📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀣𑁂𑀭𑀻𑀕𑀸𑀣𑀸-𑀅𑀝𑁆𑀞𑀓𑀣𑀸

𑁧. 𑀏𑀓𑀓𑀦𑀺𑀧𑀸𑀢𑁄

𑁧. 𑀅𑀜𑁆𑀜𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀣𑁂𑀭𑀻𑀕𑀸𑀣𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 𑀆𑀤𑀺𑀢𑁄 𑀬𑀣𑀸 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘 𑀧𑀝𑀺𑀮𑀤𑁆𑀥𑀸, 𑀢𑀁 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀓𑀭𑀻𑀬𑀫𑀸𑀦𑀸𑀬 𑀢𑀢𑁆𑀣 𑀢𑀢𑁆𑀣 𑀕𑀸𑀣𑀸𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑁂𑀢𑀼𑀁 𑀲𑀼𑀓𑀭𑀸 𑀳𑁄𑀢𑀺 𑀲𑀼𑀧𑀸𑀓𑀝𑀸 𑀘, 𑀢𑀲𑁆𑀫𑀸 𑀢𑀁 𑀧𑀓𑀸𑀲𑁂𑀢𑀼𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁄 𑀅𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀅𑀬𑀜𑁆𑀳𑀺 𑀮𑁄𑀓𑀦𑀸𑀣𑁄 ‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻’’𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀅𑀦𑀼𑀓𑁆𑀓𑀫𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀜𑀸𑀢𑀢𑁆𑀣𑀘𑀭𑀺𑀬𑀸𑀬 𑀮𑁄𑀓𑀢𑁆𑀣𑀘𑀭𑀺𑀬𑀸𑀬 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸𑀬 𑀘 𑀓𑁄𑀝𑀺𑀁 𑀧𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀩𑀼𑀤𑁆𑀥𑀪𑀸𑀯𑀸𑀬 𑁋

‘‘𑀓𑀸𑀮𑁄 𑀔𑁄 𑀢𑁂 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁭) 𑁋

𑀆𑀬𑀸𑀘𑀺𑀢𑀫𑀦𑀼𑀲𑁆𑀲𑀽𑀧𑀧𑀢𑁆𑀢𑀺𑀓𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸, 𑀓𑀢𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑁄 𑀲𑀓𑁆𑀬𑀭𑀸𑀚𑀓𑀼𑀮𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀕𑁂𑀳𑁂 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀤𑀲𑀫𑀸𑀲𑁂 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀢𑀢𑁆𑀣 𑀞𑀢𑁆𑀯𑀸, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀢𑀢𑁄 𑀦𑀺𑀓𑁆𑀔𑀦𑁆𑀢𑁄 𑀮𑀼𑀫𑁆𑀩𑀺𑀦𑀻𑀯𑀦𑁂 𑀮𑀤𑁆𑀥𑀸𑀪𑀺𑀚𑀸𑀢𑀺𑀓𑁄 𑀯𑀺𑀯𑀺𑀥𑀸 𑀥𑀸𑀢𑀺𑀬𑁄 𑀆𑀤𑀺𑀁 𑀓𑀢𑁆𑀯𑀸 𑀫𑀳𑀢𑀸 𑀧𑀭𑀺𑀳𑀸𑀭𑁂𑀦 𑀲𑀫𑁆𑀫𑀤𑁂𑀯 𑀧𑀭𑀺𑀳𑀭𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀯𑀺𑀯𑀺𑀥𑀦𑀸𑀝𑀓𑀚𑀦𑀧𑀭𑀺𑀯𑀼𑀢𑁄 𑀤𑁂𑀯𑁄 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀤𑀲𑁆𑀲𑀦𑁂𑀦 𑀚𑀸𑀢𑀲𑀁𑀯𑁂𑀕𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀢𑀁 𑀕𑀢𑀢𑁆𑀢𑀸, 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸, 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀚𑀸𑀢𑀤𑀺𑀯𑀲𑁂 𑀙𑀦𑁆𑀦𑀲𑀳𑀸𑀬𑁄 𑀓𑀡𑁆𑀟𑀓𑀁 𑀅𑀲𑁆𑀲𑀭𑀸𑀚𑀁 𑀆𑀭𑀼𑀬𑁆𑀳, 𑀤𑁂𑀯𑀢𑀸𑀳𑀺 𑀯𑀺𑀯𑀝𑁂𑀦 𑀤𑁆𑀯𑀸𑀭𑁂𑀦 𑀅𑀟𑁆𑀠𑀭𑀢𑁆𑀢𑀺𑀓𑀲𑀫𑀬𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀢𑁂𑀦𑁂𑀯 𑀭𑀢𑁆𑀢𑀸𑀯𑀲𑁂𑀲𑁂𑀦 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑀁 𑀧𑀢𑁆𑀯𑀸 𑀖𑀝𑀺𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀦𑀻𑀢𑁂 𑀅𑀭𑀳𑀢𑁆𑀢𑀤𑁆𑀥𑀚𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑀸𑀯𑀤𑁂𑀯 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑁄 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸, 𑀧𑀸𑀲𑀸𑀤𑀺𑀓𑁂𑀦 𑀇𑀭𑀺𑀬𑀸𑀧𑀣𑁂𑀦 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀧𑀢𑁆𑀯𑀸, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀧𑀩𑁆𑀪𑀸𑀭𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸, 𑀫𑀸𑀕𑀥𑀭𑀸𑀚𑁂𑀦 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀪𑀕𑁆𑀕𑀯𑀲𑁆𑀲𑀸𑀭𑀸𑀫𑀁 𑀕𑀦𑁆𑀢𑁆𑀯𑀸, 𑀢𑀲𑁆𑀲 𑀲𑀫𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁄 𑀆𑀴𑀸𑀭𑀼𑀤𑀓𑀸𑀦𑀁 𑀲𑀫𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸, 𑀢𑀁 𑀲𑀩𑁆𑀩𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸, 𑀢𑀸𑀬 𑀅𑀭𑀺𑀬𑀥𑀫𑁆𑀫𑀧𑀝𑀺𑀯𑁂𑀥𑀲𑁆𑀲𑀸𑀪𑀸𑀯𑀁 𑀜𑀢𑁆𑀯𑀸 ‘‘𑀦𑀸𑀬𑀁 𑀫𑀕𑁆𑀕𑁄 𑀩𑁄𑀥𑀸𑀬𑀸’’𑀢𑀺 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀦𑁆𑀢𑁄 𑀓𑀢𑀺𑀧𑀸𑀳𑁂𑀦 𑀩𑀮𑀁 𑀕𑀸𑀳𑁂𑀢𑁆𑀯𑀸 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀤𑀺𑀬𑀸 𑀧𑀝𑀺𑀲𑁄𑀢𑀁 𑀔𑀺𑀧𑀺𑀢𑁆𑀯𑀸, ‘‘𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀲𑀸𑀬𑀦𑁆𑀳𑀲𑀫𑀬𑁂 𑀓𑀸𑀴𑁂𑀦 𑀦𑀸𑀕𑀭𑀸𑀚𑁂𑀦 𑀅𑀪𑀺𑀢𑁆𑀣𑀼𑀢𑀺𑀕𑀼𑀡𑁄 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀅𑀘𑀮𑀝𑁆𑀞𑀸𑀦𑁂 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀅𑀪𑀺𑀫𑀼𑀔𑁄 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬, 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸, 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸, 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀥𑀺𑀕𑀢𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑁆𑀯𑀸, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀢𑀢𑁆𑀣𑁂𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀢𑁂𑀦𑁂𑀯 𑀦𑀬𑁂𑀦 𑀇𑀢𑀭𑀲𑀢𑁆𑀢𑀸𑀳𑁂𑀧𑀺 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀭𑀸𑀚𑀸𑀬𑀢𑀦𑀫𑀽𑀮𑁂 𑀫𑀥𑀼𑀧𑀺𑀡𑁆𑀟𑀺𑀓𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀧𑀼𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀢𑀸𑀬 𑀥𑀫𑁆𑀫𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑁂 𑀦𑀫𑀦𑁆𑀢𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑁂𑀤𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀥𑀫𑁆𑀫𑀤𑁂𑀲𑀦𑀸𑀬 𑀓𑀢𑀧𑀝𑀺𑀜𑁆𑀜𑁄 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸, ‘‘𑀩𑀳𑀼𑀧𑀓𑀸𑀭𑀸 𑀔𑁄 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀬𑁂 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁦) 𑀘𑀺𑀦𑁆𑀢𑁂𑀢𑁆𑀯𑀸, 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 𑀫𑀳𑀸𑀩𑁄𑀥𑀺𑀢𑁄 𑀩𑀸𑀭𑀸𑀡𑀲𑀺𑀁 𑀉𑀤𑁆𑀤𑀺𑀲𑁆𑀲 𑀅𑀝𑁆𑀞𑀸𑀭𑀲𑀬𑁄𑀚𑀦𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀓𑁂𑀦 𑀆𑀚𑀻𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀇𑀲𑀺𑀧𑀢𑀦𑀁 𑀧𑀢𑁆𑀯𑀸 𑀢𑀢𑁆𑀣 𑀧𑀜𑁆𑀘𑀯𑀕𑁆𑀕𑀺𑀬𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩; 𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁨.𑁩𑁦) 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸 𑀅𑀝𑁆𑀞𑀸𑀭𑀲𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀢𑁆𑀯𑀸 𑀧𑀸𑀝𑀺𑀧𑀤𑁂 𑀪𑀤𑁆𑀤𑀺𑀬𑀢𑁆𑀣𑁂𑀭𑀁, 𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑀸𑀬𑀁 𑀯𑀧𑁆𑀧𑀢𑁆𑀣𑁂𑀭𑀁, 𑀧𑀓𑁆𑀔𑀲𑁆𑀲 𑀢𑀢𑀺𑀬𑀸𑀬𑀁 𑀫𑀳𑀸𑀦𑀸𑀫𑀢𑁆𑀣𑁂𑀭𑀁, 𑀘𑀢𑀼𑀢𑁆𑀣𑀺𑀬𑀁 𑀅𑀲𑁆𑀲𑀚𑀺𑀢𑁆𑀣𑁂𑀭𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀧𑀜𑁆𑀘𑀫𑀺𑀬𑀁 𑀧𑀦 𑀧𑀓𑁆𑀔𑀲𑁆𑀲 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 (𑀫𑀳𑀸𑀯. 𑁨𑁦; 𑀲𑀁. 𑀦𑀺. 𑁩.𑁫𑁯) 𑀲𑀩𑁆𑀩𑁂𑀧𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀬𑀲𑀤𑀸𑀭𑀓𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀡𑁆𑀡𑀸𑀲𑀧𑀼𑀭𑀺𑀲𑁂, 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲𑀫𑀢𑁆𑀢𑁂 𑀪𑀤𑁆𑀤𑀯𑀕𑁆𑀕𑀺𑀬𑁂, 𑀕𑀬𑀸𑀲𑀻𑀲𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀳𑀲𑁆𑀲𑀫𑀢𑁆𑀢𑁂 𑀧𑀼𑀭𑀸𑀡𑀚𑀝𑀺𑀮𑁂𑀢𑀺 𑀏𑀯𑀁 𑀫𑀳𑀸𑀚𑀦𑀁 𑀅𑀭𑀺𑀬𑀪𑀽𑀫𑀺𑀁 𑀑𑀢𑀸𑀭𑁂𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑀸𑀦𑀺 𑀏𑀓𑀸𑀤𑀲𑀦𑀳𑀼𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀦𑀳𑀼𑀢𑀁 𑀲𑀭𑀡𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑁂𑀴𑀼𑀯𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑀲𑁆𑀲 𑀯𑀸𑀳𑀲𑀸 𑀅𑀥𑀺𑀕𑀢𑀧𑀞𑀫𑀫𑀕𑁆𑀕𑁂 𑀲𑀜𑁆𑀘𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸, 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀅𑀕𑁆𑀕𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁂 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀅𑀪𑀺𑀬𑀸𑀘𑀦𑀸𑀬 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸, 𑀫𑀸𑀦𑀢𑁆𑀣𑀤𑁆𑀥𑁂 𑀜𑀸𑀢𑀓𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂𑀦 𑀤𑀫𑁂𑀢𑁆𑀯𑀸, 𑀧𑀺𑀢𑀭𑀁 𑀅𑀦𑀸𑀕𑀸𑀫𑀺𑀨𑀮𑁂, 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀝𑀺𑀝𑁆𑀞𑀸𑀧𑁂𑀢𑁆𑀯𑀸, 𑀦𑀦𑁆𑀤𑀓𑀼𑀫𑀸𑀭𑀁 𑀭𑀸𑀳𑀼𑀮𑀓𑀼𑀫𑀸𑀭𑀜𑁆𑀘 𑀧𑀩𑁆𑀩𑀸𑀚𑁂𑀢𑁆𑀯𑀸, 𑀲𑀢𑁆𑀣𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀘𑁆𑀙𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑀢𑁆𑀣𑀭𑀺 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀅𑀣 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺, 𑀢𑀢𑁄 𑀭𑁄𑀳𑀺𑀦𑀻𑀦𑀤𑀻𑀢𑀻𑀭𑁂 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 (𑀲𑀼. 𑀦𑀺. 𑁮𑁬𑁮 𑀆𑀤𑀬𑁄) 𑀧𑀭𑀺𑀬𑁄𑀲𑀸𑀦𑁂 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀧𑀩𑁆𑀩𑀚𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀼𑀫𑀸𑀭𑀲𑀢𑀸𑀦𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀏𑀓𑀚𑁆𑀛𑀸𑀲𑀬𑀸𑀯 𑀳𑀼𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀲𑀩𑁆𑀩𑀸𑀯 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀧𑀚𑀸𑀧𑀢𑀺𑀁 𑀚𑁂𑀝𑁆𑀞𑀺𑀓𑀁 𑀓𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀅𑀬𑀜𑁆𑀘 𑀫𑀳𑀸𑀧𑀚𑀸𑀧𑀢𑀺 𑀧𑀼𑀩𑁆𑀩𑁂𑀧𑀺 𑀏𑀓𑀯𑀸𑀭𑀁 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀦𑀸𑀮𑀢𑁆𑀣, 𑀢𑀲𑁆𑀫𑀸 𑀓𑀧𑁆𑀧𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑁂𑀲𑁂 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀲𑀩𑁆𑀩𑀸 𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀆𑀤𑀸𑀬 𑀯𑁂𑀲𑀸𑀮𑀺𑀁 𑀕𑀦𑁆𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀤𑀲𑀩𑀮𑀁 𑀬𑀸𑀘𑀸𑀧𑁂𑀢𑁆𑀯𑀸, 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑁂𑀦 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀅𑀮𑀢𑁆𑀣. 𑀇𑀢𑀭𑀸 𑀧𑀦 𑀲𑀩𑁆𑀩𑀸𑀧𑀺 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀯𑀢𑁆𑀣𑀼 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀬𑀁 (𑀘𑀽𑀴𑀯. 𑁪𑁦𑁨) 𑀆𑀕𑀢𑀫𑁂𑀯.

𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸 𑀧𑀦 𑀫𑀳𑀸𑀧𑀚𑀸𑀧𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁂𑀲𑀸 𑀘 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀦𑀺𑀬𑁄 𑀦𑀦𑁆𑀤𑀓𑁄𑀯𑀸𑀤𑀧𑀭𑀺𑀬𑁄𑀲𑀸𑀦𑁂 (𑀫. 𑀦𑀺. 𑁩.𑁩𑁯𑁮) 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀯𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂 𑀧𑀼𑀣𑀼𑀪𑀽𑀢𑁂 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀲𑀼𑀡𑁆𑀳𑀸𑀬𑁄 𑀓𑀼𑀮𑀓𑀼𑀫𑀸𑀭𑀺𑀓𑀸𑀬𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀢𑀜𑁆𑀘 𑀲𑀼𑀢𑁆𑀯𑀸, 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀲𑀁𑀲𑀸𑀭𑁂 𑀘 𑀚𑀸𑀢𑀲𑀁𑀯𑁂𑀕𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀫𑀸𑀢𑀸𑀧𑀺𑀢𑀭𑁄 𑀜𑀸𑀢𑀓𑁂 𑀘 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸, 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀲𑀢𑁆𑀣𑀼𑀦𑁄 𑀘 𑀢𑁂𑀲𑀁 𑀣𑁂𑀭𑀸𑀦𑀜𑁆𑀘 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀖𑀝𑁂𑀦𑁆𑀢𑀺𑀬𑁄 𑀯𑀸𑀬𑀫𑀦𑁆𑀢𑀺𑀬𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀁𑀲𑀼. 𑀢𑀸𑀳𑀺 𑀉𑀤𑀸𑀦𑀸𑀤𑀺𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀪𑀸𑀲𑀺𑀢𑀸 𑀕𑀸𑀣𑀸 𑀧𑀘𑁆𑀙𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀏𑀓𑀓𑀦𑀺𑀧𑀸𑀢𑀸𑀤𑀺𑀯𑀲𑁂𑀦 𑀲𑀗𑁆𑀕𑀻𑀢𑀺𑀁 𑀆𑀭𑁄𑀧𑀬𑀺𑀁𑀲𑀼 ‘‘𑀇𑀫𑀸 𑀣𑁂𑀭𑀻𑀕𑀸𑀣𑀸 𑀦𑀸𑀫𑀸’’𑀢𑀺. 𑀢𑀸𑀲𑀁 𑀦𑀺𑀧𑀸𑀢𑀸𑀤𑀺𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣 𑀦𑀺𑀧𑀸𑀢𑁂𑀲𑀼 𑀏𑀓𑀓𑀦𑀺𑀧𑀸𑀢𑁄 𑀆𑀤𑀺. 𑀢𑀢𑁆𑀣𑀧𑀺 𑁋

𑁧.

‘‘𑀲𑀼𑀔𑀁 𑀲𑀼𑀧𑀸𑀳𑀺 𑀣𑁂𑀭𑀺𑀓𑁂, 𑀓𑀢𑁆𑀯𑀸 𑀘𑁄𑀴𑁂𑀦 𑀧𑀸𑀭𑀼𑀢𑀸;

𑀉𑀧𑀲𑀦𑁆𑀢𑁄 𑀳𑀺 𑀢𑁂 𑀭𑀸𑀕𑁄, 𑀲𑀼𑀓𑁆𑀔𑀟𑀸𑀓𑀁𑀯 𑀓𑀼𑀫𑁆𑀪𑀺𑀬’’𑀦𑁆𑀢𑀺. 𑁋

𑀅𑀬𑀁 𑀕𑀸𑀣𑀸 𑀆𑀤𑀺. 𑀢𑀲𑁆𑀲𑀸 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀢𑀻𑀢𑁂 𑀓𑀺𑀭 𑀅𑀜𑁆𑀜𑀢𑀭𑀸 𑀓𑀼𑀮𑀥𑀻𑀢𑀸 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀸𑀔𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀯𑀸𑀮𑀺𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀢𑁆𑀣𑀼 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀺. 𑀢𑀲𑁆𑀲𑀸 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀼𑀕𑀢𑀻𑀲𑀼 𑀏𑀯 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀲𑀁𑀲𑀸𑀭𑁂 𑀚𑀸𑀢𑀲𑀁𑀯𑁂𑀕𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀦𑀺𑀲𑀻𑀮𑀁 𑀧𑀽𑀭𑁂𑀢𑁆𑀯𑀸, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸, 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀣𑀺𑀭𑀲𑀦𑁆𑀢𑀲𑀭𑀻𑀭𑀢𑀸𑀬 𑀣𑁂𑀭𑀺𑀓𑀸𑀢𑀺 𑀯𑁄𑀳𑀭𑀺𑀁𑀲𑀼. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀓𑀼𑀮𑀧𑁆𑀧𑀤𑁂𑀲𑀸𑀤𑀺𑀦𑀸 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀽𑀳𑀺 𑀤𑀺𑀦𑁆𑀦𑀸 𑀧𑀢𑀺𑀤𑁂𑀯𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻 𑀲𑀢𑁆𑀣𑀼 𑀯𑁂𑀲𑀸𑀮𑀺𑀕𑀫𑀦𑁂 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸, 𑀅𑀧𑀭𑀪𑀸𑀕𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀺𑀓𑀲𑁆𑀲𑀸𑀭𑁄𑀘𑁂𑀲𑀺. 𑀲𑀸𑀫𑀺𑀓𑁄 𑀦𑀸𑀦𑀼𑀚𑀸𑀦𑀸𑀢𑀺. 𑀲𑀸 𑀧𑀦 𑀓𑀢𑀸𑀥𑀺𑀓𑀸𑀭𑀢𑀸𑀬 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀦𑀲𑁂 𑀩𑁆𑀬𑀜𑁆𑀚𑀦𑁂 𑀧𑀘𑁆𑀘𑀫𑀸𑀦𑁂 𑀫𑀳𑀢𑀻 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺. 𑀲𑀸 𑀅𑀕𑁆𑀕𑀺𑀚𑀸𑀮𑀸 𑀲𑀓𑀮𑀪𑀸𑀚𑀦𑀁 𑀢𑀝𑀢𑀝𑀸𑀬𑀦𑁆𑀢𑀁 𑀛𑀸𑀬𑀢𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀅𑀦𑀺𑀘𑁆𑀘𑀢𑀁 𑀉𑀧𑀝𑁆𑀞𑀳𑀦𑁆𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀢𑁄 𑀢𑀢𑁆𑀣 𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀢𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀆𑀪𑀭𑀡𑀁 𑀯𑀸 𑀅𑀮𑀗𑁆𑀓𑀸𑀭𑀁 𑀯𑀸 𑀦 𑀥𑀸𑀭𑁂𑀢𑀺. 𑀲𑀸 𑀲𑀸𑀫𑀺𑀓𑁂𑀦 ‘‘𑀓𑀲𑁆𑀫𑀸 𑀢𑁆𑀯𑀁, 𑀪𑀤𑁆𑀤𑁂, 𑀇𑀤𑀸𑀦𑀺 𑀧𑀼𑀩𑁆𑀩𑁂 𑀯𑀺𑀬 𑀆𑀪𑀭𑀡𑀁 𑀯𑀸 𑀅𑀮𑀗𑁆𑀓𑀸𑀭𑀁 𑀯𑀸 𑀦 𑀥𑀸𑀭𑁂𑀲𑀻’’𑀢𑀺 𑀯𑀼𑀢𑁆𑀢𑀸 𑀅𑀢𑁆𑀢𑀦𑁄 𑀕𑀺𑀳𑀺𑀪𑀸𑀯𑁂 𑀅𑀪𑀩𑁆𑀩𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀲𑀺. 𑀲𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀯𑀺𑀬 𑀥𑀫𑁆𑀫𑀤𑀺𑀦𑁆𑀦𑀁 𑀫𑀳𑀢𑀸 𑀧𑀭𑀺𑀳𑀸𑀭𑁂𑀦 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀇𑀫𑀁, 𑀅𑀬𑁆𑀬𑁂, 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀅𑀣 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲𑀸 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀭𑀫𑁆𑀫𑀡𑀫𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀼𑀔𑀁 𑀲𑀼𑀧𑀸𑀳𑀻’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀲𑀼𑀔𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀲𑀼𑀧𑀸𑀳𑀻𑀢𑀺 𑀆𑀡𑀢𑁆𑀢𑀺𑀯𑀘𑀦𑀁. 𑀣𑁂𑀭𑀺𑀓𑁂𑀢𑀺 𑀆𑀫𑀦𑁆𑀢𑀦𑀯𑀘𑀦𑀁. 𑀓𑀢𑁆𑀯𑀸 𑀘𑁄𑀴𑁂𑀦 𑀧𑀸𑀭𑀼𑀢𑀸𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀬 𑀦𑀺𑀬𑁄𑀚𑀦𑀁. 𑀉𑀧𑀲𑀦𑁆𑀢𑁄 𑀳𑀺 𑀢𑁂 𑀭𑀸𑀕𑁄𑀢𑀺 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀁. 𑀲𑀼𑀓𑁆𑀔𑀟𑀸𑀓𑀁𑀯𑀸𑀢𑀺 𑀉𑀧𑀲𑀫𑁂𑀢𑀩𑁆𑀩𑀲𑁆𑀲 𑀓𑀺𑀮𑁂𑀲𑀲𑁆𑀲 𑀅𑀲𑀸𑀭𑀪𑀸𑀯𑀦𑀺𑀤𑀲𑁆𑀲𑀦𑀁. 𑀓𑀼𑀫𑁆𑀪𑀺𑀬𑀦𑁆𑀢𑀺 𑀢𑀤𑀸𑀥𑀸𑀭𑀲𑁆𑀲 𑀅𑀦𑀺𑀘𑁆𑀘𑀢𑀼𑀘𑁆𑀙𑀸𑀤𑀺𑀪𑀸𑀯𑀦𑀺𑀤𑀲𑁆𑀲𑀦𑀁.

𑀲𑀼𑀔𑀦𑁆𑀢𑀺 𑀘𑁂𑀢𑀁 𑀇𑀝𑁆𑀞𑀸𑀥𑀺𑀯𑀘𑀦𑀁. 𑀲𑀼𑀔𑁂𑀦 𑀦𑀺𑀤𑀼𑀓𑁆𑀔𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀧𑀸𑀳𑀻𑀢𑀺 𑀦𑀺𑀧𑀚𑁆𑀚𑀦𑀺𑀤𑀲𑁆𑀲𑀦𑀜𑁆𑀘𑁂𑀢𑀁 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁, 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄𑀧𑀺 𑀇𑀭𑀺𑀬𑀸𑀧𑀣𑁂 𑀲𑀼𑀔𑁂𑀦𑁂𑀯 𑀓𑀧𑁆𑀧𑁂𑀳𑀺 𑀲𑀼𑀔𑀁 𑀯𑀺𑀳𑀭𑀸𑀢𑀺 𑀅𑀢𑁆𑀣𑁄. 𑀣𑁂𑀭𑀺𑀓𑁂𑀢𑀺 𑀇𑀤𑀁 𑀬𑀤𑀺𑀧𑀺 𑀢𑀲𑁆𑀲𑀸 𑀦𑀸𑀫𑀓𑀺𑀢𑁆𑀢𑀦𑀁, 𑀧𑀘𑀼𑀭𑁂𑀦 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀪𑀸𑀯𑀢𑁄 𑀧𑀦 𑀣𑀺𑀭𑁂 𑀲𑀸𑀲𑀦𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑁂, 𑀣𑀺𑀭𑁂𑀳𑀺 𑀲𑀻𑀮𑀸𑀤𑀺𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀢𑀺 𑀅𑀢𑁆𑀣𑁄. 𑀓𑀢𑁆𑀯𑀸 𑀘𑁄𑀴𑁂𑀦 𑀧𑀸𑀭𑀼𑀢𑀸𑀢𑀺 𑀧𑀁𑀲𑀼𑀓𑀽𑀮𑀘𑁄𑀴𑁂𑀳𑀺 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀘𑁆𑀙𑀸𑀤𑀺𑀢𑀲𑀭𑀻𑀭𑀸 𑀢𑀁 𑀦𑀺𑀯𑀢𑁆𑀣𑀸 𑀘𑁂𑀯 𑀧𑀸𑀭𑀼𑀢𑀸 𑀘. 𑀉𑀧𑀲𑀦𑁆𑀢𑁄 𑀳𑀺 𑀢𑁂 𑀭𑀸𑀕𑁄𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑁆𑀯𑀢𑁆𑀣𑁄. 𑀬𑀲𑁆𑀫𑀸 𑀢𑀯 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑀓𑀓𑀸𑀫𑀭𑀸𑀕𑁄 𑀉𑀧𑀲𑀦𑁆𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀇𑀤𑀸𑀦𑀺 𑀢𑀤𑀯𑀲𑁂𑀲𑀁 𑀭𑀸𑀕𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀤𑀳𑁂𑀢𑁆𑀯𑀸 𑀲𑀼𑀔𑀁 𑀲𑀼𑀧𑀸𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀓𑁆𑀔𑀟𑀸𑀓𑀁𑀯 𑀓𑀼𑀫𑁆𑀪𑀺𑀬𑀦𑁆𑀢𑀺 𑀬𑀣𑀸 𑀢𑀁 𑀧𑀓𑁆𑀓𑁂 𑀪𑀸𑀚𑀦𑁂 𑀅𑀧𑁆𑀧𑀓𑀁 𑀟𑀸𑀓𑀩𑁆𑀬𑀜𑁆𑀚𑀦𑀁 𑀫𑀳𑀢𑀺𑀬𑀸 𑀅𑀕𑁆𑀕𑀺𑀚𑀸𑀮𑀸𑀬 𑀧𑀘𑁆𑀘𑀫𑀸𑀦𑀁 𑀛𑀸𑀬𑀺𑀢𑁆𑀯𑀸 𑀲𑀼𑀲𑁆𑀲𑀦𑁆𑀢𑀁 𑀯𑀽𑀧𑀲𑀫𑁆𑀫𑀢𑀺, 𑀬𑀣𑀸 𑀯𑀸 𑀉𑀤𑀓𑀫𑀺𑀲𑁆𑀲𑁂 𑀟𑀸𑀓𑀩𑁆𑀬𑀜𑁆𑀚𑀦𑁂 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀧𑀘𑁆𑀘𑀫𑀸𑀦𑁂 𑀉𑀤𑀓𑁂 𑀯𑀺𑀚𑁆𑀚𑀫𑀸𑀦𑁂 𑀢𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺, 𑀉𑀤𑀓𑁂 𑀧𑀦 𑀙𑀺𑀦𑁆𑀦𑁂 𑀉𑀧𑀲𑀦𑁆𑀢𑀫𑁂𑀯 𑀳𑁄𑀢𑀺, 𑀏𑀯𑀁 𑀢𑀯 𑀲𑀦𑁆𑀢𑀸𑀦𑁂 𑀓𑀸𑀫𑀭𑀸𑀕𑁄 𑀉𑀧𑀲𑀦𑁆𑀢𑁄, 𑀇𑀢𑀭𑀫𑁆𑀧𑀺 𑀯𑀽𑀧𑀲𑀫𑁂𑀢𑁆𑀯𑀸 𑀲𑀼𑀔𑀁 𑀲𑀼𑀧𑀸𑀳𑀻𑀢𑀺.

𑀣𑁂𑀭𑀻 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁨𑁬-𑁩𑁦).

‘‘𑀓𑁄𑀡𑀸𑀕𑀫𑀦𑀩𑀼𑀤𑁆𑀥𑀲𑁆𑀲, 𑀫𑀡𑁆𑀟𑀧𑁄 𑀓𑀸𑀭𑀺𑀢𑁄 𑀫𑀬𑀸;

𑀥𑀼𑀯𑀁 𑀢𑀺𑀘𑀻𑀯𑀭𑀁𑀤𑀸𑀲𑀺𑀁, 𑀩𑀼𑀤𑁆𑀥𑀲𑁆𑀲 𑀮𑁄𑀓𑀩𑀦𑁆𑀥𑀼𑀦𑁄.

‘‘𑀬𑀁 𑀬𑀁 𑀚𑀦𑀧𑀤𑀁 𑀬𑀸𑀫𑀺, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀣𑁂𑀭𑀻 𑀉𑀤𑀸𑀦𑁂𑀦𑁆𑀢𑀻 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺, 𑀢𑁂𑀦𑀸𑀬𑀁 𑀕𑀸𑀣𑀸 𑀢𑀲𑁆𑀲𑀸 𑀣𑁂𑀭𑀺𑀬𑀸 𑀕𑀸𑀣𑀸 𑀅𑀳𑁄𑀲𑀺. 𑀢𑀢𑁆𑀣 𑀣𑁂𑀭𑀺𑀬𑀸 𑀯𑀼𑀢𑁆𑀢𑀕𑀸𑀣𑀸𑀬 𑀅𑀦𑀯𑀲𑁂𑀲𑁄 𑀭𑀸𑀕𑁄 𑀧𑀭𑀺𑀕𑁆𑀕𑀳𑀺𑀢𑁄 𑀅𑀕𑁆𑀕𑀫𑀕𑁆𑀕𑁂𑀦 𑀢𑀲𑁆𑀲 𑀯𑀽𑀧𑀲𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀭𑀸𑀕𑀯𑀽𑀧𑀲𑀫𑁂𑀦𑁂𑀯 𑀘𑁂𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁 𑀢𑀤𑁂𑀓𑀝𑁆𑀞𑀢𑀸𑀬 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀯𑀽𑀧𑀲𑀫𑀲𑀺𑀤𑁆𑀥𑀺𑀢𑁄. 𑀢𑀣𑀸 𑀳𑀺 𑀯𑀼𑀘𑁆𑀘𑀢𑀺 𑁋

‘‘𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀳𑀺, 𑀬𑁄 𑀫𑁄𑀳𑁄 𑀲𑀳𑀚𑁄 𑀫𑀢𑁄;

𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑁂𑀦, 𑀭𑀸𑀕𑁂𑀦 𑀲𑀭𑀡𑁄 𑀳𑀺 𑀲𑁄’’𑀢𑀺.

𑀬𑀣𑀸 𑀘𑁂𑀢𑁆𑀣 𑀲𑀩𑁆𑀩𑁂𑀲𑀁 𑀲𑀁𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀢𑁂𑀲𑀁 𑀯𑀽𑀧𑀲𑀫𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑀪𑀸𑀕𑁂 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦, 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀯𑀽𑀧𑀲𑀫𑀲𑀺𑀤𑁆𑀥𑀺𑀢𑁄. 𑀢𑁂𑀦 𑀘𑀢𑀼𑀩𑁆𑀩𑀺𑀥𑀲𑁆𑀲𑀸𑀧𑀺 𑀧𑀳𑀸𑀦𑀲𑁆𑀲 𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀲𑀻𑀮𑀲𑀫𑁆𑀧𑀤𑀸𑀲𑀺𑀤𑁆𑀥𑀺, 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑁂𑀦 𑀲𑀫𑀸𑀥𑀺𑀲𑀫𑁆𑀧𑀤𑀸𑀲𑀺𑀤𑁆𑀥𑀺, 𑀇𑀢𑀭𑁂𑀳𑀺 𑀧𑀜𑁆𑀜𑀸𑀲𑀫𑁆𑀧𑀤𑀸𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺 𑀧𑀳𑀸𑀦𑀸𑀪𑀺𑀲𑀫𑀬𑁄𑀧𑀲𑀺𑀚𑁆𑀛𑀦𑀢𑁄. 𑀬𑀣𑀸 𑀪𑀸𑀯𑀦𑀸𑀪𑀺𑀲𑀫𑀬𑀁 𑀲𑀸𑀥𑁂𑀢𑀺 𑀢𑀲𑁆𑀫𑀺𑀁 𑀅𑀲𑀢𑀺 𑀢𑀤𑀪𑀸𑀯𑀢𑁄, 𑀢𑀣𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀜𑁆𑀘 𑀲𑀸𑀥𑁂𑀢𑀺 𑀏𑀯𑀸𑀢𑀺. 𑀘𑀢𑀼𑀭𑀸𑀪𑀺𑀲𑀫𑀬𑀲𑀺𑀤𑁆𑀥𑀺𑀬𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀧𑀝𑀺𑀧𑀢𑁆𑀢𑀺𑀬𑀸 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸, 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑁄 𑀘 𑀧𑀭𑀺𑀧𑀼𑀡𑁆𑀡𑀸 𑀇𑀫𑀸𑀬 𑀕𑀸𑀣𑀸𑀬 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀢𑀭𑀸𑀣𑁂𑀭𑀻 𑀅𑀧𑀜𑁆𑀜𑀸𑀢𑀸 𑀦𑀸𑀫𑀕𑁄𑀢𑁆𑀢𑀸𑀤𑀺𑀯𑀲𑁂𑀦 𑀅𑀧𑀸𑀓𑀝𑀸, 𑀏𑀓𑀸 𑀣𑁂𑀭𑀻 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀜𑁆𑀜𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑁨.

‘‘𑀫𑀼𑀢𑁆𑀢𑁂 𑀫𑀼𑀘𑁆𑀘𑀲𑁆𑀲𑀼 𑀬𑁄𑀕𑁂𑀳𑀺, 𑀘𑀦𑁆𑀤𑁄 𑀭𑀸𑀳𑀼𑀕𑁆𑀕𑀳𑀸 𑀇𑀯;

𑀯𑀺𑀧𑁆𑀧𑀫𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀅𑀦𑀡𑀸 𑀪𑀼𑀜𑁆𑀚 𑀧𑀺𑀡𑁆𑀟𑀓’’𑀦𑁆𑀢𑀺. 𑁋

𑀅𑀬𑀁 𑀫𑀼𑀢𑁆𑀢𑀸𑀬 𑀦𑀸𑀫 𑀲𑀺𑀓𑁆𑀔𑀫𑀸𑀦𑀸𑀬 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀭𑀣𑀺𑀬𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀻𑀢𑀺𑀯𑁂𑀕𑁂𑀦 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀅𑀯𑀓𑀼𑀚𑁆𑀚𑀸 𑀦𑀺𑀧𑀚𑁆𑀚𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀫𑀼𑀢𑁆𑀢𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀺𑀓𑁆𑀔𑀫𑀸𑀦𑀸𑀯 𑀳𑀼𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀣𑁂𑀭𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀭𑀳𑁄 𑀦𑀺𑀲𑀺𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀬 𑀫𑀦𑀲𑀺𑀓𑀸𑀭𑀁 𑀆𑀭𑀪𑀺. 𑀲𑀢𑁆𑀣𑀸 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀬𑀸 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀲𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀫𑀼𑀢𑁆𑀢𑁂 𑀫𑀼𑀘𑁆𑀘𑀲𑁆𑀲𑀼 𑀬𑁄𑀕𑁂𑀳𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀫𑀼𑀢𑁆𑀢𑁂𑀢𑀺 𑀢𑀲𑁆𑀲𑀸 𑀆𑀮𑀧𑀦𑀁. 𑀫𑀼𑀘𑁆𑀘𑀲𑁆𑀲𑀼 𑀬𑁄𑀕𑁂𑀳𑀻𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀓𑀸𑀫𑀬𑁄𑀕𑀸𑀤𑀻𑀳𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀫𑀼𑀘𑁆𑀘, 𑀢𑁂𑀳𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀳𑁄𑀳𑀺. 𑀬𑀣𑀸 𑀓𑀺𑀁? 𑀘𑀦𑁆𑀤𑁄 𑀭𑀸𑀳𑀼𑀕𑁆𑀕𑀳𑀸 𑀇𑀯𑀸𑀢𑀺 𑀭𑀸𑀳𑀼𑀲𑀗𑁆𑀔𑀸𑀢𑁄 𑀕𑀳𑀢𑁄 𑀘𑀦𑁆𑀤𑁄 𑀯𑀺𑀬 𑀉𑀧𑀓𑁆𑀓𑀺𑀮𑁂𑀲𑀢𑁄 𑀫𑀼𑀘𑁆𑀘𑀲𑁆𑀲𑀼. 𑀯𑀺𑀧𑁆𑀧𑀫𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀇𑀢𑁆𑀣𑀁 𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀅𑀦𑀡𑀸 𑀪𑀼𑀜𑁆𑀚 𑀧𑀺𑀡𑁆𑀟𑀓𑀦𑁆𑀢𑀺 𑀓𑀺𑀮𑁂𑀲𑀇𑀡𑀁 𑀧𑀳𑀸𑀬 𑀅𑀦𑀡𑀸 𑀳𑀼𑀢𑁆𑀯𑀸 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑁂𑀬𑁆𑀬𑀸𑀲𑀺. 𑀬𑁄 𑀳𑀺 𑀓𑀺𑀮𑁂𑀲𑁂 𑀅𑀧𑁆𑀧𑀳𑀸𑀬 𑀲𑀢𑁆𑀣𑀸𑀭𑀸 𑀅𑀦𑀼𑀜𑁆𑀜𑀸𑀢𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁄 𑀲𑀸𑀡𑁄 𑀧𑀭𑀺𑀪𑀼𑀜𑁆𑀚𑀢𑀺 𑀦𑀸𑀫. 𑀬𑀣𑀸𑀳 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑁋 ‘‘𑀲𑀢𑁆𑀢𑀸𑀳𑀫𑁂𑀯 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀸𑀡𑁄 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀺’’𑀦𑁆𑀢𑀺 (𑀫. 𑀦𑀺. 𑁩.𑁨𑁧𑁧). 𑀢𑀲𑁆𑀫𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁂𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀇𑀡𑀁 𑀧𑀳𑀸𑀦𑀸𑀬 𑀅𑀦𑀡𑁂𑀦 𑀳𑀼𑀢𑁆𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀺𑀡𑁆𑀟𑀓𑀦𑁆𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀯, 𑀘𑀢𑁆𑀢𑀸𑀭𑁄𑀧𑀺 𑀧𑀘𑁆𑀘𑀬𑁂𑀢𑀺 𑀅𑀢𑁆𑀣𑁄. 𑀅𑀪𑀺𑀡𑁆𑀳𑀁 𑀑𑀯𑀤𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀉𑀧𑀓𑁆𑀓𑀺𑀮𑁂𑀲𑁂 𑀯𑀺𑀲𑁄𑀥𑁂𑀦𑁆𑀢𑁄 𑀩𑀳𑀼𑀲𑁄 𑀑𑀯𑀸𑀤𑀁 𑀤𑁂𑀢𑀺.

𑀲𑀸 𑀢𑀲𑁆𑀫𑀺𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁩𑁧-𑁩𑁬) 𑁋

‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀭𑀣𑀺𑀬𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀢𑀸𑀭𑀬𑀦𑁆𑀢𑀲𑁆𑀲 𑀧𑀸𑀡𑀺𑀦𑁄.

‘‘𑀖𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀅𑀯𑀓𑀼𑀚𑁆𑀚𑀸 𑀦𑀺𑀧𑀚𑁆𑀚𑀳𑀁;

𑀅𑀦𑀼𑀓𑀫𑁆𑀧𑀓𑁄 𑀮𑁄𑀓𑀦𑀸𑀣𑁄, 𑀲𑀺𑀭𑀲𑀺 𑀅𑀓𑁆𑀓𑀫𑀻 𑀫𑀫.

‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀲𑀺𑀭𑀲𑀺, 𑀅𑀕𑀫𑀸 𑀮𑁄𑀓𑀦𑀸𑀬𑀓𑁄;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀸 𑀢𑀫𑁂𑀯 𑀕𑀸𑀣𑀁 𑀉𑀤𑀸𑀦𑁂𑀲𑀺. 𑀧𑀭𑀺𑀧𑀼𑀡𑁆𑀡𑀲𑀺𑀓𑁆𑀔𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀧𑀺 𑀢𑀫𑁂𑀯 𑀕𑀸𑀣𑀁 𑀧𑀘𑁆𑀘𑀪𑀸𑀲𑀻𑀢𑀺.

𑀫𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀼𑀡𑁆𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀧𑀼𑀡𑁆𑀡𑁂 𑀧𑀽𑀭𑀲𑁆𑀲𑀼 𑀥𑀫𑁆𑀫𑁂𑀳𑀻𑀢𑀺 𑀧𑀼𑀡𑁆𑀡𑀸𑀬 𑀦𑀸𑀫 𑀲𑀺𑀓𑁆𑀔𑀫𑀸𑀦𑀸𑀬 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸. 𑀏𑀓𑀤𑀺𑀯𑀲𑀁 𑀢𑀢𑁆𑀣 𑀅𑀜𑁆𑀜𑀢𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀦𑀴𑀫𑀸𑀮𑀸𑀬 𑀢𑀁 𑀧𑀽𑀚𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀧𑀼𑀡𑁆𑀡𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀯𑀲𑀫𑀸𑀦𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀺𑀓𑁆𑀔𑀫𑀸𑀦𑀸 𑀏𑀯 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀏𑀯 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑁋

𑁩.

‘‘𑀧𑀼𑀡𑁆𑀡𑁂 𑀧𑀽𑀭𑀲𑁆𑀲𑀼 𑀥𑀫𑁆𑀫𑁂𑀳𑀺, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁂𑀭𑀺𑀯;

𑀧𑀭𑀺𑀧𑀼𑀡𑁆𑀡𑀸𑀬 𑀧𑀜𑁆𑀜𑀸𑀬, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀸’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑀢𑀢𑁆𑀣 𑀧𑀼𑀡𑁆𑀡𑁂𑀢𑀺 𑀢𑀲𑁆𑀲𑀸 𑀆𑀮𑀧𑀦𑀁. 𑀧𑀽𑀭𑀲𑁆𑀲𑀼 𑀥𑀫𑁆𑀫𑁂𑀳𑀻𑀢𑀺 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀳𑀺 𑀧𑀭𑀺𑀧𑀼𑀡𑁆𑀡𑀸 𑀳𑁄𑀳𑀺. 𑀘𑀦𑁆𑀤𑁄 𑀧𑀦𑁆𑀦𑀭𑀲𑁂𑀭𑀺𑀯𑀸𑀢𑀺 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀫𑀸𑀲𑀺𑀬𑀁 𑀲𑀩𑁆𑀩𑀸𑀳𑀺 𑀓𑀮𑀸𑀳𑀺 𑀧𑀭𑀺𑀧𑀼𑀡𑁆𑀡𑁄 𑀘𑀦𑁆𑀤𑁄 𑀯𑀺𑀬. 𑀧𑀭𑀺𑀧𑀼𑀡𑁆𑀡𑀸𑀬 𑀧𑀜𑁆𑀜𑀸𑀬𑀸𑀢𑀺 𑀲𑁄𑀴𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑀭𑀺𑀧𑀼𑀡𑁆𑀡𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀬. 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀸𑀢𑀺 𑀫𑁄𑀳𑀓𑁆𑀔𑀦𑁆𑀥𑀁 𑀅𑀦𑀯𑀲𑁂𑀲𑀢𑁄 𑀪𑀺𑀦𑁆𑀤 𑀲𑀫𑀼𑀘𑁆𑀙𑀺𑀦𑁆𑀤. 𑀫𑁄𑀳𑀓𑁆𑀔𑀦𑁆𑀥𑀧𑀤𑀸𑀮𑀦𑁂𑀦 𑀲𑀳𑁂𑀯 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀧𑀤𑀸𑀮𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀲𑀸 𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁩𑁭-𑁪𑁫) 𑁋

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑀻 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

‘‘𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻;

𑀦𑀴𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀻𑀤𑁂𑀳𑀁, 𑀅𑀕𑀘𑁆𑀙𑀺𑀁 𑀢𑀺𑀤𑀲𑀁 𑀕𑀢𑀺𑀁.

‘‘𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀤𑀲𑀦𑁆𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀁𑀯𑁂𑀚𑁂𑀢𑁆𑀯𑀸𑀦 𑀫𑁂 𑀘𑀺𑀢𑁆𑀢𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀸 𑀣𑁂𑀭𑀻 𑀢𑀫𑁂𑀯 𑀕𑀸𑀣𑀁 𑀉𑀤𑀸𑀦𑁂𑀲𑀺. 𑀅𑀬𑀫𑁂𑀯 𑀘𑀲𑁆𑀲𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀳𑁄𑀲𑀻𑀢𑀺.

𑀧𑀼𑀡𑁆𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀢𑀺𑀲𑁆𑀲𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀢𑀺𑀲𑁆𑀲𑁂 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀬𑀸𑀢𑀺 𑀢𑀺𑀲𑁆𑀲𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀫𑁆𑀪𑀢𑀓𑀼𑀲𑀮𑀧𑀘𑁆𑀘𑀬𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀭𑁄𑀥𑀪𑀽𑀢𑀸 𑀧𑀘𑁆𑀙𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲𑀸 𑀲𑀢𑁆𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑁋

𑁪.

‘‘𑀢𑀺𑀲𑁆𑀲𑁂 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀬, 𑀫𑀸 𑀢𑀁 𑀬𑁄𑀕𑀸 𑀉𑀧𑀘𑁆𑀘𑀕𑀼𑀁;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀘𑀭 𑀮𑁄𑀓𑁂 𑀅𑀦𑀸𑀲𑀯𑀸’’𑀢𑀺. 𑁋 𑀕𑀸𑀣𑀁 𑀅𑀪𑀸𑀲𑀺;

𑀢𑀢𑁆𑀣 𑀢𑀺𑀲𑁆𑀲𑁂𑀢𑀺 𑀢𑀲𑁆𑀲𑀸 𑀆𑀮𑀧𑀦𑀁. 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀬𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀓𑀸𑀬 𑀢𑀺𑀯𑀺𑀥𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔, 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀲𑀫𑁆𑀧𑀸𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀸𑀲𑀁 𑀲𑀫𑁆𑀧𑀸𑀤𑀦𑁂 𑀓𑀸𑀭𑀡𑀫𑀸𑀳 ‘‘𑀫𑀸 𑀢𑀁 𑀬𑁄𑀕𑀸 𑀉𑀧𑀘𑁆𑀘𑀕𑀼’’𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀁, 𑀇𑀦𑁆𑀤𑁆𑀭𑀺𑀬𑀸𑀯𑁂𑀓𑀮𑁆𑀮𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀲𑀤𑁆𑀥𑀸𑀧𑀝𑀺𑀮𑀸𑀪𑁄𑀢𑀺 𑀇𑀫𑁂 𑀬𑁄𑀕𑀸 𑀲𑀫𑀬𑀸 𑀤𑀼𑀮𑁆𑀮𑀪𑀓𑁆𑀔𑀡𑀸 𑀢𑀁 𑀫𑀸 𑀅𑀢𑀺𑀓𑁆𑀓𑀫𑀼𑀁. 𑀓𑀸𑀫𑀬𑁄𑀕𑀸𑀤𑀬𑁄 𑀏𑀯 𑀯𑀸 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀢𑀁 𑀫𑀸 𑀉𑀧𑀘𑁆𑀘𑀕𑀼𑀁 𑀫𑀸 𑀅𑀪𑀺𑀪𑀯𑁂𑀬𑁆𑀬𑀼𑀁. 𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀩𑁆𑀩𑁂𑀳𑀺 𑀓𑀸𑀫𑀬𑁄𑀕𑀸𑀤𑀻𑀳𑀺 𑀬𑁄𑀕𑁂𑀳𑀺 𑀯𑀺𑀫𑀼𑀢𑁆𑀢𑀸 𑀢𑀢𑁄 𑀏𑀯 𑀅𑀦𑀸𑀲𑀯𑀸 𑀳𑀼𑀢𑁆𑀯𑀸 𑀮𑁄𑀓𑁂 𑀘𑀭, 𑀤𑀺𑀝𑁆𑀞𑀲𑀼𑀔𑀯𑀺𑀳𑀸𑀭𑁂𑀦 𑀯𑀺𑀳𑀭𑀸𑀳𑀻𑀢𑀺 𑀅𑀢𑁆𑀣𑁄.

𑀲𑀸 𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀆𑀤𑀺𑀦𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀲𑁆𑀲𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀢𑀺𑀲𑁆𑀲𑀸𑀤𑀺𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀢𑀺𑀲𑁆𑀲𑁂 𑀬𑀼𑀜𑁆𑀚𑀲𑁆𑀲𑀼 𑀥𑀫𑁆𑀫𑁂𑀳𑀻𑀢𑀺 𑀢𑀺𑀲𑁆𑀲𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸 𑀯𑀢𑁆𑀣𑀼 𑀢𑀺𑀲𑁆𑀲𑀸𑀲𑀺𑀓𑁆𑀔𑀫𑀸𑀦𑀸𑀬 𑀯𑀢𑁆𑀣𑀼𑀲𑀤𑀺𑀲𑀁. 𑀅𑀬𑀁 𑀧𑀦 𑀣𑁂𑀭𑀻 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀬𑀣𑀸 𑀘 𑀅𑀬𑀁, 𑀏𑀯𑀁 𑀇𑀢𑁄 𑀧𑀭𑀁 𑀥𑀻𑀭𑀸, 𑀯𑀻𑀭𑀸, 𑀫𑀺𑀢𑁆𑀢𑀸, 𑀪𑀤𑁆𑀭𑀸, 𑀉𑀧𑀲𑀫𑀸𑀢𑀺 𑀧𑀜𑁆𑀘𑀦𑁆𑀦𑀁 𑀣𑁂𑀭𑀻𑀦𑀁 𑀯𑀢𑁆𑀣𑀼 𑀏𑀓𑀲𑀤𑀺𑀲𑀫𑁂𑀯. 𑀲𑀩𑁆𑀩𑀸𑀧𑀺 𑀇𑀫𑀸 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑀺𑀬𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀭𑁄𑀥𑀪𑀽𑀢𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸 𑀑𑀪𑀸𑀲𑀕𑀸𑀣𑀸𑀬 𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀞𑀧𑁂𑀢𑁆𑀯𑀸 𑀲𑀢𑁆𑀢𑀫𑀺𑀁. 𑀲𑀸 𑀧𑀦 𑀑𑀪𑀸𑀲𑀕𑀸𑀣𑀸𑀬 𑀯𑀺𑀦𑀸 𑀧𑀕𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀮𑀤𑁆𑀥𑀁 𑀑𑀯𑀸𑀤𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 ‘‘𑀯𑀻𑀭𑀸 𑀯𑀻𑀭𑁂𑀳𑀻’’𑀢𑀺 𑀕𑀸𑀣𑀁 𑀅𑀪𑀸𑀲𑀺. 𑀇𑀢𑀭𑀸𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑁋

𑁫.

‘‘𑀢𑀺𑀲𑁆𑀲𑁂 𑀬𑀼𑀜𑁆𑀚𑀲𑁆𑀲𑀼 𑀥𑀫𑁆𑀫𑁂𑀳𑀺, 𑀔𑀡𑁄 𑀢𑀁 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸.

𑁬.

‘‘𑀥𑀻𑀭𑁂 𑀦𑀺𑀭𑁄𑀥𑀁 𑀨𑀼𑀲𑁂𑀳𑀺, 𑀲𑀜𑁆𑀜𑀸𑀯𑀽𑀧𑀲𑀫𑀁 𑀲𑀼𑀔𑀁;

𑀆𑀭𑀸𑀥𑀬𑀸𑀳𑀺 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀫𑀦𑀼𑀢𑁆𑀢𑀭𑀁.

𑁭.

‘‘𑀯𑀻𑀭𑀸 𑀯𑀻𑀭𑁂𑀳𑀺 𑀥𑀫𑁆𑀫𑁂𑀳𑀺, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁.

𑁮.

‘‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀫𑀺𑀢𑁆𑀢𑁂 𑀫𑀺𑀢𑁆𑀢𑀭𑀢𑀸 𑀪𑀯;

𑀪𑀸𑀯𑁂𑀳𑀺 𑀓𑀼𑀲𑀮𑁂 𑀥𑀫𑁆𑀫𑁂, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸.

𑁯.

‘‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀪𑀤𑁆𑀭𑁂 𑀪𑀤𑁆𑀭𑀭𑀢𑀸 𑀪𑀯;

𑀪𑀸𑀯𑁂𑀳𑀺 𑀓𑀼𑀲𑀮𑁂 𑀥𑀫𑁆𑀫𑁂, 𑀬𑁄𑀕𑀓𑁆𑀔𑁂𑀫𑀫𑀦𑀼𑀢𑁆𑀢𑀭𑀁.

𑁧𑁦.

‘‘𑀉𑀧𑀲𑀫𑁂 𑀢𑀭𑁂 𑀑𑀖𑀁, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁;

𑀥𑀸𑀭𑁂𑀳𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦’’𑀦𑁆𑀢𑀺. 𑁋 𑀕𑀸𑀣𑀸𑀬𑁄 𑀅𑀪𑀸𑀲𑀺𑀁𑀲𑀼;

𑀢𑀢𑁆𑀣 𑀬𑀼𑀜𑁆𑀚𑀲𑁆𑀲𑀼 𑀥𑀫𑁆𑀫𑁂𑀳𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀅𑀭𑀺𑀬𑁂𑀳𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀳𑀺 𑀘 𑀬𑀼𑀜𑁆𑀚 𑀬𑁄𑀕𑀁 𑀓𑀭𑁄𑀳𑀺. 𑀔𑀡𑁄 𑀢𑀁 𑀫𑀸 𑀉𑀧𑀘𑁆𑀘𑀕𑀸𑀢𑀺 𑀬𑁄 𑀏𑀯𑀁 𑀬𑁄𑀕𑀪𑀸𑀯𑀦𑀁 𑀦 𑀓𑀭𑁄𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀧𑀢𑀺𑀭𑀽𑀧𑀤𑁂𑀲𑁂 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁄, 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀯𑁂𑀓𑀮𑁆𑀮𑀓𑁆𑀔𑀡𑁄, 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄, 𑀲𑀤𑁆𑀥𑀸𑀬 𑀧𑀝𑀺𑀮𑀤𑁆𑀥𑀓𑁆𑀔𑀡𑁄, 𑀲𑀩𑁆𑀩𑁄𑀧𑀺 𑀅𑀬𑀁 𑀔𑀡𑁄 𑀅𑀢𑀺𑀓𑁆𑀓𑀫𑀢𑀺 𑀦𑀸𑀫. 𑀲𑁄 𑀔𑀡𑁄 𑀢𑀁 𑀫𑀸 𑀅𑀢𑀺𑀓𑁆𑀓𑀫𑀺. 𑀔𑀡𑀸𑀢𑀻𑀢𑀸𑀢𑀺 𑀬𑁂 𑀳𑀺 𑀔𑀡𑀁 𑀅𑀢𑀻𑀢𑀸, 𑀬𑁂 𑀘 𑀧𑀼𑀕𑁆𑀕𑀮𑁂 𑀲𑁄 𑀔𑀡𑁄 𑀅𑀪𑀻𑀢𑁄, 𑀢𑁂 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸 𑀳𑀼𑀢𑁆𑀯𑀸 𑀲𑁄𑀘𑀦𑁆𑀢𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀺𑀭𑁄𑀥𑀁 𑀨𑀼𑀲𑁂𑀳𑀻𑀢𑀺 𑀓𑀺𑀮𑁂𑀲𑀦𑀺𑀭𑁄𑀥𑀁 𑀨𑀼𑀲𑁆𑀲 𑀧𑀝𑀺𑀮𑀪. 𑀲𑀜𑁆𑀜𑀸𑀯𑀽𑀧𑀲𑀫𑀁 𑀲𑀼𑀔𑀁, 𑀆𑀭𑀸𑀥𑀬𑀸𑀳𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑀸𑀫𑀲𑀜𑁆𑀜𑀸𑀤𑀻𑀦𑀁 𑀧𑀸𑀧𑀲𑀜𑁆𑀜𑀸𑀦𑀁 𑀉𑀧𑀲𑀫𑀦𑀺𑀫𑀺𑀢𑁆𑀢𑀁 𑀅𑀘𑁆𑀘𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀳𑀺.

𑀯𑀻𑀭𑀸 𑀯𑀻𑀭𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀯𑀻𑀭𑀺𑀬𑀧𑀥𑀸𑀦𑀢𑀸𑀬 𑀯𑀻𑀭𑁂𑀳𑀺 𑀢𑁂𑀚𑀼𑀲𑁆𑀲𑀤𑁂𑀳𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁂𑀳𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸 𑀯𑀟𑁆𑀠𑀺𑀢𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀸 𑀯𑀻𑀭𑀸 𑀪𑀺𑀓𑁆𑀔𑀼𑀦𑀻 𑀯𑀢𑁆𑀣𑀼𑀓𑀸𑀫𑁂𑀳𑀺 𑀲𑀯𑀸𑀳𑀦𑀁 𑀓𑀺𑀮𑁂𑀲𑀫𑀸𑀭𑀁 𑀚𑀺𑀦𑀺𑀢𑁆𑀯𑀸 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄 𑀅𑀦𑁆𑀢𑀺𑀫𑀁 𑀤𑁂𑀳𑀁 𑀥𑀸𑀭𑁂𑀢𑀻𑀢𑀺 𑀣𑁂𑀭𑀻 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺.

𑀫𑀺𑀢𑁆𑀢𑁂𑀢𑀺 𑀢𑀁 𑀆𑀮𑀧𑀢𑀺. 𑀫𑀺𑀢𑁆𑀢𑀭𑀢𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀲𑀼 𑀅𑀪𑀺𑀭𑀢𑀸. 𑀢𑀢𑁆𑀣 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀓𑀭𑀡𑀢𑀸 𑀳𑁄𑀳𑀺. 𑀪𑀸𑀯𑁂𑀳𑀺 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁂 𑀯𑀟𑁆𑀠𑁂𑀳𑀺. 𑀬𑁄𑀕𑀓𑁆𑀔𑁂𑀫𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀸𑀬.

𑀪𑀤𑁆𑀭𑁂𑀢𑀺 𑀢𑀁 𑀆𑀮𑀧𑀢𑀺. 𑀪𑀤𑁆𑀭𑀭𑀢𑀸𑀢𑀺 𑀪𑀤𑁆𑀭𑁂𑀲𑀼 𑀲𑀻𑀮𑀸𑀤𑀺𑀥𑀫𑁆𑀫𑁂𑀲𑀼 𑀭𑀢𑀸 𑀅𑀪𑀺𑀭𑀢𑀸 𑀳𑁄𑀳𑀺. 𑀬𑁄𑀕𑀓𑁆𑀔𑁂𑀫𑀫𑀦𑀼𑀢𑁆𑀢𑀭𑀦𑁆𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀅𑀦𑀼𑀧𑀤𑁆𑀤𑀯𑀁 𑀅𑀦𑀼𑀢𑁆𑀢𑀭𑀁 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀧𑀢𑁆𑀢𑀺𑀬𑀸 𑀓𑀼𑀲𑀮𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀪𑀸𑀯𑁂𑀳𑀻𑀢𑀺 𑀅𑀢𑁆𑀣𑁄.

𑀉𑀧𑀲𑀫𑁂𑀢𑀺 𑀢𑀁 𑀆𑀮𑀧𑀢𑀺. 𑀢𑀭𑁂 𑀑𑀖𑀁 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀦𑁆𑀢𑀺 𑀫𑀘𑁆𑀘𑀼 𑀏𑀢𑁆𑀣 𑀥𑀻𑀬𑀢𑀻𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀁, 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀲𑀼𑀝𑁆𑀞𑀼 𑀤𑀼𑀢𑁆𑀢𑀭𑀦𑁆𑀢𑀺 𑀲𑀼𑀤𑀼𑀢𑁆𑀢𑀭𑀁, 𑀲𑀁𑀲𑀸𑀭𑀫𑀳𑁄𑀖𑀁 𑀢𑀭𑁂 𑀅𑀭𑀺𑀬𑀫𑀕𑁆𑀕𑀦𑀸𑀯𑀸𑀬 𑀢𑀭𑁂𑀬𑁆𑀬𑀸𑀲𑀺. 𑀥𑀸𑀭𑁂𑀳𑀺 𑀅𑀦𑁆𑀢𑀺𑀫𑀁 𑀤𑁂𑀳𑀦𑁆𑀢𑀺 𑀢𑀲𑁆𑀲 𑀢𑀭𑀡𑁂𑀦𑁂𑀯 𑀅𑀦𑁆𑀢𑀺𑀫𑀤𑁂𑀳𑀥𑀭𑀸 𑀳𑁄𑀳𑀻𑀢𑀺 𑀅𑀢𑁆𑀣𑁄.

𑀢𑀺𑀲𑁆𑀲𑀸𑀤𑀺𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸.

𑁧𑁧. 𑀫𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀼𑀫𑀼𑀢𑁆𑀢𑀸 𑀲𑀸𑀥𑀼𑀫𑀼𑀢𑁆𑀢𑀸𑀫𑁆𑀳𑀻𑀢𑀺𑀆𑀤𑀺𑀓𑀸 𑀫𑀼𑀢𑁆𑀢𑀸𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀮𑀚𑀦𑀧𑀤𑁂 𑀑𑀖𑀸𑀢𑀓𑀲𑁆𑀲 𑀦𑀸𑀫 𑀤𑀮𑀺𑀤𑁆𑀤𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀁 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 𑀏𑀓𑀲𑁆𑀲 𑀔𑀼𑀚𑁆𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀁𑀲𑀼. 𑀲𑀸 𑀢𑁂𑀦 𑀖𑀭𑀸𑀯𑀸𑀲𑀁 𑀅𑀭𑁄𑀘𑀦𑁆𑀢𑀻 𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺, 𑀲𑀸 𑀢𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑀻 ‘‘𑀲𑀼𑀫𑀼𑀢𑁆𑀢𑀸 𑀲𑀸𑀥𑀼𑀫𑀼𑀢𑁆𑀢𑀸𑀫𑁆𑀳𑀻’’𑀢𑀺 𑀕𑀸𑀣𑀁 𑀯𑀤𑀦𑁆𑀢𑀻𑀬𑁂𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀧𑀸𑀡𑀺𑀦𑁂 𑀅𑀦𑀼𑀕𑀡𑁆𑀳𑀦𑁆𑀢𑁄, 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻 𑀧𑀼𑀭𑀁.

‘‘𑀢𑀲𑁆𑀲 𑀆𑀕𑀘𑁆𑀙𑀢𑁄 𑀲𑀢𑁆𑀣𑀼, 𑀲𑀩𑁆𑀩𑁂 𑀦𑀕𑀭𑀯𑀸𑀲𑀺𑀦𑁄;

𑀳𑀝𑁆𑀞𑀢𑀼𑀝𑁆𑀞𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀯𑀸𑀮𑀺𑀓𑀸 𑀆𑀓𑀺𑀭𑀺𑀁𑀲𑀼 𑀢𑁂.

‘‘𑀯𑀻𑀣𑀺𑀲𑀫𑁆𑀫𑀚𑁆𑀚𑀦𑀁 𑀓𑀢𑁆𑀯𑀸, 𑀓𑀤𑀮𑀺𑀧𑀼𑀡𑁆𑀡𑀓𑀤𑁆𑀥𑀚𑁂;

𑀥𑀽𑀫𑀁 𑀘𑀼𑀡𑁆𑀡𑀜𑁆𑀘 𑀫𑀸𑀲𑀜𑁆𑀘, 𑀲𑀓𑁆𑀓𑀸𑀭𑀁 𑀓𑀘𑁆𑀘 𑀲𑀢𑁆𑀣𑀼𑀦𑁄.

‘‘𑀫𑀡𑁆𑀟𑀧𑀁 𑀧𑀝𑀺𑀬𑀸𑀤𑁂𑀢𑁆𑀯𑀸, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀺𑀦𑀸𑀬𑀓𑀁;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀲𑀫𑁆𑀩𑁄𑀥𑀺𑀁 𑀅𑀪𑀺𑀧𑀢𑁆𑀣𑀬𑀺.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀯𑀻𑀭𑁄, 𑀳𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀅𑀦𑀼𑀫𑁄𑀤𑀦𑀺𑀬𑀁 𑀓𑀢𑁆𑀯𑀸, 𑀩𑁆𑀬𑀸𑀓𑀸𑀲𑀺 𑀅𑀕𑁆𑀕𑀧𑀼𑀕𑁆𑀕𑀮𑁄.

‘‘𑀲𑀢𑀲𑀳𑀲𑁆𑀲𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀓𑀧𑁆𑀧𑁄 𑀳𑁂𑀲𑁆𑀲𑀢𑀺 𑀪𑀤𑁆𑀤𑀓𑁄;

𑀪𑀯𑀸𑀪𑀯𑁂 𑀲𑀼𑀔𑀁 𑀮𑀤𑁆𑀥𑀸, 𑀧𑀸𑀧𑀼𑀡𑀺𑀲𑁆𑀲𑀲𑀺 𑀩𑁄𑀥𑀺𑀬𑀁.

‘‘𑀳𑀢𑁆𑀣𑀓𑀫𑁆𑀫𑀜𑁆𑀘 𑀬𑁂 𑀓𑁂𑀘𑀺, 𑀓𑀢𑀸𑀯𑀻 𑀦𑀭𑀦𑀸𑀭𑀺𑀬𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀲𑀩𑁆𑀩𑀸 𑀳𑁂𑀲𑁆𑀲𑀦𑁆𑀢𑀺 𑀲𑀫𑁆𑀫𑀼𑀔𑀸.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀉𑀧𑁆𑀧𑀦𑁆𑀦𑀤𑁂𑀯𑀪𑀯𑀦𑁂, 𑀢𑀼𑀬𑁆𑀳𑀁 𑀢𑀸 𑀧𑀭𑀺𑀘𑀸𑀭𑀺𑀓𑀸.

‘‘𑀤𑀺𑀩𑁆𑀩𑀁 𑀲𑀼𑀔𑀫𑀲𑀗𑁆𑀔𑁆𑀬𑁂𑀬𑁆𑀬𑀁, 𑀫𑀸𑀦𑀼𑀲𑀜𑁆𑀘 𑀅𑀲𑀗𑁆𑀔𑀺𑀬𑀁;

𑀅𑀦𑀼𑀪𑁄𑀦𑁆𑀢𑀺 𑀘𑀺𑀭𑀁 𑀓𑀸𑀮𑀁, 𑀲𑀁𑀲𑀭𑀺𑀫𑁆𑀳 𑀪𑀯𑀸𑀪𑀯𑁂.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀲𑀼𑀔𑀼𑀫𑀸𑀮𑀸 𑀫𑀦𑀼𑀲𑁆𑀲𑁂𑀲𑀼, 𑀅𑀣𑁄 𑀤𑁂𑀯𑀧𑀼𑀭𑁂𑀲𑀼 𑀘.

‘‘𑀭𑀽𑀧𑀁 𑀪𑁄𑀕𑀁 𑀬𑀲𑀁 𑀆𑀬𑀼𑀁, 𑀅𑀣𑁄 𑀓𑀺𑀢𑁆𑀢𑀺𑀲𑀼𑀔𑀁 𑀧𑀺𑀬𑀁;

𑀮𑀪𑀸𑀫𑀺 𑀲𑀢𑀢𑀁 𑀲𑀩𑁆𑀩𑀁, 𑀲𑀼𑀓𑀢𑀁 𑀓𑀫𑁆𑀫𑀲𑀫𑁆𑀧𑀤𑀁.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀚𑀸𑀢𑀸𑀳𑀁 𑀩𑁆𑀭𑀸𑀳𑁆𑀫𑀡𑁂 𑀓𑀼𑀮𑁂;

𑀲𑀼𑀔𑀼𑀫𑀸𑀮𑀳𑀢𑁆𑀣𑀧𑀸𑀤𑀸, 𑀭𑀫𑀡𑀺𑀬𑁂 𑀦𑀺𑀯𑁂𑀲𑀦𑁂.

‘‘𑀲𑀩𑁆𑀩𑀓𑀸𑀮𑀫𑁆𑀧𑀺 𑀧𑀣𑀯𑀻, 𑀦 𑀧𑀲𑁆𑀲𑀸𑀫𑀦𑀮𑀗𑁆𑀓𑀢𑀁;

𑀘𑀺𑀓𑁆𑀔𑀮𑁆𑀮𑀪𑀽𑀫𑀺𑀁 𑀅𑀲𑀼𑀘𑀺𑀁, 𑀦 𑀧𑀲𑁆𑀲𑀸𑀫𑀺 𑀓𑀼𑀤𑀸𑀘𑀦𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑀻 𑁋

𑁧𑁧.

‘‘𑀲𑀼𑀫𑀼𑀢𑁆𑀢𑀸 𑀲𑀸𑀥𑀼𑀫𑀼𑀢𑁆𑀢𑀸𑀫𑁆𑀳𑀺, 𑀢𑀻𑀳𑀺 𑀔𑀼𑀚𑁆𑀚𑁂𑀳𑀺 𑀫𑀼𑀢𑁆𑀢𑀺𑀬𑀸;

𑀉𑀤𑀼𑀓𑁆𑀔𑀮𑁂𑀦 𑀫𑀼𑀲𑀮𑁂𑀦, 𑀧𑀢𑀺𑀦𑀸 𑀔𑀼𑀚𑁆𑀚𑀓𑁂𑀦 𑀘;

𑀫𑀼𑀢𑁆𑀢𑀸𑀫𑁆𑀳𑀺 𑀚𑀸𑀢𑀺𑀫𑀭𑀡𑀸, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸’’𑀢𑀺. 𑁋 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺;

𑀢𑀢𑁆𑀣 𑀲𑀼𑀫𑀼𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸. 𑀲𑀸𑀥𑀼𑀫𑀼𑀢𑁆𑀢𑀸𑀫𑁆𑀳𑀻𑀢𑀺 𑀲𑀸𑀥𑀼 𑀲𑀫𑁆𑀫𑀤𑁂𑀯 𑀫𑀼𑀢𑁆𑀢𑀸 𑀅𑀫𑁆𑀳𑀺. 𑀓𑀼𑀢𑁄 𑀧𑀦 𑀲𑀼𑀫𑀼𑀢𑁆𑀢𑀸 𑀲𑀸𑀥𑀼𑀫𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀻𑀳𑀺 𑀔𑀼𑀚𑁆𑀚𑁂𑀳𑀺 𑀫𑀼𑀢𑁆𑀢𑀺𑀬𑀸’’𑀢𑀺, 𑀢𑀻𑀳𑀺 𑀯𑀗𑁆𑀓𑀓𑁂𑀳𑀺 𑀧𑀭𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑀻 ‘‘𑀉𑀤𑀼𑀓𑁆𑀔𑀮𑁂𑀦 𑀫𑀼𑀲𑀮𑁂𑀦, 𑀧𑀢𑀺𑀦𑀸 𑀔𑀼𑀚𑁆𑀚𑀓𑁂𑀦 𑀘𑀸’’𑀢𑀺 𑀆𑀳. 𑀉𑀤𑀼𑀓𑁆𑀔𑀮𑁂 𑀳𑀺 𑀥𑀜𑁆𑀜𑀁 𑀧𑀓𑁆𑀔𑀺𑀧𑀦𑁆𑀢𑀺𑀬𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀺𑀬𑀸 𑀫𑀼𑀲𑀮𑁂𑀦 𑀓𑁄𑀝𑁆𑀝𑁂𑀦𑁆𑀢𑀺𑀬𑀸 𑀘 𑀧𑀺𑀝𑁆𑀞𑀺 𑀑𑀦𑀸𑀫𑁂𑀢𑀩𑁆𑀩𑀸 𑀳𑁄𑀢𑀻𑀢𑀺 𑀔𑀼𑀚𑁆𑀚𑀓𑀭𑀡𑀳𑁂𑀢𑀼𑀢𑀸𑀬 𑀢𑀤𑀼𑀪𑀬𑀁 ‘‘𑀔𑀼𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀺𑀓𑁄 𑀧𑀦𑀲𑁆𑀲𑀸 𑀔𑀼𑀚𑁆𑀚𑁄 𑀏𑀯. 𑀇𑀤𑀸𑀦𑀺 𑀬𑀲𑁆𑀲𑀸 𑀫𑀼𑀢𑁆𑀢𑀺𑀬𑀸 𑀦𑀺𑀤𑀲𑁆𑀲𑀦𑀯𑀲𑁂𑀦 𑀢𑀻𑀳𑀺 𑀔𑀼𑀚𑁆𑀚𑁂𑀳𑀺 𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑀻 ‘‘𑀫𑀼𑀢𑁆𑀢𑀸𑀫𑁆𑀳𑀺 𑀚𑀸𑀢𑀺𑀫𑀭𑀡𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀦 𑀓𑁂𑀯𑀮𑀫𑀳𑀁 𑀢𑀻𑀳𑀺 𑀔𑀼𑀚𑁆𑀚𑁂𑀳𑀺 𑀏𑀯 𑀫𑀼𑀢𑁆𑀢𑀸, 𑀅𑀣 𑀔𑁄 𑀲𑀩𑁆𑀩𑀲𑁆𑀫𑀸 𑀚𑀸𑀢𑀺𑀫𑀭𑀡𑀸𑀧𑀺, 𑀬𑀲𑁆𑀫𑀸 𑀲𑀩𑁆𑀩𑀲𑁆𑀲𑀸𑀧𑀺 𑀪𑀯𑀲𑁆𑀲 𑀦𑁂𑀢𑁆𑀢𑀺 𑀦𑀸𑀬𑀺𑀓𑀸 𑀢𑀡𑁆𑀳𑀸 𑀅𑀕𑁆𑀕𑀫𑀕𑁆𑀕𑁂𑀦 𑀫𑀬𑀸 𑀲𑀫𑀼𑀕𑁆𑀖𑀸𑀝𑀺𑀢𑀸𑀢𑀺.

𑀫𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀙𑀦𑁆𑀤𑀚𑀸𑀢𑀸 𑀅𑀯𑀲𑀸𑀬𑀻𑀢𑀺 𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀺𑀬𑀸 𑀕𑀸𑀣𑀸. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀧𑀭𑀸𑀥𑀻𑀦𑀯𑀼𑀢𑁆𑀢𑀺𑀓𑀸 𑀳𑀼𑀢𑁆𑀯𑀸 𑀚𑀻𑀯𑀦𑁆𑀢𑀻 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀧𑀽𑀚𑀸𑀲𑀓𑁆𑀓𑀸𑀭𑀧𑀼𑀩𑁆𑀩𑀓𑀁 𑀤𑀸𑀦𑀁 𑀤𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀸𑀢𑀺𑀓𑀸𑀦𑀁 𑀓𑀫𑁆𑀫𑀺𑀓𑀲𑁆𑀲 𑀕𑁂𑀳𑁂 𑀯𑀲𑀫𑀸𑀦𑀸 𑀤𑀸𑀦𑀁 𑀧𑀝𑀺𑀘𑁆𑀘 ‘‘𑀏𑀓𑀁 𑀤𑁂𑀳𑀻’’𑀢𑀺 𑀲𑀸𑀫𑀺𑀓𑁂𑀦 𑀯𑀼𑀢𑁆𑀢𑁂 𑀤𑁆𑀯𑁂 𑀤𑁂𑀦𑁆𑀢𑀻, 𑀩𑀳𑀼𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀓𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀯𑀺𑀲𑀸𑀔𑀲𑁆𑀲 𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀢𑀸.

𑀅𑀣𑁂𑀓𑀤𑀺𑀯𑀲𑀁 𑀯𑀺𑀲𑀸𑀔𑁄 𑀲𑁂𑀝𑁆𑀞𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀦𑁆𑀢𑁄 𑀲𑁄𑀧𑀸𑀦𑀫𑀢𑁆𑀣𑀓𑁂 𑀞𑀺𑀢𑀸𑀬 𑀥𑀫𑁆𑀫𑀤𑀺𑀦𑁆𑀦𑀸𑀬 𑀧𑀲𑀸𑀭𑀺𑀢𑀳𑀢𑁆𑀣𑀁 𑀅𑀦𑀸𑀮𑀫𑁆𑀩𑀺𑀢𑁆𑀯𑀸𑀯 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑁄𑀧𑀺 𑀢𑀼𑀡𑁆𑀳𑀻𑀪𑀽𑀢𑁄𑀯 𑀪𑀼𑀜𑁆𑀚𑀺. 𑀥𑀫𑁆𑀫𑀤𑀺𑀦𑁆𑀦𑀸 𑀢𑀁 𑀉𑀧𑀥𑀸𑀭𑁂𑀢𑁆𑀯𑀸, ‘‘𑀅𑀬𑁆𑀬𑀧𑀼𑀢𑁆𑀢, 𑀓𑀲𑁆𑀫𑀸 𑀢𑁆𑀯𑀁 𑀅𑀚𑁆𑀚 𑀫𑀫 𑀳𑀢𑁆𑀣𑀁 𑀦𑀸𑀮𑀫𑁆𑀩𑀺, 𑀪𑀼𑀜𑁆𑀚𑀫𑀸𑀦𑁄𑀧𑀺 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺, 𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀫𑀬𑁆𑀳𑀁 𑀤𑁄𑀲𑁄’’𑀢𑀺 𑀆𑀳. 𑀯𑀺𑀲𑀸𑀔𑁄 ‘‘𑀥𑀫𑁆𑀫𑀤𑀺𑀦𑁆𑀦𑁂, 𑀦 𑀢𑁂 𑀤𑁄𑀲𑁄 𑀅𑀢𑁆𑀣𑀺, 𑀅𑀳𑀁 𑀧𑀦 𑀅𑀚𑁆𑀚 𑀧𑀝𑁆𑀞𑀸𑀬 𑀇𑀢𑁆𑀣𑀺𑀲𑀭𑀻𑀭𑀁 𑀨𑀼𑀲𑀺𑀢𑀼𑀁 𑀆𑀳𑀸𑀭𑁂 𑀘 𑀮𑁄𑀮𑀪𑀸𑀯𑀁 𑀓𑀸𑀢𑀼𑀁 𑀅𑀦𑀭𑀳𑁄, 𑀢𑀸𑀤𑀺𑀲𑁄 𑀫𑀬𑀸 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄. 𑀢𑁆𑀯𑀁 𑀧𑀦 𑀲𑀘𑁂 𑀇𑀘𑁆𑀙𑀲𑀺, 𑀇𑀫𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀯𑀲. 𑀦𑁄 𑀘𑁂 𑀇𑀘𑁆𑀙𑀲𑀺, 𑀬𑀢𑁆𑀢𑀓𑁂𑀦 𑀥𑀦𑁂𑀦 𑀢𑁂 𑀅𑀢𑁆𑀣𑁄, 𑀢𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀓𑀼𑀮𑀖𑀭𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳. ‘‘𑀦𑀸𑀳𑀁, 𑀅𑀬𑁆𑀬𑀧𑀼𑀢𑁆𑀢, 𑀢𑀬𑀸 𑀯𑀦𑁆𑀢𑀯𑀫𑀦𑀁 𑀆𑀘𑀫𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦𑀸𑀳𑀻’’𑀢𑀺. 𑀯𑀺𑀲𑀸𑀔𑁄 ‘‘𑀲𑀸𑀥𑀼, 𑀥𑀫𑁆𑀫𑀤𑀺𑀦𑁆𑀦𑁂’’𑀢𑀺 𑀢𑀁 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀧𑁂𑀲𑁂𑀲𑀺. 𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀬𑁆𑀬𑀸, 𑀆𑀓𑀺𑀡𑁆𑀡𑀝𑁆𑀞𑀸𑀦𑁂 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀦 𑀭𑀫𑀢𑀺, 𑀕𑀸𑀫𑀓𑀸𑀯𑀸𑀲𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀕𑀸𑀫𑀓𑀸𑀯𑀸𑀲𑀁 𑀦𑀬𑀺𑀁𑀲𑀼. 𑀲𑀸 𑀢𑀢𑁆𑀣 𑀯𑀲𑀦𑁆𑀢𑀻 𑀅𑀢𑀻𑀢𑁂 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀢𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁩.𑁯𑁫-𑁧𑁩𑁦) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀼𑀁;

𑀧𑀭𑀓𑀫𑁆𑀫𑀓𑀸𑀭𑀻 𑀆𑀲𑀺𑀁, 𑀦𑀺𑀧𑀓𑀸 𑀲𑀻𑀮𑀲𑀁𑀯𑀼𑀢𑀸.

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀲𑀼𑀚𑀸𑀢𑁄 𑀅𑀕𑁆𑀕𑀲𑀸𑀯𑀓𑁄;

𑀯𑀺𑀳𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀺𑀡𑁆𑀟𑀧𑀸𑀢𑀸𑀬 𑀕𑀘𑁆𑀙𑀢𑀺.

‘‘𑀖𑀝𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻, 𑀢𑀤𑀸 𑀉𑀤𑀓𑀳𑀸𑀭𑀺𑀓𑀸;

𑀢𑀁 𑀤𑀺𑀲𑁆𑀯𑀸 𑀅𑀤𑀤𑀁 𑀧𑀽𑀧𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯, 𑀦𑀺𑀲𑀺𑀦𑁆𑀦𑁄 𑀧𑀭𑀺𑀪𑀼𑀜𑁆𑀚𑀺 𑀲𑁄;

𑀢𑀢𑁄 𑀦𑁂𑀢𑁆𑀯𑀸𑀦 𑀢𑀁 𑀕𑁂𑀳𑀁, 𑀅𑀤𑀸𑀲𑀺𑀁 𑀢𑀲𑁆𑀲 𑀪𑁄𑀚𑀦𑀁.

‘‘𑀢𑀢𑁄 𑀫𑁂 𑀅𑀬𑁆𑀬𑀓𑁄 𑀢𑀼𑀝𑁆𑀞𑁄, 𑀅𑀓𑀭𑀻 𑀲𑀼𑀡𑀺𑀲𑀁 𑀲𑀓𑀁;

𑀲𑀲𑁆𑀲𑀼𑀬𑀸 𑀲𑀳 𑀕𑀦𑁆𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑀬𑀺𑀁.

‘‘𑀢𑀤𑀸 𑀲𑁄 𑀥𑀫𑁆𑀫𑀓𑀣𑀺𑀓𑀁, 𑀪𑀺𑀓𑁆𑀔𑀼𑀦𑀺𑀁 𑀧𑀭𑀺𑀓𑀺𑀢𑁆𑀢𑀬𑀁;

𑀞𑀧𑁂𑀲𑀺 𑀏𑀢𑀤𑀕𑁆𑀕𑀫𑁆𑀳𑀺, 𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀅𑀳𑀁.

‘‘𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀲𑀼𑀕𑀢𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

‘‘𑀢𑀢𑁄 𑀫𑀁 𑀲𑀼𑀕𑀢𑁄 𑀆𑀳, 𑀖𑀦𑀦𑀺𑀦𑁆𑀦𑀸𑀤𑀲𑀼𑀲𑁆𑀲𑀭𑁄;

𑀫𑀫𑀼𑀧𑀝𑁆𑀞𑀸𑀦𑀦𑀺𑀭𑀢𑁂, 𑀲𑀲𑀗𑁆𑀖𑀧𑀭𑀺𑀯𑁂𑀲𑀺𑀓𑁂.

‘‘𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀬𑀼𑀢𑁆𑀢𑁂, 𑀕𑀼𑀡𑀯𑀤𑁆𑀥𑀺𑀢𑀫𑀸𑀦𑀲𑁂;

𑀪𑀤𑁆𑀤𑁂 𑀪𑀯𑀲𑁆𑀲𑀼 𑀫𑀼𑀤𑀺𑀢𑀸, 𑀮𑀘𑁆𑀙𑀲𑁂 𑀧𑀡𑀺𑀥𑀻𑀨𑀮𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀥𑀫𑁆𑀫𑀤𑀺𑀦𑁆𑀦𑀸𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀫𑀳𑀸𑀫𑀼𑀦𑀺𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀙𑀝𑁆𑀞𑀸 𑀢𑀲𑁆𑀲𑀸𑀲𑀳𑀁 𑀥𑀻𑀢𑀸, 𑀲𑀼𑀥𑀫𑁆𑀫𑀸 𑀇𑀢𑀺 𑀯𑀺𑀲𑁆𑀲𑀼𑀢𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢 𑀥𑀻𑀢𑀭𑁄.

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀧𑀝𑀸𑀘𑀸𑀭𑀸 𑀘 𑀓𑀼𑀡𑁆𑀟𑀮𑀸;

𑀕𑁄𑀢𑀫𑀻 𑀘 𑀅𑀳𑀜𑁆𑀘𑁂𑀯, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀨𑀻𑀢𑁂, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑁂.

‘‘𑀬𑀤𑀸 𑀭𑀽𑀧𑀕𑀼𑀡𑀽𑀧𑁂𑀢𑀸, 𑀧𑀞𑀫𑁂 𑀬𑁄𑀩𑁆𑀩𑀦𑁂 𑀞𑀺𑀢𑀸;

𑀢𑀤𑀸 𑀧𑀭𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀯𑀲𑀺𑀁 𑀲𑀼𑀔𑀲𑀫𑀧𑁆𑀧𑀺𑀢𑀸.

‘‘𑀉𑀧𑁂𑀢𑁆𑀯𑀸 𑀮𑁄𑀓𑀲𑀭𑀡𑀁, 𑀲𑀼𑀡𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁;

𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄, 𑀲𑀸𑀫𑀺𑀓𑁄 𑀫𑁂 𑀲𑀼𑀩𑀼𑀤𑁆𑀥𑀺𑀫𑀸.

‘‘𑀢𑀤𑀸𑀳𑀁 𑀅𑀦𑀼𑀚𑀸𑀦𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀢𑀤𑀸 𑀉𑀧𑀸𑀲𑀓𑁄 𑀲𑁄 𑀫𑀁, 𑀉𑀧𑀕𑀦𑁆𑀢𑁆𑀯𑀸 𑀅𑀧𑀼𑀘𑁆𑀙𑀣;

𑀕𑀫𑁆𑀪𑀻𑀭𑁂 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀢𑁂 𑀲𑀩𑁆𑀩𑁂 𑀩𑁆𑀬𑀸𑀓𑀭𑀺𑀁 𑀅𑀳𑀁.

‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀪𑀺𑀓𑁆𑀔𑀼𑀦𑀺𑀁 𑀥𑀫𑁆𑀫𑀓𑀣𑀺𑀓𑀁, 𑀦𑀸𑀜𑁆𑀜𑀁 𑀧𑀲𑁆𑀲𑀸𑀫𑀺 𑀏𑀤𑀺𑀲𑀺𑀁.

‘‘𑀥𑀫𑁆𑀫𑀤𑀺𑀦𑁆𑀦𑀸 𑀬𑀣𑀸 𑀥𑀻𑀭𑀸, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄;

𑀏𑀯𑀸𑀳𑀁 𑀧𑀡𑁆𑀟𑀺𑀢𑀸 𑀳𑁄𑀫𑀺, 𑀦𑀸𑀬𑀓𑁂𑀦𑀸𑀦𑀼𑀓𑀫𑁆𑀧𑀺𑀢𑀸.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀧𑀭𑀘𑀺𑀢𑁆𑀢𑀸𑀦𑀺 𑀚𑀸𑀦𑀸𑀫𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀯𑀺𑀲𑀼𑀤𑁆𑀥𑀸𑀲𑀺𑀁 𑀲𑀼𑀦𑀺𑀫𑁆𑀫𑀮𑀸.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁯𑁫-𑁧𑁩𑁦);

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 ‘‘𑀫𑀬𑁆𑀳𑀁 𑀫𑀦𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀇𑀤𑀸𑀦𑀺 𑀇𑀥 𑀯𑀲𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀭𑀸𑀚𑀕𑀳𑀫𑁂𑀯 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀩𑀳𑀽 𑀘 𑀫𑁂 𑀜𑀸𑀢𑀓𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑀫𑁂𑀯 𑀧𑀘𑁆𑀘𑀸𑀕𑀢𑀸. 𑀯𑀺𑀲𑀸𑀔𑁄 𑀢𑀲𑁆𑀲𑀸 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀅𑀥𑀺𑀕𑀫𑀁 𑀯𑀻𑀫𑀁𑀲𑀦𑁆𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀥𑀫𑁆𑀫𑀤𑀺𑀦𑁆𑀦𑀸 𑀲𑀼𑀦𑀺𑀲𑀺𑀢𑁂𑀦 𑀲𑀢𑁆𑀣𑁂𑀦 𑀓𑀼𑀫𑀼𑀤𑀦𑀸𑀴𑁂 𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀯𑀺𑀲𑀸𑀔𑁄 𑀲𑀩𑁆𑀩𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀧𑀡𑁆𑀟𑀺𑀢𑀸, 𑀯𑀺𑀲𑀸𑀔, 𑀥𑀫𑁆𑀫𑀤𑀺𑀦𑁆𑀦𑀸 𑀪𑀺𑀓𑁆𑀔𑀼𑀦𑀻’’𑀢𑀺𑀆𑀤𑀺𑀦𑀸 𑀢𑀁 𑀧𑀲𑀁𑀲𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀩𑁆𑀬𑀸𑀓𑀢𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸 𑀢𑀫𑁂𑀯 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁪𑁬𑁦) 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀢𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀬𑀤𑀸 𑀧𑀦 𑀲𑀸 𑀢𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀯𑀲𑀦𑁆𑀢𑀻 𑀳𑁂𑀝𑁆𑀞𑀺𑀫𑀫𑀕𑁆𑀕𑁂 𑀅𑀥𑀺𑀕𑀦𑁆𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀢𑀤𑀸 𑁋

𑁧𑁨.

‘‘𑀙𑀦𑁆𑀤𑀚𑀸𑀢𑀸 𑀅𑀯𑀲𑀸𑀬𑀻, 𑀫𑀦𑀲𑀸 𑀘 𑀨𑀼𑀝𑀸 𑀲𑀺𑀬𑀸;

𑀓𑀸𑀫𑁂𑀲𑀼 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸, 𑀉𑀤𑁆𑀥𑀁𑀲𑁄𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀙𑀦𑁆𑀤𑀚𑀸𑀢𑀸𑀢𑀺 𑀅𑀕𑁆𑀕𑀨𑀮𑀢𑁆𑀣𑀁 𑀚𑀸𑀢𑀘𑁆𑀙𑀦𑁆𑀤𑀸. 𑀅𑀯𑀲𑀸𑀬𑀻𑀢𑀺 𑀅𑀯𑀲𑀸𑀬𑁄 𑀯𑀼𑀘𑁆𑀘𑀢𑀺 𑀅𑀯𑀲𑀸𑀦𑀁 𑀦𑀺𑀝𑁆𑀞𑀸𑀦𑀁, 𑀢𑀫𑁆𑀧𑀺 𑀓𑀸𑀫𑁂𑀲𑀼 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 ‘‘𑀉𑀤𑁆𑀥𑀁𑀲𑁄𑀢𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀲𑀫𑀡𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀬𑀲𑁆𑀲 𑀓𑀲𑁆𑀲𑀘𑀺, 𑀢𑀲𑁆𑀫𑀸 𑀧𑀤𑀤𑁆𑀯𑀬𑁂𑀦𑀸𑀧𑀺 𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀫𑀦𑀲𑀸 𑀘 𑀨𑀼𑀝𑀸 𑀲𑀺𑀬𑀸𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀢𑀻𑀳𑀺 𑀫𑀕𑁆𑀕𑀘𑀺𑀢𑁆𑀢𑁂𑀳𑀺 𑀦𑀺𑀩𑁆𑀩𑀸𑀦𑀁 𑀨𑀼𑀝𑀸 𑀨𑀼𑀲𑀺𑀢𑀸 𑀪𑀯𑁂𑀬𑁆𑀬. 𑀓𑀸𑀫𑁂𑀲𑀼 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀲𑁂𑀦 𑀓𑀸𑀫𑁂𑀲𑀼 𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸. 𑀉𑀤𑁆𑀥𑀁𑀲𑁄𑀢𑀸𑀢𑀺 𑀉𑀤𑁆𑀥𑀫𑁂𑀯 𑀫𑀕𑁆𑀕𑀲𑁄𑀢𑁄 𑀲𑀁𑀲𑀸𑀭𑀲𑁄𑀢𑁄 𑀘 𑀏𑀢𑀺𑀲𑁆𑀲𑀸𑀢𑀺 𑀉𑀤𑁆𑀥𑀁𑀲𑁄𑀢𑀸. 𑀅𑀦𑀸𑀕𑀸𑀫𑀺𑀦𑁄 𑀳𑀺 𑀬𑀣𑀸 𑀅𑀕𑁆𑀕𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁄, 𑀏𑀯𑀁 𑀅𑀯𑀺𑀳𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 𑀬𑀸𑀯 𑀅𑀓𑀦𑀺𑀝𑁆𑀞𑀸 𑀉𑀤𑁆𑀥𑀫𑁂𑀯 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺.

𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀯𑀺𑀲𑀸𑀔𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀦𑁆𑀢𑀺 𑀯𑀺𑀲𑀸𑀔𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸 𑀯𑀢𑁆𑀣𑀼 𑀥𑀻𑀭𑀸𑀣𑁂𑀭𑀺𑀬𑀸𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀲𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀻 𑁋

𑁧𑁩.

‘‘𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀣𑀸’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀦𑁆𑀢𑀺 𑀩𑀼𑀤𑁆𑀥𑀲𑀸𑀲𑀦𑀁 𑀑𑀯𑀸𑀤𑀅𑀦𑀼𑀲𑀺𑀝𑁆𑀞𑀺𑀁 𑀓𑀭𑁄𑀣, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀣𑀸𑀢𑀺 𑀅𑀢𑁆𑀣𑁄. 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀻𑀢𑀺 𑀅𑀦𑀼𑀲𑀺𑀝𑁆𑀞𑀺𑀁 𑀓𑀢𑁆𑀯𑀸 𑀓𑀭𑀡𑀳𑁂𑀢𑀼 𑀦 𑀅𑀦𑀼𑀢𑀧𑁆𑀧𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀤𑁂𑀯 𑀅𑀥𑀺𑀧𑁆𑀧𑀸𑀬𑀸𑀦𑀁 𑀲𑀫𑀺𑀚𑁆𑀛𑀦𑀢𑁄. 𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀣𑀸𑀢𑀺 𑀇𑀤𑀁 𑀬𑀲𑁆𑀫𑀸 𑀲𑀬𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀭𑀳𑁄 𑀦𑀺𑀲𑀺𑀦𑁆𑀦𑀸 𑀲𑀤𑀢𑁆𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑀺, 𑀢𑀲𑁆𑀫𑀸 𑀢𑀢𑁆𑀣 𑀅𑀜𑁆𑀜𑁂𑀧𑀺 𑀦𑀺𑀬𑁄𑀚𑁂𑀦𑁆𑀢𑀻 𑀅𑀯𑁄𑀘.

𑀯𑀺𑀲𑀸𑀔𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀲𑀼𑀫𑀦𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀥𑀸𑀢𑀼𑀬𑁄 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸𑀢𑀺 𑀲𑀼𑀫𑀦𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸 𑀯𑀢𑁆𑀣𑀼 𑀢𑀺𑀲𑁆𑀲𑀸𑀣𑁂𑀭𑀺𑀬𑀸 𑀯𑀢𑁆𑀣𑀼𑀲𑀤𑀺𑀲𑀁. 𑀇𑀫𑀺𑀲𑁆𑀲𑀸𑀧𑀺 𑀳𑀺 𑀲𑀢𑁆𑀣𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

𑁧𑁪.

‘‘𑀥𑀸𑀢𑀼𑀬𑁄 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸, 𑀫𑀸 𑀚𑀸𑀢𑀺𑀁 𑀧𑀼𑀦𑀭𑀸𑀕𑀫𑀺;

𑀪𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺. 𑁋

𑀇𑀫𑀁 𑀕𑀸𑀣𑀫𑀸𑀳. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀢𑀢𑁆𑀣 𑀥𑀸𑀢𑀼𑀬𑁄 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸𑀢𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀘𑀓𑁆𑀔𑀸𑀤𑀺𑀥𑀸𑀢𑀼𑀬𑁄 𑀇𑀢𑀭𑀸𑀧𑀺 𑀘 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀸𑀤𑀺𑀦𑀸 ‘‘𑀤𑀼𑀓𑁆𑀔𑀸’’𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸. 𑀫𑀸 𑀚𑀸𑀢𑀺𑀁 𑀧𑀼𑀦𑀭𑀸𑀕𑀫𑀻𑀢𑀺 𑀧𑀼𑀦 𑀚𑀸𑀢𑀺𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀁 𑀫𑀸 𑀉𑀧𑀕𑀘𑁆𑀙𑀺. 𑀪𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀓𑀸𑀫𑀪𑀯𑀸𑀤𑀺𑀓𑁂 𑀲𑀩𑁆𑀩𑀲𑁆𑀫𑀺𑀁 𑀪𑀯𑁂 𑀢𑀡𑁆𑀳𑀸𑀙𑀦𑁆𑀤𑀁 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀧𑀚𑀳𑀺𑀢𑁆𑀯𑀸. 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻𑀢𑀺 𑀲𑀩𑁆𑀩𑀲𑁄 𑀧𑀳𑀻𑀦𑀓𑀺𑀮𑁂𑀲𑀢𑀸𑀬 𑀦𑀺𑀩𑁆𑀩𑀼𑀢𑀸 𑀯𑀺𑀳𑀭𑀺𑀲𑁆𑀲𑀲𑀺.

𑀏𑀢𑁆𑀣 𑀘 ‘‘𑀥𑀸𑀢𑀼𑀬𑁄 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸 𑀤𑀲𑁆𑀲𑀺𑀢𑀸. ‘‘𑀪𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀫𑀕𑁆𑀕𑁄, ‘‘𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺 𑀇𑀫𑀺𑀦𑀸 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼, ‘‘𑀫𑀸 𑀚𑀸𑀢𑀺𑀁 𑀧𑀼𑀦𑀭𑀸𑀕𑀫𑀻’’𑀢𑀺 𑀇𑀫𑀺𑀦𑀸 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀼𑀫𑀦𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀉𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀓𑀸𑀬𑁂𑀦 𑀲𑀁𑀯𑀼𑀢𑀸 𑀆𑀲𑀺𑀦𑁆𑀢𑀺 𑀉𑀢𑁆𑀢𑀭𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸𑀧𑀺 𑀯𑀢𑁆𑀣𑀼 𑀢𑀺𑀲𑁆𑀲𑀸𑀣𑁂𑀭𑀺𑀬𑀸 𑀯𑀢𑁆𑀣𑀼𑀲𑀤𑀺𑀲𑀁. 𑀲𑀸𑀧𑀺 𑀳𑀺 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀭𑁄𑀥𑀪𑀽𑀢𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸 𑀑𑀪𑀸𑀲𑀕𑀸𑀣𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀦 𑁋

𑁧𑁫.

‘‘𑀓𑀸𑀬𑁂𑀦 𑀲𑀁𑀯𑀼𑀢𑀸 𑀆𑀲𑀺𑀁, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀉𑀤𑀸𑀦𑀯𑀲𑁂𑀦 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀓𑀸𑀬𑁂𑀦 𑀲𑀁𑀯𑀼𑀢𑀸 𑀆𑀲𑀺𑀦𑁆𑀢𑀺 𑀓𑀸𑀬𑀺𑀓𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑀸 𑀅𑀳𑁄𑀲𑀺𑀁. 𑀯𑀸𑀘𑀸𑀬𑀸𑀢𑀺 𑀯𑀸𑀘𑀲𑀺𑀓𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑀸 𑀆𑀲𑀺𑀦𑁆𑀢𑀺 𑀬𑁄𑀚𑀦𑀸, 𑀧𑀤𑀤𑁆𑀯𑀬𑁂𑀦𑀸𑀧𑀺 𑀲𑀻𑀮𑀲𑀁𑀯𑀭𑀫𑀸𑀳. 𑀉𑀤𑀸𑀢𑀺 𑀅𑀣. 𑀘𑁂𑀢𑀲𑀸𑀢𑀺 𑀲𑀫𑀸𑀥𑀺𑀘𑀺𑀢𑁆𑀢𑁂𑀦, 𑀏𑀢𑁂𑀦 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀫𑀸𑀳. 𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳𑀸𑀢𑀺 𑀲𑀸𑀦𑀼𑀲𑀬𑀁, 𑀲𑀳 𑀯𑀸 𑀅𑀯𑀺𑀚𑁆𑀚𑀸𑀬 𑀢𑀡𑁆𑀳𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀅𑀯𑀺𑀚𑁆𑀚𑀸𑀬 𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂 𑀪𑀯𑀢𑁆𑀢𑀬𑁂 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺.

𑀅𑀧𑀭𑁄 𑀦𑀬𑁄 𑁋 𑀓𑀸𑀬𑁂𑀦 𑀲𑀁𑀯𑀼𑀢𑀸𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀲𑀩𑁆𑀩𑀲𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑁆𑀲 𑀧𑀳𑀸𑀦𑀸 𑀫𑀕𑁆𑀕𑀲𑀁𑀯𑀭𑁂𑀦𑁂𑀯 𑀓𑀸𑀬𑁂𑀦 𑀲𑀁𑀯𑀼𑀢𑀸 𑀆𑀲𑀺𑀁. 𑀯𑀸𑀘𑀸𑀬𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀬 𑀲𑀩𑁆𑀩𑀲𑁄 𑀫𑀺𑀘𑁆𑀙𑀸𑀯𑀸𑀘𑀸𑀬 𑀧𑀳𑀸𑀦𑀸 𑀫𑀕𑁆𑀕𑀲𑀁𑀯𑀭𑁂𑀦𑁂𑀯 𑀯𑀸𑀘𑀸𑀬 𑀲𑀁𑀯𑀼𑀢𑀸 𑀆𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀘𑁂𑀢𑀲𑀸𑀢𑀺 𑀲𑀫𑀸𑀥𑀺𑀦𑀸. 𑀘𑁂𑀢𑁄𑀲𑀻𑀲𑁂𑀦 𑀳𑁂𑀢𑁆𑀣 𑀲𑀫𑁆𑀫𑀸𑀲𑀫𑀸𑀥𑀺 𑀯𑀼𑀢𑁆𑀢𑁄, 𑀲𑀫𑁆𑀫𑀸𑀲𑀫𑀸𑀥𑀺𑀕𑁆𑀕𑀳𑀡𑁂𑀦𑁂𑀯 𑀫𑀕𑁆𑀕𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀫𑀕𑁆𑀕𑀥𑀫𑁆𑀫𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺, 𑀫𑀕𑁆𑀕𑀲𑀁𑀯𑀭𑁂𑀦 𑀅𑀪𑀺𑀚𑁆𑀛𑀸𑀤𑀺𑀓𑀲𑁆𑀲 𑀅𑀲𑀁𑀯𑀭𑀲𑁆𑀲 𑀅𑀦𑀯𑀲𑁂𑀲𑀢𑁄 𑀧𑀳𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳𑀸’’𑀢𑀺. 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀼𑀢𑀸 𑀅𑀫𑁆𑀳𑀻𑀢𑀺.

𑀉𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑀼𑀫𑀦𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀼𑀔𑀁 𑀢𑁆𑀯𑀁 𑀯𑀼𑀟𑁆𑀠𑀺𑀓𑁂 𑀲𑁂𑀳𑀻𑀢𑀺 𑀲𑀼𑀫𑀦𑀸𑀬 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀸𑀬 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀫𑀳𑀸𑀓𑁄𑀲𑀮𑀭𑀜𑁆𑀜𑁄 𑀪𑀕𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀲𑀢𑁆𑀣𑀸𑀭𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 ‘‘𑀘𑀢𑁆𑀢𑀸𑀭𑁄 𑀔𑁄 𑀫𑁂, 𑀫𑀳𑀸𑀭𑀸𑀚, 𑀤𑀳𑀭𑀸𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁧𑁧𑁨) 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀮𑀤𑁆𑀥𑀧𑁆𑀧𑀲𑀸𑀤𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑀼𑀓𑀸𑀫𑀸𑀧𑀺 ‘‘𑀅𑀬𑁆𑀬𑀺𑀓𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀭𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀬𑁆𑀬𑀺𑀓𑀸𑀬 𑀓𑀸𑀮𑀗𑁆𑀓𑀢𑀸𑀬 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀳𑀕𑁆𑀖𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀜𑀸𑀡𑀧𑀭𑀺𑀧𑀸𑀓𑀁 𑀤𑀺𑀲𑁆𑀯𑀸 𑁋

𑁧𑁬.

‘‘𑀲𑀼𑀔𑀁 𑀢𑁆𑀯𑀁 𑀯𑀼𑀟𑁆𑀠𑀺𑀓𑁂 𑀲𑁂𑀳𑀺, 𑀓𑀢𑁆𑀯𑀸 𑀘𑁄𑀴𑁂𑀦 𑀧𑀸𑀭𑀼𑀢𑀸;

𑀉𑀧𑀲𑀦𑁆𑀢𑁄 𑀳𑀺 𑀢𑁂 𑀭𑀸𑀕𑁄, 𑀲𑀻𑀢𑀺𑀪𑀽𑀢𑀸𑀲𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺. 𑀇𑀤𑀫𑁂𑀯 𑀘𑀲𑁆𑀲𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀺, 𑀲𑀸 𑀢𑀸𑀯𑀤𑁂𑀯 𑀧𑀩𑁆𑀩𑀚𑀺. 𑀕𑀸𑀣𑀸𑀬 𑀧𑀦 𑀯𑀼𑀟𑁆𑀠𑀺𑀓𑁂𑀢𑀺 𑀯𑀼𑀟𑁆𑀠𑁂, 𑀯𑀬𑁄𑀯𑀼𑀟𑁆𑀠𑁂𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀲𑀻𑀮𑀸𑀤𑀺𑀕𑀼𑀡𑁂𑀳𑀺𑀧𑀺 𑀯𑀼𑀟𑁆𑀠𑀸, 𑀣𑁂𑀭𑀺𑀬𑀸 𑀯𑀼𑀢𑁆𑀢𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀸𑀤𑁂 𑀲𑀻𑀢𑀺𑀪𑀽𑀢𑀸𑀲𑀺 𑀦𑀺𑀩𑁆𑀩𑀼𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑀼𑀫𑀦𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀥𑀫𑁆𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀧𑀺𑀡𑁆𑀟𑀧𑀸𑀢𑀁 𑀘𑀭𑀺𑀢𑁆𑀯𑀸𑀦𑀸𑀢𑀺 𑀥𑀫𑁆𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀫𑁆𑀪𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀧𑀢𑀺𑀭𑀽𑀧𑀲𑁆𑀲 𑀲𑀸𑀫𑀺𑀓𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑀸𑀫𑀺𑀓𑁂𑀦 𑀅𑀦𑀦𑀼𑀜𑁆𑀜𑀸𑀢𑀸 𑀧𑀘𑁆𑀙𑀸 𑀲𑀸𑀫𑀺𑀓𑁂 𑀓𑀸𑀮𑀗𑁆𑀓𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀏𑀓𑀤𑀺𑀯𑀲𑀁 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀘𑁆𑀙𑀦𑁆𑀢𑀻 𑀧𑀭𑀺𑀧𑀢𑀺𑀢𑁆𑀯𑀸 𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑁋

𑁧𑁭.

‘‘𑀧𑀺𑀡𑁆𑀟𑀧𑀸𑀢𑀁 𑀘𑀭𑀺𑀢𑁆𑀯𑀸𑀦, 𑀤𑀡𑁆𑀟𑀫𑁄𑀮𑀼𑀩𑁆𑀪 𑀤𑀼𑀩𑁆𑀩𑀮𑀸;

𑀯𑁂𑀥𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺, 𑀢𑀢𑁆𑀣𑁂𑀯 𑀦𑀺𑀧𑀢𑀺𑀁 𑀙𑀫𑀸;

𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀓𑀸𑀬𑁂, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂’’𑀢𑀺. 𑁋

𑀉𑀤𑀸𑀦𑀯𑀲𑁂𑀦 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀧𑀺𑀡𑁆𑀟𑀧𑀸𑀢𑀁 𑀘𑀭𑀺𑀢𑁆𑀯𑀸𑀦, 𑀤𑀡𑁆𑀟𑀫𑁄𑀮𑀼𑀩𑁆𑀪𑀸𑀢𑀺 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀬𑀝𑁆𑀞𑀺𑀁 𑀉𑀧𑀢𑁆𑀣𑀫𑁆𑀪𑁂𑀦 𑀦𑀕𑀭𑁂 𑀯𑀺𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀆𑀳𑀺𑀡𑁆𑀟𑀺𑀢𑁆𑀯𑀸. 𑀙𑀫𑀸𑀢𑀺 𑀙𑀫𑀸𑀬𑀁 𑀪𑀽𑀫𑀺𑀬𑀁, 𑀧𑀸𑀤𑀸𑀦𑀁 𑀅𑀯𑀲𑁂𑀦 𑀪𑀽𑀫𑀺𑀬𑀁 𑀦𑀺𑀧𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀓𑀸𑀬𑁂𑀢𑀺 𑀅𑀲𑀼𑀪𑀸𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀢𑀸𑀤𑀻𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀲𑀭𑀻𑀭𑁂 𑀤𑁄𑀲𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸. 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂𑀢𑀺 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀧𑀭𑀢𑁄 𑀧𑀯𑀢𑁆𑀢𑁂𑀳𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀫𑀫 𑀘𑀺𑀢𑁆𑀢𑀁 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀦 𑀫𑀕𑁆𑀕𑀨𑀮𑁂𑀳𑀺 𑀬𑀣𑀸𑀓𑁆𑀓𑀫𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘𑁂𑀯 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘 𑀲𑀩𑁆𑀩𑀲𑁄 𑀯𑀺𑀫𑀼𑀘𑁆𑀘𑀺 𑀯𑀺𑀫𑀼𑀢𑁆𑀢𑀁, 𑀦 𑀤𑀸𑀦𑀺𑀲𑁆𑀲𑀸 𑀯𑀺𑀫𑁄𑀘𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺. 𑀇𑀤𑀫𑁂𑀯 𑀘𑀲𑁆𑀲𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻𑀢𑀺.

𑀥𑀫𑁆𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀲𑀗𑁆𑀖𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀳𑀺𑀢𑁆𑀯𑀸 𑀖𑀭𑁂 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀲𑀗𑁆𑀖𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸 𑀯𑀢𑁆𑀣𑀼 𑀥𑀻𑀭𑀸𑀣𑁂𑀭𑀺𑀬𑀸 𑀯𑀢𑁆𑀣𑀼𑀲𑀤𑀺𑀲𑀁. 𑀕𑀸𑀣𑀸 𑀧𑀦 𑁋

𑁧𑁮.

‘‘𑀳𑀺𑀢𑁆𑀯𑀸 𑀖𑀭𑁂 𑀧𑀩𑁆𑀩𑀚𑀺𑀢𑁆𑀯𑀸, 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑀼𑀁 𑀧𑀺𑀬𑀁;

𑀳𑀺𑀢𑁆𑀯𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀅𑀯𑀺𑀚𑁆𑀚𑀜𑁆𑀘 𑀯𑀺𑀭𑀸𑀚𑀺𑀬;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀉𑀧𑀲𑀦𑁆𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋 𑀕𑀸𑀣𑀁 𑀅𑀪𑀸𑀲𑀺;

𑀢𑀢𑁆𑀣 𑀳𑀺𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀖𑀭𑁂𑀢𑀺 𑀕𑁂𑀳𑀁. 𑀖𑀭𑀲𑀤𑁆𑀤𑁄 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀅𑀪𑀺𑀥𑁂𑀬𑁆𑀬𑁂 𑀓𑀤𑀸𑀘𑀺 𑀩𑀳𑀽𑀲𑀼 𑀩𑀻𑀚𑀁 𑀯𑀺𑀬 𑀭𑀽𑀴𑁆𑀳𑀺𑀯𑀲𑁂𑀦 𑀯𑁄𑀳𑀭𑀻𑀬𑀢𑀺. 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑀼𑀁 𑀧𑀺𑀬𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑁂 𑀧𑀼𑀢𑁆𑀢𑁂 𑀘𑁂𑀯 𑀕𑁄𑀫𑀳𑀺𑀁𑀲𑀸𑀤𑀺𑀓𑁂 𑀧𑀲𑀽 𑀘 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀳𑀸𑀬. 𑀳𑀺𑀢𑁆𑀯𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘𑀸𑀢𑀺 𑀭𑀚𑁆𑀚𑀦𑀲𑀪𑀸𑀯𑀁 𑀭𑀸𑀕𑀁, 𑀤𑀼𑀲𑁆𑀲𑀦𑀲𑀪𑀸𑀯𑀁 𑀤𑁄𑀲𑀜𑁆𑀘 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀅𑀯𑀺𑀚𑁆𑀚𑀜𑁆𑀘 𑀯𑀺𑀭𑀸𑀚𑀺𑀬𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀧𑀼𑀩𑁆𑀩𑀗𑁆𑀕𑀫𑀁 𑀫𑁄𑀳𑀜𑁆𑀘 𑀯𑀺𑀭𑀸𑀚𑁂𑀢𑁆𑀯𑀸 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀗𑁆𑀖𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀧𑀸𑀢𑁄

𑁧. 𑀅𑀪𑀺𑀭𑀽𑀧𑀦𑀦𑁆𑀤𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑀼𑀓𑀦𑀺𑀧𑀸𑀢𑁂 𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀦𑁆𑀢𑀺𑀆𑀤𑀺𑀓𑀸 𑀅𑀪𑀺𑀭𑀽𑀧𑀦𑀦𑁆𑀤𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀕𑀸𑀣𑀸. 𑀅𑀬𑀁 𑀓𑀺𑀭 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀸 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀘𑁂𑀢𑀺𑀬𑀁 𑀭𑀢𑀦𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀼𑀯𑀡𑁆𑀡𑀘𑁆𑀙𑀢𑁆𑀢𑁂𑀦 𑀧𑀽𑀚𑀁 𑀓𑀢𑁆𑀯𑀸, 𑀓𑀸𑀮𑀗𑁆𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀔𑁂𑀫𑀓𑀲𑁆𑀲 𑀲𑀓𑁆𑀓𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀦𑀦𑁆𑀤𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀅𑀢𑁆𑀢𑀪𑀸𑀯𑀲𑁆𑀲 𑀅𑀢𑀺𑀯𑀺𑀬 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀅𑀪𑀺𑀭𑀽𑀧𑀦𑀦𑁆𑀤𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀸𑀬 𑀯𑀸𑀭𑁂𑀬𑁆𑀬𑀤𑀺𑀯𑀲𑁂𑀬𑁂𑀯 𑀯𑀭𑀪𑀽𑀢𑁄 𑀲𑀓𑁆𑀬𑀓𑀼𑀫𑀸𑀭𑁄 𑀓𑀸𑀮𑀫𑀓𑀸𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀓𑀸𑀫𑀁 𑀧𑀩𑁆𑀩𑀸𑀚𑁂𑀲𑀼𑀁.

𑀲𑀸 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀫𑀤𑀸 ‘‘𑀲𑀢𑁆𑀣𑀸 𑀭𑀽𑀧𑀁 𑀯𑀺𑀯𑀡𑁆𑀡𑁂𑀢𑀺 𑀕𑀭𑀳𑀢𑀺 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀭𑀽𑀧𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀻’’𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀪𑀕𑀯𑀸 𑀢𑀲𑁆𑀲𑀸 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀆𑀡𑀸𑀧𑁂𑀲𑀺 ‘‘𑀲𑀩𑁆𑀩𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀑𑀯𑀸𑀤𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺. 𑀲𑀸 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑀁 𑀧𑁂𑀲𑁂𑀲𑀺. 𑀪𑀕𑀯𑀸 ‘‘𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀅𑀢𑁆𑀢𑀦𑀸𑀯 𑀆𑀕𑀦𑁆𑀢𑀩𑁆𑀩𑀁, 𑀦 𑀅𑀜𑁆𑀜𑀸 𑀧𑁂𑀲𑁂𑀢𑀩𑁆𑀩𑀸’’𑀢𑀺 𑀆𑀳. 𑀲𑀸 𑀲𑀢𑁆𑀣𑀼 𑀆𑀡𑀁 𑀮𑀗𑁆𑀖𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀪𑀕𑀯𑀸 𑀇𑀤𑁆𑀥𑀺𑀬𑀸 𑀏𑀓𑀁 𑀅𑀪𑀺𑀭𑀽𑀧𑀁 𑀇𑀢𑁆𑀣𑀺𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀧𑀼𑀦 𑀚𑀭𑀸𑀚𑀺𑀡𑁆𑀡𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑁋

𑁧𑁯.

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁨𑁦.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀢𑀸𑀲𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄 𑀏𑀯. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀪𑀺𑀭𑀽𑀧𑀦𑀦𑁆𑀤𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 𑁋

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀩𑀦𑁆𑀥𑀼𑀫𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀏𑀓𑀚𑁆𑀛𑀁 𑀘𑀸𑀭𑀬𑀸𑀫𑀳𑀁.

‘‘𑀭𑀳𑁄𑀕𑀢𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀆𑀤𑀸𑀬 𑀕𑀫𑀦𑀻𑀬𑀜𑁆𑀳𑀺, 𑀓𑀼𑀲𑀮𑀁 𑀦𑀢𑁆𑀣𑀺 𑀫𑁂 𑀓𑀢𑀁.

‘‘𑀫𑀳𑀸𑀪𑀺𑀢𑀸𑀧𑀁 𑀓𑀝𑀼𑀓𑀁, 𑀖𑁄𑀭𑀭𑀽𑀧𑀁 𑀲𑀼𑀤𑀸𑀭𑀼𑀡𑀁;

𑀦𑀺𑀭𑀬𑀁 𑀦𑀽𑀦 𑀕𑀘𑁆𑀙𑀸𑀫𑀺, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄.

‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀧𑀳𑀁𑀲𑁂𑀢𑁆𑀯𑀸𑀦 𑀫𑀸𑀦𑀲𑀁;

𑀭𑀸𑀚𑀸𑀦𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀇𑀢𑁆𑀣𑀻 𑀦𑀸𑀫 𑀫𑀬𑀁 𑀤𑁂𑀯, 𑀧𑀼𑀭𑀺𑀲𑀸𑀦𑀼𑀕𑀢𑀸 𑀲𑀤𑀸;

𑀏𑀓𑀁 𑀫𑁂 𑀲𑀫𑀡𑀁 𑀤𑁂𑀳𑀺, 𑀪𑁄𑀚𑀬𑀺𑀲𑁆𑀲𑀸𑀫𑀺 𑀔𑀢𑁆𑀢𑀺𑀬.

‘‘𑀅𑀤𑀸𑀲𑀺 𑀫𑁂 𑀫𑀳𑀸𑀭𑀸𑀚𑀸, 𑀲𑀫𑀡𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀭𑀫𑀦𑁆𑀦𑁂𑀦 𑀧𑀽𑀭𑀬𑀺𑀁.

‘‘𑀧𑀽𑀭𑀬𑀺𑀢𑁆𑀯𑀸 𑀧𑀭𑀫𑀦𑁆𑀦𑀁, 𑀲𑀳𑀲𑁆𑀲𑀕𑁆𑀖𑀦𑀓𑁂𑀦𑀳𑀁;

𑀯𑀢𑁆𑀣𑀬𑀼𑀕𑁂𑀦 𑀙𑀸𑀤𑁂𑀢𑁆𑀯𑀸, 𑀅𑀤𑀸𑀲𑀺𑀁 𑀢𑀼𑀝𑁆𑀞𑀫𑀸𑀦𑀲𑀸.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀲𑀳𑀲𑁆𑀲𑀁 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀳𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀦𑀸𑀦𑀸𑀯𑀺𑀥𑀁 𑀩𑀳𑀼𑀁 𑀧𑀼𑀜𑁆𑀜𑀁, 𑀢𑀲𑁆𑀲 𑀓𑀫𑁆𑀫𑀨𑀮𑀸 𑀢𑀢𑁄.

‘‘𑀉𑀧𑁆𑀧𑀮𑀲𑁆𑀲𑁂𑀯 𑀫𑁂 𑀯𑀡𑁆𑀡𑀸, 𑀅𑀪𑀺𑀭𑀽𑀧𑀸 𑀲𑀼𑀤𑀲𑁆𑀲𑀦𑀸;

𑀇𑀢𑁆𑀣𑀻 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀅𑀪𑀺𑀚𑀸𑀢𑀸 𑀚𑀼𑀢𑀺𑀦𑁆𑀥𑀭𑀸.

‘‘𑀧𑀘𑁆𑀙𑀺𑀫𑁂 𑀪𑀯𑀲𑀫𑁆𑀧𑀢𑁆𑀢𑁂, 𑀅𑀚𑀸𑀬𑀺𑀁 𑀲𑀸𑀓𑀺𑀬𑁂 𑀓𑀼𑀮𑁂;

𑀦𑀸𑀭𑀻𑀲𑀳𑀲𑁆𑀲𑀧𑀸𑀫𑁄𑀓𑁆𑀔𑀸, 𑀲𑀼𑀤𑁆𑀥𑁄𑀤𑀦𑀲𑀼𑀢𑀲𑁆𑀲𑀳𑀁.

‘‘𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀅𑀕𑀸𑀭𑁂𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀲𑀢𑁆𑀢𑀫𑀺𑀁 𑀭𑀢𑁆𑀢𑀺𑀁 𑀲𑀫𑁆𑀧𑀢𑁆𑀯𑀸, 𑀘𑀢𑀼𑀲𑀘𑁆𑀘𑀁 𑀅𑀧𑀸𑀧𑀼𑀡𑀺𑀁.

‘‘𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀜𑁆𑀘 𑀲𑁂𑀦𑀸𑀲𑀦𑀁;

𑀧𑀭𑀺𑀫𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

‘‘𑀬𑀁 𑀫𑀬𑁆𑀳𑀁 𑀧𑀼𑀭𑀺𑀫𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀚𑀦𑀺𑀢𑀁 𑀫𑀼𑀦𑀺;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀭𑀺𑀘𑀺𑀡𑁆𑀡𑀁 𑀩𑀳𑀼𑀁 𑀫𑀬𑀸.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

‘‘𑀤𑀼𑀯𑁂 𑀕𑀢𑀻 𑀧𑀚𑀸𑀦𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀜𑁆𑀜𑀁 𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

‘‘𑀉𑀘𑁆𑀘𑁂 𑀓𑀼𑀮𑁂 𑀧𑀚𑀸𑀦𑀸𑀫𑀺, 𑀢𑀬𑁄 𑀲𑀸𑀮𑁂 𑀫𑀳𑀸𑀥𑀦𑁂;

𑀅𑀜𑁆𑀜𑀁 𑀓𑀼𑀮𑀁 𑀦 𑀚𑀸𑀦𑀸𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

‘‘𑀪𑀯𑀸𑀪𑀯𑁂 𑀲𑀁𑀲𑀭𑀺𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑀸;

𑀅𑀫𑀦𑀸𑀧𑀁 𑀦 𑀧𑀲𑁆𑀲𑀸𑀫𑀺, 𑀲𑁄𑀫𑀦𑀲𑁆𑀲𑀓𑀢𑀁 𑀨𑀮𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑀫 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀦 𑀲𑀸 𑀲𑀬𑀫𑁆𑀧𑀺 𑀉𑀤𑀸𑀦𑀯𑀲𑁂𑀦 𑀢𑀸𑀬𑁂𑀯 𑀕𑀸𑀣𑀸 𑀅𑀪𑀸𑀲𑀺, 𑀇𑀤𑀫𑁂𑀯 𑀘𑀲𑁆𑀲𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻𑀢𑀺.

𑀅𑀪𑀺𑀭𑀽𑀧𑀦𑀦𑁆𑀤𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀚𑁂𑀦𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀆𑀤𑀺𑀓𑀸 𑀚𑁂𑀦𑁆𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸 𑀅𑀢𑀻𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀯𑀢𑁆𑀣𑀼 𑀅𑀪𑀺𑀭𑀽𑀧𑀦𑀦𑁆𑀤𑀸𑀯𑀢𑁆𑀣𑀼𑀲𑀤𑀺𑀲𑀁. 𑀅𑀬𑀁 𑀧𑀦 𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀁 𑀯𑀺𑀲𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀯𑀲𑁂𑀦 𑁋

𑁨𑁧.

‘‘𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀫𑀕𑁆𑀕𑀸 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀪𑀸𑀯𑀺𑀢𑀸 𑀢𑁂 𑀫𑀬𑀸 𑀲𑀩𑁆𑀩𑁂, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸.

𑁨𑁨.

‘‘𑀤𑀺𑀝𑁆𑀞𑁄 𑀳𑀺 𑀫𑁂 𑀲𑁄 𑀪𑀕𑀯𑀸, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑀬𑁂 𑀇𑀫𑁂 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸 𑀩𑁄𑀥𑀺𑀬𑀸 𑀬𑀣𑀸𑀯𑀼𑀢𑁆𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀩𑀼𑀚𑁆𑀛𑀦𑀓𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀪𑀽𑀢𑀢𑁆𑀢𑀸 ‘‘𑀩𑁄𑀚𑁆𑀛𑀗𑁆𑀕𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀲𑀢𑁆𑀢 𑀥𑀫𑁆𑀫𑀸. 𑀫𑀕𑁆𑀕𑀸 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀽𑀢𑀸. 𑀪𑀸𑀯𑀺𑀢𑀸 𑀢𑁂 𑀫𑀬𑀸 𑀲𑀩𑁆𑀩𑁂, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸𑀢𑀺 𑀢𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀫𑀬𑀸 𑀬𑀣𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀣𑀸 𑀫𑀬𑀸 𑀉𑀧𑁆𑀧𑀸𑀤𑀺𑀢𑀸 𑀘 𑀯𑀟𑁆𑀠𑀺𑀢𑀸 𑀘.

𑀤𑀺𑀝𑁆𑀞𑁄 𑀳𑀺 𑀫𑁂 𑀲𑁄 𑀪𑀕𑀯𑀸𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀲𑁄 𑀪𑀕𑀯𑀸 𑀥𑀫𑁆𑀫𑀓𑀸𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀢𑀦𑀸 𑀅𑀥𑀺𑀕𑀢𑀅𑀭𑀺𑀬𑀥𑀫𑁆𑀫𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄𑀢𑀺 𑀬𑁄𑀚𑀦𑀸. 𑀅𑀭𑀺𑀬𑀥𑀫𑁆𑀫𑀤𑀲𑁆𑀲𑀦𑁂𑀦 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀅𑀜𑁆𑀜𑁂 𑀘 𑀅𑀭𑀺𑀬𑀸 𑀤𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺, 𑀦 𑀭𑀽𑀧𑀓𑀸𑀬𑀤𑀲𑁆𑀲𑀦𑀫𑀢𑁆𑀢𑁂𑀦. 𑀬𑀣𑀸𑀳 𑁋 ‘‘𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭) 𑀘 ‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻’’𑀢𑀺 (𑀫. 𑀦𑀺. 𑁧.𑁨𑁦; 𑀲𑀁. 𑀦𑀺. 𑁩.𑁧) 𑀘 𑀆𑀤𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀚𑁂𑀦𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀫𑀗𑁆𑀕𑀮𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀼𑀫𑀼𑀢𑁆𑀢𑀺𑀓𑀸𑀢𑀺𑀆𑀤𑀺𑀓𑀸 𑀲𑀼𑀫𑀗𑁆𑀕𑀮𑀫𑀸𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀅𑀜𑁆𑀜𑀢𑀭𑀲𑁆𑀲 𑀦𑀴𑀓𑀸𑀭𑀲𑁆𑀲 𑀤𑀺𑀦𑁆𑀦𑀸 𑀧𑀞𑀫𑀕𑀩𑁆𑀪𑁂𑀬𑁂𑀯 𑀧𑀘𑁆𑀙𑀺𑀫𑀪𑀯𑀺𑀓𑀁 𑀧𑀼𑀢𑁆𑀢𑀁 𑀮𑀪𑀺. 𑀢𑀲𑁆𑀲 𑀲𑀼𑀫𑀗𑁆𑀕𑀮𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀲𑀼𑀫𑀗𑁆𑀕𑀮𑀫𑀸𑀢𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀬𑀲𑁆𑀫𑀸 𑀧𑀦𑀲𑁆𑀲𑀸 𑀦𑀸𑀫𑀕𑁄𑀢𑁆𑀢𑀁 𑀦 𑀧𑀸𑀓𑀝𑀁, 𑀢𑀲𑁆𑀫𑀸 ‘‘𑀅𑀜𑁆𑀜𑀢𑀭𑀸 𑀣𑁂𑀭𑀻 𑀪𑀺𑀓𑁆𑀔𑀼𑀦𑀻 𑀅𑀧𑀜𑁆𑀜𑀸𑀢𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀲𑁄𑀧𑀺𑀲𑁆𑀲𑀸 𑀧𑀼𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀏𑀓𑀤𑀺𑀯𑀲𑀁 𑀕𑀺𑀳𑀺𑀓𑀸𑀮𑁂 𑀅𑀢𑁆𑀢𑀦𑀸 𑀮𑀤𑁆𑀥𑀤𑀼𑀓𑁆𑀔𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑀻 𑁋

𑁨𑁩.

‘‘𑀲𑀼𑀫𑀼𑀢𑁆𑀢𑀺𑀓𑀸 𑀲𑀼𑀫𑀼𑀢𑁆𑀢𑀺𑀓𑀸, 𑀲𑀸𑀥𑀼𑀫𑀼𑀢𑁆𑀢𑀺𑀓𑀸𑀫𑁆𑀳𑀺 𑀫𑀼𑀲𑀮𑀲𑁆𑀲;

𑀅𑀳𑀺𑀭𑀺𑀓𑁄 𑀫𑁂 𑀙𑀢𑁆𑀢𑀓𑀁 𑀯𑀸𑀧𑀺, 𑀉𑀓𑁆𑀔𑀮𑀺𑀓𑀸 𑀫𑁂 𑀤𑁂𑀟𑁆𑀟𑀼𑀪𑀁 𑀯𑀸𑀢𑀺.

𑁨𑁪.

‘‘𑀭𑀸𑀕𑀜𑁆𑀘 𑀅𑀳𑀁 𑀤𑁄𑀲𑀜𑁆𑀘, 𑀘𑀺𑀘𑁆𑀘𑀺𑀝𑀺 𑀘𑀺𑀘𑁆𑀘𑀺𑀝𑀻𑀢𑀺 𑀯𑀺𑀳𑀦𑀸𑀫𑀺;

𑀲𑀸 𑀭𑀼𑀓𑁆𑀔𑀫𑀽𑀮𑀫𑀼𑀧𑀕𑀫𑁆𑀫, ‘𑀅𑀳𑁄 𑀲𑀼𑀔’𑀦𑁆𑀢𑀺 𑀲𑀼𑀔𑀢𑁄 𑀛𑀸𑀬𑀸𑀫𑀻’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀼𑀫𑀼𑀢𑁆𑀢𑀺𑀓𑀸𑀢𑀺 𑀲𑀼𑀫𑀼𑀢𑁆𑀢𑀸. 𑀓-𑀓𑀸𑀭𑁄 𑀧𑀤𑀧𑀽𑀭𑀡𑀫𑀢𑁆𑀢𑀁, 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸 𑀯𑀢𑀸𑀢𑀺 𑀅𑀢𑁆𑀣𑁄. 𑀲𑀸 𑀲𑀸𑀲𑀦𑁂 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀲𑀸𑀤𑀯𑀲𑁂𑀦, 𑀢𑀲𑁆𑀲𑀸 𑀯𑀸 𑀧𑀲𑀁𑀲𑀸𑀯𑀲𑁂𑀦 𑀆𑀫𑀦𑁆𑀢𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀼𑀫𑀼𑀢𑁆𑀢𑀺𑀓𑀸 𑀲𑀼𑀫𑀼𑀢𑁆𑀢𑀺𑀓𑀸’’𑀢𑀺. 𑀬𑀁 𑀧𑀦 𑀕𑀺𑀳𑀺𑀓𑀸𑀮𑁂 𑀯𑀺𑀲𑁂𑀲𑀢𑁄 𑀚𑀺𑀕𑀼𑀘𑁆𑀙𑀢𑀺, 𑀢𑀢𑁄 𑀯𑀺𑀫𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑀻 ‘‘𑀲𑀸𑀥𑀼𑀫𑀼𑀢𑁆𑀢𑀺𑀓𑀸𑀫𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀥𑀼𑀫𑀼𑀢𑁆𑀢𑀺𑀓𑀸𑀫𑁆𑀳𑀻𑀢𑀺 𑀲𑀫𑁆𑀫𑀤𑁂𑀯 𑀫𑀼𑀢𑁆𑀢𑀸 𑀯𑀢 𑀅𑀫𑁆𑀳𑀺. 𑀫𑀼𑀲𑀮𑀲𑁆𑀲𑀸𑀢𑀺 𑀫𑀼𑀲𑀮𑀢𑁄. 𑀅𑀬𑀁 𑀓𑀺𑀭 𑀤𑀮𑀺𑀤𑁆𑀤𑀪𑀸𑀯𑁂𑀦 𑀕𑀺𑀳𑀺𑀓𑀸𑀮𑁂 𑀲𑀬𑀫𑁂𑀯 𑀫𑀼𑀲𑀮𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀳𑀺𑀭𑀺𑀓𑁄 𑀫𑁂𑀢𑀺 𑀫𑀫 𑀲𑀸𑀫𑀺𑀓𑁄 𑀅𑀳𑀺𑀭𑀺𑀓𑁄 𑀦𑀺𑀮𑁆𑀮𑀚𑁆𑀚𑁄, 𑀲𑁄 𑀫𑀫 𑀦 𑀭𑀼𑀘𑁆𑀘𑀢𑀻𑀢𑀺 𑀯𑀘𑀦𑀲𑁂𑀲𑁄. 𑀧𑀓𑀢𑀺𑀬𑀸𑀯 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸𑀬 𑀓𑀸𑀫𑀸𑀥𑀺𑀫𑀼𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀁 𑀚𑀺𑀕𑀼𑀘𑁆𑀙𑀦𑁆𑀢𑀻 𑀯𑀤𑀢𑀺. 𑀙𑀢𑁆𑀢𑀓𑀁 𑀯𑀸𑀧𑀻𑀢𑀺 𑀚𑀻𑀯𑀺𑀢𑀳𑁂𑀢𑀼𑀓𑁂𑀦 𑀓𑀭𑀻𑀬𑀫𑀸𑀦𑀁 𑀙𑀢𑁆𑀢𑀓𑀫𑁆𑀧𑀺 𑀫𑁂 𑀦 𑀭𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀧𑁂𑀴𑀸𑀘𑀗𑁆𑀓𑁄𑀝𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑁂𑀴𑀼𑀤𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀙𑀢𑁆𑀢𑀸𑀤𑀻𑀦𑀁 𑀓𑀭𑀡𑀯𑀲𑁂𑀦 𑀤𑀼𑀓𑁆𑀔𑀚𑀻𑀯𑀺𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑀻 𑀯𑀤𑀢𑀺. ‘‘𑀅𑀳𑀺𑀢𑀓𑁄 𑀫𑁂 𑀯𑀸𑀢𑁄 𑀯𑀸𑀢𑀻’’𑀢𑀺 𑀓𑁂𑀘𑀺 𑀯𑀢𑁆𑀯𑀸 𑀅𑀳𑀺𑀢𑀓𑁄 𑀚𑀭𑀸𑀯𑀳𑁄 𑀕𑀺𑀳𑀺𑀓𑀸𑀮𑁂 𑀫𑀫 𑀲𑀭𑀻𑀭𑁂 𑀯𑀸𑀢𑁄 𑀯𑀸𑀬𑀢𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀅𑀳𑀺𑀢𑀓𑁄 𑀧𑀭𑁂𑀲𑀁 𑀤𑀼𑀕𑁆𑀕𑀦𑁆𑀥𑀢𑀭𑁄 𑀘 𑀫𑀫 𑀲𑀭𑀻𑀭𑀢𑁄 𑀯𑀸𑀢𑁄 𑀯𑀸𑀬𑀢𑀻’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀉𑀓𑁆𑀔𑀮𑀺𑀓𑀸 𑀫𑁂 𑀤𑁂𑀟𑁆𑀟𑀼𑀪𑀁 𑀯𑀸𑀢𑀻𑀢𑀺 𑀫𑁂 𑀫𑀫 𑀪𑀢𑁆𑀢𑀧𑀘𑀦𑀪𑀸𑀚𑀦𑀁 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑀪𑀸𑀯𑁂𑀦 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀉𑀤𑀓𑀲𑀧𑁆𑀧𑀕𑀦𑁆𑀥𑀁 𑀯𑀸𑀬𑀢𑀺, 𑀢𑀢𑁄 𑀅𑀳𑀁 𑀲𑀸𑀥𑀼𑀫𑀼𑀢𑁆𑀢𑀺𑀓𑀸𑀫𑁆𑀳𑀻𑀢𑀺 𑀬𑁄𑀚𑀦𑀸.

𑀭𑀸𑀕𑀜𑁆𑀘 𑀅𑀳𑀁 𑀤𑁄𑀲𑀜𑁆𑀘, 𑀘𑀺𑀘𑁆𑀘𑀺𑀝𑀺 𑀘𑀺𑀘𑁆𑀘𑀺𑀝𑀻𑀢𑀺 𑀯𑀺𑀳𑀦𑀸𑀫𑀻𑀢𑀺 𑀅𑀳𑀁 𑀓𑀺𑀮𑁂𑀲𑀚𑁂𑀝𑁆𑀞𑀓𑀁 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀘𑀺𑀘𑁆𑀘𑀺𑀝𑀺 𑀘𑀺𑀘𑁆𑀘𑀺𑀝𑀻𑀢𑀺 𑀇𑀫𑀺𑀦𑀸 𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀯𑀺𑀳𑀦𑀸𑀫𑀺 𑀯𑀺𑀦𑀸𑀲𑁂𑀫𑀺, 𑀧𑀚𑀳𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀸 𑀓𑀺𑀭 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀚𑀺𑀕𑀼𑀘𑁆𑀙𑀦𑁆𑀢𑀻 𑀢𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀨𑀸𑀮𑀺𑀬𑀫𑀸𑀦𑀸𑀦𑀁 𑀲𑀼𑀓𑁆𑀔𑀸𑀦𑀁 𑀯𑁂𑀴𑀼𑀤𑀡𑁆𑀟𑀸𑀤𑀻𑀦𑀁 𑀲𑀤𑁆𑀤𑀁 𑀕𑀭𑀳𑀦𑁆𑀢𑀻 𑀢𑀲𑁆𑀲 𑀧𑀳𑀸𑀦𑀁 𑀭𑀸𑀕𑀤𑁄𑀲𑀧𑀳𑀸𑀦𑁂𑀦 𑀲𑀫𑀁 𑀓𑀢𑁆𑀯𑀸 𑀅𑀯𑁄𑀘. 𑀲𑀸 𑀭𑀼𑀓𑁆𑀔𑀫𑀽𑀮𑀫𑀼𑀧𑀕𑀫𑁆𑀫𑀸𑀢𑀺 𑀲𑀸 𑀅𑀳𑀁 𑀲𑀼𑀫𑀗𑁆𑀕𑀮𑀫𑀸𑀢𑀸 𑀯𑀺𑀯𑀺𑀢𑁆𑀢𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸. 𑀲𑀼𑀔𑀢𑁄 𑀛𑀸𑀬𑀸𑀫𑀻𑀢𑀺 𑀲𑀼𑀔𑀦𑁆𑀢𑀺 𑀛𑀸𑀬𑀸𑀫𑀺, 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻 𑀨𑀮𑀲𑀼𑀔𑀁 𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑀸 𑀨𑀮𑀚𑁆𑀛𑀸𑀦𑁂𑀦 𑀛𑀸𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀳𑁄 𑀲𑀼𑀔𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲𑀸 𑀲𑀫𑀸𑀧𑀢𑁆𑀢𑀺𑀢𑁄 𑀧𑀘𑁆𑀙𑀸 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀼𑀩𑁆𑀩𑀸𑀪𑁄𑀕𑀯𑀲𑁂𑀦𑀸𑀢𑀺𑀧𑀺 𑀬𑀼𑀚𑁆𑀚𑀢𑁂𑀯.

𑀲𑀼𑀫𑀗𑁆𑀕𑀮𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀟𑁆𑀠𑀓𑀸𑀲𑀺𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀬𑀸𑀯 𑀓𑀸𑀲𑀺𑀚𑀦𑀧𑀤𑁄𑀢𑀺𑀆𑀤𑀺𑀓𑀸 𑀅𑀟𑁆𑀠𑀓𑀸𑀲𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀁 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀤𑀲𑀩𑀮𑀲𑁆𑀲 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀻𑀮𑁂 𑀞𑀺𑀢𑀁 𑀅𑀜𑁆𑀜𑀢𑀭𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀺𑀁 𑀕𑀡𑀺𑀓𑀸𑀯𑀸𑀤𑁂𑀦 𑀅𑀓𑁆𑀓𑁄𑀲𑀺𑀢𑁆𑀯𑀸, 𑀢𑀢𑁄 𑀘𑀼𑀢𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀸𑀲𑀺𑀓𑀭𑀝𑁆𑀞𑁂 𑀉𑀴𑀸𑀭𑀯𑀺𑀪𑀯𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀞𑀸𑀦𑀢𑁄 𑀧𑀭𑀺𑀪𑀝𑁆𑀞𑀸 𑀕𑀡𑀺𑀓𑀸 𑀅𑀳𑁄𑀲𑀺. 𑀦𑀸𑀫𑁂𑀦 𑀅𑀟𑁆𑀠𑀓𑀸𑀲𑀻 𑀦𑀸𑀫. 𑀢𑀲𑁆𑀲𑀸 𑀧𑀩𑁆𑀩𑀚𑁆𑀚𑀸 𑀘 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀘 𑀔𑀦𑁆𑀥𑀓𑁂 𑀆𑀕𑀢𑀸𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀟𑁆𑀠𑀓𑀸𑀲𑀻 𑀕𑀡𑀺𑀓𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸 𑀳𑁄𑀢𑀺. 𑀲𑀸 𑀘 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑀼𑀓𑀸𑀫𑀸 𑀳𑁄𑀢𑀺 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀥𑀼𑀢𑁆𑀢𑀸 𑁋 ‘‘𑀅𑀟𑁆𑀠𑀓𑀸𑀲𑀻 𑀓𑀺𑀭 𑀕𑀡𑀺𑀓𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑀼𑀓𑀸𑀫𑀸’’𑀢𑀺. 𑀢𑁂 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀼. 𑀅𑀲𑁆𑀲𑁄𑀲𑀺 𑀔𑁄 𑀅𑀟𑁆𑀠𑀓𑀸𑀲𑀻 𑀕𑀡𑀺𑀓𑀸 ‘‘𑀥𑀼𑀢𑁆𑀢𑀸 𑀓𑀺𑀭 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀢𑀸’’𑀢𑀺. 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀜𑁆𑀳𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑀸, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀽𑀢𑁂𑀦𑀧𑀺 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁩𑁦).

𑀏𑀯𑀁 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁪.𑁧𑁬𑁮-𑁧𑁮𑁩) 𑁋

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀢𑀤𑀸𑀳𑀁 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂;

𑀲𑀁𑀯𑀼𑀢𑀸 𑀧𑀸𑀢𑀺𑀫𑁄𑀓𑁆𑀔𑀫𑁆𑀳𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀼.

‘‘𑀫𑀢𑁆𑀢𑀜𑁆𑀜𑀼𑀦𑀻 𑀘 𑀅𑀲𑀦𑁂, 𑀬𑀼𑀢𑁆𑀢𑀸 𑀚𑀸𑀕𑀭𑀺𑀬𑁂𑀧𑀺 𑀘;

𑀯𑀲𑀦𑁆𑀢𑀻 𑀬𑀼𑀢𑁆𑀢𑀬𑁄𑀕𑀸𑀳𑀁, 𑀪𑀺𑀓𑁆𑀔𑀼𑀦𑀺𑀁 𑀯𑀺𑀕𑀢𑀸𑀲𑀯𑀁.

‘‘𑀅𑀓𑁆𑀓𑁄𑀲𑀺𑀁 𑀤𑀼𑀝𑁆𑀞𑀘𑀺𑀢𑁆𑀢𑀸𑀳𑀁, 𑀕𑀡𑀺𑀓𑁂𑀢𑀺 𑀪𑀡𑀺𑀁 𑀢𑀤𑀸;

𑀢𑁂𑀦 𑀧𑀸𑀧𑁂𑀦 𑀓𑀫𑁆𑀫𑁂𑀦, 𑀦𑀺𑀭𑀬𑀫𑁆𑀳𑀺 𑀅𑀧𑀘𑁆𑀘𑀺𑀲𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀅𑀚𑀸𑀬𑀺𑀁 𑀕𑀡𑀺𑀓𑀸𑀓𑀼𑀮𑁂;

𑀩𑀳𑀼𑀲𑁄𑀯 𑀧𑀭𑀸𑀥𑀻𑀦𑀸, 𑀧𑀘𑁆𑀙𑀺𑀫𑀸𑀬 𑀘 𑀚𑀸𑀢𑀺𑀬𑀁.

‘‘𑀓𑀸𑀲𑀻𑀲𑀼 𑀲𑁂𑀝𑁆𑀞𑀺𑀓𑀼𑀮𑀚𑀸, 𑀩𑁆𑀭𑀳𑁆𑀫𑀘𑀸𑀭𑀻𑀩𑀮𑁂𑀦𑀳𑀁;

𑀅𑀘𑁆𑀙𑀭𑀸 𑀯𑀺𑀬 𑀤𑁂𑀯𑁂𑀲𑀼, 𑀅𑀳𑁄𑀲𑀺𑀁 𑀭𑀽𑀧𑀲𑀫𑁆𑀧𑀤𑀸.

‘‘𑀤𑀺𑀲𑁆𑀯𑀸𑀦 𑀤𑀲𑁆𑀲𑀦𑀻𑀬𑀁 𑀫𑀁, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀕𑀡𑀺𑀓𑀢𑁆𑀢𑁂 𑀦𑀺𑀯𑁂𑀲𑁂𑀲𑀼𑀁, 𑀅𑀓𑁆𑀓𑁄𑀲𑀦𑀩𑀮𑁂𑀦 𑀫𑁂.

‘‘𑀲𑀸𑀳𑀁 𑀲𑀼𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀩𑀼𑀤𑁆𑀥𑀲𑁂𑀝𑁆𑀞𑁂𑀦 𑀤𑁂𑀲𑀺𑀢𑀁;

𑀧𑀼𑀩𑁆𑀩𑀯𑀸𑀲𑀦𑀲𑀫𑁆𑀧𑀦𑁆𑀦𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀢𑀤𑀽𑀧𑀲𑀫𑁆𑀧𑀤𑀢𑁆𑀣𑀸𑀬, 𑀕𑀘𑁆𑀙𑀦𑁆𑀢𑀻 𑀚𑀺𑀦𑀲𑀦𑁆𑀢𑀺𑀓𑀁;

𑀫𑀕𑁆𑀕𑁂 𑀥𑀼𑀢𑁆𑀢𑁂 𑀞𑀺𑀢𑁂 𑀲𑀼𑀢𑁆𑀯𑀸, 𑀮𑀪𑀺𑀁 𑀤𑀽𑀢𑁄𑀧𑀲𑀫𑁆𑀧𑀤𑀁.

‘‘𑀲𑀩𑁆𑀩𑀓𑀫𑁆𑀫𑀁 𑀧𑀭𑀺𑀓𑁆𑀔𑀻𑀡𑀁, 𑀧𑀼𑀜𑁆𑀜𑀁 𑀧𑀸𑀧𑀁 𑀢𑀣𑁂𑀯 𑀘;

𑀲𑀩𑁆𑀩𑀲𑀁𑀲𑀸𑀭𑀫𑀼𑀢𑁆𑀢𑀺𑀡𑁆𑀡𑀸, 𑀕𑀡𑀺𑀓𑀢𑁆𑀢𑀜𑁆𑀘 𑀔𑁂𑀧𑀺𑀢𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑀫 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁪.𑁧𑁬𑁮-𑁧𑁮𑁩);

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁨𑁫.

‘‘𑀬𑀸𑀯 𑀓𑀸𑀲𑀺𑀚𑀦𑀧𑀤𑁄, 𑀲𑀼𑀗𑁆𑀓𑁄 𑀫𑁂 𑀢𑀢𑁆𑀢𑀓𑁄 𑀅𑀳𑀼;

𑀢𑀁 𑀓𑀢𑁆𑀯𑀸 𑀦𑁂𑀕𑀫𑁄 𑀅𑀕𑁆𑀖𑀁, 𑀅𑀟𑁆𑀠𑁂𑀦𑀕𑁆𑀖𑀁 𑀞𑀧𑁂𑀲𑀺 𑀫𑀁.

𑁨𑁬.

‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀳𑀁 𑀭𑀽𑀧𑁂, 𑀦𑀺𑀩𑁆𑀩𑀺𑀦𑁆𑀤𑀜𑁆𑀘 𑀯𑀺𑀭𑀚𑁆𑀚𑀳𑀁;

𑀫𑀸 𑀧𑀼𑀦 𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑁂𑀬𑁆𑀬𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀬𑀸𑀯 𑀓𑀸𑀲𑀺𑀚𑀦𑀧𑀤𑁄, 𑀲𑀼𑀗𑁆𑀓𑁄 𑀫𑁂 𑀢𑀢𑁆𑀢𑀓𑁄 𑀅𑀳𑀽𑀢𑀺 𑀓𑀸𑀲𑀻𑀲𑀼 𑀚𑀦𑀧𑀤𑁂𑀲𑀼 𑀪𑀯𑁄 𑀲𑀼𑀗𑁆𑀓𑁄 𑀓𑀸𑀲𑀺𑀚𑀦𑀧𑀤𑁄, 𑀲𑁄 𑀬𑀸𑀯 𑀬𑀢𑁆𑀢𑀓𑁄, 𑀢𑀢𑁆𑀢𑀓𑁄 𑀫𑀬𑁆𑀳𑀁 𑀲𑀼𑀗𑁆𑀓𑁄 𑀅𑀳𑀼 𑀅𑀳𑁄𑀲𑀺. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺? 𑀲𑀳𑀲𑁆𑀲𑀫𑀢𑁆𑀢𑁄. 𑀓𑀸𑀲𑀺𑀭𑀝𑁆𑀞𑁂 𑀓𑀺𑀭 𑀢𑀤𑀸 𑀲𑀼𑀗𑁆𑀓𑀯𑀲𑁂𑀦 𑀏𑀓𑀤𑀺𑀯𑀲𑀁 𑀭𑀜𑁆𑀜𑁄 𑀉𑀧𑁆𑀧𑀚𑁆𑀚𑀦𑀓𑀆𑀬𑁄 𑀅𑀳𑁄𑀲𑀺 𑀲𑀳𑀲𑁆𑀲𑀫𑀢𑁆𑀢𑁄, 𑀇𑀫𑀸𑀬𑀧𑀺 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀢𑁄 𑀏𑀓𑀤𑀺𑀯𑀲𑀁 𑀮𑀤𑁆𑀥𑀥𑀦𑀁 𑀢𑀢𑁆𑀢𑀓𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀸𑀯 𑀓𑀸𑀲𑀺𑀚𑀦𑀧𑀤𑁄, 𑀲𑀼𑀗𑁆𑀓𑁄 𑀫𑁂 𑀢𑀢𑁆𑀢𑀓𑁄 𑀅𑀳𑀽’’𑀢𑀺. 𑀲𑀸 𑀧𑀦 𑀓𑀸𑀲𑀺𑀲𑀼𑀗𑁆𑀓𑀧𑀭𑀺𑀫𑀸𑀡𑀢𑀸𑀬 𑀓𑀸𑀲𑀻𑀢𑀺 𑀲𑀫𑀜𑁆𑀜𑀁 𑀮𑀪𑀺. 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀲𑀳𑀲𑁆𑀲𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀢𑁄 𑀉𑀧𑀟𑁆𑀠𑀁 𑀤𑀢𑁆𑀯𑀸 𑀤𑀺𑀯𑀲𑀪𑀸𑀕𑀫𑁂𑀯 𑀭𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦𑀸𑀬𑀁 𑀅𑀟𑁆𑀠𑀓𑀸𑀲𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀁 𑀓𑀢𑁆𑀯𑀸 𑀦𑁂𑀕𑀫𑁄 𑀅𑀕𑁆𑀖𑀁, 𑀅𑀟𑁆𑀠𑁂𑀦𑀕𑁆𑀖𑀁 𑀞𑀧𑁂𑀲𑀺 𑀫’’𑀦𑁆𑀢𑀺. 𑀢𑀁 𑀧𑀜𑁆𑀘𑀲𑀢𑀫𑀢𑁆𑀢𑀁 𑀥𑀦𑀁 𑀅𑀕𑁆𑀖𑀁 𑀓𑀢𑁆𑀯𑀸 𑀦𑁂𑀕𑀫𑁄 𑀦𑀺𑀕𑀫𑀯𑀸𑀲𑀺𑀚𑀦𑁄 𑀇𑀢𑁆𑀣𑀺𑀭𑀢𑀦𑀪𑀸𑀯𑁂𑀦 𑀅𑀦𑀕𑁆𑀖𑀫𑁆𑀧𑀺 𑀲𑀫𑀸𑀦𑀁 𑀅𑀟𑁆𑀠𑁂𑀦 𑀅𑀕𑁆𑀖𑀁 𑀦𑀺𑀫𑀺𑀢𑁆𑀢𑀁 𑀅𑀟𑁆𑀠𑀓𑀸𑀲𑀻𑀢𑀺 𑀲𑀫𑀜𑁆𑀜𑀸𑀯𑀲𑁂𑀦 𑀫𑀁 𑀞𑀧𑁂𑀲𑀺, 𑀢𑀣𑀸 𑀫𑀁 𑀯𑁄𑀳𑀭𑀻𑀢𑀺 𑀅𑀢𑁆𑀣𑁄.

𑀅𑀣 𑀦𑀺𑀩𑁆𑀩𑀺𑀦𑁆𑀤𑀳𑀁 𑀭𑀽𑀧𑁂𑀢𑀺 𑀏𑀯𑀁 𑀭𑀽𑀧𑀽𑀧𑀚𑀻𑀯𑀺𑀦𑀻 𑀳𑀼𑀢𑁆𑀯𑀸 𑀞𑀺𑀢𑀸. 𑀅𑀣 𑀧𑀘𑁆𑀙𑀸 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀭𑀽𑀧𑁂 𑀅𑀳𑀁 𑀦𑀺𑀩𑁆𑀩𑀺𑀦𑁆𑀤𑀺𑀁 ‘‘𑀇𑀢𑀺𑀧𑀺 𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀇𑀢𑀺𑀧𑀺𑀤𑀁 𑀭𑀽𑀧𑀁 𑀤𑀼𑀓𑁆𑀔𑀁, 𑀅𑀲𑀼𑀪’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀻 𑀢𑀢𑁆𑀣 𑀉𑀓𑁆𑀓𑀡𑁆𑀞𑀺𑀁. 𑀦𑀺𑀩𑁆𑀩𑀺𑀦𑁆𑀤𑀜𑁆𑀘 𑀯𑀺𑀭𑀚𑁆𑀚𑀳𑀦𑁆𑀢𑀺 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀻 𑀘𑀸𑀳𑀁 𑀢𑀢𑁄 𑀧𑀭𑀁 𑀯𑀺𑀭𑀸𑀕𑀁 𑀆𑀧𑀚𑁆𑀚𑀺𑀁. 𑀦𑀺𑀩𑁆𑀩𑀺𑀦𑁆𑀤𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀺, 𑀯𑀺𑀭𑀸𑀕𑀕𑁆𑀕𑀳𑀡𑁂𑀦 𑀩𑀮𑀯𑀯𑀺𑀧𑀲𑁆𑀲𑀦𑀁. ‘‘𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀢𑀺 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀫𑀸 𑀧𑀼𑀦 𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑁂𑀬𑁆𑀬𑀁 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀺𑀦𑁆𑀤𑀦𑀯𑀺𑀭𑀚𑁆𑀚𑀦𑀸𑀓𑀸𑀭𑁂 𑀦𑀺𑀤𑀲𑁆𑀲𑁂𑀢𑀺. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺𑀆𑀤𑀺𑀦𑀸 𑀢𑁂𑀲𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀁, 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀟𑁆𑀠𑀓𑀸𑀲𑀺𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀓𑀺𑀲𑀺𑀓𑀸𑀢𑀺𑀆𑀤𑀺𑀓𑀸 𑀘𑀺𑀢𑁆𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀇𑀢𑁄 𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑁂 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀦𑀴𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀭𑀸𑀚𑀕𑀳𑀧𑁆𑀧𑀯𑁂𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀘𑁆𑀙𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀮𑁆𑀮𑀺𑀓𑀸𑀓𑀸𑀮𑁂 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 𑁋

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑀻 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

‘‘𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻;

𑀦𑀴𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀻𑀤𑁂𑀳𑀁, 𑀅𑀕𑀘𑁆𑀙𑀺𑀁 𑀢𑀺𑀤𑀲𑀁 𑀕𑀢𑀺𑀁.

‘‘𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀤𑀲𑀦𑁆𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀁𑀯𑁂𑀚𑁂𑀢𑁆𑀯𑀸𑀦 𑀫𑁂 𑀘𑀺𑀢𑁆𑀢𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀲𑀸 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑁋

𑁨𑁭.

‘‘𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀓𑀺𑀲𑀺𑀓𑀸, 𑀕𑀺𑀮𑀸𑀦𑀸 𑀩𑀸𑀴𑁆𑀳𑀤𑀼𑀩𑁆𑀩𑀮𑀸;

𑀤𑀡𑁆𑀟𑀫𑁄𑀮𑀼𑀩𑁆𑀪 𑀕𑀘𑁆𑀙𑀸𑀫𑀺, 𑀧𑀩𑁆𑀩𑀢𑀁 𑀅𑀪𑀺𑀭𑀽𑀳𑀺𑀬.

𑁨𑁮.

‘‘𑀲𑀗𑁆𑀖𑀸𑀝𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀧𑀢𑁆𑀢𑀓𑀜𑁆𑀘 𑀦𑀺𑀓𑀼𑀚𑁆𑀚𑀺𑀬;

𑀲𑁂𑀮𑁂 𑀔𑀫𑁆𑀪𑁂𑀲𑀺𑀫𑀢𑁆𑀢𑀸𑀦𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀓𑀺𑀲𑀺𑀓𑀸𑀢𑀺 𑀬𑀤𑀺𑀧𑀺 𑀅𑀳𑀁 𑀚𑀭𑀸𑀚𑀺𑀡𑁆𑀡𑀸 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀪𑀸𑀯𑁂𑀦 𑀓𑀺𑀲𑀲𑀭𑀻𑀭𑀸 𑀅𑀫𑁆𑀳𑀺. 𑀕𑀺𑀮𑀸𑀦𑀸 𑀩𑀸𑀴𑁆𑀳𑀤𑀼𑀩𑁆𑀩𑀮𑀸𑀢𑀺 𑀥𑀸𑀢𑁆𑀯𑀸𑀤𑀺𑀯𑀺𑀓𑀸𑀭𑁂𑀦 𑀕𑀺𑀮𑀸𑀦𑀸, 𑀢𑁂𑀦𑁂𑀯 𑀕𑁂𑀮𑀜𑁆𑀜𑁂𑀦 𑀅𑀢𑀺𑀯𑀺𑀬 𑀤𑀼𑀩𑁆𑀩𑀮𑀸. 𑀤𑀡𑁆𑀟𑀫𑁄𑀮𑀼𑀩𑁆𑀪 𑀕𑀘𑁆𑀙𑀸𑀫𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀘𑁆𑀙𑀦𑁆𑀢𑀻 𑀓𑀢𑁆𑀢𑀭𑀬𑀝𑁆𑀞𑀺𑀁 𑀆𑀮𑀫𑁆𑀩𑀺𑀢𑁆𑀯𑀸𑀯 𑀕𑀘𑁆𑀙𑀸𑀫𑀺. 𑀧𑀩𑁆𑀩𑀢𑀁 𑀅𑀪𑀺𑀭𑀽𑀳𑀺𑀬𑀸𑀢𑀺 𑀏𑀯𑀁 𑀪𑀽𑀢𑀸𑀧𑀺 𑀯𑀺𑀯𑁂𑀓𑀓𑀸𑀫𑀢𑀸𑀬 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸.

𑀲𑀗𑁆𑀖𑀸𑀝𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦𑀸𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀸 𑀏𑀯 𑀳𑀼𑀢𑁆𑀯𑀸 𑀬𑀣𑀸𑀲𑀁𑀳𑀢𑀁 𑀅𑀁𑀲𑁂 𑀞𑀧𑀺𑀢𑀁 𑀲𑀗𑁆𑀖𑀸𑀝𑀺𑀁 𑀳𑀢𑁆𑀣𑀧𑀸𑀲𑁂 𑀞𑀧𑁂𑀢𑁆𑀯𑀸. 𑀧𑀢𑁆𑀢𑀓𑀜𑁆𑀘 𑀦𑀺𑀓𑀼𑀚𑁆𑀚𑀺𑀬𑀸𑀢𑀺 𑀫𑀬𑁆𑀳𑀁 𑀯𑀮𑀜𑁆𑀚𑀦𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸. 𑀲𑁂𑀮𑁂 𑀔𑀫𑁆𑀪𑁂𑀲𑀺𑀫𑀢𑁆𑀢𑀸𑀦𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸𑀢𑀺 𑀧𑀩𑁆𑀩𑀢𑁂 𑀦𑀺𑀲𑀺𑀦𑁆𑀦𑀸 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀫𑁄𑀳𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑁆𑀯𑀸, 𑀢𑁂𑀦𑁂𑀯 𑀘 𑀫𑁄𑀳𑀓𑁆𑀔𑀦𑁆𑀥𑀧𑀤𑀸𑀮𑀦𑁂𑀦 𑀅𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑀁 𑀔𑀫𑁆𑀪𑁂𑀲𑀺𑀁, 𑀫𑀫 𑀲𑀦𑁆𑀢𑀸𑀦𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀯𑀺𑀓𑁆𑀔𑀫𑁆𑀪𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀘𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑁂𑀢𑁆𑀢𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀤𑀼𑀓𑁆𑀔𑀺𑀢𑀸𑀢𑀺𑀆𑀤𑀺𑀓𑀸 𑀫𑁂𑀢𑁆𑀢𑀺𑀓𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑀻 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀘𑁂𑀢𑀺𑀬𑁂 𑀭𑀢𑀦𑁂𑀦 𑀧𑀝𑀺𑀫𑀡𑁆𑀟𑀺𑀢𑀸𑀬 𑀫𑁂𑀔𑀮𑀸𑀬 𑀧𑀽𑀚𑀁 𑀅𑀓𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁂𑀲𑀁 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀲𑀤𑀺𑀲𑀁. 𑀅𑀬𑀁 𑀧𑀦 𑀧𑀝𑀺𑀪𑀸𑀕𑀓𑀽𑀝𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁨𑁦-𑁨𑁫) 𑁋

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀣𑀽𑀧𑀓𑀸𑀭𑀸𑀧𑀺𑀓𑀸 𑀅𑀳𑀼𑀁;

𑀫𑁂𑀔𑀮𑀺𑀓𑀸 𑀫𑀬𑀸 𑀤𑀺𑀦𑁆𑀦𑀸, 𑀦𑀯𑀓𑀫𑁆𑀫𑀸𑀬 𑀲𑀢𑁆𑀣𑀼𑀦𑁄.

‘‘𑀦𑀺𑀝𑁆𑀞𑀺𑀢𑁂 𑀘 𑀫𑀳𑀸𑀣𑀽𑀧𑁂, 𑀫𑁂𑀔𑀮𑀁 𑀧𑀼𑀦𑀤𑀸𑀲𑀳𑀁;

𑀮𑁄𑀓𑀦𑀸𑀣𑀲𑁆𑀲 𑀫𑀼𑀦𑀺𑀦𑁄, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑁂𑀔𑀮𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑀽𑀧𑀓𑀸𑀭𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁨𑁯.

‘‘𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀤𑀼𑀓𑁆𑀔𑀺𑀢𑀸, 𑀤𑀼𑀩𑁆𑀩𑀮𑀸 𑀕𑀢𑀬𑁄𑀩𑁆𑀩𑀦𑀸;

𑀤𑀡𑁆𑀟𑀫𑁄𑀮𑀼𑀩𑁆𑀪 𑀕𑀘𑁆𑀙𑀸𑀫𑀺, 𑀧𑀩𑁆𑀩𑀢𑀁 𑀅𑀪𑀺𑀭𑀽𑀳𑀺𑀬.

𑁩𑁦.

‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦 𑀲𑀗𑁆𑀖𑀸𑀝𑀺𑀁, 𑀧𑀢𑁆𑀢𑀓𑀜𑁆𑀘 𑀦𑀺𑀓𑀼𑀚𑁆𑀚𑀺𑀬;

𑀦𑀺𑀲𑀺𑀦𑁆𑀦𑀸 𑀘𑀫𑁆𑀳𑀺 𑀲𑁂𑀮𑀫𑁆𑀳𑀺, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀤𑀼𑀓𑁆𑀔𑀺𑀢𑀸𑀢𑀺 𑀭𑁄𑀕𑀸𑀪𑀺𑀪𑀯𑁂𑀦 𑀤𑀼𑀓𑁆𑀔𑀺𑀢𑀸 𑀲𑀜𑁆𑀚𑀸𑀢𑀤𑀼𑀓𑁆𑀔𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑀸. 𑀤𑀼𑀩𑁆𑀩𑀮𑀸𑀢𑀺 𑀢𑀸𑀬 𑀘𑁂𑀯 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀬𑀸, 𑀚𑀭𑀸𑀚𑀺𑀡𑁆𑀡𑀢𑀸𑀬 𑀘 𑀩𑀮𑀯𑀺𑀭𑀳𑀺𑀢𑀸. 𑀢𑁂𑀦𑀸𑀳 ‘‘𑀕𑀢𑀬𑁄𑀩𑁆𑀩𑀦𑀸’’𑀢𑀺, 𑀅𑀤𑁆𑀥𑀕𑀢𑀸𑀢𑀺 𑀅𑀢𑁆𑀣𑁄.

𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂𑀢𑀺 𑀲𑁂𑀮𑀫𑁆𑀳𑀺 𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑀸 𑀘𑀫𑁆𑀳𑀺, 𑀅𑀣 𑀢𑀤𑀦𑀦𑁆𑀢𑀭𑀁 𑀯𑀻𑀭𑀺𑀬𑀲𑀫𑀢𑀸𑀬 𑀲𑀫𑁆𑀫𑀤𑁂𑀯 𑀬𑁄𑀚𑀺𑀢𑀢𑁆𑀢𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑁂𑀳𑀺𑀧𑀺 𑀆𑀲𑀯𑁂𑀳𑀺 𑀫𑀫 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑁂𑀢𑁆𑀢𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀦𑁆𑀢𑀺𑀆𑀤𑀺𑀓𑀸 𑀅𑀧𑀭𑀸𑀬 𑀫𑀺𑀢𑁆𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀺𑀓𑀸 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀸𑀯𑀺𑀓𑀁 𑀏𑀓𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀺𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀡𑀻𑀢𑀲𑁆𑀲 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑁆𑀲 𑀧𑀽𑀭𑁂𑀢𑁆𑀯𑀸 𑀫𑀳𑀕𑁆𑀖𑁂𑀦 𑀲𑀸𑀝𑀓𑀬𑀼𑀕𑁂𑀦 𑀲𑀤𑁆𑀥𑀺𑀁 𑀅𑀤𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁪𑁬-𑁫𑁯) 𑁋

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀩𑀦𑁆𑀥𑀼𑀫𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀏𑀓𑀚𑁆𑀛𑀁 𑀘𑀸𑀭𑀬𑀸𑀫𑀳𑀁.

‘‘𑀭𑀳𑁄𑀕𑀢𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀆𑀤𑀸𑀬 𑀕𑀫𑀦𑀻𑀬𑀜𑁆𑀳𑀺, 𑀓𑀼𑀲𑀮𑀁 𑀦𑀢𑁆𑀣𑀺 𑀫𑁂 𑀓𑀢𑀁.

‘‘𑀫𑀳𑀸𑀪𑀺𑀢𑀸𑀧𑀁 𑀓𑀝𑀼𑀓𑀁, 𑀖𑁄𑀭𑀭𑀽𑀧𑀁 𑀲𑀼𑀤𑀸𑀭𑀼𑀡𑀁;

𑀦𑀺𑀭𑀬𑀁 𑀦𑀽𑀦 𑀕𑀘𑁆𑀙𑀸𑀫𑀺, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄.

‘‘𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑁆𑀫, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

𑀏𑀓𑀁 𑀫𑁂 𑀲𑀫𑀡𑀁 𑀤𑁂𑀳𑀺, 𑀪𑁄𑀚𑀬𑀺𑀲𑁆𑀲𑀸𑀫𑀺 𑀔𑀢𑁆𑀢𑀺𑀬.

‘‘𑀅𑀤𑀸𑀲𑀺 𑀫𑁂 𑀫𑀳𑀸𑀭𑀸𑀚𑀸, 𑀲𑀫𑀡𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀭𑀫𑀦𑁆𑀦𑁂𑀦 𑀧𑀽𑀭𑀬𑀺𑀁.

‘‘𑀧𑀽𑀭𑀬𑀺𑀢𑁆𑀯𑀸 𑀧𑀭𑀫𑀦𑁆𑀦𑀁, 𑀕𑀦𑁆𑀥𑀸𑀮𑁂𑀧𑀁 𑀅𑀓𑀸𑀲𑀳𑀁;

𑀚𑀸𑀮𑁂𑀦 𑀧𑀺𑀤𑀳𑀺𑀢𑁆𑀯𑀸𑀦, 𑀯𑀢𑁆𑀣𑀬𑀼𑀕𑁂𑀦 𑀙𑀸𑀤𑀬𑀺𑀁.

‘‘𑀆𑀭𑀫𑁆𑀫𑀡𑀁 𑀫𑀫𑀁 𑀏𑀢𑀁, 𑀲𑀭𑀸𑀫𑀺 𑀬𑀸𑀯𑀚𑀻𑀯𑀺𑀢𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀺𑀁𑀲𑀸𑀦𑀁 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀫𑀬𑁆𑀳𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀬𑀣𑀺𑀘𑁆𑀙𑀺𑀢𑀁.

‘‘𑀯𑀻𑀲𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀑𑀘𑀺𑀢𑀢𑁆𑀢𑀸𑀯 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑁂𑀲𑁆𑀯𑀳𑀁.

‘‘𑀲𑀩𑁆𑀩𑀩𑀦𑁆𑀥𑀦𑀫𑀼𑀢𑁆𑀢𑀸𑀳𑀁, 𑀅𑀧𑁂𑀢𑀸 𑀫𑁂 𑀉𑀧𑀸𑀤𑀺𑀓𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀺𑀡𑁆𑀟𑀧𑀸𑀢𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁧.𑁪𑁬-𑁫𑁯);

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀤𑀸𑀦𑀯𑀲𑁂𑀦 𑁋

𑁩𑁧.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁩𑁨.

‘‘𑀉𑀧𑁄𑀲𑀣𑀁 𑀉𑀧𑀸𑀕𑀘𑁆𑀙𑀺𑀁, 𑀤𑁂𑀯𑀓𑀸𑀬𑀸𑀪𑀺𑀦𑀦𑁆𑀤𑀺𑀦𑀻;

𑀲𑀸𑀚𑁆𑀚 𑀏𑀓𑁂𑀦 𑀪𑀢𑁆𑀢𑁂𑀦, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀤𑁂𑀯𑀓𑀸𑀬𑀁 𑀦 𑀧𑀢𑁆𑀣𑁂𑀳𑀁, 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭’’𑀦𑁆𑀢𑀺. 𑁋 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀦𑁆𑀢𑀺 𑀘𑀢𑀼𑀤𑁆𑀤𑀲𑀦𑁆𑀦𑀁 𑀧𑀽𑀭𑀡𑀻 𑀘𑀸𑀢𑀼𑀤𑁆𑀤𑀲𑀻, 𑀧𑀜𑁆𑀘𑀤𑀲𑀦𑁆𑀦𑀁 𑀧𑀽𑀭𑀡𑀻 𑀧𑀜𑁆𑀘𑀤𑀲𑀻, 𑀢𑀁 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀜𑁆𑀘, 𑀧𑀓𑁆𑀔𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻, 𑀢𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀧𑀭𑀺𑀳𑀭𑀡𑀓𑀧𑀓𑁆𑀔𑀜𑁆𑀘 𑀘𑀸𑀢𑀼𑀤𑁆𑀤𑀲𑀻𑀧𑀜𑁆𑀘𑀤𑀲𑀻𑀅𑀝𑁆𑀞𑀫𑀻𑀦𑀁 𑀬𑀣𑀸𑀓𑁆𑀓𑀫𑀁 𑀆𑀤𑀺𑀢𑁄 𑀅𑀦𑁆𑀢𑀢𑁄 𑀯𑀸 𑀧𑀯𑁂𑀲𑀦𑀺𑀕𑁆𑀕𑀫𑀯𑀲𑁂𑀦 𑀉𑀧𑁄𑀲𑀣𑀲𑀻𑀮𑀲𑁆𑀲 𑀧𑀭𑀺𑀳𑀭𑀺𑀢𑀩𑁆𑀩𑀧𑀓𑁆𑀔𑀜𑁆𑀘 𑀢𑁂𑀭𑀲𑀻𑀧𑀸𑀝𑀺𑀧𑀤𑀲𑀢𑁆𑀢𑀫𑀻𑀦𑀯𑀫𑀻𑀲𑀼 𑀘𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀆𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀼𑀝𑁆𑀞𑀼 𑀲𑀫𑀦𑁆𑀦𑀸𑀕𑀢𑀁. 𑀉𑀧𑁄𑀲𑀣𑀁 𑀉𑀧𑀸𑀕𑀘𑁆𑀙𑀺𑀦𑁆𑀢𑀺 𑀉𑀧𑀯𑀸𑀲𑀁 𑀉𑀧𑀕𑀫𑀺𑀁, 𑀉𑀧𑀯𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀧𑀸𑀡𑀁 𑀦 𑀳𑀦𑁂 𑀦 𑀘𑀸𑀤𑀺𑀦𑁆𑀦𑀫𑀸𑀤𑀺𑀬𑁂, 𑀫𑀼𑀲𑀸 𑀦 𑀪𑀸𑀲𑁂 𑀦 𑀘 𑀫𑀚𑁆𑀚𑀧𑁄 𑀲𑀺𑀬𑀸;

𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑀺𑀭𑀫𑁂𑀬𑁆𑀬 𑀫𑁂𑀣𑀼𑀦𑀸, 𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀁.

‘‘𑀫𑀸𑀮𑀁 𑀦 𑀥𑀸𑀭𑁂 𑀦 𑀘 𑀕𑀦𑁆𑀥𑀫𑀸𑀘𑀭𑁂, 𑀫𑀜𑁆𑀘𑁂 𑀙𑀫𑀸𑀬𑀁 𑀯 𑀲𑀬𑁂𑀣 𑀲𑀦𑁆𑀣𑀢𑁂;

𑀏𑀢𑀜𑁆𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀸𑀳𑀼𑀧𑁄𑀲𑀣𑀁, 𑀩𑀼𑀤𑁆𑀥𑁂𑀦 𑀤𑀼𑀓𑁆𑀔𑀦𑁆𑀢𑀕𑀼𑀦𑀸 𑀧𑀓𑀸𑀲𑀺𑀢’’𑀦𑁆𑀢𑀺. (𑀲𑀼. 𑀦𑀺. 𑁪𑁦𑁨-𑁪𑁦𑁩);

𑀤𑁂𑀯𑀓𑀸𑀬𑀸𑀪𑀺𑀦𑀦𑁆𑀤𑀺𑀦𑀻𑀢𑀺 𑀢𑀢𑁆𑀭𑀽𑀧𑀧𑀢𑁆𑀢𑀺𑀆𑀓𑀗𑁆𑀔𑀸𑀯𑀲𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀁 𑀤𑁂𑀯𑀓𑀸𑀬𑀁 𑀅𑀪𑀺𑀧𑀢𑁆𑀣𑁂𑀦𑁆𑀢𑀻 𑀉𑀧𑁄𑀲𑀣𑀁 𑀉𑀧𑀸𑀕𑀘𑁆𑀙𑀺𑀦𑁆𑀢𑀺 𑀬𑁄𑀚𑀦𑀸. 𑀲𑀸𑀚𑁆𑀚 𑀏𑀓𑁂𑀦 𑀪𑀢𑁆𑀢𑁂𑀦𑀸𑀢𑀺 𑀲𑀸 𑀅𑀳𑀁 𑀅𑀚𑁆𑀚 𑀇𑀫𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀏𑀓𑁂𑀦 𑀪𑀢𑁆𑀢𑀪𑁄𑀚𑀦𑀓𑁆𑀔𑀡𑁂𑀦. 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸𑀢𑀺 𑀫𑀼𑀡𑁆𑀟𑀺𑀢𑀓𑁂𑀲𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀲𑀭𑀻𑀭𑀸 𑀘 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀢𑀺 𑀅𑀢𑁆𑀣𑁄. 𑀤𑁂𑀯𑀓𑀸𑀬𑀁 𑀦 𑀧𑀢𑁆𑀣𑁂𑀳𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀓𑀜𑁆𑀘𑀺 𑀤𑁂𑀯𑀦𑀺𑀓𑀸𑀬𑀁 𑀅𑀳𑀁 𑀦 𑀧𑀢𑁆𑀣𑀬𑁂. 𑀢𑁂𑀦𑁂𑀯𑀸𑀳 𑁋 ‘‘𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭’’𑀦𑁆𑀢𑀺, 𑀘𑀺𑀢𑁆𑀢𑀕𑀢𑀁 𑀓𑀺𑀮𑁂𑀲𑀤𑀭𑀣𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀘𑀲𑁆𑀲𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀺.

𑀫𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀪𑀬𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀉𑀤𑁆𑀥𑀁 𑀧𑀸𑀤𑀢𑀮𑀸𑀢𑀺𑀆𑀤𑀺𑀓𑀸 𑀅𑀪𑀬𑀫𑀸𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑀻 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀺𑀓𑁆𑀔𑀁 𑀅𑀤𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀸𑀤𑀺𑀲𑁂𑀦 𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀉𑀚𑁆𑀚𑁂𑀦𑀺𑀬𑀁 𑀧𑀤𑀼𑀫𑀯𑀢𑀻 𑀦𑀸𑀫 𑀦𑀕𑀭𑀲𑁄𑀪𑀺𑀡𑀻 𑀅𑀳𑁄𑀲𑀺. 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀆𑀤𑀺𑀓𑁂 𑀕𑀼𑀡𑁂 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑀲𑁆𑀲 𑀆𑀘𑀺𑀓𑁆𑀔𑀺 𑁋 ‘‘𑀉𑀚𑁆𑀚𑁂𑀦𑀺𑀬𑀁 𑀓𑀺𑀭 𑀧𑀤𑀼𑀫𑀯𑀢𑀻 𑀦𑀸𑀫 𑀕𑀡𑀺𑀓𑀸 𑀅𑀳𑁄𑀲𑀺, 𑀢𑀫𑀳𑀁 𑀤𑀝𑁆𑀞𑀼𑀓𑀸𑀫𑁄𑀫𑁆𑀳𑀻’’𑀢𑀺. 𑀧𑀼𑀭𑁄𑀳𑀺𑀢𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀫𑀦𑁆𑀢𑀩𑀮𑁂𑀦 𑀓𑀼𑀫𑁆𑀪𑀻𑀭𑀁 𑀦𑀸𑀫 𑀬𑀓𑁆𑀔𑀁 𑀆𑀯𑀳𑁂𑀢𑁆𑀯𑀸 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀭𑀸𑀚𑀸𑀦𑀁 𑀢𑀸𑀯𑀤𑁂𑀯 𑀉𑀚𑁆𑀚𑁂𑀦𑀻𑀦𑀕𑀭𑀁 𑀦𑁂𑀲𑀺. 𑀭𑀸𑀚𑀸 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀭𑀢𑁆𑀢𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀭𑀜𑁆𑀜𑁄 𑀘 𑀆𑀭𑁄𑀘𑁂𑀲𑀺 𑁋 ‘‘𑀫𑀫 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀦𑀁 ‘‘𑀲𑀘𑁂 𑀧𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀯𑀟𑁆𑀠𑁂𑀢𑁆𑀯𑀸 𑀫𑀫𑀁 𑀤𑀲𑁆𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀦𑀸𑀫𑀫𑀼𑀤𑁆𑀤𑀺𑀓𑀁 𑀤𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀪𑀬𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀧𑀼𑀢𑁆𑀢𑀜𑁆𑀘 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 ‘‘𑀢𑀯 𑀧𑀺𑀢𑀸 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. 𑀭𑀸𑀚𑀸 𑀢𑀁 𑀧𑀼𑀢𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 𑀓𑀼𑀫𑀸𑀭𑀓𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑁂𑀲𑀺. 𑀢𑀲𑁆𑀲 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀧𑀩𑁆𑀩𑀚𑁆𑀚𑀸 𑀯𑀺𑀲𑁂𑀲𑀸𑀥𑀺𑀕𑀫𑁄 𑀘 𑀳𑁂𑀝𑁆𑀞𑀸 𑀆𑀕𑀢𑁄𑀬𑁂𑀯. 𑀢𑀲𑁆𑀲 𑀫𑀸𑀢𑀸 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀲𑁆𑀲 𑀅𑀪𑀬𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁬𑁦-𑁭𑁦) 𑁋

‘‘𑀧𑀺𑀡𑁆𑀟𑀘𑀸𑀭𑀁 𑀘𑀭𑀦𑁆𑀢𑀲𑁆𑀲, 𑀢𑀺𑀲𑁆𑀲𑀦𑀸𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀯𑀻𑀣𑀺𑀬𑀸 𑀲𑀡𑁆𑀞𑀺𑀢𑁄 𑀲𑀢𑁆𑀣𑀸, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

‘‘𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀢𑀸𑀯𑀢𑀺𑀁𑀲𑀁 𑀕𑀫𑀺𑀲𑁆𑀲𑀲𑀺;

𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺.

‘‘𑀧𑀜𑁆𑀜𑀸𑀲𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀝𑀺𑀮𑀘𑁆𑀙𑀲𑀺 𑀲𑀩𑁆𑀩𑀤𑀸.

‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀧𑀩𑁆𑀩𑀚𑀺𑀲𑁆𑀲𑀲𑀺 𑀓𑀺𑀜𑁆𑀘𑀦𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺𑀦𑀸𑀲𑀯𑀸.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

‘‘𑀲𑀼𑀤𑀺𑀦𑁆𑀦𑀁 𑀫𑁂 𑀤𑀸𑀦𑀯𑀭𑀁, 𑀲𑀼𑀬𑀺𑀝𑁆𑀞𑀸 𑀬𑀸𑀕𑀲𑀫𑁆𑀧𑀤𑀸;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀧𑀢𑁆𑀢𑀸𑀳𑀁 𑀅𑀘𑀮𑀁 𑀧𑀤𑀁.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀓𑁆𑀔𑀸𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀦 𑀅𑀪𑀬𑀢𑁆𑀣𑁂𑀭𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀦 𑀑𑀯𑀸𑀤𑀯𑀲𑁂𑀦 𑀬𑀸 𑀕𑀸𑀣𑀸 𑀪𑀸𑀲𑀺𑀢𑀸, 𑀉𑀤𑀸𑀦𑀯𑀲𑁂𑀦 𑀲𑀬𑀫𑁆𑀧𑀺 𑀢𑀸 𑀏𑀯 𑀧𑀘𑁆𑀘𑀼𑀤𑀸𑀳𑀭𑀦𑁆𑀢𑀻 𑁋

𑁩𑁩.

‘‘𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀫𑁆𑀫, 𑀅𑀥𑁄 𑀯𑁂 𑀓𑁂𑀲𑀫𑀢𑁆𑀣𑀓𑀸;

𑀧𑀘𑁆𑀘𑀯𑁂𑀓𑁆𑀔𑀲𑁆𑀲𑀼𑀫𑀁 𑀓𑀸𑀬𑀁, 𑀅𑀲𑀼𑀘𑀺𑀁 𑀧𑀽𑀢𑀺𑀕𑀦𑁆𑀥𑀺𑀓𑀁.

𑁩𑁪.

‘‘𑀏𑀯𑀁 𑀯𑀺𑀳𑀭𑀫𑀸𑀦𑀸𑀬, 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀽𑀳𑀢𑁄;

𑀧𑀭𑀺𑀴𑀸𑀳𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋 𑀆𑀳;

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀫𑁆𑀫 𑀧𑀤𑀼𑀫𑀯𑀢𑀺, 𑀧𑀸𑀤𑀢𑀮𑀢𑁄 𑀉𑀤𑁆𑀥𑀁 𑀓𑁂𑀲𑀫𑀢𑁆𑀣𑀓𑀢𑁄 𑀅𑀥𑁄 𑀦𑀸𑀦𑀧𑁆𑀧𑀓𑀸𑀭𑀅𑀲𑀼𑀘𑀺𑀧𑀽𑀭𑀺𑀢𑀸𑀬 𑀅𑀲𑀼𑀘𑀺𑀁 𑀲𑀩𑁆𑀩𑀓𑀸𑀮𑀁 𑀧𑀽𑀢𑀺𑀕𑀦𑁆𑀥𑀯𑀸𑀬𑀦𑀢𑁄 𑀧𑀽𑀢𑀺𑀕𑀦𑁆𑀥𑀺𑀓𑀁, 𑀇𑀫𑀁 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑀢𑀦𑀢𑀸𑀬 𑀓𑀸𑀬𑀁 𑀲𑀭𑀻𑀭𑀁 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀯𑁂𑀓𑁆𑀔𑀲𑁆𑀲𑀽𑀢𑀺. 𑀅𑀬𑀜𑁆𑀳𑀺 𑀢𑀲𑁆𑀲𑀸 𑀧𑀼𑀢𑁆𑀢𑁂𑀦 𑀑𑀯𑀸𑀤𑀤𑀸𑀦𑀯𑀲𑁂𑀦 𑀪𑀸𑀲𑀺𑀢𑀸 𑀕𑀸𑀣𑀸.

𑀲𑀸 𑀢𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑀻 𑀆𑀘𑀭𑀺𑀬𑀧𑀽𑀚𑀸𑀯𑀲𑁂𑀦 𑀢𑀫𑁂𑀯 𑀕𑀸𑀣𑀁 𑀧𑀞𑀫𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑀻 ‘‘𑀏𑀯𑀁 𑀯𑀺𑀳𑀭𑀫𑀸𑀦𑀸𑀬𑀸’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀏𑀯𑀁 𑀯𑀺𑀳𑀭𑀫𑀸𑀦𑀸𑀬𑀸𑀢𑀺 𑀏𑀯𑀁 𑀫𑀫 𑀧𑀼𑀢𑁆𑀢𑁂𑀦 𑀅𑀪𑀬𑀢𑁆𑀣𑁂𑀭𑁂𑀦 ‘‘𑀉𑀤𑁆𑀥𑀁 𑀧𑀸𑀤𑀢𑀮𑀸’’𑀢𑀺𑀆𑀤𑀺𑀦𑀸 𑀤𑀺𑀦𑁆𑀦𑁂 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀩𑁆𑀩𑀓𑀸𑀬𑀁 𑀅𑀲𑀼𑀪𑀢𑁄 𑀤𑀺𑀲𑁆𑀯𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀢𑀢𑁆𑀣 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑁂 𑀭𑀽𑀧𑀥𑀫𑁆𑀫𑁂 𑀢𑀧𑁆𑀧𑀝𑀺𑀩𑀤𑁆𑀥𑁂 𑀯𑁂𑀤𑀦𑀸𑀤𑀺𑀓𑁂 𑀅𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀳𑀭𑀫𑀸𑀦𑀸𑀬. 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀽𑀳𑀢𑁄𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁂𑀦 𑀖𑀝𑀺𑀢𑀸𑀬 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑁄 𑀭𑀸𑀕𑁄 𑀫𑀬𑀸 𑀲𑀫𑀽𑀳𑀢𑁄 𑀲𑀫𑀼𑀕𑁆𑀖𑀸𑀝𑀺𑀢𑁄. 𑀧𑀭𑀺𑀴𑀸𑀳𑁄 𑀲𑀫𑀼𑀘𑁆𑀙𑀺𑀦𑁆𑀦𑁄𑀢𑀺 𑀢𑀢𑁄 𑀏𑀯 𑀲𑀩𑁆𑀩𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀲𑀫𑁆𑀫𑀤𑁂𑀯 𑀉𑀘𑁆𑀙𑀺𑀦𑁆𑀦𑁄, 𑀢𑀲𑁆𑀲 𑀘 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀏𑀯 𑀲𑀻𑀢𑀺𑀪𑀽𑀢𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀼𑀢𑀸 𑀅𑀫𑁆𑀳𑀻𑀢𑀺.

𑀅𑀪𑀬𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀪𑀬𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀪𑀬𑁂 𑀪𑀺𑀤𑀼𑀭𑁄 𑀓𑀸𑀬𑁄𑀢𑀺𑀆𑀤𑀺𑀓𑀸 𑀅𑀪𑀬𑀢𑁆𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑀻 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀭𑀼𑀡𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀏𑀓𑀤𑀺𑀯𑀲𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀲𑀢𑁆𑀢 𑀉𑀧𑁆𑀧𑀮𑀸𑀦𑀺 𑀅𑀤𑀸𑀲𑀺. 𑀲𑀸 𑀢𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀓𑀺𑀁 𑀫𑁂 𑀇𑀫𑁂𑀳𑀺 𑀧𑀺𑀴𑀦𑁆𑀥𑀦𑁆𑀢𑁂𑀳𑀺. 𑀬𑀁𑀦𑀽𑀦𑀸𑀳𑀁 𑀇𑀫𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀕𑀯𑀸 𑀘 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀭𑀸𑀚𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀚𑁆𑀚𑁂𑀦𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀪𑀬𑀫𑀸𑀢𑀼𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸 𑀢𑀸𑀬 𑀧𑀩𑁆𑀩𑀚𑀺𑀢𑀸𑀬 𑀢𑀲𑁆𑀲𑀸 𑀲𑀺𑀦𑁂𑀳𑁂𑀦 𑀲𑀬𑀫𑁆𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀭𑀸𑀚𑀕𑀳𑁂 𑀯𑀲𑀫𑀸𑀦𑀸 𑀏𑀓𑀤𑀺𑀯𑀲𑀁 𑀅𑀲𑀼𑀪𑀤𑀲𑁆𑀲𑀦𑀢𑁆𑀣𑀁 𑀲𑀻𑀢𑀯𑀦𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑀲𑁆𑀲𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀢𑀲𑁆𑀲𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀁 𑀧𑀓𑀸𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀁𑀯𑁂𑀕𑀫𑀸𑀦𑀲𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

𑁩𑁫.

‘‘𑀅𑀪𑀬𑁂 𑀪𑀺𑀤𑀼𑀭𑁄 𑀓𑀸𑀬𑁄, 𑀬𑀢𑁆𑀣 𑀲𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸;

𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀺𑀫𑀁 𑀤𑁂𑀳𑀁, 𑀲𑀫𑁆𑀧𑀚𑀸𑀦𑀸 𑀲𑀢𑀻𑀫𑀢𑀻.

𑁩𑁬.

‘‘𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀫𑁂;

𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁭𑁧-𑁯𑁦) 𑁋

‘‘𑀦𑀕𑀭𑁂 𑀅𑀭𑀼𑀡𑀯𑀢𑀺𑀬𑀸, 𑀅𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀯𑀸𑀭𑀺𑀢𑀁 𑀯𑀸𑀭𑀬𑀸𑀫𑀳𑀁.

‘‘𑀲𑀢𑁆𑀢𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀉𑀧𑁆𑀧𑀮𑀸 𑀤𑁂𑀯𑀕𑀦𑁆𑀥𑀺𑀓𑀸;

𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀢𑀸𑀯𑀤𑁂.

‘‘𑀓𑀺𑀁 𑀫𑁂 𑀇𑀫𑀸𑀳𑀺 𑀫𑀸𑀮𑀸𑀳𑀺, 𑀲𑀺𑀭𑀲𑀸𑀭𑁄𑀧𑀺𑀢𑀸𑀳𑀺 𑀫𑁂;

𑀯𑀭𑀁 𑀫𑁂 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀜𑀸𑀡𑀫𑁆𑀳𑀺 𑀅𑀪𑀺𑀭𑁄𑀧𑀺𑀢𑀁.

‘‘𑀲𑀫𑁆𑀩𑀼𑀤𑁆𑀥𑀁 𑀧𑀝𑀺𑀫𑀸𑀦𑁂𑀦𑁆𑀢𑀻, 𑀤𑁆𑀯𑀸𑀭𑀸𑀲𑀦𑁆𑀦𑁂 𑀦𑀺𑀲𑀻𑀤𑀳𑀁;

𑀬𑀤𑀸 𑀏𑀳𑀺𑀢𑀺 𑀲𑀫𑁆𑀩𑀼𑀤𑁆𑀥𑁄, 𑀧𑀽𑀚𑀬𑀺𑀲𑁆𑀲𑀁 𑀫𑀳𑀸𑀫𑀼𑀦𑀺𑀁.

‘‘𑀓𑀓𑀼𑀥𑁄 𑀯𑀺𑀮𑀲𑀦𑁆𑀢𑁄𑀯, 𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻;

𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀳𑀺𑀢𑁄, 𑀆𑀕𑀘𑁆𑀙𑀺 𑀯𑀻𑀣𑀺𑀬𑀸 𑀚𑀺𑀦𑁄.

‘‘𑀩𑀼𑀤𑁆𑀥𑀲𑁆𑀲 𑀭𑀁𑀲𑀺𑀁 𑀤𑀺𑀲𑁆𑀯𑀸𑀦, 𑀳𑀝𑁆𑀞𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸;

𑀤𑁆𑀯𑀸𑀭𑀁 𑀅𑀯𑀸𑀧𑀼𑀭𑀺𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀫𑀧𑀽𑀚𑀬𑀺𑀁.

‘‘𑀲𑀢𑁆𑀢 𑀉𑀧𑁆𑀧𑀮𑀧𑀼𑀧𑁆𑀨𑀸𑀦𑀺, 𑀧𑀭𑀺𑀓𑀺𑀡𑁆𑀡𑀸𑀦𑀺 𑀅𑀫𑁆𑀩𑀭𑁂;

𑀙𑀤𑀺𑀁 𑀓𑀭𑁄𑀦𑁆𑀢𑁄 𑀩𑀼𑀤𑁆𑀥𑀲𑁆𑀲, 𑀫𑀢𑁆𑀣𑀓𑁂 𑀥𑀸𑀭𑀬𑀦𑁆𑀢𑀺 𑀢𑁂.

‘‘𑀉𑀤𑀕𑁆𑀕𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀫𑀳𑀸𑀦𑁂𑀮𑀲𑁆𑀲 𑀙𑀸𑀤𑀦𑀁, 𑀥𑀸𑀭𑁂𑀦𑁆𑀢𑀺 𑀫𑀫 𑀫𑀼𑀤𑁆𑀥𑀦𑀺;

𑀤𑀺𑀩𑁆𑀩𑀕𑀦𑁆𑀥𑀁 𑀧𑀯𑀸𑀬𑀸𑀫𑀺, 𑀲𑀢𑁆𑀢𑀼𑀧𑁆𑀧𑀮𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀤𑀸𑀘𑀺 𑀦𑀻𑀬𑀫𑀸𑀦𑀸𑀬, 𑀜𑀸𑀢𑀺𑀲𑀗𑁆𑀖𑁂𑀦 𑀫𑁂 𑀢𑀤𑀸;

𑀬𑀸𑀯𑀢𑀸 𑀧𑀭𑀺𑀲𑀸 𑀫𑀬𑁆𑀳𑀁, 𑀫𑀳𑀸𑀦𑁂𑀮𑀁 𑀥𑀭𑀻𑀬𑀢𑀺.

‘‘𑀲𑀢𑁆𑀢𑀢𑀺 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀩𑁆𑀩𑀢𑁆𑀣 𑀇𑀲𑁆𑀲𑀭𑀸 𑀳𑀼𑀢𑁆𑀯𑀸, 𑀲𑀁𑀲𑀭𑀸𑀫𑀺 𑀪𑀯𑀸𑀪𑀯𑁂.

‘‘𑀢𑁂𑀲𑀝𑁆𑀞𑀺 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀩𑁆𑀩𑁂 𑀫𑀫𑀦𑀼𑀯𑀢𑁆𑀢𑀦𑁆𑀢𑀺, 𑀆𑀤𑁂𑀬𑁆𑀬𑀯𑀘𑀦𑀸 𑀅𑀳𑀼𑀁.

‘‘𑀉𑀧𑁆𑀧𑀮𑀲𑁆𑀲𑁂𑀯 𑀫𑁂 𑀯𑀡𑁆𑀡𑁄, 𑀕𑀦𑁆𑀥𑁄 𑀘𑁂𑀯 𑀧𑀯𑀸𑀬𑀢𑀺;

𑀤𑀼𑀩𑁆𑀩𑀡𑁆𑀡𑀺𑀬𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀇𑀤𑁆𑀥𑀺𑀧𑀸𑀤𑁂𑀲𑀼 𑀓𑀼𑀲𑀮𑀸, 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀭𑀢𑀸;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸, 𑀲𑀫𑀸𑀥𑀺𑀛𑀸𑀦𑀕𑁄𑀘𑀭𑀸;

𑀲𑀫𑁆𑀫𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑀸, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁧.𑁭𑁧-𑁯𑁦);

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑀻 𑀢𑀸 𑀏𑀯 𑀕𑀸𑀣𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀪𑀬𑁂𑀢𑀺 𑀅𑀢𑁆𑀢𑀸𑀦𑀫𑁂𑀯 𑀆𑀮𑀧𑀢𑀺. 𑀪𑀺𑀤𑀼𑀭𑁄𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑁄, 𑀅𑀦𑀺𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀲𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸𑀢𑀺 𑀬𑀲𑁆𑀫𑀺𑀁 𑀔𑀡𑁂𑀦 𑀪𑀺𑀚𑁆𑀚𑀦𑀲𑀻𑀮𑁂 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀲𑀪𑀸𑀯𑁂 𑀓𑀸𑀬𑁂 𑀇𑀫𑁂 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸. 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀺𑀫𑀁 𑀤𑁂𑀳𑀦𑁆𑀢𑀺 𑀅𑀳𑀁 𑀧𑀦 𑀇𑀫𑀁 𑀤𑁂𑀳𑀁 𑀧𑀽𑀢𑀺𑀓𑀸𑀬𑀁 𑀧𑀼𑀦 𑀅𑀦𑀸𑀤𑀸𑀦𑁂𑀦 𑀦𑀺𑀭𑀧𑁂𑀓𑁆𑀔𑀸 𑀔𑀺𑀧𑀺𑀲𑁆𑀲𑀸𑀫𑀺 𑀙𑀟𑁆𑀟𑁂𑀲𑁆𑀲𑀸𑀫𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀫𑁆𑀧𑀚𑀸𑀦𑀸 𑀲𑀢𑀻𑀫𑀢𑀻’’𑀢𑀺.

𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀻𑀢𑀺 𑀚𑀸𑀢𑀺𑀚𑀭𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀨𑀼𑀝𑁆𑀞𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑀫𑀸𑀤𑀭𑀢𑀸𑀬𑀸𑀢𑀺 𑀢𑀸𑀬 𑀏𑀯 𑀤𑀼𑀓𑁆𑀔𑁄𑀢𑀺𑀡𑁆𑀡𑀢𑀸𑀬 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑀢𑁆𑀢𑀸 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑁂 𑀅𑀧𑁆𑀧𑀫𑀸𑀤𑁂 𑀭𑀢𑀸𑀬. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦 𑁋

‘‘𑀦𑀺𑀓𑁆𑀔𑀺𑀧𑀸𑀳𑀺 𑀇𑀫𑀁 𑀤𑁂𑀳𑀁, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀢𑁂;

𑀢𑀡𑁆𑀳𑀓𑁆𑀔𑀬𑀁 𑀧𑀸𑀧𑀼𑀡𑀸𑀳𑀺, 𑀓𑀭𑁄𑀳𑀺 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺. 𑁋

𑀧𑀸𑀞𑁄, 𑀣𑁂𑀭𑀺𑀬𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀧𑀦 𑀲𑀁𑀕𑀻𑀢𑀺𑀁 𑀆𑀭𑁄𑀧𑀺𑀢𑀢𑁆𑀢𑀸. 𑀅𑀧𑁆𑀧𑀫𑀸𑀤𑀭𑀢𑀸𑀬 𑀢𑁂𑀢𑀺 𑀅𑀧𑁆𑀧𑀫𑀸𑀤𑀭𑀢𑀸𑀬 𑀢𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀪𑀬𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀸𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀦𑁆𑀢𑀺𑀆𑀤𑀺𑀓𑀸 𑀲𑀸𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀫𑁆𑀩𑀺𑀬𑀁 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀸𑀫𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀲𑀸𑀫𑀸𑀯𑀢𑀺𑀬𑀸 𑀉𑀧𑀸𑀲𑀺𑀓𑀸𑀬 𑀧𑀺𑀬𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸 𑀢𑀸𑀬 𑀓𑀸𑀮𑀗𑁆𑀓𑀢𑀸𑀬 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀲𑀸𑀫𑀸𑀯𑀢𑀺𑀓𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑁄𑀓𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀅𑀭𑀺𑀬𑀫𑀕𑁆𑀕𑀁 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀧𑀭𑀪𑀸𑀕𑁂 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑀁 𑀧𑀓𑀸𑀲𑁂𑀦𑁆𑀢𑀻 𑁋

𑁩𑁭.

‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻;

𑀢𑀲𑁆𑀲𑀸 𑀫𑁂 𑀅𑀝𑁆𑀞𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀲𑀫𑀽𑀳𑀢𑀸.

𑁩𑁮.

‘‘𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀫𑁂;

𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀉𑀤𑀸𑀦𑀯𑀲𑁂𑀦 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀦𑁆𑀢𑀺 ‘‘𑀫𑀫 𑀯𑀲𑀦𑀓𑀯𑀺𑀳𑀸𑀭𑁂 𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑀸 𑀲𑀫𑀡𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀉𑀢𑀼𑀲𑀧𑁆𑀧𑀸𑀬𑀸𑀪𑀸𑀯𑁂𑀦 𑀦𑀦𑀼 𑀔𑁄 𑀫𑀬𑁆𑀳𑀁 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀖𑀝𑁆𑀝𑁂𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀘𑀸𑀢𑀺 𑀦𑀯 𑀯𑀸𑀭𑁂 𑀯𑀺𑀳𑀸𑀭𑀸 𑀉𑀧𑀲𑁆𑀲𑀬𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀁. 𑀢𑁂𑀦𑀸𑀳 ‘‘𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻’’𑀢𑀺. 𑀢𑀢𑁆𑀣 𑀘𑁂𑀢𑀲𑁄 𑀲𑀦𑁆𑀢𑀺𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑀸𑀥𑀺𑀁 𑀲𑀦𑁆𑀥𑀸𑀬𑀸𑀳. 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻𑀢𑀺 𑀯𑀻𑀭𑀺𑀬𑀲𑀫𑀢𑀸𑀬 𑀅𑀪𑀸𑀯𑁂𑀦 𑀫𑀫 𑀪𑀸𑀯𑀦𑀸𑀘𑀺𑀢𑁆𑀢𑁂 𑀦 𑀯𑀲𑀯𑀢𑁆𑀢𑀺𑀦𑀻. 𑀲𑀸 𑀓𑀺𑀭 𑀅𑀢𑀺𑀯𑀺𑀬 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀸 𑀅𑀳𑁄𑀲𑀺. 𑀢𑀲𑁆𑀲𑀸 𑀫𑁂 𑀅𑀝𑁆𑀞𑀫𑀻 𑀭𑀢𑁆𑀢𑀻𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀧𑀝𑀺𑀮𑀪𑀺𑀁, 𑀢𑀢𑁄 𑀧𑀝𑁆𑀞𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀭𑀢𑁆𑀢𑀺𑀬𑀁 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀻 𑀯𑀺𑀲𑁂𑀲𑀁 𑀅𑀦𑀥𑀺𑀕𑀦𑁆𑀢𑁆𑀯𑀸 𑀅𑀝𑁆𑀞𑀫𑀺𑀬𑀁 𑀭𑀢𑁆𑀢𑀺𑀬𑀁 𑀯𑀻𑀭𑀺𑀬𑀲𑀫𑀢𑀁 𑀮𑀪𑀺𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀓𑀺𑀮𑁂𑀲𑁂 𑀔𑁂𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀲𑀸 𑀫𑁂 𑀅𑀝𑁆𑀞𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀲𑀫𑀽𑀳𑀢𑀸’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀸𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀧𑀸𑀢𑁄

𑁧. 𑀅𑀧𑀭𑀸𑀲𑀸𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀢𑀺𑀓𑀦𑀺𑀧𑀸𑀢𑁂 𑀧𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀦𑀻𑀢𑀺𑀆𑀤𑀺𑀓𑀸 𑀅𑀧𑀭𑀸𑀬 𑀲𑀸𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀢𑀢𑁆𑀣 𑀓𑀺𑀦𑁆𑀦𑀭𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀸𑀧𑀲𑀼𑀢𑀸 𑀯𑀺𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀢𑀲𑁆𑀲𑀸 𑀓𑀼𑀲𑀮𑀩𑀻𑀚𑀭𑁄𑀧𑀦𑀢𑁆𑀣𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀤𑀻𑀢𑀻𑀭𑁂 𑀘𑀗𑁆𑀓𑀫𑀺. 𑀲𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀲𑀴𑀮𑀧𑀼𑀧𑁆𑀨𑀸𑀦𑀺 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑁂𑀳𑀺 𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀫𑁆𑀩𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀲𑀸𑀫𑀸𑀯𑀢𑀺𑀬𑀸 𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀫𑀢𑀓𑀸𑀮𑁂 𑀲𑀁𑀯𑁂𑀕𑀚𑀸𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑀁 𑀅𑀮𑀪𑀺𑀢𑁆𑀯𑀸 𑀫𑀳𑀮𑁆𑀮𑀺𑀓𑀸𑀓𑀸𑀮𑁂 𑀲𑀼𑀕𑀢𑁄𑀯𑀸𑀤𑀁 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁨𑁨-𑁨𑁯) 𑁋

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑀻 𑀢𑀤𑀸;

𑀅𑀤𑁆𑀤𑀲𑀸𑀳𑀁 𑀤𑁂𑀯𑀤𑁂𑀯𑀁, 𑀘𑀗𑁆𑀓𑀫𑀦𑁆𑀢𑀁 𑀦𑀭𑀸𑀲𑀪𑀁.

‘‘𑀑𑀘𑀺𑀦𑀺𑀢𑁆𑀯𑀸𑀦 𑀲𑀴𑀮𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀉𑀧𑀲𑀺𑀗𑁆𑀖𑀺 𑀫𑀳𑀸𑀯𑀻𑀭𑁄, 𑀲𑀴𑀮𑀁 𑀤𑁂𑀯𑀕𑀦𑁆𑀥𑀺𑀓𑀁.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀯𑀺𑀧𑀲𑁆𑀲𑀻 𑀮𑁄𑀓𑀦𑀸𑀬𑀓𑁄;

𑀉𑀧𑀲𑀺𑀗𑁆𑀖𑀺 𑀫𑀳𑀸𑀯𑀻𑀭𑁄, 𑀧𑁂𑀓𑁆𑀔𑀫𑀸𑀦𑀸𑀬 𑀫𑁂 𑀢𑀤𑀸.

‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀯𑀦𑁆𑀤𑀺𑀢𑁆𑀯𑀸 𑀤𑁆𑀯𑀺𑀧𑀤𑀼𑀢𑁆𑀢𑀫𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀢𑁄 𑀧𑀩𑁆𑀩𑀢𑀫𑀸𑀭𑀼𑀳𑀺𑀁.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁩𑁯.

‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀬𑀢𑁄 𑀧𑀩𑁆𑀩𑀚𑀺𑀢𑀸𑀬 𑀫𑁂;

𑀦𑀸𑀪𑀺𑀚𑀸𑀦𑀸𑀫𑀺 𑀘𑀺𑀢𑁆𑀢𑀲𑁆𑀲, 𑀲𑀫𑀁 𑀮𑀤𑁆𑀥𑀁 𑀓𑀼𑀤𑀸𑀘𑀦𑀁.

𑁪𑁦.

‘‘𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻;

𑀢𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀺𑀁, 𑀲𑀭𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀁.

𑁪𑁧.

‘‘𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀫𑁂;

𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀅𑀚𑁆𑀚 𑀫𑁂 𑀲𑀢𑁆𑀢𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀯𑀺𑀲𑁄𑀲𑀺𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀲𑀫𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀯𑀽𑀧𑀲𑀫𑀁, 𑀘𑁂𑀢𑁄𑀲𑀫𑀣𑀫𑀕𑁆𑀕𑀨𑀮𑀲𑀫𑀸𑀥𑀻𑀢𑀺 𑀅𑀢𑁆𑀣𑁄.

𑀢𑀢𑁄𑀢𑀺 𑀢𑀲𑁆𑀫𑀸 𑀘𑀺𑀢𑁆𑀢𑀯𑀲𑀁 𑀯𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀲𑀁𑀯𑁂𑀕𑀫𑀸𑀧𑀸𑀤𑀺𑀦𑁆𑀢𑀺 𑀲𑀢𑁆𑀣𑀭𑀺 𑀥𑀭𑀦𑁆𑀢𑁂𑀧𑀺 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀘𑁆𑀙𑀸 𑀓𑀣𑀁 𑀧𑀸𑀧𑀬𑀺𑀲𑁆𑀲𑀸𑀫𑀻𑀢𑀺 𑀲𑀁𑀯𑁂𑀕𑀁 𑀜𑀸𑀡𑀼𑀢𑁆𑀭𑀸𑀲𑀁 𑀆𑀧𑀚𑁆𑀚𑀺𑀁. 𑀲𑀭𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀦𑁆𑀢𑀺 𑀓𑀸𑀡𑀓𑀘𑁆𑀙𑀧𑁄𑀧𑀫𑀸𑀤𑀺𑀲𑀢𑁆𑀣𑀼𑀑𑀯𑀸𑀤𑀁 (𑀲𑀁. 𑀦𑀺. 𑁫.𑁧𑁧𑁧𑁭; 𑀫. 𑀦𑀺. 𑁩.𑁨𑁫𑁨) 𑀅𑀦𑀼𑀲𑁆𑀲𑀭𑀺𑀢𑁆𑀯𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀭𑀸𑀲𑀸𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀢𑁆𑀢𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀦𑁆𑀢𑀺𑀆𑀤𑀺𑀓𑀸 𑀉𑀢𑁆𑀢𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀖𑀭𑀤𑀸𑀲𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀅𑀢𑁆𑀢𑀦𑁄 𑀅𑀬𑁆𑀬𑀓𑀸𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀻 𑀚𑀻𑀯𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀩𑀦𑁆𑀥𑀼𑀫𑀭𑀸𑀚𑀸 𑀧𑀼𑀡𑁆𑀡𑀫𑀻𑀤𑀺𑀯𑀲𑁂 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀸𑀦𑀺 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀅𑀣 𑀫𑀳𑀸𑀚𑀦𑀸 𑀬𑀣𑀸 𑀭𑀸𑀚𑀸 𑀧𑀝𑀺𑀧𑀚𑁆𑀚𑀢𑀺, 𑀢𑀣𑁂𑀯 𑀧𑀼𑀡𑁆𑀡𑀫𑀻𑀤𑀺𑀯𑀲𑁂 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺. 𑀅𑀣𑀲𑁆𑀲𑀸 𑀤𑀸𑀲𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑀳𑀸𑀭𑀸𑀚𑀸 𑀫𑀳𑀸𑀚𑀦𑀸 𑀘 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀲𑀻𑀮𑀁 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺. 𑀲𑀸 𑀢𑀣𑀸 𑀓𑀭𑁄𑀦𑁆𑀢𑀻 𑀲𑀼𑀧𑀭𑀺𑀲𑀼𑀤𑁆𑀥𑀁 𑀉𑀧𑁄𑀲𑀣𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀝𑀸𑀘𑀸𑀭𑀸 𑀣𑁂𑀭𑀻 𑀢𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀑𑀯𑀸𑀤𑀫𑀤𑀸𑀲𑀺. 𑀲𑀸 𑀢𑀲𑁆𑀲𑀸 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁧-𑁨𑁧) 𑁋

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀩𑀦𑁆𑀥𑀼𑀫𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀤𑀺𑀯𑀲𑁂 𑀧𑀼𑀡𑁆𑀡𑀫𑀸𑀬 𑀲𑁄, 𑀉𑀧𑀯𑀲𑀺 𑀉𑀧𑁄𑀲𑀣𑀁.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀓𑀼𑀫𑁆𑀪𑀤𑀸𑀲𑀻 𑀅𑀳𑀁 𑀢𑀳𑀺𑀁;

𑀤𑀺𑀲𑁆𑀯𑀸 𑀲𑀭𑀸𑀚𑀓𑀁 𑀲𑁂𑀦𑀁, 𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀁 𑀢𑀤𑀸.

‘‘𑀭𑀸𑀚𑀸𑀧𑀺 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸, 𑀉𑀧𑀯𑀲𑀺 𑀉𑀧𑁄𑀲𑀣𑀁;

𑀲𑀨𑀮𑀁 𑀦𑀽𑀦 𑀢𑀁 𑀓𑀫𑁆𑀫𑀁, 𑀚𑀦𑀓𑀸𑀬𑁄 𑀧𑀫𑁄𑀤𑀺𑀢𑁄.

‘‘𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀤𑀼𑀕𑁆𑀕𑀘𑁆𑀘𑀜𑁆𑀘 𑀤𑀮𑀺𑀤𑁆𑀤𑀢𑀁;

𑀫𑀸𑀦𑀲𑀁 𑀲𑀫𑁆𑀧𑀳𑀁𑀲𑀺𑀢𑁆𑀯𑀸, 𑀉𑀧𑀯𑀲𑀺𑀁 𑀉𑀧𑁄𑀲𑀣𑀁.

‘‘𑀅𑀳𑀁 𑀉𑀧𑁄𑀲𑀣𑀁 𑀓𑀢𑁆𑀯𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀉𑀩𑁆𑀪𑀬𑁄𑀚𑀦𑀫𑀼𑀕𑁆𑀕𑀢𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀫𑀳𑀸𑀲𑀦𑀲𑀼𑀪𑀽𑀲𑀺𑀢𑀁.

‘‘𑀅𑀘𑁆𑀙𑀭𑀸 𑀲𑀢𑀲𑀳𑀲𑁆𑀲𑀸, 𑀉𑀧𑀢𑀺𑀝𑁆𑀞𑀦𑁆𑀢𑀺 𑀫𑀁 𑀲𑀤𑀸;

𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀓𑁆𑀓𑀫𑁆𑀫, 𑀅𑀢𑀺𑀭𑁄𑀘𑀸𑀫𑀺 𑀲𑀩𑁆𑀩𑀤𑀸.

‘‘𑀘𑀢𑀼𑀲𑀝𑁆𑀞𑀺𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀢𑁂𑀲𑀝𑁆𑀞𑀺𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑀼𑀢𑁆𑀯𑀸𑀦, 𑀪𑀯𑁂𑀲𑀼 𑀲𑀁𑀲𑀭𑀸𑀫𑀳𑀁;

𑀲𑀩𑁆𑀩𑀢𑁆𑀣 𑀧𑀯𑀭𑀸 𑀳𑁄𑀫𑀺, 𑀉𑀧𑁄𑀲𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀭𑀣𑀬𑀸𑀦𑀜𑁆𑀘 𑀲𑀻𑀯𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀉𑀧𑁄𑀲𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀲𑁄𑀡𑁆𑀡𑀫𑀬𑀁 𑀭𑀽𑀧𑀺𑀫𑀬𑀁, 𑀅𑀣𑁄𑀧𑀺 𑀨𑀮𑀺𑀓𑀸𑀫𑀬𑀁;

𑀮𑁄𑀳𑀺𑀢𑀗𑁆𑀕𑀫𑀬𑀜𑁆𑀘𑁂𑀯, 𑀲𑀩𑁆𑀩𑀁 𑀧𑀝𑀺𑀮𑀪𑀸𑀫𑀳𑀁.

‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀺𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀫𑀳𑀕𑁆𑀖𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀲𑀩𑁆𑀩𑀁 𑀧𑀝𑀺𑀮𑀪𑀸𑀫𑀳𑀁.

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀲𑀩𑁆𑀩𑀫𑁂𑀢𑀁 𑀧𑀝𑀺𑀮𑀪𑁂, 𑀉𑀧𑁄𑀲𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀯𑀭𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘, 𑀘𑀼𑀡𑁆𑀡𑀓𑀜𑁆𑀘 𑀯𑀺𑀮𑁂𑀧𑀦𑀁;

𑀲𑀩𑁆𑀩𑀫𑁂𑀢𑀁 𑀧𑀝𑀺𑀮𑀪𑁂, 𑀉𑀧𑁄𑀲𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀽𑀝𑀸𑀕𑀸𑀭𑀜𑁆𑀘 𑀧𑀸𑀲𑀸𑀤𑀁, 𑀫𑀡𑁆𑀟𑀧𑀁 𑀳𑀫𑁆𑀫𑀺𑀬𑀁 𑀕𑀼𑀳𑀁;

𑀲𑀩𑁆𑀩𑀫𑁂𑀢𑀁 𑀧𑀝𑀺𑀮𑀪𑁂, 𑀉𑀧𑁄𑀲𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀸𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀟𑁆𑀠𑀫𑀸𑀲𑁂 𑀅𑀲𑀫𑁆𑀧𑀢𑁆𑀢𑁂, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑁄𑀲𑀣𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁪𑁨.

‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁪𑁩.

‘‘𑀲𑀸 𑀪𑀺𑀓𑁆𑀔𑀼𑀦𑀺𑀁 𑀉𑀧𑀸𑀕𑀘𑁆𑀙𑀺𑀁, 𑀬𑀸 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀅𑀳𑀼;

𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄.

𑁪𑁪.

‘‘𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀬𑀣𑀸 𑀫𑀁 𑀅𑀦𑀼𑀲𑀸𑀲𑀺 𑀲𑀸;

𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦, 𑀦𑀺𑀲𑀻𑀤𑀺𑀁 𑀧𑀻𑀢𑀺𑀲𑀼𑀔𑀲𑀫𑀧𑁆𑀧𑀺𑀢𑀸;

𑀅𑀝𑁆𑀞𑀫𑀺𑀬𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀸 𑀪𑀺𑀓𑁆𑀔𑀼𑀦𑀺𑀁 𑀉𑀧𑀸𑀕𑀘𑁆𑀙𑀺𑀁 , 𑀬𑀸 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀅𑀳𑀽𑀢𑀺 𑀬𑀸 𑀫𑀬𑀸 𑀲𑀤𑁆𑀥𑀸𑀢𑀩𑁆𑀩𑀸 𑀲𑀤𑁆𑀥𑁂𑀬𑁆𑀬𑀯𑀘𑀦𑀸 𑀅𑀳𑁄𑀲𑀺, 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀲𑀸𑀳𑀁 𑀉𑀧𑀕𑀘𑁆𑀙𑀺𑀁 𑀉𑀧𑀲𑀗𑁆𑀓𑀫𑀺𑀁, 𑀧𑀝𑀸𑀘𑀸𑀭𑀸𑀣𑁂𑀭𑀺𑀁 𑀲𑀤𑁆𑀥𑀸𑀬 𑀯𑀤𑀢𑀺. ‘‘𑀲𑀸 𑀪𑀺𑀓𑁆𑀔𑀼𑀦𑀻 𑀉𑀧𑀕𑀘𑁆𑀙𑀺, 𑀬𑀸 𑀫𑁂 𑀲𑀸𑀥𑀬𑀺𑀓𑀸’’𑀢𑀺𑀧𑀺 𑀧𑀸𑀞𑁄. 𑀲𑀸 𑀧𑀝𑀸𑀘𑀸𑀭𑀸 𑀪𑀺𑀓𑁆𑀔𑀼𑀦𑀻 𑀅𑀦𑀼𑀓𑀫𑁆𑀧𑀸𑀬 𑀫𑀁 𑀉𑀧𑀕𑀘𑁆𑀙𑀺, 𑀬𑀸 𑀫𑀬𑁆𑀳𑀁 𑀲𑀤𑀢𑁆𑀣𑀲𑁆𑀲 𑀲𑀸𑀥𑀺𑀓𑀸𑀢𑀺 𑀅𑀢𑁆𑀣𑁄. 𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄𑀢𑀺 𑀲𑀸 𑀧𑀝𑀸𑀘𑀸𑀭𑀸 𑀣𑁂𑀭𑀻 ‘‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀇𑀫𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀇𑀫𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’𑀢𑀺 𑀔𑀦𑁆𑀥𑀸𑀤𑀺𑀓𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦𑀸𑀢𑀺 𑀢𑀲𑁆𑀲𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀺𑀢𑀲𑀡𑁆𑀳𑀲𑀼𑀔𑀼𑀫𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀲𑀼𑀢𑁆𑀯𑀸. 𑀬𑀣𑀸 𑀫𑀁 𑀅𑀦𑀼𑀲𑀸𑀲𑀺 𑀲𑀸𑀢𑀺 𑀲𑀸 𑀣𑁂𑀭𑀻 𑀬𑀣𑀸 𑀫𑀁 𑀅𑀦𑀼𑀲𑀸𑀲𑀺 𑀑𑀯𑀤𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀻 𑀧𑀝𑀺𑀧𑀢𑁆𑀢𑀺𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸𑀧𑀺 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀁. 𑀓𑀣𑀁? 𑀧𑀻𑀢𑀺𑀲𑀼𑀔𑀲𑀫𑀧𑁆𑀧𑀺𑀢𑀸𑀢𑀺 𑀛𑀸𑀦𑀫𑀬𑁂𑀦 𑀧𑀻𑀢𑀺𑀲𑀼𑀔𑁂𑀦 𑀲𑀫𑀗𑁆𑀕𑀻𑀪𑀽𑀢𑀸. 𑀅𑀝𑁆𑀞𑀫𑀺𑀬𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸𑀢𑀺 𑀅𑀦𑀯𑀲𑁂𑀲𑀁 𑀫𑁄𑀳𑀓𑁆𑀔𑀦𑁆𑀥𑀁 𑀅𑀕𑁆𑀕𑀫𑀕𑁆𑀕𑁂𑀦 𑀧𑀤𑀸𑀮𑁂𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀦𑁆𑀢𑀻 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁. 𑀇𑀤𑀫𑁂𑀯 𑀘𑀲𑁆𑀲𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀺.

𑀉𑀢𑁆𑀢𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀧𑀭𑀸 𑀉𑀢𑁆𑀢𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀆𑀤𑀺𑀓𑀸 𑀅𑀧𑀭𑀸𑀬 𑀉𑀢𑁆𑀢𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀓𑀼𑀮𑀤𑀸𑀲𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀸𑀯𑀓𑀁 𑀏𑀓𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀢𑀻𑀡𑀺 𑀫𑁄𑀤𑀓𑀸𑀦𑀺 𑀅𑀤𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀲𑀮𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁩𑁦-𑁩𑁬) 𑁋

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀓𑀼𑀫𑁆𑀪𑀤𑀸𑀲𑀻 𑀅𑀳𑁄𑀲𑀳𑀁;

𑀫𑀫 𑀪𑀸𑀕𑀁 𑀕𑀳𑁂𑀢𑁆𑀯𑀸𑀦, 𑀕𑀘𑁆𑀙𑀁 𑀉𑀤𑀓𑀳𑀸𑀭𑀺𑀓𑀸.

‘‘𑀧𑀦𑁆𑀣𑀫𑁆𑀳𑀺 𑀲𑀫𑀡𑀁 𑀤𑀺𑀲𑁆𑀯𑀸, 𑀲𑀦𑁆𑀢𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀫𑁄𑀤𑀓𑁂 𑀢𑀻𑀡𑀺𑀤𑀸𑀲𑀳𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀏𑀓𑀦𑀯𑀼𑀢𑀺𑀓𑀧𑁆𑀧𑀸𑀦𑀺, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀳𑀁.

‘‘𑀲𑀫𑁆𑀧𑀢𑁆𑀢𑀺 𑀢𑀁 𑀓𑀭𑀺𑀢𑁆𑀯𑀸𑀦, 𑀲𑀩𑁆𑀩𑀁 𑀅𑀦𑀼𑀪𑀯𑀺𑀁 𑀅𑀳𑀁;

𑀫𑁄𑀤𑀓𑁂 𑀢𑀻𑀡𑀺 𑀤𑀢𑁆𑀯𑀸𑀦, 𑀧𑀢𑁆𑀢𑀸𑀳𑀁 𑀅𑀘𑀮𑀁 𑀧𑀤𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁪𑁫.

‘‘𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀫𑀕𑁆𑀕𑀸 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀪𑀸𑀯𑀺𑀢𑀸 𑀢𑁂 𑀫𑀬𑀸 𑀲𑀩𑁆𑀩𑁂, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸.

𑁪𑁬.

‘‘𑀲𑀼𑀜𑁆𑀜𑀢𑀲𑁆𑀲𑀸𑀦𑀺𑀫𑀺𑀢𑁆𑀢𑀲𑁆𑀲, 𑀮𑀸𑀪𑀺𑀦𑀻𑀳𑀁 𑀬𑀤𑀺𑀘𑁆𑀙𑀓𑀁;

𑀑𑀭𑀲𑀸 𑀥𑀻𑀢𑀸 𑀩𑀼𑀤𑁆𑀥𑀲𑁆𑀲, 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸 𑀲𑀤𑀸.

𑁪𑁭.

‘‘𑀲𑀩𑁆𑀩𑁂 𑀓𑀸𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀼𑀜𑁆𑀜𑀢𑀲𑁆𑀲𑀸𑀦𑀺𑀫𑀺𑀢𑁆𑀢𑀲𑁆𑀲, 𑀮𑀸𑀪𑀺𑀦𑀻𑀳𑀁 𑀬𑀤𑀺𑀘𑁆𑀙𑀓𑀦𑁆𑀢𑀺 𑀲𑀼𑀜𑁆𑀜𑀢𑀲𑀫𑀸𑀧𑀢𑁆𑀢𑀺𑀬𑀸 𑀘 𑀅𑀦𑀺𑀫𑀺𑀢𑁆𑀢𑀲𑀫𑀸𑀧𑀢𑁆𑀢𑀺𑀬𑀸 𑀘 𑀅𑀳𑀁 𑀬𑀤𑀺𑀘𑁆𑀙𑀓𑀁 𑀮𑀸𑀪𑀺𑀦𑀻, 𑀢𑀢𑁆𑀣 𑀬𑀁 𑀬𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀇𑀘𑁆𑀙𑀸𑀫𑀺 𑀬𑀢𑁆𑀣 𑀬𑀢𑁆𑀣 𑀬𑀤𑀸 𑀬𑀤𑀸, 𑀢𑀁 𑀢𑀁 𑀢𑀢𑁆𑀣 𑀢𑀢𑁆𑀣 𑀢𑀤𑀸 𑀢𑀤𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀳𑀭𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀤𑀺𑀧𑀺 𑀳𑀺 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀸𑀤𑀺𑀦𑀸𑀫𑀓𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺𑀧𑀺 𑀫𑀕𑁆𑀕𑀲𑁆𑀲 𑀲𑀼𑀜𑁆𑀜𑀢𑀸𑀤𑀺𑀪𑁂𑀤𑀁 𑀢𑀺𑀯𑀺𑀥𑀫𑁆𑀧𑀺 𑀨𑀮𑀁 𑀲𑀫𑁆𑀪𑀯𑀢𑀺. 𑀅𑀬𑀁 𑀧𑀦 𑀣𑁂𑀭𑀻 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀲𑀫𑀸𑀧𑀢𑁆𑀢𑀺𑀬𑁄𑀯 𑀲𑀫𑀸𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀼𑀜𑁆𑀜𑀢𑀲𑁆𑀲𑀸𑀦𑀺𑀫𑀺𑀢𑁆𑀢𑀲𑁆𑀲, 𑀮𑀸𑀪𑀺𑀦𑀻𑀳𑀁 𑀬𑀤𑀺𑀘𑁆𑀙𑀓’’𑀦𑁆𑀢𑀺. 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀦𑁆𑀢𑀺 𑀅𑀧𑀭𑁂.

𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸𑀢𑀺 𑀬𑁂 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀬𑁂 𑀘 𑀫𑀦𑀼𑀲𑁆𑀲𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀯𑀢𑁆𑀣𑀼𑀓𑀸𑀫𑀸, 𑀢𑁂 𑀲𑀩𑁆𑀩𑁂𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀫𑀬𑀸 𑀲𑀫𑁆𑀫𑀤𑁂𑀯 𑀉𑀘𑁆𑀙𑀺𑀦𑁆𑀦𑀸, 𑀅𑀧𑀭𑀺𑀪𑁄𑀕𑀸𑀭𑀳𑀸 𑀓𑀢𑀸. 𑀯𑀼𑀢𑁆𑀢𑀜𑁆𑀳𑀺 𑁋 ‘‘𑀅𑀪𑀩𑁆𑀩𑁄, 𑀆𑀯𑀼𑀲𑁄, 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀭𑀸 𑀉𑀢𑁆𑀢𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀦𑁆𑀢𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫𑀸𑀢𑀺𑀆𑀤𑀺𑀓𑀸 𑀤𑀦𑁆𑀢𑀺𑀓𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀩𑀼𑀤𑁆𑀥𑀲𑀼𑀜𑁆𑀜𑀓𑀸𑀮𑁂 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀓𑀺𑀦𑁆𑀦𑀭𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑀻 𑀯𑀺𑀘𑀭𑀫𑀸𑀦𑀸 𑀅𑀤𑁆𑀤𑀲 𑀅𑀜𑁆𑀜𑀢𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀧𑀲𑀦𑁆𑀦𑀫𑀸𑀦𑀲𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀮𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀚𑁂𑀢𑀯𑀦𑀧𑀝𑀺𑀕𑁆𑀕𑀳𑀡𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀕𑀳𑁂 𑀯𑀲𑀫𑀸𑀦𑀸 𑀏𑀓𑀤𑀺𑀯𑀲𑀁 𑀧𑀘𑁆𑀙𑀸𑀪𑀢𑁆𑀢𑀁 𑀕𑀺𑀚𑁆𑀛𑀓𑀽𑀝𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀸 𑀳𑀢𑁆𑀣𑀸𑀭𑁄𑀳𑀓𑀲𑁆𑀲 𑀅𑀪𑀺𑀭𑀼𑀳𑀦𑀢𑁆𑀣𑀸𑀬 𑀧𑀸𑀤𑀁 𑀧𑀲𑀸𑀭𑁂𑀦𑁆𑀢𑀁 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁮𑁬-𑁯𑁬) 𑁋

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑀻 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

‘‘𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻;

𑀲𑀸𑀮𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀻𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀫𑀬𑁆𑀳𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀬𑀣𑀺𑀘𑁆𑀙𑀺𑀢𑀁.

‘‘𑀤𑀲𑀦𑁆𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀑𑀘𑀺𑀢𑀢𑁆𑀢𑀸𑀯 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑁂𑀲𑁆𑀯𑀳𑀁.

‘‘𑀓𑀼𑀲𑀮𑀁 𑀯𑀺𑀚𑁆𑀚𑀢𑁂 𑀫𑀬𑁆𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀧𑀽𑀚𑀸𑀭𑀳𑀸 𑀅𑀳𑀁 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

‘‘𑀯𑀺𑀲𑀼𑀤𑁆𑀥𑀫𑀦𑀲𑀸 𑀅𑀚𑁆𑀚, 𑀅𑀧𑁂𑀢𑀫𑀦𑀧𑀸𑀧𑀺𑀓𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀸𑀮𑀫𑀸𑀮𑀸𑀬𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀤𑀸𑀦𑀯𑀲𑁂𑀦 𑁋

𑁪𑁮.

‘‘𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂;

𑀦𑀸𑀕𑀁 𑀑𑀕𑀸𑀳𑀫𑀼𑀢𑁆𑀢𑀺𑀡𑁆𑀡𑀁, 𑀦𑀤𑀻𑀢𑀻𑀭𑀫𑁆𑀳𑀺 𑀅𑀤𑁆𑀤𑀲𑀁.

𑁪𑁯.

‘‘𑀧𑀼𑀭𑀺𑀲𑁄 𑀅𑀗𑁆𑀓𑀼𑀲𑀫𑀸𑀤𑀸𑀬, ‘𑀤𑁂𑀳𑀺 𑀧𑀸𑀤’𑀦𑁆𑀢𑀺 𑀬𑀸𑀘𑀢𑀺;

𑀦𑀸𑀕𑁄 𑀧𑀲𑀸𑀭𑀬𑀻 𑀧𑀸𑀤𑀁, 𑀧𑀼𑀭𑀺𑀲𑁄 𑀦𑀸𑀕𑀫𑀸𑀭𑀼𑀳𑀺.

𑁫𑁦.

‘‘𑀤𑀺𑀲𑁆𑀯𑀸 𑀅𑀤𑀦𑁆𑀢𑀁 𑀤𑀫𑀺𑀢𑀁, 𑀫𑀦𑀼𑀲𑁆𑀲𑀸𑀦𑀁 𑀯𑀲𑀁 𑀕𑀢𑀁;

𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁, 𑀔𑀮𑀼 𑀢𑀸𑀬 𑀯𑀦𑀁 𑀕𑀢𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀦𑀸𑀕𑀁 𑀑𑀕𑀸𑀳𑀫𑀼𑀢𑁆𑀢𑀺𑀡𑁆𑀡𑀦𑁆𑀢𑀺 𑀳𑀢𑁆𑀣𑀺𑀦𑀸𑀕𑀁 𑀦𑀤𑀺𑀬𑀁 𑀑𑀕𑀸𑀳𑀁 𑀓𑀢𑁆𑀯𑀸 𑀑𑀕𑀬𑁆𑀳 𑀢𑀢𑁄 𑀉𑀢𑁆𑀢𑀺𑀡𑁆𑀡𑀁. ‘‘𑀑𑀕𑀬𑁆𑀳 𑀫𑀼𑀢𑁆𑀢𑀺𑀡𑁆𑀡’’𑀦𑁆𑀢𑀺 𑀯𑀸 𑀧𑀸𑀞𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀤𑀻𑀢𑀻𑀭𑀫𑁆𑀳𑀺 𑀅𑀤𑁆𑀤𑀲𑀦𑁆𑀢𑀺 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀧𑀲𑁆𑀲𑀺𑀁.

𑀓𑀺𑀁 𑀓𑀭𑁄𑀦𑁆𑀢𑀦𑁆𑀢𑀺 𑀘𑁂𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀲𑁄’’𑀢𑀺𑀆𑀤𑀺. 𑀢𑀢𑁆𑀣 ‘𑀤𑁂𑀳𑀺 𑀧𑀸𑀤’𑀦𑁆𑀢𑀺 𑀬𑀸𑀘𑀢𑀻𑀢𑀺 ‘‘𑀧𑀸𑀤𑀁 𑀤𑁂𑀳𑀺’’𑀇𑀢𑀺 𑀧𑀺𑀝𑁆𑀞𑀺𑀆𑀭𑁄𑀳𑀦𑀢𑁆𑀣𑀁 𑀧𑀸𑀤𑀁 𑀧𑀲𑀸𑀭𑁂𑀢𑀼𑀁 𑀲𑀜𑁆𑀜𑀁 𑀤𑁂𑀢𑀺, 𑀬𑀣𑀸𑀧𑀭𑀺𑀘𑀺𑀢𑀜𑁆𑀳𑀺 𑀲𑀜𑁆𑀜𑀁 𑀤𑁂𑀦𑁆𑀢𑁄 𑀇𑀥 𑀬𑀸𑀘𑀢𑀻𑀢𑀺 𑀯𑀼𑀢𑁆𑀢𑁄.

𑀤𑀺𑀲𑁆𑀯𑀸 𑀅𑀤𑀦𑁆𑀢𑀁 𑀤𑀫𑀺𑀢𑀦𑁆𑀢𑀺 𑀧𑀓𑀢𑀺𑀬𑀸 𑀧𑀼𑀩𑁆𑀩𑁂 𑀅𑀤𑀦𑁆𑀢𑀁 𑀇𑀤𑀸𑀦𑀺 𑀳𑀢𑁆𑀣𑀸𑀘𑀭𑀺𑀬𑁂𑀦 𑀳𑀢𑁆𑀣𑀺𑀲𑀺𑀓𑁆𑀔𑀸𑀬 𑀤𑀫𑀺𑀢𑀤𑀫𑀣𑀁 𑀉𑀧𑀕𑀫𑀺𑀢𑀁. 𑀓𑀻𑀤𑀺𑀲𑀁 𑀤𑀫𑀺𑀢𑀁? 𑀫𑀦𑀼𑀲𑁆𑀲𑀸𑀦𑀁 𑀯𑀲𑀁 𑀕𑀢𑀁 𑀬𑀁 𑀬𑀁 𑀫𑀦𑀼𑀲𑁆𑀲𑀸 𑀆𑀡𑀸𑀧𑁂𑀦𑁆𑀢𑀺, 𑀢𑀁 𑀢𑀁 𑀤𑀺𑀲𑁆𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁, 𑀔𑀮𑀼 𑀢𑀸𑀬 𑀯𑀦𑀁 𑀕𑀢𑀸𑀢𑀺 𑀔𑀮𑀽𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁄 𑀳𑀢𑁆𑀣𑀺𑀤𑀲𑁆𑀲𑀦𑀢𑁄 𑀧𑀘𑁆𑀙𑀸, 𑀢𑀸𑀬 𑀳𑀢𑁆𑀣𑀺𑀦𑁄 𑀓𑀺𑀭𑀺𑀬𑀸𑀬 𑀳𑁂𑀢𑀼𑀪𑀽𑀢𑀸𑀬, 𑀯𑀦𑀁 𑀅𑀭𑀜𑁆𑀜𑀁 𑀕𑀢𑀸 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁𑀬𑁂𑀯. 𑀓𑀣𑀁? ‘‘𑀅𑀬𑀫𑁆𑀧𑀺 𑀦𑀸𑀫 𑀢𑀺𑀭𑀘𑁆𑀙𑀸𑀦𑀕𑀢𑁄 𑀳𑀢𑁆𑀣𑀻 𑀳𑀢𑁆𑀣𑀺𑀤𑀫𑀓𑀲𑁆𑀲 𑀯𑀲𑁂𑀦 𑀤𑀫𑀣𑀁 𑀕𑀢𑁄, 𑀓𑀲𑁆𑀫𑀸 𑀫𑀦𑀼𑀲𑁆𑀲𑀪𑀽𑀢𑀸𑀬 𑀘𑀺𑀢𑁆𑀢𑀁 𑀧𑀼𑀭𑀺𑀲𑀤𑀫𑀓𑀲𑁆𑀲 𑀲𑀢𑁆𑀣𑀼 𑀯𑀲𑁂𑀦 𑀤𑀫𑀣𑀁 𑀦 𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀁𑀯𑁂𑀕𑀚𑀸𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀲𑀫𑀸𑀥𑀺𑀦𑀸 𑀫𑀫 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁 𑀅𑀘𑁆𑀘𑀦𑁆𑀢𑀲𑀫𑀸𑀥𑀸𑀦𑁂𑀦 𑀲𑀩𑁆𑀩𑀲𑁄 𑀓𑀺𑀮𑁂𑀲𑁂 𑀔𑁂𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀤𑀦𑁆𑀢𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀩𑁆𑀩𑀺𑀭𑀺𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀫𑁆𑀫, 𑀚𑀻𑀯𑀸𑀢𑀺𑀆𑀤𑀺𑀓𑀸 𑀉𑀩𑁆𑀩𑀺𑀭𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀏𑀓𑀤𑀺𑀯𑀲𑀁 𑀫𑀸𑀢𑀸𑀧𑀺𑀢𑀽𑀲𑀼 𑀫𑀗𑁆𑀕𑀮𑀁 𑀅𑀦𑀼𑀪𑀯𑀺𑀢𑀼𑀁 𑀕𑁂𑀳𑀦𑁆𑀢𑀭𑀕𑀢𑁂𑀲𑀼 𑀅𑀤𑀼𑀢𑀺𑀬𑀸 𑀲𑀬𑀁 𑀕𑁂𑀳𑁂 𑀑𑀳𑀻𑀦𑀸 𑀉𑀧𑀓𑀝𑁆𑀞𑀸𑀬 𑀯𑁂𑀮𑀸𑀬 𑀪𑀕𑀯𑀢𑁄 𑀲𑀸𑀯𑀓𑀁 𑀏𑀓𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀁 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀁 𑀤𑀸𑀢𑀼𑀓𑀸𑀫𑀸, ‘‘𑀪𑀦𑁆𑀢𑁂, 𑀇𑀥 𑀧𑀯𑀺𑀲𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂 𑀕𑁂𑀳𑀁 𑀧𑀯𑀺𑀝𑁆𑀞𑁂 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑁄𑀦𑀓𑀸𑀤𑀻𑀳𑀺 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀣𑁂𑀭𑁄 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀣𑁂𑀭𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀉𑀴𑀸𑀭𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀩𑁆𑀩𑀺𑀭𑀻𑀢𑀺 𑀮𑀤𑁆𑀥𑀦𑀸𑀫𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀅𑀳𑁄𑀲𑀺. 𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀓𑁄𑀲𑀮𑀭𑀜𑁆𑀜𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀦𑀻𑀢𑀸, 𑀓𑀢𑀺𑀧𑀬𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀫𑁂𑀦 𑀏𑀓𑀁 𑀥𑀻𑀢𑀭𑀁 𑀮𑀪𑀺. 𑀢𑀲𑁆𑀲𑀸 𑀚𑀻𑀯𑀦𑁆𑀢𑀻𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀭𑀸𑀚𑀸 𑀢𑀲𑁆𑀲𑀸 𑀥𑀻𑀢𑀭𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀉𑀩𑁆𑀩𑀺𑀭𑀺𑀬𑀸 𑀅𑀪𑀺𑀲𑁂𑀓𑀁 𑀅𑀤𑀸𑀲𑀺. 𑀥𑀻𑀢𑀸 𑀧𑀦𑀲𑁆𑀲𑀸 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀓𑀸𑀮𑀫𑀓𑀸𑀲𑀺. 𑀫𑀸𑀢𑀸 𑀬𑀢𑁆𑀣 𑀢𑀲𑁆𑀲𑀸 𑀲𑀭𑀻𑀭𑀦𑀺𑀓𑁆𑀔𑁂𑀧𑁄 𑀓𑀢𑁄, 𑀢𑀁 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀤𑁂𑀯𑀢𑀺. 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁄𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀕𑀢𑀸 𑀅𑀘𑀺𑀭𑀯𑀢𑀻𑀦𑀤𑀺𑀬𑀸 𑀢𑀻𑀭𑁂 𑀞𑀢𑁆𑀯𑀸 𑀥𑀻𑀢𑀭𑀁 𑀆𑀭𑀩𑁆𑀪 𑀧𑀭𑀺𑀤𑁂𑀯𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀯𑀺𑀧𑁆𑀧𑀮𑀧𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀫 𑀥𑀻𑀢𑀭𑀁 𑀆𑀭𑀩𑁆𑀪 𑀯𑀺𑀧𑁆𑀧𑀮𑀧𑀸𑀫𑀺, 𑀪𑀕𑀯𑀸’’𑀢𑀺. ‘‘𑀇𑀫𑀲𑁆𑀫𑀺𑀁 𑀲𑀼𑀲𑀸𑀦𑁂 𑀛𑀸𑀧𑀺𑀢𑀸 𑀢𑀯 𑀥𑀻𑀢𑀭𑁄 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀸, 𑀢𑀸𑀲𑀁 𑀓𑀢𑀭 𑀲𑀦𑁆𑀥𑀸𑀬 𑀯𑀺𑀧𑁆𑀧𑀮𑀧𑀲𑀻’’𑀢𑀺. 𑀢𑀸𑀲𑀁 𑀢𑀁 𑀢𑀁 𑀆𑀴𑀸𑀳𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

𑁫𑁧.

‘‘𑀅𑀫𑁆𑀫 𑀚𑀻𑀯𑀸𑀢𑀺 𑀯𑀦𑀫𑁆𑀳𑀺 𑀓𑀦𑁆𑀤𑀲𑀺, 𑀅𑀢𑁆𑀢𑀸𑀦𑀁 𑀅𑀥𑀺𑀕𑀘𑁆𑀙 𑀉𑀩𑁆𑀩𑀺𑀭𑀺;

𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸 𑀚𑀻𑀯𑀲𑀦𑀸𑀫𑀺𑀓𑀸;

𑀏𑀢𑀫𑁆𑀳𑀸𑀴𑀸𑀳𑀦𑁂 𑀤𑀟𑁆𑀠𑀸, 𑀢𑀸𑀲𑀁 𑀓𑀫𑀦𑀼𑀲𑁄𑀘𑀲𑀻’’𑀢𑀺. 𑁋 𑀲𑀉𑀧𑀟𑁆𑀠𑀕𑀸𑀣𑀫𑀸𑀳;

𑀢𑀢𑁆𑀣, 𑀅𑀫𑁆𑀫, 𑀚𑀻𑀯𑀸𑀢𑀺 𑀫𑀸𑀢𑀼𑀧𑀘𑀸𑀭𑀦𑀸𑀫𑁂𑀦 𑀥𑀻𑀢𑀼𑀬𑀸 𑀆𑀮𑀧𑀦𑀁, 𑀇𑀤𑀜𑁆𑀘𑀲𑁆𑀲𑀸 𑀯𑀺𑀧𑁆𑀧𑀮𑀧𑀦𑀸𑀓𑀸𑀭𑀤𑀲𑁆𑀲𑀦𑀁. 𑀯𑀦𑀫𑁆𑀳𑀺 𑀓𑀦𑁆𑀤𑀲𑀻𑀢𑀺 𑀯𑀦𑀫𑀚𑁆𑀛𑁂 𑀧𑀭𑀺𑀤𑁂𑀯𑀲𑀺. 𑀅𑀢𑁆𑀢𑀸𑀦𑀁 𑀅𑀥𑀺𑀕𑀘𑁆𑀙 𑀉𑀩𑁆𑀩𑀺𑀭𑀻𑀢𑀺 𑀉𑀩𑁆𑀩𑀺𑀭𑀺 𑀢𑀯 𑀅𑀢𑁆𑀢𑀸𑀦𑀫𑁂𑀯 𑀢𑀸𑀯 𑀩𑀼𑀚𑁆𑀛𑀲𑁆𑀲𑀼 𑀬𑀸𑀣𑀸𑀯𑀢𑁄 𑀚𑀸𑀦𑀸𑀳𑀺. 𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺. 𑀲𑀩𑁆𑀩𑀸 𑀚𑀻𑀯𑀲𑀦𑀸𑀫𑀺𑀓𑀸𑀢𑀺 𑀢𑀸 𑀲𑀩𑁆𑀩𑀸𑀧𑀺 𑀚𑀻𑀯𑀦𑁆𑀢𑀺, 𑀬𑀸 𑀲𑀫𑀸𑀦𑀦𑀸𑀫𑀺𑀓𑀸. 𑀏𑀢𑀫𑁆𑀳𑀸𑀴𑀸𑀳𑀦𑁂 𑀤𑀟𑁆𑀠𑀸𑀢𑀺 𑀏𑀢𑀫𑁆𑀳𑀺 𑀲𑀼𑀲𑀸𑀦𑁂 𑀛𑀸𑀧𑀺𑀢𑀸. 𑀢𑀸𑀲𑀁 𑀓𑀫𑀦𑀼𑀲𑁄𑀘𑀲𑀻𑀢𑀺 𑀢𑀸𑀲𑀼 𑀚𑀻𑀯𑀦𑁆𑀢𑀻𑀦𑀸𑀫𑀸𑀲𑀼 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀸𑀲𑀼 𑀓𑀁 𑀲𑀦𑁆𑀥𑀸𑀬 𑀢𑁆𑀯𑀁 𑀅𑀦𑀼𑀲𑁄𑀘𑀲𑀺 𑀅𑀦𑀼𑀲𑁄𑀓𑀁 𑀆𑀧𑀚𑁆𑀚𑀲𑀻𑀢𑀺 𑀏𑀯𑀁 𑀲𑀢𑁆𑀣𑀸𑀭𑀸 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀅𑀢𑁆𑀢𑀦𑁄 𑀘 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀬𑀣𑀸𑀞𑀸𑀢𑀸𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁩𑁭-𑁬𑁦) 𑁋

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀩𑀸𑀮𑀺𑀓𑀸 𑀢𑀤𑀸;

𑀫𑀸𑀢𑀸 𑀘 𑀫𑁂 𑀧𑀺𑀢𑀸 𑀘𑁂𑀯, 𑀓𑀫𑁆𑀫𑀦𑁆𑀢𑀁 𑀅𑀕𑀫𑀁𑀲𑀼 𑀢𑁂.

‘‘𑀫𑀚𑁆𑀛𑀦𑁆𑀳𑀺𑀓𑀫𑁆𑀳𑀺 𑀲𑀽𑀭𑀺𑀬𑁂, 𑀅𑀤𑁆𑀤𑀲𑀁 𑀲𑀫𑀡𑀁 𑀅𑀳𑀁;

𑀯𑀻𑀣𑀺𑀬𑀸 𑀅𑀦𑀼𑀕𑀘𑁆𑀙𑀦𑁆𑀢𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀲𑀳𑀁.

‘‘𑀕𑁄𑀦𑀓𑀸𑀯𑀺𑀓𑀢𑀺𑀓𑀸𑀳𑀺, 𑀧𑀜𑁆𑀜𑀧𑁂𑀢𑁆𑀯𑀸 𑀫𑀫𑀸𑀲𑀦𑀁;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀲𑀦𑁆𑀢𑀢𑁆𑀢𑀸 𑀓𑀼𑀣𑀺𑀢𑀸 𑀪𑀽𑀫𑀺, 𑀲𑀽𑀭𑁄 𑀫𑀚𑁆𑀛𑀦𑁆𑀳𑀺𑀓𑁂 𑀞𑀺𑀢𑁄;

𑀫𑀸𑀮𑀼𑀢𑀸 𑀘 𑀦 𑀯𑀸𑀬𑀦𑁆𑀢𑀺, 𑀓𑀸𑀮𑁄 𑀘𑁂𑀯𑁂𑀢𑁆𑀣 𑀫𑁂𑀳𑀺𑀢𑀺.

‘‘𑀧𑀜𑁆𑀜𑀢𑁆𑀢𑀫𑀸𑀲𑀦𑀫𑀺𑀤𑀁, 𑀢𑀯𑀢𑁆𑀣𑀸𑀬 𑀫𑀳𑀸𑀫𑀼𑀦𑀺;

𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀦𑀺𑀲𑀻𑀤 𑀫𑀫 𑀆𑀲𑀦𑁂.

‘‘𑀦𑀺𑀲𑀻𑀤𑀺 𑀢𑀢𑁆𑀣 𑀲𑀫𑀡𑁄, 𑀲𑀼𑀤𑀦𑁆𑀢𑁄 𑀲𑀼𑀤𑁆𑀥𑀫𑀸𑀦𑀲𑁄;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀬𑀣𑀸𑀭𑀦𑁆𑀥𑀁 𑀅𑀤𑀸𑀲𑀳𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀆𑀲𑀦𑁂𑀦 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

‘‘𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀅𑀣𑁄𑀧𑀺 𑀨𑀮𑀺𑀓𑀸𑀫𑀬𑀸;

𑀮𑁄𑀳𑀺𑀢𑀗𑁆𑀕𑀫𑀬𑀸 𑀘𑁂𑀯, 𑀧𑀮𑁆𑀮𑀗𑁆𑀓𑀸 𑀯𑀺𑀯𑀺𑀥𑀸 𑀫𑀫.

‘‘𑀢𑀽𑀮𑀺𑀓𑀸𑀯𑀺𑀓𑀢𑀺𑀓𑀸𑀳𑀺, 𑀓𑀝𑁆𑀝𑀺𑀲𑁆𑀲𑀘𑀺𑀢𑁆𑀢𑀓𑀸𑀳𑀺 𑀘;

𑀉𑀤𑁆𑀥𑀏𑀓𑀦𑁆𑀢𑀮𑁄𑀫𑀻 𑀘, 𑀧𑀮𑁆𑀮𑀗𑁆𑀓𑀸 𑀫𑁂 𑀲𑀼𑀲𑀡𑁆𑀞𑀺𑀢𑀸.

‘‘𑀬𑀤𑀸 𑀇𑀘𑁆𑀙𑀸𑀫𑀺 𑀕𑀫𑀦𑀁, 𑀳𑀸𑀲𑀔𑀺𑀟𑁆𑀟𑀲𑀫𑀧𑁆𑀧𑀺𑀢𑀸;

𑀲𑀳 𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂𑀦, 𑀕𑀘𑁆𑀙𑀸𑀫𑀺 𑀫𑀫 𑀧𑀢𑁆𑀣𑀺𑀢𑀁.

‘‘𑀅𑀲𑀻𑀢𑀺𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀢𑁆𑀢𑀢𑀺𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑀻, 𑀫𑀳𑀸𑀪𑁄𑀕𑀁 𑀮𑀪𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑁂 𑀪𑀯𑁂 𑀦 𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁂;

𑀉𑀘𑁆𑀘𑀸𑀓𑀼𑀮𑀻𑀦𑀸 𑀲𑀩𑁆𑀩𑀢𑁆𑀣, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀤𑁄𑀫𑀦𑀲𑁆𑀲𑀁 𑀦 𑀚𑀸𑀦𑀸𑀫𑀺, 𑀘𑀺𑀢𑁆𑀢𑀲𑀦𑁆𑀢𑀸𑀧𑀦𑀁 𑀫𑀫;

𑀯𑁂𑀯𑀡𑁆𑀡𑀺𑀬𑀁 𑀦 𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀥𑀸𑀢𑀺𑀬𑁄 𑀫𑀁 𑀉𑀧𑀝𑁆𑀞𑀦𑁆𑀢𑀺, 𑀔𑀼𑀚𑁆𑀚𑀸 𑀘𑁂𑀮𑀸𑀧𑀺𑀓𑀸 𑀩𑀳𑀽;

𑀅𑀗𑁆𑀓𑁂𑀦 𑀅𑀗𑁆𑀓𑀁 𑀕𑀘𑁆𑀙𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀅𑀜𑁆𑀜𑀸 𑀦𑁆𑀳𑀸𑀧𑁂𑀦𑁆𑀢𑀺 𑀪𑁄𑀚𑁂𑀦𑁆𑀢𑀺, 𑀅𑀜𑁆𑀜𑀸 𑀭𑀫𑁂𑀦𑁆𑀢𑀺 𑀫𑀁 𑀲𑀤𑀸;

𑀅𑀜𑁆𑀜𑀸 𑀕𑀦𑁆𑀥𑀁 𑀯𑀺𑀮𑀺𑀫𑁆𑀧𑀦𑁆𑀢𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂 𑀯𑀲𑀦𑁆𑀢𑀺𑀬𑀸;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀮𑁆𑀮𑀗𑁆𑀓𑁄 𑀉𑀧𑀢𑀺𑀝𑁆𑀞𑀢𑀺.

‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑁂 𑀧𑀦 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀧𑀓𑀸𑀲𑁂𑀦𑁆𑀢𑀻 𑁋

𑁫𑁨.

‘‘𑀅𑀩𑁆𑀩𑀳𑀻 𑀢𑀯 𑀫𑁂 𑀲𑀮𑁆𑀮𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀁;

𑀬𑀁 𑀫𑁂 𑀲𑁄𑀓𑀧𑀭𑁂𑀢𑀸𑀬, 𑀥𑀻𑀢𑀼𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺.

𑁫𑁩.

‘‘𑀲𑀸𑀚𑁆𑀚 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀳𑀁, 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀉𑀧𑁂𑀫𑀺 𑀲𑀭𑀡𑀁 𑀫𑀼𑀦𑀺’’𑀦𑁆𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀦𑁆𑀢𑀺 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀬𑀸𑀣𑀸𑀯𑀢𑁄 𑀤𑀼𑀤𑁆𑀤𑀲𑀁 𑀫𑀫 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀻𑀴𑀸𑀚𑀦𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀢𑁄 𑀅𑀦𑁆𑀢𑁄 𑀢𑀼𑀤𑀦𑀢𑁄 𑀘 ‘‘𑀲𑀮𑁆𑀮’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑁄𑀓𑀁 𑀢𑀡𑁆𑀳𑀜𑁆𑀘 𑀅𑀩𑁆𑀩𑀳𑀻 𑀯𑀢 𑀦𑀻𑀳𑀭𑀺 𑀯𑀢. 𑀬𑀁 𑀫𑁂 𑀲𑁄𑀓𑀧𑀭𑁂𑀢𑀸𑀬𑀸𑀢𑀺 𑀬𑀲𑁆𑀫𑀸 𑀲𑁄𑀓𑁂𑀦 𑀅𑀪𑀺𑀪𑀽𑀢𑀸𑀬 𑀫𑀬𑁆𑀳𑀁 𑀥𑀻𑀢𑀼𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺 𑀅𑀦𑀯𑀲𑁂𑀲𑀢𑁄 𑀦𑀻𑀳𑀭𑀺, 𑀢𑀲𑁆𑀫𑀸 𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀦𑁆𑀢𑀺 𑀬𑁄𑀚𑀦𑀸.

𑀲𑀸𑀚𑁆𑀚 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀳𑀦𑁆𑀢𑀺 𑀲𑀸 𑀅𑀳𑀁 𑀅𑀚𑁆𑀚 𑀲𑀩𑁆𑀩𑀲𑁄 𑀉𑀤𑁆𑀥𑀝𑀢𑀡𑁆𑀳𑀸𑀲𑀮𑁆𑀮𑀸 𑀢𑀢𑁄 𑀏𑀯 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸. 𑀫𑀼𑀦𑀺𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁 𑀢𑀤𑀼𑀧𑀤𑁂𑀲𑀺𑀢𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀪𑁂𑀤𑀁 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀜𑁆𑀘, 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑀲𑀗𑁆𑀔𑀸𑀢𑀁 𑀲𑀗𑁆𑀖𑀜𑁆𑀘, 𑀅𑀦𑀼𑀢𑁆𑀢𑀭𑁂𑀳𑀺 𑀢𑁂𑀳𑀺 𑀬𑁄𑀚𑀦𑀢𑁄 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀯𑀺𑀦𑀸𑀲𑀦𑀢𑁄 𑀘 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀦𑁆𑀢𑀺, 𑀉𑀧𑁂𑀫𑀺 𑀉𑀧𑀕𑀘𑁆𑀙𑀸𑀫𑀺 𑀩𑀼𑀚𑁆𑀛𑀸𑀫𑀺 𑀲𑁂𑀯𑀸𑀫𑀺 𑀘𑀸𑀢𑀺 𑀅𑀢𑁆𑀣𑁄.

𑀉𑀩𑁆𑀩𑀺𑀭𑀺𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀓𑁆𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀓𑀺𑀁𑀫𑁂 𑀓𑀢𑀸 𑀭𑀸𑀚𑀕𑀳𑁂𑀢𑀺𑀆𑀤𑀺𑀓𑀸 𑀲𑀼𑀓𑁆𑀓𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀧𑀝𑀺𑀪𑀸𑀦𑀯𑀢𑀻 𑀅𑀳𑁄𑀲𑀺. 𑀲𑀸 𑀢𑀢𑁆𑀣 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀫𑁂𑀯 𑀓𑀢𑁆𑀯𑀸 𑀢𑀼𑀲𑀺𑀢𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀣𑀸 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄, 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂𑀢𑀺 𑀏𑀯𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀅𑀳𑁄𑀲𑀺, 𑀢𑀣𑀸 𑀓𑀓𑀼𑀲𑀦𑁆𑀥𑀲𑁆𑀲, 𑀓𑁄𑀡𑀸𑀕𑀫𑀦𑀲𑁆𑀲, 𑀓𑀲𑁆𑀲𑀧𑀲𑁆𑀲 𑀘 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀲𑀼𑀤𑁆𑀥𑀲𑀻𑀮𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀓𑀣𑀺𑀓𑀸 𑀅𑀳𑁄𑀲𑀺.

𑀏𑀯𑀁 𑀲𑀸 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀓𑁆𑀓𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀲𑀢𑁆𑀣𑀼 𑀭𑀸𑀚𑀕𑀳𑀧𑀯𑁂𑀲𑀦𑁂 𑀮𑀤𑁆𑀥𑀧𑁆𑀧𑀲𑀸𑀤𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀥𑀫𑁆𑀫𑀤𑀺𑀦𑁆𑀦𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀢𑀲𑁆𑀲𑀸 𑀏𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁪.𑁧𑁧𑁧-𑁧𑁪𑁨) 𑁋

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

‘‘𑀢𑀤𑀸𑀳𑀁 𑀩𑀦𑁆𑀥𑀼𑀫𑀢𑀺𑀬𑀁, 𑀚𑀸𑀢𑀸 𑀅𑀜𑁆𑀜𑀢𑀭𑁂 𑀓𑀼𑀮𑁂;

𑀥𑀫𑁆𑀫𑀁 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀧𑀝𑀺𑀪𑀸𑀦𑀯𑀢𑀻 𑀢𑀣𑀸;

𑀯𑀺𑀘𑀺𑀢𑁆𑀢𑀓𑀣𑀺𑀓𑀸 𑀘𑀸𑀧𑀺, 𑀚𑀺𑀦𑀲𑀸𑀲𑀦𑀓𑀸𑀭𑀺𑀓𑀸.

‘‘𑀢𑀤𑀸 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀳𑀺𑀢𑀸𑀬 𑀚𑀦𑀢𑀁 𑀩𑀳𑀼𑀁;

𑀢𑀢𑁄 𑀘𑀼𑀢𑀸𑀳𑀁 𑀢𑀼𑀲𑀺𑀢𑀁, 𑀉𑀧𑀧𑀦𑁆𑀦𑀸 𑀬𑀲𑀲𑁆𑀲𑀺𑀦𑀻.

‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀲𑀺𑀔𑀻 𑀯𑀺𑀬 𑀲𑀺𑀔𑀻 𑀚𑀺𑀦𑁄;

𑀢𑀧𑀦𑁆𑀢𑁄 𑀬𑀲𑀲𑀸 𑀮𑁄𑀓𑁂, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀢𑀤𑀸𑀧𑀺 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀩𑀼𑀤𑁆𑀥𑀲𑀸𑀲𑀦𑀓𑁄𑀯𑀺𑀤𑀸;

𑀚𑁄𑀢𑁂𑀢𑁆𑀯𑀸 𑀚𑀺𑀦𑀯𑀸𑀓𑁆𑀬𑀸𑀦𑀺, 𑀢𑀢𑁄𑀧𑀺 𑀢𑀺𑀤𑀺𑀯𑀁 𑀕𑀢𑀸.

‘‘𑀏𑀓𑀢𑁆𑀢𑀺𑀁𑀲𑁂𑀯 𑀓𑀧𑁆𑀧𑀫𑁆𑀳𑀺, 𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺𑀢𑁆𑀣 𑀫𑀳𑀸𑀜𑀸𑀡𑀻, 𑀢𑀤𑀸𑀧𑀺 𑀘 𑀢𑀣𑁂𑀯𑀳𑀁.

‘‘𑀧𑀩𑁆𑀩𑀚𑀺𑀢𑁆𑀯𑀸 𑀥𑀫𑁆𑀫𑀥𑀭𑀸, 𑀚𑁄𑀢𑀬𑀺𑀁 𑀚𑀺𑀦𑀲𑀸𑀲𑀦𑀁;

𑀕𑀦𑁆𑀢𑁆𑀯𑀸 𑀫𑀭𑀼𑀧𑀼𑀭𑀁 𑀭𑀫𑁆𑀫𑀁, 𑀅𑀦𑀼𑀪𑁄𑀲𑀺𑀁 𑀫𑀳𑀸𑀲𑀼𑀔𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀓𑀓𑀼𑀲𑀦𑁆𑀥𑁄 𑀚𑀺𑀦𑀼𑀢𑁆𑀢𑀫𑁄;

𑀉𑀧𑁆𑀧𑀚𑁆𑀚𑀺 𑀦𑀭𑀲𑀭𑀡𑁄, 𑀢𑀤𑀸𑀧𑀺 𑀘 𑀢𑀣𑁂𑀯𑀳𑀁.

‘‘𑀧𑀩𑁆𑀩𑀚𑀺𑀢𑁆𑀯𑀸 𑀫𑀼𑀦𑀺𑀫𑀢𑀁, 𑀚𑁄𑀢𑀬𑀺𑀢𑁆𑀯𑀸 𑀬𑀣𑀸𑀬𑀼𑀓𑀁;

𑀢𑀢𑁄 𑀘𑀼𑀢𑀸𑀳𑀁 𑀢𑀺𑀤𑀺𑀯𑀁, 𑀅𑀕𑀁 𑀲𑀪𑀯𑀦𑀁 𑀬𑀣𑀸.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀓𑁄𑀡𑀸𑀕𑀫𑀦𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀮𑁄𑀓𑀲𑀭𑀡𑁄, 𑀅𑀭𑀡𑁄 𑀅𑀫𑀢𑀗𑁆𑀕𑀢𑁄.

‘‘𑀢𑀤𑀸𑀧𑀺 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀸𑀲𑀦𑁂 𑀢𑀲𑁆𑀲 𑀢𑀸𑀤𑀺𑀦𑁄;

𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀚𑁄𑀢𑀬𑀺𑀁 𑀚𑀺𑀦𑀲𑀸𑀲𑀦𑀁.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀓𑀲𑁆𑀲𑀧𑁄 𑀫𑀼𑀦𑀺𑀫𑀼𑀢𑁆𑀢𑀫𑁄;

𑀉𑀧𑁆𑀧𑀚𑁆𑀚𑀺 𑀮𑁄𑀓𑀲𑀭𑀡𑁄, 𑀅𑀭𑀡𑁄 𑀫𑀭𑀡𑀦𑁆𑀢𑀕𑀽.

‘‘𑀢𑀲𑁆𑀲𑀸𑀧𑀺 𑀦𑀭𑀯𑀻𑀭𑀲𑁆𑀲, 𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀧𑀭𑀺𑀬𑀸𑀧𑀼𑀝𑀲𑀤𑁆𑀥𑀫𑁆𑀫𑀸, 𑀧𑀭𑀺𑀧𑀼𑀘𑁆𑀙𑀸 𑀯𑀺𑀲𑀸𑀭𑀤𑀸.

‘‘𑀲𑀼𑀲𑀻𑀮𑀸 𑀮𑀚𑁆𑀚𑀺𑀦𑀻 𑀘𑁂𑀯, 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀓𑁄𑀯𑀺𑀤𑀸;

𑀩𑀳𑀼𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀫𑀳𑀸𑀫𑀼𑀦𑁂.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀨𑀻𑀢𑁂, 𑀫𑀳𑀸𑀭𑀢𑀦𑀲𑀜𑁆𑀘𑀬𑁂.

‘‘𑀬𑀤𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀧𑀭𑀺𑀯𑀼𑀢𑁄 𑀮𑁄𑀓𑀦𑀸𑀬𑀓𑁄;

𑀉𑀧𑀸𑀕𑀫𑀺 𑀭𑀸𑀚𑀕𑀳𑀁, 𑀲𑀳𑀲𑁆𑀲𑀓𑁆𑀔𑁂𑀦 𑀯𑀡𑁆𑀡𑀺𑀢𑁄.

‘‘𑀤𑀦𑁆𑀢𑁄 𑀤𑀦𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀤𑀺𑀲𑁆𑀯𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀢𑀁, 𑀲𑀼𑀢𑁆𑀯𑀸𑀯 𑀕𑀼𑀡𑀲𑀜𑁆𑀘𑀬𑀁;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀧𑀽𑀚𑀬𑀺𑀁 𑀢𑀁 𑀬𑀣𑀸𑀩𑀮𑀁.

‘‘𑀅𑀧𑀭𑁂𑀦 𑀘 𑀓𑀸𑀮𑁂𑀦, 𑀥𑀫𑁆𑀫𑀤𑀺𑀦𑁆𑀦𑀸𑀬 𑀲𑀦𑁆𑀢𑀺𑀓𑁂;

𑀅𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀓𑁂𑀲𑁂𑀲𑀼 𑀙𑀺𑀚𑁆𑀚𑀫𑀸𑀦𑁂𑀲𑀼, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀅𑀳𑀁;

𑀉𑀕𑁆𑀕𑀳𑀺𑀁 𑀲𑀸𑀲𑀦𑀁 𑀲𑀩𑁆𑀩𑀁, 𑀧𑀩𑁆𑀩𑀚𑀺𑀢𑁆𑀯𑀸 𑀘𑀺𑀭𑁂𑀦𑀳𑀁.

‘‘𑀢𑀢𑁄 𑀥𑀫𑁆𑀫𑀫𑀤𑁂𑀲𑁂𑀲𑀺𑀁, 𑀫𑀳𑀸𑀚𑀦𑀲𑀫𑀸𑀕𑀫𑁂;

𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑀫𑁆𑀳𑀺, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

‘‘𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁, 𑀢𑀁 𑀯𑀺𑀤𑀺𑀢𑁆𑀯𑀸𑀢𑀺𑀯𑀺𑀫𑁆𑀳𑀺𑀢𑁄;

𑀅𑀪𑀺𑀧𑁆𑀧𑀲𑀦𑁆𑀦𑁄 𑀫𑁂 𑀬𑀓𑁆𑀔𑁄, 𑀪𑀫𑀺𑀢𑁆𑀯𑀸𑀦 𑀕𑀺𑀭𑀺𑀩𑁆𑀩𑀚𑀁.

‘‘𑀓𑀺𑀁𑀫𑁂 𑀓𑀢𑀸 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸, 𑀫𑀥𑀼𑀁 𑀧𑀻𑀢𑀸𑀯 𑀅𑀘𑁆𑀙𑀭𑁂;

𑀬𑁂 𑀲𑀼𑀓𑁆𑀓𑀁 𑀦 𑀉𑀧𑀸𑀲𑀦𑁆𑀢𑀺, 𑀤𑁂𑀲𑁂𑀦𑁆𑀢𑀺𑀁 𑀅𑀫𑀢𑀁 𑀧𑀤𑀁.

‘‘𑀢𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀻𑀬𑀁, 𑀅𑀲𑁂𑀘𑀦𑀓𑀫𑁄𑀚𑀯𑀁;

𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀲𑀧𑁆𑀧𑀜𑁆𑀜𑀸, 𑀯𑀮𑀸𑀳𑀓𑀫𑀺𑀯𑀤𑁆𑀥𑀕𑀽.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑀫 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀦𑀺𑀧𑀭𑀺𑀯𑀸𑀭𑀸 𑀫𑀳𑀸𑀥𑀫𑁆𑀫𑀓𑀣𑀺𑀓𑀸 𑀅𑀳𑁄𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀬 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀫𑀥𑀼𑀪𑀡𑁆𑀟𑀁 𑀧𑀻𑀴𑁂𑀢𑁆𑀯𑀸 𑀲𑀼𑀫𑀥𑀼𑀭𑀁 𑀧𑀸𑀬𑁂𑀦𑁆𑀢𑀻 𑀯𑀺𑀬 𑀅𑀫𑀢𑁂𑀦 𑀅𑀪𑀺𑀲𑀺𑀜𑁆𑀘𑀦𑁆𑀢𑀻 𑀯𑀺𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀧𑀭𑀺𑀲𑀸 𑀘𑀲𑁆𑀲𑀸 𑀥𑀫𑁆𑀫𑀓𑀣𑀁 𑀑𑀳𑀺𑀢𑀲𑁄𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑀺𑀬𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀥𑀫𑁆𑀫𑀤𑁂𑀲𑀦𑀸𑀬 𑀧𑀲𑀦𑁆𑀦𑀸 𑀭𑀸𑀚𑀕𑀳𑀁 𑀧𑀯𑀺𑀲𑀺𑀢𑁆𑀯𑀸 𑀭𑀣𑀺𑀬𑀸𑀬 𑀭𑀣𑀺𑀬𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀯𑀺𑀘𑀭𑀺𑀢𑁆𑀯𑀸 𑀢𑀲𑁆𑀲𑀸 𑀕𑀼𑀡𑀁 𑀯𑀺𑀪𑀸𑀯𑁂𑀦𑁆𑀢𑀻 𑁋

𑁫𑁪.

‘‘𑀓𑀺𑀁𑀫𑁂 𑀓𑀢𑀸 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸, 𑀫𑀥𑀼𑀁 𑀧𑀻𑀢𑀸𑀯 𑀅𑀘𑁆𑀙𑀭𑁂;

𑀬𑁂 𑀲𑀼𑀓𑁆𑀓𑀁 𑀦 𑀉𑀧𑀸𑀲𑀦𑁆𑀢𑀺, 𑀤𑁂𑀲𑁂𑀦𑁆𑀢𑀺𑀁 𑀩𑀼𑀤𑁆𑀥𑀲𑀸𑀲𑀦𑀁.

𑁫𑁫.

‘‘𑀢𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀻𑀬𑀁, 𑀅𑀲𑁂𑀘𑀦𑀓𑀫𑁄𑀚𑀯𑀁;

𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀲𑀧𑁆𑀧𑀜𑁆𑀜𑀸, 𑀯𑀮𑀸𑀳𑀓𑀫𑀺𑀯𑀤𑁆𑀥𑀕𑀽’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀓𑀺𑀁𑀫𑁂 𑀓𑀢𑀸 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸𑀢𑀺 𑀇𑀫𑁂 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸 𑀓𑀺𑀁 𑀓𑀢𑀸, 𑀓𑀺𑀲𑁆𑀫𑀺𑀁 𑀦𑀸𑀫 𑀓𑀺𑀘𑁆𑀘𑁂 𑀩𑁆𑀬𑀸𑀯𑀝𑀸. 𑀫𑀥𑀼𑀁 𑀧𑀻𑀢𑀸𑀯 𑀅𑀘𑁆𑀙𑀭𑁂𑀢𑀺 𑀬𑀣𑀸 𑀪𑀡𑁆𑀟𑀫𑀥𑀼𑀁 𑀕𑀳𑁂𑀢𑁆𑀯𑀸 𑀫𑀥𑀼𑀁 𑀧𑀻𑀢𑀯𑀦𑁆𑀢𑁄 𑀯𑀺𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀇𑀫𑁂𑀧𑀺 𑀥𑀫𑁆𑀫𑀲𑀜𑁆𑀜𑀸𑀬 𑀯𑀺𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀫𑀜𑁆𑀜𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑁂𑀯𑀮𑀁 𑀅𑀘𑁆𑀙𑀦𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀬𑁂 𑀲𑀼𑀓𑁆𑀓𑀁 𑀦 𑀉𑀧𑀸𑀲𑀦𑁆𑀢𑀺, 𑀤𑁂𑀲𑁂𑀦𑁆𑀢𑀺𑀁 𑀩𑀼𑀤𑁆𑀥𑀲𑀸𑀲𑀦𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀬𑀸𑀣𑀸𑀯𑀢𑁄 𑀤𑁂𑀲𑁂𑀦𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑀺𑀁 𑀲𑀼𑀓𑁆𑀓𑀁 𑀣𑁂𑀭𑀺𑀁 𑀬𑁂 𑀦 𑀉𑀧𑀸𑀲𑀦𑁆𑀢𑀺 𑀦 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀢𑁂 𑀇𑀫𑁂 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸 𑀓𑀺𑀁 𑀓𑀢𑀸𑀢𑀺 𑀬𑁄𑀚𑀦𑀸.

𑀢𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀻𑀬𑀦𑁆𑀢𑀺 𑀢𑀜𑁆𑀘 𑀧𑀦 𑀥𑀫𑁆𑀫𑀁 𑀅𑀦𑀺𑀯𑀢𑁆𑀢𑀺𑀢𑀪𑀸𑀯𑀸𑀯𑀳𑀁 𑀦𑀺𑀬𑁆𑀬𑀸𑀦𑀺𑀓𑀁, 𑀅𑀪𑀺𑀓𑁆𑀓𑀦𑁆𑀢𑀢𑀸𑀬 𑀯𑀸 𑀬𑀣𑀸 𑀲𑁄𑀢𑀼𑀚𑀦𑀲𑀯𑀦𑀫𑀦𑁄𑀳𑀭𑀪𑀸𑀯𑁂𑀦 𑀅𑀦𑀧𑀦𑀻𑀬𑀁, 𑀅𑀲𑁂𑀘𑀦𑀓𑀁 𑀅𑀦𑀸𑀲𑀺𑀢𑁆𑀢𑀓𑀁 𑀧𑀓𑀢𑀺𑀬𑀸𑀯 𑀫𑀳𑀸𑀭𑀲𑀁 𑀢𑀢𑁄 𑀏𑀯 𑀑𑀚𑀯𑀦𑁆𑀢𑀁. ‘‘𑀑𑀲𑀥’’𑀦𑁆𑀢𑀺𑀧𑀺 𑀧𑀸𑀴𑀺. 𑀯𑀝𑁆𑀝𑀤𑀼𑀓𑁆𑀔𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀸𑀬 𑀑𑀲𑀥𑀪𑀽𑀢𑀁. 𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀲𑀧𑁆𑀧𑀜𑁆𑀜𑀸, 𑀯𑀮𑀸𑀳𑀓𑀫𑀺𑀯𑀤𑁆𑀥𑀕𑀽𑀢𑀺 𑀯𑀮𑀸𑀳𑀓𑀦𑁆𑀢𑀭𑀢𑁄 𑀦𑀺𑀓𑁆𑀔𑀦𑁆𑀢𑀁 𑀉𑀤𑀓𑀁 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑁂 𑀧𑀣𑀕𑀸 𑀯𑀺𑀬 𑀢𑀁 𑀥𑀫𑁆𑀫𑀁 𑀲𑀧𑁆𑀧𑀜𑁆𑀜𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀧𑀺𑀯𑀦𑁆𑀢𑀸 𑀯𑀺𑀬 𑀲𑀼𑀡𑀦𑁆𑀢𑀺.

𑀫𑀦𑀼𑀲𑁆𑀲𑀸 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀣𑁂𑀭𑀺𑀬𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻 𑁋

𑁫𑁬.

‘‘𑀲𑀼𑀓𑁆𑀓𑀸 𑀲𑀼𑀓𑁆𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦’’𑀦𑁆𑀢𑀺. 𑁋 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺;

𑀢𑀢𑁆𑀣 𑀲𑀼𑀓𑁆𑀓𑀸𑀢𑀺 𑀲𑀼𑀓𑁆𑀓𑀸𑀣𑁂𑀭𑀻 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀤𑀲𑁆𑀲𑁂𑀢𑀺. 𑀲𑀼𑀓𑁆𑀓𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑁂𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺. 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀯𑀻𑀢𑀭𑀸𑀕𑀸 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀼𑀓𑁆𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑁂𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀦𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂𑀢𑀺𑀆𑀤𑀺𑀓𑀸 𑀲𑁂𑀮𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀦𑁆𑀦𑀸, 𑀢𑁂𑀦 𑀲𑀤𑁆𑀥𑀺𑀁 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀲𑀼𑀔𑀲𑀁𑀯𑀸𑀲𑀁 𑀯𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀸𑀮𑀗𑁆𑀓𑀢𑁂 𑀲𑀬𑀫𑁆𑀧𑀺 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀲𑀁𑀯𑁂𑀕𑀚𑀸𑀢𑀸 𑀓𑀺𑀁𑀓𑀼𑀲𑀮𑀕𑀯𑁂𑀲𑀺𑀦𑀻 𑀓𑀸𑀮𑁂𑀦 𑀓𑀸𑀮𑀁 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀅𑀦𑀼𑀯𑀺𑀘𑀭𑀢𑀺 ‘‘𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀩𑁄𑀥𑀺𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀬𑀤𑀺 𑀩𑀼𑀤𑁆𑀥𑁄 𑀪𑀕𑀯𑀸 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀤𑀲𑁆𑀲𑁂𑀢𑀼 𑀫𑁂 𑀅𑀬𑀁 𑀩𑁄𑀥𑀺 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀦𑀺𑀲𑀻𑀤𑀺. 𑀢𑀲𑁆𑀲𑀸 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀦𑀦𑁆𑀢𑀭𑀫𑁂𑀯 𑀩𑁄𑀥𑀺 𑀧𑀚𑁆𑀚𑀮𑀺, 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀸 𑀲𑀸𑀔𑀸 𑀉𑀝𑁆𑀞𑀳𑀺𑀁𑀲𑀼, 𑀲𑀩𑁆𑀩𑀸 𑀤𑀺𑀲𑀸 𑀯𑀺𑀭𑁄𑀘𑀺𑀁𑀲𑀼. 𑀲𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀴𑀸𑀭𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀆𑀴𑀯𑀻𑀭𑀝𑁆𑀞𑁂 𑀆𑀴𑀯𑀺𑀓𑀲𑁆𑀲 𑀭𑀜𑁆𑀜𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁂𑀮𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀆𑀴𑀯𑀺𑀓𑀲𑁆𑀲 𑀧𑀦 𑀭𑀜𑁆𑀜𑁄 𑀥𑀻𑀢𑀸𑀢𑀺 𑀓𑀢𑁆𑀯𑀸 𑀆𑀴𑀯𑀺𑀓𑀸𑀢𑀺𑀧𑀺 𑀦𑀁 𑀯𑁄𑀳𑀭𑀦𑁆𑀢𑀺. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀲𑀢𑁆𑀣𑀭𑀺 𑀆𑀴𑀯𑀓𑀁 𑀤𑀫𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀆𑀴𑀯𑀻𑀦𑀕𑀭𑀁 𑀉𑀧𑀕𑀢𑁂 𑀤𑀸𑀭𑀺𑀓𑀸 𑀳𑀼𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀻 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀭𑀺𑀧𑀓𑁆𑀓𑀜𑀸𑀡𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁬𑁧-𑁮𑁫) 𑁋

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀘𑀸𑀭𑀺𑀓𑀻 𑀆𑀲𑀳𑀁 𑀢𑀤𑀸;

𑀆𑀭𑀸𑀫𑁂𑀦 𑀘 𑀆𑀭𑀸𑀫𑀁, 𑀘𑀭𑀸𑀫𑀺 𑀓𑀼𑀲𑀮𑀢𑁆𑀣𑀺𑀓𑀸.

‘‘𑀓𑀸𑀴𑀧𑀓𑁆𑀔𑀫𑁆𑀳𑀺 𑀤𑀺𑀯𑀲𑁂, 𑀅𑀤𑁆𑀤𑀲𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀳𑀁.

‘‘𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑁂𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀢𑀸𑀯𑀤𑁂.

‘‘𑀬𑀤𑀺 𑀩𑀼𑀤𑁆𑀥𑁄 𑀅𑀫𑀺𑀢𑀕𑀼𑀡𑁄, 𑀅𑀲𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀻𑀭𑀁 𑀫𑁂, 𑀩𑁄𑀥𑀺 𑀑𑀪𑀸𑀲𑀢𑀼 𑀅𑀬𑀁.

‘‘𑀲𑀳 𑀆𑀯𑀚𑁆𑀚𑀺𑀢𑁂 𑀫𑀬𑁆𑀳𑀁, 𑀩𑁄𑀥𑀺 𑀧𑀚𑁆𑀚𑀮𑀺 𑀢𑀸𑀯𑀤𑁂;

𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀆𑀲𑀺, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀭𑁄𑀘𑀢𑀺.

‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁆𑀣, 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀳𑀁;

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀢𑁆𑀢𑁂, 𑀤𑀻𑀧𑀧𑀽𑀚𑀁 𑀅𑀓𑀸𑀲𑀳𑀁.

‘‘𑀆𑀲𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀧𑀜𑁆𑀘𑀤𑀻𑀧𑀸𑀦𑀺 𑀧𑀚𑁆𑀚𑀮𑀼𑀁;

𑀬𑀸𑀯 𑀉𑀤𑁂𑀢𑀺 𑀲𑀽𑀭𑀺𑀬𑁄, 𑀤𑀻𑀧𑀸 𑀫𑁂 𑀧𑀚𑁆𑀚𑀮𑀼𑀁 𑀢𑀤𑀸.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀧𑀜𑁆𑀘𑀤𑀻𑀧𑀸𑀢𑀺 𑀯𑀼𑀘𑁆𑀘𑀢𑀺;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

‘‘𑀅𑀲𑀗𑁆𑀔𑀺𑀬𑀸𑀦𑀺 𑀤𑀻𑀧𑀸𑀦𑀺, 𑀧𑀭𑀺𑀯𑀸𑀭𑁂 𑀚𑀮𑀺𑀁𑀲𑀼 𑀫𑁂;

𑀬𑀸𑀯𑀢𑀸 𑀤𑁂𑀯𑀪𑀯𑀦𑀁, 𑀤𑀻𑀧𑀸𑀮𑁄𑀓𑁂𑀦 𑀚𑁄𑀢𑀢𑀺.

‘‘𑀧𑀭𑀫𑁆𑀫𑀼𑀔𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀬𑀤𑀺 𑀇𑀘𑁆𑀙𑀸𑀫𑀺 𑀧𑀲𑁆𑀲𑀺𑀢𑀼𑀁;

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀲𑀩𑁆𑀩𑀁 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀦𑀸.

‘‘𑀬𑀸𑀯𑀢𑀸 𑀅𑀪𑀺𑀓𑀗𑁆𑀔𑀸𑀫𑀺, 𑀤𑀝𑁆𑀞𑀼𑀁 𑀲𑀼𑀕𑀢𑀤𑀼𑀕𑁆𑀕𑀢𑁂;

𑀢𑀢𑁆𑀣 𑀆𑀯𑀭𑀡𑀁 𑀦𑀢𑁆𑀣𑀺, 𑀭𑀼𑀓𑁆𑀔𑁂𑀲𑀼 𑀧𑀩𑁆𑀩𑀢𑁂𑀲𑀼 𑀯𑀸.

‘‘𑀅𑀲𑀻𑀢𑀺𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂 𑀚𑀮𑀦𑁆𑀢𑀺 𑀫𑁂.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀉𑀧𑁆𑀧𑀚𑁆𑀚𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀸 𑀲𑀦𑁆𑀢𑀻, 𑀅𑀓𑁆𑀔𑀺 𑀫𑁂 𑀦 𑀦𑀺𑀫𑀻𑀮𑀢𑀺.

‘‘𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀢𑀸;

𑀚𑀮𑀦𑁆𑀢𑀺 𑀲𑀽𑀢𑀺𑀓𑀸𑀕𑁂𑀳𑁂, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀫𑀸𑀦𑀲𑀁 𑀯𑀺𑀦𑀺𑀯𑀢𑁆𑀢𑀬𑀺𑀁;

𑀅𑀚𑀭𑀸𑀫𑀢𑀁 𑀲𑀻𑀢𑀺𑀪𑀸𑀯𑀁, 𑀦𑀺𑀩𑁆𑀩𑀸𑀦𑀁 𑀨𑀲𑁆𑀲𑀬𑀺𑀁 𑀅𑀳𑀁.

‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀸𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀕𑁄𑀢𑀫𑁄.

‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂 𑀯𑀲𑀦𑁆𑀢𑀺𑀬𑀸;

𑀢𑀤𑀸 𑀧𑀚𑁆𑀚𑀮𑀢𑁂 𑀤𑀻𑀧𑀁, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

‘‘𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑀸 𑀅𑀳𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

‘‘𑀲𑀩𑁆𑀩𑀯𑁄𑀲𑀺𑀢𑀯𑁄𑀲𑀸𑀦𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀧𑀜𑁆𑀘𑀤𑀻𑀧𑀸 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀻𑀧𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀣𑁂𑀭𑀻 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑀻 𑀏𑀓𑀤𑀺𑀯𑀲𑀁 𑀧𑀘𑁆𑀙𑀸𑀪𑀢𑁆𑀢𑀁 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀅𑀦𑁆𑀥𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀫𑀸𑀭𑁄 𑀯𑀺𑀯𑁂𑀓𑀢𑁄 𑀯𑀺𑀘𑁆𑀙𑁂𑀤𑁂𑀢𑀼𑀓𑀸𑀫𑁄 𑀅𑀜𑁆𑀜𑀸𑀢𑀓𑀭𑀽𑀧𑁂𑀦 𑀉𑀧𑀕𑀦𑁆𑀢𑁆𑀯𑀸 𑁋

𑁫𑁭.

‘‘𑀦𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀳𑀲𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀲𑁆𑀲𑀢𑁆𑀣𑁄 𑁋 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀩𑁆𑀩𑀲𑀫𑀬𑁂𑀲𑀼𑀧𑀺 𑀉𑀧𑀧𑀭𑀺𑀓𑁆𑀔𑀻𑀬𑀫𑀸𑀦𑁂𑀲𑀼 𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀺 𑀢𑁂𑀲𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀙𑀦𑁆𑀤𑀲𑁄 𑀧𑀝𑀺𑀜𑁆𑀜𑀸𑀬𑀫𑀸𑀦𑀁 𑀯𑁄𑀳𑀸𑀭𑀫𑀢𑁆𑀢𑀫𑁂𑀯𑁂𑀢𑀁, 𑀢𑀲𑁆𑀫𑀸 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀳𑀲𑀺 𑀏𑀯𑀭𑀽𑀧𑁂 𑀲𑀫𑁆𑀧𑀦𑁆𑀦𑀧𑀞𑀫𑀯𑀬𑁂 𑀞𑀺𑀢𑀸 𑀇𑀫𑀺𑀦𑀸 𑀓𑀸𑀬𑀯𑀺𑀯𑁂𑀓𑁂𑀦 𑀓𑀺𑀁 𑀓𑀭𑀺𑀲𑁆𑀲𑀲𑀺? 𑀅𑀣 𑀔𑁄 𑀪𑀼𑀜𑁆𑀚𑀸𑀳𑀺 𑀓𑀸𑀫𑀭𑀢𑀺𑀬𑁄 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀸 𑀔𑀺𑀟𑁆𑀟𑀸𑀭𑀢𑀺𑀬𑁄 𑀧𑀘𑁆𑀘𑀦𑀼𑀪𑁄𑀳𑀺. 𑀓𑀲𑁆𑀫𑀸? 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻 ‘‘𑀬𑀤𑀢𑁆𑀣𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀢𑀤𑁂𑀯 𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀺, 𑀢𑁂𑀦𑁂𑀯𑁂𑀢𑀁 𑀦𑀸𑀥𑀺𑀕𑀢𑀁, 𑀓𑀸𑀫𑀪𑁄𑀕𑀸 𑀘 𑀧𑀭𑀺𑀳𑀻𑀦𑀸, 𑀅𑀦𑀢𑁆𑀣𑁄 𑀯𑀢 𑀫𑀬𑁆𑀳’’𑀦𑁆𑀢𑀺 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀫𑀸 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑀻 ‘‘𑀩𑀸𑀮𑁄 𑀯𑀢𑀸𑀬𑀁 𑀫𑀸𑀭𑁄, 𑀬𑁄 𑀫𑀫 𑀧𑀘𑁆𑀘𑀓𑁆𑀔𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀫𑁂𑀲𑀼 𑀘 𑀫𑀁 𑀧𑀯𑀸𑀭𑁂𑀢𑀺, 𑀫𑀫 𑀔𑀻𑀡𑀸𑀲𑀯𑀪𑀸𑀯𑀁 𑀦 𑀚𑀸𑀦𑀸𑀢𑀺. 𑀳𑀦𑁆𑀤 𑀦𑀁 𑀢𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

𑁫𑁮.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀢𑀻 𑀤𑀸𑀦𑀺 𑀲𑀸 𑀫𑀫.

𑁫𑁯.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺. 𑁋 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳;

𑀢𑀢𑁆𑀣 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸𑀢𑀺 𑀓𑀸𑀫𑀸 𑀦𑀸𑀫 𑀬𑁂𑀦 𑀅𑀥𑀺𑀝𑁆𑀞𑀺𑀢𑀸, 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀯𑀺𑀦𑀺𑀯𑀺𑀚𑁆𑀛𑀦𑀢𑁄 𑀦𑀺𑀲𑀺𑀢𑀲𑀢𑁆𑀢𑀺 𑀯𑀺𑀬 𑀲𑀽𑀮𑀁 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸. 𑀔𑀦𑁆𑀥𑀸𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀆𑀲𑀦𑁆𑀢𑀺 𑀢𑁂𑀲𑀁. 𑀅𑀥𑀺𑀓𑀼𑀝𑁆𑀝𑀦𑀸𑀢𑀺 𑀙𑀺𑀦𑁆𑀤𑀦𑀸𑀥𑀺𑀝𑁆𑀞𑀸𑀦𑀸, 𑀅𑀘𑁆𑀘𑀸𑀤𑀸𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁄 𑀔𑀦𑁆𑀥𑁂 𑀅𑀘𑁆𑀘𑀸𑀤𑀸𑀬 𑀲𑀢𑁆𑀢𑀸 𑀓𑀸𑀫𑁂𑀳𑀺 𑀙𑁂𑀚𑁆𑀚𑀪𑁂𑀚𑁆𑀚𑀁 𑀧𑀸𑀧𑀼𑀡𑀦𑁆𑀢𑀺. 𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀢𑀺 𑀤𑀸𑀦𑀺 𑀲𑀸 𑀫𑀫𑀸𑀢𑀺, 𑀧𑀸𑀧𑀺𑀫, 𑀢𑁆𑀯𑀁 𑀬𑀁 𑀓𑀸𑀫𑀭𑀢𑀺𑀁 𑀭𑀫𑀺𑀢𑀩𑁆𑀩𑀁 𑀲𑁂𑀯𑀺𑀢𑀩𑁆𑀩𑀁 𑀓𑀢𑁆𑀯𑀸 𑀯𑀤𑀲𑀺, 𑀲𑀸 𑀤𑀸𑀦𑀺 𑀫𑀫 𑀦𑀺𑀭𑀢𑀺𑀚𑀸𑀢𑀺𑀓𑀢𑁆𑀢𑀸 𑀫𑀻𑀴𑁆𑀳𑀲𑀤𑀺𑀲𑀸, 𑀦 𑀢𑀸𑀬 𑀫𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺.

𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀏𑀯𑀁 𑀚𑀸𑀦𑀸𑀳𑀻𑀢𑀺 ‘‘𑀲𑀩𑁆𑀩𑀲𑁄 𑀧𑀳𑀻𑀦𑀢𑀡𑁆𑀳𑀸𑀯𑀺𑀚𑁆𑀚𑀸’’𑀢𑀺 𑀫𑀁 𑀚𑀸𑀦𑀸𑀳𑀺, 𑀢𑀢𑁄 𑀏𑀯 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑁂𑀳𑀺 𑀅𑀦𑁆𑀢𑀓 𑀮𑀸𑀫𑀓𑀸𑀘𑀸𑀭, 𑀫𑀸𑀭, 𑀢𑁆𑀯𑀁 𑀫𑀬𑀸 𑀦𑀺𑀳𑀢𑁄 𑀩𑀸𑀥𑀺𑀢𑁄 𑀅𑀲𑀺, 𑀦 𑀧𑀦𑀸𑀳𑀁 𑀢𑀬𑀸 𑀩𑀸𑀥𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀣𑁂𑀭𑀺𑀬𑀸 𑀫𑀸𑀭𑁄 𑀲𑀦𑁆𑀢𑀚𑁆𑀚𑀺𑀢𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀣𑁂𑀭𑀻𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀅𑀦𑁆𑀥𑀯𑀦𑁂 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑁂 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸.

𑀲𑁂𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑁄𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀬𑀁 𑀢𑀁 𑀇𑀲𑀻𑀳𑀺 𑀧𑀢𑁆𑀢𑀩𑁆𑀩𑀦𑁆𑀢𑀺𑀆𑀤𑀺𑀓𑀸 𑀲𑁄𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀭𑀼𑀡𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀅𑀢𑀻𑀢𑀯𑀢𑁆𑀣𑀼 𑀅𑀪𑀬𑀢𑁆𑀣𑁂𑀭𑀺𑀬𑀸 𑀯𑀢𑁆𑀣𑀼𑀲𑀤𑀺𑀲𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀧𑀦 𑀅𑀬𑀁 𑀣𑁂𑀭𑀻 𑀢𑀢𑁆𑀣 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀲𑁄𑀫𑀸𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀲𑀢𑁆𑀣𑀼 𑀭𑀸𑀚𑀕𑀳𑀧𑀯𑁂𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁭𑁧, 𑁮𑁦-𑁯𑁦) 𑁋

‘‘𑀦𑀕𑀭𑁂 𑀅𑀭𑀼𑀡𑀯𑀢𑀺𑀬𑀸, 𑀅𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀭𑀜𑁆𑀜𑁄 𑀅𑀳𑀼𑀁 𑀪𑀭𑀺𑀬𑀸, 𑀯𑀸𑀭𑀺𑀢𑀁 𑀯𑀸𑀭𑀬𑀸𑀫𑀳𑀁.

‘‘𑀬𑀸𑀯𑀢𑀸…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀲𑀩𑁆𑀩𑀁 𑀅𑀪𑀬𑀢𑁆𑀣𑁂𑀭𑀺𑀬𑀸 𑀅𑀧𑀤𑀸𑀦𑀲𑀤𑀺𑀲𑀁.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑀻 𑀏𑀓𑀤𑀺𑀯𑀲𑀁 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀅𑀦𑁆𑀥𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀫𑀸𑀭𑁄 𑀯𑀺𑀯𑁂𑀓𑀢𑁄 𑀯𑀺𑀘𑁆𑀙𑁂𑀤𑁂𑀢𑀼𑀓𑀸𑀫𑁄 𑀅𑀤𑀺𑀲𑁆𑀲𑀫𑀸𑀦𑀼𑀭𑀽𑀧𑁄 𑀉𑀧𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑁋

𑁬𑁦.

‘‘𑀬𑀁 𑀢𑀁 𑀇𑀲𑀻𑀳𑀺 𑀧𑀢𑁆𑀢𑀩𑁆𑀩𑀁, 𑀞𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀦 𑀢𑀁 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬, 𑀲𑀓𑁆𑀓𑀸 𑀧𑀧𑁆𑀧𑁄𑀢𑀼𑀫𑀺𑀢𑁆𑀣𑀺𑀬𑀸’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑀢𑀲𑁆𑀲𑀢𑁆𑀣𑁄 𑁋 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀦𑀝𑁆𑀞𑁂𑀦 ‘‘𑀇𑀲𑀻’’𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑀸𑀧𑀜𑁆𑀜𑁂𑀳𑀺 𑀧𑀢𑁆𑀢𑀩𑁆𑀩𑀁, 𑀢𑀁 𑀅𑀜𑁆𑀜𑁂𑀳𑀺 𑀧𑀦 𑀤𑀼𑀭𑀪𑀺𑀲𑀫𑁆𑀪𑀯𑀁 𑀤𑀼𑀦𑁆𑀦𑀺𑀧𑁆𑀨𑀸𑀤𑀦𑀻𑀬𑀁. 𑀬𑀁 𑀢𑀁 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀁 𑀧𑀭𑀫𑀲𑁆𑀲𑀸𑀲𑀝𑁆𑀞𑀸𑀦𑀁, 𑀦 𑀢𑀁 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬 𑀦𑀺𑀳𑀻𑀦𑀧𑀜𑁆𑀜𑀸𑀬 𑀇𑀢𑁆𑀣𑀺𑀬𑀸 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑀸. 𑀇𑀢𑁆𑀣𑀺𑀬𑁄 𑀳𑀺 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑀸𑀮𑀁 𑀑𑀤𑀦𑀁 𑀧𑀘𑀦𑁆𑀢𑀺𑀬𑁄 𑀧𑀓𑁆𑀓𑀼𑀣𑀺𑀢𑁂 𑀉𑀤𑀓𑁂 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀢𑁆𑀢𑀸𑀯𑀢𑀸 𑀑𑀤𑀦𑀁 𑀧𑀓𑁆𑀓’’𑀦𑁆𑀢𑀺 𑀦 𑀚𑀸𑀦𑀦𑁆𑀢𑀺, 𑀧𑀓𑁆𑀓𑀼𑀣𑀺𑀬𑀫𑀸𑀦𑁂 𑀧𑀦 𑀢𑀡𑁆𑀟𑀼𑀮𑁂 𑀤𑀩𑁆𑀩𑀺𑀬𑀸 𑀉𑀤𑁆𑀥𑀭𑀺𑀢𑁆𑀯𑀸 𑀤𑁆𑀯𑀻𑀳𑀺 𑀅𑀗𑁆𑀕𑀼𑀮𑀻𑀳𑀺 𑀧𑀻𑀴𑁂𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀤𑁆𑀯𑀗𑁆𑀕𑀼𑀮𑀺𑀧𑀜𑁆𑀜𑀸𑀬𑀸𑀢𑀺 𑀯𑀼𑀢𑁆𑀢𑀸.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑀻 𑀫𑀸𑀭𑀁 𑀅𑀧𑀲𑀸𑀤𑁂𑀦𑁆𑀢𑀻 𑁋

𑁬𑁧.

‘‘𑀇𑀢𑁆𑀣𑀺𑀪𑀸𑀯𑁄 𑀦𑁄 𑀓𑀺𑀁 𑀓𑀬𑀺𑀭𑀸, 𑀘𑀺𑀢𑁆𑀢𑀫𑁆𑀳𑀺 𑀲𑀼𑀲𑀫𑀸𑀳𑀺𑀢𑁂;

𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑁬𑁨.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺. 𑁋

𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀇𑀢𑁆𑀣𑀺𑀪𑀸𑀯𑁄 𑀦𑁄 𑀓𑀺𑀁 𑀓𑀬𑀺𑀭𑀸𑀢𑀺 𑀫𑀸𑀢𑀼𑀕𑀸𑀫𑀪𑀸𑀯𑁄 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑁂𑀬𑁆𑀬, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀓𑀻𑀤𑀺𑀲𑀁 𑀯𑀺𑀩𑀦𑁆𑀥𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀘𑀺𑀢𑁆𑀢𑀫𑁆𑀳𑀺 𑀲𑀼𑀲𑀫𑀸𑀳𑀺𑀢𑁂𑀢𑀺 𑀘𑀺𑀢𑁆𑀢𑁂 𑀅𑀕𑁆𑀕𑀫𑀕𑁆𑀕𑀲𑀫𑀸𑀥𑀺𑀦𑀸 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁂. 𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀻𑀢𑀺 𑀢𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂 𑀧𑀯𑀢𑁆𑀢𑀫𑀸𑀦𑁂. 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀤𑀺𑀯𑀺𑀥𑀺𑀦𑀸 𑀲𑀫𑁆𑀫𑀤𑁂𑀯 𑀧𑀲𑁆𑀲𑀢𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀧𑀸𑀧𑀺𑀫, 𑀇𑀢𑁆𑀣𑀻 𑀯𑀸 𑀳𑁄𑀢𑀼 𑀧𑀼𑀭𑀺𑀲𑁄 𑀯𑀸, 𑀅𑀕𑁆𑀕𑀫𑀕𑁆𑀕𑁂 𑀅𑀥𑀺𑀕𑀢𑁂 𑀅𑀭𑀳𑀢𑁆𑀢𑀁 𑀳𑀢𑁆𑀣𑀕𑀢𑀫𑁂𑀯𑀸𑀢𑀺.

𑀇𑀤𑀸𑀦𑀺 𑀢𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀕𑀢𑀪𑀸𑀯𑀁 𑀉𑀚𑀼𑀓𑀫𑁂𑀯 𑀤𑀲𑁆𑀲𑁂𑀦𑁆𑀢𑀻 ‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻’’𑀢𑀺 𑀕𑀸𑀣𑀫𑀸𑀳. 𑀲𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯.

𑀲𑁄𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀓𑁆𑀓𑀦𑀺𑀧𑀸𑀢𑁄

𑁧. 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄𑀢𑀺𑀆𑀤𑀺𑀓𑀸 𑀪𑀤𑁆𑀤𑀸𑀬 𑀓𑀸𑀧𑀺𑀮𑀸𑀦𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀦𑀦𑀦𑁆𑀤𑀸𑀬 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀦𑁆𑀢𑀻 𑀢𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀤𑀺𑀦𑁆𑀦𑁂 ‘‘𑀅𑀬𑀁 𑀇𑀫𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀉𑀴𑀸𑀭𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀫𑀳𑀸𑀚𑀦𑁄 𑀕𑀭𑀳𑀺 𑁋 ‘‘𑀩𑀸𑀮𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑁂 𑀓𑀺𑀁 𑀅𑀧𑀭𑀚𑁆𑀛𑀻’’𑀢𑀺? 𑀲𑀸 𑀢𑁂𑀲𑀁 𑀯𑀘𑀦𑁂𑀦 𑀮𑀚𑁆𑀚𑀫𑀸𑀦𑀸 𑀧𑀼𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀮𑀮𑀁 𑀦𑀻𑀳𑀭𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑁂𑀦 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀧𑀭𑀺 𑀆𑀲𑀺𑀢𑁆𑀢𑁂𑀦 𑀧𑀤𑀼𑀫𑀕𑀩𑁆𑀪𑀯𑀡𑁆𑀡𑁂𑀦 𑀲𑀧𑁆𑀧𑀺𑀦𑀸 𑀯𑀺𑀚𑁆𑀚𑁄𑀢𑀫𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀬𑀣𑀸 𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀑𑀪𑀸𑀲𑀚𑀸𑀢𑁄, 𑀏𑀯𑀁 𑀑𑀪𑀸𑀲𑀚𑀸𑀢𑀁 𑀫𑁂 𑀲𑀭𑀻𑀭𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀧𑀼𑀩𑁆𑀩𑀓𑀫𑁆𑀫𑀨𑀮𑁂𑀦 𑀤𑀼𑀕𑁆𑀕𑀦𑁆𑀥𑀲𑀭𑀻𑀭𑀸 𑀫𑀦𑀼𑀲𑁆𑀲𑁂𑀳𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀸 𑀳𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑀸 𑀅𑀢𑁆𑀢𑀦𑁄 𑀆𑀪𑀭𑀡𑁂𑀳𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀁 𑀓𑀸𑀭𑁂𑀢𑁆𑀯𑀸 𑀪𑀕𑀯𑀢𑁄 𑀘𑁂𑀢𑀺𑀬𑁂 𑀧𑀢𑀺𑀝𑁆𑀞𑀧𑁂𑀲𑀺, 𑀉𑀧𑁆𑀧𑀮𑀳𑀢𑁆𑀣𑁂𑀦 𑀘 𑀧𑀽𑀚𑀁 𑀅𑀓𑀸𑀲𑀺. 𑀢𑁂𑀦𑀲𑁆𑀲𑀸 𑀲𑀭𑀻𑀭𑀁 𑀢𑀲𑁆𑀫𑀺𑀁𑀬𑁂𑀯 𑀪𑀯𑁂 𑀲𑀼𑀕𑀦𑁆𑀥𑀁 𑀫𑀦𑁄𑀳𑀭𑀁 𑀚𑀸𑀢𑀁. 𑀲𑀸 𑀧𑀢𑀺𑀦𑁄 𑀧𑀺𑀬𑀸 𑀫𑀦𑀸𑀧𑀸 𑀳𑀼𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣𑀸𑀧𑀺 𑀬𑀸𑀯𑀚𑀻𑀯𑀁 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸, 𑀢𑀢𑁄 𑀘𑀼𑀢𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀤𑁂𑀯𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻 𑀘𑀺𑀭𑀓𑀸𑀮𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀧𑀝𑁆𑀞𑀳𑀺𑀢𑁆𑀯𑀸, 𑀢𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀲𑀁𑀯𑁂𑀕𑀚𑀸𑀢𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀦𑁆𑀢𑀻 𑀛𑀸𑀦𑀸𑀦𑀺 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀸𑀕𑀮𑀦𑀕𑀭𑁂 𑀓𑁄𑀲𑀺𑀬𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀢𑀸 𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀫𑀳𑀸𑀢𑀺𑀢𑁆𑀣𑀕𑀸𑀫𑁂 𑀧𑀺𑀧𑁆𑀨𑀮𑀺𑀓𑀼𑀫𑀸𑀭𑀲𑁆𑀲 𑀕𑁂𑀳𑀁 𑀦𑀻𑀢𑀸. 𑀢𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑀼𑀁 𑀦𑀺𑀓𑁆𑀔𑀦𑁆𑀢𑁂 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀧𑀩𑁆𑀩𑀚𑁆𑀚𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀧𑀯𑀺𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁩.𑁨𑁪𑁪-𑁩𑁧𑁩) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀼 𑀳𑀁𑀲𑀯𑀢𑀺𑀬𑀁, 𑀯𑀺𑀤𑁂𑀳𑁄 𑀦𑀸𑀫 𑀦𑀸𑀫𑀢𑁄;

𑀲𑁂𑀝𑁆𑀞𑀻 𑀧𑀳𑀽𑀢𑀭𑀢𑀦𑁄, 𑀢𑀲𑁆𑀲 𑀚𑀸𑀬𑀸 𑀅𑀳𑁄𑀲𑀳𑀁.

‘‘𑀓𑀤𑀸𑀘𑀺 𑀲𑁄 𑀦𑀭𑀸𑀤𑀺𑀘𑁆𑀘𑀁, 𑀉𑀧𑁂𑀘𑁆𑀘 𑀲𑀧𑀭𑀺𑀚𑁆𑀚𑀦𑁄;

𑀥𑀫𑁆𑀫𑀫𑀲𑁆𑀲𑁄𑀲𑀺 𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀤𑀼𑀓𑁆𑀔𑀪𑀬𑀧𑁆𑀧𑀳𑀁.

‘‘𑀲𑀸𑀯𑀓𑀁 𑀥𑀼𑀢𑀯𑀸𑀤𑀸𑀦𑀁, 𑀅𑀕𑁆𑀕𑀁 𑀓𑀺𑀢𑁆𑀢𑁂𑀲𑀺 𑀦𑀸𑀬𑀓𑁄;

𑀲𑀼𑀢𑁆𑀯𑀸 𑀲𑀢𑁆𑀢𑀸𑀳𑀺𑀓𑀁 𑀤𑀸𑀦𑀁, 𑀤𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀢𑀸𑀤𑀺𑀦𑁄.

‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀲 𑀳𑀸𑀲𑀬𑀦𑁆𑀢𑁄 𑀧𑀭𑀺𑀲𑀁, 𑀢𑀤𑀸 𑀳𑀺 𑀦𑀭𑀧𑀼𑀗𑁆𑀕𑀯𑁄.

‘‘𑀲𑁂𑀝𑁆𑀞𑀺𑀦𑁄 𑀅𑀦𑀼𑀓𑀫𑁆𑀧𑀸𑀬, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣;

𑀮𑀘𑁆𑀙𑀲𑁂 𑀧𑀢𑁆𑀣𑀺𑀢𑀁 𑀞𑀸𑀦𑀁, 𑀦𑀺𑀩𑁆𑀩𑀼𑀢𑁄 𑀳𑁄𑀳𑀺 𑀧𑀼𑀢𑁆𑀢𑀓.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀘𑀭𑀺, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

‘‘𑀲𑀸𑀲𑀦𑀁 𑀚𑁄𑀢𑀬𑀺𑀢𑁆𑀯𑀸𑀦, 𑀲𑁄 𑀫𑀤𑁆𑀤𑀺𑀢𑁆𑀯𑀸 𑀓𑀼𑀢𑀺𑀢𑁆𑀣𑀺𑀬𑁂;

𑀯𑁂𑀦𑁂𑀬𑁆𑀬𑀁 𑀯𑀺𑀦𑀬𑀺𑀢𑁆𑀯𑀸 𑀘, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

‘‘𑀦𑀺𑀩𑁆𑀩𑀼𑀢𑁂 𑀢𑀫𑁆𑀳𑀺 𑀮𑁄𑀓𑀕𑁆𑀕𑁂, 𑀧𑀽𑀚𑀦𑀢𑁆𑀣𑀸𑀬 𑀲𑀢𑁆𑀣𑀼𑀦𑁄;

𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸, 𑀲𑀳 𑀢𑁂𑀳𑀺 𑀅𑀓𑀸𑀭𑀬𑀺.

‘‘𑀲𑀢𑁆𑀢𑀬𑁄𑀚𑀦𑀺𑀓𑀁 𑀣𑀽𑀧𑀁, 𑀉𑀩𑁆𑀩𑀺𑀤𑁆𑀥𑀁 𑀭𑀢𑀦𑀸𑀫𑀬𑀁;

𑀚𑀮𑀦𑁆𑀢𑀁 𑀲𑀢𑀭𑀁𑀲𑀺𑀁𑀯, 𑀲𑀸𑀮𑀭𑀸𑀚𑀁𑀯 𑀨𑀼𑀮𑁆𑀮𑀺𑀢𑀁.

‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀧𑀸𑀢𑀺𑀬𑁄 𑀢𑀢𑁆𑀣 𑀓𑀸𑀭𑀬𑀺;

𑀦𑀴𑀕𑁆𑀕𑀻 𑀯𑀺𑀬 𑀚𑁄𑀢𑀦𑁆𑀢𑀻, 𑀭𑀢𑀦𑁂𑀳𑁂𑀯 𑀲𑀢𑁆𑀢𑀳𑀺.

‘‘𑀕𑀦𑁆𑀥𑀢𑁂𑀮𑁂𑀦 𑀧𑀽𑀭𑁂𑀢𑁆𑀯𑀸, 𑀤𑀻𑀧𑀸𑀦𑀼𑀚𑁆𑀚𑀮𑀬𑀻 𑀢𑀳𑀺𑀁;

𑀧𑀽𑀚𑀦𑀢𑁆𑀣𑀸𑀬 𑀫𑀳𑁂𑀲𑀺𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄.

‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀧𑀼𑀡𑁆𑀡𑀓𑀼𑀫𑁆𑀪𑀸𑀦𑀺 𑀓𑀸𑀭𑀬𑀺;

𑀭𑀢𑀦𑁂𑀳𑁂𑀯 𑀧𑀼𑀡𑁆𑀡𑀸𑀦𑀺, 𑀧𑀽𑀚𑀦𑀢𑁆𑀣𑀸𑀬 𑀫𑀳𑁂𑀲𑀺𑀦𑁄.

‘‘𑀫𑀚𑁆𑀛𑁂 𑀅𑀝𑁆𑀞𑀝𑁆𑀞𑀓𑀼𑀫𑁆𑀪𑀻𑀦𑀁, 𑀉𑀲𑁆𑀲𑀺𑀢𑀸 𑀓𑀜𑁆𑀘𑀦𑀕𑁆𑀖𑀺𑀬𑁄;

𑀅𑀢𑀺𑀭𑁄𑀘𑀦𑁆𑀢𑀺 𑀯𑀡𑁆𑀡𑁂𑀦, 𑀲𑀭𑀤𑁂𑀯 𑀤𑀺𑀯𑀸𑀓𑀭𑁄.

‘‘𑀘𑀢𑀼𑀤𑁆𑀯𑀸𑀭𑁂𑀲𑀼 𑀲𑁄𑀪𑀦𑁆𑀢𑀺, 𑀢𑁄𑀭𑀡𑀸 𑀭𑀢𑀦𑀸𑀫𑀬𑀸;

𑀉𑀲𑁆𑀲𑀺𑀢𑀸 𑀨𑀮𑀓𑀸 𑀭𑀫𑁆𑀫𑀸, 𑀲𑁄𑀪𑀦𑁆𑀢𑀺 𑀭𑀢𑀦𑀸𑀫𑀬𑀸.

‘‘𑀯𑀺𑀭𑁄𑀘𑀦𑁆𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀸, 𑀅𑀯𑀝𑀁𑀲𑀸 𑀲𑀼𑀦𑀺𑀫𑁆𑀫𑀺𑀢𑀸;

𑀉𑀲𑁆𑀲𑀺𑀢𑀸𑀦𑀺 𑀧𑀝𑀸𑀓𑀸𑀦𑀺, 𑀭𑀢𑀦𑀸𑀦𑀺 𑀯𑀺𑀭𑁄𑀘𑀭𑁂.

‘‘𑀲𑀼𑀭𑀢𑁆𑀢𑀁 𑀲𑀼𑀓𑀢𑀁 𑀘𑀺𑀢𑁆𑀢𑀁, 𑀘𑁂𑀢𑀺𑀬𑀁 𑀭𑀢𑀦𑀸𑀫𑀬𑀁;

𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦, 𑀲𑀲𑀜𑁆𑀛𑁄𑀯 𑀤𑀺𑀯𑀸𑀓𑀭𑁄.

‘‘𑀣𑀽𑀧𑀲𑁆𑀲 𑀯𑁂𑀤𑀺𑀬𑁄 𑀢𑀺𑀲𑁆𑀲𑁄, 𑀳𑀭𑀺𑀢𑀸𑀮𑁂𑀦 𑀧𑀽𑀭𑀬𑀺;

𑀏𑀓𑀁 𑀫𑀦𑁄𑀲𑀺𑀮𑀸𑀬𑁂𑀓𑀁, 𑀅𑀜𑁆𑀚𑀦𑁂𑀦 𑀘 𑀏𑀓𑀺𑀓𑀁.

‘‘𑀧𑀽𑀚𑀁 𑀏𑀢𑀸𑀤𑀺𑀲𑀁 𑀭𑀫𑁆𑀫𑀁, 𑀓𑀸𑀭𑁂𑀢𑁆𑀯𑀸 𑀯𑀭𑀯𑀸𑀤𑀺𑀦𑁄;

𑀅𑀤𑀸𑀲𑀺 𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀬𑀸𑀯𑀚𑀻𑀯𑀁 𑀬𑀣𑀸𑀩𑀮𑀁.

‘‘𑀲𑀳𑀸𑀯 𑀲𑁂𑀝𑁆𑀞𑀺𑀦𑀸 𑀢𑁂𑀦, 𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀲𑀩𑁆𑀩𑀲𑁄;

𑀬𑀸𑀯𑀚𑀻𑀯𑀁 𑀓𑀭𑀺𑀢𑁆𑀯𑀸𑀦, 𑀲𑀳𑀸𑀯 𑀲𑀼𑀕𑀢𑀺𑀁 𑀕𑀢𑀸.

‘‘𑀲𑀫𑁆𑀧𑀢𑁆𑀢𑀺𑀬𑁄𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀙𑀸𑀬𑀸 𑀯𑀺𑀬 𑀲𑀭𑀻𑀭𑁂𑀦, 𑀲𑀳 𑀢𑁂𑀦𑁂𑀯 𑀲𑀁𑀲𑀭𑀺𑀁.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

‘‘𑀢𑀤𑀸𑀬𑀁 𑀩𑀦𑁆𑀥𑀼𑀧𑀢𑀺𑀬𑀁, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀲𑀫𑁆𑀫𑀢𑁄;

𑀅𑀟𑁆𑀠𑁄 𑀲𑀦𑁆𑀢𑁄 𑀕𑀼𑀡𑁂𑀦𑀸𑀧𑀺, 𑀥𑀦𑁂𑀦 𑀘 𑀲𑀼𑀤𑀼𑀕𑁆𑀕𑀢𑁄.

‘‘𑀢𑀤𑀸𑀧𑀺 𑀢𑀲𑁆𑀲𑀸𑀳𑀁 𑀆𑀲𑀺𑀁, 𑀩𑁆𑀭𑀸𑀳𑁆𑀫𑀡𑀻 𑀲𑀫𑀘𑁂𑀢𑀲𑀸;

𑀓𑀤𑀸𑀘𑀺 𑀲𑁄 𑀤𑀺𑀚𑀯𑀭𑁄, 𑀲𑀗𑁆𑀕𑀫𑁂𑀲𑀺 𑀫𑀳𑀸𑀫𑀼𑀦𑀺𑀁.

‘‘𑀦𑀺𑀲𑀺𑀦𑁆𑀦𑀁 𑀚𑀦𑀓𑀸𑀬𑀫𑁆𑀳𑀺, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁;

𑀲𑀼𑀢𑁆𑀯𑀸 𑀥𑀫𑁆𑀫𑀁 𑀧𑀫𑀼𑀤𑀺𑀢𑁄, 𑀅𑀤𑀸𑀲𑀺 𑀏𑀓𑀲𑀸𑀝𑀓𑀁.

‘‘𑀖𑀭𑀫𑁂𑀓𑁂𑀦 𑀯𑀢𑁆𑀣𑁂𑀦, 𑀕𑀦𑁆𑀢𑁆𑀯𑀸𑀦𑁂𑀢𑀁 𑀲 𑀫𑀩𑁆𑀭𑀯𑀺;

𑀅𑀦𑀼𑀫𑁄𑀤 𑀫𑀳𑀸𑀧𑀼𑀜𑁆𑀜𑀁, 𑀤𑀺𑀦𑁆𑀦𑀁 𑀩𑀼𑀤𑁆𑀥𑀲𑁆𑀲 𑀲𑀸𑀝𑀓𑀁.

‘‘𑀢𑀤𑀸𑀳𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀅𑀦𑀼𑀫𑁄𑀤𑀺𑀁 𑀲𑀼𑀧𑀻𑀡𑀺𑀢𑀸;

𑀲𑀼𑀤𑀺𑀦𑁆𑀦𑁄 𑀲𑀸𑀝𑀓𑁄 𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄.

‘‘𑀲𑀼𑀔𑀺𑀢𑁄 𑀲𑀚𑁆𑀚𑀺𑀢𑁄 𑀳𑀼𑀢𑁆𑀯𑀸, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀩𑀸𑀭𑀸𑀡𑀲𑀺𑀧𑀼𑀭𑁂 𑀭𑀫𑁆𑀫𑁂, 𑀭𑀸𑀚𑀸 𑀆𑀲𑀺 𑀫𑀳𑀻𑀧𑀢𑀺.

‘‘𑀢𑀤𑀸 𑀢𑀲𑁆𑀲 𑀫𑀳𑁂𑀲𑀻𑀳𑀁, 𑀇𑀢𑁆𑀣𑀺𑀕𑀼𑀫𑁆𑀩𑀲𑁆𑀲 𑀉𑀢𑁆𑀢𑀫𑀸;

𑀢𑀲𑁆𑀲𑀸𑀢𑀺 𑀤𑀬𑀺𑀢𑀸 𑀆𑀲𑀺𑀁, 𑀧𑀼𑀩𑁆𑀩𑀲𑁆𑀦𑁂𑀳𑁂𑀦 𑀪𑀢𑁆𑀢𑀼𑀦𑁄.

‘‘𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑁂 𑀢𑁂, 𑀅𑀝𑁆𑀞 𑀧𑀘𑁆𑀘𑁂𑀓𑀦𑀸𑀬𑀓𑁂;

𑀤𑀺𑀲𑁆𑀯𑀸 𑀧𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀤𑀢𑁆𑀯𑀸 𑀧𑀺𑀡𑁆𑀟𑀁 𑀫𑀳𑀸𑀭𑀳𑀁.

‘‘𑀧𑀼𑀦𑁄 𑀦𑀺𑀫𑀦𑁆𑀢𑀬𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀭𑀢𑀦𑀫𑀡𑁆𑀟𑀧𑀁;

𑀓𑀫𑁆𑀫𑀸𑀭𑁂𑀳𑀺 𑀓𑀢𑀁 𑀧𑀢𑁆𑀢𑀁, 𑀲𑁄𑀯𑀡𑁆𑀡𑀁 𑀯𑀢 𑀢𑀢𑁆𑀢𑀓𑀁.

‘‘𑀲𑀫𑀸𑀦𑁂𑀢𑁆𑀯𑀸𑀦 𑀢𑁂 𑀲𑀩𑁆𑀩𑁂, 𑀢𑁂𑀲𑀁 𑀤𑀸𑀦𑀫𑀤𑀸𑀲𑀺 𑀲𑁄;

𑀲𑁄𑀡𑁆𑀡𑀸𑀲𑀦𑁂 𑀧𑀯𑀺𑀝𑁆𑀞𑀸𑀦𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

‘‘𑀢𑀫𑁆𑀧𑀺 𑀤𑀸𑀦𑀁 𑀲𑀳𑀸𑀤𑀸𑀲𑀺𑀁, 𑀓𑀸𑀲𑀺𑀭𑀸𑀚𑁂𑀦𑀳𑀁 𑀢𑀤𑀸;

𑀧𑀼𑀦𑀸𑀳𑀁 𑀩𑀸𑀭𑀸𑀡𑀲𑀺𑀬𑀁, 𑀚𑀸𑀢𑀸 𑀓𑀸𑀲𑀺𑀓𑀕𑀸𑀫𑀓𑁂.

‘‘𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀨𑀻𑀢𑁂, 𑀲𑀼𑀔𑀺𑀢𑁄 𑀲𑁄 𑀲𑀪𑀸𑀢𑀼𑀓𑁄;

𑀚𑁂𑀝𑁆𑀞𑀲𑁆𑀲 𑀪𑀸𑀢𑀼𑀦𑁄 𑀚𑀸𑀬𑀸, 𑀅𑀳𑁄𑀲𑀺𑀁 𑀲𑀼𑀧𑀢𑀺𑀩𑁆𑀩𑀢𑀸.

‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀓𑀦𑀺𑀬𑀲𑁆𑀲 𑀫𑀫 𑀪𑀢𑁆𑀢𑀼𑀦𑁄;

𑀪𑀸𑀕𑀦𑁆𑀦𑀁 𑀢𑀲𑁆𑀲 𑀤𑀢𑁆𑀯𑀸𑀦, 𑀆𑀕𑀢𑁂 𑀢𑀫𑁆𑀳𑀺 𑀧𑀸𑀯𑀤𑀺𑀁.

‘‘𑀦𑀸𑀪𑀺𑀦𑀦𑁆𑀤𑀺𑀢𑁆𑀣 𑀲𑁄 𑀤𑀸𑀦𑀁, 𑀢𑀢𑁄 𑀢𑀲𑁆𑀲 𑀅𑀤𑀸𑀲𑀳𑀁;

𑀉𑀔𑀸 𑀆𑀦𑀺𑀬 𑀢𑀁 𑀅𑀦𑁆𑀦𑀁, 𑀧𑀼𑀦𑁄 𑀢𑀲𑁆𑀲𑁂𑀯 𑀲𑁄 𑀅𑀤𑀸.

‘‘𑀢𑀤𑀦𑁆𑀦𑀁 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀤𑀼𑀝𑁆𑀞𑀸 𑀩𑀼𑀤𑁆𑀥𑀲𑁆𑀲𑀳𑀁 𑀢𑀤𑀸;

𑀧𑀢𑁆𑀢𑀁 𑀓𑀮𑀮𑀧𑀼𑀡𑁆𑀡𑀁 𑀢𑀁, 𑀅𑀤𑀸𑀲𑀺𑀁 𑀢𑀲𑁆𑀲 𑀢𑀸𑀤𑀺𑀦𑁄.

‘‘𑀤𑀸𑀦𑁂 𑀘 𑀕𑀳𑀡𑁂 𑀘𑁂𑀯, 𑀅𑀧𑀘𑁂 𑀧𑀤𑀼𑀲𑁂𑀧𑀺 𑀘;

𑀲𑀫𑀘𑀺𑀢𑁆𑀢𑀫𑀼𑀔𑀁 𑀤𑀺𑀲𑁆𑀯𑀸, 𑀢𑀤𑀸𑀳𑀁 𑀲𑀁𑀯𑀺𑀚𑀺𑀁 𑀪𑀼𑀲𑀁.

‘‘𑀧𑀼𑀦𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀲𑁄𑀥𑀬𑀺𑀢𑁆𑀯𑀸 𑀲𑀼𑀕𑀦𑁆𑀥𑀺𑀦𑀸,

𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀽𑀭𑁂𑀢𑁆𑀯𑀸, 𑀲𑀖𑀢𑀁 𑀲𑀓𑁆𑀓𑀭𑀁 𑀅𑀤𑀁.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀲𑀼𑀭𑀽𑀧𑀸 𑀳𑁄𑀫𑀺 𑀤𑀸𑀦𑀢𑁄;

𑀩𑀼𑀤𑁆𑀥𑀲𑁆𑀲 𑀅𑀧𑀓𑀸𑀭𑁂𑀦, 𑀤𑀼𑀕𑁆𑀕𑀦𑁆𑀥𑀸 𑀯𑀤𑀦𑁂𑀦 𑀘.

‘‘𑀧𑀼𑀦 𑀓𑀲𑁆𑀲𑀧𑀯𑀻𑀭𑀲𑁆𑀲, 𑀦𑀺𑀥𑀸𑀬𑀦𑁆𑀢𑀫𑁆𑀳𑀺 𑀘𑁂𑀢𑀺𑀬𑁂;

𑀲𑁄𑀯𑀡𑁆𑀡𑀁 𑀇𑀝𑁆𑀞𑀓𑀁 𑀯𑀭𑀁, 𑀅𑀤𑀸𑀲𑀺𑀁 𑀫𑀼𑀤𑀺𑀢𑀸 𑀅𑀳𑀁.

‘‘𑀘𑀢𑀼𑀚𑁆𑀚𑀸𑀢𑁂𑀦 𑀕𑀦𑁆𑀥𑁂𑀦, 𑀦𑀺𑀘𑀬𑀺𑀢𑁆𑀯𑀸 𑀢𑀫𑀺𑀝𑁆𑀞𑀓𑀁;

𑀫𑀼𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑀤𑁄𑀲𑀫𑁆𑀳𑀸, 𑀲𑀩𑁆𑀩𑀗𑁆𑀕𑀲𑀼𑀲𑀫𑀸𑀕𑀢𑀸.

‘‘𑀲𑀢𑁆𑀢 𑀧𑀸𑀢𑀺𑀲𑀳𑀲𑁆𑀲𑀸𑀦𑀺, 𑀭𑀢𑀦𑁂𑀳𑁂𑀯 𑀲𑀢𑁆𑀢𑀳𑀺;

𑀓𑀸𑀭𑁂𑀢𑁆𑀯𑀸 𑀖𑀢𑀧𑀽𑀭𑀸𑀦𑀺, 𑀯𑀝𑁆𑀝𑀻𑀦𑀺 𑀘 𑀲𑀳𑀲𑁆𑀲𑀲𑁄.

‘‘𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀻𑀧𑁂𑀢𑁆𑀯𑀸, 𑀞𑀧𑀬𑀺𑀁 𑀲𑀢𑁆𑀢𑀧𑀦𑁆𑀢𑀺𑀬𑁄;

𑀧𑀽𑀚𑀦𑀢𑁆𑀣𑀁 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀢𑀤𑀸𑀧𑀺 𑀢𑀫𑁆𑀳𑀺 𑀧𑀼𑀜𑁆𑀜𑀫𑁆𑀳𑀺, 𑀪𑀸𑀕𑀺𑀦𑀻𑀬𑀺 𑀯𑀺𑀲𑁂𑀲𑀢𑁄;

𑀧𑀼𑀦 𑀓𑀸𑀲𑀻𑀲𑀼 𑀲𑀜𑁆𑀚𑀸𑀢𑁄, 𑀲𑀼𑀫𑀺𑀢𑁆𑀢𑀸 𑀇𑀢𑀺 𑀯𑀺𑀲𑁆𑀲𑀼𑀢𑁄.

‘‘𑀢𑀲𑁆𑀲𑀸𑀳𑀁 𑀪𑀭𑀺𑀬𑀸 𑀆𑀲𑀺𑀁, 𑀲𑀼𑀔𑀺𑀢𑀸 𑀲𑀚𑁆𑀚𑀺𑀢𑀸 𑀧𑀺𑀬𑀸;

𑀢𑀤𑀸 𑀧𑀘𑁆𑀘𑁂𑀓𑀫𑀼𑀦𑀺𑀦𑁄, 𑀅𑀤𑀸𑀲𑀺𑀁 𑀖𑀦𑀯𑁂𑀞𑀦𑀁.

‘‘𑀢𑀲𑁆𑀲𑀸𑀧𑀺 𑀪𑀸𑀕𑀺𑀦𑀻 𑀆𑀲𑀺𑀁, 𑀫𑁄𑀤𑀺𑀢𑁆𑀯𑀸 𑀤𑀸𑀦𑀫𑀼𑀢𑁆𑀢𑀫𑀁;

𑀧𑀼𑀦𑀸𑀧𑀺 𑀓𑀸𑀲𑀺𑀭𑀝𑁆𑀞𑀫𑁆𑀳𑀺, 𑀚𑀸𑀢𑁄 𑀓𑁄𑀮𑀺𑀬𑀚𑀸𑀢𑀺𑀬𑀸.

‘‘𑀢𑀤𑀸 𑀓𑁄𑀮𑀺𑀬𑀧𑀼𑀢𑁆𑀢𑀸𑀦𑀁, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺;

𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀢𑀸𑀦𑀺 𑀲𑀫𑀼𑀧𑀝𑁆𑀞𑀳𑀺.

‘‘𑀢𑁂𑀫𑀸𑀲𑀁 𑀢𑀧𑁆𑀧𑀬𑀺𑀢𑁆𑀯𑀸𑀦, 𑀅𑀤𑀸𑀲𑀺 𑀘 𑀢𑀺𑀘𑀻𑀯𑀭𑁂;

𑀚𑀸𑀬𑀸 𑀢𑀲𑁆𑀲 𑀢𑀤𑀸 𑀆𑀲𑀺𑀁, 𑀧𑀼𑀜𑁆𑀜𑀓𑀫𑁆𑀫𑀧𑀣𑀸𑀦𑀼𑀕𑀸.

‘‘𑀢𑀢𑁄 𑀘𑀼𑀢𑁄 𑀅𑀳𑀼 𑀭𑀸𑀚𑀸, 𑀦𑀦𑁆𑀤𑁄 𑀦𑀸𑀫 𑀫𑀳𑀸𑀬𑀲𑁄;

𑀢𑀲𑁆𑀲𑀸𑀧𑀺 𑀫𑀳𑁂𑀲𑀻 𑀆𑀲𑀺𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

‘‘𑀢𑀤𑀸 𑀭𑀸𑀚𑀸 𑀪𑀯𑀺𑀢𑁆𑀯𑀸𑀦, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀳𑀻𑀧𑀢𑀺;

𑀧𑀤𑀼𑀫𑀯𑀢𑀻𑀧𑀼𑀢𑁆𑀢𑀸𑀦𑀁, 𑀧𑀘𑁆𑀘𑁂𑀓𑀫𑀼𑀦𑀺𑀦𑀁 𑀢𑀤𑀸.

‘‘𑀲𑀢𑀸𑀦𑀺 𑀧𑀜𑁆𑀘𑀦𑀽𑀦𑀸𑀦𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀳𑀺𑀁;

𑀭𑀸𑀚𑀼𑀬𑁆𑀬𑀸𑀦𑁂 𑀦𑀺𑀯𑀸𑀲𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸𑀦𑀺 𑀘 𑀧𑀽𑀚𑀬𑀺𑀁.

‘‘𑀘𑁂𑀢𑀺𑀬𑀸𑀦𑀺 𑀘 𑀓𑀸𑀭𑁂𑀢𑁆𑀯𑀸, 𑀧𑀩𑁆𑀩𑀚𑀺𑀢𑁆𑀯𑀸 𑀉𑀪𑁄 𑀫𑀬𑀁;

𑀪𑀸𑀯𑁂𑀢𑁆𑀯𑀸 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀩𑁆𑀭𑀳𑁆𑀫𑀮𑁄𑀓𑀁 𑀅𑀕𑀫𑁆𑀳𑀲𑁂.

‘‘𑀢𑀢𑁄 𑀘𑀼𑀢𑁄 𑀫𑀳𑀸𑀢𑀺𑀢𑁆𑀣𑁂, 𑀲𑀼𑀚𑀸𑀢𑁄 𑀧𑀺𑀧𑁆𑀨𑀮𑀸𑀬𑀦𑁄;

𑀫𑀸𑀢𑀸 𑀲𑀼𑀫𑀦𑀤𑁂𑀯𑀻𑀢𑀺, 𑀓𑁄𑀲𑀺𑀕𑁄𑀢𑁆𑀢𑁄 𑀤𑀺𑀚𑁄 𑀧𑀺𑀢𑀸.

‘‘𑀅𑀳𑀁 𑀫𑀤𑁆𑀤𑁂 𑀚𑀦𑀧𑀤𑁂, 𑀲𑀸𑀓𑀮𑀸𑀬 𑀧𑀼𑀭𑀼𑀢𑁆𑀢𑀫𑁂;

𑀓𑀧𑁆𑀧𑀺𑀮𑀲𑁆𑀲 𑀤𑀺𑀚𑀲𑁆𑀲𑀸𑀲𑀺𑀁, 𑀥𑀻𑀢𑀸 𑀫𑀸𑀢𑀸 𑀲𑀼𑀘𑀻𑀫𑀢𑀺.

‘‘𑀖𑀭𑀓𑀜𑁆𑀘𑀦𑀩𑀺𑀫𑁆𑀩𑁂𑀦, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀫𑀁 𑀧𑀺𑀢𑀸;

𑀅𑀤𑀸 𑀓𑀲𑁆𑀲𑀧𑀥𑀻𑀭𑀲𑁆𑀲, 𑀓𑀸𑀫𑁂𑀳𑀺 𑀯𑀚𑁆𑀚𑀺𑀢𑀲𑁆𑀲𑀫𑀁.

‘‘𑀓𑀤𑀸𑀘𑀺 𑀲𑁄 𑀓𑀸𑀭𑀼𑀡𑀺𑀓𑁄, 𑀕𑀦𑁆𑀢𑁆𑀯𑀸 𑀓𑀫𑁆𑀫𑀦𑁆𑀢𑀧𑁂𑀓𑁆𑀔𑀓𑁄;

𑀓𑀸𑀓𑀸𑀤𑀺𑀓𑁂𑀳𑀺 𑀔𑀚𑁆𑀚𑀦𑁆𑀢𑁂, 𑀧𑀸𑀡𑁂 𑀤𑀺𑀲𑁆𑀯𑀸𑀦 𑀲𑀁𑀯𑀺𑀚𑀺.

‘‘𑀖𑀭𑁂𑀯𑀸𑀳𑀁 𑀢𑀺𑀮𑁂 𑀚𑀸𑀢𑁂, 𑀤𑀺𑀲𑁆𑀯𑀸𑀦𑀸𑀢𑀧𑀢𑀸𑀧𑀦𑁂;

𑀓𑀺𑀫𑀻 𑀓𑀸𑀓𑁂𑀳𑀺 𑀔𑀚𑁆𑀚𑀦𑁆𑀢𑁂, 𑀲𑀁𑀯𑁂𑀕𑀫𑀮𑀪𑀺𑀁 𑀢𑀤𑀸.

‘‘𑀢𑀤𑀸 𑀲𑁄 𑀧𑀩𑁆𑀩𑀚𑀻 𑀥𑀻𑀭𑁄, 𑀅𑀳𑀁 𑀢𑀫𑀦𑀼𑀧𑀩𑁆𑀩𑀚𑀺𑀁;

𑀧𑀜𑁆𑀘 𑀯𑀲𑁆𑀲𑀸𑀦𑀺 𑀦𑀺𑀯𑀲𑀺𑀁, 𑀧𑀭𑀺𑀩𑁆𑀩𑀸𑀚𑀯𑀢𑁂 𑀅𑀳𑀁.

‘‘𑀬𑀤𑀸 𑀧𑀩𑁆𑀩𑀚𑀺𑀢𑀸 𑀆𑀲𑀺, 𑀕𑁄𑀢𑀫𑀻 𑀚𑀺𑀦𑀧𑁄𑀲𑀺𑀓𑀸;

𑀢𑀤𑀸𑀳𑀁 𑀢𑀫𑀼𑀧𑀕𑀦𑁆𑀢𑁆𑀯𑀸, 𑀩𑀼𑀤𑁆𑀥𑁂𑀦 𑀅𑀦𑀼𑀲𑀸𑀲𑀺𑀢𑀸.

‘‘𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀅𑀳𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁆𑀢𑀁, 𑀓𑀲𑁆𑀲𑀧𑀲𑁆𑀲 𑀲𑀺𑀭𑀻𑀫𑀢𑁄.

‘‘𑀲𑀼𑀢𑁄 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀓𑀲𑁆𑀲𑀧𑁄 𑀲𑀼𑀲𑀫𑀸𑀳𑀺𑀢𑁄;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀺, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺.

‘‘𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺;

𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

‘‘𑀢𑀣𑁂𑀯 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑀺𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁.

‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂, 𑀉𑀪𑁄 𑀧𑀩𑁆𑀩𑀚𑀺𑀢𑀸 𑀫𑀬𑀁;

𑀢𑁆𑀬𑀫𑁆𑀳 𑀔𑀻𑀡𑀸𑀲𑀯𑀸 𑀤𑀦𑁆𑀢𑀸, 𑀲𑀻𑀢𑀺𑀪𑀽𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀸.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁨𑁪𑁪-𑁩𑁧𑁩);

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀢𑀢𑁆𑀣 𑀲𑀸𑀢𑀺𑀲𑀬𑀁 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀅𑀧𑀭𑀪𑀸𑀕𑁂 𑀢𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀕𑀼𑀡𑀸𑀪𑀺𑀢𑁆𑀣𑀯𑀦𑀧𑀼𑀩𑁆𑀩𑀓𑀁 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀢𑀸𑀤𑀺𑀯𑀺𑀪𑀸𑀯𑀦𑀫𑀼𑀔𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑀻 𑁋

𑁬𑁩.

‘‘𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀓𑀲𑁆𑀲𑀧𑁄 𑀲𑀼𑀲𑀫𑀸𑀳𑀺𑀢𑁄;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄𑀯𑁂𑀤𑀺, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺.

𑁬𑁪.

‘‘𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺;

𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁬𑁫.

‘‘𑀢𑀣𑁂𑀯 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁.

𑁬𑁬.

‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂, 𑀉𑀪𑁄 𑀧𑀩𑁆𑀩𑀚𑀺𑀢𑀸 𑀫𑀬𑀁;

𑀢𑁆𑀬𑀫𑁆𑀳 𑀔𑀻𑀡𑀸𑀲𑀯𑀸 𑀤𑀦𑁆𑀢𑀸, 𑀲𑀻𑀢𑀺𑀪𑀽𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄𑀢𑀺 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀪𑀸𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀦𑀼𑀚𑀸𑀢𑀲𑀼𑀢𑁄 𑀢𑀢𑁄 𑀏𑀯 𑀢𑀲𑁆𑀲 𑀤𑀸𑀬𑀪𑀽𑀢𑀲𑁆𑀲 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀆𑀤𑀸𑀦𑁂𑀦 𑀤𑀸𑀬𑀸𑀤𑁄 𑀓𑀲𑁆𑀲𑀧𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀲𑀫𑀸𑀥𑀻𑀳𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑀸𑀬 𑀲𑀼𑀲𑀫𑀸𑀳𑀺𑀢𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄𑀯𑁂𑀤𑀻𑀢𑀺 𑀬𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀻𑀢𑀺 𑀙𑀩𑁆𑀩𑀻𑀲𑀢𑀺𑀤𑁂𑀯𑀮𑁄𑀓𑀪𑁂𑀤𑀁 𑀲𑀕𑁆𑀕𑀁 𑀘𑀢𑀼𑀩𑁆𑀩𑀺𑀥𑀁 𑀅𑀧𑀸𑀬𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀲𑁆𑀲𑀢𑀺.

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄𑀢𑀺 𑀢𑀢𑁄 𑀧𑀭𑀁 𑀚𑀸𑀢𑀺𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀪𑀺𑀜𑁆𑀜𑀸𑀬 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀅𑀪𑀺𑀜𑁆𑀜𑁂𑀬𑁆𑀬𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀺𑀢𑁆𑀯𑀸, 𑀧𑀳𑀸𑀢𑀩𑁆𑀩𑀁 𑀧𑀳𑀸𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑁆𑀯𑀸 𑀯𑁄𑀲𑀺𑀢𑁄 𑀦𑀺𑀝𑁆𑀞𑀁 𑀧𑀢𑁆𑀢𑁄 𑀓𑀢𑀓𑀺𑀘𑁆𑀘𑁄. 𑀆𑀲𑀯𑀓𑁆𑀔𑀬𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀫𑁄𑀦𑀁 𑀧𑀢𑁆𑀢𑀢𑁆𑀢𑀸 𑀫𑀼𑀦𑀺.

𑀢𑀣𑁂𑀯 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻𑀢𑀺 𑀬𑀣𑀸 𑀫𑀳𑀸𑀓𑀲𑁆𑀲𑀧𑁄 𑀏𑀢𑀸𑀳𑀺 𑀬𑀣𑀸𑀯𑀼𑀢𑁆𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑁂𑀯𑀺𑀚𑁆𑀚𑁄 𑀫𑀘𑁆𑀘𑀼𑀳𑀸𑀬𑀻 𑀘, 𑀢𑀣𑁂𑀯 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻𑀢𑀺. 𑀢𑀢𑁄 𑀏𑀯 𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀦𑁆𑀢𑀺 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑀣𑀸 𑀣𑁂𑀭𑀲𑁆𑀲 𑀧𑀝𑀺𑀧𑀢𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸, 𑀏𑀯𑀁 𑀫𑀫𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑀻 ‘‘𑀤𑀺𑀲𑁆𑀯𑀸 𑀆𑀤𑀻𑀦𑀯’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁆𑀬𑀫𑁆𑀳 𑀔𑀻𑀡𑀸𑀲𑀯𑀸 𑀤𑀦𑁆𑀢𑀸𑀢𑀺 𑀢𑁂 𑀫𑀬𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀳𑀜𑁆𑀘 𑀉𑀢𑁆𑀢𑀫𑁂𑀦 𑀤𑀫𑁂𑀦 𑀤𑀦𑁆𑀢𑀸 𑀲𑀩𑁆𑀩𑀲𑁄 𑀔𑀻𑀡𑀸𑀲𑀯𑀸 𑀘 𑀅𑀫𑁆𑀳. 𑀲𑀻𑀢𑀺𑀪𑀽𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀸𑀢𑀺 𑀢𑀢𑁄 𑀏𑀯 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑀢𑁄 𑀲𑀻𑀢𑀺𑀪𑀽𑀢𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀼𑀢𑀸 𑀘 𑀅𑀫𑁆𑀳 𑀪𑀯𑀸𑀫𑀸𑀢𑀺 𑀅𑀢𑁆𑀣𑁄.

𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀧𑀸𑀢𑁄

𑁧. 𑀅𑀜𑁆𑀜𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀧𑀜𑁆𑀘𑀓𑀦𑀺𑀧𑀸𑀢𑁂 𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀻𑀢𑀺𑀆𑀤𑀺𑀓𑀸 𑀅𑀜𑁆𑀜𑀢𑀭𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀤𑁂𑀯𑀤𑀳𑀦𑀕𑀭𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀥𑀸𑀢𑀻 𑀳𑀼𑀢𑁆𑀯𑀸 𑀯𑀟𑁆𑀠𑁂𑀲𑀺. 𑀦𑀸𑀫𑀕𑁄𑀢𑁆𑀢𑀢𑁄 𑀧𑀦 𑀅𑀧𑀜𑁆𑀜𑀸𑀢𑀸 𑀅𑀳𑁄𑀲𑀺. 𑀲𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀧𑀩𑁆𑀩𑀚𑀺𑀢𑀓𑀸𑀮𑁂 𑀲𑀬𑀫𑁆𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀲𑀁𑀯𑀘𑁆𑀙𑀭𑀸𑀦𑀺 𑀓𑀸𑀫𑀭𑀸𑀕𑁂𑀦 𑀉𑀧𑀤𑁆𑀤𑀼𑀢𑀸 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀓𑀸𑀮𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀅𑀮𑀪𑀦𑁆𑀢𑀻 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀫𑀸𑀦𑀸 𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀓𑀸𑀫𑁂𑀳𑀺 𑀯𑀺𑀦𑀺𑀯𑀢𑁆𑀢𑀺𑀢𑀫𑀸𑀦𑀲𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀪𑀸𑀯𑀦𑀫𑀦𑀼𑀬𑀜𑁆𑀚𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁬𑁭.

‘‘𑀧𑀡𑁆𑀡𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀬𑀢𑁄 𑀧𑀩𑁆𑀩𑀚𑀺𑀢𑀸 𑀅𑀳𑀁;

𑀦𑀸𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺, 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑀚𑁆𑀛𑀕𑀁.

𑁬𑁮.

‘‘𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀓𑀸𑀫𑀭𑀸𑀕𑁂𑀦𑀯𑀲𑁆𑀲𑀼𑀢𑀸;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀻, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺𑀁 𑀅𑀳𑀁.

𑁬𑁯.

‘‘𑀲𑀸 𑀪𑀺𑀓𑁆𑀔𑀼𑀦𑀺𑀁 𑀉𑀧𑀸𑀕𑀘𑁆𑀙𑀺𑀁, 𑀬𑀸 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀅𑀳𑀼;

𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄.

𑁭𑁦.

‘‘𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑁂 𑀉𑀧𑀸𑀯𑀺𑀲𑀺𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁.

𑁭𑁧.

‘‘𑀘𑁂𑀢𑁄𑀧𑀭𑀺𑀘𑁆𑀘𑀜𑀸𑀡𑀜𑁆𑀘, 𑀲𑁄𑀢𑀥𑀸𑀢𑀼 𑀯𑀺𑀲𑁄𑀥𑀺𑀢𑀸;

𑀇𑀤𑁆𑀥𑀻𑀧𑀺 𑀫𑁂 𑀲𑀘𑁆𑀙𑀺𑀓𑀢𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀦𑀸𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀻𑀢𑀺 𑀅𑀘𑁆𑀙𑀭𑀸𑀖𑀝𑀺𑀢𑀫𑀢𑁆𑀢𑀫𑁆𑀧𑀺 𑀔𑀡𑀁 𑀅𑀗𑁆𑀕𑀼𑀮𑀺𑀨𑁄𑀝𑀦𑀫𑀢𑁆𑀢𑀫𑁆𑀧𑀺 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑀚𑁆𑀛𑀕𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑀲𑀫𑀁 𑀘𑀺𑀢𑁆𑀢𑁂𑀓𑀕𑁆𑀕𑀁 𑀦 𑀅𑀚𑁆𑀛𑀕𑀦𑁆𑀢𑀺 𑀬𑁄𑀚𑀦𑀸, 𑀦 𑀧𑀝𑀺𑀮𑀪𑀺𑀦𑁆𑀢𑀺 𑀅𑀢𑁆𑀣𑁄.

𑀓𑀸𑀫𑀭𑀸𑀕𑁂𑀦𑀯𑀲𑁆𑀲𑀼𑀢𑀸𑀢𑀺 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀤𑀴𑁆𑀳𑀢𑀭𑀸𑀪𑀺𑀦𑀺𑀯𑁂𑀲𑀺𑀢𑀸𑀬 𑀩𑀳𑀮𑁂𑀦 𑀙𑀦𑁆𑀤𑀭𑀸𑀕𑁂𑀦 𑀢𑀺𑀦𑁆𑀢𑀘𑀺𑀢𑁆𑀢𑀸.

𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀘𑁂𑀢𑁄𑀧𑀭𑀺𑀘𑁆𑀘𑀜𑀸𑀡𑀜𑁆𑀘𑀸𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀜𑁆𑀘 𑀯𑀺𑀲𑁄𑀥𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀜𑁆𑀜𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀫𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀫𑀢𑁆𑀢𑀸 𑀯𑀡𑁆𑀡𑁂𑀦 𑀭𑀽𑀧𑁂𑀦𑀸𑀢𑀺𑀆𑀤𑀺𑀓𑀸 𑀯𑀺𑀫𑀮𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀅𑀜𑁆𑀜𑀢𑀭𑀸𑀬 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑀸 𑀇𑀢𑁆𑀣𑀺𑀬𑀸 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀯𑀺𑀫𑀮𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀢𑀣𑁂𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀉𑀤𑁆𑀤𑀺𑀲𑁆𑀲 𑀧𑀮𑁄𑀪𑀦𑀓𑀫𑁆𑀫𑀁 𑀓𑀸𑀢𑀼𑀁 𑀆𑀭𑀪𑀺. ‘‘𑀢𑀺𑀢𑁆𑀣𑀺𑀬𑁂𑀳𑀺 𑀉𑀬𑁆𑀬𑁄𑀚𑀺𑀢𑀸 𑀢𑀣𑀸 𑀅𑀓𑀸𑀲𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀣𑁂𑀭𑁄 𑀢𑀲𑁆𑀲𑀸 𑀅𑀲𑀼𑀪𑀯𑀺𑀪𑀸𑀯𑀦𑀫𑀼𑀔𑁂𑀦 𑀲𑀦𑁆𑀢𑀚𑁆𑀚𑀦𑀁 𑀓𑀢𑁆𑀯𑀸 𑀑𑀯𑀸𑀤𑀫𑀤𑀸𑀲𑀺. 𑀢𑀁 𑀳𑁂𑀝𑁆𑀞𑀸 𑀣𑁂𑀭𑀕𑀸𑀣𑀸𑀬 𑀆𑀕𑀢𑀫𑁂𑀯, 𑀢𑀣𑀸 𑀧𑀦 𑀣𑁂𑀭𑁂𑀦 𑀑𑀯𑀸𑀤𑁂 𑀤𑀺𑀦𑁆𑀦𑁂 𑀲𑀸 𑀲𑀁𑀯𑁂𑀕𑀚𑀸𑀢𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀖𑀝𑁂𑀦𑁆𑀢𑀻 𑀯𑀸𑀬𑀫𑀦𑁆𑀢𑀻 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁭𑁨.

‘‘𑀫𑀢𑁆𑀢𑀸 𑀯𑀡𑁆𑀡𑁂𑀦 𑀭𑀽𑀧𑁂𑀦, 𑀲𑁄𑀪𑀕𑁆𑀕𑁂𑀦 𑀬𑀲𑁂𑀦 𑀘;

𑀬𑁄𑀩𑁆𑀩𑀦𑁂𑀦 𑀘𑀼𑀧𑀢𑁆𑀣𑀤𑁆𑀥𑀸, 𑀅𑀜𑁆𑀜𑀸𑀲𑀫𑀢𑀺𑀫𑀜𑁆𑀜𑀺𑀳𑀁.

𑁭𑁩.

‘‘𑀯𑀺𑀪𑀽𑀲𑁂𑀢𑁆𑀯𑀸 𑀇𑀫𑀁 𑀓𑀸𑀬𑀁, 𑀲𑀼𑀘𑀺𑀢𑁆𑀢𑀁 𑀩𑀸𑀮𑀮𑀸𑀧𑀦𑀁;

𑀅𑀝𑁆𑀞𑀸𑀲𑀺𑀁 𑀯𑁂𑀲𑀺𑀤𑁆𑀯𑀸𑀭𑀫𑁆𑀳𑀺, 𑀮𑀼𑀤𑁆𑀤𑁄 𑀧𑀸𑀲𑀫𑀺𑀯𑁄𑀟𑁆𑀟𑀺𑀬.

𑁭𑁪.

‘‘𑀧𑀺𑀴𑀦𑁆𑀥𑀦𑀁 𑀯𑀺𑀤𑀁𑀲𑁂𑀦𑁆𑀢𑀻, 𑀕𑀼𑀬𑁆𑀳𑀁 𑀧𑀓𑀸𑀲𑀺𑀓𑀁 𑀩𑀳𑀼𑀁;

𑀅𑀓𑀸𑀲𑀺𑀁 𑀯𑀺𑀯𑀺𑀥𑀁 𑀫𑀸𑀬𑀁, 𑀉𑀚𑁆𑀛𑀕𑁆𑀖𑀦𑁆𑀢𑀻 𑀩𑀳𑀼𑀁 𑀚𑀦𑀁.

𑁭𑁫.

‘‘𑀲𑀸𑀚𑁆𑀚 𑀧𑀺𑀡𑁆𑀟𑀁 𑀘𑀭𑀺𑀢𑁆𑀯𑀸𑀦, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀦𑀺𑀲𑀺𑀦𑁆𑀦𑀸 𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀅𑀯𑀺𑀢𑀓𑁆𑀓𑀲𑁆𑀲 𑀮𑀸𑀪𑀺𑀦𑀻.

𑁭𑁬.

‘‘𑀲𑀩𑁆𑀩𑁂 𑀬𑁄𑀕𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀫𑀢𑁆𑀢𑀸 𑀯𑀡𑁆𑀡𑁂𑀦 𑀭𑀽𑀧𑁂𑀦𑀸𑀢𑀺 𑀕𑀼𑀡𑀯𑀡𑁆𑀡𑁂𑀦 𑀘𑁂𑀯 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘. 𑀲𑁄𑀪𑀕𑁆𑀕𑁂𑀦𑀸𑀢𑀺 𑀲𑀼𑀪𑀕𑀪𑀸𑀯𑁂𑀦. 𑀬𑀲𑁂𑀦𑀸𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸. 𑀫𑀢𑁆𑀢𑀸 𑀯𑀡𑁆𑀡𑀫𑀤𑀭𑀽𑀧𑀫𑀤𑀲𑁄𑀪𑀕𑁆𑀕𑀫𑀤𑀧𑀭𑀺𑀯𑀸𑀭𑀫𑀤𑀯𑀲𑁂𑀦 𑀫𑀤𑀁 𑀆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀬𑁄𑀩𑁆𑀩𑀦𑁂𑀦 𑀘𑀼𑀧𑀢𑁆𑀣𑀤𑁆𑀥𑀸𑀢𑀺 𑀬𑁄𑀩𑁆𑀩𑀦𑀫𑀤𑁂𑀦 𑀉𑀧𑀭𑀽𑀧𑀭𑀺 𑀣𑀤𑁆𑀥𑀸 𑀬𑁄𑀩𑁆𑀩𑀦𑀦𑀺𑀫𑀺𑀢𑁆𑀢𑁂𑀦 𑀅𑀳𑀗𑁆𑀓𑀸𑀭𑁂𑀦 𑀉𑀧𑀢𑁆𑀣𑀤𑁆𑀥𑀘𑀺𑀢𑁆𑀢𑀸 𑀅𑀦𑀼𑀧𑀲𑀦𑁆𑀢𑀫𑀸𑀦𑀲𑀸. 𑀅𑀜𑁆𑀜𑀸𑀲𑀫𑀢𑀺𑀫𑀜𑁆𑀜𑀺𑀳𑀦𑁆𑀢𑀺 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀅𑀢𑁆𑀢𑀦𑁄 𑀯𑀡𑁆𑀡𑀸𑀤𑀺𑀕𑀼𑀡𑁂𑀳𑀺 𑀲𑀩𑁆𑀩𑀣𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀺𑀁 𑀅𑀳𑀁. 𑀅𑀜𑁆𑀜𑀸𑀲𑀁 𑀯𑀸 𑀇𑀢𑁆𑀣𑀻𑀦𑀁 𑀯𑀡𑁆𑀡𑀸𑀤𑀺𑀕𑀼𑀡𑁂 𑀅𑀢𑀺𑀫𑀜𑁆𑀜𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀫𑀜𑁆𑀜𑀺𑀁 𑀅𑀯𑀫𑀸𑀦𑀁 𑀅𑀓𑀸𑀲𑀺𑀁.

𑀯𑀺𑀪𑀽𑀲𑀺𑀢𑁆𑀯𑀸 𑀇𑀫𑀁 𑀓𑀸𑀬𑀁, 𑀲𑀼𑀘𑀺𑀢𑁆𑀢𑀁 𑀩𑀸𑀮𑀮𑀸𑀧𑀦𑀦𑁆𑀢𑀺 𑀇𑀫𑀁 𑀦𑀸𑀦𑀸𑀯𑀺𑀥𑀅𑀲𑀼𑀘𑀺𑀪𑀭𑀺𑀢𑀁 𑀚𑁂𑀕𑀼𑀘𑁆𑀙𑀁 𑀅𑀳𑀁 𑀫𑀫𑀸𑀢𑀺 𑀩𑀸𑀮𑀸𑀦𑀁 𑀮𑀸𑀧𑀦𑀢𑁄 𑀯𑀸𑀘𑀦𑀢𑁄 𑀩𑀸𑀮𑀮𑀸𑀧𑀦𑀁 𑀫𑀫 𑀓𑀸𑀬𑀁 𑀙𑀯𑀺𑀭𑀸𑀕𑀓𑀭𑀡𑀓𑁂𑀲𑀝𑁆𑀞𑀧𑀦𑀸𑀤𑀺𑀦𑀸 𑀲𑀼𑀘𑀺𑀢𑁆𑀢𑀁 𑀯𑀢𑁆𑀣𑀸𑀪𑀭𑀡𑁂𑀳𑀺 𑀯𑀺𑀪𑀽𑀲𑀺𑀢𑁆𑀯𑀸 𑀲𑀼𑀫𑀡𑁆𑀟𑀺𑀢𑀧𑀲𑀸𑀤𑀺𑀢𑀁 𑀓𑀢𑁆𑀯𑀸. 𑀅𑀝𑁆𑀞𑀸𑀲𑀺𑀁 𑀯𑁂𑀲𑀺𑀤𑁆𑀯𑀸𑀭𑀫𑁆𑀳𑀺, 𑀮𑀼𑀤𑁆𑀤𑁄 𑀧𑀸𑀲𑀫𑀺𑀯𑁄𑀟𑁆𑀟𑀺𑀬𑀸𑀢𑀺 𑀫𑀺𑀕𑀮𑀼𑀤𑁆𑀤𑁄 𑀯𑀺𑀬 𑀫𑀺𑀕𑀸𑀦𑀁 𑀩𑀦𑁆𑀥𑀦𑀢𑁆𑀣𑀸𑀬 𑀤𑀡𑁆𑀟𑀯𑀸𑀓𑀼𑀭𑀸𑀤𑀺𑀫𑀺𑀕𑀧𑀸𑀲𑀁, 𑀫𑀸𑀭𑀲𑁆𑀲 𑀧𑀸𑀲𑀪𑀽𑀢𑀁 𑀬𑀣𑀸𑀯𑀼𑀢𑁆𑀢𑀁 𑀫𑀫 𑀓𑀸𑀬𑀁 𑀯𑁂𑀲𑀺𑀤𑁆𑀯𑀸𑀭𑀫𑁆𑀳𑀺 𑀯𑁂𑀲𑀺𑀬𑀸 𑀖𑀭𑀤𑁆𑀯𑀸𑀭𑁂 𑀑𑀟𑁆𑀟𑀺𑀬𑀺𑀢𑁆𑀯𑀸 𑀅𑀝𑁆𑀞𑀸𑀲𑀺𑀁.

𑀧𑀺𑀴𑀦𑁆𑀥𑀦𑀁 𑀯𑀺𑀤𑀁𑀲𑁂𑀦𑁆𑀢𑀻, 𑀕𑀼𑀬𑁆𑀳𑀁 𑀧𑀓𑀸𑀲𑀺𑀓𑀁 𑀩𑀳𑀼𑀦𑁆𑀢𑀺 𑀊𑀭𑀼𑀚𑀖𑀦𑀣𑀦𑀤𑀲𑁆𑀲𑀦𑀸𑀤𑀺𑀓𑀁 𑀕𑀼𑀬𑁆𑀳𑀜𑁆𑀘𑁂𑀯 𑀧𑀸𑀤𑀚𑀸𑀡𑀼𑀲𑀺𑀭𑀸𑀤𑀺𑀓𑀁 𑀧𑀓𑀸𑀲𑀜𑁆𑀘𑀸𑀢𑀺 𑀕𑀼𑀬𑁆𑀳𑀁 𑀧𑀓𑀸𑀲𑀺𑀓𑀜𑁆𑀘 𑀩𑀳𑀼𑀁 𑀦𑀸𑀦𑀧𑁆𑀧𑀓𑀸𑀭𑀁 𑀧𑀺𑀴𑀦𑁆𑀥𑀦𑀁 𑀆𑀪𑀭𑀡𑀁 𑀤𑀲𑁆𑀲𑁂𑀦𑁆𑀢𑀻. 𑀅𑀓𑀸𑀲𑀺𑀁 𑀯𑀺𑀯𑀺𑀥𑀁 𑀫𑀸𑀬𑀁, 𑀉𑀚𑁆𑀛𑀕𑁆𑀖𑀦𑁆𑀢𑀻 𑀩𑀳𑀼𑀁 𑀚𑀦𑀦𑁆𑀢𑀺 𑀬𑁄𑀩𑁆𑀩𑀦𑀫𑀤𑀫𑀢𑁆𑀢𑀁 𑀩𑀳𑀼𑀁 𑀩𑀸𑀮𑀚𑀦𑀁 𑀯𑀺𑀧𑁆𑀧𑀮𑀫𑁆𑀪𑁂𑀢𑀼𑀁 𑀳𑀲𑀦𑁆𑀢𑀻 𑀕𑀦𑁆𑀥𑀫𑀸𑀮𑀸𑀯𑀢𑁆𑀣𑀸𑀪𑀭𑀡𑀸𑀤𑀻𑀳𑀺 𑀲𑀭𑀻𑀭𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑁂𑀦 𑀳𑀲𑀯𑀺𑀮𑀸𑀲𑀪𑀸𑀯𑀸𑀤𑀻𑀳𑀺 𑀢𑁂𑀳𑀺 𑀘 𑀯𑀺𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀜𑁆𑀘𑀦𑀁 𑀅𑀓𑀸𑀲𑀺𑀁.

𑀲𑀸𑀚𑁆𑀚 𑀧𑀺𑀡𑁆𑀟𑀁 𑀘𑀭𑀺𑀢𑁆𑀯𑀸𑀦…𑀧𑁂… 𑀅𑀯𑀺𑀢𑀓𑁆𑀓𑀲𑁆𑀲 𑀮𑀸𑀪𑀺𑀦𑀻𑀢𑀺 𑀲𑀸 𑀅𑀳𑀁 𑀏𑀯𑀁 𑀧𑀫𑀸𑀤𑀯𑀺𑀳𑀸𑀭𑀺𑀦𑀻 𑀲𑀫𑀸𑀦𑀸 𑀅𑀚𑁆𑀚 𑀇𑀤𑀸𑀦𑀺 𑀅𑀬𑁆𑀬𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸 𑀳𑀼𑀢𑁆𑀯𑀸 𑀧𑀺𑀡𑁆𑀟𑀁 𑀘𑀭𑀺𑀢𑁆𑀯𑀸𑀦 𑀪𑀺𑀓𑁆𑀔𑀸𑀳𑀸𑀭𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀭𑀼𑀓𑁆𑀔𑀫𑀽𑀮𑁂 𑀯𑀺𑀯𑀺𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑀸 𑀤𑀼𑀢𑀺𑀬𑀚𑁆𑀛𑀸𑀦𑀧𑀸𑀤𑀓𑀲𑁆𑀲 𑀅𑀕𑁆𑀕𑀨𑀮𑀲𑁆𑀲 𑀅𑀥𑀺𑀕𑀫𑁂𑀦 𑀅𑀯𑀺𑀢𑀓𑁆𑀓𑀲𑁆𑀲 𑀮𑀸𑀪𑀺𑀦𑀻 𑀅𑀫𑁆𑀳𑀻𑀢𑀺 𑀬𑁄𑀚𑀦𑀸.

𑀲𑀩𑁆𑀩𑁂 𑀬𑁄𑀕𑀸𑀢𑀺 𑀓𑀸𑀫𑀬𑁄𑀕𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀬𑁄𑀕𑀸. 𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀧𑀞𑀫𑀫𑀕𑁆𑀕𑀸𑀤𑀺𑀦𑀸 𑀬𑀣𑀸𑀭𑀳𑀁 𑀲𑀫𑁆𑀫𑀤𑁂𑀯 𑀉𑀘𑁆𑀙𑀺𑀦𑁆𑀦𑀸 𑀧𑀳𑀻𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀺𑀫𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀻𑀳𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺𑀆𑀤𑀺𑀓𑀸 𑀲𑀻𑀳𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀲𑀻𑀳𑀲𑁂𑀦𑀸𑀧𑀢𑀺𑀦𑁄 𑀪𑀕𑀺𑀦𑀺𑀬𑀸 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 ‘‘𑀫𑀸𑀢𑀼𑀮𑀲𑁆𑀲 𑀦𑀸𑀫𑀁 𑀓𑀭𑁄𑀫𑀸’’𑀢𑀺 𑀲𑀻𑀳𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀸 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀦𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸𑀧𑀺 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀯𑀺𑀥𑀸𑀯𑀦𑁆𑀢𑀁 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀳𑀺 𑀩𑀸𑀥𑀻𑀬𑀫𑀸𑀦𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑀻 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀧𑀸𑀧𑀚𑀻𑀯𑀺𑀢𑁂𑀦, 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀁 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀲𑀸𑀔𑀸𑀬𑀁 𑀮𑀕𑁆𑀕𑀺𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀓𑀡𑁆𑀞𑁂 𑀧𑀝𑀺𑀫𑀼𑀜𑁆𑀘𑀦𑁆𑀢𑀻 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺, 𑀅𑀦𑁆𑀢𑀺𑀫𑀪𑀯𑀺𑀓𑀢𑀸𑀬 𑀧𑀸𑀲𑀲𑁆𑀲 𑀩𑀦𑁆𑀥𑀦𑀁 𑀕𑀻𑀯𑀝𑁆𑀞𑀸𑀦𑁂 𑀅𑀳𑁄𑀲𑀺, 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀸 𑀢𑀸𑀯𑀤𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑀫𑀓𑀸𑀮𑀫𑁂𑀯 𑀘 𑀧𑀸𑀲𑀩𑀦𑁆𑀥𑁄 𑀕𑀻𑀯𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀦𑀺𑀯𑀢𑁆𑀢𑀺. 𑀲𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑀸 𑀉𑀤𑀸𑀦𑀯𑀲𑁂𑀦 𑁋

𑁭𑁭.

‘‘𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸;

𑀅𑀳𑁄𑀲𑀺𑀁 𑀉𑀤𑁆𑀥𑀢𑀸 𑀧𑀼𑀩𑁆𑀩𑁂, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁭𑁮.

‘‘𑀧𑀭𑀺𑀬𑀼𑀝𑁆𑀞𑀺𑀢𑀸 𑀓𑁆𑀮𑁂𑀲𑁂𑀳𑀺, 𑀲𑀼𑀪𑀲𑀜𑁆𑀜𑀸𑀦𑀼𑀯𑀢𑁆𑀢𑀺𑀦𑀻;

𑀲𑀫𑀁 𑀘𑀺𑀢𑁆𑀢𑀲𑁆𑀲 𑀦 𑀮𑀪𑀺𑀁, 𑀭𑀸𑀕𑀘𑀺𑀢𑁆𑀢𑀯𑀲𑀸𑀦𑀼𑀕𑀸.

𑁭𑁯.

‘‘𑀓𑀺𑀲𑀸 𑀧𑀡𑁆𑀟𑀼 𑀯𑀺𑀯𑀡𑁆𑀡𑀸 𑀘, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀘𑀸𑀭𑀺𑀳𑀁;

𑀦𑀸𑀳𑀁 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀼𑀔𑀁 𑀯𑀺𑀦𑁆𑀤𑀺𑀁 𑀲𑀼𑀤𑀼𑀓𑁆𑀔𑀺𑀢𑀸.

𑁮𑁦.

‘‘𑀢𑀢𑁄 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦, 𑀧𑀸𑀯𑀺𑀲𑀺𑀁 𑀯𑀦𑀫𑀦𑁆𑀢𑀭𑀁;

𑀯𑀭𑀁 𑀫𑁂 𑀇𑀥 𑀉𑀩𑁆𑀩𑀦𑁆𑀥𑀁, 𑀬𑀜𑁆𑀘 𑀳𑀻𑀦𑀁 𑀧𑀼𑀦𑀸𑀘𑀭𑁂.

𑁮𑁧.

‘‘𑀤𑀴𑁆𑀳𑀧𑀸𑀲𑀁 𑀓𑀭𑀺𑀢𑁆𑀯𑀸𑀦, 𑀭𑀼𑀓𑁆𑀔𑀲𑀸𑀔𑀸𑀬 𑀩𑀦𑁆𑀥𑀺𑀬;

𑀧𑀓𑁆𑀔𑀺𑀧𑀺𑀁 𑀧𑀸𑀲𑀁 𑀕𑀻𑀯𑀸𑀬𑀁, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁂𑀦, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁂𑀦. 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸𑀢𑀺 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁂𑀦 𑀧𑀻𑀴𑀺𑀢𑀸. 𑀅𑀳𑁄𑀲𑀺𑀁 𑀉𑀤𑁆𑀥𑀢𑀸 𑀧𑀼𑀩𑁆𑀩𑁂, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻𑀢𑀺 𑀧𑀼𑀩𑁆𑀩𑁂 𑀫𑀫 𑀘𑀺𑀢𑁆𑀢𑁂 𑀫𑀬𑁆𑀳𑀁 𑀯𑀲𑁂 𑀅𑀯𑀢𑁆𑀢𑀫𑀸𑀦𑁂 𑀉𑀤𑁆𑀥𑀢𑀸 𑀦𑀸𑀦𑀸𑀭𑀫𑁆𑀫𑀡𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀅𑀲𑀫𑀸𑀳𑀺𑀢𑀸 𑀅𑀳𑁄𑀲𑀺𑀁.

𑀧𑀭𑀺𑀬𑀼𑀝𑁆𑀞𑀺𑀢𑀸 𑀓𑁆𑀮𑁂𑀲𑁂𑀳𑀺, 𑀲𑀼𑀪𑀲𑀜𑁆𑀜𑀸𑀦𑀼𑀯𑀢𑁆𑀢𑀺𑀦𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀧𑀢𑁆𑀢𑁂𑀳𑀺 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑁂𑀳𑀺 𑀅𑀪𑀺𑀪𑀽𑀢𑀸 𑀭𑀽𑀧𑀸𑀤𑀻𑀲𑀼 𑀲𑀼𑀪𑀦𑁆𑀢𑀺 𑀧𑀯𑀢𑁆𑀢𑀸𑀬 𑀓𑀸𑀫𑀲𑀜𑁆𑀜𑀸𑀬 𑀅𑀦𑀼𑀯𑀢𑁆𑀢𑀦𑀲𑀻𑀮𑀸. 𑀲𑀫𑀁 𑀘𑀺𑀢𑁆𑀢𑀲𑁆𑀲 𑀦 𑀮𑀪𑀺𑀁, 𑀭𑀸𑀕𑀘𑀺𑀢𑁆𑀢𑀯𑀲𑀸𑀦𑀼𑀕𑀸𑀢𑀺 𑀓𑀸𑀫𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑀲𑀁 𑀅𑀦𑀼𑀕𑀘𑁆𑀙𑀦𑁆𑀢𑀻 𑀈𑀲𑀓𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀲𑀫𑀁 𑀘𑁂𑀢𑁄𑀲𑀫𑀣𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀦 𑀮𑀪𑀺𑀁.

𑀓𑀺𑀲𑀸 𑀧𑀡𑁆𑀟𑀼 𑀯𑀺𑀯𑀡𑁆𑀡𑀸 𑀘𑀸𑀢𑀺 𑀏𑀯𑀁 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑁂𑀦 𑀓𑀺𑀲𑀸 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸 𑀢𑀢𑁄 𑀏𑀯 𑀯𑀺𑀯𑀡𑁆𑀡𑀸 𑀯𑀺𑀕𑀢𑀙𑀯𑀺𑀯𑀡𑁆𑀡𑀸 𑀘 𑀳𑀼𑀢𑁆𑀯𑀸. 𑀲𑀢𑁆𑀢 𑀯𑀲𑁆𑀲𑀸𑀦𑀻𑀢𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺. 𑀘𑀸𑀭𑀺𑀳𑀦𑁆𑀢𑀺 𑀘𑀭𑀺𑀁 𑀅𑀳𑀁. 𑀦𑀸𑀳𑀁 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀼𑀔𑀁 𑀯𑀺𑀦𑁆𑀤𑀺𑀁 𑀲𑀼𑀤𑀼𑀓𑁆𑀔𑀺𑀢𑀸𑀢𑀺 𑀏𑀯𑀫𑀳𑀁 𑀲𑀢𑁆𑀢𑀲𑀼 𑀲𑀁𑀯𑀘𑁆𑀙𑀭𑁂𑀲𑀼 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀸 𑀏𑀓𑀤𑀸𑀧𑀺 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸 𑀲𑀫𑀡𑀲𑀼𑀔𑀁 𑀦 𑀧𑀝𑀺𑀮𑀪𑀺𑀁.

𑀢𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀫𑀡𑀲𑀼𑀔𑀸𑀮𑀸𑀪𑀪𑀸𑀯𑀢𑁄. 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦 𑀧𑀸𑀯𑀺𑀲𑀺𑀁, 𑀯𑀦𑀫𑀦𑁆𑀢𑀭𑀦𑁆𑀢𑀺 𑀧𑀸𑀲𑀭𑀚𑁆𑀚𑀼𑀁 𑀆𑀤𑀸𑀬 𑀯𑀦𑀦𑁆𑀢𑀭𑀁 𑀧𑀸𑀯𑀺𑀲𑀺𑀁. 𑀓𑀺𑀫𑀢𑁆𑀣𑀁 𑀧𑀸𑀯𑀺𑀲𑀻𑀢𑀺 𑀘𑁂 𑀆𑀳 𑁋 ‘‘𑀯𑀭𑀁 𑀫𑁂 𑀇𑀥 𑀉𑀩𑁆𑀩𑀦𑁆𑀥𑀁, 𑀬𑀜𑁆𑀘 𑀳𑀻𑀦𑀁 𑀧𑀼𑀦𑀸𑀘𑀭𑁂’’𑀢𑀺 𑀬𑀤𑀳𑀁 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀳𑀻𑀦𑀁 𑀕𑀺𑀳𑀺𑀪𑀸𑀯𑀁 𑀧𑀼𑀦 𑀆𑀘𑀭𑁂 𑀆𑀘𑀭𑁂𑀬𑁆𑀬𑀁 𑀅𑀦𑀼𑀢𑀺𑀝𑁆𑀞𑁂𑀬𑁆𑀬𑀁, 𑀢𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀇𑀫𑀲𑁆𑀫𑀺𑀁 𑀯𑀦𑀦𑁆𑀢𑀭𑁂 𑀉𑀩𑁆𑀩𑀦𑁆𑀥𑀁 𑀩𑀦𑁆𑀥𑀺𑀢𑁆𑀯𑀸 𑀫𑀭𑀡𑀁 𑀫𑁂 𑀯𑀭𑀁 𑀲𑁂𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂𑀢𑀺 𑀬𑀤𑀸 𑀭𑀼𑀓𑁆𑀔𑀲𑀸𑀔𑀸𑀬 𑀩𑀦𑁆𑀥𑀧𑀸𑀲𑀁 𑀕𑀻𑀯𑀸𑀬𑀁 𑀧𑀓𑁆𑀔𑀺𑀧𑀺, 𑀅𑀣 𑀢𑀤𑀦𑀦𑁆𑀢𑀭𑀫𑁂𑀯 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀖𑀝𑀺𑀢𑀢𑁆𑀢𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀸𑀲𑀯𑁂𑀳𑀺 𑀫𑀫 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀯𑀺𑀫𑀼𑀢𑁆𑀢𑀁 𑀅𑀳𑁄𑀲𑀻𑀢𑀺.

𑀲𑀻𑀳𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀆𑀢𑀼𑀭𑀁 𑀅𑀲𑀼𑀘𑀺𑀦𑁆𑀢𑀺𑀆𑀤𑀺𑀓𑀸 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀛𑀸𑀬𑀺𑀦𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀦𑀦𑁆𑀤𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀅𑀧𑀭𑀪𑀸𑀕𑁂 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀦𑁆𑀤𑀭𑀻𑀦𑀦𑁆𑀤𑀸, 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀘 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀜𑁆𑀘 𑀭𑀸𑀳𑀼𑀮𑀓𑀼𑀫𑀸𑀭𑀜𑁆𑀘 𑀧𑀩𑁆𑀩𑀸𑀚𑁂𑀢𑁆𑀯𑀸 𑀕𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂 𑀘 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀭𑀸𑀳𑀼𑀮𑀫𑀸𑀢𑀸𑀬 𑀘 𑀧𑀩𑁆𑀩𑀚𑀺𑀢𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀚𑁂𑀝𑁆𑀞𑀪𑀸𑀢𑀸 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄 𑀚𑀸𑀢𑁄, 𑀧𑀼𑀢𑁆𑀢𑁄𑀧𑀺𑀲𑁆𑀲 𑀭𑀸𑀳𑀼𑀮𑀓𑀼𑀫𑀸𑀭𑁄 𑀧𑀩𑁆𑀩𑀚𑀺, 𑀪𑀢𑁆𑀢𑀸𑀧𑀺 𑀫𑁂 𑀦𑀦𑁆𑀤𑀭𑀸𑀚𑀸, 𑀫𑀸𑀢𑀸𑀧𑀺 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻, 𑀪𑀕𑀺𑀦𑀻𑀧𑀺 𑀭𑀸𑀳𑀼𑀮𑀫𑀸𑀢𑀸 𑀧𑀩𑁆𑀩𑀚𑀺𑀢𑀸, 𑀇𑀤𑀸𑀦𑀸𑀳𑀁 𑀕𑁂𑀳𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀜𑀸𑀢𑀺𑀲𑀺𑀦𑁂𑀳𑁂𑀦 𑀧𑀩𑁆𑀩𑀚𑀺, 𑀦𑁄 𑀲𑀤𑁆𑀥𑀸𑀬. 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀫𑀤𑀸. ‘‘𑀲𑀢𑁆𑀣𑀸 𑀭𑀽𑀧𑀁 𑀯𑀺𑀯𑀡𑁆𑀡𑁂𑀢𑀺 𑀕𑀭𑀳𑀢𑀺, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀭𑀽𑀧𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀻’’𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀅𑀪𑀺𑀭𑀽𑀧𑀦𑀦𑁆𑀤𑀸𑀬 𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀢𑁆𑀣𑀸𑀭𑀸 𑀦𑀺𑀫𑁆𑀫𑀺𑀢𑀁 𑀇𑀢𑁆𑀣𑀺𑀭𑀽𑀧𑀁 𑀅𑀦𑀼𑀓𑁆𑀓𑀫𑁂𑀦 𑀚𑀭𑀸𑀪𑀺𑀪𑀽𑀢𑀁 𑀤𑀺𑀲𑁆𑀯𑀸 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑀺𑀬𑀸 𑀣𑁂𑀭𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀢𑀲𑁆𑀲𑀸 𑀲𑀧𑁆𑀧𑀸𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

𑁮𑁨.

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁮𑁩.

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀤𑀼𑀕𑁆𑀕𑀦𑁆𑀥𑀁 𑀧𑀽𑀢𑀺𑀓𑀁 𑀯𑀸𑀢𑀺, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

𑁮𑁪.

‘‘𑀏𑀯𑀫𑁂𑀢𑀁 𑀅𑀯𑁂𑀓𑁆𑀔𑀦𑁆𑀢𑀻, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀢𑀢𑁄 𑀲𑀓𑀸𑀬 𑀧𑀜𑁆𑀜𑀸𑀬, 𑀅𑀪𑀺𑀦𑀺𑀩𑁆𑀩𑀺𑀚𑁆𑀛 𑀤𑀓𑁆𑀔𑀺𑀲’’𑀦𑁆𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀲𑀸 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀲𑁆𑀲𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀦𑀦𑁆𑀤𑁂, 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀲𑀸𑀭𑁄 𑀦𑀢𑁆𑀣𑀺, 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑁄 𑀚𑀭𑀸𑀤𑀻𑀦𑀁 𑀯𑀸𑀲𑀪𑀽𑀢𑁄, 𑀅𑀝𑁆𑀞𑀺𑀧𑀼𑀜𑁆𑀚𑀫𑀢𑁆𑀢𑁄 𑀏𑀯𑀸𑀬’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑁋

‘‘𑀅𑀝𑁆𑀞𑀺𑀦𑀁 𑀦𑀕𑀭𑀁 𑀓𑀢𑀁, 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑀁;

𑀬𑀢𑁆𑀣 𑀚𑀭𑀸 𑀘 𑀫𑀘𑁆𑀘𑀼 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀑𑀳𑀺𑀢𑁄’’𑀢𑀺. (𑀥. 𑀧. 𑁧𑁫𑁦) 𑁋

𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀫𑀸𑀳.

𑀲𑀸 𑀤𑁂𑀲𑀦𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁩.𑁧𑁬𑁬-𑁨𑁧𑁯) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺.

‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄𑀯 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀫𑀳𑀸𑀲𑀼𑀔𑀲𑀫𑀧𑁆𑀧𑀺𑀢𑀸.

‘‘𑀉𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀅𑀫𑀢𑀁 𑀧𑀭𑀫𑀲𑁆𑀲𑀸𑀤𑀁, 𑀧𑀭𑀫𑀢𑁆𑀣𑀦𑀺𑀯𑁂𑀤𑀓𑀁.

‘‘𑀢𑀤𑀸 𑀦𑀺𑀫𑀦𑁆𑀢𑀬𑀺𑀢𑁆𑀯𑀸𑀦, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀤𑀢𑁆𑀯𑀸 𑀢𑀲𑁆𑀲 𑀫𑀳𑀸𑀤𑀸𑀦𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

‘‘𑀛𑀸𑀬𑀺𑀦𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀅𑀕𑁆𑀕𑀝𑁆𑀞𑀸𑀦𑀫𑀧𑀢𑁆𑀣𑀬𑀺𑀁;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀥𑀻𑀭𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

‘‘𑀢𑀤𑀸 𑀅𑀤𑀦𑁆𑀢𑀤𑀫𑀓𑁄, 𑀢𑀺𑀮𑁄𑀓𑀲𑀭𑀡𑁄 𑀧𑀪𑀽;

𑀩𑁆𑀬𑀸𑀓𑀸𑀲𑀺 𑀦𑀭𑀲𑀸𑀭𑀣𑀺, 𑀮𑀘𑁆𑀙𑀲𑁂 𑀢𑀁 𑀲𑀼𑀧𑀢𑁆𑀣𑀺𑀢𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀦𑀦𑁆𑀤𑀸𑀢𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁄 𑀘𑀼𑀢𑀸 𑀬𑀸𑀫𑀫𑀕𑀁, 𑀢𑀢𑁄𑀳𑀁 𑀢𑀼𑀲𑀺𑀢𑀁 𑀕𑀢𑀸;

𑀢𑀢𑁄 𑀘 𑀦𑀺𑀫𑁆𑀫𑀸𑀦𑀭𑀢𑀺𑀁, 𑀯𑀲𑀯𑀢𑁆𑀢𑀺𑀧𑀼𑀭𑀁 𑀢𑀢𑁄.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑀢𑁆𑀢𑁂, 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀦𑀁;

𑀫𑀡𑁆𑀟𑀮𑀻𑀦𑀜𑁆𑀘 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀦𑀼𑀚𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸, 𑀦𑁂𑀓𑀓𑀧𑁆𑀧𑁂𑀲𑀼 𑀲𑀁𑀲𑀭𑀺𑀁.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀼𑀭𑀫𑁆𑀫𑁂 𑀓𑀧𑀺𑀮𑀯𑁆𑀳𑀬𑁂;

𑀭𑀜𑁆𑀜𑁄 𑀲𑀼𑀤𑁆𑀥𑁄𑀤𑀦𑀲𑁆𑀲𑀸𑀳𑀁, 𑀥𑀻𑀢𑀸 𑀆𑀲𑀺𑀁 𑀅𑀦𑀺𑀦𑁆𑀤𑀺𑀢𑀸.

‘‘𑀲𑀺𑀭𑀺𑀬𑀸 𑀭𑀽𑀧𑀺𑀦𑀺𑀁 𑀤𑀺𑀲𑁆𑀯𑀸, 𑀦𑀦𑁆𑀤𑀺𑀢𑀁 𑀆𑀲𑀺 𑀢𑀁 𑀓𑀼𑀮𑀁;

𑀢𑁂𑀦 𑀦𑀦𑁆𑀤𑀸𑀢𑀺 𑀫𑁂 𑀦𑀸𑀫𑀁, 𑀲𑀼𑀦𑁆𑀤𑀭𑀁 𑀧𑀯𑀭𑀁 𑀅𑀳𑀼.

‘‘𑀬𑀼𑀯𑀢𑀻𑀦𑀜𑁆𑀘 𑀲𑀩𑁆𑀩𑀸𑀲𑀁, 𑀓𑀮𑁆𑀬𑀸𑀡𑀻𑀢𑀺 𑀘 𑀯𑀺𑀲𑁆𑀲𑀼𑀢𑀸;

𑀢𑀲𑁆𑀫𑀺𑀫𑁆𑀧𑀺 𑀦𑀕𑀭𑁂 𑀭𑀫𑁆𑀫𑁂, 𑀞𑀧𑁂𑀢𑁆𑀯𑀸 𑀢𑀁 𑀬𑀲𑁄𑀥𑀭𑀁.

‘‘𑀚𑁂𑀝𑁆𑀞𑁄 𑀪𑀸𑀢𑀸 𑀢𑀺𑀮𑁄𑀓𑀕𑁆𑀕𑁄, 𑀧𑀘𑁆𑀙𑀺𑀫𑁄 𑀅𑀭𑀳𑀸 𑀢𑀣𑀸;

𑀏𑀓𑀸𑀓𑀺𑀦𑀻 𑀕𑀳𑀝𑁆𑀞𑀸𑀳𑀁, 𑀫𑀸𑀢𑀭𑀸 𑀧𑀭𑀺𑀘𑁄𑀤𑀺𑀢𑀸.

‘‘𑀲𑀸𑀓𑀺𑀬𑀫𑁆𑀳𑀺 𑀓𑀼𑀮𑁂 𑀚𑀸𑀢𑀸, 𑀧𑀼𑀢𑁆𑀢𑁂 𑀩𑀼𑀤𑁆𑀥𑀸𑀦𑀼𑀚𑀸 𑀢𑀼𑀯𑀁;

𑀦𑀦𑁆𑀤𑁂𑀦𑀧𑀺 𑀯𑀺𑀦𑀸 𑀪𑀽𑀢𑀸, 𑀅𑀕𑀸𑀭𑁂 𑀓𑀺𑀦𑁆𑀦𑀼 𑀅𑀘𑁆𑀙𑀲𑀺.

‘‘𑀚𑀭𑀸𑀯𑀲𑀸𑀦𑀁 𑀬𑁄𑀩𑁆𑀩𑀜𑁆𑀜𑀁, 𑀭𑀽𑀧𑀁 𑀅𑀲𑀼𑀘𑀺𑀲𑀫𑁆𑀫𑀢𑀁;

𑀭𑁄𑀕𑀦𑁆𑀢𑀫𑀧𑀺𑀘𑀸𑀭𑁄𑀕𑁆𑀬𑀁, 𑀚𑀻𑀯𑀺𑀢𑀁 𑀫𑀭𑀡𑀦𑁆𑀢𑀺𑀓𑀁.

‘‘𑀇𑀤𑀫𑁆𑀧𑀺 𑀢𑁂 𑀲𑀼𑀪𑀁 𑀭𑀽𑀧𑀁, 𑀲𑀲𑀻𑀓𑀦𑁆𑀢𑀁 𑀫𑀦𑁄𑀳𑀭𑀁;

𑀪𑀽𑀲𑀦𑀸𑀦𑀁 𑀅𑀮𑀗𑁆𑀓𑀸𑀭𑀁, 𑀲𑀺𑀭𑀺𑀲𑀗𑁆𑀖𑀸𑀝𑀲𑀁𑀦𑀺𑀪𑀁.

‘‘𑀧𑀼𑀜𑁆𑀚𑀺𑀢𑀁 𑀮𑁄𑀓𑀲𑀸𑀭𑀁𑀯, 𑀦𑀬𑀦𑀸𑀦𑀁 𑀭𑀲𑀸𑀬𑀦𑀁;

𑀧𑀼𑀜𑁆𑀜𑀸𑀦𑀁 𑀓𑀺𑀢𑁆𑀢𑀺𑀚𑀦𑀦𑀁, 𑀉𑀓𑁆𑀓𑀸𑀓𑀓𑀼𑀮𑀦𑀦𑁆𑀤𑀦𑀁.

‘‘𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀚𑀭𑀸 𑀲𑀫𑀥𑀺𑀲𑁂𑀲𑁆𑀲𑀢𑀺;

𑀯𑀺𑀳𑀸𑀬 𑀕𑁂𑀳𑀁 𑀓𑀸𑀭𑀼𑀜𑁆𑀜𑁂, 𑀘𑀭 𑀥𑀫𑁆𑀫𑀫𑀦𑀺𑀦𑁆𑀤𑀺𑀢𑁂.

‘‘𑀲𑀼𑀢𑁆𑀯𑀸𑀳𑀁 𑀫𑀸𑀢𑀼 𑀯𑀘𑀦𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀤𑁂𑀳𑁂𑀦 𑀦𑀢𑀼 𑀘𑀺𑀢𑁆𑀢𑁂𑀦, 𑀭𑀽𑀧𑀬𑁄𑀩𑁆𑀩𑀦𑀮𑀸𑀴𑀺𑀢𑀸.

‘‘𑀫𑀳𑀢𑀸 𑀘 𑀧𑀬𑀢𑁆𑀢𑁂𑀦, 𑀛𑀸𑀦𑀚𑁆𑀛𑁂𑀦 𑀧𑀭𑀁 𑀫𑀫;

𑀓𑀸𑀢𑀼𑀜𑁆𑀘 𑀯𑀤𑀢𑁂 𑀫𑀸𑀢𑀸, 𑀦 𑀘𑀸𑀳𑀁 𑀢𑀢𑁆𑀣 𑀉𑀲𑁆𑀲𑀼𑀓𑀸.

‘‘𑀢𑀢𑁄 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀤𑀺𑀲𑁆𑀯𑀸 𑀫𑀁 𑀓𑀸𑀫𑀮𑀸𑀮𑀲𑀁;

𑀦𑀺𑀩𑁆𑀩𑀦𑁆𑀤𑀦𑀢𑁆𑀣𑀁 𑀭𑀽𑀧𑀲𑁆𑀫𑀺𑀁, 𑀫𑀫 𑀘𑀓𑁆𑀔𑀼𑀧𑀣𑁂 𑀚𑀺𑀦𑁄.

‘‘𑀲𑀓𑁂𑀦 𑀆𑀦𑀼𑀪𑀸𑀯𑁂𑀦, 𑀇𑀢𑁆𑀣𑀺𑀁 𑀫𑀸𑀧𑁂𑀲𑀺 𑀲𑁄𑀪𑀺𑀦𑀺𑀁;

𑀤𑀲𑁆𑀲𑀦𑀻𑀬𑀁 𑀲𑀼𑀭𑀼𑀘𑀺𑀭𑀁, 𑀫𑀫𑀢𑁄𑀧𑀺 𑀲𑀼𑀭𑀽𑀧𑀺𑀦𑀺𑀁.

‘‘𑀢𑀫𑀳𑀁 𑀯𑀺𑀫𑁆𑀳𑀺𑀢𑀸 𑀤𑀺𑀲𑁆𑀯𑀸, 𑀅𑀢𑀺𑀯𑀺𑀫𑁆𑀳𑀺𑀢𑀤𑁂𑀳𑀺𑀦𑀺𑀁;

𑀘𑀺𑀦𑁆𑀢𑀬𑀺𑀁 𑀲𑀨𑀮𑀁 𑀫𑁂𑀢𑀺, 𑀦𑁂𑀢𑁆𑀢𑀮𑀸𑀪𑀜𑁆𑀘 𑀫𑀸𑀦𑀼𑀲𑀁.

‘‘𑀢𑀫𑀳𑀁 𑀏𑀳𑀺 𑀲𑀼𑀪𑀕𑁂, 𑀬𑁂𑀦𑀢𑁆𑀣𑁄 𑀢𑀁 𑀯𑀤𑁂𑀳𑀺 𑀫𑁂;

𑀓𑀼𑀮𑀁 𑀢𑁂 𑀦𑀸𑀫𑀕𑁄𑀢𑁆𑀢𑀜𑁆𑀘, 𑀯𑀤 𑀫𑁂 𑀬𑀤𑀺 𑀢𑁂 𑀧𑀺𑀬𑀁.

‘‘𑀦 𑀯𑀜𑁆𑀘𑀓𑀸𑀮𑁄 𑀲𑀼𑀪𑀕𑁂, 𑀉𑀘𑁆𑀙𑀗𑁆𑀕𑁂 𑀫𑀁 𑀦𑀺𑀯𑀸𑀲𑀬;

𑀲𑀻𑀤𑀦𑁆𑀢𑀻𑀯 𑀫𑀫𑀗𑁆𑀕𑀸𑀦𑀺, 𑀧𑀲𑀼𑀧𑁆𑀧𑀬𑀫𑀼𑀳𑀼𑀢𑁆𑀢𑀓𑀁.

‘‘𑀢𑀢𑁄 𑀲𑀻𑀲𑀁 𑀫𑀫𑀗𑁆𑀕𑁂 𑀲𑀸, 𑀓𑀢𑁆𑀯𑀸 𑀲𑀬𑀺 𑀲𑀼𑀮𑁄𑀘𑀦𑀸;

𑀢𑀲𑁆𑀲𑀸 𑀦𑀮𑀸𑀝𑁂 𑀧𑀢𑀺𑀢𑀸, 𑀮𑀼𑀤𑁆𑀥𑀸 𑀧𑀭𑀫𑀤𑀸𑀭𑀼𑀡𑀸.

‘‘𑀲𑀳 𑀢𑀲𑁆𑀲𑀸 𑀦𑀺𑀧𑀸𑀢𑁂𑀦, 𑀧𑀺𑀴𑀓𑀸 𑀉𑀧𑀧𑀚𑁆𑀚𑀣;

𑀧𑀕𑁆𑀖𑀭𑀺𑀁𑀲𑀼 𑀧𑀪𑀺𑀦𑁆𑀦𑀸 𑀘, 𑀓𑀼𑀡𑀧𑀸 𑀧𑀼𑀩𑁆𑀩𑀮𑁄𑀳𑀺𑀢𑀸.

‘‘𑀧𑀪𑀺𑀦𑁆𑀦𑀁 𑀯𑀤𑀦𑀜𑁆𑀘𑀸𑀧𑀺, 𑀓𑀼𑀡𑀧𑀁 𑀧𑀽𑀢𑀺𑀕𑀦𑁆𑀥𑀦𑀁;

𑀉𑀤𑁆𑀥𑀼𑀫𑀸𑀢𑀁 𑀯𑀺𑀦𑀺𑀮𑀜𑁆𑀘, 𑀧𑀼𑀩𑁆𑀩𑀜𑁆𑀘𑀸𑀧𑀺 𑀲𑀭𑀻𑀭𑀓𑀁.

‘‘𑀲𑀸 𑀧𑀯𑁂𑀤𑀺𑀢𑀲𑀩𑁆𑀩𑀗𑁆𑀕𑀻, 𑀦𑀺𑀲𑁆𑀲𑀲𑀦𑁆𑀢𑀻 𑀫𑀼𑀳𑀼𑀁 𑀫𑀼𑀳𑀼𑀁;

𑀯𑁂𑀤𑀬𑀦𑁆𑀢𑀻 𑀲𑀓𑀁 𑀤𑀼𑀓𑁆𑀔𑀁, 𑀓𑀭𑀼𑀡𑀁 𑀧𑀭𑀺𑀤𑁂𑀯𑀬𑀺.

‘‘𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀸 𑀳𑁄𑀫𑀺, 𑀨𑀼𑀲𑀬𑀦𑁆𑀢𑀺 𑀘 𑀯𑁂𑀤𑀦𑀸;

𑀫𑀳𑀸𑀤𑀼𑀓𑁆𑀔𑁂 𑀦𑀺𑀫𑀼𑀕𑁆𑀕𑀫𑁆𑀳𑀺, 𑀲𑀭𑀡𑀁 𑀳𑁄𑀳𑀺 𑀫𑁂 𑀲𑀔𑀻.

‘‘𑀓𑀼𑀳𑀺𑀁 𑀯𑀤𑀦𑀲𑁄𑀢𑀁 𑀢𑁂, 𑀓𑀼𑀳𑀺𑀁 𑀢𑁂 𑀢𑀼𑀗𑁆𑀕𑀦𑀸𑀲𑀺𑀓𑀸;

𑀢𑀫𑁆𑀩𑀩𑀺𑀫𑁆𑀩𑀯𑀭𑁄𑀝𑁆𑀞𑀦𑁆𑀢𑁂, 𑀯𑀤𑀦𑀁 𑀢𑁂 𑀓𑀼𑀳𑀺𑀁 𑀕𑀢𑀁.

‘‘𑀓𑀼𑀳𑀺𑀁 𑀲𑀲𑀻𑀦𑀺𑀪𑀁 𑀯𑀡𑁆𑀡𑀁, 𑀓𑀫𑁆𑀩𑀼𑀕𑀻𑀯𑀸 𑀓𑀼𑀳𑀺𑀁 𑀕𑀢𑀸;

𑀤𑁄𑀴𑀸 𑀮𑁄𑀮𑀸𑀯 𑀢𑁂 𑀓𑀡𑁆𑀡𑀸, 𑀯𑁂𑀯𑀡𑁆𑀡𑀁 𑀲𑀫𑀼𑀧𑀸𑀕𑀢𑀸.

‘‘𑀫𑀓𑀼𑀴𑀔𑀸𑀭𑀓𑀸𑀓𑀸𑀭𑀸, 𑀓𑀮𑀺𑀓𑀸𑀯 𑀧𑀬𑁄𑀥𑀭𑀸;

𑀧𑀪𑀺𑀦𑁆𑀦𑀸 𑀧𑀽𑀢𑀺𑀓𑀼𑀡𑀧𑀸, 𑀤𑀼𑀝𑁆𑀞𑀕𑀦𑁆𑀥𑀺𑀢𑁆𑀢𑀫𑀸𑀕𑀢𑀸.

‘‘𑀯𑁂𑀤𑀺𑀫𑀚𑁆𑀛𑀸𑀯 𑀲𑀼𑀲𑁆𑀲𑁄𑀡𑀻, 𑀲𑀽𑀦𑀸𑀯 𑀦𑀻𑀢𑀓𑀺𑀩𑁆𑀩𑀺𑀲𑀸;

𑀚𑀸𑀢𑀸 𑀅𑀫𑀚𑁆𑀛𑀪𑀭𑀺𑀢𑀸, 𑀅𑀳𑁄 𑀭𑀽𑀧𑀫𑀲𑀲𑁆𑀲𑀢𑀁.

‘‘𑀲𑀩𑁆𑀩𑀁 𑀲𑀭𑀻𑀭𑀲𑀜𑁆𑀚𑀸𑀢𑀁, 𑀧𑀽𑀢𑀺𑀕𑀦𑁆𑀥𑀁 𑀪𑀬𑀸𑀦𑀓𑀁;

𑀲𑀼𑀲𑀸𑀦𑀫𑀺𑀯 𑀩𑀻𑀪𑀘𑁆𑀙𑀁, 𑀭𑀫𑀦𑁆𑀢𑁂 𑀬𑀢𑁆𑀣 𑀩𑀸𑀮𑀺𑀲𑀸.

‘‘𑀢𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀪𑀸𑀢𑀸 𑀫𑁂 𑀮𑁄𑀓𑀦𑀸𑀬𑀓𑁄;

𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀘𑀺𑀢𑁆𑀢𑀁 𑀫𑀁, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀆𑀢𑀼𑀭𑀁 𑀓𑀼𑀡𑀧𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀤𑀼𑀕𑁆𑀕𑀦𑁆𑀥𑀁 𑀧𑀽𑀢𑀺𑀓𑀁 𑀯𑀸𑀢𑀺, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

‘‘𑀏𑀯𑀫𑁂𑀢𑀁 𑀅𑀯𑁂𑀓𑁆𑀔𑀦𑁆𑀢𑀻, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀢𑀢𑁄 𑀲𑀓𑀸𑀬 𑀧𑀜𑁆𑀜𑀸𑀬, 𑀅𑀪𑀺𑀦𑀺𑀩𑁆𑀩𑀺𑀚𑁆𑀛 𑀤𑀓𑁆𑀔𑀺𑀲𑀁.

‘‘𑀢𑀢𑁄𑀳𑀁 𑀅𑀢𑀺𑀲𑀁𑀯𑀺𑀕𑁆𑀕𑀸, 𑀲𑀼𑀢𑁆𑀯𑀸 𑀕𑀸𑀣𑀸 𑀲𑀼𑀪𑀸𑀲𑀺𑀢𑀸;

𑀢𑀢𑁆𑀭𑀝𑁆𑀞𑀺𑀢𑀸𑀯𑀳𑀁 𑀲𑀦𑁆𑀢𑀻, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀬𑀢𑁆𑀣 𑀬𑀢𑁆𑀣 𑀦𑀺𑀲𑀺𑀦𑁆𑀦𑀸𑀳𑀁, 𑀲𑀤𑀸 𑀛𑀸𑀦𑀧𑀭𑀸𑀬𑀡𑀸;

𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 ‘‘𑀆𑀢𑀼𑀭𑀁 𑀅𑀲𑀼𑀘𑀺’’𑀦𑁆𑀢𑀺𑀆𑀤𑀺𑀦𑀸 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀲𑀤𑁆𑀥𑀺𑀁 𑁋

𑁮𑁫.

‘‘𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬, 𑀯𑀺𑀘𑀺𑀦𑀦𑁆𑀢𑀺𑀬𑀸 𑀬𑁄𑀦𑀺𑀲𑁄;

𑀬𑀣𑀸𑀪𑀽𑀢𑀁 𑀅𑀬𑀁 𑀓𑀸𑀬𑁄, 𑀤𑀺𑀝𑁆𑀞𑁄 𑀲𑀦𑁆𑀢𑀭𑀩𑀸𑀳𑀺𑀭𑁄.

𑁮𑁬.

‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀳𑀁 𑀓𑀸𑀬𑁂, 𑀅𑀚𑁆𑀛𑀢𑁆𑀢𑀜𑁆𑀘 𑀯𑀺𑀭𑀚𑁆𑀚𑀳𑀁;

𑀅𑀧𑁆𑀧𑀫𑀢𑁆𑀢𑀸 𑀯𑀺𑀲𑀁𑀬𑀼𑀢𑁆𑀢𑀸, 𑀉𑀧𑀲𑀦𑁆𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀏𑀯𑀫𑁂𑀢𑀁 𑀅𑀯𑁂𑀓𑁆𑀔𑀦𑁆𑀢𑀻…𑀧𑁂… 𑀤𑀓𑁆𑀔𑀺𑀲𑀦𑁆𑀢𑀺 𑀏𑀢𑀁 𑀆𑀢𑀼𑀭𑀸𑀤𑀺𑀲𑀪𑀸𑀯𑀁 𑀓𑀸𑀬𑀁 𑀏𑀯𑀁 ‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀩𑁆𑀩𑀓𑀸𑀮𑀁 𑀅𑀢𑀦𑁆𑀤𑀺𑀢𑀸 𑀳𑀼𑀢𑁆𑀯𑀸 𑀧𑀭𑀢𑁄 𑀖𑁄𑀲𑀳𑁂𑀢𑀼𑀓𑀁 𑀲𑀼𑀢𑀫𑀬𑀜𑀸𑀡𑀁 𑀫𑀼𑀜𑁆𑀘𑀺𑀢𑁆𑀯𑀸, 𑀢𑀢𑁄 𑀢𑀁𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀢𑁆𑀢𑀸 𑀲𑀓𑀸𑀬𑀪𑀸𑀯𑀦𑀸𑀫𑀬𑀸𑀬 𑀧𑀜𑁆𑀜𑀸𑀬 𑀬𑀸𑀣𑀸𑀯𑀢𑁄 𑀖𑀦𑀯𑀺𑀦𑀺𑀩𑁆𑀪𑁄𑀕𑀓𑀭𑀡𑁂𑀦 𑀅𑀪𑀺𑀦𑀺𑀩𑁆𑀩𑀺𑀚𑁆𑀛, 𑀓𑀣𑀁 𑀦𑀼 𑀔𑁄 𑀤𑀓𑁆𑀔𑀺𑀲𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺 𑀆𑀪𑁄𑀕𑀧𑀼𑀭𑁂𑀘𑀸𑀭𑀺𑀓𑁂𑀦 𑀧𑀼𑀩𑁆𑀩𑀪𑀸𑀕𑀜𑀸𑀡𑀘𑀓𑁆𑀔𑀼𑀦𑀸 𑀅𑀯𑁂𑀓𑁆𑀔𑀦𑁆𑀢𑀻 𑀯𑀺𑀘𑀺𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀦𑀸𑀳 ‘‘𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀢𑀲𑁆𑀲𑀸 𑀫𑁂 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑀸𑀬 𑀬𑁄𑀦𑀺𑀲𑁄 𑀉𑀧𑀸𑀬𑁂𑀦 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀯𑀺𑀘𑀺𑀦𑀦𑁆𑀢𑀺𑀬𑀸 𑀯𑀻𑀫𑀁𑀲𑀦𑁆𑀢𑀺𑀬𑀸, 𑀅𑀬𑀁 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁄 𑀓𑀸𑀬𑁄 𑀲𑀲𑀦𑁆𑀢𑀸𑀦𑀧𑀭𑀲𑀦𑁆𑀢𑀸𑀦𑀯𑀺𑀪𑀸𑀕𑀢𑁄 𑀲𑀦𑁆𑀢𑀭𑀩𑀸𑀳𑀺𑀭𑁄 𑀬𑀣𑀸𑀪𑀽𑀢𑀁 𑀤𑀺𑀝𑁆𑀞𑁄.

𑀅𑀣 𑀢𑀣𑀸 𑀤𑀲𑁆𑀲𑀦𑀢𑁄 𑀧𑀘𑁆𑀙𑀸 𑀦𑀺𑀩𑁆𑀩𑀺𑀦𑁆𑀤𑀳𑀁 𑀓𑀸𑀬𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀺𑀦𑁆𑀤𑀺𑀁, 𑀯𑀺𑀲𑁂𑀲𑀢𑁄𑀯 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀯𑀺𑀭𑀚𑁆𑀚𑀺 𑀯𑀺𑀭𑀸𑀕𑀁 𑀆𑀧𑀚𑁆𑀚𑀺𑀁, 𑀅𑀳𑀁 𑀬𑀣𑀸𑀪𑀽𑀢𑀸𑀬 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀫𑀢𑁆𑀢𑀸 𑀲𑀩𑁆𑀩𑀲𑁄 𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀲𑀁𑀬𑀼𑀢𑁆𑀢𑀸 𑀉𑀧𑀲𑀦𑁆𑀢𑀸 𑀘 𑀦𑀺𑀩𑁆𑀩𑀼𑀢𑀸 𑀘 𑀅𑀫𑁆𑀳𑀻𑀢𑀺.

𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀦𑁆𑀤𑀼𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀕𑁆𑀕𑀺𑀁 𑀘𑀦𑁆𑀤𑀜𑁆𑀘𑀸𑀢𑀺𑀆𑀤𑀺𑀓𑀸 𑀦𑀦𑁆𑀤𑀼𑀢𑁆𑀢𑀭𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀼𑀭𑀝𑁆𑀞𑁂 𑀓𑀫𑁆𑀫𑀸𑀲𑀥𑀫𑁆𑀫𑀦𑀺𑀕𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸, 𑀏𑀓𑀘𑁆𑀘𑀸𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀦𑀺𑀕𑀡𑁆𑀞𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸, 𑀯𑀸𑀤𑀧𑁆𑀧𑀲𑀼𑀢𑀸 𑀚𑀫𑁆𑀩𑀼𑀲𑀸𑀔𑀁 𑀕𑀳𑁂𑀢𑁆𑀯𑀸 𑀪𑀤𑁆𑀤𑀸𑀓𑀼𑀡𑁆𑀟𑀮𑀓𑁂𑀲𑀸 𑀯𑀺𑀬 𑀚𑀫𑁆𑀩𑀼𑀤𑀻𑀧𑀢𑀮𑁂 𑀯𑀺𑀘𑀭𑀦𑁆𑀢𑀻 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀸𑀚𑀬𑀁 𑀧𑀢𑁆𑀢𑀸 𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁮𑁭.

‘‘𑀅𑀕𑁆𑀕𑀺𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘, 𑀤𑁂𑀯𑀢𑀸 𑀘 𑀦𑀫𑀲𑁆𑀲𑀺𑀳𑀁;

𑀦𑀤𑀻𑀢𑀺𑀢𑁆𑀣𑀸𑀦𑀺 𑀕𑀦𑁆𑀢𑁆𑀯𑀸𑀦, 𑀉𑀤𑀓𑀁 𑀑𑀭𑀼𑀳𑀸𑀫𑀺𑀳𑀁.

𑁮𑁮.

‘‘𑀩𑀳𑀽𑀯𑀢𑀲𑀫𑀸𑀤𑀸𑀦𑀸, 𑀅𑀟𑁆𑀠𑀁 𑀲𑀻𑀲𑀲𑁆𑀲 𑀑𑀮𑀺𑀔𑀺𑀁;

𑀙𑀫𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀭𑀢𑁆𑀢𑀺𑀁 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀳𑀁.

𑁮𑁯.

‘‘𑀯𑀺𑀪𑀽𑀲𑀸𑀫𑀡𑁆𑀟𑀦𑀭𑀢𑀸, 𑀦𑁆𑀳𑀸𑀧𑀦𑀼𑀘𑁆𑀙𑀸𑀤𑀦𑁂𑀳𑀺 𑀘;

𑀉𑀧𑀓𑀸𑀲𑀺𑀁 𑀇𑀫𑀁 𑀓𑀸𑀬𑀁, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸.

𑁯𑁦.

‘‘𑀢𑀢𑁄 𑀲𑀤𑁆𑀥𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀤𑀺𑀲𑁆𑀯𑀸 𑀓𑀸𑀬𑀁 𑀬𑀣𑀸𑀪𑀽𑀢𑀁, 𑀓𑀸𑀫𑀭𑀸𑀕𑁄 𑀲𑀫𑀽𑀳𑀢𑁄.

𑁯𑁧.

‘‘𑀲𑀩𑁆𑀩𑁂 𑀪𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀇𑀘𑁆𑀙𑀸 𑀘 𑀧𑀢𑁆𑀣𑀦𑀸𑀧𑀺 𑀘;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀲𑀦𑁆𑀢𑀺𑀁 𑀧𑀸𑀧𑀼𑀡𑀺 𑀘𑁂𑀢𑀲𑁄’’𑀢𑀺. 𑁋

𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀕𑁆𑀕𑀺𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘, 𑀤𑁂𑀯𑀢𑀸 𑀘 𑀦𑀫𑀲𑁆𑀲𑀺𑀳𑀦𑁆𑀢𑀺 𑀅𑀕𑁆𑀕𑀺𑀧𑁆𑀧𑀫𑀼𑀔𑀸 𑀤𑁂𑀯𑀸𑀢𑀺 𑀇𑀦𑁆𑀤𑀸𑀦𑀁 𑀤𑁂𑀯𑀸𑀦𑀁 𑀆𑀭𑀸𑀥𑀦𑀢𑁆𑀣𑀁 𑀆𑀳𑀼𑀢𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀜𑁆𑀘, 𑀫𑀸𑀲𑁂 𑀫𑀸𑀲𑁂 𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑀸𑀬 𑀘𑀦𑁆𑀤𑀜𑁆𑀘, 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀸𑀬𑀁 𑀧𑀸𑀢𑀁 𑀲𑀽𑀭𑀺𑀬𑀜𑁆𑀘, 𑀅𑀜𑁆𑀜𑀸 𑀘 𑀩𑀸𑀳𑀺𑀭𑀸 𑀳𑀺𑀭𑀜𑁆𑀜𑀕𑀩𑁆𑀪𑀸𑀤𑀬𑁄 𑀤𑁂𑀯𑀢𑀸 𑀘, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑀻 𑀦𑀫𑀲𑁆𑀲𑀺𑀳𑀁 𑀦𑀫𑀓𑁆𑀓𑀸𑀭𑀁 𑀅𑀳𑀁 𑀅𑀓𑀸𑀲𑀺𑀁. 𑀦𑀤𑀻𑀢𑀺𑀢𑁆𑀣𑀸𑀦𑀺 𑀕𑀦𑁆𑀢𑁆𑀯𑀸𑀦, 𑀉𑀤𑀓𑀁 𑀑𑀭𑀼𑀳𑀸𑀫𑀺𑀳𑀦𑁆𑀢𑀺 𑀕𑀗𑁆𑀕𑀸𑀤𑀻𑀦𑀁 𑀦𑀤𑀻𑀦𑀁 𑀧𑀽𑀚𑀸𑀢𑀺𑀢𑁆𑀣𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀲𑀸𑀬𑀁 𑀧𑀸𑀢𑀁 𑀉𑀤𑀓𑀁 𑀑𑀢𑀭𑀸𑀫𑀺 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀲𑀺𑀜𑁆𑀘𑀦𑀁 𑀓𑀭𑁄𑀫𑀺.

𑀩𑀳𑀽𑀯𑀢𑀲𑀫𑀸𑀤𑀸𑀦𑀸𑀢𑀺 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀸𑀤𑀺 𑀩𑀳𑀼𑀯𑀺𑀥𑀯𑀢𑀲𑀫𑀸𑀤𑀸𑀦𑀸. 𑀕𑀸𑀣𑀸𑀲𑀼𑀔𑀢𑁆𑀣𑀁 𑀩𑀳𑀽𑀢𑀺 𑀤𑀻𑀖𑀓𑀭𑀡𑀁. 𑀅𑀟𑁆𑀠𑀁 𑀲𑀻𑀲𑀲𑁆𑀲 𑀑𑀮𑀺𑀔𑀺𑀦𑁆𑀢𑀺 𑀫𑀬𑁆𑀳𑀁 𑀲𑀻𑀲𑀲𑁆𑀲 𑀅𑀟𑁆𑀠𑀫𑁂𑀯 𑀫𑀼𑀡𑁆𑀟𑁂𑀫𑀺. 𑀓𑁂𑀘𑀺 ‘‘𑀅𑀟𑁆𑀠𑀁 𑀲𑀻𑀲𑀲𑁆𑀲 𑀑𑀮𑀺𑀔𑀺𑀦𑁆𑀢𑀺 𑀓𑁂𑀲𑀓𑀮𑀸𑀧𑀲𑁆𑀲 𑀅𑀟𑁆𑀠𑀁 𑀚𑀝𑀸𑀩𑀦𑁆𑀥𑀦𑀯𑀲𑁂𑀦 𑀩𑀦𑁆𑀥𑀺𑀢𑁆𑀯𑀸 𑀅𑀟𑁆𑀠𑀁 𑀯𑀺𑀲𑁆𑀲𑀚𑁆𑀚𑁂𑀲𑀺’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀙𑀫𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀻𑀢𑀺 𑀣𑀡𑁆𑀟𑀺𑀮𑀲𑀸𑀬𑀺𑀦𑀻 𑀳𑀼𑀢𑁆𑀯𑀸 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀲𑀬𑀸𑀫𑀺. 𑀭𑀢𑁆𑀢𑀺𑀁 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀳𑀦𑁆𑀢𑀺 𑀭𑀢𑁆𑀢𑀽𑀧𑀭𑀢𑀸 𑀳𑀼𑀢𑁆𑀯𑀸 𑀭𑀢𑁆𑀢𑀺𑀬𑀁 𑀪𑁄𑀚𑀦𑀁 𑀦 𑀪𑀼𑀜𑁆𑀚𑀺𑀁.

𑀯𑀺𑀪𑀽𑀲𑀸𑀫𑀡𑁆𑀟𑀦𑀭𑀢𑀸𑀢𑀺 𑀘𑀺𑀭𑀓𑀸𑀮𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁂𑀦 𑀓𑀺𑀮𑀦𑁆𑀢𑀓𑀸𑀬𑀸 ‘‘𑀏𑀯𑀁 𑀲𑀭𑀻𑀭𑀲𑁆𑀲 𑀓𑀺𑀮𑀫𑀦𑁂𑀦 𑀦𑀢𑁆𑀣𑀺 𑀧𑀜𑁆𑀜𑀸𑀲𑀼𑀤𑁆𑀥𑀺. 𑀲𑀘𑁂 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑁄𑀲𑀦𑀯𑀲𑁂𑀦 𑀲𑀭𑀻𑀭𑀲𑁆𑀲 𑀢𑀧𑁆𑀧𑀦𑁂𑀦 𑀲𑀼𑀤𑁆𑀥𑀺 𑀲𑀺𑀬𑀸’’𑀢𑀺 𑀫𑀦𑁆𑀢𑁆𑀯𑀸 𑀇𑀫𑀁 𑀓𑀸𑀬𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀻 𑀯𑀺𑀪𑀽𑀲𑀸𑀬𑀁 𑀫𑀡𑁆𑀟𑀦𑁂 𑀘 𑀭𑀢𑀸 𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀡𑁂 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀫𑀡𑁆𑀟𑀦𑁂 𑀘 𑀅𑀪𑀺𑀭𑀢𑀸. 𑀦𑁆𑀳𑀸𑀧𑀦𑀼𑀘𑁆𑀙𑀸𑀤𑀦𑁂𑀳𑀺 𑀘𑀸𑀢𑀺 𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀦𑁆𑀳𑀸𑀧𑀦𑁂𑀦 𑀉𑀘𑁆𑀙𑀸𑀤𑀦𑁂𑀦 𑀘. 𑀉𑀧𑀓𑀸𑀲𑀺𑀁 𑀇𑀫𑀁 𑀓𑀸𑀬𑀦𑁆𑀢𑀺 𑀇𑀫𑀁 𑀫𑀫 𑀓𑀸𑀬𑀁 𑀅𑀦𑀼𑀕𑁆𑀕𑀡𑁆𑀳𑀺𑀁 𑀲𑀦𑁆𑀢𑀧𑁆𑀧𑁂𑀲𑀺𑀁. 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸𑀢𑀺 𑀏𑀯𑀁 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸 𑀳𑀼𑀢𑁆𑀯𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀘𑁆𑀘𑀬𑀸 𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸 𑀅𑀪𑀺𑀡𑁆𑀳𑀁 𑀉𑀧𑀤𑁆𑀤𑀼𑀢𑀸 𑀅𑀳𑁄𑀲𑀺𑀁.

𑀢𑀢𑁄 𑀲𑀤𑁆𑀥𑀁 𑀮𑀪𑀺𑀢𑁆𑀯𑀸𑀦𑀸𑀢𑀺 𑀏𑀯𑀁 𑀲𑀫𑀸𑀤𑀺𑀦𑁆𑀦𑀯𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸 𑀯𑀸𑀤𑀧𑁆𑀧𑀲𑀼𑀢𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀻 𑀢𑀢𑁄 𑀧𑀘𑁆𑀙𑀸 𑀅𑀧𑀭𑀪𑀸𑀕𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀮𑀤𑁆𑀥𑁄𑀯𑀸𑀤𑀸𑀦𑀼𑀲𑀸𑀲𑀦𑀸 𑀲𑀤𑁆𑀥𑀁 𑀧𑀝𑀺𑀮𑀪𑀺𑀢𑁆𑀯𑀸. 𑀤𑀺𑀲𑁆𑀯𑀸 𑀓𑀸𑀬𑀁 𑀬𑀣𑀸𑀪𑀽𑀢𑀦𑁆𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀇𑀫𑀁 𑀫𑀫 𑀓𑀸𑀬𑀁 𑀬𑀣𑀸𑀪𑀽𑀢𑀁 𑀤𑀺𑀲𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀓𑀸𑀫𑀭𑀸𑀕𑁄 𑀲𑀫𑀽𑀳𑀢𑁄. 𑀢𑀢𑁄 𑀧𑀭𑀁 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑁂 𑀪𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀇𑀘𑁆𑀙𑀸 𑀘 𑀧𑀢𑁆𑀣𑀦𑀸𑀧𑀺 𑀘𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀸𑀪𑀺𑀮𑀸𑀲𑀲𑀗𑁆𑀔𑀸𑀢𑀸 𑀇𑀘𑁆𑀙𑀸 𑀘 𑀆𑀬𑀢𑀺𑀪𑀯𑀸𑀪𑀺𑀮𑀸𑀲𑀲𑀗𑁆𑀔𑀸𑀢𑀸 𑀧𑀢𑁆𑀣𑀦𑀸𑀧𑀺 𑀲𑀩𑁆𑀩𑁂 𑀪𑀯𑀸𑀧𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀬𑁄𑀚𑀦𑀸. 𑀲𑀦𑁆𑀢𑀺𑀁 𑀧𑀸𑀧𑀼𑀡𑀺 𑀘𑁂𑀢𑀲𑁄𑀢𑀺 𑀅𑀘𑁆𑀘𑀦𑁆𑀢𑀁 𑀲𑀦𑁆𑀢𑀺𑀁 𑀅𑀭𑀳𑀢𑁆𑀢𑀨𑀮𑀁 𑀧𑀸𑀧𑀼𑀡𑀺𑀁 𑀅𑀥𑀺𑀕𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

𑀦𑀦𑁆𑀤𑀼𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀺𑀢𑁆𑀢𑀸𑀓𑀸𑀴𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦𑀸𑀢𑀺𑀆𑀤𑀺𑀓𑀸 𑀫𑀺𑀢𑁆𑀢𑀸𑀓𑀸𑀴𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀼𑀭𑀝𑁆𑀞𑁂 𑀓𑀫𑁆𑀫𑀸𑀲𑀥𑀫𑁆𑀫𑀦𑀺𑀕𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀬 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀮𑀸𑀪𑀲𑀓𑁆𑀓𑀸𑀭𑀕𑀺𑀤𑁆𑀥𑀺𑀓𑀸 𑀳𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀻 𑀲𑀁𑀯𑁂𑀕𑀚𑀸𑀢𑀸 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁯𑁨.

‘‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀯𑀺𑀘𑀭𑀺𑀁𑀳𑀁 𑀢𑁂𑀦 𑀢𑁂𑀦, 𑀮𑀸𑀪𑀲𑀓𑁆𑀓𑀸𑀭𑀉𑀲𑁆𑀲𑀼𑀓𑀸.

𑁯𑁩.

‘‘𑀭𑀺𑀜𑁆𑀘𑀺𑀢𑁆𑀯𑀸 𑀧𑀭𑀫𑀁 𑀅𑀢𑁆𑀣𑀁, 𑀳𑀻𑀦𑀫𑀢𑁆𑀣𑀁 𑀅𑀲𑁂𑀯𑀺𑀳𑀁;

𑀓𑀺𑀮𑁂𑀲𑀸𑀦𑀁 𑀯𑀲𑀁 𑀕𑀦𑁆𑀢𑁆𑀯𑀸, 𑀲𑀸𑀫𑀜𑁆𑀜𑀢𑁆𑀣𑀁 𑀦 𑀩𑀼𑀚𑁆𑀛𑀺𑀳𑀁.

𑁯𑁪.

‘‘𑀢𑀲𑁆𑀲𑀸 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀦𑀺𑀲𑀺𑀦𑁆𑀦𑀸𑀬 𑀯𑀺𑀳𑀸𑀭𑀓𑁂;

𑀉𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀫𑁆𑀳𑀺, 𑀢𑀡𑁆𑀳𑀸𑀬 𑀯𑀲𑀫𑀸𑀕𑀢𑀸.

𑁯𑁫.

‘‘𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀫𑀬𑁆𑀳𑀁, 𑀚𑀭𑀸 𑀩𑁆𑀬𑀸𑀥𑀺 𑀘 𑀫𑀤𑁆𑀤𑀢𑀺;

𑀧𑀼𑀭𑀸𑀬𑀁 𑀪𑀺𑀚𑁆𑀚𑀢𑀺 𑀓𑀸𑀬𑁄, 𑀦 𑀫𑁂 𑀓𑀸𑀮𑁄 𑀧𑀫𑀚𑁆𑀚𑀺𑀢𑀼𑀁.

𑁯𑁬.

‘‘𑀬𑀣𑀸𑀪𑀽𑀢𑀫𑀯𑁂𑀓𑁆𑀔𑀦𑁆𑀢𑀻, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀉𑀝𑁆𑀞𑀸𑀲𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀯𑀺𑀘𑀭𑀺𑀁𑀳𑀁 𑀢𑁂𑀦 𑀢𑁂𑀦, 𑀮𑀸𑀪𑀲𑀓𑁆𑀓𑀸𑀭𑀉𑀲𑁆𑀲𑀼𑀓𑀸𑀢𑀺 𑀮𑀸𑀪𑁂 𑀘 𑀲𑀓𑁆𑀓𑀸𑀭𑁂 𑀘 𑀉𑀲𑁆𑀲𑀼𑀓𑀸 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀢𑁂𑀦 𑀢𑁂𑀦 𑀩𑀸𑀳𑀼𑀲𑀘𑁆𑀘𑀥𑀫𑁆𑀫𑀓𑀣𑀸𑀤𑀺𑀦𑀸 𑀮𑀸𑀪𑀼𑀧𑁆𑀧𑀸𑀤𑀳𑁂𑀢𑀼𑀦𑀸 𑀯𑀺𑀘𑀭𑀺𑀁 𑀅𑀳𑀁.

𑀭𑀺𑀜𑁆𑀘𑀺𑀢𑁆𑀯𑀸 𑀧𑀭𑀫𑀁 𑀅𑀢𑁆𑀣𑀦𑁆𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀤𑀺𑀁 𑀉𑀢𑁆𑀢𑀫𑀁 𑀅𑀢𑁆𑀣𑀁 𑀚𑀳𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸. 𑀳𑀻𑀦𑀫𑀢𑁆𑀣𑀁 𑀅𑀲𑁂𑀯𑀺𑀳𑀦𑁆𑀢𑀺 𑀘𑀢𑀼𑀧𑀘𑁆𑀘𑀬𑀲𑀗𑁆𑀔𑀸𑀢𑀆𑀫𑀺𑀲𑀪𑀸𑀯𑀢𑁄 𑀳𑀻𑀦𑀁 𑀮𑀸𑀫𑀓𑀁 𑀅𑀢𑁆𑀣𑀁 𑀅𑀬𑁄𑀦𑀺𑀲𑁄 𑀧𑀭𑀺𑀬𑁂𑀲𑀦𑀸𑀬 𑀧𑀝𑀺𑀲𑁂𑀯𑀺𑀁 𑀅𑀳𑀁. 𑀓𑀺𑀮𑁂𑀲𑀸𑀦𑀁 𑀯𑀲𑀁 𑀕𑀦𑁆𑀢𑁆𑀯𑀸𑀢𑀺 𑀫𑀸𑀦𑀫𑀤𑀢𑀡𑁆𑀳𑀸𑀤𑀻𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑀁 𑀉𑀧𑀕𑀦𑁆𑀢𑁆𑀯𑀸 𑀲𑀸𑀫𑀜𑁆𑀜𑀢𑁆𑀣𑀁 𑀲𑀫𑀡𑀓𑀺𑀘𑁆𑀘𑀁 𑀦 𑀩𑀼𑀚𑁆𑀛𑀺𑀁 𑀦 𑀚𑀸𑀦𑀺𑀁 𑀅𑀳𑀁.

𑀦𑀺𑀲𑀺𑀦𑁆𑀦𑀸𑀬 𑀯𑀺𑀳𑀸𑀭𑀓𑁂𑀢𑀺 𑀫𑀫 𑀯𑀲𑀦𑀓𑀑𑀯𑀭𑀓𑁂 𑀦𑀺𑀲𑀺𑀦𑁆𑀦𑀸𑀬 𑀅𑀳𑀼 𑀲𑀁𑀯𑁂𑀕𑁄. 𑀓𑀣𑀦𑁆𑀢𑀺 𑀘𑁂, 𑀆𑀳 ‘‘𑀉𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀫𑁆𑀳𑀻’’𑀢𑀺. 𑀢𑀢𑁆𑀣 𑀉𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀫𑁆𑀳𑀻𑀢𑀺 𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀫𑀺𑀤𑀁 𑀲𑀸𑀲𑀦𑀁, 𑀢𑀢𑁆𑀣 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀫𑀦𑀲𑀺𑀓𑀭𑁄𑀦𑁆𑀢𑀻 𑀢𑀲𑁆𑀲 𑀉𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀸 𑀅𑀫𑁆𑀳𑀻𑀢𑀺. 𑀢𑀡𑁆𑀳𑀸𑀬 𑀯𑀲𑀫𑀸𑀕𑀢𑀸𑀢𑀺 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑀡𑁆𑀳𑀸𑀬 𑀯𑀲𑀁 𑀉𑀧𑀕𑀢𑀸.

𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀫𑀬𑁆𑀳𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸 𑀯𑀚𑁆𑀚𑀺𑀢𑀢𑁄 𑀩𑀳𑀽𑀧𑀤𑁆𑀤𑀯𑀢𑁄 𑀘 𑀫𑀫 𑀚𑀻𑀯𑀺𑀢𑀁 𑀅𑀧𑁆𑀧𑀓𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁. 𑀚𑀭𑀸 𑀩𑁆𑀬𑀸𑀥𑀺 𑀘 𑀫𑀤𑁆𑀤𑀢𑀻𑀢𑀺 𑀢𑀜𑁆𑀘 𑀲𑀫𑀦𑁆𑀢𑀢𑁄 𑀆𑀧𑀢𑀺𑀢𑁆𑀯𑀸 𑀦𑀺𑀧𑁆𑀧𑁄𑀣𑁂𑀦𑁆𑀢𑀸 𑀧𑀩𑁆𑀩𑀢𑀸 𑀯𑀺𑀬 𑀚𑀭𑀸 𑀩𑁆𑀬𑀸𑀥𑀺 𑀘 𑀫𑀤𑁆𑀤𑀢𑀺 𑀦𑀺𑀫𑁆𑀫𑀣𑀢𑀺. ‘‘𑀫𑀤𑁆𑀤𑀭𑁂’’𑀢𑀺𑀧𑀺 𑀧𑀸𑀞𑁄. 𑀧𑀼𑀭𑀸𑀬𑀁 𑀪𑀺𑀚𑁆𑀚𑀢𑀺 𑀓𑀸𑀬𑁄𑀢𑀺 𑀅𑀬𑀁 𑀓𑀸𑀬𑁄 𑀪𑀺𑀚𑁆𑀚𑀢𑀺 𑀧𑀼𑀭𑀸. 𑀬𑀲𑁆𑀫𑀸 𑀢𑀲𑁆𑀲 𑀏𑀓𑀁𑀲𑀺𑀓𑁄 𑀪𑁂𑀤𑁄, 𑀢𑀲𑁆𑀫𑀸 𑀦 𑀫𑁂 𑀓𑀸𑀮𑁄 𑀧𑀫𑀚𑁆𑀚𑀺𑀢𑀼𑀁 𑀅𑀬𑀁 𑀓𑀸𑀮𑁄 𑀅𑀝𑁆𑀞𑀓𑁆𑀔𑀡𑀯𑀚𑁆𑀚𑀺𑀢𑁄 𑀦𑀯𑀫𑁄 𑀔𑀡𑁄, 𑀲𑁄 𑀧𑀫𑀚𑁆𑀚𑀺𑀢𑀼𑀁 𑀦 𑀬𑀼𑀢𑁆𑀢𑁄𑀢𑀺 𑀢𑀲𑁆𑀲𑀸𑀳𑀼𑀁 𑀲𑀁𑀯𑁂𑀕𑁄𑀢𑀺 𑀬𑁄𑀚𑀦𑀸.

𑀬𑀣𑀸𑀪𑀽𑀢𑀫𑀯𑁂𑀓𑁆𑀔𑀦𑁆𑀢𑀻𑀢𑀺 𑀏𑀯𑀁 𑀚𑀸𑀢𑀲𑀁𑀯𑁂𑀕𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑁂𑀦 𑀬𑀣𑀸𑀪𑀽𑀢𑀫𑀯𑁂𑀓𑁆𑀔𑀦𑁆𑀢𑀻. 𑀓𑀺𑀁 𑀅𑀯𑁂𑀓𑁆𑀔𑀦𑁆𑀢𑀻𑀢𑀺 𑀆𑀳 ‘‘𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬’’𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁫𑁦) 𑀲𑀫𑀧𑀜𑁆𑀜𑀸𑀲𑀧𑁆𑀧𑀪𑁂𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀜𑁆𑀘 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀅𑀯𑁂𑀓𑁆𑀔𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀲𑁄 𑀓𑀺𑀮𑁂𑀲𑁂𑀳𑀺 𑀘 𑀪𑀯𑁂𑀳𑀺 𑀘 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀉𑀝𑁆𑀞𑀸𑀲𑀺𑀁, 𑀉𑀪𑀢𑁄 𑀉𑀝𑁆𑀞𑀸𑀦𑁂𑀦 𑀫𑀕𑁆𑀕𑁂𑀦 𑀪𑀯𑀢𑁆𑀢𑀬𑀢𑁄 𑀘𑀸𑀢𑀺 𑀯𑀼𑀝𑁆𑀞𑀺𑀢𑀸 𑀅𑀳𑁄𑀲𑀺𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀺𑀢𑁆𑀢𑀸𑀓𑀸𑀴𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀓𑀼𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀕𑀸𑀭𑀲𑁆𑀫𑀺𑀁 𑀯𑀲𑀦𑁆𑀢𑀻𑀢𑀺𑀆𑀤𑀺𑀓𑀸 𑀲𑀓𑀼𑀮𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀆𑀦𑀦𑁆𑀤𑀲𑁆𑀲 𑀭𑀜𑁆𑀜𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀕𑀺𑀦𑀻 𑀦𑀦𑁆𑀤𑀸𑀢𑀺 𑀦𑀸𑀫𑁂𑀦. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀸 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀉𑀲𑁆𑀲𑀸𑀳𑀚𑀸𑀢𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑀻 𑀧𑀡𑀺𑀥𑀸𑀦𑀫𑀓𑀸𑀲𑀺. 𑀲𑀸 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀩𑀳𑀼𑀁 𑀉𑀴𑀸𑀭𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀘𑀸𑀭𑀺𑀦𑀻 𑀯𑀺𑀘𑀭𑀦𑁆𑀢𑀻 𑀏𑀓𑀤𑀺𑀯𑀲𑀁 𑀢𑁂𑀮𑀪𑀺𑀓𑁆𑀔𑀸𑀬 𑀆𑀳𑀺𑀡𑁆𑀟𑀺𑀢𑁆𑀯𑀸 𑀢𑁂𑀮𑀁 𑀮𑀪𑀺𑀢𑁆𑀯𑀸 𑀢𑁂𑀦 𑀢𑁂𑀮𑁂𑀦 𑀲𑀢𑁆𑀣𑀼 𑀘𑁂𑀢𑀺𑀬𑁂 𑀲𑀩𑁆𑀩𑀭𑀢𑁆𑀢𑀺𑀁 𑀤𑀻𑀧𑀧𑀽𑀚𑀁 𑀅𑀓𑀸𑀲𑀺. 𑀲𑀸 𑀢𑀢𑁄 𑀘𑀼𑀢𑀸 𑀢𑀸𑀯𑀢𑀺𑀁𑀲𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀳𑀼𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑁂𑀲𑀼𑀬𑁂𑀯 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀓𑀼𑀮𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀲𑀢𑁆𑀣𑀼 𑀚𑁂𑀢𑀯𑀦𑀧𑀝𑀺𑀕𑁆𑀕𑀳𑀡𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀜𑁆𑀜𑀢𑀭𑀲𑁆𑀲 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀖𑀝𑁂𑀦𑁆𑀢𑀻 𑀯𑀸𑀬𑀫𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁩.𑁧𑁩𑁧-𑁧𑁬𑁫) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀳𑀺𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀲𑀼𑀔𑀸𑀬 𑀯𑀤𑀢𑀁 𑀯𑀭𑁄;

𑀅𑀢𑁆𑀣𑀸𑀬 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀧𑀝𑀺𑀧𑀦𑁆𑀦𑁄 𑀲𑀤𑁂𑀯𑀓𑁂.

‘‘𑀬𑀲𑀕𑁆𑀕𑀧𑀢𑁆𑀢𑁄 𑀲𑀺𑀭𑀺𑀫𑀸, 𑀓𑀺𑀢𑁆𑀢𑀺𑀯𑀡𑁆𑀡𑀕𑀢𑁄 𑀚𑀺𑀦𑁄;

𑀧𑀽𑀚𑀺𑀢𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀤𑀺𑀲𑀸 𑀲𑀩𑁆𑀩𑀸𑀲𑀼 𑀯𑀺𑀲𑁆𑀲𑀼𑀢𑁄.

‘‘𑀉𑀢𑁆𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀲𑁄, 𑀯𑀻𑀢𑀺𑀯𑀢𑁆𑀢𑀓𑀣𑀁𑀓𑀣𑁄;

𑀲𑀫𑁆𑀧𑀼𑀡𑁆𑀡𑀫𑀦𑀲𑀗𑁆𑀓𑀧𑁆𑀧𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲, 𑀉𑀧𑁆𑀧𑀸𑀤𑁂𑀢𑀸 𑀦𑀭𑀼𑀢𑁆𑀢𑀫𑁄;

𑀅𑀦𑀓𑁆𑀔𑀸𑀢𑀜𑁆𑀘 𑀅𑀓𑁆𑀔𑀸𑀲𑀺, 𑀅𑀲𑀜𑁆𑀚𑀸𑀢𑀜𑁆𑀘 𑀲𑀜𑁆𑀚𑀦𑀻.

‘‘𑀫𑀕𑁆𑀕𑀜𑁆𑀜𑀽 𑀘 𑀫𑀕𑁆𑀕𑀯𑀺𑀤𑀽, 𑀫𑀕𑁆𑀕𑀓𑁆𑀔𑀸𑀬𑀻 𑀦𑀭𑀸𑀲𑀪𑁄;

𑀫𑀕𑁆𑀕𑀲𑁆𑀲 𑀓𑀼𑀲𑀮𑁄 𑀲𑀢𑁆𑀣𑀸, 𑀲𑀸𑀭𑀣𑀻𑀦𑀁 𑀯𑀭𑀼𑀢𑁆𑀢𑀫𑁄.

‘‘𑀫𑀳𑀸𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀸𑀬𑀓𑁄;

𑀦𑀺𑀫𑀼𑀕𑁆𑀕𑁂 𑀓𑀸𑀫𑀧𑀗𑁆𑀓𑀫𑁆𑀳𑀺, 𑀲𑀫𑀼𑀤𑁆𑀥𑀭𑀢𑀺 𑀧𑀸𑀡𑀺𑀦𑁂.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀔𑀢𑁆𑀢𑀺𑀬𑀦𑀦𑁆𑀤𑀦𑀸;

𑀲𑀼𑀭𑀽𑀧𑀸 𑀲𑀥𑀦𑀸 𑀘𑀸𑀧𑀺, 𑀤𑀬𑀺𑀢𑀸 𑀘 𑀲𑀺𑀭𑀻𑀫𑀢𑀻.

‘‘𑀆𑀦𑀦𑁆𑀤𑀲𑁆𑀲 𑀫𑀳𑀸𑀭𑀜𑁆𑀜𑁄, 𑀥𑀻𑀢𑀸 𑀧𑀭𑀫𑀲𑁄𑀪𑀦𑀸;

𑀯𑁂𑀫𑀸𑀢𑀸 𑀪𑀕𑀺𑀦𑀻 𑀘𑀸𑀧𑀺, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀺𑀦𑁄.

‘‘𑀭𑀸𑀚𑀓𑀜𑁆𑀜𑀸𑀳𑀺 𑀲𑀳𑀺𑀢𑀸, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀸;

𑀉𑀧𑀸𑀕𑀫𑁆𑀫 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁.

‘‘𑀢𑀤𑀸 𑀳𑀺 𑀲𑁄 𑀮𑁄𑀓𑀕𑀭𑀼, 𑀪𑀺𑀓𑁆𑀔𑀼𑀦𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀁;

𑀓𑀺𑀢𑁆𑀢𑀬𑀁 𑀧𑀭𑀺𑀲𑀸𑀫𑀚𑁆𑀛𑁂, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑀢𑀁.

‘‘𑀲𑀼𑀡𑀺𑀢𑁆𑀯𑀸 𑀢𑀫𑀳𑀁 𑀳𑀝𑁆𑀞𑀸, 𑀤𑀸𑀦𑀁 𑀤𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀧𑀽𑀚𑀺𑀢𑁆𑀯𑀸𑀦 𑀘 𑀲𑀫𑁆𑀩𑀼𑀤𑁆𑀥𑀁, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀅𑀧𑀢𑁆𑀣𑀬𑀺𑀁.

‘‘𑀢𑀢𑁄 𑀅𑀯𑁄𑀘 𑀫𑀁 𑀲𑀢𑁆𑀣𑀸, 𑀦𑀦𑁆𑀤𑁂 𑀮𑀘𑁆𑀙𑀲𑀺 𑀧𑀢𑁆𑀣𑀺𑀢𑀁;

𑀧𑀤𑀻𑀧𑀥𑀫𑁆𑀫𑀤𑀸𑀦𑀸𑀦𑀁, 𑀨𑀮𑀫𑁂𑀢𑀁 𑀲𑀼𑀦𑀺𑀘𑁆𑀙𑀺𑀢𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀲𑀓𑀼𑀮𑀸 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀧𑀭𑀺𑀩𑁆𑀩𑀸𑀚𑀓𑀺𑀦𑀻 𑀆𑀲𑀺𑀁, 𑀢𑀤𑀸𑀳𑀁 𑀏𑀓𑀘𑀸𑀭𑀺𑀦𑀻;

𑀪𑀺𑀓𑁆𑀔𑀸𑀬 𑀯𑀺𑀘𑀭𑀺𑀢𑁆𑀯𑀸𑀦, 𑀅𑀮𑀪𑀺𑀁 𑀢𑁂𑀮𑀫𑀢𑁆𑀢𑀓𑀁.

‘‘𑀢𑁂𑀦 𑀤𑀻𑀧𑀁 𑀧𑀤𑀻𑀧𑁂𑀢𑁆𑀯𑀸, 𑀉𑀧𑀝𑁆𑀞𑀺𑀁 𑀲𑀩𑁆𑀩𑀲𑀁𑀯𑀭𑀺𑀁;

𑀘𑁂𑀢𑀺𑀬𑀁 𑀤𑁆𑀯𑀺𑀧𑀤𑀕𑁆𑀕𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀧𑀚𑁆𑀚𑀮𑀦𑁆𑀢𑀺 𑀫𑀳𑀸𑀤𑀻𑀧𑀸, 𑀢𑀢𑁆𑀣 𑀢𑀢𑁆𑀣 𑀕𑀢𑀸𑀬 𑀫𑁂.

‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀧𑀲𑁆𑀲𑀸𑀫𑀳𑀁 𑀬𑀤𑀺𑀘𑁆𑀙𑀸𑀫𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀯𑀺𑀲𑀼𑀤𑁆𑀥𑀦𑀬𑀦𑀸 𑀳𑁄𑀫𑀺, 𑀬𑀲𑀲𑀸 𑀘 𑀚𑀮𑀸𑀫𑀳𑀁;

𑀲𑀤𑁆𑀥𑀸𑀧𑀜𑁆𑀜𑀸𑀯𑀢𑀻 𑀘𑁂𑀯, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸 𑀯𑀺𑀧𑁆𑀧𑀓𑀼𑀮𑁂 𑀅𑀳𑀁;

𑀧𑀳𑀽𑀢𑀥𑀦𑀥𑀜𑁆𑀜𑀫𑁆𑀳𑀺, 𑀫𑀼𑀤𑀺𑀢𑁂 𑀭𑀸𑀚𑀧𑀽𑀚𑀺𑀢𑁂.

‘‘𑀅𑀳𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀸;

𑀧𑀼𑀭𑀧𑁆𑀧𑀯𑁂𑀲𑁂 𑀲𑀼𑀕𑀢𑀁, 𑀯𑀸𑀢𑀧𑀸𑀦𑁂 𑀞𑀺𑀢𑀸 𑀅𑀳𑀁.

‘‘𑀤𑀺𑀲𑁆𑀯𑀸 𑀚𑀮𑀦𑁆𑀢𑀁 𑀬𑀲𑀲𑀸, 𑀤𑁂𑀯𑀫𑀦𑀼𑀲𑁆𑀲𑀲𑀓𑁆𑀓𑀢𑀁;

𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀮𑀓𑁆𑀔𑀡𑁂𑀳𑀺 𑀯𑀺𑀪𑀽𑀲𑀺𑀢𑀁.

‘‘𑀉𑀤𑀕𑁆𑀕𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀧𑀭𑀘𑀺𑀢𑁆𑀢𑀸𑀦𑀺 𑀚𑀸𑀦𑀸𑀫𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀯𑀺𑀲𑀼𑀤𑁆𑀥𑀸𑀲𑀺𑀁 𑀲𑀼𑀦𑀺𑀫𑁆𑀫𑀮𑀸.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀢𑀢𑁄 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀸, 𑀲𑀓𑀼𑀮𑀸𑀢𑀺 𑀦𑀭𑀼𑀢𑁆𑀢𑀫𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀓𑀢𑀸𑀥𑀺𑀓𑀸𑀭𑀢𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀢𑁂𑀦 𑀦𑀁 𑀲𑀢𑁆𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀤𑀸𑀦𑀯𑀲𑁂𑀦 𑁋

𑁯𑁭.

‘‘𑀅𑀕𑀸𑀭𑀲𑁆𑀫𑀺𑀁 𑀯𑀲𑀦𑁆𑀢𑀻𑀳𑀁, 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦 𑀪𑀺𑀓𑁆𑀔𑀼𑀦𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀁.

𑁯𑁮.

‘‘𑀲𑀸𑀳𑀁 𑀧𑀼𑀢𑁆𑀢𑀁 𑀥𑀻𑀢𑀭𑀜𑁆𑀘, 𑀥𑀦𑀥𑀜𑁆𑀜𑀜𑁆𑀘 𑀙𑀟𑁆𑀟𑀺𑀬;

𑀓𑁂𑀲𑁂 𑀙𑁂𑀤𑀸𑀧𑀬𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁯𑁯.

‘‘𑀲𑀺𑀓𑁆𑀔𑀫𑀸𑀦𑀸 𑀅𑀳𑀁 𑀲𑀦𑁆𑀢𑀻, 𑀪𑀸𑀯𑁂𑀦𑁆𑀢𑀻 𑀫𑀕𑁆𑀕𑀫𑀜𑁆𑀚𑀲𑀁;

𑀧𑀳𑀸𑀲𑀺𑀁 𑀭𑀸𑀕𑀤𑁄𑀲𑀜𑁆𑀘, 𑀢𑀤𑁂𑀓𑀝𑁆𑀞𑁂 𑀘 𑀆𑀲𑀯𑁂.

𑁧𑁦𑁦.

‘‘𑀪𑀺𑀓𑁆𑀔𑀼𑀦𑀻 𑀉𑀧𑀲𑀫𑁆𑀧𑀚𑁆𑀚, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁, 𑀯𑀺𑀫𑀮𑀁 𑀲𑀸𑀥𑀼𑀪𑀸𑀯𑀺𑀢𑀁.

𑁧𑁦𑁧.

‘‘𑀲𑀗𑁆𑀔𑀸𑀭𑁂 𑀧𑀭𑀢𑁄 𑀤𑀺𑀲𑁆𑀯𑀸, 𑀳𑁂𑀢𑀼𑀚𑀸𑀢𑁂 𑀧𑀮𑁄𑀓𑀺𑀢𑁂;

𑀧𑀳𑀸𑀲𑀺𑀁 𑀆𑀲𑀯𑁂 𑀲𑀩𑁆𑀩𑁂, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀕𑀸𑀭𑀲𑁆𑀫𑀺𑀁 𑀯𑀲𑀦𑁆𑀢𑀻𑀳𑀁, 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦 𑀪𑀺𑀓𑁆𑀔𑀼𑀦𑁄𑀢𑀺 𑀅𑀳𑀁 𑀧𑀼𑀩𑁆𑀩𑁂 𑀅𑀕𑀸𑀭𑀫𑀚𑁆𑀛𑁂 𑀯𑀲𑀫𑀸𑀦𑀸 𑀅𑀜𑁆𑀜𑀢𑀭𑀲𑁆𑀲 𑀪𑀺𑀦𑁆𑀦𑀓𑀺𑀮𑁂𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀘𑀢𑀼𑀲𑀘𑁆𑀘𑀕𑀩𑁆𑀪𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸. 𑀅𑀤𑁆𑀤𑀲𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀦𑁆𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀅𑀪𑀸𑀯𑁂𑀦 𑀯𑀺𑀭𑀚𑀁, 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁, 𑀘𑀯𑀦𑀸𑀪𑀸𑀯𑀢𑁄 𑀅𑀥𑀺𑀕𑀢𑀸𑀦𑀁 𑀅𑀘𑁆𑀘𑀼𑀢𑀺𑀳𑁂𑀢𑀼𑀢𑀸𑀬 𑀘 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀼𑀢𑀁, 𑀧𑀤𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀅𑀲𑀗𑁆𑀔𑀢𑀥𑀫𑁆𑀫𑀁, 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑁂𑀦 𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑀘𑀓𑁆𑀔𑀼𑀦𑀸 𑀅𑀤𑁆𑀤𑀲𑀁 𑀧𑀲𑁆𑀲𑀺𑀁.

𑀲𑀸𑀳𑀦𑁆𑀢𑀺 𑀲𑀸 𑀅𑀳𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑁄𑀢𑀸𑀧𑀦𑁆𑀦𑀸 𑀳𑁄𑀫𑀺.

𑀲𑀺𑀓𑁆𑀔𑀫𑀸𑀦𑀸 𑀅𑀳𑀁 𑀲𑀦𑁆𑀢𑀻𑀢𑀺 𑀅𑀳𑀁 𑀲𑀺𑀓𑁆𑀔𑀫𑀸𑀦𑀸𑀯 𑀲𑀫𑀸𑀦𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀲𑁆𑀲𑁂 𑀅𑀧𑀭𑀺𑀧𑀼𑀡𑁆𑀡𑁂 𑀏𑀯. 𑀪𑀸𑀯𑁂𑀦𑁆𑀢𑀻 𑀫𑀕𑁆𑀕𑀫𑀜𑁆𑀚𑀲𑀦𑁆𑀢𑀺 𑀫𑀚𑁆𑀛𑀺𑀫𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄 𑀅𑀜𑁆𑀚𑀲𑀁 𑀉𑀧𑀭𑀺𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀻. 𑀢𑀤𑁂𑀓𑀝𑁆𑀞𑁂 𑀘 𑀆𑀲𑀯𑁂𑀢𑀺 𑀭𑀸𑀕𑀤𑁄𑀲𑁂𑀳𑀺 𑀲𑀳𑀚𑁂𑀓𑀝𑁆𑀞𑁂 𑀧𑀳𑀸𑀦𑁂𑀓𑀝𑁆𑀞𑁂 𑀘 𑀢𑀢𑀺𑀬𑀫𑀕𑁆𑀕𑀯𑀚𑁆𑀛𑁂 𑀆𑀲𑀯𑁂 𑀧𑀳𑀸𑀲𑀺𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀁.

𑀪𑀺𑀓𑁆𑀔𑀼𑀦𑀻 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀯𑀲𑁆𑀲𑁂 𑀧𑀭𑀺𑀧𑀼𑀡𑁆𑀡𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻 𑀳𑀼𑀢𑁆𑀯𑀸. 𑀯𑀺𑀫𑀮𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑀸𑀬 𑀯𑀺𑀕𑀢𑀫𑀮𑀁, 𑀲𑀸𑀥𑀼 𑀲𑀓𑁆𑀓𑀘𑁆𑀘 𑀲𑀫𑁆𑀫𑀤𑁂𑀯 𑀪𑀸𑀯𑀺𑀢𑀁, 𑀲𑀸𑀥𑀽𑀳𑀺 𑀯𑀸 𑀩𑀼𑀤𑁆𑀥𑀸𑀤𑀻𑀳𑀺 𑀪𑀸𑀯𑀺𑀢𑀁 𑀉𑀧𑁆𑀧𑀸𑀤𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀗𑁆𑀔𑀸𑀭𑁂𑀢𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂. 𑀧𑀭𑀢𑁄𑀢𑀺 𑀅𑀦𑀢𑁆𑀢𑀢𑁄. 𑀳𑁂𑀢𑀼𑀚𑀸𑀢𑁂𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂. 𑀧𑀮𑁄𑀓𑀺𑀢𑁂𑀢𑀺 𑀧𑀮𑀼𑀚𑁆𑀚𑀦𑀲𑀪𑀸𑀯𑁂 𑀧𑀪𑀗𑁆𑀕𑀼𑀦𑁂 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸. 𑀧𑀳𑀸𑀲𑀺𑀁 𑀆𑀲𑀯𑁂 𑀲𑀩𑁆𑀩𑁂𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀅𑀯𑀲𑀺𑀝𑁆𑀞𑁂 𑀲𑀩𑁆𑀩𑁂𑀧𑀺 𑀆𑀲𑀯𑁂 𑀧𑀚𑀳𑀺𑀁, 𑀔𑁂𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀓𑀼𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑁄𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑀲 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸𑀢𑀺𑀆𑀤𑀺𑀓𑀸 𑀲𑁄𑀡𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸, 𑀢𑀢𑁄 𑀘𑀼𑀢𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀧𑀢𑀺𑀓𑀼𑀮𑀁 𑀕𑀢𑀸 𑀤𑀲 𑀧𑀼𑀢𑁆𑀢𑀥𑀻𑀢𑀭𑁄 𑀮𑀪𑀺𑀢𑁆𑀯𑀸 𑀩𑀳𑀼𑀧𑀼𑀢𑁆𑀢𑀺𑀓𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀸 𑀲𑀸𑀫𑀺𑀓𑁂 𑀧𑀩𑁆𑀩𑀚𑀺𑀢𑁂 𑀯𑀬𑀧𑁆𑀧𑀢𑁆𑀢𑁂 𑀧𑀼𑀢𑁆𑀢𑀥𑀻𑀢𑀭𑁄 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀥𑀦𑀁 𑀧𑀼𑀢𑁆𑀢𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀅𑀤𑀸𑀲𑀺, 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀞𑀧𑁂𑀲𑀺. 𑀢𑀁 𑀧𑀼𑀢𑁆𑀢𑀸 𑀘 𑀥𑀻𑀢𑀭𑁄 𑀘 𑀓𑀢𑀺𑀧𑀸𑀳𑀫𑁂𑀯 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀯𑀁 𑀅𑀓𑀁𑀲𑀼. 𑀲𑀸 ‘‘𑀓𑀺𑀁 𑀫𑀬𑁆𑀳𑀁 𑀇𑀫𑁂𑀳𑀺 𑀧𑀭𑀺𑀪𑀯𑀸𑀬 𑀖𑀭𑁂 𑀯𑀲𑀦𑁆𑀢𑀺𑀬𑀸’’𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀼𑀦𑀺𑀬𑁄 𑀧𑀩𑁆𑀩𑀸𑀚𑁂𑀲𑀼𑀁. 𑀲𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 ‘‘𑀅𑀳𑀁 𑀫𑀳𑀮𑁆𑀮𑀺𑀓𑀸𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑀻 ‘‘𑀲𑀩𑁆𑀩𑀭𑀢𑁆𑀢𑀺𑀁 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀏𑀓𑀣𑀫𑁆𑀪𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀢𑀁 𑀅𑀯𑀺𑀚𑀳𑀫𑀸𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻 𑀘𑀗𑁆𑀓𑀫𑀫𑀸𑀦𑀸𑀧𑀺 ‘‘𑀅𑀦𑁆𑀥𑀓𑀸𑀭𑁂 𑀞𑀸𑀦𑁂 𑀭𑀼𑀓𑁆𑀔𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀫𑁂 𑀲𑀻𑀲𑀁 𑀧𑀝𑀺𑀳𑀜𑁆𑀜𑁂𑀬𑁆𑀬𑀸’’𑀢𑀺 𑀭𑀼𑀓𑁆𑀔𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀢𑀁 𑀅𑀯𑀺𑀚𑀳𑀫𑀸𑀦𑀸𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀧𑀸𑀓𑀝𑀸 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀜𑀸𑀡𑀧𑀭𑀺𑀧𑀸𑀓𑀁 𑀤𑀺𑀲𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀥𑀫𑁆𑀫𑀫𑀼𑀢𑁆𑀢𑀫’’𑀦𑁆𑀢𑀺. (𑀥. 𑀧. 𑁧𑁧𑁫) 𑁋

𑀕𑀸𑀣𑀁 𑀅𑀪𑀸𑀲𑀺. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁩.𑁨𑁨𑁦-𑁨𑁪𑁩) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸 𑀲𑁂𑀝𑁆𑀞𑀺𑀓𑀼𑀮𑁂 𑀚𑀸𑀢𑀸, 𑀲𑀼𑀔𑀺𑀢𑀸 𑀧𑀽𑀚𑀺𑀢𑀸 𑀧𑀺𑀬𑀸;

𑀉𑀧𑁂𑀢𑁆𑀯𑀸 𑀢𑀁 𑀫𑀼𑀦𑀺𑀯𑀭𑀁, 𑀅𑀲𑁆𑀲𑁄𑀲𑀺𑀁 𑀫𑀥𑀼𑀭𑀁 𑀯𑀘𑀁.

‘‘𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀕𑁆𑀕𑀁, 𑀯𑀡𑁆𑀡𑁂𑀲𑀺 𑀪𑀺𑀓𑁆𑀔𑀼𑀦𑀺𑀁 𑀚𑀺𑀦𑁄;

𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀓𑀸𑀭𑀁 𑀓𑀢𑁆𑀯𑀸𑀦 𑀲𑀢𑁆𑀣𑀼𑀦𑁄.

‘‘𑀅𑀪𑀺𑀯𑀸𑀤𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀞𑀸𑀦𑀁 𑀢𑀁 𑀧𑀢𑁆𑀣𑀬𑀺𑀁 𑀢𑀤𑀸;

𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀺𑀚𑁆𑀛𑀢𑀁 𑀧𑀡𑀺𑀥𑀻 𑀢𑀯.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀲𑁄𑀡𑀸𑀢𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀁;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀯𑀭𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂.

‘‘𑀬𑀤𑀸 𑀘 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸, 𑀕𑀦𑁆𑀢𑁆𑀯𑀸 𑀧𑀢𑀺𑀓𑀼𑀮𑀁 𑀅𑀳𑀁;

𑀤𑀲 𑀧𑀼𑀢𑁆𑀢𑀸𑀦𑀺 𑀅𑀚𑀦𑀺𑀁, 𑀲𑀼𑀭𑀽𑀧𑀸𑀦𑀺 𑀯𑀺𑀲𑁂𑀲𑀢𑁄.

‘‘𑀲𑀼𑀔𑁂𑀥𑀺𑀢𑀸 𑀘 𑀢𑁂 𑀲𑀩𑁆𑀩𑁂, 𑀚𑀦𑀦𑁂𑀢𑁆𑀢𑀫𑀦𑁄𑀳𑀭𑀸;

𑀅𑀫𑀺𑀢𑁆𑀢𑀸𑀦𑀫𑁆𑀧𑀺 𑀭𑀼𑀘𑀺𑀢𑀸, 𑀫𑀫 𑀧𑀕𑁂𑀯 𑀢𑁂 𑀲𑀺𑀬𑀸.

‘‘𑀢𑀢𑁄 𑀫𑀬𑁆𑀳𑀁 𑀅𑀓𑀸𑀫𑀸𑀬, 𑀤𑀲𑀧𑀼𑀢𑁆𑀢𑀧𑀼𑀭𑀓𑁆𑀔𑀢𑁄;

𑀧𑀩𑁆𑀩𑀚𑀺𑀢𑁆𑀣 𑀲 𑀫𑁂 𑀪𑀢𑁆𑀢𑀸, 𑀤𑁂𑀯𑀤𑁂𑀯𑀲𑁆𑀲 𑀲𑀸𑀲𑀦𑁂.

‘‘𑀢𑀤𑁂𑀓𑀺𑀓𑀸 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀚𑀻𑀯𑀺𑀢𑁂𑀦𑀸𑀮𑀫𑀢𑁆𑀣𑀼 𑀫𑁂;

𑀘𑀢𑁆𑀢𑀸𑀬 𑀧𑀢𑀺𑀧𑀼𑀢𑁆𑀢𑁂𑀳𑀺, 𑀯𑀼𑀟𑁆𑀠𑀸𑀬 𑀘 𑀯𑀭𑀸𑀓𑀺𑀬𑀸.

‘‘𑀅𑀳𑀫𑁆𑀧𑀺 𑀢𑀢𑁆𑀣 𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀧𑀢𑁆𑀢𑁄 𑀬𑀢𑁆𑀣 𑀫𑁂 𑀧𑀢𑀺;

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀢𑀢𑁄 𑀘 𑀫𑀁 𑀪𑀺𑀓𑁆𑀔𑀼𑀦𑀺𑀬𑁄, 𑀏𑀓𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂;

𑀯𑀺𑀳𑀸𑀬 𑀕𑀘𑁆𑀙𑀼𑀫𑁄𑀯𑀸𑀤𑀁, 𑀢𑀸𑀧𑁂𑀳𑀺 𑀉𑀤𑀓𑀁 𑀇𑀢𑀺.

‘‘𑀢𑀤𑀸 𑀉𑀤𑀓𑀫𑀸𑀳𑀺𑀢𑁆𑀯𑀸, 𑀑𑀓𑀺𑀭𑀺𑀢𑁆𑀯𑀸𑀦 𑀓𑀼𑀫𑁆𑀪𑀺𑀬𑀸;

𑀘𑀼𑀮𑁆𑀮𑁂 𑀞𑀧𑁂𑀢𑁆𑀯𑀸 𑀆𑀲𑀻𑀦𑀸, 𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀁.

‘‘𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀺𑀲𑁆𑀯𑀸, 𑀤𑀼𑀓𑁆𑀔𑀢𑁄 𑀘 𑀅𑀦𑀢𑁆𑀢𑀢𑁄;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀢𑀤𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀉𑀡𑁆𑀳𑁄𑀤𑀓𑀫𑀧𑀼𑀘𑁆𑀙𑀺𑀲𑀼𑀁;

𑀢𑁂𑀚𑁄𑀥𑀸𑀢𑀼𑀫𑀥𑀺𑀝𑁆𑀞𑀸𑀬, 𑀔𑀺𑀧𑁆𑀧𑀁 𑀲𑀦𑁆𑀢𑀸𑀧𑀬𑀺𑀁 𑀚𑀮𑀁.

‘‘𑀯𑀺𑀫𑁆𑀳𑀺𑀢𑀸 𑀢𑀸 𑀚𑀺𑀦𑀯𑀭𑀁, 𑀏𑀢𑀫𑀢𑁆𑀣𑀫𑀲𑀸𑀯𑀬𑀼𑀁;

𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀦𑀸𑀣𑁄, 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀣.

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀯𑀻𑀭𑀺𑀬𑀫𑀸𑀭𑀪𑀢𑁄 𑀤𑀴𑁆𑀳𑀁.

‘‘𑀆𑀭𑀸𑀥𑀺𑀢𑁄 𑀫𑀳𑀸𑀯𑀻𑀭𑁄, 𑀫𑀬𑀸 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸;

𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀕𑁆𑀕𑀁, 𑀫𑀫𑀸𑀳 𑀲 𑀫𑀳𑀸𑀫𑀼𑀦𑀺.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀣 𑀦𑀁 𑀪𑀕𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁦𑁨.

‘‘𑀤𑀲 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸, 𑀅𑀲𑁆𑀫𑀺𑀁 𑀭𑀽𑀧𑀲𑀫𑀼𑀲𑁆𑀲𑀬𑁂;

𑀢𑀢𑁄𑀳𑀁 𑀤𑀼𑀩𑁆𑀩𑀮𑀸 𑀚𑀺𑀡𑁆𑀡𑀸, 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀁.

𑁧𑁦𑁩.

‘‘𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄;

𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀓𑁂𑀲𑁂 𑀙𑁂𑀢𑁆𑀯𑀸𑀦 𑀧𑀩𑁆𑀩𑀚𑀺𑀁.

𑁧𑁦𑁪.

‘‘𑀢𑀲𑁆𑀲𑀸 𑀫𑁂 𑀲𑀺𑀓𑁆𑀔𑀫𑀸𑀦𑀸𑀬, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂.

𑁧𑁦𑁫.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀫𑀺, 𑀏𑀓𑀕𑁆𑀕𑀸 𑀲𑀼𑀲𑀫𑀸𑀳𑀺𑀢𑀸;

𑀅𑀦𑀦𑁆𑀢𑀭𑀸𑀯𑀺𑀫𑁄𑀓𑁆𑀔𑀸𑀲𑀺𑀁, 𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑀸.

𑁧𑁦𑁬.

‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸;

𑀥𑀺 𑀢𑀯𑀢𑁆𑀣𑀼 𑀚𑀭𑁂 𑀚𑀫𑁆𑀫𑁂, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀭𑀽𑀧𑀲𑀫𑀼𑀲𑁆𑀲𑀬𑁂𑀢𑀺 𑀭𑀽𑀧𑀲𑀗𑁆𑀔𑀸𑀢𑁂 𑀲𑀫𑀼𑀲𑁆𑀲𑀬𑁂. 𑀅𑀬𑀜𑁆𑀳𑀺 𑀭𑀽𑀧𑀲𑀤𑁆𑀤𑁄 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁬𑁦) 𑀭𑀽𑀧𑀸𑀬𑀢𑀦𑁂 𑀆𑀕𑀢𑁄. ‘‘𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁮𑁧) 𑀭𑀽𑀧𑀓𑁆𑀔𑀦𑁆𑀥𑁂. ‘‘𑀧𑀺𑀬𑀭𑀽𑀧𑁂 𑀲𑀸𑀢𑀭𑀽𑀧𑁂 𑀭𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁦𑁯) 𑀲𑀪𑀸𑀯𑁂. ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁩𑁮; 𑀅. 𑀦𑀺. 𑁧.𑁪𑁨𑁭-𑁪𑁩𑁪) 𑀓𑀲𑀺𑀡𑀸𑀬𑀢𑀦𑁂. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁩𑁯; 𑀅. 𑀦𑀺. 𑁧.𑁪𑁩𑁫-𑁪𑁪𑁨) 𑀭𑀽𑀧𑀛𑀸𑀦𑁂. ‘‘𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁬) 𑀭𑀽𑀧𑀓𑀸𑀬𑁂. 𑀇𑀥𑀸𑀧𑀺 𑀭𑀽𑀧𑀓𑀸𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀲𑀫𑀼𑀲𑁆𑀲𑀬𑀲𑀤𑁆𑀤𑁄𑀧𑀺 𑀅𑀝𑁆𑀞𑀻𑀦𑀁 𑀲𑀭𑀻𑀭𑀲𑁆𑀲 𑀧𑀭𑀺𑀬𑀸𑀬𑁄. ‘‘𑀲𑀢𑀦𑁆𑀢𑀺 𑀲𑀫𑀼𑀲𑁆𑀲𑀬𑀸’’𑀢𑀺𑀆𑀤𑀻𑀲𑀼 𑀅𑀝𑁆𑀞𑀺𑀲𑀭𑀻𑀭𑀧𑀭𑀺𑀬𑀸𑀬𑁂. ‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁧𑁯) 𑀲𑀭𑀻𑀭𑁂. 𑀇𑀥𑀸𑀧𑀺 𑀲𑀭𑀻𑀭𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀽𑀧𑀲𑀫𑀼𑀲𑁆𑀲𑀬𑁂’’𑀢𑀺, 𑀭𑀽𑀧𑀲𑀗𑁆𑀔𑀸𑀢𑁂 𑀲𑀫𑀼𑀲𑁆𑀲𑀬𑁂 𑀲𑀭𑀻𑀭𑁂𑀢𑀺 𑀅𑀢𑁆𑀣𑁄. 𑀞𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀅𑀲𑁆𑀫𑀺𑀁 𑀭𑀽𑀧𑀲𑀫𑀼𑀲𑁆𑀲𑀬𑁂𑀢𑀺 𑀳𑀺 𑀇𑀫𑀲𑁆𑀫𑀺𑀁 𑀭𑀽𑀧𑀲𑀫𑀼𑀲𑁆𑀲𑀬𑁂 𑀞𑀢𑁆𑀯𑀸 𑀇𑀫𑀁 𑀭𑀽𑀧𑀓𑀸𑀬𑀁 𑀦𑀺𑀲𑁆𑀲𑀸𑀬 𑀤𑀲 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀢𑀲𑁆𑀫𑀸 𑀤𑀲𑀧𑀼𑀢𑁆𑀢𑀯𑀺𑀚𑀸𑀬𑀦𑀳𑁂𑀢𑀼. 𑀲𑀸 𑀳𑀺 𑀧𑀞𑀫𑀯𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀢𑁆𑀢𑀓𑁂 𑀯𑀺𑀚𑀸𑀬𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀤𑀼𑀩𑁆𑀩𑀮𑀲𑀭𑀻𑀭𑀸 𑀚𑀭𑀸𑀚𑀺𑀡𑁆𑀡𑀸 𑀘 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁄𑀳𑀁 𑀤𑀼𑀩𑁆𑀩𑀮𑀸 𑀚𑀺𑀡𑁆𑀡𑀸’’𑀢𑀺.

𑀢𑀲𑁆𑀲𑀸𑀢𑀺 𑀢𑀢𑁄, 𑀢𑀲𑁆𑀲𑀸𑀢𑀺 𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂. 𑀧𑀼𑀦 𑀢𑀲𑁆𑀲𑀸𑀢𑀺 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀫𑀸𑀦𑀸𑀬𑀸𑀢𑀺 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀲𑀺𑀓𑁆𑀔𑀫𑀸𑀦𑀸.

𑀅𑀦𑀦𑁆𑀢𑀭𑀸𑀯𑀺𑀫𑁄𑀓𑁆𑀔𑀸𑀲𑀺𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑀯𑀺𑀫𑁄𑀓𑁆𑀔𑀸 𑀆𑀲𑀺𑀁. 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺𑀆𑀤𑀬𑁄 𑀳𑀺 𑀅𑀝𑁆𑀞𑀧𑀺 𑀯𑀺𑀫𑁄𑀓𑁆𑀔𑀸 𑀅𑀦𑀦𑁆𑀢𑀭𑀯𑀺𑀫𑁄𑀓𑁆𑀔𑀸 𑀦𑀸𑀫 𑀦 𑀳𑁄𑀦𑁆𑀢𑀺. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀦𑀼𑀧𑁆𑀧𑀢𑁆𑀢𑀸 𑀳𑀺 𑀨𑀮𑀯𑀺𑀫𑁄𑀓𑁆𑀔𑀸 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀫𑀸𑀦𑀸𑀧𑀺 𑀧𑀞𑀫𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯 𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀢𑀁 𑀉𑀧𑀸𑀤𑀸𑀬 𑀅𑀦𑀦𑁆𑀢𑀭𑀯𑀺𑀫𑁄𑀓𑁆𑀔𑀸 𑀦𑀸𑀫, 𑀬𑀣𑀸 𑀫𑀕𑁆𑀕𑀲𑀫𑀸𑀥𑀺 𑀆𑀦𑀦𑁆𑀢𑀭𑀺𑀓𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑀸𑀢𑀺 𑀭𑀽𑀧𑀸𑀤𑀻𑀲𑀼 𑀓𑀺𑀜𑁆𑀘𑀺𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀸 𑀆𑀲𑀺𑀁.

𑀏𑀯𑀁 𑀯𑀺𑀚𑁆𑀚𑀸𑀢𑁆𑀢𑀬𑀁 𑀯𑀺𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑀻 𑀉𑀤𑀸𑀦𑁂𑀢𑁆𑀯𑀸, 𑀇𑀤𑀸𑀦𑀺 𑀚𑀭𑀸𑀬 𑀘𑀺𑀭𑀓𑀸𑀮𑀁 𑀉𑀧𑀤𑁆𑀤𑀼𑀢𑀲𑀭𑀻𑀭𑀁 𑀯𑀺𑀕𑀭𑀳𑀦𑁆𑀢𑀻 𑀲𑀳 𑀯𑀢𑁆𑀣𑀼𑀦𑀸 𑀢𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀥𑀺 𑀢𑀯𑀢𑁆𑀣𑀼 𑀚𑀭𑁂 𑀚𑀫𑁆𑀫𑁂𑀢𑀺 𑀅𑀗𑁆𑀕𑀸𑀦𑀁 𑀲𑀺𑀣𑀺𑀮𑀪𑀸𑀯𑀓𑀭𑀡𑀸𑀤𑀺𑀦𑀸 𑀚𑀭𑁂 𑀚𑀫𑁆𑀫𑁂 𑀮𑀸𑀫𑀓𑁂 𑀳𑀻𑀦𑁂 𑀢𑀯 𑀢𑀼𑀬𑁆𑀳𑀁 𑀥𑀺 𑀅𑀢𑁆𑀣𑀼 𑀥𑀺𑀓𑀸𑀭𑁄 𑀳𑁄𑀢𑀼. 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀢𑀲𑁆𑀫𑀸 𑀢𑁆𑀯𑀁 𑀫𑀬𑀸 𑀅𑀢𑀺𑀓𑁆𑀓𑀦𑁆𑀢𑀸 𑀅𑀪𑀺𑀪𑀽𑀢𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑁄𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀪𑀤𑁆𑀤𑀸𑀓𑀼𑀡𑁆𑀟𑀮𑀓𑁂𑀲𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀮𑀽𑀦𑀓𑁂𑀲𑀻𑀢𑀺𑀆𑀤𑀺𑀓𑀸 𑀪𑀤𑁆𑀤𑀸𑀬 𑀓𑀼𑀡𑁆𑀟𑀮𑀓𑁂𑀲𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸, 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀸𑀬 𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻 𑀲𑀗𑁆𑀖𑀲𑁆𑀲 𑀯𑀲𑀦𑀧𑀭𑀺𑀯𑁂𑀡𑀁 𑀓𑀸𑀭𑁂𑀢𑁆𑀯𑀸, 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀤𑁆𑀤𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀫𑀸𑀦𑀸 𑀯𑀬𑀧𑁆𑀧𑀢𑁆𑀢𑀸, 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑀁 𑀲𑀢𑁆𑀢𑀼𑀓𑀁 𑀦𑀸𑀫 𑀘𑁄𑀭𑀁 𑀲𑀳𑁄𑀟𑁆𑀠𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀡𑀸𑀬 𑀦𑀕𑀭𑀕𑀼𑀢𑁆𑀢𑀺𑀓𑁂𑀦 𑀫𑀸𑀭𑁂𑀢𑀼𑀁 𑀆𑀖𑀸𑀢𑀦𑀁 𑀦𑀺𑀬𑁆𑀬𑀫𑀸𑀦𑀁, 𑀲𑀻𑀳𑀧𑀜𑁆𑀚𑀭𑁂𑀦 𑀑𑀮𑁄𑀓𑁂𑀦𑁆𑀢𑀻 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀘𑁂 𑀢𑀁 𑀮𑀪𑀸𑀫𑀺, 𑀚𑀻𑀯𑀺𑀲𑁆𑀲𑀸𑀫𑀺; 𑀦𑁄 𑀘𑁂, 𑀫𑀭𑀺𑀲𑁆𑀲𑀸𑀫𑀻𑀢𑀺 𑀲𑀬𑀦𑁂 𑀅𑀥𑁄𑀫𑀼𑀔𑀻 𑀦𑀺𑀧𑀚𑁆𑀚𑀺.

𑀅𑀣𑀲𑁆𑀲𑀸 𑀧𑀺𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀏𑀓𑀥𑀻𑀢𑀼𑀢𑀸𑀬 𑀩𑀮𑀯𑀲𑀺𑀦𑁂𑀳𑁄 𑀲𑀳𑀲𑁆𑀲𑀮𑀜𑁆𑀚𑀁 𑀤𑀢𑁆𑀯𑀸 𑀉𑀧𑀸𑀬𑁂𑀦𑁂𑀯 𑀘𑁄𑀭𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀁 𑀓𑀸𑀭𑁂𑀢𑁆𑀯𑀸 𑀧𑀸𑀲𑀸𑀤𑀁 𑀧𑁂𑀲𑁂𑀲𑀺. 𑀪𑀤𑁆𑀤𑀸𑀧𑀺 𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑀸 𑀅𑀢𑀺𑀭𑁂𑀓𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀁 𑀧𑀭𑀺𑀘𑀭𑀢𑀺. 𑀲𑀢𑁆𑀢𑀼𑀓𑁄 𑀓𑀢𑀺𑀧𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲𑀸 𑀆𑀪𑀭𑀡𑁂𑀲𑀼 𑀉𑀧𑁆𑀧𑀦𑁆𑀦𑀮𑁄𑀪𑁄 𑀪𑀤𑁆𑀤𑁂, 𑀅𑀳𑀁 𑀦𑀕𑀭𑀕𑀼𑀢𑁆𑀢𑀺𑀓𑁂𑀦 𑀕𑀳𑀺𑀢𑀫𑀢𑁆𑀢𑁄𑀯 𑀘𑁄𑀭𑀧𑀧𑀸𑀢𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 ‘‘𑀲𑀘𑀸𑀳𑀁 𑀚𑀻𑀯𑀺𑀢𑀁 𑀮𑀪𑀸𑀫𑀺, 𑀢𑀼𑀬𑁆𑀳𑀁 𑀩𑀮𑀺𑀓𑀫𑁆𑀫𑀁 𑀉𑀧𑀲𑀁𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀣𑀦𑀁 𑀆𑀬𑀸𑀘𑀺𑀁, 𑀢𑀲𑁆𑀫𑀸 𑀩𑀮𑀺𑀓𑀫𑁆𑀫𑀁 𑀲𑀚𑁆𑀚𑀸𑀧𑁂𑀳𑀻𑀢𑀺. 𑀲𑀸 ‘‘𑀢𑀲𑁆𑀲 𑀫𑀦𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀩𑀮𑀺𑀓𑀫𑁆𑀫𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀏𑀓𑀁 𑀬𑀸𑀦𑀁 𑀅𑀪𑀺𑀭𑀼𑀬𑁆𑀳 ‘‘𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑁄𑀭𑀧𑀧𑀸𑀢𑀁 𑀅𑀪𑀺𑀭𑀼𑀳𑀺𑀢𑀼𑀁 𑀆𑀭𑀤𑁆𑀥𑀸.

𑀲𑀢𑁆𑀢𑀼𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀩𑁆𑀩𑁂𑀲𑀼 𑀅𑀪𑀺𑀭𑀼𑀳𑀦𑁆𑀢𑁂𑀲𑀼 𑀇𑀫𑀺𑀲𑁆𑀲𑀸 𑀆𑀪𑀭𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀧𑀭𑀺𑀯𑀸𑀭𑀚𑀦𑀁 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 𑀢𑀫𑁂𑀯 𑀩𑀮𑀺𑀪𑀸𑀚𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀦𑁆𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀧𑀺𑀬𑀓𑀣𑀁 𑀦 𑀓𑀣𑁂𑀲𑀺. 𑀲𑀸 𑀇𑀗𑁆𑀕𑀺𑀢𑁂𑀦𑁂𑀯 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀅𑀜𑁆𑀜𑀸𑀲𑀺. 𑀲𑀢𑁆𑀢𑀼𑀓𑁄, ‘‘𑀪𑀤𑁆𑀤𑁂, 𑀢𑀯 𑀉𑀢𑁆𑀢𑀭𑀲𑀸𑀝𑀓𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑀸𑀬𑀸𑀭𑀽𑀴𑁆𑀳𑀧𑀲𑀸𑀥𑀦𑀁 𑀪𑀡𑁆𑀟𑀺𑀓𑀁 𑀓𑀭𑁄𑀳𑀻’’𑀢𑀺. 𑀲𑀸, ‘‘𑀲𑀸𑀫𑀺, 𑀫𑀬𑁆𑀳𑀁 𑀓𑁄 𑀅𑀧𑀭𑀸𑀥𑁄’’𑀢𑀺? ‘‘𑀓𑀺𑀁 𑀦𑀼 𑀫𑀁, 𑀩𑀸𑀮𑁂,‘𑀩𑀮𑀺𑀓𑀫𑁆𑀫𑀢𑁆𑀣𑀁 𑀆𑀕𑀢𑁄’𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺? 𑀩𑀮𑀺𑀓𑀫𑁆𑀫𑀸𑀧𑀤𑁂𑀲𑁂𑀦 𑀧𑀦 𑀢𑀯 𑀆𑀪𑀭𑀡𑀁 𑀕𑀳𑁂𑀢𑀼𑀁 𑀆𑀕𑀢𑁄’’𑀢𑀺. ‘‘𑀓𑀲𑁆𑀲 𑀧𑀦, 𑀅𑀬𑁆𑀬, 𑀧𑀲𑀸𑀥𑀦𑀁, 𑀓𑀲𑁆𑀲 𑀅𑀳’’𑀦𑁆𑀢𑀺? ‘‘𑀦𑀸𑀳𑀁 𑀏𑀢𑀁 𑀯𑀺𑀪𑀸𑀕𑀁 𑀚𑀸𑀦𑀸𑀫𑀻’’𑀢𑀺. ‘‘𑀳𑁄𑀢𑀼, 𑀅𑀬𑁆𑀬, 𑀏𑀓𑀁 𑀧𑀦 𑀫𑁂 𑀅𑀥𑀺𑀧𑁆𑀧𑀸𑀬𑀁 𑀧𑀽𑀭𑁂𑀳𑀺, 𑀅𑀮𑀗𑁆𑀓𑀢𑀦𑀺𑀬𑀸𑀫𑁂𑀦 𑀘 𑀆𑀮𑀺𑀗𑁆𑀕𑀺𑀢𑀼𑀁 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀭𑀢𑁄 𑀆𑀮𑀺𑀗𑁆𑀕𑀺𑀢𑁆𑀯𑀸 𑀧𑀘𑁆𑀙𑀢𑁄 𑀆𑀮𑀺𑀗𑁆𑀕𑀦𑁆𑀢𑀻 𑀯𑀺𑀬 𑀧𑀩𑁆𑀩𑀢𑀧𑀧𑀸𑀢𑁂 𑀧𑀸𑀢𑁂𑀲𑀺. 𑀲𑁄 𑀧𑀢𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀅𑀳𑁄𑀲𑀺. 𑀢𑀸𑀬 𑀓𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀓𑁄𑀲𑀮𑁆𑀮𑀁 𑀯𑀺𑀪𑀸𑀯𑁂𑀦𑁆𑀢𑀻 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸.

‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀮𑀳𑀼𑀁 𑀅𑀢𑁆𑀣𑀯𑀺𑀘𑀺𑀦𑁆𑀢𑀺𑀓𑀸’’𑀢𑀺. (𑀅𑀧. 𑀣𑁂𑀭𑀻. 𑁨.𑁩.𑁩𑁧-𑁩𑁨);

𑀢𑀢𑁄 𑀪𑀤𑁆𑀤𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀲𑀓𑁆𑀓𑀸 𑀫𑀬𑀸 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀕𑁂𑀳𑀁 𑀕𑀦𑁆𑀢𑀼𑀁, 𑀇𑀢𑁄𑀯 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀕𑀡𑁆𑀞𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 𑀦𑀺𑀕𑀡𑁆𑀞𑁂 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀢𑁂 𑀆𑀳𑀁𑀲𑀼 𑁋 ‘‘𑀓𑁂𑀦 𑀦𑀺𑀬𑀸𑀫𑁂𑀦 𑀧𑀩𑁆𑀩𑀚𑁆𑀚𑀸 𑀳𑁄𑀢𑀽’’𑀢𑀺? ‘‘𑀬𑀁 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸𑀬 𑀉𑀢𑁆𑀢𑀫𑀁, 𑀢𑀤𑁂𑀯 𑀓𑀭𑁄𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀢𑀲𑁆𑀲𑀸 𑀢𑀸𑀮𑀝𑁆𑀞𑀺𑀦𑀸 𑀓𑁂𑀲𑁂 𑀮𑀼𑀜𑁆𑀘𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀼𑀁. 𑀧𑀼𑀦 𑀓𑁂𑀲𑀸 𑀯𑀟𑁆𑀠𑀦𑁆𑀢𑀸 𑀓𑀼𑀡𑁆𑀟𑀮𑀸𑀯𑀝𑁆𑀝𑀸 𑀳𑀼𑀢𑁆𑀯𑀸 𑀯𑀟𑁆𑀠𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀓𑀼𑀡𑁆𑀟𑀮𑀓𑁂𑀲𑀸𑀢𑀺 𑀦𑀸𑀫 𑀚𑀸𑀢𑀸. 𑀲𑀸 𑀢𑀢𑁆𑀣 𑀉𑀕𑁆𑀕𑀳𑁂𑀢𑀩𑁆𑀩𑀁 𑀲𑀫𑀬𑀁 𑀯𑀸𑀤𑀫𑀕𑁆𑀕𑀜𑁆𑀘 𑀉𑀕𑁆𑀕𑀳𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀇𑀫𑁂 𑀚𑀸𑀦𑀦𑁆𑀢𑀺, 𑀇𑀢𑁄 𑀉𑀢𑁆𑀢𑀭𑀺 𑀯𑀺𑀲𑁂𑀲𑁄 𑀦𑀢𑁆𑀣𑀻’’𑀢𑀺 𑀜𑀢𑁆𑀯𑀸 𑀢𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀧𑀡𑁆𑀟𑀺𑀢𑀸 𑀅𑀢𑁆𑀣𑀺, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀚𑀸𑀦𑀦𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀬𑀁 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀯𑀺𑀲𑀢𑀺, 𑀢𑀲𑁆𑀲 𑀤𑁆𑀯𑀸𑀭𑁂 𑀯𑀸𑀮𑀼𑀓𑀸𑀭𑀸𑀲𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀚𑀫𑁆𑀩𑀼𑀲𑀸𑀔𑀁 𑀞𑀧𑁂𑀢𑁆𑀯𑀸 ‘‘𑀬𑁄 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀇𑀫𑀁 𑀲𑀸𑀔𑀁 𑀫𑀤𑁆𑀤𑀢𑀽’’𑀢𑀺 𑀲𑀫𑀻𑀧𑁂 𑀞𑀺𑀢𑀤𑀸𑀭𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀲𑀢𑁆𑀢𑀸𑀳𑀫𑁆𑀧𑀺 𑀚𑀫𑁆𑀩𑀼𑀲𑀸𑀔𑀸𑀬 𑀢𑀣𑁂𑀯 𑀞𑀺𑀢𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺. 𑀓𑀼𑀡𑁆𑀟𑀮𑀓𑁂𑀲𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀯𑀺𑀘𑀭𑀦𑁆𑀢𑀻 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀯𑀸𑀮𑀼𑀓𑀸𑀭𑀸𑀲𑀺𑀫𑁆𑀳𑀺 𑀚𑀫𑁆𑀩𑀼𑀲𑀸𑀔𑀁 𑀞𑀧𑁂𑀢𑁆𑀯𑀸 𑀤𑀸𑀭𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀸𑀯𑀺𑀲𑀺.

𑀅𑀣𑀸𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀏𑀓𑀓𑁄𑀯 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀢𑀁 𑀲𑀸𑀔𑀁 𑀤𑀺𑀲𑁆𑀯𑀸 𑀢𑀁 𑀤𑀫𑁂𑀢𑀼𑀓𑀸𑀫𑁄 𑀤𑀸𑀭𑀓𑁂 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸𑀬𑀁 𑀲𑀸𑀔𑀸 𑀏𑀯𑀁 𑀞𑀧𑀺𑀢𑀸’’𑀢𑀺? 𑀤𑀸𑀭𑀓𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 ‘‘𑀬𑀤𑀺 𑀏𑀯𑀁 𑀇𑀫𑀁 𑀲𑀸𑀔𑀁 𑀫𑀤𑁆𑀤𑀣𑀸’’𑀢𑀺 𑀆𑀳. 𑀤𑀸𑀭𑀓𑀸 𑀢𑀁 𑀫𑀤𑁆𑀤𑀺𑀁𑀲𑀼. 𑀓𑀼𑀡𑁆𑀟𑀮𑀓𑁂𑀲𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀻 𑀢𑀁 𑀲𑀸𑀔𑀁 𑀫𑀤𑁆𑀤𑀺𑀢𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀤𑀁 𑀫𑀤𑁆𑀤𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀣𑁂𑀭𑁂𑀦 𑀫𑀤𑁆𑀤𑀸𑀧𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀧𑀓𑁆𑀔𑀺𑀓𑁄 𑀯𑀸𑀤𑁄 𑀦 𑀲𑁄𑀪𑀢𑀻’’𑀢𑀺 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀯𑀻𑀣𑀺𑀢𑁄 𑀯𑀻𑀣𑀺𑀁 𑀯𑀺𑀘𑀭𑀦𑁆𑀢𑀻 ‘‘𑀧𑀲𑁆𑀲𑁂𑀬𑁆𑀬𑀸𑀣 𑀲𑀫𑀡𑁂𑀳𑀺 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀯𑀸𑀤’’𑀦𑁆𑀢𑀺 𑀉𑀕𑁆𑀖𑁄𑀲𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀫𑀫 𑀚𑀫𑁆𑀩𑀼𑀲𑀸𑀔𑀸 𑀫𑀤𑁆𑀤𑀸𑀧𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀬𑀸 𑀫𑀤𑁆𑀤𑀸𑀧𑀺𑀢𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀯𑀸𑀤𑁄 𑀳𑁄𑀢𑀽’’𑀢𑀺. ‘‘𑀳𑁄𑀢𑀼, 𑀪𑀤𑁆𑀤𑁂’’𑀢𑀺. ‘‘𑀓𑀲𑁆𑀲 𑀧𑀼𑀘𑁆𑀙𑀸, 𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺? ‘‘𑀧𑀼𑀘𑁆𑀙𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀧𑀢𑁆𑀢𑀸, 𑀢𑁆𑀯𑀁 𑀬𑀁 𑀅𑀢𑁆𑀢𑀦𑁄 𑀚𑀸𑀦𑀦𑀓𑀁 𑀧𑀼𑀘𑁆𑀙𑀸’’𑀢𑀺. 𑀲𑀸 𑀲𑀩𑁆𑀩𑀫𑁂𑀯 𑀅𑀢𑁆𑀢𑀦𑁄 𑀚𑀸𑀦𑀦𑀓𑀁 𑀯𑀸𑀤𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀢𑀁 𑀲𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀸 𑀉𑀧𑀭𑀺 𑀧𑀼𑀘𑁆𑀙𑀺𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑀻 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀢𑀬𑀸 𑀩𑀳𑀼𑀁 𑀧𑀼𑀘𑁆𑀙𑀺𑀢𑀁, 𑀫𑀬𑀫𑁆𑀧𑀺 𑀢𑀁 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸𑀫𑀸’’𑀢𑀺. ‘‘𑀧𑀼𑀘𑁆𑀙𑀣, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀓𑀼𑀡𑁆𑀟𑀮𑀓𑁂𑀲𑀸 𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀧𑀲𑁆𑀲𑀦𑁆𑀢𑀻 𑀅𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀳𑀼𑀢𑁆𑀯𑀸 ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀢𑁆𑀯𑀁 𑀏𑀢𑁆𑀢𑀓𑀫𑁆𑀧𑀺 𑀅𑀚𑀸𑀦𑀦𑁆𑀢𑀻 𑀅𑀜𑁆𑀜𑀁 𑀓𑀺𑀁 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. ‘‘𑀫𑀸 𑀫𑀁 𑀢𑁆𑀯𑀁, 𑀪𑀤𑁆𑀤𑁂, 𑀲𑀭𑀡𑀁 𑀕𑀘𑁆𑀙, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀪𑀕𑀯𑀦𑁆𑀢𑀫𑁂𑀯 𑀲𑀭𑀡𑀁 𑀕𑀘𑁆𑀙𑀸’’𑀢𑀺. ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀲𑀸 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑁋

‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀲𑀼𑀧𑀲𑀫𑁆𑀫𑀢𑀻’’𑀢𑀺. 𑁋

𑀇𑀫𑀁 𑀕𑀸𑀣𑀫𑀸𑀳. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀞𑀺𑀢𑀸𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁩.𑁧-𑁫𑁪) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀫𑀳𑀸𑀲𑀼𑀔𑀲𑀫𑀧𑁆𑀧𑀺𑀢𑀸.

‘‘𑀉𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀢𑀢𑁄 𑀚𑀸𑀢𑀧𑁆𑀧𑀲𑀸𑀤𑀸𑀳𑀁, 𑀉𑀧𑁂𑀲𑀺𑀁 𑀲𑀭𑀡𑀁 𑀚𑀺𑀦𑀁.

‘‘𑀢𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄;

𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀫𑀕𑁆𑀕𑀦𑁆𑀢𑀺, 𑀞𑀧𑁂𑀲𑀺 𑀪𑀺𑀓𑁆𑀔𑀼𑀦𑀺𑀁 𑀲𑀼𑀪𑀁.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀤𑀸𑀦𑀁 𑀤𑀢𑁆𑀯𑀸 𑀫𑀳𑁂𑀲𑀺𑀦𑁄;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀪𑀤𑁆𑀤𑁂 𑀬𑀁 𑀢𑁂𑀪𑀺𑀧𑀢𑁆𑀣𑀺𑀢𑀁;

𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀢𑀁 𑀲𑀩𑁆𑀩𑀁, 𑀲𑀼𑀔𑀺𑀦𑀻 𑀳𑁄𑀳𑀺 𑀦𑀺𑀩𑁆𑀩𑀼𑀢𑀸.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀪𑀤𑁆𑀤𑀸𑀓𑀼𑀡𑁆𑀟𑀮𑀓𑁂𑀲𑀸𑀢𑀺, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁄 𑀘𑀼𑀢𑀸 𑀬𑀸𑀫𑀫𑀕𑀁, 𑀢𑀢𑁄𑀳𑀁 𑀢𑀼𑀲𑀺𑀢𑀁 𑀕𑀢𑀸;

𑀢𑀢𑁄 𑀘 𑀦𑀺𑀫𑁆𑀫𑀸𑀦𑀭𑀢𑀺𑀁, 𑀯𑀲𑀯𑀢𑁆𑀢𑀺𑀧𑀼𑀭𑀁 𑀢𑀢𑁄.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼, 𑀭𑀸𑀚𑀽𑀦𑀁 𑀘𑀓𑁆𑀓𑀯𑀢𑁆𑀢𑀺𑀦𑀁;

𑀫𑀡𑁆𑀟𑀮𑀻𑀦𑀜𑁆𑀘 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸, 𑀦𑁂𑀓𑀓𑀧𑁆𑀧𑁂𑀲𑀼 𑀲𑀁𑀲𑀭𑀺𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀢𑀲𑁆𑀲 𑀥𑀻𑀢𑀸 𑀘𑀢𑀼𑀢𑁆𑀣𑀸𑀲𑀺𑀁, 𑀪𑀺𑀓𑁆𑀔𑀼𑀤𑀸𑀬𑀻𑀢𑀺 𑀯𑀺𑀲𑁆𑀲𑀼𑀢𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢 𑀥𑀻𑀢𑀭𑁄.

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀧𑀝𑀸𑀘𑀸𑀭𑀸 𑀅𑀳𑀁 𑀢𑀤𑀸;

𑀓𑀺𑀲𑀸𑀕𑁄𑀢𑀫𑀻 𑀥𑀫𑁆𑀫𑀤𑀺𑀦𑁆𑀦𑀸, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀨𑀻𑀢𑁂, 𑀬𑀤𑀸𑀳𑀁 𑀬𑁄𑀩𑁆𑀩𑀦𑁂 𑀞𑀺𑀢𑀸.

‘‘𑀘𑁄𑀭𑀁 𑀯𑀥𑀢𑁆𑀣𑀁 𑀦𑀻𑀬𑀦𑁆𑀢𑀁, 𑀤𑀺𑀲𑁆𑀯𑀸 𑀭𑀢𑁆𑀢𑀸 𑀢𑀳𑀺𑀁 𑀅𑀳𑀁;

𑀧𑀺𑀢𑀸 𑀫𑁂 𑀢𑀁 𑀲𑀳𑀲𑁆𑀲𑁂𑀦, 𑀫𑁄𑀘𑀬𑀺𑀢𑁆𑀯𑀸 𑀯𑀥𑀸 𑀢𑀢𑁄.

‘‘𑀅𑀤𑀸𑀲𑀺 𑀢𑀲𑁆𑀲 𑀫𑀁 𑀢𑀸𑀢𑁄, 𑀯𑀺𑀤𑀺𑀢𑁆𑀯𑀸𑀦 𑀫𑀦𑀁 𑀫𑀫;

𑀢𑀲𑁆𑀲𑀸𑀳𑀫𑀸𑀲𑀺𑀁 𑀯𑀺𑀲𑀝𑁆𑀞𑀸, 𑀅𑀢𑀻𑀯 𑀤𑀬𑀺𑀢𑀸 𑀳𑀺𑀢𑀸.

‘‘𑀲𑁄 𑀫𑁂 𑀪𑀽𑀲𑀦𑀮𑁄𑀪𑁂𑀦, 𑀩𑀮𑀺𑀫𑀚𑁆𑀛𑀸𑀲𑀬𑁄 𑀤𑀺𑀲𑁄;

𑀘𑁄𑀭𑀧𑁆𑀧𑀧𑀸𑀢𑀁 𑀦𑁂𑀢𑁆𑀯𑀸𑀦, 𑀧𑀩𑁆𑀩𑀢𑀁 𑀘𑁂𑀢𑀬𑀻 𑀯𑀥𑀁.

‘‘𑀢𑀤𑀸𑀳𑀁 𑀧𑀡𑀫𑀺𑀢𑁆𑀯𑀸𑀦, 𑀲𑀢𑁆𑀢𑀼𑀓𑀁 𑀲𑀼𑀓𑀢𑀜𑁆𑀚𑀮𑀻;

𑀭𑀓𑁆𑀔𑀦𑁆𑀢𑀻 𑀅𑀢𑁆𑀢𑀦𑁄 𑀧𑀸𑀡𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀇𑀤𑀁 𑀲𑀼𑀯𑀡𑁆𑀡𑀓𑁂𑀬𑀽𑀭𑀁, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀲𑀩𑁆𑀩𑀁 𑀳𑀭𑀲𑁆𑀲𑀼 𑀪𑀤𑁆𑀤𑀦𑁆𑀢𑁂, 𑀫𑀜𑁆𑀘 𑀤𑀸𑀲𑀻𑀢𑀺 𑀲𑀸𑀯𑀬.

‘‘𑀑𑀭𑁄𑀧𑀬𑀲𑁆𑀲𑀼 𑀓𑀮𑁆𑀬𑀸𑀡𑀻, 𑀫𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑀲𑀺;

𑀦 𑀘𑀸𑀳𑀁 𑀅𑀪𑀺𑀚𑀸𑀦𑀸𑀫𑀺, 𑀅𑀳𑀦𑁆𑀢𑁆𑀯𑀸 𑀥𑀦𑀫𑀸𑀪𑀢𑀁.

‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦 𑀘𑀸𑀳𑀁 𑀅𑀪𑀺𑀚𑀸𑀦𑀸𑀫𑀺, 𑀅𑀜𑁆𑀜𑀁 𑀧𑀺𑀬𑀢𑀭𑀁 𑀢𑀬𑀸.

‘‘𑀏𑀳𑀺 𑀢𑀁 𑀉𑀧𑀕𑀽𑀳𑀺𑀲𑁆𑀲𑀁, 𑀓𑀢𑁆𑀯𑀸𑀦 𑀢𑀁 𑀧𑀤𑀓𑁆𑀔𑀺𑀡𑀁;

𑀦 𑀘 𑀤𑀸𑀦𑀺 𑀧𑀼𑀦𑁄 𑀅𑀢𑁆𑀣𑀺, 𑀫𑀫 𑀢𑀼𑀬𑁆𑀳𑀜𑁆𑀘 𑀲𑀗𑁆𑀕𑀫𑁄.

‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸.

‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀮𑀳𑀼𑀁 𑀅𑀢𑁆𑀣𑀯𑀺𑀘𑀺𑀦𑁆𑀢𑀺𑀓𑀸.

‘‘𑀮𑀳𑀼𑀜𑁆𑀘 𑀯𑀢 𑀔𑀺𑀧𑁆𑀧𑀜𑁆𑀘, 𑀦𑀺𑀓𑀝𑁆𑀞𑁂 𑀲𑀫𑀘𑁂𑀢𑀬𑀺𑀁;

𑀫𑀺𑀕𑀁 𑀉𑀡𑁆𑀡𑀸 𑀬𑀣𑀸 𑀏𑀯𑀁, 𑀢𑀤𑀸𑀳𑀁 𑀲𑀢𑁆𑀢𑀼𑀓𑀁 𑀯𑀥𑀺𑀁.

‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀲𑁄 𑀳𑀜𑁆𑀜𑀢𑁂 𑀫𑀦𑁆𑀤𑀫𑀢𑀺, 𑀘𑁄𑀭𑁄𑀯 𑀕𑀺𑀭𑀺𑀕𑀩𑁆𑀪𑀭𑁂.

‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀢𑀤𑀸𑀳𑀁 𑀲𑀢𑁆𑀢𑀼𑀓𑀸 𑀬𑀣𑀸.

‘‘𑀢𑀤𑀸𑀳𑀁 𑀧𑀸𑀢𑀬𑀺𑀢𑁆𑀯𑀸𑀦, 𑀕𑀺𑀭𑀺𑀤𑀼𑀕𑁆𑀕𑀫𑁆𑀳𑀺 𑀲𑀢𑁆𑀢𑀼𑀓𑀁;

𑀲𑀦𑁆𑀢𑀺𑀓𑀁 𑀲𑁂𑀢𑀯𑀢𑁆𑀣𑀸𑀦𑀁, 𑀉𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀁 𑀅𑀳𑀁.

‘‘𑀲𑀡𑁆𑀟𑀸𑀲𑁂𑀦 𑀘 𑀓𑁂𑀲𑁂 𑀫𑁂, 𑀮𑀼𑀜𑁆𑀘𑀺𑀢𑁆𑀯𑀸 𑀲𑀩𑁆𑀩𑀲𑁄 𑀢𑀤𑀸;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀫𑀬𑀁, 𑀆𑀘𑀺𑀓𑁆𑀔𑀺𑀁𑀲𑀼 𑀦𑀺𑀭𑀦𑁆𑀢𑀭𑀁.

‘‘𑀢𑀢𑁄 𑀢𑀁 𑀉𑀕𑁆𑀕𑀳𑁂𑀢𑁆𑀯𑀸𑀳𑀁, 𑀦𑀺𑀲𑀻𑀤𑀺𑀢𑁆𑀯𑀸𑀦 𑀏𑀓𑀺𑀓𑀸;

𑀲𑀫𑀬𑀁 𑀢𑀁 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀲𑀼𑀯𑀸𑀦𑁄 𑀫𑀸𑀦𑀼𑀲𑀁 𑀓𑀭𑀁.

‘‘𑀙𑀺𑀦𑁆𑀦𑀁 𑀕𑀬𑁆𑀳 𑀲𑀫𑀻𑀧𑁂 𑀫𑁂, 𑀧𑀸𑀢𑀬𑀺𑀢𑁆𑀯𑀸 𑀅𑀧𑀓𑁆𑀓𑀫𑀺;

𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀫𑀮𑀪𑀺𑀁, 𑀳𑀢𑁆𑀣𑀁 𑀢𑀁 𑀧𑀼𑀴𑀯𑀸𑀓𑀼𑀮𑀁.

‘‘𑀢𑀢𑁄 𑀉𑀝𑁆𑀞𑀸𑀬 𑀲𑀁𑀯𑀺𑀕𑁆𑀕𑀸, 𑀅𑀧𑀼𑀘𑁆𑀙𑀺𑀁 𑀲𑀳𑀥𑀫𑁆𑀫𑀺𑀓𑁂;

𑀢𑁂 𑀅𑀯𑁄𑀘𑀼𑀁 𑀯𑀺𑀚𑀸𑀦𑀦𑁆𑀢𑀺, 𑀢𑀁 𑀅𑀢𑁆𑀣𑀁 𑀲𑀓𑁆𑀬𑀪𑀺𑀓𑁆𑀔𑀯𑁄.

‘‘𑀲𑀸𑀳𑀁 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀁, 𑀉𑀧𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀯𑀓𑁂;

𑀢𑁂 𑀫𑀫𑀸𑀤𑀸𑀬 𑀕𑀘𑁆𑀙𑀺𑀁𑀲𑀼, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁.

‘‘𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄;

𑀅𑀲𑀼𑀪𑀸𑀦𑀺𑀘𑁆𑀘𑀤𑀼𑀓𑁆𑀔𑀸𑀢𑀺, 𑀅𑀦𑀢𑁆𑀢𑀸𑀢𑀺 𑀘 𑀦𑀸𑀬𑀓𑁄.

‘‘𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀳𑀁, 𑀥𑀫𑁆𑀫𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁;

𑀢𑀢𑁄 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸, 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀁.

‘‘𑀆𑀬𑀸𑀘𑀺𑀢𑁄 𑀢𑀤𑀸 𑀆𑀳, 𑀏𑀳𑀺 𑀪𑀤𑁆𑀤𑁂𑀢𑀺 𑀦𑀸𑀬𑀓𑁄;

𑀢𑀤𑀸𑀳𑀁 𑀉𑀧𑀲𑀫𑁆𑀧𑀦𑁆𑀦𑀸, 𑀧𑀭𑀺𑀢𑁆𑀢𑀁 𑀢𑁄𑀬𑀫𑀤𑁆𑀤𑀲𑀁.

‘‘𑀧𑀸𑀤𑀧𑀓𑁆𑀔𑀸𑀮𑀦𑁂𑀦𑀸𑀳𑀁, 𑀜𑀢𑁆𑀯𑀸 𑀲𑀉𑀤𑀬𑀩𑁆𑀩𑀬𑀁;

𑀢𑀣𑀸 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑁂, 𑀈𑀤𑀺𑀲𑀁 𑀘𑀺𑀦𑁆𑀢𑀬𑀺𑀁 𑀢𑀤𑀸.

‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀅𑀦𑀼𑀧𑀸𑀤𑀸𑀬 𑀲𑀩𑁆𑀩𑀲𑁄;

𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀫𑀕𑁆𑀕𑀁 𑀫𑁂, 𑀢𑀤𑀸 𑀧𑀜𑁆𑀜𑀸𑀧𑀬𑀻 𑀚𑀺𑀦𑁄.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀧𑀭𑀘𑀺𑀢𑁆𑀢𑀸𑀦𑀺 𑀚𑀸𑀦𑀸𑀫𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀯𑀺𑀲𑀼𑀤𑁆𑀥𑀸𑀲𑀺𑀁 𑀲𑀼𑀦𑀺𑀫𑁆𑀫𑀮𑀸.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀸𑀲𑀦𑁂.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀢𑀸𑀯𑀤𑁂𑀯 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺. 𑀲𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸𑀦 𑀧𑀩𑁆𑀩𑀚𑀺𑀢𑁆𑀯𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑀻 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁦𑁭.

‘‘𑀮𑀽𑀦𑀓𑁂𑀲𑀻 𑀧𑀗𑁆𑀓𑀥𑀭𑀻, 𑀏𑀓𑀲𑀸𑀝𑀻 𑀧𑀼𑀭𑁂 𑀘𑀭𑀺𑀁;

𑀅𑀯𑀚𑁆𑀚𑁂 𑀯𑀚𑁆𑀚𑀫𑀢𑀺𑀦𑀻, 𑀯𑀚𑁆𑀚𑁂 𑀘𑀸𑀯𑀚𑁆𑀚𑀤𑀲𑁆𑀲𑀺𑀦𑀻.

𑁧𑁦𑁮.

‘‘𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁧𑁦𑁯.

‘‘𑀦𑀺𑀳𑀘𑁆𑀘 𑀚𑀸𑀡𑀼𑀁 𑀯𑀦𑁆𑀤𑀺𑀢𑁆𑀯𑀸, 𑀲𑀫𑁆𑀫𑀼𑀔𑀸 𑀅𑀜𑁆𑀚𑀮𑀺𑀁 𑀅𑀓𑀁;

𑀏𑀳𑀺 𑀪𑀤𑁆𑀤𑁂𑀢𑀺 𑀫𑀁 𑀅𑀯𑀘, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁧𑁧𑁦.

‘‘𑀘𑀺𑀡𑁆𑀡𑀸 𑀅𑀗𑁆𑀕𑀸 𑀘 𑀫𑀕𑀥𑀸, 𑀯𑀚𑁆𑀚𑀻 𑀓𑀸𑀲𑀻 𑀘 𑀓𑁄𑀲𑀮𑀸;

𑀅𑀦𑀓𑀸 𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺, 𑀭𑀝𑁆𑀞𑀧𑀺𑀡𑁆𑀟𑀁 𑀅𑀪𑀼𑀜𑁆𑀚𑀳𑀁.

𑁧𑁧𑁧.

‘‘𑀧𑀼𑀜𑁆𑀜𑀁 𑀯𑀢 𑀧𑀲𑀯𑀺 𑀩𑀳𑀼𑀁, 𑀲𑀧𑁆𑀧𑀜𑁆𑀜𑁄 𑀯𑀢𑀸𑀬𑀁 𑀉𑀧𑀸𑀲𑀓𑁄;

𑀬𑁄 𑀪𑀤𑁆𑀤𑀸𑀬 𑀘𑀻𑀯𑀭𑀁 𑀅𑀤𑀸𑀲𑀺, 𑀯𑀺𑀧𑁆𑀧𑀫𑀼𑀢𑁆𑀢𑀸𑀬 𑀲𑀩𑁆𑀩𑀕𑀦𑁆𑀣𑁂𑀳𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀮𑀽𑀦𑀓𑁂𑀲𑀻𑀢𑀺 𑀮𑀽𑀦𑀸 𑀮𑀼𑀜𑁆𑀘𑀺𑀢𑀸 𑀓𑁂𑀲𑀸 𑀫𑀬𑁆𑀳𑀦𑁆𑀢𑀺 𑀮𑀽𑀦𑀓𑁂𑀲𑀻, 𑀦𑀺𑀕𑀡𑁆𑀞𑁂𑀲𑀼 𑀧𑀩𑁆𑀩𑀚𑁆𑀚𑀸𑀬 𑀢𑀸𑀮𑀝𑁆𑀞𑀺𑀦𑀸 𑀮𑀼𑀜𑁆𑀘𑀺𑀢𑀓𑁂𑀲𑀸, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀗𑁆𑀓𑀥𑀭𑀻𑀢𑀺 𑀤𑀦𑁆𑀢𑀓𑀝𑁆𑀞𑀲𑁆𑀲 𑀅𑀔𑀸𑀤𑀦𑁂𑀦 𑀤𑀦𑁆𑀢𑁂𑀲𑀼 𑀫𑀮𑀧𑀗𑁆𑀓𑀥𑀸𑀭𑀡𑀢𑁄 𑀧𑀗𑁆𑀓𑀥𑀭𑀻. 𑀏𑀓𑀲𑀸𑀝𑀻𑀢𑀺 𑀦𑀺𑀕𑀡𑁆𑀞𑀘𑀸𑀭𑀺𑀢𑁆𑀢𑀯𑀲𑁂𑀦 𑀏𑀓𑀲𑀸𑀝𑀺𑀓𑀸. 𑀧𑀼𑀭𑁂 𑀘𑀭𑀺𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀕𑀡𑁆𑀞𑀻 𑀳𑀼𑀢𑁆𑀯𑀸 𑀏𑀯𑀁 𑀯𑀺𑀘𑀭𑀺𑀁. 𑀅𑀯𑀚𑁆𑀚𑁂 𑀯𑀚𑁆𑀚𑀫𑀢𑀺𑀦𑀻𑀢𑀺 𑀦𑁆𑀳𑀸𑀦𑀼𑀘𑁆𑀙𑀸𑀤𑀦𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀸𑀤𑀺𑀓𑁂 𑀅𑀦𑀯𑀚𑁆𑀚𑁂 𑀲𑀸𑀯𑀚𑁆𑀚𑀲𑀜𑁆𑀜𑀻. 𑀯𑀚𑁆𑀚𑁂 𑀘𑀸𑀯𑀚𑁆𑀚𑀤𑀲𑁆𑀲𑀺𑀦𑀻𑀢𑀺 𑀫𑀸𑀦𑀫𑀓𑁆𑀔𑀧𑀮𑀸𑀲𑀯𑀺𑀧𑀮𑁆𑀮𑀸𑀲𑀸𑀤𑀺𑀓𑁂 𑀲𑀸𑀯𑀚𑁆𑀚𑁂 𑀅𑀦𑀯𑀚𑁆𑀚𑀤𑀺𑀝𑁆𑀞𑀻.

𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫𑀸𑀢𑀺 𑀅𑀢𑁆𑀢𑀦𑁄 𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀅𑀬𑀫𑁆𑀧𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀣𑁂𑀭𑁂𑀦 𑀲𑀫𑀸𑀕𑀢𑀸 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀘 𑀦𑀺𑀳𑀢𑀫𑀸𑀦𑀤𑀩𑁆𑀩𑀸 𑀧𑀲𑀦𑁆𑀦𑀫𑀸𑀦𑀲𑀸 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑀸𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸.

𑀦𑀺𑀳𑀘𑁆𑀘 𑀚𑀸𑀡𑀼𑀁 𑀯𑀦𑁆𑀤𑀺𑀢𑁆𑀯𑀸𑀢𑀺 𑀚𑀸𑀡𑀼𑀤𑁆𑀯𑀬𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸. 𑀲𑀫𑁆𑀫𑀼𑀔𑀸 𑀅𑀜𑁆𑀚𑀮𑀺𑀁 𑀅𑀓𑀦𑁆𑀢𑀺 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀅𑀓𑀸𑀲𑀺𑀁. 𑀏𑀳𑀺, 𑀪𑀤𑁆𑀤𑁂𑀢𑀺 𑀫𑀁 𑀅𑀯𑀘, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸𑀢𑀺 𑀬𑀁 𑀫𑀁 𑀪𑀕𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀬𑀸𑀘𑀺𑀢𑁆𑀯𑀸 𑀞𑀺𑀢𑀁 ‘‘𑀏𑀳𑀺, 𑀪𑀤𑁆𑀤𑁂, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚 𑀉𑀧𑀲𑀫𑁆𑀧𑀚𑁆𑀚𑀲𑁆𑀲𑀽’’𑀢𑀺 𑀅𑀯𑀘 𑀆𑀡𑀸𑀧𑁂𑀲𑀺. 𑀲𑀸 𑀲𑀢𑁆𑀣𑀼 𑀆𑀡𑀸 𑀫𑀬𑁆𑀳𑀁 𑀉𑀧𑀲𑀫𑁆𑀧𑀤𑀸𑀬 𑀓𑀸𑀭𑀡𑀢𑁆𑀢𑀸 𑀉𑀧𑀲𑀫𑁆𑀧𑀤𑀸 𑀆𑀲𑀺 𑀅𑀳𑁄𑀲𑀺.

𑀘𑀺𑀡𑁆𑀡𑀸𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀕𑀸𑀣𑀸. 𑀢𑀢𑁆𑀣 𑀘𑀺𑀡𑁆𑀡𑀸 𑀅𑀗𑁆𑀕𑀸 𑀘 𑀫𑀕𑀥𑀸𑀢𑀺 𑀬𑁂 𑀇𑀫𑁂 𑀅𑀗𑁆𑀕𑀸 𑀘 𑀫𑀕𑀥𑀸 𑀘 𑀯𑀚𑁆𑀚𑀻 𑀘 𑀓𑀸𑀲𑀻 𑀘 𑀓𑁄𑀲𑀮𑀸 𑀘 𑀚𑀦𑀧𑀤𑀸 𑀧𑀼𑀩𑁆𑀩𑁂 𑀲𑀸𑀡𑀸𑀬 𑀫𑀬𑀸 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀦𑁆𑀢𑀺𑀬𑀸 𑀘𑀺𑀡𑁆𑀡𑀸 𑀘𑀭𑀺𑀢𑀸, 𑀢𑁂𑀲𑀼𑀬𑁂𑀯 𑀲𑀢𑁆𑀣𑀸𑀭𑀸 𑀲𑀫𑀸𑀕𑀫𑀢𑁄 𑀧𑀝𑁆𑀞𑀸𑀬 𑀅𑀦𑀡𑀸 𑀦𑀺𑀤𑁆𑀤𑁄𑀲𑀸 𑀅𑀧𑀕𑀢𑀓𑀺𑀮𑁂𑀲𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀲 𑀲𑀁𑀯𑀘𑁆𑀙𑀭𑀸𑀦𑀺 𑀭𑀝𑁆𑀞𑀧𑀺𑀡𑁆𑀟𑀁 𑀅𑀪𑀼𑀜𑁆𑀚𑀺𑀁 𑀅𑀳𑀁.

𑀬𑁂𑀦 𑀅𑀪𑀺𑀧𑁆𑀧𑀲𑀦𑁆𑀦𑀫𑀸𑀦𑀲𑁂𑀦 𑀉𑀧𑀸𑀲𑀓𑁂𑀦 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀢𑀲𑁆𑀲 𑀧𑀼𑀜𑁆𑀜𑀯𑀺𑀲𑁂𑀲𑀓𑀺𑀢𑁆𑀢𑀦𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻 ‘‘𑀧𑀼𑀜𑁆𑀜𑀁 𑀯𑀢 𑀧𑀲𑀯𑀻 𑀩𑀳𑀼’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀲𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀪𑀤𑁆𑀤𑀸𑀓𑀼𑀡𑁆𑀟𑀮𑀓𑁂𑀲𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀝𑀸𑀘𑀸𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀦𑀗𑁆𑀕𑀮𑁂𑀳𑀺 𑀓𑀲𑀁 𑀔𑁂𑀢𑁆𑀢𑀦𑁆𑀢𑀺𑀆𑀤𑀺𑀓𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀯𑁂𑀡𑀁 𑀅𑀓𑀸𑀲𑀺. 𑀲𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸, 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀏𑀓𑁂𑀦 𑀓𑀫𑁆𑀫𑀓𑀸𑀭𑁂𑀦 𑀲𑀤𑁆𑀥𑀺𑀁 𑀓𑀺𑀮𑁂𑀲𑀲𑀦𑁆𑀣𑀯𑀁 𑀅𑀓𑀸𑀲𑀺. 𑀢𑀁 𑀫𑀸𑀢𑀸𑀧𑀺𑀢𑀭𑁄 𑀲𑀫𑀚𑀸𑀢𑀺𑀓𑀲𑁆𑀲 𑀓𑀼𑀫𑀸𑀭𑀲𑁆𑀲 𑀤𑀸𑀢𑀼𑀁 𑀤𑀺𑀯𑀲𑀁 𑀲𑀡𑁆𑀞𑀧𑁂𑀲𑀼𑀁. 𑀢𑀁 𑀜𑀢𑁆𑀯𑀸 𑀲𑀸 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀓𑀢𑀲𑀦𑁆𑀣𑀯𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀅𑀕𑁆𑀕𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀯𑀲𑀦𑁆𑀢𑀻 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀲𑀸 𑀧𑀭𑀺𑀧𑀓𑁆𑀓𑁂 𑀕𑀩𑁆𑀪𑁂 ‘‘𑀓𑀺𑀁 𑀇𑀥 𑀅𑀦𑀸𑀣𑀯𑀸𑀲𑁂𑀦, 𑀓𑀼𑀮𑀕𑁂𑀳𑀁 𑀕𑀘𑁆𑀙𑀸𑀫, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀓𑀸𑀮𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁂 ‘‘𑀦𑀸𑀬𑀁 𑀩𑀸𑀮𑁄 𑀫𑀁 𑀦𑁂𑀲𑁆𑀲𑀢𑀻’’𑀢𑀺 𑀢𑀲𑁆𑀫𑀺𑀁 𑀩𑀳𑀺 𑀕𑀢𑁂 𑀕𑁂𑀳𑁂 𑀧𑀝𑀺𑀲𑀸𑀫𑁂𑀢𑀩𑁆𑀩𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 ‘‘𑀓𑀼𑀮𑀖𑀭𑀁 𑀕𑀢𑀸𑀢𑀺 𑀫𑀬𑁆𑀳𑀁 𑀲𑀸𑀫𑀺𑀓𑀲𑁆𑀲 𑀓𑀣𑁂𑀣𑀸’’𑀢𑀺 𑀧𑀝𑀺𑀯𑀺𑀲𑁆𑀲𑀓𑀖𑀭𑀯𑀸𑀲𑀻𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀓𑀺𑀓𑀸𑀯 𑀓𑀼𑀮𑀖𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀕𑁂𑀳𑁂 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀼𑀮𑀖𑀭𑀁 𑀕𑀢𑀸’’𑀢𑀺 𑀲𑀼𑀢𑁆𑀯𑀸 ‘‘𑀫𑀁 𑀦𑀺𑀲𑁆𑀲𑀸𑀬 𑀓𑀼𑀮𑀥𑀻𑀢𑀸 𑀅𑀦𑀸𑀣𑀸 𑀚𑀸𑀢𑀸’’𑀢𑀺 𑀧𑀤𑀸𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑀸 𑀧𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀕𑀫𑀦𑀼𑀲𑁆𑀲𑀼𑀓𑁆𑀓𑀸 𑀲𑀸𑀫𑀺𑀓𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀤𑀼𑀢𑀺𑀬𑀯𑀸𑀭𑀫𑁆𑀧𑀺 𑀕𑀩𑁆𑀪𑀺𑀦𑀻 𑀅𑀳𑁄𑀲𑀻𑀢𑀺𑀆𑀤𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀤𑀸 𑀢𑀲𑁆𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼, 𑀢𑀤𑀸 𑀫𑀳𑀸𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺. 𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑀼𑀮𑀢𑀸𑀳𑀺 𑀆𑀤𑀺𑀢𑁆𑀢𑀁 𑀯𑀺𑀬 𑀫𑁂𑀖𑀣𑀦𑀺𑀢𑁂𑀳𑀺 𑀪𑀺𑀚𑁆𑀚𑀫𑀸𑀦𑀁 𑀯𑀺𑀬 𑀘 𑀉𑀤𑀓𑀥𑀸𑀭𑀸𑀦𑀺𑀧𑀸𑀢𑀦𑀺𑀭𑀦𑁆𑀢𑀭𑀁 𑀦𑀪𑀁 𑀅𑀳𑁄𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸, ‘‘𑀲𑀸𑀫𑀺, 𑀫𑁂 𑀅𑀦𑁄𑀯𑀲𑁆𑀲𑀓𑀁 𑀞𑀸𑀦𑀁 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀢𑀺𑀡𑀲𑀜𑁆𑀙𑀦𑁆𑀦𑀁 𑀕𑀼𑀫𑁆𑀩𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀳𑀢𑁆𑀣𑀕𑀢𑀸𑀬 𑀯𑀸𑀲𑀺𑀬𑀸 𑀢𑀲𑁆𑀫𑀺𑀁 𑀕𑀼𑀫𑁆𑀩𑁂 𑀤𑀡𑁆𑀟𑀓𑁂 𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑀢𑀺𑀡𑁂𑀳𑀺 𑀲𑀜𑁆𑀙𑀸𑀤𑀺𑀢𑀯𑀫𑁆𑀫𑀺𑀓𑀲𑀻𑀲𑀦𑁆𑀢𑁂 𑀉𑀝𑁆𑀞𑀺𑀢𑀭𑀼𑀓𑁆𑀔𑀤𑀡𑁆𑀟𑀓𑀁 𑀙𑀺𑀦𑁆𑀤𑀺. 𑀢𑀸𑀯𑀤𑁂𑀯 𑀘 𑀦𑀁 𑀢𑀢𑁄 𑀯𑀫𑁆𑀫𑀺𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀖𑁄𑀭𑀯𑀺𑀲𑁄 𑀆𑀲𑀻𑀯𑀺𑀲𑁄 𑀟𑀁𑀲𑀺. 𑀲𑁄 𑀢𑀢𑁆𑀣𑁂𑀯 𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀲𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻 𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑀻 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀯𑀸𑀢𑀯𑀼𑀝𑁆𑀞𑀺𑀁 𑀅𑀲𑀳𑀫𑀸𑀦𑁂 𑀯𑀺𑀭𑀯𑀦𑁆𑀢𑁂 𑀉𑀭𑀦𑁆𑀢𑀭𑁂 𑀓𑀢𑁆𑀯𑀸, 𑀤𑁆𑀯𑀻𑀳𑀺 𑀚𑀸𑀡𑀼𑀓𑁂𑀳𑀺 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀘 𑀪𑀽𑀫𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀬𑀣𑀸𑀞𑀺𑀢𑀸𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀁𑀲𑀧𑁂𑀲𑀺𑀯𑀡𑁆𑀡𑀁 𑀏𑀓𑀁 𑀧𑀼𑀢𑁆𑀢𑀁 𑀧𑀺𑀮𑁄𑀢𑀺𑀓𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀉𑀭𑁂𑀳𑀺 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀇𑀢𑀭𑀁 ‘‘𑀏𑀳𑀺, 𑀢𑀸𑀢, 𑀧𑀺𑀢𑀸 𑀢𑁂 𑀇𑀢𑁄 𑀕𑀢𑁄’’𑀢𑀺 𑀯𑀢𑁆𑀯𑀸 𑀲𑀸𑀫𑀺𑀓𑁂𑀦 𑀕𑀢𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀻 𑀢𑀁 𑀯𑀫𑁆𑀫𑀺𑀓𑀲𑀫𑀻𑀧𑁂 𑀓𑀸𑀮𑀗𑁆𑀓𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀁 𑀦𑀺𑀲𑁆𑀲𑀸𑀬 𑀫𑀫 𑀲𑀸𑀫𑀺𑀓𑁄 𑀫𑀢𑁄’’𑀢𑀺 𑀭𑁄𑀤𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑀲𑀓𑀮𑀭𑀢𑁆𑀢𑀺𑀁 𑀤𑁂𑀯𑁂𑀦 𑀯𑀼𑀝𑁆𑀞𑀢𑁆𑀢𑀸 𑀚𑀡𑁆𑀡𑀼𑀓𑀧𑁆𑀧𑀫𑀸𑀡𑀁 𑀣𑀦𑀧𑁆𑀧𑀫𑀸𑀡𑀁 𑀉𑀤𑀓𑀁 𑀲𑀯𑀦𑁆𑀢𑀺𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀤𑀺𑀁 𑀧𑀢𑁆𑀯𑀸, 𑀅𑀢𑁆𑀢𑀦𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀤𑀼𑀩𑁆𑀩𑀮𑀢𑀸𑀬 𑀘 𑀤𑁆𑀯𑀻𑀳𑀺 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀉𑀤𑀓𑀁 𑀑𑀢𑀭𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀚𑁂𑀝𑁆𑀞𑀧𑀼𑀢𑁆𑀢𑀁 𑀑𑀭𑀺𑀫𑀢𑀻𑀭𑁂 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀆𑀤𑀸𑀬 𑀧𑀭𑀢𑀻𑀭𑀁 𑀕𑀦𑁆𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑀁 𑀅𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀧𑀺𑀮𑁄𑀢𑀺𑀓𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀇𑀢𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀮𑀧𑀼𑀢𑁆𑀢𑀓𑀁 𑀧𑀳𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀦𑀤𑀺𑀁 𑀑𑀢𑀭𑀢𑀺.

𑀅𑀣𑀲𑁆𑀲𑀸 𑀦𑀤𑀻𑀫𑀚𑁆𑀛𑀁 𑀕𑀢𑀓𑀸𑀮𑁂 𑀏𑀓𑁄 𑀲𑁂𑀦𑁄 𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀫𑀁𑀲𑀧𑁂𑀲𑀻’’𑀢𑀺 𑀲𑀜𑁆𑀜𑀸𑀬 𑀆𑀓𑀸𑀲𑀢𑁄 𑀪𑀲𑁆𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀽𑀲𑀽’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀲𑁂𑀦𑁄 𑀤𑀽𑀭𑀪𑀸𑀯𑁂𑀦 𑀢𑀁 𑀅𑀦𑀸𑀤𑀺𑀬𑀦𑁆𑀢𑁄 𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺. 𑀑𑀭𑀺𑀫𑀢𑀻𑀭𑁂 𑀞𑀺𑀢𑁄 𑀧𑀼𑀢𑁆𑀢𑁄 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀫𑀁 𑀲𑀦𑁆𑀥𑀸𑀬 𑀯𑀤𑀢𑀻’’𑀢𑀺 𑀲𑀜𑁆𑀜𑀸𑀬 𑀯𑁂𑀕𑁂𑀦 𑀉𑀤𑀓𑁂 𑀧𑀢𑀺. 𑀇𑀢𑀺 𑀩𑀸𑀮𑀧𑀼𑀢𑁆𑀢𑀓𑁄 𑀲𑁂𑀦𑁂𑀦, 𑀚𑁂𑀝𑁆𑀞𑀧𑀼𑀢𑁆𑀢𑀓𑁄 𑀉𑀤𑀓𑁂𑀦 𑀳𑀢𑁄. 𑀲𑀸 ‘‘𑀏𑀓𑁄 𑀫𑁂 𑀧𑀼𑀢𑁆𑀢𑁄 𑀲𑁂𑀦𑁂𑀦 𑀕𑀳𑀺𑀢𑁄, 𑀏𑀓𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄, 𑀧𑀦𑁆𑀣𑁂 𑀫𑁂 𑀧𑀢𑀺 𑀫𑀢𑁄’’𑀢𑀺 𑀭𑁄𑀤𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑀕𑀘𑁆𑀙𑀦𑁆𑀢𑀻 𑀲𑀸𑀯𑀢𑁆𑀣𑀺𑀢𑁄 𑀆𑀕𑀘𑁆𑀙𑀦𑁆𑀢𑀁 𑀏𑀓𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀢𑁆𑀣 𑀯𑀸𑀲𑀺𑀓𑁄𑀲𑀺, 𑀢𑀸𑀢𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑁄𑀫𑁆𑀳𑀺, 𑀅𑀫𑁆𑀫𑀸’’𑀢𑀺. ‘‘𑀲𑀸𑀯𑀢𑁆𑀣𑀺𑀬𑀁 𑀅𑀲𑀼𑀓𑀯𑀻𑀣𑀺𑀬𑀁 𑀅𑀲𑀼𑀓𑀓𑀼𑀮𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀚𑀸𑀦𑀸𑀲𑀺, 𑀢𑀸𑀢𑀸’’𑀢𑀺? ‘‘𑀚𑀸𑀦𑀸𑀫𑀺, 𑀅𑀫𑁆𑀫, 𑀢𑀁 𑀧𑀦 𑀫𑀸 𑀧𑀼𑀘𑁆𑀙𑀺, 𑀅𑀜𑁆𑀜𑀁 𑀧𑀼𑀘𑁆𑀙𑀸’’𑀢𑀺. ‘‘𑀅𑀜𑁆𑀜𑁂𑀦 𑀫𑁂 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀢𑀤𑁂𑀯 𑀧𑀼𑀘𑁆𑀙𑀸𑀫𑀺, 𑀢𑀸𑀢𑀸’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀅𑀢𑁆𑀢𑀦𑁄 𑀅𑀦𑀸𑀘𑀺𑀓𑁆𑀔𑀺𑀢𑀼𑀁 𑀦 𑀤𑁂𑀲𑀺, 𑀅𑀚𑁆𑀚 𑀢𑁂 𑀲𑀩𑁆𑀩𑀭𑀢𑁆𑀢𑀺𑀁 𑀤𑁂𑀯𑁄 𑀯𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑁄’’𑀢𑀺? ‘‘𑀤𑀺𑀝𑁆𑀞𑁄 𑀫𑁂, 𑀢𑀸𑀢, 𑀫𑀬𑁆𑀳𑀫𑁂𑀯 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀯𑀼𑀝𑁆𑀞𑁄, 𑀢𑀁 𑀓𑀸𑀭𑀡𑀁 𑀧𑀘𑁆𑀙𑀸 𑀓𑀣𑁂𑀲𑁆𑀲𑀸𑀫𑀺, 𑀏𑀢𑀲𑁆𑀫𑀺𑀁 𑀢𑀸𑀯 𑀫𑁂 𑀲𑁂𑀝𑁆𑀞𑀺𑀕𑁂𑀳𑁂 𑀧𑀯𑀢𑁆𑀢𑀺𑀁 𑀓𑀣𑁂𑀳𑀻’’𑀢𑀺. ‘‘𑀅𑀫𑁆𑀫, 𑀅𑀚𑁆𑀚 𑀭𑀢𑁆𑀢𑀺𑀬𑀁 𑀲𑁂𑀝𑁆𑀞𑀺 𑀘 𑀪𑀭𑀺𑀬𑀸 𑀘 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀘𑀸𑀢𑀺 𑀢𑀬𑁄𑀧𑀺 𑀚𑀦𑁂 𑀅𑀯𑀢𑁆𑀣𑀭𑀫𑀸𑀦𑀁 𑀕𑁂𑀳𑀁 𑀧𑀢𑀺, 𑀢𑁂 𑀏𑀓𑀘𑀺𑀢𑀓𑀸𑀬𑀁 𑀛𑀸𑀬𑀦𑁆𑀢𑀺, 𑀲𑁆𑀯𑀸𑀬𑀁 𑀥𑀽𑀫𑁄 𑀧𑀜𑁆𑀜𑀸𑀬𑀢𑀺, 𑀅𑀫𑁆𑀫𑀸’’𑀢𑀺. 𑀲𑀸 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀯𑀢𑁆𑀣𑀯𑀢𑁆𑀣𑀫𑁆𑀧𑀺 𑀧𑀢𑀫𑀸𑀦𑀁 𑀦 𑀲𑀜𑁆𑀚𑀸𑀦𑀺. 𑀲𑁄𑀓𑀼𑀫𑁆𑀫𑀢𑁆𑀢𑀢𑁆𑀢𑀁 𑀧𑀢𑁆𑀯𑀸 𑀚𑀸𑀢𑀭𑀽𑀧𑁂𑀦𑁂𑀯 𑁋

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀗𑁆𑀓𑀢𑀸, 𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸 𑀘, 𑀏𑀓𑀘𑀺𑀢𑀫𑁆𑀳𑀺 𑀟𑀬𑁆𑀳𑀭𑁂’’𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁪𑁯𑁮) 𑁋

𑀯𑀺𑀮𑀧𑀦𑁆𑀢𑀻 𑀧𑀭𑀺𑀩𑁆𑀪𑀫𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀦𑀺𑀯𑀸𑀲𑀦𑀫𑀢𑁆𑀢𑁂𑀦𑀧𑀺 𑀧𑀝𑁂𑀦 𑀅𑀘𑀭𑀡𑀢𑁄 𑀧𑀢𑀺𑀢𑀸𑀘𑀸𑀭𑀢𑁆𑀢𑀸 𑀧𑀝𑀸𑀘𑀸𑀭𑀸𑀢𑁆𑀯𑁂𑀯 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀕𑀘𑁆𑀙, 𑀉𑀫𑁆𑀫𑀢𑁆𑀢𑀺𑀓𑁂’’𑀢𑀺 𑀓𑁂𑀘𑀺 𑀓𑀘𑀯𑀭𑀁 𑀫𑀢𑁆𑀣𑀓𑁂 𑀔𑀺𑀧𑀦𑁆𑀢𑀺, 𑀅𑀜𑁆𑀜𑁂 𑀧𑀁𑀲𑀼𑀁 𑀑𑀓𑀺𑀭𑀦𑁆𑀢𑀺, 𑀅𑀧𑀭𑁂 𑀮𑁂𑀟𑁆𑀟𑀼𑀁 𑀔𑀺𑀧𑀦𑁆𑀢𑀺. 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀫𑀳𑀸𑀧𑀭𑀺𑀲𑀸𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀢𑀁 𑀢𑀣𑀸 𑀧𑀭𑀺𑀩𑁆𑀪𑀫𑀦𑁆𑀢𑀺𑀁 𑀤𑀺𑀲𑁆𑀯𑀸 𑀜𑀸𑀡𑀧𑀭𑀺𑀧𑀸𑀓𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀬𑀣𑀸 𑀯𑀺𑀳𑀸𑀭𑀸𑀪𑀺𑀫𑀼𑀔𑀻 𑀆𑀕𑀘𑁆𑀙𑀢𑀺, 𑀢𑀣𑀸 𑀅𑀓𑀸𑀲𑀺. 𑀧𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀇𑀢𑁄 𑀆𑀕𑀦𑁆𑀢𑀼𑀁 𑀫𑀸𑀤𑀢𑁆𑀣𑀸’’𑀢𑀺 𑀆𑀳. ‘‘𑀪𑀕𑀯𑀸 𑀫𑀸 𑀦𑀁 𑀯𑀸𑀭𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀯𑀺𑀤𑀽𑀭𑀝𑁆𑀞𑀸𑀦𑀁 𑀆𑀕𑀢𑀓𑀸𑀮𑁂 ‘‘𑀲𑀢𑀺𑀁 𑀧𑀝𑀺𑀮𑀪 𑀪𑀕𑀺𑀦𑀻’’𑀢𑀺 𑀆𑀳. 𑀲𑀸 𑀢𑀸𑀯𑀤𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲 𑀧𑀢𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀉𑀧𑀦𑀺𑀲𑀚𑁆𑀚𑀸𑀬 𑀦𑀺𑀲𑀻𑀤𑀺. 𑀏𑀓𑁄 𑀧𑀼𑀭𑀺𑀲𑁄 𑀉𑀢𑁆𑀢𑀭𑀲𑀸𑀝𑀓𑀁 𑀔𑀺𑀧𑀺. 𑀲𑀸 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀣, 𑀏𑀓𑀁 𑀫𑁂 𑀧𑀼𑀢𑁆𑀢𑀁 𑀲𑁂𑀦𑁄 𑀕𑀡𑁆𑀳𑀺, 𑀏𑀓𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄, 𑀧𑀦𑁆𑀣𑁂 𑀧𑀢𑀺 𑀫𑀢𑁄, 𑀫𑀸𑀢𑀸𑀧𑀺𑀢𑀭𑁄 𑀪𑀸𑀢𑀸 𑀘 𑀕𑁂𑀳𑁂𑀦 𑀅𑀯𑀢𑁆𑀣𑀝𑀸 𑀫𑀢𑀸 𑀏𑀓𑀘𑀺𑀢𑀓𑀲𑁆𑀫𑀺𑀁 𑀛𑀸𑀬𑀦𑁆𑀢𑀻’’𑀢𑀺 𑀲𑀸 𑀲𑁄𑀓𑀓𑀸𑀭𑀡𑀁 𑀆𑀘𑀺𑀓𑁆𑀔𑀺. 𑀲𑀢𑁆𑀣𑀸 ‘‘𑀧𑀝𑀸𑀘𑀸𑀭𑁂, 𑀫𑀸 𑀘𑀺𑀦𑁆𑀢𑀬𑀺, 𑀢𑀯 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀆𑀕𑀢𑀸𑀲𑀺. 𑀬𑀣𑀸 𑀳𑀺 𑀢𑁆𑀯𑀁 𑀇𑀤𑀸𑀦𑀺 𑀧𑀼𑀢𑁆𑀢𑀸𑀤𑀻𑀦𑀁 𑀫𑀭𑀡𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀲𑀺, 𑀏𑀯𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀼𑀢𑁆𑀢𑀸𑀤𑀻𑀦𑀁 𑀫𑀭𑀡𑀳𑁂𑀢𑀼 𑀧𑀯𑀢𑁆𑀢𑀺𑀢𑀁 𑀅𑀲𑁆𑀲𑀼 𑀘𑀢𑀼𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀸𑀦𑀁 𑀉𑀤𑀓𑀢𑁄 𑀩𑀳𑀼𑀢𑀭’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀚𑀮𑀁 𑀧𑀭𑀺𑀢𑁆𑀢𑀓𑀁, 𑀢𑀢𑁄 𑀩𑀳𑀼𑀁 𑀅𑀲𑁆𑀲𑀼𑀚𑀮𑀁 𑀅𑀦𑀧𑁆𑀧𑀓𑀁;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀲𑁄𑀘𑀦𑀸, 𑀓𑀺𑀁 𑀓𑀸𑀭𑀡𑀸 𑀅𑀫𑁆𑀫 𑀢𑀼𑀯𑀁 𑀧𑀫𑀚𑁆𑀚𑀲𑀻’’𑀢𑀺. (𑀥. 𑀧. 𑀅𑀝𑁆𑀞. 𑁧.𑁧𑁧𑁨 𑀧𑀝𑀸𑀘𑀸𑀭𑀸𑀣𑁂𑀭𑀻𑀯𑀢𑁆𑀣𑀼) 𑁋

𑀕𑀸𑀣𑀁 𑀅𑀪𑀸𑀲𑀺.

𑀏𑀯𑀁 𑀲𑀢𑁆𑀣𑀭𑀺 𑀅𑀦𑀫𑀢𑀕𑁆𑀕𑀧𑀭𑀺𑀬𑀸𑀬𑀓𑀣𑀁 (𑀲𑀁. 𑀦𑀺. 𑁨.𑁧𑁨𑁫-𑁧𑁨𑁬) 𑀓𑀣𑁂𑀦𑁆𑀢𑁂 𑀢𑀲𑁆𑀲𑀸 𑀲𑁄𑀓𑁄 𑀢𑀦𑀼𑀢𑀭𑀪𑀸𑀯𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀢𑀦𑀼𑀪𑀽𑀢𑀲𑁄𑀓𑀁 𑀜𑀢𑁆𑀯𑀸 ‘‘𑀧𑀝𑀸𑀘𑀸𑀭𑁂, 𑀧𑀼𑀢𑁆𑀢𑀸𑀤𑀬𑁄 𑀦𑀸𑀫 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀸𑀡𑀁 𑀯𑀸 𑀮𑁂𑀡𑀁 𑀯𑀸 𑀲𑀭𑀡𑀁 𑀯𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀯𑀺𑀚𑁆𑀚𑀫𑀸𑀦𑀸𑀧𑀺 𑀢𑁂 𑀦 𑀲𑀦𑁆𑀢𑀺 𑀏𑀯, 𑀢𑀲𑁆𑀫𑀸 𑀧𑀡𑁆𑀟𑀺𑀢𑁂𑀦 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄𑀬𑁂𑀯 𑀲𑀸𑀥𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸.

‘‘𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀫𑁂𑀯 𑀯𑀺𑀲𑁄𑀥𑀬𑁂’’𑀢𑀺. (𑀥. 𑀧. 𑁨𑁮𑁮-𑁨𑁮𑁯) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀧𑀝𑀸𑀘𑀸𑀭𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀏𑀓𑀤𑀺𑀯𑀲𑀁 𑀖𑀝𑁂𑀦 𑀉𑀤𑀓𑀁 𑀆𑀤𑀸𑀬 𑀧𑀸𑀤𑁂 𑀥𑁄𑀯𑀦𑁆𑀢𑀻 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀢𑀁 𑀣𑁄𑀓𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀚𑁆𑀚𑀺, 𑀤𑀼𑀢𑀺𑀬𑀯𑀸𑀭𑀁 𑀆𑀲𑀺𑀢𑁆𑀢𑀁 𑀢𑀢𑁄 𑀤𑀽𑀭𑀁 𑀅𑀕𑀫𑀸𑀲𑀺, 𑀢𑀢𑀺𑀬𑀯𑀸𑀭𑀁 𑀆𑀲𑀺𑀢𑁆𑀢𑀁 𑀢𑀢𑁄𑀧𑀺 𑀤𑀽𑀭𑀢𑀭𑀁 𑀅𑀕𑀫𑀸𑀲𑀺. 𑀲𑀸 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀢𑀬𑁄 𑀯𑀬𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀫𑀬𑀸 𑀧𑀞𑀫𑀁 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀇𑀫𑁂 𑀲𑀢𑁆𑀢𑀸 𑀧𑀞𑀫𑀯𑀬𑁂𑀧𑀺 𑀫𑀭𑀦𑁆𑀢𑀺, 𑀢𑀢𑁄 𑀤𑀽𑀭𑀁 𑀕𑀢𑀁 𑀤𑀼𑀢𑀺𑀬𑀯𑀸𑀭𑀁 𑀆𑀲𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀫𑀚𑁆𑀛𑀺𑀫𑀯𑀬𑁂𑀧𑀺, 𑀢𑀢𑁄 𑀤𑀽𑀭𑀢𑀭𑀁 𑀕𑀢𑀁 𑀢𑀢𑀺𑀬𑀯𑀸𑀭𑀁 𑀆𑀲𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀧𑀘𑁆𑀙𑀺𑀫𑀯𑀬𑁂𑀧𑀺 𑀫𑀭𑀦𑁆𑀢𑀺𑀬𑁂𑀯𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑀲𑁆𑀲𑀸 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀏𑀯𑀫𑁂𑀢𑀁, 𑀧𑀝𑀸𑀘𑀸𑀭𑁂, 𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸, 𑀢𑀲𑁆𑀫𑀸 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑀁 𑀚𑀻𑀯𑀢𑁄 𑀢𑀁 𑀧𑀲𑁆𑀲𑀦𑁆𑀢𑀲𑁆𑀲 𑀏𑀓𑀸𑀳𑀫𑁆𑀧𑀺 𑀏𑀓𑀓𑁆𑀔𑀡𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬’’𑀦𑁆𑀢𑀺. (𑀥. 𑀧. 𑁧𑁧𑁩) 𑁋

𑀕𑀸𑀣𑀫𑀸𑀳. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀝𑀸𑀘𑀸𑀭𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁪𑁬𑁮-𑁫𑁧𑁧) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀫𑀳𑀸𑀲𑀼𑀔𑀲𑀫𑀧𑁆𑀧𑀺𑀢𑀸.

‘‘𑀉𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀢𑀢𑁄 𑀚𑀸𑀢𑀧𑀲𑀸𑀤𑀸𑀳𑀁, 𑀉𑀧𑁂𑀲𑀺𑀁 𑀲𑀭𑀡𑀁 𑀚𑀺𑀦𑀁.

‘‘𑀢𑀢𑁄 𑀯𑀺𑀦𑀬𑀥𑀸𑀭𑀻𑀦𑀁, 𑀅𑀕𑁆𑀕𑀁 𑀯𑀡𑁆𑀡𑁂𑀲𑀺 𑀦𑀸𑀬𑀓𑁄;

𑀪𑀺𑀓𑁆𑀔𑀼𑀦𑀺𑀁 𑀮𑀚𑁆𑀚𑀺𑀦𑀺𑀁 𑀢𑀸𑀤𑀺𑀁, 𑀓𑀧𑁆𑀧𑀸𑀓𑀧𑁆𑀧𑀯𑀺𑀲𑀸𑀭𑀤𑀁.

‘‘𑀢𑀤𑀸 𑀫𑀼𑀤𑀺𑀢𑀘𑀺𑀢𑁆𑀢𑀸𑀳𑀁, 𑀢𑀁 𑀞𑀸𑀦𑀫𑀪𑀺𑀓𑀗𑁆𑀔𑀺𑀦𑀻;

𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀲𑀩𑀮𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

‘‘𑀪𑁄𑀚𑀬𑀺𑀢𑁆𑀯𑀸𑀦 𑀲𑀢𑁆𑀢𑀸𑀳𑀁, 𑀤𑀤𑀺𑀢𑁆𑀯𑀸𑀯 𑀢𑀺𑀘𑀻𑀯𑀭𑀁;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀬𑀸 𑀢𑀬𑀸 𑀯𑀡𑁆𑀡𑀺𑀢𑀸 𑀯𑀻𑀭, 𑀇𑀢𑁄 𑀅𑀝𑁆𑀞𑀫𑀓𑁂 𑀫𑀼𑀦𑀺;

𑀢𑀸𑀤𑀺𑀲𑀸𑀳𑀁 𑀪𑀯𑀺𑀲𑁆𑀲𑀸𑀫𑀺, 𑀬𑀤𑀺 𑀲𑀺𑀚𑁆𑀛𑀢𑀺 𑀦𑀸𑀬𑀓.

‘‘𑀢𑀤𑀸 𑀅𑀯𑁄𑀘 𑀫𑀁 𑀲𑀢𑁆𑀣𑀸, 𑀪𑀤𑁆𑀤𑁂 𑀫𑀸 𑀪𑀸𑀬𑀺 𑀅𑀲𑁆𑀲𑀲;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀧𑀝𑀸𑀘𑀸𑀭𑀸𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀤𑀸𑀳𑀁 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀢𑀲𑁆𑀲𑀸𑀲𑀺𑀁 𑀢𑀢𑀺𑀬𑀸 𑀥𑀻𑀢𑀸, 𑀪𑀺𑀓𑁆𑀔𑀼𑀦𑀻 𑀇𑀢𑀺 𑀯𑀺𑀲𑁆𑀲𑀼𑀢𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢𑀥𑀻𑀢𑀭𑁄.

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸.

‘‘𑀅𑀳𑀁 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀔𑁂𑀫𑀸 𑀪𑀤𑁆𑀤𑀸 𑀘 𑀪𑀺𑀓𑁆𑀔𑀼𑀦𑀻;

𑀓𑀺𑀲𑀸𑀕𑁄𑀢𑀫𑀻 𑀥𑀫𑁆𑀫𑀤𑀺𑀦𑁆𑀦𑀸, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀁;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀯𑀭𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂.

‘‘𑀬𑀤𑀸 𑀘 𑀬𑁄𑀩𑁆𑀩𑀦𑀽𑀧𑁂𑀢𑀸, 𑀯𑀺𑀢𑀓𑁆𑀓𑀯𑀲𑀕𑀸 𑀅𑀳𑀁;

𑀦𑀭𑀁 𑀚𑀸𑀭𑀧𑀢𑀺𑀁 𑀤𑀺𑀲𑁆𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀅𑀕𑀘𑁆𑀙𑀳𑀁.

‘‘𑀏𑀓𑀧𑀼𑀢𑁆𑀢𑀧𑀲𑀽𑀢𑀸𑀳𑀁, 𑀤𑀼𑀢𑀺𑀬𑁄 𑀓𑀼𑀘𑁆𑀙𑀺𑀬𑀸 𑀫𑀫;

𑀢𑀤𑀸𑀳𑀁 𑀫𑀸𑀢𑀸𑀧𑀺𑀢𑀭𑁄, 𑀑𑀓𑁆𑀔𑀸𑀫𑀻𑀢𑀺 𑀲𑀼𑀦𑀺𑀘𑁆𑀙𑀺𑀢𑀸.

‘‘𑀦𑀸𑀭𑁄𑀘𑁂𑀲𑀺𑀁 𑀧𑀢𑀺𑀁 𑀫𑀬𑁆𑀳𑀁, 𑀢𑀤𑀸 𑀢𑀫𑁆𑀳𑀺 𑀧𑀯𑀸𑀲𑀺𑀢𑁂;

𑀏𑀓𑀺𑀓𑀸 𑀦𑀺𑀕𑁆𑀕𑀢𑀸 𑀕𑁂𑀳𑀸, 𑀕𑀦𑁆𑀢𑀼𑀁 𑀲𑀸𑀯𑀢𑁆𑀣𑀺𑀫𑀼𑀢𑁆𑀢𑀫𑀁.

‘‘𑀢𑀢𑁄 𑀫𑁂 𑀲𑀸𑀫𑀺 𑀆𑀕𑀦𑁆𑀢𑁆𑀯𑀸, 𑀲𑀫𑁆𑀪𑀸𑀯𑁂𑀲𑀺 𑀧𑀣𑁂 𑀫𑀫𑀁;

𑀢𑀤𑀸 𑀫𑁂 𑀓𑀫𑁆𑀫𑀚𑀸 𑀯𑀸𑀢𑀸, 𑀉𑀧𑁆𑀧𑀦𑁆𑀦𑀸 𑀅𑀢𑀺𑀤𑀸𑀭𑀼𑀡𑀸.

‘‘𑀉𑀝𑁆𑀞𑀺𑀢𑁄 𑀘 𑀫𑀳𑀸𑀫𑁂𑀖𑁄, 𑀧𑀲𑀽𑀢𑀺𑀲𑀫𑀬𑁂 𑀫𑀫;

𑀤𑀩𑁆𑀩𑀢𑁆𑀣𑀸𑀬 𑀢𑀤𑀸 𑀕𑀦𑁆𑀢𑁆𑀯𑀸, 𑀲𑀸𑀫𑀺 𑀲𑀧𑁆𑀧𑁂𑀦 𑀫𑀸𑀭𑀺𑀢𑁄.

‘‘𑀢𑀤𑀸 𑀯𑀺𑀚𑀸𑀢𑀤𑀼𑀓𑁆𑀔𑁂𑀦, 𑀅𑀦𑀸𑀣𑀸 𑀓𑀧𑀡𑀸 𑀅𑀳𑀁;

𑀓𑀼𑀦𑁆𑀦𑀤𑀺𑀁 𑀧𑀽𑀭𑀺𑀢𑀁 𑀤𑀺𑀲𑁆𑀯𑀸, 𑀕𑀘𑁆𑀙𑀦𑁆𑀢𑀻 𑀲𑀓𑀼𑀮𑀸𑀮𑀬𑀁.

‘‘𑀩𑀸𑀮𑀁 𑀆𑀤𑀸𑀬 𑀅𑀢𑀭𑀺𑀁, 𑀧𑀸𑀭𑀓𑀽𑀮𑁂 𑀘 𑀏𑀓𑀓𑀁;

𑀲𑀸𑀬𑁂𑀢𑁆𑀯𑀸 𑀩𑀸𑀮𑀓𑀁 𑀧𑀼𑀢𑁆𑀢𑀁, 𑀇𑀢𑀭𑀁 𑀢𑀭𑀡𑀸𑀬𑀳𑀁.

‘‘𑀦𑀺𑀯𑀢𑁆𑀢𑀸 𑀉𑀓𑁆𑀓𑀼𑀲𑁄 𑀳𑀸𑀲𑀺, 𑀢𑀭𑀼𑀡𑀁 𑀯𑀺𑀮𑀧𑀦𑁆𑀢𑀓𑀁;

𑀇𑀢𑀭𑀜𑁆𑀘 𑀯𑀳𑀻 𑀲𑁄𑀢𑁄, 𑀲𑀸𑀳𑀁 𑀲𑁄𑀓𑀲𑀫𑀧𑁆𑀧𑀺𑀢𑀸.

‘‘𑀲𑀸𑀯𑀢𑁆𑀣𑀺𑀦𑀕𑀭𑀁 𑀕𑀦𑁆𑀢𑁆𑀯𑀸, 𑀅𑀲𑁆𑀲𑁄𑀲𑀺𑀁 𑀲𑀚𑀦𑁂 𑀫𑀢𑁂;

𑀢𑀤𑀸 𑀅𑀯𑁄𑀘𑀁 𑀲𑁄𑀓𑀝𑁆𑀝𑀸, 𑀫𑀳𑀸𑀲𑁄𑀓𑀲𑀫𑀧𑁆𑀧𑀺𑀢𑀸.

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀗𑁆𑀓𑀢𑀸, 𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸 𑀘, 𑀏𑀓𑀘𑀺𑀢𑀫𑁆𑀳𑀺 𑀟𑀬𑁆𑀳𑀭𑁂.

‘‘𑀢𑀤𑀸 𑀓𑀺𑀲𑀸 𑀘 𑀧𑀡𑁆𑀟𑀼 𑀘, 𑀅𑀦𑀸𑀣𑀸 𑀤𑀻𑀦𑀫𑀸𑀦𑀲𑀸;

𑀇𑀢𑁄 𑀢𑀢𑁄 𑀪𑀫𑀦𑁆𑀢𑀻𑀳𑀁, 𑀅𑀤𑁆𑀤𑀲𑀁 𑀦𑀭𑀲𑀸𑀭𑀣𑀺𑀁.

‘‘𑀢𑀢𑁄 𑀅𑀯𑁄𑀘 𑀫𑀁 𑀲𑀢𑁆𑀣𑀸, 𑀧𑀼𑀢𑁆𑀢𑁂 𑀫𑀸 𑀲𑁄𑀘𑀺 𑀅𑀲𑁆𑀲𑀲;

𑀅𑀢𑁆𑀢𑀸𑀦𑀁 𑀢𑁂 𑀕𑀯𑁂𑀲𑀲𑁆𑀲𑀼, 𑀓𑀺𑀁 𑀦𑀺𑀭𑀢𑁆𑀣𑀁 𑀯𑀺𑀳𑀜𑁆𑀜𑀲𑀺.

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀜𑀸𑀢𑀻 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀦𑀺𑀦𑁄 𑀯𑀸𑀓𑁆𑀬𑀁, 𑀧𑀞𑀫𑀁 𑀨𑀮𑀫𑀚𑁆𑀛𑀕𑀁;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀦𑀘𑀺𑀭𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀧𑀭𑀘𑀺𑀢𑁆𑀢𑀸𑀦𑀺 𑀚𑀸𑀦𑀸𑀫𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀯𑀺𑀲𑀼𑀤𑁆𑀥𑀸𑀲𑀺𑀁 𑀲𑀼𑀦𑀺𑀫𑁆𑀫𑀮𑀸.

‘‘𑀢𑀢𑁄𑀳𑀁 𑀯𑀺𑀦𑀬𑀁 𑀲𑀩𑁆𑀩𑀁, 𑀲𑀦𑁆𑀢𑀺𑀓𑁂 𑀲𑀩𑁆𑀩𑀤𑀲𑁆𑀲𑀺𑀦𑁄;

𑀉𑀕𑁆𑀕𑀳𑀺𑀁 𑀲𑀩𑁆𑀩𑀯𑀺𑀢𑁆𑀣𑀸𑀭𑀁, 𑀩𑁆𑀬𑀸𑀳𑀭𑀺𑀜𑁆𑀘 𑀬𑀣𑀸𑀢𑀣𑀁.

‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀅𑀕𑁆𑀕𑀸 𑀯𑀺𑀦𑀬𑀥𑀸𑀭𑀻𑀦𑀁, 𑀧𑀝𑀸𑀘𑀸𑀭𑀸𑀯 𑀏𑀓𑀺𑀓𑀸.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑁂𑀓𑁆𑀔𑀓𑀸𑀮𑁂 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑀭𑀺𑀯𑀺𑀲𑁂𑀲𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀸𑀓𑀸𑀭𑀁 𑀯𑀺𑀪𑀸𑀯𑁂𑀦𑁆𑀢𑀻 𑀉𑀤𑀸𑀦𑀯𑀲𑁂𑀦 𑁋

𑁧𑁧𑁨.

‘‘𑀦𑀗𑁆𑀕𑀮𑁂𑀳𑀺 𑀓𑀲𑀁 𑀔𑁂𑀢𑁆𑀢𑀁, 𑀩𑀻𑀚𑀸𑀦𑀺 𑀧𑀯𑀧𑀁 𑀙𑀫𑀸;

𑀧𑀼𑀢𑁆𑀢𑀤𑀸𑀭𑀸𑀦𑀺 𑀧𑁄𑀲𑁂𑀦𑁆𑀢𑀸, 𑀥𑀦𑀁 𑀯𑀺𑀦𑁆𑀤𑀦𑁆𑀢𑀺 𑀫𑀸𑀡𑀯𑀸.

𑁧𑁧𑁩.

‘‘𑀓𑀺𑀫𑀳𑀁 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸;

𑀦𑀺𑀩𑁆𑀩𑀸𑀦𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀓𑀼𑀲𑀻𑀢𑀸 𑀅𑀦𑀼𑀤𑁆𑀥𑀢𑀸.

𑁧𑁧𑁪.

‘‘𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦, 𑀉𑀤𑀓𑁂𑀲𑀼 𑀓𑀭𑁄𑀫𑀳𑀁;

𑀧𑀸𑀤𑁄𑀤𑀓𑀜𑁆𑀘 𑀤𑀺𑀲𑁆𑀯𑀸𑀦, 𑀣𑀮𑀢𑁄 𑀦𑀺𑀦𑁆𑀦𑀫𑀸𑀕𑀢𑀁.

𑁧𑁧𑁫.

‘‘𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁, 𑀅𑀲𑁆𑀲𑀁 𑀪𑀤𑁆𑀭𑀁𑀯𑀚𑀸𑀦𑀺𑀬𑀁;

𑀢𑀢𑁄 𑀤𑀻𑀧𑀁 𑀕𑀳𑁂𑀢𑁆𑀯𑀸𑀦, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺𑀁 𑀅𑀳𑀁;

𑀲𑁂𑀬𑁆𑀬𑀁 𑀑𑀮𑁄𑀓𑀬𑀺𑀢𑁆𑀯𑀸𑀦, 𑀫𑀜𑁆𑀘𑀓𑀫𑁆𑀳𑀺 𑀉𑀧𑀸𑀯𑀺𑀲𑀺𑀁.

𑁧𑁧𑁬.

‘‘𑀢𑀢𑁄 𑀲𑀽𑀘𑀺𑀁 𑀕𑀳𑁂𑀢𑁆𑀯𑀸𑀦, 𑀯𑀝𑁆𑀝𑀺𑀁 𑀑𑀓𑀲𑁆𑀲𑀬𑀸𑀫𑀳𑀁;

𑀧𑀤𑀻𑀧𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀅𑀳𑀼 𑀘𑁂𑀢𑀲𑁄’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀓𑀲𑀦𑁆𑀢𑀺 𑀓𑀲𑀦𑁆𑀢𑀸 𑀓𑀲𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀸. 𑀩𑀳𑀼𑀢𑁆𑀣𑁂 𑀳𑀺 𑀇𑀤𑀁 𑀏𑀓𑀯𑀘𑀦𑀁. 𑀧𑀯𑀧𑀦𑁆𑀢𑀺 𑀩𑀻𑀚𑀸𑀦𑀺 𑀯𑀧𑀦𑁆𑀢𑀸. 𑀙𑀫𑀸𑀢𑀺 𑀙𑀫𑀸𑀬𑀁. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀫𑁂 𑀫𑀸𑀡𑀯𑀸 𑀲𑀢𑁆𑀢𑀸 𑀦𑀗𑁆𑀕𑀮𑁂𑀳𑀺 𑀨𑀸𑀮𑁂𑀳𑀺 𑀔𑁂𑀢𑁆𑀢𑀁 𑀓𑀲𑀦𑁆𑀢𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀔𑁂𑀢𑁆𑀢𑀪𑀽𑀫𑀺𑀬𑀁 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀪𑁂𑀤𑀸𑀦𑀺 𑀩𑀻𑀚𑀸𑀦𑀺 𑀯𑀧𑀦𑁆𑀢𑀸 𑀢𑀁𑀳𑁂𑀢𑀼 𑀢𑀁𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀼𑀢𑁆𑀢𑀤𑀸𑀭𑀸𑀤𑀻𑀦𑀺 𑀧𑁄𑀲𑁂𑀦𑁆𑀢𑀸 𑀳𑀼𑀢𑁆𑀯𑀸 𑀥𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑁄𑀦𑀺𑀲𑁄 𑀧𑀬𑀼𑀢𑁆𑀢𑁄 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄 𑀦𑀸𑀫 𑀲𑀨𑀮𑁄 𑀲𑀉𑀤𑀬𑁄.

𑀢𑀢𑁆𑀣 𑀓𑀺𑀫𑀳𑀁 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸. 𑀦𑀺𑀩𑁆𑀩𑀸𑀦𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀓𑀼𑀲𑀻𑀢𑀸 𑀅𑀦𑀼𑀤𑁆𑀥𑀢𑀸𑀢𑀺 𑀅𑀳𑀁 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀅𑀓𑀼𑀲𑀻𑀢𑀸 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀢𑀸 𑀘 𑀳𑀼𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀓𑀭𑁄𑀦𑁆𑀢𑀻 𑀓𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀥𑀺𑀕𑀫𑀺𑀲𑁆𑀲𑀸𑀫𑀺 𑀏𑀯𑀸𑀢𑀺.

𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀏𑀓𑀤𑀺𑀯𑀲𑀁 𑀧𑀸𑀤𑀥𑁄𑀯𑀦𑀉𑀤𑀓𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺. 𑀢𑁂𑀦𑀸𑀳 ‘‘𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀧𑀸𑀤𑁂 𑀥𑁄𑀯𑀦𑁆𑀢𑀻 𑀧𑀸𑀤𑀧𑀓𑁆𑀔𑀸𑀮𑀦𑀳𑁂𑀢𑀼 𑀢𑀺𑀓𑁆𑀔𑀢𑁆𑀢𑀼𑀁 𑀆𑀲𑀺𑀢𑁆𑀢𑁂𑀲𑀼 𑀉𑀤𑀓𑁂𑀲𑀼 𑀣𑀮𑀢𑁄 𑀦𑀺𑀦𑁆𑀦𑀫𑀸𑀕𑀢𑀁 𑀧𑀸𑀤𑁄𑀤𑀓𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀁 𑀓𑀭𑁄𑀫𑀺.

‘‘𑀬𑀣𑀸 𑀇𑀤𑀁 𑀉𑀤𑀓𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁, 𑀏𑀯𑀁 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀸’’𑀢𑀺 𑀏𑀯𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀢𑀤𑀦𑀼𑀲𑀸𑀭𑁂𑀦 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘 𑀉𑀧𑀥𑀸𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀻 𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁, 𑀅𑀲𑁆𑀲𑀁 𑀪𑀤𑁆𑀭𑀁𑀯𑀚𑀸𑀦𑀺𑀬𑀦𑁆𑀢𑀺 𑀬𑀣𑀸 𑀅𑀲𑁆𑀲𑀁 𑀪𑀤𑁆𑀭𑀁 𑀆𑀚𑀸𑀦𑀺𑀬𑀁 𑀓𑀼𑀲𑀮𑁄 𑀲𑀸𑀭𑀣𑀺 𑀲𑀼𑀔𑁂𑀦 𑀲𑀸𑀭𑁂𑀢𑀺, 𑀏𑀯𑀁 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀲𑀼𑀔𑁂𑀦𑁂𑀯 𑀲𑀫𑀸𑀥𑁂𑀲𑀺𑀁, 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁 𑀅𑀓𑀸𑀲𑀺𑀁. 𑀏𑀯𑀁 𑀧𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀻 𑀉𑀢𑀼𑀲𑀧𑁆𑀧𑀸𑀬𑀦𑀺𑀚𑀺𑀕𑀺𑀲𑀸𑀬 𑀑𑀯𑀭𑀓𑀁 𑀧𑀯𑀺𑀲𑀦𑁆𑀢𑀻 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁆𑀣𑀁 𑀤𑀻𑀧𑀁 𑀕𑀳𑁂𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑀻𑀧𑀁 𑀞𑀧𑁂𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑀸𑀯 𑀤𑀻𑀧𑀁 𑀯𑀺𑀚𑁆𑀛𑀸𑀧𑁂𑀢𑀼𑀁 𑀅𑀕𑁆𑀕𑀴𑀲𑀽𑀘𑀺𑀬𑀸 𑀤𑀻𑀧𑀯𑀝𑁆𑀝𑀺𑀁 𑀆𑀓𑀟𑁆𑀠𑀺𑀁, 𑀢𑀸𑀯𑀤𑁂𑀯 𑀉𑀢𑀼𑀲𑀧𑁆𑀧𑀸𑀬𑀮𑀸𑀪𑁂𑀦 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀅𑀳𑁄𑀲𑀺, 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀢𑀭𑀺, 𑀫𑀕𑁆𑀕𑁂𑀦 𑀖𑀝𑁆𑀝𑁂𑀲𑀺. 𑀢𑀢𑁄 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀲𑁄 𑀆𑀲𑀯𑀸𑀦𑀁 𑀔𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀢𑁄 𑀤𑀻𑀧𑀁 𑀕𑀳𑁂𑀢𑁆𑀯𑀸𑀦…𑀧𑁂… 𑀯𑀺𑀫𑁄𑀓𑁆𑀔𑁄 𑀅𑀳𑀼 𑀘𑁂𑀢𑀲𑁄’’𑀢𑀺. 𑀢𑀢𑁆𑀣 𑀲𑁂𑀬𑁆𑀬𑀁 𑀑𑀮𑁄𑀓𑀬𑀺𑀢𑁆𑀯𑀸𑀦𑀸𑀢𑀺 𑀤𑀻𑀧𑀸𑀮𑁄𑀓𑁂𑀦 𑀲𑁂𑀬𑁆𑀬𑀁 𑀧𑀲𑁆𑀲𑀺𑀢𑁆𑀯𑀸.

𑀲𑀽𑀘𑀺𑀦𑁆𑀢𑀺 𑀅𑀕𑁆𑀕𑀴𑀲𑀽𑀘𑀺𑀁. 𑀯𑀝𑁆𑀝𑀺𑀁 𑀑𑀓𑀲𑁆𑀲𑀬𑀸𑀫𑀻𑀢𑀺 𑀤𑀻𑀧𑀁 𑀯𑀺𑀚𑁆𑀛𑀸𑀧𑁂𑀢𑀼𑀁 𑀢𑁂𑀮𑀸𑀪𑀺𑀫𑀼𑀔𑀁 𑀤𑀻𑀧𑀯𑀝𑁆𑀝𑀺𑀁 𑀆𑀓𑀟𑁆𑀠𑁂𑀫𑀺. 𑀯𑀺𑀫𑁄𑀓𑁆𑀔𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑁄𑀓𑁆𑀔𑁄. 𑀲𑁄 𑀧𑀦 𑀬𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀘𑀺𑀢𑁆𑀢𑀲𑁆𑀲 𑀲𑀦𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑁂𑀢𑀲𑁄’’𑀢𑀺. 𑀬𑀣𑀸 𑀧𑀦 𑀯𑀝𑁆𑀝𑀺𑀢𑁂𑀮𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀧𑀤𑀻𑀧𑁄 𑀢𑀤𑀪𑀸𑀯𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀦𑀺𑀩𑁆𑀩𑀼𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀺𑀮𑁂𑀲𑀸𑀤𑀺𑀧𑀘𑁆𑀘𑀬𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀘𑀺𑀢𑁆𑀢𑀁 𑀢𑀤𑀪𑀸𑀯𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀧𑀤𑀻𑀧𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀅𑀳𑀼 𑀘𑁂𑀢𑀲𑁄’’𑀢𑀺.

𑀧𑀝𑀸𑀘𑀸𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀢𑀺𑀁𑀲𑀫𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀫𑀼𑀲𑀮𑀸𑀦𑀺 𑀕𑀳𑁂𑀢𑁆𑀯𑀸𑀦𑀸𑀢𑀺𑀆𑀤𑀺𑀓𑀸 𑀢𑀺𑀁𑀲𑀫𑀢𑁆𑀢𑀸𑀦𑀁 𑀣𑁂𑀭𑀻𑀦𑀁 𑀕𑀸𑀣𑀸. 𑀢𑀸𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀺𑀬𑁄 𑀅𑀦𑀼𑀓𑁆𑀓𑀫𑁂𑀦 𑀉𑀧𑀘𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀓𑀓𑀫𑁆𑀫𑀲𑀜𑁆𑀘𑁄𑀤𑀺𑀢𑀸 𑀢𑀢𑁆𑀣 𑀢𑀢𑁆𑀣 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀧𑀭𑀺𑀧𑀽𑀭𑁂𑀦𑁆𑀢𑀺𑀬𑁄 𑀯𑀺𑀳𑀭𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀝𑀸𑀘𑀸𑀭𑀸𑀣𑁂𑀭𑀻 𑀢𑀸𑀲𑀁 𑀑𑀯𑀸𑀤𑀁 𑀤𑁂𑀦𑁆𑀢𑀻 𑁋

𑁧𑁧𑁭.

‘‘𑀫𑀼𑀲𑀮𑀸𑀦𑀺 𑀕𑀳𑁂𑀢𑁆𑀯𑀸𑀦, 𑀥𑀜𑁆𑀜𑀁 𑀓𑁄𑀝𑁆𑀝𑁂𑀦𑁆𑀢𑀺 𑀫𑀸𑀡𑀯𑀸;

𑀧𑀼𑀢𑁆𑀢𑀤𑀸𑀭𑀸𑀦𑀺 𑀧𑁄𑀲𑁂𑀦𑁆𑀢𑀸, 𑀥𑀦𑀁 𑀯𑀺𑀦𑁆𑀤𑀦𑁆𑀢𑀺 𑀫𑀸𑀡𑀯𑀸.

𑁧𑁧𑁮.

‘‘𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀣;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸, 𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺. 𑁋 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀫𑁂 𑀲𑀢𑁆𑀢𑀸 𑀚𑀻𑀯𑀺𑀢𑀳𑁂𑀢𑀼 𑀫𑀼𑀲𑀮𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑁂𑀲𑀁 𑀥𑀜𑁆𑀜𑀁 𑀓𑁄𑀝𑁆𑀝𑁂𑀦𑁆𑀢𑀺, 𑀉𑀤𑀼𑀓𑁆𑀔𑀮𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀫𑁆𑀧𑀺 𑀏𑀤𑀺𑀲𑀁 𑀦𑀺𑀳𑀻𑀦𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑀸 𑀬𑀣𑀸𑀭𑀳𑀁 𑀥𑀦𑀫𑁆𑀧𑀺 𑀲𑀁𑀳𑀭𑀦𑁆𑀢𑀺. 𑀢𑀁 𑀧𑀦 𑀦𑁂𑀲𑀁 𑀓𑀫𑁆𑀫𑀁 𑀦𑀺𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀤𑀼𑀓𑁆𑀔𑀁 𑀅𑀦𑀢𑁆𑀣𑀲𑀜𑁆𑀳𑀺𑀢𑀜𑁆𑀘. 𑀢𑀲𑁆𑀫𑀸 𑀏𑀤𑀺𑀲𑀁 𑀲𑀁𑀓𑀺𑀮𑁂𑀲𑀺𑀓𑀧𑀧𑀜𑁆𑀘𑀁 𑀯𑀚𑁆𑀚𑁂𑀢𑁆𑀯𑀸 𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁 𑀓𑀭𑁄𑀣 𑀲𑀫𑁆𑀧𑀸𑀤𑁂𑀣 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑁂𑀣. 𑀢𑀢𑁆𑀣 𑀓𑀸𑀭𑀡𑀫𑀸𑀳 𑁋 ‘‘𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀻’’𑀢𑀺, 𑀬𑀲𑁆𑀲 𑀓𑀭𑀡𑀳𑁂𑀢𑀼 𑀏𑀢𑀭𑀳𑀺 𑀆𑀬𑀢𑀺𑀜𑁆𑀘 𑀅𑀦𑀼𑀢𑀸𑀧𑀁 𑀦𑀸𑀧𑀚𑁆𑀚𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀓𑀭𑀡𑁂 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀦𑀼𑀬𑁄𑀕𑀯𑀺𑀥𑀺𑀜𑁆𑀘 𑀤𑀲𑁆𑀲𑁂𑀢𑀼𑀁, ‘‘𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀅𑀥𑁄𑀯𑀺𑀢𑀧𑀸𑀤𑀲𑁆𑀲 𑀅𑀯𑀺𑀓𑁆𑀔𑀸𑀮𑀺𑀢𑀫𑀼𑀔𑀲𑁆𑀲 𑀘 𑀦𑀺𑀲𑀚𑁆𑀚𑀲𑀼𑀔𑀁 𑀉𑀢𑀼𑀲𑀧𑁆𑀧𑀸𑀬𑀮𑀸𑀪𑁄 𑀘 𑀦 𑀳𑁄𑀢𑀺, 𑀧𑀸𑀤𑁂 𑀧𑀦 𑀥𑁄𑀯𑀺𑀢𑁆𑀯𑀸 𑀫𑀼𑀔𑀜𑁆𑀘 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀺𑀦𑁆𑀦𑀲𑁆𑀲 𑀢𑀤𑀼𑀪𑀬𑀁 𑀮𑀪𑀢𑀺, 𑀢𑀲𑁆𑀫𑀸 𑀔𑀺𑀧𑁆𑀧𑀁 𑀇𑀫𑀁 𑀬𑀣𑀸𑀮𑀤𑁆𑀥𑀁 𑀔𑀡𑀁 𑀅𑀯𑀺𑀭𑀸𑀥𑁂𑀦𑁆𑀢𑀺𑀬𑁄 𑀧𑀸𑀤𑀸𑀦𑀺 𑀅𑀢𑁆𑀢𑀦𑁄 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀦𑀺𑀲𑀻𑀤𑀣 𑀦𑀺𑀲𑀚𑁆𑀚𑀣. 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀭𑀼𑀘𑀺𑀓𑁂 𑀆𑀭𑀫𑁆𑀫𑀡𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀲𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀑𑀯𑀸𑀤𑀁 𑀅𑀦𑀼𑀲𑀺𑀝𑁆𑀞𑀺𑀁 𑀓𑀭𑁄𑀣 𑀲𑀫𑁆𑀧𑀸𑀤𑁂𑀣𑀸𑀢𑀺.

𑀅𑀣 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑀲𑁆𑀲𑀸 𑀣𑁂𑀭𑀺𑀬𑀸 𑀑𑀯𑀸𑀤𑁂 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺𑀬𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀘 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀑𑀯𑀸𑀤𑀕𑀸𑀣𑀸𑀳𑀺 𑀲𑀤𑁆𑀥𑀺𑀁 𑁋

𑁧𑁧𑁯.

‘‘𑀢𑀲𑁆𑀲𑀸 𑀢𑀸 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀝𑀸𑀘𑀸𑀭𑀸𑀬 𑀲𑀸𑀲𑀦𑀁;

𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀼𑀁;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸, 𑀅𑀓𑀁𑀲𑀼 𑀩𑀼𑀤𑁆𑀥𑀲𑀸𑀲𑀦𑀁.

𑁧𑁨𑁦.

‘‘𑀭𑀢𑁆𑀢𑀺𑀬𑀸 𑀧𑀼𑀭𑀺𑀫𑁂 𑀬𑀸𑀫𑁂, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀼𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀼𑀁;

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀼𑀁.

𑁧𑁨𑁧.

‘‘𑀉𑀝𑁆𑀞𑀸𑀬 𑀧𑀸𑀤𑁂 𑀯𑀦𑁆𑀤𑀺𑀁𑀲𑀼, 𑀓𑀢𑀸 𑀢𑁂 𑀅𑀦𑀼𑀲𑀸𑀲𑀦𑀻;

𑀇𑀦𑁆𑀤𑀁𑀯 𑀤𑁂𑀯𑀸 𑀢𑀺𑀤𑀲𑀸, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀁;

𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀲𑁆𑀲𑀸𑀫, 𑀢𑁂𑀯𑀺𑀚𑁆𑀚𑀸𑀫𑁆𑀳 𑀅𑀦𑀸𑀲𑀯𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼.

𑀢𑀢𑁆𑀣 𑀢𑀲𑁆𑀲𑀸 𑀢𑀸 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀝𑀸𑀘𑀸𑀭𑀸𑀬 𑀲𑀸𑀲𑀦𑀦𑁆𑀢𑀺 𑀢𑀲𑁆𑀲𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀓𑀺𑀮𑁂𑀲𑀧𑀝𑀺𑀲𑀢𑁆𑀢𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀪𑀽𑀢𑀁 𑀑𑀯𑀸𑀤𑀯𑀘𑀦𑀁, 𑀢𑀸 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀼𑀢𑁆𑀯𑀸 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸.

𑀉𑀝𑁆𑀞𑀸𑀬 𑀧𑀸𑀤𑁂 𑀯𑀦𑁆𑀤𑀺𑀁𑀲𑀼, 𑀓𑀢𑀸 𑀢𑁂 𑀅𑀦𑀼𑀲𑀸𑀲𑀦𑀻𑀢𑀺 𑀬𑀣𑀸𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀢𑀲𑁆𑀲𑀸 𑀲𑀸𑀲𑀦𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀸𑀯𑁂𑀦𑁆𑀢𑀺𑀬𑁄 𑀪𑀸𑀯𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀆𑀭𑁄𑀘𑁂𑀢𑀼𑀁 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀉𑀝𑁆𑀞𑀸𑀬 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀳𑀸𑀣𑁂𑀭𑀺 𑀢𑀯𑀸𑀦𑀼𑀲𑀸𑀲𑀦𑀻 𑀬𑀣𑀸𑀦𑀼𑀲𑀺𑀝𑁆𑀞𑀁 𑀅𑀫𑁆𑀳𑁂𑀳𑀺 𑀓𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀧𑀸𑀤𑁂 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀁𑀲𑀼. 𑀇𑀦𑁆𑀤𑀁𑀯 𑀤𑁂𑀯𑀸 𑀢𑀺𑀤𑀲𑀸, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀦𑁆𑀢𑀺 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀁 𑀯𑀺𑀚𑀺𑀢𑀸𑀯𑀺𑀁 𑀇𑀦𑁆𑀤𑀁 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀯𑀺𑀬 𑀫𑀳𑀸𑀣𑁂𑀭𑀺, 𑀫𑀬𑀁 𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫 𑀅𑀜𑁆𑀜𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀢𑀲𑁆𑀫𑀸 ‘‘𑀢𑁂𑀯𑀺𑀚𑁆𑀚𑀸𑀫𑁆𑀳 𑀅𑀦𑀸𑀲𑀯𑀸’’𑀢𑀺 𑀅𑀢𑁆𑀢𑀦𑁄 𑀓𑀢𑀜𑁆𑀜𑀼𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑀻 𑀇𑀤𑀫𑁂𑀯 𑀢𑀸𑀲𑀁 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀢𑀺𑀁𑀲𑀫𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀘𑀦𑁆𑀤𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑀼𑀕𑁆𑀕𑀢𑀸𑀳𑀁 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀸 𑀘𑀦𑁆𑀤𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀧𑀭𑀺𑀧𑀓𑁆𑀓𑀜𑀸𑀡𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀅𑀧𑀜𑁆𑀜𑀸𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀝𑁆𑀞𑀸𑀬𑀁 𑀢𑀁 𑀓𑀼𑀮𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀬𑀁 𑀕𑀢𑀁. 𑀲𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀤𑀼𑀓𑁆𑀔𑁂𑀦 𑀚𑀻𑀯𑀢𑀺. 𑀅𑀣 𑀢𑀲𑁆𑀫𑀺𑀁 𑀕𑁂𑀳𑁂 𑀅𑀳𑀺𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀲𑁆𑀲𑀸 𑀲𑀩𑁆𑀩𑁂𑀧𑀺 𑀜𑀸𑀢𑀓𑀸 𑀫𑀭𑀡𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀸 𑀜𑀸𑀢𑀺𑀓𑁆𑀔𑀬𑁂 𑀚𑀸𑀢𑁂 𑀅𑀜𑁆𑀜𑀢𑁆𑀣 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀓𑀧𑀸𑀮𑀳𑀢𑁆𑀣𑀸 𑀓𑀼𑀮𑁂 𑀓𑀼𑀮𑁂 𑀯𑀺𑀘𑀭𑀺𑀢𑁆𑀯𑀸 𑀮𑀤𑁆𑀥𑀮𑀤𑁆𑀥𑁂𑀦 𑀪𑀺𑀓𑁆𑀔𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑀻 𑀏𑀓𑀤𑀺𑀯𑀲𑀁 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀤𑀼𑀓𑁆𑀔𑀺𑀢𑀁 𑀔𑀼𑀤𑁆𑀤𑀸𑀪𑀺𑀪𑀽𑀢𑀁 𑀤𑀺𑀲𑁆𑀯𑀸𑀦 𑀲𑀜𑁆𑀚𑀸𑀢𑀓𑀸𑀭𑀼𑀜𑁆𑀜𑀸 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑁂𑀦 𑀉𑀧𑀘𑀸𑀭𑀫𑀦𑁄𑀳𑀭𑁂𑀦 𑀆𑀳𑀸𑀭𑁂𑀦 𑀲𑀦𑁆𑀢𑀧𑁆𑀧𑁂𑀲𑀼𑀁. 𑀲𑀸 𑀢𑀸𑀲𑀁 𑀆𑀘𑀸𑀭𑀲𑀻𑀮𑁂 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀲𑁆𑀲𑀸 𑀣𑁂𑀭𑀻 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑀸 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀲𑀁𑀲𑀸𑀭𑁂 𑀘 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀣𑁂𑀭𑀺𑀬𑀸 𑀑𑀯𑀸𑀤𑁂 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀻 𑀓𑀢𑀸𑀥𑀺𑀓𑀸𑀭𑀢𑀸𑀬 𑀜𑀸𑀡𑀲𑁆𑀲 𑀘 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑁋

𑁧𑁨𑁨.

‘‘𑀤𑀼𑀕𑁆𑀕𑀢𑀸𑀳𑀁 𑀧𑀼𑀭𑁂 𑀆𑀲𑀺𑀁, 𑀯𑀺𑀥𑀯𑀸 𑀘 𑀅𑀧𑀼𑀢𑁆𑀢𑀺𑀓𑀸;

𑀯𑀺𑀦𑀸 𑀫𑀺𑀢𑁆𑀢𑁂𑀳𑀺 𑀜𑀸𑀢𑀻𑀳𑀺, 𑀪𑀢𑁆𑀢𑀘𑁄𑀴𑀲𑁆𑀲 𑀦𑀸𑀥𑀺𑀕𑀁.

𑁧𑁨𑁩.

‘‘𑀧𑀢𑁆𑀢𑀁 𑀤𑀡𑁆𑀟𑀜𑁆𑀘 𑀕𑀡𑁆𑀳𑀺𑀢𑁆𑀯𑀸, 𑀪𑀺𑀓𑁆𑀔𑀫𑀸𑀦𑀸 𑀓𑀼𑀮𑀸 𑀓𑀼𑀮𑀁;

𑀲𑀻𑀢𑀼𑀡𑁆𑀳𑁂𑀦 𑀘 𑀟𑀬𑁆𑀳𑀦𑁆𑀢𑀻, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀘𑀸𑀭𑀺𑀳𑀁.

𑁧𑁨𑁪.

‘‘𑀪𑀺𑀓𑁆𑀔𑀼𑀦𑀺𑀁 𑀧𑀼𑀦 𑀤𑀺𑀲𑁆𑀯𑀸𑀦, 𑀅𑀦𑁆𑀦𑀧𑀸𑀦𑀲𑁆𑀲 𑀮𑀸𑀪𑀺𑀦𑀺𑀁;

𑀉𑀧𑀲𑀗𑁆𑀓𑀫𑁆𑀫𑀁 𑀅𑀯𑁄𑀘𑀁, 𑀧𑀩𑁆𑀩𑀚𑁆𑀚𑀁 𑀅𑀦𑀕𑀸𑀭𑀺𑀬𑀁.

𑁧𑁨𑁫.

‘‘𑀲𑀸 𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀧𑀩𑁆𑀩𑀸𑀚𑁂𑀲𑀺 𑀧𑀝𑀸𑀘𑀸𑀭𑀸;

𑀢𑀢𑁄 𑀫𑀁 𑀑𑀯𑀤𑀺𑀢𑁆𑀯𑀸𑀦, 𑀧𑀭𑀫𑀢𑁆𑀣𑁂 𑀦𑀺𑀬𑁄𑀚𑀬𑀺.

𑁧𑁨𑁬.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀓𑀸𑀲𑀺𑀁 𑀅𑀦𑀼𑀲𑀸𑀲𑀦𑀺𑀁;

𑀅𑀫𑁄𑀖𑁄 𑀅𑀬𑁆𑀬𑀸𑀬𑁄𑀯𑀸𑀤𑁄, 𑀢𑁂𑀯𑀺𑀚𑁆𑀚𑀸𑀫𑁆𑀳𑀺 𑀅𑀦𑀸𑀲𑀯𑀸’’𑀢𑀺. 𑁋

𑀉𑀤𑀸𑀦𑀯𑀲𑁂𑀦 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀤𑀼𑀕𑁆𑀕𑀢𑀸𑀢𑀺 𑀤𑀮𑀺𑀤𑁆𑀤𑀸. 𑀧𑀼𑀭𑁂𑀢𑀺 𑀧𑀩𑁆𑀩𑀚𑀺𑀢𑀢𑁄 𑀧𑀼𑀩𑁆𑀩𑁂. 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀇𑀥 𑀧𑀼𑀕𑁆𑀕𑀮𑁄 𑀪𑁄𑀕𑁂𑀳𑀺 𑀅𑀟𑁆𑀠𑁄 𑀯𑀸 𑀤𑀮𑀺𑀤𑁆𑀤𑁄 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀕𑀼𑀡𑁂𑀳𑀺 𑀧𑀦 𑀅𑀬𑀁 𑀣𑁂𑀭𑀻 𑀅𑀟𑁆𑀠𑀸𑀬𑁂𑀯. 𑀢𑁂𑀦𑀸𑀳 ‘‘𑀤𑀼𑀕𑁆𑀕𑀢𑀸𑀳𑀁 𑀧𑀼𑀭𑁂 𑀆𑀲𑀺’’𑀦𑁆𑀢𑀺. 𑀯𑀺𑀥𑀯𑀸𑀢𑀺 𑀥𑀯𑁄 𑀯𑀼𑀘𑁆𑀘𑀢𑀺 𑀲𑀸𑀫𑀺𑀓𑁄, 𑀢𑀤𑀪𑀸𑀯𑀸 𑀯𑀺𑀥𑀯𑀸, 𑀫𑀢𑀧𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀧𑀼𑀢𑁆𑀢𑀺𑀓𑀸𑀢𑀺 𑀧𑀼𑀢𑁆𑀢𑀭𑀳𑀺𑀢𑀸. 𑀯𑀺𑀦𑀸 𑀫𑀺𑀢𑁆𑀢𑁂𑀳𑀻𑀢𑀺 𑀫𑀺𑀢𑁆𑀢𑁂𑀳𑀺 𑀩𑀦𑁆𑀥𑀯𑁂𑀳𑀺 𑀘 𑀧𑀭𑀺𑀳𑀻𑀦𑀸 𑀭𑀳𑀺𑀢𑀸. 𑀪𑀢𑁆𑀢𑀘𑁄𑀴𑀲𑁆𑀲 𑀦𑀸𑀥𑀺𑀕𑀦𑁆𑀢𑀺 𑀪𑀢𑁆𑀢𑀲𑁆𑀲 𑀘𑁄𑀴𑀲𑁆𑀲 𑀘 𑀧𑀸𑀭𑀺𑀧𑀽𑀭𑀺𑀁 𑀦𑀸𑀥𑀺𑀕𑀘𑁆𑀙𑀺𑀁, 𑀓𑁂𑀯𑀮𑀁 𑀧𑀦 𑀪𑀺𑀓𑁆𑀔𑀸𑀧𑀺𑀡𑁆𑀟𑀲𑁆𑀲 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀲𑁆𑀲 𑀘 𑀯𑀲𑁂𑀦 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁂𑀯 𑀅𑀮𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀧𑀢𑁆𑀢𑀁 𑀤𑀡𑁆𑀟𑀜𑁆𑀘 𑀕𑀡𑁆𑀳𑀺𑀢𑁆𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀧𑀢𑁆𑀢𑀦𑁆𑀢𑀺 𑀫𑀢𑁆𑀢𑀺𑀓𑀸𑀪𑀸𑀚𑀦𑀁. 𑀤𑀡𑁆𑀟𑀦𑁆𑀢𑀺 𑀕𑁄𑀡𑀲𑀼𑀦𑀔𑀸𑀤𑀺𑀧𑀭𑀺𑀳𑀭𑀡𑀤𑀡𑁆𑀟𑀓𑀁. 𑀓𑀼𑀮𑀸 𑀓𑀼𑀮𑀦𑁆𑀢𑀺 𑀓𑀼𑀮𑀢𑁄 𑀓𑀼𑀮𑀁. 𑀲𑀻𑀢𑀼𑀡𑁆𑀳𑁂𑀦 𑀘 𑀟𑀬𑁆𑀳𑀦𑁆𑀢𑀻𑀢𑀺 𑀯𑀲𑀦𑀕𑁂𑀳𑀸𑀪𑀸𑀯𑀢𑁄 𑀲𑀻𑀢𑁂𑀦 𑀘 𑀉𑀡𑁆𑀳𑁂𑀦 𑀘 𑀧𑀻𑀴𑀺𑀬𑀫𑀸𑀦𑀸.

𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀧𑀝𑀸𑀘𑀸𑀭𑀸𑀣𑁂𑀭𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀼𑀦𑀸𑀢𑀺 𑀧𑀘𑁆𑀙𑀸, 𑀲𑀢𑁆𑀢𑀲𑀁𑀯𑀘𑁆𑀙𑀭𑀢𑁄 𑀅𑀧𑀭𑀪𑀸𑀕𑁂.

𑀧𑀭𑀫𑀢𑁆𑀣𑁂𑀢𑀺 𑀧𑀭𑀫𑁂 𑀉𑀢𑁆𑀢𑀫𑁂 𑀅𑀢𑁆𑀣𑁂, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀦𑀺𑀩𑁆𑀩𑀸𑀦𑁂 𑀘. 𑀦𑀺𑀬𑁄𑀚𑀬𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑀻 𑀦𑀺𑀬𑁄𑀚𑁂𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀦𑁆𑀤𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀧𑀸𑀢𑁄

𑁧. 𑀧𑀜𑁆𑀘𑀲𑀢𑀫𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀙𑀓𑁆𑀓𑀦𑀺𑀧𑀸𑀢𑁂 𑀬𑀲𑁆𑀲 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀻𑀢𑀺𑀆𑀤𑀺𑀓𑀸 𑀧𑀜𑁆𑀘𑀲𑀢𑀫𑀢𑁆𑀢𑀸𑀦𑀁 𑀣𑁂𑀭𑀻𑀦𑀁 𑀕𑀸𑀣𑀸. 𑀇𑀫𑀸𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀺𑀬𑁄 𑀅𑀦𑀼𑀓𑁆𑀓𑀫𑁂𑀦 𑀉𑀧𑀘𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁆𑀣 𑀢𑀢𑁆𑀣 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀧𑀢𑀺𑀓𑀼𑀮𑀁 𑀆𑀦𑀻𑀢𑀸 𑀢𑀢𑁆𑀣 𑀢𑀢𑁆𑀣 𑀧𑀼𑀢𑁆𑀢𑁂 𑀮𑀪𑀺𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑀺𑀬𑁄 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀢𑀸𑀤𑀺𑀲𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀲𑀩𑁆𑀩𑀸𑀯 𑀫𑀢𑀧𑀼𑀢𑁆𑀢𑀸 𑀳𑀼𑀢𑁆𑀯𑀸, 𑀧𑀼𑀢𑁆𑀢𑀲𑁄𑀓𑁂𑀦 𑀅𑀪𑀺𑀪𑀽𑀢𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀅𑀢𑁆𑀢𑀦𑁄 𑀲𑁄𑀓𑀓𑀸𑀭𑀡𑀁 𑀆𑀭𑁄𑀘𑁂𑀲𑀼𑀁. 𑀣𑁂𑀭𑀻 𑀢𑀸𑀲𑀁 𑀲𑁄𑀓𑀁 𑀯𑀺𑀦𑁄𑀤𑁂𑀦𑁆𑀢𑀻 𑁋

𑁧𑁨𑁭.

‘‘𑀬𑀲𑁆𑀲 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀺, 𑀆𑀕𑀢𑀲𑁆𑀲 𑀕𑀢𑀲𑁆𑀲 𑀯𑀸;

𑀢𑀁 𑀓𑀼𑀢𑁄 𑀘𑀸𑀕𑀢𑀁 𑀲𑀢𑁆𑀢𑀁, 𑀫𑀫 𑀧𑀼𑀢𑁆𑀢𑁄𑀢𑀺 𑀭𑁄𑀤𑀲𑀺.

𑁧𑁨𑁮.

‘‘𑀫𑀕𑁆𑀕𑀜𑁆𑀘 𑀔𑁄𑀲𑁆𑀲 𑀚𑀸𑀦𑀸𑀲𑀺, 𑀆𑀕𑀢𑀲𑁆𑀲 𑀕𑀢𑀲𑁆𑀲 𑀯𑀸;

𑀦 𑀦𑀁 𑀲𑀫𑀦𑀼𑀲𑁄𑀘𑁂𑀲𑀺, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄.

𑁧𑁨𑁯.

‘‘𑀅𑀬𑀸𑀘𑀺𑀢𑁄 𑀢𑀢𑀸𑀕𑀘𑁆𑀙𑀺, 𑀦𑀸𑀦𑀼𑀜𑁆𑀜𑀸𑀢𑁄 𑀇𑀢𑁄 𑀕𑀢𑁄;

𑀓𑀼𑀢𑁄𑀘𑀺 𑀦𑀽𑀦 𑀆𑀕𑀦𑁆𑀢𑁆𑀯𑀸, 𑀯𑀲𑀺𑀢𑁆𑀯𑀸 𑀓𑀢𑀺𑀧𑀸𑀳𑀓𑀁;

𑀇𑀢𑁄𑀧𑀺 𑀅𑀜𑁆𑀜𑁂𑀦 𑀕𑀢𑁄, 𑀢𑀢𑁄𑀧𑀜𑁆𑀜𑁂𑀦 𑀕𑀘𑁆𑀙𑀢𑀺.

𑁧𑁩𑁦.

‘‘𑀧𑁂𑀢𑁄 𑀫𑀦𑀼𑀲𑁆𑀲𑀭𑀽𑀧𑁂𑀦, 𑀲𑀁𑀲𑀭𑀦𑁆𑀢𑁄 𑀕𑀫𑀺𑀲𑁆𑀲𑀢𑀺;

𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄, 𑀓𑀸 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸’’𑀢𑀺. 𑁋

𑀇𑀫𑀸𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀸 𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺𑀬𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀢𑀸 𑀅𑀥𑀺𑀕𑀢𑀸𑀭𑀳𑀢𑁆𑀢𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 ‘‘𑀬𑀲𑁆𑀲 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀻’’𑀢𑀺𑀆𑀤𑀺𑀓𑀸𑀳𑀺 𑀑𑀯𑀸𑀤𑀕𑀸𑀣𑀸𑀳𑀺 𑀲𑀤𑁆𑀥𑀺𑀁 𑁋

𑁧𑁩𑁧.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀁;

𑀬𑀸 𑀫𑁂 𑀲𑁄𑀓𑀧𑀭𑁂𑀢𑀸𑀬, 𑀧𑀼𑀢𑁆𑀢𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺.

𑁧𑁩𑁨.

‘‘𑀲𑀸𑀚𑁆𑀚 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀳𑀁, 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀉𑀧𑁂𑀫𑀺 𑀲𑀭𑀡𑀁 𑀫𑀼𑀦𑀺’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀪𑀸𑀲𑀺𑀁𑀲𑀼.

𑀢𑀢𑁆𑀣 𑀬𑀲𑁆𑀲 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀺, 𑀆𑀕𑀢𑀲𑁆𑀲 𑀕𑀢𑀲𑁆𑀲 𑀯𑀸𑀢𑀺 𑀬𑀲𑁆𑀲 𑀲𑀢𑁆𑀢𑀲𑁆𑀲 𑀇𑀥 𑀆𑀕𑀢𑀲𑁆𑀲 𑀆𑀕𑀢𑀫𑀕𑁆𑀕𑀁 𑀯𑀸 𑀇𑀢𑁄 𑀕𑀢𑀲𑁆𑀲 𑀕𑀢𑀫𑀕𑁆𑀕𑀁 𑀯𑀸 𑀢𑁆𑀯𑀁 𑀦 𑀚𑀸𑀦𑀸𑀲𑀺. 𑀅𑀦𑀦𑁆𑀢𑀭𑀸 𑀅𑀢𑀻𑀢𑀸𑀦𑀸𑀕𑀢𑀪𑀯𑀽𑀧𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀁 𑀓𑀼𑀢𑁄 𑀘𑀸𑀕𑀢𑀁 𑀲𑀢𑁆𑀢𑀦𑁆𑀢𑀺 𑀢𑀁 𑀏𑀯𑀁 𑀅𑀯𑀺𑀜𑁆𑀜𑀸𑀢𑀸𑀕𑀢𑀕𑀢𑀫𑀕𑁆𑀕𑀁 𑀓𑀼𑀢𑁄𑀘𑀺 𑀕𑀢𑀺𑀢𑁄 𑀆𑀕𑀢𑀫𑀕𑁆𑀕𑀁 𑀆𑀕𑀘𑁆𑀙𑀦𑁆𑀢𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀓𑀢𑀧𑀭𑀺𑀘𑀬𑀲𑀫𑀸𑀕𑀢𑀧𑀼𑀭𑀺𑀲𑀲𑀤𑀺𑀲𑀁 𑀲𑀢𑁆𑀢𑀁 𑀓𑁂𑀯𑀮𑀁 𑀫𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑁄𑀢𑀺 𑀓𑀼𑀢𑁄 𑀓𑁂𑀦 𑀓𑀸𑀭𑀡𑁂𑀦 𑀭𑁄𑀤𑀲𑀺. 𑀅𑀧𑁆𑀧𑀝𑀺𑀓𑀸𑀭𑀢𑁄 𑀫𑀫 𑀧𑀼𑀢𑁆𑀢𑀲𑁆𑀲 𑀘 𑀅𑀓𑀸𑀢𑀩𑁆𑀩𑀢𑁄 𑀦 𑀏𑀢𑁆𑀣 𑀭𑁄𑀤𑀦𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀕𑁆𑀕𑀜𑁆𑀘 𑀔𑁄𑀲𑁆𑀲 𑀚𑀸𑀦𑀸𑀲𑀻𑀢𑀺 𑀅𑀲𑁆𑀲 𑀢𑀯 𑀧𑀼𑀢𑁆𑀢𑀸𑀪𑀺𑀫𑀢𑀲𑁆𑀲 𑀲𑀢𑁆𑀢𑀲𑁆𑀲 𑀆𑀕𑀢𑀲𑁆𑀲 𑀆𑀕𑀢𑀫𑀕𑁆𑀕𑀜𑁆𑀘 𑀕𑀢𑀲𑁆𑀲 𑀕𑀢𑀫𑀕𑁆𑀕𑀜𑁆𑀘 𑀅𑀣 𑀚𑀸𑀦𑁂𑀬𑁆𑀬𑀸𑀲𑀺. 𑀦 𑀦𑀁 𑀲𑀫𑀦𑀼𑀲𑁄𑀘𑁂𑀲𑀻𑀢𑀺 𑀏𑀯𑀫𑁆𑀧𑀺 𑀦𑀁 𑀦 𑀲𑀫𑀦𑀼𑀲𑁄𑀘𑁂𑀬𑁆𑀬𑀸𑀲𑀺. 𑀓𑀲𑁆𑀫𑀸? 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄, 𑀤𑀺𑀝𑁆𑀞𑀥𑀫𑁆𑀫𑁂𑀧𑀺 𑀳𑀺 𑀲𑀢𑁆𑀢𑀸𑀦𑀁 𑀲𑀩𑁆𑀩𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑀸 𑀯𑀺𑀦𑀸𑀪𑀸𑀯𑀸 𑀢𑀢𑁆𑀣 𑀯𑀲𑀯𑀢𑁆𑀢𑀺𑀢𑀸𑀬 𑀅𑀪𑀸𑀯𑀢𑁄, 𑀧𑀕𑁂𑀯 𑀅𑀪𑀺𑀲𑀫𑁆𑀧𑀭𑀸𑀬𑀁.

𑀅𑀬𑀸𑀘𑀺𑀢𑁄 𑀢𑀢𑀸𑀕𑀘𑁆𑀙𑀻𑀢𑀺 𑀢𑀢𑁄 𑀧𑀭𑀮𑁄𑀓𑀢𑁄 𑀓𑁂𑀦𑀘𑀺 𑀅𑀬𑀸𑀘𑀺𑀢𑁄 𑀇𑀥 𑀆𑀕𑀘𑁆𑀙𑀺. ‘‘𑀆𑀕𑀢𑁄’’𑀢𑀺𑀧𑀺 𑀧𑀸𑀴𑀺, 𑀲𑁄 𑀏𑀯𑀢𑁆𑀣𑁄. 𑀦𑀸𑀦𑀼𑀜𑁆𑀜𑀸𑀢𑁄 𑀇𑀢𑁄 𑀕𑀢𑁄𑀢𑀺 𑀇𑀥𑀮𑁄𑀓𑀢𑁄 𑀓𑁂𑀦𑀘𑀺 𑀅𑀦𑀦𑀼𑀜𑁆𑀜𑀸𑀢𑁄 𑀧𑀭𑀮𑁄𑀓𑀁 𑀕𑀢𑁄. 𑀓𑀼𑀢𑁄𑀘𑀻𑀢𑀺 𑀦𑀺𑀭𑀬𑀸𑀤𑀺𑀢𑁄 𑀬𑀢𑁄 𑀓𑀼𑀢𑁄𑀘𑀺 𑀕𑀢𑀺𑀢𑁄. 𑀦𑀽𑀦𑀸𑀢𑀺 𑀧𑀭𑀺𑀲𑀗𑁆𑀓𑀸𑀬𑀁. 𑀯𑀲𑀺𑀢𑁆𑀯𑀸 𑀓𑀢𑀺𑀧𑀸𑀳𑀓𑀦𑁆𑀢𑀺 𑀓𑀢𑀺𑀧𑀬𑀤𑀺𑀯𑀲𑀫𑀢𑁆𑀢𑀁 𑀇𑀥 𑀯𑀲𑀺𑀢𑁆𑀯𑀸. 𑀇𑀢𑁄𑀧𑀺 𑀅𑀜𑁆𑀜𑁂𑀦 𑀕𑀢𑁄𑀢𑀺 𑀇𑀢𑁄𑀧𑀺 𑀪𑀯𑀢𑁄 𑀅𑀜𑁆𑀜𑁂𑀦 𑀕𑀢𑁄, 𑀇𑀢𑁄 𑀅𑀜𑁆𑀜𑀫𑁆𑀧𑀺 𑀪𑀯𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀕𑀢𑁄. 𑀢𑀢𑁄𑀧𑀜𑁆𑀜𑁂𑀦 𑀕𑀘𑁆𑀙𑀢𑀻𑀢𑀺 𑀢𑀢𑁄𑀧𑀺 𑀪𑀯𑀢𑁄 𑀅𑀜𑁆𑀜𑁂𑀦 𑀕𑀫𑀺𑀲𑁆𑀲𑀢𑀺, 𑀅𑀜𑁆𑀜𑀫𑁂𑀯 𑀪𑀯𑀁 𑀉𑀧𑀕𑀫𑀺𑀲𑁆𑀲𑀢𑀺.

𑀧𑁂𑀢𑁄𑀢𑀺 𑀅𑀧𑁂𑀢𑁄 𑀢𑀁 𑀢𑀁 𑀪𑀯𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀅𑀧𑀕𑀢𑁄. 𑀫𑀦𑀼𑀲𑁆𑀲𑀭𑀽𑀧𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀫𑀦𑀼𑀲𑁆𑀲𑀪𑀸𑀯𑁂𑀦 𑀢𑀺𑀭𑀘𑁆𑀙𑀸𑀦𑀸𑀤𑀺𑀪𑀸𑀯𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀲𑀁𑀲𑀭𑀦𑁆𑀢𑁄𑀢𑀺 𑀅𑀧𑀭𑀸𑀧𑀭𑀁 𑀉𑀧𑀧𑀢𑁆𑀢𑀺𑀯𑀲𑁂𑀦 𑀲𑀁𑀲𑀭𑀦𑁆𑀢𑁄. 𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄𑀢𑀺 𑀬𑀣𑀸 𑀅𑀯𑀺𑀜𑁆𑀜𑀸𑀢𑀕𑀢𑀺𑀢𑁄 𑀘 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀆𑀕𑀢𑁄 𑀢𑀣𑀸 𑀅𑀯𑀺𑀜𑁆𑀜𑀸𑀢𑀕𑀢𑀺𑀓𑁄 𑀅𑀦𑀦𑀼𑀜𑁆𑀜𑀸𑀢𑁄𑀯 𑀕𑀢𑁄. 𑀓𑀸 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸𑀢𑀺 𑀢𑀢𑁆𑀣 𑀢𑀸𑀤𑀺𑀲𑁂 𑀅𑀯𑀲𑀯𑀢𑁆𑀢𑀺𑀦𑀺 𑀬𑀣𑀸𑀓𑀸𑀫𑀸𑀯𑀘𑀭𑁂 𑀓𑀸 𑀦𑀸𑀫 𑀧𑀭𑀺𑀤𑁂𑀯𑀦𑀸, 𑀓𑀺𑀁 𑀧𑀭𑀺𑀤𑁂𑀯𑀺𑀢𑁂𑀦 𑀧𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀢𑁆𑀣 𑀘 𑀆𑀤𑀺𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀢𑁂𑀲𑀁 𑀧𑀜𑁆𑀘𑀫𑀢𑁆𑀢𑀸𑀦𑀁 𑀇𑀢𑁆𑀣𑀺𑀲𑀢𑀸𑀦𑀁 𑀲𑁄𑀓𑀯𑀺𑀦𑁄𑀤𑀦𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀪𑀸𑀲𑀺𑀢𑀸. 𑀢𑀲𑁆𑀲𑀸 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀥𑀺𑀕𑀢𑀯𑀺𑀲𑁂𑀲𑀸𑀳𑀺 𑀢𑀸𑀳𑀺 𑀧𑀜𑁆𑀘𑀲𑀢𑀫𑀢𑁆𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀙𑀧𑀺 𑀕𑀸𑀣𑀸 𑀧𑀘𑁆𑀘𑁂𑀓𑀁 𑀪𑀸𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀜𑁆𑀘𑀲𑀢𑀸 𑀧𑀝𑀸𑀘𑀸𑀭𑀸𑀢𑀺 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀮𑀤𑁆𑀥𑀑𑀯𑀸𑀤𑀢𑀸𑀬 𑀧𑀝𑀸𑀘𑀸𑀭𑀸𑀬 𑀯𑀼𑀢𑁆𑀢𑀁 𑀅𑀯𑁂𑀤𑀺𑀲𑀼𑀦𑁆𑀢𑀺 𑀓𑀢𑁆𑀯𑀸 ‘‘𑀧𑀝𑀸𑀘𑀸𑀭𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄.

𑀧𑀜𑁆𑀘𑀲𑀢𑀫𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀸𑀲𑁂𑀝𑁆𑀞𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀧𑀼𑀢𑁆𑀢𑀲𑁄𑀓𑁂𑀦𑀳𑀁 𑀅𑀝𑁆𑀝𑀸𑀢𑀺𑀆𑀤𑀺𑀓𑀸 𑀯𑀸𑀲𑁂𑀝𑁆𑀞𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀺𑀦𑁆𑀦𑀸 𑀧𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀼𑀔𑀲𑀁𑀯𑀸𑀲𑀁 𑀯𑀲𑀦𑁆𑀢𑀻 𑀏𑀓𑀁 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀢𑀲𑁆𑀫𑀺𑀁 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀓𑀸𑀮𑀁 𑀓𑀢𑁂 𑀧𑀼𑀢𑁆𑀢𑀲𑁄𑀓𑁂𑀦 𑀅𑀝𑁆𑀝𑀺𑀢𑀸 𑀉𑀫𑁆𑀫𑀢𑁆𑀢𑀺𑀓𑀸 𑀅𑀳𑁄𑀲𑀺. 𑀲𑀸 𑀜𑀸𑀢𑀓𑁂𑀲𑀼 𑀲𑀸𑀫𑀺𑀓𑁂 𑀘 𑀢𑀺𑀓𑀺𑀘𑁆𑀙𑀁 𑀓𑀭𑁄𑀦𑁆𑀢𑁂𑀲𑀼 𑀢𑁂𑀲𑀁 𑀅𑀚𑀸𑀦𑀦𑁆𑀢𑀸𑀦𑀁𑀬𑁂𑀯 𑀧𑀮𑀸𑀬𑀺𑀢𑁆𑀯𑀸 𑀬𑀢𑁄 𑀢𑀢𑁄 𑀧𑀭𑀺𑀩𑁆𑀪𑀫𑀦𑁆𑀢𑀻 𑀫𑀺𑀣𑀺𑀮𑀸𑀦𑀕𑀭𑀁 𑀲𑀫𑁆𑀧𑀢𑁆𑀢𑀸 𑀢𑀢𑁆𑀣𑀤𑁆𑀤𑀲 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀕𑀘𑁆𑀙𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀁𑀬𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀕𑀁. 𑀤𑀺𑀲𑁆𑀯𑀸𑀦 𑀲𑀳 𑀤𑀲𑁆𑀲𑀦𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑀢𑁄 𑀅𑀧𑀕𑀢𑀼𑀫𑁆𑀫𑀸𑀤𑀸 𑀧𑀓𑀢𑀺𑀘𑀺𑀢𑁆𑀢𑀁 𑀧𑀝𑀺𑀮𑀪𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑀸 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼 𑀆𑀡𑀸𑀬 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀖𑀝𑁂𑀦𑁆𑀢𑀻 𑀯𑀸𑀬𑀫𑀦𑁆𑀢𑀻 𑀧𑀭𑀺𑀧𑀓𑁆𑀓𑀜𑀸𑀡𑀢𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁩𑁩.

‘‘𑀧𑀼𑀢𑁆𑀢𑀲𑁄𑀓𑁂𑀦𑀳𑀁 𑀅𑀝𑁆𑀝𑀸, 𑀔𑀺𑀢𑁆𑀢𑀘𑀺𑀢𑁆𑀢𑀸 𑀯𑀺𑀲𑀜𑁆𑀜𑀺𑀦𑀻;

𑀦𑀕𑁆𑀕𑀸 𑀧𑀓𑀺𑀡𑁆𑀡𑀓𑁂𑀲𑀻 𑀘, 𑀢𑁂𑀦 𑀢𑁂𑀦 𑀯𑀺𑀘𑀸𑀭𑀺𑀳𑀁.

𑁧𑁩𑁪.

‘‘𑀯𑀻𑀣𑀺𑀲𑀗𑁆𑀓𑀸𑀭𑀓𑀽𑀝𑁂𑀲𑀼, 𑀲𑀼𑀲𑀸𑀦𑁂 𑀭𑀣𑀺𑀬𑀸𑀲𑀼 𑀘;

𑀅𑀘𑀭𑀺𑀁 𑀢𑀻𑀡𑀺 𑀯𑀲𑁆𑀲𑀸𑀦𑀺, 𑀔𑀼𑀧𑁆𑀧𑀺𑀧𑀸𑀲𑀸 𑀲𑀫𑀧𑁆𑀧𑀺𑀢𑀸.

𑁧𑁩𑁫.

‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀼𑀕𑀢𑀁, 𑀦𑀕𑀭𑀁 𑀫𑀺𑀣𑀺𑀮𑀁 𑀧𑀢𑀺;

𑀅𑀤𑀦𑁆𑀢𑀸𑀦𑀁 𑀤𑀫𑁂𑀢𑀸𑀭𑀁, 𑀲𑀫𑁆𑀩𑀼𑀤𑁆𑀥𑀫𑀓𑀼𑀢𑁄𑀪𑀬𑀁.

𑁧𑁩𑁬.

‘‘𑀲𑀘𑀺𑀢𑁆𑀢𑀁 𑀧𑀝𑀺𑀮𑀤𑁆𑀥𑀸𑀦, 𑀯𑀦𑁆𑀤𑀺𑀢𑁆𑀯𑀸𑀦 𑀉𑀧𑀸𑀯𑀺𑀲𑀺𑀁;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑁄.

𑁧𑁩𑁭.

‘‘𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀬𑀼𑀜𑁆𑀚𑀦𑁆𑀢𑀻 𑀲𑀢𑁆𑀣𑀼𑀯𑀘𑀦𑁂, 𑀲𑀘𑁆𑀙𑀸𑀓𑀸𑀲𑀺𑀁 𑀧𑀤𑀁 𑀲𑀺𑀯𑀁.

𑁧𑁩𑁮.

‘‘𑀲𑀩𑁆𑀩𑁂 𑀲𑁄𑀓𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀧𑀳𑀻𑀦𑀸 𑀏𑀢𑀤𑀦𑁆𑀢𑀺𑀓𑀸;

𑀧𑀭𑀺𑀜𑁆𑀜𑀸𑀢𑀸 𑀳𑀺 𑀫𑁂 𑀯𑀢𑁆𑀣𑀽, 𑀬𑀢𑁄 𑀲𑁄𑀓𑀸𑀦 𑀲𑀫𑁆𑀪𑀯𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀝𑁆𑀝𑀸𑀢𑀺 𑀅𑀝𑁆𑀝𑀺𑀢𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀅𑀝𑁆𑀝𑀺𑀢𑀸 𑀧𑀻𑀴𑀺𑀢𑀸𑀢𑀺 𑀅𑀢𑁆𑀣𑁄. 𑀔𑀺𑀢𑁆𑀢𑀘𑀺𑀢𑁆𑀢𑀸𑀢𑀺 𑀲𑁄𑀓𑀼𑀫𑁆𑀫𑀸𑀤𑁂𑀦 𑀔𑀺𑀢𑁆𑀢𑀳𑀤𑀬𑀸. 𑀢𑀢𑁄 𑀏𑀯 𑀧𑀓𑀢𑀺𑀲𑀜𑁆𑀜𑀸𑀬 𑀯𑀺𑀕𑀫𑁂𑀦 𑀯𑀺𑀲𑀜𑁆𑀜𑀺𑀦𑀻. 𑀳𑀺𑀭𑁄𑀢𑁆𑀢𑀧𑁆𑀧𑀸𑀪𑀸𑀯𑀢𑁄 𑀅𑀧𑀕𑀢𑀯𑀢𑁆𑀣𑀢𑀸𑀬 𑀦𑀕𑁆𑀕𑀸. 𑀯𑀺𑀥𑀼𑀢𑀓𑁂𑀲𑀢𑀸𑀬 𑀧𑀓𑀺𑀡𑁆𑀡𑀓𑁂𑀲𑀻. 𑀢𑁂𑀦 𑀢𑁂𑀦𑀸𑀢𑀺 𑀕𑀸𑀫𑁂𑀦 𑀕𑀸𑀫𑀁 𑀦𑀕𑀭𑁂𑀦 𑀦𑀕𑀭𑀁 𑀯𑀻𑀣𑀺𑀬𑀸 𑀯𑀻𑀣𑀺𑀁 𑀯𑀺𑀘𑀭𑀺𑀁 𑀅𑀳𑀁.

𑀅𑀣𑀸𑀢𑀺 𑀧𑀘𑁆𑀙𑀸 𑀉𑀫𑁆𑀫𑀸𑀤𑀲𑀁𑀯𑀢𑁆𑀢𑀦𑀺𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀬𑁂. 𑀲𑀼𑀕𑀢𑀦𑁆𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀫𑁆𑀫𑀸 𑀕𑀤𑀢𑁆𑀢𑀸 𑀲𑀫𑁆𑀫𑀸 𑀘 𑀕𑀢𑀢𑁆𑀢𑀸 𑀲𑀼𑀕𑀢𑀁 𑀪𑀕𑀯𑀦𑁆𑀢𑀁. 𑀫𑀺𑀣𑀺𑀮𑀁 𑀧𑀢𑀻𑀢𑀺 𑀫𑀺𑀣𑀺𑀮𑀸𑀪𑀺𑀫𑀼𑀔𑀁, 𑀫𑀺𑀣𑀺𑀮𑀸𑀦𑀕𑀭𑀸𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀘𑀺𑀢𑁆𑀢𑀁 𑀧𑀝𑀺𑀮𑀤𑁆𑀥𑀸𑀦𑀸𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀉𑀫𑁆𑀫𑀸𑀤𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀧𑀓𑀢𑀺𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸.

𑀬𑀼𑀜𑁆𑀚𑀦𑁆𑀢𑀻 𑀲𑀢𑁆𑀣𑀼𑀯𑀘𑀦𑁂𑀢𑀺 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀬𑁄𑀕𑀁 𑀓𑀭𑁄𑀦𑁆𑀢𑀻 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀻. 𑀲𑀘𑁆𑀙𑀸𑀓𑀸𑀲𑀺𑀁 𑀧𑀤𑀁 𑀲𑀺𑀯𑀦𑁆𑀢𑀺 𑀲𑀺𑀯𑀁 𑀔𑁂𑀫𑀁 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀁 𑀦𑀺𑀩𑁆𑀩𑀸𑀦𑀁 𑀧𑀤𑀁 𑀲𑀘𑁆𑀙𑀺𑀅𑀓𑀸𑀲𑀺𑀁.

𑀏𑀢𑀤𑀦𑁆𑀢𑀺𑀓𑀸𑀢𑀺 𑀏𑀢𑀁 𑀇𑀤𑀸𑀦𑀺 𑀫𑀬𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀁 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀏𑀢𑁂𑀲𑀦𑁆𑀢𑀺 𑀏𑀢𑀤𑀦𑁆𑀢𑀺𑀓𑀸, 𑀲𑁄𑀓𑀸. 𑀦 𑀤𑀸𑀦𑀺 𑀢𑁂𑀲𑀁 𑀲𑀫𑁆𑀪𑀯𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀢𑁄 𑀲𑁄𑀓𑀸𑀦 𑀲𑀫𑁆𑀪𑀯𑁄𑀢𑀺 𑀬𑀢𑁄 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀸𑀦𑀁 𑀲𑁄𑀓𑀸𑀦𑀁 𑀲𑀫𑁆𑀪𑀯𑁄, 𑀢𑁂𑀲𑀁 𑀲𑁄𑀓𑀸𑀦𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸 𑀯𑀢𑁆𑀣𑀽 𑀅𑀥𑀺𑀝𑁆𑀞𑀸𑀦𑀸𑀦𑀺 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑀸. 𑀢𑀲𑁆𑀫𑀸 𑀲𑁄𑀓𑀸 𑀏𑀢𑀤𑀦𑁆𑀢𑀺𑀓𑀸𑀢𑀺 𑀬𑁄𑀚𑀦𑀸.

𑀯𑀸𑀲𑁂𑀝𑁆𑀞𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀔𑁂𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑀳𑀭𑀸 𑀢𑁆𑀯𑀁 𑀭𑀽𑀧𑀯𑀢𑀻𑀢𑀺𑀆𑀤𑀺𑀓𑀸 𑀔𑁂𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀧𑀭𑀸𑀥𑀻𑀦𑀯𑀼𑀢𑁆𑀢𑀺𑀓𑀸 𑀧𑀭𑁂𑀲𑀁 𑀤𑀸𑀲𑀻 𑀅𑀳𑁄𑀲𑀺. 𑀲𑀸 𑀧𑀭𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻 𑀏𑀓𑀤𑀺𑀯𑀲𑀁 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑀁 𑀲𑀼𑀚𑀸𑀢𑀢𑁆𑀣𑁂𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀬𑁄 𑀫𑁄𑀤𑀓𑁂 𑀤𑀢𑁆𑀯𑀸 𑀢𑀁𑀤𑀺𑀯𑀲𑀫𑁂𑀯 𑀅𑀢𑁆𑀢𑀦𑁄 𑀓𑁂𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀫𑀳𑀸𑀧𑀜𑁆𑀜𑀸 𑀩𑀼𑀤𑁆𑀥𑀲𑁆𑀲 𑀲𑀸𑀯𑀺𑀓𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑁂 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀙𑀓𑀸𑀫𑀲𑀕𑁆𑀕𑁂, 𑀢𑁂𑀲𑀁 𑀢𑁂𑀲𑀁 𑀤𑁂𑀯𑀭𑀸𑀚𑀽𑀦𑀁 𑀫𑀳𑁂𑀲𑀺𑀪𑀸𑀯𑁂𑀦 𑀉𑀧𑀧𑀦𑁆𑀦𑀸, 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀅𑀦𑁂𑀓𑀯𑀸𑀭𑀁 𑀘𑀓𑁆𑀓𑀯𑀢𑁆𑀢𑀻𑀦𑀁 𑀫𑀡𑁆𑀟𑀮𑀭𑀸𑀚𑀽𑀦𑀜𑁆𑀘 𑀫𑀳𑁂𑀲𑀺𑀪𑀸𑀯𑀁 𑀉𑀧𑀕𑀢𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑀸 𑀧𑀩𑁆𑀩𑀚𑀺𑀢𑁆𑀯𑀸 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀓𑀣𑀺𑀓𑀸 𑀳𑀼𑀢𑁆𑀯𑀸 𑀩𑀳𑀼𑀚𑀦𑀲𑁆𑀲 𑀥𑀫𑁆𑀫𑀓𑀣𑀦𑀸𑀤𑀺𑀦𑀸 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀪𑀕𑀯𑀢𑁄 𑀘 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀘 𑀓𑁄𑀡𑀸𑀕𑀫𑀦𑀲𑁆𑀲 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀫𑀳𑀦𑁆𑀢𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺.

𑀪𑀕𑀯𑀢𑁄 𑀧𑀦 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀲𑀩𑁆𑀩𑀚𑁂𑀝𑁆𑀞𑀺𑀓𑀸 𑀲𑀫𑀡𑀻 𑀦𑀸𑀫 𑀥𑀻𑀢𑀸 𑀳𑀼𑀢𑁆𑀯𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑀸 𑀅𑀕𑀸𑀭𑁂𑀬𑁂𑀯 𑀞𑀺𑀢𑀸, 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻 𑀲𑀫𑀡𑀕𑀼𑀢𑁆𑀢𑀸𑀤𑀻𑀳𑀺 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀭𑀫𑀡𑀻𑀬𑀁 𑀧𑀭𑀺𑀯𑁂𑀡𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀏𑀯𑀫𑁂𑀯 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀆𑀬𑀢𑀦𑀕𑀢𑀁 𑀉𑀴𑀸𑀭𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀤𑁆𑀤𑀭𑀝𑁆𑀞𑁂 𑀲𑀸𑀓𑀮𑀦𑀕𑀭𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀔𑁂𑀫𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺, 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀸. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀕𑁂𑀳𑀁 𑀕𑀢𑀸. 𑀲𑀢𑁆𑀣𑀭𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀭𑀽𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀭𑀽𑀧𑁂 𑀤𑁄𑀲𑀁 𑀤𑀲𑁆𑀲𑁂𑀢𑀻’’𑀢𑀺 𑀲𑀢𑁆𑀣𑀼 𑀤𑀲𑁆𑀲𑀦𑀸𑀬 𑀦 𑀕𑀘𑁆𑀙𑀢𑀺.

𑀭𑀸𑀚𑀸 𑀫𑀦𑀼𑀲𑁆𑀲𑁂𑀳𑀺 𑀯𑁂𑀴𑀼𑀯𑀦𑀲𑁆𑀲 𑀯𑀡𑁆𑀡𑁂 𑀧𑀓𑀸𑀲𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀯𑀺𑀳𑀸𑀭𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣 𑀤𑁂𑀯𑀻 ‘‘𑀯𑀺𑀳𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀧𑀝𑀺𑀧𑀼𑀘𑁆𑀙𑀺. 𑀭𑀸𑀚𑀸 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀤𑀺𑀲𑁆𑀯𑀸 𑀆𑀕𑀦𑁆𑀢𑀼𑀁 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀲𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀩𑀮𑀓𑁆𑀓𑀸𑀭𑁂𑀦𑀧𑀺 𑀤𑁂𑀯𑀺𑀁 𑀤𑀲𑀩𑀮𑀁 𑀤𑀲𑁆𑀲𑁂𑀣𑀸’’𑀢𑀺. 𑀤𑁂𑀯𑀻 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀲𑀪𑀸𑀕𑀁 𑀔𑁂𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑁂𑀦𑁆𑀢𑀻 𑀲𑀢𑁆𑀣𑀸𑀭𑀁 𑀅𑀤𑀺𑀲𑁆𑀯𑀸𑀯 𑀕𑀦𑁆𑀢𑀼𑀁 𑀆𑀭𑀤𑁆𑀥𑀸. 𑀅𑀣 𑀦𑀁 𑀭𑀸𑀚𑀧𑀼𑀭𑀺𑀲𑀸 𑀅𑀦𑀺𑀘𑁆𑀙𑀦𑁆𑀢𑀺𑀫𑁆𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀇𑀤𑁆𑀥𑀺𑀬𑀸 𑀤𑁂𑀯𑀘𑁆𑀙𑀭𑀸𑀲𑀤𑀺𑀲𑀁 𑀇𑀢𑁆𑀣𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀸𑀮𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 𑀩𑀻𑀚𑀬𑀫𑀸𑀦𑀁 𑀅𑀓𑀸𑀲𑀺. 𑀔𑁂𑀫𑀸 𑀤𑁂𑀯𑀻 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀭𑀽𑀧𑀸 𑀦𑀸𑀫 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀇𑀢𑁆𑀣𑀺𑀬𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀢𑀺𑀝𑁆𑀞𑀦𑁆𑀢𑀺, 𑀅𑀳𑀁 𑀏𑀢𑀸𑀲𑀁 𑀧𑀭𑀺𑀘𑀸𑀭𑀺𑀓𑀢𑀸𑀬𑀧𑀺 𑀦𑀧𑁆𑀧𑀳𑁄𑀫𑀺, 𑀫𑀦𑀫𑁆𑀧𑀺 𑀦𑀺𑀓𑁆𑀓𑀸𑀭𑀡𑀸 𑀧𑀸𑀧𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀝𑁆𑀞𑀸’’𑀢𑀺 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀫𑁂𑀯 𑀇𑀢𑁆𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀧𑀲𑁆𑀲𑀦𑁆𑀢𑀺𑀬𑀸𑀯 𑀲𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀲𑀸 𑀇𑀢𑁆𑀣𑀻 𑀧𑀞𑀫𑀯𑀬𑀁 𑀅𑀢𑀺𑀓𑁆𑀓𑀫𑁆𑀫 𑀫𑀚𑁆𑀛𑀺𑀫𑀯𑀬𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀧𑀘𑁆𑀙𑀺𑀫𑀯𑀬𑀁 𑀧𑀢𑁆𑀯𑀸 𑀔𑀡𑁆𑀟𑀤𑀦𑁆𑀢𑀸 𑀧𑀮𑀺𑀢𑀓𑁂𑀲𑀸 𑀯𑀮𑀺𑀢𑁆𑀢𑀘𑀸 𑀳𑀼𑀢𑁆𑀯𑀸 𑀲𑀤𑁆𑀥𑀺𑀁 𑀢𑀸𑀮𑀧𑀡𑁆𑀡𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺. 𑀢𑀢𑁄 𑀔𑁂𑀫𑀸 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁𑀯𑀺𑀥𑀫𑁆𑀧𑀺 𑀲𑀭𑀻𑀭𑀁 𑀈𑀤𑀺𑀲𑀁 𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀺, 𑀫𑀬𑁆𑀳𑀫𑁆𑀧𑀺 𑀲𑀭𑀻𑀭𑀁 𑀏𑀯𑀁𑀕𑀢𑀺𑀓𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀲𑀢𑁆𑀣𑀸 𑁋

‘‘𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁, 𑀲𑀬𑀁 𑀓𑀢𑀁 𑀫𑀓𑁆𑀓𑀝𑀓𑁄𑀯 𑀚𑀸𑀮𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺. 𑁋

𑀕𑀸𑀣𑀫𑀸𑀳. 𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀁. 𑀅𑀧𑀤𑀸𑀦𑁂 𑀧𑀦 ‘‘𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸 𑀭𑀸𑀚𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻’’𑀢𑀺 𑀆𑀕𑀢𑀁. 𑀢𑀢𑁆𑀣𑀸𑀬𑀁 𑀅𑀧𑀤𑀸𑀦𑀧𑀸𑀴𑀺 (𑀅𑀧. 𑀣𑁂𑀭𑀻 𑁨.𑁨.𑁨𑁮𑁯-𑁩𑁮𑁩) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀫𑀳𑀸𑀲𑀼𑀔𑀲𑀫𑀧𑁆𑀧𑀺𑀢𑀸.

‘‘𑀉𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀢𑀢𑁄 𑀚𑀸𑀢𑀧𑁆𑀧𑀲𑀸𑀤𑀸𑀳𑀁, 𑀉𑀧𑁂𑀫𑀺 𑀲𑀭𑀡𑀁 𑀚𑀺𑀦𑀁.

‘‘𑀫𑀸𑀢𑀭𑀁 𑀧𑀺𑀢𑀭𑀁 𑀘𑀸𑀳𑀁, 𑀆𑀬𑀸𑀘𑀺𑀢𑁆𑀯𑀸 𑀯𑀺𑀦𑀸𑀬𑀓𑀁;

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀲𑀢𑁆𑀢𑀸𑀳𑀁, 𑀪𑁄𑀚𑀬𑀺𑀁 𑀲𑀳𑀲𑀸𑀯𑀓𑀁.

‘‘𑀅𑀢𑀺𑀓𑁆𑀓𑀦𑁆𑀢𑁂 𑀘 𑀲𑀢𑁆𑀢𑀸𑀳𑁂, 𑀫𑀳𑀸𑀧𑀜𑁆𑀜𑀸𑀦𑀫𑀼𑀢𑁆𑀢𑀫𑀁;

𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀕𑁆𑀕𑀫𑁆𑀳𑀺, 𑀞𑀧𑁂𑀲𑀺 𑀦𑀭𑀲𑀸𑀭𑀣𑀺.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀧𑀼𑀦𑁄 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀓𑀸𑀭𑀁 𑀓𑀢𑁆𑀯𑀸𑀦 𑀢𑀁 𑀞𑀸𑀦𑀁, 𑀧𑀡𑀺𑀧𑀘𑁆𑀘 𑀧𑀡𑀻𑀤𑀳𑀺𑀁.

‘‘𑀢𑀢𑁄 𑀫𑀫 𑀚𑀺𑀦𑁄 𑀆𑀳, 𑀲𑀺𑀚𑁆𑀛𑀢𑀁 𑀧𑀡𑀺𑀥𑀻 𑀢𑀯;

𑀲𑀲𑀗𑁆𑀖𑁂 𑀫𑁂 𑀓𑀢𑀁 𑀓𑀸𑀭𑀁, 𑀅𑀧𑁆𑀧𑀫𑁂𑀬𑁆𑀬𑀨𑀮𑀁 𑀢𑀬𑀸.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀏𑀢𑀤𑀕𑁆𑀕𑀫𑀦𑀼𑀧𑁆𑀧𑀢𑁆𑀢𑀸, 𑀔𑁂𑀫𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑀸 𑀅𑀳𑀁.

‘‘𑀢𑀢𑁄 𑀘𑀼𑀢𑀸 𑀬𑀸𑀫𑀫𑀕𑀁, 𑀢𑀢𑁄𑀳𑀁 𑀢𑀼𑀲𑀺𑀢𑀁 𑀕𑀢𑀸;

𑀢𑀢𑁄 𑀘 𑀦𑀺𑀫𑁆𑀫𑀸𑀦𑀭𑀢𑀺𑀁, 𑀯𑀲𑀯𑀢𑁆𑀢𑀺𑀧𑀼𑀭𑀁 𑀢𑀢𑁄.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑀢𑁆𑀢𑁂, 𑀭𑀸𑀚𑀽𑀦𑀁 𑀘𑀓𑁆𑀓𑀯𑀢𑁆𑀢𑀺𑀦𑀁;

𑀫𑀡𑁆𑀟𑀮𑀻𑀦𑀜𑁆𑀘 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀦𑀼𑀚𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸, 𑀦𑁂𑀓𑀓𑀧𑁆𑀧𑁂𑀲𑀼 𑀲𑀁𑀲𑀭𑀺𑀁.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀮𑁄𑀓𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

‘‘𑀢𑀫𑀳𑀁 𑀮𑁄𑀓𑀦𑀸𑀬𑀓𑀁, 𑀉𑀧𑁂𑀢𑁆𑀯𑀸 𑀦𑀭𑀲𑀸𑀭𑀣𑀺𑀁;

𑀥𑀫𑁆𑀫𑀁 𑀪𑀡𑀺𑀢𑀁 𑀲𑀼𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀲𑁆𑀲 𑀯𑀻𑀭𑀲𑁆𑀲 𑀲𑀸𑀲𑀦𑁂;

𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸𑀦, 𑀬𑀼𑀢𑁆𑀢𑀬𑁄𑀕𑀸 𑀩𑀳𑀼𑀲𑁆𑀲𑀼𑀢𑀸.

‘‘𑀧𑀘𑁆𑀘𑀬𑀸𑀓𑀸𑀭𑀓𑀼𑀲𑀮𑀸, 𑀘𑀢𑀼𑀲𑀘𑁆𑀘𑀯𑀺𑀲𑀸𑀭𑀤𑀸;

𑀦𑀺𑀧𑀼𑀡𑀸 𑀘𑀺𑀢𑁆𑀢𑀓𑀣𑀺𑀓𑀸, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸.

‘‘𑀢𑀢𑁄 𑀘𑀼𑀢𑀸𑀳𑀁 𑀢𑀼𑀲𑀺𑀢𑀁, 𑀉𑀧𑀧𑀦𑁆𑀦𑀸 𑀬𑀲𑀲𑁆𑀲𑀺𑀦𑀻;

𑀅𑀪𑀺𑀪𑁄𑀫𑀺 𑀢𑀳𑀺𑀁 𑀅𑀜𑁆𑀜𑁂, 𑀩𑁆𑀭𑀳𑁆𑀫𑀘𑀸𑀭𑀻𑀨𑀮𑁂𑀦𑀳𑀁.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀦𑁆𑀦𑀸𑀳𑀁, 𑀫𑀳𑀸𑀪𑁄𑀕𑀸 𑀫𑀳𑀤𑁆𑀥𑀦𑀸;

𑀫𑁂𑀥𑀸𑀯𑀺𑀦𑀻 𑀲𑀻𑀮𑀯𑀢𑀻, 𑀯𑀺𑀦𑀻𑀢𑀧𑀭𑀺𑀲𑀸𑀧𑀺 𑀘.

‘‘𑀪𑀯𑀸𑀫𑀺 𑀢𑁂𑀦 𑀓𑀫𑁆𑀫𑁂𑀦, 𑀬𑁄𑀕𑁂𑀦 𑀚𑀺𑀦𑀲𑀸𑀲𑀦𑁂;

𑀲𑀩𑁆𑀩𑀸 𑀲𑀫𑁆𑀧𑀢𑁆𑀢𑀺𑀬𑁄 𑀫𑀬𑁆𑀳𑀁, 𑀲𑀼𑀮𑀪𑀸 𑀫𑀦𑀲𑁄 𑀧𑀺𑀬𑀸.

‘‘𑀬𑁄𑀧𑀺 𑀫𑁂 𑀪𑀯𑀢𑁂 𑀪𑀢𑁆𑀢𑀸, 𑀬𑀢𑁆𑀣 𑀬𑀢𑁆𑀣 𑀕𑀢𑀸𑀬𑀧𑀺;

𑀯𑀺𑀫𑀸𑀦𑁂𑀢𑀺 𑀦 𑀫𑀁 𑀓𑁄𑀘𑀺, 𑀧𑀝𑀺𑀧𑀢𑁆𑀢𑀺𑀩𑀮𑁂𑀦 𑀫𑁂.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀦𑀸𑀫𑁂𑀦 𑀓𑁄𑀡𑀸𑀕𑀫𑀦𑁄, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀁, 𑀲𑀼𑀲𑀫𑀺𑀤𑁆𑀥𑀓𑀼𑀮𑀧𑁆𑀧𑀚𑀸;

𑀥𑀦𑀜𑁆𑀚𑀸𑀦𑀻 𑀲𑀼𑀫𑁂𑀥𑀸 𑀘, 𑀅𑀳𑀫𑁆𑀧𑀺 𑀘 𑀢𑀬𑁄 𑀚𑀦𑀸.

‘‘𑀲𑀗𑁆𑀖𑀸𑀭𑀸𑀫𑀫𑀤𑀸𑀲𑀺𑀫𑁆𑀳, 𑀤𑀸𑀦𑀲𑀳𑀸𑀬𑀺𑀓𑀸 𑀧𑀼𑀭𑁂;

𑀲𑀗𑁆𑀖𑀲𑁆𑀲 𑀘 𑀯𑀺𑀳𑀸𑀭𑀫𑁆𑀧𑀺, 𑀉𑀤𑁆𑀤𑀺𑀲𑁆𑀲 𑀓𑀸𑀭𑀺𑀓𑀸 𑀫𑀬𑀁.

‘‘𑀢𑀢𑁄 𑀘𑀼𑀢𑀸 𑀫𑀬𑀁 𑀲𑀩𑁆𑀩𑀸, 𑀢𑀸𑀯𑀢𑀺𑀁𑀲𑀽𑀧𑀕𑀸 𑀅𑀳𑀼𑀁;

𑀬𑀲𑀲𑀸 𑀅𑀕𑁆𑀕𑀢𑀁 𑀧𑀢𑁆𑀢𑀸, 𑀫𑀦𑀼𑀲𑁆𑀲𑁂𑀲𑀼 𑀢𑀣𑁂𑀯 𑀘.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀢𑀲𑁆𑀲𑀸𑀲𑀺𑀁 𑀚𑁂𑀝𑁆𑀞𑀺𑀓𑀸 𑀥𑀻𑀢𑀸, 𑀲𑀫𑀡𑀻 𑀇𑀢𑀺 𑀯𑀺𑀲𑁆𑀲𑀼𑀢𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢 𑀥𑀻𑀢𑀭𑁄.

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸.

‘‘𑀅𑀳𑀁 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀧𑀝𑀸𑀘𑀸𑀭𑀸 𑀘 𑀓𑀼𑀡𑁆𑀟𑀮𑀸;

𑀓𑀺𑀲𑀸𑀕𑁄𑀢𑀫𑀻 𑀥𑀫𑁆𑀫𑀤𑀺𑀦𑁆𑀦𑀸, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

‘‘𑀓𑀤𑀸𑀘𑀺 𑀲𑁄 𑀦𑀭𑀸𑀤𑀺𑀘𑁆𑀘𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀅𑀩𑁆𑀪𑀼𑀢𑀁;

𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀦𑁆𑀢𑀁, 𑀲𑀼𑀢𑁆𑀯𑀸 𑀢𑀁 𑀧𑀭𑀺𑀬𑀸𑀧𑀼𑀡𑀺𑀁.

‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀲𑀸𑀓𑀮𑀸𑀬 𑀧𑀼𑀭𑀼𑀢𑁆𑀢𑀫𑁂;

𑀭𑀜𑁆𑀜𑁄 𑀫𑀤𑁆𑀤𑀲𑁆𑀲 𑀥𑀻𑀢𑀸𑀫𑁆𑀳𑀺, 𑀫𑀦𑀸𑀧𑀸 𑀤𑀬𑀺𑀢𑀸 𑀧𑀺𑀬𑀸.

‘‘𑀲𑀳 𑀫𑁂 𑀚𑀸𑀢𑀫𑀢𑁆𑀢𑀫𑁆𑀳𑀺, 𑀔𑁂𑀫𑀁 𑀢𑀫𑁆𑀳𑀺 𑀧𑀼𑀭𑁂 𑀅𑀳𑀼;

𑀢𑀢𑁄 𑀔𑁂𑀫𑀸𑀢𑀺 𑀦𑀸𑀫𑀁 𑀫𑁂, 𑀕𑀼𑀡𑀢𑁄 𑀉𑀧𑀧𑀚𑁆𑀚𑀣.

‘‘𑀬𑀤𑀸𑀳𑀁 𑀬𑁄𑀩𑁆𑀩𑀦𑀁 𑀧𑀢𑁆𑀢𑀸, 𑀭𑀽𑀧𑀮𑀸𑀯𑀜𑁆𑀜𑀪𑀽𑀲𑀺𑀢𑀸;

𑀢𑀤𑀸 𑀅𑀤𑀸𑀲𑀺 𑀫𑀁 𑀢𑀸𑀢𑁄, 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀭𑀸𑀚𑀺𑀦𑁄.

‘‘𑀢𑀲𑁆𑀲𑀸𑀳𑀁 𑀲𑀼𑀧𑁆𑀧𑀺𑀬𑀸 𑀆𑀲𑀺𑀁, 𑀭𑀽𑀧𑀓𑁂𑀮𑀸𑀬𑀦𑁂 𑀭𑀢𑀸;

𑀭𑀽𑀧𑀸𑀦𑀁 𑀤𑁄𑀲𑀯𑀸𑀤𑀻𑀢𑀺, 𑀦 𑀉𑀧𑁂𑀲𑀺𑀁 𑀫𑀳𑀸𑀤𑀬𑀁.

‘‘𑀩𑀺𑀫𑁆𑀩𑀺𑀲𑀸𑀭𑁄 𑀢𑀤𑀸 𑀭𑀸𑀚𑀸, 𑀫𑀫𑀸𑀦𑀼𑀕𑁆𑀕𑀳𑀩𑀼𑀤𑁆𑀥𑀺𑀬𑀸;

𑀯𑀡𑁆𑀡𑀬𑀺𑀢𑁆𑀯𑀸 𑀯𑁂𑀴𑀼𑀯𑀦𑀁, 𑀕𑀸𑀬𑀓𑁂 𑀕𑀸𑀧𑀬𑀻 𑀫𑀫𑀁.

‘‘𑀭𑀫𑁆𑀫𑀁 𑀯𑁂𑀴𑀼𑀯𑀦𑀁 𑀬𑁂𑀦, 𑀦 𑀤𑀺𑀝𑁆𑀞𑀁 𑀲𑀼𑀕𑀢𑀸𑀮𑀬𑀁;

𑀦 𑀢𑁂𑀦 𑀦𑀦𑁆𑀤𑀦𑀁 𑀤𑀺𑀝𑁆𑀞𑀁, 𑀇𑀢𑀺 𑀫𑀜𑁆𑀜𑀸𑀫𑀲𑁂 𑀫𑀬𑀁.

‘‘𑀬𑁂𑀦 𑀯𑁂𑀴𑀼𑀯𑀦𑀁 𑀤𑀺𑀝𑁆𑀞𑀁, 𑀦𑀭𑀦𑀦𑁆𑀤𑀦𑀦𑀦𑁆𑀤𑀦𑀁;

𑀲𑀼𑀤𑀺𑀝𑁆𑀞𑀁 𑀦𑀦𑁆𑀤𑀦𑀁 𑀢𑁂𑀦, 𑀅𑀫𑀭𑀺𑀦𑁆𑀤𑀲𑀼𑀦𑀦𑁆𑀤𑀦𑀁.

‘‘𑀯𑀺𑀳𑀸𑀬 𑀦𑀦𑁆𑀤𑀦𑀁 𑀤𑁂𑀯𑀸, 𑀑𑀢𑀭𑀺𑀢𑁆𑀯𑀸 𑀫𑀳𑀻𑀢𑀮𑀁;

𑀭𑀫𑁆𑀫𑀁 𑀯𑁂𑀴𑀼𑀯𑀦𑀁 𑀤𑀺𑀲𑁆𑀯𑀸, 𑀦 𑀢𑀧𑁆𑀧𑀦𑁆𑀢𑀺 𑀲𑀼𑀯𑀺𑀫𑁆𑀳𑀺𑀢𑀸.

‘‘𑀭𑀸𑀚𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀩𑀼𑀤𑁆𑀥𑀧𑀼𑀜𑁆𑀜𑁂𑀦 𑀪𑀽𑀲𑀺𑀢𑀁;

𑀓𑁄 𑀯𑀢𑁆𑀢𑀸 𑀢𑀲𑁆𑀲 𑀦𑀺𑀲𑁆𑀲𑁂𑀲𑀁, 𑀯𑀦𑀲𑁆𑀲 𑀕𑀼𑀡𑀲𑀜𑁆𑀘𑀬𑀁.

‘‘𑀢𑀁 𑀲𑀼𑀢𑁆𑀯𑀸 𑀯𑀦𑀲𑀫𑀺𑀤𑁆𑀥𑀁, 𑀫𑀫 𑀲𑁄𑀢𑀫𑀦𑁄𑀳𑀭𑀁;

𑀤𑀝𑁆𑀞𑀼𑀓𑀸𑀫𑀸 𑀢𑀫𑀼𑀬𑁆𑀬𑀸𑀦𑀁, 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁 𑀢𑀤𑀸.

‘‘𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀢𑀤𑀸 𑀘 𑀲𑁄 𑀫𑀳𑀻𑀧𑀢𑀺;

𑀫𑀁 𑀧𑁂𑀲𑁂𑀲𑀺 𑀢𑀫𑀼𑀬𑁆𑀬𑀸𑀦𑀁, 𑀤𑀲𑁆𑀲𑀦𑀸𑀬 𑀲𑀫𑀼𑀲𑁆𑀲𑀼𑀓𑀁.

‘‘𑀕𑀘𑁆𑀙 𑀧𑀲𑁆𑀲 𑀫𑀳𑀸𑀪𑁄𑀕𑁂, 𑀯𑀦𑀁 𑀦𑁂𑀢𑁆𑀢𑀭𑀲𑀸𑀬𑀦𑀁;

𑀬𑀁 𑀲𑀤𑀸 𑀪𑀸𑀢𑀺 𑀲𑀺𑀭𑀺𑀬𑀸, 𑀲𑀼𑀕𑀢𑀸𑀪𑀸𑀦𑀼𑀭𑀜𑁆𑀚𑀺𑀢𑀁.

‘‘𑀬𑀤𑀸 𑀘 𑀧𑀺𑀡𑁆𑀟𑀸𑀬 𑀫𑀼𑀦𑀺, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑀁;

𑀧𑀯𑀺𑀝𑁆𑀞𑁄𑀳𑀁 𑀢𑀤𑀸𑀬𑁂𑀯, 𑀯𑀦𑀁 𑀤𑀝𑁆𑀞𑀼𑀫𑀼𑀧𑀸𑀕𑀫𑀺𑀁.

‘‘𑀢𑀤𑀸 𑀢𑀁 𑀨𑀼𑀮𑁆𑀮𑀯𑀺𑀧𑀺𑀦𑀁, 𑀦𑀸𑀦𑀸𑀪𑀫𑀭𑀓𑀽𑀚𑀺𑀢𑀁;

𑀓𑁄𑀓𑀺𑀮𑀸𑀕𑀻𑀢𑀲𑀳𑀺𑀢𑀁, 𑀫𑀬𑀽𑀭𑀕𑀡𑀦𑀘𑁆𑀘𑀺𑀢𑀁.

‘‘𑀅𑀧𑁆𑀧𑀲𑀤𑁆𑀤𑀫𑀦𑀸𑀓𑀺𑀡𑁆𑀡𑀁, 𑀦𑀸𑀦𑀸𑀘𑀗𑁆𑀓𑀫𑀪𑀽𑀲𑀺𑀢𑀁;

𑀓𑀼𑀝𑀺𑀫𑀡𑁆𑀟𑀧𑀲𑀁𑀓𑀺𑀡𑁆𑀡𑀁, 𑀬𑁄𑀕𑀻𑀯𑀭𑀯𑀺𑀭𑀸𑀚𑀺𑀢𑀁.

‘‘𑀯𑀺𑀘𑀭𑀦𑁆𑀢𑀻 𑀅𑀫𑀜𑁆𑀜𑀺𑀲𑁆𑀲𑀁, 𑀲𑀨𑀮𑀁 𑀦𑀬𑀦𑀁 𑀫𑀫;

𑀢𑀢𑁆𑀣𑀸𑀧𑀺 𑀢𑀭𑀼𑀡𑀁 𑀪𑀺𑀓𑁆𑀔𑀼𑀁, 𑀬𑀼𑀢𑁆𑀢𑀁 𑀤𑀺𑀲𑁆𑀯𑀸 𑀯𑀺𑀘𑀺𑀦𑁆𑀢𑀬𑀺𑀁.

‘‘𑀈𑀤𑀺𑀲𑁂 𑀯𑀺𑀧𑀺𑀦𑁂 𑀭𑀫𑁆𑀫𑁂, 𑀞𑀺𑀢𑁄𑀬𑀁 𑀦𑀯𑀬𑁄𑀩𑁆𑀩𑀦𑁂;

𑀯𑀲𑀦𑁆𑀢𑀫𑀺𑀯 𑀓𑀦𑁆𑀢𑁂𑀦, 𑀭𑀽𑀧𑁂𑀦 𑀘 𑀲𑀫𑀦𑁆𑀯𑀺𑀢𑁄.

‘‘𑀦𑀺𑀲𑀺𑀦𑁆𑀦𑁄 𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀫𑀼𑀡𑁆𑀟𑁄 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁄;

𑀛𑀸𑀬𑀢𑁂 𑀯𑀢𑀬𑀁 𑀪𑀺𑀓𑁆𑀔𑀼, 𑀳𑀺𑀢𑁆𑀯𑀸 𑀯𑀺𑀲𑀬𑀚𑀁 𑀭𑀢𑀺𑀁.

‘‘𑀦𑀦𑀼 𑀦𑀸𑀫 𑀕𑀳𑀝𑁆𑀞𑁂𑀦, 𑀓𑀸𑀫𑀁 𑀪𑀼𑀢𑁆𑀯𑀸 𑀬𑀣𑀸𑀲𑀼𑀔𑀁;

𑀧𑀘𑁆𑀙𑀸 𑀚𑀺𑀡𑁆𑀡𑁂𑀦 𑀥𑀫𑁆𑀫𑁄𑀬𑀁, 𑀘𑀭𑀺𑀢𑀩𑁆𑀩𑁄 𑀲𑀼𑀪𑀤𑁆𑀤𑀓𑁄.

‘‘𑀲𑀼𑀜𑁆𑀜𑀓𑀦𑁆𑀢𑀺 𑀯𑀺𑀤𑀺𑀢𑁆𑀯𑀸𑀦, 𑀕𑀦𑁆𑀥𑀕𑁂𑀳𑀁 𑀚𑀺𑀦𑀸𑀮𑀬𑀁;

𑀉𑀧𑁂𑀢𑁆𑀯𑀸 𑀚𑀺𑀦𑀫𑀤𑁆𑀤𑀓𑁆𑀔𑀁, 𑀉𑀤𑀬𑀦𑁆𑀢𑀁 𑀯 𑀪𑀸𑀓𑀭𑀁.

‘‘𑀏𑀓𑀓𑀁 𑀲𑀼𑀔𑀫𑀸𑀲𑀻𑀦𑀁, 𑀩𑀻𑀚𑀫𑀸𑀦𑀁 𑀯𑀭𑀺𑀢𑁆𑀣𑀺𑀬𑀸;

𑀤𑀺𑀲𑁆𑀯𑀸𑀦𑁂𑀯𑀁 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀦𑀸𑀬𑀁 𑀮𑀽𑀔𑁄 𑀦𑀭𑀸𑀲𑀪𑁄.

‘‘𑀲𑀸 𑀓𑀜𑁆𑀜𑀸 𑀓𑀦𑀓𑀸𑀪𑀸𑀲𑀸, 𑀧𑀤𑀼𑀫𑀸𑀦𑀦𑀮𑁄𑀘𑀦𑀸;

𑀩𑀺𑀫𑁆𑀩𑁄𑀝𑁆𑀞𑀻 𑀓𑀼𑀦𑁆𑀤𑀤𑀲𑀦𑀸, 𑀫𑀦𑁄𑀦𑁂𑀢𑁆𑀢𑀭𑀲𑀸𑀬𑀦𑀸.

‘‘𑀳𑁂𑀫𑀤𑁄𑀮𑀸𑀪𑀲𑀯𑀦𑀸, 𑀓𑀮𑀺𑀓𑀸𑀓𑀸𑀭𑀲𑀼𑀢𑁆𑀣𑀦𑀻;

𑀯𑁂𑀤𑀺𑀫𑀚𑁆𑀛𑀸𑀯 𑀲𑀼𑀲𑁆𑀲𑁄𑀡𑀻, 𑀭𑀫𑁆𑀪𑁄𑀭𑀼 𑀘𑀸𑀭𑀼𑀪𑀽𑀲𑀦𑀸.

‘‘𑀭𑀢𑁆𑀢𑀁𑀲𑀓𑀼𑀧𑀲𑀁𑀩𑁆𑀬𑀸𑀦𑀸, 𑀦𑀻𑀮𑀫𑀝𑁆𑀞𑀦𑀺𑀯𑀸𑀲𑀦𑀸;

𑀅𑀢𑀧𑁆𑀧𑀦𑁂𑀬𑁆𑀬𑀭𑀽𑀧𑁂𑀦, 𑀳𑀸𑀲𑀪𑀸𑀯𑀲𑀫𑀦𑁆𑀯𑀺𑀢𑀸.

‘‘𑀤𑀺𑀲𑁆𑀯𑀸 𑀢𑀫𑁂𑀯𑀁 𑀘𑀺𑀦𑁆𑀢𑁂𑀲𑀺𑀁, 𑀅𑀳𑁄𑀬𑀫𑀪𑀺𑀭𑀽𑀧𑀺𑀦𑀻;

𑀦 𑀫𑀬𑀸𑀦𑁂𑀦 𑀦𑁂𑀢𑁆𑀢𑁂𑀦, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀓𑀼𑀤𑀸𑀘𑀦𑀁.

‘‘𑀢𑀢𑁄 𑀚𑀭𑀸𑀪𑀺𑀪𑀽𑀢𑀸 𑀲𑀸, 𑀯𑀺𑀯𑀡𑁆𑀡𑀸 𑀯𑀺𑀓𑀢𑀸𑀦𑀦𑀸;

𑀪𑀺𑀦𑁆𑀦𑀤𑀦𑁆𑀢𑀸 𑀲𑁂𑀢𑀲𑀺𑀭𑀸, 𑀲𑀮𑀸𑀮𑀸 𑀯𑀤𑀦𑀸𑀲𑀼𑀘𑀺.

‘‘𑀲𑀁𑀔𑀺𑀢𑁆𑀢𑀓𑀡𑁆𑀡𑀸 𑀲𑁂𑀢𑀓𑁆𑀔𑀻, 𑀮𑀫𑁆𑀩𑀸𑀲𑀼𑀪𑀧𑀬𑁄𑀥𑀭𑀸;

𑀯𑀮𑀺𑀯𑀺𑀢𑀢𑀲𑀩𑁆𑀩𑀗𑁆𑀕𑀻, 𑀲𑀺𑀭𑀸𑀯𑀺𑀢𑀢𑀤𑁂𑀳𑀺𑀦𑀻.

‘‘𑀦𑀢𑀗𑁆𑀕𑀸 𑀤𑀡𑁆𑀟𑀤𑀼𑀢𑀺𑀬𑀸, 𑀉𑀧𑁆𑀨𑀸𑀲𑀼𑀮𑀺𑀓𑀢𑀸 𑀓𑀺𑀲𑀸;

𑀧𑀯𑁂𑀥𑀫𑀸𑀦𑀸 𑀧𑀢𑀺𑀢𑀸, 𑀦𑀺𑀲𑁆𑀲𑀲𑀦𑁆𑀢𑀻 𑀫𑀼𑀳𑀼𑀁 𑀫𑀼𑀳𑀼𑀁.

‘‘𑀢𑀢𑁄 𑀫𑁂 𑀆𑀲𑀺 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄;

𑀥𑀺𑀭𑀢𑁆𑀣𑀼 𑀭𑀽𑀧𑀁 𑀅𑀲𑀼𑀘𑀺𑀁, 𑀭𑀫𑀦𑁆𑀢𑁂 𑀬𑀢𑁆𑀣 𑀩𑀸𑀮𑀺𑀲𑀸.

‘‘𑀢𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀕𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀔𑁂𑀫𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

‘‘𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸 𑀩𑀳𑀼𑀮𑀸 𑀪𑀯.

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀓𑀸𑀬𑁂 𑀙𑀦𑁆𑀤𑀁 𑀯𑀺𑀭𑀸𑀚𑀬.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀺.

‘‘𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁, 𑀲𑀬𑀁 𑀓𑀢𑀁 𑀫𑀓𑁆𑀓𑀝𑀓𑁄𑀯 𑀚𑀸𑀮𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬.

‘‘𑀢𑀢𑁄 𑀓𑀮𑁆𑀮𑀺𑀢𑀘𑀺𑀢𑁆𑀢𑀁 𑀫𑀁, 𑀜𑀢𑁆𑀯𑀸𑀦 𑀦𑀭𑀲𑀸𑀭𑀣𑀺;

𑀫𑀳𑀸𑀦𑀺𑀤𑀸𑀦𑀁 𑀤𑁂𑀲𑁂𑀲𑀺, 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀸𑀬 𑀫𑁂.

‘‘𑀲𑀼𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀲𑁂𑀝𑁆𑀞𑀁 𑀢𑀁, 𑀧𑀼𑀩𑁆𑀩𑀲𑀜𑁆𑀜𑀫𑀦𑀼𑀲𑁆𑀲𑀭𑀺𑀁;

𑀢𑀢𑁆𑀣 𑀞𑀺𑀢𑀸𑀯𑀳𑀁 𑀲𑀦𑁆𑀢𑀻, 𑀥𑀫𑁆𑀫𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁.

‘‘𑀦𑀺𑀧𑀢𑀺𑀢𑁆𑀯𑀸 𑀫𑀳𑁂𑀲𑀺𑀲𑁆𑀲, 𑀧𑀸𑀤𑀫𑀽𑀮𑀫𑁆𑀳𑀺 𑀢𑀸𑀯𑀤𑁂;

𑀅𑀘𑁆𑀘𑀬𑀁 𑀤𑁂𑀲𑀦𑀢𑁆𑀣𑀸𑀬, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀦𑀫𑁄 𑀢𑁂 𑀲𑀩𑁆𑀩𑀤𑀲𑁆𑀲𑀸𑀯𑀺, 𑀦𑀫𑁄 𑀢𑁂 𑀓𑀭𑀼𑀡𑀸𑀓𑀭;

𑀦𑀫𑁄 𑀢𑁂 𑀢𑀺𑀡𑁆𑀡𑀲𑀁𑀲𑀸𑀭, 𑀦𑀫𑁄 𑀢𑁂 𑀅𑀫𑀢𑀁 𑀤𑀤.

‘‘𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑀸, 𑀓𑀸𑀫𑀭𑀸𑀕𑀯𑀺𑀫𑁄𑀳𑀺𑀢𑀸;

𑀢𑀬𑀸 𑀲𑀫𑁆𑀫𑀸 𑀉𑀧𑀸𑀬𑁂𑀦, 𑀯𑀺𑀦𑀻𑀢𑀸 𑀯𑀺𑀦𑀬𑁂 𑀭𑀢𑀸.

‘‘𑀅𑀤𑀲𑁆𑀲𑀦𑁂𑀦 𑀯𑀺𑀪𑁄𑀕𑀸, 𑀢𑀸𑀤𑀺𑀲𑀸𑀦𑀁 𑀫𑀳𑁂𑀲𑀺𑀦𑀁;

𑀅𑀦𑀼𑀪𑁄𑀦𑁆𑀢𑀺 𑀫𑀳𑀸𑀤𑀼𑀓𑁆𑀔𑀁, 𑀲𑀢𑁆𑀢𑀸 𑀲𑀁𑀲𑀸𑀭𑀲𑀸𑀕𑀭𑁂.

‘‘𑀬𑀤𑀸𑀳𑀁 𑀮𑁄𑀓𑀲𑀭𑀡𑀁, 𑀅𑀭𑀡𑀁 𑀅𑀭𑀡𑀦𑁆𑀢𑀕𑀼𑀁;

𑀦𑀸𑀤𑁆𑀤𑀲𑀸𑀫𑀺 𑀅𑀤𑀽𑀭𑀝𑁆𑀞𑀁, 𑀤𑁂𑀲𑀬𑀸𑀫𑀺 𑀢𑀫𑀘𑁆𑀘𑀬𑀁.

‘‘𑀫𑀳𑀸𑀳𑀺𑀢𑀁 𑀯𑀭𑀤𑀤𑀁, 𑀅𑀳𑀺𑀢𑁄𑀢𑀺 𑀯𑀺𑀲𑀗𑁆𑀓𑀺𑀢𑀸;

𑀦𑁄𑀧𑁂𑀲𑀺𑀁 𑀭𑀽𑀧𑀦𑀺𑀭𑀢𑀸, 𑀤𑁂𑀲𑀬𑀸𑀫𑀺 𑀢𑀫𑀘𑁆𑀘𑀬𑀁.

‘‘𑀢𑀤𑀸 𑀫𑀥𑀼𑀭𑀦𑀺𑀕𑁆𑀖𑁄𑀲𑁄, 𑀫𑀳𑀸𑀓𑀸𑀭𑀼𑀡𑀺𑀓𑁄 𑀚𑀺𑀦𑁄;

𑀅𑀯𑁄𑀘 𑀢𑀺𑀝𑁆𑀞 𑀔𑁂𑀫𑁂𑀢𑀺, 𑀲𑀺𑀜𑁆𑀘𑀦𑁆𑀢𑁄 𑀅𑀫𑀢𑁂𑀦 𑀫𑀁.

‘‘𑀢𑀤𑀸 𑀧𑀓𑀫𑁆𑀬 𑀲𑀺𑀭𑀲𑀸, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;

𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀦𑀭𑀧𑀢𑀺𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀅𑀳𑁄 𑀲𑀫𑁆𑀫𑀸 𑀉𑀧𑀸𑀬𑁄 𑀢𑁂, 𑀘𑀺𑀦𑁆𑀢𑀺𑀢𑁄𑀬𑀫𑀭𑀺𑀦𑁆𑀤𑀫;

𑀯𑀦𑀤𑀲𑁆𑀲𑀦𑀓𑀸𑀫𑀸𑀬, 𑀤𑀺𑀝𑁆𑀞𑁄 𑀦𑀺𑀩𑁆𑀩𑀸𑀦𑀢𑁄 𑀫𑀼𑀦𑀺.

‘‘𑀬𑀤𑀺 𑀢𑁂 𑀭𑀼𑀘𑁆𑀘𑀢𑁂 𑀭𑀸𑀚, 𑀲𑀸𑀲𑀦𑁂 𑀢𑀲𑁆𑀲 𑀢𑀸𑀤𑀺𑀦𑁄;

𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀭𑀽𑀧𑁂𑀳𑀁, 𑀦𑀺𑀩𑁆𑀩𑀺𑀦𑁆𑀦𑀸 𑀫𑀼𑀦𑀺𑀯𑀸𑀡𑀺𑀦𑀸.

‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀢𑀤𑀸𑀳 𑀲 𑀫𑀳𑀻𑀧𑀢𑀺;

𑀅𑀦𑀼𑀚𑀸𑀦𑀸𑀫𑀺 𑀢𑁂 𑀪𑀤𑁆𑀤𑁂, 𑀧𑀩𑁆𑀩𑀚𑁆𑀚𑀸 𑀢𑀯 𑀲𑀺𑀚𑁆𑀛𑀢𑀼.

‘‘𑀧𑀩𑁆𑀩𑀚𑀺𑀢𑁆𑀯𑀸 𑀢𑀤𑀸 𑀘𑀸𑀳𑀁, 𑀅𑀤𑁆𑀥𑀫𑀸𑀲𑁂 𑀉𑀧𑀝𑁆𑀞𑀺𑀢𑁂;

𑀤𑀻𑀧𑁄𑀤𑀬𑀜𑁆𑀘 𑀪𑁂𑀤𑀜𑁆𑀘, 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸.

‘‘𑀦𑀺𑀩𑁆𑀩𑀺𑀦𑁆𑀦𑀸 𑀲𑀩𑁆𑀩𑀲𑀗𑁆𑀔𑀸𑀭𑁂, 𑀧𑀘𑁆𑀘𑀬𑀸𑀓𑀸𑀭𑀓𑁄𑀯𑀺𑀤𑀸;

𑀘𑀢𑀼𑀭𑁄𑀖𑁂 𑀅𑀢𑀺𑀓𑁆𑀓𑀫𑁆𑀫, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀆𑀲𑀺𑀁, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀘𑀸𑀧𑀺 𑀪𑀯𑀸𑀫𑀳𑀁.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀧𑀭𑀺𑀲𑀼𑀤𑁆𑀥𑀁 𑀫𑀫 𑀜𑀸𑀡𑀁, 𑀉𑀧𑁆𑀧𑀦𑁆𑀦𑀁 𑀩𑀼𑀤𑁆𑀥𑀲𑀸𑀲𑀦𑁂.

‘‘𑀓𑀼𑀲𑀮𑀸𑀳𑀁 𑀯𑀺𑀲𑀼𑀤𑁆𑀥𑀻𑀲𑀼, 𑀓𑀣𑀸𑀯𑀢𑁆𑀣𑀼𑀯𑀺𑀲𑀸𑀭𑀤𑀸;

𑀅𑀪𑀺𑀥𑀫𑁆𑀫𑀦𑀬𑀜𑁆𑀜𑀽 𑀘, 𑀯𑀲𑀺𑀧𑁆𑀧𑀢𑁆𑀢𑀸𑀫𑁆𑀳𑀺 𑀲𑀸𑀲𑀦𑁂.

‘‘𑀢𑀢𑁄 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁, 𑀭𑀜𑁆𑀜𑀸 𑀓𑁄𑀲𑀮𑀲𑀸𑀫𑀺𑀦𑀸;

𑀧𑀼𑀘𑁆𑀙𑀺𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑁆𑀬𑀸𑀓𑀭𑁄𑀦𑁆𑀢𑀻 𑀬𑀣𑀸𑀢𑀣𑀁.

‘‘𑀢𑀤𑀸 𑀲 𑀭𑀸𑀚𑀸 𑀲𑀼𑀕𑀢𑀁, 𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙𑀣;

𑀢𑀣𑁂𑀯 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀬𑀣𑀸 𑀢𑁂 𑀩𑁆𑀬𑀸𑀓𑀢𑀸 𑀫𑀬𑀸.

‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀫𑀳𑀸𑀧𑀜𑁆𑀜𑀸𑀦𑀫𑀕𑁆𑀕𑀸𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀦𑀭𑀼𑀢𑁆𑀢𑀫𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁨𑁮𑁯-𑁩𑁮𑁩);

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀺𑀳𑀭𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀣𑁂𑀭𑀺𑀬𑀸 𑀲𑀢𑀺𑀧𑀺 𑀅𑀜𑁆𑀜𑀸𑀲𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀻𑀦𑀁 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀁 𑀢𑀢𑁆𑀣 𑀧𑀦 𑀓𑀢𑀸𑀥𑀺𑀓𑀸𑀭𑀢𑀸𑀬 𑀫𑀳𑀸𑀧𑀜𑁆𑀜𑀸𑀪𑀸𑀯𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀣𑀸 𑀳𑀺 𑀦𑀁 𑀪𑀕𑀯𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀔𑁂𑀫𑀸’’𑀢𑀺 (𑀅. 𑀦𑀺. 𑁧.𑁨𑁩𑁫-𑁨𑁩𑁬) 𑀫𑀳𑀸𑀧𑀜𑁆𑀜𑀢𑀸𑀬 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀁 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀁 𑀫𑀸𑀭𑁄 𑀧𑀸𑀧𑀺𑀫𑀸 𑀢𑀭𑀼𑀡𑀭𑀽𑀧𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀸𑀫𑁂𑀳𑀺 𑀧𑀮𑁄𑀪𑁂𑀦𑁆𑀢𑁄 𑁋

𑁧𑁩𑁯.

‘‘𑀤𑀳𑀭𑀸 𑀢𑁆𑀯𑀁 𑀭𑀽𑀧𑀯𑀢𑀻, 𑀅𑀳𑀫𑁆𑀧𑀺 𑀤𑀳𑀭𑁄 𑀬𑀼𑀯𑀸;

𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦, 𑀏𑀳𑀺 𑀔𑁂𑀫𑁂 𑀭𑀫𑀸𑀫𑀲𑁂’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀲𑁆𑀲𑀢𑁆𑀣𑁄 𑁋 𑀔𑁂𑀫𑁂, 𑀢𑁆𑀯𑀁 𑀢𑀭𑀼𑀡𑀧𑁆𑀧𑀢𑁆𑀢𑀸, 𑀬𑁄𑀩𑁆𑀩𑀦𑁂 𑀞𑀺𑀢𑀸 𑀭𑀽𑀧𑀲𑀫𑁆𑀧𑀦𑁆𑀦𑀸, 𑀅𑀳𑀫𑁆𑀧𑀺 𑀢𑀭𑀼𑀡𑁄 𑀬𑀼𑀯𑀸, 𑀢𑀲𑁆𑀫𑀸 𑀫𑀬𑀁 𑀬𑁄𑀩𑁆𑀩𑀜𑁆𑀜𑀁 𑀅𑀔𑁂𑀧𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦 𑀯𑀚𑁆𑀚𑀫𑀸𑀦𑁂𑀦 𑀏𑀳𑀺 𑀓𑀸𑀫𑀔𑀺𑀟𑁆𑀟𑀸𑀭𑀢𑀺𑀬𑀸 𑀭𑀫𑀸𑀫 𑀓𑀻𑀴𑀸𑀫𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀸 𑀓𑀸𑀫𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘 𑀅𑀢𑁆𑀢𑀦𑁄 𑀯𑀺𑀭𑀢𑁆𑀢𑀪𑀸𑀯𑀁 𑀢𑀲𑁆𑀲 𑀘 𑀫𑀸𑀭𑀪𑀸𑀯𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁂𑀲𑀼 𑀲𑀢𑁆𑀢𑁂𑀲𑀼 𑀅𑀢𑁆𑀢𑀦𑁄 𑀣𑀸𑀫𑀕𑀢𑀁 𑀅𑀧𑁆𑀧𑀲𑀸𑀤𑀁 𑀓𑀢𑀓𑀺𑀘𑁆𑀘𑀢𑀜𑁆𑀘 𑀧𑀓𑀸𑀲𑁂𑀦𑁆𑀢𑀻 𑁋

𑁧𑁪𑁦.

‘‘𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦, 𑀆𑀢𑀼𑀭𑁂𑀦 𑀧𑀪𑀗𑁆𑀕𑀼𑀦𑀸;

𑀅𑀝𑁆𑀝𑀺𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀓𑀸𑀫𑀢𑀡𑁆𑀳𑀸 𑀲𑀫𑀽𑀳𑀢𑀸.

𑁧𑁪𑁧.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀢𑀻 𑀤𑀸𑀦𑀺 𑀲𑀸 𑀫𑀫.

𑁧𑁪𑁨.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓.

𑁧𑁪𑁩.

‘‘𑀦𑀓𑁆𑀔𑀢𑁆𑀢𑀸𑀦𑀺 𑀦𑀫𑀲𑁆𑀲𑀦𑁆𑀢𑀸, 𑀅𑀕𑁆𑀕𑀺𑀁 𑀧𑀭𑀺𑀘𑀭𑀁 𑀯𑀦𑁂;

𑀬𑀣𑀸𑀪𑀼𑀘𑁆𑀘𑀫𑀚𑀸𑀦𑀦𑁆𑀢𑀸, 𑀩𑀸𑀮𑀸 𑀲𑀼𑀤𑁆𑀥𑀺𑀫𑀫𑀜𑁆𑀜𑀣.

𑁧𑁪𑁪.

‘‘𑀅𑀳𑀜𑁆𑀘 𑀔𑁄 𑀦𑀫𑀲𑁆𑀲𑀦𑁆𑀢𑀻, 𑀲𑀫𑁆𑀩𑀼𑀤𑁆𑀥𑀁 𑀧𑀼𑀭𑀺𑀲𑀼𑀢𑁆𑀢𑀫𑀁;

𑀧𑀫𑀼𑀢𑁆𑀢𑀸 𑀲𑀩𑁆𑀩𑀤𑀼𑀓𑁆𑀔𑁂𑀳𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀅𑀕𑁆𑀕𑀺𑀁 𑀧𑀭𑀺𑀘𑀭𑀁 𑀯𑀦𑁂𑀢𑀺 𑀢𑀧𑁄𑀯𑀦𑁂 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀦𑁆𑀢𑁄. 𑀬𑀣𑀸𑀪𑀼𑀘𑁆𑀘𑀫𑀚𑀸𑀦𑀦𑁆𑀢𑀸𑀢𑀺 𑀧𑀯𑀢𑁆𑀢𑀺𑀬𑁄 𑀬𑀣𑀸𑀪𑀽𑀢𑀁 𑀅𑀧𑀭𑀺𑀚𑀸𑀦𑀦𑁆𑀢𑀸. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀔𑁂𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀚𑀸𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸𑀢𑀺𑀆𑀤𑀺𑀓𑀸 𑀲𑀼𑀚𑀸𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀓𑁂𑀢𑀦𑀕𑀭𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀤𑀺𑀦𑁆𑀦𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑀁 𑀕𑀢𑀸. 𑀢𑀢𑁆𑀣 𑀢𑁂𑀦 𑀲𑀤𑁆𑀥𑀺𑀁 𑀲𑀼𑀔𑀲𑀁𑀯𑀸𑀲𑀁 𑀯𑀲𑀦𑁆𑀢𑀻 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀦𑀓𑁆𑀔𑀢𑁆𑀢𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀧𑀭𑀺𑀚𑀦𑁂𑀦 𑀲𑀤𑁆𑀥𑀺𑀁 𑀦𑀕𑀭𑀁 𑀆𑀕𑀘𑁆𑀙𑀦𑁆𑀢𑀻 𑀅𑀜𑁆𑀚𑀦𑀯𑀦𑁂 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀓𑀮𑁆𑀮𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀉𑀧𑀭𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀁 𑀧𑀓𑀸𑀲𑁂𑀲𑀺. 𑀲𑀸 𑀤𑁂𑀲𑀦𑀸𑀯𑀲𑀸𑀦𑁂 𑀅𑀢𑁆𑀢𑀦𑁄 𑀓𑀢𑀸𑀥𑀺𑀓𑀸𑀭𑀢𑀸𑀬 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀘, 𑀲𑀢𑁆𑀣𑀼 𑀘 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀸𑀫𑀺𑀓𑀜𑁆𑀘 𑀫𑀸𑀢𑀸𑀧𑀺𑀢𑀭𑁄 𑀘 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀼𑀆𑀡𑀸𑀬 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁪𑁫.

‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑁄𑀓𑁆𑀔𑀺𑀢𑀸;

𑀲𑀩𑁆𑀩𑀸𑀪𑀭𑀡𑀲𑀜𑁆𑀙𑀦𑁆𑀦𑀸, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸.

𑁧𑁪𑁬.

‘‘𑀅𑀦𑁆𑀦𑀁 𑀧𑀸𑀦𑀜𑁆𑀘 𑀆𑀤𑀸𑀬, 𑀔𑀚𑁆𑀚𑀁 𑀪𑁄𑀚𑁆𑀚𑀁 𑀅𑀦𑀧𑁆𑀧𑀓𑀁;

𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀉𑀬𑁆𑀬𑀸𑀦𑀫𑀪𑀺𑀳𑀸𑀭𑀬𑀺𑀁.

𑁧𑁪𑁭.

‘‘𑀢𑀢𑁆𑀣 𑀭𑀫𑀺𑀢𑁆𑀯𑀸 𑀓𑀻𑀴𑀺𑀢𑁆𑀯𑀸, 𑀆𑀕𑀘𑁆𑀙𑀦𑁆𑀢𑀻 𑀲𑀓𑀁 𑀖𑀭𑀁;

𑀯𑀺𑀳𑀸𑀭𑀁 𑀤𑀝𑁆𑀞𑀼𑀁 𑀧𑀸𑀯𑀺𑀲𑀺𑀁, 𑀲𑀸𑀓𑁂𑀢𑁂 𑀅𑀜𑁆𑀚𑀦𑀁 𑀯𑀦𑀁.

𑁧𑁪𑁮.

‘‘𑀤𑀺𑀲𑁆𑀯𑀸𑀦 𑀮𑁄𑀓𑀧𑀚𑁆𑀚𑁄𑀢𑀁, 𑀯𑀦𑁆𑀤𑀺𑀢𑁆𑀯𑀸𑀦 𑀉𑀧𑀸𑀯𑀺𑀲𑀺𑀁;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

𑁧𑁪𑁯.

‘‘𑀲𑀼𑀢𑁆𑀯𑀸 𑀘 𑀔𑁄 𑀫𑀳𑁂𑀲𑀺𑀲𑁆𑀲, 𑀲𑀘𑁆𑀘𑀁 𑀲𑀫𑁆𑀧𑀝𑀺𑀯𑀺𑀚𑁆𑀛𑀳𑀁;

𑀢𑀢𑁆𑀣𑁂𑀯 𑀯𑀺𑀭𑀚𑀁 𑀥𑀫𑁆𑀫𑀁, 𑀨𑀼𑀲𑀬𑀺𑀁 𑀅𑀫𑀢𑀁 𑀧𑀤𑀁.

𑁧𑁫𑁦.

‘‘𑀢𑀢𑁄 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀫𑁄𑀖𑀁 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀮𑀗𑁆𑀓𑀢𑀸𑀢𑀺 𑀯𑀺𑀪𑀽𑀲𑀺𑀢𑀸. 𑀢𑀁 𑀧𑀦 𑀅𑀮𑀗𑁆𑀓𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀯𑀲𑀦𑀸 𑀫𑀸𑀮𑀺𑀦𑀻 𑀘𑀦𑁆𑀤𑀦𑁄𑀓𑁆𑀔𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀸𑀮𑀺𑀦𑀻𑀢𑀺 𑀫𑀸𑀮𑀸𑀥𑀸𑀭𑀺𑀦𑀻. 𑀘𑀦𑁆𑀤𑀦𑁄𑀓𑁆𑀔𑀺𑀢𑀸𑀢𑀺 𑀘𑀦𑁆𑀤𑀦𑀸𑀦𑀼𑀮𑀺𑀢𑁆𑀢𑀸. 𑀲𑀩𑁆𑀩𑀸𑀪𑀭𑀡𑀲𑀜𑁆𑀙𑀦𑁆𑀦𑀸𑀢𑀺 𑀳𑀢𑁆𑀣𑀽𑀧𑀕𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀆𑀪𑀭𑀡𑁂𑀳𑀺 𑀅𑀮𑀗𑁆𑀓𑀸𑀭𑀯𑀲𑁂𑀦 𑀲𑀜𑁆𑀙𑀸𑀤𑀺𑀢𑀲𑀭𑀻𑀭𑀸.

𑀅𑀦𑁆𑀦𑀁 𑀧𑀸𑀦𑀜𑁆𑀘 𑀆𑀤𑀸𑀬, 𑀔𑀚𑁆𑀚𑀁 𑀪𑁄𑀚𑁆𑀚𑀁 𑀅𑀦𑀧𑁆𑀧𑀓𑀦𑁆𑀢𑀺 𑀲𑀸𑀮𑀺𑀑𑀤𑀦𑀸𑀤𑀺𑀅𑀦𑁆𑀦𑀁, 𑀅𑀫𑁆𑀩𑀧𑀸𑀦𑀸𑀤𑀺𑀧𑀸𑀦𑀁, 𑀧𑀺𑀝𑁆𑀞𑀔𑀸𑀤𑀦𑀻𑀬𑀸𑀤𑀺𑀔𑀚𑁆𑀚𑀁, 𑀅𑀯𑀲𑀺𑀝𑁆𑀞𑀁 𑀆𑀳𑀸𑀭𑀲𑀗𑁆𑀔𑀸𑀢𑀁 𑀪𑁄𑀚𑁆𑀚𑀜𑁆𑀘 𑀧𑀳𑀽𑀢𑀁 𑀕𑀳𑁂𑀢𑁆𑀯𑀸. 𑀉𑀬𑁆𑀬𑀸𑀦𑀫𑀪𑀺𑀳𑀸𑀭𑀬𑀺𑀦𑁆𑀢𑀺 𑀦𑀓𑁆𑀔𑀢𑁆𑀢𑀓𑀻𑀴𑀸𑀯𑀲𑁂𑀦 𑀉𑀬𑁆𑀬𑀸𑀦𑀁 𑀉𑀧𑀦𑁂𑀲𑀺𑀁. 𑀅𑀦𑁆𑀦𑀧𑀸𑀦𑀸𑀤𑀺𑀁 𑀢𑀢𑁆𑀣 𑀆𑀦𑁂𑀢𑁆𑀯𑀸 𑀲𑀳 𑀧𑀭𑀺𑀚𑀦𑁂𑀦 𑀓𑀻𑀴𑀦𑁆𑀢𑀻 𑀭𑀫𑀦𑁆𑀢𑀻 𑀧𑀭𑀺𑀘𑀸𑀭𑁂𑀲𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀸𑀓𑁂𑀢𑁂 𑀅𑀜𑁆𑀚𑀦𑀁 𑀯𑀦𑀦𑁆𑀢𑀺 𑀲𑀸𑀓𑁂𑀢𑀲𑀫𑀻𑀧𑁂 𑀅𑀜𑁆𑀚𑀦𑀯𑀦𑁂 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺𑀁.

𑀮𑁄𑀓𑀧𑀚𑁆𑀚𑁄𑀢𑀦𑁆𑀢𑀺 𑀜𑀸𑀡𑀧𑀚𑁆𑀚𑁄𑀢𑁂𑀦 𑀮𑁄𑀓𑀲𑁆𑀲 𑀧𑀚𑁆𑀚𑁄𑀢𑀪𑀽𑀢𑀁.

𑀨𑀼𑀲𑀬𑀺𑀦𑁆𑀢𑀺 𑀨𑀼𑀲𑀺𑀁, 𑀅𑀥𑀺𑀕𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀼𑀚𑀸𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑁄𑀧𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀉𑀘𑁆𑀘𑁂 𑀓𑀼𑀮𑁂𑀢𑀺𑀆𑀤𑀺𑀓𑀸 𑀅𑀦𑁄𑀧𑀫𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑁂 𑀥𑀫𑁆𑀫𑁂 𑀧𑀭𑀺𑀩𑁆𑀭𑀽𑀳𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀓𑁂𑀢𑀦𑀕𑀭𑁂 𑀫𑀚𑁆𑀛𑀲𑁆𑀲 𑀦𑀸𑀫 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑁄𑀧𑀫𑀸𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀢𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀩𑀳𑀽 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀭𑀸𑀚𑀸𑀦𑁄 𑀘 𑀧𑀺𑀢𑀼 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀅𑀢𑁆𑀢𑀦𑁄 𑀥𑀻𑀢𑀭𑀁 𑀅𑀦𑁄𑀧𑀫𑀁 𑀤𑁂𑀳𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀢𑁂 𑀤𑀲𑁆𑀲𑀸𑀫𑀸’’𑀢𑀺. 𑀲𑀸 𑀢𑀁 𑀲𑀼𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 ‘‘𑀖𑀭𑀸𑀯𑀸𑀲𑁂𑀦 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀢𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑀻 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀢𑀢𑀺𑀬𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼𑀆𑀡𑀸𑀬 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁫𑁧.

‘‘𑀉𑀘𑁆𑀘𑁂 𑀓𑀼𑀮𑁂 𑀅𑀳𑀁 𑀚𑀸𑀢𑀸, 𑀩𑀳𑀼𑀯𑀺𑀢𑁆𑀢𑁂 𑀫𑀳𑀤𑁆𑀥𑀦𑁂;

𑀯𑀡𑁆𑀡𑀭𑀽𑀧𑁂𑀦 𑀲𑀫𑁆𑀧𑀦𑁆𑀦𑀸, 𑀥𑀻𑀢𑀸 𑀫𑀚𑁆𑀛𑀲𑁆𑀲 𑀅𑀢𑁆𑀭𑀚𑀸.

𑁧𑁫𑁨.

‘‘𑀧𑀢𑁆𑀣𑀺𑀢𑀸 𑀭𑀸𑀚𑀧𑀼𑀢𑁆𑀢𑁂𑀳𑀺, 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺 𑀕𑀺𑀚𑁆𑀛𑀺𑀢𑀸;

𑀧𑀺𑀢𑀼 𑀫𑁂 𑀧𑁂𑀲𑀬𑀻 𑀤𑀽𑀢𑀁, 𑀤𑁂𑀣 𑀫𑀬𑁆𑀳𑀁 𑀅𑀦𑁄𑀧𑀫𑀁.

𑁧𑁫𑁩.

‘‘𑀬𑀢𑁆𑀢𑀓𑀁 𑀢𑀼𑀮𑀺𑀢𑀸 𑀏𑀲𑀸, 𑀢𑀼𑀬𑁆𑀳𑀁 𑀥𑀻𑀢𑀸 𑀅𑀦𑁄𑀧𑀫𑀸;

𑀢𑀢𑁄 𑀅𑀝𑁆𑀞𑀕𑀼𑀡𑀁 𑀤𑀲𑁆𑀲𑀁, 𑀳𑀺𑀭𑀜𑁆𑀜𑀁 𑀭𑀢𑀦𑀸𑀦𑀺 𑀘.

𑁧𑁫𑁪.

‘‘𑀲𑀸𑀳𑀁 𑀤𑀺𑀲𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀅𑀦𑀼𑀢𑁆𑀢𑀭𑀁;

𑀢𑀲𑁆𑀲 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁧𑁫𑁫.

‘‘𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑁄;

𑀦𑀺𑀲𑀺𑀦𑁆𑀦𑀸 𑀆𑀲𑀦𑁂 𑀢𑀲𑁆𑀫𑀺𑀁, 𑀨𑀼𑀲𑀬𑀺𑀁 𑀢𑀢𑀺𑀬𑀁 𑀨𑀮𑀁.

𑁧𑁫𑁬.

‘‘𑀢𑀢𑁄 𑀓𑁂𑀲𑀸𑀦𑀺 𑀙𑁂𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀚𑁆𑀚 𑀫𑁂 𑀲𑀢𑁆𑀢𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀯𑀺𑀲𑁂𑀲𑀺𑀢𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀘𑁆𑀘𑁂 𑀓𑀼𑀮𑁂𑀢𑀺 𑀉𑀴𑀸𑀭𑀢𑀫𑁂 𑀯𑁂𑀲𑁆𑀲𑀓𑀼𑀮𑁂. 𑀩𑀳𑀼𑀯𑀺𑀢𑁆𑀢𑁂𑀢𑀺 𑀅𑀮𑀗𑁆𑀓𑀸𑀭𑀸𑀤𑀺𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂. 𑀫𑀳𑀤𑁆𑀥𑀦𑁂𑀢𑀺 𑀦𑀺𑀥𑀸𑀦𑀕𑀢𑀲𑁆𑀲𑁂𑀯 𑀘𑀢𑁆𑀢𑀸𑀭𑀻𑀲𑀓𑁄𑀝𑀺𑀧𑀭𑀺𑀫𑀸𑀡𑀲𑁆𑀲 𑀫𑀳𑀢𑁄 𑀥𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦 𑀫𑀳𑀤𑁆𑀥𑀦𑁂 𑀅𑀳𑀁 𑀚𑀸𑀢𑀸𑀢𑀺 𑀬𑁄𑀚𑀦𑀸. 𑀯𑀡𑁆𑀡𑀭𑀽𑀧𑁂𑀦 𑀲𑀫𑁆𑀧𑀦𑁆𑀦𑀸𑀢𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀘𑁂𑀯 𑀭𑀽𑀧𑀲𑀫𑁆𑀧𑀦𑁆𑀦𑀸 𑀘, 𑀲𑀺𑀦𑀺𑀤𑁆𑀥𑀪𑀸𑀲𑀼𑀭𑀸𑀬 𑀙𑀯𑀺𑀲𑀫𑁆𑀧𑀢𑁆𑀢𑀺𑀬𑀸 𑀯𑀢𑁆𑀣𑀸𑀪𑀭𑀡𑀸𑀤𑀺𑀲𑀭𑀻𑀭𑀸𑀯𑀬𑀯𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀥𑀻𑀢𑀸 𑀫𑀚𑁆𑀛𑀲𑁆𑀲 𑀅𑀢𑁆𑀭𑀚𑀸𑀢𑀺 𑀫𑀚𑁆𑀛𑀦𑀸𑀫𑀲𑁆𑀲 𑀲𑁂𑀝𑁆𑀞𑀺𑀦𑁄 𑀑𑀭𑀲𑀸 𑀥𑀻𑀢𑀸.

𑀧𑀢𑁆𑀣𑀺𑀢𑀸 𑀭𑀸𑀚𑀧𑀼𑀢𑁆𑀢𑁂𑀳𑀻𑀢𑀺 ‘‘𑀓𑀣𑀁 𑀦𑀼 𑀔𑁄 𑀢𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀭𑀸𑀚𑀓𑀼𑀫𑀸𑀭𑁂𑀳𑀺 𑀅𑀪𑀺𑀧𑀢𑁆𑀣𑀺𑀢𑀸. 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺 𑀕𑀺𑀚𑁆𑀛𑀺𑀢𑀸𑀢𑀺 𑀢𑀣𑀸 𑀲𑁂𑀝𑁆𑀞𑀺𑀓𑀼𑀫𑀸𑀭𑁂𑀳𑀺𑀧𑀺 𑀅𑀪𑀺𑀕𑀺𑀚𑁆𑀛𑀺𑀢𑀸 𑀧𑀘𑁆𑀘𑀸𑀲𑀻𑀲𑀺𑀢𑀸. 𑀤𑁂𑀣 𑀫𑀬𑁆𑀳𑀁 𑀅𑀦𑁄𑀧𑀫𑀦𑁆𑀢𑀺 𑀭𑀸𑀚𑀧𑀼𑀢𑁆𑀢𑀸𑀤𑀬𑁄 ‘‘𑀤𑁂𑀣 𑀫𑀬𑁆𑀳𑀁 𑀅𑀦𑁄𑀧𑀫𑀁 𑀤𑁂𑀣 𑀫𑀬𑁆𑀳’’𑀦𑁆𑀢𑀺 𑀧𑀺𑀢𑀼 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑁂𑀲𑀬𑀺𑀁𑀲𑀼.

𑀬𑀢𑁆𑀢𑀓𑀁 𑀢𑀼𑀮𑀺𑀢𑀸 𑀏𑀲𑀸𑀢𑀺 ‘‘𑀢𑀼𑀬𑁆𑀳𑀁 𑀥𑀻𑀢𑀸 𑀅𑀦𑁄𑀧𑀫𑀸 𑀬𑀢𑁆𑀢𑀓𑀁 𑀥𑀦𑀁 𑀅𑀕𑁆𑀖𑀢𑀻’’𑀢𑀺 𑀢𑀼𑀮𑀺𑀢𑀸 𑀮𑀓𑁆𑀔𑀡𑀜𑁆𑀜𑀽𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸, ‘‘𑀢𑀢𑁄 𑀅𑀝𑁆𑀞𑀕𑀼𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀼 𑀫𑁂 𑀧𑁂𑀲𑀬𑀺 𑀤𑀽𑀢𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀦𑁄𑀧𑀫𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀩𑀼𑀤𑁆𑀥 𑀯𑀻𑀭 𑀦𑀫𑁄 𑀢𑁆𑀬𑀢𑁆𑀣𑀽𑀢𑀺𑀆𑀤𑀺𑀓𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸, 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸, 𑀓𑀲𑁆𑀲𑀧𑀲𑁆𑀲 𑀘 𑀪𑀕𑀯𑀢𑁄 𑀅𑀦𑁆𑀢𑀭𑁂 𑀅𑀫𑁆𑀳𑀸𑀓𑀜𑁆𑀘 𑀪𑀕𑀯𑀢𑁄 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀩𑀸𑀭𑀸𑀡𑀲𑀺𑀬𑀁 𑀧𑀜𑁆𑀘𑀦𑁆𑀦𑀁 𑀤𑀸𑀲𑀺𑀲𑀢𑀸𑀦𑀁 𑀚𑁂𑀝𑁆𑀞𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀲𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀢𑁄 𑀇𑀲𑀺𑀧𑀢𑀦𑁂 𑀑𑀢𑀭𑀺𑀢𑁆𑀯𑀸, 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀇𑀲𑀺𑀧𑀢𑀦𑀫𑁂𑀯 𑀕𑀦𑁆𑀢𑁆𑀯𑀸, 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀓𑀼𑀝𑀺𑀬𑀸 𑀅𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀧𑀭𑀺𑀬𑁂𑀲𑀦𑁆𑀢𑁂 𑀤𑀺𑀲𑁆𑀯𑀸, 𑀢𑀸 𑀤𑀸𑀲𑀺𑀬𑁄 𑀢𑀸𑀲𑀁 𑀅𑀢𑁆𑀢𑀦𑁄 𑀘 𑀲𑀸𑀫𑀺𑀓𑁂 𑀲𑀫𑀸𑀤𑀧𑁂𑀢𑁆𑀯𑀸 𑀘𑀗𑁆𑀓𑀫𑀸𑀤𑀺𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸 𑀧𑀜𑁆𑀘 𑀓𑀼𑀝𑀺𑀬𑁄 𑀓𑀸𑀭𑁂𑀢𑁆𑀯𑀸, 𑀫𑀜𑁆𑀘𑀧𑀻𑀞𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀪𑀸𑀚𑀦𑀸𑀤𑀻𑀦𑀺 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀢𑁂𑀫𑀸𑀲𑀁 𑀢𑀢𑁆𑀣𑁂𑀯 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀯𑀸𑀭𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀼𑀁. 𑀬𑀸 𑀅𑀢𑁆𑀢𑀦𑁄 𑀯𑀸𑀭𑀤𑀺𑀯𑀲𑁂 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲𑀸 𑀲𑀬𑀁 𑀲𑀓𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀺. 𑀏𑀯𑀁 𑀢𑁂𑀫𑀸𑀲𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀯𑀸𑀭𑀡𑀸𑀬 𑀲𑀫𑁆𑀧𑀢𑁆𑀢𑀸𑀬 𑀏𑀓𑁂𑀓𑀁 𑀤𑀸𑀲𑀺𑀁 𑀏𑀓𑁂𑀓𑀁 𑀲𑀸𑀝𑀓𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀧𑀜𑁆𑀘𑀣𑀽𑀮𑀲𑀸𑀝𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑀺𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀅𑀤𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀸𑀲𑀁 𑀧𑀲𑁆𑀲𑀦𑁆𑀢𑀻𑀦𑀁𑀬𑁂𑀯 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀅𑀕𑀫𑀁𑀲𑀼.

𑀢𑀸𑀧𑀺 𑀲𑀩𑁆𑀩𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀸𑀲𑀁 𑀚𑁂𑀝𑁆𑀞𑀺𑀓𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂 𑀧𑁂𑀲𑀓𑀸𑀭𑀕𑀸𑀫𑁂 𑀧𑁂𑀲𑀓𑀸𑀭𑀚𑁂𑀝𑁆𑀞𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑁂 𑀧𑀜𑁆𑀘𑀲𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀲𑀩𑁆𑀩𑁂 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀅𑀤𑀸𑀲𑀺. 𑀢𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀫𑁂𑀯 𑀅𑀕𑀫𑀁𑀲𑀼. 𑀲𑀸𑀧𑀺 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀤𑁂𑀯𑀤𑀳𑀦𑀕𑀭𑁂 𑀫𑀳𑀸𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀕𑁄𑀢𑀫𑀻𑀢𑀺𑀲𑁆𑀲𑀸 𑀕𑁄𑀢𑁆𑀢𑀸𑀕𑀢𑀫𑁂𑀯 𑀦𑀸𑀫𑀁 𑀅𑀳𑁄𑀲𑀺; 𑀫𑀳𑀸𑀫𑀸𑀬𑀸𑀬 𑀓𑀦𑀺𑀝𑁆𑀞𑀪𑀕𑀺𑀦𑀻. 𑀮𑀓𑁆𑀔𑀡𑀧𑀸𑀞𑀓𑀸𑀧𑀺 ‘‘𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀼𑀘𑁆𑀙𑀺𑀬𑀁 𑀯𑀲𑀺𑀢𑀸 𑀤𑀸𑀭𑀓𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀤𑁆𑀯𑁂𑀧𑀺 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀅𑀪𑀺𑀦𑁂𑀲𑀺.

𑀅𑀧𑀭𑀪𑀸𑀕𑁂 𑀅𑀫𑁆𑀳𑀸𑀓𑀁 𑀲𑀢𑁆𑀣𑀭𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀧𑀼𑀩𑁆𑀩𑁂𑀦 𑀢𑀢𑁆𑀣 𑀢𑀢𑁆𑀣 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁂 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀅𑀣 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀏𑀓𑀯𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀫𑀸𑀦𑀸 𑀅𑀮𑀪𑀺𑀢𑁆𑀯𑀸 𑀤𑀼𑀢𑀺𑀬𑀯𑀸𑀭𑀁 𑀓𑁂𑀲𑁂 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 (𑀲𑀼. 𑀦𑀺. 𑁮𑁬𑁮 𑀆𑀤𑀬𑁄) 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀓𑁆𑀬𑀓𑀼𑀫𑀸𑀭𑀲𑀢𑀸𑀦𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀯𑁂𑀲𑀸𑀮𑀺𑀁 𑀕𑀦𑁆𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀲𑀢𑁆𑀣𑀸𑀭𑀁 𑀬𑀸𑀘𑀸𑀧𑁂𑀢𑁆𑀯𑀸 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 (𑀅. 𑀦𑀺. 𑁮.𑁫𑁧; 𑀘𑀽𑀴𑀯. 𑁪𑁦𑁩) 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀧𑀝𑀺𑀮𑀪𑀺. 𑀇𑀢𑀭𑀸 𑀧𑀦 𑀲𑀩𑁆𑀩𑀸𑀧𑀺 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀯𑀢𑁆𑀣𑀼 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸 𑀧𑀦 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁂𑀲𑀸 𑀧𑀦 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀦𑁆𑀤𑀓𑁄𑀯𑀸𑀤𑀧𑀭𑀺𑀬𑁄𑀲𑀸𑀦𑁂 (𑀫. 𑀦𑀺. 𑁩.𑁩𑁯𑁮 𑀆𑀤𑀬𑁄) 𑀙𑀴𑀪𑀺𑀜𑁆𑀜𑀸 𑀅𑀳𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀁 𑀭𑀢𑁆𑀢𑀜𑁆𑀜𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑀻 𑀓𑀢𑀜𑁆𑀜𑀼𑀢𑀸𑀬 𑀞𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀕𑀼𑀡𑀸𑀪𑀺𑀢𑁆𑀣𑀯𑀦𑀧𑀼𑀩𑁆𑀩𑀓𑀉𑀧𑀓𑀸𑀭𑀓𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻 𑁋

𑁧𑁫𑁭.

‘‘𑀩𑀼𑀤𑁆𑀥𑀯𑀻𑀭 𑀦𑀫𑁄 𑀢𑁆𑀬𑀢𑁆𑀣𑀼, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫;

𑀬𑁄 𑀫𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀲𑀺, 𑀅𑀜𑁆𑀜𑀜𑁆𑀘 𑀩𑀳𑀼𑀓𑀁 𑀚𑀦𑀁.

𑁧𑁫𑁮.

‘‘𑀲𑀩𑁆𑀩𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀢𑀁, 𑀳𑁂𑀢𑀼𑀢𑀡𑁆𑀳𑀸 𑀯𑀺𑀲𑁄𑀲𑀺𑀢𑀸;

𑀪𑀸𑀯𑀺𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀨𑀼𑀲𑀺𑀢𑁄 𑀫𑀬𑀸.

𑁧𑁫𑁯.

‘‘𑀫𑀸𑀢𑀸 𑀧𑀼𑀢𑁆𑀢𑁄 𑀧𑀺𑀢𑀸 𑀪𑀸𑀢𑀸, 𑀅𑀬𑁆𑀬𑀓𑀸 𑀘 𑀧𑀼𑀭𑁂 𑀅𑀳𑀼𑀁;

𑀬𑀣𑀸𑀪𑀼𑀘𑁆𑀘𑀫𑀚𑀸𑀦𑀦𑁆𑀢𑀻, 𑀲𑀁𑀲𑀭𑀺𑀁𑀳𑀁 𑀅𑀦𑀺𑀩𑁆𑀩𑀺𑀲𑀁.

𑁧𑁬𑁦.

‘‘𑀤𑀺𑀝𑁆𑀞𑁄 𑀳𑀺 𑀫𑁂 𑀲𑁄 𑀪𑀕𑀯𑀸, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁬𑁧.

‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂;

𑀲𑀫𑀕𑁆𑀕𑁂 𑀲𑀸𑀯𑀓𑁂 𑀧𑀲𑁆𑀲𑁂, 𑀏𑀲𑀸 𑀩𑀼𑀤𑁆𑀥𑀸𑀦 𑀯𑀦𑁆𑀤𑀦𑀸.

𑁧𑁬𑁨.

‘‘𑀩𑀳𑀽𑀦𑀁 𑀯𑀢 𑀅𑀢𑁆𑀣𑀸𑀬, 𑀫𑀸𑀬𑀸 𑀚𑀦𑀬𑀺 𑀕𑁄𑀢𑀫𑀁;

𑀩𑁆𑀬𑀸𑀥𑀺𑀫𑀭𑀡𑀢𑀼𑀦𑁆𑀦𑀸𑀦𑀁, 𑀤𑀼𑀓𑁆𑀔𑀓𑁆𑀔𑀦𑁆𑀥𑀁 𑀩𑁆𑀬𑀧𑀸𑀦𑀼𑀤𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀩𑀼𑀤𑁆𑀥𑀯𑀻𑀭𑀸𑀢𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁂𑀲𑀼 𑀯𑀻𑀭, 𑀲𑀩𑁆𑀩𑀩𑀼𑀤𑁆𑀥𑀸 𑀳𑀺 𑀉𑀢𑁆𑀢𑀫𑀯𑀻𑀭𑀺𑀬𑁂𑀳𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁂𑀳𑀺 𑀯𑀸 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀦𑀺𑀧𑁆𑀨𑀢𑁆𑀢𑀺𑀬𑀸 𑀯𑀺𑀚𑀺𑀢𑀯𑀺𑀚𑀬𑀢𑁆𑀢𑀸 𑀯𑀻𑀭𑀸 𑀦𑀸𑀫. 𑀪𑀕𑀯𑀸 𑀧𑀦 𑀯𑀻𑀭𑀺𑀬𑀧𑀸𑀭𑀫𑀺𑀧𑀸𑀭𑀺𑀧𑀽𑀭𑀺𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑁂𑀦 𑀲𑀸𑀢𑀺𑀲𑀬𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀢𑀲𑁆𑀲𑀸 𑀘 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀲𑀫𑁆𑀫𑀤𑁂𑀯 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀯𑀺𑀲𑁂𑀲𑀢𑁄 𑀯𑀻𑀭𑀺𑀬𑀬𑀼𑀢𑁆𑀢𑀢𑀸𑀬 𑀯𑀻𑀭𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀦𑀫𑁄 𑀢𑁆𑀬𑀢𑁆𑀣𑀽𑀢𑀺 𑀦𑀫𑁄 𑀦𑀫𑀓𑁆𑀓𑀸𑀭𑁄 𑀢𑁂 𑀳𑁄𑀢𑀼. 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀸𑀢𑀺 𑀅𑀧𑀤𑀸𑀤𑀺𑀪𑁂𑀤𑁂𑀲𑀼 𑀲𑀢𑁆𑀢𑁂𑀲𑀼 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀉𑀢𑁆𑀢𑀫𑁄 𑀪𑀕𑀯𑀸. 𑀢𑀤𑁂𑀓𑀤𑁂𑀲𑀁 𑀲𑀢𑁆𑀣𑀼𑀧𑀓𑀸𑀭𑀕𑀼𑀡𑀁 𑀤𑀲𑁆𑀲𑁂𑀢𑀼𑀁, ‘‘𑀬𑁄 𑀫𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀲𑀺, 𑀅𑀜𑁆𑀜𑀜𑁆𑀘 𑀩𑀳𑀼𑀓𑀁 𑀚𑀦’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸 𑀧𑀫𑀼𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑀻 ‘‘𑀲𑀩𑁆𑀩𑀤𑀼𑀓𑁆𑀔’’𑀦𑁆𑀢𑀺 𑀕𑀸𑀣𑀫𑀸𑀳.

𑀧𑀼𑀦 𑀬𑀢𑁄 𑀧𑀫𑁄𑀘𑁂𑀲𑀺, 𑀢𑀁 𑀯𑀝𑁆𑀝𑀤𑀼𑀓𑁆𑀔𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑀻 ‘‘𑀫𑀸𑀢𑀸 𑀧𑀼𑀢𑁆𑀢𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀣𑀸𑀪𑀼𑀘𑁆𑀘𑀫𑀚𑀸𑀦𑀦𑁆𑀢𑀻𑀢𑀺 𑀧𑀯𑀢𑁆𑀢𑀺𑀳𑁂𑀢𑀼𑀆𑀤𑀺𑀁 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀦𑁆𑀢𑀻. 𑀲𑀁𑀲𑀭𑀺𑀁𑀳𑀁 𑀅𑀦𑀺𑀩𑁆𑀩𑀺𑀲𑀦𑁆𑀢𑀺 𑀲𑀁𑀲𑀸𑀭𑀲𑀫𑀼𑀤𑁆𑀤𑁂 𑀧𑀢𑀺𑀝𑁆𑀞𑀁 𑀅𑀯𑀺𑀦𑁆𑀤𑀦𑁆𑀢𑀻 𑀅𑀮𑀪𑀦𑁆𑀢𑀻 𑀪𑀯𑀸𑀤𑀻𑀲𑀼 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑀁𑀲𑀭𑀺𑀁 𑀅𑀳𑀦𑁆𑀢𑀺 𑀓𑀣𑁂𑀦𑁆𑀢𑀻 𑀆𑀳 ‘‘𑀫𑀸𑀢𑀸 𑀧𑀼𑀢𑁆𑀢𑁄’’𑀢𑀺𑀆𑀤𑀺. 𑀬𑀲𑁆𑀫𑀺𑀁 𑀪𑀯𑁂 𑀏𑀢𑀲𑁆𑀲 𑀫𑀸𑀢𑀸 𑀅𑀳𑁄𑀲𑀺, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀪𑀯𑁂 𑀢𑀲𑁆𑀲𑁂𑀯 𑀧𑀼𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀪𑀯𑁂 𑀧𑀺𑀢𑀸 𑀪𑀸𑀢𑀸 𑀅𑀳𑀽𑀢𑀺 𑀅𑀢𑁆𑀣𑁄.

‘‘𑀤𑀺𑀝𑁆𑀞𑁄 𑀳𑀺 𑀫𑁂’’𑀢𑀺 𑀕𑀸𑀣𑀸𑀬𑀧𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀢𑁄 𑀧𑀫𑀼𑀢𑁆𑀢𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀤𑀺𑀝𑁆𑀞𑁄 𑀳𑀺 𑀫𑁂 𑀲𑁄 𑀪𑀕𑀯𑀸𑀢𑀺 𑀲𑁄 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀢𑀦𑀸 𑀤𑀺𑀝𑁆𑀞𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀲𑁆𑀲𑀦𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀫𑀬𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑁄. 𑀬𑁄 𑀳𑀺 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀪𑀕𑀯𑀦𑁆𑀢𑀁 𑀧𑀲𑁆𑀲𑀢𑀺 𑀦𑀸𑀫. 𑀬𑀣𑀸𑀳 𑁋 ‘‘𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁮𑁭).

𑀆𑀭𑀤𑁆𑀥𑀯𑀻𑀭𑀺𑀬𑁂𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁂. 𑀧𑀳𑀺𑀢𑀢𑁆𑀢𑁂𑀢𑀺 𑀦𑀺𑀩𑁆𑀩𑀸𑀦𑀁 𑀧𑁂𑀲𑀺𑀢𑀘𑀺𑀢𑁆𑀢𑁂. 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂𑀢𑀺 𑀅𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀧𑀢𑁆𑀢𑀲𑁆𑀲 𑀯𑁂𑀧𑀼𑀮𑁆𑀮𑀢𑁆𑀣𑀸𑀬 𑀲𑀩𑁆𑀩𑀓𑀸𑀮𑀁 𑀣𑀺𑀭𑀧𑀭𑀓𑁆𑀓𑀫𑁂. 𑀲𑀫𑀕𑁆𑀕𑁂𑀢𑀺 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁂𑀦 𑀲𑀫𑀕𑁆𑀕𑁂. 𑀲𑀢𑁆𑀣𑀼𑀤𑁂𑀲𑀦𑀸𑀬 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀲𑀸𑀯𑀓𑁂, ‘‘𑀇𑀫𑁂 𑀫𑀕𑁆𑀕𑀝𑁆𑀞𑀸 𑀇𑀫𑁂 𑀨𑀮𑀝𑁆𑀞𑀸’’𑀢𑀺 𑀬𑀸𑀣𑀸𑀯𑀢𑁄 𑀧𑀲𑁆𑀲𑀢𑀺. 𑀏𑀲𑀸 𑀩𑀼𑀤𑁆𑀥𑀸𑀦 𑀯𑀦𑁆𑀤𑀦𑀸𑀢𑀺 𑀬𑀸 𑀲𑀢𑁆𑀣𑀼 𑀥𑀫𑁆𑀫𑀲𑀭𑀻𑀭𑀪𑀽𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀸𑀦𑀁 𑀅𑀭𑀺𑀬𑀪𑀸𑀯𑀪𑀽𑀢𑀲𑁆𑀲 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸, 𑀏𑀲𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀩𑀼𑀤𑁆𑀥𑀸𑀦𑀜𑁆𑀘 𑀯𑀦𑁆𑀤𑀦𑀸 𑀬𑀸𑀣𑀸𑀯𑀢𑁄 𑀕𑀼𑀡𑀦𑀺𑀦𑁆𑀦𑀢𑀸.

‘‘𑀩𑀳𑀽𑀦𑀁 𑀯𑀢 𑀅𑀢𑁆𑀣𑀸𑀬𑀸’’𑀢𑀺 𑀑𑀲𑀸𑀦𑀕𑀸𑀣𑀸𑀬𑀧𑀺 𑀲𑀢𑁆𑀣𑀼 𑀮𑁄𑀓𑀲𑁆𑀲 𑀩𑀳𑀽𑀧𑀓𑀸𑀭𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀣𑁂𑀓𑀤𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀲𑀢𑁆𑀣𑀭𑀺 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀦𑁆𑀢𑁂 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀲𑀬𑀁 𑀯𑁂𑀲𑀸𑀮𑀺𑀬𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀯𑀺𑀳𑀭𑀦𑁆𑀢𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑁂 𑀆𑀯𑀚𑁆𑀚𑁂𑀦𑁆𑀢𑀻 𑀢𑁂𑀲𑀁 𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀦𑁄𑀪𑀸𑀯𑀦𑀻𑀬𑁂 𑀘 𑀣𑁂𑀭𑁂 𑀲𑀩𑁆𑀩𑁂𑀯 𑀲𑀩𑁆𑀭𑀳𑁆𑀫𑀘𑀭𑀺𑀬𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀇𑀥𑁂𑀯 𑀆𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬’’𑀦𑁆𑀢𑀺. 𑀬𑀣𑀸 𑀘 𑀣𑁂𑀭𑀺𑀬𑀸, 𑀏𑀯𑀁 𑀢𑀲𑁆𑀲𑀸 𑀧𑀭𑀺𑀯𑀸𑀭𑀪𑀽𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀲𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑁯𑁭-𑁨𑁮𑁮) 𑁋

‘‘𑀏𑀓𑀤𑀸 𑀮𑁄𑀓𑀧𑀚𑁆𑀚𑁄𑀢𑁄, 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂;

𑀓𑀽𑀝𑀸𑀕𑀸𑀭𑁂 𑀓𑀼𑀲𑀸𑀮𑀸𑀬𑀁, 𑀯𑀲𑀢𑁂 𑀦𑀭𑀲𑀸𑀭𑀣𑀺.

‘‘𑀢𑀤𑀸 𑀚𑀺𑀦𑀲𑁆𑀲 𑀫𑀸𑀢𑀼𑀘𑁆𑀙𑀸, 𑀫𑀳𑀸𑀕𑁄𑀢𑀫𑀺 𑀪𑀺𑀓𑁆𑀔𑀼𑀦𑀻;

𑀢𑀳𑀺𑀁 𑀓𑀢𑁂 𑀧𑀼𑀭𑁂 𑀭𑀫𑁆𑀫𑁂, 𑀯𑀲𑀻 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂.

‘‘𑀪𑀺𑀓𑁆𑀔𑀼𑀦𑀻𑀳𑀺 𑀯𑀺𑀫𑀼𑀢𑁆𑀢𑀸𑀳𑀺, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺;

𑀭𑀳𑁄𑀕𑀢𑀸𑀬 𑀢𑀲𑁆𑀲𑁂𑀯𑀁, 𑀘𑀺𑀢𑀲𑁆𑀲𑀸𑀲𑀺 𑀯𑀺𑀢𑀓𑁆𑀓𑀺𑀢𑀁.

‘‘𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀲𑀸𑀯𑀓𑀕𑁆𑀕𑀬𑀼𑀕𑀲𑁆𑀲 𑀯𑀸;

𑀭𑀸𑀳𑀼𑀮𑀸𑀦𑀦𑁆𑀤𑀦𑀦𑁆𑀤𑀸𑀦𑀁, 𑀦𑀸𑀳𑀁 𑀮𑀘𑁆𑀙𑀸𑀫𑀺 𑀧𑀲𑁆𑀲𑀺𑀢𑀼𑀁.

‘‘𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀸, 𑀲𑀸𑀯𑀓𑀕𑁆𑀕𑀬𑀼𑀕𑀲𑁆𑀲 𑀯𑀸;

𑀫𑀳𑀸𑀓𑀲𑁆𑀲𑀧𑀦𑀦𑁆𑀤𑀸𑀦𑀁, 𑀆𑀦𑀦𑁆𑀤𑀭𑀸𑀳𑀼𑀮𑀸𑀦 𑀘.

‘‘𑀧𑀝𑀺𑀓𑀘𑁆𑀘𑀸𑀬𑀼𑀲𑀗𑁆𑀔𑀸𑀭𑀁, 𑀑𑀲𑀚𑁆𑀚𑀺𑀢𑁆𑀯𑀸𑀦 𑀦𑀺𑀩𑁆𑀩𑀼𑀢𑀺𑀁;

𑀕𑀘𑁆𑀙𑁂𑀬𑁆𑀬𑀁 𑀮𑁄𑀓𑀦𑀸𑀣𑁂𑀦, 𑀅𑀦𑀼𑀜𑁆𑀜𑀸𑀢𑀸 𑀫𑀳𑁂𑀲𑀺𑀦𑀸.

‘‘𑀢𑀣𑀸 𑀧𑀜𑁆𑀘𑀲𑀢𑀸𑀦𑀫𑁆𑀧𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀢𑀓𑁆𑀓𑀺𑀢𑀁;

𑀆𑀲𑀺 𑀔𑁂𑀫𑀸𑀤𑀺𑀓𑀸𑀦𑀫𑁆𑀧𑀺, 𑀏𑀢𑀤𑁂𑀯 𑀯𑀺𑀢𑀓𑁆𑀓𑀺𑀢𑀁.

‘‘𑀪𑀽𑀫𑀺𑀘𑀸𑀮𑁄 𑀢𑀤𑀸 𑀅𑀲𑀺, 𑀦𑀸𑀤𑀺𑀢𑀸 𑀤𑁂𑀯𑀤𑀼𑀦𑁆𑀤𑀼𑀪𑀻;

𑀉𑀧𑀲𑁆𑀲𑀬𑀸𑀥𑀺𑀯𑀢𑁆𑀣𑀸𑀬𑁄, 𑀤𑁂𑀯𑀢𑀸 𑀲𑁄𑀓𑀧𑀻𑀴𑀺𑀢𑀸.

‘‘𑀯𑀺𑀮𑀧𑀦𑁆𑀢𑀸 𑀲𑀼𑀓𑀭𑀼𑀡𑀁, 𑀢𑀢𑁆𑀣𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀼𑀁;

𑀫𑀺𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑀸𑀳𑀺, 𑀉𑀧𑀕𑀦𑁆𑀢𑁆𑀯𑀸𑀦 𑀕𑁄𑀢𑀫𑀺𑀁.

‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀼𑀁;

𑀢𑀢𑁆𑀣 𑀢𑁄𑀬𑀮𑀯𑀸𑀲𑀺𑀢𑁆𑀢𑀸, 𑀫𑀬𑀫𑀬𑁆𑀬𑁂 𑀭𑀳𑁄𑀕𑀢𑀸.

‘‘𑀲𑀸 𑀘𑀮𑀸 𑀘𑀮𑀺𑀢𑀸 𑀪𑀽𑀫𑀺, 𑀦𑀸𑀤𑀺𑀢𑀸 𑀤𑁂𑀯𑀤𑀼𑀦𑁆𑀤𑀼𑀪𑀻;

𑀧𑀭𑀺𑀤𑁂𑀯𑀸 𑀘 𑀲𑀼𑀬𑁆𑀬𑀦𑁆𑀢𑁂, 𑀓𑀺𑀫𑀢𑁆𑀣𑀁 𑀦𑀽𑀦 𑀕𑁄𑀢𑀫𑀻.

‘‘𑀢𑀤𑀸 𑀅𑀯𑁄𑀘 𑀲𑀸 𑀲𑀩𑁆𑀩𑀁, 𑀬𑀣𑀸𑀧𑀭𑀺𑀯𑀺𑀢𑀓𑁆𑀓𑀺𑀢𑀁;

𑀢𑀸𑀬𑁄𑀧𑀺 𑀲𑀩𑁆𑀩𑀸 𑀆𑀳𑀁𑀲𑀼, 𑀬𑀣𑀸𑀧𑀭𑀺𑀯𑀺𑀢𑀓𑁆𑀓𑀺𑀢𑀁.

‘‘𑀬𑀤𑀺 𑀢𑁂 𑀭𑀼𑀘𑀺𑀢𑀁 𑀅𑀬𑁆𑀬𑁂, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀺𑀯𑀁;

𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫 𑀲𑀩𑁆𑀩𑀸𑀧𑀺, 𑀩𑀼𑀤𑁆𑀥𑀸𑀦𑀼𑀜𑁆𑀜𑀸𑀬 𑀲𑀼𑀩𑁆𑀩𑀢𑁂.

‘‘𑀫𑀬𑀁 𑀲𑀳𑀸𑀯 𑀦𑀺𑀓𑁆𑀔𑀦𑁆𑀢𑀸, 𑀖𑀭𑀸𑀧𑀺 𑀘 𑀪𑀯𑀸𑀧𑀺 𑀘;

𑀲𑀳𑀸𑀬𑁂𑀯 𑀕𑀫𑀺𑀲𑁆𑀲𑀸𑀫, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀼𑀢𑁆𑀢𑀫𑀁.

‘‘𑀦𑀺𑀩𑁆𑀩𑀸𑀦𑀸𑀬 𑀯𑀚𑀦𑁆𑀢𑀻𑀦𑀁, 𑀓𑀺𑀁 𑀯𑀓𑁆𑀔𑀸𑀫𑀻𑀢𑀺 𑀲𑀸 𑀯𑀤𑀁;

𑀲𑀳 𑀲𑀩𑁆𑀩𑀸𑀳𑀺 𑀦𑀺𑀕𑁆𑀕𑀜𑁆𑀙𑀺, 𑀪𑀺𑀓𑁆𑀔𑀼𑀦𑀻𑀦𑀺𑀮𑀬𑀸 𑀢𑀤𑀸.

‘‘𑀉𑀧𑀲𑁆𑀲𑀬𑁂 𑀬𑀸𑀥𑀺𑀯𑀢𑁆𑀣𑀸, 𑀤𑁂𑀯𑀢𑀸 𑀢𑀸 𑀔𑀫𑀦𑁆𑀢𑀼 𑀫𑁂;

𑀪𑀺𑀓𑁆𑀔𑀼𑀦𑀻𑀦𑀺𑀮𑀬𑀲𑁆𑀲𑁂𑀤𑀁, 𑀧𑀘𑁆𑀙𑀺𑀫𑀁 𑀤𑀲𑁆𑀲𑀦𑀁 𑀫𑀫.

‘‘𑀦 𑀚𑀭𑀸 𑀫𑀘𑁆𑀘𑀼 𑀯𑀸 𑀬𑀢𑁆𑀣, 𑀅𑀧𑁆𑀧𑀺𑀬𑁂𑀳𑀺 𑀲𑀫𑀸𑀕𑀫𑁄;

𑀧𑀺𑀬𑁂𑀳𑀺 𑀦 𑀯𑀺𑀬𑁄𑀕𑁄𑀢𑁆𑀣𑀺, 𑀢𑀁 𑀯𑀚𑀺𑀲𑁆𑀲𑀁 𑀅𑀲𑀗𑁆𑀔𑀢𑀁.

‘‘𑀅𑀯𑀻𑀢𑀭𑀸𑀕𑀸 𑀢𑀁 𑀲𑀼𑀢𑁆𑀯𑀸, 𑀯𑀘𑀦𑀁 𑀲𑀼𑀕𑀢𑁄𑀭𑀲𑀸;

𑀲𑁄𑀓𑀝𑁆𑀝𑀸 𑀧𑀭𑀺𑀤𑁂𑀯𑀺𑀁𑀲𑀼, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

‘‘𑀪𑀺𑀓𑁆𑀔𑀼𑀦𑀻𑀦𑀺𑀮𑀬𑁄 𑀲𑀼𑀜𑁆𑀜𑁄, 𑀪𑀽𑀢𑁄 𑀢𑀸𑀳𑀺 𑀯𑀺𑀦𑀸 𑀅𑀬𑀁;

𑀧𑀪𑀸𑀢𑁂 𑀯𑀺𑀬 𑀢𑀸𑀭𑀸𑀬𑁄, 𑀦 𑀤𑀺𑀲𑁆𑀲𑀦𑁆𑀢𑀺 𑀚𑀺𑀦𑁄𑀭𑀲𑀸.

‘‘𑀦𑀺𑀩𑁆𑀩𑀸𑀦𑀁 𑀕𑁄𑀢𑀫𑀻 𑀬𑀸𑀢𑀺, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺;

𑀦𑀤𑀻𑀲𑀢𑁂𑀳𑀺𑀯 𑀲𑀳, 𑀕𑀗𑁆𑀕𑀸 𑀧𑀜𑁆𑀘𑀳𑀺 𑀲𑀸𑀕𑀭𑀁.

‘‘𑀭𑀣𑀺𑀬𑀸𑀬 𑀯𑀚𑀦𑁆𑀢𑀺𑀬𑁄, 𑀤𑀺𑀲𑁆𑀯𑀸 𑀲𑀤𑁆𑀥𑀸 𑀉𑀧𑀸𑀲𑀺𑀓𑀸;

𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀸𑀤𑁂𑀲𑀼, 𑀦𑀺𑀧𑀘𑁆𑀘 𑀇𑀤𑀫𑀩𑁆𑀭𑀯𑀼𑀁.

‘‘𑀧𑀲𑀻𑀤𑀲𑁆𑀲𑀼 𑀫𑀳𑀸𑀪𑁄𑀕𑁂, 𑀅𑀦𑀸𑀣𑀸𑀬𑁄 𑀯𑀺𑀳𑀸𑀬 𑀦𑁄;

𑀢𑀬𑀸 𑀦 𑀬𑀼𑀢𑁆𑀢𑀸 𑀦𑀺𑀩𑁆𑀩𑀸𑀢𑀼𑀁, 𑀇𑀘𑁆𑀙𑀝𑁆𑀝𑀸 𑀯𑀺𑀮𑀧𑀺𑀁𑀲𑀼 𑀢𑀸.

‘‘𑀢𑀸𑀲𑀁 𑀲𑁄𑀓𑀧𑀳𑀸𑀦𑀢𑁆𑀣𑀁, 𑀅𑀯𑁄𑀘 𑀫𑀥𑀼𑀭𑀁 𑀕𑀺𑀭𑀁;

𑀭𑀼𑀤𑀺𑀢𑁂𑀦 𑀅𑀮𑀁 𑀧𑀼𑀢𑁆𑀢𑀸, 𑀳𑀸𑀲𑀓𑀸𑀮𑁄𑀬𑀫𑀚𑁆𑀚 𑀯𑁄.

‘‘𑀧𑀭𑀺𑀜𑁆𑀜𑀸𑀢𑀁 𑀫𑀬𑀸 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀳𑁂𑀢𑀼 𑀯𑀺𑀯𑀚𑁆𑀚𑀺𑀢𑁄;

𑀦𑀺𑀭𑁄𑀥𑁄 𑀫𑁂 𑀲𑀘𑁆𑀙𑀺𑀓𑀢𑁄, 𑀫𑀕𑁆𑀕𑁄 𑀘𑀸𑀧𑀺 𑀲𑀼𑀪𑀸𑀯𑀺𑀢𑁄.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀩𑀼𑀤𑁆𑀥𑁄 𑀢𑀲𑁆𑀲 𑀘 𑀲𑀤𑁆𑀥𑀫𑁆𑀫𑁄, 𑀅𑀦𑀽𑀦𑁄 𑀬𑀸𑀯 𑀢𑀺𑀝𑁆𑀞𑀢𑀺;

𑀦𑀺𑀩𑁆𑀩𑀸𑀢𑀼𑀁 𑀢𑀸𑀯 𑀓𑀸𑀮𑁄 𑀫𑁂, 𑀫𑀸 𑀫𑀁 𑀲𑁄𑀘𑀣 𑀧𑀼𑀢𑁆𑀢𑀺𑀓𑀸.

‘‘𑀓𑁄𑀡𑁆𑀟𑀜𑁆𑀜𑀸𑀦𑀦𑁆𑀤𑀦𑀦𑁆𑀤𑀸𑀤𑀻, 𑀢𑀺𑀝𑁆𑀞𑀦𑁆𑀢𑀺 𑀭𑀸𑀳𑀼𑀮𑁄 𑀚𑀺𑀦𑁄;

𑀲𑀼𑀔𑀺𑀢𑁄 𑀲𑀳𑀺𑀢𑁄 𑀲𑀗𑁆𑀖𑁄, 𑀳𑀢𑀤𑀩𑁆𑀩𑀸 𑀘 𑀢𑀺𑀢𑁆𑀣𑀺𑀬𑀸.

‘‘𑀑𑀓𑁆𑀓𑀸𑀓𑀯𑀁𑀲𑀲𑁆𑀲 𑀬𑀲𑁄, 𑀉𑀲𑁆𑀲𑀺𑀢𑁄 𑀫𑀸𑀭𑀫𑀤𑁆𑀤𑀦𑁄;

𑀦𑀦𑀼 𑀲𑀫𑁆𑀧𑀢𑀺 𑀓𑀸𑀮𑁄 𑀫𑁂, 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀼𑀢𑁆𑀢𑀺𑀓𑀸.

‘‘𑀘𑀺𑀭𑀧𑁆𑀧𑀪𑀼𑀢𑀺 𑀬𑀁 𑀫𑀬𑁆𑀳𑀁, 𑀧𑀢𑁆𑀣𑀺𑀢𑀁 𑀅𑀚𑁆𑀚 𑀲𑀺𑀚𑁆𑀛𑀢𑁂;

𑀆𑀦𑀦𑁆𑀤𑀪𑁂𑀭𑀺𑀓𑀸𑀮𑁄𑀬𑀁, 𑀓𑀺𑀁 𑀯𑁄 𑀅𑀲𑁆𑀲𑀽𑀳𑀺 𑀧𑀼𑀢𑁆𑀢𑀺𑀓𑀸.

‘‘𑀲𑀘𑁂 𑀫𑀬𑀺 𑀤𑀬𑀸 𑀅𑀢𑁆𑀣𑀺, 𑀬𑀤𑀺 𑀘𑀢𑁆𑀣𑀺 𑀓𑀢𑀜𑁆𑀜𑀼𑀢𑀸;

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀲𑀩𑁆𑀩𑀸, 𑀓𑀭𑁄𑀣 𑀯𑀻𑀭𑀺𑀬𑀁 𑀤𑀴𑁆𑀳𑀁.

‘‘𑀣𑀻𑀦𑀁 𑀅𑀤𑀸𑀲𑀺 𑀧𑀩𑁆𑀩𑀚𑁆𑀚𑀁, 𑀲𑀫𑁆𑀩𑀼𑀤𑁆𑀥𑁄 𑀬𑀸𑀘𑀺𑀢𑁄 𑀫𑀬𑀸;

𑀢𑀲𑁆𑀫𑀸 𑀬𑀣𑀸𑀳𑀁 𑀦𑀦𑁆𑀤𑀺𑀲𑁆𑀲𑀁, 𑀢𑀣𑀸 𑀢𑀫𑀦𑀼𑀢𑀺𑀝𑁆𑀞𑀣.

‘‘𑀢𑀸 𑀏𑀯𑀫𑀦𑀼𑀲𑀸𑀲𑀺𑀢𑁆𑀯𑀸, 𑀪𑀺𑀓𑁆𑀔𑀼𑀦𑀻𑀳𑀺 𑀧𑀼𑀭𑀓𑁆𑀔𑀢𑀸;

𑀉𑀧𑁂𑀘𑁆𑀘 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀅𑀳𑀁 𑀲𑀼𑀕𑀢 𑀢𑁂 𑀫𑀸𑀢𑀸, 𑀢𑁆𑀯𑀜𑁆𑀘 𑀯𑀻𑀭 𑀧𑀺𑀢𑀸 𑀫𑀫;

𑀲𑀤𑁆𑀥𑀫𑁆𑀫𑀲𑀼𑀔𑀤 𑀦𑀸𑀣, 𑀢𑀬𑀺 𑀚𑀸𑀢𑀸𑀫𑁆𑀳𑀺 𑀕𑁄𑀢𑀫.

‘‘𑀲𑀁𑀯𑀤𑁆𑀥𑀺𑀢𑁄𑀬𑀁 𑀲𑀼𑀕𑀢, 𑀭𑀽𑀧𑀓𑀸𑀬𑁄 𑀫𑀬𑀸 𑀢𑀯;

𑀅𑀦𑀺𑀦𑁆𑀤𑀺𑀢𑁄 𑀥𑀫𑁆𑀫𑀓𑀸𑀬𑁄, 𑀫𑀫 𑀲𑀁𑀯𑀤𑁆𑀥𑀺𑀢𑁄 𑀢𑀬𑀸.

‘‘𑀫𑀼𑀳𑀼𑀢𑁆𑀢𑀁 𑀢𑀡𑁆𑀳𑀸𑀲𑀫𑀡𑀁, 𑀔𑀻𑀭𑀁 𑀢𑁆𑀯𑀁 𑀧𑀸𑀬𑀺𑀢𑁄 𑀫𑀬𑀸;

𑀢𑀬𑀸𑀳𑀁 𑀲𑀦𑁆𑀢𑀫𑀘𑁆𑀘𑀦𑁆𑀢𑀁, 𑀥𑀫𑁆𑀫𑀔𑀻𑀭𑀜𑁆𑀳𑀺 𑀧𑀸𑀬𑀺𑀢𑀸.

‘‘𑀩𑀦𑁆𑀥𑀦𑀸𑀭𑀓𑁆𑀔𑀡𑁂 𑀫𑀬𑁆𑀳𑀁, 𑀅𑀡𑀡𑁄 𑀢𑁆𑀯𑀁 𑀫𑀳𑀸𑀫𑀼𑀦𑁂;

𑀧𑀼𑀢𑁆𑀢𑀓𑀸𑀫𑀸 𑀣𑀺𑀬𑁄 𑀬𑀸𑀘𑀁, 𑀮𑀪𑀦𑁆𑀢𑀺 𑀢𑀸𑀤𑀺𑀲𑀁 𑀲𑀼𑀢𑀁.

‘‘𑀫𑀦𑁆𑀥𑀸𑀢𑀸𑀤𑀺𑀦𑀭𑀺𑀦𑁆𑀤𑀸𑀦𑀁, 𑀬𑀸 𑀫𑀸𑀢𑀸 𑀲𑀸 𑀪𑀯𑀡𑁆𑀡𑀯𑁂;

𑀦𑀺𑀫𑀼𑀕𑁆𑀕𑀸𑀳𑀁 𑀢𑀬𑀸 𑀧𑀼𑀢𑁆𑀢, 𑀢𑀸𑀭𑀺𑀢𑀸 𑀪𑀯𑀲𑀸𑀕𑀭𑀸.

‘‘𑀭𑀜𑁆𑀜𑁄 𑀫𑀸𑀢𑀸 𑀫𑀳𑁂𑀲𑀻𑀢𑀺, 𑀲𑀼𑀮𑀪𑀁 𑀦𑀸𑀫𑀫𑀺𑀢𑁆𑀣𑀺𑀦𑀁;

𑀩𑀼𑀤𑁆𑀥𑀫𑀸𑀢𑀸𑀢𑀺 𑀬𑀁 𑀦𑀸𑀫𑀁, 𑀏𑀢𑀁 𑀧𑀭𑀫𑀤𑀼𑀮𑁆𑀮𑀪𑀁.

‘‘𑀢𑀜𑁆𑀘 𑀮𑀤𑁆𑀥𑀁 𑀫𑀳𑀸𑀯𑀻𑀭, 𑀧𑀡𑀺𑀥𑀸𑀦𑀁 𑀫𑀫𑀁 𑀢𑀬𑀸;

𑀅𑀡𑀼𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸, 𑀢𑀁 𑀲𑀩𑁆𑀩𑀁 𑀧𑀽𑀭𑀺𑀢𑀁 𑀫𑀬𑀸.

‘‘𑀧𑀭𑀺𑀦𑀺𑀩𑁆𑀩𑀸𑀢𑀼𑀫𑀺𑀘𑁆𑀙𑀸𑀫𑀺, 𑀯𑀺𑀳𑀸𑀬𑁂𑀫𑀁 𑀓𑀴𑁂𑀯𑀭𑀁;

𑀅𑀦𑀼𑀚𑀸𑀦𑀸𑀳𑀺 𑀫𑁂 𑀯𑀻𑀭, 𑀤𑀼𑀓𑁆𑀔𑀦𑁆𑀢𑀓𑀭 𑀦𑀸𑀬𑀓.

‘‘𑀘𑀓𑁆𑀓𑀗𑁆𑀓𑀼𑀲𑀥𑀚𑀸𑀓𑀺𑀡𑁆𑀡𑁂, 𑀧𑀸𑀤𑁂 𑀓𑀫𑀮𑀓𑁄𑀫𑀮𑁂;

𑀧𑀲𑀸𑀭𑁂𑀳𑀺 𑀧𑀡𑀸𑀫𑀁 𑀢𑁂, 𑀓𑀭𑀺𑀲𑁆𑀲𑀁 𑀧𑀼𑀢𑁆𑀢𑀉𑀢𑁆𑀢𑀫𑁂.

‘‘𑀲𑀼𑀯𑀡𑁆𑀡𑀭𑀸𑀲𑀺𑀲𑀗𑁆𑀓𑀸𑀲𑀁, 𑀲𑀭𑀻𑀭𑀁 𑀓𑀼𑀭𑀼 𑀧𑀸𑀓𑀝𑀁;

𑀓𑀢𑁆𑀯𑀸 𑀤𑁂𑀳𑀁 𑀲𑀼𑀤𑀺𑀝𑁆𑀞𑀁 𑀢𑁂, 𑀲𑀦𑁆𑀢𑀺𑀁 𑀕𑀘𑁆𑀙𑀸𑀫𑀺 𑀦𑀸𑀬𑀓.

‘‘𑀤𑁆𑀯𑀢𑁆𑀢𑀺𑀁𑀲𑀮𑀓𑁆𑀔𑀡𑀽𑀧𑁂𑀢𑀁, 𑀲𑀼𑀧𑁆𑀧𑀪𑀸𑀮𑀗𑁆𑀓𑀢𑀁 𑀢𑀦𑀼𑀁;

𑀲𑀜𑁆𑀛𑀸𑀖𑀦𑀸𑀯 𑀩𑀸𑀮𑀓𑁆𑀓𑀁, 𑀫𑀸𑀢𑀼𑀘𑁆𑀙𑀁 𑀤𑀲𑁆𑀲𑀬𑀻 𑀚𑀺𑀦𑁄.

‘‘𑀨𑀼𑀮𑁆𑀮𑀸𑀭𑀯𑀺𑀦𑁆𑀤𑀲𑀁𑀓𑀸𑀲𑁂, 𑀢𑀭𑀼𑀡𑀸𑀤𑀺𑀘𑁆𑀘𑀲𑀧𑁆𑀧𑀪𑁂;

𑀘𑀓𑁆𑀓𑀗𑁆𑀓𑀺𑀢𑁂 𑀧𑀸𑀤𑀢𑀮𑁂, 𑀢𑀢𑁄 𑀲𑀸 𑀲𑀺𑀭𑀲𑀸 𑀧𑀢𑀺.

‘‘𑀧𑀡𑀫𑀸𑀫𑀺 𑀦𑀭𑀸𑀤𑀺𑀘𑁆𑀘, 𑀆𑀤𑀺𑀘𑁆𑀘𑀓𑀼𑀮𑀓𑁂𑀢𑀼𑀓𑀁;

𑀧𑀘𑁆𑀙𑀺𑀫𑁂 𑀫𑀭𑀡𑁂 𑀫𑀬𑁆𑀳𑀁, 𑀦 𑀢𑀁 𑀇𑀓𑁆𑀔𑀸𑀫𑀳𑀁 𑀧𑀼𑀦𑁄.

‘‘𑀇𑀢𑁆𑀣𑀺𑀬𑁄 𑀦𑀸𑀫 𑀮𑁄𑀓𑀕𑁆𑀕, 𑀲𑀩𑁆𑀩𑀤𑁄𑀲𑀸𑀓𑀭𑀸 𑀫𑀢𑀸;

𑀬𑀤𑀺 𑀓𑁄 𑀘𑀢𑁆𑀣𑀺 𑀤𑁄𑀲𑁄 𑀫𑁂, 𑀔𑀫𑀲𑁆𑀲𑀼 𑀓𑀭𑀼𑀡𑀸𑀓𑀭.

‘‘𑀇𑀢𑁆𑀣𑀺𑀓𑀸𑀦𑀜𑁆𑀘 𑀧𑀩𑁆𑀩𑀚𑁆𑀚𑀁, 𑀳𑀁 𑀢𑀁 𑀬𑀸𑀘𑀺𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀢𑁆𑀣 𑀘𑁂 𑀅𑀢𑁆𑀣𑀺 𑀤𑁄𑀲𑁄 𑀫𑁂, 𑀢𑀁 𑀔𑀫𑀲𑁆𑀲𑀼 𑀦𑀭𑀸𑀲𑀪.

‘‘𑀫𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀻𑀭, 𑀢𑀯𑀸𑀦𑀼𑀜𑁆𑀜𑀸𑀬 𑀲𑀸𑀲𑀺𑀢𑀸;

𑀢𑀢𑁆𑀭 𑀘𑁂 𑀅𑀢𑁆𑀣𑀺 𑀤𑀼𑀦𑁆𑀦𑀻𑀢𑀁, 𑀢𑀁 𑀔𑀫𑀲𑁆𑀲𑀼 𑀔𑀫𑀸𑀥𑀺𑀧.

‘‘𑀅𑀓𑁆𑀔𑀦𑁆𑀢𑁂 𑀦𑀸𑀫 𑀔𑀦𑁆𑀢𑀩𑁆𑀩𑀁, 𑀓𑀺𑀁 𑀪𑀯𑁂 𑀕𑀼𑀡𑀪𑀽𑀲𑀦𑁂;

𑀓𑀺𑀫𑀼𑀢𑁆𑀢𑀭𑀁 𑀢𑁂 𑀯𑀢𑁆𑀣𑀸𑀫𑀺, 𑀦𑀺𑀩𑁆𑀩𑀸𑀦𑀸𑀬 𑀯𑀚𑀦𑁆𑀢𑀺𑀬𑀸.

‘‘𑀲𑀼𑀤𑁆𑀥𑁂 𑀅𑀦𑀽𑀦𑁂 𑀫𑀫 𑀪𑀺𑀓𑁆𑀔𑀼𑀲𑀗𑁆𑀖𑁂, 𑀮𑁄𑀓𑀸 𑀇𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀔𑀫𑀦𑁆𑀢𑁂;

𑀧𑀪𑀸𑀢𑀓𑀸𑀮𑁂 𑀩𑁆𑀬𑀲𑀦𑀗𑁆𑀕𑀢𑀸𑀦𑀁, 𑀤𑀺𑀲𑁆𑀯𑀸𑀦 𑀦𑀺𑀬𑁆𑀬𑀸𑀢𑀺𑀯 𑀘𑀦𑁆𑀤𑀮𑁂𑀔𑀸.

‘‘𑀢𑀤𑁂𑀢𑀭𑀸 𑀪𑀺𑀓𑁆𑀔𑀼𑀦𑀺𑀬𑁄 𑀚𑀺𑀦𑀕𑁆𑀕𑀁, 𑀢𑀸𑀭𑀸𑀯 𑀘𑀦𑁆𑀤𑀸𑀦𑀼𑀕𑀢𑀸 𑀲𑀼𑀫𑁂𑀭𑀼𑀁;

𑀧𑀤𑀓𑁆𑀔𑀺𑀡𑀁 𑀓𑀘𑁆𑀘 𑀦𑀺𑀧𑀘𑁆𑀘 𑀧𑀸𑀤𑁂, 𑀞𑀺𑀢𑀸 𑀫𑀼𑀔𑀦𑁆𑀢𑀁 𑀲𑀫𑀼𑀤𑀺𑀓𑁆𑀔𑀫𑀸𑀦𑀸.

‘‘𑀦 𑀢𑀺𑀢𑁆𑀢𑀺𑀧𑀼𑀩𑁆𑀩𑀁 𑀢𑀯 𑀤𑀲𑁆𑀲𑀦𑁂𑀦, 𑀘𑀓𑁆𑀔𑀼𑀁 𑀦 𑀲𑁄𑀢𑀁 𑀢𑀯 𑀪𑀸𑀲𑀺𑀢𑁂𑀦;

𑀘𑀺𑀢𑁆𑀢𑀁 𑀫𑀫𑀁 𑀓𑁂𑀯𑀮𑀫𑁂𑀓𑀫𑁂𑀯, 𑀧𑀧𑁆𑀧𑀼𑀬𑁆𑀬 𑀢𑀁 𑀥𑀫𑁆𑀫𑀭𑀲𑁂𑀦 𑀢𑀺𑀢𑁆𑀢𑀺.

‘‘𑀦𑀤𑀢𑁄 𑀧𑀭𑀺𑀲𑀸𑀬𑀁 𑀢𑁂, 𑀯𑀸𑀤𑀺𑀢𑀩𑁆𑀩𑀧𑀳𑀸𑀭𑀺𑀦𑁄;

𑀬𑁂 𑀢𑁂 𑀤𑀓𑁆𑀔𑀦𑁆𑀢𑀺 𑀯𑀤𑀦𑀁, 𑀥𑀜𑁆𑀜𑀸 𑀢𑁂 𑀦𑀭𑀧𑀼𑀗𑁆𑀕𑀯.

‘‘𑀤𑀻𑀖𑀗𑁆𑀕𑀼𑀮𑀻 𑀢𑀫𑁆𑀩𑀦𑀔𑁂, 𑀲𑀼𑀪𑁂 𑀆𑀬𑀢𑀧𑀡𑁆𑀳𑀺𑀓𑁂;

𑀬𑁂 𑀧𑀸𑀤𑁂 𑀧𑀡𑀫𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀥𑀜𑁆𑀜𑀸 𑀕𑀼𑀡𑀦𑁆𑀥𑀭.

‘‘𑀫𑀥𑀼𑀭𑀸𑀦𑀺 𑀧𑀳𑀝𑁆𑀞𑀸𑀦𑀺, 𑀤𑁄𑀲𑀕𑁆𑀖𑀸𑀦𑀺 𑀳𑀺𑀢𑀸𑀦𑀺 𑀘;

𑀬𑁂 𑀢𑁂 𑀯𑀸𑀓𑁆𑀬𑀸𑀦𑀺 𑀲𑀼𑀬𑁆𑀬𑀦𑁆𑀢𑀺, 𑀢𑁂𑀧𑀺 𑀥𑀜𑁆𑀜𑀸 𑀦𑀭𑀼𑀢𑁆𑀢𑀫.

‘‘𑀥𑀜𑁆𑀜𑀸𑀳𑀁 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑀧𑀽𑀚𑀦𑀢𑀧𑁆𑀧𑀭𑀸;

𑀢𑀺𑀡𑁆𑀡𑀲𑀁𑀲𑀸𑀭𑀓𑀦𑁆𑀢𑀸𑀭𑀸, 𑀲𑀼𑀯𑀸𑀓𑁆𑀬𑁂𑀦 𑀲𑀺𑀭𑀻𑀫𑀢𑁄.

‘‘𑀢𑀢𑁄 𑀲𑀸 𑀅𑀦𑀼𑀲𑀸𑀯𑁂𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀫𑁆𑀧𑀺 𑀲𑀼𑀩𑁆𑀩𑀢𑀸;

𑀭𑀸𑀳𑀼𑀮𑀸𑀦𑀦𑁆𑀤𑀦𑀦𑁆𑀤𑁂 𑀘, 𑀯𑀦𑁆𑀤𑀺𑀢𑁆𑀯𑀸 𑀇𑀤𑀫𑀩𑁆𑀭𑀯𑀺.

‘‘𑀆𑀲𑀻𑀯𑀺𑀲𑀸𑀮𑀬𑀲𑀫𑁂, 𑀭𑁄𑀕𑀸𑀯𑀸𑀲𑁂 𑀓𑀴𑁂𑀯𑀭𑁂;

𑀦𑀺𑀩𑁆𑀩𑀺𑀦𑁆𑀤𑀸 𑀤𑀼𑀓𑁆𑀔𑀲𑀗𑁆𑀖𑀸𑀝𑁂, 𑀚𑀭𑀸𑀫𑀭𑀡𑀕𑁄𑀘𑀭𑁂.

‘‘𑀦𑀸𑀦𑀸𑀓𑀮𑀺𑀫𑀮𑀸𑀓𑀺𑀡𑁆𑀡𑁂, 𑀧𑀭𑀸𑀬𑀢𑁆𑀢𑁂 𑀦𑀺𑀭𑀻𑀳𑀓𑁂;

𑀢𑁂𑀦 𑀦𑀺𑀩𑁆𑀩𑀸𑀢𑀼𑀫𑀺𑀘𑁆𑀙𑀸𑀫𑀺, 𑀅𑀦𑀼𑀫𑀜𑁆𑀜𑀣 𑀧𑀼𑀢𑁆𑀢𑀓𑀸.

‘‘𑀦𑀦𑁆𑀤𑁄 𑀭𑀸𑀳𑀼𑀮𑀪𑀤𑁆𑀤𑁄 𑀘, 𑀯𑀻𑀢𑀲𑁄𑀓𑀸 𑀦𑀺𑀭𑀸𑀲𑀯𑀸;

𑀞𑀺𑀢𑀸𑀘𑀮𑀝𑁆𑀞𑀺𑀢𑀺 𑀣𑀺𑀭𑀸, 𑀥𑀫𑁆𑀫𑀢𑀫𑀦𑀼𑀘𑀺𑀦𑁆𑀢𑀬𑀼𑀁.

‘‘𑀥𑀺𑀭𑀢𑁆𑀣𑀼 𑀲𑀗𑁆𑀔𑀢𑀁 𑀮𑁄𑀮𑀁, 𑀅𑀲𑀸𑀭𑀁 𑀓𑀤𑀮𑀽𑀧𑀫𑀁;

𑀫𑀸𑀬𑀸𑀫𑀭𑀻𑀘𑀺𑀲𑀤𑀺𑀲𑀁, 𑀇𑀢𑁆𑀢𑀭𑀁 𑀅𑀦𑀯𑀝𑁆𑀞𑀺𑀢𑀁.

‘‘𑀬𑀢𑁆𑀣 𑀦𑀸𑀫 𑀚𑀺𑀦𑀲𑁆𑀲𑀸𑀬𑀁, 𑀫𑀸𑀢𑀼𑀘𑁆𑀙𑀸 𑀩𑀼𑀤𑁆𑀥𑀧𑁄𑀲𑀺𑀓𑀸;

𑀕𑁄𑀢𑀫𑀻 𑀦𑀺𑀥𑀦𑀁 𑀬𑀸𑀢𑀺, 𑀅𑀦𑀺𑀘𑁆𑀘𑀁 𑀲𑀩𑁆𑀩𑀲𑀗𑁆𑀔𑀢𑀁.

‘‘𑀆𑀦𑀦𑁆𑀤𑁄 𑀘 𑀢𑀤𑀸 𑀲𑁂𑀔𑁄, 𑀲𑁄𑀓𑀝𑁆𑀝𑁄 𑀚𑀺𑀦𑀯𑀘𑁆𑀙𑀮𑁄;

𑀢𑀢𑁆𑀣𑀲𑁆𑀲𑀽𑀦𑀺 𑀓𑀭𑁄𑀦𑁆𑀢𑁄 𑀲𑁄, 𑀓𑀭𑀼𑀡𑀁 𑀧𑀭𑀺𑀤𑁂𑀯𑀢𑀺.

‘‘𑀳𑀸 𑀲𑀦𑁆𑀢𑀺𑀁 𑀕𑁄𑀢𑀫𑀻 𑀬𑀸𑀢𑀺, 𑀦𑀽𑀦 𑀩𑀼𑀤𑁆𑀥𑁄𑀧𑀺 𑀦𑀺𑀩𑁆𑀩𑀼𑀢𑀺𑀁;

𑀕𑀘𑁆𑀙𑀢𑀺 𑀦 𑀘𑀺𑀭𑁂𑀦𑁂𑀯, 𑀅𑀕𑁆𑀕𑀺𑀭𑀺𑀯 𑀦𑀺𑀭𑀺𑀦𑁆𑀥𑀦𑁄.

‘‘𑀏𑀯𑀁 𑀯𑀺𑀮𑀸𑀧𑀫𑀸𑀦𑀁 𑀢𑀁, 𑀆𑀦𑀦𑁆𑀤𑀁 𑀆𑀳 𑀕𑁄𑀢𑀫𑀻;

𑀲𑀼𑀢𑀲𑀸𑀕𑀭𑀕𑀫𑁆𑀪𑀻𑀭, 𑀩𑀼𑀤𑁆𑀥𑁄𑀧𑀝𑁆𑀞𑀸𑀦 𑀢𑀧𑁆𑀧𑀭.

‘‘𑀦 𑀬𑀼𑀢𑁆𑀢𑀁 𑀲𑁄𑀘𑀺𑀢𑀼𑀁 𑀧𑀼𑀢𑁆𑀢, 𑀳𑀸𑀲𑀓𑀸𑀮𑁂 𑀉𑀧𑀝𑁆𑀞𑀺𑀢𑁂;

𑀢𑀬𑀸 𑀫𑁂 𑀲𑀭𑀡𑀁 𑀧𑀼𑀢𑁆𑀢, 𑀦𑀺𑀩𑁆𑀩𑀸𑀦𑀁 𑀢𑀫𑀼𑀧𑀸𑀕𑀢𑀁.

‘‘𑀢𑀬𑀸 𑀢𑀸𑀢 𑀲𑀫𑀚𑁆𑀛𑀺𑀝𑁆𑀞𑁄, 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺 𑀦𑁄;

𑀫𑀸 𑀧𑀼𑀢𑁆𑀢 𑀯𑀺𑀫𑀦𑁄 𑀳𑁄𑀳𑀺, 𑀲𑀨𑀮𑁄 𑀢𑁂 𑀧𑀭𑀺𑀲𑁆𑀲𑀫𑁄.

‘‘𑀬𑀁 𑀦 𑀤𑀺𑀝𑁆𑀞𑀁 𑀧𑀼𑀭𑀸𑀡𑁂𑀳𑀺, 𑀢𑀺𑀢𑁆𑀣𑀺𑀓𑀸𑀘𑀭𑀺𑀬𑁂𑀳𑀺𑀧𑀺;

𑀢𑀁 𑀧𑀤𑀁 𑀲𑀼𑀓𑀼𑀫𑀸𑀭𑀻𑀳𑀺, 𑀲𑀢𑁆𑀢𑀯𑀲𑁆𑀲𑀸𑀳𑀺 𑀯𑁂𑀤𑀺𑀢𑀁.

‘‘𑀩𑀼𑀤𑁆𑀥𑀲𑀸𑀲𑀦𑀧𑀸𑀮𑁂𑀢, 𑀧𑀘𑁆𑀙𑀺𑀫𑀁 𑀤𑀲𑁆𑀲𑀦𑀁 𑀢𑀯;

𑀢𑀢𑁆𑀣 𑀕𑀘𑁆𑀙𑀸𑀫𑀳𑀁 𑀧𑀼𑀢𑁆𑀢, 𑀕𑀢𑁄 𑀬𑀢𑁆𑀣 𑀦 𑀤𑀺𑀲𑁆𑀲𑀢𑁂.

‘‘𑀓𑀤𑀸𑀘𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀔𑀺𑀧𑀻 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀢𑀤𑀸𑀳𑀁 𑀆𑀲𑀻𑀲𑀯𑀸𑀘𑀁, 𑀅𑀯𑁄𑀘𑀁 𑀅𑀦𑀼𑀓𑀫𑁆𑀧𑀺𑀓𑀸.

‘‘𑀘𑀺𑀭𑀁 𑀚𑀻𑀯 𑀫𑀳𑀸𑀯𑀻𑀭, 𑀓𑀧𑁆𑀧𑀁 𑀢𑀺𑀝𑁆𑀞 𑀫𑀳𑀸𑀫𑀼𑀦𑁂;

𑀲𑀩𑁆𑀩𑀮𑁄𑀓𑀲𑁆𑀲 𑀅𑀢𑁆𑀣𑀸𑀬, 𑀪𑀯𑀲𑁆𑀲𑀼 𑀅𑀚𑀭𑀸𑀫𑀭𑁄.

‘‘𑀢𑀁 𑀢𑀣𑀸𑀯𑀸𑀤𑀺𑀦𑀺𑀁 𑀩𑀼𑀤𑁆𑀥𑁄, 𑀫𑀫𑀁 𑀲𑁄 𑀏𑀢𑀤𑀩𑁆𑀭𑀯𑀺;

𑀦 𑀳𑁂𑀯𑀁 𑀯𑀦𑁆𑀤𑀺𑀬𑀸 𑀩𑀼𑀤𑁆𑀥𑀸, 𑀬𑀣𑀸 𑀯𑀦𑁆𑀤𑀲𑀺 𑀕𑁄𑀢𑀫𑀻.

‘‘𑀓𑀣𑀁 𑀘𑀭𑀳𑀺 𑀲𑀩𑁆𑀩𑀜𑁆𑀜𑀽, 𑀯𑀦𑁆𑀤𑀺𑀢𑀩𑁆𑀩𑀸 𑀢𑀣𑀸𑀕𑀢𑀸;

𑀓𑀣𑀁 𑀅𑀯𑀦𑁆𑀤𑀺𑀬𑀸 𑀩𑀼𑀤𑁆𑀥𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂;

𑀲𑀫𑀕𑁆𑀕𑁂 𑀲𑀸𑀯𑀓𑁂 𑀧𑀲𑁆𑀲, 𑀏𑀢𑀁 𑀩𑀼𑀤𑁆𑀥𑀸𑀦𑀯𑀦𑁆𑀤𑀦𑀁.

‘‘𑀢𑀢𑁄 𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸, 𑀏𑀓𑀺𑀓𑀸𑀳𑀁 𑀯𑀺𑀘𑀺𑀦𑁆𑀢𑀬𑀺𑀁;

𑀲𑀫𑀕𑁆𑀕𑀧𑀭𑀺𑀲𑀁 𑀦𑀸𑀣𑁄, 𑀭𑁄𑀥𑁂𑀲𑀺 𑀢𑀺𑀪𑀯𑀦𑁆𑀢𑀕𑁄.

‘‘𑀳𑀦𑁆𑀤𑀸𑀳𑀁 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀁, 𑀫𑀸 𑀯𑀺𑀧𑀢𑁆𑀢𑀺𑀢𑀫𑀤𑁆𑀤𑀲𑀁;

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀤𑀺𑀲𑁆𑀯𑀸𑀦 𑀇𑀲𑀺𑀲𑀢𑁆𑀢𑀫𑀁.

‘‘𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀫𑁂, 𑀆𑀭𑁄𑀘𑁂𑀲𑀺𑀁 𑀯𑀺𑀦𑀸𑀬𑀓𑀁;

𑀢𑀢𑁄 𑀲𑁄 𑀲𑀫𑀦𑀼𑀜𑁆𑀜𑀸𑀲𑀺, 𑀓𑀸𑀮𑀁 𑀚𑀸𑀦𑀸𑀳𑀺 𑀕𑁄𑀢𑀫𑀻.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀣𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁂, 𑀬𑁂 𑀩𑀸𑀮𑀸 𑀯𑀺𑀫𑀢𑀺𑀁 𑀕𑀢𑀸;

𑀢𑁂𑀲𑀁 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀢𑁆𑀣𑀁, 𑀇𑀤𑁆𑀥𑀺𑀁 𑀤𑀲𑁆𑀲𑁂𑀳𑀺 𑀕𑁄𑀢𑀫𑀻.

‘‘𑀢𑀤𑀸 𑀦𑀺𑀧𑀘𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀉𑀧𑁆𑀧𑀢𑀺𑀢𑁆𑀯𑀸𑀦 𑀅𑀫𑁆𑀩𑀭𑀁;

𑀇𑀤𑁆𑀥𑀻 𑀅𑀦𑁂𑀓𑀸 𑀤𑀲𑁆𑀲𑁂𑀲𑀺, 𑀩𑀼𑀤𑁆𑀥𑀸𑀦𑀼𑀜𑁆𑀜𑀸𑀬 𑀕𑁄𑀢𑀫𑀻.

‘‘𑀏𑀓𑀺𑀓𑀸 𑀩𑀳𑀼𑀥𑀸 𑀆𑀲𑀺, 𑀩𑀳𑀼𑀥𑀸 𑀘𑁂𑀓𑀺𑀓𑀸 𑀢𑀣𑀸;

𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁, 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀦𑀕𑀁.

‘‘𑀅𑀲𑀚𑁆𑀚𑀫𑀸𑀦𑀸 𑀅𑀕𑀫𑀸, 𑀪𑀽𑀫𑀺𑀬𑀫𑁆𑀧𑀺 𑀦𑀺𑀫𑀼𑀚𑁆𑀚𑀣;

𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂, 𑀅𑀕𑀜𑁆𑀙𑀺 𑀫𑀳𑀺𑀬𑀸 𑀬𑀣𑀸.

‘‘𑀲𑀓𑀼𑀡𑀻𑀯 𑀢𑀣𑀸𑀓𑀸𑀲𑁂, 𑀧𑀮𑁆𑀮𑀗𑁆𑀓𑁂𑀦 𑀓𑀫𑀻 𑀢𑀤𑀸;

𑀯𑀲𑀁 𑀯𑀢𑁆𑀢𑁂𑀲𑀺 𑀓𑀸𑀬𑁂𑀦, 𑀬𑀸𑀯 𑀩𑁆𑀭𑀳𑁆𑀫𑀦𑀺𑀯𑁂𑀲𑀦𑀁.

‘‘𑀲𑀺𑀦𑁂𑀭𑀼𑀁 𑀤𑀡𑁆𑀟𑀁 𑀓𑀢𑁆𑀯𑀸𑀦, 𑀙𑀢𑁆𑀢𑀁 𑀓𑀢𑁆𑀯𑀸 𑀫𑀳𑀸𑀫𑀳𑀺𑀁;

𑀲𑀫𑀽𑀮𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸, 𑀥𑀸𑀭𑀬𑀁 𑀘𑀗𑁆𑀓𑀫𑀻 𑀦𑀪𑁂.

‘‘𑀙𑀲𑁆𑀲𑀽𑀭𑁄𑀤𑀬𑀓𑀸𑀮𑁂𑀯, 𑀮𑁄𑀓𑀜𑁆𑀘𑀸𑀓𑀸𑀲𑀺 𑀥𑀽𑀫𑀺𑀓𑀁;

𑀬𑀼𑀕𑀦𑁆𑀢𑁂 𑀯𑀺𑀬 𑀮𑁄𑀓𑀁 𑀲𑀸, 𑀚𑀸𑀮𑀸𑀫𑀸𑀮𑀸𑀓𑀼𑀮𑀁 𑀅𑀓𑀸.

‘‘𑀫𑀼𑀘𑀮𑀺𑀦𑁆𑀤𑀁 𑀫𑀳𑀸𑀲𑁂𑀮𑀁, 𑀫𑁂𑀭𑀼𑀫𑀽𑀮𑀦𑀤𑀦𑁆𑀢𑀭𑁂;

𑀲𑀸𑀲𑀧𑀸𑀭𑀺𑀯 𑀲𑀩𑁆𑀩𑀸𑀦𑀺, 𑀏𑀓𑁂𑀦𑀕𑁆𑀕𑀳𑀺 𑀫𑀼𑀝𑁆𑀞𑀺𑀦𑀸.

‘‘𑀅𑀗𑁆𑀕𑀼𑀮𑀕𑁆𑀕𑁂𑀦 𑀙𑀸𑀤𑁂𑀲𑀺, 𑀪𑀸𑀓𑀭𑀁 𑀲𑀦𑀺𑀲𑀸𑀓𑀭𑀁;

𑀘𑀦𑁆𑀤𑀲𑀽𑀭𑀲𑀳𑀲𑁆𑀲𑀸𑀦𑀺, 𑀆𑀯𑁂𑀴𑀫𑀺𑀯 𑀥𑀸𑀭𑀬𑀺.

‘‘𑀘𑀢𑀼𑀲𑀸𑀕𑀭𑀢𑁄𑀬𑀸𑀦𑀺, 𑀥𑀸𑀭𑀬𑀻 𑀏𑀓𑀧𑀸𑀡𑀺𑀦𑀸;

𑀬𑀼𑀕𑀦𑁆𑀢𑀚𑀮𑀤𑀸𑀓𑀸𑀭𑀁, 𑀫𑀳𑀸𑀯𑀲𑁆𑀲𑀁 𑀧𑀯𑀲𑁆𑀲𑀣.

‘‘𑀘𑀓𑁆𑀓𑀯𑀢𑁆𑀢𑀺𑀁 𑀲𑀧𑀭𑀺𑀲𑀁, 𑀫𑀸𑀧𑀬𑀻 𑀲𑀸 𑀦𑀪𑀢𑁆𑀢𑀮𑁂;

𑀕𑀭𑀼𑀴𑀁 𑀤𑁆𑀯𑀺𑀭𑀤𑀁 𑀲𑀻𑀳𑀁, 𑀯𑀺𑀦𑀤𑀦𑁆𑀢𑀁 𑀧𑀤𑀲𑁆𑀲𑀬𑀺.

‘‘𑀏𑀓𑀺𑀓𑀸 𑀅𑀪𑀺𑀦𑀺𑀫𑁆𑀫𑀺𑀢𑁆𑀯𑀸, 𑀅𑀧𑁆𑀧𑀫𑁂𑀬𑁆𑀬𑀁 𑀪𑀺𑀓𑁆𑀔𑀼𑀦𑀻𑀕𑀡𑀁;

𑀧𑀼𑀦 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸, 𑀏𑀓𑀺𑀓𑀸 𑀫𑀼𑀦𑀺𑀫𑀩𑁆𑀭𑀯𑀺.

‘‘𑀫𑀸𑀢𑀼𑀘𑁆𑀙𑀸 𑀢𑁂 𑀫𑀳𑀸𑀯𑀻𑀭, 𑀢𑀯 𑀲𑀸𑀲𑀦𑀓𑀸𑀭𑀺𑀓𑀸;

𑀅𑀦𑀼𑀧𑁆𑀧𑀢𑁆𑀢𑀸 𑀲𑀓𑀁 𑀅𑀢𑁆𑀣𑀁, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

‘‘𑀤𑀲𑁆𑀲𑁂𑀢𑁆𑀯𑀸 𑀯𑀺𑀯𑀺𑀥𑀸 𑀇𑀤𑁆𑀥𑀻, 𑀑𑀭𑁄𑀳𑀺𑀢𑁆𑀯𑀸 𑀦𑀪𑀢𑁆𑀢𑀮𑀸;

𑀯𑀦𑁆𑀤𑀺𑀢𑁆𑀯𑀸 𑀮𑁄𑀓𑀧𑀚𑁆𑀚𑁄𑀢𑀁, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀸.

‘‘𑀲𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸, 𑀚𑀸𑀢𑀺𑀬𑀸𑀳𑀁 𑀫𑀳𑀸𑀫𑀼𑀦𑁂;

𑀅𑀮𑀫𑁂𑀢𑁆𑀢𑀸𑀯𑀢𑀸 𑀯𑀻𑀭, 𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 𑀦𑀸𑀬𑀓.

‘‘𑀢𑀤𑀸𑀢𑀺𑀯𑀺𑀫𑁆𑀳𑀺𑀢𑀸 𑀲𑀩𑁆𑀩𑀸, 𑀧𑀭𑀺𑀲𑀸 𑀲𑀸 𑀓𑀢𑀜𑁆𑀚𑀮𑀻;

𑀅𑀯𑁄𑀘𑀬𑁆𑀬𑁂 𑀓𑀣𑀁 𑀆𑀲𑀺, 𑀅𑀢𑀼𑀮𑀺𑀤𑁆𑀥𑀺𑀧𑀭𑀓𑁆𑀓𑀫𑀸.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸𑀫𑀘𑁆𑀘𑀓𑀼𑀮𑁂 𑀅𑀳𑀼𑀁;

𑀲𑀩𑁆𑀩𑁄𑀧𑀓𑀸𑀭𑀲𑀫𑁆𑀧𑀦𑁆𑀦𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂.

‘‘𑀓𑀤𑀸𑀘𑀺 𑀧𑀺𑀢𑀼𑀦𑀸 𑀲𑀤𑁆𑀥𑀺𑀁, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸;

𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀢𑀁 𑀉𑀧𑁂𑀘𑁆𑀘 𑀦𑀭𑀸𑀲𑀪𑀁.

‘‘𑀯𑀸𑀲𑀯𑀁 𑀯𑀺𑀬 𑀯𑀲𑁆𑀲𑀦𑁆𑀢𑀁, 𑀥𑀫𑁆𑀫𑀫𑁂𑀖𑀁 𑀅𑀦𑀸𑀲𑀯𑀁;

𑀲𑀭𑀤𑀸𑀤𑀺𑀘𑁆𑀘𑀲𑀤𑀺𑀲𑀁, 𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀁.

‘‘𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀼𑀢𑁆𑀯𑀸 𑀘𑀲𑁆𑀲 𑀲𑀼𑀪𑀸𑀲𑀺𑀢𑀁;

𑀫𑀸𑀢𑀼𑀘𑁆𑀙𑀁 𑀪𑀺𑀓𑁆𑀔𑀼𑀦𑀺𑀁 𑀅𑀕𑁆𑀕𑁂, 𑀞𑀧𑁂𑀦𑁆𑀢𑀁 𑀦𑀭𑀦𑀸𑀬𑀓𑀁.

‘‘𑀲𑀼𑀢𑁆𑀯𑀸 𑀤𑀢𑁆𑀯𑀸 𑀫𑀳𑀸𑀤𑀸𑀦𑀁, 𑀲𑀢𑁆𑀢𑀸𑀳𑀁 𑀢𑀲𑁆𑀲 𑀢𑀸𑀤𑀺𑀦𑁄;

𑀲𑀲𑀗𑁆𑀖𑀲𑁆𑀲 𑀦𑀭𑀕𑁆𑀕𑀲𑁆𑀲, 𑀧𑀘𑁆𑀘𑀬𑀸𑀦𑀺 𑀩𑀳𑀽𑀦𑀺 𑀘.

‘‘𑀦𑀺𑀧𑀘𑁆𑀘 𑀧𑀸𑀤𑀫𑀽𑀮𑀫𑁆𑀳𑀺, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀢𑀢𑁄 𑀫𑀳𑀸𑀧𑀭𑀺𑀲𑀢𑀺𑀁, 𑀅𑀯𑁄𑀘 𑀇𑀲𑀺𑀲𑀢𑁆𑀢𑀫𑁄.

‘‘𑀬𑀸 𑀲𑀲𑀗𑁆𑀖𑀁 𑀅𑀪𑁄𑀚𑁂𑀲𑀺, 𑀲𑀢𑁆𑀢𑀸𑀳𑀁 𑀮𑁄𑀓𑀦𑀸𑀬𑀓𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀕𑁄𑀢𑀫𑀻 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀸𑀢𑀼𑀘𑁆𑀙𑀸, 𑀚𑀻𑀯𑀺𑀢𑀸𑀧𑀸𑀤𑀺𑀓𑀸 𑀅𑀬𑀁;

𑀭𑀢𑁆𑀢𑀜𑁆𑀜𑀽𑀦𑀜𑁆𑀘 𑀅𑀕𑁆𑀕𑀢𑁆𑀢𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀮𑀪𑀺𑀲𑁆𑀲𑀢𑀺.

‘‘𑀢𑀁 𑀲𑀼𑀢𑁆𑀯𑀸𑀦 𑀧𑀫𑁄𑀤𑀺𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀺𑀢𑁆𑀯𑀸, 𑀢𑀢𑁄 𑀓𑀸𑀮𑀗𑁆𑀓𑀢𑀸 𑀅𑀳𑀁.

‘‘𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼;

𑀦𑀺𑀩𑁆𑀩𑀢𑁆𑀢𑀸 𑀤𑀲𑀳𑀗𑁆𑀕𑁂𑀳𑀺, 𑀅𑀜𑁆𑀜𑁂 𑀅𑀪𑀺𑀪𑀯𑀺𑀁 𑀅𑀳𑀁.

‘‘𑀭𑀽𑀧𑀲𑀤𑁆𑀤𑁂𑀳𑀺 𑀕𑀦𑁆𑀥𑁂𑀳𑀺, 𑀭𑀲𑁂𑀳𑀺 𑀨𑀼𑀲𑀦𑁂𑀳𑀺 𑀘;

𑀆𑀬𑀼𑀦𑀸𑀧𑀺 𑀘 𑀯𑀡𑁆𑀡𑁂𑀦, 𑀲𑀼𑀔𑁂𑀦 𑀬𑀲𑀲𑀸𑀧𑀺 𑀘.

‘‘𑀢𑀣𑁂𑀯𑀸𑀥𑀺𑀧𑀢𑁂𑀬𑁆𑀬𑁂𑀦, 𑀅𑀥𑀺𑀕𑀬𑁆𑀳 𑀯𑀺𑀭𑁄𑀘𑀳𑀁;

𑀅𑀳𑁄𑀲𑀺𑀁 𑀅𑀫𑀭𑀺𑀦𑁆𑀤𑀲𑁆𑀲, 𑀫𑀳𑁂𑀲𑀻 𑀤𑀬𑀺𑀢𑀸 𑀢𑀳𑀺𑀁.

‘‘𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀻𑀳𑀁, 𑀓𑀫𑁆𑀫𑀯𑀸𑀬𑀼𑀲𑀫𑁂𑀭𑀺𑀢𑀸;

𑀓𑀸𑀲𑀺𑀲𑁆𑀲 𑀭𑀜𑁆𑀜𑁄 𑀯𑀺𑀲𑀬𑁂, 𑀅𑀚𑀸𑀬𑀺𑀁 𑀤𑀸𑀲𑀕𑀸𑀫𑀓𑁂.

‘‘𑀧𑀜𑁆𑀘𑀤𑀸𑀲𑀲𑀢𑀸𑀦𑀽𑀦𑀸, 𑀦𑀺𑀯𑀲𑀦𑁆𑀢𑀺 𑀢𑀳𑀺𑀁 𑀢𑀤𑀸;

𑀲𑀩𑁆𑀩𑁂𑀲𑀁 𑀢𑀢𑁆𑀣 𑀬𑁄 𑀚𑁂𑀝𑁆𑀞𑁄, 𑀢𑀲𑁆𑀲 𑀚𑀸𑀬𑀸 𑀅𑀳𑁄𑀲𑀳𑀁.

‘‘𑀲𑀬𑀫𑁆𑀪𑀼𑀦𑁄 𑀧𑀜𑁆𑀘𑀲𑀢𑀸, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀼𑀁;

𑀢𑁂 𑀤𑀺𑀲𑁆𑀯𑀸𑀦 𑀅𑀳𑀁 𑀢𑀼𑀝𑁆𑀞𑀸, 𑀲𑀳 𑀲𑀩𑁆𑀩𑀸𑀳𑀺 𑀇𑀢𑁆𑀣𑀺𑀪𑀺.

‘‘𑀧𑀽𑀕𑀸 𑀳𑀼𑀢𑁆𑀯𑀸𑀯 𑀲𑀩𑁆𑀩𑀸𑀬𑁄, 𑀘𑀢𑀼𑀫𑀸𑀲𑁂 𑀉𑀧𑀝𑁆𑀞𑀳𑀼𑀁;

𑀢𑀺𑀘𑀻𑀯𑀭𑀸𑀦𑀺 𑀤𑀢𑁆𑀯𑀸𑀦, 𑀲𑀁𑀲𑀭𑀺𑀫𑁆𑀳 𑀲𑀲𑀸𑀫𑀺𑀓𑀸.

‘‘𑀢𑀢𑁄 𑀘𑀼𑀢𑀸 𑀲𑀩𑁆𑀩𑀸𑀧𑀺 𑀢𑀸, 𑀢𑀸𑀯𑀢𑀺𑀁𑀲𑀕𑀢𑀸 𑀫𑀬𑀁;

𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸 𑀤𑁂𑀯𑀤𑀳𑁂 𑀧𑀼𑀭𑁂.

‘‘𑀧𑀺𑀢𑀸 𑀅𑀜𑁆𑀚𑀦𑀲𑀓𑁆𑀓𑁄 𑀫𑁂, 𑀫𑀸𑀢𑀸 𑀫𑀫 𑀲𑀼𑀮𑀓𑁆𑀔𑀡𑀸;

𑀢𑀢𑁄 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀲𑀼𑀤𑁆𑀥𑁄𑀤𑀦𑀖𑀭𑀁 𑀕𑀢𑀸.

‘‘𑀲𑁂𑀲𑀸 𑀲𑀓𑁆𑀬𑀓𑀼𑀮𑁂 𑀚𑀸𑀢𑀸, 𑀲𑀓𑁆𑀬𑀸𑀦𑀁 𑀖𑀭𑀫𑀸𑀕𑀫𑀼𑀁;

𑀅𑀳𑀁 𑀯𑀺𑀲𑀺𑀝𑁆𑀞𑀸 𑀲𑀩𑁆𑀩𑀸𑀲𑀁, 𑀚𑀺𑀦𑀲𑁆𑀲𑀸𑀧𑀸𑀤𑀺𑀓𑀸 𑀅𑀳𑀼𑀁.

‘‘𑀫𑀫 𑀧𑀼𑀢𑁆𑀢𑁄𑀪𑀺𑀦𑀺𑀓𑁆𑀔𑀫𑁆𑀫, 𑀩𑀼𑀤𑁆𑀥𑁄 𑀆𑀲𑀺 𑀯𑀺𑀦𑀸𑀬𑀓𑁄;

𑀧𑀘𑁆𑀙𑀸𑀳𑀁 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺.

‘‘𑀲𑀸𑀓𑀺𑀬𑀸𑀦𑀻𑀳𑀺 𑀥𑀻𑀭𑀸𑀳𑀺, 𑀲𑀳 𑀲𑀦𑁆𑀢𑀺𑀲𑀼𑀔𑀁 𑀨𑀼𑀲𑀺𑀁;

𑀬𑁂 𑀢𑀤𑀸 𑀧𑀼𑀩𑁆𑀩𑀚𑀸𑀢𑀺𑀬𑀁, 𑀅𑀫𑁆𑀳𑀸𑀓𑀁 𑀆𑀲𑀼 𑀲𑀸𑀫𑀺𑀦𑁄.

‘‘𑀲𑀳𑀧𑀼𑀜𑁆𑀜𑀲𑁆𑀲 𑀓𑀢𑁆𑀢𑀸𑀭𑁄, 𑀫𑀳𑀸𑀲𑀫𑀬𑀓𑀸𑀭𑀓𑀸;

𑀨𑀼𑀲𑀺𑀁𑀲𑀼 𑀅𑀭𑀳𑀢𑁆𑀢𑀁 𑀢𑁂, 𑀲𑀼𑀕𑀢𑁂𑀦𑀸𑀦𑀼𑀓𑀫𑁆𑀧𑀺𑀢𑀸.

‘‘𑀢𑀤𑁂𑀢𑀭𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀆𑀭𑀼𑀳𑀺𑀁𑀲𑀼 𑀦𑀪𑀢𑁆𑀢𑀮𑀁;

𑀲𑀁𑀕𑀢𑀸 𑀯𑀺𑀬 𑀢𑀸𑀭𑀸𑀬𑁄, 𑀯𑀺𑀭𑁄𑀘𑀺𑀁𑀲𑀼 𑀫𑀳𑀺𑀤𑁆𑀥𑀺𑀓𑀸.

‘‘𑀇𑀤𑁆𑀥𑀻 𑀅𑀦𑁂𑀓𑀸 𑀤𑀲𑁆𑀲𑁂𑀲𑀼𑀁, 𑀧𑀺𑀴𑀦𑁆𑀥𑀯𑀺𑀓𑀢𑀺𑀁 𑀬𑀣𑀸;

𑀓𑀫𑁆𑀫𑀸𑀭𑁄 𑀓𑀦𑀓𑀲𑁆𑀲𑁂𑀯, 𑀓𑀫𑁆𑀫𑀜𑁆𑀜𑀲𑁆𑀲 𑀲𑀼𑀲𑀺𑀓𑁆𑀔𑀺𑀢𑁄.

‘‘𑀤𑀲𑁆𑀲𑁂𑀢𑁆𑀯𑀸 𑀧𑀸𑀝𑀺𑀳𑀻𑀭𑀸𑀦𑀺, 𑀯𑀺𑀘𑀺𑀢𑁆𑀢𑀸𑀦𑀺 𑀩𑀳𑀽𑀦𑀺 𑀘;

𑀢𑁄𑀲𑁂𑀢𑁆𑀯𑀸 𑀯𑀸𑀤𑀺𑀧𑀯𑀭𑀁, 𑀫𑀼𑀦𑀺𑀁 𑀲𑀧𑀭𑀺𑀲𑀁 𑀢𑀤𑀸.

‘‘𑀑𑀭𑁄𑀳𑀺𑀢𑁆𑀯𑀸𑀦 𑀕𑀕𑀦𑀸, 𑀯𑀦𑁆𑀤𑀺𑀢𑁆𑀯𑀸 𑀇𑀲𑀺𑀲𑀢𑁆𑀢𑀫𑀁;

𑀅𑀦𑀼𑀜𑁆𑀜𑀸𑀢𑀸 𑀦𑀭𑀕𑁆𑀕𑁂𑀦, 𑀬𑀣𑀸𑀞𑀸𑀦𑁂 𑀦𑀺𑀲𑀻𑀤𑀺𑀲𑀼𑀁.

‘‘𑀅𑀳𑁄𑀦𑀼𑀓𑀫𑁆𑀧𑀺𑀓𑀸 𑀅𑀫𑁆𑀳𑀁, 𑀲𑀩𑁆𑀩𑀸𑀲𑀁 𑀘𑀺𑀭 𑀕𑁄𑀢𑀫𑀻;

𑀯𑀸𑀲𑀺𑀢𑀸 𑀢𑀯 𑀧𑀼𑀜𑁆𑀜𑁂𑀳𑀺, 𑀧𑀢𑁆𑀢𑀸 𑀦𑁄 𑀆𑀲𑀯𑀓𑁆𑀔𑀬𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀅𑀫𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀦𑁄 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫 𑀫𑀳𑀸𑀫𑀼𑀦𑁂.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑀸.

‘‘𑀅𑀢𑁆𑀣𑁂 𑀥𑀫𑁆𑀫𑁂 𑀘 𑀦𑁂𑀭𑀼𑀢𑁆𑀢𑁂, 𑀧𑀝𑀺𑀪𑀸𑀦𑁂 𑀘 𑀯𑀺𑀚𑁆𑀚𑀢𑀺;

𑀜𑀸𑀡𑀁 𑀅𑀫𑁆𑀳𑀁 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

‘‘𑀅𑀲𑁆𑀫𑀸𑀪𑀺 𑀧𑀭𑀺𑀘𑀺𑀡𑁆𑀡𑁄𑀲𑀺, 𑀫𑁂𑀢𑁆𑀢𑀘𑀺𑀢𑁆𑀢𑀸 𑀳𑀺 𑀦𑀸𑀬𑀓;

𑀅𑀦𑀼𑀚𑀸𑀦𑀸𑀳𑀺 𑀲𑀩𑁆𑀩𑀸𑀲𑀁, 𑀦𑀺𑀩𑁆𑀩𑀸𑀦𑀸𑀬 𑀫𑀳𑀸𑀫𑀼𑀦𑁂.

‘‘𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫 𑀇𑀘𑁆𑀘𑁂𑀯𑀁, 𑀓𑀺𑀁 𑀯𑀓𑁆𑀔𑀸𑀫𑀺 𑀯𑀤𑀦𑁆𑀢𑀺𑀬𑁄;

𑀬𑀲𑁆𑀲 𑀤𑀸𑀦𑀺 𑀘 𑀯𑁄 𑀓𑀸𑀮𑀁, 𑀫𑀜𑁆𑀜𑀣𑀸𑀢𑀺 𑀚𑀺𑀦𑁄𑀩𑁆𑀭𑀯𑀺.

‘‘𑀕𑁄𑀢𑀫𑀻𑀆𑀤𑀺𑀓𑀸 𑀢𑀸𑀬𑁄, 𑀢𑀤𑀸 𑀪𑀺𑀓𑁆𑀔𑀼𑀦𑀺𑀬𑁄 𑀚𑀺𑀦𑀁;

𑀯𑀦𑁆𑀤𑀺𑀢𑁆𑀯𑀸 𑀆𑀲𑀦𑀸 𑀢𑀫𑁆𑀳𑀸, 𑀯𑀼𑀝𑁆𑀞𑀸𑀬 𑀆𑀕𑀫𑀺𑀁𑀲𑀼 𑀢𑀸.

‘‘𑀫𑀳𑀢𑀸 𑀚𑀦𑀓𑀸𑀬𑁂𑀦, 𑀲𑀳 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀅𑀦𑀼𑀲𑀁𑀬𑀸𑀬𑀻 𑀲𑁄 𑀯𑀻𑀭𑁄, 𑀫𑀸𑀢𑀼𑀘𑁆𑀙𑀁 𑀬𑀸𑀯𑀓𑁄𑀝𑁆𑀞𑀓𑀁.

‘‘𑀢𑀤𑀸 𑀦𑀺𑀧𑀢𑀺 𑀧𑀸𑀤𑁂𑀲𑀼, 𑀕𑁄𑀢𑀫𑀻 𑀮𑁄𑀓𑀩𑀦𑁆𑀥𑀼𑀦𑁄;

𑀲𑀳𑁂𑀯 𑀢𑀸𑀳𑀺 𑀲𑀩𑁆𑀩𑀸𑀳𑀺, 𑀧𑀘𑁆𑀙𑀺𑀫𑀁 𑀧𑀸𑀤𑀯𑀦𑁆𑀤𑀦𑀁.

‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀮𑁄𑀓𑀦𑀸𑀣𑀲𑁆𑀲 𑀤𑀲𑁆𑀲𑀦𑀁;

𑀦 𑀧𑀼𑀦𑁄 𑀅𑀫𑀢𑀸𑀓𑀸𑀭𑀁, 𑀧𑀲𑁆𑀲𑀺𑀲𑁆𑀲𑀸𑀫𑀺 𑀫𑀼𑀔𑀁 𑀢𑀯.

‘‘𑀦 𑀘 𑀫𑁂 𑀯𑀦𑁆𑀤𑀦𑀁 𑀯𑀻𑀭, 𑀢𑀯 𑀧𑀸𑀤𑁂 𑀲𑀼𑀓𑁄𑀫𑀮𑁂;

𑀲𑀫𑁆𑀨𑀼𑀲𑀺𑀲𑁆𑀲𑀢𑀺 𑀮𑁄𑀓𑀕𑁆𑀕, 𑀅𑀚𑁆𑀚 𑀕𑀘𑁆𑀙𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

‘‘𑀭𑀽𑀧𑁂𑀦 𑀓𑀺𑀁 𑀢𑀯𑀸𑀦𑁂𑀦, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀬𑀣𑀸𑀢𑀣𑁂;

𑀲𑀩𑁆𑀩𑀁 𑀲𑀗𑁆𑀔𑀢𑀫𑁂𑀯𑁂𑀢𑀁, 𑀅𑀦𑀲𑁆𑀲𑀸𑀲𑀺𑀓𑀫𑀺𑀢𑁆𑀢𑀭𑀁.

‘‘𑀲𑀸 𑀲𑀳 𑀢𑀸𑀳𑀺 𑀕𑀦𑁆𑀢𑁆𑀯𑀸𑀦, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀲𑀓𑀁;

𑀅𑀟𑁆𑀠𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑁆𑀚, 𑀦𑀺𑀲𑀻𑀤𑀺 𑀧𑀭𑀫𑀸𑀲𑀦𑁂.

‘‘𑀢𑀤𑀸 𑀉𑀧𑀸𑀲𑀺𑀓𑀸 𑀢𑀢𑁆𑀣, 𑀩𑀼𑀤𑁆𑀥𑀲𑀸𑀲𑀦𑀯𑀘𑁆𑀙𑀮𑀸;

𑀢𑀲𑁆𑀲𑀸 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸𑀦, 𑀉𑀧𑁂𑀲𑀼𑀁 𑀧𑀸𑀤𑀯𑀦𑁆𑀤𑀺𑀓𑀸.

‘‘𑀓𑀭𑁂𑀳𑀺 𑀉𑀭𑀁 𑀧𑀳𑀦𑁆𑀢𑀸, 𑀙𑀺𑀦𑁆𑀦𑀫𑀽𑀮𑀸 𑀬𑀣𑀸 𑀮𑀢𑀸;

𑀭𑁄𑀤𑀦𑁆𑀢𑀸 𑀓𑀭𑀼𑀡𑀁 𑀭𑀯𑀁, 𑀲𑁄𑀓𑀝𑁆𑀝𑀸 𑀪𑀽𑀫𑀺𑀧𑀸𑀢𑀺𑀢𑀸.

‘‘𑀫𑀸 𑀦𑁄 𑀲𑀭𑀡𑀤𑁂 𑀦𑀸𑀣𑁂, 𑀯𑀺𑀳𑀸𑀬 𑀕𑀫𑀺 𑀦𑀺𑀩𑁆𑀩𑀼𑀢𑀺𑀁;

𑀦𑀺𑀧𑀢𑀺𑀢𑁆𑀯𑀸𑀦 𑀬𑀸𑀘𑀸𑀫, 𑀲𑀩𑁆𑀩𑀸𑀬𑁄 𑀲𑀺𑀭𑀲𑀸 𑀫𑀬𑀁.

‘‘𑀬𑀸 𑀧𑀥𑀸𑀦𑀢𑀫𑀸 𑀢𑀸𑀲𑀁, 𑀲𑀤𑁆𑀥𑀸 𑀧𑀜𑁆𑀜𑀸 𑀉𑀧𑀸𑀲𑀺𑀓𑀸;

𑀢𑀲𑁆𑀲𑀸 𑀲𑀻𑀲𑀁 𑀧𑀫𑀚𑁆𑀚𑀦𑁆𑀢𑀻, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀅𑀮𑀁 𑀧𑀼𑀢𑁆𑀢𑀸 𑀯𑀺𑀲𑀸𑀤𑁂𑀦, 𑀫𑀸𑀭𑀧𑀸𑀲𑀸𑀦𑀼𑀯𑀢𑁆𑀢𑀺𑀦𑀸;

𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀲𑀩𑁆𑀩𑀁, 𑀯𑀺𑀬𑁄𑀕𑀦𑁆𑀢𑀁 𑀘𑀮𑀸𑀘𑀮𑀁.

‘‘𑀢𑀢𑁄 𑀲𑀸 𑀢𑀸 𑀯𑀺𑀲𑀚𑁆𑀚𑀺𑀢𑁆𑀯𑀸, 𑀧𑀞𑀫𑀁 𑀛𑀸𑀦𑀫𑀼𑀢𑁆𑀢𑀫𑀁;

𑀤𑀼𑀢𑀺𑀬𑀜𑁆𑀘 𑀢𑀢𑀺𑀬𑀜𑁆𑀘, 𑀲𑀫𑀸𑀧𑀚𑁆𑀚𑀺 𑀘𑀢𑀼𑀢𑁆𑀣𑀓𑀁.

‘‘𑀆𑀓𑀸𑀲𑀸𑀬𑀢𑀦𑀜𑁆𑀘𑁂𑀯, 𑀯𑀺𑀜𑁆𑀜𑀸𑀡𑀸𑀬𑀢𑀦𑀁 𑀢𑀣𑀸;

𑀆𑀓𑀺𑀜𑁆𑀘𑀁 𑀦𑁂𑀯𑀲𑀜𑁆𑀜𑀜𑁆𑀘, 𑀲𑀫𑀸𑀧𑀚𑁆𑀚𑀺 𑀬𑀣𑀸𑀓𑁆𑀓𑀫𑀁.

‘‘𑀧𑀝𑀺𑀮𑁄𑀫𑁂𑀦 𑀛𑀸𑀦𑀸𑀦𑀺, 𑀲𑀫𑀸𑀧𑀚𑁆𑀚𑀺𑀢𑁆𑀣 𑀕𑁄𑀢𑀫𑀻;

𑀬𑀸𑀯𑀢𑀸 𑀧𑀞𑀫𑀁 𑀛𑀸𑀦𑀁, 𑀢𑀢𑁄 𑀬𑀸𑀯𑀘𑀢𑀼𑀢𑁆𑀣𑀓𑀁.

‘‘𑀢𑀢𑁄 𑀯𑀼𑀝𑁆𑀞𑀸𑀬 𑀦𑀺𑀩𑁆𑀩𑀸𑀬𑀺, 𑀤𑀻𑀧𑀘𑁆𑀘𑀻𑀯 𑀦𑀺𑀭𑀸𑀲𑀯𑀸;

𑀪𑀽𑀫𑀺𑀘𑀸𑀮𑁄 𑀫𑀳𑀸 𑀆𑀲𑀺, 𑀦𑀪𑀲𑀸 𑀯𑀺𑀚𑁆𑀚𑀼𑀢𑀸 𑀧𑀢𑀺.

‘‘𑀧𑀦𑀸𑀤𑀺𑀢𑀸 𑀤𑀼𑀦𑁆𑀤𑀼𑀪𑀺𑀬𑁄, 𑀧𑀭𑀺𑀤𑁂𑀯𑀺𑀁𑀲𑀼 𑀤𑁂𑀯𑀢𑀸;

𑀧𑀼𑀧𑁆𑀨𑀯𑀼𑀝𑁆𑀞𑀻 𑀘 𑀕𑀕𑀦𑀸, 𑀅𑀪𑀺𑀯𑀲𑁆𑀲𑀣 𑀫𑁂𑀤𑀦𑀺𑀁.

‘‘𑀓𑀫𑁆𑀧𑀺𑀢𑁄 𑀫𑁂𑀭𑀼𑀭𑀸𑀚𑀸𑀧𑀺, 𑀭𑀗𑁆𑀕𑀫𑀚𑁆𑀛𑁂 𑀬𑀣𑀸 𑀦𑀝𑁄;

𑀲𑁄𑀓𑁂𑀦 𑀘𑀸𑀢𑀺𑀤𑀻𑀦𑁄𑀯, 𑀯𑀺𑀭𑀯𑁄 𑀆𑀲𑀺 𑀲𑀸𑀕𑀭𑁄.

‘‘𑀤𑁂𑀯𑀸 𑀦𑀸𑀕𑀸𑀲𑀼𑀭𑀸 𑀩𑁆𑀭𑀳𑁆𑀫𑀸, 𑀲𑀁𑀯𑀺𑀕𑁆𑀕𑀸𑀳𑀺𑀁𑀲𑀼 𑀢𑀗𑁆𑀔𑀡𑁂;

𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀬𑀣𑀸𑀬𑀁 𑀯𑀺𑀮𑀬𑀁 𑀕𑀢𑀸.

‘‘𑀬𑀸 𑀘𑁂 𑀫𑀁 𑀧𑀭𑀺𑀯𑀸𑀭𑀺𑀁𑀲𑀼, 𑀲𑀢𑁆𑀣𑀼 𑀲𑀸𑀲𑀦𑀓𑀸𑀭𑀺𑀓𑀸;

𑀢𑀬𑁄𑀧𑀺 𑀅𑀦𑀼𑀧𑀸𑀤𑀸𑀦𑀸, 𑀤𑀻𑀧𑀘𑁆𑀘𑀺 𑀯𑀺𑀬 𑀦𑀺𑀩𑁆𑀩𑀼𑀢𑀸.

‘‘𑀳𑀸 𑀬𑁄𑀕𑀸 𑀯𑀺𑀧𑁆𑀧𑀬𑁄𑀕𑀦𑁆𑀢𑀸, 𑀳𑀸𑀦𑀺𑀘𑁆𑀘𑀁 𑀲𑀩𑁆𑀩𑀲𑀗𑁆𑀔𑀢𑀁;

𑀳𑀸 𑀚𑀻𑀯𑀺𑀢𑀁 𑀯𑀺𑀦𑀸𑀲𑀦𑁆𑀢𑀁, 𑀇𑀘𑁆𑀘𑀸𑀲𑀺 𑀧𑀭𑀺𑀤𑁂𑀯𑀦𑀸.

‘‘𑀢𑀢𑁄 𑀤𑁂𑀯𑀸 𑀘 𑀩𑁆𑀭𑀳𑁆𑀫𑀸 𑀘, 𑀮𑁄𑀓𑀥𑀫𑁆𑀫𑀸𑀦𑀼𑀯𑀢𑁆𑀢𑀦𑀁;

𑀓𑀸𑀮𑀸𑀦𑀼𑀭𑀽𑀧𑀁 𑀓𑀼𑀩𑁆𑀩𑀦𑁆𑀢𑀺, 𑀉𑀧𑁂𑀢𑁆𑀯𑀸 𑀇𑀲𑀺𑀲𑀢𑁆𑀢𑀫𑀁.

‘‘𑀢𑀤𑀸 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸, 𑀆𑀦𑀦𑁆𑀤𑀁 𑀲𑀼𑀢𑀲𑀸𑀕𑀭𑀁;

𑀕𑀘𑁆𑀙𑀸𑀦𑀦𑁆𑀤 𑀦𑀺𑀯𑁂𑀤𑁂𑀳𑀺, 𑀪𑀺𑀓𑁆𑀔𑀽𑀦𑀁 𑀫𑀸𑀢𑀼 𑀦𑀺𑀩𑁆𑀩𑀼𑀢𑀺𑀁.

‘‘𑀢𑀤𑀸𑀦𑀦𑁆𑀤𑁄 𑀦𑀺𑀭𑀸𑀦𑀦𑁆𑀤𑁄, 𑀅𑀲𑁆𑀲𑀼𑀦𑀸 𑀧𑀼𑀡𑁆𑀡𑀮𑁄𑀘𑀦𑁄;

𑀕𑀕𑁆𑀕𑀭𑁂𑀦 𑀲𑀭𑁂𑀦𑀸𑀳, 𑀲𑀫𑀸𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀯𑁄.

‘‘𑀧𑀼𑀩𑁆𑀩𑀤𑀓𑁆𑀔𑀺𑀡𑀧𑀘𑁆𑀙𑀸𑀲𑀼, 𑀉𑀢𑁆𑀢𑀭𑀸𑀬 𑀘 𑀲𑀦𑁆𑀢𑀺𑀓𑁂;

𑀲𑀼𑀡𑀦𑁆𑀢𑀼 𑀪𑀸𑀲𑀺𑀢𑀁 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁄 𑀲𑀼𑀕𑀢𑁄𑀭𑀲𑀸.

‘‘𑀬𑀸 𑀯𑀟𑁆𑀠𑀬𑀺 𑀧𑀬𑀢𑁆𑀢𑁂𑀦, 𑀲𑀭𑀻𑀭𑀁 𑀧𑀘𑁆𑀙𑀺𑀫𑀁 𑀫𑀼𑀦𑁂;

𑀲𑀸 𑀕𑁄𑀢𑀫𑀻 𑀕𑀢𑀸 𑀲𑀦𑁆𑀢𑀺𑀁, 𑀢𑀸𑀭𑀸𑀯 𑀲𑀽𑀭𑀺𑀬𑁄𑀤𑀬𑁂.

‘‘𑀩𑀼𑀤𑁆𑀥𑀫𑀸𑀢𑀸𑀧𑀺 𑀧𑀜𑁆𑀜𑀢𑁆𑀢𑀺𑀁, 𑀞𑀧𑀬𑀺𑀢𑁆𑀯𑀸 𑀕𑀢𑀸𑀲𑀫𑀁;

𑀦 𑀬𑀢𑁆𑀣 𑀧𑀜𑁆𑀘𑀦𑁂𑀢𑁆𑀢𑁄𑀧𑀺, 𑀕𑀢𑀺𑀁 𑀤𑀓𑁆𑀔𑀢𑀺 𑀦𑀸𑀬𑀓𑁄.

‘‘𑀬𑀲𑁆𑀲𑀢𑁆𑀣𑀺 𑀲𑀼𑀕𑀢𑁂 𑀲𑀤𑁆𑀥𑀸, 𑀬𑁄 𑀘 𑀧𑀺𑀬𑁄 𑀫𑀳𑀸𑀫𑀼𑀦𑁂;

𑀩𑀼𑀤𑁆𑀥𑀫𑀸𑀢𑀼𑀲𑁆𑀲 𑀲𑀓𑁆𑀓𑀸𑀭𑀁, 𑀓𑀭𑁄𑀢𑀼 𑀲𑀼𑀕𑀢𑁄𑀭𑀲𑁄.

‘‘𑀲𑀼𑀤𑀽𑀭𑀝𑁆𑀞𑀸𑀧𑀺 𑀢𑀁 𑀲𑀼𑀢𑁆𑀯𑀸, 𑀲𑀻𑀖𑀫𑀸𑀕𑀘𑁆𑀙𑀼 𑀪𑀺𑀓𑁆𑀔𑀯𑁄;

𑀓𑁂𑀘𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦, 𑀓𑁂𑀘𑀺 𑀇𑀤𑁆𑀥𑀻𑀲𑀼 𑀓𑁄𑀯𑀺𑀤𑀸.

‘‘𑀓𑀽𑀝𑀸𑀕𑀸𑀭𑀯𑀭𑁂 𑀭𑀫𑁆𑀫𑁂, 𑀲𑀩𑁆𑀩𑀲𑁄𑀡𑁆𑀡𑀫𑀬𑁂 𑀲𑀼𑀪𑁂;

𑀫𑀜𑁆𑀘𑀓𑀁 𑀲𑀫𑀸𑀭𑁄𑀧𑁂𑀲𑀼𑀁, 𑀬𑀢𑁆𑀣 𑀲𑀼𑀢𑁆𑀢𑀸𑀲𑀺 𑀕𑁄𑀢𑀫𑀻.

‘‘𑀘𑀢𑁆𑀢𑀸𑀭𑁄 𑀮𑁄𑀓𑀧𑀸𑀮𑀸 𑀢𑁂, 𑀅𑀁𑀲𑁂𑀳𑀺 𑀲𑀫𑀥𑀸𑀭𑀬𑀼𑀁;

𑀲𑁂𑀲𑀸 𑀲𑀓𑁆𑀓𑀸𑀤𑀺𑀓𑀸 𑀤𑁂𑀯𑀸, 𑀓𑀽𑀝𑀸𑀕𑀸𑀭𑁂 𑀲𑀫𑀕𑁆𑀕𑀳𑀼𑀁.

‘‘𑀓𑀽𑀝𑀸𑀕𑀸𑀭𑀸𑀦𑀺 𑀲𑀩𑁆𑀩𑀸𑀦𑀺, 𑀆𑀲𑀼𑀁 𑀧𑀜𑁆𑀘𑀲𑀢𑀸𑀦𑀺𑀧𑀺;

𑀲𑀭𑀤𑀸𑀤𑀺𑀘𑁆𑀘𑀯𑀡𑁆𑀡𑀸𑀦𑀺, 𑀯𑀺𑀲𑁆𑀲𑀓𑀫𑁆𑀫𑀓𑀢𑀸𑀦𑀺 𑀳𑀺.

‘‘𑀲𑀩𑁆𑀩𑀸 𑀢𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄, 𑀆𑀲𑀼𑀁 𑀫𑀜𑁆𑀘𑁂𑀲𑀼 𑀲𑀸𑀬𑀺𑀢𑀸;

𑀤𑁂𑀯𑀸𑀦𑀁 𑀔𑀦𑁆𑀥𑀫𑀸𑀭𑀼𑀴𑁆𑀳𑀸, 𑀦𑀺𑀬𑁆𑀬𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀲𑁄.

‘‘𑀲𑀩𑁆𑀩𑀲𑁄 𑀙𑀸𑀤𑀺𑀢𑀁 𑀆𑀲𑀺, 𑀯𑀺𑀢𑀸𑀦𑁂𑀦 𑀦𑀪𑀢𑁆𑀢𑀮𑀁;

𑀲𑀢𑀸𑀭𑀸 𑀘𑀦𑁆𑀤𑀲𑀽𑀭𑀸 𑀘, 𑀮𑀜𑁆𑀙𑀺𑀢𑀸 𑀓𑀦𑀓𑀸𑀫𑀬𑀸.

‘‘𑀧𑀝𑀸𑀓𑀸 𑀉𑀲𑁆𑀲𑀺𑀢𑀸𑀦𑁂𑀓𑀸, 𑀯𑀺𑀢𑀢𑀸 𑀧𑀼𑀧𑁆𑀨𑀓𑀜𑁆𑀘𑀼𑀓𑀸;

𑀑𑀕𑀢𑀸𑀓𑀸𑀲𑀧𑀤𑀼𑀫𑀸, 𑀫𑀳𑀺𑀬𑀸 𑀧𑀼𑀧𑁆𑀨𑀫𑀼𑀕𑁆𑀕𑀢𑀁.

‘‘𑀤𑀺𑀲𑁆𑀲𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀧𑀚𑁆𑀚𑀮𑀦𑁆𑀢𑀺 𑀘 𑀢𑀸𑀭𑀓𑀸;

𑀫𑀚𑁆𑀛𑀁 𑀕𑀢𑁄𑀧𑀺 𑀘𑀸𑀤𑀺𑀘𑁆𑀘𑁄, 𑀦 𑀢𑀸𑀧𑁂𑀲𑀺 𑀲𑀲𑀻 𑀬𑀣𑀸.

‘‘𑀤𑁂𑀯𑀸 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺, 𑀫𑀸𑀮𑁂𑀳𑀺 𑀲𑀼𑀭𑀪𑀻𑀳𑀺 𑀘;

𑀯𑀸𑀤𑀺𑀢𑁂𑀳𑀺 𑀘 𑀦𑀘𑁆𑀘𑁂𑀳𑀺, 𑀲𑀗𑁆𑀕𑀻𑀢𑀻𑀳𑀺 𑀘 𑀧𑀽𑀚𑀬𑀼𑀁.

‘‘𑀦𑀸𑀕𑀸𑀲𑀼𑀭𑀸 𑀘 𑀩𑁆𑀭𑀳𑁆𑀫𑀸𑀦𑁄, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁;

𑀧𑀽𑀚𑀬𑀺𑀁𑀲𑀼 𑀘 𑀦𑀺𑀬𑁆𑀬𑀦𑁆𑀢𑀺𑀁, 𑀦𑀺𑀩𑁆𑀩𑀼𑀢𑀁 𑀩𑀼𑀤𑁆𑀥𑀫𑀸𑀢𑀭𑀁.

‘‘𑀲𑀩𑁆𑀩𑀸𑀬𑁄 𑀧𑀼𑀭𑀢𑁄 𑀦𑀻𑀢𑀸, 𑀦𑀺𑀩𑁆𑀩𑀼𑀢𑀸 𑀲𑀼𑀕𑀢𑁄𑀭𑀲𑀸;

𑀕𑁄𑀢𑀫𑀻 𑀦𑀺𑀬𑁆𑀬𑀢𑁂 𑀧𑀘𑁆𑀙𑀸, 𑀲𑀓𑁆𑀓𑀢𑀸 𑀩𑀼𑀤𑁆𑀥𑀧𑁄𑀲𑀺𑀓𑀸.

‘‘𑀧𑀼𑀭𑀢𑁄 𑀤𑁂𑀯𑀫𑀦𑀼𑀚𑀸, 𑀲𑀦𑀸𑀕𑀸𑀲𑀼𑀭𑀩𑁆𑀭𑀳𑁆𑀫𑀓𑀸;

𑀧𑀘𑁆𑀙𑀸 𑀲𑀲𑀸𑀯𑀓𑁄 𑀩𑀼𑀤𑁆𑀥𑁄, 𑀧𑀽𑀚𑀢𑁆𑀣𑀁 𑀬𑀸𑀢𑀺 𑀫𑀸𑀢𑀼𑀬𑀸.

‘‘𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀦𑁂𑀤𑀺𑀲𑀁 𑀆𑀲𑀺 𑀬𑀸𑀤𑀺𑀲𑀁;

𑀕𑁄𑀢𑀫𑀻𑀧𑀭𑀺𑀦𑀺𑀩𑁆𑀩𑀸𑀦𑀁, 𑀅𑀢𑁂𑀯𑀘𑁆𑀙𑀭𑀺𑀬𑀁 𑀅𑀳𑀼.

‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑀲𑁆𑀲 𑀦𑀺𑀩𑁆𑀩𑀸𑀦𑁂, 𑀦𑁄𑀧𑀝𑀺𑀬𑀸𑀤𑀺 𑀪𑀺𑀓𑁆𑀔𑀯𑁄;

𑀩𑀼𑀤𑁆𑀥𑁄 𑀕𑁄𑀢𑀫𑀺𑀦𑀺𑀩𑁆𑀩𑀸𑀦𑁂, 𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀓𑀸 𑀢𑀣𑀸.

‘‘𑀘𑀺𑀢𑀓𑀸𑀦𑀺 𑀓𑀭𑀺𑀢𑁆𑀯𑀸𑀦, 𑀲𑀩𑁆𑀩𑀕𑀦𑁆𑀥𑀫𑀬𑀸𑀦𑀺 𑀢𑁂;

𑀕𑀦𑁆𑀥𑀘𑀼𑀡𑁆𑀡𑀧𑀓𑀺𑀡𑁆𑀡𑀸𑀦𑀺, 𑀛𑀸𑀧𑀬𑀺𑀁𑀲𑀼 𑀘 𑀢𑀸 𑀢𑀳𑀺𑀁.

‘‘𑀲𑁂𑀲𑀪𑀸𑀕𑀸𑀦𑀺 𑀟𑀬𑁆𑀳𑀺𑀁𑀲𑀼, 𑀅𑀝𑁆𑀞𑀻 𑀲𑁂𑀲𑀸𑀦𑀺 𑀲𑀩𑁆𑀩𑀲𑁄;

𑀆𑀦𑀦𑁆𑀤𑁄 𑀘 𑀢𑀤𑀸𑀯𑁄𑀘, 𑀲𑀁𑀯𑁂𑀕𑀚𑀦𑀓𑀁 𑀯𑀘𑁄.

‘‘𑀕𑁄𑀢𑀫𑀻 𑀦𑀺𑀥𑀦𑀁 𑀬𑀸𑀢𑀸, 𑀟𑀬𑁆𑀳𑀜𑁆𑀘𑀲𑁆𑀲 𑀲𑀭𑀻𑀭𑀓𑀁;

𑀲𑀗𑁆𑀓𑁂𑀢𑀁 𑀩𑀼𑀤𑁆𑀥𑀦𑀺𑀩𑁆𑀩𑀸𑀦𑀁, 𑀦 𑀘𑀺𑀭𑁂𑀦 𑀪𑀯𑀺𑀲𑁆𑀲𑀢𑀺.

‘‘𑀢𑀢𑁄 𑀕𑁄𑀢𑀫𑀺𑀥𑀸𑀢𑀽𑀦𑀺, 𑀢𑀲𑁆𑀲𑀸 𑀧𑀢𑁆𑀢𑀕𑀢𑀸𑀦𑀺 𑀲𑁄;

𑀉𑀧𑀦𑀸𑀫𑁂𑀲𑀺 𑀦𑀸𑀣𑀲𑁆𑀲, 𑀆𑀦𑀦𑁆𑀤𑁄 𑀩𑀼𑀤𑁆𑀥𑀘𑁄𑀤𑀺𑀢𑁄.

‘‘𑀧𑀸𑀡𑀺𑀦𑀸 𑀢𑀸𑀦𑀺 𑀧𑀕𑁆𑀕𑀬𑁆𑀳, 𑀅𑀯𑁄𑀘 𑀇𑀲𑀺𑀲𑀢𑁆𑀢𑀫𑁄;

𑀫𑀳𑀢𑁄 𑀲𑀸𑀭𑀯𑀦𑁆𑀢𑀲𑁆𑀲, 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄.

‘‘𑀬𑁄 𑀲𑁄 𑀫𑀳𑀢𑁆𑀢𑀭𑁄 𑀔𑀦𑁆𑀥𑁄, 𑀧𑀮𑀼𑀚𑁆𑀚𑁂𑀬𑁆𑀬 𑀅𑀦𑀺𑀘𑁆𑀘𑀢𑀸;

𑀢𑀣𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲, 𑀕𑁄𑀢𑀫𑀻 𑀧𑀭𑀺𑀦𑀺𑀩𑁆𑀩𑀼𑀢𑀸.

‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀁, 𑀦𑀺𑀩𑁆𑀩𑀼𑀢𑀸𑀬𑀧𑀺 𑀫𑀸𑀢𑀼𑀬𑀸;

𑀲𑀸𑀭𑀻𑀭𑀫𑀢𑁆𑀢𑀲𑁂𑀲𑀸𑀬, 𑀦𑀢𑁆𑀣𑀺 𑀲𑁄𑀓𑀧𑀭𑀺𑀤𑁆𑀤𑀯𑁄.

‘‘𑀦 𑀲𑁄𑀘𑀺𑀬𑀸 𑀧𑀭𑁂𑀲𑀁 𑀲𑀸, 𑀢𑀺𑀡𑁆𑀡𑀲𑀁𑀲𑀸𑀭𑀲𑀸𑀕𑀭𑀸;

𑀧𑀭𑀺𑀯𑀚𑁆𑀚𑀺𑀢𑀲𑀦𑁆𑀢𑀸𑀧𑀸, 𑀲𑀻𑀢𑀺𑀪𑀽𑀢𑀸 𑀲𑀼𑀦𑀺𑀩𑁆𑀩𑀼𑀢𑀸.

‘‘𑀧𑀡𑁆𑀟𑀺𑀢𑀸𑀲𑀺 𑀫𑀳𑀸𑀧𑀜𑁆𑀜𑀸, 𑀧𑀼𑀣𑀼𑀧𑀜𑁆𑀜𑀸 𑀢𑀣𑁂𑀯 𑀘;

𑀭𑀢𑁆𑀢𑀜𑁆𑀜𑀽 𑀪𑀺𑀓𑁆𑀔𑀼𑀦𑀻𑀦𑀁 𑀲𑀸, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀆𑀲𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀆𑀲𑀺 𑀘 𑀕𑁄𑀢𑀫𑀻.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀫𑀜𑁆𑀜𑀸𑀲𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀢𑀲𑁆𑀲𑀸 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀧𑀭𑀺𑀲𑀼𑀤𑁆𑀥𑀁 𑀅𑀳𑀼 𑀜𑀸𑀡𑀁, 𑀢𑀲𑁆𑀫𑀸 𑀲𑁄𑀘𑀦𑀺𑀬𑀸 𑀦 𑀲𑀸.

‘‘𑀅𑀬𑁄𑀖𑀦𑀳𑀢𑀲𑁆𑀲𑁂𑀯, 𑀚𑀮𑀢𑁄 𑀚𑀸𑀢𑀯𑁂𑀤𑀲𑁆𑀲;

𑀅𑀦𑀼𑀧𑀼𑀩𑁆𑀩𑀽𑀧𑀲𑀦𑁆𑀢𑀲𑁆𑀲, 𑀬𑀣𑀸 𑀦 𑀜𑀸𑀬𑀢𑁂 𑀕𑀢𑀺.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀓𑀸𑀫𑀩𑀦𑁆𑀥𑁄𑀖𑀢𑀸𑀭𑀺𑀦𑀁;

𑀧𑀜𑁆𑀜𑀸𑀧𑁂𑀢𑀼𑀁 𑀕𑀢𑀺 𑀦𑀢𑁆𑀣𑀺, 𑀧𑀢𑁆𑀢𑀸𑀦𑀁 𑀅𑀘𑀮𑀁 𑀲𑀼𑀔𑀁.

‘‘𑀅𑀢𑁆𑀢𑀤𑀻𑀧𑀸 𑀢𑀢𑁄 𑀳𑁄𑀣, 𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸;

𑀪𑀸𑀯𑁂𑀢𑁆𑀯𑀸 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁯𑁭-𑁨𑁮𑁮);

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀕𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀕𑀼𑀢𑁆𑀢𑁂 𑀬𑀤𑀢𑁆𑀣𑀁 𑀧𑀩𑁆𑀩𑀚𑁆𑀚𑀸𑀢𑀺𑀆𑀤𑀺𑀓𑀸 𑀕𑀼𑀢𑁆𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀳𑀼𑀢𑁆𑀯𑀸, 𑀧𑀭𑀺𑀧𑀓𑁆𑀓𑀓𑀼𑀲𑀮𑀫𑀽𑀮𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸, 𑀕𑀼𑀢𑁆𑀢𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑀸 𑀖𑀭𑀸𑀯𑀸𑀲𑀁 𑀚𑀺𑀕𑀼𑀘𑁆𑀙𑀦𑁆𑀢𑀻 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀺𑀬𑀸 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁂 𑀯𑀺𑀥𑀸𑀯𑀢𑀺, 𑀏𑀓𑀕𑁆𑀕𑀁 𑀦𑀸𑀳𑁄𑀲𑀺. 𑀲𑀢𑁆𑀣𑀸 𑀤𑀺𑀲𑁆𑀯𑀸 𑀢𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄, 𑀕𑀦𑁆𑀥𑀓𑀼𑀝𑀺𑀬𑀁 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑀲𑁆𑀲𑀸 𑀆𑀲𑀦𑁆𑀦𑁂 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀦𑁆𑀢𑁄 𑁋

𑁧𑁬𑁩.

‘‘𑀕𑀼𑀢𑁆𑀢𑁂 𑀬𑀤𑀢𑁆𑀣𑀁 𑀧𑀩𑁆𑀩𑀚𑁆𑀚𑀸, 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀲𑀼𑀁 𑀧𑀺𑀬𑀁;

𑀢𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀳𑀺, 𑀫𑀸 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀫𑀺.

𑁧𑁬𑁪.

‘‘𑀘𑀺𑀢𑁆𑀢𑁂𑀦 𑀯𑀜𑁆𑀘𑀺𑀢𑀸 𑀲𑀢𑁆𑀢𑀸, 𑀫𑀸𑀭𑀲𑁆𑀲 𑀯𑀺𑀲𑀬𑁂 𑀭𑀢𑀸;

𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀦𑁆𑀢𑀺 𑀅𑀯𑀺𑀤𑁆𑀤𑀲𑀽.

𑁧𑁬𑁫.

‘‘𑀓𑀸𑀫𑀸𑀘𑁆𑀙𑀦𑁆𑀤𑀜𑁆𑀘 𑀩𑁆𑀬𑀸𑀧𑀸𑀤𑀁, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑁂𑀯 𑀘;

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁, 𑀯𑀺𑀘𑀺𑀓𑀺𑀘𑁆𑀙𑀁 𑀘 𑀧𑀜𑁆𑀘𑀫𑀁.

𑁧𑁬𑁬.

‘‘𑀲𑀁𑀬𑁄𑀚𑀦𑀸𑀦𑀺 𑀏𑀢𑀸𑀦𑀺, 𑀧𑀚𑀳𑀺𑀢𑁆𑀯𑀸𑀦 𑀪𑀺𑀓𑁆𑀔𑀼𑀦𑀻;

𑀑𑀭𑀫𑁆𑀪𑀸𑀕𑀫𑀦𑀻𑀬𑀸𑀦𑀺, 𑀦𑀬𑀺𑀤𑀁 𑀧𑀼𑀦𑀭𑁂𑀳𑀺𑀲𑀺.

𑁧𑁬𑁭.

‘‘𑀭𑀸𑀕𑀁 𑀫𑀸𑀦𑀁 𑀅𑀯𑀺𑀚𑁆𑀚𑀜𑁆𑀘, 𑀉𑀤𑁆𑀥𑀘𑁆𑀘𑀜𑁆𑀘 𑀯𑀺𑀯𑀚𑁆𑀚𑀺𑀬;

𑀲𑀁𑀬𑁄𑀚𑀦𑀸𑀦𑀺 𑀙𑁂𑀢𑁆𑀯𑀸𑀦, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀲𑀺.

𑁧𑁬𑁮.

‘‘𑀔𑁂𑀧𑁂𑀢𑁆𑀯𑀸 𑀚𑀸𑀢𑀺𑀲𑀁𑀲𑀸𑀭𑀁, 𑀧𑀭𑀺𑀜𑁆𑀜𑀸𑀬 𑀧𑀼𑀦𑀩𑁆𑀪𑀯𑀁;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀆𑀪𑀸𑀲𑀺;

𑀢𑀢𑁆𑀣 𑀢𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀳𑀻𑀢𑀺 𑀬𑀤𑀢𑁆𑀣𑀁 𑀬𑀲𑁆𑀲 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀢𑁆𑀣𑀸𑀬. 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀲𑀼𑀁 𑀧𑀺𑀬𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀪𑁄𑀕𑀓𑁆𑀔𑀦𑁆𑀥𑀜𑁆𑀘 𑀳𑀺𑀢𑁆𑀯𑀸 𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀇𑀘𑁆𑀙𑀺𑀢𑁄, 𑀢𑀫𑁂𑀯 𑀯𑀟𑁆𑀠𑁂𑀬𑁆𑀬𑀸𑀲𑀺 𑀲𑀫𑁆𑀧𑀸𑀤𑁂𑀬𑁆𑀬𑀸𑀲𑀺. 𑀫𑀸 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀫𑀻𑀢𑀺 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀯𑀟𑁆𑀠𑀺𑀢𑀲𑁆𑀲 𑀓𑀽𑀝𑀘𑀺𑀢𑁆𑀢𑀲𑁆𑀲 𑀯𑀲𑀁 𑀫𑀸 𑀕𑀘𑁆𑀙𑀺.

𑀬𑀲𑁆𑀫𑀸 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀫𑀸𑀬𑀽𑀧𑀫𑀁, 𑀬𑁂𑀦 𑀯𑀜𑁆𑀘𑀺𑀢𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀫𑀸𑀭𑀯𑀲𑀸𑀦𑀼𑀕𑀸 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑁂𑀦 𑀯𑀜𑁆𑀘𑀺𑀢𑀸’’𑀢𑀺𑀆𑀤𑀺.

𑀲𑀁𑀬𑁄𑀚𑀦𑀸𑀦𑀺 𑀏𑀢𑀸𑀦𑀻𑀢𑀺 𑀏𑀢𑀸𑀦𑀺 ‘‘𑀓𑀸𑀫𑀘𑁆𑀙𑀦𑁆𑀤𑀜𑁆𑀘 𑀩𑁆𑀬𑀸𑀧𑀸𑀤’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀸𑀦𑀺. 𑀧𑀚𑀳𑀺𑀢𑁆𑀯𑀸𑀦𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀪𑀺𑀓𑁆𑀔𑀼𑀦𑀻𑀢𑀺 𑀢𑀲𑁆𑀲𑀸 𑀆𑀮𑀧𑀦𑀁. 𑀑𑀭𑀫𑁆𑀪𑀸𑀕𑀫𑀦𑀻𑀬𑀸𑀦𑀻𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼𑀢𑁄 𑀳𑁂𑀝𑁆𑀞𑀸𑀪𑀸𑀕𑁂 𑀓𑀸𑀫𑀥𑀸𑀢𑀼𑀬𑀁 𑀫𑀦𑀼𑀲𑁆𑀲𑀚𑀻𑀯𑀲𑁆𑀲 𑀳𑀺𑀢𑀸𑀦𑀺 𑀉𑀧𑀓𑀸𑀭𑀸𑀦𑀺 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. ‘‘𑀑𑀭𑀫𑀸𑀕𑀫𑀦𑀻𑀬𑀸𑀦𑀻’’𑀢𑀺 𑀧𑀸𑀴𑀺, 𑀲𑁄 𑀏𑀯𑀢𑁆𑀣𑁄. 𑀦𑀬𑀺𑀤𑀁 𑀧𑀼𑀦𑀭𑁂𑀳𑀺𑀲𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑁂𑀦 𑀇𑀤𑀁 𑀓𑀸𑀫𑀝𑁆𑀞𑀸𑀦𑀁 𑀓𑀸𑀫𑀪𑀯𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀼𑀦 𑀦𑀸𑀕𑀫𑀺𑀲𑁆𑀲𑀲𑀺. 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. ‘‘𑀇𑀢𑁆𑀣’’𑀦𑁆𑀢𑀺 𑀯𑀸 𑀧𑀸𑀴𑀺, 𑀇𑀢𑁆𑀣𑀢𑁆𑀢𑀁 𑀓𑀸𑀫𑀪𑀯𑀫𑀺𑀘𑁆𑀘𑁂𑀯 𑀅𑀢𑁆𑀣𑁄.

𑀭𑀸𑀕𑀦𑁆𑀢𑀺 𑀭𑀽𑀧𑀭𑀸𑀕𑀜𑁆𑀘 𑀅𑀭𑀽𑀧𑀭𑀸𑀕𑀜𑁆𑀘. 𑀫𑀸𑀦𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀯𑀚𑁆𑀛𑀁 𑀫𑀸𑀦𑀁. 𑀅𑀯𑀺𑀚𑁆𑀚𑀜𑁆𑀘 𑀉𑀤𑁆𑀥𑀘𑁆𑀘𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀯𑀚𑁆𑀚𑀺𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸. 𑀲𑀁𑀬𑁄𑀚𑀦𑀸𑀦𑀺 𑀙𑁂𑀢𑁆𑀯𑀸𑀦𑀸𑀢𑀺 𑀏𑀢𑀸𑀦𑀺 𑀭𑀽𑀧𑀭𑀸𑀕𑀸𑀤𑀻𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀲𑀻𑀢𑀺 𑀲𑀩𑁆𑀩𑀲𑁆𑀲𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑀔𑁂𑀧𑁂𑀢𑁆𑀯𑀸 𑀚𑀸𑀢𑀺𑀲𑀁𑀲𑀸𑀭𑀦𑁆𑀢𑀺 𑀚𑀸𑀢𑀺 𑀲𑀫𑀽𑀮𑀺𑀓𑀲𑀁𑀲𑀸𑀭𑀧𑀯𑀢𑁆𑀢𑀺𑀁 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸. 𑀦𑀺𑀘𑁆𑀙𑀸𑀢𑀸𑀢𑀺 𑀦𑀺𑀢𑁆𑀢𑀡𑁆𑀳𑀸. 𑀉𑀧𑀲𑀦𑁆𑀢𑀸𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀲𑀢𑁆𑀣𑀸𑀭𑀸 𑀇𑀫𑀸𑀲𑀼 𑀕𑀸𑀣𑀸𑀲𑀼 𑀪𑀸𑀲𑀺𑀢𑀸𑀲𑀼 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀣𑁂𑀭𑀻 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑁂𑀦𑁂𑀯 𑀢𑀸 𑀣𑁂𑀭𑀺𑀬𑀸 𑀕𑀸𑀣𑀸 𑀦𑀸𑀫 𑀚𑀸𑀢𑀸.

𑀕𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀚𑀬𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀘𑀢𑀼𑀓𑁆𑀔𑀢𑁆𑀢𑀼𑀦𑁆𑀢𑀺𑀆𑀤𑀺𑀓𑀸 𑀯𑀺𑀚𑀬𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀓𑀼𑀲𑀮𑀫𑀽𑀮𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀔𑁂𑀫𑀸𑀬 𑀣𑁂𑀭𑀺𑀬𑀸 𑀕𑀺𑀳𑀺𑀓𑀸𑀮𑁂 𑀲𑀳𑀸𑀬𑀺𑀓𑀸 𑀅𑀳𑁄𑀲𑀺. 𑀲𑀸 𑀢𑀲𑁆𑀲𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀲𑀸𑀧𑀺 𑀦𑀸𑀫 𑀭𑀸𑀚𑀫𑀳𑁂𑀲𑀻 𑀧𑀩𑁆𑀩𑀚𑀺𑀲𑁆𑀲𑀢𑀺 𑀓𑀺𑀫𑀗𑁆𑀕𑀁 𑀧𑀦𑀸𑀳’’𑀦𑁆𑀢𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸𑀬𑁂𑀯 𑀳𑀼𑀢𑁆𑀯𑀸 𑀔𑁂𑀫𑀸𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀣𑁂𑀭𑀻 𑀢𑀲𑁆𑀲𑀸 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀬𑀣𑀸 𑀲𑀁𑀲𑀸𑀭𑁂 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 𑀲𑀸𑀲𑀦𑁂 𑀲𑀸 𑀅𑀪𑀺𑀧𑁆𑀧𑀲𑀦𑁆𑀦𑀸 𑀪𑀯𑀺𑀲𑁆𑀲𑀢𑀺. 𑀲𑀸 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀘 𑀳𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀣𑁂𑀭𑀻 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬, 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁬𑁯.

‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁧𑁭𑁦.

‘‘𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀓𑁆𑀓𑀘𑁆𑀘𑀁 𑀧𑀭𑀺𑀧𑀼𑀘𑁆𑀙𑀳𑀁;

𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀥𑀸𑀢𑀼𑀆𑀬𑀢𑀦𑀸𑀦𑀺 𑀘.

𑁧𑁭𑁧.

‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀩𑁄𑀚𑁆𑀛𑀗𑁆𑀕𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁧𑁭𑁨.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀓𑀭𑁄𑀦𑁆𑀢𑀻 𑀅𑀦𑀼𑀲𑀸𑀲𑀦𑀺𑀁;

𑀭𑀢𑁆𑀢𑀺𑀬𑀸 𑀧𑀼𑀭𑀺𑀫𑁂 𑀬𑀸𑀫𑁂, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁.

𑁧𑁭𑁩.

‘‘𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁;

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀺𑀁.

𑁧𑁭𑁪.

‘‘𑀧𑀻𑀢𑀺𑀲𑀼𑀔𑁂𑀦 𑀘 𑀓𑀸𑀬𑀁, 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁 𑀢𑀤𑀸;

𑀲𑀢𑁆𑀢𑀫𑀺𑀬𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀔𑁂𑀫𑀸𑀣𑁂𑀭𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀩𑁄𑀚𑁆𑀛𑀗𑁆𑀕𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀦𑁆𑀢𑀺 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀜𑁆𑀘 𑀅𑀭𑀺𑀬𑀫𑀕𑁆𑀕𑀁. 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑀸 𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀸𑀬.

𑀧𑀻𑀢𑀺𑀲𑀼𑀔𑁂𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀬 𑀧𑀻𑀢𑀺𑀬𑀸 𑀲𑀼𑀔𑁂𑀦 𑀘. 𑀓𑀸𑀬𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫𑀓𑀸𑀬𑀁 𑀢𑀤𑀦𑀼𑀲𑀸𑀭𑁂𑀦 𑀭𑀽𑀧𑀓𑀸𑀬𑀜𑁆𑀘. 𑀨𑀭𑀺𑀢𑁆𑀯𑀸𑀢𑀺 𑀨𑀼𑀲𑀺𑀢𑁆𑀯𑀸 𑀩𑁆𑀬𑀸𑀧𑁂𑀢𑁆𑀯𑀸 𑀯𑀸. 𑀲𑀢𑁆𑀢𑀫𑀺𑀬𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀤𑀺𑀯𑀲𑀢𑁄 𑀲𑀢𑁆𑀢𑀫𑀺𑀬𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁. 𑀓𑀣𑀁? 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬, 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀫𑁄𑀳𑀓𑁆𑀔𑀦𑁆𑀥𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀸𑀲𑀺𑀦𑀸 𑀧𑀤𑀸𑀮𑁂𑀢𑁆𑀯𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀺𑀚𑀬𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀧𑀸𑀢𑁄

𑁧. 𑀉𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀢𑁆𑀢𑀓𑀦𑀺𑀧𑀸𑀢𑁂 𑀫𑀼𑀲𑀮𑀸𑀦𑀺 𑀕𑀳𑁂𑀢𑁆𑀯𑀸𑀦𑀸𑀢𑀺 𑀉𑀢𑁆𑀢𑀭𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀸𑀯𑀺𑀢𑀓𑀼𑀲𑀮𑀫𑀽𑀮𑀸 𑀲𑀫𑀼𑀧𑀘𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀧𑀭𑀺𑀧𑀓𑁆𑀓𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸 𑀳𑀼𑀢𑁆𑀯𑀸, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀢𑁆𑀢𑀭𑀸𑀢𑀺 𑀮𑀤𑁆𑀥𑀦𑀸𑀫𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀣𑁂𑀭𑀻 𑀢𑀲𑁆𑀲𑀸 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀁𑀲𑀸𑀭𑁂 𑀚𑀸𑀢𑀲𑀁𑀯𑁂𑀕𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀻 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀘 𑀦 𑀘𑀺𑀭𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁭𑁫.

‘‘𑀫𑀼𑀲𑀮𑀸𑀦𑀺 𑀕𑀳𑁂𑀢𑁆𑀯𑀸𑀦, 𑀥𑀜𑁆𑀜𑀁 𑀓𑁄𑀝𑁆𑀝𑁂𑀦𑁆𑀢𑀺 𑀫𑀸𑀡𑀯𑀸;

𑀧𑀼𑀢𑁆𑀢𑀤𑀸𑀭𑀸𑀦𑀺 𑀧𑁄𑀲𑁂𑀦𑁆𑀢𑀸, 𑀥𑀦𑀁 𑀯𑀺𑀦𑁆𑀤𑀦𑁆𑀢𑀺 𑀫𑀸𑀡𑀯𑀸.

𑁧𑁭𑁬.

‘‘𑀖𑀝𑁂𑀣 𑀩𑀼𑀤𑁆𑀥𑀲𑀸𑀲𑀦𑁂, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀣.

𑁧𑁭𑁭.

‘‘𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀧𑀘𑁆𑀘𑀯𑁂𑀓𑁆𑀔𑀣 𑀲𑀗𑁆𑀔𑀸𑀭𑁂, 𑀧𑀭𑀢𑁄 𑀦𑁄 𑀘 𑀅𑀢𑁆𑀢𑀢𑁄.

𑁧𑁭𑁮.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀝𑀸𑀘𑀸𑀭𑀸𑀦𑀼𑀲𑀸𑀲𑀦𑀺𑀁;

𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑁂 𑀉𑀧𑀸𑀯𑀺𑀲𑀺𑀁.

𑁧𑁭𑁯.

‘‘𑀭𑀢𑁆𑀢𑀺𑀬𑀸 𑀧𑀼𑀭𑀺𑀫𑁂 𑀬𑀸𑀫𑁂, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁.

𑁧𑁮𑁦.

‘‘𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀓𑁆𑀔𑀦𑁆𑀥𑀁 𑀧𑀤𑀸𑀮𑀬𑀺𑀁;

𑀢𑁂𑀯𑀺𑀚𑁆𑀚𑀸 𑀅𑀣 𑀯𑀼𑀝𑁆𑀞𑀸𑀲𑀺𑀁, 𑀓𑀢𑀸 𑀢𑁂 𑀅𑀦𑀼𑀲𑀸𑀲𑀦𑀻.

𑁧𑁮𑁧.

‘‘𑀲𑀓𑁆𑀓𑀁𑀯 𑀤𑁂𑀯𑀸 𑀢𑀺𑀤𑀲𑀸, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀁;

𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀲𑁆𑀲𑀸𑀫𑀺, 𑀢𑁂𑀯𑀺𑀚𑁆𑀚𑀸𑀫𑁆𑀳𑀺 𑀅𑀦𑀸𑀲𑀯𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦𑀸𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑁂 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀓𑀣𑀁? 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀣𑀸𑀢𑀺 𑀧𑀝𑀺𑀧𑀢𑁆𑀢𑀺𑀁 𑀅𑀯𑁂𑀓𑁆𑀔𑀣, 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀢𑀺𑀧𑀺, 𑀤𑀼𑀓𑁆𑀔𑀸𑀢𑀺𑀧𑀺, 𑀅𑀦𑀢𑁆𑀢𑀸𑀢𑀺𑀧𑀺 𑀮𑀓𑁆𑀔𑀡𑀢𑁆𑀢𑀬𑀁 𑀯𑀺𑀧𑀲𑁆𑀲𑀣𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀑𑀯𑀸𑀤𑀓𑀸𑀮𑁂 𑀅𑀢𑁆𑀢𑀦𑁄 𑀅𑀜𑁆𑀜𑁂𑀲𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀁 𑀣𑁂𑀭𑀺𑀬𑀸𑀤𑀻𑀦𑀁 𑀑𑀯𑀸𑀤𑀲𑁆𑀲 𑀅𑀦𑀼𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀝𑀸𑀘𑀸𑀭𑀸𑀦𑀼𑀲𑀸𑀲𑀦𑀺𑀦𑁆𑀢𑀺 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀅𑀦𑀼𑀲𑀺𑀝𑁆𑀞𑀺𑀁. ‘‘𑀧𑀝𑀸𑀘𑀸𑀭𑀸𑀬 𑀲𑀸𑀲𑀦’’𑀦𑁆𑀢𑀺𑀧𑀺 𑀯𑀸 𑀧𑀸𑀞𑁄.

𑀅𑀣 𑀯𑀼𑀝𑁆𑀞𑀸𑀲𑀺𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀘𑁆𑀙𑀸 𑀆𑀲𑀦𑀢𑁄 𑀯𑀼𑀝𑁆𑀞𑀸𑀲𑀺𑀁. 𑀅𑀬𑀫𑁆𑀧𑀺 𑀣𑁂𑀭𑀻 𑀏𑀓𑀤𑀺𑀯𑀲𑀁 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. ‘‘𑀦 𑀢𑀸𑀯𑀺𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑁆𑀯𑀸, 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀸𑀬 𑀧𑀯𑀢𑁆𑀢𑀸𑀬 ‘‘𑀇𑀤𑀸𑀦𑀺𑀫𑁆𑀳𑀺 𑀓𑀢𑀓𑀺𑀘𑁆𑀘𑀸’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀇𑀫𑀸 𑀕𑀸𑀣𑀸 𑀉𑀤𑀸𑀦𑁂𑀢𑁆𑀯𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁. 𑀢𑀢𑁄 𑀲𑀫𑁆𑀫𑀤𑁂𑀯 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀧𑀘𑁆𑀘𑀼𑀤𑀸𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀢𑀸 𑀢𑁂 𑀅𑀦𑀼𑀲𑀸𑀲𑀦𑀻’’𑀢𑀺𑀆𑀤𑀺. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀉𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑀸𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦𑀸𑀢𑀺𑀆𑀤𑀺𑀓𑀸 𑀘𑀸𑀮𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑁂𑀲𑀼 𑀦𑀸𑀮𑀓𑀕𑀸𑀫𑁂 𑀭𑀽𑀧𑀲𑀸𑀭𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀸𑀮𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀢𑀲𑁆𑀲𑀸 𑀓𑀦𑀺𑀝𑁆𑀞𑀸𑀬 𑀉𑀧𑀘𑀸𑀮𑀸𑀢𑀺, 𑀅𑀣 𑀢𑀲𑁆𑀲𑀸 𑀓𑀦𑀺𑀝𑁆𑀞𑀸𑀬 𑀲𑀻𑀲𑀽𑀧𑀘𑀸𑀮𑀸𑀢𑀺. 𑀇𑀫𑀸 𑀢𑀺𑀲𑁆𑀲𑁄𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀓𑀦𑀺𑀝𑁆𑀞𑀪𑀕𑀺𑀦𑀺𑀬𑁄, 𑀇𑀫𑀸𑀲𑀁 𑀧𑀼𑀢𑁆𑀢𑀸𑀦𑀫𑁆𑀧𑀺 𑀢𑀺𑀡𑁆𑀡𑀁 𑀇𑀤𑀫𑁂𑀯 𑀦𑀸𑀫𑀁. 𑀬𑁂 𑀲𑀦𑁆𑀥𑀸𑀬 𑀣𑁂𑀭𑀕𑀸𑀣𑀸𑀬 ‘‘𑀘𑀸𑀮𑁂 𑀉𑀧𑀘𑀸𑀮𑁂 𑀲𑀻𑀲𑀽𑀧𑀘𑀸𑀮𑁂’’𑀢𑀺 (𑀣𑁂𑀭𑀕𑀸. 𑁪𑁨) 𑀆𑀕𑀢𑀁.

𑀇𑀫𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀪𑀕𑀺𑀦𑀺𑀬𑁄 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀩𑁆𑀩𑀚𑀻’’𑀢𑀺 𑀲𑀼𑀢𑁆𑀯𑀸 ‘‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀥𑀫𑁆𑀫𑀯𑀺𑀦𑀬𑁄, 𑀦 𑀲𑀸 𑀑𑀭𑀺𑀓𑀸 𑀧𑀩𑁆𑀩𑀚𑁆𑀚𑀸, 𑀬𑀢𑁆𑀣 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀢𑀺𑀩𑁆𑀩𑀘𑁆𑀙𑀦𑁆𑀤𑀸 𑀅𑀲𑁆𑀲𑀼𑀫𑀼𑀔𑀁 𑀭𑀼𑀤𑀫𑀸𑀦𑀁 𑀜𑀸𑀢𑀺𑀧𑀭𑀺𑀚𑀦𑀁 𑀧𑀳𑀸𑀬 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀖𑀝𑁂𑀦𑁆𑀢𑀺𑀬𑁄 𑀯𑀸𑀬𑀫𑀦𑁆𑀢𑀺𑀬𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑀺.

𑀢𑀸𑀲𑀼 𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀏𑀓𑀤𑀺𑀯𑀲𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀅𑀦𑁆𑀥𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀸𑀫𑁂𑀳𑀺 𑀉𑀧𑀦𑁂𑀲𑀺. 𑀬𑀁 𑀲𑀦𑁆𑀥𑀸𑀬 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 𑁋

‘‘𑀅𑀣 𑀔𑁄 𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀅𑀦𑁆𑀥𑀯𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀘𑀸𑀮𑀸 𑀪𑀺𑀓𑁆𑀔𑀼𑀦𑀻, 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀸𑀮𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘𑀸’’𑀢𑀺 (𑀲𑀁. 𑀦𑀺. 𑁧.𑁧𑁬𑁭).

𑀅𑀦𑁆𑀥𑀯𑀦𑀫𑁆𑀳𑀺 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀢𑁄 𑀯𑀺𑀘𑁆𑀙𑀺𑀦𑁆𑀤𑀺𑀢𑀼𑀓𑀸𑀫𑁄 ‘‘𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀻’’𑀢𑀺𑀆𑀤𑀺𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀼 𑀕𑀼𑀡𑁂 𑀥𑀫𑁆𑀫𑀲𑁆𑀲 𑀘 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀪𑀸𑀯𑀯𑀺𑀪𑀸𑀯𑀦𑁂𑀦 𑀢𑀲𑁆𑀲 𑀯𑀺𑀲𑀬𑀸𑀢𑀺𑀓𑁆𑀓𑀫𑀁 𑀧𑀯𑁂𑀤𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀸𑀭𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀅𑀣 𑀲𑀸 𑀅𑀢𑁆𑀢𑀦𑀸 𑀫𑀸𑀭𑁂𑀦 𑀘 𑀪𑀸𑀲𑀺𑀢𑀸 𑀕𑀸𑀣𑀸 𑀉𑀤𑀸𑀦𑀯𑀲𑁂𑀦 𑀓𑀣𑁂𑀦𑁆𑀢𑀻 𑁋

𑁧𑁮𑁨.

‘‘𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀧𑀝𑀺𑀯𑀺𑀚𑁆𑀛𑀺 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀁.

𑁧𑁮𑁩.

‘‘𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀺, 𑀲𑀫𑀡𑀻 𑀯𑀺𑀬 𑀤𑀺𑀲𑁆𑀲𑀢𑀺;

𑀦 𑀘 𑀭𑁄𑀘𑁂𑀲𑀺 𑀧𑀸𑀲𑀡𑁆𑀟𑁂, 𑀓𑀺𑀫𑀺𑀤𑀁 𑀘𑀭𑀲𑀺 𑀫𑁄𑀫𑀼𑀳𑀸.

𑁧𑁮𑁪.

‘‘𑀇𑀢𑁄 𑀩𑀳𑀺𑀤𑁆𑀥𑀸 𑀧𑀸𑀲𑀡𑁆𑀟𑀸, 𑀤𑀺𑀝𑁆𑀞𑀺𑀬𑁄 𑀉𑀧𑀦𑀺𑀲𑁆𑀲𑀺𑀢𑀸;

𑀦 𑀢𑁂 𑀥𑀫𑁆𑀫𑀁 𑀯𑀺𑀚𑀸𑀦𑀦𑁆𑀢𑀺, 𑀦 𑀢𑁂 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸.

𑁧𑁮𑁫.

‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄, 𑀩𑀼𑀤𑁆𑀥𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀤𑀺𑀝𑁆𑀞𑀻𑀦𑀁 𑀲𑀫𑀢𑀺𑀓𑁆𑀓𑀫𑀁.

𑁧𑁮𑁬.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁧𑁮𑁭.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁮𑁮.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀯𑀲𑁂𑀦 𑀓𑀸𑀬𑀸𑀤𑀻𑀲𑀼 𑀅𑀲𑀼𑀪𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀯𑀲𑁂𑀦 𑀲𑀢𑀺𑀁 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀁 𑀓𑀢𑁆𑀯𑀸. 𑀪𑀺𑀓𑁆𑀔𑀼𑀦𑀻𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑀺𑀢𑀲𑀤𑁆𑀥𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸. 𑀧𑀝𑀺𑀯𑀺𑀚𑁆𑀛𑀺 𑀧𑀤𑀁 𑀲𑀦𑁆𑀢𑀦𑁆𑀢𑀺 𑀲𑀦𑁆𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀺 𑀲𑀘𑁆𑀙𑀸𑀓𑀸𑀲𑀺. 𑀲𑀗𑁆𑀔𑀸𑀭𑀽𑀧𑀲𑀫𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀉𑀧𑀲𑀫𑀳𑁂𑀢𑀼𑀪𑀽𑀢𑀁. 𑀲𑀼𑀔𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀼𑀔𑀁.

‘‘𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲𑀸’’𑀢𑀺 𑀕𑀸𑀣𑀸 𑀫𑀸𑀭𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀩𑀳𑀽 𑀲𑀫𑀬𑀸 𑀢𑁂𑀲𑀜𑁆𑀘 𑀤𑁂𑀲𑁂𑀢𑀸𑀭𑁄 𑀩𑀳𑀽 𑀏𑀯 𑀢𑀺𑀢𑁆𑀣𑀓𑀭𑀸, 𑀢𑁂𑀲𑀼 𑀓𑀁 𑀦𑀼 𑀔𑁄 𑀢𑁆𑀯𑀁 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀺 𑀫𑀼𑀡𑁆𑀟𑀺𑀢𑀓𑁂𑀲𑀸 𑀅𑀲𑀺. 𑀦 𑀓𑁂𑀯𑀮𑀁 𑀫𑀼𑀡𑁆𑀟𑀸𑀯, 𑀅𑀣 𑀔𑁄 𑀓𑀸𑀲𑀸𑀯𑀥𑀸𑀭𑀡𑁂𑀦 𑀘 𑀲𑀫𑀡𑀻 𑀯𑀺𑀬 𑀤𑀺𑀲𑁆𑀲𑀢𑀺. 𑀦 𑀘 𑀭𑁄𑀘𑁂𑀲𑀺 𑀧𑀸𑀲𑀡𑁆𑀟𑁂𑀢𑀺 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁 𑀆𑀤𑀸𑀲𑀪𑀽𑀢𑁂 𑀧𑀸𑀲𑀡𑁆𑀟𑁂 𑀢𑁂 𑀢𑁂 𑀲𑀫𑀬𑀦𑁆𑀢𑀭𑁂 𑀦𑁂𑀯 𑀭𑁄𑀘𑁂𑀲𑀺. 𑀓𑀺𑀫𑀺𑀤𑀁 𑀘𑀭𑀲𑀺 𑀫𑁄𑀫𑀼𑀳𑀸𑀢𑀺 𑀓𑀺𑀁 𑀦𑀸𑀫𑀺𑀤𑀁, 𑀬𑀁 𑀧𑀸𑀲𑀡𑁆𑀟𑀯𑀺𑀳𑀺𑀢𑀁 𑀉𑀚𑀼𑀁 𑀦𑀺𑀩𑁆𑀩𑀸𑀦𑀫𑀕𑁆𑀕𑀁 𑀧𑀳𑀸𑀬 𑀅𑀚𑁆𑀚 𑀓𑀸𑀮𑀺𑀓𑀁 𑀓𑀼𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑀻 𑀅𑀢𑀺𑀯𑀺𑀬 𑀫𑀽𑀴𑁆𑀳𑀸 𑀘𑀭𑀲𑀺 𑀧𑀭𑀺𑀩𑁆𑀪𑀫𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑀻 𑀧𑀝𑀺𑀯𑀘𑀦𑀤𑀸𑀦𑀫𑀼𑀔𑁂𑀦 𑀢𑀁 𑀢𑀚𑁆𑀚𑁂𑀦𑁆𑀢𑀻 ‘‘𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀸𑀲𑀡𑁆𑀟𑀸 𑀦𑀸𑀫 𑀇𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀓𑀼𑀝𑀻𑀲𑀓𑀩𑀳𑀼𑀓𑀸𑀭𑀸𑀤𑀺𑀓𑀸. 𑀢𑁂 𑀳𑀺 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀧𑀸𑀲𑀁 𑀤𑀺𑀝𑁆𑀞𑀺𑀧𑀸𑀲𑀜𑁆𑀘 𑀟𑁂𑀦𑁆𑀢𑀺 𑀑𑀟𑁆𑀟𑁂𑀦𑁆𑀢𑀻𑀢𑀺 𑀧𑀸𑀲𑀡𑁆𑀟𑀸𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀤𑀺𑀝𑁆𑀞𑀺𑀬𑁄 𑀉𑀧𑀦𑀺𑀲𑁆𑀲𑀺𑀢𑀸’’𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀕𑀢𑀸𑀦𑀺 𑀉𑀧𑁂𑀘𑁆𑀘 𑀦𑀺𑀲𑁆𑀲𑀺𑀢𑀸, 𑀤𑀺𑀝𑁆𑀞𑀺𑀕𑀢𑀸𑀦𑀺 𑀆𑀤𑀺𑀬𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀬𑀤𑀕𑁆𑀕𑁂𑀦 𑀘 𑀤𑀺𑀝𑁆𑀞𑀺𑀲𑀦𑁆𑀦𑀺𑀲𑁆𑀲𑀺𑀢𑀸, 𑀢𑀤𑀕𑁆𑀕𑁂𑀦 𑀧𑀸𑀲𑀡𑁆𑀟𑀲𑀦𑁆𑀦𑀺𑀲𑁆𑀲𑀺𑀢𑀸. 𑀦 𑀢𑁂 𑀥𑀫𑁆𑀫𑀁 𑀯𑀺𑀚𑀸𑀦𑀦𑁆𑀢𑀻𑀢𑀺 𑀬𑁂 𑀧𑀸𑀲𑀡𑁆𑀟𑀺𑀦𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀕𑀢𑀲𑀦𑁆𑀦𑀺𑀲𑁆𑀲𑀺𑀢𑀸 ‘‘𑀅𑀬𑀁 𑀧𑀯𑀢𑁆𑀢𑀺 𑀏𑀯𑀁 𑀧𑀯𑀢𑁆𑀢𑀢𑀻’’𑀢𑀺 𑀧𑀯𑀢𑁆𑀢𑀺𑀥𑀫𑁆𑀫𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦 𑀯𑀺𑀚𑀸𑀦𑀦𑁆𑀢𑀺. 𑀦 𑀢𑁂 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸𑀢𑀺 ‘‘𑀅𑀬𑀁 𑀦𑀺𑀯𑀢𑁆𑀢𑀺 𑀏𑀯𑀁 𑀦𑀺𑀯𑀢𑁆𑀢𑀢𑀻’’𑀢𑀺 𑀦𑀺𑀯𑀢𑁆𑀢𑀺𑀥𑀫𑁆𑀫𑀲𑁆𑀲𑀸𑀧𑀺 𑀅𑀓𑀼𑀲𑀮𑀸, 𑀧𑀯𑀢𑁆𑀢𑀺𑀥𑀫𑁆𑀫𑀫𑀕𑁆𑀕𑁂𑀧𑀺 𑀳𑀺 𑀢𑁂 𑀲𑀁𑀫𑀽𑀴𑁆𑀳𑀸, 𑀓𑀺𑀫𑀗𑁆𑀕𑀁 𑀧𑀦 𑀦𑀺𑀯𑀢𑁆𑀢𑀺𑀥𑀫𑁆𑀫𑁂𑀢𑀺.

𑀏𑀯𑀁 𑀧𑀸𑀲𑀡𑁆𑀟𑀯𑀸𑀤𑀸𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀻𑀢𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀝𑁆𑀞𑀻𑀦𑀁 𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀲𑀩𑁆𑀩𑀸𑀲𑀁 𑀤𑀺𑀝𑁆𑀞𑀻𑀦𑀁 𑀲𑀫𑀢𑀺𑀓𑁆𑀓𑀫𑀦𑀼𑀧𑀸𑀬𑀁 𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀸𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀧𑀘𑀸𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀢𑀺𑀫𑀢𑀻𑀢𑀺𑀆𑀤𑀺𑀓𑀸 𑀉𑀧𑀘𑀸𑀮𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀢𑀲𑁆𑀲𑀸 𑀯𑀢𑁆𑀣𑀼 𑀘𑀸𑀮𑀸𑀬 𑀣𑁂𑀭𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀫𑁂𑀯. 𑀅𑀬𑀫𑁆𑀧𑀺 𑀳𑀺 𑀘𑀸𑀮𑀸 𑀯𑀺𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑀻 𑁋

𑁧𑁮𑁯.

‘‘𑀲𑀢𑀺𑀫𑀢𑀻 𑀘𑀓𑁆𑀔𑀼𑀫𑀢𑀻, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀧𑀝𑀺𑀯𑀺𑀚𑁆𑀛𑀺 𑀧𑀤𑀁 𑀲𑀦𑁆𑀢𑀁, 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢’’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀲𑀢𑀺𑀫𑀢𑀻𑀢𑀺 𑀲𑀢𑀺𑀲𑀫𑁆𑀧𑀦𑁆𑀦𑀸, 𑀧𑀼𑀩𑁆𑀩𑀪𑀸𑀕𑁂 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀉𑀢𑁆𑀢𑀫𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀫𑀢𑀻𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑀦𑁆𑀦𑀸𑀕𑀢𑀸, 𑀆𑀤𑀺𑀢𑁄 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀧𑀭𑀫𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑀦𑁆𑀢𑀺 𑀅𑀮𑀸𑀫𑀓𑀧𑀼𑀭𑀺𑀲𑁂𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑁂𑀳𑀺 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑁂𑀯𑀺𑀢𑀁.

‘‘𑀓𑀺𑀦𑁆𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀻’’𑀢𑀺 𑀕𑀸𑀣𑀸 𑀣𑁂𑀭𑀺𑀁 𑀓𑀸𑀫𑁂𑀲𑀼 𑀉𑀧𑀳𑀸𑀭𑁂𑀢𑀼𑀓𑀸𑀫𑁂𑀦 𑀫𑀸𑀭𑁂𑀦 𑀯𑀼𑀢𑁆𑀢𑀸. ‘‘𑀓𑀺𑀁 𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼𑀦𑀺 𑀦 𑀭𑁄𑀘𑁂𑀲𑀻’’𑀢𑀺 (𑀲𑀁. 𑀦𑀺. 𑁧.𑁧𑁬𑁭) 𑀳𑀺 𑀫𑀸𑀭𑁂𑀦 𑀧𑀼𑀝𑁆𑀞𑀸 𑀣𑁂𑀭𑀻 𑀆𑀳 𑁋 ‘‘𑀚𑀸𑀢𑀺𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀦 𑀭𑁄𑀘𑁂𑀫𑀻’’𑀢𑀺. 𑀅𑀣 𑀦𑀁 𑀫𑀸𑀭𑁄 𑀚𑀸𑀢𑀲𑁆𑀲 𑀓𑀸𑀫𑀸 𑀧𑀭𑀺𑀪𑁄𑀕𑀸, 𑀢𑀲𑁆𑀫𑀸 𑀚𑀸𑀢𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀓𑀸𑀫𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

𑁧𑁯𑁦.

‘‘𑀓𑀺𑀦𑁆𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺, 𑀚𑀸𑀢𑁄 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’𑀢𑀺. 𑁋

𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀓𑀺𑀁 𑀦𑀼 𑀢𑀁 𑀓𑀸𑀭𑀡𑀁, 𑀬𑁂𑀦 𑀢𑁆𑀯𑀁 𑀉𑀧𑀘𑀸𑀮𑁂 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺 𑀦 𑀭𑁄𑀘𑁂𑀬𑁆𑀬𑀸𑀲𑀺, 𑀦 𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺. 𑀬𑀲𑁆𑀫𑀸 𑀚𑀸𑀢𑁄 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺 𑀇𑀥 𑀚𑀸𑀢𑁄 𑀓𑀸𑀫𑀕𑀼𑀡𑀲𑀁𑀳𑀺𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀧𑀝𑀺𑀲𑁂𑀯𑀦𑁆𑀢𑁄 𑀓𑀸𑀫𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀦 𑀳𑀺 𑀅𑀚𑀸𑀢𑀲𑁆𑀲 𑀢𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀪𑀼𑀜𑁆𑀚𑀸𑀳𑀺 𑀓𑀸𑀫𑀭𑀢𑀺𑀬𑁄 𑀓𑀸𑀫𑀔𑀺𑀟𑁆𑀟𑀸𑀭𑀢𑀺𑀬𑁄 𑀅𑀦𑀼𑀪𑀯. 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻 ‘‘𑀬𑁄𑀩𑁆𑀩𑀜𑁆𑀜𑁂 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑁄𑀕𑁂𑀲𑀼 𑀦 𑀫𑀬𑀸 𑀓𑀸𑀫𑀲𑀼𑀔𑀫𑀦𑀼𑀪𑀽𑀢’’𑀦𑁆𑀢𑀺 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻 𑀫𑀸 𑀅𑀳𑁄𑀲𑀺. 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀥𑀫𑁆𑀫𑀸 𑀦𑀸𑀫 𑀬𑀸𑀯𑀤𑁂𑀯 𑀅𑀢𑁆𑀣𑀸𑀥𑀺𑀕𑀫𑀢𑁆𑀣𑁄 𑀅𑀢𑁆𑀣𑁄 𑀘 𑀓𑀸𑀫𑀲𑀼𑀔𑀢𑁆𑀣𑁄𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑀻 𑀚𑀸𑀢𑀺𑀬𑀸 𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀢𑀁 𑀅𑀢𑁆𑀢𑀦𑁄 𑀘 𑀢𑀲𑁆𑀲 𑀯𑀺𑀲𑀬𑀸𑀢𑀺𑀓𑁆𑀓𑀫𑀁 𑀯𑀺𑀪𑀸𑀯𑁂𑀢𑁆𑀯𑀸 𑀢𑀚𑁆𑀚𑁂𑀦𑁆𑀢𑀻 𑁋

𑁧𑁯𑁧.

‘‘𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀳𑀢𑁆𑀣𑀧𑀸𑀤𑀸𑀦 𑀙𑁂𑀤𑀦𑀁;

𑀯𑀥𑀩𑀦𑁆𑀥𑀧𑀭𑀺𑀓𑁆𑀮𑁂𑀲𑀁, 𑀚𑀸𑀢𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁧𑁯𑁨.

‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄, 𑀲𑀫𑁆𑀩𑀼𑀤𑁆𑀥𑁄 𑀅𑀧𑀭𑀸𑀚𑀺𑀢𑁄;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀚𑀸𑀢𑀺𑀬𑀸 𑀲𑀫𑀢𑀺𑀓𑁆𑀓𑀫𑀁.

𑁧𑁯𑁩.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁧𑁯𑁪.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁯𑁫.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀚𑀸𑀢𑀲𑁆𑀲 𑀲𑀢𑁆𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀦 𑀅𑀚𑀸𑀢𑀲𑁆𑀲. 𑀦 𑀓𑁂𑀯𑀮𑀁 𑀫𑀭𑀡𑀫𑁂𑀯, 𑀅𑀣 𑀔𑁄 𑀚𑀭𑀸𑀭𑁄𑀕𑀸𑀤𑀬𑁄 𑀬𑀢𑁆𑀢𑀓𑀸𑀦𑀢𑁆𑀣𑀸, 𑀲𑀩𑁆𑀩𑁂𑀧𑀺 𑀢𑁂 𑀚𑀸𑀢𑀲𑁆𑀲 𑀳𑁄𑀦𑁆𑀢𑀺 𑀚𑀸𑀢𑀺𑀳𑁂𑀢𑀼𑀓𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧). 𑀢𑁂𑀦𑁂𑀯𑀸𑀳 𑁋 ‘‘𑀳𑀢𑁆𑀣𑀧𑀸𑀤𑀸𑀦 𑀙𑁂𑀤𑀦’’𑀦𑁆𑀢𑀺 𑀳𑀢𑁆𑀣𑀧𑀸𑀤𑀸𑀦𑀁 𑀙𑁂𑀤𑀦𑀁 𑀚𑀸𑀢𑀲𑁆𑀲𑁂𑀯 𑀳𑁄𑀢𑀺, 𑀦 𑀅𑀚𑀸𑀢𑀲𑁆𑀲. 𑀳𑀢𑁆𑀣𑀧𑀸𑀤𑀙𑁂𑀤𑀦𑀸𑀧𑀤𑁂𑀲𑁂𑀦 𑀘𑁂𑀢𑁆𑀣 𑀩𑀸𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸𑀧𑀺 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 𑁋 ‘‘𑀯𑀥𑀩𑀦𑁆𑀥𑀧𑀭𑀺𑀓𑁆𑀮𑁂𑀲𑀁, 𑀚𑀸𑀢𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀻’’𑀢𑀺. 𑀚𑀻𑀯𑀺𑀢𑀯𑀺𑀬𑁄𑀚𑀦𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀸𑀤𑀺𑀲𑀗𑁆𑀔𑀸𑀢𑀁 𑀯𑀥𑀧𑀭𑀺𑀓𑁆𑀮𑁂𑀲𑀜𑁆𑀘𑁂𑀯 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀺𑀲𑀗𑁆𑀔𑀸𑀢𑀁 𑀩𑀦𑁆𑀥𑀧𑀭𑀺𑀓𑁆𑀮𑁂𑀲𑀁 𑀅𑀜𑁆𑀜𑀜𑁆𑀘 𑀬𑀁𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀦𑀸𑀫 𑀢𑀁 𑀲𑀩𑁆𑀩𑀁 𑀚𑀸𑀢𑁄 𑀏𑀯 𑀦𑀺𑀕𑀘𑁆𑀙𑀢𑀺, 𑀦 𑀅𑀚𑀸𑀢𑁄, 𑀢𑀲𑁆𑀫𑀸 𑀚𑀸𑀢𑀺𑀁 𑀦 𑀭𑁄𑀘𑁂𑀫𑀻𑀢𑀺.

𑀇𑀤𑀸𑀦𑀺 𑀚𑀸𑀢𑀺𑀬𑀸 𑀓𑀸𑀫𑀸𑀦𑀜𑁆𑀘 𑀅𑀘𑁆𑀘𑀦𑁆𑀢𑀫𑁂𑀯 𑀅𑀢𑁆𑀢𑀦𑀸 𑀲𑀫𑀢𑀺𑀓𑁆𑀓𑀦𑁆𑀢𑀪𑀸𑀯𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀦𑁆𑀢𑀻 𑁋 ‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑀭𑀸𑀚𑀺𑀢𑁄𑀢𑀺 𑀓𑀺𑀮𑁂𑀲𑀫𑀸𑀭𑀸𑀤𑀺𑀦𑀸 𑀓𑁂𑀦𑀘𑀺 𑀦 𑀧𑀭𑀸𑀚𑀺𑀢𑁄. 𑀲𑀢𑁆𑀣𑀸 𑀳𑀺 𑀲𑀩𑁆𑀩𑀸𑀪𑀺𑀪𑀽 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀜𑁆𑀜𑀤𑀢𑁆𑀣𑀼 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄, 𑀢𑀲𑁆𑀫𑀸 𑀅𑀧𑀭𑀸𑀚𑀺𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀉𑀧𑀘𑀸𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀓𑀦𑀺𑀧𑀸𑀢𑁄

𑁧. 𑀲𑀻𑀲𑀽𑀧𑀘𑀸𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀅𑀝𑁆𑀞𑀓𑀦𑀺𑀧𑀸𑀢𑁂 𑀪𑀺𑀓𑁆𑀔𑀼𑀦𑀻 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺𑀆𑀤𑀺𑀓𑀸 𑀲𑀻𑀲𑀽𑀧𑀘𑀸𑀮𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀇𑀫𑀺𑀲𑁆𑀲𑀸𑀧𑀺 𑀯𑀢𑁆𑀣𑀼 𑀘𑀸𑀮𑀸𑀬 𑀣𑁂𑀭𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀫𑁆𑀧𑀺 𑀳𑀺 𑀆𑀬𑀲𑁆𑀫𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺 𑀉𑀲𑁆𑀲𑀸𑀳𑀚𑀸𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀖𑀝𑁂𑀦𑁆𑀢𑀻 𑀯𑀸𑀬𑀫𑀦𑁆𑀢𑀻 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑀻 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀢𑀓𑀺𑀘𑁆𑀘𑀸𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀤𑀸𑀦𑀯𑀲𑁂𑀦 𑁋

𑁧𑁯𑁬.

‘‘𑀪𑀺𑀓𑁆𑀔𑀼𑀦𑀻 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀸;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀅𑀲𑁂𑀘𑀦𑀓𑀫𑁄𑀚𑀯’’𑀦𑁆𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑁂𑀦 𑀪𑀺𑀓𑁆𑀔𑀼𑀦𑀺𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀭𑀺𑀧𑀼𑀡𑁆𑀡𑀸. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀸𑀢𑀺 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀝𑁆𑀞𑀼 𑀲𑀁𑀯𑀼𑀢𑀸, 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀇𑀝𑁆𑀞𑁂 𑀭𑀸𑀕𑀁, 𑀅𑀦𑀺𑀝𑁆𑀞𑁂 𑀤𑁄𑀲𑀁, 𑀅𑀲𑀫𑀧𑁂𑀓𑁆𑀔𑀦𑁂 𑀫𑁄𑀳𑀜𑁆𑀘 𑀧𑀳𑀸𑀬 𑀲𑀼𑀝𑁆𑀞𑀼 𑀧𑀺𑀳𑀺𑀢𑀺𑀦𑁆𑀤𑁆𑀭𑀺𑀬𑀸. 𑀅𑀲𑁂𑀘𑀦𑀓𑀫𑁄𑀚𑀯𑀦𑁆𑀢𑀺 𑀓𑁂𑀦𑀘𑀺 𑀅𑀦𑀸𑀲𑀺𑀢𑁆𑀢𑀓𑀁 𑀑𑀚𑀯𑀦𑁆𑀢𑀁 𑀲𑀪𑀸𑀯𑀫𑀥𑀼𑀭𑀁 𑀲𑀩𑁆𑀩𑀲𑁆𑀲𑀸𑀧𑀺 𑀓𑀺𑀮𑁂𑀲𑀭𑁄𑀕𑀲𑁆𑀲 𑀯𑀽𑀧𑀲𑀫𑀦𑁄𑀲𑀥𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸. 𑀅𑀭𑀺𑀬𑀫𑀕𑁆𑀕𑀫𑁆𑀧𑀺 𑀳𑀺 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑀢𑁄 𑀘 𑀧𑀤𑀁 𑀲𑀦𑁆𑀢𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁧𑁯𑁭.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀻𑀥𑁂𑀳𑀺, 𑀬𑀢𑁆𑀣 𑀢𑁂 𑀯𑀼𑀲𑀺𑀢𑀁 𑀧𑀼𑀭𑁂’’𑀢𑀺. 𑁋

𑀅𑀬𑀁 𑀕𑀸𑀣𑀸 𑀓𑀸𑀫𑀲𑀕𑁆𑀕𑁂𑀲𑀼 𑀦𑀺𑀓𑀦𑁆𑀢𑀺𑀁 𑀉𑀧𑁆𑀧𑀸𑀤𑁂𑀳𑀻𑀢𑀺 𑀢𑀢𑁆𑀣 𑀉𑀬𑁆𑀬𑁄𑀚𑀦𑀯𑀲𑁂𑀦 𑀣𑁂𑀭𑀺𑀁 𑀲𑀫𑀸𑀧𑀢𑁆𑀢𑀺𑀬𑀸 𑀘𑀸𑀯𑁂𑀢𑀼𑀓𑀸𑀫𑁂𑀦 𑀫𑀸𑀭𑁂𑀦 𑀯𑀼𑀢𑁆𑀢𑀸.

𑀢𑀢𑁆𑀣 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀬𑀢𑁆𑀣 𑀉𑀧𑀧𑀦𑁆𑀦𑀸, 𑀢𑀁 𑀞𑀸𑀦𑀁 𑀢𑀸𑀯𑀢𑀺𑀁𑀲𑀦𑁆𑀢𑀺. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀲𑀩𑁆𑀩𑁂𑀧𑀺 𑀤𑁂𑀯𑀧𑀼𑀢𑁆𑀢𑀸 𑀢𑀸𑀯𑀢𑀺𑀁𑀲𑀸. 𑀓𑁂𑀘𑀺 𑀧𑀦 ‘‘𑀢𑀸𑀯𑀢𑀺𑀁𑀲𑀸𑀢𑀺 𑀢𑁂𑀲𑀁 𑀤𑁂𑀯𑀸𑀦𑀁 𑀦𑀸𑀫𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀤𑁆𑀯𑀻𑀳𑀺 𑀤𑁂𑀯𑀮𑁄𑀓𑁂𑀳𑀺 𑀯𑀺𑀲𑀺𑀝𑁆𑀞𑀁 𑀤𑀺𑀩𑁆𑀩𑀁 𑀲𑀼𑀔𑀁 𑀬𑀸𑀢𑀸 𑀉𑀧𑀬𑀸𑀢𑀸 𑀲𑀫𑁆𑀧𑀦𑁆𑀦𑀸𑀢𑀺 𑀬𑀸𑀫𑀸. 𑀤𑀺𑀩𑁆𑀩𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀢𑀼𑀝𑁆𑀞𑀸 𑀧𑀳𑀝𑁆𑀞𑀸𑀢𑀺 𑀢𑀼𑀲𑀺𑀢𑀸. 𑀧𑀓𑀢𑀺𑀧𑀝𑀺𑀬𑀢𑁆𑀢𑀸𑀭𑀫𑁆𑀫𑀡𑀢𑁄 𑀅𑀢𑀺𑀭𑁂𑀓𑁂𑀦 𑀭𑀫𑀺𑀢𑀼𑀓𑀸𑀫𑀢𑀸𑀓𑀸𑀮𑁂 𑀬𑀣𑀸𑀭𑀼𑀘𑀺𑀢𑁂 𑀪𑁄𑀕𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀭𑀫𑀦𑁆𑀢𑀻𑀢𑀺 𑀦𑀺𑀫𑁆𑀫𑀸𑀦𑀭𑀢𑀺𑀦𑁄. 𑀘𑀺𑀢𑁆𑀢𑀭𑀼𑀘𑀺𑀁 𑀜𑀢𑁆𑀯𑀸 𑀧𑀭𑁂𑀳𑀺 𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀯𑀲𑀯𑀢𑁆𑀢𑀺𑀦𑁄. 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀻𑀥𑁂𑀳𑀻𑀢𑀺 𑀢𑀲𑁆𑀫𑀺𑀁 𑀢𑀸𑀯𑀢𑀺𑀁𑀲𑀸𑀤𑀺𑀓𑁂 𑀤𑁂𑀯𑀦𑀺𑀓𑀸𑀬𑁂 𑀢𑀯 𑀘𑀺𑀢𑁆𑀢𑀁 𑀞𑀧𑁂𑀳𑀺, 𑀉𑀧𑀧𑀚𑁆𑀚𑀦𑀸𑀬 𑀦𑀺𑀓𑀦𑁆𑀢𑀺𑀁 𑀓𑀭𑁄𑀳𑀺. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀪𑁄𑀕𑀸 𑀇𑀢𑀭𑁂𑀳𑀺 𑀦𑀺𑀳𑀻𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀸𑀯𑀢𑀺𑀁𑀲𑀸𑀤𑀬𑁄𑀯 𑀯𑀼𑀢𑁆𑀢𑀸. 𑀬𑀢𑁆𑀣 𑀢𑁂 𑀯𑀼𑀲𑀺𑀢𑀁 𑀧𑀼𑀭𑁂𑀢𑀺 𑀬𑁂𑀲𑀼 𑀤𑁂𑀯𑀦𑀺𑀓𑀸𑀬𑁂𑀲𑀼 𑀢𑀬𑀸 𑀧𑀼𑀩𑁆𑀩𑁂 𑀯𑀼𑀢𑁆𑀣𑀁. 𑀅𑀬𑀁 𑀓𑀺𑀭 𑀧𑀼𑀩𑁆𑀩𑁂 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻, 𑀢𑀸𑀯𑀢𑀺𑀁𑀲𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀓𑀸𑀫𑀲𑀕𑁆𑀕𑁂 𑀲𑁄𑀥𑁂𑀢𑁆𑀯𑀸 𑀧𑀼𑀦 𑀳𑁂𑀝𑁆𑀞𑀢𑁄 𑀑𑀢𑀭𑀦𑁆𑀢𑀻, 𑀢𑀼𑀲𑀺𑀢𑁂𑀲𑀼 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀇𑀤𑀸𑀦𑀺 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀸.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑀻 𑁋 ‘‘𑀢𑀺𑀝𑁆𑀞𑀢𑀼, 𑀫𑀸𑀭, 𑀢𑀬𑀸 𑀯𑀼𑀢𑁆𑀢𑀓𑀸𑀫𑀮𑁄𑀓𑁄. 𑀅𑀜𑁆𑀜𑁄𑀧𑀺 𑀲𑀩𑁆𑀩𑁄 𑀮𑁄𑀓𑁄 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀆𑀤𑀺𑀢𑁆𑀢𑁄 𑀲𑀫𑁆𑀧𑀚𑁆𑀚𑀮𑀺𑀢𑁄. 𑀦 𑀢𑀢𑁆𑀣 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀭𑀫𑀢𑀻’’𑀢𑀺 𑀓𑀸𑀫𑀢𑁄 𑀘 𑀮𑁄𑀓𑀢𑁄 𑀘 𑀅𑀢𑁆𑀢𑀦𑁄 𑀯𑀺𑀦𑀺𑀯𑀢𑁆𑀢𑀺𑀢𑀫𑀸𑀦𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀫𑀸𑀭𑀁 𑀢𑀚𑁆𑀚𑁂𑀦𑁆𑀢𑀻 𑁋

𑁧𑁯𑁮.

𑀬𑀸𑀫𑀸 𑀘‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄.

𑁧𑁯𑁯.

‘‘𑀓𑀸𑀮𑀁 𑀓𑀸𑀮𑀁 𑀪𑀯𑀸 𑀪𑀯𑀁, 𑀲𑀓𑁆𑀓𑀸𑀬𑀲𑁆𑀫𑀺𑀁 𑀧𑀼𑀭𑀓𑁆𑀔𑀢𑀸;

𑀅𑀯𑀻𑀢𑀺𑀯𑀢𑁆𑀢𑀸 𑀲𑀓𑁆𑀓𑀸𑀬𑀁, 𑀚𑀸𑀢𑀺𑀫𑀭𑀡𑀲𑀸𑀭𑀺𑀦𑁄.

𑁨𑁦𑁦.

‘‘𑀲𑀩𑁆𑀩𑁄 𑀆𑀤𑀻𑀧𑀺𑀢𑁄 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀤𑀻𑀧𑀺𑀢𑁄;

𑀲𑀩𑁆𑀩𑁄 𑀧𑀚𑁆𑀚𑀮𑀺𑀢𑁄 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀓𑀫𑁆𑀧𑀺𑀢𑁄.

𑁨𑁦𑁧.

‘‘𑀅𑀓𑀫𑁆𑀧𑀺𑀬𑀁 𑀅𑀢𑀼𑀮𑀺𑀬𑀁, 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁;

𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄.

𑁨𑁦𑁨.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁦𑁩.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀓𑀸𑀮𑀁 𑀓𑀸𑀮𑀦𑁆𑀢𑀺 𑀢𑀁 𑀢𑀁 𑀓𑀸𑀮𑀁. 𑀪𑀯𑀸 𑀪𑀯𑀦𑁆𑀢𑀺 𑀪𑀯𑀢𑁄 𑀪𑀯𑀁. 𑀲𑀓𑁆𑀓𑀸𑀬𑀲𑁆𑀫𑀺𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑁂. 𑀧𑀼𑀭𑀓𑁆𑀔𑀢𑀸𑀢𑀺 𑀧𑀼𑀭𑀓𑁆𑀔𑀸𑀭𑀓𑀸𑀭𑀺𑀦𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀸𑀭, 𑀢𑀬𑀸 𑀯𑀼𑀢𑁆𑀢𑀸 𑀢𑀸𑀯𑀢𑀺𑀁𑀲𑀸𑀤𑀬𑁄 𑀤𑁂𑀯𑀸 𑀪𑀯𑀢𑁄 𑀪𑀯𑀁 𑀉𑀧𑀕𑀘𑁆𑀙𑀦𑁆𑀢𑀸 𑀅𑀦𑀺𑀘𑁆𑀘𑀢𑀸𑀤𑀺𑀅𑀦𑁂𑀓𑀸𑀤𑀻𑀦𑀯𑀸𑀓𑀼𑀮𑁂 𑀲𑀓𑁆𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀪𑀯𑁂 𑀉𑀧𑁆𑀧𑀢𑁆𑀢𑀺𑀓𑀸𑀮𑁂, 𑀯𑁂𑀫𑀚𑁆𑀛𑀓𑀸𑀮𑁂, 𑀧𑀭𑀺𑀬𑁄𑀲𑀸𑀦𑀓𑀸𑀮𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀓𑁆𑀓𑀸𑀬𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸 𑀞𑀺𑀢𑀸. 𑀢𑀢𑁄 𑀏𑀯 𑀅𑀯𑀻𑀢𑀺𑀯𑀢𑁆𑀢𑀸 𑀲𑀓𑁆𑀓𑀸𑀬𑀁 𑀦𑀺𑀲𑁆𑀲𑀭𑀡𑀸𑀪𑀺𑀫𑀼𑀔𑀸 𑀅𑀳𑀼𑀢𑁆𑀯𑀸 𑀲𑀓𑁆𑀓𑀸𑀬𑀢𑀻𑀭𑀫𑁂𑀯 𑀅𑀦𑀼𑀧𑀭𑀺𑀥𑀸𑀯𑀦𑁆𑀢𑀸 𑀚𑀸𑀢𑀺𑀫𑀭𑀡𑀲𑀸𑀭𑀺𑀦𑁄 𑀭𑀸𑀕𑀸𑀤𑀻𑀳𑀺 𑀅𑀦𑀼𑀕𑀢𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺𑀫𑀭𑀡𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀢𑀢𑁄 𑀦 𑀯𑀺𑀫𑀼𑀘𑁆𑀘𑀦𑁆𑀢𑀻𑀢𑀺.

𑀲𑀩𑁆𑀩𑁄 𑀆𑀤𑀻𑀧𑀺𑀢𑁄 𑀮𑁄𑀓𑁄𑀢𑀺, 𑀫𑀸𑀭, 𑀦 𑀓𑁂𑀯𑀮𑀁 𑀢𑀬𑀸 𑀯𑀼𑀢𑁆𑀢𑀓𑀸𑀫𑀮𑁄𑀓𑁄𑀬𑁂𑀯 𑀥𑀸𑀢𑀼𑀢𑁆𑀢𑀬𑀲𑀜𑁆𑀜𑀺𑀢𑁄, 𑀲𑀩𑁆𑀩𑁄𑀧𑀺 𑀮𑁄𑀓𑁄 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀏𑀓𑀸𑀤𑀲𑀳𑀺 𑀆𑀤𑀺𑀢𑁆𑀢𑁄. 𑀢𑁂𑀳𑀺𑀬𑁂𑀯 𑀧𑀼𑀦𑀧𑁆𑀧𑀼𑀦𑀁 𑀆𑀤𑀻𑀧𑀺𑀢𑀢𑀸𑀬 𑀧𑀤𑀻𑀧𑀺𑀢𑁄. 𑀦𑀺𑀭𑀦𑁆𑀢𑀭𑀁 𑀏𑀓𑀚𑀸𑀮𑀻𑀪𑀽𑀢𑀢𑀸𑀬 𑀧𑀚𑁆𑀚𑀮𑀺𑀢𑁄. 𑀢𑀡𑁆𑀳𑀸𑀬 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀘 𑀇𑀢𑁄 𑀘𑀺𑀢𑁄 𑀘 𑀓𑀫𑁆𑀧𑀺𑀢𑀢𑀸𑀬 𑀘𑀮𑀺𑀢𑀢𑀸𑀬 𑀧𑀓𑀫𑁆𑀧𑀺𑀢𑁄.

𑀏𑀯𑀁 𑀆𑀤𑀺𑀢𑁆𑀢𑁂 𑀧𑀚𑁆𑀚𑀮𑀺𑀢𑁂 𑀧𑀓𑀫𑁆𑀧𑀺𑀢𑁂 𑀘 𑀮𑁄𑀓𑁂 𑀓𑁂𑀦𑀘𑀺𑀧𑀺 𑀓𑀫𑁆𑀧𑁂𑀢𑀼𑀁 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀓𑀫𑁆𑀧𑀺𑀬𑀁, 𑀕𑀼𑀡𑀢𑁄 ‘‘𑀏𑀢𑁆𑀢𑀓𑁄’’𑀢𑀺 𑀢𑀼𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀅𑀪𑀸𑀯𑀢𑁄 𑀘 𑀅𑀢𑀼𑀮𑀺𑀬𑀁. 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀏𑀯 𑀕𑁄𑀘𑀭𑀪𑀸𑀯𑀦𑀸𑀪𑀺𑀕𑀫𑀢𑁄 𑀲𑁂𑀯𑀺𑀢𑀢𑁆𑀢𑀸 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁. 𑀩𑀼𑀤𑁆𑀥𑁄 𑀪𑀕𑀯𑀸 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑁆𑀧𑀪𑁂𑀤𑀁 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀅𑀤𑁂𑀲𑁂𑀲𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀓𑀣𑁂𑀲𑀺 𑀧𑀯𑁂𑀤𑁂𑀲𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀭𑀺𑀬𑀥𑀫𑁆𑀫𑁂 𑀫𑀬𑁆𑀳𑀁 𑀫𑀦𑁄 𑀦𑀺𑀭𑀢𑁄 𑀅𑀪𑀺𑀭𑀢𑁄, 𑀦 𑀢𑀢𑁄 𑀯𑀺𑀦𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀻𑀲𑀽𑀧𑀘𑀸𑀮𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀓𑀦𑀺𑀧𑀸𑀢𑁄

𑁧. 𑀯𑀟𑁆𑀠𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀦𑀯𑀓𑀦𑀺𑀧𑀸𑀢𑁂 𑀫𑀸 𑀲𑀼 𑀢𑁂 𑀯𑀟𑁆𑀠 𑀮𑁄𑀓𑀫𑁆𑀳𑀻𑀢𑀺𑀆𑀤𑀺𑀓𑀸 𑀯𑀟𑁆𑀠𑀫𑀸𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀸𑀭𑀼𑀓𑀘𑁆𑀙𑀓𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀧𑀢𑀺𑀓𑀼𑀮𑀁 𑀕𑀢𑀸 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀯𑀟𑁆𑀠𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀯𑀟𑁆𑀠𑀫𑀸𑀢𑀸𑀢𑀺 𑀯𑁄𑀳𑀭𑀻𑀬𑀺𑀢𑁆𑀣. 𑀲𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀼𑀢𑁆𑀢𑀁 𑀜𑀸𑀢𑀻𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀇𑀢𑁄 𑀧𑀭𑀁 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀟𑁆𑀠𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 (𑀣𑁂𑀭𑀕𑀸. 𑀅𑀝𑁆𑀞. 𑁨.𑀯𑀟𑁆𑀠𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀆𑀕𑀢𑀫𑁂𑀯. 𑀯𑀟𑁆𑀠𑀢𑁆𑀣𑁂𑀭𑀜𑁆𑀳𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀲𑀦𑁆𑀢𑀭𑀼𑀢𑁆𑀢𑀭𑀁 𑀏𑀓𑀓𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀅𑀢𑁆𑀢𑀦𑁄 𑀤𑀲𑁆𑀲𑀦𑀢𑁆𑀣𑀸𑀬 𑀉𑀧𑀕𑀢𑀁 𑀅𑀬𑀁 𑀣𑁂𑀭𑀻 ‘‘𑀓𑀲𑁆𑀫𑀸 𑀢𑁆𑀯𑀁 𑀏𑀓𑀓𑁄 𑀲𑀦𑁆𑀢𑀭𑀼𑀢𑁆𑀢𑀭𑁄𑀯 𑀇𑀥𑀸𑀕𑀢𑁄’’𑀢𑀺 𑀘𑁄𑀤𑁂𑀢𑁆𑀯𑀸 𑀑𑀯𑀤𑀦𑁆𑀢𑀻 𑁋

𑁨𑁦𑁪.

‘‘𑀫𑀸 𑀲𑀼 𑀢𑁂 𑀯𑀟𑁆𑀠 𑀮𑁄𑀓𑀫𑁆𑀳𑀺, 𑀯𑀦𑀣𑁄 𑀅𑀳𑀼 𑀓𑀼𑀤𑀸𑀘𑀦𑀁;

𑀫𑀸 𑀧𑀼𑀢𑁆𑀢𑀓 𑀧𑀼𑀦𑀧𑁆𑀧𑀼𑀦𑀁, 𑀅𑀳𑀼 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀫𑀸.

𑁨𑁦𑁫.

‘‘𑀲𑀼𑀔𑀜𑁆𑀳𑀺 𑀯𑀟𑁆𑀠 𑀫𑀼𑀦𑀬𑁄, 𑀅𑀦𑁂𑀚𑀸 𑀙𑀺𑀦𑁆𑀦𑀲𑀁𑀲𑀬𑀸;

𑀲𑀻𑀢𑀺𑀪𑀽𑀢𑀸 𑀤𑀫𑀧𑁆𑀧𑀢𑁆𑀢𑀸, 𑀯𑀺𑀳𑀭𑀦𑁆𑀢𑀺 𑀅𑀦𑀸𑀲𑀯𑀸.

𑁨𑁦𑁬.

‘‘𑀢𑁂𑀳𑀸𑀦𑀼𑀘𑀺𑀡𑁆𑀡𑀁 𑀇𑀲𑀻𑀳𑀺, 𑀫𑀕𑁆𑀕𑀁 𑀤𑀲𑁆𑀲𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀢𑁆𑀯𑀁 𑀯𑀟𑁆𑀠 𑀅𑀦𑀼𑀩𑁆𑀭𑀽𑀳𑀬𑀸’’𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀫𑀸 𑀲𑀼 𑀢𑁂 𑀯𑀟𑁆𑀠 𑀮𑁄𑀓𑀫𑁆𑀳𑀺, 𑀯𑀦𑀣𑁄 𑀅𑀳𑀼 𑀓𑀼𑀤𑀸𑀘𑀦𑀦𑁆𑀢𑀺 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑀟𑁆𑀠, 𑀧𑀼𑀢𑁆𑀢𑀓, 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀲𑀢𑁆𑀢𑀮𑁄𑀓𑁂, 𑀲𑀗𑁆𑀔𑀸𑀭𑀮𑁄𑀓𑁂 𑀘 𑀓𑀺𑀮𑁂𑀲𑀯𑀦𑀣𑁄 𑀢𑀼𑀬𑁆𑀳𑀁 𑀓𑀤𑀸𑀘𑀺𑀧𑀺 𑀫𑀸 𑀅𑀳𑀼 𑀫𑀸 𑀅𑀳𑁄𑀲𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 𑁋 ‘‘𑀫𑀸, 𑀧𑀼𑀢𑁆𑀢𑀓, 𑀧𑀼𑀦𑀧𑁆𑀧𑀼𑀦𑀁, 𑀅𑀳𑀼 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀫𑀸’’𑀢𑀺 𑀯𑀦𑀣𑀁 𑀅𑀦𑀼𑀘𑁆𑀙𑀺𑀦𑁆𑀤𑀦𑁆𑀢𑁄 𑀢𑀁 𑀦𑀺𑀫𑀺𑀢𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀅𑀧𑀭𑀸𑀧𑀭𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀲𑁆𑀲 𑀪𑀸𑀕𑀻 𑀫𑀸 𑀅𑀳𑁄𑀲𑀺.

𑀏𑀯𑀁 𑀯𑀦𑀣𑀲𑁆𑀲 𑀅𑀲𑀫𑀼𑀘𑁆𑀙𑁂𑀤𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀼𑀘𑁆𑀙𑁂𑀤𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑀻 ‘‘𑀲𑀼𑀔𑀜𑁆𑀳𑀺 𑀯𑀟𑁆𑀠𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀢𑁆𑀢𑀓, 𑀯𑀟𑁆𑀠 𑀫𑁄𑀦𑁂𑀬𑁆𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁂𑀦 𑀫𑀼𑀦𑀬𑁄, 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑀸, 𑀤𑀲𑁆𑀲𑀦𑀫𑀕𑁆𑀕𑁂𑀦𑁂𑀯 𑀧𑀳𑀻𑀦𑀯𑀺𑀘𑀺𑀓𑀺𑀘𑁆𑀙𑀢𑀸𑀬 𑀙𑀺𑀦𑁆𑀦𑀲𑀁𑀲𑀬𑀸, 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀲𑀻𑀢𑀺𑀪𑀽𑀢𑀸, 𑀉𑀢𑁆𑀢𑀫𑀲𑁆𑀲 𑀤𑀫𑀣𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀤𑀫𑀧𑁆𑀧𑀢𑁆𑀢𑀸 𑀅𑀦𑀸𑀲𑀯𑀸 𑀔𑀻𑀡𑀸𑀲𑀯𑀸 𑀲𑀼𑀔𑀁 𑀯𑀺𑀳𑀭𑀦𑁆𑀢𑀺, 𑀦 𑀢𑁂𑀲𑀁 𑀏𑀢𑀭𑀳𑀺 𑀘𑁂𑀢𑁄𑀤𑀼𑀓𑁆𑀔𑀁 𑀅𑀢𑁆𑀣𑀺, 𑀆𑀬𑀢𑀺𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀦 𑀪𑀯𑀺𑀲𑁆𑀲𑀢𑁂𑀯.

𑀬𑀲𑁆𑀫𑀸 𑀘𑁂𑀢𑁂𑀯𑀁, 𑀢𑀲𑁆𑀫𑀸 𑀢𑁂𑀳𑀸𑀦𑀼𑀘𑀺𑀡𑁆𑀡𑀁 𑀇𑀲𑀻𑀳𑀺…𑀧𑁂… 𑀅𑀦𑀼𑀩𑁆𑀭𑀽𑀳𑀬𑀸𑀢𑀺 𑀢𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀇𑀲𑀻𑀳𑀺 𑀅𑀦𑀼𑀘𑀺𑀡𑁆𑀡𑀁 𑀧𑀝𑀺𑀧𑀦𑁆𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀅𑀥𑀺𑀕𑀫𑀸𑀬 𑀲𑀓𑀮𑀲𑁆𑀲𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬 𑀯𑀟𑁆𑀠, 𑀢𑁆𑀯𑀁 𑀅𑀦𑀼𑀩𑁆𑀭𑀽𑀳𑀬 𑀯𑀟𑁆𑀠𑁂𑀬𑁆𑀬𑀸𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀯𑀟𑁆𑀠𑀢𑁆𑀣𑁂𑀭𑁄 ‘‘𑀅𑀤𑁆𑀥𑀸 𑀫𑀫 𑀫𑀸𑀢𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀧𑀯𑁂𑀤𑁂𑀦𑁆𑀢𑁄 𑁋

𑁨𑁦𑁭.

‘‘𑀯𑀺𑀲𑀸𑀭𑀤𑀸𑀯 𑀪𑀡𑀲𑀺, 𑀏𑀢𑀫𑀢𑁆𑀣𑀁 𑀚𑀦𑁂𑀢𑁆𑀢𑀺 𑀫𑁂;

𑀫𑀜𑁆𑀜𑀸𑀫𑀺 𑀦𑀽𑀦 𑀫𑀸𑀫𑀺𑀓𑁂, 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀯𑀺𑀲𑀸𑀭𑀤𑀸𑀯 𑀪𑀡𑀲𑀺, 𑀏𑀢𑀫𑀢𑁆𑀣𑀁 𑀚𑀦𑁂𑀢𑁆𑀢𑀺 𑀫𑁂𑀢𑀺 ‘‘𑀫𑀸 𑀲𑀼 𑀢𑁂 𑀯𑀟𑁆𑀠 𑀮𑁄𑀓𑀫𑁆𑀳𑀺, 𑀯𑀦𑀣𑁄 𑀅𑀳𑀼 𑀓𑀼𑀤𑀸𑀘𑀦’’𑀦𑁆𑀢𑀺 𑀏𑀢𑀫𑀢𑁆𑀣𑀁 𑀏𑀢𑀁 𑀑𑀯𑀸𑀤𑀁, 𑀅𑀫𑁆𑀫, 𑀯𑀺𑀕𑀢𑀲𑀸𑀭𑀚𑁆𑀚𑀸 𑀓𑀢𑁆𑀣𑀘𑀺 𑀅𑀮𑀕𑁆𑀕𑀸 𑀅𑀦𑀮𑁆𑀮𑀻𑀦𑀸𑀯 𑀳𑀼𑀢𑁆𑀯𑀸 𑀫𑀬𑁆𑀳𑀁 𑀯𑀤𑀲𑀺. 𑀢𑀲𑁆𑀫𑀸 𑀫𑀜𑁆𑀜𑀸𑀫𑀺 𑀦𑀽𑀦 𑀫𑀸𑀫𑀺𑀓𑁂, 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀻𑀢𑀺, 𑀦𑀽𑀦 𑀫𑀸𑀫𑀺𑀓𑁂 𑀫𑀬𑁆𑀳𑀁, 𑀅𑀫𑁆𑀫, 𑀕𑁂𑀳𑀲𑀺𑀢𑀧𑁂𑀫𑀫𑀢𑁆𑀢𑁄𑀧𑀺 𑀯𑀦𑀣𑁄 𑀢𑀼𑀬𑁆𑀳𑀁 𑀫𑀬𑀺 𑀦 𑀯𑀺𑀚𑁆𑀚𑀢𑀻𑀢𑀺 𑀫𑀜𑁆𑀜𑀸𑀫𑀺, 𑀦 𑀫𑀸𑀫𑀺𑀓𑀸𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀣𑁂𑀭𑀻 ‘‘𑀅𑀡𑀼𑀫𑀢𑁆𑀢𑁄𑀧𑀺 𑀓𑀺𑀮𑁂𑀲𑁄 𑀓𑀢𑁆𑀣𑀘𑀺𑀧𑀺 𑀯𑀺𑀲𑀬𑁂 𑀫𑀫 𑀦 𑀯𑀺𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀢𑀁 𑀧𑀓𑀸𑀲𑁂𑀦𑁆𑀢𑀻 𑁋

𑁨𑁦𑁮.

‘‘𑀬𑁂 𑀓𑁂𑀘𑀺 𑀯𑀟𑁆𑀠 𑀲𑀗𑁆𑀔𑀸𑀭𑀸, 𑀳𑀻𑀦𑀸 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸;

𑀅𑀡𑀽𑀧𑀺 𑀅𑀡𑀼𑀫𑀢𑁆𑀢𑁄𑀧𑀺, 𑀯𑀦𑀣𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁨𑁦𑁯.

‘‘𑀲𑀩𑁆𑀩𑁂 𑀫𑁂 𑀆𑀲𑀯𑀸 𑀔𑀻𑀡𑀸, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀛𑀸𑀬𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀢𑁆𑀣 𑀬𑁂 𑀓𑁂𑀘𑀻𑀢𑀺 𑀅𑀦𑀺𑀬𑀫𑀯𑀘𑀦𑀁. 𑀲𑀗𑁆𑀔𑀸𑀭𑀸𑀢𑀺 𑀲𑀗𑁆𑀔𑀢𑀥𑀫𑁆𑀫𑀸. 𑀳𑀻𑀦𑀸𑀢𑀺 𑀮𑀸𑀫𑀓𑀸 𑀧𑀢𑀺𑀓𑀼𑀝𑁆𑀞𑀸. 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸𑀢𑀺 𑀧𑀡𑀻𑀢𑀸 𑀘𑁂𑀯 𑀫𑀚𑁆𑀛𑀺𑀫𑀸 𑀘. 𑀢𑁂𑀲𑀼 𑀯𑀸 𑀅𑀲𑀗𑁆𑀔𑀢𑀸 𑀳𑀻𑀦𑀸 𑀚𑀸𑀢𑀺𑀲𑀗𑁆𑀔𑀢𑀸 𑀉𑀓𑁆𑀓𑀝𑁆𑀞𑀸, 𑀉𑀪𑀬𑀯𑀺𑀫𑀺𑀲𑁆𑀲𑀺𑀢𑀸 𑀫𑀚𑁆𑀛𑀺𑀫𑀸. 𑀳𑀻𑀦𑁂𑀳𑀺 𑀯𑀸 𑀙𑀦𑁆𑀤𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀸 𑀳𑀻𑀦𑀸, 𑀫𑀚𑁆𑀛𑀺𑀫𑁂𑀳𑀺 𑀫𑀚𑁆𑀛𑀺𑀫𑀸, 𑀧𑀡𑀻𑀢𑁂𑀳𑀺 𑀉𑀓𑁆𑀓𑀝𑁆𑀞𑀸. 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀸 𑀳𑀻𑀦𑀸, 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀉𑀓𑁆𑀓𑀝𑁆𑀞𑀸, 𑀇𑀢𑀭𑀸 𑀫𑀚𑁆𑀛𑀺𑀫𑀸. 𑀅𑀡𑀽𑀧𑀺 𑀅𑀡𑀼𑀫𑀢𑁆𑀢𑁄𑀧𑀻𑀢𑀺 𑀦 𑀓𑁂𑀯𑀮𑀁 𑀢𑀬𑀺 𑀏𑀯, 𑀅𑀣 𑀔𑁄 𑀬𑁂 𑀓𑁂𑀘𑀺 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀲𑀗𑁆𑀔𑀸𑀭𑀸. 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀅𑀡𑀽𑀧𑀺 𑀅𑀡𑀼𑀫𑀢𑁆𑀢𑁄𑀧𑀺 𑀅𑀢𑀺𑀧𑀭𑀺𑀢𑁆𑀢𑀓𑁄𑀧𑀺 𑀯𑀦𑀣𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺.

𑀢𑀢𑁆𑀣 𑀓𑀸𑀭𑀡𑀫𑀸𑀳 𑁋 ‘‘𑀲𑀩𑁆𑀩𑁂 𑀫𑁂 𑀆𑀲𑀯𑀸 𑀔𑀻𑀡𑀸, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀛𑀸𑀬𑀢𑁄’’𑀢𑀺. 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀲𑁆𑀲 𑀛𑀸𑀬𑀢𑁄𑀢𑀺 𑀅𑀧𑁆𑀧𑀫𑀢𑁆𑀢𑀸𑀬 𑀛𑀸𑀬𑀦𑁆𑀢𑀺𑀬𑀸, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑀲𑁆𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀢𑀲𑁆𑀫𑀸 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁. 𑀬𑀲𑁆𑀫𑀸 𑀅𑀧𑁆𑀧𑀫𑀢𑁆𑀢𑀸 𑀛𑀸𑀬𑀺𑀦𑀻, 𑀢𑀲𑁆𑀫𑀸 𑀲𑀩𑁆𑀩𑁂 𑀫𑁂 𑀆𑀲𑀯𑀸 𑀔𑀻𑀡𑀸, 𑀅𑀡𑀽𑀧𑀺 𑀅𑀡𑀼𑀫𑀢𑁆𑀢𑁄𑀧𑀺 𑀯𑀦𑀣𑁄 𑀫𑁂 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀁 𑀯𑀼𑀢𑁆𑀢𑀑𑀯𑀸𑀤𑀁 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀣𑁂𑀭𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁨𑁧𑁦.

‘‘𑀉𑀴𑀸𑀭𑀁 𑀯𑀢 𑀫𑁂 𑀫𑀸𑀢𑀸, 𑀧𑀢𑁄𑀤𑀁 𑀲𑀫𑀯𑀲𑁆𑀲𑀭𑀺;

𑀧𑀭𑀫𑀢𑁆𑀣𑀲𑀜𑁆𑀳𑀺𑀢𑀸 𑀕𑀸𑀣𑀸, 𑀬𑀣𑀸𑀧𑀺 𑀅𑀦𑀼𑀓𑀫𑁆𑀧𑀺𑀓𑀸.

𑁨𑁧𑁧.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀦𑀼𑀲𑀺𑀝𑁆𑀞𑀺𑀁 𑀚𑀦𑁂𑀢𑁆𑀢𑀺𑀬𑀸;

𑀥𑀫𑁆𑀫𑀲𑀁𑀯𑁂𑀕𑀫𑀸𑀧𑀸𑀤𑀺𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸.

𑁨𑁧𑁨.

‘‘𑀲𑁄𑀳𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄;

𑀫𑀸𑀢𑀭𑀸 𑀘𑁄𑀤𑀺𑀢𑁄 𑀲𑀦𑁆𑀢𑁂, 𑀅𑀨𑀼𑀲𑀺𑀁 𑀲𑀦𑁆𑀢𑀺𑀫𑀼𑀢𑁆𑀢𑀫’’𑀦𑁆𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀅𑀣 𑀣𑁂𑀭𑀻 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑀘𑀺𑀢𑁆𑀢𑀸 𑀢𑁂𑀦 𑀪𑀸𑀲𑀺𑀢𑀕𑀸𑀣𑀸 𑀲𑀬𑀁 𑀧𑀘𑁆𑀘𑀦𑀼𑀪𑀸𑀲𑀺. 𑀏𑀯𑀁 𑀢𑀸𑀧𑀺 𑀣𑁂𑀭𑀺𑀬𑀸 𑀕𑀸𑀣𑀸 𑀦𑀸𑀫 𑀚𑀸𑀢𑀸.

𑀢𑀢𑁆𑀣 𑀉𑀴𑀸𑀭𑀦𑁆𑀢𑀺 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁. 𑀧𑀢𑁄𑀤𑀦𑁆𑀢𑀺 𑀑𑀯𑀸𑀤𑀧𑀢𑁄𑀤𑀁. 𑀲𑀫𑀯𑀲𑁆𑀲𑀭𑀻𑀢𑀺 𑀲𑀫𑁆𑀫𑀸 𑀧𑀯𑀢𑁆𑀢𑁂𑀲𑀺 𑀯𑀢𑀸𑀢𑀺 𑀬𑁄𑀚𑀦𑀸. 𑀓𑁄 𑀧𑀦 𑀲𑁄 𑀧𑀢𑁄𑀤𑁄𑀢𑀺 𑀆𑀳 ‘‘𑀧𑀭𑀫𑀢𑁆𑀣𑀲𑀜𑁆𑀳𑀺𑀢𑀸 𑀕𑀸𑀣𑀸’’𑀢𑀺. 𑀢𑀁 ‘‘𑀫𑀸 𑀲𑀼 𑀢𑁂, 𑀯𑀟𑁆𑀠, 𑀮𑁄𑀓𑀫𑁆𑀳𑀻’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀣𑀸𑀧𑀺 𑀅𑀦𑀼𑀓𑀫𑁆𑀧𑀺𑀓𑀸𑀢𑀺 𑀬𑀣𑀸 𑀅𑀜𑁆𑀜𑀸𑀧𑀺 𑀅𑀦𑀼𑀕𑁆𑀕𑀸𑀳𑀺𑀓𑀸, 𑀏𑀯𑀁 𑀫𑀬𑁆𑀳𑀁 𑀫𑀸𑀢𑀸 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀯𑀺𑀪𑀸𑀯𑀦𑀕𑀸𑀣𑀸𑀲𑀗𑁆𑀔𑀸𑀢𑀁 𑀉𑀴𑀸𑀭𑀁 𑀧𑀢𑁄𑀤𑀁 𑀧𑀸𑀚𑀦𑀤𑀡𑁆𑀟𑀓𑀁 𑀫𑀫 𑀜𑀸𑀡𑀯𑁂𑀕𑀲𑀫𑀼𑀢𑁆𑀢𑁂𑀚𑀁 𑀧𑀯𑀢𑁆𑀢𑁂𑀲𑀻𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀲𑀁𑀯𑁂𑀕𑀫𑀸𑀧𑀸𑀤𑀺𑀦𑁆𑀢𑀺 𑀜𑀸𑀡𑀪𑀬𑀸𑀯𑀳𑀢𑁆𑀢𑀸 𑀅𑀢𑀺𑀯𑀺𑀬 𑀫𑀳𑀦𑁆𑀢𑀁 𑀪𑀺𑀁𑀲𑀦𑀁 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀁.

𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀬𑁄𑀕𑁂𑀦 𑀤𑀺𑀩𑁆𑀩𑀸𑀦𑀁 𑀧𑀝𑀺𑀧𑁂𑀲𑀺𑀢𑀘𑀺𑀢𑁆𑀢𑁄. 𑀅𑀨𑀼𑀲𑀺𑀁 𑀲𑀦𑁆𑀢𑀺𑀫𑀼𑀢𑁆𑀢𑀫𑀦𑁆𑀢𑀺 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀨𑀼𑀲𑀺𑀁 𑀅𑀥𑀺𑀕𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

𑀯𑀟𑁆𑀠𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀏𑀓𑀸𑀤𑀲𑀓𑀦𑀺𑀧𑀸𑀢𑁄

𑁧. 𑀓𑀺𑀲𑀸𑀕𑁄𑀢𑀫𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀏𑀓𑀸𑀤𑀲𑀓𑀦𑀺𑀧𑀸𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺𑀆𑀤𑀺𑀓𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀮𑀽𑀔𑀘𑀻𑀯𑀭𑀥𑀸𑀭𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀕𑁄𑀢𑀫𑀻𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀓𑀺𑀲𑀲𑀭𑀻𑀭𑀢𑀸𑀬 𑀧𑀦 ‘‘𑀓𑀺𑀲𑀸𑀕𑁄𑀢𑀫𑀻’’𑀢𑀺 𑀯𑁄𑀳𑀭𑀻𑀬𑀺𑀢𑁆𑀣. 𑀢𑀁 𑀧𑀢𑀺𑀓𑀼𑀮𑀁 𑀕𑀢𑀁 𑀤𑀼𑀕𑁆𑀕𑀢𑀓𑀼𑀮𑀲𑁆𑀲 𑀥𑀻𑀢𑀸𑀢𑀺 𑀧𑀭𑀺𑀪𑀯𑀺𑀁𑀲𑀼. 𑀲𑀸 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀧𑀼𑀢𑁆𑀢𑀮𑀸𑀪𑁂𑀦 𑀘𑀲𑁆𑀲𑀸 𑀲𑀫𑁆𑀫𑀸𑀦𑀁 𑀅𑀓𑀁𑀲𑀼. 𑀲𑁄 𑀧𑀦𑀲𑁆𑀲𑀸 𑀧𑀼𑀢𑁆𑀢𑁄 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀓𑀻𑀴𑀦𑀓𑀸𑀮𑁂 𑀓𑀸𑀮𑀫𑀓𑀸𑀲𑀺. 𑀢𑁂𑀦𑀲𑁆𑀲𑀸 𑀲𑁄𑀓𑀼𑀫𑁆𑀫𑀸𑀤𑁄 𑀉𑀧𑁆𑀧𑀚𑁆𑀚𑀺.

𑀲𑀸 ‘‘𑀅𑀳𑀁 𑀧𑀼𑀩𑁆𑀩𑁂 𑀧𑀭𑀺𑀪𑀯𑀧𑀢𑁆𑀢𑀸 𑀳𑀼𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀺𑀁, 𑀇𑀫𑁂 𑀫𑀬𑁆𑀳𑀁 𑀧𑀼𑀢𑁆𑀢𑀁 𑀩𑀳𑀺 𑀙𑀟𑁆𑀟𑁂𑀢𑀼𑀫𑁆𑀧𑀺 𑀯𑀸𑀬𑀫𑀦𑁆𑀢𑀻’’𑀢𑀺 𑀲𑁄𑀓𑀼𑀫𑁆𑀫𑀸𑀤𑀯𑀲𑁂𑀦 𑀫𑀢𑀓𑀴𑁂𑀯𑀭𑀁 𑀅𑀗𑁆𑀓𑁂𑀦𑀸𑀤𑀸𑀬 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀪𑁂𑀲𑀚𑁆𑀚𑀁 𑀤𑁂𑀣𑀸’’𑀢𑀺 𑀕𑁂𑀳𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀦𑀕𑀭𑁂 𑀯𑀺𑀘𑀭𑀢𑀺. 𑀫𑀦𑀼𑀲𑁆𑀲𑀸 ‘‘𑀪𑁂𑀲𑀚𑁆𑀚𑀁 𑀓𑀼𑀢𑁄’’𑀢𑀺 𑀧𑀭𑀺𑀪𑀸𑀲𑀦𑁆𑀢𑀺. 𑀲𑀸 𑀢𑁂𑀲𑀁 𑀓𑀣𑀁 𑀦 𑀕𑀡𑁆𑀳𑀸𑀢𑀺. 𑀅𑀣 𑀦𑀁 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 ‘‘𑀅𑀬𑀁 𑀧𑀼𑀢𑁆𑀢𑀲𑁄𑀓𑁂𑀦 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀧𑀢𑁆𑀢𑀸, 𑀏𑀢𑀺𑀲𑁆𑀲𑀸 𑀪𑁂𑀲𑀚𑁆𑀚𑀁 𑀤𑀲𑀩𑀮𑁄𑀬𑁂𑀯 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀫𑁆𑀫, 𑀢𑀯 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺 𑀆𑀳. 𑀲𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀪𑁂𑀲𑀚𑁆𑀚𑀁 𑀤𑁂𑀣 𑀪𑀕𑀯𑀸’’𑀢𑀺 𑀆𑀳. 𑀲𑀢𑁆𑀣𑀸 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀕𑀘𑁆𑀙 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀲𑁆𑀫𑀺𑀁 𑀕𑁂𑀳𑁂 𑀓𑁄𑀘𑀺 𑀫𑀢𑀧𑀼𑀩𑁆𑀩𑁄 𑀦𑀢𑁆𑀣𑀺, 𑀢𑀢𑁄 𑀲𑀺𑀤𑁆𑀥𑀢𑁆𑀣𑀓𑀁 𑀆𑀳𑀭𑀸’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀞𑀫𑀕𑁂𑀳𑁂𑀬𑁂𑀯 ‘‘𑀲𑀢𑁆𑀣𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀺𑀤𑁆𑀥𑀢𑁆𑀣𑀓𑀁 𑀆𑀳𑀭𑀸𑀧𑁂𑀢𑀺. 𑀲𑀘𑁂 𑀏𑀢𑀲𑁆𑀫𑀺𑀁 𑀕𑁂𑀳𑁂 𑀓𑁄𑀘𑀺 𑀫𑀢𑀧𑀼𑀩𑁆𑀩𑁄 𑀦𑀢𑁆𑀣𑀺, 𑀲𑀺𑀤𑁆𑀥𑀢𑁆𑀣𑀓𑀁 𑀫𑁂 𑀤𑁂𑀣𑀸’’𑀢𑀺 𑀆𑀳. 𑀓𑁄 𑀇𑀥 𑀫𑀢𑁂 𑀕𑀡𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺. 𑀓𑀺𑀁 𑀢𑁂𑀦 𑀳𑀺 𑀅𑀮𑀁 𑀲𑀺𑀤𑁆𑀥𑀢𑁆𑀣𑀓𑁂𑀳𑀻𑀢𑀺 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀯𑀺𑀕𑀢𑀼𑀫𑁆𑀫𑀸𑀤𑀸 𑀧𑀓𑀢𑀺𑀘𑀺𑀢𑁆𑀢𑁂 𑀞𑀺𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑀮𑀦𑀕𑀭𑁂 𑀅𑀬𑀫𑁂𑀯 𑀦𑀺𑀬𑀫𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸 𑀪𑀕𑀯𑀢𑀸 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀢𑀢𑁄𑀯 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀢𑁆𑀢𑀁 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 𑀕𑀸𑀫𑀥𑀫𑁆𑀫𑁄 𑀦𑀺𑀕𑀫𑀲𑁆𑀲 𑀥𑀫𑁆𑀫𑁄, 𑀦 𑀘𑀸𑀧𑀺𑀬𑀁 𑀏𑀓𑀓𑀼𑀮𑀲𑁆𑀲 𑀥𑀫𑁆𑀫𑁄;

𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲, 𑀏𑀲𑁂𑀯 𑀥𑀫𑁆𑀫𑁄 𑀬𑀤𑀺𑀤𑀁 𑀅𑀦𑀺𑀘𑁆𑀘𑀢𑀸’’𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁮𑁨);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀮𑀤𑁆𑀥𑁄 𑀢𑁂, 𑀕𑁄𑀢𑀫𑀺, 𑀲𑀺𑀤𑁆𑀥𑀢𑁆𑀣𑀓𑁄’’𑀢𑀺 𑀆𑀳. ‘‘𑀦𑀺𑀝𑁆𑀞𑀺𑀢𑀁, 𑀪𑀦𑁆𑀢𑁂, 𑀲𑀺𑀤𑁆𑀥𑀢𑁆𑀣𑀓𑁂𑀦 𑀓𑀫𑁆𑀫𑀁, 𑀧𑀢𑀺𑀝𑁆𑀞𑀸 𑀧𑀦 𑀫𑁂 𑀳𑁄𑀣𑀸’’𑀢𑀺 𑀆𑀳. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑁋

‘‘𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺. (𑀥. 𑀧. 𑁨𑁮𑁭) 𑁋

𑀕𑀸𑀣𑀫𑀸𑀳.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀞𑀺𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺. 𑀲𑀸 𑀲𑀢𑁆𑀣𑀸𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀅𑀫𑀢𑀁 𑀧𑀤𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀅𑀫𑀢𑀁 𑀧𑀤’’𑀦𑁆𑀢𑀺. (𑀥. 𑀧. 𑁧𑁧𑁪) 𑁋

𑀇𑀫𑀁 𑀑𑀪𑀸𑀲𑀕𑀸𑀣𑀫𑀸𑀳.

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀯𑀮𑀜𑁆𑀚𑁂 𑀧𑀭𑀫𑀼𑀓𑁆𑀓𑀝𑁆𑀞𑀸 𑀳𑀼𑀢𑁆𑀯𑀸 𑀢𑀻𑀳𑀺 𑀮𑀽𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀘𑀭𑀺. 𑀅𑀣 𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀮𑀽𑀔𑀘𑀻𑀯𑀭𑀥𑀸𑀭𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀅𑀬𑀁 𑀯𑀺𑀲𑁂𑀲𑁄 𑀮𑀤𑁆𑀥𑁄’’𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬 𑀧𑀲𑀁𑀲𑀸𑀫𑀼𑀔𑁂𑀦 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁧𑁩.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀫𑀼𑀦𑀺𑀦𑀸, 𑀮𑁄𑀓𑀁 𑀆𑀤𑀺𑀲𑁆𑀲 𑀯𑀡𑁆𑀡𑀺𑀢𑀸;

𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄, 𑀅𑀧𑀺 𑀩𑀸𑀮𑁄 𑀧𑀡𑁆𑀟𑀺𑀢𑁄 𑀅𑀲𑁆𑀲.

𑁨𑁧𑁪.

‘‘𑀪𑀚𑀺𑀢𑀩𑁆𑀩𑀸 𑀲𑀧𑁆𑀧𑀼𑀭𑀺𑀲𑀸, 𑀧𑀜𑁆𑀜𑀸 𑀢𑀣𑀸 𑀯𑀟𑁆𑀠𑀢𑀺 𑀪𑀚𑀦𑁆𑀢𑀸𑀦𑀁;

𑀪𑀚𑀫𑀸𑀦𑁄 𑀲𑀧𑁆𑀧𑀼𑀭𑀺𑀲𑁂, 𑀲𑀩𑁆𑀩𑁂𑀳𑀺𑀧𑀺 𑀤𑀼𑀓𑁆𑀔𑁂𑀳𑀺 𑀧𑀫𑀼𑀘𑁆𑀘𑁂𑀬𑁆𑀬.

𑁨𑁧𑁫.

‘‘𑀤𑀼𑀓𑁆𑀔𑀜𑁆𑀘 𑀯𑀺𑀚𑀸𑀦𑁂𑀬𑁆𑀬, 𑀤𑀼𑀓𑁆𑀔𑀲𑁆𑀲 𑀘 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁;

𑀅𑀝𑁆𑀞𑀗𑁆𑀕𑀺𑀓𑀜𑁆𑀘 𑀫𑀕𑁆𑀕𑀁, 𑀘𑀢𑁆𑀢𑀸𑀭𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺.

𑁨𑁧𑁬.

‘‘𑀤𑀼𑀓𑁆𑀔𑁄 𑀇𑀢𑁆𑀣𑀺𑀪𑀸𑀯𑁄, 𑀅𑀓𑁆𑀔𑀸𑀢𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀦𑀸;

𑀲𑀧𑀢𑁆𑀢𑀺𑀓𑀫𑁆𑀧𑀺 𑀳𑀺 𑀤𑀼𑀓𑁆𑀔𑀁, 𑀅𑀧𑁆𑀧𑁂𑀓𑀘𑁆𑀘𑀸 𑀲𑀓𑀺𑀁 𑀯𑀺𑀚𑀸𑀢𑀸𑀬𑁄.

𑁨𑁧𑁭.

‘‘𑀕𑀮𑀓𑁂 𑀅𑀧𑀺 𑀓𑀦𑁆𑀢𑀦𑁆𑀢𑀺, 𑀲𑀼𑀔𑀼𑀫𑀸𑀮𑀺𑀦𑀺𑀬𑁄 𑀯𑀺𑀲𑀸𑀦𑀺 𑀔𑀸𑀤𑀦𑁆𑀢𑀺;

𑀚𑀦𑀫𑀸𑀭𑀓𑀫𑀚𑁆𑀛𑀕𑀢𑀸, 𑀉𑀪𑁄𑀧𑀺 𑀩𑁆𑀬𑀲𑀦𑀸𑀦𑀺 𑀅𑀦𑀼𑀪𑁄𑀦𑁆𑀢𑀺.

𑁨𑁧𑁮.

‘‘𑀉𑀧𑀯𑀺𑀚𑀜𑁆𑀜𑀸 𑀕𑀘𑁆𑀙𑀦𑁆𑀢𑀻, 𑀅𑀤𑁆𑀤𑀲𑀸𑀳𑀁 𑀧𑀢𑀺𑀁 𑀫𑀢𑀁;

𑀧𑀦𑁆𑀣𑀫𑁆𑀳𑀺 𑀯𑀺𑀚𑀸𑀬𑀺𑀢𑁆𑀯𑀸𑀦, 𑀅𑀧𑁆𑀧𑀢𑁆𑀢𑀸𑀯 𑀲𑀓𑀁 𑀖𑀭𑀁.

𑁨𑁧𑁯.

‘‘𑀤𑁆𑀯𑁂 𑀧𑀼𑀢𑁆𑀢𑀸 𑀓𑀸𑀮𑀓𑀢𑀸, 𑀧𑀢𑀻 𑀘 𑀧𑀦𑁆𑀣𑁂 𑀫𑀢𑁄 𑀓𑀧𑀡𑀺𑀓𑀸𑀬;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸, 𑀟𑀬𑁆𑀳𑀦𑁆𑀢𑀺 𑀘 𑀏𑀓𑀘𑀺𑀢𑀓𑀸𑀬𑀁.

𑁨𑁨𑁦.

‘‘𑀔𑀻𑀡𑀓𑀼𑀮𑀻𑀦𑁂 𑀓𑀧𑀡𑁂, 𑀅𑀦𑀼𑀪𑀽𑀢𑀁 𑀢𑁂 𑀤𑀼𑀔𑀁 𑀅𑀧𑀭𑀺𑀫𑀸𑀡𑀁;

𑀅𑀲𑁆𑀲𑀽 𑀘 𑀢𑁂 𑀧𑀯𑀢𑁆𑀢𑀁, 𑀩𑀳𑀽𑀦𑀺 𑀘 𑀚𑀸𑀢𑀺𑀲𑀳𑀲𑁆𑀲𑀸𑀦𑀺.

𑁨𑁨𑁧.

‘‘𑀯𑀲𑀺𑀢𑀸 𑀲𑀼𑀲𑀸𑀦𑀫𑀚𑁆𑀛𑁂, 𑀅𑀣𑁄𑀧𑀺 𑀔𑀸𑀤𑀺𑀢𑀸𑀦𑀺 𑀧𑀼𑀢𑁆𑀢𑀫𑀁𑀲𑀸𑀦𑀺;

𑀳𑀢𑀓𑀼𑀮𑀺𑀓𑀸 𑀲𑀩𑁆𑀩𑀕𑀭𑀳𑀺𑀢𑀸, 𑀫𑀢𑀧𑀢𑀺𑀓𑀸 𑀅𑀫𑀢𑀫𑀥𑀺𑀕𑀘𑁆𑀙𑀺𑀁.

𑁨𑁨𑁨.

‘‘𑀪𑀸𑀯𑀺𑀢𑁄 𑀫𑁂 𑀫𑀕𑁆𑀕𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀅𑀫𑀢𑀕𑀸𑀫𑀻;

𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁, 𑀥𑀫𑁆𑀫𑀸𑀤𑀸𑀲𑀁 𑀅𑀯𑁂𑀓𑁆𑀔𑀺𑀁𑀳𑀁.

𑁨𑁨𑁩.

‘‘𑀅𑀳𑀫𑀫𑁆𑀳𑀺 𑀓𑀦𑁆𑀢𑀲𑀮𑁆𑀮𑀸, 𑀑𑀳𑀺𑀢𑀪𑀸𑀭𑀸 𑀓𑀢𑀜𑁆𑀳𑀺 𑀓𑀭𑀡𑀻𑀬𑀁;

𑀓𑀺𑀲𑀸𑀕𑁄𑀢𑀫𑀻 𑀣𑁂𑀭𑀻, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀇𑀫𑀁 𑀪𑀡𑀻’’𑀢𑀺.

𑀢𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀓𑀮𑁆𑀬𑀸𑀡𑁄 𑀪𑀤𑁆𑀤𑁄 𑀲𑀼𑀦𑁆𑀤𑀭𑁄 𑀫𑀺𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀬𑁄 𑀬𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑀲𑀫𑀸𑀤𑀧𑁂𑀢𑀸, 𑀅𑀖𑀲𑁆𑀲 𑀖𑀸𑀢𑀸, 𑀳𑀺𑀢𑀲𑁆𑀲 𑀯𑀺𑀥𑀸𑀢𑀸, 𑀏𑀯𑀁 𑀲𑀩𑁆𑀩𑀸𑀓𑀸𑀭𑁂𑀦 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀳𑁄𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀯𑀦𑁆𑀢𑀢𑀸. 𑀫𑀼𑀦𑀺𑀦𑀸𑀢𑀺 𑀲𑀢𑁆𑀣𑀸𑀭𑀸. 𑀮𑁄𑀓𑀁 𑀆𑀤𑀺𑀲𑁆𑀲 𑀯𑀡𑁆𑀡𑀺𑀢𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀅𑀦𑀼𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀢𑁆𑀢𑀮𑁄𑀓𑀁 𑀉𑀤𑁆𑀤𑀺𑀲𑁆𑀲 𑁋

‘‘𑀲𑀓𑀮𑀫𑁂𑀯𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’ (𑀲𑀁. 𑀦𑀺. 𑁫.𑁨). ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀬𑀁 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 (𑀉𑀤𑀸. 𑁩𑁧) 𑀘 𑀏𑀯𑀫𑀸𑀤𑀺𑀦𑀸 𑀧𑀲𑀁𑀲𑀺𑀢𑀸.

𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄𑀢𑀺𑀆𑀤𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬 𑀆𑀦𑀺𑀲𑀁𑀲𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀧𑀺 𑀩𑀸𑀮𑁄 𑀧𑀡𑁆𑀟𑀺𑀢𑁄 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑁂 𑀲𑀼𑀢𑀸𑀤𑀺𑀯𑀺𑀭𑀳𑁂𑀦 𑀩𑀸𑀮𑁄𑀧𑀺 𑀲𑀫𑀸𑀦𑁄 𑀅𑀲𑁆𑀲𑀼𑀢𑀲𑀯𑀦𑀸𑀤𑀺𑀦𑀸 𑀧𑀡𑁆𑀟𑀺𑀢𑁄 𑀪𑀯𑁂𑀬𑁆𑀬.

𑀪𑀚𑀺𑀢𑀩𑁆𑀩𑀸 𑀲𑀧𑁆𑀧𑀼𑀭𑀺𑀲𑀸𑀢𑀺 𑀩𑀸𑀮𑀲𑁆𑀲𑀸𑀧𑀺 𑀧𑀡𑁆𑀟𑀺𑀢𑀪𑀸𑀯𑀳𑁂𑀢𑀼𑀢𑁄 𑀩𑀼𑀤𑁆𑀥𑀸𑀤𑀬𑁄 𑀲𑀧𑁆𑀧𑀼𑀭𑀺𑀲𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀸𑀤𑀺𑀦𑀸 𑀲𑁂𑀯𑀺𑀢𑀩𑁆𑀩𑀸. 𑀧𑀜𑁆𑀜𑀸 𑀢𑀣𑀸 𑀧𑀯𑀟𑁆𑀠𑀢𑀺 𑀪𑀚𑀦𑁆𑀢𑀸𑀦𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀦𑁆𑀢𑀸𑀦𑀁 𑀢𑀣𑀸 𑀧𑀜𑁆𑀜𑀸 𑀯𑀟𑁆𑀠𑀢𑀺 𑀩𑁆𑀭𑀽𑀳𑀢𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀬𑀣𑀸 𑀢𑁂𑀲𑀼 𑀬𑁄 𑀓𑁄𑀘𑀺 𑀔𑀢𑁆𑀢𑀺𑀬𑀸𑀤𑀺𑀓𑁄 𑀪𑀚𑀫𑀸𑀦𑁄 𑀲𑀧𑁆𑀧𑀼𑀭𑀺𑀲𑁂 𑀲𑀩𑁆𑀩𑁂𑀳𑀺𑀧𑀺 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑁂𑀳𑀺 𑀧𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀫𑀼𑀘𑁆𑀘𑀦𑀯𑀺𑀥𑀺𑀁 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀯𑀺𑀥𑀺𑀦𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀜𑁆𑀘 𑀯𑀺𑀚𑀸𑀦𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀤𑀼𑀓𑁆𑀔𑀜𑁆𑀘 𑀤𑀼𑀓𑁆𑀔𑀲𑀫𑀼𑀤𑀬𑀜𑁆𑀘 𑀦𑀺𑀭𑁄𑀥𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀜𑁆𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

‘‘𑀤𑀼𑀓𑁆𑀔𑁄 𑀇𑀢𑁆𑀣𑀺𑀪𑀸𑀯𑁄’’𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀅𑀜𑁆𑀜𑀢𑀭𑀸𑀬 𑀬𑀓𑁆𑀔𑀺𑀦𑀺𑀬𑀸 𑀇𑀢𑁆𑀣𑀺𑀪𑀸𑀯𑀁 𑀕𑀭𑀳𑀦𑁆𑀢𑀺𑀬𑀸 𑀪𑀸𑀲𑀺𑀢𑀸. 𑀢𑀢𑁆𑀣 𑀤𑀼𑀓𑁆𑀔𑁄 𑀇𑀢𑁆𑀣𑀺𑀪𑀸𑀯𑁄 𑀅𑀓𑁆𑀔𑀸𑀢𑁄𑀢𑀺 𑀘𑀧𑀮𑀢𑀸, 𑀕𑀩𑁆𑀪𑀥𑀸𑀭𑀡𑀁, 𑀲𑀩𑁆𑀩𑀓𑀸𑀮𑀁 𑀧𑀭𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀢𑀺 𑀏𑀯𑀫𑀸𑀤𑀻𑀳𑀺 𑀆𑀤𑀻𑀦𑀯𑁂𑀳𑀺 𑀇𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑁄𑀢𑀺, 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀦𑀸 𑀪𑀕𑀯𑀢𑀸 𑀓𑀣𑀺𑀢𑁄. 𑀲𑀧𑀢𑁆𑀢𑀺𑀓𑀫𑁆𑀧𑀺 𑀤𑀼𑀓𑁆𑀔𑀦𑁆𑀢𑀺 𑀲𑀧𑀢𑁆𑀢𑀯𑀸𑀲𑁄 𑀲𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄𑀧𑀺 𑀤𑀼𑀓𑁆𑀔𑁄, 𑀅𑀬𑀫𑁆𑀧𑀺 𑀇𑀢𑁆𑀣𑀺𑀪𑀸𑀯𑁂 𑀆𑀤𑀻𑀦𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑁂𑀓𑀘𑁆𑀘𑀸 𑀲𑀓𑀺𑀁 𑀯𑀺𑀚𑀸𑀢𑀸𑀬𑁄𑀢𑀺 𑀏𑀓𑀘𑁆𑀘𑀸 𑀇𑀢𑁆𑀣𑀺𑀬𑁄 𑀏𑀓𑀯𑀸𑀭𑀫𑁂𑀯 𑀯𑀺𑀚𑀸𑀢𑀸, 𑀧𑀞𑀫𑀕𑀩𑁆𑀪𑁂 𑀯𑀺𑀚𑀸𑀬𑀦𑀤𑀼𑀓𑁆𑀔𑀁 𑀅𑀲𑀳𑀦𑁆𑀢𑀺𑀬𑁄. 𑀕𑀮𑀓𑁂 𑀅𑀧𑀺 𑀓𑀦𑁆𑀢𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀕𑀻𑀯𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺. 𑀲𑀼𑀔𑀼𑀫𑀸𑀮𑀺𑀦𑀺𑀬𑁄 𑀯𑀺𑀲𑀸𑀦𑀺 𑀔𑀸𑀤𑀦𑁆𑀢𑀻𑀢𑀺 𑀲𑀼𑀔𑀼𑀫𑀸𑀮𑀲𑀭𑀻𑀭𑀸 𑀅𑀢𑁆𑀢𑀦𑁄 𑀲𑀼𑀔𑀼𑀫𑀸𑀮𑀪𑀸𑀯𑁂𑀦 𑀔𑁂𑀤𑀁 𑀅𑀯𑀺𑀲𑀳𑀦𑁆𑀢𑀺𑀬𑁄 𑀯𑀺𑀲𑀸𑀦𑀺𑀧𑀺 𑀔𑀸𑀤𑀦𑁆𑀢𑀺. 𑀚𑀦𑀫𑀸𑀭𑀓𑀫𑀚𑁆𑀛𑀕𑀢𑀸𑀢𑀺 𑀚𑀦𑀫𑀸𑀭𑀓𑁄 𑀯𑀼𑀘𑁆𑀘𑀢𑀺 𑀫𑀽𑀴𑁆𑀳𑀕𑀩𑁆𑀪𑁄. 𑀫𑀸𑀢𑀼𑀕𑀸𑀫𑀚𑀦𑀲𑁆𑀲 𑀫𑀸𑀭𑀓𑁄, 𑀫𑀚𑁆𑀛𑀕𑀢𑀸 𑀚𑀦𑀫𑀸𑀭𑀓𑀸 𑀓𑀼𑀘𑁆𑀙𑀺𑀕𑀢𑀸, 𑀫𑀽𑀴𑁆𑀳𑀕𑀩𑁆𑀪𑀸𑀢𑀺 𑀅𑀢𑁆𑀣𑁄. 𑀉𑀪𑁄𑀧𑀺 𑀩𑁆𑀬𑀲𑀦𑀸𑀦𑀺 𑀅𑀦𑀼𑀪𑁄𑀦𑁆𑀢𑀻𑀢𑀺 𑀕𑀩𑁆𑀪𑁄 𑀕𑀩𑁆𑀪𑀺𑀦𑀻 𑀘𑀸𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀫𑀭𑀡𑀜𑁆𑀘 𑀫𑀸𑀭𑀡𑀦𑁆𑀢𑀺𑀓𑀩𑁆𑀬𑀲𑀦𑀸𑀦𑀺 𑀘 𑀧𑀸𑀧𑀼𑀡𑀦𑁆𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀚𑀦𑀫𑀸𑀭𑀓𑀸 𑀦𑀸𑀫 𑀓𑀺𑀮𑁂𑀲𑀸, 𑀢𑁂𑀲𑀁 𑀫𑀚𑁆𑀛𑀕𑀢𑀸 𑀓𑀺𑀮𑁂𑀲𑀲𑀦𑁆𑀢𑀸𑀦𑀧𑀢𑀺𑀢𑀸 𑀉𑀪𑁄𑀧𑀺 𑀚𑀸𑀬𑀸𑀧𑀢𑀺𑀓𑀸 𑀇𑀥 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀲𑁂𑀦, 𑀆𑀬𑀢𑀺𑀁 𑀤𑀼𑀕𑁆𑀕𑀢𑀺𑀧𑀭𑀺𑀓𑁆𑀓𑀺𑀮𑁂𑀲𑀯𑀲𑁂𑀦 𑀩𑁆𑀬𑀲𑀦𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺. 𑀇𑀫𑀸 𑀓𑀺𑀭 𑀤𑁆𑀯𑁂 𑀕𑀸𑀣𑀸 𑀲𑀸 𑀬𑀓𑁆𑀔𑀺𑀦𑀻 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀅𑀦𑀼𑀪𑀽𑀢𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀆𑀳. 𑀣𑁂𑀭𑀻 𑀧𑀦 𑀇𑀢𑁆𑀣𑀺𑀪𑀸𑀯𑁂 𑀆𑀤𑀻𑀦𑀯𑀯𑀺𑀪𑀸𑀯𑀦𑀸𑀬 𑀧𑀘𑁆𑀘𑀦𑀼𑀪𑀸𑀲𑀦𑁆𑀢𑀻 𑀅𑀯𑁄𑀘.

‘‘𑀉𑀧𑀯𑀺𑀚𑀜𑁆𑀜𑀸 𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀧𑀝𑀸𑀘𑀸𑀭𑀸𑀬 𑀣𑁂𑀭𑀺𑀬𑀸 𑀧𑀯𑀢𑁆𑀢𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸. 𑀢𑀢𑁆𑀣 𑀉𑀧𑀯𑀺𑀚𑀜𑁆𑀜𑀸 𑀕𑀘𑁆𑀙𑀦𑁆𑀢𑀻𑀢𑀺 𑀉𑀧𑀕𑀢𑀯𑀺𑀚𑀸𑀬𑀦𑀓𑀸𑀮𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀻, 𑀅𑀧𑀢𑁆𑀢𑀸𑀯 𑀲𑀓𑀁 𑀕𑁂𑀳𑀁 𑀧𑀦𑁆𑀣𑁂 𑀯𑀺𑀚𑀸𑀬𑀺𑀢𑁆𑀯𑀸𑀦 𑀧𑀢𑀺𑀁 𑀫𑀢𑀁 𑀅𑀤𑁆𑀤𑀲𑀁 𑀅𑀳𑀦𑁆𑀢𑀺 𑀬𑁄𑀚𑀦𑀸.

𑀓𑀧𑀡𑀺𑀓𑀸𑀬𑀸𑀢𑀺 𑀯𑀭𑀸𑀓𑀸𑀬. 𑀇𑀫𑀸 𑀓𑀺𑀭 𑀤𑁆𑀯𑁂 𑀕𑀸𑀣𑀸 𑀧𑀝𑀸𑀘𑀸𑀭𑀸𑀬 𑀢𑀤𑀸 𑀲𑁄𑀓𑀼𑀫𑁆𑀫𑀸𑀤𑀧𑀢𑁆𑀢𑀸𑀬 𑀯𑀼𑀢𑁆𑀢𑀸𑀓𑀸𑀭𑀲𑁆𑀲 𑀅𑀦𑀼𑀓𑀭𑀡𑀯𑀲𑁂𑀦 𑀇𑀢𑁆𑀣𑀺𑀪𑀸𑀯𑁂 𑀆𑀤𑀻𑀦𑀯𑀯𑀺𑀪𑀸𑀯𑀦𑀢𑁆𑀣𑀫𑁂𑀯 𑀣𑁂𑀭𑀺𑀬𑀸 𑀯𑀼𑀢𑁆𑀢𑀸.

𑀉𑀪𑀬𑀫𑁆𑀧𑁂𑀢𑀁 𑀉𑀤𑀸𑀳𑀭𑀡𑀪𑀸𑀯𑁂𑀦 𑀆𑀦𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀅𑀦𑀼𑀪𑀽𑀢𑀁 𑀤𑀼𑀓𑁆𑀔𑀁 𑀯𑀺𑀪𑀸𑀯𑁂𑀦𑁆𑀢𑀻 ‘‘𑀔𑀻𑀡𑀓𑀼𑀮𑀺𑀦𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀻𑀡𑀓𑀼𑀮𑀺𑀦𑁂𑀢𑀺 𑀪𑁄𑀕𑀸𑀤𑀻𑀳𑀺 𑀧𑀸𑀭𑀺𑀚𑀼𑀜𑁆𑀜𑀧𑀢𑁆𑀢𑀓𑀼𑀮𑀺𑀓𑁂. 𑀓𑀧𑀡𑁂𑀢𑀺 𑀧𑀭𑀫𑀅𑀯𑀜𑁆𑀜𑀸𑀢𑀁 𑀧𑀢𑁆𑀢𑁂. 𑀉𑀪𑀬𑀜𑁆𑀘𑁂𑀢𑀁 𑀅𑀢𑁆𑀢𑀦𑁄 𑀏𑀯 𑀆𑀫𑀦𑁆𑀢𑀦𑀯𑀘𑀦𑀁. 𑀅𑀦𑀼𑀪𑀽𑀢𑀁 𑀢𑁂 𑀤𑀼𑀔𑀁 𑀅𑀧𑀭𑀺𑀫𑀸𑀡𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀇𑀢𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂𑀲𑀼 𑀯𑀸 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀢𑀬𑀸 𑀅𑀦𑀼𑀪𑀯𑀺𑀢𑀁. 𑀇𑀤𑀸𑀦𑀺 𑀢𑀁 𑀤𑀼𑀓𑁆𑀔𑀁 𑀏𑀓𑀤𑁂𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀲𑁆𑀲𑀽 𑀘 𑀢𑁂 𑀧𑀯𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.𑀢𑀲𑁆𑀲𑀢𑁆𑀣𑁄 𑁋 𑀇𑀫𑀲𑁆𑀫𑀺𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀺𑀬𑀸 𑀩𑀳𑀼𑀓𑀸𑀦𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀲𑁄𑀓𑀸𑀪𑀺𑀪𑀽𑀢𑀸𑀬 𑀅𑀲𑁆𑀲𑀼 𑀘 𑀧𑀯𑀢𑁆𑀢𑀁, 𑀅𑀯𑀺𑀲𑁂𑀲𑀺𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀜𑁆𑀘𑁂𑀢𑀁, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀉𑀤𑀓𑀢𑁄𑀧𑀺 𑀩𑀳𑀼𑀓𑀫𑁂𑀯 𑀲𑀺𑀬𑀸.

𑀯𑀲𑀺𑀢𑀸 𑀲𑀼𑀲𑀸𑀦𑀫𑀚𑁆𑀛𑁂𑀢𑀺 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀺𑀓𑀸 𑀲𑀼𑀦𑀔𑀻 𑀲𑀺𑀗𑁆𑀕𑀸𑀮𑀻 𑀘 𑀳𑀼𑀢𑁆𑀯𑀸 𑀲𑀼𑀲𑀸𑀦𑀫𑀚𑁆𑀛𑁂 𑀯𑀼𑀲𑀺𑀢𑀸. 𑀔𑀸𑀤𑀺𑀢𑀸𑀦𑀺 𑀧𑀼𑀢𑁆𑀢𑀫𑀁𑀲𑀸𑀦𑀻𑀢𑀺 𑀩𑁆𑀬𑀕𑁆𑀖𑀤𑀻𑀧𑀺𑀩𑀺𑀴𑀸𑀭𑀸𑀤𑀺𑀓𑀸𑀮𑁂 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀺𑀢𑀸𑀦𑀺. 𑀳𑀢𑀓𑀼𑀮𑀺𑀓𑀸𑀢𑀺 𑀯𑀺𑀦𑀝𑁆𑀞𑀓𑀼𑀮𑀯𑀁𑀲𑀸. 𑀲𑀩𑁆𑀩𑀕𑀭𑀳𑀺𑀢𑀸𑀢𑀺 𑀲𑀩𑁆𑀩𑁂𑀳𑀺 𑀖𑀭𑀯𑀸𑀲𑀻𑀳𑀺 𑀕𑀭𑀳𑀺𑀢𑀸 𑀕𑀭𑀳𑀧𑁆𑀧𑀢𑁆𑀢𑀸. 𑀫𑀢𑀧𑀢𑀺𑀓𑀸𑀢𑀺 𑀯𑀺𑀥𑀯𑀸. 𑀇𑀫𑁂 𑀧𑀦 𑀢𑀬𑁄 𑀧𑀓𑀸𑀭𑁂 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀅𑀦𑀼𑀧𑁆𑀧𑀢𑁆𑀢𑁂 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀏𑀯𑀁𑀪𑀽𑀢𑀸𑀧𑀺 𑀳𑀼𑀢𑁆𑀯𑀸 𑀅𑀥𑀺𑀘𑁆𑀘 𑀮𑀤𑁆𑀥𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁂𑀯𑀸𑀬 𑀅𑀫𑀢𑀫𑀥𑀺𑀕𑀘𑁆𑀙𑀺,𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀸.

𑀇𑀤𑀸𑀦𑀺 𑀢𑀫𑁂𑀯 𑀅𑀫𑀢𑀸𑀥𑀺𑀕𑀫𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀪𑀸𑀯𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀸𑀯𑀺𑀢𑁄𑀢𑀺 𑀯𑀺𑀪𑀸𑀯𑀺𑀢𑁄 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀤𑁆𑀥𑁄. 𑀥𑀫𑁆𑀫𑀸𑀤𑀸𑀲𑀁 𑀅𑀯𑁂𑀓𑁆𑀔𑀺𑀁𑀳𑀦𑁆𑀢𑀺 𑀥𑀫𑁆𑀫𑀫𑀬𑀁 𑀆𑀤𑀸𑀲𑀁 𑀅𑀤𑁆𑀤𑀓𑁆𑀔𑀺𑀁 𑀅𑀧𑀲𑁆𑀲𑀺𑀁 𑀅𑀳𑀁.

𑀅𑀳𑀫𑀫𑁆𑀳𑀺 𑀓𑀦𑁆𑀢𑀲𑀮𑁆𑀮𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀕𑀸𑀭𑀸𑀤𑀺𑀲𑀮𑁆𑀮𑀸 𑀅𑀳𑀁 𑀅𑀫𑁆𑀳𑀺. 𑀑𑀳𑀺𑀢𑀪𑀸𑀭𑀸𑀢𑀺 𑀑𑀭𑁄𑀧𑀺𑀢𑀓𑀸𑀫𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀪𑀸𑀭𑀸. 𑀓𑀢𑀜𑁆𑀳𑀺 𑀓𑀭𑀡𑀻𑀬𑀦𑁆𑀢𑀺 𑀧𑀭𑀺𑀜𑁆𑀜𑀸𑀤𑀺𑀪𑁂𑀤𑀁 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀓𑀢𑀁 𑀧𑀭𑀺𑀬𑁄𑀲𑀺𑀢𑀁. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀇𑀫𑀁 𑀪𑀡𑀻𑀢𑀺 𑀲𑀩𑁆𑀩𑀲𑁄 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀓𑀺𑀲𑀸𑀕𑁄𑀢𑀫𑀻 𑀣𑁂𑀭𑀻 𑀇𑀫𑀫𑀢𑁆𑀣𑀁 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺𑀆𑀤𑀺𑀦𑀸 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀅𑀪𑀡𑀻𑀢𑀺 𑀅𑀢𑁆𑀢𑀸𑀦𑀁 𑀧𑀭𑀁 𑀯𑀺𑀬 𑀣𑁂𑀭𑀻 𑀯𑀤𑀢𑀺. 𑀢𑀢𑁆𑀭𑀺𑀤𑀁 𑀇𑀫𑀺𑀲𑁆𑀲𑀸 𑀣𑁂𑀭𑀺𑀬𑀸 𑀅𑀧𑀤𑀸𑀦𑀁 (𑀅𑀧. 𑀣𑁂𑀭𑀻 𑁨.𑁩.𑁫𑁫-𑁯𑁪) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀅𑀜𑁆𑀜𑀢𑀭𑁂 𑀓𑀼𑀮𑁂;

𑀉𑀧𑁂𑀢𑁆𑀯𑀸 𑀢𑀁 𑀦𑀭𑀯𑀭𑀁, 𑀲𑀭𑀡𑀁 𑀲𑀫𑀼𑀧𑀸𑀕𑀫𑀺𑀁.

‘‘𑀥𑀫𑁆𑀫𑀜𑁆𑀘 𑀢𑀲𑁆𑀲 𑀅𑀲𑁆𑀲𑁄𑀲𑀺𑀁, 𑀘𑀢𑀼𑀲𑀘𑁆𑀘𑀽𑀧𑀲𑀜𑁆𑀳𑀺𑀢𑀁;

𑀫𑀥𑀼𑀭𑀁 𑀧𑀭𑀫𑀲𑁆𑀲𑀸𑀤𑀁, 𑀯𑀝𑁆𑀝𑀲𑀦𑁆𑀢𑀺𑀲𑀼𑀔𑀸𑀯𑀳𑀁.

‘‘𑀢𑀤𑀸 𑀘 𑀪𑀺𑀓𑁆𑀔𑀼𑀦𑀺𑀁 𑀯𑀻𑀭𑁄, 𑀮𑀽𑀔𑀘𑀻𑀯𑀭𑀥𑀸𑀭𑀺𑀦𑀺𑀁;

𑀞𑀧𑁂𑀦𑁆𑀢𑁄 𑀏𑀢𑀤𑀕𑁆𑀕𑀫𑁆𑀳𑀺, 𑀯𑀡𑁆𑀡𑀬𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

‘‘𑀚𑀦𑁂𑀢𑁆𑀯𑀸𑀦𑀧𑁆𑀧𑀓𑀁 𑀧𑀻𑀢𑀺𑀁, 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀕𑀼𑀡𑁂;

𑀓𑀸𑀭𑀁 𑀓𑀢𑁆𑀯𑀸𑀦 𑀩𑀼𑀤𑁆𑀥𑀲𑁆𑀲, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁.

‘‘𑀦𑀺𑀧𑀘𑁆𑀘 𑀫𑀼𑀦𑀺𑀯𑀭𑀁 𑀢𑀁, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀢𑀤𑀸𑀦𑀼𑀫𑁄𑀤𑀺 𑀲𑀫𑁆𑀩𑀼𑀤𑁆𑀥𑁄, 𑀞𑀸𑀦𑀮𑀸𑀪𑀸𑀬 𑀦𑀸𑀬𑀓𑁄.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀓𑀺𑀲𑀸𑀕𑁄𑀢𑀫𑀻 𑀦𑀸𑀫𑁂𑀦, 𑀳𑁂𑀲𑁆𑀲𑀲𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀧𑀜𑁆𑀘𑀫𑀻 𑀢𑀲𑁆𑀲 𑀥𑀻𑀢𑀸𑀲𑀺𑀁, 𑀥𑀫𑁆𑀫𑀸 𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢 𑀥𑀻𑀢𑀭𑁄.

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀧𑀝𑀸𑀘𑀸𑀭𑀸 𑀘 𑀓𑀼𑀡𑁆𑀟𑀮𑀸;

𑀅𑀳𑀜𑁆𑀘 𑀥𑀫𑁆𑀫𑀤𑀺𑀦𑁆𑀦𑀸 𑀘, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀁;

𑀤𑀼𑀕𑁆𑀕𑀢𑁂 𑀅𑀥𑀦𑁂 𑀦𑀝𑁆𑀞𑁂, 𑀕𑀢𑀸 𑀘 𑀲𑀥𑀦𑀁 𑀓𑀼𑀮𑀁.

‘‘𑀧𑀢𑀺𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀫𑁂, 𑀤𑁂𑀲𑁆𑀲𑀦𑁆𑀢𑀺 𑀅𑀥𑀦𑀸 𑀇𑀢𑀺;

𑀬𑀤𑀸 𑀘 𑀧𑀲𑁆𑀲𑀽𑀢𑀸 𑀆𑀲𑀺𑀁, 𑀲𑀩𑁆𑀩𑁂𑀲𑀁 𑀤𑀬𑀺𑀢𑀸 𑀢𑀤𑀸.

‘‘𑀬𑀤𑀸 𑀲𑁄 𑀢𑀭𑀼𑀡𑁄 𑀪𑀤𑁆𑀤𑁄, 𑀓𑁄𑀫𑀮𑀓𑁄 𑀲𑀼𑀔𑁂𑀥𑀺𑀢𑁄;

𑀲𑀧𑀸𑀡𑀫𑀺𑀯 𑀓𑀦𑁆𑀢𑁄 𑀫𑁂, 𑀢𑀤𑀸 𑀬𑀫𑀯𑀲𑀁 𑀕𑀢𑁄.

‘‘𑀲𑁄𑀓𑀝𑁆𑀝𑀸𑀤𑀻𑀦𑀯𑀤𑀦𑀸, 𑀅𑀲𑁆𑀲𑀼𑀦𑁂𑀢𑁆𑀢𑀸 𑀭𑀼𑀤𑀫𑁆𑀫𑀼𑀔𑀸;

𑀫𑀢𑀁 𑀓𑀼𑀡𑀧𑀫𑀸𑀤𑀸𑀬, 𑀯𑀺𑀮𑀧𑀦𑁆𑀢𑀻 𑀕𑀫𑀸𑀫𑀳𑀁.

‘‘𑀢𑀤𑀸 𑀏𑀓𑁂𑀦 𑀲𑀦𑁆𑀤𑀺𑀝𑁆𑀞𑀸, 𑀉𑀧𑁂𑀢𑁆𑀯𑀸𑀪𑀺𑀲𑀓𑁆𑀓𑀼𑀢𑁆𑀢𑀫𑀁;

𑀅𑀯𑁄𑀘𑀁 𑀤𑁂𑀳𑀺 𑀪𑁂𑀲𑀚𑁆𑀚𑀁, 𑀧𑀼𑀢𑁆𑀢𑀲𑀜𑁆𑀚𑀻𑀯𑀦𑀦𑁆𑀢𑀺 𑀪𑁄.

‘‘𑀦 𑀯𑀺𑀚𑁆𑀚𑀦𑁆𑀢𑁂 𑀫𑀢𑀸 𑀬𑀲𑁆𑀫𑀺𑀁, 𑀕𑁂𑀳𑁂 𑀲𑀺𑀤𑁆𑀥𑀢𑁆𑀣𑀓𑀁 𑀢𑀢𑁄;

𑀆𑀳𑀭𑀸𑀢𑀺 𑀚𑀺𑀦𑁄 𑀆𑀳, 𑀯𑀺𑀦𑀬𑁄𑀧𑀸𑀬𑀓𑁄𑀯𑀺𑀤𑁄.

‘‘𑀢𑀤𑀸 𑀕𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁, 𑀦 𑀮𑀪𑀺𑀁 𑀢𑀸𑀤𑀺𑀲𑀁 𑀖𑀭𑀁;

𑀓𑀼𑀢𑁄 𑀲𑀺𑀤𑁆𑀥𑀢𑁆𑀣𑀓𑀁 𑀢𑀲𑁆𑀫𑀸, 𑀢𑀢𑁄 𑀮𑀤𑁆𑀥𑀸 𑀲𑀢𑀺𑀁 𑀅𑀳𑀁.

‘‘𑀓𑀼𑀡𑀧𑀁 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀤𑀽𑀭𑀢𑁄𑀯 𑀫𑀫𑀁 𑀤𑀺𑀲𑁆𑀯𑀸, 𑀅𑀯𑁄𑀘 𑀫𑀥𑀼𑀭𑀲𑁆𑀲𑀭𑁄.

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀁.

‘‘𑀦 𑀕𑀸𑀫𑀥𑀫𑁆𑀫𑁄 𑀦𑀺𑀕𑀫𑀲𑁆𑀲 𑀥𑀫𑁆𑀫𑁄, 𑀦 𑀘𑀸𑀧𑀺𑀬𑀁 𑀏𑀓𑀓𑀼𑀮𑀲𑁆𑀲 𑀥𑀫𑁆𑀫𑁄;

𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲, 𑀏𑀲𑁂𑀯 𑀥𑀫𑁆𑀫𑁄 𑀬𑀤𑀺𑀤𑀁 𑀅𑀦𑀺𑀘𑁆𑀘𑀢𑀸.

‘‘𑀲𑀸𑀳𑀁 𑀲𑀼𑀢𑁆𑀯𑀸𑀦𑀺𑀫𑀸 𑀕𑀸𑀣𑀸, 𑀥𑀫𑁆𑀫𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁;

𑀢𑀢𑁄 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀢𑀣𑀸 𑀧𑀩𑁆𑀩𑀚𑀺𑀢𑀸 𑀲𑀦𑁆𑀢𑀻, 𑀬𑀼𑀜𑁆𑀚𑀦𑁆𑀢𑀻 𑀚𑀺𑀦𑀲𑀸𑀲𑀦𑁂;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀧𑀭𑀘𑀺𑀢𑁆𑀢𑀸𑀦𑀺 𑀚𑀸𑀦𑀸𑀫𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀯𑀺𑀲𑀼𑀤𑁆𑀥𑀸𑀲𑀺𑀁 𑀲𑀼𑀦𑀺𑀫𑁆𑀫𑀮𑀸.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸.

‘‘𑀲𑀗𑁆𑀓𑀸𑀭𑀓𑀽𑀝𑀸 𑀆𑀳𑀺𑀢𑁆𑀯𑀸, 𑀲𑀼𑀲𑀸𑀦𑀸 𑀭𑀣𑀺𑀬𑀸𑀧𑀺 𑀘;

𑀢𑀢𑁄 𑀲𑀗𑁆𑀖𑀸𑀝𑀺𑀓𑀁 𑀓𑀢𑁆𑀯𑀸, 𑀮𑀽𑀔𑀁 𑀥𑀸𑀭𑁂𑀫𑀺 𑀘𑀻𑀯𑀭𑀁.

‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀮𑀽𑀔𑀘𑀻𑀯𑀭𑀥𑀸𑀭𑀡𑁂;

𑀞𑀧𑁂𑀲𑀺 𑀏𑀢𑀤𑀕𑁆𑀕𑀫𑁆𑀳𑀺, 𑀧𑀭𑀺𑀲𑀸𑀲𑀼 𑀯𑀺𑀦𑀸𑀬𑀓𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀓𑀺𑀲𑀸𑀕𑁄𑀢𑀫𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

𑁧. 𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 𑀉𑀪𑁄 𑀫𑀸𑀢𑀸 𑀘 𑀥𑀻𑀢𑀸 𑀘𑀸𑀢𑀺𑀆𑀤𑀺𑀓𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼𑀁 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀯𑁂𑀡𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸.

𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀻 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀲𑀳𑀢𑁆𑀣𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸. 𑀲𑀸 𑀏𑀓𑀤𑀺𑀯𑀲𑀁 𑀔𑁂𑀢𑁆𑀢𑀓𑀼𑀝𑀺𑀁 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀧𑀸𑀢𑁄𑀯 𑀧𑀼𑀧𑁆𑀨𑀺𑀢𑀁 𑀧𑀤𑀼𑀫𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀢𑀁 𑀲𑀭𑀁 𑀑𑀭𑀼𑀬𑁆𑀳 𑀢𑀜𑁆𑀘𑁂𑀯 𑀧𑀼𑀧𑁆𑀨𑀁 𑀮𑀸𑀚𑀧𑀓𑁆𑀔𑀺𑀧𑀦𑀢𑁆𑀣𑀸𑀬 𑀧𑀤𑀼𑀫𑀺𑀦𑀺𑀧𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 𑀓𑁂𑀤𑀸𑀭𑁂 𑀲𑀸𑀮𑀺𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀝𑀺𑀓𑀸𑀬 𑀦𑀺𑀲𑀺𑀦𑁆𑀦𑀸 𑀮𑀸𑀚𑁂 𑀪𑀚𑁆𑀚𑀺𑀢𑁆𑀯𑀸 𑀧𑀜𑁆𑀘 𑀮𑀸𑀚𑀲𑀢𑀸𑀦𑀺 𑀓𑀢𑁆𑀯𑀸 𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀮𑀸𑀚𑁂𑀳𑀺 𑀲𑀤𑁆𑀥𑀺𑀁 𑀧𑀤𑀼𑀫𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸, 𑀓𑀼𑀝𑀺𑀢𑁄 𑀑𑀭𑀼𑀬𑁆𑀳 𑀮𑀸𑀚𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑁂𑀦 𑀧𑀢𑁆𑀢𑀁 𑀧𑀺𑀥𑀸𑀬 𑀅𑀤𑀸𑀲𑀺. 𑀅𑀣𑀲𑁆𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀣𑁄𑀓𑀁 𑀕𑀢𑁂 𑀏𑀢𑀤𑀳𑁄𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀧𑀼𑀧𑁆𑀨𑁂𑀦 𑀅𑀦𑀢𑁆𑀣𑀺𑀓𑀸, 𑀅𑀳𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀺𑀴𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀢𑁄 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂, 𑀅𑀬𑁆𑀬𑁄, 𑀧𑀼𑀧𑁆𑀨𑁂𑀦 𑀅𑀦𑀢𑁆𑀣𑀺𑀓𑁄 𑀅𑀪𑀯𑀺𑀲𑁆𑀲𑀸, 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑀼𑀁 𑀦𑀸𑀤𑀲𑁆𑀲, 𑀅𑀤𑁆𑀥𑀸 𑀅𑀬𑁆𑀬𑀲𑁆𑀲 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀕𑀦𑁆𑀢𑁆𑀯𑀸 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀔𑀫𑀸𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑁂𑀲𑀁 𑀫𑁂 𑀮𑀸𑀚𑀸𑀦𑀁 𑀦𑀺𑀲𑁆𑀲𑀦𑁆𑀤𑁂𑀦 𑀮𑀸𑀚𑀕𑀡𑀦𑀸𑀬 𑀧𑀼𑀢𑁆𑀢𑀸 𑀅𑀲𑁆𑀲𑀼, 𑀧𑀤𑀼𑀫𑀧𑀼𑀧𑁆𑀨𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀤𑁂 𑀧𑀤𑁂 𑀧𑀤𑀼𑀫𑀧𑀼𑀧𑁆𑀨𑀁 𑀉𑀝𑁆𑀞𑀳𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀼𑀩𑀼𑀤𑁆𑀥𑁄 𑀢𑀲𑁆𑀲𑀸 𑀧𑀲𑁆𑀲𑀦𑁆𑀢𑀺𑀬𑀸𑀯 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀤𑀼𑀫𑀁 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀅𑀓𑁆𑀓𑀫𑀦𑀲𑁄𑀧𑀸𑀦𑀲𑀫𑀻𑀧𑁂 𑀧𑀸𑀤𑀧𑀼𑀜𑁆𑀙𑀦𑀁 𑀓𑀢𑁆𑀯𑀸 𑀞𑀧𑁂𑀲𑀺.

𑀲𑀸𑀧𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀤𑁂𑀯𑀮𑁄𑀓𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲𑀸 𑀧𑀤𑁂 𑀧𑀤𑁂 𑀫𑀳𑀸𑀧𑀤𑀼𑀫𑀧𑀼𑀧𑁆𑀨𑀁 𑀉𑀝𑁆𑀞𑀸𑀲𑀺. 𑀲𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀏𑀓𑀲𑁆𑀫𑀺𑀁 𑀧𑀤𑀼𑀫𑀲𑀭𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀏𑀓𑁄 𑀢𑀸𑀧𑀲𑁄 𑀯𑀲𑀢𑀺. 𑀲𑁄 𑀧𑀸𑀢𑁄𑀯 𑀫𑀼𑀔𑀥𑁄𑀯𑀦𑀢𑁆𑀣𑀸𑀬 𑀲𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀧𑀼𑀧𑁆𑀨𑀁 𑀲𑁂𑀲𑁂𑀳𑀺 𑀫𑀳𑀦𑁆𑀢𑀢𑀭𑀁, 𑀲𑁂𑀲𑀸𑀦𑀺 𑀘 𑀧𑀼𑀧𑁆𑀨𑀺𑀢𑀸𑀦𑀺 𑀇𑀤𑀁 𑀫𑀓𑀼𑀮𑀺𑀢𑀫𑁂𑀯, 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑁂𑀦𑀸’’𑀢𑀺 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀕𑀡𑁆𑀳𑀺. 𑀢𑀁 𑀢𑁂𑀦 𑀕𑀳𑀺𑀢𑀫𑀢𑁆𑀢𑀫𑁂𑀯 𑀧𑀼𑀧𑁆𑀨𑀺𑀢𑀁. 𑀢𑀸𑀧𑀲𑁄 𑀅𑀦𑁆𑀢𑁄𑀧𑀤𑀼𑀫𑀕𑀩𑁆𑀪𑁂 𑀦𑀺𑀧𑀦𑁆𑀦𑀤𑀸𑀭𑀺𑀓𑀁 𑀅𑀤𑁆𑀤𑀲. 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀥𑀻𑀢𑀼𑀲𑀺𑀦𑁂𑀳𑀁 𑀮𑀪𑀺𑀢𑁆𑀯𑀸 𑀧𑀤𑀼𑀫𑁂𑀦𑁂𑀯 𑀲𑀤𑁆𑀥𑀺𑀁 𑀧𑀡𑁆𑀡𑀲𑀸𑀮𑀁 𑀦𑁂𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀗𑁆𑀕𑀼𑀝𑁆𑀞𑀓𑁂 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀧𑀼𑀧𑁆𑀨𑁂 𑀫𑀺𑀮𑀸𑀢𑁂 𑀅𑀜𑁆𑀜𑀁 𑀦𑀯𑀁 𑀧𑀼𑀧𑁆𑀨𑀁 𑀆𑀳𑀭𑀺𑀢𑁆𑀯𑀸 𑀢𑀁 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀆𑀥𑀸𑀯𑀦𑀯𑀺𑀥𑀸𑀯𑀦𑁂𑀦 𑀓𑀻𑀴𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀧𑀤𑀼𑀫𑀧𑀼𑀧𑁆𑀨𑀁 𑀉𑀝𑁆𑀞𑀸𑀢𑀺, 𑀓𑀼𑀗𑁆𑀓𑀼𑀫𑀭𑀸𑀲𑀺𑀲𑁆𑀲 𑀯𑀺𑀬 𑀅𑀲𑁆𑀲𑀸 𑀲𑀭𑀻𑀭𑀯𑀡𑁆𑀡𑁄 𑀳𑁄𑀢𑀺. 𑀲𑀸 𑀅𑀧𑀢𑁆𑀢𑀸 𑀤𑁂𑀯𑀯𑀡𑁆𑀡𑀁, 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁 𑀅𑀳𑁄𑀲𑀺. 𑀲𑀸 𑀧𑀺𑀢𑀭𑀺 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂 𑀧𑀡𑁆𑀡𑀲𑀸𑀮𑀸𑀬𑀁 𑀑𑀳𑀺𑀬𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀺𑀢𑀭𑀺 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂 𑀏𑀓𑁄 𑀯𑀦𑀘𑀭𑀓𑁄 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀦𑀸𑀫 𑀏𑀯𑀁𑀯𑀺𑀥𑀁 𑀭𑀽𑀧𑀁 𑀦𑀢𑁆𑀣𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀸𑀧𑀲𑀲𑁆𑀲 𑀆𑀕𑀫𑀦𑀁 𑀉𑀤𑀺𑀓𑁆𑀔𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀸 𑀧𑀺𑀢𑀭𑀺 𑀆𑀕𑀘𑁆𑀙𑀦𑁆𑀢𑁂 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀓𑀸𑀚𑀓𑀫𑀡𑁆𑀟𑀮𑀼𑀁 𑀅𑀕𑁆𑀕𑀳𑁂𑀲𑀺, 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀘𑀲𑁆𑀲 𑀅𑀢𑁆𑀢𑀦𑁄 𑀓𑀭𑀡𑀯𑀢𑁆𑀢𑀁 𑀤𑀲𑁆𑀲𑁂𑀲𑀺. 𑀢𑀤𑀸 𑀲𑁄 𑀯𑀦𑀘𑀭𑀓𑁄 𑀫𑀦𑀼𑀲𑁆𑀲𑀪𑀸𑀯𑀁 𑀜𑀢𑁆𑀯𑀸 𑀢𑀸𑀧𑀲𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀸𑀧𑀲𑁄 𑀢𑀁 𑀯𑀦𑀘𑀭𑀓𑀁 𑀯𑀦𑀫𑀽𑀮𑀨𑀮𑁂𑀳𑀺 𑀘 𑀧𑀸𑀦𑀻𑀬𑁂𑀦 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸, ‘‘𑀪𑁄 𑀧𑀼𑀭𑀺𑀲, 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀲𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀕𑀫𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀕𑀫𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂, 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀇𑀤𑀁 𑀢𑀬𑀸 𑀤𑀺𑀝𑁆𑀞𑀓𑀸𑀭𑀡𑀁 𑀏𑀢𑁆𑀢𑁄 𑀕𑀦𑁆𑀢𑁆𑀯𑀸 𑀅𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? ‘‘𑀲𑀘𑁂, 𑀅𑀬𑁆𑀬𑁄, 𑀦 𑀇𑀘𑁆𑀙𑀢𑀺, 𑀓𑀺𑀁𑀓𑀸𑀭𑀡𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀆𑀕𑀫𑀦𑀓𑀸𑀮𑁂 𑀫𑀕𑁆𑀕𑀲𑀜𑁆𑀚𑀸𑀦𑀦𑀢𑁆𑀣𑀁 𑀲𑀸𑀔𑀸𑀲𑀜𑁆𑀜𑀜𑁆𑀘 𑀭𑀼𑀓𑁆𑀔𑀲𑀜𑁆𑀜𑀜𑁆𑀘 𑀓𑀭𑁄𑀦𑁆𑀢𑁄 𑀧𑀓𑁆𑀓𑀸𑀫𑀺.

𑀲𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀤𑁆𑀤𑀲. 𑀭𑀸𑀚𑀸 ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀯𑀦𑀘𑀭𑀓𑁄 𑀧𑀩𑁆𑀩𑀢𑀧𑀸𑀤𑁂 𑀅𑀘𑁆𑀙𑀭𑀺𑀬𑀁 𑀇𑀢𑁆𑀣𑀺𑀭𑀢𑀦𑀁 𑀤𑀺𑀲𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀦𑀘𑀭𑀓𑁂𑀦 𑀘𑁂𑀯 𑀅𑀜𑁆𑀜𑁂𑀳𑀺 𑀘 𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀢𑀸𑀧𑀲𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀯𑁂𑀮𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀭𑀸𑀚𑀸 𑀢𑀸𑀧𑀲𑀲𑁆𑀲 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀁 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀓𑀭𑁄𑀫, 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀕𑀘𑁆𑀙, 𑀫𑀳𑀸𑀭𑀸𑀚𑀸’’𑀢𑀺. ‘‘𑀆𑀫, 𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀧𑀦 𑀲𑀫𑀻𑀧𑁂 𑀯𑀺𑀲𑀪𑀸𑀕𑀧𑀭𑀺𑀲𑀸 𑀅𑀢𑁆𑀣𑀻’’𑀢𑀺 𑀅𑀲𑁆𑀲𑀼𑀫𑁆𑀳𑀸, 𑀅𑀲𑀸𑀭𑀼𑀧𑁆𑀧𑀸 𑀏𑀲𑀸 𑀧𑀩𑁆𑀩𑀚𑀺𑀢𑀸𑀦𑀁, 𑀫𑀬𑀸 𑀲𑀤𑁆𑀥𑀺𑀁 𑀕𑀘𑁆𑀙𑀢𑀼, 𑀪𑀦𑁆𑀢𑁂𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀦𑀸𑀫 𑀘𑀺𑀢𑁆𑀢𑀁 𑀤𑀼𑀢𑁆𑀢𑁄𑀲𑀬𑀁, 𑀓𑀣𑀁 𑀩𑀳𑀽𑀦𑀁 𑀫𑀚𑁆𑀛𑁂 𑀯𑀲𑀺𑀲𑁆𑀲𑀢𑀻𑀢𑀺? 𑀅𑀫𑁆𑀳𑀸𑀓𑀁 𑀭𑀼𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑀸𑀦𑀁 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫, 𑀪𑀦𑁆𑀢𑁂𑀢𑀺.

𑀲𑁄 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀤𑀳𑀭𑀓𑀸𑀮𑁂 𑀕𑀳𑀺𑀢𑀦𑀸𑀫𑀯𑀲𑁂𑀦𑁂𑀯, ‘‘𑀅𑀫𑁆𑀫, 𑀧𑀤𑀼𑀫𑀯𑀢𑀻’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀺. 𑀲𑀸 𑀏𑀓𑀯𑀘𑀦𑁂𑀦𑁂𑀯 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀺𑀢𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀧𑀺𑀢𑀸 𑀆𑀳 𑁋 ‘‘𑀢𑁆𑀯𑀁, 𑀅𑀫𑁆𑀫, 𑀯𑀬𑀧𑁆𑀧𑀢𑁆𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑀜𑁆𑀜𑀸 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀲𑀺𑀢𑀼𑀁 𑀅𑀬𑀼𑀢𑁆𑀢𑀸, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀘𑁆𑀙, 𑀅𑀫𑁆𑀫𑀸’’𑀢𑀺. 𑀲𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀧𑀺𑀢𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀇𑀫𑀺𑀲𑁆𑀲𑀸 𑀧𑀺𑀢𑀼 𑀘𑀺𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀓𑀳𑀸𑀧𑀡𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀅𑀓𑀸𑀲𑀺. 𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀆𑀦𑁂𑀢𑁆𑀯𑀸 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑀺𑀢𑁆𑀣𑀺𑀬𑁄 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀭𑀫𑀢𑀺. 𑀢𑀸 𑀇𑀢𑁆𑀣𑀺𑀬𑁄 𑀇𑀲𑁆𑀲𑀸𑀧𑀓𑀢𑀸 𑀢𑀁 𑀭𑀜𑁆𑀜𑁄 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀤𑀺𑀢𑀼𑀓𑀸𑀫𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀸𑀬𑀁, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀓𑀳𑀁 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀫𑀦𑀼𑀲𑁆𑀲𑀸𑀦𑀁 𑀯𑀺𑀘𑀭𑀡𑀝𑁆𑀞𑀸𑀦𑁂 𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀦𑁆𑀢𑀸𑀦𑀺 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀺, 𑀅𑀤𑁆𑀥𑀸 𑀅𑀬𑀁 𑀬𑀓𑁆𑀔𑀺𑀦𑀻, 𑀦𑀻𑀳𑀭𑀣 𑀦𑀁, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀢𑀸𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀣𑀲𑁆𑀲𑀸𑀧𑀭𑁂𑀦 𑀲𑀫𑀬𑁂𑀦 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑁄 ‘‘𑀕𑀭𑀼𑀕𑀩𑁆𑀪𑀸 𑀧𑀤𑀼𑀫𑀯𑀢𑀻’’𑀢𑀺 𑀦𑀕𑀭𑁂 𑀞𑀧𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀅𑀕𑀫𑀸𑀲𑀺. 𑀅𑀣 𑀢𑀸 𑀇𑀢𑁆𑀣𑀺𑀬𑁄 𑀢𑀲𑁆𑀲𑀸 𑀉𑀧𑀝𑁆𑀞𑀸𑀬𑀺𑀓𑀸𑀬 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀤𑀸𑀭𑀓𑀁 𑀚𑀸𑀢𑀫𑀢𑁆𑀢𑀫𑁂𑀯 𑀅𑀧𑀦𑁂𑀢𑁆𑀯𑀸 𑀏𑀓𑀁 𑀤𑀸𑀭𑀼𑀖𑀝𑀺𑀓𑀁 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀢𑁆𑀯𑀸 𑀲𑀦𑁆𑀢𑀺𑀓𑁂 𑀞𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀧𑀤𑀼𑀫𑀯𑀢𑀺𑀬𑀸𑀧𑀺 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄 𑀏𑀓𑀓𑁄𑀯 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀯𑀲𑁂𑀲𑀸 𑀏𑀓𑀽𑀦𑀧𑀜𑁆𑀘𑀲𑀢𑀸 𑀤𑀸𑀭𑀓𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀧𑀦𑁆𑀦𑀓𑀸𑀮𑁂 𑀲𑀁𑀲𑁂𑀤𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀅𑀣𑀲𑁆𑀲𑀸 ‘‘𑀦 𑀢𑀸𑀯 𑀅𑀬𑀁 𑀲𑀢𑀺𑀁 𑀧𑀝𑀺𑀮𑀪𑀢𑀻’’𑀢𑀺 𑀜𑀢𑁆𑀯𑀸 𑀲𑀸 𑀉𑀧𑀝𑁆𑀞𑀸𑀬𑀺𑀓𑀸 𑀏𑀓𑀁 𑀤𑀸𑀭𑀼𑀖𑀝𑀺𑀓𑀁 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀢𑁆𑀯𑀸 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑀸𑀧𑀺 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀏𑀓𑁂𑀓𑀸 𑀏𑀓𑁂𑀓𑀁 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀘𑀼𑀦𑁆𑀤𑀓𑀸𑀭𑀓𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀓𑀭𑀡𑁆𑀟𑀓𑁂 𑀆𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀕𑀳𑀺𑀢𑀤𑀸𑀭𑀓𑁂 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑀳𑀺 𑀮𑀜𑁆𑀙𑀦𑀁 𑀓𑀢𑁆𑀯𑀸 𑀞𑀧𑀬𑀺𑀁𑀲𑀼.

𑀧𑀤𑀼𑀫𑀯𑀢𑀻𑀧𑀺 𑀔𑁄 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸 𑀢𑀁 𑀉𑀧𑀝𑁆𑀞𑀸𑀬𑀺𑀓𑀁 ‘‘𑀓𑀺𑀁 𑀯𑀺𑀚𑀸𑀢𑀫𑁆𑀳𑀺, 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 ‘‘𑀓𑀼𑀢𑁄 𑀢𑁆𑀯𑀁 𑀤𑀸𑀭𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀬𑀁 𑀢𑀯 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀤𑀸𑀭𑀓𑁄’’𑀢𑀺 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀤𑀸𑀭𑀼𑀖𑀝𑀺𑀓𑀁 𑀧𑀼𑀭𑀢𑁄 𑀞𑀧𑁂𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 ‘‘𑀲𑀻𑀖𑀁 𑀢𑀁 𑀨𑀸𑀮𑁂𑀢𑁆𑀯𑀸 𑀅𑀧𑀦𑁂𑀳𑀺, 𑀲𑀘𑁂 𑀓𑁄𑀘𑀺 𑀧𑀲𑁆𑀲𑁂𑀬𑁆𑀬, 𑀮𑀚𑁆𑀚𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀲𑀸 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀣𑀓𑀸𑀫𑀸 𑀯𑀺𑀬 𑀤𑀸𑀭𑀼𑀖𑀝𑀺𑀓𑀁 𑀨𑀸𑀮𑁂𑀢𑁆𑀯𑀸 𑀉𑀤𑁆𑀥𑀦𑁂 𑀧𑀓𑁆𑀔𑀺𑀧𑀺.

𑀭𑀸𑀚𑀸𑀧𑀺 𑀧𑀘𑁆𑀘𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑁄 𑀩𑀳𑀺𑀦𑀕𑀭𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀭𑀜𑁆𑀜𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀆𑀕𑀦𑁆𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀢𑁆𑀯𑀁, 𑀫𑀳𑀸𑀭𑀸𑀚, 𑀦 𑀅𑀫𑁆𑀳𑀸𑀓𑀁 𑀲𑀤𑁆𑀤𑀳𑀲𑀺, 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀅𑀓𑀸𑀭𑀡𑀁 𑀯𑀺𑀬 𑀳𑁄𑀢𑀺, 𑀢𑁆𑀯𑀁 𑀫𑀳𑁂𑀲𑀺𑀬𑀸 𑀉𑀧𑀝𑁆𑀞𑀸𑀬𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀝𑀺𑀧𑀼𑀘𑁆𑀙, 𑀤𑀸𑀭𑀼𑀖𑀝𑀺𑀓𑀁 𑀢𑁂 𑀤𑁂𑀯𑀻 𑀯𑀺𑀚𑀸𑀢𑀸’’𑀢𑀺. 𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 ‘‘𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀕𑁂𑀳𑀢𑁄 𑀦𑀺𑀓𑁆𑀓𑀟𑁆𑀠𑀺. 𑀢𑀲𑁆𑀲𑀸 𑀭𑀸𑀚𑀕𑁂𑀳𑀢𑁄 𑀲𑀳 𑀦𑀺𑀓𑁆𑀔𑀫𑀦𑁂𑀦𑁂𑀯 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀅𑀦𑁆𑀢𑀭𑀥𑀸𑀬𑀺𑀁𑀲𑀼, 𑀲𑀭𑀻𑀭𑀘𑁆𑀙𑀯𑀻𑀧𑀺 𑀯𑀺𑀯𑀡𑁆𑀡𑀸 𑀅𑀳𑁄𑀲𑀺. 𑀲𑀸 𑀏𑀓𑀺𑀓𑀸𑀯 𑀅𑀦𑁆𑀢𑀭𑀯𑀻𑀣𑀺𑀬𑀸 𑀧𑀸𑀬𑀸𑀲𑀺. 𑀅𑀣 𑀦𑀁 𑀏𑀓𑀸 𑀯𑀬𑀧𑁆𑀧𑀢𑁆𑀢𑀸 𑀫𑀳𑀮𑁆𑀮𑀺𑀓𑀸 𑀇𑀢𑁆𑀣𑀻 𑀤𑀺𑀲𑁆𑀯𑀸 𑀥𑀻𑀢𑀼𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀲𑀺, 𑀅𑀫𑁆𑀫𑀸’’𑀢𑀺 𑀆𑀳. ‘‘𑀆𑀕𑀦𑁆𑀢𑀼𑀓𑀫𑁆𑀳𑀺, 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀻 𑀯𑀺𑀘𑀭𑀸𑀫𑀻’’𑀢𑀺. ‘‘𑀇𑀥𑀸𑀕𑀘𑁆𑀙, 𑀅𑀫𑁆𑀫𑀸’’𑀢𑀺 𑀯𑀲𑀦𑀝𑁆𑀞𑀸𑀦𑀁 𑀤𑀢𑁆𑀯𑀸 𑀪𑁄𑀚𑀦𑀁 𑀧𑀝𑀺𑀬𑀸𑀤𑁂𑀲𑀺.

𑀢𑀲𑁆𑀲𑀸 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀢𑀢𑁆𑀣 𑀯𑀲𑀫𑀸𑀦𑀸𑀬 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂𑀲𑀼 𑀬𑀼𑀤𑁆𑀥𑀁 𑀕𑀢𑁂𑀲𑀼 𑀅𑀫𑁆𑀳𑁂𑀳𑀺 𑀕𑀗𑁆𑀕𑀸𑀤𑁂𑀯𑀢𑀸𑀬 ‘𑀅𑀫𑁆𑀳𑀸𑀓𑀁 𑀤𑁂𑀯𑁂 𑀯𑀺𑀚𑀺𑀢𑀲𑀗𑁆𑀕𑀸𑀫𑁂 𑀆𑀕𑀢𑁂 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀧𑀢𑁆𑀣𑀺𑀢𑀁 𑀅𑀢𑁆𑀣𑀺, 𑀏𑀢𑀫𑀢𑁆𑀣𑀁, 𑀤𑁂𑀯, 𑀚𑀸𑀦𑀸𑀧𑁂𑀫𑀸’’𑀢𑀺. 𑀭𑀸𑀚𑀸 𑀢𑀸𑀲𑀁 𑀯𑀘𑀦𑁂𑀦 𑀢𑀼𑀝𑁆𑀞𑁄 𑀕𑀗𑁆𑀕𑀸𑀬 𑀉𑀤𑀓𑀓𑀻𑀴𑀁 𑀓𑀸𑀢𑀼𑀁 𑀅𑀕𑀫𑀸𑀲𑀺. 𑀢𑀸𑀧𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀕𑀳𑀺𑀢𑀓𑀭𑀡𑁆𑀟𑀓𑀁 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀆𑀤𑀸𑀬 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀭𑀡𑁆𑀟𑀓𑀸𑀦𑀁 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀉𑀤𑀓𑁂 𑀧𑀢𑀺𑀢𑁆𑀯𑀸 𑀓𑀭𑀡𑁆𑀟𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑁂𑀧𑀺 𑀔𑁄 𑀓𑀭𑀡𑁆𑀟𑀓𑀸 𑀲𑀩𑁆𑀩𑁂 𑀲𑀳 𑀕𑀦𑁆𑀢𑁆𑀯𑀸 𑀳𑁂𑀝𑁆𑀞𑀸𑀲𑁄𑀢𑁂 𑀧𑀲𑀸𑀭𑀺𑀢𑀚𑀸𑀮𑀫𑁆𑀳𑀺 𑀮𑀕𑁆𑀕𑀺𑀁𑀲𑀼. 𑀢𑀢𑁄 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀭𑀜𑁆𑀜𑁄 𑀉𑀢𑁆𑀢𑀺𑀡𑁆𑀡𑀓𑀸𑀮𑁂 𑀚𑀸𑀮𑀁 𑀉𑀓𑁆𑀔𑀺𑀧𑀦𑁆𑀢𑀸 𑀢𑁂 𑀓𑀭𑀡𑁆𑀟𑀓𑁂 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼.

𑀭𑀸𑀚𑀸 𑀓𑀭𑀡𑁆𑀟𑀓𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀓𑀭𑀡𑁆𑀟𑀓𑁂𑀲𑀽’’𑀢𑀺 𑀆𑀳. ‘‘𑀦 𑀚𑀸𑀦𑀸𑀫, 𑀤𑁂𑀯𑀸’’𑀢𑀺. 𑀲𑁄 𑀢𑁂 𑀓𑀭𑀡𑁆𑀟𑀓𑁂 𑀯𑀺𑀯𑀭𑀸𑀧𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀞𑀫𑀁 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀲𑁆𑀲 𑀓𑀭𑀡𑁆𑀟𑀓𑀁 𑀯𑀺𑀯𑀭𑀸𑀧𑁂𑀲𑀺. 𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀓𑀭𑀡𑁆𑀟𑀓𑁂𑀲𑀼 𑀦𑀺𑀧𑀚𑁆𑀚𑀸𑀧𑀺𑀢𑀤𑀺𑀯𑀲𑁂𑀲𑀼𑀬𑁂𑀯 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀅𑀗𑁆𑀕𑀼𑀝𑁆𑀞𑀢𑁄 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀲𑁆𑀲 𑀭𑀜𑁆𑀜𑁄 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀁 𑀅𑀦𑁆𑀢𑁄𑀓𑀭𑀡𑁆𑀟𑀓𑁂 𑀅𑀓𑁆𑀔𑀭𑀸𑀦𑀺 𑀮𑀺𑀔𑀸𑀧𑁂𑀲𑀺 𑁋 ‘‘𑀇𑀫𑁂 𑀓𑀼𑀫𑀸𑀭𑀸 𑀧𑀤𑀼𑀫𑀯𑀢𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑀸, 𑀅𑀣 𑀦𑁂 𑀧𑀤𑀼𑀫𑀯𑀢𑀺𑀬𑀸 𑀲𑀧𑀢𑁆𑀢𑀺𑀬𑁄 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀓𑀭𑀡𑁆𑀟𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑁂 𑀔𑀺𑀧𑀺𑀁𑀲𑀼, 𑀭𑀸𑀚𑀸 𑀇𑀫𑀁 𑀓𑀸𑀭𑀡𑀁 𑀚𑀸𑀦𑀸𑀢𑀽’’𑀢𑀺. 𑀓𑀭𑀡𑁆𑀟𑀓𑁂 𑀯𑀺𑀯𑀝𑀫𑀢𑁆𑀢𑁂 𑀭𑀸𑀚𑀸 𑀅𑀓𑁆𑀔𑀭𑀸𑀦𑀺 𑀯𑀸𑀘𑁂𑀢𑁆𑀯𑀸 𑀤𑀸𑀭𑀓𑁂 𑀤𑀺𑀲𑁆𑀯𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀕𑁂𑀦 𑀭𑀣𑁂 𑀬𑁄𑀚𑁂𑀢𑁆𑀯𑀸 ‘‘𑀅𑀲𑁆𑀲𑁂 𑀓𑀧𑁆𑀧𑁂𑀣, 𑀅𑀳𑀁 𑀅𑀚𑁆𑀚 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀘𑁆𑀘𑀸𑀦𑀁 𑀫𑀸𑀢𑀼𑀕𑀸𑀫𑀸𑀦𑀁 𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀯𑀭𑀁 𑀆𑀭𑀼𑀬𑁆𑀳 𑀳𑀢𑁆𑀣𑀺𑀕𑀻𑀯𑀸𑀬 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀞𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀬𑁄 𑀧𑀤𑀼𑀫𑀯𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀇𑀫𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀢𑀽’’𑀢𑀺.

𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀤𑀼𑀫𑀯𑀢𑀻 𑀫𑀸𑀢𑀼 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀳𑀢𑁆𑀣𑀺𑀕𑀻𑀯𑀢𑁄 𑀲𑀳𑀲𑁆𑀲𑀁 𑀕𑀡𑁆𑀳, 𑀅𑀫𑁆𑀫𑀸’’𑀢𑀺. ‘‘𑀦𑀸𑀳𑀁 𑀏𑀯𑀭𑀽𑀧𑀁 𑀕𑀡𑁆𑀳𑀺𑀢𑀼𑀁 𑀯𑀺𑀲𑀳𑀸𑀫𑀻’’𑀢𑀺 𑀆𑀳. 𑀲𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀯𑀢𑁆𑀯𑀸 𑀕𑀡𑁆𑀳𑀸𑀫𑀺, 𑀅𑀫𑁆𑀫𑀸’’𑀢𑀺 𑀆𑀳. ‘‘‘𑀫𑀫 𑀥𑀻𑀢𑀸 𑀧𑀤𑀼𑀫𑀯𑀢𑀺𑀁 𑀤𑁂𑀯𑀺𑀁 𑀧𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. 𑀲𑀸 ‘‘𑀬𑀁 𑀯𑀸 𑀢𑀁 𑀯𑀸 𑀳𑁄𑀢𑀽’’𑀢𑀺 𑀕𑀦𑁆𑀢𑁆𑀯𑀸 𑀲𑀳𑀲𑁆𑀲𑀘𑀗𑁆𑀓𑁄𑀝𑀓𑀁 𑀕𑀡𑁆𑀳𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀧𑀤𑀼𑀫𑀯𑀢𑀺𑀁 𑀤𑁂𑀯𑀺𑀁 𑀧𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺? ‘‘𑀅𑀳𑀁 𑀦 𑀧𑀲𑁆𑀲𑀸𑀫𑀺, 𑀥𑀻𑀢𑀸 𑀓𑀺𑀭 𑀫𑁂 𑀧𑀲𑁆𑀲𑀢𑀻’’𑀢𑀺 𑀆𑀳. 𑀢𑁂 ‘‘𑀓𑀳𑀁 𑀧𑀦 𑀲𑀸, 𑀅𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀤𑀼𑀫𑀯𑀢𑀺𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸 ‘‘𑀧𑀤𑀼𑀫𑀯𑀢𑀻 𑀤𑁂𑀯𑀻 𑀅𑀬’’𑀦𑁆𑀢𑀺 𑀜𑀢𑁆𑀯𑀸 ‘‘𑀪𑀸𑀭𑀺𑀬𑀁 𑀯𑀢 𑀇𑀢𑁆𑀣𑀺𑀬𑀸 𑀓𑀫𑁆𑀫𑀁 𑀓𑀢𑀁, 𑀬𑀸 𑀏𑀯𑀁𑀯𑀺𑀥𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀲𑀫𑀸𑀦𑀸 𑀏𑀯𑀭𑀽𑀧𑁂 𑀞𑀸𑀦𑁂 𑀦𑀺𑀭𑀸𑀭𑀓𑁆𑀔𑀸 𑀯𑀲𑀻’’𑀢𑀺 𑀆𑀳.

𑀢𑁂𑀧𑀺 𑀭𑀸𑀚𑀧𑀼𑀭𑀺𑀲𑀸 𑀧𑀤𑀼𑀫𑀯𑀢𑀺𑀬𑀸 𑀦𑀺𑀯𑁂𑀲𑀦𑀁 𑀲𑁂𑀢𑀲𑀸𑀡𑀻𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑁂 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀼𑀯𑀡𑁆𑀡𑀲𑀺𑀯𑀺𑀓𑀁 𑀧𑁂𑀲𑁂𑀲𑀺. 𑀲𑀸 ‘‘𑀅𑀳𑀁 𑀏𑀯𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀫 𑀯𑀲𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀭𑀸𑀚𑀕𑁂𑀳𑀁 𑀏𑀢𑁆𑀣𑀦𑁆𑀢𑀭𑁂 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑁂 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀧𑀲𑀸𑀥𑀦𑀢𑁆𑀣𑀸𑀬 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀲𑀼 𑀧𑀳𑀺𑀢𑁂𑀲𑀼 𑀧𑀤𑀲𑀸𑀯 𑀕𑀫𑀺𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀦𑀸𑀕𑀭𑀸 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀧𑀤𑀼𑀫𑀯𑀢𑀺𑀬𑀸 𑀬𑀣𑀸𑀭𑀼𑀘𑀺𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑀢𑁄 𑀧𑀤𑀼𑀫𑀯𑀢𑀻 𑀲𑀩𑁆𑀩𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 ‘‘𑀭𑀸𑀚𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀣𑀲𑁆𑀲𑀸 𑀅𑀓𑁆𑀓𑀦𑁆𑀢𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀲𑀸 𑀫𑀳𑀸𑀚𑀦𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀆𑀭𑀼𑀬𑁆𑀳 𑀲𑀩𑁆𑀩𑁂𑀧𑀺 𑀢𑁂 𑀘𑁂𑀮𑀘𑀺𑀢𑁆𑀢𑀢𑁆𑀣𑀭𑀡𑁂 𑀢𑀲𑁆𑀲𑀸 𑀫𑀳𑀮𑁆𑀮𑀺𑀓𑀸𑀬 𑀧𑁄𑀲𑀸𑀯𑀦𑀺𑀓𑀫𑀽𑀮𑀁 𑀓𑀢𑁆𑀯𑀸 𑀤𑀸𑀧𑁂𑀲𑀺.

𑀭𑀸𑀚𑀸𑀧𑀺 𑀔𑁄 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀸𑀬𑁄 𑀢𑁂, 𑀤𑁂𑀯𑀺, 𑀤𑀸𑀲𑀺𑀬𑁄 𑀓𑀢𑁆𑀯𑀸 𑀤𑁂𑀫𑀻’’𑀢𑀺 𑀆𑀳. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀏𑀢𑀸𑀲𑀁 𑀫𑀬𑁆𑀳𑀁 𑀤𑀺𑀦𑁆𑀦𑀪𑀸𑀯𑀁 𑀲𑀓𑀮𑀦𑀕𑀭𑁂 𑀚𑀸𑀦𑀸𑀧𑁂𑀳𑀻’’𑀢𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀧𑀤𑀼𑀫𑀯𑀢𑀺𑀬𑀸 𑀤𑀼𑀩𑁆𑀪𑀺𑀓𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀏𑀢𑀺𑀲𑁆𑀲𑀸𑀯 𑀤𑀸𑀲𑀺𑀬𑁄 𑀓𑀢𑁆𑀯𑀸 𑀤𑀺𑀦𑁆𑀦𑀸’’𑀢𑀺. 𑀲𑀸 ‘‘𑀢𑀸𑀲𑀁 𑀲𑀓𑀮𑀦𑀸𑀕𑀭𑁂𑀦 𑀤𑀸𑀲𑀺𑀪𑀸𑀯𑁄 𑀲𑀮𑁆𑀮𑀓𑁆𑀔𑀺𑀢𑁄’’𑀢𑀺 𑀜𑀢𑁆𑀯𑀸 ‘‘𑀅𑀳𑀁 𑀫𑀫 𑀤𑀸𑀲𑀺𑀬𑁄 𑀪𑀼𑀚𑀺𑀲𑁆𑀲𑀸 𑀓𑀸𑀢𑀼𑀁 𑀮𑀪𑀸𑀫𑀺, 𑀤𑁂𑀯𑀸’’𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺. ‘‘𑀢𑀯 𑀇𑀘𑁆𑀙𑀸, 𑀤𑁂𑀯𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀫𑁂𑀯 𑀪𑁂𑀭𑀺𑀘𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘𑀧𑀤𑀼𑀫𑀯𑀢𑀺𑀤𑁂𑀯𑀺𑀬𑀸 𑀅𑀢𑁆𑀢𑀦𑁄 𑀤𑀸𑀲𑀺𑀬𑁄 𑀓𑀢𑁆𑀯𑀸 𑀤𑀺𑀦𑁆𑀦𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀲𑀩𑁆𑀩𑀸𑀯 𑀪𑀼𑀚𑀺𑀲𑁆𑀲𑀸 𑀓𑀢𑀸’𑀢𑀺 𑀧𑀼𑀦 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺 𑀆𑀳. 𑀲𑀸 𑀢𑀸𑀲𑀁 𑀪𑀼𑀚𑀺𑀲𑁆𑀲𑀪𑀸𑀯𑁂 𑀓𑀢𑁂 𑀏𑀓𑀽𑀦𑀸𑀦𑀺 𑀧𑀜𑁆𑀘𑀧𑀼𑀢𑁆𑀢𑀲𑀢𑀸𑀦𑀺 𑀢𑀸𑀲𑀁𑀬𑁂𑀯 𑀳𑀢𑁆𑀣𑁂 𑀧𑁄𑀲𑀦𑀢𑁆𑀣𑀸𑀬 𑀤𑀢𑁆𑀯𑀸 𑀲𑀬𑀁 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀁𑀬𑁂𑀯 𑀕𑀡𑁆𑀳𑀺.

𑀅𑀣𑀸𑀧𑀭𑀪𑀸𑀕𑁂 𑀢𑁂𑀲𑀁 𑀓𑀼𑀫𑀸𑀭𑀸𑀦𑀁 𑀓𑀻𑀴𑀦𑀯𑀬𑁂 𑀲𑀫𑁆𑀧𑀢𑁆𑀢𑁂 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀦𑀸𑀦𑀸𑀯𑀺𑀥𑀁 𑀓𑀻𑀴𑀦𑀝𑁆𑀞𑀸𑀦𑀁 𑀓𑀸𑀭𑁂𑀲𑀺. 𑀢𑁂 𑀅𑀢𑁆𑀢𑀦𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀲𑀩𑁆𑀩𑁂𑀯 𑀏𑀓𑀢𑁄 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀤𑀼𑀫𑀲𑀜𑁆𑀙𑀦𑁆𑀦𑀸𑀬 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀸 𑀓𑀻𑀴𑀦𑁆𑀢𑀸 𑀦𑀯𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀢𑀸𑀦𑀺 𑀧𑀼𑀭𑀸𑀡𑀧𑀤𑀼𑀫𑀸𑀦𑀺 𑀘 𑀯𑀡𑁆𑀝𑀢𑁄 𑀧𑀢𑀦𑁆𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀢𑀸𑀯 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑁆𑀲 𑀏𑀯𑀭𑀽𑀧𑀸 𑀚𑀭𑀸 𑀧𑀸𑀧𑀼𑀡𑀸𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀫𑁆𑀳𑀸𑀓𑀁 𑀲𑀭𑀻𑀭𑀲𑁆𑀲. 𑀇𑀤𑀫𑁆𑀧𑀺 𑀳𑀺 𑀏𑀯𑀁𑀕𑀢𑀺𑀓𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀯 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀢𑀭𑀸𑀚𑀧𑀼𑀭𑀺𑀲𑀸 𑀩𑀳𑀼𑀕𑀢𑀁 𑀤𑀺𑀯𑀲𑀁 𑀜𑀢𑁆𑀯𑀸 ‘‘𑀅𑀬𑁆𑀬𑀧𑀼𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀯𑁂𑀮𑀁 𑀚𑀸𑀦𑀸𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀼𑀫𑀸𑀭𑀸, 𑀤𑁂𑀯, 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀦𑀺𑀲𑀺𑀦𑁆𑀦𑀸, 𑀅𑀫𑁆𑀳𑁂𑀲𑀼 𑀓𑀣𑁂𑀦𑁆𑀢𑁂𑀲𑀼𑀧𑀺 𑀯𑀘𑀻𑀪𑁂𑀤𑀁 𑀦 𑀓𑀭𑁄𑀦𑁆𑀢𑀻’’𑀢𑀺. ‘‘𑀬𑀣𑀸𑀭𑀼𑀘𑀺𑀬𑀸 𑀦𑁂𑀲𑀁 𑀦𑀺𑀲𑀻𑀤𑀺𑀢𑀼𑀁 𑀤𑁂𑀣𑀸’’𑀢𑀺. 𑀢𑁂 𑀲𑀩𑁆𑀩𑀭𑀢𑁆𑀢𑀺𑀁 𑀕𑀳𑀺𑀢𑀸𑀭𑀓𑁆𑀔𑀸 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀦𑀺𑀲𑀺𑀦𑁆𑀦𑀦𑀺𑀬𑀸𑀫𑁂𑀦𑁂𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀲𑀼𑀁. 𑀧𑀼𑀭𑀺𑀲𑀸 𑀧𑀼𑀦𑀤𑀺𑀯𑀲𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯𑀸, 𑀯𑁂𑀮𑀁 𑀚𑀸𑀦𑀸𑀣𑀸’’𑀢𑀺 𑀆𑀳𑀁𑀲𑀼. ‘‘𑀦 𑀫𑀬𑀁 𑀤𑁂𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀫𑀬𑀁 𑀅𑀫𑁆𑀳𑀸’’𑀢𑀺. ‘‘𑀅𑀬𑁆𑀬𑀸, 𑀢𑀼𑀫𑁆𑀳𑁂 𑀪𑀸𑀭𑀺𑀬𑀁 𑀓𑀣𑀁 𑀓𑀣𑁂𑀣, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸 𑀦 𑀳𑁄𑀦𑁆𑀢𑀺, 𑀤𑁆𑀯𑀗𑁆𑀕𑀼𑀮𑀓𑁂𑀲𑀫𑀲𑁆𑀲𑀼𑀥𑀭𑀸 𑀓𑀸𑀬𑁂 𑀧𑀝𑀺𑀫𑀼𑀓𑁆𑀓𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀻’’𑀢𑀺. 𑀢𑁂 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀲𑀻𑀲𑀁 𑀧𑀭𑀸𑀫𑀲𑀺𑀁𑀲𑀼, 𑀢𑀸𑀯𑀤𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺. 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀓𑀸𑀬𑁂 𑀧𑀝𑀺𑀫𑀼𑀓𑁆𑀓𑀸 𑀘 𑀅𑀳𑁂𑀲𑀼𑀁. 𑀢𑀢𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀁𑀲𑀼.

𑀲𑀸𑀧𑀺 𑀔𑁄 𑀧𑀤𑀼𑀫𑀯𑀢𑀻 𑀤𑁂𑀯𑀻 ‘‘𑀅𑀳𑀁 𑀩𑀳𑀼𑀧𑀼𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀧𑀼𑀢𑁆𑀢𑀸 𑀚𑀸𑀢𑀸’’𑀢𑀺 𑀳𑀤𑀬𑀲𑁄𑀓𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀲𑁄𑀓𑁂𑀦 𑀓𑀸𑀮𑀗𑁆𑀓𑀢𑁆𑀯𑀸 𑀭𑀸𑀚𑀕𑀳𑀦𑀕𑀭𑁂 𑀤𑁆𑀯𑀸𑀭𑀕𑀸𑀫𑀓𑁂 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀓𑀼𑀮𑀖𑀭𑀁 𑀕𑀢𑀸 𑀏𑀓𑀤𑀺𑀯𑀲𑀁 𑀲𑀸𑀫𑀺𑀓𑀲𑁆𑀲 𑀔𑁂𑀢𑁆𑀢𑀁 𑀬𑀸𑀕𑀼𑀁 𑀳𑀭𑀫𑀸𑀦𑀸 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀧𑀲𑁆𑀲, 𑀅𑀬𑁆𑀬, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂, 𑀏𑀢𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀲𑁄 𑀆𑀳 𑁋 ‘‘𑀲𑀫𑀡𑀲𑀓𑀼𑀡𑀸 𑀦𑀸𑀫𑁂𑀢𑁂 𑀅𑀜𑁆𑀜𑀢𑁆𑀣𑀸𑀧𑀺 𑀏𑀯𑀁 𑀘𑀭𑀦𑁆𑀢𑀺, 𑀦 𑀏𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺 𑀢𑁂 𑀢𑁂𑀲𑀁 𑀓𑀣𑁂𑀦𑁆𑀢𑀸𑀦𑀁𑀬𑁂𑀯 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀑𑀢𑀭𑀺𑀁𑀲𑀼. 𑀲𑀸 𑀇𑀢𑁆𑀣𑀻 𑀢𑀁 𑀤𑀺𑀯𑀲𑀁 𑀅𑀢𑁆𑀢𑀦𑁄 𑀪𑀢𑁆𑀢𑀔𑀚𑁆𑀚𑀪𑁄𑀚𑀦𑀁 𑀢𑁂𑀲𑀁 𑀤𑀢𑁆𑀯𑀸 ‘‘𑀲𑁆𑀯𑁂𑀧𑀺 𑀅𑀝𑁆𑀞 𑀚𑀦𑀸 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. ‘‘𑀲𑀸𑀥𑀼, 𑀉𑀧𑀸𑀲𑀺𑀓𑁂, 𑀢𑀯 𑀲𑀓𑁆𑀓𑀸𑀭𑁄 𑀏𑀢𑁆𑀢𑀓𑁄𑀯 𑀳𑁄𑀢𑀼, 𑀆𑀲𑀦𑀸𑀦𑀺 𑀘 𑀅𑀝𑁆𑀞𑁂𑀯 𑀳𑁄𑀦𑁆𑀢𑀼, 𑀅𑀜𑁆𑀜𑁂𑀧𑀺 𑀩𑀳𑀽 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀢𑀯 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀅𑀝𑁆𑀞 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀦𑀺𑀫𑀦𑁆𑀢𑀺𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑁂𑀲𑀸𑀦𑀁 𑀲𑀜𑁆𑀜𑀁 𑀅𑀤𑀁𑀲𑀼 𑁋 ‘‘𑀫𑀸𑀭𑀺𑀲𑀸 𑀅𑀚𑁆𑀚 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀯 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀯 𑀏𑀓𑀢𑁄 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀫𑀸𑀢𑀼𑀖𑀭𑀤𑁆𑀯𑀸𑀭𑁂 𑀧𑀸𑀢𑀼𑀭𑀳𑁂𑀲𑀼𑀁. 𑀲𑀸𑀧𑀺 𑀧𑀞𑀫𑀁 𑀮𑀤𑁆𑀥𑀲𑀜𑁆𑀜𑀢𑀸𑀬 𑀩𑀳𑀽𑀧𑀺 𑀤𑀺𑀲𑁆𑀯𑀸 𑀦 𑀓𑀫𑁆𑀧𑀺𑀢𑁆𑀣. 𑀲𑀩𑁆𑀩𑁂𑀧𑀺 𑀢𑁂 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑁂𑀲𑀼 𑀦𑀺𑀲𑀻𑀤𑀸𑀧𑁂𑀲𑀺. 𑀢𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀦𑁆𑀢𑁂𑀲𑀼 𑀦𑀯𑀫𑁄 𑀅𑀜𑁆𑀜𑀸𑀦𑀺 𑀅𑀝𑁆𑀞 𑀆𑀲𑀦𑀸𑀦𑀺 𑀫𑀸𑀧𑁂𑀢𑁆𑀯𑀸 𑀲𑀬𑀁 𑀥𑀼𑀭𑀸𑀲𑀦𑁂 𑀦𑀺𑀲𑀻𑀤𑀢𑀺, 𑀬𑀸𑀯 𑀆𑀲𑀦𑀸𑀦𑀺 𑀯𑀟𑁆𑀠𑀦𑁆𑀢𑀺, 𑀢𑀸𑀯 𑀕𑁂𑀳𑀁 𑀯𑀟𑁆𑀠𑀢𑀺. 𑀏𑀯𑀁 𑀢𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀦𑀺𑀲𑀺𑀦𑁆𑀦𑁂𑀲𑀼 𑀲𑀸 𑀇𑀢𑁆𑀣𑀻 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀝𑀺𑀬𑀸𑀤𑀺𑀢𑀁 𑀲𑀓𑁆𑀓𑀸𑀭𑀁 𑀧𑀜𑁆𑀘𑀲𑀢𑀸𑀦𑀫𑁆𑀧𑀺 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀅𑀝𑁆𑀞 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑁂 𑀆𑀳𑀭𑀺𑀢𑁆𑀯𑀸 𑀦𑀺𑀫𑀦𑁆𑀢𑀺𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀯𑀡𑁆𑀡𑁄 𑀇𑀫𑁂𑀲𑀁 𑀦𑀻𑀮𑀼𑀧𑁆𑀧𑀮𑀸𑀦𑀁 𑀅𑀦𑁆𑀢𑁄𑀕𑀩𑁆𑀪𑀯𑀡𑁆𑀡𑁄 𑀯𑀺𑀬 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀫𑀸𑀢𑀼 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀁𑀬𑁂𑀯 𑀅𑀕𑀫𑀁𑀲𑀼.

𑀲𑀸𑀧𑀺 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀻𑀮𑀼𑀧𑁆𑀧𑀮𑀕𑀩𑁆𑀪𑀲𑀫𑀸𑀦𑀯𑀡𑁆𑀡𑀢𑀸𑀬 𑀘𑀲𑁆𑀲𑀸 𑀉𑀧𑁆𑀧𑀮𑀯𑀡𑁆𑀡𑀸𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀘 𑀲𑁂𑀝𑁆𑀞𑀺𑀦𑁄 𑀘 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀤𑀽𑀢𑀁 𑀧𑀳𑀺𑀡𑀺𑀁𑀲𑀼 ‘‘𑀥𑀻𑀢𑀭𑀁 𑀅𑀫𑁆𑀳𑀸𑀓𑀁 𑀤𑁂𑀢𑀽’’𑀢𑀺. 𑀅𑀧𑀳𑀺𑀡𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑀢𑁄 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀩𑁆𑀩𑁂𑀲𑀁 𑀫𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀉𑀧𑀸𑀬𑀁 𑀧𑀦𑁂𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑀼𑀁, 𑀅𑀫𑁆𑀫, 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀲𑁆𑀲𑀸 𑀧𑀘𑁆𑀙𑀺𑀫𑀪𑀯𑀺𑀓𑀢𑁆𑀢𑀸 𑀧𑀺𑀢𑀼 𑀯𑀘𑀦𑀁 𑀲𑀻𑀲𑁂 𑀆𑀲𑀺𑀢𑁆𑀢𑀲𑀢𑀧𑀸𑀓𑀢𑁂𑀮𑀁 𑀯𑀺𑀬 𑀅𑀳𑁄𑀲𑀺. 𑀢𑀲𑁆𑀫𑀸 𑀧𑀺𑀢𑀭𑀁 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸𑀬 𑀏𑀯 𑀉𑀧𑁄𑀲𑀣𑀸𑀕𑀸𑀭𑁂 𑀓𑀸𑀮𑀯𑀸𑀭𑁄 𑀧𑀸𑀧𑀼𑀡𑀺. 𑀲𑀸 𑀧𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀻𑀧𑀲𑀺𑀔𑀸𑀬 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀞𑀺𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀬𑀫𑀸𑀦𑀸 𑀢𑁂𑀚𑁄𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀨𑀮𑁂𑀦 𑀲𑀤𑁆𑀥𑀺𑀁𑀬𑁂𑀯 𑀘 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑀺 𑀇𑀚𑁆𑀛𑀺𑀁𑀲𑀼. 𑀯𑀺𑀲𑁂𑀲𑀢𑁄 𑀧𑀦 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁨.𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀅𑀧𑀤𑀸𑀦, 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀁) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀫𑀳𑀸𑀲𑀼𑀔𑀲𑀫𑀧𑁆𑀧𑀺𑀢𑀸.

‘‘𑀉𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀢𑀢𑁄 𑀚𑀸𑀢𑀧𑁆𑀧𑀲𑀸𑀤𑀸𑀳𑀁, 𑀉𑀧𑁂𑀫𑀺 𑀲𑀭𑀡𑀁 𑀚𑀺𑀦𑀁.

‘‘𑀪𑀕𑀯𑀸 𑀇𑀤𑁆𑀥𑀺𑀫𑀦𑁆𑀢𑀻𑀦𑀁, 𑀅𑀕𑁆𑀕𑀁 𑀯𑀡𑁆𑀡𑁂𑀲𑀺 𑀦𑀸𑀬𑀓𑁄;

𑀪𑀺𑀓𑁆𑀔𑀼𑀦𑀺𑀁 𑀮𑀚𑁆𑀚𑀺𑀦𑀺𑀁 𑀢𑀸𑀤𑀺𑀁, 𑀲𑀫𑀸𑀥𑀺𑀛𑀸𑀦𑀓𑁄𑀯𑀺𑀤𑀁.

‘‘𑀢𑀤𑀸 𑀫𑀼𑀤𑀺𑀢𑀘𑀺𑀢𑁆𑀢𑀸𑀳𑀁, 𑀢𑀁 𑀞𑀸𑀦𑀁 𑀅𑀪𑀺𑀓𑀗𑁆𑀔𑀺𑀦𑀻;

𑀦𑀺𑀫𑀦𑁆𑀢𑀺𑀢𑁆𑀯𑀸 𑀤𑀲𑀩𑀮𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

‘‘𑀪𑁄𑀚𑀬𑀺𑀢𑁆𑀯𑀸𑀦 𑀲𑀢𑁆𑀢𑀸𑀳𑀁, 𑀤𑀢𑁆𑀯𑀸𑀦 𑀘 𑀢𑀺𑀘𑀻𑀯𑀭𑀁;

𑀲𑀢𑁆𑀢𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀉𑀧𑁆𑀧𑀮𑀸𑀤𑁂𑀯𑀕𑀦𑁆𑀥𑀺𑀓𑀁.

‘‘𑀲𑀢𑁆𑀣𑀼 𑀧𑀸𑀤𑁂 𑀞𑀧𑁂𑀢𑁆𑀯𑀸𑀦, 𑀜𑀸𑀡𑀫𑁆𑀳𑀺 𑀅𑀪𑀺𑀧𑀽𑀚𑀬𑀺𑀁;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀬𑀸𑀤𑀺𑀲𑀸 𑀯𑀡𑁆𑀡𑀺𑀢𑀸 𑀯𑀻𑀭, 𑀇𑀢𑁄 𑀅𑀝𑁆𑀞𑀫𑀓𑁂 𑀫𑀼𑀦𑀺;

𑀢𑀸𑀤𑀺𑀲𑀸𑀳𑀁 𑀪𑀯𑀺𑀲𑁆𑀲𑀸𑀫𑀺, 𑀬𑀤𑀺 𑀲𑀺𑀚𑁆𑀛𑀢𑀺 𑀦𑀸𑀬𑀓.

‘‘𑀢𑀤𑀸 𑀅𑀯𑁄𑀘 𑀫𑀁 𑀲𑀢𑁆𑀣𑀸, 𑀯𑀺𑀲𑁆𑀲𑀝𑁆𑀞𑀸 𑀳𑁄𑀢𑀺 𑀤𑀸𑀭𑀺𑀓𑁂;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀦𑀸𑀫𑁂𑀦𑀼𑀧𑁆𑀧𑀮𑀯𑀡𑁆𑀡𑀸𑀢𑀺, 𑀭𑀽𑀧𑁂𑀦 𑀘 𑀬𑀲𑀲𑁆𑀲𑀺𑀦𑀻.

‘‘𑀅𑀪𑀺𑀜𑁆𑀜𑀸𑀲𑀼 𑀯𑀲𑀺𑀧𑁆𑀧𑀢𑁆𑀢𑀸, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀳𑁂𑀲𑁆𑀲𑀲𑀻 𑀲𑀢𑁆𑀣𑀼 𑀲𑀸𑀯𑀺𑀓𑀸.

‘‘𑀢𑀤𑀸𑀳𑀁 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁄 𑀘𑀼𑀢𑀸𑀳𑀁 𑀫𑀦𑀼𑀚𑁂, 𑀉𑀧𑀧𑀦𑁆𑀦𑀸 𑀲𑀬𑀫𑁆𑀪𑀼𑀦𑁄;

𑀉𑀧𑁆𑀧𑀮𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀧𑀺𑀡𑁆𑀟𑀧𑀸𑀢𑀫𑀤𑀸𑀲𑀳𑀁.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸.

‘‘𑀲𑁂𑀝𑁆𑀞𑀺𑀥𑀻𑀢𑀸 𑀢𑀤𑀸 𑀳𑀼𑀢𑁆𑀯𑀸, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂;

𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

‘‘𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀉𑀧𑁆𑀧𑀮𑁂𑀳𑀺 𑀯𑀺𑀦𑀸𑀬𑀓𑀁;

𑀧𑀽𑀚𑀬𑀺𑀢𑁆𑀯𑀸 𑀘𑁂𑀢𑀲𑀸𑀯, 𑀯𑀡𑁆𑀡𑀲𑁄𑀪𑀁 𑀅𑀧𑀢𑁆𑀣𑀬𑀺𑀁.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀢𑀲𑁆𑀲𑀸𑀲𑀺𑀁 𑀤𑀼𑀢𑀺𑀬𑀸 𑀥𑀻𑀢𑀸, 𑀲𑀫𑀡𑀕𑀼𑀢𑁆𑀢𑀲𑀯𑁆𑀳𑀬𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢𑀥𑀻𑀢𑀭𑁄.

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸.

‘‘𑀅𑀳𑀁 𑀔𑁂𑀫𑀸 𑀘 𑀲𑀧𑁆𑀧𑀜𑁆𑀜𑀸, 𑀧𑀝𑀸𑀘𑀸𑀭𑀸 𑀘 𑀓𑀼𑀡𑁆𑀟𑀮𑀸;

𑀓𑀺𑀲𑀸𑀕𑁄𑀢𑀫𑀻 𑀥𑀫𑁆𑀫𑀤𑀺𑀦𑁆𑀦𑀸, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼, 𑀉𑀧𑀧𑀦𑁆𑀦𑀸 𑀫𑀳𑀸𑀓𑀼𑀮𑁂;

𑀧𑀻𑀢𑀁 𑀫𑀝𑁆𑀞𑀁 𑀯𑀭𑀁 𑀤𑀼𑀲𑁆𑀲𑀁, 𑀅𑀤𑀁 𑀅𑀭𑀳𑀢𑁄 𑀅𑀳𑀁.

‘‘𑀢𑀢𑁄 𑀘𑀼𑀢𑀸𑀭𑀺𑀝𑁆𑀞𑀧𑀼𑀭𑁂, 𑀚𑀸𑀢𑀸 𑀯𑀺𑀧𑁆𑀧𑀓𑀼𑀮𑁂 𑀅𑀳𑀁;

𑀥𑀻𑀢𑀸 𑀢𑀺𑀭𑀺𑀝𑀺𑀯𑀘𑁆𑀙𑀲𑁆𑀲, 𑀉𑀫𑁆𑀫𑀸𑀤𑀦𑁆𑀢𑀻 𑀫𑀦𑁄𑀳𑀭𑀸.

‘‘𑀢𑀢𑁄 𑀘𑀼𑀢𑀸 𑀚𑀦𑀧𑀤𑁂, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀁;

𑀧𑀲𑀽𑀢𑀸 𑀦𑀸𑀢𑀺𑀨𑀻𑀢𑀫𑁆𑀳𑀺, 𑀲𑀸𑀮𑀺𑀁 𑀕𑁄𑀧𑁂𑀫𑀳𑀁 𑀢𑀤𑀸.

‘‘𑀤𑀺𑀲𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁, 𑀧𑀜𑁆𑀘𑀮𑀸𑀚𑀲𑀢𑀸𑀦𑀺𑀳𑀁;

𑀤𑀢𑁆𑀯𑀸 𑀧𑀤𑀼𑀫𑀘𑁆𑀙𑀦𑁆𑀦𑀸𑀦𑀺, 𑀧𑀜𑁆𑀘 𑀧𑀼𑀢𑁆𑀢𑀲𑀢𑀸𑀦𑀺𑀳𑀁.

‘‘𑀧𑀢𑁆𑀣𑀬𑀺𑀁 𑀢𑁂𑀧𑀺 𑀧𑀢𑁆𑀣𑁂𑀲𑀼𑀁, 𑀫𑀥𑀼𑀁 𑀤𑀢𑁆𑀯𑀸 𑀲𑀬𑀫𑁆𑀪𑀼𑀦𑁄;

𑀢𑀢𑁄 𑀘𑀼𑀢𑀸 𑀅𑀭𑀜𑁆𑀜𑁂𑀳𑀁, 𑀅𑀚𑀸𑀬𑀺𑀁 𑀧𑀤𑀼𑀫𑁄𑀤𑀭𑁂.

‘‘𑀓𑀸𑀲𑀺𑀭𑀜𑁆𑀜𑁄 𑀫𑀳𑁂𑀲𑀻𑀳𑀁, 𑀳𑀼𑀢𑁆𑀯𑀸 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀅𑀚𑀦𑀺𑀁 𑀭𑀸𑀚𑀧𑀼𑀢𑁆𑀢𑀸𑀦𑀁, 𑀅𑀦𑀽𑀦𑀁 𑀲𑀢𑀧𑀜𑁆𑀘𑀓𑀁.

‘‘𑀬𑀤𑀸 𑀢𑁂 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸, 𑀓𑀻𑀴𑀦𑁆𑀢𑀸 𑀚𑀮𑀓𑀻𑀴𑀺𑀢𑀁;

𑀤𑀺𑀲𑁆𑀯𑀸 𑀑𑀧𑀢𑁆𑀢𑀧𑀤𑀼𑀫𑀁, 𑀆𑀲𑀼𑀁 𑀧𑀘𑁆𑀘𑁂𑀓𑀦𑀸𑀬𑀓𑀸.

‘‘𑀲𑀸𑀳𑀁 𑀢𑁂𑀳𑀺 𑀯𑀺𑀦𑀸𑀪𑀽𑀢𑀸, 𑀲𑀼𑀢𑀯𑀻𑀭𑁂𑀳𑀺 𑀲𑁄𑀓𑀺𑀦𑀻;

𑀘𑀼𑀢𑀸 𑀇𑀲𑀺𑀕𑀺𑀮𑀺𑀧𑀲𑁆𑀲𑁂, 𑀕𑀸𑀫𑀓𑀫𑁆𑀳𑀺 𑀅𑀚𑀸𑀬𑀺𑀳𑀁.

‘‘𑀬𑀤𑀸 𑀩𑀼𑀤𑁆𑀥𑁄 𑀲𑀼𑀢𑀫𑀢𑀻, 𑀲𑀼𑀢𑀸𑀦𑀁 𑀪𑀢𑁆𑀢𑀼𑀦𑁄𑀧𑀺 𑀘;

𑀬𑀸𑀕𑀼𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀻, 𑀅𑀝𑁆𑀞 𑀧𑀘𑁆𑀘𑁂𑀓𑀦𑀸𑀬𑀓𑁂.

‘‘𑀪𑀺𑀓𑁆𑀔𑀸𑀬 𑀕𑀸𑀫𑀁 𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸 𑀧𑀼𑀢𑁆𑀢𑁂 𑀅𑀦𑀼𑀲𑁆𑀲𑀭𑀺𑀁;

𑀔𑀻𑀭𑀥𑀸𑀭𑀸 𑀯𑀺𑀦𑀺𑀕𑁆𑀕𑀘𑁆𑀙𑀺, 𑀢𑀤𑀸 𑀫𑁂 𑀧𑀼𑀢𑁆𑀢𑀧𑁂𑀫𑀲𑀸.

‘‘𑀢𑀢𑁄 𑀢𑁂𑀲𑀁 𑀅𑀤𑀁 𑀬𑀸𑀕𑀼𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀢𑁄 𑀘𑀼𑀢𑀸𑀳𑀁 𑀢𑀺𑀤𑀲𑀁, 𑀦𑀦𑁆𑀤𑀦𑀁 𑀉𑀧𑀧𑀚𑁆𑀚𑀳𑀁.

‘‘𑀅𑀦𑀼𑀪𑁄𑀢𑁆𑀯𑀸 𑀲𑀼𑀔𑀁 𑀤𑀼𑀓𑁆𑀔𑀁, 𑀲𑀁𑀲𑀭𑀺𑀢𑁆𑀯𑀸 𑀪𑀯𑀸𑀪𑀯𑁂;

𑀢𑀯𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀭𑀺𑀘𑁆𑀘𑀢𑁆𑀢𑀜𑁆𑀘 𑀚𑀻𑀯𑀺𑀢𑀁.

‘‘𑀥𑀻𑀢𑀸 𑀢𑀼𑀬𑁆𑀳𑀁 𑀫𑀳𑀸𑀯𑀻𑀭, 𑀧𑀜𑁆𑀜𑀯𑀦𑁆𑀢 𑀚𑀼𑀢𑀺𑀦𑁆𑀥𑀭;

𑀩𑀳𑀼𑀜𑁆𑀘 𑀤𑀼𑀓𑁆𑀓𑀭𑀁 𑀓𑀫𑁆𑀫𑀁, 𑀓𑀢𑀁 𑀫𑁂 𑀅𑀢𑀺𑀤𑀼𑀓𑁆𑀓𑀭𑀁.

‘‘𑀭𑀸𑀳𑀼𑀮𑁄 𑀘 𑀅𑀳𑀜𑁆𑀘𑁂𑀯, 𑀦𑁂𑀓𑀚𑀸𑀢𑀺𑀲𑀢𑁂 𑀩𑀳𑀽;

𑀏𑀓𑀲𑁆𑀫𑀺𑀁 𑀲𑀫𑁆𑀪𑀯𑁂 𑀚𑀸𑀢𑀸, 𑀲𑀫𑀸𑀦𑀘𑁆𑀙𑀦𑁆𑀤𑀫𑀸𑀦𑀲𑀸.

‘‘𑀦𑀺𑀩𑁆𑀩𑀢𑁆𑀢𑀺 𑀏𑀓𑀢𑁄 𑀳𑁄𑀢𑀺, 𑀚𑀸𑀢𑀺𑀬𑀸𑀧𑀺 𑀘 𑀏𑀓𑀢𑁄;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀉𑀪𑁄𑀧𑀺 𑀦𑀸𑀦𑀸𑀲𑀫𑁆𑀪𑀯𑀸.

‘‘𑀧𑀼𑀭𑀺𑀫𑀸𑀦𑀁 𑀚𑀺𑀦𑀕𑁆𑀕𑀸𑀦𑀁, 𑀲𑀗𑁆𑀕𑀫𑀁 𑀢𑁂 𑀦𑀺𑀤𑀲𑁆𑀲𑀺𑀢𑀁;

𑀅𑀥𑀺𑀓𑀸𑀭𑀁 𑀩𑀳𑀼𑀁 𑀫𑀬𑁆𑀳𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

‘‘𑀬𑀁 𑀫𑀬𑀸 𑀧𑀽𑀭𑀺𑀢𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀲𑀭 𑀫𑁂 𑀫𑀼𑀦𑀺;

𑀢𑀯𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀼𑀜𑁆𑀜𑀁 𑀉𑀧𑀘𑀺𑀢𑀁 𑀫𑀬𑀸.

‘‘𑀅𑀪𑀩𑁆𑀩𑀝𑁆𑀞𑀸𑀦𑁂 𑀯𑀚𑁆𑀚𑁂𑀢𑁆𑀯𑀸, 𑀯𑀸𑀭𑀬𑀦𑁆𑀢𑀺 𑀅𑀦𑀸𑀘𑀸𑀭𑀁;

𑀢𑀯𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀘𑀢𑁆𑀢𑀁 𑀫𑁂 𑀚𑀻𑀯𑀺𑀢𑀁 𑀩𑀳𑀼𑀁.

‘‘𑀏𑀯𑀁 𑀩𑀳𑀼𑀯𑀺𑀥𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀢𑁆𑀢𑀺 𑀘 𑀩𑀳𑀼𑀩𑁆𑀩𑀺𑀥𑀸;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀚𑀸𑀢𑀸 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂.

‘‘𑀫𑀳𑀸𑀥𑀦𑀲𑁂𑀝𑁆𑀞𑀺𑀓𑀼𑀮𑁂, 𑀲𑀼𑀔𑀺𑀢𑁂 𑀲𑀚𑁆𑀚𑀺𑀢𑁂 𑀢𑀣𑀸;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑁂.

‘‘𑀲𑀓𑁆𑀓𑀢𑀸 𑀧𑀽𑀚𑀺𑀢𑀸 𑀘𑁂𑀯, 𑀫𑀸𑀦𑀺𑀢𑀸𑀧𑀘𑀺𑀢𑀸 𑀢𑀣𑀸;

𑀭𑀽𑀧𑀲𑀻𑀭𑀺𑀫𑀦𑀼𑀧𑁆𑀧𑀢𑁆𑀢𑀸, 𑀓𑀼𑀮𑁂𑀲𑀼 𑀅𑀪𑀺𑀲𑀓𑁆𑀓𑀢𑀸.

‘‘𑀅𑀢𑀻𑀯 𑀧𑀢𑁆𑀣𑀺𑀢𑀸 𑀘𑀸𑀲𑀺𑀁, 𑀭𑀽𑀧𑀲𑁄𑀪𑀲𑀺𑀭𑀻𑀳𑀺 𑀘;

𑀧𑀢𑁆𑀣𑀺𑀢𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺, 𑀅𑀦𑁂𑀓𑁂𑀳𑀺 𑀲𑀢𑁂𑀳𑀺𑀧𑀺.

‘‘𑀅𑀕𑀸𑀭𑀁 𑀧𑀚𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀟𑁆𑀠𑀫𑀸𑀲𑁂 𑀅𑀲𑀫𑁆𑀧𑀢𑁆𑀢𑁂, 𑀘𑀢𑀼𑀲𑀘𑁆𑀘𑀫𑀧𑀸𑀧𑀼𑀡𑀺𑀁.

‘‘𑀇𑀤𑁆𑀥𑀺𑀬𑀸 𑀅𑀪𑀺𑀦𑀺𑀫𑁆𑀫𑀺𑀢𑁆𑀯𑀸, 𑀘𑀢𑀼𑀭𑀲𑁆𑀲𑀁 𑀭𑀣𑀁 𑀅𑀳𑀁;

𑀩𑀼𑀤𑁆𑀥𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀲𑁆𑀲𑀁, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀧𑀪𑀸𑀯𑁂𑀦 𑀫𑀳𑁂𑀲𑀺𑀦𑁄.

‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀔𑀡𑁂𑀦 𑀉𑀧𑀦𑀸𑀫𑁂𑀦𑁆𑀢𑀺, 𑀲𑀳𑀲𑁆𑀲𑀸𑀦𑀺 𑀲𑀫𑀦𑁆𑀢𑀢𑁄.

‘‘𑀚𑀺𑀦𑁄 𑀢𑀫𑁆𑀳𑀺 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀅𑀕𑁆𑀕𑀸 𑀇𑀤𑁆𑀥𑀺𑀫𑀢𑀻𑀦𑀦𑁆𑀢𑀺, 𑀧𑀭𑀺𑀲𑀸𑀲𑀼 𑀯𑀺𑀦𑀸𑀬𑀓𑁄.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀬𑀁 𑀧𑀦 𑀣𑁂𑀭𑀻 𑀬𑀤𑀸 𑀪𑀕𑀯𑀸 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀜𑁆𑀙𑀺, 𑀢𑀤𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀬𑀤𑀺 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀺. 𑀲𑀢𑁆𑀣𑀸 𑀇𑀤𑀁 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀇𑀤𑁆𑀥𑀺𑀫𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑀻 𑀏𑀓𑀤𑀺𑀯𑀲𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀸 𑀕𑀗𑁆𑀕𑀸𑀢𑀻𑀭𑀺𑀬𑀢𑁆𑀣𑁂𑀭𑀲𑁆𑀲 𑀫𑀸𑀢𑀼𑀬𑀸 𑀥𑀻𑀢𑀸𑀬 𑀲𑀤𑁆𑀥𑀺𑀁 𑀲𑀧𑀢𑁆𑀢𑀺𑀯𑀸𑀲𑀁 𑀉𑀤𑁆𑀤𑀺𑀲𑁆𑀲 𑀲𑀁𑀯𑁂𑀕𑀚𑀸𑀢𑀸𑀬 𑀯𑀼𑀢𑁆𑀢𑀕𑀸𑀣𑀸 𑀧𑀘𑁆𑀘𑀦𑀼𑀪𑀸𑀲𑀦𑁆𑀢𑀻 𑁋

𑁨𑁨𑁪.

‘‘𑀉𑀪𑁄 𑀫𑀸𑀢𑀸 𑀘 𑀥𑀻𑀢𑀸 𑀘, 𑀫𑀬𑀁 𑀆𑀲𑀼𑀁 𑀲𑀧𑀢𑁆𑀢𑀺𑀬𑁄;

𑀢𑀲𑁆𑀲𑀸 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑁨𑁨𑁫.

‘‘𑀥𑀺𑀭𑀢𑁆𑀣𑀼 𑀓𑀸𑀫𑀸 𑀅𑀲𑀼𑀘𑀻, 𑀤𑀼𑀕𑁆𑀕𑀦𑁆𑀥𑀸 𑀩𑀳𑀼𑀓𑀡𑁆𑀝𑀓𑀸;

𑀬𑀢𑁆𑀣 𑀫𑀸𑀢𑀸 𑀘 𑀥𑀻𑀢𑀸 𑀘, 𑀲𑀪𑀭𑀺𑀬𑀸 𑀫𑀬𑀁 𑀅𑀳𑀼𑀁.

𑁨𑁨𑁬.

‘‘𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀲𑀸 𑀧𑀩𑁆𑀩𑀚𑀺𑀁 𑀭𑀸𑀚𑀕𑀳𑁂, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬’’𑀦𑁆𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀪𑁄 𑀫𑀸𑀢𑀸 𑀘 𑀥𑀻𑀢𑀸 𑀘, 𑀫𑀬𑀁 𑀆𑀲𑀼𑀁 𑀲𑀧𑀢𑁆𑀢𑀺𑀬𑁄𑀢𑀺 𑀫𑀸𑀢𑀸 𑀘 𑀥𑀻𑀢𑀸 𑀘𑀸𑀢𑀺 𑀉𑀪𑁄 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀲𑀧𑀢𑁆𑀢𑀺𑀬𑁄 𑀅𑀳𑀼𑀫𑁆𑀳.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀯𑀸𑀡𑀺𑀚𑀲𑁆𑀲 𑀪𑀭𑀺𑀬𑀸𑀬 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺, 𑀲𑀸 𑀢𑀁 𑀦 𑀅𑀜𑁆𑀜𑀸𑀲𑀺. 𑀯𑀸𑀡𑀺𑀚𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀓𑀝𑁂𑀲𑀼 𑀪𑀡𑁆𑀟𑀁 𑀆𑀭𑁄𑀧𑁂𑀢𑁆𑀯𑀸 𑀭𑀸𑀚𑀕𑀳𑀁 𑀉𑀤𑁆𑀤𑀺𑀲𑁆𑀲 𑀕𑀢𑁄. 𑀢𑀲𑁆𑀲𑀸 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀕𑀩𑁆𑀪𑁄 𑀯𑀟𑁆𑀠𑁂𑀢𑁆𑀯𑀸 𑀧𑀭𑀺𑀧𑀸𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀲𑁆𑀲𑀼 𑀏𑀯𑀫𑀸𑀳 𑁋 ‘‘𑀫𑀫 𑀧𑀼𑀢𑁆𑀢𑁄 𑀘𑀺𑀭𑀧𑁆𑀧𑀯𑀼𑀢𑁆𑀣𑁄 𑀢𑁆𑀯𑀜𑁆𑀘 𑀕𑀩𑁆𑀪𑀺𑀦𑀻, 𑀧𑀸𑀧𑀓𑀁 𑀢𑀬𑀸 𑀓𑀢’’𑀦𑁆𑀢𑀺. 𑀲𑀸 ‘‘𑀢𑀯 𑀧𑀼𑀢𑁆𑀢𑀢𑁄 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀦 𑀚𑀸𑀦𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸𑀧𑀺 𑀲𑀲𑁆𑀲𑀼 𑀅𑀲𑀤𑁆𑀤𑀳𑀦𑁆𑀢𑀻 𑀢𑀁 𑀖𑀭𑀢𑁄 𑀦𑀺𑀓𑁆𑀓𑀟𑁆𑀠𑀺. 𑀲𑀸 𑀲𑀸𑀫𑀺𑀓𑀁 𑀕𑀯𑁂𑀲𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀲𑀫𑁆𑀧𑀢𑁆𑀢𑀸. 𑀢𑀸𑀯𑀤𑁂𑀯 𑀘𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑁂𑀲𑀼 𑀘𑀮𑀦𑁆𑀢𑁂𑀲𑀼 𑀫𑀕𑁆𑀕𑀲𑀫𑀻𑀧𑁂 𑀅𑀜𑁆𑀜𑀢𑀭𑀁 𑀲𑀸𑀮𑀁 𑀧𑀯𑀺𑀝𑁆𑀞𑀸𑀬 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑀸 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀅𑀦𑀸𑀣𑀲𑀸𑀮𑀸𑀬𑀁 𑀲𑀬𑀸𑀧𑁂𑀢𑁆𑀯𑀸 𑀉𑀤𑀓𑀓𑀺𑀘𑁆𑀘𑀢𑁆𑀣𑀁 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸. 𑀅𑀣𑀜𑁆𑀜𑀢𑀭𑁄 𑀅𑀧𑀼𑀢𑁆𑀢𑀓𑁄 𑀲𑀢𑁆𑀣𑀯𑀸𑀳𑁄 𑀢𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 ‘‘𑀅𑀲𑁆𑀲𑀸𑀫𑀺𑀓𑀸𑀬 𑀤𑀸𑀭𑀓𑁄, 𑀫𑀫 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀥𑀸𑀢𑀺𑀬𑀸 𑀳𑀢𑁆𑀣𑁂 𑀅𑀤𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀲𑁄𑀓𑀸𑀪𑀺𑀪𑀽𑀢𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀭𑀸𑀚𑀕𑀳𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀁 𑀅𑀜𑁆𑀜𑀢𑀭𑁄 𑀘𑁄𑀭𑀚𑁂𑀝𑁆𑀞𑀓𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀢𑁆𑀢𑀦𑁄 𑀧𑀚𑀸𑀧𑀢𑀺𑀁 𑀅𑀓𑀸𑀲𑀺. 𑀲𑀸 𑀢𑀲𑁆𑀲 𑀕𑁂𑀳𑁂 𑀯𑀲𑀦𑁆𑀢𑀻 𑀏𑀓𑀁 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀅𑀣 𑀲𑀸 𑀏𑀓𑀤𑀺𑀯𑀲𑀁 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀲𑀸𑀫𑀺𑀓𑁂𑀦 𑀪𑀡𑁆𑀟𑀺𑀢𑁆𑀯𑀸 𑀥𑀻𑀢𑀭𑀁 𑀫𑀜𑁆𑀘𑀓𑁂 𑀔𑀺𑀧𑀺. 𑀤𑀸𑀭𑀺𑀓𑀸𑀬 𑀲𑀻𑀲𑀁 𑀣𑁄𑀓𑀁 𑀪𑀺𑀦𑁆𑀤𑀺. 𑀢𑀢𑁄 𑀲𑀸𑀧𑀺 𑀲𑀸𑀫𑀺𑀓𑀁 𑀪𑀸𑀬𑀺𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀲𑁂𑀭𑀺𑀯𑀺𑀘𑀸𑀭𑁂𑀦 𑀯𑀺𑀘𑀭𑀢𑀺. 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀧𑀞𑀫𑀬𑁄𑀩𑁆𑀩𑀦𑁂 𑀞𑀺𑀢𑁄 ‘‘𑀫𑀸𑀢𑀸’’𑀢𑀺 𑀅𑀚𑀸𑀦𑀦𑁆𑀢𑁄 𑀅𑀢𑁆𑀢𑀦𑁄 𑀧𑀚𑀸𑀧𑀢𑀺𑀁 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀢𑀁 𑀘𑁄𑀭𑀚𑁂𑀝𑁆𑀞𑀓𑀥𑀻𑀢𑀭𑀁 𑀪𑀕𑀺𑀦𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀯𑀺𑀯𑀸𑀳𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀦𑁂𑀲𑀺. 𑀏𑀯𑀁 𑀲𑁄 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀪𑀕𑀺𑀦𑀺𑀜𑁆𑀘 𑀧𑀚𑀸𑀧𑀢𑀻 𑀓𑀢𑁆𑀯𑀸 𑀯𑀸𑀲𑁂𑀲𑀺. 𑀢𑁂𑀦 𑀢𑀸 𑀉𑀪𑁄𑀧𑀺 𑀲𑀧𑀢𑁆𑀢𑀺𑀯𑀸𑀲𑀁 𑀯𑀲𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀫𑀸𑀢𑀸 𑀥𑀻𑀢𑀼 𑀓𑁂𑀲𑀯𑀝𑁆𑀝𑀺𑀁 𑀫𑁄𑀘𑁂𑀢𑁆𑀯𑀸 𑀊𑀓𑀁 𑀑𑀮𑁄𑀓𑁂𑀦𑁆𑀢𑀻 𑀲𑀻𑀲𑁂 𑀯𑀡𑀁 𑀤𑀺𑀲𑁆𑀯𑀸 ‘‘𑀅𑀧𑁆𑀧𑁂𑀯𑀦𑀸𑀫𑀸𑀬𑀁 𑀫𑀫 𑀥𑀻𑀢𑀸 𑀪𑀯𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑀸 𑀳𑀼𑀢𑁆𑀯𑀸 𑀭𑀸𑀚𑀕𑀳𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀸 𑀯𑀺𑀯𑁂𑀓𑀯𑀸𑀲𑀁 𑀯𑀲𑀦𑁆𑀢𑀻 𑀅𑀢𑁆𑀢𑀦𑁄 𑀘 𑀧𑀼𑀩𑁆𑀩𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀉𑀪𑁄 𑀫𑀸𑀢𑀸’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀸 𑀧𑀦 𑀢𑀸𑀬 𑀯𑀼𑀢𑁆𑀢𑀕𑀸𑀣𑀸𑀯 𑀓𑀸𑀫𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦 𑀧𑀘𑁆𑀘𑀦𑀼𑀪𑀸𑀲𑀦𑁆𑀢𑀻 𑀅𑀬𑀁 𑀣𑁂𑀭𑀻 ‘‘𑀉𑀪𑁄 𑀫𑀸𑀢𑀸 𑀘 𑀥𑀻𑀢𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑀻 𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀻’’𑀢𑀺.

𑀢𑀢𑁆𑀣 𑀅𑀲𑀼𑀘𑀻𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑁂𑀦 𑀅𑀲𑀼𑀘𑀻. 𑀤𑀼𑀕𑁆𑀕𑀦𑁆𑀥𑀸𑀢𑀺 𑀯𑀺𑀲𑀕𑀦𑁆𑀥𑀯𑀸𑀬𑀦𑁂𑀦 𑀧𑀽𑀢𑀺𑀕𑀦𑁆𑀥𑀸. 𑀩𑀳𑀼𑀓𑀡𑁆𑀝𑀓𑀸𑀢𑀺 𑀯𑀺𑀲𑀽𑀬𑀺𑀓𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀘𑀭𑀺𑀢𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀩𑀳𑀼𑀯𑀺𑀥𑀓𑀺𑀮𑁂𑀲𑀓𑀡𑁆𑀝𑀓𑀸. 𑀢𑀣𑀸 𑀳𑀺 𑀢𑁂 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸𑀢𑀺 𑀯𑀼𑀢𑁆𑀢𑀸. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀓𑀸𑀫𑁂𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁂𑀲𑀼. 𑀲𑀪𑀭𑀺𑀬𑀸𑀢𑀺 𑀲𑀫𑀸𑀦𑀪𑀭𑀺𑀬𑀸, 𑀲𑀧𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄.

𑁨𑁨𑁭.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀺𑀢𑀁;

𑀘𑁂𑀢𑁄𑀧𑀭𑀺𑀘𑁆𑀘𑀜𑀸𑀡𑀜𑁆𑀘, 𑀲𑁄𑀢𑀥𑀸𑀢𑀼 𑀯𑀺𑀲𑁄𑀥𑀺𑀢𑀸.

𑁨𑁨𑁮.

‘‘𑀇𑀤𑁆𑀥𑀻𑀧𑀺 𑀫𑁂 𑀲𑀘𑁆𑀙𑀺𑀓𑀢𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲’’𑀦𑁆𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀅𑀢𑁆𑀢𑀦𑁄 𑀅𑀥𑀺𑀕𑀢𑀯𑀺𑀲𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸𑀬 𑀣𑁂𑀭𑀺𑀬𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀘𑁂𑀢𑁄𑀧𑀭𑀺𑀘𑁆𑀘𑀜𑀸𑀡𑀦𑁆𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁, 𑀲𑀘𑁆𑀙𑀺𑀓𑀢𑀁, 𑀧𑀢𑁆𑀢𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄.

𑁨𑁨𑁯.

‘‘𑀇𑀤𑁆𑀥𑀺𑀬𑀸 𑀅𑀪𑀺𑀦𑀺𑀫𑁆𑀫𑀺𑀢𑁆𑀯𑀸, 𑀘𑀢𑀼𑀭𑀲𑁆𑀲𑀁 𑀭𑀣𑀁 𑀅𑀳𑀁;

𑀩𑀼𑀤𑁆𑀥𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄’’𑀢𑀺. 𑁋

𑀅𑀬𑀁 𑀕𑀸𑀣𑀸 𑀬𑀤𑀸 𑀪𑀕𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀺, 𑀢𑀤𑀸 𑀅𑀬𑀁 𑀣𑁂𑀭𑀻 𑀏𑀯𑀭𑀽𑀧𑀁 𑀭𑀣𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀕𑀯𑀸 ‘‘𑀅𑀳𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺 𑀢𑀺𑀢𑁆𑀣𑀺𑀬𑀫𑀤𑀦𑀺𑀫𑁆𑀫𑀣𑀦𑀸𑀬, 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺, 𑀢𑀁 𑀲𑀤𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀢𑁆𑀣 𑀇𑀤𑁆𑀥𑀺𑀬𑀸 𑀅𑀪𑀺𑀦𑀺𑀫𑁆𑀫𑀺𑀢𑁆𑀯𑀸, 𑀘𑀢𑀼𑀭𑀲𑁆𑀲𑀁 𑀭𑀣𑀁 𑀅𑀳𑀦𑁆𑀢𑀺 𑀘𑀢𑀽𑀳𑀺 𑀅𑀲𑁆𑀲𑁂𑀳𑀺 𑀬𑁄𑀚𑀺𑀢𑀁 𑀭𑀣𑀁 𑀇𑀤𑁆𑀥𑀺𑀬𑀸 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁩𑁦.

‘‘𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀁 𑀉𑀧𑀕𑀫𑁆𑀫 𑀧𑀸𑀤𑀧𑀁, 𑀏𑀓𑀸 𑀢𑀼𑀯𑀁 𑀢𑀺𑀝𑁆𑀞𑀲𑀺 𑀲𑀸𑀮𑀫𑀽𑀮𑁂;

𑀦 𑀘𑀸𑀧𑀺 𑀢𑁂 𑀤𑀼𑀢𑀺𑀬𑁄 𑀅𑀢𑁆𑀣𑀺 𑀓𑁄𑀘𑀺, 𑀩𑀸𑀮𑁂 𑀦 𑀢𑁆𑀯𑀁 𑀪𑀸𑀬𑀲𑀺 𑀥𑀼𑀢𑁆𑀢𑀓𑀸𑀦𑀁’’.

𑀢𑀢𑁆𑀣 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀦𑁆𑀢𑀺 𑀲𑀼𑀝𑁆𑀞𑀼 𑀧𑀼𑀧𑁆𑀨𑀺𑀢𑀅𑀕𑁆𑀕𑀁, 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀨𑀸𑀮𑀺𑀧𑀼𑀮𑁆𑀮𑀦𑁆𑀢𑀻 𑀅𑀢𑁆𑀣𑁄. 𑀧𑀸𑀤𑀧𑀦𑁆𑀢𑀺 𑀭𑀼𑀓𑁆𑀔𑀁, 𑀇𑀥 𑀧𑀦 𑀲𑀸𑀮𑀭𑀼𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀸 𑀢𑀼𑀯𑀦𑁆𑀢𑀺 𑀏𑀓𑀺𑀓𑀸 𑀢𑁆𑀯𑀁 𑀇𑀥 𑀢𑀺𑀝𑁆𑀞𑀲𑀺. 𑀦 𑀘𑀸𑀧𑀺 𑀢𑁂 𑀤𑀼𑀢𑀺𑀬𑁄 𑀅𑀢𑁆𑀣𑀺 𑀓𑁄𑀘𑀻𑀢𑀺 𑀢𑀯 𑀲𑀳𑀸𑀬𑀪𑀽𑀢𑁄 𑀆𑀭𑀓𑁆𑀔𑀓𑁄 𑀓𑁄𑀘𑀺𑀧𑀺 𑀦𑀢𑁆𑀣𑀺, 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀢𑀼𑀬𑁆𑀳𑀁 𑀤𑀼𑀢𑀺𑀬𑁄 𑀓𑁄𑀘𑀺𑀧𑀺 𑀦𑀢𑁆𑀣𑀺, 𑀅𑀲𑀤𑀺𑀲𑀭𑀽𑀧𑀸 𑀏𑀓𑀺𑀓𑀸𑀯 𑀇𑀫𑀲𑁆𑀫𑀺𑀁 𑀚𑀦𑀯𑀺𑀯𑀺𑀢𑁆𑀢𑁂 𑀞𑀸𑀦𑁂 𑀢𑀺𑀝𑁆𑀞𑀲𑀺. 𑀩𑀸𑀮𑁂 𑀦 𑀢𑁆𑀯𑀁 𑀪𑀸𑀬𑀲𑀺 𑀥𑀼𑀢𑁆𑀢𑀓𑀸𑀦𑀦𑁆𑀢𑀺 𑀢𑀭𑀼𑀡𑀺𑀓𑁂 𑀢𑁆𑀯𑀁 𑀥𑀼𑀢𑁆𑀢𑀧𑀼𑀭𑀺𑀲𑀸𑀦𑀁 𑀓𑀣𑀁 𑀦 𑀪𑀸𑀬𑀲𑀺, 𑀲𑀓𑀺𑀜𑁆𑀘𑀦𑀓𑀸𑀭𑀺𑀦𑁄 𑀥𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀁 𑀓𑀺𑀭 𑀕𑀸𑀣𑀁 𑀫𑀸𑀭𑁄 𑀏𑀓𑀤𑀺𑀯𑀲𑀁 𑀣𑁂𑀭𑀺𑀁 𑀲𑀼𑀧𑀼𑀧𑁆𑀨𑀺𑀢𑁂 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀯𑁂𑀓𑀢𑁄 𑀯𑀺𑀘𑁆𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑀯𑀻𑀫𑀁𑀲𑀦𑁆𑀢𑁄 𑀆𑀳. 𑀅𑀣 𑀦𑀁 𑀣𑁂𑀭𑀻 𑀲𑀦𑁆𑀢𑀚𑁆𑀚𑁂𑀦𑁆𑀢𑀻 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀯𑀲𑁂𑀦 𑁋

𑁨𑁩𑁧.

‘‘𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀥𑀼𑀢𑁆𑀢𑀓𑀸𑀦𑀁, 𑀲𑀫𑀸𑀕𑀢𑀸 𑀏𑀤𑀺𑀲𑀓𑀸 𑀪𑀯𑁂𑀬𑁆𑀬𑀼𑀁;

𑀮𑁄𑀫𑀁 𑀦 𑀇𑀜𑁆𑀚𑁂 𑀦𑀧𑀺 𑀲𑀫𑁆𑀧𑀯𑁂𑀥𑁂, 𑀓𑀺𑀁 𑀫𑁂 𑀢𑀼𑀯𑀁 𑀫𑀸𑀭 𑀓𑀭𑀺𑀲𑁆𑀲𑀲𑁂𑀓𑁄.

𑁨𑁩𑁨.

‘‘𑀏𑀲𑀸 𑀅𑀦𑁆𑀢𑀭𑀥𑀸𑀬𑀸𑀫𑀺, 𑀓𑀼𑀘𑁆𑀙𑀺𑀁 𑀯𑀸 𑀧𑀯𑀺𑀲𑀸𑀫𑀺 𑀢𑁂;

𑀪𑀫𑀼𑀓𑀦𑁆𑀢𑀭𑁂 𑀢𑀺𑀝𑁆𑀞𑀸𑀫𑀺, 𑀢𑀺𑀝𑁆𑀞𑀦𑁆𑀢𑀺𑀁 𑀫𑀁 𑀦 𑀤𑀓𑁆𑀔𑀲𑀺.

𑁨𑁩𑁩.

‘‘𑀘𑀺𑀢𑁆𑀢𑀫𑁆𑀳𑀺 𑀯𑀲𑀻𑀪𑀽𑀢𑀸𑀳𑀁, 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁩𑁪.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀢𑀻 𑀤𑀸𑀦𑀺 𑀲𑀸 𑀫𑀫.

𑁨𑁩𑁫.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀥𑀼𑀢𑁆𑀢𑀓𑀸𑀦𑀁, 𑀲𑀫𑀸𑀕𑀢𑀸 𑀏𑀤𑀺𑀲𑀓𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀬𑀸𑀤𑀺𑀲𑀓𑁄 𑀢𑁆𑀯𑀁 𑀏𑀤𑀺𑀲𑀓𑀸 𑀏𑀯𑀭𑀽𑀧𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀫𑀢𑁆𑀢𑀸𑀧𑀺 𑀥𑀼𑀢𑁆𑀢𑀓𑀸 𑀲𑀫𑀸𑀕𑀢𑀸 𑀬𑀤𑀺 𑀪𑀯𑁂𑀬𑁆𑀬𑀼𑀁. 𑀮𑁄𑀫𑀁 𑀦 𑀇𑀜𑁆𑀚𑁂 𑀦𑀧𑀺 𑀲𑀫𑁆𑀧𑀯𑁂𑀥𑁂𑀢𑀺 𑀮𑁄𑀫𑀫𑀢𑁆𑀢𑀫𑁆𑀧𑀺 𑀦 𑀇𑀜𑁆𑀚𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬. 𑀓𑀺𑀁 𑀫𑁂 𑀢𑀼𑀯𑀁 𑀫𑀸𑀭 𑀓𑀭𑀺𑀲𑁆𑀲𑀲𑁂𑀓𑁄𑀢𑀺 𑀫𑀸𑀭, 𑀢𑁆𑀯𑀁 𑀏𑀓𑀓𑁄𑀯 𑀫𑀬𑁆𑀳𑀁 𑀓𑀺𑀁 𑀓𑀭𑀺𑀲𑁆𑀲𑀲𑀺?

𑀇𑀤𑀸𑀦𑀺 𑀫𑀸𑀭𑀲𑁆𑀲 𑀅𑀢𑁆𑀢𑀦𑁄 𑀓𑀺𑀜𑁆𑀘𑀺𑀧𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀁𑀬𑁂𑀯 𑀯𑀺𑀪𑀸𑀯𑁂𑀦𑁆𑀢𑀻 ‘‘𑀏𑀲𑀸 𑀅𑀦𑁆𑀢𑀭𑀥𑀸𑀬𑀸𑀫𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀫𑀸𑀭, 𑀏𑀲𑀸𑀳𑀁 𑀢𑀯 𑀧𑀼𑀭𑀢𑁄 𑀞𑀺𑀢𑀸𑀯 𑀅𑀦𑁆𑀢𑀭𑀥𑀸𑀬𑀸𑀫𑀺 𑀅𑀤𑀲𑁆𑀲𑀦𑀁 𑀕𑀘𑁆𑀙𑀸𑀫𑀺, 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀢𑁂 𑀓𑀼𑀘𑁆𑀙𑀺𑀁 𑀯𑀸 𑀧𑀯𑀺𑀲𑀸𑀫𑀺, 𑀪𑀫𑀼𑀓𑀦𑁆𑀢𑀭𑁂 𑀯𑀸 𑀢𑀺𑀝𑁆𑀞𑀸𑀫𑀺, 𑀏𑀯𑀁 𑀢𑀺𑀝𑁆𑀞𑀦𑁆𑀢𑀺𑀜𑁆𑀘 𑀫𑀁 𑀢𑁆𑀯𑀁 𑀦 𑀧𑀲𑁆𑀲𑀲𑀺.

𑀓𑀲𑁆𑀫𑀸𑀢𑀺 𑀘𑁂? 𑀘𑀺𑀢𑁆𑀢𑀫𑁆𑀳𑀺 𑀯𑀲𑀻𑀪𑀽𑀢𑀸𑀳𑀁, 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸, 𑀅𑀳𑀁 𑀘𑀫𑁆𑀳𑀺 𑀫𑀸𑀭, 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁, 𑀘𑀢𑁆𑀢𑀸𑀭𑁄𑀧𑀺 𑀇𑀤𑁆𑀥𑀺𑀧𑀸𑀤𑀸 𑀫𑀬𑀸 𑀲𑀼𑀝𑁆𑀞𑀼 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸, 𑀢𑀲𑁆𑀫𑀸 𑀅𑀳𑀁 𑀬𑀣𑀸𑀯𑀼𑀢𑁆𑀢𑀸𑀬 𑀇𑀤𑁆𑀥𑀺𑀯𑀺𑀲𑀬𑀢𑀸𑀬 𑀧𑀳𑁄𑀫𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀲𑁄𑀴𑀲𑀦𑀺𑀧𑀸𑀢𑁄

𑁧. 𑀧𑀼𑀡𑁆𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑁄𑀴𑀲𑀦𑀺𑀧𑀸𑀢𑁂 𑀉𑀤𑀳𑀸𑀭𑀻 𑀅𑀳𑀁 𑀲𑀻𑀢𑁂𑀢𑀺𑀆𑀤𑀺𑀓𑀸 𑀧𑀼𑀡𑁆𑀡𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀲𑀜𑁆𑀚𑀸𑀢𑀲𑀁𑀯𑁂𑀕𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀮𑀤𑁆𑀥𑀧𑁆𑀧𑀲𑀸𑀤𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀓𑀣𑀺𑀓𑀸 𑀘 𑀅𑀳𑁄𑀲𑀺. 𑀬𑀣𑀸 𑀘 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂, 𑀏𑀯𑀁 𑀲𑀺𑀔𑀺𑀲𑁆𑀲 𑀯𑁂𑀲𑁆𑀲𑀪𑀼𑀲𑁆𑀲 𑀓𑀓𑀼𑀲𑀦𑁆𑀥𑀲𑁆𑀲 𑀓𑁄𑀡𑀸𑀕𑀫𑀦𑀲𑁆𑀲 𑀓𑀲𑁆𑀲𑀧𑀲𑁆𑀲 𑀘 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀓𑀣𑀺𑀓𑀸 𑀘 𑀅𑀳𑁄𑀲𑀺. 𑀫𑀸𑀦𑀥𑀸𑀢𑀼𑀓𑀢𑁆𑀢𑀸 𑀧𑀦 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀫𑀸𑀦𑁄𑀧𑀦𑀺𑀲𑁆𑀲𑀬𑀯𑀲𑁂𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑁂𑀝𑁆𑀞𑀺𑀦𑁄 𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀧𑀼𑀡𑁆𑀡𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀲𑀻𑀳𑀦𑀸𑀤𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 (𑀫. 𑀦𑀺. 𑁧.𑁧𑁪𑁬 𑀆𑀤𑀬𑁄) 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀉𑀤𑀓𑀲𑀼𑀤𑁆𑀥𑀺𑀓𑀁 𑀩𑁆𑀭𑀸𑀳𑁆𑀫𑀡𑀁 𑀤𑀫𑁂𑀢𑁆𑀯𑀸 𑀲𑁂𑀝𑁆𑀞𑀺𑀦𑀸 𑀲𑀫𑁆𑀪𑀸𑀯𑀺𑀢𑀸 𑀳𑀼𑀢𑁆𑀯𑀸 𑀢𑁂𑀦 𑀪𑀼𑀚𑀺𑀲𑁆𑀲𑀪𑀸𑀯𑀁 𑀧𑀸𑀧𑀺𑀢𑀸 𑀢𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁪.𑁧𑁮𑁪-𑁨𑁦𑁩) 𑁋

‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀲𑀺𑀔𑀺𑀦𑁄 𑀯𑁂𑀲𑁆𑀲𑀪𑀼𑀲𑁆𑀲 𑀘;

𑀓𑀓𑀼𑀲𑀦𑁆𑀥𑀲𑁆𑀲 𑀫𑀼𑀦𑀺𑀦𑁄, 𑀓𑁄𑀡𑀸𑀕𑀫𑀦𑀢𑀸𑀤𑀺𑀦𑁄.

‘‘𑀓𑀲𑁆𑀲𑀧𑀲𑁆𑀲 𑀘 𑀩𑀼𑀤𑁆𑀥𑀲𑁆𑀲, 𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀪𑀺𑀓𑁆𑀔𑀼𑀦𑀻 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀦𑀺𑀧𑀓𑀸 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸.

‘‘𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀥𑀫𑁆𑀫𑀢𑁆𑀣𑀧𑀝𑀺𑀧𑀼𑀘𑁆𑀙𑀺𑀓𑀸;

𑀉𑀕𑁆𑀕𑀳𑁂𑀢𑀸 𑀘 𑀥𑀫𑁆𑀫𑀸𑀦𑀁, 𑀲𑁄𑀢𑀸 𑀧𑀬𑀺𑀭𑀼𑀧𑀸𑀲𑀺𑀢𑀸.

‘‘𑀤𑁂𑀲𑁂𑀦𑁆𑀢𑀻 𑀚𑀦𑀫𑀚𑁆𑀛𑁂𑀳𑀁, 𑀅𑀳𑁄𑀲𑀺𑀁 𑀚𑀺𑀦𑀲𑀸𑀲𑀦𑁂;

𑀩𑀸𑀳𑀼𑀲𑀘𑁆𑀘𑁂𑀦 𑀢𑁂𑀦𑀸𑀳𑀁, 𑀧𑁂𑀲𑀮𑀸 𑀅𑀪𑀺𑀫𑀜𑁆𑀜𑀺𑀲𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑀼𑀢𑁆𑀢𑀫𑁂;

𑀅𑀦𑀸𑀣𑀧𑀺𑀡𑁆𑀟𑀺𑀦𑁄 𑀕𑁂𑀳𑁂, 𑀚𑀸𑀢𑀸𑀳𑀁 𑀓𑀼𑀫𑁆𑀪𑀤𑀸𑀲𑀺𑀬𑀸.

‘‘𑀕𑀢𑀸 𑀉𑀤𑀓𑀳𑀸𑀭𑀺𑀬𑀁, 𑀲𑁄𑀢𑁆𑀣𑀺𑀬𑀁 𑀤𑀺𑀚𑀫𑀤𑁆𑀤𑀲𑀁;

𑀲𑀻𑀢𑀝𑁆𑀝𑀁 𑀢𑁄𑀬𑀫𑀚𑁆𑀛𑀫𑁆𑀳𑀺, 𑀢𑀁 𑀤𑀺𑀲𑁆𑀯𑀸 𑀇𑀤𑀫𑀩𑁆𑀭𑀯𑀺𑀁.

‘‘𑀉𑀤𑀳𑀸𑀭𑀻 𑀅𑀳𑀁 𑀲𑀻𑀢𑁂, 𑀲𑀤𑀸 𑀉𑀤𑀓𑀫𑁄𑀢𑀭𑀺𑀁;

𑀅𑀬𑁆𑀬𑀸𑀦𑀁 𑀤𑀡𑁆𑀟𑀪𑀬𑀪𑀻𑀢𑀸, 𑀯𑀸𑀘𑀸𑀤𑁄𑀲𑀪𑀬𑀝𑁆𑀝𑀺𑀢𑀸.

‘‘𑀓𑀲𑁆𑀲 𑀩𑁆𑀭𑀸𑀳𑁆𑀫𑀡 𑀢𑁆𑀯𑀁 𑀪𑀻𑀢𑁄, 𑀲𑀤𑀸 𑀉𑀤𑀓𑀫𑁄𑀢𑀭𑀺;

𑀯𑁂𑀥𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺, 𑀲𑀻𑀢𑀁 𑀯𑁂𑀤𑀬𑀲𑁂 𑀪𑀼𑀲𑀁.

‘‘𑀚𑀸𑀦𑀦𑁆𑀢𑀻 𑀯𑀢 𑀫𑀁 𑀪𑁄𑀢𑀺, 𑀧𑀼𑀡𑁆𑀡𑀺𑀓𑁂 𑀧𑀭𑀺𑀧𑀼𑀘𑁆𑀙𑀲𑀺;

𑀓𑀭𑁄𑀦𑁆𑀢𑀁 𑀓𑀼𑀲𑀮𑀁 𑀓𑀫𑁆𑀫𑀁, 𑀭𑀼𑀦𑁆𑀥𑀦𑁆𑀢𑀁 𑀓𑀢𑀧𑀸𑀧𑀓𑀁.

‘‘𑀬𑁄 𑀘 𑀯𑀼𑀟𑁆𑀠𑁄 𑀤𑀳𑀭𑁄 𑀯𑀸, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑀺;

𑀤𑀓𑀸𑀪𑀺𑀲𑁂𑀘𑀦𑀸 𑀲𑁄𑀧𑀺, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺.

‘‘𑀉𑀢𑁆𑀢𑀭𑀦𑁆𑀢𑀲𑁆𑀲 𑀅𑀓𑁆𑀔𑀸𑀲𑀺𑀁, 𑀥𑀫𑁆𑀫𑀢𑁆𑀣𑀲𑀁𑀳𑀺𑀢𑀁 𑀧𑀤𑀁;

𑀢𑀜𑁆𑀘 𑀲𑀼𑀢𑁆𑀯𑀸 𑀲 𑀲𑀁𑀯𑀺𑀕𑁆𑀕𑁄, 𑀧𑀩𑁆𑀩𑀚𑀺𑀢𑁆𑀯𑀸𑀭𑀳𑀸 𑀅𑀳𑀼.

‘‘𑀧𑀽𑀭𑁂𑀦𑁆𑀢𑀻 𑀊𑀦𑀓𑀲𑀢𑀁, 𑀚𑀸𑀢𑀸 𑀤𑀸𑀲𑀺𑀓𑀼𑀮𑁂 𑀬𑀢𑁄;

𑀢𑀢𑁄 𑀧𑀼𑀡𑁆𑀡𑀸𑀢𑀺 𑀦𑀸𑀫𑀁 𑀫𑁂, 𑀪𑀼𑀚𑀺𑀲𑁆𑀲𑀁 𑀫𑀁 𑀅𑀓𑀁𑀲𑀼 𑀢𑁂.

‘‘𑀲𑁂𑀝𑁆𑀞𑀺𑀁 𑀢𑀢𑁄𑀦𑀼𑀚𑀸𑀦𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸.

‘‘𑀪𑀸𑀯𑀦𑀸𑀬 𑀫𑀳𑀸𑀧𑀜𑁆𑀜𑀸, 𑀲𑀼𑀢𑁂𑀦𑁂𑀯 𑀲𑀼𑀢𑀸𑀯𑀺𑀦𑀻;

𑀫𑀸𑀦𑁂𑀦 𑀦𑀻𑀘𑀓𑀼𑀮𑀚𑀸, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁨𑁩𑁬.

‘‘𑀉𑀤𑀳𑀸𑀭𑀻 𑀅𑀳𑀁 𑀲𑀻𑀢𑁂, 𑀲𑀤𑀸 𑀉𑀤𑀓𑀫𑁄𑀢𑀭𑀺𑀁;

𑀅𑀬𑁆𑀬𑀸𑀦𑀁 𑀤𑀡𑁆𑀟𑀪𑀬𑀪𑀻𑀢𑀸, 𑀯𑀸𑀘𑀸𑀤𑁄𑀲𑀪𑀬𑀝𑁆𑀝𑀺𑀢𑀸.

𑁨𑁩𑁭.

‘‘𑀓𑀲𑁆𑀲 𑀩𑁆𑀭𑀸𑀳𑁆𑀫𑀡 𑀢𑁆𑀯𑀁 𑀪𑀻𑀢𑁄, 𑀲𑀤𑀸 𑀉𑀤𑀓𑀫𑁄𑀢𑀭𑀺;

𑀯𑁂𑀥𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺, 𑀲𑀻𑀢𑀁 𑀯𑁂𑀤𑀬𑀲𑁂 𑀪𑀼𑀲𑀁.

𑁨𑁩𑁮.

‘‘𑀚𑀸𑀦𑀦𑁆𑀢𑀻 𑀯𑀢 𑀫𑀁 𑀪𑁄𑀢𑀺, 𑀧𑀼𑀡𑁆𑀡𑀺𑀓𑁂 𑀧𑀭𑀺𑀧𑀼𑀘𑁆𑀙𑀲𑀺;

𑀓𑀭𑁄𑀦𑁆𑀢𑀁 𑀓𑀼𑀲𑀮𑀁 𑀓𑀫𑁆𑀫𑀁, 𑀭𑀼𑀦𑁆𑀥𑀦𑁆𑀢𑀁 𑀓𑀢𑀧𑀸𑀧𑀓𑀁.

𑁨𑁩𑁯.

‘‘𑀬𑁄 𑀘 𑀯𑀼𑀟𑁆𑀠𑁄 𑀤𑀳𑀭𑁄 𑀯𑀸, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑀺;

𑀤𑀓𑀸𑀪𑀺𑀲𑁂𑀘𑀦𑀸 𑀲𑁄𑀧𑀺, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺.

𑁨𑁪𑁦.

‘‘𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀅𑀚𑀸𑀦𑀦𑁆𑀢𑀲𑁆𑀲 𑀅𑀚𑀸𑀦𑀓𑁄;

‘𑀤𑀓𑀸𑀪𑀺𑀲𑁂𑀘𑀦𑀸 𑀦𑀸𑀫, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺’.

𑁨𑁪𑁧.

‘‘𑀲𑀕𑁆𑀕𑀁 𑀦𑀽𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀫𑀡𑁆𑀟𑀽𑀓𑀓𑀘𑁆𑀙𑀧𑀸;

𑀦𑀸𑀕𑀸 𑀘 𑀲𑀼𑀲𑀼𑀫𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀉𑀤𑀓𑁂 𑀘𑀭𑀸.

𑁨𑁪𑁨.

‘‘𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸, 𑀫𑀘𑁆𑀙𑀺𑀓𑀸 𑀫𑀺𑀕𑀩𑀦𑁆𑀥𑀓𑀸;

𑀘𑁄𑀭𑀸 𑀘 𑀯𑀚𑁆𑀛𑀖𑀸𑀢𑀸 𑀘, 𑀬𑁂 𑀘𑀜𑁆𑀜𑁂 𑀧𑀸𑀧𑀓𑀫𑁆𑀫𑀺𑀦𑁄;

𑀤𑀓𑀸𑀪𑀺𑀲𑁂𑀘𑀦𑀸 𑀢𑁂𑀧𑀺, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀭𑁂.

𑁨𑁪𑁩.

‘‘𑀲𑀘𑁂 𑀇𑀫𑀸 𑀦𑀤𑀺𑀬𑁄 𑀢𑁂, 𑀧𑀸𑀧𑀁 𑀧𑀼𑀩𑁆𑀩𑁂 𑀓𑀢𑀁 𑀯𑀳𑀼𑀁;

𑀧𑀼𑀜𑁆𑀜𑀫𑁆𑀧𑀺 𑀫𑀸 𑀯𑀳𑁂𑀬𑁆𑀬𑀼𑀁 𑀢𑁂, 𑀢𑁂𑀦 𑀢𑁆𑀯𑀁 𑀧𑀭𑀺𑀩𑀸𑀳𑀺𑀭𑁄.

𑁨𑁪𑁪.

‘‘𑀬𑀲𑁆𑀲 𑀩𑁆𑀭𑀸𑀳𑁆𑀫𑀡 𑀢𑁆𑀯𑀁 𑀪𑀻𑀢𑁄, 𑀲𑀤𑀸 𑀉𑀤𑀓𑀫𑁄𑀢𑀭𑀺;

𑀢𑀫𑁂𑀯 𑀩𑁆𑀭𑀳𑁆𑀫𑁂 𑀫𑀸𑀓𑀸𑀲𑀺, 𑀫𑀸 𑀢𑁂 𑀲𑀻𑀢𑀁 𑀙𑀯𑀺𑀁 𑀳𑀦𑁂.

𑁨𑁪𑁫.

‘‘𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀁 𑀫𑀁, 𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀦𑀬𑀺;

𑀤𑀓𑀸𑀪𑀺𑀲𑁂𑀘𑀦𑀸 𑀪𑁄𑀢𑀺, 𑀇𑀫𑀁 𑀲𑀸𑀝𑀁 𑀤𑀤𑀸𑀫𑀺 𑀢𑁂.

𑁨𑁪𑁬.

‘‘𑀢𑀼𑀬𑁆𑀳𑁂𑀯 𑀲𑀸𑀝𑀓𑁄 𑀳𑁄𑀢𑀼, 𑀦𑀸𑀳𑀫𑀺𑀘𑁆𑀙𑀸𑀫𑀺 𑀲𑀸𑀝𑀓𑀁;

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀧𑁆𑀧𑀺𑀬𑀁.

𑁨𑁪𑁭.

‘‘𑀫𑀸𑀓𑀸𑀲𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

𑀲𑀘𑁂 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀲𑀺 𑀓𑀭𑁄𑀲𑀺 𑀯𑀸.

𑁨𑁪𑁮.

‘‘𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁂𑀘𑁆𑀘𑀸𑀧𑀺 𑀧𑀮𑀸𑀬𑀢𑁄;

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀧𑁆𑀧𑀺𑀬𑀁.

𑁨𑁪𑁯.

‘‘𑀉𑀧𑁂𑀳𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀳𑀺 𑀲𑀻𑀮𑀸𑀦𑀺, 𑀢𑀁 𑀢𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁨𑁫𑁦.

‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀫𑀺 𑀲𑀻𑀮𑀸𑀦𑀺, 𑀢𑀁 𑀫𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁨𑁫𑁧.

‘‘𑀩𑁆𑀭𑀳𑁆𑀫𑀩𑀦𑁆𑀥𑀼 𑀧𑀼𑀭𑁂 𑀆𑀲𑀺𑀁, 𑀅𑀚𑁆𑀚𑀫𑁆𑀳𑀺 𑀲𑀘𑁆𑀘𑀩𑁆𑀭𑀸𑀳𑁆𑀫𑀡𑁄;

𑀢𑁂𑀯𑀺𑀚𑁆𑀚𑁄 𑀯𑁂𑀤𑀲𑀫𑁆𑀧𑀦𑁆𑀦𑁄, 𑀲𑁄𑀢𑁆𑀢𑀺𑀬𑁄 𑀘𑀫𑁆𑀳𑀺 𑀦𑁆𑀳𑀸𑀢𑀓𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀉𑀤𑀳𑀸𑀭𑀻𑀢𑀺 𑀖𑀝𑁂𑀦 𑀉𑀤𑀓𑀁 𑀯𑀸𑀳𑀺𑀓𑀸. 𑀲𑀻𑀢𑁂 𑀢𑀤𑀸 𑀉𑀤𑀓𑀫𑁄𑀢𑀭𑀺𑀦𑁆𑀢𑀺 𑀲𑀻𑀢𑀓𑀸𑀮𑁂𑀧𑀺 𑀲𑀩𑁆𑀩𑀤𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀉𑀤𑀓𑀁 𑀑𑀢𑀭𑀺𑀁. 𑀬𑀤𑀸 𑀬𑀤𑀸 𑀅𑀬𑁆𑀬𑀓𑀸𑀦𑀁 𑀉𑀤𑀓𑁂𑀦 𑀅𑀢𑁆𑀣𑁄, 𑀢𑀤𑀸 𑀢𑀤𑀸 𑀉𑀤𑀓𑀁 𑀧𑀸𑀯𑀺𑀲𑀺𑀁, 𑀉𑀤𑀓𑀫𑁄𑀢𑀭𑀺𑀢𑁆𑀯𑀸 𑀉𑀤𑀓𑀁 𑀉𑀧𑀦𑁂𑀲𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑁆𑀬𑀸𑀦𑀁 𑀤𑀡𑁆𑀟𑀪𑀬𑀪𑀻𑀢𑀸𑀢𑀺 𑀅𑀬𑁆𑀬𑀓𑀸𑀦𑀁 𑀤𑀡𑁆𑀟𑀪𑀬𑁂𑀦 𑀪𑀻𑀢𑀸. 𑀯𑀸𑀘𑀸𑀤𑁄𑀲𑀪𑀬𑀝𑁆𑀝𑀺𑀢𑀸𑀢𑀺 𑀯𑀘𑀻𑀤𑀡𑁆𑀟𑀪𑀬𑁂𑀦 𑀘𑁂𑀯 𑀤𑁄𑀲𑀪𑀬𑁂𑀦 𑀘 𑀅𑀝𑁆𑀝𑀺𑀢𑀸 𑀧𑀻𑀴𑀺𑀢𑀸, 𑀲𑀻𑀢𑁂𑀧𑀺 𑀉𑀤𑀓𑀫𑁄𑀢𑀭𑀺𑀦𑁆𑀢𑀺 𑀬𑁄𑀚𑀦𑀸.

𑀅𑀣𑁂𑀓𑀤𑀺𑀯𑀲𑀁 𑀧𑀼𑀡𑁆𑀡𑀸 𑀤𑀸𑀲𑀻 𑀖𑀝𑁂𑀦 𑀉𑀤𑀓𑀁 𑀆𑀦𑁂𑀢𑀼𑀁 𑀉𑀤𑀓𑀢𑀺𑀢𑁆𑀣𑀁 𑀕𑀢𑀸. 𑀢𑀢𑁆𑀣 𑀅𑀤𑁆𑀤𑀲 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀳𑀺𑀫𑀧𑀸𑀢𑀲𑀫𑀬𑁂 𑀫𑀳𑀢𑀺 𑀲𑀻𑀢𑁂 𑀯𑀢𑁆𑀢𑀫𑀸𑀦𑁂 𑀧𑀸𑀢𑁄𑀯 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀲𑀲𑀻𑀲𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀫𑀦𑁆𑀢𑁂 𑀚𑀧𑁆𑀧𑀺𑀢𑁆𑀯𑀸 𑀉𑀤𑀓𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑀁 𑀅𑀮𑁆𑀮𑀓𑁂𑀲𑀁 𑀧𑀯𑁂𑀥𑀦𑁆𑀢𑀁 𑀤𑀦𑁆𑀢𑀯𑀻𑀡𑀁 𑀯𑀸𑀤𑀬𑀫𑀸𑀦𑀁. 𑀢𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑀸 𑀢𑀢𑁄 𑀦𑀁 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀓𑀸𑀫𑀸 ‘‘𑀓𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀪𑀻𑀢𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀓𑀼𑀢𑁄 𑀘 𑀦𑀸𑀫 𑀪𑀬𑀳𑁂𑀢𑀼𑀢𑁄 𑀪𑀻𑀢𑁄 𑀳𑀼𑀢𑁆𑀯𑀸 𑀲𑀤𑀸 𑀉𑀤𑀓𑀫𑁄𑀢𑀭𑀺 𑀲𑀩𑁆𑀩𑀓𑀸𑀮𑀁 𑀲𑀸𑀬𑀁 𑀧𑀸𑀢𑀁 𑀉𑀤𑀓𑀁 𑀑𑀢𑀭𑀺. 𑀑𑀢𑀭𑀺𑀢𑁆𑀯𑀸 𑀘 𑀯𑁂𑀥𑀫𑀸𑀦𑁂𑀳𑀺 𑀓𑀫𑁆𑀧𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺 𑀲𑀭𑀻𑀭𑀸𑀯𑀬𑀯𑁂𑀳𑀺 𑀲𑀻𑀢𑀁 𑀯𑁂𑀤𑀬𑀲𑁂 𑀪𑀼𑀲𑀁 𑀲𑀻𑀢𑀤𑀼𑀓𑁆𑀔𑀁 𑀅𑀢𑀺𑀯𑀺𑀬 𑀤𑀼𑀲𑁆𑀲𑀳𑀁 𑀧𑀝𑀺𑀲𑀁𑀯𑁂𑀤𑀬𑀲𑀺 𑀧𑀘𑁆𑀘𑀦𑀼𑀪𑀯𑀲𑀺.

𑀚𑀸𑀦𑀦𑁆𑀢𑀻 𑀯𑀢 𑀫𑀁 𑀪𑁄𑀢𑀻𑀢𑀺, 𑀪𑁄𑀢𑀺 𑀧𑀼𑀡𑁆𑀡𑀺𑀓𑁂, 𑀢𑁆𑀯𑀁 𑀢𑀁 𑀉𑀧𑀘𑀺𑀢𑀁 𑀧𑀸𑀧𑀓𑀫𑁆𑀫𑀁 𑀭𑀼𑀦𑁆𑀥𑀦𑁆𑀢𑀁 𑀦𑀺𑀯𑀸𑀭𑀡𑀲𑀫𑀢𑁆𑀣𑀁 𑀓𑀼𑀲𑀮𑀁 𑀓𑀫𑁆𑀫𑀁 𑀇𑀫𑀺𑀦𑀸 𑀉𑀤𑀓𑁄𑀭𑁄𑀳𑀦𑁂𑀦 𑀓𑀭𑁄𑀦𑁆𑀢𑀁 𑀫𑀁 𑀚𑀸𑀦𑀦𑁆𑀢𑀻 𑀯𑀢 𑀧𑀭𑀺𑀧𑀼𑀘𑁆𑀙𑀲𑀺.

𑀦𑀦𑀼 𑀅𑀬𑀫𑀢𑁆𑀣𑁄 𑀮𑁄𑀓𑁂 𑀧𑀸𑀓𑀝𑁄 𑀏𑀯. 𑀓𑀣𑀸𑀧𑀺 𑀫𑀬𑀁 𑀢𑀼𑀬𑁆𑀳𑀁 𑀯𑀤𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀘 𑀯𑀼𑀟𑁆𑀠𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀯𑀼𑀟𑁆𑀠𑁄 𑀯𑀸 𑀤𑀳𑀭𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸 𑀬𑁄 𑀓𑁄𑀘𑀺 𑀳𑀺𑀁𑀲𑀸𑀤𑀺𑀪𑁂𑀤𑀁 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑀺 𑀅𑀢𑀺𑀯𑀺𑀬 𑀓𑀭𑁄𑀢𑀺, 𑀲𑁄𑀧𑀺 𑀪𑀼𑀲𑀁 𑀧𑀸𑀧𑀓𑀫𑁆𑀫𑀦𑀺𑀭𑀢𑁄 𑀤𑀓𑀸𑀪𑀺𑀲𑁂𑀘𑀦𑀸 𑀲𑀺𑀦𑀸𑀦𑁂𑀦 𑀢𑀢𑁄 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀫𑀼𑀘𑁆𑀘𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀡𑁆𑀡𑀺𑀓𑀸 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀻 ‘‘𑀓𑁄 𑀦𑀼 𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀅𑀚𑀸𑀦𑀦𑁆𑀢𑀲𑁆𑀲 𑀅𑀚𑀸𑀦𑀓𑁄𑀢𑀺 𑀓𑀫𑁆𑀫𑀯𑀺𑀧𑀸𑀓𑀁 𑀅𑀚𑀸𑀦𑀦𑁆𑀢𑀲𑁆𑀲 𑀢𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀓𑀫𑁆𑀫𑀯𑀺𑀧𑀸𑀓𑀁 𑀅𑀚𑀸𑀦𑀢𑁄 𑀅𑀚𑀸𑀦𑀓𑁄 𑀅𑀯𑀺𑀤𑁆𑀤𑀲𑀼 𑀩𑀸𑀮𑁄 𑀉𑀤𑀓𑀸𑀪𑀺𑀲𑁂𑀘𑀦𑀳𑁂𑀢𑀼 𑀧𑀸𑀧𑀓𑀫𑁆𑀫𑀢𑁄 𑀧𑀫𑀼𑀘𑁆𑀘𑀢𑀻𑀢𑀺, 𑀇𑀤𑀁 𑀅𑀢𑁆𑀣𑀚𑀸𑀢𑀁 𑀓𑁄 𑀦𑀼 𑀦𑀸𑀫 𑀅𑀓𑁆𑀔𑀸𑀲𑀺, 𑀦 𑀲𑁄 𑀲𑀤𑁆𑀥𑁂𑀬𑁆𑀬𑀯𑀘𑀦𑁄, 𑀦𑀸𑀧𑀺 𑀘𑁂𑀢𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺𑀲𑁆𑀲 𑀢𑀫𑁂𑀯 𑀬𑀼𑀢𑁆𑀢𑀺𑀅𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑀻 ‘‘𑀲𑀕𑁆𑀕𑀁 𑀦𑀽𑀦 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀕𑀸𑀢𑀺 𑀯𑀺𑀚𑁆𑀛𑀲𑀸. 𑀲𑀼𑀲𑀼𑀫𑀸𑀭𑀸𑀢𑀺 𑀓𑀼𑀫𑁆𑀪𑀻𑀮𑀸. 𑀬𑁂 𑀘𑀜𑁆𑀜𑁂 𑀉𑀤𑀓𑁂 𑀘𑀭𑀸𑀢𑀺 𑀬𑁂 𑀘𑀜𑁆𑀜𑁂𑀧𑀺 𑀯𑀸𑀭𑀺𑀕𑁄𑀘𑀭𑀸 𑀫𑀘𑁆𑀙𑀫𑀓𑀭𑀦𑀦𑁆𑀤𑀺𑀬𑀸𑀯𑀢𑁆𑀢𑀸𑀤𑀬𑁄 𑀘, 𑀢𑁂𑀧𑀺 𑀲𑀕𑁆𑀕𑀁 𑀦𑀽𑀦 𑀕𑀫𑀺𑀲𑁆𑀲𑀦𑁆𑀢𑀺 𑀤𑁂𑀯𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑁂, 𑀉𑀤𑀓𑀸𑀪𑀺𑀲𑁂𑀘𑀦𑀸 𑀧𑀸𑀧𑀓𑀫𑁆𑀫𑀢𑁄 𑀫𑀼𑀢𑁆𑀢𑀺 𑀳𑁄𑀢𑀺 𑀘𑁂𑀢𑀺 𑀅𑀢𑁆𑀣𑁄.

𑀑𑀭𑀩𑁆𑀪𑀺𑀓𑀸𑀢𑀺 𑀉𑀭𑀩𑁆𑀪𑀖𑀸𑀢𑀓𑀸. 𑀲𑀽𑀓𑀭𑀺𑀓𑀸𑀢𑀺 𑀲𑀽𑀓𑀭𑀖𑀸𑀢𑀓𑀸. 𑀫𑀘𑁆𑀙𑀺𑀓𑀸𑀢𑀺 𑀓𑁂𑀯𑀝𑁆𑀝𑀸. 𑀫𑀺𑀕𑀩𑀦𑁆𑀥𑀓𑀸𑀢𑀺 𑀫𑀸𑀕𑀯𑀺𑀓𑀸. 𑀯𑀚𑁆𑀛𑀖𑀸𑀢𑀸𑀢𑀺 𑀯𑀚𑁆𑀛𑀖𑀸𑀢𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀸.

𑀧𑀼𑀜𑁆𑀜𑀫𑁆𑀧𑀺 𑀫𑀸 𑀯𑀳𑁂𑀬𑁆𑀬𑀼𑀦𑁆𑀢𑀺 𑀇𑀫𑀸 𑀅𑀘𑀺𑀭𑀯𑀢𑀺𑀆𑀤𑀬𑁄 𑀦𑀤𑀺𑀬𑁄 𑀬𑀣𑀸 𑀢𑀬𑀸 𑀧𑀼𑀩𑁆𑀩𑁂 𑀓𑀢𑀁 𑀧𑀸𑀧𑀁 𑀢𑀢𑁆𑀣 𑀉𑀤𑀓𑀸𑀪𑀺𑀲𑁂𑀘𑀦𑁂𑀦 𑀲𑀘𑁂 𑀯𑀳𑀼𑀁 𑀦𑀻𑀳𑀭𑁂𑀬𑁆𑀬𑀼𑀁, 𑀢𑀣𑀸 𑀢𑀬𑀸 𑀓𑀢𑀁 𑀧𑀼𑀜𑁆𑀜𑀫𑁆𑀧𑀺 𑀇𑀫𑀸 𑀦𑀤𑀺𑀬𑁄 𑀯𑀳𑁂𑀬𑁆𑀬𑀼𑀁 𑀧𑀯𑀸𑀳𑁂𑀬𑁆𑀬𑀼𑀁. 𑀢𑁂𑀦 𑀢𑁆𑀯𑀁 𑀧𑀭𑀺𑀩𑀸𑀳𑀺𑀭𑁄 𑀅𑀲𑁆𑀲 𑀢𑀣𑀸 𑀲𑀢𑀺 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑁆𑀯𑀁 𑀧𑀭𑀺𑀩𑀸𑀳𑀺𑀭𑁄 𑀯𑀺𑀭𑀳𑀺𑀢𑁄𑀯 𑀪𑀯𑁂𑀬𑁆𑀬𑀸𑀢𑀺 𑀦 𑀘𑁂𑀢𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀯𑀸 𑀉𑀤𑀓𑁂𑀦 𑀉𑀤𑀓𑁄𑀭𑁄𑀳𑀓𑀲𑁆𑀲 𑀧𑀼𑀜𑁆𑀜𑀧𑀯𑀸𑀳𑀦𑀁 𑀦 𑀳𑁄𑀢𑀺, 𑀏𑀯𑀁 𑀧𑀸𑀧𑀧𑀯𑀸𑀳𑀦𑀫𑁆𑀧𑀺 𑀦 𑀳𑁄𑀢𑀺 𑀏𑀯. 𑀓𑀲𑁆𑀫𑀸? 𑀦𑁆𑀳𑀸𑀦𑀲𑁆𑀲 𑀧𑀸𑀧𑀳𑁂𑀢𑀽𑀦𑀁 𑀅𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄. 𑀬𑁄 𑀬𑀁 𑀯𑀺𑀦𑀸𑀲𑁂𑀢𑀺, 𑀲𑁄 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄. 𑀬𑀣𑀸 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑀲𑁆𑀲, 𑀯𑀺𑀚𑁆𑀚𑀸 𑀘 𑀅𑀯𑀺𑀚𑁆𑀚𑀸𑀬, 𑀦 𑀏𑀯𑀁 𑀦𑁆𑀳𑀸𑀦𑀁 𑀧𑀸𑀧𑀲𑁆𑀲. 𑀢𑀲𑁆𑀫𑀸 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀦 𑀉𑀤𑀓𑀸𑀪𑀺𑀲𑁂𑀘𑀦𑀸 𑀧𑀸𑀧𑀢𑁄 𑀧𑀭𑀺𑀫𑀼𑀢𑁆𑀢𑀻’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀉𑀤𑀓𑁂𑀦 𑀲𑀼𑀘𑀻 𑀳𑁄𑀢𑀺, 𑀩𑀳𑁆𑀯𑁂𑀢𑁆𑀣 𑀦𑁆𑀳𑀸𑀬𑀢𑀻 𑀚𑀦𑁄;

𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀲𑁄 𑀲𑀼𑀘𑀻 𑀲𑁄 𑀘 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀉𑀤𑀸. 𑁯; 𑀦𑁂𑀢𑁆𑀢𑀺. 𑁧𑁦𑁪);

𑀇𑀤𑀸𑀦𑀺 𑀬𑀤𑀺 𑀧𑀸𑀧𑀁 𑀧𑀯𑀸𑀳𑁂𑀢𑀼𑀓𑀸𑀫𑁄𑀲𑀺, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀸𑀧𑀁 𑀫𑀸 𑀓𑀭𑁄𑀳𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀫𑁂𑀯 𑀩𑁆𑀭𑀳𑁆𑀫𑁂 𑀫𑀸𑀓𑀸𑀲𑀻𑀢𑀺 𑀬𑀢𑁄 𑀧𑀸𑀧𑀢𑁄 𑀢𑁆𑀯𑀁 𑀪𑀻𑀢𑁄, 𑀢𑀫𑁂𑀯 𑀧𑀸𑀧𑀁 𑀩𑁆𑀭𑀳𑁆𑀫𑁂, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀫𑀸 𑀅𑀓𑀸𑀲𑀺. 𑀉𑀤𑀓𑁄𑀭𑁄𑀳𑀦𑀁 𑀧𑀦 𑀈𑀤𑀺𑀲𑁂 𑀲𑀻𑀢𑀓𑀸𑀮𑁂 𑀓𑁂𑀯𑀮𑀁 𑀲𑀭𑀻𑀭𑀫𑁂𑀯 𑀩𑀸𑀥𑀢𑀺. 𑀢𑁂𑀦𑀸𑀳 𑁋 ‘‘𑀫𑀸 𑀢𑁂 𑀲𑀻𑀢𑀁 𑀙𑀯𑀺𑀁 𑀳𑀦𑁂’’𑀢𑀺, 𑀈𑀤𑀺𑀲𑁂 𑀲𑀻𑀢𑀓𑀸𑀮𑁂 𑀉𑀤𑀓𑀸𑀪𑀺𑀲𑁂𑀘𑀦𑁂𑀦 𑀚𑀸𑀢𑀲𑀻𑀢𑀁 𑀢𑀯 𑀲𑀭𑀻𑀭𑀘𑁆𑀙𑀯𑀺𑀁 𑀫𑀸 𑀳𑀦𑁂𑀬𑁆𑀬 𑀫𑀸 𑀩𑀸𑀥𑁂𑀲𑀻𑀢𑀺 𑀅𑀢𑁆𑀣𑁄.

𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀁 𑀫𑀦𑁆𑀢𑀺 ‘‘𑀉𑀤𑀓𑀸𑀪𑀺𑀲𑁂𑀘𑀦𑁂𑀦 𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀇𑀫𑀁 𑀓𑀼𑀫𑁆𑀫𑀕𑁆𑀕𑀁 𑀫𑀺𑀘𑁆𑀙𑀸𑀕𑀸𑀳𑀁 𑀧𑀝𑀺𑀧𑀦𑁆𑀦𑀁 𑀧𑀕𑁆𑀕𑀬𑁆𑀳 𑀞𑀺𑀢𑀁 𑀫𑀁. 𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀦𑀬𑀻𑀢𑀺 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸’’𑀢𑀺 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁧𑁧𑁬, 𑁧𑁨𑁪; 𑀧𑁂𑀝𑀓𑁄. 𑁨𑁯) 𑀇𑀫𑀁 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀕𑀢𑀫𑀕𑁆𑀕𑀁 𑀲𑀫𑀸𑀦𑀬𑀺, 𑀲𑀫𑁆𑀫𑀤𑁂𑀯 𑀉𑀧𑀦𑁂𑀲𑀺, 𑀢𑀲𑁆𑀫𑀸 𑀪𑁄𑀢𑀺 𑀇𑀫𑀁 𑀲𑀸𑀝𑀓𑀁 𑀢𑀼𑀝𑁆𑀞𑀺𑀤𑀸𑀦𑀁 𑀆𑀘𑀭𑀺𑀬𑀪𑀸𑀕𑀁 𑀢𑀼𑀬𑁆𑀳𑀁 𑀤𑀤𑀸𑀫𑀺, 𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀅𑀢𑁆𑀣𑁄.

𑀲𑀸 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀢𑀼𑀬𑁆𑀳𑁂𑀯 𑀲𑀸𑀝𑀓𑁄 𑀳𑁄𑀢𑀼, 𑀦𑀸𑀳𑀫𑀺𑀘𑁆𑀙𑀸𑀫𑀺 𑀲𑀸𑀝𑀓’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀢𑀼𑀯𑀁 𑀲𑀓𑀮𑀸𑀧𑀸𑀬𑀺𑀓𑁂 𑀲𑀼𑀕𑀢𑀺𑀬𑀜𑁆𑀘 𑀅𑀨𑀸𑀲𑀼𑀓𑀢𑀸𑀤𑁄𑀪𑀕𑁆𑀕𑀢𑀸𑀤𑀺𑀪𑁂𑀤𑀸 𑀤𑀼𑀓𑁆𑀔𑀸 𑀪𑀸𑀬𑀲𑀺. 𑀬𑀤𑀺 𑀢𑁂 𑀢𑀁 𑀅𑀧𑁆𑀧𑀺𑀬𑀁 𑀦 𑀇𑀝𑁆𑀞𑀁. 𑀆𑀯𑀺 𑀯𑀸 𑀧𑀭𑁂𑀲𑀁 𑀧𑀸𑀓𑀝𑀪𑀸𑀯𑁂𑀦 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀯𑀸𑀘𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀯𑀸 𑀬𑀤𑀺 𑀯𑀸 𑀭𑀳𑁄 𑀅𑀧𑀸𑀓𑀝𑀪𑀸𑀯𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀅𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀧𑀸𑀧𑀓𑀁 𑀮𑀸𑀫𑀓𑀁 𑀓𑀫𑁆𑀫𑀁 𑀫𑀸𑀓𑀸𑀲𑀺 𑀫𑀸 𑀓𑀭𑀺. 𑀅𑀣 𑀧𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀆𑀬𑀢𑀺𑀁 𑀓𑀭𑀺𑀲𑁆𑀲𑀲𑀺, 𑀏𑀢𑀭𑀳𑀺 𑀓𑀭𑁄𑀲𑀺 𑀯𑀸, ‘‘𑀦𑀺𑀭𑀬𑀸𑀤𑀻𑀲𑀼 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀘 𑀢𑀲𑁆𑀲 𑀨𑀮𑀪𑀽𑀢𑀁 𑀤𑀼𑀓𑁆𑀔𑀁 𑀇𑀢𑁄 𑀏𑀢𑁆𑀢𑁄 𑀯𑀸 𑀧𑀮𑀸𑀬𑀦𑁆𑀢𑁂 𑀫𑀬𑀺 𑀦𑀸𑀦𑀼𑀩𑀦𑁆𑀥𑀺𑀲𑁆𑀲𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀉𑀧𑁂𑀘𑁆𑀘 𑀲𑀜𑁆𑀘𑀺𑀘𑁆𑀘 𑀧𑀮𑀸𑀬𑀢𑁄𑀧𑀺 𑀢𑁂 𑀢𑀢𑁄 𑀧𑀸𑀧𑀢𑁄 𑀫𑀼𑀢𑁆𑀢𑀺 𑀫𑁄𑀓𑁆𑀔𑀸 𑀦𑀢𑁆𑀣𑀺, 𑀕𑀢𑀺𑀓𑀸𑀮𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀢𑀺 𑀯𑀺𑀧𑀘𑁆𑀘𑀢𑁂 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀉𑀧𑁆𑀧𑀘𑁆𑀘𑀸’’𑀢𑀺 𑀯𑀸 𑀧𑀸𑀞𑁄, 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀸𑀧𑀲𑁆𑀲 𑀅𑀓𑀭𑀡𑁂𑀦 𑀤𑀼𑀓𑁆𑀔𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀜𑁆𑀜𑀲𑁆𑀲 𑀓𑀭𑀡𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀪𑀸𑀬𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀸𑀤𑀺𑀦𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁. 𑀬𑀣𑀸 𑀯𑀸 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀧𑀲𑁆𑀲𑀺𑀢𑀩𑁆𑀩𑀸, 𑀢𑀣𑀸 𑀧𑀲𑁆𑀲𑀺𑀢𑀩𑁆𑀩𑀢𑁄 𑀢𑀸𑀤𑀺, 𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀳𑀻𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀲𑀗𑁆𑀖𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀤𑀻𑀦𑀁 𑀯𑀭𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀁, 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀗𑁆𑀖𑀁 𑀲𑀫𑀽𑀳𑀦𑁆𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀲𑀭𑀡𑀕𑀫𑀦𑀁 𑀲𑀻𑀮𑀸𑀦𑀁 𑀲𑀫𑀸𑀤𑀸𑀦𑀜𑁆𑀘. 𑀳𑁂𑀳𑀺𑀢𑀻𑀢𑀺 𑀪𑀯𑀺𑀲𑁆𑀲𑀢𑀺.

𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀢𑁂𑀯𑀺𑀚𑁆𑀚𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑁄 ‘‘𑀩𑁆𑀭𑀳𑁆𑀫𑀩𑀦𑁆𑀥𑀽’’𑀢𑀺 𑀕𑀸𑀣𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀧𑀼𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦 𑀩𑁆𑀭𑀳𑁆𑀫𑀩𑀦𑁆𑀥𑀼 𑀦𑀸𑀫𑀸𑀲𑀺𑀁. 𑀢𑀣𑀸 𑀇𑀭𑀼𑀩𑁆𑀩𑁂𑀤𑀸𑀤𑀻𑀦𑀁 𑀅𑀚𑁆𑀛𑁂𑀦𑀸𑀤𑀺𑀫𑀢𑁆𑀢𑁂𑀦 𑀢𑁂𑀯𑀺𑀚𑁆𑀚𑁄 𑀯𑁂𑀤𑀲𑀫𑁆𑀧𑀦𑁆𑀦𑁄 𑀲𑁄𑀢𑁆𑀢𑀺𑀬𑁄 𑀦𑁆𑀳𑀸𑀢𑀓𑁄 𑀘 𑀦𑀸𑀫𑀸𑀲𑀺𑀁. 𑀇𑀤𑀸𑀦𑀺 𑀲𑀩𑁆𑀩𑀲𑁄 𑀩𑀸𑀳𑀺𑀢𑀧𑀸𑀧𑀢𑀸𑀬 𑀲𑀘𑁆𑀘𑀩𑁆𑀭𑀸𑀳𑁆𑀫𑀡𑁄 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄, 𑀯𑀺𑀚𑁆𑀚𑀢𑁆𑀢𑀬𑀸𑀥𑀺𑀕𑀫𑁂𑀦 𑀢𑁂𑀯𑀺𑀚𑁆𑀚𑁄, 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀦 𑀯𑁂𑀤𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑁂𑀤𑀲𑀫𑁆𑀧𑀦𑁆𑀦𑁄, 𑀦𑀺𑀢𑁆𑀣𑀭𑀲𑀩𑁆𑀩𑀧𑀸𑀧𑀢𑀸𑀬 𑀦𑁆𑀳𑀸𑀢𑀓𑁄 𑀘 𑀅𑀫𑁆𑀳𑀻𑀢𑀺. 𑀏𑀢𑁆𑀣 𑀘 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀕𑀸𑀣𑀸𑀧𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀕𑀸𑀣𑀸𑀧𑀺 𑀧𑀘𑁆𑀙𑀸 𑀣𑁂𑀭𑀺𑀬𑀸 𑀧𑀘𑁆𑀘𑁂𑀓𑀁 𑀪𑀸𑀲𑀺𑀢𑀸𑀢𑀺 𑀲𑀩𑁆𑀩𑀸 𑀣𑁂𑀭𑀺𑀬𑀸 𑀕𑀸𑀣𑀸 𑀏𑀯 𑀚𑀸𑀢𑀸𑀢𑀺.

𑀧𑀼𑀡𑁆𑀡𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀯𑀻𑀲𑀢𑀺𑀦𑀺𑀧𑀸𑀢𑁄

𑁧. 𑀅𑀫𑁆𑀩𑀧𑀸𑀮𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀯𑀻𑀲𑀢𑀺𑀦𑀺𑀧𑀸𑀢𑁂 𑀓𑀸𑀴𑀓𑀸 𑀪𑀫𑀭𑀯𑀡𑁆𑀡𑀲𑀸𑀤𑀺𑀲𑀸𑀢𑀺𑀆𑀤𑀺𑀓𑀸 𑀅𑀫𑁆𑀩𑀧𑀸𑀮𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀸𑀬 𑀯𑀺𑀳𑀭𑀦𑁆𑀢𑀻, 𑀏𑀓𑀤𑀺𑀯𑀲𑀁 𑀲𑀫𑁆𑀩𑀳𑀼𑀮𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀻 𑀧𑀼𑀭𑁂𑀢𑀭𑀁 𑀕𑀘𑁆𑀙𑀦𑁆𑀢𑀺𑀬𑀸 𑀔𑀻𑀡𑀸𑀲𑀯𑀢𑁆𑀣𑁂𑀭𑀺𑀬𑀸 𑀔𑀺𑀧𑀦𑁆𑀢𑀺𑀬𑀸 𑀲𑀳𑀲𑀸 𑀔𑁂𑀴𑀧𑀺𑀡𑁆𑀟𑀁 𑀘𑁂𑀢𑀺𑀬𑀗𑁆𑀕𑀡𑁂 𑀧𑀢𑀺𑀢𑀁, 𑀔𑀻𑀡𑀸𑀲𑀯𑀢𑁆𑀣𑁂𑀭𑀺𑀬𑀸 𑀅𑀧𑀲𑁆𑀲𑀺𑀢𑁆𑀯𑀸 𑀕𑀢𑀸𑀬 𑀅𑀬𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀻 𑀢𑀁 𑀔𑁂𑀴𑀧𑀺𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀓𑀸 𑀦𑀸𑀫 𑀕𑀡𑀺𑀓𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀔𑁂𑀴𑀧𑀺𑀡𑁆𑀟𑀁 𑀧𑀸𑀢𑁂𑀲𑀻’’𑀢𑀺 𑀅𑀓𑁆𑀓𑁄𑀲𑀺. 𑀲𑀸 𑀪𑀺𑀓𑁆𑀔𑀼𑀦𑀺𑀓𑀸𑀮𑁂 𑀲𑀻𑀮𑀁 𑀭𑀓𑁆𑀔𑀦𑁆𑀢𑀻 𑀕𑀩𑁆𑀪𑀯𑀸𑀲𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀑𑀧𑀧𑀸𑀢𑀺𑀓𑀢𑁆𑀢𑀪𑀸𑀯𑁂 𑀘𑀺𑀢𑁆𑀢𑀁 𑀞𑀧𑁂𑀲𑀺. 𑀢𑁂𑀦 𑀘𑀭𑀺𑀫𑀢𑁆𑀢𑀪𑀸𑀯𑁂 𑀯𑁂𑀲𑀸𑀮𑀺𑀬𑀁 𑀭𑀸𑀚𑀼𑀬𑁆𑀬𑀸𑀦𑁂 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀑𑀧𑀧𑀸𑀢𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁄 𑀦𑀕𑀭𑀁 𑀉𑀧𑀦𑁂𑀲𑀺. 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀦𑀺𑀩𑁆𑀩𑀢𑁆𑀢𑀢𑀸𑀬 𑀲𑀸 𑀅𑀫𑁆𑀩𑀧𑀸𑀮𑀻𑀢𑁆𑀯𑁂𑀯 𑀯𑁄𑀳𑀭𑀻𑀬𑀺𑀢𑁆𑀣. 𑀅𑀣 𑀦𑀁 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀯𑀺𑀮𑀸𑀲𑀓𑀦𑁆𑀢𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀼𑀤𑀺𑀢𑀁 𑀤𑀺𑀲𑁆𑀯𑀸 𑀲𑀫𑁆𑀩𑀳𑀼𑀮𑀸 𑀭𑀸𑀚𑀓𑀼𑀫𑀸𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀁 𑀓𑀸𑀢𑀼𑀓𑀸𑀫𑀸 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀅𑀓𑀁𑀲𑀼. 𑀢𑁂𑀲𑀁 𑀓𑀮𑀳𑀯𑀽𑀧𑀲𑀫𑀢𑁆𑀣𑀁 𑀢𑀲𑁆𑀲𑀸 𑀓𑀫𑁆𑀫𑀲𑀜𑁆𑀘𑁄𑀤𑀺𑀢𑀸 𑀯𑁄𑀳𑀸𑀭𑀺𑀓𑀸 ‘‘𑀲𑀩𑁆𑀩𑁂𑀲𑀁 𑀳𑁄𑀢𑀽’’𑀢𑀺 𑀕𑀡𑀺𑀓𑀸𑀝𑁆𑀞𑀸𑀦𑁂 𑀞𑀧𑁂𑀲𑀼𑀁. 𑀲𑀸 𑀲𑀢𑁆𑀣𑀭𑀺 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀯𑀺𑀫𑀮𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀚𑀭𑀸𑀚𑀺𑀡𑁆𑀡𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀁𑀯𑁂𑀕𑀚𑀸𑀢𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀁 𑀯𑀺𑀪𑀸𑀯𑁂𑀦𑁆𑀢𑀻 𑁋

𑁨𑁫𑁨.

‘‘𑀓𑀸𑀴𑀓𑀸 𑀪𑀫𑀭𑀯𑀡𑁆𑀡𑀲𑀸𑀤𑀺𑀲𑀸, 𑀯𑁂𑀮𑁆𑀮𑀺𑀢𑀕𑁆𑀕𑀸 𑀫𑀫 𑀫𑀼𑀤𑁆𑀥𑀚𑀸 𑀅𑀳𑀼𑀁;

𑀢𑁂 𑀚𑀭𑀸𑀬 𑀲𑀸𑀡𑀯𑀸𑀓𑀲𑀸𑀤𑀺𑀲𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁩.

‘‘𑀯𑀸𑀲𑀺𑀢𑁄𑀯 𑀲𑀼𑀭𑀪𑀻 𑀓𑀭𑀡𑁆𑀟𑀓𑁄, 𑀧𑀼𑀧𑁆𑀨𑀧𑀽𑀭 𑀫𑀫 𑀉𑀢𑁆𑀢𑀫𑀗𑁆𑀕𑀚𑁄;

𑀢𑀁 𑀚𑀭𑀸𑀬𑀣 𑀲𑀮𑁄𑀫𑀕𑀦𑁆𑀥𑀺𑀓𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁪.

‘‘𑀓𑀸𑀦𑀦𑀁𑀯 𑀲𑀳𑀺𑀢𑀁 𑀲𑀼𑀭𑁄𑀧𑀺𑀢𑀁, 𑀓𑁄𑀘𑁆𑀙𑀲𑀽𑀘𑀺𑀯𑀺𑀘𑀺𑀢𑀕𑁆𑀕𑀲𑁄𑀪𑀺𑀢𑀁;

𑀢𑀁 𑀚𑀭𑀸𑀬 𑀯𑀺𑀭𑀮𑀁 𑀢𑀳𑀺𑀁 𑀢𑀳𑀺𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁫.

‘‘𑀓𑀡𑁆𑀳𑀔𑀦𑁆𑀥𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀁, 𑀲𑁄𑀪𑀢𑁂 𑀲𑀼𑀯𑁂𑀡𑀻𑀳𑀺𑀮𑀗𑁆𑀓𑀢𑀁;

𑀢𑀁 𑀚𑀭𑀸𑀬 𑀔𑀮𑀺𑀢𑀁 𑀲𑀺𑀭𑀁 𑀓𑀢𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁬.

‘‘𑀘𑀺𑀢𑁆𑀢𑀓𑀸𑀭𑀲𑀼𑀓𑀢𑀸𑀯 𑀮𑁂𑀔𑀺𑀓𑀸, 𑀲𑁄𑀪𑀭𑁂 𑀲𑀼 𑀪𑀫𑀼𑀓𑀸 𑀧𑀼𑀭𑁂 𑀫𑀫;

𑀢𑀸 𑀚𑀭𑀸𑀬 𑀯𑀮𑀺𑀪𑀺𑀧𑁆𑀧𑀮𑀫𑁆𑀩𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁭.

‘‘𑀪𑀲𑁆𑀲𑀭𑀸 𑀲𑀼𑀭𑀼𑀘𑀺𑀭𑀸 𑀬𑀣𑀸 𑀫𑀡𑀻, 𑀦𑁂𑀢𑁆𑀢𑀳𑁂𑀲𑀼𑀫𑀪𑀺𑀦𑀻𑀮𑀫𑀸𑀬𑀢𑀸;

𑀢𑁂 𑀚𑀭𑀸𑀬𑀪𑀺𑀳𑀢𑀸 𑀦 𑀲𑁄𑀪𑀭𑁂, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁮.

‘‘𑀲𑀡𑁆𑀳𑀢𑀼𑀗𑁆𑀕𑀲𑀤𑀺𑀲𑀻 𑀘 𑀦𑀸𑀲𑀺𑀓𑀸, 𑀲𑁄𑀪𑀢𑁂 𑀲𑀼 𑀅𑀪𑀺𑀬𑁄𑀩𑁆𑀩𑀦𑀁 𑀧𑀢𑀺;

𑀲𑀸 𑀚𑀭𑀸𑀬 𑀉𑀧𑀓𑀽𑀮𑀺𑀢𑀸 𑀯𑀺𑀬, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁯.

‘‘𑀓𑀗𑁆𑀓𑀡𑀁𑀯 𑀲𑀼𑀓𑀢𑀁 𑀲𑀼𑀦𑀺𑀝𑁆𑀞𑀺𑀢𑀁, 𑀲𑁄𑀪𑀭𑁂 𑀲𑀼 𑀫𑀫 𑀓𑀡𑁆𑀡𑀧𑀸𑀴𑀺𑀬𑁄;

𑀢𑀸 𑀚𑀭𑀸𑀬 𑀯𑀮𑀺𑀪𑀺𑀧𑁆𑀧𑀮𑀫𑁆𑀩𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁦.

‘‘𑀧𑀢𑁆𑀢𑀮𑀻𑀫𑀓𑀼𑀮𑀯𑀡𑁆𑀡𑀲𑀸𑀤𑀺𑀲𑀸, 𑀲𑁄𑀪𑀭𑁂 𑀲𑀼 𑀤𑀦𑁆𑀢𑀸 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀔𑀡𑁆𑀟𑀺𑀢𑀸 𑀘𑀸𑀲𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁧.

‘‘𑀓𑀸𑀦𑀦𑀫𑁆𑀳𑀺 𑀯𑀦𑀲𑀡𑁆𑀟𑀘𑀸𑀭𑀺𑀦𑀻, 𑀓𑁄𑀓𑀺𑀮𑀸𑀯 𑀫𑀥𑀼𑀭𑀁 𑀦𑀺𑀓𑀽𑀚𑀺𑀳𑀁;

𑀢𑀁 𑀚𑀭𑀸𑀬 𑀔𑀮𑀺𑀢𑀁 𑀢𑀳𑀺𑀁 𑀢𑀳𑀺𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁨.

‘‘𑀲𑀡𑁆𑀳𑀓𑀫𑁆𑀩𑀼𑀭𑀺𑀯 𑀲𑀼𑀧𑁆𑀧𑀫𑀚𑁆𑀚𑀺𑀢𑀸, 𑀲𑁄𑀪𑀢𑁂 𑀲𑀼 𑀕𑀻𑀯𑀸 𑀧𑀼𑀭𑁂 𑀫𑀫;

𑀲𑀸 𑀚𑀭𑀸𑀬 𑀪𑀕𑁆𑀕𑀸 𑀯𑀺𑀦𑀸𑀫𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁩.

‘‘𑀯𑀝𑁆𑀝𑀧𑀮𑀺𑀖𑀲𑀤𑀺𑀲𑁄𑀧𑀫𑀸 𑀉𑀪𑁄, 𑀲𑁄𑀪𑀭𑁂 𑀲𑀼 𑀩𑀸𑀳𑀸 𑀧𑀼𑀭𑁂 𑀫𑀫;

𑀢𑀸 𑀚𑀭𑀸𑀬 𑀬𑀣𑀸 𑀧𑀸𑀝𑀮𑀺𑀩𑁆𑀩𑀮𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁪.

‘‘𑀲𑀡𑁆𑀳𑀫𑀼𑀤𑁆𑀤𑀺𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀸, 𑀲𑁄𑀪𑀭𑁂 𑀲𑀼 𑀳𑀢𑁆𑀣𑀸 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀬𑀣𑀸 𑀫𑀽𑀮𑀫𑀽𑀮𑀺𑀓𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁫.

‘‘𑀧𑀻𑀦𑀯𑀝𑁆𑀝𑀲𑀳𑀺𑀪𑀼𑀕𑁆𑀕𑀢𑀸 𑀉𑀪𑁄, 𑀲𑁄𑀪𑀭𑁂 𑀲𑀼 𑀣𑀦𑀓𑀸 𑀧𑀼𑀭𑁂 𑀫𑀫;

𑀣𑁂𑀯𑀺𑀓𑀻𑀯 𑀮𑀫𑁆𑀩𑀦𑁆𑀢𑀺 𑀦𑁄𑀤𑀓𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁬.

‘‘𑀓𑀜𑁆𑀘𑀦𑀲𑁆𑀲 𑀨𑀮𑀓𑀁𑀯 𑀲𑀫𑁆𑀫𑀝𑁆𑀞𑀁, 𑀲𑁄𑀪𑀢𑁂 𑀲𑀼 𑀓𑀸𑀬𑁄 𑀧𑀼𑀭𑁂 𑀫𑀫;

𑀲𑁄 𑀯𑀮𑀻𑀳𑀺 𑀲𑀼𑀔𑀼𑀫𑀸𑀳𑀺 𑀑𑀢𑀢𑁄, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁭.

‘‘𑀦𑀸𑀕𑀪𑁄𑀕𑀲𑀤𑀺𑀲𑁄𑀧𑀫𑀸 𑀉𑀪𑁄, 𑀲𑁄𑀪𑀭𑁂 𑀲𑀼 𑀊𑀭𑀽 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀬𑀣𑀸 𑀯𑁂𑀴𑀼𑀦𑀸𑀴𑀺𑀬𑁄, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁮.

‘‘𑀲𑀡𑁆𑀳𑀦𑀽𑀧𑀼𑀭𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀸, 𑀲𑁄𑀪𑀭𑁂 𑀲𑀼 𑀚𑀗𑁆𑀖𑀸 𑀧𑀼𑀭𑁂 𑀫𑀫;

𑀢𑀸 𑀚𑀭𑀸𑀬 𑀢𑀺𑀮𑀤𑀡𑁆𑀟𑀓𑀸𑀭𑀺𑀯, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁯.

‘‘𑀢𑀽𑀮𑀧𑀼𑀡𑁆𑀡𑀲𑀤𑀺𑀲𑁄𑀧𑀫𑀸 𑀉𑀪𑁄, 𑀲𑁄𑀪𑀭𑁂 𑀲𑀼 𑀧𑀸𑀤𑀸 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀨𑀼𑀝𑀺𑀢𑀸 𑀯𑀮𑀻𑀫𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁭𑁦.

‘‘𑀏𑀤𑀺𑀲𑁄 𑀅𑀳𑀼 𑀅𑀬𑀁 𑀲𑀫𑀼𑀲𑁆𑀲𑀬𑁄, 𑀚𑀚𑁆𑀚𑀭𑁄 𑀩𑀳𑀼𑀤𑀼𑀔𑀸𑀦𑀫𑀸𑀮𑀬𑁄;

𑀲𑁄𑀧𑀮𑁂𑀧𑀧𑀢𑀺𑀢𑁄 𑀚𑀭𑀸𑀖𑀭𑁄, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀓𑀸𑀴𑀓𑀸𑀢𑀺 𑀓𑀸𑀴𑀓𑀯𑀡𑁆𑀡𑀸. 𑀪𑀫𑀭𑀯𑀡𑁆𑀡𑀲𑀸𑀤𑀺𑀲𑀸𑀢𑀺 𑀓𑀸𑀴𑀓𑀸 𑀳𑁄𑀦𑁆𑀢𑀸𑀧𑀺 𑀪𑀫𑀭𑀲𑀤𑀺𑀲𑀯𑀡𑁆𑀡𑀸, 𑀲𑀺𑀦𑀺𑀤𑁆𑀥𑀦𑀻𑀮𑀸𑀢𑀺 𑀅𑀢𑁆𑀣𑁄. 𑀯𑁂𑀮𑁆𑀮𑀺𑀢𑀕𑁆𑀕𑀸𑀢𑀺 𑀓𑀼𑀜𑁆𑀘𑀺𑀢𑀕𑁆𑀕𑀸, 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀸 𑀓𑀼𑀜𑁆𑀘𑀺𑀢𑀸 𑀯𑁂𑀮𑁆𑀮𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀼𑀤𑁆𑀥𑀚𑀸𑀢𑀺 𑀓𑁂𑀲𑀸. 𑀚𑀭𑀸𑀬𑀸𑀢𑀺 𑀚𑀭𑀸𑀳𑁂𑀢𑀼 𑀚𑀭𑀸𑀬 𑀉𑀧𑀳𑀢𑀲𑁄𑀪𑀸. 𑀲𑀸𑀡𑀯𑀸𑀓𑀲𑀸𑀤𑀺𑀲𑀸𑀢𑀺 𑀲𑀸𑀡𑀲𑀤𑀺𑀲𑀸 𑀯𑀸𑀓𑀲𑀤𑀺𑀲𑀸 𑀘, 𑀲𑀸𑀡𑀯𑀸𑀓𑀲𑀤𑀺𑀲𑀸 𑀘𑁂𑀯 𑀫𑀓𑀘𑀺𑀯𑀸𑀓𑀲𑀤𑀺𑀲𑀸 𑀘𑀸𑀢𑀺𑀧𑀺 𑀅𑀢𑁆𑀣𑁄. 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸𑀢𑀺 𑀲𑀘𑁆𑀘𑀯𑀸𑀤𑀺𑀦𑁄 𑀅𑀯𑀺𑀢𑀣𑀯𑀸𑀤𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 ‘‘𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀚𑀭𑀸𑀪𑀺𑀪𑀽𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸 𑀬𑀣𑀸𑀪𑀽𑀢𑀫𑁂𑀯, 𑀦 𑀢𑀢𑁆𑀣 𑀯𑀺𑀢𑀣𑀁 𑀅𑀢𑁆𑀣𑀻𑀢𑀺.

𑀯𑀸𑀲𑀺𑀢𑁄𑀯 𑀲𑀼𑀭𑀪𑀻 𑀓𑀭𑀡𑁆𑀟𑀓𑁄𑀢𑀺 𑀧𑀼𑀧𑁆𑀨𑀕𑀦𑁆𑀥𑀯𑀸𑀲𑀘𑀼𑀡𑁆𑀡𑀸𑀤𑀻𑀳𑀺 𑀯𑀸𑀲𑀺𑀢𑁄 𑀯𑀸𑀲𑀁 𑀕𑀸𑀳𑀸𑀧𑀺𑀢𑁄 𑀧𑀲𑀸𑀥𑀦𑀲𑀫𑀼𑀕𑁆𑀕𑁄 𑀯𑀺𑀬 𑀲𑀼𑀕𑀦𑁆𑀥𑀺. 𑀧𑀼𑀧𑁆𑀨𑀧𑀽𑀭 𑀫𑀫 𑀉𑀢𑁆𑀢𑀫𑀗𑁆𑀕𑀚𑁄𑀢𑀺 𑀘𑀫𑁆𑀧𑀓𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀭𑀺𑀢𑁄 𑀧𑀼𑀩𑁆𑀩𑁂 𑀫𑀫 𑀓𑁂𑀲𑀓𑀮𑀸𑀧𑁄 𑀦𑀺𑀫𑁆𑀫𑀮𑁄𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀉𑀢𑁆𑀢𑀫𑀗𑁆𑀕𑀚𑀁. 𑀅𑀣 𑀧𑀘𑁆𑀙𑀸 𑀏𑀢𑀭𑀳𑀺 𑀲𑀮𑁄𑀫𑀕𑀦𑁆𑀥𑀺𑀓𑀁 𑀧𑀸𑀓𑀢𑀺𑀓𑀮𑁄𑀫𑀕𑀦𑁆𑀥𑀫𑁂𑀯 𑀚𑀸𑀢𑀁. 𑀅𑀣 𑀯𑀸 𑀲𑀮𑁄𑀫𑀕𑀦𑁆𑀥𑀺𑀓𑀦𑁆𑀢𑀺 𑀫𑁂𑀡𑁆𑀟𑀓𑀮𑁄𑀫𑁂𑀳𑀺 𑀲𑀫𑀸𑀦𑀕𑀦𑁆𑀥𑀁. ‘‘𑀏𑀴𑀓𑀮𑁄𑀫𑀕𑀦𑁆𑀥’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀓𑀸𑀦𑀦𑀁𑀯 𑀲𑀳𑀺𑀢𑀁 𑀲𑀼𑀭𑁄𑀧𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀭𑁄𑀧𑀺𑀢𑀁 𑀲𑀳𑀺𑀢𑀁 𑀖𑀦𑀲𑀦𑁆𑀦𑀺𑀯𑁂𑀲𑀁 𑀉𑀤𑁆𑀥𑀫𑁂𑀯 𑀉𑀝𑁆𑀞𑀺𑀢𑀁 𑀉𑀚𑀼𑀓𑀤𑀻𑀖𑀲𑀸𑀔𑀁 𑀉𑀧𑀯𑀦𑀁 𑀯𑀺𑀬. 𑀓𑁄𑀘𑁆𑀙𑀲𑀽𑀘𑀺𑀯𑀺𑀘𑀺𑀢𑀕𑁆𑀕𑀲𑁄𑀪𑀺𑀢𑀦𑁆𑀢𑀺 𑀧𑀼𑀩𑁆𑀩𑁂 𑀓𑁄𑀘𑁆𑀙𑁂𑀦 𑀲𑀼𑀯𑀡𑁆𑀡𑀲𑀽𑀘𑀺𑀬𑀸 𑀘 𑀓𑁂𑀲𑀚𑀝𑀸𑀯𑀺𑀚𑀝𑀦𑁂𑀦 𑀯𑀺𑀘𑀺𑀢𑀕𑁆𑀕𑀁 𑀳𑀼𑀢𑁆𑀯𑀸 𑀲𑁄𑀪𑀺𑀢𑀁, 𑀖𑀦𑀪𑀸𑀯𑁂𑀦 𑀯𑀸 𑀓𑁄𑀘𑁆𑀙𑀲𑀤𑀺𑀲𑀁 𑀳𑀼𑀢𑁆𑀯𑀸 𑀧𑀡𑀤𑀦𑁆𑀢𑀲𑀽𑀘𑀻𑀳𑀺 𑀯𑀺𑀘𑀺𑀢𑀕𑁆𑀕𑀢𑀸𑀬 𑀲𑁄𑀪𑀺𑀢𑀁. 𑀢𑀦𑁆𑀢𑀺 𑀉𑀢𑁆𑀢𑀫𑀗𑁆𑀕𑀚𑀁. 𑀯𑀺𑀭𑀮𑀁 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀭𑀮𑀁 𑀯𑀺𑀮𑀽𑀦𑀓𑁂𑀲𑀁.

𑀓𑀡𑁆𑀳𑀔𑀦𑁆𑀥𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀦𑁆𑀢𑀺 𑀲𑀼𑀯𑀡𑁆𑀡𑀯𑀚𑀺𑀭𑀸𑀤𑀻𑀳𑀺 𑀯𑀺𑀪𑀽𑀲𑀺𑀢𑀁 𑀓𑀡𑁆𑀳𑀓𑁂𑀲𑀧𑀼𑀜𑁆𑀚𑀓𑀁. 𑀬𑁂 𑀧𑀦 ‘‘𑀲𑀡𑁆𑀳𑀓𑀡𑁆𑀟𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀲𑀡𑁆𑀳𑀸𑀳𑀺 𑀲𑀼𑀯𑀡𑁆𑀡𑀲𑀽𑀘𑀻𑀳𑀺 𑀚𑀝𑀸𑀯𑀺𑀚𑀝𑀦𑁂𑀦 𑀫𑀡𑁆𑀟𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀪𑀢𑁂 𑀲𑀼𑀯𑁂𑀡𑀻𑀳𑀺𑀮𑀗𑁆𑀓𑀢𑀦𑁆𑀢𑀺 𑀲𑀼𑀦𑁆𑀤𑀭𑁂𑀳𑀺 𑀭𑀸𑀚𑀭𑀼𑀓𑁆𑀔𑀫𑀸𑀮𑀸 𑀲𑀤𑀺𑀲𑁂𑀳𑀺 𑀓𑁂𑀲𑀯𑁂𑀡𑀻𑀳𑀺 𑀅𑀮𑀗𑁆𑀓𑀢𑀁 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂 𑀯𑀺𑀭𑀸𑀚𑀢𑁂. 𑀢𑀁 𑀚𑀭𑀸𑀬 𑀔𑀮𑀺𑀢𑀁 𑀲𑀺𑀭𑀁 𑀓𑀢𑀦𑁆𑀢𑀺 𑀢𑀁 𑀢𑀣𑀸 𑀲𑁄𑀪𑀺𑀢𑀁 𑀲𑀺𑀭𑀁 𑀇𑀤𑀸𑀦𑀺 𑀚𑀭𑀸𑀬 𑀔𑀮𑀺𑀢𑀁 𑀔𑀡𑁆𑀟𑀺𑀢𑀸𑀔𑀡𑁆𑀟𑀺𑀢𑀁 𑀯𑀺𑀮𑀽𑀦𑀓𑁂𑀲𑀁 𑀓𑀢𑀁.

𑀘𑀺𑀢𑁆𑀢𑀓𑀸𑀭𑀲𑀼𑀓𑀢𑀸𑀯 𑀮𑁂𑀔𑀺𑀓𑀸𑀢𑀺 𑀘𑀺𑀢𑁆𑀢𑀓𑀸𑀭𑁂𑀦 𑀲𑀺𑀧𑁆𑀧𑀺𑀦𑀸 𑀦𑀻𑀮𑀸𑀬 𑀯𑀡𑁆𑀡𑀥𑀸𑀢𑀼𑀬𑀸 𑀲𑀼𑀝𑁆𑀞𑀼 𑀓𑀢𑀸 𑀮𑁂𑀔𑀸 𑀯𑀺𑀬 𑀲𑁄𑀪𑀢𑁂. 𑀲𑀼 𑀪𑀫𑀼𑀓𑀸 𑀧𑀼𑀭𑁂 𑀫𑀫𑀸𑀢𑀺 𑀲𑀼𑀦𑁆𑀤𑀭𑀸 𑀪𑀫𑀼𑀓𑀸 𑀧𑀼𑀩𑁆𑀩𑁂 𑀫𑀫 𑀲𑁄𑀪𑀦𑀁 𑀕𑀢𑀸. 𑀯𑀮𑀺𑀪𑀺𑀧𑁆𑀧𑀮𑀫𑁆𑀩𑀺𑀢𑀸𑀢𑀺 𑀦𑀮𑀸𑀝𑀦𑁆𑀢𑁂 𑀉𑀧𑁆𑀧𑀦𑁆𑀦𑀸𑀳𑀺 𑀯𑀮𑀻𑀳𑀺 𑀧𑀮𑀫𑁆𑀩𑀦𑁆𑀢𑀸 𑀞𑀺𑀢𑀸.

𑀪𑀲𑁆𑀲𑀭𑀸𑀢𑀺 𑀪𑀸𑀲𑀼𑀭𑀸. 𑀲𑀼𑀭𑀼𑀘𑀺𑀭𑀸𑀢𑀺 𑀲𑀼𑀝𑁆𑀞𑀼 𑀭𑀼𑀘𑀺𑀭𑀸. 𑀬𑀣𑀸 𑀫𑀡𑀻𑀢𑀺 𑀫𑀡𑀺𑀫𑀼𑀤𑁆𑀤𑀺𑀓𑀸 𑀯𑀺𑀬. 𑀦𑁂𑀢𑁆𑀢𑀳𑁂𑀲𑀼𑀦𑁆𑀢𑀺 𑀲𑀼𑀦𑁂𑀢𑁆𑀢𑀸 𑀅𑀳𑁂𑀲𑀼𑀁. 𑀅𑀪𑀺𑀦𑀻𑀮𑀫𑀸𑀬𑀢𑀸𑀢𑀺 𑀅𑀪𑀺𑀦𑀻𑀮𑀸 𑀳𑀼𑀢𑁆𑀯𑀸 𑀆𑀬𑀢𑀸. 𑀢𑁂𑀢𑀺 𑀦𑁂𑀢𑁆𑀢𑀸. 𑀚𑀭𑀸𑀬𑀪𑀺𑀳𑀢𑀸𑀢𑀺 𑀚𑀭𑀸𑀬 𑀅𑀪𑀺𑀳𑀢𑀸.

𑀲𑀡𑁆𑀳𑀢𑀼𑀗𑁆𑀕𑀲𑀤𑀺𑀲𑀻 𑀘𑀸𑀢𑀺 𑀲𑀡𑁆𑀳𑀸 𑀢𑀼𑀗𑁆𑀕𑀸 𑀲𑁂𑀲𑀫𑀼𑀔𑀸𑀯𑀬𑀯𑀸𑀦𑀁 𑀅𑀦𑀼𑀭𑀽𑀧𑀸 𑀘. 𑀲𑁄𑀪𑀢𑁂𑀢𑀺 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀺 𑀯𑀺𑀬 𑀫𑀫 𑀦𑀸𑀲𑀺𑀓𑀸 𑀲𑁄𑀪𑀢𑁂. 𑀲𑀼 𑀅𑀪𑀺𑀬𑁄𑀩𑁆𑀩𑀦𑀁 𑀧𑀢𑀻𑀢𑀺 𑀲𑀼𑀦𑁆𑀤𑀭𑁂 𑀅𑀪𑀺𑀦𑀯𑀬𑁄𑀩𑁆𑀩𑀦𑀓𑀸𑀮𑁂 𑀲𑀸 𑀦𑀸𑀲𑀺𑀓𑀸 𑀇𑀤𑀸𑀦𑀺 𑀚𑀭𑀸𑀬 𑀦𑀺𑀯𑀸𑀭𑀺𑀢𑀲𑁄𑀪𑀢𑀸𑀬 𑀧𑀭𑀺𑀲𑁂𑀤𑀺𑀢𑀸 𑀯𑀺𑀬 𑀯𑀭𑀢𑁆𑀢𑀸 𑀯𑀺𑀬 𑀘 𑀚𑀸𑀢𑀸.

𑀓𑀗𑁆𑀓𑀡𑀁𑀯 𑀲𑀼𑀓𑀢𑀁 𑀲𑀼𑀦𑀺𑀝𑁆𑀞𑀺𑀢𑀦𑁆𑀢𑀺 𑀲𑀼𑀧𑀭𑀺𑀓𑀫𑁆𑀫𑀓𑀢𑀁 𑀲𑀼𑀯𑀡𑁆𑀡𑀓𑀗𑁆𑀓𑀡𑀁 𑀯𑀺𑀬 𑀯𑀝𑁆𑀝𑀼𑀮𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄𑀪𑀭𑁂𑀢𑀺 𑀲𑁄𑀪𑀦𑁆𑀢𑁂. ‘‘𑀲𑁄𑀪𑀦𑁆𑀢𑁂’’𑀢𑀺 𑀯𑀸 𑀧𑀸𑀞𑁄. 𑀲𑀼𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀡𑁆𑀡𑀧𑀸𑀴𑀺𑀬𑁄𑀢𑀺 𑀓𑀡𑁆𑀡𑀕𑀦𑁆𑀥𑀸. 𑀯𑀮𑀺𑀪𑀺𑀧𑁆𑀧𑀮𑀫𑁆𑀩𑀺𑀢𑀸𑀢𑀺 𑀢𑀳𑀺𑀁 𑀢𑀳𑀺𑀁 𑀉𑀧𑁆𑀧𑀦𑁆𑀦𑀯𑀮𑀻𑀳𑀺 𑀯𑀮𑀺𑀢𑀸 𑀳𑀼𑀢𑁆𑀯𑀸 𑀯𑀝𑁆𑀝𑀦𑀺𑀬𑀸 𑀧𑀡𑀸𑀫𑀺𑀢𑀯𑀢𑁆𑀣𑀔𑀦𑁆𑀥𑀸 𑀯𑀺𑀬 𑀪𑀲𑁆𑀲𑀦𑁆𑀢𑀸 𑀑𑀮𑀫𑁆𑀩𑀦𑁆𑀢𑀺.

𑀧𑀢𑁆𑀢𑀮𑀻𑀫𑀓𑀼𑀮𑀯𑀡𑁆𑀡𑀲𑀸𑀤𑀺𑀲𑀸𑀢𑀺 𑀓𑀤𑀮𑀺𑀫𑀓𑀼𑀮𑀲𑀤𑀺𑀲𑀯𑀡𑁆𑀡𑀲𑀡𑁆𑀞𑀸𑀦𑀸. 𑀔𑀡𑁆𑀟𑀺𑀢𑀸𑀢𑀺 𑀪𑁂𑀤𑀦𑀧𑀢𑀦𑁂𑀳𑀺 𑀔𑀡𑁆𑀟𑀺𑀢𑀸 𑀔𑀡𑁆𑀟𑀪𑀸𑀯𑀁 𑀕𑀢𑀸. 𑀅𑀲𑀺𑀢𑀸𑀢𑀺 𑀯𑀡𑁆𑀡𑀪𑁂𑀤𑁂𑀦 𑀅𑀲𑀺𑀢𑀪𑀸𑀯𑀁 𑀕𑀢𑀸.

𑀓𑀸𑀦𑀦𑀫𑁆𑀳𑀺 𑀯𑀦𑀲𑀡𑁆𑀟𑀘𑀸𑀭𑀺𑀦𑀻, 𑀓𑁄𑀓𑀺𑀮𑀸𑀯 𑀫𑀥𑀼𑀭𑀁 𑀦𑀺𑀓𑀽𑀚𑀺𑀳𑀦𑁆𑀢𑀺 𑀯𑀦𑀲𑀡𑁆𑀟𑁂 𑀕𑁄𑀘𑀭𑀘𑀭𑀡𑁂𑀦 𑀯𑀦𑀲𑀡𑁆𑀟𑀘𑀸𑀭𑀺𑀦𑀻 𑀓𑀸𑀦𑀦𑁂 𑀅𑀦𑀼𑀲𑀁𑀕𑀻𑀢𑀦𑀺𑀯𑀸𑀲𑀺𑀦𑀻 𑀓𑁄𑀓𑀺𑀮𑀸 𑀯𑀺𑀬 𑀫𑀥𑀼𑀭𑀸𑀮𑀸𑀧𑀁 𑀦𑀺𑀓𑀽𑀚𑀺𑀳𑀁. 𑀢𑀦𑁆𑀢𑀺 𑀦𑀺𑀓𑀽𑀚𑀺𑀢𑀁 𑀆𑀮𑀸𑀧𑀁. 𑀔𑀮𑀺𑀢𑀁 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀔𑀡𑁆𑀟𑀤𑀦𑁆𑀢𑀸𑀤𑀺𑀪𑀸𑀯𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀓𑁆𑀔𑀮𑀺𑀢𑀁 𑀚𑀸𑀢𑀁.

𑀲𑀡𑁆𑀳𑀓𑀫𑁆𑀩𑀼𑀭𑀺𑀯 𑀲𑀼𑀧𑁆𑀧𑀫𑀚𑁆𑀚𑀺𑀢𑀸𑀢𑀺 𑀲𑀼𑀝𑁆𑀞𑀼 𑀧𑀫𑀚𑁆𑀚𑀺𑀢𑀸 𑀲𑀡𑁆𑀳𑀸 𑀲𑀼𑀯𑀡𑁆𑀡𑀲𑀗𑁆𑀔𑀸 𑀯𑀺𑀬. 𑀪𑀕𑁆𑀕𑀸 𑀯𑀺𑀦𑀸𑀫𑀺𑀢𑀸𑀢𑀺 𑀫𑀁𑀲𑀧𑀭𑀺𑀓𑁆𑀔𑀬𑁂𑀦 𑀯𑀺𑀪𑀽𑀢𑀲𑀺𑀭𑀸𑀚𑀸𑀮𑀢𑀸𑀬 𑀪𑀕𑁆𑀕𑀸 𑀳𑀼𑀢𑁆𑀯𑀸 𑀯𑀺𑀦𑀢𑀸.

𑀯𑀝𑁆𑀝𑀧𑀮𑀺𑀖𑀲𑀤𑀺𑀲𑁄𑀧𑀫𑀸𑀢𑀺 𑀯𑀝𑁆𑀝𑁂𑀦 𑀧𑀮𑀺𑀖𑀤𑀡𑁆𑀟𑁂𑀦 𑀲𑀫𑀲𑀫𑀸. 𑀢𑀸𑀢𑀺 𑀢𑀸 𑀉𑀪𑁄𑀧𑀺 𑀩𑀸𑀳𑀸𑀬𑁄. 𑀬𑀣𑀸 𑀧𑀸𑀝𑀮𑀺𑀩𑁆𑀩𑀮𑀺𑀢𑀸𑀢𑀺 𑀚𑀚𑁆𑀚𑀭𑀪𑀸𑀯𑁂𑀦 𑀧𑀮𑀺𑀢𑀧𑀸𑀝𑀮𑀺𑀲𑀸𑀔𑀸𑀲𑀤𑀺𑀲𑀸.

𑀲𑀡𑁆𑀳𑀫𑀼𑀤𑁆𑀤𑀺𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀸𑀢𑀺 𑀲𑀼𑀯𑀡𑁆𑀡𑀫𑀬𑀸𑀳𑀺 𑀫𑀝𑁆𑀞𑀪𑀸𑀲𑀼𑀭𑀸𑀳𑀺 𑀫𑀼𑀤𑁆𑀤𑀺𑀓𑀸𑀳𑀺 𑀯𑀺𑀪𑀽𑀲𑀺𑀢𑀸. 𑀬𑀣𑀸 𑀫𑀽𑀮𑀫𑀽𑀮𑀺𑀓𑀸𑀢𑀺 𑀫𑀽𑀮𑀓𑀓𑀡𑁆𑀟𑀲𑀤𑀺𑀲𑀸.

𑀧𑀻𑀦𑀯𑀝𑁆𑀝𑀲𑀳𑀺𑀢𑀼𑀕𑁆𑀕𑀢𑀸𑀢𑀺 𑀧𑀻𑀦𑀸 𑀯𑀝𑁆𑀝𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀺𑀢𑀸𑀯 𑀳𑀼𑀢𑁆𑀯𑀸 𑀉𑀕𑁆𑀕𑀢𑀸 𑀉𑀤𑁆𑀥𑀫𑀼𑀔𑀸. 𑀲𑁄𑀪𑀢𑁂 𑀲𑀼 𑀣𑀦𑀓𑀸 𑀧𑀼𑀭𑁂 𑀫𑀫𑀸𑀢𑀺 𑀫𑀫 𑀉𑀪𑁄𑀧𑀺 𑀣𑀦𑀸 𑀬𑀣𑀸𑀯𑀼𑀢𑁆𑀢𑀭𑀽𑀧𑀸 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀓𑀮𑀲𑀺𑀬𑁄 𑀯𑀺𑀬 𑀲𑁄𑀪𑀺𑀁𑀲𑀼. 𑀧𑀼𑀣𑀼𑀢𑁆𑀢𑁂 𑀳𑀺 𑀇𑀤𑀁 𑀏𑀓𑀯𑀘𑀦𑀁, 𑀅𑀢𑀻𑀢𑀢𑁆𑀣𑁂 𑀘 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀣𑁂𑀯𑀺𑀓𑀻𑀯 𑀮𑀫𑁆𑀩𑀦𑁆𑀢𑀺 𑀦𑁄𑀤𑀓𑀸𑀢𑀺 𑀢𑁂 𑀉𑀪𑁄𑀧𑀺 𑀫𑁂 𑀣𑀦𑀸 𑀦𑁄𑀤𑀓𑀸 𑀕𑀮𑀺𑀢𑀚𑀮𑀸 𑀯𑁂𑀡𑀼𑀤𑀡𑁆𑀟𑀓𑁂 𑀞𑀧𑀺𑀢𑀉𑀤𑀓𑀪𑀲𑁆𑀫𑀸 𑀯𑀺𑀬 𑀮𑀫𑁆𑀩𑀦𑁆𑀢𑀺.

𑀓𑀜𑁆𑀘𑀦𑀨𑀮𑀓𑀁𑀯 𑀲𑀫𑁆𑀫𑀝𑁆𑀞𑀦𑁆𑀢𑀺 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀓𑁆𑀔𑀺𑀢𑁆𑀯𑀸 𑀘𑀺𑀭𑀧𑀭𑀺𑀫𑀚𑁆𑀚𑀺𑀢𑀲𑁄𑀯𑀡𑁆𑀡𑀨𑀮𑀓𑀁 𑀯𑀺𑀬 𑀲𑁄𑀪𑀢𑁂. 𑀲𑁄 𑀯𑀮𑀻𑀳𑀺 𑀲𑀼𑀔𑀼𑀫𑀸𑀳𑀺 𑀑𑀢𑀢𑁄𑀢𑀺 𑀲𑁄 𑀫𑀫 𑀓𑀸𑀬𑁄 𑀇𑀤𑀸𑀦𑀺 𑀲𑀼𑀔𑀼𑀫𑀸𑀳𑀺 𑀯𑀮𑀻𑀳𑀺 𑀢𑀳𑀺𑀁 𑀢𑀳𑀺𑀁 𑀯𑀺𑀢𑀢𑁄 𑀯𑀮𑀺𑀢𑁆𑀢𑀘𑀢𑀁 𑀆𑀧𑀦𑁆𑀦𑁄.

𑀦𑀸𑀕𑀪𑁄𑀕𑀲𑀤𑀺𑀲𑁄𑀧𑀫𑀸𑀢𑀺 𑀳𑀢𑁆𑀣𑀺𑀦𑀸𑀕𑀲𑁆𑀲 𑀳𑀢𑁆𑀣𑁂𑀦 𑀲𑀫𑀲𑀫𑀸. 𑀳𑀢𑁆𑀣𑁄 𑀳𑀺 𑀇𑀥 𑀪𑀼𑀜𑁆𑀚𑀢𑀺 𑀏𑀢𑁂𑀦𑀸𑀢𑀺 𑀪𑁄𑀕𑁄𑀢𑀺 𑀯𑀼𑀢𑁆𑀢𑁄. 𑀢𑁂𑀢𑀺 𑀊𑀭𑀼𑀬𑁄. 𑀬𑀣𑀸 𑀯𑁂𑀴𑀼𑀦𑀸𑀴𑀺𑀬𑁄𑀢𑀺 𑀇𑀤𑀸𑀦𑀺 𑀯𑁂𑀴𑀼𑀧𑀩𑁆𑀩𑀲𑀤𑀺𑀲𑀸 𑀅𑀳𑁂𑀲𑀼𑀁.

𑀲𑀡𑁆𑀳𑀦𑀽𑀧𑀼𑀭𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀸𑀢𑀺 𑀲𑀺𑀦𑀺𑀤𑁆𑀥𑀫𑀝𑁆𑀞𑁂𑀳𑀺 𑀲𑀼𑀯𑀡𑁆𑀡𑀦𑀽𑀧𑀼𑀭𑁂𑀳𑀺 𑀯𑀺𑀪𑀽𑀲𑀺𑀢𑀸. 𑀚𑀗𑁆𑀖𑀸𑀢𑀺 𑀅𑀝𑁆𑀞𑀺𑀚𑀗𑁆𑀖𑀸𑀬𑁄. 𑀢𑀸𑀢𑀺 𑀢𑀸 𑀚𑀗𑁆𑀖𑀸𑀬𑁄. 𑀢𑀺𑀮𑀤𑀡𑁆𑀟𑀓𑀸𑀭𑀺𑀯𑀸𑀢𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀓𑀺𑀲𑀪𑀸𑀯𑁂𑀦 𑀮𑀽𑀦𑀸𑀯𑀲𑀺𑀝𑁆𑀞𑀯𑀺𑀲𑀼𑀓𑁆𑀔𑀢𑀺𑀮𑀤𑀡𑁆𑀟𑀓𑀸 𑀯𑀺𑀬 𑀅𑀳𑁂𑀲𑀼𑀁. 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀢𑀽𑀮𑀧𑀼𑀡𑁆𑀡𑀲𑀤𑀺𑀲𑁄𑀧𑀫𑀸𑀢𑀺 𑀫𑀼𑀤𑀼𑀲𑀺𑀦𑀺𑀤𑁆𑀥𑀪𑀸𑀯𑁂𑀦 𑀲𑀺𑀫𑁆𑀩𑀮𑀺𑀢𑀽𑀮𑀧𑀼𑀡𑁆𑀡𑀧𑀮𑀺𑀕𑀼𑀡𑁆𑀞𑀺𑀢𑀉𑀧𑀸𑀳𑀦𑀲𑀤𑀺𑀲𑀸. 𑀢𑁂 𑀫𑀫 𑀧𑀸𑀤𑀸 𑀇𑀤𑀸𑀦𑀺 𑀨𑀼𑀝𑀺𑀢𑀸 𑀨𑀮𑀺𑀢𑀸, 𑀯𑀮𑀻𑀫𑀢𑀸 𑀯𑀮𑀺𑀫𑀦𑁆𑀢𑁄 𑀚𑀸𑀢𑀸.

𑀏𑀤𑀺𑀲𑁄𑀢𑀺 𑀏𑀯𑀭𑀽𑀧𑁄. 𑀅𑀳𑀼 𑀅𑀳𑁄𑀲𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄. 𑀅𑀬𑀁 𑀲𑀫𑀼𑀲𑁆𑀲𑀬𑁄𑀢𑀺 𑀅𑀬𑀁 𑀫𑀫 𑀓𑀸𑀬𑁄. 𑀚𑀚𑁆𑀚𑀭𑁄𑀢𑀺 𑀲𑀺𑀣𑀺𑀮𑀸𑀩𑀦𑁆𑀥𑁄. 𑀩𑀳𑀼𑀤𑀼𑀔𑀸𑀦𑀫𑀸𑀮𑀬𑁄𑀢𑀺 𑀚𑀭𑀸𑀤𑀺𑀳𑁂𑀢𑀼𑀓𑀸𑀦𑀁 𑀩𑀳𑀽𑀦𑀁 𑀤𑀼𑀓𑁆𑀔𑀸𑀦𑀁 𑀆𑀮𑀬𑀪𑀽𑀢𑁄. 𑀲𑁄𑀧𑀮𑁂𑀧𑀧𑀢𑀺𑀢𑁄𑀢𑀺 𑀲𑁄 𑀅𑀬𑀁 𑀲𑀫𑀼𑀲𑁆𑀲𑀬𑁄 𑀅𑀧𑀮𑁂𑀧𑀧𑀢𑀺𑀢𑁄 𑀅𑀪𑀺𑀲𑀗𑁆𑀔𑀸𑀭𑀸𑀮𑁂𑀧𑀧𑀭𑀺𑀓𑁆𑀔𑀬𑁂𑀦 𑀧𑀢𑀺𑀢𑁄 𑀧𑀸𑀢𑀸𑀪𑀺𑀫𑀼𑀔𑁄𑀢𑀺 𑀅𑀢𑁆𑀣𑁄. 𑀲𑁄𑀧𑀺 𑀅𑀮𑁂𑀧𑀧𑀢𑀺𑀢𑁄𑀢𑀺 𑀯𑀸 𑀧𑀤𑀯𑀺𑀪𑀸𑀕𑁄, 𑀲𑁄 𑀏𑀯𑀢𑁆𑀣𑁄. 𑀚𑀭𑀸𑀖𑀭𑁄𑀢𑀺 𑀚𑀺𑀡𑁆𑀡𑀖𑀭𑀲𑀤𑀺𑀲𑁄. 𑀚𑀭𑀸𑀬 𑀯𑀸 𑀖𑀭𑀪𑀽𑀢𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀘𑁆𑀘𑀯𑀸𑀤𑀺𑀦𑁄 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀲𑀪𑀸𑀯𑀁 𑀲𑀫𑁆𑀫𑀤𑁂𑀯 𑀜𑀢𑁆𑀯𑀸 𑀓𑀣𑀦𑀢𑁄 𑀅𑀯𑀺𑀢𑀣𑀯𑀸𑀤𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀫 𑀲𑀢𑁆𑀣𑀼𑀯𑀘𑀦𑀁 𑀅𑀦𑀜𑁆𑀜𑀣𑀸.

𑀏𑀯𑀁 𑀅𑀬𑀁 𑀣𑁂𑀭𑀻 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁂 𑀅𑀦𑀺𑀘𑁆𑀘𑀢𑀸𑀬 𑀲𑀮𑁆𑀮𑀓𑁆𑀔𑀡𑀫𑀼𑀔𑁂𑀦 𑀲𑀩𑁆𑀩𑁂𑀲𑀼𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀢𑀢𑁆𑀣 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑀻 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁪.𑁨𑁦𑁪-𑁨𑁧𑁯) 𑁋

‘‘𑀬𑁄 𑀭𑀁𑀲𑀺𑀨𑀼𑀲𑀺𑀢𑀸𑀯𑁂𑀴𑁄, 𑀨𑀼𑀲𑁆𑀲𑁄 𑀦𑀸𑀫 𑀫𑀳𑀸𑀫𑀼𑀦𑀺;

𑀢𑀲𑁆𑀲𑀸𑀳𑀁 𑀪𑀕𑀺𑀦𑀻 𑀆𑀲𑀺𑀁, 𑀅𑀚𑀸𑀬𑀺𑀁 𑀔𑀢𑁆𑀢𑀺𑀬𑁂 𑀓𑀼𑀮𑁂.

‘‘𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀳𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀧𑀢𑁆𑀣𑀬𑀺𑀁 𑀭𑀽𑀧𑀲𑀫𑁆𑀧𑀤𑀁.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀲𑀺𑀔𑀻 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀉𑀧𑁆𑀧𑀦𑁆𑀦𑁄 𑀮𑁄𑀓𑀧𑀚𑁆𑀚𑁄𑀢𑁄, 𑀢𑀺𑀮𑁄𑀓𑀲𑀭𑀡𑁄 𑀚𑀺𑀦𑁄.

‘‘𑀢𑀤𑀸𑀭𑀼𑀡𑀧𑀼𑀭𑁂 𑀭𑀫𑁆𑀫𑁂, 𑀩𑁆𑀭𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀯𑀸;

𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀓𑀼𑀧𑀺𑀢𑀸, 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀲𑀸𑀧𑀬𑀺𑀁.

‘‘𑀯𑁂𑀲𑀺𑀓𑀸𑀯 𑀅𑀦𑀸𑀘𑀸𑀭𑀸, 𑀚𑀺𑀦𑀲𑀸𑀲𑀦𑀤𑀽𑀲𑀺𑀓𑀸;

𑀏𑀯𑀁 𑀅𑀓𑁆𑀓𑁄𑀲𑀬𑀺𑀢𑁆𑀯𑀸𑀦, 𑀢𑁂𑀦 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸.

‘‘𑀤𑀸𑀭𑀼𑀡𑀁 𑀦𑀺𑀭𑀬𑀁 𑀕𑀦𑁆𑀢𑁆𑀯𑀸, 𑀫𑀳𑀸𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸;

𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼, 𑀉𑀧𑀧𑀦𑁆𑀦𑀸 𑀢𑀧𑀲𑁆𑀲𑀺𑀦𑀻.

‘‘𑀤𑀲𑀚𑀸𑀢𑀺𑀲𑀳𑀲𑁆𑀲𑀸𑀦𑀺, 𑀕𑀡𑀺𑀓𑀢𑁆𑀢𑀫𑀓𑀸𑀭𑀬𑀺𑀁;

𑀢𑀫𑁆𑀳𑀸 𑀧𑀸𑀧𑀸 𑀦 𑀫𑀼𑀘𑁆𑀘𑀺𑀲𑁆𑀲𑀁, 𑀪𑀼𑀢𑁆𑀯𑀸 𑀤𑀼𑀝𑁆𑀞𑀯𑀺𑀲𑀁 𑀬𑀣𑀸.

‘‘𑀩𑁆𑀭𑀳𑁆𑀫𑀘𑀭𑀺𑀬𑀫𑀲𑁂𑀯𑀺𑀲𑁆𑀲𑀁, 𑀓𑀲𑁆𑀲𑀧𑁂 𑀚𑀺𑀦𑀲𑀸𑀲𑀦𑁂;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀚𑀸𑀬𑀺𑀁 𑀢𑀺𑀤𑀲𑁂 𑀧𑀼𑀭𑁂.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀅𑀳𑁄𑀲𑀺𑀁 𑀑𑀧𑀧𑀸𑀢𑀺𑀓𑀸;

𑀅𑀫𑁆𑀩𑀲𑀸𑀔𑀦𑁆𑀢𑀭𑁂 𑀚𑀸𑀢𑀸, 𑀅𑀫𑁆𑀩𑀧𑀸𑀮𑀻𑀢𑀺 𑀢𑁂𑀦𑀳𑀁.

‘‘𑀧𑀭𑀺𑀯𑀼𑀢𑀸 𑀧𑀸𑀡𑀓𑁄𑀝𑀻𑀳𑀺, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀸𑀲𑀦𑁂;

𑀧𑀢𑁆𑀢𑀸𑀳𑀁 𑀅𑀘𑀮𑀁 𑀞𑀸𑀦𑀁, 𑀥𑀻𑀢𑀸 𑀩𑀼𑀤𑁆𑀥𑀲𑁆𑀲 𑀑𑀭𑀲𑀸.

‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑀺.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀯𑀸𑀳𑀲𑀸.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑀢𑀸 𑀏𑀯 𑀕𑀸𑀣𑀸 𑀧𑀘𑁆𑀘𑀼𑀤𑀸𑀳𑀸𑀲𑀻𑀢𑀺.

𑀅𑀫𑁆𑀩𑀧𑀸𑀮𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑁄𑀳𑀺𑀦𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀲𑀫𑀡𑀸𑀢𑀺 𑀪𑁄𑀢𑀺 𑀲𑀼𑀧𑀻𑀢𑀺𑀆𑀤𑀺𑀓𑀸 𑀭𑁄𑀳𑀺𑀦𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀏𑀓𑀤𑀺𑀯𑀲𑀁 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀪𑀕𑀯𑀦𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀽𑀯𑀲𑁆𑀲 𑀧𑀽𑀭𑁂𑀢𑁆𑀯𑀸 𑀪𑀕𑀯𑀢𑁄 𑀤𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀉𑀧𑀘𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀭𑁄𑀳𑀺𑀦𑀻𑀢𑀺 𑀮𑀤𑁆𑀥𑀦𑀸𑀫𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀲𑀢𑁆𑀣𑀭𑀺 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀦𑁆𑀢𑁂 𑀯𑀺𑀳𑀸𑀭𑀁 𑀕𑀦𑁆𑀢𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀸𑀲𑀦𑁂 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀲𑁆𑀲, 𑀧𑀽𑀯𑁂𑀤𑀸𑀲𑀺𑀫𑀳𑀁 𑀢𑀤𑀸.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

‘‘𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀧𑀜𑁆𑀜𑀸𑀲𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀫𑀦𑀲𑀸 𑀧𑀢𑁆𑀣𑀺𑀢𑀸 𑀦𑀸𑀫, 𑀲𑀩𑁆𑀩𑀸 𑀫𑀬𑁆𑀳𑀁 𑀲𑀫𑀺𑀚𑁆𑀛𑀣;

𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀦𑀼𑀚𑁂𑀲𑀼 𑀘.

‘‘𑀧𑀘𑁆𑀙𑀺𑀫𑁂 𑀪𑀯𑀲𑀫𑁆𑀧𑀢𑁆𑀢𑁂, 𑀚𑀸𑀢𑁄 𑀯𑀺𑀧𑁆𑀧𑀓𑀼𑀮𑁂 𑀅𑀳𑀁;

𑀭𑁄𑀳𑀺𑀦𑀻 𑀦𑀸𑀫 𑀦𑀸𑀫𑁂𑀦, 𑀜𑀸𑀢𑀓𑁂𑀳𑀺 𑀧𑀺𑀬𑀸𑀬𑀺𑀢𑀸.

‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑀣𑀸𑀢𑀣𑀁;

𑀲𑀁𑀯𑀺𑀕𑁆𑀕𑀫𑀸𑀦𑀲𑀸 𑀳𑀼𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀬𑁄𑀦𑀺𑀲𑁄 𑀧𑀤𑀳𑀦𑁆𑀢𑀻𑀦𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀽𑀯𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀼𑀩𑁆𑀩𑁂 𑀲𑁄𑀢𑀸𑀧𑀦𑁆𑀦𑀓𑀸𑀮𑁂 𑀧𑀺𑀢𑀭𑀸 𑀅𑀢𑁆𑀢𑀦𑀸 𑀘 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀕𑀸𑀣𑀸 𑀉𑀤𑀸𑀦𑀯𑀲𑁂𑀦 𑀪𑀸𑀲𑀦𑁆𑀢𑀻 𑁋

𑁨𑁭𑁧.

‘‘𑀲𑀫𑀡𑀸𑀢𑀺 𑀪𑁄𑀢𑀺 𑀲𑀼𑀧𑀺, 𑀲𑀫𑀡𑀸𑀢𑀺 𑀧𑀩𑀼𑀚𑁆𑀛𑀲𑀺;

𑀲𑀫𑀡𑀸𑀦𑁂𑀯 𑀓𑀺𑀢𑁆𑀢𑁂𑀲𑀺, 𑀲𑀫𑀡𑀻 𑀦𑀽𑀦 𑀪𑀯𑀺𑀲𑁆𑀲𑀲𑀺.

𑁨𑁭𑁨.

‘‘𑀯𑀺𑀧𑀼𑀮𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀲𑀺;

𑀭𑁄𑀳𑀺𑀦𑀻 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑁂𑀦 𑀢𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁩.

‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸, 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄;

𑀆𑀲𑀁𑀲𑀼𑀓𑀸 𑀲𑀸𑀤𑀼𑀓𑀸𑀫𑀸, 𑀓𑁂𑀦 𑀢𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁪.

‘‘𑀘𑀺𑀭𑀲𑁆𑀲𑀁 𑀯𑀢 𑀫𑀁 𑀢𑀸𑀢, 𑀲𑀫𑀡𑀸𑀦𑀁 𑀧𑀭𑀺𑀧𑀼𑀘𑁆𑀙𑀲𑀺;

𑀢𑁂𑀲𑀁 𑀢𑁂 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀧𑀜𑁆𑀜𑀸𑀲𑀻𑀮𑀧𑀭𑀓𑁆𑀓𑀫𑀁.

𑁨𑁭𑁫.

‘‘𑀓𑀫𑁆𑀫𑀓𑀸𑀫𑀸 𑀅𑀦𑀮𑀲𑀸, 𑀓𑀫𑁆𑀫𑀲𑁂𑀝𑁆𑀞𑀲𑁆𑀲 𑀓𑀸𑀭𑀓𑀸;

𑀭𑀸𑀕𑀁 𑀤𑁄𑀲𑀁 𑀧𑀚𑀳𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁬.

‘‘𑀢𑀻𑀡𑀺 𑀧𑀸𑀧𑀲𑁆𑀲 𑀫𑀽𑀮𑀸𑀦𑀺, 𑀥𑀼𑀦𑀦𑁆𑀢𑀺 𑀲𑀼𑀘𑀺𑀓𑀸𑀭𑀺𑀦𑁄;

𑀲𑀩𑁆𑀩𑀁 𑀧𑀸𑀧𑀁 𑀧𑀳𑀻𑀦𑁂𑀲𑀁, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁭.

‘‘𑀓𑀸𑀬𑀓𑀫𑁆𑀫𑀁 𑀲𑀼𑀘𑀺 𑀦𑁂𑀲𑀁, 𑀯𑀘𑀻𑀓𑀫𑁆𑀫𑀜𑁆𑀘 𑀢𑀸𑀤𑀺𑀲𑀁;

𑀫𑀦𑁄𑀓𑀫𑁆𑀫𑀁 𑀲𑀼𑀘𑀺 𑀦𑁂𑀲𑀁, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁮.

‘‘𑀯𑀺𑀫𑀮𑀸 𑀲𑀗𑁆𑀔𑀫𑀼𑀢𑁆𑀢𑀸𑀯, 𑀲𑀼𑀤𑁆𑀥𑀸 𑀲𑀦𑁆𑀢𑀭𑀩𑀸𑀳𑀺𑀭𑀸;

𑀧𑀼𑀡𑁆𑀡𑀸 𑀲𑀼𑀓𑁆𑀓𑀸𑀦 𑀥𑀫𑁆𑀫𑀸𑀦𑀁, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁯.

‘‘𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀅𑀭𑀺𑀬𑀸 𑀥𑀫𑁆𑀫𑀚𑀻𑀯𑀺𑀦𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁦.

‘‘𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀅𑀭𑀺𑀬𑀸 𑀥𑀫𑁆𑀫𑀚𑀻𑀯𑀺𑀦𑁄;

𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀢𑀺𑀫𑀦𑁆𑀢𑁄, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁧.

‘‘𑀤𑀽𑀭𑀗𑁆𑀕𑀫𑀸 𑀲𑀢𑀺𑀫𑀦𑁆𑀢𑁄, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁨.

‘‘𑀬𑀲𑁆𑀫𑀸 𑀕𑀸𑀫𑀸 𑀧𑀓𑁆𑀓𑀫𑀦𑁆𑀢𑀺, 𑀦 𑀯𑀺𑀮𑁄𑀓𑁂𑀦𑁆𑀢𑀺 𑀓𑀺𑀜𑁆𑀘𑀦𑀁;

𑀅𑀦𑀧𑁂𑀓𑁆𑀔𑀸𑀯 𑀕𑀘𑁆𑀙𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁩.

‘‘𑀦 𑀢𑁂 𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺, 𑀦 𑀓𑀼𑀫𑁆𑀪𑀺𑀁 𑀦 𑀔𑀴𑁄𑀧𑀺𑀬𑀁;

𑀧𑀭𑀺𑀦𑀺𑀝𑁆𑀞𑀺𑀢𑀫𑁂𑀲𑀸𑀦𑀸, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁪.

‘‘𑀦 𑀢𑁂 𑀳𑀺𑀭𑀜𑁆𑀜𑀁 𑀕𑀡𑁆𑀳𑀦𑁆𑀢𑀺, 𑀦 𑀲𑀼𑀯𑀡𑁆𑀡𑀁 𑀦 𑀭𑀽𑀧𑀺𑀬𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁫.

‘‘𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸, 𑀦𑀸𑀦𑀸𑀚𑀦𑀧𑀤𑁂𑀳𑀺 𑀘;

𑀅𑀜𑁆𑀜𑀫𑀜𑁆𑀜𑀁 𑀧𑀺𑀳𑀬𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁬.

‘‘𑀅𑀢𑁆𑀣𑀸𑀬 𑀯𑀢 𑀦𑁄 𑀪𑁄𑀢𑀺, 𑀓𑀼𑀮𑁂 𑀚𑀸𑀢𑀸𑀲𑀺 𑀭𑁄𑀳𑀺𑀦𑀻;

𑀲𑀤𑁆𑀥𑀸 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑀸.

𑁨𑁮𑁭.

‘‘𑀢𑀼𑀯𑀜𑁆𑀳𑁂𑀢𑀁 𑀧𑀚𑀸𑀦𑀸𑀲𑀺, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁;

𑀅𑀫𑁆𑀳𑀫𑁆𑀧𑀺 𑀏𑀢𑁂 𑀲𑀫𑀡𑀸, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑀓𑁆𑀔𑀺𑀡𑀁.

𑁨𑁮𑁮.

‘‘𑀧𑀢𑀺𑀝𑁆𑀞𑀺𑀢𑁄 𑀳𑁂𑀢𑁆𑀣 𑀬𑀜𑁆𑀜𑁄, 𑀯𑀺𑀧𑀼𑀮𑁄 𑀦𑁄 𑀪𑀯𑀺𑀲𑁆𑀲𑀢𑀺;

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀧𑁆𑀧𑀺𑀬𑀁.

𑁨𑁮𑁯.

‘‘𑀉𑀧𑁂𑀳𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀳𑀺 𑀲𑀻𑀮𑀸𑀦𑀺, 𑀢𑀁 𑀢𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁨𑁯𑁦.

‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀫𑀺 𑀲𑀻𑀮𑀸𑀦𑀺, 𑀢𑀁 𑀫𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁨𑁯𑁧.

‘‘𑀩𑁆𑀭𑀳𑁆𑀫𑀩𑀦𑁆𑀥𑀼 𑀧𑀼𑀭𑁂 𑀆𑀲𑀺𑀁, 𑀲𑁄 𑀇𑀤𑀸𑀦𑀺𑀫𑁆𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀢𑁂𑀯𑀺𑀚𑁆𑀚𑁄 𑀲𑁄𑀢𑁆𑀢𑀺𑀬𑁄 𑀘𑀫𑁆𑀳𑀺, 𑀯𑁂𑀤𑀕𑀽 𑀘𑀫𑁆𑀳𑀺 𑀦𑁆𑀳𑀸𑀢𑀓𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀧𑀘𑁆𑀘𑀼𑀤𑀸𑀳𑀸𑀲𑀺.

𑀢𑀢𑁆𑀣 𑀆𑀤𑀺𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀢𑁆𑀢𑀦𑁄 𑀥𑀻𑀢𑀼 𑀪𑀺𑀓𑁆𑀔𑀽𑀲𑀼 𑀲𑀫𑁆𑀫𑀼𑀢𑀺𑀁 𑀅𑀦𑀺𑀘𑁆𑀙𑀦𑁆𑀢𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀫𑀡𑀸𑀢𑀺 𑀪𑁄𑀢𑀺 𑀲𑀼𑀧𑀻𑀢𑀺 𑀪𑁄𑀢𑀺 𑀢𑁆𑀯𑀁 𑀲𑀼𑀧𑀦𑀓𑀸𑀮𑁂𑀧𑀺 ‘‘𑀲𑀫𑀡𑀸 𑀲𑀫𑀡𑀸’’𑀢𑀺 𑀓𑀺𑀢𑁆𑀢𑁂𑀦𑁆𑀢𑀻 𑀲𑀫𑀡𑀧𑀝𑀺𑀩𑀤𑁆𑀥𑀁𑀬𑁂𑀯 𑀓𑀣𑀁 𑀓𑀣𑁂𑀦𑁆𑀢𑀻 𑀲𑀼𑀧𑀲𑀺. 𑀲𑀫𑀡𑀸𑀢𑀺 𑀧𑀩𑀼𑀚𑁆𑀛𑀲𑀻𑀢𑀺 𑀲𑀼𑀧𑀦𑀢𑁄 𑀉𑀝𑁆𑀞𑀳𑀦𑁆𑀢𑀻𑀧𑀺 ‘‘𑀲𑀫𑀡𑀸’’𑀇𑀘𑁆𑀘𑁂𑀯𑀁 𑀯𑀢𑁆𑀯𑀸 𑀧𑀩𑀼𑀚𑁆𑀛𑀲𑀺 𑀦𑀺𑀤𑁆𑀤𑀸𑀬 𑀯𑀼𑀝𑁆𑀞𑀸𑀲𑀺. 𑀲𑀫𑀡𑀸𑀦𑁂𑀯 𑀓𑀺𑀢𑁆𑀢𑁂𑀲𑀻𑀢𑀺 𑀲𑀩𑁆𑀩𑀓𑀸𑀮𑀫𑁆𑀧𑀺 𑀲𑀫𑀡𑁂 𑀏𑀯 𑀲𑀫𑀡𑀸𑀦𑀫𑁂𑀯 𑀯𑀸 𑀕𑀼𑀡𑁂 𑀓𑀺𑀢𑁆𑀢𑁂𑀲𑀺 𑀅𑀪𑀺𑀢𑁆𑀣𑀯𑀲𑀺. 𑀲𑀫𑀡𑀻 𑀦𑀽𑀦 𑀪𑀯𑀺𑀲𑁆𑀲𑀲𑀻𑀢𑀺 𑀕𑀺𑀳𑀺𑀭𑀽𑀧𑁂𑀦 𑀞𑀺𑀢𑀸𑀧𑀺 𑀘𑀺𑀢𑁆𑀢𑁂𑀦 𑀲𑀫𑀡𑀻 𑀏𑀯 𑀫𑀜𑁆𑀜𑁂 𑀪𑀯𑀺𑀲𑁆𑀲𑀲𑀺. 𑀅𑀣 𑀯𑀸 𑀲𑀫𑀡𑀻 𑀦𑀽𑀦 𑀪𑀯𑀺𑀲𑁆𑀲𑀲𑀻𑀢𑀺 𑀇𑀤𑀸𑀦𑀺 𑀕𑀺𑀳𑀺𑀭𑀽𑀧𑁂𑀦 𑀞𑀺𑀢𑀸𑀧𑀺 𑀦 𑀘𑀺𑀭𑁂𑀦𑁂𑀯 𑀲𑀫𑀡𑀻 𑀏𑀯 𑀫𑀜𑁆𑀜𑁂 𑀪𑀯𑀺𑀲𑁆𑀲𑀲𑀺 𑀲𑀫𑀡𑁂𑀲𑀼 𑀏𑀯 𑀦𑀺𑀦𑁆𑀦𑀧𑁄𑀡𑀪𑀸𑀯𑀢𑁄.

𑀧𑀯𑁂𑀘𑁆𑀙𑀲𑀻𑀢𑀺 𑀤𑁂𑀲𑀺. 𑀭𑁄𑀳𑀺𑀦𑀻 𑀤𑀸𑀦𑀺 𑀧𑀼𑀘𑁆𑀙𑀸𑀫𑀻𑀢𑀺, 𑀅𑀫𑁆𑀫 𑀭𑁄𑀳𑀺𑀦𑀺, 𑀢𑀁 𑀅𑀳𑀁 𑀇𑀤𑀸𑀦𑀺 𑀧𑀼𑀘𑁆𑀙𑀸𑀫𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳. 𑀓𑁂𑀦 𑀢𑁂 𑀲𑀫𑀡𑀸 𑀧𑀺𑀬𑀸𑀢𑀺, 𑀅𑀫𑁆𑀫 𑀭𑁄𑀳𑀺𑀦𑀺, 𑀢𑁆𑀯𑀁 𑀲𑀬𑀦𑁆𑀢𑀻𑀧𑀺 𑀧𑀩𑀼𑀚𑁆𑀛𑀦𑁆𑀢𑀻𑀧𑀺 𑀅𑀜𑁆𑀜𑀤𑀸𑀧𑀺 𑀲𑀫𑀡𑀸𑀦𑀫𑁂𑀯 𑀕𑀼𑀡𑁂 𑀓𑀺𑀢𑁆𑀢𑀬𑀲𑀺, 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦 𑀢𑀼𑀬𑁆𑀳𑀁 𑀲𑀫𑀡𑀸 𑀧𑀺𑀬𑀸𑀬𑀺𑀢𑀩𑁆𑀩𑀸 𑀚𑀸𑀢𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁂𑀲𑀼 𑀤𑁄𑀲𑀁 𑀥𑀻𑀢𑀼 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀅𑀓𑀫𑁆𑀫𑀓𑀸𑀫𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀓𑀫𑁆𑀫𑀓𑀸𑀫𑀸𑀢𑀺 𑀦 𑀓𑀫𑁆𑀫𑀓𑀸𑀫𑀸, 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀢𑁆𑀣𑀸𑀯𑀳𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀦 𑀓𑀸𑀢𑀼𑀓𑀸𑀫𑀸. 𑀅𑀮𑀲𑀸𑀢𑀺 𑀓𑀼𑀲𑀻𑀢𑀸. 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑁂𑀦𑁂𑀯 𑀉𑀧𑀚𑀻𑀯𑀦𑀲𑀻𑀮𑀸. 𑀆𑀲𑀁𑀲𑀼𑀓𑀸𑀢𑀺 𑀢𑀢𑁄 𑀏𑀯 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀦𑀁 𑀆𑀲𑀻𑀲𑀦𑀓𑀸. 𑀲𑀸𑀤𑀼𑀓𑀸𑀫𑀸𑀢𑀺 𑀲𑀸𑀤𑀼𑀁 𑀫𑀥𑀼𑀭𑀫𑁂𑀯 𑀆𑀳𑀸𑀭𑀁 𑀇𑀘𑁆𑀙𑀦𑀓𑀸. 𑀲𑀩𑁆𑀩𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀸𑀦𑀁 𑀕𑀼𑀡𑁂 𑀅𑀚𑀸𑀦𑀦𑁆𑀢𑁄 𑀅𑀢𑁆𑀢𑀦𑀸𑀯 𑀧𑀭𑀺𑀓𑀧𑁆𑀧𑀺𑀢𑀁 𑀤𑁄𑀲𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀭𑁄𑀳𑀺𑀦𑀻 ‘‘𑀮𑀤𑁆𑀥𑁄 𑀤𑀸𑀦𑀺 𑀫𑁂 𑀑𑀓𑀸𑀲𑁄 𑀅𑀬𑁆𑀬𑀸𑀦𑀁 𑀕𑀼𑀡𑁂 𑀓𑀣𑁂𑀢𑀼’’𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀪𑀺𑀓𑁆𑀔𑀽𑀦𑀁 𑀕𑀼𑀡𑁂 𑀓𑀺𑀢𑁆𑀢𑁂𑀢𑀼𑀓𑀸𑀫𑀸 𑀧𑀞𑀫𑀁 𑀢𑀸𑀯 𑀢𑁂𑀲𑀁 𑀓𑀺𑀢𑁆𑀢𑀦𑁂 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑀻 ‘‘𑀘𑀻𑀭𑀲𑁆𑀲𑀁 𑀯𑀢 𑀫𑀁, 𑀢𑀸𑀢𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀘𑀺𑀭𑀲𑁆𑀲𑀁 𑀯𑀢𑀸𑀢𑀺 𑀘𑀺𑀭𑁂𑀦 𑀯𑀢. 𑀢𑀸𑀢𑀸𑀢𑀺 𑀧𑀺𑀢𑀭𑀁 𑀆𑀮𑀧𑀢𑀺. 𑀲𑀫𑀡𑀸𑀦𑀦𑁆𑀢𑀺 𑀲𑀫𑀡𑁂 𑀲𑀫𑀡𑀸𑀦𑀁 𑀯𑀸 𑀫𑀬𑁆𑀳𑀁 𑀧𑀺𑀬𑀸𑀬𑀺𑀢𑀩𑁆𑀩𑀁 𑀧𑀭𑀺𑀧𑀼𑀘𑁆𑀙𑀲𑀺. 𑀢𑁂𑀲𑀦𑁆𑀢𑀺 𑀲𑀫𑀡𑀸𑀦𑀁. 𑀧𑀜𑁆𑀜𑀸𑀲𑀻𑀮𑀧𑀭𑀓𑁆𑀓𑀫𑀦𑁆𑀢𑀺 𑀧𑀜𑁆𑀜𑀜𑁆𑀘 𑀲𑀻𑀮𑀜𑁆𑀘 𑀉𑀲𑁆𑀲𑀸𑀳𑀜𑁆𑀘.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀓𑀣𑀬𑀺𑀲𑁆𑀲𑀸𑀫𑀺. 𑀧𑀝𑀺𑀚𑀸𑀦𑁂𑀢𑁆𑀯𑀸 𑀢𑁂 𑀓𑀺𑀢𑁆𑀢𑁂𑀦𑁆𑀢𑀻 ‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸’’𑀢𑀺 𑀢𑁂𑀦 𑀯𑀼𑀢𑁆𑀢𑀁 𑀤𑁄𑀲𑀁 𑀢𑀸𑀯 𑀦𑀺𑀩𑁆𑀩𑁂𑀞𑁂𑀢𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀁 𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀓𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀓𑀸𑀫𑀸𑀢𑀺 𑀯𑀢𑁆𑀢𑀧𑀝𑀺𑀯𑀢𑁆𑀢𑀸𑀤𑀺𑀪𑁂𑀤𑀁 𑀓𑀫𑁆𑀫𑀁 𑀲𑀫𑀡𑀓𑀺𑀘𑁆𑀘𑀁 𑀧𑀭𑀺𑀧𑀽𑀭𑀡𑀯𑀲𑁂𑀦 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀓𑀫𑁆𑀫𑀓𑀸𑀫𑀸. 𑀢𑀢𑁆𑀣 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀯𑀸𑀬𑀫𑀦𑀢𑁄 𑀦 𑀅𑀮𑀲𑀸𑀢𑀺 𑀅𑀦𑀮𑀲𑀸. 𑀢𑀁 𑀧𑀦 𑀓𑀫𑁆𑀫𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀦𑀺𑀩𑁆𑀩𑀸𑀦𑀸𑀯𑀳𑀫𑁂𑀯 𑀓𑀭𑁄𑀦𑁆𑀢𑀻𑀢𑀺 𑀓𑀫𑁆𑀫𑀲𑁂𑀝𑁆𑀞𑀲𑁆𑀲 𑀓𑀸𑀭𑀓𑀸. 𑀓𑀭𑁄𑀦𑁆𑀢𑀸 𑀧𑀦 𑀢𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀯𑀚𑁆𑀚𑀪𑀸𑀯𑀢𑁄 𑀭𑀸𑀕𑀁 𑀤𑁄𑀲𑀁 𑀧𑀚𑀳𑀦𑁆𑀢𑀺, 𑀬𑀣𑀸 𑀭𑀸𑀕𑀤𑁄𑀲𑀸 𑀧𑀳𑀻𑀬𑀦𑁆𑀢𑀺, 𑀏𑀯𑀁 𑀲𑀫𑀡𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀫𑀬𑁆𑀳𑀁 𑀲𑀫𑀡𑀸 𑀧𑀺𑀬𑀸𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑀻𑀡𑀺 𑀧𑀸𑀧𑀲𑁆𑀲 𑀫𑀽𑀮𑀸𑀦𑀻𑀢𑀺 𑀮𑁄𑀪𑀤𑁄𑀲𑀫𑁄𑀳𑀲𑀗𑁆𑀔𑀸𑀢𑀸𑀦𑀺 𑀅𑀓𑀼𑀲𑀮𑀲𑁆𑀲 𑀢𑀻𑀡𑀺 𑀫𑀽𑀮𑀸𑀦𑀺. 𑀥𑀼𑀦𑀦𑁆𑀢𑀻𑀢𑀺 𑀦𑀺𑀕𑁆𑀖𑀸𑀢𑁂𑀦𑁆𑀢𑀺, 𑀧𑀚𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀘𑀺𑀓𑀸𑀭𑀺𑀦𑁄𑀢𑀺 𑀅𑀦𑀯𑀚𑁆𑀚𑀓𑀫𑁆𑀫𑀓𑀸𑀭𑀺𑀦𑁄. 𑀲𑀩𑁆𑀩𑀁 𑀧𑀸𑀧𑀁 𑀧𑀳𑀻𑀦𑁂𑀲𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀏𑀲𑀁 𑀲𑀩𑁆𑀩𑀫𑁆𑀧𑀺 𑀧𑀸𑀧𑀁 𑀧𑀳𑀻𑀦𑀁.

𑀏𑀯𑀁 ‘‘𑀲𑀫𑀡𑀸 𑀲𑀼𑀘𑀺𑀓𑀸𑀭𑀺𑀦𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀫𑀮𑀸 𑀲𑀗𑁆𑀔𑀫𑀼𑀢𑁆𑀢𑀸𑀯𑀸𑀢𑀺 𑀲𑀼𑀥𑁄𑀢𑀲𑀗𑁆𑀔𑀸 𑀯𑀺𑀬 𑀫𑀼𑀢𑁆𑀢𑀸 𑀯𑀺𑀬 𑀘 𑀯𑀺𑀕𑀢𑀫𑀮𑀸 𑀭𑀸𑀕𑀸𑀤𑀺𑀫𑀮𑀭𑀳𑀺𑀢𑀸. 𑀲𑀼𑀤𑁆𑀥𑀸 𑀲𑀦𑁆𑀢𑀭𑀩𑀸𑀳𑀺𑀭𑀸𑀢𑀺 𑀲𑀦𑁆𑀢𑀭𑀜𑁆𑀘 𑀩𑀸𑀳𑀺𑀭𑀜𑁆𑀘 𑀲𑀦𑁆𑀢𑀭𑀩𑀸𑀳𑀺𑀭𑀁. 𑀢𑀢𑁄 𑀲𑀦𑁆𑀢𑀭𑀩𑀸𑀳𑀺𑀭𑀢𑁄 𑀲𑀼𑀤𑁆𑀥𑀸, 𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑀸𑀢𑀺 𑀅𑀢𑁆𑀣𑁄. 𑀧𑀼𑀡𑁆𑀡𑀸 𑀲𑀼𑀓𑁆𑀓𑀸𑀦 𑀥𑀫𑁆𑀫𑀸𑀦𑀦𑁆𑀢𑀺 𑀏𑀓𑀦𑁆𑀢𑀲𑀼𑀓𑁆𑀓𑁂𑀳𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀳𑀺 𑀧𑀭𑀺𑀧𑀼𑀡𑁆𑀡𑀸, 𑀅𑀲𑁂𑀔𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄.

𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀩𑀳𑀼𑀁 𑀲𑀼𑀢𑀁 𑀏𑀢𑁂𑀲𑀁, 𑀲𑀼𑀢𑁂𑀦 𑀯𑀸 𑀉𑀧𑁆𑀧𑀦𑁆𑀦𑀸𑀢𑀺 𑀩𑀳𑀼𑀲𑁆𑀲𑀼𑀢𑀸, 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦 𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀤𑀼𑀯𑀺𑀥𑀫𑁆𑀧𑀺 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀥𑀭𑀸. 𑀲𑀢𑁆𑀢𑀸𑀦𑀁 𑀆𑀘𑀸𑀭𑀲𑀫𑀸𑀘𑀸𑀭𑀲𑀺𑀓𑁆𑀔𑀸𑀧𑀤𑁂𑀦 𑀅𑀭𑀻𑀬𑀦𑁆𑀢𑀻𑀢𑀺 𑀅𑀭𑀺𑀬𑀸. 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀚𑀻𑀯𑀦𑁆𑀢𑀻𑀢𑀺 𑀥𑀫𑁆𑀫𑀚𑀻𑀯𑀺𑀦𑁄. 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀦𑁆𑀢𑀻𑀢𑀺 𑀪𑀸𑀲𑀺𑀢𑀢𑁆𑀣𑀜𑁆𑀘 𑀤𑁂𑀲𑀦𑀸𑀥𑀫𑁆𑀫𑀜𑁆𑀘 𑀓𑀣𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺. 𑀅𑀣 𑀯𑀸 𑀅𑀢𑁆𑀣𑀢𑁄 𑀅𑀦𑀧𑁂𑀢𑀁 𑀥𑀫𑁆𑀫𑀢𑁄 𑀅𑀦𑀧𑁂𑀢𑀜𑁆𑀘 𑀤𑁂𑀲𑁂𑀦𑁆𑀢𑀺 𑀆𑀘𑀺𑀓𑁆𑀔𑀦𑁆𑀢𑀺.

𑀏𑀓𑀕𑁆𑀕𑀘𑀺𑀢𑁆𑀢𑀸𑀢𑀺 𑀲𑀫𑀸𑀳𑀺𑀢𑀘𑀺𑀢𑁆𑀢𑀸. 𑀲𑀢𑀺𑀫𑀦𑁆𑀢𑁄𑀢𑀺 𑀉𑀧𑀝𑁆𑀞𑀺𑀢𑀲𑀢𑀺𑀦𑁄.

𑀤𑀽𑀭𑀗𑁆𑀕𑀫𑀸𑀢𑀺 𑀅𑀭𑀜𑁆𑀜𑀕𑀢𑀸, 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀽𑀭𑀁 𑀕𑀘𑁆𑀙𑀦𑁆𑀢𑀸, 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀯𑀸 𑀬𑀣𑀸𑀭𑀼𑀘𑀺𑀢𑀁 𑀤𑀽𑀭𑀁 𑀞𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀽𑀭𑀗𑁆𑀕𑀫𑀸. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀪𑀡𑀦𑀲𑀻𑀮𑀢𑀸𑀬 𑀫𑀦𑁆𑀢𑀪𑀸𑀡𑀻. 𑀦 𑀉𑀤𑁆𑀥𑀢𑀸𑀢𑀺 𑀅𑀦𑀼𑀤𑁆𑀥𑀢𑀸, 𑀉𑀤𑁆𑀥𑀘𑁆𑀘𑀭𑀳𑀺𑀢𑀸 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀧𑀚𑀸𑀦𑀦𑁆𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺.

𑀦 𑀯𑀺𑀮𑁄𑀓𑁂𑀦𑁆𑀢𑀺 𑀓𑀺𑀜𑁆𑀘𑀦𑀦𑁆𑀢𑀺 𑀬𑀢𑁄 𑀕𑀸𑀫𑀢𑁄 𑀧𑀓𑁆𑀓𑀫𑀦𑁆𑀢𑀺, 𑀢𑀲𑁆𑀫𑀺𑀁 𑀕𑀸𑀫𑁂 𑀓𑀜𑁆𑀘𑀺 𑀲𑀢𑁆𑀢𑀁 𑀯𑀸 𑀲𑀗𑁆𑀔𑀸𑀭𑀁 𑀯𑀸 𑀅𑀧𑁂𑀓𑁆𑀔𑀸𑀯𑀲𑁂𑀦 𑀦 𑀑𑀮𑁄𑀓𑁂𑀦𑁆𑀢𑀺, 𑀅𑀣 𑀔𑁄 𑀧𑀦 𑀅𑀦𑀧𑁂𑀓𑁆𑀔𑀸𑀯 𑀕𑀘𑁆𑀙𑀦𑁆𑀢𑀺 𑀧𑀓𑁆𑀓𑀫𑀦𑁆𑀢𑀺.

𑀦 𑀢𑁂 𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀻𑀢𑀺 𑀢𑁂 𑀲𑀫𑀡𑀸 𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀓𑁄𑀝𑁆𑀞𑁂 𑀦 𑀑𑀧𑁂𑀦𑁆𑀢𑀺 𑀦 𑀧𑀝𑀺𑀲𑀸𑀫𑁂𑀢𑁆𑀯𑀸 𑀞𑀧𑁂𑀦𑁆𑀢𑀺 𑀢𑀸𑀤𑀺𑀲𑀲𑁆𑀲 𑀧𑀭𑀺𑀕𑁆𑀕𑀳𑀲𑁆𑀲 𑀅𑀪𑀸𑀯𑀢𑁄. 𑀓𑀼𑀫𑁆𑀪𑀺𑀦𑁆𑀢𑀺 𑀓𑀼𑀫𑁆𑀪𑀺𑀬𑀁. 𑀔𑀴𑁄𑀧𑀺𑀬𑀦𑁆𑀢𑀺 𑀧𑀘𑁆𑀙𑀺𑀬𑀁. 𑀧𑀭𑀺𑀦𑀺𑀝𑁆𑀞𑀺𑀢𑀫𑁂𑀲𑀸𑀦𑀸𑀢𑀺 𑀧𑀭𑀓𑀼𑀮𑁂𑀲𑀼 𑀧𑀭𑁂𑀲𑀁 𑀅𑀢𑁆𑀣𑀸𑀬 𑀲𑀺𑀤𑁆𑀥𑀫𑁂𑀯 𑀖𑀸𑀲𑀁 𑀧𑀭𑀺𑀬𑁂𑀲𑀦𑁆𑀢𑀸.

𑀳𑀺𑀭𑀜𑁆𑀜𑀦𑁆𑀢𑀺 𑀓𑀳𑀸𑀧𑀡𑀁. 𑀭𑀽𑀧𑀺𑀬𑀦𑁆𑀢𑀺 𑀭𑀚𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀻𑀢𑀺 𑀅𑀢𑀻𑀢𑀁 𑀅𑀦𑀦𑀼𑀲𑁄𑀘𑀦𑁆𑀢𑀸 𑀅𑀦𑀸𑀕𑀢𑀜𑁆𑀘 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀦𑁆𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀧𑀺𑀳𑀬𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀫𑁂𑀢𑁆𑀢𑀺𑀁 𑀓𑀭𑁄𑀦𑁆𑀢𑀺. ‘‘𑀧𑀺𑀳𑀸𑀬𑀦𑁆𑀢𑀺’’𑀧𑀺 𑀧𑀸𑀞𑁄, 𑀲𑁄 𑀏𑀯 𑀅𑀢𑁆𑀣𑁄.

𑀏𑀯𑀁 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀥𑀻𑀢𑀼𑀬𑀸 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀽𑀦𑀁 𑀕𑀼𑀡𑁂 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀥𑀻𑀢𑀭𑀁 𑀧𑀲𑀁𑀲𑀦𑁆𑀢𑁄 ‘‘𑀅𑀢𑁆𑀣𑀸𑀬 𑀯𑀢𑀸’’𑀢𑀺𑀆𑀤𑀺𑀫𑀸𑀳.

𑀅𑀫𑁆𑀳𑀫𑁆𑀧𑀻𑀢𑀺 𑀅𑀫𑁆𑀳𑀸𑀓𑀫𑁆𑀧𑀺. 𑀤𑀓𑁆𑀔𑀺𑀡𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀁.

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑀫𑀡𑁂𑀲𑀼. 𑀬𑀜𑁆𑀜𑁄𑀢𑀺 𑀤𑀸𑀦𑀥𑀫𑁆𑀫𑁄. 𑀯𑀺𑀧𑀼𑀮𑁄𑀢𑀺 𑀯𑀺𑀧𑀼𑀮𑀨𑀮𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑁄 𑀅𑀧𑀭𑀪𑀸𑀕𑁂 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑁄 ‘‘𑀩𑁆𑀭𑀳𑁆𑀫𑀩𑀦𑁆𑀥𑀽’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀭𑁄𑀳𑀺𑀦𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀸𑀧𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀮𑀝𑁆𑀞𑀺𑀳𑀢𑁆𑀣𑁄 𑀧𑀼𑀭𑁂 𑀆𑀲𑀻𑀢𑀺𑀆𑀤𑀺𑀓𑀸 𑀘𑀸𑀧𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀅𑀦𑀼𑀓𑁆𑀓𑀫𑁂𑀦 𑀉𑀧𑀘𑀺𑀢𑀓𑀼𑀲𑀮𑀫𑀽𑀮𑀸 𑀲𑀫𑁆𑀪𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀗𑁆𑀕𑀳𑀸𑀭𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀺𑀕𑀮𑀼𑀤𑁆𑀤𑀓𑀕𑀸𑀫𑁂 𑀚𑁂𑀝𑁆𑀞𑀓𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀘𑀸𑀧𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀉𑀧𑀓𑁄 𑀆𑀚𑀻𑀯𑀓𑁄 𑀩𑁄𑀥𑀺𑀫𑀡𑁆𑀟𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀁 𑀩𑀸𑀭𑀸𑀡𑀲𑀺𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑁂𑀦 𑀲𑀢𑁆𑀣𑀸𑀭𑀸 𑀲𑀫𑀸𑀕𑀢𑁄 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄, 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺 (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫) 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀺, 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄;

𑀲𑀩𑁆𑀩𑀜𑁆𑀚𑀳𑁄 𑀢𑀡𑁆𑀳𑀸𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀁. (𑀥. 𑀧. 𑁩𑁫𑁩; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫. 𑀦𑀺. 𑁧.𑁨𑁮𑁫);

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄.

‘‘𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂, 𑀅𑀳𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀺𑀪𑀽𑀢𑁄𑀫𑁆𑀳𑀺 𑀦𑀺𑀩𑁆𑀩𑀼𑀢𑁄.

‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀁, 𑀕𑀘𑁆𑀙𑀸𑀫𑀺 𑀓𑀸𑀲𑀺𑀦𑀁 𑀧𑀼𑀭𑀁;

𑀅𑀦𑁆𑀥𑀻𑀪𑀽𑀢𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀆𑀳𑀜𑁆𑀙𑀁 𑀅𑀫𑀢𑀤𑀼𑀦𑁆𑀤𑀼𑀪𑀺’’𑀦𑁆𑀢𑀺. (𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫. 𑀦𑀺. 𑁧.𑁨𑁮𑁫) 𑁋

𑀲𑀢𑁆𑀣𑀸𑀭𑀸 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀸𑀯𑁂 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑁂 𑀘 𑀧𑀯𑁂𑀤𑀺𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑁄 ‘‘𑀳𑀼𑀧𑁂𑀬𑁆𑀬𑀧𑀸𑀯𑀼𑀲𑁄, 𑀅𑀭𑀳𑀲𑀺 𑀅𑀦𑀦𑁆𑀢𑀚𑀺𑀦𑁄’’𑀢𑀺 (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫) 𑀯𑀢𑁆𑀯𑀸 𑀉𑀫𑁆𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 𑀯𑀗𑁆𑀕𑀳𑀸𑀭𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀲𑁄 𑀢𑀢𑁆𑀣 𑀏𑀓𑀁 𑀫𑀺𑀕𑀮𑀼𑀤𑁆𑀤𑀓𑀕𑀸𑀫𑀓𑀁 𑀉𑀧𑀦𑀺𑀲𑁆𑀲𑀸𑀬 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀁 𑀢𑀢𑁆𑀣 𑀚𑁂𑀝𑁆𑀞𑀓𑀫𑀺𑀕𑀮𑀼𑀤𑁆𑀤𑀓𑁄 𑀉𑀧𑀝𑁆𑀞𑀸𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀤𑀽𑀭𑀁 𑀫𑀺𑀕𑀯𑀁 𑀕𑀘𑁆𑀙𑀦𑁆𑀢𑁄 ‘‘𑀫𑀬𑁆𑀳𑀁 𑀅𑀭𑀳𑀦𑁆𑀢𑁂 𑀫𑀸 𑀧𑀫𑀚𑁆𑀚𑀻’’𑀢𑀺 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀘𑀸𑀧𑀁 𑀆𑀡𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀧𑀼𑀢𑁆𑀢𑀪𑀸𑀢𑀼𑀓𑁂𑀳𑀺. 𑀲𑀸 𑀘𑀲𑁆𑀲 𑀥𑀻𑀢𑀸 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸.

𑀅𑀣 𑀔𑁄 𑀉𑀧𑀓𑁄 𑀆𑀚𑀻𑀯𑀓𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀖𑀭𑀁 𑀕𑀢𑁄 𑀧𑀭𑀺𑀯𑀺𑀲𑀺𑀢𑀼𑀁 𑀉𑀧𑀕𑀢𑀁 𑀘𑀸𑀧𑀁 𑀤𑀺𑀲𑁆𑀯𑀸 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀪𑀸𑀚𑀦𑁂𑀦 𑀪𑀢𑁆𑀢𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀏𑀓𑀫𑀦𑁆𑀢𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀘𑁂 𑀘𑀸𑀧𑀁 𑀮𑀪𑀺𑀲𑁆𑀲𑀸𑀫𑀺, 𑀚𑀻𑀯𑀸𑀫𑀺, 𑀦𑁄 𑀘𑁂, 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀭𑀸𑀳𑀸𑀭𑁄 𑀦𑀺𑀧𑀚𑁆𑀚𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀺𑀕𑀮𑀼𑀤𑁆𑀤𑀓𑁄 𑀆𑀕𑀦𑁆𑀢𑁆𑀯𑀸 𑀥𑀻𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀅𑀭𑀳𑀦𑁆𑀢𑁂 𑀦 𑀧𑀫𑀚𑁆𑀚𑀻’’𑀢𑀺? 𑀲𑀸 ‘‘𑀏𑀓𑀤𑀺𑀯𑀲𑀫𑁂𑀯 𑀆𑀕𑀦𑁆𑀢𑁆𑀯𑀸 𑀧𑀼𑀦 𑀦𑀸𑀕𑀢𑀧𑀼𑀩𑁆𑀩𑁄’’𑀢𑀺 𑀆𑀳. 𑀫𑀺𑀕𑀮𑀼𑀤𑁆𑀤𑀓𑁄 𑀘 𑀢𑀸𑀯𑀤𑁂𑀯𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀧𑀼𑀘𑁆𑀙𑀺. 𑀉𑀧𑀓𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 𑀧𑀭𑀺𑀯𑀢𑁆𑀢𑀢𑀺𑀬𑁂𑀯. 𑀲𑁄 ‘‘𑀯𑀤𑀣, 𑀪𑀦𑁆𑀢𑁂, 𑀬𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼𑀁, 𑀲𑀩𑁆𑀩𑀁 𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀉𑀧𑀓𑁄 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀆𑀭𑁄𑀘𑁂𑀲𑀺. ‘‘𑀇𑀢𑀭𑁄 𑀚𑀸𑀦𑀸𑀲𑀺 𑀧𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀲𑀺𑀧𑁆𑀧’’𑀦𑁆𑀢𑀺. ‘‘𑀦 𑀚𑀸𑀦𑀸𑀫𑀻’’𑀢𑀺. ‘‘𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀚𑀸𑀦𑀦𑁆𑀢𑁂𑀦 𑀲𑀓𑁆𑀓𑀸 𑀖𑀭𑀁 𑀆𑀯𑀲𑀺𑀢𑀼’’𑀦𑁆𑀢𑀺. 𑀲𑁄 𑀆𑀳 𑁋 ‘‘𑀦𑀸𑀳𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀫𑀺, 𑀅𑀧𑀺𑀘 𑀢𑀼𑀫𑁆𑀳𑀸𑀓𑀁 𑀫𑀁𑀲𑀳𑀸𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀁𑀲𑀜𑁆𑀘 𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀕𑀯𑀺𑀓𑁄 ‘‘𑀅𑀫𑁆𑀳𑀸𑀓𑀫𑁆𑀧𑀺 𑀏𑀢𑀤𑁂𑀯 𑀭𑀼𑀘𑁆𑀘𑀢𑀻’’𑀢𑀺 𑀉𑀢𑁆𑀢𑀭𑀲𑀸𑀝𑀓𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀸𑀬𑀓𑀲𑁆𑀲 𑀕𑁂𑀳𑁂 𑀓𑀢𑀺𑀧𑀸𑀳𑀁 𑀯𑀲𑀸𑀧𑁂𑀢𑁆𑀯𑀸 𑀢𑀸𑀤𑀺𑀲𑁂 𑀤𑀺𑀯𑀲𑁂 𑀖𑀭𑀁 𑀆𑀦𑁂𑀢𑁆𑀯𑀸 𑀥𑀻𑀢𑀭𑀁 𑀅𑀤𑀸𑀲𑀺.

𑀅𑀣 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀪𑀤𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀘𑀸𑀧𑀸 𑀢𑀲𑁆𑀲 𑀭𑁄𑀤𑀦𑀓𑀸𑀮𑁂 ‘‘𑀉𑀧𑀓𑀲𑁆𑀲 𑀧𑀼𑀢𑁆𑀢, 𑀆𑀚𑀻𑀯𑀓𑀲𑁆𑀲 𑀧𑀼𑀢𑁆𑀢, 𑀫𑀁𑀲𑀳𑀸𑀭𑀓𑀲𑁆𑀲 𑀧𑀼𑀢𑁆𑀢, 𑀫𑀸 𑀭𑁄𑀤𑀺 𑀫𑀸 𑀭𑁄𑀤𑀻’’𑀢𑀺𑀆𑀤𑀺𑀦𑀸 𑀧𑀼𑀢𑁆𑀢𑀢𑁄𑀲𑀦𑀕𑀻𑀢𑁂𑀦 𑀉𑀧𑀓𑀁 𑀉𑀧𑁆𑀧𑀡𑁆𑀟𑁂𑀲𑀺. 𑀲𑁄 ‘‘𑀫𑀸 𑀢𑁆𑀯𑀁 𑀘𑀸𑀧𑁂 𑀫𑀁 ‘𑀅𑀦𑀸𑀣𑁄’𑀢𑀺 𑀫𑀜𑁆𑀜𑀺, 𑀅𑀢𑁆𑀣𑀺 𑀫𑁂 𑀲𑀳𑀸𑀬𑁄 𑀅𑀦𑀦𑁆𑀢𑀚𑀺𑀦𑁄 𑀦𑀸𑀫, 𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀘𑀸𑀧𑀸 ‘‘𑀏𑀯𑀫𑀬𑀁 𑀅𑀝𑁆𑀝𑀻𑀬𑀢𑀻’’𑀢𑀺 𑀜𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀣𑀸 𑀓𑀣𑁂𑀲𑀺𑀬𑁂𑀯. 𑀲𑁄 𑀏𑀓𑀤𑀺𑀯𑀲𑀁 𑀢𑀸𑀬 𑀢𑀣𑀸 𑀯𑀼𑀢𑁆𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 𑀕𑀦𑁆𑀢𑀼𑀫𑀸𑀭𑀤𑁆𑀥𑁄. 𑀢𑀸𑀬 𑀢𑀁 𑀢𑀁 𑀯𑀢𑁆𑀯𑀸 𑀅𑀦𑀼𑀦𑀻𑀬𑀫𑀸𑀦𑁄𑀧𑀺 𑀲𑀜𑁆𑀜𑀢𑁆𑀢𑀺𑀁 𑀅𑀦𑀸𑀕𑀘𑁆𑀙𑀦𑁆𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀺𑀫𑀼𑀔𑁄 𑀧𑀓𑁆𑀓𑀸𑀫𑀺.

𑀪𑀕𑀯𑀸 𑀘 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀆𑀘𑀺𑀓𑁆𑀔𑀺 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀅𑀚𑁆𑀚 ‘𑀓𑀼𑀳𑀺𑀁 𑀅𑀦𑀦𑁆𑀢𑀚𑀺𑀦𑁄’𑀢𑀺 𑀇𑀥𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀢𑀺, 𑀢𑀁 𑀫𑀫 𑀲𑀦𑁆𑀢𑀺𑀓𑀁 𑀧𑁂𑀲𑁂𑀣𑀸’’𑀢𑀺. 𑀉𑀧𑀓𑁄𑀧𑀺 ‘‘𑀓𑀼𑀳𑀺𑀁 𑀅𑀦𑀦𑁆𑀢𑀚𑀺𑀦𑁄 𑀯𑀲𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀘𑁆𑀙𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀓𑀼𑀳𑀺𑀁 𑀅𑀦𑀦𑁆𑀢𑀚𑀺𑀦𑁄’’𑀢𑀺 𑀧𑀼𑀘𑁆𑀙𑀺. 𑀢𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀚𑀸𑀦𑀸𑀣 𑀫𑀁 𑀪𑀕𑀯𑀸’’𑀢𑀺 𑀆𑀳. ‘‘𑀆𑀫, 𑀚𑀸𑀦𑀸𑀫𑀺, 𑀓𑀼𑀳𑀺𑀁 𑀧𑀦 𑀢𑁆𑀯𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀲𑀻’’𑀢𑀺? ‘‘𑀯𑀗𑁆𑀕𑀳𑀸𑀭𑀚𑀦𑀧𑀤𑁂, 𑀪𑀦𑁆𑀢𑁂’’𑀢𑀺. ‘‘𑀉𑀧𑀓, 𑀇𑀤𑀸𑀦𑀺 𑀫𑀳𑀮𑁆𑀮𑀓𑁄 𑀚𑀸𑀢𑁄 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀫𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀲𑁄 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑁄, 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑀸 𑀲𑀢𑁆𑀢 𑀚𑀦𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑁂𑀲𑀁 𑀅𑀬𑀁 𑀅𑀜𑁆𑀜𑀢𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀯𑀺𑀳𑀁 𑀉𑀧𑀧𑀦𑁆𑀦𑀸𑀲𑁂, 𑀯𑀺𑀫𑀼𑀢𑁆𑀢𑀸 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

‘‘𑀉𑀧𑀓𑁄𑀧𑀮𑀕𑀡𑁆𑀟𑁄 𑀘, 𑀧𑀓𑁆𑀓𑀼𑀲𑀸𑀢𑀺 𑀘 𑀢𑁂 𑀢𑀬𑁄;

𑀪𑀤𑁆𑀤𑀺𑀬𑁄 𑀔𑀡𑁆𑀟𑀤𑁂𑀯𑁄 𑀘, 𑀩𑀸𑀳𑀼𑀭𑀕𑁆𑀕𑀺 𑀘 𑀲𑀺𑀗𑁆𑀕𑀺𑀬𑁄;

𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁦𑁫);

𑀉𑀧𑀓𑁂 𑀧𑀦 𑀧𑀓𑁆𑀓𑀦𑁆𑀢𑁂 𑀦𑀺𑀩𑁆𑀩𑀺𑀦𑁆𑀤𑀳𑀤𑀬𑀸 𑀘𑀸𑀧𑀸 𑀤𑀸𑀭𑀓𑀁 𑀅𑀬𑁆𑀬𑀓𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀼𑀩𑁆𑀩𑁂 𑀉𑀧𑀓𑁂𑀦 𑀕𑀢𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀻 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑀸, 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀼𑀩𑁆𑀩𑁂 𑀉𑀧𑀓𑁂𑀦 𑀅𑀢𑁆𑀢𑀦𑀸 𑀘 𑀓𑀣𑀺𑀢𑀕𑀸𑀣𑀸𑀬𑁄 𑀉𑀤𑀸𑀦𑀯𑀲𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑁋

𑁨𑁯𑁨.

‘‘𑀮𑀝𑁆𑀞𑀺𑀳𑀢𑁆𑀣𑁄 𑀧𑀼𑀭𑁂 𑀆𑀲𑀺, 𑀲𑁄 𑀤𑀸𑀦𑀺 𑀫𑀺𑀕𑀮𑀼𑀤𑁆𑀤𑀓𑁄;

𑀆𑀲𑀸𑀬 𑀧𑀮𑀺𑀧𑀸 𑀖𑁄𑀭𑀸, 𑀦𑀸𑀲𑀓𑁆𑀔𑀺 𑀧𑀸𑀭𑀫𑁂𑀢𑀯𑁂.

𑁨𑁯𑁩.

‘‘𑀲𑀼𑀫𑀢𑁆𑀢𑀁 𑀫𑀁 𑀫𑀜𑁆𑀜𑀫𑀸𑀦𑀸, 𑀘𑀸𑀧𑀺 𑀧𑀼𑀢𑁆𑀢𑀫𑀢𑁄𑀲𑀬𑀺;

𑀘𑀸𑀧𑀸𑀬 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀧𑀩𑁆𑀩𑀚𑀺𑀲𑁆𑀲𑀁 𑀧𑀼𑀦𑁄𑀧𑀳𑀁.

𑁨𑁯𑁪.

‘‘𑀫𑀸 𑀫𑁂 𑀓𑀼𑀚𑁆𑀛𑀺 𑀫𑀳𑀸𑀯𑀻𑀭, 𑀫𑀸 𑀫𑁂 𑀓𑀼𑀚𑁆𑀛𑀺 𑀫𑀳𑀸𑀫𑀼𑀦𑀺;

𑀦 𑀳𑀺 𑀓𑁄𑀥𑀧𑀭𑁂𑀢𑀲𑁆𑀲, 𑀲𑀼𑀤𑁆𑀥𑀺 𑀅𑀢𑁆𑀣𑀺 𑀓𑀼𑀢𑁄 𑀢𑀧𑁄.

𑁨𑁯𑁫.

‘‘𑀧𑀓𑁆𑀓𑀫𑀺𑀲𑁆𑀲𑀜𑁆𑀘 𑀦𑀸𑀴𑀸𑀢𑁄, 𑀓𑁄𑀥 𑀦𑀸𑀴𑀸𑀬 𑀯𑀘𑁆𑀙𑀢𑀺;

𑀩𑀦𑁆𑀥𑀦𑁆𑀢𑀻 𑀇𑀢𑁆𑀣𑀺𑀭𑀽𑀧𑁂𑀦, 𑀲𑀫𑀡𑁂 𑀥𑀫𑁆𑀫𑀚𑀻𑀯𑀺𑀦𑁄.

𑁨𑁯𑁬.

‘‘𑀏𑀳𑀺 𑀓𑀸𑀴 𑀦𑀺𑀯𑀢𑁆𑀢𑀲𑁆𑀲𑀼, 𑀪𑀼𑀜𑁆𑀚 𑀓𑀸𑀫𑁂 𑀬𑀣𑀸 𑀧𑀼𑀭𑁂;

𑀅𑀳𑀜𑁆𑀘 𑀢𑁂 𑀯𑀲𑀻𑀓𑀢𑀸, 𑀬𑁂 𑀘 𑀫𑁂 𑀲𑀦𑁆𑀢𑀺 𑀜𑀸𑀢𑀓𑀸.

𑁨𑁯𑁭.

‘‘𑀏𑀢𑁆𑀢𑁄 𑀘𑀸𑀧𑁂 𑀘𑀢𑀼𑀩𑁆𑀪𑀸𑀕𑀁, 𑀬𑀣𑀸 𑀪𑀸𑀲𑀲𑀺 𑀢𑁆𑀯𑀜𑁆𑀘 𑀫𑁂;

𑀢𑀬𑀺 𑀭𑀢𑁆𑀢𑀲𑁆𑀲 𑀧𑁄𑀲𑀲𑁆𑀲, 𑀉𑀴𑀸𑀭𑀁 𑀯𑀢 𑀢𑀁 𑀲𑀺𑀬𑀸.

𑁨𑁯𑁮.

‘‘𑀓𑀸𑀴𑀗𑁆𑀕𑀺𑀦𑀺𑀁𑀯 𑀢𑀓𑁆𑀓𑀸𑀭𑀺𑀁, 𑀧𑀼𑀧𑁆𑀨𑀺𑀢𑀁 𑀕𑀺𑀭𑀺𑀫𑀼𑀤𑁆𑀥𑀦𑀺;

𑀨𑀼𑀮𑁆𑀮𑀁 𑀤𑀸𑀮𑀺𑀫𑀮𑀝𑁆𑀞𑀺𑀁𑀯, 𑀅𑀦𑁆𑀢𑁄𑀤𑀻𑀧𑁂𑀯 𑀧𑀸𑀝𑀮𑀺𑀁.

𑁨𑁯𑁯.

‘‘𑀳𑀭𑀺𑀘𑀦𑁆𑀤𑀦𑀮𑀺𑀢𑁆𑀢𑀗𑁆𑀕𑀺𑀁, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀺𑀁;

𑀢𑀁 𑀫𑀁 𑀭𑀽𑀧𑀯𑀢𑀺𑀁 𑀲𑀦𑁆𑀢𑀺𑀁, 𑀓𑀲𑁆𑀲 𑀑𑀳𑀸𑀬𑀁 𑀕𑀘𑁆𑀙𑀲𑀺.

𑁩𑁦𑁦.

‘‘𑀲𑀸𑀓𑀼𑀦𑁆𑀢𑀺𑀓𑁄𑀯 𑀲𑀓𑀼𑀡𑀺𑀁, 𑀬𑀣𑀸 𑀩𑀦𑁆𑀥𑀺𑀢𑀼𑀫𑀺𑀘𑁆𑀙𑀢𑀺;

𑀆𑀳𑀭𑀺𑀫𑁂𑀦 𑀭𑀽𑀧𑁂𑀦, 𑀦 𑀫𑀁 𑀢𑁆𑀯𑀁 𑀩𑀸𑀥𑀬𑀺𑀲𑁆𑀲𑀲𑀺.

𑁩𑁦𑁧.

‘‘𑀇𑀫𑀜𑁆𑀘 𑀫𑁂 𑀧𑀼𑀢𑁆𑀢𑀨𑀮𑀁, 𑀓𑀸𑀴 𑀉𑀧𑁆𑀧𑀸𑀤𑀺𑀢𑀁 𑀢𑀬𑀸;

𑀢𑀁 𑀫𑀁 𑀧𑀼𑀢𑁆𑀢𑀯𑀢𑀺𑀁 𑀲𑀦𑁆𑀢𑀺𑀁, 𑀓𑀲𑁆𑀲 𑀑𑀳𑀸𑀬 𑀕𑀘𑁆𑀙𑀲𑀺.

𑁩𑁦𑁨.

‘‘𑀚𑀳𑀦𑁆𑀢𑀺 𑀧𑀼𑀢𑁆𑀢𑁂 𑀲𑀧𑁆𑀧𑀜𑁆𑀜𑀸, 𑀢𑀢𑁄 𑀜𑀸𑀢𑀻 𑀢𑀢𑁄 𑀥𑀦𑀁;

𑀧𑀩𑁆𑀩𑀚𑀦𑁆𑀢𑀺 𑀫𑀳𑀸𑀯𑀻𑀭𑀸, 𑀦𑀸𑀕𑁄 𑀙𑁂𑀢𑁆𑀯𑀸𑀯 𑀩𑀦𑁆𑀥𑀦𑀁.

𑁩𑁦𑁩.

‘‘𑀇𑀤𑀸𑀦𑀺 𑀢𑁂 𑀇𑀫𑀁 𑀧𑀼𑀢𑁆𑀢𑀁, 𑀤𑀡𑁆𑀟𑁂𑀦 𑀙𑀼𑀭𑀺𑀓𑀸𑀬 𑀯𑀸;

𑀪𑀽𑀫𑀺𑀬𑀁 𑀯𑀸 𑀦𑀺𑀲𑀼𑀫𑁆𑀪𑀺𑀲𑁆𑀲𑀁, 𑀧𑀼𑀢𑁆𑀢𑀲𑁄𑀓𑀸 𑀦 𑀕𑀘𑁆𑀙𑀲𑀺.

𑁩𑁦𑁪.

‘‘𑀲𑀘𑁂 𑀧𑀼𑀢𑁆𑀢𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀓𑀼𑀓𑁆𑀓𑀼𑀭𑀸𑀦𑀁 𑀧𑀤𑀸𑀳𑀺𑀲𑀺;

𑀦 𑀫𑀁 𑀧𑀼𑀢𑁆𑀢𑀓𑀢𑁆𑀢𑁂 𑀚𑀫𑁆𑀫𑀺, 𑀧𑀼𑀦𑀭𑀸𑀯𑀢𑁆𑀢𑀬𑀺𑀲𑁆𑀲𑀲𑀺.

𑁩𑁦𑁫.

‘‘𑀳𑀦𑁆𑀤 𑀔𑁄 𑀤𑀸𑀦𑀺 𑀪𑀤𑁆𑀤𑀦𑁆𑀢𑁂, 𑀓𑀼𑀳𑀺𑀁 𑀓𑀸𑀴 𑀕𑀫𑀺𑀲𑁆𑀲𑀲𑀺;

𑀓𑀢𑀫𑀁 𑀕𑀸𑀫𑀦𑀺𑀕𑀫𑀁, 𑀦𑀕𑀭𑀁 𑀭𑀸𑀚𑀥𑀸𑀦𑀺𑀬𑁄.

𑁩𑁦𑁬.

‘‘𑀅𑀳𑀼𑀫𑁆𑀳 𑀧𑀼𑀩𑁆𑀩𑁂 𑀕𑀡𑀺𑀦𑁄, 𑀅𑀲𑁆𑀲𑀫𑀡𑀸 𑀲𑀫𑀡𑀫𑀸𑀦𑀺𑀦𑁄;

𑀕𑀸𑀫𑁂𑀦 𑀕𑀸𑀫𑀁 𑀯𑀺𑀘𑀭𑀺𑀫𑁆𑀳, 𑀦𑀕𑀭𑁂 𑀭𑀸𑀚𑀥𑀸𑀦𑀺𑀬𑁄.

𑁩𑁦𑁭.

‘‘𑀏𑀲𑁄 𑀳𑀺 𑀪𑀕𑀯𑀸 𑀩𑀼𑀤𑁆𑀥𑁄, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀧𑀸𑀡𑀺𑀦𑀁;

𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀁, 𑀲𑁄 𑀫𑁂 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺.

𑁩𑁦𑁮.

‘‘𑀯𑀦𑁆𑀤𑀦𑀁 𑀤𑀸𑀦𑀺 𑀫𑁂 𑀯𑀚𑁆𑀚𑀸𑀲𑀺, 𑀮𑁄𑀓𑀦𑀸𑀣𑀁 𑀅𑀦𑀼𑀢𑁆𑀢𑀭𑀁;

𑀧𑀤𑀓𑁆𑀔𑀺𑀡𑀜𑁆𑀘 𑀓𑀢𑁆𑀯𑀸𑀦, 𑀆𑀤𑀺𑀲𑁂𑀬𑁆𑀬𑀸𑀲𑀺 𑀤𑀓𑁆𑀔𑀺𑀡𑀁.

𑁩𑁦𑁯.

‘‘𑀏𑀢𑀁 𑀔𑁄 𑀮𑀩𑁆𑀪𑀫𑀫𑁆𑀳𑁂𑀳𑀺, 𑀬𑀣𑀸 𑀪𑀸𑀲𑀲𑀺 𑀢𑁆𑀯𑀜𑁆𑀘 𑀫𑁂;

𑀯𑀦𑁆𑀤𑀦𑀁 𑀤𑀸𑀦𑀺 𑀢𑁂 𑀯𑀚𑁆𑀚𑀁, 𑀮𑁄𑀓𑀦𑀸𑀣𑀁 𑀅𑀦𑀼𑀢𑁆𑀢𑀭𑀁;

𑀧𑀤𑀓𑁆𑀔𑀺𑀡𑀜𑁆𑀘 𑀓𑀢𑁆𑀯𑀸𑀦, 𑀆𑀤𑀺𑀲𑀺𑀲𑁆𑀲𑀸𑀫𑀺 𑀤𑀓𑁆𑀔𑀺𑀡𑀁.

𑁩𑁧𑁦.

‘‘𑀢𑀢𑁄 𑀘 𑀓𑀸𑀴𑁄 𑀧𑀓𑁆𑀓𑀸𑀫𑀺, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀲𑁄 𑀅𑀤𑁆𑀤𑀲𑀸𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁.

𑁩𑁧𑁧.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁩𑁧𑁨.

‘‘𑀢𑀲𑁆𑀲 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸, 𑀓𑀢𑁆𑀯𑀸𑀦 𑀦𑀁 𑀧𑀤𑀓𑁆𑀔𑀺𑀡𑀁;

𑀘𑀸𑀧𑀸𑀬 𑀆𑀤𑀺𑀲𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀮𑀝𑁆𑀞𑀺𑀳𑀢𑁆𑀣𑁄𑀢𑀺 𑀤𑀡𑁆𑀟𑀳𑀢𑁆𑀣𑁄. 𑀧𑀼𑀭𑁂𑀢𑀺 𑀧𑀼𑀩𑁆𑀩𑁂 𑀧𑀭𑀺𑀩𑁆𑀩𑀸𑀚𑀓𑀓𑀸𑀮𑁂 𑀘𑀡𑁆𑀟𑀕𑁄𑀡𑀓𑀼𑀓𑁆𑀓𑀼𑀭𑀸𑀤𑀻𑀦𑀁 𑀧𑀭𑀺𑀳𑀭𑀡𑀢𑁆𑀣𑀁 𑀤𑀡𑁆𑀟𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀘𑀭𑀡𑀓𑁄 𑀅𑀳𑁄𑀲𑀺. 𑀲𑁄 𑀤𑀸𑀦𑀺 𑀫𑀺𑀕𑀮𑀼𑀤𑁆𑀤𑀓𑁄𑀢𑀺 𑀲𑁄 𑀇𑀤𑀸𑀦𑀺 𑀫𑀺𑀕𑀮𑀼𑀤𑁆𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀪𑁄𑀕𑀲𑀁𑀯𑀸𑀲𑁂𑀳𑀺 𑀫𑀺𑀕𑀮𑀼𑀤𑁆𑀤𑁄 𑀫𑀸𑀕𑀯𑀺𑀓𑁄 𑀚𑀸𑀢𑁄. 𑀆𑀲𑀸𑀬𑀸𑀢𑀺 𑀢𑀡𑁆𑀳𑀸𑀬. ‘‘𑀆𑀲𑀬𑀸’’𑀢𑀺𑀧𑀺 𑀧𑀸𑀞𑁄, 𑀅𑀚𑁆𑀛𑀸𑀲𑀬𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀧𑀮𑀺𑀧𑀸𑀢𑀺 𑀓𑀸𑀫𑀧𑀗𑁆𑀓𑀢𑁄 𑀤𑀺𑀝𑁆𑀞𑀺𑀧𑀗𑁆𑀓𑀢𑁄 𑀘. 𑀖𑁄𑀭𑀸𑀢𑀺 𑀅𑀯𑀺𑀤𑀺𑀢𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑀢𑁆𑀢𑀸 𑀤𑀸𑀭𑀼𑀡𑀢𑁄 𑀖𑁄𑀭𑀸. 𑀦𑀸𑀲𑀓𑁆𑀔𑀺 𑀧𑀸𑀭𑀫𑁂𑀢𑀯𑁂𑀢𑀺 𑀢𑀲𑁆𑀲𑁂𑀯 𑀧𑀮𑀺𑀧𑀲𑁆𑀲 𑀧𑀸𑀭𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀏𑀢𑀼𑀁 𑀕𑀦𑁆𑀢𑀼𑀁 𑀦 𑀅𑀲𑀓𑁆𑀔𑀺, 𑀦 𑀅𑀪𑀺𑀲𑀫𑁆𑀪𑀼𑀦𑀻𑀢𑀺 𑀅𑀢𑁆𑀢𑀸𑀦𑀫𑁂𑀯 𑀲𑀦𑁆𑀥𑀸𑀬 𑀉𑀧𑀓𑁄 𑀯𑀤𑀢𑀺.

𑀲𑀼𑀫𑀢𑁆𑀢𑀁 𑀫𑀁 𑀫𑀜𑁆𑀜𑀫𑀸𑀦𑀸𑀢𑀺 𑀅𑀢𑁆𑀢𑀦𑀺 𑀲𑀼𑀝𑁆𑀞𑀼 𑀫𑀢𑁆𑀢𑀁 𑀫𑀤𑀧𑁆𑀧𑀢𑁆𑀢𑀁 𑀓𑀸𑀫𑀕𑁂𑀥𑀯𑀲𑁂𑀦 𑀮𑀕𑁆𑀕𑀁 𑀧𑀫𑀢𑁆𑀢𑀁 𑀯𑀸 𑀓𑀢𑁆𑀯𑀸 𑀫𑀁 𑀲𑀮𑁆𑀮𑀓𑁆𑀔𑀦𑁆𑀢𑀻. 𑀘𑀸𑀧𑀸 𑀧𑀼𑀢𑁆𑀢𑀫𑀢𑁄𑀲𑀬𑀻𑀢𑀺 𑀫𑀺𑀕𑀮𑀼𑀤𑁆𑀤𑀲𑁆𑀲 𑀥𑀻𑀢𑀸 𑀘𑀸𑀧𑀸 ‘‘𑀆𑀚𑀻𑀯𑀓𑀲𑁆𑀲 𑀧𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀫𑀁 𑀖𑀝𑁆𑀝𑁂𑀦𑁆𑀢𑀻 𑀧𑀼𑀢𑁆𑀢𑀁 𑀢𑁄𑀲𑁂𑀲𑀺 𑀓𑁂𑀴𑀸𑀬𑀲𑀺. ‘‘𑀲𑀼𑀧𑀢𑀺 𑀫𑀁 𑀫𑀜𑁆𑀜𑀫𑀸𑀦𑀸’’𑀢𑀺 𑀘 𑀧𑀞𑀦𑁆𑀢𑀺, 𑀲𑀼𑀧𑀢𑀻𑀢𑀺 𑀫𑀁 𑀫𑀜𑁆𑀜𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀘𑀸𑀧𑀸𑀬 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸𑀢𑀺 𑀘𑀸𑀧𑀸𑀬 𑀢𑀬𑀺 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀩𑁆𑀩𑀚𑀺𑀲𑁆𑀲𑀁 𑀧𑀼𑀦𑁄𑀧𑀳𑀦𑁆𑀢𑀺 𑀧𑀼𑀦 𑀤𑀼𑀢𑀺𑀬𑀯𑀸𑀭𑀫𑁆𑀧𑀺 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺.

𑀇𑀤𑀸𑀦𑀺 𑀢𑀲𑁆𑀲𑀸 ‘‘𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀯𑀤𑀢𑀺, 𑀢𑀁 𑀲𑀼𑀢𑁆𑀯𑀸 𑀘𑀸𑀧𑀸 𑀔𑀫𑀸𑀧𑁂𑀦𑁆𑀢𑀻 ‘‘𑀫𑀸 𑀫𑁂 𑀓𑀼𑀚𑁆𑀛𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀫𑀸 𑀫𑁂 𑀓𑀼𑀚𑁆𑀛𑀻𑀢𑀺 𑀓𑁂𑀴𑀺𑀓𑀭𑀡𑀫𑀢𑁆𑀢𑁂𑀦 𑀫𑀸 𑀫𑀬𑁆𑀳𑀁 𑀓𑀼𑀚𑁆𑀛𑀺. 𑀫𑀳𑀸𑀯𑀻𑀭, 𑀫𑀳𑀸𑀫𑀼𑀦𑀻𑀢𑀺 𑀉𑀧𑀓𑀁 𑀆𑀮𑀧𑀢𑀺. 𑀢𑀜𑁆𑀳𑀺 𑀲𑀸 𑀧𑀼𑀩𑁆𑀩𑁂𑀧𑀺 𑀧𑀩𑁆𑀩𑀚𑀺𑀢𑁄, 𑀇𑀤𑀸𑀦𑀺𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀢𑀺 𑀓𑀢𑁆𑀯𑀸 𑀔𑀦𑁆𑀢𑀺𑀜𑁆𑀘 𑀧𑀘𑁆𑀘𑀸𑀲𑀻𑀲𑀦𑁆𑀢𑀻 ‘‘𑀫𑀳𑀸𑀫𑀼𑀦𑀻’’𑀢𑀺 𑀆𑀳. 𑀢𑁂𑀦𑁂𑀯𑀸𑀳 𑁋 ‘‘𑀦 𑀳𑀺 𑀓𑁄𑀥𑀧𑀭𑁂𑀢𑀲𑁆𑀲, 𑀲𑀼𑀤𑁆𑀥𑀺 𑀅𑀢𑁆𑀣𑀺 𑀓𑀼𑀢𑁄 𑀢𑀧𑁄’’𑀢𑀺, 𑀢𑁆𑀯𑀁 𑀏𑀢𑁆𑀢𑀓𑀫𑁆𑀧𑀺 𑀅𑀲𑀳𑀦𑁆𑀢𑁄 𑀓𑀣𑀁 𑀘𑀺𑀢𑁆𑀢𑀁 𑀤𑀫𑁂𑀲𑁆𑀲𑀲𑀺, 𑀓𑀣𑀁 𑀯𑀸 𑀢𑀧𑀁 𑀘𑀭𑀺𑀲𑁆𑀲𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀦𑀸𑀴𑀁 𑀕𑀦𑁆𑀢𑁆𑀯𑀸 𑀚𑀻𑀯𑀺𑀢𑀼𑀓𑀸𑀫𑁄𑀲𑀻𑀢𑀺 𑀘𑀸𑀧𑀸𑀬 𑀯𑀼𑀢𑁆𑀢𑁄 𑀆𑀳 𑁋 ‘‘𑀧𑀓𑁆𑀓𑀫𑀺𑀲𑁆𑀲𑀜𑁆𑀘 𑀦𑀸𑀴𑀸𑀢𑁄, 𑀓𑁄𑀥 𑀦𑀸𑀴𑀸𑀬 𑀯𑀘𑁆𑀙𑀢𑀻’’𑀢𑀺 𑀓𑁄 𑀇𑀥 𑀦𑀸𑀴𑀸𑀬 𑀯𑀲𑀺𑀲𑁆𑀲𑀢𑀺, 𑀦𑀸𑀴𑀸𑀢𑁄𑀯 𑀅𑀳𑀁 𑀧𑀓𑁆𑀓𑀫𑀺𑀲𑁆𑀲𑀸𑀫𑁂𑀯. 𑀲𑁄 𑀳𑀺 𑀢𑀲𑁆𑀲 𑀚𑀸𑀢𑀕𑀸𑀫𑁄, 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄 𑀘 𑀫𑀕𑀥𑀭𑀝𑁆𑀞𑁂 𑀩𑁄𑀥𑀺𑀫𑀡𑁆𑀟𑀲𑁆𑀲 𑀆𑀲𑀦𑁆𑀦𑀧𑀤𑁂𑀲𑁂, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀦𑁆𑀥𑀦𑁆𑀢𑀻 𑀇𑀢𑁆𑀣𑀺𑀭𑀽𑀧𑁂𑀦, 𑀲𑀫𑀡𑁂 𑀥𑀫𑁆𑀫𑀚𑀻𑀯𑀺𑀦𑁄𑀢𑀺 𑀘𑀸𑀧𑁂 𑀢𑁆𑀯𑀁 𑀥𑀫𑁆𑀫𑁂𑀦 𑀚𑀻𑀯𑀦𑁆𑀢𑁂 𑀥𑀫𑁆𑀫𑀺𑀓𑁂 𑀧𑀩𑁆𑀩𑀚𑀺𑀢𑁂 𑀅𑀢𑁆𑀢𑀦𑁄 𑀇𑀢𑁆𑀣𑀺𑀭𑀽𑀧𑁂𑀦 𑀇𑀢𑁆𑀣𑀺𑀓𑀼𑀢𑁆𑀢𑀸𑀓𑀧𑁆𑀧𑁂𑀳𑀺 𑀩𑀦𑁆𑀥𑀦𑁆𑀢𑀻 𑀢𑀺𑀝𑁆𑀞𑀲𑀺. 𑀬𑁂𑀦𑀸𑀳𑀁 𑀇𑀤𑀸𑀦𑀺 𑀏𑀤𑀺𑀲𑁄 𑀚𑀸𑀢𑁄, 𑀢𑀲𑁆𑀫𑀸 𑀢𑀁 𑀧𑀭𑀺𑀘𑁆𑀘𑀚𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀯𑀼𑀢𑁆𑀢𑁂 𑀘𑀸𑀧𑀸 𑀢𑀁 𑀦𑀺𑀯𑀢𑁆𑀢𑁂𑀢𑀼𑀓𑀸𑀫𑀸 ‘‘𑀏𑀳𑀺, 𑀓𑀸𑀴𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀓𑀸𑀴𑀯𑀡𑁆𑀡𑀢𑀸𑀬, 𑀓𑀸𑀴, 𑀉𑀧𑀓, 𑀏𑀳𑀺 𑀦𑀺𑀯𑀢𑁆𑀢𑀲𑁆𑀲𑀼 𑀫𑀸 𑀧𑀓𑁆𑀓𑀫𑀺, 𑀧𑀼𑀩𑁆𑀩𑁂 𑀯𑀺𑀬 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚, 𑀅𑀳𑀜𑁆𑀘 𑀬𑁂 𑀘 𑀫𑁂 𑀲𑀦𑁆𑀢𑀺 𑀜𑀸𑀢𑀓𑀸, 𑀢𑁂 𑀲𑀩𑁆𑀩𑁂𑀯 𑀢𑀼𑀬𑁆𑀳𑀁 𑀫𑀸 𑀧𑀓𑁆𑀓𑀫𑀺𑀢𑀼𑀓𑀸𑀫𑀢𑀸𑀬 𑀯𑀲𑀻𑀓𑀢𑀸 𑀯𑀲𑀯𑀢𑁆𑀢𑀺𑀦𑁄 𑀓𑀢𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀉𑀧𑀓𑁄 ‘‘𑀏𑀢𑁆𑀢𑁄 𑀘𑀸𑀧𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀘𑀸𑀧𑁂𑀢𑀺 𑀘𑀸𑀧𑁂. 𑀘𑀸𑀧𑀲𑀤𑀺𑀲𑀅𑀗𑁆𑀕𑀮𑀝𑁆𑀞𑀺𑀢𑀸𑀬 𑀳𑀺 𑀲𑀸, 𑀘𑀸𑀧𑀸𑀢𑀺 𑀦𑀸𑀫𑀁 𑀮𑀪𑀺, 𑀢𑀲𑁆𑀫𑀸, 𑀘𑀸𑀧𑀸𑀢𑀺 𑀯𑀼𑀘𑁆𑀘𑀢𑀺. 𑀢𑁆𑀯𑀁 𑀘𑀸𑀧𑁂, 𑀬𑀣𑀸 𑀪𑀸𑀲𑀲𑀺, 𑀇𑀤𑀸𑀦𑀺 𑀬𑀸𑀤𑀺𑀲𑀁 𑀓𑀣𑁂𑀲𑀺, 𑀇𑀢𑁄 𑀘𑀢𑀼𑀩𑁆𑀪𑀸𑀕𑀫𑁂𑀯 𑀧𑀺𑀬𑀲𑀫𑀼𑀤𑀸𑀘𑀸𑀭𑀁 𑀓𑀭𑁂𑀬𑁆𑀬𑀸𑀲𑀺. 𑀢𑀬𑀺 𑀭𑀢𑁆𑀢𑀲𑁆𑀲 𑀭𑀸𑀕𑀸𑀪𑀺𑀪𑀽𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀴𑀸𑀭𑀁 𑀯𑀢 𑀢𑀁 𑀲𑀺𑀬𑀸, 𑀅𑀳𑀁 𑀧𑀦𑁂𑀢𑀭𑀳𑀺 𑀢𑀬𑀺 𑀓𑀸𑀫𑁂𑀲𑀼 𑀘 𑀯𑀺𑀭𑀢𑁆𑀢𑁄, 𑀢𑀲𑁆𑀫𑀸 𑀘𑀸𑀧𑀸𑀬 𑀯𑀘𑀦𑁂 𑀦 𑀢𑀺𑀝𑁆𑀞𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀦, 𑀘𑀸𑀧𑀸, 𑀅𑀢𑁆𑀢𑀦𑀺 𑀢𑀲𑁆𑀲 𑀆𑀲𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀸 ‘‘𑀓𑀸𑀴𑀗𑁆𑀕𑀺𑀦𑀺’’𑀦𑁆𑀢𑀺 𑀆𑀳. 𑀢𑀢𑁆𑀣, 𑀓𑀸𑀴𑀸𑀢𑀺 𑀢𑀲𑁆𑀲𑀸𑀮𑀧𑀦𑀁. 𑀅𑀗𑁆𑀕𑀺𑀦𑀺𑀦𑁆𑀢𑀺 𑀅𑀗𑁆𑀕𑀮𑀝𑁆𑀞𑀺𑀲𑀫𑁆𑀧𑀦𑁆𑀦𑀁. 𑀇𑀯𑀸𑀢𑀺 𑀉𑀧𑀫𑀸𑀬 𑀦𑀺𑀧𑀸𑀢𑁄. 𑀢𑀓𑁆𑀓𑀸𑀭𑀺𑀁 𑀧𑀼𑀧𑁆𑀨𑀺𑀢𑀁 𑀕𑀺𑀭𑀺𑀫𑀼𑀤𑁆𑀥𑀦𑀻𑀢𑀺 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀺𑀢𑀁 𑀲𑀼𑀧𑀼𑀧𑁆𑀨𑀺𑀢𑀤𑀸𑀮𑀺𑀫𑀮𑀝𑁆𑀞𑀺𑀁 𑀯𑀺𑀬. ‘‘𑀉𑀓𑁆𑀓𑀸𑀕𑀸𑀭𑀺’’𑀦𑁆𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺, 𑀅𑀗𑁆𑀕𑀢𑁆𑀣𑀺𑀮𑀝𑁆𑀞𑀺𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀕𑀺𑀭𑀺𑀫𑀼𑀤𑁆𑀥𑀦𑀻𑀢𑀺 𑀘 𑀇𑀤𑀁 𑀓𑁂𑀦𑀘𑀺 𑀅𑀦𑀼𑀧𑀳𑀢𑀲𑁄𑀪𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑁂𑀘𑀺 ‘‘𑀓𑀸𑀮𑀺𑀗𑁆𑀕𑀺𑀦𑀺’’𑀦𑁆𑀢𑀺 𑀧𑀸𑀞𑀁 𑀯𑀢𑁆𑀯𑀸 𑀢𑀲𑁆𑀲 𑀓𑀼𑀫𑁆𑀪𑀡𑁆𑀟𑀮𑀢𑀸𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀨𑀼𑀮𑁆𑀮𑀁 𑀤𑀸𑀮𑀺𑀫𑀮𑀝𑁆𑀞𑀺𑀁𑀯𑀸𑀢𑀺 𑀧𑀼𑀧𑁆𑀨𑀺𑀢𑀁 𑀩𑀻𑀚𑀧𑀽𑀭𑀮𑀢𑀁 𑀯𑀺𑀬. 𑀅𑀦𑁆𑀢𑁄𑀤𑀻𑀧𑁂𑀯 𑀧𑀸𑀝𑀮𑀺𑀦𑁆𑀢𑀺 𑀤𑀻𑀧𑀓𑀩𑁆𑀪𑀦𑁆𑀢𑀭𑁂 𑀧𑀼𑀧𑁆𑀨𑀺𑀢𑀧𑀸𑀝𑀮𑀺𑀭𑀼𑀓𑁆𑀔𑀁 𑀯𑀺𑀬, 𑀤𑀻𑀧𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑁄𑀪𑀸𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑀢𑁆𑀣𑀫𑁂𑀯.

𑀳𑀭𑀺𑀘𑀦𑁆𑀤𑀦𑀮𑀺𑀢𑁆𑀢𑀗𑁆𑀕𑀺𑀦𑁆𑀢𑀺 𑀮𑁄𑀳𑀺𑀢𑀘𑀦𑁆𑀤𑀦𑁂𑀦 𑀅𑀦𑀼𑀮𑀺𑀢𑁆𑀢𑀲𑀩𑁆𑀩𑀗𑁆𑀕𑀺𑀁. 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀺𑀦𑁆𑀢𑀺 𑀉𑀢𑁆𑀢𑀫𑀓𑀸𑀲𑀺𑀓𑀯𑀢𑁆𑀣𑀥𑀭𑀁. 𑀢𑀁 𑀫𑀦𑁆𑀢𑀺 𑀢𑀸𑀤𑀺𑀲𑀁 𑀫𑀁. 𑀭𑀽𑀧𑀯𑀢𑀺𑀁 𑀲𑀦𑁆𑀢𑀺𑀦𑁆𑀢𑀺 𑀭𑀽𑀧𑀲𑀫𑁆𑀧𑀦𑁆𑀦𑀁 𑀲𑀫𑀸𑀦𑀁. 𑀓𑀲𑁆𑀲 𑀑𑀳𑀸𑀬 𑀕𑀘𑁆𑀙𑀲𑀻𑀢𑀺 𑀓𑀲𑁆𑀲 𑀦𑀸𑀫 𑀲𑀢𑁆𑀢𑀲𑁆𑀲, 𑀓𑀲𑁆𑀲 𑀯𑀸 𑀳𑁂𑀢𑀼𑀦𑁄, 𑀓𑁂𑀦 𑀓𑀸𑀭𑀡𑁂𑀦, 𑀑𑀳𑀸𑀬 𑀧𑀳𑀸𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀘𑁆𑀙𑀲𑀺.

𑀇𑀢𑁄 𑀧𑀭𑀫𑁆𑀧𑀺 𑀢𑁂𑀲𑀁 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸𑀯 𑀞𑀧𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀢𑀺𑀲𑁆𑀲𑁄 𑀕𑀸𑀣𑀸. 𑀢𑀢𑁆𑀣 𑀲𑀸𑀓𑀼𑀦𑁆𑀢𑀺𑀓𑁄𑀯𑀸𑀢𑀺 𑀲𑀓𑀼𑀡𑀮𑀼𑀤𑁆𑀤𑁄 𑀯𑀺𑀬. 𑀆𑀳𑀭𑀺𑀫𑁂𑀦 𑀭𑀽𑀧𑁂𑀦𑀸𑀢𑀺 𑀓𑁂𑀲𑀫𑀡𑁆𑀟𑀦𑀸𑀤𑀺𑀦𑀸 𑀲𑀭𑀻𑀭𑀚𑀕𑁆𑀕𑀦𑁂𑀦 𑀘𑁂𑀯 𑀯𑀢𑁆𑀣𑀸𑀪𑀭𑀡𑀸𑀤𑀺𑀦𑀸 𑀘 𑀅𑀪𑀺𑀲𑀗𑁆𑀔𑀸𑀭𑀺𑀓𑁂𑀦 𑀭𑀽𑀧𑁂𑀦 𑀯𑀡𑁆𑀡𑁂𑀦 𑀓𑀺𑀢𑁆𑀢𑀺𑀫𑁂𑀦 𑀘𑀸𑀢𑀼𑀭𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀫𑀁 𑀢𑁆𑀯𑀁 𑀩𑀸𑀥𑀬𑀺𑀲𑁆𑀲𑀲𑀻𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀇𑀤𑀸𑀦𑀺 𑀫𑀁 𑀢𑁆𑀯𑀁 𑀦 𑀩𑀸𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺.

𑀧𑀼𑀢𑁆𑀢𑀨𑀮𑀦𑁆𑀢𑀺 𑀧𑀼𑀢𑁆𑀢𑀲𑀗𑁆𑀔𑀸𑀢𑀁 𑀨𑀮𑀁 𑀧𑀼𑀢𑁆𑀢𑀧𑀲𑀯𑁄.

𑀲𑀧𑁆𑀧𑀜𑁆𑀜𑀸𑀢𑀺 𑀧𑀜𑁆𑀜𑀯𑀦𑁆𑀢𑁄, 𑀲𑀁𑀲𑀸𑀭𑁂 𑀆𑀤𑀻𑀦𑀯𑀯𑀺𑀪𑀸𑀯𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂 𑀳𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀪𑁄𑀕𑀓𑁆𑀔𑀦𑁆𑀥𑀁 𑀯𑀸 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀧𑀩𑁆𑀩𑀚𑀦𑁆𑀢𑀺 𑀫𑀳𑀸𑀯𑀻𑀭𑀸, 𑀦𑀸𑀕𑁄 𑀙𑁂𑀢𑁆𑀯𑀸𑀯 𑀩𑀦𑁆𑀥𑀦’’𑀦𑁆𑀢𑀺, 𑀅𑀬𑀩𑀦𑁆𑀥𑀦𑀁 𑀯𑀺𑀬 𑀳𑀢𑁆𑀣𑀺𑀦𑀸𑀕𑁄 𑀕𑀺𑀳𑀺𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀯𑀻𑀭𑀺𑀬𑀸𑀯 𑀧𑀩𑁆𑀩𑀚𑀦𑁆𑀢𑀺, 𑀦 𑀦𑀺𑀳𑀻𑀦𑀯𑀻𑀭𑀺𑀬𑀸𑀢𑀺 𑀅𑀢𑁆𑀣𑁄.

𑀤𑀡𑁆𑀟𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀤𑀡𑁆𑀟𑁂𑀦. 𑀙𑀼𑀭𑀺𑀓𑀸𑀬𑀸𑀢𑀺 𑀔𑀼𑀭𑁂𑀦. 𑀪𑀽𑀫𑀺𑀬𑀁 𑀯𑀸 𑀦𑀺𑀲𑀼𑀫𑁆𑀪𑀺𑀲𑁆𑀲𑀦𑁆𑀢𑀺 𑀧𑀣𑀯𑀺𑀬𑀁 𑀧𑀸𑀢𑁂𑀢𑁆𑀯𑀸 𑀧𑁄𑀣𑀦𑀯𑀺𑀚𑁆𑀛𑀦𑀸𑀤𑀺𑀦𑀸 𑀯𑀺𑀩𑀸𑀥𑀺𑀲𑁆𑀲𑀸𑀫𑀺. 𑀧𑀼𑀢𑁆𑀢𑀲𑁄𑀓𑀸 𑀦 𑀕𑀘𑁆𑀙𑀲𑀻𑀢𑀺 𑀧𑀼𑀢𑁆𑀢𑀲𑁄𑀓𑀦𑀺𑀫𑀺𑀢𑁆𑀢𑀁 𑀦 𑀕𑀘𑁆𑀙𑀺𑀲𑁆𑀲𑀲𑀺.

𑀧𑀤𑀸𑀳𑀺𑀲𑀻𑀢𑀺 𑀤𑀲𑁆𑀲𑀲𑀺. 𑀧𑀼𑀢𑁆𑀢𑀓𑀢𑁆𑀢𑁂𑀢𑀺 𑀧𑀼𑀢𑁆𑀢𑀓𑀸𑀭𑀡𑀸. 𑀚𑀫𑁆𑀫𑀻𑀢𑀺 𑀢𑀲𑁆𑀲𑀸 𑀆𑀮𑀧𑀦𑀁, 𑀮𑀸𑀫𑀓𑁂𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀲𑁆𑀲 𑀕𑀫𑀦𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀕𑀫𑀦𑀝𑁆𑀞𑀸𑀦𑀁 𑀚𑀸𑀦𑀺𑀢𑀼𑀁 ‘‘𑀳𑀦𑁆𑀤 𑀔𑁄’’𑀢𑀺 𑀕𑀸𑀣𑀫𑀸𑀳.

𑀇𑀢𑀭𑁄 𑀧𑀼𑀩𑁆𑀩𑁂 𑀅𑀳𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺𑀁, 𑀇𑀤𑀸𑀦𑀺 𑀧𑀦 𑀦𑀺𑀬𑁆𑀬𑀸𑀦𑀺𑀓𑁂 𑀅𑀦𑀦𑁆𑀢𑀚𑀺𑀦𑀲𑁆𑀲 𑀲𑀸𑀲𑀦𑁂 𑀞𑀸𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀳𑀼𑀫𑁆𑀳𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀡𑀺𑀦𑁄𑀢𑀺 𑀕𑀡𑀥𑀭𑀸. 𑀅𑀲𑁆𑀲𑀫𑀡𑀸𑀢𑀺 𑀦 𑀲𑀫𑀺𑀢𑀧𑀸𑀧𑀸. 𑀲𑀫𑀡𑀫𑀸𑀦𑀺𑀦𑁄𑀢𑀺 𑀲𑀫𑀺𑀢𑀧𑀸𑀧𑀸𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄. 𑀯𑀺𑀘𑀭𑀺𑀫𑁆𑀳𑀸𑀢𑀺 𑀧𑀽𑀭𑀡𑀸𑀤𑀻𑀲𑀼 𑀅𑀢𑁆𑀢𑀸𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀤𑀢𑀺.

𑀦𑁂𑀭𑀜𑁆𑀚𑀭𑀁 𑀧𑀢𑀻𑀢𑀺 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀲𑀫𑀻𑀧𑁂 𑀢𑀲𑁆𑀲𑀸 𑀢𑀻𑀭𑁂. 𑀩𑀼𑀤𑁆𑀥𑁄𑀢𑀺 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄, 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀩𑁆𑀩𑀓𑀸𑀮𑀁 𑀪𑀕𑀯𑀸 𑀢𑀢𑁆𑀣𑁂𑀯 𑀯𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑀯𑀦𑁆𑀤𑀦𑀁 𑀤𑀸𑀦𑀺 𑀫𑁂 𑀯𑀚𑁆𑀚𑀸𑀲𑀻𑀢𑀺 𑀫𑀫 𑀯𑀦𑁆𑀤𑀦𑀁 𑀯𑀤𑁂𑀬𑁆𑀬𑀸𑀲𑀺, 𑀫𑀫 𑀯𑀘𑀦𑁂𑀦 𑀮𑁄𑀓𑀦𑀸𑀣𑀁 𑀅𑀦𑀼𑀢𑁆𑀢𑀭𑀁 𑀯𑀤𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀤𑀓𑁆𑀔𑀺𑀡𑀜𑁆𑀘 𑀓𑀢𑁆𑀯𑀸𑀦, 𑀆𑀤𑀺𑀲𑁂𑀬𑁆𑀬𑀸𑀲𑀺 𑀤𑀓𑁆𑀔𑀺𑀡𑀦𑁆𑀢𑀺 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸𑀧𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸, 𑀢𑀢𑁄 𑀧𑀼𑀜𑁆𑀜𑀢𑁄 𑀫𑀬𑁆𑀳𑀁 𑀧𑀢𑁆𑀢𑀺𑀤𑀸𑀦𑀁 𑀤𑁂𑀦𑁆𑀢𑁄 𑀧𑀤𑀓𑁆𑀔𑀺𑀡𑀁 𑀆𑀤𑀺𑀲𑁂𑀬𑁆𑀬𑀸𑀲𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀘 𑀏𑀯𑀁 𑀯𑀤𑀢𑀺.

𑀏𑀢𑀁 𑀔𑁄 𑀮𑀩𑁆𑀪𑀫𑀫𑁆𑀳𑁂𑀳𑀻𑀢𑀺 𑀏𑀢𑀁 𑀧𑀤𑀓𑁆𑀔𑀺𑀡𑀓𑀭𑀡𑀁 𑀧𑀼𑀜𑁆𑀜𑀁 𑀅𑀫𑁆𑀳𑁂𑀳𑀺 𑀢𑀯 𑀤𑀸𑀢𑀼𑀁 𑀲𑀓𑁆𑀓𑀸, 𑀦 𑀦𑀺𑀯𑀢𑁆𑀢𑀦𑀁, 𑀧𑀼𑀩𑁆𑀩𑁂 𑀯𑀺𑀬 𑀓𑀸𑀫𑀽𑀧𑀪𑁄𑀕𑁄 𑀘 𑀦 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂 𑀯𑀚𑁆𑀚𑀦𑁆𑀢𑀺 𑀢𑀯 𑀯𑀦𑁆𑀤𑀦𑀁 𑀯𑀚𑁆𑀚𑀁 𑀯𑀓𑁆𑀔𑀸𑀫𑀺.

𑀲𑁄𑀢𑀺 𑀓𑀸𑀴𑁄, 𑀅𑀤𑁆𑀤𑀲𑀸𑀲𑀻𑀢𑀺 𑀅𑀤𑁆𑀤𑀓𑁆𑀔𑀺.

𑀲𑀢𑁆𑀣𑀼𑀤𑁂𑀲𑀦𑀸𑀬𑀁 𑀲𑀘𑁆𑀘𑀓𑀣𑀸𑀬 𑀧𑀥𑀸𑀦𑀢𑁆𑀢𑀸 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀸𑀬 𑀅𑀪𑀸𑀯𑀢𑁄 ‘‘𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀸𑀧𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀼𑀦𑁆𑀤𑀭𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀧𑁂𑀢𑀸𑀦𑀺 𑀪𑁄𑀢𑀺 𑀧𑀼𑀢𑁆𑀢𑀸𑀦𑀻𑀢𑀺𑀆𑀤𑀺𑀓𑀸 𑀲𑀼𑀦𑁆𑀤𑀭𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀇𑀢𑁄 𑀏𑀓𑀢𑀺𑀁𑀲𑀓𑀧𑁆𑀧𑁂 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀜𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀧𑀭𑀺𑀧𑀓𑁆𑀓𑀜𑀸𑀡𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑀸𑀭𑀸𑀡𑀲𑀺𑀬𑀁 𑀲𑀼𑀚𑀸𑀢𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀦𑁆𑀤𑀭𑀻𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀘𑀲𑁆𑀲𑀸 𑀓𑀦𑀺𑀝𑁆𑀞𑀪𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀅𑀣𑀲𑁆𑀲𑀸 𑀧𑀺𑀢𑀸 𑀧𑀼𑀢𑁆𑀢𑀲𑁄𑀓𑁂𑀦 𑀅𑀪𑀺𑀪𑀽𑀢𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀯𑀸𑀲𑀺𑀝𑁆𑀞𑀺𑀢𑁆𑀣𑁂𑀭𑀺𑀬𑀸 𑀲𑀫𑀸𑀕𑀦𑁆𑀢𑁆𑀯𑀸 𑀢𑀁 𑀲𑁄𑀓𑀯𑀺𑀦𑁄𑀤𑀦𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀧𑁂𑀢𑀸𑀦𑀺 𑀪𑁄𑀢𑀺 𑀧𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀣𑁂𑀭𑀻 𑀢𑀁 𑀲𑁄𑀓𑀸𑀪𑀺𑀪𑀽𑀢𑀁 𑀜𑀢𑁆𑀯𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑀼𑀓𑀸𑀫𑀸 ‘‘𑀩𑀳𑀽𑀦𑀺 𑀧𑀼𑀢𑁆𑀢𑀲𑀢𑀸𑀦𑀻’’𑀢𑀺𑀆𑀤𑀺𑀓𑀸 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀅𑀲𑁄𑀓𑀪𑀸𑀯𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀣𑀁 𑀢𑁆𑀯𑀁, 𑀅𑀬𑁆𑀬𑁂, 𑀏𑀯𑀁 𑀅𑀲𑁄𑀓𑀸 𑀚𑀸𑀢𑀸’’𑀢𑀺 𑀆𑀳. 𑀢𑀲𑁆𑀲 𑀣𑁂𑀭𑀻 𑀭𑀢𑀦𑀢𑁆𑀢𑀬𑀕𑀼𑀡𑀁 𑀓𑀣𑁂𑀲𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀼𑀳𑀺𑀁 𑀲𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀺𑀣𑀺𑀮𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀢𑀁 𑀲𑀼𑀢𑁆𑀯𑀸 𑀢𑀸𑀯𑀤𑁂𑀯 𑀭𑀣𑀁 𑀬𑁄𑀚𑁂𑀢𑁆𑀯𑀸 𑀭𑀣𑁂𑀦 𑀫𑀺𑀣𑀺𑀮𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀲𑁆𑀲 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀢𑀢𑀺𑀬𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀲𑀸𑀭𑀣𑀺 𑀭𑀣𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀼𑀦𑁆𑀤𑀭𑀻 𑀅𑀢𑁆𑀢𑀦𑁄 𑀧𑀺𑀢𑀼 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸, ‘‘𑀅𑀫𑁆𑀫, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀁 𑀆𑀧𑀼𑀘𑁆𑀙𑀺. 𑀫𑀸𑀢𑀸 ‘‘𑀬𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀪𑁄𑀕𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀢𑀼𑀬𑁆𑀳𑀁 𑀲𑀦𑁆𑀢𑀓𑀁, 𑀢𑁆𑀯𑀁 𑀇𑀫𑀲𑁆𑀲 𑀓𑀼𑀮𑀲𑁆𑀲 𑀤𑀸𑀬𑀸𑀤𑀺𑀓𑀸 𑀧𑀝𑀺𑀧𑀚𑁆𑀚, 𑀇𑀫𑀁 𑀲𑀩𑁆𑀩𑀪𑁄𑀕𑀁 𑀧𑀭𑀺𑀪𑀼𑀜𑁆𑀚, 𑀫𑀸 𑀧𑀩𑁆𑀩𑀚𑀻’’𑀢𑀺 𑀆𑀳. 𑀲𑀸 ‘‘𑀦 𑀫𑀬𑁆𑀳𑀁 𑀪𑁄𑀕𑁂𑀳𑀺 𑀅𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑁂𑀯𑀸𑀳𑀁, 𑀅𑀫𑁆𑀫𑀸’’𑀢𑀺 𑀫𑀸𑀢𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀲𑀺𑀓𑁆𑀔𑀫𑀸𑀦𑀸𑀬𑁂𑀯 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀖𑀝𑁂𑀦𑁆𑀢𑀻 𑀯𑀸𑀬𑀫𑀦𑁆𑀢𑀻 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 𑁋

‘‘𑀧𑀺𑀡𑁆𑀟𑀧𑀸𑀢𑀁 𑀘𑀭𑀦𑁆𑀢𑀲𑁆𑀲, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑀼𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀯𑁂𑀲𑁆𑀲𑀪𑀽 𑀮𑁄𑀓𑀦𑀸𑀬𑀓𑁄;

𑀯𑀻𑀣𑀺𑀬𑀸 𑀲𑀡𑁆𑀞𑀺𑀢𑁄 𑀲𑀢𑁆𑀣𑀸, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

‘‘𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀢𑀸𑀯𑀢𑀺𑀁𑀲𑀁 𑀕𑀫𑀺𑀲𑁆𑀲𑀲𑀺;

𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺.

‘‘𑀧𑀜𑁆𑀜𑀸𑀲𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀝𑀺𑀮𑀘𑁆𑀙𑀲𑀺 𑀲𑀩𑁆𑀩𑀤𑀸.

‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀧𑀩𑁆𑀩𑀚𑀺𑀲𑁆𑀲𑀲𑀺 𑀓𑀺𑀜𑁆𑀘𑀦𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺𑀦𑀸𑀲𑀯𑀸.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀯𑁂𑀲𑁆𑀲𑀪𑀽 𑀮𑁄𑀓𑀦𑀸𑀬𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

‘‘𑀲𑀼𑀤𑀺𑀦𑁆𑀦𑀁 𑀫𑁂 𑀤𑀸𑀦𑀯𑀭𑀁, 𑀲𑀼𑀬𑀺𑀝𑁆𑀞𑀸 𑀬𑀸𑀕𑀲𑀫𑁆𑀧𑀤𑀸;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀧𑀢𑁆𑀢𑀸𑀳𑀁 𑀅𑀘𑀮𑀁 𑀧𑀤𑀁.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀓𑁆𑀔𑀸𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀺𑀳𑀭𑀦𑁆𑀢𑀻 𑀅𑀧𑀭𑀪𑀸𑀕𑁂 ‘‘𑀲𑀢𑁆𑀣𑀼 𑀧𑀼𑀭𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀚𑁆𑀛𑀸𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀩𑀳𑀼𑀮𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀲𑀢𑁆𑀣𑀸𑀭𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 𑀲𑀢𑁆𑀣𑀼 𑀑𑀭𑀲𑀥𑀻𑀢𑀼𑀪𑀸𑀯𑀸𑀤𑀺𑀯𑀺𑀪𑀸𑀯𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺. 𑀅𑀣𑀲𑁆𑀲𑀸 𑀫𑀸𑀢𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁄 𑀜𑀸𑀢𑀺𑀕𑀡𑁄 𑀧𑀭𑀺𑀚𑀦𑁄 𑀘 𑀧𑀩𑁆𑀩𑀚𑀺. 𑀲𑀸 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀢𑀭𑀸 𑀯𑀼𑀢𑁆𑀢𑀕𑀸𑀣𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁩𑁧𑁩.

‘‘𑀧𑁂𑀢𑀸𑀦𑀺 𑀪𑁄𑀢𑀺 𑀧𑀼𑀢𑁆𑀢𑀸𑀦𑀺, 𑀔𑀸𑀤𑀫𑀸𑀦𑀸 𑀢𑀼𑀯𑀁 𑀧𑀼𑀭𑁂;

𑀢𑀼𑀯𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀅𑀢𑀻𑀯 𑀧𑀭𑀺𑀢𑀧𑁆𑀧𑀲𑀺.

𑁩𑁧𑁪.

‘‘𑀲𑀸𑀚𑁆𑀚 𑀲𑀩𑁆𑀩𑀸𑀦𑀺 𑀔𑀸𑀤𑀺𑀢𑁆𑀯𑀸, 𑀲𑀢𑀧𑀼𑀢𑁆𑀢𑀸𑀦𑀺 𑀩𑁆𑀭𑀸𑀳𑁆𑀫𑀡𑀻;

𑀯𑀸𑀲𑁂𑀝𑁆𑀞𑀺 𑀓𑁂𑀦 𑀯𑀡𑁆𑀡𑁂𑀦, 𑀦 𑀩𑀸𑀴𑁆𑀳𑀁 𑀧𑀭𑀺𑀢𑀧𑁆𑀧𑀲𑀺.

𑁩𑁧𑁫.

‘‘𑀩𑀳𑀽𑀦𑀺 𑀧𑀼𑀢𑁆𑀢𑀲𑀢𑀸𑀦𑀺, 𑀜𑀸𑀢𑀺𑀲𑀗𑁆𑀖𑀲𑀢𑀸𑀦𑀺 𑀘;

𑀔𑀸𑀤𑀺𑀢𑀸𑀦𑀺 𑀅𑀢𑀻𑀢𑀁𑀲𑁂, 𑀫𑀫 𑀢𑀼𑀜𑁆𑀳𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁩𑁧𑁬.

‘‘𑀲𑀸𑀳𑀁 𑀦𑀺𑀲𑁆𑀲𑀭𑀡𑀁 𑀜𑀢𑁆𑀯𑀸, 𑀚𑀸𑀢𑀺𑀬𑀸 𑀫𑀭𑀡𑀲𑁆𑀲 𑀘;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀦 𑀘𑀸𑀧𑀺 𑀧𑀭𑀺𑀢𑀧𑁆𑀧𑀬𑀺𑀁.

𑁩𑁧𑁭.

‘‘𑀅𑀩𑁆𑀪𑀼𑀢𑀁 𑀯𑀢 𑀯𑀸𑀲𑁂𑀝𑁆𑀞𑀺, 𑀯𑀸𑀘𑀁 𑀪𑀸𑀲𑀲𑀺 𑀏𑀤𑀺𑀲𑀺𑀁;

𑀓𑀲𑁆𑀲 𑀢𑁆𑀯𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀕𑀺𑀭𑀁 𑀪𑀸𑀲𑀲𑀺 𑀏𑀤𑀺𑀲𑀺𑀁.

𑁩𑁧𑁮.

‘‘𑀏𑀲 𑀩𑁆𑀭𑀸𑀳𑁆𑀫𑀡 𑀲𑀫𑁆𑀩𑀼𑀤𑁆𑀥𑁄, 𑀦𑀕𑀭𑀁 𑀫𑀺𑀣𑀺𑀮𑀁 𑀧𑀢𑀺;

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀧𑀸𑀡𑀺𑀦𑀁.

𑁩𑁧𑁯.

‘‘𑀢𑀲𑁆𑀲 𑀩𑁆𑀭𑀳𑁆𑀫𑁂 𑀅𑀭𑀳𑀢𑁄, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀦𑀺𑀭𑀽𑀧𑀥𑀺𑀁;

𑀢𑀢𑁆𑀣 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸, 𑀧𑀼𑀢𑁆𑀢𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺𑀁.

𑁩𑁨𑁦.

‘‘𑀲𑁄 𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀺, 𑀦𑀕𑀭𑀁 𑀫𑀺𑀣𑀺𑀮𑀁 𑀧𑀢𑀺;

𑀅𑀧𑁆𑀧𑁂𑀯 𑀫𑀁 𑀲𑁄 𑀪𑀕𑀯𑀸, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑁄𑀘𑀬𑁂.

𑁩𑁨𑁧.

‘‘𑀅𑀤𑁆𑀤𑀲 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁;

𑀲𑁆𑀯𑀲𑁆𑀲 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀫𑀼𑀦𑀺 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀽.

𑁩𑁨𑁨.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁩𑁨𑁩.

‘‘𑀢𑀢𑁆𑀣 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺;

𑀲𑀼𑀚𑀸𑀢𑁄 𑀢𑀻𑀳𑀺 𑀭𑀢𑁆𑀢𑀻𑀳𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺.

𑁩𑁨𑁪.

‘‘𑀏𑀳𑀺 𑀲𑀸𑀭𑀣𑀺 𑀕𑀘𑁆𑀙𑀸𑀳𑀺, 𑀭𑀣𑀁 𑀦𑀺𑀬𑁆𑀬𑀸𑀤𑀬𑀸𑀳𑀺𑀫𑀁;

𑀆𑀭𑁄𑀕𑁆𑀬𑀁 𑀩𑁆𑀭𑀸𑀳𑁆𑀫𑀡𑀺𑀁 𑀯𑀚𑁆𑀚, 𑀧𑀩𑁆𑀩𑀚𑀺 𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀼𑀚𑀸𑀢𑁄 𑀢𑀻𑀳𑀺 𑀭𑀢𑁆𑀢𑀻𑀳𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺.

𑁩𑁨𑁫.

‘‘𑀢𑀢𑁄 𑀘 𑀭𑀣𑀫𑀸𑀤𑀸𑀬, 𑀲𑀳𑀲𑁆𑀲𑀜𑁆𑀘𑀸𑀧𑀺 𑀲𑀸𑀭𑀣𑀺;

𑀆𑀭𑁄𑀕𑁆𑀬𑀁 𑀩𑁆𑀭𑀸𑀳𑁆𑀫𑀡𑀺𑀁𑀯𑁄𑀘, ‘𑀧𑀩𑁆𑀩𑀚𑀺 𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀼𑀚𑀸𑀢𑁄 𑀢𑀻𑀳𑀺 𑀭𑀢𑁆𑀢𑀻𑀳𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺.

𑁩𑁨𑁬.

‘‘𑀏𑀢𑀜𑁆𑀘𑀸𑀳𑀁 𑀅𑀲𑁆𑀲𑀭𑀣𑀁, 𑀲𑀳𑀲𑁆𑀲𑀜𑁆𑀘𑀸𑀧𑀺 𑀲𑀸𑀭𑀣𑀺;

𑀢𑁂𑀯𑀺𑀚𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀲𑀼𑀢𑁆𑀯𑀸, 𑀧𑀼𑀡𑁆𑀡𑀧𑀢𑁆𑀢𑀁 𑀤𑀤𑀸𑀫𑀺 𑀢𑁂.

𑁩𑁨𑁭.

‘‘𑀢𑀼𑀬𑁆𑀳𑁂𑀯 𑀳𑁄𑀢𑁆𑀯𑀲𑁆𑀲𑀭𑀣𑁄, 𑀲𑀳𑀲𑁆𑀲𑀜𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀺;

𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂.

𑁩𑁨𑁮.

‘‘𑀳𑀢𑁆𑀣𑀻 𑀕𑀯𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑀜𑁆𑀘, 𑀨𑀻𑀢𑀜𑁆𑀘𑀺𑀫𑀁 𑀕𑀳𑀯𑀺𑀪𑀯𑀁 𑀧𑀳𑀸𑀬;

𑀧𑀺𑀢𑀸 𑀧𑀩𑁆𑀩𑀚𑀺𑀢𑁄 𑀢𑀼𑀬𑁆𑀳𑀁, 𑀪𑀼𑀜𑁆𑀚 𑀪𑁄𑀕𑀸𑀦𑀺 𑀲𑀼𑀦𑁆𑀤𑀭𑀻;

𑀢𑀼𑀯𑀁 𑀤𑀸𑀬𑀸𑀤𑀺𑀓𑀸 𑀓𑀼𑀮𑁂.

𑁩𑁨𑁯.

‘‘𑀳𑀢𑁆𑀣𑀻 𑀕𑀯𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑀜𑁆𑀘, 𑀭𑀫𑁆𑀫𑀁 𑀘𑀺𑀫𑀁 𑀕𑀳𑀯𑀺𑀪𑀯𑀁 𑀧𑀳𑀸𑀬;

𑀧𑀺𑀢𑀸 𑀧𑀩𑁆𑀩𑀚𑀺𑀢𑁄 𑀫𑀬𑁆𑀳𑀁, 𑀧𑀼𑀢𑁆𑀢𑀲𑁄𑀓𑁂𑀦 𑀅𑀝𑁆𑀝𑀺𑀢𑁄;

𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀪𑀸𑀢𑀼𑀲𑁄𑀓𑁂𑀦 𑀅𑀝𑁆𑀝𑀺𑀢𑀸.

𑁩𑁩𑁦.

‘‘𑀲𑁄 𑀢𑁂 𑀇𑀚𑁆𑀛𑀢𑀼 𑀲𑀗𑁆𑀓𑀧𑁆𑀧𑁄, 𑀬𑀁 𑀢𑁆𑀯𑀁 𑀧𑀢𑁆𑀣𑁂𑀲𑀺 𑀲𑀼𑀦𑁆𑀤𑀭𑀻;

𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄 𑀉𑀜𑁆𑀙𑁄 𑀘, 𑀧𑀁𑀲𑀼𑀓𑀽𑀮𑀜𑁆𑀘 𑀘𑀻𑀯𑀭𑀁;

𑀏𑀢𑀸𑀦𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑀻, 𑀧𑀭𑀮𑁄𑀓𑁂 𑀅𑀦𑀸𑀲𑀯𑀸.

𑁩𑁩𑁧.

‘‘𑀲𑀺𑀓𑁆𑀔𑀫𑀸𑀦𑀸𑀬 𑀫𑁂 𑀅𑀬𑁆𑀬𑁂, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂.

𑁩𑁩𑁨.

‘‘𑀢𑀼𑀯𑀁 𑀦𑀺𑀲𑁆𑀲𑀸𑀬 𑀓𑀮𑁆𑀬𑀸𑀡𑀺, 𑀣𑁂𑀭𑀺 𑀲𑀗𑁆𑀖𑀲𑁆𑀲 𑀲𑁄𑀪𑀦𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁩𑁩.

‘‘𑀅𑀦𑀼𑀚𑀸𑀦𑀸𑀳𑀺 𑀫𑁂 𑀅𑀬𑁆𑀬𑁂, 𑀇𑀘𑁆𑀙𑁂 𑀲𑀸𑀯𑀢𑁆𑀣𑀺 𑀕𑀦𑁆𑀢𑀯𑁂;

𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂.

𑁩𑁩𑁪.

‘‘𑀧𑀲𑁆𑀲 𑀲𑀼𑀦𑁆𑀤𑀭𑀺 𑀲𑀢𑁆𑀣𑀸𑀭𑀁, 𑀳𑁂𑀫𑀯𑀡𑁆𑀡𑀁 𑀳𑀭𑀺𑀢𑁆𑀢𑀘𑀁;

𑀅𑀤𑀦𑁆𑀢𑀸𑀦𑀁 𑀤𑀫𑁂𑀢𑀸𑀭𑀁, 𑀲𑀫𑁆𑀩𑀼𑀤𑁆𑀥𑀫𑀓𑀼𑀢𑁄𑀪𑀬𑀁.

𑁩𑁩𑁫.

‘‘𑀧𑀲𑁆𑀲 𑀲𑀼𑀦𑁆𑀤𑀭𑀺𑀫𑀸𑀬𑀦𑁆𑀢𑀺𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁;

𑀯𑀻𑀢𑀭𑀸𑀕𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁.

𑁩𑁩𑁬.

‘‘𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑁆𑀫, 𑀢𑀯 𑀲𑀦𑁆𑀢𑀺𑀓𑀫𑀸𑀕𑀢𑀸;

𑀲𑀸𑀯𑀺𑀓𑀸 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀢𑀺 𑀲𑀼𑀦𑁆𑀤𑀭𑀻.

𑁩𑁩𑁭.

‘‘𑀢𑀼𑀯𑀁 𑀩𑀼𑀤𑁆𑀥𑁄 𑀢𑀼𑀯𑀁 𑀲𑀢𑁆𑀣𑀸, 𑀢𑀼𑀬𑁆𑀳𑀁 𑀥𑀻𑀢𑀸𑀫𑁆𑀳𑀺 𑀩𑁆𑀭𑀸𑀳𑁆𑀫𑀡;

𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸.

𑁩𑁩𑁮.

‘‘𑀢𑀲𑁆𑀲𑀸 𑀢𑁂 𑀲𑁆𑀯𑀸𑀕𑀢𑀁 𑀪𑀤𑁆𑀤𑁂, 𑀢𑀢𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀏𑀯𑀜𑁆𑀳𑀺 𑀤𑀦𑁆𑀢𑀸 𑀆𑀬𑀦𑁆𑀢𑀺, 𑀲𑀢𑁆𑀣𑀼 𑀧𑀸𑀤𑀸𑀦𑀺 𑀯𑀦𑁆𑀤𑀺𑀓𑀸;

𑀯𑀻𑀢𑀭𑀸𑀕𑀸 𑀯𑀺𑀲𑀁𑀬𑀼𑀢𑁆𑀢𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀧𑀘𑁆𑀘𑀼𑀤𑀸𑀳𑀸𑀲𑀺.

𑀢𑀢𑁆𑀣 𑀧𑁂𑀢𑀸𑀦𑀻𑀢𑀺 𑀫𑀢𑀸𑀦𑀺. 𑀪𑁄𑀢𑀻𑀢𑀺 𑀢𑀁 𑀆𑀮𑀧𑀢𑀺. 𑀧𑀼𑀢𑁆𑀢𑀸𑀦𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀧𑁂𑀢𑁂 𑀧𑀼𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀏𑀓𑁄 𑀏𑀯 𑀘 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀫𑀢𑁄, 𑀩𑁆𑀭𑀸𑀳𑁆𑀫𑀡𑁄 𑀧𑀦 ‘‘𑀘𑀺𑀭𑀓𑀸𑀮𑀁 𑀅𑀬𑀁 𑀲𑁄𑀓𑁂𑀦 𑀅𑀝𑁆𑀝𑀸 𑀳𑀼𑀢𑁆𑀯𑀸 𑀯𑀺𑀘𑀭𑀺, 𑀩𑀳𑀽 𑀫𑀜𑁆𑀜𑁂 𑀇𑀫𑀺𑀲𑁆𑀲𑀸 𑀧𑀼𑀢𑁆𑀢𑀸 𑀫𑀢𑀸’’𑀢𑀺 𑀏𑀯𑀁𑀲𑀜𑁆𑀜𑀻 𑀳𑀼𑀢𑁆𑀯𑀸 𑀩𑀳𑀼𑀯𑀘𑀦𑁂𑀦𑀸𑀳. 𑀢𑀣𑀸 𑀘 ‘‘𑀲𑀸𑀚𑁆𑀚 𑀲𑀩𑁆𑀩𑀸𑀦𑀺 𑀔𑀸𑀤𑀺𑀢𑁆𑀯𑀸 𑀲𑀢𑀧𑀼𑀢𑁆𑀢𑀸𑀦𑀻’’𑀢𑀺. 𑀔𑀸𑀤𑀫𑀸𑀦𑀸𑀢𑀺 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀔𑀼𑀁𑀲𑀦𑀯𑀘𑀦𑀫𑁂𑀢𑀁. 𑀮𑁄𑀓𑁂 𑀳𑀺 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀚𑀸𑀢𑀚𑀸𑀢𑀸 𑀧𑀼𑀢𑁆𑀢𑀸 𑀫𑀭𑀦𑁆𑀢𑀺, 𑀢𑀁 𑀕𑀭𑀳𑀦𑁆𑀢𑀸 ‘‘𑀧𑀼𑀢𑁆𑀢𑀔𑀸𑀤𑀺𑀦𑀻’’𑀢𑀺𑀆𑀤𑀺𑀁 𑀯𑀤𑀦𑁆𑀢𑀺. 𑀅𑀢𑀻𑀯𑀸𑀢𑀺 𑀅𑀢𑀺𑀯𑀺𑀬 𑀪𑀼𑀲𑀁. 𑀧𑀭𑀺𑀢𑀧𑁆𑀧𑀲𑀻𑀢𑀺 𑀲𑀦𑁆𑀢𑀧𑁆𑀧𑀲𑀺, 𑀧𑀼𑀭𑁂𑀢𑀺 𑀬𑁄𑀚𑀦𑀸. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑁄𑀢𑀺 𑀯𑀸𑀲𑁂𑀝𑁆𑀞𑀺, 𑀧𑀼𑀩𑁆𑀩𑁂 𑀢𑁆𑀯𑀁 𑀫𑀢𑀧𑀼𑀢𑁆𑀢𑀸 𑀳𑀼𑀢𑁆𑀯𑀸 𑀲𑁄𑀘𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑀅𑀢𑀺𑀯𑀺𑀬 𑀲𑁄𑀓𑀸𑀬 𑀲𑀫𑀧𑁆𑀧𑀺𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀆𑀳𑀺𑀡𑁆𑀟𑀲𑀺.

𑀲𑀸𑀚𑁆𑀚𑀸𑀢𑀺 𑀲𑀸 𑀅𑀚𑁆𑀚, 𑀲𑀸 𑀢𑁆𑀯𑀁 𑀏𑀢𑀭𑀳𑀻𑀢𑀺 𑀅𑀢𑁆𑀣𑁄. ‘‘𑀲𑀚𑁆𑀚𑀸’’𑀢𑀺 𑀯𑀸 𑀧𑀸𑀞𑁄. 𑀓𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦.

𑀔𑀸𑀤𑀺𑀢𑀸𑀦𑀻𑀢𑀺 𑀣𑁂𑀭𑀻𑀧𑀺 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦𑁂𑀯 𑀯𑀤𑀢𑀺. 𑀔𑀸𑀤𑀺𑀢𑀸𑀦𑀺 𑀯𑀸 𑀩𑁆𑀬𑀕𑁆𑀖𑀤𑀻𑀧𑀺𑀩𑀺𑀴𑀸𑀭𑀸𑀤𑀺𑀚𑀸𑀢𑀺𑀬𑁄 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀅𑀢𑀻𑀢𑀁𑀲𑁂𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑁂, 𑀅𑀢𑀺𑀓𑁆𑀓𑀦𑁆𑀢𑀪𑀯𑁂𑀲𑀽𑀢𑀺 𑀅𑀢𑁆𑀣𑁄. 𑀫𑀫 𑀢𑀼𑀬𑁆𑀳𑀜𑁆𑀘𑀸𑀢𑀺 𑀫𑀬𑀸 𑀘 𑀢𑀬𑀸 𑀘.

𑀦𑀺𑀲𑁆𑀲𑀭𑀡𑀁 𑀜𑀢𑁆𑀯𑀸 𑀚𑀸𑀢𑀺𑀬𑀸 𑀫𑀭𑀡𑀲𑁆𑀲 𑀘𑀸𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀦𑀺𑀲𑁆𑀲𑀭𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀦 𑀘𑀸𑀧𑀺 𑀧𑀭𑀺𑀢𑀧𑁆𑀧𑀬𑀺𑀦𑁆𑀢𑀺 𑀦 𑀘𑀸𑀧𑀺 𑀉𑀧𑀸𑀬𑀸𑀲𑀸𑀲𑀺𑀁, 𑀅𑀳𑀁 𑀉𑀧𑀸𑀬𑀸𑀲𑀁 𑀦 𑀆𑀧𑀚𑁆𑀚𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀩𑁆𑀪𑀼𑀢𑀁 𑀯𑀢𑀸𑀢𑀺 𑀅𑀘𑁆𑀙𑀭𑀺𑀬𑀁 𑀯𑀢. 𑀢𑀜𑁆𑀳𑀺 𑀅𑀩𑁆𑀪𑀼𑀢𑀁 𑀧𑀼𑀩𑁆𑀩𑁂 𑀅𑀪𑀽𑀢𑀁 𑀅𑀩𑁆𑀪𑀼𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀤𑀺𑀲𑀺𑀦𑁆𑀢𑀺 𑀏𑀯𑀭𑀽𑀧𑀺𑀁, ‘‘𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀦 𑀘𑀸𑀧𑀺 𑀧𑀭𑀺𑀢𑀧𑁆𑀧𑀬𑀺’’𑀦𑁆𑀢𑀺 𑀏𑀯𑀁 𑀲𑁄𑀘𑀦𑀸𑀤𑀻𑀦𑀁 𑀅𑀪𑀸𑀯𑀤𑀻𑀧𑀦𑀺𑀁 𑀯𑀸𑀘𑀁. 𑀓𑀲𑁆𑀲 𑀢𑁆𑀯𑀁 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀓𑁂𑀯𑀮𑀁 𑀬𑀣𑀸 𑀏𑀤𑀺𑀲𑁄 𑀥𑀫𑁆𑀫𑁄 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀓𑀲𑁆𑀲 𑀦𑀸𑀫 𑀲𑀢𑁆𑀣𑀼𑀦𑁄 𑀥𑀫𑁆𑀫𑀫𑀜𑁆𑀜𑀸𑀬 𑀕𑀺𑀭𑀁 𑀪𑀸𑀲𑀲𑀺 𑀏𑀤𑀺𑀲𑀦𑁆𑀢𑀺 𑀲𑀢𑁆𑀣𑀸𑀭𑀁 𑀲𑀸𑀲𑀦𑀜𑁆𑀘 𑀧𑀼𑀘𑁆𑀙𑀢𑀺.

𑀦𑀺𑀭𑀽𑀧𑀥𑀺𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁. 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸𑀢𑀺 𑀧𑀝𑀺𑀯𑀺𑀤𑁆𑀥𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸. 𑀩𑁆𑀬𑀧𑀸𑀦𑀼𑀤𑀺𑀦𑁆𑀢𑀺 𑀦𑀻𑀳𑀭𑀺𑀁 𑀧𑀚𑀳𑀺𑀁.

𑀯𑀺𑀧𑁆𑀧𑀫𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑁄 𑀯𑀺𑀫𑀼𑀢𑁆𑀢𑀁, 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑀪𑀯𑁂𑀳𑀺 𑀘 𑀯𑀺𑀲𑀁𑀬𑀼𑀢𑁆𑀢𑀁. 𑀲𑁆𑀯𑀲𑁆𑀲𑀸𑀢𑀺 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲.

𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀸𑀬𑀁.

𑀭𑀣𑀁 𑀦𑀺𑀬𑁆𑀬𑀸𑀤𑀬𑀸𑀳𑀺𑀫𑀦𑁆𑀢𑀺 𑀇𑀫𑀁 𑀭𑀣𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀦𑀺𑀬𑁆𑀬𑀸𑀤𑁂𑀳𑀺.

𑀲𑀳𑀲𑁆𑀲𑀜𑁆𑀘𑀸𑀧𑀻𑀢𑀺 𑀫𑀕𑁆𑀕𑀧𑀭𑀺𑀩𑁆𑀩𑀬𑀢𑁆𑀣𑀁 𑀦𑀻𑀢𑀁 𑀓𑀳𑀸𑀧𑀡𑀲𑀳𑀲𑁆𑀲𑀜𑁆𑀘𑀸𑀧𑀺 𑀆𑀤𑀸𑀬 𑀦𑀺𑀬𑁆𑀬𑀸𑀤𑁂𑀳𑀻𑀢𑀺 𑀬𑁄𑀚𑀦𑀸.

𑀅𑀲𑁆𑀲𑀭𑀣𑀦𑁆𑀢𑀺 𑀅𑀲𑁆𑀲𑀬𑀼𑀢𑁆𑀢𑀭𑀣𑀁. 𑀧𑀼𑀡𑁆𑀡𑀧𑀢𑁆𑀢𑀦𑁆𑀢𑀺 𑀢𑀼𑀝𑁆𑀞𑀺𑀤𑀸𑀦𑀁.

𑀏𑀯𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀼𑀝𑁆𑀞𑀺𑀤𑀸𑀦𑁂 𑀤𑀺𑀬𑁆𑀬𑀫𑀸𑀦𑁂 𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀲𑀸𑀭𑀣𑀺 ‘‘𑀢𑀼𑀬𑁆𑀳𑁂𑀯 𑀳𑁄𑀢𑀽’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁂 𑀧𑀦 𑀲𑀸𑀭𑀣𑀺𑀫𑁆𑀳𑀺 𑀩𑁆𑀭𑀸𑀳𑁆𑀫𑀡𑀻 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀲𑀼𑀦𑁆𑀤𑀭𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 𑀖𑀭𑀸𑀯𑀸𑀲𑁂 𑀦𑀺𑀬𑁄𑀚𑁂𑀦𑁆𑀢𑀻 ‘‘𑀳𑀢𑁆𑀣𑀻 𑀕𑀯𑀲𑁆𑀲’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀳𑀢𑁆𑀣𑀻𑀢𑀺 𑀳𑀢𑁆𑀣𑀺𑀦𑁄. 𑀕𑀯𑀲𑁆𑀲𑀦𑁆𑀢𑀺 𑀕𑀸𑀯𑁄 𑀘 𑀅𑀲𑁆𑀲𑀸 𑀘. 𑀫𑀡𑀺𑀓𑀼𑀡𑁆𑀟𑀮𑀜𑁆𑀘𑀸𑀢𑀺 𑀫𑀡𑀺 𑀘 𑀓𑀼𑀡𑁆𑀟𑀮𑀸𑀦𑀺 𑀘. 𑀨𑀻𑀢𑀜𑁆𑀘𑀺𑀫𑀁 𑀕𑀳𑀯𑀺𑀪𑀯𑀁 𑀧𑀳𑀸𑀬𑀸𑀢𑀺 𑀇𑀫𑀁 𑀳𑀢𑁆𑀣𑀺𑀆𑀤𑀺𑀧𑁆𑀧𑀪𑁂𑀤𑀁 𑀬𑀣𑀸𑀯𑀼𑀢𑁆𑀢𑀁 𑀅𑀯𑀼𑀢𑁆𑀢𑀜𑁆𑀘 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀪𑁂𑀤𑀁 𑀨𑀻𑀢𑀁 𑀧𑀳𑀽𑀢𑀜𑁆𑀘 𑀕𑀳𑀯𑀺𑀪𑀯𑀁 𑀕𑁂𑀳𑀽𑀧𑀓𑀭𑀡𑀁 𑀅𑀜𑁆𑀜𑀜𑁆𑀘 𑀤𑀸𑀲𑀺𑀤𑀸𑀲𑀸𑀤𑀺𑀓𑀁 𑀲𑀩𑁆𑀩𑀁 𑀧𑀳𑀸𑀬 𑀢𑀯 𑀧𑀺𑀢𑀸 𑀧𑀩𑁆𑀩𑀚𑀺𑀢𑁄. 𑀪𑀼𑀜𑁆𑀚 𑀪𑁄𑀕𑀸𑀦𑀺 𑀲𑀼𑀦𑁆𑀤𑀭𑀻𑀢𑀺 𑀲𑀼𑀦𑁆𑀤𑀭𑀺, 𑀢𑁆𑀯𑀁 𑀇𑀫𑁂 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀼. 𑀢𑀼𑀯𑀁 𑀤𑀸𑀬𑀸𑀤𑀺𑀓𑀸 𑀓𑀼𑀮𑁂𑀢𑀺 𑀢𑀼𑀯𑀜𑁆𑀳𑀺 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀤𑀸𑀬𑀚𑁆𑀚𑀸𑀭𑀳𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀼𑀦𑁆𑀤𑀭𑀻 𑀅𑀢𑁆𑀢𑀦𑁄 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀁 𑀧𑀓𑀸𑀲𑁂𑀦𑁆𑀢𑀻 ‘‘𑀳𑀢𑁆𑀣𑀻𑀕𑀯𑀲𑁆𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀅𑀣 𑀦𑀁 𑀫𑀸𑀢𑀸 𑀦𑁂𑀓𑁆𑀔𑀫𑁆𑀫𑁂𑀬𑁂𑀯 𑀦𑀺𑀬𑁄𑀚𑁂𑀦𑁆𑀢𑀻 ‘‘𑀲𑁄 𑀢𑁂 𑀇𑀚𑁆𑀛𑀢𑀽’’𑀢𑀺𑀆𑀤𑀺𑀦𑀸 𑀤𑀺𑀬𑀟𑁆𑀠𑀕𑀸𑀣𑀫𑀸𑀳. 𑀢𑀢𑁆𑀣 𑀬𑀁 𑀢𑁆𑀯𑀁 𑀧𑀢𑁆𑀣𑁂𑀲𑀺 𑀲𑀼𑀦𑁆𑀤𑀭𑀻𑀢𑀺 𑀲𑀼𑀦𑁆𑀤𑀭𑀺 𑀢𑁆𑀯𑀁 𑀇𑀤𑀸𑀦𑀺 𑀬𑀁 𑀧𑀢𑁆𑀣𑁂𑀲𑀺 𑀆𑀓𑀗𑁆𑀔𑀲𑀺. 𑀲𑁄 𑀢𑀯 𑀧𑀩𑁆𑀩𑀚𑁆𑀚𑀸𑀬 𑀲𑀗𑁆𑀓𑀧𑁆𑀧𑁄 𑀧𑀩𑁆𑀩𑀚𑁆𑀚𑀸𑀬 𑀙𑀦𑁆𑀤𑁄 𑀇𑀚𑁆𑀛𑀢𑀼 𑀅𑀦𑀦𑁆𑀢𑀭𑀸𑀬𑁂𑀦 𑀲𑀺𑀚𑁆𑀛𑀢𑀼. 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄𑀢𑀺 𑀖𑀭𑁂 𑀖𑀭𑁂 𑀧𑀢𑀺𑀝𑁆𑀞𑀺𑀢𑁆𑀯𑀸 𑀮𑀤𑁆𑀥𑀩𑁆𑀩𑀪𑀺𑀓𑁆𑀔𑀸𑀧𑀺𑀡𑁆𑀟𑁄. 𑀉𑀜𑁆𑀙𑁄𑀢𑀺 𑀢𑀤𑀢𑁆𑀣𑀁 𑀖𑀭𑀧𑀝𑀺𑀧𑀸𑀝𑀺𑀬𑀸 𑀆𑀳𑀺𑀡𑁆𑀟𑀦𑀁 𑀉𑀤𑁆𑀤𑀺𑀲𑁆𑀲 𑀞𑀸𑀦𑀜𑁆𑀘. 𑀏𑀢𑀸𑀦𑀻𑀢𑀺 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀸𑀤𑀻𑀦𑀺. 𑀅𑀪𑀺𑀲𑀫𑁆𑀪𑁄𑀦𑁆𑀢𑀻𑀢𑀺 𑀅𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸 𑀚𑀗𑁆𑀖𑀩𑀮𑀁 𑀦𑀺𑀲𑁆𑀲𑀸𑀬 𑀅𑀪𑀺𑀲𑀫𑁆𑀪𑀯𑀦𑁆𑀢𑀻, 𑀲𑀸𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀲𑀼𑀦𑁆𑀤𑀭𑀻 ‘‘𑀲𑀸𑀥𑀼, 𑀅𑀫𑁆𑀫𑀸’’𑀢𑀺 𑀫𑀸𑀢𑀼𑀬𑀸 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀫𑀸𑀦𑀸𑀬𑁂𑀯 𑀲𑀫𑀸𑀦𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀚𑁆𑀛𑀸𑀬𑀁 𑀆𑀭𑁄𑀘𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀫𑀸𑀦𑀸𑀬 𑀫𑁂, 𑀅𑀬𑁆𑀬𑁂’’𑀢𑀺𑀆𑀤𑀺. 𑀢𑀢𑁆𑀣 𑀲𑀺𑀓𑁆𑀔𑀫𑀸𑀦𑀸𑀬 𑀫𑁂𑀢𑀺 𑀲𑀺𑀓𑁆𑀔𑀫𑀸𑀦𑀸𑀬 𑀲𑀫𑀸𑀦𑀸𑀬 𑀫𑀬𑀸. 𑀅𑀬𑁆𑀬𑁂𑀢𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀁 𑀆𑀮𑀧𑀢𑀺.

𑀢𑀼𑀯𑀁 𑀦𑀺𑀲𑁆𑀲𑀸𑀬 𑀓𑀮𑁆𑀬𑀸𑀡𑀺, 𑀣𑁂𑀭𑀺 𑀲𑀗𑁆𑀖𑀲𑁆𑀲 𑀲𑁄𑀪𑀦𑁂𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀯𑀼𑀤𑁆𑀥𑀢𑀭𑀪𑀸𑀯𑁂𑀦 𑀣𑀺𑀭𑀕𑀼𑀡𑀬𑁄𑀕𑁂𑀦 𑀘 𑀲𑀗𑁆𑀖𑀢𑁆𑀣𑁂𑀭𑀺 𑀲𑁄𑀪𑀦𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁄𑀪𑀦𑁂 𑀓𑀮𑁆𑀬𑀸𑀡𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂, 𑀅𑀬𑁆𑀬𑁂, 𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀬𑁄𑀚𑀦𑀸.

𑀇𑀘𑁆𑀙𑁂𑀢𑀺 𑀇𑀘𑁆𑀙𑀸𑀫𑀺. 𑀲𑀸𑀯𑀢𑁆𑀣𑀺 𑀕𑀦𑁆𑀢𑀯𑁂𑀢𑀺 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑀼𑀁. 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀫𑁂𑀯 𑀲𑀦𑁆𑀥𑀸𑀬𑀸𑀳.

𑀅𑀣 𑀲𑀼𑀦𑁆𑀤𑀭𑀻 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀫𑀸𑀦𑀸 𑀅𑀢𑁆𑀢𑀸𑀦𑀫𑁂𑀯 𑀆𑀮𑀧𑀦𑁆𑀢𑀻 𑀆𑀳 ‘‘𑀧𑀲𑁆𑀲 𑀲𑀼𑀦𑁆𑀤𑀭𑀻’’𑀢𑀺. 𑀳𑁂𑀫𑀯𑀡𑁆𑀡𑀦𑁆𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁. 𑀳𑀭𑀺𑀢𑁆𑀢𑀘𑀦𑁆𑀢𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀁. 𑀏𑀢𑁆𑀣 𑀘 𑀪𑀕𑀯𑀸 𑀧𑀻𑀢𑀯𑀡𑁆𑀡𑁂𑀦 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀔𑁄 𑀲𑀫𑁆𑀫𑀤𑁂𑀯 𑀖𑀁𑀲𑀺𑀢𑁆𑀯𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸 𑀲𑀼𑀧𑀭𑀺𑀫𑀚𑁆𑀚𑀺𑀢𑀓𑀜𑁆𑀘𑀦𑀸𑀤𑀸𑀲𑀲𑀦𑁆𑀦𑀺𑀪𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀫𑀯𑀡𑁆𑀡’’𑀦𑁆𑀢𑀺 𑀯𑀢𑁆𑀯𑀸 ‘‘𑀳𑀭𑀺𑀢𑁆𑀢𑀘’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀲𑁆𑀲 𑀲𑀼𑀦𑁆𑀤𑀭𑀺𑀫𑀸𑀬𑀦𑁆𑀢𑀺𑀦𑁆𑀢𑀺 𑀢𑀁 𑀲𑀼𑀦𑁆𑀤𑀭𑀺𑀦𑀸𑀫𑀺𑀓𑀁 𑀫𑀁 𑀪𑀕𑀯𑀸 𑀆𑀕𑀘𑁆𑀙𑀦𑁆𑀢𑀺 𑀧𑀲𑁆𑀲. ‘‘𑀯𑀺𑀧𑁆𑀧𑀫𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻 𑀧𑀻𑀢𑀺𑀯𑀺𑀧𑁆𑀨𑀸𑀭𑀯𑀲𑁂𑀦 𑀯𑀤𑀢𑀺.

𑀓𑀼𑀢𑁄 𑀧𑀦 𑀆𑀕𑀢𑀸, 𑀓𑀢𑁆𑀣 𑀘 𑀆𑀕𑀢𑀸, 𑀓𑀻𑀤𑀺𑀲𑀸 𑀘𑀸𑀬𑀁 𑀲𑀼𑀦𑁆𑀤𑀭𑀻𑀢𑀺 𑀆𑀲𑀗𑁆𑀓𑀦𑁆𑀢𑀸𑀦𑀁 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀩𑀸𑀭𑀸𑀡𑀲𑀺𑀢𑁄’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀢𑀢𑁆𑀣 ‘‘𑀲𑀸𑀯𑀺𑀓𑀸 𑀘𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀢𑀼𑀯𑀁 𑀩𑀼𑀤𑁆𑀥𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀇𑀫𑀲𑁆𑀫𑀺𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀢𑀼𑀯𑀫𑁂𑀯𑁂𑀓𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀦𑀢𑁄 𑀢𑀼𑀯𑀁 𑀫𑁂 𑀲𑀢𑁆𑀣𑀸, 𑀅𑀳𑀜𑁆𑀘 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀻 𑀪𑀕𑀯𑀸 𑀢𑀼𑀬𑁆𑀳𑀁 𑀉𑀭𑁂 𑀯𑀸𑀬𑀸𑀫 𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀑𑀭𑀲𑀸, 𑀫𑀼𑀔𑀢𑁄 𑀧𑀯𑀢𑁆𑀢𑀥𑀫𑁆𑀫𑀖𑁄𑀲𑁂𑀦 𑀲𑀸𑀲𑀦𑀲𑁆𑀲 𑀘 𑀫𑀼𑀔𑀪𑀽𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀚𑀸𑀢𑀢𑁆𑀢𑀸 𑀫𑀼𑀔𑀢𑁄 𑀚𑀸𑀢𑀸, 𑀦𑀺𑀝𑁆𑀞𑀺𑀢𑀧𑀭𑀺𑀜𑁆𑀜𑀸𑀢𑀸𑀤𑀺𑀓𑀭𑀡𑀻𑀬𑀢𑀸𑀬 𑀓𑀢𑀓𑀺𑀘𑁆𑀘𑀸, 𑀲𑀩𑁆𑀩𑀲𑁄 𑀆𑀲𑀯𑀸𑀦𑀁 𑀔𑁂𑀧𑀺𑀢𑀢𑁆𑀢𑀸 𑀅𑀦𑀸𑀲𑀯𑀸𑀢𑀺.

𑀅𑀣𑀲𑁆𑀲𑀸 𑀲𑀢𑁆𑀣𑀸 𑀆𑀕𑀫𑀦𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 ‘‘𑀢𑀲𑁆𑀲𑀸 𑀢𑁂 𑀲𑁆𑀯𑀸𑀕𑀢’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀸 𑀢𑁆𑀯𑀁 𑀫𑀬𑀸 𑀅𑀥𑀺𑀕𑀢𑀁 𑀥𑀫𑁆𑀫𑀁 𑀬𑀸𑀣𑀸𑀯𑀢𑁄 𑀅𑀥𑀺𑀕𑀘𑁆𑀙𑀺. 𑀢𑀲𑁆𑀲𑀸 𑀢𑁂, 𑀪𑀤𑁆𑀤𑁂 𑀲𑀼𑀦𑁆𑀤𑀭𑀺, 𑀇𑀥 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀢𑀁 𑀆𑀕𑀫𑀦𑀁 𑀲𑀼𑀆𑀕𑀢𑀁. 𑀢𑀢𑁄 𑀏𑀯 𑀢𑀁 𑀅𑀤𑀼𑀭𑀸𑀕𑀢𑀁 𑀦 𑀤𑀼𑀭𑀸𑀕𑀢𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀏𑀯𑀜𑁆𑀳𑀺 𑀤𑀦𑁆𑀢𑀸 𑀆𑀬𑀦𑁆𑀢𑀻𑀢𑀺, 𑀬𑀣𑀸 𑀢𑁆𑀯𑀁 𑀲𑀼𑀦𑁆𑀤𑀭𑀺, 𑀏𑀯𑀜𑁆𑀳𑀺 𑀉𑀢𑁆𑀢𑀫𑁂𑀦 𑀅𑀭𑀺𑀬𑀫𑀕𑁆𑀕𑀤𑀫𑀣𑁂𑀦 𑀤𑀦𑁆𑀢𑀸 𑀢𑀢𑁄 𑀏𑀯 𑀲𑀩𑁆𑀩𑀥𑀺 𑀯𑀻𑀢𑀭𑀸𑀕𑀸, 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀲𑀁𑀬𑀼𑀢𑁆𑀢𑀸 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸 𑀲𑀢𑁆𑀣𑀼 𑀧𑀸𑀤𑀸𑀦𑀁 𑀯𑀦𑁆𑀤𑀺𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀢𑁂 𑀲𑁆𑀯𑀸𑀕𑀢𑀁 𑀅𑀤𑀼𑀭𑀸𑀕𑀢𑀦𑁆𑀢𑀺 𑀬𑁄𑀚𑀦𑀸.

𑀲𑀼𑀦𑁆𑀤𑀭𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀪𑀸𑀓𑀫𑁆𑀫𑀸𑀭𑀥𑀻𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀤𑀳𑀭𑀸𑀳𑀦𑁆𑀢𑀺𑀆𑀤𑀺𑀓𑀸 𑀲𑀼𑀪𑀸𑀬 𑀓𑀫𑁆𑀫𑀸𑀭𑀥𑀻𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀪𑀸𑀯𑀺𑀢𑀓𑀼𑀲𑀮𑀫𑀽𑀮𑀸 𑀉𑀧𑀘𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻 𑀧𑀭𑀺𑀧𑀓𑁆𑀓𑀜𑀸𑀡𑀸 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀲𑁆𑀲 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀭𑀽𑀧𑀲𑀫𑁆𑀧𑀢𑁆𑀢𑀺𑀲𑁄𑀪𑀸𑀬 𑀲𑀼𑀪𑀸𑀢𑀺 𑀢𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺. 𑀲𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀲𑀢𑁆𑀣𑀼 𑀭𑀸𑀚𑀕𑀳𑀧𑁆𑀧𑀯𑁂𑀲𑀦𑁂 𑀲𑀢𑁆𑀣𑀭𑀺 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀸 𑀏𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀤𑀺𑀲𑁆𑀯𑀸 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀘𑀢𑀼𑀲𑀘𑁆𑀘𑀕𑀩𑁆𑀪𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀢𑀸𑀯𑀤𑁂𑀯 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀖𑀭𑀸𑀯𑀸𑀲𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀺. 𑀢𑀁 𑀜𑀸𑀢𑀓𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑁂𑀦𑁆𑀢𑀸 𑀧𑀳𑀽𑀢𑀥𑀦𑀁 𑀯𑀺𑀪𑀯𑀚𑀸𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀧𑀮𑁄𑀪𑁂𑀦𑁆𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀖𑀭𑀸𑀯𑀸𑀲𑁂𑀲𑀼 𑀓𑀸𑀫𑁂𑀲𑀼 𑀘 𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑀻 ‘‘𑀤𑀳𑀭𑀸𑀳’’𑀦𑁆𑀢𑀺𑀆𑀤𑀻𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀢𑁂 𑀦𑀺𑀭𑀸𑀲𑁂 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀬𑁄𑀤𑀧𑁂𑀦𑁆𑀢𑀻 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑁋

𑁩𑁩𑁯.

‘‘𑀤𑀳𑀭𑀸𑀳𑀁 𑀲𑀼𑀤𑁆𑀥𑀯𑀲𑀦𑀸, 𑀬𑀁 𑀧𑀼𑀭𑁂 𑀥𑀫𑁆𑀫𑀫𑀲𑁆𑀲𑀼𑀡𑀺𑀁;

𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬, 𑀲𑀘𑁆𑀘𑀸𑀪𑀺𑀲𑀫𑀬𑁄 𑀅𑀳𑀼.

𑁩𑁪𑁦.

‘‘𑀢𑀢𑁄𑀳𑀁 𑀲𑀩𑁆𑀩𑀓𑀸𑀫𑁂𑀲𑀼, 𑀪𑀼𑀲𑀁 𑀅𑀭𑀢𑀺𑀫𑀚𑁆𑀛𑀕𑀁;

𑀲𑀓𑁆𑀓𑀸𑀬𑀲𑁆𑀫𑀺𑀁 𑀪𑀬𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀫𑁂𑀯 𑀧𑀻𑀳𑀬𑁂.

𑁩𑁪𑁧.

‘‘𑀳𑀺𑀢𑁆𑀯𑀸𑀦𑀳𑀁 𑀜𑀸𑀢𑀺𑀕𑀡𑀁, 𑀤𑀸𑀲𑀓𑀫𑁆𑀫𑀓𑀭𑀸𑀦𑀺 𑀘;

𑀕𑀸𑀫𑀔𑁂𑀢𑁆𑀢𑀸𑀦𑀺 𑀨𑀻𑀢𑀸𑀦𑀺, 𑀭𑀫𑀡𑀻𑀬𑁂 𑀧𑀫𑁄𑀤𑀺𑀢𑁂.

𑁩𑁪𑁨.

‘‘𑀧𑀳𑀸𑀬𑀳𑀁 𑀧𑀩𑁆𑀩𑀚𑀺𑀢𑀸, 𑀲𑀸𑀧𑀢𑁂𑀬𑁆𑀬𑀫𑀦𑀧𑁆𑀧𑀓𑀁;

𑀏𑀯𑀁 𑀲𑀤𑁆𑀥𑀸𑀬 𑀦𑀺𑀓𑁆𑀔𑀫𑁆𑀫, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂.

𑁩𑁪𑁩.

‘‘𑀦𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧𑀁, 𑀆𑀓𑀺𑀜𑁆𑀘𑀜𑁆𑀜𑀜𑁆𑀳𑀺 𑀧𑀢𑁆𑀣𑀬𑁂;

𑀬𑁄 𑀚𑀸𑀢𑀭𑀽𑀧𑀁 𑀭𑀚𑀢𑀁, 𑀙𑀟𑁆𑀟𑁂𑀢𑁆𑀯𑀸 𑀧𑀼𑀦𑀭𑀸𑀕𑀫𑁂.

𑁩𑁪𑁪.

‘‘𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸, 𑀦 𑀩𑁄𑀥𑀸𑀬 𑀦 𑀲𑀦𑁆𑀢𑀺𑀬𑀸;

𑀦𑁂𑀢𑀁 𑀲𑀫𑀡𑀲𑀸𑀭𑀼𑀧𑁆𑀧𑀁, 𑀦 𑀏𑀢𑀁 𑀅𑀭𑀺𑀬𑀤𑁆𑀥𑀦𑀁.

𑁩𑁪𑁫.

‘‘𑀮𑁄𑀪𑀦𑀁 𑀫𑀤𑀦𑀜𑁆𑀘𑁂𑀢𑀁, 𑀫𑁄𑀳𑀦𑀁 𑀭𑀚𑀯𑀟𑁆𑀠𑀦𑀁;

𑀲𑀸𑀲𑀗𑁆𑀓𑀁 𑀩𑀳𑀼𑀆𑀬𑀸𑀲𑀁, 𑀦𑀢𑁆𑀣𑀺 𑀘𑁂𑀢𑁆𑀣 𑀥𑀼𑀯𑀁 𑀞𑀺𑀢𑀺.

𑁩𑁪𑁬.

‘‘𑀏𑀢𑁆𑀣 𑀭𑀢𑁆𑀢𑀸 𑀧𑀫𑀢𑁆𑀢𑀸 𑀘, 𑀲𑀁𑀓𑀺𑀮𑀺𑀝𑁆𑀞𑀫𑀦𑀸 𑀦𑀭𑀸;

𑀅𑀜𑁆𑀜𑀫𑀜𑁆𑀜𑁂𑀦 𑀩𑁆𑀬𑀸𑀭𑀼𑀤𑁆𑀥𑀸, 𑀧𑀼𑀣𑀽 𑀓𑀼𑀩𑁆𑀩𑀦𑁆𑀢𑀺 𑀫𑁂𑀥𑀕𑀁.

𑁩𑁪𑁭.

‘‘𑀯𑀥𑁄 𑀩𑀦𑁆𑀥𑁄 𑀧𑀭𑀺𑀓𑁆𑀮𑁂𑀲𑁄, 𑀚𑀸𑀦𑀺 𑀲𑁄𑀓𑀧𑀭𑀺𑀤𑁆𑀤𑀯𑁄;

𑀓𑀸𑀫𑁂𑀲𑀼 𑀅𑀥𑀺𑀧𑀦𑁆𑀦𑀸𑀦𑀁, 𑀤𑀺𑀲𑁆𑀲𑀢𑁂 𑀩𑁆𑀬𑀲𑀦𑀁 𑀩𑀳𑀼𑀁.

𑁩𑁪𑁮.

‘‘𑀢𑀁 𑀫𑀁 𑀜𑀸𑀢𑀻 𑀅𑀫𑀺𑀢𑁆𑀢𑀸𑀯, 𑀓𑀺𑀁 𑀯𑁄 𑀓𑀸𑀫𑁂𑀲𑀼 𑀬𑀼𑀜𑁆𑀚𑀣;

𑀚𑀸𑀦𑀸𑀣 𑀫𑀁 𑀧𑀩𑁆𑀩𑀚𑀺𑀢𑀁, 𑀓𑀸𑀫𑁂𑀲𑀼 𑀪𑀬𑀤𑀲𑁆𑀲𑀺𑀦𑀺𑀁.

𑁩𑁪𑁯.

‘‘𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦, 𑀧𑀭𑀺𑀓𑁆𑀔𑀻𑀬𑀦𑁆𑀢𑀺 𑀆𑀲𑀯𑀸;

𑀅𑀫𑀺𑀢𑁆𑀢𑀸 𑀯𑀥𑀓𑀸 𑀓𑀸𑀫𑀸, 𑀲𑀧𑀢𑁆𑀢𑀸 𑀲𑀮𑁆𑀮𑀩𑀦𑁆𑀥𑀦𑀸.

𑁩𑁫𑁦.

‘‘𑀢𑀁 𑀫𑀁 𑀜𑀸𑀢𑀻 𑀅𑀫𑀺𑀢𑁆𑀢𑀸𑀯, 𑀓𑀺𑀁 𑀯𑁄 𑀓𑀸𑀫𑁂𑀲𑀼 𑀬𑀼𑀜𑁆𑀚𑀣;

𑀚𑀸𑀦𑀸𑀣 𑀫𑀁 𑀧𑀩𑁆𑀩𑀚𑀺𑀢𑀁, 𑀫𑀼𑀡𑁆𑀟𑀁 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀁.

𑁩𑁫𑁧.

‘‘𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄 𑀉𑀜𑁆𑀙𑁄 𑀘, 𑀧𑀁𑀲𑀼𑀓𑀽𑀮𑀜𑁆𑀘 𑀘𑀻𑀯𑀭𑀁;

𑀏𑀢𑀁 𑀔𑁄 𑀫𑀫 𑀲𑀸𑀭𑀼𑀧𑁆𑀧𑀁, 𑀅𑀦𑀕𑀸𑀭𑀽𑀧𑀦𑀺𑀲𑁆𑀲𑀬𑁄.

𑁩𑁫𑁨.

‘‘𑀯𑀦𑁆𑀢𑀸 𑀫𑀳𑁂𑀲𑀻𑀳𑀺 𑀓𑀸𑀫𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀔𑁂𑀫𑀝𑁆𑀞𑀸𑀦𑁂 𑀯𑀺𑀫𑀼𑀢𑁆𑀢𑀸 𑀢𑁂, 𑀧𑀢𑁆𑀢𑀸 𑀢𑁂 𑀅𑀘𑀮𑀁 𑀲𑀼𑀔𑀁.

𑁩𑁫𑁩.

‘‘𑀫𑀸𑀳𑀁 𑀓𑀸𑀫𑁂𑀳𑀺 𑀲𑀁𑀕𑀘𑁆𑀙𑀺𑀁, 𑀬𑁂𑀲𑀼 𑀢𑀸𑀡𑀁 𑀦 𑀯𑀺𑀚𑁆𑀚𑀢𑀺;

𑀅𑀫𑀺𑀢𑁆𑀢𑀸 𑀯𑀥𑀓𑀸 𑀓𑀸𑀫𑀸, 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸 𑀤𑀼𑀔𑀸.

𑁩𑁫𑁪.

‘‘𑀧𑀭𑀺𑀧𑀦𑁆𑀣𑁄 𑀏𑀲 𑀪𑀬𑁄, 𑀲𑀯𑀺𑀖𑀸𑀢𑁄 𑀲𑀓𑀡𑁆𑀝𑀓𑁄;

𑀕𑁂𑀥𑁄 𑀲𑀼𑀯𑀺𑀲𑀫𑁄 𑀘𑁂𑀲𑁄, 𑀫𑀳𑀦𑁆𑀢𑁄 𑀫𑁄𑀳𑀦𑀸𑀫𑀼𑀔𑁄.

𑁩𑁫𑁫.

‘‘𑀉𑀧𑀲𑀕𑁆𑀕𑁄 𑀪𑀻𑀫𑀭𑀽𑀧𑁄, 𑀓𑀸𑀫𑀸 𑀲𑀧𑁆𑀧𑀲𑀺𑀭𑀽𑀧𑀫𑀸;

𑀬𑁂 𑀩𑀸𑀮𑀸 𑀅𑀪𑀺𑀦𑀦𑁆𑀤𑀦𑁆𑀢𑀺, 𑀅𑀦𑁆𑀥𑀪𑀽𑀢𑀸 𑀧𑀼𑀣𑀼𑀚𑁆𑀚𑀦𑀸.

𑁩𑁫𑁬.

‘‘𑀓𑀸𑀫𑀧𑀗𑁆𑀓𑁂𑀦 𑀲𑀢𑁆𑀢𑀸 𑀳𑀺, 𑀩𑀳𑀽 𑀮𑁄𑀓𑁂 𑀅𑀯𑀺𑀤𑁆𑀤𑀲𑀽;

𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀫𑀭𑀡𑀲𑁆𑀲 𑀘.

𑁩𑁫𑁭.

‘‘𑀤𑀼𑀕𑁆𑀕𑀢𑀺𑀕𑀫𑀦𑀁 𑀫𑀕𑁆𑀕𑀁, 𑀫𑀦𑀼𑀲𑁆𑀲𑀸 𑀓𑀸𑀫𑀳𑁂𑀢𑀼𑀓𑀁;

𑀩𑀳𑀼𑀁 𑀯𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀅𑀢𑁆𑀢𑀦𑁄 𑀭𑁄𑀕𑀫𑀸𑀯𑀳𑀁.

𑁩𑁫𑁮.

‘‘𑀏𑀯𑀁 𑀅𑀫𑀺𑀢𑁆𑀢𑀚𑀦𑀦𑀸, 𑀢𑀸𑀧𑀦𑀸 𑀲𑀁𑀓𑀺𑀮𑁂𑀲𑀺𑀓𑀸;

𑀮𑁄𑀓𑀸𑀫𑀺𑀲𑀸 𑀩𑀦𑁆𑀥𑀦𑀻𑀬𑀸, 𑀓𑀸𑀫𑀸 𑀫𑀭𑀡𑀩𑀦𑁆𑀥𑀦𑀸.

𑁩𑁫𑁯.

‘‘𑀉𑀫𑁆𑀫𑀸𑀤𑀦𑀸 𑀉𑀮𑁆𑀮𑀧𑀦𑀸, 𑀓𑀸𑀫𑀸 𑀘𑀺𑀢𑁆𑀢𑀧𑁆𑀧𑀫𑀸𑀣𑀺𑀦𑁄;

𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀔𑀺𑀧𑁆𑀧𑀁 𑀫𑀸𑀭𑁂𑀦 𑀑𑀟𑁆𑀟𑀺𑀢𑀁.

𑁩𑁬𑁦.

‘‘𑀅𑀦𑀦𑁆𑀢𑀸𑀤𑀻𑀦𑀯𑀸 𑀓𑀸𑀫𑀸, 𑀩𑀳𑀼𑀤𑀼𑀓𑁆𑀔𑀸 𑀫𑀳𑀸𑀯𑀺𑀲𑀸;

𑀅𑀧𑁆𑀧𑀲𑁆𑀲𑀸𑀤𑀸 𑀭𑀡𑀓𑀭𑀸, 𑀲𑀼𑀓𑁆𑀓𑀧𑀓𑁆𑀔𑀯𑀺𑀲𑁄𑀲𑀦𑀸.

𑁩𑁬𑁧.

‘‘𑀲𑀸𑀳𑀁 𑀏𑀢𑀸𑀤𑀺𑀲𑀁 𑀓𑀢𑁆𑀯𑀸, 𑀩𑁆𑀬𑀲𑀦𑀁 𑀓𑀸𑀫𑀳𑁂𑀢𑀼𑀓𑀁;

𑀦 𑀢𑀁 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀺, 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸 𑀲𑀤𑀸.

𑁩𑁬𑁨.

‘‘𑀭𑀡𑀁 𑀢𑀭𑀺𑀢𑁆𑀯𑀸 𑀓𑀸𑀫𑀸𑀦𑀁, 𑀲𑀻𑀢𑀺𑀪𑀸𑀯𑀸𑀪𑀺𑀓𑀗𑁆𑀔𑀺𑀦𑀻;

𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀲𑁆𑀲𑀸𑀫𑀺, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁂.

𑁩𑁬𑁩.

‘‘𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀅𑀭𑀺𑀬𑀝𑁆𑀞𑀗𑁆𑀕𑀺𑀓𑀁 𑀉𑀚𑀼𑀁;

𑀢𑀁 𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀬𑁂𑀦 𑀢𑀺𑀡𑁆𑀡𑀸 𑀫𑀳𑁂𑀲𑀺𑀦𑁄.

𑁩𑁬𑁪.

‘‘𑀇𑀫𑀁 𑀧𑀲𑁆𑀲𑀣 𑀥𑀫𑁆𑀫𑀝𑁆𑀞𑀁, 𑀲𑀼𑀪𑀁 𑀓𑀫𑁆𑀫𑀸𑀭𑀥𑀻𑀢𑀭𑀁;

𑀅𑀦𑁂𑀚𑀁 𑀉𑀧𑀲𑀫𑁆𑀧𑀚𑁆𑀚, 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀛𑀸𑀬𑀢𑀺.

𑁩𑁬𑁫.

‘‘𑀅𑀚𑁆𑀚𑀝𑁆𑀞𑀫𑀻 𑀧𑀩𑁆𑀩𑀚𑀺𑀢𑀸, 𑀲𑀤𑁆𑀥𑀸 𑀲𑀤𑁆𑀥𑀫𑁆𑀫𑀲𑁄𑀪𑀦𑀸;

𑀯𑀺𑀦𑀻𑀢𑀼𑀧𑁆𑀧𑀮𑀯𑀡𑁆𑀡𑀸𑀬, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻.

𑁩𑁬𑁬.

‘‘𑀲𑀸𑀬𑀁 𑀪𑀼𑀚𑀺𑀲𑁆𑀲𑀸 𑀅𑀡𑀡𑀸, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸.

𑁩𑁬𑁭.

‘‘𑀢𑀁 𑀲𑀓𑁆𑀓𑁄 𑀤𑁂𑀯𑀲𑀗𑁆𑀖𑁂𑀦, 𑀉𑀧𑀲𑀗𑁆𑀓𑀫𑁆𑀫 𑀇𑀤𑁆𑀥𑀺𑀬𑀸;

𑀦𑀫𑀲𑁆𑀲𑀢𑀺 𑀪𑀽𑀢𑀧𑀢𑀺, 𑀲𑀼𑀪𑀁 𑀓𑀫𑁆𑀫𑀸𑀭𑀥𑀻𑀢𑀭’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀤𑀳𑀭𑀸𑀳𑀁 𑀲𑀼𑀤𑁆𑀥𑀯𑀲𑀦𑀸, 𑀬𑀁 𑀧𑀼𑀭𑁂 𑀥𑀫𑁆𑀫𑀫𑀲𑁆𑀲𑀼𑀡𑀺𑀦𑁆𑀢𑀺 𑀬𑀲𑁆𑀫𑀸 𑀅𑀳𑀁 𑀧𑀼𑀩𑁆𑀩𑁂 𑀤𑀳𑀭𑀸 𑀢𑀭𑀼𑀡𑀻 𑀏𑀯 𑀲𑀼𑀤𑁆𑀥𑀯𑀲𑀦𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺𑀁. 𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬, 𑀲𑀘𑁆𑀘𑀸𑀪𑀺𑀲𑀫𑀬𑁄 𑀅𑀳𑀽𑀢𑀺 𑀬𑀲𑁆𑀫𑀸 𑀘 𑀢𑀲𑁆𑀲𑀸 𑀫𑁂 𑀫𑀬𑁆𑀳𑀁 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸𑀬 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀬𑀸 𑀲𑀻𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀺𑀬𑀸𑀯 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁩𑁨) 𑀧𑀝𑀺𑀯𑁂𑀥𑁄 𑀅𑀳𑁄𑀲𑀺.

𑀢𑀢𑁄𑀳𑀁 𑀲𑀩𑁆𑀩𑀓𑀸𑀫𑁂𑀲𑀼, 𑀪𑀼𑀲𑀁 𑀅𑀭𑀢𑀺𑀫𑀚𑁆𑀛𑀕𑀦𑁆𑀢𑀺 𑀢𑀢𑁄 𑀢𑁂𑀦 𑀓𑀸𑀭𑀡𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲 𑀲𑀼𑀢𑀢𑁆𑀢𑀸 𑀲𑀘𑁆𑀘𑀸𑀦𑀜𑁆𑀘 𑀅𑀪𑀺𑀲𑀫𑀺𑀢𑀢𑁆𑀢𑀸 𑀫𑀦𑀼𑀲𑁆𑀲𑁂𑀲𑀼 𑀤𑀺𑀩𑁆𑀩𑁂𑀲𑀼 𑀘𑀸𑀢𑀺 𑀲𑀩𑁆𑀩𑁂𑀲𑀼𑀧𑀺 𑀓𑀸𑀫𑁂𑀲𑀼 𑀪𑀼𑀲𑀁 𑀅𑀢𑀺𑀯𑀺𑀬 𑀅𑀭𑀢𑀺𑀁 𑀉𑀓𑁆𑀓𑀡𑁆𑀞𑀺𑀁 𑀅𑀥𑀺𑀕𑀘𑁆𑀙𑀺𑀁. 𑀲𑀓𑁆𑀓𑀸𑀬𑀲𑁆𑀫𑀺𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑁂, 𑀪𑀬𑀁 𑀲𑀧𑁆𑀧𑀝𑀺𑀪𑀬𑀪𑀸𑀯𑀁 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀫𑁂𑀯 𑀧𑀩𑁆𑀩𑀚𑁆𑀚𑀁 𑀦𑀺𑀩𑁆𑀩𑀸𑀦𑀫𑁂𑀯, 𑀧𑀻𑀳𑀬𑁂 𑀧𑀺𑀳𑀬𑀸𑀫𑀺 𑀧𑀢𑁆𑀣𑀬𑀸𑀫𑀺.

𑀤𑀸𑀲𑀓𑀫𑁆𑀫𑀓𑀭𑀸𑀦𑀺 𑀘𑀸𑀢𑀺 𑀤𑀸𑀲𑁂 𑀘 𑀓𑀫𑁆𑀫𑀓𑀸𑀭𑁂 𑀘, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀕𑀸𑀫𑀔𑁂𑀢𑁆𑀢𑀸𑀦𑀻𑀢𑀺 𑀕𑀸𑀫𑁂 𑀘 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀯𑀺𑀭𑀼𑀳𑀦𑀓𑁆𑀔𑁂𑀢𑁆𑀢𑀸𑀦𑀺 𑀘, 𑀕𑀸𑀫𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀯𑀸 𑀔𑁂𑀢𑁆𑀢𑀸𑀦𑀺. 𑀨𑀻𑀢𑀸𑀦𑀻𑀢𑀺 𑀲𑀫𑀺𑀤𑁆𑀥𑀸𑀦𑀺. 𑀭𑀫𑀡𑀻𑀬𑁂𑀢𑀺 𑀫𑀦𑀼𑀜𑁆𑀜𑁂. 𑀧𑀫𑁄𑀤𑀺𑀢𑁂𑀢𑀺 𑀧𑀫𑀼𑀤𑀺𑀢𑁂, 𑀪𑁄𑀕𑀓𑁆𑀔𑀦𑁆𑀥𑁂 𑀳𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀲𑀦𑁆𑀢𑀓𑀁 𑀥𑀦𑀁, 𑀫𑀡𑀺𑀓𑀦𑀓𑀭𑀚𑀢𑀸𑀤𑀺𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀁. 𑀅𑀦𑀧𑁆𑀧𑀓𑀦𑁆𑀢𑀺 𑀫𑀳𑀦𑁆𑀢𑀁, 𑀧𑀳𑀸𑀬𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑀤𑁆𑀥𑀸𑀬 𑀦𑀺𑀓𑁆𑀔𑀫𑁆𑀫𑀸𑀢𑀺 ‘‘𑀳𑀺𑀢𑁆𑀯𑀸𑀦𑀳𑀁 𑀜𑀸𑀢𑀺𑀕𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀺 𑀭𑀢𑀦𑀢𑁆𑀢𑀬𑀜𑁆𑀘𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀲𑀤𑁆𑀥𑀸𑀬 𑀲𑀤𑁆𑀤𑀳𑀺𑀢𑁆𑀯𑀸 𑀖𑀭𑀢𑁄 𑀦𑀺𑀓𑁆𑀔𑀫𑁆𑀫, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀼𑀝𑁆𑀞𑀼 𑀧𑀯𑁂𑀤𑀺𑀢𑁂 𑀅𑀭𑀺𑀬𑀯𑀺𑀦𑀬𑁂 𑀅𑀳𑀁 𑀧𑀩𑁆𑀩𑀚𑀺𑀢𑀸.

𑀏𑀯𑀁 𑀧𑀩𑁆𑀩𑀚𑀺𑀢𑀸𑀬 𑀧𑀦 𑀦𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧𑀁, 𑀬𑀤𑀺𑀤𑀁 𑀙𑀟𑁆𑀟𑀺𑀢𑀸𑀦𑀁 𑀓𑀸𑀫𑀸𑀦𑀁 𑀧𑀘𑁆𑀘𑀸𑀕𑀫𑀦𑀁. 𑀆𑀓𑀺𑀜𑁆𑀘𑀜𑁆𑀜𑀜𑁆𑀳𑀺 𑀧𑀢𑁆𑀣𑀬𑁂𑀢𑀺 𑀅𑀳𑀁 𑀅𑀓𑀺𑀜𑁆𑀘𑀦𑀪𑀸𑀯𑀁 𑀅𑀧𑀭𑀺𑀕𑁆𑀕𑀳𑀪𑀸𑀯𑀫𑁂𑀯 𑀧𑀢𑁆𑀣𑀬𑀸𑀫𑀺. 𑀬𑁄 𑀚𑀸𑀢𑀭𑀽𑀧𑀭𑀚𑀢𑀁, 𑀙𑀟𑁆𑀟𑁂𑀢𑁆𑀯𑀸 𑀧𑀼𑀦𑀭𑀸𑀕𑀫𑁂𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀲𑀼𑀯𑀡𑁆𑀡𑀁 𑀭𑀚𑀢𑀁 𑀅𑀜𑁆𑀜𑀫𑁆𑀧𑀺 𑀯𑀸 𑀓𑀺𑀜𑁆𑀘𑀺 𑀥𑀦𑀚𑀸𑀢𑀁 𑀙𑀟𑁆𑀟𑁂𑀢𑁆𑀯𑀸 𑀧𑀼𑀦 𑀢𑀁 𑀕𑀡𑁆𑀳𑁂𑀬𑁆𑀬, 𑀲𑁄 𑀧𑀡𑁆𑀟𑀺𑀢𑀸𑀦𑀁 𑀅𑀦𑁆𑀢𑀭𑁂 𑀓𑀣𑀁 𑀲𑀻𑀲𑀁 𑀉𑀓𑁆𑀔𑀺𑀧𑁂𑀬𑁆𑀬?

𑀬𑀲𑁆𑀫𑀸 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸, 𑀦 𑀩𑁄𑀥𑀸𑀬 𑀦 𑀲𑀦𑁆𑀢𑀺𑀬𑀸 𑀦 𑀫𑀕𑁆𑀕𑀜𑀸𑀡𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀢𑀁 𑀲𑀫𑀡𑀲𑀸𑀭𑀼𑀧𑁆𑀧𑀦𑁆𑀢𑀺 𑀏𑀢𑀁 𑀚𑀸𑀢𑀭𑀽𑀧𑀭𑀚𑀢𑀸𑀤𑀺𑀧𑀭𑀺𑀕𑁆𑀕𑀳𑀯𑀢𑁆𑀣𑀼, 𑀢𑀲𑁆𑀲 𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀫𑀡𑀸𑀦𑀁 𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢’’𑀦𑁆𑀢𑀺𑀆𑀤𑀺 (𑀘𑀽𑀴𑀯. 𑁪𑁪𑁬). 𑀦 𑀏𑀢𑀁 𑀅𑀭𑀺𑀬𑀤𑁆𑀥𑀦𑀦𑁆𑀢𑀺 𑀏𑀢𑀁 𑀬𑀣𑀸𑀯𑀼𑀢𑁆𑀢𑀧𑀭𑀺𑀕𑁆𑀕𑀳𑀯𑀢𑁆𑀣𑀼 𑀲𑀤𑁆𑀥𑀸𑀤𑀺𑀥𑀦𑀁 𑀯𑀺𑀬 𑀅𑀭𑀺𑀬𑀥𑀫𑁆𑀫𑀫𑀬𑀫𑁆𑀧𑀺 𑀥𑀦𑀁 𑀦 𑀳𑁄𑀢𑀺, 𑀦 𑀅𑀭𑀺𑀬𑀪𑀸𑀯𑀸𑀯𑀳𑀢𑁄. 𑀢𑁂𑀦𑀸𑀳 ‘‘𑀮𑁄𑀪𑀦’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀮𑁄𑀪𑀦𑀦𑁆𑀢𑀺 𑀮𑁄𑀪𑀼𑀧𑁆𑀧𑀸𑀤𑀦𑀁. 𑀫𑀤𑀦𑀦𑁆𑀢𑀺 𑀫𑀤𑀸𑀯𑀳𑀁. 𑀫𑁄𑀳𑀦𑀦𑁆𑀢𑀺 𑀲𑀫𑁆𑀫𑁄𑀳𑀚𑀦𑀦𑀁. 𑀭𑀚𑀯𑀟𑁆𑀠𑀦𑀦𑁆𑀢𑀺 𑀭𑀸𑀕𑀭𑀚𑀸𑀤𑀺𑀲𑀁𑀯𑀟𑁆𑀠𑀦𑀁. 𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁, 𑀢𑀲𑁆𑀲 𑀆𑀲𑀗𑁆𑀓𑀸𑀯𑀳𑀢𑁆𑀢𑀸 𑀲𑀳 𑀆𑀲𑀗𑁆𑀓𑀸𑀬 𑀯𑀢𑁆𑀢𑀢𑀻𑀢𑀺 𑀲𑀸𑀲𑀗𑁆𑀓𑀁, 𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁, 𑀢𑀲𑁆𑀲 𑀬𑀢𑁄 𑀓𑀼𑀢𑁄 𑀆𑀲𑀗𑁆𑀓𑀸𑀯𑀳𑀦𑁆𑀢𑀺 𑀅𑀢𑁆𑀣𑁄. 𑀩𑀳𑀼𑀆𑀬𑀸𑀲𑀦𑁆𑀢𑀺 𑀲𑀚𑁆𑀚𑀦𑀭𑀓𑁆𑀔𑀡𑀸𑀤𑀺𑀯𑀲𑁂𑀦 𑀩𑀳𑀼𑀧𑀭𑀺𑀲𑁆𑀲𑀫𑀁. 𑀦𑀢𑁆𑀣𑀺 𑀘𑁂𑀢𑁆𑀣 𑀥𑀼𑀯𑀁 𑀞𑀺𑀢𑀻𑀢𑀺 𑀏𑀢𑀲𑁆𑀫𑀺𑀁 𑀥𑀦𑁂 𑀥𑀼𑀯𑀪𑀸𑀯𑁄 𑀘 𑀞𑀺𑀢𑀺𑀪𑀸𑀯𑁄 𑀘 𑀦𑀢𑁆𑀣𑀺, 𑀘𑀜𑁆𑀘𑀮𑀫𑀦𑀯𑀝𑁆𑀞𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀭𑀢𑁆𑀢𑀸 𑀧𑀫𑀢𑁆𑀢𑀸 𑀘𑀸𑀢𑀺 𑀏𑀢𑀲𑁆𑀫𑀺𑀁 𑀥𑀦𑁂 𑀭𑀢𑁆𑀢𑀸 𑀲𑀜𑁆𑀚𑀸𑀢𑀭𑀸𑀕𑀸 𑀤𑀲𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀢𑀺𑀬𑀸 𑀯𑀺𑀧𑁆𑀧𑀯𑀸𑀲𑁂𑀦 𑀧𑀫𑀢𑁆𑀢𑀸. 𑀲𑀁𑀓𑀺𑀮𑀺𑀝𑁆𑀞𑀫𑀦𑀸 𑀮𑁄𑀪𑀸𑀤𑀺𑀲𑀁𑀓𑀺𑀮𑁂𑀲𑁂𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀯 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁄 𑀘 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀩𑁆𑀬𑀸𑀭𑀼𑀤𑁆𑀥𑀸, 𑀧𑀼𑀣𑀽 𑀓𑀼𑀩𑁆𑀩𑀦𑁆𑀢𑀺 𑀫𑁂𑀥𑀕𑀁 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀭𑀼𑀤𑁆𑀥𑀸 𑀳𑀼𑀢𑁆𑀯𑀸 𑀧𑀼𑀣𑀽 𑀲𑀢𑁆𑀢𑀸 𑀫𑁂𑀥𑀕𑀁 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁…𑀧𑁂… 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁬𑁮, 𑁧𑁭𑁮).

𑀯𑀥𑁄𑀢𑀺 𑀫𑀭𑀡𑀁. 𑀩𑀦𑁆𑀥𑁄𑀢𑀺 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀺𑀩𑀦𑁆𑀥𑀦𑀁. 𑀧𑀭𑀺𑀓𑁆𑀮𑁂𑀲𑁄𑀢𑀺 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀧𑀭𑀺𑀓𑀺𑀮𑁂𑀲𑀸𑀧𑀢𑁆𑀢𑀺. 𑀚𑀸𑀦𑀻𑀢𑀺 𑀥𑀦𑀚𑀸𑀦𑀺 𑀘𑁂𑀯 𑀧𑀭𑀺𑀯𑀸𑀭𑀚𑀸𑀦𑀺 𑀘. 𑀲𑁄𑀓𑀧𑀭𑀺𑀤𑁆𑀤𑀯𑁄𑀢𑀺 𑀲𑁄𑀓𑁄 𑀘 𑀧𑀭𑀺𑀤𑁂𑀯𑁄 𑀘. 𑀅𑀥𑀺𑀧𑀦𑁆𑀦𑀸𑀦𑀦𑁆𑀢𑀺 𑀅𑀚𑁆𑀛𑁄𑀲𑀺𑀢𑀸𑀦𑀁. 𑀤𑀺𑀲𑁆𑀲𑀢𑁂 𑀩𑁆𑀬𑀲𑀦𑀁 𑀩𑀳𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀥𑀩𑀦𑁆𑀥𑀦𑀸𑀤𑀺𑀪𑁂𑀤𑀁 𑀅𑀯𑀼𑀢𑁆𑀢𑀜𑁆𑀘 𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀤𑀺𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀩𑀳𑀼𑀁 𑀩𑀳𑀼𑀯𑀺𑀥𑀁 𑀩𑁆𑀬𑀲𑀦𑀁 𑀅𑀦𑀢𑁆𑀣𑁄 𑀓𑀸𑀫𑁂𑀲𑀼 𑀤𑀺𑀲𑁆𑀲𑀢𑁂𑀯.

𑀢𑀁 𑀫𑀁 𑀜𑀸𑀢𑀻 𑀅𑀫𑀺𑀢𑁆𑀢𑀸𑀯, 𑀓𑀺𑀁 𑀯𑁄 𑀓𑀸𑀫𑁂𑀲𑀼 𑀬𑀼𑀜𑁆𑀚𑀣𑀸𑀢𑀺 𑀢𑀸𑀤𑀺𑀲𑀁 𑀫𑀁 𑀬𑀣𑀸 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀁 𑀢𑀼𑀫𑁆𑀳𑁂 𑀜𑀸𑀢𑀻 𑀜𑀸𑀢𑀓𑀸 𑀲𑀫𑀸𑀦𑀸 𑀅𑀦𑀢𑁆𑀣𑀓𑀸𑀫𑀸 𑀅𑀫𑀺𑀢𑁆𑀢𑀸 𑀯𑀺𑀬 𑀓𑀺𑀁 𑀓𑁂𑀦 𑀓𑀸𑀭𑀡𑁂𑀦 𑀓𑀸𑀫𑁂𑀲𑀼 𑀬𑀼𑀜𑁆𑀚𑀣 𑀦𑀺𑀬𑁄𑀚𑁂𑀣. 𑀚𑀸𑀦𑀸𑀣 𑀫𑀁 𑀧𑀩𑁆𑀩𑀚𑀺𑀢𑀁, 𑀓𑀸𑀫𑁂𑀲𑀼 𑀪𑀬𑀤𑀲𑁆𑀲𑀺𑀦𑀺𑀦𑁆𑀢𑀺 𑀓𑀸𑀫𑁂 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺𑀁 𑀧𑀩𑁆𑀩𑀚𑀺𑀢𑀁 𑀫𑀁 𑀆𑀚𑀸𑀦𑀸𑀣, 𑀓𑀺𑀁 𑀏𑀢𑁆𑀢𑀓𑀁 𑀢𑀼𑀫𑁆𑀳𑁂𑀳𑀺 𑀅𑀦𑀜𑁆𑀜𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦, 𑀧𑀭𑀺𑀓𑁆𑀔𑀻𑀬𑀦𑁆𑀢𑀺 𑀆𑀲𑀯𑀸𑀢𑀺 𑀓𑀸𑀫𑀸𑀲𑀯𑀸𑀤𑀬𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦 𑀦 𑀓𑀤𑀸𑀘𑀺 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀣 𑀔𑁄 𑀢𑁂𑀳𑀺 𑀏𑀯 𑀧𑀭𑀺𑀯𑀟𑁆𑀠𑀦𑁆𑀢𑁂𑀯. 𑀢𑁂𑀦𑀸𑀳 𑁋 ‘‘𑀅𑀫𑀺𑀢𑁆𑀢𑀸 𑀯𑀥𑀓𑀸 𑀓𑀸𑀫𑀸, 𑀲𑀧𑀢𑁆𑀢𑀸 𑀲𑀮𑁆𑀮𑀩𑀦𑁆𑀥𑀦𑀸’’𑀢𑀺. 𑀓𑀸𑀫𑀸 𑀳𑀺 𑀅𑀳𑀺𑀢𑀸𑀯𑀳𑀢𑁆𑀢𑀸 𑀫𑁂𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀅𑀫𑀺𑀢𑁆𑀢𑀸, 𑀫𑀭𑀡𑀳𑁂𑀢𑀼𑀢𑀸𑀬 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀲𑀤𑀺𑀲𑀢𑁆𑀢𑀸 𑀯𑀥𑀓𑀸, 𑀅𑀦𑀼𑀩𑀦𑁆𑀥𑀺𑀢𑁆𑀯𑀸𑀧𑀺 𑀅𑀦𑀢𑁆𑀣𑀸𑀯𑀳𑀦𑀢𑀸𑀬 𑀯𑁂𑀭𑀸𑀦𑀼𑀩𑀦𑁆𑀥𑀲𑀧𑀢𑁆𑀢𑀲𑀤𑀺𑀲𑀢𑁆𑀢𑀸 𑀲𑀧𑀢𑁆𑀢𑀸, 𑀭𑀸𑀕𑀸𑀤𑀻𑀦𑀁 𑀲𑀮𑁆𑀮𑀸𑀦𑀁 𑀩𑀦𑁆𑀥𑀦𑀢𑁄 𑀲𑀮𑁆𑀮𑀩𑀦𑁆𑀥𑀦𑀸.

𑀫𑀼𑀡𑁆𑀟𑀦𑁆𑀢𑀺 𑀫𑀼𑀡𑁆𑀟𑀺𑀢𑀓𑁂𑀲𑀁. 𑀢𑀢𑁆𑀣 𑀢𑀢𑁆𑀣 𑀦𑀦𑁆𑀢𑀓𑀸𑀦𑀺 𑀕𑀳𑁂𑀢𑁆𑀯𑀸 𑀲𑀗𑁆𑀖𑀸𑀝𑀺𑀘𑀻𑀯𑀭𑀧𑀸𑀭𑀼𑀧𑀦𑁂𑀦 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀁.

𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄𑀢𑀺 𑀯𑀺𑀯𑀝𑀤𑁆𑀯𑀸𑀭𑁂 𑀖𑀭𑁂 𑀖𑀭𑁂 𑀧𑀢𑀺𑀝𑁆𑀞𑀺𑀢𑁆𑀯𑀸 𑀮𑀪𑀦𑀓𑀧𑀺𑀡𑁆𑀟𑁄. 𑀉𑀜𑁆𑀙𑁄𑀢𑀺 𑀢𑀤𑀢𑁆𑀣𑀁 𑀉𑀜𑁆𑀙𑀸𑀘𑀭𑀺𑀬𑀸. 𑀅𑀦𑀕𑀸𑀭𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀦𑀕𑀸𑀭𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑀺𑀢𑀩𑁆𑀩𑀢𑁄 𑀉𑀧𑀦𑀺𑀲𑁆𑀲𑀬𑀪𑀽𑀢𑁄 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁄. 𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑀺𑀢𑀸 𑀚𑀻𑀯𑀦𑁆𑀢𑀺.

𑀯𑀦𑁆𑀢𑀸𑀢𑀺 𑀙𑀟𑁆𑀟𑀺𑀢𑀸. 𑀫𑀳𑁂𑀲𑀻𑀳𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑁂𑀲𑀻𑀳𑀺. 𑀔𑁂𑀫𑀝𑁆𑀞𑀸𑀦𑁂𑀢𑀺 𑀓𑀸𑀫𑀬𑁄𑀕𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀯𑀝𑁆𑀞𑀸𑀦𑀪𑀽𑀢𑁂 𑀦𑀺𑀩𑁆𑀩𑀸𑀦𑁂. 𑀢𑁂𑀢𑀺 𑀫𑀳𑁂𑀲𑀬𑁄. 𑀅𑀘𑀮𑀁 𑀲𑀼𑀔𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑀁 𑀧𑀢𑁆𑀢𑀸. 𑀢𑀲𑁆𑀫𑀸 𑀢𑀁 𑀧𑀢𑁆𑀣𑁂𑀦𑁆𑀢𑁂𑀦 𑀓𑀸𑀫𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀳𑀁 𑀓𑀸𑀫𑁂𑀳𑀺 𑀲𑀁𑀕𑀘𑁆𑀙𑀺𑀦𑁆𑀢𑀺 𑀅𑀳𑀁 𑀓𑀤𑀸𑀘𑀺𑀧𑀺 𑀓𑀸𑀫𑁂𑀳𑀺 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬𑀁. 𑀓𑀲𑁆𑀫𑀸𑀢𑀺 𑀘𑁂 𑀆𑀳 𑁋 ‘‘𑀬𑁂𑀲𑀼 𑀢𑀸𑀡𑀁 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺, 𑀬𑁂𑀲𑀼 𑀓𑀸𑀫𑁂𑀲𑀼 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀅𑀦𑀢𑁆𑀣𑀧𑀭𑀺𑀢𑁆𑀢𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸 𑀫𑀳𑀸𑀪𑀺𑀢𑀸𑀧𑀝𑁆𑀞𑁂𑀦. 𑀤𑀼𑀔𑀸 𑀤𑀼𑀓𑁆𑀔𑀫𑀝𑁆𑀞𑁂𑀦.

𑀧𑀭𑀺𑀧𑀦𑁆𑀣𑁄 𑀏𑀲 𑀪𑀬𑁄 𑀬𑀤𑀺𑀤𑀁 𑀓𑀸𑀫𑀸 𑀦𑀸𑀫 𑀅𑀯𑀺𑀤𑀺𑀢𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑀢𑁆𑀢𑀸. 𑀲𑀯𑀺𑀖𑀸𑀢𑁄 𑀘𑀺𑀢𑁆𑀢𑀯𑀺𑀖𑀸𑀢𑀓𑀭𑀢𑁆𑀢𑀸. 𑀲𑀓𑀡𑁆𑀝𑀓𑁄 𑀯𑀺𑀦𑀺𑀯𑀺𑀚𑁆𑀛𑀦𑀢𑁆𑀢𑀸. 𑀕𑁂𑀥𑁄 𑀲𑀼𑀯𑀺𑀲𑀫𑁄 𑀘𑁂𑀲𑁄𑀢𑀺 𑀕𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀕𑁂𑀥𑁄. 𑀲𑀼𑀝𑁆𑀞𑀼 𑀯𑀺𑀲𑀫𑁄 𑀫𑀳𑀸𑀧𑀮𑀺𑀩𑁄𑀥𑁄 𑀲𑁄. 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀫𑀳𑀦𑁆𑀢𑁄. 𑀫𑁄𑀳𑀦𑀸𑀫𑀼𑀔𑁄 𑀫𑀼𑀘𑁆𑀙𑀸𑀧𑀢𑁆𑀢𑀺𑀳𑁂𑀢𑀼𑀢𑁄.

𑀉𑀧𑀲𑀕𑁆𑀕𑁄 𑀪𑀻𑀫𑀭𑀽𑀧𑁄𑀢𑀺 𑀅𑀢𑀺𑀪𑀺𑀁𑀲𑀦𑀓𑀲𑀪𑀸𑀯𑁄, 𑀫𑀳𑀦𑁆𑀢𑁄 𑀤𑁂𑀯𑀢𑀽𑀧𑀲𑀕𑁆𑀕𑁄 𑀯𑀺𑀬 𑀅𑀦𑀢𑁆𑀣𑀓𑀸𑀤𑀺𑀤𑀼𑀓𑁆𑀔𑀸𑀯𑀳𑀦𑀢𑁄. 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦.

𑀓𑀸𑀫𑀧𑀗𑁆𑀓𑁂𑀦 𑀲𑀢𑁆𑀢𑀸𑀢𑀺 𑀓𑀸𑀫𑀲𑀗𑁆𑀔𑀸𑀢𑁂𑀦 𑀧𑀗𑁆𑀓𑁂𑀦 𑀲𑀢𑁆𑀢𑀸 𑀮𑀕𑁆𑀕𑀸.

𑀤𑀼𑀕𑁆𑀕𑀢𑀺𑀕𑀫𑀦𑀁 𑀫𑀕𑁆𑀕𑀦𑁆𑀢𑀺 𑀦𑀺𑀭𑀬𑀸𑀤𑀺𑀅𑀧𑀸𑀬𑀕𑀸𑀫𑀺𑀦𑀁 𑀫𑀕𑁆𑀕𑀁. 𑀓𑀸𑀫𑀳𑁂𑀢𑀼𑀓𑀦𑁆𑀢𑀺 𑀓𑀸𑀫𑁄𑀧𑀪𑁄𑀕𑀳𑁂𑀢𑀼𑀓𑀁. 𑀩𑀳𑀼𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀪𑁂𑀤𑁂𑀦 𑀩𑀳𑀼𑀯𑀺𑀥𑀁. 𑀭𑁄𑀕𑀫𑀸𑀯𑀳𑀦𑁆𑀢𑀺 𑀭𑀼𑀚𑁆𑀚𑀦𑀝𑁆𑀞𑁂𑀦 𑀭𑁄𑀕𑀲𑀗𑁆𑀔𑀸𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀲𑁆𑀲 𑀤𑀼𑀓𑁆𑀔𑀲𑁆𑀲 𑀆𑀯𑀳𑀦𑀓𑀁.

𑀏𑀯𑀦𑁆𑀢𑀺 ‘‘𑀅𑀫𑀺𑀢𑁆𑀢𑀸 𑀯𑀥𑀓𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀫𑀺𑀢𑁆𑀢𑀚𑀦𑀦𑀸𑀢𑀺 𑀅𑀫𑀺𑀢𑁆𑀢𑀪𑀸𑀯𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀓𑀸. 𑀢𑀸𑀧𑀦𑀸𑀢𑀺 𑀲𑀦𑁆𑀢𑀸𑀧𑀦𑀓𑀸, 𑀢𑀧𑀦𑀻𑀬𑀸𑀢𑀺 𑀅𑀢𑁆𑀣𑁄. 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀲𑀁𑀓𑀺𑀮𑁂𑀲𑀸𑀯𑀳𑀸. 𑀮𑁄𑀓𑀸𑀫𑀺𑀲𑀸𑀢𑀺 𑀮𑁄𑀓𑁂 𑀆𑀫𑀺𑀲𑀪𑀽𑀢𑀸. 𑀩𑀦𑁆𑀥𑀦𑀺𑀬𑀸𑀢𑀺 𑀩𑀦𑁆𑀥𑀪𑀽𑀢𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀯𑀟𑁆𑀠𑀺𑀢𑀩𑁆𑀩𑀸, 𑀲𑀁𑀬𑁄𑀚𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀫𑀭𑀡𑀩𑀦𑁆𑀥𑀦𑀸𑀢𑀺 𑀪𑀯𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀧𑀯𑀢𑁆𑀢𑀓𑀸𑀭𑀡𑀢𑁄 𑀘 𑀫𑀭𑀡𑀯𑀺𑀩𑀦𑁆𑀥𑀦𑀸.

𑀉𑀫𑁆𑀫𑀸𑀤𑀦𑀸𑀢𑀺 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀦𑀁 𑀯𑀺𑀬𑁄𑀕𑀯𑀲𑁂𑀦 𑀲𑁄𑀓𑀼𑀫𑁆𑀫𑀸𑀤𑀓𑀭𑀸, 𑀯𑀟𑁆𑀠𑀺𑀬𑀸 𑀯𑀸 𑀉𑀧𑀭𑀽𑀧𑀭𑀺𑀫𑀤𑀸𑀯𑀳𑀸. 𑀉𑀮𑁆𑀮𑀧𑀦𑀸𑀢𑀺 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀮𑀧𑀸𑀧𑀦𑀓𑀸. ‘‘𑀉𑀮𑁆𑀮𑁄𑀮𑀦𑀸’’𑀢𑀺𑀧𑀺 𑀧𑀸𑀞𑁄, 𑀪𑀢𑁆𑀢𑀧𑀺𑀡𑁆𑀟𑀦𑀺𑀫𑀺𑀢𑁆𑀢𑀁 𑀦𑀗𑁆𑀕𑀼𑀝𑁆𑀞𑀁 𑀉𑀮𑁆𑀮𑁄𑀮𑁂𑀦𑁆𑀢𑁄 𑀲𑀼𑀦𑀔𑁄 𑀯𑀺𑀬 𑀆𑀫𑀺𑀲𑀳𑁂𑀢𑀼 𑀲𑀢𑁆𑀢𑁂 𑀉𑀧𑀭𑀽𑀧𑀭𑀺𑀮𑀸𑀮𑀦𑀸, 𑀧𑀭𑀸𑀪𑀯𑀸𑀯𑀜𑁆𑀜𑀸𑀢𑀧𑀸𑀧𑀦𑀓𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀧𑁆𑀧𑀫𑀸𑀣𑀺𑀦𑁄𑀢𑀺 𑀧𑀭𑀺𑀴𑀸𑀳𑀼𑀧𑁆𑀧𑀸𑀤𑀦𑀸𑀤𑀺𑀦𑀸 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀘𑀺𑀢𑁆𑀢𑀲𑁆𑀲 𑀧𑀫𑀣𑀦𑀲𑀻𑀮𑀸. ‘‘𑀘𑀺𑀢𑁆𑀢𑀧𑁆𑀧𑀫𑀤𑁆𑀤𑀺𑀦𑁄’’𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀬𑁂 𑀧𑀦 ‘‘𑀘𑀺𑀢𑁆𑀢𑀧𑁆𑀧𑀫𑀸𑀤𑀺𑀦𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀘𑀺𑀢𑁆𑀢𑀲𑁆𑀲 𑀧𑀫𑀸𑀤𑀸𑀯𑀳𑀸𑀢𑀺 𑀅𑀢𑁆𑀣𑁄. 𑀲𑀁𑀓𑀺𑀮𑁂𑀲𑀸𑀬𑀸𑀢𑀺 𑀯𑀺𑀩𑀸𑀥𑀦𑀸𑀬 𑀉𑀧𑀢𑀸𑀧𑀦𑀸𑀬 𑀯𑀸. 𑀔𑀺𑀧𑁆𑀧𑀁 𑀫𑀸𑀭𑁂𑀦 𑀑𑀟𑁆𑀟𑀺𑀢𑀦𑁆𑀢𑀺 𑀓𑀸𑀫𑀸 𑀦𑀸𑀫𑁂𑀢𑁂 𑀫𑀸𑀭𑁂𑀦 𑀑𑀟𑁆𑀟𑀺𑀢𑀁 𑀓𑀼𑀫𑀺𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀸 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀦𑀢𑁄.

𑀅𑀦𑀦𑁆𑀢𑀸𑀤𑀻𑀦𑀯𑀸𑀢𑀺 ‘‘𑀮𑁄𑀪𑀦𑀁 𑀫𑀤𑀦𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺𑀦𑀸, ‘‘𑀇𑀥 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁬𑁭) 𑀘 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀧𑀭𑀺𑀬𑀦𑁆𑀢𑀸𑀤𑀻𑀦𑀯𑀸 𑀩𑀳𑀼𑀤𑁄𑀲𑀸. 𑀩𑀳𑀼𑀤𑀼𑀓𑁆𑀔𑀸𑀢𑀺 𑀆𑀧𑀸𑀬𑀺𑀓𑀸𑀤𑀺𑀩𑀳𑀼𑀯𑀺𑀥𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀸. 𑀫𑀳𑀸𑀯𑀺𑀲𑀸𑀢𑀺 𑀓𑀝𑀼𑀓𑀸𑀲𑀬𑁆𑀳𑀨𑀮𑀢𑀸𑀬 𑀳𑀮𑀸𑀳𑀮𑀸𑀤𑀺𑀫𑀳𑀸𑀯𑀺𑀲𑀲𑀤𑀺𑀲𑀸. 𑀅𑀧𑁆𑀧𑀲𑁆𑀲𑀸𑀤𑀸𑀢𑀺 𑀲𑀢𑁆𑀣𑀥𑀸𑀭𑀸𑀕𑀢𑀫𑀥𑀼𑀩𑀺𑀦𑁆𑀤𑀼 𑀯𑀺𑀬 𑀧𑀭𑀺𑀢𑁆𑀢𑀲𑁆𑀲𑀸𑀤𑀸. 𑀭𑀡𑀓𑀭𑀸𑀢𑀺 𑀲𑀸𑀭𑀸𑀕𑀸𑀤𑀺𑀲𑀁𑀯𑀟𑁆𑀠𑀓𑀸. 𑀲𑀼𑀓𑁆𑀓𑀧𑀓𑁆𑀔𑀯𑀺𑀲𑁄𑀲𑀦𑀸𑀢𑀺 𑀲𑀢𑁆𑀢𑀸𑀦𑀁 𑀅𑀦𑀯𑀚𑁆𑀚𑀓𑁄𑀝𑁆𑀞𑀸𑀲𑀲𑁆𑀲 𑀯𑀺𑀦𑀸𑀲𑀓𑀸.

𑀲𑀸𑀳𑀦𑁆𑀢𑀺 𑀲𑀸 𑀅𑀳𑀁, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀏𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀓𑀢𑁆𑀯𑀸𑀢𑀺 𑀇𑀢𑀺 𑀓𑀢𑁆𑀯𑀸, 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀢𑀁 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀻𑀢𑀺 𑀢𑀁 𑀫𑀬𑀸 𑀧𑀼𑀩𑁆𑀩𑁂 𑀯𑀦𑁆𑀢𑀓𑀸𑀫𑁂 𑀧𑀼𑀦 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺. 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸 𑀲𑀤𑀸𑀢𑀺 𑀬𑀲𑁆𑀫𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑀸𑀮𑀁 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸, 𑀢𑀲𑁆𑀫𑀸 𑀦 𑀢𑀁 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸.

𑀭𑀡𑀁 𑀢𑀭𑀺𑀢𑁆𑀯𑀸 𑀓𑀸𑀫𑀸𑀦𑀦𑁆𑀢𑀺 𑀓𑀸𑀫𑀸𑀦𑀁 𑀭𑀡𑀁 𑀢𑀭𑀺𑀢𑁆𑀯𑀸, 𑀢𑀜𑁆𑀘 𑀫𑀬𑀸 𑀓𑀸𑀢𑀩𑁆𑀩𑀁 𑀅𑀭𑀺𑀬𑀫𑀕𑁆𑀕𑀲𑀁𑀧𑀳𑀸𑀭𑀁 𑀓𑀢𑁆𑀯𑀸. 𑀲𑀻𑀢𑀺𑀪𑀸𑀯𑀸𑀪𑀺𑀓𑀗𑁆𑀔𑀺𑀦𑀻𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑁂𑀦 𑀲𑀻𑀢𑀺𑀪𑀸𑀯𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀅𑀪𑀺𑀓𑀗𑁆𑀔𑀦𑁆𑀢𑀻. 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁂𑀢𑀺 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀔𑀬𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀅𑀪𑀺𑀭𑀢𑀸.

𑀬𑁂𑀦 𑀢𑀺𑀡𑁆𑀡𑀸 𑀫𑀳𑁂𑀲𑀺𑀦𑁄𑀢𑀺 𑀬𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀩𑀼𑀤𑁆𑀥𑀸𑀤𑀬𑁄 𑀫𑀳𑁂𑀲𑀺𑀦𑁄 𑀲𑀁𑀲𑀸𑀭𑀫𑀳𑁄𑀖𑀁 𑀢𑀺𑀡𑁆𑀡𑀸, 𑀅𑀳𑀫𑁆𑀧𑀺 𑀢𑁂𑀳𑀺 𑀕𑀢𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀧𑀸𑀧𑀼𑀡𑀸𑀫𑀻𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀝𑁆𑀞𑀦𑁆𑀢𑀺 𑀅𑀭𑀺𑀬𑀨𑀮𑀥𑀫𑁆𑀫𑁂 𑀞𑀺𑀢𑀁. 𑀅𑀦𑁂𑀚𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥 𑀏𑀚𑀢𑀸𑀬 𑀅𑀦𑁂𑀚𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀅𑀕𑁆𑀕𑀨𑀮𑀁. 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀥𑀺𑀕𑀦𑁆𑀢𑁆𑀯𑀸. 𑀛𑀸𑀬𑀢𑀻𑀢𑀺 𑀢𑀫𑁂𑀯 𑀨𑀮𑀚𑁆𑀛𑀸𑀦𑀁 𑀉𑀧𑀦𑀺𑀚𑁆𑀛𑀸𑀬𑀢𑀺.

𑀅𑀚𑁆𑀚𑀝𑁆𑀞𑀫𑀻 𑀧𑀩𑁆𑀩𑀚𑀺𑀢𑀸𑀢𑀺 𑀧𑀩𑁆𑀩𑀚𑀺𑀢𑀸 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀢𑁄 𑀧𑀝𑁆𑀞𑀸𑀬 𑀅𑀚𑁆𑀚 𑀅𑀝𑁆𑀞𑀫𑀤𑀺𑀯𑀲𑁄, 𑀇𑀢𑁄 𑀅𑀢𑀻𑀢𑁂 𑀅𑀝𑁆𑀞𑀫𑀺𑀬𑀁 𑀧𑀩𑁆𑀩𑀚𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸. 𑀲𑀤𑁆𑀥𑀫𑁆𑀫𑀲𑁄𑀪𑀦𑀸𑀢𑀺 𑀲𑀤𑁆𑀥𑀫𑁆𑀫𑀸𑀥𑀺𑀕𑀫𑁂𑀦 𑀲𑁄𑀪𑀦𑀸.

𑀪𑀼𑀚𑀺𑀲𑁆𑀲𑀸𑀢𑀺 𑀤𑀸𑀲𑀪𑀸𑀯𑀲𑀤𑀺𑀲𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑁂𑀦 𑀪𑀼𑀚𑀺𑀲𑁆𑀲𑀸. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀇𑀡𑀸𑀧𑀕𑀫𑁂𑀦 𑀅𑀡𑀡𑀸.

𑀇𑀫𑀸 𑀓𑀺𑀭 𑀢𑀺𑀲𑁆𑀲𑁄 𑀕𑀸𑀣𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀣𑁂𑀭𑀺𑀁 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀲𑀁𑀲𑀦𑁆𑀢𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸.

𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀁 𑀧𑀯𑀢𑁆𑀢𑀺𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 ‘‘𑀏𑀯𑀁 𑀲𑀢𑁆𑀣𑀸𑀭𑀸 𑀧𑀲𑀁𑀲𑀻𑀬𑀫𑀸𑀦𑀸 𑀅𑀬𑀁 𑀣𑁂𑀭𑀻 𑀬𑀲𑁆𑀫𑀸 𑀤𑁂𑀯𑁂𑀳𑀺 𑀘 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀸’’𑀢𑀺 𑀢𑀸𑀯𑀤𑁂𑀯 𑀢𑀸𑀯𑀢𑀺𑀁𑀲𑁂𑀳𑀺 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀁 𑁋

‘‘𑀢𑀁 𑀲𑀓𑁆𑀓𑁄 𑀤𑁂𑀯𑀲𑀗𑁆𑀖𑁂𑀦, 𑀉𑀧𑀲𑀗𑁆𑀓𑀫𑁆𑀫 𑀇𑀤𑁆𑀥𑀺𑀬𑀸;

𑀦𑀫𑀲𑁆𑀲𑀢𑀺 𑀪𑀽𑀢𑀧𑀢𑀺, 𑀲𑀼𑀪𑀁 𑀓𑀫𑁆𑀫𑀸𑀭𑀥𑀻𑀢𑀭’’𑀦𑁆𑀢𑀺.

𑀢𑀢𑁆𑀣 𑀢𑀻𑀲𑀼 𑀓𑀸𑀫𑀪𑀯𑁂𑀲𑀼 𑀪𑀽𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀢𑀺 𑀇𑀲𑁆𑀲𑀭𑁄𑀢𑀺 𑀓𑀢𑁆𑀯𑀸 𑀪𑀽𑀢𑀧𑀢𑀻𑀢𑀺 𑀮𑀤𑁆𑀥𑀦𑀸𑀫𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀢𑀁 𑀲𑀼𑀪𑀁 𑀓𑀫𑁆𑀫𑀸𑀭𑀥𑀻𑀢𑀭𑀁 𑀅𑀢𑁆𑀢𑀦𑁄 𑀤𑁂𑀯𑀺𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑁆𑀫 𑀦𑀫𑀲𑁆𑀲𑀢𑀺, 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀪𑀸𑀓𑀫𑁆𑀫𑀸𑀭𑀥𑀻𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀲𑀢𑀺𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀢𑀺𑀁𑀲𑀦𑀺𑀧𑀸𑀢𑁄

𑁧. 𑀲𑀼𑀪𑀸𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀢𑀺𑀁𑀲𑀦𑀺𑀧𑀸𑀢𑁂 𑀚𑀻𑀯𑀓𑀫𑁆𑀩𑀯𑀦𑀁 𑀭𑀫𑁆𑀫𑀦𑁆𑀢𑀺𑀆𑀤𑀺𑀓𑀸 𑀲𑀼𑀪𑀸𑀬 𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀲𑀫𑁆𑀪𑀸𑀯𑀺𑀢𑀓𑀼𑀲𑀮𑀫𑀽𑀮𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀧𑀭𑀺𑀧𑀓𑁆𑀓𑀜𑀸𑀡𑀸 𑀳𑀼𑀢𑁆𑀯𑀸, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀪𑀸𑀢𑀺𑀲𑁆𑀲𑀸 𑀦𑀸𑀫𑀫𑀳𑁄𑀲𑀺. 𑀢𑀲𑁆𑀲𑀸 𑀓𑀺𑀭 𑀲𑀭𑀻𑀭𑀸𑀯𑀬𑀯𑀸 𑀲𑁄𑀪𑀦𑀯𑀡𑁆𑀡𑀬𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀲𑀼𑀪𑀸𑀢𑀺 𑀅𑀦𑁆𑀯𑀢𑁆𑀣𑀫𑁂𑀯 𑀦𑀸𑀫𑀁 𑀚𑀸𑀢𑀁. 𑀲𑀸 𑀲𑀢𑁆𑀣𑀼 𑀭𑀸𑀚𑀕𑀳𑀧𑁆𑀧𑀯𑁂𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀁𑀲𑀸𑀭𑁂 𑀚𑀸𑀢𑀲𑀁𑀯𑁂𑀕𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀦𑁂𑀓𑁆𑀔𑀫𑁆𑀫𑀜𑁆𑀘 𑀔𑁂𑀫𑀢𑁄 𑀲𑀮𑁆𑀮𑀓𑁆𑀔𑀦𑁆𑀢𑀻 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀓𑀢𑀺𑀧𑀸𑀳𑁂𑀦𑁂𑀯 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑁄 𑀭𑀸𑀚𑀕𑀳𑀯𑀸𑀲𑀻 𑀥𑀼𑀢𑁆𑀢𑀧𑀼𑀭𑀺𑀲𑁄 𑀢𑀭𑀼𑀡𑁄 𑀧𑀞𑀫𑀬𑁄𑀩𑁆𑀩𑀦𑁂 𑀞𑀺𑀢𑁄 𑀚𑀻𑀯𑀓𑀫𑁆𑀩𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀸𑀬 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀫𑀕𑁆𑀕𑀁 𑀑𑀯𑀭𑀦𑁆𑀢𑁄 𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑁂𑀲𑀺. 𑀲𑀸 𑀢𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀅𑀢𑁆𑀢𑀦𑁄 𑀘 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀁 𑀧𑀯𑁂𑀤𑁂𑀦𑁆𑀢𑀻 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸𑀧𑀺 𑀦 𑀧𑀝𑀺𑀓𑁆𑀓𑀫𑀢𑀺, 𑀦𑀺𑀩𑀦𑁆𑀥𑀢𑀺𑀬𑁂𑀯. 𑀣𑁂𑀭𑀻 𑀦𑀁 𑀅𑀢𑁆𑀢𑀦𑁄 𑀯𑀘𑀦𑁂 𑀅𑀢𑀺𑀝𑁆𑀞𑀦𑁆𑀢𑀁 𑀅𑀓𑁆𑀔𑀺𑀫𑁆𑀳𑀺 𑀘 𑀅𑀪𑀺𑀭𑀢𑁆𑀢𑀁 𑀤𑀺𑀲𑁆𑀯𑀸, ‘‘𑀳𑀦𑁆𑀤, 𑀢𑀬𑀸 𑀲𑀫𑁆𑀪𑀸𑀯𑀺𑀢𑀁 𑀅𑀓𑁆𑀔𑀺’’𑀦𑁆𑀢𑀺 𑀅𑀢𑁆𑀢𑀦𑁄 𑀏𑀓𑀁 𑀅𑀓𑁆𑀔𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀲𑁆𑀲 𑀉𑀧𑀦𑁂𑀲𑀺. 𑀢𑀢𑁄 𑀲𑁄 𑀧𑀼𑀭𑀺𑀲𑁄 𑀲𑀦𑁆𑀢𑀸𑀲𑁄 𑀲𑀁𑀯𑁂𑀕𑀚𑀸𑀢𑁄 𑀢𑀢𑁆𑀣 𑀯𑀺𑀕𑀢𑀭𑀸𑀕𑁄𑀯 𑀳𑀼𑀢𑁆𑀯𑀸 𑀣𑁂𑀭𑀺𑀁 𑀔𑀫𑀸𑀧𑁂𑀢𑁆𑀯𑀸 𑀕𑀢𑁄. 𑀣𑁂𑀭𑀻 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀼𑀦𑁄 𑀲𑀳 𑀤𑀲𑁆𑀲𑀦𑁂𑀦𑁂𑀯𑀲𑁆𑀲𑀸 𑀅𑀓𑁆𑀔𑀺 𑀧𑀝𑀺𑀧𑀸𑀓𑀢𑀺𑀓𑀁 𑀅𑀳𑁄𑀲𑀺. 𑀢𑀢𑁄 𑀲𑀸 𑀩𑀼𑀤𑁆𑀥𑀕𑀢𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑀸 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀸𑀯𑀤𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑀻 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑀸 𑀢𑁂𑀦 𑀘 𑀥𑀼𑀢𑁆𑀢𑀧𑀼𑀭𑀺𑀲𑁂𑀦 𑀯𑀼𑀢𑁆𑀢𑀕𑀸𑀣𑀸 𑀉𑀤𑀸𑀦𑀯𑀲𑁂𑀦 𑁋

𑁩𑁬𑁮.

‘‘𑀚𑀻𑀯𑀓𑀫𑁆𑀩𑀯𑀦𑀁 𑀭𑀫𑁆𑀫𑀁, 𑀕𑀘𑁆𑀙𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁 𑀲𑀼𑀪𑀁;

𑀥𑀼𑀢𑁆𑀢𑀓𑁄 𑀲𑀦𑁆𑀦𑀺𑀯𑀸𑀭𑁂𑀲𑀺, 𑀢𑀫𑁂𑀦𑀁 𑀅𑀩𑁆𑀭𑀯𑀻 𑀲𑀼𑀪𑀸.

𑁩𑁬𑁯.

‘‘𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢𑀁 𑀫𑀬𑀸, 𑀬𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺;

𑀦 𑀳𑀺 𑀧𑀩𑁆𑀩𑀚𑀺𑀢𑀸𑀬 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀫𑁆𑀨𑀼𑀲𑀦𑀸𑀬 𑀓𑀧𑁆𑀧𑀢𑀺.

𑁩𑁭𑁦.

‘‘𑀕𑀭𑀼𑀓𑁂 𑀫𑀫 𑀲𑀢𑁆𑀣𑀼𑀲𑀸𑀲𑀦𑁂, 𑀬𑀸 𑀲𑀺𑀓𑁆𑀔𑀸 𑀲𑀼𑀕𑀢𑁂𑀦 𑀤𑁂𑀲𑀺𑀢𑀸;

𑀧𑀭𑀺𑀲𑀼𑀤𑁆𑀥𑀧𑀤𑀁 𑀅𑀦𑀗𑁆𑀕𑀡𑀁, 𑀓𑀺𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺.

𑁩𑁭𑁧.

‘‘𑀆𑀯𑀺𑀮𑀘𑀺𑀢𑁆𑀢𑁄 𑀅𑀦𑀸𑀯𑀺𑀮𑀁, 𑀲𑀭𑀚𑁄 𑀯𑀻𑀢𑀭𑀚𑀁 𑀅𑀦𑀗𑁆𑀕𑀡𑀁;

𑀲𑀩𑁆𑀩𑀢𑁆𑀣 𑀯𑀺𑀫𑀼𑀢𑁆𑀢𑀫𑀸𑀦𑀲𑀁, 𑀓𑀺𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺.

𑁩𑁭𑁨.

‘‘𑀤𑀳𑀭𑀸 𑀘 𑀅𑀧𑀸𑀧𑀺𑀓𑀸 𑀘𑀲𑀺, 𑀓𑀺𑀁 𑀢𑁂 𑀧𑀩𑁆𑀩𑀚𑁆𑀚𑀸 𑀓𑀭𑀺𑀲𑁆𑀲𑀢𑀺;

𑀦𑀺𑀓𑁆𑀔𑀺𑀧 𑀓𑀸𑀲𑀸𑀬𑀘𑀻𑀯𑀭𑀁, 𑀏𑀳𑀺 𑀭𑀫𑀸𑀫 𑀲𑀼𑀧𑀼𑀧𑁆𑀨𑀺𑀢𑁂 𑀯𑀦𑁂.

𑁩𑁭𑁩.

‘‘𑀫𑀥𑀼𑀭𑀜𑁆𑀘 𑀧𑀯𑀦𑁆𑀢𑀺 𑀲𑀩𑁆𑀩𑀲𑁄, 𑀓𑀼𑀲𑀼𑀫𑀭𑀚𑁂𑀦 𑀲𑀫𑀼𑀝𑁆𑀞𑀺𑀢𑀸 𑀤𑀼𑀫𑀸;

𑀧𑀞𑀫𑀯𑀲𑀦𑁆𑀢𑁄 𑀲𑀼𑀔𑁄 𑀉𑀢𑀼, 𑀏𑀳𑀺 𑀭𑀫𑀸𑀫 𑀲𑀼𑀧𑀼𑀧𑁆𑀨𑀺𑀢𑁂 𑀯𑀦𑁂.

𑁩𑁭𑁪.

‘‘𑀓𑀼𑀲𑀼𑀫𑀺𑀢𑀲𑀺𑀔𑀭𑀸 𑀘 𑀧𑀸𑀤𑀧𑀸, 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀫𑀸𑀮𑀼𑀢𑁂𑀭𑀺𑀢𑀸;

𑀓𑀸 𑀢𑀼𑀬𑁆𑀳𑀁 𑀭𑀢𑀺 𑀪𑀯𑀺𑀲𑁆𑀲𑀢𑀺, 𑀬𑀤𑀺 𑀏𑀓𑀸 𑀯𑀦𑀫𑁄𑀕𑀳𑀺𑀲𑁆𑀲𑀲𑀺.

𑁩𑁭𑁫.

‘‘𑀯𑀸𑀴𑀫𑀺𑀕𑀲𑀗𑁆𑀖𑀲𑁂𑀯𑀺𑀢𑀁, 𑀓𑀼𑀜𑁆𑀚𑀭𑀫𑀢𑁆𑀢𑀓𑀭𑁂𑀡𑀼𑀮𑁄𑀴𑀺𑀢𑀁;

𑀅𑀲𑀳𑀸𑀬𑀺𑀓𑀸 𑀕𑀦𑁆𑀢𑀼𑀫𑀺𑀘𑁆𑀙𑀲𑀺, 𑀭𑀳𑀺𑀢𑀁 𑀪𑀺𑀁𑀲𑀦𑀓𑀁 𑀫𑀳𑀸𑀯𑀦𑀁.

𑁩𑁭𑁬.

‘‘𑀢𑀧𑀦𑀻𑀬𑀓𑀢𑀸𑀯 𑀥𑀻𑀢𑀺𑀓𑀸, 𑀯𑀺𑀘𑀭𑀲𑀺 𑀘𑀺𑀢𑁆𑀢𑀮𑀢𑁂𑀯 𑀅𑀘𑁆𑀙𑀭𑀸;

𑀓𑀸𑀲𑀺𑀓𑀲𑀼𑀔𑀼𑀫𑁂𑀳𑀺 𑀯𑀕𑁆𑀕𑀼𑀪𑀺, 𑀲𑁄𑀪𑀲𑀻 𑀲𑀼𑀯𑀲𑀦𑁂𑀳𑀺 𑀦𑀽𑀧𑀫𑁂.

𑁩𑁭𑁭.

‘‘𑀅𑀳𑀁 𑀢𑀯 𑀯𑀲𑀸𑀦𑀼𑀕𑁄 𑀲𑀺𑀬𑀁, 𑀬𑀤𑀺 𑀯𑀺𑀳𑀭𑁂𑀫𑀲𑁂 𑀓𑀸𑀦𑀦𑀦𑁆𑀢𑀭𑁂;

𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄, 𑀧𑀸𑀡𑁄 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂.

𑁩𑁭𑁮.

‘‘𑀬𑀤𑀺 𑀫𑁂 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀲𑀼𑀔𑀺𑀢𑀸 𑀏𑀳𑀺 𑀅𑀕𑀸𑀭𑀫𑀸𑀯𑀲;

𑀧𑀸𑀲𑀸𑀤𑀦𑀺𑀯𑀸𑀢𑀯𑀸𑀲𑀺𑀦𑀻, 𑀧𑀭𑀺𑀓𑀫𑁆𑀫𑀁 𑀢𑁂 𑀓𑀭𑁄𑀦𑁆𑀢𑀼 𑀦𑀸𑀭𑀺𑀬𑁄.

𑁩𑁭𑁯.

‘‘𑀓𑀸𑀲𑀺𑀓𑀲𑀼𑀔𑀼𑀫𑀸𑀦𑀺 𑀥𑀸𑀭𑀬, 𑀅𑀪𑀺𑀭𑁄𑀧𑁂𑀳𑀺 𑀘 𑀫𑀸𑀮𑀯𑀡𑁆𑀡𑀓𑀁;

𑀓𑀜𑁆𑀘𑀦𑀫𑀡𑀺𑀫𑀼𑀢𑁆𑀢𑀓𑀁 𑀩𑀳𑀼𑀁, 𑀯𑀺𑀯𑀺𑀥𑀁 𑀆𑀪𑀭𑀡𑀁 𑀓𑀭𑁄𑀫𑀺 𑀢𑁂.

𑁩𑁮𑁦.

‘‘𑀲𑀼𑀥𑁄𑀢𑀭𑀚𑀧𑀘𑁆𑀙𑀤𑀁 𑀲𑀼𑀪𑀁, 𑀕𑁄𑀦𑀓𑀢𑀽𑀮𑀺𑀓𑀲𑀦𑁆𑀣𑀢𑀁 𑀦𑀯𑀁;

𑀅𑀪𑀺𑀭𑀼𑀳 𑀲𑀬𑀦𑀁 𑀫𑀳𑀸𑀭𑀳𑀁, 𑀘𑀦𑁆𑀤𑀦𑀫𑀡𑁆𑀟𑀺𑀢𑀲𑀸𑀭𑀕𑀦𑁆𑀥𑀺𑀓𑀁.

𑁩𑁮𑁧.

‘‘𑀉𑀧𑁆𑀧𑀮𑀁 𑀘𑀼𑀤𑀓𑀸 𑀲𑀫𑀼𑀕𑁆𑀕𑀢𑀁, 𑀬𑀣𑀸 𑀢𑀁 𑀅𑀫𑀦𑀼𑀲𑁆𑀲𑀲𑁂𑀯𑀺𑀢𑀁;

𑀏𑀯𑀁 𑀢𑁆𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻, 𑀲𑀓𑁂𑀲𑀗𑁆𑀕𑁂𑀲𑀼 𑀚𑀭𑀁 𑀕𑀫𑀺𑀲𑁆𑀲𑀲𑀺.

𑁩𑁮𑁨.

‘‘𑀓𑀺𑀁 𑀢𑁂 𑀇𑀥 𑀲𑀸𑀭𑀲𑀫𑁆𑀫𑀢𑀁, 𑀓𑀼𑀡𑀧𑀧𑀽𑀭𑀫𑁆𑀳𑀺 𑀲𑀼𑀲𑀸𑀦𑀯𑀟𑁆𑀠𑀦𑁂;

𑀪𑁂𑀤𑀦𑀥𑀫𑁆𑀫𑁂 𑀓𑀴𑁂𑀯𑀭𑁂, 𑀬𑀁 𑀤𑀺𑀲𑁆𑀯𑀸 𑀯𑀺𑀫𑀦𑁄 𑀉𑀤𑀺𑀓𑁆𑀔𑀲𑀺.

𑁩𑁮𑁩.

‘‘𑀅𑀓𑁆𑀔𑀻𑀦𑀺 𑀘 𑀢𑀽𑀭𑀺𑀬𑀸𑀭𑀺𑀯, 𑀓𑀺𑀦𑁆𑀦𑀭𑀺𑀬𑀸𑀭𑀺𑀯 𑀧𑀩𑁆𑀩𑀢𑀦𑁆𑀢𑀭𑁂;

𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬, 𑀪𑀺𑀬𑁆𑀬𑁄 𑀓𑀸𑀫𑀭𑀢𑀻 𑀧𑀯𑀟𑁆𑀠𑀢𑀺.

𑁩𑁮𑁪.

‘‘𑀉𑀧𑁆𑀧𑀮𑀲𑀺𑀔𑀭𑁄𑀧𑀫𑀸𑀦𑀺 𑀢𑁂, 𑀯𑀺𑀫𑀮𑁂 𑀳𑀸𑀝𑀓𑀲𑀦𑁆𑀦𑀺𑀪𑁂 𑀫𑀼𑀔𑁂;

𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬, 𑀪𑀺𑀬𑁆𑀬𑁄 𑀓𑀸𑀫𑀕𑀼𑀡𑁄 𑀧𑀯𑀟𑁆𑀠𑀢𑀺.

𑁩𑁮𑁫.

‘‘𑀅𑀧𑀺 𑀤𑀽𑀭𑀕𑀢𑀸 𑀲𑀭𑀫𑁆𑀳𑀲𑁂, 𑀆𑀬𑀢𑀧𑀫𑁆𑀳𑁂 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁂;

𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄, 𑀦𑀬𑀦𑀸 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂.

𑁩𑁮𑁬.

‘‘𑀅𑀧𑀣𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀺, 𑀘𑀦𑁆𑀤𑀁 𑀓𑀻𑀴𑀦𑀓𑀁 𑀕𑀯𑁂𑀲𑀲𑀺;

𑀫𑁂𑀭𑀼𑀁 𑀮𑀗𑁆𑀖𑁂𑀢𑀼𑀫𑀺𑀘𑁆𑀙𑀲𑀺, 𑀬𑁄 𑀢𑁆𑀯𑀁 𑀩𑀼𑀤𑁆𑀥𑀲𑀼𑀢𑀁 𑀫𑀕𑁆𑀕𑀬𑀲𑀺.

𑁩𑁮𑁭.

‘‘𑀦𑀢𑁆𑀣𑀺 𑀳𑀺 𑀮𑁄𑀓𑁂 𑀲𑀤𑁂𑀯𑀓𑁂, 𑀭𑀸𑀕𑁄 𑀬𑀢𑁆𑀣𑀧𑀺 𑀤𑀸𑀦𑀺 𑀫𑁂 𑀲𑀺𑀬𑀸;

𑀦𑀧𑀺 𑀦𑀁 𑀚𑀸𑀦𑀸𑀫𑀺 𑀓𑀻𑀭𑀺𑀲𑁄, 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄.

𑁩𑁮𑁮.

‘‘𑀇𑀗𑁆𑀕𑀸𑀮𑀓𑀼𑀬𑀸𑀯 𑀉𑀚𑁆𑀛𑀺𑀢𑁄, 𑀯𑀺𑀲𑀧𑀢𑁆𑀢𑁄𑀭𑀺𑀯 𑀅𑀕𑁆𑀕𑀺𑀢𑁄 𑀓𑀢𑁄;

𑀦𑀧𑀺 𑀦𑀁 𑀧𑀲𑁆𑀲𑀸𑀫𑀺 𑀓𑀻𑀭𑀺𑀲𑁄, 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄.

𑁩𑁮𑁯.

‘‘𑀬𑀲𑁆𑀲𑀸 𑀲𑀺𑀬𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀁, 𑀲𑀢𑁆𑀣𑀸 𑀯𑀸 𑀅𑀦𑀼𑀧𑀸𑀲𑀺𑀢𑁄 𑀲𑀺𑀬𑀸;

𑀢𑁆𑀯𑀁 𑀢𑀸𑀤𑀺𑀲𑀺𑀓𑀁 𑀧𑀮𑁄𑀪𑀬, 𑀚𑀸𑀦𑀦𑁆𑀢𑀺𑀁 𑀲𑁄 𑀇𑀫𑀁 𑀯𑀺𑀳𑀜𑁆𑀜𑀲𑀺.

𑁩𑁯𑁦.

‘‘𑀫𑀬𑁆𑀳𑀜𑁆𑀳𑀺 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑁂, 𑀲𑀼𑀔𑀤𑀼𑀓𑁆𑀔𑁂 𑀘 𑀲𑀢𑀻 𑀉𑀧𑀝𑁆𑀞𑀺𑀢𑀸;

𑀲𑀗𑁆𑀔𑀢𑀫𑀲𑀼𑀪𑀦𑁆𑀢𑀺 𑀚𑀸𑀦𑀺𑀬, 𑀲𑀩𑁆𑀩𑀢𑁆𑀣𑁂𑀯 𑀫𑀦𑁄 𑀦 𑀮𑀺𑀫𑁆𑀧𑀢𑀺.

𑁩𑁯𑁧.

‘‘𑀲𑀸𑀳𑀁 𑀲𑀼𑀕𑀢𑀲𑁆𑀲 𑀲𑀸𑀯𑀺𑀓𑀸, 𑀫𑀕𑁆𑀕𑀝𑁆𑀞𑀗𑁆𑀕𑀺𑀓𑀬𑀸𑀦𑀬𑀸𑀬𑀺𑀦𑀻;

𑀉𑀤𑁆𑀥𑀝𑀲𑀮𑁆𑀮𑀸 𑀅𑀦𑀸𑀲𑀯𑀸, 𑀲𑀼𑀜𑁆𑀜𑀸𑀕𑀸𑀭𑀕𑀢𑀸 𑀭𑀫𑀸𑀫𑀳𑀁.

𑁩𑁯𑁨.

‘‘𑀤𑀺𑀝𑁆𑀞𑀸 𑀳𑀺 𑀫𑀬𑀸 𑀲𑀼𑀘𑀺𑀢𑁆𑀢𑀺𑀢𑀸, 𑀲𑁄𑀫𑁆𑀪𑀸 𑀤𑀸𑀭𑀼𑀓𑀧𑀺𑀮𑁆𑀮𑀓𑀸𑀦𑀺 𑀯𑀸;

𑀢𑀦𑁆𑀢𑀻𑀳𑀺 𑀘 𑀔𑀻𑀮𑀓𑁂𑀳𑀺 𑀘, 𑀯𑀺𑀦𑀺𑀩𑀤𑁆𑀥𑀸 𑀯𑀺𑀯𑀺𑀥𑀁 𑀧𑀦𑀘𑁆𑀘𑀓𑀸.

𑁩𑁯𑁩.

‘‘𑀢𑀫𑁆𑀳𑀼𑀤𑁆𑀥𑀝𑁂 𑀢𑀦𑁆𑀢𑀺𑀔𑀻𑀮𑀓𑁂, 𑀯𑀺𑀲𑁆𑀲𑀝𑁆𑀞𑁂 𑀯𑀺𑀓𑀮𑁂 𑀧𑀭𑀺𑀓𑁆𑀭𑀺𑀢𑁂;

𑀦 𑀯𑀺𑀦𑁆𑀤𑁂𑀬𑁆𑀬 𑀔𑀡𑁆𑀟𑀲𑁄 𑀓𑀢𑁂, 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂.

𑁩𑁯𑁪.

‘‘𑀢𑀣𑀽𑀧𑀫𑀸 𑀤𑁂𑀳𑀓𑀸𑀦𑀺 𑀫𑀁, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀦𑁆𑀢𑀺;

𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂.

𑁩𑁯𑁫.

‘‘𑀬𑀣𑀸 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁, 𑀅𑀤𑁆𑀤𑀲 𑀘𑀺𑀢𑁆𑀢𑀺𑀓𑀁 𑀪𑀺𑀢𑁆𑀢𑀺𑀬𑀸 𑀓𑀢𑀁;

𑀢𑀫𑁆𑀳𑀺 𑀢𑁂 𑀯𑀺𑀧𑀭𑀻𑀢𑀤𑀲𑁆𑀲𑀦𑀁, 𑀲𑀜𑁆𑀜𑀸 𑀫𑀸𑀦𑀼𑀲𑀺𑀓𑀸 𑀦𑀺𑀭𑀢𑁆𑀣𑀺𑀓𑀸.

𑁩𑁯𑁬.

‘‘𑀫𑀸𑀬𑀁 𑀯𑀺𑀬 𑀅𑀕𑁆𑀕𑀢𑁄 𑀓𑀢𑀁, 𑀲𑀼𑀧𑀺𑀦𑀦𑁆𑀢𑁂𑀯 𑀲𑀼𑀯𑀡𑁆𑀡𑀧𑀸𑀤𑀧𑀁;

𑀉𑀧𑀕𑀘𑁆𑀙𑀲𑀺 𑀅𑀦𑁆𑀥 𑀭𑀺𑀢𑁆𑀢𑀓𑀁, 𑀚𑀦𑀫𑀚𑁆𑀛𑁂𑀭𑀺𑀯 𑀭𑀼𑀧𑁆𑀧𑀭𑀽𑀧𑀓𑀁.

𑁩𑁯𑁭.

‘‘𑀯𑀝𑁆𑀝𑀦𑀺𑀭𑀺𑀯 𑀓𑁄𑀝𑀭𑁄𑀳𑀺𑀢𑀸, 𑀫𑀚𑁆𑀛𑁂 𑀧𑀼𑀩𑁆𑀩𑀼𑀴𑀓𑀸 𑀲𑀅𑀲𑁆𑀲𑀼𑀓𑀸;

𑀧𑀻𑀴𑀓𑁄𑀴𑀺𑀓𑀸 𑀘𑁂𑀢𑁆𑀣 𑀚𑀸𑀬𑀢𑀺, 𑀯𑀺𑀯𑀺𑀥𑀸 𑀘𑀓𑁆𑀔𑀼𑀯𑀺𑀥𑀸 𑀘 𑀧𑀺𑀡𑁆𑀟𑀺𑀢𑀸.

𑁩𑁯𑁮.

‘‘𑀉𑀧𑁆𑀧𑀸𑀝𑀺𑀬 𑀘𑀸𑀭𑀼𑀤𑀲𑁆𑀲𑀦𑀸, 𑀦 𑀘 𑀧𑀚𑁆𑀚𑀺𑀢𑁆𑀣 𑀅𑀲𑀗𑁆𑀕𑀫𑀸𑀦𑀲𑀸;

𑀳𑀦𑁆𑀤 𑀢𑁂 𑀘𑀓𑁆𑀔𑀼𑀁 𑀳𑀭𑀲𑁆𑀲𑀼 𑀢𑀁, 𑀢𑀲𑁆𑀲 𑀦𑀭𑀲𑁆𑀲 𑀅𑀤𑀸𑀲𑀺 𑀢𑀸𑀯𑀤𑁂.

𑁩𑁯𑁯.

‘‘𑀢𑀲𑁆𑀲 𑀘 𑀯𑀺𑀭𑀫𑀸𑀲𑀺 𑀢𑀸𑀯𑀤𑁂, 𑀭𑀸𑀕𑁄 𑀢𑀢𑁆𑀣 𑀔𑀫𑀸𑀧𑀬𑀻 𑀘 𑀦𑀁;

𑀲𑁄𑀢𑁆𑀣𑀺 𑀲𑀺𑀬𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀻, 𑀦 𑀧𑀼𑀦𑁄 𑀏𑀤𑀺𑀲𑀓𑀁 𑀪𑀯𑀺𑀲𑁆𑀲𑀢𑀺.

𑁪𑁦𑁦.

‘‘𑀆𑀲𑀸𑀤𑀺𑀬 𑀏𑀤𑀺𑀲𑀁 𑀚𑀦𑀁, 𑀅𑀕𑁆𑀕𑀺𑀁 𑀧𑀚𑁆𑀚𑀮𑀺𑀢𑀁𑀯 𑀮𑀺𑀗𑁆𑀕𑀺𑀬;

𑀕𑀡𑁆𑀳𑀺𑀬 𑀆𑀲𑀻𑀯𑀺𑀲𑀁 𑀯𑀺𑀬, 𑀅𑀧𑀺 𑀦𑀼 𑀲𑁄𑀢𑁆𑀣𑀺 𑀲𑀺𑀬𑀸 𑀔𑀫𑁂𑀳𑀺 𑀦𑁄.

𑁪𑁦𑁧.

‘‘𑀫𑀼𑀢𑁆𑀢𑀸 𑀘 𑀢𑀢𑁄 𑀲𑀸 𑀪𑀺𑀓𑁆𑀔𑀼𑀦𑀻, 𑀅𑀕𑀫𑀻 𑀩𑀼𑀤𑁆𑀥𑀯𑀭𑀲𑁆𑀲 𑀲𑀦𑁆𑀢𑀺𑀓𑀁;

𑀧𑀲𑁆𑀲𑀺𑀬 𑀯𑀭𑀧𑀼𑀜𑁆𑀜𑀮𑀓𑁆𑀔𑀡𑀁, 𑀘𑀓𑁆𑀔𑀼 𑀆𑀲𑀺 𑀬𑀣𑀸 𑀧𑀼𑀭𑀸𑀡𑀓’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀧𑀘𑁆𑀘𑀼𑀤𑀸𑀳𑀸𑀲𑀺.

𑀢𑀢𑁆𑀣 𑀚𑀻𑀯𑀓𑀫𑁆𑀩𑀯𑀦𑀦𑁆𑀢𑀺 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑀁. 𑀭𑀫𑁆𑀫𑀦𑁆𑀢𑀺 𑀭𑀫𑀡𑀻𑀬𑀁. 𑀢𑀁 𑀓𑀺𑀭 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀘 𑀭𑀼𑀓𑁆𑀔𑀸𑀦𑀁 𑀭𑁄𑀧𑀺𑀢𑀸𑀓𑀸𑀭𑁂𑀦 𑀅𑀢𑀺𑀯𑀺𑀬 𑀫𑀦𑀼𑀜𑁆𑀜𑀁 𑀫𑀦𑁄𑀭𑀫𑀁. 𑀕𑀘𑁆𑀙𑀦𑁆𑀢𑀺𑀦𑁆𑀢𑀺 𑀅𑀫𑁆𑀩𑀯𑀦𑀁 𑀉𑀤𑁆𑀤𑀺𑀲𑁆𑀲 𑀕𑀢𑀁, 𑀤𑀺𑀯𑀸𑀯𑀺𑀳𑀸𑀭𑀸𑀬 𑀉𑀧𑀕𑀘𑁆𑀙𑀦𑁆𑀢𑀺𑀁. 𑀲𑀼𑀪𑀦𑁆𑀢𑀺 𑀏𑀯𑀁𑀦𑀸𑀫𑀺𑀓𑀁. 𑀥𑀼𑀢𑁆𑀢𑀓𑁄𑀢𑀺 𑀇𑀢𑁆𑀣𑀺𑀥𑀼𑀢𑁆𑀢𑁄. 𑀭𑀸𑀚𑀕𑀳𑀯𑀸𑀲𑀻 𑀓𑀺𑀭𑁂𑀓𑁄 𑀫𑀳𑀸𑀯𑀺𑀪𑀯𑀲𑁆𑀲 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀧𑀼𑀢𑁆𑀢𑁄 𑀬𑀼𑀯𑀸 𑀅𑀪𑀺𑀭𑀽𑀧𑁄 𑀇𑀢𑁆𑀣𑀺𑀥𑀼𑀢𑁆𑀢𑁄 𑀧𑀼𑀭𑀺𑀲𑁄 𑀫𑀢𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀢𑀁 𑀧𑀝𑀺𑀧𑀣𑁂 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀕𑁆𑀕𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀥𑀼𑀢𑁆𑀢𑀓𑁄 𑀲𑀦𑁆𑀦𑀺𑀯𑀸𑀭𑁂𑀲𑀻’’𑀢𑀺, 𑀫𑀫 𑀕𑀫𑀦𑀁 𑀦𑀺𑀲𑁂𑀥𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀦𑀁 𑀅𑀩𑁆𑀭𑀯𑀻 𑀲𑀼𑀪𑀸𑀢𑀺 𑀢𑀫𑁂𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁 𑀥𑀼𑀢𑁆𑀢𑀁 𑀲𑀼𑀪𑀸 𑀪𑀺𑀓𑁆𑀔𑀼𑀦𑀻 𑀓𑀣𑁂𑀲𑀺. 𑀏𑀢𑁆𑀣 𑀘 ‘‘𑀕𑀘𑁆𑀙𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁 𑀲𑀼𑀪𑀁, 𑀅𑀩𑁆𑀭𑀯𑀺 𑀲𑀼𑀪𑀸’’𑀢𑀺 𑀘 𑀅𑀢𑁆𑀢𑀸𑀦𑀫𑁂𑀯 𑀣𑁂𑀭𑀻 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺. 𑀣𑁂𑀭𑀺𑀬𑀸 𑀯𑀼𑀢𑁆𑀢𑀕𑀸𑀣𑀸𑀦𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀯𑀲𑁂𑀦 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

‘‘𑀅𑀩𑁆𑀭𑀯𑀻 𑀲𑀼𑀪𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀯𑀼𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀆𑀳 ‘‘𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢𑀁 𑀫𑀬𑀸𑀢𑀺 𑀓𑀺𑀁 𑀢𑀼𑀬𑁆𑀳𑀁, 𑀆𑀯𑀼𑀲𑁄, 𑀫𑀬𑀸 𑀅𑀧𑀭𑀤𑁆𑀥𑀁. 𑀬𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀻𑀢𑀺 𑀬𑁂𑀦 𑀅𑀧𑀭𑀸𑀥𑁂𑀦 𑀫𑀁 𑀕𑀘𑁆𑀙𑀦𑁆𑀢𑀺𑀁 𑀑𑀯𑀭𑀺𑀢𑁆𑀯𑀸 𑀕𑀫𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀢𑀺𑀝𑁆𑀞𑀲𑀺, 𑀲𑁄 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀇𑀢𑁆𑀣𑀻𑀢𑀺𑀲𑀜𑁆𑀜𑀸𑀬 𑀏𑀯𑀁 𑀧𑀝𑀺𑀧𑀚𑁆𑀚𑀲𑀺, 𑀏𑀯𑀫𑁆𑀧𑀺 𑀦 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋 ‘‘𑀦 𑀳𑀺 𑀧𑀩𑁆𑀩𑀚𑀺𑀢𑀸𑀬, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀫𑁆𑀨𑀼𑀲𑀦𑀸𑀬 𑀓𑀧𑁆𑀧𑀢𑀻’’𑀢𑀺, 𑀆𑀯𑀼𑀲𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢, 𑀮𑁄𑀓𑀺𑀬𑀘𑀸𑀭𑀺𑀢𑁆𑀢𑁂𑀦𑀧𑀺 𑀧𑀼𑀭𑀺𑀲𑀲𑁆𑀲 𑀧𑀩𑁆𑀩𑀚𑀺𑀢𑀸𑀦𑀁 𑀲𑀫𑁆𑀨𑀼𑀲𑀦𑀸𑀬 𑀦 𑀓𑀧𑁆𑀧𑀢𑀺, 𑀧𑀩𑁆𑀩𑀚𑀺𑀢𑀸𑀬 𑀧𑀦 𑀧𑀼𑀭𑀺𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀲𑀫𑁆𑀨𑀼𑀲𑀦𑀸𑀬 𑀦 𑀓𑀧𑁆𑀧𑀢𑀺, 𑀢𑀺𑀝𑁆𑀞𑀢𑀼 𑀢𑀸𑀯 𑀧𑀼𑀭𑀺𑀲𑀨𑀼𑀲𑀦𑀸, 𑀭𑀸𑀕𑀯𑀲𑁂𑀦𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀼𑀭𑀺𑀲𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲𑀸𑀧𑀺 𑀨𑀼𑀲𑀦𑀸 𑀦 𑀓𑀧𑁆𑀧𑀢𑁂𑀯.

𑀢𑁂𑀦𑀸𑀳 ‘‘𑀕𑀭𑀼𑀓𑁂 𑀫𑀫 𑀲𑀢𑁆𑀣𑀼𑀲𑀸𑀲𑀦𑁂’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀕𑀭𑀼𑀓𑁂 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀸𑀢𑀩𑁆𑀩𑁂 𑀫𑀬𑁆𑀳𑀁 𑀲𑀢𑁆𑀣𑀼 𑀲𑀸𑀲𑀦𑁂 𑀬𑀸 𑀲𑀺𑀓𑁆𑀔𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑁆𑀤𑀺𑀲𑁆𑀲 𑀲𑀼𑀕𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸. 𑀢𑀸𑀳𑀺 𑀧𑀭𑀺𑀲𑀼𑀤𑁆𑀥𑀧𑀤𑀁 𑀧𑀭𑀺𑀲𑀼𑀤𑁆𑀥𑀓𑀼𑀲𑀮𑀓𑁄𑀝𑁆𑀞𑀸𑀲𑀁, 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑀁, 𑀏𑀯𑀁𑀪𑀽𑀢𑀁 𑀫𑀁 𑀕𑀘𑁆𑀙𑀦𑁆𑀢𑀺𑀁 𑀓𑁂𑀦 𑀓𑀸𑀭𑀡𑁂𑀦 𑀆𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀲𑀻𑀢𑀺.

𑀆𑀯𑀺𑀮𑀘𑀺𑀢𑁆𑀢𑁄𑀢𑀺 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀪𑀸𑀯𑀓𑀭𑀸𑀦𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀆𑀯𑀺𑀮𑀘𑀺𑀢𑁆𑀢𑁄, 𑀢𑁆𑀯𑀁 𑀢𑀤𑀪𑀸𑀯𑀢𑁄 𑀅𑀦𑀸𑀯𑀺𑀮𑀁, 𑀭𑀸𑀕𑀭𑀚𑀸𑀤𑀻𑀦𑀁 𑀯𑀲𑁂𑀦 𑀲𑀭𑀚𑁄, 𑀲𑀸𑀗𑁆𑀕𑀡𑁄 𑀢𑀤𑀪𑀸𑀯𑀢𑁄 𑀯𑀻𑀢𑀭𑀚𑀁 𑀅𑀦𑀗𑁆𑀕𑀡𑀁 𑀲𑀩𑁆𑀩𑀢𑁆𑀣 𑀔𑀦𑁆𑀥𑀧𑀜𑁆𑀘𑀓𑁂 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀫𑀸𑀦𑀲𑀁, 𑀫𑀁 𑀓𑀲𑁆𑀫𑀸 𑀑𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀲𑀻𑀢𑀺?

𑀏𑀯𑀁 𑀣𑁂𑀭𑀺𑀬𑀸 𑀯𑀼𑀢𑁆𑀢𑁂 𑀥𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀤𑀳𑀭𑀸 𑀘𑀸’’𑀢𑀺𑀆𑀤𑀺𑀦𑀸 𑀤𑀲 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀤𑀳𑀭𑀸𑀢𑀺 𑀢𑀭𑀼𑀡𑀻 𑀧𑀞𑀫𑁂 𑀬𑁄𑀩𑁆𑀩𑀦𑁂 𑀞𑀺𑀢𑀸. 𑀅𑀧𑀸𑀧𑀺𑀓𑀸 𑀘𑀲𑀻𑀢𑀺 𑀭𑀽𑀧𑁂𑀦 𑀅𑀮𑀸𑀫𑀺𑀓𑀸 𑀘 𑀅𑀲𑀺, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀘𑀸𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀢𑁂 𑀧𑀩𑁆𑀩𑀚𑁆𑀚𑀸 𑀓𑀭𑀺𑀲𑁆𑀲𑀢𑀻𑀢𑀺 𑀢𑀼𑀬𑁆𑀳𑀁 𑀏𑀯𑀁 𑀧𑀞𑀫𑀯𑀬𑁂 𑀞𑀺𑀢𑀸𑀬 𑀭𑀽𑀧𑀲𑀫𑁆𑀧𑀦𑁆𑀦𑀸𑀬 𑀧𑀩𑁆𑀩𑀚𑁆𑀚𑀸 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀯𑀼𑀟𑁆𑀠𑀸𑀬 𑀩𑀻𑀪𑀘𑁆𑀙𑀭𑀽𑀧𑀸𑀬 𑀯𑀸 𑀧𑀩𑁆𑀩𑀚𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀦𑀺𑀓𑁆𑀔𑀺𑀧𑀸𑀢𑀺 𑀙𑀟𑁆𑀟𑁂𑀳𑀺. ‘‘𑀉𑀓𑁆𑀔𑀺𑀧𑀸’’𑀢𑀺 𑀯𑀸 𑀧𑀸𑀞𑁄, 𑀅𑀧𑀦𑁂𑀳𑀻𑀢𑀺 𑀅𑀢𑁆𑀣𑁄.

𑀫𑀥𑀼𑀭𑀦𑁆𑀢𑀺 𑀲𑀼𑀪𑀁, 𑀲𑀼𑀕𑀦𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀦𑁆𑀢𑀻𑀢𑀺 𑀯𑀸𑀬𑀦𑁆𑀢𑀺. 𑀲𑀩𑁆𑀩𑀲𑁄𑀢𑀺 𑀲𑀫𑀦𑁆𑀢𑀢𑁄. 𑀓𑀼𑀲𑀼𑀫𑀭𑀚𑁂𑀦 𑀲𑀫𑀼𑀝𑁆𑀞𑀺𑀢𑀸 𑀤𑀼𑀫𑀸𑀢𑀺 𑀇𑀫𑁂 𑀭𑀼𑀓𑁆𑀔𑀸 𑀫𑀦𑁆𑀤𑀯𑀸𑀢𑁂𑀦 𑀲𑀫𑀼𑀝𑁆𑀞𑀳𑀫𑀸𑀦𑀓𑀼𑀲𑀼𑀫𑀭𑁂𑀡𑀼𑀚𑀸𑀢𑁂𑀦 𑀅𑀢𑁆𑀢𑀦𑁄 𑀓𑀼𑀲𑀼𑀫𑀭𑀚𑁂𑀦 𑀲𑀬𑀁 𑀲𑀫𑀼𑀝𑁆𑀞𑀺𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀼𑀭𑀪𑀻 𑀯𑀸𑀬𑀦𑁆𑀢𑀺. 𑀧𑀞𑀫𑀯𑀲𑀦𑁆𑀢𑁄 𑀲𑀼𑀔𑁄 𑀉𑀢𑀽𑀢𑀺 𑀅𑀬𑀁 𑀧𑀞𑀫𑁄 𑀯𑀲𑀦𑁆𑀢𑀫𑀸𑀲𑁄 𑀲𑀼𑀔𑀲𑀫𑁆𑀨𑀲𑁆𑀲𑁄 𑀘 𑀉𑀢𑀼 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀓𑀼𑀲𑀼𑀫𑀺𑀢𑀲𑀺𑀔𑀭𑀸𑀢𑀺 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀸. 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀫𑀸𑀮𑀼𑀢𑁂𑀭𑀺𑀢𑀸𑀢𑀺 𑀯𑀸𑀢𑁂𑀦 𑀲𑀜𑁆𑀘𑀮𑀺𑀢𑀸 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀅𑀪𑀺𑀢𑁆𑀣𑀦𑀺𑀢𑀸 𑀯𑀺𑀬 𑀢𑀺𑀝𑁆𑀞𑀦𑁆𑀢𑀺. 𑀬𑀤𑀺 𑀏𑀓𑀸 𑀯𑀦𑀫𑁄𑀕𑀳𑀺𑀲𑁆𑀲𑀲𑀻𑀢𑀺 𑀲𑀘𑁂 𑀢𑁆𑀯𑀁 𑀏𑀓𑀺𑀓𑀸 𑀯𑀦𑀫𑁄𑀕𑀸𑀳𑀺𑀲𑁆𑀲𑀲𑀺, 𑀓𑀸 𑀦𑀸𑀫 𑀢𑁂 𑀢𑀢𑁆𑀣 𑀭𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑀸 𑀩𑀤𑁆𑀥𑀲𑀼𑀔𑀸𑀪𑀺𑀭𑀢𑁆𑀢𑀢𑁆𑀢𑀸 𑀏𑀯𑀫𑀸𑀳.

𑀯𑀸𑀴𑀫𑀺𑀕𑀲𑀗𑁆𑀖𑀲𑁂𑀯𑀺𑀢𑀦𑁆𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑀲𑀫𑀽𑀳𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀉𑀧𑀲𑁂𑀯𑀺𑀢𑀁. 𑀓𑀼𑀜𑁆𑀚𑀭𑀫𑀢𑁆𑀢𑀓𑀭𑁂𑀡𑀼𑀮𑁄𑀴𑀺𑀢𑀦𑁆𑀢𑀺 𑀫𑀢𑁆𑀢𑀓𑀼𑀜𑁆𑀚𑀭𑁂𑀳𑀺 𑀳𑀢𑁆𑀣𑀺𑀦𑀻𑀳𑀺 𑀘 𑀫𑀺𑀕𑀸𑀦𑀁 𑀘𑀺𑀢𑁆𑀢𑀢𑀸𑀧𑀦𑁂𑀦 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀲𑀸𑀔𑀸𑀪𑀜𑁆𑀚𑀦𑁂𑀦 𑀘 𑀆𑀮𑁄𑀴𑀺𑀢𑀧𑀤𑁂𑀲𑀁. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀫𑀺𑀁 𑀯𑀦𑁂 𑀈𑀤𑀺𑀲𑀁 𑀢𑀤𑀸 𑀦𑀢𑁆𑀣𑀺, 𑀯𑀦𑀁 𑀦𑀸𑀫 𑀏𑀯𑀭𑀽𑀧𑀦𑁆𑀢𑀺 𑀢𑀁 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀭𑀳𑀺𑀢𑀦𑁆𑀢𑀺 𑀚𑀦𑀭𑀳𑀺𑀢𑀁 𑀯𑀺𑀚𑀦𑀁. 𑀪𑀺𑀁𑀲𑀦𑀓𑀦𑁆𑀢𑀺 𑀪𑀬𑀚𑀦𑀓𑀁.

𑀢𑀧𑀦𑀻𑀬𑀓𑀢𑀸𑀯 𑀥𑀻𑀢𑀺𑀓𑀸𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑁂𑀦 𑀯𑀺𑀘𑀭𑀺𑀢𑀸 𑀥𑀻𑀢𑀮𑀺𑀓𑀸 𑀯𑀺𑀬 𑀲𑀼𑀓𑀼𑀲𑀮𑁂𑀦 𑀬𑀦𑁆𑀢𑀸𑀘𑀭𑀺𑀬𑁂𑀦 𑀬𑀦𑁆𑀢𑀬𑁄𑀕𑀯𑀲𑁂𑀦 𑀲𑀚𑁆𑀚𑀺𑀢𑀸 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀯𑀺𑀘𑀭𑀲𑀺, 𑀇𑀤𑀸𑀦𑁂𑀯 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀲𑀺. 𑀘𑀺𑀢𑁆𑀢𑀮𑀢𑁂𑀯 𑀅𑀘𑁆𑀙𑀭𑀸𑀢𑀺 𑀘𑀺𑀢𑁆𑀢𑀮𑀢𑀸𑀦𑀸𑀫𑀓𑁂 𑀉𑀬𑁆𑀬𑀸𑀦𑁂 𑀤𑁂𑀯𑀘𑁆𑀙𑀭𑀸 𑀯𑀺𑀬. 𑀓𑀸𑀲𑀺𑀓𑀲𑀼𑀔𑀼𑀫𑁂𑀳𑀻𑀢𑀺 𑀓𑀸𑀲𑀺𑀭𑀝𑁆𑀞𑁂 𑀉𑀧𑁆𑀧𑀦𑁆𑀦𑁂𑀳𑀺 𑀅𑀢𑀺𑀯𑀺𑀬 𑀲𑀼𑀔𑀼𑀫𑁂𑀳𑀺. 𑀯𑀕𑁆𑀕𑀼𑀪𑀻𑀢𑀺 𑀲𑀺𑀦𑀺𑀤𑁆𑀥𑀫𑀝𑁆𑀞𑁂𑀳𑀺. 𑀲𑁄𑀪𑀲𑀻 𑀲𑀼𑀯𑀲𑀦𑁂𑀳𑀺 𑀦𑀽𑀧𑀫𑁂𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀢𑁆𑀣𑁂𑀳𑀺 𑀅𑀦𑀼𑀧𑀫𑁂 𑀉𑀧𑀫𑀸𑀭𑀳𑀺𑀢𑁂 𑀢𑁆𑀯𑀁 𑀇𑀤𑀸𑀦𑀺 𑀫𑁂 𑀯𑀲𑀸𑀦𑀼𑀕𑁄 𑀲𑁄𑀪𑀲𑀻𑀢𑀺 𑀪𑀸𑀯𑀺𑀦𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀏𑀓𑀦𑁆𑀢𑀺𑀓𑀁 𑀯𑀢𑁆𑀢𑀫𑀸𑀦𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

𑀅𑀳𑀁 𑀢𑀯 𑀯𑀲𑀸𑀦𑀼𑀕𑁄 𑀲𑀺𑀬𑀦𑁆𑀢𑀺 𑀅𑀳𑀫𑁆𑀧𑀺 𑀢𑀼𑀬𑁆𑀳𑀁 𑀯𑀲𑀸𑀦𑀼𑀕𑁄 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀪𑀯𑁂𑀬𑁆𑀬𑀁. 𑀬𑀤𑀺 𑀯𑀺𑀳𑀭𑁂𑀫𑀲𑁂 𑀓𑀸𑀦𑀦𑀦𑁆𑀢𑀭𑁂𑀢𑀺 𑀬𑀤𑀺 𑀫𑀬𑀁 𑀉𑀪𑁄𑀧𑀺 𑀯𑀦𑀦𑁆𑀢𑀭𑁂 𑀲𑀳 𑀯𑀲𑀸𑀫 𑀭𑀫𑀸𑀫. 𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄𑀢𑀺 𑀯𑀲𑀸𑀦𑀼𑀕𑀪𑀸𑀯𑀲𑁆𑀲 𑀓𑀸𑀭𑀡𑀫𑀸𑀳. 𑀧𑀸𑀡𑁄𑀢𑀺 𑀲𑀢𑁆𑀢𑁄, 𑀅𑀜𑁆𑀜𑁄 𑀓𑁄𑀘𑀺𑀧𑀺 𑀲𑀢𑁆𑀢𑁄 𑀢𑀬𑀸 𑀧𑀺𑀬𑀢𑀭𑁄 𑀫𑀬𑁆𑀳𑀁 𑀦 𑀳𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀸𑀡𑁄𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀢𑀬𑀸 𑀧𑀺𑀬𑀢𑀭𑀁 𑀦 𑀳𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂𑀢𑀺 𑀓𑀺𑀦𑁆𑀦𑀭𑀺𑀬𑀸 𑀯𑀺𑀬 𑀫𑀦𑁆𑀤𑀧𑀼𑀣𑀼𑀯𑀺𑀮𑁄𑀘𑀦𑁂.

𑀬𑀤𑀺 𑀫𑁂 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀲𑀼𑀔𑀺𑀢𑀸 𑀏𑀳𑀺 𑀅𑀕𑀸𑀭𑀫𑀸𑀯𑀲𑀸𑀢𑀺 𑀲𑀘𑁂 𑀢𑁆𑀯𑀁 𑀫𑀫 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀤𑀼𑀓𑁆𑀔𑀁 𑀧𑀳𑀸𑀬 𑀏𑀳𑀺 𑀓𑀸𑀫𑀪𑁄𑀕𑁂𑀳𑀺 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲. ‘‘𑀲𑀼𑀔𑀺𑀢𑀸 𑀳𑁂𑀢𑀺 𑀅𑀕𑀸𑀭𑀫𑀸𑀯𑀲𑀦𑁆𑀢𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀲𑀼𑀔𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀦𑀺𑀯𑀸𑀢𑀯𑀸𑀲𑀺𑀦𑀻𑀢𑀺 𑀦𑀺𑀯𑀸𑀢𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀸𑀲𑀺𑀦𑀻. ‘‘𑀧𑀸𑀲𑀸𑀤𑀯𑀺𑀫𑀸𑀦𑀯𑀸𑀲𑀺𑀦𑀻’’𑀢𑀺 𑀘 𑀧𑀸𑀞𑁄, 𑀯𑀺𑀫𑀸𑀦𑀲𑀤𑀺𑀲𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀸𑀲𑀺𑀦𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀁.

𑀥𑀸𑀭𑀬𑀸𑀢𑀺 𑀧𑀭𑀺𑀤𑀳, 𑀦𑀺𑀯𑀸𑀲𑁂𑀳𑀺 𑀘𑁂𑀯 𑀉𑀢𑁆𑀢𑀭𑀺𑀬𑀜𑁆𑀘 𑀓𑀭𑁄𑀳𑀺. 𑀅𑀪𑀺𑀭𑁄𑀧𑁂𑀳𑀻𑀢𑀺 𑀫𑀡𑁆𑀟𑀦𑀯𑀺𑀪𑀽𑀲𑀦𑀯𑀲𑁂𑀦 𑀯𑀸 𑀲𑀭𑀻𑀭𑀁 𑀆𑀭𑁄𑀧𑀬, 𑀅𑀮𑀗𑁆𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀫𑀸𑀮𑀯𑀡𑁆𑀡𑀓𑀦𑁆𑀢𑀺 𑀫𑀸𑀮𑀜𑁆𑀘𑁂𑀯 𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘. 𑀓𑀜𑁆𑀘𑀦𑀫𑀡𑀺𑀫𑀼𑀢𑁆𑀢𑀓𑀦𑁆𑀢𑀺 𑀓𑀜𑁆𑀘𑀦𑁂𑀦 𑀫𑀡𑀺𑀫𑀼𑀢𑁆𑀢𑀸𑀳𑀺 𑀘 𑀬𑀼𑀢𑁆𑀢𑀁, 𑀲𑀼𑀯𑀡𑁆𑀡𑀫𑀬𑀫𑀡𑀺𑀫𑀼𑀢𑁆𑀢𑀸𑀳𑀺 𑀔𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑀳𑀼𑀦𑁆𑀢𑀺 𑀳𑀢𑁆𑀣𑀽𑀧𑀕𑀸𑀤𑀺𑀪𑁂𑀤𑀢𑁄 𑀩𑀳𑀼𑀧𑁆𑀧𑀓𑀸𑀭𑀁. 𑀯𑀺𑀯𑀺𑀥𑀦𑁆𑀢𑀺 𑀓𑀭𑀡𑀯𑀺𑀓𑀢𑀺𑀬𑀸 𑀦𑀸𑀦𑀸𑀯𑀺𑀥𑀁.

𑀲𑀼𑀥𑁄𑀢𑀭𑀚𑀧𑀘𑁆𑀙𑀤𑀦𑁆𑀢𑀺 𑀲𑀼𑀥𑁄𑀢𑀢𑀸𑀬 𑀧𑀯𑀸𑀳𑀺𑀢𑀭𑀚𑀁 𑀉𑀢𑁆𑀢𑀭𑀘𑁆𑀙𑀤𑀁. 𑀲𑀼𑀪𑀦𑁆𑀢𑀺 𑀲𑁄𑀪𑀦𑀁. 𑀕𑁄𑀦𑀓𑀢𑀽𑀮𑀺𑀓𑀲𑀦𑁆𑀣𑀢𑀦𑁆𑀢𑀺 𑀤𑀻𑀖𑀮𑁄𑀫𑀓𑀸𑀴𑀓𑁄𑀚𑀯𑁂𑀦 𑀘𑁂𑀯 𑀳𑀁𑀲𑀮𑁄𑀫𑀸𑀤𑀺𑀧𑀼𑀡𑁆𑀡𑀸𑀬 𑀢𑀽𑀮𑀺𑀓𑀸𑀬 𑀘 𑀲𑀦𑁆𑀣𑀢𑀁. 𑀦𑀯𑀦𑁆𑀢𑀺 𑀅𑀪𑀺𑀦𑀯𑀁. 𑀫𑀳𑀸𑀭𑀳𑀦𑁆𑀢𑀺 𑀫𑀳𑀕𑁆𑀖𑀁. 𑀘𑀦𑁆𑀤𑀦𑀫𑀡𑁆𑀟𑀺𑀢𑀲𑀸𑀭𑀕𑀦𑁆𑀥𑀺𑀓𑀦𑁆𑀢𑀺 𑀕𑁄𑀲𑀻𑀲𑀓𑀸𑀤𑀺𑀲𑀸𑀭𑀘𑀦𑁆𑀤𑀦𑁂𑀦 𑀫𑀡𑁆𑀟𑀺𑀢𑀢𑀸𑀬 𑀲𑀼𑀭𑀪𑀺𑀕𑀦𑁆𑀥𑀺𑀓𑀁, 𑀏𑀯𑀭𑀽𑀧𑀁 𑀲𑀬𑀦𑀫𑀸𑀭𑀼𑀳, 𑀢𑀁 𑀆𑀭𑀼𑀳𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀲𑀬𑀸𑀳𑀺 𑀘𑁂𑀯 𑀦𑀺𑀲𑀻𑀤 𑀘𑀸𑀢𑀺 𑀅𑀢𑁆𑀣𑁄.

𑀉𑀧𑁆𑀧𑀮𑀁 𑀘𑀼𑀤𑀓𑀸 𑀲𑀫𑀼𑀕𑁆𑀕𑀢𑀦𑁆𑀢𑀺 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀉𑀤𑀓𑀢𑁄 𑀉𑀕𑁆𑀕𑀢𑀁 𑀉𑀝𑁆𑀞𑀺𑀢𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀁 𑀲𑀼𑀨𑀼𑀮𑁆𑀮𑀫𑀼𑀧𑁆𑀧𑀮𑀁. 𑀬𑀣𑀸 𑀢𑀁 𑀅𑀫𑀦𑀼𑀲𑁆𑀲𑀲𑁂𑀯𑀺𑀢𑀦𑁆𑀢𑀺 𑀢𑀜𑁆𑀘 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀚𑀸𑀢𑀢𑁆𑀢𑀸 𑀦𑀺𑀫𑁆𑀫𑀦𑀼𑀲𑁆𑀲𑁂𑀳𑀺 𑀲𑁂𑀯𑀺𑀢𑀁 𑀓𑁂𑀦𑀘𑀺 𑀅𑀧𑀭𑀺𑀪𑀼𑀢𑁆𑀢𑀫𑁂𑀯 𑀪𑀯𑁂𑀬𑁆𑀬. 𑀏𑀯𑀁 𑀢𑁆𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀢𑀺 𑀏𑀯𑀫𑁂𑀯 𑀢𑀁 𑀲𑀼𑀝𑁆𑀞𑀼 𑀨𑀼𑀮𑁆𑀮𑀫𑀼𑀧𑁆𑀧𑀮𑀁 𑀯𑀺𑀬 𑀢𑀼𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻. 𑀲𑀓𑁂𑀲𑀗𑁆𑀕𑁂𑀲𑀼 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑁂𑀲𑀼 𑀓𑁂𑀦𑀘𑀺 𑀅𑀧𑀭𑀺𑀪𑀼𑀢𑁆𑀢𑁂𑀲𑀼𑀬𑁂𑀯 𑀚𑀭𑀁 𑀕𑀫𑀺𑀲𑁆𑀲𑀲𑀺, 𑀫𑀼𑀥𑀸𑀬𑁂𑀯 𑀚𑀭𑀸𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀲𑀺.

𑀏𑀯𑀁 𑀥𑀼𑀢𑁆𑀢𑀓𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀧𑀓𑀸𑀲𑀺𑀢𑁂 𑀣𑁂𑀭𑀻 𑀲𑀭𑀻𑀭𑀲𑀪𑀸𑀯𑀯𑀺𑀪𑀸𑀯𑀦𑁂𑀦 𑀢𑀁 𑀢𑀢𑁆𑀣 𑀯𑀺𑀘𑁆𑀙𑀺𑀦𑁆𑀤𑁂𑀦𑁆𑀢𑀻 ‘‘𑀓𑀺𑀁 𑀢𑁂 𑀇𑀥𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀆𑀯𑀼𑀲𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢, 𑀓𑁂𑀲𑀸𑀤𑀺𑀓𑀼𑀡𑀧𑀧𑀽𑀭𑁂 𑀏𑀓𑀦𑁆𑀢𑁂𑀦 𑀪𑁂𑀤𑀦𑀥𑀫𑁆𑀫𑁂 𑀲𑀼𑀲𑀸𑀦𑀯𑀟𑁆𑀠𑀦𑁂, 𑀇𑀥 𑀇𑀫𑀲𑁆𑀫𑀺𑀁 𑀓𑀸𑀬𑀲𑀜𑁆𑀜𑀺𑀢𑁂 𑀅𑀲𑀼𑀘𑀺𑀓𑀴𑁂𑀯𑀭𑁂 𑀓𑀺𑀁 𑀦𑀸𑀫 𑀢𑀯 𑀲𑀸𑀭𑀦𑁆𑀢𑀺 𑀲𑀫𑁆𑀫𑀢𑀁 𑀲𑀫𑁆𑀪𑀸𑀯𑀺𑀢𑀁, 𑀬𑀁 𑀤𑀺𑀲𑁆𑀯𑀸 𑀯𑀺𑀫𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀺𑀕𑀢𑀫𑀦𑀲𑀗𑁆𑀓𑀧𑁆𑀧𑁄, 𑀏𑀢𑁆𑀣𑁂𑀯 𑀯𑀸 𑀅𑀯𑀺𑀫𑀦𑁄 𑀲𑁄𑀫𑀦𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀉𑀤𑀺𑀓𑁆𑀔𑀲𑀺, 𑀢𑀁 𑀫𑀬𑁆𑀳𑀁 𑀓𑀣𑁂𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀥𑀼𑀢𑁆𑀢𑀓𑁄 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀭𑀽𑀧𑀁 𑀘𑀸𑀢𑀼𑀭𑀺𑀬𑀲𑁄𑀪𑀺𑀢𑀁, 𑀧𑀞𑀫𑀤𑀲𑁆𑀲𑀦𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀲𑁆𑀫𑀺𑀁 𑀤𑀺𑀝𑁆𑀞𑀺𑀧𑀸𑀢𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀢𑀫𑁂𑀯 𑀅𑀧𑀤𑀺𑀲𑀦𑁆𑀢𑁄 ‘‘𑀅𑀓𑁆𑀔𑀻𑀦𑀺 𑀘 𑀢𑀽𑀭𑀺𑀬𑀸𑀭𑀺𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀜𑁆𑀘𑀸𑀬𑀁 𑀣𑁂𑀭𑀻 𑀲𑀼𑀝𑁆𑀞𑀼 𑀲𑀁𑀬𑀢𑀢𑀸𑀬 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸, 𑀢𑀸𑀬 𑀣𑀺𑀭𑀯𑀺𑀧𑁆𑀧𑀲𑀦𑁆𑀦𑀲𑁄𑀫𑁆𑀫𑀲𑀦𑁆𑀢𑀦𑀬𑀦𑀦𑀺𑀧𑀸𑀢𑁂𑀲𑀼 𑀓𑀫𑁆𑀫𑀸𑀦𑀼𑀪𑀸𑀯𑀦𑀺𑀧𑁆𑀨𑀦𑁆𑀦𑁂𑀲𑀼 𑀧𑀲𑀦𑁆𑀦𑀧𑀜𑁆𑀘𑀧𑁆𑀧𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑁂𑀲𑀼 𑀦𑀬𑀦𑁂𑀲𑀼 𑀮𑀩𑁆𑀪𑀫𑀸𑀦𑁂 𑀧𑀪𑀸𑀯𑀺𑀲𑀺𑀝𑁆𑀞𑀘𑀸𑀢𑀼𑀭𑀺𑀬𑁂 𑀤𑀺𑀝𑁆𑀞𑀺𑀧𑀸𑀢𑁂, 𑀬𑀲𑁆𑀫𑀸 𑀲𑀬𑀁 𑀘𑀭𑀺𑀢𑀳𑀸𑀯𑀪𑀸𑀯𑀯𑀺𑀮𑀸𑀲𑀸𑀤𑀺𑀧𑀭𑀺𑀓𑀧𑁆𑀧𑀯𑀜𑁆𑀘𑀺𑀢𑁄 𑀲𑁄 𑀥𑀼𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀫𑀸𑀲𑁆𑀲 𑀤𑀺𑀝𑁆𑀞𑀺𑀭𑀸𑀕𑁄 𑀲𑀯𑀺𑀲𑁂𑀲𑀁 𑀯𑁂𑀧𑀼𑀮𑁆𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀅𑀓𑁆𑀔𑀻𑀦𑀺 𑀘 𑀢𑀽𑀭𑀺𑀬𑀸𑀭𑀺𑀯𑀸𑀢𑀺 𑀢𑀽𑀭𑀺 𑀯𑀼𑀘𑁆𑀘𑀢𑀺 𑀫𑀺𑀕𑀻, 𑀘-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀺𑀕𑀘𑁆𑀙𑀸𑀧𑀸𑀬 𑀯𑀺𑀬 𑀢𑁂 𑀅𑀓𑁆𑀔𑀻𑀦𑀻𑀢𑀺 𑀅𑀢𑁆𑀣𑁄. ‘‘𑀓𑁄𑀭𑀺𑀬𑀸𑀭𑀺𑀯𑀸’’𑀢𑀺 𑀯𑀸 𑀧𑀸𑀴𑀺, 𑀓𑀼𑀜𑁆𑀘𑀓𑀸𑀭𑀓𑀼𑀓𑁆𑀓𑀼𑀝𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀦𑁆𑀦𑀭𑀺𑀬𑀸𑀭𑀺𑀯 𑀧𑀩𑁆𑀩𑀢𑀦𑁆𑀢𑀭𑁂𑀢𑀺 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀯𑀺𑀘𑀭𑀫𑀸𑀦𑀸𑀬 𑀓𑀺𑀦𑁆𑀦𑀭𑀺𑀯𑀦𑀺𑀢𑀸𑀬 𑀯𑀺𑀬 𑀘 𑀢𑁂 𑀅𑀓𑁆𑀔𑀻𑀦𑀻𑀢𑀺 𑀅𑀢𑁆𑀣𑁄. 𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬𑀸𑀢𑀺 𑀢𑀯 𑀯𑀼𑀢𑁆𑀢𑀕𑀼𑀡𑀯𑀺𑀲𑁂𑀲𑀸𑀦𑀺 𑀦𑀬𑀦𑀸𑀦𑀺 𑀤𑀺𑀲𑁆𑀯𑀸, 𑀪𑀺𑀬𑁆𑀬𑁄 𑀉𑀧𑀭𑀽𑀧𑀭𑀺 𑀫𑁂 𑀓𑀸𑀫𑀸𑀪𑀺𑀭𑀢𑀺 𑀧𑀯𑀟𑁆𑀠𑀢𑀺.

𑀉𑀧𑁆𑀧𑀮𑀲𑀺𑀔𑀭𑁄𑀧𑀫𑀸𑀦𑀺 𑀢𑁂𑀢𑀺 𑀭𑀢𑁆𑀢𑀼𑀧𑁆𑀧𑀮𑀅𑀕𑁆𑀕𑀲𑀤𑀺𑀲𑀸𑀦𑀺 𑀧𑀫𑁆𑀳𑀸𑀦𑀺 𑀢𑀯. 𑀯𑀺𑀫𑀮𑁂𑀢𑀺 𑀦𑀺𑀫𑁆𑀫𑀮𑁂. 𑀳𑀸𑀝𑀓𑀲𑀦𑁆𑀦𑀺𑀪𑁂𑀢𑀺 𑀓𑀜𑁆𑀘𑀦𑀭𑀽𑀧𑀓𑀲𑁆𑀲 𑀫𑀼𑀔𑀲𑀤𑀺𑀲𑁂 𑀢𑁂 𑀫𑀼𑀔𑁂, 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬𑀸𑀢𑀺 𑀬𑁄𑀚𑀦𑀸.

𑀅𑀧𑀺 𑀤𑀽𑀭𑀕𑀢𑀸𑀢𑀺 𑀤𑀽𑀭𑀁 𑀞𑀸𑀦𑀁 𑀕𑀢𑀸𑀧𑀺. 𑀲𑀭𑀫𑁆𑀳𑀲𑁂𑀢𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀯 𑀦𑀬𑀦𑀸𑀦𑀺 𑀏𑀯 𑀅𑀦𑀼𑀲𑁆𑀲𑀭𑀸𑀫𑀺. 𑀆𑀬𑀢𑀧𑀫𑁆𑀳𑁂𑀢𑀺 𑀤𑀻𑀖𑀧𑀔𑀼𑀫𑁂. 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁂𑀢𑀺 𑀦𑀺𑀫𑁆𑀫𑀮𑀮𑁄𑀘𑀦𑁂. 𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄 𑀦𑀬𑀦𑀸𑀢𑀺 𑀢𑀯 𑀦𑀬𑀦𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀫𑀬𑁆𑀳𑀁 𑀧𑀺𑀬𑀢𑀭𑁄 𑀦𑀢𑁆𑀣𑀺. 𑀢𑀬𑀸𑀢𑀺 𑀳𑀺 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀓𑀭𑀡𑀯𑀘𑀦𑀁.

𑀏𑀯𑀁 𑀘𑀓𑁆𑀔𑀼𑀲𑀫𑁆𑀧𑀢𑁆𑀢𑀺𑀬𑀸 𑀉𑀫𑁆𑀫𑀸𑀤𑀺𑀢𑀲𑁆𑀲 𑀯𑀺𑀬 𑀢𑀁 𑀢𑀁 𑀯𑀺𑀧𑁆𑀧𑀮𑀧𑀢𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀦𑁄𑀭𑀣𑀁 𑀯𑀺𑀧𑀭𑀺𑀯𑀢𑁆𑀢𑁂𑀦𑁆𑀢𑀻 𑀣𑁂𑀭𑀻 ‘‘𑀅𑀧𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀸𑀤𑀲 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀅𑀧𑀣𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀻𑀢𑀺, 𑀆𑀯𑀼𑀲𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢, 𑀲𑀦𑁆𑀢𑁂 𑀅𑀜𑁆𑀜𑀲𑁆𑀫𑀺𑀁 𑀇𑀢𑁆𑀣𑀺𑀚𑀦𑁂 𑀬𑁄 𑀢𑁆𑀯𑀁 𑀩𑀼𑀤𑁆𑀥𑀲𑀼𑀢𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀑𑀭𑀲𑀥𑀻𑀢𑀭𑀁 𑀫𑀁 𑀫𑀕𑁆𑀕𑀬𑀲𑀺 𑀧𑀢𑁆𑀣𑁂𑀲𑀺, 𑀲𑁄 𑀢𑁆𑀯𑀁 𑀲𑀦𑁆𑀢𑁂 𑀔𑁂𑀫𑁂 𑀉𑀚𑀼𑀫𑀕𑁆𑀕𑁂 𑀅𑀧𑀣𑁂𑀦 𑀓𑀡𑁆𑀝𑀓𑀦𑀺𑀯𑀼𑀢𑁂𑀦 𑀲𑀪𑀬𑁂𑀦 𑀓𑀼𑀫𑁆𑀫𑀕𑁆𑀕𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀺 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄𑀲𑀺, 𑀘𑀦𑁆𑀤𑀁 𑀓𑀻𑀴𑀦𑀓𑀁 𑀕𑀯𑁂𑀲𑀲𑀺 𑀘𑀦𑁆𑀤𑀫𑀡𑁆𑀟𑀮𑀁 𑀓𑀻𑀴𑀸𑀕𑁄𑀴𑀓𑀁 𑀓𑀸𑀢𑀼𑀓𑀸𑀫𑁄𑀲𑀺, 𑀫𑁂𑀭𑀼𑀁 𑀮𑀗𑁆𑀖𑁂𑀢𑀼𑀫𑀺𑀘𑁆𑀙𑀲𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀮𑀗𑁆𑀖𑀬𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀞𑀸𑀢𑀼𑀓𑀸𑀫𑁄𑀲𑀺, 𑀲𑁄 𑀢𑁆𑀯𑀁 𑀫𑀁 𑀩𑀼𑀤𑁆𑀥𑀲𑀼𑀢𑀁 𑀫𑀕𑁆𑀕𑀬𑀲𑀻𑀢𑀺 𑀬𑁄𑀚𑀦𑀸.

𑀇𑀤𑀸𑀦𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀯𑀺𑀲𑀬𑀪𑀸𑀯𑀁 𑀧𑀢𑁆𑀣𑀦𑀸𑀬 𑀘 𑀯𑀺𑀖𑀸𑀢𑀸𑀯𑀳𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀢𑁆𑀣𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀕𑁄 𑀬𑀢𑁆𑀣𑀧𑀺 𑀤𑀸𑀦𑀺 𑀫𑁂 𑀲𑀺𑀬𑀸𑀢𑀺 𑀬𑀢𑁆𑀣 𑀇𑀤𑀸𑀦𑀺 𑀫𑁂 𑀭𑀸𑀕𑁄 𑀲𑀺𑀬𑀸 𑀪𑀯𑁂𑀬𑁆𑀬, 𑀢𑀁 𑀆𑀭𑀫𑁆𑀫𑀡𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀦𑀢𑁆𑀣𑀺 𑀏𑀯. 𑀦𑀧𑀺 𑀦𑀁 𑀚𑀸𑀦𑀸𑀫𑀺 𑀓𑀻𑀭𑀺𑀲𑁄𑀢𑀺 𑀦𑀁 𑀭𑀸𑀕𑀁 𑀓𑀻𑀭𑀺𑀲𑁄𑀢𑀺𑀧𑀺 𑀦 𑀚𑀸𑀦𑀸𑀫𑀺. 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄𑀢𑀺 𑀅𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑁂𑀦 𑀫𑀽𑀮𑁂𑀦 𑀲𑀫𑀽𑀮𑀓𑁄 𑀭𑀸𑀕𑁄 𑀅𑀭𑀺𑀬𑀫𑀕𑁆𑀕𑁂𑀦 𑀳𑀢𑁄 𑀲𑀫𑀼𑀕𑁆𑀖𑀸𑀢𑀺𑀢𑁄.

𑀇𑀗𑁆𑀕𑀸𑀮𑀓𑀼𑀬𑀸𑀢𑀺 𑀅𑀗𑁆𑀕𑀸𑀭𑀓𑀸𑀲𑀼𑀬𑀸. 𑀉𑀚𑁆𑀛𑀺𑀢𑁄𑀢𑀺 𑀯𑀸𑀢𑀼𑀓𑁆𑀔𑀺𑀢𑁆𑀢𑁄 𑀯𑀺𑀬 𑀬𑁄 𑀓𑁄𑀘𑀺, 𑀤𑀳𑀦𑀺𑀬𑀸 𑀇𑀦𑁆𑀥𑀦𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀧𑀢𑁆𑀢𑁄𑀭𑀺𑀯𑀸𑀢𑀺 𑀯𑀺𑀲𑀕𑀢𑀪𑀸𑀚𑀦𑀁 𑀯𑀺𑀬. 𑀅𑀕𑁆𑀕𑀺𑀢𑁄 𑀓𑀢𑁄𑀢𑀺 𑀅𑀕𑁆𑀕𑀺𑀢𑁄 𑀅𑀗𑁆𑀕𑀸𑀭𑀢𑁄 𑀅𑀧𑀕𑀢𑁄 𑀓𑀢𑁄, 𑀯𑀺𑀲𑀲𑁆𑀲 𑀮𑁂𑀲𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀅𑀧𑀦𑀻𑀢𑁄 𑀯𑀺𑀦𑀸𑀲𑀺𑀢𑁄𑀢𑀺 𑀅𑀢𑁆𑀣𑁄.

𑀬𑀲𑁆𑀲𑀸 𑀲𑀺𑀬𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀦𑁆𑀢𑀺 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀜𑀸𑀡𑁂𑀦 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑀁 𑀅𑀧𑀭𑀺𑀜𑁆𑀜𑀸𑀢𑀁 𑀲𑀺𑀬𑀸. 𑀲𑀢𑁆𑀢𑀸 𑀯𑀸 𑀅𑀦𑀼𑀲𑀸𑀲𑀺𑀢𑁄 𑀲𑀺𑀬𑀸𑀢𑀺 𑀲𑀢𑁆𑀢𑀸 𑀯𑀸 𑀥𑀫𑁆𑀫𑀲𑀭𑀻𑀭𑀲𑁆𑀲 𑀅𑀤𑀲𑁆𑀲𑀦𑁂𑀦 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀅𑀦𑀦𑀼𑀲𑀸𑀲𑀺𑀢𑁄 𑀲𑀺𑀬𑀸. 𑀢𑁆𑀯𑀁 𑀢𑀸𑀤𑀺𑀲𑀺𑀓𑀁 𑀧𑀮𑁄𑀪𑀬𑀸𑀢𑀺, 𑀆𑀯𑀼𑀲𑁄, 𑀢𑁆𑀯𑀁 𑀢𑀣𑀸𑀭𑀽𑀧𑀁 𑀅𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀓𑀸𑀫𑁂𑀳𑀺 𑀧𑀮𑁄𑀪𑀬 𑀉𑀧𑀕𑀘𑁆𑀙. 𑀚𑀸𑀦𑀦𑁆𑀢𑀺𑀁 𑀲𑁄 𑀇𑀫𑀁 𑀯𑀺𑀳𑀜𑁆𑀜𑀲𑀻𑀢𑀺 𑀲𑁄 𑀢𑁆𑀯𑀁 𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑀺𑀜𑁆𑀘 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀺𑀁 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀁 𑀇𑀫𑀁 𑀲𑀼𑀪𑀁 𑀪𑀺𑀓𑁆𑀔𑀼𑀦𑀺𑀁 𑀆𑀕𑀫𑁆𑀫 𑀯𑀺𑀳𑀜𑁆𑀜𑀲𑀺, 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀯𑀺𑀖𑀸𑀢𑀁 𑀤𑀼𑀓𑁆𑀔𑀁 𑀆𑀧𑀚𑁆𑀚𑀲𑀺.

𑀇𑀤𑀸𑀦𑀺𑀲𑁆𑀲 𑀯𑀺𑀖𑀸𑀢𑀸𑀧𑀢𑁆𑀢𑀺𑀢𑀁 𑀓𑀸𑀭𑀡𑀯𑀺𑀪𑀸𑀯𑀦𑁂𑀦 𑀤𑀲𑁆𑀲𑁂𑀦𑁆𑀢𑀻 ‘‘𑀫𑀬𑁆𑀳𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀻𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑁂𑀢𑀺 𑀅𑀓𑁆𑀓𑁄𑀲𑁂 𑀯𑀦𑁆𑀤𑀦𑀸𑀬 𑀘. 𑀲𑀼𑀔𑀤𑀼𑀓𑁆𑀔𑁂𑀢𑀺 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘, 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁂 𑀯𑀸. 𑀲𑀢𑀻 𑀉𑀧𑀝𑁆𑀞𑀺𑀢𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀬𑀼𑀢𑁆𑀢𑀸 𑀲𑀢𑀺 𑀲𑀩𑁆𑀩𑀓𑀸𑀮𑀁 𑀉𑀧𑀝𑁆𑀞𑀺𑀢𑀸. 𑀲𑀗𑁆𑀔𑀢𑀫𑀲𑀼𑀪𑀦𑁆𑀢𑀺 𑀚𑀸𑀦𑀺𑀬𑀸𑀢𑀺 𑀢𑁂𑀪𑀽𑀫𑀓𑀁 𑀲𑀗𑁆𑀔𑀸𑀭𑀕𑀢𑀁 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑁂𑀦 𑀅𑀲𑀼𑀪𑀦𑁆𑀢𑀺 𑀜𑀢𑁆𑀯𑀸. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀲𑁆𑀫𑀺𑀁𑀬𑁂𑀯 𑀪𑀯𑀢𑁆𑀢𑀬𑁂 𑀫𑀬𑁆𑀳𑀁 𑀫𑀦𑁄 𑀢𑀡𑁆𑀳𑀸𑀮𑁂𑀧𑀸𑀤𑀺𑀦𑀸 𑀦 𑀉𑀧𑀮𑀺𑀫𑁆𑀧𑀢𑀺.

𑀫𑀕𑁆𑀕𑀝𑁆𑀞𑀗𑁆𑀕𑀺𑀓𑀬𑀸𑀦𑀬𑀸𑀬𑀺𑀦𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀅𑀭𑀺𑀬𑀬𑀸𑀦𑁂𑀦 𑀦𑀺𑀩𑁆𑀩𑀸𑀦𑀧𑀼𑀭𑀁 𑀬𑀸𑀬𑀺𑀦𑀻 𑀉𑀧𑀕𑀢𑀸. 𑀉𑀤𑁆𑀥𑀝𑀲𑀮𑁆𑀮𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀲𑀫𑀼𑀤𑁆𑀥𑀝𑀭𑀸𑀕𑀸𑀤𑀺𑀲𑀮𑁆𑀮𑀸.

𑀲𑀼𑀘𑀺𑀢𑁆𑀢𑀺𑀢𑀸𑀢𑀺 𑀳𑀢𑁆𑀣𑀧𑀸𑀤𑀫𑀼𑀔𑀸𑀤𑀺𑀆𑀓𑀸𑀭𑁂𑀦 𑀲𑀼𑀝𑁆𑀞𑀼 𑀘𑀺𑀢𑁆𑀢𑀺𑀢𑀸 𑀯𑀺𑀭𑀘𑀺𑀢𑀸. 𑀲𑁄𑀫𑁆𑀪𑀸𑀢𑀺 𑀲𑀼𑀫𑁆𑀪𑀓𑀸. 𑀤𑀸𑀭𑀼𑀓𑀧𑀺𑀮𑁆𑀮𑀓𑀸𑀦𑀺 𑀯𑀸𑀢𑀺 𑀤𑀸𑀭𑀼𑀤𑀡𑁆𑀟𑀸𑀤𑀻𑀳𑀺 𑀉𑀧𑀭𑀘𑀺𑀢𑀭𑀽𑀧𑀓𑀸𑀦𑀺. 𑀢𑀦𑁆𑀢𑀻𑀳𑀻𑀢𑀺 𑀦𑁆𑀳𑀸𑀭𑀼𑀲𑀼𑀢𑁆𑀢𑀓𑁂𑀳𑀺. 𑀔𑀻𑀮𑀓𑁂𑀳𑀻𑀢𑀺 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀓𑀡𑁆𑀡𑀸𑀤𑀺𑀅𑀢𑁆𑀣𑀸𑀬 𑀞𑀧𑀺𑀢𑀤𑀡𑁆𑀟𑁂𑀳𑀺. 𑀯𑀺𑀦𑀺𑀩𑀤𑁆𑀥𑀸𑀢𑀺 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀩𑀤𑁆𑀥𑀸. 𑀯𑀺𑀯𑀺𑀥𑀁 𑀧𑀦𑀘𑁆𑀘𑀓𑀸𑀢𑀺 𑀬𑀦𑁆𑀢𑀲𑀼𑀢𑁆𑀢𑀸𑀤𑀻𑀦𑀁 𑀅𑀜𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀦𑀸 𑀧𑀝𑁆𑀞𑀧𑀺𑀢𑀦𑀘𑁆𑀘𑀓𑀸, 𑀧𑀦𑀘𑁆𑀘𑀦𑁆𑀢𑀸 𑀯𑀺𑀬 𑀤𑀺𑀝𑁆𑀞𑀸𑀢𑀺 𑀬𑁄𑀚𑀦𑀸.

𑀢𑀫𑁆𑀳𑀼𑀤𑁆𑀥𑀝𑁂 𑀢𑀦𑁆𑀢𑀺𑀔𑀻𑀮𑀓𑁂𑀢𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀭𑀘𑀦𑀸𑀯𑀺𑀲𑁂𑀲𑀬𑀼𑀢𑁆𑀢𑀁 𑀉𑀧𑀸𑀤𑀸𑀬 𑀭𑀽𑀧𑀓𑀲𑀫𑀜𑁆𑀜𑀸 𑀢𑀫𑁆𑀳𑀺 𑀢𑀦𑁆𑀢𑀺𑀫𑁆𑀳𑀺 𑀔𑀻𑀮𑀓𑁂 𑀘 𑀞𑀸𑀦𑀢𑁄 𑀉𑀤𑁆𑀥𑀝𑁂 𑀩𑀦𑁆𑀥𑀦𑁆𑀢𑁄 𑀯𑀺𑀲𑁆𑀲𑀝𑁆𑀞𑁂, 𑀯𑀺𑀲𑀼𑀁 𑀓𑀭𑀡𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀓𑀮𑁂, 𑀢𑀳𑀺𑀁 𑀢𑀳𑀺𑀁 𑀔𑀺𑀧𑀦𑁂𑀦 𑀧𑀭𑀺𑀓𑁆𑀭𑀺𑀢𑁂 𑀯𑀺𑀓𑀺𑀭𑀺𑀢𑁂. 𑀦 𑀯𑀺𑀦𑁆𑀤𑁂𑀬𑁆𑀬 𑀔𑀡𑁆𑀟𑀲𑁄 𑀓𑀢𑁂𑀢𑀺 𑀧𑁄𑀢𑁆𑀣𑀓𑀭𑀽𑀧𑀲𑁆𑀲 𑀅𑀯𑀬𑀯𑁂 𑀔𑀡𑁆𑀟𑀸𑀔𑀡𑁆𑀟𑀺𑀢𑁂 𑀓𑀢𑁂 𑀧𑁄𑀢𑁆𑀣𑀓𑀭𑀽𑀧𑀁 𑀦 𑀯𑀺𑀦𑁆𑀤𑁂𑀬𑁆𑀬, 𑀦 𑀉𑀧𑀮𑀪𑁂𑀬𑁆𑀬. 𑀏𑀯𑀁 𑀲𑀦𑁆𑀢𑁂 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂 𑀢𑀲𑁆𑀫𑀺𑀁 𑀧𑁄𑀢𑁆𑀣𑀓𑀭𑀽𑀧𑀸𑀯𑀬𑀯𑁂 𑀓𑀺𑀫𑁆𑀳𑀺 𑀓𑀺𑀁 𑀔𑀸𑀡𑀼𑀓𑁂, 𑀉𑀤𑀸𑀳𑀼 𑀭𑀚𑁆𑀚𑀼𑀓𑁂, 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸𑀤𑀺𑀓𑁂 𑀯𑀸 𑀫𑀦𑀁 𑀫𑀦𑀲𑀜𑁆𑀜𑀁 𑀦𑀺𑀯𑁂𑀲𑁂𑀬𑁆𑀬, 𑀯𑀺𑀲𑀗𑁆𑀔𑀸𑀭𑁂 𑀅𑀯𑀬𑀯𑁂 𑀲𑀸 𑀲𑀜𑁆𑀜𑀸 𑀓𑀤𑀸𑀘𑀺𑀧𑀺 𑀦𑀧𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀣𑀽𑀧𑀫𑀸𑀢𑀺 𑀢𑀁𑀲𑀤𑀺𑀲𑀸 𑀢𑁂𑀦 𑀧𑁄𑀢𑁆𑀣𑀓𑀭𑀽𑀧𑁂𑀦 𑀲𑀤𑀺𑀲𑀸. 𑀓𑀺𑀦𑁆𑀢𑀺 𑀘𑁂 𑀆𑀳 ‘‘𑀤𑁂𑀳𑀓𑀸𑀦𑀻’’𑀢𑀺𑀆𑀤𑀺. 𑀢𑀢𑁆𑀣 𑀤𑁂𑀳𑀓𑀸𑀦𑀻𑀢𑀺 𑀳𑀢𑁆𑀣𑀧𑀸𑀤𑀫𑀼𑀔𑀸𑀤𑀺𑀤𑁂𑀳𑀸𑀯𑀬𑀯𑀸. 𑀫𑀦𑁆𑀢𑀺 𑀫𑁂 𑀧𑀝𑀺𑀩𑀤𑁆𑀥𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀢𑁂𑀳𑀺 𑀧𑀣𑀯𑀺𑀆𑀤𑀻𑀳𑀺 𑀘 𑀘𑀓𑁆𑀔𑀸𑀤𑀻𑀳𑀺 𑀘 𑀥𑀫𑁆𑀫𑁂𑀳𑀺. 𑀯𑀺𑀦𑀸 𑀦 𑀯𑀢𑁆𑀢𑀦𑁆𑀢𑀻𑀢𑀺 𑀦 𑀳𑀺 𑀢𑀣𑀸 𑀢𑀣𑀸 𑀲𑀦𑁆𑀦𑀺𑀯𑀺𑀝𑁆𑀞𑁂 𑀧𑀣𑀯𑀺𑀆𑀤𑀺𑀥𑀫𑁆𑀫𑁂 𑀫𑀼𑀜𑁆𑀘𑀺𑀢𑁆𑀯𑀸 𑀤𑁂𑀳𑀸 𑀦𑀸𑀫 𑀲𑀦𑁆𑀢𑀺. 𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀢𑀻𑀢𑀺 𑀤𑁂𑀳𑁄 𑀅𑀯𑀬𑀯𑁂𑀳𑀺 𑀅𑀯𑀬𑀯𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀢𑀺 𑀦 𑀉𑀧𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂𑀢𑀺 𑀓𑀺𑀫𑁆𑀳𑀺 𑀓𑀺𑀁 𑀧𑀣𑀯𑀺𑀬𑀁, 𑀉𑀤𑀸𑀳𑀼 𑀆𑀧𑀸𑀤𑀺𑀓𑁂 𑀤𑁂𑀳𑁄𑀢𑀺 𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀻𑀢𑀺 𑀯𑀸 𑀫𑀦𑀁 𑀫𑀦𑀲𑀜𑁆𑀜𑀁 𑀦𑀺𑀯𑁂𑀲𑁂𑀬𑁆𑀬. 𑀬𑀲𑁆𑀫𑀸 𑀧𑀣𑀯𑀺𑀆𑀤𑀺𑀧𑀲𑀸𑀤𑀥𑀫𑁆𑀫𑀫𑀢𑁆𑀢𑁂 𑀏𑀲𑀸 𑀲𑀫𑀜𑁆𑀜𑀸, 𑀬𑀤𑀺𑀤𑀁 𑀤𑁂𑀳𑁄𑀢𑀺 𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀻𑀢𑀺 𑀯𑀸 𑀲𑀢𑁆𑀢𑁄𑀢𑀺 𑀯𑀸 𑀇𑀢𑁆𑀣𑀻𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸, 𑀢𑀲𑁆𑀫𑀸 𑀦 𑀏𑀢𑁆𑀣 𑀚𑀸𑀦𑀢𑁄 𑀓𑁄𑀘𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺.

𑀬𑀣𑀸 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁, 𑀅𑀤𑁆𑀤𑀲 𑀘𑀺𑀢𑁆𑀢𑀺𑀓𑀁 𑀪𑀺𑀢𑁆𑀢𑀺𑀬𑀸 𑀓𑀢𑀦𑁆𑀢𑀺 𑀬𑀣𑀸 𑀓𑀼𑀲𑀮𑁂𑀦 𑀘𑀺𑀢𑁆𑀢𑀓𑀸𑀭𑁂𑀦 𑀪𑀺𑀢𑁆𑀢𑀺𑀬𑀁 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁 𑀮𑀺𑀢𑁆𑀢𑀁 𑀢𑁂𑀦 𑀮𑁂𑀧𑀁 𑀤𑀢𑁆𑀯𑀸 𑀓𑀢𑀁 𑀆𑀮𑀺𑀔𑀺𑀢𑀁 𑀘𑀺𑀢𑁆𑀢𑀺𑀓𑀁 𑀇𑀢𑁆𑀣𑀺𑀭𑀽𑀧𑀁 𑀅𑀤𑁆𑀤𑀲 𑀧𑀲𑁆𑀲𑁂𑀬𑁆𑀬. 𑀢𑀢𑁆𑀣 𑀬𑀸 𑀉𑀧𑀣𑀫𑁆𑀪𑀦𑀔𑁂𑀧𑀦𑀸𑀤𑀺𑀓𑀺𑀭𑀺𑀬𑀸𑀲𑀫𑁆𑀧𑀢𑁆𑀢𑀺𑀬𑀸 𑀫𑀸𑀦𑀼𑀲𑀺𑀓𑀸 𑀦𑀼 𑀔𑁄 𑀅𑀬𑀁 𑀪𑀺𑀢𑁆𑀢𑀺 𑀅𑀧𑀲𑁆𑀲𑀸𑀬 𑀞𑀺𑀢𑀸𑀢𑀺 𑀲𑀜𑁆𑀜𑀸, 𑀲𑀸 𑀦𑀺𑀭𑀢𑁆𑀣𑀓𑀸 𑀫𑀦𑀼𑀲𑁆𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄, 𑀫𑀸𑀦𑀼𑀲𑀻𑀢𑀺 𑀧𑀦 𑀓𑁂𑀯𑀮𑀁 𑀢𑀳𑀺𑀁 𑀢𑀲𑁆𑀲 𑀘 𑀯𑀺𑀧𑀭𑀻𑀢𑀤𑀲𑁆𑀲𑀦𑀁, 𑀬𑀸𑀣𑀸𑀯𑀢𑁄 𑀕𑀳𑀡𑀁 𑀦 𑀳𑁄𑀢𑀺, 𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀕𑀳𑀡𑀫𑁆𑀧𑀺 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀬𑀁 𑀯𑀺𑀬 𑀅𑀕𑁆𑀕𑀢𑁄 𑀓𑀢𑀦𑁆𑀢𑀺 𑀫𑀸𑀬𑀸𑀓𑀸𑀭𑁂𑀦 𑀧𑀼𑀭𑀢𑁄 𑀉𑀧𑀝𑁆𑀞𑀸𑀧𑀺𑀢𑀁 𑀫𑀸𑀬𑀸𑀲𑀤𑀺𑀲𑀁. 𑀲𑀼𑀧𑀺𑀦𑀦𑁆𑀢𑁂𑀯 𑀲𑀼𑀯𑀡𑁆𑀡𑀧𑀸𑀤𑀧𑀦𑁆𑀢𑀺 𑀲𑀼𑀧𑀺𑀦𑀫𑁂𑀯 𑀲𑀼𑀧𑀺𑀦𑀦𑁆𑀢𑀁, 𑀢𑀢𑁆𑀣 𑀉𑀧𑀝𑁆𑀞𑀺𑀢𑀲𑀼𑀯𑀡𑁆𑀡𑀫𑀬𑀭𑀼𑀓𑁆𑀔𑀁 𑀯𑀺𑀬. 𑀉𑀧𑀕𑀘𑁆𑀙𑀲𑀺 𑀅𑀦𑁆𑀥 𑀭𑀺𑀢𑁆𑀢𑀓𑀦𑁆𑀢𑀺 𑀅𑀦𑁆𑀥𑀩𑀸𑀮 𑀭𑀺𑀢𑁆𑀢𑀓𑀁 𑀢𑀼𑀘𑁆𑀙𑀓𑀁 𑀅𑀦𑁆𑀢𑁄𑀲𑀸𑀭𑀭𑀳𑀺𑀢𑀁 𑀇𑀫𑀁 𑀅𑀢𑁆𑀢𑀪𑀸𑀯𑀁 ‘‘𑀏𑀢𑀁 𑀫𑀫𑀸’’𑀢𑀺 𑀲𑀸𑀭𑀯𑀦𑁆𑀢𑀁 𑀯𑀺𑀬 𑀉𑀧𑀕𑀘𑁆𑀙𑀲𑀺 𑀅𑀪𑀺𑀦𑀺𑀯𑀺𑀲𑀲𑀺. 𑀚𑀦𑀫𑀚𑁆𑀛𑁂𑀭𑀺𑀯 𑀭𑀼𑀧𑁆𑀧𑀭𑀽𑀧𑀓𑀦𑁆𑀢𑀺 𑀫𑀸𑀬𑀸𑀓𑀸𑀭𑁂𑀦 𑀫𑀳𑀸𑀚𑀦𑀫𑀚𑁆𑀛𑁂 𑀤𑀲𑁆𑀲𑀺𑀢𑀁 𑀭𑀽𑀧𑀺𑀬𑀭𑀽𑀧𑀲𑀤𑀺𑀲𑀁 𑀲𑀸𑀭𑀁 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀁, 𑀅𑀲𑀸𑀭𑀦𑁆𑀢𑀺 𑀅𑀢𑁆𑀣𑁄.

𑀯𑀝𑁆𑀝𑀦𑀺𑀭𑀺𑀯𑀸𑀢𑀺 𑀮𑀸𑀔𑀸𑀬 𑀕𑀼𑀴𑀺𑀓𑀸 𑀯𑀺𑀬. 𑀓𑁄𑀝𑀭𑁄𑀳𑀺𑀢𑀸𑀢𑀺 𑀓𑁄𑀝𑀭𑁂 𑀭𑀼𑀓𑁆𑀔𑀲𑀼𑀲𑀺𑀭𑁂 𑀞𑀧𑀺𑀢𑀸. 𑀫𑀚𑁆𑀛𑁂 𑀧𑀼𑀩𑁆𑀩𑀼𑀴𑀓𑀸𑀢𑀺 𑀅𑀓𑁆𑀔𑀺𑀤𑀮𑀫𑀚𑁆𑀛𑁂 𑀞𑀺𑀢𑀚𑀮𑀧𑀼𑀩𑁆𑀩𑀼𑀴𑀲𑀤𑀺𑀲𑀸. 𑀲𑀅𑀲𑁆𑀲𑀼𑀓𑀸𑀢𑀺 𑀅𑀲𑁆𑀲𑀼𑀚𑀮𑀲𑀳𑀺𑀢𑀸. 𑀧𑀻𑀴𑀓𑁄𑀴𑀺𑀓𑀸𑀢𑀺 𑀅𑀓𑁆𑀔𑀺𑀕𑀽𑀣𑀓𑁄. 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀏𑀢𑀲𑁆𑀫𑀺𑀁 𑀅𑀓𑁆𑀔𑀺𑀫𑀡𑁆𑀟𑀮𑁂 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀯𑀺𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀻𑀴𑀓𑁄𑀴𑀺𑀓𑀸𑀢𑀺 𑀯𑀸 𑀅𑀓𑁆𑀔𑀺𑀤𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀓𑀸 𑀧𑀻𑀴𑀓𑀸 𑀯𑀼𑀘𑁆𑀘𑀢𑀺. 𑀯𑀺𑀯𑀺𑀥𑀸𑀢𑀺 𑀲𑁂𑀢𑀦𑀻𑀮𑀫𑀡𑁆𑀟𑀮𑀸𑀦𑀜𑁆𑀘𑁂𑀯 𑀭𑀢𑁆𑀢𑀧𑀻𑀢𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀧𑀝𑀮𑀸𑀦𑀜𑁆𑀘 𑀯𑀲𑁂𑀦 𑀅𑀦𑁂𑀓𑀯𑀺𑀥𑀸. 𑀘𑀓𑁆𑀔𑀼𑀯𑀺𑀥𑀸𑀢𑀺 𑀘𑀓𑁆𑀔𑀼𑀪𑀸𑀕𑀸 𑀘𑀓𑁆𑀔𑀼𑀧𑁆𑀧𑀓𑀸𑀭𑀸 𑀯𑀸 𑀢𑀲𑁆𑀲 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑀢𑁄. 𑀧𑀺𑀡𑁆𑀟𑀺𑀢𑀸𑀢𑀺 𑀲𑀫𑀼𑀤𑀺𑀢𑀸.

𑀏𑀯𑀁 𑀘𑀓𑁆𑀔𑀼𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀲𑁆𑀲 𑀘𑀓𑁆𑀔𑀼𑀦𑁄 𑀅𑀲𑀼𑀪𑀢𑀁 𑀅𑀦𑀯𑀝𑁆𑀞𑀺𑀢𑀢𑀸𑀬 𑀅𑀦𑀺𑀘𑁆𑀘𑀢𑀜𑁆𑀘 𑀯𑀺𑀪𑀸𑀯𑁂𑀲𑀺. 𑀯𑀺𑀪𑀸𑀯𑁂𑀢𑁆𑀯𑀸 𑀘 𑀬𑀣𑀸 𑀦𑀸𑀫 𑀓𑁄𑀘𑀺 𑀮𑁄𑀪𑀦𑀻𑀬𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀘𑁄𑀭𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀘𑁄𑀭𑁂𑀳𑀺 𑀧𑀮𑀺𑀩𑀼𑀤𑁆𑀥𑁄 𑀢𑀁 𑀮𑁄𑀪𑀦𑀻𑀬𑀪𑀡𑁆𑀟𑀁 𑀤𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀘𑀓𑁆𑀔𑀼𑀫𑁆𑀳𑀺 𑀲𑀸𑀭𑀢𑁆𑀢𑁂𑀦 𑀢𑁂𑀦 𑀧𑀼𑀭𑀺𑀲𑁂𑀦 𑀧𑀮𑀺𑀩𑀼𑀤𑁆𑀥𑀸 𑀣𑁂𑀭𑀻 𑀅𑀢𑁆𑀢𑀦𑁄 𑀘𑀓𑁆𑀔𑀼𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀝𑀺𑀬 𑀘𑀸𑀭𑀼𑀤𑀲𑁆𑀲𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑁆𑀧𑀸𑀝𑀺𑀬𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀘𑀓𑁆𑀔𑀼𑀓𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀘𑀸𑀭𑀼𑀤𑀲𑁆𑀲𑀦𑀸𑀢𑀺 𑀧𑀺𑀬𑀤𑀲𑁆𑀲𑀦𑀸 𑀫𑀦𑁄𑀳𑀭𑀤𑀲𑁆𑀲𑀦𑀸. 𑀦 𑀘 𑀧𑀚𑁆𑀚𑀺𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀕𑀁 𑀦𑀸𑀧𑀚𑁆𑀚𑀺. 𑀅𑀲𑀗𑁆𑀕𑀫𑀸𑀦𑀲𑀸𑀢𑀺 𑀓𑀢𑁆𑀣𑀘𑀺𑀧𑀺 𑀆𑀭𑀫𑁆𑀫𑀡𑁂 𑀅𑀦𑀸𑀲𑀢𑁆𑀢𑀘𑀺𑀢𑁆𑀢𑀸. 𑀳𑀦𑁆𑀤 𑀢𑁂 𑀘𑀓𑁆𑀔𑀼𑀦𑁆𑀢𑀺 𑀢𑀬𑀸 𑀓𑀸𑀫𑀺𑀢𑀁 𑀢𑀢𑁄 𑀏𑀯 𑀫𑀬𑀸 𑀤𑀺𑀦𑁆𑀦𑀢𑁆𑀢𑀸 𑀢𑁂 𑀘𑀓𑁆𑀔𑀼𑀲𑀜𑁆𑀜𑀺𑀢𑀁 𑀅𑀲𑀼𑀘𑀺𑀧𑀺𑀡𑁆𑀟𑀁 𑀕𑀡𑁆𑀳, 𑀕𑀳𑁂𑀢𑁆𑀯𑀸 𑀳𑀭𑀲𑁆𑀲𑀼 𑀧𑀲𑀸𑀤𑀬𑀼𑀢𑁆𑀢𑀁 𑀇𑀘𑁆𑀙𑀺𑀢𑀁 𑀞𑀸𑀦𑀁 𑀦𑁂𑀳𑀺.

𑀢𑀲𑁆𑀲 𑀘 𑀯𑀺𑀭𑀫𑀸𑀲𑀺 𑀢𑀸𑀯𑀤𑁂𑀢𑀺 𑀢𑀲𑁆𑀲 𑀥𑀼𑀢𑁆𑀢𑀧𑀼𑀭𑀺𑀲𑀲𑁆𑀲 𑀢𑀸𑀯𑀤𑁂𑀯 𑀅𑀓𑁆𑀔𑀺𑀫𑁆𑀳𑀺 𑀉𑀧𑁆𑀧𑀸𑀝𑀺𑀢𑀓𑁆𑀔𑀡𑁂 𑀏𑀯 𑀭𑀸𑀕𑁄 𑀯𑀺𑀕𑀘𑁆𑀙𑀺. 𑀢𑀢𑁆𑀣𑀸𑀢𑀺 𑀅𑀓𑁆𑀔𑀺𑀫𑁆𑀳𑀺, 𑀢𑀲𑁆𑀲𑀁 𑀯𑀸 𑀣𑁂𑀭𑀺𑀬𑀁. 𑀅𑀣 𑀯𑀸 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀔𑀫𑀸𑀧𑀬𑀻𑀢𑀺 𑀔𑀫𑀸𑀧𑁂𑀲𑀺. 𑀲𑁄𑀢𑁆𑀣𑀺 𑀲𑀺𑀬𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀢𑀺 𑀲𑁂𑀝𑁆𑀞𑀘𑀸𑀭𑀺𑀦𑀺 𑀫𑀳𑁂𑀲𑀺𑀓𑁂 𑀢𑀼𑀬𑁆𑀳𑀁 𑀆𑀭𑁄𑀕𑁆𑀬𑀫𑁂𑀯 𑀪𑀯𑁂𑀬𑁆𑀬. 𑀦 𑀧𑀼𑀦𑁄 𑀏𑀤𑀺𑀲𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀢𑁄 𑀧𑀭𑀁 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀘𑀭𑀡𑀁 𑀦 𑀪𑀯𑀺𑀲𑁆𑀲𑀢𑀺, 𑀦 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀆𑀲𑀸𑀤𑀺𑀬𑀸𑀢𑀺 𑀖𑀝𑁆𑀝𑁂𑀢𑁆𑀯𑀸. 𑀏𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀲𑀩𑁆𑀩𑀢𑁆𑀣 𑀯𑀻𑀢𑀭𑀸𑀕𑀁. 𑀅𑀕𑁆𑀕𑀺𑀁 𑀧𑀚𑁆𑀚𑀮𑀺𑀢𑀁𑀯 𑀮𑀺𑀗𑁆𑀕𑀺𑀬𑀸𑀢𑀺 𑀧𑀚𑁆𑀚𑀮𑀺𑀢𑀁 𑀅𑀕𑁆𑀕𑀺𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀯𑀺𑀬.

𑀢𑀢𑁄𑀢𑀺 𑀢𑀲𑁆𑀫𑀸 𑀥𑀼𑀢𑁆𑀢𑀧𑀼𑀭𑀺𑀲𑀸. 𑀲𑀸 𑀪𑀺𑀓𑁆𑀔𑀼𑀦𑀻𑀢𑀺 𑀲𑀸 𑀲𑀼𑀪𑀸 𑀪𑀺𑀓𑁆𑀔𑀼𑀦𑀻. 𑀅𑀕𑀫𑀻 𑀩𑀼𑀤𑁆𑀥𑀯𑀭𑀲𑁆𑀲 𑀲𑀦𑁆𑀢𑀺𑀓𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀕𑀘𑁆𑀙𑀺 𑀉𑀧𑀲𑀗𑁆𑀓𑀫𑀺. 𑀧𑀲𑁆𑀲𑀺𑀬 𑀯𑀭𑀧𑀼𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀉𑀢𑁆𑀢𑀫𑁂𑀳𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑁂𑀳𑀺 𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀤𑀺𑀲𑁆𑀯𑀸. 𑀬𑀣𑀸 𑀧𑀼𑀭𑀸𑀡𑀓𑀦𑁆𑀢𑀺 𑀧𑁄𑀭𑀸𑀡𑀁 𑀯𑀺𑀬 𑀉𑀧𑁆𑀧𑀸𑀝𑀦𑀢𑁄 𑀧𑀼𑀩𑁆𑀩𑁂 𑀯𑀺𑀬 𑀘𑀓𑁆𑀔𑀼 𑀧𑀝𑀺𑀧𑀸𑀓𑀢𑀺𑀓𑀁 𑀅𑀳𑁄𑀲𑀺. 𑀬𑀫𑁂𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀪𑀸𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀁𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁄

𑁧. 𑀇𑀲𑀺𑀤𑀸𑀲𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁂 𑀦𑀕𑀭𑀫𑁆𑀳𑀺 𑀓𑀼𑀲𑀼𑀫𑀦𑀸𑀫𑁂𑀢𑀺𑀆𑀤𑀺𑀓𑀸 𑀇𑀲𑀺𑀤𑀸𑀲𑀺𑀬𑀸 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀭𑀺𑀲𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻 𑀘𑀭𑀺𑀫𑀪𑀯𑀢𑁄 𑀲𑀢𑁆𑀢𑀫𑁂 𑀪𑀯𑁂 𑀅𑀓𑀮𑁆𑀬𑀸𑀡𑀲𑀦𑁆𑀦𑀺𑀲𑁆𑀲𑀬𑁂𑀦 𑀧𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸, 𑀢𑀢𑁄 𑀘𑀼𑀢𑀸 𑀢𑀻𑀲𑀼 𑀚𑀸𑀢𑀻𑀲𑀼 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀧𑀼𑀁𑀲𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀧𑀦 𑀘𑀼𑀢𑀸 𑀏𑀓𑀲𑁆𑀲 𑀤𑀮𑀺𑀤𑁆𑀤𑀲𑁆𑀲 𑀲𑀸𑀓𑀝𑀺𑀓𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀕𑀺𑀭𑀺𑀤𑀸𑀲𑁄 𑀦𑀸𑀫 𑀅𑀜𑁆𑀜𑀢𑀭𑀲𑁆𑀲 𑀲𑀢𑁆𑀣𑀯𑀸𑀳𑀲𑁆𑀲 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀓𑀢𑁆𑀯𑀸 𑀕𑁂𑀳𑀁 𑀆𑀦𑁂𑀲𑀺. 𑀢𑀲𑁆𑀲 𑀘 𑀪𑀭𑀺𑀬𑀸 𑀅𑀢𑁆𑀣𑀺 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀢𑀲𑁆𑀲𑀁 𑀇𑀲𑁆𑀲𑀸𑀧𑀓𑀢𑀸 𑀲𑀸𑀫𑀺𑀦𑁄 𑀢𑀲𑁆𑀲𑀸 𑀯𑀺𑀤𑁆𑀤𑁂𑀲𑀦𑀓𑀫𑁆𑀫𑀁 𑀅𑀓𑀸𑀲𑀺. 𑀲𑀸 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀞𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀚𑁆𑀚𑁂𑀦𑀺𑀬𑀁 𑀓𑀼𑀮𑀧𑀤𑁂𑀲𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑁂𑀳𑀺 𑀅𑀪𑀺𑀲𑀫𑁆𑀫𑀢𑀲𑁆𑀲 𑀯𑀺𑀪𑀯𑀲𑀫𑁆𑀧𑀦𑁆𑀦𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀇𑀲𑀺𑀤𑀸𑀲𑀻𑀢𑀺𑀲𑁆𑀲𑀸 𑀦𑀸𑀫𑀁 𑀅𑀳𑁄𑀲𑀺.

𑀢𑀁 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 𑀓𑀼𑀮𑀭𑀽𑀧𑀯𑀬𑀯𑀺𑀪𑀯𑀸𑀤𑀺𑀲𑀤𑀺𑀲𑀲𑁆𑀲 𑀅𑀜𑁆𑀜𑀢𑀭𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀅𑀤𑀁𑀲𑀼. 𑀲𑀸 𑀢𑀲𑁆𑀲 𑀕𑁂𑀳𑁂 𑀧𑀢𑀺𑀤𑁂𑀯𑀢𑀸 𑀳𑀼𑀢𑁆𑀯𑀸 𑀫𑀸𑀲𑀫𑀢𑁆𑀢𑀁 𑀯𑀲𑀺. 𑀅𑀣𑀲𑁆𑀲𑀸 𑀓𑀫𑁆𑀫𑀩𑀮𑁂𑀦 𑀲𑀸𑀫𑀺𑀓𑁄 𑀯𑀺𑀭𑀢𑁆𑀢𑀭𑀽𑀧𑁄 𑀳𑀼𑀢𑁆𑀯𑀸 𑀢𑀁 𑀖𑀭𑀢𑁄 𑀦𑀻𑀳𑀭𑀺. 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀲𑀁 𑀢𑁂𑀲𑀁 𑀧𑀦 𑀲𑀸𑀫𑀺𑀓𑀸𑀦𑀁 𑀅𑀭𑀼𑀘𑁆𑀘𑀦𑁂𑀬𑁆𑀬𑀢𑀸𑀬 𑀲𑀁𑀯𑁂𑀕𑀚𑀸𑀢𑀸 𑀧𑀺𑀢𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸, 𑀚𑀺𑀦𑀤𑀢𑁆𑀢𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸, 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀦𑁆𑀢𑀻 𑀏𑀓𑀤𑀺𑀯𑀲𑀁 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀫𑀳𑀸𑀕𑀗𑁆𑀕𑀸𑀬𑀁 𑀯𑀸𑀮𑀼𑀓𑀧𑀼𑀮𑀺𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀢𑁆𑀣𑁂𑀭𑀺𑀬𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀳𑀸𑀬𑀢𑁆𑀣𑁂𑀭𑀺𑀬𑀸 𑀧𑀼𑀩𑁆𑀩𑀧𑀝𑀺𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑀸 𑀢𑀫𑀢𑁆𑀣𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀲𑀺 ‘‘𑀉𑀚𑁆𑀚𑁂𑀦𑀺𑀬𑀸 𑀧𑀼𑀭𑀯𑀭𑁂’’𑀢𑀺𑀆𑀤𑀺𑀦𑀸. 𑀢𑁂𑀲𑀁 𑀧𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 𑁋

𑁪𑁦𑁨.

‘‘𑀦𑀕𑀭𑀫𑁆𑀳𑀺 𑀓𑀼𑀲𑀼𑀫𑀦𑀸𑀫𑁂, 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀺 𑀧𑀣𑀯𑀺𑀬𑀸 𑀫𑀡𑁆𑀟𑁂;

𑀲𑀓𑁆𑀬𑀓𑀼𑀮𑀓𑀼𑀮𑀻𑀦𑀸𑀬𑁄, 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀳𑀺 𑀕𑀼𑀡𑀯𑀢𑀺𑀬𑁄.

𑁪𑁦𑁩.

‘‘𑀇𑀲𑀺𑀤𑀸𑀲𑀻 𑀢𑀢𑁆𑀣 𑀏𑀓𑀸, 𑀤𑀼𑀢𑀺𑀬𑀸 𑀩𑁄𑀥𑀻𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀸 𑀘;

𑀛𑀸𑀦𑀚𑁆𑀛𑀸𑀬𑀦𑀭𑀢𑀸𑀬𑁄, 𑀩𑀳𑀼𑀲𑁆𑀲𑀼𑀢𑀸𑀬𑁄 𑀥𑀼𑀢𑀓𑀺𑀮𑁂𑀲𑀸𑀬𑁄.

𑁪𑁦𑁪.

‘‘𑀢𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀪𑀢𑁆𑀢𑀢𑁆𑀣𑀁 𑀓𑀭𑀺𑀬 𑀥𑁄𑀢𑀧𑀢𑁆𑀢𑀸𑀬𑁄;

𑀭𑀳𑀺𑀢𑀫𑁆𑀳𑀺 𑀲𑀼𑀔𑀦𑀺𑀲𑀺𑀦𑁆𑀦𑀸, 𑀇𑀫𑀸 𑀕𑀺𑀭𑀸 𑀅𑀩𑁆𑀪𑀼𑀤𑀻𑀭𑁂𑀲𑀼’’𑀦𑁆𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸.

𑁪𑁦𑁫.

‘‘𑀧𑀸𑀲𑀸𑀤𑀺𑀓𑀸𑀲𑀺 𑀅𑀬𑁆𑀬𑁂, 𑀇𑀲𑀺𑀤𑀸𑀲𑀺 𑀯𑀬𑁄𑀧𑀺 𑀢𑁂 𑀅𑀧𑀭𑀺𑀳𑀻𑀦𑁄;

𑀓𑀺𑀁 𑀤𑀺𑀲𑁆𑀯𑀸𑀦 𑀩𑁆𑀬𑀸𑀮𑀺𑀓𑀁, 𑀅𑀣𑀸𑀲𑀺 𑀦𑁂𑀓𑁆𑀔𑀫𑁆𑀫𑀫𑀦𑀼𑀬𑀼𑀢𑁆𑀢𑀸.

𑁪𑁦𑁬.

‘‘𑀏𑀯𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸 𑀲𑀸, 𑀭𑀳𑀺𑀢𑁂 𑀥𑀫𑁆𑀫𑀤𑁂𑀲𑀦𑀸𑀓𑀼𑀲𑀮𑀸;

𑀇𑀲𑀺𑀤𑀸𑀲𑀻 𑀯𑀘𑀦𑀫𑀩𑁆𑀭𑀯𑀺, 𑀲𑀼𑀡 𑀩𑁄𑀥𑀺 𑀬𑀣𑀸𑀫𑁆𑀳𑀺 𑀧𑀩𑁆𑀩𑀚𑀺𑀢𑀸.

𑀇𑀢𑁄 𑀧𑀭𑀁 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸.

𑁪𑁦𑁭.

‘‘𑀉𑀚𑁆𑀚𑁂𑀦𑀺𑀬𑀸 𑀧𑀼𑀭𑀯𑀭𑁂, 𑀫𑀬𑁆𑀳𑀁 𑀧𑀺𑀢𑀸 𑀲𑀻𑀮𑀲𑀁𑀯𑀼𑀢𑁄 𑀲𑁂𑀝𑁆𑀞𑀺;

𑀢𑀲𑁆𑀲𑀫𑁆𑀳𑀺 𑀏𑀓𑀥𑀻𑀢𑀸, 𑀧𑀺𑀬𑀸 𑀫𑀦𑀸𑀧𑀸 𑀘 𑀤𑀬𑀺𑀢𑀸 𑀘.

𑁪𑁦𑁮.

‘‘𑀅𑀣 𑀫𑁂 𑀲𑀸𑀓𑁂𑀢𑀢𑁄 𑀯𑀭𑀓𑀸, 𑀆𑀕𑀘𑁆𑀙𑀼𑀫𑀼𑀢𑁆𑀢𑀫𑀓𑀼𑀮𑀻𑀦𑀸;

𑀲𑁂𑀝𑁆𑀞𑀻 𑀧𑀳𑀽𑀢𑀭𑀢𑀦𑁄, 𑀢𑀲𑁆𑀲 𑀫𑀫𑀁 𑀲𑀼𑀡𑀼𑀫𑀤𑀸𑀲𑀺 𑀢𑀸𑀢𑁄.

𑁪𑁦𑁯.

‘‘𑀲𑀲𑁆𑀲𑀼𑀬𑀸 𑀲𑀲𑀼𑀭𑀲𑁆𑀲 𑀘, 𑀲𑀸𑀬𑀁 𑀧𑀸𑀢𑀁 𑀧𑀡𑀸𑀫𑀫𑀼𑀧𑀕𑀫𑁆𑀫;

𑀲𑀺𑀭𑀲𑀸 𑀓𑀭𑁄𑀫𑀺 𑀧𑀸𑀤𑁂, 𑀯𑀦𑁆𑀤𑀸𑀫𑀺 𑀬𑀣𑀸𑀫𑁆𑀳𑀺 𑀅𑀦𑀼𑀲𑀺𑀝𑁆𑀞𑀸.

𑁪𑁧𑁦.

‘‘𑀬𑀸 𑀫𑀬𑁆𑀳𑀁 𑀲𑀸𑀫𑀺𑀓𑀲𑁆𑀲, 𑀪𑀕𑀺𑀦𑀺𑀬𑁄 𑀪𑀸𑀢𑀼𑀦𑁄 𑀧𑀭𑀺𑀚𑀦𑁄 𑀯𑀸;

𑀢𑀫𑁂𑀓𑀯𑀭𑀓𑀫𑁆𑀧𑀺 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀕𑁆𑀕𑀸 𑀆𑀲𑀦𑀁 𑀤𑁂𑀫𑀺.

𑁪𑁧𑁧.

‘‘𑀅𑀦𑁆𑀦𑁂𑀦 𑀘 𑀧𑀸𑀦𑁂𑀦 𑀘, 𑀔𑀚𑁆𑀚𑁂𑀦 𑀘 𑀬𑀜𑁆𑀘 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀁;

𑀙𑀸𑀤𑁂𑀫𑀺 𑀉𑀧𑀦𑀬𑀸𑀫𑀺 𑀘, 𑀤𑁂𑀫𑀺 𑀘 𑀬𑀁 𑀬𑀲𑁆𑀲 𑀧𑀢𑀺𑀭𑀽𑀧𑀁.

𑁪𑁧𑁨.

‘‘𑀓𑀸𑀮𑁂𑀦 𑀉𑀧𑀝𑁆𑀞𑀳𑀺𑀢𑁆𑀯𑀸, 𑀖𑀭𑀁 𑀲𑀫𑀼𑀧𑀕𑀫𑀸𑀫𑀺 𑀉𑀫𑁆𑀫𑀸𑀭𑁂;

𑀥𑁄𑀯𑀦𑁆𑀢𑀻 𑀳𑀢𑁆𑀣𑀧𑀸𑀤𑁂, 𑀧𑀜𑁆𑀚𑀮𑀺𑀓𑀸 𑀲𑀸𑀫𑀺𑀓𑀫𑀼𑀧𑁂𑀫𑀺.

𑁪𑁧𑁩.

‘‘𑀓𑁄𑀘𑁆𑀙𑀁 𑀧𑀲𑀸𑀤𑀁 𑀅𑀜𑁆𑀚𑀦𑀺𑀜𑁆𑀘, 𑀆𑀤𑀸𑀲𑀓𑀜𑁆𑀘 𑀕𑀡𑁆𑀳𑀺𑀢𑁆𑀯𑀸;

𑀧𑀭𑀺𑀓𑀫𑁆𑀫𑀓𑀸𑀭𑀺𑀓𑀸 𑀯𑀺𑀬, 𑀲𑀬𑀫𑁂𑀯 𑀧𑀢𑀺𑀁 𑀯𑀺𑀪𑀽𑀲𑁂𑀫𑀺.

𑁪𑁧𑁪.

‘‘𑀲𑀬𑀫𑁂𑀯 𑀑𑀤𑀦𑀁 𑀲𑀸𑀥𑀬𑀸𑀫𑀺, 𑀲𑀬𑀫𑁂𑀯 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻;

𑀫𑀸𑀢𑀸𑀯 𑀏𑀓𑀧𑀼𑀢𑁆𑀢𑀓𑀁, 𑀢𑀣𑀸 𑀪𑀢𑁆𑀢𑀸𑀭𑀁 𑀧𑀭𑀺𑀘𑀭𑀸𑀫𑀺.

𑁪𑁧𑁫.

‘‘𑀏𑀯𑀁 𑀫𑀁 𑀪𑀢𑁆𑀢𑀺𑀓𑀢𑀁, 𑀅𑀦𑀼𑀭𑀢𑁆𑀢𑀁 𑀓𑀸𑀭𑀺𑀓𑀁 𑀦𑀺𑀳𑀢𑀫𑀸𑀦𑀁;

𑀉𑀝𑁆𑀞𑀸𑀬𑀺𑀓𑀁 𑀅𑀦𑀮𑀲𑀁, 𑀲𑀻𑀮𑀯𑀢𑀺𑀁 𑀤𑀼𑀲𑁆𑀲𑀢𑁂 𑀪𑀢𑁆𑀢𑀸.

𑁪𑁧𑁬.

‘‘𑀲𑁄 𑀫𑀸𑀢𑀭𑀜𑁆𑀘 𑀧𑀺𑀢𑀭𑀜𑁆𑀘, 𑀪𑀡𑀢𑀺 𑀆𑀧𑀼𑀘𑁆𑀙𑀳𑀁 𑀕𑀫𑀺𑀲𑁆𑀲𑀸𑀫𑀺;

𑀇𑀲𑀺𑀤𑀸𑀲𑀺𑀬𑀸 𑀦 𑀲𑀳 𑀯𑀘𑁆𑀙𑀁, 𑀏𑀓𑀸𑀕𑀸𑀭𑁂𑀳𑀁 𑀲𑀳 𑀯𑀢𑁆𑀣𑀼𑀁.

𑁪𑁧𑁭.

‘‘𑀫𑀸 𑀏𑀯𑀁 𑀧𑀼𑀢𑁆𑀢 𑀅𑀯𑀘, 𑀇𑀲𑀺𑀤𑀸𑀲𑀻 𑀧𑀡𑁆𑀟𑀺𑀢𑀸 𑀧𑀭𑀺𑀩𑁆𑀬𑀢𑁆𑀢𑀸;

𑀉𑀝𑁆𑀞𑀸𑀬𑀺𑀓𑀸 𑀅𑀦𑀮𑀲𑀸, 𑀓𑀺𑀁 𑀢𑀼𑀬𑁆𑀳𑀁 𑀦 𑀭𑁄𑀘𑀢𑁂 𑀧𑀼𑀢𑁆𑀢.

𑁪𑁧𑁮.

‘‘𑀦 𑀘 𑀫𑁂 𑀳𑀺𑀁𑀲𑀢𑀺 𑀓𑀺𑀜𑁆𑀘𑀺, 𑀦 𑀘𑀳𑀁 𑀇𑀲𑀺𑀤𑀸𑀲𑀺𑀬𑀸 𑀲𑀳 𑀯𑀘𑁆𑀙𑀁;

𑀤𑁂𑀲𑁆𑀲𑀸𑀯 𑀫𑁂 𑀅𑀮𑀁 𑀫𑁂, 𑀅𑀧𑀼𑀘𑁆𑀙𑀸𑀳𑀁 𑀕𑀫𑀺𑀲𑁆𑀲𑀸𑀫𑀺.

𑁪𑁧𑁯.

‘‘𑀢𑀲𑁆𑀲 𑀯𑀘𑀦𑀁 𑀲𑀼𑀡𑀺𑀢𑁆𑀯𑀸, 𑀲𑀲𑁆𑀲𑀼 𑀲𑀲𑀼𑀭𑁄 𑀘 𑀫𑀁 𑀅𑀧𑀼𑀘𑁆𑀙𑀺𑀁𑀲𑀼;

𑀓𑀺𑀲𑁆𑀲 𑀢𑀬𑀸 𑀅𑀧𑀭𑀤𑁆𑀥𑀁, 𑀪𑀡 𑀯𑀺𑀲𑁆𑀲𑀝𑁆𑀞𑀸 𑀬𑀣𑀸𑀪𑀽𑀢𑀁.

𑁪𑁨𑁦.

‘‘𑀦𑀧𑀺𑀳𑀁 𑀅𑀧𑀭𑀚𑁆𑀛𑀁 𑀓𑀺𑀜𑁆𑀘𑀺, 𑀦𑀧𑀺 𑀳𑀺𑀁𑀲𑁂𑀫𑀺 𑀦 𑀪𑀡𑀸𑀫𑀺 𑀤𑀼𑀩𑁆𑀩𑀘𑀦𑀁;

𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀬𑁆𑀬𑁂, 𑀬𑀁 𑀫𑀁 𑀯𑀺𑀤𑁆𑀤𑁂𑀲𑁆𑀲𑀢𑁂 𑀪𑀢𑁆𑀢𑀸.

𑁪𑁨𑁧.

‘‘𑀢𑁂 𑀫𑀁 𑀧𑀺𑀢𑀼𑀖𑀭𑀁 𑀧𑀝𑀺𑀦𑀬𑀺𑀁𑀲𑀼, 𑀯𑀺𑀫𑀦𑀸 𑀤𑀼𑀔𑁂𑀦 𑀅𑀥𑀺𑀪𑀽𑀢𑀸;

𑀧𑀼𑀢𑁆𑀢𑀫𑀦𑀼𑀭𑀓𑁆𑀔𑀫𑀸𑀦𑀸, 𑀚𑀺𑀢𑀸𑀫𑁆𑀳𑀲𑁂 𑀭𑀽𑀧𑀺𑀦𑀺𑀁 𑀮𑀓𑁆𑀔𑀺𑀁.

𑁪𑁨𑁨.

‘‘𑀅𑀣 𑀫𑀁 𑀅𑀤𑀸𑀲𑀺 𑀢𑀸𑀢𑁄, 𑀅𑀟𑁆𑀠𑀲𑁆𑀲 𑀖𑀭𑀫𑁆𑀳𑀺 𑀤𑀼𑀢𑀺𑀬𑀓𑀼𑀮𑀺𑀓𑀲𑁆𑀲;

𑀢𑀢𑁄 𑀉𑀧𑀟𑁆𑀠𑀲𑀼𑀗𑁆𑀓𑁂𑀦, 𑀬𑁂𑀦 𑀫𑀁 𑀯𑀺𑀦𑁆𑀤𑀣 𑀲𑁂𑀝𑁆𑀞𑀺.

𑁪𑁨𑁩.

‘‘𑀢𑀲𑁆𑀲𑀧𑀺 𑀖𑀭𑀫𑁆𑀳𑀺 𑀫𑀸𑀲𑀁, 𑀅𑀯𑀲𑀺𑀁 𑀅𑀣 𑀲𑁄𑀧𑀺 𑀫𑀁 𑀧𑀝𑀺𑀘𑁆𑀙𑀭𑀬𑀺;

𑀤𑀸𑀲𑀻𑀯 𑀉𑀧𑀝𑁆𑀞𑀳𑀦𑁆𑀢𑀺𑀁, 𑀅𑀤𑀽𑀲𑀺𑀓𑀁 𑀲𑀻𑀮𑀲𑀫𑁆𑀧𑀦𑁆𑀦𑀁.

𑁪𑁨𑁪.

‘‘𑀪𑀺𑀓𑁆𑀔𑀸𑀬 𑀘 𑀯𑀺𑀘𑀭𑀦𑁆𑀢𑀁, 𑀤𑀫𑀓𑀁 𑀤𑀦𑁆𑀢𑀁 𑀫𑁂 𑀧𑀺𑀢𑀸 𑀪𑀡𑀢𑀺;

𑀳𑁄𑀳𑀺𑀲𑀺 𑀫𑁂 𑀚𑀸𑀫𑀸𑀢𑀸, 𑀦𑀺𑀓𑁆𑀔𑀺𑀧 𑀧𑁄𑀝𑁆𑀞𑀺𑀜𑁆𑀘 𑀖𑀝𑀺𑀓𑀜𑁆𑀘.

𑁪𑁨𑁫.

‘‘𑀲𑁄𑀧𑀺 𑀯𑀲𑀺𑀢𑁆𑀯𑀸 𑀧𑀓𑁆𑀔𑀁, 𑀅𑀣 𑀢𑀸𑀢𑀁 𑀪𑀡𑀢𑀺 ‘𑀤𑁂𑀳𑀺 𑀫𑁂 𑀧𑁄𑀝𑁆𑀞𑀺𑀁;

𑀖𑀝𑀺𑀓𑀜𑁆𑀘 𑀫𑀮𑁆𑀮𑀓𑀜𑁆𑀘, 𑀧𑀼𑀦𑀧𑀺 𑀪𑀺𑀓𑁆𑀔𑀁 𑀘𑀭𑀺𑀲𑁆𑀲𑀸𑀫𑀺’.

𑁪𑁨𑁬.

‘‘𑀅𑀣 𑀦𑀁 𑀪𑀡𑀢𑀻 𑀢𑀸𑀢𑁄, 𑀅𑀫𑁆𑀫𑀸 𑀲𑀩𑁆𑀩𑁄 𑀘 𑀫𑁂 𑀜𑀸𑀢𑀺𑀕𑀡𑀯𑀕𑁆𑀕𑁄;

𑀓𑀺𑀁 𑀢𑁂 𑀦 𑀓𑀻𑀭𑀢𑀺 𑀇𑀥, 𑀪𑀡 𑀔𑀺𑀧𑁆𑀧𑀁 𑀢𑀁 𑀢𑁂 𑀓𑀭𑀺𑀳𑀺𑀢𑀺.

𑁪𑁨𑁭.

‘‘𑀏𑀯𑀁 𑀪𑀡𑀺𑀢𑁄 𑀪𑀡𑀢𑀺, 𑀬𑀤𑀺 𑀫𑁂 𑀅𑀢𑁆𑀢𑀸 𑀲𑀓𑁆𑀓𑁄𑀢𑀺 𑀅𑀮𑀁 𑀫𑀬𑁆𑀳𑀁;

𑀇𑀲𑀺𑀤𑀸𑀲𑀺𑀬𑀸 𑀦 𑀲𑀳 𑀯𑀘𑁆𑀙𑀁, 𑀏𑀓𑀖𑀭𑁂𑀳𑀁 𑀲𑀳 𑀯𑀢𑁆𑀣𑀼𑀁.

𑁪𑁨𑁮.

‘‘𑀯𑀺𑀲𑁆𑀲𑀚𑁆𑀚𑀺𑀢𑁄 𑀕𑀢𑁄 𑀲𑁄, 𑀅𑀳𑀫𑁆𑀧𑀺 𑀏𑀓𑀸𑀓𑀺𑀦𑀻 𑀯𑀺𑀘𑀺𑀦𑁆𑀢𑁂𑀫𑀺;

𑀆𑀧𑀼𑀘𑁆𑀙𑀺𑀢𑀽𑀦 𑀕𑀘𑁆𑀙𑀁, 𑀫𑀭𑀺𑀢𑀼𑀬𑁂 𑀯𑀸 𑀧𑀩𑁆𑀩𑀚𑀺𑀲𑁆𑀲𑀁 𑀯𑀸.

𑁪𑁨𑁯.

‘‘𑀅𑀣 𑀅𑀬𑁆𑀬𑀸 𑀚𑀺𑀦𑀤𑀢𑁆𑀢𑀸, 𑀆𑀕𑀘𑁆𑀙𑀻 𑀕𑁄𑀘𑀭𑀸𑀬 𑀘𑀭𑀫𑀸𑀦𑀸;

𑀢𑀸𑀢 𑀓𑀼𑀮𑀁 𑀯𑀺𑀦𑀬𑀥𑀭𑀻, 𑀩𑀳𑀼𑀲𑁆𑀲𑀼𑀢𑀸 𑀲𑀻𑀮𑀲𑀫𑁆𑀧𑀦𑁆𑀦𑀸.

𑁪𑁩𑁦.

‘‘𑀢𑀁 𑀤𑀺𑀲𑁆𑀯𑀸𑀦 𑀅𑀫𑁆𑀳𑀸𑀓𑀁, 𑀉𑀝𑁆𑀞𑀸𑀬𑀸𑀲𑀦𑀁 𑀢𑀲𑁆𑀲𑀸 𑀧𑀜𑁆𑀜𑀸𑀧𑀬𑀺𑀁;

𑀦𑀺𑀲𑀺𑀦𑁆𑀦𑀸𑀬 𑀘 𑀧𑀸𑀤𑁂, 𑀯𑀦𑁆𑀤𑀺𑀢𑁆𑀯𑀸 𑀪𑁄𑀚𑀦𑀫𑀤𑀸𑀲𑀺𑀁.

𑁪𑁩𑁧.

‘‘𑀅𑀦𑁆𑀦𑁂𑀦 𑀘 𑀧𑀸𑀦𑁂𑀦 𑀘, 𑀔𑀚𑁆𑀚𑁂𑀦 𑀘 𑀬𑀜𑁆𑀘 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀁;

𑀲𑀦𑁆𑀢𑀧𑁆𑀧𑀬𑀺𑀢𑁆𑀯𑀸 𑀅𑀯𑀘𑀁, 𑀅𑀬𑁆𑀬𑁂 𑀇𑀘𑁆𑀙𑀸𑀫𑀺 𑀧𑀩𑁆𑀩𑀚𑀺𑀢𑀼𑀁.

𑁪𑁩𑁨.

‘‘𑀅𑀣 𑀫𑀁 𑀪𑀡𑀢𑀻 𑀢𑀸𑀢𑁄, 𑀇𑀥𑁂𑀯 𑀧𑀼𑀢𑁆𑀢𑀓 𑀘𑀭𑀸𑀳𑀺 𑀢𑁆𑀯𑀁 𑀥𑀫𑁆𑀫𑀁;

𑀅𑀦𑁆𑀦𑁂𑀦 𑀘 𑀧𑀸𑀦𑁂𑀦 𑀘, 𑀢𑀧𑁆𑀧𑀬 𑀲𑀫𑀡𑁂 𑀤𑁆𑀯𑀺𑀚𑀸𑀢𑀻 𑀘.

𑁪𑁩𑁩.

‘‘𑀅𑀣𑀳𑀁 𑀪𑀡𑀸𑀫𑀺 𑀢𑀸𑀢𑀁, 𑀭𑁄𑀤𑀦𑁆𑀢𑀻 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸;

𑀧𑀸𑀧𑀜𑁆𑀳𑀺 𑀫𑀬𑀸 𑀧𑀓𑀢𑀁, 𑀓𑀫𑁆𑀫𑀁 𑀢𑀁 𑀦𑀺𑀚𑁆𑀚𑀭𑁂𑀲𑁆𑀲𑀸𑀫𑀺.

𑁪𑁩𑁪.

‘‘𑀅𑀣 𑀫𑀁 𑀪𑀡𑀢𑀻 𑀢𑀸𑀢𑁄, 𑀧𑀸𑀧𑀼𑀡 𑀩𑁄𑀥𑀺𑀜𑁆𑀘 𑀅𑀕𑁆𑀕𑀥𑀫𑁆𑀫𑀜𑁆𑀘;

𑀦𑀺𑀩𑁆𑀩𑀸𑀦𑀜𑁆𑀘 𑀮𑀪𑀲𑁆𑀲𑀼, 𑀬𑀁 𑀲𑀘𑁆𑀙𑀺𑀓𑀭𑀻 𑀤𑁆𑀯𑀺𑀧𑀤𑀲𑁂𑀝𑁆𑀞𑁄.

𑁪𑁩𑁫.

‘‘𑀫𑀸𑀢𑀸𑀧𑀺𑀢𑀽 𑀅𑀪𑀺𑀯𑀸𑀤, 𑀬𑀺𑀢𑁆𑀯𑀸 𑀲𑀩𑁆𑀩𑀜𑁆𑀘 𑀜𑀸𑀢𑀺𑀕𑀡𑀯𑀕𑁆𑀕𑀁;

𑀲𑀢𑁆𑀢𑀸𑀳𑀁 𑀧𑀩𑁆𑀩𑀚𑀺𑀢𑀸, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺𑀁.

𑁪𑁩𑁬.

‘‘𑀚𑀸𑀦𑀸𑀫𑀺 𑀅𑀢𑁆𑀢𑀦𑁄 𑀲𑀢𑁆𑀢, 𑀚𑀸𑀢𑀺𑀬𑁄 𑀬𑀲𑁆𑀲𑀬𑀁 𑀨𑀮𑀯𑀺𑀧𑀸𑀓𑁄;

𑀢𑀁 𑀢𑀯 𑀆𑀘𑀺𑀓𑁆𑀔𑀺𑀲𑁆𑀲𑀁, 𑀢𑀁 𑀏𑀓𑀫𑀦𑀸 𑀦𑀺𑀲𑀸𑀫𑁂𑀳𑀺.

𑁪𑁩𑁭.

‘‘𑀦𑀕𑀭𑀫𑁆𑀳𑀺 𑀏𑀭𑀓𑀘𑁆𑀙𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀅𑀳𑀁 𑀧𑀳𑀽𑀢𑀥𑀦𑁄;

𑀬𑁄𑀩𑁆𑀩𑀦𑀫𑀤𑁂𑀦 𑀫𑀢𑁆𑀢𑁄, 𑀲𑁄 𑀧𑀭𑀤𑀸𑀭𑀁 𑀅𑀲𑁂𑀯𑀺𑀳𑀁.

𑁪𑁩𑁮.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀦𑀺𑀭𑀬𑀫𑁆𑀳𑀺 𑀅𑀧𑀘𑁆𑀘𑀺𑀲𑀁 𑀘𑀺𑀭𑀁;

𑀧𑀓𑁆𑀓𑁄 𑀢𑀢𑁄 𑀘 𑀉𑀝𑁆𑀞𑀳𑀺𑀢𑁆𑀯𑀸, 𑀫𑀓𑁆𑀓𑀝𑀺𑀬𑀸 𑀓𑀼𑀘𑁆𑀙𑀺𑀫𑁄𑀓𑁆𑀓𑀫𑀺𑀁.

𑁪𑁩𑁯.

‘‘𑀲𑀢𑁆𑀢𑀸𑀳𑀚𑀸𑀢𑀓𑀁 𑀫𑀁, 𑀫𑀳𑀸𑀓𑀧𑀺 𑀬𑀽𑀣𑀧𑁄 𑀦𑀺𑀮𑁆𑀮𑀘𑁆𑀙𑁂𑀲𑀺;

𑀢𑀲𑁆𑀲𑁂𑀢𑀁 𑀓𑀫𑁆𑀫𑀨𑀮𑀁, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁦.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀓𑀸𑀮𑀁 𑀓𑀭𑀺𑀢𑁆𑀯𑀸 𑀲𑀺𑀦𑁆𑀥𑀯𑀸𑀭𑀜𑁆𑀜𑁂;

𑀓𑀸𑀡𑀸𑀬 𑀘 𑀔𑀜𑁆𑀚𑀸𑀬 𑀘, 𑀏𑀴𑀓𑀺𑀬𑀸 𑀓𑀼𑀘𑁆𑀙𑀺𑀫𑁄𑀓𑁆𑀓𑀫𑀺𑀁.

𑁪𑁪𑁧.

‘‘𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀅𑀳𑀁, 𑀦𑀺𑀮𑁆𑀮𑀘𑁆𑀙𑀺𑀢𑁄 𑀤𑀸𑀭𑀓𑁂 𑀧𑀭𑀺𑀯𑀳𑀺𑀢𑁆𑀯𑀸;

𑀓𑀺𑀫𑀺𑀦𑀸𑀯𑀝𑁆𑀝𑁄 𑀅𑀓𑀮𑁆𑀮𑁄, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁨.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀕𑁄𑀯𑀸𑀡𑀺𑀚𑀓𑀲𑁆𑀲 𑀕𑀸𑀯𑀺𑀬𑀸 𑀚𑀸𑀢𑁄;

𑀯𑀘𑁆𑀙𑁄 𑀮𑀸𑀔𑀸𑀢𑀫𑁆𑀩𑁄, 𑀦𑀺𑀮𑁆𑀮𑀘𑁆𑀙𑀺𑀢𑁄 𑀤𑁆𑀯𑀸𑀤𑀲𑁂 𑀫𑀸𑀲𑁂.

𑁪𑁪𑁩.

‘‘𑀯𑁄𑀠𑀽𑀦 𑀦𑀗𑁆𑀕𑀮𑀫𑀳𑀁, 𑀲𑀓𑀝𑀜𑁆𑀘 𑀥𑀸𑀭𑀬𑀸𑀫𑀺;

𑀅𑀦𑁆𑀥𑁄𑀯𑀝𑁆𑀝𑁄 𑀅𑀓𑀮𑁆𑀮𑁄, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁪.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀯𑀻𑀣𑀺𑀬𑀸 𑀤𑀸𑀲𑀺𑀬𑀸 𑀖𑀭𑁂 𑀚𑀸𑀢𑁄;

𑀦𑁂𑀯 𑀫𑀳𑀺𑀮𑀸 𑀦 𑀧𑀼𑀭𑀺𑀲𑁄, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁫.

‘‘𑀢𑀺𑀁𑀲𑀢𑀺𑀯𑀲𑁆𑀲𑀫𑁆𑀳𑀺 𑀫𑀢𑁄, 𑀲𑀸𑀓𑀝𑀺𑀓𑀓𑀼𑀮𑀫𑁆𑀳𑀺 𑀤𑀸𑀭𑀺𑀓𑀸 𑀚𑀸𑀢𑀸;

𑀓𑀧𑀡𑀫𑁆𑀳𑀺 𑀅𑀧𑁆𑀧𑀪𑁄𑀕𑁂, 𑀥𑀦𑀺𑀓𑀧𑀼𑀭𑀺𑀲𑀧𑀸𑀢𑀩𑀳𑀼𑀮𑀫𑁆𑀳𑀺.

𑁪𑁪𑁬.

‘‘𑀢𑀁 𑀫𑀁 𑀢𑀢𑁄 𑀲𑀢𑁆𑀣𑀯𑀸𑀳𑁄, 𑀉𑀲𑁆𑀲𑀦𑁆𑀦𑀸𑀬 𑀯𑀺𑀧𑀼𑀮𑀸𑀬 𑀯𑀟𑁆𑀠𑀺𑀬𑀸;

𑀑𑀓𑀟𑁆𑀠𑀢𑀺 𑀯𑀺𑀮𑀧𑀦𑁆𑀢𑀺𑀁, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀮𑀖𑀭𑀲𑁆𑀫𑀸.

𑁪𑁪𑁭.

‘‘𑀅𑀣 𑀲𑁄𑀴𑀲𑀫𑁂 𑀯𑀲𑁆𑀲𑁂, 𑀤𑀺𑀲𑁆𑀯𑀸 𑀫𑀁 𑀧𑀢𑁆𑀢𑀬𑁄𑀩𑁆𑀩𑀦𑀁 𑀓𑀜𑁆𑀜𑀁;

𑀑𑀭𑀼𑀦𑁆𑀥𑀢𑀲𑁆𑀲 𑀧𑀼𑀢𑁆𑀢𑁄, 𑀕𑀺𑀭𑀺𑀤𑀸𑀲𑁄 𑀦𑀸𑀫 𑀦𑀸𑀫𑁂𑀦.

𑁪𑁪𑁮.

‘‘𑀢𑀲𑁆𑀲𑀧𑀺 𑀅𑀜𑁆𑀜𑀸 𑀪𑀭𑀺𑀬𑀸, 𑀲𑀻𑀮𑀯𑀢𑀻 𑀕𑀼𑀡𑀯𑀢𑀻 𑀬𑀲𑀯𑀢𑀻 𑀘;

𑀅𑀦𑀼𑀭𑀢𑁆𑀢𑀸 𑀪𑀢𑁆𑀢𑀸𑀭𑀁, 𑀢𑀲𑁆𑀲𑀸𑀳𑀁 𑀯𑀺𑀤𑁆𑀤𑁂𑀲𑀦𑀫𑀓𑀸𑀲𑀺𑀁.

𑁪𑁪𑁯.

‘‘𑀢𑀲𑁆𑀲𑁂𑀢𑀁 𑀓𑀫𑁆𑀫𑀨𑀮𑀁, 𑀬𑀁 𑀫𑀁 𑀅𑀧𑀓𑀻𑀭𑀺𑀢𑀽𑀦 𑀕𑀘𑁆𑀙𑀦𑁆𑀢𑀺;

𑀤𑀸𑀲𑀻𑀯 𑀉𑀧𑀝𑁆𑀞𑀳𑀦𑁆𑀢𑀺𑀁, 𑀢𑀲𑁆𑀲𑀧𑀺 𑀅𑀦𑁆𑀢𑁄 𑀓𑀢𑁄 𑀫𑀬𑀸’’𑀢𑀺.

𑀢𑀢𑁆𑀣 𑀦𑀕𑀭𑀫𑁆𑀳𑀺 𑀓𑀼𑀲𑀼𑀫𑀦𑀸𑀫𑁂𑀢𑀺 ‘‘𑀓𑀼𑀲𑀼𑀫𑀧𑀼𑀭’’𑀦𑁆𑀢𑀺 𑀏𑀯𑀁 𑀓𑀼𑀲𑀼𑀫𑀲𑀤𑁆𑀤𑁂𑀦 𑀕𑀳𑀺𑀢𑀦𑀸𑀫𑀓𑁂 𑀦𑀕𑀭𑁂, 𑀇𑀤𑀸𑀦𑀺 𑀢𑀁 𑀦𑀕𑀭𑀁 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀻𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀧𑀣𑀯𑀺𑀬𑀸 𑀫𑀡𑁆𑀟𑁂𑀢𑀺 𑀲𑀓𑀮𑀸𑀬 𑀧𑀣𑀯𑀺𑀬𑀸 𑀫𑀡𑁆𑀟𑀪𑀽𑀢𑁂. 𑀲𑀓𑁆𑀬𑀓𑀼𑀮𑀓𑀼𑀮𑀻𑀦𑀸𑀬𑁄𑀢𑀺 𑀲𑀓𑁆𑀬𑀓𑀼𑀮𑁂 𑀓𑀼𑀮𑀥𑀻𑀢𑀭𑁄, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁.

𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑁆𑀯𑀻𑀲𑀼 𑀪𑀺𑀓𑁆𑀔𑀼𑀦𑀻𑀲𑀼. 𑀩𑁄𑀥𑀻𑀢𑀺 𑀏𑀯𑀁𑀦𑀸𑀫𑀺𑀓𑀸 𑀣𑁂𑀭𑀻. 𑀛𑀸𑀦𑀚𑁆𑀛𑀸𑀬𑀦𑀭𑀢𑀸𑀬𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑁆𑀲 𑀛𑀸𑀦𑀲𑁆𑀲 𑀛𑀸𑀬𑀦𑁂 𑀅𑀪𑀺𑀭𑀢𑀸. 𑀩𑀳𑀼𑀲𑁆𑀲𑀼𑀢𑀸𑀬𑁄𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦 𑀩𑀳𑀼𑀲𑁆𑀲𑀼𑀢𑀸. 𑀥𑀼𑀢𑀓𑀺𑀮𑁂𑀲𑀸𑀬𑁄𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀲𑀫𑀼𑀕𑁆𑀖𑀸𑀢𑀺𑀢𑀓𑀺𑀮𑁂𑀲𑀸. 𑀪𑀢𑁆𑀢𑀢𑁆𑀣𑀁 𑀓𑀭𑀺𑀬𑀸𑀢𑀺 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸. 𑀭𑀳𑀺𑀢𑀫𑁆𑀳𑀻𑀢𑀺 𑀚𑀦𑀭𑀳𑀺𑀢𑀫𑁆𑀳𑀺 𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑁂. 𑀲𑀼𑀔𑀦𑀺𑀲𑀺𑀦𑁆𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀺𑀯𑁂𑀓𑀲𑀼𑀔𑁂𑀦 𑀘 𑀲𑀼𑀔𑀦𑀺𑀲𑀺𑀦𑁆𑀦𑀸. 𑀇𑀫𑀸 𑀕𑀺𑀭𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀲𑀼𑀔𑀸 𑀮𑀸𑀧𑀦𑀸. 𑀅𑀩𑁆𑀪𑀼𑀤𑀻𑀭𑁂𑀲𑀼𑀦𑁆𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀓𑀣𑀬𑀺𑀁𑀲𑀼.

‘‘𑀧𑀸𑀲𑀸𑀤𑀺𑀓𑀸𑀲𑀻’’𑀢𑀺 𑀕𑀸𑀣𑀸 𑀩𑁄𑀥𑀺𑀢𑁆𑀣𑁂𑀭𑀺𑀬𑀸 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀸. ‘‘𑀏𑀯𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸’’𑀢𑀺 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑁂𑀯 𑀯𑀼𑀢𑁆𑀢𑀸. ‘‘𑀉𑀚𑁆𑀚𑁂𑀦𑀺𑀬𑀸’’𑀢𑀺𑀆𑀤𑀺𑀓𑀸 𑀳𑀺 𑀲𑀩𑁆𑀩𑀸𑀧𑀺 𑀇𑀲𑀺𑀤𑀸𑀲𑀺𑀬𑀸𑀯 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀸𑀲𑀸𑀤𑀺𑀓𑀸𑀲𑀻𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑁆𑀲𑀦𑁆𑀢𑀸𑀦𑀁 𑀧𑀲𑀸𑀤𑀸𑀯𑀳𑀸 𑀅𑀲𑀺. 𑀯𑀬𑁄𑀧𑀺 𑀢𑁂 𑀅𑀧𑀭𑀺𑀳𑀻𑀦𑁄𑀢𑀺 𑀢𑀼𑀬𑁆𑀳𑀁 𑀯𑀬𑁄𑀧𑀺 𑀦 𑀧𑀭𑀺𑀳𑀻𑀦𑁄, 𑀧𑀞𑀫𑀯𑀬𑁂 𑀞𑀺𑀢𑀸𑀲𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀤𑀺𑀲𑁆𑀯𑀸𑀦 𑀩𑁆𑀬𑀸𑀮𑀺𑀓𑀦𑁆𑀢𑀺 𑀓𑀻𑀤𑀺𑀲𑀁 𑀩𑁆𑀬𑀸𑀮𑀺𑀓𑀁 𑀤𑁄𑀲𑀁 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸. 𑀅𑀣𑀸𑀲𑀺 𑀦𑁂𑀓𑁆𑀔𑀫𑁆𑀫𑀫𑀦𑀼𑀬𑀼𑀢𑁆𑀢𑀸𑀢𑀺 𑀅𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀦𑁂𑀓𑁆𑀔𑀫𑁆𑀫𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀬𑀼𑀢𑁆𑀢𑀸 𑀅𑀲𑀺.

𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑀸, 𑀲𑀸 𑀇𑀲𑀺𑀤𑀸𑀲𑀻𑀢𑀺 𑀬𑁄𑀚𑀦𑀸. 𑀭𑀳𑀺𑀢𑁂𑀢𑀺 𑀲𑀼𑀜𑁆𑀜𑀝𑁆𑀞𑀸𑀦𑁂. 𑀲𑀼𑀡 𑀩𑁄𑀥𑀺 𑀬𑀣𑀸𑀫𑁆𑀳𑀺 𑀧𑀩𑁆𑀩𑀚𑀺𑀢𑀸𑀢𑀺 𑀩𑁄𑀥𑀺𑀢𑁆𑀣𑁂𑀭𑀺 𑀅𑀳𑀁 𑀬𑀣𑀸 𑀧𑀩𑁆𑀩𑀚𑀺𑀢𑀸 𑀅𑀫𑁆𑀳𑀺, 𑀢𑀁 𑀢𑀁 𑀧𑀼𑀭𑀸𑀡𑀁 𑀲𑀼𑀡 𑀲𑀼𑀡𑀸𑀳𑀺.

𑀉𑀚𑁆𑀚𑁂𑀦𑀺𑀬𑀸 𑀧𑀼𑀭𑀯𑀭𑁂𑀢𑀺 𑀉𑀚𑁆𑀚𑁂𑀦𑀻𑀦𑀸𑀫𑀓𑁂 𑀅𑀯𑀦𑁆𑀢𑀺𑀭𑀝𑁆𑀞𑁂 𑀉𑀢𑁆𑀢𑀫𑀦𑀕𑀭𑁂. 𑀧𑀺𑀬𑀸𑀢𑀺 𑀏𑀓𑀥𑀻𑀢𑀼𑀪𑀸𑀯𑁂𑀦 𑀧𑀺𑀬𑀸𑀬𑀺𑀢𑀩𑁆𑀩𑀸. 𑀫𑀦𑀸𑀧𑀸𑀢𑀺 𑀲𑀻𑀮𑀸𑀘𑀸𑀭𑀕𑀼𑀡𑁂𑀦 𑀫𑀦𑀯𑀟𑁆𑀠𑀦𑀓𑀸. 𑀤𑀬𑀺𑀢𑀸𑀢𑀺 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀸.

𑀅𑀣𑀸𑀢𑀺 𑀧𑀘𑁆𑀙𑀸 𑀫𑀫 𑀯𑀬𑀧𑁆𑀧𑀢𑁆𑀢𑀓𑀸𑀮𑁂. 𑀫𑁂 𑀲𑀸𑀓𑁂𑀢𑀢𑁄 𑀯𑀭𑀓𑀸𑀢𑀺 𑀲𑀸𑀓𑁂𑀢𑀦𑀕𑀭𑀢𑁄 𑀫𑀫 𑀯𑀭𑀓𑀸 𑀫𑀁 𑀯𑀸𑀭𑁂𑀦𑁆𑀢𑀸 𑀆𑀕𑀘𑁆𑀙𑀼𑀁. 𑀉𑀢𑁆𑀢𑀫𑀓𑀼𑀮𑀻𑀦𑀸𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂 𑀅𑀕𑁆𑀕𑀓𑀼𑀮𑀺𑀓𑀸, 𑀬𑁂𑀦 𑀢𑁂 𑀧𑁂𑀲𑀺𑀢𑀸, 𑀲𑁄 𑀲𑁂𑀝𑁆𑀞𑀺 𑀧𑀳𑀽𑀢𑀭𑀢𑀦𑁄. 𑀢𑀲𑁆𑀲 𑀫𑀫𑀁 𑀲𑀼𑀡𑁆𑀳𑀫𑀤𑀸𑀲𑀺 𑀢𑀸𑀢𑁄𑀢𑀺 𑀢𑀲𑁆𑀲 𑀲𑀸𑀓𑁂𑀢𑀲𑁂𑀝𑁆𑀞𑀺𑀦𑁄 𑀲𑀼𑀡𑀺𑀲𑀁 𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀁 𑀓𑀢𑁆𑀯𑀸 𑀫𑀬𑁆𑀳𑀁 𑀧𑀺𑀢𑀸 𑀫𑀁 𑀅𑀤𑀸𑀲𑀺.

𑀲𑀸𑀬𑀁 𑀧𑀸𑀢𑀦𑁆𑀢𑀺 𑀲𑀸𑀬𑀦𑁆𑀳𑁂 𑀧𑀼𑀩𑁆𑀩𑀡𑁆𑀳𑁂 𑀘. 𑀧𑀡𑀸𑀫𑀫𑀼𑀧𑀕𑀫𑁆𑀫 𑀲𑀺𑀭𑀲𑀸 𑀓𑀭𑁄𑀫𑀻𑀢𑀺 𑀲𑀲𑁆𑀲𑀼𑀬𑀸 𑀲𑀲𑀼𑀭𑀲𑁆𑀲 𑀘 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀲𑀺𑀭𑀲𑀸 𑀧𑀡𑀸𑀫𑀁 𑀓𑀭𑁄𑀫𑀺, 𑀢𑁂𑀲𑀁 𑀧𑀸𑀤𑁂 𑀯𑀦𑁆𑀤𑀸𑀫𑀺. 𑀬𑀣𑀸𑀫𑁆𑀳𑀺 𑀅𑀦𑀼𑀲𑀺𑀝𑁆𑀞𑀸𑀢𑀺 𑀢𑁂𑀳𑀺 𑀬𑀣𑀸 𑀅𑀦𑀼𑀲𑀺𑀝𑁆𑀞𑀸 𑀅𑀫𑁆𑀳𑀺, 𑀢𑀣𑀸 𑀓𑀭𑁄𑀫𑀺, 𑀢𑁂𑀲𑀁 𑀅𑀦𑀼𑀲𑀺𑀝𑁆𑀞𑀺𑀁 𑀦 𑀅𑀢𑀺𑀓𑁆𑀓𑀫𑀸𑀫𑀺.

𑀢𑀫𑁂𑀓𑀯𑀭𑀓𑀫𑁆𑀧𑀻𑀢𑀺 𑀏𑀓𑀯𑀮𑁆𑀮𑀪𑀫𑁆𑀧𑀺. 𑀉𑀩𑁆𑀩𑀺𑀕𑁆𑀕𑀸𑀢𑀺 𑀢𑀲𑀦𑁆𑀢𑀸. 𑀆𑀲𑀦𑀁 𑀤𑁂𑀫𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀁 𑀢𑀲𑁆𑀲 𑀤𑁂𑀫𑀺.

𑀢𑀢𑁆𑀣𑀸𑀢𑀺 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑁂. 𑀲𑀦𑁆𑀦𑀺𑀳𑀺𑀢𑀦𑁆𑀢𑀺 𑀲𑀚𑁆𑀚𑀺𑀢𑀁 𑀳𑀼𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀁. 𑀙𑀸𑀤𑁂𑀫𑀻𑀢𑀺 𑀉𑀧𑀘𑁆𑀙𑀸𑀤𑁂𑀫𑀺, 𑀉𑀧𑀘𑁆𑀙𑀸𑀤𑁂𑀢𑁆𑀯𑀸 𑀉𑀧𑀦𑀬𑀸𑀫𑀺 𑀘, 𑀉𑀧𑀦𑁂𑀢𑁆𑀯𑀸 𑀤𑁂𑀫𑀺, 𑀤𑁂𑀦𑁆𑀢𑀻𑀧𑀺 𑀬𑀁 𑀬𑀲𑁆𑀲 𑀧𑀢𑀺𑀭𑀽𑀧𑀁, 𑀢𑀤𑁂𑀯 𑀤𑁂𑀫𑀻𑀢𑀺 𑀅𑀢𑁆𑀣𑁄.

𑀉𑀫𑁆𑀫𑀸𑀭𑁂𑀢𑀺 𑀤𑁆𑀯𑀸𑀭𑁂. 𑀥𑁄𑀯𑀦𑁆𑀢𑀻 𑀳𑀢𑁆𑀣𑀧𑀸𑀤𑁂𑀢𑀺 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀦𑀻 𑀆𑀲𑀺𑀁, 𑀥𑁄𑀯𑀺𑀢𑁆𑀯𑀸 𑀖𑀭𑀁 𑀲𑀫𑀼𑀧𑀕𑀫𑀸𑀫𑀻𑀢𑀺 𑀬𑁄𑀚𑀦𑀸.

𑀓𑁄𑀘𑁆𑀙𑀦𑁆𑀢𑀺 𑀫𑀲𑁆𑀲𑀽𑀦𑀁 𑀓𑁂𑀲𑀸𑀦𑀜𑁆𑀘 𑀉𑀮𑁆𑀮𑀺𑀔𑀦𑀓𑁄𑀘𑁆𑀙𑀁. 𑀧𑀲𑀸𑀤𑀦𑁆𑀢𑀺 𑀕𑀦𑁆𑀥𑀘𑀼𑀡𑁆𑀡𑀸𑀤𑀺𑀫𑀼𑀔𑀯𑀺𑀮𑁂𑀧𑀦𑀁. ‘‘𑀧𑀲𑀸𑀥𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀧𑀲𑀸𑀥𑀦𑀪𑀡𑁆𑀟𑀁. 𑀅𑀜𑁆𑀚𑀦𑀺𑀦𑁆𑀢𑀺 𑀅𑀜𑁆𑀚𑀦𑀦𑀸𑀴𑀺𑀁. 𑀧𑀭𑀺𑀓𑀫𑁆𑀫𑀓𑀸𑀭𑀺𑀓𑀸 𑀯𑀺𑀬𑀸𑀢𑀺 𑀅𑀕𑁆𑀕𑀓𑀼𑀮𑀺𑀓𑀸 𑀯𑀺𑀪𑀯𑀲𑀫𑁆𑀧𑀦𑁆𑀦𑀸𑀧𑀺 𑀧𑀢𑀺𑀧𑀭𑀺𑀘𑀸𑀭𑀺𑀓𑀸 𑀘𑁂𑀝𑀺𑀓𑀸 𑀯𑀺𑀬.

𑀲𑀸𑀥𑀬𑀸𑀫𑀻𑀢𑀺 𑀧𑀘𑀸𑀫𑀺. 𑀪𑀸𑀚𑀦𑀦𑁆𑀢𑀺 𑀮𑁄𑀳𑀪𑀸𑀚𑀦𑀜𑁆𑀘. 𑀥𑁄𑀯𑀦𑁆𑀢𑀻 𑀧𑀭𑀺𑀘𑀭𑀸𑀫𑀻𑀢𑀺 𑀬𑁄𑀚𑀦𑀸.

𑀪𑀢𑁆𑀢𑀺𑀓𑀢𑀦𑁆𑀢𑀺 𑀓𑀢𑀲𑀸𑀫𑀺𑀪𑀢𑀺𑀓𑀁. 𑀅𑀦𑀼𑀭𑀢𑁆𑀢𑀦𑁆𑀢𑀺 𑀅𑀦𑀼𑀭𑀢𑁆𑀢𑀯𑀦𑁆𑀢𑀺𑀁. 𑀓𑀸𑀭𑀺𑀓𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀇𑀢𑀺 𑀓𑀢𑁆𑀢𑀩𑁆𑀩𑀲𑁆𑀲 𑀓𑀸𑀭𑀺𑀓𑀁. 𑀦𑀺𑀳𑀢𑀫𑀸𑀦𑀦𑁆𑀢𑀺 𑀅𑀧𑀦𑀻𑀢𑀫𑀸𑀦𑀁. 𑀉𑀝𑁆𑀞𑀸𑀬𑀺𑀓𑀦𑁆𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀁. 𑀅𑀦𑀮𑀲𑀦𑁆𑀢𑀺 𑀢𑀢𑁄 𑀏𑀯 𑀅𑀓𑀼𑀲𑀻𑀢𑀁. 𑀲𑀻𑀮𑀯𑀢𑀺𑀦𑁆𑀢𑀺 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀁. 𑀤𑀼𑀲𑁆𑀲𑀢𑁂𑀢𑀺 𑀤𑀼𑀲𑁆𑀲𑀢𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀪𑀡𑀢𑀺.

𑀪𑀡𑀢𑀺 𑀆𑀧𑀼𑀘𑁆𑀙𑀳𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 ‘‘𑀅𑀳𑀁 𑀢𑀼𑀫𑁆𑀳𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀫𑀫 𑀲𑀸𑀫𑀺𑀓𑁄 𑀅𑀢𑁆𑀢𑀦𑁄 𑀫𑀸𑀢𑀭𑀜𑁆𑀘 𑀧𑀺𑀢𑀭𑀜𑁆𑀘 𑀪𑀡𑀢𑀺. 𑀓𑀺𑀁 𑀪𑀡𑀢𑀻𑀢𑀺 𑀘𑁂 𑀆𑀳 𑁋 ‘‘𑀇𑀲𑀺𑀤𑀸𑀲𑀺𑀬𑀸 𑀦 𑀲𑀳 𑀯𑀘𑁆𑀙𑀁, 𑀏𑀓𑀸𑀕𑀸𑀭𑁂𑀳𑀁 𑀲𑀳 𑀯𑀢𑁆𑀣𑀼’’𑀦𑁆𑀢𑀺. 𑀢𑀢𑁆𑀣 𑀯𑀘𑁆𑀙𑀦𑁆𑀢𑀺 𑀯𑀲𑀺𑀲𑁆𑀲𑀁.

𑀤𑁂𑀲𑁆𑀲𑀸𑀢𑀺 𑀅𑀧𑁆𑀧𑀺𑀬𑀸. 𑀅𑀮𑀁 𑀫𑁂𑀢𑀺 𑀧𑀬𑁄𑀚𑀦𑀁 𑀫𑁂 𑀢𑀸𑀬 𑀇𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀧𑀼𑀘𑁆𑀙𑀸𑀳𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀬𑀤𑀺 𑀫𑁂 𑀢𑀼𑀫𑁆𑀳𑁂 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀇𑀘𑁆𑀙𑀣, 𑀅𑀳𑀁 𑀢𑀼𑀫𑁆𑀳𑁂 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀤𑁂𑀲𑀁 𑀧𑀓𑁆𑀓𑀫𑀺𑀲𑁆𑀲𑀸𑀫𑀺.

𑀢𑀲𑁆𑀲𑀸𑀢𑀺 𑀫𑀫 𑀪𑀢𑁆𑀢𑀼𑀦𑁄. 𑀓𑀺𑀲𑁆𑀲𑀸𑀢𑀺 𑀓𑀺𑀁 𑀅𑀲𑁆𑀲 𑀢𑀯 𑀲𑀸𑀫𑀺𑀓𑀲𑁆𑀲. 𑀢𑀬𑀸 𑀅𑀧𑀭𑀤𑁆𑀥𑀁 𑀩𑁆𑀬𑀸𑀮𑀺𑀓𑀁 𑀓𑀢𑀁.

𑀦𑀧𑀺𑀳𑀁 𑀅𑀧𑀭𑀚𑁆𑀛𑀦𑁆𑀢𑀺 𑀦𑀧𑀺 𑀅𑀳𑀁 𑀢𑀲𑁆𑀲 𑀓𑀺𑀜𑁆𑀘𑀺 𑀅𑀧𑀭𑀚𑁆𑀛𑀺𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦𑀧𑀺 𑀳𑀺𑀁𑀲𑁂𑀫𑀻𑀢𑀺 𑀦𑀧𑀺 𑀩𑀸𑀥𑁂𑀫𑀺. 𑀤𑀼𑀩𑁆𑀩𑀘𑀦𑀦𑁆𑀢𑀺 𑀤𑀼𑀭𑀼𑀢𑁆𑀢𑀯𑀘𑀦𑀁. 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀬𑁆𑀬𑁂𑀢𑀺 𑀓𑀺𑀁 𑀫𑀬𑀸 𑀓𑀸𑀢𑀼𑀁 𑀅𑀬𑁆𑀬𑁂 𑀲𑀓𑁆𑀓𑀸. 𑀬𑀁 𑀫𑀁 𑀯𑀺𑀤𑁆𑀤𑁂𑀲𑁆𑀲𑀢𑁂 𑀪𑀢𑁆𑀢𑀸𑀢𑀺 𑀬𑀲𑁆𑀫𑀸 𑀅𑀓𑀸𑀭𑀡𑁂𑀦𑁂𑀯 𑀪𑀢𑁆𑀢𑀸 𑀫𑀬𑁆𑀳𑀁 𑀯𑀺𑀤𑁆𑀤𑁂𑀲𑁆𑀲𑀢𑁂 𑀯𑀺𑀤𑁆𑀤𑁂𑀲𑁆𑀲𑀁 𑀘𑀺𑀢𑁆𑀢𑀧𑁆𑀧𑀓𑁄𑀧𑀁 𑀓𑀭𑁄𑀢𑀺.

𑀯𑀺𑀫𑀦𑀸𑀢𑀺 𑀤𑁄𑀫𑀦𑀲𑁆𑀲𑀺𑀓𑀸. 𑀧𑀼𑀢𑁆𑀢𑀫𑀦𑀼𑀭𑀓𑁆𑀔𑀫𑀸𑀦𑀸𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀫𑀬𑁆𑀳𑀁 𑀲𑀸𑀫𑀺𑀓𑀁 𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑀡𑁂𑀦 𑀅𑀦𑀼𑀭𑀓𑁆𑀔𑀦𑁆𑀢𑀸. 𑀚𑀺𑀢𑀸𑀫𑁆𑀳𑀲𑁂 𑀭𑀽𑀧𑀺𑀦𑀺𑀁 𑀮𑀓𑁆𑀔𑀺𑀦𑁆𑀢𑀺 𑀚𑀺𑀢𑀸 𑀅𑀫𑁆𑀳𑀲𑁂 𑀚𑀺𑀢𑀸 𑀯𑀢𑀸𑀫𑁆𑀳 𑀭𑀽𑀧𑀯𑀢𑀺𑀁 𑀲𑀺𑀭𑀺𑀁, 𑀫𑀦𑀼𑀲𑁆𑀲𑀯𑁂𑀲𑁂𑀦 𑀘𑀭𑀦𑁆𑀢𑀺𑀬𑀸 𑀲𑀺𑀭𑀺𑀤𑁂𑀯𑀢𑀸𑀬 𑀧𑀭𑀺𑀳𑀻𑀦𑀸 𑀯𑀢𑀸𑀢𑀺 𑀅𑀢𑁆𑀣𑁄.

𑀅𑀟𑁆𑀠𑀲𑁆𑀲 𑀖𑀭𑀫𑁆𑀳𑀺 𑀤𑀼𑀢𑀺𑀬𑀓𑀼𑀮𑀺𑀓𑀲𑁆𑀲𑀸𑀢𑀺 𑀧𑀞𑀫𑀲𑀸𑀫𑀺𑀓𑀁 𑀉𑀧𑀸𑀤𑀸𑀬 𑀤𑀼𑀢𑀺𑀬𑀲𑁆𑀲 𑀅𑀟𑁆𑀠𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀖𑀭𑀫𑁆𑀳𑀺 𑀫𑀁 𑀅𑀤𑀸𑀲𑀺, 𑀤𑁂𑀦𑁆𑀢𑁄 𑀘 𑀢𑀢𑁄 𑀧𑀞𑀫𑀲𑀼𑀗𑁆𑀓𑀢𑁄 𑀉𑀧𑀟𑁆𑀠𑀲𑀼𑀗𑁆𑀓𑁂𑀦 𑀅𑀤𑀸𑀲𑀺. 𑀬𑁂𑀦 𑀫𑀁 𑀯𑀺𑀦𑁆𑀤𑀣 𑀲𑁂𑀝𑁆𑀞𑀻𑀢𑀺 𑀬𑁂𑀦 𑀲𑀼𑀗𑁆𑀓𑁂𑀦 𑀫𑀁 𑀧𑀞𑀫𑀁 𑀲𑁂𑀝𑁆𑀞𑀺 𑀯𑀺𑀦𑁆𑀤𑀣 𑀧𑀝𑀺𑀮𑀪𑀺, 𑀢𑀢𑁄 𑀉𑀧𑀟𑁆𑀠𑀲𑀼𑀗𑁆𑀓𑁂𑀦𑀸𑀢𑀺 𑀬𑁄𑀚𑀦𑀸.

𑀲𑁄𑀧𑀻𑀢𑀺 𑀤𑀼𑀢𑀺𑀬𑀲𑀸𑀫𑀺𑀓𑁄𑀧𑀺. 𑀫𑀁 𑀧𑀝𑀺𑀘𑁆𑀙𑀭𑀬𑀻𑀢𑀺 𑀫𑀁 𑀦𑀻𑀳𑀭𑀺, 𑀲𑁄 𑀫𑀁 𑀕𑁂𑀳𑀢𑁄 𑀦𑀺𑀓𑁆𑀓𑀟𑁆𑀠𑀺. 𑀉𑀧𑀝𑁆𑀞𑀳𑀦𑁆𑀢𑀺𑀦𑁆𑀢𑀺 𑀤𑀸𑀲𑀻 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺𑀁 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺𑀁. 𑀅𑀤𑀽𑀲𑀺𑀓𑀦𑁆𑀢𑀺 𑀅𑀤𑀼𑀩𑁆𑀪𑀦𑀓𑀁.

𑀤𑀫𑀓𑀦𑁆𑀢𑀺 𑀓𑀸𑀭𑀼𑀜𑁆𑀜𑀸𑀥𑀺𑀝𑁆𑀞𑀸𑀦𑀢𑀸𑀬 𑀧𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀤𑀫𑀓𑀁. 𑀬𑀣𑀸 𑀧𑀭𑁂 𑀓𑀺𑀜𑁆𑀘𑀺 𑀤𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀓𑀸𑀬𑀁 𑀯𑀸𑀘𑀜𑁆𑀘 𑀤𑀦𑁆𑀢𑀁 𑀯𑀽𑀧𑀲𑀦𑁆𑀢𑀁 𑀓𑀢𑁆𑀯𑀸 𑀧𑀭𑀤𑀢𑁆𑀢𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑀁. 𑀚𑀸𑀫𑀸𑀢𑀸𑀢𑀺 𑀤𑀼𑀳𑀺𑀢𑀼𑀧𑀢𑀺. 𑀦𑀺𑀓𑁆𑀔𑀺𑀧 𑀧𑁄𑀝𑁆𑀞𑀺𑀜𑁆𑀘 𑀖𑀝𑀺𑀓𑀜𑁆𑀘𑀸𑀢𑀺 𑀢𑀬𑀸 𑀧𑀭𑀺𑀤𑀳𑀺𑀢𑀁 𑀧𑀺𑀮𑁄𑀢𑀺𑀓𑀸𑀔𑀡𑁆𑀟𑀜𑁆𑀘 𑀪𑀺𑀓𑁆𑀔𑀸𑀓𑀧𑀸𑀮𑀜𑁆𑀘 𑀙𑀟𑁆𑀟𑁂𑀳𑀺.

𑀲𑁄𑀧𑀺 𑀯𑀲𑀺𑀢𑁆𑀯𑀸 𑀧𑀓𑁆𑀔𑀦𑁆𑀢𑀺 𑀲𑁄𑀧𑀺 𑀪𑀺𑀓𑁆𑀔𑀓𑁄 𑀧𑀼𑀭𑀺𑀲𑁄 𑀫𑀬𑀸 𑀲𑀤𑁆𑀥𑀺𑀁 𑀅𑀤𑁆𑀥𑀫𑀸𑀲𑀫𑀢𑁆𑀢𑀁 𑀯𑀲𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀦𑀁 𑀪𑀡𑀢𑀻 𑀢𑀸𑀢𑁄𑀢𑀺 𑀢𑀁 𑀪𑀺𑀓𑁆𑀔𑀓𑀁 𑀫𑀫 𑀧𑀺𑀢𑀸 𑀫𑀸𑀢𑀸 𑀲𑀩𑁆𑀩𑁄 𑀘 𑀫𑁂 𑀜𑀸𑀢𑀺𑀕𑀡𑁄 𑀯𑀕𑁆𑀕𑀯𑀕𑁆𑀕𑁄 𑀳𑀼𑀢𑁆𑀯𑀸 𑀪𑀡𑀢𑀺. 𑀓𑀣𑀁? 𑀓𑀺𑀁 𑀢𑁂 𑀦 𑀓𑀻𑀭𑀢𑀺 𑀇𑀥 𑀢𑀼𑀬𑁆𑀳𑀁 𑀓𑀺𑀁 𑀦𑀸𑀫 𑀦 𑀓𑀺𑀭𑀢𑀺 𑀦 𑀲𑀸𑀥𑀺𑀬𑀢𑀺, 𑀪𑀡 𑀔𑀺𑀧𑁆𑀧𑀁. 𑀢𑀁 𑀢𑁂 𑀓𑀭𑀺𑀳𑀺𑀢𑀻𑀢𑀺 𑀢𑀁 𑀢𑀼𑀬𑁆𑀳𑀁 𑀓𑀭𑀺𑀲𑁆𑀲𑀢𑀺.

𑀬𑀤𑀺 𑀫𑁂 𑀅𑀢𑁆𑀢𑀸 𑀲𑀓𑁆𑀓𑁄𑀢𑀻𑀢𑀺 𑀬𑀤𑀺 𑀫𑀬𑁆𑀳𑀁 𑀅𑀢𑁆𑀢𑀸 𑀅𑀢𑁆𑀢𑀸𑀥𑀻𑀦𑁄 𑀪𑀼𑀚𑀺𑀲𑁆𑀲𑁄 𑀘 𑀳𑁄𑀢𑀺, 𑀅𑀮𑀁 𑀫𑀬𑁆𑀳𑀁 𑀇𑀲𑀺𑀤𑀸𑀲𑀺𑀬𑀸 𑀢𑀸𑀬 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀲𑀳 𑀯𑀘𑁆𑀙𑀁 𑀦 𑀲𑀳 𑀯𑀲𑀺𑀲𑁆𑀲𑀁, 𑀏𑀓𑀖𑀭𑁂 𑀅𑀳𑀁 𑀢𑀸𑀬 𑀲𑀳 𑀯𑀢𑁆𑀣𑀼𑀦𑁆𑀢𑀺 𑀬𑁄𑀚𑀦𑀸.

𑀯𑀺𑀲𑁆𑀲𑀚𑁆𑀚𑀺𑀢𑁄 𑀕𑀢𑁄 𑀲𑁄𑀢𑀺 𑀲𑁄 𑀪𑀺𑀓𑁆𑀔𑀓𑁄 𑀧𑀺𑀢𑀭𑀸 𑀯𑀺𑀲𑁆𑀲𑀚𑁆𑀚𑀺𑀢𑁄 𑀬𑀣𑀸𑀭𑀼𑀘𑀺 𑀕𑀢𑁄. 𑀏𑀓𑀸𑀓𑀺𑀦𑀻𑀢𑀺 𑀏𑀓𑀺𑀓𑀸𑀯. 𑀆𑀧𑀼𑀘𑁆𑀙𑀺𑀢𑀽𑀦 𑀕𑀘𑁆𑀙𑀦𑁆𑀢𑀺 𑀫𑀬𑁆𑀳𑀁 𑀧𑀺𑀢𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀘𑁆𑀙𑀸𑀫𑀺. 𑀫𑀭𑀺𑀢𑀼𑀬𑁂𑀢𑀺 𑀫𑀭𑀺𑀢𑀼𑀁. 𑀯𑀸𑀢𑀺 𑀯𑀺𑀓𑀧𑁆𑀧𑀢𑁆𑀣𑁂 𑀦𑀺𑀧𑀸𑀢𑁄.

𑀕𑁄𑀘𑀭𑀸𑀬𑀸𑀢𑀺 𑀪𑀺𑀓𑁆𑀔𑀸𑀬, 𑀢𑀸𑀢-𑀓𑀼𑀮𑀁 𑀆𑀕𑀘𑁆𑀙𑀻𑀢𑀺 𑀬𑁄𑀚𑀦𑀸.

𑀢𑀦𑁆𑀢𑀺 𑀢𑀁 𑀚𑀺𑀦𑀤𑀢𑁆𑀢𑀢𑁆𑀣𑁂𑀭𑀺𑀁. 𑀉𑀝𑁆𑀞𑀸𑀬𑀸𑀲𑀦𑀁 𑀢𑀲𑁆𑀲𑀸 𑀧𑀜𑁆𑀜𑀸𑀧𑀬𑀺𑀦𑁆𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀆𑀲𑀦𑀁 𑀢𑀲𑁆𑀲𑀸 𑀣𑁂𑀭𑀺𑀬𑀸 𑀧𑀜𑁆𑀜𑀸𑀧𑁂𑀲𑀺𑀁.

𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀏𑀯 𑀕𑁂𑀳𑁂 𑀞𑀺𑀢𑀸. 𑀧𑀼𑀢𑁆𑀢𑀓𑀸𑀢𑀺 𑀲𑀸𑀫𑀜𑁆𑀜𑀯𑁄𑀳𑀸𑀭𑁂𑀦 𑀥𑀻𑀢𑀭𑀁 𑀅𑀦𑀼𑀓𑀫𑁆𑀧𑁂𑀦𑁆𑀢𑁄 𑀆𑀮𑀧𑀢𑀺. 𑀘𑀭𑀸𑀳𑀺 𑀢𑁆𑀯𑀁 𑀥𑀫𑁆𑀫𑀦𑁆𑀢𑀺 𑀢𑁆𑀯𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀸𑀤𑀺𑀥𑀫𑁆𑀫𑀁 𑀘𑀭. 𑀤𑁆𑀯𑀺𑀚𑀸𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀻.

𑀦𑀺𑀚𑁆𑀚𑀭𑁂𑀲𑁆𑀲𑀸𑀫𑀻𑀢𑀺 𑀚𑀻𑀭𑀸𑀧𑁂𑀲𑁆𑀲𑀸𑀫𑀺 𑀯𑀺𑀦𑀸𑀲𑁂𑀲𑁆𑀲𑀸𑀫𑀺.

𑀩𑁄𑀥𑀺𑀦𑁆𑀢𑀺 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀺𑀁, 𑀫𑀕𑁆𑀕𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀥𑀫𑁆𑀫𑀦𑁆𑀢𑀺 𑀨𑀮𑀥𑀫𑁆𑀫𑀁, 𑀅𑀭𑀳𑀢𑁆𑀢𑀁. 𑀬𑀁 𑀲𑀘𑁆𑀙𑀺𑀓𑀭𑀻 𑀤𑁆𑀯𑀺𑀧𑀤𑀲𑁂𑀝𑁆𑀞𑁄𑀢𑀺 𑀬𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀜𑁆𑀜𑀺𑀢𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀤𑁆𑀯𑀺𑀧𑀤𑀸𑀦𑀁 𑀲𑁂𑀝𑁆𑀞𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀘𑁆𑀙𑀺 𑀅𑀓𑀸𑀲𑀺, 𑀢𑀁 𑀮𑀪𑀲𑁆𑀲𑀽𑀢𑀺 𑀬𑁄𑀚𑀦𑀸.

𑀲𑀢𑁆𑀢𑀸𑀳𑀁 𑀧𑀩𑁆𑀩𑀚𑀺𑀢𑀸𑀢𑀺 𑀧𑀩𑁆𑀩𑀚𑀺𑀢𑀸 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑁂𑀦. 𑀅𑀨𑀲𑁆𑀲𑀬𑀺𑀦𑁆𑀢𑀺 𑀨𑀼𑀲𑀺𑀁 𑀲𑀘𑁆𑀙𑀸𑀓𑀸𑀲𑀺𑀁.

𑀬𑀲𑁆𑀲𑀬𑀁 𑀨𑀮𑀯𑀺𑀧𑀸𑀓𑁄𑀢𑀺 𑀬𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲, 𑀅𑀬𑀁 𑀲𑀸𑀫𑀺𑀓𑀲𑁆𑀲 𑀅𑀫𑀦𑀸𑀧𑀪𑀸𑀯𑀲𑀗𑁆𑀔𑀸𑀢𑁄 𑀦𑀺𑀲𑁆𑀲𑀦𑁆𑀤𑀨𑀮𑀪𑀽𑀢𑁄 𑀯𑀺𑀧𑀸𑀓𑁄. 𑀢𑀁 𑀢𑀯 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀢𑀁 𑀓𑀫𑁆𑀫𑀁 𑀢𑀯 𑀓𑀣𑁂𑀲𑁆𑀲𑀸𑀫𑀺. 𑀢𑀦𑁆𑀢𑀺 𑀆𑀘𑀺𑀓𑁆𑀔𑀺𑀬𑀫𑀸𑀦𑀁 𑀢𑀫𑁂𑀯 𑀓𑀫𑁆𑀫𑀁, 𑀢𑀁 𑀯𑀸 𑀫𑀫 𑀯𑀘𑀦𑀁. 𑀏𑀓𑀫𑀦𑀸𑀢𑀺 𑀏𑀓𑀕𑁆𑀕𑀫𑀦𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀦𑀕𑀭𑀫𑁆𑀳𑀺 𑀏𑀭𑀓𑀘𑁆𑀙𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀲𑁄 𑀧𑀭𑀤𑀸𑀭𑀁 𑀅𑀲𑁂𑀯𑀺𑀳𑀦𑁆𑀢𑀺 𑀲𑁄 𑀅𑀳𑀁 𑀧𑀭𑀲𑁆𑀲 𑀤𑀸𑀭𑀁 𑀅𑀲𑁂𑀯𑀺𑀁.

𑀘𑀺𑀭𑀁 𑀧𑀓𑁆𑀓𑁄𑀢𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑀕𑁆𑀕𑀺𑀦𑀸 𑀤𑀟𑁆𑀠𑁄. 𑀢𑀢𑁄 𑀘 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀢𑀢𑁄 𑀦𑀺𑀭𑀬𑀢𑁄 𑀯𑀼𑀝𑁆𑀞𑀺𑀢𑁄 𑀘𑀼𑀢𑁄. 𑀫𑀓𑁆𑀓𑀝𑀺𑀬𑀸 𑀓𑀼𑀘𑁆𑀙𑀺𑀫𑁄𑀓𑁆𑀓𑀫𑀺𑀦𑁆𑀢𑀺 𑀯𑀸𑀦𑀭𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀁.

𑀬𑀽𑀣𑀧𑁄𑀢𑀺 𑀬𑀽𑀣𑀧𑀢𑀺. 𑀦𑀺𑀮𑁆𑀮𑀘𑁆𑀙𑁂𑀲𑀻𑀢𑀺 𑀧𑀼𑀭𑀺𑀲𑀪𑀸𑀯𑀲𑁆𑀲 𑀮𑀓𑁆𑀔𑀡𑀪𑀽𑀢𑀸𑀦𑀺 𑀩𑀻𑀚𑀓𑀸𑀦𑀺 𑀦𑀺𑀮𑁆𑀮𑀘𑁆𑀙𑁂𑀲𑀺 𑀦𑀻𑀳𑀭𑀺. 𑀢𑀲𑁆𑀲𑁂𑀢𑀁 𑀓𑀫𑁆𑀫𑀨𑀮𑀦𑁆𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀏𑀢𑀁 𑀅𑀢𑀻𑀢𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁. 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀦𑁆𑀢𑀺 𑀬𑀣𑀸 𑀢𑀁 𑀧𑀭𑀤𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸.

𑀢𑀢𑁄𑀢𑀺 𑀫𑀓𑁆𑀓𑀝𑀬𑁄𑀦𑀺𑀢𑁄. 𑀲𑀺𑀦𑁆𑀥𑀯𑀸𑀭𑀜𑁆𑀜𑁂𑀢𑀺 𑀲𑀺𑀦𑁆𑀥𑀯𑀭𑀝𑁆𑀞𑁂 𑀅𑀭𑀜𑁆𑀜𑀝𑁆𑀞𑀸𑀦𑁂. 𑀏𑀴𑀓𑀺𑀬𑀸𑀢𑀺 𑀅𑀚𑀺𑀬𑀸.

𑀤𑀸𑀭𑀓𑁂 𑀧𑀭𑀺𑀯𑀳𑀺𑀢𑁆𑀯𑀸𑀢𑀺 𑀧𑀺𑀝𑁆𑀞𑀺𑀁 𑀆𑀭𑀼𑀬𑁆𑀳 𑀓𑀼𑀫𑀸𑀭𑀓𑁂 𑀯𑀳𑀺𑀢𑁆𑀯𑀸. 𑀓𑀺𑀫𑀺𑀦𑀸𑀯𑀝𑁆𑀝𑁄𑀢𑀺 𑀅𑀪𑀺𑀚𑀸𑀢𑀝𑁆𑀞𑀸𑀦𑁂 𑀓𑀺𑀫𑀺𑀧𑀭𑀺𑀕𑀢𑁄𑀯 𑀳𑀼𑀢𑁆𑀯𑀸 𑀅𑀝𑁆𑀝𑁄 𑀅𑀝𑁆𑀝𑀺𑀢𑁄. 𑀅𑀓𑀮𑁆𑀮𑁄𑀢𑀺 𑀕𑀺𑀮𑀸𑀦𑁄, 𑀅𑀳𑁄𑀲𑀻𑀢𑀺 𑀯𑀘𑀦𑀲𑁂𑀲𑁄.

𑀕𑁄𑀯𑀸𑀡𑀺𑀚𑀓𑀲𑁆𑀲𑀸𑀢𑀺 𑀕𑀸𑀯𑀺𑀬𑁄 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀓𑀲𑁆𑀲. 𑀮𑀸𑀔𑀸𑀢𑀫𑁆𑀩𑁄𑀢𑀺 𑀮𑀸𑀔𑀸𑀭𑀲𑀭𑀢𑁆𑀢𑁂𑀳𑀺 𑀯𑀺𑀬 𑀢𑀫𑁆𑀩𑁂𑀳𑀺 𑀮𑁄𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑀯𑁄𑀠𑀽𑀦𑀸𑀢𑀺 𑀯𑀳𑀺𑀢𑁆𑀯𑀸. 𑀦𑀗𑁆𑀕𑀮𑀦𑁆𑀢𑀺 𑀲𑀻𑀭𑀁, 𑀲𑀓𑀝𑀜𑁆𑀘 𑀥𑀸𑀭𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀥𑁄𑀯𑀝𑁆𑀝𑁄𑀢𑀺 𑀓𑀸𑀡𑁄𑀯 𑀳𑀼𑀢𑁆𑀯𑀸 𑀅𑀝𑁆𑀝𑁄 𑀧𑀻𑀴𑀺𑀢𑁄.

𑀯𑀻𑀣𑀺𑀬𑀸𑀢𑀺 𑀦𑀕𑀭𑀯𑀻𑀣𑀺𑀬𑀁. 𑀤𑀸𑀲𑀺𑀬𑀸 𑀖𑀭𑁂 𑀚𑀸𑀢𑁄𑀢𑀺 𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑁄. ‘‘𑀯𑀡𑁆𑀡𑀤𑀸𑀲𑀺𑀬𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀦𑁂𑀯 𑀫𑀳𑀺𑀮𑀸 𑀦 𑀧𑀼𑀭𑀺𑀲𑁄𑀢𑀺 𑀇𑀢𑁆𑀣𑀻𑀧𑀺 𑀧𑀼𑀭𑀺𑀲𑁄𑀧𑀺 𑀦 𑀳𑁄𑀫𑀺, 𑀚𑀸𑀢𑀺𑀦𑀧𑀼𑀁𑀲𑀓𑁄𑀢𑀺 𑀅𑀢𑁆𑀣𑁄.

𑀢𑀺𑀁𑀲𑀢𑀺𑀯𑀲𑁆𑀲𑀫𑁆𑀳𑀺 𑀫𑀢𑁄𑀢𑀺 𑀦𑀧𑀼𑀁𑀲𑀓𑁄 𑀳𑀼𑀢𑁆𑀯𑀸 𑀢𑀺𑀁𑀲𑀯𑀲𑁆𑀲𑀓𑀸𑀮𑁂 𑀫𑀢𑁄. 𑀲𑀸𑀓𑀝𑀺𑀓𑀓𑀼𑀮𑀫𑁆𑀳𑀻𑀢𑀺 𑀲𑀽𑀢𑀓𑀓𑀼𑀮𑁂. 𑀥𑀦𑀺𑀓𑀧𑀼𑀭𑀺𑀲𑀧𑀸𑀢𑀩𑀳𑀼𑀮𑀫𑁆𑀳𑀻𑀢𑀺 𑀇𑀡𑀸𑀬𑀺𑀓𑀸𑀦𑀁 𑀧𑀼𑀭𑀺𑀲𑀸𑀦𑀁 𑀅𑀥𑀺𑀧𑀢𑀦𑀩𑀳𑀼𑀮𑁂 𑀩𑀳𑀽𑀳𑀺 𑀇𑀡𑀸𑀬𑀺𑀓𑁂𑀳𑀺 𑀅𑀪𑀺𑀪𑀯𑀺𑀢𑀩𑁆𑀩𑁂.

𑀉𑀲𑁆𑀲𑀦𑁆𑀦𑀸𑀬𑀸𑀢𑀺 𑀉𑀧𑀘𑀺𑀢𑀸𑀬. 𑀯𑀺𑀧𑀼𑀮𑀸𑀬𑀸𑀢𑀺 𑀫𑀳𑀢𑀺𑀬𑀸. 𑀯𑀟𑁆𑀠𑀺𑀬𑀸𑀢𑀺 𑀇𑀡𑀯𑀟𑁆𑀠𑀺𑀬𑀸. 𑀑𑀓𑀟𑁆𑀠𑀢𑀻𑀢𑀺 𑀅𑀯𑀓𑀟𑁆𑀠𑀢𑀺. 𑀓𑀼𑀮𑀖𑀭𑀲𑁆𑀫𑀸𑀢𑀺 𑀫𑀫 𑀚𑀸𑀢𑀓𑀼𑀮𑀕𑁂𑀳𑀢𑁄.

𑀑𑀭𑀼𑀦𑁆𑀥𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀅𑀲𑁆𑀲 𑀲𑀢𑁆𑀣𑀯𑀸𑀳𑀲𑁆𑀲 𑀧𑀼𑀢𑁆𑀢𑁄, 𑀫𑀬𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀦𑀸𑀫𑁂𑀦 𑀕𑀺𑀭𑀺𑀤𑀸𑀲𑁄 𑀦𑀸𑀫 𑀅𑀯𑀭𑀼𑀦𑁆𑀥𑀢𑀺 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀪𑀸𑀯𑁂𑀦 𑀕𑁂𑀳𑁂 𑀓𑀭𑁄𑀢𑀺.

𑀅𑀦𑀼𑀭𑀢𑁆𑀢𑀸 𑀪𑀢𑁆𑀢𑀸𑀭𑀦𑁆𑀢𑀺 𑀪𑀢𑁆𑀢𑀸𑀭𑀁 𑀅𑀦𑀼𑀯𑀢𑁆𑀢𑀺𑀓𑀸. 𑀢𑀲𑁆𑀲𑀸𑀳𑀁 𑀯𑀺𑀤𑁆𑀤𑁂𑀲𑀦𑀫𑀓𑀸𑀲𑀺𑀦𑁆𑀢𑀺 𑀢𑀲𑁆𑀲 𑀪𑀢𑁆𑀢𑀼𑀦𑁄 𑀢𑀁 𑀪𑀭𑀺𑀬𑀁 𑀲𑀧𑀢𑁆𑀢𑀺𑀁 𑀯𑀺𑀤𑁆𑀤𑁂𑀲𑀦𑀓𑀫𑁆𑀫𑀁 𑀅𑀓𑀸𑀲𑀺𑀁. 𑀬𑀣𑀸 𑀢𑀁 𑀲𑁄 𑀓𑀼𑀚𑁆𑀛𑀢𑀺, 𑀏𑀯𑀁 𑀧𑀝𑀺𑀧𑀚𑁆𑀚𑀺𑀁.

𑀬𑀁 𑀫𑀁 𑀅𑀧𑀓𑀻𑀭𑀺𑀢𑀽𑀦 𑀕𑀘𑁆𑀙𑀦𑁆𑀢𑀻𑀢𑀺 𑀬𑀁 𑀤𑀸𑀲𑀻 𑀯𑀺𑀬 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺𑀁 𑀫𑀁 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀦𑁄 𑀅𑀧𑀓𑀺𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑀸 𑀅𑀧𑀕𑀘𑁆𑀙𑀦𑁆𑀢𑀺. 𑀏𑀢𑀁 𑀢𑀲𑁆𑀲𑀸 𑀫𑀬𑁆𑀳𑀁 𑀢𑀤𑀸 𑀓𑀢𑀲𑁆𑀲 𑀧𑀭𑀤𑀸𑀭𑀺𑀓𑀓𑀫𑁆𑀫𑀲𑁆𑀲 𑀲𑀧𑀢𑁆𑀢𑀺𑀁 𑀯𑀺𑀤𑁆𑀤𑁂𑀲𑀦𑀓𑀫𑁆𑀫𑀲𑁆𑀲 𑀘 𑀦𑀺𑀲𑁆𑀲𑀦𑁆𑀤𑀨𑀮𑀁. 𑀢𑀲𑁆𑀲𑀧𑀺 𑀅𑀦𑁆𑀢𑁄 𑀓𑀢𑁄 𑀫𑀬𑀸𑀢𑀺 𑀢𑀲𑁆𑀲𑀧𑀺 𑀢𑀣𑀸 𑀅𑀦𑀼𑀦𑀬𑀧𑀸𑀧𑀓𑀓𑀫𑁆𑀫𑀲𑁆𑀲 𑀤𑀸𑀭𑀼𑀡𑀲𑁆𑀲 𑀧𑀭𑀺𑀬𑀦𑁆𑀢𑁄 𑀇𑀤𑀸𑀦𑀺 𑀫𑀬𑀸 𑀅𑀕𑁆𑀕𑀫𑀕𑁆𑀕𑀁 𑀅𑀥𑀺𑀕𑀘𑁆𑀙𑀦𑁆𑀢𑀺𑀬𑀸 𑀓𑀢𑁄, 𑀇𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀦𑀢𑁆𑀣𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀺𑀪𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀲𑀺𑀤𑀸𑀲𑀻𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀫𑀳𑀸𑀦𑀺𑀧𑀸𑀢𑁄

𑁧. 𑀲𑀼𑀫𑁂𑀥𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀫𑀳𑀸𑀦𑀺𑀧𑀸𑀢𑁂 𑀫𑀦𑁆𑀢𑀸𑀯𑀢𑀺𑀬𑀸 𑀦𑀕𑀭𑁂𑀢𑀺𑀆𑀤𑀺𑀓𑀸 𑀲𑀼𑀫𑁂𑀥𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀲𑀓𑁆𑀓𑀘𑁆𑀘𑀁 𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑁂 𑀲𑀫𑁆𑀪𑀸𑀭𑁂𑀦𑁆𑀢𑀻 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸, 𑀅𑀢𑁆𑀢𑀦𑁄 𑀲𑀔𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀲𑀤𑁆𑀥𑀺𑀁 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀆𑀭𑀸𑀫𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀢𑀸𑀯𑀢𑀺𑀁𑀲𑀁 𑀉𑀧𑀕𑀘𑁆𑀙𑀺. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀬𑀸𑀫𑁂𑀲𑀼 𑀉𑀧𑀧𑀚𑁆𑀚𑀺. 𑀢𑀢𑁄 𑀘𑀼𑀢𑀸 𑀢𑀼𑀲𑀺𑀢𑁂𑀲𑀼, 𑀢𑀢𑁄 𑀘𑀼𑀢𑀸 𑀦𑀺𑀫𑁆𑀫𑀸𑀦𑀭𑀢𑀻𑀲𑀼, 𑀢𑀢𑁄 𑀘𑀼𑀢𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀽𑀢𑀺 𑀅𑀦𑀼𑀓𑁆𑀓𑀫𑁂𑀦 𑀧𑀜𑁆𑀘𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑁂𑀯𑀭𑀸𑀚𑀽𑀦𑀁 𑀫𑀳𑁂𑀲𑀻 𑀳𑀼𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀳𑀼𑀢𑁆𑀯𑀸 𑀭𑀢𑀦𑀢𑁆𑀢𑀬𑀁 𑀉𑀤𑁆𑀤𑀺𑀲𑁆𑀲 𑀉𑀴𑀸𑀭𑀧𑀼𑀜𑁆𑀜𑀓𑀫𑁆𑀫𑀁 𑀅𑀓𑀸𑀲𑀺.

𑀢𑀢𑁆𑀣 𑀬𑀸𑀯𑀚𑀻𑀯𑀁 𑀥𑀫𑁆𑀫𑀽𑀧𑀚𑀻𑀯𑀺𑀦𑀻 𑀓𑀼𑀲𑀮𑀥𑀫𑁆𑀫𑀦𑀺𑀭𑀢𑀸 𑀳𑀼𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑀻, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀦𑁆𑀢𑀸𑀯𑀢𑀻𑀦𑀕𑀭𑁂 𑀓𑁄𑀜𑁆𑀘𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀲𑀼𑀫𑁂𑀥𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 ‘‘𑀯𑀸𑀭𑀡𑀯𑀢𑀻𑀦𑀕𑀭𑁂 𑀅𑀦𑀺𑀓𑀭𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀤𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑁂𑀲𑀼𑀁. 𑀲𑀸 𑀧𑀦 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀲𑀫𑀸𑀦𑀯𑀬𑀸𑀳𑀺 𑀭𑀸𑀚𑀓𑀜𑁆𑀜𑀸𑀳𑀺 𑀤𑀸𑀲𑀺𑀚𑀦𑁂𑀳𑀺 𑀘 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀢𑀸𑀥𑀺𑀓𑀸𑀭𑀢𑀸𑀬 𑀲𑀁𑀲𑀸𑀭𑁂 𑀚𑀸𑀢𑀲𑀁𑀯𑁂𑀕𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀓𑀸𑀫𑁂𑀳𑀺 𑀯𑀺𑀦𑀺𑀯𑀢𑁆𑀢𑀺𑀢𑀫𑀸𑀦𑀲𑀸 𑀅𑀳𑁄𑀲𑀺. 𑀢𑁂𑀦 𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀜𑀸𑀢𑀻𑀦𑀁 𑀲𑀫𑁆𑀫𑀦𑁆𑀢𑀦𑀁 𑀲𑀼𑀢𑁆𑀯𑀸 ‘‘𑀦 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦 𑀓𑀺𑀘𑁆𑀘𑀁, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳’’𑀦𑁆𑀢𑀺 𑀆𑀳. 𑀢𑀁 𑀫𑀸𑀢𑀸𑀧𑀺𑀢𑀭𑁄 𑀖𑀭𑀸𑀯𑀸𑀲𑁂 𑀦𑀺𑀬𑁄𑀚𑁂𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀬𑀸𑀘𑀦𑁆𑀢𑀸𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀸 ‘‘𑀏𑀯𑀁 𑀫𑁂 𑀧𑀩𑁆𑀩𑀚𑀺𑀢𑀼𑀁 𑀮𑀩𑁆𑀪𑀢𑀻’’𑀢𑀺 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀢𑁂 𑀏𑀯 𑀓𑁂𑀲𑁂 𑀆𑀭𑀩𑁆𑀪 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀻 𑀢𑀢𑁆𑀣 𑀓𑀢𑀸𑀥𑀺𑀓𑀸𑀭𑀢𑀸𑀬 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀫𑀦𑀲𑀺𑀓𑀸𑀭𑀯𑀺𑀥𑀸𑀦𑀲𑁆𑀲 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 𑀘 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀅𑀥𑀺𑀕𑀘𑁆𑀙𑀺. 𑀅𑀥𑀺𑀕𑀢𑀧𑀞𑀫𑀚𑁆𑀛𑀸𑀦𑀸 𑀘 𑀅𑀢𑁆𑀢𑀦𑀸 𑀖𑀭𑀸𑀯𑀸𑀲𑁂 𑀉𑀬𑁆𑀬𑁄𑀚𑁂𑀢𑀼𑀁 𑀉𑀧𑀕𑀢𑁂 𑀫𑀸𑀢𑀸𑀧𑀺𑀢𑀭𑁄 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑁄𑀚𑀦𑀧𑀭𑀺𑀚𑀦𑀁 𑀲𑀩𑁆𑀩𑀁 𑀭𑀸𑀚𑀓𑀼𑀮𑀁 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑀁 𑀓𑀸𑀭𑁂𑀢𑁆𑀯𑀸 𑀖𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀧𑀭𑀺𑀧𑀓𑁆𑀓𑀜𑀸𑀡𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀺𑀢𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁧-𑁧𑁯) 𑁋

‘‘𑀪𑀕𑀯𑀢𑀺 𑀓𑁄𑀡𑀸𑀕𑀫𑀦𑁂, 𑀲𑀗𑁆𑀖𑀸𑀭𑀸𑀫𑀫𑁆𑀳𑀺 𑀦𑀯𑀦𑀺𑀯𑁂𑀲𑀫𑁆𑀳𑀺;

𑀲𑀔𑀺𑀬𑁄 𑀢𑀺𑀲𑁆𑀲𑁄 𑀚𑀦𑀺𑀬𑁄, 𑀯𑀺𑀳𑀸𑀭𑀤𑀸𑀦𑀁 𑀅𑀤𑀸𑀲𑀺𑀫𑁆𑀳.

‘‘𑀤𑀲𑀓𑁆𑀔𑀢𑁆𑀢𑀼𑀁 𑀲𑀢𑀓𑁆𑀔𑀢𑁆𑀢𑀼𑀁, 𑀤𑀲𑀲𑀢𑀓𑁆𑀔𑀢𑁆𑀢𑀼𑀁 𑀲𑀢𑀸𑀦𑀺 𑀘 𑀲𑀢𑀓𑁆𑀔𑀢𑁆𑀢𑀼𑀁;

𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀺𑀫𑁆𑀳, 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑁂𑀲𑀼.

‘‘𑀤𑁂𑀯𑁂𑀲𑀼 𑀫𑀳𑀺𑀤𑁆𑀥𑀺𑀓𑀸 𑀅𑀳𑀼𑀫𑁆𑀳, 𑀫𑀸𑀦𑀼𑀲𑀓𑀫𑁆𑀳𑀺 𑀓𑁄 𑀧𑀦 𑀯𑀸𑀤𑁄;

𑀲𑀢𑁆𑀢𑀭𑀢𑀦𑀲𑁆𑀲 𑀫𑀳𑁂𑀲𑀻, 𑀇𑀢𑁆𑀣𑀺𑀭𑀢𑀦𑀁 𑀅𑀳𑀁 𑀆𑀲𑀺𑀁.

‘‘𑀇𑀥 𑀲𑀜𑁆𑀘𑀺𑀢𑀓𑀼𑀲𑀮𑀸, 𑀲𑀼𑀲𑀫𑀺𑀤𑁆𑀥𑀓𑀼𑀮𑀧𑁆𑀧𑀚𑀸;

𑀥𑀦𑀜𑁆𑀚𑀸𑀦𑀻 𑀘 𑀔𑁂𑀫𑀸 𑀘, 𑀅𑀳𑀫𑁆𑀧𑀺 𑀘 𑀢𑀬𑁄 𑀚𑀦𑀸.

‘‘𑀆𑀭𑀸𑀫𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀩𑁆𑀩𑀸𑀯𑀬𑀯𑀫𑀡𑁆𑀟𑀺𑀢𑀁;

𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑀗𑁆𑀖𑀲𑁆𑀲, 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀫𑁄𑀤𑀺𑀢𑀸.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀤𑁂𑀯𑁂𑀲𑀼 𑀅𑀕𑁆𑀕𑀢𑀁 𑀧𑀢𑁆𑀢𑀸, 𑀫𑀦𑀼𑀲𑁆𑀲𑁂𑀲𑀼 𑀢𑀣𑁂𑀯 𑀘.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

‘‘𑀢𑀲𑁆𑀲𑀸𑀲𑀼𑀁 𑀲𑀢𑁆𑀢 𑀥𑀻𑀢𑀭𑁄, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁𑀲𑀼 𑀢𑀸.

‘‘𑀢𑀸𑀲𑀁 𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑀸;

𑀤𑀢𑁆𑀯𑀸 𑀤𑀸𑀦𑀸𑀦𑀺 𑀲𑀓𑁆𑀓𑀘𑁆𑀘𑀁, 𑀅𑀕𑀸𑀭𑁂𑀯 𑀯𑀢𑀁 𑀘𑀭𑀺𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑀸 𑀅𑀳𑀁.

‘‘𑀢𑀢𑁄 𑀘𑀼𑀢𑀸 𑀬𑀸𑀫𑀫𑀕𑀁, 𑀢𑀢𑁄𑀳𑀁 𑀢𑀼𑀲𑀺𑀢𑀁 𑀕𑀢𑀸;

𑀢𑀢𑁄 𑀘 𑀦𑀺𑀫𑁆𑀫𑀸𑀦𑀭𑀢𑀺𑀁, 𑀯𑀲𑀯𑀢𑁆𑀢𑀺𑀧𑀼𑀭𑀁 𑀕𑀢𑀸.

‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑁄𑀳𑀺𑀢𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀳𑀸𑀭𑀬𑀺𑀁.

‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑀢𑁆𑀢𑁂, 𑀭𑀸𑀚𑀽𑀦𑀁 𑀘𑀓𑁆𑀓𑀯𑀢𑁆𑀢𑀺𑀦𑀁;

𑀫𑀡𑁆𑀟𑀮𑀻𑀦𑀜𑁆𑀘 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

‘‘𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸, 𑀦𑁂𑀓𑀚𑀸𑀢𑀻𑀲𑀼 𑀲𑀁𑀲𑀭𑀺𑀁.

‘‘𑀲𑁄 𑀳𑁂𑀢𑀼 𑀲𑁄 𑀧𑀪𑀯𑁄, 𑀢𑀫𑁆𑀫𑀽𑀮𑀁 𑀲𑀸𑀯 𑀲𑀸𑀲𑀦𑁂 𑀔𑀦𑁆𑀢𑀻;

𑀢𑀁 𑀧𑀞𑀫𑀲𑀫𑁄𑀥𑀸𑀦𑀁, 𑀢𑀁 𑀥𑀫𑁆𑀫𑀭𑀢𑀸𑀬 𑀦𑀺𑀩𑁆𑀩𑀸𑀦𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀤𑀸𑀦𑀯𑀲𑁂𑀦 𑁋

𑁪𑁫𑁦.

‘‘𑀫𑀦𑁆𑀢𑀸𑀯𑀢𑀺𑀬𑀸 𑀦𑀕𑀭𑁂, 𑀭𑀜𑁆𑀜𑁄 𑀓𑁄𑀜𑁆𑀘𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸;

𑀥𑀻𑀢𑀸 𑀆𑀲𑀺𑀁 𑀲𑀼𑀫𑁂𑀥𑀸, 𑀧𑀲𑀸𑀤𑀺𑀢𑀸 𑀲𑀸𑀲𑀦𑀓𑀭𑁂𑀳𑀺.

𑁪𑁫𑁧.

‘‘𑀲𑀻𑀮𑀯𑀢𑀻 𑀘𑀺𑀢𑁆𑀢𑀓𑀣𑀸, 𑀩𑀳𑀼𑀲𑁆𑀲𑀼𑀢𑀸 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀦𑀺𑀢𑀸;

𑀫𑀸𑀢𑀸𑀧𑀺𑀢𑀭𑁄 𑀉𑀧𑀕𑀫𑁆𑀫, 𑀪𑀡𑀢𑀺 𑀉𑀪𑀬𑁄 𑀦𑀺𑀲𑀸𑀫𑁂𑀣.

𑁪𑁫𑁨.

‘‘𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸𑀳𑀁, 𑀅𑀲𑀲𑁆𑀲𑀢𑀁 𑀪𑀯𑀕𑀢𑀁 𑀬𑀤𑀺𑀧𑀺 𑀤𑀺𑀩𑁆𑀩𑀁;

𑀓𑀺𑀫𑀗𑁆𑀕𑀁 𑀧𑀦 𑀢𑀼𑀘𑁆𑀙𑀸 𑀓𑀸𑀫𑀸, 𑀅𑀧𑁆𑀧𑀲𑁆𑀲𑀸𑀤𑀸 𑀩𑀳𑀼𑀯𑀺𑀖𑀸𑀢𑀸.

𑁪𑁫𑁩.

‘‘𑀓𑀸𑀫𑀸 𑀓𑀝𑀼𑀓𑀸 𑀆𑀲𑀻, 𑀯𑀺𑀲𑀽𑀧𑀫𑀸 𑀬𑁂𑀲𑀼 𑀫𑀼𑀘𑁆𑀙𑀺𑀢𑀸 𑀩𑀸𑀮𑀸;

𑀢𑁂 𑀤𑀻𑀖𑀭𑀢𑁆𑀢𑀁 𑀦𑀺𑀭𑀬𑁂, 𑀲𑀫𑀧𑁆𑀧𑀺𑀢𑀸 𑀳𑀜𑁆𑀜𑀦𑁆𑀢𑁂 𑀤𑀼𑀓𑁆𑀔𑀺𑀢𑀸.

𑁪𑁫𑁪.

‘‘𑀲𑁄𑀘𑀦𑁆𑀢𑀺 𑀧𑀸𑀧𑀓𑀫𑁆𑀫𑀸, 𑀯𑀺𑀦𑀺𑀧𑀸𑀢𑁂 𑀧𑀸𑀧𑀯𑀤𑁆𑀥𑀺𑀦𑁄 𑀲𑀤𑀸;

𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘, 𑀫𑀦𑀲𑀸 𑀘 𑀅𑀲𑀁𑀯𑀼𑀢𑀸 𑀩𑀸𑀮𑀸.

𑁪𑁫𑁫.

‘‘𑀩𑀸𑀮𑀸 𑀢𑁂 𑀤𑀼𑀧𑁆𑀧𑀜𑁆𑀜𑀸, 𑀅𑀘𑁂𑀢𑀦𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀭𑀼𑀤𑁆𑀥𑀸;

𑀤𑁂𑀲𑁂𑀦𑁆𑀢𑁂 𑀅𑀚𑀸𑀦𑀦𑁆𑀢𑀸, 𑀦 𑀩𑀼𑀚𑁆𑀛𑀭𑁂 𑀅𑀭𑀺𑀬𑀲𑀘𑁆𑀘𑀸𑀦𑀺.

𑁪𑁫𑁬.

‘‘𑀲𑀘𑁆𑀘𑀸𑀦𑀺 ‘𑀅𑀫𑁆𑀫’𑀩𑀼𑀤𑁆𑀥𑀯𑀭𑀤𑁂𑀲𑀺, 𑀢𑀸𑀦𑀺 𑀢𑁂 𑀩𑀳𑀼𑀢𑀭𑀸 𑀅𑀚𑀸𑀦𑀦𑁆𑀢𑀸 𑀬𑁂;

𑀅𑀪𑀺𑀦𑀦𑁆𑀤𑀦𑁆𑀢𑀺 𑀪𑀯𑀕𑀢𑀁, 𑀧𑀺𑀳𑁂𑀦𑁆𑀢𑀺 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺𑀁.

𑁪𑁫𑁭.

‘‘𑀤𑁂𑀯𑁂𑀲𑀼𑀧𑀺 𑀉𑀧𑀧𑀢𑁆𑀢𑀺, 𑀅𑀲𑀲𑁆𑀲𑀢𑀸 𑀪𑀯𑀕𑀢𑁂 𑀅𑀦𑀺𑀘𑁆𑀘𑀫𑁆𑀳𑀺;

𑀦 𑀘 𑀲𑀦𑁆𑀢𑀲𑀦𑁆𑀢𑀺 𑀩𑀸𑀮𑀸, 𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀺𑀢𑀩𑁆𑀩𑀲𑁆𑀲.

𑁪𑁫𑁮.

‘‘𑀘𑀢𑁆𑀢𑀸𑀭𑁄 𑀯𑀺𑀦𑀺𑀧𑀸𑀢𑀸, 𑀤𑀼𑀯𑁂 𑀘 𑀕𑀢𑀺𑀬𑁄 𑀓𑀣𑀜𑁆𑀘𑀺 𑀮𑀩𑁆𑀪𑀦𑁆𑀢𑀺;

𑀦 𑀘 𑀯𑀺𑀦𑀺𑀧𑀸𑀢𑀕𑀢𑀸𑀦𑀁, 𑀧𑀩𑁆𑀩𑀚𑁆𑀚𑀸 𑀅𑀢𑁆𑀣𑀺 𑀦𑀺𑀭𑀬𑁂𑀲𑀼.

𑁪𑁫𑁯.

‘‘𑀅𑀦𑀼𑀚𑀸𑀦𑀸𑀣 𑀫𑀁 𑀉𑀪𑀬𑁄, 𑀧𑀩𑁆𑀩𑀚𑀺𑀢𑀼𑀁 𑀤𑀲𑀩𑀮𑀲𑁆𑀲 𑀧𑀸𑀯𑀘𑀦𑁂;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀖𑀝𑀺𑀲𑁆𑀲𑀁, 𑀚𑀸𑀢𑀺𑀫𑀭𑀡𑀧𑁆𑀧𑀳𑀸𑀦𑀸𑀬.

𑁪𑁬𑁦.

‘‘𑀓𑀺𑀁 𑀪𑀯𑀕𑀢𑁂 𑀅𑀪𑀺𑀦𑀦𑁆𑀤𑀺, 𑀢𑁂𑀦 𑀓𑀸𑀬𑀓𑀮𑀺𑀦𑀸 𑀅𑀲𑀸𑀭𑁂𑀦;

𑀪𑀯𑀢𑀡𑁆𑀳𑀸𑀬 𑀦𑀺𑀭𑁄𑀥𑀸, 𑀅𑀦𑀼𑀚𑀸𑀦𑀸𑀣 𑀧𑀩𑁆𑀩𑀚𑀺𑀲𑁆𑀲𑀸𑀫𑀺.

𑁪𑁬𑁧.

‘‘𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄, 𑀯𑀺𑀯𑀚𑁆𑀚𑀺𑀢𑁄 𑀅𑀓𑁆𑀔𑀡𑁄 𑀔𑀡𑁄 𑀮𑀤𑁆𑀥𑁄;

𑀲𑀻𑀮𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀬𑀸𑀯𑀚𑀻𑀯𑀁 𑀦 𑀤𑀽𑀲𑁂𑀬𑁆𑀬𑀁.

𑁪𑁬𑁨.

‘‘𑀏𑀯𑀁 𑀪𑀡𑀢𑀺 𑀲𑀼𑀫𑁂𑀥𑀸, 𑀫𑀸𑀢𑀸𑀧𑀺𑀢𑀭𑁄 ‘𑀦 𑀢𑀸𑀯 𑀆𑀳𑀸𑀭𑀁;

𑀆𑀳𑀭𑀺𑀲𑁆𑀲𑀁 𑀕𑀳𑀝𑁆𑀞𑀸, 𑀫𑀭𑀡𑀯𑀲𑀁 𑀕𑀢𑀸𑀯 𑀳𑁂𑀲𑁆𑀲𑀸𑀫𑀺’.

𑁪𑁬𑁩.

‘‘𑀫𑀸𑀢𑀸 𑀤𑀼𑀓𑁆𑀔𑀺𑀢𑀸 𑀭𑁄𑀤𑀢𑀺 𑀧𑀺𑀢𑀸 𑀘;

𑀅𑀲𑁆𑀲𑀸 𑀲𑀩𑁆𑀩𑀲𑁄 𑀲𑀫𑀪𑀺𑀳𑀢𑁄;

𑀖𑀝𑁂𑀦𑁆𑀢𑀺 𑀲𑀜𑁆𑀜𑀸𑀧𑁂𑀢𑀼𑀁, 𑀧𑀸𑀲𑀸𑀤𑀢𑀮𑁂 𑀙𑀫𑀸𑀧𑀢𑀺𑀢𑀁.

𑁪𑁬𑁪.

‘‘𑀉𑀝𑁆𑀞𑁂𑀳𑀺 𑀧𑀼𑀢𑁆𑀢𑀓 𑀓𑀺𑀁 𑀲𑁄𑀘𑀺, 𑀢𑁂𑀦 𑀤𑀺𑀦𑁆𑀦𑀸𑀲𑀺 𑀯𑀸𑀭𑀡𑀯𑀢𑀺𑀫𑁆𑀳𑀺;

𑀭𑀸𑀚𑀸 𑀅𑀦𑀻𑀓𑀭𑀢𑁆𑀢𑁄, 𑀅𑀪𑀺𑀭𑀽𑀧𑁄 𑀢𑀲𑁆𑀲 𑀢𑁆𑀯𑀁 𑀤𑀺𑀦𑁆𑀦𑀸.

𑁪𑁬𑁫.

‘‘𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀲𑀺, 𑀅𑀦𑀺𑀓𑀭𑀢𑁆𑀢𑀲𑁆𑀲 𑀭𑀸𑀚𑀺𑀦𑁄 𑀪𑀭𑀺𑀬𑀸;

𑀲𑀻𑀮𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸 𑀤𑀼𑀓𑁆𑀓𑀭𑀸 𑀧𑀼𑀢𑁆𑀢𑀓.

𑁪𑁬𑁬.

‘‘𑀭𑀚𑁆𑀚𑁂 𑀆𑀡𑀸 𑀥𑀦𑀫𑀺𑀲𑁆𑀲𑀭𑀺𑀬𑀁, 𑀪𑁄𑀕𑀸 𑀲𑀼𑀔𑀸 𑀤𑀳𑀭𑀺𑀓𑀸𑀲𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀪𑁄𑀕𑁂, 𑀯𑀸𑀭𑁂𑀬𑁆𑀬𑀁 𑀳𑁄𑀢𑀼 𑀢𑁂 𑀧𑀼𑀢𑁆𑀢.

𑁪𑁬𑁭.

‘‘𑀅𑀣 𑀦𑁂 𑀪𑀡𑀢𑀺 𑀲𑀼𑀫𑁂𑀥𑀸, 𑀫𑀸 𑀏𑀤𑀺𑀲𑀺𑀓𑀸𑀦𑀺 𑀪𑀯𑀕𑀢𑀫𑀲𑀸𑀭𑀁;

𑀧𑀩𑁆𑀩𑀚𑁆𑀚𑀸 𑀯𑀸 𑀳𑁄𑀳𑀺𑀢𑀺, 𑀫𑀭𑀡𑀁 𑀯𑀸 𑀫𑁂 𑀦 𑀘𑁂𑀯 𑀯𑀸𑀭𑁂𑀬𑁆𑀬𑀁.

𑁪𑁬𑁮.

‘‘𑀓𑀺𑀫𑀺𑀯 𑀧𑀽𑀢𑀺𑀓𑀸𑀬𑀫𑀲𑀼𑀘𑀺𑀁, 𑀲𑀯𑀦𑀕𑀦𑁆𑀥𑀁 𑀪𑀬𑀸𑀦𑀓𑀁 𑀓𑀼𑀡𑀧𑀁;

𑀅𑀪𑀺𑀲𑀁𑀯𑀺𑀲𑁂𑀬𑁆𑀬𑀁 𑀪𑀲𑁆𑀢𑀁, 𑀅𑀲𑀓𑀺𑀁 𑀧𑀕𑁆𑀖𑀭𑀺𑀢𑀁 𑀅𑀲𑀼𑀘𑀺𑀧𑀼𑀡𑁆𑀡𑀁.

𑁪𑁬𑁯.

‘‘𑀓𑀺𑀫𑀺𑀯 𑀢𑀳𑀁 𑀚𑀸𑀦𑀦𑁆𑀢𑀻, 𑀯𑀺𑀓𑀽𑀮𑀓𑀁 𑀫𑀁𑀲𑀲𑁄𑀡𑀺𑀢𑀼𑀧𑀮𑀺𑀢𑁆𑀢𑀁;

𑀓𑀺𑀫𑀺𑀓𑀼𑀮𑀮𑀬𑀁 𑀲𑀓𑀼𑀡𑀪𑀢𑁆𑀢𑀁, 𑀓𑀴𑁂𑀯𑀭𑀁 𑀓𑀺𑀲𑁆𑀲 𑀤𑀺𑀬𑀢𑀻𑀢𑀺.

𑁪𑁭𑁦.

‘‘𑀦𑀺𑀩𑁆𑀩𑀼𑀬𑁆𑀳𑀢𑀺 𑀲𑀼𑀲𑀸𑀦𑀁, 𑀅𑀘𑀺𑀭𑀁 𑀓𑀸𑀬𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑁄;

𑀙𑀼𑀤𑁆𑀥𑁄 𑀓𑀴𑀺𑀗𑁆𑀕𑀭𑀁 𑀯𑀺𑀬, 𑀚𑀺𑀕𑀼𑀘𑁆𑀙𑀫𑀸𑀦𑁂𑀳𑀺 𑀜𑀸𑀢𑀻𑀳𑀺.

𑁪𑁭𑁧.

‘‘𑀙𑀼𑀤𑁆𑀥𑀽𑀦 𑀦𑀁 𑀲𑀼𑀲𑀸𑀦𑁂, 𑀧𑀭𑀪𑀢𑁆𑀢𑀁 𑀦𑁆𑀳𑀸𑀬𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀸;

𑀦𑀺𑀬𑀓𑀸 𑀫𑀸𑀢𑀸𑀧𑀺𑀢𑀭𑁄, 𑀓𑀺𑀁 𑀧𑀦 𑀲𑀸𑀥𑀸𑀭𑀡𑀸 𑀚𑀦𑀢𑀸.

𑁪𑁭𑁨.

‘‘𑀅𑀚𑁆𑀛𑁄𑀲𑀺𑀢𑀸 𑀅𑀲𑀸𑀭𑁂, 𑀓𑀴𑁂𑀯𑀭𑁂 𑀅𑀝𑁆𑀞𑀺𑀦𑁆𑀳𑀸𑀭𑀼𑀲𑀗𑁆𑀖𑀸𑀢𑁂;

𑀔𑁂𑀴𑀲𑁆𑀲𑀼𑀘𑁆𑀘𑀸𑀭𑀲𑁆𑀲𑀯𑀧𑀭𑀺𑀧𑀼𑀡𑁆𑀡𑁂 𑀧𑀽𑀢𑀺𑀓𑀸𑀬𑀫𑁆𑀳𑀺.

𑁪𑁭𑁩.

‘‘𑀬𑁄 𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸, 𑀅𑀩𑁆𑀪𑀦𑁆𑀢𑀭𑀫𑀲𑁆𑀲 𑀩𑀸𑀳𑀺𑀭𑀁 𑀓𑀬𑀺𑀭𑀸;

𑀕𑀦𑁆𑀥𑀲𑁆𑀲 𑀅𑀲𑀳𑀫𑀸𑀦𑀸, 𑀲𑀓𑀸𑀧𑀺 𑀫𑀸𑀢𑀸 𑀚𑀺𑀕𑀼𑀘𑁆𑀙𑁂𑀬𑁆𑀬.

𑁪𑁭𑁪.

‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀁, 𑀲𑀗𑁆𑀔𑀢𑀁 𑀚𑀸𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁;

𑀬𑁄𑀦𑀺𑀲𑁄 𑀅𑀦𑀼𑀯𑀺𑀘𑀺𑀦𑀦𑁆𑀢𑀻, 𑀯𑀸𑀭𑁂𑀬𑁆𑀬𑀁 𑀓𑀺𑀲𑁆𑀲 𑀇𑀘𑁆𑀙𑁂𑀬𑁆𑀬𑀁.

𑁪𑁭𑁫.

‘‘𑀤𑀺𑀯𑀲𑁂 𑀤𑀺𑀯𑀲𑁂 𑀢𑀺𑀲𑀢𑁆𑀢𑀺, 𑀲𑀢𑀸𑀦𑀺 𑀦𑀯𑀦𑀯𑀸 𑀧𑀢𑁂𑀬𑁆𑀬𑀼𑀁 𑀓𑀸𑀬𑀫𑁆𑀳𑀺;

𑀯𑀲𑁆𑀲𑀲𑀢𑀫𑁆𑀧𑀺 𑀘 𑀖𑀸𑀢𑁄, 𑀲𑁂𑀬𑁆𑀬𑁄 𑀤𑀼𑀓𑁆𑀔𑀲𑁆𑀲 𑀘𑁂𑀯𑀁 𑀔𑀬𑁄.

𑁪𑁭𑁬.

‘‘𑀅𑀚𑁆𑀛𑀼𑀧𑀕𑀘𑁆𑀙𑁂 𑀖𑀸𑀢𑀁, 𑀬𑁄 𑀯𑀺𑀜𑁆𑀜𑀸𑀬𑁂𑀯𑀁 𑀲𑀢𑁆𑀣𑀼𑀦𑁄 𑀯𑀘𑀦𑀁;

𑀤𑀻𑀖𑁄 𑀢𑁂𑀲𑀁 𑀲𑀁𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀁 𑀳𑀜𑁆𑀜𑀫𑀸𑀦𑀸𑀦𑀁.

𑁪𑁭𑁭.

‘‘𑀤𑁂𑀯𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀘, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀅𑀲𑀼𑀭𑀓𑀸𑀬𑁂;

𑀧𑁂𑀢𑁂𑀲𑀼 𑀘 𑀦𑀺𑀭𑀬𑁂𑀲𑀼 𑀘, 𑀅𑀧𑀭𑀺𑀫𑀺𑀢𑀸 𑀤𑀺𑀲𑁆𑀲𑀦𑁆𑀢𑁂 𑀖𑀸𑀢𑀸.

𑁪𑁭𑁮.

‘‘𑀖𑀸𑀢𑀸 𑀦𑀺𑀭𑀬𑁂𑀲𑀼 𑀩𑀳𑀽, 𑀯𑀺𑀦𑀺𑀧𑀸𑀢𑀕𑀢𑀲𑁆𑀲 𑀧𑀻𑀴𑀺𑀬𑀫𑀸𑀦𑀲𑁆𑀲;

𑀤𑁂𑀯𑁂𑀲𑀼𑀧𑀺 𑀅𑀢𑁆𑀢𑀸𑀡𑀁, 𑀦𑀺𑀩𑁆𑀩𑀸𑀦𑀲𑀼𑀔𑀸 𑀧𑀭𑀁 𑀦𑀢𑁆𑀣𑀺.

𑁪𑁭𑁯.

‘‘𑀧𑀢𑁆𑀢𑀸 𑀢𑁂 𑀦𑀺𑀩𑁆𑀩𑀸𑀦𑀁, 𑀬𑁂 𑀬𑀼𑀢𑁆𑀢𑀸 𑀤𑀲𑀩𑀮𑀲𑁆𑀲 𑀧𑀸𑀯𑀘𑀦𑁂;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀖𑀝𑁂𑀦𑁆𑀢𑀺, 𑀚𑀸𑀢𑀺𑀫𑀭𑀡𑀧𑁆𑀧𑀳𑀸𑀦𑀸𑀬.

𑁪𑁮𑁦.

‘‘𑀅𑀚𑁆𑀚𑁂𑀯 𑀢𑀸𑀢𑀪𑀺𑀦𑀺𑀓𑁆𑀔𑀫𑀺𑀲𑁆𑀲𑀁, 𑀪𑁄𑀕𑁂𑀳𑀺 𑀓𑀺𑀁 𑀅𑀲𑀸𑀭𑁂𑀳𑀺;

𑀦𑀺𑀩𑁆𑀩𑀺𑀦𑁆𑀦𑀸 𑀫𑁂 𑀓𑀸𑀫𑀸, 𑀯𑀦𑁆𑀢𑀲𑀫𑀸 𑀢𑀸𑀮𑀯𑀢𑁆𑀣𑀼𑀓𑀢𑀸.

𑁪𑁮𑁧.

‘‘𑀲𑀸 𑀘𑁂𑀯𑀁 𑀪𑀡𑀢𑀺 𑀧𑀺𑀢𑀭𑀫𑀦𑀻𑀓𑀭𑀢𑁆𑀢𑁄, 𑀘 𑀬𑀲𑁆𑀲 𑀲𑀸 𑀤𑀺𑀦𑁆𑀦𑀸;

𑀉𑀧𑀬𑀸𑀲𑀺 𑀯𑀸𑀭𑀡𑀯𑀢𑁂, 𑀯𑀸𑀭𑁂𑀬𑁆𑀬𑀫𑀼𑀧𑀝𑁆𑀞𑀺𑀢𑁂 𑀓𑀸𑀮𑁂.

𑁪𑁮𑁨.

‘‘𑀅𑀣 𑀅𑀲𑀺𑀢𑀦𑀺𑀘𑀺𑀢𑀫𑀼𑀤𑀼𑀓𑁂, 𑀓𑁂𑀲𑁂 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀬 𑀲𑀼𑀫𑁂𑀥𑀸;

𑀧𑀸𑀲𑀸𑀤𑀁 𑀧𑀺𑀤𑀳𑀺𑀢𑁆𑀯𑀸, 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺.

𑁪𑁮𑁩.

‘‘𑀲𑀸 𑀘 𑀢𑀳𑀺𑀁 𑀲𑀫𑀸𑀧𑀦𑁆𑀦𑀸, 𑀅𑀦𑀻𑀓𑀭𑀢𑁆𑀢𑁄 𑀘 𑀆𑀕𑀢𑁄 𑀦𑀕𑀭𑀁;

𑀧𑀸𑀲𑀸𑀤𑁂 𑀘 𑀲𑀼𑀫𑁂𑀥𑀸, 𑀅𑀦𑀺𑀘𑁆𑀘𑀲𑀜𑁆𑀜𑀁 𑀲𑀼𑀪𑀸𑀯𑁂𑀢𑀺.

𑁪𑁮𑁪.

‘‘𑀲𑀸 𑀘 𑀫𑀦𑀲𑀺 𑀓𑀭𑁄𑀢𑀺, 𑀅𑀦𑀻𑀓𑀭𑀢𑁆𑀢𑁄 𑀘 𑀆𑀭𑀼𑀳𑀻 𑀢𑀼𑀭𑀺𑀢𑀁;

𑀫𑀡𑀺𑀓𑀦𑀓𑀪𑀽𑀲𑀺𑀢𑀗𑁆𑀕𑁄, 𑀓𑀢𑀜𑁆𑀚𑀮𑀻 𑀬𑀸𑀘𑀢𑀺 𑀲𑀼𑀫𑁂𑀥𑀁.

𑁪𑁮𑁫.

‘‘𑀭𑀚𑁆𑀚𑁂 𑀆𑀡𑀸 𑀥𑀦𑀫𑀺𑀲𑁆𑀲𑀭𑀺𑀬𑀁, 𑀪𑁄𑀕𑀸 𑀲𑀼𑀔𑀸 𑀤𑀳𑀭𑀺𑀓𑀸𑀲𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀪𑁄𑀕𑁂, 𑀓𑀸𑀫𑀲𑀼𑀔𑀸 𑀤𑀼𑀮𑁆𑀮𑀪𑀸 𑀮𑁄𑀓𑁂.

𑁪𑁮𑁬.

‘‘𑀦𑀺𑀲𑁆𑀲𑀝𑁆𑀞𑀁 𑀢𑁂 𑀭𑀚𑁆𑀚𑀁, 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀼 𑀤𑁂𑀳𑀺 𑀤𑀸𑀦𑀸𑀦𑀺;

𑀫𑀸 𑀤𑀼𑀫𑁆𑀫𑀦𑀸 𑀅𑀳𑁄𑀲𑀺, 𑀫𑀸𑀢𑀸𑀧𑀺𑀢𑀭𑁄 𑀢𑁂 𑀤𑀼𑀓𑁆𑀔𑀺𑀢𑀸.

𑁪𑁮𑁭.

‘‘𑀢𑀁 𑀢𑀁 𑀪𑀡𑀢𑀺 𑀲𑀼𑀫𑁂𑀥𑀸, 𑀓𑀸𑀫𑁂𑀳𑀺 𑀅𑀦𑀢𑁆𑀣𑀺𑀓𑀸 𑀯𑀺𑀕𑀢𑀫𑁄𑀳𑀸;

𑀫𑀸 𑀓𑀸𑀫𑁂 𑀅𑀪𑀺𑀦𑀦𑁆𑀤𑀺, 𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀧𑀲𑁆𑀲.

𑁪𑁮𑁮.

‘‘𑀘𑀸𑀢𑀼𑀤𑁆𑀤𑀻𑀧𑁄 𑀭𑀸𑀚𑀸, 𑀫𑀦𑁆𑀥𑀸𑀢𑀸 𑀆𑀲𑀺 𑀓𑀸𑀫𑀪𑁄𑀕𑀺𑀦𑀫𑀕𑁆𑀕𑁄;

𑀅𑀢𑀺𑀢𑁆𑀢𑁄 𑀓𑀸𑀮𑀗𑁆𑀓𑀢𑁄, 𑀦 𑀘𑀲𑁆𑀲 𑀧𑀭𑀺𑀧𑀽𑀭𑀺𑀢𑀸 𑀇𑀘𑁆𑀙𑀸.

𑁪𑁮𑁯.

‘‘𑀲𑀢𑁆𑀢 𑀭𑀢𑀦𑀸𑀦𑀺 𑀯𑀲𑁆𑀲𑁂𑀬𑁆𑀬, 𑀯𑀼𑀝𑁆𑀞𑀺𑀫𑀸 𑀤𑀲𑀤𑀺𑀲𑀸 𑀲𑀫𑀦𑁆𑀢𑁂𑀦;

𑀦 𑀘𑀢𑁆𑀣𑀺 𑀢𑀺𑀢𑁆𑀢𑀺 𑀓𑀸𑀫𑀸𑀦𑀁, 𑀅𑀢𑀺𑀢𑁆𑀢𑀸𑀯 𑀫𑀭𑀦𑁆𑀢𑀺 𑀦𑀭𑀸.

𑁪𑁯𑁦.

‘‘𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸, 𑀓𑀸𑀫𑀸 𑀲𑀧𑁆𑀧𑀲𑀺𑀭𑁄𑀧𑀫𑀸;

𑀉𑀓𑁆𑀓𑁄𑀧𑀫𑀸 𑀅𑀦𑀼𑀤𑀳𑀦𑁆𑀢𑀺, 𑀅𑀝𑁆𑀞𑀺𑀓𑀗𑁆𑀓𑀮𑀲𑀦𑁆𑀦𑀺𑀪𑀸.

𑁪𑁯𑁧.

‘‘𑀅𑀦𑀺𑀘𑁆𑀘𑀸 𑀅𑀥𑀼𑀯𑀸 𑀓𑀸𑀫𑀸, 𑀩𑀳𑀼𑀤𑀼𑀓𑁆𑀔𑀸 𑀫𑀳𑀸𑀯𑀺𑀲𑀸;

𑀅𑀬𑁄𑀕𑀼𑀴𑁄𑀯 𑀲𑀦𑁆𑀢𑀢𑁆𑀢𑁄, 𑀅𑀖𑀫𑀽𑀮𑀸 𑀤𑀼𑀔𑀧𑁆𑀨𑀮𑀸.

𑁪𑁯𑁨.

‘‘𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸, 𑀫𑀁𑀲𑀧𑁂𑀲𑀽𑀧𑀫𑀸 𑀤𑀼𑀔𑀸;

𑀲𑀼𑀧𑀺𑀦𑁄𑀧𑀫𑀸 𑀯𑀜𑁆𑀘𑀦𑀺𑀬𑀸, 𑀓𑀸𑀫𑀸 𑀬𑀸𑀘𑀺𑀢𑀓𑀽𑀧𑀫𑀸.

𑁪𑁯𑁩.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀭𑁄𑀕𑁄 𑀕𑀡𑁆𑀟𑁄 𑀅𑀖𑀁 𑀦𑀺𑀖𑀁;

𑀅𑀗𑁆𑀕𑀸𑀭𑀓𑀸𑀲𑀼𑀲𑀤𑀺𑀲𑀸, 𑀅𑀖𑀫𑀽𑀮𑀁 𑀪𑀬𑀁 𑀯𑀥𑁄.

𑁪𑁯𑁪.

‘‘𑀏𑀯𑀁 𑀩𑀳𑀼𑀤𑀼𑀓𑁆𑀔𑀸 𑀓𑀸𑀫𑀸, 𑀅𑀓𑁆𑀔𑀸𑀢𑀸 𑀅𑀦𑁆𑀢𑀭𑀸𑀬𑀺𑀓𑀸;

𑀕𑀘𑁆𑀙𑀣 𑀦 𑀫𑁂 𑀪𑀯𑀕𑀢𑁂, 𑀯𑀺𑀲𑁆𑀲𑀸𑀲𑁄 𑀅𑀢𑁆𑀣𑀺 𑀅𑀢𑁆𑀢𑀦𑁄.

𑁪𑁯𑁫.

‘‘𑀓𑀺𑀁 𑀫𑀫 𑀧𑀭𑁄 𑀓𑀭𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀲𑀻𑀲𑀫𑁆𑀳𑀺 𑀟𑀬𑁆𑀳𑀫𑀸𑀦𑀫𑁆𑀳𑀺;

𑀅𑀦𑀼𑀩𑀦𑁆𑀥𑁂 𑀚𑀭𑀸𑀫𑀭𑀡𑁂, 𑀢𑀲𑁆𑀲 𑀖𑀸𑀢𑀸𑀬 𑀖𑀝𑀺𑀢𑀩𑁆𑀩𑀁.

𑁪𑁯𑁬.

‘‘𑀤𑁆𑀯𑀸𑀭𑀁 𑀅𑀧𑀸𑀧𑀼𑀭𑀺𑀢𑁆𑀯𑀸𑀦𑀳𑀁, 𑀫𑀸𑀢𑀸𑀧𑀺𑀢𑀭𑁄 𑀅𑀦𑀻𑀓𑀭𑀢𑁆𑀢𑀜𑁆𑀘;

𑀤𑀺𑀲𑁆𑀯𑀸𑀦 𑀙𑀫𑀁 𑀦𑀺𑀲𑀺𑀦𑁆𑀦𑁂, 𑀭𑁄𑀤𑀦𑁆𑀢𑁂 𑀇𑀤𑀫𑀯𑁄𑀘𑀁.

𑁪𑁯𑁭.

‘‘𑀤𑀻𑀖𑁄 𑀩𑀸𑀮𑀸𑀦𑀁 𑀲𑀁𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀜𑁆𑀘 𑀭𑁄𑀤𑀢𑀁;

𑀅𑀦𑀫𑀢𑀕𑁆𑀕𑁂 𑀧𑀺𑀢𑀼 𑀫𑀭𑀡𑁂, 𑀪𑀸𑀢𑀼 𑀯𑀥𑁂 𑀅𑀢𑁆𑀢𑀦𑁄 𑀘 𑀯𑀥𑁂.

𑁪𑁯𑁮.

‘‘𑀅𑀲𑁆𑀲𑀼 𑀣𑀜𑁆𑀜𑀁 𑀭𑀼𑀥𑀺𑀭𑀁, 𑀲𑀁𑀲𑀸𑀭𑀁 𑀅𑀦𑀫𑀢𑀕𑁆𑀕𑀢𑁄 𑀲𑀭𑀣;

𑀲𑀢𑁆𑀢𑀸𑀦𑀁 𑀲𑀁𑀲𑀭𑀢𑀁, 𑀲𑀭𑀸𑀳𑀺 𑀅𑀝𑁆𑀞𑀻𑀦𑀜𑁆𑀘 𑀲𑀦𑁆𑀦𑀺𑀘𑀬𑀁.

𑁪𑁯𑁯.

‘‘𑀲𑀭 𑀘𑀢𑀼𑀭𑁄𑀤𑀥𑀻, 𑀉𑀧𑀦𑀻𑀢𑁂 𑀅𑀲𑁆𑀲𑀼𑀣𑀜𑁆𑀜𑀭𑀼𑀥𑀺𑀭𑀫𑁆𑀳𑀺;

𑀲𑀭 𑀏𑀓𑀓𑀧𑁆𑀧𑀫𑀝𑁆𑀞𑀻𑀦𑀁, 𑀲𑀜𑁆𑀘𑀬𑀁 𑀯𑀺𑀧𑀼𑀮𑁂𑀦 𑀲𑀫𑀁.

𑁫𑁦𑁦.

‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀭𑀢𑁄, 𑀫𑀳𑀺𑀁 𑀚𑀫𑁆𑀩𑀼𑀤𑀻𑀧𑀫𑀼𑀧𑀦𑀻𑀢𑀁;

𑀓𑁄𑀮𑀝𑁆𑀞𑀺𑀫𑀢𑁆𑀢𑀕𑀼𑀴𑀺𑀓𑀸, 𑀫𑀸𑀢𑀸 𑀫𑀸𑀢𑀼𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀺.

𑁫𑁦𑁧.

‘‘𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁, 𑀉𑀧𑀦𑀻𑀢𑀁 𑀅𑀦𑀫𑀢𑀕𑁆𑀕𑀢𑁄 𑀲𑀭;

𑀘𑀢𑀼𑀭𑀗𑁆𑀕𑀼𑀮𑀺𑀓𑀸 𑀖𑀝𑀺𑀓𑀸, 𑀧𑀺𑀢𑀼𑀧𑀺𑀢𑀼𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀺.

𑁫𑁦𑁨.

‘‘𑀲𑀭 𑀓𑀸𑀡𑀓𑀘𑁆𑀙𑀧𑀁 𑀧𑀼𑀩𑁆𑀩𑀲𑀫𑀼𑀤𑁆𑀤𑁂, 𑀅𑀧𑀭𑀢𑁄 𑀘 𑀬𑀼𑀕𑀙𑀺𑀤𑁆𑀤𑀁;

𑀲𑀺𑀭𑀁 𑀢𑀲𑁆𑀲 𑀘 𑀧𑀝𑀺𑀫𑀼𑀓𑁆𑀓𑀁, 𑀫𑀦𑀼𑀲𑁆𑀲𑀮𑀸𑀪𑀫𑁆𑀳𑀺 𑀑𑀧𑀫𑁆𑀫𑀁.

𑁫𑁦𑁩.

‘‘𑀲𑀭 𑀭𑀽𑀧𑀁 𑀨𑁂𑀡𑀧𑀺𑀡𑁆𑀟𑁄𑀧𑀫𑀲𑁆𑀲, 𑀓𑀸𑀬𑀓𑀮𑀺𑀦𑁄 𑀅𑀲𑀸𑀭𑀲𑁆𑀲;

𑀔𑀦𑁆𑀥𑁂 𑀧𑀲𑁆𑀲 𑀅𑀦𑀺𑀘𑁆𑀘𑁂, 𑀲𑀭𑀸𑀳𑀺 𑀦𑀺𑀭𑀬𑁂 𑀩𑀳𑀼𑀯𑀺𑀖𑀸𑀢𑁂.

𑁫𑁦𑁪.

‘‘𑀲𑀭 𑀓𑀝𑀲𑀺𑀁 𑀯𑀟𑁆𑀠𑁂𑀦𑁆𑀢𑁂, 𑀧𑀼𑀦𑀧𑁆𑀧𑀼𑀦𑀁 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼;

𑀲𑀭 𑀓𑀼𑀫𑁆𑀪𑀻𑀮𑀪𑀬𑀸𑀦𑀺 𑀘, 𑀲𑀭𑀸𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺.

𑁫𑁦𑁫.

‘‘𑀅𑀫𑀢𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀧𑀜𑁆𑀘𑀓𑀝𑀼𑀓𑁂𑀦 𑀧𑀻𑀢𑁂𑀦;

𑀲𑀩𑁆𑀩𑀸 𑀳𑀺 𑀓𑀸𑀫𑀭𑀢𑀺𑀬𑁄, 𑀓𑀝𑀼𑀓𑀢𑀭𑀸 𑀧𑀜𑁆𑀘𑀓𑀝𑀼𑀓𑁂𑀦.

𑁫𑁦𑁬.

‘‘𑀅𑀫𑀢𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂 𑀧𑀭𑀺𑀴𑀸𑀳𑀸;

𑀲𑀩𑁆𑀩𑀸 𑀳𑀺 𑀓𑀸𑀫𑀭𑀢𑀺𑀬𑁄, 𑀚𑀮𑀺𑀢𑀸 𑀓𑀼𑀣𑀺𑀢𑀸 𑀓𑀫𑁆𑀧𑀺𑀢𑀸 𑀲𑀦𑁆𑀢𑀸𑀧𑀺𑀢𑀸.

𑁫𑁦𑁭.

‘‘𑀅𑀲𑀧𑀢𑁆𑀢𑀫𑁆𑀳𑀺 𑀲𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂 𑀩𑀳𑀼𑀲𑀧𑀢𑁆𑀢𑀸;

𑀭𑀸𑀚𑀕𑁆𑀕𑀺𑀘𑁄𑀭𑀉𑀤𑀓𑀧𑁆𑀧𑀺𑀬𑁂𑀳𑀺, 𑀲𑀸𑀥𑀸𑀭𑀡𑀸 𑀓𑀸𑀫𑀸 𑀩𑀳𑀼𑀲𑀧𑀢𑁆𑀢𑀸.

𑁫𑁦𑁮.

‘‘𑀫𑁄𑀓𑁆𑀔𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂𑀲𑀼 𑀯𑀥𑀩𑀦𑁆𑀥𑁄;

𑀓𑀸𑀫𑁂𑀲𑀼 𑀳𑀺 𑀅𑀲𑀓𑀸𑀫𑀸, 𑀯𑀥𑀩𑀦𑁆𑀥𑀤𑀼𑀔𑀸𑀦𑀺 𑀅𑀦𑀼𑀪𑁄𑀦𑁆𑀢𑀺.

𑁫𑁦𑁯.

‘‘𑀆𑀤𑀻𑀧𑀺𑀢𑀸 𑀢𑀺𑀡𑀼𑀓𑁆𑀓𑀸, 𑀕𑀡𑁆𑀳𑀦𑁆𑀢𑀁 𑀤𑀳𑀦𑁆𑀢𑀺 𑀦𑁂𑀯 𑀫𑀼𑀜𑁆𑀘𑀦𑁆𑀢𑀁;

𑀉𑀓𑁆𑀓𑁄𑀧𑀫𑀸 𑀳𑀺 𑀓𑀸𑀫𑀸, 𑀤𑀳𑀦𑁆𑀢𑀺 𑀬𑁂 𑀢𑁂 𑀦 𑀫𑀼𑀜𑁆𑀘𑀦𑁆𑀢𑀺.

𑁫𑁧𑁦.

‘‘𑀫𑀸 𑀅𑀧𑁆𑀧𑀓𑀲𑁆𑀲 𑀳𑁂𑀢𑀼, 𑀓𑀸𑀫𑀲𑀼𑀔𑀲𑁆𑀲 𑀯𑀺𑀧𑀼𑀮𑀁 𑀚𑀳𑀻 𑀲𑀼𑀔𑀁;

𑀫𑀸 𑀧𑀼𑀣𑀼𑀮𑁄𑀫𑁄𑀯 𑀩𑀴𑀺𑀲𑀁, 𑀕𑀺𑀮𑀺𑀢𑁆𑀯𑀸 𑀧𑀘𑁆𑀙𑀸 𑀯𑀺𑀳𑀜𑁆𑀜𑀲𑀺.

𑁫𑁧𑁧.

‘‘𑀓𑀸𑀫𑀁 𑀓𑀸𑀫𑁂𑀲𑀼 𑀤𑀫𑀲𑁆𑀲𑀼, 𑀢𑀸𑀯 𑀲𑀼𑀦𑀔𑁄𑀯 𑀲𑀗𑁆𑀔𑀮𑀸𑀩𑀤𑁆𑀥𑁄;

𑀓𑀸𑀳𑀺𑀦𑁆𑀢𑀺 𑀔𑀼 𑀢𑀁 𑀓𑀸𑀫𑀸, 𑀙𑀸𑀢𑀸 𑀲𑀼𑀦𑀔𑀁𑀯 𑀘𑀡𑁆𑀟𑀸𑀮𑀸.

𑁫𑁧𑁨.

‘‘𑀅𑀧𑀭𑀺𑀫𑀺𑀢𑀜𑁆𑀘 𑀤𑀼𑀓𑁆𑀔𑀁, 𑀩𑀳𑀽𑀦𑀺 𑀘 𑀘𑀺𑀢𑁆𑀢𑀤𑁄𑀫𑀦𑀲𑁆𑀲𑀸𑀦𑀺;

𑀅𑀦𑀼𑀪𑁄𑀳𑀺𑀲𑀺 𑀓𑀸𑀫𑀬𑀼𑀢𑁆𑀢𑁄, 𑀧𑀝𑀺𑀦𑀺𑀲𑁆𑀲𑀚 𑀅𑀤𑁆𑀥𑀼𑀯𑁂 𑀓𑀸𑀫𑁂.

𑁫𑁧𑁩.

‘‘𑀅𑀚𑀭𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂𑀲𑀼 𑀚𑀭𑀸;

𑀫𑀭𑀡𑀩𑁆𑀬𑀸𑀥𑀺𑀕𑀳𑀺𑀢𑀸, 𑀲𑀩𑁆𑀩𑀸 𑀲𑀩𑁆𑀩𑀢𑁆𑀣 𑀚𑀸𑀢𑀺𑀬𑁄.

𑁫𑁧𑁪.

‘‘𑀇𑀤𑀫𑀚𑀭𑀫𑀺𑀤𑀫𑀫𑀭𑀁, 𑀇𑀤𑀫𑀚𑀭𑀸𑀫𑀭𑀁 𑀧𑀤𑀫𑀲𑁄𑀓𑀁;

𑀅𑀲𑀧𑀢𑁆𑀢𑀫𑀲𑀫𑁆𑀩𑀸𑀥𑀁, 𑀅𑀔𑀮𑀺𑀢𑀫𑀪𑀬𑀁 𑀦𑀺𑀭𑀼𑀧𑀢𑀸𑀧𑀁.

𑁫𑁧𑁫.

‘‘𑀅𑀥𑀺𑀕𑀢𑀫𑀺𑀤𑀁 𑀩𑀳𑀽𑀳𑀺, 𑀅𑀫𑀢𑀁 𑀅𑀚𑁆𑀚𑀸𑀧𑀺 𑀘 𑀮𑀪𑀦𑀻𑀬𑀫𑀺𑀤𑀁;

𑀬𑁄 𑀬𑁄𑀦𑀺𑀲𑁄 𑀧𑀬𑀼𑀜𑁆𑀚𑀢𑀺, 𑀦 𑀘 𑀲𑀓𑁆𑀓𑀸 𑀅𑀖𑀝𑀫𑀸𑀦𑁂𑀦.

𑁫𑁧𑁬.

‘‘𑀏𑀯𑀁 𑀪𑀡𑀢𑀺 𑀲𑀼𑀫𑁂𑀥𑀸, 𑀲𑀗𑁆𑀔𑀸𑀭𑀕𑀢𑁂 𑀭𑀢𑀺𑀁 𑀅𑀮𑀪𑀫𑀸𑀦𑀸;

𑀅𑀦𑀼𑀦𑁂𑀦𑁆𑀢𑀻 𑀅𑀦𑀺𑀓𑀭𑀢𑁆𑀢𑀁, 𑀓𑁂𑀲𑁂 𑀘 𑀙𑀫𑀁 𑀔𑀺𑀧𑀺 𑀲𑀼𑀫𑁂𑀥𑀸.

𑁫𑁧𑁭.

‘‘𑀉𑀝𑁆𑀞𑀸𑀬 𑀅𑀦𑀺𑀓𑀭𑀢𑁆𑀢𑁄, 𑀧𑀜𑁆𑀚𑀮𑀺𑀓𑁄 𑀬𑀸𑀘𑀢𑀲𑁆𑀲𑀸 𑀧𑀺𑀢𑀭𑀁 𑀲𑁄;

𑀯𑀺𑀲𑁆𑀲𑀚𑁆𑀚𑁂𑀣 𑀲𑀼𑀫𑁂𑀥𑀁, 𑀧𑀩𑁆𑀩𑀚𑀺𑀢𑀼𑀁 𑀯𑀺𑀫𑁄𑀓𑁆𑀔𑀲𑀘𑁆𑀘𑀤𑀲𑁆𑀲𑀸.

𑁫𑁧𑁮.

‘‘𑀯𑀺𑀲𑁆𑀲𑀚𑁆𑀚𑀺𑀢𑀸 𑀫𑀸𑀢𑀸𑀧𑀺𑀢𑀽𑀳𑀺, 𑀧𑀩𑁆𑀩𑀚𑀺 𑀲𑁄𑀓𑀪𑀬𑀪𑀻𑀢𑀸;

𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀅𑀕𑁆𑀕𑀨𑀮𑀁 𑀲𑀺𑀓𑁆𑀔𑀫𑀸𑀦𑀸𑀬.

𑁫𑁧𑁯.

‘‘𑀅𑀘𑁆𑀙𑀭𑀺𑀬𑀫𑀩𑁆𑀪𑀼𑀢𑀁 𑀢𑀁, 𑀦𑀺𑀩𑁆𑀩𑀸𑀦𑀁 𑀆𑀲𑀺 𑀭𑀸𑀚𑀓𑀜𑁆𑀜𑀸𑀬;

𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑀭𑀺𑀢𑀁, 𑀬𑀣𑀸 𑀩𑁆𑀬𑀸𑀓𑀭𑀺 𑀧𑀘𑁆𑀙𑀺𑀫𑁂 𑀓𑀸𑀮𑁂.

𑁫𑁨𑁦.

‘‘𑀪𑀕𑀯𑀢𑀺 𑀓𑁄𑀡𑀸𑀕𑀫𑀦𑁂, 𑀲𑀗𑁆𑀖𑀸𑀭𑀸𑀫𑀫𑁆𑀳𑀺 𑀦𑀯𑀦𑀺𑀯𑁂𑀲𑀫𑁆𑀳𑀺;

𑀲𑀔𑀺𑀬𑁄 𑀢𑀺𑀲𑁆𑀲𑁄 𑀚𑀦𑀺𑀬𑁄, 𑀯𑀺𑀳𑀸𑀭𑀤𑀸𑀦𑀁 𑀅𑀤𑀸𑀲𑀺𑀫𑁆𑀳.

𑁫𑁨𑁧.

‘‘𑀤𑀲𑀓𑁆𑀔𑀢𑁆𑀢𑀼𑀁 𑀲𑀢𑀓𑁆𑀔𑀢𑁆𑀢𑀼𑀁, 𑀤𑀲𑀲𑀢𑀓𑁆𑀔𑀢𑁆𑀢𑀼𑀁 𑀲𑀢𑀸𑀦𑀺 𑀘 𑀲𑀢𑀓𑁆𑀔𑀢𑁆𑀢𑀼𑀁;

𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀺𑀫𑁆𑀳, 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑁂𑀲𑀼.

𑁫𑁨𑁨.

‘‘𑀤𑁂𑀯𑁂𑀲𑀼 𑀫𑀳𑀺𑀤𑁆𑀥𑀺𑀓𑀸 𑀅𑀳𑀼𑀫𑁆𑀳, 𑀫𑀸𑀦𑀼𑀲𑀓𑀫𑁆𑀳𑀺 𑀓𑁄 𑀧𑀦 𑀯𑀸𑀤𑁄;

𑀲𑀢𑁆𑀢𑀭𑀢𑀦𑀲𑁆𑀲 𑀫𑀳𑁂𑀲𑀻, 𑀇𑀢𑁆𑀣𑀺𑀭𑀢𑀦𑀁 𑀅𑀳𑀁 𑀆𑀲𑀺𑀁.

𑁫𑁨𑁩.

‘‘𑀲𑁄 𑀳𑁂𑀢𑀼 𑀲𑁄 𑀧𑀪𑀯𑁄, 𑀢𑀁 𑀫𑀽𑀮𑀁 𑀲𑀸𑀯 𑀲𑀸𑀲𑀦𑁂 𑀔𑀦𑁆𑀢𑀻;

𑀢𑀁 𑀧𑀞𑀫𑀲𑀫𑁄𑀥𑀸𑀦𑀁, 𑀢𑀁 𑀥𑀫𑁆𑀫𑀭𑀢𑀸𑀬 𑀦𑀺𑀩𑁆𑀩𑀸𑀦𑀁.

𑁫𑁨𑁪.

‘‘𑀏𑀯𑀁 𑀓𑀭𑁄𑀦𑁆𑀢𑀺 𑀬𑁂 𑀲𑀤𑁆𑀤𑀳𑀦𑁆𑀢𑀺, 𑀯𑀘𑀦𑀁 𑀅𑀦𑁄𑀫𑀧𑀜𑁆𑀜𑀲𑁆𑀲;

𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺 𑀪𑀯𑀕𑀢𑁂, 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀯𑀺𑀭𑀚𑁆𑀚𑀦𑁆𑀢𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀫𑀦𑁆𑀢𑀯𑀢𑀺𑀬𑀸 𑀦𑀕𑀭𑁂𑀢𑀺 𑀫𑀦𑁆𑀢𑀯𑀢𑀻𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀭𑀜𑁆𑀜𑁄 𑀓𑁄𑀜𑁆𑀘𑀲𑁆𑀲𑀸𑀢𑀺 𑀓𑁄𑀜𑁆𑀘𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀸 𑀥𑀻𑀢𑀸 𑀆𑀲𑀺𑀁. 𑀲𑀼𑀫𑁂𑀥𑀸𑀢𑀺 𑀦𑀸𑀫𑁂𑀦 𑀲𑀼𑀫𑁂𑀥𑀸. 𑀧𑀲𑀸𑀤𑀺𑀢𑀸 𑀲𑀸𑀲𑀦𑀓𑀭𑁂𑀳𑀻𑀢𑀺 𑀲𑀢𑁆𑀣𑀼𑀲𑀸𑀲𑀦𑀓𑀭𑁂𑀳𑀺 𑀅𑀭𑀺𑀬𑁂𑀳𑀺 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀲𑀦𑁂 𑀧𑀲𑀸𑀤𑀺𑀢𑀸 𑀲𑀜𑁆𑀚𑀸𑀢𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀸 𑀓𑀢𑀸.

𑀲𑀻𑀮𑀯𑀢𑀻𑀢𑀺 𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑀸. 𑀘𑀺𑀢𑁆𑀢𑀓𑀣𑀸𑀢𑀺 𑀘𑀺𑀢𑁆𑀢𑀥𑀫𑁆𑀫𑀓𑀣𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀼𑀢𑀺𑀬𑀼𑀢𑀸. 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀦𑀻𑀢𑀸𑀢𑀺 𑀏𑀯𑀁 𑀧𑀯𑀢𑁆𑀢𑀺, 𑀏𑀯𑀁 𑀦𑀺𑀯𑀢𑁆𑀢𑀺, 𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸𑀢𑀺 𑀲𑀼𑀢𑁆𑀢𑀸𑀦𑀼𑀕𑀢𑁂𑀦 (𑀤𑀻. 𑀦𑀺. 𑁨.𑁧𑁮𑁬) 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀢𑀤𑀗𑁆𑀕𑀢𑁄 𑀓𑀺𑀮𑁂𑀲𑀸𑀦𑀁 𑀯𑀺𑀦𑀺𑀯𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀯𑀺𑀦𑀻𑀢𑀸 𑀲𑀁𑀬𑀢𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀸. 𑀉𑀪𑀬𑁄 𑀦𑀺𑀲𑀸𑀫𑁂𑀣𑀸𑀢𑀺 𑀢𑀼𑀫𑁆𑀳𑁂 𑀤𑁆𑀯𑁂𑀧𑀺 𑀫𑀫 𑀯𑀘𑀦𑀁 𑀦𑀺𑀲𑀸𑀫𑁂𑀣, 𑀫𑀸𑀢𑀸𑀧𑀺𑀢𑀭𑁄 𑀉𑀧𑀕𑀦𑁆𑀢𑁆𑀯𑀸 𑀪𑀡𑀢𑀻𑀢𑀺 𑀬𑁄𑀚𑀦𑀸.

𑀬𑀤𑀺𑀧𑀺 𑀤𑀺𑀩𑁆𑀩𑀦𑁆𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀪𑀯𑀕𑀢𑀁 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀅𑀲𑀲𑁆𑀲𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀓𑀺𑀫𑀗𑁆𑀕𑀁 𑀧𑀦 𑀢𑀼𑀘𑁆𑀙𑀸 𑀓𑀸𑀫𑀸𑀢𑀺 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀦𑀼𑀲𑀓𑀸 𑀓𑀸𑀫𑀸, 𑀢𑁂 𑀲𑀩𑁆𑀩𑁂𑀧𑀺 𑀅𑀲𑀸𑀭𑀓𑀪𑀸𑀯𑀢𑁄 𑀢𑀼𑀘𑁆𑀙𑀸 𑀭𑀺𑀢𑁆𑀢𑀸, 𑀲𑀢𑁆𑀣𑀥𑀸𑀭𑀸𑀬𑀁 𑀫𑀥𑀼𑀩𑀺𑀦𑁆𑀤𑀼 𑀯𑀺𑀬 𑀅𑀧𑁆𑀧𑀲𑁆𑀲𑀸𑀤𑀸, 𑀏𑀢𑀭𑀳𑀺 𑀆𑀬𑀢𑀺𑀜𑁆𑀘 𑀯𑀺𑀧𑀼𑀮𑀤𑀼𑀓𑁆𑀔𑀢𑀸𑀬 𑀩𑀳𑀼𑀯𑀺𑀖𑀸𑀢𑀸.

𑀓𑀝𑀼𑀓𑀸𑀢𑀺 𑀅𑀦𑀺𑀝𑁆𑀞𑀸. 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦 𑀆𑀲𑀻𑀯𑀺𑀲𑀽𑀧𑀫𑀸. 𑀬𑁂𑀲𑀼 𑀓𑀸𑀫𑁂𑀲𑀼. 𑀫𑀼𑀘𑁆𑀙𑀺𑀢𑀸𑀢𑀺 𑀅𑀚𑁆𑀛𑁄𑀲𑀺𑀢𑀸. 𑀲𑀫𑀧𑁆𑀧𑀺𑀢𑀸𑀢𑀺 𑀲𑀓𑀫𑁆𑀫𑀼𑀦𑀸 𑀲𑀩𑁆𑀩𑀲𑁄 𑀅𑀧𑁆𑀧𑀺𑀢𑀸 𑀔𑀺𑀢𑁆𑀢𑀸, 𑀉𑀧𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀳𑀜𑁆𑀜𑀦𑁆𑀢𑁂𑀢𑀺 𑀩𑀸𑀥𑀻𑀬𑀦𑁆𑀢𑀺.

𑀯𑀺𑀦𑀺𑀧𑀸𑀢𑁂𑀢𑀺 𑀅𑀧𑀸𑀬𑁂.

𑀅𑀘𑁂𑀢𑀦𑀸𑀢𑀺 𑀅𑀢𑁆𑀢𑀳𑀺𑀢𑀘𑁂𑀢𑀦𑀸𑀬 𑀅𑀪𑀸𑀯𑁂𑀦 𑀅𑀘𑁂𑀢𑀦𑀸. 𑀤𑀼𑀓𑁆𑀔𑀲𑀫𑀼𑀤𑀬𑁄𑀭𑀼𑀤𑁆𑀥𑀸𑀢𑀺 𑀢𑀡𑁆𑀳𑀸𑀦𑀺𑀫𑀺𑀢𑁆𑀢𑀲𑀁𑀲𑀸𑀭𑁂 𑀅𑀯𑀭𑀼𑀤𑁆𑀥𑀸. 𑀤𑁂𑀲𑁂𑀦𑁆𑀢𑁂𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂. 𑀅𑀚𑀸𑀦𑀦𑁆𑀢𑀸𑀢𑀺 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑀸. 𑀦 𑀩𑀼𑀚𑁆𑀛𑀭𑁂 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀤𑀼𑀓𑁆𑀔𑀸𑀤𑀻𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀦 𑀧𑀝𑀺𑀩𑀼𑀚𑁆𑀛𑀦𑁆𑀢𑀺.

𑀅𑀫𑁆𑀫𑀸𑀢𑀺 𑀫𑀸𑀢𑀭𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀆𑀮𑀧𑀢𑀺. 𑀢𑁂 𑀩𑀳𑀼𑀢𑀭𑀸 𑀅𑀚𑀸𑀦𑀦𑁆𑀢𑀸𑀢𑀺 𑀬𑁂 𑀅𑀪𑀺𑀦𑀦𑁆𑀤𑀦𑁆𑀢𑀺 𑀪𑀯𑀕𑀢𑀁 𑀧𑀺𑀳𑁂𑀦𑁆𑀢𑀺 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺𑀁 𑀩𑀼𑀤𑁆𑀥𑀯𑀭𑀤𑁂𑀲𑀺𑀢𑀸𑀦𑀺 𑀲𑀘𑁆𑀘𑀸𑀦𑀺 𑀅𑀚𑀸𑀦𑀦𑁆𑀢𑀸, 𑀢𑁂𑀬𑁂𑀯 𑀘 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀩𑀳𑀼𑀢𑀭𑀸𑀢𑀺 𑀬𑁄𑀚𑀦𑀸.

𑀪𑀯𑀕𑀢𑁂 𑀅𑀦𑀺𑀘𑁆𑀘𑀫𑁆𑀳𑀻𑀢𑀺 𑀲𑀩𑁆𑀩𑀲𑁆𑀫𑀺𑀁 𑀪𑀯𑁂 𑀅𑀦𑀺𑀘𑁆𑀘𑁂 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺 𑀦 𑀲𑀲𑁆𑀲𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀦 𑀘 𑀲𑀦𑁆𑀢𑀲𑀦𑁆𑀢𑀺 𑀩𑀸𑀮𑀸 𑀦 𑀉𑀢𑁆𑀢𑀲𑀦𑁆𑀢𑀺 𑀦 𑀲𑀁𑀯𑁂𑀕𑀁 𑀆𑀧𑀚𑁆𑀚𑀦𑁆𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀺𑀢𑀩𑁆𑀩𑀲𑁆𑀲𑀸𑀢𑀺 𑀅𑀧𑀭𑀸𑀧𑀭𑀁 𑀉𑀧𑀧𑀚𑁆𑀚𑀫𑀸𑀦𑀲𑁆𑀲.

𑀘𑀢𑁆𑀢𑀸𑀭𑁄 𑀯𑀺𑀦𑀺𑀧𑀸𑀢𑀸𑀢𑀺 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀅𑀲𑀼𑀭𑀬𑁄𑀦𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀸𑀢𑀕𑀢𑀺𑀬𑁄. 𑀫𑀦𑀼𑀲𑁆𑀲𑀤𑁂𑀯𑀽𑀧𑀧𑀢𑁆𑀢𑀺𑀲𑀜𑁆𑀜𑀺𑀢𑀸 𑀧𑀦 𑀤𑁆𑀯𑁂𑀯 𑀕𑀢𑀺𑀬𑁄 𑀓𑀣𑀜𑁆𑀘𑀺 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀮𑀩𑁆𑀪𑀦𑁆𑀢𑀺 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸. 𑀦𑀺𑀭𑀬𑁂𑀲𑀽𑀢𑀺 𑀲𑀼𑀔𑀭𑀳𑀺𑀢𑁂𑀲𑀼 𑀅𑀧𑀸𑀬𑁂𑀲𑀼.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸𑀢𑀺 𑀅𑀜𑁆𑀜𑀓𑀺𑀘𑁆𑀘𑁂𑀲𑀼 𑀦𑀺𑀭𑀼𑀲𑁆𑀲𑀼𑀓𑁆𑀓𑀸. 𑀖𑀝𑀺𑀲𑁆𑀲𑀦𑁆𑀢𑀺 𑀯𑀸𑀬𑀫𑀺𑀲𑁆𑀲𑀁 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀺𑀲𑁆𑀲𑀸𑀫𑀺, 𑀓𑀸𑀬𑀓𑀮𑀺𑀦𑀸 𑀅𑀲𑀸𑀭𑁂𑀦 𑀪𑀯𑀕𑀢𑁂 𑀓𑀺𑀁 𑀅𑀪𑀺𑀦𑀦𑁆𑀤𑀺𑀢𑁂𑀦𑀸𑀢𑀺 𑀬𑁄𑀚𑀦𑀸.

𑀪𑀯𑀢𑀡𑁆𑀳𑀸𑀬 𑀦𑀺𑀭𑁄𑀥𑀸𑀢𑀺 𑀪𑀯𑀕𑀢𑀸𑀬 𑀢𑀡𑁆𑀳𑀸𑀬 𑀦𑀺𑀭𑁄𑀥𑀳𑁂𑀢𑀼 𑀦𑀺𑀭𑁄𑀥𑀢𑁆𑀣𑀁.

𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 𑀮𑀤𑁆𑀥𑁄, 𑀯𑀺𑀯𑀚𑁆𑀚𑀺𑀢𑁄 𑀦𑀺𑀭𑀬𑀽𑀧𑀧𑀢𑁆𑀢𑀺𑀆𑀤𑀺𑀓𑁄 𑀅𑀝𑁆𑀞𑀯𑀺𑀥𑁄 𑀅𑀓𑁆𑀔𑀡𑁄, 𑀔𑀡𑁄 𑀦𑀯𑀫𑁄 𑀔𑀡𑁄 𑀮𑀤𑁆𑀥𑁄𑀢𑀺 𑀬𑁄𑀚𑀦𑀸. 𑀲𑀻𑀮𑀸𑀦𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀦 𑀤𑀽𑀲𑁂𑀬𑁆𑀬𑀦𑁆𑀢𑀺 𑀦 𑀓𑁄𑀧𑁂𑀬𑁆𑀬𑀸𑀫𑀺.

𑀦 𑀢𑀸𑀯 𑀆𑀳𑀸𑀭𑀁 𑀆𑀳𑀭𑀺𑀲𑁆𑀲𑀁 𑀕𑀳𑀝𑁆𑀞𑀸𑀢𑀺 ‘‘𑀦𑁂𑀯 𑀢𑀸𑀯 𑀅𑀳𑀁 𑀕𑀳𑀝𑁆𑀞𑀸 𑀳𑀼𑀢𑁆𑀯𑀸 𑀆𑀳𑀸𑀭𑀁 𑀆𑀳𑀭𑀺𑀲𑁆𑀲𑀸𑀫𑀺, 𑀲𑀘𑁂 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀭𑀡𑀯𑀲𑀫𑁂𑀯 𑀕𑀢𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀼𑀫𑁂𑀥𑀸 𑀫𑀸𑀢𑀸𑀧𑀺𑀢𑀭𑁄 𑀪𑀡𑀢𑀻𑀢𑀺 𑀬𑁄𑀚𑀦𑀸.

𑀅𑀲𑁆𑀲𑀸𑀢𑀺 𑀲𑀼𑀫𑁂𑀥𑀸𑀬. 𑀲𑀩𑁆𑀩𑀲𑁄 𑀲𑀫𑀪𑀺𑀳𑀢𑁄𑀢𑀺 𑀅𑀲𑁆𑀲𑀽𑀳𑀺 𑀲𑀩𑁆𑀩𑀲𑁄 𑀅𑀪𑀺𑀳𑀢𑀫𑀼𑀔𑁄. 𑀖𑀝𑁂𑀦𑁆𑀢𑀺 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀧𑀸𑀲𑀸𑀤𑀢𑀮𑁂 𑀙𑀫𑀸𑀧𑀢𑀺𑀢𑀁 𑀲𑀼𑀫𑁂𑀥𑀁 𑀫𑀸𑀢𑀸 𑀘 𑀧𑀺𑀢𑀸 𑀘 𑀕𑀺𑀳𑀺𑀪𑀸𑀯𑀸𑀬 𑀲𑀜𑁆𑀜𑀸𑀧𑁂𑀢𑀼𑀁 𑀖𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀺. ‘‘𑀖𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄.

𑀓𑀺𑀁 𑀲𑁄𑀘𑀺𑀢𑁂𑀦𑀸𑀢𑀺 ‘‘𑀧𑀩𑁆𑀩𑀚𑁆𑀚𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀓𑀺𑀁 𑀲𑁄𑀘𑀦𑁂𑀦. 𑀤𑀺𑀦𑁆𑀦𑀸𑀲𑀺 𑀯𑀸𑀭𑀡𑀯𑀢𑀺𑀫𑁆𑀳𑀻𑀢𑀺 𑀯𑀸𑀭𑀡𑀯𑀢𑀻𑀦𑀕𑀭𑁂 𑀤𑀺𑀦𑁆𑀦𑀸 𑀅𑀲𑀺. ‘‘𑀤𑀺𑀦𑁆𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑀺 ‘‘𑀢𑁆𑀯𑀁 𑀤𑀺𑀦𑁆𑀦𑀸’’𑀢𑀺 𑀯𑀘𑀦𑀁 𑀤𑀴𑁆𑀳𑀁 𑀤𑀺𑀦𑁆𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀭𑀚𑁆𑀚𑁂 𑀆𑀡𑀸𑀢𑀺 𑀅𑀦𑀺𑀓𑀭𑀢𑁆𑀢𑀲𑁆𑀲 𑀭𑀚𑁆𑀚𑁂 𑀢𑀯 𑀆𑀡𑀸 𑀧𑀯𑀢𑁆𑀢𑀢𑀺. 𑀥𑀦𑀫𑀺𑀲𑁆𑀲𑀭𑀺𑀬𑀦𑁆𑀢𑀺 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀧𑀢𑀺𑀓𑀼𑀮𑁂 𑀘 𑀥𑀦𑀁 𑀇𑀲𑁆𑀲𑀭𑀺𑀬𑀜𑁆𑀘, 𑀪𑁄𑀕𑀸 𑀲𑀼𑀔𑀸 𑀅𑀢𑀺𑀯𑀺𑀬 𑀇𑀝𑁆𑀞𑀸 𑀪𑁄𑀕𑀸𑀢𑀺 𑀲𑀩𑁆𑀩𑀫𑀺𑀤𑀁 𑀢𑀼𑀬𑁆𑀳𑀁 𑀉𑀧𑀝𑁆𑀞𑀺𑀢𑀁 𑀳𑀢𑁆𑀣𑀕𑀢𑀁. 𑀤𑀳𑀭𑀺𑀓𑀸𑀲𑀻𑀢𑀺 𑀢𑀭𑀼𑀡𑀻 𑀘𑀸𑀲𑀺, 𑀢𑀲𑁆𑀫𑀸 𑀪𑀼𑀜𑁆𑀚𑀸𑀳𑀺 𑀓𑀸𑀫𑀪𑁄𑀕𑁂. 𑀢𑁂𑀦 𑀓𑀸𑀭𑀡𑁂𑀦 𑀯𑀸𑀭𑁂𑀬𑁆𑀬𑀁 𑀳𑁄𑀢𑀼 𑀢𑁂 𑀧𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀦𑁂𑀢𑀺 𑀫𑀸𑀢𑀸𑀧𑀺𑀢𑀭𑁄. 𑀫𑀸 𑀏𑀤𑀺𑀲𑀺𑀓𑀸𑀦𑀻𑀢𑀺 𑀏𑀯𑀭𑀽𑀧𑀸𑀦𑀺 𑀭𑀚𑁆𑀚𑁂 𑀆𑀡𑀸𑀤𑀻𑀦𑀺 𑀫𑀸 𑀪𑀯𑀦𑁆𑀢𑀼. 𑀓𑀲𑁆𑀫𑀸𑀢𑀺 𑀘𑁂 𑀆𑀳 ‘‘𑀪𑀕𑀯𑀢𑀫𑀲𑀸𑀭’’𑀦𑁆𑀢𑀺𑀆𑀤𑀺.

𑀓𑀺𑀫𑀺𑀯𑀸𑀢𑀺 𑀓𑀺𑀫𑀺 𑀯𑀺𑀬. 𑀧𑀽𑀢𑀺𑀓𑀸𑀬𑀦𑁆𑀢𑀺 𑀇𑀫𑀁 𑀧𑀽𑀢𑀺𑀓𑀴𑁂𑀯𑀭𑀁. 𑀲𑀯𑀦𑀕𑀦𑁆𑀥𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀯𑀺𑀲𑁆𑀲𑀕𑀦𑁆𑀥𑀁. 𑀪𑀬𑀸𑀦𑀓𑀦𑁆𑀢𑀺 𑀅𑀯𑀻𑀢𑀭𑀸𑀕𑀸𑀦𑀁 𑀪𑀬𑀸𑀯𑀳𑀁. 𑀓𑀼𑀡𑀧𑀁 𑀅𑀪𑀺𑀲𑀁𑀯𑀺𑀲𑁂𑀬𑁆𑀬𑀁 𑀪𑀲𑁆𑀢𑀦𑁆𑀢𑀺 𑀓𑀼𑀡𑀧𑀪𑀭𑀺𑀢𑀁 𑀘𑀫𑁆𑀫𑀧𑀲𑀺𑀩𑁆𑀩𑀓𑀁, 𑀅𑀲𑀓𑀺𑀁 𑀧𑀕𑁆𑀖𑀭𑀺𑀢𑀁 𑀅𑀲𑀼𑀘𑀺𑀧𑀼𑀡𑁆𑀡𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀼𑀡𑁆𑀡𑀁 𑀳𑀼𑀢𑁆𑀯𑀸 𑀅𑀲𑀓𑀺𑀁 𑀲𑀩𑁆𑀩𑀓𑀸𑀮𑀁 𑀅𑀥𑀺𑀧𑀕𑁆𑀖𑀭𑀦𑁆𑀢𑀁 ‘‘𑀫𑀫 𑀇𑀤’’𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑁂𑀬𑁆𑀬𑀁.

𑀓𑀺𑀫𑀺𑀯 𑀢𑀳𑀁 𑀚𑀸𑀦𑀦𑁆𑀢𑀻, 𑀯𑀺𑀓𑀽𑀮𑀓𑀦𑁆𑀢𑀺 𑀅𑀢𑀺𑀯𑀺𑀬 𑀧𑀝𑀺𑀓𑁆𑀓𑀽𑀮𑀁 𑀅𑀲𑀼𑀘𑀻𑀳𑀺 𑀫𑀁𑀲𑀧𑁂𑀲𑀻𑀳𑀺 𑀲𑁄𑀡𑀺𑀢𑁂𑀳𑀺 𑀘 𑀉𑀧𑀮𑀺𑀢𑁆𑀢𑀁 𑀅𑀦𑁂𑀓𑁂𑀲𑀁 𑀓𑀺𑀫𑀺𑀓𑀼𑀮𑀸𑀦𑀁 𑀆𑀮𑀬𑀁 𑀲𑀓𑀼𑀡𑀸𑀦𑀁 𑀪𑀢𑁆𑀢𑀪𑀽𑀢𑀁. ‘‘𑀓𑀺𑀫𑀺𑀓𑀼𑀮𑀸𑀮𑀲𑀓𑀼𑀡𑀪𑀢𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀓𑀺𑀫𑀻𑀦𑀁 𑀅𑀯𑀲𑀺𑀝𑁆𑀞𑀲𑀓𑀼𑀡𑀸𑀦𑀜𑁆𑀘 𑀪𑀢𑁆𑀢𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀅𑀳𑀁 𑀓𑀴𑁂𑀯𑀭𑀁 𑀚𑀸𑀦𑀦𑁆𑀢𑀻 𑀞𑀺𑀢𑀸. 𑀢𑀁 𑀫𑀁 𑀇𑀤𑀸𑀦𑀺 𑀯𑀸𑀭𑁂𑀬𑁆𑀬𑀯𑀲𑁂𑀦 𑀓𑀺𑀲𑁆𑀲 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦 𑀤𑀺𑀬𑁆𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀢𑀜𑁆𑀘 𑀤𑀸𑀦𑀁 𑀓𑀺𑀫𑀺𑀯 𑀓𑀺𑀁 𑀯𑀺𑀬 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀦𑀺𑀩𑁆𑀩𑀼𑀬𑁆𑀳𑀢𑀺 𑀲𑀼𑀲𑀸𑀦𑀁, 𑀅𑀘𑀺𑀭𑀁 𑀓𑀸𑀬𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑁄𑀢𑀺 𑀅𑀬𑀁 𑀓𑀸𑀬𑁄 𑀅𑀘𑀺𑀭𑁂𑀦𑁂𑀯 𑀅𑀧𑀕𑀢𑀯𑀺𑀜𑁆𑀜𑀸𑀡𑁄 𑀲𑀼𑀲𑀸𑀦𑀁 𑀦𑀺𑀩𑁆𑀩𑀼𑀬𑁆𑀳𑀢𑀺 𑀉𑀧𑀦𑀻𑀬𑀢𑀺. 𑀙𑀼𑀤𑁆𑀥𑁄𑀢𑀺 𑀙𑀟𑁆𑀟𑀺𑀢𑁄. 𑀓𑀴𑀺𑀗𑁆𑀕𑀭𑀁 𑀯𑀺𑀬𑀸𑀢𑀺 𑀦𑀺𑀭𑀢𑁆𑀣𑀓𑀓𑀝𑁆𑀞𑀔𑀡𑁆𑀟𑀲𑀤𑀺𑀲𑁄. 𑀚𑀺𑀕𑀼𑀘𑁆𑀙𑀫𑀸𑀦𑁂𑀳𑀺 𑀜𑀸𑀢𑀻𑀳𑀻𑀢𑀺 𑀜𑀸𑀢𑀺𑀚𑀦𑁂𑀳𑀺𑀧𑀺 𑀚𑀺𑀕𑀼𑀘𑁆𑀙𑀫𑀸𑀦𑁂𑀳𑀺.

𑀙𑀼𑀤𑁆𑀥𑀽𑀦 𑀦𑀁 𑀲𑀼𑀲𑀸𑀦𑁂𑀢𑀺 𑀦𑀁 𑀓𑀴𑁂𑀯𑀭𑀁 𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸. 𑀧𑀭𑀪𑀢𑁆𑀢𑀦𑁆𑀢𑀺 𑀧𑀭𑁂𑀲𑀁 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀁 𑀪𑀢𑁆𑀢𑀪𑀽𑀢𑀁. 𑀦𑁆𑀳𑀸𑀬𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀸𑀢𑀺 ‘‘𑀇𑀫𑀲𑁆𑀲 𑀧𑀘𑁆𑀙𑀢𑁄 𑀆𑀕𑀢𑀸’’𑀢𑀺 𑀏𑀢𑁆𑀢𑀓𑁂𑀦𑀸𑀧𑀺 𑀚𑀺𑀕𑀼𑀘𑁆𑀙𑀫𑀸𑀦𑀸 𑀲𑀲𑀻𑀲𑀁 𑀦𑀺𑀫𑀼𑀚𑁆𑀚𑀦𑁆𑀢𑀸 𑀦𑁆𑀳𑀸𑀬𑀦𑁆𑀢𑀺, 𑀧𑀕𑁂𑀯 𑀨𑀼𑀝𑁆𑀞𑀯𑀦𑁆𑀢𑁄. 𑀦𑀺𑀬𑀓𑀸 𑀫𑀸𑀢𑀸𑀧𑀺𑀢𑀭𑁄𑀢𑀺 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀭𑁄𑀧𑀺. 𑀓𑀺𑀁 𑀧𑀦 𑀲𑀸𑀥𑀸𑀭𑀡𑀸 𑀚𑀦𑀢𑀸𑀢𑀺 𑀇𑀢𑀭𑁄 𑀧𑀦 𑀲𑀫𑀽𑀳𑁄 𑀚𑀺𑀕𑀼𑀘𑁆𑀙𑀢𑀻𑀢𑀺 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁.

𑀅𑀚𑁆𑀛𑁄𑀲𑀺𑀢𑀸𑀢𑀺 𑀢𑀡𑁆𑀳𑀸𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀸. 𑀅𑀲𑀸𑀭𑁂𑀢𑀺 𑀦𑀺𑀘𑁆𑀘𑀲𑀸𑀭𑀸𑀤𑀺𑀲𑀸𑀭𑀭𑀳𑀺𑀢𑁂.

𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 𑀯𑀺𑀜𑁆𑀜𑀸𑀡𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸. 𑀕𑀦𑁆𑀥𑀲𑁆𑀲 𑀅𑀲𑀳𑀫𑀸𑀦𑀸𑀢𑀺 𑀕𑀦𑁆𑀥𑀁 𑀅𑀲𑁆𑀲 𑀓𑀸𑀬𑀲𑁆𑀲 𑀅𑀲𑀳𑀦𑁆𑀢𑀻. 𑀲𑀓𑀸𑀧𑀺 𑀫𑀸𑀢𑀸𑀢𑀺 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺 𑀚𑀺𑀕𑀼𑀘𑁆𑀙𑁂𑀬𑁆𑀬 𑀓𑁄𑀝𑁆𑀞𑀸𑀲𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑁂𑀦 𑀧𑀝𑀺𑀓𑁆𑀓𑀽𑀮𑀪𑀸𑀯𑀸𑀬 𑀲𑀼𑀝𑁆𑀞𑀼𑀢𑀭𑀁 𑀉𑀧𑀝𑁆𑀞𑀳𑀦𑀢𑁄.

𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀇𑀫𑀸 𑀅𑀝𑁆𑀞𑀸𑀭𑀲𑀥𑀸𑀢𑀼𑀬𑁄, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀇𑀫𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀏𑀯𑀁 𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀺 𑀘𑀸𑀢𑀺 𑀲𑀩𑁆𑀩𑀁 𑀇𑀤𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀚𑀸𑀢𑀁 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀢𑁆𑀢𑀸 𑀲𑀗𑁆𑀔𑀢𑀁, 𑀢𑀬𑀺𑀤𑀁 𑀢𑀲𑁆𑀫𑀺𑀁 𑀪𑀯𑁂 𑀧𑀯𑀢𑁆𑀢𑀫𑀸𑀦𑀁 𑀤𑀼𑀓𑁆𑀔𑀁, 𑀚𑀸𑀢𑀺𑀧𑀘𑁆𑀘𑀬𑀢𑁆𑀢𑀸 𑀚𑀸𑀢𑀺𑀫𑀽𑀮𑀓𑀦𑁆𑀢𑀺. 𑀏𑀯𑀁 𑀬𑁄𑀦𑀺𑀲𑁄 𑀉𑀧𑀸𑀬𑁂𑀦 𑀅𑀦𑀼𑀯𑀺𑀘𑀺𑀦𑀦𑁆𑀢𑀻 𑀘𑀺𑀦𑁆𑀢𑀬𑀦𑁆𑀢𑀻, 𑀯𑀸𑀭𑁂𑀬𑁆𑀬𑀁 𑀯𑀺𑀯𑀸𑀳𑀁, 𑀓𑀺𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀇𑀘𑁆𑀙𑀺𑀲𑁆𑀲𑀸𑀫𑀺.

‘‘𑀲𑀻𑀮𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸 𑀤𑀼𑀓𑁆𑀓𑀭𑀸’’𑀢𑀺 𑀬𑀤𑁂𑀢𑀁 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 ‘‘𑀤𑀺𑀯𑀲𑁂 𑀤𑀺𑀯𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀺𑀲𑀢𑁆𑀢𑀺𑀲𑀢𑀸𑀦𑀺 𑀦𑀯𑀦𑀯𑀸 𑀧𑀢𑁂𑀬𑁆𑀬𑀼𑀁 𑀓𑀸𑀬𑀫𑁆𑀳𑀻𑀢𑀺 𑀤𑀺𑀦𑁂 𑀤𑀺𑀦𑁂 𑀢𑀻𑀡𑀺 𑀲𑀢𑁆𑀢𑀺𑀲𑀢𑀸𑀦𑀺 𑀢𑀸𑀯𑀤𑁂𑀯 𑀧𑀻𑀢𑀦𑀺𑀲𑀺𑀢𑀪𑀸𑀯𑁂𑀦 𑀅𑀪𑀺𑀦𑀯𑀸𑀦𑀺 𑀓𑀸𑀬𑀲𑁆𑀫𑀺𑀁 𑀲𑀫𑁆𑀧𑀢𑁂𑀬𑁆𑀬𑀼𑀁. 𑀯𑀲𑁆𑀲𑀲𑀢𑀫𑁆𑀧𑀺 𑀘 𑀖𑀸𑀢𑁄 𑀲𑁂𑀬𑁆𑀬𑁄𑀢𑀺 𑀦𑀺𑀭𑀦𑁆𑀢𑀭𑀁 𑀯𑀲𑁆𑀲𑀲𑀢𑀫𑁆𑀧𑀺 𑀧𑀢𑀫𑀸𑀦𑁄 𑀬𑀣𑀸𑀯𑀼𑀢𑁆𑀢𑁄 𑀲𑀢𑁆𑀢𑀺𑀖𑀸𑀢𑁄 𑀲𑁂𑀬𑁆𑀬𑁄. 𑀤𑀼𑀓𑁆𑀔𑀲𑁆𑀲 𑀘𑁂𑀯𑀁 𑀔𑀬𑁄𑀢𑀺 𑀏𑀯𑀁 𑀘𑁂 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀓𑁆𑀔𑀬𑁄 𑀪𑀯𑁂𑀬𑁆𑀬, 𑀏𑀯𑀁 𑀫𑀳𑀦𑁆𑀢𑀫𑁆𑀧𑀺 𑀧𑀯𑀢𑁆𑀢𑀺𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀚𑁆𑀛𑀼𑀧𑀕𑀘𑁆𑀙𑁂𑀢𑀺 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀼𑀕𑁆𑀕𑀮𑁄 𑀅𑀦𑀫𑀢𑀕𑁆𑀕𑀁 𑀲𑀁𑀲𑀸𑀭𑀁 𑀅𑀧𑀭𑀺𑀫𑀸𑀡𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀁 𑀤𑀻𑀧𑁂𑀦𑁆𑀢𑀁 𑀲𑀢𑁆𑀣𑀼𑀦𑁄 𑀯𑀘𑀦𑀁 𑀯𑀺𑀜𑁆𑀜𑀸𑀬 𑀞𑀺𑀢𑁄 𑀬𑀣𑀸𑀯𑀼𑀢𑁆𑀢𑀁 𑀲𑀢𑁆𑀢𑀺𑀖𑀸𑀢𑀤𑀼𑀓𑁆𑀔𑀁 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬, 𑀢𑁂𑀦 𑀘𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀓𑁆𑀔𑀬𑁄 𑀲𑀺𑀬𑀸𑀢𑀺. 𑀢𑁂𑀦𑀸𑀳 𑁋 ‘‘𑀤𑀻𑀖𑁄 𑀢𑁂𑀲𑀁 𑀲𑀁𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀜𑁆𑀘 𑀳𑀜𑁆𑀜𑀫𑀸𑀦𑀸𑀦’’𑀦𑁆𑀢𑀺, 𑀅𑀧𑀭𑀸𑀧𑀭𑀁 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀻𑀳𑀺 𑀩𑀸𑀥𑀺𑀬𑀫𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀲𑀼𑀭𑀓𑀸𑀬𑁂𑀢𑀺 𑀓𑀸𑀮𑀓𑀜𑁆𑀘𑀺𑀓𑀸𑀤𑀺 𑀧𑁂𑀢𑀸𑀲𑀼𑀭𑀦𑀺𑀓𑀸𑀬𑁂. 𑀖𑀸𑀢𑀸𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀉𑀧𑀖𑀸𑀢𑀸 𑀯𑀥𑀸.

𑀩𑀳𑀽𑀢𑀺 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀓𑀫𑁆𑀫𑀓𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀩𑀳𑀽 𑀅𑀦𑁂𑀓𑀖𑀸𑀢𑀸. 𑀯𑀺𑀦𑀺𑀧𑀸𑀢𑀕𑀢𑀲𑁆𑀲𑀸𑀢𑀺 𑀲𑁂𑀲𑀸𑀧𑀸𑀬𑀲𑀗𑁆𑀔𑀸𑀢𑀁 𑀯𑀺𑀦𑀺𑀧𑀸𑀢𑀁 𑀉𑀧𑀕𑀢𑀲𑁆𑀲𑀸𑀧𑀺. 𑀧𑀻𑀴𑀺𑀬𑀫𑀸𑀦𑀲𑁆𑀲𑀸𑀢𑀺 𑀢𑀺𑀭𑀘𑁆𑀙𑀸𑀦𑀸𑀤𑀺𑀅𑀢𑁆𑀢𑀪𑀸𑀯𑁂 𑀅𑀪𑀺𑀖𑀸𑀢𑀸𑀤𑀻𑀳𑀺 𑀆𑀩𑀸𑀥𑀺𑀬𑀫𑀸𑀦𑀲𑁆𑀲. 𑀤𑁂𑀯𑁂𑀲𑀼𑀧𑀺 𑀅𑀢𑁆𑀢𑀸𑀡𑀦𑁆𑀢𑀺 𑀤𑁂𑀯𑀢𑁆𑀢𑀪𑀸𑀯𑁂𑀲𑀼𑀧𑀺 𑀢𑀸𑀡𑀁 𑀦𑀢𑁆𑀣𑀺 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀦𑀸 𑀲𑀤𑀼𑀓𑁆𑀔𑀲𑀯𑀺𑀖𑀸𑀢𑀪𑀸𑀯𑀢𑁄. 𑀦𑀺𑀩𑁆𑀩𑀸𑀦𑀲𑀼𑀔𑀸 𑀧𑀭𑀁 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑀢𑁄 𑀧𑀭𑀁 𑀅𑀜𑁆𑀜𑀁 𑀉𑀢𑁆𑀢𑀫𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺 𑀮𑁄𑀓𑀺𑀬𑀲𑀼𑀔𑀲𑁆𑀲 𑀯𑀺𑀧𑀭𑀺𑀡𑀸𑀫𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀥. 𑀧. 𑁨𑁦𑁩-𑁨𑁦𑁪).

𑀧𑀢𑁆𑀢𑀸 𑀢𑁂 𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑁂 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸𑀬𑁂𑀯 𑀦𑀸𑀫. 𑀅𑀣 𑀯𑀸 𑀢𑁂𑀬𑁂𑀯 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸. 𑀬𑁂 𑀬𑀼𑀢𑁆𑀢𑀸 𑀤𑀲𑀩𑀮𑀲𑁆𑀲 𑀧𑀸𑀯𑀘𑀦𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀬𑁂 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸.

𑀦𑀺𑀩𑁆𑀩𑀺𑀦𑁆𑀦𑀸𑀢𑀺 𑀯𑀺𑀭𑀢𑁆𑀢𑀸. 𑀫𑁂𑀢𑀺 𑀫𑀬𑀸. 𑀯𑀦𑁆𑀢𑀲𑀫𑀸𑀢𑀺 𑀲𑀼𑀯𑀸𑀦𑀯𑀫𑀣𑀼𑀲𑀤𑀺𑀲𑀸. 𑀢𑀸𑀮𑀯𑀢𑁆𑀣𑀼𑀓𑀢𑀸𑀢𑀺 𑀢𑀸𑀮𑀲𑁆𑀲 𑀧𑀢𑀺𑀝𑁆𑀞𑀸𑀦𑀲𑀤𑀺𑀲𑀸 𑀓𑀢𑀸.

𑀅𑀣𑀸𑀢𑀺 𑀧𑀘𑁆𑀙𑀸, 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀯𑁂𑀤𑁂𑀢𑁆𑀯𑀸 𑀅𑀦𑀺𑀓𑀭𑀢𑁆𑀢𑀲𑁆𑀲 𑀘 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸. 𑀅𑀲𑀺𑀢𑀦𑀺𑀘𑀺𑀢𑀫𑀼𑀤𑀼𑀓𑁂𑀢𑀺 𑀇𑀦𑁆𑀤𑀦𑀻𑀮𑀪𑀫𑀭𑀲𑀫𑀸𑀦𑀯𑀡𑁆𑀡𑀢𑀸𑀬 𑀅𑀲𑀺𑀢𑁂, 𑀖𑀦𑀪𑀸𑀯𑁂𑀦 𑀦𑀺𑀘𑀺𑀢𑁂, 𑀲𑀺𑀫𑁆𑀩𑀮𑀺𑀢𑀽𑀮𑀲𑀫𑀲𑀫𑁆𑀨𑀲𑁆𑀲𑀢𑀸𑀬 𑀫𑀼𑀤𑀼𑀓𑁂. 𑀓𑁂𑀲𑁂 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀬𑀸𑀢𑀺 𑀅𑀢𑁆𑀢𑀦𑁄 𑀓𑁂𑀲𑁂 𑀲𑀼𑀦𑀺𑀲𑀺𑀢𑁂𑀦 𑀅𑀲𑀺𑀦𑀸 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀸𑀲𑀸𑀤𑀁 𑀧𑀺𑀤𑀳𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀧𑀸𑀲𑀸𑀤𑁂 𑀲𑀺𑀭𑀺𑀕𑀩𑁆𑀪𑀁 𑀧𑀺𑀥𑀸𑀬, 𑀢𑀲𑁆𑀲 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀻𑀢𑀺 𑀔𑀕𑁆𑀕𑁂𑀦 𑀙𑀺𑀦𑁆𑀦𑁂 𑀅𑀢𑁆𑀢𑀦𑁄 𑀓𑁂𑀲𑁂 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀻 𑀬𑀣𑀸𑀉𑀧𑀝𑁆𑀞𑀺𑀢𑁂 𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 𑀧𑀞𑀫𑀁 𑀛𑀸𑀦𑀁 𑀯𑀲𑀻𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸 𑀲𑀫𑀸𑀧𑀚𑁆𑀚𑀺.

𑀲𑀸 𑀘 𑀲𑀼𑀫𑁂𑀥𑀸 𑀢𑀳𑀺𑀁 𑀧𑀸𑀲𑀸𑀤𑁂 𑀲𑀫𑀸𑀧𑀦𑁆𑀦𑀸 𑀛𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀺𑀘𑁆𑀘𑀲𑀜𑁆𑀜𑀁 𑀲𑀼𑀪𑀸𑀯𑁂𑀢𑀻𑀢𑀺 𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 ‘‘𑀬𑀁𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁧𑁮𑁧; 𑀫. 𑀦𑀺. 𑁧.𑁨𑁪𑁪; 𑀧𑀝𑀺. 𑀫. 𑁧.𑁪𑁮) 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁 𑀲𑀼𑀝𑁆𑀞𑀼 𑀪𑀸𑀯𑁂𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀲𑀜𑁆𑀜𑀸𑀤𑀻𑀦𑀫𑁆𑀧𑀺 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀡𑀺𑀓𑀦𑀓𑀪𑀽𑀲𑀺𑀢𑀗𑁆𑀕𑁄𑀢𑀺 𑀫𑀡𑀺𑀯𑀺𑀘𑀺𑀢𑁆𑀢𑁂𑀳𑀺 𑀳𑁂𑀫𑀫𑀸𑀮𑀸𑀮𑀗𑁆𑀓𑀸𑀭𑁂𑀳𑀺 𑀯𑀺𑀪𑀽𑀲𑀺𑀢𑀕𑀢𑁆𑀢𑁄.

𑀭𑀚𑁆𑀚𑁂 𑀆𑀡𑀸𑀢𑀺𑀆𑀤𑀺 𑀬𑀸𑀘𑀺𑀢𑀸𑀓𑀸𑀭𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀆𑀡𑀸𑀢𑀺 𑀆𑀥𑀺𑀧𑀘𑁆𑀘𑀁. 𑀇𑀲𑁆𑀲𑀭𑀺𑀬𑀦𑁆𑀢𑀺 𑀬𑀲𑁄 𑀯𑀺𑀪𑀯𑀲𑀫𑁆𑀧𑀢𑁆𑀢𑀺. 𑀪𑁄𑀕𑀸 𑀲𑀼𑀔𑀸𑀢𑀺 𑀇𑀝𑁆𑀞𑀸 𑀫𑀦𑀸𑀧𑀺𑀬𑀸 𑀓𑀸𑀫𑀽𑀧𑀪𑁄𑀕𑀸. 𑀤𑀳𑀭𑀺𑀓𑀸𑀲𑀻𑀢𑀺 𑀢𑁆𑀯𑀁 𑀇𑀤𑀸𑀦𑀺 𑀤𑀳𑀭𑀸 𑀢𑀭𑀼𑀡𑀻 𑀅𑀲𑀺.

𑀦𑀺𑀲𑁆𑀲𑀝𑁆𑀞𑀁 𑀢𑁂 𑀭𑀚𑁆𑀚𑀦𑁆𑀢𑀺 𑀫𑀬𑁆𑀳𑀁 𑀲𑀩𑁆𑀩𑀫𑁆𑀧𑀺 𑀢𑀺𑀬𑁄𑀚𑀦𑀺𑀓𑀁 𑀭𑀚𑁆𑀚𑀁 𑀢𑀼𑀬𑁆𑀳𑀁 𑀧𑀭𑀺𑀘𑁆𑀘𑀢𑁆𑀢𑀁, 𑀢𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼, 𑀅𑀬𑀁 𑀫𑀁 𑀓𑀸𑀫𑁂𑀳𑀺𑀬𑁂𑀯 𑀦𑀺𑀫𑀦𑁆𑀢𑁂𑀢𑀻𑀢𑀺 𑀫𑀸 𑀤𑀼𑀫𑁆𑀫𑀦𑀸 𑀅𑀳𑁄𑀲𑀺. 𑀤𑁂𑀳𑀺 𑀤𑀸𑀦𑀸𑀦𑀻𑀢𑀺 𑀬𑀣𑀸𑀭𑀼𑀘𑀺𑀬𑀸 𑀫𑀳𑀦𑁆𑀢𑀸𑀦𑀺 𑀤𑀸𑀦𑀸𑀦𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀧𑀯𑀢𑁆𑀢𑁂𑀳𑀺, 𑀫𑀸𑀢𑀸𑀧𑀺𑀢𑀭𑁄 𑀢𑁂 𑀤𑀼𑀓𑁆𑀔𑀺𑀢𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀢𑀯 𑀧𑀩𑁆𑀩𑀚𑁆𑀚𑀸𑀥𑀺𑀧𑁆𑀧𑀸𑀬𑀁 𑀲𑀼𑀢𑁆𑀯𑀸 𑀢𑀲𑁆𑀫𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀻. 𑀢𑁂𑀧𑀺 𑀉𑀧𑀝𑁆𑀞𑀳𑀦𑁆𑀢𑀻 𑀢𑁂𑀲𑀁 𑀘𑀺𑀢𑁆𑀢𑀁 𑀤𑀼𑀓𑁆𑀔𑀸 𑀫𑁄𑀘𑁂𑀳𑀻𑀢𑀺 𑀏𑀯𑀫𑁂𑀢𑁆𑀣 𑀧𑀤𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀸 𑀓𑀸𑀫𑁂 𑀅𑀪𑀺𑀦𑀦𑁆𑀤𑀻𑀢𑀺 𑀯𑀢𑁆𑀣𑀼𑀓𑀸𑀫𑁂 𑀓𑀺𑀮𑁂𑀲𑀓𑀸𑀫𑁂 𑀫𑀸 𑀅𑀪𑀺𑀦𑀦𑁆𑀤𑀺. 𑀅𑀣 𑀔𑁄 𑀢𑁂𑀲𑀼 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑁄𑀲𑀁 𑀫𑀬𑁆𑀳𑀁 𑀯𑀘𑀦𑀸𑀦𑀼𑀲𑀸𑀭𑁂𑀦 𑀧𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀳𑀺.

𑀘𑀸𑀢𑀼𑀤𑁆𑀤𑀻𑀧𑁄𑀢𑀺 𑀚𑀫𑁆𑀩𑀼𑀤𑀻𑀧𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀇𑀲𑁆𑀲𑀭𑁄. 𑀫𑀦𑁆𑀥𑀸𑀢𑀸𑀢𑀺 𑀏𑀯𑀁𑀦𑀸𑀫𑁄 𑀭𑀸𑀚𑀸, 𑀓𑀸𑀫𑀪𑁄𑀕𑀻𑀦𑀁 𑀅𑀕𑁆𑀕𑁄 𑀅𑀕𑁆𑀕𑀪𑀽𑀢𑁄 𑀆𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀭𑀸𑀳𑀼𑀕𑁆𑀕𑀁 𑀅𑀢𑁆𑀢𑀪𑀸𑀯𑀻𑀦𑀁, 𑀫𑀦𑁆𑀥𑀸𑀢𑀸 𑀓𑀸𑀫𑀪𑁄𑀕𑀺𑀦’’𑀦𑁆𑀢𑀺 (𑀅. 𑀦𑀺. 𑁪.𑁧𑁫). 𑀅𑀢𑀺𑀢𑁆𑀢𑁄 𑀓𑀸𑀮𑀗𑁆𑀓𑀢𑁄𑀢𑀺 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀼𑀫𑀸𑀭𑀓𑀻𑀴𑀸𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀑𑀧𑀭𑀚𑁆𑀚𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀤𑁂𑀯𑀪𑁄𑀕𑀲𑀤𑀺𑀲𑁂 𑀪𑁄𑀕𑁂 𑀪𑀼𑀜𑁆𑀚𑀺𑀢𑁆𑀯𑀸 𑀙𑀢𑁆𑀢𑀺𑀁𑀲𑀸𑀬 𑀲𑀓𑁆𑀓𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀓𑀸𑀮𑀁 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸𑀧𑀺 𑀓𑀸𑀫𑁂𑀳𑀺 𑀅𑀢𑀺𑀢𑁆𑀢𑁄𑀯 𑀓𑀸𑀮𑀗𑁆𑀓𑀢𑁄. 𑀦 𑀘𑀲𑁆𑀲 𑀧𑀭𑀺𑀧𑀽𑀭𑀺𑀢𑀸 𑀇𑀘𑁆𑀙𑀸 𑀅𑀲𑁆𑀲 𑀫𑀦𑁆𑀥𑀸𑀢𑀼𑀭𑀜𑁆𑀜𑁄 𑀓𑀸𑀫𑁂𑀲𑀼 𑀆𑀲𑀸 𑀦 𑀘 𑀧𑀭𑀺𑀧𑀼𑀡𑁆𑀡𑀸 𑀆𑀲𑀺.

𑀲𑀢𑁆𑀢 𑀭𑀢𑀦𑀸𑀦𑀺 𑀯𑀲𑁆𑀲𑁂𑀬𑁆𑀬𑀸𑀢𑀺 𑀲𑀢𑁆𑀢𑀧𑀺 𑀭𑀢𑀦𑀸𑀦𑀺, 𑀯𑀼𑀝𑁆𑀞𑀺𑀫𑀸 𑀤𑁂𑀯𑁄 𑀤𑀲𑀤𑀺𑀲𑀸 𑀩𑁆𑀬𑀸𑀧𑁂𑀢𑁆𑀯𑀸, 𑀲𑀫𑀦𑁆𑀢𑁂𑀦 𑀲𑀫𑀦𑁆𑀢𑀢𑁄 𑀧𑀼𑀭𑀺𑀲𑀲𑁆𑀲 𑀭𑀼𑀘𑀺𑀯𑀲𑁂𑀦 𑀬𑀤𑀺𑀧𑀺 𑀯𑀲𑁆𑀲𑁂𑀬𑁆𑀬, 𑀬𑀣𑀸 𑀢𑀁 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀲𑁆𑀲 𑀏𑀯𑀁 𑀲𑀦𑁆𑀢𑁂𑀧𑀺 𑀦 𑀘𑀢𑁆𑀣𑀺 𑀢𑀺𑀢𑁆𑀢𑀺 𑀓𑀸𑀫𑀸𑀦𑀁, 𑀅𑀢𑀺𑀢𑁆𑀢𑀸𑀯 𑀫𑀭𑀦𑁆𑀢𑀺 𑀦𑀭𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦 𑀓𑀳𑀸𑀧𑀡𑀯𑀲𑁆𑀲𑁂𑀦, 𑀢𑀺𑀢𑁆𑀢𑀺 𑀓𑀸𑀫𑁂𑀲𑀼 𑀯𑀺𑀚𑁆𑀚𑀢𑀻’’𑀢𑀺 (𑀥. 𑀧. 𑁧𑁮𑁬; 𑀚𑀸. 𑁧.𑁩.𑁨𑁩).

𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦, 𑀲𑀧𑁆𑀧𑀲𑀺𑀭𑁄𑀧𑀫𑀸 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦, 𑀉𑀓𑁆𑀓𑁄𑀧𑀫𑀸 𑀢𑀺𑀡𑀼𑀓𑁆𑀓𑀽𑀧𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀢𑁂𑀦𑀸𑀳 ‘‘𑀅𑀦𑀼𑀤𑀳𑀦𑁆𑀢𑀻’’𑀢𑀺. 𑀅𑀝𑁆𑀞𑀺𑀓𑀗𑁆𑀓𑀮𑀲𑀦𑁆𑀦𑀺𑀪𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦.

𑀫𑀳𑀸𑀯𑀺𑀲𑀸𑀢𑀺 𑀳𑀮𑀸𑀳𑀮𑀸𑀤𑀺𑀫𑀳𑀸𑀯𑀺𑀲𑀲𑀤𑀺𑀲𑀸. 𑀅𑀖𑀫𑀽𑀮𑀸𑀢𑀺 𑀅𑀖𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮𑀸 𑀓𑀸𑀭𑀡𑀪𑀽𑀢𑀸. 𑀢𑁂𑀦𑀸𑀳 ‘‘𑀤𑀼𑀔𑀧𑁆𑀨𑀮𑀸’’𑀢𑀺.

𑀭𑀼𑀓𑁆𑀔𑀧𑁆𑀨𑀮𑀽𑀧𑀫𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀨𑀮𑀺𑀪𑀜𑁆𑀚𑀦𑀝𑁆𑀞𑁂𑀦. 𑀫𑀁𑀲𑀧𑁂𑀲𑀽𑀧𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦. 𑀲𑀼𑀧𑀺𑀦𑁄𑀧𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦 𑀫𑀸𑀬𑀸 𑀯𑀺𑀬 𑀧𑀮𑁄𑀪𑀦𑀢𑁄. 𑀢𑁂𑀦𑀸𑀳 ‘‘𑀯𑀜𑁆𑀘𑀦𑀺𑀬𑀸’’𑀢𑀺, 𑀯𑀜𑁆𑀘𑀓𑀸𑀢𑀺 𑀅𑀢𑁆𑀣𑁄. 𑀬𑀸𑀘𑀺𑀢𑀓𑀽𑀧𑀫𑀸𑀢𑀺 𑀬𑀸𑀘𑀺𑀢𑀓𑀪𑀡𑁆𑀟𑀲𑀤𑀺𑀲𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦.

𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀭𑀼𑀚𑁆𑀚𑀦𑀝𑁆𑀞𑁂𑀦 𑀭𑁄𑀕𑁄 𑀤𑀼𑀓𑁆𑀔𑀢𑀸𑀲𑀼𑀮𑀪𑀢𑁆𑀢𑀸. 𑀕𑀡𑁆𑀟𑁄 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄. 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀝𑁆𑀞𑁂𑀦 𑀅𑀖𑀁. 𑀫𑀭𑀡𑀲𑀫𑁆𑀧𑀸𑀧𑀦𑁂𑀦 𑀦𑀺𑀖𑀁. 𑀅𑀗𑁆𑀕𑀸𑀭𑀓𑀸𑀲𑀼𑀲𑀤𑀺𑀲𑀸 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦. 𑀪𑀬𑀳𑁂𑀢𑀼𑀢𑀸𑀬 𑀘𑁂𑀯 𑀯𑀥𑀓𑀧𑀳𑀽𑀢𑀢𑀸𑀬 𑀘 𑀪𑀬𑀁 𑀯𑀥𑁄 𑀦𑀸𑀫, 𑀓𑀸𑀫𑀸𑀢𑀺 𑀬𑁄𑀚𑀦𑀸.

𑀅𑀓𑁆𑀔𑀸𑀢𑀸 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 ‘‘𑀲𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀲𑁆𑀲 𑀘 𑀅𑀦𑁆𑀢𑀭𑀸𑀬𑀓𑀭𑀸’’𑀢𑀺 𑀘𑀓𑁆𑀔𑀼𑀪𑀽𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀯𑀼𑀢𑁆𑀢𑀸. 𑀕𑀘𑁆𑀙𑀣𑀸𑀢𑀺 𑀅𑀦𑀺𑀓𑀭𑀢𑁆𑀢𑀁 𑀲𑀧𑀭𑀺𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑀺.

𑀓𑀺𑀁 𑀫𑀫 𑀧𑀭𑁄 𑀓𑀭𑀺𑀲𑁆𑀲𑀢𑀻𑀢𑀺 𑀧𑀭𑁄 𑀅𑀜𑁆𑀜𑁄 𑀫𑀫 𑀓𑀺𑀁 𑀦𑀸𑀫 𑀳𑀺𑀢𑀁 𑀓𑀭𑀺𑀲𑁆𑀲𑀢𑀺 𑀅𑀢𑁆𑀢𑀦𑁄 𑀲𑀻𑀲𑀫𑁆𑀳𑀺 𑀉𑀢𑁆𑀢𑀫𑀗𑁆𑀕𑁂 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀫𑀸𑀦𑁂. 𑀢𑁂𑀦𑀸𑀳 ‘‘𑀅𑀦𑀼𑀩𑀦𑁆𑀥𑁂 𑀚𑀭𑀸𑀫𑀭𑀡𑁂’’𑀢𑀺. 𑀢𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀲𑀻𑀲𑀟𑀸𑀳𑀲𑁆𑀲, 𑀖𑀸𑀢𑀸𑀬 𑀲𑀫𑀼𑀕𑁆𑀖𑀸𑀢𑀸𑀬, 𑀖𑀝𑀺𑀢𑀩𑁆𑀩𑀁 𑀯𑀸𑀬𑀫𑀺𑀢𑀩𑁆𑀩𑀁.

𑀙𑀫𑀦𑁆𑀢𑀺 𑀙𑀫𑀸𑀬𑀁. 𑀇𑀤𑀫𑀯𑁄𑀘𑀦𑁆𑀢𑀺 𑀇𑀤𑀁 ‘‘𑀤𑀻𑀖𑁄 𑀩𑀸𑀮𑀸𑀦𑀁 𑀲𑀁𑀲𑀸𑀭𑁄’’𑀢𑀺𑀆𑀤𑀺𑀓𑀁 𑀲𑀁𑀯𑁂𑀕𑀲𑀁𑀯𑀢𑁆𑀢𑀦𑀓𑀁 𑀯𑀘𑀦𑀁 𑀅𑀯𑁄𑀘𑀁.

𑀤𑀻𑀖𑁄 𑀩𑀸𑀮𑀸𑀦𑀁 𑀲𑀁𑀲𑀸𑀭𑁄𑀢𑀺 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀪𑀽𑀢𑀸𑀦𑀁 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀧𑀝𑀺𑀧𑀸𑀝𑀺𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑁄 𑀲𑀁𑀲𑀸𑀭𑁄 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀁 𑀅𑀦𑁆𑀥𑀩𑀸𑀮𑀸𑀦𑀁 𑀤𑀻𑀖𑁄 𑀩𑀼𑀤𑁆𑀥𑀜𑀸𑀡𑁂𑀦𑀧𑀺 𑀅𑀧𑀭𑀺𑀘𑁆𑀙𑀺𑀦𑁆𑀤𑀦𑀺𑀬𑁄. 𑀬𑀣𑀸 𑀳𑀺 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀬𑁂𑀯 𑀪𑀯𑀧𑀩𑀦𑁆𑀥𑀲𑁆𑀲 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀭𑀸𑀧𑀺 𑀓𑁄𑀝𑀻𑀢𑀺. 𑀧𑀼𑀦𑀧𑁆𑀧𑀼𑀦𑀜𑁆𑀘 𑀭𑁄𑀤𑀢𑀦𑁆𑀢𑀺 𑀅𑀧𑀭𑀸𑀧𑀭𑀁 𑀲𑁄𑀓𑀯𑀲𑁂𑀦 𑀭𑀼𑀤𑀦𑁆𑀢𑀸𑀦𑀁. 𑀇𑀫𑀺𑀦𑀸𑀧𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀁𑀬𑁂𑀯 𑀢𑁂𑀲𑀁 𑀯𑀺𑀪𑀸𑀯𑁂𑀢𑀺.

𑀅𑀲𑁆𑀲𑀼 𑀣𑀜𑁆𑀜𑀁 𑀭𑀼𑀥𑀺𑀭𑀦𑁆𑀢𑀺 𑀬𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀸 𑀨𑀼𑀝𑁆𑀞𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀘 𑀤𑀸𑀭𑀓𑀓𑀸𑀮𑁂 𑀫𑀸𑀢𑀼𑀣𑀦𑀢𑁄 𑀧𑀻𑀢𑀁 𑀣𑀜𑁆𑀜𑀜𑁆𑀘 𑀬𑀜𑁆𑀘 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀖𑀸𑀢𑀺𑀢𑀸𑀦𑀁 𑀭𑀼𑀥𑀺𑀭𑀁. 𑀲𑀁𑀲𑀸𑀭𑀁 𑀅𑀦𑀫𑀢𑀕𑁆𑀕𑀢𑁄 𑀲𑀁𑀲𑀸𑀭𑀲𑁆𑀲 𑀅𑀦𑀼 𑀅𑀫𑀢𑀕𑁆𑀕𑀢𑁆𑀢𑀸 𑀜𑀸𑀡𑁂𑀦 𑀅𑀦𑀼𑀕𑀦𑁆𑀢𑁆𑀯𑀸𑀧𑀺 𑀅𑀫𑀢𑀅𑀕𑁆𑀕𑀢𑁆𑀢𑀸 𑀅𑀯𑀺𑀤𑀺𑀢𑀕𑁆𑀕𑀢𑁆𑀢𑀸 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀢𑁆𑀢𑀸𑀦𑀁 𑀲𑀁𑀲𑀭𑀢𑀁, 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑀸𑀦𑀁 𑀲𑀁𑀲𑀭𑀺𑀢𑀁 𑀲𑀭𑀸𑀳𑀺, 𑀢𑀁 ‘‘𑀓𑀻𑀯 𑀩𑀳𑀼𑀓’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀸𑀳𑀺, 𑀅𑀝𑁆𑀞𑀻𑀦𑀁 𑀲𑀦𑁆𑀦𑀺𑀘𑀬𑀁 𑀲𑀭𑀸𑀳𑀺 𑀅𑀦𑀼𑀲𑁆𑀲𑀭, 𑀉𑀧𑀥𑀸𑀭𑁂𑀳𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀆𑀤𑀻𑀦𑀯𑀲𑁆𑀲 𑀩𑀳𑀼𑀪𑀸𑀯𑀜𑁆𑀘 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀭 𑀘𑀢𑀼𑀭𑁄𑀤𑀥𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀭 𑀘𑀢𑀼𑀭𑁄𑀤𑀥𑀻 𑀉𑀧𑀦𑀻𑀢𑁂 𑀅𑀲𑁆𑀲𑀼𑀣𑀜𑁆𑀜𑀭𑀼𑀥𑀺𑀭𑀫𑁆𑀳𑀻𑀢𑀺 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀸𑀦𑀁 𑀏𑀓𑁂𑀓𑀲𑁆𑀲𑀧𑀺 𑀅𑀲𑁆𑀲𑀼𑀫𑁆𑀳𑀺 𑀣𑀜𑁆𑀜𑁂 𑀭𑀼𑀥𑀺𑀭𑀫𑁆𑀳𑀺 𑀘 𑀧𑀫𑀸𑀡𑀢𑁄 𑀉𑀧𑀫𑁂𑀢𑀩𑁆𑀩𑁂 𑀘𑀢𑀼𑀭𑁄𑀤𑀥𑀻 𑀘𑀢𑁆𑀢𑀸𑀭𑁄 𑀫𑀳𑀸𑀲𑀫𑀼𑀤𑁆𑀤𑁂 𑀉𑀧𑀫𑀸𑀯𑀲𑁂𑀦 𑀩𑀼𑀤𑁆𑀥𑁂𑀳𑀺 𑀉𑀧𑀦𑀻𑀢𑁂 𑀲𑀭 𑀲𑀭𑀸𑀳𑀺. 𑀏𑀓𑀓𑀧𑁆𑀧𑀫𑀝𑁆𑀞𑀻𑀦𑀁, 𑀲𑀜𑁆𑀘𑀬𑀁 𑀯𑀺𑀧𑀼𑀮𑁂𑀦 𑀲𑀫𑀦𑁆𑀢𑀺 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀅𑀝𑁆𑀞𑀻𑀦𑀁 𑀲𑀜𑁆𑀘𑀬𑀁 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑁂𑀦 𑀲𑀫𑀁 𑀉𑀧𑀦𑀻𑀢𑀁 𑀲𑀭. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀲𑀁 𑁋

‘‘𑀏𑀓𑀲𑁆𑀲𑁂𑀓𑁂𑀦 𑀓𑀧𑁆𑀧𑁂𑀦, 𑀧𑀼𑀕𑁆𑀕𑀮𑀲𑁆𑀲𑀝𑁆𑀞𑀺𑀲𑀜𑁆𑀘𑀬𑁄;

𑀲𑀺𑀬𑀸 𑀧𑀩𑁆𑀩𑀢𑀲𑀫𑁄 𑀭𑀸𑀲𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸.

‘‘𑀲𑁄 𑀔𑁄 𑀧𑀦𑀸𑀬𑀁 𑀅𑀓𑁆𑀔𑀸𑀢𑁄, 𑀯𑁂𑀧𑀼𑀮𑁆𑀮𑁄 𑀧𑀩𑁆𑀩𑀢𑁄 𑀫𑀳𑀸;

𑀉𑀢𑁆𑀢𑀭𑁄 𑀕𑀺𑀚𑁆𑀛𑀓𑀽𑀝𑀲𑁆𑀲, 𑀫𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑁂’’𑀢𑀺. (𑀲𑀁. 𑀦𑀺. 𑁨.𑁧𑁩𑁩);

𑀫𑀳𑀺𑀁 𑀚𑀫𑁆𑀩𑀼𑀤𑀻𑀧𑀫𑀼𑀧𑀦𑀻𑀢𑀁. 𑀓𑁄𑀮𑀝𑁆𑀞𑀺𑀫𑀢𑁆𑀢𑀕𑀼𑀴𑀺𑀓𑀸, 𑀫𑀸𑀢𑀸 𑀫𑀸𑀢𑀼𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀚𑀫𑁆𑀩𑀼𑀤𑀻𑀧𑁄𑀢𑀺𑀲𑀗𑁆𑀔𑀸𑀢𑀁 𑀫𑀳𑀸𑀧𑀣𑀯𑀺𑀁 𑀓𑁄𑀮𑀝𑁆𑀞𑀺𑀫𑀢𑁆𑀢𑀸 𑀩𑀤𑀭𑀝𑁆𑀞𑀺𑀫𑀢𑁆𑀢𑀸 𑀕𑀼𑀴𑀺𑀓𑀸 𑀓𑀢𑁆𑀯𑀸 𑀢𑀢𑁆𑀣𑁂𑀓𑁂𑀓𑀸 ‘‘𑀅𑀬𑀁 𑀫𑁂 𑀫𑀸𑀢𑀼, 𑀅𑀬𑀁 𑀫𑁂 𑀫𑀸𑀢𑀼𑀫𑀸𑀢𑀽’’𑀢𑀺 𑀏𑀯𑀁 𑀯𑀺𑀪𑀸𑀚𑀺𑀬𑀫𑀸𑀦𑁂 𑀢𑀸 𑀕𑀼𑀴𑀺𑀓𑀸 𑀫𑀸𑀢𑀸 𑀫𑀸𑀢𑀽𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀺, 𑀫𑀸𑀢𑀸 𑀫𑀸𑀢𑀽𑀲𑀼 𑀅𑀔𑀻𑀡𑀸𑀲𑁆𑀯𑁂𑀯 𑀧𑀭𑀺𑀬𑀦𑁆𑀢𑀺𑀓𑀸 𑀢𑀸 𑀕𑀼𑀴𑀺𑀓𑀸 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀁𑀲𑀭𑀢𑁄 𑀲𑀢𑁆𑀢𑀲𑁆𑀲 𑀫𑀸𑀢𑀼𑀫𑀸𑀢𑀭𑁄𑀢𑀺. 𑀏𑀯𑀁 𑀚𑀫𑁆𑀩𑀼𑀤𑀻𑀧𑀫𑀳𑀺𑀁 𑀲𑀁𑀲𑀸𑀭𑀲𑁆𑀲 𑀤𑀻𑀖𑀪𑀸𑀯𑁂𑀦 𑀉𑀧𑀫𑀸𑀪𑀸𑀯𑁂𑀦 𑀉𑀧𑀦𑀻𑀢𑀁 𑀫𑀦𑀲𑀺 𑀓𑀭𑁄𑀳𑀻𑀢𑀺.

𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀦𑁆𑀢𑀺 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀲𑀸𑀔𑀸𑀧𑀮𑀸𑀲𑀜𑁆𑀘. 𑀉𑀧𑀦𑀻𑀢𑀦𑁆𑀢𑀺 𑀉𑀧𑀫𑀸𑀪𑀸𑀯𑁂𑀦 𑀉𑀧𑀦𑀻𑀢𑀁. 𑀅𑀦𑀫𑀢𑀕𑁆𑀕𑀢𑁄𑀢𑀺 𑀲𑀁𑀲𑀸𑀭𑀲𑁆𑀲 𑀅𑀦𑀫𑀢𑀕𑁆𑀕𑀪𑀸𑀯𑀢𑁄. 𑀘𑀢𑀼𑀭𑀗𑁆𑀕𑀼𑀮𑀺𑀓𑀸 𑀖𑀝𑀺𑀓𑀸𑀢𑀺 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀦𑀺 𑀔𑀡𑁆𑀟𑀸𑀦𑀺. 𑀧𑀺𑀢𑀼𑀧𑀺𑀢𑀼𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀧𑀺𑀢𑀼𑀧𑀺𑀢𑀸𑀫𑀳𑁂𑀲𑀼 𑀏𑀯 𑀢𑀸 𑀖𑀝𑀺𑀓𑀸 𑀦𑀧𑁆𑀧𑀳𑁄𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀩𑁆𑀩𑀁 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀲𑀸𑀔𑀸𑀧𑀮𑀸𑀲𑀜𑁆𑀘 𑀘𑀢𑀼𑀭𑀗𑁆𑀕𑀼𑀮𑀺𑀓𑀸 𑀓𑀢𑁆𑀯𑀸 𑀢𑀢𑁆𑀣𑁂𑀓𑁂𑀓𑀸 ‘‘𑀅𑀬𑀁 𑀫𑁂 𑀧𑀺𑀢𑀼, 𑀅𑀬𑀁 𑀫𑁂 𑀧𑀺𑀢𑀸𑀫𑀳𑀲𑁆𑀲𑀸’’𑀢𑀺 𑀯𑀺𑀪𑀸𑀚𑀺𑀬𑀫𑀸𑀦𑁂 𑀢𑀸 𑀖𑀝𑀺𑀓𑀸𑀯 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀁𑀲𑀭𑀢𑁄 𑀲𑀢𑁆𑀢𑀲𑁆𑀲 𑀧𑀺𑀢𑀼𑀧𑀺𑀢𑀸𑀫𑀳𑀸𑀢𑀺. 𑀏𑀯𑀁 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀲𑀸𑀔𑀸𑀧𑀮𑀸𑀲𑀜𑁆𑀘 𑀲𑀁𑀲𑀸𑀭𑀲𑁆𑀲 𑀤𑀻𑀖𑀪𑀸𑀯𑁂𑀦 𑀉𑀧𑀦𑀻𑀢𑀁 𑀲𑀭𑀸𑀳𑀻𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑁋

‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺𑀆𑀤𑀺𑀓𑀸 (𑀲𑀁. 𑀦𑀺. 𑁨.𑁧𑁨𑁬) 𑁋 ‘𑀅𑀦𑀫𑀢𑀕𑁆𑀕𑀧𑀸𑀴𑀺’ 𑀆𑀳𑀭𑀺𑀢𑀩𑁆𑀩𑀸.

𑀲𑀭 𑀓𑀸𑀡𑀓𑀘𑁆𑀙𑀧𑀦𑁆𑀢𑀺 𑀉𑀪𑀬𑀓𑁆𑀔𑀺𑀓𑀸𑀡𑀁 𑀓𑀘𑁆𑀙𑀧𑀁 𑀅𑀦𑀼𑀲𑁆𑀲𑀭. 𑀧𑀼𑀩𑁆𑀩𑀲𑀫𑀼𑀤𑁆𑀤𑁂 𑀅𑀧𑀭𑀢𑁄 𑀘 𑀬𑀼𑀕𑀙𑀺𑀤𑁆𑀤𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑁂 𑀅𑀧𑀭𑀢𑁄 𑀘 𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑁂 𑀯𑀸𑀢𑀯𑁂𑀕𑁂𑀦 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀬𑀼𑀕𑀲𑁆𑀲 𑀏𑀓𑀘𑁆𑀙𑀺𑀤𑁆𑀤𑀁. 𑀲𑀺𑀭𑀁 𑀢𑀲𑁆𑀲 𑀘 𑀧𑀝𑀺𑀫𑀼𑀓𑁆𑀓𑀦𑁆𑀢𑀺 𑀓𑀸𑀡𑀓𑀘𑁆𑀙𑀧𑀲𑁆𑀲 𑀲𑀻𑀲𑀁 𑀢𑀲𑁆𑀲 𑀘 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀕𑀻𑀯𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀲𑀻𑀲𑀲𑁆𑀲 𑀬𑀼𑀕𑀘𑁆𑀙𑀺𑀤𑁆𑀤𑁂 𑀧𑀯𑁂𑀲𑀦𑀜𑁆𑀘 𑀲𑀭. 𑀫𑀦𑀼𑀲𑁆𑀲𑀮𑀸𑀪𑀫𑁆𑀳𑀺 𑀑𑀧𑀫𑁆𑀫𑀦𑁆𑀢𑀺 𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀥𑀫𑁆𑀫𑀤𑁂𑀲𑀦𑀸𑀲𑀼 𑀯𑀺𑀬 𑀫𑀦𑀼𑀲𑁆𑀲𑀢𑁆𑀢𑀮𑀸𑀪𑁂 𑀑𑀧𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀜𑀸𑀬 𑀲𑀭, 𑀢𑀲𑁆𑀲 𑀅𑀢𑀻𑀯 𑀤𑀼𑀮𑁆𑀮𑀪𑀲𑀪𑀸𑀯𑀢𑁆𑀢𑀁 𑀲𑀸𑀭𑀚𑁆𑀚𑀪𑀬𑀲𑁆𑀲𑀸𑀧𑀺 𑀅𑀢𑀺𑀘𑁆𑀘𑀲𑀪𑀸𑀯𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀸𑀲𑀫𑀼𑀤𑁆𑀤𑁂 𑀏𑀓𑀘𑁆𑀙𑀺𑀕𑁆𑀕𑀴𑁆𑀳𑀁 𑀬𑀼𑀕𑀁 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁨𑁫𑁨; 𑀲𑀁. 𑀦𑀺. 𑁫.𑁧𑁧𑁧𑁭).

𑀲𑀭 𑀭𑀽𑀧𑀁 𑀨𑁂𑀡𑀧𑀺𑀡𑁆𑀟𑁄𑀧𑀫𑀲𑁆𑀲𑀸𑀢𑀺 𑀯𑀺𑀫𑀤𑁆𑀤𑀸𑀲𑀳𑀦𑀢𑁄 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀲𑁆𑀲 𑀅𑀦𑁂𑀓𑀸𑀦𑀢𑁆𑀣𑀲𑀦𑁆𑀦𑀺𑀧𑀸𑀢𑀢𑁄 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀓𑀮𑀺𑀦𑁄, 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑁂𑀦 𑀅𑀲𑀸𑀭𑀲𑁆𑀲 𑀭𑀽𑀧𑀁 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀪𑀸𑀯𑀁 𑀲𑀭. 𑀔𑀦𑁆𑀥𑁂 𑀧𑀲𑁆𑀲 𑀅𑀦𑀺𑀘𑁆𑀘𑁂𑀢𑀺 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑁂 𑀧𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀳𑀺. 𑀲𑀭𑀸𑀳𑀺 𑀦𑀺𑀭𑀬𑁂 𑀩𑀳𑀼𑀯𑀺𑀖𑀸𑀢𑁂𑀢𑀺 𑀅𑀝𑁆𑀞 𑀫𑀳𑀸𑀦𑀺𑀭𑀬𑁂 𑀲𑁄𑀴𑀲𑀉𑀲𑁆𑀲𑀤𑀦𑀺𑀭𑀬𑁂 𑀘 𑀩𑀳𑀼𑀯𑀺𑀖𑀸𑀢𑁂 𑀩𑀳𑀼𑀤𑀼𑀓𑁆𑀔𑁂 𑀫𑀳𑀸𑀤𑀼𑀓𑁆𑀔𑁂 𑀘 𑀅𑀦𑀼𑀲𑁆𑀲𑀭.

𑀲𑀭 𑀓𑀝𑀲𑀺𑀁 𑀯𑀟𑁆𑀠𑁂𑀦𑁆𑀢𑁂𑀢𑀺 𑀧𑀼𑀦𑀧𑁆𑀧𑀼𑀦𑀁 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼 𑀅𑀧𑀭𑀸𑀧𑀭𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀁 𑀓𑀝𑀲𑀺𑀁 𑀲𑀼𑀲𑀸𑀦𑀁 𑀆𑀴𑀳𑀦𑀫𑁂𑀯 𑀯𑀟𑁆𑀠𑁂𑀦𑁆𑀢𑁂 𑀲𑀢𑁆𑀢𑁂 𑀅𑀦𑀼𑀲𑁆𑀲𑀭. ‘‘𑀯𑀟𑁆𑀠𑀦𑁆𑀢𑁄’’𑀢𑀺 𑀯𑀸 𑀧𑀸𑀴𑀺, 𑀢𑁆𑀯𑀁 𑀯𑀟𑁆𑀠𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀓𑀼𑀫𑁆𑀪𑀻𑀮𑀪𑀬𑀸𑀦𑀻𑀢𑀺 𑀉𑀤𑀭𑀧𑁄𑀲𑀦𑀢𑁆𑀣𑀁 𑀅𑀓𑀺𑀘𑁆𑀘𑀓𑀸𑀭𑀺𑀢𑀸𑀯𑀲𑁂𑀦 𑀑𑀤𑀭𑀺𑀓𑀢𑁆𑀢𑀪𑀬𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀼𑀫𑁆𑀪𑀻𑀮𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀑𑀤𑀭𑀺𑀓𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁪.𑁧𑁨𑁨). 𑀲𑀭𑀸𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀬𑀸𑀣𑀸𑀯𑀢𑁄 𑀅𑀦𑀼𑀲𑁆𑀲𑀭 𑀉𑀧𑀥𑀸𑀭𑁂𑀳𑀺.

𑀏𑀯𑀁 𑀭𑀸𑀚𑀧𑀼𑀢𑁆𑀢𑀻 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀓𑀸𑀫𑁂𑀲𑀼 𑀲𑀁𑀲𑀸𑀭𑁂 𑀘 𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑁂𑀦𑀧𑀺 𑀢𑀁 𑀧𑀓𑀸𑀲𑁂𑀢𑀼𑀁 ‘‘𑀅𑀫𑀢𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀫𑀢𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀳𑀸𑀓𑀭𑀼𑀡𑀸𑀬 𑀉𑀧𑀦𑀻𑀢𑁂 𑀲𑀤𑁆𑀥𑀫𑁆𑀫𑀸𑀫𑀢𑁂 𑀉𑀧𑀮𑀩𑁆𑀪𑀫𑀸𑀦𑁂. 𑀓𑀺𑀁 𑀢𑀯 𑀧𑀜𑁆𑀘𑀓𑀝𑀼𑀓𑁂𑀦 𑀧𑀻𑀢𑁂𑀦𑀸𑀢𑀺 𑀧𑀭𑀺𑀬𑁂𑀲𑀦𑀸 𑀧𑀭𑀺𑀕𑁆𑀕𑀳𑁄 𑀆𑀭𑀓𑁆𑀔𑀸 𑀧𑀭𑀺𑀪𑁄𑀕𑁄 𑀯𑀺𑀧𑀸𑀓𑁄 𑀘𑀸𑀢𑀺 𑀧𑀜𑁆𑀘𑀲𑀼𑀧𑀺 𑀞𑀸𑀦𑁂𑀲𑀼 𑀢𑀺𑀔𑀺𑀡𑀢𑀭𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑀸𑀬 𑀲𑀯𑀺𑀖𑀸𑀢𑀢𑁆𑀢𑀸 𑀲𑀉𑀧𑀸𑀬𑀸𑀲𑀢𑁆𑀢𑀸 𑀓𑀺𑀁 𑀢𑀼𑀬𑁆𑀳𑀁 𑀧𑀜𑁆𑀘𑀓𑀝𑀼𑀓𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀭𑀲𑁂𑀦 𑀧𑀻𑀢𑁂𑀦? 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀦𑁆𑀢𑀻 𑀆𑀳 𑁋 ‘‘𑀲𑀩𑁆𑀩𑀸 𑀳𑀺 𑀓𑀸𑀫𑀭𑀢𑀺𑀬𑁄, 𑀓𑀝𑀼𑀓𑀢𑀭𑀸 𑀧𑀜𑁆𑀘𑀓𑀝𑀼𑀓𑁂𑀦𑀸’’𑀢𑀺, 𑀅𑀢𑀺𑀯𑀺𑀬 𑀓𑀝𑀼𑀓𑀢𑀭𑀸𑀢𑀺 𑀅𑀢𑁆𑀣𑁄.

𑀬𑁂 𑀧𑀭𑀺𑀴𑀸𑀳𑀸𑀢𑀺 𑀬𑁂 𑀓𑀸𑀫𑀸 𑀲𑀫𑁆𑀧𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁂𑀦 𑀆𑀬𑀢𑀺𑀁 𑀯𑀺𑀧𑀸𑀓𑀧𑀭𑀺𑀴𑀸𑀳𑁂𑀦 𑀘 𑀲𑀧𑀭𑀺𑀴𑀸𑀳𑀸 𑀫𑀳𑀸𑀯𑀺𑀖𑀸𑀢𑀸. 𑀚𑀮𑀺𑀢𑀸 𑀓𑀼𑀣𑀺𑀢𑀸 𑀓𑀫𑁆𑀧𑀺𑀢𑀸 𑀲𑀦𑁆𑀢𑀸𑀧𑀺𑀢𑀸𑀢𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀧𑀚𑁆𑀚𑀮𑀺𑀢𑀸 𑀧𑀓𑁆𑀓𑀼𑀣𑀺𑀢𑀸 𑀘 𑀳𑀼𑀢𑁆𑀯𑀸 𑀢𑀁𑀲𑀫𑀗𑁆𑀕𑀻𑀦𑀁 𑀓𑀫𑁆𑀧𑀦𑀓𑀸 𑀲𑀦𑁆𑀢𑀸𑀧𑀦𑀓𑀸 𑀘.

𑀅𑀲𑀧𑀢𑁆𑀢𑀫𑁆𑀳𑀻𑀢𑀺 𑀲𑀧𑀢𑁆𑀢𑀭𑀳𑀺𑀢𑁂 𑀦𑁂𑀓𑁆𑀔𑀫𑁆𑀫𑁂. 𑀲𑀫𑀸𑀦𑁂𑀢𑀺 𑀲𑀦𑁆𑀢𑁂 𑀯𑀺𑀚𑁆𑀚𑀫𑀸𑀦𑁂. ‘‘𑀩𑀳𑀼𑀲𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀬𑁂𑀳𑀺 𑀩𑀳𑀽 𑀲𑀧𑀢𑁆𑀢𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀭𑀸𑀚𑀕𑁆𑀕𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀸𑀚𑀽𑀳𑀺 𑀘 𑀅𑀕𑁆𑀕𑀺𑀦𑀸 𑀘 𑀘𑁄𑀭𑁂𑀳𑀺 𑀘 𑀉𑀤𑀓𑁂𑀦 𑀘 𑀤𑀸𑀬𑀸𑀤𑀸𑀤𑀺𑀅𑀧𑁆𑀧𑀺𑀬𑁂𑀳𑀺 𑀘 𑀭𑀸𑀚𑀕𑁆𑀕𑀺𑀘𑁄𑀭𑀉𑀤𑀓𑀧𑁆𑀧𑀺𑀬𑁂𑀳𑀺 𑀲𑀸𑀥𑀸𑀭𑀡𑀢𑁄 𑀢𑁂𑀲𑁆𑀯𑁂𑀯𑁄𑀧𑀫𑀸 𑀯𑀼𑀢𑁆𑀢𑀸.

𑀬𑁂𑀲𑀼 𑀯𑀥𑀩𑀦𑁆𑀥𑁄𑀢𑀺 𑀬𑁂𑀲𑀼 𑀓𑀸𑀫𑁂𑀲𑀼 𑀓𑀸𑀫𑀦𑀺𑀫𑀺𑀢𑁆𑀢𑀁 𑀫𑀭𑀡𑀧𑁄𑀣𑀦𑀸𑀤𑀺𑀧𑀭𑀺𑀓𑁆𑀓𑀺𑀮𑁂𑀲𑁄 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀺𑀩𑀦𑁆𑀥𑁄 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑁂𑀲𑀽𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀢𑀢𑁆𑀣 𑀳𑀻𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀓𑀸𑀫𑁂𑀲𑀼 𑀓𑀸𑀫𑀳𑁂𑀢𑀼 𑀇𑀫𑁂 𑀲𑀢𑁆𑀢𑀸 𑀯𑀥𑀩𑀦𑁆𑀥𑀦𑀤𑀼𑀓𑁆𑀔𑀸𑀦𑀺 𑀅𑀦𑀼𑀪𑀯𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀆𑀳 𑁋 ‘‘𑀅𑀲𑀓𑀸𑀫𑀸’’𑀢𑀺, 𑀓𑀸𑀫𑀸 𑀦𑀸𑀫𑁂𑀢𑁂 𑀅𑀲𑀦𑁆𑀢𑁄 𑀳𑀻𑀦𑀸 𑀮𑀸𑀫𑀓𑀸𑀢𑀺 𑀅𑀢𑁆𑀣𑁄. ‘‘𑀅𑀳𑀓𑀸𑀫𑀸’’𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀅𑀳𑀸𑀢𑀺 𑀳𑀺 𑀮𑀸𑀫𑀓𑀧𑀭𑀺𑀬𑀸𑀬𑁄 ‘‘𑀅𑀳𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬.

𑀆𑀤𑀻𑀧𑀺𑀢𑀸𑀢𑀺 𑀧𑀚𑁆𑀚𑀮𑀺𑀢𑀸. 𑀢𑀺𑀡𑀼𑀓𑁆𑀓𑀸𑀢𑀺 𑀢𑀺𑀡𑁂𑀳𑀺 𑀓𑀢𑀸 𑀉𑀓𑁆𑀓𑀸. 𑀤𑀳𑀦𑁆𑀢𑀺 𑀬𑁂 𑀢𑁂 𑀫𑀼𑀜𑁆𑀘𑀦𑁆𑀢𑀻𑀢𑀺 𑀬𑁂 𑀲𑀢𑁆𑀢𑀸 𑀢𑁂 𑀓𑀸𑀫𑁂 𑀦 𑀫𑀼𑀜𑁆𑀘𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀕𑀡𑁆𑀳𑀦𑁆𑀢𑀺, 𑀢𑁂 𑀤𑀳𑀦𑁆𑀢𑀺𑀬𑁂𑀯, 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀛𑀸𑀧𑁂𑀦𑁆𑀢𑀺.

𑀫𑀸 𑀅𑀧𑁆𑀧𑀓𑀲𑁆𑀲 𑀳𑁂𑀢𑀽𑀢𑀺 𑀧𑀼𑀧𑁆𑀨𑀲𑁆𑀲𑀸𑀤𑀲𑀤𑀺𑀲𑀲𑁆𑀲 𑀧𑀭𑀺𑀢𑁆𑀢𑀓𑀲𑁆𑀲 𑀓𑀸𑀫𑀲𑀼𑀔𑀲𑁆𑀲 𑀳𑁂𑀢𑀼 𑀯𑀺𑀧𑀼𑀮𑀁 𑀉𑀴𑀸𑀭𑀁 𑀧𑀡𑀻𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀁 𑀲𑀼𑀔𑀁 𑀫𑀸 𑀚𑀳𑀺 𑀫𑀸 𑀙𑀟𑁆𑀟𑁂𑀳𑀺. 𑀫𑀸 𑀧𑀼𑀣𑀼𑀮𑁄𑀫𑁄𑀯 𑀩𑀴𑀺𑀲𑀁 𑀕𑀺𑀮𑀺𑀢𑁆𑀯𑀸𑀢𑀺 𑀆𑀫𑀺𑀲𑀮𑁄𑀪𑁂𑀦 𑀩𑀴𑀺𑀲𑀁 𑀕𑀺𑀮𑀺𑀢𑁆𑀯𑀸 𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑁄 ‘‘𑀧𑀼𑀣𑀼𑀮𑁄𑀫𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀫𑀘𑁆𑀙𑁄 𑀯𑀺𑀬 𑀓𑀸𑀫𑁂 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀸 𑀧𑀘𑁆𑀙𑀸 𑀯𑀺𑀳𑀜𑁆𑀜𑀲𑀺 𑀧𑀘𑁆𑀙𑀸 𑀯𑀺𑀖𑀸𑀝𑀁 𑀆𑀧𑀚𑁆𑀚𑀲𑀺.

𑀲𑀼𑀦𑀔𑁄𑀯 𑀲𑀗𑁆𑀔𑀮𑀸𑀩𑀤𑁆𑀥𑁄𑀢𑀺 𑀬𑀣𑀸 𑀕𑀤𑁆𑀤𑀼𑀮𑁂𑀦 𑀩𑀤𑁆𑀥𑁄 𑀲𑀼𑀦𑀔𑁄 𑀕𑀤𑁆𑀤𑀼𑀮𑀩𑀦𑁆𑀥𑁂𑀦 𑀣𑀫𑁆𑀪𑁂 𑀉𑀧𑀦𑀺𑀩𑀤𑁆𑀥𑁄 𑀅𑀜𑁆𑀜𑀢𑁄 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀧𑀭𑀺𑀩𑁆𑀪𑀫𑀢𑀺, 𑀏𑀯𑀁 𑀢𑁆𑀯𑀁 𑀓𑀸𑀫𑀢𑀡𑁆𑀳𑀸𑀬 𑀩𑀤𑁆𑀥𑁄, 𑀇𑀤𑀸𑀦𑀺 𑀓𑀸𑀫𑀁 𑀬𑀤𑀺𑀧𑀺 𑀓𑀸𑀫𑁂𑀲𑀼 𑀢𑀸𑀯 𑀤𑀫𑀲𑁆𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀫𑁂𑀳𑀺. 𑀓𑀸𑀳𑀺𑀦𑁆𑀢𑀺 𑀔𑀼 𑀢𑀁 𑀓𑀸𑀫𑀸, 𑀙𑀸𑀢𑀸 𑀲𑀼𑀦𑀔𑀁𑀯 𑀘𑀡𑁆𑀟𑀸𑀮𑀸𑀢𑀺 𑀔𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑁂 𑀧𑀦 𑀓𑀸𑀫𑀸 𑀢𑀁 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀬𑀣𑀸 𑀙𑀸𑀢𑀚𑁆𑀛𑀢𑁆𑀢𑀸 𑀲𑀧𑀸𑀓𑀸 𑀲𑀼𑀦𑀔𑀁 𑀮𑀪𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀧𑀭𑀺𑀫𑀺𑀢𑀜𑁆𑀘 𑀤𑀼𑀓𑁆𑀔𑀦𑁆𑀢𑀺 𑀅𑀧𑀭𑀺𑀫𑀸𑀡𑀁 ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀺𑀭𑀬𑀸𑀤𑀻𑀲𑀼 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁. 𑀩𑀳𑀽𑀦𑀺 𑀘 𑀘𑀺𑀢𑁆𑀢𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀘𑀺𑀢𑁆𑀢𑁂 𑀮𑀩𑁆𑀪𑀫𑀸𑀦𑀸𑀦𑀺 𑀩𑀳𑀽𑀦𑀺 𑀅𑀦𑁂𑀓𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀘𑁂𑀢𑁄𑀤𑀼𑀓𑁆𑀔𑀸𑀦𑀺. 𑀅𑀦𑀼𑀪𑁄𑀳𑀺𑀲𑀻𑀢𑀺 𑀅𑀦𑀼𑀪𑀯𑀺𑀲𑁆𑀲𑀲𑀺. 𑀓𑀸𑀫𑀬𑀼𑀢𑁆𑀢𑁄𑀢𑀺 𑀓𑀸𑀫𑁂𑀳𑀺 𑀬𑀼𑀢𑁆𑀢𑁄, 𑀢𑁂 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄. 𑀧𑀝𑀺𑀦𑀺𑀲𑁆𑀲𑀚 𑀅𑀤𑁆𑀥𑀼𑀯𑁂 𑀓𑀸𑀫𑁂𑀢𑀺 𑀅𑀤𑁆𑀥𑀼𑀯𑁂𑀳𑀺 𑀅𑀦𑀺𑀘𑁆𑀘𑁂𑀳𑀺 𑀓𑀸𑀫𑁂𑀳𑀺 𑀯𑀺𑀦𑀺𑀲𑁆𑀲𑀚 𑀅𑀧𑁂𑀳𑀻𑀢𑀺 𑀅𑀢𑁆𑀣𑁄.

𑀚𑀭𑀸𑀫𑀭𑀡𑀩𑁆𑀬𑀸𑀥𑀺𑀕𑀳𑀺𑀢𑀸, 𑀲𑀩𑁆𑀩𑀸 𑀲𑀩𑁆𑀩𑀢𑁆𑀣 𑀚𑀸𑀢𑀺𑀬𑁄𑀢𑀺 𑀬𑀲𑁆𑀫𑀸 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀲𑀩𑁆𑀩𑀢𑁆𑀣 𑀪𑀯𑀸𑀤𑀻𑀲𑀼 𑀚𑀸𑀢𑀺𑀬𑁄 𑀚𑀭𑀸𑀫𑀭𑀡𑀩𑁆𑀬𑀸𑀥𑀺𑀦𑀸 𑀘 𑀕𑀳𑀺𑀢𑀸, 𑀢𑁂𑀳𑀺 𑀅𑀧𑀭𑀺𑀫𑀼𑀢𑁆𑀢𑀸, 𑀢𑀲𑁆𑀫𑀸 𑀅𑀚𑀭𑀫𑁆𑀳𑀺 𑀦𑀺𑀩𑁆𑀩𑀸𑀦𑁂 𑀯𑀺𑀚𑁆𑀚𑀫𑀸𑀦𑁂 𑀚𑀭𑀸𑀤𑀻𑀳𑀺 𑀅𑀧𑀭𑀺𑀫𑀼𑀢𑁆𑀢𑁂𑀳𑀺 𑀓𑀸𑀫𑁂𑀳𑀺 𑀓𑀺𑀁 𑀢𑀯 𑀧𑀬𑁄𑀚𑀦𑀦𑁆𑀢𑀺 𑀬𑁄𑀚𑀦𑀸.

𑀏𑀯𑀁 𑀦𑀺𑀩𑁆𑀩𑀸𑀦𑀕𑀼𑀡𑀤𑀲𑁆𑀲𑀦𑀫𑀼𑀔𑁂𑀦 𑀓𑀸𑀫𑁂𑀲𑀼 𑀪𑀯𑁂𑀲𑀼 𑀘 𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀺𑀩𑁆𑀩𑀸𑀦𑀕𑀼𑀡𑀫𑁂𑀯 𑀧𑀓𑀸𑀲𑁂𑀦𑁆𑀢𑀻 ‘‘𑀇𑀤𑀫𑀚𑀭’’𑀦𑁆𑀢𑀺𑀆𑀤𑀺𑀦𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀇𑀤𑀫𑀚𑀭𑀦𑁆𑀢𑀺 𑀇𑀤𑀫𑁂𑀯𑁂𑀓𑀁 𑀅𑀢𑁆𑀢𑀦𑀺 𑀚𑀭𑀸𑀪𑀸𑀯𑀢𑁄 𑀅𑀥𑀺𑀕𑀢𑀲𑁆𑀲 𑀘 𑀚𑀭𑀸𑀪𑀸𑀯𑀳𑁂𑀢𑀼𑀢𑁄 𑀅𑀚𑀭𑀁. 𑀇𑀤𑀫𑀫𑀭𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀫𑀚𑀭𑀸𑀫𑀭𑀦𑁆𑀢𑀺 𑀢𑀤𑀼𑀪𑀬𑀫𑁂𑀓𑀚𑁆𑀛𑀁 𑀓𑀢𑁆𑀯𑀸 𑀣𑁄𑀫𑀦𑀸𑀯𑀲𑁂𑀦 𑀯𑀤𑀢𑀺. 𑀧𑀤𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁂𑀳𑀺 𑀧𑀩𑁆𑀩𑀚𑀺𑀢𑀩𑁆𑀩𑀢𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀤𑀁. 𑀲𑁄𑀓𑀳𑁂𑀢𑀽𑀦𑀁 𑀅𑀪𑀸𑀯𑀢𑁄 𑀲𑁄𑀓𑀸𑀪𑀸𑀯𑀢𑁄 𑀘 𑀅𑀲𑁄𑀓𑀁. 𑀲𑀧𑀢𑁆𑀢𑀓𑀭𑀥𑀫𑁆𑀫𑀸𑀪𑀸𑀯𑀢𑁄 𑀅𑀲𑀧𑀢𑁆𑀢𑀁. 𑀓𑀺𑀮𑁂𑀲𑀲𑀫𑁆𑀩𑀸𑀥𑀸𑀪𑀸𑀯𑀢𑁄 𑀅𑀲𑀫𑁆𑀩𑀸𑀥𑀁. 𑀔𑀮𑀺𑀢𑀲𑀗𑁆𑀔𑀸𑀢𑀸𑀦𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀅𑀪𑀸𑀯𑁂𑀦 𑀅𑀔𑀮𑀺𑀢𑀁. 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑀸𑀦𑀁 𑀯𑀝𑁆𑀝𑀪𑀬𑀲𑁆𑀲 𑀘 𑀲𑀩𑁆𑀩𑀲𑁄 𑀅𑀪𑀸𑀯𑀸 𑀅𑀪𑀬𑀁. 𑀤𑀼𑀓𑁆𑀔𑀽𑀧𑀢𑀸𑀧𑀲𑁆𑀲 𑀓𑀺𑀮𑁂𑀲𑀲𑁆𑀲𑀸𑀧𑀺 𑀅𑀪𑀸𑀯𑁂𑀦 𑀦𑀺𑀭𑀼𑀧𑀢𑀸𑀧𑀁. 𑀲𑀩𑁆𑀩𑀫𑁂𑀢𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀜𑁆𑀳𑀺 𑀲𑀸 𑀅𑀦𑀼𑀲𑁆𑀲𑀯𑀸𑀤𑀺𑀲𑀺𑀤𑁆𑀥𑁂𑀦 𑀆𑀓𑀸𑀭𑁂𑀦 𑀅𑀢𑁆𑀢𑀦𑁄 𑀉𑀧𑀝𑁆𑀞𑀳𑀦𑁆𑀢𑀻 𑀢𑁂𑀲𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑀻 𑀯𑀺𑀬 ‘‘𑀇𑀤’’𑀦𑁆𑀢𑀺 𑀅𑀯𑁄𑀘.

𑀅𑀯𑀺𑀕𑀢𑀫𑀺𑀤𑀁 𑀩𑀳𑀽𑀳𑀺 𑀅𑀫𑀢𑀦𑁆𑀢𑀺 𑀇𑀤𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀩𑀳𑀽𑀳𑀺 𑀅𑀦𑀦𑁆𑀢𑀅𑀧𑀭𑀺𑀫𑀸𑀡𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀅𑀥𑀺𑀕𑀢𑀁 𑀜𑀸𑀢𑀁 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀁 𑀓𑀢𑀁. 𑀦 𑀓𑁂𑀯𑀮𑀁 𑀢𑁂𑀳𑀺 𑀅𑀥𑀺𑀕𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀅𑀣 𑀔𑁄 𑀅𑀚𑁆𑀚𑀸𑀧𑀺 𑀘 𑀮𑀪𑀦𑀻𑀬𑀁 𑀇𑀤𑀸𑀦𑀺𑀧𑀺 𑀅𑀥𑀺𑀕𑀫𑀦𑀻𑀬𑀁 𑀅𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸. 𑀓𑁂𑀦 𑀮𑀪𑀦𑀻𑀬𑀦𑁆𑀢𑀺 𑀆𑀳 ‘‘𑀬𑁄 𑀬𑁄𑀦𑀺𑀲𑁄 𑀧𑀬𑀼𑀜𑁆𑀚𑀢𑀻’’𑀢𑀺, 𑀬𑁄 𑀧𑀼𑀕𑁆𑀕𑀮𑁄 𑀬𑁄𑀦𑀺𑀲𑁄 𑀉𑀧𑀸𑀬𑁂𑀦 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀑𑀯𑀸𑀤𑁂 𑀞𑀢𑁆𑀯𑀸 𑀬𑀼𑀜𑁆𑀚𑀢𑀺 𑀲𑀫𑁆𑀫𑀸𑀧𑀬𑁄𑀕𑀜𑁆𑀘 𑀓𑀭𑁄𑀢𑀺, 𑀢𑁂𑀦 𑀮𑀪𑀦𑀻𑀬𑀦𑁆𑀢𑀺 𑀬𑁄𑀚𑀦𑀸. 𑀦 𑀘 𑀲𑀓𑁆𑀓𑀸 𑀅𑀖𑀝𑀫𑀸𑀦𑁂𑀦𑀸𑀢𑀺 𑀬𑁄 𑀧𑀦 𑀬𑁄𑀦𑀺𑀲𑁄 𑀦 𑀧𑀬𑀼𑀜𑁆𑀚𑀢𑀺, 𑀢𑁂𑀦 𑀅𑀖𑀝𑀫𑀸𑀦𑁂𑀦 𑀦 𑀘 𑀲𑀓𑁆𑀓𑀸, 𑀓𑀤𑀸𑀘𑀺𑀧𑀺 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀪𑀡𑀢𑀺 𑀲𑀼𑀫𑁂𑀥𑀸𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀼𑀫𑁂𑀥𑀸 𑀭𑀸𑀚𑀓𑀜𑁆𑀜𑀸 𑀲𑀁𑀲𑀸𑀭𑁂 𑀅𑀢𑁆𑀢𑀦𑁄 𑀲𑀁𑀯𑁂𑀕𑀤𑀻𑀧𑀦𑀺𑀁 𑀓𑀸𑀫𑁂𑀲𑀼 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀺𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺. 𑀲𑀗𑁆𑀔𑀸𑀭𑀕𑀢𑁂 𑀭𑀢𑀺𑀁 𑀅𑀮𑀪𑀫𑀸𑀦𑀸𑀢𑀺 𑀅𑀡𑀼𑀫𑀢𑁆𑀢𑁂𑀧𑀺 𑀲𑀗𑁆𑀔𑀸𑀭𑀧𑀯𑀢𑁆𑀢𑁂 𑀅𑀪𑀺𑀭𑀢𑀺𑀁 𑀅𑀯𑀺𑀦𑁆𑀤𑀦𑁆𑀢𑀻. 𑀅𑀦𑀼𑀦𑁂𑀦𑁆𑀢𑀻 𑀅𑀦𑀺𑀓𑀭𑀢𑁆𑀢𑀦𑁆𑀢𑀺 𑀅𑀦𑀺𑀓𑀭𑀢𑁆𑀢𑀁 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑀻. 𑀓𑁂𑀲𑁂 𑀘 𑀙𑀫𑀁 𑀔𑀺𑀧𑀻𑀢𑀺 𑀅𑀢𑁆𑀢𑀦𑁄 𑀔𑀕𑁆𑀕𑁂𑀦 𑀙𑀺𑀦𑁆𑀦𑁂 𑀓𑁂𑀲𑁂 𑀘 𑀪𑀽𑀫𑀺𑀬𑀁 𑀔𑀺𑀧𑀺 𑀙𑀟𑁆𑀟𑁂𑀲𑀺.

𑀬𑀸𑀘𑀢𑀲𑁆𑀲𑀸 𑀧𑀺𑀢𑀭𑀁 𑀲𑁄𑀢𑀺 𑀲𑁄 𑀅𑀦𑀺𑀓𑀭𑀢𑁆𑀢𑁄 𑀅𑀲𑁆𑀲𑀸 𑀲𑀼𑀫𑁂𑀥𑀸𑀬 𑀧𑀺𑀢𑀭𑀁 𑀓𑁄𑀜𑁆𑀘𑀭𑀸𑀚𑀸𑀦𑀁 𑀬𑀸𑀘𑀢𑀺. 𑀓𑀺𑀦𑁆𑀢𑀺 𑀬𑀸𑀘𑀢𑀻𑀢𑀺 𑀆𑀳 ‘‘𑀯𑀺𑀲𑁆𑀲𑀚𑁆𑀚𑁂𑀣 𑀲𑀼𑀫𑁂𑀥𑀁, 𑀧𑀩𑁆𑀩𑀚𑀺𑀢𑀼𑀁 𑀯𑀺𑀫𑁄𑀓𑁆𑀔𑀲𑀘𑁆𑀘𑀤𑀲𑁆𑀲𑀸’’𑀢𑀺, 𑀲𑀼𑀫𑁂𑀥𑀁 𑀭𑀸𑀚𑀧𑀼𑀢𑁆𑀢𑀺𑀁 𑀧𑀩𑁆𑀩𑀚𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀲𑀸 𑀘 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀫𑁄𑀓𑁆𑀔𑀲𑀘𑁆𑀘𑀤𑀲𑁆𑀲𑀸 𑀅𑀯𑀺𑀧𑀭𑀻𑀢𑀦𑀺𑀩𑁆𑀩𑀸𑀦𑀤𑀲𑁆𑀲𑀸𑀯𑀺𑀦𑀻 𑀳𑁄𑀢𑀽𑀢𑀺 𑀅𑀢𑁆𑀣𑁄.

𑀲𑁄𑀓𑀪𑀬𑀪𑀻𑀢𑀸𑀢𑀺 𑀜𑀸𑀢𑀺𑀯𑀺𑀬𑁄𑀕𑀸𑀤𑀺𑀳𑁂𑀢𑀼𑀢𑁄 𑀲𑀩𑁆𑀩𑀲𑁆𑀫𑀸𑀧𑀺 𑀲𑀁𑀲𑀸𑀭𑀪𑀬𑀢𑁄 𑀪𑀻𑀢𑀸 𑀜𑀸𑀡𑀼𑀢𑁆𑀢𑀭𑀯𑀲𑁂𑀦 𑀉𑀢𑁆𑀭𑀸𑀲𑀺𑀢𑀸. 𑀲𑀺𑀓𑁆𑀔𑀫𑀸𑀦𑀸𑀬𑀸𑀢𑀺 𑀲𑀺𑀓𑁆𑀔𑀫𑀸𑀦𑀸𑀬 𑀲𑀫𑀸𑀦𑀸𑀬 𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀢𑀢𑁄 𑀏𑀯 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁.

𑀅𑀘𑁆𑀙𑀭𑀺𑀬𑀫𑀩𑁆𑀪𑀼𑀢𑀁 𑀢𑀁, 𑀦𑀺𑀩𑁆𑀩𑀸𑀦𑀁 𑀆𑀲𑀺 𑀭𑀸𑀚𑀓𑀜𑁆𑀜𑀸𑀬𑀸𑀢𑀺 𑀭𑀸𑀚𑀧𑀼𑀢𑁆𑀢𑀺𑀬𑀸 𑀲𑀼𑀫𑁂𑀥𑀸𑀬 𑀓𑀺𑀮𑁂𑀲𑁂𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀜𑁆𑀘 𑀆𑀲𑀺. 𑀙𑀴𑀪𑀺𑀜𑁆𑀜𑀸𑀯 𑀲𑀺𑀤𑁆𑀥𑀺𑀬𑀸 𑀓𑀣𑀦𑁆𑀢𑀺 𑀘𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑀭𑀺𑀢𑀁, 𑀬𑀣𑀸 𑀩𑁆𑀬𑀸𑀓𑀭𑀺 𑀧𑀘𑁆𑀙𑀺𑀫𑁂 𑀓𑀸𑀮𑁂𑀢𑀺, 𑀧𑀘𑁆𑀙𑀺𑀫𑁂 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀭𑀺𑀬𑀸𑀧𑀦𑁆𑀦𑀘𑀭𑀺𑀢𑀁 𑀬𑀣𑀸 𑀩𑁆𑀬𑀸𑀓𑀸𑀲𑀺, 𑀢𑀣𑀸 𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀧𑀦 𑀢𑀸𑀬 𑀬𑀣𑀸 𑀩𑁆𑀬𑀸𑀓𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑀺 𑀓𑁄𑀡𑀸𑀕𑀫𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀕𑀯𑀢𑀺 𑀓𑁄𑀡𑀸𑀕𑀫𑀦𑁂𑀢𑀺 𑀓𑁄𑀡𑀸𑀕𑀫𑀦𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑁂. 𑀲𑀗𑁆𑀖𑀸𑀭𑀸𑀫𑀫𑁆𑀳𑀺 𑀦𑀯𑀦𑀺𑀯𑁂𑀲𑀫𑁆𑀳𑀻𑀢𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀦𑀯𑀦𑀺𑀯𑁂𑀲𑀺𑀢𑁂 𑀆𑀭𑀸𑀫𑁂. 𑀲𑀔𑀺𑀬𑁄 𑀢𑀺𑀲𑁆𑀲𑁄 𑀚𑀦𑀺𑀬𑁄, 𑀯𑀺𑀳𑀸𑀭𑀤𑀸𑀦𑀁 𑀅𑀤𑀸𑀲𑀺𑀫𑁆𑀳𑀸𑀢𑀺 𑀥𑀦𑀜𑁆𑀚𑀸𑀦𑀻 𑀔𑁂𑀫𑀸 𑀅𑀳𑀜𑁆𑀘𑀸𑀢𑀺 𑀫𑀬𑀁 𑀢𑀺𑀲𑁆𑀲𑁄 𑀲𑀔𑀺𑀬𑁄 𑀆𑀭𑀸𑀫𑀁 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀤𑀸𑀦𑀁 𑀅𑀤𑀫𑁆𑀳.

𑀤𑀲𑀓𑁆𑀔𑀢𑁆𑀢𑀼𑀁 𑀲𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀢𑀲𑁆𑀲 𑀯𑀺𑀳𑀸𑀭𑀤𑀸𑀦𑀲𑁆𑀲 𑀆𑀦𑀼𑀪𑀸𑀯𑁂𑀦 𑀤𑀲𑀯𑀸𑀭𑁂 𑀤𑁂𑀯𑁂𑀲𑀼 𑀉𑀧𑀧𑀚𑀺𑀫𑁆𑀳, 𑀢𑀢𑁄 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀲𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀺𑀫𑁆𑀳, 𑀢𑀢𑁄𑀧𑀺 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀤𑀲𑀲𑀢𑀓𑁆𑀔𑀢𑁆𑀢𑀼𑀁 𑀲𑀳𑀲𑁆𑀲𑀯𑀸𑀭𑀁 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀺𑀫𑁆𑀳, 𑀢𑀢𑁄𑀧𑀺 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀲𑀢𑀸𑀦𑀺 𑀲𑀢𑀓𑁆𑀔𑀢𑁆𑀢𑀼𑀁 𑀤𑀲𑀲𑀳𑀲𑁆𑀲𑀯𑀸𑀭𑁂 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀺𑀫𑁆𑀳, 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑁂𑀲𑀼. 𑀏𑀯𑀁 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑀯𑀸𑀭𑁂𑀲𑀼 𑀓𑀣𑀸𑀯 𑀦𑀢𑁆𑀣𑀺, 𑀅𑀦𑁂𑀓𑀲𑀳𑀲𑁆𑀲𑀯𑀸𑀭𑀁 𑀉𑀧𑀧𑀚𑁆𑀚𑀺𑀫𑁆𑀳𑀸𑀢𑀺 𑀅𑀢𑁆𑀣𑁄.

𑀤𑁂𑀯𑁂𑀲𑀼 𑀫𑀳𑀺𑀤𑁆𑀥𑀺𑀓𑀸 𑀅𑀳𑀼𑀫𑁆𑀳𑀸𑀢𑀺 𑀤𑁂𑀯𑁂𑀲𑀼 𑀉𑀧𑀧𑀦𑁆𑀦𑀓𑀸𑀮𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁂𑀯𑀦𑀺𑀓𑀸𑀬𑁂 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸 𑀅𑀳𑀼𑀫𑁆𑀳. 𑀫𑀸𑀦𑀼𑀲𑀓𑀫𑁆𑀳𑀺 𑀓𑁄 𑀧𑀦 𑀯𑀸𑀤𑁄𑀢𑀺 𑀫𑀦𑀼𑀲𑁆𑀲𑀢𑁆𑀢𑀮𑀸𑀪𑁂 𑀫𑀳𑀺𑀤𑁆𑀥𑀺𑀓𑀢𑀸𑀬 𑀓𑀣𑀸𑀯 𑀦𑀢𑁆𑀣𑀺. 𑀇𑀤𑀸𑀦𑀺 𑀢𑀫𑁂𑀯 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀉𑀓𑁆𑀓𑀁𑀲𑀢𑀁 𑀫𑀳𑀺𑀤𑁆𑀥𑀺𑀓𑀢𑀁 𑀤𑀲𑁆𑀲𑁂𑀦𑁆𑀢𑀻 ‘‘𑀲𑀢𑁆𑀢𑀭𑀢𑀦𑀲𑁆𑀲 𑀫𑀳𑁂𑀲𑀻, 𑀇𑀢𑁆𑀣𑀺𑀭𑀢𑀦𑀁 𑀅𑀳𑀁 𑀆𑀲𑀺’’𑀦𑁆𑀢𑀺 𑀆𑀳. 𑀢𑀢𑁆𑀣 𑀘𑀓𑁆𑀓𑀭𑀢𑀦𑀸𑀤𑀻𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀲𑀢𑁆𑀢𑀭𑀢𑀦𑁄, 𑀘𑀓𑁆𑀓𑀯𑀢𑁆𑀢𑀻, 𑀢𑀲𑁆𑀲 𑀲𑀢𑁆𑀢𑀭𑀢𑀦𑀲𑁆𑀲. 𑀙𑀤𑁄𑀲𑀭𑀳𑀺𑀢𑀸 𑀧𑀜𑁆𑀘𑀓𑀮𑁆𑀬𑀸𑀡𑀸 𑀅𑀢𑀺𑀓𑁆𑀓𑀦𑁆𑀢𑀫𑀦𑀼𑀲𑁆𑀲𑀯𑀡𑁆𑀡𑀸 𑀅𑀧𑀢𑁆𑀢𑀤𑀺𑀩𑁆𑀩𑀯𑀡𑁆𑀡𑀸𑀢𑀺 𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀫𑁂𑀦 𑀇𑀢𑁆𑀣𑀻𑀲𑀼 𑀭𑀢𑀦𑀪𑀽𑀢𑀸 𑀅𑀳𑀁 𑀅𑀳𑁄𑀲𑀺𑀁.

𑀲𑁄 𑀳𑁂𑀢𑀽𑀢𑀺 𑀬𑀁 𑀢𑀁 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀤𑀸𑀦𑀁 𑀓𑀢𑀁, 𑀲𑁄 𑀬𑀣𑀸𑀯𑀼𑀢𑁆𑀢𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀘 𑀳𑁂𑀢𑀼. 𑀲𑁄 𑀧𑀪𑀯𑁄 𑀢𑀁 𑀫𑀽𑀮𑀦𑁆𑀢𑀺 𑀢𑀲𑁆𑀲𑁂𑀯 𑀧𑀭𑀺𑀬𑀸𑀬𑀯𑀘𑀦𑀁. 𑀲𑀸𑀯 𑀲𑀸𑀲𑀦𑁂 𑀔𑀦𑁆𑀢𑀻𑀢𑀺 𑀲𑀸 𑀏𑀯 𑀇𑀥 𑀲𑀢𑁆𑀣𑀼𑀲𑀸𑀲𑀦𑁂 𑀥𑀫𑁆𑀫𑁂 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀻. 𑀢𑀁 𑀧𑀞𑀫𑀲𑀫𑁄𑀥𑀸𑀦𑀦𑁆𑀢𑀺 𑀢𑀤𑁂𑀯 𑀲𑀢𑁆𑀣𑀼𑀲𑀸𑀲𑀦𑀥𑀫𑁆𑀫𑁂𑀦 𑀧𑀞𑀫𑀁 𑀲𑀫𑁄𑀥𑀸𑀦𑀁 𑀧𑀞𑀫𑁄 𑀲𑀫𑀸𑀕𑀫𑁄, 𑀢𑀤𑁂𑀯 𑀲𑀢𑁆𑀣𑀼𑀲𑀸𑀲𑀦𑀥𑀫𑁆𑀫𑁂 𑀅𑀪𑀺𑀭𑀢𑀸𑀬 𑀧𑀭𑀺𑀬𑁄𑀲𑀸𑀦𑁂 𑀦𑀺𑀩𑁆𑀩𑀸𑀦𑀦𑁆𑀢𑀺 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀯𑀤𑀢𑀺. 𑀇𑀫𑀸 𑀧𑀦 𑀘𑀢𑀲𑁆𑀲𑁄 𑀕𑀸𑀣𑀸 𑀣𑁂𑀭𑀺𑀬𑀸 𑀅𑀧𑀤𑀸𑀦𑀲𑁆𑀲 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀅𑀧𑀤𑀸𑀦𑀧𑀸𑀴𑀺𑀬𑀫𑁆𑀧𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀸.

𑀑𑀲𑀸𑀦𑀕𑀸𑀣𑀸𑀬 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀬𑀣𑀸 𑀫𑀬𑀸 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀏𑀢𑀭𑀳𑀺 𑀘 𑀓𑀢𑀁 𑀧𑀝𑀺𑀧𑀦𑁆𑀦𑀁, 𑀏𑀯𑀁 𑀅𑀜𑁆𑀜𑁂𑀧𑀺 𑀓𑀭𑁄𑀦𑁆𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀓𑁂 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀬𑁂 𑀲𑀤𑁆𑀤𑀳𑀦𑁆𑀢𑀺 𑀯𑀘𑀦𑀁 𑀅𑀦𑁄𑀫𑀧𑀜𑁆𑀜𑀲𑁆𑀲𑀸’’𑀢𑀺, 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀜𑀸𑀡𑀢𑀸𑀬 𑀧𑀭𑀺𑀧𑀼𑀡𑁆𑀡𑀧𑀜𑁆𑀜𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀬𑁂 𑀧𑀼𑀕𑁆𑀕𑀮𑀸 𑀲𑀤𑁆𑀤𑀳𑀦𑁆𑀢𑀺 ‘‘𑀏𑀯𑀫𑁂𑀢’’𑀦𑁆𑀢𑀺 𑀑𑀓𑀧𑁆𑀧𑀦𑁆𑀢𑀺, 𑀢𑁂 𑀏𑀯𑀁 𑀓𑀭𑁄𑀦𑁆𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀇𑀤𑀸𑀦𑀺 𑀢𑀸𑀬 𑀉𑀓𑁆𑀓𑀁𑀲𑀕𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺 𑀪𑀯𑀕𑀢𑁂, 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀯𑀺𑀭𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀪𑀕𑀯𑀢𑁄 𑀯𑀘𑀦𑀁 𑀬𑀸𑀣𑀸𑀯𑀢𑁄 𑀲𑀤𑁆𑀤𑀳𑀦𑁆𑀢𑀺, 𑀢𑁂 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑀸 𑀲𑀩𑁆𑀩𑀲𑁆𑀫𑀺𑀁 𑀪𑀯𑀕𑀢𑁂 𑀢𑁂𑀪𑀽𑀫𑀓𑁂 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺, 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀘 𑀧𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀯𑀺𑀭𑀚𑁆𑀚𑀦𑁆𑀢𑀺, 𑀲𑀩𑁆𑀩𑀲𑁆𑀫𑀸𑀧𑀺 𑀪𑀯𑀕𑀢𑀸 𑀯𑀺𑀫𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀸𑀕𑁂 𑀅𑀭𑀺𑀬𑀫𑀕𑁆𑀕𑁂 𑀅𑀥𑀺𑀕𑀢𑁂 𑀯𑀺𑀫𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀻𑀢𑀺.

𑀏𑀯𑀫𑁂𑀢𑀸 𑀣𑁂𑀭𑀺𑀓𑀸𑀤𑀬𑁄 𑀲𑀼𑀫𑁂𑀥𑀸𑀧𑀭𑀺𑀬𑁄𑀲𑀸𑀦𑀸 𑀕𑀸𑀣𑀸𑀲𑀪𑀸𑀕𑁂𑀦 𑀇𑀥 𑀏𑀓𑀚𑁆𑀛𑀁 𑀲𑀗𑁆𑀕𑀳𑀁 𑀆𑀭𑀽𑀴𑁆𑀳𑀸 ‘‘𑀢𑀺𑀲𑀢𑁆𑀢𑀢𑀺𑀧𑀭𑀺𑀫𑀸𑀡𑀸’’𑀢𑀺. 𑀪𑀸𑀡𑀯𑀸𑀭𑀢𑁄 𑀧𑀦 𑀤𑁆𑀯𑀸𑀥𑀺𑀓𑀸 𑀙𑀲𑀢𑀫𑀢𑁆𑀢𑀸 𑀣𑁂𑀭𑀺𑀬𑁄 𑀕𑀸𑀣𑀸 𑀘. 𑀢𑀸 𑀲𑀩𑁆𑀩𑀸𑀧𑀺 𑀬𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀺𑀓𑀸𑀪𑀸𑀯𑁂𑀦 𑀏𑀓𑀯𑀺𑀥𑀸, 𑀢𑀣𑀸 𑀅𑀲𑁂𑀔𑀪𑀸𑀯𑁂𑀦 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀢𑀸𑀬 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑀢𑀸𑀬 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑀢𑀸𑀬 𑀦𑀺𑀭𑀕𑁆𑀕𑀮𑀢𑀸𑀬 𑀧𑀦𑁆𑀦𑀪𑀸𑀭𑀢𑀸𑀬 𑀯𑀺𑀲𑀜𑁆𑀜𑀼𑀢𑁆𑀢𑀢𑀸𑀬 𑀤𑀲𑀲𑀼 𑀅𑀭𑀺𑀬𑀯𑀸𑀲𑁂𑀲𑀼 𑀯𑀼𑀝𑁆𑀞𑀯𑀸𑀲𑀢𑀸𑀬 𑀘, 𑀢𑀣𑀸 𑀳𑀺 𑀢𑀸 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀸 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀏𑀓𑀸𑀭𑀓𑁆𑀔𑀸 𑀘𑀢𑀼𑀭𑀸𑀧𑀲𑁆𑀲𑁂𑀦𑀸 𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑀸 𑀲𑀫𑀯𑀬𑀲𑀝𑁆𑀞𑁂𑀲𑀦𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑀸 𑀘𑀸𑀢𑀺 𑀏𑀯𑀫𑀸𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁬𑁦) 𑀦𑀬𑁂𑀦 𑀏𑀓𑀯𑀺𑀥𑀸.

𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀸𑀪𑁂𑀤𑀢𑁄 𑀤𑀼𑀯𑀺𑀥𑀸. 𑀬𑀸 𑀳𑀺 𑀲𑀢𑁆𑀣𑀼𑀥𑀭𑀫𑀸𑀦𑀓𑀸𑀮𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀆𑀤𑀬𑁄, 𑀢𑀸 𑀲𑀫𑁆𑀫𑀼𑀔𑀸𑀲𑀸𑀯𑀺𑀓𑀸 𑀦𑀸𑀫. 𑀬𑀸 𑀧𑀦 𑀪𑀕𑀯𑀢𑁄 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀘𑁆𑀙𑀸 𑀅𑀥𑀺𑀕𑀢𑀯𑀺𑀲𑁂𑀲𑀸, 𑀢𑀸 𑀲𑀢𑀺𑀧𑀺 𑀲𑀢𑁆𑀣𑀼𑀥𑀫𑁆𑀫𑀲𑀭𑀻𑀭𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑁂 𑀲𑀢𑁆𑀣𑀼𑀲𑀭𑀻𑀭𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀧𑀭𑀫𑁆𑀫𑀼𑀔𑀸𑀲𑀸𑀯𑀺𑀓𑀸 𑀦𑀸𑀫. 𑀢𑀣𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀢𑀸𑀯𑀲𑁂𑀦. 𑀇𑀥 𑀧𑀸𑀴𑀺𑀬𑀸𑀕𑀢𑀸 𑀧𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀬𑁂𑀯. 𑀢𑀣𑀸 𑀲𑀸𑀧𑀤𑀸𑀦𑀦𑀸𑀧𑀤𑀸𑀦𑀪𑁂𑀤𑀢𑁄. 𑀬𑀸𑀲𑀜𑁆𑀳𑀺 𑀧𑀼𑀭𑀺𑀫𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀲𑀸𑀯𑀓𑀩𑀼𑀤𑁆𑀥𑁂𑀲𑀼 𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀲𑁂𑀦 𑀓𑀢𑀸𑀥𑀺𑀓𑀸𑀭𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺 𑀅𑀧𑀤𑀸𑀦𑀁, 𑀢𑀸 𑀲𑀸𑀧𑀤𑀸𑀦𑀸. 𑀬𑀸𑀲𑀁 𑀢𑀁 𑀦𑀢𑁆𑀣𑀺, 𑀢𑀸 𑀦𑀸𑀧𑀤𑀸𑀦𑀸. 𑀢𑀣𑀸 𑀲𑀢𑁆𑀣𑀼𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀲𑀗𑁆𑀖𑀢𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑀸𑀢𑀺 𑀤𑀼𑀯𑀺𑀥𑀸. 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀫𑁆𑀳𑀺 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀲𑀢𑁆𑀣𑀼𑀲𑀦𑁆𑀢𑀺𑀓𑀸𑀯 𑀮𑀤𑁆𑀥𑀽𑀧𑀲𑀫𑁆𑀧𑀤𑀢𑁆𑀢𑀸 𑀲𑀢𑁆𑀣𑀼𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀦𑀸𑀫. 𑀲𑁂𑀲𑀸 𑀲𑀩𑁆𑀩𑀸𑀧𑀺 𑀲𑀗𑁆𑀖𑀢𑁄 𑀮𑀤𑁆𑀥𑀽𑀧𑀲𑀫𑁆𑀧𑀤𑀸. 𑀢𑀸𑀧𑀺 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀉𑀪𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀬𑀸 𑀢𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄, 𑀢𑀸 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀏𑀯 𑀮𑀤𑁆𑀥𑀽𑀧𑀲𑀫𑁆𑀧𑀤𑀢𑁆𑀢𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀁 𑀞𑀧𑁂𑀢𑁆𑀯𑀸. 𑀇𑀢𑀭𑀸 𑀉𑀪𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀤𑀢𑁆𑀢𑀸.

𑀏𑀳𑀺𑀪𑀺𑀓𑁆𑀔𑀼𑀤𑀼𑀓𑁄 𑀯𑀺𑀬 𑀏𑀳𑀺𑀪𑀺𑀓𑁆𑀔𑀼𑀦𑀺𑀤𑀼𑀓𑁄 𑀇𑀥 𑀦 𑀮𑀩𑁆𑀪𑀢𑀺. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀦𑀻𑀦𑀁 𑀢𑀣𑀸 𑀉𑀧𑀲𑀫𑁆𑀧𑀤𑀸𑀬 𑀅𑀪𑀸𑀯𑀢𑁄. 𑀬𑀤𑀺 𑀏𑀯𑀁 𑀬𑀁 𑀢𑀁 𑀣𑁂𑀭𑀺𑀕𑀸𑀣𑀸𑀬 𑀲𑀼𑀪𑀤𑁆𑀤𑀸𑀬 𑀓𑀼𑀡𑁆𑀟𑀮𑀓𑁂𑀲𑀸𑀬 𑀯𑀼𑀢𑁆𑀢𑀁 𑁋

‘‘𑀦𑀺𑀳𑀘𑁆𑀘 𑀚𑀸𑀡𑀼𑀁 𑀯𑀦𑁆𑀤𑀺𑀢𑁆𑀯𑀸, 𑀲𑀫𑁆𑀫𑀼𑀔𑀸 𑀅𑀜𑁆𑀚𑀮𑀺𑀁 𑀅𑀓𑀁;

𑀏𑀳𑀺 𑀪𑀤𑁆𑀤𑁂𑀢𑀺 𑀫𑀁 𑀅𑀯𑀘, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸’’𑀢𑀺. (𑀣𑁂𑀭𑀻𑀕𑀸. 𑁧𑁦𑁯);

𑀢𑀣𑀸 𑀅𑀧𑀤𑀸𑀦𑁂𑀧𑀺 𑁋

‘‘𑀆𑀬𑀸𑀘𑀺𑀢𑁄 𑀢𑀤𑀸 𑀆𑀳, 𑀏𑀳𑀺 𑀪𑀤𑁆𑀤𑁂𑀢𑀺 𑀦𑀸𑀬𑀓𑁄;

𑀢𑀤𑀸𑀳𑀁 𑀉𑀧𑀲𑀫𑁆𑀧𑀦𑁆𑀦𑀸, 𑀧𑀭𑀺𑀢𑁆𑀢𑀁 𑀢𑁄𑀬𑀫𑀤𑁆𑀤𑀲’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁪𑁪);

𑀢𑀁 𑀓𑀣𑀦𑁆𑀢𑀺? 𑀦𑀬𑀺𑀤𑀁 𑀏𑀳𑀺𑀪𑀺𑀓𑁆𑀔𑀼𑀦𑀺𑀪𑀸𑀯𑁂𑀦 𑀉𑀧𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑀲𑀫𑁆𑀧𑀤𑀸𑀬 𑀧𑀦 𑀳𑁂𑀢𑀼𑀪𑀸𑀯𑀢𑁄 𑀬𑀸 𑀲𑀢𑁆𑀣𑀼 𑀆𑀡𑀢𑁆𑀢𑀺, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸𑀢𑀺 𑀯𑀼𑀢𑁆𑀢𑀁.

𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀳𑀺, 𑀪𑀤𑁆𑀤𑁂, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚 𑀉𑀧𑀲𑀫𑁆𑀧𑀚𑁆𑀚𑀲𑁆𑀲𑀽𑀢𑀺 𑀫𑀁 𑀅𑀯𑁄𑀘 𑀆𑀡𑀸𑀧𑁂𑀲𑀺. 𑀲𑀸 𑀲𑀢𑁆𑀣𑀼 𑀆𑀡𑀸 𑀫𑀬𑁆𑀳𑀁 𑀉𑀧𑀲𑀫𑁆𑀧𑀤𑀸𑀬 𑀓𑀸𑀭𑀡𑀢𑁆𑀢𑀸 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀻’’𑀢𑀺. 𑀏𑀢𑁂𑀦𑁂𑀯 𑀅𑀧𑀤𑀸𑀦𑀕𑀸𑀣𑀸𑀬𑀧𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀯𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀏𑀳𑀺 𑀪𑀺𑀓𑁆𑀔𑀼𑀦𑀻𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀏𑀳𑀺𑀪𑀺𑀓𑁆𑀔𑀼𑀦𑀺𑀪𑀸𑀯𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑀫𑁆𑀧𑀤𑀸𑀬 𑀅𑀲𑀪𑀸𑀯𑀚𑁄𑀢𑀦𑀯𑀘𑀦𑀁 𑀢𑀣𑀸 𑀉𑀧𑀲𑀫𑁆𑀧𑀤𑀸𑀬 𑀪𑀺𑀓𑁆𑀔𑀼𑀦𑀻𑀦𑀁 𑀅𑀪𑀸𑀯𑀢𑁄. 𑀬𑀤𑀺 𑀏𑀯𑀁, 𑀓𑀣𑀁 𑀏𑀳𑀺𑀪𑀺𑀓𑁆𑀔𑀼𑀦𑀻𑀢𑀺 𑀯𑀺𑀪𑀗𑁆𑀕𑁂 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺? 𑀤𑁂𑀲𑀦𑀸𑀦𑀬𑀲𑁄𑀢𑀧𑀢𑀺𑀢𑀪𑀸𑀯𑁂𑀦. 𑀅𑀬𑀜𑁆𑀳𑀺 𑀲𑁄𑀢𑀧𑀢𑀺𑀢𑀢𑀸 𑀦𑀸𑀫 𑀓𑀢𑁆𑀣𑀘𑀺 𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀅𑀦𑀸𑀳𑀝𑀁 𑀳𑁄𑀢𑀺.

𑀬𑀣𑀸 𑀅𑀪𑀺𑀥𑀫𑁆𑀫𑁂 𑀫𑀦𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 (𑀥. 𑀲. 𑁫𑁬𑁬-𑁫𑁬𑁭) 𑀮𑀩𑁆𑀪𑀫𑀸𑀦𑀫𑁆𑀧𑀺 𑀛𑀸𑀦𑀗𑁆𑀕𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑀧𑀢𑀺𑀢𑀢𑀸𑀬 𑀦 𑀉𑀤𑁆𑀥𑀝𑀁 𑀓𑀢𑁆𑀣𑀘𑀺 𑀤𑁂𑀲𑀦𑀸𑀬 𑀅𑀲𑀫𑁆𑀪𑀯𑀢𑁄. 𑀬𑀣𑀸 𑀢𑀢𑁆𑀣𑁂𑀯 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀳𑀤𑀬𑀯𑀢𑁆𑀣𑀼, 𑀓𑀢𑁆𑀣𑀘𑀺 𑀅𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀕𑀳𑀡𑀯𑀲𑁂𑀦. 𑀢𑀣𑀸 𑀞𑀺𑀢𑀓𑀧𑁆𑀧𑀺𑀦𑀺𑀤𑁆𑀤𑁂𑀲𑁂. 𑀬𑀣𑀸𑀳 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀞𑀺𑀢𑀓𑀧𑁆𑀧𑀻? 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀅𑀲𑁆𑀲, 𑀓𑀧𑁆𑀧𑀲𑁆𑀲 𑀘 𑀉𑀟𑁆𑀟𑀬𑁆𑀳𑀦𑀯𑁂𑀮𑀸 𑀅𑀲𑁆𑀲, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀉𑀟𑁆𑀟𑀬𑁆𑀳𑁂𑀬𑁆𑀬, 𑀬𑀸𑀯𑀸𑀬𑀁 𑀧𑀼𑀕𑁆𑀕𑀮𑁄 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 (𑀧𑀼. 𑀧. 𑁧𑁭).

𑀏𑀯𑀫𑀺𑀥𑀸𑀧𑀺 𑀅𑀮𑀩𑁆𑀪𑀫𑀸𑀦𑀕𑀳𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀧𑀭𑀺𑀓𑀧𑁆𑀧𑀯𑀘𑀦𑀜𑁆𑀳𑁂𑀢𑀁 𑀲𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀦𑀺𑀪𑀸𑀯𑀬𑁄𑀕𑁆𑀬𑀁 𑀓𑀜𑁆𑀘𑀺 𑀫𑀸𑀢𑀼𑀕𑀸𑀫𑀁 𑀏𑀳𑀺 𑀪𑀺𑀓𑁆𑀔𑀼𑀦𑀻𑀢𑀺 𑀯𑀤𑁂𑀬𑁆𑀬, 𑀏𑀯𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀪𑀸𑀯𑁄 𑀲𑀺𑀬𑀸𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀁 𑀦 𑀓𑀣𑁂𑀲𑀻𑀢𑀺? 𑀢𑀣𑀸 𑀓𑀢𑀸𑀥𑀺𑀓𑀸𑀭𑀸𑀦𑀁 𑀅𑀪𑀸𑀯𑀢𑁄. 𑀬𑁂 𑀧𑀦 ‘‘𑀅𑀦𑀸𑀲𑀦𑁆𑀦𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄’’𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽 𑀏𑀯 𑀳𑀺 𑀲𑀢𑁆𑀣𑀼 𑀆𑀲𑀦𑁆𑀦𑀘𑀸𑀭𑀻 𑀲𑀤𑀸 𑀲𑀦𑁆𑀦𑀺𑀳𑀺𑀢𑀸𑀯, 𑀢𑀲𑁆𑀫𑀸 𑀢𑁂 ‘𑀏𑀳𑀺𑀪𑀺𑀓𑁆𑀔𑀽’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺, 𑀦 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀲𑀢𑁆𑀣𑀼 𑀆𑀲𑀦𑁆𑀦𑀤𑀽𑀭𑀪𑀸𑀯𑀲𑁆𑀲 𑀪𑀩𑁆𑀩𑀸𑀪𑀩𑁆𑀩𑀪𑀸𑀯𑀸𑀲𑀺𑀤𑁆𑀥𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀗𑁆𑀖𑀸𑀝𑀺𑀓𑀡𑁆𑀡𑁂 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀅𑀲𑁆𑀲 𑀧𑀤𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄, 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀫𑀁 𑀧𑀲𑁆𑀲𑀢𑀺.

‘‘𑀬𑁄𑀚𑀦𑀲𑀢𑁂 𑀘𑁂𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬. 𑀲𑁄 𑀘 𑀳𑁄𑀢𑀺 𑀅𑀦𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀦 𑀢𑀺𑀩𑁆𑀩𑀲𑀸𑀭𑀸𑀕𑁄 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄, 𑀅𑀣 𑀔𑁄 𑀲𑁄 𑀲𑀦𑁆𑀢𑀺𑀓𑁂𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀇𑀢𑀺𑀯𑀼. 𑁯𑁨).

𑀢𑀲𑁆𑀫𑀸 𑀅𑀓𑀸𑀭𑀡𑀁 𑀤𑁂𑀲𑀢𑁄 𑀲𑀢𑁆𑀣𑀼 𑀆𑀲𑀦𑁆𑀦𑀸𑀦𑀸𑀲𑀦𑁆𑀦𑀢𑀸. 𑀅𑀓𑀢𑀸𑀥𑀺𑀓𑀸𑀭𑀢𑀸𑀬 𑀧𑀦 𑀪𑀺𑀓𑁆𑀔𑀼𑀦𑀻𑀦𑀁 𑀢𑀢𑁆𑀣 𑀅𑀬𑁄𑀕𑁆𑀬𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀳𑀺𑀪𑀺𑀓𑁆𑀔𑀼𑀦𑀺𑀤𑀼𑀓𑁄 𑀇𑀥 𑀦 𑀮𑀩𑁆𑀪𑀢𑀻’’𑀢𑀺. 𑀏𑀯𑀁 𑀤𑀼𑀯𑀺𑀥𑀸.

𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑀸𑀯𑀺𑀓𑀸, 𑀧𑀓𑀢𑀺𑀲𑀸𑀯𑀺𑀓𑀸𑀢𑀺 𑀢𑀺𑀯𑀺𑀥𑀸. 𑀢𑀢𑁆𑀣 𑀔𑁂𑀫𑀸, 𑀉𑀧𑁆𑀧𑀮𑀯𑀡𑁆𑀡𑀸𑀢𑀺 𑀇𑀫𑀸 𑀤𑁆𑀯𑁂 𑀣𑁂𑀭𑀺𑀬𑁄 𑀅𑀕𑁆𑀕𑀲𑀸𑀯𑀺𑀓𑀸 𑀦𑀸𑀫. 𑀓𑀸𑀫𑀁 𑀲𑀩𑁆𑀩𑀸𑀧𑀺 𑀔𑀻𑀡𑀸𑀲𑀯𑀢𑁆𑀣𑁂𑀭𑀺𑀬𑁄 𑀲𑀻𑀮𑀲𑀼𑀤𑁆𑀥𑀺𑀆𑀤𑀺𑀓𑁂 𑀲𑀫𑁆𑀧𑀸𑀤𑁂𑀦𑁆𑀢𑀺𑀬𑁄 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀦𑀯𑀲𑁂𑀲𑀢𑁄 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀢𑀣𑀸𑀧𑀺 𑀬𑀣𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀢𑁄 𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀯𑀺𑀲𑁂𑀲𑀲𑀺𑀤𑁆𑀥𑁄 𑀇𑀘𑁆𑀙𑀺𑀢𑁄 𑀯𑀺𑀲𑁂𑀲𑁄, 𑀏𑀯𑀁 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑀸𑀧𑀼𑀩𑁆𑀩𑀬𑁄𑀕𑀫𑀳𑀦𑁆𑀢𑀢𑀸𑀳𑀺𑀲𑀲𑀦𑁆𑀢𑀸𑀦𑁂 𑀲𑀸𑀢𑀺𑀲𑀬𑀕𑀼𑀡𑀯𑀺𑀲𑁂𑀲𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀫𑀳𑀦𑁆𑀢𑀸 𑀲𑀸𑀯𑀺𑀓𑀸𑀢𑀺 𑀫𑀳𑀸𑀲𑀸𑀯𑀺𑀓𑀸. 𑀢𑁂𑀲𑀼𑀬𑁂𑀯 𑀧𑀦 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀧𑀸𑀫𑁄𑀓𑁆𑀔𑀪𑀸𑀯𑁂𑀦 𑀥𑀼𑀭𑀪𑀽𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀫𑀸𑀥𑀻𑀦𑀁 𑀲𑀸𑀢𑀺𑀲𑀬𑀓𑀺𑀘𑁆𑀘𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬 𑀢𑀚𑁆𑀚𑀸𑀪𑀺𑀦𑀻𑀳𑀸𑀭𑀢𑀸𑀬 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀘𑀺𑀭𑀓𑀸𑀮𑀲𑀫𑁆𑀪𑀽𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸𑀓𑁆𑀓𑀫𑀁 𑀧𑀜𑁆𑀜𑀸𑀬 𑀲𑀫𑀸𑀥𑀺𑀫𑁆𑀳𑀺 𑀘 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀁 𑀲𑀩𑁆𑀩𑀕𑀼𑀡𑁂𑀳𑀺 𑀅𑀕𑁆𑀕𑀪𑀸𑀯𑁂 𑀞𑀺𑀢𑀢𑁆𑀢𑀸 𑀢𑀸 𑀤𑁆𑀯𑁂𑀧𑀺 𑀅𑀕𑁆𑀕𑀲𑀸𑀯𑀺𑀓𑀸 𑀦𑀸𑀫. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀆𑀤𑀬𑁄 𑀧𑀦 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑀸𑀬 𑀧𑀼𑀩𑁆𑀩𑀬𑁄𑀕𑀫𑀳𑀦𑁆𑀢𑀢𑀸𑀬 𑀘 𑀧𑀝𑀺𑀮𑀤𑁆𑀥𑀕𑀼𑀡𑀯𑀺𑀲𑁂𑀲𑀯𑀲𑁂𑀦 𑀫𑀳𑀢𑀺𑀬𑁄 𑀲𑀸𑀯𑀺𑀓𑀸𑀢𑀺 𑀫𑀳𑀸𑀲𑀸𑀯𑀺𑀓𑀸 𑀦𑀸𑀫. 𑀇𑀢𑀭𑀸 𑀣𑁂𑀭𑀺𑀓𑀸 𑀢𑀺𑀲𑁆𑀲𑀸 𑀯𑀻𑀭𑀸 𑀥𑀻𑀭𑀸𑀢𑀺 𑀏𑀯𑀫𑀸𑀤𑀺𑀓𑀸 𑀅𑀪𑀺𑀦𑀻𑀳𑀸𑀭𑀫𑀳𑀦𑁆𑀢𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀧𑀓𑀢𑀺𑀲𑀸𑀯𑀺𑀓𑀸 𑀦𑀸𑀫. 𑀢𑀸 𑀧𑀦 𑀅𑀕𑁆𑀕𑀲𑀸𑀯𑀺𑀓𑀸 𑀯𑀺𑀬 𑀫𑀳𑀸𑀲𑀸𑀯𑀺𑀓𑀸 𑀯𑀺𑀬 𑀘 𑀦 𑀧𑀭𑀺𑀫𑀺𑀢𑀸, 𑀅𑀣 𑀔𑁄 𑀅𑀦𑁂𑀓𑀲𑀢𑀸𑀦𑀺 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀅𑀕𑁆𑀕𑀲𑀸𑀯𑀺𑀓𑀸𑀤𑀺𑀪𑁂𑀤𑀢𑁄 𑀢𑀺𑀯𑀺𑀥𑀸. 𑀢𑀣𑀸 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀸𑀤𑀺𑀪𑁂𑀤𑀢𑁄 𑀢𑀺𑀯𑀺𑀥𑀸.

𑀧𑀝𑀺𑀧𑀤𑀸𑀤𑀺𑀯𑀺𑀪𑀸𑀕𑁂𑀦 𑀘𑀢𑀼𑀩𑁆𑀩𑀺𑀥𑀸. 𑀇𑀦𑁆𑀤𑁆𑀭𑀺𑀬𑀸𑀥𑀺𑀓𑀯𑀺𑀪𑀸𑀕𑁂𑀦 𑀧𑀜𑁆𑀘𑀯𑀺𑀥𑀸. 𑀢𑀣𑀸 𑀧𑀝𑀺𑀧𑀢𑁆𑀢𑀺𑀬𑀸𑀤𑀺𑀯𑀺𑀪𑀸𑀕𑁂𑀦 𑀧𑀜𑁆𑀘𑀯𑀺𑀥𑀸. 𑀅𑀦𑀺𑀫𑀺𑀢𑁆𑀢𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀸. 𑀅𑀥𑀺𑀫𑀼𑀢𑁆𑀢𑀺𑀪𑁂𑀤𑁂𑀦 𑀲𑀢𑁆𑀢𑀯𑀺𑀥𑀸. 𑀥𑀼𑀭𑀧𑀝𑀺𑀧𑀤𑀸𑀤𑀺𑀯𑀺𑀪𑀸𑀕𑁂𑀦 𑀅𑀝𑁆𑀞𑀯𑀺𑀥𑀸. 𑀯𑀺𑀫𑀼𑀢𑁆𑀢𑀺𑀯𑀺𑀪𑀸𑀕𑁂𑀦 𑀦𑀯𑀯𑀺𑀥𑀸 𑀤𑀲𑀯𑀺𑀥𑀸 𑀘. 𑀢𑀸 𑀧𑀦𑁂𑀢𑀸 𑀬𑀣𑀸𑀯𑀼𑀢𑁆𑀢𑁂𑀦 𑀥𑀼𑀭𑀪𑁂𑀤𑁂𑀦 𑀯𑀺𑀪𑀚𑁆𑀚𑀫𑀸𑀦𑀸 𑀯𑀻𑀲𑀢𑀺 𑀳𑁄𑀦𑁆𑀢𑀺, 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀯𑀺𑀪𑀚𑁆𑀚𑀫𑀸𑀦𑀸 𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀧𑀼𑀦 𑀧𑀝𑀺𑀧𑀤𑀸𑀪𑁂𑀤𑁂𑀦 𑀥𑀼𑀭𑀪𑁂𑀤𑁂𑀦 𑀯𑀺𑀪𑀚𑁆𑀚𑀫𑀸𑀦𑀸 𑀅𑀲𑀻𑀢𑀺 𑀳𑁄𑀦𑁆𑀢𑀺. 𑀅𑀣 𑀯𑀸 𑀲𑀼𑀜𑁆𑀜𑀢𑀸𑀯𑀺𑀫𑀼𑀢𑁆𑀢𑀸𑀤𑀺𑀯𑀺𑀪𑀸𑀕𑁂𑀦 𑀯𑀺𑀪𑀚𑁆𑀚𑀫𑀸𑀦𑀸 𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀸𑀦𑀺 𑀤𑁆𑀯𑁂𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀦 𑀇𑀦𑁆𑀤𑁆𑀭𑀺𑀬𑀸𑀥𑀺𑀓𑀯𑀺𑀪𑀸𑀕𑁂𑀦 𑀯𑀺𑀪𑀚𑁆𑀚𑀫𑀸𑀦𑀸 𑀤𑁆𑀯𑀺𑀲𑀢𑀼𑀢𑁆𑀢𑀭𑀲𑀳𑀲𑁆𑀲𑀁 𑀳𑁄𑀦𑁆𑀢𑀻𑀢𑀺. 𑀏𑀯𑀫𑁂𑀢𑀸𑀲𑀁 𑀣𑁂𑀭𑀻𑀦𑀁 𑀅𑀢𑁆𑀢𑀦𑁄 𑀕𑀼𑀡𑀯𑀲𑁂𑀦𑁂𑀯 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀳𑁂𑀝𑁆𑀞𑀸 𑀣𑁂𑀭𑀕𑀸𑀣𑀸𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑁄𑀢𑀺.

𑀲𑀼𑀫𑁂𑀥𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀕𑀸𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

‘‘𑀬𑁂 𑀢𑁂 𑀲𑀫𑁆𑀧𑀦𑁆𑀦𑀲𑀤𑁆𑀥𑀫𑁆𑀫𑀸, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀣𑀼𑀦𑁄;

𑀑𑀭𑀲𑀸 𑀫𑀼𑀔𑀚𑀸 𑀧𑀼𑀢𑁆𑀢𑀸, 𑀤𑀸𑀬𑀸𑀤𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸.

‘‘𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀲𑀼𑀪𑀽𑀢𑀺𑀆𑀤𑀬𑁄 𑀣𑁂𑀭𑀸, 𑀣𑁂𑀭𑀺𑀬𑁄 𑀣𑁂𑀭𑀺𑀓𑀸𑀤𑀬𑁄.

‘‘𑀢𑁂𑀳𑀺 𑀬𑀸 𑀪𑀸𑀲𑀺𑀢𑀸 𑀕𑀸𑀣𑀸, 𑀅𑀜𑁆𑀜𑀩𑁆𑀬𑀸𑀓𑀭𑀡𑀸𑀤𑀺𑀦𑀸;

𑀢𑀸 𑀲𑀩𑁆𑀩𑀸 𑀏𑀓𑀢𑁄 𑀓𑀢𑁆𑀯𑀸, 𑀣𑁂𑀭𑀕𑀸𑀣𑀸𑀢𑀺 𑀲𑀗𑁆𑀕𑀳𑀁.

‘‘𑀆𑀭𑁄𑀧𑁂𑀲𑀼𑀁 𑀫𑀳𑀸𑀣𑁂𑀭𑀸, 𑀣𑁂𑀭𑀻𑀕𑀸𑀣𑀸𑀢𑀺 𑀢𑀸𑀤𑀺𑀦𑁄;

𑀢𑀸𑀲𑀁 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁.

‘‘𑀦𑀺𑀲𑁆𑀲𑀸𑀬 𑀬𑀸 𑀲𑀫𑀸𑀭𑀤𑁆𑀥𑀸, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸;

𑀲𑀸 𑀢𑀢𑁆𑀣 𑀧𑀭𑀫𑀢𑁆𑀣𑀸𑀦𑀁, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁.

‘‘𑀧𑀓𑀸𑀲𑀦𑀸 𑀧𑀭𑀫𑀢𑁆𑀣𑀤𑀻𑀧𑀦𑀻, 𑀦𑀸𑀫 𑀦𑀸𑀫𑀢𑁄;

𑀲𑀫𑁆𑀧𑀢𑁆𑀢𑀸 𑀧𑀭𑀺𑀦𑀺𑀝𑁆𑀞𑀸𑀦𑀁, 𑀅𑀦𑀸𑀓𑀼𑀮𑀯𑀺𑀦𑀺𑀘𑁆𑀙𑀬𑀸;

𑀤𑁆𑀯𑀸𑀦𑀯𑀼𑀢𑀺𑀧𑀭𑀺𑀫𑀸𑀡𑀸, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄.

‘‘𑀇𑀢𑀺 𑀢𑀁 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀢𑀁 𑀅𑀥𑀺𑀕𑀢𑀁 𑀫𑀬𑀸;

𑀧𑀼𑀜𑁆𑀜𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

‘‘𑀑𑀕𑀸𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸;

𑀲𑀩𑁆𑀩𑁂𑀧𑀺 𑀤𑁂𑀳𑀺𑀦𑁄 𑀳𑁄𑀦𑁆𑀢𑀼, 𑀯𑀺𑀫𑀼𑀢𑁆𑀢𑀺𑀭𑀲𑀪𑀸𑀕𑀺𑀦𑁄.

‘‘𑀘𑀺𑀭𑀁 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀦𑀺𑀘𑁆𑀘𑀁, 𑀳𑁄𑀦𑁆𑀢𑀼 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄.

‘‘𑀲𑀫𑁆𑀫𑀸 𑀯𑀲𑁆𑀲𑀢𑀼 𑀓𑀸𑀮𑁂𑀦, 𑀤𑁂𑀯𑁄𑀧𑀺 𑀚𑀕𑀢𑀻𑀧𑀢𑀺;

𑀲𑀤𑁆𑀥𑀫𑁆𑀫𑀦𑀺𑀭𑀢𑁄 𑀮𑁄𑀓𑀁, 𑀥𑀫𑁆𑀫𑁂𑀦𑁂𑀯 𑀧𑀲𑀸𑀲𑀢𑀽’’𑀢𑀺.

𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀺𑀦𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦

𑀓𑀢𑀸

𑀣𑁂𑀭𑀻𑀕𑀸𑀣𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀭𑀻𑀕𑀸𑀣𑀸-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.