯𑀸, 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀫𑀸𑀤𑀺𑀦𑁆𑀦𑀥𑀼𑀢𑀥𑀫𑁆𑀫𑁄 𑀭𑀸𑀚𑀕𑀳𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀉𑀕𑁆𑀕𑀳𑁂𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀲 𑀫𑀸𑀢𑀸 𑀭𑀸𑀚𑀕𑀳𑁂 𑀉𑀲𑁆𑀲𑀯𑀤𑀺𑀯𑀲𑁂 𑀅𑀜𑁆𑀜𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁂 𑀲𑀧𑀚𑀸𑀧𑀢𑀺𑀓𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀉𑀲𑁆𑀲𑀯𑀓𑀻𑀴𑀁 𑀓𑀻𑀴𑀦𑁆𑀢𑁂 𑀤𑀺𑀲𑁆𑀯𑀸, 𑀧𑀼𑀢𑁆𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀭𑁄𑀤𑀢𑀺. 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑀢𑀭𑀸 𑀕𑀡𑀺𑀓𑀸 𑀭𑁄𑀤𑀦𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀲𑀸 𑀢𑀲𑁆𑀲𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀡𑀺𑀓𑀸 ‘‘𑀅𑀳𑀁 𑀢𑀁 𑀆𑀦𑁂𑀲𑁆𑀲𑀸𑀫𑀺, 𑀧𑀲𑁆𑀲 𑀢𑀸𑀯 𑀫𑀫 𑀇𑀢𑁆𑀣𑀺𑀪𑀸𑀯’’𑀦𑁆𑀢𑀺 𑀯𑀢𑁆𑀯𑀸 ‘‘𑀬𑀤𑀺 𑀏𑀯𑀁 𑀢𑀁𑀬𑁂𑀯 𑀢𑀲𑁆𑀲 𑀧𑀚𑀸𑀧𑀢𑀺𑀁 𑀓𑀢𑁆𑀯𑀸 𑀇𑀫𑀲𑁆𑀲 𑀓𑀼𑀮𑀲𑁆𑀲 𑀲𑀸𑀫𑀺𑀦𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀬 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ¶ , 𑀯𑀺𑀲𑁆𑀲𑀚𑁆𑀚𑀺𑀢𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸, 𑀣𑁂𑀭𑀲𑁆𑀲 𑀧𑀺𑀡𑁆𑀟𑀸𑀬 𑀯𑀺𑀘𑀭𑀡𑀝𑁆𑀞𑀸𑀦𑁂 𑀏𑀓𑀲𑁆𑀫𑀺𑀁 𑀕𑁂𑀳𑁂 𑀯𑀲𑀫𑀸𑀦𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀜𑁆𑀜𑁂𑀳𑀺 𑀣𑁂𑀭𑀲𑁆𑀲 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀧𑁂𑀲𑀺. 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀘 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀤𑀼𑀓𑀸 𑀆𑀭𑀼𑀬𑁆𑀳 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀕𑁂𑀳𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀣𑁂𑀭𑀁 𑀤𑀺𑀲𑁆𑀯𑀸, 𑀲𑀼𑀯𑀡𑁆𑀡𑀧𑀸𑀤𑀼𑀓𑀸 𑀑𑀫𑀼𑀜𑁆𑀘𑀺𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀻 𑀦𑀸𑀦𑀧𑁆𑀧𑀓𑀸𑀭𑀁 𑀣𑁂𑀭𑀁 𑀓𑀸𑀫𑀦𑀺𑀫𑀦𑁆𑀢𑀦𑀸𑀬 𑀦𑀺𑀫𑀦𑁆𑀢𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 ‘‘𑀧𑀼𑀣𑀼𑀚𑁆𑀚𑀦𑀘𑀺𑀢𑁆𑀢𑀁 𑀦𑀸𑀫 𑀘𑀜𑁆𑀘𑀮𑀁, 𑀬𑀁𑀦𑀽𑀦 𑀫𑀬𑀸 𑀇𑀤𑀸𑀦𑁂𑀯 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄’’𑀢𑀺 𑀢𑀢𑁆𑀣𑁂𑀯 𑀞𑀺𑀢𑁄 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

𑁪𑁫𑁯.

‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀥𑀸𑀭𑀻 𑀯𑀺𑀪𑀽𑀲𑀺𑀢𑀸;

𑀅𑀮𑀢𑁆𑀢𑀓𑀓𑀢𑀸𑀧𑀸𑀤𑀸, 𑀧𑀸𑀤𑀼𑀓𑀸𑀭𑀼𑀬𑁆𑀳 𑀯𑁂𑀲𑀺𑀓𑀸.

𑁪𑁬𑁦.

‘‘𑀧𑀸𑀤𑀼𑀓𑀸 ¶ ¶ 𑀑𑀭𑀼𑀳𑀺𑀢𑁆𑀯𑀸𑀦, 𑀧𑀼𑀭𑀢𑁄 𑀧𑀜𑁆𑀚𑀮𑀻𑀓𑀢𑀸;

𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸, 𑀫𑁆𑀳𑀺𑀢𑀧𑀼𑀩𑁆𑀩𑀁 𑀅𑀪𑀸𑀲𑀣.

𑁪𑁬𑁧.

‘‘‘𑀬𑀼𑀯𑀸𑀲𑀺 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄, 𑀢𑀺𑀝𑁆𑀞𑀸𑀳𑀺 𑀫𑀫 𑀲𑀸𑀲𑀦𑁂;

𑀪𑀼𑀜𑁆𑀚 𑀫𑀸𑀦𑀼𑀲𑀓𑁂 𑀓𑀸𑀫𑁂, 𑀅𑀳𑀁 𑀯𑀺𑀢𑁆𑀢𑀁 𑀤𑀤𑀸𑀫𑀺 𑀢𑁂;

𑀲𑀘𑁆𑀘𑀁 𑀢𑁂 𑀧𑀝𑀺𑀚𑀸𑀦𑀸𑀫𑀺, 𑀅𑀕𑁆𑀕𑀺𑀁 𑀯𑀸 𑀢𑁂 𑀳𑀭𑀸𑀫𑀳𑀁.

𑁪𑁬𑁨.

‘‘‘𑀬𑀤𑀸 𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀸𑀫, 𑀉𑀪𑁄 𑀤𑀡𑁆𑀟𑀧𑀭𑀸𑀬𑀦𑀸;

𑀉𑀪𑁄𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄’’’.

𑁪𑁬𑁩.

‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀬𑀸𑀘𑀦𑁆𑀢𑀺𑀁, 𑀯𑁂𑀲𑀺𑀓𑀁 𑀧𑀜𑁆𑀚𑀮𑀻𑀓𑀢𑀁;

𑀅𑀮𑀗𑁆𑀓𑀢𑀁 𑀲𑀼𑀯𑀲𑀦𑀁, 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀁.

𑁪𑁬𑁪.

‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁪𑁬𑁫.

‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀢𑀢𑁆𑀣 𑀫𑀸𑀮𑀥𑀸𑀭𑀻𑀢𑀺 𑀫𑀸𑀮𑀸𑀥𑀸𑀭𑀺𑀦𑀻 𑀧𑀺𑀴𑀦𑁆𑀥𑀧𑀼𑀧𑁆𑀨𑀤𑀸𑀫𑀸. 𑀯𑀺𑀪𑀽𑀲𑀺𑀢𑀸𑀢𑀺 𑀊𑀦𑀝𑁆𑀞𑀸𑀦𑀲𑁆𑀲 𑀧𑀽𑀭𑀡𑀯𑀲𑁂𑀦 𑀧𑀼𑀧𑁆𑀨𑁂𑀳𑀺 𑀘𑁂𑀯 𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀳𑀺 𑀘 𑀯𑀺𑀪𑀽𑀲𑀺𑀢𑀕𑀢𑁆𑀢𑀸. ‘‘𑀅𑀮𑀗𑁆𑀓𑀢𑀸’’𑀢𑀺 𑀇𑀫𑀺𑀦𑀸 𑀳𑀢𑁆𑀣𑀽𑀧𑀕𑀕𑀻𑀯𑀽𑀧𑀕𑀸𑀤𑀻𑀳𑀺 𑀆𑀪𑀭𑀡𑁂𑀳𑀺 𑀅𑀮𑀗𑁆𑀓𑀭𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀮𑀢𑁆𑀢𑀓𑀓𑀢𑀸𑀧𑀸𑀤𑀸𑀢𑀺 𑀧𑀭𑀺𑀡𑀢𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑁂𑀦 𑀮𑀸𑀔𑀸𑀭𑀲𑁂𑀦 𑀭𑀜𑁆𑀚𑀺𑀢𑀘𑀭𑀡𑀬𑀼𑀕𑀴𑀸. 𑀲𑀫𑀸𑀲𑀧𑀤𑀜𑁆𑀳𑁂𑀢𑀁, ‘‘𑀅𑀮𑀢𑁆𑀢𑀓𑀓𑀢𑀧𑀸𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀲𑀼𑀔𑀢𑁆𑀣𑀁 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀲𑀫𑀸𑀲𑀪𑀸𑀯𑁂 𑀧𑀦 ‘‘𑀢𑀲𑁆𑀲𑀸’’𑀢𑀺 𑀯𑀘𑀦𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀤𑀼𑀓𑀸𑀭𑀼𑀬𑁆𑀳 𑀯𑁂𑀲𑀺𑀓𑀸𑀢𑀺 𑀏𑀓𑀸 𑀭𑀽𑀧𑀽𑀧𑀚𑀻𑀯𑀺𑀓𑀸 𑀇𑀢𑁆𑀣𑀻 𑀬𑀣𑀸𑀯𑀼𑀢𑁆𑀢𑀯𑁂𑀲𑀸 𑀲𑀼𑀯𑀡𑁆𑀡𑀧𑀸𑀤𑀼𑀓𑀸 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 ‘‘𑀞𑀺𑀢𑀸’’𑀢𑀺 𑀯𑀘𑀦𑀲𑁂𑀲𑁄.

𑀧𑀸𑀤𑀼𑀓𑀸 𑀑𑀭𑀼𑀳𑀺𑀢𑁆𑀯𑀸𑀦𑀸𑀢𑀺 𑀧𑀸𑀤𑀼𑀓𑀸𑀳𑀺 𑀑𑀢𑀭𑀺𑀢𑁆𑀯𑀸, 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀬𑁄 𑀑𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀚𑀮𑀻𑀓𑀢𑀸𑀢𑀺 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀓𑀸 𑀲𑀸 𑀯𑁂𑀲𑀻 𑀫𑀁. 𑀲𑀸𑀫𑀁 𑀯𑀸 𑀯𑀘𑀦𑀧𑀭𑀫𑁆𑀧𑀭𑀁 ¶ 𑀯𑀺𑀦𑀸 𑀲𑀬𑀫𑁂𑀯 𑀅𑀪𑀸𑀲𑀣. 𑀲𑀡𑁆𑀳𑁂𑀦𑀸𑀢𑀺 𑀫𑀝𑁆𑀞𑁂𑀦. 𑀫𑀼𑀤𑀼𑀦𑀸𑀢𑀺 𑀫𑀥𑀼𑀭𑁂𑀦. ‘‘𑀯𑀘𑀦𑁂𑀦𑀸’’𑀢𑀺 𑀅𑀯𑀼𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀪𑀸𑀲𑀣𑀸𑀢𑀺, 𑀯𑀼𑀢𑁆𑀢𑀢𑁆𑀢𑀸.

𑀬𑀼𑀯𑀸𑀲𑀺 ¶ 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄𑀢𑀺 𑀢𑁆𑀯𑀁 𑀧𑀩𑁆𑀩𑀚𑀦𑁆𑀢𑁄 𑀬𑀼𑀯𑀸, 𑀤𑀳𑀭𑁄𑀬𑁂𑀯 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀲𑀺, 𑀦𑀦𑀼 𑀧𑀩𑁆𑀩𑀚𑀦𑁆𑀢𑁂𑀦 𑀲𑀢𑁆𑀢𑀫𑁂 𑀤𑀲𑀓𑁂 𑀲𑀫𑁆𑀧𑀢𑁆𑀢𑁂𑀯 𑀧𑀩𑁆𑀩𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀺𑀝𑁆𑀞𑀸𑀳𑀺 𑀫𑀫 𑀲𑀸𑀲𑀦𑁂𑀢𑀺 𑀫𑀫 𑀯𑀘𑀦𑁂 𑀢𑀺𑀝𑁆𑀞.

𑀓𑀺𑀁 ¶ 𑀧𑀦 𑀢𑀦𑁆𑀢𑀺 𑀆𑀳 ‘‘𑀪𑀼𑀜𑁆𑀚 𑀫𑀸𑀦𑀼𑀲𑀓𑁂 𑀓𑀸𑀫𑁂’’𑀢𑀺 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺, 𑀯𑀬𑀲𑀫𑁆𑀧𑀢𑁆𑀢𑀺, 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺, 𑀪𑁄𑀕𑀲𑀫𑁆𑀧𑀢𑁆𑀢𑀺 𑀘 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀢𑁆𑀣 ‘‘𑀓𑀼𑀢𑁄 𑀫𑁂 𑀪𑁄𑀕𑀲𑀫𑁆𑀧𑀢𑁆𑀢𑀻’’𑀢𑀺 𑀯𑀤𑁂𑀬𑁆𑀬𑀸𑀢𑀺, 𑀆𑀳 ‘‘𑀅𑀳𑀁 𑀯𑀺𑀢𑁆𑀢𑀁 𑀤𑀤𑀸𑀫𑀺 𑀢𑁂’’𑀢𑀺. ‘‘𑀢𑀬𑀺𑀤𑀁 𑀯𑀘𑀦𑀁 𑀓𑀣𑀁 𑀲𑀤𑁆𑀤𑀳𑀸𑀢𑀩𑁆𑀩’’𑀦𑁆𑀢𑀺 𑀫𑀜𑁆𑀜𑁂𑀬𑁆𑀬𑀸𑀢𑀺 𑀢𑀁 𑀲𑀤𑁆𑀤𑀳𑀸𑀧𑁂𑀦𑁆𑀢𑀻 𑀆𑀳 ‘‘𑀲𑀘𑁆𑀘𑀁 𑀢𑁂 𑀧𑀝𑀺𑀚𑀸𑀦𑀸𑀫𑀺, 𑀅𑀕𑁆𑀕𑀺𑀁 𑀯𑀸 𑀢𑁂 𑀳𑀭𑀸𑀫𑀳’’𑀦𑁆𑀢𑀺. ‘‘𑀪𑀼𑀜𑁆𑀚 𑀫𑀸𑀦𑀼𑀲𑀓𑁂 𑀓𑀸𑀫𑁂, 𑀅𑀳𑀁 𑀯𑀺𑀢𑁆𑀢𑀁 𑀤𑀤𑀸𑀫𑀺 𑀢𑁂’’𑀢𑀺 𑀬𑀤𑀺𑀤𑀁 𑀫𑀬𑀸 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀏𑀓𑀁𑀲𑁂𑀦 𑀲𑀘𑁆𑀘𑀫𑁂𑀯 𑀧𑀝𑀺𑀚𑀸𑀦𑀸𑀫𑀺, 𑀲𑀘𑁂 𑀫𑁂 𑀦 𑀧𑀢𑁆𑀢𑀺𑀬𑀸𑀬𑀲𑀺, 𑀅𑀕𑁆𑀕𑀺𑀁 𑀯𑀸 𑀢𑁂 𑀳𑀭𑀸𑀫𑀳𑀁 𑀅𑀕𑁆𑀕𑀺𑀁 𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀧𑀘𑁆𑀘𑀬𑀁 𑀲𑀧𑀣𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄. 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄𑀢𑀺 𑀅𑀫𑁆𑀳𑀸𑀓𑀁 𑀉𑀪𑀺𑀦𑁆𑀦𑀁 𑀚𑀺𑀡𑁆𑀡𑀓𑀸𑀮𑁂 𑀧𑀩𑁆𑀩𑀚𑁆𑀚𑀦𑀁 𑀉𑀪𑀬𑀢𑁆𑀣 𑀚𑀬𑀕𑁆𑀕𑀸𑀳𑁄. 𑀬𑀁 𑀫𑀬𑀁 𑀬𑀸𑀯 𑀤𑀡𑁆𑀟𑀧𑀭𑀸𑀬𑀦𑀓𑀸𑀮𑀸 𑀪𑁄𑀕𑁂 𑀪𑀼𑀜𑁆𑀚𑀸𑀫, 𑀏𑀯𑀁 𑀇𑀥𑀮𑁄𑀓𑁂𑀧𑀺 𑀪𑁄𑀕𑁂𑀳𑀺 𑀦 𑀚𑀻𑀬𑀸𑀫, 𑀫𑀬𑀁 𑀧𑀘𑁆𑀙𑀸 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀏𑀯𑀁 𑀧𑀭𑀮𑁄𑀓𑁂𑀧𑀺 𑀪𑁄𑀕𑁂𑀳𑀺 𑀦 𑀚𑀻𑀬𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄𑀢𑀺 𑀢𑀁 𑀦𑀺𑀫𑀺𑀢𑁆𑀢𑀁, 𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑁂𑀦𑁆𑀢𑀺𑀬𑀸 ‘‘𑀬𑀼𑀯𑀸𑀲𑀺 𑀢𑁆𑀯’’𑀦𑁆𑀢𑀺𑀆𑀤𑀺𑀦𑀸 ‘‘𑀬𑀤𑀸 𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀘 𑀢𑀲𑁆𑀲𑀸 𑀯𑁂𑀲𑀺𑀬𑀸 𑀯𑀼𑀢𑁆𑀢𑀯𑀘𑀦𑀳𑁂𑀢𑀼. 𑀢𑀜𑁆𑀳𑀺 𑀯𑀘𑀦𑀁 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀣𑁂𑀭𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀤𑀢𑁆𑀣𑀁 𑀧𑀭𑀺𑀧𑀽𑀭𑁂𑀲𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀭𑁂 𑀅𑀫𑁆𑀩𑀸𑀝𑀓𑀸𑀭𑀸𑀫𑁂𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸, 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀫𑀜𑁆𑀚𑀼𑀲𑁆𑀲𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸, ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀸𑀕𑀢𑁂 𑀅𑀬𑀁 𑀪𑀺𑀓𑁆𑀔𑀼 ¶ 𑀯𑀺𑀬 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀫𑀜𑁆𑀚𑀼𑀲𑁆𑀲𑀭𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀘 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 ¶ 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀘𑀺𑀢𑁆𑀢𑀧𑀢𑁆𑀢𑀓𑁄𑀓𑀺𑀮𑁄 𑀳𑀼𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑀢𑁄 𑀫𑀥𑀼𑀭𑀁 𑀅𑀫𑁆𑀩𑀨𑀮𑀁 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀓𑁄𑀓𑀺𑀮𑁄 𑀤𑀲𑀩𑀮𑀲𑁆𑀲 𑀧𑀢𑁆𑀢𑁂 𑀅𑀫𑁆𑀩𑀧𑀓𑁆𑀓𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀓𑁄𑀓𑀺𑀮𑁄 ¶ 𑀧𑀲𑀦𑁆𑀦𑀫𑀸𑀦𑀲𑁄 𑀢𑁂𑀦𑁂𑀯 𑀧𑀻𑀢𑀺𑀲𑀼𑀔𑁂𑀦 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀢𑁂𑀦 𑀘 𑀧𑀼𑀜𑁆𑀜𑀓𑀫𑁆𑀫𑁂𑀦 𑀫𑀜𑁆𑀚𑀼𑀲𑁆𑀲𑀭𑁄 𑀅𑀳𑁄𑀲𑀺. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀦 𑀘𑁂𑀢𑀺𑀬𑁂 𑀆𑀭𑀤𑁆𑀥𑁂 𑀓𑀺𑀁 𑀧𑀫𑀸𑀡𑀁 𑀓𑀭𑁄𑀫? 𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑀁. 𑀅𑀢𑀺𑀫𑀳𑀦𑁆𑀢𑀫𑁂𑀢𑀁. 𑀙𑀬𑁄𑀚𑀦𑀧𑁆𑀧𑀫𑀸𑀡𑀁. 𑀏𑀢𑀫𑁆𑀧𑀺 𑀅𑀢𑀺𑀫𑀳𑀦𑁆𑀢𑀁. 𑀧𑀜𑁆𑀘𑀬𑁄𑀚𑀦𑀁, 𑀘𑀢𑀼𑀬𑁄𑀚𑀦𑀁, 𑀢𑀺𑀬𑁄𑀚𑀦𑀁, 𑀤𑁆𑀯𑀺𑀬𑁄𑀚𑀦𑀦𑁆𑀢𑀺 𑀯𑀼𑀢𑁆𑀢𑁂 𑀅𑀬𑀁 𑀢𑀤𑀸 𑀚𑁂𑀝𑁆𑀞𑀯𑀟𑁆𑀠𑀓𑀻 𑀳𑀼𑀢𑁆𑀯𑀸 ‘‘𑀏𑀣, 𑀪𑁄, 𑀅𑀦𑀸𑀕𑀢𑁂 𑀲𑀼𑀔𑀧𑀝𑀺𑀚𑀕𑁆𑀕𑀺𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀭𑀚𑁆𑀚𑀼𑀬𑀸 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀕𑀸𑀯𑀼𑀢𑀫𑀢𑁆𑀢𑀓𑁂 𑀞𑀢𑁆𑀯𑀸 ‘‘𑀏𑀓𑁂𑀓𑀁 𑀫𑀼𑀔𑀁 𑀕𑀸𑀯𑀼𑀢𑀁 𑀕𑀸𑀯𑀼𑀢𑀁 𑀳𑁄𑀢𑀼, 𑀘𑁂𑀢𑀺𑀬𑀁 𑀏𑀓𑀬𑁄𑀚𑀦𑀸𑀯𑀝𑁆𑀝𑀁 𑀬𑁄𑀚𑀦𑀼𑀩𑁆𑀩𑁂𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑁂 𑀢𑀲𑁆𑀲 𑀯𑀘𑀦𑁂 𑀅𑀝𑁆𑀞𑀁𑀲𑀼. 𑀇𑀢𑀺 𑀅𑀧𑁆𑀧𑀫𑀸𑀡𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀫𑀸𑀡𑀁 𑀅𑀓𑀸𑀲𑀻𑀢𑀺. 𑀢𑁂𑀦 𑀧𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀜𑁆𑀜𑁂𑀳𑀺 𑀦𑀻𑀘𑀢𑀭𑀧𑁆𑀧𑀫𑀸𑀡𑁄 𑀳𑁄𑀢𑀺.

𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀪𑀤𑁆𑀤𑀺𑀬𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀅𑀢𑀺𑀭𑀲𑁆𑀲𑀢𑀸𑀬 𑀧𑀦 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸, 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀳𑀼𑀢𑁆𑀯𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀧𑀭𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺. 𑀅𑀣𑁂𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀏𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀭𑀣𑁂𑀦 𑀕𑀘𑁆𑀙𑀦𑁆𑀢𑀻 𑀅𑀜𑁆𑀜𑀢𑀭𑀸 𑀕𑀡𑀺𑀓𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀺. 𑀣𑁂𑀭𑁄 𑀢𑀲𑁆𑀲𑀸 𑀤𑀦𑁆𑀢𑀝𑁆𑀞𑀺𑀓𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸, 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀲𑁄 𑀅𑀪𑀺𑀡𑁆𑀳𑀁 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀑𑀯𑀤𑀺𑀬𑀫𑀸𑀦𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁫.𑁧-𑁩𑁩) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀫𑀳𑀤𑁆𑀥𑀦𑁄;

𑀚𑀗𑁆𑀖𑀸𑀯𑀺𑀳𑀸𑀭𑀁 𑀯𑀺𑀘𑀭𑀁, 𑀲𑀗𑁆𑀖𑀸𑀭𑀸𑀫𑀁 𑀅𑀕𑀘𑁆𑀙𑀳𑀁.

‘‘𑀢𑀤𑀸 𑀲𑁄 𑀮𑁄𑀓𑀧𑀚𑁆𑀚𑁄𑀢𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀦𑀸𑀬𑀓𑁄;

𑀫𑀜𑁆𑀚𑀼𑀲𑁆𑀲𑀭𑀸𑀦𑀁 𑀧𑀯𑀭𑀁, 𑀲𑀸𑀯𑀓𑀁 𑀅𑀪𑀺𑀓𑀺𑀢𑁆𑀢𑀬𑀺.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀓𑀸𑀭𑀁 𑀓𑀢𑁆𑀯𑀸 𑀫𑀳𑁂𑀲𑀺𑀦𑁄;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

‘‘𑀢𑀤𑀸 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀯𑀺𑀦𑀸𑀬𑀓𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀪𑀤𑁆𑀤𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀢𑁂𑀦 ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀨𑀼𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀤𑀼𑀧𑁆𑀧𑀲𑀳𑁄, 𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀚𑀺𑀦𑁄.

‘‘𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀳𑀺𑀢𑁂𑀲𑀻 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀩𑀳𑀼𑀁 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸.

‘‘𑀦𑀦𑁆𑀤𑀸𑀭𑀸𑀫𑀯𑀦𑁂 𑀢𑀲𑁆𑀲, 𑀅𑀳𑁄𑀲𑀺𑀁 𑀨𑀼𑀲𑁆𑀲𑀓𑁄𑀓𑀺𑀮𑁄;

𑀕𑀦𑁆𑀥𑀓𑀼𑀝𑀺𑀲𑀫𑀸𑀲𑀦𑁆𑀦𑁂, 𑀅𑀫𑁆𑀩𑀭𑀼𑀓𑁆𑀔𑁂 𑀯𑀲𑀸𑀫𑀳𑀁.

‘‘𑀢𑀤𑀸 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑀁, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀚𑀺𑀦𑀼𑀢𑁆𑀢𑀫𑀁;

𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀫𑀜𑁆𑀚𑀼𑀦𑀸𑀪𑀺𑀦𑀺𑀓𑀽𑀚𑀳𑀁.

‘‘𑀭𑀸𑀚𑀼𑀬𑁆𑀬𑀸𑀦𑀁 𑀢𑀤𑀸 𑀕𑀦𑁆𑀢𑁆𑀯𑀸, 𑀲𑀼𑀧𑀓𑁆𑀓𑀁 𑀓𑀦𑀓𑀢𑁆𑀢𑀘𑀁;

𑀅𑀫𑁆𑀩𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀲𑁆𑀲𑁄𑀧𑀦𑀸𑀫𑀬𑀺𑀁.

‘‘𑀢𑀤𑀸 ¶ 𑀫𑁂 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀫𑀳𑀸𑀓𑀸𑀭𑀼𑀡𑀺𑀓𑁄 𑀚𑀺𑀦𑁄;

𑀉𑀧𑀝𑁆𑀞𑀸𑀓𑀲𑁆𑀲 𑀳𑀢𑁆𑀣𑀢𑁄, 𑀧𑀢𑁆𑀢𑀁 𑀧𑀕𑁆𑀕𑀡𑁆𑀳𑀺 𑀦𑀸𑀬𑀓𑁄.

‘‘𑀅𑀤𑀸𑀲𑀺𑀁 𑀳𑀝𑁆𑀞𑀘𑀺𑀢𑁆𑀢𑁄𑀳𑀁, 𑀅𑀫𑁆𑀩𑀧𑀺𑀡𑁆𑀟𑀁 𑀫𑀳𑀸𑀫𑀼𑀦𑁂;

𑀧𑀢𑁆𑀢𑁂 𑀧𑀓𑁆𑀔𑀺𑀧𑁆𑀧 𑀧𑀓𑁆𑀔𑁂𑀳𑀺, 𑀧𑀜𑁆𑀚𑀮𑀺𑀁 𑀓𑀢𑁆𑀯𑀸𑀦 𑀫𑀜𑁆𑀚𑀼𑀦𑀸.

‘‘𑀲𑀭𑁂𑀦 𑀭𑀚𑀦𑀻𑀬𑁂𑀦, 𑀲𑀯𑀦𑀻𑀬𑁂𑀦 𑀯𑀕𑁆𑀕𑀼𑀦𑀸;

𑀯𑀲𑁆𑀲𑀦𑁆𑀢𑁄 𑀩𑀼𑀤𑁆𑀥𑀧𑀽𑀚𑀢𑁆𑀣𑀁, 𑀦𑀻𑀴𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀳𑀁.

‘‘𑀢𑀤𑀸 𑀫𑀼𑀤𑀺𑀢𑀘𑀺𑀢𑁆𑀢𑀁 𑀫𑀁, 𑀩𑀼𑀤𑁆𑀥𑀧𑁂𑀫𑀕𑀢𑀸𑀲𑀬𑀁;

𑀲𑀓𑀼𑀡𑀕𑁆𑀖𑀺 𑀉𑀧𑀸𑀕𑀦𑁆𑀢𑁆𑀯𑀸, 𑀖𑀸𑀢𑀬𑀻 𑀤𑀼𑀝𑁆𑀞𑀫𑀸𑀦𑀲𑁄.

‘‘𑀢𑀢𑁄 𑀘𑀼𑀢𑁄𑀳𑀁 𑀢𑀼𑀲𑀺𑀢𑁂, 𑀅𑀦𑀼𑀪𑁄𑀢𑁆𑀯𑀸 𑀫𑀳𑀸𑀲𑀼𑀔𑀁;

𑀫𑀦𑀼𑀲𑁆𑀲𑀬𑁄𑀦𑀺𑀫𑀸𑀕𑀘𑁆𑀙𑀺𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀲𑀸𑀲𑀦𑀁 𑀚𑁄𑀢𑀬𑀺𑀢𑁆𑀯𑀸 𑀲𑁄, 𑀅𑀪𑀺𑀪𑀼𑀬𑁆𑀬 𑀓𑀼𑀢𑀺𑀢𑁆𑀣𑀺𑀬𑁂;

𑀯𑀺𑀦𑀬𑀺𑀢𑁆𑀯𑀸𑀦 𑀯𑁂𑀦𑁂𑀬𑁆𑀬𑁂, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

‘‘𑀦𑀺𑀩𑁆𑀩𑀼𑀢𑁂 𑀢𑀫𑁆𑀳𑀺 𑀮𑁄𑀓𑀕𑁆𑀕𑁂, 𑀧𑀲𑀦𑁆𑀦𑀸 𑀚𑀦𑀢𑀸 𑀩𑀳𑀽;

𑀧𑀽𑀚𑀦𑀢𑁆𑀣𑀸𑀬 𑀩𑀼𑀤𑁆𑀥𑀲𑁆𑀲, 𑀣𑀽𑀧𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

‘‘𑀲𑀢𑁆𑀢𑀬𑁄𑀚𑀦𑀺𑀓𑀁 𑀣𑀽𑀧𑀁, 𑀲𑀢𑁆𑀢𑀭𑀢𑀦𑀪𑀽𑀲𑀺𑀢𑀁;

𑀓𑀭𑀺𑀲𑁆𑀲𑀸𑀫 𑀫𑀳𑁂𑀲𑀺𑀲𑁆𑀲, 𑀇𑀘𑁆𑀘𑁂𑀯𑀁 𑀫𑀦𑁆𑀢𑀬𑀦𑁆𑀢𑀺 𑀢𑁂.

‘‘𑀓𑀺𑀓𑀺𑀦𑁄 𑀓𑀸𑀲𑀺𑀭𑀸𑀚𑀲𑁆𑀲, 𑀢𑀤𑀸 𑀲𑁂𑀦𑀸𑀬 𑀦𑀸𑀬𑀓𑁄;

𑀳𑀼𑀢𑁆𑀯𑀸𑀳𑀁 𑀅𑀧𑁆𑀧𑀫𑀸𑀡𑀲𑁆𑀲, 𑀧𑀫𑀸𑀡𑀁 𑀘𑁂𑀢𑀺𑀬𑁂 𑀯𑀤𑀺𑀁.

‘‘𑀢𑀤𑀸 ¶ 𑀢𑁂 𑀫𑀫 𑀯𑀸𑀓𑁆𑀬𑁂𑀦, 𑀘𑁂𑀢𑀺𑀬𑀁 𑀬𑁄𑀚𑀦𑀼𑀕𑁆𑀕𑀢𑀁;

𑀅𑀓𑀁𑀲𑀼 𑀦𑀭𑀯𑀻𑀭𑀲𑁆𑀲, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀁;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀯𑀭𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂.

‘‘𑀧𑀼𑀭𑀧𑁆𑀧𑀯𑁂𑀲𑁂 ¶ 𑀲𑀼𑀕𑀢𑀁, 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑁄;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀦 𑀘𑀺𑀭𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀘𑁂𑀢𑀺𑀬𑀲𑁆𑀲 𑀧𑀫𑀸𑀡𑀁 𑀬𑀁, 𑀅𑀓𑀭𑀺𑀁 𑀢𑁂𑀦 𑀓𑀫𑁆𑀫𑀼𑀦𑀸;

𑀮𑀓𑀼𑀡𑁆𑀟𑀓𑀲𑀭𑀻𑀭𑁄𑀳𑀁, 𑀚𑀸𑀢𑁄 𑀧𑀭𑀺𑀪𑀯𑀸𑀭𑀳𑁄.

‘‘𑀲𑀭𑁂𑀦 𑀫𑀥𑀼𑀭𑁂𑀦𑀸𑀳𑀁, 𑀧𑀽𑀚𑀺𑀢𑁆𑀯𑀸 𑀇𑀲𑀺𑀲𑀢𑁆𑀢𑀫𑀁;

𑀫𑀜𑁆𑀚𑀼𑀲𑁆𑀲𑀭𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀅𑀕𑁆𑀕𑀢𑁆𑀢𑀫𑀦𑀼𑀧𑀸𑀧𑀼𑀡𑀺𑀁.

‘‘𑀨𑀮𑀤𑀸𑀦𑁂𑀦 𑀩𑀼𑀤𑁆𑀥𑀲𑁆𑀲, 𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘;

𑀲𑀸𑀫𑀜𑁆𑀜𑀨𑀮𑀲𑀫𑁆𑀧𑀦𑁆𑀦𑁄, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀧𑀭𑀪𑀸𑀕𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁬𑁬.

‘‘𑀧𑀭𑁂 𑀅𑀫𑁆𑀩𑀸𑀝𑀓𑀸𑀭𑀸𑀫𑁂, 𑀯𑀦𑀲𑀡𑁆𑀟𑀫𑁆𑀳𑀺 𑀪𑀤𑁆𑀤𑀺𑀬𑁄;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀢𑀢𑁆𑀣 𑀪𑀤𑁆𑀤𑁄𑀯 𑀛𑀸𑀬𑀢𑀺.

𑁪𑁬𑁭.

‘‘𑀭𑀫𑀦𑁆𑀢𑁂𑀓𑁂 ¶ 𑀫𑀼𑀤𑀺𑀗𑁆𑀕𑁂𑀳𑀺, 𑀯𑀻𑀡𑀸𑀳𑀺 𑀧𑀡𑀯𑁂𑀳𑀺 𑀘;

𑀅𑀳𑀜𑁆𑀘 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀭𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂.

𑁪𑁬𑁮.

‘‘𑀩𑀼𑀤𑁆𑀥𑁄 𑀘𑁂 𑀫𑁂 𑀯𑀭𑀁 𑀤𑀚𑁆𑀚𑀸, 𑀲𑁄 𑀘 𑀮𑀩𑁆𑀪𑁂𑀣 𑀫𑁂 𑀯𑀭𑁄;

𑀕𑀡𑁆𑀳𑁂𑀳𑀁 𑀲𑀩𑁆𑀩𑀮𑁄𑀓𑀲𑁆𑀲, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀁 𑀲𑀢𑀺’’𑀦𑁆𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀧𑀭𑁂𑀢𑀺 𑀲𑁂𑀝𑁆𑀞𑁂 𑀅𑀥𑀺𑀓𑁂, 𑀯𑀺𑀲𑀺𑀝𑁆𑀞𑁂𑀢𑀺 𑀅𑀢𑁆𑀣𑁄. 𑀅𑀥𑀺𑀓𑀯𑀸𑀘𑀻 𑀳𑀺 𑀅𑀬𑀁 𑀧𑀭𑀲𑀤𑁆𑀤𑁄 ‘‘𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀫𑁆𑀩𑀸𑀝𑀓𑀸𑀭𑀸𑀫𑁂𑀢𑀺 𑀏𑀯𑀁𑀦𑀸𑀫𑀓𑁂 𑀆𑀭𑀸𑀫𑁂. 𑀲𑁄 𑀓𑀺𑀭 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁄 𑀯𑀦𑀲𑀡𑁆𑀟𑀫𑀡𑁆𑀟𑀺𑀢𑁄 𑀭𑀫𑀡𑀻𑀬𑁄 𑀳𑁄𑀢𑀺 𑀢𑁂𑀦 ‘‘𑀧𑀭𑁂’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄. ‘‘𑀅𑀫𑁆𑀩𑀸𑀝𑀓𑀯𑀦𑁂 𑀅𑀫𑁆𑀩𑀸𑀝𑀓𑁂𑀳𑀺 𑀅𑀪𑀺𑀮𑀓𑁆𑀔𑀺𑀢𑀯𑀦𑁂’’𑀢𑀺 𑀘 𑀯𑀤𑀦𑁆𑀢𑀺. 𑀯𑀦𑀲𑀡𑁆𑀟𑀫𑁆𑀳𑀻𑀢𑀺 𑀯𑀦𑀕𑀳𑀦𑁂, 𑀖𑀦𑀦𑀺𑀘𑀺𑀢𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀲𑀫𑀽𑀳𑁂 𑀯𑀦𑁂𑀢𑀺 𑀅𑀢𑁆𑀣𑁄. 𑀪𑀤𑁆𑀤𑀺𑀬𑁄𑀢𑀺 𑀏𑀯𑀁𑀦𑀸𑀫𑀓𑁄, 𑀅𑀢𑁆𑀢𑀸𑀦𑀫𑁂𑀯 𑀣𑁂𑀭𑁄 𑀅𑀜𑁆𑀜𑀁 𑀯𑀺𑀬 𑀯𑀤𑀢𑀺. 𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳𑀸𑀢𑀺 𑀢𑀡𑁆𑀳𑀸𑀬 ¶ 𑀫𑀽𑀮𑀁 𑀦𑀸𑀫 𑀅𑀯𑀺𑀚𑁆𑀚𑀸. 𑀢𑀲𑁆𑀫𑀸 𑀲𑀸𑀯𑀺𑀚𑁆𑀚𑀁 𑀢𑀡𑁆𑀳𑀁 𑀅𑀕𑁆𑀕𑀫𑀕𑁆𑀕𑁂𑀦 ¶ 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀪𑀤𑁆𑀤𑁄𑀯 𑀛𑀸𑀬𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑁂𑀳𑀺 𑀲𑀻𑀮𑀸𑀤𑀻𑀳𑀺 𑀪𑀤𑁆𑀤𑁄 𑀲𑀼𑀦𑁆𑀤𑀭𑁄 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀓𑀢𑀓𑀺𑀘𑁆𑀘𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀯𑀲𑁂𑀦 𑀅𑀕𑁆𑀕𑀨𑀮𑀛𑀸𑀦𑁂𑀦 𑀛𑀸𑀬𑀢𑀺.

𑀨𑀮𑀲𑀼𑀔𑁂𑀦 𑀘 𑀛𑀸𑀦𑀲𑀫𑀸𑀧𑀢𑁆𑀢𑀻𑀳𑀺 𑀘 𑀯𑀻𑀢𑀺𑀦𑀸𑀫𑁂𑀢𑀻𑀢𑀺 𑀅𑀢𑁆𑀢𑀦𑁄 𑀯𑀺𑀯𑁂𑀓𑀭𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀭𑀫𑀦𑁆𑀢𑁂𑀓𑁂’’𑀢𑀺 𑀕𑀸𑀣𑀸𑀬𑀧𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀫𑀼𑀤𑀺𑀗𑁆𑀕𑁂𑀳𑀻𑀢𑀺 𑀅𑀗𑁆𑀕𑀺𑀓𑀸𑀤𑀻𑀳𑀺 𑀫𑀼𑀭𑀚𑁂𑀳𑀺. 𑀯𑀻𑀡𑀸𑀳𑀻𑀢𑀺 𑀦𑀦𑁆𑀤𑀺𑀦𑀻𑀆𑀤𑀻𑀳𑀺 𑀯𑀻𑀡𑀸𑀳𑀺. 𑀧𑀡𑀯𑁂𑀳𑀻𑀢𑀺 𑀢𑀼𑀭𑀺𑀬𑁂𑀳𑀺 𑀭𑀫𑀦𑁆𑀢𑀺 𑀏𑀓𑁂 𑀓𑀸𑀫𑀪𑁄𑀕𑀺𑀦𑁄, 𑀲𑀸 𑀧𑀦 𑀢𑁂𑀲𑀁 𑀭𑀢𑀺 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀁𑀳𑀺𑀢𑀸. 𑀅𑀳𑀜𑁆𑀘𑀸 𑀢𑀺 𑀅𑀳𑀁 𑀧𑀦, 𑀏𑀓𑀓𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀭𑀢𑁄, 𑀢𑀢𑁄 𑀏𑀯 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁 𑀭𑀢𑁄 𑀅𑀪𑀺𑀭𑀢𑁄 𑀯𑀺𑀳𑀭𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀅𑀢𑁆𑀢𑀦𑁄 𑀯𑀺𑀯𑁂𑀓𑀸𑀪𑀺𑀭𑀢𑀺𑀁 𑀓𑀺𑀢𑁆𑀢𑁂𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑀲𑁆𑀲 𑀧𑀲𑀁𑀲𑀦𑀢𑁆𑀣𑀁 ‘‘𑀩𑀼𑀤𑁆𑀥𑁄 𑀘𑁂 𑀫𑁂’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀩𑀼𑀤𑁆𑀥𑁄 𑀪𑀕𑀯𑀸 ‘‘𑀏𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀻’’𑀢𑀺 𑀫𑀬𑀸 𑀬𑀸𑀘𑀺𑀢𑁄 ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀪𑀺𑀓𑁆𑀔𑀼, 𑀢𑀣𑀸𑀕𑀢𑀸’’𑀢𑀺 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀬𑁆𑀳𑀁 𑀬𑀣𑀸𑀬𑀸𑀘𑀺𑀢𑀁 𑀯𑀭𑀁 𑀤𑀤𑁂𑀬𑁆𑀬, 𑀲𑁄 𑀘 𑀯𑀭𑁄 𑀫𑀫𑀸𑀥𑀺𑀧𑁆𑀧𑀸𑀬𑀧𑀽𑀭𑀓𑁄 𑀮𑀩𑁆𑀪𑁂𑀣 𑀫𑀬𑁆𑀳𑀁 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀬𑁆𑀬𑀸𑀢𑀺 𑀣𑁂𑀭𑁄 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀤𑀢𑀺. ‘‘𑀪𑀦𑁆𑀢𑁂, 𑀲𑀩𑁆𑀩𑁄 𑀮𑁄𑀓𑁄 𑀲𑀩𑁆𑀩𑀓𑀸𑀮𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀽’’𑀢𑀺 ‘‘𑀲𑀩𑁆𑀩𑀮𑁄𑀓𑀲𑁆𑀲 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸𑀲𑀢𑀺 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀓𑀢𑁆𑀯𑀸 𑀯𑀭𑀁 𑀕𑀡𑁆𑀳𑁂 𑀅𑀳𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀡𑁆𑀳𑁂𑀳𑀁 𑀲𑀩𑁆𑀩𑀮𑁄𑀓𑀲𑁆𑀲, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀁 𑀲𑀢𑀺’’𑀦𑁆𑀢𑀺. 𑀇𑀤𑀸𑀦𑀺 𑀅𑀧𑀭𑀺𑀓𑁆𑀔𑀡𑀕𑀭𑀳𑀸𑀫𑀼𑀔𑁂𑀦 𑀧𑀭𑀺𑀓𑁆𑀔𑀡𑀁 𑀧𑀲𑀁𑀲𑀦𑁆𑀢𑁄 𑁋

𑁪𑁬𑁯.

‘‘𑀬𑁂 ¶ 𑀫𑀁 𑀭𑀽𑀧𑁂𑀦 𑀧𑀸𑀫𑀺𑀁𑀲𑀼, 𑀬𑁂 𑀘 𑀖𑁄𑀲𑁂𑀦 𑀅𑀦𑁆𑀯𑀕𑀽;

𑀙𑀦𑁆𑀤𑀭𑀸𑀕𑀯𑀲𑀽𑀧𑁂𑀢𑀸, 𑀦 𑀫𑀁 𑀚𑀸𑀦𑀦𑁆𑀢𑀺 𑀢𑁂 𑀚𑀦𑀸.

𑁪𑁭𑁦.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀦 𑀧𑀲𑁆𑀲𑀢𑀺;

𑀲𑀫𑀦𑁆𑀢𑀸𑀯𑀭𑀡𑁄 𑀩𑀸𑀮𑁄, 𑀲 𑀯𑁂 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺.

𑁪𑁭𑁧.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀺;

𑀩𑀳𑀺𑀤𑁆𑀥𑀸 𑀨𑀮𑀤𑀲𑁆𑀲𑀸𑀯𑀻, 𑀲𑁄𑀧𑀺 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺.

𑁪𑁭𑁨.

‘‘𑀅𑀚𑁆𑀛𑀢𑁆𑀢𑀜𑁆𑀘 ¶ 𑀧𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀺;

𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻, 𑀦 𑀲𑁄 𑀖𑁄𑀲𑁂𑀦 𑀯𑀼𑀬𑁆𑀳𑀢𑀻’’𑀢𑀺. 𑁋

𑀇𑀫𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀬𑁂 𑀫𑀁 𑀭𑀽𑀧𑁂𑀦 𑀧𑀸𑀫𑀺𑀁𑀲𑀽𑀢𑀺 𑀬𑁂 𑀚𑀦𑀸 𑀅𑀯𑀺𑀤𑁆𑀤𑀲𑀽 𑀫𑀫 𑀭𑀽𑀧𑁂𑀦 𑀅𑀧𑀲𑀸𑀤𑀺𑀓𑁂𑀦 𑀦𑀺𑀳𑀻𑀦𑁂𑀦 ‘‘𑀆𑀓𑀸𑀭𑀲𑀤𑀺𑀲𑀻 𑀧𑀜𑁆𑀜𑀸’’𑀢𑀺, 𑀥𑀫𑁆𑀫𑀲𑀭𑀻𑀭𑁂𑀦 𑀘 𑀫𑀁 𑀦𑀺𑀳𑀻𑀦𑀁 𑀧𑀸𑀫𑀺𑀁𑀲𑀼, ‘‘𑀑𑀭𑀓𑁄 𑀅𑀬’’𑀦𑁆𑀢𑀺 𑀳𑀻𑀴𑁂𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 ¶ 𑀫𑀜𑁆𑀜𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀬𑁂 𑀘 𑀖𑁄𑀲𑁂𑀦 𑀅𑀦𑁆𑀯𑀕𑀽𑀢𑀺 𑀬𑁂 𑀘 𑀲𑀢𑁆𑀢𑀸 𑀖𑁄𑀲𑁂𑀦 𑀫𑀜𑁆𑀚𑀼𑀦𑀸 𑀫𑀁 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀅𑀦𑀼𑀕𑀢𑀸 𑀩𑀳𑀼 𑀫𑀜𑁆𑀜𑀺𑀁𑀲𑀼, 𑀢𑀁 𑀢𑁂𑀲𑀁 𑀫𑀺𑀘𑁆𑀙𑀸, 𑀦 𑀳𑀺 𑀅𑀳𑀁 𑀭𑀽𑀧𑀫𑀢𑁆𑀢𑁂𑀦 𑀅𑀯𑀫𑀦𑁆𑀢𑀩𑁆𑀩𑁄, 𑀖𑁄𑀲𑀫𑀢𑁆𑀢𑁂𑀦 𑀯𑀸 𑀦 𑀩𑀳𑀼𑀁 𑀫𑀦𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀙𑀦𑁆𑀤𑀭𑀸𑀕𑀯𑀲𑀽𑀧𑁂𑀢𑀸, 𑀦 𑀫𑀁 𑀚𑀸𑀦𑀦𑁆𑀢𑀺 𑀢𑁂 𑀚𑀦𑀸𑀢𑀺 𑀢𑁂 𑀤𑀼𑀯𑀺𑀥𑀸𑀧𑀺 𑀚𑀦𑀸 𑀙𑀦𑁆𑀤𑀭𑀸𑀕𑀲𑁆𑀲 𑀯𑀲𑀁 𑀉𑀧𑁂𑀢𑀸 𑀅𑀧𑁆𑀧𑀳𑀻𑀦𑀙𑀦𑁆𑀤𑀭𑀸𑀕𑀸 𑀲𑀩𑁆𑀩𑀲𑁄 𑀧𑀳𑀻𑀦𑀙𑀦𑁆𑀤𑀭𑀸𑀕𑀁 𑀫𑀁 𑀦 𑀚𑀸𑀦𑀦𑁆𑀢𑀺.

𑀅𑀯𑀺𑀲𑀬𑁄 𑀢𑁂𑀲𑀁 𑀫𑀸𑀤𑀺𑀲𑁄 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀔𑀦𑁆𑀥𑀸𑀬𑀢𑀦𑀸𑀤𑀺𑀥𑀫𑁆𑀫𑀁. 𑀩𑀳𑀺𑀤𑁆𑀥𑀸𑀢𑀺 𑀧𑀭𑀲𑀦𑁆𑀢𑀸𑀦𑁂. 𑀅𑀣 𑀯𑀸 𑀅𑀚𑁆𑀛𑀢𑁆𑀢𑀦𑁆𑀢𑀺, 𑀫𑀫 𑀅𑀩𑁆𑀪𑀦𑁆𑀢𑀭𑁂 𑀅𑀲𑁂𑀓𑁆𑀔𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀁. 𑀩𑀳𑀺𑀤𑁆𑀥𑀸𑀢𑀺, 𑀫𑀫𑁂𑀯 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸𑀤𑀺𑀬𑀼𑀢𑁆𑀢𑀁 𑀩𑀳𑀺𑀤𑁆𑀥𑀸 𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀯𑀢𑁆𑀢𑀺𑀜𑁆𑀘. 𑀲𑀫𑀦𑁆𑀢𑀸𑀯𑀭𑀡𑁄𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀅𑀚𑀸𑀦𑀦𑁂𑀦 𑀲𑀫𑀦𑁆𑀢𑀢𑁄 𑀆𑀯𑀭𑀡𑀬𑀼𑀢𑁆𑀢𑁄 𑀆𑀯𑀝𑀜𑀸𑀡𑀕𑀢𑀺𑀓𑁄. 𑀲 𑀯𑁂 𑀖𑁄𑀲𑁂𑀦 𑀯𑀼𑀬𑁆𑀳𑀢𑀻𑀢𑀺 𑀲𑁄 𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀓𑁄 𑀩𑀸𑀮𑁄 𑀖𑁄𑀲𑁂𑀦 𑀧𑀭𑁂𑀲𑀁 𑀯𑀘𑀦𑁂𑀦 𑀯𑀼𑀬𑁆𑀳𑀢𑀺 𑀦𑀺𑀬𑁆𑀬𑀢𑀺 𑀆𑀓𑀟𑁆𑀠𑀻𑀬𑀢𑀺.

𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀻𑀢𑀺 𑀬𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀚𑁆𑀛𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀧𑀦 𑀲𑀼𑀢𑀸𑀦𑀼𑀲𑀸𑀭𑁂𑀦 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀆𑀤𑀺𑀉𑀧𑀥𑀸𑀭𑀡𑁂𑀦 𑀯𑀸 𑀯𑀺𑀲𑁂𑀲𑀢𑁄 𑀧𑀲𑁆𑀲𑀢𑀺. ‘‘𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑀺𑀬𑀸’’𑀢𑀺 𑀫𑀜𑁆𑀜𑀢𑀺, 𑀲𑁄𑀧𑀺 𑀩𑀳𑀺𑀤𑁆𑀥𑀸 𑀨𑀮𑀤𑀲𑁆𑀲𑀸𑀯𑀻 𑀦𑀬𑀕𑁆𑀕𑀸𑀳𑁂𑀦 𑀨𑀮𑀫𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀯𑀼𑀢𑁆𑀢𑀦𑀬𑁂𑀦 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺, 𑀲𑁄𑀧𑀺 𑀫𑀸𑀤𑀺𑀲𑁂 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

𑀬𑁄 𑀧𑀦 𑀅𑀚𑁆𑀛𑀢𑁆𑀢𑀜𑁆𑀘 𑀔𑀻𑀡𑀸𑀲𑀯𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀲𑁂𑀓𑁆𑀔𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀁 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀧𑀝𑀺𑀧𑀢𑁆𑀢𑀺𑀲𑀮𑁆𑀮𑀓𑁆𑀔𑀡𑁂𑀦 𑀯𑀺𑀲𑁂𑀲𑀢𑁄 𑀕𑀼𑀡𑀯𑀺𑀲𑁂𑀲𑀬𑁄𑀕𑀁 𑀧𑀲𑁆𑀲𑀢𑀺. 𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻 𑀓𑁂𑀦𑀘𑀺 𑀅𑀦𑀸𑀯𑀝𑁄 𑀳𑀼𑀢𑁆𑀯𑀸 𑀅𑀭𑀺𑀬𑀸𑀦𑀁 𑀕𑀼𑀡𑁂 ¶ 𑀤𑀝𑁆𑀞𑀼𑀁 𑀜𑀸𑀢𑀼𑀁 𑀲𑀫𑀢𑁆𑀣𑁄, 𑀦 𑀲𑁄 𑀖𑁄𑀲𑀫𑀢𑁆𑀢𑁂𑀦 𑀯𑀼𑀬𑁆𑀳𑀢𑀺 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑀢𑁄𑀢𑀺.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀤𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀏𑀓𑀧𑀼𑀢𑁆𑀢𑁄𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀪𑀤𑁆𑀤𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀘𑀻𑀯𑀭𑀸𑀤𑀻𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 ¶ 𑀘 𑀅𑀧𑀼𑀢𑁆𑀢𑀓𑁂𑀲𑀼 𑀫𑀸𑀢𑀸𑀧𑀺𑀢𑀽𑀲𑀼 𑀤𑁂𑀯𑀢𑀸𑀬𑀸𑀘𑀦𑀸𑀤𑀻𑀦𑀺 𑀓𑀢𑁆𑀯𑀸𑀧𑀺 𑀅𑀮𑀪𑀦𑁆𑀢𑁂𑀲𑀼 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀘𑁂, 𑀪𑀦𑁆𑀢𑁂, 𑀫𑀬𑀁 𑀏𑀓𑀁 𑀧𑀼𑀢𑁆𑀢𑀁 𑀮𑀘𑁆𑀙𑀸𑀫, 𑀢𑀁 𑀢𑀼𑀫𑁆𑀳𑀸𑀓𑀁 𑀤𑀸𑀲𑀢𑁆𑀣𑀸𑀬 𑀤𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀆𑀬𑀸𑀘𑀺𑀢𑁆𑀯𑀸 𑀕𑀢𑁂𑀲𑀼 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀔𑀻𑀡𑀸𑀬𑀼𑀓𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 ‘‘𑀅𑀫𑀼𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸𑀳𑀻’’𑀢𑀺 𑀆𑀡𑀢𑁆𑀢𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺, 𑀪𑀤𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀲𑀢𑁆𑀢𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀚𑀸𑀢𑀁 𑀫𑀸𑀢𑀸𑀧𑀺𑀢𑀭𑁄 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀲𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀆𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀤𑀸𑀭𑀓𑁄, 𑀇𑀫𑀁 𑀢𑀼𑀫𑁆𑀳𑀸𑀓𑀁 𑀦𑀺𑀬𑁆𑀬𑀸𑀢𑁂𑀫𑀸’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀇𑀫𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀆𑀡𑀸𑀧𑁂𑀢𑁆𑀯𑀸 𑀘 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀗𑁆𑀔𑁂𑀧𑁂𑀦 𑀯𑀺𑀧𑀲𑁆𑀲𑀦𑀸𑀫𑀼𑀔𑀁 𑀆𑀘𑀺𑀓𑁆𑀔𑀺. 𑀲𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀽𑀭𑀺𑀬𑁂 𑀅𑀦𑁄𑀕𑁆𑀕𑀢𑁂𑀬𑁂𑀯 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁫.𑁫𑁪-𑁬𑁯) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁, 𑀫𑁂𑀢𑁆𑀢𑀘𑀺𑀢𑁆𑀢𑀁 𑀫𑀳𑀸𑀫𑀼𑀦𑀺𑀁;

𑀉𑀧𑁂𑀢𑀺 𑀚𑀦𑀢𑀸 𑀲𑀩𑁆𑀩𑀸, 𑀲𑀩𑁆𑀩𑀮𑁄𑀓𑀕𑁆𑀕𑀦𑀸𑀬𑀓𑀁.

‘‘𑀲𑀢𑁆𑀢𑀼𑀓𑀜𑁆𑀘 𑀩𑀤𑁆𑀥𑀓𑀜𑁆𑀘, 𑀆𑀫𑀺𑀲𑀁 𑀧𑀸𑀦𑀪𑁄𑀚𑀦𑀁;

𑀤𑀤𑀦𑁆𑀢𑀺 𑀲𑀢𑁆𑀣𑀼𑀦𑁄 𑀲𑀩𑁆𑀩𑁂, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂.

‘‘𑀅𑀳𑀫𑁆𑀧𑀺 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀤𑁂𑀯𑀤𑁂𑀯𑀲𑁆𑀲 𑀢𑀸𑀤𑀺𑀦𑁄;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀲𑀗𑁆𑀖𑀫𑁆𑀧𑀺 𑀘 𑀅𑀦𑀼𑀢𑁆𑀢𑀭𑀁.

‘‘𑀉𑀬𑁆𑀬𑁄𑀚𑀺𑀢𑀸 ¶ 𑀫𑀬𑀸 𑀘𑁂𑀢𑁂, 𑀦𑀺𑀫𑀦𑁆𑀢𑁂𑀲𑀼𑀁 𑀢𑀣𑀸𑀕𑀢𑀁;

𑀓𑁂𑀯𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

‘‘𑀲𑀢𑀲𑀳𑀲𑁆𑀲𑀧𑀮𑁆𑀮𑀗𑁆𑀓𑀁, 𑀲𑁄𑀯𑀡𑁆𑀡𑀁 𑀕𑁄𑀦𑀓𑀢𑁆𑀣𑀢𑀁;

𑀢𑀽𑀮𑀺𑀓𑀸𑀧𑀝𑀮𑀺𑀓𑀸𑀬, 𑀔𑁄𑀫𑀓𑀧𑁆𑀧𑀸𑀲𑀺𑀓𑁂𑀳𑀺 𑀘;

𑀫𑀳𑀸𑀭𑀳𑀁 𑀧𑀜𑁆𑀜𑀸𑀧𑀬𑀺𑀁, 𑀆𑀲𑀦𑀁 𑀩𑀼𑀤𑁆𑀥𑀬𑀼𑀢𑁆𑀢𑀓𑀁.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑁄, 𑀫𑀫 𑀤𑁆𑀯𑀸𑀭𑀫𑀼𑀧𑀸𑀕𑀫𑀺.

‘‘𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀦𑀸𑀣𑀁 𑀬𑀲𑀲𑁆𑀲𑀺𑀦𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀪𑀺𑀦𑀸𑀫𑀬𑀺𑀁 𑀲𑀗𑁆𑀖𑀭𑀁.

‘‘𑀪𑀺𑀓𑁆𑀔𑀽𑀦𑀁 𑀲𑀢𑀲𑀳𑀲𑁆𑀲𑀁, 𑀩𑀼𑀤𑁆𑀥𑀜𑁆𑀘 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀭𑀫𑀦𑁆𑀦𑁂𑀦 𑀢𑀧𑁆𑀧𑀬𑀺𑀁.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀬𑁂𑀦𑀺𑀤𑀁 𑀆𑀲𑀦𑀁 𑀤𑀺𑀦𑁆𑀦𑀁, 𑀲𑁄𑀯𑀡𑁆𑀡𑀁 𑀕𑁄𑀦𑀓𑀢𑁆𑀣𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

‘‘𑀘𑀢𑀼𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀁 ¶ 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

‘‘𑀧𑀤𑁂𑀲𑀭𑀚𑁆𑀚𑀁 𑀲𑀳𑀲𑁆𑀲𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺;

𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

‘‘𑀲𑀩𑁆𑀩𑀸𑀲𑀼 𑀪𑀯𑀬𑁄𑀦𑀻𑀲𑀼, 𑀉𑀘𑁆𑀘𑀸𑀓𑀼𑀮𑀻 𑀪𑀯𑀺𑀲𑁆𑀲𑀢𑀺;

𑀲𑁄 𑀘 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀪𑀤𑁆𑀤𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀫𑁆𑀳𑀺, 𑀧𑀦𑁆𑀢𑀲𑁂𑀦𑀦𑀺𑀯𑀸𑀲𑀳𑀁;

𑀨𑀮𑀜𑁆𑀘𑀸𑀥𑀺𑀕𑀢𑀁 𑀲𑀩𑁆𑀩𑀁, 𑀘𑀢𑁆𑀢𑀓𑁆𑀮𑁂𑀲𑁄𑀫𑁆𑀳𑀺 𑀅𑀚𑁆𑀚𑀳𑀁.

‘‘𑀫𑀫 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀢𑀲𑁆𑀲 ¶ 𑀪𑀕𑀯𑀸 𑀙𑀴𑀪𑀺𑀜𑁆𑀜𑀼𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀏𑀳𑀺, 𑀪𑀤𑁆𑀤𑀸’’𑀢𑀺 𑀆𑀳. 𑀲𑁄 𑀢𑀸𑀯𑀤𑁂𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀲𑀢𑁆𑀣𑀼 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺, 𑀲𑀸 𑀏𑀯 𑀘𑀲𑁆𑀲 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺. 𑀩𑀼𑀤𑁆𑀥𑀽𑀧𑀲𑀫𑁆𑀧𑀤𑀸 𑀦𑀸𑀫 𑀓𑀺𑀭𑁂𑀲𑀸. 𑀣𑁂𑀭𑁄 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀬𑀸 𑀓𑀣𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁭𑁩.

‘‘𑀏𑀓𑀧𑀼𑀢𑁆𑀢𑁄 𑀅𑀳𑀁 𑀆𑀲𑀺𑀁, 𑀧𑀺𑀬𑁄 𑀫𑀸𑀢𑀼 𑀧𑀺𑀬𑁄 𑀧𑀺𑀢𑀼;

𑀩𑀳𑀽𑀳𑀺 𑀯𑀢𑀘𑀭𑀺𑀬𑀸𑀳𑀺, 𑀮𑀤𑁆𑀥𑁄 𑀆𑀬𑀸𑀘𑀦𑀸𑀳𑀺 𑀘.

𑁪𑁭𑁪.

‘‘𑀢𑁂 𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄;

𑀉𑀪𑁄 𑀧𑀺𑀢𑀸 𑀘 𑀫𑀸𑀢𑀸 𑀘, 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑀬𑀼𑀁.

𑁪𑁭𑁫.

‘‘𑀓𑀺𑀘𑁆𑀙𑀸 𑀮𑀤𑁆𑀥𑁄 𑀅𑀬𑀁 𑀧𑀼𑀢𑁆𑀢𑁄, 𑀲𑀼𑀔𑀼𑀫𑀸𑀮𑁄 𑀲𑀼𑀔𑁂𑀥𑀺𑀢𑁄;

𑀇𑀫𑀁 𑀤𑀤𑀸𑀫 𑀢𑁂 𑀦𑀸𑀣, 𑀚𑀺𑀦𑀲𑁆𑀲 𑀧𑀭𑀺𑀘𑀸𑀭𑀓𑀁.

𑁪𑁭𑁬.

‘‘𑀲𑀢𑁆𑀣𑀸 𑀘 𑀫𑀁 𑀧𑀝𑀺𑀕𑁆𑀕𑀬𑁆𑀳, 𑀆𑀦𑀦𑁆𑀤𑀁 𑀏𑀢𑀤𑀩𑁆𑀭𑀯𑀺;

𑀧𑀩𑁆𑀩𑀸𑀚𑁂𑀳𑀺 𑀇𑀫𑀁 𑀔𑀺𑀧𑁆𑀧𑀁, 𑀳𑁂𑀲𑁆𑀲𑀢𑁆𑀬𑀸𑀚𑀸𑀦𑀺𑀬𑁄 𑀅𑀬𑀁.

𑁪𑁭𑁭.

‘‘𑀧𑀩𑁆𑀩𑀸𑀚𑁂𑀢𑁆𑀯𑀸𑀦 ¶ 𑀫𑀁 𑀲𑀢𑁆𑀣𑀸, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀚𑀺𑀦𑁄;

𑀅𑀦𑁄𑀕𑁆𑀕𑀢𑀲𑁆𑀫𑀺𑀁 𑀲𑀽𑀭𑀺𑀬𑀲𑁆𑀫𑀺𑀁, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂.

𑁪𑁭𑁮.

‘‘𑀢𑀢𑁄 ¶ 𑀲𑀢𑁆𑀣𑀸 𑀦𑀺𑀭𑀸𑀓𑀢𑁆𑀯𑀸, 𑀧𑀝𑀺𑀲𑀮𑁆𑀮𑀸𑀦𑀯𑀼𑀝𑁆𑀞𑀺𑀢𑁄;

𑀏𑀳𑀺 𑀪𑀤𑁆𑀤𑀸𑀢𑀺 𑀫𑀁 𑀆𑀳, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁪𑁭𑁯.

‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀮𑀤𑁆𑀥𑀸 𑀫𑁂 𑀉𑀧𑀲𑀫𑁆𑀧𑀤𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀯𑀢𑀘𑀭𑀺𑀬𑀸𑀳𑀻𑀢𑀺, ‘‘𑀏𑀯𑀁 𑀓𑀢𑁆𑀯𑀸 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀔𑀻𑀭𑀁 𑀧𑀸𑀬𑀺𑀢𑁆𑀯𑀸, 𑀅𑀦𑀲𑀦𑀸𑀤𑀺𑀯𑀢𑀘𑀭𑀡𑁂𑀳𑀺. 𑀆𑀬𑀸𑀘𑀦𑀸𑀳𑀻𑀢𑀺 𑀤𑁂𑀯𑀢𑀸𑀬𑀸𑀘𑀦𑀸𑀳𑀺 𑀲𑀢𑁆𑀣𑀼𑀆𑀬𑀸𑀘𑀦𑀸𑀬 𑀘, 𑀇𑀤𑀫𑁂𑀯 𑀘𑁂𑀢𑁆𑀣 𑀓𑀸𑀭𑀡𑀁, 𑀇𑀢𑀭𑀁 𑀣𑁂𑀭𑁄 𑀫𑀸𑀢𑀸𑀧𑀺𑀢𑀽𑀦𑀁 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀓𑀺𑀘𑁆𑀙𑀮𑀤𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀤𑀢𑀺.

𑀢𑁂𑀢𑀺 ¶ 𑀫𑀸𑀢𑀸𑀧𑀺𑀢𑀭𑁄. 𑀉𑀧𑀦𑀸𑀫𑀬𑀼𑀦𑁆𑀢𑀺 𑀉𑀧𑀦𑀸𑀫𑁂𑀲𑀼𑀁.

𑀲𑀼𑀔𑁂𑀥𑀺𑀢𑁄𑀢𑀺 𑀲𑀼𑀔𑀲𑀁𑀯𑀟𑁆𑀠𑀺𑀢𑁄. 𑀢𑁂𑀢𑀺 𑀢𑀼𑀬𑁆𑀳𑀁. 𑀧𑀭𑀺𑀘𑀸𑀭𑀓𑀦𑁆𑀢𑀺 𑀓𑀺𑀁𑀓𑀸𑀭𑀁.

𑀳𑁂𑀲𑁆𑀲𑀢𑁆𑀬𑀸𑀚𑀸𑀦𑀺𑀬𑁄 𑀅𑀬𑀦𑁆𑀢𑀺 𑀅𑀬𑀁 𑀤𑀸𑀭𑀓𑁄 𑀫𑀫 𑀲𑀸𑀲𑀦𑁂 𑀆𑀚𑀸𑀦𑀻𑀬𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀔𑀺𑀧𑁆𑀧𑀁 𑀅𑀚𑁆𑀚𑁂𑀯 𑀧𑀩𑁆𑀩𑀸𑀚𑁂𑀳𑀻𑀢𑀺 𑀏𑀢𑀁 𑀅𑀩𑁆𑀭𑀯𑀺, 𑀆𑀳.

𑀧𑀩𑁆𑀩𑀸𑀚𑁂𑀢𑁆𑀯𑀸𑀦𑀸𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸. 𑀯𑀺𑀳𑀸𑀭𑀦𑁆𑀢𑀺 𑀕𑀦𑁆𑀥𑀓𑀼𑀝𑀺𑀁. 𑀅𑀦𑁄𑀕𑁆𑀕𑀢𑀲𑁆𑀫𑀺𑀁 𑀲𑀽𑀭𑀺𑀬𑀲𑁆𑀫𑀺𑀦𑁆𑀢𑀺 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯. 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂𑀢𑀺 𑀢𑀢𑁄 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑀢𑁄 𑀧𑀭𑀁 𑀦 𑀘𑀺𑀭𑁂𑀦𑁂𑀯 𑀔𑀡𑁂𑀦 𑀲𑀩𑁆𑀩𑀸𑀲𑀯𑁂𑀳𑀺 𑀫𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺, 𑀔𑀻𑀡𑀸𑀲𑀯𑁄 𑀅𑀳𑁄𑀲𑀺𑀁.

𑀢𑀢𑁄𑀢𑀺 𑀫𑀫 𑀆𑀲𑀯𑀓𑁆𑀔𑀬𑀢𑁄 𑀧𑀘𑁆𑀙𑀸. 𑀦𑀺𑀭𑀸𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀲𑀫𑀸𑀧𑀦𑁆𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬. 𑀢𑁂𑀦𑀸𑀳 ‘‘𑀧𑀝𑀺𑀲𑀮𑁆𑀮𑀸𑀦𑀯𑀼𑀝𑁆𑀞𑀺𑀢𑁄’’𑀢𑀺. 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸𑀢𑀺 𑀬𑀸 𑀫𑀁 𑀉𑀤𑁆𑀤𑀺𑀲𑁆𑀲 ‘‘𑀏𑀳𑀺, 𑀪𑀤𑁆𑀤𑀸’’𑀢𑀺 𑀲𑀢𑁆𑀣𑀼 𑀯𑀸𑀘𑀸 𑀧𑀯𑀢𑁆𑀢𑀸, 𑀲𑀸 𑀏𑀯 𑀫𑁂 𑀫𑀬𑁆𑀳𑀁 𑀉𑀧𑀲𑀫𑁆𑀧𑀤𑀸 𑀆𑀲𑀺. 𑀏𑀯𑀁 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀮𑀤𑁆𑀥𑀸 𑀫𑁂 𑀉𑀧𑀲𑀫𑁆𑀧𑀤𑀸𑀢𑀺 𑀲𑀸𑀢𑀺𑀲𑀬𑀁 𑀲𑀢𑁆𑀣𑀸𑀭𑀸 𑀅𑀢𑁆𑀢𑀦𑁄 𑀓𑀢𑀁 𑀅𑀦𑀼𑀕𑁆𑀕𑀳𑀁 𑀲𑀸𑀲𑀦𑀲𑁆𑀲 𑀘 𑀦𑀺𑀬𑁆𑀬𑀸𑀦𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸’’𑀢𑀺.

𑀏𑀢𑁆𑀣 𑀘 ‘‘𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂’’𑀢𑀺 𑀔𑀻𑀡𑀸𑀲𑀯𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸𑀧𑀺 𑀧𑀼𑀦 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸’’𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑁂𑀓𑀤𑁂𑀲𑀤𑀲𑁆𑀲𑀦𑀁 𑀙𑀴𑀪𑀺𑀜𑁆𑀜𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁. 𑀢𑁂𑀦𑀸𑀳 𑀅𑀧𑀤𑀸𑀦𑁂 ‘‘𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸’’𑀢𑀺.

𑀪𑀤𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑁄𑀧𑀸𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀤𑀺𑀲𑁆𑀯𑀸 ¶ ¶ 𑀧𑀸𑀲𑀸𑀤𑀙𑀸𑀬𑀸𑀬𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑁄𑀧𑀸𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀚𑁆𑀚𑀸𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 ¶ 𑀧𑀩𑁆𑀩𑀢𑁂 𑀯𑀺𑀳𑀭𑀢𑀺. 𑀲𑀢𑁆𑀣𑀸 𑀆𑀲𑀦𑁆𑀦𑀫𑀭𑀡𑀁 𑀢𑀁 𑀜𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑁄 𑀧𑀼𑀧𑁆𑀨𑀫𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀲𑁄 𑀧𑀼𑀩𑁆𑀩𑁂 𑀕𑀳𑀺𑀢𑀁 𑀦𑀺𑀘𑁆𑀘𑀕𑁆𑀕𑀸𑀳𑀁 𑀧𑀳𑀸𑀬 𑀅𑀦𑀺𑀘𑁆𑀘𑀲𑀜𑁆𑀜𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸, 𑀓𑀸𑀮𑀗𑁆𑀓𑀢𑁆𑀯𑀸, 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑀺𑀢𑁆𑀯𑀸, 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀲𑁄𑀧𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀚𑀸𑀢𑀺𑀆𑀕𑀢𑁂𑀦 𑀲𑁄𑀧𑀸𑀓𑁄𑀢𑀺 𑀦𑀸𑀫𑁂𑀦 𑀧𑀜𑁆𑀜𑀸𑀬𑀺. 𑀓𑁂𑀘𑀺 𑀧𑀦 ‘‘𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, ‘𑀲𑁄𑀧𑀸𑀓𑁄’𑀢𑀺 𑀧𑀦 𑀦𑀸𑀫𑀫𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀧𑀤𑀸𑀦𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺 ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑁄𑀧𑀸𑀓𑀬𑁄𑀦𑀼𑀧𑀸𑀕𑀫𑀺’’𑀦𑁆𑀢𑀺 𑀯𑀘𑀦𑀢𑁄.

𑀢𑀲𑁆𑀲 𑀘𑀢𑀼𑀫𑀸𑀲𑀚𑀸𑀢𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺, 𑀘𑀽𑀴𑀧𑀺𑀢𑀸 𑀧𑁄𑀲𑁂𑀲𑀺. 𑀅𑀦𑀼𑀓𑁆𑀓𑀫𑁂𑀦 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑁄. 𑀏𑀓𑀤𑀺𑀯𑀲𑀁 𑀘𑀽𑀴𑀧𑀺𑀢𑀸 ‘‘𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀦 𑀓𑀮𑀳𑀁 𑀓𑀭𑁄𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸, 𑀢𑀁 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸, 𑀤𑁆𑀯𑁂 𑀳𑀢𑁆𑀣𑁂 𑀭𑀚𑁆𑀚𑀼𑀬𑀸 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸, 𑀢𑀸𑀬 𑀏𑀯 𑀭𑀚𑁆𑀚𑀼𑀬𑀸 𑀫𑀢𑀫𑀦𑀼𑀲𑁆𑀲𑀲𑁆𑀲 𑀲𑀭𑀻𑀭𑁂 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀕𑀢𑁄 ‘‘𑀲𑀺𑀗𑁆𑀕𑀸𑀮𑀸𑀤𑀬𑁄 𑀔𑀸𑀤𑀦𑁆𑀢𑀽’’𑀢𑀺. 𑀧𑀘𑁆𑀙𑀺𑀫𑀪𑀯𑀺𑀓𑀢𑀸𑀬 𑀤𑀸𑀭𑀓𑀲𑁆𑀲 𑀧𑀼𑀜𑁆𑀜𑀨𑀮𑁂𑀦 𑀲𑀬𑀁 𑀫𑀸𑀭𑁂𑀢𑀼𑀁 𑀦 𑀯𑀺𑀲𑀳𑀺, 𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀦 𑀅𑀪𑀺𑀪𑀯𑀺𑀁𑀲𑀼. 𑀤𑀸𑀭𑀓𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀏𑀯𑀁 𑀯𑀺𑀧𑁆𑀧𑀮𑀧𑀢𑀺 𑁋

‘‘𑀓𑀸 𑀕𑀢𑀺 𑀫𑁂 𑀅𑀕𑀢𑀺𑀲𑁆𑀲, 𑀓𑁄 𑀯𑀸 𑀩𑀦𑁆𑀥𑀼 𑀅𑀩𑀦𑁆𑀥𑀼𑀦𑁄;

𑀲𑀼𑀲𑀸𑀦𑀫𑀚𑁆𑀛𑁂 𑀩𑀦𑁆𑀥𑀲𑁆𑀲, 𑀓𑁄 𑀫𑁂 𑀅𑀪𑀬𑀤𑀸𑀬𑀓𑁄’’𑀢𑀺.

𑀲𑀢𑁆𑀣𑀸 𑀢𑀸𑀬 𑀯𑁂𑀮𑀸𑀬 𑀯𑁂𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀤𑀸𑀭𑀓𑀲𑁆𑀲 𑀳𑀤𑀬𑀩𑁆𑀪𑀦𑁆𑀢𑀭𑁂 𑀧𑀚𑁆𑀚𑀮𑀦𑁆𑀢𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀲𑀢𑀺𑀁 𑀚𑀦𑁂𑀢𑁆𑀯𑀸 𑀏𑀯𑀫𑀸𑀳 𑁋

‘‘𑀏𑀳𑀺 ¶ 𑀲𑁄𑀧𑀸𑀓 𑀫𑀸 𑀪𑀸𑀬𑀺, 𑀑𑀮𑁄𑀓𑀲𑁆𑀲𑀼 𑀢𑀣𑀸𑀕𑀢𑀁;

𑀅𑀳𑀁 𑀢𑀁 𑀢𑀸𑀭𑀬𑀺𑀲𑁆𑀲𑀸𑀫𑀺, 𑀭𑀸𑀳𑀼𑀫𑀼𑀔𑁂𑀯 𑀘𑀦𑁆𑀤𑀺𑀫’’𑀦𑁆𑀢𑀺.

𑀤𑀸𑀭𑀓𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀙𑀺𑀦𑁆𑀦𑀩𑀦𑁆𑀥𑀦𑁄 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀲𑀫𑁆𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀫𑀸𑀢𑀸 𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀘𑀽𑀴𑀧𑀺𑀢𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦𑀲𑁆𑀲 𑀧𑀯𑀢𑁆𑀢𑀺𑀬𑀸 𑀅𑀓𑀣𑀺𑀢𑀸𑀬 𑀢𑀢𑁆𑀣 𑀢𑀢𑁆𑀣 ¶ 𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑀻 ¶ ‘‘𑀩𑀼𑀤𑁆𑀥𑀸 𑀓𑀺𑀭 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀚𑀸𑀦𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸, 𑀇𑀤𑁆𑀥𑀺𑀬𑀸 𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀫 𑀧𑀼𑀢𑁆𑀢𑀁 𑀦 𑀧𑀲𑁆𑀲𑀸𑀫𑀺, 𑀅𑀧𑀺𑀘 𑀪𑀕𑀯𑀸 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀢𑀻’’𑀢𑀺 𑀢𑀸𑀬 𑀧𑀼𑀝𑁆𑀞𑁄 𑁋

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸’’𑀢𑀺. (𑀥. 𑀧. 𑁨𑁮𑁮) 𑁋

𑀥𑀫𑁆𑀫𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀤𑀸𑀭𑀓𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁨.𑁧𑁧𑁨-𑁧𑁨𑁩) 𑁋

‘‘𑀧𑀩𑁆𑀪𑀸𑀭𑀁 𑀲𑁄𑀥𑀬𑀦𑁆𑀢𑀲𑁆𑀲, 𑀯𑀺𑀧𑀺𑀦𑁂 𑀧𑀩𑁆𑀩𑀢𑀼𑀢𑁆𑀢𑀫𑁂;

𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀕𑀯𑀸, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

‘‘𑀩𑀼𑀤𑁆𑀥𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸𑀦, 𑀧𑀼𑀧𑁆𑀨𑀸𑀲𑀦𑀫𑀤𑀸𑀲𑀳𑀁.

‘‘𑀧𑀼𑀧𑁆𑀨𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀫𑀫𑀜𑁆𑀘 𑀕𑀢𑀺𑀫𑀜𑁆𑀜𑀸𑀬, 𑀅𑀦𑀺𑀘𑁆𑀘𑀢𑀫𑀼𑀤𑀸𑀳𑀭𑀺.

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

‘‘𑀲𑀓𑀁 𑀤𑀺𑀝𑁆𑀞𑀺𑀁 𑀚𑀳𑀺𑀢𑁆𑀯𑀸𑀦, 𑀪𑀸𑀯𑀬𑀸𑀦𑀺𑀘𑁆𑀘𑀲𑀜𑁆𑀜𑀳𑀁;

𑀏𑀓𑀸𑀳𑀁 𑀪𑀸𑀯𑀬𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀁 𑀓𑀢𑁄 𑀅𑀳𑀁.

‘‘𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀧𑀸𑀓𑀬𑁄𑀦𑀼𑀧𑀸𑀕𑀫𑀺𑀁.

‘‘𑀅𑀕𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀆𑀭𑀤𑁆𑀥𑀯𑀻𑀭𑀺𑀬𑁄 ¶ 𑀧𑀳𑀺𑀢𑀢𑁆𑀢𑁄, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀢𑁄𑀲𑁂𑀢𑁆𑀯𑀸𑀦 𑀫𑀳𑀸𑀦𑀸𑀕𑀁, 𑀅𑀮𑀢𑁆𑀣𑀁 𑀉𑀧𑀲𑀫𑁆𑀧𑀤𑀁.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀁 𑀪𑀸𑀯𑀬𑀺𑀁 𑀢𑀤𑀸;

𑀢𑀁 𑀲𑀜𑁆𑀜𑀁 𑀪𑀸𑀯𑀬𑀦𑁆𑀢𑀲𑁆𑀲, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 𑀪𑀕𑀯𑀸 𑀇𑀤𑁆𑀥𑀺𑀁 𑀧𑀝𑀺𑀲𑀁𑀳𑀭𑀺. 𑀲𑀸𑀧𑀺 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀢𑀲𑁆𑀲 𑀔𑀻𑀡𑀸𑀲𑀯𑀪𑀸𑀯𑀁 𑀲𑀼𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀕𑀢𑀸. 𑀲𑁄 𑀲𑀢𑁆𑀣𑀸𑀭𑀁 𑀕𑀦𑁆𑀥𑀓𑀼𑀝𑀺𑀘𑁆𑀙𑀸𑀬𑀸𑀬𑀁 𑀘𑀗𑁆𑀓𑀫𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀅𑀦𑀼𑀘𑀗𑁆𑀓𑀫𑀺. 𑀢𑀲𑁆𑀲 𑀪𑀕𑀯𑀸 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀺𑀢𑀼𑀓𑀸𑀫𑁄 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺𑀆𑀤𑀺𑀦𑀸 𑀤𑀲 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑁄𑀧𑀺 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑀁 𑀕𑀡𑁆𑀳𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀁𑀲𑀦𑁆𑀤𑁂𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺𑀆𑀤𑀺𑀦𑀸 (𑀔𑀼. 𑀧𑀸. 𑁪.𑁧) 𑀢𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂𑀦𑁂𑀯 𑀢𑁂 𑀓𑀼𑀫𑀸𑀭𑀧𑀜𑁆𑀳𑀸 𑀦𑀸𑀫 𑀚𑀸𑀢𑀸. 𑀲𑀢𑁆𑀣𑀸 𑀢𑀲𑁆𑀲 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀸𑀥𑀺𑀢𑀘𑀺𑀢𑁆𑀢𑁄 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀺. 𑀢𑁂𑀦 𑀲𑀸 𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀚𑀸𑀢𑀸. 𑀢𑀲𑁆𑀲𑀺𑀫𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀧𑀓𑀸𑀲𑁂𑀢𑁆𑀯𑀸 𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁮𑁦.

‘‘𑀤𑀺𑀲𑁆𑀯𑀸 𑀧𑀸𑀲𑀸𑀤𑀙𑀸𑀬𑀸𑀬𑀁, 𑀘𑀗𑁆𑀓𑀫𑀦𑁆𑀢𑀁 𑀦𑀭𑀼𑀢𑁆𑀢𑀫𑀁;

𑀢𑀢𑁆𑀣 𑀦𑀁 𑀉𑀧𑀲𑀗𑁆𑀓𑀫𑁆𑀫, 𑀯𑀦𑁆𑀤𑀺𑀲𑁆𑀲𑀁 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁪𑁮𑁧.

‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀲𑀁𑀳𑀭𑀺𑀢𑁆𑀯𑀸𑀦 𑀧𑀸𑀡𑀬𑁄;

𑀅𑀦𑀼𑀘𑀗𑁆𑀓𑀫𑀺𑀲𑁆𑀲𑀁 𑀯𑀺𑀭𑀚𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁪𑁮𑁨.

‘‘𑀢𑀢𑁄 𑀧𑀜𑁆𑀳𑁂 𑀅𑀧𑀼𑀘𑁆𑀙𑀺 𑀫𑀁, 𑀧𑀜𑁆𑀳𑀸𑀦𑀁 𑀓𑁄𑀯𑀺𑀤𑁄 𑀯𑀺𑀤𑀽;

𑀅𑀘𑁆𑀙𑀫𑁆𑀪𑀻 𑀘 𑀅𑀪𑀻𑀢𑁄 𑀘, 𑀩𑁆𑀬𑀸𑀓𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁪𑁮𑁩.

‘‘𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀧𑀜𑁆𑀳𑁂𑀲𑀼, 𑀅𑀦𑀼𑀫𑁄𑀤𑀺 𑀢𑀣𑀸𑀕𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀮𑁄𑀓𑁂𑀢𑁆𑀯𑀸, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

𑁪𑁮𑁪.

‘‘‘𑀮𑀸𑀪𑀸 𑀅𑀗𑁆𑀕𑀸𑀦𑀁 𑀫𑀕𑀥𑀸𑀦𑀁, 𑀬𑁂𑀲𑀸𑀬𑀁 𑀧𑀭𑀺𑀪𑀼𑀜𑁆𑀚𑀢𑀺;

𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀧𑀘𑁆𑀘𑀼𑀝𑁆𑀞𑀸𑀦𑀜𑁆𑀘 𑀲𑀸𑀫𑀻𑀘𑀺𑀁, 𑀢𑁂𑀲𑀁 𑀮𑀸𑀪𑀸’𑀢𑀺 𑀘𑀸𑀩𑁆𑀭𑀯𑀺.

𑁪𑁮𑁫.

‘‘‘𑀅𑀚𑁆𑀚𑀤𑀕𑁆𑀕𑁂 ¶ 𑀫𑀁 𑀲𑁄𑀧𑀸𑀓, 𑀤𑀲𑁆𑀲𑀦𑀸𑀬𑁄𑀧𑀲𑀗𑁆𑀓𑀫;

𑀏𑀲𑀸 𑀘𑁂𑀯 𑀢𑁂 𑀲𑁄𑀧𑀸𑀓, 𑀪𑀯𑀢𑀼 𑀉𑀧𑀲𑀫𑁆𑀧𑀤𑀸’’’.

𑁪𑁮𑁬.

‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀮𑀤𑁆𑀥𑀸𑀦 𑀉𑀧𑀲𑀫𑁆𑀧𑀤𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 ¶ ¶ 𑀧𑀸𑀲𑀸𑀤𑀙𑀸𑀬𑀸𑀬𑀦𑁆𑀢𑀺 𑀕𑀦𑁆𑀥𑀓𑀼𑀝𑀺𑀘𑁆𑀙𑀸𑀬𑀸𑀬𑀁. 𑀯𑀦𑁆𑀤𑀺𑀲𑁆𑀲𑀦𑁆𑀢𑀺, 𑀅𑀪𑀺𑀯𑀦𑁆𑀤𑀺𑀁.

𑀲𑀁𑀳𑀭𑀺𑀢𑁆𑀯𑀸𑀦 𑀧𑀸𑀡𑀬𑁄𑀢𑀺 𑀉𑀪𑁄 𑀳𑀢𑁆𑀣𑁂 𑀓𑀫𑀮𑀫𑀓𑀼𑀴𑀸𑀓𑀸𑀭𑁂𑀦 𑀲𑀗𑁆𑀕𑀢𑁂 𑀓𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀺 𑀘𑀗𑁆𑀓𑀫𑀦𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀅𑀦𑀼𑀧𑀘𑁆𑀙𑀢𑁄 𑀅𑀦𑀼𑀕𑀫𑀦𑀯𑀲𑁂𑀦 𑀘𑀗𑁆𑀓𑀫𑀺𑀁. 𑀯𑀺𑀭𑀚𑀦𑁆𑀢𑀺 𑀯𑀺𑀕𑀢𑀭𑀸𑀕𑀸𑀤𑀺𑀭𑀚𑀁.

𑀧𑀜𑁆𑀳𑁂𑀢𑀺 𑀓𑀼𑀫𑀸𑀭𑀧𑀜𑁆𑀳𑁂. 𑀯𑀺𑀤𑀽𑀢𑀺 𑀯𑁂𑀤𑀺𑀢𑀩𑁆𑀩𑀁 𑀯𑀺𑀤𑀺𑀢𑀯𑀸, 𑀲𑀩𑁆𑀩𑀜𑁆𑀜𑀽𑀢𑀺 𑀅𑀢𑁆𑀣𑁄. ‘‘𑀲𑀢𑁆𑀣𑀸 𑀫𑀁 𑀧𑀼𑀘𑁆𑀙𑀢𑀻’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑀲𑁆𑀲 𑀪𑀬𑀲𑁆𑀲 𑀘 𑀲𑁂𑀢𑀼𑀖𑀸𑀢𑁂𑀦 𑀧𑀳𑀻𑀦𑀢𑁆𑀢𑀸 𑀅𑀘𑁆𑀙𑀫𑁆𑀪𑀻 𑀘 𑀅𑀪𑀻𑀢𑁄 𑀘 𑀩𑁆𑀬𑀸𑀓𑀸𑀲𑀺.

𑀬𑁂𑀲𑀸𑀬𑀦𑁆𑀢𑀺 𑀬𑁂𑀲𑀁 𑀅𑀗𑁆𑀕𑀫𑀕𑀥𑀸𑀦𑀁 𑀅𑀬𑀁 𑀲𑁄𑀧𑀸𑀓𑁄. 𑀧𑀘𑁆𑀘𑀬𑀦𑁆𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀁. 𑀲𑀸𑀫𑀻𑀘𑀺𑀦𑁆𑀢𑀺 𑀫𑀕𑁆𑀕𑀤𑀸𑀦𑀩𑀻𑀚𑀦𑀸𑀤𑀺𑀲𑀸𑀫𑀻𑀘𑀺𑀓𑀺𑀭𑀺𑀬𑀁.

𑀅𑀚𑁆𑀚𑀤𑀕𑁆𑀕𑁂𑀢𑀺 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑁂 𑀆𑀤𑀺𑀁 𑀓𑀢𑁆𑀯𑀸, 𑀅𑀚𑁆𑀚 𑀧𑀝𑁆𑀞𑀸𑀬. ‘‘𑀅𑀚𑁆𑀚𑀢𑀕𑁆𑀕𑁂’’𑀢𑀺𑀧𑀺 𑀧𑀸𑀴𑀺, 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑀸𑀬𑁄𑀧𑀲𑀗𑁆𑀓𑀫𑀸𑀢𑀺 ‘‘𑀳𑀻𑀦𑀚𑀘𑁆𑀘𑁄, 𑀯𑀬𑀲𑀸 𑀢𑀭𑀼𑀡𑀢𑀭𑁄’’𑀢𑀺 𑀯𑀸 𑀅𑀘𑀺𑀦𑁆𑀢𑁂𑀢𑁆𑀯𑀸 𑀤𑀲𑁆𑀲𑀦𑀸𑀬 𑀫𑀁 𑀉𑀧𑀲𑀗𑁆𑀓𑀫. 𑀏𑀲𑀸 𑀘𑁂𑀯𑀸𑀢𑀺 𑀬𑀸 𑀢𑀲𑁆𑀲 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀓𑀢𑀸 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸. 𑀏𑀲𑀸𑀬𑁂𑀯 𑀢𑁂 𑀪𑀯𑀢𑀼 𑀉𑀧𑀲𑀫𑁆𑀧𑀤𑀸 𑀇𑀢𑀺 𑀘 𑀅𑀩𑁆𑀭𑀯𑀻𑀢𑀺 𑀬𑁄𑀚𑀦𑀸. ‘‘𑀮𑀤𑁆𑀥𑀸 𑀫𑁂 𑀉𑀧𑀲𑀫𑁆𑀧𑀤𑀸’’𑀢𑀺𑀧𑀺 𑀧𑀸𑀴𑀺. 𑀬𑁂 𑀧𑀦 ‘‘𑀮𑀤𑁆𑀥𑀸𑀦 𑀉𑀧𑀲𑀫𑁆𑀧𑀤’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀲𑀢𑁆𑀢𑀯𑀲𑁆𑀲𑁂𑀦𑀸𑀢𑀺 𑀲𑀢𑁆𑀢𑀫𑁂𑀦 𑀯𑀲𑁆𑀲𑁂𑀦𑀸𑀢𑀺 𑀅𑀢𑁆𑀣𑁄, 𑀲𑀢𑁆𑀢𑀯𑀲𑁆𑀲𑁂𑀦 𑀯𑀸 𑀳𑀼𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀬𑀁 𑀧𑀦𑁂𑀢𑁆𑀣 𑀅𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑁄𑀧𑀸𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀭𑀪𑀗𑁆𑀕𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀭𑁂 ¶ 𑀳𑀢𑁆𑀣𑁂𑀳𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀭𑀪𑀗𑁆𑀕𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀅𑀦𑀪𑀺𑀮𑀓𑁆𑀔𑀺𑀢𑁄𑀢𑀺𑀲𑁆𑀲 𑀓𑀼𑀮𑀯𑀁𑀲𑀸𑀕𑀢𑀁 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀭𑀢𑀺𑀡𑀸𑀦𑀺 ¶ 𑀲𑀬𑀫𑁂𑀯 𑀪𑀜𑁆𑀚𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀯𑀲𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀭𑀪𑀗𑁆𑀕𑁄𑀢𑀺𑀲𑁆𑀲 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀅𑀣 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀢𑀺. 𑀅𑀣𑀲𑁆𑀲 𑀢𑀸𑀧𑀲𑀓𑀸𑀮𑁂 𑀓𑀢𑀸 𑀧𑀡𑁆𑀡𑀲𑀸𑀮𑀸 𑀚𑀺𑀡𑁆𑀡𑀸 𑀧𑀮𑀼𑀕𑁆𑀕𑀸 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 ¶ 𑀫𑀦𑀼𑀲𑁆𑀲𑀸 ‘‘𑀓𑀺𑀲𑁆𑀲, 𑀪𑀦𑁆𑀢𑁂, 𑀇𑀫𑀁 𑀓𑀼𑀝𑀺𑀓𑀁 𑀦 𑀧𑀝𑀺𑀲𑀗𑁆𑀔𑀭𑁄𑀣𑀸’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀓𑀼𑀝𑀺𑀓𑀸 𑀬𑀣𑀸 𑀢𑀸𑀧𑀲𑀓𑀸𑀮𑁂 𑀓𑀢𑀸, 𑀇𑀤𑀸𑀦𑀺 𑀢𑀣𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀢𑀁 𑀲𑀩𑁆𑀩𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁪𑁮𑁭.

‘‘𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑁆𑀯𑀸, 𑀓𑀢𑁆𑀯𑀸𑀦 𑀓𑀼𑀝𑀺𑀫𑀘𑁆𑀙𑀺𑀲𑀁;

𑀢𑁂𑀦 𑀫𑁂 𑀲𑀭𑀪𑀗𑁆𑀕𑁄𑀢𑀺, 𑀦𑀸𑀫𑀁 𑀲𑀫𑁆𑀫𑀼𑀢𑀺𑀬𑀸 𑀅𑀳𑀼.

𑁪𑁮𑁮.

‘‘𑀦 𑀫𑀬𑁆𑀳𑀁 𑀓𑀧𑁆𑀧𑀢𑁂 𑀅𑀚𑁆𑀚, 𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑀼𑀁;

𑀲𑀺𑀓𑁆𑀔𑀸𑀧𑀤𑀸 𑀦𑁄 𑀧𑀜𑁆𑀜𑀢𑁆𑀢𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑁆𑀯𑀸𑀢𑀺, 𑀧𑀼𑀩𑁆𑀩𑁂 𑀢𑀸𑀧𑀲𑀓𑀸𑀮𑁂 𑀲𑀭𑀢𑀺𑀡𑀸𑀦𑀺 𑀫𑀫 𑀳𑀢𑁆𑀣𑁂𑀳𑀺 𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀡𑀓𑀼𑀝𑀺𑀁 𑀓𑀢𑁆𑀯𑀸 𑀅𑀘𑁆𑀙𑀺𑀲𑀁 𑀯𑀲𑀺𑀁, 𑀦𑀺𑀲𑀻𑀤𑀺𑀜𑁆𑀘𑁂𑀯 𑀦𑀺𑀧𑀚𑁆𑀚𑀺𑀜𑁆𑀘. 𑀢𑁂𑀦𑀸𑀢𑀺 𑀓𑀼𑀝𑀺𑀓𑀭𑀡𑀢𑁆𑀣𑀁 𑀲𑀭𑀸𑀦𑀁 𑀪𑀜𑁆𑀚𑀦𑁂𑀦. 𑀲𑀫𑁆𑀫𑀼𑀢𑀺𑀬𑀸𑀢𑀺 𑀅𑀦𑁆𑀯𑀢𑁆𑀣𑀲𑀫𑁆𑀫𑀼𑀢𑀺𑀬𑀸 𑀲𑀭𑀪𑀗𑁆𑀕𑁄𑀢𑀺, 𑀦𑀸𑀫𑀁 𑀅𑀳𑀼 𑀅𑀳𑁄𑀲𑀺.

𑀦 𑀫𑀬𑁆𑀳𑀁 𑀓𑀧𑁆𑀧𑀢𑁂 𑀅𑀚𑁆𑀚𑀸𑀢𑀺 𑀅𑀚𑁆𑀚 𑀇𑀤𑀸𑀦𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀫𑀬𑁆𑀳𑀁 𑀲𑀭𑁂 𑀲𑀭𑀢𑀺𑀡𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑀼𑀁 𑀦 𑀓𑀧𑁆𑀧𑀢𑁂 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀲𑀺𑀓𑁆𑀔𑀸𑀧𑀤𑀸 𑀦𑁄 𑀧𑀜𑁆𑀜𑀢𑁆𑀢𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸𑀢𑀺. 𑀢𑁂𑀦 𑀬𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀬𑀁 𑀚𑀻𑀯𑀺𑀢𑀳𑁂𑀢𑀼𑀦𑀸𑀧𑀺 𑀦𑀸𑀢𑀺𑀓𑁆𑀓𑀫𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 ¶ 𑀏𑀓𑁂𑀦 𑀧𑀓𑀸𑀭𑁂𑀦 𑀢𑀺𑀡𑀓𑀼𑀝𑀺𑀓𑀸𑀬 𑀅𑀧𑀝𑀺𑀲𑀗𑁆𑀔𑀭𑀡𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀦𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁪𑁮𑁯.

‘‘𑀲𑀓𑀮𑀁 𑀲𑀫𑀢𑁆𑀢𑀁 𑀭𑁄𑀕𑀁, 𑀲𑀭𑀪𑀗𑁆𑀕𑁄 𑀦𑀸𑀤𑁆𑀤𑀲𑀁 𑀧𑀼𑀩𑁆𑀩𑁂;

𑀲𑁄𑀬𑀁 𑀭𑁄𑀕𑁄 𑀤𑀺𑀝𑁆𑀞𑁄, 𑀯𑀘𑀦𑀓𑀭𑁂𑀦𑀸𑀢𑀺𑀤𑁂𑀯𑀲𑁆𑀲𑀸’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑀢𑀢𑁆𑀣 𑀲𑀓𑀮𑀦𑁆𑀢𑀺 𑀲𑀩𑁆𑀩𑀁. 𑀲𑀫𑀢𑁆𑀢𑀦𑁆𑀢𑀺 𑀲𑀫𑁆𑀧𑀼𑀡𑁆𑀡𑀁, 𑀲𑀩𑁆𑀩𑀪𑀸𑀕𑀢𑁄 𑀅𑀦𑀯𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀭𑁄𑀕𑀦𑁆𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀭𑀼𑀚𑀦𑀝𑁆𑀞𑁂𑀦 𑀭𑁄𑀕𑀪𑀽𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀸𑀤𑁆𑀤𑀲𑀁 𑀧𑀼𑀩𑁆𑀩𑁂𑀢𑀺 ¶ 𑀲𑀢𑁆𑀣𑀼 𑀑𑀯𑀸𑀤𑀧𑀝𑀺𑀮𑀸𑀪𑀢𑁄 𑀧𑀼𑀩𑁆𑀩𑁂 𑀦 𑀅𑀤𑁆𑀤𑀓𑁆𑀔𑀺𑀁. 𑀲𑁄𑀬𑀁 𑀭𑁄𑀕𑁄 𑀤𑀺𑀝𑁆𑀞𑁄, 𑀯𑀘𑀦𑀓𑀭𑁂𑀦𑀸𑀢𑀺𑀤𑁂𑀯𑀲𑁆𑀲𑀸𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺 𑀲𑀩𑁆𑀩𑁂𑀧𑀺 𑀤𑁂𑀯𑁂 𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀅𑀢𑀺𑀤𑁂𑀯𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀑𑀯𑀸𑀤𑀧𑀝𑀺𑀓𑀭𑁂𑀦 𑀲𑀭𑀪𑀗𑁆𑀕𑁂𑀦 𑀲𑁄 𑀅𑀬𑀁 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁄 𑀭𑁄𑀕𑁄 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀜𑁆𑀘𑀓𑁆𑀔𑀦𑁆𑀥𑀢𑁄 𑀤𑀺𑀝𑁆𑀞𑁄, 𑀧𑀭𑀺𑀜𑁆𑀜𑀸𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀏𑀯𑀁 𑀅𑀢𑁆𑀢𑀪𑀸𑀯𑀓𑀼𑀝𑀺𑀓𑀸𑀬𑀫𑁆𑀧𑀺 𑀅𑀦𑀧𑁂𑀓𑁆𑀔𑁄 𑀩𑀸𑀳𑀺𑀭𑀁 𑀢𑀺𑀡𑀓𑀼𑀝𑀺𑀓𑀁 𑀓𑀣𑀁 𑀧𑀝𑀺𑀲𑀗𑁆𑀔𑀭𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀫𑀬𑀸 𑀅𑀬𑀁 𑀅𑀢𑁆𑀢𑀪𑀸𑀯𑀭𑁄𑀕𑁄 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑁄, 𑀲𑁆𑀯𑀸𑀬𑀁 𑀫𑀕𑁆𑀕𑁄 𑀲𑀩𑁆𑀩𑀩𑀼𑀤𑁆𑀥𑀲𑀸𑀥𑀸𑀭𑀡𑁄. 𑀬𑁂𑀦 𑀦𑁂𑀲𑀁 𑀑𑀯𑀸𑀤𑀥𑀫𑁆𑀫𑁄𑀧𑀺 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀲𑀤𑀺𑀲𑁄 𑀬𑀢𑁆𑀣𑀸𑀳𑀁 𑀧𑀢𑀺𑀝𑁆𑀞𑀸𑀬 𑀤𑀼𑀓𑁆𑀔𑀓𑁆𑀔𑀬𑀁 𑀧𑀢𑁆𑀢𑁄𑀢𑀺 ¶ 𑀏𑀯𑀁 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁪𑁯𑁦.

‘‘𑀬𑁂𑀦𑁂𑀯 𑀫𑀕𑁆𑀕𑁂𑀦 𑀕𑀢𑁄 𑀯𑀺𑀧𑀲𑁆𑀲𑀻, 𑀬𑁂𑀦𑁂𑀯 𑀫𑀕𑁆𑀕𑁂𑀦 𑀲𑀺𑀔𑀻 𑀘 𑀯𑁂𑀲𑁆𑀲𑀪𑀽;

𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑁄 𑀘 𑀓𑀲𑁆𑀲𑀧𑁄, 𑀢𑁂𑀦𑀜𑁆𑀚𑀲𑁂𑀦 𑀅𑀕𑀫𑀸𑀲𑀺 𑀕𑁄𑀢𑀫𑁄.

𑁪𑁯𑁧.

‘‘𑀯𑀻𑀢𑀢𑀡𑁆𑀳𑀸 𑀅𑀦𑀸𑀤𑀸𑀦𑀸, 𑀲𑀢𑁆𑀢 𑀩𑀼𑀤𑁆𑀥𑀸 𑀔𑀬𑁄𑀕𑀥𑀸;

𑀬𑁂𑀳𑀸𑀬𑀁 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀥𑀫𑁆𑀫𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁪𑁯𑁨.

‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀺𑀦𑀁;

𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀤𑀼𑀓𑁆𑀔𑀲𑀗𑁆𑀔𑀬𑁄.

𑁪𑁯𑁩.

‘‘𑀬𑀲𑁆𑀫𑀺𑀁 ¶ 𑀦𑀺𑀯𑀢𑁆𑀢𑀢𑁂 𑀤𑀼𑀓𑁆𑀔𑀁, 𑀲𑀁𑀲𑀸𑀭𑀲𑁆𑀫𑀺𑀁 𑀅𑀦𑀦𑁆𑀢𑀓𑀁;

𑀪𑁂𑀤𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀚𑀻𑀯𑀺𑀢𑀲𑁆𑀲 𑀘 𑀲𑀗𑁆𑀔𑀬𑀸;

𑀅𑀜𑁆𑀜𑁄 𑀧𑀼𑀦𑀩𑁆𑀪𑀯𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑀢𑀢𑁆𑀣 𑀬𑁂𑀦𑁂𑀯 𑀫𑀕𑁆𑀕𑁂𑀦𑀸𑀢𑀺 𑀬𑁂𑀦𑁂𑀯 𑀲𑀧𑀼𑀩𑁆𑀩𑀪𑀸𑀕𑁂𑀦 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦. 𑀕𑀢𑁄𑀢𑀺 𑀧𑀝𑀺𑀧𑀦𑁆𑀦𑁄 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀢𑁄. 𑀯𑀺𑀧𑀲𑁆𑀲𑀻𑀢𑀺 𑀯𑀺𑀧𑀲𑁆𑀲𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀓𑀓𑀼𑀲𑀦𑁆𑀥𑀸𑀢𑀺 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄. ‘‘𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑀸’’𑀢𑀺𑀧𑀺 𑀧𑀸𑀞𑁄. 𑀢𑁂𑀦𑀜𑁆𑀚𑀲𑁂𑀦𑀸𑀢𑀺 𑀢𑁂𑀦𑁂𑀯 𑀅𑀜𑁆𑀚𑀲𑁂𑀦 𑀅𑀭𑀺𑀬𑀫𑀕𑁆𑀕𑁂𑀦.

𑀅𑀦𑀸𑀤𑀸𑀦𑀸𑀢𑀺 𑀅𑀦𑀼𑀧𑀸𑀤𑀸𑀦𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀯𑀸. 𑀔𑀬𑁄𑀕𑀥𑀸𑀢𑀺 𑀦𑀺𑀩𑁆𑀩𑀸𑀦𑁄𑀕𑀥𑀸 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀸. 𑀬𑁂𑀳𑀸𑀬𑀁 𑀤𑁂𑀲𑀺𑀢𑁄 𑀥𑀫𑁆𑀫𑁄𑀢𑀺 𑀬𑁂𑀳𑀺 𑀲𑀢𑁆𑀢𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀬𑀁 𑀲𑀸𑀲𑀦𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀯𑁂𑀤𑀺𑀢𑁄. 𑀥𑀫𑁆𑀫𑀪𑀽𑀢𑁂𑀳𑀻𑀢𑀺 𑀥𑀫𑁆𑀫𑀓𑀸𑀬𑀢𑀸𑀬 𑀥𑀫𑁆𑀫𑀲𑀪𑀸𑀯𑁂𑀳𑀺, 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀢𑁄 𑀯𑀸 𑀪𑀽𑀢𑁂𑀳𑀺 𑀚𑀸𑀢𑁂𑀳𑀺, 𑀥𑀫𑁆𑀫𑀁 𑀯𑀸 𑀧𑀢𑁆𑀢𑁂𑀳𑀺. 𑀢𑀸𑀤𑀺𑀪𑀻𑀢𑀺, 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁂𑀳𑀺.

‘‘𑀘𑀢𑁆𑀢𑀸𑀭𑀺 ¶ 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀦𑀸 𑀢𑁂𑀳𑀺 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀤𑀲𑁆𑀲𑀦𑀁. 𑀯𑀘𑀦𑀢𑁆𑀣𑀢𑁄 𑀧𑀦 𑀅𑀭𑀺𑀬𑀸𑀦𑀺 𑀘 𑀅𑀯𑀺𑀢𑀣𑀝𑁆𑀞𑁂𑀦 𑀲𑀘𑁆𑀘𑀸𑀦𑀺 𑀘𑀸𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀭𑀺𑀬𑀲𑁆𑀲 𑀯𑀸 𑀪𑀕𑀯𑀢𑁄 𑀲𑀘𑁆𑀘𑀸𑀦𑀺 𑀢𑁂𑀦 𑀤𑁂𑀲𑀺𑀢𑀢𑁆𑀢𑀸, 𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀯𑀸 𑀲𑀘𑁆𑀘𑀸𑀦𑀻𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀓𑀼𑀘𑁆𑀙𑀺𑀢𑀪𑀸𑀯𑀢𑁄 𑀢𑀼𑀘𑁆𑀙𑀪𑀸𑀯𑀢𑁄 𑀘 𑀤𑀼𑀓𑁆𑀔𑀁, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀢𑀁 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑀼𑀤𑀬𑁄, 𑀢𑀡𑁆𑀳𑀸. 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑀻𑀢𑀺 𑀯𑀸 𑀫𑀕𑁆𑀕𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀥𑀫𑁆𑀫𑀸. 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑁄 𑀦𑀢𑁆𑀣𑀺 𑀏𑀢𑁆𑀣 𑀭𑁄𑀥𑁄, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀭𑁄𑀥𑀸𑀪𑀸𑀯𑁄 𑀳𑁄𑀢𑀺, 𑀦𑀺𑀭𑀼𑀚𑁆𑀛𑀢𑀺 𑀤𑀼𑀓𑁆𑀔𑀫𑁂𑀢𑁆𑀣𑀸𑀢𑀺 𑀯𑀸 𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀲𑀗𑁆𑀔𑀬𑁄’’𑀢𑀺. 𑀅𑀬𑀫𑁂𑀢𑁆𑀣 ¶ 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀅𑀥𑀺𑀕𑀢𑁂. 𑀦𑀺𑀯𑀢𑁆𑀢𑀢𑁂𑀢𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀲𑀢𑀺 𑀅𑀦𑀦𑁆𑀢𑀓𑀁 𑀅𑀧𑀭𑀺𑀬𑀦𑁆𑀢𑀁 𑀇𑀫𑀲𑁆𑀫𑀺𑀁 𑀲𑀁𑀲𑀸𑀭𑁂 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀦 𑀧𑀯𑀢𑁆𑀢𑀢𑀺 𑀉𑀘𑁆𑀙𑀺𑀚𑁆𑀚𑀢𑀺, 𑀲𑁄 𑀦𑀺𑀭𑁄𑀥𑁄𑀢𑀺 𑀅𑀬𑀁 𑀥𑀫𑁆𑀫𑀪𑀽𑀢𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀤𑁂𑀲𑀺𑀢𑁄 ¶ 𑀥𑀫𑁆𑀫𑁄𑀢𑀺 𑀬𑁄𑀚𑀦𑀸. ‘‘𑀪𑁂𑀤𑀸’’𑀢𑀺𑀆𑀤𑀺𑀦𑀸 ‘‘𑀭𑁄𑀕𑁄 𑀤𑀺𑀝𑁆𑀞𑁄’’𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀬 𑀲𑀽𑀘𑀺𑀢𑀁 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. ‘‘𑀬𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀢𑁂 𑀤𑀼𑀓𑁆𑀔’’𑀦𑁆𑀢𑀺 𑀧𑀦 𑀧𑀸𑀞𑁂 𑀲𑀓𑀮𑀕𑀸𑀣𑀸𑀬 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀬𑀲𑁆𑀫𑀺𑀁 𑀔𑀦𑁆𑀥𑀸𑀤𑀺𑀧𑀝𑀺𑀧𑀸𑀝𑀺𑀲𑀜𑁆𑀜𑀺𑀢𑁂 𑀲𑀁𑀲𑀸𑀭𑁂 𑀇𑀤𑀁 𑀅𑀦𑀦𑁆𑀢𑀓𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀁, 𑀲𑁄 𑀇𑀢𑁄 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀢𑁄 𑀅𑀜𑁆𑀜𑁄 𑀧𑀼𑀦𑀧𑁆𑀧𑀼𑀦𑀁 𑀪𑀯𑀦𑀪𑀸𑀯𑀢𑁄 𑀧𑀼𑀦𑀩𑁆𑀪𑀯𑁄. 𑀇𑀫𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀗𑁆𑀔𑀬𑀸 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀪𑁂𑀤𑀸 𑀯𑀺𑀦𑀸𑀲𑀸 𑀉𑀤𑁆𑀥𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀥𑀺 𑀲𑀩𑁆𑀩𑁂𑀳𑀺 𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑁂𑀳𑀺 𑀪𑀯𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄 𑀅𑀫𑁆𑀳𑀻𑀢𑀺.

𑀲𑀭𑀪𑀗𑁆𑀕𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀓𑀦𑀺𑀧𑀸𑀢𑁄

𑁧. 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀝𑁆𑀞𑀓𑀦𑀺𑀧𑀸𑀢𑁂 ¶ ¶ 𑀓𑀫𑁆𑀫𑀁 𑀩𑀳𑀼𑀓𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄, 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀬𑀫𑀸𑀦𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸, 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀧𑀡𑀺𑀥𑀸𑀦𑀁 𑀓𑀢𑁆𑀯𑀸, 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸, 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀚𑁆𑀚𑀸𑀥𑀭𑁄 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂 𑀏𑀓𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀡𑀺𑀓𑀸𑀭𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀅𑀓𑀸𑀲𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀬 𑀧𑀽𑀚𑀁 𑀓𑀢𑁆𑀯𑀸, ‘‘𑀪𑀕𑀯𑀸 𑀫𑀬𑁆𑀳𑀁 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺.

𑀢𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 ¶ 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀚𑁆𑀚𑁂𑀦𑀺𑀬𑀁 𑀭𑀜𑁆𑀜𑁄 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀧𑀼𑀭𑁄𑀳𑀺𑀢𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀫𑀸𑀢𑀸 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀅𑀢𑁆𑀢𑀦𑁄 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀓𑀜𑁆𑀘𑀦𑀫𑀸𑀡𑀯𑁄 𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀪𑀺. 𑀲𑁄 𑀕𑁄𑀢𑁆𑀢𑀯𑀲𑁂𑀦 𑀓𑀘𑁆𑀘𑀸𑀬𑀦𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀁 𑀭𑀸𑀚𑀸 𑀘𑀡𑁆𑀟𑀧𑀚𑁆𑀚𑁄𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀲𑀼𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀇𑀥𑀸𑀦𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀅𑀢𑁆𑀢𑀝𑁆𑀞𑀫𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀕𑀢𑁄. 𑀢𑀲𑁆𑀲 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀲𑀢𑁆𑀢𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁪.𑁧-𑁨𑁭) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ ¶ 𑀦𑀸𑀫 𑀚𑀺𑀦𑁄, 𑀅𑀦𑁂𑀚𑁄 𑀅𑀚𑀺𑀢𑀁 𑀚𑀬𑁄;

𑀲𑀢𑀲𑀳𑀲𑁆𑀲𑁂 𑀓𑀧𑁆𑀧𑀸𑀦𑀁, 𑀇𑀢𑁄 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀯𑀻𑀭𑁄 𑀓𑀫𑀮𑀧𑀢𑁆𑀢𑀓𑁆𑀔𑁄, 𑀲𑀲𑀗𑁆𑀓𑀯𑀺𑀫𑀮𑀸𑀦𑀦𑁄;

𑀓𑀦𑀓𑀸𑀘𑀮𑀲𑀗𑁆𑀓𑀸𑀲𑁄, 𑀭𑀯𑀺𑀤𑀺𑀢𑁆𑀢𑀺𑀲𑀫𑀧𑁆𑀧𑀪𑁄.

‘‘𑀲𑀢𑁆𑀢𑀦𑁂𑀢𑁆𑀢𑀫𑀦𑁄𑀳𑀸𑀭𑀻, 𑀯𑀭𑀮𑀓𑁆𑀔𑀡𑀪𑀽𑀲𑀺𑀢𑁄;

𑀲𑀩𑁆𑀩𑀯𑀸𑀓𑁆𑀬𑀧𑀣𑀸𑀢𑀻𑀢𑁄, 𑀫𑀦𑀼𑀚𑀸𑀫𑀭𑀲𑀓𑁆𑀓𑀢𑁄.

‘‘𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀬𑀁 𑀲𑀢𑁆𑀢𑁂, 𑀯𑀸𑀕𑀻𑀲𑁄 𑀫𑀥𑀼𑀭𑀲𑁆𑀲𑀭𑁄;

𑀓𑀭𑀼𑀡𑀸𑀦𑀺𑀩𑀦𑁆𑀥𑀲𑀦𑁆𑀢𑀸𑀦𑁄, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

‘‘𑀤𑁂𑀲𑁂𑀢𑀺 𑀫𑀥𑀼𑀭𑀁 𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀽𑀧𑀲𑀁𑀳𑀺𑀢𑀁;

𑀦𑀺𑀫𑀼𑀕𑁆𑀕𑁂 𑀫𑁄𑀳𑀧𑀗𑁆𑀓𑀫𑁆𑀳𑀺, 𑀲𑀫𑀼𑀤𑁆𑀥𑀭𑀢𑀺 𑀧𑀸𑀡𑀺𑀦𑁂.

‘‘𑀢𑀤𑀸 𑀏𑀓𑀘𑀭𑁄 𑀳𑀼𑀢𑁆𑀯𑀸, 𑀢𑀸𑀧𑀲𑁄 𑀳𑀺𑀫𑀯𑀸𑀮𑀬𑁄;

𑀦𑀪𑀲𑀸 𑀫𑀸𑀦𑀼𑀲𑀁 𑀮𑁄𑀓𑀁, 𑀕𑀘𑁆𑀙𑀦𑁆𑀢𑁄 𑀚𑀺𑀦𑀫𑀤𑁆𑀤𑀲𑀁.

‘‘𑀉𑀧𑁂𑀘𑁆𑀘 𑀲𑀦𑁆𑀢𑀺𑀓𑀁 𑀢𑀲𑁆𑀲, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀯𑀡𑁆𑀡𑀬𑀦𑁆𑀢𑀲𑁆𑀲 𑀯𑀻𑀭𑀲𑁆𑀲, 𑀲𑀸𑀯𑀓𑀲𑁆𑀲 𑀫𑀳𑀸𑀕𑀼𑀡𑀁.

‘‘𑀲𑀁𑀔𑀺𑀢𑁆𑀢𑁂𑀦 𑀫𑀬𑀸 𑀯𑀼𑀢𑁆𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑀬𑀁;

𑀧𑀭𑀺𑀲𑀁 𑀫𑀜𑁆𑀘 𑀢𑁄𑀲𑁂𑀢𑀺, 𑀬𑀣𑀸 𑀓𑀘𑁆𑀘𑀸𑀬𑀦𑁄 𑀅𑀬𑀁.

‘‘𑀦𑀸𑀳𑀁 𑀏𑀯𑀫𑀺𑀥𑁂𑀓𑀘𑁆𑀘𑀁, 𑀅𑀜𑁆𑀜𑀁 𑀧𑀲𑁆𑀲𑀸𑀫𑀺 𑀲𑀸𑀯𑀓𑀁;

𑀢𑀲𑁆𑀫𑀸𑀢𑀤𑀕𑁆𑀕𑁂 𑀏𑀲𑀕𑁆𑀕𑁄, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄.

‘‘𑀢𑀤𑀸𑀳𑀁 𑀯𑀺𑀫𑁆𑀳𑀺𑀢𑁄 𑀳𑀼𑀢𑁆𑀯𑀸, 𑀲𑀼𑀢𑁆𑀯𑀸 𑀯𑀸𑀓𑁆𑀬𑀁 𑀫𑀦𑁄𑀭𑀫𑀁;

𑀳𑀺𑀫𑀯𑀦𑁆𑀢𑀁 𑀕𑀫𑀺𑀢𑁆𑀯𑀸𑀦, 𑀆𑀳𑀺𑀢𑁆𑀯𑀸 𑀧𑀼𑀧𑁆𑀨𑀲𑀜𑁆𑀘𑀬𑀁.

‘‘𑀧𑀽𑀚𑁂𑀢𑁆𑀯𑀸 𑀮𑁄𑀓𑀲𑀭𑀡𑀁, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀢𑀤𑀸 𑀫𑀫𑀸𑀲𑀬𑀁 𑀜𑀢𑁆𑀯𑀸, 𑀩𑁆𑀬𑀸𑀓𑀸𑀲𑀺 𑀲 𑀭𑀡𑀜𑁆𑀚𑀳𑁄.

‘‘𑀧𑀲𑁆𑀲𑀣𑁂𑀢𑀁 𑀇𑀲𑀺𑀯𑀭𑀁, 𑀦𑀺𑀤𑁆𑀥𑀦𑁆𑀢𑀓𑀦𑀓𑀢𑁆𑀢𑀘𑀁;

𑀉𑀤𑁆𑀥𑀕𑁆𑀕𑀮𑁄𑀫𑀁 𑀧𑀻𑀡𑀁𑀲𑀁, 𑀅𑀘𑀮𑀁 𑀧𑀜𑁆𑀚𑀮𑀺𑀁 𑀞𑀺𑀢𑀁.

‘‘𑀳𑀸𑀲𑀁 𑀲𑀼𑀧𑀼𑀡𑁆𑀡𑀦𑀬𑀦𑀁, 𑀩𑀼𑀤𑁆𑀥𑀯𑀡𑁆𑀡𑀕𑀢𑀸𑀲𑀬𑀁;

𑀥𑀫𑁆𑀫𑀚𑀁 𑀉𑀕𑁆𑀕𑀳𑀤𑀬𑀁, 𑀅𑀫𑀢𑀸𑀲𑀺𑀢𑁆𑀢𑀲𑀦𑁆𑀦𑀺𑀪𑀁.

‘‘𑀓𑀘𑁆𑀘𑀸𑀦𑀲𑁆𑀲 ¶ 𑀕𑀼𑀡𑀁 𑀲𑀼𑀢𑁆𑀯𑀸, 𑀢𑀁 𑀞𑀸𑀦𑀁 𑀧𑀢𑁆𑀣𑀬𑀁 𑀞𑀺𑀢𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀕𑁄𑀢𑀫𑀲𑁆𑀲 𑀫𑀳𑀸𑀫𑀼𑀦𑁂.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀘𑁆𑀘𑀸𑀦𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀜𑀸𑀡𑀻, 𑀅𑀥𑀺𑀧𑁆𑀧𑀸𑀬𑀯𑀺𑀤𑀽 𑀫𑀼𑀦𑁂;

𑀧𑀸𑀧𑀼𑀡𑀺𑀲𑁆𑀲𑀢𑀺 𑀢𑀁 𑀞𑀸𑀦𑀁, 𑀬𑀣𑀸𑀬𑀁 𑀩𑁆𑀬𑀸𑀓𑀢𑁄 𑀫𑀬𑀸.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀅𑀣 𑀩𑁆𑀭𑀸𑀳𑁆𑀫𑀡𑁂;

𑀦𑀻𑀘𑁂 𑀓𑀼𑀮𑁂 𑀦 𑀚𑀸𑀬𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀉𑀚𑁆𑀚𑁂𑀦𑀺𑀬𑀁 𑀧𑀼𑀭𑁂;

𑀧𑀚𑁆𑀚𑁄𑀢𑀲𑁆𑀲 𑀘 𑀘𑀡𑁆𑀟𑀲𑁆𑀲, 𑀧𑀼𑀭𑁄𑀳𑀺𑀢𑀤𑀺𑀚𑀸𑀥𑀺𑀦𑁄.

‘‘𑀧𑀼𑀢𑁆𑀢𑁄 𑀢𑀺𑀭𑀺𑀝𑀺𑀯𑀘𑁆𑀙𑀲𑁆𑀲, 𑀦𑀺𑀧𑀼𑀡𑁄 𑀯𑁂𑀤𑀧𑀸𑀭𑀕𑀽;

𑀫𑀸𑀢𑀸 𑀘 𑀘𑀦𑁆𑀤𑀺𑀫𑀸 𑀦𑀸𑀫, 𑀓𑀘𑁆𑀘𑀸𑀦𑁄𑀳𑀁 𑀯𑀭𑀢𑁆𑀢𑀘𑁄.

‘‘𑀯𑀻𑀫𑀁𑀲𑀦𑀢𑁆𑀣𑀁 𑀩𑀼𑀤𑁆𑀥𑀲𑁆𑀲, 𑀪𑀽𑀫𑀺𑀧𑀸𑀮𑁂𑀦 𑀧𑁂𑀲𑀺𑀢𑁄;

𑀤𑀺𑀲𑁆𑀯𑀸 𑀫𑁄𑀓𑁆𑀔𑀧𑀼𑀭𑀤𑁆𑀯𑀸𑀭𑀁, 𑀦𑀸𑀬𑀓𑀁 𑀕𑀼𑀡𑀲𑀜𑁆𑀘𑀬𑀁.

‘‘𑀲𑀼𑀢𑁆𑀯𑀸 𑀘 𑀯𑀺𑀫𑀮𑀁 𑀯𑀸𑀓𑁆𑀬𑀁, 𑀕𑀢𑀺𑀧𑀗𑁆𑀓𑀯𑀺𑀲𑁄𑀲𑀦𑀁;

𑀧𑀸𑀧𑀼𑀡𑀺𑀁 𑀅𑀫𑀢𑀁 𑀲𑀦𑁆𑀢𑀁, 𑀲𑁂𑀲𑁂𑀳𑀺 𑀲𑀳 𑀲𑀢𑁆𑀢𑀳𑀺.

‘‘𑀅𑀥𑀺𑀧𑁆𑀧𑀸𑀬𑀯𑀺𑀤𑀽 𑀚𑀸𑀢𑁄, 𑀲𑀼𑀕𑀢𑀲𑁆𑀲 𑀫𑀳𑀸𑀫𑀢𑁂.

𑀞𑀧𑀺𑀢𑁄 𑀏𑀢𑀤𑀕𑁆𑀕𑁂 𑀘, 𑀲𑀼𑀲𑀫𑀺𑀤𑁆𑀥𑀫𑀦𑁄𑀭𑀣𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂 𑀢𑀸𑀯𑀤𑁂𑀯 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀓𑁂𑀲𑀫𑀲𑁆𑀲𑀼𑀓𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀏𑀯𑀁 𑀣𑁂𑀭𑁄 𑀲𑀤𑀢𑁆𑀣𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑀼𑀫𑁆𑀳𑀸𑀓𑀁 ¶ 𑀧𑀸𑀤𑁂 𑀯𑀦𑁆𑀤𑀺𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀇𑀘𑁆𑀙𑀢𑀻’’𑀢𑀺 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸, ‘‘𑀢𑁆𑀯𑀁𑀬𑁂𑀯, 𑀪𑀺𑀓𑁆𑀔𑀼, 𑀢𑀢𑁆𑀣 𑀕𑀘𑁆𑀙, 𑀢𑀬𑀺 𑀕𑀢𑁂𑀧𑀺 𑀭𑀸𑀚𑀸 𑀧𑀲𑀻𑀤𑀺𑀲𑁆𑀲𑀢𑀻’’𑀢𑀺 𑀆𑀳. 𑀣𑁂𑀭𑁄 𑀲𑀢𑁆𑀣𑀼 𑀆𑀡𑀸𑀬 𑀅𑀢𑁆𑀢𑀝𑁆𑀞𑀫𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑀸𑀤𑁂𑀢𑁆𑀯𑀸 𑀅𑀯𑀦𑁆𑀢𑀻𑀲𑀼 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀕𑀢𑁄. 𑀲𑁄 𑀏𑀓𑀤𑀺𑀯𑀲𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀫𑀡𑀥𑀫𑁆𑀫𑀁 𑀧𑀳𑀸𑀬 𑀓𑀫𑁆𑀫𑀸𑀭𑀸𑀫𑁂 𑀲𑀗𑁆𑀕𑀡𑀺𑀓𑀸𑀭𑀸𑀫𑁂 𑀭𑀲𑀢𑀡𑁆𑀳𑀸𑀦𑀼𑀕𑀢𑁂 𑀘 𑀧𑀫𑀸𑀤𑀯𑀺𑀳𑀸𑀭𑀺𑀦𑁄 𑀤𑀺𑀲𑁆𑀯𑀸 𑀢𑁂𑀲𑀁 𑀑𑀯𑀸𑀤𑀯𑀲𑁂𑀦 𑁋

𑁪𑁯𑁪.

‘‘𑀓𑀫𑁆𑀫𑀁 𑀩𑀳𑀼𑀓𑀁 𑀦 𑀓𑀸𑀭𑀬𑁂, 𑀧𑀭𑀺𑀯𑀚𑁆𑀚𑁂𑀬𑁆𑀬 𑀚𑀦𑀁 𑀦 𑀉𑀬𑁆𑀬𑀫𑁂;

𑀲𑁄 𑀉𑀲𑁆𑀲𑀼𑀓𑁆𑀓𑁄 𑀭𑀲𑀸𑀦𑀼𑀕𑀺𑀤𑁆𑀥𑁄, 𑀅𑀢𑁆𑀣𑀁 𑀭𑀺𑀜𑁆𑀘𑀢𑀺 𑀬𑁄 𑀲𑀼𑀔𑀸𑀥𑀺𑀯𑀸𑀳𑁄.

𑁪𑁯𑁫.

‘‘𑀧𑀗𑁆𑀓𑁄𑀢𑀺 𑀳𑀺 𑀦𑀁 𑀅𑀯𑁂𑀤𑀬𑀼𑀁, 𑀬𑀸𑀬𑀁 𑀯𑀦𑁆𑀤𑀦𑀧𑀽𑀚𑀦𑀸 𑀓𑀼𑀮𑁂𑀲𑀼;

𑀲𑀼𑀔𑀼𑀫𑀁 𑀲𑀮𑁆𑀮𑀁 𑀤𑀼𑀭𑀼𑀩𑁆𑀩𑀳𑀁, 𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑁂𑀦 𑀤𑀼𑀚𑁆𑀚𑀳𑁄’’𑀢𑀺. 𑁋

𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ ¶ 𑀓𑀫𑁆𑀫𑀁 𑀩𑀳𑀼𑀓𑀁 𑀦 𑀓𑀸𑀭𑀬𑁂𑀢𑀺 𑀦𑀯𑀸𑀯𑀸𑀲𑀓𑀸𑀭𑀸𑀧𑀦𑀸𑀤𑀺𑀁 𑀲𑀫𑀡𑀥𑀫𑁆𑀫𑀓𑀭𑀡𑀲𑁆𑀲 𑀧𑀭𑀺𑀩𑀦𑁆𑀥𑀪𑀽𑀢𑀁 𑀫𑀳𑀦𑁆𑀢𑀁 𑀦𑀯𑀓𑀫𑁆𑀫𑀁 𑀦 𑀧𑀝𑁆𑀞𑀧𑁂𑀬𑁆𑀬, 𑀔𑀼𑀤𑁆𑀤𑀓𑀁 𑀅𑀧𑁆𑀧𑀲𑀫𑀸𑀭𑀫𑁆𑀪𑀁 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀸𑀤𑀺𑀁 𑀲𑀢𑁆𑀣𑀼 𑀯𑀘𑀦𑀧𑀝𑀺𑀧𑀽𑀚𑀦𑀢𑁆𑀣𑀁 𑀓𑀸𑀢𑀩𑁆𑀩𑀫𑁂𑀯. 𑀧𑀭𑀺𑀯𑀚𑁆𑀚𑁂𑀬𑁆𑀬 𑀚𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀯𑀲𑁂𑀦 𑀚𑀦𑀁 𑀯𑀺𑀯𑀚𑁆𑀚𑁂𑀬𑁆𑀬. 𑀚𑀦𑀦𑁆𑀢𑀺 𑀯𑀸 𑀬𑀸𑀤𑀺𑀲𑀁 𑀲𑀁𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀢𑀸𑀤𑀺𑀲𑀁 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀪𑀽𑀢𑀁 𑀚𑀦𑀁 𑀧𑀭𑀺𑀯𑀚𑁆𑀚𑁂𑀬𑁆𑀬. 𑀦 𑀉𑀬𑁆𑀬𑀫𑁂𑀢𑀺, 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀓𑀼𑀮𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀦 𑀯𑀸𑀬𑀫𑁂𑀬𑁆𑀬, 𑀬𑀲𑁆𑀫𑀸 𑀲𑁄 𑀉𑀲𑁆𑀲𑀼𑀓𑁆𑀓𑁄 𑀭𑀲𑀸𑀦𑀼𑀕𑀺𑀤𑁆𑀥𑁄, 𑀅𑀢𑁆𑀣𑀁 𑀭𑀺𑀜𑁆𑀘𑀢𑀺 𑀬𑁄 𑀲𑀼𑀔𑀸𑀥𑀺𑀯𑀸𑀳𑁄𑀢𑀺 𑀬𑁄 𑀭𑀲𑀸𑀦𑀼𑀕𑀺𑀤𑁆𑀥𑁄 𑀭𑀲𑀢𑀡𑁆𑀳𑀸𑀯𑀲𑀺𑀓𑁄 𑀪𑀺𑀓𑁆𑀔𑀼 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀧𑀲𑀼𑀢𑁄, 𑀲𑁄 𑀓𑀼𑀮𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀉𑀲𑁆𑀲𑀼𑀓𑁆𑀓𑁄, 𑀢𑁂𑀲𑀼 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀬𑁄𑀕𑀁 𑀆𑀧𑀚𑁆𑀚𑀢𑀺, 𑀬𑁄 𑀲𑀼𑀔𑀸𑀥𑀺𑀯𑀸𑀳𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀸𑀯𑀳𑁄 𑀲𑀻𑀮𑀸𑀤𑀺𑀅𑀢𑁆𑀣𑁄, 𑀢𑀁 𑀭𑀺𑀜𑁆𑀘𑀢𑀺 𑀧𑀚𑀳𑀢𑀺 𑀏𑀓𑀁𑀲𑁂𑀦 𑀅𑀢𑁆𑀢𑀸𑀦𑀁 𑀢𑀢𑁄 𑀯𑀺𑀯𑁂𑀘𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀞𑀫𑀕𑀸𑀣𑀸𑀬 ‘‘𑀓𑀫𑁆𑀫𑀸𑀭𑀸𑀫𑀢𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀧𑀘𑁆𑀘𑀬𑀕𑁂𑀥𑀜𑁆𑀘 𑀯𑀚𑁆𑀚𑁂𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀓𑁆𑀓𑀸𑀭𑀸𑀪𑀺𑀮𑀸𑀲𑀁 𑀕𑀭𑀳𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀸 𑀅𑀬𑀁 𑀪𑀺𑀓𑁆𑀔𑀸𑀬 𑀉𑀧𑀕𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑁂𑀲𑀼 𑀕𑁂𑀳𑀯𑀸𑀲𑀻𑀳𑀺 𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀓𑀭𑀻𑀬𑀫𑀸𑀦𑀸 𑀯𑀦𑁆𑀤𑀦𑀸 𑀧𑀽𑀚𑀦𑀸 𑀘, 𑀬𑀲𑁆𑀫𑀸 𑀢𑀁 ¶ 𑀅𑀪𑀸𑀯𑀺𑀢𑀢𑁆𑀢𑀸𑀦𑀁 𑀑𑀲𑀻𑀤𑀸𑀧𑀦𑀝𑁆𑀞𑁂𑀦 𑀫𑀮𑀺𑀦𑀪𑀸𑀯𑀓𑀭𑀡𑀝𑁆𑀞𑁂𑀦 𑀘 𑀧𑀗𑁆𑀓𑁄 𑀓𑀤𑁆𑀤𑀫𑁄𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀧𑀯𑁂𑀤𑀬𑀼𑀁 𑀅𑀩𑁆𑀪𑀜𑁆𑀜𑀁𑀲𑀼 𑀧𑀯𑁂𑀤𑁂𑀲𑀼𑀁 𑀯𑀸, 𑀬𑀲𑁆𑀫𑀸 𑀘 𑀅𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀸𑀦𑀁 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀓𑁆𑀓𑀸𑀭𑀸𑀪𑀺𑀮𑀸𑀲𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀢𑀸𑀬 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄 𑀢𑀼𑀤𑀦𑀢𑁄 𑀤𑀼𑀭𑀼𑀤𑁆𑀥𑀭𑀡𑀢𑁄 𑀘 𑀲𑀼𑀔𑀼𑀫𑀁 𑀲𑀮𑁆𑀮𑀁 𑀤𑀼𑀭𑀼𑀩𑁆𑀩𑀳𑀁 𑀧𑀯𑁂𑀤𑀬𑀼𑀁, 𑀢𑀢𑁄 𑀏𑀯 𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑁂𑀦 𑀤𑀼𑀚𑁆𑀚𑀳𑁄 𑀤𑀼𑀧𑁆𑀧𑀚𑀳𑁂𑀬𑁆𑀬𑁄 𑀢𑀲𑁆𑀲 𑀧𑀳𑀸𑀦𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑁄. 𑀲𑀓𑁆𑀓𑀸𑀭𑀸𑀪𑀺𑀮𑀸𑀲𑀧𑁆𑀧𑀳𑀸𑀦𑁂𑀦 𑀳𑀺 𑀲𑀓𑁆𑀓𑀸𑀭𑁄 𑀧𑀳𑀻𑀦𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀳𑀸𑀦𑀸𑀬 𑀆𑀬𑁄𑀕𑁄 𑀓𑀭𑀡𑀻𑀬𑁄𑀢𑀺 𑀤𑀲𑁆𑀲𑁂𑀢𑀺 𑁋

𑁪𑁯𑁬.

‘‘𑀦 𑀧𑀭𑀲𑁆𑀲𑀼𑀧𑀦𑀺𑀥𑀸𑀬, 𑀓𑀫𑁆𑀫𑀁 𑀫𑀘𑁆𑀘𑀲𑁆𑀲 𑀧𑀸𑀧𑀓𑀁;

𑀅𑀢𑁆𑀢𑀦𑀸 𑀢𑀁 𑀦 𑀲𑁂𑀯𑁂𑀬𑁆𑀬, 𑀓𑀫𑁆𑀫𑀩𑀦𑁆𑀥𑀽 𑀳𑀺 𑀫𑀸𑀢𑀺𑀬𑀸.

𑁪𑁯𑁭.

‘‘𑀦 𑀧𑀭𑁂 𑀯𑀘𑀦𑀸 𑀘𑁄𑀭𑁄, 𑀦 𑀧𑀭𑁂 𑀯𑀘𑀦𑀸 𑀫𑀼𑀦𑀺;

𑀅𑀢𑁆𑀢𑀸 𑀘 𑀦𑀁 𑀬𑀣𑀸 𑀯𑁂𑀤𑀺, 𑀤𑁂𑀯𑀸𑀧𑀺 𑀦𑀁 𑀢𑀣𑀸 𑀯𑀺𑀤𑀽.

𑁪𑁯𑁮.

‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁪𑁯𑁯.

‘‘𑀚𑀻𑀯𑀢𑁂 𑀯𑀸𑀧𑀺 𑀲𑀧𑁆𑀧𑀜𑁆𑀜𑁄, 𑀅𑀧𑀺 𑀯𑀺𑀢𑁆𑀢𑀧𑀭𑀺𑀓𑁆𑀔𑀬𑁄;

𑀧𑀜𑁆𑀜𑀸𑀬 𑀘 𑀅𑀮𑀸𑀪𑁂𑀦, 𑀯𑀺𑀢𑁆𑀢𑀯𑀸𑀧𑀺 𑀦 𑀚𑀻𑀯𑀢𑀺.

𑁫𑁦𑁦.

‘‘𑀲𑀩𑁆𑀩𑀁 ¶ ¶ 𑀲𑀼𑀡𑀸𑀢𑀺 𑀲𑁄𑀢𑁂𑀦, 𑀲𑀩𑁆𑀩𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸;

𑀦 𑀘 𑀤𑀺𑀝𑁆𑀞𑀁 𑀲𑀼𑀢𑀁 𑀥𑀻𑀭𑁄, 𑀲𑀩𑁆𑀩𑀁 𑀉𑀚𑁆𑀛𑀺𑀢𑀼𑀫𑀭𑀳𑀢𑀺.

𑁫𑁦𑁧.

‘‘𑀘𑀓𑁆𑀔𑀼𑀫𑀸𑀲𑁆𑀲 𑀬𑀣𑀸 𑀅𑀦𑁆𑀥𑁄, 𑀲𑁄𑀢𑀯𑀸 𑀩𑀥𑀺𑀭𑁄 𑀬𑀣𑀸;

𑀧𑀜𑁆𑀜𑀯𑀸𑀲𑁆𑀲 𑀬𑀣𑀸 𑀫𑀽𑀕𑁄, 𑀩𑀮𑀯𑀸 𑀤𑀼𑀩𑁆𑀩𑀮𑁄𑀭𑀺𑀯;

𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀬𑁂𑀣 𑀫𑀢𑀲𑀸𑀬𑀺𑀓’’𑀦𑁆𑀢𑀺. 𑁋

𑀇𑀫𑀸 𑀙 𑀕𑀸𑀣𑀸 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀑𑀯𑀸𑀤𑀯𑀲𑁂𑀦 𑀅𑀪𑀸𑀲𑀺. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁂 𑀲𑀤𑁆𑀤𑀳𑀺𑀢𑁆𑀯𑀸 𑀧𑀲𑀼𑀖𑀸𑀢𑀬𑀜𑁆𑀜𑀁 𑀓𑀸𑀭𑁂𑀢𑀺, 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸𑀯 𑀅𑀘𑁄𑀭𑁂 𑀘𑁄𑀭𑀲𑀜𑁆𑀜𑀸𑀬 𑀤𑀡𑁆𑀟𑁂𑀲𑀺, 𑀅𑀝𑁆𑀝𑀓𑀭𑀡𑁂 𑀘 𑀅𑀲𑁆𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀭𑁄𑀢𑀺, 𑀲𑀸𑀫𑀺𑀓𑁂 𑀘 𑀅𑀲𑁆𑀲𑀸𑀫𑀺𑀓𑁂. 𑀢𑀢𑁄 𑀦𑀁 𑀣𑁂𑀭𑁄 𑀯𑀺𑀯𑁂𑀘𑁂𑀢𑀼𑀁 ‘‘𑀦 𑀧𑀭𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀙 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀦 𑀧𑀭𑀲𑁆𑀲𑀼𑀧𑀦𑀺𑀥𑀸𑀬, 𑀓𑀫𑁆𑀫𑀁 𑀫𑀘𑁆𑀘𑀲𑁆𑀲 𑀧𑀸𑀧𑀓𑀦𑁆𑀢𑀺 𑀧𑀭𑀲𑁆𑀲 𑀫𑀘𑁆𑀘𑀲𑁆𑀲 𑀲𑀢𑁆𑀢𑀲𑁆𑀲 𑀉𑀧𑀦𑀺𑀥𑀸𑀬 𑀉𑀤𑁆𑀤𑀺𑀲𑁆𑀲 𑀓𑀸𑀭𑀡𑀁 𑀓𑀢𑁆𑀯𑀸 𑀧𑀸𑀧𑀓𑀁 𑀯𑀥𑀩𑀦𑁆𑀥𑀸𑀤𑀺𑀓𑀫𑁆𑀫𑀁 𑀦 𑀲𑁂𑀯𑁂𑀬𑁆𑀬, 𑀧𑀭𑁂𑀦 𑀦 𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑀸 𑀢𑀁 𑀦 𑀲𑁂𑀯𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑀸𑀧𑀺 𑀢𑀁 𑀧𑀸𑀧𑀓𑀁 𑀦 𑀓𑀭𑁂𑀬𑁆𑀬. 𑀓𑀲𑁆𑀫𑀸? 𑀓𑀫𑁆𑀫𑀩𑀦𑁆𑀥𑀽 𑀳𑀺 𑀫𑀸𑀢𑀺𑀬𑀸 𑀇𑀫𑁂 𑀫𑀸𑀢𑀺𑀬𑀸 𑀫𑀘𑁆𑀘𑀸 𑀓𑀫𑁆𑀫𑀤𑀸𑀬𑀸𑀤𑀸, 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀘 𑀓𑀺𑀜𑁆𑀘𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀧𑀭𑁂𑀦𑀧𑀺 𑀦 𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀦 𑀧𑀭𑁂 𑀯𑀘𑀦𑀸 𑀘𑁄𑀭𑁄𑀢𑀺 𑀅𑀢𑁆𑀢𑀦𑀸 𑀘𑁄𑀭𑀺𑀬𑀁 𑀅𑀓𑀢𑁆𑀯𑀸 𑀧𑀭𑀯𑀘𑀦𑀸 𑀧𑀭𑀲𑁆𑀲 𑀯𑀘𑀦𑀫𑀢𑁆𑀢𑁂𑀦 𑀘𑁄𑀭𑁄 𑀦𑀸𑀫 𑀦 𑀳𑁄𑀢𑀺, 𑀢𑀣𑀸 𑀦 𑀧𑀭𑁂 𑀯𑀘𑀦𑀸 𑀫𑀼𑀦𑀺 𑀧𑀭𑀲𑁆𑀲 𑀯𑀘𑀦𑀫𑀢𑁆𑀢𑁂𑀦 𑀫𑀼𑀦𑀺 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑁄 𑀦 𑀳𑁄𑀢𑀺. 𑀏𑀢𑁆𑀣 𑀳𑀺 𑀧𑀭𑁂𑀢𑀺 𑀯𑀺𑀪𑀢𑁆𑀢𑀺𑀅𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀓𑁂𑀘𑀺 𑀧𑀦 ‘‘𑀧𑀭𑁂𑀲𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀧𑀭𑁂𑀢𑀺 𑀲𑀁-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀸 𑀘 𑀦𑀁 𑀬𑀣𑀸 𑀯𑁂𑀤𑀻𑀢𑀺 𑀦𑀁 𑀲𑀢𑁆𑀢𑀁 𑀢𑀲𑁆𑀲 𑀅𑀢𑁆𑀢𑀸 𑀘𑀺𑀢𑁆𑀢𑀁 𑀬𑀣𑀸 ‘‘𑀅𑀳𑀁 𑀧𑀭𑀺𑀲𑀼𑀤𑁆𑀥𑁄, 𑀅𑀧𑀭𑀺𑀲𑀼𑀤𑁆𑀥𑁄 𑀯𑀸’’𑀢𑀺 𑀬𑀸𑀣𑀸𑀯𑀢𑁄 𑀅𑀯𑁂𑀤𑀺 𑀚𑀸𑀦𑀸𑀢𑀺. 𑀤𑁂𑀯𑀸𑀧𑀺 𑀦𑀁 𑀢𑀣𑀸 𑀯𑀺𑀤𑀽𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸 𑀘 𑀢𑀣𑀸 𑀯𑀺𑀤𑀽 𑀯𑀺𑀤𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀲𑀬𑀁 𑀢𑀸𑀤𑀺𑀲𑀸 𑀤𑁂𑀯𑀸 𑀘 𑀧𑀫𑀸𑀡𑀁 𑀲𑀼𑀤𑁆𑀥𑀸𑀲𑀼𑀤𑁆𑀥𑀸𑀦𑀁 𑀲𑀼𑀤𑁆𑀥𑀸𑀲𑀼𑀤𑁆𑀥𑀪𑀸𑀯𑀚𑀸𑀦𑀦𑁂, 𑀦 𑀬𑁂 𑀓𑁂𑀘𑀺 𑀇𑀘𑁆𑀙𑀸𑀤𑁄𑀲𑀧𑀭𑁂𑀢𑀸 𑀲𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑁂𑀢𑀺 𑀧𑀡𑁆𑀟𑀺𑀢𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂, 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀓𑀫𑁆𑀫𑀁 𑀓𑀫𑁆𑀫𑀨𑀮𑀁 𑀓𑀸𑀬𑀲𑁆𑀲 𑀅𑀲𑀼𑀪𑀢𑀁 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀁 𑀅𑀚𑀸𑀦𑀦𑁆𑀢𑀸 𑀇𑀥 𑀧𑀭𑁂 𑀦𑀸𑀫. 𑀢𑁂 𑀫𑀬𑀫𑁂𑀢𑁆𑀣 𑀇𑀫𑀲𑁆𑀫𑀺𑀁 𑀚𑀻𑀯𑀮𑁄𑀓𑁂 𑀬𑀫𑀸𑀫 𑀉𑀧𑀭𑀫𑀸𑀫, ‘‘𑀲𑀢𑀢𑀁 𑀲𑀫𑀺𑀢𑀁 𑀫𑀘𑁆𑀘𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀦 𑀚𑀸𑀦𑀦𑁆𑀢𑀺. 𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀻𑀢𑀺 𑀬𑁂 𑀘 𑀢𑀢𑁆𑀣 𑀧𑀡𑁆𑀟𑀺𑀢𑀸 ‘‘𑀫𑀬𑀁 𑀫𑀘𑁆𑀘𑀼 𑀲𑀫𑀻𑀧𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀺𑀚𑀸𑀦𑀦𑁆𑀢𑀺. 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸𑀢𑀺 𑀏𑀯𑀜𑁆𑀳𑀺 𑀢𑁂 𑀚𑀸𑀦𑀦𑁆𑀢𑀸 𑀫𑁂𑀥𑀕𑀸𑀦𑀁 𑀧𑀭𑀯𑀺𑀳𑀺𑀁𑀲𑀦𑀸𑀦𑀁 𑀯𑀽𑀧𑀲𑀫𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀅𑀢𑁆𑀢𑀦𑀸 ¶ 𑀧𑀭𑁂 𑀘 𑀅𑀜𑁆𑀜𑁂 𑀦 𑀫𑁂𑀥𑀦𑁆𑀢𑀺 𑀦 𑀩𑀸𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁆𑀯𑀁 𑀧𑀦 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀅𑀘𑁄𑀭𑁂 𑀘𑁄𑀭𑁂 𑀓𑀭𑁄𑀦𑁆𑀢𑁄𑀧𑀺 𑀤𑀡𑁆𑀟𑀦𑁂𑀦 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑁄𑀧𑀺 𑀥𑀦𑀚𑀸𑀦𑀺𑀬𑀸 𑀩𑀸𑀥𑀲𑀺 𑀧𑀜𑁆𑀜𑀸𑀯𑁂𑀓𑀮𑁆𑀮𑀢𑁄. 𑀢𑀣𑀸 ¶ 𑀅𑀓𑀭𑁄𑀦𑁆𑀢𑁄𑀧𑀺 𑀚𑀻𑀯𑀢𑁂 𑀯𑀸𑀧𑀺 𑀲𑀧𑁆𑀧𑀜𑁆𑀜𑁄, 𑀅𑀧𑀺 𑀯𑀺𑀢𑁆𑀢𑀧𑀭𑀺𑀓𑁆𑀔𑀬𑁄 𑀧𑀭𑀺𑀓𑁆𑀔𑀻𑀡𑀥𑀦𑁄𑀧𑀺 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀅𑀦𑀯𑀚𑁆𑀚𑀸𑀬 𑀚𑀻𑀯𑀺𑀓𑀸𑀬 𑀚𑀻𑀯𑀢𑀺𑀬𑁂𑀯. 𑀢𑀲𑁆𑀲 𑀳𑀺 𑀚𑀻𑀯𑀺𑀢𑀁 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁩, 𑁨𑁪𑁬; 𑀲𑀼. 𑀦𑀺. 𑁧𑁮𑁪). 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑁄 𑀧𑀦 𑀧𑀜𑁆𑀜𑀸𑀬 ¶ 𑀘 𑀅𑀮𑀸𑀪𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀅𑀢𑁆𑀣𑀁 𑀯𑀺𑀭𑀸𑀥𑁂𑀦𑁆𑀢𑁄 𑀯𑀺𑀢𑁆𑀢𑀯𑀸𑀧𑀺 𑀦 𑀚𑀻𑀯𑀢𑀺 𑀕𑀭𑀳𑀸𑀤𑀺𑀧𑀯𑀢𑁆𑀢𑀺𑀬𑀸 𑀚𑀻𑀯𑀦𑁆𑀢𑁄 𑀦𑀸𑀫 𑀦 𑀳𑁄𑀢𑀺, 𑀅𑀦𑀼𑀧𑀸𑀬𑀜𑁆𑀜𑀼𑀢𑀸𑀬 𑀬𑀣𑀸𑀥𑀺𑀕𑀢𑀁 𑀥𑀦𑀁 𑀦𑀸𑀲𑁂𑀦𑁆𑀢𑁄 𑀚𑀻𑀯𑀺𑀢𑀫𑁆𑀧𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯.

𑀇𑀫𑀸 𑀓𑀺𑀭 𑀘𑀢𑀲𑁆𑀲𑁄𑀧𑀺 𑀕𑀸𑀣𑀸 𑀣𑁂𑀭𑁄 𑀲𑀼𑀧𑀺𑀦𑀦𑁆𑀢𑁂𑀦 𑀭𑀜𑁆𑀜𑁄 𑀓𑀣𑁂𑀲𑀺. 𑀭𑀸𑀚𑀸 𑀲𑀼𑀧𑀺𑀦𑀁 𑀤𑀺𑀲𑁆𑀯𑀸 𑀣𑁂𑀭𑀁 𑀦𑀫𑀲𑁆𑀲𑀦𑁆𑀢𑁄𑀬𑁂𑀯 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀦𑀺𑀬𑀸𑀫𑁂𑀦 𑀲𑀼𑀧𑀺𑀦𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀢𑀸 𑀕𑀸𑀣𑀸 𑀧𑀘𑁆𑀘𑀼𑀦𑀼𑀪𑀸𑀲𑀺𑀢𑁆𑀯𑀸 ‘‘𑀲𑀩𑁆𑀩𑀁 𑀲𑀼𑀡𑀸𑀢𑀻’’𑀢𑀺𑀆𑀤𑀺𑀦𑀸 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀭𑀸𑀚𑀸𑀦𑀁 𑀑𑀯𑀤𑀺. 𑀢𑀢𑁆𑀣 𑀲𑀩𑁆𑀩𑀁 𑀲𑀼𑀡𑀸𑀢𑀺 𑀲𑁄𑀢𑁂𑀦𑀸𑀢𑀺 𑀇𑀥 𑀲𑁄𑀢𑀩𑁆𑀩𑀁 𑀲𑀤𑁆𑀤𑀁 𑀆𑀧𑀸𑀣𑀕𑀢𑀁 𑀲𑀩𑁆𑀩𑀁 𑀲𑀼𑀪𑀸𑀲𑀺𑀢𑀁 𑀤𑀼𑀩𑁆𑀪𑀸𑀲𑀺𑀢𑀜𑁆𑀘 𑀅𑀩𑀥𑀺𑀭𑁄 𑀲𑁄𑀢𑁂𑀦 𑀲𑀼𑀡𑀸𑀢𑀺. 𑀢𑀣𑀸 𑀲𑀩𑁆𑀩𑀁 𑀭𑀽𑀧𑀁 𑀲𑀼𑀦𑁆𑀤𑀭𑀁 𑀅𑀲𑀼𑀦𑁆𑀤𑀭𑀫𑁆𑀧𑀺 𑀘𑀓𑁆𑀔𑀼𑀦𑀸 𑀅𑀦𑀦𑁆𑀥𑁄 𑀧𑀲𑁆𑀲𑀢𑀺, 𑀅𑀬𑀫𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀪𑀸𑀯𑁄. 𑀢𑀢𑁆𑀣 𑀧𑀦 𑀦 𑀘 𑀤𑀺𑀝𑁆𑀞𑀁 𑀲𑀼𑀢𑀁 𑀥𑀻𑀭𑁄, 𑀲𑀩𑁆𑀩𑀁 𑀉𑀚𑁆𑀛𑀺𑀢𑀼𑀦𑁆𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀬𑀜𑁆𑀳𑀺 𑀢𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀯𑀸, 𑀦 𑀢𑀁 𑀲𑀩𑁆𑀩𑀁 𑀥𑀻𑀭𑁄 𑀲𑀧𑁆𑀧𑀜𑁆𑀜𑁄 𑀉𑀚𑁆𑀛𑀺𑀢𑀼𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀕𑀳𑁂𑀢𑀼𑀁 𑀯𑀸 𑀅𑀭𑀳𑀢𑀺. 𑀕𑀼𑀡𑀸𑀕𑀼𑀡𑀁 𑀧𑀦 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀉𑀚𑁆𑀛𑀺𑀢𑀩𑁆𑀩𑀫𑁂𑀯 𑀉𑀚𑁆𑀛𑀺𑀢𑀼𑀁 𑀕𑀳𑁂𑀢𑀩𑁆𑀩𑀜𑁆𑀘 𑀕𑀳𑁂𑀢𑀼𑀁 𑀅𑀭𑀳𑀢𑀺, 𑀢𑀲𑁆𑀫𑀸 𑀘𑀓𑁆𑀔𑀼𑀫𑀸𑀲𑁆𑀲 𑀬𑀣𑀸 𑀅𑀦𑁆𑀥𑁄 𑀘𑀓𑁆𑀔𑀼𑀫𑀸𑀧𑀺 𑀲𑀫𑀸𑀦𑁄 𑀉𑀚𑁆𑀛𑀺𑀢𑀩𑁆𑀩𑁂 𑀤𑀺𑀝𑁆𑀞𑁂 𑀅𑀦𑁆𑀥𑁄 𑀬𑀣𑀸 𑀅𑀲𑁆𑀲 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀪𑀯𑁂𑀬𑁆𑀬, 𑀢𑀣𑀸 𑀉𑀚𑁆𑀛𑀺𑀢𑀩𑁆𑀩𑁂 𑀲𑀼𑀢𑁂 𑀲𑁄𑀢𑀯𑀸𑀧𑀺 𑀩𑀥𑀺𑀭𑁄 𑀬𑀣𑀸 𑀅𑀲𑁆𑀲 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀪𑀯𑁂𑀬𑁆𑀬. 𑀧𑀜𑁆𑀜𑀯𑀸𑀲𑁆𑀲 𑀬𑀣𑀸 𑀫𑀽𑀕𑁄𑀢𑀺 𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀧𑀜𑁆𑀜𑀯𑀸 𑀯𑀘𑀦𑀓𑀼𑀲𑀮𑁄𑀧𑀺 𑀅𑀯𑀢𑁆𑀢𑀩𑁆𑀩𑁂 𑀫𑀽𑀕𑁄 𑀯𑀺𑀬 𑀪𑀯𑁂𑀬𑁆𑀬. 𑀩𑀮𑀯𑀸 𑀣𑀸𑀫𑀲𑀫𑁆𑀧𑀦𑁆𑀦𑁄𑀧𑀺 𑀅𑀓𑀢𑁆𑀢𑀩𑁆𑀩𑁂 𑀤𑀼𑀩𑁆𑀩𑀮𑁄𑀭𑀺𑀯, 𑀭𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀲𑀫𑀢𑁆𑀣𑁄 𑀯𑀺𑀬 𑀪𑀯𑁂𑀬𑁆𑀬. 𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀬𑁂𑀣 𑀫𑀢𑀲𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀉𑀧𑀝𑁆𑀞𑀺𑀢𑁂 𑀫𑀢𑀲𑀸𑀬𑀺𑀓𑀁 𑀲𑀬𑁂𑀣, 𑀫𑀢𑀲𑀸𑀬𑀺𑀓𑀁 𑀲𑀬𑀺𑀢𑁆𑀯𑀸𑀧𑀺 𑀢𑀁 𑀓𑀺𑀘𑁆𑀘𑀁 𑀢𑀻𑀭𑁂𑀢𑀩𑁆𑀩𑀫𑁂𑀯, 𑀦 𑀯𑀺𑀭𑀸𑀥𑁂𑀢𑀩𑁆𑀩𑀁. 𑀅𑀣 𑀯𑀸 𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂𑀢𑀺 𑀅𑀢𑁆𑀢𑀦𑀸 𑀅𑀓𑀭𑀡𑀻𑀬𑁂 𑀅𑀢𑁆𑀣𑁂 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀉𑀧𑀝𑁆𑀞𑀺𑀢𑁂 𑀫𑀢𑀲𑀸𑀬𑀺𑀓𑀁 𑀲𑀬𑁂𑀣, 𑀫𑀢𑀲𑀸𑀬𑀺𑀓𑀁 𑀲𑀬𑀺𑀢𑁆𑀯𑀸𑀧𑀺 𑀢𑀁 𑀦 𑀓𑀸𑀢𑀩𑁆𑀩𑀫𑁂𑀯. 𑀦 𑀳𑀺 𑀧𑀡𑁆𑀟𑀺𑀢𑁄 𑀅𑀬𑀼𑀢𑁆𑀢𑀁 𑀓𑀸𑀢𑀼𑀫𑀭𑀳𑀢𑀻𑀢𑀺 𑀏𑀯𑀁 𑀣𑁂𑀭𑁂𑀦 𑀑𑀯𑀤𑀺𑀢𑁄 𑀭𑀸𑀚𑀸 𑀅𑀓𑀢𑁆𑀢𑀩𑁆𑀩𑀁 𑀧𑀳𑀸𑀬 𑀓𑀸𑀢𑀩𑁆𑀩𑁂𑀬𑁂𑀯 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀅𑀳𑁄𑀲𑀻𑀢𑀺.

𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀺𑀭𑀺𑀫𑀺𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀓𑁆𑀓𑁄𑀥𑀦𑁄𑀢𑀺𑀆𑀤𑀺𑀓𑀸 ¶ ¶ ¶ 𑀆𑀬𑀲𑁆𑀫𑀢𑁄 𑀲𑀺𑀭𑀺𑀫𑀺𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀫𑀳𑀤𑁆𑀥𑀦𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀺𑀭𑀺𑀫𑀺𑀢𑁆𑀢𑁄𑀢𑀺 𑀮𑀤𑁆𑀥𑀦𑀸𑀫𑁄. 𑀢𑀲𑁆𑀲 𑀓𑀺𑀭 𑀫𑀸𑀢𑀸 𑀲𑀺𑀭𑀺𑀕𑀼𑀢𑁆𑀢𑀲𑁆𑀲 𑀪𑀕𑀺𑀦𑀻. 𑀢𑀲𑁆𑀲 𑀯𑀢𑁆𑀣𑀼 𑀥𑀫𑁆𑀫𑀧𑀤𑀯𑀡𑁆𑀡𑀦𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑀕𑀭𑀳𑀤𑀺𑀦𑁆𑀦𑀯𑀢𑁆𑀣𑀼) 𑀆𑀕𑀢𑀫𑁂𑀯. 𑀲𑁄 𑀲𑀺𑀭𑀺𑀕𑀼𑀢𑁆𑀢𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀲𑀺𑀭𑀺𑀫𑀺𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀦𑀧𑀸𑀮𑀤𑀫𑀦𑁂 𑀮𑀤𑁆𑀥𑀧𑁆𑀧𑀲𑀸𑀤𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀏𑀓𑀤𑀺𑀯𑀲𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀆𑀲𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀘 𑀉𑀴𑀸𑀭𑀢𑀭𑁂 𑀕𑀼𑀡𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑁋

𑁫𑁦𑁨.

‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁩.

‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀤𑀸 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁪.

‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀓𑀮𑁆𑀬𑀸𑀡𑀲𑀻𑀮𑁄 𑀲𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁫.

‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁬.

‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀓𑀮𑁆𑀬𑀸𑀡𑀧𑀜𑁆𑀜𑁄 𑀲𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁭.

‘‘𑀬𑀲𑁆𑀲 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

𑁫𑁦𑁮.

‘‘𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀺, 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀁;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑁫𑁦𑁯.

‘‘𑀢𑀲𑁆𑀫𑀸 ¶ 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀅𑀓𑁆𑀓𑁄𑀥𑀦𑁄𑀢𑀺 𑀅𑀓𑀼𑀚𑁆𑀛𑀦𑀲𑀻𑀮𑁄. 𑀉𑀧𑀝𑁆𑀞𑀺𑀢𑁂 𑀳𑀺 𑀓𑁄𑀥𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑁂 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀁 𑀞𑀢𑁆𑀯𑀸 ¶ 𑀓𑁄𑀧𑀲𑁆𑀲 𑀅𑀦𑀼𑀧𑁆𑀧𑀸𑀤𑀓𑁄. 𑀅𑀦𑀼𑀧𑀦𑀸𑀳𑀻𑀢𑀺 𑀦 𑀉𑀧𑀦𑀸𑀳𑀓𑁄, 𑀧𑀭𑁂𑀳𑀺 𑀓𑀢𑀁 𑀅𑀧𑀭𑀸𑀥𑀁 𑀧𑀝𑀺𑀘𑁆𑀘 ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂’’𑀢𑀺𑀆𑀤𑀺𑀦𑀸 (𑀥. 𑀧. 𑁩; 𑀫𑀳𑀸𑀯. 𑁪𑁬𑁪; 𑀫. 𑀦𑀺. 𑁩.𑁨𑁩𑁭) 𑀓𑁄𑀥𑀲𑁆𑀲 𑀅𑀦𑀼𑀧𑀦𑀬𑁆𑀳𑀦𑀲𑀻𑀮𑁄. 𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀫𑀸𑀬𑀸𑀬 𑀅𑀪𑀸𑀯𑀢𑁄 𑀅𑀫𑀸𑀬𑁄. 𑀧𑀺𑀲𑀼𑀡𑀯𑀸𑀘𑀸𑀯𑀺𑀭𑀳𑀺𑀢𑀢𑁄 𑀭𑀺𑀢𑁆𑀢𑀧𑁂𑀲𑀼𑀡𑁄, 𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀢𑀣𑀸𑀭𑀽𑀧𑁄 𑀢𑀣𑀸𑀚𑀸𑀢𑀺𑀓𑁄 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 ¶ . 𑀏𑀯𑀁 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀧𑁂𑀘𑁆𑀘 𑀧𑀭𑀮𑁄𑀓𑁂 𑀦 𑀲𑁄𑀘𑀢𑀺 𑀲𑁄𑀓𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀬𑁄 𑀓𑀸𑀬𑀤𑁆𑀯𑀸𑀭𑀸𑀤𑀬𑁄 𑀘 𑀕𑀼𑀢𑁆𑀢𑀸 𑀧𑀺𑀳𑀺𑀢𑀸 𑀲𑀁𑀯𑀼𑀢𑀸 𑀏𑀢𑀲𑁆𑀲𑀸𑀢𑀺 𑀕𑀼𑀢𑁆𑀢𑀤𑁆𑀯𑀸𑀭𑁄. 𑀓𑀮𑁆𑀬𑀸𑀡𑀲𑀻𑀮𑁄𑀢𑀺 𑀲𑀼𑀦𑁆𑀤𑀭𑀲𑀻𑀮𑁄 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑁋

‘‘𑀧𑀺𑀬𑁄 𑀕𑀭𑀼𑀪𑀸𑀯𑀦𑀺𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀬𑁂’’𑀢𑀺. (𑀅. 𑀦𑀺. 𑁭.𑁩𑁭) 𑁋

𑀏𑀯𑀁 𑀯𑀺𑀪𑀸𑀯𑀺𑀢𑀮𑀓𑁆𑀔𑀡𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀓𑀮𑁆𑀬𑀸𑀡𑀧𑀜𑁆𑀜𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄. 𑀬𑀤𑀺𑀧𑀺 𑀧𑀜𑁆𑀜𑀸 𑀦𑀸𑀫 𑀅𑀲𑀼𑀦𑁆𑀤𑀭𑀸 𑀦𑀢𑁆𑀣𑀺, 𑀦𑀺𑀬𑁆𑀬𑀸𑀦𑀺𑀓𑀸𑀬 𑀧𑀦 𑀧𑀜𑁆𑀜𑀸𑀬 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁

𑀏𑀯𑀫𑁂𑀢𑁆𑀣 𑀓𑁄𑀥𑀸𑀤𑀻𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀓𑁆𑀓𑁄𑀥𑀦𑀸𑀤𑀺𑀫𑀼𑀔𑁂𑀦, 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀕𑀸𑀣𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀧𑁆𑀨𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀸𑀤𑀺𑀓𑁂 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀕𑀸𑀣𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲 𑀲𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀕𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀫𑀕𑁆𑀕𑁂𑀦𑀸𑀕𑀢𑀲𑀤𑁆𑀥𑀸, 𑀢𑀢𑁄 𑀏𑀯 𑀅𑀘𑀮𑀸 𑀅𑀯𑀺𑀓𑀫𑁆𑀧𑀸 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀸. ‘‘𑀅𑀢𑁆𑀣𑀻’’𑀢𑀺, 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀭𑀺𑀬𑀓𑀦𑁆𑀢𑀦𑁆𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀁 𑀧𑀺𑀬𑀸𑀬𑀺𑀢𑀁 𑀪𑀯𑀦𑁆𑀢𑀭𑁂𑀧𑀺 𑀅𑀯𑀺𑀚𑀳𑀦𑀢𑁄. 𑀧𑀲𑀁𑀲𑀺𑀢𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀝𑁆𑀞𑀁, 𑀯𑀡𑁆𑀡𑀺𑀢𑀁 𑀣𑁄𑀫𑀺𑀢𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑀁 𑀧𑀦𑁂𑀢𑀁 𑀲𑀻𑀮𑀁 𑀕𑀳𑀝𑁆𑀞𑀲𑀻𑀮𑀁 𑀧𑀩𑁆𑀩𑀚𑀺𑀢𑀲𑀻𑀮𑀦𑁆𑀢𑀺 ¶ 𑀤𑀼𑀯𑀺𑀥𑀁. 𑀢𑀢𑁆𑀣 𑀕𑀳𑀝𑁆𑀞𑀲𑀻𑀮𑀁 𑀦𑀸𑀫 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀻𑀮𑀁, 𑀬𑀁 𑀕𑀳𑀝𑁆𑀞𑁂𑀦 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑀸. 𑀧𑀩𑁆𑀩𑀚𑀺𑀢𑀲𑀻𑀮𑀁 𑀦𑀸𑀫 𑀤𑀲𑀲𑀺𑀓𑁆𑀔𑀸𑀧𑀤𑀲𑀻𑀮𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑁂𑀦 𑀅𑀧𑀭𑀸𑀫𑀝𑁆𑀞𑀢𑀸𑀬 ‘‘𑀓𑀮𑁆𑀬𑀸𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀻𑀢𑀺 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀅𑀭𑀺𑀬𑀲𑀗𑁆𑀖𑁂 𑀧𑀲𑀸𑀤𑁄 𑀲𑀤𑁆𑀥𑀸 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀦𑁆𑀢𑀺 𑀤𑀺𑀝𑁆𑀞𑀺𑀯𑀗𑁆𑀓𑀸𑀪𑀸𑀯𑀢𑁄 𑀓𑀺𑀮𑁂𑀲𑀯𑀗𑁆𑀓𑀸𑀪𑀸𑀯𑀢𑁄 𑀘 𑀉𑀚𑀼𑀪𑀽𑀢𑀁. 𑀅𑀓𑀼𑀝𑀺𑀮𑀁 𑀅𑀚𑀺𑀫𑁆𑀳𑀁 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀜𑁆𑀘𑁂𑀯 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀜𑁆𑀘𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀤𑀲𑁆𑀲𑀦𑀁 𑀬𑀲𑁆𑀲 𑀅𑀢𑁆𑀣𑀺 𑀅𑀘𑀮𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑁆𑀢𑀺 ¶ 𑀬𑁄𑀚𑀦𑀸. 𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀲𑀼𑀢𑀥𑀦𑀁, 𑀘𑀸𑀕𑀥𑀦𑀁, 𑀧𑀜𑁆𑀜𑀸𑀥𑀦𑀦𑁆𑀢𑀺 𑀇𑀫𑁂𑀲𑀁 𑀲𑀼𑀯𑀺𑀲𑀼𑀤𑁆𑀥𑀸𑀦𑀁 𑀥𑀦𑀸𑀦𑀁 𑀅𑀢𑁆𑀣𑀺𑀢𑀸𑀬 ‘‘𑀅𑀤𑀮𑀺𑀤𑁆𑀤𑁄’’𑀢𑀺 𑀢𑀁 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀳𑀼. 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁 𑀢𑀲𑁆𑀲 𑀢𑀣𑀸𑀭𑀽𑀧𑀲𑁆𑀲 𑀚𑀻𑀯𑀺𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀸𑀥𑀺𑀕𑀫𑁂𑀦 𑀅𑀫𑁄𑀖𑀁 𑀅𑀯𑀜𑁆𑀛𑀁 𑀲𑀨𑀮𑀫𑁂𑀯𑀸𑀢𑀺 𑀆𑀳𑀽𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 ¶ , 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 ‘‘𑀅𑀤𑀮𑀺𑀤𑁆𑀤𑁄 𑀅𑀫𑁄𑀖𑀚𑀻𑀯𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀢𑀣𑀸𑀭𑀽𑀧𑁄 𑀪𑀯𑁂𑀬𑁆𑀬𑀦𑁆𑀢𑀺. 𑀲𑀤𑁆𑀥𑀜𑁆𑀘…𑀧𑁂… 𑀲𑀸𑀲𑀦𑀦𑁆𑀢𑀺 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁧𑁮𑁩; 𑀤𑀻. 𑀦𑀺. 𑁨.𑁯𑁦) 𑀯𑀼𑀢𑁆𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀓𑀼𑀮𑀧𑀼𑀢𑁆𑀢𑁄 𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀲𑀤𑁆𑀥𑀜𑁆𑀘𑁂𑀯 𑀲𑀻𑀮𑀜𑁆𑀘 𑀥𑀫𑁆𑀫𑀤𑀲𑁆𑀲𑀦𑀳𑁂𑀢𑀼𑀓𑀁 𑀥𑀫𑁆𑀫𑁂 𑀲𑀼𑀦𑀺𑀘𑁆𑀙𑀬𑀸 𑀯𑀺𑀫𑁄𑀓𑁆𑀔𑀪𑀽𑀢𑀁 𑀧𑀲𑀸𑀤𑀜𑁆𑀘 𑀅𑀦𑀼𑀬𑀼𑀜𑁆𑀚𑁂𑀬𑁆𑀬 𑀯𑀟𑁆𑀠𑁂𑀬𑁆𑀬𑀸𑀢𑀺.

𑀏𑀯𑀁 𑀣𑁂𑀭𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀤𑁂𑀲𑀦𑀸𑀫𑀼𑀔𑁂𑀦 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑁂 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀲𑀺𑀭𑀺𑀫𑀺𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀤𑀸 ¶ 𑀧𑀞𑀫𑀫𑀤𑁆𑀤𑀓𑁆𑀔𑀺𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀓𑀼𑀝𑀼𑀫𑁆𑀩𑀺𑀬𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀁 𑀪𑀺𑀓𑁆𑀔𑀼𑀁 𑀢𑀼𑀫𑁆𑀳𑁂 𑀇𑀢𑁄 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑁋 ‘𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑀸𑀦𑀁 𑀅𑀬𑀁 𑀫𑀫 𑀲𑀸𑀲𑀦𑁂 𑀅𑀕𑁆𑀕𑁄’𑀢𑀺 𑀏𑀢𑀤𑀕𑁆𑀕𑁂 𑀞𑀧𑀬𑀺𑀢𑁆𑀣, 𑀅𑀳𑀫𑁆𑀧𑀺 𑀇𑀫𑀲𑁆𑀲 𑀅𑀥𑀺𑀓𑀸𑀭𑀓𑀫𑁆𑀫𑀲𑁆𑀲 𑀩𑀮𑁂𑀦 𑀲𑁄 𑀪𑀺𑀓𑁆𑀔𑀼 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀢𑀣𑁂𑀯 𑀪𑀕𑀯𑀢𑀺 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀫𑀦𑁄𑀫𑀬𑀲𑁆𑀲 𑀓𑀸𑀬𑀲𑁆𑀲𑀸𑀪𑀺𑀦𑀺𑀫𑁆𑀫𑀸𑀦𑀁 𑀘𑁂𑀢𑁄𑀯𑀺𑀯𑀝𑁆𑀝𑀓𑁄𑀲𑀮𑁆𑀮𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀢𑁆𑀣𑀦𑀁 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀢𑀼𑀫𑁆𑀳𑀸𑀓𑀁 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀢𑁂 ¶ 𑀉𑀪𑁄𑀧𑀺 𑀚𑀦𑀸 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀫𑀳𑀸𑀧𑀦𑁆𑀣𑀓𑀲𑁆𑀲 𑀅𑀦𑁆𑀢𑀭𑀸𑀓𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀦 𑀓𑀣𑀻𑀬𑀢𑀺. 𑀘𑀽𑀴𑀧𑀦𑁆𑀣𑀓𑁄 𑀧𑀦 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀑𑀤𑀸𑀢𑀓𑀲𑀺𑀡𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀧𑀤𑀸𑀦𑁂 𑀧𑀦 ‘‘𑀘𑀽𑀴𑀧𑀦𑁆𑀣𑀓𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀼𑀧𑁆𑀨𑀘𑁆𑀙𑀢𑁆𑀢𑁂𑀦 𑀧𑀽𑀚𑀁 𑀅𑀓𑀸𑀲𑀻’’𑀢𑀺 𑀆𑀕𑀢𑀁. 𑀢𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 ¶ 𑀲𑀁𑀲𑀭𑀦𑁆𑀢𑀸𑀦𑀁𑀬𑁂𑀯 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀢𑀺𑀓𑁆𑀓𑀦𑁆𑀢𑀁. 𑀅𑀣 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀥𑀦𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸 𑀅𑀢𑁆𑀢𑀦𑁄 𑀤𑀸𑀲𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 𑀜𑀸𑀢𑀓𑁂𑀳𑀺 𑀪𑀻𑀢𑀸 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀲𑀦𑁆𑀢𑀻 𑀢𑀁 𑀧𑀝𑀺𑀘𑁆𑀘 𑀕𑀩𑁆𑀪𑀁 𑀮𑀪𑀺𑀢𑁆𑀯𑀸 𑀧𑀭𑀺𑀧𑀓𑁆𑀓𑀕𑀩𑁆𑀪𑀸 ‘‘𑀜𑀸𑀢𑀺𑀖𑀭𑀁 ¶ 𑀕𑀦𑁆𑀢𑁆𑀯𑀸 𑀯𑀺𑀚𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀲𑀸𑀫𑀺𑀦𑀸 𑀦𑀺𑀯𑀢𑁆𑀢𑀺𑀢𑀸 𑀧𑀼𑀩𑁆𑀩𑁂 𑀯𑀲𑀺𑀢𑀝𑁆𑀞𑀸𑀦𑁂 𑀯𑀲𑀦𑁆𑀢𑀻 𑀧𑀼𑀢𑁆𑀢𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀦𑁆𑀣𑀓𑁄𑀢𑀺, 𑀦𑀸𑀫𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀆𑀥𑀸𑀯𑀺𑀢𑁆𑀯𑀸 𑀯𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀢𑀫𑁂𑀯 𑀧𑀝𑀺𑀘𑁆𑀘 𑀤𑀼𑀢𑀺𑀬𑀁 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀧𑀓𑁆𑀓𑀕𑀩𑁆𑀪𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀲𑀸𑀫𑀺𑀦𑀸 𑀦𑀺𑀯𑀢𑁆𑀢𑀺𑀢𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀫𑀳𑀸𑀧𑀦𑁆𑀣𑀓𑁄𑀢𑀺 𑀓𑀦𑀺𑀝𑁆𑀞𑀲𑁆𑀲 𑀘𑀽𑀴𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀬𑀣𑀸𑀯𑀲𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀲𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀤𑀸𑀭𑀓𑁂𑀲𑀼 𑀯𑀟𑁆𑀠𑀦𑁆𑀢𑁂𑀲𑀼 𑀢𑁂𑀳𑀺, ‘‘𑀅𑀫𑁆𑀫, 𑀅𑀬𑁆𑀬𑀓𑀓𑀼𑀮𑀁 𑀦𑁄 𑀤𑀲𑁆𑀲𑁂𑀳𑀻’’𑀢𑀺 𑀦𑀺𑀩𑀼𑀦𑁆𑀥𑀺𑀬𑀫𑀸𑀦𑀸 𑀤𑀸𑀭𑀓𑁂 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀭𑀓𑀸 𑀥𑀦𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀘𑀽𑀴𑀧𑀦𑁆𑀣𑀓𑁄 𑀅𑀢𑀺𑀤𑀳𑀭𑁄. 𑀫𑀳𑀸𑀧𑀦𑁆𑀣𑀓𑁄 𑀧𑀦 𑀅𑀬𑁆𑀬𑀓𑁂𑀦 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀲𑀳 𑀤𑀲𑁆𑀲𑀦𑁂𑀦 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀧𑀺𑀢𑀸𑀫𑀳𑀁 𑀆𑀧𑀼𑀘𑁆𑀙𑀺. 𑀲𑁄 𑀲𑀢𑁆𑀣𑀼 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀮𑀸𑀪𑀻 𑀳𑀼𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀢𑀺 𑀲𑁄 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑀸𑀦𑀁 𑀅𑀕𑁆𑀕𑁄 𑀚𑀸𑀢𑁄. 𑀲𑁄 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀥𑀺𑀕𑀢𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀘𑁆𑀘 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑁋

𑁫𑁧𑁦.

‘‘𑀬𑀤𑀸 𑀧𑀞𑀫𑀫𑀤𑁆𑀤𑀓𑁆𑀔𑀺𑀁, 𑀲𑀢𑁆𑀣𑀸𑀭𑀫𑀓𑀼𑀢𑁄𑀪𑀬𑀁;

𑀢𑀢𑁄 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀧𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁫𑁧𑁧.

‘‘𑀲𑀺𑀭𑀺𑀁 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺, 𑀬𑁄 𑀧𑀡𑀸𑀫𑁂𑀬𑁆𑀬 𑀆𑀕𑀢𑀁;

𑀏𑀢𑀸𑀤𑀺𑀲𑀁 𑀲𑁄 𑀲𑀢𑁆𑀣𑀸𑀭𑀁, 𑀆𑀭𑀸𑀥𑁂𑀢𑁆𑀯𑀸 𑀯𑀺𑀭𑀸𑀥𑀬𑁂.

𑁫𑁧𑁨.

‘‘𑀢𑀤𑀸𑀳𑀁 ¶ 𑀧𑀼𑀢𑁆𑀢𑀤𑀸𑀭𑀜𑁆𑀘, 𑀥𑀦𑀥𑀜𑁆𑀜𑀜𑁆𑀘 𑀙𑀟𑁆𑀟𑀬𑀺𑀁;

𑀓𑁂𑀲𑀫𑀲𑁆𑀲𑀽𑀦𑀺 𑀙𑁂𑀤𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁫𑁧𑁩.

‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑁆𑀧𑀦𑁆𑀦𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑁄;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀯𑀺𑀳𑀸𑀲𑀺𑀁 𑀅𑀧𑀭𑀸𑀚𑀺𑀢𑁄.

𑁫𑁧𑁪.

‘‘𑀢𑀢𑁄 ¶ ¶ 𑀫𑁂 𑀧𑀡𑀺𑀥𑀻 𑀆𑀲𑀺, 𑀘𑁂𑀢𑀲𑁄 𑀅𑀪𑀺𑀧𑀢𑁆𑀣𑀺𑀢𑁄;

𑀦 𑀦𑀺𑀲𑀻𑀤𑁂 𑀫𑀼𑀳𑀼𑀢𑁆𑀢𑀫𑁆𑀧𑀺, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂.

𑁫𑁧𑁫.

‘‘𑀢𑀲𑁆𑀲 𑀫𑁂𑀯𑀁 𑀯𑀺𑀳𑀭𑀢𑁄, 𑀧𑀲𑁆𑀲 𑀯𑀻𑀭𑀺𑀬𑀧𑀭𑀓𑁆𑀓𑀫𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁧𑁬.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀦𑀺𑀭𑀽𑀧𑀥𑀺.

𑁫𑁧𑁭.

‘‘𑀢𑀢𑁄 𑀭𑀢𑁆𑀬𑀸𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀲𑀩𑁆𑀩𑀁 𑀢𑀡𑁆𑀳𑀁 𑀯𑀺𑀲𑁄𑀲𑁂𑀢𑁆𑀯𑀸, 𑀧𑀮𑁆𑀮𑀗𑁆𑀓𑁂𑀦 𑀉𑀧𑀸𑀯𑀺𑀲𑀺’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀧𑀞𑀫𑀦𑁆𑀢𑀺 𑀆𑀤𑀺𑀢𑁄. 𑀅𑀤𑁆𑀤𑀓𑁆𑀔𑀺𑀦𑁆𑀢𑀺 𑀧𑀲𑁆𑀲𑀺𑀁, 𑀲𑀢𑁆𑀣𑀸𑀭𑀦𑁆𑀢𑀺, 𑀪𑀕𑀯𑀦𑁆𑀢𑀁. 𑀅𑀓𑀼𑀢𑁄𑀪𑀬𑀦𑁆𑀢𑀺 𑀦𑀺𑀩𑁆𑀪𑀬𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀩𑁆𑀩𑁂𑀲𑀁 𑀪𑀬𑀳𑁂𑀢𑀽𑀦𑀁 𑀩𑁄𑀥𑀺𑀫𑀽𑀮𑁂𑀬𑁂𑀯 𑀧𑀳𑀻𑀦𑀢𑁆𑀢𑀸 𑀓𑀼𑀢𑁄𑀘𑀺𑀧𑀺 𑀪𑀬𑀸𑀪𑀸𑀯𑀢𑁄 𑀅𑀓𑀼𑀢𑁄𑀪𑀬𑀁 𑀦𑀺𑀩𑁆𑀪𑀬𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀫𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀫𑀬𑁆𑀳𑀁 𑀧𑀺𑀢𑀸𑀫𑀳𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀬𑀸𑀬 𑀯𑁂𑀮𑀸𑀬 𑀲𑀩𑁆𑀩𑀧𑀞𑀫𑀁 𑀧𑀲𑁆𑀲𑀺𑀁, 𑀢𑀁 𑀧𑀼𑀭𑀺𑀲𑀼𑀢𑁆𑀢𑀫𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀧𑀲𑁆𑀲𑀺𑀢𑁆𑀯𑀸 𑀢𑀢𑁄 𑀤𑀲𑁆𑀲𑀦𑀳𑁂𑀢𑀼 𑀢𑀢𑁄 𑀤𑀲𑁆𑀲𑀦𑀢𑁄 𑀧𑀘𑁆𑀙𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀦𑀸𑀮𑀢𑁆𑀣’’𑀦𑁆𑀢𑀺 𑀫𑀬𑁆𑀳𑀁 𑀲𑀁𑀯𑁂𑀕𑁄 𑀅𑀳𑀼 𑀲𑀳𑁄𑀢𑁆𑀢𑀧𑁆𑀧𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀺. 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀧𑀦𑀸𑀳𑀁 𑀏𑀯𑀁 𑀘𑀺𑀦𑁆𑀢𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺 𑀲𑀺𑀭𑀺𑀁 𑀳𑀢𑁆𑀣𑁂𑀳𑀻𑀢𑀺 𑀕𑀸𑀣𑀸𑀬. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀯𑀺𑀪𑀯𑀢𑁆𑀣𑀺𑀓𑁄 𑀧𑀼𑀭𑀺𑀲𑁄 ‘‘𑀉𑀧𑀝𑁆𑀞𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀯 𑀲𑀦𑁆𑀢𑀺𑀓𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀯𑀺𑀕𑁆𑀕𑀳𑀁 𑀲𑀺𑀭𑀺𑀁 𑀲𑀬𑀦𑁂 𑀉𑀧𑀕𑀢𑀁 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀓𑁄𑀝𑁆𑀝𑁂𑀦𑁆𑀢𑁄 𑀧𑀡𑀸𑀫𑁂𑀬𑁆𑀬 𑀦𑀻𑀳𑀭𑁂𑀬𑁆𑀬, 𑀲𑁄 𑀢𑀣𑀸𑀭𑀽𑀧𑁄 𑀅𑀮𑀓𑁆𑀔𑀺𑀓𑀧𑀼𑀭𑀺𑀲𑁄 𑀏𑀢𑀸𑀤𑀺𑀲𑀁 𑀲𑀢𑁆𑀣𑀸𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀆𑀭𑀸𑀥𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀦𑀯𑀫𑁂 𑀔𑀡𑁂 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀭𑀸𑀥𑀬𑁂 𑀢𑀲𑁆𑀲 𑀑𑀯𑀸𑀤𑀸𑀓𑀭𑀡𑁂𑀦 𑀢𑀁 𑀯𑀺𑀭𑀚𑁆𑀛𑁂𑀬𑁆𑀬, 𑀅𑀳𑀁 𑀧𑀦𑁂𑀯𑀁 𑀦 𑀓𑀭𑁄𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀤𑀸𑀳𑀁…𑀧𑁂… 𑀅𑀦𑀕𑀸𑀭𑀺𑀬’’𑀦𑁆𑀢𑀺. 𑀢𑀢𑁆𑀣 𑀙𑀟𑁆𑀟𑀬𑀺𑀦𑁆𑀢𑀺, 𑀧𑀚𑀳𑀺𑀁. ‘‘𑀙𑀟𑁆𑀟𑀺𑀬’’𑀦𑁆𑀢𑀺𑀧𑀺 𑀧𑀸𑀞𑁄. 𑀦𑀦𑀼 𑀅𑀬𑀁 𑀣𑁂𑀭𑁄 𑀤𑀸𑀭𑀧𑀭𑀺𑀕𑁆𑀕𑀳𑀁 𑀅𑀓𑀢𑁆𑀯𑀸𑀯 𑀧𑀩𑁆𑀩𑀚𑀺𑀢𑁄, 𑀲𑁄 𑀓𑀲𑁆𑀫𑀸 ‘‘𑀧𑀼𑀢𑁆𑀢𑀤𑀸𑀭𑀜𑁆𑀘 ¶ 𑀙𑀟𑁆𑀟𑀬𑀺’’𑀦𑁆𑀢𑀺 𑀅𑀯𑁄𑀘𑀸𑀢𑀺? 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀅𑀦𑀺𑀩𑁆𑀩𑀢𑁆𑀢𑀨𑀮𑀫𑁂𑀯 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑁄 𑀅𑀘𑁆𑀙𑀺𑀦𑁆𑀦𑁂 𑀢𑀢𑁄 𑀮𑀤𑁆𑀥𑀨𑀮𑁂𑀳𑀺 𑀧𑀭𑀺𑀳𑀻𑀦𑁄 𑀦𑀸𑀫 𑀳𑁄𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀬𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀢𑀸𑀬 𑀘, 𑀬𑀢𑁆𑀣 𑀪𑀺𑀓𑁆𑀔𑀽 𑀲𑀳 𑀚𑀻𑀯𑀦𑁆𑀢𑀺, 𑀏𑀓𑀚𑀻𑀯𑀺𑀓𑀸 ¶ 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀢𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑁂𑀦 𑀲𑀸𑀚𑀻𑀯𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀲𑀺𑀓𑁆𑀔𑀦𑀪𑀸𑀯𑁂𑀦 ¶ 𑀲𑀫𑀗𑁆𑀕𑀻𑀪𑀽𑀢𑁄, 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀤𑀼𑀪𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀲𑀼𑀯𑀺𑀲𑀼𑀤𑁆𑀥𑁂 𑀧𑀸𑀢𑀺𑀫𑁄𑀓𑁆𑀔𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑁄𑀢𑀺 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀝𑁆𑀞𑀼 𑀲𑀁𑀯𑀼𑀢𑁄. 𑀭𑀽𑀧𑀸𑀤𑀺𑀯𑀺𑀲𑀬𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀸𑀦𑀁 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀯𑀲𑁂𑀦 𑀲𑀢𑀺𑀓𑀯𑀸𑀝𑁂𑀦 𑀲𑀼𑀧𑀺𑀳𑀺𑀢𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀇𑀢𑀭𑀲𑀻𑀮𑀫𑁆𑀧𑀺 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀻𑀢𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀦𑀼𑀬𑁄𑀕𑀫𑀸𑀳. 𑀯𑀺𑀳𑀸𑀲𑀺𑀁 𑀅𑀧𑀭𑀸𑀚𑀺𑀢𑁄𑀢𑀺 𑀓𑀺𑀮𑁂𑀲𑀫𑀸𑀭𑀸𑀤𑀻𑀳𑀺 𑀅𑀧𑀭𑀸𑀚𑀺𑀢𑁄 𑀏𑀯 𑀳𑀼𑀢𑁆𑀯𑀸 𑀯𑀺𑀳𑀭𑀺𑀁, 𑀬𑀸𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺, 𑀢𑀸𑀯 𑀢𑁂𑀳𑀺 𑀅𑀦𑀪𑀺𑀪𑀽𑀢𑁄, 𑀅𑀜𑁆𑀜𑀤𑀢𑁆𑀣𑀼 𑀢𑁂 𑀅𑀪𑀺𑀪𑀯𑀦𑁆𑀢𑁄 𑀏𑀯 𑀯𑀺𑀳𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁄𑀢𑀺 𑀢𑀲𑁆𑀫𑀸, 𑀬𑀲𑁆𑀫𑀸 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑁄 𑀲𑀢𑁆𑀣𑀭𑀺 𑀅𑀪𑀺𑀧𑁆𑀧𑀲𑀦𑁆𑀦𑁄 𑀓𑀺𑀮𑁂𑀲𑀸𑀪𑀺𑀪𑀯𑀦𑀧𑀝𑀺𑀧𑀢𑁆𑀢𑀺𑀬𑀜𑁆𑀘 𑀞𑀺𑀢𑁄, 𑀢𑀲𑁆𑀫𑀸. 𑀧𑀡𑀺𑀥𑀻𑀢𑀺 𑀧𑀡𑀺𑀥𑀸𑀦𑀁. 𑀢𑀢𑁄 𑀯𑀸 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄. 𑀆𑀲𑀻𑀢𑀺 𑀅𑀳𑁄𑀲𑀺. 𑀘𑁂𑀢𑀲𑁄 𑀅𑀪𑀺𑀧𑀢𑁆𑀣𑀺𑀢𑁄𑀢𑀺, 𑀫𑀫 𑀘𑀺𑀢𑁆𑀢𑁂𑀦 𑀇𑀘𑁆𑀙𑀺𑀢𑁄. 𑀓𑀻𑀤𑀺𑀲𑁄 𑀧𑀦 𑀲𑁄𑀢𑀺 𑀆𑀳 ‘‘𑀦 𑀦𑀺𑀲𑀻𑀤𑁂 𑀫𑀼𑀳𑀼𑀢𑁆𑀢𑀫𑁆𑀧𑀺, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂’’𑀢𑀺. ‘‘𑀅𑀕𑁆𑀕𑀫𑀕𑁆𑀕𑀲𑀡𑁆𑀟𑀸𑀲𑁂𑀦 𑀫𑀫 𑀳𑀤𑀬𑀢𑁄 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀼𑀤𑁆𑀥𑀝𑁂 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀦𑀺𑀲𑀻𑀤𑁂, 𑀦𑀺𑀲𑀚𑁆𑀚𑀁 𑀦 𑀓𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀫𑁂 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀪𑀸𑀯𑀦𑀁 𑀪𑀸𑀯𑀬𑀺𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑁂𑀳𑁂𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀛𑀸𑀦𑀗𑁆𑀕𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀫𑁂’’𑀢𑀺𑀆𑀤𑀺. 𑀦𑀺𑀭𑀽𑀧𑀥𑀻𑀢𑀺 𑀓𑀺𑀮𑁂𑀲𑀼𑀧𑀥𑀺𑀆𑀤𑀻𑀦𑀁 𑀅𑀪𑀸𑀯𑁂𑀦 𑀦𑀺𑀭𑀼𑀧𑀥𑀺. 𑀭𑀢𑁆𑀬𑀸𑀯𑀺𑀯𑀲𑀸𑀦𑁂𑀢𑀺 𑀭𑀢𑁆𑀢𑀺𑀪𑀸𑀕𑀲𑁆𑀲 𑀯𑀺𑀕𑀫𑀦𑁂 ¶ 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸. 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀻𑀢𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀮𑀓𑁆𑀔𑀡𑀁 𑀓𑀢𑁆𑀯𑀸. 𑀲𑀩𑁆𑀩𑀁 𑀢𑀡𑁆𑀳𑀦𑁆𑀢𑀺 𑀓𑀸𑀫𑀢𑀡𑁆𑀳𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀢𑀡𑁆𑀳𑀸𑀲𑁄𑀢𑀁 𑀅𑀕𑁆𑀕𑀫𑀕𑁆𑀕𑁂𑀦 𑀯𑀺𑀲𑁄𑀲𑁂𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 ‘‘𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂 𑀦 𑀦𑀺𑀲𑀻𑀤𑁂’’𑀢𑀺, 𑀧𑀝𑀺𑀜𑁆𑀜𑀸𑀬 𑀫𑁄𑀘𑀺𑀢𑀢𑁆𑀢𑀸. 𑀧𑀮𑁆𑀮𑀗𑁆𑀓𑁂𑀦 𑀉𑀧𑀸𑀯𑀺𑀲𑀺𑀦𑁆𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀓𑀦𑀺𑀧𑀸𑀢𑁄

𑁧. 𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀦𑀯𑀓𑀦𑀺𑀧𑀸𑀢𑁂 ¶ ¶ 𑀬𑀤𑀸 𑀤𑀼𑀓𑁆𑀔𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀪𑀽𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 ¶ 𑀲𑁂𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀉𑀲𑀪𑀁 𑀧𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀓𑁂𑀢𑀦𑀕𑀭𑀲𑁆𑀲 𑀤𑁆𑀯𑀸𑀭𑀕𑀸𑀫𑁂 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑀺𑀭 𑀲𑁂𑀝𑁆𑀞𑀺𑀦𑁄 𑀚𑀸𑀢𑀸 𑀚𑀸𑀢𑀸 𑀤𑀸𑀭𑀓𑀸 𑀩𑀤𑁆𑀥𑀸𑀖𑀸𑀢𑁂𑀦 𑀏𑀓𑁂𑀦 𑀬𑀓𑁆𑀔𑁂𑀦 𑀔𑀸𑀤𑀺𑀢𑀸, 𑀇𑀫𑀲𑁆𑀲 𑀧𑀦 𑀧𑀘𑁆𑀙𑀺𑀫𑀪𑀯𑀺𑀓𑀢𑁆𑀢𑀸 𑀪𑀽𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀬𑀓𑁆𑀔𑁄 𑀧𑀦 𑀯𑁂𑀲𑁆𑀲𑀯𑀡𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀢𑁄, 𑀧𑀼𑀦 𑀦𑀸𑀕𑀫𑀸𑀲𑀺. 𑀦𑀸𑀫𑀓𑀭𑀡𑀤𑀺𑀯𑀲𑁂 𑀘𑀲𑁆𑀲 ‘‘𑀏𑀯𑀁 𑀓𑀢𑁂 𑀅𑀫𑀦𑀼𑀲𑁆𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀸 𑀧𑀭𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺 𑀪𑀽𑀢𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦 𑀅𑀦𑀦𑁆𑀢𑀭𑀸𑀬𑁄 𑀯𑀟𑁆𑀠𑀺, 𑀢𑀲𑁆𑀲 ‘‘𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀪𑀯𑀓𑀺𑀢𑁆𑀢𑀦𑁂 𑀯𑀺𑀬 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀲𑀸𑀓𑁂𑀢𑁂 𑀯𑀲𑀦𑁆𑀢𑁂 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀢𑁄. 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀚𑀓𑀭𑀡𑀺𑀬𑀸 𑀦𑀸𑀫 𑀦𑀤𑀺𑀬𑀸 𑀢𑀻𑀭𑁂 𑀮𑁂𑀡𑁂 𑀯𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁭.𑁨𑁦-𑁨𑁮) 𑁋

‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

‘‘𑀳𑀺𑀫𑀯𑀸 𑀯𑀸𑀧𑀭𑀺𑀫𑁂𑀬𑁆𑀬𑁄, 𑀲𑀸𑀕𑀭𑁄𑀯 𑀤𑀼𑀭𑀼𑀢𑁆𑀢𑀭𑁄;

𑀢𑀣𑁂𑀯 𑀛𑀸𑀦𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

‘‘𑀯𑀲𑀼𑀥𑀸 ¶ 𑀬𑀣𑀸𑀧𑁆𑀧𑀫𑁂𑀬𑁆𑀬𑀸, 𑀘𑀺𑀢𑁆𑀢𑀸 𑀯𑀦𑀯𑀝𑀁𑀲𑀓𑀸;

𑀢𑀣𑁂𑀯 𑀲𑀻𑀮𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

‘‘𑀅𑀦𑀺𑀮𑀜𑁆𑀚𑀲𑀸𑀲𑀗𑁆𑀔𑀼𑀩𑁆𑀪𑁄 ¶ , 𑀬𑀣𑀸𑀓𑀸𑀲𑁄 𑀅𑀲𑀗𑁆𑀔𑀺𑀬𑁄;

𑀢𑀣𑁂𑀯 𑀜𑀸𑀡𑀁 𑀩𑀼𑀤𑁆𑀥𑀲𑁆𑀲, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

‘‘𑀇𑀫𑀸𑀳𑀺 𑀘𑀢𑀼𑀕𑀸𑀣𑀸𑀳𑀺, 𑀩𑁆𑀭𑀸𑀳𑁆𑀫𑀡𑁄 𑀲𑁂𑀦𑀲𑀯𑁆𑀳𑀬𑁄;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀢𑁆𑀯𑀸𑀦, 𑀲𑀺𑀤𑁆𑀥𑀢𑁆𑀣𑀁 𑀅𑀧𑀭𑀸𑀚𑀺𑀢𑀁.

‘‘𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑀸𑀦𑀺, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀣;

𑀲𑀼𑀕𑀢𑀺𑀁 𑀲𑀼𑀔𑀲𑀫𑁆𑀧𑀢𑁆𑀢𑀺𑀁, 𑀅𑀦𑀼𑀪𑁄𑀲𑀺𑀫𑀦𑀧𑁆𑀧𑀓𑀁.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀣𑀯𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑁄𑀫𑀦𑀸𑀬 𑀇𑀤𑀁 𑀨𑀮𑀁.

‘‘𑀘𑀸𑀢𑀼𑀤𑁆𑀤𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺, 𑀘𑀢𑀼𑀭𑁄 𑀆𑀲𑀼𑀫𑀼𑀕𑁆𑀕𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀜𑀸𑀢𑀻𑀦𑀁 𑀅𑀦𑀼𑀓𑀫𑁆𑀧𑀸𑀬 𑀲𑀸𑀓𑁂𑀢𑀁 𑀕𑀦𑁆𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑁂𑀳𑀺 𑀉𑀧𑀝𑁆𑀞𑀺𑀬𑀫𑀸𑀦𑁄 𑀅𑀜𑁆𑀚𑀦𑀯𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑀸 𑀯𑀲𑀺𑀢𑀝𑁆𑀞𑀸𑀦𑀫𑁂𑀯 𑀕𑀦𑁆𑀢𑀼𑀓𑀸𑀫𑁄 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀜𑀸𑀢𑀓𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣, 𑀢𑀼𑀫𑁆𑀳𑁂𑀧𑀺 𑀦 𑀓𑀺𑀮𑀫𑀺𑀲𑁆𑀲𑀣, 𑀫𑀬𑀫𑁆𑀧𑀺 𑀧𑀼𑀜𑁆𑀜𑁂𑀦 𑀯𑀟𑁆𑀠𑀺𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀁 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀅𑀢𑁆𑀢𑀦𑁄 𑀯𑀺𑀯𑁂𑀓𑀸𑀪𑀺𑀭𑀢𑀺𑀁 𑀢𑀢𑁆𑀣 𑀘 𑀨𑀸𑀲𑀼𑀯𑀺𑀳𑀸𑀭𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁫𑁧𑁮.

‘‘𑀬𑀤𑀸 𑀤𑀼𑀓𑁆𑀔𑀁 𑀚𑀭𑀸𑀫𑀭𑀡𑀦𑁆𑀢𑀺 𑀧𑀡𑁆𑀟𑀺𑀢𑁄, 𑀅𑀯𑀺𑀤𑁆𑀤𑀲𑀽 𑀬𑀢𑁆𑀣 𑀲𑀺𑀢𑀸 𑀧𑀼𑀣𑀼𑀚𑁆𑀚𑀦𑀸;

𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀬 𑀲𑀢𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁧𑁯.

‘‘𑀬𑀤𑀸 𑀤𑀼𑀓𑁆𑀔𑀲𑁆𑀲𑀸𑀯𑀳𑀦𑀺𑀁 𑀯𑀺𑀲𑀢𑁆𑀢𑀺𑀓𑀁, 𑀧𑀧𑀜𑁆𑀘𑀲𑀗𑁆𑀖𑀸𑀢𑀤𑀼𑀔𑀸𑀥𑀺𑀯𑀸𑀳𑀺𑀦𑀺𑀁;

𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦 𑀲𑀢𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁦.

‘‘𑀬𑀤𑀸 ¶ 𑀲𑀺𑀯𑀁 𑀤𑁆𑀯𑁂𑀘𑀢𑀼𑀭𑀗𑁆𑀕𑀕𑀸𑀫𑀺𑀦𑀁, 𑀫𑀕𑁆𑀕𑀼𑀢𑁆𑀢𑀫𑀁 𑀲𑀩𑁆𑀩𑀓𑀺𑀮𑁂𑀲𑀲𑁄𑀥𑀦𑀁;

𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑁆𑀯 𑀲𑀢𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁧.

‘‘𑀬𑀤𑀸 ¶ 𑀅𑀲𑁄𑀓𑀁 𑀯𑀺𑀭𑀚𑀁 𑀅𑀲𑀗𑁆𑀔𑀢𑀁, 𑀲𑀦𑁆𑀢𑀁 𑀧𑀤𑀁 𑀲𑀩𑁆𑀩𑀓𑀺𑀮𑁂𑀲𑀲𑁄𑀥𑀦𑀁;

𑀪𑀸𑀯𑁂𑀢𑀺 𑀲𑀜𑁆𑀜𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀁, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁨.

‘‘𑀬𑀤𑀸 𑀦𑀪𑁂 𑀕𑀚𑁆𑀚𑀢𑀺 𑀫𑁂𑀖𑀤𑀼𑀦𑁆𑀤𑀼𑀪𑀺, 𑀥𑀸𑀭𑀸𑀓𑀼𑀮𑀸 𑀯𑀺𑀳𑀕𑀧𑀣𑁂 𑀲𑀫𑀦𑁆𑀢𑀢𑁄;

𑀪𑀺𑀓𑁆𑀔𑀽 𑀘 𑀧𑀩𑁆𑀪𑀸𑀭𑀕𑀢𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁩.

‘‘𑀬𑀤𑀸 ¶ 𑀦𑀤𑀻𑀦𑀁 𑀓𑀼𑀲𑀼𑀫𑀸𑀓𑀼𑀮𑀸𑀦𑀁, 𑀯𑀺𑀘𑀺𑀢𑁆𑀢-𑀯𑀸𑀦𑁂𑀬𑁆𑀬-𑀯𑀝𑀁𑀲𑀓𑀸𑀦𑀁;

𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀲𑀼𑀫𑀦𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁪.

‘‘𑀬𑀤𑀸 𑀦𑀺𑀲𑀻𑀣𑁂 𑀭𑀳𑀺𑀢𑀫𑁆𑀳𑀺 𑀓𑀸𑀦𑀦𑁂, 𑀤𑁂𑀯𑁂 𑀕𑀴𑀦𑁆𑀢𑀫𑁆𑀳𑀺 𑀦𑀤𑀦𑁆𑀢𑀺 𑀤𑀸𑀞𑀺𑀦𑁄;

𑀪𑀺𑀓𑁆𑀔𑀽 𑀘 𑀧𑀩𑁆𑀪𑀸𑀭𑀕𑀢𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁫.

‘‘𑀬𑀤𑀸 𑀯𑀺𑀢𑀓𑁆𑀓𑁂 𑀉𑀧𑀭𑀼𑀦𑁆𑀥𑀺𑀬𑀢𑁆𑀢𑀦𑁄, 𑀦𑀕𑀦𑁆𑀢𑀭𑁂 𑀦𑀕𑀯𑀺𑀯𑀭𑀁 𑀲𑀫𑀲𑁆𑀲𑀺𑀢𑁄;

𑀯𑀻𑀢𑀤𑁆𑀤𑀭𑁄 𑀯𑀻𑀢𑀔𑀺𑀮𑁄𑀯 𑀛𑀸𑀬𑀢𑀺, 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀺.

𑁫𑁨𑁬.

‘‘𑀬𑀤𑀸 𑀲𑀼𑀔𑀻 𑀫𑀮𑀔𑀺𑀮𑀲𑁄𑀓𑀦𑀸𑀲𑀦𑁄,

𑀦𑀺𑀭𑀕𑁆𑀕𑀴𑁄 𑀦𑀺𑀩𑁆𑀩𑀦𑀣𑁄 𑀯𑀺𑀲𑀮𑁆𑀮𑁄;

𑀲𑀩𑁆𑀩𑀸𑀲𑀯𑁂 𑀩𑁆𑀬𑀦𑁆𑀢𑀺𑀓𑀢𑁄𑀯 𑀛𑀸𑀬𑀢𑀺,

𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣𑀸𑀬𑀁 ¶ 𑀧𑀤𑀬𑁄𑀚𑀦𑀸𑀫𑀼𑀔𑁂𑀦 𑀧𑀞𑀫𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀔𑀦𑁆𑀥𑀸𑀦𑀁 𑀧𑀭𑀺𑀧𑀸𑀓𑁄 𑀚𑀭𑀸. 𑀪𑁂𑀤𑁄 𑀫𑀭𑀡𑀁. 𑀚𑀭𑀸𑀫𑀭𑀡𑀲𑀻𑀲𑁂𑀦 𑀘𑁂𑀢𑁆𑀣 𑀚𑀭𑀸𑀫𑀭𑀡𑀯𑀦𑁆𑀢𑁄 𑀥𑀫𑁆𑀫𑀸 𑀕𑀳𑀺𑀢𑀸. ‘‘𑀢𑀬𑀺𑀤𑀁 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔’’𑀦𑁆𑀢𑀺 𑀅𑀯𑀺𑀤𑁆𑀤𑀲𑀽 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸 𑀧𑀼𑀣𑀼𑀚𑁆𑀚𑀦𑀸 𑀬𑀢𑁆𑀣 𑀬𑀲𑁆𑀫𑀺𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑁂 𑀲𑀺𑀢𑀸 𑀧𑀝𑀺𑀩𑀦𑁆𑀥𑀸 𑀅𑀮𑁆𑀮𑀻𑀦𑀸, 𑀢𑀁 ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀭𑀺𑀚𑀸𑀦𑀺𑀢𑁆𑀯𑀸, 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼, 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬𑀢𑀺. 𑀢𑀢𑁄 𑀯𑀺𑀧𑀲𑁆𑀲𑀦𑀸𑀭𑀢𑀺𑀢𑁄 𑀫𑀕𑁆𑀕𑀨𑀮𑀭𑀢𑀺𑀢𑁄 𑀘 𑀧𑀭𑀫𑀢𑀭𑀁 𑀉𑀢𑁆𑀢𑀫𑀢𑀭𑀁 𑀭𑀢𑀺𑀁 𑀦 𑀯𑀺𑀦𑁆𑀤𑀢𑀺 𑀦𑀧𑁆𑀧𑀝𑀺𑀮𑀪𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁.

‘‘𑀧𑀞𑀩𑁆𑀬𑀸 𑀏𑀓𑀭𑀚𑁆𑀚𑁂𑀦, 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸;

𑀲𑀩𑁆𑀩𑀮𑁄𑀓𑀸𑀥𑀺𑀧𑀘𑁆𑀘𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀭’’𑀦𑁆𑀢𑀺. (𑀥. 𑀧. 𑁩𑁭𑁪, 𑁧𑁭𑁮);

𑀏𑀯𑀁 ¶ 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀫𑀼𑀔𑁂𑀦 𑀯𑀺𑀯𑁂𑀓𑀭𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀳𑀸𑀦𑀸𑀪𑀺𑀲𑀫𑀬𑀸𑀤𑀺𑀫𑀼𑀔𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀸𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀤𑀼𑀓𑁆𑀔𑀲𑁆𑀲𑀸𑀯𑀳𑀦𑀺𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀆𑀬𑀢𑀺𑀁 𑀧𑀯𑀢𑁆𑀢𑀺𑀁, 𑀤𑀼𑀓𑁆𑀔𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀢𑀡𑁆𑀳𑀁. 𑀲𑀸 𑀳𑀺 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁 𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂 𑀓𑀼𑀮𑁂 ¶ 𑀕𑀡𑁂 𑀯𑀺𑀢𑁆𑀣𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀧𑀜𑁆𑀘𑀲𑀗𑁆𑀖𑀸𑀢𑀤𑀼𑀔𑀸𑀥𑀺𑀯𑀸𑀳𑀺𑀦𑀺𑀦𑁆𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸, 𑀭𑀸𑀕𑀸𑀤𑀬𑁄 𑀫𑀸𑀦𑀸𑀤𑀬𑁄 𑀘. 𑀢𑁂 𑀏𑀯 𑀧𑀯𑀢𑁆𑀢𑀺𑀤𑀼𑀓𑁆𑀔𑀲𑁆𑀲 𑀲𑀗𑁆𑀖𑀸𑀢𑀝𑁆𑀞𑁂𑀦 𑀲𑀗𑁆𑀖𑀸𑀢𑀸, 𑀲𑀤𑀭𑀣𑀧𑀭𑀺𑀴𑀸𑀳𑀲𑀪𑀸𑀯𑀢𑁆𑀢𑀸 𑀤𑀼𑀓𑁆𑀔𑀜𑁆𑀘𑀸𑀢𑀺 𑀧𑀧𑀜𑁆𑀘𑀲𑀗𑁆𑀖𑀸𑀢𑀤𑀼𑀔𑀁, 𑀢𑀲𑁆𑀲 𑀅𑀥𑀺𑀯𑀸𑀳𑀢𑁄 𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀧𑀜𑁆𑀘𑀲𑀗𑁆𑀖𑀸𑀢𑀤𑀼𑀔𑀸𑀥𑀺𑀯𑀸𑀳𑀺𑀦𑀻. 𑀢𑀁 𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑀲𑀺𑀯𑀦𑁆𑀢𑀺 ¶ 𑀔𑁂𑀫𑀁, 𑀅𑀔𑁂𑀫𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀢𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀲𑁂𑀦 𑀤𑁆𑀯𑀺𑀘𑀢𑀼𑀭𑀗𑁆𑀕𑁄 𑀳𑀼𑀢𑁆𑀯𑀸 𑀅𑀭𑀺𑀬𑁂 𑀦𑀺𑀩𑁆𑀩𑀸𑀦𑀁 𑀕𑀫𑁂𑀢𑀻𑀢𑀺 𑀤𑁆𑀯𑁂𑀘𑀢𑀼𑀭𑀗𑁆𑀕𑀕𑀸𑀫𑀺𑀦𑀁, 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀘𑁂𑀢𑁆𑀣 𑀯𑀺𑀪𑀢𑁆𑀢𑀺𑀅𑀮𑁄𑀧𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀽𑀧𑀽𑀧𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀲𑀼 𑀲𑀩𑁆𑀩𑁂𑀲𑀼 𑀫𑀕𑁆𑀕𑁂𑀲𑀼 𑀉𑀢𑁆𑀢𑀫𑀢𑁆𑀢𑀸 𑀫𑀕𑁆𑀕𑀼𑀢𑁆𑀢𑀫𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄’’𑀢𑀺𑀆𑀤𑀺 (𑀥. 𑀧. 𑁨𑁭𑁩). 𑀲𑀩𑁆𑀩𑁂𑀳𑀺 𑀓𑀺𑀮𑁂𑀲𑀫𑀮𑁂𑀳𑀺 𑀲𑀢𑁆𑀢𑀸𑀦𑀁 𑀲𑁄𑀥𑀦𑀢𑁄 𑀲𑀩𑁆𑀩𑀓𑀺𑀮𑁂𑀲𑀲𑁄𑀥𑀦𑀁. 𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑁆𑀯𑀸𑀢𑀺 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀘𑁆𑀘.

𑀲𑁄𑀓𑀳𑁂𑀢𑀽𑀦𑀁 𑀅𑀪𑀸𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀘 𑀲𑁄𑀓𑀸𑀪𑀸𑀯𑀳𑁂𑀢𑀼𑀢𑁄 𑀦𑀢𑁆𑀣𑀺 𑀏𑀢𑁆𑀣 𑀲𑁄𑀓𑁄𑀢𑀺 𑀅𑀲𑁄𑀓𑀁. 𑀢𑀣𑀸 𑀯𑀺𑀕𑀢𑀭𑀸𑀕𑀸𑀤𑀺𑀭𑀚𑀢𑁆𑀢𑀸 𑀯𑀺𑀭𑀚𑀁. 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀲𑀗𑁆𑀔𑀢𑀦𑁆𑀢𑀺 𑀅𑀲𑀗𑁆𑀔𑀢𑀁. 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀯𑀽𑀧𑀲𑀫𑀪𑀸𑀯𑀢𑁄, 𑀲𑀁𑀲𑀸𑀭𑀤𑀼𑀓𑁆𑀔𑀤𑁆𑀤𑀺𑀢𑁂𑀳𑀺 𑀧𑀚𑁆𑀚𑀺𑀢𑀩𑁆𑀩𑀢𑁄 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀘 𑀲𑀦𑁆𑀢𑀁 𑀧𑀤𑀁. 𑀲𑀩𑁆𑀩𑁂𑀳𑀺 𑀓𑀺𑀮𑁂𑀲𑀫𑀮𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀲𑁄𑀥𑀦𑀦𑀺𑀫𑀺𑀢𑁆𑀢𑀢𑁄 𑀲𑀩𑁆𑀩𑀓𑀺𑀮𑁂𑀲𑀲𑁄𑀥𑀦𑀁. 𑀪𑀸𑀯𑁂𑀢𑀻𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀢𑀺. 𑀩𑀳𑀼𑀓𑁆𑀔𑀢𑁆𑀢𑀼𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀆𑀮𑀫𑁆𑀩𑀓𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀓𑀁 𑀆𑀮𑀫𑁆𑀩𑀺𑀢𑀩𑁆𑀩𑁂 𑀆𑀭𑁄𑀧𑁂𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑀸𑀦𑀁 𑀩𑀦𑁆𑀥𑀦𑀸𑀦𑀁 𑀙𑁂𑀤𑀦𑀢𑁄 𑀲𑀁𑀬𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀁. 𑀦𑀺𑀫𑀺𑀢𑁆𑀢𑀜𑁆𑀳𑁂𑀢𑁆𑀣 𑀓𑀢𑁆𑀢𑀼𑀪𑀸𑀯𑁂𑀦 𑀉𑀧𑀘𑀸𑀭𑀺𑀢𑀁, 𑀬𑀣𑀸 𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺. 𑀬𑀣𑀸 𑀧𑀼𑀭𑀺𑀫𑀕𑀸𑀣𑀸𑀲𑀼 𑀬𑀤𑀸 𑀛𑀸𑀬𑀢𑀺, 𑀢𑀤𑀸 ¶ 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀇𑀥 𑀬𑀤𑀸 𑀪𑀸𑀯𑁂𑀢𑀺, 𑀢𑀤𑀸 𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀁 𑀣𑁂𑀭𑁄 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀸𑀦𑀁 𑀅𑀦𑀼𑀧𑀦𑁂𑀢𑁆𑀯𑀸𑀯 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀓𑀺𑀢𑁆𑀢𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀯𑀲𑀺𑀢𑀝𑁆𑀞𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀪𑀸𑀯𑁂𑀦 𑀨𑀸𑀲𑀼𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀸 𑀦𑀪𑁂’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀦𑀪𑁂𑀢𑀺 𑀆𑀓𑀸𑀲𑁂. 𑀲𑀺𑀦𑀺𑀤𑁆𑀥𑀕𑀫𑁆𑀪𑀻𑀭𑀦𑀺𑀕𑁆𑀖𑁄𑀲𑀢𑀸𑀬 𑀫𑁂𑀖𑁄𑀬𑁂𑀯 𑀤𑀼𑀦𑁆𑀤𑀼𑀪𑀺 𑀫𑁂𑀖𑀤𑀼𑀦𑁆𑀤𑀼𑀪𑀺. 𑀲𑀫𑀦𑁆𑀢𑀢𑁄 𑀧𑀕𑁆𑀖𑀭𑀦𑁆𑀢𑀻𑀳𑀺 𑀥𑀸𑀭𑀸𑀳𑀺 𑀆𑀓𑀼𑀮𑀸𑀢𑀺 𑀥𑀸𑀭𑀸𑀓𑀼𑀮𑀸. 𑀯𑀺𑀳𑀕𑀸𑀦𑀁 𑀧𑀓𑁆𑀔𑀻𑀦𑀁 𑀕𑀫𑀦𑀫𑀕𑁆𑀕𑀢𑁆𑀢𑀸 𑀯𑀺𑀳𑀕𑀧𑀣𑁂 𑀦𑀪𑁂𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀛𑀸𑀦𑀭𑀢𑀺𑀢𑁄.

𑀓𑀼𑀲𑀼𑀫𑀸𑀓𑀼𑀮𑀸𑀦𑀦𑁆𑀢𑀺 ¶ 𑀢𑀭𑀽𑀳𑀺 𑀕𑀴𑀺𑀢𑀓𑀼𑀲𑀼𑀫𑁂𑀳𑀺 𑀲𑀫𑁄𑀳𑀺𑀢𑀸𑀦𑀁. 𑀯𑀺𑀘𑀺𑀢𑁆𑀢𑀯𑀸𑀦𑁂𑀬𑁆𑀬𑀯𑀝𑀁𑀲𑀓𑀸𑀦𑀦𑁆𑀢𑀺 𑀯𑀦𑁂 𑀚𑀸𑀢𑀢𑁆𑀢𑀸 ¶ 𑀯𑀸𑀦𑁂𑀬𑁆𑀬𑀸𑀦𑀺 𑀯𑀦𑀧𑀼𑀧𑁆𑀨𑀸𑀦𑀺, 𑀯𑀺𑀘𑀺𑀢𑁆𑀢𑀸𑀦𑀺 𑀯𑀸𑀦𑁂𑀬𑁆𑀬𑀸𑀦𑀺 𑀯𑀝𑀁𑀲𑀓𑀸𑀦𑀺 𑀏𑀢𑀸𑀲𑀦𑁆𑀢𑀺 𑀯𑀺𑀘𑀺𑀢𑁆𑀢𑀯𑀸𑀦𑁂𑀬𑁆𑀬𑀯𑀝𑀁𑀲𑀓𑀸 𑀦𑀤𑀺𑀬𑁄, 𑀢𑀸𑀲𑀁 𑀦𑀸𑀦𑀸𑀯𑀺𑀥𑀯𑀦𑀧𑀼𑀧𑁆𑀨𑀯𑀝𑀁𑀲𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀲𑁂𑀦 𑀲𑀼𑀦𑁆𑀤𑀭𑁄 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀲𑀼𑀫𑀦𑁄 𑀛𑀸𑀬𑀢𑀺.

𑀦𑀺𑀲𑀻𑀣𑁂𑀢𑀺 𑀭𑀢𑁆𑀢𑀺𑀬𑀁. 𑀭𑀳𑀺𑀢𑀫𑁆𑀳𑀻𑀢𑀺, 𑀚𑀦𑀲𑀫𑁆𑀩𑀸𑀥𑀯𑀺𑀭𑀳𑀺𑀢𑁂 𑀯𑀺𑀯𑀺𑀢𑁆𑀢𑁂. 𑀤𑁂𑀯𑁂𑀢𑀺 𑀫𑁂𑀖𑁂. 𑀕𑀴𑀦𑁆𑀢𑀫𑁆𑀳𑀻𑀢𑀺 𑀯𑀼𑀝𑁆𑀞𑀺𑀥𑀸𑀭𑀸𑀬𑁄 𑀧𑀕𑁆𑀖𑀭𑀦𑁆𑀢𑁂 𑀯𑀲𑁆𑀲𑀦𑁆𑀢𑁂. 𑀤𑀸𑀞𑀺𑀦𑁄𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀧𑀝𑀺𑀧𑀓𑁆𑀔𑀲𑀢𑁆𑀢𑀸. 𑀢𑁂 𑀳𑀺 𑀤𑀸𑀞𑀸𑀯𑀼𑀥𑀸𑀢𑀺 ‘‘𑀤𑀸𑀞𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦𑀤𑀦𑁆𑀢𑀺 𑀤𑀸𑀞𑀺𑀦𑁄𑀢𑀺 𑀇𑀤𑀫𑁆𑀧𑀺 𑀚𑀦𑀯𑀺𑀯𑁂𑀓𑀤𑀲𑁆𑀲𑀦𑀢𑁆𑀣𑀫𑁂𑀯 𑀕𑀳𑀺𑀢𑀁.

𑀯𑀺𑀢𑀓𑁆𑀓𑁂 𑀉𑀧𑀭𑀼𑀦𑁆𑀥𑀺𑀬𑀢𑁆𑀢𑀦𑁄𑀢𑀺 𑀅𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀢𑁆𑀢𑀦𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂 𑀧𑀝𑀺𑀧𑀓𑁆𑀔𑀩𑀮𑁂𑀦 𑀦𑀺𑀲𑁂𑀥𑁂𑀢𑁆𑀯𑀸. 𑀅𑀢𑁆𑀢𑀦𑁄𑀢𑀺 𑀯𑀸 𑀇𑀤𑀁 𑀯𑀺𑀦𑁆𑀤𑀢𑀻𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁 ‘‘𑀢𑀢𑁄 𑀭𑀢𑀺𑀁 𑀧𑀭𑀫𑀢𑀭𑀁 𑀅𑀢𑁆𑀢𑀦𑀸 𑀦 𑀯𑀺𑀦𑁆𑀤𑀢𑀻’’𑀢𑀺. 𑀦𑀕𑀦𑁆𑀢𑀭𑁂𑀢𑀺 𑀧𑀩𑁆𑀩𑀢𑀦𑁆𑀢𑀭𑁂. 𑀦𑀕𑀯𑀺𑀯𑀭𑀦𑁆𑀢𑀺 𑀧𑀩𑁆𑀩𑀢𑀕𑀼𑀳𑀁 𑀧𑀩𑁆𑀪𑀸𑀭𑀁 𑀯𑀸. 𑀲𑀫𑀲𑁆𑀲𑀺𑀢𑁄𑀢𑀺 𑀦𑀺𑀲𑁆𑀲𑀺𑀢𑁄 𑀉𑀧𑀕𑀢𑁄. 𑀯𑀻𑀢𑀤𑁆𑀤𑀭𑁄𑀢𑀺 𑀯𑀺𑀕𑀢𑀓𑀺𑀮𑁂𑀲𑀤𑀭𑀣𑁄. 𑀯𑀻𑀢𑀔𑀺𑀮𑁄𑀢𑀺 𑀧𑀳𑀻𑀦𑀘𑁂𑀢𑁄𑀔𑀺𑀮𑁄.

𑀲𑀼𑀔𑀻𑀢𑀺 𑀛𑀸𑀦𑀸𑀤𑀺𑀲𑀼𑀔𑁂𑀦 𑀲𑀼𑀔𑀺𑀢𑁄. 𑀫𑀮𑀔𑀺𑀮𑀲𑁄𑀓𑀦𑀸𑀲𑀦𑁄𑀢𑀺 𑀭𑀸𑀕𑀸𑀤𑀻𑀦𑀁 𑀫𑀮𑀸𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀘𑁂𑀢𑁄𑀔𑀺𑀮𑀸𑀦𑀁 𑀜𑀸𑀢𑀺𑀯𑀺𑀬𑁄𑀕𑀸𑀤𑀺𑀳𑁂𑀢𑀼𑀓𑀲𑁆𑀲 𑀲𑁄𑀓𑀲𑁆𑀲 𑀘 𑀧𑀳𑀸𑀬𑀓𑁄. 𑀦𑀺𑀭𑀕𑁆𑀕𑀴𑁄𑀢𑀺, 𑀅𑀕𑁆𑀕𑀴𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸 𑀦𑀺𑀩𑁆𑀩𑀸𑀦𑀧𑀼𑀭𑀧𑀯𑁂𑀲𑀦𑀺𑀯𑀸𑀭𑀡𑀢𑁄, 𑀢𑀤𑀪𑀸𑀯𑀢𑁄 𑀦𑀺𑀭𑀕𑁆𑀕𑀴𑁄. 𑀦𑀺𑀩𑁆𑀩𑀦𑀣𑁄𑀢𑀺 𑀦𑀺𑀢𑀡𑁆𑀳𑁄. 𑀯𑀺𑀲𑀮𑁆𑀮𑁄𑀢𑀺, 𑀯𑀺𑀕𑀢𑀭𑀸𑀕𑀸𑀤𑀺𑀲𑀮𑁆𑀮𑁄. 𑀲𑀩𑁆𑀩𑀸𑀲𑀯𑁂𑀢𑀺, 𑀓𑀸𑀫𑀸𑀲𑀯𑀸𑀤𑀺𑀓𑁂 𑀲𑀩𑁆𑀩𑁂𑀧𑀺 𑀆𑀲𑀯𑁂. 𑀩𑁆𑀬𑀦𑁆𑀢𑀺𑀓𑀢𑁄𑀢𑀺 𑀩𑁆𑀬𑀦𑁆𑀢𑀺𑀓𑀢𑀸𑀯𑀻 𑀅𑀭𑀺𑀬𑀫𑀕𑁆𑀕𑁂𑀦 𑀯𑀺𑀕𑀢𑀦𑁆𑀢𑁂 𑀓𑀢𑁆𑀯𑀸 𑀞𑀺𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀬𑀤𑀸 𑀛𑀸𑀬𑀢𑀺, 𑀢𑀢𑁄 𑀛𑀸𑀦𑀭𑀢𑀺𑀢𑁄 𑀧𑀭𑀫𑀢𑀭𑀁 𑀭𑀢𑀺𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀧𑀦 𑀯𑀢𑁆𑀯𑀸 𑀣𑁂𑀭𑁄 𑀅𑀚𑀓𑀭𑀡𑀻𑀢𑀻𑀭𑀫𑁂𑀯 𑀕𑀢𑁄.

𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀓𑀦𑀺𑀧𑀸𑀢𑁄

𑁧. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀤𑀲𑀓𑀦𑀺𑀧𑀸𑀢𑁂 ¶ ¶ ¶ 𑀅𑀗𑁆𑀕𑀸𑀭𑀺𑀦𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀚𑁆𑀚𑀁 𑀅𑀪𑀺𑀦𑀻𑀳𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺.

𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀅𑀫𑀘𑁆𑀘𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑀁𑀬𑁂𑀯 𑀚𑀸𑀢𑁄𑀢𑀺 𑀢𑀁𑀤𑀺𑀯𑀲𑀁𑀬𑁂𑀯 𑀦𑀁 𑀤𑀼𑀓𑀽𑀮𑀘𑀼𑀫𑁆𑀩𑀝𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀩𑁄𑀥𑀺𑀭𑀼𑀓𑁆𑀔𑁄, 𑀭𑀸𑀳𑀼𑀮𑀫𑀸𑀢𑀸, 𑀘𑀢𑁆𑀢𑀸𑀭𑁄 𑀦𑀺𑀥𑀻, 𑀆𑀭𑁄𑀳𑀦𑀺𑀬𑀳𑀢𑁆𑀣𑀻, 𑀅𑀲𑁆𑀲𑀓𑀡𑁆𑀟𑀓𑁄, 𑀙𑀦𑁆𑀦𑁄 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑁂 𑀲𑀢𑁆𑀢 𑀏𑀓𑀤𑀺𑀯𑀲𑀁𑀬𑁂𑀯 𑀚𑀸𑀢𑀢𑁆𑀢𑀸 𑀲𑀳𑀚𑀸𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀲𑀓𑀮𑀦𑀕𑀭𑀲𑁆𑀲 𑀉𑀤𑀕𑁆𑀕𑀘𑀺𑀢𑁆𑀢𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀉𑀤𑀸𑀬𑀻𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼, 𑀣𑁄𑀓𑀁 𑀓𑀸𑀴𑀥𑀸𑀢𑀼𑀓𑀢𑁆𑀢𑀸 𑀧𑀦 𑀓𑀸𑀴𑀼𑀤𑀸𑀬𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀼𑀤𑁆𑀥𑀺𑀁 𑀅𑀕𑀫𑀸𑀲𑀺.

𑀅𑀧𑀭𑀪𑀸𑀕𑁂 𑀮𑁄𑀓𑀦𑀸𑀣𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀏𑀓𑀁 𑀅𑀫𑀘𑁆𑀘𑀁 ‘‘𑀧𑀼𑀢𑁆𑀢𑀁 𑀫𑁂 𑀇𑀥𑀸𑀦𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀲𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑁂 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀲𑀩𑁆𑀩𑁂 𑀢𑀗𑁆𑀔𑀡𑀁𑀬𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀭𑀺𑀬𑀸 𑀫𑀚𑁆𑀛𑀢𑁆𑀢𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦𑀁 𑀤𑀲𑀩𑀮𑀲𑁆𑀲 𑀦 𑀓𑀣𑁂𑀲𑀺. 𑀭𑀸𑀚𑀸 ‘‘𑀦𑁂𑀯 𑀕𑀢𑀩𑀮𑀓𑁄𑀝𑁆𑀞𑀓𑁄 𑀆𑀕𑀘𑁆𑀙𑀢𑀺, 𑀦 𑀲𑀸𑀲𑀦𑀁 𑀲𑀼𑀬𑁆𑀬𑀢𑀻’’𑀢𑀺 𑀅𑀧𑀭𑀫𑁆𑀧𑀺 𑀅𑀫𑀘𑁆𑀘𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 ¶ 𑀧𑁂𑀲𑁂𑀲𑀺 ¶ . 𑀢𑀲𑁆𑀫𑀺𑀫𑁆𑀧𑀺 𑀢𑀣𑀸 𑀧𑀝𑀺𑀧𑀦𑁆𑀦𑁂 𑀅𑀧𑀭𑀦𑁆𑀢𑀺 𑀏𑀯𑀁 𑀦𑀯𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀦𑀯 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁆𑀢𑀓𑀸 𑀚𑀦𑀸 𑀫𑀬𑀺 𑀲𑀺𑀦𑁂𑀳𑀸𑀪𑀸𑀯𑁂𑀦 𑀤𑀲𑀩𑀮𑀲𑁆𑀲 𑀇𑀥𑀸𑀕𑀫𑀦𑀢𑁆𑀣𑀸𑀬 𑀦 𑀓𑀺𑀜𑁆𑀘𑀺 𑀓𑀣𑀬𑀺𑀁𑀲𑀼, 𑀅𑀬𑀁 𑀔𑁄 𑀧𑀦 𑀉𑀤𑀸𑀬𑀻 𑀤𑀲𑀩𑀮𑁂𑀦 𑀲𑀫𑀯𑀬𑁄 𑀲𑀳𑀧𑀁𑀲𑀼𑀓𑀻𑀴𑀺𑀓𑁄, 𑀫𑀬𑀺 𑀘 𑀲𑀺𑀦𑁂𑀳𑀯𑀸, 𑀇𑀫𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀆𑀦𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀲𑀺. 𑀲𑁄 𑀧𑀦 𑀕𑀘𑁆𑀙𑀦𑁆𑀢𑁄 ‘‘𑀲𑀘𑀸𑀳𑀁, 𑀤𑁂𑀯, 𑀧𑀩𑁆𑀩𑀚𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀇𑀥𑀸𑀦𑁂𑀲𑁆𑀲𑀸𑀫𑀻’’𑀢𑀺 ¶ 𑀯𑀢𑁆𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀤𑀲𑁆𑀲𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁪.𑁪𑁮-𑁬𑁩) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀘𑀭𑀢𑁄 𑀘𑀸𑀭𑀺𑀓𑀁 𑀢𑀤𑀸.

‘‘𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳, 𑀉𑀧𑁆𑀧𑀮𑀁 𑀫𑀮𑁆𑀮𑀺𑀓𑀜𑁆𑀘𑀳𑀁;

𑀧𑀭𑀫𑀦𑁆𑀦𑀁 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

‘‘𑀧𑀭𑀺𑀪𑀼𑀜𑁆𑀚𑀺 𑀫𑀳𑀸𑀯𑀻𑀭𑁄, 𑀧𑀭𑀫𑀦𑁆𑀦𑀁 𑀲𑀼𑀪𑁄𑀚𑀦𑀁;

𑀢𑀜𑁆𑀘 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀚𑀦𑀲𑁆𑀲 𑀲𑀫𑁆𑀧𑀤𑀲𑁆𑀲𑀬𑀺.

‘‘𑀇𑀝𑁆𑀞𑀁 𑀓𑀦𑁆𑀢𑀁 𑀧𑀺𑀬𑀁 𑀮𑁄𑀓𑁂, 𑀚𑀮𑀚𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀲𑀼𑀤𑀼𑀓𑁆𑀓𑀭𑀁 𑀓𑀢𑀁 𑀢𑁂𑀦, 𑀬𑁄 𑀫𑁂 𑀧𑀼𑀧𑁆𑀨𑀁 𑀅𑀤𑀸𑀲𑀺𑀤𑀁.

‘‘𑀬𑁄 𑀧𑀼𑀧𑁆𑀨𑀫𑀪𑀺𑀭𑁄𑀧𑁂𑀲𑀺, 𑀧𑀭𑀫𑀦𑁆𑀦𑀜𑁆𑀘𑀤𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

‘‘𑀤𑀲 𑀅𑀝𑁆𑀞 𑀘𑀓𑁆𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀉𑀧𑁆𑀧𑀮𑀁 𑀧𑀤𑀼𑀫𑀜𑁆𑀘𑀸𑀧𑀺, 𑀫𑀮𑁆𑀮𑀺𑀓𑀜𑁆𑀘 𑀢𑀤𑀼𑀢𑁆𑀢𑀭𑀺.

‘‘𑀅𑀲𑁆𑀲 𑀧𑀼𑀜𑁆𑀜𑀯𑀺𑀧𑀸𑀓𑁂𑀦, 𑀤𑀺𑀩𑁆𑀩𑀕𑀦𑁆𑀥𑀲𑀫𑀸𑀬𑀼𑀢𑀁;

𑀆𑀓𑀸𑀲𑁂 𑀙𑀤𑀦𑀁 𑀓𑀢𑁆𑀯𑀸, 𑀥𑀸𑀭𑀬𑀺𑀲𑁆𑀲𑀢𑀺 𑀢𑀸𑀯𑀤𑁂.

‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘 ¶ , 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀧𑀜𑁆𑀘𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 ¶ 𑀲𑁄, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀓𑁆𑀬𑀸𑀦𑀁 𑀦𑀦𑁆𑀤𑀺𑀚𑀦𑀦𑁄, 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

‘‘𑀧𑀝𑀺𑀲𑀫𑁆𑀪𑀺𑀤𑀫𑀦𑀼𑀧𑁆𑀧𑀢𑁆𑀢𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀕𑁄𑀢𑀫𑁄 𑀮𑁄𑀓𑀩𑀦𑁆𑀥𑀼 𑀢𑀁, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀉𑀤𑀸𑀬𑀻 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀭𑀸𑀕𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀥𑀁𑀲𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀢𑁄𑀲𑀬𑀺𑀜𑁆𑀘𑀸𑀧𑀺 𑀲𑀫𑁆𑀩𑀼𑀤𑁆𑀥𑀁, 𑀆𑀢𑀸𑀧𑀻 𑀦𑀺𑀧𑀓𑁄 𑀅𑀳𑀁;

𑀧𑀲𑀸𑀤𑀺𑀢𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 ‘‘𑀦 𑀢𑀸𑀯𑀸𑀬𑀁 𑀤𑀲𑀩𑀮𑀲𑁆𑀲 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀓𑀸𑀮𑁄, 𑀯𑀲𑀦𑁆𑀢𑁂 𑀧𑀦 𑀉𑀧𑀕𑀢𑁂 𑀧𑀼𑀧𑁆𑀨𑀺𑀢𑁂𑀲𑀼 𑀯𑀦𑀲𑀡𑁆𑀟𑁂𑀲𑀼 𑀳𑀭𑀺𑀢𑀢𑀺𑀡𑀲𑀜𑁆𑀙𑀦𑁆𑀦𑀸𑀬 𑀪𑀽𑀫𑀺𑀬𑀸 𑀕𑀫𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁄 𑀯𑀲𑀦𑁆𑀢𑁂 𑀲𑀫𑁆𑀧𑀢𑁆𑀢𑁂 𑀲𑀢𑁆𑀣𑀼 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀕𑀫𑀦𑀫𑀕𑁆𑀕𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑁋

𑁫𑁨𑁭.

‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬;

𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀪𑀸𑀕𑀻𑀭𑀲𑀸𑀦𑀁.

𑁫𑁨𑁮.

‘‘𑀤𑀼𑀫𑀸𑀦𑀺 ¶ 𑀨𑀼𑀮𑁆𑀮𑀸𑀦𑀺 𑀫𑀦𑁄𑀭𑀫𑀸𑀦𑀺, 𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸 𑀧𑀯𑀦𑁆𑀢𑀺;

𑀧𑀢𑁆𑀢𑀁 𑀧𑀳𑀸𑀬 𑀨𑀮𑀫𑀸𑀲𑀲𑀸𑀦𑀸, 𑀓𑀸𑀮𑁄 𑀇𑀢𑁄 𑀧𑀓𑁆𑀓𑀫𑀦𑀸𑀬 𑀯𑀻𑀭.

𑁫𑁨𑁯.

‘‘𑀦𑁂𑀯𑀸𑀢𑀺𑀲𑀻𑀢𑀁 𑀦 𑀧𑀦𑀸𑀢𑀺𑀉𑀡𑁆𑀳𑀁, 𑀲𑀼𑀔𑀸 𑀉𑀢𑀼 𑀅𑀤𑁆𑀥𑀦𑀺𑀬𑀸 𑀪𑀤𑀦𑁆𑀢𑁂;

𑀧𑀲𑁆𑀲𑀦𑁆𑀢𑀼 𑀢𑀁 𑀲𑀸𑀓𑀺𑀬𑀸 𑀓𑁄𑀴𑀺𑀬𑀸 𑀘, 𑀧𑀘𑁆𑀙𑀸𑀫𑀼𑀔𑀁 𑀭𑁄𑀳𑀺𑀦𑀺𑀬𑀁 𑀢𑀭𑀦𑁆𑀢𑀁.

𑁫𑁩𑁦.

‘‘𑀆𑀲𑀸𑀬 𑀓𑀲𑀢𑁂 𑀔𑁂𑀢𑁆𑀢𑀁, 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀺;

𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀺, 𑀲𑀫𑀼𑀤𑁆𑀤𑀁 𑀥𑀦𑀳𑀸𑀭𑀓𑀸;

𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀺, 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀼.

𑁫𑁩𑁧.

‘‘𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀧𑀼𑀦𑀧𑁆𑀧𑀼𑀦𑀁 𑀥𑀜𑁆𑀜𑀫𑀼𑀧𑁂𑀢𑀺 𑀭𑀝𑁆𑀞𑀁.

𑁫𑁩𑁨.

‘‘𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑀓𑀸 𑀘𑀭𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀦𑁆𑀢𑀺;

𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀁.

𑁫𑁩𑁩.

‘‘𑀯𑀻𑀭𑁄 ¶ ¶ 𑀳𑀯𑁂 𑀲𑀢𑁆𑀢𑀬𑀼𑀕𑀁 𑀧𑀼𑀦𑁂𑀢𑀺, 𑀬𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄;

𑀫𑀜𑁆𑀜𑀸𑀫𑀳𑀁 𑀲𑀓𑁆𑀓𑀢𑀺 𑀤𑁂𑀯𑀤𑁂𑀯𑁄, 𑀢𑀬𑀸 𑀳𑀺 𑀚𑀸𑀢𑁄 𑀫𑀼𑀦𑀺 𑀲𑀘𑁆𑀘𑀦𑀸𑀫𑁄.

𑁫𑁩𑁪.

‘‘𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀧𑀺𑀢𑀸 𑀫𑀳𑁂𑀲𑀺𑀦𑁄, 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸 𑀧𑀦 𑀫𑀸𑀬𑀦𑀸𑀫𑀸;

𑀬𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀬 𑀓𑀼𑀘𑁆𑀙𑀺𑀦𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀢𑀺𑀤𑀺𑀯𑀫𑁆𑀳𑀺 𑀫𑁄𑀤𑀢𑀺.

𑁫𑁩𑁫.

‘‘𑀲𑀸 𑀕𑁄𑀢𑀫𑀻 𑀓𑀸𑀮𑀓𑀢𑀸 𑀇𑀢𑁄 𑀘𑀼𑀢𑀸, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀲𑀸 𑀫𑁄𑀤𑀢𑀺 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺, 𑀧𑀭𑀺𑀯𑀸𑀭𑀺𑀢𑀸 𑀤𑁂𑀯𑀕𑀡𑁂𑀳𑀺 𑀢𑁂𑀳𑀺.

𑁫𑁩𑁬.

‘‘𑀩𑀼𑀤𑁆𑀥𑀲𑁆𑀲 ¶ 𑀧𑀼𑀢𑁆𑀢𑁄𑀫𑁆𑀳𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀺 𑀲𑀓𑁆𑀓, 𑀥𑀫𑁆𑀫𑁂𑀦 𑀫𑁂 𑀕𑁄𑀢𑀫 𑀅𑀬𑁆𑀬𑀓𑁄𑀲𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀗𑁆𑀕𑀸𑀭𑀺𑀦𑁄𑀢𑀺 𑀅𑀗𑁆𑀕𑀸𑀭𑀸𑀦𑀺 𑀯𑀺𑀬𑀸𑀢𑀺 𑀅𑀗𑁆𑀕𑀸𑀭𑀸𑀦𑀺, 𑀭𑀢𑁆𑀢𑀧𑀯𑀸𑀴𑀯𑀡𑁆𑀡𑀸𑀦𑀺 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀧𑀮𑁆𑀮𑀯𑀸𑀦𑀺, 𑀢𑀸𑀦𑀺 𑀏𑀢𑁂𑀲𑀁 𑀲𑀦𑁆𑀢𑀻𑀢𑀺 𑀅𑀗𑁆𑀕𑀸𑀭𑀺𑀦𑁄, 𑀅𑀢𑀺𑀮𑁄𑀳𑀺𑀢𑀓𑀼𑀲𑀼𑀫𑀓𑀺𑀲𑀮𑀬𑁂𑀳𑀺 𑀅𑀗𑁆𑀕𑀸𑀭𑀯𑀼𑀝𑁆𑀞𑀺𑀲𑀁𑀧𑀭𑀺𑀓𑀺𑀡𑁆𑀡𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂. 𑀤𑀼𑀫𑀸𑀢𑀺 𑀭𑀼𑀓𑁆𑀔𑀸. 𑀪𑀤𑀦𑁆𑀢𑁂𑀢𑀺, 𑀪𑀤𑁆𑀤𑀁 𑀅𑀦𑁆𑀢𑁂 𑀏𑀢𑀲𑁆𑀲𑀸𑀢𑀺 𑀪𑀤𑀦𑁆𑀢𑁂𑀢𑀺 𑀏𑀓𑀲𑁆𑀲 𑀤𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄, 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀜𑁆𑀘 𑀅𑀕𑁆𑀕𑀪𑀽𑀢𑁄 𑀲𑀢𑁆𑀣𑀸. 𑀢𑀲𑁆𑀫𑀸 𑀪𑀤𑀦𑁆𑀢𑁂𑀢𑀺 𑀲𑀢𑁆𑀣𑀼 𑀆𑀮𑀧𑀦𑀁. 𑀧𑀘𑁆𑀘𑀢𑁆𑀢𑀯𑀘𑀦𑀜𑁆𑀘𑁂𑀢𑀁 𑀏𑀓𑀸𑀭𑀦𑁆𑀢𑀁 ‘‘𑀲𑀼𑀓𑀝𑁂 𑀧𑀝𑀺𑀓𑀫𑁆𑀫𑁂 𑀲𑀼𑀔𑁂 𑀤𑀼𑀓𑁆𑀔𑁂𑀧𑀺 𑀘𑁂’’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀥 𑀧𑀦 𑀲𑀫𑁆𑀩𑁄𑀥𑀦𑀢𑁆𑀣𑁂 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀤𑀦𑁆𑀢𑁂𑀢𑀺 𑀆𑀮𑀧𑀦’’𑀦𑁆𑀢𑀺. ‘‘𑀪𑀤𑁆𑀤𑀲𑀤𑁆𑀤𑀲𑀫𑀸𑀦𑀢𑁆𑀣𑀁 𑀧𑀤𑀦𑁆𑀢𑀭𑀫𑁂𑀓’’𑀦𑁆𑀢𑀺 𑀓𑁂𑀘𑀺. 𑀨𑀮𑀸𑀦𑀺 𑀏𑀲𑀦𑁆𑀢𑀻𑀢𑀺 𑀨𑀮𑁂𑀲𑀺𑀦𑁄. 𑀅𑀘𑁂𑀢𑀦𑁂𑀧𑀺 𑀳𑀺 𑀲𑀘𑁂𑀢𑀦𑀓𑀺𑀭𑀺𑀬𑀫𑀸𑀭𑁄𑀧𑁂𑀢𑁆𑀯𑀸 𑀯𑁄𑀳𑀭𑀦𑁆𑀢𑀺, 𑀬𑀣𑀸 𑀓𑀼𑀮𑀁 𑀧𑀢𑀺𑀢𑀼𑀓𑀸𑀫𑀦𑁆𑀢𑀺, 𑀨𑀮𑀸𑀦𑀺 𑀕𑀳𑁂𑀢𑀼𑀫𑀸𑀭𑀤𑁆𑀥𑀸 𑀲𑀫𑁆𑀧𑀢𑁆𑀢𑀺𑀨𑀮𑀕𑀳𑀡𑀓𑀸𑀮𑀸𑀢𑀺 𑀅𑀢𑁆𑀣𑁄. 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬𑀸𑀢𑀺 𑀧𑀼𑀭𑀸𑀡𑀧𑀡𑁆𑀡𑀸𑀦𑀺 𑀧𑀚𑀳𑀺𑀢𑁆𑀯𑀸 𑀲𑀫𑁆𑀧𑀦𑁆𑀦𑀧𑀡𑁆𑀟𑀼𑀧𑀮𑀸𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀤𑀼𑀫𑀸. 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀻𑀢𑀺 𑀤𑀻𑀧𑀲𑀺𑀔𑀸𑀯𑀦𑁆𑀢𑁄 𑀯𑀺𑀬 𑀚𑀮𑀺𑀢𑀅𑀕𑁆𑀕𑀻 𑀯𑀺𑀬 𑀯𑀸 𑀑𑀪𑀸𑀲𑀬𑀦𑁆𑀢𑀺 𑀲𑀩𑁆𑀩𑀸 𑀤𑀺𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀬𑁄𑀢𑀺 𑀓𑀸𑀮𑁄, ‘‘𑀅𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀯𑀘𑀦𑀲𑁂𑀲𑁄. 𑀫𑀳𑀸𑀯𑀻𑀭𑀸𑀢𑀺 𑀫𑀳𑀸𑀯𑀺𑀓𑁆𑀓𑀦𑁆𑀢. 𑀪𑀸𑀕𑀻 𑀭𑀲𑀸𑀦𑀦𑁆𑀢𑀺 𑀅𑀢𑁆𑀣𑀭𑀲𑀸𑀤𑀻𑀦𑀁 𑀪𑀸𑀕𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋 ‘‘𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲𑀸’’𑀢𑀺𑀆𑀤𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨). 𑀫𑀳𑀸𑀯𑀻𑀭, 𑀪𑀸𑀕𑀻𑀢𑀺 𑀘 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀲𑀫𑁆𑀩𑁄𑀥𑀦𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀪𑀸𑀕𑀻𑀭𑀣𑀸𑀦𑀦𑁆𑀢𑀺 𑀧𑀦 𑀧𑀸𑀞𑁂 𑀪𑀕𑀻𑀭𑀣𑁄 𑀦𑀸𑀫 ¶ 𑀆𑀤𑀺𑀭𑀸𑀚𑀸. 𑀢𑀩𑁆𑀩𑀁𑀲𑀚𑀸𑀢𑀢𑀸𑀬 𑀲𑀸𑀓𑀺𑀬𑀸 𑀪𑀸𑀕𑀻𑀭𑀣𑀸, 𑀢𑁂𑀲𑀁 𑀪𑀸𑀕𑀻𑀭𑀣𑀸𑀦𑀁 𑀉𑀧𑀓𑀸𑀭𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀼𑀫𑀸𑀦𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀫𑀸 𑀭𑀼𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸 𑀧𑀯𑀦𑁆𑀢𑀻𑀢𑀺, 𑀲𑀫𑀦𑁆𑀢𑀢𑁄 𑀲𑀩𑁆𑀩𑀪𑀸𑀕𑀢𑁄 𑀲𑀩𑁆𑀩𑀤𑀺𑀲𑀸𑀲𑀼 𑀘 𑀨𑀼𑀮𑁆𑀮𑀸𑀦𑀺, 𑀢𑀣𑀸 𑀨𑀼𑀮𑁆𑀮𑀢𑁆𑀢𑀸 𑀏𑀯 𑀲𑀩𑁆𑀩𑀤𑀺𑀲𑀸 𑀧𑀯𑀦𑁆𑀢𑀺 𑀕𑀦𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀆𑀲𑀫𑀸𑀦𑀸𑀢𑀺 𑀆𑀲𑀻𑀲𑀦𑁆𑀢𑀸 ¶ 𑀕𑀳𑀺𑀢𑀼𑀓𑀸𑀫𑀸. 𑀏𑀯𑀁 𑀭𑀼𑀓𑁆𑀔𑀲𑁄𑀪𑀸𑀬 𑀕𑀫𑀦𑀫𑀕𑁆𑀕𑀲𑁆𑀲 ¶ 𑀭𑀸𑀫𑀡𑁂𑀬𑁆𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀦𑁂𑀯𑀸𑀢𑀺𑀲𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀉𑀢𑀼𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀲𑀼𑀔𑀸𑀢𑀺 𑀦𑀸𑀢𑀺𑀲𑀻𑀢𑀦𑀸𑀢𑀺𑀉𑀡𑁆𑀳𑀪𑀸𑀯𑁂𑀦𑁂𑀯 𑀲𑀼𑀔𑀸 𑀇𑀝𑁆𑀞𑀸. 𑀉𑀢𑀼 𑀅𑀤𑁆𑀥𑀦𑀺𑀬𑀸𑀢𑀺 𑀅𑀤𑁆𑀥𑀸𑀦𑀕𑀫𑀦𑀬𑁄𑀕𑁆𑀕𑀸 𑀉𑀢𑀼. 𑀧𑀲𑁆𑀲𑀦𑁆𑀢𑀼 𑀢𑀁 𑀲𑀸𑀓𑀺𑀬𑀸 𑀓𑁄𑀴𑀺𑀬𑀸 𑀘, 𑀧𑀘𑁆𑀙𑀸𑀫𑀼𑀔𑀁 𑀭𑁄𑀳𑀺𑀦𑀺𑀬𑀁 𑀢𑀭𑀦𑁆𑀢𑀦𑁆𑀢𑀺 𑀭𑁄𑀳𑀺𑀦𑀻 𑀦𑀸𑀫 𑀦𑀤𑀻 𑀲𑀸𑀓𑀺𑀬𑀓𑁄𑀴𑀺𑀬𑀚𑀦𑀧𑀤𑀸𑀦𑀁 𑀅𑀦𑁆𑀢𑀭𑁂 𑀉𑀢𑁆𑀢𑀭𑀤𑀺𑀲𑀢𑁄 𑀤𑀓𑁆𑀔𑀺𑀡𑀫𑀼𑀔𑀸 𑀲𑀦𑁆𑀤𑀢𑀺, 𑀭𑀸𑀚𑀕𑀳𑀁 𑀘𑀲𑁆𑀲𑀸 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬, 𑀢𑀲𑁆𑀫𑀸 𑀭𑀸𑀚𑀕𑀳𑀢𑁄 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑀼𑀁 𑀢𑀁 𑀦𑀤𑀺𑀁 𑀢𑀭𑀦𑁆𑀢𑀸 𑀧𑀘𑁆𑀙𑀸𑀫𑀼𑀔𑀸 𑀳𑀼𑀢𑁆𑀯𑀸 𑀢𑀭𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀲𑁆𑀲𑀦𑁆𑀢𑀼 𑀢𑀁…𑀧𑁂… 𑀢𑀭𑀦𑁆𑀢’’𑀦𑁆𑀢𑀺. ‘‘𑀪𑀕𑀯𑀦𑁆𑀢𑀁 𑀧𑀘𑁆𑀙𑀸𑀫𑀼𑀔𑀁 𑀭𑁄𑀳𑀺𑀦𑀺𑀁 𑀦𑀸𑀫 𑀦𑀤𑀺𑀁 𑀅𑀢𑀺𑀓𑁆𑀓𑀫𑀦𑁆𑀢𑀁 𑀲𑀸𑀓𑀺𑀬𑀓𑁄𑀴𑀺𑀬𑀚𑀦𑀧𑀤𑀯𑀸𑀲𑀺𑀦𑁄 𑀧𑀲𑁆𑀲𑀦𑁆𑀢𑀽’’𑀢𑀺 𑀓𑀧𑀺𑀮𑀯𑀢𑁆𑀣𑀼𑀕𑀫𑀦𑀸𑀬 𑀪𑀕𑀯𑀦𑁆𑀢𑀁 𑀆𑀬𑀸𑀘𑀦𑁆𑀢𑁄 𑀉𑀲𑁆𑀲𑀸𑀳𑁂𑀢𑀺.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀢𑁆𑀣𑀦𑀁 𑀉𑀧𑀫𑀸𑀳𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀆𑀲𑀸𑀬 𑀓𑀲𑀢𑁂’’𑀢𑀺 𑀕𑀸𑀣𑀫𑀸𑀳. 𑀆𑀲𑀸𑀬 𑀓𑀲𑀢𑁂 𑀔𑁂𑀢𑁆𑀢𑀦𑁆𑀢𑀺 𑀓𑀲𑁆𑀲𑀓𑁄 𑀓𑀲𑀦𑁆𑀢𑁄 𑀔𑁂𑀢𑁆𑀢𑀁 𑀨𑀮𑀸𑀲𑀸𑀬 𑀓𑀲𑀢𑀺. 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀻𑀢𑀺 𑀓𑀲𑀺𑀢𑁆𑀯𑀸 𑀘 𑀯𑀧𑀦𑁆𑀢𑁂𑀦 𑀨𑀮𑀸𑀲𑀸𑀬 𑀏𑀯 𑀩𑀻𑀚𑀁 𑀯𑀧𑁆𑀧𑀢𑀺 𑀦𑀺𑀓𑁆𑀔𑀺𑀧𑀻𑀬𑀢𑀺. 𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀻𑀢𑀺 𑀥𑀦𑀳𑀸𑀭𑀓𑀸 𑀯𑀸𑀡𑀺𑀚𑀸 𑀥𑀦𑀸𑀲𑀸𑀬 𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀁 𑀤𑁂𑀲𑀁 𑀉𑀧𑀕𑀦𑁆𑀢𑀼𑀁 𑀲𑀫𑀼𑀤𑁆𑀤𑀁 𑀦𑀸𑀯𑀸𑀬 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀻𑀢𑀺 𑀏𑀯𑀁 𑀅𑀳𑀫𑁆𑀧𑀺 𑀬𑀸𑀬 𑀆𑀲𑀸𑀬 𑀧𑀢𑁆𑀣𑀦𑀸𑀬 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀓𑀧𑀺𑀮𑀧𑀼𑀭𑀕𑀫𑀦𑀧𑀢𑁆𑀣𑀦𑀸𑀬 𑀇𑀥 𑀢𑀺𑀝𑁆𑀞𑀸𑀫𑀺. 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀼, 𑀢𑀼𑀫𑁆𑀳𑁂𑀳𑀺 ‘‘𑀓𑀧𑀺𑀮𑀯𑀢𑁆𑀣𑀼 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀢𑀺, 𑀆𑀲𑀸𑀬 𑀲𑀤𑀺𑀲𑀢𑀸𑀬 𑀘𑁂𑀢𑁆𑀣 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀆𑀲𑀸𑀢𑀺 𑀆𑀳.

𑀕𑀫𑀦𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀤𑀺𑀦𑀸 𑀅𑀦𑁂𑀓𑀯𑀸𑀭𑀁 𑀬𑀸𑀘𑀦𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀲𑀓𑀺𑀁 𑀯𑀼𑀢𑁆𑀢𑀫𑀢𑁆𑀢𑁂𑀦 𑀯𑀧𑁆𑀧𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀓𑀲𑁆𑀲𑀓𑀸 𑀧𑀼𑀦𑀧𑁆𑀧𑀼𑀦𑀁 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀩𑀻𑀚𑀁 𑀯𑀧𑀦𑁆𑀢𑀺. 𑀧𑀚𑁆𑀚𑀼𑀦𑁆𑀦𑁄 𑀤𑁂𑀯𑀭𑀸𑀚𑀸𑀧𑀺 𑀏𑀓𑀯𑀸𑀭𑀫𑁂𑀯 𑀅𑀯𑀲𑁆𑀲𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀯𑀲𑁆𑀲𑀢𑀺. 𑀓𑀲𑁆𑀲𑀓𑀸𑀧𑀺 𑀏𑀓𑀯𑀸𑀭𑀫𑁂𑀯 𑀅𑀓𑀲𑀺𑀢𑁆𑀯𑀸 𑀲𑀲𑁆𑀲𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀁 𑀧𑀁𑀲𑀼𑀁 𑀓𑀤𑁆𑀤𑀫𑀁 𑀯𑀸 𑀫𑀼𑀤𑀼𑀁 𑀓𑀸𑀢𑀼𑀁 𑀔𑁂𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀓𑀲𑀦𑁆𑀢𑀺. 𑀏𑀓𑀯𑀸𑀭𑀫𑁂𑀯 𑀥𑀜𑁆𑀜𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸 ¶ ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀅𑀧𑀭𑀺𑀢𑀼𑀲𑁆𑀲𑀦𑀢𑁄 𑀓𑁄𑀝𑁆𑀞𑀸𑀕𑀸𑀭𑀸𑀤𑀻𑀲𑀼 𑀧𑀝𑀺𑀲𑀸𑀫𑀦𑀯𑀲𑁂𑀦 𑀫𑀦𑀼𑀲𑁆𑀲𑁂𑀳𑀺 𑀉𑀧𑀦𑀻𑀬𑀫𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀲𑀸𑀮𑀺𑀆𑀤𑀺𑀥𑀜𑁆𑀜𑀁 𑀭𑀝𑁆𑀞𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺.

𑀬𑀸𑀘𑀦𑀓𑀸𑀧𑀺 ¶ 𑀬𑀸𑀘𑀦𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀮𑀸𑀦𑀺 𑀘𑀭𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺, 𑀦 𑀏𑀓𑀯𑀸𑀭𑀫𑁂𑀯, 𑀬𑀸𑀘𑀺𑀢𑀸 𑀧𑀦 𑀢𑁂𑀲𑀁 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀦𑁆𑀢𑀺, 𑀦 𑀲𑀓𑀺𑀁𑀬𑁂𑀯. 𑀢𑀣𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫𑀁 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀺𑀢𑁆𑀯𑀸 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀅𑀧𑀭𑀸𑀧𑀭𑀁 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁂𑀯𑀮𑁄𑀓𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀸𑀫𑀺 𑀪𑀕𑀯𑀸 𑀫𑀬𑁆𑀳𑀁 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 ¶ 𑀬𑀤𑀢𑁆𑀣𑀁 𑀲𑀢𑁆𑀣𑀸𑀭𑀁 𑀓𑀧𑀺𑀮𑀯𑀢𑁆𑀣𑀼𑀕𑀫𑀦𑀁 𑀬𑀸𑀘𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀭𑁄 𑀳𑀯𑁂’’𑀢𑀺𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀯𑀻𑀭𑁄 𑀯𑀻𑀭𑀺𑀬𑀯𑀸 𑀫𑀳𑀸𑀯𑀺𑀓𑁆𑀓𑀦𑁆𑀢𑁄 𑀪𑀽𑀭𑀺𑀧𑀜𑁆𑀜𑁄 𑀫𑀳𑀸𑀧𑀜𑁆𑀜𑁄 𑀧𑀼𑀭𑀺𑀲𑁄 𑀬𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀢𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀣 𑀳𑀯𑁂 𑀏𑀓𑀁𑀲𑁂𑀦 𑀲𑀢𑁆𑀢𑀬𑀼𑀕𑀁 𑀲𑀢𑁆𑀢𑀧𑀼𑀭𑀺𑀲𑀬𑀼𑀕𑀁 𑀬𑀸𑀯𑀲𑀢𑁆𑀢𑀫𑀁 𑀧𑀺𑀢𑀸𑀫𑀳𑀬𑀼𑀕𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀼𑀦𑁂𑀢𑀺 𑀲𑁄𑀥𑁂𑀢𑀻𑀢𑀺 𑀮𑁄𑀓𑀯𑀸𑀤𑁄 𑀅𑀢𑀺𑀯𑀸𑀤𑁄 𑀅𑀜𑁆𑀜𑁂𑀲𑀼. 𑀪𑀕𑀯𑀸 𑀧𑀦 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀉𑀢𑁆𑀢𑀫𑀤𑁂𑀯𑀢𑀸𑀬 𑀤𑁂𑀯𑀤𑁂𑀯𑁄 𑀧𑀸𑀧𑀦𑀺𑀯𑀸𑀭𑀡𑁂𑀦 𑀓𑀮𑁆𑀬𑀸𑀡𑀧𑀢𑀺𑀝𑁆𑀞𑀸𑀧𑀦𑁂𑀦 𑀢𑀢𑁄 𑀧𑀭𑀫𑁆𑀧𑀺 𑀲𑁄𑀥𑁂𑀢𑀼𑀁 𑀲𑀓𑁆𑀓𑀢𑀺 𑀲𑀓𑁆𑀓𑁄𑀢𑀻𑀢𑀺 𑀫𑀜𑁆𑀜𑀸𑀫𑀺 𑀅𑀳𑀁. 𑀓𑀲𑁆𑀫𑀸? 𑀢𑀬𑀸 𑀳𑀺 𑀚𑀸𑀢𑁄 𑀫𑀼𑀦𑀺 𑀲𑀘𑁆𑀘𑀦𑀸𑀫𑁄 𑀬𑀲𑁆𑀫𑀸 𑀢𑀬𑀸 𑀲𑀢𑁆𑀣𑀸𑀭𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄 𑀫𑀼𑀦𑀺𑀪𑀸𑀯𑁄, 𑀫𑀼𑀦𑀺 𑀯𑀸 𑀲𑀫𑀸𑀦𑁄 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀦𑀁 𑀇𑀥𑀮𑁄𑀓𑀧𑀭𑀮𑁄𑀓𑀸𑀦𑀜𑁆𑀘 𑀫𑀼𑀦𑀦𑀝𑁆𑀞𑁂𑀦 ‘‘𑀫𑀼𑀦𑀻’’𑀢𑀺 𑀅𑀯𑀺𑀢𑀣𑀦𑀸𑀫𑁄, 𑀫𑁄𑀦𑀯𑀸 𑀯𑀸 𑀫𑀼𑀦𑀺, ‘‘𑀲𑀫𑀡𑁄 𑀧𑀩𑁆𑀩𑀚𑀺𑀢𑁄 𑀇𑀲𑀻’’𑀢𑀺 𑀅𑀯𑀺𑀢𑀣𑀦𑀸𑀫𑁄 𑀢𑀬𑀸 𑀚𑀸𑀢𑁄. 𑀢𑀲𑁆𑀫𑀸 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀳𑁂𑀢𑀼𑀪𑀸𑀯𑀢𑁄 𑀪𑀕𑀯𑀸 𑀢𑀯 𑀢𑀢𑁆𑀣 𑀕𑀫𑀦𑀁 𑀬𑀸𑀘𑀸𑀫𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 ‘‘𑀲𑀢𑁆𑀢𑀬𑀼𑀕’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀺𑀢𑀼𑀬𑀼𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀤𑁆𑀥𑁄𑀤𑀦𑁄 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀁 𑀑𑀤𑀦𑀁 𑀚𑀻𑀯𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀤𑁆𑀥𑁄𑀤𑀦𑁄. 𑀩𑀼𑀤𑁆𑀥𑀧𑀺𑀢𑀸 𑀳𑀺 𑀏𑀓𑀁𑀲𑀢𑁄 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑁄 𑀲𑀼𑀯𑀺𑀲𑀼𑀤𑁆𑀥𑀸𑀚𑀻𑀯𑁄 𑀳𑁄𑀢𑀺 𑀢𑀣𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸. 𑀫𑀸𑀬𑀦𑀸𑀫𑀸𑀢𑀺 𑀓𑀼𑀮𑀭𑀽𑀧𑀲𑀻𑀮𑀸𑀘𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀢𑀺𑀫𑀺𑀢𑁆𑀢𑀸𑀤𑀻𑀳𑀺 ‘‘𑀫𑀸 𑀬𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀕𑀼𑀡𑀢𑀸𑀬 ‘‘𑀫𑀸𑀬𑀸’’𑀢𑀺 𑀮𑀤𑁆𑀥𑀦𑀸𑀫𑀸. 𑀧𑀭𑀺𑀳𑀭𑀺𑀬𑀸𑀢𑀺 𑀥𑀸𑀭𑁂𑀢𑁆𑀯𑀸. 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀘𑁂𑀢𑀺𑀬𑀲𑀤𑀺𑀲𑀲𑁆𑀲 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀯𑀺𑀦𑀸𑀲𑀢𑁄 𑀉𑀤𑁆𑀥𑀁. 𑀢𑀺𑀤𑀺𑀯𑀫𑁆𑀳𑀻𑀢𑀺 𑀢𑀼𑀲𑀺𑀢𑀤𑁂𑀯𑀮𑁄𑀓𑁂.

𑀲𑀸𑀢𑀺 𑀫𑀸𑀬𑀸𑀤𑁂𑀯𑀻. 𑀕𑁄𑀢𑀫𑀻𑀢𑀺 𑀕𑁄𑀢𑁆𑀢𑁂𑀦 𑀢𑀁 𑀓𑀺𑀢𑁆𑀢𑁂𑀢𑀺. 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀻𑀢𑀺, 𑀢𑀼𑀲𑀺𑀢𑀪𑀯𑀦𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀤𑀺𑀩𑁆𑀩𑁂𑀳𑀺 𑀯𑀢𑁆𑀣𑀼𑀓𑀸𑀫𑁂𑀳𑀺. 𑀲𑀫𑀗𑁆𑀕𑀺𑀪𑀽𑀢𑀸𑀢𑀺 𑀲𑀫𑀦𑁆𑀦𑀸𑀕𑀢𑀸. 𑀓𑀸𑀫𑀕𑀼𑀡𑁂𑀳𑀻𑀢𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺, ‘‘𑀓𑀸𑀫𑁂𑀳𑀻’’𑀢𑀺 𑀯𑀢𑁆𑀯𑀸 ¶ 𑀧𑀼𑀦 ‘‘𑀓𑀸𑀫𑀕𑀼𑀡𑁂𑀳𑀻’’𑀢𑀺 𑀯𑀘𑀦𑁂𑀦 𑀅𑀦𑁂𑀓𑀪𑀸𑀕𑁂𑀳𑀺 𑀯𑀢𑁆𑀣𑀼𑀓𑀸𑀫𑁂𑀳𑀺 𑀧𑀭𑀺𑀘𑀸𑀭𑀺𑀬𑀢𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀳𑀻𑀢𑀺 𑀬𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀦𑀺𑀩𑁆𑀩𑀢𑁆𑀢𑀺, 𑀢𑁂𑀳𑀺 𑀢𑀼𑀲𑀺𑀢𑀤𑁂𑀯𑀕𑀡𑁂𑀳𑀺, 𑀢𑁂𑀳𑀺 𑀯𑀸 𑀓𑀸𑀫𑀕𑀼𑀡𑁂𑀳𑀺. ‘‘𑀲𑀫𑀗𑁆𑀕𑀺𑀪𑀽𑀢𑀸 𑀧𑀭𑀺𑀯𑀸𑀭𑀺𑀢𑀸’’𑀢𑀺 𑀘 ¶ 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑀲𑀺𑀤𑁆𑀥𑀁 𑀇𑀢𑁆𑀣𑀺𑀪𑀸𑀯𑀁, 𑀤𑁂𑀯𑀢𑀸𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀓𑀢𑁄, 𑀤𑁂𑀯𑀽𑀧𑀧𑀢𑁆𑀢𑀺 𑀧𑀦 𑀧𑀼𑀭𑀺𑀲𑀪𑀸𑀯𑁂𑀦𑁂𑀯 𑀚𑀸𑀢𑀸.

𑀏𑀯𑀁 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀪𑀕𑀯𑀸 𑀢𑀢𑁆𑀣 𑀕𑀫𑀦𑁂 𑀩𑀳𑀽𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀤𑀺𑀲𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲 𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀢𑁄 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀓𑀧𑀺𑀮𑀯𑀢𑁆𑀣𑀼𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀣𑁂𑀭𑁄 𑀇𑀤𑁆𑀥𑀺𑀬𑀸 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀆𑀓𑀸𑀲𑁂 𑀞𑀺𑀢𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑁂𑀲𑀁 𑀤𑀺𑀲𑁆𑀯𑀸 𑀭𑀜𑁆𑀜𑀸 ‘‘𑀓𑁄𑀲𑀺 ¶ 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄, ‘‘𑀲𑀘𑁂 𑀅𑀫𑀘𑁆𑀘𑀧𑀼𑀢𑁆𑀢𑀁 𑀢𑀬𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑀁 𑀫𑀁 𑀦 𑀚𑀸𑀦𑀸𑀲𑀺, 𑀏𑀯𑀁 𑀧𑀦 𑀚𑀸𑀦𑀸𑀳𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀺 𑀲𑀓𑁆𑀓, 𑀥𑀫𑁆𑀫𑁂𑀦 𑀫𑁂 𑀕𑁄𑀢𑀫 𑀅𑀬𑁆𑀬𑀓𑁄𑀲𑀻’’𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳.

𑀢𑀢𑁆𑀣 𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀉𑀭𑁂 𑀚𑀸𑀢𑀢𑀸𑀬 𑀑𑀭𑀲𑀧𑀼𑀢𑁆𑀢𑁄 𑀅𑀫𑁆𑀳𑀺. 𑀅𑀲𑀬𑁆𑀳𑀲𑀸𑀳𑀺𑀦𑁄𑀢𑀺, 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀞𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀁 𑀅𑀜𑁆𑀜𑁂𑀳𑀺 𑀲𑀳𑀺𑀢𑀼𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀬𑁆𑀳𑀲𑁆𑀲 𑀲𑀓𑀮𑀲𑁆𑀲 𑀩𑁄𑀥𑀺𑀲𑀫𑁆𑀪𑀸𑀭𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀸𑀥𑀺𑀓𑀸𑀭𑀲𑁆𑀲 𑀘 𑀲𑀳𑀦𑀢𑁄 𑀯𑀳𑀦𑀢𑁄, 𑀢𑀢𑁄 𑀧𑀭𑀫𑁆𑀧𑀺 𑀅𑀜𑁆𑀜𑁂𑀳𑀺 𑀲𑀳𑀺𑀢𑀼𑀁 𑀅𑀪𑀺𑀪𑀯𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀬𑁆𑀳𑀸𑀦𑀁 𑀧𑀜𑁆𑀘𑀦𑁆𑀦𑀁 𑀫𑀸𑀭𑀸𑀦𑀁 𑀲𑀳𑀦𑀢𑁄 𑀅𑀪𑀺𑀪𑀯𑀦𑀢𑁄, 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀯𑀺𑀪𑀸𑀕𑀸𑀯𑀩𑁄𑀥𑀦𑁂𑀦 𑀬𑀣𑀸𑀭𑀳𑀁 𑀯𑁂𑀦𑁂𑀬𑁆𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀅𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑁂𑀳𑀺 𑀅𑀲𑀬𑁆𑀳𑀲𑁆𑀲 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲 𑀘 𑀲𑀳𑀦𑀢𑁄, 𑀢𑀢𑁆𑀣 𑀯𑀸 𑀲𑀸𑀥𑀼𑀓𑀸𑀭𑀻𑀪𑀸𑀯𑀢𑁄 𑀅𑀲𑀬𑁆𑀳𑀲𑀸𑀳𑀺𑀦𑁄. 𑀅𑀗𑁆𑀕𑀻𑀭𑀲𑀲𑁆𑀲𑀸𑀢𑀺 𑀅𑀗𑁆𑀕𑀻𑀓𑀢𑀲𑀻𑀮𑀸𑀤𑀺𑀲𑀫𑁆𑀧𑀢𑁆𑀢𑀺𑀓𑀲𑁆𑀲. ‘‘𑀅𑀗𑁆𑀕𑀫𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀡𑀓𑀑𑀪𑀸𑀲𑀲𑁆𑀲𑀸’’𑀢𑀺 𑀅𑀧𑀭𑁂. 𑀓𑁂𑀘𑀺 𑀧𑀦 ‘‘𑀅𑀗𑁆𑀕𑀻𑀭𑀲𑁄, 𑀲𑀺𑀤𑁆𑀥𑀢𑁆𑀣𑁄𑀢𑀺 𑀤𑁆𑀯𑁂 ¶ 𑀦𑀸𑀫𑀸𑀦𑀺 𑀧𑀺𑀢𑀭𑀸𑀬𑁂𑀯 𑀕𑀳𑀺𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑁆𑀧𑀝𑀺𑀫𑀲𑁆𑀲𑀸𑀢𑀺 𑀅𑀦𑀽𑀧𑀫𑀲𑁆𑀲. 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀦𑁄. 𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀻𑀢𑀺 𑀅𑀭𑀺𑀬𑀚𑀸𑀢𑀺𑀯𑀲𑁂𑀦 𑀫𑀬𑁆𑀳𑀁 𑀧𑀺𑀢𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀮𑁄𑀓𑀯𑁄𑀳𑀸𑀭𑁂𑀦 𑀢𑁆𑀯𑀁 𑀧𑀺𑀢𑀸 𑀅𑀲𑀺. 𑀲𑀓𑁆𑀓𑀸𑀢𑀺 𑀚𑀸𑀢𑀺𑀯𑀲𑁂𑀦 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀲𑀪𑀸𑀯𑁂𑀦 𑀅𑀭𑀺𑀬𑀚𑀸𑀢𑀺 𑀮𑁄𑀓𑀺𑀬𑀚𑀸𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀚𑀸𑀢𑀻𑀦𑀁 𑀲𑀪𑀸𑀯𑀲𑀫𑁄𑀥𑀸𑀦𑁂𑀦 𑀕𑁄𑀢𑀫𑀸𑀢𑀺 𑀭𑀸𑀚𑀸𑀦𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀅𑀬𑁆𑀬𑀓𑁄𑀲𑀻𑀢𑀺 𑀧𑀺𑀢𑀸𑀫𑀳𑁄 𑀅𑀲𑀺. 𑀏𑀢𑁆𑀣 𑀘 ‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄 𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀏𑀯𑀁 ¶ 𑀧𑀦 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁂𑀦 𑀭𑀜𑁆𑀜𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀲𑁆𑀲 𑀦𑀸𑀦𑀕𑁆𑀕𑀭𑀲𑀲𑁆𑀲 𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑁂 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. ‘‘𑀓𑀲𑁆𑀫𑀸 𑀕𑀦𑁆𑀢𑀼𑀓𑀸𑀫𑀢𑁆𑀣, 𑀪𑀼𑀜𑁆𑀚𑀣𑀸’’𑀢𑀺 𑀘 𑀯𑀼𑀢𑁆𑀢𑁂, ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀳𑀁 𑀧𑀦 𑀲𑀢𑁆𑀣𑀸’’𑀢𑀺? ‘‘𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄’’𑀢𑀺. ‘‘𑀢𑀼𑀫𑁆𑀳𑁂 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀯 𑀫𑀫 𑀧𑀼𑀢𑁆𑀢𑁄 𑀇𑀫𑀁 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀢𑀸𑀯𑀲𑁆𑀲 𑀇𑀢𑁄𑀯 𑀧𑀺𑀡𑁆𑀟𑀧𑀸𑀢𑀁 𑀳𑀭𑀣𑀸’’𑀢𑀺. 𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀧𑀭𑀺𑀲𑀸𑀬 𑀘 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀼 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀓𑀮𑀁 𑀭𑀸𑀚𑀦𑀺𑀯𑁂𑀲𑀦𑀁 𑀭𑀢𑀦𑀢𑁆𑀢𑀬𑁂 𑀅𑀪𑀺𑀧𑁆𑀧𑀲𑀦𑁆𑀦𑀁 𑀓𑀭𑁄𑀦𑁆𑀢𑁄 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀲𑀢𑁆𑀣𑀼 𑀆𑀳𑀭𑀺𑀢𑀩𑁆𑀩𑀪𑀢𑁆𑀢𑀧𑀼𑀡𑁆𑀡𑀁 𑀧𑀢𑁆𑀢𑀁 𑀆𑀓𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 ¶ 𑀧𑀺𑀡𑁆𑀟𑀧𑀸𑀢𑀁 𑀉𑀧𑀦𑁂𑀢𑁆𑀯𑀸 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑀢𑁆𑀣𑀸 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀏𑀯𑀁 𑀲𑀝𑁆𑀞𑀺𑀬𑁄𑀚𑀦𑀁 𑀫𑀕𑁆𑀕𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀢𑁆𑀣𑀼 𑀭𑀸𑀚𑀕𑁂𑀳𑀢𑁄𑀯 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀦𑀁 𑀪𑀕𑀯𑀸 ‘‘𑀫𑀬𑁆𑀳𑀁 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀲𑀓𑀮𑀦𑀺𑀯𑁂𑀲𑀦𑀁 𑀧𑀲𑀸𑀤𑁂𑀲𑀻’’𑀢𑀺 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀏𑀓𑀯𑀺𑀳𑀸𑀭𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀼𑀭𑀢𑁄 ¶ 𑀧𑀘𑁆𑀙𑀢𑁄 𑀯𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀏𑀓𑀯𑀺𑀳𑀸𑀭𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀫𑁆𑀫𑀸𑀲𑁄𑀓𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀲𑁄𑀓𑀫𑀳𑀸𑀭𑀸𑀚𑀸 𑀓𑀺𑀭 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀸𑀪𑀺𑀲𑁂𑀓𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀁 𑀢𑀺𑀲𑁆𑀲𑀓𑀼𑀫𑀸𑀭𑀁 𑀑𑀧𑀭𑀚𑁆𑀚𑁂 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀉𑀧𑀸𑀬𑁂𑀦 𑀢𑀁 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀁 𑀅𑀓𑀸𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀺𑀕𑀯𑀁 𑀕𑀢𑁄 𑀅𑀭𑀜𑁆𑀜𑁂 𑀬𑁄𑀦𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀳𑀢𑁆𑀣𑀺𑀦𑀸𑀕𑁂𑀦 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀩𑀻𑀚𑀺𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑀲𑀸𑀤𑁄 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀬𑀁 𑀫𑀳𑀸𑀣𑁂𑀭𑁄 𑀯𑀺𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 ¶ 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑁂 𑀧𑁄𑀓𑁆𑀔𑀭𑀡𑀺𑀬𑀸 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀞𑀢𑁆𑀯𑀸 𑀘𑀻𑀯𑀭𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀜𑁆𑀘 𑀆𑀓𑀸𑀲𑁂 𑀑𑀮𑀕𑁆𑀕𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀆𑀭𑀪𑀺. 𑀓𑀼𑀫𑀸𑀭𑁄 𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀅𑀪𑀺𑀧𑁆𑀧𑀲𑀦𑁆𑀦𑁄 𑀅𑀭𑀜𑁆𑀜𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀸𑀚𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀥𑀺𑀧𑁆𑀧𑀸𑀬𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀉𑀧𑀸𑀲𑀓𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀲𑀼𑀔𑀁 𑀧𑀢𑁆𑀣𑁂𑀦𑁆𑀢𑁄 𑁋

𑁫𑁩𑁭.

‘‘𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀺, 𑀅𑀧𑀭𑁄 𑀘𑁂 𑀦 𑀯𑀺𑀚𑁆𑀚𑀢𑀺;

𑀅𑀢𑀻𑀯 𑀨𑀸𑀲𑀼 𑀪𑀯𑀢𑀺, 𑀏𑀓𑀲𑁆𑀲 𑀯𑀲𑀢𑁄 𑀯𑀦𑁂.

𑁫𑁩𑁮.

‘‘𑀳𑀦𑁆𑀤 ¶ 𑀏𑀓𑁄 𑀕𑀫𑀺𑀲𑁆𑀲𑀸𑀫𑀺, 𑀅𑀭𑀜𑁆𑀜𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀨𑀸𑀲𑀼 𑀏𑀓𑀯𑀺𑀳𑀸𑀭𑀺𑀲𑁆𑀲, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁫𑁩𑁯.

‘‘𑀬𑁄𑀕𑀻-𑀧𑀻𑀢𑀺𑀓𑀭𑀁 𑀭𑀫𑁆𑀫𑀁, 𑀫𑀢𑁆𑀢𑀓𑀼𑀜𑁆𑀚𑀭𑀲𑁂𑀯𑀺𑀢𑀁;

𑀏𑀓𑁄 𑀅𑀢𑁆𑀣𑀯𑀲𑀻 𑀔𑀺𑀧𑁆𑀧𑀁, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁.

𑁫𑁪𑁦.

‘‘𑀲𑀼𑀧𑀼𑀧𑁆𑀨𑀺𑀢𑁂 ¶ 𑀲𑀻𑀢𑀯𑀦𑁂, 𑀲𑀻𑀢𑀮𑁂 𑀕𑀺𑀭𑀺𑀓𑀦𑁆𑀤𑀭𑁂;

𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸, 𑀘𑀗𑁆𑀓𑀫𑀺𑀲𑁆𑀲𑀸𑀫𑀺 𑀏𑀓𑀓𑁄.

𑁫𑁪𑁧.

‘‘𑀏𑀓𑀸𑀓𑀺𑀬𑁄 𑀅𑀤𑀼𑀢𑀺𑀬𑁄, 𑀭𑀫𑀡𑀻𑀬𑁂 𑀫𑀳𑀸𑀯𑀦𑁂;

𑀓𑀤𑀸𑀳𑀁 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄.

𑁫𑁪𑁨.

‘‘𑀏𑀯𑀁 𑀫𑁂 𑀓𑀢𑁆𑀢𑀼𑀓𑀸𑀫𑀲𑁆𑀲, 𑀅𑀥𑀺𑀧𑁆𑀧𑀸𑀬𑁄 𑀲𑀫𑀺𑀚𑁆𑀛𑀢𑀼;

𑀲𑀸𑀥𑀬𑀺𑀲𑁆𑀲𑀸𑀫𑀳𑀁𑀬𑁂𑀯, 𑀦𑀸𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄’’𑀢𑀺. 𑁋

𑀇𑀫𑀸 𑀙 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀢𑀺 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸, 𑀯𑀸-𑀲𑀤𑁆𑀤𑀲𑁆𑀲 𑀯𑀺𑀓𑀧𑁆𑀧𑀢𑁆𑀣𑀢𑁆𑀢𑀸 𑀧𑀲𑁆𑀲𑀢𑁄 𑀯𑀸 𑀅𑀧𑀭𑁄 𑀅𑀜𑁆𑀜𑁄 𑀚𑀦𑁄 𑀦 𑀯𑀺𑀚𑁆𑀚𑀢𑀺 𑀘𑁂, 𑀅𑀢𑀻𑀯 𑀅𑀢𑀺𑀯𑀺𑀬 𑀨𑀸𑀲𑀼 𑀘𑀺𑀢𑁆𑀢𑀲𑀼𑀔𑀁 𑀪𑀯𑀢𑀺. 𑀏𑀓𑀯𑀺𑀳𑀸𑀭𑀻𑀪𑀸𑀯𑁂𑀦 𑀏𑀓𑀲𑁆𑀲 𑀅𑀲𑀳𑀸𑀬𑀲𑁆𑀲. 𑀯𑀦𑁂 𑀯𑀲𑀢𑁄𑀢𑀺 𑀘𑀺𑀭𑀧𑀭𑀺𑀘𑀺𑀢𑁂𑀦 𑀯𑀺𑀯𑁂𑀓𑀚𑁆𑀛𑀸𑀲𑀬𑁂𑀦 𑀆𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑁄 𑀲𑁄 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀳𑀸𑀚𑀦𑀧𑀭𑀺𑀯𑀼𑀢𑀲𑁆𑀲 𑀯𑀲𑀢𑁄 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀯𑁂𑀓𑀲𑀼𑀔𑀜𑁆𑀘 𑀩𑀳𑀼𑀁 𑀫𑀜𑁆𑀜𑀦𑁆𑀢𑁄 𑀯𑀤𑀢𑀺.

𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀇𑀤𑀸𑀦𑀺 𑀓𑀭𑀻𑀬𑀫𑀸𑀦𑀲𑁆𑀲 𑀅𑀭𑀜𑁆𑀜𑀕𑀫𑀦𑀲𑁆𑀲 𑀦𑀺𑀘𑁆𑀙𑀺𑀢𑀪𑀸𑀯𑀫𑀸𑀳. 𑀏𑀓𑁄 𑀕𑀫𑀺𑀲𑁆𑀲𑀸𑀫𑀻𑀢𑀺 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄, 𑀕𑀳𑀧𑀢𑀺, 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀘𑀽𑀴𑀯. 𑁩𑁦𑁬) 𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑀁 𑀧𑀲𑀝𑁆𑀞𑀁 𑀅𑀭𑀜𑁆𑀜𑀁 𑀏𑀓𑁄 𑀅𑀲𑀳𑀸𑀬𑁄 𑀕𑀫𑀺𑀲𑁆𑀲𑀸𑀫𑀺 𑀯𑀸𑀲𑀸𑀥𑀺𑀧𑁆𑀧𑀸𑀬𑁂𑀦 𑀉𑀧𑀕𑀘𑁆𑀙𑀸𑀫𑀺. 𑀬𑀲𑁆𑀫𑀸 𑀏𑀓𑀯𑀺𑀳𑀸𑀭𑀺𑀲𑁆𑀲 𑀞𑀸𑀦𑀸𑀤𑀻𑀲𑀼 𑀅𑀲𑀳𑀸𑀬𑀪𑀸𑀯𑁂𑀦 𑀏𑀓𑀯𑀺𑀳𑀸𑀭𑀺𑀲𑁆𑀲 𑀦𑀺𑀩𑁆𑀩𑀸𑀦𑀁 𑀧𑀝𑀺𑀧𑁂𑀲𑀺𑀢𑀘𑀺𑀢𑁆𑀢𑀢𑀸𑀬 𑀧𑀳𑀺𑀢𑀢𑁆𑀢𑀲𑁆𑀲 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀓𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀢𑁄 𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑀁 𑀨𑀸𑀲𑀼 𑀇𑀝𑁆𑀞𑀁 𑀲𑀼𑀔𑀸𑀯𑀳𑀦𑁆𑀢𑀺 𑀅𑀢𑁆𑀣𑁄.

𑀬𑁄𑀕𑀻-𑀧𑀻𑀢𑀺𑀓𑀭𑀦𑁆𑀢𑀺 𑀬𑁄𑀕𑀻𑀦𑀁 𑀪𑀸𑀯𑀦𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀦𑀁 𑀅𑀧𑁆𑀧𑀲𑀤𑁆𑀤𑀸𑀤𑀺𑀪𑀸𑀯𑁂𑀦 𑀛𑀸𑀦𑀯𑀺𑀧𑀲𑁆𑀲𑀦𑀸𑀤𑀺𑀧𑀻𑀢𑀺𑀁 𑀆𑀯𑀳𑀦𑀢𑁄 𑀬𑁄𑀕𑀻-𑀧𑀻𑀢𑀺𑀓𑀭𑀁. 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀪𑀸𑀯𑁂𑀦 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀢𑀸𑀬 𑀭𑀫𑁆𑀫𑀁. 𑀫𑀢𑁆𑀢𑀓𑀼𑀜𑁆𑀚𑀭𑀲𑁂𑀯𑀺𑀢𑀦𑁆𑀢𑀺 ¶ 𑀫𑀢𑁆𑀢𑀯𑀭𑀯𑀸𑀭𑀡𑀯𑀺𑀘𑀭𑀺𑀢𑀁, 𑀇𑀫𑀺𑀦𑀸𑀧𑀺 𑀩𑁆𑀭𑀳𑀸𑀭𑀜𑁆𑀜𑀪𑀸𑀯𑁂𑀦 𑀚𑀦𑀯𑀺𑀯𑁂𑀓𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀯𑀲𑀻𑀢𑀺 𑀇𑀥 𑀅𑀢𑁆𑀣𑁄𑀢𑀺 𑀲𑀫𑀡𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. ‘‘𑀓𑀣𑀁 𑀦𑀼 𑀔𑁄 𑀲𑁄 𑀫𑁂 𑀪𑀯𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀯𑀲𑀁 𑀕𑀢𑁄.

𑀲𑀼𑀧𑀼𑀧𑁆𑀨𑀺𑀢𑁂𑀢𑀺 ¶ ¶ 𑀲𑀼𑀝𑁆𑀞𑀼 𑀧𑀼𑀧𑁆𑀨𑀺𑀢𑁂. 𑀲𑀻𑀢𑀯𑀦𑁂𑀢𑀺 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀲𑀻𑀢𑁂 𑀯𑀦𑁂. 𑀉𑀪𑀬𑁂𑀦𑀧𑀺 𑀢𑀲𑁆𑀲 𑀭𑀫𑀡𑀻𑀬𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀕𑀺𑀭𑀺𑀓𑀦𑁆𑀤𑀭𑁂𑀢𑀺 𑀕𑀺𑀭𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀓𑀦𑁆𑀤𑀭𑁂. 𑀓𑀦𑁆𑀢𑀺 𑀳𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑀁 𑀦𑀺𑀦𑁆𑀦𑀝𑁆𑀞𑀸𑀦𑀁 𑀓𑀦𑁆𑀤𑀭𑀁 𑀦𑀸𑀫. 𑀢𑀸𑀤𑀺𑀲𑁂 𑀲𑀻𑀢𑀮𑁂 𑀕𑀺𑀭𑀺𑀓𑀦𑁆𑀤𑀭𑁂 𑀖𑀫𑁆𑀫𑀧𑀭𑀺𑀢𑀸𑀧𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀘𑀗𑁆𑀓𑀫𑀺𑀲𑁆𑀲𑀸𑀫𑀺 𑀏𑀓𑀓𑁄𑀢𑀺 𑀓𑀢𑁆𑀣𑀘𑀺 𑀅𑀦𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺.

𑀏𑀓𑀸𑀓𑀺𑀬𑁄𑀢𑀺 𑀏𑀓𑀸𑀓𑀻 𑀅𑀲𑀳𑀸𑀬𑁄. 𑀅𑀤𑀼𑀢𑀺𑀬𑁄𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀤𑀼𑀢𑀺𑀬𑀸𑀪𑀸𑀯𑁂𑀦 𑀅𑀤𑀼𑀢𑀺𑀬𑁄. 𑀢𑀡𑁆𑀳𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀲𑀩𑁆𑀩𑀤𑀸 𑀅𑀯𑀺𑀚𑀳𑀦𑀝𑁆𑀞𑁂𑀦 𑀤𑀼𑀢𑀺𑀬𑀸 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭’’𑀦𑁆𑀢𑀺 (𑀇𑀢𑀺𑀯𑀼. 𑁧𑁫, 𑁧𑁦𑁫).

𑀏𑀯𑀁 𑀫𑁂 𑀓𑀢𑁆𑀢𑀼𑀓𑀸𑀫𑀲𑁆𑀲𑀸𑀢𑀺 ‘‘𑀳𑀦𑁆𑀤 𑀏𑀓𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀺𑀦𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀪𑀸𑀯𑀦𑀸𑀪𑀺𑀬𑁄𑀕𑀁 𑀓𑀢𑁆𑀢𑀼𑀓𑀸𑀫𑀲𑁆𑀲 𑀫𑁂. 𑀅𑀥𑀺𑀧𑁆𑀧𑀸𑀬𑁄 𑀲𑀫𑀺𑀚𑁆𑀛𑀢𑀽𑀢𑀺 ‘‘𑀓𑀤𑀸𑀳𑀁 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀫𑀦𑁄𑀭𑀣𑁄 𑀇𑀚𑁆𑀛𑀢𑀼 𑀲𑀺𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀼. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀬𑀲𑁆𑀫𑀸 𑀦 𑀆𑀬𑀸𑀘𑀦𑀫𑀢𑁆𑀢𑁂𑀦 𑀲𑀺𑀚𑁆𑀛𑀢𑀺, 𑀦𑀸𑀧𑀺 𑀅𑀜𑁆𑀜𑁂𑀦 𑀲𑀸𑀥𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀆𑀳 ‘‘𑀲𑀸𑀥𑀬𑀺𑀲𑁆𑀲𑀸𑀫𑀳𑀁𑀬𑁂𑀯, 𑀦𑀸𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄’’𑀢𑀺.

𑀏𑀯𑀁 𑀉𑀧𑀭𑀸𑀚𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀤𑀴𑁆𑀳𑀦𑀺𑀘𑁆𑀙𑀬𑀢𑀁 𑀜𑀢𑁆𑀯𑀸 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑀕𑀫𑀦𑀻𑀬𑀁 𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀓𑀼𑀫𑀸𑀭𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀯𑀺𑀳𑀸𑀭𑀁 𑀦𑁂𑀲𑀺. 𑀓𑀼𑀫𑀸𑀭𑁄 𑀧𑀥𑀸𑀦𑀖𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺, 𑀅𑀦𑁂𑀓𑀲𑀢𑀸 𑀫𑀦𑀼𑀲𑁆𑀲𑀸 𑀢𑀁 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑁄 𑀲𑀗𑁆𑀖𑀫𑀺𑀢𑁆𑀢𑀸𑀬 𑀲𑀸𑀫𑀺𑀓𑁄 𑀅𑀕𑁆𑀕𑀺𑀩𑁆𑀭𑀳𑁆𑀫𑀸𑀧𑀺 𑀢𑀫𑁂𑀯 𑀅𑀦𑀼𑀧𑀩𑁆𑀩𑀚𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁫𑁪𑁩.

‘‘𑀏𑀲 𑀩𑀦𑁆𑀥𑀸𑀫𑀺 𑀲𑀦𑁆𑀦𑀸𑀳𑀁, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁;

𑀦 𑀢𑀢𑁄 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀅𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁.

𑁫𑁪𑁪.

‘‘𑀫𑀸𑀮𑀼𑀢𑁂 𑀉𑀧𑀯𑀸𑀬𑀦𑁆𑀢𑁂, 𑀲𑀻𑀢𑁂 𑀲𑀼𑀭𑀪𑀺𑀕𑀦𑁆𑀥𑀺𑀓𑁂;

𑀅𑀯𑀺𑀚𑁆𑀚𑀁 𑀤𑀸𑀮𑀬𑀺𑀲𑁆𑀲𑀸𑀫𑀺, 𑀦𑀺𑀲𑀺𑀦𑁆𑀦𑁄 𑀦𑀕𑀫𑀼𑀤𑁆𑀥𑀦𑀺.

𑁫𑁪𑁫.

‘‘𑀯𑀦𑁂 ¶ 𑀓𑀼𑀲𑀼𑀫𑀲𑀜𑁆𑀙𑀦𑁆𑀦𑁂, 𑀧𑀩𑁆𑀪𑀸𑀭𑁂 𑀦𑀽𑀦 𑀲𑀻𑀢𑀮𑁂;

𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀲𑀼𑀔𑀺𑀢𑁄, 𑀭𑀫𑀺𑀲𑁆𑀲𑀸𑀫𑀺 𑀕𑀺𑀭𑀺𑀩𑁆𑀩𑀚𑁂’’𑀢𑀺. 𑁋

𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀏𑀲 𑀩𑀦𑁆𑀥𑀸𑀫𑀺 𑀲𑀦𑁆𑀦𑀸𑀳𑀦𑁆𑀢𑀺 𑀏𑀲𑀸𑀳𑀁 𑀯𑀻𑀭𑀺𑀬𑀲𑀗𑁆𑀔𑀸𑀢𑀁 𑀲𑀦𑁆𑀦𑀸𑀳𑀁 𑀩𑀦𑁆𑀥𑀸𑀫𑀺, 𑀓𑀸𑀬𑁂 𑀘 ¶ 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑁄 𑀯𑀻𑀭𑀺𑀬𑀲𑀦𑁆𑀦𑀸𑀳𑁂𑀦 𑀲𑀦𑁆𑀦𑀬𑁆𑀳𑀸𑀫𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀸𑀫 𑀲𑀽𑀭𑁄 𑀧𑀼𑀭𑀺𑀲𑁄 𑀧𑀘𑁆𑀘𑀢𑁆𑀣𑀺𑀓𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 ¶ 𑀢𑀁 𑀚𑁂𑀢𑀼𑀓𑀸𑀫𑁄 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀧𑀳𑀸𑀬 𑀓𑀯𑀘𑀧𑀝𑀺𑀫𑀼𑀘𑁆𑀘𑀦𑀸𑀤𑀺𑀦𑀸 𑀬𑀼𑀤𑁆𑀥𑀸𑀬 𑀲𑀦𑁆𑀦𑀬𑁆𑀳𑀢𑀺, 𑀬𑀼𑀤𑁆𑀥𑀪𑀽𑀫𑀺𑀜𑁆𑀘 𑀕𑀦𑁆𑀢𑁆𑀯𑀸 𑀧𑀘𑁆𑀘𑀢𑁆𑀣𑀺𑀓𑁂 𑀅𑀚𑁂𑀢𑁆𑀯𑀸 𑀢𑀢𑁄 𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀫𑀳𑀫𑁆𑀧𑀺 𑀓𑀺𑀮𑁂𑀲𑀧𑀘𑁆𑀘𑀢𑁆𑀣𑀺𑀓𑁂 𑀚𑁂𑀢𑀼𑀁 𑀆𑀤𑀺𑀢𑁆𑀢𑀫𑁆𑀧𑀺 𑀲𑀻𑀲𑀁 𑀘𑁂𑀮𑀜𑁆𑀘 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑀦𑁆𑀦𑀸𑀳𑀁 𑀲𑀦𑁆𑀦𑀬𑁆𑀳𑀸𑀫𑀺, 𑀓𑀺𑀮𑁂𑀲𑁂 𑀅𑀚𑁂𑀢𑁆𑀯𑀸 𑀓𑀺𑀮𑁂𑀲𑀯𑀺𑀚𑀬𑀬𑁄𑀕𑁆𑀕𑀁 𑀯𑀺𑀯𑁂𑀓𑀝𑁆𑀞𑀸𑀦𑀁 𑀦 𑀯𑀺𑀲𑁆𑀲𑀚𑁆𑀚𑁂𑀫𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁 𑀦 𑀢𑀢𑁄 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀅𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬’’𑀦𑁆𑀢𑀺.

‘‘𑀫𑀸𑀮𑀼𑀢𑁂 𑀉𑀧𑀯𑀸𑀬𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀅𑀭𑀜𑁆𑀜𑀝𑁆𑀞𑀸𑀦𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬𑁄𑀕𑁆𑀬𑀢𑀁 𑀯𑀤𑀢𑀺, 𑀭𑀫𑀺𑀲𑁆𑀲𑀸𑀫𑀺 𑀦𑀽𑀦 𑀕𑀺𑀭𑀺𑀩𑁆𑀩𑀚𑁂𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀢𑀧𑀭𑀺𑀓𑁆𑀔𑁂𑀧𑁂 𑀅𑀪𑀺𑀭𑀫𑀺𑀲𑁆𑀲𑀸𑀫𑀺 𑀫𑀜𑁆𑀜𑁂𑀢𑀺 𑀅𑀦𑀸𑀕𑀢𑀢𑁆𑀣𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑁄 𑀯𑀤𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 𑀯𑀢𑁆𑀯𑀸 𑀣𑁂𑀭𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀓𑀮𑀺𑀗𑁆𑀕𑀭𑀝𑁆𑀞𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀲𑁆𑀲 𑀧𑀸𑀤𑁂 𑀘𑀫𑁆𑀫𑀺𑀓𑀸𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀢𑀁 𑀤𑀺𑀲𑁆𑀯𑀸 𑀏𑀓𑁄 𑀯𑁂𑀚𑁆𑀚𑁄 ‘‘𑀲𑀧𑁆𑀧𑀺𑀁, 𑀪𑀦𑁆𑀢𑁂, 𑀧𑀭𑀺𑀬𑁂𑀲𑀣, 𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳. 𑀣𑁂𑀭𑁄 𑀲𑀧𑁆𑀧𑀺𑀧𑀭𑀺𑀬𑁂𑀲𑀦𑀁 𑀅𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀏𑀯 𑀓𑀫𑁆𑀫𑀁 𑀓𑀭𑁄𑀢𑀺, 𑀭𑁄𑀕𑁄 𑀯𑀟𑁆𑀠𑀢𑀺, 𑀯𑁂𑀚𑁆𑀚𑁄 𑀣𑁂𑀭𑀲𑁆𑀲 𑀢𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀤𑀺𑀲𑁆𑀯𑀸 𑀲𑀬𑀫𑁂𑀯 𑀲𑀧𑁆𑀧𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀣𑁂𑀭𑀁 𑀅𑀭𑁄𑀕𑀁 𑀅𑀓𑀸𑀲𑀺. 𑀲𑁄 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁪.𑁧-𑁧𑁨) 𑁋

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀦𑀺𑀧𑁆𑀧𑀧𑀜𑁆𑀘𑁄 𑀦𑀺𑀭𑀸𑀮𑀫𑁆𑀩𑁄, 𑀆𑀓𑀸𑀲𑀲𑀫𑀫𑀸𑀦𑀲𑁄;

𑀲𑀼𑀜𑁆𑀜𑀢𑀸𑀩𑀳𑀼𑀮𑁄 𑀢𑀸𑀤𑀻, 𑀅𑀦𑀺𑀫𑀺𑀢𑁆𑀢𑀭𑀢𑁄 𑀯𑀲𑀻.

‘‘𑀅𑀲𑀗𑁆𑀕𑀘𑀺𑀢𑁆𑀢𑁄 ¶ 𑀦𑀺𑀓𑁆𑀮𑁂𑀲𑁄, 𑀅𑀲𑀁𑀲𑀝𑁆𑀞𑁄 𑀓𑀼𑀮𑁂 𑀕𑀡𑁂;

𑀫𑀳𑀸𑀓𑀸𑀭𑀼𑀡𑀺𑀓𑁄 𑀯𑀻𑀭𑁄, 𑀯𑀺𑀦𑀬𑁄𑀧𑀸𑀬𑀓𑁄𑀯𑀺𑀤𑁄.

‘‘𑀉𑀬𑁆𑀬𑀼𑀢𑁆𑀢𑁄 𑀧𑀭𑀓𑀺𑀘𑁆𑀘𑁂𑀲𑀼, 𑀯𑀺𑀦𑀬𑀦𑁆𑀢𑁄 𑀲𑀤𑁂𑀯𑀓𑁂;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀕𑀢𑀺𑀁 𑀧𑀗𑁆𑀓𑀯𑀺𑀲𑁄𑀲𑀦𑀁.

‘‘𑀅𑀫𑀢𑀁 𑀧𑀭𑀫𑀲𑁆𑀲𑀸𑀤𑀁, 𑀚𑀭𑀸𑀫𑀘𑁆𑀘𑀼𑀦𑀺𑀯𑀸𑀭𑀡𑀁;

𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀲𑁄, 𑀦𑀺𑀲𑀺𑀦𑁆𑀦𑁄 𑀮𑁄𑀓𑀢𑀸𑀭𑀓𑁄.

‘‘𑀓𑀭𑀯𑀻𑀓𑀭𑀼𑀢𑁄 ¶ 𑀦𑀸𑀣𑁄, 𑀩𑁆𑀭𑀳𑁆𑀫𑀖𑁄𑀲𑁄 𑀢𑀣𑀸𑀕𑀢𑁄;

𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀤𑀼𑀕𑁆𑀕𑀸, 𑀯𑀺𑀧𑁆𑀧𑀦𑀝𑁆𑀞𑁂 𑀅𑀦𑀸𑀬𑀓𑁂.

‘‘𑀤𑁂𑀲𑁂𑀦𑁆𑀢𑁄 𑀯𑀺𑀭𑀚𑀁 𑀥𑀫𑁆𑀫𑀁, 𑀤𑀺𑀝𑁆𑀞𑁄 𑀫𑁂 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀧𑀩𑁆𑀩𑀚𑀺𑀢𑁆𑀯𑀸 𑀢𑀤𑀸𑀧𑀸𑀳𑀁, 𑀘𑀺𑀦𑁆𑀢𑁂𑀦𑁆𑀢𑁄 𑀚𑀺𑀦𑀲𑀸𑀲𑀦𑀁;

𑀏𑀓𑀓𑁄𑀯 𑀯𑀦𑁂 𑀭𑀫𑁆𑀫𑁂, 𑀯𑀲𑀺𑀁 𑀲𑀁𑀲𑀕𑁆𑀕𑀧𑀻𑀴𑀺𑀢𑁄.

‘‘𑀲𑀓𑁆𑀓𑀸𑀬𑀯𑀽𑀧𑀓𑀸𑀲𑁄 𑀫𑁂, 𑀳𑁂𑀢𑀼𑀪𑀽𑀢𑁄 𑀫𑀫𑀸𑀪𑀯𑀻;

𑀫𑀦𑀲𑁄 𑀯𑀽𑀧𑀓𑀸𑀲𑀲𑁆𑀲, 𑀲𑀁𑀲𑀕𑁆𑀕𑀪𑀬𑀤𑀲𑁆𑀲𑀺𑀦𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀣𑁂𑀭𑁂 𑀢𑀢𑁆𑀣 𑀯𑀺𑀳𑀭𑀦𑁆𑀢𑁂 𑀭𑀸𑀚𑀸 𑀓𑁄𑀝𑀺𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀪𑁄𑀚𑀓𑀕𑀺𑀭𑀺𑀯𑀺𑀳𑀸𑀭𑀁 𑀦𑀸𑀫 𑀓𑀸𑀭𑁂𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀯𑀸𑀲𑁂𑀲𑀺. 𑀲𑁄 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑁋

𑁫𑁪𑁬.

‘‘𑀲𑁄𑀳𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀑𑀲𑀸𑀦𑀕𑀸𑀣𑀫𑀸𑀳. 𑀲𑀸 𑀉𑀢𑁆𑀢𑀸𑀦𑀢𑁆𑀣𑀸𑀯. 𑀢𑀤𑁂𑀯 𑀘 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻𑀢𑀺.

𑀏𑀓𑀯𑀺𑀳𑀸𑀭𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀦𑀸𑀕𑀢𑀁 ¶ 𑀬𑁄 𑀧𑀝𑀺𑀓𑀘𑁆𑀘 𑀧𑀲𑁆𑀲𑀢𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 ¶ 𑀤𑀺𑀲𑁆𑀯𑀸 𑀢𑀚𑁆𑀚𑀁 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺.

𑀲𑁄 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀼𑀭𑀺𑀲𑀲𑀳𑀲𑁆𑀲𑀕𑀡𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀕𑀩𑁆𑀪𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀦𑁆𑀢𑀁 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀚𑀦𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀁 ¶ 𑀉𑀧𑀸𑀲𑀓𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀲𑀧𑀼𑀢𑁆𑀢𑀤𑀸𑀭𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀁𑀲𑀼. 𑀢𑁂𑀲𑀼 𑀕𑀡𑀚𑁂𑀝𑁆𑀞𑀓𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀘𑁆𑀘𑀦𑁆𑀢𑀤𑁂𑀲𑁂 𑀓𑀼𑀓𑁆𑀓𑀼𑀝𑀦𑀸𑀫𑀓𑁂 𑀦𑀕𑀭𑁂 𑀭𑀸𑀚𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀓𑀧𑁆𑀧𑀺𑀦𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀲𑁂𑀲𑀧𑀼𑀭𑀺𑀲𑀸 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀓𑀧𑁆𑀧𑀺𑀦𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸 𑀦𑀸𑀫 𑀚𑀸𑀢𑁄. 𑀲𑁄 𑀲𑀼𑀢𑀯𑀺𑀢𑁆𑀢𑀓𑀢𑀸𑀬 𑀧𑀸𑀢𑁄𑀯 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀲𑀻𑀖𑀁 𑀤𑀽𑀢𑁂 𑀧𑁂𑀲𑁂𑀲𑀺 𑁋 ‘‘𑀬𑀢𑁆𑀣 𑀩𑀳𑀼𑀲𑁆𑀲𑀼𑀢𑁂 𑀧𑀲𑁆𑀲𑀣, 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀣𑀸’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀲𑀸𑀯𑀢𑁆𑀣𑀺𑀬𑀁 𑀉𑀝𑁆𑀞𑀸𑀦𑀓𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀢𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀳𑀢𑁆𑀣𑀸 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀼𑀁. 𑀢𑁂 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑀺𑀢𑀧𑀡𑁆𑀡𑀸𑀓𑀸𑀭𑁂 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀯𑀢𑁆𑀣𑀺𑀢𑁄, 𑀤𑁂𑀯𑀸’’𑀢𑀺. ‘‘𑀓𑀘𑁆𑀘𑀺 𑀯𑁄 𑀭𑀝𑁆𑀞𑀁 𑀲𑀼𑀪𑀺𑀓𑁆𑀔𑀁, 𑀥𑀫𑁆𑀫𑀺𑀓𑁄 𑀭𑀸𑀚𑀸’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑀻𑀤𑀺𑀲𑁄 𑀥𑀫𑁆𑀫𑁄 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂 𑀇𑀤𑀸𑀦𑀺 𑀧𑀯𑀢𑁆𑀢𑀢𑀻’’𑀢𑀺? ‘‘𑀢𑀁, 𑀤𑁂𑀯, 𑀦 𑀲𑀓𑁆𑀓𑀸 𑀉𑀘𑁆𑀙𑀺𑀝𑁆𑀞𑀫𑀼𑀔𑁂𑀳𑀺 𑀓𑀣𑁂𑀢𑀼’’𑀦𑁆𑀢𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀉𑀤𑀓𑀁 𑀤𑀸𑀧𑁂𑀲𑀺. 𑀢𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀤𑀲𑀩𑀮𑀸𑀪𑀺𑀫𑀼𑀔𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀤𑁂𑀲𑁂 𑀩𑀼𑀤𑁆𑀥𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦’’𑀦𑁆𑀢𑀺 ¶ 𑀆𑀳𑀁𑀲𑀼. 𑀭𑀜𑁆𑀜𑁄 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑁂 𑀲𑀼𑀢𑀫𑀢𑁆𑀢𑁂𑀬𑁂𑀯 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀢𑁄 ‘‘𑀩𑀼𑀤𑁆𑀥𑁄𑀢𑀺, 𑀢𑀸𑀢𑀸, 𑀯𑀤𑁂𑀣𑀸’’𑀢𑀺 𑀆𑀳. ‘‘𑀩𑀼𑀤𑁆𑀥𑁄𑀢𑀺, 𑀤𑁂𑀯, 𑀯𑀤𑀸𑀫𑀸’’𑀢𑀺. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀤𑀸𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑁄𑀢𑀺 𑀧𑀤𑀁 𑀅𑀧𑀭𑀺𑀫𑀸𑀡’’𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂 𑀧𑀲𑀦𑁆𑀦𑁄 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀅𑀧𑀭𑀁 𑀯𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀮𑁄𑀓𑁂 𑀥𑀫𑁆𑀫𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑀫𑁆𑀧𑀺 ¶ 𑀲𑀼𑀢𑁆𑀯𑀸 𑀢𑀣𑁂𑀯 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀅𑀧𑀭𑀁 𑀯𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀲𑀗𑁆𑀖𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀣𑁂𑀯 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁄𑀯 𑀦𑀺𑀓𑁆𑀔𑀫𑀺. 𑀅𑀫𑀘𑁆𑀘𑀸𑀧𑀺 𑀢𑀣𑁂𑀯 𑀦𑀺𑀓𑁆𑀔𑀫𑀺𑀁𑀲𑀼. 𑀲𑁄 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀕𑀗𑁆𑀕𑀸𑀢𑀻𑀭𑀁 𑀧𑀢𑁆𑀯𑀸 ‘‘𑀲𑀘𑁂 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀇𑀫𑁂𑀲𑀁 𑀅𑀲𑁆𑀲𑀸𑀦𑀁 𑀔𑀼𑀭𑀫𑀢𑁆𑀢𑀫𑁆𑀧𑀺 𑀫𑀸 𑀢𑁂𑀫𑁂𑀢𑀽’’𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂𑀦𑁂𑀯 𑀧𑀽𑀭𑀁 𑀕𑀗𑁆𑀕𑀸𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑀭𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀸𑀭𑀁 𑀦𑀤𑀺𑀁 𑀢𑀣𑁂𑀯 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀢𑀺𑀬𑀁 𑀘𑀦𑁆𑀤𑀪𑀸𑀕𑀁 𑀦𑀸𑀫 𑀫𑀳𑀸𑀦𑀤𑀺𑀁 𑀧𑀢𑁆𑀯𑀸 𑀢𑀫𑁆𑀧𑀺 𑀢𑀸𑀬 𑀏𑀯 𑀲𑀘𑁆𑀘𑀓𑀺𑀭𑀺𑀬𑀸𑀬 𑀅𑀢𑀺𑀓𑁆𑀓𑀫𑀺.

𑀲𑀢𑁆𑀣𑀸𑀧𑀺 𑀢𑀁𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑀁𑀬𑁂𑀯 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚 𑀫𑀳𑀸𑀓𑀧𑁆𑀧𑀺𑀦𑁄 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀧𑀳𑀸𑀬 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 ‘‘𑀫𑀬𑀸 𑀢𑁂𑀲𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀸𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 ¶ 𑀲𑀬𑀫𑁂𑀯 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀢𑁂𑀲𑀁 𑀉𑀢𑁆𑀢𑀭𑀡𑀢𑀺𑀢𑁆𑀣𑀲𑁆𑀲𑀸𑀪𑀺𑀫𑀼𑀔𑀝𑁆𑀞𑀸𑀦𑁂 𑀫𑀳𑀸𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀢𑁂𑀦 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀦𑁆𑀢𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀦𑁆𑀢𑀺𑀬𑁄 𑀑𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀬𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀫𑀬𑀁 𑀆𑀕𑀢𑀸, 𑀅𑀤𑁆𑀥𑀸 𑀲𑁄 𑀏𑀲𑁄’’𑀢𑀺 𑀤𑀲𑁆𑀲𑀦𑁂𑀦𑁂𑀯 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀫𑀺𑀢𑁆𑀯𑀸 𑀧𑀭𑀫𑀦𑀺𑀧𑀘𑁆𑀘𑀸𑀓𑀸𑀭𑀁 𑀓𑀭𑁄𑀦𑁆𑀢𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀭𑀸𑀚𑀸 𑀪𑀕𑀯𑀢𑁄 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦. 𑀲𑀢𑁆𑀣𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁪.𑁬𑁬-𑁧𑁦𑁭) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀉𑀤𑀺𑀢𑁄 𑀅𑀚𑀝𑀸𑀓𑀸𑀲𑁂, 𑀭𑀯𑀻𑀯 𑀲𑀭𑀤𑀫𑁆𑀩𑀭𑁂.

‘‘𑀯𑀘𑀦𑀸𑀪𑀸𑀬 𑀩𑁄𑀥𑁂𑀢𑀺, 𑀯𑁂𑀦𑁂𑀬𑁆𑀬𑀧𑀤𑀼𑀫𑀸𑀦𑀺 𑀲𑁄;

𑀓𑀺𑀮𑁂𑀲𑀧𑀗𑁆𑀓𑀁 𑀲𑁄𑀲𑁂𑀢𑀺, 𑀫𑀢𑀺𑀭𑀁𑀲𑀻𑀳𑀺 𑀦𑀸𑀬𑀓𑁄.

‘‘𑀢𑀺𑀢𑁆𑀣𑀺𑀬𑀸𑀦𑀁 𑀬𑀲𑁂 𑀳𑀦𑁆𑀢𑀺, 𑀔𑀚𑁆𑀚𑁄𑀢𑀸𑀪𑀸 𑀬𑀣𑀸 𑀭𑀯𑀺;

𑀲𑀘𑁆𑀘𑀢𑁆𑀣𑀸𑀪𑀁 𑀧𑀓𑀸𑀲𑁂𑀢𑀺, 𑀭𑀢𑀦𑀁𑀯 𑀤𑀺𑀯𑀸𑀓𑀭𑁄.

‘‘𑀕𑀼𑀡𑀸𑀦𑀁 𑀆𑀬𑀢𑀺𑀪𑀽𑀢𑁄, 𑀭𑀢𑀦𑀸𑀦𑀁𑀯 𑀲𑀸𑀕𑀭𑁄;

𑀧𑀚𑁆𑀚𑀼𑀦𑁆𑀦𑁄𑀭𑀺𑀯 𑀪𑀽𑀢𑀸𑀦𑀺, 𑀥𑀫𑁆𑀫𑀫𑁂𑀖𑁂𑀦 𑀯𑀲𑁆𑀲𑀢𑀺.

‘‘𑀅𑀓𑁆𑀔𑀤𑀲𑁆𑀲𑁄 𑀢𑀤𑀸 𑀆𑀲𑀺𑀁, 𑀦𑀕𑀭𑁂 𑀳𑀁𑀲𑀲𑀯𑁆𑀳𑀬𑁂;

𑀉𑀧𑁂𑀘𑁆𑀘 𑀥𑀫𑁆𑀫𑀫𑀲𑁆𑀲𑁄𑀲𑀺𑀁, 𑀚𑀮𑀚𑀼𑀢𑁆𑀢𑀫𑀦𑀸𑀫𑀺𑀦𑁄.

‘‘𑀑𑀯𑀸𑀤𑀓𑀲𑁆𑀲 𑀪𑀺𑀓𑁆𑀔𑀽𑀦𑀁, 𑀲𑀸𑀯𑀓𑀲𑁆𑀲 𑀓𑀢𑀸𑀯𑀺𑀦𑁄;

𑀕𑀼𑀡𑀁 𑀧𑀓𑀸𑀲𑀬𑀦𑁆𑀢𑀲𑁆𑀲, 𑀢𑀧𑁆𑀧𑀬𑀦𑁆𑀢𑀲𑁆𑀲 𑀫𑁂 𑀫𑀦𑀁.

‘‘𑀲𑀼𑀢𑁆𑀯𑀸 𑀧𑀢𑀻𑀢𑁄 𑀲𑀼𑀫𑀦𑁄, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀲𑀺𑀲𑁆𑀲𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

‘‘𑀢𑀤𑀸 𑀳𑀁𑀲𑀲𑀫𑀪𑀸𑀕𑁄, 𑀳𑀁𑀲𑀤𑀼𑀦𑁆𑀤𑀼𑀪𑀺𑀦𑀺𑀲𑁆𑀲𑀦𑁄;

𑀧𑀲𑁆𑀲𑀣𑁂𑀢𑀁 𑀫𑀳𑀸𑀫𑀢𑁆𑀢𑀁, 𑀯𑀺𑀦𑀺𑀘𑁆𑀙𑀬𑀯𑀺𑀲𑀸𑀭𑀤𑀁.

‘‘𑀧𑀢𑀺𑀢𑀁 𑀧𑀸𑀤𑀫𑀽𑀮𑁂 𑀫𑁂, 𑀲𑀫𑀼𑀕𑁆𑀕𑀢𑀢𑀦𑀽𑀭𑀼𑀳𑀁;

𑀚𑀻𑀫𑀽𑀢𑀯𑀡𑁆𑀡𑀁 𑀧𑀻𑀡𑀁𑀲𑀁, 𑀧𑀲𑀦𑁆𑀦𑀦𑀬𑀦𑀸𑀦𑀦𑀁.

‘‘𑀧𑀭𑀺𑀯𑀸𑀭𑁂𑀦 𑀫𑀳𑀢𑀸, 𑀭𑀸𑀚𑀬𑀼𑀢𑁆𑀢𑀁 𑀫𑀳𑀸𑀬𑀲𑀁;

𑀏𑀲𑁄 𑀓𑀢𑀸𑀯𑀺𑀦𑁄 𑀞𑀸𑀦𑀁, 𑀧𑀢𑁆𑀣𑁂𑀢𑀺 𑀫𑀼𑀤𑀺𑀢𑀸𑀲𑀬𑁄.

‘‘𑀇𑀫𑀺𑀦𑀸 𑀧𑀡𑀺𑀧𑀸𑀢𑁂𑀦, 𑀘𑀸𑀕𑁂𑀦 𑀧𑀡𑀺𑀥𑀻𑀳𑀺 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀦𑀼𑀧𑀧𑀚𑁆𑀚𑀢𑀺 𑀤𑀼𑀕𑁆𑀕𑀢𑀺𑀁.

‘‘𑀤𑁂𑀯𑁂𑀲𑀼 ¶ 𑀤𑁂𑀯𑀲𑁄𑀪𑀕𑁆𑀕𑀁, 𑀫𑀦𑀼𑀲𑁆𑀲𑁂𑀲𑀼 𑀫𑀳𑀦𑁆𑀢𑀢𑀁;

𑀅𑀦𑀼𑀪𑁄𑀢𑁆𑀯𑀸𑀦 𑀲𑁂𑀲𑁂𑀦, 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 ¶ 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀧𑁆𑀧𑀺𑀦𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀢𑀢𑁄𑀳𑀁 𑀲𑀼𑀓𑀢𑀁 𑀓𑀸𑀭𑀁, 𑀓𑀢𑁆𑀯𑀸𑀦 𑀚𑀺𑀦𑀲𑀸𑀲𑀦𑁂;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁.

‘‘𑀤𑁂𑀯𑀫𑀸𑀦𑀼𑀲𑀭𑀚𑁆𑀚𑀸𑀦𑀺, 𑀲𑀢𑀲𑁄 𑀅𑀦𑀼𑀲𑀸𑀲𑀺𑀬;

𑀩𑀸𑀭𑀸𑀡𑀲𑀺𑀬𑀫𑀸𑀲𑀦𑁆𑀦𑁂, 𑀚𑀸𑀢𑁄 𑀓𑁂𑀡𑀺𑀬𑀚𑀸𑀢𑀺𑀬𑀁.

‘‘𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀦, 𑀲𑀧𑀚𑀸𑀧𑀢𑀺𑀓𑁄 𑀅𑀳𑀁;

𑀧𑀜𑁆𑀘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀢𑀸𑀦𑀺 𑀲𑀫𑀼𑀧𑀝𑁆𑀞𑀳𑀺𑀁.

‘‘𑀢𑁂𑀫𑀸𑀲𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀧𑀘𑁆𑀙𑀸𑀤𑀫𑁆𑀳 𑀢𑀺𑀘𑀻𑀯𑀭𑀁;

𑀢𑀢𑁄 𑀘𑀼𑀢𑀸 𑀫𑀬𑀁 𑀲𑀩𑁆𑀩𑁂, 𑀅𑀳𑀼𑀫𑁆𑀳 𑀢𑀺𑀤𑀲𑀽𑀧𑀕𑀸.

‘‘𑀧𑀼𑀦𑁄 𑀲𑀩𑁆𑀩𑁂 𑀫𑀦𑀼𑀲𑁆𑀲𑀢𑁆𑀢𑀁, 𑀅𑀕𑀫𑀺𑀫𑁆𑀳 𑀢𑀢𑁄 𑀘𑀼𑀢𑀸;

𑀓𑀼𑀓𑁆𑀓𑀼𑀝𑀫𑁆𑀳𑀺 𑀧𑀼𑀭𑁂 𑀚𑀸𑀢𑀸, 𑀳𑀺𑀫𑀯𑀦𑁆𑀢𑀲𑁆𑀲 𑀧𑀲𑁆𑀲𑀢𑁄.

‘‘𑀓𑀧𑁆𑀧𑀺𑀦𑁄 𑀦𑀸𑀫𑀳𑀁 𑀆𑀲𑀺𑀁, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀲𑁂𑀲𑀸𑀫𑀘𑁆𑀘𑀓𑀼𑀮𑁂 𑀚𑀸𑀢𑀸, 𑀫𑀫𑁂𑀯 𑀧𑀭𑀺𑀯𑀸𑀭𑀬𑀼𑀁.

‘‘𑀫𑀳𑀸𑀭𑀚𑁆𑀚𑀲𑀼𑀔𑀁 𑀧𑀢𑁆𑀢𑁄, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀫𑀸;

𑀯𑀸𑀡𑀺𑀚𑁂𑀳𑀺 𑀲𑀫𑀓𑁆𑀔𑀸𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑀫𑀳𑀁 𑀲𑀼𑀡𑀺𑀁.

‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀅𑀲𑀫𑁄 𑀏𑀓𑀧𑀼𑀕𑁆𑀕𑀮𑁄;

𑀲𑁄 𑀧𑀓𑀸𑀲𑁂𑀢𑀺 𑀲𑀤𑁆𑀥𑀫𑁆𑀫𑀁, 𑀅𑀫𑀢𑀁 𑀲𑀼𑀔𑀫𑀼𑀢𑁆𑀢𑀫𑀁.

‘‘𑀲𑀼𑀬𑀼𑀢𑁆𑀢𑀸 𑀢𑀲𑁆𑀲 𑀲𑀺𑀲𑁆𑀲𑀸 𑀘, 𑀲𑀼𑀫𑀼𑀢𑁆𑀢𑀸 𑀘 𑀅𑀦𑀸𑀲𑀯𑀸;

𑀲𑀼𑀢𑁆𑀯𑀸 𑀦𑁂𑀲𑀁 𑀲𑀼𑀯𑀘𑀦𑀁, 𑀲𑀓𑁆𑀓𑀭𑀺𑀢𑁆𑀯𑀸𑀦 𑀯𑀸𑀡𑀺𑀚𑁂.

‘‘𑀧𑀳𑀸𑀬 𑀭𑀚𑁆𑀚𑀁 𑀲𑀸𑀫𑀘𑁆𑀘𑁄, 𑀦𑀺𑀓𑁆𑀔𑀫𑀺𑀁 𑀩𑀼𑀤𑁆𑀥𑀫𑀸𑀫𑀓𑁄;

𑀦𑀤𑀺𑀁 𑀤𑀺𑀲𑁆𑀯𑀸 𑀫𑀳𑀸𑀘𑀦𑁆𑀤𑀁, 𑀧𑀽𑀭𑀺𑀢𑀁 𑀲𑀫𑀢𑀺𑀢𑁆𑀢𑀺𑀓𑀁.

‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀮𑀫𑁆𑀩𑀁, 𑀤𑀼𑀢𑁆𑀢𑀭𑀁 𑀲𑀻𑀖𑀯𑀸𑀳𑀺𑀦𑀺𑀁;

𑀕𑀼𑀡𑀁 𑀲𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲, 𑀲𑁄𑀢𑁆𑀣𑀺𑀦𑀸 𑀲𑀫𑀢𑀺𑀓𑁆𑀓𑀫𑀺𑀁.

‘‘𑀪𑀯𑀲𑁄𑀢𑀁 𑀲𑀘𑁂 𑀩𑀼𑀤𑁆𑀥𑁄, 𑀢𑀺𑀡𑁆𑀡𑁄 𑀮𑁄𑀓𑀦𑁆𑀢𑀕𑀽 𑀯𑀺𑀤𑀽;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀕𑀫𑀦𑀁 𑀫𑁂 𑀲𑀫𑀺𑀚𑁆𑀛𑀢𑀼.

‘‘𑀬𑀤𑀺 ¶ 𑀲𑀦𑁆𑀢𑀺𑀕𑀫𑁄 𑀫𑀕𑁆𑀕𑁄, 𑀫𑁄𑀓𑁆𑀔𑁄 𑀘𑀘𑁆𑀘𑀦𑁆𑀢𑀺𑀓𑀁 𑀲𑀼𑀔𑀁;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀕𑀫𑀦𑀁 𑀫𑁂 𑀲𑀫𑀺𑀚𑁆𑀛𑀢𑀼.

‘‘𑀲𑀗𑁆𑀖𑁄 ¶ 𑀘𑁂 𑀢𑀺𑀡𑁆𑀡𑀓𑀦𑁆𑀢𑀸𑀭𑁄, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁄 𑀅𑀦𑀼𑀢𑁆𑀢𑀭𑁄;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀕𑀫𑀦𑀁 𑀫𑁂 𑀲𑀫𑀺𑀚𑁆𑀛𑀢𑀼.

‘‘𑀲𑀳 𑀓𑀢𑁂 𑀲𑀘𑁆𑀘𑀯𑀭𑁂, 𑀫𑀕𑁆𑀕𑀸 𑀅𑀧𑀕𑀢𑀁 𑀚𑀮𑀁;

𑀢𑀢𑁄 𑀲𑀼𑀔𑁂𑀦 𑀉𑀢𑁆𑀢𑀺𑀡𑁆𑀡𑁄, 𑀦𑀤𑀻𑀢𑀻𑀭𑁂 𑀫𑀦𑁄𑀭𑀫𑁂.

‘‘𑀦𑀺𑀲𑀺𑀦𑁆𑀦𑀁 𑀅𑀤𑁆𑀤𑀲𑀁 𑀩𑀼𑀤𑁆𑀥𑀁, 𑀉𑀤𑁂𑀦𑁆𑀢𑀁𑀯 𑀧𑀪𑀗𑁆𑀓𑀭𑀁;

𑀚𑀮𑀦𑁆𑀢𑀁 𑀳𑁂𑀫𑀲𑁂𑀮𑀁𑀯, 𑀤𑀻𑀧𑀭𑀼𑀓𑁆𑀔𑀁𑀯 𑀚𑁄𑀢𑀺𑀢𑀁.

‘‘𑀲𑀲𑀺𑀁𑀯 𑀢𑀸𑀭𑀸𑀲𑀳𑀺𑀢𑀁, 𑀲𑀸𑀯𑀓𑁂𑀳𑀺 𑀧𑀼𑀭𑀓𑁆𑀔𑀢𑀁;

𑀯𑀸𑀲𑀯𑀁 𑀯𑀺𑀬 𑀯𑀲𑁆𑀲𑀦𑁆𑀢𑀁, 𑀤𑁂𑀲𑀦𑀸𑀚𑀮𑀤𑀦𑁆𑀢𑀭𑀁.

‘‘𑀯𑀦𑁆𑀤𑀺𑀢𑁆𑀯𑀸𑀦 𑀲𑀳𑀸𑀫𑀘𑁆𑀘𑁄, 𑀏𑀓𑀫𑀦𑁆𑀢𑀫𑀼𑀧𑀸𑀯𑀺𑀲𑀺𑀁;

𑀢𑀢𑁄 𑀦𑁄 𑀆𑀲𑀬𑀁 𑀜𑀢𑁆𑀯𑀸, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺.

‘‘𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀯𑀺𑀫𑀮𑀁, 𑀅𑀯𑁄𑀘𑀼𑀫𑁆𑀳 𑀫𑀬𑀁 𑀚𑀺𑀦𑀁;

𑀧𑀩𑁆𑀩𑀸𑀚𑁂𑀳𑀺 𑀫𑀳𑀸𑀯𑀻𑀭, 𑀦𑀺𑀩𑁆𑀩𑀺𑀦𑁆𑀤𑀸𑀫𑁆𑀳 𑀫𑀬𑀁 𑀪𑀯𑁂.

‘‘𑀲𑁆𑀯𑀓𑁆𑀔𑀸𑀢𑁄 𑀪𑀺𑀓𑁆𑀔𑀯𑁂 𑀥𑀫𑁆𑀫𑁄, 𑀤𑀼𑀓𑁆𑀔𑀦𑁆𑀢𑀓𑀭𑀡𑀸𑀬 𑀯𑁄;

𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀇𑀘𑁆𑀘𑀸𑀳 𑀫𑀼𑀦𑀺𑀲𑀢𑁆𑀢𑀫𑁄.

‘‘𑀲𑀳 𑀯𑀸𑀘𑀸𑀬 𑀲𑀩𑁆𑀩𑁂𑀧𑀺, 𑀪𑀺𑀓𑁆𑀔𑀼𑀯𑁂𑀲𑀥𑀭𑀸 𑀫𑀬𑀁;

𑀅𑀳𑀼𑀫𑁆𑀳 𑀉𑀧𑀲𑀫𑁆𑀧𑀦𑁆𑀦𑀸, 𑀲𑁄𑀢𑀸𑀧𑀦𑁆𑀦𑀸 𑀘 𑀲𑀸𑀲𑀦𑁂.

‘‘𑀢𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸, 𑀅𑀦𑀼𑀲𑀸𑀲𑀺 𑀯𑀺𑀦𑀸𑀬𑀓𑁄;

𑀅𑀦𑀼𑀲𑀺𑀝𑁆𑀞𑁄 𑀚𑀺𑀦𑁂𑀦𑀸𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀢𑀢𑁄 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀅𑀦𑀼𑀲𑀸𑀲𑀺𑀫𑀳𑀁 𑀢𑀤𑀸;

𑀫𑀫𑀸𑀦𑀼𑀲𑀸𑀲𑀦𑀓𑀭𑀸, 𑀢𑁂𑀧𑀺 𑀆𑀲𑀼𑀁 𑀅𑀦𑀸𑀲𑀯𑀸.

‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀕𑁆𑀕𑁄, 𑀓𑀧𑁆𑀧𑀺𑀦𑁄𑀢𑀺 𑀫𑀳𑀸𑀚𑀦𑁂.

‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀧𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀫𑀫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 ¶ 𑀧𑀢𑁆𑀯𑀸 𑀧𑀦 𑀢𑁂 𑀲𑀩𑁆𑀩𑁂𑀯 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 𑀢𑁂 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀆𑀳. 𑀲𑀸 𑀏𑀯 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀆𑀤𑀸𑀬 𑀆𑀓𑀸𑀲𑁂𑀦 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀢𑀲𑁆𑀲𑀦𑁆𑀢𑁂𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀺𑀦𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺? ‘‘𑀦, 𑀪𑀕𑀯𑀸, 𑀤𑁂𑀲𑁂𑀢𑀺 ¶ . 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀑𑀯𑀸𑀤𑀫𑀢𑁆𑀢𑀫𑁆𑀧𑀺 𑀦 𑀤𑁂𑀢𑀻’’𑀢𑀺. 𑀲𑀢𑁆𑀣𑀸 ¶ 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀓𑀧𑁆𑀧𑀺𑀦, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀑𑀯𑀸𑀤𑀫𑀢𑁆𑀢𑀫𑁆𑀧𑀺 𑀦 𑀤𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀫𑀸 𑀏𑀯𑀁 𑀓𑀭𑀺, 𑀅𑀚𑁆𑀚 𑀧𑀝𑁆𑀞𑀸𑀬 𑀉𑀧𑀕𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑁄𑀯𑀸𑀤𑁂𑀦𑁂𑀯 𑀲𑀫𑀡𑀲𑀳𑀲𑁆𑀲𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀦𑀁 𑀲𑀢𑁆𑀣𑀸 𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀣𑁂𑀭𑁂 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀣𑁂𑀭𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑁄 𑁋

𑁫𑁪𑁭.

‘‘𑀅𑀦𑀸𑀕𑀢𑀁 𑀬𑁄 𑀧𑀝𑀺𑀓𑀘𑁆𑀘 𑀧𑀲𑁆𑀲𑀢𑀺, 𑀳𑀺𑀢𑀜𑁆𑀘 𑀅𑀢𑁆𑀣𑀁 𑀅𑀳𑀺𑀢𑀜𑁆𑀘 𑀢𑀁 𑀤𑁆𑀯𑀬𑀁;

𑀯𑀺𑀤𑁆𑀤𑁂𑀲𑀺𑀦𑁄 𑀢𑀲𑁆𑀲 𑀳𑀺𑀢𑁂𑀲𑀺𑀦𑁄 𑀯𑀸, 𑀭𑀦𑁆𑀥𑀁 𑀦 𑀧𑀲𑁆𑀲𑀦𑁆𑀢𑀺 𑀲𑀫𑁂𑀓𑁆𑀔𑀫𑀸𑀦𑀸.

𑁫𑁪𑁮.

‘‘𑀆𑀦𑀸𑀧𑀸𑀦𑀲𑀢𑀻 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑁫𑁪𑁯.

‘‘𑀑𑀤𑀸𑀢𑀁 𑀯𑀢 𑀫𑁂 𑀘𑀺𑀢𑁆𑀢𑀁, 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀁;

𑀦𑀺𑀩𑁆𑀩𑀺𑀤𑁆𑀥𑀁 𑀧𑀕𑁆𑀕𑀳𑀻𑀢𑀜𑁆𑀘, 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸.

𑁫𑁫𑁦.

‘‘𑀚𑀻𑀯𑀢𑁂 𑀯𑀸𑀧𑀺 𑀲𑀧𑁆𑀧𑀜𑁆𑀜𑁄, 𑀅𑀧𑀺 𑀯𑀺𑀢𑁆𑀢𑀧𑀭𑀺𑀓𑁆𑀔𑀬𑁄;

𑀧𑀜𑁆𑀜𑀸𑀬 𑀘 𑀅𑀮𑀸𑀪𑁂𑀦, 𑀯𑀺𑀢𑁆𑀢𑀯𑀸𑀧𑀺 𑀦 𑀚𑀻𑀯𑀢𑀺.

𑁫𑁫𑁧.

‘‘𑀧𑀜𑁆𑀜𑀸 𑀲𑀼𑀢𑀯𑀺𑀦𑀺𑀘𑁆𑀙𑀺𑀦𑀻, 𑀧𑀜𑁆𑀜𑀸 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀤𑁆𑀥𑀦𑀻;

𑀧𑀜𑁆𑀜𑀸𑀲𑀳𑀺𑀢𑁄 𑀦𑀭𑁄 𑀇𑀥, 𑀅𑀧𑀺 𑀤𑀼𑀓𑁆𑀔𑁂𑀲𑀼 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀺.

𑁫𑁫𑁨.

‘‘𑀦𑀸𑀬𑀁 ¶ 𑀅𑀚𑁆𑀚𑀢𑀦𑁄 𑀥𑀫𑁆𑀫𑁄, 𑀦𑀘𑁆𑀙𑁂𑀭𑁄 𑀦𑀧𑀺 𑀅𑀩𑁆𑀪𑀼𑀢𑁄;

𑀬𑀢𑁆𑀣 𑀚𑀸𑀬𑁂𑀣 𑀫𑀻𑀬𑁂𑀣, 𑀢𑀢𑁆𑀣 𑀓𑀺𑀁 𑀯𑀺𑀬 𑀅𑀩𑁆𑀪𑀼𑀢𑀁.

𑁫𑁫𑁩.

‘‘𑀅𑀦𑀦𑁆𑀢𑀭𑀜𑁆𑀳𑀺 𑀚𑀸𑀢𑀲𑁆𑀲, 𑀚𑀻𑀯𑀺𑀢𑀸 𑀫𑀭𑀡𑀁 𑀥𑀼𑀯𑀁;

𑀚𑀸𑀢𑀸 𑀚𑀸𑀢𑀸 𑀫𑀭𑀦𑁆𑀢𑀻𑀥, 𑀏𑀯𑀁 𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄.

𑁫𑁫𑁪.

‘‘𑀦 𑀳𑁂𑀢𑀤𑀢𑁆𑀣𑀸𑀬 𑀫𑀢𑀲𑁆𑀲 𑀳𑁄𑀢𑀺, 𑀬𑀁 𑀚𑀻𑀯𑀺𑀢𑀢𑁆𑀣𑀁 𑀧𑀭𑀧𑁄𑀭𑀺𑀲𑀸𑀦𑀁;

𑀫𑀢𑀫𑁆𑀳𑀺 𑀭𑀼𑀡𑁆𑀡𑀁 𑀦 𑀬𑀲𑁄 𑀦 𑀮𑁄𑀓𑁆𑀬𑀁, 𑀦 𑀯𑀡𑁆𑀡𑀺𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺.

𑁫𑁫𑁫.

‘‘𑀘𑀓𑁆𑀔𑀼𑀁 𑀲𑀭𑀻𑀭𑀁 𑀉𑀧𑀳𑀦𑁆𑀢𑀺 𑀢𑁂𑀦, 𑀦𑀺𑀳𑀻𑀬𑀢𑀺 𑀯𑀡𑁆𑀡𑀩𑀮𑀁 𑀫𑀢𑀻 𑀘;

𑀆𑀦𑀦𑁆𑀤𑀺𑀦𑁄 𑀢𑀲𑁆𑀲 𑀤𑀺𑀲𑀸 𑀪𑀯𑀦𑁆𑀢𑀺, 𑀳𑀺𑀢𑁂𑀲𑀺𑀦𑁄 𑀦𑀸𑀲𑁆𑀲 𑀲𑀼𑀔𑀻 𑀪𑀯𑀦𑁆𑀢𑀺.

𑁫𑁫𑁬.

‘‘𑀢𑀲𑁆𑀫𑀸 𑀳𑀺 𑀇𑀘𑁆𑀙𑁂𑀬𑁆𑀬 𑀓𑀼𑀮𑁂 𑀯𑀲𑀦𑁆𑀢𑁂, 𑀫𑁂𑀥𑀸𑀯𑀺𑀦𑁄 𑀘𑁂𑀯 𑀩𑀳𑀼𑀲𑁆𑀲𑀼𑀢𑁂 𑀘;

𑀬𑁂𑀲𑀜𑁆𑀳𑀺 𑀧𑀜𑁆𑀜𑀸𑀯𑀺𑀪𑀯𑁂𑀦 𑀓𑀺𑀘𑁆𑀘𑀁, 𑀢𑀭𑀦𑁆𑀢𑀺 𑀦𑀸𑀯𑀸𑀬 𑀦𑀤𑀺𑀁𑀯 𑀧𑀼𑀡𑁆𑀡’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ ¶ 𑀅𑀦𑀸𑀕𑀢𑀦𑁆𑀢𑀺 𑀦 𑀆𑀕𑀢𑀁, 𑀅𑀯𑀺𑀦𑁆𑀤𑀦𑁆𑀢𑀺, 𑀅𑀢𑁆𑀣𑁄. 𑀧𑀝𑀺𑀓𑀘𑁆𑀘𑀸𑀢𑀺 𑀧𑀼𑀢𑁂𑀢𑀭𑀁𑀬𑁂𑀯. 𑀧𑀲𑁆𑀲𑀢𑀻𑀢𑀺 𑀑𑀮𑁄𑀓𑁂𑀢𑀺. 𑀅𑀢𑁆𑀣𑀦𑁆𑀢𑀺 𑀓𑀺𑀘𑁆𑀘𑀁. 𑀢𑀁 𑀤𑁆𑀯𑀬𑀦𑁆𑀢𑀺 𑀳𑀺𑀢𑀸𑀳𑀺𑀢𑀁. 𑀯𑀺𑀤𑁆𑀤𑁂𑀲𑀺𑀦𑁄𑀢𑀺 𑀅𑀫𑀺𑀢𑁆𑀢𑀸. 𑀳𑀺𑀢𑁂𑀲𑀺𑀦𑁄𑀢𑀺 𑀫𑀺𑀢𑁆𑀢𑀸. 𑀭𑀦𑁆𑀥𑀦𑁆𑀢𑀺 𑀙𑀺𑀤𑁆𑀤𑀁. 𑀲𑀫𑁂𑀓𑁆𑀔𑀫𑀸𑀦𑀸𑀢𑀺 𑀕𑀯𑁂𑀲𑀦𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀳𑀺𑀢𑀸𑀯𑀳𑀁 𑀅𑀳𑀺𑀢𑀸𑀯𑀳𑀁 𑀢𑀤𑀼𑀪𑀬𑀜𑁆𑀘 𑀅𑀢𑁆𑀣𑀁 𑀓𑀺𑀘𑁆𑀘𑀁 𑀅𑀦𑀸𑀕𑀢𑀁 𑀅𑀲𑀫𑁆𑀧𑀢𑁆𑀢𑀁 𑀧𑀼𑀭𑁂𑀢𑀭𑀁𑀬𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀳𑀁 𑀯𑀺𑀬 𑀧𑀲𑁆𑀲𑀢𑀺 𑀯𑀻𑀫𑀁𑀲𑀢𑀺 𑀯𑀺𑀘𑀸𑀭𑁂𑀢𑀺, 𑀢𑀲𑁆𑀲 𑀅𑀫𑀺𑀢𑁆𑀢𑀸 𑀯𑀸 𑀅𑀳𑀺𑀢𑀚𑁆𑀛𑀸𑀲𑀬𑁂𑀦 𑀫𑀺𑀢𑁆𑀢𑀸 𑀯𑀸 𑀳𑀺𑀢𑀚𑁆𑀛𑀸𑀲𑀬𑁂𑀦 𑀭𑀦𑁆𑀥𑀁 𑀕𑀯𑁂𑀲𑀦𑁆𑀢𑀸 𑀦 𑀧𑀲𑁆𑀲𑀦𑁆𑀢𑀺, 𑀢𑀸𑀤𑀺𑀲𑁄 𑀧𑀜𑁆𑀜𑀯𑀸 𑀧𑀼𑀕𑁆𑀕𑀮𑁄 𑀅𑀘𑁆𑀙𑀺𑀤𑁆𑀤𑀯𑀼𑀢𑁆𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀢𑀣𑀸𑀭𑀽𑀧𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀇𑀤𑀸𑀦𑀺 𑀆𑀦𑀸𑀧𑀸𑀦𑀲𑀢𑀺𑀪𑀸𑀯𑀦𑀸𑀬 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀢𑀸𑀦𑀺 𑀬𑁄𑀚𑁂𑀢𑀼𑀁 ‘‘𑀆𑀦𑀸𑀧𑀸𑀦𑀲𑀢𑀻 𑀬𑀲𑁆𑀲𑀸’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀆𑀦𑀦𑁆𑀢𑀺 ¶ 𑀅𑀲𑁆𑀲𑀸𑀲𑁄. 𑀅𑀧𑀸𑀦𑀦𑁆𑀢𑀺 𑀧𑀲𑁆𑀲𑀸𑀲𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀢𑀺 𑀆𑀦𑀸𑀧𑀸𑀦𑀲𑀢𑀺. 𑀲𑀢𑀺𑀲𑀻𑀲𑁂𑀦 𑀘𑁂𑀢𑁆𑀣 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀪𑀸𑀯𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀲𑁆𑀲𑀸𑀢𑀺, 𑀬𑀲𑁆𑀲 𑀬𑁄𑀕𑀺𑀦𑁄. 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸𑀢𑀺 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑁄𑀴𑀲𑀦𑁆𑀦𑀜𑁆𑀘 𑀆𑀓𑀸𑀭𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀲𑀩𑁆𑀩𑀲𑁄 𑀧𑀼𑀡𑁆𑀡𑀸 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀦𑀜𑁆𑀘 𑀧𑀸𑀭𑀺𑀧𑀽𑀭𑀺𑀬𑀸 𑀲𑀼𑀝𑁆𑀞𑀼 𑀪𑀸𑀯𑀺𑀢𑀸 𑀯𑀟𑁆𑀠𑀺𑀢𑀸. 𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸𑀢𑀺 ‘‘𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭) 𑀬𑀣𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀣𑀸 𑀅𑀦𑀼𑀧𑀼𑀩𑁆𑀩𑀁 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀘𑀺𑀢𑀸 𑀆𑀲𑁂𑀯𑀺𑀢𑀸 𑀪𑀸𑀯𑀺𑀢𑀸. 𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸𑀢𑀺 𑀲𑁄 𑀬𑁄𑀕𑀸𑀯𑀘𑀭𑁄 𑀬𑀣𑀸 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸 𑀯𑀺𑀫𑀼𑀢𑁆𑀢𑁄 𑀘𑀦𑁆𑀤𑁄 𑀘𑀦𑁆𑀤𑀸𑀮𑁄𑀓𑁂𑀦 𑀇𑀫𑀁 𑀑𑀓𑀸𑀲𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀏𑀯𑀁 𑀅𑀯𑀺𑀚𑁆𑀚𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄 𑀜𑀸𑀡𑀸𑀮𑁄𑀓𑁂𑀦 𑀅𑀢𑁆𑀢𑀲𑀦𑁆𑀢𑀸𑀦𑀧𑀢𑀺𑀢𑀁 𑀧𑀭𑀲𑀦𑁆𑀢𑀸𑀦𑀧𑀢𑀺𑀢𑀜𑁆𑀘 𑀲𑀗𑁆𑀔𑀸𑀭𑀮𑁄𑀓𑀁 𑀧𑀪𑀸𑀲𑁂𑀢𑀺 𑀧𑀓𑀸𑀲𑁂𑀢𑀺. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀆𑀦𑀸𑀧𑀸𑀦𑀲𑀢𑀺𑀪𑀸𑀯𑀦𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀅𑀢𑁆𑀢𑀸𑀦𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀪𑀸𑀯𑀦𑀸𑀪𑀺𑀬𑁄𑀕𑀲𑁆𑀲 𑀲𑀨𑀮𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀤𑀸𑀢𑀁 𑀯𑀢 𑀫𑁂 𑀘𑀺𑀢𑁆𑀢’’𑀦𑁆𑀢𑀺 𑀢𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀦𑀻𑀯𑀭𑀡𑀫𑀮𑀯𑀺𑀕𑀫𑀢𑁄 𑀑𑀤𑀸𑀢𑀁 𑀲𑀼𑀤𑁆𑀥𑀁 𑀯𑀢 𑀫𑀫 𑀘𑀺𑀢𑁆𑀢𑀁. 𑀬𑀣𑀸 𑀧𑀫𑀸𑀡𑀓𑀭𑀸 𑀭𑀸𑀕𑀸𑀤𑀬𑁄 𑀧𑀳𑀻𑀦𑀸, 𑀅𑀧𑁆𑀧𑀫𑀸𑀡𑀜𑁆𑀘 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀓𑁆𑀔𑀁 𑀓𑀢𑀁 𑀅𑀳𑁄𑀲𑀺, 𑀢𑀣𑀸 𑀪𑀸𑀯𑀺𑀢𑀢𑁆𑀢𑀸 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀁, 𑀢𑀢𑁄 𑀏𑀯 𑀘𑀢𑀼𑀲𑀘𑁆𑀘𑀁 𑀦𑀺𑀩𑁆𑀩𑀺𑀤𑁆𑀥𑀁 𑀧𑀝𑀺𑀯𑀺𑀚𑁆𑀛𑀺𑀢𑀁, 𑀲𑀓𑀮𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄 𑀧𑀕𑁆𑀕𑀳𑀺𑀢𑀜𑁆𑀘 𑀳𑀼𑀢𑁆𑀯𑀸 𑀤𑀼𑀓𑁆𑀔𑀸𑀤𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀤𑀺𑀓𑀸 𑀘 𑀤𑀺𑀲𑀸 𑀑𑀪𑀸𑀲𑀢𑁂 𑀢𑀢𑁆𑀣 𑀯𑀺𑀢𑀺𑀡𑁆𑀡𑀓𑀗𑁆𑀔𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀕𑀢𑀲𑀫𑁆𑀫𑁄𑀳𑀢𑁆𑀢𑀸 𑀘. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀬𑀣𑀸 𑀪𑀸𑀯𑀦𑀸𑀫𑀬𑀸 𑀧𑀜𑁆𑀜𑀸 𑀘𑀺𑀢𑁆𑀢𑀫𑀮𑀯𑀺𑀲𑁄𑀥𑀦𑀸𑀤𑀺𑀦𑀸 𑀧𑀼𑀭𑀺𑀲𑀲𑁆𑀲 𑀩𑀳𑀼𑀧𑀓𑀸𑀭𑀸, 𑀏𑀯𑀁 𑀇𑀢𑀭𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀚𑀻𑀯𑀢𑁂 𑀯𑀸𑀧𑀺 𑀲𑀧𑁆𑀧𑀜𑁆𑀜𑁄’’𑀢𑀺 𑀘𑀢𑀼𑀢𑁆𑀣𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀭𑀺𑀓𑁆𑀔𑀻𑀡𑀥𑀦𑁄𑀧𑀺 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀅𑀦𑀯𑀚𑁆𑀚𑀸𑀬 𑀚𑀻𑀯𑀺𑀓𑀸𑀬 𑀚𑀻𑀯𑀢𑀺𑀬𑁂𑀯. 𑀢𑀲𑁆𑀲 𑀳𑀺 𑀚𑀻𑀯𑀺𑀢𑀁 𑀚𑀻𑀯𑀺𑀢𑀁 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁩, 𑁨𑁪𑁬; 𑀲𑀼. 𑀦𑀺. 𑁧𑁮𑁪). 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑁄 𑀧𑀦 𑀧𑀜𑁆𑀜𑀸𑀬 𑀅𑀮𑀸𑀪𑁂𑀦 ¶ 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀅𑀢𑁆𑀣𑀁 ¶ 𑀯𑀺𑀭𑀸𑀥𑁂𑀦𑁆𑀢𑁄 𑀯𑀺𑀢𑁆𑀢𑀯𑀸𑀧𑀺 𑀦 𑀚𑀻𑀯𑀢𑀺, 𑀕𑀭𑀳𑀸𑀤𑀺𑀧𑁆𑀧𑀢𑁆𑀢𑀺𑀬𑀸 𑀚𑀻𑀯𑀦𑁆𑀢𑁄 𑀦𑀸𑀫 𑀦 𑀢𑀲𑁆𑀲 𑀳𑁄𑀢𑀺, 𑀅𑀦𑀼𑀧𑀸𑀬𑀜𑁆𑀜𑀼𑀢𑀸𑀬 𑀯𑀸 𑀬𑀣𑀸𑀥𑀺𑀕𑀢𑀁 𑀥𑀦𑀁 𑀦𑀸𑀲𑁂𑀦𑁆𑀢𑁄 𑀚𑀻𑀯𑀺𑀢𑀫𑁆𑀧𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀧𑀺 𑀢𑀼𑀫𑁆𑀳𑁂𑀳𑀺 𑀅𑀧𑁆𑀧𑀫𑀢𑁆𑀢𑁂𑀳𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀧𑀜𑁆𑀜𑀸𑀬 𑀆𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀜𑀸 𑀲𑀼𑀢𑀯𑀺𑀦𑀺𑀘𑁆𑀙𑀺𑀦𑀻’’𑀢𑀺 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀜𑁆𑀜𑀸 𑀲𑀼𑀢𑀯𑀺𑀦𑀺𑀘𑁆𑀙𑀺𑀦𑀻𑀢𑀺 𑀧𑀜𑁆𑀜𑀸 𑀦𑀸𑀫𑁂𑀲𑀸 𑀲𑀼𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑀺𑀦𑀻, 𑀬𑀣𑀸𑀲𑀼𑀢𑁂 𑀲𑁄𑀢𑀧𑀣𑀫𑀸𑀕𑀢𑁂 𑀅𑀢𑁆𑀣𑁂 ‘‘𑀅𑀬𑀁 𑀅𑀓𑀼𑀲𑀮𑁄, 𑀅𑀬𑀁 𑀓𑀼𑀲𑀮𑁄, 𑀅𑀬𑀁 𑀲𑀸𑀯𑀚𑁆𑀚𑁄, 𑀅𑀬𑀁 𑀅𑀦𑀯𑀚𑁆𑀚𑁄’’𑀢𑀺𑀆𑀤𑀺𑀦𑀸 𑀯𑀺𑀦𑀺𑀘𑁆𑀙𑀬𑀚𑀦𑀦𑀻. 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀤𑁆𑀥𑀦𑀻𑀢𑀺 𑀓𑀺𑀢𑁆𑀢𑀺𑀬𑀸 𑀲𑀫𑁆𑀫𑀼𑀔𑀸 𑀧𑀲𑀁𑀲𑀸𑀬 𑀲𑀺𑀮𑁄𑀓𑀲𑁆𑀲 𑀧𑀢𑁆𑀣𑀝𑀬𑀲𑀪𑀸𑀯𑀲𑁆𑀲 𑀯𑀤𑁆𑀥𑀦𑀻, 𑀧𑀜𑁆𑀜𑀯𑀢𑁄𑀬𑁂𑀯 𑀳𑀺 𑀓𑀺𑀢𑁆𑀢𑀺𑀆𑀤𑀬𑁄 𑀯𑀺𑀜𑁆𑀜𑀽𑀦𑀁 𑀧𑀸𑀲𑀁𑀲𑀪𑀸𑀯𑀢𑁄. 𑀧𑀜𑁆𑀜𑀸𑀲𑀳𑀺𑀢𑁄𑀢𑀺 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀬, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘 𑀬𑀼𑀢𑁆𑀢𑁄. 𑀅𑀧𑀺 𑀤𑀼𑀓𑁆𑀔𑁂𑀲𑀼 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀻𑀢𑀺 𑀏𑀓𑀦𑁆𑀢𑀤𑀼𑀓𑁆𑀔𑀲𑀪𑀸𑀯𑁂𑀲𑀼 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁂𑀦 𑀦𑀺𑀭𑀸𑀫𑀺𑀲𑀸𑀦𑀺𑀧𑀺 𑀲𑀼𑀔𑀸𑀦𑀺 𑀧𑀝𑀺𑀮𑀪𑀢𑀺.

𑀇𑀤𑀸𑀦𑀺 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀻𑀭𑀪𑀸𑀯𑀸𑀯𑀳𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 ‘‘𑀦𑀸𑀬𑀁 𑀅𑀚𑁆𑀚𑀢𑀦𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀲𑀢𑁆𑀢𑀸𑀦𑀁 𑀚𑀸𑀬𑀦𑀫𑀻𑀬𑀦𑀲𑀪𑀸𑀯𑁄, 𑀅𑀬𑀁 𑀥𑀫𑁆𑀫𑁄 𑀅𑀚𑁆𑀚𑀢𑀦𑁄 𑀅𑀥𑀼𑀦𑀸𑀕𑀢𑁄 𑀦 𑀳𑁄𑀢𑀺, 𑀅𑀪𑀺𑀡𑁆𑀳𑀧𑀯𑀢𑁆𑀢𑀺𑀓𑀢𑀸𑀬 𑀦 𑀅𑀘𑁆𑀙𑀭𑀺𑀬𑁄, 𑀅𑀩𑁆𑀪𑀼𑀢𑀧𑀼𑀩𑁆𑀩𑀢𑀸𑀪𑀸𑀯𑀢𑁄 𑀦𑀸𑀧𑀺 𑀅𑀩𑁆𑀪𑀼𑀢𑁄. 𑀢𑀲𑁆𑀫𑀸 𑀬𑀢𑁆𑀣 𑀚𑀸𑀬𑁂𑀣 𑀫𑀻𑀬𑁂𑀣, 𑀬𑀲𑁆𑀫𑀺𑀁 𑀮𑁄𑀓𑁂 𑀲𑀢𑁆𑀢𑁄 𑀚𑀸𑀬𑁂𑀬𑁆𑀬, 𑀲𑁄 𑀏𑀓𑀁𑀲𑁂𑀦 𑀫𑀻𑀬𑁂𑀣, 𑀢𑀢𑁆𑀣 𑀓𑀺𑀁 𑀯𑀺𑀬? 𑀓𑀺𑀁 𑀦𑀸𑀫 𑀅𑀩𑁆𑀪𑀼𑀢𑀁 𑀲𑀺𑀬𑀸? 𑀲𑀪𑀸𑀯𑀺𑀓𑀢𑁆𑀢𑀸 𑀫𑀭𑀡𑀲𑁆𑀲 𑁋 𑀦 𑀳𑀺 𑀔𑀡𑀺𑀓𑀫𑀭𑀡𑀲𑁆𑀲 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀅𑀢𑁆𑀣𑀺. 𑀬𑀢𑁄 𑀅𑀦𑀦𑁆𑀢𑀭𑀜𑁆𑀳𑀺 𑀚𑀸𑀢𑀲𑁆𑀲, 𑀚𑀻𑀯𑀺𑀢𑀸 𑀫𑀭𑀡𑀁 𑀥𑀼𑀯𑀁 𑀚𑀸𑀢𑀲𑁆𑀲 𑀚𑀸𑀢𑀺𑀲𑀫𑀦𑀦𑁆𑀢𑀭𑀁 𑀚𑀻𑀯𑀺𑀢𑀢𑁄 𑀫𑀭𑀡𑀁 𑀏𑀓𑀦𑁆𑀢𑀺𑀓𑀁 𑀉𑀧𑁆𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀁 𑀏𑀓𑀁𑀲𑁂𑀦 𑀪𑀺𑀚𑁆𑀚𑀦𑀢𑁄. 𑀬𑁄 𑀧𑀦𑁂𑀢𑁆𑀣 𑀚𑀻𑀯𑀢𑀻𑀢𑀺 𑀮𑁄𑀓𑀯𑁄𑀳𑀸𑀭𑁄, 𑀲𑁄 𑀢𑀤𑀼𑀧𑀸𑀤𑀸𑀦𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀸𑀬𑀢𑁆𑀢𑀢𑀸𑀬 𑀅𑀦𑁂𑀓𑀦𑁆𑀢𑀺𑀓𑁄, 𑀬𑀲𑁆𑀫𑀸 𑀏𑀢𑀤𑁂𑀯𑀁, 𑀢𑀲𑁆𑀫𑀸 𑀚𑀸𑀢𑀸 𑀫𑀭𑀦𑁆𑀢𑀻𑀥, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄𑀢𑀺 𑀅𑀬𑀁 𑀲𑀢𑁆𑀢𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀚𑀸𑀢𑀸𑀦𑀁 𑀫𑀭𑀡𑀦𑁆𑀢𑀺 𑀚𑀸𑀢𑀺𑀬𑀸 𑀫𑀭𑀡𑀸𑀦𑀼𑀩𑀦𑁆𑀥𑀦𑀢𑀁 𑀆𑀳.

𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀢𑀸𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀓𑀸𑀘𑀺 𑀲𑁄𑀓𑀩𑀦𑁆𑀥𑀺𑀢𑀘𑀺𑀢𑁆𑀢𑀸𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀸𑀲𑀁 𑀲𑁄𑀓𑀯𑀺𑀦𑁄𑀤𑀦𑀁 𑀓𑀸𑀢𑀼𑀁 ‘‘𑀦 𑀳𑁂𑀢𑀤𑀢𑁆𑀣𑀸𑀬𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀳𑁂𑀢𑀤𑀢𑁆𑀣𑀸𑀬 𑀫𑀢𑀲𑁆𑀲 𑀳𑁄𑀢𑀻𑀢𑀺 𑀬𑀁 𑀫𑀢𑀲𑁆𑀲 ¶ 𑀚𑀻𑀯𑀺𑀢𑀢𑁆𑀣𑀁 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀧𑀭𑀧𑁄𑀭𑀺𑀲𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀭𑀼𑀡𑁆𑀡𑀁, 𑀏𑀢𑀁 𑀢𑀲𑁆𑀲 𑀫𑀢𑀲𑁆𑀲 𑀲𑀢𑁆𑀢𑀲𑁆𑀲 𑀚𑀻𑀯𑀺𑀢𑀢𑁆𑀣𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀓𑀲𑁆𑀲𑀘𑀺𑀧𑀺 𑀅𑀢𑁆𑀣𑀸𑀬 𑀦 𑀳𑁄𑀢𑀺, 𑀬𑁂 𑀧𑀦 𑀭𑀼𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀫𑀢𑀫𑁆𑀳𑀺 𑀫𑀢𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀁 𑀭𑀼𑀡𑁆𑀡𑀁, 𑀦 𑀬𑀲𑁄 𑀦 𑀮𑁄𑀓𑁆𑀬𑀁 𑀬𑀲𑀸𑀯𑀳𑀁 𑀯𑀺𑀲𑀼𑀤𑁆𑀥𑀸𑀯𑀳𑀜𑁆𑀘 𑀦 𑀳𑁄𑀢𑀺 ¶ . 𑀦 𑀯𑀡𑁆𑀡𑀺𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀻𑀢𑀺 𑀯𑀺𑀜𑁆𑀜𑀼𑀧𑁆𑀧𑀲𑀝𑁆𑀞𑀫𑁆𑀧𑀺 𑀦 𑀳𑁄𑀢𑀺, 𑀅𑀣 𑀔𑁄 𑀯𑀺𑀜𑁆𑀜𑀼𑀕𑀭𑀳𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀦 𑀓𑁂𑀯𑀮𑀫𑁂𑀢𑁂𑀯 𑀬𑁂 𑀭𑀼𑀤𑀢𑁄 𑀆𑀤𑀻𑀦𑀯𑀸, 𑀅𑀣 𑀔𑁄 𑀇𑀫𑁂𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀁 𑀲𑀭𑀻𑀭𑀁 𑀉𑀧𑀳𑀦𑁆𑀢𑀻’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀢𑀢𑁄 𑀧𑀭𑀁 𑀲𑁄𑀓𑀸𑀤𑀺𑀅𑀦𑀢𑁆𑀣𑀧𑀝𑀺𑀩𑀸𑀳𑀦𑀢𑁆𑀣𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀧𑀬𑀺𑀭𑀼𑀧𑀸𑀲𑀦𑀸𑀬𑀁 𑀢𑀸 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀭𑀼𑀡𑁆𑀡𑀁 𑀭𑀼𑀤𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀓𑁆𑀔𑀼𑀁 𑀲𑀭𑀻𑀭𑀜𑁆𑀘 𑀉𑀧𑀳𑀦𑁆𑀢𑀺 𑀯𑀺𑀩𑀸𑀥𑀢𑀺, 𑀢𑁂𑀦 𑀭𑀼𑀡𑁆𑀡𑁂𑀦 𑀯𑀡𑁆𑀡𑁄 𑀩𑀮𑀁 𑀫𑀢𑀺 𑀘 𑀦𑀺𑀳𑀻𑀬𑀢𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀲 𑀭𑀼𑀤𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀲𑀸 𑀲𑀧𑀢𑁆𑀢𑀸 𑀆𑀦𑀦𑁆𑀤𑀺𑀦𑁄 𑀧𑀫𑁄𑀤𑀯𑀦𑁆𑀢𑁄 𑀧𑀻𑀢𑀺𑀯𑀦𑁆𑀢𑁄 𑀪𑀯𑀦𑁆𑀢𑀺. 𑀳𑀺𑀢𑁂𑀲𑀺𑀦𑁄 𑀫𑀺𑀢𑁆𑀢𑀸 𑀤𑀼𑀓𑁆𑀔𑀻 𑀤𑀼𑀓𑁆𑀔𑀺𑀢𑀸 𑀪𑀯𑀦𑁆𑀢𑀺 𑀢𑀲𑁆𑀫𑀸 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀩𑀸𑀳𑀼𑀲𑀘𑁆𑀘𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀩𑀳𑀼𑀲𑁆𑀲𑀼𑀢𑁂, 𑀅𑀢𑁆𑀢𑀦𑁄 𑀓𑀼𑀮𑁂 𑀯𑀲𑀦𑁆𑀢𑁂 𑀇𑀘𑁆𑀙𑁂𑀬𑁆𑀬 𑀧𑀸𑀝𑀺𑀓𑀗𑁆𑀔𑁂𑀬𑁆𑀬 𑀓𑀼𑀮𑀽𑀧𑀓𑁂 𑀓𑀭𑁂𑀬𑁆𑀬. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀫𑁂𑀥𑀸𑀯𑀻𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀧𑀜𑁆𑀜𑀸𑀯𑀺𑀪𑀯𑁂𑀦 𑀧𑀜𑁆𑀜𑀸𑀩𑀮𑁂𑀦 𑀬𑀣𑀸 𑀫𑀳𑁄𑀖𑀲𑁆𑀲 𑀧𑀼𑀡𑁆𑀡𑀁 𑀦𑀤𑀺𑀁 𑀦𑀸𑀯𑀸𑀬 𑀢𑀭𑀦𑁆𑀢𑀺, 𑀏𑀯𑀁 𑀓𑀼𑀮𑀧𑀼𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀓𑀺𑀘𑁆𑀘𑀁 𑀢𑀭𑀦𑁆𑀢𑀺 𑀧𑀸𑀭𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂 𑀇𑀘𑁆𑀙𑁂𑀬𑁆𑀬 𑀓𑀼𑀮𑁂 𑀯𑀲𑀦𑁆𑀢𑁂𑀢𑀺 𑀬𑁄𑀚𑀦𑀸.

𑀏𑀯𑀁 𑀣𑁂𑀭𑁄 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀸 𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑀺𑀬𑁄 𑀲𑀤𑀢𑁆𑀣𑀁 𑀧𑀭𑀺𑀧𑀽𑀭𑁂𑀲𑀼𑀁.

𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀤𑀦𑁆𑀥𑀸 ¶ 𑀫𑀬𑁆𑀳𑀁 𑀕𑀢𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀬𑀤𑁂𑀢𑁆𑀣 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀓𑀦𑀺𑀧𑀸𑀢𑁂 𑀫𑀳𑀸𑀧𑀦𑁆𑀣𑀓𑀯𑀢𑁆𑀣𑀼𑀲𑁆𑀫𑀺𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀕𑁆𑀕𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀲𑀓𑁆𑀓𑀸 𑀘𑀽𑀴𑀧𑀦𑁆𑀣𑀓𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀼𑀔𑁂 𑀧𑀢𑀺𑀝𑁆𑀞𑀧𑁂𑀢𑀼’’𑀦𑁆𑀢𑀺? 𑀲𑁄 𑀅𑀢𑁆𑀢𑀦𑁄 𑀅𑀬𑁆𑀬𑀓𑀁 𑀥𑀦𑀲𑁂𑀝𑁆𑀞𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀲𑀘𑁂, 𑀫𑀳𑀸𑀲𑁂𑀝𑁆𑀞𑀺, 𑀅𑀦𑀼𑀚𑀸𑀦𑀸𑀣 ¶ , 𑀅𑀳𑀁 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀬𑁆𑀬’’𑀦𑁆𑀢𑀺. ‘‘𑀧𑀩𑁆𑀩𑀸𑀚𑁂𑀣, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀪𑀸𑀢𑀼 𑀲𑀦𑁆𑀢𑀺𑀓𑁂 𑁋

‘‘𑀧𑀤𑀼𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁, 𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁, 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁨𑁩; 𑀅. 𑀦𑀺. 𑁫.𑁧𑁯𑁫) 𑁋

𑀕𑀸𑀣𑀁 ¶ 𑀉𑀕𑁆𑀕𑀡𑁆𑀳𑀦𑁆𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀕𑀳𑀺𑀢𑀕𑀳𑀺𑀢𑀁 𑀧𑀤𑀁 𑀳𑀤𑀬𑁂 𑀦 𑀢𑀺𑀝𑁆𑀞𑀢𑀺. 𑀅𑀣 𑀦𑀁 𑀫𑀳𑀸𑀧𑀦𑁆𑀣𑀓𑁄 𑀆𑀳 𑁋 ‘‘𑀧𑀦𑁆𑀣𑀓, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀪𑀩𑁆𑀩𑁄, 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀕𑀸𑀣𑀫𑁆𑀧𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺. 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀦 𑀢𑁆𑀯𑀁 𑀓𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀲𑀺? 𑀦𑀺𑀓𑁆𑀔𑀫 𑀇𑀢𑁄’’𑀢𑀺. 𑀲𑁄 𑀣𑁂𑀭𑁂𑀦 𑀧𑀡𑀸𑀫𑀺𑀢𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑁂 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀢𑁆𑀣𑀸 𑀚𑀻𑀯𑀓𑀫𑁆𑀩𑀯𑀦𑁂 𑀯𑀺𑀳𑀭𑀢𑀺. 𑀅𑀣 𑀚𑀻𑀯𑀓𑁄 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺, ‘‘𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀳𑀻’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀧𑀦𑁆𑀣𑀓𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀳𑁄𑀢𑀺. 𑀲𑁄 ‘‘𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀪𑀺𑀓𑁆𑀔𑀁 𑀧𑀝𑀺𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄 ‘‘𑀘𑀽𑀴𑀧𑀦𑁆𑀣𑀓𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀧𑀝𑀺𑀘𑁆𑀙𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀓𑁆𑀔𑁂𑀤𑀁 𑀜𑀢𑁆𑀯𑀸, ‘‘𑀘𑀽𑀴𑀧𑀦𑁆𑀣𑀓𑁄 𑀫𑀬𑀸 𑀓𑀢𑁂𑀦 𑀉𑀧𑀸𑀬𑁂𑀦 𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀺𑀁, 𑀧𑀦𑁆𑀣𑀓, 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀸𑀢𑀸 𑀫𑀁, 𑀪𑀦𑁆𑀢𑁂, 𑀧𑀡𑀸𑀫𑁂𑀢𑀻’’𑀢𑀺 𑀆𑀳. ‘‘𑀧𑀦𑁆𑀣𑀓, 𑀫𑀸 𑀘𑀺𑀦𑁆𑀢𑀬𑀺, 𑀫𑀫 𑀲𑀸𑀲𑀦𑁂 𑀢𑀼𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀏𑀳𑀺, 𑀇𑀫𑀁 𑀕𑀳𑁂𑀢𑁆𑀯𑀸 ‘𑀭𑀚𑁄𑀳𑀭𑀡𑀁, 𑀭𑀚𑁄𑀳𑀭𑀡’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀇𑀤𑁆𑀥𑀺𑀬𑀸 𑀲𑀼𑀤𑁆𑀥𑀁 𑀘𑁄𑀴𑀓𑁆𑀔𑀡𑁆𑀟𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 ¶ 𑀤𑀺𑀦𑁆𑀦𑀁 𑀘𑁄𑀴𑀓𑁆𑀔𑀡𑁆𑀟𑀁 ‘‘𑀭𑀚𑁄𑀳𑀭𑀡𑀁, 𑀭𑀚𑁄𑀳𑀭𑀡’’𑀦𑁆𑀢𑀺 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀲 𑀢𑀁 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀓𑀺𑀮𑀺𑀝𑁆𑀞𑀥𑀸𑀢𑀼𑀓𑀁 𑀚𑀸𑀢𑀁, 𑀧𑀼𑀦 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀉𑀓𑁆𑀔𑀮𑀺𑀧𑀭𑀺𑀧𑀼𑀜𑁆𑀙𑀦𑀲𑀤𑀺𑀲𑀁 𑀚𑀸𑀢𑀁. 𑀲𑁄 𑀜𑀸𑀡𑀲𑁆𑀲 𑀧𑀭𑀺𑀧𑀓𑁆𑀓𑀢𑁆𑀢𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀘𑁄𑀴𑀓𑁆𑀔𑀡𑁆𑀟𑀁 𑀧𑀓𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀁, 𑀇𑀫𑀁 𑀉𑀧𑀸𑀤𑀺𑀡𑁆𑀡𑀓𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀓𑀺𑀮𑀺𑀝𑁆𑀞𑀁 𑀅𑀜𑁆𑀜𑀣𑀸 𑀚𑀸𑀢𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀬𑀣𑀸𑀧𑁂𑀢𑀁, 𑀏𑀯𑀁 𑀘𑀺𑀢𑁆𑀢𑀫𑁆𑀧𑀻’’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀦𑀺𑀫𑀺𑀢𑁆𑀢𑁂 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀸𑀤𑀓𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁨.𑁩𑁫-𑁫𑁪) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀲𑁄, 𑀳𑀺𑀫𑀯𑀦𑁆𑀢𑁂 𑀯𑀲𑀻 𑀢𑀤𑀸.

‘‘𑀅𑀳𑀫𑁆𑀧𑀺 ¶ 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀢𑀤𑀸;

𑀅𑀘𑀺𑀭𑀸𑀕𑀢𑀁 𑀫𑀳𑀸𑀯𑀻𑀭𑀁, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

‘‘𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀁, 𑀅𑀦𑁆𑀢𑀭𑀸𑀬𑀫𑀓𑀸𑀲𑀳𑀁.

‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀅𑀤𑀸𑀲𑀳𑀁;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺.

‘‘𑀲𑀩𑁆𑀩𑁂 𑀤𑁂𑀯𑀸 𑀅𑀢𑁆𑀢𑀫𑀦𑀸, 𑀳𑀺𑀫𑀯𑀦𑁆𑀢𑀁 𑀉𑀧𑁂𑀦𑁆𑀢𑀺 𑀢𑁂;

𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀼𑀁, 𑀅𑀦𑀼𑀫𑁄𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

‘‘𑀇𑀤𑀁 𑀯𑀢𑁆𑀯𑀸𑀦 𑀢𑁂 𑀤𑁂𑀯𑀸, 𑀉𑀧𑀕𑀘𑁆𑀙𑀼𑀁 𑀦𑀭𑀼𑀢𑁆𑀢𑀫𑀁;

𑀆𑀓𑀸𑀲𑁂 𑀥𑀸𑀭𑀬𑀦𑁆𑀢𑀲𑁆𑀲, 𑀧𑀤𑀼𑀫𑀘𑁆𑀙𑀢𑁆𑀢𑀫𑀼𑀢𑁆𑀢𑀫𑀁.

‘‘𑀲𑀢𑀧𑀢𑁆𑀢𑀙𑀢𑁆𑀢𑀁 𑀧𑀕𑁆𑀕𑀬𑁆𑀳, 𑀅𑀤𑀸𑀲𑀺 𑀢𑀸𑀧𑀲𑁄 𑀫𑀫;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

‘‘𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀸𑀦𑀺, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀘𑀢𑀼𑀢𑁆𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

‘‘𑀬𑀁 𑀬𑀁 𑀬𑁄𑀦𑀺𑀁 𑀲𑀁𑀲𑀭𑀢𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀩𑁆𑀪𑁄𑀓𑀸𑀲𑁂 𑀧𑀢𑀺𑀝𑁆𑀞𑀦𑁆𑀢𑀁, 𑀧𑀤𑀼𑀫𑀁 𑀥𑀸𑀭𑀬𑀺𑀲𑁆𑀲𑀢𑀺.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺 ¶ , 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂, 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑀺𑀲𑁆𑀲𑀢𑀺;

𑀫𑀦𑁄𑀫𑀬𑀫𑁆𑀳𑀺 𑀓𑀸𑀬𑀫𑁆𑀳𑀺, 𑀉𑀢𑁆𑀢𑀫𑁄 𑀲𑁄 𑀪𑀯𑀺𑀲𑁆𑀲𑀢𑀺.

‘‘𑀤𑁆𑀯𑁂 𑀪𑀸𑀢𑀭𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀉𑀪𑁄𑀧𑀺 𑀧𑀦𑁆𑀣𑀓𑀯𑁆𑀳𑀬𑀸;

𑀅𑀦𑀼𑀪𑁄𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁, 𑀚𑁄𑀢𑀬𑀺𑀲𑁆𑀲𑀦𑁆𑀢𑀺 𑀲𑀸𑀲𑀦𑀁.

‘‘𑀲𑁄𑀳𑀁 𑀅𑀝𑁆𑀞𑀸𑀭𑀲𑀯𑀲𑁆𑀲𑁄, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀯𑀺𑀲𑁂𑀲𑀸𑀳𑀁 𑀦 𑀯𑀺𑀦𑁆𑀤𑀸𑀫𑀺, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

‘‘𑀤𑀦𑁆𑀥𑀸 𑀫𑀬𑁆𑀳𑀁 𑀕𑀢𑀻 𑀆𑀲𑀺, 𑀧𑀭𑀺𑀪𑀽𑀢𑁄 𑀧𑀼𑀭𑁂 𑀅𑀳𑀼𑀁;

𑀪𑀸𑀢𑀸 𑀘 𑀫𑀁 𑀧𑀡𑀸𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀲𑀓𑀁 𑀖𑀭𑀁.

‘‘𑀲𑁄𑀳𑀁 𑀧𑀡𑀸𑀫𑀺𑀢𑁄 𑀲𑀦𑁆𑀢𑁄, 𑀲𑀗𑁆𑀖𑀸𑀭𑀸𑀫𑀲𑁆𑀲 𑀓𑁄𑀝𑁆𑀞𑀓𑁂;

𑀤𑀼𑀫𑁆𑀫𑀦𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺𑀁, 𑀲𑀸𑀫𑀜𑁆𑀜𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸.

‘‘𑀪𑀕𑀯𑀸 𑀢𑀢𑁆𑀣 𑀆𑀕𑀘𑁆𑀙𑀺, 𑀲𑀻𑀲𑀁 𑀫𑀬𑁆𑀳𑀁 𑀧𑀭𑀸𑀫𑀲𑀺;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀲𑀗𑁆𑀖𑀸𑀭𑀸𑀫𑀁 𑀧𑀯𑁂𑀲𑀬𑀺.

‘‘𑀅𑀦𑀼𑀓𑀫𑁆𑀧𑀸𑀬 𑀫𑁂 𑀲𑀢𑁆𑀣𑀸, 𑀅𑀤𑀸𑀲𑀺 𑀧𑀸𑀤𑀧𑀼𑀜𑁆𑀙𑀦𑀺𑀁;

𑀏𑀯𑀁 𑀲𑀼𑀤𑁆𑀥𑀁 𑀅𑀥𑀺𑀝𑁆𑀞𑁂𑀳𑀺, 𑀏𑀓𑀫𑀦𑁆𑀢𑀫𑀥𑀺𑀝𑁆𑀞𑀳𑀁.

‘‘𑀳𑀢𑁆𑀣𑁂𑀳𑀺 ¶ 𑀢𑀫𑀳𑀁 𑀕𑀬𑁆𑀳, 𑀲𑀭𑀺𑀁 𑀓𑁄𑀓𑀦𑀤𑀁 𑀅𑀳𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀁.

‘‘𑀫𑀦𑁄𑀫𑀬𑁂𑀲𑀼 𑀓𑀸𑀬𑁂𑀲𑀼, 𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯𑀲𑁆𑀲 𑀢𑁂𑀧𑀺𑀝𑀓𑀁 𑀧𑀜𑁆𑀘𑀸𑀪𑀺𑀜𑁆𑀜𑀸 𑀘 𑀆𑀕𑀫𑀺𑀁𑀲𑀼. 𑀲𑀢𑁆𑀣𑀸 𑀏𑀓𑁂𑀦 𑀊𑀦𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀚𑀻𑀯𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀘𑀽𑀴𑀧𑀦𑁆𑀣𑀓𑁄 𑀧𑀦 𑀅𑀢𑁆𑀢𑀦𑁄 𑀪𑀺𑀓𑁆𑀔𑀸𑀬 𑀅𑀧𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀏𑀯 𑀦 𑀕𑀢𑁄. 𑀚𑀻𑀯𑀓𑁄 𑀬𑀸𑀕𑀼𑀁 𑀤𑀸𑀢𑀼𑀁 𑀆𑀭𑀪𑀺, 𑀲𑀢𑁆𑀣𑀸 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀧𑀺𑀤𑀳𑀺. ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑁋 ‘‘𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀚𑀻𑀯𑀓𑀸’’𑀢𑀺. 𑀲𑁄 𑀧𑀼𑀭𑀺𑀲𑀁 𑀧𑀳𑀺𑀡𑀺, ‘‘𑀕𑀘𑁆𑀙, 𑀪𑀡𑁂, 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀁 𑀅𑀬𑁆𑀬𑀁 𑀕𑀳𑁂𑀢𑁆𑀯𑀸 ¶ 𑀏𑀳𑀻’’𑀢𑀺. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑁄𑀧𑀺 𑀭𑀽𑀧𑁂𑀦 𑀓𑀺𑀭𑀺𑀬𑀸𑀬 𑀘 𑀏𑀓𑀫𑁆𑀧𑀺 𑀏𑀓𑁂𑀦 𑀅𑀲𑀤𑀺𑀲𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀧𑀼𑀭𑀺𑀲𑁄 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀩𑀳𑀼𑀪𑀸𑀯𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀚𑀻𑀯𑀓𑀲𑁆𑀲 𑀓𑀣𑁂𑀲𑀺 𑁋 ‘‘𑀇𑀫𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑀸 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀩𑀳𑀼𑀢𑀭𑁄, 𑀧𑀓𑁆𑀓𑁄𑀲𑀺𑀢𑀩𑁆𑀩𑀁 𑀅𑀬𑁆𑀬𑀁 𑀦 𑀚𑀸𑀦𑀸𑀫𑀻’’𑀢𑀺. 𑀚𑀻𑀯𑀓𑁄 𑀲𑀢𑁆𑀣𑀸𑀭𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀓𑁄𑀦𑀸𑀫𑁄, 𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽’’𑀢𑀺? ‘‘𑀘𑀽𑀴𑀧𑀦𑁆𑀣𑀓𑁄 𑀦𑀸𑀫, 𑀚𑀻𑀯𑀓𑀸’’𑀢𑀺. ‘‘𑀕𑀘𑁆𑀙 ¶ , 𑀪𑀡𑁂, ‘𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀓𑀢𑀭𑁄’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀆𑀦𑁂𑀳𑀻’’𑀢𑀺. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀓𑀢𑀭𑁄, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’,‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀏𑀓𑀧𑀳𑀸𑀭𑁂𑀦𑁂𑀯 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑁆𑀧𑀺 𑀓𑀣𑁂𑀲𑀺. 𑀲𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀚𑀻𑀯𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀚𑀻𑀯𑀓𑁄 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀢𑁆𑀢𑀸 ‘‘𑀇𑀤𑁆𑀥𑀺𑀫𑀸 𑀫𑀜𑁆𑀜𑁂, 𑀅𑀬𑁆𑀬𑁄’’𑀢𑀺 𑀦𑀬𑀢𑁄 𑀜𑀢𑁆𑀯𑀸 ‘‘𑀕𑀘𑁆𑀙, 𑀪𑀡𑁂, 𑀧𑀞𑀫𑀁 𑀓𑀣𑀦𑀓𑀫𑀬𑁆𑀬𑀫𑁂𑀯 ‘𑀢𑀼𑀫𑁆𑀳𑁂 𑀲𑀢𑁆𑀣𑀸 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑁂 𑀕𑀡𑁆𑀳𑀸’’𑀢𑀺 𑀆𑀳. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺, 𑀢𑀸𑀯𑀤𑁂𑀯 𑀦𑀺𑀫𑁆𑀫𑀺𑀢𑀪𑀺𑀓𑁆𑀔𑀽 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀲𑁄 𑀣𑁂𑀭𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀢𑀲𑁆𑀫𑀺𑀁 𑀔𑀡𑁂 𑀬𑀸𑀕𑀼𑀜𑁆𑀘 𑀔𑀚𑁆𑀚𑀓𑀸𑀤𑀺𑀪𑁂𑀤𑀜𑁆𑀘 𑀧𑀝𑀺𑀕𑁆𑀕𑀡𑁆𑀳𑀺. 𑀤𑀲𑀩𑀮𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀏𑀓𑀕𑀸𑀣𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀫𑁆𑀧𑀺 𑀮𑀳𑀼𑀓𑁂𑀦 𑀔𑀡𑁂𑀦𑁂𑀯 𑀏𑀯𑀁 𑀫𑀳𑀺𑀤𑁆𑀥𑀺𑀓𑀁 𑀅𑀓𑀁𑀲𑀽’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀚𑁆𑀚, ‘‘𑀓𑀺𑀁 𑀯𑀤𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀁 𑀦𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀘𑀽𑀴𑀧𑀦𑁆𑀣𑀓𑁂𑀦 𑀇𑀤𑀸𑀦𑀺 𑀫𑀬𑁆𑀳𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀤𑀸𑀬𑀚𑁆𑀚𑀁 𑀮𑀤𑁆𑀥𑀁, 𑀧𑀼𑀩𑁆𑀩𑁂 𑀧𑀦 𑀮𑁄𑀓𑀺𑀬𑀤𑀸𑀬𑀚𑁆𑀚’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀁 (𑀚𑀸. 𑁧.𑁧.𑁪) 𑀓𑀣𑁂𑀲𑀺. 𑀅𑀧𑀭𑀪𑀸𑀕𑁂 𑀢𑀁 𑀲𑀢𑁆𑀣𑀸 𑀅𑀭𑀺𑀬𑀕𑀡𑀧𑀭𑀺𑀯𑀼𑀢𑁄 𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀦𑁄𑀫𑀬𑀁 𑀓𑀸𑀬𑀁 ¶ 𑀅𑀪𑀺𑀦𑀺𑀫𑁆𑀫𑀺𑀦𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑀸𑀦𑀜𑁆𑀘 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀳𑀺 ‘‘𑀢𑀣𑀸 𑀤𑀦𑁆𑀥𑀥𑀸𑀢𑀼𑀓𑁂𑀦 𑀓𑀣𑀁 𑀢𑀬𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀤𑁆𑀥𑀸𑀦𑀻’’𑀢𑀺 𑀧𑀼𑀝𑁆𑀞𑁄 𑀪𑀸𑀢𑀼 𑀧𑀡𑀸𑀫𑀦𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁫𑁫𑁭.

‘‘𑀤𑀦𑁆𑀥𑀸 𑀫𑀬𑁆𑀳𑀁 𑀕𑀢𑀻 𑀆𑀲𑀺, 𑀧𑀭𑀺𑀪𑀽𑀢𑁄 𑀧𑀼𑀭𑁂 𑀅𑀳𑀁;

𑀪𑀸𑀢𑀸 𑀘 𑀫𑀁 𑀧𑀡𑀸𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀢𑀼𑀯𑀁 𑀖𑀭𑀁.

𑁫𑁫𑁮.

‘‘𑀲𑁄𑀳𑀁 ¶ 𑀧𑀡𑀸𑀫𑀺𑀢𑁄 𑀲𑀦𑁆𑀢𑁄, 𑀲𑀗𑁆𑀖𑀸𑀭𑀸𑀫𑀲𑁆𑀲 𑀓𑁄𑀝𑁆𑀞𑀓𑁂;

𑀤𑀼𑀫𑁆𑀫𑀦𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺𑀁, 𑀲𑀸𑀲𑀦𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸.

𑁫𑁫𑁯.

‘‘𑀪𑀕𑀯𑀸 ¶ 𑀢𑀢𑁆𑀣 𑀆𑀕𑀘𑁆𑀙𑀺, 𑀲𑀻𑀲𑀁 𑀫𑀬𑁆𑀳𑀁 𑀧𑀭𑀸𑀫𑀲𑀺;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀲𑀗𑁆𑀖𑀸𑀭𑀸𑀫𑀁 𑀧𑀯𑁂𑀲𑀬𑀺.

𑁫𑁬𑁦.

‘‘𑀅𑀦𑀼𑀓𑀫𑁆𑀧𑀸𑀬 𑀫𑁂 𑀲𑀢𑁆𑀣𑀸, 𑀧𑀸𑀤𑀸𑀲𑀺 𑀧𑀸𑀤𑀧𑀼𑀜𑁆𑀙𑀦𑀺𑀁;

𑀏𑀢𑀁 𑀲𑀼𑀤𑁆𑀥𑀁 𑀅𑀥𑀺𑀝𑁆𑀞𑁂𑀳𑀺, 𑀏𑀓𑀫𑀦𑁆𑀢𑀁 𑀲𑁆𑀯𑀥𑀺𑀝𑁆𑀞𑀺𑀢𑀁.

𑁫𑁬𑁧.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀲𑀫𑀸𑀥𑀺𑀁 𑀧𑀝𑀺𑀧𑀸𑀤𑁂𑀲𑀺𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁫𑁬𑁨.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁬𑁩.

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑀢𑁆𑀢𑀸𑀦𑀁, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀦𑁆𑀣𑀓𑁄;

𑀦𑀺𑀲𑀻𑀤𑀫𑁆𑀩𑀯𑀦𑁂 𑀭𑀫𑁆𑀫𑁂, 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸.

𑁫𑁬𑁪.

‘‘𑀢𑀢𑁄 𑀫𑁂 𑀲𑀢𑁆𑀣𑀸 𑀧𑀸𑀳𑁂𑀲𑀺, 𑀤𑀽𑀢𑀁 𑀓𑀸𑀮𑀧𑁆𑀧𑀯𑁂𑀤𑀓𑀁;

𑀧𑀯𑁂𑀤𑀺𑀢𑀫𑁆𑀳𑀺 𑀓𑀸𑀮𑀫𑁆𑀳𑀺, 𑀯𑁂𑀳𑀸𑀲𑀸𑀤𑀼𑀧𑀲𑀗𑁆𑀓𑀫𑀺𑀁.

𑁫𑁬𑁫.

‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀳𑀁;

𑀦𑀺𑀲𑀺𑀦𑁆𑀦𑀁 𑀫𑀁 𑀯𑀺𑀤𑀺𑀢𑁆𑀯𑀸𑀦, 𑀅𑀢𑁆𑀣 𑀲𑀢𑁆𑀣𑀸 𑀧𑀝𑀺𑀕𑁆𑀕𑀳𑀺.

𑁫𑁬𑁬.

‘‘𑀆𑀬𑀸𑀕𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀣 𑀤𑀓𑁆𑀔𑀺𑀡’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀤𑀦𑁆𑀥𑀸𑀢𑀺, 𑀫𑀦𑁆𑀤𑀸, 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁂𑀦 𑀤𑀼𑀩𑁆𑀩𑀮𑀸. 𑀕𑀢𑀻𑀢𑀺 𑀜𑀸𑀡𑀕𑀢𑀺. 𑀆𑀲𑀻𑀢𑀺, 𑀅𑀳𑁄𑀲𑀺. 𑀧𑀭𑀺𑀪𑀽𑀢𑁄𑀢𑀺, 𑀢𑀢𑁄 𑀏𑀯 ‘‘𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄’’𑀢𑀺 𑀳𑀻𑀴𑀺𑀢𑁄. 𑀧𑀼𑀭𑁂𑀢𑀺, 𑀧𑀼𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑁂. 𑀪𑀸𑀢𑀸 𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄 𑀘-𑀲𑀤𑁆𑀤𑁄, 𑀦 𑀓𑁂𑀯𑀮𑀁 𑀧𑀭𑀺𑀪𑀽𑀢𑁄𑀯, 𑀅𑀣 𑀔𑁄 𑀪𑀸𑀢𑀸𑀧𑀺 𑀫𑀁 𑀧𑀡𑀸𑀫𑁂𑀲𑀺, ‘‘𑀧𑀦𑁆𑀣𑀓, 𑀢𑁆𑀯𑀁 𑀤𑀼𑀧𑁆𑀧𑀜𑁆𑀜𑁄 𑀅𑀳𑁂𑀢𑀼𑀓𑁄 𑀫𑀜𑁆𑀜𑁂, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 ¶ 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑁄 ¶ , 𑀦 𑀇𑀫𑀲𑁆𑀲 𑀲𑀸𑀲𑀦𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄, 𑀕𑀘𑁆𑀙 𑀤𑀸𑀦𑀺 𑀢𑀼𑀬𑁆𑀳𑀁 𑀅𑀬𑁆𑀬𑀓𑀖𑀭’’𑀦𑁆𑀢𑀺 𑀦𑀺𑀓𑁆𑀓𑀟𑁆𑀠𑁂𑀲𑀺. 𑀪𑀸𑀢𑀸𑀢𑀺, 𑀪𑀸𑀢𑀭𑀸.

𑀓𑁄𑀝𑁆𑀞𑀓𑁂𑀢𑀺, 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑁂. 𑀤𑀼𑀫𑁆𑀫𑀦𑁄𑀢𑀺, 𑀤𑁄𑀫𑀦𑀲𑁆𑀲𑀺𑀢𑁄. 𑀲𑀸𑀲𑀦𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀸𑀧𑁂𑀓𑁆𑀔𑁄 𑀅𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑁄.

𑀪𑀕𑀯𑀸 𑀢𑀢𑁆𑀣 𑀆𑀕𑀘𑁆𑀙𑀻𑀢𑀺, 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀫𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀪𑀕𑀯𑀸 𑀬𑀢𑁆𑀣𑀸𑀳𑀁 𑀞𑀺𑀢𑁄, 𑀢𑀢𑁆𑀣 𑀆𑀕𑀘𑁆𑀙𑀺. 𑀆𑀕𑀦𑁆𑀢𑁆𑀯𑀸 𑀘, ‘‘𑀧𑀦𑁆𑀣𑀓, 𑀅𑀳𑀁 𑀢𑁂 𑀲𑀢𑁆𑀣𑀸, 𑀦 𑀫𑀳𑀸𑀧𑀦𑁆𑀣𑀓𑁄, 𑀫𑀁 𑀉𑀤𑁆𑀤𑀺𑀲𑁆𑀲 𑀢𑀯 𑀧𑀩𑁆𑀩𑀚𑁆𑀚𑀸’’𑀢𑀺 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀲𑀻𑀲𑀁 𑀫𑀬𑁆𑀳𑀁 𑀧𑀭𑀸𑀫𑀲𑀺 𑀚𑀸𑀮𑀸𑀩𑀦𑁆𑀥𑀦𑀫𑀼𑀤𑀼𑀢𑀮𑀼𑀦𑀧𑀻𑀡𑀯𑀭𑀸𑀬𑀢𑀗𑁆𑀕𑀼𑀮𑀺𑀲𑀫𑀼𑀧𑀲𑁄𑀪𑀺𑀢𑁂𑀦 𑀯𑀺𑀓𑀲𑀺𑀢𑀧𑀤𑀼𑀫𑀲𑀲𑁆𑀲𑀺𑀭𑀻𑀓𑁂𑀦 𑀘𑀓𑁆𑀓𑀗𑁆𑀓𑀺𑀢𑁂𑀦 𑀳𑀢𑁆𑀣𑀢𑀮𑁂𑀦 ‘‘𑀇𑀤𑀸𑀦𑀺𑀬𑁂𑀯 𑀫𑀫 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀻𑀧𑁂𑀦𑁆𑀢𑁄 𑀫𑀬𑁆𑀳𑀁 𑀲𑀻𑀲𑀁 𑀧𑀭𑀸𑀫𑀲𑀺. 𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦𑀸𑀢𑀺, ‘‘𑀓𑀲𑁆𑀫𑀸 𑀢𑁆𑀯𑀁, 𑀇𑀥 𑀢𑀺𑀝𑁆𑀞𑀲𑀻’’𑀢𑀺 𑀘𑀦𑁆𑀤𑀦𑀕𑀦𑁆𑀥𑀕𑀦𑁆𑀥𑀺𑀦𑀸 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀫𑀁 𑀪𑀼𑀚𑁂 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀲𑀗𑁆𑀖𑀸𑀭𑀸𑀫𑀁 𑀧𑀯𑁂𑀲𑁂𑀲𑀺. 𑀧𑀸𑀤𑀸𑀲𑀺 ¶ 𑀧𑀸𑀤𑀧𑀼𑀜𑁆𑀙𑀦𑀺𑀦𑁆𑀢𑀺 𑀧𑀸𑀤𑀧𑀼𑀜𑁆𑀙𑀦𑀺𑀁 𑀓𑀢𑁆𑀯𑀸 𑀧𑀸𑀤𑀸𑀲𑀺 ‘‘𑀭𑀚𑁄𑀳𑀭𑀡𑀦𑁆𑀢𑀺 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. ‘‘𑀅𑀤𑀸𑀲𑀻’’𑀢𑀺 ‘‘𑀧𑀸𑀤𑀧𑀼𑀜𑁆𑀙𑀦𑀺’’𑀦𑁆𑀢𑀺 𑀘 𑀧𑀞𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀧𑀸𑀤𑀧𑀼𑀜𑁆𑀙𑀦𑀺’’𑀦𑁆𑀢𑀺 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑁆𑀔𑀡𑁆𑀟𑀁 𑀧𑀸𑀤𑀸𑀲𑀻’’𑀢𑀺 𑀯𑀤𑀦𑁆𑀢𑀺. 𑀢𑀤𑀬𑀼𑀢𑁆𑀢𑀁 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀘𑁄𑀴𑀓𑁆𑀔𑀡𑁆𑀟𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀏𑀢𑀁 𑀲𑀼𑀤𑁆𑀥𑀁 𑀅𑀥𑀺𑀝𑁆𑀞𑁂𑀳𑀺, 𑀏𑀓𑀫𑀦𑁆𑀢𑀁 𑀲𑁆𑀯𑀥𑀺𑀝𑁆𑀞𑀺𑀢𑀦𑁆𑀢𑀺, 𑀏𑀢𑀁 𑀲𑀼𑀤𑁆𑀥𑀁 𑀘𑁄𑀴𑀓𑁆𑀔𑀡𑁆𑀟𑀁 ‘‘𑀭𑀚𑁄𑀳𑀭𑀡𑀁, 𑀭𑀚𑁄𑀳𑀭𑀡’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁂𑀦 𑀲𑁆𑀯𑀥𑀺𑀝𑁆𑀞𑀺𑀢𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀏𑀓𑀫𑀦𑁆𑀢𑁂 𑀯𑀺𑀯𑀺𑀢𑁆𑀢𑁂 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀦𑀺𑀲𑀺𑀦𑁆𑀦𑁄 𑀅𑀥𑀺𑀝𑁆𑀞𑁂𑀳𑀺 𑀢𑀣𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀳𑀺.

𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀑𑀯𑀸𑀤𑀁 𑀅𑀳𑀁 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁 𑀲𑀸𑀲𑀦𑁂 𑀑𑀯𑀸𑀤𑁂 𑀭𑀢𑁄 𑀅𑀪𑀺𑀭𑀢𑁄 𑀳𑀼𑀢𑁆𑀯𑀸 𑀯𑀺𑀳𑀸𑀲𑀺𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀁. 𑀧𑀝𑀺𑀧𑀚𑁆𑀚𑀦𑁆𑀢𑁄 𑀘 𑀲𑀫𑀸𑀥𑀺𑀁 𑀧𑀝𑀺𑀧𑀸𑀤𑁂𑀲𑀺𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸𑀢𑀺, 𑀉𑀢𑁆𑀢𑀫𑀢𑁆𑀣𑁄 𑀦𑀸𑀫 𑀅𑀭𑀳𑀢𑁆𑀢𑀁, 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀯𑀲𑁂𑀦 𑀭𑀽𑀧𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀸𑀤𑀓𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀕𑁆𑀕𑀫𑀕𑁆𑀕𑀲𑀫𑀸𑀥𑀺𑀁 𑀲𑀫𑁆𑀧𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀲𑀫𑀸𑀥𑀻𑀢𑀺 𑀉𑀧𑀘𑀸𑀭𑀲𑀫𑀸𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀢𑀼𑀢𑁆𑀣𑀫𑀕𑁆𑀕𑀲𑀫𑀸𑀥𑀺, 𑀢𑀸𑀯 𑀲𑀫𑀸𑀥𑀺𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑁄, 𑀅𑀕𑁆𑀕𑀨𑀮𑀲𑀫𑀸𑀥𑀺 𑀧𑀦 𑀉𑀢𑁆𑀢𑀫𑀢𑁆𑀣𑀕𑁆𑀕𑀳𑀡𑁂𑀦, 𑀲𑀸𑀢𑀺𑀲𑀬𑀁 𑀘𑁂𑀯𑀸𑀬𑀁 𑀲𑀫𑀸𑀥𑀺𑀓𑀼𑀲𑀮𑁄, 𑀢𑀲𑁆𑀫𑀸 ‘‘𑀲𑀫𑀸𑀥𑀺𑀁 𑀧𑀝𑀺𑀧𑀸𑀤𑁂𑀲𑀺’’𑀦𑁆𑀢𑀺 𑀆𑀳. 𑀲𑀫𑀸𑀥𑀺𑀓𑀼𑀲𑀮𑀢𑀸𑀬 ¶ 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑁄 𑀦𑀸𑀫 𑀚𑀸𑀢𑁄, 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑁄 𑀧𑀦 𑀯𑀺𑀧𑀲𑁆𑀲𑀦𑀸𑀓𑀼𑀲𑀮𑀢𑀸𑀬 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑁄 𑀦𑀸𑀫. 𑀏𑀓𑁄 𑀘𑁂𑀢𑁆𑀣 𑀲𑀫𑀸𑀥𑀺𑀮𑀓𑁆𑀔𑀡𑁂 𑀙𑁂𑀓𑁄, 𑀏𑀓𑁄 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂, 𑀏𑀓𑁄 𑀲𑀫𑀸𑀥𑀺𑀕𑀸𑀴𑁆𑀳𑁄, 𑀏𑀓𑁄 𑀯𑀺𑀧𑀲𑁆𑀲𑀦𑀸𑀕𑀸𑀴𑁆𑀳𑁄 𑀏𑀓𑁄 𑀅𑀗𑁆𑀕𑀲𑀁𑀔𑀺𑀢𑁆𑀢𑁂 𑀙𑁂𑀓𑁄, 𑀏𑀓𑁄 𑀆𑀭𑀫𑁆𑀫𑀡𑀲𑀁𑀔𑀺𑀢𑁆𑀢𑁂, 𑀏𑀓𑁄 𑀅𑀗𑁆𑀕𑀯𑀯𑀢𑁆𑀣𑀸𑀦𑁂, 𑀏𑀓𑁄 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑁂𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀅𑀧𑀺𑀘 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑁄 ¶ 𑀲𑀸𑀢𑀺𑀲𑀬𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀮𑀸𑀪𑀺𑀢𑀸𑀬 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑁄 𑀯𑀼𑀢𑁆𑀢𑁄, 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑁄 𑀲𑀸𑀢𑀺𑀲𑀬𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀮𑀸𑀪𑀺𑀢𑀸𑀬 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑁄. 𑀧𑀞𑀫𑁄 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀮𑀸𑀪𑀻 𑀳𑀼𑀢𑁆𑀯𑀸 𑀛𑀸𑀦𑀗𑁆𑀕𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑁄, 𑀇𑀢𑀭𑁄 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀮𑀸𑀪𑀻 𑀳𑀼𑀢𑁆𑀯𑀸 𑀛𑀸𑀦𑀗𑁆𑀕𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑁄. 𑀫𑀦𑁄𑀫𑀬𑀁 𑀧𑀦 𑀓𑀸𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀅𑀜𑁆𑀜𑁂 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀩𑀳𑀼𑀓𑁂, 𑀏𑀓𑀲𑀤𑀺𑀲𑁂𑀬𑁂𑀯 𑀘 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀏𑀓𑀯𑀺𑀥𑀫𑁂𑀯 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑁂. 𑀅𑀬𑀁 𑀧𑀦 𑀣𑁂𑀭𑁄 𑀏𑀓𑀸𑀯𑀚𑁆𑀚𑀦𑁂𑀦 𑀲𑀫𑀡𑀲𑀳𑀲𑁆𑀲𑀁 𑀫𑀸𑀧𑁂𑀲𑀺, 𑀤𑁆𑀯𑁂𑀧𑀺 𑀦 𑀓𑀸𑀬𑁂𑀦 𑀏𑀓𑀲𑀤𑀺𑀲𑁂 𑀅𑀓𑀸𑀲𑀺, 𑀦 𑀏𑀓𑀯𑀺𑀥𑀁 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑁂. 𑀢𑀲𑁆𑀫𑀸 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀇𑀤𑀸𑀦𑀺 ¶ 𑀅𑀢𑁆𑀢𑀦𑁄 𑀅𑀥𑀺𑀕𑀢𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀜𑁆𑀘𑀸𑀬𑀁 𑀣𑁂𑀭𑁄 𑀙𑀴𑀪𑀺𑀜𑁆𑀜𑁄, 𑀬𑀸 𑀧𑀦 𑀅𑀪𑀺𑀜𑁆𑀜𑀸 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑀲𑁆𑀲 𑀩𑀳𑀽𑀧𑀓𑀸𑀭𑀸, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀬𑀣𑀸𑀓𑀫𑁆𑀫𑀼𑀧𑀕𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀺 𑀳𑀺 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀩𑀳𑀽𑀧𑀓𑀸𑀭𑀸𑀦𑀺, 𑀦 𑀢𑀣𑀸 𑀇𑀢𑀭𑀜𑀸𑀡𑀸𑀦𑀺.

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀦𑁆𑀢𑀺 𑀲𑀳𑀲𑁆𑀲𑀁. ‘‘𑀲𑀳𑀲𑁆𑀲𑀯𑀸𑀭’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀏𑀓𑀸𑀯𑀚𑁆𑀚𑀦𑁂𑀦 𑀧𑀦 𑀣𑁂𑀭𑁄 𑀲𑀳𑀲𑁆𑀲𑁂 𑀫𑀦𑁄𑀫𑀬𑁂 𑀓𑀸𑀬𑁂 𑀦𑀺𑀫𑁆𑀫𑀺𑀦𑀺, 𑀦 𑀯𑀸𑀭𑁂𑀦. 𑀢𑁂 𑀘 𑀔𑁄 𑀅𑀜𑁆𑀜𑀫𑀜𑁆𑀜𑀫𑀲𑀤𑀺𑀲𑁂 𑀯𑀺𑀯𑀺𑀥𑀜𑁆𑀘 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂. ‘‘𑀓𑀺𑀁 𑀧𑀦 𑀲𑀸𑀯𑀓𑀸𑀦𑀫𑁆𑀧𑀺 𑀏𑀯𑀭𑀽𑀧𑀁 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀁 𑀲𑀫𑁆𑀪𑀯𑀢𑀻’’𑀢𑀺? 𑀦 𑀲𑀫𑁆𑀪𑀯𑀢𑀺 𑀲𑀩𑁆𑀩𑁂𑀲𑀁, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀦 𑀅𑀬𑀫𑁂𑀯 𑀣𑁂𑀭𑁄 𑀏𑀯𑀫𑀓𑀸𑀲𑀺, 𑀢𑀣𑀸 𑀳𑁂𑀲 𑀇𑀫𑀺𑀦𑀸 𑀅𑀗𑁆𑀕𑁂𑀦 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀧𑀦𑁆𑀣𑀓𑁄 𑀦𑀺𑀲𑀻𑀤𑀻𑀢𑀺 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀯𑀤𑀢𑀺. 𑀅𑀫𑁆𑀩𑀯𑀦𑁂𑀢𑀺, 𑀅𑀫𑁆𑀩𑀯𑀦𑁂 𑀚𑀻𑀯𑀓𑁂𑀦 ¶ 𑀓𑀢𑀯𑀺𑀳𑀸𑀭𑁂. 𑀯𑁂𑀳𑀸𑀲𑀸𑀤𑀼𑀧𑀲𑀗𑁆𑀓𑀫𑀺𑀦𑁆𑀢𑀺 𑀯𑁂𑀳𑀸𑀲𑀸𑀢𑀺 𑀓𑀭𑀡𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀯𑁂𑀳𑀸𑀲𑁂𑀦𑀸𑀢𑀺 𑀅𑀢𑁆𑀣𑁄, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀣𑀸𑀢𑀺, 𑀫𑀫 𑀦𑀺𑀲𑀚𑁆𑀚𑀸𑀬 𑀧𑀘𑁆𑀙𑀸. 𑀧𑀝𑀺𑀕𑁆𑀕𑀳𑀻𑀢𑀺 𑀤𑀓𑁆𑀔𑀺𑀡𑁄𑀤𑀓𑀁 𑀧𑀝𑀺𑀕𑁆𑀕𑀡𑁆𑀳𑀺. 𑀆𑀬𑀸𑀕𑁄 𑀲𑀩𑁆𑀩𑀮𑁄𑀓𑀲𑁆𑀲𑀸𑀢𑀺, 𑀲𑀩𑁆𑀩𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀁 𑀆𑀦𑁂𑀢𑁆𑀯𑀸 𑀬𑀚𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑁄. 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄𑀢𑀺, 𑀫𑀳𑀸𑀨𑀮𑀪𑀸𑀯𑀓𑀭𑀡𑁂𑀦 𑀤𑀓𑁆𑀔𑀺𑀡𑀸𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀡𑁆𑀳𑀓𑁄. 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀣 𑀤𑀓𑁆𑀔𑀺𑀡𑀦𑁆𑀢𑀺 𑀚𑀻𑀯𑀓𑁂𑀦 𑀉𑀧𑀦𑀻𑀢𑀁 𑀬𑀸𑀕𑀼𑀔𑀚𑁆𑀚𑀸𑀤𑀺𑀪𑁂𑀤𑀁 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀳𑁂𑀲𑀺.

𑀅𑀣 𑀔𑁄 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀆𑀬𑀲𑁆𑀫𑀦𑁆𑀢𑀁 𑀘𑀽𑀴𑀧𑀦𑁆𑀣𑀓𑀁 𑀆𑀡𑀸𑀧𑁂𑀲𑀺 𑁋 ‘‘𑀅𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀲𑁄 𑀲𑀺𑀦𑁂𑀭𑀼𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀫𑀦𑁆𑀣𑁂𑀦𑁆𑀢𑁄 𑀯𑀺𑀬 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀢𑀸𑀬 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀗𑁆𑀔𑁄𑀪𑁂𑀦𑁆𑀢𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀦𑁆𑀢𑁄 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀢𑀣𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄𑀧𑀺 ¶ 𑀘𑀸𑀬𑀫𑀸𑀬𑀲𑁆𑀫𑀸 𑀢𑀣𑀸𑀭𑀽𑀧𑀸𑀬 𑀓𑀫𑁆𑀫𑀧𑀺𑀮𑁄𑀢𑀺𑀓𑀸𑀬 𑀧𑀭𑀺𑀩𑀸𑀥𑀺𑀢𑁄 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀘𑀢𑀽𑀳𑀺𑀧𑀺 𑀫𑀸𑀲𑁂𑀳𑀺 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀁 𑀧𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀲𑀢𑁆𑀣𑀸 𑀧𑀼𑀩𑁆𑀩𑀘𑀭𑀺𑀬𑀸𑀦𑀼𑀭𑀽𑀧𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀦𑀺𑀬𑁄𑀚𑁂𑀲𑀺. 𑀢𑀣𑀸 𑀳𑀺 𑀪𑀕𑀯𑀸 𑀢𑀤𑀸 𑀚𑀻𑀯𑀓𑀲𑁆𑀲 𑀦𑀺𑀯𑁂𑀲𑀦𑁂 𑀦𑀺𑀲𑀺𑀦𑁆𑀦𑁄 𑀏𑀯 ‘‘𑀘𑀽𑀴𑀧𑀦𑁆𑀣𑀓𑀲𑁆𑀲 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁, 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀜𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀧𑀦𑁆𑀣𑀓, 𑀬𑀤𑀺𑀧𑀸𑀬𑀁 𑀧𑀺𑀮𑁄𑀢𑀺𑀓𑀸 𑀲𑀁𑀓𑀺𑀮𑀺𑀝𑁆𑀞𑀸 𑀭𑀚𑀸𑀦𑀼𑀓𑀺𑀡𑁆𑀡𑀸, 𑀇𑀢𑁄 𑀧𑀦 𑀅𑀜𑁆𑀜𑁄 𑀏𑀯 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀁𑀓𑀺𑀮𑁂𑀲𑁄 𑀭𑀚𑁄 𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 ¶ 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 𑀪𑀺𑀓𑁆𑀔𑀯𑁄, 𑀯𑀺𑀳𑀭𑀦𑁆𑀢𑀺 𑀢𑁂 𑀯𑀻𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 𑀭𑀚𑁄…𑀧𑁂… 𑀲𑀸𑀲𑀦𑁂.

‘‘𑀫𑁄𑀳𑁄 𑀭𑀚𑁄…𑀧𑁂… 𑀯𑀻𑀢𑀭𑀚𑀲𑁆𑀲 𑀲𑀸𑀲𑀦𑁂’’𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀑𑀪𑀸𑀲𑀕𑀸𑀣𑀸 𑀅𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀽𑀴𑀧𑀦𑁆𑀣𑀓𑁄 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀧𑁆𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀦𑀸𑀦𑀸𑀓𑀼𑀮𑀫𑀮𑀲𑀫𑁆𑀧𑀼𑀡𑁆𑀡𑁄𑀢𑀺𑀆𑀤𑀺𑀓𑀸 ¶ 𑀆𑀬𑀲𑁆𑀫𑀢𑁄 𑀓𑀧𑁆𑀧𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺 𑀅𑀦𑁂𑀓𑀯𑀺𑀥𑁂𑀳𑀺 𑀆𑀪𑀭𑀡𑁂𑀳𑀺 𑀦𑀸𑀦𑀸𑀯𑀺𑀥𑁂𑀳𑀺 𑀫𑀡𑀺𑀭𑀢𑀦𑁂𑀳𑀺 𑀩𑀳𑀼𑀯𑀺𑀥𑁂𑀳𑀺 𑀧𑀼𑀧𑁆𑀨𑀤𑀸𑀫𑀫𑀸𑀮𑀸𑀤𑀻𑀳𑀺 𑀘 𑀓𑀧𑁆𑀧𑀭𑀼𑀓𑁆𑀔𑀁 𑀦𑀸𑀫 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑁂𑀦 𑀲𑀢𑁆𑀣𑀼 𑀣𑀽𑀧𑀁 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑀭𑀝𑁆𑀞𑁂 𑀫𑀡𑁆𑀟𑀮𑀺𑀓𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄 𑀓𑀸𑀫𑁂𑀲𑀼 𑀅𑀢𑀺𑀯𑀺𑀬 𑀭𑀢𑁆𑀢𑁄 𑀕𑀺𑀤𑁆𑀥𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀁 𑀲𑀢𑁆𑀣𑀸 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀡𑀚𑀸𑀮𑁂 𑀧𑀜𑁆𑀜𑀸𑀬𑀫𑀸𑀦𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄, ‘‘𑀏𑀲 𑀫𑀫 𑀲𑀦𑁆𑀢𑀺𑀓𑁂 𑀅𑀲𑀼𑀪𑀓𑀣𑀁 𑀲𑀼𑀢𑁆𑀯𑀸 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀆𑀓𑀸𑀲𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑁋

𑁫𑁬𑁭.

‘‘𑀦𑀸𑀦𑀸𑀓𑀼𑀮𑀫𑀮𑀲𑀫𑁆𑀧𑀼𑀡𑁆𑀡𑁄 ¶ , 𑀫𑀳𑀸𑀉𑀓𑁆𑀓𑀸𑀭𑀲𑀫𑁆𑀪𑀯𑁄;

𑀘𑀦𑁆𑀤𑀦𑀺𑀓𑀁𑀯 𑀧𑀭𑀺𑀧𑀓𑁆𑀓𑀁, 𑀫𑀳𑀸𑀕𑀡𑁆𑀟𑁄 𑀫𑀳𑀸𑀯𑀡𑁄.

𑁫𑁬𑁮.

‘‘𑀧𑀼𑀩𑁆𑀩𑀭𑀼𑀳𑀺𑀭𑀲𑀫𑁆𑀧𑀼𑀡𑁆𑀡𑁄, 𑀕𑀽𑀣𑀓𑀽𑀧𑁂𑀦 𑀕𑀸𑀴𑁆𑀳𑀺𑀢𑁄;

𑀆𑀧𑁄𑀧𑀕𑁆𑀖𑀭𑀡𑁄 𑀓𑀸𑀬𑁄, 𑀲𑀤𑀸 𑀲𑀦𑁆𑀤𑀢𑀺 𑀧𑀽𑀢𑀺𑀓𑀁.

𑁫𑁬𑁯.

‘‘𑀲𑀝𑁆𑀞𑀺𑀓𑀡𑁆𑀟𑀭𑀲𑀫𑁆𑀩𑀦𑁆𑀥𑁄, 𑀫𑀁𑀲𑀮𑁂𑀧𑀦𑀮𑁂𑀧𑀺𑀢𑁄;

𑀘𑀫𑁆𑀫𑀓𑀜𑁆𑀘𑀼𑀓𑀲𑀦𑁆𑀦𑀤𑁆𑀥𑁄, 𑀧𑀽𑀢𑀺𑀓𑀸𑀬𑁄 𑀦𑀺𑀭𑀢𑁆𑀣𑀓𑁄.

𑁫𑁭𑁦.

‘‘𑀅𑀝𑁆𑀞𑀺𑀲𑀗𑁆𑀖𑀸𑀢𑀖𑀝𑀺𑀢𑁄, 𑀦𑁆𑀳𑀸𑀭𑀼𑀲𑀼𑀢𑁆𑀢𑀦𑀺𑀩𑀦𑁆𑀥𑀦𑁄;

𑀦𑁂𑀓𑁂𑀲𑀁 𑀲𑀁𑀕𑀢𑀻𑀪𑀸𑀯𑀸, 𑀓𑀧𑁆𑀧𑁂𑀢𑀺 𑀇𑀭𑀺𑀬𑀸𑀧𑀣𑀁.

𑁫𑁭𑁧.

‘‘𑀥𑀼𑀯𑀧𑁆𑀧𑀬𑀸𑀢𑁄 𑀫𑀭𑀡𑀸𑀬, 𑀫𑀘𑁆𑀘𑀼𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂;

𑀇𑀥𑁂𑀯 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀬𑁂𑀦𑀓𑀸𑀫𑀗𑁆𑀕𑀫𑁄 𑀦𑀭𑁄.

𑁫𑁭𑁨.

‘‘𑀅𑀯𑀺𑀚𑁆𑀚𑀸𑀬 ¶ 𑀦𑀺𑀯𑀼𑀢𑁄 𑀓𑀸𑀬𑁄, 𑀘𑀢𑀼𑀕𑀦𑁆𑀣𑁂𑀦 𑀕𑀦𑁆𑀣𑀺𑀢𑁄;

𑀑𑀖𑀲𑀁𑀲𑀻𑀤𑀦𑁄 𑀓𑀸𑀬𑁄, 𑀅𑀦𑀼𑀲𑀬𑀸𑀚𑀸𑀮𑀫𑁄𑀢𑁆𑀣𑀢𑁄.

𑁫𑁭𑁩.

‘‘𑀧𑀜𑁆𑀘𑀦𑀻𑀯𑀭𑀡𑁂 𑀬𑀼𑀢𑁆𑀢𑁄, 𑀯𑀺𑀢𑀓𑁆𑀓𑁂𑀦 𑀲𑀫𑀧𑁆𑀧𑀺𑀢𑁄;

𑀢𑀡𑁆𑀳𑀸𑀫𑀽𑀮𑁂𑀦𑀸𑀦𑀼𑀕𑀢𑁄, 𑀫𑁄𑀳𑀘𑁆𑀙𑀸𑀤𑀦𑀙𑀸𑀤𑀺𑀢𑁄.

𑁫𑁭𑁪.

‘‘𑀏𑀯𑀸𑀬𑀁 ¶ 𑀯𑀢𑁆𑀢𑀢𑁂 𑀓𑀸𑀬𑁄, 𑀓𑀫𑁆𑀫𑀬𑀦𑁆𑀢𑁂𑀦 𑀬𑀦𑁆𑀢𑀺𑀢𑁄;

𑀲𑀫𑁆𑀧𑀢𑁆𑀢𑀺 𑀘 𑀯𑀺𑀧𑀢𑁆𑀬𑀦𑁆𑀢𑀸, 𑀦𑀸𑀦𑀸𑀪𑀸𑀯𑁄 𑀯𑀺𑀧𑀚𑁆𑀚𑀢𑀺.

𑁫𑁭𑁫.

‘‘𑀬𑁂𑀫𑀁 𑀓𑀸𑀬𑀁 𑀫𑀫𑀸𑀬𑀦𑁆𑀢𑀺, 𑀅𑀦𑁆𑀥𑀩𑀸𑀮𑀸 𑀧𑀼𑀣𑀼𑀚𑁆𑀚𑀦𑀸;

𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀁 𑀖𑁄𑀭𑀁, 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀁.

𑁫𑁭𑁬.

‘‘𑀬𑁂𑀫𑀁 𑀓𑀸𑀬𑀁 𑀯𑀺𑀯𑀚𑁆𑀚𑁂𑀦𑁆𑀢𑀺, 𑀕𑀽𑀣𑀮𑀺𑀢𑁆𑀢𑀁𑀯 𑀧𑀦𑁆𑀦𑀕𑀁;

𑀪𑀯𑀫𑀽𑀮𑀁 𑀯𑀫𑀺𑀢𑁆𑀯𑀸𑀦, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀦𑁆𑀢𑀺𑀦𑀸𑀲𑀯𑀸’’𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀢𑀲𑁆𑀲 𑀅𑀲𑀼𑀪𑀓𑀣𑀁 𑀓𑀣𑁂𑀲𑀺. 𑀲𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀬𑀸𑀣𑀸𑀯𑀢𑁄 𑀲𑀭𑀻𑀭𑀲𑀪𑀸𑀯𑀯𑀺𑀪𑀸𑀯𑀦𑀁 𑀅𑀲𑀼𑀪𑀓𑀣𑀁 𑀲𑀼𑀢𑁆𑀯𑀸 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀲𑀁𑀯𑀺𑀕𑁆𑀕𑀳𑀤𑀬𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚’’𑀦𑁆𑀢𑀺 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀲𑀫𑀻𑀧𑁂 𑀞𑀺𑀢𑀫𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀺𑀓𑁆𑀔𑀼, 𑀇𑀫𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀢𑀁 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀔𑀼𑀭𑀕𑁆𑀕𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀢𑁂𑀭 𑁧.𑁪.𑁧𑁦𑁨-𑁧𑁦𑁭) 𑁋

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀣𑀽𑀧𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸;

𑀯𑀺𑀘𑀺𑀢𑁆𑀢𑀤𑀼𑀲𑁆𑀲𑁂 𑀮𑀕𑁂𑀢𑁆𑀯𑀸, 𑀓𑀧𑁆𑀧𑀭𑀼𑀓𑁆𑀔𑀁 𑀞𑀧𑁂𑀲𑀳𑀁.

‘‘𑀬𑀁 ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑁄𑀪𑀬𑀦𑁆𑀢𑁄 𑀫𑀫 𑀤𑁆𑀯𑀸𑀭𑀁, 𑀓𑀧𑁆𑀧𑀭𑀼𑀓𑁆𑀔𑁄 𑀧𑀢𑀺𑀝𑁆𑀞𑀢𑀺.

‘‘𑀅𑀳𑀜𑁆𑀘 𑀧𑀭𑀺𑀲𑀸 𑀘𑁂𑀯, 𑀬𑁂 𑀓𑁂𑀘𑀺 𑀫𑀫𑀯𑀲𑁆𑀲𑀺𑀢𑀸;

𑀢𑀫𑁆𑀳𑀸 𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸𑀦, 𑀦𑀺𑀯𑀸𑀲𑁂𑀫 𑀫𑀬𑀁 𑀲𑀤𑀸.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀭𑀼𑀓𑁆𑀔𑀁 𑀞𑀧𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀧𑁆𑀧𑀭𑀼𑀓𑁆𑀔𑀲𑁆𑀲𑀺𑀤𑀁 𑀨𑀮𑀁.

‘‘𑀇𑀢𑁄 𑀘 𑀲𑀢𑁆𑀢𑀫𑁂 𑀓𑀧𑁆𑀧𑁂, 𑀲𑀼𑀘𑁂𑀴𑀸 𑀅𑀝𑁆𑀞 𑀔𑀢𑁆𑀢𑀺𑀬𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 ¶ 𑀧𑀦 𑀧𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀢𑀸 𑀏𑀯 𑀕𑀸𑀣𑀸 𑀅𑀪𑀸𑀲𑀺. 𑀢𑁂𑀦𑁂𑀯 𑀢𑀸 𑀣𑁂𑀭𑀕𑀸𑀣𑀸 𑀦𑀸𑀫 𑀚𑀸𑀢𑀸.

𑀢𑀢𑁆𑀣 𑀦𑀸𑀦𑀸𑀓𑀼𑀮𑀫𑀮𑀲𑀫𑁆𑀧𑀼𑀡𑁆𑀡𑁄𑀢𑀺, 𑀦𑀸𑀦𑀸𑀓𑀼𑀮𑁂𑀳𑀺 𑀦𑀸𑀦𑀸𑀪𑀸𑀕𑁂𑀳𑀺 𑀫𑀮𑁂𑀳𑀺 𑀲𑀫𑁆𑀧𑀼𑀡𑁆𑀡𑁄, 𑀓𑁂𑀲𑀮𑁄𑀫𑀸𑀤𑀺𑀦𑀸𑀦𑀸𑀯𑀺𑀥𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑀪𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀉𑀓𑁆𑀓𑀸𑀭𑀲𑀫𑁆𑀪𑀯𑁄𑀢𑀺, 𑀉𑀓𑁆𑀓𑀸𑀭𑁄 𑀯𑀼𑀘𑁆𑀘𑀢𑀺 𑀯𑀘𑁆𑀘𑀓𑀽𑀧𑀁. 𑀬𑀢𑁆𑀢𑀓𑀯𑀬𑀸 𑀫𑀸𑀢𑀸, 𑀢𑀢𑁆𑀢𑀓𑀁 𑀓𑀸𑀮𑀁 𑀓𑀸𑀭𑀧𑀭𑀺𑀲𑁂𑀤𑀺𑀢𑀯𑀘𑁆𑀘𑀓𑀽𑀧𑀲𑀤𑀺𑀲𑀢𑀸𑀬 𑀫𑀸𑀢𑀼 𑀓𑀼𑀘𑁆𑀙𑀺 𑀇𑀥 ‘‘𑀫𑀳𑀸𑀉𑀓𑁆𑀓𑀸𑀭𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀓𑀼𑀘𑁆𑀙𑀺 𑀲𑀫𑁆𑀪𑀯𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀫𑀳𑀸𑀉𑀓𑁆𑀓𑀸𑀭𑀲𑀫𑁆𑀪𑀯𑁄. 𑀘𑀦𑁆𑀤𑀦𑀺𑀓𑀁𑀯𑀸𑀢𑀺 𑀘𑀦𑁆𑀤𑀦𑀺𑀓𑀁 𑀦𑀸𑀫 𑀉𑀘𑁆𑀙𑀺𑀝𑁆𑀞𑁄𑀤𑀓𑀕𑀩𑁆𑀪𑀫𑀮𑀸𑀤𑀻𑀦𑀁 𑀙𑀟𑁆𑀟𑀦𑀝𑁆𑀞𑀸𑀦𑀁, 𑀬𑀁 𑀚𑀡𑁆𑀡𑀼𑀫𑀢𑁆𑀢𑀁 𑀅𑀲𑀼𑀘𑀺𑀪𑀭𑀺𑀢𑀫𑁆𑀧𑀺 𑀳𑁄𑀢𑀺, 𑀢𑀸𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀓𑁆𑀓𑀦𑁆𑀢𑀺, 𑀧𑀭𑀺𑀡𑀢𑀁 𑀧𑀼𑀭𑀸𑀡𑀁. 𑀢𑁂𑀦 𑀬𑀣𑀸 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑁂 𑀦𑀺𑀤𑀸𑀖𑀲𑀫𑀬𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀲𑀫𑀼𑀧𑀩𑁆𑀬𑀽𑀴𑁆𑀳𑀫𑀼𑀢𑁆𑀢𑀓𑀭𑀻𑀲𑀅𑀝𑁆𑀞𑀺𑀘𑀫𑁆𑀫𑀦𑁆𑀳𑀸𑀭𑀼𑀔𑀡𑁆𑀟𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀦𑀸𑀦𑀸𑀓𑀼𑀡𑀧𑀪𑀭𑀺𑀢𑀁 𑀓𑀤𑁆𑀤𑀫𑁄𑀤𑀓𑀸𑀮𑀼𑀴𑀺𑀢𑀁 ¶ 𑀓𑀢𑀺𑀧𑀬𑀤𑀺𑀯𑀲𑀸𑀢𑀺𑀓𑁆𑀓𑀫𑁂𑀦 𑀲𑀁𑀚𑀸𑀢 𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀲𑀽𑀭𑀺𑀬𑀸𑀢𑀧𑀲𑀦𑁆𑀢𑀸𑀧𑀓𑀼𑀣𑀺𑀢𑀁 𑀉𑀧𑀭𑀺 𑀨𑁂𑀡𑀧𑀼𑀩𑁆𑀩𑀼𑀴𑀓𑀸𑀦𑀺 𑀫𑀼𑀜𑁆𑀘𑀦𑁆𑀢𑀁 𑀅𑀪𑀺𑀦𑀻𑀮𑀯𑀡𑁆𑀡𑀁 𑀧𑀭𑀫𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀁 𑀘𑀦𑁆𑀤𑀦𑀺𑀓𑀸𑀯𑀸𑀝𑀁 𑀦𑁂𑀯 𑀉𑀧𑀕𑀦𑁆𑀢𑀼𑀁, 𑀦 𑀤𑀝𑁆𑀞𑀼𑀁 𑀅𑀭𑀳𑀭𑀽𑀧𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀣𑀸𑀭𑀽𑀧𑁄𑀬𑀁 𑀓𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀤𑀸 𑀤𑀼𑀓𑁆𑀔𑀢𑀸𑀫𑀽𑀮𑀬𑁄𑀕𑀢𑁄 𑀅𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀫𑀭𑀡𑁂𑀳𑀺 𑀉𑀤𑁆𑀥𑀼𑀫𑀸𑀬𑀦𑀧𑀭𑀺𑀧𑀘𑁆𑀘𑀦𑀪𑀺𑀚𑁆𑀚𑀦𑀲𑀪𑀸𑀯𑀢𑁆𑀢𑀸 𑀘 𑀫𑀳𑀦𑁆𑀢𑁄 𑀕𑀡𑁆𑀟𑁄 𑀯𑀺𑀬𑀸𑀢𑀺 𑀫𑀳𑀸𑀕𑀡𑁆𑀟𑁄. 𑀲𑀩𑁆𑀩𑀢𑁆𑀣𑀓𑀫𑁂𑀯 𑀤𑀼𑀓𑁆𑀔𑀯𑁂𑀤𑀦𑀸𑀦𑀼𑀩𑀤𑁆𑀥𑀢𑁆𑀢𑀸 𑀕𑀡𑁆𑀟𑀸𑀦𑀁 𑀲𑀳𑀦𑀢𑁄 𑀅𑀲𑀼𑀘𑀺𑀯𑀺𑀲𑁆𑀲𑀦𑁆𑀤𑀦𑀢𑁄 𑀘 𑀫𑀳𑀦𑁆𑀢𑁄 𑀯𑀡𑁄 𑀯𑀺𑀬𑀸𑀢𑀺 𑀫𑀳𑀸𑀯𑀡𑁄 𑀕𑀽𑀣𑀓𑀽𑀧𑁂𑀦 𑀕𑀸𑀴𑀺𑀢𑁄𑀢𑀺, 𑀯𑀘𑁆𑀘𑀓𑀽𑀧𑁂𑀦 𑀯𑀘𑁆𑀘𑁂𑀦𑁂𑀯 𑀯𑀸 𑀪𑀭𑀺𑀢𑁄. ‘‘𑀕𑀽𑀣𑀓𑀽𑀧𑀦𑀺𑀕𑀸𑀴𑁆𑀳𑀺𑀢𑁄’’𑀢𑀺𑀧𑀺 𑀧𑀸𑀴𑀺, 𑀯𑀘𑁆𑀘𑀓𑀽𑀧𑀢𑁄 𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀧𑁄𑀧𑀕𑁆𑀖𑀭𑀡𑁄 𑀓𑀸𑀬𑁄, 𑀲𑀤𑀸 𑀲𑀦𑁆𑀤𑀢𑀺 𑀧𑀽𑀢𑀺𑀓𑀦𑁆𑀢𑀺, 𑀅𑀬𑀁 𑀓𑀸𑀬𑁄 𑀆𑀧𑁄𑀥𑀸𑀢𑀼𑀬𑀸 𑀲𑀤𑀸 𑀧𑀕𑁆𑀖𑀭𑀡𑀲𑀻𑀮𑁄, 𑀢𑀜𑁆𑀘 𑀔𑁄 𑀧𑀺𑀢𑁆𑀢𑀲𑁂𑀫𑁆𑀳𑀲𑁂𑀤𑀫𑀼𑀢𑁆𑀢𑀸𑀤𑀺𑀓𑀁 𑀧𑀽𑀢𑀺𑀓𑀁 𑀅𑀲𑀼𑀘𑀺𑀁𑀬𑁂𑀯 𑀲𑀦𑁆𑀤𑀢𑀺, 𑀦 𑀓𑀤𑀸𑀘𑀺 𑀲𑀼𑀘𑀺𑀦𑁆𑀢𑀺 𑀅𑀢𑁆𑀣𑁄.

𑀲𑀝𑁆𑀞𑀺𑀓𑀡𑁆𑀟𑀭𑀲𑀫𑁆𑀩𑀦𑁆𑀥𑁄𑀢𑀺 ¶ , 𑀕𑀻𑀯𑀸𑀬 𑀉𑀧𑀭𑀺𑀫𑀪𑀸𑀕𑀢𑁄 𑀧𑀝𑁆𑀞𑀸𑀬 𑀲𑀭𑀻𑀭𑀁 𑀯𑀺𑀦𑀤𑁆𑀥𑀫𑀸𑀦𑀸 𑀲𑀭𑀻𑀭𑀲𑁆𑀲 𑀧𑀼𑀭𑀺𑀫𑀧𑀘𑁆𑀙𑀺𑀫𑀤𑀓𑁆𑀔𑀺𑀡𑀯𑀸𑀫𑀧𑀲𑁆𑀲𑁂𑀲𑀼 𑀧𑀘𑁆𑀘𑁂𑀓𑀁 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀻𑀲𑀢𑀺, 𑀳𑀢𑁆𑀣𑀧𑀸𑀤𑁂 𑀯𑀺𑀦𑀤𑁆𑀥𑀫𑀸𑀦𑀸 𑀢𑁂𑀲𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀲𑁆𑀲𑁂𑀲𑀼 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀸𑀢𑀺 ¶ 𑀲𑀝𑁆𑀞𑀺𑀬𑀸 𑀓𑀡𑁆𑀟𑀭𑁂𑀳𑀺 𑀫𑀳𑀸𑀦𑁆𑀳𑀸𑀭𑀽𑀳𑀺 𑀲𑀩𑁆𑀩𑀲𑁄 𑀩𑀤𑁆𑀥𑁄 𑀯𑀺𑀦𑀤𑁆𑀥𑁄𑀢𑀺 𑀲𑀝𑁆𑀞𑀺𑀓𑀡𑁆𑀟𑀭𑀲𑀫𑁆𑀩𑀦𑁆𑀥𑁄. 𑀫𑀁𑀲𑀮𑁂𑀧𑀦𑀮𑁂𑀧𑀺𑀢𑁄𑀢𑀺, 𑀫𑀁𑀲𑀲𑀗𑁆𑀔𑀸𑀢𑁂𑀦 𑀮𑁂𑀧𑀦𑁂𑀦 𑀮𑀺𑀢𑁆𑀢𑁄, 𑀦𑀯𑀫𑀁𑀲𑀧𑁂𑀲𑀺𑀲𑀢𑀸𑀦𑀼𑀮𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀘𑀫𑁆𑀫𑀓𑀜𑁆𑀘𑀼𑀓𑀲𑀦𑁆𑀦𑀤𑁆𑀥𑁄𑀢𑀺, 𑀘𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀜𑁆𑀘𑀼𑀓𑁂𑀦 𑀲𑀩𑁆𑀩𑀲𑁄 𑀑𑀦𑀤𑁆𑀥𑁄 𑀧𑀭𑀺𑀬𑁄𑀦𑀤𑁆𑀥𑁄 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀧𑀽𑀢𑀺𑀓𑀸𑀬𑁄𑀢𑀺, 𑀲𑀩𑁆𑀩𑀲𑁄 𑀧𑀽𑀢𑀺𑀕𑀦𑁆𑀥𑀺𑀓𑁄 𑀓𑀸𑀬𑁄. 𑀦𑀺𑀭𑀢𑁆𑀣𑀓𑁄𑀢𑀺, 𑀦𑀺𑀧𑁆𑀧𑀬𑁄𑀚𑀦𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀸𑀡𑀻𑀦𑀁 𑀓𑀸𑀬𑁄 𑀘𑀫𑁆𑀫𑀸𑀤𑀺𑀯𑀺𑀦𑀺𑀬𑁄𑀕𑁂𑀦 𑀲𑀺𑀬𑀸 𑀲𑀧𑁆𑀧𑀬𑁄𑀚𑀦𑁄, 𑀦 𑀢𑀣𑀸 𑀫𑀦𑀼𑀲𑁆𑀲𑀓𑀸𑀬𑁄𑀢𑀺. 𑀅𑀝𑁆𑀞𑀺𑀲𑀗𑁆𑀖𑀸𑀢𑀖𑀝𑀺𑀢𑁄𑀢𑀺, 𑀅𑀢𑀺𑀭𑁂𑀓𑀢𑀺𑀲𑀢𑀸𑀦𑀁 𑀅𑀝𑁆𑀞𑀻𑀦𑀁 𑀲𑀗𑁆𑀖𑀸𑀢𑁂𑀦 𑀖𑀝𑀺𑀢𑁄 𑀲𑀫𑁆𑀩𑀦𑁆𑀥𑁄. 𑀦𑁆𑀳𑀸𑀭𑀼𑀲𑀼𑀢𑁆𑀢𑀦𑀺𑀩𑀦𑁆𑀥𑀦𑁄𑀢𑀺, 𑀲𑀼𑀢𑁆𑀢𑀲𑀤𑀺𑀲𑁂𑀳𑀺 𑀦𑀯𑀳𑀺 𑀦𑁆𑀳𑀸𑀭𑀼𑀲𑀢𑁂𑀳𑀺 𑀦𑀺𑀩𑀦𑁆𑀥𑀺𑀢𑁄. 𑀦𑁂𑀓𑁂𑀲𑀁 𑀲𑀁𑀕𑀢𑀻𑀪𑀸𑀯𑀸𑀢𑀺, 𑀘𑀢𑀼𑀫𑀳𑀸𑀪𑀽𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀲𑀫𑀯𑀸𑀬𑀲𑀫𑁆𑀩𑀦𑁆𑀥𑁂𑀦 𑀲𑀼𑀢𑁆𑀢𑀫𑁂𑀭𑀓𑀲𑀫𑀯𑀸𑀬𑁂𑀦 𑀬𑀦𑁆𑀢𑀁 𑀯𑀺𑀬 𑀞𑀸𑀦𑀸𑀤𑀺𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺.

𑀥𑀼𑀯𑀧𑁆𑀧𑀬𑀸𑀢𑁄 𑀫𑀭𑀡𑀸𑀬𑀸𑀢𑀺, 𑀫𑀭𑀡𑀲𑁆𑀲 𑀅𑀢𑁆𑀣𑀸𑀬 𑀏𑀓𑀦𑁆𑀢𑀕𑀫𑀦𑁄, 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀫𑀭𑀡𑀁 𑀧𑀢𑀺 𑀧𑀯𑀢𑁆𑀢𑁄. 𑀢𑀢𑁄 𑀏𑀯 𑀫𑀘𑁆𑀘𑀼𑀭𑀸𑀚𑀲𑁆𑀲 𑀫𑀭𑀡𑀲𑁆𑀲 ¶ 𑀲𑀦𑁆𑀢𑀺𑀓𑁂 𑀞𑀺𑀢𑁄. 𑀇𑀥𑁂𑀯 𑀙𑀟𑁆𑀟𑀬𑀺𑀢𑁆𑀯𑀸𑀦𑀸𑀢𑀺, 𑀇𑀫𑀲𑁆𑀫𑀺𑀁𑀬𑁂𑀯 𑀮𑁄𑀓𑁂 𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸, 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑀕𑀸𑀫𑀻 𑀅𑀬𑀁 𑀲𑀢𑁆𑀢𑁄, 𑀢𑀲𑁆𑀫𑀸 ‘‘𑀧𑀳𑀸𑀬 𑀕𑀫𑀦𑀻𑀬𑁄 𑀅𑀬𑀁 𑀓𑀸𑀬𑁄’’𑀢𑀺 𑀏𑀯𑀫𑁆𑀧𑀺 𑀲𑀗𑁆𑀕𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄𑀢𑀺, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑁄 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁄, 𑀅𑀜𑁆𑀜𑀣𑀸 𑀓𑁄 𑀏𑀢𑁆𑀣 𑀲𑀗𑁆𑀕𑀁 𑀚𑀦𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀼𑀕𑀦𑁆𑀣𑁂𑀦𑀸𑀢𑀺, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑁂𑀦 𑀕𑀦𑁆𑀣𑁂𑀦 𑀕𑀦𑁆𑀣𑀺𑀢𑁄, 𑀕𑀦𑁆𑀣𑀦𑀺𑀬𑀪𑀸𑀯𑁂𑀦 𑀯𑀺𑀦𑀤𑁆𑀥𑀺𑀢𑁄. 𑀑𑀖𑀲𑀁𑀲𑀻𑀤𑀦𑁄𑀢𑀺, 𑀑𑀖𑀦𑀺𑀬𑀪𑀸𑀯𑁂𑀦 𑀓𑀸𑀫𑁄𑀖𑀸𑀤𑀻𑀲𑀼 𑀘𑀢𑀽𑀲𑀼 𑀑𑀖𑁂𑀲𑀼 𑀲𑀁𑀲𑀻𑀤𑀦𑀓𑁄. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀓𑀸𑀫𑀭𑀸𑀕𑀸𑀤𑀬𑁄 𑀅𑀦𑀼𑀲𑀬𑀸. 𑀢𑁂𑀲𑀁 𑀚𑀸𑀮𑁂𑀦 𑀑𑀢𑁆𑀣𑀢𑁄 𑀅𑀪𑀺𑀪𑀽𑀢𑁄𑀢𑀺 𑀅𑀦𑀼𑀲𑀬𑀸𑀚𑀸𑀮𑀫𑁄𑀢𑁆𑀣𑀢𑁄. 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀕𑀸𑀣𑀸𑀲𑀼𑀔𑀢𑁆𑀣𑀁 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸 𑀧𑀜𑁆𑀘𑀯𑀺𑀥𑁂𑀦 𑀦𑀻𑀯𑀭𑀡𑁂𑀦 𑀬𑀼𑀢𑁆𑀢𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀘𑀦𑀻𑀯𑀭𑀡𑁂 𑀬𑀼𑀢𑁆𑀢𑁄, 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁.

𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀦𑀸 ¶ 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀧𑁆𑀧𑀺𑀢𑁄 𑀲𑀫𑀲𑁆𑀲𑀺𑀢𑁄𑀢𑀺 𑀯𑀺𑀢𑀓𑁆𑀓𑁂𑀦 𑀲𑀫𑀧𑁆𑀧𑀺𑀢𑁄. 𑀢𑀡𑁆𑀳𑀸𑀫𑀽𑀮𑁂𑀦𑀸𑀦𑀼𑀕𑀢𑁄𑀢𑀺, 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀪𑀯𑀫𑀽𑀮𑁂𑀦 𑀅𑀦𑀼𑀩𑀤𑁆𑀥𑁄. 𑀫𑁄𑀳𑀘𑁆𑀙𑀸𑀤𑀦𑀙𑀸𑀤𑀺𑀢𑁄𑀢𑀺, 𑀲𑀫𑁆𑀫𑁄𑀳𑀲𑀗𑁆𑀔𑀸𑀢𑁂𑀦 𑀆𑀯𑀭𑀡𑁂𑀦 𑀧𑀮𑀺𑀕𑀼𑀡𑁆𑀞𑀺𑀢𑁄. 𑀲𑀩𑁆𑀩𑀫𑁂𑀢𑀁 𑀲𑀯𑀺𑀜𑁆𑀜𑀸𑀡𑀓𑀁 𑀓𑀭𑀚𑀓𑀸𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀯𑀺𑀜𑁆𑀜𑀸𑀡𑀓𑁄 𑀳𑀺 𑀅𑀢𑁆𑀢𑀪𑀸𑀯𑁄 ‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀢𑀺𑀝𑁆𑀞𑀢𑀺, 𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧.𑁧𑁪𑁭) 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀸𑀬𑀁 𑀯𑀢𑁆𑀢𑀢𑁂 𑀓𑀸𑀬𑁄𑀢𑀺 ¶ 𑀏𑀯𑀁 ‘‘𑀦𑀸𑀦𑀸𑀓𑀼𑀮𑀫𑀮𑀲𑀫𑁆𑀧𑀼𑀡𑁆𑀡𑁄’’𑀢𑀺𑀆𑀤𑀺𑀦𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄’’𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀬𑀁 𑀓𑀸𑀬𑁄 𑀯𑀢𑁆𑀢𑀢𑀺, 𑀯𑀢𑁆𑀢𑀦𑁆𑀢𑁄 𑀘 𑀓𑀫𑁆𑀫𑀬𑀦𑁆𑀢𑁂𑀦 𑀲𑀼𑀓𑀢𑀤𑀼𑀓𑁆𑀓𑀝𑁂𑀦 𑀓𑀫𑁆𑀫𑀲𑀗𑁆𑀔𑀸𑀢𑁂𑀦 𑀬𑀦𑁆𑀢𑁂𑀦 𑀬𑀦𑁆𑀢𑀺𑀢𑁄 𑀲𑀗𑁆𑀖𑀝𑀺𑀢𑁄. 𑀬𑀣𑀸 𑀯𑀸 𑀔𑁂𑀫𑀦𑁆𑀢𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀲𑀗𑁆𑀔𑁄𑀪𑀺𑀢𑁄 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼 𑀯𑀢𑁆𑀢𑀢𑀺 𑀧𑀭𑀺𑀩𑁆𑀪𑀫𑀢𑀺. 𑀲𑀫𑁆𑀧𑀢𑁆𑀢𑀺 𑀘 𑀯𑀺𑀧𑀢𑁆𑀬𑀦𑁆𑀢𑀸𑀢𑀺 𑀬𑀸 𑀏𑀢𑁆𑀣 𑀲𑀫𑁆𑀧𑀢𑁆𑀢𑀺, 𑀲𑀸 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸. 𑀲𑀩𑁆𑀩𑀜𑁆𑀳𑀺 𑀬𑁄𑀩𑁆𑀩𑀦𑀁 𑀚𑀭𑀸𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀩𑁆𑀬𑀸𑀥𑀺𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀚𑀻𑀯𑀺𑀢𑀁 𑀫𑀭𑀡𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑁄 𑀲𑀫𑀸𑀕𑀫𑁄 𑀯𑀺𑀬𑁄𑀕𑀧𑀭𑀺𑀬𑁄𑀲𑀸𑀦𑁄. 𑀢𑁂𑀦𑀸𑀳 ‘‘𑀦𑀸𑀦𑀸𑀪𑀸𑀯𑁄 𑀯𑀺𑀧𑀚𑁆𑀚𑀢𑀻’’𑀢𑀺. 𑀦𑀸𑀦𑀸𑀪𑀸𑀯𑁄𑀢𑀺, 𑀯𑀺𑀦𑀸𑀪𑀸𑀯𑁄 𑀯𑀺𑀧𑁆𑀧𑀬𑁄𑀕𑁄, 𑀲𑁄 𑀓𑀤𑀸𑀘𑀺 𑀯𑀺𑀧𑁆𑀧𑀬𑀼𑀜𑁆𑀚𑀓𑀲𑁆𑀲 𑀯𑀲𑁂𑀦, 𑀓𑀤𑀸𑀘𑀺 𑀯𑀺𑀧𑁆𑀧𑀬𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀯𑀲𑁂𑀦𑀸𑀢𑀺 𑀯𑀺𑀯𑀺𑀥𑀁 𑀧𑀚𑁆𑀚𑀢𑀺 𑀧𑀸𑀧𑀼𑀡𑀻𑀬𑀢𑀺.

𑀬𑁂𑀫𑀁 𑀓𑀸𑀬𑀁 𑀫𑀫𑀸𑀬𑀦𑁆𑀢𑀻𑀢𑀺 𑀬𑁂 𑀅𑀦𑁆𑀥𑀩𑀸𑀮𑀸 𑀧𑀼𑀣𑀼𑀚𑁆𑀚𑀦𑀸 𑀏𑀯𑀁 𑀅𑀲𑀼𑀪𑀁 𑀅𑀦𑀺𑀘𑁆𑀘𑀁 𑀅𑀥𑀼𑀯𑀁 𑀤𑀼𑀓𑁆𑀔𑀁 𑀅𑀲𑀸𑀭𑀁 𑀇𑀫𑀁 𑀓𑀸𑀬𑀁 ‘‘𑀫𑀫 𑀇𑀤’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀸 𑀫𑀫𑀸𑀬𑀦𑁆𑀢𑀺 𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑁂 𑀚𑀸𑀢𑀺𑀆𑀤𑀻𑀳𑀺 𑀦𑀺𑀭𑀬𑀸𑀤𑀻𑀳𑀺 𑀘 𑀖𑁄𑀭𑀁 𑀪𑀬𑀸𑀦𑀓𑀁 𑀅𑀧𑀡𑁆𑀟𑀺𑀢𑁂𑀳𑀺 𑀅𑀪𑀺𑀭𑀫𑀺𑀢𑀩𑁆𑀩𑀢𑁄 𑀓𑀝𑀲𑀺𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑀁 𑀧𑀼𑀦𑀧𑁆𑀧𑀼𑀦𑀁 𑀚𑀦𑀦𑀫𑀭𑀡𑀸𑀤𑀻𑀳𑀺 𑀯𑀟𑁆𑀠𑁂𑀦𑁆𑀢𑀺, 𑀢𑁂𑀦𑀸𑀳 ‘‘𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑀬𑁂𑀫𑀁 𑀓𑀸𑀬𑀁 𑀯𑀺𑀯𑀚𑁆𑀚𑁂𑀦𑁆𑀢𑀺, 𑀕𑀽𑀣𑀮𑀺𑀢𑁆𑀢𑀁𑀯 𑀧𑀦𑁆𑀦𑀕𑀦𑁆𑀢𑀺 𑀬𑀣𑀸 𑀦𑀸𑀫 ¶ 𑀧𑀼𑀭𑀺𑀲𑁄 𑀲𑀼𑀔𑀓𑀸𑀫𑁄 𑀚𑀻𑀯𑀺𑀢𑀼𑀓𑀸𑀫𑁄 𑀕𑀽𑀣𑀕𑀢𑀁 𑀆𑀲𑀻𑀯𑀺𑀲𑀁 𑀤𑀺𑀲𑁆𑀯𑀸 𑀚𑀺𑀕𑀼𑀘𑁆𑀙𑀦𑀺𑀬𑀢𑀸𑀬 𑀯𑀸 𑀲𑀧𑁆𑀧𑀝𑀺𑀪𑀬𑀢𑀸𑀬 𑀯𑀸 𑀯𑀺𑀯𑀚𑁆𑀚𑁂𑀢𑀺 𑀦 𑀅𑀮𑁆𑀮𑀻𑀬𑀢𑀺, 𑀏𑀯𑀫𑁂𑀯𑀁 𑀬𑁂 𑀧𑀡𑁆𑀟𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀅𑀲𑀼𑀘𑀺𑀪𑀸𑀯𑁂𑀦 𑀚𑁂𑀕𑀼𑀘𑁆𑀙𑀁 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀲𑀧𑁆𑀧𑀝𑀺𑀪𑀬𑀁 𑀇𑀫𑀁 𑀓𑀸𑀬𑀁 𑀯𑀺𑀯𑀚𑁆𑀚𑁂𑀦𑁆𑀢𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀦𑁆𑀢𑀺. 𑀢𑁂 𑀪𑀯𑀫𑀽𑀮𑀁 𑀅𑀯𑀺𑀚𑁆𑀚𑀁 𑀪𑀯𑀢𑀡𑁆𑀳𑀜𑁆𑀘 𑀯𑀫𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀅𑀘𑁆𑀘𑀦𑁆𑀢𑀫𑁂𑀯 𑀧𑀳𑀸𑀬 𑀢𑀢𑁄 𑀏𑀯 𑀲𑀩𑁆𑀩𑀲𑁄 𑀅𑀦𑀸𑀲𑀯𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺.

𑀓𑀧𑁆𑀧𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀉𑀧𑀲𑁂𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀯𑀺𑀯𑀺𑀢𑁆𑀢𑀁 ¶ 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀉𑀧𑀲𑁂𑀦𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 ¶ 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀦𑀸𑀮𑀓𑀕𑀸𑀫𑁂 𑀭𑀽𑀧𑀲𑀸𑀭𑀻𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀉𑀧𑀲𑁂𑀦𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀬 𑀏𑀓𑀯𑀲𑁆𑀲𑀺𑀓𑁄 ‘‘𑀅𑀭𑀺𑀬𑀕𑀩𑁆𑀪𑀁 𑀯𑀟𑁆𑀠𑁂𑀫𑀻’’𑀢𑀺 𑀏𑀓𑀁 𑀓𑀼𑀮𑀧𑀼𑀢𑁆𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀲𑀢𑁆𑀣𑀸𑀭𑀸 𑀘𑀲𑁆𑀲 𑀢𑀲𑁆𑀲 𑀅𑀯𑀲𑁆𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀪𑀸𑀯𑀁 𑀲𑀼𑀢𑁆𑀯𑀸, ‘‘𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄’’𑀢𑀺 (𑀫𑀳𑀸𑀯. 𑁭𑁫) 𑀕𑀭𑀳𑀺𑀢𑁄. ‘‘𑀇𑀤𑀸𑀦𑀸𑀳𑀁 𑀬𑀤𑀺𑀧𑀺 𑀧𑀭𑀺𑀲𑀁 𑀦𑀺𑀲𑁆𑀲𑀸𑀬 𑀲𑀢𑁆𑀣𑀸𑀭𑀸 𑀕𑀭𑀳𑀺𑀢𑁄, 𑀧𑀭𑀺𑀲𑀁𑀬𑁂𑀯 𑀧𑀦 𑀦𑀺𑀲𑁆𑀲𑀸𑀬 𑀲𑀢𑁆𑀣𑀼 𑀧𑀸𑀲𑀁𑀲𑁄𑀧𑀺 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁨.𑁮𑁬-𑁯𑁬) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀧𑀩𑁆𑀪𑀸𑀭𑀫𑁆𑀳𑀺 𑀦𑀺𑀲𑀻𑀤𑀦𑁆𑀢𑀁, 𑀉𑀧𑀕𑀘𑁆𑀙𑀺𑀁 𑀦𑀭𑀼𑀢𑁆𑀢𑀫𑀁.

‘‘𑀓𑀡𑀺𑀓𑀸𑀭𑀧𑀼𑀧𑁆𑀨𑀁 𑀤𑀺𑀲𑁆𑀯𑀸, 𑀯𑀡𑁆𑀝𑁂 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀙𑀢𑁆𑀢𑀫𑁆𑀳𑀺, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

‘‘𑀧𑀺𑀡𑁆𑀟𑀧𑀸𑀢𑀜𑁆𑀘 𑀧𑀸𑀤𑀸𑀲𑀺𑀁, 𑀧𑀭𑀫𑀦𑁆𑀦𑀁 𑀲𑀼𑀪𑁄𑀚𑀦𑀁;

𑀩𑀼𑀤𑁆𑀥𑁂𑀦 𑀦𑀯𑀫𑁂 𑀢𑀢𑁆𑀣, 𑀲𑀫𑀡𑁂 𑀅𑀝𑁆𑀞 𑀪𑁄𑀚𑀬𑀺𑀁.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀇𑀫𑀺𑀦𑀸 𑀙𑀢𑁆𑀢𑀤𑀸𑀦𑁂𑀦, 𑀧𑀭𑀫𑀦𑁆𑀦𑀧𑀯𑁂𑀘𑁆𑀙𑀦𑀸.

‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀲𑁆𑀲𑀲𑀺;

𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

‘‘𑀏𑀓𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀲𑀸𑀲𑀦𑁂 𑀤𑀺𑀩𑁆𑀩𑀫𑀸𑀦𑀫𑁆𑀳𑀺, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄.

‘‘𑀉𑀧𑀲𑁂𑀦𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄;

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺.

‘‘𑀘𑀭𑀺𑀫𑀁 𑀯𑀢𑁆𑀢𑀢𑁂 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀬𑀫𑁆𑀧𑀺 𑀲𑀩𑁆𑀩𑁂 𑀥𑀼𑀢𑀗𑁆𑀕𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀅𑀜𑁆𑀜𑁂𑀧𑀺 𑀢𑀤𑀢𑁆𑀣𑀸𑀬 𑀲𑀫𑀸𑀤𑀧𑁂𑀢𑀺 ¶ , 𑀢𑁂𑀦 𑀦𑀁 𑀪𑀕𑀯𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑁄𑀲𑀫𑁆𑀩𑀺𑀬𑀁 𑀓𑀮𑀳𑁂 ¶ 𑀉𑀧𑁆𑀧𑀦𑁆𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀤𑁆𑀯𑀺𑀥𑀸𑀪𑀽𑀢𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀓𑀮𑀳𑀁 𑀧𑀭𑀺𑀯𑀚𑁆𑀚𑀺𑀢𑀼𑀓𑀸𑀫𑁂𑀦 ‘‘𑀏𑀢𑀭𑀳𑀺 𑀔𑁄 𑀓𑀮𑀳𑁄 𑀉𑀧𑁆𑀧𑀦𑁆𑀦𑁄, 𑀲𑀗𑁆𑀖𑁄 𑀤𑁆𑀯𑀺𑀥𑀸𑀪𑀽𑀢𑁄, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀝𑁆𑀞𑁄 𑀯𑀺𑀯𑁂𑀓𑀯𑀸𑀲𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄 𑁋

𑁫𑁭𑁭.

‘‘𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀯𑀸𑀴𑀫𑀺𑀕𑀦𑀺𑀲𑁂𑀯𑀺𑀢𑀁;

𑀲𑁂𑀯𑁂 𑀲𑁂𑀦𑀸𑀲𑀦𑀁 𑀪𑀺𑀓𑁆𑀔𑀼, 𑀧𑀝𑀺𑀲𑀮𑁆𑀮𑀸𑀦𑀓𑀸𑀭𑀡𑀸.

𑁫𑁭𑁮.

‘‘𑀲𑀗𑁆𑀓𑀸𑀭𑀧𑀼𑀜𑁆𑀚𑀸 𑀆𑀳𑀢𑁆𑀯𑀸, 𑀲𑀼𑀲𑀸𑀦𑀸 𑀭𑀣𑀺𑀬𑀸𑀳𑀺 𑀘;

𑀢𑀢𑁄 𑀲𑀗𑁆𑀖𑀸𑀝𑀺𑀓𑀁 𑀓𑀢𑁆𑀯𑀸, 𑀮𑀽𑀔𑀁 𑀥𑀸𑀭𑁂𑀬𑁆𑀬 𑀘𑀻𑀯𑀭𑀁.

𑁫𑁭𑁯.

‘‘𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦, 𑀲𑀧𑀤𑀸𑀦𑀁 𑀓𑀼𑀮𑀸 𑀓𑀼𑀮𑀁;

𑀧𑀺𑀡𑁆𑀟𑀺𑀓𑀸𑀬 𑀘𑀭𑁂 𑀪𑀺𑀓𑁆𑀔𑀼, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄.

𑁫𑁮𑁦.

‘‘𑀮𑀽𑀔𑁂𑀦𑀧𑀺 𑀯𑀸 𑀲𑀦𑁆𑀢𑀼𑀲𑁆𑀲𑁂, 𑀦𑀸𑀜𑁆𑀜𑀁 𑀧𑀢𑁆𑀣𑁂 𑀭𑀲𑀁 𑀩𑀳𑀼𑀁;

𑀭𑀲𑁂𑀲𑀼 𑀅𑀦𑀼𑀕𑀺𑀤𑁆𑀥𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑀻 𑀫𑀦𑁄.

𑁫𑁮𑁧.

‘‘𑀅𑀧𑁆𑀧𑀺𑀘𑁆𑀙𑁄 𑀘𑁂𑀯 𑀲𑀦𑁆𑀢𑀼𑀝𑁆𑀞𑁄, 𑀧𑀯𑀺𑀯𑀺𑀢𑁆𑀢𑁄 𑀯𑀲𑁂 𑀫𑀼𑀦𑀺;

𑀅𑀲𑀁𑀲𑀝𑁆𑀞𑁄 𑀕𑀳𑀝𑁆𑀞𑁂𑀳𑀺, 𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀁.

𑁫𑁮𑁨.

‘‘𑀬𑀣𑀸 ¶ 𑀚𑀴𑁄 𑀯 𑀫𑀽𑀕𑁄 𑀯, 𑀅𑀢𑁆𑀢𑀸𑀦𑀁 𑀤𑀲𑁆𑀲𑀬𑁂 𑀢𑀣𑀸;

𑀦𑀸𑀢𑀺𑀯𑁂𑀮𑀁 𑀲𑀫𑁆𑀪𑀸𑀲𑁂𑀬𑁆𑀬, 𑀲𑀗𑁆𑀖𑀫𑀚𑁆𑀛𑀫𑁆𑀳𑀺 𑀧𑀡𑁆𑀟𑀺𑀢𑁄.

𑁫𑁮𑁩.

‘‘𑀦 𑀲𑁄 𑀉𑀧𑀯𑀤𑁂 𑀓𑀜𑁆𑀘𑀺, 𑀉𑀧𑀖𑀸𑀢𑀁 𑀯𑀺𑀯𑀚𑁆𑀚𑀬𑁂;

𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀁, 𑀫𑀢𑁆𑀢𑀜𑁆𑀜𑀽 𑀘𑀲𑁆𑀲 𑀪𑁄𑀚𑀦𑁂.

𑁫𑁮𑁪. ‘‘𑀲𑀼𑀕𑁆𑀕𑀳𑀻𑀢𑀦𑀺𑀫𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀲𑁆𑀲𑀼𑀧𑁆𑀧𑀸𑀤𑀓𑁄𑀯𑀺𑀤𑁄.

𑀲𑀫𑀣𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬, 𑀓𑀸𑀮𑁂𑀦 𑀘 𑀯𑀺𑀧𑀲𑁆𑀲𑀦𑀁.

𑁫𑁮𑁫.

‘‘𑀯𑀻𑀭𑀺𑀬𑀲𑀸𑀢𑀘𑁆𑀘𑀲𑀫𑁆𑀧𑀦𑁆𑀦𑁄, 𑀬𑀼𑀢𑁆𑀢𑀬𑁄𑀕𑁄 𑀲𑀤𑀸 𑀲𑀺𑀬𑀸;

𑀦 𑀘 𑀅𑀧𑁆𑀧𑀢𑁆𑀯𑀸 𑀤𑀼𑀓𑁆𑀔𑀦𑁆𑀢𑀁, 𑀯𑀺𑀲𑁆𑀲𑀸𑀲𑀁 𑀏𑀬𑁆𑀬 𑀧𑀡𑁆𑀟𑀺𑀢𑁄.

𑁫𑁮𑁬.

‘‘𑀏𑀯𑀁 𑀯𑀺𑀳𑀭𑀫𑀸𑀦𑀲𑁆𑀲, 𑀲𑀼𑀤𑁆𑀥𑀺𑀓𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀔𑀻𑀬𑀦𑁆𑀢𑀺 𑀆𑀲𑀯𑀸 𑀲𑀩𑁆𑀩𑁂, 𑀦𑀺𑀩𑁆𑀩𑀼𑀢𑀺𑀜𑁆𑀘𑀸𑀥𑀺𑀕𑀘𑁆𑀙𑀢𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀯𑀺𑀯𑀺𑀢𑁆𑀢𑀦𑁆𑀢𑀺, 𑀚𑀦𑀯𑀺𑀯𑀺𑀢𑁆𑀢𑀁 𑀲𑀼𑀜𑁆𑀜𑀁 𑀅𑀭𑀜𑁆𑀜𑀸𑀤𑀺𑀁. 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺, 𑀦𑀺𑀲𑁆𑀲𑀤𑁆𑀤𑀁 𑀲𑀤𑁆𑀤𑀲𑀗𑁆𑀖𑀝𑁆𑀝𑀦𑀭𑀳𑀺𑀢𑀁. 𑀯𑀸𑀴𑀫𑀺𑀕𑀦𑀺𑀲𑁂𑀯𑀺𑀢𑀦𑁆𑀢𑀺, 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀯𑀸𑀴𑀫𑀺𑀕𑁂𑀳𑀺 𑀘𑀭𑀺𑀢𑀁. 𑀇𑀫𑀺𑀦𑀸𑀧𑀺 𑀚𑀦𑀯𑀺𑀯𑁂𑀓𑀁𑀬𑁂𑀯 𑀤𑀲𑁆𑀲𑁂𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑀪𑀸𑀯𑀤𑀻𑀧𑀦𑀢𑁄. 𑀲𑁂𑀦𑀸𑀲𑀦𑀦𑁆𑀢𑀺, 𑀲𑀬𑀺𑀢𑀼𑀁 𑀆𑀲𑀬𑀺𑀢𑀼𑀜𑁆𑀘 𑀬𑀼𑀢𑁆𑀢𑀪𑀸𑀯𑁂𑀦 ¶ 𑀯𑀲𑀦𑀝𑁆𑀞𑀸𑀦𑀁 𑀇𑀥 𑀲𑁂𑀦𑀸𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀝𑀺𑀲𑀮𑁆𑀮𑀸𑀦𑀓𑀸𑀭𑀡𑀸𑀢𑀺, 𑀧𑀝𑀺𑀲𑀮𑁆𑀮𑀸𑀦𑀦𑀺𑀫𑀺𑀢𑁆𑀢𑀁, 𑀦𑀸𑀦𑀸𑀭𑀫𑁆𑀫𑀡𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂𑀬𑁂𑀯 𑀘𑀺𑀢𑁆𑀢𑀲𑁆𑀲 𑀧𑀝𑀺 𑀧𑀝𑀺 𑀲𑀫𑁆𑀫𑀤𑁂𑀯 𑀅𑀮𑁆𑀮𑀻𑀬𑀦𑀢𑁆𑀣𑀁.

𑀏𑀯𑀁 𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀲𑁂𑀦𑀸𑀲𑀦𑁂 𑀲𑀦𑁆𑀢𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀻𑀯𑀭𑀸𑀤𑀻𑀲𑀼𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀓𑀸𑀭𑀧𑀼𑀜𑁆𑀚𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀲𑀁𑀓𑀸𑀭𑀧𑀼𑀜𑁆𑀚𑀸𑀢𑀺 𑀲𑀁𑀓𑀸𑀭𑀸𑀦𑀁 𑀧𑀼𑀜𑁆𑀚𑀁 𑀲𑀁𑀓𑀸𑀭𑀧𑀼𑀜𑁆𑀚𑀁, 𑀢𑀢𑁄 𑀓𑀘𑀯𑀭𑀝𑁆𑀞𑀸𑀦𑀸. 𑀆𑀳𑀢𑁆𑀯𑀸𑀢𑀺 𑀆𑀳𑀭𑀺𑀢𑁆𑀯𑀸. 𑀢𑀢𑁄𑀢𑀺 𑀢𑀣𑀸 𑀆𑀳𑀝𑀘𑁄𑀴𑀓𑁆𑀔𑀡𑁆𑀟𑁂𑀳𑀺. 𑀓𑀭𑀡𑁂 𑀳𑀺 𑀇𑀤𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀮𑀽𑀔𑀦𑁆𑀢𑀺 𑀲𑀢𑁆𑀣𑀮𑀽𑀔𑀭𑀚𑀦𑀮𑀽𑀔𑀸𑀤𑀺𑀦𑀸 𑀮𑀽𑀔𑀁 𑀅𑀯𑀡𑁆𑀡𑀸𑀫𑀝𑁆𑀞𑀁. 𑀥𑀸𑀭𑁂𑀬𑁆𑀬𑀸𑀢𑀺 𑀦𑀺𑀯𑀸𑀲𑀦𑀸𑀤𑀺𑀯𑀲𑁂𑀦 𑀧𑀭𑀺𑀳𑀭𑁂𑀬𑁆𑀬, 𑀏𑀢𑁂𑀦 𑀘𑀻𑀯𑀭𑀲𑀦𑁆𑀢𑁄𑀲𑀁 𑀯𑀤𑀢𑀺.

𑀦𑀻𑀘 𑀫𑀦𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦’’𑀦𑁆𑀢𑀺𑀆𑀤𑀺𑀓𑀁 (𑀇𑀢𑀺𑀯𑀼. 𑁯𑁧; 𑀲𑀁. 𑀦𑀺. 𑁩.𑁮𑁦) 𑀲𑀼𑀕𑀢𑁄𑀯𑀸𑀤𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀦𑀺𑀳𑀢𑀫𑀸𑀦𑀤𑀧𑁆𑀧𑀁 𑀘𑀺𑀢𑁆𑀢𑀁 𑀓𑀢𑁆𑀯𑀸. 𑀲𑀧𑀤𑀸𑀦𑀦𑁆𑀢𑀺 𑀖𑀭𑁂𑀲𑀼 ¶ 𑀅𑀯𑀔𑀡𑁆𑀟𑀭𑀳𑀺𑀢𑀁; 𑀅𑀦𑀼𑀖𑀭𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀼𑀮𑀸 𑀓𑀼𑀮’’𑀦𑁆𑀢𑀺. 𑀓𑀼𑀮𑀸 𑀓𑀼𑀮𑀦𑁆𑀢𑀺 𑀓𑀼𑀮𑀢𑁄 𑀓𑀼𑀮𑀁, 𑀓𑀼𑀮𑀸𑀦𑀼𑀧𑀼𑀩𑁆𑀩𑀺𑀬𑀸 𑀖𑀭𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀺𑀡𑁆𑀟𑀺𑀓𑀸𑀬𑀸𑀢𑀺 𑀫𑀺𑀲𑁆𑀲𑀓𑀪𑀺𑀓𑁆𑀔𑀸𑀬, 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀁 𑀯𑀤𑀢𑀺. 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀲𑀼𑀧𑀺𑀳𑀺𑀢𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁄. 𑀲𑀼𑀲𑀁𑀯𑀼𑀢𑁄𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀦𑀁 𑀅𑀪𑀸𑀯𑁂𑀦 𑀲𑀼𑀝𑁆𑀞𑀼 𑀲𑀁𑀯𑀼𑀢𑁄.

𑀮𑀽𑀔𑁂𑀦𑀧𑀺 𑀯𑀸𑀢𑀺 𑀅𑀧𑀺𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂, 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑁂. 𑀉𑀪𑀬𑁂𑀦𑀧𑀺 𑀮𑀽𑀔𑁂𑀦𑀧𑀺 𑀅𑀧𑁆𑀧𑁂𑀦𑀧𑀺 𑀬𑁂𑀦 𑀓𑁂𑀦𑀘𑀺 𑀲𑀼𑀮𑀪𑁂𑀦 𑀇𑀢𑀭𑀻𑀢𑀭𑁂𑀦 𑀲𑀦𑁆𑀢𑀼𑀲𑁆𑀲𑁂 𑀲𑀫𑀁 𑀲𑀫𑁆𑀫𑀸 𑀢𑀼𑀲𑁆𑀲𑁂𑀬𑁆𑀬. 𑀢𑁂𑀦𑀸𑀳 ‘‘𑀦𑀸𑀜𑁆𑀜𑀁 𑀧𑀢𑁆𑀣𑁂 𑀭𑀲𑀁 𑀩𑀳𑀼’’𑀦𑁆𑀢𑀺. 𑀦𑀸𑀜𑁆𑀜𑀁 𑀧𑀢𑁆𑀣𑁂 𑀭𑀲𑀁 𑀩𑀳𑀼𑀦𑁆𑀢𑀺 𑀅𑀢𑁆𑀢𑀦𑀸 𑀬𑀣𑀸𑀮𑀤𑁆𑀥𑀢𑁄 𑀅𑀜𑁆𑀜𑀁 𑀫𑀥𑀼𑀭𑀸𑀤𑀺𑀭𑀲𑀁 𑀩𑀳𑀼𑀁 𑀧𑀡𑀻𑀢𑀜𑁆𑀘 𑀦 𑀧𑀢𑁆𑀣𑁂𑀬𑁆𑀬 𑀦 𑀧𑀺𑀳𑁂𑀬𑁆𑀬, 𑀇𑀫𑀺𑀦𑀸 𑀕𑀺𑀮𑀸𑀦𑀧𑀘𑁆𑀘𑀬𑁂𑀧𑀺 𑀲𑀦𑁆𑀢𑁄𑀲𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀭𑀲𑁂𑀲𑀼 𑀕𑁂𑀥𑀯𑀸𑀭𑀡𑀢𑁆𑀣𑀁 𑀧𑀦 𑀓𑀸𑀭𑀡𑀁 𑀯𑀤𑀦𑁆𑀢𑁄 𑀭𑀲𑁂𑀲𑀼 𑀅𑀦𑀼𑀕𑀺𑀤𑁆𑀥𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑀻 𑀫𑀦𑁄’’𑀢𑀺 𑀆𑀳. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀫𑁆𑀧𑀺 𑀅𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀓𑀼𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑀫𑀸𑀥𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀲𑀺𑀝𑁆𑀞𑀓𑀣𑀸𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀺𑀘𑁆𑀙𑁄 𑀘𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑁄𑀢𑀺, 𑀅𑀦𑀺𑀘𑁆𑀙𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀇𑀘𑁆𑀙𑀸𑀭𑀳𑀺𑀢𑁄, 𑀢𑁂𑀦 𑀘𑀢𑀼𑀩𑁆𑀩𑀺𑀥𑀧𑀘𑁆𑀘𑀬𑁂𑀲𑀼 𑀢𑀡𑁆𑀳𑀼𑀧𑁆𑀧𑀸𑀤𑀯𑀺𑀓𑁆𑀔𑀫𑁆𑀪𑀦𑀫𑀸𑀳. 𑀲𑀦𑁆𑀢𑀼𑀝𑁆𑀞𑁄𑀢𑀺, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑀸𑀤𑀺𑀦𑀸 𑀲𑀦𑁆𑀢𑀼𑀝𑁆𑀞𑁄. 𑀬𑁄 𑀳𑀺 𑁋

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑁂𑀬𑁆𑀬, 𑀦𑀧𑁆𑀧𑀚𑀧𑁆𑀧𑁂𑀬𑁆𑀬𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀬𑁆𑀬, 𑀲𑁄 ‘𑀲𑀦𑁆𑀢𑀼𑀝𑁆𑀞𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀧𑀯𑀺𑀯𑀺𑀢𑁆𑀢𑁄𑀢𑀺 ¶ 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀓𑀸𑀬𑁂𑀦 𑀧𑀯𑀺𑀯𑀺𑀢𑁆𑀢𑁄 𑀯𑀽𑀧𑀓𑀝𑁆𑀞𑁄. 𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀺𑀓𑁂 𑀳𑀺 𑀧𑀭𑀢𑁄 𑀯𑀓𑁆𑀔𑀢𑀺. 𑀯𑀲𑁂𑀢𑀺 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀫𑁄𑀦𑁂𑀬𑁆𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑁂𑀦 𑀫𑀼𑀦𑀺. 𑀅𑀲𑀁𑀲𑀝𑁆𑀞𑁄𑀢𑀺 𑀤𑀲𑁆𑀲𑀦𑀲𑀯𑀦𑀲𑀫𑀼𑀮𑁆𑀮𑀧𑀦𑀲𑀫𑁆𑀪𑁄𑀕𑀓𑀸𑀬𑀲𑀁𑀲𑀕𑁆𑀕𑀸𑀦𑀁 𑀅𑀪𑀸𑀯𑁂𑀦 ¶ 𑀅𑀲𑀁𑀲𑀝𑁆𑀞𑁄 𑀬𑀣𑀸𑀯𑀼𑀢𑁆𑀢𑀲𑀁𑀲𑀕𑁆𑀕𑀭𑀳𑀺𑀢𑁄. 𑀉𑀪𑀬𑀦𑁆𑀢𑀺, 𑀕𑀳𑀝𑁆𑀞𑁂𑀳𑀺 𑀅𑀦𑀸𑀕𑀸𑀭𑁂𑀳𑀺 𑀘𑀸𑀢𑀺 𑀉𑀪𑀬𑁂𑀳𑀺𑀧𑀺 𑀅𑀲𑀁𑀲𑀝𑁆𑀞𑁄. 𑀓𑀭𑀡𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁.

𑀅𑀢𑁆𑀢𑀸𑀦𑀁 𑀤𑀲𑁆𑀲𑀬𑁂 𑀢𑀣𑀸𑀢𑀺 𑀅𑀚𑀴𑁄 𑀅𑀫𑀽𑀕𑁄𑀧𑀺 𑀲𑀫𑀸𑀦𑁄 𑀬𑀣𑀸 𑀚𑀴𑁄 𑀯𑀸 𑀫𑀽𑀕𑁄 𑀯𑀸, 𑀢𑀣𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀬𑁆𑀬, 𑀏𑀢𑁂𑀦 𑀧𑀸𑀕𑀩𑁆𑀩𑀺𑀬𑀧𑁆𑀧𑀳𑀸𑀦𑀫𑀸𑀳. 𑀚𑀴𑁄 𑀯 𑀫𑀽𑀕𑁄 𑀯𑀸𑀢𑀺 𑀘 𑀕𑀸𑀣𑀸𑀲𑀼𑀔𑀢𑁆𑀣𑀁 𑀭𑀲𑁆𑀲𑀢𑁆𑀢𑀁 𑀓𑀢𑀁, 𑀲𑀫𑀼𑀘𑁆𑀘𑀬𑀢𑁆𑀣𑁄 𑀘 ¶ 𑀯𑀸𑀲𑀤𑁆𑀤𑁄. 𑀦𑀸𑀢𑀺𑀯𑁂𑀮𑀁 𑀲𑀫𑁆𑀪𑀸𑀲𑁂𑀬𑁆𑀬𑀸𑀢𑀺 𑀅𑀢𑀺𑀯𑁂𑀮𑀁 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀁 𑀦 𑀪𑀸𑀲𑁂𑀬𑁆𑀬, 𑀫𑀢𑁆𑀢𑀪𑀸𑀡𑀻 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀫𑀚𑁆𑀛𑀫𑁆𑀳𑀻𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂, 𑀚𑀦𑀲𑀫𑀽𑀳𑁂 𑀯𑀸.

𑀦 𑀲𑁄 𑀉𑀧𑀯𑀤𑁂 𑀓𑀜𑁆𑀘𑀻𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀢𑁆𑀢𑀺𑀓𑁄 𑀪𑀺𑀓𑁆𑀔𑀼 𑀳𑀻𑀦𑀁 𑀯𑀸 𑀫𑀚𑁆𑀛𑀺𑀫𑀁 𑀯𑀸 𑀉𑀓𑁆𑀓𑀝𑁆𑀞𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀦 𑀯𑀸𑀘𑀸𑀬 𑀉𑀧𑀯𑀤𑁂𑀬𑁆𑀬. 𑀉𑀧𑀖𑀸𑀢𑀁 𑀯𑀺𑀯𑀚𑁆𑀚𑀬𑁂𑀢𑀺 𑀓𑀸𑀬𑁂𑀦 𑀉𑀧𑀖𑀸𑀢𑀁 𑀧𑀭𑀺𑀯𑀺𑀳𑁂𑀞𑀦𑀁 𑀯𑀚𑁆𑀚𑁂𑀬𑁆𑀬. 𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀫𑁆𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀲𑀁𑀯𑀼𑀢𑁄 𑀅𑀲𑁆𑀲, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀧𑀺𑀳𑀺𑀢𑀓𑀸𑀬𑀯𑀸𑀘𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀜𑁆𑀜𑀽 𑀘𑀲𑁆𑀲 𑀪𑁄𑀚𑀦𑁂𑀢𑀺 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀪𑁄𑀚𑀦𑁂 𑀧𑀫𑀸𑀡𑀜𑁆𑀜𑀽 𑀲𑀺𑀬𑀸.

𑀲𑀼𑀕𑁆𑀕𑀳𑀻𑀢𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 ‘‘𑀏𑀯𑀁 𑀫𑁂 𑀫𑀦𑀲𑀺 𑀓𑀭𑁄𑀢𑁄 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀅𑀳𑁄𑀲𑀻’’𑀢𑀺 𑀢𑀤𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀲𑀼𑀝𑁆𑀞𑀼 𑀕𑀳𑀺𑀢𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁄 𑀅𑀲𑁆𑀲. ‘‘𑀲𑀼𑀕𑁆𑀕𑀳𑀻𑀢𑀦𑀺𑀫𑀺𑀢𑁆𑀢𑁄 𑀲𑁄’’𑀢𑀺𑀧𑀺 𑀧𑀸𑀞𑁄, 𑀲𑁄 𑀬𑁄𑀕𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀲𑁆𑀲𑀼𑀧𑁆𑀧𑀸𑀤𑀓𑁄𑀯𑀺𑀤𑁄𑀢𑀺 𑀏𑀯𑀁 𑀪𑀸𑀯𑀬𑀢𑁄 𑀘𑀺𑀢𑁆𑀢𑀁 𑀮𑀻𑀦𑀁 𑀳𑁄𑀢𑀺, ‘‘𑀏𑀯𑀁 𑀉𑀤𑁆𑀥𑀢’’𑀦𑁆𑀢𑀺 𑀮𑀻𑀦𑀲𑁆𑀲 𑀉𑀤𑁆𑀥𑀢𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑁂 𑀓𑀼𑀲𑀮𑁄 𑀅𑀲𑁆𑀲. 𑀮𑀻𑀦𑁂 𑀳𑀺 𑀘𑀺𑀢𑁆𑀢𑁂 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑁂𑀢𑀩𑁆𑀩𑀸, 𑀉𑀤𑁆𑀥𑀢𑁂 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀦 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁨𑁩𑁪). 𑀲𑀫𑀣𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬𑀸𑀢𑀺 𑀲𑀫𑀣𑀪𑀸𑀯𑀦𑀁 𑀪𑀸𑀯𑁂𑀬𑁆𑀬, 𑀅𑀦𑀼𑀧𑁆𑀧𑀦𑁆𑀦𑀁 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀉𑀧𑁆𑀧𑀦𑁆𑀦𑀜𑁆𑀘 𑀬𑀸𑀯 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺, 𑀢𑀸𑀯 𑀯𑀟𑁆𑀠𑁂𑀬𑁆𑀬 𑀩𑁆𑀬𑀽𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦 𑀘 𑀯𑀺𑀧𑀲𑁆𑀲𑀦𑀦𑁆𑀢𑀺 𑀬𑀣𑀸𑀮𑀤𑁆𑀥𑀁 𑀲𑀫𑀸𑀥𑀺𑀁 𑀦𑀺𑀓𑀦𑁆𑀢𑀺𑀬𑀸 𑀅𑀧𑀭𑀺𑀬𑀸𑀤𑀸𑀦𑁂𑀦 𑀳𑀸𑀦𑀪𑀸𑀕𑀺𑀬𑀁 𑀞𑀺𑀢𑀺𑀪𑀸𑀕𑀺𑀬𑀁 𑀯𑀸 𑀅𑀓𑀢𑁆𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁𑀯 𑀓𑀢𑁆𑀯𑀸 𑀓𑀸𑀮𑁂𑀦 𑀯𑀺𑀧𑀲𑁆𑀲𑀦𑀜𑁆𑀘 𑀅𑀦𑀼𑀬𑀼𑀜𑁆𑀚𑁂𑀬𑁆𑀬. 𑀅𑀣 𑀯𑀸 𑀓𑀸𑀮𑁂𑀦 𑀘 𑀯𑀺𑀧𑀲𑁆𑀲𑀦𑀦𑁆𑀢𑀺 𑀲𑀫𑀣𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀢𑀲𑁆𑀲 𑀣𑀺𑀭𑀻𑀪𑀽𑀢𑀓𑀸𑀮𑁂 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬. 𑀬𑀣𑀸𑀳 𑁋

‘‘𑀅𑀣 ¶ 𑀯𑀸 𑀲𑀫𑀸𑀥𑀺𑀮𑀸𑀪𑁂𑀦, 𑀯𑀺𑀯𑀺𑀢𑁆𑀢𑀲𑀬𑀦𑁂𑀦 𑀯𑀸;

𑀪𑀺𑀓𑁆𑀔𑀼 𑀯𑀺𑀲𑁆𑀲𑀸𑀲𑀫𑀸𑀧𑀸𑀤𑀺, 𑀅𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬’’𑀦𑁆𑀢𑀺. (𑀥. 𑀧. 𑁨𑁭𑁧-𑁨𑁭𑁨);

𑀢𑁂𑀦 ¶ ¶ 𑀯𑀼𑀢𑁆𑀢𑀁 𑁋 ‘‘𑀯𑀻𑀭𑀺𑀬𑀲𑀸𑀢𑀘𑁆𑀘𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺. 𑀲𑀢𑀢𑀪𑀸𑀯𑁄 𑀲𑀸𑀢𑀘𑁆𑀘𑀁, 𑀯𑀻𑀭𑀺𑀬𑀲𑁆𑀲 𑀲𑀸𑀢𑀘𑁆𑀘𑀁, 𑀢𑁂𑀦 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑀢𑀢𑀧𑀯𑀢𑁆𑀢𑀯𑀻𑀭𑀺𑀬𑁄, 𑀦𑀺𑀘𑁆𑀘𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀬𑀼𑀢𑁆𑀢𑀬𑁄𑀕𑁄 𑀲𑀤𑀸 𑀲𑀺𑀬𑀸𑀢𑀺 𑀲𑀩𑁆𑀩𑀓𑀸𑀮𑀁 𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀲𑀺𑀬𑀸. 𑀤𑀼𑀓𑁆𑀔𑀦𑁆𑀢𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀅𑀧𑁆𑀧𑀢𑁆𑀯𑀸 𑀯𑀺𑀲𑁆𑀲𑀸𑀲𑀁 𑀦 𑀏𑀬𑁆𑀬 𑀦 𑀕𑀘𑁆𑀙𑁂𑀬𑁆𑀬. ‘‘𑀅𑀳𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀛𑀸𑀦𑀮𑀸𑀪𑀻 𑀅𑀪𑀺𑀜𑁆𑀜𑀸𑀮𑀸𑀪𑀻 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑁄’’𑀢𑀺 𑀯𑀸 𑀯𑀺𑀲𑁆𑀲𑀝𑁆𑀞𑁄 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀺𑀳𑀭𑀫𑀸𑀦𑀲𑁆𑀲𑀸𑀢𑀺, 𑀏𑀯𑀁 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁂𑀯𑀦𑀸𑀤𑀺𑀦𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀬𑀼𑀢𑁆𑀢𑀬𑁄𑀕𑀢𑀸𑀧𑀭𑀺𑀬𑁄𑀲𑀸𑀦𑁂𑀦 𑀯𑀺𑀥𑀺𑀦𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀲𑀼𑀤𑁆𑀥𑀺𑀓𑀸𑀫𑀲𑁆𑀲𑀸𑀢𑀺, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀇𑀘𑁆𑀙𑀦𑁆𑀢𑀲𑁆𑀲. 𑀲𑀁𑀲𑀸𑀭𑁂 𑀪𑀬𑀲𑁆𑀲 𑀇𑀓𑁆𑀔𑀢𑁄 𑀪𑀺𑀓𑁆𑀔𑀼𑀦𑁄, 𑀓𑀸𑀫𑀸𑀲𑀯𑀸𑀤𑀬𑁄 𑀲𑀩𑁆𑀩𑁂 𑀆𑀲𑀯𑀸 𑀔𑀻𑀬𑀦𑁆𑀢𑀺 𑀔𑀬𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀔𑀬𑀕𑀫𑀦𑁂𑀦𑁂𑀯 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀧𑀪𑁂𑀤𑀁 𑀤𑀼𑀯𑀺𑀥𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀺.

𑀏𑀯𑀁 𑀣𑁂𑀭𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀑𑀯𑀸𑀤𑀤𑀸𑀦𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑀸 𑀢𑀣𑀸𑀧𑀝𑀺𑀧𑀦𑁆𑀦𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀉𑀧𑀲𑁂𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. (𑀅𑀧𑀭)-𑀕𑁄𑀢𑀫𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀯𑀺𑀚𑀸𑀦𑁂𑀬𑁆𑀬 𑀲𑀓𑀁 𑀅𑀢𑁆𑀣𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀅𑀧𑀭𑀲𑁆𑀲 𑀕𑁄𑀢𑀫𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀸𑀯𑀢𑁆𑀣𑀺𑀬𑀁 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀳𑀼𑀢𑁆𑀯𑀸, 𑀯𑀸𑀤𑀫𑀕𑁆𑀕𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀉𑀧𑀭𑀺 𑀉𑀢𑁆𑀢𑀭𑀺𑀁 𑀯𑀤𑀦𑁆𑀢𑀁 𑀅𑀮𑀪𑀦𑁆𑀢𑁄 𑀢𑁂𑀳𑀺 𑀢𑁂𑀳𑀺 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀘𑀭𑀢𑀺. 𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 ¶ 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀬𑀲𑀸𑀤𑀺𑀓𑁂 𑀯𑁂𑀦𑁂𑀬𑁆𑀬𑁂 𑀯𑀺𑀦𑁂𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀅𑀪𑀺𑀬𑀸𑀘𑀦𑀸𑀬 𑀲𑀸𑀯𑀢𑁆𑀣𑀺𑀁 𑀉𑀧𑀕𑀘𑁆𑀙𑀺. 𑀢𑀤𑀸 𑀲𑀢𑁆𑀣𑀼 𑀚𑁂𑀢𑀯𑀦𑀧𑀝𑀺𑀕𑁆𑀕𑀳𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 ¶ 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺 𑁋 ‘‘𑀪𑀺𑀓𑁆𑀔𑀼, 𑀇𑀫𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀲𑁄 𑀢𑁂𑀦 𑀧𑀩𑁆𑀩𑀸𑀚𑀺𑀬𑀫𑀸𑀦𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀓𑁄𑀲𑀮𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀫𑀺. 𑀢𑀁 𑀩𑀳𑀽 𑀜𑀸𑀢𑀓𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 ¶ 𑀩𑀳𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀁𑀲𑀸𑀭𑁂 𑀲𑀼𑀤𑁆𑀥𑀺𑀯𑀸𑀤𑀸, 𑀢𑁂𑀲𑀼 𑀓𑀢𑀫𑁂𑀲𑀁 𑀦𑀼 𑀔𑁄 𑀯𑀸𑀤𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀓𑀣𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑀁𑀲𑀸𑀭𑀢𑁄 𑀲𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀢𑁂𑀲𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁫𑁮𑁭.

‘‘𑀯𑀺𑀚𑀸𑀦𑁂𑀬𑁆𑀬 𑀲𑀓𑀁 𑀅𑀢𑁆𑀣𑀁, 𑀅𑀯𑀮𑁄𑀓𑁂𑀬𑁆𑀬𑀸𑀣 𑀧𑀸𑀯𑀘𑀦𑀁;

𑀬𑀜𑁆𑀘𑁂𑀢𑁆𑀣 𑀅𑀲𑁆𑀲 𑀧𑀢𑀺𑀭𑀽𑀧𑀁, 𑀲𑀸𑀫𑀜𑁆𑀜𑀁 𑀅𑀚𑁆𑀛𑀽𑀧𑀕𑀢𑀲𑁆𑀲.

𑁫𑁮𑁮.

‘‘𑀫𑀺𑀢𑁆𑀢𑀁 𑀇𑀥 𑀘 𑀓𑀮𑁆𑀬𑀸𑀡𑀁, 𑀲𑀺𑀓𑁆𑀔𑀸 𑀯𑀺𑀧𑀼𑀮𑀁 𑀲𑀫𑀸𑀤𑀸𑀦𑀁;

𑀲𑀼𑀲𑁆𑀲𑀽𑀲𑀸 𑀘 𑀕𑀭𑀽𑀦𑀁, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁮𑁯.

‘‘𑀩𑀼𑀤𑁆𑀥𑁂𑀲𑀼 𑀲𑀕𑀸𑀭𑀯𑀢𑀸, 𑀥𑀫𑁆𑀫𑁂 𑀅𑀧𑀘𑀺𑀢𑀺 𑀬𑀣𑀸𑀪𑀽𑀢𑀁;

𑀲𑀗𑁆𑀖𑁂 𑀘 𑀘𑀺𑀢𑁆𑀢𑀻𑀓𑀸𑀭𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁦.

‘‘𑀆𑀘𑀸𑀭𑀕𑁄𑀘𑀭𑁂 𑀬𑀼𑀢𑁆𑀢𑁄, 𑀆𑀚𑀻𑀯𑁄 𑀲𑁄𑀥𑀺𑀢𑁄 𑀅𑀕𑀸𑀭𑀬𑁆𑀳𑁄;

𑀘𑀺𑀢𑁆𑀢𑀲𑁆𑀲 𑀘 𑀲𑀡𑁆𑀞𑀧𑀦𑀁, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁧.

‘‘𑀘𑀸𑀭𑀺𑀢𑁆𑀢𑀁 𑀅𑀣 𑀯𑀸𑀭𑀺𑀢𑁆𑀢𑀁, 𑀇𑀭𑀺𑀬𑀸𑀧𑀣𑀺𑀬𑀁 𑀧𑀲𑀸𑀤𑀦𑀺𑀬𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁨.

‘‘𑀆𑀭𑀜𑁆𑀜𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀧𑀦𑁆𑀢𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺;

𑀪𑀚𑀺𑀢𑀩𑁆𑀩𑀸𑀦𑀺 𑀫𑀼𑀦𑀺𑀦𑀸, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁩.

‘‘𑀲𑀻𑀮𑀜𑁆𑀘 𑀩𑀸𑀳𑀼𑀲𑀘𑁆𑀘𑀜𑁆𑀘, 𑀥𑀫𑁆𑀫𑀸𑀦𑀁 𑀧𑀯𑀺𑀘𑀬𑁄 𑀬𑀣𑀸𑀪𑀽𑀢𑀁;

𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁪.

‘‘𑀪𑀸𑀯𑁂𑀬𑁆𑀬 𑀘 𑀅𑀦𑀺𑀘𑁆𑀘𑀦𑁆𑀢𑀺, 𑀅𑀦𑀢𑁆𑀢𑀲𑀜𑁆𑀜𑀁 𑀅𑀲𑀼𑀪𑀲𑀜𑁆𑀜𑀜𑁆𑀘;

𑀮𑁄𑀓𑀫𑁆𑀳𑀺 𑀘 𑀅𑀦𑀪𑀺𑀭𑀢𑀺𑀁, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁫.

‘‘𑀪𑀸𑀯𑁂𑀬𑁆𑀬 ¶ 𑀘 𑀩𑁄𑀚𑁆𑀛𑀗𑁆𑀕𑁂, 𑀇𑀤𑁆𑀥𑀺𑀧𑀸𑀤𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺;

𑀅𑀝𑁆𑀞𑀗𑁆𑀕𑀫𑀕𑁆𑀕𑀫𑀭𑀺𑀬𑀁, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁬.

‘‘𑀢𑀡𑁆𑀳𑀁 𑀧𑀚𑀳𑁂𑀬𑁆𑀬 𑀫𑀼𑀦𑀺, 𑀲𑀫𑀽𑀮𑀓𑁂 𑀆𑀲𑀯𑁂 𑀧𑀤𑀸𑀮𑁂𑀬𑁆𑀬;

𑀯𑀺𑀳𑀭𑁂𑀬𑁆𑀬 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀯𑀺𑀚𑀸𑀦𑁂𑀬𑁆𑀬 𑀲𑀓𑀁 𑀅𑀢𑁆𑀣𑀦𑁆𑀢𑀺, 𑀯𑀺𑀜𑁆𑀜𑀽𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀬𑀸𑀣𑀸𑀯𑀢𑁄 𑀯𑀺𑀘𑀸𑀭𑁂𑀢𑁆𑀯𑀸 𑀚𑀸𑀦𑁂𑀬𑁆𑀬. 𑀯𑀺𑀘𑀸𑀭𑁂𑀦𑁆𑀢𑁄 𑀘 𑀅𑀯𑀮𑁄𑀓𑁂𑀬𑁆𑀬𑀸𑀣 𑀧𑀸𑀯𑀘𑀦𑀁 𑀇𑀥 𑀮𑁄𑀓𑁂 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘 𑀧𑀯𑀼𑀢𑁆𑀢𑀁 𑀧𑀸𑀯𑀘𑀦𑀁, 𑀲𑀫𑀬𑁄. 𑀢𑀢𑁆𑀣 𑀬𑀁 𑀦𑀺𑀬𑁆𑀬𑀸𑀦𑀺𑀓𑀁, 𑀢𑀁 𑀑𑀮𑁄𑀓𑁂𑀬𑁆𑀬 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀲𑁆𑀲𑁂𑀬𑁆𑀬. 𑀇𑀫𑁂 𑀳𑀺 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺, 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺, 𑀅𑀲𑀼𑀤𑁆𑀥𑀺𑀫𑀕𑁆𑀕𑀜𑁆𑀘 ‘‘𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀺𑀦𑁄 𑀅𑀜𑁆𑀜𑀫𑀜𑁆𑀜𑀜𑁆𑀘 𑀯𑀺𑀭𑀼𑀤𑁆𑀥𑀯𑀸𑀤𑀸, 𑀢𑀲𑁆𑀫𑀸 𑀦𑁂𑀲𑀁 𑀯𑀸𑀤𑁄 𑀅𑀦𑀺𑀬𑁆𑀬𑀸𑀦𑀺𑀓𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸, 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀲𑀬𑀫𑁆𑀪𑀽𑀜𑀸𑀡𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀬 𑀧𑀯𑁂𑀤𑁂𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲 ¶ 𑀯𑀸𑀤𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀲𑀢𑁆𑀣𑀼 𑀲𑀸𑀲𑀦𑀫𑀳𑀦𑁆𑀢𑀢𑀁 𑀑𑀮𑁄𑀓𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀜𑁆𑀘𑁂𑀢𑁆𑀣 𑀅𑀲𑁆𑀲 𑀧𑀢𑀺𑀭𑀽𑀧𑀁, 𑀲𑀸𑀫𑀜𑁆𑀜𑀁 𑀅𑀚𑁆𑀛𑀽𑀧𑀕𑀢𑀲𑁆𑀲𑀸𑀢𑀺, 𑀲𑀸𑀫𑀜𑁆𑀜𑀁 𑀲𑀫𑀡𑀪𑀸𑀯𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀬𑀁 𑀏𑀢𑁆𑀣 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀪𑀸𑀯𑁂 𑀯𑀸 𑀧𑀢𑀺𑀭𑀽𑀧𑀁 𑀬𑀼𑀢𑁆𑀢𑀭𑀽𑀧𑀁 𑀲𑀸𑀭𑀼𑀧𑁆𑀧𑀁 𑀅𑀲𑁆𑀲 𑀲𑀺𑀬𑀸, 𑀢𑀫𑁆𑀧𑀺 𑀅𑀧𑀮𑁄𑀓𑁂𑀬𑁆𑀬.

𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀫𑀺𑀢𑁆𑀢𑀁 𑀇𑀥 𑀘 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀲𑁂𑀯𑀺𑀬𑀫𑀸𑀦𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀦𑁆𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀓𑀮𑁆𑀬𑀸𑀡𑀫𑀺𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀲𑀺𑀓𑁆𑀔𑀸 𑀯𑀺𑀧𑀼𑀮𑀁 𑀲𑀫𑀸𑀤𑀸𑀦𑀦𑁆𑀢𑀺 𑀯𑀺𑀧𑀼𑀮𑀁 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁, 𑀫𑀳𑀢𑀺𑀬𑀸 𑀦𑀺𑀩𑁆𑀩𑀸𑀦𑀸𑀯𑀳𑀸𑀬 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀸𑀬 𑀅𑀦𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀲𑁆𑀲𑀽𑀲𑀸 𑀘 𑀕𑀭𑀽𑀦𑀦𑁆𑀢𑀺 𑀕𑀭𑀽𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀑𑀯𑀸𑀤𑀲𑁆𑀲 𑀲𑁄𑀢𑀼𑀓𑀫𑁆𑀬𑀢𑀸 𑀧𑀸𑀭𑀺𑀘𑀭𑀺𑀬𑀸 𑀘. 𑀏𑀢𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁂𑀯𑀦𑀸𑀤𑀺.

𑀩𑀼𑀤𑁆𑀥𑁂𑀲𑀼 𑀲𑀕𑀸𑀭𑀯𑀢𑀸𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀲𑀼 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀕𑀸𑀭𑀯𑀬𑁄𑀕𑁄 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑁄. 𑀥𑀫𑁆𑀫𑁂 𑀅𑀧𑀘𑀺𑀢𑀺 𑀬𑀣𑀸𑀪𑀽𑀢𑀦𑁆𑀢𑀺 𑀅𑀭𑀺𑀬𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 ¶ 𑀅𑀧𑀘𑀸𑀬𑀦𑀁 𑀆𑀤𑀭𑁂𑀦 𑀅𑀪𑀺𑀧𑀽𑀚𑀦𑀁. 𑀲𑀗𑁆𑀖𑁂𑀢𑀺 𑀅𑀭𑀺𑀬𑀲𑀗𑁆𑀖𑁂. 𑀘𑀺𑀢𑁆𑀢𑀻𑀓𑀸𑀭𑁄𑀢𑀺 𑀲𑀓𑁆𑀓𑀸𑀭𑁄 𑀲𑀫𑁆𑀫𑀸𑀦𑀦𑀁. 𑀏𑀢𑀦𑁆𑀢𑀺 𑀭𑀢𑀦𑀢𑁆𑀢𑀬𑀕𑀭𑀼𑀓𑀭𑀡𑀁.

𑀆𑀘𑀸𑀭𑀕𑁄𑀘𑀭𑁂 𑀬𑀼𑀢𑁆𑀢𑁄𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀦𑀲𑀗𑁆𑀔𑀸𑀢𑀁 𑀅𑀦𑀸𑀘𑀸𑀭𑀁, 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑀸𑀦𑀪𑀽𑀢𑀁 𑀯𑁂𑀲𑀺𑀬𑀸𑀤𑀺𑀅𑀕𑁄𑀘𑀭𑀜𑁆𑀘 𑀧𑀳𑀸𑀬 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀯𑀻𑀢𑀺𑀓𑁆𑀓𑀫𑀦𑀲𑀗𑁆𑀔𑀸𑀢𑁂𑀦 𑀆𑀘𑀸𑀭𑁂𑀦 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀪𑀽𑀢𑁂𑀦 𑀕𑁄𑀘𑀭𑁂𑀦 𑀘 𑀬𑀼𑀢𑁆𑀢𑁄 𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀆𑀘𑀸𑀭𑀕𑁄𑀘𑀭𑁄𑀢𑀺 𑀅𑀢𑁆𑀣𑁄. 𑀆𑀚𑀻𑀯𑁄 𑀲𑁄𑀥𑀺𑀢𑁄𑀢𑀺 𑀯𑁂𑀴𑀼𑀤𑀸𑀦𑀸𑀤𑀺𑀁 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀁 𑀅𑀦𑁂𑀲𑀦𑀁 𑀧𑀳𑀸𑀬 𑀅𑀦𑀯𑀚𑁆𑀚𑀼𑀧𑁆𑀧𑀸𑀤𑁂 𑀧𑀘𑁆𑀘𑀬𑁂 𑀲𑁂𑀯𑀦𑁆𑀢𑀲𑁆𑀲 𑀆𑀚𑀻𑀯𑁄 𑀲𑁄𑀥𑀺𑀢𑁄 𑀳𑁄𑀢𑀺 𑀲𑀼𑀯𑀺𑀲𑀼𑀤𑁆𑀥𑁄, 𑀲𑁄𑀥𑀺𑀢𑀢𑁆𑀢𑀸 𑀏𑀯 𑀅𑀕𑀸𑀭𑀬𑁆𑀳𑁄 𑀯𑀺𑀜𑁆𑀜𑀽𑀳𑀺. 𑀘𑀺𑀢𑁆𑀢𑀲𑁆𑀲 𑀘 𑀲𑀡𑁆𑀞𑀧𑀦𑀦𑁆𑀢𑀺 𑀬𑀣𑀸 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀳𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂𑀲𑀼 𑀅𑀪𑀺𑀚𑁆𑀛𑀸𑀤𑀬𑁄 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 ¶ 𑀲𑀫𑁆𑀫𑀸 𑀞𑀧𑀦𑀁. 𑀏𑀢𑀦𑁆𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀢𑁆𑀢𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀢𑀺 𑀏𑀢𑀁 𑀢𑀬𑀁.

𑀘𑀸𑀭𑀺𑀢𑁆𑀢𑀦𑁆𑀢𑀺 𑀘𑀭𑀺𑀢𑁆𑀯𑀸 𑀧𑀭𑀺𑀧𑀽𑀭𑁂𑀢𑀩𑁆𑀩𑀲𑀻𑀮𑀁. 𑀯𑀸𑀭𑀺𑀢𑁆𑀢𑀦𑁆𑀢𑀺 𑀯𑀺𑀭𑀢𑀺𑀬𑀸 𑀅𑀓𑀭𑀡𑁂𑀦 𑀧𑀭𑀺𑀧𑀽𑀭𑁂𑀢𑀩𑁆𑀩𑀲𑀻𑀮𑀁. 𑀇𑀭𑀺𑀬𑀸𑀧𑀣𑀺𑀬𑀁 𑀧𑀲𑀸𑀤𑀦𑀺𑀬𑀦𑁆𑀢𑀺 𑀧𑀭𑁂𑀲𑀁 𑀧𑀲𑀸𑀤𑀸𑀯𑀳𑀁 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀇𑀭𑀺𑀬𑀸𑀧𑀣𑀦𑀺𑀲𑁆𑀲𑀺𑀢𑀁 𑀲𑀫𑁆𑀧𑀚𑀜𑁆𑀜𑀁. 𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀅𑀦𑀼𑀬𑁄𑀕𑁄 𑀪𑀸𑀯𑀦𑀸.

𑀆𑀭𑀜𑁆𑀜𑀓𑀸𑀦𑀻𑀢𑀺 𑀅𑀭𑀜𑁆𑀜𑁂 𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀧𑀦𑁆𑀢𑀸𑀦𑀻𑀢𑀺 𑀯𑀺𑀯𑀺𑀢𑁆𑀢𑀸𑀦𑀺.

𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀳𑁂𑀝𑁆𑀞𑀸 𑀳𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀥 𑀅𑀪𑀺𑀦𑁆𑀤𑀺𑀢𑁆𑀯𑀸 ¶ 𑀯𑀤𑀢𑀺. 𑀩𑀸𑀳𑀼𑀲𑀘𑁆𑀘𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀪𑀸𑀯𑁄. 𑀲𑁄 𑀳𑀺 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀩𑀳𑀼𑀓𑀸𑀭𑁄, 𑀩𑁄𑀚𑁆𑀛𑀗𑁆𑀕𑀓𑁄𑀲𑀮𑁆𑀮𑀅𑀦𑀼𑀢𑁆𑀢𑀭𑀲𑀻𑀢𑀺𑀪𑀸𑀯𑀅𑀥𑀺𑀘𑀺𑀢𑁆𑀢𑀬𑀼𑀢𑁆𑀢𑀢𑀸𑀤𑀻𑀲𑀼 𑀲𑀫𑁆𑀫𑀸 𑀧𑀯𑀺𑀘𑀬𑀩𑀳𑀼𑀮𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁄 𑀲𑀫𑁆𑀧𑀚𑁆𑀚𑀢𑀺. 𑀥𑀫𑁆𑀫𑀸𑀦𑀁 𑀧𑀯𑀺𑀘𑀬𑁄 𑀬𑀣𑀸𑀪𑀽𑀢𑀦𑁆𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀧𑀭𑀺𑀯𑀻𑀫𑀁𑀲𑀸. 𑀇𑀫𑀺𑀦𑀸 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀫𑀸𑀳. 𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀝𑀺𑀯𑁂𑀥𑁄.

𑀲𑁆𑀯𑀸𑀬𑀁 𑀲𑀘𑁆𑀘𑀸𑀪𑀺𑀲𑀫𑀬𑁄 𑀬𑀣𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀸𑀯𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀸𑀯𑁂𑀬𑁆𑀬 𑀘 𑀅𑀦𑀺𑀘𑁆𑀘𑀦𑁆𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭) 𑀅𑀯𑀺𑀪𑀸𑀕𑀢𑁄 ¶ ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁨; 𑀲𑀁. 𑀦𑀺. 𑁩.𑁪𑁯) 𑀯𑀺𑀪𑀸𑀕𑀢𑁄 𑀯𑀸 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀬𑁆𑀬 𑀉𑀧𑁆𑀧𑀸𑀤𑁂𑀬𑁆𑀬 𑀘𑁂𑀯 𑀯𑀟𑁆𑀠𑁂𑀬𑁆𑀬 𑀘𑀸𑀢𑀺 𑀅𑀢𑁆𑀣𑁄. 𑀅𑀦𑀢𑁆𑀢𑀲𑀜𑁆𑀜𑀦𑁆𑀢𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀁 𑀅𑀦𑀢𑁆𑀢𑀲𑀜𑁆𑀜𑀜𑁆𑀘 𑀪𑀸𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀲𑀼𑀪𑀲𑀜𑁆𑀜𑀦𑁆𑀢𑀺, 𑀓𑀭𑀚𑀓𑀸𑀬𑁂 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑀸 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 ‘‘𑀅𑀲𑀼𑀪𑀸’’𑀢𑀺 𑀧𑀯𑀢𑁆𑀢𑀲𑀜𑁆𑀜𑀁. 𑀤𑀼𑀓𑁆𑀔𑀲𑀜𑁆𑀜𑀸𑀧𑀭𑀺𑀯𑀸𑀭𑀸 𑀳𑀺 𑀅𑀬𑀁, 𑀏𑀢𑁂𑀦𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀲𑀜𑁆𑀜𑀸𑀧𑀺 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀫𑁆𑀳𑀺 𑀘 𑀅𑀦𑀪𑀺𑀭𑀢𑀺𑀦𑁆𑀢𑀺 𑀲𑀩𑁆𑀩𑀮𑁄𑀓𑁂 𑀢𑁂𑀪𑀽𑀫𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀅𑀦𑀸𑀪𑀺𑀭𑀢𑀺𑀲𑀜𑁆𑀜𑀁. 𑀏𑀢𑁂𑀦 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀜𑁆𑀘 𑀯𑀤𑀢𑀺.

𑀏𑀯𑀁 𑀧𑀦 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄 𑀢𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄 𑀇𑀫𑁂 𑀥𑀫𑁆𑀫𑁂 𑀯𑀟𑁆𑀠𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀸𑀯𑁂𑀬𑁆𑀬 𑀘 𑀩𑁄𑀚𑁆𑀛𑀗𑁆𑀕𑁂’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀩𑁄𑀥𑀺𑀬𑀸 𑀲𑀢𑀺𑀆𑀤𑀺𑀲𑀢𑁆𑀢𑀯𑀺𑀥𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀢𑀺𑀆𑀤𑀬𑁄 𑀥𑀫𑁆𑀫𑀸. 𑀢𑁂 𑀲𑀢𑀺𑀆𑀤𑀺𑀓𑁂 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂, 𑀙𑀦𑁆𑀤𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀇𑀤𑁆𑀥𑀺𑀧𑀸𑀤𑀸𑀦𑀺, 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀤𑁆𑀥𑀸𑀤𑀻𑀦𑀺𑀬𑁂𑀯 𑀧𑀜𑁆𑀘 ¶ 𑀩𑀮𑀸𑀦𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀅𑀭𑀺𑀬𑀫𑀕𑁆𑀕𑀜𑁆𑀘. 𑀘-𑀲𑀤𑁆𑀤𑁂𑀦 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀘 𑀕𑀳𑀺𑀢𑀸𑀦𑀻𑀢𑀺 𑀲𑀩𑁆𑀩𑁂𑀧𑀺 𑀲𑀢𑁆𑀢𑀢𑀺𑀁𑀲𑀧𑁆𑀧𑀪𑁂𑀤𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀪𑀸𑀯𑁂𑀬𑁆𑀬 𑀉𑀧𑁆𑀧𑀸𑀤𑁂𑀬𑁆𑀬 𑀘𑁂𑀯 𑀯𑀟𑁆𑀠𑁂𑀬𑁆𑀬 𑀘. 𑀢𑀢𑁆𑀣 𑀬𑀤𑁂𑀢𑁂𑀲𑀁 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀸𑀤𑀦𑀁, 𑀉𑀧𑀭𑀺𑀫𑀕𑁆𑀕𑀓𑁆𑀔𑀡𑁂 𑀘 𑀯𑀟𑁆𑀠𑀦𑀁, 𑀏𑀢𑀁 𑀲𑀫𑀡𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀭𑀼𑀧𑁆𑀧𑀦𑁆𑀢𑀺.

𑀏𑀯𑀁 𑀩𑁄𑀥𑀺𑀧𑀓𑁆𑀔𑀺𑀬𑀲𑀢𑁆𑀢𑀢𑀺𑀁𑀲𑀥𑀫𑁆𑀫𑁂 𑀪𑀸𑀯𑁂𑀦𑁆𑀢𑁄 𑀬𑀣𑀸 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀢𑀺, 𑀏𑀯𑀁 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦, 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀡𑁆𑀳𑀁 𑀧𑀚𑀳𑁂𑀬𑁆𑀬𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀡𑁆𑀳𑀁 𑀧𑀚𑀳𑁂𑀬𑁆𑀬𑀸𑀢𑀺, 𑀓𑀸𑀫𑀢𑀡𑁆𑀳𑀸𑀤𑀺𑀧𑀪𑁂𑀤𑀁 𑀲𑀩𑁆𑀩𑀁 𑀢𑀡𑁆𑀳𑀁 𑀅𑀭𑀺𑀬𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 ¶ 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀦𑀺. 𑀲𑀫𑀽𑀮𑀓𑁂 𑀆𑀲𑀯𑁂 𑀧𑀤𑀸𑀮𑁂𑀬𑁆𑀬𑀸𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀺𑀲𑀫𑀽𑀮𑀓𑁂 𑀓𑀸𑀫𑀸𑀲𑀯𑀸𑀤𑀺𑀓𑁂 𑀲𑀩𑁆𑀩𑁂𑀧𑀺 𑀆𑀲𑀯𑁂 𑀪𑀺𑀦𑁆𑀤𑁂𑀬𑁆𑀬 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬. 𑀯𑀺𑀳𑀭𑁂𑀬𑁆𑀬 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀏𑀯𑀁 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀥𑀺 𑀯𑀺𑀫𑀼𑀢𑁆𑀢𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁 ¶ 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀭𑁂𑀬𑁆𑀬. 𑀏𑀢𑀦𑁆𑀢𑀺 𑀬𑀤𑁂𑀢𑀁 𑀯𑀺𑀳𑀭𑀡𑀁, 𑀏𑀢𑀁 𑀲𑀫𑀡𑀲𑁆𑀲 𑀲𑀫𑀺𑀢𑀧𑀸𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑀺𑀭𑀽𑀧𑀁 𑀲𑀸𑀭𑀼𑀧𑁆𑀧𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀣𑁂𑀭𑁄 𑀲𑀫𑀡𑀲𑀸𑀭𑀼𑀧𑁆𑀧𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀫𑀼𑀔𑁂𑀦 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀢𑀩𑁆𑀩𑀺𑀮𑁄𑀫𑀢𑁄 𑀩𑀸𑀳𑀺𑀭𑀓𑀲𑀫𑀬𑀲𑁆𑀲 𑀅𑀦𑀺𑀬𑁆𑀬𑀸𑀦𑀺𑀓𑀢𑀜𑁆𑀘 𑀯𑀺𑀪𑀸𑀯𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀲𑀭𑀡𑀸𑀤𑀻𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼.

(𑀅𑀧𑀭)-𑀕𑁄𑀢𑀫𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀦𑀺𑀧𑀸𑀢𑁄

𑁧. 𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀏𑀓𑀸𑀤𑀲𑀦𑀺𑀧𑀸𑀢𑁂 ¶ ¶ 𑀓𑀺𑀁 𑀢𑀯𑀢𑁆𑀣𑁄 𑀯𑀦𑁂 𑀢𑀸𑀢𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀫𑀺𑀁 𑀓𑀼𑀘𑁆𑀙𑀺𑀕𑀢𑁂𑀬𑁂𑀯 𑀫𑀸𑀢𑀸 𑀩𑁆𑀬𑀸𑀥𑀺𑀢𑀸 𑀳𑀼𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲𑀸 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀛𑀸𑀧𑀺𑀬𑀫𑀸𑀦𑀸𑀬 𑀕𑀩𑁆𑀪𑀸𑀲𑀬𑁄 𑀦 𑀛𑀸𑀬𑀺. 𑀫𑀦𑀼𑀲𑁆𑀲𑀸 𑀲𑀽𑀮𑁂𑀳𑀺 𑀓𑀼𑀘𑁆𑀙𑀺𑀁 𑀯𑀺𑀚𑁆𑀛𑀦𑁆𑀢𑀸 𑀤𑀸𑀭𑀓𑀲𑁆𑀲 𑀅𑀓𑁆𑀔𑀺𑀓𑁄𑀝𑀺𑀁 𑀧𑀳𑀭𑀺𑀁𑀲𑀼. 𑀢𑁂 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀅𑀗𑁆𑀕𑀸𑀭𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀓𑀼𑀘𑁆𑀙𑀺𑀧𑀤𑁂𑀲𑁄𑀧𑀺 𑀛𑀸𑀬𑀺, 𑀅𑀗𑁆𑀕𑀸𑀭𑀫𑀢𑁆𑀣𑀓𑁂 𑀧𑀦 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄 𑀧𑀤𑀼𑀫𑀕𑀩𑁆𑀪𑁂 𑀦𑀺𑀧𑀦𑁆𑀦𑁄 𑀯𑀺𑀬 𑀅𑀳𑁄𑀲𑀺. 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑀲𑁆𑀲 𑀳𑀺 𑀲𑀺𑀦𑁂𑀭𑀼𑀦𑀸 𑀑𑀢𑁆𑀣𑀭𑀺𑀬𑀫𑀸𑀦𑀲𑁆𑀲𑀧𑀺 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑁄 𑀦𑀸𑀫 𑀦𑀢𑁆𑀣𑀺.

𑀧𑀼𑀦𑀤𑀺𑀯𑀲𑁂 𑀆𑀴𑀸𑀳𑀦𑀝𑁆𑀞𑀸𑀦𑀁 𑀕𑀢𑀸 𑀫𑀦𑀼𑀲𑁆𑀲𑀸 𑀢𑀣𑀸𑀦𑀺𑀧𑀦𑁆𑀦𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀤𑀸𑀭𑀓𑀁 𑀆𑀤𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑁂𑀫𑀺𑀢𑁆𑀢𑀓𑁂 𑀧𑀼𑀘𑁆𑀙𑀺𑀁𑀲𑀼. 𑀦𑁂𑀫𑀺𑀢𑁆𑀢𑀓𑀸 ‘‘𑀲𑀘𑁂 𑀅𑀬𑀁 𑀤𑀸𑀭𑀓𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀤𑀼𑀕𑁆𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀧𑀜𑁆𑀘𑀳𑀺 𑀲𑀫𑀡𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀜𑀸𑀢𑀓𑀸 ‘‘𑀳𑁄𑀢𑀼, 𑀯𑀟𑁆𑀠𑀺𑀢𑀓𑀸𑀮𑁂 𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀲𑀗𑁆𑀓𑀼𑀦𑀸 𑀙𑀺𑀦𑁆𑀦𑀓𑁆𑀔𑀺𑀓𑁄𑀝𑀺𑀢𑀸𑀬 𑀲𑀁𑀓𑀺𑀘𑁆𑀘𑁄𑀢𑀺 𑀯𑀤𑀦𑁆𑀢𑀸 𑀅𑀧𑀭𑀪𑀸𑀕𑁂 𑀲𑀁𑀓𑀺𑀘𑁆𑀘𑁄𑀢𑀺 𑀯𑁄𑀳𑀭𑀺𑀁𑀲𑀼. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀅𑀢𑁆𑀢𑀦𑁄 𑀕𑀩𑁆𑀪𑀕𑀢𑀲𑁆𑀲𑁂𑀯 𑀫𑀸𑀢𑀼 𑀫𑀭𑀡𑀁, 𑀕𑀩𑁆𑀪𑁂 𑀘 𑀅𑀢𑁆𑀢𑀦𑁄 ¶ 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀜𑀸𑀢𑀓𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀅𑀤𑀁𑀲𑀼. 𑀣𑁂𑀭𑁄 𑀢𑀁 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀔𑀼𑀭𑀕𑁆𑀕𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀺𑀁𑀲𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀘𑁂 𑀘𑁄𑀭𑀳𑀢𑁆𑀣𑀢𑁄 𑀫𑁄𑀘𑁂𑀢𑁆𑀯𑀸 𑀲𑀬𑀫𑁆𑀧𑀺 𑀢𑁂 𑀘𑁄𑀭𑁂 𑀤𑀫𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀺𑀳𑀸𑀭𑁂 𑀩𑀳𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀦𑁆𑀢𑁄 ¶ 𑀢𑁂 𑀯𑀺𑀯𑀸𑀤𑀧𑀲𑀼𑀢𑁂 𑀤𑀺𑀲𑁆𑀯𑀸 ‘‘𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀻’’𑀢𑀺 𑀪𑀺𑀓𑁆𑀔𑀽 𑀆𑀧𑀼𑀘𑁆𑀙𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀫𑁆𑀫𑀧𑀤𑀯𑀢𑁆𑀣𑀼𑀫𑁆𑀳𑀺 (𑀥. 𑀧. 𑀅𑀝𑁆𑀞. 𑁧.𑀲𑀗𑁆𑀓𑀺𑀘𑁆𑀘𑀲𑀸𑀫𑀡𑁂𑀭𑀯𑀢𑁆𑀣𑀼) ¶ 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀦𑀁 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀉𑀧𑀝𑁆𑀞𑀸𑀢𑀼𑀓𑀸𑀫𑁄 𑀆𑀲𑀦𑁆𑀦𑀝𑁆𑀞𑀸𑀦𑁂 𑀯𑀸𑀲𑀁 𑀬𑀸𑀘𑀦𑁆𑀢𑁄 𑁋

𑁫𑁯𑁭.

‘‘𑀓𑀺𑀁 𑀢𑀯𑀢𑁆𑀣𑁄 𑀯𑀦𑁂 𑀢𑀸𑀢, 𑀉𑀚𑁆𑀚𑀼𑀳𑀸𑀦𑁄𑀯 𑀧𑀸𑀯𑀼𑀲𑁂;

𑀯𑁂𑀭𑀫𑁆𑀪𑀸 𑀭𑀫𑀡𑀻𑀬𑀸 𑀢𑁂, 𑀧𑀯𑀺𑀯𑁂𑀓𑁄 𑀳𑀺 𑀛𑀸𑀬𑀺𑀦’’𑀦𑁆𑀢𑀺. 𑁋

𑀧𑀞𑀫𑀁 𑀕𑀸𑀣𑀫𑀸𑀳. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑁋

𑁫𑁯𑁮.

‘‘𑀬𑀣𑀸 𑀅𑀩𑁆𑀪𑀸𑀦𑀺 𑀯𑁂𑀭𑀫𑁆𑀪𑁄, 𑀯𑀸𑀢𑁄 𑀦𑀼𑀤𑀢𑀺 𑀧𑀸𑀯𑀼𑀲𑁂;

𑀲𑀜𑁆𑀜𑀸 𑀫𑁂 𑀅𑀪𑀺𑀓𑀺𑀭𑀦𑁆𑀢𑀺, 𑀯𑀺𑀯𑁂𑀓𑀧𑀝𑀺𑀲𑀜𑁆𑀜𑀼𑀢𑀸.

𑁫𑁯𑁯.

‘‘𑀅𑀧𑀡𑁆𑀟𑀭𑁄 𑀅𑀡𑁆𑀟𑀲𑀫𑁆𑀪𑀯𑁄, 𑀲𑀻𑀯𑀣𑀺𑀓𑀸𑀬 𑀦𑀺𑀓𑁂𑀢𑀘𑀸𑀭𑀺𑀓𑁄;

𑀉𑀧𑁆𑀧𑀸𑀤𑀬𑀢𑁂𑀯 𑀫𑁂 𑀲𑀢𑀺𑀁, 𑀲𑀦𑁆𑀤𑁂𑀳𑀲𑁆𑀫𑀺𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁.

𑁬𑁦𑁦.

‘‘𑀬𑀜𑁆𑀘 𑀅𑀜𑁆𑀜𑁂 𑀦 𑀭𑀓𑁆𑀔𑀦𑁆𑀢𑀺, 𑀬𑁄 𑀘 𑀅𑀜𑁆𑀜𑁂 𑀦 𑀭𑀓𑁆𑀔𑀢𑀺;

𑀲 𑀯𑁂 𑀪𑀺𑀓𑁆𑀔𑀼 𑀲𑀼𑀔𑀁 𑀲𑁂𑀢𑀺, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀯𑀸.

𑁬𑁦𑁧.

‘‘𑀅𑀘𑁆𑀙𑁄𑀤𑀺𑀓𑀸 𑀧𑀼𑀣𑀼𑀲𑀺𑀮𑀸, 𑀕𑁄𑀦𑀗𑁆𑀕𑀮𑀫𑀺𑀕𑀸𑀬𑀼𑀢𑀸;

𑀅𑀫𑁆𑀩𑀼𑀲𑁂𑀯𑀸𑀮𑀲𑀜𑁆𑀙𑀦𑁆𑀦𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫𑀁.

𑁬𑁦𑁨.

‘‘𑀯𑀲𑀺𑀢𑀁 𑀫𑁂 𑀅𑀭𑀜𑁆𑀜𑁂𑀲𑀼, 𑀓𑀦𑁆𑀤𑀭𑀸𑀲𑀼 𑀕𑀼𑀳𑀸𑀲𑀼 𑀘;

𑀲𑁂𑀦𑀸𑀲𑀦𑁂𑀲𑀼 𑀧𑀦𑁆𑀢𑁂𑀲𑀼, 𑀯𑀸𑀴𑀫𑀺𑀕𑀦𑀺𑀲𑁂𑀯𑀺𑀢𑁂.

𑁬𑁦𑁩.

‘‘‘𑀇𑀫𑁂 𑀳𑀜𑁆𑀜𑀦𑁆𑀢𑀼 𑀯𑀚𑁆𑀛𑀦𑁆𑀢𑀼, 𑀤𑀼𑀓𑁆𑀔𑀁 𑀧𑀧𑁆𑀧𑁄𑀦𑁆𑀢𑀼 𑀧𑀸𑀡𑀺𑀦𑁄’;

𑀲𑀗𑁆𑀓𑀧𑁆𑀧𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀦𑀭𑀺𑀬𑀁 𑀤𑁄𑀲𑀲𑀁𑀳𑀺𑀢𑀁.

𑁬𑁦𑁪.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁬𑁦𑁫.

‘‘𑀬𑀲𑁆𑀲 𑀘𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

𑁬𑁦𑁬.

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 ¶ 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸.

𑁬𑁦𑁭.

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁.

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀓𑀺𑀁 𑀢𑀯𑀢𑁆𑀣𑁄 𑀯𑀦𑁂𑀢𑀺 𑀓𑀺𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀯𑀦𑁂 𑀓𑁄 𑀢𑀯𑀢𑁆𑀣𑁄, 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀢𑀸𑀢𑀺 𑀤𑀳𑀭𑀲𑀸𑀫𑀡𑁂𑀭𑀢𑀸𑀬 𑀦𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀆𑀮𑀧𑀢𑀺. 𑀉𑀚𑁆𑀚𑀼𑀳𑀸𑀦𑁄𑀯 𑀧𑀸𑀯𑀼𑀲𑁂𑀢𑀺 ¶ 𑀉𑀚𑁆𑀚𑀼𑀳𑀸𑀦𑁄 𑀓𑀺𑀭 𑀦𑀸𑀫 𑀏𑀓𑁄 𑀧𑀩𑁆𑀩𑀢𑁄, 𑀲𑁄 𑀧𑀦 𑀕𑀳𑀦𑀲𑀜𑁆𑀙𑀦𑁆𑀦𑁄 𑀩𑀳𑀼𑀲𑁄𑀡𑁆𑀟𑀺𑀓𑀦𑁆𑀤𑀭𑁄, 𑀢𑀳𑀁 𑀢𑀳𑀁 𑀲𑀦𑁆𑀤𑀫𑀸𑀦𑀲𑀮𑀺𑀮𑁄 ¶ , 𑀯𑀲𑁆𑀲𑀓𑀸𑀮𑁂 𑀅𑀲𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀉𑀚𑁆𑀚𑀼𑀳𑀸𑀦𑁄 𑀯𑀸 𑀧𑀩𑁆𑀩𑀢𑁄 𑀏𑀢𑀭𑀳𑀺 𑀧𑀸𑀯𑀼𑀲𑀓𑀸𑀮𑁂 𑀢𑀯 𑀓𑀺𑀫𑀢𑁆𑀣𑀺𑀬𑁄𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀉𑀚𑁆𑀚𑀼𑀳𑀸𑀦𑁄 𑀦𑀸𑀫 𑀏𑀓𑁄 𑀲𑀓𑀼𑀡𑁄 𑀲𑀻𑀢𑀁 𑀦 𑀲𑀳𑀢𑀺, 𑀯𑀲𑁆𑀲𑀓𑀸𑀮𑁂 𑀯𑀦𑀕𑀼𑀫𑁆𑀩𑁂 𑀦𑀺𑀮𑀻𑀦𑁄 𑀅𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂𑀦 𑀉𑀚𑁆𑀚𑀼𑀳𑀸𑀦𑀲𑁆𑀲 𑀯𑀺𑀬 𑀲𑀓𑀼𑀡𑀲𑁆𑀲 𑀧𑀸𑀯𑀼𑀲𑀓𑀸𑀮𑁂 𑀓𑁄 𑀢𑀯 𑀅𑀢𑁆𑀣𑁄 𑀯𑀦𑁂𑀢𑀺? 𑀯𑁂𑀭𑀫𑁆𑀪𑀸 𑀭𑀫𑀡𑀻𑀬𑀸 𑀢𑁂𑀢𑀺 𑀯𑁂𑀭𑀫𑁆𑀪𑀯𑀸𑀢𑀸 𑀯𑀸𑀬𑀦𑁆𑀢𑀸 𑀓𑀺𑀁 𑀢𑁂 𑀭𑀫𑀡𑀻𑀬𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀺 ‘‘𑀯𑁂𑀭𑀫𑁆𑀪𑀸 𑀦𑀸𑀫 𑀏𑀓𑀸 𑀧𑀩𑁆𑀩𑀢𑀕𑀼𑀳𑀸, 𑀧𑀩𑁆𑀪𑀸𑀭𑁄’’𑀢𑀺 𑀘 𑀯𑀤𑀦𑁆𑀢𑀺. 𑀢𑀜𑁆𑀘 𑀞𑀸𑀦𑀁 𑀕𑀫𑀦𑀸𑀕𑀫𑀦𑀬𑀼𑀢𑁆𑀢𑀁 𑀚𑀦𑀲𑀫𑁆𑀩𑀸𑀥𑀭𑀳𑀺𑀢𑀁 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀜𑁆𑀘, 𑀢𑀲𑁆𑀫𑀸 𑀯𑁂𑀭𑀫𑁆𑀪𑀸 𑀭𑀫𑀡𑀻𑀬𑀸, 𑀯𑀦𑁂 𑀯𑀲𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀸. 𑀓𑀲𑁆𑀫𑀸? 𑀧𑀯𑀺𑀯𑁂𑀓𑁄 𑀳𑀺 𑀛𑀸𑀬𑀺𑀦𑀁 𑀬𑀲𑁆𑀫𑀸 𑀢𑀸𑀤𑀺𑀲𑀸𑀦𑀁 𑀛𑀸𑀬𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀺𑀯𑁂𑀓𑁄𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀤𑀽𑀭𑀁 𑀅𑀭𑀜𑁆𑀜𑀝𑁆𑀞𑀸𑀦𑀁 𑀅𑀕𑀦𑁆𑀢𑁆𑀯𑀸 𑀯𑁂𑀭𑀫𑁆𑀪𑀸𑀬𑀁 𑀯𑀲, 𑀢𑀸𑀢𑀸’’𑀢𑀺 𑀯𑀤𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀛𑀸𑀬𑀻𑀦𑀁 𑀧𑀯𑀺𑀯𑁂𑀓𑀓𑁆𑀔𑀫𑁂 𑀦𑀺𑀯𑀸𑀲𑀨𑀸𑀲𑀼𑀓𑁂 𑀲𑁂𑀦𑀸𑀲𑀦𑁂 𑀮𑀤𑁆𑀥𑁂𑀬𑁂𑀯 𑀛𑀸𑀦𑀸𑀤𑀬𑁄 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀮𑀤𑁆𑀥𑁂, 𑀢𑀲𑁆𑀫𑀸 𑀦 𑀏𑀯𑀭𑀽𑀧𑁂 𑀲𑀻𑀢𑀓𑀸𑀮𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀦𑁂 𑀯𑀲𑀺𑀢𑀼𑀁 𑀲𑀓𑁆𑀓𑀸, 𑀕𑀼𑀳𑀸𑀧𑀩𑁆𑀪𑀸𑀭𑀸𑀤𑀻𑀲𑀼 𑀧𑀦 𑀲𑀓𑁆𑀓𑀸𑀢𑀺.

𑀏𑀯𑀁 𑀉𑀧𑀸𑀲𑀓𑁂𑀦 𑀯𑀼𑀢𑁆𑀢𑁂 𑀣𑁂𑀭𑁄 𑀯𑀦𑀸𑀤𑀬𑁄 𑀏𑀯 𑀫𑀁 𑀭𑀫𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀅𑀩𑁆𑀪𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀧𑀸𑀯𑀼𑀲𑁂 𑀓𑀸𑀮𑁂 𑀅𑀩𑁆𑀪𑀸𑀦𑀺 𑀯𑀮𑀸𑀳𑀓𑀸𑀦𑀺 𑀯𑁂𑀭𑀫𑁆𑀪𑀯𑀸𑀢𑁄 𑀦𑀼𑀤𑀢𑀺 𑀔𑀺𑀧𑀢𑀺 𑀦𑀻𑀳𑀭𑀢𑀺, 𑀏𑀯𑀫𑁂𑀯 𑀫𑁂 𑀘𑀺𑀢𑁆𑀢𑀁 𑀯𑀺𑀯𑁂𑀓𑀧𑀝𑀺𑀲𑀜𑁆𑀜𑀼𑀢𑀸 𑀲𑀜𑁆𑀜𑀸 𑀅𑀪𑀺𑀓𑀺𑀭𑀦𑁆𑀢𑀺 𑀯𑀺𑀯𑁂𑀓𑀝𑁆𑀞𑀸𑀦𑀁𑀬𑁂𑀯 𑀆𑀓𑀟𑁆𑀠𑀦𑁆𑀢𑀺.

𑀓𑀺𑀜𑁆𑀘 ¶ ? 𑀅𑀧𑀡𑁆𑀟𑀭𑁄 𑀓𑀸𑀴𑀯𑀡𑁆𑀡𑁄, 𑀅𑀡𑁆𑀟𑀲𑀫𑁆𑀪𑀯𑁄 𑀅𑀡𑁆𑀟𑀚𑁄 𑀓𑀸𑀓𑁄, 𑀲𑀻𑀯𑀣𑀺𑀓𑀸𑀬 𑀲𑀼𑀲𑀸𑀦𑀝𑁆𑀞𑀸𑀦𑁂, 𑀦𑀺𑀓𑁂𑀢𑀘𑀸𑀭𑀺𑀓𑁄 𑀢𑀫𑁂𑀯 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀘𑀭𑀡𑀓𑁄 𑀉𑀧𑁆𑀧𑀸𑀤𑀬𑀢𑁂𑀯 𑀫𑁂 𑀲𑀢𑀺𑀁, 𑀲𑀦𑁆𑀤𑁂𑀳𑀲𑁆𑀫𑀺𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺, 𑀓𑀸𑀬𑀲𑁆𑀫𑀺𑀁 𑀯𑀺𑀭𑀸𑀕𑀽𑀧𑀲𑀁𑀳𑀺𑀢𑀁 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀫𑀬𑁆𑀳𑀁 𑀉𑀧𑁆𑀧𑀸𑀤𑀬𑀢𑀺𑀬𑁂𑀯. 𑀏𑀓𑀤𑀺𑀯𑀲𑀁 𑀓𑀺𑀭 𑀣𑁂𑀭𑁄 𑀓𑀸𑀓𑁂𑀦 𑀔𑀚𑁆𑀚𑀫𑀸𑀦𑀁 𑀫𑀦𑀼𑀲𑁆𑀲𑀓𑀼𑀡𑀧𑀁 𑀧𑀲𑁆𑀲𑀺𑀢𑁆𑀯𑀸 𑀅𑀲𑀼𑀪𑀲𑀜𑁆𑀜𑀁 𑀧𑀝𑀺𑀮𑀪𑀺, 𑀢𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀢𑁂𑀦 𑀓𑀸𑀬𑁂 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀲𑁆𑀲 𑀦𑀢𑁆𑀣𑀺𑀢𑀸𑀬 𑀯𑀦𑁂𑀬𑁂𑀯 𑀯𑀲𑀺𑀢𑀼𑀓𑀸𑀫𑁄𑀫𑁆𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀜𑁆𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀅𑀜𑁆𑀜𑀫𑁆𑀧𑀺 𑀫𑀫 𑀅𑀭𑀜𑁆𑀜𑀯𑀸𑀲𑀓𑀸𑀭𑀡𑀁 𑀲𑀼𑀡𑀸𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀩𑁆𑀩𑀚𑀺𑀢𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀢𑀸𑀬 𑀅𑀮𑁄𑀪𑀦𑀺𑀬𑀧𑀭𑀺𑀓𑁆𑀔𑀸𑀭𑀢𑀸𑀬 𑀘 𑀭𑀓𑁆𑀔𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀅𑀜𑁆𑀜𑁂 𑀲𑁂𑀯𑀓𑀸𑀤𑀬𑁄 𑀦 𑀭𑀓𑁆𑀔𑀦𑁆𑀢𑀺. 𑀬𑁄 𑀘 𑀧𑀩𑁆𑀩𑀚𑀺𑀢𑁄 𑀅𑀜𑁆𑀜𑁂 𑀓𑁂𑀦𑀘𑀺 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑀪𑀽𑀢𑁂 𑀦 𑀭𑀓𑁆𑀔𑀢𑀺 𑀢𑀸𑀤𑀺𑀲𑀸𑀦𑀁𑀬𑁂𑀯 𑀅𑀪𑀸𑀯𑀢𑁄. 𑀲 𑀯𑁂 𑀪𑀺𑀓𑁆𑀔𑀼 𑀲𑀼𑀔𑀁 𑀲𑁂𑀢𑀻𑀢𑀺, 𑀲𑁄 𑀪𑀺𑀓𑁆𑀔𑀼 𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀓𑀸𑀫𑀢𑀸𑀬 𑀲𑀩𑁆𑀩𑀲𑁄 𑀯𑀢𑁆𑀣𑀼𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀯𑀸 𑀅𑀧𑁂𑀓𑁆𑀔𑀸𑀭𑀳𑀺𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 ¶ 𑀲𑀼𑀔𑀁 𑀲𑁂𑀢𑀺. 𑀢𑀲𑁆𑀲 𑀅𑀦𑀼𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀸𑀪𑀸𑀯𑀢𑁄 𑀅𑀭𑀜𑁆𑀜𑀫𑁆𑀳𑀺 𑀕𑀸𑀫𑀫𑁆𑀳𑀺 𑀲𑀤𑀺𑀲𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 ¶ 𑀧𑀩𑁆𑀩𑀢𑀯𑀦𑀸𑀤𑀻𑀦𑀁 𑀭𑀫𑀡𑀻𑀬𑀢𑀁 𑀯𑀲𑀺𑀢𑀧𑀼𑀩𑁆𑀩𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀙𑁄𑀤𑀺𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀲𑀺𑀢𑀁 𑀫𑁂𑀢𑀺, 𑀯𑀼𑀝𑁆𑀞𑀧𑀼𑀩𑁆𑀩𑀁 𑀫𑀬𑀸. 𑀯𑀸𑀴𑀫𑀺𑀕𑀦𑀺𑀲𑁂𑀯𑀺𑀢𑁂𑀢𑀺, 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀯𑀸𑀴𑀫𑀺𑀕𑁂𑀳𑀺 𑀉𑀧𑀲𑁂𑀯𑀺𑀢𑁂 𑀯𑀦𑁂.

𑀲𑀗𑁆𑀓𑀧𑁆𑀧𑀁 𑀦𑀸𑀪𑀺𑀚𑀸𑀦𑀸𑀫𑀻𑀢𑀺, 𑀇𑀫𑁂 𑀬𑁂 𑀓𑁂𑀘𑀺 𑀧𑀸𑀡𑀺𑀦𑁄 𑀲𑀢𑁆𑀢𑀸 𑀉𑀲𑀼𑀲𑀢𑁆𑀢𑀺𑀆𑀤𑀻𑀳𑀺 𑀧𑀳𑀭𑀡𑁂𑀳𑀺 𑀳𑀜𑁆𑀜𑀦𑁆𑀢𑀼 𑀫𑀸𑀭𑀺𑀬𑀦𑁆𑀢𑀼 𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀸𑀤𑀻𑀳𑀺 𑀯𑀚𑁆𑀛𑀦𑁆𑀢𑀼 𑀩𑀸𑀥𑀻𑀬𑀦𑁆𑀢𑀼, 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀤𑀼𑀓𑁆𑀔𑀁 𑀧𑀧𑁆𑀧𑁄𑀦𑁆𑀢𑀼 𑀧𑀸𑀧𑀼𑀡𑀦𑁆𑀢𑀽𑀢𑀺; 𑀏𑀯𑀁 𑀤𑁄𑀲𑀲𑀁𑀳𑀺𑀢𑀁 𑀧𑀝𑀺𑀖𑀲𑀁𑀬𑀼𑀢𑁆𑀢𑀁 𑀢𑀢𑁄 𑀏𑀯 𑀅𑀦𑀭𑀺𑀬𑀁 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀤𑀺𑀧𑁆𑀧𑀪𑁂𑀤𑀁 𑀧𑀸𑀧𑀲𑀗𑁆𑀓𑀧𑁆𑀧𑀁 𑀉𑀧𑁆𑀧𑀸𑀤𑀺𑀢𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀢𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 ‘‘𑀧𑀭𑀺𑀘𑀺𑀡𑁆𑀡𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀭𑀺𑀘𑀺𑀡𑁆𑀡𑁄𑀢𑀺 𑀉𑀧𑀸𑀲𑀺𑀢𑁄 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀓𑀭𑀡𑀯𑀲𑁂𑀦. 𑀑𑀳𑀺𑀢𑁄𑀢𑀺 𑀑𑀭𑁄𑀳𑀺𑀢𑁄. 𑀕𑀭𑀼𑀓𑁄 𑀪𑀸𑀭𑁄𑀢𑀺 𑀕𑀭𑀼𑀢𑀭𑁄 𑀔𑀦𑁆𑀥𑀪𑀸𑀭𑁄.

𑀦𑀸𑀪𑀺𑀦𑀦𑁆𑀤𑀸𑀫𑀺 ¶ 𑀫𑀭𑀡𑀦𑁆𑀢𑀺 ‘‘𑀓𑀣𑀁 𑀦𑀼 𑀔𑁄 𑀫𑁂 𑀫𑀭𑀡𑀁 𑀲𑀺𑀬𑀸’’𑀢𑀺 𑀫𑀭𑀡𑀁 𑀦 𑀇𑀘𑁆𑀙𑀸𑀫𑀺. 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀦𑁆𑀢𑀺 ‘‘𑀓𑀣𑀁 𑀦𑀼 𑀔𑁄 𑀅𑀳𑀁 𑀘𑀺𑀭𑀁 𑀚𑀻𑀯𑁂𑀬𑁆𑀬’’𑀦𑁆𑀢𑀺 𑀚𑀻𑀯𑀺𑀢𑀫𑁆𑀧𑀺 𑀦 𑀇𑀘𑁆𑀙𑀸𑀫𑀺. 𑀏𑀢𑁂𑀦 𑀫𑀭𑀡𑁂 𑀚𑀻𑀯𑀺𑀢𑁂 𑀘 𑀲𑀫𑀸𑀦𑀘𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀻𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁𑀯 𑀆𑀕𑀫𑁂𑀫𑀺. 𑀦𑀺𑀩𑁆𑀩𑀺𑀲𑀦𑁆𑀢𑀺 𑀦𑀺𑀩𑁆𑀩𑀺𑀲𑀦𑁆𑀢𑁄, 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄. 𑀪𑀢𑀓𑁄 𑀬𑀣𑀸𑀢𑀺 𑀬𑀣𑀸 𑀪𑀢𑀓𑁄 𑀧𑀭𑀲𑁆𑀲 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀫𑁆𑀫𑀲𑀺𑀤𑁆𑀥𑀺𑀁 𑀅𑀦𑀪𑀺𑀦𑀦𑁆𑀤𑀦𑁆𑀢𑁄𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀯 𑀤𑀺𑀯𑀲𑀓𑁆𑀔𑀬𑀁 𑀉𑀤𑀺𑀓𑁆𑀔𑀢𑀺, 𑀏𑀯𑀁 𑀅𑀳𑀫𑁆𑀧𑀺 𑀚𑀻𑀯𑀺𑀢𑀁 𑀅𑀦𑀪𑀺𑀦𑀦𑁆𑀤𑀦𑁆𑀢𑁄𑀧𑀺 𑀅𑀢𑁆𑀢𑀪𑀸𑀯𑀲𑁆𑀲 𑀬𑀸𑀧𑀦𑁂𑀦 𑀫𑀭𑀡𑀁 𑀅𑀦𑀪𑀺𑀦𑀦𑁆𑀤𑀦𑁆𑀢𑁄𑀧𑀺 𑀧𑀭𑀺𑀬𑁄𑀲𑀸𑀦𑀓𑀸𑀮𑀁 𑀧𑀝𑀺𑀓𑀗𑁆𑀔𑀸𑀫𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

𑁧. 𑀲𑀻𑀮𑀯𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 ¶ ¶ 𑀲𑀻𑀮𑀫𑁂𑀯𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀻𑀮𑀯𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀻𑀮𑀯𑀸𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀫𑀸𑀭𑁂𑀢𑀼𑀓𑀸𑀫𑁄 𑀘𑀡𑁆𑀟𑀁 𑀫𑀢𑁆𑀢𑀳𑀢𑁆𑀣𑀺𑀁 𑀆𑀭𑁄𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀉𑀧𑀓𑁆𑀓𑀫𑀦𑁆𑀢𑁄𑀧𑀺 𑀫𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺 𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀪𑀸𑀯𑀢𑁄. 𑀢𑀲𑁆𑀲 𑀧𑀯𑀢𑁆𑀢𑀺𑀁 ¶ 𑀤𑀺𑀲𑁆𑀯𑀸 𑀪𑀕𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀲𑀻𑀮𑀯𑀓𑀼𑀫𑀸𑀭𑀁 𑀆𑀦𑁂𑀳𑀻’’𑀢𑀺. 𑀣𑁂𑀭𑁄 𑀇𑀤𑁆𑀥𑀺𑀩𑀮𑁂𑀦 𑀲𑀤𑁆𑀥𑀺𑀁 𑀳𑀢𑁆𑀣𑀺𑀦𑀸 𑀢𑀁 𑀆𑀦𑁂𑀲𑀺. 𑀓𑀼𑀫𑀸𑀭𑁄 𑀳𑀢𑁆𑀣𑀺𑀢𑁄 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀪𑀕𑀯𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀯𑀲𑀢𑀺. 𑀅𑀣 𑀦𑀁 𑀅𑀚𑀸𑀢𑀲𑀢𑁆𑀢𑀼 ‘‘𑀫𑀸𑀭𑁂𑀣𑀸’’𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺. 𑀢𑁂 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀞𑀺𑀢𑀸 𑀣𑁂𑀭𑁂𑀦 𑀓𑀣𑀺𑀢𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀣𑁂𑀭𑁄 𑀢𑁂𑀲𑀁 𑁋

𑁬𑁦𑁮.

‘‘𑀲𑀻𑀮𑀫𑁂𑀯𑀺𑀥 𑀲𑀺𑀓𑁆𑀔𑁂𑀣, 𑀅𑀲𑁆𑀫𑀺𑀁 𑀮𑁄𑀓𑁂 𑀲𑀼𑀲𑀺𑀓𑁆𑀔𑀺𑀢𑀁.

𑀲𑀻𑀮𑀜𑁆𑀳𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁, 𑀉𑀧𑀦𑀸𑀫𑁂𑀢𑀺 𑀲𑁂𑀯𑀺𑀢𑀁.

𑁬𑁦𑁯.

‘‘𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀫𑁂𑀥𑀸𑀯𑀻, 𑀧𑀢𑁆𑀣𑀬𑀸𑀦𑁄 𑀢𑀬𑁄 𑀲𑀼𑀔𑁂;

𑀧𑀲𑀁𑀲𑀁 𑀯𑀺𑀢𑁆𑀢𑀺𑀮𑀸𑀪𑀜𑁆𑀘, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀦𑀁.

𑁬𑁧𑁦.

‘‘𑀲𑀻𑀮𑀯𑀸 𑀳𑀺 𑀩𑀳𑀽 𑀫𑀺𑀢𑁆𑀢𑁂, 𑀲𑀜𑁆𑀜𑀫𑁂𑀦𑀸𑀥𑀺𑀕𑀘𑁆𑀙𑀢𑀺;

𑀤𑀼𑀲𑁆𑀲𑀻𑀮𑁄 𑀧𑀦 𑀫𑀺𑀢𑁆𑀢𑁂𑀳𑀺, 𑀥𑀁𑀲𑀢𑁂 𑀧𑀸𑀧𑀫𑀸𑀘𑀭𑀁.

𑁬𑁧𑁧.

‘‘𑀅𑀯𑀡𑁆𑀡𑀜𑁆𑀘 𑀅𑀓𑀺𑀢𑁆𑀢𑀺𑀜𑁆𑀘, 𑀤𑀼𑀲𑁆𑀲𑀻𑀮𑁄 𑀮𑀪𑀢𑁂 𑀦𑀭𑁄;

𑀯𑀡𑁆𑀡𑀁 𑀓𑀺𑀢𑁆𑀢𑀺𑀁 𑀧𑀲𑀁𑀲𑀜𑁆𑀘, 𑀲𑀤𑀸 𑀮𑀪𑀢𑀺 𑀲𑀻𑀮𑀯𑀸.

𑁬𑁧𑁨.

‘‘𑀆𑀤𑀺 ¶ ¶ 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀘, 𑀓𑀮𑁆𑀬𑀸𑀡𑀸𑀦𑀜𑁆𑀘 𑀫𑀸𑀢𑀼𑀓𑀁;

𑀧𑀫𑀼𑀔𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀢𑀲𑁆𑀫𑀸 𑀲𑀻𑀮𑀁 𑀯𑀺𑀲𑁄𑀥𑀬𑁂.

𑁬𑁧𑁩.

‘‘𑀯𑁂𑀮𑀸 𑀘 𑀲𑀁𑀯𑀭𑀁 𑀲𑀻𑀮𑀁, 𑀘𑀺𑀢𑁆𑀢𑀲𑁆𑀲 𑀅𑀪𑀺𑀳𑀸𑀲𑀦𑀁;

𑀢𑀺𑀢𑁆𑀣𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀸𑀦𑀁, 𑀢𑀲𑁆𑀫𑀸 𑀲𑀻𑀮𑀁 𑀯𑀺𑀲𑁄𑀥𑀬𑁂.

𑁬𑁧𑁪.

‘‘𑀲𑀻𑀮𑀁 𑀩𑀮𑀁 𑀅𑀧𑁆𑀧𑀝𑀺𑀫𑀁, 𑀲𑀻𑀮𑀁 𑀆𑀯𑀼𑀥𑀫𑀼𑀢𑁆𑀢𑀫𑀁;

𑀲𑀻𑀮𑀫𑀸𑀪𑀭𑀡𑀁 𑀲𑁂𑀝𑁆𑀞𑀁, 𑀲𑀻𑀮𑀁 𑀓𑀯𑀘𑀫𑀩𑁆𑀪𑀼𑀢𑀁.

𑁬𑁧𑁫.

‘‘𑀲𑀻𑀮𑀁 𑀲𑁂𑀢𑀼 𑀫𑀳𑁂𑀲𑀓𑁆𑀔𑁄, 𑀲𑀻𑀮𑀁 𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄;

𑀲𑀻𑀮𑀁 𑀯𑀺𑀮𑁂𑀧𑀦𑀁 𑀲𑁂𑀝𑁆𑀞𑀁, 𑀬𑁂𑀦 𑀯𑀸𑀢𑀺 𑀤𑀺𑀲𑁄𑀤𑀺𑀲𑀁.

𑁬𑁧𑁬.

‘‘𑀲𑀻𑀮𑀁 𑀲𑀫𑁆𑀩𑀮𑀫𑁂𑀯𑀕𑁆𑀕𑀁, 𑀲𑀻𑀮𑀁 𑀧𑀸𑀣𑁂𑀬𑁆𑀬𑀫𑀼𑀢𑁆𑀢𑀫𑀁;

𑀲𑀻𑀮𑀁 𑀲𑁂𑀝𑁆𑀞𑁄 𑀅𑀢𑀺𑀯𑀸𑀳𑁄, 𑀬𑁂𑀦 𑀬𑀸𑀢𑀺 𑀤𑀺𑀲𑁄𑀤𑀺𑀲𑀁.

𑁬𑁧𑁭.

‘‘𑀇𑀥𑁂𑀯 𑀦𑀺𑀦𑁆𑀤𑀁 𑀮𑀪𑀢𑀺, 𑀧𑁂𑀘𑁆𑀘𑀸𑀧𑀸𑀬𑁂 𑀘 𑀤𑀼𑀫𑁆𑀫𑀦𑁄;

𑀲𑀩𑁆𑀩𑀢𑁆𑀣 𑀤𑀼𑀫𑁆𑀫𑀦𑁄 𑀩𑀸𑀮𑁄, 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑁄.

𑁬𑁧𑁮.

‘‘𑀇𑀥𑁂𑀯 𑀓𑀺𑀢𑁆𑀢𑀺𑀁 𑀮𑀪𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀘 𑀲𑀼𑀫𑁆𑀫𑀦𑁄;

𑀲𑀩𑁆𑀩𑀢𑁆𑀣 𑀲𑀼𑀫𑀦𑁄 𑀥𑀻𑀭𑁄, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄.

𑁬𑁧𑁯.

‘‘𑀲𑀻𑀮𑀫𑁂𑀯 𑀇𑀥 𑀅𑀕𑁆𑀕𑀁, 𑀧𑀜𑁆𑀜𑀯𑀸 𑀧𑀦 𑀉𑀢𑁆𑀢𑀫𑁄;

𑀫𑀦𑀼𑀲𑁆𑀲𑁂𑀲𑀼 𑀘 𑀤𑁂𑀯𑁂𑀲𑀼, 𑀲𑀻𑀮𑀧𑀜𑁆𑀜𑀸𑀡𑀢𑁄 𑀚𑀬’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀢𑁆𑀣 𑀲𑀻𑀮𑀫𑁂𑀯𑀺𑀥 𑀲𑀺𑀓𑁆𑀔𑁂𑀣, 𑀅𑀲𑁆𑀫𑀺𑀁 𑀮𑁄𑀓𑁂𑀢𑀺 𑀇𑀥𑀸𑀢𑀺, 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀪𑁂𑀤𑀁 𑀆𑀤𑀺𑀢𑁄 𑀲𑀻𑀮𑀫𑁂𑀯 𑀲𑀺𑀓𑁆𑀔𑁂𑀬𑁆𑀬, 𑀲𑀺𑀓𑁆𑀔𑀦𑁆𑀢𑁄 𑀘 𑀦𑀁 𑀲𑀼𑀲𑀺𑀓𑁆𑀔𑀺𑀢𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀧𑀼𑀡𑁆𑀡𑀜𑁆𑀘 𑀓𑀢𑁆𑀯𑀸 𑀲𑀺𑀓𑁆𑀔𑁂𑀬𑁆𑀬. 𑀅𑀲𑁆𑀫𑀺𑀁 ¶ 𑀮𑁄𑀓𑁂𑀢𑀺 𑀯𑀸 𑀇𑀫𑀲𑁆𑀫𑀺𑀁 𑀲𑀗𑁆𑀔𑀸𑀭𑀮𑁄𑀓𑁂 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑁂𑀲𑀼 𑀲𑀻𑀮𑀁 𑀆𑀤𑀺𑀢𑁄 𑀲𑀺𑀓𑁆𑀔𑁂𑀬𑁆𑀬. 𑀤𑀺𑀝𑁆𑀞𑀺𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀻𑀮𑀲𑁆𑀲 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀆𑀳 ‘‘𑀲𑀻𑀮𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀻𑀢𑀺 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀲𑀻𑀮𑀁 𑀲𑁂𑀯𑀺𑀢𑀁 𑀧𑀭𑀺𑀘𑀺𑀢𑀁 𑀭𑀓𑁆𑀔𑀺𑀢𑀁 ¶ 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺, 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀻𑀢𑀺 𑀏𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀢𑀁𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑀲𑁆𑀲 𑀉𑀧𑀦𑀸𑀫𑁂𑀢𑀺 𑀆𑀯𑀳𑀢𑀺.

𑀲𑀻𑀮𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀉𑀧𑀦𑀸𑀫𑁂𑀢𑀻𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀮𑀁 𑀭𑀓𑁆𑀔𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀓𑁆𑀔𑁂𑀬𑁆𑀬𑀸𑀢𑀺 𑀕𑁄𑀧𑁂𑀬𑁆𑀬. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄 𑀳𑀺 𑀯𑀺𑀭𑀫𑀦𑁆𑀢𑁄 𑀯𑀢𑁆𑀢𑀧𑀝𑀺𑀯𑀢𑁆𑀢𑀜𑁆𑀘 𑀧𑀽𑀭𑁂𑀦𑁆𑀢𑁄 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀢𑁄 𑀢𑀁 𑀭𑀓𑁆𑀔𑀢𑀺 𑀦𑀸𑀫. 𑀫𑁂𑀥𑀸𑀯𑀻𑀢𑀺 𑀧𑀜𑁆𑀜𑀯𑀸, 𑀇𑀤𑀁 𑀢𑀲𑁆𑀲 𑀭𑀓𑁆𑀔𑀦𑀼𑀧𑀸𑀬𑀤𑀲𑁆𑀲𑀦𑀁 𑀜𑀸𑀡𑀩𑀮𑁂𑀦 𑀳𑀺𑀲𑁆𑀲 𑀲𑀫𑀸𑀤𑀸𑀦𑀁 𑀅𑀯𑀺𑀓𑁄𑀧𑀦𑀜𑁆𑀘 𑀳𑁄𑀢𑀺. 𑀧𑀢𑁆𑀣𑀬𑀸𑀦𑁄𑀢𑀺 𑀇𑀘𑁆𑀙𑀦𑁆𑀢𑁄. 𑀢𑀬𑁄 𑀲𑀼𑀔𑁂𑀢𑀺 ¶ 𑀢𑀻𑀡𑀺 𑀲𑀼𑀔𑀸𑀦𑀺. 𑀲𑀼𑀔𑀦𑀺𑀫𑀺𑀢𑁆𑀢𑀁 𑀯𑀸 ‘‘𑀲𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀲𑀁𑀲𑀦𑁆𑀢𑀺 𑀓𑀺𑀢𑁆𑀢𑀺𑀁, 𑀯𑀺𑀜𑁆𑀜𑀽𑀳𑀺 𑀯𑀸 𑀧𑀲𑀁𑀲𑀦𑀁. 𑀯𑀺𑀢𑁆𑀢𑀺𑀮𑀸𑀪𑀦𑁆𑀢𑀺 𑀢𑀼𑀝𑁆𑀞𑀺𑀮𑀸𑀪𑀁. ‘‘𑀯𑀺𑀢𑁆𑀢𑀮𑀸𑀪’’𑀦𑁆𑀢𑀺 𑀘 𑀧𑀞𑀦𑁆𑀢𑀺, 𑀥𑀦𑀮𑀸𑀪𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀮𑀯𑀸 𑀳𑀺 𑀅𑀧𑁆𑀧𑀫𑀢𑁆𑀢𑀢𑀸𑀬 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺. 𑀧𑁂𑀘𑁆𑀘𑀸𑀢𑀺 𑀓𑀸𑀮𑀗𑁆𑀓𑀢𑁆𑀯𑀸. 𑀲𑀕𑁆𑀕𑁂 𑀧𑀫𑁄𑀤𑀦𑀦𑁆𑀢𑀺 𑀤𑁂𑀯𑀮𑁄𑀓𑁂 𑀇𑀝𑁆𑀞𑁂𑀳𑀺 𑀓𑀸𑀫𑀕𑀼𑀡𑁂𑀳𑀺, 𑀫𑁄𑀤𑀦𑀜𑁆𑀘 𑀧𑀢𑁆𑀣𑀬𑀫𑀸𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀮𑁄𑀓𑁂 𑀧𑀲𑀁𑀲𑀁 𑀯𑀺𑀢𑁆𑀢𑀺𑀮𑀸𑀪𑀁 𑀧𑀭𑀮𑁄𑀓𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀫𑁄𑀤𑀦𑀜𑁆𑀘 𑀇𑀘𑁆𑀙𑀦𑁆𑀢𑁄 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀲𑀜𑁆𑀜𑀫𑁂𑀦𑀸𑀢𑀺 𑀓𑀸𑀬𑀸𑀤𑀻𑀦𑀁 𑀲𑀁𑀬𑀫𑁂𑀦. 𑀲𑀁𑀬𑀢𑁄 𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀓𑀜𑁆𑀘𑀺 𑀅𑀯𑀺𑀳𑁂𑀞𑁂𑀦𑁆𑀢𑁄 𑀅𑀪𑀬𑀤𑀸𑀦𑀁 𑀤𑀤𑀦𑁆𑀢𑁄 𑀧𑀺𑀬𑀫𑀦𑀸𑀧𑀢𑀸𑀬 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺. 𑀥𑀁𑀲𑀢𑁂𑀢𑀺 𑀅𑀧𑁂𑀢𑀺. 𑀧𑀸𑀧𑀫𑀸𑀘𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑁄. 𑀤𑀼𑀲𑁆𑀲𑀻𑀮𑀜𑁆𑀳𑀺 𑀧𑀼𑀕𑁆𑀕𑀮𑀁 𑀅𑀢𑁆𑀣𑀓𑀸𑀫𑀸 𑀲𑀢𑁆𑀢𑀸 𑀦 𑀪𑀚𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀭𑀺𑀯𑀚𑁆𑀚𑁂𑀦𑁆𑀢𑀺.

𑀅𑀯𑀡𑁆𑀡𑀦𑁆𑀢𑀺 𑀅𑀕𑀼𑀡𑀁, 𑀲𑀫𑁆𑀫𑀼𑀔𑀸 𑀕𑀭𑀳𑀁 𑀯𑀸. 𑀅𑀓𑀺𑀢𑁆𑀢𑀺𑀦𑁆𑀢𑀺, 𑀅𑀬𑀲𑀁 𑀅𑀲𑀺𑀮𑁄𑀓𑀁. 𑀯𑀡𑁆𑀡𑀦𑁆𑀢𑀺 𑀕𑀼𑀡𑀁. 𑀓𑀺𑀢𑁆𑀢𑀺𑀦𑁆𑀢𑀺 𑀲𑀺𑀮𑁄𑀓𑀁 𑀧𑀢𑁆𑀣𑀝𑀬𑀲𑀢𑀁. 𑀧𑀲𑀁𑀲𑀦𑁆𑀢𑀺 𑀲𑀫𑁆𑀫𑀼𑀔𑀸 𑀣𑁄𑀫𑀦𑀁.

𑀆𑀤𑀻𑀢𑀺 𑀫𑀽𑀮𑀁. 𑀲𑀻𑀮𑀜𑁆𑀳𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀤𑀺. 𑀬𑀣𑀸𑀳 𑁋 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥’’𑀦𑁆𑀢𑀺 (𑀲𑀁. 𑀦𑀺. 𑁫.𑁩𑁬𑁯). 𑀧𑀢𑀺𑀝𑁆𑀞𑀸𑀢𑀺 𑀅𑀥𑀺𑀝𑁆𑀞𑀸𑀦𑀁. 𑀲𑀻𑀮𑀜𑁆𑀳𑀺 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸. 𑀢𑁂𑀦𑀸𑀳 𑁋 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁨𑁩; 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯). 𑀓𑀮𑁆𑀬𑀸𑀡𑀸𑀦𑀜𑁆𑀘 𑀫𑀸𑀢𑀼𑀓𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀫𑀸𑀢𑀼𑀪𑀽𑀢𑀁 ¶ , 𑀚𑀦𑀓𑀦𑁆𑀢𑀺, 𑀅𑀢𑁆𑀣𑁄. 𑀧𑀫𑀼𑀔𑀁 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀫𑁄𑀚𑁆𑀚𑀸𑀤𑀻𑀦𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀧𑀫𑀼𑀔𑀁 𑀫𑀼𑀔𑀪𑀽𑀢𑀁, 𑀧𑀯𑀢𑁆𑀢𑀺𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀆𑀤𑀺𑀪𑀸𑀯𑀸𑀤𑀺𑀢𑁄. 𑀯𑀺𑀲𑁄𑀥𑀬𑁂𑀢𑀺 𑀅𑀓𑁆𑀔𑀡𑁆𑀟𑀸𑀤𑀺𑀪𑀸𑀯𑁂𑀦 𑀲𑀫𑁆𑀧𑀸𑀤𑁂𑀬𑁆𑀬.

𑀯𑁂𑀮𑀸𑀢𑀺 𑀤𑀼𑀘𑁆𑀘𑀭𑀺𑀢𑁂𑀳𑀺 𑀅𑀦𑀢𑀺𑀓𑁆𑀓𑀫𑀦𑀻𑀬𑀝𑁆𑀞𑁂𑀦 𑀯𑁂𑀮𑀸, 𑀲𑀻𑀫𑀸𑀢𑀺 𑀅𑀢𑁆𑀣𑁄 ¶ . 𑀯𑁂𑀮𑀸𑀬𑀢𑀺 𑀯𑀸 𑀤𑀼𑀲𑁆𑀲𑀺𑀮𑁆𑀬𑀁 𑀘𑀮𑀬𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀯𑁂𑀮𑀸. 𑀲𑀁𑀯𑀭𑀁 𑀲𑀻𑀮𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀲𑁆𑀲 𑀧𑀺𑀤𑀳𑀦𑀢𑁄. 𑀅𑀪𑀺𑀳𑀸𑀲𑀦𑀦𑁆𑀢𑀺 𑀢𑁄𑀲𑀦𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀳𑁂𑀢𑀼𑀢𑀸𑀬 𑀘𑀺𑀢𑁆𑀢𑀲𑁆𑀲𑀸𑀪𑀺𑀧𑁆𑀧𑀫𑁄𑀤𑀦𑀢𑁄. 𑀢𑀺𑀢𑁆𑀣𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀸𑀦𑀦𑁆𑀢𑀺 𑀲𑀸𑀯𑀓𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀫𑀮𑀧𑁆𑀧𑀯𑀸𑀳𑀦𑁂 𑀦𑀺𑀩𑁆𑀩𑀸𑀦𑀫𑀳𑀸𑀲𑀫𑀼𑀤𑁆𑀤𑀸𑀯𑀕𑀸𑀳𑀡𑁂 𑀘 𑀢𑀺𑀢𑁆𑀣𑀪𑀽𑀢𑀜𑁆𑀘.

𑀲𑀻𑀮𑀁 𑀩𑀮𑀁 𑀅𑀧𑁆𑀧𑀝𑀺𑀫𑀦𑁆𑀢𑀺 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁂 𑀅𑀲𑀤𑀺𑀲𑀁 𑀩𑀮𑀁 𑀲𑁂𑀦𑀸𑀣𑀸𑀫𑁄 𑀘. 𑀆𑀯𑀼𑀥𑀫𑀼𑀢𑁆𑀢𑀫𑀦𑁆𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 ¶ 𑀙𑁂𑀤𑀦𑁂 𑀉𑀢𑁆𑀢𑀫𑀁 𑀧𑀳𑀭𑀡𑀁. 𑀕𑀼𑀡𑀲𑀭𑀻𑀭𑁄𑀧𑀲𑁄𑀪𑀦𑀝𑁆𑀞𑁂𑀦 𑀆𑀪𑀭𑀡𑀁. 𑀲𑁂𑀝𑁆𑀞𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀉𑀢𑁆𑀢𑀫𑀁 𑀤𑀩𑁆𑀩𑀜𑁆𑀘. 𑀲𑀧𑀸𑀡𑀧𑀭𑀺𑀢𑁆𑀢𑀸𑀦𑀢𑁄 𑀓𑀯𑀘𑀫𑀩𑁆𑀪𑀼𑀢𑀁. ‘‘𑀅𑀩𑁆𑀪𑀺𑀤’’𑀦𑁆𑀢𑀺 𑀘 𑀧𑀞𑀦𑁆𑀢𑀺, 𑀅𑀪𑁂𑀚𑁆𑀚𑀦𑁆𑀢𑀺 𑀅𑀢𑁆𑀣𑁄.

𑀅𑀧𑀸𑀬𑀫𑀳𑁄𑀖𑀸𑀢𑀺𑀓𑁆𑀓𑀫𑀦𑁂 𑀲𑀁𑀲𑀸𑀭𑀫𑀳𑁄𑀖𑀸𑀢𑀺𑀓𑁆𑀓𑀫𑀦𑁂 𑀘 𑀓𑀺𑀮𑁂𑀲𑁂𑀳𑀺 𑀅𑀲𑀁𑀲𑀻𑀤𑀦𑀝𑁆𑀞𑁂𑀦 𑀲𑁂𑀢𑀼. 𑀫𑀳𑁂𑀲𑀓𑁆𑀔𑁄𑀢𑀺 𑀫𑀳𑀩𑁆𑀩𑀮𑁄. 𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄𑀢𑀺 𑀧𑀝𑀺𑀯𑀸𑀢𑀁 𑀲𑀩𑁆𑀩𑀤𑀺𑀲𑀸𑀲𑀼 𑀯𑀸𑀬𑀦𑀢𑁄 𑀅𑀦𑀼𑀢𑁆𑀢𑀭𑁄 𑀕𑀦𑁆𑀥𑁄 𑀲𑀩𑁆𑀩𑀚𑀦𑀫𑀦𑁄𑀳𑀭𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑁂𑀦 𑀯𑀸𑀢𑀺 𑀤𑀺𑀲𑁄𑀤𑀺𑀲’’𑀦𑁆𑀢𑀺 𑀬𑁂𑀦 𑀲𑀻𑀮𑀕𑀦𑁆𑀥𑁂𑀦 𑀢𑀁𑀲𑀫𑀗𑁆𑀕𑀻 𑀤𑀺𑀲𑁄𑀤𑀺𑀲𑀁 𑀲𑀩𑁆𑀩𑀸 𑀤𑀺𑀲𑀸 𑀯𑀸𑀬𑀢𑀺. ‘‘𑀤𑀺𑀲𑁄𑀤𑀺𑀲𑀸’’𑀢𑀺𑀧𑀺 𑀧𑀸𑀴𑀺, 𑀤𑀲 𑀤𑀺𑀲𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀩𑀮𑀫𑁂𑀯𑀕𑁆𑀕𑀦𑁆𑀢𑀺 𑀲𑀫𑁆𑀩𑀮𑀁 𑀦𑀸𑀫 𑀧𑀼𑀝𑀪𑀢𑁆𑀢𑀁. 𑀬𑀣𑀸 𑀧𑀼𑀝𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑁂𑀦 𑀦 𑀓𑀺𑀮𑀫𑀢𑀺, 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄𑀧𑀺 𑀲𑀼𑀤𑁆𑀥𑀁 𑀲𑀻𑀮𑀲𑀫𑁆𑀩𑀮𑀁 𑀕𑀳𑁂𑀢𑁆𑀯𑀸 𑀲𑀁𑀲𑀸𑀭𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑁄 𑀕𑀢𑀕𑀢𑀝𑁆𑀞𑀸𑀦𑁂 𑀦 𑀓𑀺𑀮𑀫𑀢𑀻𑀢𑀺 𑀲𑀻𑀮𑀁 𑀅𑀕𑁆𑀕𑀁 𑀲𑀫𑁆𑀩𑀮𑀁 𑀦𑀸𑀫. 𑀢𑀣𑀸 𑀲𑀻𑀮𑀁 𑀧𑀸𑀣𑁂𑀬𑁆𑀬𑀫𑀼𑀢𑁆𑀢𑀫𑀁 𑀘𑁄𑀭𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀘. 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀢𑀁 𑀢𑀁 𑀞𑀸𑀦𑀁 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀯𑀸 𑀯𑀸𑀳𑁂𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀅𑀢𑀺𑀯𑀸𑀳𑁄, 𑀬𑀸𑀦𑀁. 𑀓𑁂𑀦𑀘𑀺 𑀅𑀦𑀼𑀧𑀤𑁆𑀤𑀼𑀢𑀁 𑀳𑀼𑀢𑁆𑀯𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 ¶ 𑀲𑀻𑀮𑀁 𑀲𑁂𑀝𑁆𑀞𑀁 𑀅𑀢𑀺𑀯𑀸𑀳𑁄. 𑀬𑁂𑀦𑀸𑀢𑀺 𑀬𑁂𑀦 𑀅𑀢𑀺𑀯𑀸𑀳𑁂𑀦 𑀬𑀸𑀢𑀺 𑀤𑀺𑀲𑁄𑀤𑀺𑀲𑀦𑁆𑀢𑀺 𑀅𑀕𑀢𑀺𑀁 𑀕𑀢𑀺𑀜𑁆𑀘𑀸𑀧𑀺 𑀢𑀁 𑀢𑀁 𑀤𑀺𑀲𑀁 𑀲𑀼𑀔𑁂𑀦𑁂𑀯 𑀕𑀘𑁆𑀙𑀢𑀺.

𑀇𑀥𑁂𑀯 𑀦𑀺𑀦𑁆𑀤𑀁 𑀮𑀪𑀢𑀻𑀢𑀺 𑀇𑀥𑀮𑁄𑀓𑁂𑀧𑀺 𑀤𑀼𑀫𑁆𑀫𑀦𑁄 𑀭𑀸𑀕𑀸𑀤𑀻𑀳𑀺 𑀤𑀽𑀲𑀺𑀢𑀘𑀺𑀢𑁆𑀢𑁄 ‘‘𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄’’𑀢𑀺 𑀦𑀺𑀦𑁆𑀤𑀁 𑀕𑀭𑀳𑀁 𑀮𑀪𑀢𑀺. 𑀧𑁂𑀘𑁆𑀘 𑀧𑀭𑀮𑁄𑀓𑁂𑀧𑀺 𑀅𑀧𑀸𑀬𑁂 ‘‘𑀧𑀼𑀭𑀺𑀲𑀢𑁆𑀢𑀓𑀮𑀺 𑀅𑀯𑀚𑀸𑀢𑀸’’𑀢𑀺𑀆𑀤𑀺𑀦𑀸 𑀬𑀫𑀧𑀼𑀭𑀺𑀲𑀸𑀤𑀻𑀳𑀺 𑀘 𑀦𑀺𑀦𑁆𑀤𑀁 𑀮𑀪𑀢𑀺. 𑀦 𑀓𑁂𑀯𑀮𑀁 𑀦𑀺𑀦𑁆𑀤𑀫𑁂𑀯 𑀮𑀪𑀢𑀺, 𑀅𑀣 𑀔𑁄 𑀲𑀩𑁆𑀩𑀢𑁆𑀣 𑀤𑀼𑀫𑁆𑀫𑀦𑁄 𑀩𑀸𑀮𑁄 𑀇𑀥𑀮𑁄𑀓𑁂 𑀤𑀼𑀘𑁆𑀘𑀭𑀺𑀢𑀘𑀭𑀡𑁂𑀦 𑀤𑀽𑀲𑀺𑀢𑀘𑀺𑀢𑁆𑀢𑁄 𑀧𑀭𑀮𑁄𑀓𑁂 𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀲𑀩𑁆𑀩𑀢𑁆𑀣 𑀩𑀸𑀮𑁄 𑀤𑀼𑀫𑁆𑀫𑀦𑁄 𑀳𑁄𑀢𑀺. 𑀓𑀣𑀁? 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑁄 𑀲𑀫𑁆𑀫𑀸 𑀲𑀻𑀮𑁂𑀲𑀼 𑀦 𑀞𑀧𑀺𑀢𑀘𑀺𑀢𑁆𑀢𑁄 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄.

𑀇𑀥𑁂𑀯 𑀓𑀺𑀢𑁆𑀢𑀺𑀁 𑀮𑀪𑀢𑀻𑀢𑀺 𑀇𑀥𑀮𑁄𑀓𑁂𑀧𑀺 𑀲𑀼𑀫𑀦𑁄 ‘‘𑀲𑀧𑁆𑀧𑀼𑀭𑀺𑀲𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 𑀓𑀺𑀢𑁆𑀢𑀺𑀁 𑀮𑀪𑀢𑀺. 𑀧𑁂𑀘𑁆𑀘 𑀧𑀭𑀮𑁄𑀓𑁂𑀧𑀺 𑀲𑀕𑁆𑀕𑁂 ‘‘𑀅𑀬𑀁 𑀲𑀧𑁆𑀧𑀼𑀭𑀺𑀲𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀢𑀣𑀸 𑀳𑀺 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀺𑀁 𑀮𑀪𑀢𑀺. 𑀦 𑀓𑁂𑀯𑀮𑀁 𑀓𑀺𑀢𑁆𑀢𑀺𑀫𑁂𑀯 𑀮𑀪𑀢𑀺, 𑀅𑀣 𑀔𑁄 ¶ 𑀥𑀻𑀭𑁄 𑀥𑀺𑀢𑀺𑀲𑀫𑁆𑀧𑀦𑁆𑀦𑁄 𑀲𑀻𑀮𑁂𑀲𑀼 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄 𑀅𑀧𑁆𑀧𑀺𑀢𑀘𑀺𑀢𑁆𑀢𑁄 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 𑀲𑀩𑁆𑀩𑀢𑁆𑀣 𑀇𑀥𑀮𑁄𑀓𑁂 𑀲𑀼𑀘𑀭𑀺𑀢𑀘𑀭𑀡𑁂𑀦, 𑀧𑀭𑀮𑁄𑀓𑁂 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁂𑀦 𑀲𑀼𑀫𑀦𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑀻𑀮𑀫𑁂𑀯 𑀇𑀥 𑀅𑀕𑁆𑀕𑀦𑁆𑀢𑀺 𑀤𑀼𑀯𑀺𑀥𑀁 𑀲𑀻𑀮𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀮𑁄𑀓𑀺𑀬𑀁 𑀢𑀸𑀯 𑀓𑀸𑀫𑀮𑁄𑀓𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀲𑀼, 𑀤𑁂𑀯𑀮𑁄𑀓𑁂 𑀩𑁆𑀭𑀳𑁆𑀫𑀮𑁄𑀓𑁂 𑀘 𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑀁 𑀆𑀯𑀳𑀢𑀺, 𑀮𑀸𑀪𑀻𑀪𑀸𑀯𑀸𑀤𑀺𑀓𑀲𑁆𑀲 𑀘 𑀓𑀸𑀭𑀡𑀁 ¶ 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀲𑀓𑀮𑀫𑁆𑀧𑀺 𑀯𑀝𑁆𑀝𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀲𑀻𑀮𑀁 𑀅𑀕𑁆𑀕𑀫𑁂𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺. (𑀚𑀸. 𑁧.𑁮.𑁭𑁫);

𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑁋 ‘‘𑀮𑀸𑀪𑀻 𑀅𑀲𑁆𑀲𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁬𑁫), ‘‘𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 (𑀫. 𑀦𑀺. 𑁧.𑁬𑁫), ‘‘𑀇𑀚𑁆𑀛𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 (𑀅. 𑀦𑀺. 𑁮.𑁩𑁫; 𑀤𑀻. 𑀦𑀺. 𑁩.𑁩𑁩𑁭) 𑀘.

𑀮𑁄𑀓𑀼𑀢𑁆𑀢𑀭𑀲𑀻𑀮𑀲𑁆𑀲 ¶ 𑀧𑀦 𑀲𑀩𑁆𑀩𑀲𑁄 𑀧𑀳𑀻𑀦𑀧𑀝𑀺𑀧𑀓𑁆𑀔𑀲𑁆𑀲 𑀲𑀢𑁆𑀢𑀫𑀪𑀯𑀢𑁄 𑀧𑀝𑁆𑀞𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀅𑀕𑁆𑀕𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀜𑁆𑀜𑀯𑀸 𑀧𑀦 𑀉𑀢𑁆𑀢𑀫𑁄𑀢𑀺 ‘‘𑀧𑀜𑁆𑀜𑀯𑀸 𑀧𑀦 𑀧𑀼𑀕𑁆𑀕𑀮𑁄 𑀉𑀢𑁆𑀢𑀫𑁄 𑀧𑀭𑀫𑁄 𑀲𑁂𑀝𑁆𑀞𑁄𑀬𑁂𑀯𑀸’’𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀧𑀜𑁆𑀜𑀸𑀬 𑀏𑀯 𑀲𑁂𑀝𑁆𑀞𑀪𑀸𑀯𑀁 𑀯𑀤𑀢𑀺. 𑀇𑀤𑀸𑀦𑀺 𑀲𑀻𑀮𑀧𑀜𑁆𑀜𑀸𑀦𑀁 𑀲𑁂𑀝𑁆𑀞𑀪𑀸𑀯𑀁 𑀓𑀺𑀘𑁆𑀘𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀮𑀧𑀜𑁆𑀜𑀸𑀡𑀢𑁄 𑀚𑀬’’𑀦𑁆𑀢𑀺 𑀆𑀳. 𑀚𑀬𑀦𑁆𑀢𑀺 𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀤𑀝𑁆𑀞𑀩𑁆𑀩𑁄, 𑀅𑀳𑀽𑀢𑀺 𑀯𑀸 𑀯𑀘𑀦𑀲𑁂𑀲𑁄. 𑀢𑀢𑁆𑀣 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸𑀡𑀁, 𑀲𑀻𑀮𑀢𑁄 𑀧𑀜𑁆𑀜𑀸𑀡𑀢𑁄 𑀘 𑀧𑀝𑀺𑀧𑀓𑁆𑀔𑀚𑀬𑁄. 𑀦 𑀳𑀺 𑀲𑀻𑀮𑁂𑀦 𑀯𑀺𑀦𑀸 𑀧𑀜𑁆𑀜𑀸 𑀲𑀫𑁆𑀪𑀯𑀢𑀺, 𑀧𑀜𑁆𑀜𑀸𑀬 𑀘 𑀯𑀺𑀦𑀸 𑀲𑀻𑀮𑀁 𑀓𑀺𑀘𑁆𑀘𑀓𑀭𑀁, 𑀅𑀜𑁆𑀜𑀫𑀜𑁆𑀜𑁄𑀧𑀓𑀸𑀭𑀓𑀜𑁆𑀘𑁂𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀻𑀮𑀧𑀭𑀺𑀥𑁄𑀢𑀸 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀭𑀺𑀥𑁄𑀢𑀁 𑀲𑀻𑀮’’𑀦𑁆𑀢𑀺 (𑀤𑀻. 𑀦𑀺. 𑁧.𑁩𑁧𑁭) 𑀫𑀦𑀼𑀲𑁆𑀲𑁂𑀲𑀼 𑀘 𑀤𑁂𑀯𑁂𑀲𑀽𑀢𑀺 𑀇𑀤𑀁 𑀦𑁂𑀲𑀁 𑀞𑀸𑀦𑀯𑀺𑀲𑁂𑀲𑀤𑀲𑁆𑀲𑀦𑀁. 𑀢𑀢𑁆𑀣 𑀳𑀺 𑀢𑀸𑀦𑀺 𑀲𑀯𑀺𑀲𑁂𑀲𑀸𑀦𑀺 𑀯𑀢𑁆𑀢𑀦𑁆𑀢𑀺, 𑀲𑀫𑀸𑀥𑀺 𑀧𑀦𑁂𑀢𑁆𑀣 𑀲𑀻𑀮𑀧𑀓𑁆𑀔𑀺𑀓𑁄 𑀧𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸𑀧𑀓𑁆𑀔𑀺𑀓𑁄 𑀯𑀸 𑀪𑀸𑀯𑁂𑀢𑀩𑁆𑀩𑀢𑁄 𑀲𑀻𑀮𑀸𑀥𑀺𑀝𑁆𑀞𑀸𑀦𑀢𑁄 𑀘.

𑀏𑀯𑀁 𑀣𑁂𑀭𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀫𑀼𑀔𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀺𑀕𑀼𑀡𑀢𑀸𑀤𑀻𑀧𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀲𑀻𑀮𑀯𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀦𑀻𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀦𑀻𑀘𑁂 ¶ 𑀓𑀼𑀮𑀫𑁆𑀳𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀦𑀻𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 ¶ 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀩𑀼𑀤𑁆𑀥𑀲𑁆𑀲 𑀲𑀼𑀜𑁆𑀜𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀩𑀸𑀮𑀚𑀦𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀸𑀧𑀲𑀼𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀢𑀼𑀬𑁆𑀳𑀁 𑀲𑀩𑁆𑀩𑀲𑁄 𑀯𑀡𑀺𑀢𑀲𑀭𑀻𑀭𑀲𑁆𑀲 𑀯𑀺𑀬 𑀲𑀓𑀮𑀁 𑀓𑀸𑀬𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀡𑁂𑀦, 𑀦𑀦𑀼 𑀦𑀸𑀫 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀳𑀺 𑀚𑀻𑀯𑀺𑀓𑀸 𑀓𑀧𑁆𑀧𑁂𑀢𑀩𑁆𑀩𑀸? 𑀢𑀸𑀦𑀺 𑀘𑁂 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀖𑀭𑁂 𑀖𑀭𑁂 𑀫𑀼𑀢𑁆𑀢𑀓𑀭𑀻𑀲𑀸𑀤𑀻𑀦𑀺 𑀦𑀻𑀳𑀭𑀦𑁆𑀢𑁄 𑀧𑀘𑁆𑀙𑀸 𑀯𑀢𑁆𑀣𑀼𑀲𑁄𑀥𑀦𑁂𑀦 𑀚𑀻𑀯𑀸𑀳𑀻’’𑀢𑀺 𑀅𑀓𑁆𑀓𑁄𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀩𑀳𑀽𑀦𑀺 𑀚𑀸𑀢𑀺𑀲𑀢𑀸𑀦𑀺 ¶ 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀣𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀇𑀫𑀲𑁆𑀫𑀺𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂 𑀏𑀯 𑀦𑀺𑀩𑁆𑀩𑀢𑁆𑀢𑁄 𑀉𑀓𑁆𑀓𑀸𑀭𑀲𑁄𑀥𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑁄.

𑀅𑀣 𑀪𑀕𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀼𑀦𑀻𑀢𑀲𑁆𑀲 𑀳𑀤𑀬𑀩𑁆𑀪𑀦𑁆𑀢𑀭𑁂 𑀖𑀝𑁂 𑀧𑀤𑀻𑀧𑀁 𑀯𑀺𑀬 𑀧𑀚𑁆𑀚𑀮𑀦𑁆𑀢𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄. 𑀬𑀲𑁆𑀲𑀁 𑀯𑀻𑀣𑀺𑀬𑀁 𑀲𑀼𑀦𑀻𑀢𑁄 𑀉𑀓𑁆𑀓𑀸𑀭𑀲𑁄𑀥𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀲𑀼𑀦𑀻𑀢𑁄𑀧𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀖𑀸𑀲𑀼𑀘𑁆𑀘𑀸𑀭𑀲𑀗𑁆𑀓𑀸𑀭𑀸𑀤𑀺𑀓𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀧𑀺𑀝𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀚𑁂𑀦𑀸𑀤𑀸𑀬 𑀧𑀭𑀺𑀳𑀭𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀲𑀢𑁆𑀣𑀸𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀸𑀭𑀚𑁆𑀚𑀫𑀸𑀦𑁄 𑀲𑀫𑁆𑀪𑀫𑀸𑀓𑀼𑀮𑀳𑀤𑀬𑁄 𑀕𑀫𑀦𑀫𑀕𑁆𑀕𑀁 𑀦𑀺𑀮𑀻𑀬𑀦𑁄𑀓𑀸𑀲𑀜𑁆𑀘 𑀅𑀮𑀪𑀦𑁆𑀢𑁄 𑀓𑀸𑀚𑀁 𑀪𑀺𑀢𑁆𑀢𑀺𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀅𑀦𑀼𑀧𑀯𑀺𑀲𑀦𑁆𑀢𑁄 𑀯𑀺𑀬 𑀪𑀺𑀢𑁆𑀢𑀺𑀁 𑀅𑀮𑁆𑀮𑀻𑀦𑁄 𑀧𑀜𑁆𑀚𑀮𑀺𑀓𑁄 𑀅𑀝𑁆𑀞𑀸𑀲𑀺. ‘‘𑀪𑀺𑀢𑁆𑀢𑀺𑀙𑀺𑀤𑁆𑀤𑁂𑀦 𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀅𑀳𑁄𑀲𑀻’’𑀢𑀺𑀧𑀺 𑀯𑀤𑀦𑁆𑀢𑀺.

𑀲𑀢𑁆𑀣𑀸 𑀢𑀲𑁆𑀲 𑀲𑀫𑀻𑀧𑀁 𑀧𑀢𑁆𑀯𑀸 ‘‘𑀅𑀬𑀁 𑀅𑀢𑁆𑀢𑀦𑁄 𑀓𑀼𑀲𑀮𑀫𑀽𑀮𑀲𑀜𑁆𑀘𑁄𑀤𑀺𑀢𑀁 𑀉𑀧𑀕𑀢𑀁 𑀫𑀁 𑀲𑀸𑀭𑀚𑁆𑀚𑀫𑀸𑀦𑁄 𑀚𑀸𑀢𑀺𑀬𑀸 𑀓𑀫𑁆𑀫𑀲𑁆𑀲 𑀘 𑀦𑀺𑀳𑀻𑀦𑀢𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀫𑁆𑀧𑀺 𑀮𑀚𑁆𑀚𑀢𑀺, 𑀳𑀦𑁆𑀤𑀲𑁆𑀲 𑀯𑁂𑀲𑀸𑀭𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀲𑀓𑀮𑀦𑀕𑀭𑀦𑀺𑀦𑁆𑀦𑀸𑀤𑀯𑀭-𑀕𑀫𑁆𑀪𑀻𑀭𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 ‘‘𑀲𑀼𑀦𑀻𑀢𑀸’’𑀢𑀺 𑀆𑀮𑀧𑀺𑀢𑁆𑀯𑀸 ‘‘𑀓𑀺𑀁 𑀇𑀫𑀸𑀬 𑀤𑀼𑀓𑁆𑀔𑀚𑀻𑀯𑀺𑀓𑀸𑀬 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑀼𑀦𑀻𑀢𑁄 𑀢𑁂𑀦 𑀲𑀢𑁆𑀣𑀼 𑀯𑀘𑀦𑁂𑀦 𑀅𑀫𑀢𑁂𑀦 𑀯𑀺𑀬 𑀅𑀪𑀺𑀲𑀺𑀢𑁆𑀢𑁄 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 ‘‘𑀪𑀕𑀯𑀸, 𑀲𑀘𑁂 𑀫𑀸𑀤𑀺𑀲𑀸𑀧𑀺 𑀇𑀥 𑀧𑀩𑁆𑀩𑀚𑁆𑀚𑀁 𑀮𑀪𑀦𑁆𑀢𑀺, 𑀓𑀲𑁆𑀫𑀸𑀳𑀁 𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀧𑀩𑁆𑀩𑀸𑀚𑁂𑀣 𑀫𑀁 𑀪𑀕𑀯𑀸’’𑀢𑀺 𑀆𑀳 ¶ . 𑀲𑀢𑁆𑀣𑀸 ‘‘𑀏𑀳𑀺, 𑀪𑀺𑀓𑁆𑀔𑀽’’𑀢𑀺 𑀆𑀳. 𑀲𑁄 𑀢𑀸𑀯𑀤𑁂𑀯 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑁄 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑁄 𑀯𑀺𑀬 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀧𑀞𑀫𑀁 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑀁 𑀲𑀓𑁆𑀓𑀸𑀤𑀬𑁄 𑀤𑁂𑀯𑀸 𑀩𑁆𑀭𑀳𑁆𑀫𑀸𑀦𑁄 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀫𑀲𑁆𑀲𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀸 ¶ ¶ 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀩𑁆𑀭𑀳𑁆𑀫𑀸 𑀘 𑀇𑀦𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸;

𑀆𑀚𑀸𑀦𑀻𑀬𑀁 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁, 𑀲𑀼𑀦𑀻𑀢𑀁 𑀦𑀫𑀲𑁆𑀲𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸’’𑀢𑀺𑀆𑀤𑀺.

𑀪𑀕𑀯𑀸 𑀢𑀁𑀬𑁂𑀯 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀓𑀢𑁆𑀯𑀸 𑀧𑀲𑀁𑀲𑀦𑁆𑀢𑁄 ‘‘𑀢𑀧𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸’’𑀢𑀺 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀣 𑀦𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀓𑀸𑀫𑀸, ‘‘𑀆𑀯𑀼𑀲𑁄 𑀲𑀼𑀦𑀻𑀢, 𑀓𑀲𑁆𑀫𑀸 𑀓𑀼𑀮𑀸 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄, 𑀓𑀣𑀁 𑀯𑀸 𑀧𑀩𑁆𑀩𑀚𑀺𑀢𑁄, 𑀓𑀣𑀜𑁆𑀘 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑀁 𑀲𑀩𑁆𑀩𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁬𑁨𑁦.

‘‘𑀦𑀻𑀘𑁂 𑀓𑀼𑀮𑀫𑁆𑀳𑀺 𑀚𑀸𑀢𑁄𑀳𑀁, 𑀤𑀮𑀺𑀤𑁆𑀤𑁄 𑀅𑀧𑁆𑀧𑀪𑁄𑀚𑀦𑁄;

𑀳𑀻𑀦𑀓𑀫𑁆𑀫𑀁 𑀫𑀫𑀁 𑀆𑀲𑀺, 𑀅𑀳𑁄𑀲𑀺𑀁 𑀧𑀼𑀧𑁆𑀨𑀙𑀟𑁆𑀟𑀓𑁄.

𑁬𑁨𑁧.

‘‘𑀚𑀺𑀕𑀼𑀘𑁆𑀙𑀺𑀢𑁄 𑀫𑀦𑀼𑀲𑁆𑀲𑀸𑀦𑀁, 𑀧𑀭𑀺𑀪𑀽𑀢𑁄 𑀘 𑀯𑀫𑁆𑀪𑀺𑀢𑁄;

𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦, 𑀯𑀦𑁆𑀤𑀺𑀲𑁆𑀲𑀁 𑀩𑀳𑀼𑀓𑀁 𑀚𑀦𑀁.

𑁬𑁨𑁨.

‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀧𑀯𑀺𑀲𑀦𑁆𑀢𑀁 𑀫𑀳𑀸𑀯𑀻𑀭𑀁, 𑀫𑀕𑀥𑀸𑀦𑀁 𑀧𑀼𑀭𑀼𑀢𑁆𑀢𑀫𑀁.

𑁬𑁨𑁩.

‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦 𑀩𑁆𑀬𑀸𑀪𑀗𑁆𑀕𑀺𑀁, 𑀯𑀦𑁆𑀤𑀺𑀢𑀼𑀁 𑀉𑀧𑀲𑀗𑁆𑀓𑀫𑀺𑀁;

𑀫𑀫𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀅𑀝𑁆𑀞𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁬𑁨𑁪.

‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀢𑀤𑀸;

𑀧𑀩𑁆𑀩𑀚𑁆𑀚𑀁 𑀅𑀳𑀫𑀸𑀬𑀸𑀘𑀺𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁬𑁨𑁫.

‘‘𑀢𑀢𑁄 ¶ 𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄;

‘𑀏𑀳𑀺 𑀪𑀺𑀓𑁆𑀔𑀽’𑀢𑀺 𑀫𑀁 𑀆𑀳, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁬𑁨𑁬. ‘‘𑀲𑁄𑀳𑀁 𑀏𑀓𑁄 𑀅𑀭𑀜𑁆𑀜𑀲𑁆𑀫𑀺𑀁, 𑀯𑀺𑀳𑀭𑀦𑁆𑀢𑁄 𑀅𑀢𑀦𑁆𑀤𑀺𑀢𑁄.

𑀅𑀓𑀸𑀲𑀺𑀁 𑀲𑀢𑁆𑀣𑀼 𑀯𑀘𑀦𑀁, 𑀬𑀣𑀸 𑀫𑀁 𑀑𑀯𑀤𑀻 𑀚𑀺𑀦𑁄.

𑁬𑁨𑁭.

‘‘𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁;

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀺𑀁.

𑁬𑁨𑁮.

‘‘𑀢𑀢𑁄 ¶ 𑀭𑀢𑁆𑀬𑀸𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺; (𑀚𑀸. 𑁧.𑁧𑁧.𑁭𑁯);

𑀇𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀆𑀕𑀦𑁆𑀢𑁆𑀯𑀸, 𑀫𑀁 𑀦𑀫𑀲𑁆𑀲𑀺𑀁𑀲𑀼 𑀧𑀜𑁆𑀚𑀮𑀻.

𑁬𑁨𑁯.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲.

𑁬𑁩𑁦.

‘‘𑀢𑀢𑁄 ¶ 𑀤𑀺𑀲𑁆𑀯𑀸𑀦 𑀫𑀁 𑀲𑀢𑁆𑀣𑀸, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸𑀦, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

𑁬𑁩𑁧.

‘‘𑀢𑀧𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀏𑀢𑀁 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀻𑀳𑀦𑀸𑀤𑀁 𑀦𑀤𑀺.

𑀢𑀢𑁆𑀣 𑀦𑀻𑀘𑁂𑀢𑀺 𑀮𑀸𑀫𑀓𑁂 𑀲𑀩𑁆𑀩𑀦𑀺𑀳𑀻𑀦𑁂. 𑀉𑀘𑁆𑀘𑀦𑀻𑀘𑀪𑀸𑀯𑁄 𑀳𑀺 𑀦𑀸𑀫 𑀲𑀢𑁆𑀢𑀸𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬, 𑀅𑀬𑀁 𑀧𑀦 𑀲𑀩𑁆𑀩𑀦𑀺𑀳𑀻𑀦𑁂 𑀧𑀼𑀓𑁆𑀓𑀼𑀲𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀻𑀘𑁂 𑀓𑀼𑀮𑀫𑁆𑀳𑀺 𑀚𑀸𑀢𑁄’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑀻𑀘𑁂𑀢𑀺 𑀮𑀸𑀫𑀓𑁂 𑀲𑀩𑁆𑀩𑀦𑀺𑀳𑀻𑀦𑁂’’𑀢𑀺. 𑀤𑀮𑀺𑀤𑁆𑀤𑁄𑀢𑀺 𑀤𑀼𑀕𑁆𑀕𑀢𑁄, 𑀤𑀮𑀺𑀤𑁆𑀤𑀸𑀧𑀺 𑀓𑁂𑀘𑀺 𑀓𑀤𑀸𑀘𑀺 𑀖𑀸𑀲𑀘𑁆𑀙𑀸𑀤𑀦𑀲𑁆𑀲 𑀮𑀸𑀪𑀺𑀦𑁄, 𑀅𑀓𑀲𑀺𑀭𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀅𑀳𑀁 𑀧𑀦 𑀲𑀩𑁆𑀩𑀓𑀸𑀮𑀁 𑀓𑀲𑀺𑀭𑀯𑀼𑀢𑁆𑀢𑀺𑀢𑀸𑀬 𑀳𑀻𑀦𑁄 𑀉𑀤𑁆𑀥𑀦𑀁 𑀉𑀧𑀝𑁆𑀞𑀧𑀺𑀢𑀉𑀓𑁆𑀔𑀮𑀺𑀓𑁄 𑀤𑀲𑁆𑀲𑀦𑀬𑀼𑀢𑁆𑀢𑀁 𑀣𑁂𑀯𑀓𑀫𑁆𑀧𑀺 𑀅𑀧𑀲𑁆𑀲𑀺𑀁 𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀪𑁄𑀚𑀦𑁄’’𑀢𑀺 𑀆𑀳. 𑀦𑀻𑀘𑀓𑀼𑀮𑀺𑀓𑀸 𑀤𑀮𑀺𑀤𑁆𑀤𑀸𑀧𑀺 𑀓𑁂𑀘𑀺 𑀅𑀦𑀻𑀘𑀓𑀫𑁆𑀫𑀸𑀚𑀻𑀯𑀸 𑀳𑁄𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀦 𑀢𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀻𑀦𑀓𑀫𑁆𑀫𑀁 𑀫𑀫𑀁 𑀆𑀲𑀻’’𑀢𑀺. 𑀓𑀻𑀤𑀺𑀲𑀦𑁆𑀢𑀺 𑀘𑁂? 𑀅𑀳𑁄𑀲𑀺𑀁 𑀧𑀼𑀧𑁆𑀨𑀙𑀟𑁆𑀟𑀓𑁄, 𑀳𑀢𑁆𑀣𑀯𑀺𑀓𑀮𑀲𑁆𑀲 𑀳𑀢𑁆𑀣𑀯𑀸𑀢𑀺 𑀯𑀺𑀬 𑀉𑀧𑀘𑀸𑀭𑀯𑀲𑁂𑀦𑀸𑀬𑀁 𑀇𑀫𑀲𑁆𑀲 𑀲𑀫𑀜𑁆𑀜𑀸 𑀅𑀳𑁄𑀲𑀺 𑀬𑀤𑀺𑀤𑀁 ‘‘𑀧𑀼𑀧𑁆𑀨𑀙𑀟𑁆𑀟𑀓𑁄’’𑀢𑀺. 𑀫𑀺𑀮𑀸𑀢𑀧𑀼𑀧𑁆𑀨𑀲𑀦𑁆𑀣𑀭𑀯𑀡𑁆𑀡𑀢𑀸𑀬 𑀯𑀸 𑀉𑀓𑁆𑀓𑀸𑀭𑀪𑀽𑀫𑀺𑀬𑀸 𑀏𑀯𑀁 𑀯𑀼𑀢𑁆𑀢𑁄.

𑀚𑀺𑀕𑀼𑀘𑁆𑀙𑀺𑀢𑁄𑀢𑀺 𑀚𑀸𑀢𑀺𑀬𑀸 𑀘𑁂𑀯 𑀓𑀫𑁆𑀫𑀼𑀦𑀸 𑀘 𑀳𑀻𑀴𑀺𑀢𑁄. 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺. 𑀧𑀭𑀺𑀪𑀽𑀢𑁄𑀢𑀺 𑀅𑀯𑀜𑁆𑀜𑀸𑀢𑁄. 𑀯𑀫𑁆𑀪𑀺𑀢𑁄𑀢𑀺 𑀔𑀼𑀁𑀲𑀺𑀢𑁄. 𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀅𑀜𑁆𑀜𑁂 𑀫𑀦𑀼𑀲𑁆𑀲𑁂 𑀲𑀺𑀦𑁂𑀭𑀼𑀁 𑀯𑀺𑀬 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀧𑀸𑀤𑀧𑀁𑀲𑀼𑀢𑁄𑀧𑀺 𑀅𑀢𑁆𑀢𑀸𑀦𑀁 𑀦𑀺𑀳𑀻𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀦𑀻𑀘𑀁 𑀦𑀺𑀳𑀻𑀦𑀁 𑀫𑀦𑀁 𑀓𑀢𑁆𑀯𑀸. 𑀯𑀦𑁆𑀤𑀺𑀲𑁆𑀲𑀁 ¶ 𑀩𑀳𑀼𑀓𑀁 𑀚𑀦𑀦𑁆𑀢𑀺 𑀧𑀼𑀣𑀼𑀫𑀳𑀸𑀚𑀦𑀁 𑀤𑀺𑀝𑁆𑀞𑀤𑀺𑀝𑁆𑀞𑀓𑀸𑀮𑁂 𑀯𑀦𑁆𑀤𑀺𑀁 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀭𑁄𑀦𑁆𑀢𑁄 𑀧𑀡𑀸𑀫𑀺𑀁.

𑀅𑀣𑀸𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀤𑀻𑀧𑀦𑁂 𑀦𑀺𑀧𑀸𑀢𑁄. 𑀅𑀤𑁆𑀤𑀲𑀸𑀲𑀺𑀦𑁆𑀢𑀺 𑀅𑀤𑁆𑀤𑀓𑁆𑀔𑀺𑀁. 𑀫𑀕𑀥𑀸𑀦𑀦𑁆𑀢𑀺 𑀫𑀕𑀥𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀬𑀸 ‘‘𑀫𑀕𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄, 𑀫𑀕𑀥𑀚𑀦𑀧𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀦𑀕𑀭𑀁.

𑀩𑁆𑀬𑀸𑀪𑀗𑁆𑀕𑀺𑀦𑁆𑀢𑀺 𑀓𑀸𑀚𑀁. 𑀧𑀩𑁆𑀩𑀚𑁆𑀚𑀁 𑀅𑀳𑀫𑀸𑀬𑀸𑀘𑀺𑀦𑁆𑀢𑀺, ‘‘𑀲𑀼𑀦𑀻𑀢, 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀲𑀢𑁆𑀣𑀸𑀭𑀸 𑀑𑀓𑀸𑀲𑁂 𑀓𑀢𑁂 𑀅𑀳𑀁 𑀧𑀩𑁆𑀩𑀚𑁆𑀚𑀁 𑀅𑀬𑀸𑀘𑀺𑀁. 𑀆𑀲𑀽𑀧𑀲𑀫𑁆𑀧𑀤𑀸𑀢𑀺 ‘‘𑀏𑀳𑀺, 𑀪𑀺𑀓𑁆𑀔𑀽’’𑀢𑀺 𑀲𑀢𑁆𑀣𑀼 𑀯𑀘𑀦𑀫𑀢𑁆𑀢𑁂𑀦 𑀆𑀲𑀺 𑀉𑀧𑀲𑀫𑁆𑀧𑀤𑀸. 𑀬𑀣𑀸 𑀫𑀁 𑀑𑀯𑀤𑀻𑀢𑀺 ‘‘𑀏𑀯𑀁 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀳𑀻’’𑀢𑀺 𑀬𑀣𑀸 𑀫𑀁 𑀑𑀯𑀤𑀺, 𑀢𑀣𑀸 𑀲𑀢𑁆𑀣𑀼𑀦𑁄 𑀯𑀘𑀦𑀁 𑀅𑀓𑀸𑀲𑀺𑀁 𑀧𑀝𑀺𑀧𑀚𑁆𑀚𑀺𑀁. 𑀭𑀢𑁆𑀢𑀺𑀬𑀸𑀢𑀺𑀆𑀤𑀺 𑀢𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀬𑀸 𑀭𑀲𑀤𑀲𑁆𑀲𑀦𑀁. 𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 ¶ 𑀅𑀦𑀸𑀕𑀢𑀁𑀲𑀜𑀸𑀡𑀜𑁆𑀘 𑀩𑀳𑀼𑀓𑀺𑀘𑁆𑀘𑀦𑁆𑀢𑀺 ‘‘𑀧𑀞𑀫𑀁 𑀬𑀸𑀫𑀁 ¶ 𑀫𑀚𑁆𑀛𑀺𑀫𑀁 𑀬𑀸𑀫’’𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁 𑀯𑀼𑀢𑁆𑀢𑀁. 𑀦 𑀢𑀣𑀸 𑀆𑀲𑀯𑀓𑁆𑀔𑀬𑀜𑀸𑀡𑀁 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀯𑀢𑁆𑀢𑀦𑀢𑁄𑀢𑀺 ‘‘𑀧𑀘𑁆𑀙𑀺𑀫𑁂 𑀬𑀸𑀫𑁂’’𑀢𑀺 𑀪𑀼𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀦𑁆𑀤𑁄𑀢𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸. 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸. 𑀇𑀦𑁆𑀤𑀩𑁆𑀭𑀳𑁆𑀫𑀕𑁆𑀕𑀳𑀡𑁂𑀦 𑀅𑀜𑁆𑀜𑁂𑀲𑀁 𑀓𑀸𑀫𑀤𑁂𑀯𑀸𑀦𑀁 𑀩𑁆𑀭𑀳𑁆𑀫𑀽𑀦𑀜𑁆𑀘 𑀆𑀕𑀫𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀳𑁂𑀲 𑀬𑀣𑀸 ‘‘𑀭𑀸𑀚𑀸 𑀆𑀕𑀢𑁄’’𑀢𑀺. 𑀦𑀫𑀲𑁆𑀲𑀺𑀁𑀲𑀽𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀦𑀫𑀓𑁆𑀓𑀸𑀭𑀁 𑀅𑀓𑀁𑀲𑀼.

𑀢𑀢𑁆𑀣 𑀓𑀸𑀬𑁂𑀦 𑀓𑀢𑀁 𑀦𑀫𑀓𑁆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀚𑀮𑀻’’𑀢𑀺 𑀯𑀢𑁆𑀯𑀸 𑀯𑀸𑀘𑀸𑀬 𑀓𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀫𑁄 𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀦𑁆𑀢𑀺 𑀤𑁂𑀯𑀕𑁆𑀕𑀳𑀡𑁂𑀦 𑀉𑀧𑀧𑀢𑁆𑀢𑀺𑀤𑁂𑀯𑀪𑀸𑀯𑀢𑁄 𑀩𑁆𑀭𑀳𑁆𑀫𑀸𑀦𑁄𑀧𑀺 𑀕𑀳𑀺𑀢𑀸. 𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸𑀦𑀸𑀢𑀺 𑀅𑀢𑁆𑀢𑀦𑁄 𑀑𑀯𑀸𑀤𑀲𑁆𑀲 𑀫𑀳𑀧𑁆𑀨𑀮𑀢𑀁 𑀤𑁂𑀯𑀩𑁆𑀭𑀳𑁆𑀫𑀽𑀦𑀜𑁆𑀘 𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀲𑀢𑁆𑀣𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀧𑀸𑀢𑀼𑀓𑀭𑁄𑀦𑁆𑀢𑁄 𑀘 𑀦 𑀅𑀜𑁆𑀜𑁂 𑀯𑀺𑀬 𑀤𑀦𑁆𑀢𑁂 𑀯𑀺𑀤𑀁𑀲𑁂𑀢𑀺, 𑀫𑀼𑀔𑀸𑀥𑀸𑀦𑀁 𑀧𑀦 𑀣𑁄𑀓𑀁 𑀯𑀺𑀯𑀭𑀢𑀺, 𑀢𑀢𑁆𑀢𑀓𑁂𑀦 𑀘 𑀅𑀪𑀺𑀪𑀽𑀢𑀤𑀺𑀩𑁆𑀩𑀨𑀮𑀺𑀓𑀫𑀼𑀢𑁆𑀢𑀭𑀲𑁆𑀫𑀺𑀬𑁄 𑀅𑀯𑀳𑀲𑀺𑀢𑀢𑀸𑀭𑀓𑀸𑀲𑀲𑀺𑀫𑀭𑀻𑀘𑀺𑀬𑁄 𑀲𑀼𑀲𑀼𑀓𑁆𑀓𑀤𑀸𑀞𑀲𑀫𑁆𑀪𑀯𑀸 𑀖𑀦𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀢𑁆𑀣𑀼 𑀫𑀼𑀔𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀺, 𑀢𑀁 𑀤𑀺𑀲𑁆𑀯𑀸 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀧𑀺 𑀲𑀢𑁆𑀣𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀺.

𑀢𑀧𑁂𑀦𑀸𑀢𑀺 ¶ 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦, ‘‘𑀥𑀼𑀢𑀥𑀫𑁆𑀫𑀲𑀫𑀸𑀤𑀸𑀦𑁂𑀦𑀸’’𑀢𑀺 𑀓𑁂𑀘𑀺. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑁂𑀦. 𑀤𑀫𑁂𑀦𑀸𑀢𑀺 𑀧𑀜𑁆𑀜𑀸𑀬. 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀅𑀯𑀲𑀺𑀝𑁆𑀞𑀲𑁂𑀝𑁆𑀞𑀘𑀭𑀺𑀬𑀸𑀬. 𑀏𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀢𑀧𑀸𑀤𑀺𑀦𑀸. 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀩𑀸𑀳𑀺𑀢𑀧𑀸𑀧𑀪𑀸𑀯𑀢𑁄. 𑀏𑀢𑀦𑁆𑀢𑀺 𑀢𑀧𑀸𑀤𑀺 𑀬𑀣𑀸𑀯𑀼𑀢𑁆𑀢𑀁. 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀩𑁆𑀭𑀸𑀳𑁆𑀫𑀡𑀁, 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀉𑀢𑁆𑀢𑀫𑀁 𑀲𑀩𑁆𑀩𑀲𑁂𑀝𑁆𑀞𑀁, 𑀅𑀳𑀽𑀢𑀺 𑀯𑀘𑀦𑀲𑁂𑀲𑁄. 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀯𑀸 𑀩𑁆𑀭𑀳𑁆𑀫𑀜𑁆𑀜𑀫𑀸𑀳, 𑀏𑀯𑀁 𑀉𑀢𑁆𑀢𑀫𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀦 𑀚𑀘𑁆𑀘𑀸𑀤𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀚𑀸𑀢𑀺𑀓𑀼𑀮𑀧𑀤𑁂𑀲𑀕𑁄𑀢𑁆𑀢𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀭𑀺𑀬𑀪𑀸𑀯𑀲𑁆𑀲 𑀓𑀸𑀭𑀡𑀁, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄 𑀏𑀯 𑀧𑀦 𑀓𑀸𑀭𑀡𑀁. 𑀢𑁂𑀦𑀸𑀳 𑁋

‘‘𑀬𑀣𑀸 𑀲𑀗𑁆𑀓𑀸𑀭𑀞𑀸𑀦𑀲𑁆𑀫𑀺𑀁, 𑀉𑀚𑁆𑀛𑀺𑀢𑀲𑁆𑀫𑀺𑀁 𑀫𑀳𑀸𑀧𑀣𑁂;

𑀧𑀤𑀼𑀫𑀁 𑀢𑀢𑁆𑀣 𑀚𑀸𑀬𑁂𑀣, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

‘‘𑀏𑀯𑀁 𑀲𑀗𑁆𑀓𑀸𑀭𑀪𑀽𑀢𑁂𑀲𑀼, 𑀅𑀦𑁆𑀥𑀪𑀽𑀢𑁂 𑀧𑀼𑀣𑀼𑀚𑁆𑀚𑀦𑁂;

𑀅𑀢𑀺𑀭𑁄𑀘𑀢𑀺 𑀧𑀜𑁆𑀜𑀸𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄’’𑀢𑀺. (𑀥. 𑀧. 𑁫𑁮-𑁫𑁯);

𑀏𑀯𑀁 𑀣𑁂𑀭𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺.

𑀲𑀼𑀦𑀻𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀦𑀺𑀧𑀸𑀢𑁄

𑁧. 𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀢𑁂𑀭𑀲𑀦𑀺𑀧𑀸𑀢𑁂 ¶ ¶ ¶ 𑀬𑀸𑀳𑀼 𑀭𑀝𑁆𑀞𑁂𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺. 𑀅𑀬𑀁 𑀓𑀺𑀭 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀢𑁆𑀣𑀼 𑀘𑀗𑁆𑀓𑀫𑀦𑀝𑁆𑀞𑀸𑀦𑁂 𑀲𑀼𑀥𑀸𑀬 𑀧𑀭𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀦𑀸𑀦𑀸𑀯𑀺𑀭𑀸𑀕𑀯𑀢𑁆𑀣𑁂𑀳𑀺 𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀲𑀺, 𑀢𑀣𑀸 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀤𑀻𑀖𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀺𑀭𑀺𑀯𑀟𑁆𑀠𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀫𑀓𑀸𑀲𑀺. 𑀲𑀢𑁆𑀣𑀸𑀧𑀺 𑀢𑀲𑁆𑀲 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄𑀧𑀺 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀲𑁆𑀲𑀧𑀤𑀲𑀩𑀮𑁂 𑀅𑀦𑀼𑀧𑁆𑀧𑀦𑁆𑀦𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀓𑀭𑀺𑀢𑁆𑀯𑀸 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀢𑁂𑀫𑀸𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀼𑀝𑁆𑀞𑀯𑀲𑁆𑀲𑁄 𑀧𑀭𑀺𑀧𑀼𑀡𑁆𑀡𑀧𑀭𑀺𑀓𑁆𑀔𑀸𑀭𑁄 𑀕𑀦𑁆𑀥𑀫𑀸𑀤𑀦𑀫𑁂𑀯 𑀕𑀢𑁄. 𑀲𑁄𑀧𑀺 𑀓𑀼𑀮𑀧𑀼𑀢𑁆𑀢𑁄 𑀬𑀸𑀯𑀚𑀻𑀯𑀁 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀘𑀫𑁆𑀧𑀸𑀦𑀕𑀭𑁂 𑀉𑀲𑀪𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺𑀲𑁆𑀲 𑀫𑀳𑀸𑀪𑁄𑀕𑀓𑁆𑀔𑀦𑁆𑀥𑁄 𑀅𑀪𑀺𑀯𑀟𑁆𑀠𑀺. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀲𑀓𑀮𑀦𑀕𑀭𑁂 𑀫𑀳𑀸𑀲𑀓𑁆𑀓𑀸𑀭𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀢𑀲𑁆𑀲 𑀧𑀼𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀘𑁆𑀘𑀸𑀕𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀼𑀔𑀼𑀫𑀸𑀮𑀢𑀭𑁄 𑀘 𑀅𑀢𑁆𑀢𑀪𑀸𑀯𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀲𑁄𑀡𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀢𑀺 ¶ , 𑀢𑀲𑁆𑀲 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀯𑀡𑁆𑀡𑀸𑀦𑀺 𑀅𑀳𑁂𑀲𑀼𑀁, 𑀲𑀢𑀯𑀺𑀳𑀢𑀓𑀧𑁆𑀧𑀸𑀲𑀲𑁆𑀲 𑀯𑀺𑀬 𑀲𑀫𑁆𑀨𑀲𑁆𑀲𑁄 𑀧𑀸𑀤𑀢𑀮𑁂𑀲𑀼 𑀫𑀡𑀺𑀓𑀼𑀡𑁆𑀟𑀮𑀸𑀯𑀝𑁆𑀝𑀯𑀡𑁆𑀡𑀸𑀦𑀺 𑀮𑁄𑀫𑀸𑀦𑀺 ¶ 𑀚𑀸𑀬𑀺𑀁𑀲𑀼. 𑀯𑀬𑀧𑁆𑀧𑀢𑁆𑀢𑀲𑁆𑀲 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀼𑀁. 𑀲𑁄 𑀢𑀢𑁆𑀣 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀧𑀝𑀺𑀯𑀲𑀢𑀺.

𑀅𑀣 ¶ 𑀅𑀫𑁆𑀳𑀸𑀓𑀁 𑀲𑀢𑁆𑀣𑀭𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑀸 𑀧𑀓𑁆𑀓𑁄𑀲𑀸𑀧𑀺𑀢𑁄 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀆𑀕𑀢𑁄, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸, 𑀚𑀦𑀲𑀁𑀲𑀕𑁆𑀕𑀧𑀭𑀺𑀳𑀭𑀡𑀢𑁆𑀣𑀁 𑀲𑀻𑀢𑀯𑀦𑁂 𑀯𑀲𑀦𑁆𑀢𑁄 ‘‘𑀫𑀫 𑀲𑀭𑀻𑀭𑀁 𑀲𑀼𑀔𑀼𑀫𑀸𑀮𑀁, 𑀦 𑀘 𑀲𑀓𑁆𑀓𑀸 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁, 𑀓𑀸𑀬𑀁 𑀓𑀺𑀮𑀫𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀬, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀸𑀤𑀢𑀮𑁂𑀲𑀼 𑀨𑁄𑀝𑁂𑀲𑀼 𑀉𑀝𑁆𑀞𑀳𑀺𑀢𑁂𑀲𑀼𑀧𑀺 𑀯𑁂𑀤𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀤𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄, ‘‘𑀏𑀯𑀁 𑀯𑀸𑀬𑀫𑀦𑁆𑀢𑁄𑀧𑀺 𑀅𑀳𑀁 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑁂 𑀧𑀩𑁆𑀩𑀚𑁆𑀚𑀸𑀬, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀻𑀡𑀽𑀧𑀫𑁄𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀕𑀢𑁄. 𑀲𑁄𑀡𑀢𑁆𑀣𑁂𑀭𑁄𑀧𑀺 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁫.𑁨𑁫-𑁫𑁩) 𑁋

‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀼𑀥𑀸𑀬 𑀮𑁂𑀧𑀦𑀁 𑀓𑀢𑁆𑀯𑀸, 𑀘𑀗𑁆𑀓𑀫𑀁 𑀓𑀸𑀭𑀬𑀺𑀁 𑀅𑀳𑀁.

‘‘𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺, 𑀘𑀗𑁆𑀓𑀫𑀁 𑀲𑀦𑁆𑀣𑀭𑀺𑀁 𑀅𑀳𑀁;

𑀆𑀓𑀸𑀲𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸, 𑀪𑁄𑀚𑀬𑀺𑀁 𑀩𑀼𑀤𑁆𑀥𑀫𑀼𑀢𑁆𑀢𑀫𑀁.

‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀲𑀼𑀩𑁆𑀩𑀢𑀁;

𑀤𑀻𑀖𑀲𑀸𑀮𑀁 𑀪𑀕𑀯𑀢𑁄, 𑀦𑀺𑀬𑁆𑀬𑀸𑀤𑁂𑀲𑀺𑀫𑀳𑀁 𑀢𑀤𑀸.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦 ¶ 𑀲𑀫𑁆𑀩𑀼𑀤𑁆𑀥𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑀤𑁂𑀯𑀓𑁂;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀬𑁄 𑀲𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀤𑀻𑀖𑀲𑀸𑀮𑀁 𑀅𑀤𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

‘‘𑀇𑀫𑀲𑁆𑀲 ¶ 𑀫𑀘𑁆𑀘𑀼𑀓𑀸𑀮𑀫𑁆𑀳𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀲𑀳𑀲𑁆𑀲𑀬𑀼𑀢𑁆𑀢𑀲𑁆𑀲𑀭𑀣𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺 𑀢𑀸𑀯𑀤𑁂.

‘‘𑀢𑁂𑀦 𑀬𑀸𑀦𑁂𑀦𑀬𑀁 𑀧𑁄𑀲𑁄, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺;

𑀅𑀦𑀼𑀫𑁄𑀤𑀺𑀲𑁆𑀲𑀭𑁂 𑀤𑁂𑀯𑀸, 𑀲𑀫𑁆𑀧𑀢𑁆𑀢𑁂 𑀓𑀼𑀮𑀲𑀫𑁆𑀪𑀯𑁂.

‘‘𑀫𑀳𑀸𑀭𑀳𑀁 𑀩𑁆𑀬𑀫𑁆𑀳𑀁 𑀲𑁂𑀝𑁆𑀞𑀁, 𑀭𑀢𑀦𑀫𑀢𑁆𑀢𑀺𑀓𑀮𑁂𑀧𑀦𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀩𑁆𑀬𑀫𑁆𑀳𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀧𑀜𑁆𑀘𑀯𑀻𑀲𑀢𑀺 𑀓𑀧𑁆𑀧𑀸𑀦𑀺, 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺.

‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀬𑀲𑁄𑀥𑀭𑀲𑀦𑀸𑀫𑀸 𑀢𑁂, 𑀲𑀩𑁆𑀩𑁂𑀧𑀺 𑀏𑀓𑀦𑀸𑀫𑀓𑀸.

‘‘𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸 𑀧𑀼𑀜𑁆𑀜𑀲𑀜𑁆𑀘𑀬𑀁;

𑀅𑀝𑁆𑀞𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

‘‘𑀢𑀢𑁆𑀭𑀸𑀧𑀺 𑀩𑁆𑀬𑀫𑁆𑀳𑀁 𑀧𑀯𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁;

𑀤𑀲𑀲𑀤𑁆𑀤𑀸𑀯𑀺𑀯𑀺𑀢𑁆𑀢𑀁 𑀢𑀁, 𑀧𑀼𑀭𑀫𑀚𑁆𑀛𑀸𑀯𑀲𑀺𑀲𑁆𑀲𑀢𑀺.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀪𑀽𑀫𑀺𑀧𑀸𑀮𑁄 𑀫𑀳𑀺𑀤𑁆𑀥𑀺𑀓𑁄;

𑀑𑀓𑁆𑀓𑀸𑀓𑁄 𑀦𑀸𑀫 𑀦𑀸𑀫𑁂𑀦, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺.

‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀲𑀩𑁆𑀩𑀸𑀲𑀁 𑀧𑀯𑀭𑀸 𑀘 𑀲𑀸;

𑀅𑀪𑀺𑀚𑀸𑀢𑀸 𑀔𑀢𑁆𑀢𑀺𑀬𑀸𑀦𑀻, 𑀦𑀯 𑀧𑀼𑀢𑁆𑀢𑁂 𑀚𑀦𑁂𑀲𑁆𑀲𑀢𑀺.

‘‘𑀦𑀯 𑀧𑀼𑀢𑁆𑀢𑁂 𑀚𑀦𑁂𑀢𑁆𑀯𑀸𑀦, 𑀔𑀢𑁆𑀢𑀺𑀬𑀸𑀦𑀻 𑀫𑀭𑀺𑀲𑁆𑀲𑀢𑀺;

𑀢𑀭𑀼𑀡𑀻 𑀘 𑀧𑀺𑀬𑀸 𑀓𑀜𑁆𑀜𑀸, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀢𑀺.

‘‘𑀑𑀓𑁆𑀓𑀸𑀓𑀁 𑀢𑁄𑀲𑀬𑀺𑀢𑁆𑀯𑀸𑀦, 𑀯𑀭𑀁 𑀓𑀜𑁆𑀜𑀸 𑀮𑀪𑀺𑀲𑁆𑀲𑀢𑀺;

𑀯𑀭𑀁 𑀮𑀤𑁆𑀥𑀸𑀦 𑀲𑀸 𑀓𑀜𑁆𑀜𑀸, 𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑀬𑀺𑀲𑁆𑀲𑀢𑀺.

‘‘𑀧𑀩𑁆𑀩𑀸𑀚𑀺𑀢𑀸 ¶ 𑀘 𑀢𑁂 𑀲𑀩𑁆𑀩𑁂, 𑀕𑀫𑀺𑀲𑁆𑀲𑀦𑁆𑀢𑀺 𑀦𑀕𑀼𑀢𑁆𑀢𑀫𑀁;

𑀚𑀸𑀢𑀺𑀪𑁂𑀤𑀪𑀬𑀸 𑀲𑀩𑁆𑀩𑁂, 𑀪𑀕𑀺𑀦𑀻𑀳𑀺 𑀯𑀲𑀺𑀲𑁆𑀲𑀭𑁂.

‘‘𑀏𑀓𑀸 𑀘 𑀓𑀜𑁆𑀜𑀸 𑀩𑁆𑀬𑀸𑀥𑀻𑀳𑀺, 𑀪𑀯𑀺𑀲𑁆𑀲𑀢𑀺 𑀧𑀭𑀺𑀓𑁆𑀔𑀢𑀸;

𑀫𑀸 𑀦𑁄 𑀚𑀸𑀢𑀺 𑀧𑀪𑀺𑀚𑁆𑀚𑀻𑀢𑀺, 𑀦𑀺𑀔𑀡𑀺𑀲𑁆𑀲𑀦𑁆𑀢𑀺 𑀔𑀢𑁆𑀢𑀺𑀬𑀸.

‘‘𑀔𑀢𑁆𑀢𑀺𑀬𑁄 𑀦𑀻𑀳𑀭𑀺𑀢𑁆𑀯𑀸𑀦, 𑀢𑀸𑀬 𑀲𑀤𑁆𑀥𑀺𑀁 𑀯𑀲𑀺𑀲𑁆𑀲𑀢𑀺;

𑀪𑀯𑀺𑀲𑁆𑀲𑀢𑀺 𑀢𑀤𑀸 𑀪𑁂𑀤𑁄, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄.

‘‘𑀢𑁂𑀲𑀁 𑀧𑀚𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑁄𑀴𑀺𑀬𑀸 𑀦𑀸𑀫 𑀚𑀸𑀢𑀺𑀬𑀸;

𑀢𑀢𑁆𑀣 𑀫𑀸𑀦𑀼𑀲𑀓𑀁 𑀪𑁄𑀕𑀁, 𑀅𑀦𑀼𑀪𑁄𑀲𑁆𑀲𑀢𑀺𑀦𑀧𑁆𑀧𑀓𑀁.

‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺;

𑀢𑀢𑁆𑀭𑀸𑀧𑀺 𑀧𑀯𑀭𑀁 𑀩𑁆𑀬𑀫𑁆𑀳𑀁, 𑀮𑀪𑀺𑀲𑁆𑀲𑀢𑀺 𑀫𑀦𑁄𑀭𑀫𑀁.

‘‘𑀤𑁂𑀯𑀮𑁄𑀓𑀸 ¶ 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀆𑀕𑀦𑁆𑀢𑁆𑀯𑀸𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀲𑁄𑀡𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺.

‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀧𑀤𑀳𑀁 𑀲𑀢𑁆𑀣𑀼 𑀲𑀸𑀲𑀦𑁂;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

‘‘𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀯𑀺𑀲𑁂𑀲𑀜𑁆𑀜𑀽 𑀫𑀳𑀸𑀯𑀻𑀭𑁄, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺.

‘‘𑀯𑀼𑀝𑁆𑀞𑀫𑁆𑀳𑀺 𑀤𑁂𑀯𑁂 𑀘𑀢𑀼𑀭𑀗𑁆𑀕𑀼𑀮𑀫𑁆𑀳𑀺, 𑀢𑀺𑀡𑁂 𑀅𑀦𑀺𑀮𑁂𑀭𑀺𑀢𑀅𑀗𑁆𑀕𑀡𑀫𑁆𑀳𑀺;

𑀞𑀢𑁆𑀯𑀸𑀦 𑀬𑁄𑀕𑀲𑁆𑀲 𑀧𑀬𑀼𑀢𑁆𑀢𑀢𑀸𑀤𑀺𑀦𑁄, 𑀢𑀢𑁄𑀢𑁆𑀢𑀭𑀺𑀁 𑀧𑀸𑀭𑀫𑀢𑀸 𑀦 𑀯𑀺𑀚𑁆𑀚𑀢𑀺.

‘‘𑀉𑀢𑁆𑀢𑀫𑁂 𑀤𑀫𑀣𑁂 𑀤𑀦𑁆𑀢𑁄, 𑀘𑀺𑀢𑁆𑀢𑀁 𑀫𑁂 𑀲𑀼𑀧𑀡𑀻𑀳𑀺𑀢𑀁;

𑀪𑀸𑀭𑁄 𑀫𑁂 𑀑𑀳𑀺𑀢𑁄 𑀲𑀩𑁆𑀩𑁄, 𑀦𑀺𑀩𑁆𑀩𑀼𑀢𑁄𑀫𑁆𑀳𑀺 𑀅𑀦𑀸𑀲𑀯𑁄.

‘‘𑀅𑀗𑁆𑀕𑀻𑀭𑀲𑁄 𑀫𑀳𑀸𑀦𑀸𑀕𑁄, 𑀅𑀪𑀺𑀚𑀸𑀢𑁄𑀯 𑀓𑁂𑀲𑀭𑀻;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀯𑀲𑁂𑀦 𑀘 𑁋

𑁬𑁩𑁨.

‘‘𑀬𑀸𑀳𑀼 𑀭𑀝𑁆𑀞𑁂 𑀲𑀫𑀼𑀓𑁆𑀓𑀝𑁆𑀞𑁄, 𑀭𑀜𑁆𑀜𑁄 𑀅𑀗𑁆𑀕𑀲𑁆𑀲 𑀧𑀤𑁆𑀥𑀕𑀽;

𑀲𑁆𑀯𑀸𑀚𑁆𑀚 𑀥𑀫𑁆𑀫𑁂𑀲𑀼 𑀉𑀓𑁆𑀓𑀝𑁆𑀞𑁄, 𑀲𑁄𑀡𑁄 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀽.

𑁬𑁩𑁩.

‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁬𑁩𑁪.

‘‘𑀉𑀦𑁆𑀦𑀴𑀲𑁆𑀲 𑀧𑀫𑀢𑁆𑀢𑀲𑁆𑀲, 𑀩𑀸𑀳𑀺𑀭𑀸𑀲𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘, 𑀧𑀸𑀭𑀺𑀧𑀽𑀭𑀺𑀁 𑀦 𑀕𑀘𑁆𑀙𑀢𑀺.

𑁬𑁩𑁫.

‘‘𑀬𑀜𑁆𑀳𑀺 𑀓𑀺𑀘𑁆𑀘𑀁 𑀅𑀧𑀯𑀺𑀤𑁆𑀥𑀁, 𑀅𑀓𑀺𑀘𑁆𑀘𑀁 𑀧𑀦 𑀓𑀭𑀻𑀬𑀢𑀺;

𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀁, 𑀢𑁂𑀲𑀁 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸.

𑁬𑁩𑁬.

‘‘𑀬𑁂𑀲𑀜𑁆𑀘 𑀲𑀼𑀲𑀫𑀸𑀭𑀤𑁆𑀥𑀸, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸 𑀲𑀢𑀺;

𑀅𑀓𑀺𑀘𑁆𑀘𑀁 𑀢𑁂 𑀦 𑀲𑁂𑀯𑀦𑁆𑀢𑀺, 𑀓𑀺𑀘𑁆𑀘𑁂 𑀲𑀸𑀢𑀘𑁆𑀘𑀓𑀸𑀭𑀺𑀦𑁄;

𑀲𑀢𑀸𑀦𑀁 𑀲𑀫𑁆𑀧𑀚𑀸𑀦𑀸𑀦𑀁, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀆𑀲𑀯𑀸.

𑁬𑁩𑁭.

‘‘𑀉𑀚𑀼𑀫𑀕𑁆𑀕𑀫𑁆𑀳𑀺 ¶ ¶ 𑀅𑀓𑁆𑀔𑀸𑀢𑁂, 𑀕𑀘𑁆𑀙𑀣 𑀫𑀸 𑀦𑀺𑀯𑀢𑁆𑀢𑀣;

𑀅𑀢𑁆𑀢𑀦𑀸 𑀘𑁄𑀤𑀬𑀢𑁆𑀢𑀸𑀦𑀁, 𑀦𑀺𑀩𑁆𑀩𑀸𑀦𑀫𑀪𑀺𑀳𑀸𑀭𑀬𑁂.

𑁬𑁩𑁮.

‘‘𑀅𑀘𑁆𑀘𑀸𑀭𑀤𑁆𑀥𑀫𑁆𑀳𑀺 ¶ 𑀯𑀻𑀭𑀺𑀬𑀫𑁆𑀳𑀺, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀯𑀻𑀡𑁄𑀧𑀫𑀁 𑀓𑀭𑀺𑀢𑁆𑀯𑀸 𑀫𑁂, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸;

𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄.

𑁬𑁩𑁯.

‘‘𑀲𑀫𑀣𑀁 𑀧𑀝𑀺𑀧𑀸𑀤𑁂𑀲𑀺𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁪𑁦.

‘‘𑀦𑁂𑀓𑁆𑀔𑀫𑁆𑀫𑁂 𑀅𑀥𑀺𑀫𑀼𑀢𑁆𑀢𑀲𑁆𑀲, 𑀧𑀯𑀺𑀯𑁂𑀓𑀜𑁆𑀘 𑀘𑁂𑀢𑀲𑁄;

𑀅𑀩𑁆𑀬𑀸𑀩𑀚𑁆𑀛𑀸𑀥𑀺𑀫𑀼𑀢𑁆𑀢𑀲𑁆𑀲, 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘.

𑁬𑁪𑁧.

‘‘𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑀲𑁆𑀲, 𑀅𑀲𑀫𑁆𑀫𑁄𑀳𑀜𑁆𑀘 𑀘𑁂𑀢𑀲𑁄;

𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀁, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

𑁬𑁪𑁨.

‘‘𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀓𑀢𑀲𑁆𑀲 𑀧𑀢𑀺𑀘𑀬𑁄 𑀦𑀢𑁆𑀣𑀺, 𑀓𑀭𑀡𑀻𑀬𑀁 𑀦 𑀯𑀺𑀚𑁆𑀚𑀢𑀺.

𑁬𑁪𑁩.

‘‘𑀲𑁂𑀮𑁄 ¶ 𑀬𑀣𑀸 𑀏𑀓𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀭𑀽𑀧𑀸 𑀭𑀲𑀸 𑀲𑀤𑁆𑀤𑀸, 𑀕𑀦𑁆𑀥𑀸 𑀨𑀲𑁆𑀲𑀸 𑀘 𑀓𑁂𑀯𑀮𑀸.

𑁬𑁪𑁪.

‘‘𑀇𑀝𑁆𑀞𑀸 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸 𑀘, 𑀦𑀧𑁆𑀧𑀯𑁂𑀥𑁂𑀦𑁆𑀢𑀺 𑀢𑀸𑀤𑀺𑀦𑁄;

𑀞𑀺𑀢𑀁 𑀘𑀺𑀢𑁆𑀢𑀁 𑀯𑀺𑀲𑀜𑁆𑀜𑀼𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀬𑀸𑀳𑀼 𑀭𑀝𑁆𑀞𑁂 𑀲𑀫𑀼𑀓𑁆𑀓𑀝𑁆𑀞𑁄𑀢𑀺 𑀬𑁄 𑀅𑀳𑀼 𑀅𑀳𑁄𑀲𑀺 𑀅𑀗𑁆𑀕𑀭𑀝𑁆𑀞𑁂 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑁂𑀳𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀫𑁆𑀫𑀸 𑀅𑀢𑀺𑀯𑀺𑀬 𑀉𑀓𑁆𑀓𑀝𑁆𑀞𑁄 𑀲𑁂𑀝𑁆𑀞𑁄. 𑀭𑀜𑁆𑀜𑁄 𑀅𑀗𑁆𑀕𑀲𑁆𑀲 𑀧𑀤𑁆𑀥𑀕𑀽𑀢𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀧𑀭𑀺𑀲𑀸𑀬 𑀭𑀜𑁆𑀚𑀦𑀝𑁆𑀞𑁂𑀦 𑀭𑀜𑁆𑀜𑁄 𑀅𑀗𑁆𑀕𑀸𑀥𑀺𑀧𑀢𑀺𑀦𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑁄 𑀕𑀳𑀧𑀢𑀺𑀯𑀺𑀲𑁂𑀲𑁄 𑀢𑀲𑁆𑀲 𑀭𑀝𑁆𑀞𑁂 𑀓𑀼𑀝𑀼𑀫𑁆𑀩𑀺𑀓𑁄 𑀅𑀳𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑁆𑀯𑀸𑀚𑁆𑀚 𑀥𑀫𑁆𑀫𑁂𑀲𑀼 𑀉𑀓𑁆𑀓𑀝𑁆𑀞𑁄𑀢𑀺 𑀲𑁄 𑀲𑁄𑀡𑁄 𑀅𑀚𑁆𑀚𑁂𑀢𑀭𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀉𑀓𑁆𑀓𑀝𑁆𑀞𑁄 𑀚𑀸𑀢𑁄, 𑀕𑀺𑀳𑀺𑀓𑀸𑀮𑁂𑀧𑀺 𑀓𑁂𑀳𑀺𑀘𑀺 𑀉𑀓𑁆𑀓𑀝𑁆𑀞𑁄𑀬𑁂𑀯 𑀳𑀼𑀢𑁆𑀯𑀸 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑀓𑀸𑀮𑁂𑀧𑀺 𑀉𑀓𑁆𑀓𑀝𑁆𑀞𑁄𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀽𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑁄, 𑀏𑀢𑁂𑀦 𑀥𑀫𑁆𑀫𑁂𑀲𑀼 𑀉𑀓𑁆𑀓𑀝𑁆𑀞𑁄𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀉𑀓𑁆𑀓𑀝𑁆𑀞𑀪𑀸𑀯𑀁 𑀯𑀺𑀲𑁂𑀲𑁂𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑀤𑀻𑀧𑀦𑀢𑁄.

𑀇𑀤𑀸𑀦𑀺 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀧𑀸𑀭𑀕𑀽 𑀚𑀸𑀢𑁄, 𑀅𑀜𑁆𑀜𑀸𑀧𑀤𑁂𑀲𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘 𑀙𑀺𑀦𑁆𑀤𑁂’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀧𑀸𑀬𑀓𑀸𑀫𑀲𑀼𑀕𑀢𑀺𑀲𑀫𑁆𑀧𑀸𑀧𑀓𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀼𑀭𑀺𑀲𑁄 𑀲𑀢𑁆𑀣𑁂𑀦 𑀧𑀸𑀤𑁂 𑀩𑀤𑁆𑀥𑀭𑀚𑁆𑀚𑀼𑀓𑀁 𑀯𑀺𑀬 𑀳𑁂𑀝𑁆𑀞𑀺𑀫𑁂𑀦 𑀫𑀕𑁆𑀕𑀢𑁆𑀢𑀬𑁂𑀦 𑀙𑀺𑀦𑁆𑀤𑁂𑀬𑁆𑀬, 𑀭𑀽𑀧𑀸𑀭𑀽𑀧𑀪𑀯𑀲𑀫𑁆𑀧𑀸𑀧𑀓𑀸𑀦𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀼𑀭𑀺𑀲𑁄 𑀕𑀻𑀯𑀸𑀬 𑀩𑀤𑁆𑀥𑀭𑀚𑁆𑀚𑀼𑀓𑀁 𑀯𑀺𑀬 𑀅𑀕𑁆𑀕𑀫𑀕𑁆𑀕𑁂𑀦 𑀚𑀳𑁂𑀬𑁆𑀬, 𑀙𑀺𑀦𑁆𑀤𑁂𑀬𑁆𑀬, 𑀢𑁂𑀲𑀁 𑀧𑀦 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀬 𑀧𑀜𑁆𑀘 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 ¶ 𑀉𑀢𑁆𑀢𑀭𑀺 𑀪𑀸𑀯𑀬𑁂 ¶ 𑀪𑀸𑀯𑁂𑀬𑁆𑀬. 𑀏𑀯𑀁𑀪𑀽𑀢𑁄 𑀧𑀦 𑀪𑀺𑀓𑁆𑀔𑀼 𑀭𑀸𑀕𑀲𑀗𑁆𑀕𑁄 𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀕𑁄𑀢𑀺 𑀧𑀜𑁆𑀘𑀦𑁆𑀦𑀁 𑀲𑀗𑁆𑀕𑀸𑀦𑀁 𑀅𑀢𑀺𑀓𑁆𑀓𑀫𑀦𑁂𑀦 𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀳𑀼𑀢𑁆𑀯𑀸, 𑀓𑀸𑀫𑁄𑀖𑁄, 𑀪𑀯𑁄𑀖𑁄, 𑀤𑀺𑀝𑁆𑀞𑁄𑀖𑁄, 𑀅𑀯𑀺𑀚𑁆𑀚𑁄𑀖𑁄𑀢𑀺 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁 𑀢𑀺𑀡𑁆𑀡𑀢𑁆𑀢𑀸 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺.

𑀅𑀬𑀜𑁆𑀘 𑀑𑀖𑀢𑀭𑀡𑀧𑀝𑀺𑀧𑀢𑁆𑀢𑀺𑀲𑀻𑀮𑀸𑀤𑀻𑀦𑀁 𑀧𑀸𑀭𑀺𑀧𑀽𑀭𑀺𑀬𑀸𑀯 𑀳𑁄𑀢𑀺, 𑀲𑀻𑀮𑀸𑀤𑀬𑁄 𑀘 𑀫𑀸𑀦𑀸𑀤𑀺𑀧𑁆𑀧𑀳𑀸𑀦𑁂𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀦𑁆𑀦𑀴𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀉𑀦𑁆𑀦𑀴𑀲𑁆𑀲𑀸𑀢𑀺 𑀉𑀕𑁆𑀕𑀢𑀢𑀼𑀘𑁆𑀙𑀫𑀸𑀦𑀲𑁆𑀲. 𑀫𑀸𑀦𑁄 ¶ 𑀳𑀺 𑀉𑀦𑁆𑀦𑀫𑀦𑀸𑀓𑀸𑀭𑀯𑀼𑀢𑁆𑀢𑀺𑀬𑀸 𑀢𑀼𑀘𑁆𑀙𑀪𑀸𑀯𑁂𑀦 𑀦𑀴𑁄 𑀯𑀺𑀬𑀸𑀢𑀺 ‘‘𑀦𑀴𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀫𑀢𑁆𑀢𑀲𑁆𑀲𑀸𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑁂𑀦 𑀧𑀫𑀸𑀤𑀁 𑀆𑀧𑀦𑁆𑀦𑀲𑁆𑀲. 𑀩𑀸𑀳𑀺𑀭𑀸𑀲𑀲𑁆𑀲𑀸𑀢𑀺 𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀆𑀲𑀸𑀯𑀢𑁄, 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘, 𑀧𑀸𑀭𑀺𑀧𑀽𑀭𑀺𑀁 𑀦 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲 𑀲𑀻𑀮𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀲𑁂𑀯𑀺𑀦𑁄 𑀮𑁄𑀓𑀺𑀬𑁄𑀧𑀺 𑀢𑀸𑀯 𑀲𑀻𑀮𑀸𑀤𑀺𑀕𑀼𑀡𑁄 𑀧𑀸𑀭𑀺𑀧𑀽𑀭𑀺𑀁 𑀦 𑀕𑀘𑁆𑀙𑀢𑀺, 𑀧𑀕𑁂𑀯 𑀮𑁄𑀓𑀼𑀢𑁆𑀢𑀭𑁄.

𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀬𑀜𑁆𑀳𑀺 𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸. 𑀪𑀺𑀓𑁆𑀔𑀼𑀦𑁄 𑀳𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀫𑀸𑀡𑀲𑀻𑀮𑀓𑁆𑀔𑀦𑁆𑀥𑀕𑁄𑀧𑀦𑀁 𑀅𑀭𑀜𑁆𑀜𑀯𑀸𑀲𑁄 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀁 𑀪𑀸𑀯𑀦𑀸𑀭𑀸𑀫𑀢𑀸𑀢𑀺 𑀏𑀯𑀫𑀸𑀤𑀺 𑀓𑀺𑀘𑁆𑀘𑀁 𑀦𑀸𑀫. 𑀬𑁂𑀳𑀺 𑀧𑀦 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁, 𑀢𑀁 𑀅𑀧𑀯𑀺𑀤𑁆𑀥𑀁 𑀅𑀓𑀭𑀡𑁂𑀦 𑀙𑀟𑁆𑀟𑀺𑀢𑀁. 𑀅𑀓𑀺𑀘𑁆𑀘𑀦𑁆𑀢𑀺 𑀧𑀢𑁆𑀢𑀫𑀡𑁆𑀟𑀦𑀁 𑀘𑀻𑀯𑀭𑀓𑀸𑀬𑀩𑀦𑁆𑀥𑀦𑀅𑀁𑀲𑀩𑀤𑁆𑀥𑀙𑀢𑁆𑀢𑀼𑀧𑀸𑀳𑀦𑀢𑀸𑀮𑀯𑀡𑁆𑀝𑀥𑀫𑁆𑀫𑀓𑀭𑀡𑀫𑀡𑁆𑀟𑀦𑀦𑁆𑀢𑀺 𑀏𑀯𑀫𑀸𑀤𑀺 𑀧𑀭𑀺𑀓𑁆𑀔𑀸𑀭𑀫𑀡𑁆𑀟𑀦𑀁 𑀧𑀘𑁆𑀘𑀬𑀩𑀸𑀳𑀼𑀮𑀺𑀬𑀦𑁆𑀢𑀺 𑀏𑀯𑀫𑀸𑀤𑀺 𑀪𑀺𑀓𑁆𑀔𑀼𑀦𑁄 𑀅𑀓𑀺𑀘𑁆𑀘𑀁 𑀦𑀸𑀫, 𑀢𑀁 𑀓𑀬𑀺𑀭𑀢𑀺, 𑀢𑁂𑀲𑀁 𑀫𑀸𑀦𑀦𑀴𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀡𑁂𑀦 𑀉𑀦𑁆𑀦𑀴𑀸𑀦𑀁 𑀲𑀢𑀺𑀯𑁄𑀲𑁆𑀲𑀕𑁆𑀕𑁂𑀦 𑀧𑀫𑀢𑁆𑀢𑀸𑀦𑀁 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺.

𑀬𑁂𑀲𑀁 𑀧𑀦 𑀧𑀜𑁆𑀜𑀸𑀤𑀺𑀕𑀼𑀡𑁄 𑀯𑀟𑁆𑀠𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀧𑀕𑁆𑀕𑀳𑀺𑀢𑀸. 𑀓𑀸𑀬𑀕𑀢𑀸 𑀲𑀢𑀻𑀢𑀺, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸. 𑀅𑀓𑀺𑀘𑁆𑀘𑀁 𑀢𑁂𑀢𑀺 𑀢𑁂 𑀏𑀢𑀁 𑀧𑀢𑁆𑀢𑀫𑀡𑁆𑀟𑀦𑀸𑀤𑀺𑀅𑀓𑀺𑀘𑁆𑀘𑀁. 𑀦 𑀲𑁂𑀯𑀦𑁆𑀢𑀻𑀢𑀺 𑀦 𑀓𑀭𑁄𑀦𑁆𑀢𑀺. 𑀓𑀺𑀘𑁆𑀘𑁂𑀢𑀺, 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀢𑁆𑀢𑀩𑁆𑀩𑁂 𑀅𑀧𑀭𑀺𑀫𑀸𑀡𑀲𑀻𑀮𑀓𑁆𑀔𑀦𑁆𑀥𑀕𑁄𑀧𑀦𑀸𑀤𑀺𑀓𑁂. 𑀲𑀸𑀢𑀘𑁆𑀘𑀓𑀸𑀭𑀺𑀦𑁄𑀢𑀺 𑀲𑀢𑀢𑀓𑀸𑀭𑀺𑀦𑁄 𑀢𑁂𑀲𑀁 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀲𑀢𑀸𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁, 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁, 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀘𑀢𑀽𑀳𑀺 𑀲𑀫𑁆𑀧𑀚𑀜𑁆𑀜𑁂𑀳𑀺 𑀲𑀫𑁆𑀧𑀚𑀸𑀦𑀸𑀦𑀁, 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀭𑀺𑀓𑁆𑀔𑀬𑀁 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀺𑀢𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑁂𑀦𑁆𑀢𑁄 ‘‘𑀉𑀚𑀼𑀫𑀕𑁆𑀕𑀫𑁆𑀳𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀉𑀚𑀼𑀫𑀕𑁆𑀕𑀫𑁆𑀳𑀺 𑀅𑀓𑁆𑀔𑀸𑀢𑁂𑀢𑀺 𑀅𑀦𑁆𑀢𑀤𑁆𑀯𑀬𑀧𑀭𑀺𑀯𑀚𑁆𑀚𑀦𑁂𑀦 𑀓𑀸𑀬𑀯𑀗𑁆𑀓𑀸𑀤𑀺𑀧𑁆𑀧𑀳𑀸𑀦𑁂𑀦 𑀘 𑀉𑀚𑀼𑀓𑁂 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀽𑀢𑁂 𑀅𑀭𑀺𑀬𑀫𑀕𑁆𑀕𑁂 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑁂. 𑀕𑀘𑁆𑀙𑀣𑀸𑀢𑀺 𑀧𑀝𑀺𑀧𑀚𑁆𑀚𑀣. 𑀫𑀸 𑀦𑀺𑀯𑀢𑁆𑀢𑀣𑀸𑀢𑀺 𑀅𑀦𑁆𑀢𑀭𑀸 ¶ 𑀯𑁄𑀲𑀸𑀦𑀁 𑀫𑀸𑀧𑀚𑁆𑀚𑀣. 𑀅𑀢𑁆𑀢𑀦𑀸 𑀘𑁄𑀤𑀬𑀢𑁆𑀢𑀸𑀦𑀦𑁆𑀢𑀺 𑀇𑀥 ¶ 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀦𑀸 ¶ 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀘𑁄𑀤𑁂𑀦𑁆𑀢𑁄. 𑀦𑀺𑀩𑁆𑀩𑀸𑀦𑀫𑀪𑀺𑀳𑀸𑀭𑀬𑁂𑀢𑀺, 𑀅𑀢𑁆𑀢𑀸𑀦𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀳𑀭𑁂𑀬𑁆𑀬 𑀉𑀧𑀦𑁂𑀬𑁆𑀬, 𑀬𑀣𑀸 𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀫𑀬𑀸𑀧𑀺 𑀏𑀯𑀫𑁂𑀯 𑀧𑀝𑀺𑀧𑀦𑁆𑀦𑀦𑁆𑀢𑀺, 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀘𑀸𑀭𑀤𑁆𑀥𑀫𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀘𑁆𑀘𑀸𑀭𑀤𑁆𑀥𑀫𑁆𑀳𑀺 𑀯𑀻𑀭𑀺𑀬𑀫𑁆𑀳𑀻𑀢𑀺 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁂𑀦 𑀫𑀬𑀸 𑀲𑀫𑀸𑀥𑀺𑀦𑀸 𑀯𑀻𑀭𑀺𑀬𑀁 𑀲𑀫𑀭𑀲𑀁 𑀅𑀓𑀢𑁆𑀯𑀸 𑀅𑀢𑀺𑀯𑀺𑀬 𑀯𑀻𑀭𑀺𑀬𑁂 𑀧𑀕𑁆𑀕𑀳𑀺𑀢𑁂. 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸 𑀘𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯. 𑀯𑀻𑀡𑁄𑀧𑀫𑀁 𑀓𑀭𑀺𑀢𑁆𑀯𑀸 𑀫𑁂𑀢𑀺 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 ‘‘𑀬𑁂 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺. 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀅𑀣 𑀘 𑀧𑀦 𑀫𑁂 𑀦𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸𑀳𑀁 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀢𑁆𑀣𑀸 𑀇𑀤𑁆𑀥𑀺𑀬𑀸 𑀢𑀲𑁆𑀲 𑀲𑀫𑁆𑀫𑀼𑀔𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀢𑁆𑀯𑀁, 𑀲𑁄𑀡, ‘𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺, 𑀓𑀼𑀲𑀮𑁄 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄 𑀯𑀻𑀡𑀸𑀬 𑀢𑀦𑁆𑀢𑀺𑀲𑁆𑀲𑀭𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡? 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂! 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀢𑀺𑀲𑀺𑀣𑀺𑀮𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀧𑀦 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀦𑁂𑀯 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺, 𑀦𑀸𑀢𑀺𑀲𑀺𑀣𑀺𑀮𑀸 𑀲𑀫𑁂 𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸𑀢𑀺? 𑀏𑀯𑀁, 𑀪𑀦𑁆𑀢𑁂. 𑀏𑀯𑀫𑁂𑀯 𑀔𑁄, 𑀲𑁄𑀡, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀲𑁄𑀡, 𑀯𑀻𑀭𑀺𑀬𑀲𑀫𑀢𑀁 𑀅𑀥𑀺𑀝𑁆𑀞𑀳, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛𑀸’’𑀢𑀺 𑀏𑀯𑀁 𑀯𑀻𑀡𑀁 𑀉𑀧𑀫𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁂𑀦 𑀯𑀻𑀡𑁄𑀧𑀫𑁄𑀯𑀸𑀤𑁂𑀦 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀯𑀻𑀡𑁄𑀧𑀫𑁄𑀯𑀸𑀤𑀁 𑀲𑀼𑀢𑁆𑀯𑀸 𑀅𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑀁 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀢𑀁 𑀧𑀳𑀸𑀬 𑀲𑀢𑁆𑀣𑀼 𑀲𑀸𑀲𑀦𑁂 𑀭𑀢𑁄 𑀅𑀪𑀺𑀭𑀢𑁄 𑀯𑀺𑀳𑀭𑀺𑀁.

𑀯𑀺𑀳𑀭𑀦𑁆𑀢𑁄 𑀘 𑀲𑀫𑀣𑀁 𑀧𑀝𑀺𑀧𑀸𑀤𑁂𑀲𑀺𑀁 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀦𑁆𑀢𑁄 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀯𑀺𑀬 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀲𑀫𑀭𑀲𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀛𑀸𑀦𑀸𑀥𑀺𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀁 ¶ 𑀲𑀫𑁆𑀧𑀸𑀤𑁂𑀲𑀺𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀲𑀺𑀁. 𑀢𑀢𑁆𑀣 𑀧𑀬𑁄𑀚𑀦𑀁 𑀆𑀳 ‘‘𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸’’𑀢𑀺. 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸 𑀧𑀝𑀺𑀧𑀦𑁆𑀦𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑁆𑀚𑀺𑀁𑀲𑀼, 𑀢𑀁 ¶ 𑀅𑀜𑁆𑀜𑀸𑀧𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀦𑁂𑀓𑁆𑀔𑀫𑁆𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑁂𑀢𑀺 𑀧𑀩𑁆𑀩𑀚𑁆𑀚𑀸𑀤𑀺𑀓𑁂 𑀓𑀸𑀫𑀦𑀺𑀲𑁆𑀲𑀭𑀡𑁂. 𑀅𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀢𑁆𑀣 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 ¶ 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲, 𑀧𑀞𑀫𑀁 𑀢𑀸𑀯 𑀧𑀩𑁆𑀩𑀚𑁆𑀚𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀲𑀻𑀮𑀯𑀺𑀲𑁄𑀥𑀦𑀁 𑀅𑀭𑀜𑁆𑀜𑀯𑀸𑀲𑁄 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀁 𑀪𑀸𑀯𑀦𑀸𑀪𑀺𑀬𑁄𑀕𑁄𑀢𑀺 𑀏𑀯𑀫𑀸𑀤𑀻𑀲𑀼 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀯𑀺𑀯𑁂𑀓𑀜𑁆𑀘 𑀘𑁂𑀢𑀲𑁄𑀢𑀺 𑀘𑁂𑀢𑀲𑁄 𑀧𑀯𑀺𑀯𑁂𑀓𑀜𑁆𑀘 𑀅𑀥𑀺𑀫𑀼𑀢𑁆𑀢𑀲𑁆𑀲 𑀏𑀯𑀁 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑀲𑁆𑀲 𑀲𑀢𑁄 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦 𑀯𑀺𑀯𑁂𑀓𑁂 𑀬𑀼𑀢𑁆𑀢𑀲𑁆𑀲 𑀧𑀬𑀼𑀢𑁆𑀢𑀲𑁆𑀲. 𑀅𑀩𑁆𑀬𑀸𑀩𑀚𑁆𑀛𑀸𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀩𑁆𑀬𑀸𑀩𑀚𑁆𑀛𑁂 𑀦𑀺𑀤𑀼𑀓𑁆𑀔𑀢𑀸𑀬 𑀅𑀥𑀺𑀫𑀼𑀢𑁆𑀢𑀲𑁆𑀲 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀣𑀲𑀼𑀔𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲. 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘𑀸𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀔𑀬𑀦𑁆𑀢𑁂 𑀅𑀭𑀳𑀢𑁆𑀢𑁂 𑀅𑀥𑀺𑀫𑀼𑀢𑁆𑀢𑀲𑁆𑀲. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀁 𑀬𑀣𑀸𑀥𑀺𑀕𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀡𑁆𑀳𑀸 𑀔𑀻𑀬𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀓𑁆𑀔𑀬𑁄, 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀺𑀁 𑀅𑀥𑀺𑀫𑀼𑀢𑁆𑀢𑀲𑁆𑀲 𑀉𑀧𑀸𑀤𑀺𑀁 𑀪𑀬𑀢𑁄, 𑀅𑀦𑀼𑀧𑀸𑀤𑀺𑀜𑁆𑀘 𑀔𑁂𑀫𑀢𑁄 𑀤𑀲𑁆𑀲𑀦𑁂𑀦 𑀦𑀺𑀭𑁄𑀥𑁂 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀲𑁆𑀲. 𑀅𑀲𑀫𑁆𑀫𑁄𑀳𑀜𑁆𑀘 𑀘𑁂𑀢𑀲𑁄𑀢𑀺 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀳𑀧𑀯𑀢𑁆𑀢𑀺𑀁 𑀲𑀫𑁆𑀫𑁄𑀳𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀸 𑀘𑀺𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀳𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀁 𑀅𑀥𑀺𑀫𑀼𑀢𑁆𑀢𑀲𑁆𑀲. 𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀸𑀦𑀁 𑀬𑀣𑀸𑀲𑀓𑀧𑀘𑁆𑀘𑀬𑁂𑀳𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀸𑀤𑀁, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀦𑀺𑀭𑁄𑀥𑀜𑁆𑀘 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀤𑀲𑁆𑀲𑀦𑀳𑁂𑀢𑀼 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀜𑀸𑀬𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀸𑀲𑀯𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

‘‘𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀤𑁂𑀯 𑀲𑀩𑁆𑀩𑀲𑀁𑀓𑀺𑀮𑁂𑀲𑀢𑁄 𑀯𑀺𑀫𑀼𑀢𑁆𑀢𑀲𑁆𑀲, 𑀢𑀢𑁄 𑀏𑀯 𑀅𑀘𑁆𑀘𑀦𑁆𑀢𑀼𑀧𑀲𑀫𑁂𑀦 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀦𑁄 𑀓𑀢𑀲𑁆𑀲 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀯𑀸 𑀉𑀧𑀘𑀬𑁄 𑀦𑀢𑁆𑀣𑀺 𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸, 𑀧𑀭𑀺𑀜𑁆𑀜𑀸𑀤𑀺𑀪𑁂𑀤𑀁 𑀓𑀭𑀡𑀻𑀬𑀁 ¶ 𑀦 𑀯𑀺𑀚𑁆𑀚𑀢𑀺 𑀓𑀢𑀓𑀺𑀘𑁆𑀘𑀢𑁆𑀢𑀸. 𑀏𑀯𑀁 𑀪𑀽𑀢𑀲𑁆𑀲 𑀬𑀣𑀸 𑀏𑀓𑀖𑀦𑁄 𑀲𑁂𑀮𑁄 𑀧𑀩𑁆𑀩𑀢𑁄 𑀧𑀓𑀢𑀺𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺 𑀦 𑀲𑀁𑀓𑀫𑁆𑀧𑀢𑀺, 𑀏𑀯𑀁 𑀇𑀝𑁆𑀞𑀸 𑀘 𑀅𑀦𑀺𑀝𑁆𑀞𑀸 𑀘 𑀭𑀽𑀧𑀸𑀤𑀬𑁄 𑀆𑀭𑀫𑁆𑀫𑀡𑀥𑀫𑁆𑀫𑀸 𑀢𑀸𑀤𑀺𑀦𑁄 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀞𑀺𑀢𑀁 𑀅𑀦𑁂𑀚𑀁 𑀧𑀳𑀻𑀦𑀲𑀩𑁆𑀩𑀲𑁄𑀓𑀢𑀸𑀬 𑀯𑀺𑀲𑀁𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦𑀧𑁆𑀧𑀯𑁂𑀥𑀦𑁆𑀢𑀺 𑀦 𑀘𑀸𑀮𑁂𑀦𑁆𑀢𑀺. 𑀅𑀲𑁆𑀲 𑀘 𑀆𑀭𑀫𑁆𑀫𑀡𑀥𑀫𑁆𑀫𑀲𑁆𑀲 𑀓𑀸𑀮𑁂𑀦 𑀓𑀸𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀯𑀬𑀁 𑀦𑀺𑀭𑁄𑀥𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀁 𑀅𑀦𑀼𑀧𑀲𑁆𑀲𑀢𑀻𑀢𑀺 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀭𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀓𑀦𑀺𑀧𑀸𑀢𑁄

𑁧. 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀘𑀼𑀤𑁆𑀤𑀲𑀓𑀦𑀺𑀧𑀸𑀢𑁂 ¶ ¶ ¶ 𑀬𑀤𑀸 𑀅𑀳𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀓𑀸𑀫𑀜𑁆𑀘𑀺𑀫𑀲𑁆𑀲 𑀣𑁂𑀭𑀲𑁆𑀲 𑀕𑀸𑀣𑀸 𑀳𑁂𑀝𑁆𑀞𑀸 𑀏𑀓𑀓𑀦𑀺𑀧𑀸𑀢𑁂 (𑀣𑁂𑀭𑀕𑀸. 𑀅𑀝𑁆𑀞. 𑁧. 𑀔𑀤𑀺𑀭𑀯𑀦𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀆𑀕𑀢𑀸. 𑀢𑀢𑁆𑀣 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑁂𑀲𑀼 𑀲𑀢𑀺𑀚𑀦𑀦𑀫𑀢𑁆𑀢𑀁 𑀤𑀲𑁆𑀲𑀺𑀢𑀦𑁆𑀢𑀺 𑀢𑀲𑁆𑀲𑀸 𑀏𑀓𑀓𑀦𑀺𑀧𑀸𑀢𑁂 𑀲𑀗𑁆𑀕𑀳𑁄 𑀓𑀢𑁄. 𑀇𑀫𑀸 𑀧𑀦 𑀣𑁂𑀭𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀝𑀺𑀧𑀢𑁆𑀢𑀺𑀧𑀓𑀸𑀲𑀺𑀢𑀸 𑀕𑀸𑀣𑀸 𑀇𑀫𑀲𑁆𑀫𑀺𑀁 𑀘𑀼𑀤𑁆𑀤𑀲𑀓𑀦𑀺𑀧𑀸𑀢𑁂 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀸. 𑀢𑀢𑁆𑀣 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀣𑁂𑀭𑁄 𑀓𑀺𑀭 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀼 𑀥𑀫𑁆𑀫𑀲𑁂𑀦𑀸𑀧𑀢𑀺𑀧𑁆𑀧𑀪𑀽𑀢𑀻𑀦𑀁 𑀫𑀳𑀸𑀣𑁂𑀭𑀸𑀦𑀜𑁆𑀘 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀢𑀺𑀧𑀸𑀳𑀫𑁂𑀯 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀔𑀤𑀺𑀭𑀯𑀦𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀳𑀺 𑀘 𑀯𑀻𑀢𑀺𑀦𑀸𑀫𑁂𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄 𑀯𑀬𑁄 𑀅𑀦𑀼𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑁂 𑀯𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀘𑁄𑀭𑀸 𑀦𑀕𑀭𑁂 𑀓𑀢𑀓𑀫𑁆𑀫𑀸 𑀆𑀭𑀓𑁆𑀔𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀩𑀦𑁆𑀥𑀸 𑀧𑀮𑀸𑀬𑀦𑁆𑀢𑀸 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀕𑀳𑀺𑀢𑀪𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀅𑀦𑀼𑀥𑀸𑀯𑀦𑁆𑀢𑀸 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀣𑁂𑀭𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀘𑁄𑀭𑁄’’𑀢𑀺 𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁, ‘‘𑀅𑀬𑀁, 𑀤𑁂𑀯, 𑀘𑁄𑀭𑁄’’𑀢𑀺. 𑀭𑀸𑀚𑀸 𑀣𑁂𑀭𑀁 𑀫𑀼𑀜𑁆𑀘𑀸𑀧𑁂𑀢𑁆𑀯𑀸, ‘‘𑀓𑀺𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀇𑀤𑀁 𑀘𑁄𑀭𑀺𑀓𑀓𑀫𑁆𑀫𑀁 𑀓𑀢𑀁 𑀯𑀸, 𑀦𑁄 𑀯𑀸’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀓𑀺𑀜𑁆𑀘𑀸𑀧𑀺 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑀸 𑀢𑀸𑀤𑀺𑀲𑀁 𑀦 𑀓𑀢𑀧𑀼𑀩𑁆𑀩𑀁, 𑀢𑀁 𑀧𑀩𑁆𑀩𑀚𑀺𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀓𑀢𑀪𑀸𑀯𑀲𑁆𑀲, 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀓𑀭𑀡𑁂 𑀅𑀪𑀩𑁆𑀩𑀢𑀸𑀬 𑀧𑀓𑀸𑀲𑀦𑀢𑁆𑀣𑀁 𑀲𑀫𑀻𑀧𑁂 𑀞𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀜𑁆𑀜𑁄 𑀘 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

𑁬𑁪𑁫.

‘‘𑀬𑀤𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀲𑀗𑁆𑀓𑀧𑁆𑀧𑀁, 𑀅𑀦𑀭𑀺𑀬𑀁 𑀤𑁄𑀲𑀲𑀁𑀳𑀺𑀢𑀁.

𑁬𑁪𑁬.

‘‘‘𑀇𑀫𑁂 𑀳𑀜𑁆𑀜𑀦𑁆𑀢𑀼 𑀯𑀚𑁆𑀛𑀦𑁆𑀢𑀼, 𑀤𑀼𑀓𑁆𑀔𑀁 𑀧𑀧𑁆𑀧𑁄𑀦𑁆𑀢𑀼 𑀧𑀸𑀡𑀺𑀦𑁄’;

𑀲𑀗𑁆𑀓𑀧𑁆𑀧𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀇𑀫𑀲𑁆𑀫𑀺𑀁 𑀤𑀻𑀖𑀫𑀦𑁆𑀢𑀭𑁂.

𑁬𑁪𑁭.

‘‘𑀫𑁂𑀢𑁆𑀢𑀜𑁆𑀘 ¶ ¶ 𑀅𑀪𑀺𑀚𑀸𑀦𑀸𑀫𑀺, 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀁;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀁, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁.

𑁬𑁪𑁮.

‘‘𑀲𑀩𑁆𑀩𑀫𑀺𑀢𑁆𑀢𑁄 𑀲𑀩𑁆𑀩𑀲𑀔𑁄, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄;

𑀫𑁂𑀢𑁆𑀢𑀘𑀺𑀢𑁆𑀢𑀜𑁆𑀘 𑀪𑀸𑀯𑁂𑀫𑀺, 𑀅𑀩𑁆𑀬𑀸𑀧𑀚𑁆𑀚𑀭𑀢𑁄 𑀲𑀤𑀸.

𑁬𑁪𑁯.

‘‘𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀘𑀺𑀢𑁆𑀢𑀁 𑀆𑀫𑁄𑀤𑀬𑀸𑀫𑀳𑀁;

𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀪𑀸𑀯𑁂𑀫𑀺, 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑀁.

𑁬𑁫𑁦.

‘‘𑀅𑀯𑀺𑀢𑀓𑁆𑀓𑀁 𑀲𑀫𑀸𑀧𑀦𑁆𑀦𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄;

𑀅𑀭𑀺𑀬𑁂𑀦 𑀢𑀼𑀡𑁆𑀳𑀻𑀪𑀸𑀯𑁂𑀦, 𑀉𑀧𑁂𑀢𑁄 𑀳𑁄𑀢𑀺 𑀢𑀸𑀯𑀤𑁂.

𑁬𑁫𑁧.

‘‘𑀬𑀣𑀸𑀧𑀺 ¶ 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄;

𑀏𑀯𑀁 𑀫𑁄𑀳𑀓𑁆𑀔𑀬𑀸 𑀪𑀺𑀓𑁆𑀔𑀼, 𑀧𑀩𑁆𑀩𑀢𑁄𑀯 𑀦 𑀯𑁂𑀥𑀢𑀺.

𑁬𑁫𑁨.

‘‘𑀅𑀦𑀗𑁆𑀕𑀡𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑁄;

𑀯𑀸𑀮𑀕𑁆𑀕𑀫𑀢𑁆𑀢𑀁 𑀧𑀸𑀧𑀲𑁆𑀲, 𑀅𑀩𑁆𑀪𑀫𑀢𑁆𑀢𑀁𑀯 𑀔𑀸𑀬𑀢𑀺.

𑁬𑁫𑁩.

‘‘𑀦𑀕𑀭𑀁 𑀬𑀣𑀸 𑀧𑀘𑁆𑀘𑀦𑁆𑀢𑀁, 𑀕𑀼𑀢𑁆𑀢𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀏𑀯𑀁 𑀕𑁄𑀧𑁂𑀣 𑀅𑀢𑁆𑀢𑀸𑀦𑀁, 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸.

𑁬𑁫𑁪.

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸.

𑁬𑁫𑁫.

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄.

𑁬𑁫𑁬.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁬𑁫𑁭.

‘‘𑀬𑀲𑁆𑀲 𑀘𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

𑁬𑁫𑁮.

‘‘𑀲𑀫𑁆𑀧𑀸𑀤𑁂𑀣𑀧𑁆𑀧𑀫𑀸𑀤𑁂𑀦, 𑀏𑀲𑀸 𑀫𑁂 𑀅𑀦𑀼𑀲𑀸𑀲𑀦𑀻;

𑀳𑀦𑁆𑀤𑀸𑀳𑀁 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀁 𑀯𑀺𑀧𑁆𑀧𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣𑀸𑀬𑀁 ¶ 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑀇𑀫𑀲𑁆𑀫𑀺𑀁 𑀤𑀻𑀖𑀫𑀦𑁆𑀢𑀭𑁂𑀢𑀺, 𑀬𑀤𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺, 𑀢𑀢𑁄 𑀧𑀝𑁆𑀞𑀸𑀬 𑀅𑀬𑀜𑁆𑀘 𑀫𑁂 𑀘𑀭𑀺𑀫𑀓𑀸𑀮𑁄, 𑀏𑀢𑀲𑁆𑀫𑀺𑀁 𑀤𑀻𑀖𑀫𑀦𑁆𑀢𑀭𑁂 𑀓𑀸𑀮𑁂 ‘‘𑀇𑀤𑀁 𑀫𑀬𑁆𑀳𑀁 𑀳𑁄𑀢𑀽’’𑀢𑀺 𑀅𑀪𑀺𑀚𑁆𑀛𑀸𑀯𑀲𑁂𑀦 𑀯𑀸, ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀩𑁆𑀬𑀸𑀧𑀸𑀤𑀯𑀲𑁂𑀦 𑀯𑀸 𑀅𑀦𑀭𑀺𑀬𑀁 𑀤𑁄𑀲𑀲𑀁𑀳𑀺𑀢𑀁 𑀲𑀗𑁆𑀓𑀧𑁆𑀧𑀁 𑀦𑀸𑀪𑀺𑀚𑀸𑀦𑀸𑀫𑀻𑀢𑀺 𑀬𑁄𑀚𑀦𑀸.

𑀫𑁂𑀢𑁆𑀢𑀜𑁆𑀘 ¶ 𑀅𑀪𑀺𑀚𑀸𑀦𑀸𑀫𑀻𑀢𑀺, 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀺 𑀏𑀢𑀸𑀬𑀸𑀢𑀺 𑀫𑁂𑀢𑁆𑀢𑀸, 𑀅𑀩𑁆𑀬𑀸𑀧𑀸𑀤𑁄. 𑀫𑁂𑀢𑁆𑀢𑀸 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀸𑀪𑀸𑀯𑀦𑀸 𑀫𑁂𑀢𑁆𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀢𑀁 𑀫𑁂𑀢𑁆𑀢𑀁. 𑀘-𑀲𑀤𑁆𑀤𑁂𑀦 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀜𑁆𑀘𑀸𑀢𑀺 𑀇𑀢𑀭𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀪𑀺𑀚𑀸𑀦𑀸𑀫𑀻𑀢𑀺, 𑀅𑀪𑀺𑀫𑀼𑀔𑀢𑁄 𑀚𑀸𑀦𑀸𑀫𑀺. 𑀅𑀥𑀺𑀕𑀢𑀜𑁆𑀳𑀺 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑀁 𑀳𑁄𑀢𑀺. 𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀅𑀧𑁆𑀧𑀫𑀸𑀡’’𑀦𑁆𑀢𑀺𑀆𑀤𑀺. 𑀢𑀜𑁆𑀳𑀺 𑀬𑀣𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀁, 𑀢𑀣𑀸 𑀅𑀦𑁄𑀤𑀺𑀲𑁆𑀲𑀓𑀨𑀭𑀡𑀯𑀲𑁂𑀦 𑀅𑀧𑀭𑀺𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀅𑀧𑁆𑀧𑀫𑀸𑀡𑀁. 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀸𑀤𑀦𑁂𑀦 𑀲𑀼𑀝𑁆𑀞𑀼 𑀪𑀸𑀯𑀺𑀢𑀢𑁆𑀢𑀸 𑀲𑀼𑀪𑀸𑀯𑀺𑀢𑀁. 𑀧𑀞𑀫𑀁 𑀫𑁂𑀢𑁆𑀢𑀸, 𑀢𑀢𑁄 𑀓𑀭𑀼𑀡𑀸, 𑀢𑀢𑁄 𑀫𑀼𑀤𑀺𑀢𑀸, 𑀧𑀘𑁆𑀙𑀸 𑀉𑀧𑁂𑀓𑁆𑀔𑀸𑀢𑀺 𑀏𑀯𑀁 𑀅𑀦𑀼𑀧𑀼𑀩𑁆𑀩𑀁 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀘𑀺𑀢𑀁 𑀆𑀲𑁂𑀯𑀺𑀢𑀁, 𑀩𑀳𑀼𑀮𑀻𑀓𑀢𑀁 𑀅𑀪𑀺𑀚𑀸𑀦𑀸𑀫𑀻𑀢𑀺 𑀬𑁄𑀚𑀦𑀸.

𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀫𑀺𑀢𑁆𑀢𑁄, 𑀲𑀩𑁆𑀩𑁂 𑀯𑀸 𑀢𑁂 𑀫𑀬𑁆𑀳𑀁 𑀫𑀺𑀢𑁆𑀢𑀸𑀢𑀺 𑀲𑀩𑁆𑀩𑀫𑀺𑀢𑁆𑀢𑁄. 𑀫𑁂𑀢𑁆𑀢𑀜𑁆𑀳𑀺 ¶ 𑀪𑀸𑀯𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺. 𑀲𑀩𑁆𑀩𑀲𑀔𑁄𑀢𑀺, 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀓𑁄𑀢𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑀓𑁄. 𑀫𑁂𑀢𑁆𑀢𑀘𑀺𑀢𑁆𑀢𑀜𑁆𑀘 𑀪𑀸𑀯𑁂𑀫𑀻𑀢𑀺, 𑀫𑁂𑀢𑁆𑀢𑀸𑀬 𑀲𑀳𑀺𑀢𑀁 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀺𑀲𑁂𑀲𑀢𑁄 𑀪𑀸𑀯𑁂𑀫𑀺, 𑀯𑀟𑁆𑀠𑁂𑀫𑀺, 𑀧𑀓𑀸𑀲𑁂𑀫𑀺 𑀯𑀸 𑀅𑀓𑀣𑁂𑀦𑁆𑀢𑁂𑀧𑀺 𑀪𑀸𑀯𑀦𑀸𑀬 𑀉𑀓𑁆𑀓𑀁𑀲𑀕𑀢𑀪𑀸𑀯𑀢𑁄. ‘‘𑀫𑁂𑀢𑁆𑀢𑀁 𑀘𑀺𑀢𑁆𑀢𑀜𑁆𑀘 𑀪𑀸𑀯𑁂𑀫𑀻’’𑀢𑀺 𑀯𑀸 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄𑀯. 𑀅𑀩𑁆𑀬𑀸𑀧𑀚𑁆𑀚𑀭𑀢𑁄𑀢𑀺, 𑀅𑀩𑁆𑀬𑀸𑀧𑀚𑁆𑀚𑁂 𑀲𑀢𑁆𑀢𑀸𑀦𑀁 𑀳𑀺𑀢𑀽𑀧𑀲𑀁𑀳𑀸𑀭𑁂 𑀅𑀪𑀺𑀭𑀢𑁄. 𑀲𑀤𑀸𑀢𑀺, 𑀲𑀩𑁆𑀩𑀓𑀸𑀮𑀁, 𑀢𑁂𑀦 𑀢𑀢𑁆𑀣 𑀲𑀸𑀢𑀘𑁆𑀘𑀓𑀺𑀭𑀺𑀬𑀁 𑀤𑀲𑁆𑀲𑁂𑀢𑀺.

𑀅𑀲𑀁𑀳𑀻𑀭𑀦𑁆𑀢𑀺 𑀦 𑀲𑀁𑀳𑀻𑀭𑀁, 𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑁂𑀦 𑀭𑀸𑀕𑁂𑀦 𑀅𑀦𑀸𑀓𑀟𑁆𑀠𑀦𑀺𑀬𑀁. 𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀦 𑀓𑀼𑀧𑁆𑀧𑀁, 𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑁂𑀦 𑀩𑁆𑀬𑀸𑀧𑀸𑀤𑁂𑀦 𑀅𑀓𑁄𑀧𑀺𑀬𑀁, 𑀏𑀯𑀁𑀪𑀽𑀢𑀁 𑀓𑀢𑁆𑀯𑀸 𑀫𑀫 𑀫𑁂𑀢𑁆𑀢𑀘𑀺𑀢𑁆𑀢𑀁 𑀆𑀫𑁄𑀤𑀬𑀸𑀫𑀺 𑀅𑀪𑀺𑀧𑁆𑀧𑀫𑁄𑀤𑀬𑀸𑀫𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀪𑀸𑀯𑁂𑀫𑀺. 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑀦𑁆𑀢𑀺, 𑀓𑀸𑀧𑀼𑀭𑀺𑀲𑁂𑀳𑀺 𑀦𑀻𑀘𑀚𑀦𑁂𑀳𑀺 𑀅𑀲𑁂𑀯𑀺𑀢𑀁, 𑀅𑀓𑀸𑀧𑀼𑀭𑀺𑀲𑁂𑀳𑀺 𑀯𑀸 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑁂𑀯𑀺𑀢𑀁 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀦𑀺𑀤𑁆𑀤𑁄𑀲𑀁 𑀫𑁂𑀢𑁆𑀢𑀸𑀤𑀺𑀯𑀺𑀳𑀸𑀭𑀁 𑀪𑀸𑀯𑁂𑀫𑀺 𑀯𑀟𑁆𑀠𑁂𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀅𑀢𑁆𑀢𑀼𑀤𑁆𑀤𑁂𑀲𑀯𑀲𑁂𑀦 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀅𑀜𑁆𑀜𑀸𑀧𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀺𑀢𑀓𑁆𑀓’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀅𑀯𑀺𑀢𑀓𑁆𑀓𑀁 𑀲𑀫𑀸𑀧𑀦𑁆𑀦𑁄𑀢𑀺, 𑀯𑀺𑀢𑀓𑁆𑀓𑀯𑀺𑀭𑀳𑀺𑀢𑀁 𑀤𑀼𑀢𑀺𑀬𑀸𑀤𑀺𑀛𑀸𑀦𑀁 𑀲𑀫𑀸𑀧𑀦𑁆𑀦𑁄, 𑀏𑀢𑁂𑀦 𑀣𑁂𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑀸 𑀤𑀼𑀢𑀺𑀬𑀸𑀤𑀺𑀛𑀸𑀦𑀸𑀥𑀺𑀕𑀫𑀫𑀸𑀳. 𑀬𑀲𑁆𑀫𑀸 𑀧𑀦𑀸𑀬𑀁 𑀣𑁂𑀭𑁄 𑀢𑀫𑁂𑀯 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑀸𑀲𑀦𑁂𑀦𑁂𑀯 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀅𑀜𑁆𑀜𑀸𑀧𑀤𑁂𑀲𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀺𑀢𑀓𑁆𑀓𑀁 𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄. 𑀅𑀭𑀺𑀬𑁂𑀦 𑀢𑀼𑀡𑁆𑀳𑀻𑀪𑀸𑀯𑁂𑀦, 𑀉𑀧𑁂𑀢𑁄 𑀳𑁄𑀢𑀺 𑀢𑀸𑀯𑀤𑁂’’𑀢𑀺 𑀆𑀳. 𑀢𑀢𑁆𑀣 𑀯𑀘𑀻𑀲𑀗𑁆𑀔𑀸𑀭𑀸𑀪𑀸𑀯𑀢𑁄 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸 𑀲𑀫𑀸𑀧𑀢𑁆𑀢𑀺 ‘‘𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 𑀯𑀤𑀦𑁆𑀢𑀺. ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑀥𑀫𑁆𑀫𑀻 𑀯𑀸 𑀓𑀣𑀸 𑀅𑀭𑀺𑀬𑁄 ¶ 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 (𑀫. 𑀦𑀺. 𑁧.𑁨𑁭𑁩) 𑀧𑀦 𑀯𑀘𑀦𑀢𑁄 𑀬𑀸 𑀓𑀸𑀘𑀺 𑀲𑀫𑀸𑀧𑀢𑁆𑀢𑀺 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫. 𑀇𑀥 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀅𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀇𑀤𑀸𑀦𑀺 𑀢𑀲𑁆𑀲𑀸𑀥𑀺𑀕𑀢𑀢𑁆𑀢𑀸 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀻𑀬𑀢𑀁 𑀉𑀧𑀫𑀸𑀬 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀣𑀸𑀧𑀺 𑀧𑀩𑁆𑀩𑀢𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄𑀢𑀺, 𑀬𑀣𑀸 𑀲𑀺𑀮𑀸𑀫𑀬𑁄 𑀏𑀓𑀖𑀦𑀲𑁂𑀮𑁄 𑀧𑀩𑁆𑀩𑀢𑁄, 𑀦 𑀧𑀁𑀲𑀼𑀧𑀩𑁆𑀩𑀢𑁄 𑀦 𑀫𑀺𑀲𑁆𑀲𑀓𑀧𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺, 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀫𑀽𑀮𑁄 𑀧𑀓𑀢𑀺𑀯𑀸𑀢𑁂𑀳𑀺 𑀅𑀘𑀮𑁄 𑀅𑀓𑀫𑁆𑀧𑀦𑀻𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀁 𑀦𑀺𑀩𑁆𑀩𑀸𑀦𑀜𑁆𑀘 𑀏𑀯𑀁 𑀫𑁄𑀳𑀓𑁆𑀔𑀬𑀸 𑀪𑀺𑀓𑁆𑀔𑀼, 𑀧𑀩𑁆𑀩𑀢𑁄𑀯 𑀦 𑀯𑁂𑀥𑀢𑀻𑀢𑀺 𑀫𑁄𑀳𑀲𑁆𑀲 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀸, 𑀫𑁄𑀳𑀫𑀽𑀮𑀓𑀢𑁆𑀢𑀸 𑀘 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀧𑀳𑀻𑀦𑀲𑀩𑁆𑀩𑀸𑀓𑀼𑀲𑀮𑁄 𑀪𑀺𑀓𑁆𑀔𑀼 𑀬𑀣𑀸 𑀲𑁄 𑀧𑀩𑁆𑀩𑀢𑁄 𑀧𑀓𑀢𑀺𑀯𑀸𑀢𑁂𑀳𑀺, 𑀏𑀯𑀁 𑀮𑁄𑀓𑀥𑀫𑁆𑀫𑁂𑀳𑀺 𑀦 𑀯𑁂𑀥𑀢𑀺 𑀦 𑀓𑀫𑁆𑀧𑀢𑀺, 𑀫𑁄𑀳𑀓𑁆𑀔𑀬𑁄𑀢𑀺 𑀯𑀸 𑀬𑀲𑁆𑀫𑀸 𑀅𑀭𑀳𑀢𑁆𑀢𑀁 𑀦𑀺𑀩𑁆𑀩𑀸𑀦𑀜𑁆𑀘 𑀯𑀼𑀘𑁆𑀘𑀢𑀺 ¶ , 𑀢𑀲𑁆𑀫𑀸 𑀫𑁄𑀳𑀓𑁆𑀔𑀬𑀸𑀢𑀺 𑀫𑁄𑀳𑀓𑁆𑀔𑀬𑀲𑁆𑀲 𑀳𑁂𑀢𑀼 𑀦𑀺𑀩𑁆𑀩𑀸𑀦𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀘 𑀅𑀥𑀺𑀕𑀢𑀢𑁆𑀢𑀸 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀅𑀲𑀫𑀸𑀧𑀦𑁆𑀦𑀓𑀸𑀮𑁂𑀧𑀺 𑀧𑀩𑁆𑀩𑀢𑁄 𑀯𑀺𑀬 𑀦 𑀯𑁂𑀥𑀢𑀺, 𑀧𑀕𑁂𑀯 𑀲𑀫𑀸𑀧𑀦𑁆𑀦𑀓𑀸𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀧𑀸𑀧𑀁 𑀦𑀸𑀫𑁂𑀢𑀁 𑀅𑀲𑀼𑀘𑀺𑀲𑀻𑀮𑁄 𑀏𑀯 𑀲𑀫𑀸𑀘𑀭𑀢𑀺, 𑀦 𑀘 𑀲𑀼𑀘𑀺𑀲𑀻𑀮𑁄, 𑀲𑀼𑀘𑀺𑀲𑀻𑀮𑀲𑁆𑀲 𑀧𑀦 𑀢𑀁 𑀅𑀡𑀼𑀫𑀢𑁆𑀢𑀫𑁆𑀧𑀺 𑀪𑀸𑀭𑀺𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀗𑁆𑀕𑀡𑀲𑁆𑀲𑀸’’𑀢𑀺𑀆𑀤𑀺𑀕𑀸𑀣𑀫𑀸𑀳 ¶ . 𑀢𑀲𑁆𑀲𑀢𑁆𑀣𑁄 𑁋 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀪𑀸𑀯𑀢𑁄 𑀅𑀦𑀗𑁆𑀕𑀡𑀲𑁆𑀲 𑀲𑀩𑁆𑀩𑀓𑀸𑀮𑀁 𑀲𑀼𑀘𑀺𑀅𑀦𑀯𑀚𑁆𑀚𑀥𑀫𑁆𑀫𑁂 𑀏𑀯 𑀕𑀯𑁂𑀲𑀦𑁆𑀢𑀲𑁆𑀲 𑀲𑀧𑁆𑀧𑀼𑀭𑀺𑀲𑀲𑁆𑀲 𑀯𑀸𑀮𑀕𑁆𑀕𑀫𑀢𑁆𑀢𑀁 𑀓𑁂𑀲𑀕𑁆𑀕𑀫𑀢𑁆𑀢𑀁 𑀧𑀸𑀧𑀲𑁆𑀲 𑀮𑁂𑀲𑀫𑀢𑁆𑀢𑀫𑁆𑀧𑀺 𑀲𑀓𑀮𑀁 𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀅𑀩𑁆𑀪𑀫𑀢𑁆𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀦 𑀏𑀯𑀭𑀽𑀧𑁂 𑀓𑀫𑁆𑀫𑁂 𑀫𑀸𑀤𑀺𑀲𑀸 𑀆𑀲𑀗𑁆𑀓𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁆𑀫𑀸 𑀦𑀺𑀓𑁆𑀓𑀺𑀮𑁂𑀲𑁂𑀲𑀼𑀧𑀺 𑀅𑀦𑁆𑀥𑀩𑀸𑀮𑀸 𑀏𑀯𑀭𑀽𑀧𑁂 𑀅𑀧𑀯𑀸𑀤𑁂 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀓𑀸𑀫𑁂𑀳𑀺 𑀲𑀓𑁆𑀓𑀘𑁆𑀘𑀁 𑀅𑀢𑁆𑀢𑀸 𑀭𑀓𑁆𑀔𑀺𑀢𑀩𑁆𑀩𑁄𑀢𑀺 𑀑𑀯𑀸𑀤𑀁 𑀤𑁂𑀦𑁆𑀢𑁄 ‘‘𑀦𑀕𑀭𑀁 𑀬𑀣𑀸’’𑀢𑀺𑀆𑀤𑀺𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀧𑀦 𑀧𑀘𑁆𑀘𑀦𑁆𑀢𑀦𑀕𑀭𑀯𑀸𑀲𑀻𑀳𑀺 𑀫𑀦𑀼𑀲𑁆𑀲𑁂𑀳𑀺 𑀧𑀘𑁆𑀘𑀦𑁆𑀢𑀁 𑀦𑀕𑀭𑀁 𑀤𑁆𑀯𑀸𑀭𑀧𑀸𑀓𑀸𑀭𑀸𑀤𑀻𑀦𑀺 𑀣𑀺𑀭𑀸𑀦𑀺 𑀓𑀭𑁄𑀦𑁆𑀢𑁂𑀳𑀺 𑀲𑀅𑀦𑁆𑀢𑀭𑀁, 𑀉𑀤𑁆𑀤𑀸𑀧𑀧𑀭𑀺𑀔𑀸𑀤𑀻𑀦𑀺 𑀣𑀺𑀭𑀸𑀦𑀺 𑀓𑀭𑁄𑀦𑁆𑀢𑁂𑀳𑀺 𑀲𑀩𑀸𑀳𑀺𑀭𑀦𑁆𑀢𑀺 𑀲𑀦𑁆𑀢𑀭𑀩𑀸𑀳𑀺𑀭𑀁 𑀕𑀼𑀢𑁆𑀢𑀁 𑀓𑀭𑀻𑀬𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀳𑀺𑀧𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀤𑁆𑀯𑀸𑀭𑀭𑀓𑁆𑀔𑀺𑀢𑀁 𑀲𑀢𑀺𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀬𑀣𑀸 𑀕𑀬𑁆𑀳𑀫𑀸𑀦𑀸𑀦𑀺 𑀩𑀸𑀳𑀺𑀭𑀸𑀦𑀺 𑀙 𑀆𑀬𑀢𑀦𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀉𑀧𑀖𑀸𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀣𑀸 𑀅𑀕𑁆𑀕𑀳𑀡𑁂𑀦 𑀢𑀸𑀦𑀺𑀧𑀺 𑀣𑀺𑀭𑀸𑀦𑀺 𑀓𑀢𑁆𑀯𑀸 𑀢𑁂𑀲𑀁 𑀅𑀧𑁆𑀧𑀯𑁂𑀲𑀸𑀬 𑀤𑁆𑀯𑀸𑀭𑀭𑀓𑁆𑀔𑀺𑀢𑀁 𑀲𑀢𑀺𑀁 𑀅𑀧𑁆𑀧𑀳𑀸𑀬 𑀯𑀺𑀘𑀭𑀦𑁆𑀢𑀸 𑀅𑀢𑁆𑀢𑀸𑀦𑀁 𑀕𑁄𑀧𑁂𑀣. 𑀓𑀲𑁆𑀫𑀸? 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸. 𑀬𑁄 𑀳𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀦 𑀕𑁄𑀧𑁂𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄, 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀓𑁆𑀔𑀡𑁄, 𑀫𑀚𑁆𑀛𑀺𑀫𑀤𑁂𑀲𑁂 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀝𑀺𑀮𑀤𑁆𑀥𑀓𑁆𑀔𑀡𑁄, 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀯𑁂𑀓𑀮𑁆𑀮𑀓𑁆𑀔𑀡𑁄𑀢𑀺 𑀲𑀩𑁆𑀩𑁄𑀧𑀺 𑀅𑀬𑀁 𑀔𑀡𑁄 𑀅𑀢𑀺𑀓𑁆𑀓𑀫𑀢𑀺, 𑀲𑁄 𑀔𑀡𑁄 𑀢𑀼𑀫𑁆𑀳𑁂 𑀫𑀸 𑀅𑀢𑀺𑀓𑁆𑀓𑀫𑀢𑀽𑀢𑀺.

𑀏𑀯𑀁 ¶ 𑀣𑁂𑀭𑁄 𑀇𑀫𑀸𑀬 𑀕𑀸𑀣𑀸𑀬 𑀲𑀭𑀸𑀚𑀺𑀓𑀁 𑀧𑀭𑀺𑀲𑀁 𑀪𑀺𑀓𑁆𑀔𑀽 𑀘 𑀑𑀯𑀤𑀺𑀢𑁆𑀯𑀸 𑀧𑀼𑀦 𑀫𑀭𑀡𑁂 𑀚𑀻𑀯𑀺𑀢𑁂 𑀘 𑀅𑀢𑁆𑀢𑀦𑁄 𑀲𑀫𑀘𑀺𑀢𑁆𑀢𑀢𑀁 𑀓𑀢𑀓𑀺𑀘𑁆𑀘𑀢𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁬𑁦𑁭).

𑀏𑀯𑀁 𑀧𑀦 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀉𑀧𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀦𑁂𑀲𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀯𑁂𑀤𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀫𑁆𑀧𑀸𑀤𑁂𑀣𑀧𑁆𑀧𑀫𑀸𑀤𑁂𑀦𑀸𑀢𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀤𑀸𑀦𑀲𑀻𑀮𑀸𑀤𑀺𑀁 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀪𑁂𑀤𑁂 𑀕𑀳𑀝𑁆𑀞𑀯𑀢𑁆𑀢𑁂 𑀲𑀻𑀮𑀸𑀦𑀼𑀭𑀓𑁆𑀔𑀡𑁂 𑀲𑀫𑀣𑀅𑀦𑀼𑀬𑁄𑀕𑁂 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀘 ¶ 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣. 𑀏𑀲𑀸 𑀫𑁂 𑀅𑀦𑀼𑀲𑀸𑀲𑀦𑀻𑀢𑀺 𑀤𑀸𑀦𑀲𑀻𑀮𑀸𑀤𑀻𑀲𑀼 𑀦 𑀧𑀫𑀚𑁆𑀚𑀣𑀸𑀢𑀺 𑀏𑀲𑀸 𑀫𑀫 𑀅𑀦𑀼𑀲𑀺𑀝𑁆𑀞𑀺 𑀑𑀯𑀸𑀤𑁄.

𑀏𑀯𑀁 ¶ 𑀲𑀺𑀔𑀸𑀧𑀢𑁆𑀢𑀁 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀻𑀧𑁂𑀢𑁆𑀯𑀸 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀫𑀢𑁆𑀣𑀓𑀁 𑀕𑀡𑁆𑀳𑀦𑁆𑀢𑁄 ‘‘𑀳𑀦𑁆𑀤𑀸𑀳𑀁 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀁, 𑀯𑀺𑀧𑁆𑀧𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻’’𑀢𑀺 𑀆𑀳. 𑀢𑀢𑁆𑀣 𑀯𑀺𑀧𑁆𑀧𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑁂𑀳𑀺 𑀪𑀯𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄 𑀅𑀫𑁆𑀳𑀺, 𑀢𑀲𑁆𑀫𑀸 𑀏𑀓𑀁𑀲𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻𑀢𑀺.

𑀏𑀯𑀁 𑀧𑀦 𑀯𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀚𑁆𑀚𑀮𑀦𑁆𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑁄𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀬𑀣𑀸𑀧𑀺 𑀪𑀤𑁆𑀤𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀕𑁄𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑀢𑁆𑀣𑀯𑀸𑀳𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀕𑁄𑀤𑀢𑁆𑀢𑁄𑀢𑀺 𑀦𑀸𑀫𑁂𑀦 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀭𑀺 𑀓𑀸𑀮𑀗𑁆𑀓𑀢𑁂 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀦𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀡𑁆𑀟𑀁 𑀆𑀤𑀸𑀬 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀺𑀢𑁆𑀯𑀸 𑀯𑀸𑀡𑀺𑀚𑁆𑀚𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀬𑀣𑀸𑀯𑀺𑀪𑀯𑀁 𑀧𑀼𑀜𑁆𑀜𑀸𑀦𑀺𑀧𑀺 𑀓𑀭𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀥𑀼𑀭𑁂 𑀬𑀼𑀢𑁆𑀢𑀕𑁄𑀡𑁂 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀧𑀢𑀺𑀢𑁂 𑀫𑀦𑀼𑀲𑁆𑀲𑁂𑀲𑀼 𑀢𑀁 𑀯𑀼𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀲𑀼 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀢𑀁 𑀦𑀗𑁆𑀕𑀼𑀝𑁆𑀞𑁂 𑀕𑀸𑀴𑁆𑀳𑀁 𑀯𑀺𑀚𑁆𑀛𑀺. 𑀕𑁄𑀡𑁄 ‘‘𑀅𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀫𑀫 𑀩𑀮𑀸𑀩𑀮𑀁 𑀅𑀚𑀸𑀦𑀦𑁆𑀢𑁄 𑀕𑀸𑀴𑁆𑀳𑀁 𑀯𑀺𑀚𑁆𑀛𑀢𑀻’’𑀢𑀺 𑀓𑀼𑀤𑁆𑀥𑁄 𑀫𑀦𑀼𑀲𑁆𑀲𑀯𑀸𑀘𑀸𑀬, ‘‘𑀪𑁄 𑀕𑁄𑀤𑀢𑁆𑀢, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀢𑁆𑀢𑀦𑁄 𑀩𑀮𑀁 𑀅𑀦𑀺𑀕𑀼𑀳𑀦𑁆𑀢𑁄 𑀢𑀼𑀬𑁆𑀳𑀁 ¶ 𑀪𑀸𑀭𑀁 𑀯𑀳𑀺𑀁, 𑀅𑀚𑁆𑀚 𑀧𑀦 𑀅𑀲𑀫𑀢𑁆𑀣𑀪𑀸𑀯𑁂𑀦 𑀧𑀢𑀺𑀢𑀁 𑀫𑀁 𑀅𑀢𑀺𑀯𑀺𑀬 𑀩𑀸𑀥𑀲𑀺, 𑀳𑁄𑀢𑀼, 𑀇𑀢𑁄 𑀘𑀯𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀢𑀁 𑀩𑀸𑀥𑁂𑀢𑀼𑀁 𑀲𑀫𑀢𑁆𑀣𑁄 𑀧𑀝𑀺𑀲𑀢𑁆𑀢𑀼 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀸𑀦𑀼𑀭𑀽𑀧𑁂𑀦 𑀅𑀓𑁆𑀓𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑁄𑀤𑀢𑁆𑀢𑁄 ‘‘𑀏𑀯𑀁 𑀦𑀸𑀫 𑀲𑀢𑁆𑀢𑁂 𑀩𑀸𑀥𑁂𑀢𑁆𑀯𑀸 𑀓𑀺𑀁 𑀇𑀫𑀸𑀬 𑀚𑀻𑀯𑀺𑀓𑀸𑀬𑀸’’𑀢𑀺 𑀲𑀁𑀯𑁂𑀕𑀚𑀸𑀢𑁄 𑀲𑀩𑁆𑀩𑀁 𑀯𑀺𑀪𑀯𑀁 𑀧𑀳𑀸𑀬 𑀅𑀜𑁆𑀜𑀢𑀭𑀲𑁆𑀲 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀺𑀬𑀕𑀡𑀸𑀦𑀁 𑀮𑁄𑀓𑀥𑀫𑁆𑀫𑁂 𑀆𑀭𑀩𑁆𑀪 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

𑁬𑁫𑁯.

‘‘𑀬𑀣𑀸𑀧𑀺 ¶ 𑀪𑀤𑁆𑀤𑁄 𑀆𑀚𑀜𑁆𑀜𑁄, 𑀥𑀼𑀭𑁂 𑀬𑀼𑀢𑁆𑀢𑁄 𑀥𑀼𑀭𑀲𑁆𑀲𑀳𑁄;

𑀫𑀣𑀺𑀢𑁄 𑀅𑀢𑀺𑀪𑀸𑀭𑁂𑀦, 𑀲𑀁𑀬𑀼𑀕𑀁 𑀦𑀸𑀢𑀺𑀯𑀢𑁆𑀢𑀢𑀺.

𑁬𑁬𑁦.

‘‘𑀏𑀯𑀁 𑀧𑀜𑁆𑀜𑀸𑀬 𑀬𑁂 𑀢𑀺𑀢𑁆𑀢𑀸, 𑀲𑀫𑀼𑀤𑁆𑀤𑁄 𑀯𑀸𑀭𑀺𑀦𑀸 𑀬𑀣𑀸;

𑀦 𑀧𑀭𑁂 𑀅𑀢𑀺𑀫𑀜𑁆𑀜𑀦𑁆𑀢𑀺, 𑀅𑀭𑀺𑀬𑀥𑀫𑁆𑀫𑁄𑀯 𑀧𑀸𑀡𑀺𑀦𑀁.

𑁬𑁬𑁧.

‘‘𑀓𑀸𑀮𑁂 ¶ 𑀓𑀸𑀮𑀯𑀲𑀁 𑀧𑀢𑁆𑀢𑀸, 𑀪𑀯𑀸𑀪𑀯𑀯𑀲𑀁 𑀕𑀢𑀸;

𑀦𑀭𑀸 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀺, 𑀢𑁂𑀥 𑀲𑁄𑀘𑀦𑁆𑀢𑀺 𑀫𑀸𑀡𑀯𑀸.

𑁬𑁬𑁨.

‘‘𑀉𑀦𑁆𑀦𑀢𑀸 𑀲𑀼𑀔𑀥𑀫𑁆𑀫𑁂𑀦, 𑀤𑀼𑀓𑁆𑀔𑀥𑀫𑁆𑀫𑁂𑀦 𑀘𑁄𑀦𑀢𑀸;

𑀤𑁆𑀯𑀬𑁂𑀦 𑀩𑀸𑀮𑀸 𑀳𑀜𑁆𑀜𑀦𑁆𑀢𑀺, 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀺𑀦𑁄.

𑁬𑁬𑁩.

‘‘𑀬𑁂 𑀘 𑀤𑀼𑀓𑁆𑀔𑁂 𑀲𑀼𑀔𑀲𑁆𑀫𑀺𑀜𑁆𑀘, 𑀫𑀚𑁆𑀛𑁂 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀽;

𑀞𑀺𑀢𑀸 𑀢𑁂 𑀇𑀦𑁆𑀤𑀔𑀻𑀮𑁄𑀯, 𑀦 𑀢𑁂 𑀉𑀦𑁆𑀦𑀢𑀑𑀦𑀢𑀸.

𑁬𑁬𑁪.

‘‘𑀦 𑀳𑁂𑀯 𑀮𑀸𑀪𑁂 𑀦𑀸𑀮𑀸𑀪𑁂, 𑀦 𑀬𑀲𑁂 𑀦 𑀘 𑀓𑀺𑀢𑁆𑀢𑀺𑀬𑀸;

𑀦 𑀦𑀺𑀦𑁆𑀤𑀸𑀬𑀁 𑀧𑀲𑀁𑀲𑀸𑀬, 𑀦 𑀢𑁂 𑀤𑀼𑀓𑁆𑀔𑁂 𑀲𑀼𑀔𑀫𑁆𑀳𑀺 𑀘.

𑁬𑁬𑁫.

‘‘𑀲𑀩𑁆𑀩𑀢𑁆𑀣 𑀢𑁂 𑀦 𑀮𑀺𑀫𑁆𑀧𑀦𑁆𑀢𑀺, 𑀉𑀤𑀩𑀺𑀦𑁆𑀤𑀼𑀯 𑀧𑁄𑀓𑁆𑀔𑀭𑁂;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀥𑀻𑀭𑀸, 𑀲𑀩𑁆𑀩𑀢𑁆𑀣 𑀅𑀧𑀭𑀸𑀚𑀺𑀢𑀸.

𑁬𑁬𑁬.

‘‘𑀥𑀫𑁆𑀫𑁂𑀦 𑀘 𑀅𑀮𑀸𑀪𑁄 𑀬𑁄, 𑀬𑁄 𑀘 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄;

𑀅𑀮𑀸𑀪𑁄 𑀥𑀫𑁆𑀫𑀺𑀓𑁄 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄.

𑁬𑁬𑁭.

‘‘𑀬𑀲𑁄 𑀘 𑀅𑀧𑁆𑀧𑀩𑀼𑀤𑁆𑀥𑀻𑀦𑀁, 𑀯𑀺𑀜𑁆𑀜𑀽𑀦𑀁 𑀅𑀬𑀲𑁄 𑀘 𑀬𑁄;

𑀅𑀬𑀲𑁄𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀦𑀁, 𑀦 𑀬𑀲𑁄 𑀅𑀧𑁆𑀧𑀩𑀼𑀤𑁆𑀥𑀺𑀦𑀁.

𑁬𑁬𑁮.

‘‘𑀤𑀼𑀫𑁆𑀫𑁂𑀥𑁂𑀳𑀺 𑀧𑀲𑀁𑀲𑀸 𑀘, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀸 𑀘 𑀬𑀸;

𑀕𑀭𑀳𑀸𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀳𑀺, 𑀬𑀜𑁆𑀘𑁂 𑀩𑀸𑀮𑀧𑁆𑀧𑀲𑀁𑀲𑀦𑀸.

𑁬𑁬𑁯.

‘‘𑀲𑀼𑀔𑀜𑁆𑀘 𑀓𑀸𑀫𑀫𑀬𑀺𑀓𑀁, 𑀤𑀼𑀓𑁆𑀔𑀜𑁆𑀘 𑀧𑀯𑀺𑀯𑁂𑀓𑀺𑀬𑀁;

𑀧𑀯𑀺𑀯𑁂𑀓𑀤𑀼𑀓𑁆𑀔𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀓𑀸𑀫𑀫𑀬𑀁 𑀲𑀼𑀔𑀁.

𑁬𑁭𑁦.

‘‘𑀚𑀻𑀯𑀺𑀢𑀜𑁆𑀘 ¶ 𑀅𑀥𑀫𑁆𑀫𑁂𑀦, 𑀥𑀫𑁆𑀫𑁂𑀦 𑀫𑀭𑀡𑀜𑁆𑀘 𑀬𑀁;

𑀫𑀭𑀡𑀁 𑀥𑀫𑁆𑀫𑀺𑀓𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀅𑀥𑀫𑁆𑀫𑀺𑀓𑀁.

𑁬𑁭𑁧.

‘‘𑀓𑀸𑀫𑀓𑁄𑀧𑀧𑁆𑀧𑀳𑀻𑀦𑀸 ¶ 𑀬𑁂, 𑀲𑀦𑁆𑀢𑀘𑀺𑀢𑁆𑀢𑀸 𑀪𑀯𑀸𑀪𑀯𑁂;

𑀘𑀭𑀦𑁆𑀢𑀺 𑀮𑁄𑀓𑁂 𑀅𑀲𑀺𑀢𑀸, 𑀦𑀢𑁆𑀣𑀺 𑀢𑁂𑀲𑀁 𑀧𑀺𑀬𑀸𑀧𑀺𑀬𑀁.

𑁬𑁭𑁨.

‘‘𑀪𑀸𑀯𑀬𑀺𑀢𑁆𑀯𑀸𑀦 𑀩𑁄𑀚𑁆𑀛𑀗𑁆𑀕𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀆𑀚𑀜𑁆𑀜𑁄𑀢𑀺, 𑀉𑀲𑀪𑀸𑀚𑀸𑀦𑀻𑀬𑁄. 𑀥𑀼𑀭𑁂 𑀬𑀼𑀢𑁆𑀢𑁄𑀢𑀺, 𑀲𑀓𑀝𑀥𑀼𑀭𑁂 𑀬𑁄𑀚𑀺𑀢𑁄. 𑀥𑀼𑀭𑀲𑁆𑀲𑀳𑁄𑀢𑀺, 𑀥𑀼𑀭𑀯𑀸𑀳𑁄. 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀘𑁂𑀢𑁆𑀣 𑀤𑁆𑀯𑀺𑀲𑀓𑀸𑀭𑀢𑁄 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀲𑀓𑀝𑀪𑀸𑀭𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀫𑀣𑀺𑀢𑁄 𑀅𑀢𑀺𑀪𑀸𑀭𑁂𑀦𑀸𑀢𑀺, 𑀅𑀢𑀺𑀪𑀸𑀭𑁂𑀦 𑀕𑀭𑀼𑀪𑀸𑀭𑁂𑀦 𑀧𑀻𑀴𑀺𑀢𑁄. ‘‘𑀫𑀤𑁆𑀤𑀺𑀢𑁄’’𑀢𑀺𑀧𑀺 𑀧𑀸𑀴𑀺, 𑀲𑁄 𑀏𑀯𑀢𑁆𑀣𑁄. 𑀲𑀁𑀬𑀼𑀕𑀦𑁆𑀢𑀺, 𑀅𑀢𑁆𑀢𑀦𑁄 𑀔𑀦𑁆𑀥𑁂 𑀞𑀧𑀺𑀢𑀁 𑀬𑀼𑀕𑀁 𑀦𑀸𑀢𑀺𑀯𑀢𑁆𑀢𑀢𑀺 𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀲𑀫𑁆𑀫𑀸 𑀬𑁄 𑀉𑀤𑁆𑀥𑀭𑀺𑀢𑁆𑀯𑀸 𑀥𑀼𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺. 𑀏𑀯𑀦𑁆𑀢𑀺 𑀬𑀣𑀸 𑀲𑁄 𑀥𑁄𑀭𑀬𑁆𑀳𑁄 𑀅𑀢𑁆𑀢𑀦𑁄 𑀪𑀤𑁆𑀭𑀸𑀚𑀸𑀦𑀻𑀬𑀢𑀸𑀬 𑀅𑀢𑁆𑀢𑀦𑁄 𑀥𑀻𑀭𑀯𑀻𑀭𑀢𑀸𑀬 𑀅𑀢𑁆𑀢𑀦𑁄 𑀪𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺 𑀦 𑀧𑀭𑀺𑀘𑁆𑀘𑀚𑀢𑀺, 𑀏𑀯𑀁 𑀬𑁂 𑀯𑀸𑀭𑀺𑀦𑀸 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀢𑀺𑀢𑁆𑀢𑀸 𑀥𑀸𑀢𑀸 𑀧𑀭𑀺𑀧𑀼𑀡𑁆𑀡𑀸, 𑀢𑁂 𑀧𑀭𑁂 𑀦𑀺𑀳𑀻𑀦𑀧𑀜𑁆𑀜𑁂 𑀦 𑀅𑀢𑀺𑀫𑀜𑁆𑀜𑀦𑁆𑀢𑀺, 𑀦 𑀧𑀭𑀺𑀪𑀯𑀦𑁆𑀢𑀺. 𑀢𑀢𑁆𑀣 ¶ 𑀓𑀸𑀭𑀡𑀫𑀸𑀳 ‘‘𑀅𑀭𑀺𑀬𑀥𑀫𑁆𑀫𑁄𑀯 𑀧𑀸𑀡𑀺𑀦’’𑀦𑁆𑀢𑀺, 𑀧𑀸𑀡𑀺𑀦𑀁 𑀲𑀢𑁆𑀢𑁂𑀲𑀼 𑀅𑀬𑀁 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄 𑀬𑀤𑀺𑀤𑀁 𑀢𑁂𑀲𑀁 𑀧𑀜𑁆𑀜𑀸𑀬 𑀧𑀸𑀭𑀺𑀧𑀽𑀭𑀺𑀁 𑀕𑀢𑀢𑁆𑀢𑀸 𑀮𑀸𑀪𑀸𑀤𑀺𑀦𑀸 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑀦𑀁 𑀯𑀺𑀬 𑀅𑀮𑀸𑀪𑀸𑀤𑀺𑀦𑀸 𑀧𑀭𑁂𑀲𑀁 𑀅𑀯𑀫𑁆𑀪𑀦𑀁.

𑀏𑀯𑀁 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀬𑀸 𑀅𑀭𑀺𑀬𑀸𑀦𑀁 𑀲𑀼𑀔𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀪𑀸𑀯𑀢𑁄 𑀅𑀦𑀭𑀺𑀬𑀸𑀦𑀁 𑀤𑀼𑀓𑁆𑀔𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀮𑁂𑀢𑀺 𑀮𑀸𑀪𑀸𑀮𑀸𑀪𑀸𑀤𑀺𑀦𑀸 𑀲𑀫𑀗𑁆𑀕𑀻𑀪𑀽𑀢𑀓𑀸𑀮𑁂. 𑀓𑀸𑀮𑀯𑀲𑀁 𑀧𑀢𑁆𑀢𑀸𑀢𑀺 𑀮𑀸𑀪𑀸𑀤𑀺𑀓𑀸𑀮𑀲𑁆𑀲 𑀘 𑀯𑀲𑀁 𑀉𑀧𑀕𑀢𑀸, 𑀮𑀸𑀪𑀸𑀤𑀺𑀦𑀸 𑀲𑁄𑀫𑀦𑀲𑁆𑀲𑀺𑀢𑀸 𑀅𑀮𑀸𑀪𑀸𑀤𑀺𑀦𑀸 𑀘 𑀤𑁄𑀫𑀦𑀲𑁆𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀪𑀯𑀸𑀪𑀯𑀯𑀲𑀁 𑀕𑀢𑀸𑀢𑀺 𑀪𑀯𑀲𑁆𑀲 𑀅𑀪𑀯𑀲𑁆𑀲 𑀘 𑀯𑀲𑀁 𑀉𑀧𑀕𑀢𑀸 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀅𑀦𑀼𑀯𑀢𑁆𑀢𑀦𑁆𑀢𑀸 𑀢𑁂. 𑀦𑀭𑀸 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀺, 𑀢𑁂𑀥 𑀲𑁄𑀘𑀦𑁆𑀢𑀺 𑀫𑀸𑀡𑀯𑀸𑀢𑀺 𑀢𑁂 𑀦𑀭𑀸 ‘‘𑀫𑀸𑀡𑀯𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀲𑀢𑁆𑀢𑀸 𑀮𑀸𑀪𑀸𑀮𑀸𑀪𑀸𑀤𑀺𑀯𑀲𑁂𑀦 𑀯𑀼𑀤𑁆𑀥𑀺𑀳𑀸𑀦𑀺𑀯𑀲𑁂𑀦 𑀅𑀦𑀼𑀭𑁄𑀥𑀧𑀝𑀺𑀯𑀺𑀭𑁄𑀥𑀁 𑀆𑀧𑀦𑁆𑀦𑀸 𑀇𑀥𑀮𑁄𑀓𑁂 𑀲𑁄𑀘𑀦𑁆𑀢𑀺, 𑀧𑀭𑀮𑁄𑀓𑁂 𑀘 𑀦𑀺𑀭𑀬𑀸𑀤𑀺𑀤𑀼𑀓𑁆𑀔𑀁 𑀕𑀘𑁆𑀙𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

‘‘𑀉𑀦𑁆𑀦𑀢𑀸’’𑀢𑀺𑀆𑀤𑀺𑀦𑀸𑀧𑀺 ¶ 𑀮𑁄𑀓𑀥𑀫𑁆𑀫𑀯𑀲𑁂𑀦 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀧𑁆𑀧𑀢𑁆𑀢𑀺𑀫𑁂𑀯 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀉𑀦𑁆𑀦𑀢𑀸 𑀲𑀼𑀔𑀥𑀫𑁆𑀫𑁂𑀦𑀸𑀢𑀺 𑀲𑀼𑀔𑀳𑁂𑀢𑀼𑀦𑀸 𑀲𑀼𑀔𑀧𑀘𑁆𑀘𑀬𑁂𑀦 𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀉𑀦𑁆𑀦𑀢𑀺𑀁 𑀕𑀢𑀸, 𑀪𑁄𑀕𑀫𑀤𑀸𑀤𑀺𑀦𑀸 𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀥𑀫𑁆𑀫𑁂𑀦 𑀘𑁄𑀦𑀢𑀸𑀢𑀺 𑀤𑀼𑀓𑁆𑀔𑀳𑁂𑀢𑀼𑀦𑀸 𑀤𑀼𑀓𑁆𑀔𑀧𑀘𑁆𑀘𑀬𑁂𑀦 𑀪𑁄𑀕𑀯𑀺𑀧𑀢𑁆𑀢𑀺𑀆𑀤𑀺𑀦𑀸 𑀦𑀺𑀳𑀻𑀦𑀢𑀁 𑀕𑀢𑀸 𑀤𑀸𑀮𑀺𑀤𑁆𑀤𑀺𑀬𑀸𑀤𑀺𑀦𑀸 𑀓𑀸𑀧𑀜𑁆𑀜𑀢𑀁 𑀧𑀢𑁆𑀢𑀸. 𑀤𑁆𑀯𑀬𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀉𑀦𑁆𑀦𑀢𑀺𑀑𑀦𑀢𑀺𑀤𑁆𑀯𑀬𑁂𑀦 𑀮𑀸𑀪𑀸𑀮𑀸𑀪𑀸𑀤𑀺𑀤𑁆𑀯𑀬𑁂𑀦 ¶ 𑀯𑀸 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀳𑀜𑁆𑀜𑀦𑁆𑀢𑀺, 𑀅𑀦𑀼𑀭𑁄𑀥𑀧𑀝𑀺𑀯𑀺𑀭𑁄𑀥𑀯𑀲𑁂𑀦 𑀯𑀺𑀩𑀸𑀥𑀻𑀬𑀦𑁆𑀢𑀺 𑀧𑀻𑀴𑀺𑀬𑀦𑁆𑀢𑀺. 𑀓𑀲𑁆𑀫𑀸? 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀺𑀦𑁄 𑀬𑀲𑁆𑀫𑀸 𑀢𑁂 𑀥𑀫𑁆𑀫𑀲𑀪𑀸𑀯𑀁 𑀬𑀸𑀣𑀸𑀯𑀢𑁄 𑀦𑀩𑁆𑀪𑀜𑁆𑀜𑀁𑀲𑀼, 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀸 𑀧𑀳𑀻𑀦𑀓𑀺𑀮𑁂𑀲𑀸 𑀘 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. ‘‘𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀅𑀤𑀲𑁆𑀲𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀬𑁂 𑀘 𑀤𑀼𑀓𑁆𑀔𑁂 𑀲𑀼𑀔𑀲𑁆𑀫𑀺𑀜𑁆𑀘, 𑀫𑀚𑁆𑀛𑁂 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀽𑀢𑀺 𑀬𑁂 𑀧𑀦 𑀅𑀭𑀺𑀬𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀼𑀔𑀯𑁂𑀤𑀦𑀸𑀬 𑀫𑀚𑁆𑀛𑀢𑁆𑀢𑀢𑀸𑀯𑁂𑀤𑀦𑀸𑀬 𑀘 𑀢𑀧𑁆𑀧𑀝𑀺𑀩𑀤𑁆𑀥𑀁 𑀙𑀦𑁆𑀤𑀭𑀸𑀕𑀪𑀽𑀢𑀁 𑀲𑀺𑀩𑁆𑀩𑀺𑀦𑀺𑀁 𑀢𑀡𑁆𑀳𑀁 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀘𑁆𑀘𑀕𑀽 𑀅𑀢𑀺𑀓𑁆𑀓𑀫𑀺𑀁𑀲𑀼, 𑀢𑁂 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀯𑀸𑀢𑁂𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑀸 𑀞𑀺𑀢𑀸, 𑀦 𑀢𑁂 𑀉𑀦𑁆𑀦𑀢𑀑𑀦𑀢𑀸, 𑀓𑀤𑀸𑀘𑀺𑀧𑀺 𑀉𑀦𑁆𑀦𑀢𑀸 𑀯𑀸 𑀑𑀦𑀢𑀸 𑀯𑀸 𑀦 𑀳𑁄𑀦𑁆𑀢𑀺 𑀲𑀩𑁆𑀩𑀲𑁄 𑀅𑀦𑀼𑀦𑀬𑀧𑀝𑀺𑀖𑀸𑀪𑀸𑀯𑀢𑁄.

𑀏𑀯𑀁 𑀯𑁂𑀤𑀦𑀸𑀥𑀺𑀝𑁆𑀞𑀸𑀦𑀁 𑀅𑀭𑀳𑀢𑁄 𑀅𑀦𑀼𑀧𑀮𑁂𑀧𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀲𑀩𑁆𑀩𑀢𑁆𑀣𑀓𑀫𑁂𑀯𑀲𑁆𑀲 𑀅𑀦𑀼𑀧𑀮𑁂𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀳𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑀸𑀪𑁂𑀢𑀺 𑀘𑀻𑀯𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀧𑀝𑀺𑀮𑀸𑀪𑁂. 𑀅𑀮𑀸𑀪𑁂𑀢𑀺 𑀢𑁂𑀲𑀁𑀬𑁂𑀯 𑀅𑀧𑁆𑀧𑀝𑀺𑀮𑀸𑀪𑁂 𑀅𑀧𑀕𑀫𑁂. 𑀦 𑀬𑀲𑁂𑀢𑀺 𑀧𑀭𑀺𑀯𑀸𑀭𑀳𑀸𑀦𑀺𑀬𑀁 𑀅𑀓𑀺𑀢𑁆𑀢𑀺𑀬𑀜𑁆𑀘. 𑀓𑀺𑀢𑁆𑀢𑀺𑀬𑀸𑀢𑀺 𑀧𑀭𑀫𑁆𑀫𑀼𑀔𑀸 𑀓𑀺𑀢𑁆𑀢𑀦𑁂 𑀧𑀢𑁆𑀣𑀝𑀬𑀲𑀢𑀸𑀬𑀁. 𑀦𑀺𑀦𑁆𑀤𑀸𑀬𑀦𑁆𑀢𑀺 𑀲𑀫𑁆𑀫𑀼𑀔𑀸 𑀕𑀭𑀳𑀸𑀬𑀁. 𑀧𑀲𑀁𑀲𑀸𑀬𑀦𑁆𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀕𑀼𑀡𑀸𑀪𑀺𑀢𑁆𑀣𑀯𑀦𑁂. 𑀤𑀼𑀓𑁆𑀔𑁂𑀢𑀺 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂. 𑀲𑀼𑀔𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀲𑀩𑁆𑀩𑀢𑁆𑀣𑀸𑀢𑀺 ¶ 𑀲𑀩𑁆𑀩𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀅𑀝𑁆𑀞𑀯𑀺𑀥𑁂𑀧𑀺 𑀮𑁄𑀓𑀥𑀫𑁆𑀫𑁂, 𑀲𑀩𑁆𑀩𑀢𑁆𑀣 𑀯𑀸 𑀭𑀽𑀧𑀸𑀤𑀺𑀓𑁂 𑀯𑀺𑀲𑀬𑁂 𑀢𑁂 𑀔𑀻𑀡𑀸𑀲𑀯𑀸 𑀦 𑀮𑀺𑀫𑁆𑀧𑀦𑁆𑀢𑀺 𑀲𑀩𑁆𑀩𑀲𑁄 𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸. 𑀬𑀣𑀸 𑀓𑀺𑀁? 𑀉𑀤𑀩𑀺𑀦𑁆𑀤𑀼𑀯 𑀧𑁄𑀓𑁆𑀔𑀭𑁂 𑀬𑀣𑀸 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀅𑀮𑁆𑀮𑀻𑀬𑀺𑀢𑁆𑀯𑀸 𑀞𑀺𑀢𑀫𑁆𑀧𑀺 𑀢𑁂𑀦 𑀦 𑀮𑀺𑀫𑁆𑀧𑀢𑀺, 𑀚𑀮𑀩𑀺𑀦𑁆𑀤𑀼𑀦𑀸 𑀘 𑀓𑀫𑀮𑀤𑀮𑀁, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀲𑀁𑀲𑀝𑁆𑀞𑀫𑁂𑀯, 𑀏𑀯𑀫𑁂𑀢𑁂𑀧𑀺 𑀉𑀧𑀝𑁆𑀞𑀺𑀢𑁂 𑀮𑀸𑀪𑀸𑀤𑀺𑀓𑁂, 𑀆𑀧𑀸𑀣𑀕𑀢𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀘 𑀯𑀺𑀲𑀁𑀲𑀝𑁆𑀞𑀸 𑀏𑀯𑀁. 𑀢𑀢𑁄 𑀏𑀯 𑀥𑀻𑀭𑀸 𑀧𑀡𑁆𑀟𑀺𑀢𑀸 𑀲𑀩𑁆𑀩𑀢𑁆𑀣 𑀮𑀸𑀪𑀸𑀤𑀻𑀲𑀼 𑀜𑀸𑀡𑀫𑀼𑀔𑁂𑀦 𑀧𑀺𑀬𑀦𑀺𑀫𑀺𑀢𑁆𑀢𑀸𑀦𑀁 𑀲𑁄𑀓𑀸𑀤𑀻𑀦𑀜𑁆𑀘 𑀅𑀪𑀸𑀯𑀢𑁄 𑀲𑀼𑀔𑀺𑀢𑀸 ¶ 𑀮𑀸𑀪𑀸𑀤𑀻𑀳𑀺 𑀘 𑀅𑀦𑀪𑀺𑀪𑀯𑀦𑀻𑀬𑀢𑁄 𑀲𑀩𑁆𑀩𑀢𑁆𑀣 𑀅𑀧𑀭𑀸𑀚𑀺𑀢𑀸𑀯 𑀳𑁄𑀦𑁆𑀢𑀺.

𑀇𑀤𑀸𑀦𑀺 𑀮𑀸𑀪𑀸𑀮𑀸𑀪𑀸𑀤𑀻𑀲𑀼 𑀲𑁂𑀬𑁆𑀬𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀫𑁆𑀫𑁂𑀦 𑀘 𑀅𑀮𑀸𑀪𑁄 𑀬𑁄𑀢𑀺 𑀬𑁄 𑀥𑀫𑁆𑀫𑀁 𑀭𑀓𑁆𑀔𑀦𑁆𑀢𑀲𑁆𑀲 𑀢𑀁𑀦𑀺𑀫𑀺𑀢𑁆𑀢𑀁 𑀅𑀮𑀸𑀪𑁄 𑀮𑀸𑀪𑀸𑀪𑀸𑀯𑁄, 𑀮𑀸𑀪𑀳𑀸𑀦𑀺. 𑀬𑁄 𑀘 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄 𑀅𑀥𑀫𑁆𑀫𑁂𑀦 𑀅𑀜𑁆𑀜𑀸𑀬𑁂𑀦 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦 𑀯𑀺𑀥𑀺𑀦𑀸 𑀉𑀧𑁆𑀧𑀦𑁆𑀦𑁄, 𑀢𑁂𑀲𑀼 𑀤𑁆𑀯𑀻𑀲𑀼 𑀅𑀮𑀸𑀪𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀸𑀯𑀳𑁄 𑀲𑁂𑀬𑁆𑀬𑁄, 𑀬𑀸𑀤𑀺𑀲𑀁 𑀮𑀸𑀪𑀁 𑀧𑀭𑀺𑀯𑀚𑁆𑀚𑀦𑁆𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀢𑀸𑀤𑀺𑀲𑁄 𑀅𑀮𑀸𑀪𑁄 𑀧𑀸𑀲𑀁𑀲𑀢𑀭𑁄 𑀅𑀢𑁆𑀣𑀸𑀯𑀳𑁄. 𑀬𑀜𑁆𑀘𑁂 𑀮𑀸𑀪𑁄 𑀅𑀥𑀫𑁆𑀫𑀺𑀓𑁄𑀢𑀺 𑀬𑁄 𑀮𑀸𑀪𑁄 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑁄, 𑀲𑁄 𑀦 𑀲𑁂𑀬𑁆𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁄 ¶ 𑀘 𑀅𑀧𑁆𑀧𑀩𑀼𑀤𑁆𑀥𑀻𑀦𑀁, 𑀯𑀺𑀜𑁆𑀜𑀽𑀦𑀁 𑀅𑀬𑀲𑁄 𑀘 𑀬𑁄𑀢𑀺 𑀬𑁄 𑀅𑀧𑁆𑀧𑀩𑀼𑀤𑁆𑀥𑀻𑀦𑀁 𑀤𑀼𑀧𑁆𑀧𑀜𑁆𑀜𑀸𑀦𑀁 𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀬𑀲𑁄 𑀮𑀩𑁆𑀪𑀢𑀺, 𑀬𑁄 𑀘 𑀯𑀺𑀜𑁆𑀜𑀽𑀦𑀁 𑀧𑀡𑁆𑀟𑀺𑀢𑀸𑀦𑀁 𑀯𑀲𑁂𑀦 𑀅𑀬𑀲𑁄 𑀬𑀲𑀳𑀸𑀦𑀺. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀅𑀬𑀲𑁄𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀦𑀁. 𑀢𑁂 𑀳𑀺𑀲𑁆𑀲 𑀬𑀣𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀁 𑀬𑀲𑀳𑀸𑀦𑀺𑀁 𑀇𑀘𑁆𑀙𑁂𑀬𑁆𑀬𑀼𑀁, 𑀢𑀣𑀸 𑀘 𑀪𑀩𑁆𑀩𑀚𑀸𑀢𑀺𑀓𑁄 𑀢𑀁 𑀅𑀕𑀼𑀡𑀁 𑀧𑀳𑀸𑀬 𑀕𑀼𑀡𑁂 𑀧𑀢𑀺𑀝𑁆𑀞𑁂𑀬𑁆𑀬. 𑀦 𑀬𑀲𑁄 𑀅𑀧𑁆𑀧𑀩𑀼𑀤𑁆𑀥𑀻𑀦𑀦𑁆𑀢𑀺 𑀤𑀼𑀧𑁆𑀧𑀜𑁆𑀜𑀸𑀦𑀁 𑀯𑀲𑁂𑀦 𑀬𑀲𑁄 𑀲𑁂𑀬𑁆𑀬𑁄 𑀳𑁄𑀢𑀺, 𑀢𑁂 𑀳𑀺 𑀅𑀪𑀽𑀢𑀕𑀼𑀡𑀸𑀪𑀺𑀩𑁆𑀬𑀸𑀳𑀸𑀭𑀯𑀲𑁂𑀦𑀸𑀧𑀺 𑀦𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀲𑁄 𑀘𑀲𑁆𑀲 𑀇𑀥 𑀘𑁂𑀯 𑀯𑀺𑀜𑁆𑀜𑀽𑀕𑀭𑀳𑀸𑀤𑀺𑀦𑀸 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺𑀬𑀁 𑀤𑀼𑀓𑁆𑀔𑀧𑀭𑀺𑀓𑁆𑀓𑀺𑀮𑁂𑀲𑀸𑀤𑀺𑀦𑀸 𑀅𑀦𑀢𑁆𑀣𑀸𑀯𑀳𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄’’𑀢𑀺 (𑀲𑀼. 𑀦𑀺. 𑁪𑁪𑁦) ‘‘𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀻’’𑀢𑀺 (𑀘𑀽𑀴𑀯. 𑁩𑁩𑁫; 𑀅. 𑀦𑀺. 𑁪.𑁬𑁮) 𑀘.

𑀤𑀼𑀫𑁆𑀫𑁂𑀥𑁂𑀳𑀻𑀢𑀺, 𑀦𑀺𑀧𑁆𑀧𑀜𑁆𑀜𑁂𑀳𑀺. 𑀬𑀜𑁆𑀘𑁂 𑀩𑀸𑀮𑀧𑁆𑀧𑀲𑀁𑀲𑀦𑀸𑀢𑀺 𑀩𑀸𑀮𑁂𑀳𑀺 𑀅𑀯𑀺𑀤𑁆𑀤𑀲𑀽𑀳𑀺 𑀬𑀸 𑀦𑀸𑀫 𑀧𑀲𑀁𑀲𑀦𑀸.

𑀓𑀸𑀫𑀫𑀬𑀺𑀓𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀫𑀬𑀁, 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁. 𑀤𑀼𑀓𑁆𑀔𑀜𑁆𑀘 𑀧𑀯𑀺𑀯𑁂𑀓𑀺𑀬𑀦𑁆𑀢𑀺 𑀧𑀯𑀺𑀯𑁂𑀓𑀢𑁄 𑀦𑀺𑀩𑁆𑀩𑀢𑁆𑀢𑀁 𑀓𑀸𑀬𑀓𑀺𑀮𑀫𑀣𑀯𑀲𑁂𑀦 𑀧𑀯𑀢𑁆𑀢𑀁 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑀸𑀤𑀺𑀳𑁂𑀢𑀼𑀓𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁, 𑀢𑀁 𑀧𑀦 𑀦𑀺𑀭𑀸𑀫𑀺𑀲𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀸𑀬 𑀯𑀺𑀜𑁆𑀜𑀽𑀦𑀁 𑀧𑀸𑀲𑀁𑀲𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀯𑀺𑀯𑁂𑀓𑀤𑀼𑀓𑁆𑀔𑀁 𑀲𑁂𑀬𑁆𑀬𑁄’’𑀢𑀺.

𑀚𑀻𑀯𑀺𑀢𑀜𑁆𑀘 ¶ ¶ 𑀅𑀥𑀫𑁆𑀫𑁂𑀦𑀸𑀢𑀺 𑀅𑀥𑀫𑁆𑀫𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀁 𑀚𑀻𑀯𑀺𑀢𑀳𑁂𑀢𑀼 𑀅𑀥𑀫𑁆𑀫𑀘𑀭𑀡𑀁. 𑀥𑀫𑁆𑀫𑁂𑀦 𑀫𑀭𑀡𑀁 𑀦𑀸𑀫 ‘‘𑀇𑀫𑀁 𑀦𑀸𑀫 𑀧𑀸𑀧𑀁 𑀅𑀓𑀭𑁄𑀦𑁆𑀢𑀁 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁂 𑀫𑀸𑀭𑁂𑀦𑁆𑀢𑁂𑀧𑀺 𑀢𑀲𑁆𑀫𑀺𑀁 𑀧𑀸𑀧𑀁 𑀅𑀓𑀢𑁆𑀯𑀸 𑀥𑀫𑁆𑀫𑀁 𑀅𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀥𑀫𑁆𑀫𑀳𑁂𑀢𑀼𑀫𑀭𑀡𑀁 𑀥𑀫𑁆𑀫𑀺𑀓𑀁 𑀲𑁂𑀬𑁆𑀬𑁄𑀢𑀺 𑀢𑀸𑀤𑀺𑀲𑀁 𑀫𑀭𑀡𑀁 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀺𑀓𑀁 𑀲𑀕𑁆𑀕𑀲𑀫𑁆𑀧𑀸𑀧𑀦𑀢𑁄 𑀦𑀺𑀩𑁆𑀩𑀸𑀦𑀼𑀧𑀦𑀺𑀲𑁆𑀲𑀬𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀧𑀸𑀲𑀁𑀲𑀢𑀭𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀘𑀚𑁂 𑀥𑀦𑀁 𑀅𑀗𑁆𑀕𑀯𑀭𑀲𑁆𑀲 𑀳𑁂𑀢𑀼, 𑀅𑀗𑁆𑀕𑀁 𑀘𑀚𑁂 𑀚𑀻𑀯𑀺𑀢𑀁 𑀭𑀓𑁆𑀔𑀫𑀸𑀦𑁄;

𑀅𑀗𑁆𑀕𑀁 𑀥𑀦𑀁 𑀚𑀻𑀯𑀺𑀢𑀜𑁆𑀘𑀸𑀧𑀺 𑀲𑀩𑁆𑀩𑀁, 𑀘𑀚𑁂 𑀦𑀭𑁄 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑁄’’𑀢𑀺. (𑀚𑀸. 𑁨.𑁨𑁧.𑁪𑁭𑁦);

𑀬𑀜𑁆𑀘𑁂 𑀚𑀻𑀯𑁂 𑀅𑀥𑀫𑁆𑀫𑀺𑀓𑀦𑁆𑀢𑀺 𑀧𑀼𑀭𑀺𑀲𑁄 𑀬𑀁 𑀥𑀫𑁆𑀫𑀢𑁄 𑀅𑀧𑁂𑀢𑀁 𑀚𑀻𑀯𑀺𑀓𑀁 𑀚𑀻𑀯𑁂𑀬𑁆𑀬, 𑀢𑀁 𑀦 𑀲𑁂𑀯𑁂𑀬𑁆𑀬 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀢𑁆𑀢𑀸 𑀅𑀧𑀸𑀬𑀲𑀫𑁆𑀧𑀸𑀧𑀦𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 ¶ 𑀬𑀣𑀸𑀯𑀼𑀢𑁆𑀢𑀁 𑀔𑀻𑀡𑀸𑀲𑀯𑀸𑀦𑀁 𑀅𑀦𑀼𑀧𑀮𑁂𑀧𑀁 𑀓𑀸𑀭𑀡𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀓𑁄𑀧𑀧𑀳𑀻𑀦𑀸’’𑀢𑀺𑀆𑀤𑀺𑀕𑀸𑀣𑀫𑀸𑀳.

𑀢𑀢𑁆𑀣 𑀓𑀸𑀫𑀓𑁄𑀧𑀧𑀳𑀻𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄𑀯 𑀧𑀳𑀻𑀦𑀸 𑀅𑀦𑀼𑀭𑁄𑀥𑀧𑀝𑀺𑀯𑀺𑀭𑁄𑀥𑀸. 𑀲𑀦𑁆𑀢𑀘𑀺𑀢𑁆𑀢𑀸 𑀪𑀯𑀸𑀪𑀯𑁂𑀢𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀪𑀯𑁂 𑀅𑀦𑀯𑀲𑁂𑀲𑀧𑀳𑀻𑀦𑀓𑀺𑀮𑁂𑀲𑀧𑀭𑀺𑀴𑀸𑀳𑀢𑀸𑀬 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸. 𑀮𑁄𑀓𑁂𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑁂. 𑀅𑀲𑀺𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀯𑀲𑁂𑀦 𑀅𑀦𑀺𑀲𑁆𑀲𑀺𑀢𑀸. 𑀦𑀢𑁆𑀣𑀺 𑀢𑁂𑀲𑀁 𑀧𑀺𑀬𑀸𑀧𑀺𑀬𑀦𑁆𑀢𑀺 𑀢𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀓𑀢𑁆𑀣𑀘𑀺 𑀮𑀸𑀪𑀸𑀤𑀺𑀓𑁂 𑀭𑀽𑀧𑀸𑀤𑀺𑀯𑀺𑀲𑀬𑁂 𑀘 𑀧𑀺𑀬𑀁 𑀯𑀸 𑀅𑀧𑀺𑀬𑀁 𑀯𑀸 𑀦𑀢𑁆𑀣𑀺, 𑀢𑀁𑀦𑀺𑀫𑀺𑀢𑁆𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸.

𑀇𑀤𑀸𑀦𑀺 𑀬𑀸𑀬 𑀪𑀸𑀯𑀦𑀸𑀬 𑀢𑁂 𑀏𑀯𑀭𑀽𑀧𑀸 𑀚𑀸𑀢𑀸, 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 ‘‘𑀪𑀸𑀯𑀬𑀺𑀢𑁆𑀯𑀸𑀦𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀧𑁆𑀧𑀼𑀬𑁆𑀬𑀸𑀢𑀺, 𑀧𑀸𑀧𑀼𑀡𑀺𑀢𑁆𑀯𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀸 𑀏𑀯 𑀘 𑀕𑀸𑀣𑀸 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀸𑀧𑀺 𑀅𑀳𑁂𑀲𑀼𑀁.

𑀕𑁄𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀤𑁆𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀲𑁄𑀴𑀲𑀓𑀦𑀺𑀧𑀸𑀢𑁄

𑁧. 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑁄𑀴𑀲𑀓𑀦𑀺𑀧𑀸𑀢𑁂 ¶ ¶ ¶ 𑀏𑀲 𑀪𑀺𑀬𑁆𑀬𑁄𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀧𑀞𑀫𑀁 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀲𑀢𑁆𑀣𑀼𑀦𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 𑀪𑀸𑀯𑀺𑀦𑀺𑀁 𑀲𑀫𑁆𑀧𑀢𑁆𑀢𑀺𑀁 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀘𑁂𑀢𑀺𑀬𑁂 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑁂 𑀅𑀦𑁆𑀢𑁄𑀘𑁂𑀢𑀺𑀬𑁂 𑀭𑀢𑀦𑀖𑀭𑀁 𑀓𑀸𑀭𑁂𑀲𑀺, 𑀘𑁂𑀢𑀺𑀬𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀳𑀲𑁆𑀲𑀭𑀢𑀦𑀕𑁆𑀖𑀺𑀬𑀸𑀦𑀺 𑀘 𑀓𑀸𑀭𑁂𑀲𑀺.

𑀲𑁄 𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸, 𑀢𑀢𑁄 𑀘𑀯𑀺𑀢𑁆𑀯𑀸, 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀓𑀸𑀮𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀳𑀼𑀢𑁆𑀯𑀸 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑁂 𑀔𑁂𑀢𑁆𑀢𑁂 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸, 𑀕𑀳𑀺𑀢𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀸𑀬𑀸𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸, 𑀢𑀢𑁆𑀣 𑀫𑀥𑀼𑀲𑀧𑁆𑀧𑀺𑀲𑀓𑁆𑀓𑀭𑀸𑀤𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸, 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀼𑀦 𑀧𑀽𑀭𑀢𑀺, 𑀧𑀼𑀣𑀼𑀓𑀓𑀸𑀮𑁂 𑀧𑀼𑀣𑀼𑀓𑀕𑁆𑀕𑀁 𑀦𑀸𑀫 𑀅𑀤𑀸𑀲𑀺. 𑀮𑀸𑀬𑀦𑁂 𑀮𑀸𑀬𑀦𑀕𑁆𑀕𑀁, 𑀯𑁂𑀡𑀺𑀓𑀭𑀡𑁂 𑀯𑁂𑀡𑀕𑁆𑀕𑀁, 𑀓𑀮𑀸𑀧𑀸𑀤𑀺𑀓𑀭𑀡𑁂 𑀓𑀮𑀸𑀧𑀕𑁆𑀕𑀁, 𑀔𑀮𑀕𑁆𑀕𑀁, 𑀪𑀡𑁆𑀟𑀕𑁆𑀕𑀁, 𑀫𑀺𑀦𑀕𑁆𑀕𑀁, 𑀓𑁄𑀝𑁆𑀞𑀕𑁆𑀕𑀦𑁆𑀢𑀺; 𑀏𑀯𑀁 𑀏𑀓𑀲𑀲𑁆𑀲𑁂 𑀦𑀯 𑀯𑀸𑀭𑁂 𑀅𑀕𑁆𑀕𑀤𑀸𑀦𑀁 𑀦𑀸𑀫 𑀅𑀤𑀸𑀲𑀺. 𑀢𑀫𑁆𑀧𑀺 𑀲𑀲𑁆𑀲𑀁 𑀅𑀢𑀺𑀭𑁂𑀓𑀢𑀭𑀁 𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀺.

𑀏𑀯𑀁 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸, 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 ¶ 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀤𑁄𑀡𑀯𑀢𑁆𑀣𑀼𑀦𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑁄𑀡𑁆𑀟𑀜𑁆𑀜𑁄𑀢𑀺 𑀕𑁄𑀢𑁆𑀢𑀢𑁄 𑀆𑀕𑀢𑀁 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀮𑀓𑁆𑀔𑀡𑀫𑀦𑁆𑀢𑁂𑀲𑀼 𑀘 𑀧𑀸𑀭𑀁 𑀅𑀕𑀫𑀸𑀲𑀺. 𑀢𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 ¶ 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 ¶ 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀝𑁆𑀞𑀼𑀢𑁆𑀢𑀭𑀲𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀧𑀦𑀻𑀢𑁂𑀲𑀼 𑀬𑁂 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀡𑀢𑁆𑀣𑀁 𑀫𑀳𑀸𑀢𑀮𑀁 𑀉𑀧𑀦𑀻𑀢𑀸. 𑀲𑁄 𑀢𑁂𑀲𑀼 𑀲𑀩𑁆𑀩𑀦𑀯𑀓𑁄 𑀳𑀼𑀢𑁆𑀯𑀸, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀮𑀓𑁆𑀔𑀡𑀦𑀺𑀧𑁆𑀨𑀢𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀏𑀓𑀁𑀲𑁂𑀦 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀉𑀤𑀺𑀓𑁆𑀔𑀦𑁆𑀢𑁄 𑀯𑀺𑀘𑀭𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀜𑀸𑀡𑀧𑀭𑀺𑀧𑀸𑀓𑀁 𑀕𑀦𑁆𑀢𑁆𑀯𑀸 𑀏𑀓𑀽𑀦𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀧𑀥𑀸𑀦𑀁 𑀧𑀤𑀳𑀺. 𑀢𑀤𑀸 𑀓𑁄𑀡𑁆𑀟𑀜𑁆𑀜𑁄 𑀫𑀸𑀡𑀯𑁄 𑀫𑀳𑀸𑀲𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸, 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑁂𑀳𑀺 𑀯𑀧𑁆𑀧𑀫𑀸𑀡𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀧𑀜𑁆𑀘𑀫𑁄 𑀧𑀩𑁆𑀩𑀚𑀺𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀙𑀩𑁆𑀩𑀲𑁆𑀲𑀸𑀦𑀺 𑀢𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑀲𑁆𑀲 𑀑𑀴𑀸𑀭𑀺𑀓𑀸𑀳𑀸𑀭𑀧𑀭𑀺𑀪𑁄𑀕𑁂𑀦 𑀦𑀺𑀩𑁆𑀩𑀺𑀦𑁆𑀦𑁄 𑀅𑀧𑀓𑁆𑀓𑀫𑀺𑀢𑁆𑀯𑀸 𑀇𑀲𑀺𑀧𑀢𑀦𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑁄 𑀑𑀴𑀸𑀭𑀺𑀓𑀸𑀳𑀸𑀭𑀧𑀭𑀺𑀪𑁄𑀕𑁂𑀦 𑀮𑀤𑁆𑀥𑀓𑀸𑀬𑀩𑀮𑁄 𑀯𑁂𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸, 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸, 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸, 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬𑀁 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸, 𑀢𑁂𑀲𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 (𑀫𑀳𑀸𑀯. 𑁧𑁩 𑀆𑀤𑀬𑁄; 𑀲𑀁. 𑀦𑀺. 𑁫.𑁧𑁦𑁮𑁧) 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀧𑀜𑁆𑀘𑀫𑀺𑀬𑀁 𑀧𑀓𑁆𑀔𑀲𑁆𑀲 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 (𑀫𑀳𑀸𑀯. 𑁨𑁦; 𑀲𑀁. 𑀦𑀺. 𑁩.𑁫𑁯) 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧.𑁫𑁯𑁬-𑁬𑁧𑁨) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀯𑀺𑀦𑀸𑀬𑀓𑀁;

𑀩𑀼𑀤𑁆𑀥𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀁, 𑀧𑀞𑀫𑀁 𑀅𑀤𑁆𑀤𑀲𑀁 𑀅𑀳𑀁.

‘‘𑀬𑀸𑀯𑀢𑀸 𑀩𑁄𑀥𑀺𑀬𑀸 𑀫𑀽𑀮𑁂, 𑀬𑀓𑁆𑀔𑀸 𑀲𑀩𑁆𑀩𑁂 𑀲𑀫𑀸𑀕𑀢𑀸;

𑀲𑀫𑁆𑀩𑀼𑀤𑁆𑀥𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀯𑀦𑁆𑀤𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

‘‘𑀲𑀩𑁆𑀩𑁂 𑀤𑁂𑀯𑀸 𑀢𑀼𑀝𑁆𑀞𑀫𑀦𑀸, 𑀆𑀓𑀸𑀲𑁂 𑀲𑀜𑁆𑀘𑀭𑀦𑁆𑀢𑀺 𑀢𑁂;

𑀩𑀼𑀤𑁆𑀥𑁄 𑀅𑀬𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀦𑁆𑀥𑀓𑀸𑀭𑀢𑀫𑁄𑀦𑀼𑀤𑁄.

‘‘𑀢𑁂𑀲𑀁 ¶ 𑀳𑀸𑀲𑀧𑀭𑁂𑀢𑀸𑀦𑀁, 𑀫𑀳𑀸𑀦𑀸𑀤𑁄 𑀅𑀯𑀢𑁆𑀢𑀣;

𑀓𑀺𑀮𑁂𑀲𑁂 𑀛𑀸𑀧𑀬𑀺𑀲𑁆𑀲𑀸𑀫, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

‘‘𑀤𑁂𑀯𑀸𑀦𑀁 𑀕𑀺𑀭𑀫𑀜𑁆𑀜𑀸𑀬, 𑀯𑀸𑀘𑀸𑀲𑀪𑀺𑀫𑀼𑀤𑀻𑀭𑀺𑀳𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀤𑀺𑀪𑀺𑀓𑁆𑀔𑀫𑀤𑀸𑀲𑀳𑀁.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀤𑁂𑀯𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀲𑀢𑁆𑀢𑀸𑀳𑀁 ¶ 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀩𑁄𑀥𑀺𑀁 𑀅𑀚𑁆𑀛𑀕𑀫𑀁 𑀅𑀳𑀁;

𑀇𑀤𑀁 𑀫𑁂 𑀧𑀞𑀫𑀁 𑀪𑀢𑁆𑀢𑀁, 𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲 𑀬𑀸𑀧𑀦𑀁.

‘‘𑀢𑀼𑀲𑀺𑀢𑀸 𑀳𑀺 𑀇𑀥𑀸𑀕𑀦𑁆𑀢𑁆𑀯𑀸, 𑀬𑁄 𑀫𑁂 𑀪𑀺𑀓𑁆𑀔𑀁 𑀉𑀧𑀸𑀦𑀬𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀢𑁆𑀯𑀸, 𑀢𑀺𑀤𑀺𑀯𑀁 𑀆𑀯𑀲𑀺𑀲𑁆𑀲𑀢𑀺.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀥𑀸 𑀘𑀓𑁆𑀓𑀯𑀢𑁆𑀢𑀻, 𑀢𑀢𑁆𑀣 𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀺𑀤𑀲𑀸 𑀲𑁄 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀅𑀕𑀸𑀭𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀙𑀩𑁆𑀩𑀲𑁆𑀲𑀸𑀦𑀺 𑀯𑀲𑀺𑀲𑁆𑀲𑀢𑀺.

‘‘𑀢𑀢𑁄 𑀲𑀢𑁆𑀢𑀫𑀓𑁂 𑀯𑀲𑁆𑀲𑁂, 𑀩𑀼𑀤𑁆𑀥𑁄 𑀲𑀘𑁆𑀘𑀁 𑀓𑀣𑁂𑀲𑁆𑀲𑀢𑀺;

𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀦𑀸𑀫𑁂𑀦, 𑀧𑀞𑀫𑀁 𑀲𑀘𑁆𑀙𑀺𑀓𑀸𑀳𑀺𑀢𑀺.

‘‘𑀦𑀺𑀓𑁆𑀔𑀦𑁆𑀢𑁂𑀦𑀸𑀦𑀼𑀧𑀩𑁆𑀩𑀚𑀺𑀁, 𑀧𑀥𑀸𑀦𑀁 𑀲𑀼𑀓𑀢𑀁 𑀫𑀬𑀸;

𑀓𑀺𑀮𑁂𑀲𑁂 𑀛𑀸𑀧𑀦𑀢𑁆𑀣𑀸𑀬, 𑀧𑀩𑁆𑀩𑀚𑀺𑀁, 𑀅𑀦𑀕𑀸𑀭𑀺𑀬𑀁.

‘‘𑀅𑀪𑀺𑀕𑀦𑁆𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽, 𑀩𑀼𑀤𑁆𑀥𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀇𑀲𑀺𑀦𑀸𑀫𑁂 𑀫𑀺𑀕𑀸𑀭𑀜𑁆𑀜𑁂, 𑀅𑀫𑀢𑀪𑁂𑀭𑀺𑀫𑀸𑀳𑀦𑀺.

‘‘𑀲𑁄 𑀤𑀸𑀦𑀺 𑀧𑀢𑁆𑀢𑁄 𑀅𑀫𑀢𑀁, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 ¶ 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀞𑀫𑀁 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀪𑀸𑀯𑀁 𑀤𑀻𑀧𑁂𑀦𑁆𑀢𑁄, ¶ ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀜𑁆𑀜𑀽𑀦𑀁 𑀬𑀤𑀺𑀤𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑀺 (𑀅. 𑀦𑀺. 𑁧.𑁧𑁮𑁮) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀲𑁄 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀅𑀢𑁆𑀢𑀦𑀺 𑀓𑀭𑀻𑀬𑀫𑀸𑀦𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀆𑀓𑀺𑀡𑁆𑀡𑀯𑀺𑀳𑀸𑀭𑀜𑁆𑀘 𑀧𑀭𑀺𑀳𑀭𑀺𑀢𑀼𑀓𑀸𑀫𑁄, 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀯𑀺𑀳𑀭𑀺𑀢𑀼𑀓𑀸𑀫𑁄 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀫𑁆𑀧𑀺 𑀧𑀧𑀜𑁆𑀘𑀁 𑀫𑀜𑁆𑀜𑀫𑀸𑀦𑁄 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀙𑀤𑁆𑀤𑀦𑁆𑀢𑁂𑀳𑀺 𑀦𑀸𑀕𑁂𑀳𑀺 𑀉𑀧𑀝𑁆𑀞𑀺𑀬𑀫𑀸𑀦𑁄 𑀙𑀤𑁆𑀤𑀦𑁆𑀢𑀤𑀳𑀢𑀻𑀭𑁂 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀲𑀺. 𑀏𑀯𑀁 𑀢𑀢𑁆𑀣 𑀯𑀲𑀦𑁆𑀢𑀁 𑀣𑁂𑀭𑀁 𑀏𑀓𑀤𑀺𑀯𑀲𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀏𑀯𑀫𑀸𑀳 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺. 𑀣𑁂𑀭𑁄 𑀢𑀲𑁆𑀲 𑀘𑀢𑀼𑀲𑀘𑁆𑀘𑀕𑀩𑁆𑀪𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀲𑀼𑀜𑁆𑀜𑀢𑀧𑀝𑀺𑀲𑀁𑀬𑀼𑀢𑁆𑀢𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀅𑀫𑀢𑁄𑀕𑀥𑀁 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀧𑀯𑁂𑀤𑁂𑀦𑁆𑀢𑁄 𑁋

𑁬𑁭𑁩.

‘‘𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀫𑀳𑀸𑀭𑀲𑀁;

𑀯𑀺𑀭𑀸𑀕𑁄 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀅𑀦𑀼𑀧𑀸𑀤𑀸𑀬 𑀲𑀩𑁆𑀩𑀲𑁄’’𑀢𑀺. 𑁋 𑀧𑀞𑀫𑀁 𑀕𑀸𑀣𑀫𑀸𑀳;

𑀢𑀢𑁆𑀣 𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀫𑀳𑀸𑀭𑀲𑀦𑁆𑀢𑀺 𑀬𑀤𑀺𑀧𑀺 𑀅𑀦𑁂𑀓𑀯𑀸𑀭𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀅𑀪𑀺𑀧𑁆𑀧𑀲𑀦𑁆𑀦𑁄. 𑀇𑀤𑀸𑀦𑀺 𑀧𑀦 𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀢𑀸𑀬 𑀅𑀲𑁂𑀘𑀦𑀓𑀢𑀸𑀬 𑀘 𑀫𑀳𑀸𑀭𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀲𑁄 𑀅𑀳𑀁 𑀢𑀢𑁄 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺. 𑀯𑀺𑀭𑀸𑀕𑁄 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀅𑀦𑀼𑀧𑀸𑀤𑀸𑀬 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀲𑀁𑀓𑀺𑀮𑁂𑀲𑀢𑁄 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀘 𑀯𑀺𑀭𑀚𑁆𑀚𑀦𑀢𑁄 𑀯𑀺𑀭𑀸𑀕𑀚𑀦𑀦𑀢𑁄 𑀯𑀺𑀭𑀸𑀕𑁄. 𑀢𑀢𑁄 𑀏𑀯 𑀭𑀽𑀧𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀼𑀧𑀸𑀤𑀸𑀬 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑁄 𑀅𑀦𑀼𑀧𑀸𑀤𑀸𑀬 𑀤𑁂𑀲𑀺𑀢𑁄.

𑀏𑀯𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀣𑁂𑀭𑀲𑁆𑀲 𑀤𑁂𑀲𑀦𑀁 𑀣𑁄𑀫𑁂𑀢𑁆𑀯𑀸 𑀣𑁂𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀣𑁂𑀭𑁄 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀳𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀸𑀦𑀁 𑀏𑀓𑀘𑁆𑀘𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀤𑀺𑀲𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀜𑁆𑀘𑀲𑁆𑀲 𑀅𑀦𑀼𑀓𑁆𑀓𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, 𑀅𑀢𑁆𑀢𑀦𑁄 𑀘 𑀲𑀩𑁆𑀩𑀲𑁄 𑀢𑀢𑁄 𑀯𑀺𑀦𑀺𑀯𑀢𑁆𑀢𑀺𑀢𑀫𑀸𑀦𑀲𑀢𑀁 𑀆𑀯𑀚𑁆𑀚𑁂𑀢𑁆𑀯𑀸 𑀢𑀤𑀢𑁆𑀣𑀁 𑀤𑀻𑀧𑁂𑀢𑁆𑀯𑀸 𑁋

𑁬𑁭𑁪.

‘‘𑀩𑀳𑀽𑀦𑀺 ¶ 𑀮𑁄𑀓𑁂 𑀘𑀺𑀢𑁆𑀭𑀸𑀦𑀺, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂;

𑀫𑀣𑁂𑀦𑁆𑀢𑀺 𑀫𑀜𑁆𑀜𑁂 𑀲𑀗𑁆𑀓𑀧𑁆𑀧𑀁, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁.

𑁬𑁭𑁫.

‘‘𑀭𑀚𑀫𑀼𑀳𑀢𑀜𑁆𑀘 ¶ 𑀯𑀸𑀢𑁂𑀦, 𑀬𑀣𑀸 𑀫𑁂𑀖𑁄𑀧𑀲𑀫𑁆𑀫𑀬𑁂;

𑀏𑀯𑀁 𑀲𑀫𑁆𑀫𑀦𑁆𑀢𑀺 𑀲𑀗𑁆𑀓𑀧𑁆𑀧𑀸, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀩𑀳𑀽𑀦𑀺 𑀮𑁄𑀓𑁂 𑀘𑀺𑀢𑁆𑀭𑀸𑀦𑀻𑀢𑀺 𑀭𑀽𑀧𑀸𑀤𑀺𑀯𑀲𑁂𑀦 𑀢𑀢𑁆𑀣𑀸𑀧𑀺 𑀦𑀻𑀮𑀧𑀻𑀢𑀸𑀤𑀺𑀯𑀲𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀸𑀦𑀺 𑀮𑁄𑀓𑁂 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀸𑀦𑀺 𑀆𑀭𑀫𑁆𑀫𑀡𑀚𑀸𑀢𑀸𑀦𑀺. 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑀁 𑀫𑀦𑀼𑀲𑁆𑀲𑀮𑁄𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀫𑀣𑁂𑀦𑁆𑀢𑀺 𑀫𑀜𑁆𑀜𑁂 𑀲𑀗𑁆𑀓𑀧𑁆𑀧𑀦𑁆𑀢𑀺 𑀢𑀚𑁆𑀚𑀁 𑀧𑀼𑀭𑀺𑀲𑀯𑀸𑀬𑀸𑀫𑀲𑀳𑀺𑀢𑀁 𑀅𑀭𑀡𑀺𑀲𑀳𑀺𑀢𑀁 𑀯𑀺𑀬 𑀅𑀕𑁆𑀕𑀺𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀪𑀺𑀲𑀗𑁆𑀔𑀸𑀢𑀸𑀦𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀦𑀺 𑀫𑀣𑁂𑀦𑁆𑀢𑀺 𑀫𑀜𑁆𑀜𑁂 𑀫𑀣𑁂𑀦𑁆𑀢𑀸𑀦𑀺 𑀯𑀺𑀬 𑀢𑀺𑀝𑁆𑀞𑀦𑁆𑀢𑀺. 𑀓𑀻𑀤𑀺𑀲𑀁? 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁, 𑀓𑀸𑀫𑀯𑀺𑀢𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀲𑀼𑀪𑀸𑀓𑀸𑀭𑀕𑁆𑀕𑀳𑀡𑁂𑀦 ‘‘𑀲𑀼𑀪𑁄’’𑀢𑀺 𑀯𑁄𑀳𑀭𑀻𑀬𑀢𑀺.

𑀭𑀚𑀫𑀼𑀳𑀢𑀜𑁆𑀘 ¶ 𑀯𑀸𑀢𑁂𑀦𑀸𑀢𑀺 𑀘-𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀯𑀸𑀢𑁂𑀦 𑀊𑀳𑀢𑀁 𑀉𑀝𑁆𑀞𑀺𑀢𑀁 𑀭𑀚𑀁 𑀫𑀳𑀸𑀫𑁂𑀖𑁄 𑀯𑀲𑁆𑀲𑀦𑁆𑀢𑁄 𑀉𑀧𑀲𑀫𑁆𑀫𑀬𑁂, 𑀯𑀽𑀧𑀲𑀫𑁂𑀬𑁆𑀬. 𑀏𑀯𑀁 𑀲𑀫𑁆𑀫𑀦𑁆𑀢𑀺 𑀲𑀗𑁆𑀓𑀧𑁆𑀧𑀸, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀬𑀤𑀸 𑀅𑀭𑀺𑀬𑀲𑀸𑀯𑀓𑁄 𑀢𑀸𑀦𑀺 𑀮𑁄𑀓𑀘𑀺𑀢𑁆𑀭𑀸𑀦𑀺 𑀲𑀫𑀼𑀤𑀬𑀢𑁄, 𑀅𑀲𑁆𑀲𑀸𑀤𑀢𑁄, 𑀆𑀤𑀻𑀦𑀯𑀢𑁄, 𑀦𑀺𑀲𑁆𑀲𑀭𑀡𑀢𑁄 𑀘 𑀬𑀣𑀸𑀪𑀽𑀢𑀁 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀅𑀣 𑀬𑀣𑀸 𑀢𑀁 𑀭𑀚𑀁 𑀉𑀳𑀢𑀁 𑀫𑁂𑀖𑁂𑀦, 𑀏𑀯𑀁 𑀲𑀫𑁆𑀫𑀦𑁆𑀢𑀺 𑀧𑀜𑁆𑀜𑀸𑀬 𑀲𑀩𑁆𑀩𑁂𑀧𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸. 𑀦 𑀳𑀺 𑀉𑀧𑁆𑀧𑀦𑁆𑀦𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀧𑀢𑀺𑀝𑁆𑀞𑀁 𑀮𑀪𑀦𑁆𑀢𑀺. 𑀬𑀣𑀸 𑀧𑀦 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁬𑁭𑁬.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁬𑁭𑁭.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺…𑀧𑁂… 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁬𑁭𑁮.

‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺. 𑁋

𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 ¶ 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀙𑀴𑀸𑀭𑀫𑁆𑀫𑀡𑀲𑀗𑁆𑀕𑀳𑀸 𑀲𑀩𑁆𑀩𑁂 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀅𑀦𑀺𑀘𑁆𑀘𑀸𑀢𑀺 ‘‘𑀆𑀤𑀺𑀫𑀚𑁆𑀛𑀅𑀦𑁆𑀢𑀯𑀦𑁆𑀢𑀢𑁄, 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑁄, 𑀢𑀸𑀯𑀓𑀸𑀮𑀺𑀓𑀢𑁄, 𑀢𑀢𑁆𑀣 𑀢𑀢𑁆𑀣 𑀪𑀺𑀚𑁆𑀚𑀦𑀢𑁄 𑀦 𑀦𑀺𑀘𑁆𑀘𑀸’’𑀢𑀺 𑀬𑀤𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂𑀢𑀺 𑀅𑀣 𑀇𑀫𑀲𑁆𑀫𑀺𑀁 𑀯𑀝𑁆𑀝𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀯𑀺𑀥𑀺𑀦𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀏𑀲 𑀬𑀣𑀸𑀯𑀼𑀢𑁆𑀢𑁄 𑀯𑀺𑀧𑀲𑁆𑀲𑀦𑀸𑀯𑀺𑀥𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸, 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀘 𑀫𑀕𑁆𑀕𑁄 𑀅𑀥𑀺𑀕𑀫𑀼𑀧𑀸𑀬𑁄.

𑀤𑀼𑀓𑁆𑀔𑀸𑀢𑀺 ¶ 𑀲𑀧𑁆𑀧𑀝𑀺𑀪𑀬𑀢𑁄, 𑀉𑀤𑀬𑀩𑁆𑀩𑀬𑀲𑀫𑁆𑀧𑀝𑀺𑀧𑀻𑀴𑀦𑀢𑁄, 𑀤𑀼𑀓𑁆𑀔𑀫𑀢𑁄, 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄 𑀘 𑀤𑀼𑀓𑁆𑀔𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀲𑀩𑁆𑀩𑁂𑀧𑀺 𑀘𑀢𑀼𑀪𑀽𑀫𑀓𑀸 𑀥𑀫𑁆𑀫𑀸 𑀅𑀦𑀢𑁆𑀢𑀸. 𑀇𑀥 𑀧𑀦 𑀢𑁂𑀪𑀽𑀫𑀓𑀥𑀫𑁆𑀫𑀸𑀯 𑀕𑀳𑁂𑀢𑀩𑁆𑀩𑀸. 𑀢𑁂 𑀳𑀺 𑀅𑀲𑀸𑀭𑀢𑁄, 𑀅𑀯𑀲𑀯𑀢𑁆𑀢𑀦𑀢𑁄, 𑀲𑀼𑀜𑁆𑀜𑀢𑁄, 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄 𑀘 𑀅𑀦𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀏𑀯𑀁 𑀯𑀺𑀧𑀲𑁆𑀲𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀯𑀺𑀥𑀺𑀦𑀸 𑀓𑀢𑀓𑀺𑀘𑁆𑀘𑀁 𑀅𑀢𑁆𑀢𑀸𑀦𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑁋

𑁬𑁭𑁯.

‘‘𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄 ¶ 𑀬𑁄 𑀣𑁂𑀭𑁄, 𑀓𑁄𑀡𑁆𑀟𑀜𑁆𑀜𑁄 𑀢𑀺𑀩𑁆𑀩𑀦𑀺𑀓𑁆𑀓𑀫𑁄;

𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻.

𑁬𑁮𑁦.

‘‘𑀑𑀖𑀧𑀸𑀲𑁄 𑀤𑀴𑁆𑀳𑀔𑀺𑀮𑁄, 𑀧𑀩𑁆𑀩𑀢𑁄 𑀤𑀼𑀧𑁆𑀧𑀤𑀸𑀮𑀬𑁄;

𑀙𑁂𑀢𑁆𑀯𑀸 𑀔𑀺𑀮𑀜𑁆𑀘 𑀧𑀸𑀲𑀜𑁆𑀘, 𑀲𑁂𑀮𑀁 𑀪𑁂𑀢𑁆𑀯𑀸𑀦 𑀤𑀼𑀩𑁆𑀪𑀺𑀤𑀁;

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀛𑀸𑀬𑀻, 𑀫𑀼𑀢𑁆𑀢𑁄 𑀲𑁄 𑀫𑀸𑀭𑀩𑀦𑁆𑀥𑀦𑀸’’𑀢𑀺. 𑁋

𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀢𑁆𑀣 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀸𑀦𑀁 𑀅𑀦𑀼𑀩𑀼𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀩𑀼𑀚𑁆𑀛𑀺𑀢𑀸𑀦𑀺 𑀲𑀘𑁆𑀘𑀸𑀦𑀺 𑀢𑁂𑀲𑀁 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀣𑀺𑀭𑁂𑀳𑀺 𑀅𑀲𑁂𑀓𑁆𑀔𑁂𑀳𑀺 𑀲𑀻𑀮𑀲𑀸𑀭𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺, 𑀣𑁂𑀭𑁄. 𑀓𑁄𑀡𑁆𑀟𑀜𑁆𑀜𑁄𑀢𑀺 𑀕𑁄𑀢𑁆𑀢𑀓𑀺𑀢𑁆𑀢𑀦𑀁. 𑀢𑀺𑀩𑁆𑀩𑀦𑀺𑀓𑁆𑀓𑀫𑁄𑀢𑀺 𑀤𑀴𑁆𑀳𑀯𑀻𑀭𑀺𑀬𑁄, 𑀣𑀺𑀭𑀧𑀭𑀓𑁆𑀓𑀫𑁄. 𑀚𑀸𑀢𑀺𑀫𑀭𑀡𑀸𑀦𑀁 𑀧𑀳𑀻𑀦𑀓𑀸𑀭𑀡𑀢𑁆𑀢𑀸 𑀧𑀳𑀻𑀦𑀚𑀸𑀢𑀺𑀫𑀭𑀡𑁄. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑀯𑀲𑁂𑀲𑀁, 𑀅𑀦𑀯𑀲𑁂𑀲𑀢𑁄 𑀯𑀸 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀸𑀭𑀺𑀧𑀽𑀭𑀓𑁄, 𑀅𑀣 𑀯𑀸 𑀓𑁂𑀯𑀮𑀻 𑀦𑀸𑀫 𑀓𑀺𑀮𑁂𑀲𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀫𑀕𑁆𑀕𑀜𑀸𑀡𑀁 𑀨𑀮𑀜𑀸𑀡𑀜𑁆𑀘, 𑀢𑀁 𑀇𑀫𑀲𑁆𑀫𑀺𑀁 ¶ 𑀅𑀢𑁆𑀣𑀻𑀢𑀺 𑀓𑁂𑀯𑀮𑀻. 𑀬𑀲𑁆𑀫𑀸 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀲𑁂𑀦 𑀳𑁄𑀢𑀺 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 ‘‘𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻’’𑀢𑀺 𑀯𑀼𑀢𑁆𑀢𑀁.

𑀑𑀖𑀧𑀸𑀲𑁄𑀢𑀺 ‘‘𑀓𑀸𑀫𑁄𑀖𑁄, 𑀪𑀯𑁄𑀖𑁄, 𑀤𑀺𑀝𑁆𑀞𑁄𑀖𑁄, 𑀅𑀯𑀺𑀚𑁆𑀚𑁄𑀖𑁄’’𑀢𑀺 (𑀥. 𑀲. 𑁧𑁧𑁫𑁬; 𑀯𑀺𑀪. 𑁯𑁩𑁮) 𑀏𑀯𑀁 𑀯𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀑𑀖𑀸 𑁋 ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀫𑀳𑀸𑀯. 𑁩𑁩; 𑀲𑀁. 𑀦𑀺. 𑁧.𑁧𑁫𑁧) 𑀏𑀯𑀁 𑀯𑀼𑀢𑁆𑀢𑁄 𑀭𑀸𑀕𑀧𑀸𑀲𑁄 𑀘. 𑀤𑀴𑁆𑀳𑀔𑀺𑀮𑁄𑀢𑀺 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀺, 𑀥𑀫𑁆𑀫𑁂 𑀓𑀗𑁆𑀔𑀢𑀺, 𑀲𑀗𑁆𑀖𑁂 𑀓𑀗𑁆𑀔𑀢𑀺, 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄’’𑀢𑀺 (𑀫. 𑀦𑀺. 𑁧.𑁧𑁮𑁫; 𑀅. 𑀦𑀺. 𑁫.𑁨𑁦𑁫) 𑀏𑀯𑀁 𑀯𑀼𑀢𑁆𑀢𑁄 𑀤𑀴𑁆𑀳𑁄 𑀣𑀺𑀭𑁄 𑀧𑀜𑁆𑀘𑀯𑀺𑀥𑁄 𑀘𑁂𑀢𑁄𑀔𑀺𑀮𑁄 𑀘. 𑀧𑀘𑀼𑀭𑀚𑀦𑁂𑀳𑀺 𑀧𑀤𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀧𑁆𑀧𑀤𑀸𑀮𑀬𑁄. 𑀢𑀢𑁄 𑀏𑀯 𑀧𑀩𑁆𑀩𑀢𑀲𑀤𑀺𑀲𑀢𑀸𑀬 𑀧𑀩𑁆𑀩𑀢𑁄𑀢𑀺 𑀘 𑀲𑀗𑁆𑀔𑀁 𑀕𑀢𑁄. ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁨𑁬; 𑀲𑀁. 𑀦𑀺. 𑁨.𑁨) 𑀯𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀅𑀜𑁆𑀜𑀸𑀡𑀧𑁆𑀧𑀪𑁂𑀤𑁄 𑀘. 𑀇𑀢𑀺 𑀏𑀢𑀁 𑀲𑀩𑁆𑀩𑀁 𑀙𑁂𑀢𑁆𑀯𑀸 𑀔𑀺𑀮𑀜𑁆𑀘 𑀧𑀸𑀲𑀜𑁆𑀘𑀸𑀢𑀺 𑀏𑀢𑁂𑀲𑀼 𑀘𑀢𑀼𑀩𑁆𑀩𑀺𑀥𑁂𑀲𑀼 𑀲𑀁𑀓𑀺𑀮𑁂𑀲𑀥𑀫𑁆𑀫𑁂𑀲𑀼 𑀬𑁄 𑀔𑀺𑀮𑀜𑁆𑀘 𑀧𑀸𑀲𑀜𑁆𑀘 𑀅𑀭𑀺𑀬𑀫𑀕𑁆𑀕𑀜𑀸𑀡𑀸𑀲𑀺𑀦𑀸 𑀙𑀺𑀦𑁆𑀤𑀺𑀢𑁆𑀯𑀸. 𑀲𑁂𑀮𑀁 𑀪𑁂𑀢𑁆𑀯𑀸𑀦 𑀤𑀼𑀩𑁆𑀪𑀺𑀤𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀜𑁆𑀜𑀸𑀡𑀲𑁂𑀮𑀁 𑀯𑀚𑀺𑀭𑀽𑀧𑀫𑀜𑀸𑀡𑁂𑀦 ¶ 𑀙𑀺𑀦𑁆𑀤𑀺𑀢𑁆𑀯𑀸, 𑀘𑀢𑁆𑀢𑀸𑀭𑁄𑀧𑀺 𑀑𑀖𑁂 𑀢𑀭𑀺𑀢𑁆𑀯𑀸, 𑀢𑁂𑀲𑀁 𑀧𑀭𑀢𑀻𑀭𑁂 𑀦𑀺𑀩𑁆𑀩𑀸𑀦𑁂 𑀞𑀺𑀢𑀢𑁆𑀢𑀸 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦𑀸𑀢𑀺 𑀤𑀼𑀯𑀺𑀥𑁂𑀦𑀧𑀺 𑀛𑀸𑀬𑀻; 𑀫𑀼𑀢𑁆𑀢𑁄 𑀲𑁄 𑀫𑀸𑀭𑀩𑀦𑁆𑀥𑀦𑀸𑀢𑀺 𑀲𑁄 𑀏𑀯𑀭𑀽𑀧𑁄 𑀔𑀻𑀡𑀸𑀲𑀯𑁄 𑀲𑀩𑁆𑀩𑀲𑁆𑀫𑀸𑀧𑀺 𑀓𑀺𑀮𑁂𑀲𑀫𑀸𑀭𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄𑀢𑀺. 𑀅𑀢𑁆𑀢𑀸𑀦𑀫𑁂𑀯 𑀲𑀦𑁆𑀥𑀸𑀬 𑀣𑁂𑀭𑁄 𑀯𑀤𑀢𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀣𑁂𑀭𑁄, 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁 𑀉𑀤𑁆𑀥𑀢𑀁 𑀉𑀦𑁆𑀦𑀴𑀁 𑀯𑀺𑀳𑀭𑀦𑁆𑀢𑀁 𑀤𑀺𑀲𑁆𑀯𑀸, 𑀇𑀤𑁆𑀥𑀺𑀬𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀢𑀁 ‘‘𑀫𑀸, 𑀆𑀯𑀼𑀲𑁄, 𑀏𑀯𑀁 𑀓𑀭𑀺, 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀧𑀳𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀑𑀯𑀤𑀺. 𑀲𑁄 𑀣𑁂𑀭𑀲𑁆𑀲 𑀯𑀘𑀦𑀁 𑀦𑀸𑀤𑀺𑀬𑀺. 𑀣𑁂𑀭𑁄 𑀢𑀲𑁆𑀲 𑀅𑀦𑀸𑀤𑀺𑀬𑀦𑁂𑀦 𑀥𑀫𑁆𑀫𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀕𑀭𑀳𑀦𑁆𑀢𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀺𑀯𑁂𑀓𑀯𑀸𑀲𑀜𑁆𑀘 𑀧𑀲𑀁𑀲𑀦𑁆𑀢𑁄 𑁋

𑁬𑁮𑁧.

‘‘𑀉𑀤𑁆𑀥𑀢𑁄 𑀘𑀧𑀮𑁄 𑀪𑀺𑀓𑁆𑀔𑀼, 𑀫𑀺𑀢𑁆𑀢𑁂 𑀆𑀕𑀫𑁆𑀫 𑀧𑀸𑀧𑀓𑁂;

𑀲𑀁𑀲𑀻𑀤𑀢𑀺 𑀫𑀳𑁄𑀖𑀲𑁆𑀫𑀺𑀁, 𑀊𑀫𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

𑁬𑁮𑁨.

‘‘𑀅𑀦𑀼𑀤𑁆𑀥𑀢𑁄 ¶ 𑀅𑀘𑀧𑀮𑁄, 𑀦𑀺𑀧𑀓𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀫𑁂𑀥𑀸𑀯𑀻, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀺𑀬𑀸.

𑁬𑁮𑁩.

‘‘𑀓𑀸𑀮𑀧𑀩𑁆𑀩𑀗𑁆𑀕𑀲𑀗𑁆𑀓𑀸𑀲𑁄, 𑀓𑀺𑀲𑁄 𑀥𑀫𑀦𑀺𑀲𑀦𑁆𑀣𑀢𑁄;

𑀫𑀢𑁆𑀢𑀜𑁆𑀜𑀽 𑀅𑀦𑁆𑀦𑀧𑀸𑀦𑀲𑁆𑀫𑀺𑀁, 𑀅𑀤𑀻𑀦𑀫𑀦𑀲𑁄 𑀦𑀭𑁄.

𑁬𑁮𑁪.

‘‘𑀨𑀼𑀝𑁆𑀞𑁄 𑀟𑀁𑀲𑁂𑀳𑀺 𑀫𑀓𑀲𑁂𑀳𑀺, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀦𑀸𑀕𑁄 𑀲𑀗𑁆𑀕𑀸𑀫𑀲𑀻𑀲𑁂𑀯, 𑀲𑀢𑁄 𑀢𑀢𑁆𑀭𑀸𑀥𑀺𑀯𑀸𑀲𑀬𑁂.

𑁬𑁮𑁫-𑁬.

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁…𑀧𑁂… 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄.

𑁬𑁮𑁭.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸…𑀧𑁂… 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁬𑁮𑁮.

‘‘𑀬𑀲𑁆𑀲 𑀘𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀺𑀁 𑀫𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀤𑁆𑀥𑀢𑁄𑀢𑀺 𑀉𑀤𑁆𑀥𑀘𑁆𑀘𑀬𑀼𑀢𑁆𑀢𑁄 𑀅𑀲𑀫𑀸𑀳𑀺𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄. 𑀘𑀧𑀮𑁄𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀮𑁄𑀮𑀧𑀓𑀢𑀺𑀓𑁄. 𑀫𑀺𑀢𑁆𑀢𑁂 𑀆𑀕𑀫𑁆𑀫 𑀧𑀸𑀧𑀓𑁂𑀢𑀺 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀲𑀫𑀡𑀥𑀫𑁆𑀫𑀁 𑀅𑀓𑀭𑁄𑀦𑁆𑀢𑁄. 𑀲𑀁𑀲𑀻𑀤𑀢𑀺 𑀫𑀳𑁄𑀖𑀲𑁆𑀫𑀺𑀁, 𑀊𑀫𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁂 𑀧𑀢𑀺𑀢𑀧𑀼𑀭𑀺𑀲𑁄 𑀲𑀫𑀼𑀤𑁆𑀤𑀯𑀻𑀘𑀻𑀳𑀺 𑀑𑀢𑁆𑀣𑀝𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀮𑀪𑀦𑁆𑀢𑁄 𑀢𑀢𑁆𑀣𑁂𑀯 𑀲𑀁𑀲𑀻𑀤𑀢𑀺, 𑀏𑀯𑀁 𑀲𑀁𑀲𑀸𑀭𑀫𑀳𑁄𑀖𑀲𑁆𑀫𑀺𑀁 𑀧𑀭𑀺𑀩𑁆𑀪𑀫𑀦𑁆𑀢𑁄 𑀓𑁄𑀥𑀼𑀧𑀸𑀬𑀸𑀲𑀊𑀫𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁄 𑀑𑀢𑁆𑀣𑀝𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀜𑁆𑀜𑀸𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀮𑀪𑀦𑁆𑀢𑁄 𑀢𑀢𑁆𑀣𑁂𑀯 𑀲𑀁𑀲𑀻𑀤𑀢𑀺.

𑀦𑀺𑀧𑀓𑁄𑀢𑀺 ¶ 𑀦𑀺𑀧𑀼𑀡𑁄, 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑁂𑀲𑀼 𑀓𑀼𑀲𑀮𑁄. 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀭𑀡𑁂𑀦 𑀧𑀺𑀳𑀺𑀢𑀺𑀦𑁆𑀤𑁆𑀭𑀺𑀬𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀓𑀮𑁆𑀬𑀸𑀡𑁂𑀳𑀺 𑀫𑀺𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀫𑁂𑀥𑀸𑀯𑀻𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 ¶ 𑀲𑀫𑀗𑁆𑀕𑀻𑀪𑀽𑀢𑁄. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀺𑀬𑀸𑀢𑀺 𑀲𑁄 𑀢𑀸𑀤𑀺𑀲𑁄 𑀲𑀓𑀮𑀲𑁆𑀲𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑁄 𑀪𑀯𑁂𑀬𑁆𑀬.

𑀓𑀸𑀮𑀧𑀩𑁆𑀩𑀗𑁆𑀕𑀲𑀗𑁆𑀓𑀸𑀲𑁄𑀢𑀺𑀆𑀤𑀺 𑀯𑀺𑀯𑁂𑀓𑀸𑀪𑀺𑀭𑀢𑀺𑀓𑀺𑀢𑁆𑀢𑀦𑀁. 𑀦𑀸𑀪𑀺𑀦𑀦𑁆𑀤𑀸𑀫𑀻𑀢𑀺𑀆𑀤𑀺 𑀧𑀦 𑀓𑀢𑀓𑀺𑀘𑁆𑀘𑀪𑀸𑀯𑀤𑀲𑁆𑀲𑀦𑀁. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁬𑁦𑁭) 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀑𑀲𑀸𑀦𑁂 𑀧𑀦 ¶ 𑀓𑀺𑀁 𑀫𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀸𑀢𑀺 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀤𑀺𑀲𑁂𑀦 𑀤𑀼𑀩𑁆𑀩𑀘𑁂𑀦 𑀅𑀦𑀸𑀤𑀭𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀸 𑀓𑀺𑀁 𑀫𑁂 𑀧𑀬𑁄𑀚𑀦𑀁 𑀏𑀓𑀯𑀺𑀳𑀸𑀭𑁄𑀬𑁂𑀯 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀦 𑀯𑀢𑁆𑀯𑀸 𑀙𑀤𑁆𑀤𑀦𑁆𑀢𑀤𑀳𑀫𑁂𑀯 𑀕𑀢𑁄. 𑀢𑀢𑁆𑀣 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀉𑀧𑀓𑀝𑁆𑀞𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑀸𑀬𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀫𑀦𑀼𑀲𑁆𑀲𑀪𑀽𑀢𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀤𑀸𑀬𑀻𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀜𑀸𑀢𑀺𑀲𑀫𑀸𑀕𑀫𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸, 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀬𑁄 𑀳𑀺 𑀇𑀫𑁂 𑀉𑀤𑀸𑀬𑀺𑀢𑁆𑀣𑁂𑀭𑀸 𑀅𑀫𑀘𑁆𑀘𑀧𑀼𑀢𑁆𑀢𑁄 𑀧𑀼𑀩𑁆𑀩𑁂 𑀆𑀕𑀢𑁄 𑀓𑀸𑀴𑀼𑀤𑀸𑀬𑀻, 𑀓𑁄𑀯𑀭𑀺𑀬𑀧𑀼𑀢𑁆𑀢𑁄 𑀮𑀸𑀮𑀼𑀤𑀸𑀬𑀻, 𑀅𑀬𑀁 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄 𑀫𑀳𑀸𑀉𑀤𑀸𑀬𑀻𑀢𑀺. 𑀲𑁆𑀯𑀸𑀬𑀁 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀸 𑀲𑁂𑀢𑀯𑀸𑀭𑀡𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀸𑀚𑀦𑁂𑀦 𑀧𑀲𑀁𑀲𑀺𑀬𑀫𑀸𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀦𑀸𑀕𑁄𑀧𑀫𑀲𑀼𑀢𑁆𑀢𑀦𑁆𑀢𑁂 (𑀅. 𑀦𑀺. 𑁬.𑁪𑁩) 𑀤𑁂𑀲𑀺𑀢𑁂 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀲𑀢𑁆𑀣𑀼 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄 ‘‘𑀅𑀬𑀁 𑀫𑀳𑀸𑀚𑀦𑁄 𑀇𑀫𑀁 𑀢𑀺𑀭𑀘𑁆𑀙𑀸𑀦𑀕𑀢𑀁 𑀦𑀸𑀕𑀁 𑀧𑀲𑀁𑀲𑀢𑀺, 𑀦 𑀩𑀼𑀤𑁆𑀥𑀫𑀳𑀸𑀦𑀸𑀕𑀁. 𑀳𑀦𑁆𑀤𑀸𑀳𑀁 𑀩𑀼𑀤𑁆𑀥𑀫𑀳𑀸𑀕𑀦𑁆𑀥𑀳𑀢𑁆𑀣𑀺𑀦𑁄 𑀕𑀼𑀡𑁂 𑀧𑀸𑀓𑀝𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀣𑁄𑀫𑁂𑀦𑁆𑀢𑁄 𑁋

𑁬𑁮𑁯.

‘‘𑀫𑀦𑀼𑀲𑁆𑀲𑀪𑀽𑀢𑀁 𑀲𑀫𑁆𑀩𑀼𑀤𑁆𑀥𑀁, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀇𑀭𑀺𑀬𑀫𑀸𑀦𑀁 𑀩𑁆𑀭𑀳𑁆𑀫𑀧𑀣𑁂, 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀁.

𑁬𑁯𑁦.

‘‘𑀬𑀁 ¶ ¶ 𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁;

𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀺, 𑀇𑀢𑀺 𑀫𑁂 𑀅𑀭𑀳𑀢𑁄 𑀲𑀼𑀢𑀁.

𑁬𑁯𑁧.

‘‘𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑀁 ¶ , 𑀯𑀦𑀸 𑀦𑀺𑀩𑁆𑀩𑀦𑀫𑀸𑀕𑀢𑀁;

𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀭𑀢𑀁, 𑀫𑀼𑀢𑁆𑀢𑀁 𑀲𑁂𑀮𑀸𑀯 𑀓𑀜𑁆𑀘𑀦𑀁.

𑁬𑁯𑁨.

‘‘𑀲 𑀯𑁂 𑀅𑀘𑁆𑀘𑀭𑀼𑀘𑀺 𑀦𑀸𑀕𑁄, 𑀳𑀺𑀫𑀯𑀸𑀯𑀜𑁆𑀜𑁂 𑀲𑀺𑀮𑀼𑀘𑁆𑀘𑀬𑁂;

𑀲𑀩𑁆𑀩𑁂𑀲𑀁 𑀦𑀸𑀕𑀦𑀸𑀫𑀸𑀦𑀁, 𑀲𑀘𑁆𑀘𑀦𑀸𑀫𑁄 𑀅𑀦𑀼𑀢𑁆𑀢𑀭𑁄.

𑁬𑁯𑁩.

‘‘𑀦𑀸𑀕𑀁 𑀯𑁄 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀦 𑀳𑀺 𑀆𑀕𑀼𑀁 𑀓𑀭𑁄𑀢𑀺 𑀲𑁄;

𑀲𑁄𑀭𑀘𑁆𑀘𑀁 𑀅𑀯𑀺𑀳𑀺𑀁𑀲𑀸 𑀘, 𑀧𑀸𑀤𑀸 𑀦𑀸𑀕𑀲𑁆𑀲 𑀢𑁂 𑀤𑀼𑀯𑁂.

𑁬𑁯𑁪.

‘‘𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀘𑀭𑀡𑀸 𑀦𑀸𑀕𑀲𑁆𑀲 𑀢𑁂𑀧𑀭𑁂;

𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄, 𑀉𑀧𑁂𑀓𑁆𑀔𑀸𑀲𑁂𑀢𑀤𑀦𑁆𑀢𑀯𑀸.

𑁬𑁯𑁫.

‘‘𑀲𑀢𑀺 𑀕𑀻𑀯𑀸 𑀲𑀺𑀭𑁄 𑀧𑀜𑁆𑀜𑀸, 𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸;

𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀯𑀸𑀲𑁄, 𑀯𑀺𑀯𑁂𑀓𑁄 𑀢𑀲𑁆𑀲 𑀯𑀸𑀮𑀥𑀺.

𑁬𑁯𑁬.

‘‘𑀲𑁄 𑀛𑀸𑀬𑀻 𑀅𑀲𑁆𑀲𑀸𑀲𑀭𑀢𑁄, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄;

𑀕𑀘𑁆𑀙𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀞𑀺𑀢𑁄 𑀦𑀸𑀕𑁄 𑀲𑀫𑀸𑀳𑀺𑀢𑁄.

𑁬𑁯𑁭.

‘‘𑀲𑀬𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀦𑀺𑀲𑀺𑀦𑁆𑀦𑁄𑀧𑀺 𑀲𑀫𑀸𑀳𑀺𑀢𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀦𑀸𑀕𑁄, 𑀏𑀲𑀸 𑀦𑀸𑀕𑀲𑁆𑀲 𑀲𑀫𑁆𑀧𑀤𑀸.

𑁬𑁯𑁮.

‘‘𑀪𑀼𑀜𑁆𑀚𑀢𑀺 𑀅𑀦𑀯𑀚𑁆𑀚𑀸𑀦𑀺, 𑀲𑀸𑀯𑀚𑁆𑀚𑀸𑀦𑀺 𑀦 𑀪𑀼𑀜𑁆𑀚𑀢𑀺;

𑀖𑀸𑀲𑀫𑀘𑁆𑀙𑀸𑀤𑀦𑀁 𑀮𑀤𑁆𑀥𑀸, 𑀲𑀦𑁆𑀦𑀺𑀥𑀺𑀁 𑀧𑀭𑀺𑀯𑀚𑁆𑀚𑀬𑀁.

𑁬𑁯𑁯.

‘‘𑀲𑀁𑀬𑁄𑀚𑀦𑀁 𑀅𑀡𑀼𑀁 𑀣𑀽𑀮𑀁, 𑀲𑀩𑁆𑀩𑀁 𑀙𑁂𑀢𑁆𑀯𑀸𑀦 𑀩𑀦𑁆𑀥𑀦𑀁;

𑀬𑁂𑀦 𑀬𑁂𑀦𑁂𑀯 𑀕𑀘𑁆𑀙𑀢𑀺, 𑀅𑀦𑀧𑁂𑀓𑁆𑀔𑁄𑀯 𑀕𑀘𑁆𑀙𑀢𑀺.

𑁭𑁦𑁦.

‘‘𑀬𑀣𑀸𑀧𑀺 𑀉𑀤𑀓𑁂 𑀚𑀸𑀢𑀁, 𑀧𑀼𑀡𑁆𑀟𑀭𑀻𑀓𑀁 𑀧𑀯𑀟𑁆𑀠𑀢𑀺;

𑀦𑁄𑀧𑀮𑀺𑀧𑁆𑀧𑀢𑀺 𑀢𑁄𑀬𑁂𑀦, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

𑁭𑁦𑁧.

‘‘𑀢𑀣𑁂𑀯 𑀘 𑀮𑁄𑀓𑁂 𑀚𑀸𑀢𑁄, 𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀳𑀭𑀢𑀺;

𑀦𑁄𑀧𑀮𑀺𑀧𑁆𑀧𑀢𑀺 𑀮𑁄𑀓𑁂𑀦, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

𑁭𑁦𑁨.

‘‘𑀫𑀳𑀸𑀕𑀺𑀦𑀺 𑀧𑀚𑁆𑀚𑀮𑀺𑀢𑁄, 𑀅𑀦𑀸𑀳𑀸𑀭𑁄𑀧𑀲𑀫𑁆𑀫𑀢𑀺;

𑀅𑀗𑁆𑀕𑀸𑀭𑁂𑀲𑀼 𑀘 𑀲𑀦𑁆𑀢𑁂𑀲𑀼, 𑀦𑀺𑀩𑁆𑀩𑀼𑀢𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁭𑁦𑁩.

‘‘𑀅𑀢𑁆𑀣𑀲𑁆𑀲𑀸𑀬𑀁 𑀯𑀺𑀜𑁆𑀜𑀸𑀧𑀦𑀻, 𑀉𑀧𑀫𑀸 𑀯𑀺𑀜𑁆𑀜𑀽𑀳𑀺 𑀤𑁂𑀲𑀺𑀢𑀸;

𑀯𑀺𑀜𑁆𑀜𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀸𑀕𑀸, 𑀦𑀸𑀕𑀁 𑀦𑀸𑀕𑁂𑀦 𑀤𑁂𑀲𑀺𑀢𑀁.

𑁭𑁦𑁪.

‘‘𑀯𑀻𑀢𑀭𑀸𑀕𑁄 ¶ 𑀯𑀻𑀢𑀤𑁄𑀲𑁄, 𑀯𑀻𑀢𑀫𑁄𑀳𑁄 𑀅𑀦𑀸𑀲𑀯𑁄;

𑀲𑀭𑀻𑀭𑀁 𑀯𑀺𑀚𑀳𑀁 𑀦𑀸𑀕𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 ¶ ¶ 𑀫𑀦𑀼𑀲𑁆𑀲𑀪𑀽𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀪𑀽𑀢𑀁, 𑀦𑀺𑀩𑁆𑀩𑀢𑁆𑀢𑀁; 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀯𑀸 𑀧𑀢𑁆𑀢𑀁. 𑀲𑀢𑁆𑀣𑀸 𑀳𑀺 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑁂𑀦 𑀲𑀩𑁆𑀩𑀕𑀢𑀺𑀯𑀺𑀫𑀼𑀢𑁆𑀢𑁄𑀧𑀺 𑀘𑀭𑀺𑀫𑀢𑁆𑀢𑀪𑀸𑀯𑁂 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀯𑀲𑁂𑀦 ‘‘𑀫𑀦𑀼𑀲𑁆𑀲𑁄’’𑀢𑁆𑀯𑁂𑀯 𑀯𑁄𑀳𑀭𑀻𑀬𑀢𑀻𑀢𑀺. 𑀕𑀼𑀡𑀯𑀲𑁂𑀦 𑀧𑀦 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄, 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸. 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀬𑀫𑁂𑀯 𑀩𑀼𑀚𑁆𑀛𑀺𑀢𑀩𑁆𑀩𑀩𑀼𑀤𑁆𑀥𑀯𑀦𑁆𑀢𑀁. 𑀅𑀢𑁆𑀢𑀤𑀦𑁆𑀢𑀦𑁆𑀢𑀺 𑀅𑀢𑁆𑀢𑀦𑀸𑀬𑁂𑀯 𑀤𑀦𑁆𑀢𑀁. 𑀪𑀕𑀯𑀸 𑀳𑀺 𑀅𑀢𑁆𑀢𑀦𑀸𑀬𑁂𑀯 𑀉𑀧𑁆𑀧𑀸𑀤𑀺𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀺 𑀉𑀢𑁆𑀢𑀫𑁂𑀦 𑀤𑀫𑀣𑁂𑀦 𑀤𑀦𑁆𑀢𑁄. 𑀲𑀫𑀸𑀳𑀺𑀢𑀦𑁆𑀢𑀺 𑀅𑀝𑁆𑀞𑀯𑀺𑀥𑁂𑀦 𑀲𑀫𑀸𑀥𑀺𑀦𑀸 𑀫𑀕𑁆𑀕𑀨𑀮𑀲𑀫𑀸𑀥𑀺𑀦𑀸 𑀘 𑀲𑀫𑀸𑀳𑀺𑀢𑀁. 𑀇𑀭𑀺𑀬𑀫𑀸𑀦𑀁 𑀩𑁆𑀭𑀳𑁆𑀫𑀧𑀣𑁂𑀢𑀺 𑀘𑀢𑀼𑀩𑁆𑀩𑀺𑀥𑁂𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀣𑁂, 𑀩𑁆𑀭𑀳𑁆𑀫𑁂 𑀯𑀸 𑀲𑁂𑀝𑁆𑀞𑁂 𑀨𑀮𑀲𑀫𑀸𑀧𑀢𑁆𑀢𑀺𑀧𑀣𑁂 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁. 𑀓𑀺𑀜𑁆𑀘𑀸𑀧𑀺 𑀪𑀕𑀯𑀸 𑀦 𑀲𑀩𑁆𑀩𑀓𑀸𑀮𑀁 𑀬𑀣𑀸𑀯𑀼𑀢𑁆𑀢𑁂 𑀩𑁆𑀭𑀳𑁆𑀫𑀧𑀣𑁂 𑀇𑀭𑀺𑀬𑀢𑀺, 𑀢𑀢𑁆𑀣 𑀇𑀭𑀺𑀬𑀲𑀸𑀫𑀢𑁆𑀣𑀺𑀬𑀁 𑀧𑀦 𑀢𑀦𑁆𑀦𑀺𑀦𑁆𑀦𑀢𑀜𑁆𑀘 𑀉𑀧𑀸𑀤𑀸𑀬 ‘‘𑀇𑀭𑀺𑀬𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑀲𑀫𑀳𑁂𑀢𑀼𑀪𑀽𑀢𑁂 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁂, 𑀦𑀺𑀩𑁆𑀩𑀸𑀦𑁂, 𑀅𑀪𑀺𑀭𑀢𑀁. 𑀬𑀁 𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀦𑁆𑀢𑀺 𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀬𑀢𑀦𑀸𑀤𑀺𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀸𑀭𑀕𑀽, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽, 𑀧𑀳𑀸𑀦𑀧𑀸𑀭𑀕𑀽, 𑀪𑀸𑀯𑀦𑀸𑀧𑀸𑀭𑀕𑀽, 𑀲𑀘𑁆𑀙𑀺𑀓𑀺𑀭𑀺𑀬𑀧𑀸𑀭𑀕𑀽, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽𑀢𑀺 𑀙𑀥𑀸 𑀧𑀸𑀭𑀕𑀼𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑀫𑁆𑀧𑀢𑁆𑀢𑀺𑀁 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀬𑁄 𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀧𑀽𑀚𑁂𑀦𑁆𑀢𑀸 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀳𑁄𑀦𑁆𑀢𑀺. 𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀻𑀢𑀺 𑀦 𑀓𑁂𑀯𑀮𑀁 𑀫𑀦𑀼𑀲𑁆𑀲𑀸 𑀏𑀯, 𑀅𑀣 𑀔𑁄 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀺. 𑀇𑀢𑀺 𑀫𑁂 𑀅𑀭𑀳𑀢𑁄 𑀲𑀼𑀢𑀦𑁆𑀢𑀺 𑀏𑀯𑀁 𑀫𑀬𑀸 𑀆𑀭𑀓𑀢𑁆𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀭𑀳𑀢𑁄, 𑀪𑀕𑀯𑀢𑁄, 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀜𑁆𑀘 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺𑀓𑀁 𑀯𑀤𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀏𑀯𑀁 𑀲𑀼𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑀦𑁆𑀢𑀺 𑀲𑀩𑁆𑀩𑀸𑀦𑀺 𑀤𑀲𑀧𑀺 𑀲𑀁𑀬𑁄𑀚𑀦𑀸𑀦𑀺 𑀬𑀣𑀸𑀭𑀳𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑀳 𑀯𑀸𑀲𑀦𑀸𑀬 𑀅𑀢𑀺𑀓𑁆𑀓𑀦𑁆𑀢𑀁. 𑀯𑀦𑀸 𑀦𑀺𑀩𑁆𑀩𑀦𑀫𑀸𑀕𑀢𑀦𑁆𑀢𑀺 𑀓𑀺𑀮𑁂𑀲𑀯𑀦𑀢𑁄 𑀢𑀩𑁆𑀩𑀺𑀭𑀳𑀺𑀢𑀁 𑀦𑀺𑀩𑁆𑀩𑀦𑀁 𑀉𑀧𑀕𑀢𑀁. 𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀭𑀢𑀦𑁆𑀢𑀺 𑀲𑀩𑁆𑀩𑀲𑁄 𑀓𑀸𑀫𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀛𑀸𑀦𑀯𑀺𑀧𑀲𑁆𑀲𑀦𑀸𑀤𑀺𑀪𑁂𑀤𑁂 𑀦𑁂𑀓𑁆𑀔𑀫𑁆𑀫𑁂 𑀅𑀪𑀺𑀭𑀢𑀁. 𑀫𑀼𑀢𑁆𑀢𑀁 𑀲𑁂𑀮𑀸𑀯 𑀓𑀜𑁆𑀘𑀦𑀦𑁆𑀢𑀺 𑀅𑀲𑀸𑀭𑀢𑁄 𑀦𑀺𑀲𑁆𑀲𑀝𑀲𑀸𑀭𑀲𑀪𑀸𑀯𑀢𑁆𑀢𑀸 𑀲𑁂𑀮𑀢𑁄 𑀦𑀺𑀲𑁆𑀲𑀝𑀓𑀜𑁆𑀘𑀦𑀲𑀤𑀺𑀲𑀁 𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀲 ¶ 𑀯𑁂 𑀅𑀘𑁆𑀘𑀭𑀼𑀘𑀺 𑀦𑀸𑀕𑁄𑀢𑀺 𑀲𑁄 𑀏𑀓𑀁𑀲𑀢𑁄 𑀆𑀕𑀼𑀁 𑀦 𑀓𑀭𑁄𑀢𑀺, 𑀧𑀼𑀦𑀩𑁆𑀪𑀯𑀁 𑀦 𑀕𑀘𑁆𑀙𑀢𑀺; 𑀦𑀸𑀕𑁄 𑀯𑀺𑀬 𑀩𑀮𑀯𑀸𑀢𑀺. ‘‘𑀦𑀸𑀕𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀘𑁆𑀘𑀭𑀼𑀘𑀻𑀢𑀺 ¶ 𑀅𑀢𑁆𑀢𑀦𑁄 𑀓𑀸𑀬𑀭𑀼𑀘𑀺𑀬𑀸 𑀜𑀸𑀡𑀭𑀼𑀘𑀺𑀬𑀸 𑀘 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀼𑀘𑀺, 𑀲𑁄𑀪𑀺. 𑀬𑀣𑀸 𑀓𑀺𑀁? 𑀳𑀺𑀫𑀯𑀸𑀯𑀜𑁆𑀜𑁂 𑀲𑀺𑀮𑀼𑀘𑁆𑀘𑀬𑁂, 𑀬𑀣𑀸 𑀳𑀺 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸 𑀅𑀢𑁆𑀢𑀦𑁄 𑀣𑀺𑀭𑀕𑀭𑀼𑀫𑀳𑀸𑀲𑀸𑀭𑀪𑀸𑀯𑀸𑀤𑀻𑀳𑀺 𑀕𑀼𑀡𑁂𑀳𑀺 𑀅𑀜𑁆𑀜𑁂 𑀧𑀩𑁆𑀩𑀢𑁂 𑀅𑀢𑀺𑀭𑁄𑀘𑀢𑀺, 𑀏𑀯𑀁 𑀅𑀢𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀲𑀁 𑀦𑀸𑀕𑀦𑀸𑀫𑀸𑀦𑀦𑁆𑀢𑀺 𑀅𑀳𑀺𑀦𑀸𑀕𑀳𑀢𑁆𑀣𑀺𑀦𑀸𑀕𑀧𑀼𑀭𑀺𑀲𑀦𑀸𑀕𑀸𑀦𑀁 ¶ , 𑀲𑁂𑀔𑀸𑀲𑁂𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑀦𑀸𑀕𑀸𑀦𑀁 𑀯𑀸. 𑀲𑀘𑁆𑀘𑀦𑀸𑀫𑁄𑀢𑀺 𑀲𑀘𑁆𑀘𑁂𑀦𑁂𑀯 𑀦𑀸𑀕𑀦𑀸𑀫𑁄. 𑀢𑀁 𑀧𑀦 𑀲𑀘𑁆𑀘𑀦𑀸𑀫𑀢𑀁 ‘‘𑀦 𑀳𑀺 𑀆𑀕𑀼𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀇𑀤𑀸𑀦𑀺 𑀩𑀼𑀤𑁆𑀥𑀦𑀸𑀕𑀁 𑀅𑀯𑀬𑀯𑀢𑁄 𑀘 𑀤𑀲𑁆𑀲𑁂𑀦𑁆𑀢𑁄 𑀦𑀸𑀫𑀢𑁄 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀺 𑀆𑀕𑀼𑀁 𑀓𑀭𑁄𑀢𑀺 𑀲𑁄’’𑀢𑀺 𑀆𑀳. 𑀬𑀲𑁆𑀫𑀸 𑀆𑀕𑀼𑀁, 𑀧𑀸𑀧𑀁, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀦𑀸𑀕𑁄𑀢𑀺 𑀅𑀢𑁆𑀣𑁄. 𑀲𑁄𑀭𑀘𑁆𑀘𑀦𑁆𑀢𑀺 𑀲𑀻𑀮𑀁. 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸. 𑀢𑀤𑀼𑀪𑀬𑀁 𑀲𑀩𑁆𑀩𑀲𑁆𑀲𑀧𑀺 𑀕𑀼𑀡𑀭𑀸𑀲𑀺𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺, 𑀓𑀢𑁆𑀯𑀸 𑀩𑀼𑀤𑁆𑀥𑀦𑀸𑀕𑀲𑁆𑀲 𑀧𑀼𑀭𑀺𑀫𑀧𑀸𑀤𑀪𑀸𑀯𑁄 𑀢𑀲𑁆𑀲 𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀸𑀤𑀸 𑀦𑀸𑀕𑀲𑁆𑀲 𑀢𑁂 𑀤𑀼𑀯𑁂’’𑀢𑀺.

𑀅𑀧𑀭𑀧𑀸𑀤𑀪𑀸𑀯𑁂𑀦 𑀯𑀤𑀦𑁆𑀢𑁄 ‘‘𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀘𑀭𑀡𑀸 𑀦𑀸𑀕𑀲𑁆𑀲 𑀢𑁂𑀧𑀭𑁂’’𑀢𑀺 𑀆𑀳. ‘‘𑀢𑁆𑀬𑀸𑀧𑀭𑁂’’𑀢𑀺 𑀯𑀸 𑀧𑀸𑀞𑁄. 𑀢𑁂 𑀅𑀧𑀭𑁂𑀢𑁆𑀯𑁂𑀯 𑀧𑀤𑀯𑀺𑀪𑀸𑀕𑁄. 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀆𑀤𑀸𑀦𑁂 𑀲𑀤𑁆𑀥𑀸 𑀳𑀢𑁆𑀣𑁄 𑀏𑀢𑀲𑁆𑀲𑀸𑀢𑀺, 𑀲𑀤𑁆𑀥𑀸𑀳𑀢𑁆𑀣𑁄. 𑀲𑀼𑀧𑀭𑀺𑀲𑀼𑀤𑁆𑀥𑀯𑁂𑀤𑀦𑀸 𑀜𑀸𑀡𑀧𑁆𑀧𑀪𑁂𑀤𑀸 𑀉𑀧𑁂𑀓𑁆𑀔𑀸 𑀲𑁂𑀢𑀤𑀦𑁆𑀢𑀸 𑀢𑁂 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺, 𑀉𑀧𑁂𑀓𑁆𑀔𑀸𑀲𑁂𑀢𑀤𑀦𑁆𑀢𑀯𑀸.

𑀉𑀢𑁆𑀢𑀫𑀗𑁆𑀕𑀁 𑀧𑀜𑁆𑀜𑀸, 𑀢𑀲𑁆𑀲𑀸 𑀅𑀥𑀺𑀝𑁆𑀞𑀸𑀦𑀁 𑀲𑀢𑀻𑀢𑀺 𑀆𑀳 ‘‘𑀲𑀢𑀺 𑀕𑀻𑀯𑀸 𑀲𑀺𑀭𑁄 𑀧𑀜𑁆𑀜𑀸’’𑀢𑀺. 𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸𑀢𑀺 𑀬𑀣𑀸 𑀔𑀸𑀤𑀺𑀢𑀩𑁆𑀩𑀸𑀔𑀸𑀤𑀺𑀢𑀩𑁆𑀩𑀲𑁆𑀲 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀦𑀁 𑀖𑀸𑀬𑀦𑀜𑁆𑀘 𑀳𑀢𑁆𑀣𑀺𑀦𑀸𑀕𑀲𑁆𑀲 𑀯𑀻𑀫𑀁𑀲𑀸 𑀦𑀸𑀫 𑀳𑁄𑀢𑀺, 𑀏𑀯𑀁 𑀩𑀼𑀤𑁆𑀥𑀦𑀸𑀕𑀲𑁆𑀲 𑀓𑀼𑀲𑀮𑀸𑀤𑀺𑀥𑀫𑁆𑀫𑀘𑀺𑀦𑁆𑀢𑀦𑀸 𑀯𑀻𑀫𑀁𑀲𑀸. 𑀲𑀫𑀸 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺, 𑀲𑀫𑀸𑀯𑀸𑀲𑁄, 𑀪𑀸𑀚𑀦𑀁 𑀓𑀼𑀘𑁆𑀙𑀺 𑀏𑀯 𑀲𑀫𑀸𑀯𑀸𑀲𑁄, 𑀅𑀪𑀺𑀜𑁆𑀜𑀸𑀲𑀫𑀣𑀸𑀦𑀁 𑀆𑀥𑀸𑀦𑀪𑀸𑀯𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀓𑀼𑀘𑁆𑀙𑀺𑀲𑀫𑀸𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀯𑀸𑀲𑁄. 𑀯𑀺𑀯𑁂𑀓𑁄𑀢𑀺 𑀉𑀧𑀥𑀺𑀯𑀺𑀯𑁂𑀓𑁄. 𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀦𑀸𑀕𑀲𑁆𑀲. 𑀯𑀸𑀮𑀥𑀺, 𑀧𑀭𑀺𑀬𑁄𑀲𑀸𑀦𑀗𑁆𑀕𑀪𑀸𑀯𑀢𑁄.

𑀛𑀸𑀬𑀻𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀛𑀸𑀬𑀦𑀲𑀻𑀮𑁄. 𑀅𑀲𑁆𑀲𑀸𑀲𑀭𑀢𑁄𑀢𑀺 𑀧𑀭𑀫𑀲𑁆𑀲𑀸𑀲𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀭𑀢𑁄. 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄𑀢𑀺 𑀯𑀺𑀲𑀬𑀚𑁆𑀛𑀢𑁆𑀢𑁂 ¶ 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄 𑀢𑀤𑀺𑀤𑀁 𑀲𑀫𑀸𑀥𑀸𑀦𑀁 𑀲𑀼𑀝𑁆𑀞𑀼 𑀲𑀩𑁆𑀩𑀓𑀸𑀮𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀘𑁆𑀙𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀕𑀯𑀸 𑀳𑀺 𑀲𑀯𑀸𑀲𑀦𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲 𑀧𑀳𑀻𑀦𑀢𑁆𑀢𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀦𑀺𑀘𑁆𑀘𑀁 𑀲𑀫𑀸𑀳𑀺𑀢𑁄𑀯. 𑀢𑀲𑁆𑀫𑀸 𑀬𑀁 𑀬𑀁 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀢𑀺, 𑀢𑀁 𑀢𑀁 𑀲𑀫𑀸𑀳𑀺𑀢𑁄𑀯 𑀓𑀧𑁆𑀧𑁂𑀲𑀻𑀢𑀺.

𑀲𑀩𑁆𑀩𑀢𑁆𑀣𑀸𑀢𑀺, 𑀲𑀩𑁆𑀩𑀲𑁆𑀫𑀺𑀁 𑀕𑁄𑀘𑀭𑁂, 𑀲𑀩𑁆𑀩𑀲𑁆𑀫𑀺𑀜𑁆𑀘 𑀤𑁆𑀯𑀸𑀭𑁂 𑀲𑀩𑁆𑀩𑀲𑁄 𑀧𑀺𑀳𑀺𑀢𑀯𑀼𑀢𑁆𑀢𑀺. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 ¶ 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢’’𑀦𑁆𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑁧𑁫). 𑀏𑀲𑀸 𑀦𑀸𑀕𑀲𑁆𑀲 𑀲𑀫𑁆𑀧𑀤𑀸𑀢𑀺 𑀏𑀲𑀸 ‘‘𑀦 𑀳𑀺 𑀆𑀕𑀼𑀁 𑀓𑀭𑁄𑀢𑀺 𑀲𑁄’’𑀢𑀺𑀆𑀤𑀺𑀦𑀸 ‘‘𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺𑀆𑀤𑀺𑀦𑀸 𑀏𑀯 𑀯𑀸 𑀬𑀣𑀸𑀯𑀼𑀢𑁆𑀢𑀸 𑀯𑀓𑁆𑀔𑀫𑀸𑀦𑀸 𑀘 𑀩𑀼𑀤𑁆𑀥𑀕𑀦𑁆𑀥𑀳𑀢𑁆𑀣𑀺𑀦𑁄 𑀲𑀫𑁆𑀧𑀢𑁆𑀢𑀺 𑀕𑀼𑀡𑀧𑀭𑀺𑀧𑀼𑀡𑁆𑀡𑀸.

𑀪𑀼𑀜𑁆𑀚𑀢𑀺 ¶ 𑀅𑀦𑀯𑀚𑁆𑀚𑀸𑀦𑀻𑀢𑀺 𑀲𑀫𑁆𑀫𑀸𑀚𑀻𑀯𑀲𑁆𑀲 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀸 𑀪𑀼𑀜𑁆𑀚𑀢𑀺 𑀅𑀕𑀭𑀳𑀺𑀢𑀩𑁆𑀩𑀸𑀦𑀺, 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀲𑀩𑁆𑀩𑀲𑁄 𑀲𑀯𑀸𑀲𑀦𑀸𑀦𑀜𑁆𑀘 𑀧𑀳𑀻𑀦𑀢𑁆𑀢𑀸 𑀲𑀸𑀯𑀚𑁆𑀚𑀸𑀦𑀺 𑀕𑀭𑀳𑀺𑀢𑀩𑁆𑀩𑀸𑀦𑀺 𑀦 𑀪𑀼𑀜𑁆𑀚𑀢𑀺 𑀅𑀦𑀯𑀚𑁆𑀚𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀘 𑀲𑀦𑁆𑀦𑀺𑀥𑀺𑀁 𑀧𑀭𑀺𑀯𑀚𑁆𑀚𑀬𑀁 𑀪𑀼𑀜𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀲𑀁𑀬𑁄𑀚𑀦𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀲𑀦𑁆𑀢𑀸𑀦𑀁 𑀲𑀁𑀬𑁄𑀚𑀦𑀢𑁄 𑀯𑀝𑁆𑀝𑁂 𑀑𑀲𑀻𑀤𑀸𑀧𑀦𑀲𑀫𑀢𑁆𑀣𑀁 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁. 𑀅𑀡𑀼𑀁 𑀣𑀽𑀮𑀦𑁆𑀢𑀺 𑀔𑀼𑀤𑁆𑀤𑀓𑀜𑁆𑀘𑁂𑀯 𑀫𑀳𑀦𑁆𑀢𑀜𑁆𑀘. 𑀲𑀩𑁆𑀩𑀁 𑀙𑁂𑀢𑁆𑀯𑀸𑀦 𑀩𑀦𑁆𑀥𑀦𑀦𑁆𑀢𑀺 𑀫𑀕𑁆𑀕𑀜𑀸𑀡𑁂𑀦 𑀅𑀦𑀯𑀲𑁂𑀲𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀬𑁂𑀦 𑀬𑁂𑀦𑀸𑀢𑀺 𑀬𑁂𑀦 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦.

𑀬𑀣𑀸 𑀳𑀺 𑀉𑀤𑀓𑁂 𑀚𑀸𑀢𑀁 𑀧𑀼𑀡𑁆𑀟𑀭𑀻𑀓𑀁 𑀉𑀤𑀓𑁂 𑀧𑀯𑀟𑁆𑀠𑀢𑀺 𑀦𑁄𑀧𑀮𑀺𑀧𑁆𑀧𑀢𑀺 𑀢𑁄𑀬𑁂𑀦, 𑀅𑀦𑀼𑀧𑀮𑁂𑀧𑀲𑀪𑀸𑀯𑀢𑁆𑀢𑀸, 𑀢𑀣𑁂𑀯 𑀮𑁄𑀓𑁂 𑀚𑀸𑀢𑁄 𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀳𑀭𑀢𑀺, 𑀦𑁄𑀧𑀮𑀺𑀧𑁆𑀧𑀢𑀺 𑀮𑁄𑀓𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀮𑁂𑀧𑀸𑀪𑀸𑀯𑀢𑁄𑀢𑀺 𑀬𑁄𑀚𑀦𑀸.

𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀅𑀦𑀸𑀳𑀸𑀭𑁄𑀢𑀺 𑀅𑀦𑀺𑀦𑁆𑀥𑀦𑁄.

𑀅𑀢𑁆𑀣𑀲𑁆𑀲𑀸𑀬𑀁 𑀯𑀺𑀜𑁆𑀜𑀸𑀧𑀦𑀻𑀢𑀺 𑀲𑀢𑁆𑀣𑀼 𑀕𑀼𑀡𑀲𑀗𑁆𑀔𑀸𑀢𑀲𑁆𑀲 𑀉𑀧𑀫𑁂𑀬𑁆𑀬𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀻, 𑀧𑀓𑀸𑀲𑀦𑀻 𑀅𑀬𑀁 𑀦𑀸𑀕𑀽𑀧𑀫𑀸. 𑀯𑀺𑀜𑁆𑀜𑀽𑀳𑀻𑀢𑀺 𑀲𑀢𑁆𑀣𑀼 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀭𑀺𑀚𑀸𑀦𑀦𑁆𑀢𑁂𑀳𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺𑀆𑀤𑀺 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀦𑀸𑀕𑁂𑀦 𑀫𑀬𑀸 𑀤𑁂𑀲𑀺𑀢𑀁 𑀦𑀸𑀕𑀁 𑀢𑀣𑀸𑀕𑀢𑀕𑀦𑁆𑀥𑀳𑀢𑁆𑀣𑀺𑀁 𑀫𑀳𑀸𑀦𑀸𑀕𑀸 𑀔𑀻𑀡𑀸𑀲𑀯𑀸 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀞𑀢𑁆𑀯𑀸 𑀯𑀺𑀚𑀸𑀦𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀜𑀸𑀧𑀦𑀢𑁆𑀣𑀁 𑀅𑀬𑀁 𑀉𑀧𑀫𑀸 𑀅𑀫𑁆𑀳𑁂𑀳𑀺 𑀪𑀸𑀲𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀭𑀻𑀭𑀁 ¶ 𑀯𑀺𑀚𑀳𑀁 𑀦𑀸𑀕𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄𑀢𑀺 𑀩𑁄𑀥𑀺𑀫𑀽𑀮𑁂 𑀲𑀉𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀅𑀦𑀸𑀲𑀯𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀦𑀸𑀕𑁄, 𑀇𑀤𑀸𑀦𑀺 𑀲𑀭𑀻𑀭𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀦𑁆𑀢𑁄 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀘𑀼𑀤𑁆𑀤𑀲𑀳𑀺 𑀉𑀧𑀫𑀸𑀳𑀺 𑀫𑀡𑁆𑀟𑁂𑀢𑁆𑀯𑀸, 𑀲𑁄𑀴𑀲𑀳𑀺 𑀕𑀸𑀣𑀸𑀳𑀺, 𑀘𑀢𑀼𑀲𑀝𑁆𑀞𑀺𑀬𑀸 𑀧𑀸𑀤𑁂𑀳𑀺 𑀲𑀢𑁆𑀣𑀼 𑀕𑀼𑀡𑁂 𑀯𑀡𑁆𑀡𑁂𑀦𑁆𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀉𑀤𑀸𑀬𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀯𑀻𑀲𑀢𑀺𑀦𑀺𑀧𑀸𑀢𑁄

𑁧. 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀯𑀻𑀲𑀢𑀺𑀦𑀺𑀧𑀸𑀢𑁂 ¶ ¶ ¶ 𑀬𑀜𑁆𑀜𑀢𑁆𑀣𑀁 𑀯𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀅𑀧𑀭𑀲𑁆𑀲 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀝𑁆𑀞𑀳𑀦𑁆𑀢𑁄 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀲𑁆𑀲 𑀪𑀕𑀺𑀦𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀅𑀥𑀺𑀫𑀼𑀢𑁆𑀢𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀫𑀸𑀢𑀼𑀮𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀸𑀫𑀡𑁂𑀭𑀪𑀽𑀫𑀺𑀬𑀁𑀬𑁂𑀯 𑀞𑀺𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁪.𑁮𑁪-𑁮𑁮) 𑁋

‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀅𑀢𑁆𑀣𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂;

𑀉𑀧𑀝𑁆𑀞𑀳𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀉𑀚𑀼𑀪𑀽𑀢𑀁 𑀲𑀫𑀸𑀳𑀺𑀢𑀁;

𑀉𑀘𑁆𑀙𑀼𑀦𑀸 𑀫𑀡𑁆𑀟𑀧𑀁 𑀓𑀢𑁆𑀯𑀸, 𑀪𑁄𑀚𑁂𑀲𑀺𑀁 𑀲𑀗𑁆𑀖𑀫𑀼𑀢𑁆𑀢𑀫𑀁.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣𑀫𑀸𑀦𑀼𑀲𑀁;

𑀲𑀩𑁆𑀩𑁂 𑀲𑀢𑁆𑀢𑁂 𑀅𑀪𑀺𑀪𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀘𑁆𑀙𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑁄 ‘‘𑀫𑀸𑀢𑀭𑀁 𑀆𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀓𑀭𑀡𑀢𑁆𑀣𑀁 𑀫𑀁𑀲𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑁂𑀳𑀺 𑀧𑀜𑁆𑀘𑀲𑀢𑁂𑀳𑀺 𑀘𑁄𑀭𑁂𑀳𑀺 𑀲𑀫𑀸𑀕𑀘𑁆𑀙𑀺. 𑀘𑁄𑀭𑀸 𑀘 𑀢𑀁 𑀅𑀕𑁆𑀕𑀳𑁂𑀲𑀼𑀁 ‘‘𑀤𑁂𑀯𑀢𑀸𑀬 𑀩𑀮𑀺 ¶ 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀘𑁄𑀭𑁂𑀳𑀺 𑀕𑀳𑀺𑀢𑁄𑀧𑀺 𑀅𑀪𑀻𑀢𑁄 𑀅𑀘𑁆𑀙𑀫𑁆𑀪𑀻 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑁄𑀯 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀘𑁄𑀭𑀕𑀸𑀫𑀡𑀺𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀧𑀲𑀁𑀲𑀦𑁆𑀢𑁄 𑁋

𑁭𑁦𑁫.

‘‘𑀬𑀜𑁆𑀜𑀢𑁆𑀣𑀁 ¶ 𑀯𑀸 𑀥𑀦𑀢𑁆𑀣𑀁 𑀯𑀸, 𑀬𑁂 𑀳𑀦𑀸𑀫 𑀫𑀬𑀁 𑀧𑀼𑀭𑁂;

𑀅𑀯𑀲𑁂𑀲𑀁 𑀪𑀬𑀁 𑀳𑁄𑀢𑀺, 𑀯𑁂𑀥𑀦𑁆𑀢𑀺 𑀯𑀺𑀮𑀧𑀦𑁆𑀢𑀺 𑀘.

𑁭𑁦𑁬.

‘‘𑀢𑀲𑁆𑀲 𑀢𑁂 𑀦𑀢𑁆𑀣𑀺 𑀪𑀻𑀢𑀢𑁆𑀢𑀁, 𑀪𑀺𑀬𑁆𑀬𑁄 𑀯𑀡𑁆𑀡𑁄 𑀧𑀲𑀻𑀤𑀢𑀺;

𑀓𑀲𑁆𑀫𑀸 𑀦 𑀧𑀭𑀺𑀤𑁂𑀯𑁂𑀲𑀺, 𑀏𑀯𑀭𑀽𑀧𑁂 𑀫𑀳𑀩𑁆𑀪𑀬𑁂’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀬𑀜𑁆𑀜𑀢𑁆𑀣𑀦𑁆𑀢𑀺 𑀬𑀚𑀦𑀢𑁆𑀣𑀁 𑀤𑁂𑀯𑀢𑀸𑀦𑀁 𑀩𑀮𑀺𑀓𑀫𑁆𑀫𑀓𑀭𑀡𑀢𑁆𑀣𑀁 𑀯𑀸. 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀥𑀦𑀢𑁆𑀣𑀦𑁆𑀢𑀺 𑀲𑀸𑀧𑀢𑁂𑀬𑁆𑀬𑀳𑀭𑀡𑀢𑁆𑀣𑀁. 𑀬𑁂 𑀳𑀦𑀸𑀫 𑀫𑀬𑀁 𑀧𑀼𑀭𑁂𑀢𑀺 𑀬𑁂 𑀲𑀢𑁆𑀢𑁂 𑀫𑀬𑀁 𑀧𑀼𑀩𑁆𑀩𑁂 𑀳𑀦𑀺𑀫𑁆𑀳. 𑀅𑀢𑀻𑀢𑀢𑁆𑀣𑁂 𑀳𑀺 𑀇𑀤𑀁 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀅𑀯𑀲𑁂𑀢𑀺 𑀅𑀯𑀲𑁂 𑀅𑀲𑁂𑀭𑀺𑀓𑁂 𑀓𑀢𑁆𑀯𑀸. 𑀢𑀦𑁆𑀢𑀺 𑀢𑁂𑀲𑀁. ‘‘𑀅𑀯𑀲𑁂𑀲𑀦𑁆𑀢𑀺’’𑀧𑀺 𑀧𑀞𑀦𑁆𑀢𑀺. 𑀅𑀫𑁆𑀳𑁂𑀳𑀺 𑀕𑀳𑀺𑀢𑁂𑀲𑀼 𑀢𑀁 𑀏𑀓𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁; 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀪𑀬𑀁 𑀳𑁄𑀢𑀻𑀢𑀺 𑀫𑀭𑀡𑀪𑀬𑀁 𑀳𑁄𑀢𑀺. 𑀬𑁂𑀦 𑀢𑁂 𑀯𑁂𑀥𑀦𑁆𑀢𑀺 𑀯𑀺𑀮𑀧𑀦𑁆𑀢𑀺,𑀘𑀺𑀢𑁆𑀢𑀼𑀢𑁆𑀭𑀸𑀲𑁂𑀦 𑀯𑁂𑀥𑀦𑁆𑀢𑀺 ¶ , ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀇𑀤𑀜𑁆𑀘𑀺𑀤𑀜𑁆𑀘 𑀤𑀲𑁆𑀲𑀸𑀫, 𑀤𑀸𑀲𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀓𑀁 𑀯𑀤𑀦𑁆𑀢𑀸 𑀯𑀺𑀮𑀧𑀦𑁆𑀢𑀺.

𑀢𑀲𑁆𑀲 𑀢𑁂𑀢𑀺 𑀬𑁄 𑀢𑁆𑀯𑀁 𑀅𑀫𑁆𑀳𑁂𑀳𑀺 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀢𑁆𑀣𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀓𑀸𑀫𑁂𑀳𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂𑀳𑀺 𑀲𑀦𑁆𑀢𑀚𑁆𑀚𑀺𑀢𑁄, 𑀢𑀲𑁆𑀲 𑀢𑁂. 𑀪𑀻𑀢𑀢𑁆𑀢𑀦𑁆𑀢𑀺 𑀪𑀻𑀢𑀪𑀸𑀯𑁄, 𑀪𑀬𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀬𑁆𑀬𑁄 𑀯𑀡𑁆𑀡𑁄 𑀧𑀲𑀻𑀤𑀢𑀻𑀢𑀺 𑀧𑀓𑀢𑀺𑀯𑀡𑁆𑀡𑀢𑁄 𑀉𑀧𑀭𑀺𑀧𑀺 𑀢𑁂 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺. 𑀣𑁂𑀭𑀲𑁆𑀲 𑀓𑀺𑀭 𑀢𑀤𑀸 ‘‘𑀲𑀘𑁂 𑀇𑀫𑁂 𑀫𑀸𑀭𑁂𑀲𑁆𑀲𑀦𑁆𑀢𑀺, 𑀇𑀤𑀸𑀦𑁂𑀯𑀸𑀳𑀁 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀤𑀼𑀓𑁆𑀔𑀪𑀸𑀭𑁄 𑀯𑀺𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀏𑀯𑀭𑀽𑀧𑁂 𑀫𑀳𑀩𑁆𑀪𑀬𑁂𑀢𑀺 𑀏𑀤𑀺𑀲𑁂 𑀫𑀳𑀢𑀺 𑀫𑀭𑀡𑀪𑀬𑁂 𑀉𑀧𑀝𑁆𑀞𑀺𑀢𑁂. 𑀳𑁂𑀢𑀼𑀅𑀢𑁆𑀣𑁂 𑀯𑀸 𑀏𑀢𑀁 𑀪𑀼𑀫𑁆𑀫𑀯𑀘𑀦𑀁.

𑀇𑀤𑀸𑀦𑀺 𑀣𑁂𑀭𑁄 𑀘𑁄𑀭𑀕𑀸𑀫𑀡𑀺𑀲𑁆𑀲 𑀧𑀝𑀺𑀯𑀘𑀦𑀤𑀸𑀦𑀫𑀼𑀔𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

𑁭𑁦𑁭.

‘‘𑀦𑀢𑁆𑀣𑀺 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀅𑀦𑀧𑁂𑀓𑁆𑀔𑀲𑁆𑀲 𑀕𑀸𑀫𑀡𑀺;

𑀅𑀢𑀺𑀓𑁆𑀓𑀦𑁆𑀢𑀸 𑀪𑀬𑀸 𑀲𑀩𑁆𑀩𑁂, 𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀯𑁂.

𑁭𑁦𑁮.

‘‘𑀔𑀻𑀡𑀸𑀬 𑀪𑀯𑀦𑁂𑀢𑁆𑀢𑀺𑀬𑀸, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀬𑀣𑀸𑀢𑀣𑁂;

𑀦 𑀪𑀬𑀁 𑀫𑀭𑀡𑁂 𑀳𑁄𑀢𑀺, 𑀪𑀸𑀭𑀦𑀺𑀓𑁆𑀔𑁂𑀧𑀦𑁂 𑀬𑀣𑀸.

𑁭𑁦𑁯.

‘‘𑀲𑀼𑀘𑀺𑀡𑁆𑀡𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑁂, 𑀫𑀕𑁆𑀕𑁄 𑀘𑀸𑀧𑀺 𑀲𑀼𑀪𑀸𑀯𑀺𑀢𑁄;

𑀫𑀭𑀡𑁂 𑀫𑁂 𑀪𑀬𑀁 𑀦𑀢𑁆𑀣𑀺, 𑀭𑁄𑀕𑀸𑀦𑀫𑀺𑀯 𑀲𑀗𑁆𑀔𑀬𑁂.

𑁭𑁧𑁦.

‘‘𑀲𑀼𑀘𑀺𑀡𑁆𑀡𑀁 ¶ ¶ 𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑁂, 𑀫𑀕𑁆𑀕𑁄 𑀘𑀸𑀧𑀺 𑀲𑀼𑀪𑀸𑀯𑀺𑀢𑁄;

𑀦𑀺𑀭𑀲𑁆𑀲𑀸𑀤𑀸 𑀪𑀯𑀸 𑀤𑀺𑀝𑁆𑀞𑀸, 𑀯𑀺𑀲𑀁 𑀧𑀺𑀢𑁆𑀯𑀸𑀯 𑀙𑀟𑁆𑀟𑀺𑀢𑀁.

𑁭𑁧𑁧.

‘‘𑀧𑀸𑀭𑀕𑀽 𑀅𑀦𑀼𑀧𑀸𑀤𑀸𑀦𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄;

𑀢𑀼𑀝𑁆𑀞𑁄 𑀆𑀬𑀼𑀓𑁆𑀔𑀬𑀸 𑀳𑁄𑀢𑀺, 𑀫𑀼𑀢𑁆𑀢𑁄 𑀆𑀖𑀸𑀢𑀦𑀸 𑀬𑀣𑀸.

𑁭𑁧𑁨.

‘‘𑀉𑀢𑁆𑀢𑀫𑀁 𑀥𑀫𑁆𑀫𑀢𑀁 𑀧𑀢𑁆𑀢𑁄, 𑀲𑀩𑁆𑀩𑀮𑁄𑀓𑁂 𑀅𑀦𑀢𑁆𑀣𑀺𑀓𑁄;

𑀆𑀤𑀺𑀢𑁆𑀢𑀸𑀯 𑀖𑀭𑀸 𑀫𑀼𑀢𑁆𑀢𑁄, 𑀫𑀭𑀡𑀲𑁆𑀫𑀺𑀁 𑀦 𑀲𑁄𑀘𑀢𑀺.

𑁭𑁧𑁩.

‘‘𑀬𑀤𑀢𑁆𑀣𑀺 𑀲𑀗𑁆𑀕𑀢𑀁 𑀓𑀺𑀜𑁆𑀘𑀺, 𑀪𑀯𑁄 𑀯𑀸 𑀬𑀢𑁆𑀣 𑀮𑀩𑁆𑀪𑀢𑀺;

𑀲𑀩𑁆𑀩𑀁 𑀅𑀦𑀺𑀲𑁆𑀲𑀭𑀁 𑀏𑀢𑀁, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

𑁭𑁧𑁪.

‘‘𑀬𑁄 𑀢𑀁 𑀢𑀣𑀸 𑀧𑀚𑀸𑀦𑀸𑀢𑀺, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀦 𑀕𑀡𑁆𑀳𑀸𑀢𑀺 𑀪𑀯𑀁 𑀓𑀺𑀜𑁆𑀘𑀺, 𑀲𑀼𑀢𑀢𑁆𑀢𑀁𑀯 𑀅𑀬𑁄𑀕𑀼𑀴𑀁.

𑁭𑁧𑁫.

‘‘𑀦 𑀫𑁂 𑀳𑁄𑀢𑀺 ‘𑀅𑀳𑁄𑀲𑀺’𑀦𑁆𑀢𑀺, ‘𑀪𑀯𑀺𑀲𑁆𑀲’𑀦𑁆𑀢𑀺 𑀦 𑀳𑁄𑀢𑀺 𑀫𑁂;

𑀲𑀗𑁆𑀔𑀸𑀭𑀸 𑀯𑀺𑀕𑀫𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

𑁭𑁧𑁬.

‘‘𑀲𑀼𑀤𑁆𑀥𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀁, 𑀲𑀼𑀤𑁆𑀥𑀁 𑀲𑀗𑁆𑀔𑀸𑀭𑀲𑀦𑁆𑀢𑀢𑀺𑀁;

𑀧𑀲𑁆𑀲𑀦𑁆𑀢𑀲𑁆𑀲 𑀬𑀣𑀸𑀪𑀽𑀢𑀁, 𑀦 𑀪𑀬𑀁 𑀳𑁄𑀢𑀺 𑀕𑀸𑀫𑀡𑀺.

𑁭𑁧𑁭.

‘‘𑀢𑀺𑀡𑀓𑀝𑁆𑀞𑀲𑀫𑀁 𑀮𑁄𑀓𑀁, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀫𑀫𑀢𑁆𑀢𑀁 𑀲𑁄 𑀅𑀲𑀁𑀯𑀺𑀦𑁆𑀤𑀁, ‘𑀦𑀢𑁆𑀣𑀺 𑀫𑁂’𑀢𑀺 𑀦 𑀲𑁄𑀘𑀢𑀺.

𑁭𑁧𑁮.

‘‘𑀉𑀓𑁆𑀓𑀡𑁆𑀞𑀸𑀫𑀺 𑀲𑀭𑀻𑀭𑁂𑀦, 𑀪𑀯𑁂𑀦𑀫𑁆𑀳𑀺 𑀅𑀦𑀢𑁆𑀣𑀺𑀓𑁄;

𑀲𑁄𑀬𑀁 𑀪𑀺𑀚𑁆𑀚𑀺𑀲𑁆𑀲𑀢𑀺 𑀓𑀸𑀬𑁄, 𑀅𑀜𑁆𑀜𑁄 𑀘 𑀦 𑀪𑀯𑀺𑀲𑁆𑀲𑀢𑀺.

𑁭𑁧𑁯.

‘‘𑀬𑀁 ¶ 𑀯𑁄 𑀓𑀺𑀘𑁆𑀘𑀁 𑀲𑀭𑀻𑀭𑁂𑀦, 𑀢𑀁 𑀓𑀭𑁄𑀣 𑀬𑀤𑀺𑀘𑁆𑀙𑀣;

𑀦 𑀫𑁂 𑀢𑀧𑁆𑀧𑀘𑁆𑀘𑀬𑀸 𑀢𑀢𑁆𑀣, 𑀤𑁄𑀲𑁄 𑀧𑁂𑀫𑀜𑁆𑀘 𑀳𑁂𑀳𑀺𑀢𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑁭𑁨𑁦.

‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀲𑀢𑁆𑀣𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀫𑀸𑀡𑀯𑀸 𑀏𑀢𑀤𑀩𑁆𑀭𑀯𑀼’’𑀦𑁆𑀢𑀺. 𑁋

𑀅𑀬𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀕𑀸𑀣𑀸. 𑀇𑀢𑁄 𑀅𑀧𑀭𑀸 𑀢𑀺𑀲𑁆𑀲𑁄 𑀘𑁄𑀭𑀸𑀦𑀁, 𑀣𑁂𑀭𑀲𑁆𑀲 𑀘 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑁋

𑁭𑁨𑁧.

‘‘𑀓𑀺𑀁 ¶ 𑀪𑀤𑀦𑁆𑀢𑁂 𑀓𑀭𑀺𑀢𑁆𑀯𑀸𑀦, 𑀓𑁄 𑀯𑀸 𑀆𑀘𑀭𑀺𑀬𑁄 𑀢𑀯;

𑀓𑀲𑁆𑀲 𑀲𑀸𑀲𑀦𑀫𑀸𑀕𑀫𑁆𑀫, 𑀮𑀩𑁆𑀪𑀢𑁂 𑀢𑀁 𑀅𑀲𑁄𑀓𑀢𑀸.

𑁭𑁨𑁨.

‘‘𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻, 𑀚𑀺𑀦𑁄 𑀆𑀘𑀭𑀺𑀬𑁄 𑀫𑀫;

𑀫𑀳𑀸𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀢𑀺𑀓𑀺𑀘𑁆𑀙𑀓𑁄.

𑁭𑁨𑁩.

‘‘𑀢𑁂𑀦𑀸𑀬𑀁 ¶ 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀔𑀬𑀕𑀸𑀫𑀻 𑀅𑀦𑀼𑀢𑁆𑀢𑀭𑁄;

𑀢𑀲𑁆𑀲 𑀲𑀸𑀲𑀦𑀫𑀸𑀕𑀫𑁆𑀫, 𑀮𑀩𑁆𑀪𑀢𑁂 𑀢𑀁 𑀅𑀲𑁄𑀓𑀢𑀸.

𑁭𑁨𑁪.

‘‘𑀲𑀼𑀢𑁆𑀯𑀸𑀦 𑀘𑁄𑀭𑀸 𑀇𑀲𑀺𑀦𑁄 𑀲𑀼𑀪𑀸𑀲𑀺𑀢𑀁, 𑀦𑀺𑀓𑁆𑀔𑀺𑀧𑁆𑀧 𑀲𑀢𑁆𑀣𑀸𑀦𑀺 𑀘 𑀆𑀯𑀼𑀥𑀸𑀦𑀺 𑀘;

𑀢𑀫𑁆𑀳𑀸 𑀘 𑀓𑀫𑁆𑀫𑀸 𑀯𑀺𑀭𑀫𑀺𑀁𑀲𑀼 𑀏𑀓𑁂, 𑀏𑀓𑁂 𑀘 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀁𑀲𑀼.

𑁭𑁨𑁫.

‘‘𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂, 𑀪𑀸𑀯𑁂𑀢𑁆𑀯 𑀩𑁄𑀚𑁆𑀛𑀗𑁆𑀕𑀩𑀮𑀸𑀦𑀺 𑀧𑀡𑁆𑀟𑀺𑀢𑀸;

𑀉𑀤𑀕𑁆𑀕𑀘𑀺𑀢𑁆𑀢𑀸 𑀲𑀼𑀫𑀦𑀸 𑀓𑀢𑀺𑀦𑁆𑀤𑁆𑀭𑀺𑀬𑀸, 𑀨𑀼𑀲𑀺𑀁𑀲𑀼 𑀦𑀺𑀩𑁆𑀩𑀸𑀦𑀧𑀤𑀁 𑀅𑀲𑀗𑁆𑀔𑀢’’𑀦𑁆𑀢𑀺. 𑁋

𑀇𑀫𑀸𑀧𑀺 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀕𑀸𑀣𑀸.

𑀢𑀢𑁆𑀣 𑀦𑀢𑁆𑀣𑀺 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀅𑀦𑀧𑁂𑀓𑁆𑀔𑀲𑁆𑀲, 𑀕𑀸𑀫𑀡𑀻𑀢𑀺 𑀕𑀸𑀫𑀡𑀺, 𑀅𑀧𑁂𑀓𑁆𑀔𑀸𑀬, 𑀢𑀡𑁆𑀳𑀸𑀬, 𑀅𑀪𑀸𑀯𑁂𑀦 𑀅𑀦𑀧𑁂𑀓𑁆𑀔𑀲𑁆𑀲 𑀫𑀸𑀤𑀺𑀲𑀲𑁆𑀲, 𑀮𑁄𑀳𑀺𑀢𑀲𑀪𑀸𑀯𑁄 𑀧𑀼𑀩𑁆𑀩𑁄 𑀯𑀺𑀬, 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀦𑀢𑁆𑀣𑀺, 𑀤𑁄𑀫𑀦𑀲𑁆𑀲𑀸𑀪𑀸𑀯𑀸𑀧𑀤𑁂𑀲𑁂𑀦 𑀪𑀬𑀸𑀪𑀸𑀯𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀢𑀺𑀓𑁆𑀓𑀦𑁆𑀢𑀸 𑀪𑀬𑀸 𑀲𑀩𑁆𑀩𑁂’’𑀢𑀺. 𑀅𑀢𑀺𑀓𑁆𑀓𑀦𑁆𑀢𑀸 𑀪𑀬𑀸 𑀲𑀩𑁆𑀩𑁂𑀢𑀺 𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀅𑀭𑀳𑀢𑁄 𑀧𑀜𑁆𑀘𑀯𑀻𑀲𑀢𑀺 𑀫𑀳𑀸𑀪𑀬𑀸, 𑀅𑀜𑁆𑀜𑁂 𑀘 𑀲𑀩𑁆𑀩𑁂𑀧𑀺 𑀪𑀬𑀸 𑀏𑀓𑀁𑀲𑁂𑀦 𑀅𑀢𑀺𑀓𑁆𑀓𑀦𑁆𑀢𑀸 𑀅𑀢𑀻𑀢𑀸, 𑀅𑀧𑀕𑀢𑀸𑀢𑀺 𑀅𑀢𑁆𑀣𑁄.

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀬𑀣𑀸𑀢𑀣𑁂𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀯𑀲𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀬𑀣𑀸𑀪𑀽𑀢𑀁 𑀤𑀺𑀝𑁆𑀞𑁂. 𑀫𑀭𑀡𑁂𑀢𑀺 𑀫𑀭𑀡𑀳𑁂𑀢𑀼. 𑀪𑀸𑀭𑀦𑀺𑀓𑁆𑀔𑁂𑀧𑀦𑁂 𑀬𑀣𑀸𑀢𑀺 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀲𑀻𑀲𑁂 𑀞𑀺𑀢𑁂𑀦 𑀫𑀳𑀢𑀸 𑀕𑀭𑀼𑀪𑀸𑀭𑁂𑀦 𑀲𑀁𑀲𑀻𑀤𑀦𑁆𑀢𑁄 𑀢𑀲𑁆𑀲 𑀦𑀺𑀓𑁆𑀔𑁂𑀧𑀦𑁂, 𑀅𑀧𑀦𑀬𑀦𑁂 𑀦 𑀪𑀸𑀬𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀪𑀸𑀭𑀸 ¶ ¶ 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀔𑀁 𑀮𑁄𑀓𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔’’𑀦𑁆𑀢𑀺. (𑀲𑀁. 𑀦𑀺. 𑁩.𑁨𑁨);

𑀲𑀼𑀘𑀺𑀡𑁆𑀡𑀦𑁆𑀢𑀺 𑀲𑀼𑀝𑁆𑀞𑀼 𑀘𑀭𑀺𑀢𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺, 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀢𑁄 𑀏𑀯 𑀫𑀕𑁆𑀕𑁄 𑀘𑀸𑀧𑀺 𑀲𑀼𑀪𑀸𑀯𑀺𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄𑀧𑀺 𑀲𑀫𑁆𑀫𑀤𑁂𑀯 𑀪𑀸𑀯𑀺𑀢𑁄. 𑀭𑁄𑀕𑀸𑀦𑀫𑀺𑀯 𑀲𑀗𑁆𑀔𑀬𑁂𑀢𑀺 𑀬𑀣𑀸 𑀩𑀳𑀽𑀳𑀺 𑀭𑁄𑀕𑁂𑀳𑀺 𑀅𑀪𑀺𑀪𑀽𑀢𑀲𑁆𑀲 𑀆𑀢𑀼𑀭𑀲𑁆𑀲 𑀭𑁄𑀕𑀸𑀦𑀁 𑀲𑀗𑁆𑀔𑀬𑁂 𑀧𑀻𑀢𑀺𑀲𑁄𑀫𑀦𑀲𑁆𑀲𑀫𑁂𑀯 𑀳𑁄𑀢𑀺, 𑀏𑀯𑀁 𑀔𑀦𑁆𑀥𑀭𑁄𑀕𑀲𑀗𑁆𑀔𑀬𑁂 𑀫𑀭𑀡𑁂 𑀫𑀸𑀤𑀺𑀲𑀲𑁆𑀲 𑀪𑀬𑀁 𑀦𑀢𑁆𑀣𑀺.

𑀦𑀺𑀭𑀲𑁆𑀲𑀸𑀤𑀸 𑀪𑀯𑀸 𑀤𑀺𑀝𑁆𑀞𑀸𑀢𑀺 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀅𑀪𑀺𑀪𑀽𑀢𑀸, 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀸, 𑀢𑀬𑁄 𑀪𑀯𑀸 𑀦𑀺𑀭𑀲𑁆𑀲𑀸𑀤𑀸, 𑀅𑀲𑁆𑀲𑀸𑀤𑀭𑀳𑀺𑀢𑀸, 𑀫𑀬𑀸 𑀤𑀺𑀝𑁆𑀞𑀸. 𑀯𑀺𑀲𑀁 𑀧𑀺𑀢𑁆𑀯𑀸𑀯 𑀙𑀟𑁆𑀟𑀺𑀢𑀦𑁆𑀢𑀺 𑀧𑀫𑀸𑀤𑀯𑀲𑁂𑀦 𑀯𑀺𑀲𑀁 𑀧𑀺𑀯𑀺𑀢𑁆𑀯𑀸 𑀢𑀸𑀤𑀺𑀲𑁂𑀦 𑀧𑀬𑁄𑀕𑁂𑀦 𑀙𑀟𑁆𑀟𑀺𑀢𑀁 𑀯𑀺𑀬 𑀫𑀭𑀡𑁂 𑀫𑁂 𑀪𑀬𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀫𑀼𑀢𑁆𑀢𑁄 ¶ 𑀆𑀖𑀸𑀢𑀦𑀸 𑀬𑀣𑀸𑀢𑀺 𑀬𑀣𑀸 𑀘𑁄𑀭𑁂𑀳𑀺 𑀫𑀸𑀭𑀡𑀢𑁆𑀣𑀁 𑀆𑀖𑀸𑀢𑀦𑀁 𑀦𑀻𑀢𑁄 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑀢𑁄 𑀫𑀼𑀢𑁆𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑁄𑀢𑀺, 𑀏𑀯𑀁 𑀲𑀁𑀲𑀸𑀭𑀧𑀸𑀭𑀁, 𑀦𑀺𑀩𑁆𑀩𑀸𑀦𑀁, 𑀕𑀢𑀢𑁆𑀢𑀸 𑀧𑀸𑀭𑀕𑀽, 𑀘𑀢𑀽𑀳𑀺𑀧𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄, 𑀧𑀭𑀺𑀜𑁆𑀜𑀸𑀤𑀻𑀦𑀁 𑀲𑁄𑀴𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀓𑀢𑀢𑁆𑀢𑀸 𑀓𑀢𑀓𑀺𑀘𑁆𑀘𑁄 𑀓𑀸𑀫𑀸𑀲𑀯𑀸𑀤𑀻𑀳𑀺 𑀅𑀦𑀸𑀲𑀯𑁄, 𑀆𑀬𑀼𑀓𑁆𑀔𑀬𑀸 𑀆𑀬𑀼𑀓𑁆𑀔𑀬𑀳𑁂𑀢𑀼 𑀢𑀼𑀝𑁆𑀞𑁄 𑀲𑁄𑀫𑀦𑀲𑁆𑀲𑀺𑀓𑁄 𑀳𑁄𑀢𑀺.

𑀉𑀢𑁆𑀢𑀫𑀦𑁆𑀢𑀺 𑀲𑁂𑀝𑁆𑀞𑀁. 𑀥𑀫𑁆𑀫𑀢𑀦𑁆𑀢𑀺, 𑀥𑀫𑁆𑀫𑀲𑀪𑀸𑀯𑀁. 𑀅𑀭𑀳𑀢𑁆𑀢𑁂 𑀲𑀺𑀤𑁆𑀥𑁂 𑀲𑀺𑀚𑁆𑀛𑀦𑀳𑁂𑀢𑀼 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀁. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀩𑁆𑀩𑀮𑁄𑀓𑀲𑁆𑀫𑀺𑀫𑁆𑀧𑀺, 𑀤𑀻𑀖𑀸𑀬𑀼𑀓𑀲𑀼𑀔𑀩𑀳𑀼𑀮𑀢𑀸𑀤𑀺𑀯𑀲𑁂𑀦 𑀲𑀁𑀬𑀼𑀢𑁆𑀢𑁂𑀧𑀺 𑀮𑁄𑀓𑁂. 𑀅𑀦𑀢𑁆𑀣𑀺𑀓𑁄𑀢𑀺, 𑀅𑀦𑀧𑁂𑀓𑁆𑀔𑁄. 𑀆𑀤𑀺𑀢𑁆𑀢𑀸𑀯 𑀖𑀭𑀸 𑀫𑀼𑀢𑁆𑀢𑁄𑀢𑀺 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀲𑀫𑀦𑁆𑀢𑀢𑁄 𑀆𑀤𑀺𑀢𑁆𑀢𑀢𑁄 𑀧𑀚𑁆𑀚𑀮𑀺𑀢𑀢𑁄 𑀕𑁂𑀳𑀢𑁄 𑀦𑀺𑀲𑁆𑀲𑀝𑁄, 𑀢𑀢𑁄 𑀦𑀺𑀲𑁆𑀲𑀭𑀡𑀦𑀺𑀫𑀺𑀢𑁆𑀢𑀁 𑀦 𑀲𑁄𑀘𑀢𑀺, 𑀏𑀯𑀁 𑀔𑀻𑀡𑀸𑀲𑀯𑁄 𑀫𑀭𑀡𑀦𑀺𑀫𑀺𑀢𑁆𑀢𑀁 𑀦 𑀲𑁄𑀘𑀢𑀺.

𑀬𑀤𑀢𑁆𑀣𑀺 𑀲𑀗𑁆𑀕𑀢𑀁 𑀓𑀺𑀜𑁆𑀘𑀻𑀢𑀺 𑀬𑀁𑀓𑀺𑀜𑁆𑀘𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀢𑁆𑀣𑀺, 𑀯𑀺𑀚𑁆𑀚𑀢𑀺, 𑀉𑀧𑀮𑀩𑁆𑀪𑀢𑀺 𑀲𑀗𑁆𑀕𑀢𑀁, 𑀲𑀢𑁆𑀢𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀯𑀸 𑀲𑀫𑀸𑀕𑀫𑁄, 𑀲𑀫𑁄𑀥𑀸𑀦𑀁. ‘‘𑀲𑀗𑁆𑀔𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀬𑀁𑀓𑀺𑀜𑁆𑀘𑀺 𑀧𑀘𑁆𑀘𑀬𑁂𑀳𑀺 𑀲𑀫𑀘𑁆𑀘 𑀲𑀫𑁆𑀪𑀼𑀬𑁆𑀬 𑀓𑀢𑀁, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀯𑁄 𑀯𑀸 𑀬𑀢𑁆𑀣 𑀮𑀩𑁆𑀪𑀢𑀻𑀢𑀺 𑀬𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀬𑁄 𑀉𑀧𑀧𑀢𑁆𑀢𑀺𑀪𑀯𑁄 𑀮𑀩𑁆𑀪𑀢𑀺. 𑀲𑀩𑁆𑀩𑀁 𑀅𑀦𑀺𑀲𑁆𑀲𑀭𑀁 𑀏𑀢𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀇𑀲𑁆𑀲𑀭𑀭𑀳𑀺𑀢𑀁, 𑀦 𑀏𑀢𑁆𑀣 𑀓𑁂𑀦𑀘𑀺 ‘‘𑀏𑀯𑀁 𑀳𑁄𑀢𑀽’’𑀢𑀺 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸. 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸𑀢𑀺 ¶ ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀢𑀲𑁆𑀫𑀸 ‘‘𑀅𑀦𑀺𑀲𑁆𑀲𑀭𑀁 𑀏𑀢’’𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀫𑀭𑀡𑀲𑁆𑀫𑀺𑀁 𑀦 𑀲𑁄𑀘𑀢𑀻𑀢𑀺 𑀬𑁄𑀚𑀦𑀸.

𑀦 ¶ 𑀕𑀡𑁆𑀳𑀸𑀢𑀺 𑀪𑀯𑀁 𑀓𑀺𑀜𑁆𑀘𑀻𑀢𑀺 𑀬𑁄 𑀅𑀭𑀺𑀬𑀲𑀸𑀯𑀓𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭) 𑀬𑀣𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀁, 𑀢𑀣𑀸 𑀢𑀁 𑀪𑀯𑀢𑁆𑀢𑀬𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀚𑀸𑀦𑀸𑀢𑀺. 𑀲𑁄 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀲𑀼𑀔𑀓𑀸𑀫𑁄 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀳𑀢𑁆𑀣𑁂𑀦 𑀦 𑀕𑀡𑁆𑀳𑀸𑀢𑀺, 𑀏𑀯𑀁 𑀓𑀺𑀜𑁆𑀘𑀺 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑀯𑀁 𑀦 𑀕𑀡𑁆𑀳𑀸𑀢𑀺, 𑀦 𑀢𑀢𑁆𑀣 𑀢𑀡𑁆𑀳𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀦 𑀫𑁂 𑀳𑁄𑀢𑀺 ‘‘𑀅𑀳𑁄𑀲𑀺’’𑀦𑁆𑀢𑀺 ‘‘𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀳𑀁 𑀈𑀤𑀺𑀲𑁄 𑀅𑀳𑁄𑀲𑀺’’𑀦𑁆𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀦 𑀫𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀤𑁂𑀯 𑀉𑀕𑁆𑀖𑀸𑀝𑀺𑀢𑀢𑁆𑀢𑀸, 𑀥𑀫𑁆𑀫𑀲𑀪𑀸𑀯𑀲𑁆𑀲 𑀘 𑀲𑀼𑀤𑀺𑀝𑁆𑀞𑀢𑁆𑀢𑀸. ‘‘𑀪𑀯𑀺𑀲𑁆𑀲’’𑀦𑁆𑀢𑀺 𑀦 𑀳𑁄𑀢𑀺 𑀫𑁂𑀢𑀺 𑀢𑀢𑁄 𑀏𑀯 ‘‘𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀳𑀁 𑀏𑀤𑀺𑀲𑁄 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀫𑁆𑀧𑀺 𑀫𑁂 𑀦 𑀳𑁄𑀢𑀺. 𑀲𑀗𑁆𑀔𑀸𑀭𑀸 𑀯𑀺𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀧𑀦 𑀳𑁄𑀢𑀺 ‘‘𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸 𑀲𑀗𑁆𑀔𑀸𑀭𑀸𑀯, 𑀦 𑀏𑀢𑁆𑀣 𑀓𑁄𑀘𑀺 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸, 𑀢𑁂 𑀘 𑀔𑁄 𑀯𑀺𑀕𑀫𑀺𑀲𑁆𑀲𑀦𑁆𑀢𑀺 ¶ , 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸𑀢𑀺 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀫𑀸𑀤𑀺𑀲𑀲𑁆𑀲 𑀢𑀢𑁆𑀣 𑀲𑀗𑁆𑀔𑀸𑀭𑀕𑀢𑁂 𑀓𑀸 𑀦𑀸𑀫 𑀧𑀭𑀺𑀤𑁂𑀯𑀦𑀸.

𑀲𑀼𑀤𑁆𑀥𑀦𑁆𑀢𑀺 𑀓𑁂𑀯𑀮𑀁, 𑀅𑀢𑁆𑀢𑀲𑀸𑀭𑁂𑀦 𑀅𑀲𑀫𑁆𑀫𑀺𑀲𑁆𑀲𑀁. 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀦𑁆𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑀫𑀼𑀧𑁆𑀧𑀢𑁆𑀢𑀺𑀁 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑀫𑀢𑁆𑀢𑀧𑁆𑀧𑀯𑀢𑁆𑀢𑀺𑀁. 𑀲𑀗𑁆𑀔𑀸𑀭𑀲𑀦𑁆𑀢𑀢𑀺𑀦𑁆𑀢𑀺 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀧𑁆𑀧𑀪𑁂𑀤𑀲𑀗𑁆𑀔𑀸𑀭𑀧𑀩𑀦𑁆𑀥𑀁. 𑀧𑀲𑁆𑀲𑀦𑁆𑀢𑀲𑁆𑀲 𑀬𑀣𑀸𑀪𑀽𑀢𑀦𑁆𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀲𑁆𑀲.

𑀢𑀺𑀡𑀓𑀝𑁆𑀞𑀲𑀫𑀁 𑀮𑁄𑀓𑀦𑁆𑀢𑀺 𑀬𑀣𑀸 𑀅𑀭𑀜𑁆𑀜𑁂 𑀅𑀧𑀭𑀺𑀕𑁆𑀕𑀳𑁂 𑀢𑀺𑀡𑀓𑀝𑁆𑀞𑁂 𑀓𑁂𑀦𑀘𑀺 𑀕𑀬𑁆𑀳𑀫𑀸𑀦𑁂 𑀅𑀧𑀭𑀲𑁆𑀲 ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀅𑀬𑀁 𑀕𑀡𑁆𑀳𑀢𑀻’’𑀢𑀺 𑀦 𑀳𑁄𑀢𑀺, 𑀏𑀯𑀁 𑀲𑁄 𑀅𑀲𑀸𑀫𑀺𑀓𑀢𑀸𑀬 𑀢𑀺𑀡𑀓𑀝𑁆𑀞𑀲𑀫𑀁 𑀲𑀗𑁆𑀔𑀸𑀭𑀮𑁄𑀓𑀁 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀲𑁄 𑀢𑀢𑁆𑀣 𑀫𑀫𑀢𑁆𑀢𑀁 𑀅𑀲𑀁𑀯𑀺𑀦𑁆𑀤𑀁 𑀅𑀲𑀁𑀯𑀺𑀦𑁆𑀤𑀦𑁆𑀢𑁄 𑀅𑀮𑀪𑀦𑁆𑀢𑁄 𑀅𑀓𑀭𑁄𑀦𑁆𑀢𑁄. 𑀦𑀢𑁆𑀣𑀺 𑀫𑁂𑀢𑀺 ‘‘𑀅𑀳𑀼 𑀯𑀢 𑀲𑁄𑀳𑀁, 𑀢𑀁 𑀫𑁂 𑀦𑀢𑁆𑀣𑀻’’𑀢𑀺 𑀦 𑀲𑁄𑀘𑀢𑀺.

𑀉𑀓𑁆𑀓𑀡𑁆𑀞𑀸𑀫𑀺 𑀲𑀭𑀻𑀭𑁂𑀦𑀸𑀢𑀺 𑀅𑀲𑀸𑀭𑀓𑁂𑀦 𑀅𑀪𑀺𑀦𑀼𑀤𑁂𑀦 𑀤𑀼𑀓𑁆𑀔𑁂𑀦 𑀅𑀓𑀢𑀜𑁆𑀜𑀼𑀦𑀸 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀲𑀪𑀸𑀯𑁂𑀦 𑀇𑀫𑀺𑀦𑀸 𑀓𑀸𑀬𑁂𑀦 𑀉𑀓𑁆𑀓𑀡𑁆𑀞𑀸𑀫𑀺 𑀇𑀫𑀁 𑀓𑀸𑀬𑀁 ¶ 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀏𑀯𑀁 𑀢𑀺𑀝𑁆𑀞𑀸𑀫𑀺. 𑀪𑀯𑁂𑀦𑀫𑁆𑀳𑀺 𑀅𑀦𑀢𑁆𑀣𑀺𑀓𑁄𑀢𑀺 𑀲𑀩𑁆𑀩𑁂𑀦𑀧𑀺 𑀪𑀯𑁂𑀦 𑀅𑀦𑀢𑁆𑀣𑀺𑀓𑁄 𑀅𑀫𑁆𑀳𑀺, 𑀦 𑀓𑀺𑀜𑁆𑀘𑀺 𑀪𑀯𑀁 𑀧𑀢𑁆𑀣𑁂𑀫𑀺. 𑀲𑁄𑀬𑀁 𑀪𑀺𑀚𑁆𑀚𑀺𑀲𑁆𑀲𑀢𑀺 𑀓𑀸𑀬𑁄𑀢𑀺 𑀅𑀬𑀁 𑀫𑀫 𑀓𑀸𑀬𑁄 𑀇𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀧𑀬𑁄𑀕𑁂𑀦 𑀅𑀜𑁆𑀜𑀣𑀸 𑀯𑀸 𑀅𑀜𑁆𑀜𑀢𑁆𑀣 𑀪𑀺𑀚𑁆𑀚𑀺𑀲𑁆𑀲𑀢𑀺. 𑀅𑀜𑁆𑀜𑁄 𑀘 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑁄 𑀓𑀸𑀬𑁄 𑀫𑀬𑁆𑀳𑀁 𑀆𑀬𑀢𑀺𑀁 𑀦 𑀪𑀯𑀺𑀲𑁆𑀲𑀢𑀺, 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄.

𑀬𑀁 𑀯𑁄 𑀓𑀺𑀘𑁆𑀘𑀁 𑀲𑀭𑀻𑀭𑁂𑀦𑀸𑀢𑀺 𑀬𑀁 𑀢𑀼𑀫𑁆𑀳𑀸𑀓𑀁 𑀇𑀫𑀺𑀦𑀸 𑀲𑀭𑀻𑀭𑁂𑀦 𑀧𑀬𑁄𑀚𑀦𑀁, 𑀢𑀁 𑀓𑀭𑁄𑀣 𑀬𑀤𑀺𑀘𑁆𑀙𑀣, 𑀇𑀘𑁆𑀙𑀣 𑀘𑁂. 𑀦 𑀫𑁂 𑀢𑀧𑁆𑀧𑀘𑁆𑀘𑀬𑀸𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 ¶ 𑀇𑀫𑀲𑁆𑀲 𑀲𑀭𑀻𑀭𑀲𑁆𑀲 𑀢𑀼𑀫𑁆𑀳𑁂𑀳𑀺 𑀬𑀣𑀺𑀘𑁆𑀙𑀺𑀢𑀓𑀺𑀘𑁆𑀘𑀲𑁆𑀲 𑀓𑀭𑀡𑀳𑁂𑀢𑀼. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑀭𑁄𑀦𑁆𑀢𑁂𑀲𑀼 𑀘 𑀅𑀓𑀭𑁄𑀦𑁆𑀢𑁂𑀲𑀼 𑀘. 𑀤𑁄𑀲𑁄 𑀧𑁂𑀫𑀜𑁆𑀘 𑀳𑁂𑀳𑀺𑀢𑀻𑀢𑀺 𑀬𑀣𑀸𑀓𑁆𑀓𑀫𑀁 𑀧𑀝𑀺𑀖𑁄 𑀅𑀦𑀼𑀦𑀬𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀪𑀯𑁂 𑀅𑀧𑁂𑀓𑁆𑀔𑀸𑀬 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀧𑀘𑁆𑀘𑀬𑀸 𑀅𑀜𑁆𑀜𑀢𑁆𑀣 𑀘 𑀧𑀝𑀺𑀖𑀸𑀦𑀼𑀦𑀬𑁂𑀲𑀼 𑀅𑀲𑀦𑁆𑀢𑁂𑀲𑀼𑀧𑀺 𑀢𑀧𑁆𑀧𑀘𑁆𑀘𑀬𑀸, ‘‘𑀢𑀢𑁆𑀣𑀸’’𑀢𑀺 𑀯𑀘𑀦𑀁 𑀬𑀣𑀸𑀥𑀺𑀕𑀢𑀯𑀲𑁂𑀦 𑀯𑀼𑀢𑁆𑀢𑀁.

𑀢𑀲𑁆𑀲𑀸𑀢𑀺 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀲𑁆𑀲. 𑀢𑀁 𑀯𑀘𑀦𑀦𑁆𑀢𑀺 ‘‘𑀦𑀢𑁆𑀣𑀺 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀓𑀁 𑀫𑀭𑀡𑁂 𑀪𑀬𑀸𑀪𑀸𑀯𑀸𑀤𑀺𑀤𑀻𑀧𑀓𑀁, 𑀢𑀢𑁄 𑀏𑀯 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸. 𑀫𑀸𑀡𑀯𑀸𑀢𑀺 𑀘𑁄𑀭𑀸. 𑀘𑁄𑀭𑀸 𑀳𑀺 ‘‘𑀫𑀸𑀡𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 ‘‘𑀫𑀸𑀡𑀯𑁂𑀳𑀺 𑀲𑀳 𑀕𑀘𑁆𑀙𑀦𑁆𑀢𑀺 𑀓𑀢𑀓𑀫𑁆𑀫𑁂𑀳𑀺 𑀅𑀓𑀢𑀓𑀫𑁆𑀫𑁂𑀳𑀺𑀧𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀯𑀺𑀬.

𑀓𑀺𑀁 ¶ 𑀪𑀤𑀦𑁆𑀢𑁂 𑀓𑀭𑀺𑀢𑁆𑀯𑀸𑀦𑀸𑀢𑀺, 𑀪𑀦𑁆𑀢𑁂, 𑀓𑀺𑀁 𑀦𑀸𑀫 𑀢𑀧𑁄𑀓𑀫𑁆𑀫𑀁 𑀓𑀢𑁆𑀯𑀸. 𑀓𑁄 𑀯𑀸 𑀢𑀯 𑀆𑀘𑀭𑀺𑀬𑁄 𑀓𑀲𑁆𑀲 𑀲𑀸𑀲𑀦𑀁, 𑀑𑀯𑀸𑀤𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀅𑀲𑁄𑀓𑀢𑀸 𑀫𑀭𑀡𑀓𑀸𑀮𑁂 𑀲𑁄𑀓𑀸𑀪𑀸𑀯𑁄 𑀮𑀩𑁆𑀪𑀢𑀻𑀢𑀺 𑀏𑀢𑀁 𑀅𑀢𑁆𑀣𑀁 𑀅𑀩𑁆𑀭𑀯𑀼𑀁, 𑀧𑀼𑀘𑁆𑀙𑀸𑀯𑀲𑁂𑀦 𑀓𑀣𑁂𑀲𑀼𑀁, 𑀪𑀸𑀲𑀺𑀁𑀲𑀼.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀢𑁂𑀲𑀁 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁄 ‘‘𑀲𑀩𑁆𑀩𑀜𑁆𑀜𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀽𑀢𑀺 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸 𑀲𑀩𑁆𑀩𑀧𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀲𑁆𑀲 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀅𑀥𑀺𑀕𑀫𑁂𑀦 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀚𑀸𑀦𑀸𑀢𑀻𑀢𑀺, 𑀲𑀩𑁆𑀩𑀜𑁆𑀜𑀽. 𑀢𑁂𑀦𑁂𑀯 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀲𑀩𑁆𑀩𑀲𑁆𑀲 𑀤𑀲𑁆𑀲𑀦𑀢𑁄 𑀲𑀩𑁆𑀩𑀤𑀲𑁆𑀲𑀸𑀯𑀻. 𑀬𑀫𑁆𑀳𑀺 𑀅𑀦𑀸𑀯𑀭𑀡𑀜𑀸𑀡𑀁, 𑀢𑀤𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀦𑀢𑁆𑀣𑁂𑀯 𑀅𑀲𑀸𑀥𑀸𑀭𑀡𑀜𑀸𑀡𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀯𑀺𑀲𑀬𑀼𑀧𑁆𑀧𑀢𑁆𑀢𑀺𑀫𑀼𑀔𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀓𑀲𑁆𑀲𑁂𑀯 𑀜𑀸𑀡𑀲𑁆𑀲 𑀤𑁆𑀯𑀺𑀥𑀸 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀇𑀢𑀺𑀯𑀼𑀢𑁆𑀢𑀓𑀯𑀡𑁆𑀡𑀦𑀸𑀬𑀁 (𑀇𑀢𑀺𑀯𑀼. 𑀅𑀝𑁆𑀞. 𑁩𑁮) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 ¶ 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀦𑁆𑀦𑀫𑁆𑀧𑀺 𑀫𑀸𑀭𑀸𑀦𑀁 𑀯𑀺𑀚𑀬𑀢𑁄 𑀚𑀺𑀦𑁄, 𑀳𑀻𑀦𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂 𑀲𑀩𑁆𑀩𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀅𑀥𑀺𑀫𑀼𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀳𑀢𑀺𑀬𑀸 𑀓𑀭𑀼𑀡𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸, 𑀢𑀢𑁄 𑀏𑀯 𑀲𑀩𑁆𑀩𑀮𑁄𑀓𑀲𑁆𑀲 𑀓𑀺𑀮𑁂𑀲𑀭𑁄𑀕𑀢𑀺𑀓𑀺𑀘𑁆𑀙𑀦𑀢𑁄 𑀲𑀩𑁆𑀩𑀮𑁄𑀓𑀢𑀺𑀓𑀺𑀘𑁆𑀙𑀓𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀆𑀘𑀭𑀺𑀬𑁄 𑀫𑀫𑀸𑀢𑀺 𑀬𑁄𑀚𑀦𑀸. 𑀔𑀬𑀕𑀸𑀫𑀻𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀻.

𑀏𑀯𑀁 𑀣𑁂𑀭𑁂𑀦 𑀲𑀢𑁆𑀣𑀼 𑀲𑀸𑀲𑀦𑀲𑁆𑀲 𑀘 𑀕𑀼𑀡𑁂 𑀧𑀓𑀸𑀲𑀺𑀢𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀏𑀓𑀘𑁆𑀘𑁂 𑀘𑁄𑀭𑀸 𑀧𑀩𑁆𑀩𑀚𑀺𑀁𑀲𑀼, 𑀏𑀓𑀘𑁆𑀘𑁂 𑀉𑀧𑀸𑀲𑀓𑀢𑁆𑀢𑀁 𑀧𑀯𑁂𑀤𑁂𑀲𑀼𑀁. 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 ‘‘𑀲𑀼𑀢𑁆𑀯𑀸𑀦 𑀘𑁄𑀭𑀸’’𑀢𑀺𑀆𑀤𑀺𑀦𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼. 𑀢𑀢𑁆𑀣 ¶ 𑀇𑀲𑀺𑀦𑁄𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀏𑀲𑀦𑀝𑁆𑀞𑁂𑀦 𑀇𑀲𑀺𑀦𑁄, 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀲𑁆𑀲. 𑀦𑀺𑀓𑁆𑀔𑀺𑀧𑁆𑀧𑀸𑀢𑀺 𑀧𑀳𑀸𑀬. 𑀲𑀢𑁆𑀣𑀸𑀦𑀺 𑀘 𑀆𑀯𑀼𑀥𑀸𑀦𑀺 𑀘𑀸𑀢𑀺 𑀅𑀲𑀺𑀆𑀤𑀺𑀲𑀢𑁆𑀣𑀸𑀦𑀺 𑀘𑁂𑀯 𑀥𑀦𑀼𑀓𑀮𑀸𑀧𑀸𑀤𑀺𑀆𑀯𑀼𑀥𑀸𑀦𑀺 𑀘. 𑀢𑀫𑁆𑀳𑀸 𑀘 𑀓𑀫𑁆𑀫𑀸𑀢𑀺 𑀢𑀢𑁄 𑀘𑁄𑀭𑀓𑀫𑁆𑀫𑀢𑁄.

𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂𑀢𑀺 𑀢𑁂 𑀘𑁄𑀭𑀸 𑀲𑁄𑀪𑀦𑀕𑀫𑀦𑀢𑀸𑀤𑀻𑀳𑀺 𑀲𑀼𑀕𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸. 𑀪𑀸𑀯𑀦𑀸𑀯𑀺𑀲𑁂𑀲𑀸𑀥𑀺𑀕𑀢𑀸𑀬 𑀑𑀤𑀕𑁆𑀬𑀮𑀓𑁆𑀔𑀡𑀸𑀬 𑀧𑀻𑀢𑀺𑀬𑀸 𑀲𑀫𑀦𑁆𑀦𑀸𑀕𑀫𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀸. 𑀲𑀼𑀫𑀦𑀸𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸. 𑀓𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸. 𑀨𑀼𑀲𑀺𑀁𑀲𑀽𑀢𑀺 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀺𑀁𑀲𑀼. 𑀅𑀥𑀺𑀫𑀼𑀢𑁆𑀢𑁄 𑀓𑀺𑀭 𑀘𑁄𑀭𑁂 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀢𑁆𑀯𑀸, 𑀢𑁂 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸, 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀫𑀸𑀢𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸, 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀅𑀓𑀸𑀲𑀺. 𑀅𑀣 𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺 ¶ , 𑀢𑁂 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀩𑁆𑀩𑀚𑀺𑀢𑁆𑀯𑀸…𑀧𑁂… 𑀅𑀲𑀗𑁆𑀔𑀢’’𑀦𑁆𑀢𑀺.

𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀫𑀡𑀲𑁆𑀲 𑀅𑀳𑀼 𑀘𑀺𑀦𑁆𑀢𑀸𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 ¶ 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀕𑁄𑀢𑁆𑀢𑀯𑀲𑁂𑀦 𑀧𑀸𑀭𑀸𑀧𑀭𑀺𑀬𑁄𑀢𑁆𑀯𑁂𑀯 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀲𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄. 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀚𑁂𑀢𑀯𑀦𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁪𑁫𑁩) 𑀤𑁂𑀲𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺. 𑀢𑀁 𑀲𑀼𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑀤𑀢𑁆𑀣𑀫𑀦𑀼𑀘𑀺𑀦𑁆𑀢𑁂𑀲𑀺. 𑀬𑀣𑀸 𑀧𑀦 𑀅𑀦𑀼𑀘𑀺𑀦𑁆𑀢𑁂𑀲𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀕𑀸𑀣𑀸𑀲𑀼 𑀏𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑁄 𑀢𑀣𑀸 𑀅𑀦𑀼𑀯𑀺𑀘𑀺𑀦𑁆𑀢𑁂𑀦𑁆𑀢𑁄 𑀆𑀬𑀢𑀦𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀢𑀸𑀓𑀸𑀭𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁭𑁨𑁬.

‘‘𑀲𑀫𑀡𑀲𑁆𑀲 𑀅𑀳𑀼 𑀘𑀺𑀦𑁆𑀢𑀸, 𑀧𑀸𑀭𑀸𑀧𑀭𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀏𑀓𑀓𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲, 𑀧𑀯𑀺𑀯𑀺𑀢𑁆𑀢𑀲𑁆𑀲 𑀛𑀸𑀬𑀺𑀦𑁄.

𑁭𑁨𑁭.

‘‘𑀓𑀺𑀫𑀸𑀦𑀼𑀧𑀼𑀩𑁆𑀩𑀁 ¶ 𑀧𑀼𑀭𑀺𑀲𑁄, 𑀓𑀺𑀁 𑀯𑀢𑀁 𑀓𑀺𑀁 𑀲𑀫𑀸𑀘𑀸𑀭𑀁;

𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀭𑀻𑀲𑁆𑀲, 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑁂.

𑁭𑁨𑁮.

‘‘𑀇𑀦𑁆𑀤𑁆𑀭𑀺𑀬𑀸𑀦𑀺 𑀫𑀦𑀼𑀲𑁆𑀲𑀸𑀦𑀁, 𑀳𑀺𑀢𑀸𑀬 𑀅𑀳𑀺𑀢𑀸𑀬 𑀘;

𑀅𑀭𑀓𑁆𑀔𑀺𑀢𑀸𑀦𑀺 𑀅𑀳𑀺𑀢𑀸𑀬, 𑀭𑀓𑁆𑀔𑀺𑀢𑀸𑀦𑀺 𑀳𑀺𑀢𑀸𑀬 𑀘.

𑁭𑁨𑁯.

‘‘𑀇𑀦𑁆𑀤𑁆𑀭𑀺𑀬𑀸𑀦𑁂𑀯 𑀲𑀸𑀭𑀓𑁆𑀔𑀁, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀕𑁄𑀧𑀬𑀁;

𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀭𑀻𑀲𑁆𑀲, 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑁂.

𑁭𑁩𑁦.

‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑁂 𑀭𑀽𑀧𑁂𑀲𑀼, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀯𑀸𑀭𑀬𑀁;

𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻, 𑀲𑁄 𑀤𑀼𑀓𑁆𑀔𑀸 𑀦 𑀳𑀺 𑀫𑀼𑀘𑁆𑀘𑀢𑀺.

𑁭𑁩𑁧.

‘‘𑀲𑁄𑀢𑀺𑀦𑁆𑀤𑁆𑀭𑀺𑀬𑀁 ¶ 𑀘𑁂 𑀲𑀤𑁆𑀤𑁂𑀲𑀼, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀯𑀸𑀭𑀬𑀁;

𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻, 𑀲𑁄 𑀤𑀼𑀓𑁆𑀔𑀸 𑀦 𑀳𑀺 𑀫𑀼𑀘𑁆𑀘𑀢𑀺.

𑁭𑁩𑁨.

‘‘𑀅𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻, 𑀕𑀦𑁆𑀥𑁂 𑀘𑁂 𑀧𑀝𑀺𑀲𑁂𑀯𑀢𑀺;

𑀦 𑀲𑁄 𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀫𑁆𑀳𑀸, 𑀕𑀦𑁆𑀥𑁂𑀲𑀼 𑀅𑀥𑀺𑀫𑀼𑀘𑁆𑀙𑀺𑀢𑁄.

𑁭𑁩𑁩.

‘‘𑀅𑀫𑁆𑀩𑀺𑀮𑀁 𑀫𑀥𑀼𑀭𑀕𑁆𑀕𑀜𑁆𑀘, 𑀢𑀺𑀢𑁆𑀢𑀓𑀕𑁆𑀕𑀫𑀦𑀼𑀲𑁆𑀲𑀭𑀁;

𑀭𑀲𑀢𑀡𑁆𑀳𑀸𑀬 𑀕𑀥𑀺𑀢𑁄, 𑀳𑀤𑀬𑀁 𑀦𑀸𑀯𑀩𑀼𑀚𑁆𑀛𑀢𑀺.

𑁭𑁩𑁪.

‘‘𑀲𑀼𑀪𑀸𑀦𑁆𑀬𑀧𑁆𑀧𑀝𑀺𑀓𑀽𑀮𑀸𑀦𑀺 ¶ , 𑀨𑁄𑀝𑁆𑀞𑀩𑁆𑀩𑀸𑀦𑀺 𑀅𑀦𑀼𑀲𑁆𑀲𑀭𑀁;

𑀭𑀢𑁆𑀢𑁄 𑀭𑀸𑀕𑀸𑀥𑀺𑀓𑀭𑀡𑀁, 𑀯𑀺𑀯𑀺𑀥𑀁 𑀯𑀺𑀦𑁆𑀤𑀢𑁂 𑀤𑀼𑀔𑀁.

𑁭𑁩𑁫.

‘‘𑀫𑀦𑀁 𑀘𑁂𑀢𑁂𑀳𑀺 𑀥𑀫𑁆𑀫𑁂𑀳𑀺, 𑀬𑁄 𑀦 𑀲𑀓𑁆𑀓𑁄𑀢𑀺 𑀭𑀓𑁆𑀔𑀺𑀢𑀼𑀁;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀲𑀩𑁆𑀩𑁂𑀳𑁂𑀢𑁂𑀳𑀺 𑀧𑀜𑁆𑀘𑀳𑀺.

𑁭𑁩𑁬.

‘‘𑀧𑀼𑀩𑁆𑀩𑀮𑁄𑀳𑀺𑀢𑀲𑀫𑁆𑀧𑀼𑀡𑁆𑀡𑀁, 𑀩𑀳𑀼𑀲𑁆𑀲 𑀓𑀼𑀡𑀧𑀲𑁆𑀲 𑀘;

𑀦𑀭𑀯𑀻𑀭𑀓𑀢𑀁 𑀯𑀕𑁆𑀕𑀼𑀁, 𑀲𑀫𑀼𑀕𑁆𑀕𑀫𑀺𑀯 𑀘𑀺𑀢𑁆𑀢𑀺𑀢𑀁.

𑁭𑁩𑁭.

‘‘𑀓𑀝𑀼𑀓𑀁 𑀫𑀥𑀼𑀭𑀲𑁆𑀲𑀸𑀤𑀁, 𑀧𑀺𑀬𑀦𑀺𑀩𑀦𑁆𑀥𑀦𑀁 𑀤𑀼𑀔𑀁;

𑀔𑀼𑀭𑀁𑀯 𑀫𑀥𑀼𑀦𑀸 𑀮𑀺𑀢𑁆𑀢𑀁, 𑀉𑀮𑁆𑀮𑀺𑀳𑀁 𑀦𑀸𑀯𑀩𑀼𑀚𑁆𑀛𑀢𑀺.

𑁭𑁩𑁮.

‘‘𑀇𑀢𑁆𑀣𑀺𑀭𑀽𑀧𑁂 𑀇𑀢𑁆𑀣𑀺𑀲𑀭𑁂, 𑀨𑁄𑀝𑁆𑀞𑀩𑁆𑀩𑁂𑀧𑀺 𑀘 𑀇𑀢𑁆𑀣𑀺𑀬𑀸;

𑀇𑀢𑁆𑀣𑀺𑀕𑀦𑁆𑀥𑁂𑀲𑀼 𑀲𑀸𑀭𑀢𑁆𑀢𑁄, 𑀯𑀺𑀯𑀺𑀥𑀁 𑀯𑀺𑀦𑁆𑀤𑀢𑁂 𑀤𑀼𑀔𑀁.

𑁭𑁩𑁯.

‘‘𑀇𑀢𑁆𑀣𑀺𑀲𑁄𑀢𑀸𑀦𑀺 𑀲𑀩𑁆𑀩𑀸𑀦𑀺, 𑀲𑀦𑁆𑀤𑀦𑁆𑀢𑀺 𑀧𑀜𑁆𑀘 𑀧𑀜𑁆𑀘𑀲𑀼;

𑀢𑁂𑀲𑀫𑀸𑀯𑀭𑀡𑀁 𑀓𑀸𑀢𑀼𑀁, 𑀬𑁄 𑀲𑀓𑁆𑀓𑁄𑀢𑀺 𑀯𑀻𑀭𑀺𑀬𑀯𑀸.

𑁭𑁪𑁦.

‘‘𑀲𑁄 𑀅𑀢𑁆𑀣𑀯𑀸 𑀲𑁄 𑀥𑀫𑁆𑀫𑀝𑁆𑀞𑁄, 𑀲𑁄 𑀤𑀓𑁆𑀔𑁄 𑀲𑁄 𑀯𑀺𑀘𑀓𑁆𑀔𑀡𑁄;

𑀓𑀭𑁂𑀬𑁆𑀬 𑀭𑀫𑀫𑀸𑀦𑁄𑀧𑀺, 𑀓𑀺𑀘𑁆𑀘𑀁 𑀥𑀫𑁆𑀫𑀢𑁆𑀣𑀲𑀁𑀳𑀺𑀢𑀁.

𑁭𑁪𑁧.

‘‘𑀅𑀣𑁄 𑀲𑀻𑀤𑀢𑀺 𑀲𑀜𑁆𑀜𑀼𑀢𑁆𑀢𑀁, 𑀯𑀚𑁆𑀚𑁂 𑀓𑀺𑀘𑁆𑀘𑀁 𑀦𑀺𑀭𑀢𑁆𑀣𑀓𑀁;

𑀦 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀫𑀜𑁆𑀜𑀺𑀢𑁆𑀯𑀸, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄.

𑁭𑁪𑁨.

‘‘𑀬𑀜𑁆𑀘 𑀅𑀢𑁆𑀣𑁂𑀦 𑀲𑀜𑁆𑀜𑀼𑀢𑁆𑀢𑀁, 𑀬𑀸 𑀘 𑀥𑀫𑁆𑀫𑀕𑀢𑀸 𑀭𑀢𑀺;

𑀢𑀁 𑀲𑀫𑀸𑀤𑀸𑀬 𑀯𑀢𑁆𑀢𑁂𑀣, 𑀲𑀸 𑀳𑀺 𑀯𑁂 𑀉𑀢𑁆𑀢𑀫𑀸 𑀭𑀢𑀺.

𑁭𑁪𑁩.

‘‘𑀉𑀘𑁆𑀘𑀸𑀯𑀘𑁂𑀳𑀼𑀧𑀸𑀬𑁂𑀳𑀺, 𑀧𑀭𑁂𑀲𑀫𑀪𑀺𑀚𑀺𑀕𑀻𑀲𑀢𑀺;

𑀳𑀦𑁆𑀢𑁆𑀯𑀸 𑀯𑀥𑀺𑀢𑁆𑀯𑀸 𑀅𑀣 𑀲𑁄𑀘𑀬𑀺𑀢𑁆𑀯𑀸, 𑀆𑀮𑁄𑀧𑀢𑀺 𑀲𑀸𑀳𑀲𑀸 𑀬𑁄 𑀧𑀭𑁂𑀲𑀁.

𑁭𑁪𑁪.

‘‘𑀢𑀘𑁆𑀙𑀦𑁆𑀢𑁄 ¶ 𑀆𑀡𑀺𑀬𑀸 𑀆𑀡𑀺𑀁, 𑀦𑀺𑀳𑀦𑁆𑀢𑀺 𑀩𑀮𑀯𑀸 𑀬𑀣𑀸;

𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑁂𑀳𑁂𑀯, 𑀦𑀺𑀳𑀦𑁆𑀢𑀺 𑀓𑀼𑀲𑀮𑁄 𑀢𑀣𑀸.

𑁭𑁪𑁫.

‘‘𑀲𑀤𑁆𑀥𑀁 ¶ 𑀯𑀻𑀭𑀺𑀬𑀁 𑀲𑀫𑀸𑀥𑀺𑀜𑁆𑀘, 𑀲𑀢𑀺𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀧𑀜𑁆𑀘 𑀧𑀜𑁆𑀘𑀳𑀺 𑀳𑀦𑁆𑀢𑁆𑀯𑀸𑀦, 𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁭𑁪𑁬.

‘‘𑀲𑁄 ¶ 𑀅𑀢𑁆𑀣𑀯𑀸 𑀲𑁄 𑀥𑀫𑁆𑀫𑀝𑁆𑀞𑁄, 𑀓𑀢𑁆𑀯𑀸 𑀯𑀸𑀓𑁆𑀬𑀸𑀦𑀼𑀲𑀸𑀲𑀦𑀺𑀁;

𑀲𑀩𑁆𑀩𑁂𑀦 𑀲𑀩𑁆𑀩𑀁 𑀩𑀼𑀤𑁆𑀥𑀲𑁆𑀲, 𑀲𑁄 𑀦𑀭𑁄 𑀲𑀼𑀔𑀫𑁂𑀥𑀢𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀲𑀫𑀡𑀲𑁆𑀲𑀸𑀢𑀺 𑀧𑀩𑁆𑀩𑀚𑀺𑀢𑀲𑁆𑀲. 𑀅𑀳𑀽𑀢𑀺 𑀅𑀳𑁄𑀲𑀺. 𑀘𑀺𑀦𑁆𑀢𑀸𑀢𑀺 𑀥𑀫𑁆𑀫𑀘𑀺𑀦𑁆𑀢𑀸 𑀥𑀫𑁆𑀫𑀯𑀺𑀘𑀸𑀭𑀡𑀸. 𑀧𑀸𑀭𑀸𑀧𑀭𑀺𑀬𑀲𑁆𑀲𑀸𑀢𑀺 𑀧𑀸𑀭𑀸𑀧𑀭𑀕𑁄𑀢𑁆𑀢𑀲𑁆𑀲. ‘‘𑀧𑀸𑀭𑀸𑀘𑀭𑀺𑀬𑀲𑁆𑀲𑀸’’𑀢𑀺𑀧𑀺 𑀧𑀞𑀦𑁆𑀢𑀺. 𑀪𑀺𑀓𑁆𑀔𑀼𑀦𑁄𑀢𑀺 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑀲𑀻𑀮𑀲𑁆𑀲. 𑀏𑀓𑀓𑀲𑁆𑀲𑀸𑀢𑀺 𑀅𑀲𑀳𑀸𑀬𑀲𑁆𑀲, 𑀏𑀢𑁂𑀦 𑀓𑀸𑀬𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀧𑀯𑀺𑀯𑁂𑀓𑀳𑁂𑀢𑀼𑀦𑀸 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀺𑀯𑁂𑀓𑀁 𑀆𑀭𑀤𑁆𑀥𑀲𑁆𑀲, 𑀏𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀛𑀸𑀬𑀺𑀦𑁄’’𑀢𑀺. 𑀛𑀸𑀬𑀺𑀦𑁄𑀢𑀺 𑀛𑀸𑀬𑀦𑀲𑀻𑀮𑀲𑁆𑀲, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀲𑀼 𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁂𑀢𑀁 𑀣𑁂𑀭𑁄 𑀅𑀢𑁆𑀢𑀸𑀦𑀁 𑀧𑀭𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

‘‘𑀓𑀺𑀫𑀸𑀦𑀼𑀧𑀼𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀢𑀁 𑀘𑀺𑀦𑁆𑀢𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀢𑀸𑀯 𑀓𑀺𑀫𑀸𑀦𑀼𑀧𑀼𑀩𑁆𑀩𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀁 𑀅𑀦𑀼𑀓𑁆𑀓𑀫𑁄, 𑀅𑀦𑀼𑀧𑀼𑀩𑁆𑀩𑀫𑁂𑀯 𑀯𑀓𑁆𑀔𑀫𑀸𑀦𑁂𑀲𑀼 𑀯𑀢𑀲𑀫𑀸𑀘𑀸𑀭𑁂𑀲𑀼 𑀓𑁄 𑀅𑀦𑀼𑀓𑁆𑀓𑀫𑁄, 𑀓𑁂𑀦 𑀅𑀦𑀼𑀓𑁆𑀓𑀫𑁂𑀦 𑀢𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀲𑁄 𑀓𑀺𑀁 𑀯𑀢𑀁 𑀓𑀺𑀁 𑀲𑀫𑀸𑀘𑀸𑀭𑀦𑁆𑀢𑀺 𑀅𑀢𑁆𑀣𑀓𑀸𑀫𑁄 𑀧𑀼𑀭𑀺𑀲𑁄 𑀲𑀫𑀸𑀤𑀺𑀬𑀺𑀢𑀩𑁆𑀩𑀝𑁆𑀞𑁂𑀦 ‘‘𑀯𑀢’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁, 𑀓𑀻𑀤𑀺𑀲𑀁 𑀲𑀻𑀮𑀁 𑀲𑀫𑀸𑀘𑀸𑀭𑀁, 𑀲𑀫𑀸𑀘𑀭𑀦𑁆𑀢𑁄, 𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀭𑀻 𑀓𑀢𑁆𑀢𑀩𑁆𑀩𑀓𑀸𑀭𑀻 𑀅𑀲𑁆𑀲, 𑀓𑀜𑁆𑀘𑀺 𑀲𑀢𑁆𑀢𑀁 𑀦 𑀘 𑀯𑀺𑀳𑁂𑀞𑀬𑁂, 𑀦 𑀩𑀸𑀥𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀦𑀸𑀫 𑀲𑀫𑀡𑀥𑀫𑁆𑀫𑁄, 𑀲𑀗𑁆𑀔𑁂𑀧𑀢𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸, 𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀭𑀯𑀺𑀳𑁂𑀞𑀦𑀸𑀬 𑀮𑁂𑀲𑁄𑀧𑀺 𑀦𑀢𑁆𑀣𑀺 𑀢𑀸𑀬 𑀲𑀢𑀺 𑀲𑀫𑀡𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄.

𑀬𑀣𑀸𑀳 𑀪𑀕𑀯𑀸 𑁋 ‘‘𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻, 𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄’’𑀢𑀺 (𑀥. 𑀧. 𑁧𑁮𑁪). 𑀏𑀢𑁆𑀣 𑀘 𑀯𑀢𑀕𑁆𑀕𑀳𑀡𑁂𑀦 𑀯𑀸𑀭𑀺𑀢𑁆𑀢𑀲𑀻𑀮𑀁 𑀕𑀳𑀺𑀢𑀁, 𑀲𑀫𑀸𑀘𑀸𑀭𑀕𑁆𑀕𑀳𑀡𑁂𑀦 𑀲𑀫𑀸𑀘𑀭𑀺𑀢𑀩𑁆𑀩𑀢𑁄 𑀘𑀸𑀭𑀺𑀢𑁆𑀢𑀲𑀻𑀮𑁂𑀦 𑀲𑀤𑁆𑀥𑀺𑀁 𑀛𑀸𑀦𑀯𑀺𑀧𑀲𑁆𑀲𑀦𑀸𑀤𑀺, 𑀢𑀲𑁆𑀫𑀸 𑀯𑀸𑀭𑀺𑀢𑁆𑀢𑀲𑀻𑀮𑀁 𑀧𑀥𑀸𑀦𑀁. 𑀢𑀢𑁆𑀣𑀸𑀧𑀺 𑀘 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀲𑀺𑀤𑁆𑀥𑁂 𑀲𑀩𑁆𑀩𑀁 𑀲𑀻𑀮𑀁 𑀲𑀼𑀭𑀓𑁆𑀔𑀺𑀢𑀁, 𑀲𑀼𑀕𑁄𑀧𑀺𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀢𑀸𑀯 𑀤𑀲𑁆𑀲𑁂𑀢𑀼𑀓𑀸𑀫𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀭𑀓𑁆𑀔𑀡𑁂 𑀭𑀓𑁆𑀔𑀡𑁂 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀯𑀺𑀪𑀸𑀯𑁂𑀦𑁆𑀢𑁄 ¶ ‘‘𑀇𑀦𑁆𑀤𑁆𑀭𑀺𑀬𑀸𑀦𑀺 𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀭𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀦𑀺𑀤𑀲𑁆𑀲𑀦𑀁, 𑀢𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀺 𑀙 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀭𑀓𑁆𑀔𑀡𑀬𑁄𑀕𑁆𑀬𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀳𑀺𑀢𑀸𑀬𑀸𑀢𑀺 𑀅𑀢𑁆𑀣𑀸𑀬. 𑀅𑀳𑀺𑀢𑀸𑀬𑀸𑀢𑀺 𑀅𑀦𑀢𑁆𑀣𑀸𑀬. 𑀳𑁄𑀦𑁆𑀢𑀻𑀢𑀺 ¶ 𑀯𑀘𑀦𑀲𑁂𑀲𑁄. 𑀓𑀣𑀁 𑀧𑀦 𑀢𑀸𑀦𑀺𑀬𑁂𑀯 𑀳𑀺𑀢𑀸𑀬 𑀘 𑀅𑀳𑀺𑀢𑀸𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀭𑀓𑁆𑀔𑀺𑀢𑀸𑀦𑀻’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀓𑀯𑀸𑀝𑁂𑀦 𑀅𑀧𑀺𑀳𑀺𑀢𑀸𑀦𑀺, 𑀢𑀲𑁆𑀲 𑀭𑀽𑀧𑀸𑀤𑀻𑀲𑀼 𑀅𑀪𑀺𑀚𑁆𑀛𑀸𑀤𑀺𑀧𑀸𑀧𑀥𑀫𑁆𑀫𑀧𑀯𑀢𑁆𑀢𑀺𑀬𑀸 𑀤𑁆𑀯𑀸𑀭𑀪𑀸𑀯𑀢𑁄 𑀅𑀦𑀢𑁆𑀣𑀸𑀬 𑀧𑀺𑀳𑀺𑀢𑀸𑀦𑀺, 𑀢𑀤𑀪𑀸𑀯𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

𑀇𑀦𑁆𑀤𑁆𑀭𑀺𑀬𑀸𑀦𑁂𑀯 ¶ 𑀲𑀸𑀭𑀓𑁆𑀔𑀦𑁆𑀢𑀺 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀭𑀺𑀧𑀼𑀡𑁆𑀡𑁄 𑀲𑀻𑀮𑀲𑀫𑁆𑀧𑀤𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀻𑀮𑀲𑀫𑁆𑀧𑀤𑀸 𑀧𑀭𑀺𑀧𑀼𑀡𑁆𑀡𑀸 𑀲𑀫𑀸𑀥𑀺𑀲𑀫𑁆𑀧𑀤𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀫𑀸𑀥𑀺𑀲𑀫𑁆𑀧𑀤𑀸 𑀧𑀭𑀺𑀧𑀼𑀡𑁆𑀡𑀸 𑀧𑀜𑁆𑀜𑀸𑀲𑀫𑁆𑀧𑀤𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀭𑀓𑁆𑀔𑀸 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸𑀯 𑀫𑀽𑀮𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀸𑀦𑁂𑀯 𑀲𑀸𑀭𑀓𑁆𑀔’’𑀦𑁆𑀢𑀺. 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑁂𑀦 𑀆𑀭𑀓𑁆𑀔𑁂𑀦 𑀲𑀁𑀭𑀓𑁆𑀔𑀦𑁆𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀯 𑀢𑀸𑀯 𑀲𑀫𑁆𑀫𑀤𑁂𑀯 𑀭𑀓𑁆𑀔𑀦𑁆𑀢𑁄, 𑀬𑀣𑀸 𑀅𑀓𑀼𑀲𑀮𑀘𑁄𑀭𑀸 𑀢𑁂𑀳𑀺 𑀢𑁂𑀳𑀺 𑀤𑁆𑀯𑀸𑀭𑁂𑀳𑀺 𑀧𑀯𑀺𑀲𑀺𑀢𑁆𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀼𑀲𑀮𑀁 𑀪𑀡𑁆𑀟𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀢𑀣𑀸 𑀢𑀸𑀦𑀺 𑀧𑀺𑀤𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀸𑀭𑀓𑁆𑀔𑀦𑁆𑀢𑀺 𑀘 𑀲𑀁-𑀲𑀤𑁆𑀤𑀲𑁆𑀲 𑀲𑀸𑀪𑀸𑀯𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, ‘‘𑀲𑀸𑀭𑀸𑀕𑁄’’𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀲𑀁𑀭𑀓𑁆𑀔’’𑀦𑁆𑀢𑀺 𑀘 𑀧𑀸𑀞𑁄. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀕𑁄𑀧𑀬𑀦𑁆𑀢𑀺 𑀢𑀲𑁆𑀲𑁂𑀯 𑀧𑀭𑀺𑀬𑀸𑀬𑀯𑀘𑀦𑀁, 𑀧𑀭𑀺𑀬𑀸𑀬𑀯𑀘𑀦𑁂 𑀧𑀬𑁄𑀚𑀦𑀁 𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀭𑀻𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, ‘‘𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑁂’’𑀢𑀺 𑀇𑀫𑀺𑀦𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀁, 𑀉𑀪𑀬𑁂𑀦𑀸𑀧𑀺 𑀯𑀸 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀫𑁂𑀯 𑀤𑀲𑁆𑀲𑁂𑀢𑀺 𑀧𑀭𑀸𑀯𑀺𑀳𑁂𑀞𑀦𑀲𑁆𑀲𑀸𑀧𑀺 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀅𑀣 𑀯𑀸 𑀧𑀤𑀤𑁆𑀯𑀬𑁂𑀦𑀧𑀺 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲 𑀘 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄.

𑀏𑀯𑀁 𑀭𑀓𑁆𑀔𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑀺𑀢𑀸𑀬 𑀳𑁄𑀦𑁆𑀢𑀻𑀢𑀺 𑀯𑁄𑀤𑀸𑀦𑀧𑀓𑁆𑀔𑀁 𑀲𑀗𑁆𑀔𑁂𑀧𑁂𑀦𑁂𑀯 𑀤𑀲𑁆𑀲𑁂𑀢𑁆𑀯𑀸, 𑀅𑀭𑀓𑁆𑀔𑀺𑀢𑀸𑀦𑀺 𑀅𑀳𑀺𑀢𑀸𑀬 𑀳𑁄𑀦𑁆𑀢𑀻𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑁂 𑀭𑀽𑀧𑁂𑀲𑀼, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀯𑀸𑀭𑀬𑀁. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀬𑁄 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀭𑀽𑀧𑀸𑀬𑀢𑀦𑁂𑀲𑀼 𑀕𑀘𑁆𑀙𑀦𑁆𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀦𑁆𑀢𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀦𑀺𑀯𑀸𑀭𑀬𑀁, 𑀅𑀦𑀺𑀯𑀸𑀭𑀬𑀦𑁆𑀢𑁄 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁄 𑀢𑀣𑀸𑀧𑀯𑀢𑁆𑀢𑀺𑀬𑀁 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦 𑀳𑁄𑀢𑀺 𑀘𑁂, 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀤𑀻𑀦𑀯𑀁 𑀤𑁄𑀲𑀁 𑀦 𑀧𑀲𑁆𑀲𑀢𑀺 𑀘𑁂 ¶ . ‘‘𑀕𑀘𑁆𑀙𑀦𑁆𑀢𑀁 𑀦𑀺𑀯𑀸𑀭𑀬𑁂 𑀅𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻’’𑀢𑀺 𑀘 𑀧𑀸𑀞𑁄. 𑀢𑀢𑁆𑀣 𑀬𑁄 ‘‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁫) 𑀯𑀼𑀢𑁆𑀢𑀯𑀺𑀥𑀺𑀦𑀸 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀞𑀢𑁆𑀯𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀭𑀽𑀧𑀸𑀬𑀢𑀦𑁂 𑀧𑀯𑀢𑁆𑀢𑀫𑀸𑀦𑁄 𑀢𑀢𑁆𑀣 𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻 𑀦𑀸𑀫. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻 𑀤𑀝𑁆𑀞𑀩𑁆𑀩𑁄. 𑀲𑁄 𑀤𑀼𑀓𑁆𑀔𑀸 𑀦 𑀳𑀺 𑀫𑀼𑀘𑁆𑀘𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑀢𑁂𑀯. 𑀏𑀢𑁆𑀣 𑀘 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀺𑀯𑀸𑀭𑀡𑀁 ¶ 𑀦𑀸𑀫 𑀬𑀣𑀸 𑀢𑁂𑀦 𑀤𑁆𑀯𑀸𑀭𑁂𑀦 𑀅𑀪𑀺𑀚𑁆𑀛𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀣𑀸 𑀧𑀯𑀢𑁆𑀢𑀦𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀅𑀦𑀼𑀝𑁆𑀞𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀥𑀺𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀫𑀼𑀢𑁆𑀢𑀢𑀡𑁆𑀳𑀸𑀬 𑀫𑀼𑀘𑁆𑀙𑀁 𑀆𑀧𑀦𑁆𑀦𑁄. 𑀅𑀫𑁆𑀩𑀺𑀮𑀦𑁆𑀢𑀺 𑀅𑀫𑁆𑀩𑀺𑀮𑀭𑀲𑀁. 𑀫𑀥𑀼𑀭𑀕𑁆𑀕𑀦𑁆𑀢𑀺 𑀫𑀥𑀼𑀭𑀭𑀲𑀓𑁄𑀝𑁆𑀞𑀸𑀲𑀁. 𑀢𑀣𑀸 𑀢𑀺𑀢𑁆𑀢𑀓𑀕𑁆𑀕𑀁. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀢𑀁 𑀢𑀁 𑀭𑀲𑀁 𑀅𑀦𑀼𑀯𑀺𑀘𑀺𑀦𑁆𑀢𑁂𑀦𑁆𑀢𑁄. 𑀕𑀦𑁆𑀣𑀺𑀢𑁄𑀢𑀺 𑀭𑀲𑀢𑀡𑁆𑀳𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀭𑀲𑁂 𑀕𑀦𑁆𑀣𑀺𑀢𑁄 𑀩𑀦𑁆𑀥𑁄. ‘‘𑀕𑀥𑀺𑀢𑁄’’𑀢𑀺 𑀘 𑀧𑀞𑀦𑁆𑀢𑀺, 𑀕𑁂𑀥𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀳𑀤𑀬𑀁 𑀦𑀸𑀯𑀩𑀼𑀚𑁆𑀛𑀢𑀻𑀢𑀺 ‘‘𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑁆𑀚𑀸𑀤𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺 ¶ , 𑀲𑀸𑀲𑀦𑀲𑁆𑀲 𑀳𑀤𑀬𑀁 𑀅𑀩𑁆𑀪𑀦𑁆𑀢𑀭𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀫𑁆𑀫𑀤𑁆𑀤𑀦𑀭𑀲𑀢𑀡𑁆𑀳𑀸𑀬 𑀕𑀥𑀺𑀢𑁄 𑀦𑀸𑀯𑀩𑀼𑀚𑁆𑀛𑀢𑀺 𑀦 𑀚𑀸𑀦𑀸𑀢𑀺, 𑀦 𑀧𑀝𑀺𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀪𑀸𑀦𑀻𑀢𑀺 𑀲𑀼𑀦𑁆𑀤𑀭𑀸𑀦𑀺. 𑀅𑀧𑁆𑀧𑀝𑀺𑀓𑀽𑀮𑀸𑀦𑀻𑀢𑀺 𑀫𑀦𑁄𑀭𑀫𑀸𑀦𑀺, 𑀇𑀝𑁆𑀞𑀸𑀦𑀺. 𑀨𑁄𑀝𑁆𑀞𑀩𑁆𑀩𑀸𑀦𑀻𑀢𑀺 𑀉𑀧𑀸𑀤𑀺𑀡𑁆𑀡𑀸𑀦𑀼𑀧𑀸𑀤𑀺𑀡𑁆𑀡𑀧𑁆𑀧𑀪𑁂𑀤𑁂 𑀨𑀲𑁆𑀲𑁂. 𑀭𑀢𑁆𑀢𑁄𑀢𑀺 𑀭𑀚𑁆𑀚𑀦𑀲𑀪𑀸𑀯𑁂𑀦 𑀭𑀸𑀕𑁂𑀦 𑀭𑀢𑁆𑀢𑁄. 𑀭𑀸𑀕𑀸𑀥𑀺𑀓𑀭𑀡𑀦𑁆𑀢𑀺 𑀭𑀸𑀕𑀳𑁂𑀢𑀼. 𑀯𑀺𑀯𑀺𑀥𑀁 𑀯𑀺𑀦𑁆𑀤𑀢𑁂 𑀤𑀼𑀔𑀦𑁆𑀢𑀺 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀲𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀦𑀺𑀭𑀬𑀲𑀦𑁆𑀢𑀸𑀧𑀸𑀤𑀺𑀯𑀲𑁂𑀦 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁 𑀧𑀝𑀺𑀮𑀪𑀢𑀺.

𑀫𑀦𑀁 𑀘𑁂𑀢𑁂𑀳𑀻𑀢𑀺 𑀫𑀦𑀜𑁆𑀘 𑀏𑀢𑁂𑀳𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀳𑀺 𑀥𑀫𑁆𑀫𑀸𑀭𑀫𑁆𑀫𑀡𑀧𑁆𑀧𑀪𑁂𑀤𑁂𑀳𑀺 𑀘. 𑀦𑀦𑁆𑀢𑀺 𑀧𑀼𑀕𑁆𑀕𑀮𑀁. 𑀲𑀩𑁆𑀩𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀧𑀜𑁆𑀘𑀳𑀺𑀧𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀼𑀕𑁆𑀕𑀮𑁄 𑀫𑀦𑀁, 𑀫𑀦𑁄𑀤𑁆𑀯𑀸𑀭𑀁, 𑀏𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀭𑀽𑀧𑀸𑀤𑀻𑀳𑀺 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀥𑀫𑁆𑀫𑀸𑀭𑀫𑁆𑀫𑀡𑀧𑁆𑀧𑀪𑁂𑀤𑀢𑁄 𑀘. 𑀢𑀢𑁆𑀣 𑀧𑀯𑀢𑁆𑀢𑀦𑀓𑀧𑀸𑀧𑀓𑀫𑁆𑀫𑀦𑀺𑀯𑀸𑀭𑀡𑁂𑀦 𑀭𑀓𑁆𑀔𑀺𑀢𑀼𑀁, 𑀕𑁄𑀧𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀢𑁄 𑀢𑀲𑁆𑀲 𑀅𑀭𑀓𑁆𑀔𑀡𑀢𑁄 𑀦𑀁 𑀧𑀼𑀕𑁆𑀕𑀮𑀁 𑀢𑀁𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺, 𑀅𑀦𑀼𑀕𑀘𑁆𑀙𑀢𑀺, 𑀅𑀦𑀼𑀕𑀘𑁆𑀙𑀦𑁆𑀢𑀜𑁆𑀘 𑀏𑀢𑁂𑀳𑀺 𑀧𑀜𑁆𑀘𑀳𑀺𑀧𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀳𑀺 𑀙𑀝𑁆𑀞𑀸𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑁂𑀳𑀺𑀧𑀺 𑀆𑀭𑀫𑁆𑀫𑀡𑀧𑁆𑀧𑀘𑁆𑀘𑀬𑀪𑀽𑀢𑁂𑀳𑀺 𑀅𑀦𑀼𑀕𑀘𑁆𑀙𑀢𑀻𑀢𑀺. 𑀏𑀢𑁆𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀺𑀪𑀸𑀯𑀢𑁄 ‘‘𑀕𑀘𑁆𑀙𑀦𑁆𑀢𑀁 ¶ 𑀅𑀦𑀺𑀯𑀸𑀭𑀬’’𑀦𑁆𑀢𑀺 𑀯𑀼𑀢𑁆𑀢𑀁 𑀇𑀢𑀭𑀁 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀻𑀢𑀺 ‘‘𑀕𑀦𑁆𑀥𑁂 𑀘𑁂 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀘 𑀭𑀲𑀢𑀡𑁆𑀳𑀸 𑀘 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀘 𑀲𑀢𑁆𑀢𑀸𑀦𑀁 𑀯𑀺𑀲𑁂𑀲𑀢𑁄 𑀩𑀮𑀯𑀢𑀻𑀢𑀺 ‘‘𑀭𑀲𑀢𑀡𑁆𑀳𑀸𑀬 𑀕𑀥𑀺𑀢𑁄, 𑀨𑁄𑀝𑁆𑀞𑀩𑁆𑀩𑀸𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑁄𑀢𑀺’’ 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀅𑀕𑀼𑀢𑁆𑀢𑀤𑁆𑀯𑀸𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀙𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀅𑀲𑀁𑀯𑀭𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑁆𑀯𑀸𑀬𑀫𑀲𑀁𑀯𑀭𑁄 𑀬𑀲𑁆𑀫𑀸 𑀲𑀭𑀻𑀭𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀭𑀻𑀭𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 ‘‘𑀧𑀼𑀩𑁆𑀩𑀮𑁄𑀳𑀺𑀢𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺𑀆𑀤𑀺𑀦𑀸 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀲𑁆𑀲𑀢𑁆𑀣𑁄 ¶ 𑁋 𑀲𑀭𑀻𑀭𑀁 𑀦𑀸𑀫𑁂𑀢𑀁 𑀧𑀼𑀩𑁆𑀩𑁂𑀦 𑀮𑁄𑀳𑀺𑀢𑁂𑀦 𑀘 𑀲𑀫𑁆𑀧𑀼𑀡𑁆𑀡𑀁 𑀪𑀭𑀺𑀢𑀁 𑀅𑀜𑁆𑀜𑁂𑀦 𑀘 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀸 𑀩𑀳𑀼𑀦𑀸 𑀓𑀼𑀡𑀧𑁂𑀦, 𑀢𑀬𑀺𑀤𑀁 𑀦𑀭𑀯𑀻𑀭𑁂𑀦 𑀦𑀭𑁂𑀲𑀼 𑀙𑁂𑀓𑁂𑀦 𑀲𑀺𑀧𑁆𑀧𑀸𑀘𑀭𑀺𑀬𑁂𑀦 𑀓𑀢𑀁 𑀯𑀕𑁆𑀕𑀼 𑀫𑀝𑁆𑀞𑀁 𑀮𑀸𑀔𑀸𑀧𑀭𑀺𑀓𑀫𑁆𑀫𑀸𑀤𑀺𑀦𑀸 𑀘𑀺𑀢𑁆𑀢𑀺𑀢𑀁, 𑀅𑀦𑁆𑀢𑁄 𑀧𑀦 𑀕𑀽𑀣𑀸𑀤𑀺𑀅𑀲𑀼𑀘𑀺𑀪𑀭𑀺𑀢𑀁 𑀲𑀫𑀼𑀕𑁆𑀕𑀁 𑀯𑀺𑀬 𑀙𑀯𑀺𑀫𑀢𑁆𑀢𑀫𑀦𑁄𑀳𑀭𑀁 𑀩𑀸𑀮𑀚𑀦𑀲𑀫𑁆𑀫𑁄𑀳𑀁 𑀤𑀼𑀓𑁆𑀔𑀲𑀪𑀸𑀯𑀢𑀸𑀬 𑀦𑀺𑀭𑀬𑀸𑀤𑀺𑀤𑀼𑀓𑁆𑀔𑀢𑀸𑀧𑀦𑀢𑁄 𑀘 𑀓𑀝𑀼𑀓𑀁, 𑀧𑀭𑀺𑀓𑀧𑁆𑀧𑀲𑀫𑁆𑀪𑀯𑁂𑀦 𑀅𑀫𑀽𑀮𑀓𑁂𑀦 𑀅𑀲𑁆𑀲𑀸𑀤𑀫𑀢𑁆𑀢𑁂𑀦 𑀫𑀥𑀼𑀭𑀢𑀸𑀬 𑀫𑀥𑀼𑀭𑀲𑁆𑀲𑀸𑀤𑀁, 𑀢𑀢𑁄 𑀏𑀯 𑀧𑀺𑀬𑀪𑀸𑀯𑀦𑀺𑀩𑀦𑁆𑀥𑀦𑁂𑀦 𑀧𑀺𑀬𑀦𑀺𑀩𑀦𑁆𑀥𑀦𑀁, 𑀤𑀼𑀲𑁆𑀲𑀳𑀢𑀸𑀬 𑀅𑀧𑁆𑀧𑀢𑀻𑀢𑀢𑀸𑀬 𑀘 𑀤𑀼𑀔𑀁, 𑀈𑀤𑀺𑀲𑁂 𑀲𑀭𑀻𑀭𑁂 𑀅𑀲𑁆𑀲𑀸𑀤𑀮𑁄𑀪𑁂𑀦 𑀫𑀳𑀸𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀼𑀬𑁆𑀬𑀫𑀸𑀦𑀁 𑀅𑀦𑀯𑀩𑀼𑀚𑁆𑀛𑀦𑁆𑀢𑁄 𑀮𑁄𑀓𑁄 𑀫𑀥𑀼𑀭𑀕𑀺𑀤𑁆𑀥𑁄 𑀔𑀼𑀭𑀥𑀸𑀭𑀸𑀮𑁂𑀳𑀓𑀧𑀼𑀭𑀺𑀲𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺.

𑀇𑀤𑀸𑀦𑀺 ¶ 𑀏𑀢𑁂 𑀘𑀓𑁆𑀔𑀸𑀤𑀻𑀦𑀁 𑀕𑁄𑀘𑀭𑀪𑀽𑀢𑀸 𑀭𑀽𑀧𑀸𑀤𑀬𑁄 𑀯𑀼𑀢𑁆𑀢𑀸, 𑀢𑁂 𑀯𑀺𑀲𑁂𑀲𑀢𑁄 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀧𑀝𑀺𑀩𑀤𑁆𑀥𑀸 𑀓𑀫𑀦𑀻𑀬𑀸𑀢𑀺 𑀢𑀢𑁆𑀣 𑀲𑀁𑀯𑀭𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀺𑀭𑀽𑀧𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁆𑀣𑀺𑀭𑀽𑀧𑁂𑀢𑀺 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀬𑀢𑀦𑀲𑀗𑁆𑀔𑀸𑀢𑁂 𑀯𑀡𑁆𑀡𑁂. 𑀅𑀧𑀺 𑀘 𑀬𑁄 𑀓𑁄𑀘𑀺 𑀇𑀢𑁆𑀣𑀺𑀬𑀸 𑀦𑀺𑀯𑀢𑁆𑀣𑀲𑁆𑀲 𑀅𑀮𑀗𑁆𑀓𑀸𑀭𑀲𑁆𑀲 𑀯𑀸 𑀕𑀦𑁆𑀥𑀯𑀡𑁆𑀡𑀓𑀸𑀤𑀻𑀦𑀁 𑀯𑀸 𑀧𑀺𑀴𑀦𑁆𑀥𑀦𑀫𑀸𑀮𑀸𑀦𑀁 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁄 𑀯𑀡𑁆𑀡𑁄 𑀧𑀼𑀭𑀺𑀲𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀸𑀬 𑀉𑀧𑀓𑀧𑁆𑀧𑀢𑀺, 𑀲𑀩𑁆𑀩𑀫𑁂𑀢𑀁 ‘‘𑀇𑀢𑁆𑀣𑀺𑀭𑀽𑀧’’𑀦𑁆𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁆𑀣𑀺𑀲𑀭𑁂𑀢𑀺 𑀇𑀢𑁆𑀣𑀺𑀬𑀸 𑀕𑀻𑀢𑀮𑀧𑀺𑀢𑀳𑀲𑀺𑀢𑀭𑀼𑀤𑀺𑀢𑀲𑀤𑁆𑀤𑁂. 𑀅𑀧𑀺 𑀘 𑀇𑀢𑁆𑀣𑀺𑀬𑀸 𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲𑀧𑀺 𑀅𑀮𑀗𑁆𑀓𑀢𑀅𑀮𑀗𑁆𑀓𑀸𑀭𑀲𑁆𑀲𑀧𑀺 𑀇𑀢𑁆𑀣𑀺𑀧𑀬𑁄𑀕𑀦𑀺𑀧𑁆𑀨𑀸𑀤𑀺𑀢𑀸 𑀯𑁂𑀡𑀼𑀯𑀻𑀡𑀸𑀲𑀗𑁆𑀔𑀧𑀡𑀯𑀸𑀤𑀻𑀦𑀫𑁆𑀧𑀺 𑀲𑀤𑁆𑀤𑀸 𑀇𑀥 𑀇𑀢𑁆𑀣𑀺𑀲𑀭𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑁄𑀧𑁂𑀲𑁄 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀆𑀓𑀟𑁆𑀠𑀢𑀻𑀢𑀺. ‘‘𑀇𑀢𑁆𑀣𑀺𑀭𑀲𑁂’’𑀢𑀺 𑀧𑀦 𑀧𑀸𑀴𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀲𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑁆𑀣𑀺𑀬𑀸 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀢𑀸𑀤𑀺𑀯𑀲𑁂𑀦 𑀅𑀲𑁆𑀲𑀯𑀭𑀲𑁄 𑀘𑁂𑀯 𑀧𑀭𑀺𑀪𑁄𑀕𑀭𑀲𑁄 ¶ 𑀘 𑀇𑀢𑁆𑀣𑀺𑀭𑀲𑁄𑀢𑀺 𑀏𑀓𑁂. 𑀬𑁄 𑀧𑀦 𑀇𑀢𑁆𑀣𑀺𑀬𑀸 𑀑𑀝𑁆𑀞𑀫𑀁𑀲𑀲𑀫𑁆𑀫𑀓𑁆𑀔𑀺𑀢𑀔𑁂𑀴𑀸𑀤𑀺𑀭𑀲𑁄, 𑀬𑁄 𑀘 𑀢𑀸𑀬 𑀧𑀼𑀭𑀺𑀲𑀲𑁆𑀲 𑀤𑀺𑀦𑁆𑀦𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀁 𑀭𑀲𑁄, 𑀲𑀩𑁆𑀩𑁄𑀧𑁂𑀲𑁄 ‘‘𑀇𑀢𑁆𑀣𑀺𑀭𑀲𑁄’’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀨𑁄𑀝𑁆𑀞𑀩𑁆𑀩𑁂𑀧𑀺 𑀘 𑀇𑀢𑁆𑀣𑀺𑀬𑀸 𑀓𑀸𑀬𑀲𑀫𑁆𑀨𑀲𑁆𑀲𑁄, 𑀇𑀢𑁆𑀣𑀺𑀲𑀭𑀻𑀭𑀸𑀭𑀽𑀴𑁆𑀳𑀸𑀦𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀫𑀸𑀮𑀸𑀤𑀻𑀦𑀁 𑀨𑀲𑁆𑀲𑁄 ‘‘𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑁄’’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀬𑁂𑀲𑀁 𑀇𑀢𑁆𑀣𑀺𑀭𑀽𑀧𑁂 𑀇𑀢𑁆𑀣𑀺𑀲𑀭𑁂𑀢𑀺 𑀧𑀸𑀴𑀺, 𑀢𑁂𑀲𑀁 𑀅𑀧𑀺-𑀲𑀤𑁆𑀤𑁂𑀦 𑀇𑀢𑁆𑀣𑀺𑀭𑀲𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀇𑀢𑁆𑀣𑀺𑀕𑀦𑁆𑀥𑁂𑀲𑀽𑀢𑀺 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀕𑀦𑁆𑀥𑀸𑀬𑀢𑀦𑁂𑀲𑀼. 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑁄 𑀦𑀸𑀫 𑀤𑀼𑀕𑁆𑀕𑀦𑁆𑀥𑁄. 𑀏𑀓𑀘𑁆𑀘𑀸 𑀳𑀺 𑀇𑀢𑁆𑀣𑀻 𑀅𑀲𑁆𑀲𑀕𑀦𑁆𑀥𑀺𑀦𑀻 𑀳𑁄𑀢𑀺, 𑀏𑀓𑀘𑁆𑀘𑀸 𑀫𑁂𑀡𑁆𑀟𑀕𑀦𑁆𑀥𑀺𑀦𑀻, 𑀏𑀓𑀘𑁆𑀘𑀸 𑀲𑁂𑀤𑀕𑀦𑁆𑀥𑀺𑀦𑀻, 𑀏𑀓𑀘𑁆𑀘𑀸 𑀲𑁄𑀡𑀺𑀢𑀕𑀦𑁆𑀥𑀺𑀦𑀻, 𑀢𑀣𑀸𑀧𑀺 𑀢𑀸𑀲𑀼 𑀅𑀦𑁆𑀥𑀩𑀸𑀮𑁄 𑀭𑀚𑁆𑀚𑀢𑁂𑀯. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀦 𑀇𑀢𑁆𑀣𑀺𑀭𑀢𑀦𑀲𑁆𑀲 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 ¶ 𑀉𑀧𑁆𑀧𑀮𑀕𑀦𑁆𑀥𑁄, 𑀅𑀬𑀁 𑀦 𑀲𑀩𑁆𑀩𑀸𑀲𑀁 𑀳𑁄𑀢𑀻𑀢𑀺, 𑀇𑀢𑁆𑀣𑀺𑀬𑀸 𑀲𑀭𑀻𑀭𑁂 𑀆𑀭𑀽𑀴𑁆𑀳𑁄 𑀆𑀕𑀦𑁆𑀢𑀼𑀓𑁄 𑀅𑀦𑀼𑀮𑀺𑀫𑁆𑀧𑀦𑀸𑀤𑀺𑀕𑀦𑁆𑀥𑁄 ‘‘𑀇𑀢𑁆𑀣𑀺𑀕𑀦𑁆𑀥𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀭𑀢𑁆𑀢𑁄𑀢𑀺 𑀲𑀼𑀝𑁆𑀞𑀼 𑀭𑀢𑁆𑀢𑁄 𑀕𑀥𑀺𑀢𑁄 𑀫𑀼𑀘𑁆𑀙𑀺𑀢𑁄, 𑀇𑀤𑀁 𑀧𑀦 𑀧𑀤𑀁 ‘‘𑀇𑀢𑁆𑀣𑀺𑀭𑀽𑀧𑁂’’𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀯𑀺𑀥𑀁 𑀯𑀺𑀦𑁆𑀤𑀢𑁂 𑀤𑀼𑀔𑀦𑁆𑀢𑀺 𑀇𑀢𑁆𑀣𑀺𑀭𑀽𑀧𑀸𑀤𑀻𑀲𑀼 𑀲𑀭𑀸𑀕𑀦𑀺𑀫𑀺𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀥𑀩𑀦𑁆𑀥𑀦𑀸𑀤𑀺𑀯𑀲𑁂𑀦 𑀲𑀫𑁆𑀧𑀭𑀸𑀬𑀺𑀓𑀁 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁 𑀧𑀝𑀺𑀮𑀪𑀢𑀺.

𑀇𑀢𑁆𑀣𑀺𑀲𑁄𑀢𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 𑀇𑀢𑁆𑀣𑀺𑀬𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀲𑀩𑁆𑀩𑀸𑀦𑀺 𑀅𑀦𑀯𑀲𑁂𑀲𑀸𑀦𑀺 𑀧𑀜𑁆𑀘 𑀢𑀡𑁆𑀳𑀸𑀲𑁄𑀢𑀸𑀦𑀺 𑀲𑀦𑁆𑀤𑀦𑁆𑀢𑀺. 𑀧𑀜𑁆𑀘𑀲𑀽𑀢𑀺 𑀧𑀼𑀭𑀺𑀲𑀲𑁆𑀲 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑁄𑀢𑀸𑀦𑀁. 𑀆𑀯𑀭𑀡𑀦𑁆𑀢𑀺 𑀲𑀁𑀯𑀭𑀡𑀁, 𑀬𑀣𑀸 𑀅𑀲𑀁𑀯𑀭𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀁𑀯𑀭𑀁 𑀧𑀯𑀢𑁆𑀢𑁂𑀢𑀼𑀁 𑀬𑁄 𑀲𑀓𑁆𑀓𑁄𑀢𑀺, 𑀲𑁄 𑀯𑀻𑀭𑀺𑀬𑀯𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀭𑀽𑀧𑀸𑀤𑀺𑀕𑁄𑀘𑀭𑁂 𑀧𑀩𑁆𑀩𑀚𑀺𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀕𑀳𑀝𑁆𑀞𑀲𑁆𑀲 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀅𑀢𑁆𑀣𑀯𑀸’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄 𑀅𑀢𑁆𑀣𑀯𑀸 𑀲𑁄 𑀥𑀫𑁆𑀫𑀝𑁆𑀞𑁄, 𑀲𑁄 𑀤𑀓𑁆𑀔𑁄 𑀲𑁄 𑀯𑀺𑀘𑀓𑁆𑀔𑀡𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀢𑁆𑀣𑀯𑀸, 𑀩𑀼𑀤𑁆𑀥𑀺𑀫𑀸, 𑀥𑀫𑁆𑀫𑁂 𑀞𑀺𑀢𑁄, 𑀥𑀫𑁆𑀫𑁂 𑀤𑀓𑁆𑀔𑁄, 𑀥𑀫𑁆𑀫𑁂 𑀙𑁂𑀓𑁄, 𑀅𑀦𑀮𑀲𑁄 𑀯𑀸 𑀯𑀺𑀘𑀓𑁆𑀔𑀡𑁄 𑀇𑀢𑀺 𑀓𑀢𑁆𑀢𑀩𑁆𑀩𑀢𑀸𑀲𑀼 𑀓𑀼𑀲𑀮𑁄 𑀦𑀸𑀫. 𑀓𑀭𑁂𑀬𑁆𑀬 𑀭𑀫𑀫𑀸𑀦𑁄𑀧𑀺, 𑀓𑀺𑀘𑁆𑀘𑀁 𑀥𑀫𑁆𑀫𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀕𑁂𑀳𑀭𑀢𑀺𑀬𑀸 𑀭𑀫𑀫𑀸𑀦𑁄𑀧𑀺 𑀥𑀫𑁆𑀫𑀢𑁆𑀣𑀲𑀁𑀳𑀺𑀢𑀁 𑀥𑀫𑁆𑀫𑀢𑁄 𑀅𑀢𑁆𑀣𑀢𑁄 𑀘 𑀅𑀦𑀧𑁂𑀢𑀫𑁂𑀯 𑀢𑀁 𑀢𑀁 𑀓𑀢𑁆𑀢𑀩𑁆𑀩𑀁. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀉𑀧𑁆𑀧𑀸𑀤𑀦𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀧𑀭𑀺𑀧𑀸𑀮𑀦𑀁, 𑀧𑀭𑀺𑀪𑁄𑀕𑀜𑁆𑀘 𑀓𑀭𑁂𑀬𑁆𑀬, 𑀅𑀜𑁆𑀜𑀫𑀜𑁆𑀜𑀁, 𑀅𑀯𑀺𑀭𑁄𑀥𑁂𑀦, 𑀅𑀜𑁆𑀜𑀫𑀜𑁆𑀜𑀁, 𑀅𑀩𑀸𑀥𑀦𑁂𑀦, 𑀢𑀺𑀯𑀕𑁆𑀕𑀢𑁆𑀣𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀅𑀬𑀜𑁆𑀘 𑀦𑀬𑁄 𑀬𑁂𑀲𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀯𑀺𑀭𑁄𑀥𑁂𑀦 𑀢𑀺𑀯𑀕𑁆𑀕𑀢𑁆𑀣𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀸𑀤𑀻𑀦𑀁 𑀯𑀺𑀬, 𑀢𑁂𑀲𑀁 𑀯𑀲𑁂𑀦 𑀯𑀼𑀢𑁆𑀢𑁄. 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣𑁄 𑀲𑀻𑀤𑀢𑀺 𑀲𑀜𑁆𑀜𑀼𑀢𑁆𑀢𑀦𑁆𑀢𑀺 𑀬𑀤𑀺 𑀇𑀥𑀮𑁄𑀓𑁂 𑀲𑀼𑀧𑀲𑀁𑀳𑀺𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀅𑀢𑁆𑀣𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀁. 𑀯𑀚𑁆𑀚𑁂 𑀓𑀺𑀘𑁆𑀘𑀁 𑀦𑀺𑀭𑀢𑁆𑀣𑀓𑀦𑁆𑀢𑀺 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀭𑀳𑀺𑀢𑀁 𑀅𑀦𑀢𑁆𑀣𑀼𑀧𑀲𑀁𑀳𑀺𑀢𑀁 𑀓𑀺𑀘𑁆𑀘𑀁 𑀲𑀘𑁂𑀧𑀺 𑀯𑀺𑀲𑁆𑀲𑀚𑁆𑀚𑁂𑀬𑁆𑀬 𑀧𑀭𑀺𑀘𑁆𑀘𑀚𑁂𑀬𑁆𑀬. 𑀦 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀫𑀜𑁆𑀜𑀺𑀢𑁆𑀯𑀸, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀸𑀭𑀡𑀧𑀜𑁆𑀜𑀸𑀲𑀫𑁆𑀪𑀯𑁂𑀦 𑀯𑀺𑀘𑀓𑁆𑀔𑀡𑁄 𑀅𑀦𑀢𑁆𑀣𑀼𑀧𑀲𑀁𑀳𑀺𑀢𑀁, 𑀢𑀁 𑀓𑀺𑀘𑁆𑀘𑀁 𑀫𑀬𑀸 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀫𑀜𑁆𑀜𑀺𑀢𑁆𑀯𑀸 𑀯𑀺𑀯𑀚𑁆𑀚𑁂𑀬𑁆𑀬.

𑀯𑀺𑀯𑀚𑁆𑀚𑁂𑀢𑁆𑀯𑀸 𑀧𑀦 𑀬𑀜𑁆𑀘 𑀅𑀢𑁆𑀣𑁂𑀦 𑀲𑀜𑁆𑀜𑀼𑀢𑁆𑀢𑀁, 𑀬𑀸 𑀘 𑀥𑀫𑁆𑀫𑀕𑀢𑀸 𑀭𑀢𑀺. 𑀢𑀁 𑀲𑀫𑀸𑀤𑀸𑀬 𑀯𑀢𑁆𑀢𑁂𑀣𑀸𑀢𑀺 𑀬𑀁𑀓𑀺𑀜𑁆𑀘𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑁆𑀧𑀪𑁂𑀤𑁂𑀦 𑀅𑀢𑁆𑀣𑁂𑀦 ¶ 𑀳𑀺𑀢𑁂𑀦 𑀲𑀁𑀬𑀼𑀢𑁆𑀢𑀁 𑀢𑀤𑀼𑀪𑀬𑀳𑀺𑀢𑀸𑀯𑀳𑀁, 𑀬𑀸 𑀘 𑀅𑀥𑀺𑀓𑀼𑀲𑀮𑀥𑀫𑁆𑀫𑀕𑀢𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀸 𑀭𑀢𑀺, 𑀢𑀤𑀼𑀪𑀬𑀁 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸 𑀧𑀭𑀺𑀕𑁆𑀕𑀳𑀁 𑀓𑀢𑁆𑀯𑀸 𑀯𑀢𑁆𑀢𑁂𑀬𑁆𑀬. ‘‘𑀲𑀩𑁆𑀩𑀁 𑀭𑀢𑀺𑀁 𑀥𑀫𑁆𑀫𑀭𑀢𑀺 𑀚𑀺𑀦𑀸𑀢𑀻’’𑀢𑀺 (𑀥. 𑀧. 𑁩𑁫𑁪) 𑀯𑀘𑀦𑀢𑁄 𑀲𑀸 𑀳𑀺 𑀏𑀓𑀁𑀲𑁂𑀦 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀸𑀧𑀦𑀢𑁄 𑀉𑀢𑁆𑀢𑀫𑀸 𑀭𑀢𑀺 𑀦𑀸𑀫.

𑀬𑀁 𑀧𑀦 𑀓𑀸𑀫𑀭𑀢𑀺𑀲𑀁𑀬𑀼𑀢𑁆𑀢𑀁 𑀓𑀺𑀘𑁆𑀘𑀁 𑀦𑀺𑀭𑀢𑁆𑀣𑀓𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲𑀸 𑀅𑀦𑀢𑁆𑀣𑀼𑀧𑀲𑀁𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀘𑁆𑀘𑀸𑀯𑀘𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀘𑁆𑀘𑀸𑀯𑀘𑁂𑀳𑀻𑀢𑀺 𑀫𑀳𑀦𑁆𑀢𑁂𑀳𑀺 𑀘𑁂𑀯 𑀔𑀼𑀤𑁆𑀤𑀓𑁂𑀳𑀺 𑀘. 𑀉𑀧𑀸𑀬𑁂𑀳𑀻𑀢𑀺 𑀦𑀬𑁂𑀳𑀺. 𑀧𑀭𑁂𑀲𑀫𑀪𑀺𑀚𑀺𑀕𑀻𑀲𑀢𑀻𑀢𑀺 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀆𑀳𑀭𑀺𑀢𑀼𑀁 𑀇𑀘𑁆𑀙𑀢𑀺, 𑀧𑀭𑁂 𑀯𑀸 𑀲𑀩𑁆𑀩𑀣𑀸 𑀳𑀸𑀧𑁂𑀢𑀺, 𑀚𑀺𑀦𑀸𑀧𑁂𑀢𑀺 𑀧𑀭𑀁 𑀳𑀦𑁆𑀢𑁆𑀯𑀸, 𑀯𑀥𑀺𑀢𑁆𑀯𑀸 𑀅𑀣 𑀲𑁄𑀘𑀬𑀺𑀢𑁆𑀯𑀸, 𑀆𑀮𑁄𑀧𑀢𑀺 𑀲𑀸𑀳𑀲𑀸 𑀬𑁄 𑀧𑀭𑁂𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀼𑀕𑁆𑀕𑀮𑁄 𑀓𑀸𑀫𑀳𑁂𑀢𑀼 𑀧𑀭𑁂 𑀳𑀦𑀦𑁆𑀢𑁄, 𑀖𑀸𑀢𑁂𑀦𑁆𑀢𑁄, 𑀲𑁄𑀘𑁂𑀦𑁆𑀢𑁄 𑀲𑀦𑁆𑀥𑀺𑀘𑁆𑀙𑁂𑀤𑀲𑀦𑁆𑀥𑀺𑀭𑀼𑀳𑀦𑀧𑀲𑀬𑁆𑀳𑀸𑀯𑀳𑀸𑀭𑀸𑀤𑀻𑀳𑀺 𑀦𑀸𑀦𑀼𑀧𑀸𑀬𑁂𑀳𑀺 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀳𑀭𑀺𑀢𑀼𑀁 𑀯𑀸𑀬𑀫𑀦𑁆𑀢𑁄 𑀲𑀸𑀳𑀲𑀸𑀓𑀸𑀭𑀁 𑀓𑀭𑁄𑀢𑀺, 𑀆𑀮𑁄𑀧𑀢𑀺, 𑀚𑀺𑀕𑀻𑀲𑀢𑀺 𑀲𑀸𑀧𑀢𑁂𑀬𑁆𑀬𑀯𑀲𑁂𑀦 𑀧𑀭𑁂 𑀳𑀸𑀧𑁂𑀢𑀺, 𑀢𑀲𑁆𑀲 𑀢𑀁 𑀓𑀺𑀘𑁆𑀘𑀁 𑀓𑀸𑀫𑀭𑀢𑀺𑀲𑀦𑁆𑀦𑀺𑀲𑁆𑀲𑀺𑀢𑀁 𑀅𑀦𑀢𑁆𑀣𑀼𑀧𑀲𑀁𑀳𑀺𑀢𑀁 𑀏𑀓𑀦𑁆𑀢𑀦𑀺𑀳𑀻𑀦𑀦𑁆𑀢𑀺. 𑀏𑀢𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀥𑀫𑁆𑀫𑀕𑀢𑀸𑀬 𑀭𑀢𑀺𑀬𑀸 𑀏𑀓𑀁𑀲𑀢𑁄 𑀉𑀢𑁆𑀢𑀫𑀪𑀸𑀯𑀁𑀬𑁂𑀯 𑀯𑀺𑀪𑀸𑀯𑁂𑀢𑀺.

𑀇𑀤𑀸𑀦𑀺 ¶ 𑀬𑀁 ‘‘𑀢𑁂𑀲𑀫𑀸𑀯𑀭𑀡𑀁 𑀓𑀸𑀢𑀼𑀁 𑀬𑁄 𑀲𑀓𑁆𑀓𑁄𑀢𑀻’’𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀯𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀉𑀧𑀸𑀬𑁂𑀦 𑀲𑀳 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀘𑁆𑀙𑀦𑁆𑀢𑁄 𑀆𑀡𑀺𑀬𑀸 𑀆𑀡𑀺𑀁 ¶ , 𑀦𑀺𑀳𑀦𑁆𑀢𑀺 𑀩𑀮𑀯𑀸 𑀬𑀣𑀸’’𑀢𑀺 𑀆𑀳. 𑀬𑀣𑀸 𑀩𑀮𑀯𑀸 𑀓𑀸𑀬𑀩𑀮𑁂𑀦, 𑀜𑀸𑀡𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀢𑀘𑁆𑀙𑀓𑁄 𑀭𑀼𑀓𑁆𑀔𑀤𑀡𑁆𑀟𑀕𑀢𑀁 𑀆𑀡𑀺𑀁 𑀦𑀻𑀳𑀭𑀺𑀢𑀼𑀓𑀸𑀫𑁄 𑀢𑀢𑁄 𑀩𑀮𑀯𑀢𑀺𑀁 𑀆𑀡𑀺𑀁 𑀓𑁄𑀝𑁂𑀦𑁆𑀢𑁄 𑀢𑀢𑁄 𑀦𑀻𑀳𑀭𑀢𑀺, 𑀢𑀣𑀸 𑀓𑀼𑀲𑀮𑁄 𑀪𑀺𑀓𑁆𑀔𑀼 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀦𑀺𑀳𑀦𑁆𑀢𑀼𑀓𑀸𑀫𑁄 𑀇𑀦𑁆𑀤𑁆𑀭𑀺𑀬𑁂𑀳𑀺 𑀏𑀯 𑀦𑀺𑀳𑀦𑁆𑀢𑀺.

𑀓𑀢𑀫𑁂𑀳𑀺 𑀧𑀦𑀸𑀢𑀺 𑀆𑀳 ‘‘𑀲𑀤𑁆𑀥’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀁 𑀲𑀤𑁆𑀥𑀁, 𑀧𑀕𑁆𑀕𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁 𑀲𑀫𑀸𑀥𑀺𑀁, 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁 𑀲𑀢𑀺𑀁, 𑀤𑀲𑁆𑀲𑀦𑀮𑀓𑁆𑀔𑀡𑀁 𑀧𑀜𑁆𑀜𑀦𑁆𑀢𑀺 𑀇𑀫𑀸𑀦𑀺𑀧𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀏𑀢𑁂𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀼𑀦𑀬𑀧𑀝𑀺𑀖𑀸𑀤𑀺𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀪𑀸𑀯𑀯𑀺𑀳𑀦𑁂𑀦 𑀳𑀦𑁆𑀢𑁆𑀯𑀸, 𑀅𑀭𑀺𑀬𑀫𑀕𑁆𑀕𑁂𑀦 𑀢𑀤𑀼𑀧𑀦𑀺𑀲𑁆𑀲𑀬𑁂 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀢𑀢𑁄 𑀏𑀯 𑀅𑀦𑀻𑀖𑁄 𑀦𑀺𑀤𑁆𑀤𑀼𑀓𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀫𑁂𑀯 𑀬𑀸𑀢𑀺 𑀉𑀧𑀕𑀘𑁆𑀙𑀢𑀻𑀢𑀺.

𑀲𑁄 𑀅𑀢𑁆𑀣𑀯𑀸𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀉𑀢𑁆𑀢𑀫𑀢𑁆𑀣𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀢𑁆𑀣𑀯𑀸, 𑀢𑀁 𑀲𑀫𑁆𑀧𑀸𑀧𑀓𑁂 𑀥𑀫𑁆𑀫𑁂 𑀞𑀺𑀢𑀢𑁆𑀢𑀸 𑀥𑀫𑁆𑀫𑀝𑁆𑀞𑁄. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀯𑀲𑁂𑀲𑁂𑀦 𑀯𑀺𑀥𑀺𑀦𑀸 𑀅𑀦𑀯𑀲𑁂𑀲𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀸𑀓𑁆𑀬𑀪𑀽𑀢𑀁 𑀅𑀦𑀼𑀲𑀸𑀲𑀦𑀺𑀁 𑀓𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑁄. 𑀢𑀢𑁄 𑀏𑀯 𑀲𑁄 𑀦𑀭𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀏𑀥𑀢𑀺, 𑀩𑁆𑀭𑀽𑀳𑁂𑀢𑀺, 𑀯𑀟𑁆𑀠𑁂𑀢𑀻𑀢𑀺.

𑀏𑀯𑀁 ¶ 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀘𑀺𑀦𑁆𑀢𑀺𑀢𑀸𑀓𑀸𑀭𑀯𑀺𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀺𑀢𑀢𑁆𑀢𑀸 𑀇𑀤𑀫𑁂𑀯 𑀘𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀤𑀝𑁆𑀞𑀩𑁆𑀩𑀁.

𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑁂𑀮𑀓𑀸𑀦𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀘𑀺𑀭𑀭𑀢𑁆𑀢𑀁 𑀯𑀢𑀸𑀢𑀸𑀧𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀢𑁂𑀮𑀓𑀸𑀦𑀺𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀢𑁆𑀣𑀼 𑀅𑀪𑀺𑀚𑀸𑀢𑀺𑀢𑁄 𑀧𑀼𑀭𑁂𑀢𑀭𑀁𑀬𑁂𑀯 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑁂𑀮𑀓𑀸𑀦𑀻𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀓𑀸𑀫𑁂 𑀚𑀺𑀕𑀼𑀘𑁆𑀙𑀦𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑁄 ‘‘𑀓𑁄 𑀲𑁄 𑀧𑀸𑀭𑀗𑁆𑀕𑀢𑁄 𑀮𑁄𑀓𑁂’’𑀢𑀺𑀆𑀤𑀺𑀦𑀸 𑀯𑀺𑀫𑁄𑀓𑁆𑀔𑀧𑀭𑀺𑀬𑁂𑀲𑀦𑀁 ¶ 𑀘𑀭𑀫𑀸𑀦𑁄 𑀢𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑁂 𑀦 𑀲𑀫𑁆𑀧𑀸𑀬𑀦𑁆𑀢𑀺. 𑀲𑁄 𑀢𑁂𑀦 𑀅𑀦𑀸𑀭𑀸𑀥𑀺𑀢𑀘𑀺𑀢𑁆𑀢𑁄 𑀯𑀺𑀘𑀭𑀢𑀺. 𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀮𑁄𑀓𑀳𑀺𑀢𑀁 𑀓𑀭𑁄𑀦𑁆𑀢𑁂 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀪𑀺𑀓𑁆𑀔𑀽𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

𑁭𑁪𑁭.

‘‘𑀘𑀺𑀭𑀭𑀢𑁆𑀢𑀁 𑀯𑀢𑀸𑀢𑀸𑀧𑀻, 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁;

𑀲𑀫𑀁 𑀘𑀺𑀢𑁆𑀢𑀲𑁆𑀲 𑀦𑀸𑀮𑀢𑁆𑀣𑀁, 𑀧𑀼𑀘𑁆𑀙𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂.

𑁭𑁪𑁮.

‘‘𑀓𑁄 𑀲𑁄 𑀧𑀸𑀭𑀗𑁆𑀕𑀢𑁄 𑀮𑁄𑀓𑁂, 𑀓𑁄 𑀧𑀢𑁆𑀢𑁄 𑀅𑀫𑀢𑁄𑀕𑀥𑀁;

𑀓𑀲𑁆𑀲 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀫𑀺, 𑀧𑀭𑀫𑀢𑁆𑀣𑀯𑀺𑀚𑀸𑀦𑀦𑀁.

𑁭𑁪𑁯.

‘‘𑀅𑀦𑁆𑀢𑁄𑀯𑀗𑁆𑀓𑀕𑀢𑁄 𑀆𑀲𑀺, 𑀫𑀘𑁆𑀙𑁄𑀯 𑀖𑀲𑀫𑀸𑀫𑀺𑀲𑀁;

𑀩𑀤𑁆𑀥𑁄 𑀫𑀳𑀺𑀦𑁆𑀤𑀧𑀸𑀲𑁂𑀦, 𑀯𑁂𑀧𑀘𑀺𑀢𑁆𑀬𑀲𑀼𑀭𑁄 𑀬𑀣𑀸.

𑁭𑁫𑁦.

‘‘𑀅𑀜𑁆𑀙𑀸𑀫𑀺 𑀦𑀁 𑀦 𑀫𑀼𑀜𑁆𑀘𑀸𑀫𑀺, 𑀅𑀲𑁆𑀫𑀸 𑀲𑁄𑀓𑀧𑀭𑀺𑀤𑁆𑀤𑀯𑀸;

𑀓𑁄 𑀫𑁂 𑀩𑀦𑁆𑀥𑀁 𑀫𑀼𑀜𑁆𑀘𑀁 𑀮𑁄𑀓𑁂, 𑀲𑀫𑁆𑀩𑁄𑀥𑀺𑀁 𑀯𑁂𑀤𑀬𑀺𑀲𑁆𑀲𑀢𑀺.

𑁭𑁫𑁧.

‘‘𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀓𑀁, 𑀆𑀤𑀺𑀲𑀦𑁆𑀢𑀁 𑀧𑀪𑀗𑁆𑀕𑀼𑀦𑀁;

𑀓𑀲𑁆𑀲 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀫𑀺, 𑀚𑀭𑀸𑀫𑀘𑁆𑀘𑀼𑀧𑀯𑀸𑀳𑀦𑀁.

𑁭𑁫𑁨.

‘‘𑀯𑀺𑀘𑀺𑀓𑀺𑀘𑁆𑀙𑀸𑀓𑀗𑁆𑀔𑀸𑀕𑀦𑁆𑀣𑀺𑀢𑀁, 𑀲𑀸𑀭𑀫𑁆𑀪𑀩𑀮𑀲𑀜𑁆𑀜𑀼𑀢𑀁;

𑀓𑁄𑀥𑀧𑁆𑀧𑀢𑁆𑀢𑀫𑀦𑀢𑁆𑀣𑀤𑁆𑀥𑀁, 𑀅𑀪𑀺𑀚𑀧𑁆𑀧𑀧𑁆𑀧𑀤𑀸𑀭𑀡𑀁.

𑁭𑁫𑁩.

‘‘𑀢𑀡𑁆𑀳𑀸𑀥𑀦𑀼𑀲𑀫𑀼𑀝𑁆𑀞𑀸𑀦𑀁, 𑀤𑁆𑀯𑁂 𑀘 𑀧𑀦𑁆𑀦𑀭𑀲𑀸𑀬𑀼𑀢𑀁;

𑀧𑀲𑁆𑀲 𑀑𑀭𑀲𑀺𑀓𑀁 𑀩𑀸𑀴𑁆𑀳𑀁, 𑀪𑁂𑀢𑁆𑀯𑀸𑀦 𑀬𑀤𑀺 𑀢𑀺𑀝𑁆𑀞𑀢𑀺.

𑁭𑁫𑁪.

‘‘𑀅𑀦𑀼𑀤𑀺𑀝𑁆𑀞𑀻𑀦𑀁 ¶ 𑀅𑀧𑁆𑀧𑀳𑀸𑀦𑀁, 𑀲𑀗𑁆𑀓𑀧𑁆𑀧𑀧𑀭𑀢𑁂𑀚𑀺𑀢𑀁;

𑀢𑁂𑀦 𑀯𑀺𑀤𑁆𑀥𑁄 𑀧𑀯𑁂𑀥𑀸𑀫𑀺, 𑀧𑀢𑁆𑀢𑀁𑀯 𑀫𑀸𑀮𑀼𑀢𑁂𑀭𑀺𑀢𑀁.

𑁭𑁫𑁫.

‘‘𑀅𑀚𑁆𑀛𑀢𑁆𑀢𑀁 𑀫𑁂 𑀲𑀫𑀼𑀝𑁆𑀞𑀸𑀬, 𑀔𑀺𑀧𑁆𑀧𑀁 𑀧𑀘𑁆𑀘𑀢𑀺 𑀫𑀸𑀫𑀓𑀁;

𑀙𑀨𑀲𑁆𑀲𑀸𑀬𑀢𑀦𑀻 𑀓𑀸𑀬𑁄, 𑀬𑀢𑁆𑀣 𑀲𑀭𑀢𑀺 𑀲𑀩𑁆𑀩𑀤𑀸.

𑁭𑁫𑁬.

‘‘𑀢𑀁 ¶ 𑀦 𑀧𑀲𑁆𑀲𑀸𑀫𑀺 𑀢𑁂𑀓𑀺𑀘𑁆𑀙𑀁, 𑀬𑁄 𑀫𑁂𑀢𑀁 𑀲𑀮𑁆𑀮𑀫𑀼𑀤𑁆𑀥𑀭𑁂;

𑀦𑀸𑀦𑀸𑀭𑀚𑁆𑀚𑁂𑀦 𑀲𑀢𑁆𑀣𑁂𑀦, 𑀦𑀸𑀜𑁆𑀜𑁂𑀦 𑀯𑀺𑀘𑀺𑀓𑀺𑀘𑁆𑀙𑀺𑀢𑀁.

𑁭𑁫𑁭.

‘‘𑀓𑁄 𑀫𑁂 𑀅𑀲𑀢𑁆𑀣𑁄 𑀅𑀯𑀡𑁄, 𑀲𑀮𑁆𑀮𑀫𑀩𑁆𑀪𑀦𑁆𑀢𑀭𑀧𑀲𑁆𑀲𑀬𑀁;

𑀅𑀳𑀺𑀁𑀲𑀁 𑀲𑀩𑁆𑀩𑀕𑀢𑁆𑀢𑀸𑀦𑀺, 𑀲𑀮𑁆𑀮𑀁 𑀫𑁂 𑀉𑀤𑁆𑀥𑀭𑀺𑀲𑁆𑀲𑀢𑀺.

𑁭𑁫𑁮.

‘‘𑀥𑀫𑁆𑀫𑀧𑁆𑀧𑀢𑀺 ¶ 𑀳𑀺 𑀲𑁄 𑀲𑁂𑀝𑁆𑀞𑁄, 𑀯𑀺𑀲𑀤𑁄𑀲𑀧𑁆𑀧𑀯𑀸𑀳𑀓𑁄;

𑀕𑀫𑁆𑀪𑀻𑀭𑁂 𑀧𑀢𑀺𑀢𑀲𑁆𑀲 𑀫𑁂, 𑀣𑀮𑀁 𑀧𑀸𑀡𑀺𑀜𑁆𑀘 𑀤𑀲𑁆𑀲𑀬𑁂.

𑁭𑁫𑁯.

‘‘𑀭𑀳𑀤𑁂𑀳𑀫𑀲𑁆𑀫𑀺 𑀑𑀕𑀸𑀴𑁆𑀳𑁄, 𑀅𑀳𑀸𑀭𑀺𑀬𑀭𑀚𑀫𑀢𑁆𑀢𑀺𑀓𑁂;

𑀫𑀸𑀬𑀸𑀉𑀲𑀽𑀬𑀲𑀸𑀭𑀫𑁆𑀪, 𑀣𑀺𑀦𑀫𑀺𑀤𑁆𑀥𑀫𑀧𑀢𑁆𑀣𑀝𑁂.

𑁭𑁬𑁦.

‘‘𑀉𑀤𑁆𑀥𑀘𑁆𑀘𑀫𑁂𑀖𑀣𑀦𑀺𑀢𑀁, 𑀲𑀁𑀬𑁄𑀚𑀦𑀯𑀮𑀸𑀳𑀓𑀁;

𑀯𑀸𑀳𑀸 𑀯𑀳𑀦𑁆𑀢𑀺 𑀓𑀼𑀤𑁆𑀤𑀺𑀝𑁆𑀞𑀺𑀁, 𑀲𑀗𑁆𑀓𑀧𑁆𑀧𑀸 𑀭𑀸𑀕𑀦𑀺𑀲𑁆𑀲𑀺𑀢𑀸.

𑁭𑁬𑁧.

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, 𑀮𑀢𑀸 𑀉𑀩𑁆𑀪𑀺𑀚𑁆𑀚 𑀢𑀺𑀝𑁆𑀞𑀢𑀺;

𑀢𑁂 𑀲𑁄𑀢𑁂 𑀓𑁄 𑀦𑀺𑀯𑀸𑀭𑁂𑀬𑁆𑀬, 𑀢𑀁 𑀮𑀢𑀁 𑀓𑁄 𑀳𑀺 𑀙𑁂𑀘𑁆𑀙𑀢𑀺.

𑁭𑁬𑁨.

‘‘𑀯𑁂𑀮𑀁 𑀓𑀭𑁄𑀣 𑀪𑀤𑁆𑀤𑀦𑁆𑀢𑁂, 𑀲𑁄𑀢𑀸𑀦𑀁 𑀲𑀦𑁆𑀦𑀺𑀯𑀸𑀭𑀡𑀁;

𑀫𑀸 𑀢𑁂 𑀫𑀦𑁄𑀫𑀬𑁄 𑀲𑁄𑀢𑀸, 𑀭𑀼𑀓𑁆𑀔𑀁𑀯 𑀲𑀳𑀲𑀸 𑀮𑀼𑀯𑁂.

𑁭𑁬𑁩.

‘‘𑀏𑀯𑀁 𑀫𑁂 𑀪𑀬𑀚𑀸𑀢𑀲𑁆𑀲, 𑀅𑀧𑀸𑀭𑀸 𑀧𑀸𑀭𑀫𑁂𑀲𑀢𑁄;

𑀢𑀸𑀡𑁄 𑀧𑀜𑁆𑀜𑀸𑀯𑀼𑀥𑁄 𑀲𑀢𑁆𑀣𑀸, 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑁄.

𑁭𑁬𑁪.

‘‘𑀲𑁄𑀧𑀸𑀦𑀁 𑀲𑀼𑀕𑀢𑀁 𑀲𑀼𑀤𑁆𑀥𑀁, 𑀥𑀫𑁆𑀫𑀲𑀸𑀭𑀫𑀬𑀁 𑀤𑀴𑁆𑀳𑀁;

𑀧𑀸𑀤𑀸𑀲𑀺 𑀯𑀼𑀬𑁆𑀳𑀫𑀸𑀦𑀲𑁆𑀲, 𑀫𑀸 𑀪𑀸𑀬𑀻𑀢𑀺 𑀘 𑀫𑀩𑁆𑀭𑀯𑀺.

𑁭𑁬𑁫.

‘‘𑀲𑀢𑀺𑀧𑀝𑁆𑀞𑀸𑀦𑀧𑀸𑀲𑀸𑀤𑀁, 𑀆𑀭𑀼𑀬𑁆𑀳 𑀧𑀘𑁆𑀘𑀯𑁂𑀓𑁆𑀔𑀺𑀲𑀁;

𑀬𑀁 𑀢𑀁 𑀧𑀼𑀩𑁆𑀩𑁂 𑀅𑀫𑀜𑁆𑀜𑀺𑀲𑁆𑀲𑀁, 𑀲𑀓𑁆𑀓𑀸𑀬𑀸𑀪𑀺𑀭𑀢𑀁 𑀧𑀚𑀁.

𑁭𑁬𑁬.

‘‘𑀬𑀤𑀸 𑀘 𑀫𑀕𑁆𑀕𑀫𑀤𑁆𑀤𑀓𑁆𑀔𑀺𑀁, 𑀦𑀸𑀯𑀸𑀬 𑀅𑀪𑀺𑀭𑀽𑀳𑀦𑀁;

𑀅𑀦𑀥𑀺𑀝𑁆𑀞𑀸𑀬 𑀅𑀢𑁆𑀢𑀸𑀦𑀁, 𑀢𑀺𑀢𑁆𑀣𑀫𑀤𑁆𑀤𑀓𑁆𑀔𑀺𑀫𑀼𑀢𑁆𑀢𑀫𑀁.

𑁭𑁬𑁭.

‘‘𑀲𑀮𑁆𑀮𑀁 𑀅𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀪𑀯𑀦𑁂𑀢𑁆𑀢𑀺𑀧𑁆𑀧𑀪𑀸𑀯𑀺𑀢𑀁;

𑀏𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀸𑀬, 𑀤𑁂𑀲𑁂𑀲𑀺 𑀫𑀕𑁆𑀕𑀫𑀼𑀢𑁆𑀢𑀫𑀁.

𑁭𑁬𑁮.

‘‘𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁 ¶ , 𑀘𑀺𑀭𑀭𑀢𑁆𑀢𑀫𑀥𑀺𑀝𑁆𑀞𑀺𑀢𑀁;

𑀩𑀼𑀤𑁆𑀥𑁄 𑀫𑁂𑀧𑀸𑀦𑀼𑀤𑀻 𑀕𑀦𑁆𑀣𑀁, 𑀯𑀺𑀲𑀤𑁄𑀲𑀧𑁆𑀧𑀯𑀸𑀳𑀦𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 ¶ 𑀘𑀺𑀭𑀭𑀢𑁆𑀢𑀁 𑀯𑀢𑀸𑀢𑀺 𑀘𑀺𑀭𑀓𑀸𑀮𑀁 𑀯𑀢. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀯𑀸 𑀯𑀺𑀫𑁄𑀓𑁆𑀔𑀥𑀫𑁆𑀫𑀧𑀭𑀺𑀬𑁂𑀲𑀦𑁂 𑀆𑀭𑀤𑁆𑀥𑀯𑀻𑀭𑀺𑀬𑁄. 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑀺 ‘‘𑀓𑀻𑀤𑀺𑀲𑁄 𑀦𑀼 𑀔𑁄 𑀯𑀺𑀫𑁄𑀓𑁆𑀔𑀥𑀫𑁆𑀫𑁄, 𑀓𑀣𑀁 𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑁄’’𑀢𑀺 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑀦𑁆𑀢𑁄 𑀕𑀯𑁂𑀲𑀦𑁆𑀢𑁄. 𑀲𑀫𑀁 𑀘𑀺𑀢𑁆𑀢𑀲𑁆𑀲 𑀦𑀸𑀮𑀢𑁆𑀣𑀁, 𑀧𑀼𑀘𑁆𑀙𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀢𑀺 𑀢𑁂 𑀢𑁂 𑀦𑀸𑀦𑀸𑀢𑀺𑀢𑁆𑀣𑀺𑀬𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀧𑀓𑀢𑀺𑀬𑀸 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀁 𑀯𑀽𑀧𑀲𑀫𑀪𑀽𑀢𑀁 𑀯𑀝𑁆𑀝𑀤𑀼𑀓𑁆𑀔𑀯𑀺𑀲𑁆𑀲𑀭𑀡𑀁 𑀅𑀭𑀺𑀬𑀥𑀫𑁆𑀫𑀁 𑀦𑀸𑀮𑀢𑁆𑀣𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺 𑀅𑀢𑁆𑀣𑁄.

𑀓𑁄 ¶ 𑀲𑁄 𑀧𑀸𑀭𑀗𑁆𑀕𑀢𑁄𑀢𑀺𑀆𑀤𑀺 𑀧𑀼𑀘𑁆𑀙𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀓𑁄 𑀲𑁄 𑀧𑀸𑀭𑀗𑁆𑀕𑀢𑁄 𑀮𑁄𑀓𑁂𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀢𑀺𑀢𑁆𑀣𑀓𑀸𑀭𑀧𑀝𑀺𑀜𑁆𑀜𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀓𑁄 𑀦𑀼 𑀔𑁄 𑀲𑁄 𑀲𑀁𑀲𑀸𑀭𑀲𑁆𑀲 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀉𑀧𑀕𑀢𑁄. 𑀓𑁄 𑀧𑀢𑁆𑀢𑁄 𑀅𑀫𑀢𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀁 𑀯𑀺𑀫𑁄𑀓𑁆𑀔𑀫𑀕𑁆𑀕𑀁 𑀓𑁄 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀲 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀫𑀻𑀢𑀺 𑀓𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀑𑀯𑀸𑀤𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀧𑀝𑀺𑀧𑀚𑁆𑀚𑀸𑀫𑀺. 𑀧𑀭𑀫𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺 𑀧𑀭𑀫𑀢𑁆𑀣𑀲𑁆𑀲 𑀯𑀺𑀚𑀸𑀦𑀦𑀁, 𑀅𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀧𑀯𑁂𑀤𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀦𑁆𑀢𑁄𑀯𑀗𑁆𑀓𑀕𑀢𑁄 𑀆𑀲𑀻𑀢𑀺 𑀯𑀗𑁆𑀓𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀕𑀢𑀁 𑀫𑀦𑁄𑀯𑀗𑁆𑀓𑀪𑀸𑀯𑀢𑁄, 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸, 𑀅𑀦𑁆𑀢𑁄𑀢𑀺 𑀧𑀦 𑀳𑀤𑀬𑀯𑀗𑁆𑀓𑀲𑁆𑀲 𑀅𑀦𑁆𑀢𑁄, 𑀳𑀤𑀬𑀩𑁆𑀪𑀦𑁆𑀢𑀭𑀕𑀢𑀓𑀺𑀮𑁂𑀲𑀯𑀗𑁆𑀓𑁄 𑀯𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀫𑀘𑁆𑀙𑁄𑀯 𑀖𑀲𑀫𑀸𑀫𑀺𑀲𑀦𑁆𑀢𑀺 𑀆𑀫𑀺𑀲𑀁 𑀖𑀲𑀦𑁆𑀢𑁄 𑀔𑀸𑀤𑀦𑁆𑀢𑁄 𑀫𑀘𑁆𑀙𑁄 𑀯𑀺𑀬, 𑀕𑀺𑀮𑀩𑀴𑀺𑀲𑁄 𑀫𑀘𑁆𑀙𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀤𑁆𑀥𑁄 𑀫𑀳𑀺𑀦𑁆𑀤𑀧𑀸𑀲𑁂𑀦, 𑀯𑁂𑀧𑀘𑀺𑀢𑁆𑀬𑀲𑀼𑀭𑁄 𑀬𑀣𑀸𑀢𑀺 𑀫𑀳𑀺𑀦𑁆𑀤𑀲𑁆𑀲 𑀲𑀓𑁆𑀓𑀲𑁆𑀲 𑀧𑀸𑀲𑁂𑀦 𑀩𑀤𑁆𑀥𑁄 𑀬𑀣𑀸 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀅𑀲𑁂𑀭𑀺𑀯𑀺𑀳𑀸𑀭𑀻 𑀫𑀳𑀸𑀤𑀼𑀓𑁆𑀔𑀧𑁆𑀧𑀢𑁆𑀢𑁄, 𑀏𑀯𑀫𑀳𑀁 𑀧𑀼𑀩𑁆𑀩𑁂 𑀓𑀺𑀮𑁂𑀲𑀧𑀸𑀲𑁂𑀦 𑀩𑀤𑁆𑀥𑁄 𑀆𑀲𑀺𑀁, 𑀅𑀲𑁂𑀭𑀺𑀯𑀺𑀳𑀸𑀭𑀻 𑀫𑀳𑀸𑀤𑀼𑀓𑁆𑀔𑀧𑁆𑀧𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀜𑁆𑀙𑀸𑀫𑀻𑀢𑀺 𑀆𑀓𑀟𑁆𑀠𑀸𑀫𑀺. 𑀦𑀦𑁆𑀢𑀺 𑀓𑀺𑀮𑁂𑀲𑀧𑀸𑀲𑀁. 𑀦 𑀫𑀼𑀜𑁆𑀘𑀸𑀫𑀻𑀢𑀺 𑀦 𑀫𑁄𑀘𑁂𑀫𑀺. 𑀅𑀲𑁆𑀫𑀸 𑀲𑁄𑀓𑀧𑀭𑀺𑀤𑁆𑀤𑀯𑀸𑀢𑀺 𑀇𑀫𑀲𑁆𑀫𑀸 𑀲𑁄𑀓𑀧𑀭𑀺𑀤𑁂𑀯𑀯𑀝𑁆𑀝𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸𑀧𑀸𑀲𑁂𑀦 𑀩𑀤𑁆𑀥𑁄 𑀫𑀺𑀕𑁄 𑀲𑀽𑀓𑀭𑁄 𑀯𑀸 𑀫𑁄𑀘𑀦𑀼𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 𑀧𑀭𑀺𑀧𑁆𑀨𑀦𑁆𑀤𑀫𑀸𑀦𑁄 𑀢𑀁 𑀆𑀯𑀺𑀜𑁆𑀙𑀦𑁆𑀢𑁄 𑀩𑀦𑁆𑀥𑀦𑀁 𑀤𑀴𑁆𑀳𑀁 𑀓𑀭𑁄𑀢𑀺, 𑀏𑀯𑀁 𑀅𑀳𑀁 𑀧𑀼𑀩𑁆𑀩𑁂 ¶ 𑀓𑀺𑀮𑁂𑀲𑀧𑀸𑀲𑁂𑀦 𑀧𑀝𑀺𑀫𑀼𑀓𑁆𑀓𑁄 𑀫𑁄𑀘𑀦𑀼𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 𑀓𑀸𑀬𑀲𑀜𑁆𑀘𑁂𑀢𑀦𑀸𑀤𑀺𑀯𑀲𑁂𑀦 𑀧𑀭𑀺𑀧𑁆𑀨𑀦𑁆𑀤𑀫𑀸𑀦𑁄 𑀢𑀁 𑀦 𑀫𑁄𑀘𑁂𑀲𑀺𑀁, 𑀅𑀜𑁆𑀜𑀤𑀢𑁆𑀣𑀼 𑀢𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 𑀲𑁄𑀓𑀸𑀤𑀺𑀦𑀸 𑀧𑀭𑀁 𑀓𑀺𑀮𑁂𑀲𑀁 𑀏𑀯 𑀧𑀸𑀧𑀼𑀡𑀺𑀦𑁆𑀢𑀺. 𑀓𑁄 𑀫𑁂 𑀩𑀦𑁆𑀥𑀁 𑀫𑀼𑀜𑁆𑀘𑀁 𑀮𑁄𑀓𑁂, 𑀲𑀫𑁆𑀩𑁄𑀥𑀺𑀁 𑀯𑁂𑀤𑀬𑀺𑀲𑁆𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀏𑀢𑀁 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀩𑀦𑁆𑀥𑀁 𑀫𑀼𑀜𑁆𑀘𑀦𑁆𑀢𑁄 𑀲𑀫𑁆𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 ‘‘𑀲𑀫𑁆𑀩𑁄𑀥𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀯𑀺𑀫𑁄𑀓𑁆𑀔𑀫𑀕𑁆𑀕𑀁 𑀓𑁄 𑀫𑁂 𑀯𑁂𑀤𑀬𑀺𑀲𑁆𑀲𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀩𑀦𑁆𑀥𑀫𑀼𑀜𑁆𑀘’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀩𑀦𑁆𑀥𑀸, 𑀩𑀦𑁆𑀥𑀲𑁆𑀲 𑀯𑀸 𑀫𑁄𑀘𑀓𑀁 𑀲𑀫𑁆𑀩𑁄𑀥𑀺𑀦𑁆𑀢𑀺 𑀬𑁄𑀚𑀦𑀸.

𑀆𑀤𑀺𑀲𑀦𑁆𑀢𑀦𑁆𑀢𑀺 𑀤𑁂𑀲𑁂𑀦𑁆𑀢𑀁. 𑀧𑀪𑀗𑁆𑀕𑀼𑀦𑀦𑁆𑀢𑀺 𑀧𑀪𑀜𑁆𑀚𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀦𑀁 ¶ , 𑀧𑀪𑀗𑁆𑀕𑀼𑀦𑀁 𑀯𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀆𑀤𑀺𑀲𑀦𑁆𑀢𑀁 𑀓𑀣𑁂𑀦𑁆𑀢𑀁 𑀚𑀭𑀸𑀬 𑀫𑀘𑁆𑀘𑀼𑀦𑁄 𑀘 𑀧𑀯𑀸𑀳𑀦𑀁 𑀓𑀲𑁆𑀲 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀫𑀺. ‘‘𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸𑀓𑀗𑁆𑀔𑀸𑀕𑀦𑁆𑀣𑀺𑀢𑀦𑁆𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀸𑀓𑀸𑀭𑀯𑀼𑀢𑁆𑀢𑀺𑀬𑀸 𑀓𑀗𑁆𑀔𑀸𑀬 𑀘 𑀕𑀦𑁆𑀣𑀺𑀢𑀁. 𑀲𑀸𑀭𑀫𑁆𑀪𑀩𑀮𑀲𑀜𑁆𑀜𑀼𑀢𑀦𑁆𑀢𑀺 𑀓𑀭𑀡𑀼𑀢𑁆𑀢𑀭𑀺𑀬𑀓𑀭𑀡𑀮𑀓𑁆𑀔𑀡𑁂𑀦 𑀩𑀮𑀧𑁆𑀧𑀢𑁆𑀢𑁂𑀦 𑀲𑀸𑀭𑀫𑁆𑀪𑁂𑀦 𑀬𑀼𑀢𑁆𑀢𑀁. 𑀓𑁄𑀥𑀧𑁆𑀧𑀢𑁆𑀢𑀫𑀦𑀢𑁆𑀣𑀤𑁆𑀥𑀦𑁆𑀢𑀺 𑀲𑀩𑁆𑀩𑀢𑁆𑀣 𑀓𑁄𑀥𑁂𑀦 𑀬𑀼𑀢𑁆𑀢𑀫𑀦𑀲𑀸 ¶ 𑀣𑀤𑁆𑀥𑀪𑀸𑀯𑀁 𑀕𑀢𑀁 𑀅𑀪𑀺𑀚𑀧𑁆𑀧𑀧𑁆𑀧𑀤𑀸𑀭𑀡𑀁. 𑀇𑀘𑁆𑀙𑀺𑀢𑀸𑀮𑀸𑀪𑀸𑀤𑀺𑀯𑀲𑁂𑀦 𑀳𑀺 𑀢𑀡𑁆𑀳𑀸 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀧𑀤𑀸𑀮𑁂𑀦𑁆𑀢𑀻 𑀯𑀺𑀬 𑀧𑀯𑀢𑁆𑀢𑀢𑀺. 𑀤𑀽𑀭𑁂 𑀞𑀺𑀢𑀲𑁆𑀲𑀸𑀧𑀺 𑀯𑀺𑀚𑁆𑀛𑀦𑀼𑀧𑀸𑀬𑀢𑀸𑀬 𑀢𑀡𑁆𑀳𑀸𑀯 𑀥𑀦𑀼 𑀲𑀫𑀼𑀧𑀢𑀺𑀝𑁆𑀞𑀢𑀺 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀢𑀡𑁆𑀳𑀸𑀥𑀦𑀼𑀲𑀫𑀼𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁. 𑀢𑀁 𑀧𑀦 𑀬𑀲𑁆𑀫𑀸 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀢𑀺𑀁𑀲𑀧𑁆𑀧𑀪𑁂𑀤𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀘 𑀧𑀦𑁆𑀦𑀭𑀲𑀸𑀬𑀼𑀢’’𑀦𑁆𑀢𑀺, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀦𑁆𑀦𑀭𑀲𑀪𑁂𑀤𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀲𑁆𑀲 𑀑𑀭𑀲𑀺𑀓𑀁 𑀩𑀸𑀴𑁆𑀳𑀁, 𑀪𑁂𑀢𑁆𑀯𑀸𑀦 𑀬𑀤𑀺 𑀢𑀺𑀝𑁆𑀞𑀢𑀻𑀢𑀺 𑀬𑀁 𑀉𑀭𑀲𑀫𑁆𑀩𑀦𑁆𑀥𑀦𑀻𑀬𑀢𑀸𑀬 𑀑𑀭𑀲𑀺𑀓𑀁 𑀩𑀸𑀴𑁆𑀳𑀁 𑀩𑀮𑀯𑀢𑀭𑀁 𑀪𑁂𑀢𑁆𑀯𑀸𑀦 𑀳𑀤𑀬𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀳𑀤𑀬𑁂 𑀢𑀺𑀝𑁆𑀞𑀢𑀺, 𑀢𑀁 𑀧𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀫𑁂𑀯 𑀆𑀮𑀧𑀢𑀺.

𑀅𑀦𑀼𑀤𑀺𑀝𑁆𑀞𑀻𑀦𑀁 𑀅𑀧𑁆𑀧𑀳𑀸𑀦𑀦𑁆𑀢𑀺 𑀅𑀦𑀼𑀤𑀺𑀝𑁆𑀞𑀺𑀪𑀽𑀢𑀸𑀦𑀁 𑀲𑁂𑀲𑀤𑀺𑀝𑁆𑀞𑀻𑀦𑀁 𑀅𑀧𑁆𑀧𑀳𑀸𑀦𑀓𑀸𑀭𑀡𑀁. 𑀬𑀸𑀯 𑀳𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀲𑀦𑁆𑀢𑀸𑀦𑀢𑁄 𑀦 𑀯𑀺𑀕𑀘𑁆𑀙𑀢𑀺, 𑀢𑀸𑀯 𑀲𑀲𑁆𑀲𑀢𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀧𑁆𑀧𑀳𑀸𑀦𑀫𑁂𑀯𑀸𑀢𑀺. 𑀲𑀗𑁆𑀓𑀧𑁆𑀧𑀧𑀭𑀢𑁂𑀚𑀺𑀢𑀦𑁆𑀢𑀺 𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀧𑀭𑁂 𑀧𑀭𑀚𑀦𑁂 𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀧𑀢𑀺𑀧𑀢𑀺𑀢𑁂 𑀢𑁂𑀚𑀺𑀢𑀁 𑀉𑀲𑁆𑀲𑀸𑀳𑀺𑀢𑀁. 𑀢𑁂𑀦 𑀯𑀺𑀤𑁆𑀥𑁄 𑀧𑀯𑁂𑀥𑀸𑀫𑀻𑀢𑀺 𑀢𑁂𑀦 𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀬𑀣𑀸 𑀳𑀤𑀬𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀏𑀯𑀁 𑀯𑀺𑀤𑁆𑀥𑁄 𑀧𑀯𑁂𑀥𑀸𑀫𑀺 𑀲𑀗𑁆𑀓𑀧𑁆𑀧𑀸𑀫𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀝𑁆𑀝𑀸𑀫𑀺. 𑀧𑀢𑁆𑀢𑀁𑀯 ¶ 𑀫𑀸𑀮𑀼𑀢𑁂𑀭𑀺𑀢𑀦𑁆𑀢𑀺 𑀫𑀸𑀮𑀼𑀢𑁂𑀦 𑀯𑀸𑀬𑀼𑀦𑀸 𑀏𑀭𑀺𑀢𑀁 𑀯𑀡𑁆𑀝𑀢𑁄 𑀫𑀼𑀢𑁆𑀢𑀁 𑀤𑀼𑀫𑀧𑀢𑁆𑀢𑀁 𑀯𑀺𑀬.

𑀅𑀚𑁆𑀛𑀢𑁆𑀢𑀁 𑀫𑁂 𑀲𑀫𑀼𑀝𑁆𑀞𑀸𑀬𑀸𑀢𑀺 𑀬𑀣𑀸 𑀮𑁄𑀓𑁂 𑀲𑀮𑁆𑀮𑀁 𑀦𑀸𑀫 𑀩𑀸𑀳𑀺𑀭𑀢𑁄 𑀉𑀝𑁆𑀞𑀸𑀬 𑀅𑀚𑁆𑀛𑀢𑁆𑀢𑀁 𑀦𑀺𑀫𑁆𑀫𑀣𑁂𑀢𑁆𑀯𑀸 𑀩𑀸𑀥𑀢𑀺, 𑀦 𑀏𑀯𑀫𑀺𑀤𑀁. 𑀇𑀤𑀁 𑀧𑀦 𑀅𑀚𑁆𑀛𑀢𑁆𑀢𑀁 𑀫𑁂 𑀫𑀫 𑀅𑀢𑁆𑀢𑀪𑀸𑀯𑁂 𑀲𑀫𑀼𑀝𑁆𑀞𑀸𑀬 𑀲𑁄 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀙𑀨𑀲𑁆𑀲𑀸𑀬𑀢𑀦𑀓𑀸𑀬𑁄 𑀬𑀣𑀸 𑀔𑀺𑀧𑁆𑀧𑀁 𑀲𑀻𑀖𑀁 𑀧𑀘𑁆𑀘𑀢𑀺, 𑀟𑀬𑁆𑀳𑀢𑀺. 𑀬𑀣𑀸 𑀓𑀺𑀁? 𑀅𑀕𑁆𑀕𑀺 𑀯𑀺𑀬 𑀲𑀦𑀺𑀲𑁆𑀲𑀬𑀟𑀸𑀳𑀓𑁄 𑀢𑀁𑀬𑁂𑀯 𑀫𑀸𑀫𑀓𑀁 𑀫𑀫 𑀲𑀦𑁆𑀢𑀓𑀁 𑀅𑀢𑁆𑀢𑀪𑀸𑀯𑀁 𑀟𑀳𑀦𑁆𑀢𑁄 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣𑁂𑀯 𑀲𑀭𑀢𑀺 𑀧𑀯𑀢𑁆𑀢𑀢𑀺.

𑀢𑀁 𑀦 𑀧𑀲𑁆𑀲𑀸𑀫𑀺 𑀢𑁂𑀓𑀺𑀘𑁆𑀙𑀦𑁆𑀢𑀺 𑀢𑀸𑀤𑀺𑀲𑀸𑀬 𑀢𑀺𑀓𑀺𑀘𑁆𑀙𑀸𑀬 𑀦𑀺𑀬𑀼𑀢𑁆𑀢𑀢𑀸𑀬 𑀢𑁂𑀓𑀺𑀘𑁆𑀙𑀁 ¶ 𑀲𑀮𑁆𑀮𑀓𑀢𑁆𑀢𑀁 𑀪𑀺𑀲𑀓𑁆𑀓𑀁 𑀢𑀁 𑀦 𑀧𑀲𑁆𑀲𑀸𑀫𑀺. 𑀬𑁄 𑀫𑁂𑀢𑀁 𑀲𑀮𑁆𑀮𑀫𑀼𑀤𑁆𑀥𑀭𑁂𑀢𑀺 𑀬𑁄 𑀪𑀺𑀲𑀓𑁆𑀓𑁄 𑀏𑀢𑀁 𑀤𑀺𑀝𑁆𑀞𑀺𑀲𑀮𑁆𑀮𑀁 𑀓𑀺𑀮𑁂𑀲𑀲𑀮𑁆𑀮𑀜𑁆𑀘 𑀉𑀤𑁆𑀥𑀭𑁂𑀬𑁆𑀬, 𑀉𑀤𑁆𑀥𑀭𑀦𑁆𑀢𑁄 𑀘 𑀦𑀸𑀦𑀸𑀭𑀚𑁆𑀚𑁂𑀦 𑀭𑀚𑁆𑀚𑀼𑀲𑀤𑀺𑀲𑀲𑀗𑁆𑀔𑀸𑀢𑀸𑀬 𑀏𑀲𑀦𑀺𑀲𑀮𑀸𑀓𑀸𑀬 𑀧𑀯𑁂𑀲𑁂𑀢𑁆𑀯𑀸𑀦 𑀲𑀢𑁆𑀣𑁂𑀦 𑀓𑀦𑁆𑀢𑀺𑀢𑁆𑀯𑀸 𑀦𑀸𑀜𑁆𑀜𑁂𑀦 𑀫𑀦𑁆𑀢𑀸𑀕𑀤𑀧𑁆𑀧𑀬𑁄𑀕𑁂𑀦 𑀯𑀺𑀘𑀺𑀓𑀺𑀘𑁆𑀙𑀺𑀢𑀁 𑀲𑀮𑁆𑀮𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀘𑀺𑀓𑀺𑀘𑁆𑀙𑀺𑀢𑀦𑁆𑀢𑀺, 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀲𑀩𑁆𑀩𑀲𑁆𑀲𑀧𑀺 𑀓𑀺𑀮𑁂𑀲𑀲𑀮𑁆𑀮𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀲𑀢𑁆𑀣𑁄𑀢𑀺 𑀲𑀢𑁆𑀣𑀭𑀳𑀺𑀢𑁄. 𑀅𑀯𑀡𑁄𑀢𑀺 𑀯𑀡𑁂𑀦 𑀯𑀺𑀦𑀸. 𑀅𑀩𑁆𑀪𑀦𑁆𑀢𑀭𑀧𑀲𑁆𑀲𑀬𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀲𑀗𑁆𑀔𑀸𑀢𑀁 𑀳𑀤𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀅𑀳𑀺𑀁𑀲𑀦𑁆𑀢𑀺 𑀅𑀧𑀻𑀴𑁂𑀦𑁆𑀢𑁄. ‘‘𑀅𑀳𑀺𑀁𑀲𑀸’’𑀢𑀺 𑀘 𑀧𑀸𑀞𑁄, 𑀅𑀳𑀺𑀁𑀲𑀸𑀬 𑀅𑀧𑀻𑀴𑀦𑁂𑀦𑀸𑀢𑀺 ¶ 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀓𑁄 𑀦𑀼 𑀔𑁄 𑀓𑀺𑀜𑁆𑀘𑀺 𑀲𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀡𑀜𑁆𑀘 𑀅𑀓𑀭𑁄𑀦𑁆𑀢𑁄 𑀢𑀢𑁄 𑀏𑀯 𑀲𑀩𑁆𑀩𑀕𑀢𑁆𑀢𑀸𑀦𑀺 𑀅𑀩𑀸𑀥𑁂𑀦𑁆𑀢𑁄 𑀫𑀫 𑀳𑀤𑀬𑀩𑁆𑀪𑀦𑁆𑀢𑀭𑀕𑀢𑀁 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄 𑀢𑀼𑀤𑀦𑀢𑁄 𑀅𑀦𑁆𑀢𑁄 𑀭𑀼𑀤𑁆𑀥𑀦𑀢𑁄 𑀘 𑀧𑀭𑀫𑀢𑁆𑀣𑁂𑀦𑁂𑀯 𑀲𑀮𑁆𑀮𑀪𑀽𑀢𑀁 𑀓𑀺𑀮𑁂𑀲𑀲𑀮𑁆𑀮𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀤𑀲𑀳𑀺 𑀕𑀸𑀣𑀸𑀳𑀺 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀢𑀁 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀧𑁆𑀧𑀢𑀺 𑀳𑀺 𑀲𑁄 𑀲𑁂𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀫𑁆𑀫𑀧𑁆𑀧𑀢𑀻𑀢𑀺 𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀥𑀫𑁆𑀫𑀳𑁂𑀢𑀼. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑁄 𑀲𑁂𑀝𑁆𑀞𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀉𑀢𑁆𑀢𑀫𑁄. 𑀯𑀺𑀲𑀤𑁄𑀲𑀧𑁆𑀧𑀯𑀸𑀳𑀓𑁄𑀢𑀺 𑀬𑁄 𑀫𑀬𑁆𑀳𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀲𑁆𑀲 𑀧𑀯𑀸𑀳𑀓𑁄 𑀉𑀘𑁆𑀙𑀺𑀦𑁆𑀦𑀓𑁄. 𑀕𑀫𑁆𑀪𑀻𑀭𑁂 𑀧𑀢𑀺𑀢𑀲𑁆𑀲 𑀫𑁂, 𑀣𑀮𑀁 𑀧𑀸𑀡𑀺𑀜𑁆𑀘 𑀤𑀲𑁆𑀲𑀬𑁂𑀢𑀺 𑀓𑁄 𑀦𑀼 𑀔𑁄 𑀅𑀢𑀺𑀕𑀫𑁆𑀪𑀻𑀭𑁂 𑀲𑀁𑀲𑀸𑀭𑀫𑀳𑁄𑀖𑁂 𑀧𑀢𑀺𑀢𑀲𑁆𑀲 𑀫𑀬𑁆𑀳𑀁 ‘‘𑀫𑀸 𑀪𑀸𑀬𑀻’’𑀢𑀺 𑀅𑀲𑁆𑀲𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀸𑀦𑀣𑀮𑀁 𑀢𑀁𑀲𑀫𑁆𑀧𑀸𑀧𑀓𑀁 𑀅𑀭𑀺𑀬𑀫𑀕𑁆𑀕𑀳𑀢𑁆𑀣𑀜𑁆𑀘 𑀤𑀲𑁆𑀲𑁂𑀬𑁆𑀬.

𑀭𑀳𑀤𑁂𑀳𑀫𑀲𑁆𑀫𑀺 ¶ 𑀑𑀕𑀸𑀴𑁆𑀳𑁄𑀢𑀺 𑀫𑀳𑀢𑀺 𑀲𑀁𑀲𑀸𑀭𑀭𑀳𑀤𑁂 𑀅𑀳𑀫𑀲𑁆𑀫𑀺 𑀲𑀲𑀻𑀲𑀁 𑀦𑀺𑀫𑀼𑀚𑁆𑀚𑀦𑀯𑀲𑁂𑀦 𑀑𑀢𑀺𑀡𑁆𑀡𑁄 𑀅𑀦𑀼𑀧𑀯𑀺𑀝𑁆𑀞𑁄. 𑀅𑀳𑀸𑀭𑀺𑀬𑀭𑀚𑀫𑀢𑁆𑀢𑀺𑀓𑁂𑀢𑀺 𑀅𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀭𑀸𑀕𑀸𑀤𑀺𑀭𑀚𑁄 𑀫𑀢𑁆𑀢𑀺𑀓𑀸 𑀓𑀤𑁆𑀤𑀫𑁄 𑀏𑀢𑀲𑁆𑀲𑀸𑀢𑀺 𑀅𑀳𑀸𑀭𑀺𑀬𑀭𑀚𑀫𑀢𑁆𑀢𑀺𑀓𑁄, 𑀭𑀳𑀤𑁄. 𑀢𑀲𑁆𑀫𑀺𑀁 𑀭𑀳𑀤𑀲𑁆𑀫𑀺𑀁. ‘‘𑀅𑀳𑀸𑀭𑀺𑀬𑀭𑀚𑀫𑀦𑁆𑀢𑀺𑀓𑁂’’𑀢𑀺 𑀯𑀸 𑀧𑀸𑀞𑁄, 𑀅𑀦𑁆𑀢𑀺𑀓𑁂 𑀞𑀺𑀢𑀭𑀸𑀕𑀸𑀤𑀻𑀲𑀼 𑀤𑀼𑀦𑁆𑀦𑀻𑀳𑀭𑀡𑀻𑀬𑀭𑀸𑀕𑀸𑀤𑀺𑀭𑀚𑁂𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸, 𑀧𑀭𑀲𑀫𑁆𑀧𑀢𑁆𑀢𑀺𑀅𑀲𑀳𑀦𑀮𑀓𑁆𑀔𑀡𑀸 𑀉𑀲𑀽𑀬𑀸, 𑀓𑀭𑀡𑀼𑀢𑁆𑀢𑀭𑀺𑀬𑀓𑀭𑀡𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄, 𑀘𑀺𑀢𑁆𑀢𑀸𑀮𑀲𑀺𑀬𑀮𑀓𑁆𑀔𑀡𑀁 𑀣𑀺𑀦𑀁, 𑀓𑀸𑀬𑀸𑀮𑀲𑀺𑀬𑀮𑀓𑁆𑀔𑀡𑀁 𑀫𑀺𑀤𑁆𑀥𑀦𑁆𑀢𑀺 𑀇𑀫𑁂 𑀧𑀸𑀧𑀥𑀫𑁆𑀫𑀸 𑀧𑀢𑁆𑀣𑀝𑀸 𑀬𑀁 𑀭𑀳𑀤𑀁, 𑀢𑀲𑁆𑀫𑀺𑀁 𑀫𑀸𑀬𑀸𑀉𑀲𑀽𑀬𑀲𑀸𑀭𑀫𑁆𑀪𑀣𑀺𑀦𑀫𑀺𑀤𑁆𑀥𑀫𑀧𑀢𑁆𑀣𑀝𑁂, 𑀫𑀓𑀸𑀭𑁄 𑀘𑁂𑀢𑁆𑀣 𑀧𑀤𑀲𑀦𑁆𑀥𑀺𑀓𑀭𑁄 𑀯𑀼𑀢𑁆𑀢𑁄. 𑀬𑀣𑀸𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀧𑀢𑁆𑀣𑀝𑁂𑀢𑀺 𑀅𑀢𑁆𑀣𑁄.

𑀉𑀤𑁆𑀥𑀘𑁆𑀘𑀫𑁂𑀖𑀣𑀦𑀺𑀢𑀁, 𑀲𑀁𑀬𑁄𑀚𑀦𑀯𑀮𑀸𑀳𑀓𑀦𑁆𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀪𑀦𑁆𑀢𑀲𑀪𑀸𑀯𑀁 𑀉𑀤𑁆𑀥𑀘𑁆𑀘𑀁 𑀫𑁂𑀖𑀣𑀦𑀺𑀢𑀁 𑀫𑁂𑀖𑀕𑀚𑁆𑀚𑀺𑀢𑀁 𑀏𑀢𑁂𑀲𑀦𑁆𑀢𑀺 𑀉𑀤𑁆𑀥𑀘𑁆𑀘𑀫𑁂𑀖𑀣𑀦𑀺𑀢𑀸. 𑀤𑀲𑀯𑀺𑀥𑀸 𑀲𑀁𑀬𑁄𑀚𑀦𑀸 ¶ 𑀏𑀯 𑀯𑀮𑀸𑀳𑀓𑀸 𑀏𑀢𑁂𑀲𑀦𑁆𑀢𑀺 𑀲𑀁𑀬𑁄𑀚𑀦𑀯𑀮𑀸𑀳𑀓𑀸. 𑀯𑀸𑀳𑀸 𑀫𑀳𑀸𑀉𑀤𑀓𑀯𑀸𑀳𑀲𑀤𑀺𑀲𑀸 𑀭𑀸𑀕𑀦𑀺𑀲𑁆𑀲𑀺𑀢𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀅𑀲𑀼𑀪𑀸𑀤𑀻𑀲𑀼 𑀞𑀺𑀢𑀸 𑀓𑀼𑀤𑁆𑀤𑀺𑀝𑁆𑀞𑀺𑀁 𑀫𑀁 𑀯𑀳𑀦𑁆𑀢𑀺 𑀅𑀧𑀸𑀬𑀲𑀫𑀼𑀤𑁆𑀤𑀫𑁂𑀯 𑀉𑀤𑁆𑀤𑀺𑀲𑁆𑀲 𑀓𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺 𑀢𑀡𑁆𑀳𑀸𑀲𑁄𑀢𑁄, 𑀤𑀺𑀝𑁆𑀞𑀺𑀲𑁄𑀢𑁄, 𑀫𑀸𑀦𑀲𑁄𑀢𑁄, 𑀅𑀯𑀺𑀚𑁆𑀚𑀸𑀲𑁄𑀢𑁄, 𑀓𑀺𑀮𑁂𑀲𑀲𑁄𑀢𑁄𑀢𑀺 𑀇𑀫𑁂 𑀧𑀜𑁆𑀘𑀧𑀺𑀲𑁄𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀁 𑀯𑀲𑁂𑀦 𑀲𑀩𑁆𑀩𑁂𑀲𑀼 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀯𑀦𑀢𑁄 ‘‘𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁦𑁪, 𑁨𑁩𑁨) 𑀲𑀩𑁆𑀩𑀪𑀸𑀕𑁂𑀳𑀺 𑀯𑀸 𑀲𑀯𑀦𑀢𑁄 𑀲𑀩𑁆𑀩𑀥𑀺 𑀲𑀯𑀦𑁆𑀢𑀺. 𑀮𑀢𑀸𑀢𑀺 𑀧𑀮𑀺𑀯𑁂𑀞𑀦𑀝𑁆𑀞𑁂𑀦 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀮𑀢𑀸 𑀯𑀺𑀬𑀸𑀢𑀺 𑀮𑀢𑀸, 𑀢𑀡𑁆𑀳𑀸. 𑀉𑀩𑁆𑀪𑀺𑀚𑁆𑀚 𑀢𑀺𑀝𑁆𑀞𑀢𑀻𑀢𑀺 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀺𑀝𑁆𑀞𑀢𑀺. 𑀢𑁂 𑀲𑁄𑀢𑁂𑀢𑀺 𑀢𑀡𑁆𑀳𑀸𑀤𑀺𑀓𑁂 ¶ 𑀲𑁄𑀢𑁂 𑀫𑀫 𑀲𑀦𑁆𑀢𑀸𑀦𑁂 𑀲𑀦𑁆𑀤𑀦𑁆𑀢𑁂 𑀫𑀕𑁆𑀕𑀲𑁂𑀢𑀼𑀩𑀦𑁆𑀥𑀦𑁂𑀦 𑀓𑁄 𑀧𑀼𑀭𑀺𑀲𑀯𑀺𑀲𑁂𑀲𑁄 𑀦𑀺𑀯𑀸𑀭𑁂𑀬𑁆𑀬, 𑀢𑀁 𑀮𑀢𑀦𑁆𑀢𑀺 𑀢𑀡𑁆𑀳𑀸𑀮𑀢𑀁, 𑀫𑀕𑁆𑀕𑀲𑀢𑁆𑀣𑁂𑀦 𑀓𑁄 𑀙𑁂𑀘𑁆𑀙𑀢𑀺 𑀙𑀺𑀦𑁆𑀤𑀺𑀲𑁆𑀲𑀢𑀺.

𑀯𑁂𑀮𑀁 𑀓𑀭𑁄𑀣𑀸𑀢𑀺 𑀢𑁂𑀲𑀁 𑀲𑁄𑀢𑀸𑀦𑀁 𑀯𑁂𑀮𑀁 𑀲𑁂𑀢𑀼𑀁 𑀓𑀭𑁄𑀣 𑀲𑀦𑁆𑀦𑀺𑀯𑀸𑀭𑀡𑀁. 𑀪𑀤𑁆𑀤𑀦𑁆𑀢𑁂𑀢𑀺 𑀆𑀮𑀧𑀦𑀸𑀓𑀸𑀭𑀤𑀲𑁆𑀲𑀦𑀁. 𑀫𑀸 𑀢𑁂 𑀫𑀦𑁄𑀫𑀬𑁄 𑀲𑁄𑀢𑁄𑀢𑀺 𑀉𑀤𑀓𑀲𑁄𑀢𑁄 𑀑𑀴𑀸𑀭𑀺𑀓𑁄, 𑀢𑀲𑁆𑀲 𑀩𑀸𑀮𑀫𑀳𑀸𑀚𑀦𑁂𑀦𑀧𑀺 𑀲𑁂𑀢𑀼𑀁 ¶ 𑀓𑀢𑁆𑀯𑀸 𑀦𑀺𑀯𑀸𑀭𑀡𑀁 𑀲𑀓𑁆𑀓𑀸. 𑀅𑀬𑀁 𑀧𑀦 𑀫𑀦𑁄𑀫𑀬𑁄 𑀲𑁄𑀢𑁄 𑀲𑀼𑀔𑀼𑀫𑁄 𑀤𑀼𑀦𑁆𑀦𑀺𑀯𑀸𑀭𑀡𑁄. 𑀲𑁄 𑀬𑀣𑀸 𑀉𑀤𑀓𑀲𑁄𑀢𑁄 𑀯𑀟𑁆𑀠𑀦𑁆𑀢𑁄 𑀓𑀽𑀮𑁂 𑀞𑀺𑀢𑀁 𑀭𑀼𑀓𑁆𑀔𑀁 𑀧𑀸𑀢𑁂𑀢𑁆𑀯𑀸𑀯 𑀦𑀸𑀲𑁂𑀢𑀺, 𑀏𑀯𑀁 𑀢𑀼𑀫𑁆𑀳𑁂 𑀅𑀧𑀸𑀬𑀢𑀻𑀭𑁂 𑀞𑀺𑀢𑁂 𑀢𑀢𑁆𑀣 𑀲𑀳𑀲𑀸 𑀧𑀸𑀢𑁂𑀢𑁆𑀯𑀸 𑀅𑀧𑀸𑀬𑀲𑀫𑀼𑀤𑁆𑀤𑀁 𑀧𑀸𑀧𑁂𑀦𑁆𑀢𑁄 𑀫𑀸 𑀮𑀼𑀯𑁂 𑀫𑀸 𑀯𑀺𑀦𑀸𑀲𑁂𑀬𑁆𑀬 𑀫𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀅𑀬𑀁 𑀣𑁂𑀭𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀢𑁆𑀢𑀸 𑀜𑀸𑀡𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀧𑀯𑀢𑁆𑀢𑀺𑀤𑀼𑀓𑁆𑀔𑀁 𑀉𑀧𑀥𑀸𑀭𑁂𑀦𑁆𑀢𑁄 𑀬𑀣𑀸 𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀓𑁂 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀺, 𑀢𑀫𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀚𑀸𑀢𑀲𑀁𑀯𑁂𑀕𑁄 𑀓𑀺𑀁𑀓𑀼𑀲𑀮𑀕𑀯𑁂𑀲𑀻 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑁄 𑀬𑀁 𑀯𑀺𑀲𑁂𑀲𑀁 𑀅𑀥𑀺𑀫𑀼𑀘𑁆𑀘𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀪𑀬𑀚𑀸𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀫𑁂 𑀪𑀬𑀚𑀸𑀢𑀲𑁆𑀲𑀸𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀁𑀲𑀸𑀭𑁂 𑀚𑀸𑀢𑀪𑀬𑀲𑁆𑀲 𑀅𑀧𑀸𑀭𑀸 𑀑𑀭𑀺𑀫𑀢𑀻𑀭𑀢𑁄 𑀲𑀧𑁆𑀧𑀝𑀺𑀪𑀬𑀢𑁄 𑀲𑀁𑀲𑀸𑀭𑀯𑀝𑁆𑀝𑀢𑁄 ‘‘𑀓𑀣𑀁 𑀦𑀼 𑀔𑁄 𑀫𑀼𑀜𑁆𑀘𑁂𑀬𑁆𑀬’’𑀦𑁆𑀢𑀺 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁, 𑀏𑀲𑀢𑁄 𑀕𑀯𑁂𑀲𑀢𑁄, 𑀢𑀸𑀡𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀢𑀸𑀡𑀪𑀽𑀢𑁄 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀦𑀻 𑀧𑀜𑁆𑀜𑀸 𑀆𑀯𑀼𑀥𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀯𑀼𑀥𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑁂𑀦 𑀲𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸, 𑀇𑀲𑀺𑀲𑀗𑁆𑀖𑁂𑀦 𑀅𑀕𑁆𑀕𑀲𑀸𑀯𑀓𑀸𑀤𑀺𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁂𑀦 𑀦𑀺𑀲𑁂𑀯𑀺𑀢𑁄 𑀧𑀬𑀺𑀭𑀼𑀧𑀸𑀲𑀺𑀢𑁄 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑁄, 𑀲𑁄𑀧𑀸𑀦𑀦𑁆𑀢𑀺 𑀤𑁂𑀲𑀦𑀸𑀜𑀸𑀡𑁂𑀦 𑀲𑀼𑀝𑁆𑀞𑀼 𑀓𑀢𑀢𑁆𑀢𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀲𑀼𑀓𑀢𑀁, 𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑀢𑁄 𑀲𑀼𑀤𑁆𑀥𑀁, 𑀲𑀤𑁆𑀥𑀸𑀧𑀜𑁆𑀜𑀸𑀤𑀺𑀲𑀸𑀭𑀪𑀽𑀢𑀁 𑀥𑀫𑁆𑀫𑀲𑀸𑀭𑀫𑀬𑀁 ¶ 𑀧𑀝𑀺𑀧𑀓𑁆𑀔𑁂𑀳𑀺 𑀅𑀘𑀮𑀦𑀻𑀬𑀢𑁄 𑀤𑀴𑁆𑀳𑀁, 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀲𑁄𑀧𑀸𑀦𑀁 𑀫𑀳𑁄𑀖𑁂𑀦 𑀯𑀼𑀬𑁆𑀳𑀫𑀸𑀦𑀲𑁆𑀲 𑀫𑀬𑁆𑀳𑀁 𑀲𑀢𑁆𑀣𑀸 𑀧𑀸𑀤𑀸𑀲𑀺, 𑀤𑀤𑀦𑁆𑀢𑁄 𑀘 ‘‘𑀇𑀫𑀺𑀦𑀸 𑀢𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀫𑀸 𑀪𑀸𑀬𑀻𑀢𑀺 𑀘 𑀅𑀩𑁆𑀭𑀯𑀺, 𑀓𑀣𑁂𑀲𑀺.

𑀲𑀢𑀺𑀧𑀝𑁆𑀞𑀸𑀦𑀧𑀸𑀲𑀸𑀤𑀦𑁆𑀢𑀺 𑀢𑁂𑀦 𑀯𑀺𑀧𑀲𑁆𑀲𑀦𑀸𑀲𑁄𑀧𑀸𑀦𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀦𑀸 𑀮𑀤𑁆𑀥𑀩𑁆𑀩𑀘𑀢𑀼𑀩𑁆𑀩𑀺𑀥𑀲𑀸𑀫𑀜𑁆𑀜𑀨𑀮𑀯𑀺𑀲𑁂𑀲𑁂𑀦 𑀘𑀢𑀼𑀪𑀽𑀫𑀺𑀲𑀫𑁆𑀧𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀧𑀸𑀲𑀸𑀤𑀁 𑀆𑀭𑀼𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀲𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀫𑀕𑁆𑀕𑀜𑀸𑀡𑁂𑀦 𑀧𑀢𑀺𑀅𑀯𑁂𑀓𑁆𑀔𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀬𑀁 𑀢𑀁 𑀧𑀼𑀩𑁆𑀩𑁂 𑀅𑀫𑀜𑁆𑀜𑀺𑀲𑁆𑀲𑀁, 𑀲𑀓𑁆𑀓𑀸𑀬𑀸𑀪𑀺𑀭𑀢𑀁 𑀧𑀚𑀦𑁆𑀢𑀺 𑀏𑀯𑀁 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁄 𑀬𑀁 𑀲𑀓𑁆𑀓𑀸𑀬𑁂 ‘‘𑀅𑀳𑀁 𑀫𑀫𑀸’’𑀢𑀺 𑀅𑀪𑀺𑀭𑀢𑀁 𑀧𑀚𑀁 𑀢𑀺𑀢𑁆𑀣𑀺𑀬𑀚𑀦𑀁 𑀢𑁂𑀦 𑀧𑀭𑀺𑀓𑀧𑁆𑀧𑀺𑀢𑀅𑀢𑁆𑀢𑀸𑀦𑀜𑁆𑀘 𑀧𑀼𑀩𑁆𑀩𑁂 𑀲𑀸𑀭𑀢𑁄 𑀅𑀫𑀜𑁆𑀜𑀺𑀲𑁆𑀲𑀁. 𑀬𑀤𑀸 𑀘 𑀫𑀕𑁆𑀕𑀫𑀤𑁆𑀤𑀓𑁆𑀔𑀺𑀁, 𑀦𑀸𑀯𑀸𑀬 𑀅𑀪𑀺𑀭𑀽𑀳𑀦𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀦𑀸𑀯𑀸𑀬 𑀅𑀪𑀺𑀭𑀼𑀳𑀦𑀽𑀧𑀸𑀬𑀪𑀽𑀢𑀁 𑀬𑀤𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀬𑀸𑀣𑀸𑀯𑀢𑁄 𑀅𑀤𑁆𑀤𑀓𑁆𑀔𑀺𑀁. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀢𑀺𑀢𑁆𑀣𑀺𑀬𑀚𑀦𑀁 𑀅𑀢𑁆𑀢𑀸𑀦𑀜𑁆𑀘 𑀅𑀦𑀥𑀺𑀝𑁆𑀞𑀸𑀬 𑀘𑀺𑀢𑁆𑀢𑁂 𑀅𑀝𑁆𑀞𑀧𑁂𑀢𑁆𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀢𑀺𑀢𑁆𑀣𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀲𑁆𑀲 𑀅𑀫𑀢𑀫𑀳𑀸𑀧𑀸𑀭𑀲𑁆𑀲 ¶ ¶ 𑀢𑀺𑀢𑁆𑀣𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀤𑀲𑁆𑀲𑀦𑀁 𑀲𑀩𑁆𑀩𑁂𑀳𑀺 𑀫𑀕𑁆𑀕𑁂𑀳𑀺 𑀲𑀩𑁆𑀩𑁂𑀳𑀺 𑀓𑀼𑀲𑀮𑀥𑀫𑁆𑀫𑁂𑀳𑀺 𑀉𑀓𑁆𑀓𑀝𑁆𑀞𑀁 𑀅𑀤𑁆𑀤𑀓𑁆𑀔𑀺𑀁, 𑀬𑀸𑀣𑀸𑀯𑀢𑁄 𑀅𑀧𑀲𑁆𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀁 𑀫𑀕𑁆𑀕𑀸𑀥𑀺𑀕𑀫𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀤𑁂𑀲𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀣𑁄𑀫𑁂𑀦𑁆𑀢𑁄 ‘‘𑀲𑀮𑁆𑀮𑀁 𑀅𑀢𑁆𑀢𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀮𑁆𑀮𑀦𑁆𑀢𑀺 𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀲𑀮𑁆𑀮𑀁. 𑀅𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 ‘‘𑀅𑀳’’𑀦𑁆𑀢𑀺 𑀫𑀸𑀦𑀝𑁆𑀞𑀸𑀦𑀢𑀸𑀬 ‘‘𑀅𑀢𑁆𑀢𑀸’’𑀢𑀺 𑀘 𑀮𑀤𑁆𑀥𑀦𑀸𑀫𑁂 𑀅𑀢𑁆𑀢𑀪𑀸𑀯𑁂 𑀲𑀫𑁆𑀪𑀽𑀢𑀁. 𑀪𑀯𑀦𑁂𑀢𑁆𑀢𑀺𑀧𑁆𑀧𑀪𑀸𑀯𑀺𑀢𑀦𑁆𑀢𑀺 𑀪𑀯𑀢𑀡𑁆𑀳𑀸𑀲𑀫𑀼𑀝𑁆𑀞𑀺𑀢𑀁 𑀪𑀯𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀬𑀁. 𑀲𑀸 𑀳𑀺 𑀤𑀺𑀝𑁆𑀞𑀺𑀫𑀸𑀦𑀸𑀤𑀻𑀦𑀁 𑀲𑀫𑁆𑀪𑀯𑁄. 𑀏𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀸𑀤𑀸𑀬. 𑀤𑁂𑀲𑁂𑀲𑀺 𑀫𑀕𑁆𑀕𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀢𑀤𑀼𑀧𑀸𑀬𑀜𑁆𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀓𑀣𑁂𑀲𑀺.

𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀦𑁆𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀘𑀺𑀭𑀓𑀸𑀮𑀁 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀺𑀢𑀁 𑀓𑀸𑀭𑀡𑀮𑀸𑀪𑁂𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀪𑀸𑀯𑁂𑀦 𑀣𑀸𑀫𑀕𑀢𑀁, 𑀢𑀢𑁄 𑀘 𑀘𑀺𑀭𑀭𑀢𑁆𑀢𑀁 𑀅𑀥𑀺𑀝𑁆𑀞𑀺𑀢𑀁 𑀲𑀦𑁆𑀢𑀸𑀦𑀁 𑀅𑀚𑁆𑀛𑀸𑀭𑀼𑀬𑁆𑀳 𑀞𑀺𑀢𑀁. 𑀕𑀦𑁆𑀣𑀦𑁆𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸𑀤𑀺𑀁 𑀫𑀫 𑀲𑀦𑁆𑀢𑀸𑀦𑁂 𑀕𑀦𑁆𑀣𑀪𑀽𑀢𑀁 𑀓𑀺𑀮𑁂𑀲𑀯𑀺𑀲𑀤𑁄𑀲𑀁 𑀧𑀯𑀸𑀳𑀦𑁄 𑀩𑀼𑀤𑁆𑀥𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀧𑀸𑀦𑀼𑀤𑀻 𑀧𑀭𑀺𑀚𑀳𑀸𑀧𑁂𑀲𑀺, 𑀕𑀦𑁆𑀣𑁂𑀲𑀼 𑀳𑀺 𑀅𑀦𑀯𑀲𑁂𑀲𑀢𑁄 𑀧𑀳𑀻𑀦𑁂𑀲𑀼 𑀅𑀧𑁆𑀧𑀳𑀻𑀦𑁄 𑀦𑀸𑀫 𑀓𑀺𑀮𑁂𑀲𑁄 𑀦𑀢𑁆𑀣𑀻𑀢𑀺.

𑀢𑁂𑀮𑀓𑀸𑀦𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀲𑁆𑀲 ¶ 𑀘𑀺𑀢𑁆𑀢𑀓𑀢𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀺𑀢𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀓𑀫𑁆𑀫𑀺𑀓𑁂𑀦 𑀤𑀲𑁆𑀲𑀺𑀢𑀁 𑀅𑀧𑀭𑀺𑀫𑀸𑀡𑀁 𑀓𑀼𑀮𑀯𑀁𑀲𑀸𑀦𑀼𑀕𑀢𑀁 𑀥𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀏𑀢𑁆𑀢𑀓𑀁 𑀥𑀦𑀭𑀸𑀲𑀺𑀁 𑀫𑀬𑁆𑀳𑀁 𑀧𑀺𑀢𑀼𑀅𑀬𑁆𑀬𑀓𑀧𑀬𑁆𑀬𑀓𑀸𑀤𑀬𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄 𑀅𑀪𑀺𑀜𑁆𑀜𑀸𑀮𑀸𑀪𑀺𑀁 𑀏𑀓𑀁 𑀢𑀸𑀧𑀲𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑁂𑀦 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑁂 𑀦𑀺𑀬𑁄𑀚𑀺𑀢𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 ¶ 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀓𑀼𑀮𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀢𑁂𑀦 ¶ 𑀘 𑀲𑀫𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑀗𑁆𑀔𑀸𑀢𑀁 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀲𑀺. 𑀅𑀣 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀣𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀧𑀲𑀦𑁆𑀦𑀫𑀸𑀦𑀲𑁄 𑀢𑀤𑀢𑁆𑀣𑀸𑀬 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑀲𑁆𑀲 𑀪𑀕𑀯𑀢𑁄 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀇𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑁂𑀦𑀯𑀼𑀢𑁂 𑀓𑀧𑁆𑀧𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀸𑀢𑀺𑀓𑁂𑀲𑀼 𑀢𑀻𑀲𑀼 𑀭𑀸𑀚𑀧𑀼𑀢𑁆𑀢𑁂𑀲𑀼 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀢𑁂𑀲𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀓𑀺𑀘𑁆𑀘𑀁 𑀅𑀓𑀸𑀲𑀺.

𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀢𑀁 𑀢𑀁 𑀩𑀳𑀼𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀼𑀭𑀝𑁆𑀞𑁂 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑀺𑀕𑀫𑁂 𑀭𑀝𑁆𑀞𑀧𑀸𑀮𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀭𑀝𑁆𑀞𑀧𑀸𑀮𑁄𑀢𑀺 ¶ 𑀯𑀁𑀲𑀸𑀦𑀼𑀕𑀢𑀫𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀬𑁄𑀩𑁆𑀩𑀦𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑀺𑀢𑁄 𑀫𑀳𑀦𑁆𑀢𑁂 𑀘 𑀬𑀲𑁂 𑀧𑀢𑀺𑀝𑁆𑀞𑀸𑀧𑀺𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀅𑀣 𑀪𑀕𑀯𑀸 𑀓𑀼𑀭𑀼𑀭𑀝𑁆𑀞𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀅𑀦𑀼𑀧𑀸𑀧𑀼𑀡𑀺. 𑀢𑀁 𑀲𑀼𑀢𑁆𑀯𑀸 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀲𑀢𑁆𑀢𑀸𑀳𑀁 𑀪𑀢𑁆𑀢𑀘𑁆𑀙𑁂𑀤𑀁 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁨.𑁯𑁭-𑁧𑁧𑁧) 𑁋

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀭𑀦𑀸𑀕𑁄 𑀫𑀬𑀸 𑀤𑀺𑀦𑁆𑀦𑁄, 𑀈𑀲𑀸𑀤𑀦𑁆𑀢𑁄 𑀉𑀭𑀽𑀴𑁆𑀳𑀯𑀸.

‘‘𑀲𑁂𑀢𑀘𑁆𑀙𑀢𑁆𑀢𑁄 𑀧𑀲𑁄𑀪𑀺𑀢𑁄, 𑀲𑀓𑀧𑁆𑀧𑀦𑁄 𑀲𑀳𑀢𑁆𑀣𑀺𑀧𑁄;

𑀅𑀕𑁆𑀖𑀸𑀧𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀲𑀗𑁆𑀖𑀸𑀭𑀸𑀫𑀁 𑀅𑀓𑀸𑀭𑀬𑀺𑀁.

‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀺𑀁 𑀅𑀳𑀁;

𑀫𑀳𑁄𑀖𑀤𑀸𑀦𑀁 𑀓𑀭𑀺𑀢𑁆𑀯𑀸𑀦, 𑀦𑀺𑀬𑁆𑀬𑀸𑀤𑁂𑀲𑀺𑀁 𑀫𑀳𑁂𑀲𑀺𑀦𑁄.

‘‘𑀅𑀦𑀼𑀫𑁄𑀤𑀺 ¶ 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀲𑀩𑁆𑀩𑁂 𑀚𑀦𑁂 𑀳𑀸𑀲𑀬𑀦𑁆𑀢𑁄, 𑀤𑁂𑀲𑁂𑀲𑀺 𑀅𑀫𑀢𑀁 𑀧𑀤𑀁.

‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀮𑀚𑀼𑀢𑁆𑀢𑀭𑀦𑀸𑀫𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀻 𑀅𑀬𑀁;

𑀓𑀣𑀬𑀺𑀲𑁆𑀲𑀸𑀫𑀺 𑀯𑀺𑀧𑀸𑀓𑀁, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀓𑀽𑀝𑀸𑀕𑀸𑀭𑀸 𑀪𑀯𑀺𑀲𑁆𑀲𑀭𑁂;

𑀩𑁆𑀬𑀫𑁆𑀳𑀼𑀢𑁆𑀢𑀫𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀘 𑀢𑁂.

‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀅𑀟𑁆𑀠𑁂 𑀓𑀼𑀮𑁂 𑀫𑀳𑀸𑀪𑁄𑀕𑁂, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑀸𑀯𑀤𑁂.

‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀭𑀝𑁆𑀞𑀧𑀸𑀮𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

‘‘𑀉𑀝𑁆𑀞𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀚𑀳𑀺𑀢𑀸 𑀪𑁄𑀕𑀲𑀫𑁆𑀧𑀤𑀸;

𑀔𑁂𑀴𑀧𑀺𑀡𑁆𑀟𑁂𑀯 𑀪𑁄𑀕𑀫𑁆𑀳𑀺, 𑀧𑁂𑀫𑀁 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺.

‘‘𑀯𑀻𑀭𑀺𑀬𑀁 ¶ 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀢𑀼𑀁 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀮𑀪𑀺𑀢𑁆𑀯𑀸 𑀢𑀁 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑁄, 𑀧𑀺𑀢𑀭𑀸 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀅𑀥𑀺𑀯𑀸𑀲𑁂𑀢𑁆𑀯𑀸, 𑀤𑀼𑀢𑀺𑀬𑀤𑀺𑀯𑀲𑁂 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀇𑀢𑁆𑀣𑀸𑀕𑀸𑀭𑀚𑀦𑁂 𑀉𑀧𑀕𑀦𑁆𑀢𑁆𑀯𑀸 ‘‘𑀓𑀻𑀤𑀺𑀲𑀸 𑀦𑀸𑀫 𑀢𑀸, 𑀅𑀬𑁆𑀬𑀧𑀼𑀢𑁆𑀢, 𑀅𑀘𑁆𑀙𑀭𑀸𑀬𑁄, 𑀬𑀸𑀲𑀁 𑀢𑁆𑀯𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀻’’𑀢𑀺𑀆𑀤𑀻𑀦𑀺 (𑀫. 𑀦𑀺. 𑁨.𑁩𑁦𑁧) 𑀯𑀢𑁆𑀯𑀸, 𑀧𑀮𑁄𑀪𑀦𑀓𑀫𑁆𑀫𑀁 𑀓𑀸𑀢𑀼𑀁 𑀆𑀭𑀤𑁆𑀥𑁂 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

𑁭𑁬𑁯.

‘‘𑀧𑀲𑁆𑀲 ¶ 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

𑁭𑁭𑁦.

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘;

𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀁, 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀺.

𑁭𑁭𑁧.

‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀁;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁭𑁭𑁨.

‘‘𑀅𑀝𑁆𑀞𑀸𑀧𑀤𑀓𑀢𑀸 𑀓𑁂𑀲𑀸, 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁭𑁭𑁩.

‘‘𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁭𑁭𑁪.

‘‘𑀑𑀤𑀳𑀺 ¶ 𑀫𑀺𑀕𑀯𑁄 𑀧𑀸𑀲𑀁, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀓𑀦𑁆𑀤𑀦𑁆𑀢𑁂 𑀫𑀺𑀕𑀩𑀦𑁆𑀥𑀓𑁂.

𑁭𑁭𑁫.

‘‘𑀙𑀺𑀦𑁆𑀦𑁄 ¶ 𑀧𑀸𑀲𑁄 𑀫𑀺𑀕𑀯𑀲𑁆𑀲, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀲𑁄𑀘𑀦𑁆𑀢𑁂 𑀫𑀺𑀕𑀮𑀼𑀤𑁆𑀤𑀓𑁂’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀘𑀺𑀢𑁆𑀢𑀓𑀢𑀦𑁆𑀢𑀺 𑀘𑀺𑀢𑁆𑀢𑀁 𑀓𑀢𑀁 𑀘𑀺𑀢𑁆𑀢𑀓𑀢𑀁, 𑀯𑀢𑁆𑀣𑀸𑀪𑀭𑀡𑀫𑀸𑀮𑀸𑀤𑀻𑀳𑀺 𑀯𑀺𑀘𑀺𑀢𑁆𑀢𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀩𑀺𑀫𑁆𑀩𑀦𑁆𑀢𑀺 𑀤𑀻𑀖𑀸𑀤𑀺𑀪𑀸𑀯𑁂𑀦 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀤𑀻𑀖𑀸𑀤𑀻𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀫𑀡𑁆𑀟𑀺𑀢𑀁 𑀅𑀢𑁆𑀢𑀪𑀸𑀯𑀁. 𑀅𑀭𑀼𑀓𑀸𑀬𑀦𑁆𑀢𑀺 𑀦𑀯𑀦𑁆𑀦𑀁 𑀯𑀡𑀫𑀼𑀔𑀸𑀦𑀁 𑀮𑁄𑀫𑀓𑀽𑀧𑀸𑀦𑀜𑁆𑀘 𑀯𑀲𑁂𑀦 𑀯𑀺𑀲𑁆𑀲𑀦𑁆𑀤𑀫𑀸𑀦𑀅𑀲𑀼𑀘𑀺𑀁, 𑀲𑀩𑁆𑀩𑀲𑁄 𑀘 𑀅𑀭𑀼𑀪𑀽𑀢𑀁 𑀯𑀡𑀪𑀽𑀢𑀁 𑀅𑀭𑀽𑀦𑀁 𑀯𑀸 𑀓𑀸𑀬𑀁. 𑀲𑀫𑀼𑀲𑁆𑀲𑀺𑀢𑀦𑁆𑀢𑀺 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀲𑀫𑀼𑀲𑁆𑀲𑀺𑀢𑀁. 𑀆𑀢𑀼𑀭𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑀸𑀤𑀻𑀳𑀺 𑀧𑀭𑀺𑀳𑀭𑀺𑀢𑀩𑁆𑀩𑀢𑀸𑀬 𑀦𑀺𑀘𑁆𑀘𑀁 𑀕𑀺𑀮𑀸𑀦𑀁. 𑀩𑀳𑀼𑀲𑀗𑁆𑀓𑀧𑁆𑀧𑀦𑁆𑀢𑀺 𑀩𑀸𑀮𑀚𑀦𑁂𑀦 𑀅𑀪𑀽𑀢𑀁 𑀆𑀭𑁄𑀧𑁂𑀢𑁆𑀯𑀸 𑀩𑀳𑀼𑀥𑀸 𑀲𑀗𑁆𑀓𑀧𑁆𑀧𑀺𑀢𑀩𑁆𑀩𑀁. 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀻𑀢𑀺 𑀬𑀲𑁆𑀲 𑀓𑀸𑀬𑀲𑁆𑀲 𑀥𑀼𑀯𑀪𑀸𑀯𑁄 𑀞𑀺𑀢𑀺𑀲𑀪𑀸𑀯𑁄 𑀦𑀢𑁆𑀣𑀺, 𑀏𑀓𑀁𑀲𑀢𑁄 𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄𑀬𑁂𑀯. 𑀢𑀁 𑀧𑀲𑁆𑀲𑀸𑀢𑀺 𑀲𑀫𑀻𑀧𑁂 𑀞𑀺𑀢𑀁 𑀚𑀦𑀁, 𑀅𑀢𑁆𑀢𑀸𑀦𑀫𑁂𑀯 𑀯𑀸 𑀲𑀦𑁆𑀥𑀸𑀬 𑀯𑀤𑀢𑀺.

𑀭𑀽𑀧𑀦𑁆𑀢𑀺 𑀲𑀭𑀻𑀭𑀁. 𑀲𑀭𑀻𑀭𑀫𑁆𑀧𑀺 𑀳𑀺 ‘‘𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘, 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘, 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘, 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘, 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 ‘𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁬) 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘𑀸𑀢𑀺 𑀲𑀻𑀲𑀽𑀧𑀕𑀸𑀤𑀺𑀆𑀪𑀭𑀡𑀕𑀢𑁂𑀦 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘𑀺𑀢𑁆𑀢𑀓𑀢𑀁. 𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀦𑁆𑀢𑀺 𑀅𑀮𑁆𑀮𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑀁 𑀅𑀢𑀺𑀭𑁂𑀓𑀢𑀺𑀲𑀢𑀧𑀪𑁂𑀤𑀁 𑀅𑀝𑁆𑀞𑀺𑀁 𑀧𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀓𑀼𑀡𑁆𑀟𑀮𑁂𑀦 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀲𑁂𑀲𑀸𑀪𑀭𑀡𑀸𑀮𑀗𑁆𑀓𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀻𑀢𑀺 𑀢𑀬𑀺𑀤𑀁 𑀭𑀽𑀧𑀁 𑀫𑀡𑀺𑀦𑀸 𑀘𑀺𑀢𑁆𑀢𑀓𑀢𑀫𑁆𑀧𑀺 𑀯𑀢𑁆𑀣𑁂𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀫𑁂𑀯 𑀲𑁄𑀪𑀢𑀺, 𑀦 𑀅𑀧𑀝𑀺𑀘𑁆𑀙𑀸𑀤𑀺𑀢𑀦𑁆𑀢𑀺 ¶ 𑀅𑀢𑁆𑀣𑁄. 𑀬𑁂 𑀧𑀦 ‘‘𑀅𑀝𑁆𑀞𑀺𑀢𑀘𑁂𑀦𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞𑀺𑀢𑀘𑁂𑀦𑀁 𑀑𑀦𑀤𑁆𑀥𑀁 𑀲𑁄𑀪𑀢𑀺, 𑀑𑀦𑀤𑁆𑀥𑀢𑁆𑀢𑀸 𑀅𑀝𑁆𑀞𑀺𑀢𑀘𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀮𑀢𑁆𑀢𑀓𑀓𑀢𑀸𑀢𑀺 𑀅𑀮𑀢𑁆𑀢𑀓𑁂𑀦 𑀓𑀢𑀭𑀜𑁆𑀚𑀦𑀸 𑀮𑀸𑀔𑀸𑀬 𑀲𑀁𑀭𑀜𑁆𑀚𑀺𑀢𑀸. 𑀧𑀸𑀤𑀸𑀢𑀺 𑀘𑀭𑀡𑀸. 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀦𑁆𑀢𑀺 𑀫𑀼𑀔𑀁 𑀘𑀼𑀡𑁆𑀡𑀓𑁂𑀦 𑀫𑀓𑁆𑀔𑀺𑀢𑀁, 𑀬𑀁 𑀫𑀡𑁆𑀟𑀦𑀫𑀦𑀼𑀬𑀼𑀢𑁆𑀢𑀸 𑀲𑀸𑀲𑀧𑀓𑀓𑁆𑀓𑁂𑀦 𑀫𑀼𑀔𑀧𑀻𑀴𑀓𑀸𑀤𑀻𑀦𑀺 𑀳𑀭𑀺𑀢𑁆𑀯𑀸 𑀮𑁄𑀡𑀫𑀢𑁆𑀢𑀺𑀓𑀸𑀬 𑀤𑀼𑀝𑁆𑀞𑀮𑁄𑀳𑀺𑀢𑀁 𑀳𑀭𑀺𑀢𑁆𑀯𑀸 𑀫𑀼𑀔𑀘𑀼𑀡𑁆𑀡𑀓𑀯𑀺𑀮𑁂𑀧𑀦𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀮𑀦𑁆𑀢𑀺 𑀩𑀸𑀮𑀲𑁆𑀲 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑁄 ¶ 𑀘 𑀧𑀸𑀭𑀕𑀯𑁂𑀲𑀺𑀦𑁄 𑀯𑀝𑁆𑀝𑀸𑀪𑀺𑀭𑀢𑀲𑁆𑀲 𑀫𑁄𑀳𑀸𑀬 𑀲𑀫𑁆𑀫𑁄𑀳𑀦𑀸𑀬 𑀲𑀫𑀢𑁆𑀣𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀫𑁄𑀳𑁂𑀢𑀼𑀁 𑀧𑀭𑀺𑀬𑀢𑁆𑀢𑀁, 𑀧𑀸𑀭𑀕𑀯𑁂𑀲𑀺𑀦𑁄 𑀧𑀦 𑀯𑀺𑀯𑀝𑁆𑀝𑀸𑀪𑀺𑀭𑀢𑀲𑁆𑀲 𑀦𑁄 𑀅𑀮𑀁 𑀦 𑀧𑀭𑀺𑀬𑀢𑁆𑀢𑀁.

𑀅𑀝𑁆𑀞𑀸𑀧𑀤𑀓𑀢𑀸𑀢𑀺 ¶ 𑀅𑀝𑁆𑀞𑀧𑀤𑀸𑀓𑀸𑀭𑁂𑀦 𑀓𑀢𑀸 𑀲𑀜𑁆𑀘𑀺𑀢𑀸 𑀧𑀼𑀭𑀺𑀫𑀪𑀸𑀕𑁂 𑀓𑁂𑀲𑁂 𑀓𑀧𑁆𑀧𑁂𑀢𑁆𑀯𑀸 𑀦𑀮𑀸𑀝𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀓𑀢𑀸 𑀓𑁂𑀲𑀭𑀘𑀦𑀸 𑀅𑀝𑁆𑀞𑀧𑀤𑀁 𑀦𑀸𑀫, 𑀬𑀁 ‘‘𑀅𑀮𑀓’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸𑀢𑀺 𑀉𑀪𑁄𑀧𑀺 𑀦𑀬𑀦𑀸𑀦𑀺 𑀅𑀦𑁆𑀢𑁄 𑀤𑁆𑀯𑀻𑀲𑀼 𑀅𑀦𑁆𑀢𑁂𑀲𑀼 𑀘 𑀬𑀣𑀸 𑀅𑀜𑁆𑀚𑀦𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀜𑁆𑀚𑀺𑀢𑀜𑁆𑀚𑀦𑀸𑀦𑀺.

𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄𑀢𑀺 𑀬𑀣𑀸 𑀅𑀜𑁆𑀚𑀦𑀻 𑀅𑀜𑁆𑀚𑀦𑀦𑀸𑀴𑀺𑀓𑀸 𑀦𑀯𑀸 𑀅𑀪𑀺𑀦𑀯𑀸 𑀫𑀸𑀮𑀸𑀓𑀫𑁆𑀫𑀫𑀓𑀭𑀤𑀦𑁆𑀢𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀸 𑀩𑀳𑀺 𑀫𑀝𑁆𑀞𑀸 𑀉𑀚𑁆𑀚𑀮𑀸 𑀤𑀲𑁆𑀲𑀦𑀻𑀬𑀸, 𑀅𑀦𑁆𑀢𑁄 𑀧𑀦 𑀦 𑀤𑀲𑁆𑀲𑀦𑀻𑀬𑀸 𑀳𑁄𑀢𑀺, 𑀏𑀯𑀫𑁂𑀯 𑀢𑀸𑀲𑀁 𑀓𑀸𑀬𑁄 𑀦𑁆𑀳𑀸𑀦𑀩𑁆𑀪𑀜𑁆𑀚𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑁄 𑀩𑀳𑀺 𑀉𑀚𑁆𑀚𑀮𑁄, 𑀅𑀦𑁆𑀢𑁄 𑀧𑀦 𑀧𑀽𑀢𑀺 𑀦𑀸𑀦𑀧𑁆𑀧𑀓𑀸𑀭𑀅𑀲𑀼𑀘𑀻𑀳𑀺 𑀪𑀭𑀺𑀢𑁄 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄.

𑀑𑀤𑀳𑀻𑀢𑀺 𑀑𑀟𑁆𑀟𑁂𑀲𑀺. 𑀫𑀺𑀕𑀯𑁄𑀢𑀺, 𑀫𑀺𑀕𑀮𑀼𑀤𑁆𑀤𑀓𑁄. 𑀧𑀸𑀲𑀦𑁆𑀢𑀺, 𑀤𑀡𑁆𑀟𑀯𑀸𑀕𑀼𑀭𑀁. 𑀦𑀸𑀲𑀤𑀸𑀢𑀺 𑀦 𑀲𑀗𑁆𑀖𑀝𑁆𑀝𑁂𑀲𑀺. 𑀯𑀸𑀕𑀼𑀭𑀦𑁆𑀢𑀺 𑀧𑀸𑀲𑀁. 𑀦𑀺𑀯𑀸𑀧𑀦𑁆𑀢𑀺 𑀫𑀺𑀕𑀸𑀦𑀁 𑀔𑀸𑀤𑀦𑀢𑁆𑀣𑀸𑀬 𑀔𑀺𑀢𑁆𑀢𑀁 𑀢𑀺𑀡𑀸𑀤𑀺𑀖𑀸𑀲𑀁. 𑀉𑀧𑀫𑀸 𑀔𑁄 𑀅𑀬𑀁 𑀣𑁂𑀭𑁂𑀦 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀫𑀺𑀕𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀤𑀡𑁆𑀟𑀯𑀸𑀕𑀼𑀭𑀁 𑀑𑀟𑁆𑀟𑁂𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀧𑀁 𑀯𑀺𑀓𑀺𑀭𑀺𑀬 𑀫𑀺𑀕𑀮𑀼𑀤𑁆𑀤𑀓𑁂 𑀦𑀺𑀮𑀻𑀦𑁂 𑀞𑀺𑀢𑁂 𑀢𑀢𑁆𑀣𑁂𑀓𑁄 𑀚𑀯𑀧𑀭𑀓𑁆𑀓𑀫𑀲𑀫𑁆𑀧𑀦𑁆𑀦𑁄 𑀙𑁂𑀓𑁄 𑀫𑀺𑀕𑁄 𑀧𑀸𑀲𑀁 𑀅𑀨𑀼𑀲𑀦𑁆𑀢𑁄 𑀏𑀯 𑀬𑀣𑀸𑀲𑀼𑀔𑀁 𑀦𑀺𑀯𑀸𑀧𑀁 𑀔𑀸𑀤𑀺𑀢𑁆𑀯𑀸, ‘‘𑀯𑀜𑁆𑀘𑁂𑀲𑀺 𑀯𑀢 𑀫𑀺𑀕𑁄’’𑀢𑀺 𑀫𑀺𑀕𑀮𑀼𑀤𑁆𑀤𑀓𑁂 𑀯𑀺𑀭𑀯𑀦𑁆𑀢𑁂 𑀏𑀯 𑀕𑀘𑁆𑀙𑀢𑀺. 𑀅𑀧𑀭𑁄 𑀫𑀺𑀕𑁄 𑀩𑀮𑀯𑀸 𑀙𑁂𑀓𑁄 𑀚𑀯𑀲𑀫𑁆𑀧𑀦𑁆𑀦𑁄𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀯𑀸𑀧𑀁 𑀔𑀸𑀤𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀲𑀁 𑀙𑀺𑀦𑁆𑀤𑀺𑀢𑁆𑀯𑀸, ‘‘𑀯𑀜𑁆𑀘𑁂𑀲𑀺 𑀯𑀢 𑀫𑀺𑀕𑁄, 𑀧𑀸𑀲𑁄 𑀙𑀺𑀦𑁆𑀦𑁄’’𑀢𑀺 𑀫𑀺𑀕𑀮𑀼𑀤𑁆𑀤𑀓𑁂 𑀲𑁄𑀘𑀦𑁆𑀢𑁂 𑀏𑀯 𑀕𑀘𑁆𑀙𑀢𑀺, 𑀏𑀯𑀁 𑀫𑀬𑀫𑁆𑀧𑀺 𑀧𑀼𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀳𑀺 𑀆𑀲𑀚𑁆𑀚𑀦𑀢𑁆𑀣𑀸𑀬 𑀦𑀺𑀬𑁆𑀬𑀸𑀤𑀺𑀢𑁂 𑀪𑁄𑀕𑁂 𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀲𑀚𑁆𑀚𑀫𑀸𑀦𑀸 𑀦𑀺𑀓𑁆𑀔𑀦𑁆𑀢𑀸. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑀲𑁄 ¶ 𑀙𑀺𑀦𑁆𑀦𑀓𑀺𑀮𑁂𑀲𑀸 𑀅𑀧𑀸𑀲𑀸 𑀳𑀼𑀢𑁆𑀯𑀸 𑀞𑀺𑀢𑀸, 𑀢𑁂𑀳𑀺 𑀤𑀺𑀦𑁆𑀦𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂𑀲𑀼 𑀲𑁄𑀘𑀦𑁆𑀢𑁂𑀲𑀼 𑀏𑀯 𑀕𑀘𑁆𑀙𑀸𑀫𑀸𑀢𑀺.

𑀏𑀯𑀁 𑀣𑁂𑀭𑁄 𑀫𑀺𑀕𑀮𑀼𑀤𑁆𑀤𑀓𑀁 𑀯𑀺𑀬 𑀫𑀸𑀢𑀸𑀧𑀺𑀢𑀭𑁄, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀇𑀢𑁆𑀣𑀸𑀕𑀸𑀭𑀜𑁆𑀘 𑀯𑀸𑀕𑀼𑀭𑀚𑀸𑀮𑀁 𑀯𑀺𑀬, 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀪𑀼𑀢𑁆𑀢𑀪𑁄𑀕𑁂 𑀘 𑀇𑀤𑀸𑀦𑀺 𑀪𑀼𑀢𑁆𑀢𑀪𑁄𑀚𑀦𑀜𑁆𑀘 𑀦𑀺𑀯𑀸𑀧𑀢𑀺𑀡𑀁 𑀯𑀺𑀬, 𑀅𑀢𑁆𑀢𑀸𑀦𑀁 𑀫𑀳𑀸𑀫𑀺𑀕𑀁 𑀯𑀺𑀬 𑀘 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀇𑀫𑀸 𑀕𑀸𑀣𑀸 𑀯𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀫𑀺𑀕𑀸𑀚𑀺𑀦𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀣𑁂𑀭𑀲𑁆𑀲 𑀓𑀺𑀭 𑀧𑀺𑀢𑀸 𑀲𑀢𑁆𑀢𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀅𑀕𑁆𑀕𑀴𑀁 𑀤𑀸𑀧𑁂𑀢𑁆𑀯𑀸 ¶ 𑀫𑀮𑁆𑀮𑁂 𑀆𑀡𑀸𑀧𑁂𑀲𑀺 ‘‘𑀦𑀺𑀓𑁆𑀔𑀫𑀺𑀢𑀼𑀁 𑀫𑀸 𑀤𑁂𑀣, 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑁂𑀣𑀸’’𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀆𑀓𑀸𑀲𑁂𑀦 ¶ 𑀅𑀕𑀫𑀸𑀲𑀺. 𑀅𑀣 𑀭𑀸𑀚𑀸 𑀓𑁄𑀭𑀩𑁆𑀬𑁄 𑀣𑁂𑀭𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 ‘‘𑀇𑀥, 𑀪𑁄 𑀭𑀝𑁆𑀞𑀧𑀸𑀮, 𑀧𑀩𑁆𑀩𑀚𑀦𑁆𑀢𑁄 𑀩𑁆𑀬𑀸𑀥𑀺𑀧𑀸𑀭𑀺𑀚𑀼𑀜𑁆𑀜𑀁 𑀯𑀸 𑀚𑀭𑀸𑀪𑁄𑀕𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀁 𑀯𑀸 𑀧𑀢𑁆𑀢𑁄 𑀧𑀩𑁆𑀩𑀚𑀢𑀺. 𑀢𑁆𑀯𑀁 𑀧𑀦 𑀓𑀺𑀜𑁆𑀘𑀺𑀧𑀺 𑀧𑀸𑀭𑀺𑀚𑀼𑀜𑁆𑀜𑀁 𑀅𑀦𑀼𑀧𑀕𑀢𑁄 𑀏𑀯 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀣𑁂𑀭𑁄, ‘‘𑀉𑀧𑀦𑀺𑀬𑁆𑀬𑀢𑀺 𑀮𑁄𑀓𑁄 𑀅𑀤𑁆𑀥𑀼𑀯𑁄, 𑀅𑀢𑀸𑀡𑁄 𑀮𑁄𑀓𑁄 𑀅𑀦𑀪𑀺𑀲𑁆𑀲𑀭𑁄, 𑀅𑀲𑁆𑀲𑀓𑁄 𑀮𑁄𑀓𑁄 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀅𑀢𑁆𑀢𑀸𑀦𑀁 𑀯𑀺𑀯𑀺𑀢𑁆𑀢𑀪𑀸𑀯𑀁 𑀓𑀣𑁂𑀢𑁆𑀯𑀸 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀅𑀦𑀼𑀕𑀻𑀢𑀺𑀁 𑀓𑀣𑁂𑀦𑁆𑀢𑁄 𑁋

𑁭𑁭𑁬.

‘‘𑀧𑀲𑁆𑀲𑀸𑀫𑀺 𑀮𑁄𑀓𑁂 𑀲𑀥𑀦𑁂 𑀫𑀦𑀼𑀲𑁆𑀲𑁂, 𑀮𑀤𑁆𑀥𑀸𑀦 𑀯𑀺𑀢𑁆𑀢𑀁 𑀦 𑀤𑀤𑀦𑁆𑀢𑀺 𑀫𑁄𑀳𑀸;

𑀮𑀼𑀤𑁆𑀥𑀸 𑀥𑀦𑀁 𑀲𑀦𑁆𑀦𑀺𑀘𑀬𑀁 𑀓𑀭𑁄𑀦𑁆𑀢𑀺, 𑀪𑀺𑀬𑁆𑀬𑁄𑀯 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑀦𑁆𑀢𑀺.

𑁭𑁭𑁭.

‘‘𑀭𑀸𑀚𑀸 𑀧𑀲𑀬𑁆𑀳𑀧𑁆𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀲𑀲𑀸𑀕𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀦𑁆𑀢𑁄;

𑀑𑀭𑀁 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀢𑁆𑀢𑀭𑀽𑀧𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀧𑀺 𑀧𑀢𑁆𑀣𑀬𑁂𑀣.

𑁭𑁭𑁮.

‘‘𑀭𑀸𑀚𑀸 𑀘 𑀅𑀜𑁆𑀜𑁂 𑀘 𑀩𑀳𑀽 𑀫𑀦𑀼𑀲𑁆𑀲𑀸, 𑀅𑀯𑀻𑀢𑀢𑀡𑁆𑀳𑀸 𑀫𑀭𑀡𑀁 𑀉𑀧𑁂𑀦𑁆𑀢𑀺;

𑀊𑀦𑀸𑀯 𑀳𑀼𑀢𑁆𑀯𑀸𑀦 𑀚𑀳𑀦𑁆𑀢𑀺 𑀤𑁂𑀳𑀁, 𑀓𑀸𑀫𑁂𑀳𑀺 𑀮𑁄𑀓𑀫𑁆𑀳𑀺 𑀦 𑀳𑀢𑁆𑀣𑀺 𑀢𑀺𑀢𑁆𑀢𑀺.

𑁭𑁭𑁯.

‘‘𑀓𑀦𑁆𑀤𑀦𑁆𑀢𑀺 𑀦𑀁 𑀜𑀸𑀢𑀻 𑀧𑀓𑀺𑀭𑀺𑀬 𑀓𑁂𑀲𑁂, ‘𑀅𑀳𑁄 𑀯𑀢𑀸 𑀦𑁄 𑀅𑀫𑀭𑀸’𑀢𑀺 𑀘𑀸𑀳𑀼;

𑀯𑀢𑁆𑀣𑁂𑀦 𑀦𑀁 𑀧𑀸𑀭𑀼𑀢𑀁 𑀦𑀻𑀳𑀭𑀺𑀢𑁆𑀯𑀸, 𑀘𑀺𑀢𑀁 𑀲𑀫𑁄𑀥𑀸𑀬 𑀢𑀢𑁄 𑀟𑀳𑀦𑁆𑀢𑀺.

𑁭𑁮𑁦.

‘‘𑀲𑁄 ¶ 𑀟𑀬𑁆𑀳𑀢𑀺 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄, 𑀏𑀓𑁂𑀦 𑀯𑀢𑁆𑀣𑁂𑀦 𑀧𑀳𑀸𑀬 𑀪𑁄𑀕𑁂;

𑀦 𑀫𑀻𑀬𑀫𑀸𑀦𑀲𑁆𑀲 𑀪𑀯𑀦𑁆𑀢𑀺 𑀢𑀸𑀡𑀸, 𑀜𑀸𑀢𑀻 𑀘 𑀫𑀺𑀢𑁆𑀢𑀸 𑀅𑀣 𑀯𑀸 𑀲𑀳𑀸𑀬𑀸.

𑁭𑁮𑁧.

‘‘𑀤𑀸𑀬𑀸𑀤𑀓𑀸 𑀢𑀲𑁆𑀲 𑀥𑀦𑀁 𑀳𑀭𑀦𑁆𑀢𑀺, 𑀲𑀢𑁆𑀢𑁄 𑀧𑀦 𑀕𑀘𑁆𑀙𑀢𑀺 𑀬𑁂𑀦𑀓𑀫𑁆𑀫𑀁;

𑀦 𑀫𑀻𑀬𑀫𑀸𑀦𑀁 𑀥𑀦𑀫𑀦𑁆𑀯𑁂𑀢𑀺 𑀓𑀺𑀜𑁆𑀘𑀺, 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀥𑀦𑀜𑁆𑀘 𑀭𑀝𑁆𑀞𑀁.

𑁭𑁮𑁨.

‘‘𑀦 ¶ 𑀤𑀻𑀖𑀫𑀸𑀬𑀼𑀁 𑀮𑀪𑀢𑁂 𑀥𑀦𑁂𑀦, 𑀦 𑀘𑀸𑀧𑀺 𑀯𑀺𑀢𑁆𑀢𑁂𑀦 𑀚𑀭𑀁 𑀯𑀺𑀳𑀦𑁆𑀢𑀺;

𑀅𑀧𑁆𑀧𑀁 𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸, 𑀅𑀲𑀲𑁆𑀲𑀢𑀁 𑀯𑀺𑀧𑁆𑀧𑀭𑀺𑀡𑀸𑀫𑀥𑀫𑁆𑀫𑀁.

𑁭𑁮𑁩.

‘‘𑀅𑀟𑁆𑀠𑀸 ¶ 𑀤𑀮𑀺𑀤𑁆𑀤𑀸 𑀘 𑀨𑀼𑀲𑀦𑁆𑀢𑀺 𑀨𑀲𑁆𑀲𑀁, 𑀩𑀸𑀮𑁄 𑀘 𑀥𑀻𑀭𑁄 𑀘 𑀢𑀣𑁂𑀯 𑀨𑀼𑀝𑁆𑀞𑁄;

𑀩𑀸𑀮𑁄 𑀳𑀺 𑀩𑀸𑀮𑁆𑀬𑀸 𑀯𑀥𑀺𑀢𑁄𑀯 𑀲𑁂𑀢𑀺, 𑀥𑀻𑀭𑁄 𑀘 𑀦𑁄 𑀯𑁂𑀥𑀢𑀺 𑀨𑀲𑁆𑀲𑀨𑀼𑀝𑁆𑀞𑁄.

𑁭𑁮𑁪.

‘‘𑀢𑀲𑁆𑀫𑀸 𑀳𑀺 𑀧𑀜𑁆𑀜𑀸𑀯 𑀥𑀦𑁂𑀦 𑀲𑁂𑀬𑁆𑀬𑀸, 𑀬𑀸𑀬 𑀯𑁄𑀲𑀸𑀦𑀫𑀺𑀥𑀸𑀥𑀺𑀕𑀘𑁆𑀙𑀢𑀺;

𑀅𑀩𑁆𑀬𑁄𑀲𑀺𑀢𑀢𑁆𑀢𑀸 𑀳𑀺 𑀪𑀯𑀸𑀪𑀯𑁂𑀲𑀼, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺 𑀫𑁄𑀳𑀸.

𑁭𑁮𑁫.

‘‘𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀲𑀁𑀲𑀸𑀭𑀫𑀸𑀧𑀚𑁆𑀚 𑀧𑀭𑀫𑁆𑀧𑀭𑀸𑀬;

𑀢𑀲𑁆𑀲𑀧𑁆𑀧𑀧𑀜𑁆𑀜𑁄 𑀅𑀪𑀺𑀲𑀤𑁆𑀤𑀳𑀦𑁆𑀢𑁄, 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁.

𑁭𑁮𑁬.

‘‘𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀧𑀸𑀧𑀥𑀫𑁆𑀫𑁄;

𑀏𑀯𑀁 𑀧𑀚𑀸 𑀧𑁂𑀘𑁆𑀘 𑀧𑀭𑀫𑁆𑀳𑀺 𑀮𑁄𑀓𑁂, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀧𑀸𑀧𑀥𑀫𑁆𑀫𑁄.

𑁭𑁮𑁭.

‘‘𑀓𑀸𑀫𑀸 ¶ 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚.

𑁭𑁮𑁮.

‘‘𑀤𑀼𑀫𑀧𑁆𑀨𑀮𑀸𑀦𑀻𑀯 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀟𑁆𑀠𑀸 𑀘 𑀲𑀭𑀻𑀭𑀪𑁂𑀤𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄.

𑁭𑁮𑁯.

‘‘𑀲𑀤𑁆𑀥𑀸𑀬𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀉𑀧𑁂𑀢𑁄 𑀚𑀺𑀦𑀲𑀸𑀲𑀦𑁂;

𑀅𑀯𑀜𑁆𑀛𑀸 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀅𑀦𑀡𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁.

𑁭𑁯𑁦.

‘‘𑀓𑀸𑀫𑁂 𑀆𑀤𑀺𑀢𑁆𑀢𑀢𑁄 𑀤𑀺𑀲𑁆𑀯𑀸, 𑀚𑀸𑀢𑀭𑀽𑀧𑀸𑀦𑀺 𑀲𑀢𑁆𑀣𑀢𑁄;

𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀢𑁄 𑀤𑀼𑀓𑁆𑀔𑀁, 𑀦𑀺𑀭𑀬𑁂𑀲𑀼 𑀫𑀳𑀩𑁆𑀪𑀬𑀁.

𑁭𑁯𑁧.

‘‘𑀏𑀢𑀫𑀸𑀤𑀻𑀦𑀯𑀁 ¶ 𑀜𑀢𑁆𑀯𑀸, 𑀲𑀁𑀯𑁂𑀕𑀁 𑀅𑀮𑀪𑀺𑀁 𑀢𑀤𑀸;

𑀲𑁄𑀳𑀁 𑀯𑀺𑀤𑁆𑀥𑁄 𑀢𑀤𑀸 𑀲𑀦𑁆𑀢𑁄, 𑀲𑀫𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁.

𑁭𑁯𑁨.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁭𑁯𑁩.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀯𑁄𑀘;

𑀢𑀢𑁆𑀣 𑀧𑀲𑁆𑀲𑀸𑀫𑀺 𑀮𑁄𑀓𑁂𑀢𑀺 𑀅𑀳𑀁, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀥𑀦𑁂 𑀥𑀦𑀲𑀫𑁆𑀧𑀦𑁆𑀦𑁂 𑀅𑀟𑁆𑀠𑁂 𑀫𑀦𑀼𑀲𑁆𑀲𑁂 𑀧𑀲𑁆𑀲𑀸𑀫𑀺, 𑀢𑁂 𑀧𑀦 𑀮𑀤𑁆𑀥𑀸𑀦 𑀯𑀺𑀢𑁆𑀢𑀁 𑀥𑀦𑀁 𑀮𑀪𑀺𑀢𑁆𑀯𑀸 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺𑀧𑀺 𑀦 𑀤𑀤𑀦𑁆𑀢𑀺. 𑀓𑀲𑁆𑀫𑀸? 𑀫𑁄𑀳𑀸 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀮𑀼𑀤𑁆𑀥𑀸 𑀮𑁄𑀪𑀸𑀪𑀺𑀪𑀽𑀢𑀸 𑀬𑀣𑀸𑀮𑀤𑁆𑀥𑀁 𑀥𑀦𑀁 𑀲𑀦𑁆𑀦𑀺𑀘𑀬𑀁 𑀲𑀩𑁆𑀩𑀲𑁄 𑀦𑀺𑀘𑁂𑀢𑀩𑁆𑀩𑀁 𑀦𑀺𑀥𑁂𑀢𑀩𑁆𑀩𑀁 𑀓𑀭𑁄𑀦𑁆𑀢𑀺. 𑀪𑀺𑀬𑁆𑀬𑁄𑀯 𑀬𑀣𑀸𑀥𑀺𑀕𑀢𑀓𑀸𑀫𑀢𑁄 𑀉𑀧𑀭𑀺 𑀓𑀸𑀫𑁂 𑀓𑀸𑀫𑀕𑀼𑀡𑁂 ‘‘𑀢𑀣𑀸𑀳𑀁 𑀏𑀤𑀺𑀲𑁂 𑀘 𑀪𑁄𑀕𑁂 𑀧𑀝𑀺𑀮𑀪𑁂𑀬𑁆𑀬’’𑀦𑁆𑀢𑀺 𑀅𑀪𑀺𑀧𑀢𑁆𑀣𑀬𑀦𑁆𑀢𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀺 𑀢𑀚𑁆𑀚𑀜𑁆𑀘 𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑀺.

𑀪𑀺𑀬𑁆𑀬𑁄 ¶ ¶ 𑀓𑀸𑀫𑀧𑀢𑁆𑀣𑀦𑀸𑀬 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀲𑀬𑁆𑀳𑀧𑁆𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀁𑀲𑀸𑀦𑀼𑀕𑀢𑀁 𑀧𑀣𑀯𑀺𑀁 𑀩𑀮𑀓𑁆𑀓𑀸𑀭𑁂𑀦 𑀅𑀪𑀺𑀯𑀺𑀚𑀺𑀬. 𑀆𑀯𑀲𑀦𑁆𑀢𑁄𑀢𑀺 𑀧𑀲𑀸𑀲𑁂𑀦𑁆𑀢𑁄. 𑀑𑀭𑀁 𑀲𑀫𑀼𑀤𑁆𑀤𑀲𑁆𑀲𑀸𑀢𑀺 𑀅𑀦𑀯𑀲𑁂𑀲𑀁 𑀲𑀫𑀼𑀤𑁆𑀤𑀲𑁆𑀲 𑀑𑀭𑀪𑀸𑀕𑀁 𑀮𑀪𑀺𑀢𑁆𑀯𑀸𑀧𑀺 𑀢𑁂𑀦 𑀅𑀢𑀺𑀢𑁆𑀢𑀭𑀽𑀧𑁄 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀤𑀻𑀧𑀦𑁆𑀢𑀭𑀫𑁆𑀧𑀺 𑀧𑀢𑁆𑀣𑀬𑁂𑀬𑁆𑀬.

𑀅𑀯𑀻𑀢𑀢𑀡𑁆𑀳𑀸𑀢𑀺 𑀅𑀯𑀺𑀕𑀢𑀢𑀡𑁆𑀳𑀸. 𑀊𑀦𑀸𑀯𑀸𑀢𑀺 𑀅𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑀸𑀯. 𑀓𑀸𑀫𑁂𑀳𑀺 𑀮𑁄𑀓𑀫𑁆𑀳𑀺 𑀦 𑀳𑀢𑁆𑀣𑀺 𑀢𑀺𑀢𑁆𑀢𑀻𑀢𑀺 𑀢𑀡𑁆𑀳𑀸𑀯𑀺𑀧𑀦𑁆𑀦𑀸𑀦𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀯𑀢𑁆𑀣𑀼𑀓𑀸𑀫𑁂𑀳𑀺 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀓𑀦𑁆𑀤𑀦𑁆𑀢𑀺 𑀦𑀦𑁆𑀢𑀺 𑀫𑀢𑀧𑀼𑀭𑀺𑀲𑀁 𑀉𑀤𑁆𑀤𑀺𑀲𑁆𑀲 𑀢𑀲𑁆𑀲 𑀕𑀼𑀡𑁂 𑀓𑀺𑀢𑁆𑀢𑁂𑀦𑁆𑀢𑀸 𑀓𑀦𑁆𑀤𑀦𑀁 𑀓𑀭𑁄𑀦𑁆𑀢𑀺. 𑀅𑀳𑁄 𑀯𑀢𑀸 𑀦𑁄 𑀅𑀫𑀭𑀸𑀢𑀺 𑀘𑀸𑀳𑀽𑀢𑀺 𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀜𑀸𑀢𑀻 𑀅𑀫𑀭𑀸 𑀲𑀺𑀬𑀼𑀦𑁆𑀢𑀺 𑀘 𑀓𑀣𑁂𑀦𑁆𑀢𑀺, 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀳𑁂𑀢𑁆𑀣 𑀯𑀢𑀸-𑀇𑀢𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑁄 𑀟𑀬𑁆𑀳𑀢𑀺 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄𑀢𑀺 𑀲𑁄 𑀫𑀢𑀲𑀢𑁆𑀢𑁄 𑀙𑀯𑀟𑀸𑀳𑀓𑁂𑀳𑀺 𑀲𑀫𑁆𑀫𑀸 𑀛𑀸𑀧𑁂𑀢𑀼𑀁 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄. 𑀢𑀸𑀡𑀸𑀢𑀺 𑀧𑀭𑀺𑀢𑁆𑀢𑀸𑀡𑀓𑀭𑀸.

𑀬𑁂𑀦𑀓𑀫𑁆𑀫𑀦𑁆𑀢𑀺 𑀬𑀣𑀸𑀓𑀫𑁆𑀫𑀁. 𑀥𑀦𑀦𑁆𑀢𑀺 𑀥𑀦𑀸𑀬𑀺𑀢𑀩𑁆𑀩𑀁 𑀬𑀁𑀓𑀺𑀜𑁆𑀘𑀺 𑀯𑀢𑁆𑀣𑀼. 𑀧𑀼𑀦 𑀥𑀦𑀦𑁆𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺.

‘‘𑀦 𑀤𑀻𑀖𑀫𑀸𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀫𑀕𑀼𑀡𑀲𑁆𑀲 𑀚𑀭𑀸𑀬 𑀘 𑀧𑀝𑀺𑀓𑀸𑀭𑀸𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀏𑀓𑀦𑁆𑀢𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀨𑀼𑀲𑀦𑁆𑀢𑀻𑀢𑀺 ¶ 𑀅𑀦𑀺𑀝𑁆𑀞𑀨𑀲𑁆𑀲𑀁 𑀨𑀼𑀲𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀣 𑀅𑀟𑁆𑀠𑀤𑀮𑀺𑀤𑁆𑀤𑀢𑀸 𑀅𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀨𑀲𑁆𑀲𑀁 𑀩𑀸𑀮𑁄 𑀘 𑀥𑀻𑀭𑁄 𑀘 𑀢𑀣𑁂𑀯 𑀨𑀼𑀝𑁆𑀞𑁄𑀢𑀺 𑀬𑀣𑀸 𑀩𑀸𑀮𑁄 𑀇𑀝𑁆𑀞𑀸𑀦𑀺𑀝𑁆𑀞𑀲𑀫𑁆𑀨𑀲𑁆𑀲𑀁 𑀨𑀼𑀝𑁆𑀞𑁄, 𑀢𑀣𑁂𑀯 𑀥𑀻𑀭𑁄 𑀇𑀝𑁆𑀞𑀸𑀦𑀺𑀝𑁆𑀞𑀨𑀲𑁆𑀲𑀁 𑀨𑀼𑀝𑁆𑀞𑁄 𑀳𑁄𑀢𑀺, 𑀦 𑀏𑀢𑁆𑀣 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀓𑁄𑀘𑀺 𑀯𑀺𑀲𑁂𑀲𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀩𑀸𑀮𑁄 𑀳𑀺 𑀩𑀸𑀮𑁆𑀬𑀸 𑀯𑀥𑀺𑀢𑁄𑀯 𑀲𑁂𑀢𑀻𑀢𑀺 𑀩𑀸𑀮𑀧𑀼𑀕𑁆𑀕𑀮𑁄 𑀓𑁂𑀦𑀘𑀺 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑁄 𑀲𑁄𑀘𑀦𑁆𑀢𑁄 𑀓𑀺𑀮𑀫𑀦𑁆𑀢𑁄 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑁄 𑀩𑀸𑀮𑀪𑀸𑀯𑁂𑀦 𑀯𑀥𑀺𑀢𑁄 𑀧𑀻𑀴𑀺𑀢𑁄𑀯 𑀳𑀼𑀢𑁆𑀯𑀸 𑀲𑁂𑀢𑀺 𑀲𑀬𑀢𑀺. 𑀇𑀢𑁄 𑀘𑀺𑀢𑁄 𑀘 𑀆𑀯𑀝𑁆𑀝𑀦𑁆𑀢𑁄 𑀯𑀺𑀯𑀝𑁆𑀝𑀦𑁆𑀢𑁄 𑀯𑀺𑀭𑁄𑀥𑁂𑀦𑁆𑀢𑁄 𑀯𑁂𑀥𑀢𑀺 𑀨𑀲𑁆𑀲𑀨𑀼𑀝𑁆𑀞𑁄𑀢𑀺 𑀥𑀻𑀭𑁄 𑀧𑀦 𑀧𑀡𑁆𑀟𑀺𑀢𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁂𑀦 𑀲𑀫𑁆𑀨𑀼𑀝𑁆𑀞𑁄 𑀦 𑀯𑁂𑀥𑀢𑀺 𑀓𑀫𑁆𑀧𑀦𑀫𑀢𑁆𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺.

𑀢𑀲𑁆𑀫𑀸𑀢𑀺 ¶ 𑀬𑀲𑁆𑀫𑀸 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀮𑁄𑀓𑀥𑀫𑁆𑀫𑁂 𑀏𑀤𑀺𑀲𑀻 𑀧𑀯𑀢𑁆𑀢𑀺, 𑀢𑀲𑁆𑀫𑀸 𑀳𑀺 𑀧𑀜𑁆𑀜𑀸𑀯 𑀥𑀦𑁂𑀦 𑀲𑁂𑀬𑁆𑀬𑀸, 𑀬𑀸𑀬 𑀯𑁄𑀲𑀸𑀦𑀫𑀺𑀥𑀸𑀥𑀺𑀕𑀘𑁆𑀙𑀢𑀻𑀢𑀺 𑀧𑀜𑁆𑀜𑀸𑀯 𑀥𑀦𑀢𑁄 𑀧𑀸𑀲𑀁𑀲𑀢𑀭𑀸, 𑀬𑀸𑀬 𑀧𑀜𑁆𑀜𑀸𑀬 𑀯𑁄𑀲𑀸𑀦𑀁 𑀪𑀯𑀲𑁆𑀲 ¶ 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀩𑁆𑀬𑁄𑀲𑀺𑀢𑀢𑁆𑀢𑀸 𑀳𑀻𑀢𑀺 𑀅𑀦𑀥𑀺𑀕𑀢𑀦𑀺𑀝𑁆𑀞𑀢𑁆𑀢𑀸. 𑀪𑀯𑀸𑀪𑀯𑁂𑀲𑀽𑀢𑀺 𑀫𑀳𑀦𑁆𑀢𑀸𑀫𑀳𑀦𑁆𑀢𑁂𑀲𑀼 𑀪𑀯𑁂𑀲𑀼.

𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀲𑀁𑀲𑀸𑀭𑀫𑀸𑀧𑀚𑁆𑀚 𑀧𑀭𑀫𑁆𑀧𑀭𑀸𑀬𑀸𑀢𑀺 𑀬𑁄 𑀧𑀸𑀧𑀸𑀦𑀺 𑀓𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀁𑀲𑀭𑀡𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁 𑀕𑀩𑁆𑀪𑀲𑁂𑀬𑁆𑀬𑀸𑀬 𑀧𑀭𑀮𑁄𑀓𑀼𑀧𑁆𑀧𑀢𑁆𑀢𑀺𑀬𑀸 𑀘 𑀦 𑀫𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀸𑀧𑀓𑀫𑁆𑀫𑀓𑀸𑀭𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀓𑀺𑀭𑀺𑀬𑀁 𑀅𑀪𑀺𑀲𑀤𑁆𑀤𑀳𑀦𑁆𑀢𑁄 ‘‘𑀅𑀢𑁆𑀢𑀸 𑀘 𑀫𑁂 𑀳𑁄𑀢𑀻’’𑀢𑀺 𑀧𑀢𑁆𑀢𑀺𑀬𑀸𑀬𑀦𑁆𑀢𑁄 𑀅𑀜𑁆𑀜𑁄𑀧𑀺 𑀅𑀧𑁆𑀧𑀧𑀜𑁆𑀜𑁄 𑀩𑀸𑀮𑁄 𑀬𑀣𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀦 𑀢𑀢𑁄 𑀧𑀭𑀺𑀫𑀼𑀘𑁆𑀘𑀢𑀺.