📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀣𑁂𑀭𑀻𑀕𑀸𑀣𑀸𑀧𑀸𑀴𑀺

𑁧. 𑀏𑀓𑀓𑀦𑀺𑀧𑀸𑀢𑁄

𑁧. 𑀅𑀜𑁆𑀜𑀢𑀭𑀸𑀣𑁂𑀭𑀻𑀕𑀸𑀣𑀸

𑁧.

‘‘𑀲𑀼𑀔𑀁 ¶ ¶ ¶ ¶ 𑀲𑀼𑀧𑀸𑀳𑀺 𑀣𑁂𑀭𑀺𑀓𑁂, 𑀓𑀢𑁆𑀯𑀸 𑀘𑁄𑀴𑁂𑀦 𑀧𑀸𑀭𑀼𑀢𑀸;

𑀉𑀧𑀲𑀦𑁆𑀢𑁄 𑀳𑀺 𑀢𑁂 𑀭𑀸𑀕𑁄, 𑀲𑀼𑀓𑁆𑀔𑀟𑀸𑀓𑀁 𑀯 𑀓𑀼𑀫𑁆𑀪𑀺𑀬’’𑀦𑁆𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀅𑀜𑁆𑀜𑀢𑀭𑀸 𑀣𑁂𑀭𑀻 𑀅𑀧𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀻 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁨. 𑀫𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁨.

‘‘𑀫𑀼𑀢𑁆𑀢𑁂 ¶ 𑀫𑀼𑀘𑁆𑀘𑀲𑁆𑀲𑀼 𑀬𑁄𑀕𑁂𑀳𑀺, 𑀘𑀦𑁆𑀤𑁄 𑀭𑀸𑀳𑀼𑀕𑁆𑀕𑀳𑀸 𑀇𑀯;

𑀯𑀺𑀧𑁆𑀧𑀫𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀅𑀦𑀡𑀸 𑀪𑀼𑀜𑁆𑀚 𑀧𑀺𑀡𑁆𑀟𑀓’’𑀦𑁆𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸 𑀫𑀼𑀢𑁆𑀢𑀁 𑀲𑀺𑀓𑁆𑀔𑀫𑀸𑀦𑀁 𑀇𑀫𑀸𑀬 𑀕𑀸𑀣𑀸𑀬 𑀅𑀪𑀺𑀡𑁆𑀳𑀁 𑀑𑀯𑀤𑀢𑀻𑀢𑀺.

𑁩. 𑀧𑀼𑀡𑁆𑀡𑀸𑀣𑁂𑀭𑀻𑀕𑀸𑀣𑀸

𑁩.

‘‘𑀧𑀼𑀡𑁆𑀡𑁂 𑀧𑀽𑀭𑀲𑁆𑀲𑀼 𑀥𑀫𑁆𑀫𑁂𑀳𑀺, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁂𑀭𑀺𑀯;

𑀧𑀭𑀺𑀧𑀼𑀡𑁆𑀡𑀸𑀬 𑀧𑀜𑁆𑀜𑀸𑀬, 𑀢𑀫𑁄𑀔𑀦𑁆𑀥𑀁 [𑀢𑀫𑁄𑀓𑁆𑀔𑀦𑁆𑀥𑀁 (𑀲𑀻. 𑀲𑁆𑀬𑀸.)] 𑀧𑀤𑀸𑀮𑀬𑀸’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀧𑀼𑀡𑁆𑀡𑀸 𑀣𑁂𑀭𑀻 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁪. 𑀢𑀺𑀲𑁆𑀲𑀸𑀣𑁂𑀭𑀻𑀕𑀸𑀣𑀸

𑁪.

‘‘𑀢𑀺𑀲𑁆𑀲𑁂 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀬, 𑀫𑀸 𑀢𑀁 𑀬𑁄𑀕𑀸 𑀉𑀧𑀘𑁆𑀘𑀕𑀼𑀁;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀘𑀭 𑀮𑁄𑀓𑁂 𑀅𑀦𑀸𑀲𑀯𑀸’’𑀢𑀺.

… 𑀢𑀺𑀲𑁆𑀲𑀸 𑀣𑁂𑀭𑀻….

𑁫. 𑀅𑀜𑁆𑀜𑀢𑀭𑀸𑀢𑀺𑀲𑁆𑀲𑀸𑀣𑁂𑀭𑀻𑀕𑀸𑀣𑀸

𑁫.

‘‘𑀢𑀺𑀲𑁆𑀲𑁂 ¶ ¶ 𑀬𑀼𑀜𑁆𑀚𑀲𑁆𑀲𑀼 𑀥𑀫𑁆𑀫𑁂𑀳𑀺, 𑀔𑀡𑁄 𑀢𑀁 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸’’𑀢𑀺.

… 𑀅𑀜𑁆𑀜𑀢𑀭𑀸 𑀢𑀺𑀲𑁆𑀲𑀸 𑀣𑁂𑀭𑀻….

𑁬. 𑀥𑀻𑀭𑀸𑀣𑁂𑀭𑀻𑀕𑀸𑀣𑀸

𑁬.

‘‘𑀥𑀻𑀭𑁂 ¶ 𑀦𑀺𑀭𑁄𑀥𑀁 𑀨𑀼𑀲𑁂𑀳𑀺 [𑀨𑀼𑀲𑁆𑀲𑁂𑀳𑀺 (𑀲𑀻.)], 𑀲𑀜𑁆𑀜𑀸𑀯𑀽𑀧𑀲𑀫𑀁 𑀲𑀼𑀔𑀁;

𑀆𑀭𑀸𑀥𑀬𑀸𑀳𑀺 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀫𑀦𑀼𑀢𑁆𑀢𑀭’’𑀦𑁆𑀢𑀺 [𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 (𑀲𑀻. 𑀲𑁆𑀬𑀸.)].

… 𑀥𑀻𑀭𑀸 𑀣𑁂𑀭𑀻….

𑁭. 𑀯𑀻𑀭𑀸𑀣𑁂𑀭𑀻𑀕𑀸𑀣𑀸

𑁭.

‘‘𑀯𑀻𑀭𑀸 ¶ 𑀯𑀻𑀭𑁂𑀳𑀺 [𑀥𑀻𑀭𑀸 𑀥𑀻𑀭𑁂𑀳𑀺 (𑀓.)] 𑀥𑀫𑁆𑀫𑁂𑀳𑀺, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀥𑀸𑀭𑁂𑀳𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺’’𑀦𑁆𑀢𑀺 [𑀲𑀯𑀸𑀳𑀦𑀦𑁆𑀢𑀺 (𑀓.)].

… 𑀯𑀻𑀭𑀸 𑀣𑁂𑀭𑀻….

𑁮. 𑀫𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁮.

‘‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀫𑀺𑀢𑁆𑀢𑁂 𑀫𑀺𑀢𑁆𑀢𑀭𑀢𑀸 𑀪𑀯;

𑀪𑀸𑀯𑁂𑀳𑀺 𑀓𑀼𑀲𑀮𑁂 𑀥𑀫𑁆𑀫𑁂, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸’’𑀢𑀺.

… 𑀫𑀺𑀢𑁆𑀢𑀸 𑀣𑁂𑀭𑀻….

𑁯. 𑀪𑀤𑁆𑀭𑀸𑀣𑁂𑀭𑀻𑀕𑀸𑀣𑀸

𑁯.

‘‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀪𑀤𑁆𑀭𑁂 𑀪𑀤𑁆𑀭𑀭𑀢𑀸 𑀪𑀯;

𑀪𑀸𑀯𑁂𑀳𑀺 𑀓𑀼𑀲𑀮𑁂 𑀥𑀫𑁆𑀫𑁂, 𑀬𑁄𑀕𑀓𑁆𑀔𑁂𑀫𑀫𑀦𑀼𑀢𑁆𑀢𑀭’’𑀦𑁆𑀢𑀺.

… 𑀪𑀤𑁆𑀭𑀸 𑀣𑁂𑀭𑀻….

𑁧𑁦. 𑀉𑀧𑀲𑀫𑀸𑀣𑁂𑀭𑀻𑀕𑀸𑀣𑀸

𑁧𑁦.

‘‘𑀉𑀧𑀲𑀫𑁂 𑀢𑀭𑁂 𑀑𑀖𑀁, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁;

𑀥𑀸𑀭𑁂𑀳𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦’’𑀦𑁆𑀢𑀺.

… 𑀉𑀧𑀲𑀫𑀸 𑀣𑁂𑀭𑀻….

𑁧𑁧. 𑀫𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁧𑁧.

‘‘𑀲𑀼𑀫𑀼𑀢𑁆𑀢𑀸 ¶ 𑀲𑀸𑀥𑀼𑀫𑀼𑀢𑁆𑀢𑀸𑀫𑁆𑀳𑀺, 𑀢𑀻𑀳𑀺 𑀔𑀼𑀚𑁆𑀚𑁂𑀳𑀺 𑀫𑀼𑀢𑁆𑀢𑀺𑀬𑀸;

𑀉𑀤𑀼𑀓𑁆𑀔𑀮𑁂𑀦 𑀫𑀼𑀲𑀮𑁂𑀦, 𑀧𑀢𑀺𑀦𑀸 𑀔𑀼𑀚𑁆𑀚𑀓𑁂𑀦 𑀘;

𑀫𑀼𑀢𑁆𑀢𑀸𑀫𑁆𑀳𑀺 ¶ 𑀚𑀸𑀢𑀺𑀫𑀭𑀡𑀸, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸’’𑀢𑀺.

… 𑀫𑀼𑀢𑁆𑀢𑀸 𑀣𑁂𑀭𑀻….

𑁧𑁨. 𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀕𑀸𑀣𑀸

𑁧𑁨.

‘‘𑀙𑀦𑁆𑀤𑀚𑀸𑀢𑀸 𑀅𑀯𑀲𑀸𑀬𑀻, 𑀫𑀦𑀲𑀸 𑀘 𑀨𑀼𑀝𑀸 [𑀨𑀼𑀝𑁆𑀞𑀸 (𑀲𑁆𑀬𑀸.), 𑀨𑀼𑀞𑀸 (𑀲𑀻. 𑀅𑀝𑁆𑀞.)] 𑀲𑀺𑀬𑀸;

𑀓𑀸𑀫𑁂𑀲𑀼 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 [𑀅𑀧𑁆𑀧𑀝𑀺𑀩𑀦𑁆𑀥𑀘𑀺𑀢𑁆𑀢𑀸 (𑀓.)], 𑀉𑀤𑁆𑀥𑀁𑀲𑁄𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 [𑀉𑀤𑁆𑀥𑀁𑀲𑁄𑀢𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 (𑀲𑀻. 𑀧𑀻.)].

… 𑀥𑀫𑁆𑀫𑀤𑀺𑀦𑁆𑀦𑀸 𑀣𑁂𑀭𑀻….

𑁧𑁩.𑀯𑀺𑀲𑀸𑀔𑀸𑀣𑁂𑀭𑀻𑀕𑀸𑀣𑀸

𑁧𑁩.

‘‘𑀓𑀭𑁄𑀣 ¶ 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀣𑀸’’𑀢𑀺.

… 𑀯𑀺𑀲𑀸𑀔𑀸 𑀣𑁂𑀭𑀻….

𑁧𑁪.𑀲𑀼𑀫𑀦𑀸𑀣𑁂𑀭𑀻𑀕𑀸𑀣𑀸

𑁧𑁪.

‘‘𑀥𑀸𑀢𑀼𑀬𑁄 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸, 𑀫𑀸 𑀚𑀸𑀢𑀺𑀁 𑀧𑀼𑀦𑀭𑀸𑀕𑀫𑀺;

𑀪𑀯𑁂 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺.

… 𑀲𑀼𑀫𑀦𑀸 𑀣𑁂𑀭𑀻….

𑁧𑁫. 𑀉𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸

𑁧𑁫.

‘‘𑀓𑀸𑀬𑁂𑀦 ¶ 𑀲𑀁𑀯𑀼𑀢𑀸 𑀆𑀲𑀺𑀁, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀉𑀢𑁆𑀢𑀭𑀸 𑀣𑁂𑀭𑀻….

𑁧𑁬. 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑀼𑀫𑀦𑀸𑀣𑁂𑀭𑀻𑀕𑀸𑀣𑀸

𑁧𑁬.

‘‘𑀲𑀼𑀔𑀁 𑀢𑁆𑀯𑀁 𑀯𑀼𑀟𑁆𑀠𑀺𑀓𑁂 𑀲𑁂𑀳𑀺, 𑀓𑀢𑁆𑀯𑀸 𑀘𑁄𑀴𑁂𑀦 𑀧𑀸𑀭𑀽𑀢𑀸;

𑀉𑀧𑀲𑀦𑁆𑀢𑁄 𑀳𑀺 𑀢𑁂 𑀭𑀸𑀕𑁄, 𑀲𑀻𑀢𑀺𑀪𑀽𑀢𑀸𑀲𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀲𑀼𑀫𑀦𑀸 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀸 𑀣𑁂𑀭𑀻….

𑁧𑁭. 𑀥𑀫𑁆𑀫𑀸𑀣𑁂𑀭𑀻𑀕𑀸𑀣𑀸

𑁧𑁭.

‘‘𑀧𑀺𑀡𑁆𑀟𑀧𑀸𑀢𑀁 ¶ 𑀘𑀭𑀺𑀢𑁆𑀯𑀸𑀦, 𑀤𑀡𑁆𑀟𑀫𑁄𑀮𑀼𑀩𑁆𑀪 𑀤𑀼𑀩𑁆𑀩𑀮𑀸;

𑀯𑁂𑀥𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺, 𑀢𑀢𑁆𑀣𑁂𑀯 𑀦𑀺𑀧𑀢𑀺𑀁 𑀙𑀫𑀸;

𑀤𑀺𑀲𑁆𑀯𑀸 ¶ 𑀆𑀤𑀻𑀦𑀯𑀁 𑀓𑀸𑀬𑁂, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂’’𑀢𑀺.

… 𑀥𑀫𑁆𑀫𑀸 𑀣𑁂𑀭𑀻….

𑁧𑁮. 𑀲𑀗𑁆𑀖𑀸𑀣𑁂𑀭𑀻𑀕𑀸𑀣𑀸

𑁧𑁮.

‘‘𑀳𑀺𑀢𑁆𑀯𑀸 ¶ 𑀖𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 [𑀧𑀩𑁆𑀩𑀚𑀺𑀢𑀸 (𑀲𑀻. 𑀅𑀝𑁆𑀞.)], 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑀼𑀁 𑀧𑀺𑀬𑀁;

𑀳𑀺𑀢𑁆𑀯𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀅𑀯𑀺𑀚𑁆𑀚𑀜𑁆𑀘 𑀯𑀺𑀭𑀸𑀚𑀺𑀬;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀉𑀧𑀲𑀦𑁆𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀲𑀗𑁆𑀖𑀸 𑀣𑁂𑀭𑀻….

𑀏𑀓𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁨. 𑀤𑀼𑀓𑀦𑀺𑀧𑀸𑀢𑁄

𑁧. 𑀅𑀪𑀺𑀭𑀽𑀧𑀦𑀦𑁆𑀤𑀸𑀣𑁂𑀭𑀻𑀕𑀸𑀣𑀸

𑁧𑁯.

[𑀅𑀧. 𑀣𑁂𑀭𑀻 𑁨.𑁪.𑁧𑁫𑁭 𑀅𑀧𑀤𑀸𑀦𑁂𑀧𑀺] ‘‘𑀆𑀢𑀼𑀭𑀁 ¶ 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁨𑁦.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀲𑀻’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸 𑀅𑀪𑀺𑀭𑀽𑀧𑀦𑀦𑁆𑀤𑀁 𑀲𑀺𑀓𑁆𑀔𑀫𑀸𑀦𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀡𑁆𑀳𑀁 𑀑𑀯𑀤𑀢𑀻𑀢𑀺 [𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸 𑀅𑀪𑀺𑀭𑀽𑀧𑀦𑀦𑁆𑀤𑀁 𑀲𑀺𑀓𑁆𑀔𑀫𑀸𑀦𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀡𑁆𑀳𑀁 𑀑𑀯𑀤𑀢𑀻𑀢𑀺 (𑀓.)].

𑁨. 𑀚𑁂𑀦𑁆𑀢𑀸𑀣𑁂𑀭𑀻𑀕𑀸𑀣𑀸

𑁨𑁧.

‘‘𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀫𑀕𑁆𑀕𑀸 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀪𑀸𑀯𑀺𑀢𑀸 𑀢𑁂 𑀫𑀬𑀸 𑀲𑀩𑁆𑀩𑁂, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸.

𑁨𑁨.

‘‘𑀤𑀺𑀝𑁆𑀞𑁄 𑀳𑀺 𑀫𑁂 𑀲𑁄 𑀪𑀕𑀯𑀸, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀚𑁂𑀦𑁆𑀢𑀸 𑀣𑁂𑀭𑀻 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁩. 𑀲𑀼𑀫𑀗𑁆𑀕𑀮𑀫𑀸𑀢𑀸𑀣𑁂𑀭𑀻𑀕𑀸𑀣𑀸

𑁨𑁩.

‘‘𑀲𑀼𑀫𑀼𑀢𑁆𑀢𑀺𑀓𑀸 ¶ ¶ ¶ 𑀲𑀼𑀫𑀼𑀢𑁆𑀢𑀺𑀓𑀸 [𑀲𑀼𑀫𑀼𑀢𑁆𑀢𑀺𑀓𑁂 𑀲𑀼𑀫𑀼𑀢𑁆𑀢𑀺𑀓𑁂 (𑀲𑀻.), 𑀲𑀼𑀫𑀼𑀢𑁆𑀢𑀺𑀓𑁂 𑀲𑀼𑀫𑀼𑀢𑁆𑀢𑀺𑀓𑀸 (𑀲𑁆𑀬𑀸. 𑀓.)], 𑀲𑀸𑀥𑀼𑀫𑀼𑀢𑁆𑀢𑀺𑀓𑀸𑀫𑁆𑀳𑀺 𑀫𑀼𑀲𑀮𑀲𑁆𑀲;

𑀅𑀳𑀺𑀭𑀺𑀓𑁄 𑀫𑁂 𑀙𑀢𑁆𑀢𑀓𑀁 𑀯𑀸𑀧𑀺, 𑀉𑀓𑁆𑀔𑀮𑀺𑀓𑀸 𑀫𑁂 𑀤𑁂𑀟𑁆𑀟𑀼𑀪𑀁 𑀯𑀸𑀢𑀺.

𑁨𑁪.

‘‘𑀭𑀸𑀕𑀜𑁆𑀘 𑀅𑀳𑀁 𑀤𑁄𑀲𑀜𑁆𑀘, 𑀘𑀺𑀘𑁆𑀘𑀺𑀝𑀺 𑀘𑀺𑀘𑁆𑀘𑀺𑀝𑀻𑀢𑀺 𑀯𑀺𑀳𑀦𑀸𑀫𑀺;

𑀲𑀸 𑀭𑀼𑀓𑁆𑀔𑀫𑀽𑀮𑀫𑀼𑀧𑀕𑀫𑁆𑀫, 𑀅𑀳𑁄 𑀲𑀼𑀔𑀦𑁆𑀢𑀺 𑀲𑀼𑀔𑀢𑁄 𑀛𑀸𑀬𑀸𑀫𑀻’’𑀢𑀺.

… 𑀲𑀼𑀫𑀗𑁆𑀕𑀮𑀫𑀸𑀢𑀸 𑀣𑁂𑀭𑀻 [𑀅𑀜𑁆𑀜𑀢𑀭𑀸 𑀣𑁂𑀭𑀻 𑀪𑀺𑀓𑁆𑀔𑀼𑀦𑀻 𑀅𑀧𑀜𑁆𑀜𑀸𑀢𑀸 (𑀲𑁆𑀬𑀸. 𑀓.)].

𑁪. 𑀅𑀟𑁆𑀠𑀓𑀸𑀲𑀺𑀣𑁂𑀭𑀻𑀕𑀸𑀣𑀸

𑁨𑁫.

‘‘𑀬𑀸𑀯 𑀓𑀸𑀲𑀺𑀚𑀦𑀧𑀤𑁄, 𑀲𑀼𑀗𑁆𑀓𑁄 𑀫𑁂 𑀢𑀢𑁆𑀣𑀓𑁄 𑀅𑀳𑀼;

𑀢𑀁 𑀓𑀢𑁆𑀯𑀸 𑀦𑁂𑀕𑀫𑁄 𑀅𑀕𑁆𑀖𑀁, 𑀅𑀟𑁆𑀠𑁂𑀦𑀕𑁆𑀖𑀁 𑀞𑀧𑁂𑀲𑀺 𑀫𑀁.

𑁨𑁬.

‘‘𑀅𑀣 ¶ 𑀦𑀺𑀩𑁆𑀩𑀺𑀦𑁆𑀤𑀳𑀁 𑀭𑀽𑀧𑁂, 𑀦𑀺𑀩𑁆𑀩𑀺𑀦𑁆𑀤𑀜𑁆𑀘 𑀯𑀺𑀭𑀚𑁆𑀚𑀳𑀁;

𑀫𑀸 𑀧𑀼𑀦 𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑁂𑀬𑁆𑀬𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀅𑀟𑁆𑀠𑀓𑀸𑀲𑀺 𑀣𑁂𑀭𑀻….

𑁫. 𑀘𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁨𑁭.

‘‘𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀓𑀺𑀲𑀺𑀓𑀸, 𑀕𑀺𑀮𑀸𑀦𑀸 𑀩𑀸𑀴𑁆𑀳𑀤𑀼𑀩𑁆𑀩𑀮𑀸;

𑀤𑀡𑁆𑀟𑀫𑁄𑀮𑀼𑀩𑁆𑀪 𑀕𑀘𑁆𑀙𑀸𑀫𑀺, 𑀧𑀩𑁆𑀩𑀢𑀁 𑀅𑀪𑀺𑀭𑀽𑀳𑀺𑀬.

𑁨𑁮.

‘‘𑀲𑀗𑁆𑀖𑀸𑀝𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀧𑀢𑁆𑀢𑀓𑀜𑁆𑀘 𑀦𑀺𑀓𑀼𑀚𑁆𑀚𑀺𑀬;

𑀲𑁂𑀮𑁂 𑀔𑀫𑁆𑀪𑁂𑀲𑀺𑀫𑀢𑁆𑀢𑀸𑀦𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸’’𑀢𑀺.

… 𑀘𑀺𑀢𑁆𑀢𑀸 𑀣𑁂𑀭𑀻….

𑁬. 𑀫𑁂𑀢𑁆𑀢𑀺𑀓𑀸𑀣𑁂𑀭𑀻𑀕𑀸𑀣𑀸

𑁨𑁯.

‘‘𑀓𑀺𑀜𑁆𑀘𑀸𑀧𑀺 𑀔𑁄𑀫𑁆𑀳𑀺 𑀤𑀼𑀓𑁆𑀔𑀺𑀢𑀸, 𑀤𑀼𑀩𑁆𑀩𑀮𑀸 𑀕𑀢𑀬𑁄𑀩𑁆𑀩𑀦𑀸;

𑀤𑀡𑁆𑀟𑀫𑁄𑀮𑀼𑀩𑁆𑀪 𑀕𑀘𑁆𑀙𑀸𑀫𑀺, 𑀧𑀩𑁆𑀩𑀢𑀁 𑀅𑀪𑀺𑀭𑀽𑀳𑀺𑀬.

𑁩𑁦.

‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦 ¶ 𑀲𑀗𑁆𑀖𑀸𑀝𑀺𑀁, 𑀧𑀢𑁆𑀢𑀓𑀜𑁆𑀘 𑀦𑀺𑀓𑀼𑀚𑁆𑀚𑀺𑀬;

𑀦𑀺𑀲𑀺𑀦𑁆𑀦𑀸 𑀘𑀫𑁆𑀳𑀺 𑀲𑁂𑀮𑀫𑁆𑀳𑀺, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂;

𑀢𑀺𑀲𑁆𑀲𑁄 ¶ 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀫𑁂𑀢𑁆𑀢𑀺𑀓𑀸 𑀣𑁂𑀭𑀻….

𑁭. 𑀫𑀺𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁩𑁧.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁩𑁨.

‘‘𑀉𑀧𑁄𑀲𑀣𑀁 ¶ 𑀉𑀧𑀸𑀕𑀘𑁆𑀙𑀺𑀁, 𑀤𑁂𑀯𑀓𑀸𑀬𑀸𑀪𑀺𑀦𑀦𑁆𑀤𑀺𑀦𑀻;

𑀲𑀸𑀚𑁆𑀚 𑀏𑀓𑁂𑀦 𑀪𑀢𑁆𑀢𑁂𑀦, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀤𑁂𑀯𑀓𑀸𑀬𑀁 𑀦 𑀧𑀢𑁆𑀣𑁂𑀳𑀁, 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭’’𑀦𑁆𑀢𑀺.

… 𑀫𑀺𑀢𑁆𑀢𑀸 𑀣𑁂𑀭𑀻….

𑁮. 𑀅𑀪𑀬𑀫𑀸𑀢𑀼𑀣𑁂𑀭𑀻𑀕𑀸𑀣𑀸

𑁩𑁩.

‘‘𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀫𑁆𑀫, 𑀅𑀥𑁄 𑀯𑁂 𑀓𑁂𑀲𑀫𑀢𑁆𑀣𑀓𑀸;

𑀧𑀘𑁆𑀘𑀯𑁂𑀓𑁆𑀔𑀲𑁆𑀲𑀼𑀫𑀁 𑀓𑀸𑀬𑀁, 𑀅𑀲𑀼𑀘𑀺𑀁 𑀧𑀽𑀢𑀺𑀕𑀦𑁆𑀥𑀺𑀓𑀁.

𑁩𑁪.

‘‘𑀏𑀯𑀁 ¶ 𑀯𑀺𑀳𑀭𑀫𑀸𑀦𑀸𑀬, 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀽𑀳𑀢𑁄;

𑀧𑀭𑀺𑀴𑀸𑀳𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀅𑀪𑀬𑀫𑀸𑀢𑀼 𑀣𑁂𑀭𑀻….

𑁯. 𑀅𑀪𑀬𑀸𑀣𑁂𑀭𑀻𑀕𑀸𑀣𑀸

𑁩𑁫.

‘‘𑀅𑀪𑀬𑁂 𑀪𑀺𑀤𑀼𑀭𑁄 𑀓𑀸𑀬𑁄, 𑀬𑀢𑁆𑀣 𑀲𑀢𑀸 𑀧𑀼𑀣𑀼𑀚𑁆𑀚𑀦𑀸;

𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀺𑀫𑀁 𑀤𑁂𑀳𑀁, 𑀲𑀫𑁆𑀧𑀚𑀸𑀦𑀸 𑀲𑀢𑀻𑀫𑀢𑀻.

𑁩𑁬.

‘‘𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀫𑁂;

𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀅𑀪𑀬𑀸 𑀣𑁂𑀭𑀻….

𑁧𑁦. 𑀲𑀸𑀫𑀸𑀣𑁂𑀭𑀻𑀕𑀸𑀣𑀸

𑁩𑁭.

‘‘𑀘𑀢𑀼𑀓𑁆𑀔𑀢𑁆𑀢𑀼𑀁 ¶ ¶ 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻;

𑀢𑀲𑁆𑀲𑀸 𑀫𑁂 𑀅𑀝𑁆𑀞𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀲𑀫𑀽𑀳𑀢𑀸.

𑁩𑁮.

‘‘𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀫𑁂;

𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀲𑀸𑀫𑀸 𑀣𑁂𑀭𑀻….

𑀤𑀼𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁩. 𑀢𑀺𑀓𑀦𑀺𑀧𑀸𑀢𑁄

𑁧. 𑀅𑀧𑀭𑀸𑀲𑀸𑀫𑀸𑀣𑁂𑀭𑀻𑀕𑀸𑀣𑀸

𑁩𑁯.

‘‘𑀧𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀦𑀺 ¶ , 𑀬𑀢𑁄 𑀧𑀩𑁆𑀩𑀚𑀺𑀢𑀸𑀬 𑀫𑁂;

𑀦𑀸𑀪𑀺𑀚𑀸𑀦𑀸𑀫𑀺 𑀘𑀺𑀢𑁆𑀢𑀲𑁆𑀲, 𑀲𑀫𑀁 𑀮𑀤𑁆𑀥𑀁 𑀓𑀼𑀤𑀸𑀘𑀦𑀁.

𑁪𑁦.

‘‘𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻;

𑀢𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀺𑀁, 𑀲𑀭𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀁.

𑁪𑁧.

‘‘𑀩𑀳𑀽𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺, 𑀅𑀧𑁆𑀧𑀫𑀸𑀤𑀭𑀢𑀸𑀬 𑀫𑁂;

𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀅𑀚𑁆𑀚 ¶ 𑀫𑁂 𑀲𑀢𑁆𑀢𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀯𑀺𑀲𑁄𑀲𑀺𑀢𑀸’’𑀢𑀺.

… 𑀅𑀧𑀭𑀸 𑀲𑀸𑀫𑀸 𑀣𑁂𑀭𑀻….

𑁨. 𑀉𑀢𑁆𑀢𑀫𑀸𑀣𑁂𑀭𑀻𑀕𑀸𑀣𑀸

𑁪𑁨.

‘‘𑀘𑀢𑀼𑀓𑁆𑀔𑀢𑁆𑀢𑀼𑀁 ¶ 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁪𑁩.

‘‘𑀲𑀸 ¶ 𑀪𑀺𑀓𑁆𑀔𑀼𑀦𑀺𑀁 𑀉𑀧𑀕𑀘𑁆𑀙𑀺𑀁, 𑀬𑀸 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀅𑀳𑀼;

𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄.

𑁪𑁪.

‘‘𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀬𑀣𑀸 𑀫𑀁 𑀅𑀦𑀼𑀲𑀸𑀲𑀺 𑀲𑀸;

𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦, 𑀦𑀺𑀲𑀻𑀤𑀺𑀁 𑀧𑀻𑀢𑀺𑀲𑀼𑀔𑀲𑀫𑀧𑁆𑀧𑀺𑀢𑀸 [𑀦𑀺𑀲𑀻𑀤𑀺𑀁 𑀲𑀼𑀔𑀲𑀫𑀧𑁆𑀧𑀺𑀢𑀸 (𑀲𑀻.)];

𑀅𑀝𑁆𑀞𑀫𑀺𑀬𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸’’𑀢𑀺.

… 𑀉𑀢𑁆𑀢𑀫𑀸 𑀣𑁂𑀭𑀻….

𑁩. 𑀅𑀧𑀭𑀸𑀉𑀢𑁆𑀢𑀫𑀸𑀣𑁂𑀭𑀻𑀕𑀸𑀣𑀸

𑁪𑁫.

‘‘𑀬𑁂 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀫𑀕𑁆𑀕𑀸 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀪𑀸𑀯𑀺𑀢𑀸 𑀢𑁂 𑀫𑀬𑀸 𑀲𑀩𑁆𑀩𑁂, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸.

𑁪𑁬.

‘‘𑀲𑀼𑀜𑁆𑀜𑀢𑀲𑁆𑀲𑀸𑀦𑀺𑀫𑀺𑀢𑁆𑀢𑀲𑁆𑀲, 𑀮𑀸𑀪𑀺𑀦𑀻𑀳𑀁 𑀬𑀤𑀺𑀘𑁆𑀙𑀓𑀁;

𑀑𑀭𑀲𑀸 𑀥𑀻𑀢𑀸 𑀩𑀼𑀤𑁆𑀥𑀲𑁆𑀲, 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸 𑀲𑀤𑀸.

𑁪𑁭.

‘‘𑀲𑀩𑁆𑀩𑁂 ¶ 𑀓𑀸𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀅𑀧𑀭𑀸 𑀉𑀢𑁆𑀢𑀫𑀸 𑀣𑁂𑀭𑀻….

𑁪. 𑀤𑀦𑁆𑀢𑀺𑀓𑀸𑀣𑁂𑀭𑀻𑀕𑀸𑀣𑀸

𑁪𑁮.

‘‘𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂;

𑀦𑀸𑀕𑀁 𑀑𑀕𑀸𑀳𑀫𑀼𑀢𑁆𑀢𑀺𑀡𑁆𑀡𑀁, 𑀦𑀤𑀻𑀢𑀻𑀭𑀫𑁆𑀳𑀺 𑀅𑀤𑁆𑀤𑀲𑀁.

𑁪𑁯.

‘‘𑀧𑀼𑀭𑀺𑀲𑁄 𑀅𑀗𑁆𑀓𑀼𑀲𑀫𑀸𑀤𑀸𑀬, ‘𑀤𑁂𑀳𑀺 𑀧𑀸𑀤’𑀦𑁆𑀢𑀺 𑀬𑀸𑀘𑀢𑀺;

𑀦𑀸𑀕𑁄 𑀧𑀲𑀸𑀭𑀬𑀻 𑀧𑀸𑀤𑀁, 𑀧𑀼𑀭𑀺𑀲𑁄 𑀦𑀸𑀕𑀫𑀸𑀭𑀼𑀳𑀺.

𑁫𑁦.

‘‘𑀤𑀺𑀲𑁆𑀯𑀸 ¶ 𑀅𑀤𑀦𑁆𑀢𑀁 𑀤𑀫𑀺𑀢𑀁, 𑀫𑀦𑀼𑀲𑁆𑀲𑀸𑀦𑀁 𑀯𑀲𑀁 𑀕𑀢𑀁;

𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁, 𑀔𑀮𑀼 𑀢𑀸𑀬 𑀯𑀦𑀁 𑀕𑀢𑀸’’𑀢𑀺.

… 𑀤𑀦𑁆𑀢𑀺𑀓𑀸 𑀣𑁂𑀭𑀻….

𑁫. 𑀉𑀩𑁆𑀩𑀺𑀭𑀺𑀣𑁂𑀭𑀻𑀕𑀸𑀣𑀸

𑁫𑁧.

‘‘𑀅𑀫𑁆𑀫 𑀚𑀻𑀯𑀸𑀢𑀺 𑀯𑀦𑀫𑁆𑀳𑀺 𑀓𑀦𑁆𑀤𑀲𑀺, 𑀅𑀢𑁆𑀢𑀸𑀦𑀁 𑀅𑀥𑀺𑀕𑀘𑁆𑀙 𑀉𑀩𑁆𑀩𑀺𑀭𑀺;

𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 [𑀘𑀽𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 (𑀲𑀻.)], 𑀲𑀩𑁆𑀩𑀸 𑀚𑀻𑀯𑀲𑀦𑀸𑀫𑀺𑀓𑀸;

𑀏𑀢𑀫𑁆𑀳𑀸𑀴𑀸𑀳𑀦𑁂 𑀤𑀟𑁆𑀠𑀸, 𑀢𑀸𑀲𑀁 𑀓𑀫𑀦𑀼𑀲𑁄𑀘𑀲𑀺.

𑁫𑁨.

‘‘𑀅𑀩𑁆𑀩𑀳𑀻 ¶ ¶ [𑀅𑀩𑁆𑀩𑀼𑀢𑀻 (𑀲𑁆𑀬𑀸.), 𑀅𑀩𑁆𑀩𑀼𑀴𑁆𑀳𑀁 (𑀓.)] 𑀯𑀢 𑀫𑁂 𑀲𑀮𑁆𑀮𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀁 [𑀳𑀤𑀬𑀦𑀺𑀲𑁆𑀲𑀺𑀢𑀁 (𑀲𑀻. 𑀲𑁆𑀬𑀸.)];

𑀬𑀁 𑀫𑁂 𑀲𑁄𑀓𑀧𑀭𑁂𑀢𑀸𑀬, 𑀥𑀻𑀢𑀼𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺.

𑁫𑁩.

‘‘𑀲𑀸𑀚𑁆𑀚 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀳𑀁, 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀉𑀧𑁂𑀫𑀺 𑀲𑀭𑀡𑀁 𑀫𑀼𑀦𑀺’’𑀦𑁆𑀢𑀺.

… 𑀉𑀩𑁆𑀩𑀺𑀭𑀻 𑀣𑁂𑀭𑀻….

𑁬. 𑀲𑀼𑀓𑁆𑀓𑀸𑀣𑁂𑀭𑀻𑀕𑀸𑀣𑀸

𑁫𑁪.

‘‘𑀓𑀺𑀁𑀫𑁂 𑀓𑀢𑀸 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸, 𑀫𑀥𑀼𑀁 𑀧𑀻𑀢𑀸𑀯 [𑀫𑀥𑀼𑀧𑀻𑀢𑀸𑀯 (𑀲𑀻.)] 𑀅𑀘𑁆𑀙𑀭𑁂;

𑀬𑁂 𑀲𑀼𑀓𑁆𑀓𑀁 𑀦 𑀉𑀧𑀸𑀲𑀦𑁆𑀢𑀺, 𑀤𑁂𑀲𑁂𑀦𑁆𑀢𑀺𑀁 𑀩𑀼𑀤𑁆𑀥𑀲𑀸𑀲𑀦𑀁.

𑁫𑁫.

‘‘𑀢𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀻𑀬𑀁, 𑀅𑀲𑁂𑀘𑀦𑀓𑀫𑁄𑀚𑀯𑀁;

𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀲𑀧𑁆𑀧𑀜𑁆𑀜𑀸, 𑀯𑀮𑀸𑀳𑀓𑀫𑀺𑀯𑀤𑁆𑀥𑀕𑀽.

𑁫𑁬.

‘‘𑀲𑀼𑀓𑁆𑀓𑀸 ¶ 𑀲𑀼𑀓𑁆𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦’’𑀦𑁆𑀢𑀺.

… 𑀲𑀼𑀓𑁆𑀓𑀸 𑀣𑁂𑀭𑀻….

𑁭. 𑀲𑁂𑀮𑀸𑀣𑁂𑀭𑀻𑀕𑀸𑀣𑀸

𑁫𑁭.

‘‘𑀦𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀳𑀲𑀺;

𑀪𑀼𑀜𑁆𑀚𑀸𑀳𑀺 ¶ 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’.

𑁫𑁮.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 ‘𑀓𑀸𑀫𑀭𑀢𑀺𑀁’ 𑀩𑁆𑀭𑀽𑀲𑀺, ‘𑀅𑀭𑀢𑀻’ 𑀤𑀸𑀦𑀺 𑀲𑀸 𑀫𑀫.

𑁫𑁯.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻 [𑀦𑀦𑁆𑀤𑀺 (𑀲𑀻. 𑀲𑁆𑀬𑀸.)], 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

… 𑀲𑁂𑀮𑀸 𑀣𑁂𑀭𑀻….

𑁮. 𑀲𑁄𑀫𑀸𑀣𑁂𑀭𑀻𑀕𑀸𑀣𑀸

𑁬𑁦.

‘‘𑀬𑀁 𑀢𑀁 𑀇𑀲𑀻𑀳𑀺 𑀧𑀢𑁆𑀢𑀩𑁆𑀩𑀁, 𑀞𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀦 𑀢𑀁 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬, 𑀲𑀓𑁆𑀓𑀸 𑀧𑀧𑁆𑀧𑁄𑀢𑀼𑀫𑀺𑀢𑁆𑀣𑀺𑀬𑀸’’.

𑁬𑁧.

‘‘𑀇𑀢𑁆𑀣𑀺𑀪𑀸𑀯𑁄 𑀦𑁄 𑀓𑀺𑀁 𑀓𑀬𑀺𑀭𑀸, 𑀘𑀺𑀢𑁆𑀢𑀫𑁆𑀳𑀺 𑀲𑀼𑀲𑀫𑀸𑀳𑀺𑀢𑁂;

𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑁬𑁨.

‘‘𑀲𑀩𑁆𑀩𑀢𑁆𑀣 ¶ ¶ 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

… 𑀲𑁄𑀫𑀸 𑀣𑁂𑀭𑀻….

𑀢𑀺𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁪. 𑀘𑀢𑀼𑀓𑁆𑀓𑀦𑀺𑀧𑀸𑀢𑁄

𑁧. 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻𑀣𑁂𑀭𑀻𑀕𑀸𑀣𑀸

𑁬𑁩.

‘‘𑀧𑀼𑀢𑁆𑀢𑁄 ¶ 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀓𑀲𑁆𑀲𑀧𑁄 𑀲𑀼𑀲𑀫𑀸𑀳𑀺𑀢𑁄;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄𑀯𑁂𑀤𑀺, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺.

𑁬𑁪.

‘‘𑀅𑀣𑁄 ¶ 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺;

𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁬𑁫.

‘‘𑀢𑀣𑁂𑀯 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁.

𑁬𑁬.

‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂, 𑀉𑀪𑁄 𑀧𑀩𑁆𑀩𑀚𑀺𑀢𑀸 𑀫𑀬𑀁;

𑀢𑁆𑀬𑀫𑁆𑀳 𑀔𑀻𑀡𑀸𑀲𑀯𑀸 𑀤𑀦𑁆𑀢𑀸, 𑀲𑀻𑀢𑀺𑀪𑀽𑀢𑀫𑁆𑀳 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀣𑁂𑀭𑀻….

𑀘𑀢𑀼𑀓𑁆𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁫. 𑀧𑀜𑁆𑀘𑀓𑀦𑀺𑀧𑀸𑀢𑁄

𑁧. 𑀅𑀜𑁆𑀜𑀢𑀭𑀸𑀣𑁂𑀭𑀻𑀕𑀸𑀣𑀸

𑁬𑁭.

‘‘𑀧𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀦𑀺 ¶ ¶ , 𑀬𑀢𑁄 𑀧𑀩𑁆𑀩𑀚𑀺𑀢𑀸 𑀅𑀳𑀁;

𑀦𑀸𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺, 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑀚𑁆𑀛𑀕𑀁.

𑁬𑁮.

‘‘𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀓𑀸𑀫𑀭𑀸𑀕𑁂𑀦𑀯𑀲𑁆𑀲𑀼𑀢𑀸;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀻, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺𑀁 𑀅𑀳𑀁.

𑁬𑁯.

‘‘𑀲𑀸 𑀪𑀺𑀓𑁆𑀔𑀼𑀦𑀺𑀁 𑀉𑀧𑀸𑀕𑀘𑁆𑀙𑀺𑀁, 𑀬𑀸 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀅𑀳𑀼;

𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄.

𑁭𑁦.

‘‘𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑁂 𑀉𑀧𑀸𑀯𑀺𑀲𑀺𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁.

𑁭𑁧.

‘‘𑀘𑁂𑀢𑁄𑀧𑀭𑀺𑀘𑁆𑀘𑀜𑀸𑀡𑀜𑁆𑀘 ¶ ¶ [𑀘𑁂𑀢𑁄𑀧𑀭𑀺𑀬𑀜𑀸𑀡𑀜𑁆𑀘 (𑀓.)], 𑀲𑁄𑀢𑀥𑀸𑀢𑀼 𑀯𑀺𑀲𑁄𑀥𑀺𑀢𑀸;

𑀇𑀤𑁆𑀥𑀻𑀧𑀺 𑀫𑁂 𑀲𑀘𑁆𑀙𑀺𑀓𑀢𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄;

𑀙𑀴𑀪𑀺𑀜𑁆𑀜𑀸 [𑀙 𑀫𑁂𑀪𑀺𑀜𑁆𑀜𑀸 (𑀲𑁆𑀬𑀸. 𑀓.)] 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀅𑀜𑁆𑀜𑀢𑀭𑀸 𑀣𑁂𑀭𑀻 ….

𑁨. 𑀯𑀺𑀫𑀮𑀸𑀣𑁂𑀭𑀻𑀕𑀸𑀣𑀸

𑁭𑁨.

‘‘𑀫𑀢𑁆𑀢𑀸 𑀯𑀡𑁆𑀡𑁂𑀦 𑀭𑀽𑀧𑁂𑀦, 𑀲𑁄𑀪𑀕𑁆𑀕𑁂𑀦 𑀬𑀲𑁂𑀦 𑀘;

𑀬𑁄𑀩𑁆𑀩𑀦𑁂𑀦 𑀘𑀼𑀧𑀢𑁆𑀣𑀤𑁆𑀥𑀸, 𑀅𑀜𑁆𑀜𑀸𑀲𑀫𑀢𑀺𑀫𑀜𑁆𑀜𑀺𑀳𑀁.

𑁭𑁩.

‘‘𑀯𑀺𑀪𑀽𑀲𑁂𑀢𑁆𑀯𑀸 𑀇𑀫𑀁 𑀓𑀸𑀬𑀁, 𑀲𑀼𑀘𑀺𑀢𑁆𑀢𑀁 𑀩𑀸𑀮𑀮𑀸𑀧𑀦𑀁;

𑀅𑀝𑁆𑀞𑀸𑀲𑀺𑀁 𑀯𑁂𑀲𑀺𑀤𑁆𑀯𑀸𑀭𑀫𑁆𑀳𑀺, 𑀮𑀼𑀤𑁆𑀤𑁄 𑀧𑀸𑀲𑀫𑀺𑀯𑁄𑀟𑁆𑀟𑀺𑀬.

𑁭𑁪.

‘‘𑀧𑀺𑀮𑀦𑁆𑀥𑀦𑀁 𑀯𑀺𑀤𑀁𑀲𑁂𑀦𑁆𑀢𑀻, 𑀕𑀼𑀬𑁆𑀳𑀁 𑀧𑀓𑀸𑀲𑀺𑀓𑀁 𑀩𑀳𑀼𑀁;

𑀅𑀓𑀸𑀲𑀺𑀁 𑀯𑀺𑀯𑀺𑀥𑀁 𑀫𑀸𑀬𑀁, 𑀉𑀚𑁆𑀚𑀕𑁆𑀖𑀦𑁆𑀢𑀻 𑀩𑀳𑀼𑀁 𑀚𑀦𑀁.

𑁭𑁫.

‘‘𑀲𑀸𑀚𑁆𑀚 𑀧𑀺𑀡𑁆𑀟𑀁 𑀘𑀭𑀺𑀢𑁆𑀯𑀸𑀦, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀦𑀺𑀲𑀺𑀦𑁆𑀦𑀸 𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀅𑀯𑀺𑀢𑀓𑁆𑀓𑀲𑁆𑀲 𑀮𑀸𑀪𑀺𑀦𑀻.

𑁭𑁬.

‘‘𑀲𑀩𑁆𑀩𑁂 𑀬𑁄𑀕𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀯𑀺𑀫𑀮𑀸 𑀧𑀼𑀭𑀸𑀡𑀕𑀡𑀺𑀓𑀸 𑀣𑁂𑀭𑀻….

𑁩. 𑀲𑀻𑀳𑀸𑀣𑁂𑀭𑀻𑀕𑀸𑀣𑀸

𑁭𑁭.

‘‘𑀅𑀬𑁄𑀦𑀺𑀲𑁄 ¶ ¶ 𑀫𑀦𑀲𑀺𑀓𑀸𑀭𑀸, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸;

𑀅𑀳𑁄𑀲𑀺𑀁 𑀉𑀤𑁆𑀥𑀢𑀸 𑀧𑀼𑀩𑁆𑀩𑁂, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁭𑁮.

‘‘𑀧𑀭𑀺𑀬𑀼𑀝𑁆𑀞𑀺𑀢𑀸 𑀓𑁆𑀮𑁂𑀲𑁂𑀳𑀺, 𑀲𑀼𑀪𑀲𑀜𑁆𑀜𑀸𑀦𑀼𑀯𑀢𑁆𑀢𑀺𑀦𑀻;

𑀲𑀫𑀁 𑀘𑀺𑀢𑁆𑀢𑀲𑁆𑀲 𑀦 𑀮𑀪𑀺𑀁, 𑀭𑀸𑀕𑀘𑀺𑀢𑁆𑀢𑀯𑀲𑀸𑀦𑀼𑀕𑀸.

𑁭𑁯.

‘‘𑀓𑀺𑀲𑀸 ¶ 𑀧𑀡𑁆𑀟𑀼 𑀯𑀺𑀯𑀡𑁆𑀡𑀸 𑀘, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀘𑀸𑀭𑀺𑀳𑀁;

𑀦𑀸𑀳𑀁 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀼𑀔𑀁 𑀯𑀺𑀦𑁆𑀤𑀺𑀁 𑀲𑀼𑀤𑀼𑀓𑁆𑀔𑀺𑀢𑀸.

𑁮𑁦.

‘‘𑀢𑀢𑁄 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦, 𑀧𑀸𑀯𑀺𑀲𑀺𑀁 𑀯𑀦𑀫𑀦𑁆𑀢𑀭𑀁;

𑀯𑀭𑀁 𑀫𑁂 𑀇𑀥 𑀉𑀩𑁆𑀩𑀦𑁆𑀥𑀁, 𑀬𑀜𑁆𑀘 𑀳𑀻𑀦𑀁 𑀧𑀼𑀦𑀸𑀘𑀭𑁂.

𑁮𑁧.

‘‘𑀤𑀴𑁆𑀳𑀧𑀸𑀲𑀁 [𑀤𑀴𑁆𑀳𑀁 𑀧𑀸𑀲𑀁 (𑀲𑀻.)] 𑀓𑀭𑀺𑀢𑁆𑀯𑀸𑀦, 𑀭𑀼𑀓𑁆𑀔𑀲𑀸𑀔𑀸𑀬 𑀩𑀦𑁆𑀥𑀺𑀬;

𑀧𑀓𑁆𑀔𑀺𑀧𑀺𑀁 ¶ 𑀧𑀸𑀲𑀁 𑀕𑀻𑀯𑀸𑀬𑀁, 𑀅𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂’’𑀢𑀺.

… 𑀲𑀻𑀳𑀸 𑀣𑁂𑀭𑀻….

𑁪. 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀣𑁂𑀭𑀻𑀕𑀸𑀣𑀸

𑁮𑁨.

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁮𑁩.

‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀤𑀼𑀕𑁆𑀕𑀦𑁆𑀥𑀁 𑀧𑀽𑀢𑀺𑀓𑀁 𑀯𑀸𑀢𑀺, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

𑁮𑁪.

‘‘𑀏𑀯𑀫𑁂𑀢𑀁 𑀅𑀯𑁂𑀓𑁆𑀔𑀦𑁆𑀢𑀻, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀢𑀢𑁄 𑀲𑀓𑀸𑀬 𑀧𑀜𑁆𑀜𑀸𑀬, 𑀅𑀪𑀺𑀦𑀺𑀩𑁆𑀩𑀺𑀚𑁆𑀛 [𑀅𑀪𑀺𑀦𑀺𑀩𑁆𑀩𑀺𑀚𑁆𑀚 (𑀲𑀻. 𑀲𑁆𑀬𑀸.)] 𑀤𑀓𑁆𑀔𑀺𑀲𑀁.

𑁮𑁫.

‘‘𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬, 𑀯𑀺𑀘𑀺𑀦𑀦𑁆𑀢𑀺𑀬𑀸 𑀬𑁄𑀦𑀺𑀲𑁄;

𑀬𑀣𑀸𑀪𑀽𑀢𑀁 𑀅𑀬𑀁 𑀓𑀸𑀬𑁄, 𑀤𑀺𑀝𑁆𑀞𑁄 𑀲𑀦𑁆𑀢𑀭𑀩𑀸𑀳𑀺𑀭𑁄.

𑁮𑁬.

‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀳𑀁 𑀓𑀸𑀬𑁂, 𑀅𑀚𑁆𑀛𑀢𑁆𑀢𑀜𑁆𑀘 𑀯𑀺𑀭𑀚𑁆𑀚𑀳𑀁;

𑀅𑀧𑁆𑀧𑀫𑀢𑁆𑀢𑀸 𑀯𑀺𑀲𑀁𑀬𑀼𑀢𑁆𑀢𑀸, 𑀉𑀧𑀲𑀦𑁆𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀣𑁂𑀭𑀻….

𑁫. 𑀦𑀦𑁆𑀤𑀼𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸

𑁮𑁭.

‘‘𑀅𑀕𑁆𑀕𑀺𑀁 ¶ 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘, 𑀤𑁂𑀯𑀢𑀸 𑀘 𑀦𑀫𑀲𑁆𑀲𑀺𑀳𑀁;

𑀦𑀤𑀻𑀢𑀺𑀢𑁆𑀣𑀸𑀦𑀺 𑀕𑀦𑁆𑀢𑁆𑀯𑀸𑀦, 𑀉𑀤𑀓𑀁 𑀑𑀭𑀼𑀳𑀸𑀫𑀺𑀳𑀁.

𑁮𑁮.

‘‘𑀩𑀳𑀽𑀯𑀢𑀲𑀫𑀸𑀤𑀸𑀦𑀸 ¶ ¶ , 𑀅𑀟𑁆𑀠𑀁 𑀲𑀻𑀲𑀲𑁆𑀲 𑀑𑀮𑀺𑀔𑀺𑀁;

𑀙𑀫𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀭𑀢𑁆𑀢𑀺𑀁 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀳𑀁.

𑁮𑁯.

‘‘𑀯𑀺𑀪𑀽𑀲𑀸𑀫𑀡𑁆𑀟𑀦𑀭𑀢𑀸, 𑀦𑁆𑀳𑀸𑀧𑀦𑀼𑀘𑁆𑀙𑀸𑀤𑀦𑁂𑀳𑀺 𑀘;

𑀉𑀧𑀓𑀸𑀲𑀺𑀁 𑀇𑀫𑀁 𑀓𑀸𑀬𑀁, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸.

𑁯𑁦.

‘‘𑀢𑀢𑁄 𑀲𑀤𑁆𑀥𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀤𑀺𑀲𑁆𑀯𑀸 𑀓𑀸𑀬𑀁 𑀬𑀣𑀸𑀪𑀽𑀢𑀁, 𑀓𑀸𑀫𑀭𑀸𑀕𑁄 𑀲𑀫𑀽𑀳𑀢𑁄.

𑁯𑁧.

‘‘𑀲𑀩𑁆𑀩𑁂 𑀪𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀇𑀘𑁆𑀙𑀸 𑀘 𑀧𑀢𑁆𑀣𑀦𑀸𑀧𑀺 𑀘;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀲𑀦𑁆𑀢𑀺𑀁 𑀧𑀸𑀧𑀼𑀡𑀺 𑀘𑁂𑀢𑀲𑁄’’𑀢𑀺.

… 𑀦𑀦𑁆𑀤𑀼𑀢𑁆𑀢𑀭𑀸 𑀣𑁂𑀭𑀻….

𑁬. 𑀫𑀺𑀢𑁆𑀢𑀸𑀓𑀸𑀴𑀻𑀣𑁂𑀭𑀻𑀕𑀸𑀣𑀸

𑁯𑁨.

‘‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀯𑀺𑀘𑀭𑀺𑀁𑀳𑀁 𑀢𑁂𑀦 𑀢𑁂𑀦, 𑀮𑀸𑀪𑀲𑀓𑁆𑀓𑀸𑀭𑀉𑀲𑁆𑀲𑀼𑀓𑀸.

𑁯𑁩.

‘‘𑀭𑀺𑀜𑁆𑀘𑀺𑀢𑁆𑀯𑀸 ¶ 𑀧𑀭𑀫𑀁 𑀅𑀢𑁆𑀣𑀁, 𑀳𑀻𑀦𑀫𑀢𑁆𑀣𑀁 𑀅𑀲𑁂𑀯𑀺𑀳𑀁;

𑀓𑀺𑀮𑁂𑀲𑀸𑀦𑀁 𑀯𑀲𑀁 𑀕𑀦𑁆𑀢𑁆𑀯𑀸, 𑀲𑀸𑀫𑀜𑁆𑀜𑀢𑁆𑀣𑀁 𑀦 𑀩𑀼𑀚𑁆𑀛𑀺𑀳𑀁.

𑁯𑁪.

‘‘𑀢𑀲𑁆𑀲𑀸 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀦𑀺𑀲𑀺𑀦𑁆𑀦𑀸𑀬 𑀯𑀺𑀳𑀸𑀭𑀓𑁂;

𑀉𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀫𑁆𑀳𑀺, 𑀢𑀡𑁆𑀳𑀸𑀬 𑀯𑀲𑀫𑀸𑀕𑀢𑀸.

𑁯𑁫.

‘‘𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀫𑀬𑁆𑀳𑀁, 𑀚𑀭𑀸 𑀩𑁆𑀬𑀸𑀥𑀺 𑀘 𑀫𑀤𑁆𑀤𑀢𑀺;

𑀧𑀼𑀭𑀸𑀬𑀁 𑀪𑀺𑀚𑁆𑀚𑀢𑀺 [𑀚𑀭𑀸𑀬 𑀪𑀺𑀚𑁆𑀚𑀢𑁂 (𑀲𑀻.)] 𑀓𑀸𑀬𑁄, 𑀦 𑀫𑁂 𑀓𑀸𑀮𑁄 𑀧𑀫𑀚𑁆𑀚𑀺𑀢𑀼𑀁.

𑁯𑁬.

‘‘𑀬𑀣𑀸𑀪𑀽𑀢𑀫𑀯𑁂𑀓𑁆𑀔𑀦𑁆𑀢𑀻, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀉𑀝𑁆𑀞𑀸𑀲𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀫𑀺𑀢𑁆𑀢𑀸 𑀓𑀸𑀴𑀻 𑀣𑁂𑀭𑀻….

𑁭. 𑀲𑀓𑀼𑀮𑀸𑀣𑁂𑀭𑀻𑀕𑀸𑀣𑀸

𑁯𑁭.

‘‘𑀅𑀕𑀸𑀭𑀲𑁆𑀫𑀺𑀁 ¶ ¶ 𑀯𑀲𑀦𑁆𑀢𑀻𑀳𑀁, 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦 𑀪𑀺𑀓𑁆𑀔𑀼𑀦𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀁.

𑁯𑁮.

‘‘𑀲𑀸𑀳𑀁 𑀧𑀼𑀢𑁆𑀢𑀁 𑀥𑀻𑀢𑀭𑀜𑁆𑀘, 𑀥𑀦𑀥𑀜𑁆𑀜𑀜𑁆𑀘 𑀙𑀟𑁆𑀟𑀺𑀬;

𑀓𑁂𑀲𑁂 𑀙𑁂𑀤𑀸𑀧𑀬𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁯𑁯.

‘‘𑀲𑀺𑀓𑁆𑀔𑀫𑀸𑀦𑀸 ¶ 𑀅𑀳𑀁 𑀲𑀦𑁆𑀢𑀻, 𑀪𑀸𑀯𑁂𑀦𑁆𑀢𑀻 𑀫𑀕𑁆𑀕𑀫𑀜𑁆𑀚𑀲𑀁;

𑀧𑀳𑀸𑀲𑀺𑀁 𑀭𑀸𑀕𑀤𑁄𑀲𑀜𑁆𑀘, 𑀢𑀤𑁂𑀓𑀝𑁆𑀞𑁂 𑀘 𑀆𑀲𑀯𑁂.

𑁧𑁦𑁦.

‘‘𑀪𑀺𑀓𑁆𑀔𑀼𑀦𑀻 𑀉𑀧𑀲𑀫𑁆𑀧𑀚𑁆𑀚, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁 [𑀯𑀺𑀲𑁄𑀥𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼 (𑀲𑀻.)], 𑀯𑀺𑀫𑀮𑀁 𑀲𑀸𑀥𑀼𑀪𑀸𑀯𑀺𑀢𑀁.

𑁧𑁦𑁧.

‘‘𑀲𑀗𑁆𑀔𑀸𑀭𑁂 𑀧𑀭𑀢𑁄 𑀤𑀺𑀲𑁆𑀯𑀸, 𑀳𑁂𑀢𑀼𑀚𑀸𑀢𑁂 𑀧𑀮𑁄𑀓𑀺𑀢𑁂 [𑀧𑀮𑁄𑀓𑀺𑀦𑁂 (𑀓.)];

𑀧𑀳𑀸𑀲𑀺𑀁 𑀆𑀲𑀯𑁂 𑀲𑀩𑁆𑀩𑁂, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺.

… 𑀲𑀓𑀼𑀮𑀸 𑀣𑁂𑀭𑀻….

𑁮. 𑀲𑁄𑀡𑀸𑀣𑁂𑀭𑀻𑀕𑀸𑀣𑀸

𑁧𑁦𑁨.

‘‘𑀤𑀲 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸, 𑀅𑀲𑁆𑀫𑀺𑀁 𑀭𑀽𑀧𑀲𑀫𑀼𑀲𑁆𑀲𑀬𑁂;

𑀢𑀢𑁄𑀳𑀁 𑀤𑀼𑀩𑁆𑀩𑀮𑀸 𑀚𑀺𑀡𑁆𑀡𑀸, 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀁.

𑁧𑁦𑁩.

‘‘𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄;

𑀢𑀲𑁆𑀲𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀓𑁂𑀲𑁂 𑀙𑁂𑀢𑁆𑀯𑀸𑀦 𑀧𑀩𑁆𑀩𑀚𑀺𑀁.

𑁧𑁦𑁪.

‘‘𑀢𑀲𑁆𑀲𑀸 𑀫𑁂 𑀲𑀺𑀓𑁆𑀔𑀫𑀸𑀦𑀸𑀬, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂.

𑁧𑁦𑁫.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 ¶ 𑀪𑀸𑀯𑁂𑀫𑀺, 𑀏𑀓𑀕𑁆𑀕𑀸 𑀲𑀼𑀲𑀫𑀸𑀳𑀺𑀢𑀸;

𑀅𑀦𑀦𑁆𑀢𑀭𑀸𑀯𑀺𑀫𑁄𑀓𑁆𑀔𑀸𑀲𑀺𑀁, 𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑀸.

𑁧𑁦𑁬.

‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸;

𑀥𑀺 ¶ 𑀢𑀯𑀢𑁆𑀣𑀼 𑀚𑀭𑁂 𑀚𑀫𑁆𑀫𑁂, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀲𑁄𑀡𑀸 𑀣𑁂𑀭𑀻….

𑁯. 𑀪𑀤𑁆𑀤𑀸𑀓𑀼𑀡𑁆𑀟𑀮𑀓𑁂𑀲𑀸𑀣𑁂𑀭𑀻𑀕𑀸𑀣𑀸

𑁧𑁦𑁭.

‘‘𑀮𑀽𑀦𑀓𑁂𑀲𑀻 ¶ 𑀧𑀗𑁆𑀓𑀥𑀭𑀻, 𑀏𑀓𑀲𑀸𑀝𑀻 𑀧𑀼𑀭𑁂 𑀘𑀭𑀺𑀁;

𑀅𑀯𑀚𑁆𑀚𑁂 𑀯𑀚𑁆𑀚𑀫𑀢𑀺𑀦𑀻, 𑀯𑀚𑁆𑀚𑁂 𑀘𑀸𑀯𑀚𑁆𑀚𑀤𑀲𑁆𑀲𑀺𑀦𑀻.

𑁧𑁦𑁮.

‘‘𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁧𑁦𑁯.

‘‘𑀦𑀺𑀳𑀘𑁆𑀘 𑀚𑀸𑀡𑀼𑀁 𑀯𑀦𑁆𑀤𑀺𑀢𑁆𑀯𑀸, 𑀲𑀫𑁆𑀫𑀼𑀔𑀸 𑀅𑀜𑁆𑀚𑀮𑀺𑀁 𑀅𑀓𑀁;

‘𑀏𑀳𑀺 𑀪𑀤𑁆𑀤𑁂’𑀢𑀺 𑀫𑀁 𑀅𑀯𑀘, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁧𑁧𑁦.

‘‘𑀘𑀺𑀡𑁆𑀡𑀸 ¶ 𑀅𑀗𑁆𑀕𑀸 𑀘 𑀫𑀕𑀥𑀸, 𑀯𑀚𑁆𑀚𑀻 𑀓𑀸𑀲𑀻 𑀘 𑀓𑁄𑀲𑀮𑀸;

𑀅𑀦𑀡𑀸 𑀧𑀡𑁆𑀡𑀸𑀲𑀯𑀲𑁆𑀲𑀸𑀦𑀺, 𑀭𑀝𑁆𑀞𑀧𑀺𑀡𑁆𑀟𑀁 𑀅𑀪𑀼𑀜𑁆𑀚𑀳𑀁.

𑁧𑁧𑁧.

‘‘𑀧𑀼𑀜𑁆𑀜𑀁 𑀯𑀢 𑀧𑀲𑀯𑀺 𑀩𑀳𑀼𑀁, 𑀲𑀧𑁆𑀧𑀜𑁆𑀜𑁄 𑀯𑀢𑀸𑀬𑀁 𑀉𑀧𑀸𑀲𑀓𑁄;

𑀬𑁄 𑀪𑀤𑁆𑀤𑀸𑀬 𑀘𑀻𑀯𑀭𑀁 𑀅𑀤𑀸𑀲𑀺, 𑀯𑀺𑀧𑁆𑀧𑀫𑀼𑀢𑁆𑀢𑀸𑀬 𑀲𑀩𑁆𑀩𑀕𑀦𑁆𑀣𑁂𑀳𑀻’’𑀢𑀺.

… 𑀪𑀤𑁆𑀤𑀸 𑀓𑀼𑀡𑁆𑀟𑀮𑀓𑁂𑀲𑀸 𑀣𑁂𑀭𑀻….

𑁧𑁦. 𑀧𑀝𑀸𑀘𑀸𑀭𑀸𑀣𑁂𑀭𑀻𑀕𑀸𑀣𑀸

𑁧𑁧𑁨.

‘‘𑀦𑀗𑁆𑀕𑀮𑁂𑀳𑀺 𑀓𑀲𑀁 𑀔𑁂𑀢𑁆𑀢𑀁, 𑀩𑀻𑀚𑀸𑀦𑀺 𑀧𑀯𑀧𑀁 𑀙𑀫𑀸;

𑀧𑀼𑀢𑁆𑀢𑀤𑀸𑀭𑀸𑀦𑀺 𑀧𑁄𑀲𑁂𑀦𑁆𑀢𑀸, 𑀥𑀦𑀁 𑀯𑀺𑀦𑁆𑀤𑀦𑁆𑀢𑀺 𑀫𑀸𑀡𑀯𑀸.

𑁧𑁧𑁩.

‘‘𑀓𑀺𑀫𑀳𑀁 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸;

𑀦𑀺𑀩𑁆𑀩𑀸𑀦𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀓𑀼𑀲𑀻𑀢𑀸 𑀅𑀦𑀼𑀤𑁆𑀥𑀢𑀸.

𑁧𑁧𑁪.

‘‘𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦, 𑀉𑀤𑀓𑁂𑀲𑀼 𑀓𑀭𑁄𑀫𑀳𑀁;

𑀧𑀸𑀤𑁄𑀤𑀓𑀜𑁆𑀘 ¶ 𑀤𑀺𑀲𑁆𑀯𑀸𑀦, 𑀣𑀮𑀢𑁄 𑀦𑀺𑀦𑁆𑀦𑀫𑀸𑀕𑀢𑀁.

𑁧𑁧𑁫.

‘‘𑀢𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑁂𑀲𑀺𑀁, 𑀅𑀲𑁆𑀲𑀁 𑀪𑀤𑁆𑀭𑀁𑀯𑀚𑀸𑀦𑀺𑀬𑀁;

𑀢𑀢𑁄 ¶ 𑀤𑀻𑀧𑀁 𑀕𑀳𑁂𑀢𑁆𑀯𑀸𑀦, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺𑀁 𑀅𑀳𑀁;

𑀲𑁂𑀬𑁆𑀬𑀁 𑀑𑀮𑁄𑀓𑀬𑀺𑀢𑁆𑀯𑀸𑀦, 𑀫𑀜𑁆𑀘𑀓𑀫𑁆𑀳𑀺 𑀉𑀧𑀸𑀯𑀺𑀲𑀺𑀁.

𑁧𑁧𑁬.

‘‘𑀢𑀢𑁄 𑀲𑀽𑀘𑀺𑀁 𑀕𑀳𑁂𑀢𑁆𑀯𑀸𑀦, 𑀯𑀝𑁆𑀝𑀺𑀁 𑀑𑀓𑀲𑁆𑀲𑀬𑀸𑀫𑀳𑀁;

𑀧𑀤𑀻𑀧𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀅𑀳𑀼 𑀘𑁂𑀢𑀲𑁄’’𑀢𑀺.

… 𑀧𑀝𑀸𑀘𑀸𑀭𑀸 𑀣𑁂𑀭𑀻….

𑁧𑁧. 𑀢𑀺𑀁𑀲𑀫𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁧𑁧𑁭.

‘‘‘𑀫𑀼𑀲𑀮𑀸𑀦𑀺 ¶ 𑀕𑀳𑁂𑀢𑁆𑀯𑀸𑀦, 𑀥𑀜𑁆𑀜𑀁 𑀓𑁄𑀝𑁆𑀝𑁂𑀦𑁆𑀢𑀺 𑀫𑀸𑀡𑀯𑀸 [𑀫𑀸𑀦𑀯𑀸 (𑀲𑀻.)];

𑀧𑀼𑀢𑁆𑀢𑀤𑀸𑀭𑀸𑀦𑀺 𑀧𑁄𑀲𑁂𑀦𑁆𑀢𑀸, 𑀥𑀦𑀁 𑀯𑀺𑀦𑁆𑀤𑀦𑁆𑀢𑀺 𑀫𑀸𑀡𑀯𑀸.

𑁧𑁧𑁮.

‘‘‘𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀣;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸, 𑀓𑀭𑁄𑀣 𑀩𑀼𑀤𑁆𑀥𑀲𑀸𑀲𑀦𑀁’.

𑁧𑁧𑁯.

‘‘𑀢𑀲𑁆𑀲𑀸 𑀢𑀸 [𑀢𑀁 (𑀲𑀻.)] 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀝𑀸𑀘𑀸𑀭𑀸𑀬 𑀲𑀸𑀲𑀦𑀁;

𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀼𑀁;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑀸, 𑀅𑀓𑀁𑀲𑀼 𑀩𑀼𑀤𑁆𑀥𑀲𑀸𑀲𑀦𑀁.

𑁧𑁨𑁦.

‘‘𑀭𑀢𑁆𑀢𑀺𑀬𑀸 ¶ 𑀧𑀼𑀭𑀺𑀫𑁂 𑀬𑀸𑀫𑁂, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀼𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀼𑀁;

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀼𑀁.

𑁧𑁨𑁧.

‘‘𑀉𑀝𑁆𑀞𑀸𑀬 𑀧𑀸𑀤𑁂 𑀯𑀦𑁆𑀤𑀺𑀁𑀲𑀼, ‘𑀓𑀢𑀸 𑀢𑁂 𑀅𑀦𑀼𑀲𑀸𑀲𑀦𑀻;

𑀇𑀦𑁆𑀤𑀁𑀯 ¶ 𑀤𑁂𑀯𑀸 𑀢𑀺𑀤𑀲𑀸, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀁;

𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀲𑁆𑀲𑀸𑀫 [𑀯𑀺𑀳𑀭𑀸𑀫 (𑀲𑀻.), 𑀯𑀺𑀳𑀭𑀺𑀲𑁆𑀲𑀸𑀫 (𑀲𑁆𑀬𑀸.)], 𑀢𑁂𑀯𑀺𑀚𑁆𑀚𑀸𑀫𑁆𑀳 𑀅𑀦𑀸𑀲𑀯𑀸’’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀢𑀺𑀁𑀲𑀫𑀢𑁆𑀢𑀸 𑀣𑁂𑀭𑀻 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀸𑀘𑀸𑀭𑀸𑀬 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀽𑀢𑀺.

𑁧𑁨. 𑀘𑀦𑁆𑀤𑀸𑀣𑁂𑀭𑀻𑀕𑀸𑀣𑀸

𑁧𑁨𑁨.

‘‘𑀤𑀼𑀕𑁆𑀕𑀢𑀸𑀳𑀁 𑀧𑀼𑀭𑁂 𑀆𑀲𑀺𑀁, 𑀯𑀺𑀥𑀯𑀸 𑀘 𑀅𑀧𑀼𑀢𑁆𑀢𑀺𑀓𑀸;

𑀯𑀺𑀦𑀸 𑀫𑀺𑀢𑁆𑀢𑁂𑀳𑀺 𑀜𑀸𑀢𑀻𑀳𑀺, 𑀪𑀢𑁆𑀢𑀘𑁄𑀴𑀲𑁆𑀲 𑀦𑀸𑀥𑀺𑀕𑀁.

𑁧𑁨𑁩.

‘‘𑀧𑀢𑁆𑀢𑀁 𑀤𑀡𑁆𑀟𑀜𑁆𑀘 𑀕𑀡𑁆𑀳𑀺𑀢𑁆𑀯𑀸, 𑀪𑀺𑀓𑁆𑀔𑀫𑀸𑀦𑀸 𑀓𑀼𑀮𑀸 𑀓𑀼𑀮𑀁;

𑀲𑀻𑀢𑀼𑀡𑁆𑀳𑁂𑀦 𑀘 𑀟𑀬𑁆𑀳𑀦𑁆𑀢𑀻, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀘𑀸𑀭𑀺𑀳𑀁.

𑁧𑁨𑁪.

‘‘𑀪𑀺𑀓𑁆𑀔𑀼𑀦𑀺𑀁 𑀧𑀼𑀦 𑀤𑀺𑀲𑁆𑀯𑀸𑀦, 𑀅𑀦𑁆𑀦𑀧𑀸𑀦𑀲𑁆𑀲 𑀮𑀸𑀪𑀺𑀦𑀺𑀁;

𑀉𑀧𑀲𑀗𑁆𑀓𑀫𑁆𑀫 𑀅𑀯𑁄𑀘𑀁 [𑀅𑀯𑁄𑀘𑀺𑀁 (𑀓.)], ‘𑀧𑀩𑁆𑀩𑀚𑁆𑀚𑀁 𑀅𑀦𑀕𑀸𑀭𑀺𑀬𑀁’.

𑁧𑁨𑁫.

‘‘𑀲𑀸 ¶ 𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀧𑀩𑁆𑀩𑀸𑀚𑁂𑀲𑀺 𑀧𑀝𑀸𑀘𑀸𑀭𑀸;

𑀢𑀢𑁄 𑀫𑀁 𑀑𑀯𑀤𑀺𑀢𑁆𑀯𑀸𑀦, 𑀧𑀭𑀫𑀢𑁆𑀣𑁂 𑀦𑀺𑀬𑁄𑀚𑀬𑀺.

𑁧𑁨𑁬.

‘‘𑀢𑀲𑁆𑀲𑀸𑀳𑀁 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀓𑀸𑀲𑀺𑀁 𑀅𑀦𑀼𑀲𑀸𑀲𑀦𑀺𑀁;

𑀅𑀫𑁄𑀖𑁄 𑀅𑀬𑁆𑀬𑀸𑀬𑁄𑀯𑀸𑀤𑁄, 𑀢𑁂𑀯𑀺𑀚𑁆𑀚𑀸𑀫𑁆𑀳𑀺 𑀅𑀦𑀸𑀲𑀯𑀸’’𑀢𑀺.

… 𑀘𑀦𑁆𑀤𑀸 𑀣𑁂𑀭𑀻….

𑀧𑀜𑁆𑀘𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁬. 𑀙𑀓𑁆𑀓𑀦𑀺𑀧𑀸𑀢𑁄

𑁧. 𑀧𑀜𑁆𑀘𑀲𑀢𑀫𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁧𑁨𑁭.

‘‘𑀬𑀲𑁆𑀲 ¶ 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀺, 𑀆𑀕𑀢𑀲𑁆𑀲 𑀕𑀢𑀲𑁆𑀲 𑀯𑀸;

𑀢𑀁 ¶ 𑀓𑀼𑀢𑁄 𑀘𑀸𑀕𑀢𑀁 𑀲𑀢𑁆𑀢𑀁 [𑀲𑀦𑁆𑀢𑀁 (𑀲𑀻.), 𑀧𑀼𑀢𑁆𑀢𑀁 (𑀲𑁆𑀬𑀸.)], ‘𑀫𑀫 𑀧𑀼𑀢𑁆𑀢𑁄’𑀢𑀺 𑀭𑁄𑀤𑀲𑀺.

𑁧𑁨𑁮.

‘‘𑀫𑀕𑁆𑀕𑀜𑁆𑀘 𑀔𑁄𑀲𑁆𑀲 [𑀔𑁄’𑀣 (𑀲𑁆𑀬𑀸. 𑀓.)] 𑀚𑀸𑀦𑀸𑀲𑀺, 𑀆𑀕𑀢𑀲𑁆𑀲 𑀕𑀢𑀲𑁆𑀲 𑀯𑀸;

𑀦 𑀦𑀁 𑀲𑀫𑀦𑀼𑀲𑁄𑀘𑁂𑀲𑀺, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄.

𑁧𑁨𑁯.

‘‘𑀅𑀬𑀸𑀘𑀺𑀢𑁄 𑀢𑀢𑀸𑀕𑀘𑁆𑀙𑀺, 𑀦𑀸𑀦𑀼𑀜𑁆𑀜𑀸𑀢𑁄 [𑀅𑀦𑀦𑀼𑀜𑁆𑀜𑀸𑀢𑁄 (𑀲𑀻. 𑀲𑁆𑀬𑀸.)] 𑀇𑀢𑁄 𑀕𑀢𑁄;

𑀓𑀼𑀢𑁄𑀘𑀺 𑀦𑀽𑀦 𑀆𑀕𑀦𑁆𑀢𑁆𑀯𑀸, 𑀯𑀲𑀺𑀢𑁆𑀯𑀸 𑀓𑀢𑀺𑀧𑀸𑀳𑀓𑀁;

𑀇𑀢𑁄𑀧𑀺 𑀅𑀜𑁆𑀜𑁂𑀦 𑀕𑀢𑁄, 𑀢𑀢𑁄𑀧𑀜𑁆𑀜𑁂𑀦 𑀕𑀘𑁆𑀙𑀢𑀺.

𑁧𑁩𑁦.

‘‘𑀧𑁂𑀢𑁄 𑀫𑀦𑀼𑀲𑁆𑀲𑀭𑀽𑀧𑁂𑀦, 𑀲𑀁𑀲𑀭𑀦𑁆𑀢𑁄 𑀕𑀫𑀺𑀲𑁆𑀲𑀢𑀺;

𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄, 𑀓𑀸 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸’’.

𑁧𑁩𑁧.

‘‘𑀅𑀩𑁆𑀩𑀳𑀻 [𑀅𑀩𑁆𑀩𑀼𑀬𑁆𑀳𑀁 (𑀲𑁆𑀬𑀸.)] 𑀯𑀢 𑀫𑁂 𑀲𑀮𑁆𑀮𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀁;

𑀬𑀸 𑀫𑁂 𑀲𑁄𑀓𑀧𑀭𑁂𑀢𑀸𑀬, 𑀧𑀼𑀢𑁆𑀢𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺.

𑁧𑁩𑁨.

‘‘𑀲𑀸𑀚𑁆𑀚 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑀸𑀳𑀁, 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀉𑀧𑁂𑀫𑀺 𑀲𑀭𑀡𑀁 𑀫𑀼𑀦𑀺𑀁’’.

𑀇𑀢𑁆𑀣𑀁 𑀲𑀼𑀤𑀁 𑀧𑀜𑁆𑀘𑀲𑀢𑀫𑀢𑁆𑀢𑀸 𑀣𑁂𑀭𑀻 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂….

𑁨. 𑀯𑀸𑀲𑁂𑀝𑁆𑀞𑀻𑀣𑁂𑀭𑀻𑀕𑀸𑀣𑀸

𑁧𑁩𑁩.

‘‘𑀧𑀼𑀢𑁆𑀢𑀲𑁄𑀓𑁂𑀦𑀳𑀁 𑀅𑀝𑁆𑀝𑀸, 𑀔𑀺𑀢𑁆𑀢𑀘𑀺𑀢𑁆𑀢𑀸 𑀯𑀺𑀲𑀜𑁆𑀜𑀺𑀦𑀻;

𑀦𑀕𑁆𑀕𑀸 𑀧𑀓𑀺𑀡𑁆𑀡𑀓𑁂𑀲𑀻 𑀘, 𑀢𑁂𑀦 𑀢𑁂𑀦 𑀯𑀺𑀘𑀸𑀭𑀺𑀳𑀁.

𑁧𑁩𑁪.

‘‘𑀯𑀻𑀣𑀺 [𑀯𑀲𑀺𑀁 (𑀲𑀻.)] 𑀲𑀗𑁆𑀓𑀸𑀭𑀓𑀽𑀝𑁂𑀲𑀼, 𑀲𑀼𑀲𑀸𑀦𑁂 𑀭𑀣𑀺𑀬𑀸𑀲𑀼 𑀘;

𑀅𑀘𑀭𑀺𑀁 𑀢𑀻𑀡𑀺 𑀯𑀲𑁆𑀲𑀸𑀦𑀺, 𑀔𑀼𑀧𑁆𑀧𑀺𑀧𑀸𑀲𑀸𑀲𑀫𑀧𑁆𑀧𑀺𑀢𑀸.

𑁧𑁩𑁫.

‘‘𑀅𑀣𑀤𑁆𑀤𑀲𑀸𑀲𑀺𑀁 ¶ ¶ 𑀲𑀼𑀕𑀢𑀁, 𑀦𑀕𑀭𑀁 𑀫𑀺𑀣𑀺𑀮𑀁 𑀧𑀢𑀺 [𑀕𑀢𑀁 (𑀓.)];

𑀅𑀤𑀦𑁆𑀢𑀸𑀦𑀁 𑀤𑀫𑁂𑀢𑀸𑀭𑀁, 𑀲𑀫𑁆𑀩𑀼𑀤𑁆𑀥𑀫𑀓𑀼𑀢𑁄𑀪𑀬𑀁.

𑁧𑁩𑁬.

‘‘𑀲𑀘𑀺𑀢𑁆𑀢𑀁 ¶ 𑀧𑀝𑀺𑀮𑀤𑁆𑀥𑀸𑀦, 𑀯𑀦𑁆𑀤𑀺𑀢𑁆𑀯𑀸𑀦 𑀉𑀧𑀸𑀯𑀺𑀲𑀺𑀁;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑁄.

𑁧𑁩𑁭.

‘‘𑀢𑀲𑁆𑀲 ¶ 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀬𑀼𑀜𑁆𑀚𑀦𑁆𑀢𑀻 𑀲𑀢𑁆𑀣𑀼𑀯𑀘𑀦𑁂, 𑀲𑀘𑁆𑀙𑀸𑀓𑀸𑀲𑀺𑀁 𑀧𑀤𑀁 𑀲𑀺𑀯𑀁.

𑁧𑁩𑁮.

‘‘𑀲𑀩𑁆𑀩𑁂 𑀲𑁄𑀓𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀧𑀳𑀻𑀦𑀸 𑀏𑀢𑀤𑀦𑁆𑀢𑀺𑀓𑀸;

𑀧𑀭𑀺𑀜𑁆𑀜𑀸𑀢𑀸 𑀳𑀺 𑀫𑁂 𑀯𑀢𑁆𑀣𑀽, 𑀬𑀢𑁄 𑀲𑁄𑀓𑀸𑀦 𑀲𑀫𑁆𑀪𑀯𑁄’’𑀢𑀺.

… 𑀯𑀸𑀲𑁂𑀝𑁆𑀞𑀻 𑀣𑁂𑀭𑀻….

𑁩. 𑀔𑁂𑀫𑀸𑀣𑁂𑀭𑀻𑀕𑀸𑀣𑀸

𑁧𑁩𑁯.

‘‘𑀤𑀳𑀭𑀸 𑀢𑁆𑀯𑀁 𑀭𑀽𑀧𑀯𑀢𑀻, 𑀅𑀳𑀫𑁆𑀧𑀺 𑀤𑀳𑀭𑁄 𑀬𑀼𑀯𑀸;

𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦 [𑀢𑀽𑀭𑁂𑀦 (𑀓.)], 𑀏𑀳𑀺 𑀔𑁂𑀫𑁂 𑀭𑀫𑀸𑀫𑀲𑁂’’.

𑁧𑁪𑁦.

‘‘𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦, 𑀆𑀢𑀼𑀭𑁂𑀦 𑀧𑀪𑀗𑁆𑀕𑀼𑀦𑀸;

𑀅𑀝𑁆𑀝𑀺𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀓𑀸𑀫𑀢𑀡𑁆𑀳𑀸 𑀲𑀫𑀽𑀳𑀢𑀸.

𑁧𑁪𑁧.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 ‘𑀢𑁆𑀯𑀁 𑀓𑀸𑀫𑀭𑀢𑀺𑀁’ 𑀩𑁆𑀭𑀽𑀲𑀺, ‘𑀅𑀭𑀢𑀻’ 𑀤𑀸𑀦𑀺 𑀲𑀸 𑀫𑀫.

𑁧𑁪𑁨.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓.

𑁧𑁪𑁩.

‘‘𑀦𑀓𑁆𑀔𑀢𑁆𑀢𑀸𑀦𑀺 𑀦𑀫𑀲𑁆𑀲𑀦𑁆𑀢𑀸, 𑀅𑀕𑁆𑀕𑀺𑀁 𑀧𑀭𑀺𑀘𑀭𑀁 𑀯𑀦𑁂;

𑀬𑀣𑀸𑀪𑀼𑀘𑁆𑀘𑀫𑀚𑀸𑀦𑀦𑁆𑀢𑀸, 𑀩𑀸𑀮𑀸 𑀲𑀼𑀤𑁆𑀥𑀺𑀫𑀫𑀜𑁆𑀜𑀣.

𑁧𑁪𑁪.

‘‘𑀅𑀳𑀜𑁆𑀘 𑀔𑁄 𑀦𑀫𑀲𑁆𑀲𑀦𑁆𑀢𑀻, 𑀲𑀫𑁆𑀩𑀼𑀤𑁆𑀥𑀁 𑀧𑀼𑀭𑀺𑀲𑀼𑀢𑁆𑀢𑀫𑀁;

𑀧𑀫𑀼𑀢𑁆𑀢𑀸 [𑀧𑀭𑀺𑀫𑀼𑀢𑁆𑀢𑀸 (𑀲𑀻. 𑀲𑁆𑀬𑀸.)] 𑀲𑀩𑁆𑀩𑀤𑀼𑀓𑁆𑀔𑁂𑀳𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀓𑀸’’𑀢𑀺.

… 𑀔𑁂𑀫𑀸 𑀣𑁂𑀭𑀻….

𑁪. 𑀲𑀼𑀚𑀸𑀢𑀸𑀣𑁂𑀭𑀻𑀕𑀸𑀣𑀸

𑁧𑁪𑁫.

‘‘𑀅𑀮𑀗𑁆𑀓𑀢𑀸 ¶ 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑁄𑀓𑁆𑀔𑀺𑀢𑀸;

𑀲𑀩𑁆𑀩𑀸𑀪𑀭𑀡𑀲𑀜𑁆𑀙𑀦𑁆𑀦𑀸, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸.

𑁧𑁪𑁬.

‘‘𑀅𑀦𑁆𑀦𑀁 ¶ 𑀧𑀸𑀦𑀜𑁆𑀘 𑀆𑀤𑀸𑀬, 𑀔𑀚𑁆𑀚𑀁 𑀪𑁄𑀚𑁆𑀚𑀁 𑀅𑀦𑀧𑁆𑀧𑀓𑀁;

𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀉𑀬𑁆𑀬𑀸𑀦𑀫𑀪𑀺𑀳𑀸𑀭𑀬𑀺𑀁.

𑁧𑁪𑁭.

‘‘𑀢𑀢𑁆𑀣 ¶ 𑀭𑀫𑀺𑀢𑁆𑀯𑀸 𑀓𑀻𑀴𑀺𑀢𑁆𑀯𑀸, 𑀆𑀕𑀘𑁆𑀙𑀦𑁆𑀢𑀻 𑀲𑀓𑀁 𑀖𑀭𑀁;

𑀯𑀺𑀳𑀸𑀭𑀁 𑀤𑀝𑁆𑀞𑀼𑀁 𑀧𑀸𑀯𑀺𑀲𑀺𑀁, 𑀲𑀸𑀓𑁂𑀢𑁂 𑀅𑀜𑁆𑀚𑀦𑀁 𑀯𑀦𑀁.

𑁧𑁪𑁮.

‘‘𑀤𑀺𑀲𑁆𑀯𑀸𑀦 ¶ 𑀮𑁄𑀓𑀧𑀚𑁆𑀚𑁄𑀢𑀁, 𑀯𑀦𑁆𑀤𑀺𑀢𑁆𑀯𑀸𑀦 𑀉𑀧𑀸𑀯𑀺𑀲𑀺𑀁;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

𑁧𑁪𑁯.

‘‘𑀲𑀼𑀢𑁆𑀯𑀸 𑀘 𑀔𑁄 𑀫𑀳𑁂𑀲𑀺𑀲𑁆𑀲, 𑀲𑀘𑁆𑀘𑀁 𑀲𑀫𑁆𑀧𑀝𑀺𑀯𑀺𑀚𑁆𑀛𑀳𑀁;

𑀢𑀢𑁆𑀣𑁂𑀯 𑀯𑀺𑀭𑀚𑀁 𑀥𑀫𑁆𑀫𑀁, 𑀨𑀼𑀲𑀬𑀺𑀁 𑀅𑀫𑀢𑀁 𑀧𑀤𑀁.

𑁧𑁫𑁦.

‘‘𑀢𑀢𑁄 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀫𑁄𑀖𑀁 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺.

… 𑀲𑀼𑀚𑀸𑀢𑀸 𑀣𑁂𑀭𑀻….

𑁫. 𑀅𑀦𑁄𑀧𑀫𑀸𑀣𑁂𑀭𑀻𑀕𑀸𑀣𑀸

𑁧𑁫𑁧.

‘‘𑀉𑀘𑁆𑀘𑁂 𑀓𑀼𑀮𑁂 𑀅𑀳𑀁 𑀚𑀸𑀢𑀸, 𑀩𑀳𑀼𑀯𑀺𑀢𑁆𑀢𑁂 𑀫𑀳𑀤𑁆𑀥𑀦𑁂;

𑀯𑀡𑁆𑀡𑀭𑀽𑀧𑁂𑀦 𑀲𑀫𑁆𑀧𑀦𑁆𑀦𑀸, 𑀥𑀻𑀢𑀸 𑀫𑀚𑁆𑀛𑀲𑁆𑀲 [𑀫𑁂𑀖𑀲𑁆𑀲 (𑀲𑀻.), 𑀫𑁂𑀖𑀺𑀲𑁆𑀲 (𑀲𑁆𑀬𑀸.)] 𑀅𑀢𑁆𑀭𑀚𑀸.

𑁧𑁫𑁨.

‘‘𑀧𑀢𑁆𑀣𑀺𑀢𑀸 𑀭𑀸𑀚𑀧𑀼𑀢𑁆𑀢𑁂𑀳𑀺, 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺 𑀕𑀺𑀚𑁆𑀛𑀺𑀢𑀸 [𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺 𑀪𑀺𑀚𑁆𑀛𑀺𑀢𑀸 (𑀲𑀻.)];

𑀧𑀺𑀢𑀼 𑀫𑁂 𑀧𑁂𑀲𑀬𑀻 𑀤𑀽𑀢𑀁, 𑀤𑁂𑀣 𑀫𑀬𑁆𑀳𑀁 𑀅𑀦𑁄𑀧𑀫𑀁.

𑁧𑁫𑁩.

‘‘𑀬𑀢𑁆𑀢𑀓𑀁 𑀢𑀼𑀮𑀺𑀢𑀸 𑀏𑀲𑀸, 𑀢𑀼𑀬𑁆𑀳𑀁 𑀥𑀻𑀢𑀸 𑀅𑀦𑁄𑀧𑀫𑀸;

𑀢𑀢𑁄 𑀅𑀝𑁆𑀞𑀕𑀼𑀡𑀁 𑀤𑀲𑁆𑀲𑀁, 𑀳𑀺𑀭𑀜𑁆𑀜𑀁 𑀭𑀢𑀦𑀸𑀦𑀺 𑀘.

𑁧𑁫𑁪.

‘‘𑀲𑀸𑀳𑀁 ¶ 𑀤𑀺𑀲𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀅𑀦𑀼𑀢𑁆𑀢𑀭𑀁;

𑀢𑀲𑁆𑀲 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁧𑁫𑁫.

‘‘𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑁄;

𑀦𑀺𑀲𑀺𑀦𑁆𑀦𑀸 𑀆𑀲𑀦𑁂 𑀢𑀲𑁆𑀫𑀺𑀁, 𑀨𑀼𑀲𑀬𑀺𑀁 𑀢𑀢𑀺𑀬𑀁 𑀨𑀮𑀁.

𑁧𑁫𑁬.

‘‘𑀢𑀢𑁄 𑀓𑁂𑀲𑀸𑀦𑀺 𑀙𑁂𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀚𑁆𑀚 𑀫𑁂 𑀲𑀢𑁆𑀢𑀫𑀻 𑀭𑀢𑁆𑀢𑀺, 𑀬𑀢𑁄 𑀢𑀡𑁆𑀳𑀸 𑀯𑀺𑀲𑁄𑀲𑀺𑀢𑀸’’𑀢𑀺.

… 𑀅𑀦𑁄𑀧𑀫𑀸 𑀣𑁂𑀭𑀻….

𑁬. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀕𑀸𑀣𑀸

𑁧𑁫𑁭.

‘‘𑀩𑀼𑀤𑁆𑀥 ¶ 𑀯𑀻𑀭 𑀦𑀫𑁄 𑀢𑁆𑀬𑀢𑁆𑀣𑀼, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫;

𑀬𑁄 𑀫𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀲𑀺, 𑀅𑀜𑁆𑀜𑀜𑁆𑀘 𑀩𑀳𑀼𑀓𑀁 𑀚𑀦𑀁.

𑁧𑁫𑁮.

‘‘𑀲𑀩𑁆𑀩𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀢𑀁, 𑀳𑁂𑀢𑀼𑀢𑀡𑁆𑀳𑀸 𑀯𑀺𑀲𑁄𑀲𑀺𑀢𑀸;

𑀪𑀸𑀯𑀺𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 [𑀅𑀭𑀺𑀬𑀝𑁆𑀞𑀗𑁆𑀕𑀺𑀓𑁄 (𑀲𑀻. 𑀓.), 𑀪𑀸𑀯𑀺𑀢𑀝𑁆𑀞𑀗𑁆𑀕𑀺𑀓𑁄 (𑀲𑁆𑀬𑀸.)] 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀨𑀼𑀲𑀺𑀢𑁄 𑀫𑀬𑀸.

𑁧𑁫𑁯.

‘‘𑀫𑀸𑀢𑀸 ¶ ¶ 𑀧𑀼𑀢𑁆𑀢𑁄 𑀧𑀺𑀢𑀸 𑀪𑀸𑀢𑀸, 𑀅𑀬𑁆𑀬𑀓𑀸 𑀘 𑀧𑀼𑀭𑁂 𑀅𑀳𑀼𑀁;

𑀬𑀣𑀸𑀪𑀼𑀘𑁆𑀘𑀫𑀚𑀸𑀦𑀦𑁆𑀢𑀻, 𑀲𑀁𑀲𑀭𑀺𑀁𑀳𑀁 𑀅𑀦𑀺𑀩𑁆𑀩𑀺𑀲𑀁.

𑁧𑁬𑁦.

‘‘𑀤𑀺𑀝𑁆𑀞𑁄 𑀳𑀺 𑀫𑁂 𑀲𑁄 𑀪𑀕𑀯𑀸, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁬𑁧.

‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂;

𑀲𑀫𑀕𑁆𑀕𑁂 𑀲𑀸𑀯𑀓𑁂 𑀧𑀲𑁆𑀲𑁂, 𑀏𑀲𑀸 𑀩𑀼𑀤𑁆𑀥𑀸𑀦 𑀯𑀦𑁆𑀤𑀦𑀸.

𑁧𑁬𑁨.

‘‘𑀩𑀳𑀽𑀦𑀁 [𑀩𑀳𑀼𑀦𑁆𑀦𑀁 (𑀲𑀻. 𑀲𑁆𑀬𑀸.)] 𑀯𑀢 𑀅𑀢𑁆𑀣𑀸𑀬, 𑀫𑀸𑀬𑀸 𑀚𑀦𑀬𑀺 𑀕𑁄𑀢𑀫𑀁;

𑀩𑁆𑀬𑀸𑀥𑀺𑀫𑀭𑀡𑀢𑀼𑀦𑁆𑀦𑀸𑀦𑀁, 𑀤𑀼𑀓𑁆𑀔𑀓𑁆𑀔𑀦𑁆𑀥𑀁 𑀩𑁆𑀬𑀧𑀸𑀦𑀼𑀤𑀻’’𑀢𑀺.

… 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀣𑁂𑀭𑀻….

𑁭. 𑀕𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁧𑁬𑁩.

‘‘𑀕𑀼𑀢𑁆𑀢𑁂 ¶ 𑀬𑀤𑀢𑁆𑀣𑀁 𑀧𑀩𑁆𑀩𑀚𑁆𑀚𑀸, 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀲𑀼𑀁 𑀧𑀺𑀬𑀁;

𑀢𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀳𑀺, 𑀫𑀸 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀫𑀺.

𑁧𑁬𑁪.

‘‘𑀘𑀺𑀢𑁆𑀢𑁂𑀦 𑀯𑀜𑁆𑀘𑀺𑀢𑀸 𑀲𑀢𑁆𑀢𑀸, 𑀫𑀸𑀭𑀲𑁆𑀲 𑀯𑀺𑀲𑀬𑁂 𑀭𑀢𑀸;

𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀦𑁆𑀢𑀺 𑀅𑀯𑀺𑀤𑁆𑀤𑀲𑀽.

𑁧𑁬𑁫.

‘‘𑀓𑀸𑀫𑀘𑁆𑀙𑀦𑁆𑀤𑀜𑁆𑀘 𑀩𑁆𑀬𑀸𑀧𑀸𑀤𑀁, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑁂𑀯 𑀘;

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁, 𑀯𑀺𑀘𑀺𑀓𑀺𑀘𑁆𑀙𑀜𑁆𑀘 𑀧𑀜𑁆𑀘𑀫𑀁.

𑁧𑁬𑁬.

‘‘𑀲𑀁𑀬𑁄𑀚𑀦𑀸𑀦𑀺 𑀏𑀢𑀸𑀦𑀺, 𑀧𑀚𑀳𑀺𑀢𑁆𑀯𑀸𑀦 𑀪𑀺𑀓𑁆𑀔𑀼𑀦𑀻;

𑀑𑀭𑀫𑁆𑀪𑀸𑀕𑀫𑀦𑀻𑀬𑀸𑀦𑀺, 𑀦𑀬𑀺𑀤𑀁 𑀧𑀼𑀦𑀭𑁂𑀳𑀺𑀲𑀺.

𑁧𑁬𑁭.

‘‘𑀭𑀸𑀕𑀁 𑀫𑀸𑀦𑀁 𑀅𑀯𑀺𑀚𑁆𑀚𑀜𑁆𑀘, 𑀉𑀤𑁆𑀥𑀘𑁆𑀘𑀜𑁆𑀘 𑀯𑀺𑀯𑀚𑁆𑀚𑀺𑀬;

𑀲𑀁𑀬𑁄𑀚𑀦𑀸𑀦𑀺 𑀙𑁂𑀢𑁆𑀯𑀸𑀦, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀲𑀺.

𑁧𑁬𑁮.

‘‘𑀔𑁂𑀧𑁂𑀢𑁆𑀯𑀸 ¶ 𑀚𑀸𑀢𑀺𑀲𑀁𑀲𑀸𑀭𑀁, 𑀧𑀭𑀺𑀜𑁆𑀜𑀸𑀬 𑀧𑀼𑀦𑀩𑁆𑀪𑀯𑀁;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀢𑀻’’𑀢𑀺.

… 𑀕𑀼𑀢𑁆𑀢𑀸 𑀣𑁂𑀭𑀻….

𑁮. 𑀯𑀺𑀚𑀬𑀸𑀣𑁂𑀭𑀻𑀕𑀸𑀣𑀸

𑁧𑁬𑁯.

‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀅𑀮𑀤𑁆𑀥𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁, 𑀘𑀺𑀢𑁆𑀢𑁂 𑀅𑀯𑀲𑀯𑀢𑁆𑀢𑀺𑀦𑀻.

𑁧𑁭𑁦.

‘‘𑀪𑀺𑀓𑁆𑀔𑀼𑀦𑀺𑀁 ¶ 𑀉𑀧𑀲𑀗𑁆𑀓𑀫𑁆𑀫, 𑀲𑀓𑁆𑀓𑀘𑁆𑀘𑀁 𑀧𑀭𑀺𑀧𑀼𑀘𑁆𑀙𑀳𑀁;

𑀲𑀸 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀥𑀸𑀢𑀼𑀆𑀬𑀢𑀦𑀸𑀦𑀺 𑀘.

𑁧𑁭𑁧.

‘‘𑀘𑀢𑁆𑀢𑀸𑀭𑀺 ¶ 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀩𑁄𑀚𑁆𑀛𑀗𑁆𑀕𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁧𑁭𑁨.

‘‘𑀢𑀲𑁆𑀲𑀸𑀳𑀁 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀓𑀭𑁄𑀦𑁆𑀢𑀻 𑀅𑀦𑀼𑀲𑀸𑀲𑀦𑀺𑀁;

𑀭𑀢𑁆𑀢𑀺𑀬𑀸 𑀧𑀼𑀭𑀺𑀫𑁂 𑀬𑀸𑀫𑁂, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁.

𑁧𑁭𑁩.

‘‘𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁;

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀺𑀁.

𑁧𑁭𑁪.

‘‘𑀧𑀻𑀢𑀺𑀲𑀼𑀔𑁂𑀦 𑀘 𑀓𑀸𑀬𑀁, 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁 𑀢𑀤𑀸;

𑀲𑀢𑁆𑀢𑀫𑀺𑀬𑀸 𑀧𑀸𑀤𑁂 𑀧𑀲𑀸𑀭𑁂𑀲𑀺𑀁, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀺𑀬𑀸’’𑀢𑀺.

… 𑀯𑀺𑀚𑀬𑀸 𑀣𑁂𑀭𑀻….

𑀙𑀓𑁆𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁭. 𑀲𑀢𑁆𑀢𑀓𑀦𑀺𑀧𑀸𑀢𑁄

𑁧. 𑀉𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸

𑁧𑁭𑁫.

‘‘‘𑀫𑀼𑀲𑀮𑀸𑀦𑀺 ¶ 𑀕𑀳𑁂𑀢𑁆𑀯𑀸𑀦, 𑀥𑀜𑁆𑀜𑀁 𑀓𑁄𑀝𑁆𑀝𑁂𑀦𑁆𑀢𑀺 𑀫𑀸𑀡𑀯𑀸;

𑀧𑀼𑀢𑁆𑀢𑀤𑀸𑀭𑀸𑀦𑀺 𑀧𑁄𑀲𑁂𑀦𑁆𑀢𑀸, 𑀥𑀦𑀁 𑀯𑀺𑀦𑁆𑀤𑀦𑁆𑀢𑀺 𑀫𑀸𑀡𑀯𑀸.

𑁧𑁭𑁬.

‘‘‘𑀖𑀝𑁂𑀣 ¶ 𑀩𑀼𑀤𑁆𑀥𑀲𑀸𑀲𑀦𑁂, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀔𑀺𑀧𑁆𑀧𑀁 𑀧𑀸𑀤𑀸𑀦𑀺 𑀥𑁄𑀯𑀺𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀣.

𑁧𑁭𑁭.

‘‘‘𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀦, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀧𑀘𑁆𑀘𑀯𑁂𑀓𑁆𑀔𑀣 𑀲𑀗𑁆𑀔𑀸𑀭𑁂, 𑀧𑀭𑀢𑁄 𑀦𑁄 𑀘 𑀅𑀢𑁆𑀢𑀢𑁄’.

𑁧𑁭𑁮.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀝𑀸𑀘𑀸𑀭𑀸𑀦𑀼𑀲𑀸𑀲𑀦𑀺𑀁;

𑀧𑀸𑀤𑁂 𑀧𑀓𑁆𑀔𑀸𑀮𑀬𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑁂 𑀉𑀧𑀸𑀯𑀺𑀲𑀺𑀁.

𑁧𑁭𑁯.

‘‘𑀭𑀢𑁆𑀢𑀺𑀬𑀸 ¶ 𑀧𑀼𑀭𑀺𑀫𑁂 𑀬𑀸𑀫𑁂, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁.

𑁧𑁮𑁦.

‘‘𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀓𑁆𑀔𑀦𑁆𑀥𑀁 𑀧𑀤𑀸𑀮𑀬𑀺𑀁;

𑀢𑁂𑀯𑀺𑀚𑁆𑀚𑀸 𑀅𑀣 𑀯𑀼𑀝𑁆𑀞𑀸𑀲𑀺𑀁, 𑀓𑀢𑀸 𑀢𑁂 𑀅𑀦𑀼𑀲𑀸𑀲𑀦𑀻.

𑁧𑁮𑁧.

‘‘𑀲𑀓𑁆𑀓𑀁𑀯 𑀤𑁂𑀯𑀸 𑀢𑀺𑀤𑀲𑀸, 𑀲𑀗𑁆𑀕𑀸𑀫𑁂 𑀅𑀧𑀭𑀸𑀚𑀺𑀢𑀁;

𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀲𑁆𑀲𑀸𑀫𑀺, 𑀢𑁂𑀯𑀺𑀚𑁆𑀚𑀸𑀫𑁆𑀳𑀺 𑀅𑀦𑀸𑀲𑀯𑀸’’.

… 𑀉𑀢𑁆𑀢𑀭𑀸 𑀣𑁂𑀭𑀻….

𑁨. 𑀘𑀸𑀮𑀸𑀣𑁂𑀭𑀻𑀕𑀸𑀣𑀸

𑁧𑁮𑁨.

‘‘𑀲𑀢𑀺𑀁 ¶ 𑀉𑀧𑀝𑁆𑀞𑀧𑁂𑀢𑁆𑀯𑀸𑀦, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀧𑀝𑀺𑀯𑀺𑀚𑁆𑀛𑀺 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀁’’.

𑁧𑁮𑁩.

‘‘𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀺, 𑀲𑀫𑀡𑀻 𑀯𑀺𑀬 𑀤𑀺𑀲𑁆𑀲𑀲𑀺;

𑀦 𑀘 𑀭𑁄𑀘𑁂𑀲𑀺 𑀧𑀸𑀲𑀡𑁆𑀟𑁂, 𑀓𑀺𑀫𑀺𑀤𑀁 𑀘𑀭𑀲𑀺 𑀫𑁄𑀫𑀼𑀳𑀸’’.

𑁧𑁮𑁪.

‘‘𑀇𑀢𑁄 𑀩𑀳𑀺𑀤𑁆𑀥𑀸 𑀧𑀸𑀲𑀡𑁆𑀟𑀸, 𑀤𑀺𑀝𑁆𑀞𑀺𑀬𑁄 𑀉𑀧𑀦𑀺𑀲𑁆𑀲𑀺𑀢𑀸;

𑀦 𑀢𑁂 𑀥𑀫𑁆𑀫𑀁 𑀯𑀺𑀚𑀸𑀦𑀦𑁆𑀢𑀺, 𑀦 𑀢𑁂 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸.

𑁧𑁮𑁫.

‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄, 𑀩𑀼𑀤𑁆𑀥𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀤𑀺𑀝𑁆𑀞𑀻𑀦𑀁 𑀲𑀫𑀢𑀺𑀓𑁆𑀓𑀫𑀁.

𑁧𑁮𑁬.

‘‘𑀤𑀼𑀓𑁆𑀔𑀁 ¶ 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁧𑁮𑁭.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁮𑁮.

‘‘𑀲𑀩𑁆𑀩𑀢𑁆𑀣 ¶ ¶ 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓’’.

… 𑀘𑀸𑀮𑀸 𑀣𑁂𑀭𑀻….

𑁩. 𑀉𑀧𑀘𑀸𑀮𑀸𑀣𑁂𑀭𑀻𑀕𑀸𑀣𑀸

𑁧𑁮𑁯.

‘‘𑀲𑀢𑀺𑀫𑀢𑀻 𑀘𑀓𑁆𑀔𑀼𑀫𑀢𑀻, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀧𑀝𑀺𑀯𑀺𑀚𑁆𑀛𑀺𑀁 𑀧𑀤𑀁 𑀲𑀦𑁆𑀢𑀁, 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑀁’’.

𑁧𑁯𑁦.

‘‘𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺, 𑀚𑀸𑀢𑁄 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’.

𑁧𑁯𑁧.

‘‘𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀳𑀢𑁆𑀣𑀧𑀸𑀤𑀸𑀦 𑀙𑁂𑀤𑀦𑀁;

𑀯𑀥𑀩𑀦𑁆𑀥𑀧𑀭𑀺𑀓𑁆𑀮𑁂𑀲𑀁, 𑀚𑀸𑀢𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁧𑁯𑁨.

‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄, 𑀲𑀫𑁆𑀩𑀼𑀤𑁆𑀥𑁄 𑀅𑀧𑀭𑀸𑀚𑀺𑀢𑁄;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀚𑀸𑀢𑀺𑀬𑀸 𑀲𑀫𑀢𑀺𑀓𑁆𑀓𑀫𑀁.

𑁧𑁯𑁩.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁧𑁯𑁪.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁯𑁫.

‘‘𑀲𑀩𑁆𑀩𑀢𑁆𑀣 ¶ 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓’’.

… 𑀉𑀧𑀘𑀸𑀮𑀸 𑀣𑁂𑀭𑀻….

𑀲𑀢𑁆𑀢𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁮. 𑀅𑀝𑁆𑀞𑀓𑀦𑀺𑀧𑀸𑀢𑁄

𑁧. 𑀲𑀻𑀲𑀽𑀧𑀘𑀸𑀮𑀸𑀣𑁂𑀭𑀻𑀕𑀸𑀣𑀸

𑁧𑁯𑁬.

‘‘𑀪𑀺𑀓𑁆𑀔𑀼𑀦𑀻 ¶ ¶ ¶ 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀸;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀅𑀲𑁂𑀘𑀦𑀓𑀫𑁄𑀚𑀯𑀁’’.

𑁧𑁯𑁭.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀻𑀥𑁂𑀳𑀺, 𑀬𑀢𑁆𑀣 𑀢𑁂 𑀯𑀼𑀲𑀺𑀢𑀁 𑀧𑀼𑀭𑁂’’.

𑁧𑁯𑁮.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄.

𑁧𑁯𑁯.

‘‘𑀓𑀸𑀮𑀁 𑀓𑀸𑀮𑀁 𑀪𑀯𑀸𑀪𑀯𑀁, 𑀲𑀓𑁆𑀓𑀸𑀬𑀲𑁆𑀫𑀺𑀁 𑀧𑀼𑀭𑀓𑁆𑀔𑀢𑀸;

𑀅𑀯𑀻𑀢𑀺𑀯𑀢𑁆𑀢𑀸 𑀲𑀓𑁆𑀓𑀸𑀬𑀁, 𑀚𑀸𑀢𑀺𑀫𑀭𑀡𑀲𑀸𑀭𑀺𑀦𑁄.

𑁨𑁦𑁦.

‘‘𑀲𑀩𑁆𑀩𑁄 𑀆𑀤𑀻𑀧𑀺𑀢𑁄 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀤𑀻𑀧𑀺𑀢𑁄;

𑀲𑀩𑁆𑀩𑁄 𑀧𑀚𑁆𑀚𑀮𑀺𑀢𑁄 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀓𑀫𑁆𑀧𑀺𑀢𑁄.

𑁨𑁦𑁧.

‘‘𑀅𑀓𑀫𑁆𑀧𑀺𑀬𑀁 𑀅𑀢𑀼𑀮𑀺𑀬𑀁, 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁;

𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄.

𑁨𑁦𑁨.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁦𑁩.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓’’.

… 𑀲𑀻𑀲𑀽𑀧𑀘𑀸𑀮𑀸 𑀣𑁂𑀭𑀻….

𑀅𑀝𑁆𑀞𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁯. 𑀦𑀯𑀓𑀦𑀺𑀧𑀸𑀢𑁄

𑁧. 𑀯𑀟𑁆𑀠𑀫𑀸𑀢𑀼𑀣𑁂𑀭𑀻𑀕𑀸𑀣𑀸

𑁨𑁦𑁪.

‘‘𑀫𑀸 ¶ ¶ ¶ 𑀲𑀼 𑀢𑁂 𑀯𑀟𑁆𑀠 𑀮𑁄𑀓𑀫𑁆𑀳𑀺, 𑀯𑀦𑀣𑁄 𑀆𑀳𑀼 𑀓𑀼𑀤𑀸𑀘𑀦𑀁;

𑀫𑀸 𑀧𑀼𑀢𑁆𑀢𑀓 𑀧𑀼𑀦𑀧𑁆𑀧𑀼𑀦𑀁, 𑀅𑀳𑀼 𑀤𑀼𑀓𑁆𑀔𑀲𑁆𑀲 𑀪𑀸𑀕𑀺𑀫𑀸.

𑁨𑁦𑁫.

‘‘𑀲𑀼𑀔𑀜𑁆𑀳𑀺 ¶ 𑀯𑀟𑁆𑀠 𑀫𑀼𑀦𑀬𑁄, 𑀅𑀦𑁂𑀚𑀸 𑀙𑀺𑀦𑁆𑀦𑀲𑀁𑀲𑀬𑀸;

𑀲𑀻𑀢𑀺𑀪𑀽𑀢𑀸 𑀤𑀫𑀧𑁆𑀧𑀢𑁆𑀢𑀸, 𑀯𑀺𑀳𑀭𑀦𑁆𑀢𑀺 𑀅𑀦𑀸𑀲𑀯𑀸.

𑁨𑁦𑁬.

‘‘𑀢𑁂𑀳𑀸𑀦𑀼𑀘𑀺𑀡𑁆𑀡𑀁 𑀇𑀲𑀻𑀪𑀺, 𑀫𑀕𑁆𑀕𑀁 𑀤𑀲𑁆𑀲𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀢𑁆𑀯𑀁 𑀯𑀟𑁆𑀠 𑀅𑀦𑀼𑀩𑁆𑀭𑀽𑀳𑀬’’.

𑁨𑁦𑁭.

‘‘𑀯𑀺𑀲𑀸𑀭𑀤𑀸𑀯 𑀪𑀡𑀲𑀺, 𑀏𑀢𑀫𑀢𑁆𑀣𑀁 𑀚𑀦𑁂𑀢𑁆𑀢𑀺 𑀫𑁂;

𑀫𑀜𑁆𑀜𑀸𑀫𑀺 𑀦𑀽𑀦 𑀫𑀸𑀫𑀺𑀓𑁂, 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀺’’.

𑁨𑁦𑁮.

‘‘𑀬𑁂 𑀓𑁂𑀘𑀺 𑀯𑀟𑁆𑀠 𑀲𑀗𑁆𑀔𑀸𑀭𑀸, 𑀳𑀻𑀦𑀸 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸;

𑀅𑀡𑀽𑀧𑀺 𑀅𑀡𑀼𑀫𑀢𑁆𑀢𑁄𑀧𑀺, 𑀯𑀦𑀣𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁨𑁦𑁯.

‘‘𑀲𑀩𑁆𑀩𑁂 𑀫𑁂 𑀆𑀲𑀯𑀸 𑀔𑀻𑀡𑀸, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀛𑀸𑀬𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑁨𑁧𑁦.

‘‘𑀉𑀴𑀸𑀭𑀁 𑀯𑀢 𑀫𑁂 𑀫𑀸𑀢𑀸, 𑀧𑀢𑁄𑀤𑀁 𑀲𑀫𑀯𑀲𑁆𑀲𑀭𑀺;

𑀧𑀭𑀫𑀢𑁆𑀣𑀲𑀜𑁆𑀳𑀺𑀢𑀸 𑀕𑀸𑀣𑀸, 𑀬𑀣𑀸𑀧𑀺 𑀅𑀦𑀼𑀓𑀫𑁆𑀧𑀺𑀓𑀸.

𑁨𑁧𑁧.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀦𑀼𑀲𑀺𑀝𑁆𑀞𑀺𑀁 𑀚𑀦𑁂𑀢𑁆𑀢𑀺𑀬𑀸;

𑀥𑀫𑁆𑀫𑀲𑀁𑀯𑁂𑀕𑀫𑀸𑀧𑀸𑀤𑀺𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸.

𑁨𑁧𑁨.

‘‘𑀲𑁄𑀳𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄;

𑀫𑀸𑀢𑀭𑀸 𑀘𑁄𑀤𑀺𑀢𑁄 𑀲𑀦𑁆𑀢𑁄, 𑀅𑀨𑀼𑀲𑀺𑀁 𑀲𑀦𑁆𑀢𑀺𑀫𑀼𑀢𑁆𑀢𑀫𑀁’’.

… 𑀯𑀟𑁆𑀠𑀫𑀸𑀢𑀸 𑀣𑁂𑀭𑀻….

𑀦𑀯𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁦. 𑀏𑀓𑀸𑀤𑀲𑀦𑀺𑀧𑀸𑀢𑁄

𑁧. 𑀓𑀺𑀲𑀸𑀕𑁄𑀢𑀫𑀻𑀣𑁂𑀭𑀻𑀕𑀸𑀣𑀸

𑁨𑁧𑁩.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 ¶ ¶ ¶ 𑀫𑀼𑀦𑀺𑀦𑀸, 𑀮𑁄𑀓𑀁 𑀆𑀤𑀺𑀲𑁆𑀲 𑀯𑀡𑁆𑀡𑀺𑀢𑀸;

𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑁄, 𑀅𑀧𑀺 𑀩𑀸𑀮𑁄 𑀧𑀡𑁆𑀟𑀺𑀢𑁄 𑀅𑀲𑁆𑀲.

𑁨𑁧𑁪.

‘‘𑀪𑀚𑀺𑀢𑀩𑁆𑀩𑀸 𑀲𑀧𑁆𑀧𑀼𑀭𑀺𑀲𑀸, 𑀧𑀜𑁆𑀜𑀸 𑀢𑀣𑀸 𑀯𑀟𑁆𑀠𑀢𑀺 𑀪𑀚𑀦𑁆𑀢𑀸𑀦𑀁;

𑀪𑀚𑀫𑀸𑀦𑁄 𑀲𑀧𑁆𑀧𑀼𑀭𑀺𑀲𑁂, 𑀲𑀩𑁆𑀩𑁂𑀳𑀺𑀧𑀺 𑀤𑀼𑀓𑁆𑀔𑁂𑀳𑀺 𑀧𑀫𑀼𑀘𑁆𑀘𑁂𑀬𑁆𑀬.

𑁨𑁧𑁫.

‘‘𑀤𑀼𑀓𑁆𑀔𑀜𑁆𑀘 𑀯𑀺𑀚𑀸𑀦𑁂𑀬𑁆𑀬, 𑀤𑀼𑀓𑁆𑀔𑀲𑁆𑀲 𑀘 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁;

𑀅𑀝𑁆𑀞𑀗𑁆𑀕𑀺𑀓𑀜𑁆𑀘 𑀫𑀕𑁆𑀕𑀁, 𑀘𑀢𑁆𑀢𑀸𑀭𑀺𑀧𑀺 𑀅𑀭𑀺𑀬𑀲𑀘𑁆𑀘𑀸𑀦𑀺.

𑁨𑁧𑁬.

‘‘𑀤𑀼𑀓𑁆𑀔𑁄 ¶ 𑀇𑀢𑁆𑀣𑀺𑀪𑀸𑀯𑁄, 𑀅𑀓𑁆𑀔𑀸𑀢𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀦𑀸;

𑀲𑀧𑀢𑁆𑀢𑀺𑀓𑀫𑁆𑀧𑀺 𑀳𑀺 𑀤𑀼𑀓𑁆𑀔𑀁, 𑀅𑀧𑁆𑀧𑁂𑀓𑀘𑁆𑀘𑀸 𑀲𑀓𑀺𑀁 𑀯𑀺𑀚𑀸𑀢𑀸𑀬𑁄.

𑁨𑁧𑁭.

‘‘𑀕𑀮𑀓𑁂 𑀅𑀧𑀺 𑀓𑀦𑁆𑀢𑀦𑁆𑀢𑀺, 𑀲𑀼𑀔𑀼𑀫𑀸𑀮𑀺𑀦𑀺𑀬𑁄 𑀯𑀺𑀲𑀸𑀦𑀺 𑀔𑀸𑀤𑀦𑁆𑀢𑀺;

𑀚𑀦𑀫𑀸𑀭𑀓𑀫𑀚𑁆𑀛𑀕𑀢𑀸, 𑀉𑀪𑁄𑀧𑀺 𑀩𑁆𑀬𑀲𑀦𑀸𑀦𑀺 𑀅𑀦𑀼𑀪𑁄𑀦𑁆𑀢𑀺.

𑁨𑁧𑁮.

‘‘𑀉𑀧𑀯𑀺𑀚𑀜𑁆𑀜𑀸 𑀕𑀘𑁆𑀙𑀦𑁆𑀢𑀻, 𑀅𑀤𑁆𑀤𑀲𑀸𑀳𑀁 𑀧𑀢𑀺𑀁 𑀫𑀢𑀁;

𑀧𑀦𑁆𑀣𑀫𑁆𑀳𑀺 𑀯𑀺𑀚𑀸𑀬𑀺𑀢𑁆𑀯𑀸𑀦, 𑀅𑀧𑁆𑀧𑀢𑁆𑀢𑀸𑀯 𑀲𑀓𑀁 𑀖𑀭𑀁.

𑁨𑁧𑁯.

‘‘𑀤𑁆𑀯𑁂 𑀧𑀼𑀢𑁆𑀢𑀸 𑀓𑀸𑀮𑀓𑀢𑀸, 𑀧𑀢𑀻 𑀘 𑀧𑀦𑁆𑀣𑁂 𑀫𑀢𑁄 𑀓𑀧𑀡𑀺𑀓𑀸𑀬;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸, 𑀟𑀬𑁆𑀳𑀦𑁆𑀢𑀺 𑀘 𑀏𑀓𑀘𑀺𑀢𑀓𑀸𑀬𑀁.

𑁨𑁨𑁦.

‘‘𑀔𑀻𑀡𑀓𑀼𑀮𑀻𑀦𑁂 𑀓𑀧𑀡𑁂, 𑀅𑀦𑀼𑀪𑀽𑀢𑀁 𑀢𑁂 𑀤𑀼𑀔𑀁 𑀅𑀧𑀭𑀺𑀫𑀸𑀡𑀁;

𑀅𑀲𑁆𑀲𑀽 𑀘 𑀢𑁂 𑀧𑀯𑀢𑁆𑀢𑀁, 𑀩𑀳𑀽𑀦𑀺 𑀘 𑀚𑀸𑀢𑀺𑀲𑀳𑀲𑁆𑀲𑀸𑀦𑀺.

𑁨𑁨𑁧.

‘‘𑀯𑀲𑀺𑀢𑀸 𑀲𑀼𑀲𑀸𑀦𑀫𑀚𑁆𑀛𑁂, 𑀅𑀣𑁄𑀧𑀺 𑀔𑀸𑀤𑀺𑀢𑀸𑀦𑀺 𑀧𑀼𑀢𑁆𑀢𑀫𑀁𑀲𑀸𑀦𑀺;

𑀳𑀢𑀓𑀼𑀮𑀺𑀓𑀸 ¶ 𑀲𑀩𑁆𑀩𑀕𑀭𑀳𑀺𑀢𑀸, 𑀫𑀢𑀧𑀢𑀺𑀓𑀸 𑀅𑀫𑀢𑀫𑀥𑀺𑀕𑀘𑁆𑀙𑀺𑀁.

𑁨𑁨𑁨.

‘‘𑀪𑀸𑀯𑀺𑀢𑁄 𑀫𑁂 𑀫𑀕𑁆𑀕𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀅𑀫𑀢𑀕𑀸𑀫𑀻;

𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁, 𑀥𑀫𑁆𑀫𑀸𑀤𑀸𑀲𑀁 𑀅𑀯𑁂𑀓𑁆𑀔𑀺𑀁𑀳𑀁 [𑀅𑀧𑁂𑀓𑁆𑀔𑀺𑀳𑀁 (𑀲𑀻.)].

𑁨𑁨𑁩.

‘‘𑀅𑀳𑀫𑀫𑁆𑀳𑀺 𑀓𑀦𑁆𑀢𑀲𑀮𑁆𑀮𑀸, 𑀑𑀳𑀺𑀢𑀪𑀸𑀭𑀸 𑀓𑀢𑀜𑁆𑀳𑀺 𑀓𑀭𑀡𑀻𑀬𑀁;

𑀓𑀺𑀲𑀸 𑀕𑁄𑀢𑀫𑀻 𑀣𑁂𑀭𑀻, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸 𑀇𑀫𑀁 𑀪𑀡𑀻’’𑀢𑀺.

… 𑀓𑀺𑀲𑀸 𑀕𑁄𑀢𑀫𑀻 𑀣𑁂𑀭𑀻….

𑀏𑀓𑀸𑀤𑀲𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁧. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

𑁧. 𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀕𑀸𑀣𑀸

𑁨𑁨𑁪.

‘‘𑀉𑀪𑁄 ¶ ¶ 𑀫𑀸𑀢𑀸 𑀘 𑀥𑀻𑀢𑀸 𑀘, 𑀫𑀬𑀁 𑀆𑀲𑀼𑀁 [𑀆𑀪𑀼𑀁 (𑀲𑀻.)] 𑀲𑀧𑀢𑁆𑀢𑀺𑀬𑁄;

𑀢𑀲𑁆𑀲𑀸 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑁨𑁨𑁫.

‘‘𑀥𑀺𑀭𑀢𑁆𑀣𑀼 𑀓𑀸𑀫𑀸 𑀅𑀲𑀼𑀘𑀻, 𑀤𑀼𑀕𑁆𑀕𑀦𑁆𑀥𑀸 𑀩𑀳𑀼𑀓𑀡𑁆𑀝𑀓𑀸;

𑀬𑀢𑁆𑀣 𑀫𑀸𑀢𑀸 𑀘 𑀥𑀻𑀢𑀸 𑀘, 𑀲𑀪𑀭𑀺𑀬𑀸 𑀫𑀬𑀁 𑀅𑀳𑀼𑀁.

𑁨𑁨𑁬.

‘‘𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 ¶ 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀲𑀸 𑀧𑀩𑁆𑀩𑀚𑁆𑀚𑀺𑀁 𑀭𑀸𑀚𑀕𑀳𑁂, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁.

𑁨𑁨𑁭.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀺𑀢𑀁;

𑀘𑁂𑀢𑁄𑀧𑀭𑀺𑀘𑁆𑀘𑀜𑀸𑀡𑀜𑁆𑀘, 𑀲𑁄𑀢𑀥𑀸𑀢𑀼 𑀯𑀺𑀲𑁄𑀥𑀺𑀢𑀸.

𑁨𑁨𑁮.

‘‘𑀇𑀤𑁆𑀥𑀻𑀧𑀺 𑀫𑁂 𑀲𑀘𑁆𑀙𑀺𑀓𑀢𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁨𑁯.

‘‘𑀇𑀤𑁆𑀥𑀺𑀬𑀸 ¶ 𑀅𑀪𑀺𑀦𑀺𑀫𑁆𑀫𑀺𑀢𑁆𑀯𑀸, 𑀘𑀢𑀼𑀭𑀲𑁆𑀲𑀁 𑀭𑀣𑀁 𑀅𑀳𑀁;

𑀩𑀼𑀤𑁆𑀥𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄’’ [𑀲𑀺𑀭𑀻𑀫𑀢𑁄 (𑀲𑁆𑀬𑀸. 𑀓.)].

𑁨𑁩𑁦.

‘‘𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀁 𑀉𑀧𑀕𑀫𑁆𑀫 𑀧𑀸𑀤𑀧𑀁, 𑀏𑀓𑀸 𑀢𑀼𑀯𑀁 𑀢𑀺𑀝𑁆𑀞𑀲𑀺 𑀲𑀸𑀮𑀫𑀽𑀮𑁂 [𑀭𑀼𑀓𑁆𑀔𑀫𑀽𑀮𑁂 (𑀲𑁆𑀬𑀸. 𑀓.)];

𑀦 𑀘𑀸𑀧𑀺 𑀢𑁂 𑀤𑀼𑀢𑀺𑀬𑁄 𑀅𑀢𑁆𑀣𑀺 𑀓𑁄𑀘𑀺, 𑀦 𑀢𑁆𑀯𑀁 𑀩𑀸𑀮𑁂 𑀪𑀸𑀬𑀲𑀺 𑀥𑀼𑀢𑁆𑀢𑀓𑀸𑀦𑀁’’.

𑁨𑁩𑁧.

‘‘𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀥𑀼𑀢𑁆𑀢𑀓𑀸𑀦𑀁, 𑀲𑀫𑀸𑀕𑀢𑀸 𑀏𑀤𑀺𑀲𑀓𑀸 𑀪𑀯𑁂𑀬𑁆𑀬𑀼𑀁;

𑀮𑁄𑀫𑀁 𑀦 𑀇𑀜𑁆𑀚𑁂 𑀦𑀧𑀺 𑀲𑀫𑁆𑀧𑀯𑁂𑀥𑁂, 𑀓𑀺𑀁 𑀫𑁂 𑀢𑀼𑀯𑀁 𑀫𑀸𑀭 𑀓𑀭𑀺𑀲𑁆𑀲𑀲𑁂𑀓𑁄.

𑁨𑁩𑁨.

‘‘𑀏𑀲𑀸 𑀅𑀦𑁆𑀢𑀭𑀥𑀸𑀬𑀸𑀫𑀺, 𑀓𑀼𑀘𑁆𑀙𑀺𑀁 𑀯𑀸 𑀧𑀯𑀺𑀲𑀸𑀫𑀺 𑀢𑁂;

𑀪𑀫𑀼𑀓𑀦𑁆𑀢𑀭𑁂 𑀢𑀺𑀝𑁆𑀞𑀸𑀫𑀺, 𑀢𑀺𑀝𑁆𑀞𑀦𑁆𑀢𑀺𑀁 𑀫𑀁 𑀦 𑀤𑀓𑁆𑀔𑀲𑀺.

𑁨𑁩𑁩.

‘‘𑀘𑀺𑀢𑁆𑀢𑀫𑁆𑀳𑀺 ¶ 𑀯𑀲𑀻𑀪𑀽𑀢𑀸𑀳𑀁, 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁩𑁪.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 ‘𑀓𑀸𑀫𑀭𑀢𑀺𑀁’ 𑀩𑁆𑀭𑀽𑀲𑀺, ‘𑀅𑀭𑀢𑀻’ 𑀤𑀸𑀦𑀺 𑀲𑀸 𑀫𑀫.

𑁨𑁩𑁫.

‘‘𑀲𑀩𑁆𑀩𑀢𑁆𑀣 ¶ 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀏𑀯𑀁 𑀚𑀸𑀦𑀸𑀳𑀺 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

… 𑀉𑀧𑁆𑀧𑀮𑀯𑀡𑁆𑀡𑀸 𑀣𑁂𑀭𑀻….

𑀤𑁆𑀯𑀸𑀤𑀲𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁨. 𑀲𑁄𑀴𑀲𑀦𑀺𑀧𑀸𑀢𑁄

𑁧. 𑀧𑀼𑀡𑁆𑀡𑀸𑀣𑁂𑀭𑀻𑀕𑀸𑀣𑀸

𑁨𑁩𑁬.

‘‘𑀉𑀤𑀳𑀸𑀭𑀻 ¶ ¶ ¶ 𑀅𑀳𑀁 𑀲𑀻𑀢𑁂 [𑀉𑀤𑀓𑀫𑀸𑀳𑀭𑀺𑀁 𑀲𑀻𑀢𑁂 (𑀲𑀻.)], 𑀲𑀤𑀸 𑀉𑀤𑀓𑀫𑁄𑀢𑀭𑀺𑀁;

𑀅𑀬𑁆𑀬𑀸𑀦𑀁 𑀤𑀡𑁆𑀟𑀪𑀬𑀪𑀻𑀢𑀸, 𑀯𑀸𑀘𑀸𑀤𑁄𑀲𑀪𑀬𑀝𑁆𑀝𑀺𑀢𑀸.

𑁨𑁩𑁭.

‘‘𑀓𑀲𑁆𑀲 𑀩𑁆𑀭𑀸𑀳𑁆𑀫𑀡 𑀢𑁆𑀯𑀁 𑀪𑀻𑀢𑁄, 𑀲𑀤𑀸 𑀉𑀤𑀓𑀫𑁄𑀢𑀭𑀺;

𑀯𑁂𑀥𑀫𑀸𑀦𑁂𑀳𑀺 𑀕𑀢𑁆𑀢𑁂𑀳𑀺, 𑀲𑀻𑀢𑀁 𑀯𑁂𑀤𑀬𑀲𑁂 𑀪𑀼𑀲𑀁’’.

𑁨𑁩𑁮.

𑀚𑀸𑀦𑀦𑁆𑀢𑀻 𑀯𑀢 𑀫𑀁 [𑀚𑀸𑀦𑀦𑁆𑀢𑀻 𑀘 𑀢𑀼𑀯𑀁 (𑀓.)] 𑀪𑁄𑀢𑀺, 𑀧𑀼𑀡𑁆𑀡𑀺𑀓𑁂 𑀧𑀭𑀺𑀧𑀼𑀘𑁆𑀙𑀲𑀺;

𑀓𑀭𑁄𑀦𑁆𑀢𑀁 𑀓𑀼𑀲𑀮𑀁 𑀓𑀫𑁆𑀫𑀁, 𑀭𑀼𑀦𑁆𑀥𑀦𑁆𑀢𑀁 𑀓𑀢𑀧𑀸𑀧𑀓𑀁.

𑁨𑁩𑁯.

‘‘𑀬𑁄 𑀘 𑀯𑀼𑀟𑁆𑀠𑁄 𑀤𑀳𑀭𑁄 𑀯𑀸, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑀺;

𑀤𑀓𑀸𑀪𑀺𑀲𑁂𑀘𑀦𑀸 𑀲𑁄𑀧𑀺, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺’’.

𑁨𑁪𑁦.

‘‘𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀅𑀚𑀸𑀦𑀦𑁆𑀢𑀲𑁆𑀲 𑀅𑀚𑀸𑀦𑀓𑁄;

𑀤𑀓𑀸𑀪𑀺𑀲𑁂𑀘𑀦𑀸 𑀦𑀸𑀫, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀢𑀺.

𑁨𑁪𑁧.

‘‘𑀲𑀕𑁆𑀕𑀁 𑀦𑀽𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀫𑀡𑁆𑀟𑀽𑀓𑀓𑀘𑁆𑀙𑀧𑀸;

𑀦𑀸𑀕𑀸 [𑀦𑀓𑁆𑀓𑀸 (𑀲𑀻.)] 𑀘 𑀲𑀼𑀲𑀼𑀫𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀉𑀤𑀓𑁂 𑀘𑀭𑀸.

𑁨𑁪𑁨.

‘‘𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸, 𑀫𑀘𑁆𑀙𑀺𑀓𑀸 𑀫𑀺𑀕𑀩𑀦𑁆𑀥𑀓𑀸;

𑀘𑁄𑀭𑀸 𑀘 𑀯𑀚𑁆𑀛𑀖𑀸𑀢𑀸 𑀘, 𑀬𑁂 𑀘𑀜𑁆𑀜𑁂 𑀧𑀸𑀧𑀓𑀫𑁆𑀫𑀺𑀦𑁄;

𑀤𑀓𑀸𑀪𑀺𑀲𑁂𑀘𑀦𑀸 𑀢𑁂𑀧𑀺, 𑀧𑀸𑀧𑀓𑀫𑁆𑀫𑀸 𑀧𑀫𑀼𑀘𑁆𑀘𑀭𑁂.

𑁨𑁪𑁩.

‘‘𑀲𑀘𑁂 𑀇𑀫𑀸 𑀦𑀤𑀺𑀬𑁄 𑀢𑁂, 𑀧𑀸𑀧𑀁 𑀧𑀼𑀩𑁆𑀩𑁂 𑀓𑀢𑀁 𑀯𑀳𑀼𑀁;

𑀧𑀼𑀜𑁆𑀜𑀫𑁆𑀧𑀺𑀫𑀸 ¶ 𑀯𑀳𑁂𑀬𑁆𑀬𑀼𑀁 𑀢𑁂, 𑀢𑁂𑀦 𑀢𑁆𑀯𑀁 𑀧𑀭𑀺𑀩𑀸𑀳𑀺𑀭𑁄.

𑁨𑁪𑁪.

‘‘𑀬𑀲𑁆𑀲 ¶ 𑀩𑁆𑀭𑀸𑀳𑁆𑀫𑀡 𑀢𑁆𑀯𑀁 𑀪𑀻𑀢𑁄, 𑀲𑀤𑀸 𑀉𑀤𑀓𑀫𑁄𑀢𑀭𑀺;

𑀢𑀫𑁂𑀯 𑀩𑁆𑀭𑀳𑁆𑀫𑁂 𑀫𑀸 𑀓𑀸𑀲𑀺, 𑀫𑀸 𑀢𑁂 𑀲𑀻𑀢𑀁 𑀙𑀯𑀺𑀁 𑀳𑀦𑁂’’.

𑁨𑁪𑁫.

‘‘𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀁 𑀫𑀁, 𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀦𑀬𑀺;

𑀤𑀓𑀸𑀪𑀺𑀲𑁂𑀘𑀦𑀸 𑀪𑁄𑀢𑀺, 𑀇𑀫𑀁 𑀲𑀸𑀝𑀁 𑀤𑀤𑀸𑀫𑀺 𑀢𑁂’’.

𑁨𑁪𑁬.

‘‘𑀢𑀼𑀬𑁆𑀳𑁂𑀯 𑀲𑀸𑀝𑀓𑁄 𑀳𑁄𑀢𑀼, 𑀦𑀸𑀳𑀫𑀺𑀘𑁆𑀙𑀸𑀫𑀺 𑀲𑀸𑀝𑀓𑀁;

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀧𑁆𑀧𑀺𑀬𑀁.

𑁨𑁪𑁭.

‘‘𑀫𑀸𑀓𑀸𑀲𑀺 ¶ ¶ 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

𑀲𑀘𑁂 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀲𑀺 𑀓𑀭𑁄𑀲𑀺 𑀯𑀸.

𑁨𑁪𑁮.

‘‘𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁂𑀘𑁆𑀘𑀸𑀧𑀺 [𑀉𑀧𑁆𑀧𑀘𑁆𑀘𑀸𑀧𑀺 (𑀅𑀝𑁆𑀞. 𑀧𑀸𑀞𑀦𑁆𑀢𑀭𑀁)] 𑀧𑀮𑀸𑀬𑀢𑁄;

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀧𑁆𑀧𑀺𑀬𑀁.

𑁨𑁪𑁯.

‘‘𑀉𑀧𑁂𑀳𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀳𑀺 𑀲𑀻𑀮𑀸𑀦𑀺, 𑀢𑀁 𑀢𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺’’.

𑁨𑁫𑁦.

‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀫𑀺 𑀲𑀻𑀮𑀸𑀦𑀺, 𑀢𑀁 𑀫𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁨𑁫𑁧.

‘‘𑀩𑁆𑀭𑀳𑁆𑀫𑀩𑀦𑁆𑀥𑀼 𑀧𑀼𑀭𑁂 𑀆𑀲𑀺𑀁, 𑀅𑀚𑁆𑀚𑀫𑁆𑀳𑀺 𑀲𑀘𑁆𑀘𑀩𑁆𑀭𑀸𑀳𑁆𑀫𑀡𑁄;

𑀢𑁂𑀯𑀺𑀚𑁆𑀚𑁄 𑀯𑁂𑀤𑀲𑀫𑁆𑀧𑀦𑁆𑀦𑁄, 𑀲𑁄𑀢𑁆𑀢𑀺𑀬𑁄 𑀘𑀫𑁆𑀳𑀺 𑀦𑁆𑀳𑀸𑀢𑀓𑁄’’𑀢𑀺.

… 𑀧𑀼𑀡𑁆𑀡𑀸 𑀣𑁂𑀭𑀻….

𑀲𑁄𑀴𑀲𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁩. 𑀯𑀻𑀲𑀢𑀺𑀦𑀺𑀧𑀸𑀢𑁄

𑁧. 𑀅𑀫𑁆𑀩𑀧𑀸𑀮𑀻𑀣𑁂𑀭𑀻𑀕𑀸𑀣𑀸

𑁨𑁫𑁨.

‘‘𑀓𑀸𑀴𑀓𑀸 ¶ ¶ 𑀪𑀫𑀭𑀯𑀡𑁆𑀡𑀲𑀸𑀤𑀺𑀲𑀸, 𑀯𑁂𑀮𑁆𑀮𑀺𑀢𑀕𑁆𑀕𑀸 𑀫𑀫 𑀫𑀼𑀤𑁆𑀥𑀚𑀸 𑀅𑀳𑀼𑀁;

𑀢𑁂 𑀚𑀭𑀸𑀬 𑀲𑀸𑀡𑀯𑀸𑀓𑀲𑀸𑀤𑀺𑀲𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁩.

‘‘𑀯𑀸𑀲𑀺𑀢𑁄𑀯 𑀲𑀼𑀭𑀪𑀻 𑀓𑀭𑀡𑁆𑀟𑀓𑁄, 𑀧𑀼𑀧𑁆𑀨𑀧𑀽𑀭 𑀫𑀫 𑀉𑀢𑁆𑀢𑀫𑀗𑁆𑀕𑀚𑁄 [𑀉𑀢𑁆𑀢𑀫𑀗𑁆𑀕𑀪𑀽𑀢𑁄 (𑀓.)].

𑀢𑀁 𑀚𑀭𑀸𑀬𑀣 𑀲𑀮𑁄𑀫𑀕𑀦𑁆𑀥𑀺𑀓𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁪.

‘‘𑀓𑀸𑀦𑀦𑀁𑀯 ¶ 𑀲𑀳𑀺𑀢𑀁 𑀲𑀼𑀭𑁄𑀧𑀺𑀢𑀁, 𑀓𑁄𑀘𑁆𑀙𑀲𑀽𑀘𑀺𑀯𑀺𑀘𑀺𑀢𑀕𑁆𑀕𑀲𑁄𑀪𑀺𑀢𑀁;

𑀢𑀁 𑀚𑀭𑀸𑀬 𑀯𑀺𑀭𑀮𑀁 𑀢𑀳𑀺𑀁 𑀢𑀳𑀺𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁫.

‘‘𑀓𑀡𑁆𑀳𑀔𑀦𑁆𑀥𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀁, 𑀲𑁄𑀪𑀢𑁂 𑀲𑀼𑀯𑁂𑀡𑀻𑀳𑀺𑀮𑀗𑁆𑀓𑀢𑀁;

𑀢𑀁 ¶ 𑀚𑀭𑀸𑀬 𑀔𑀮𑀺𑀢𑀁 𑀲𑀺𑀭𑀁 𑀓𑀢𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁬.

‘‘𑀘𑀺𑀢𑁆𑀢𑀓𑀸𑀭𑀲𑀼𑀓𑀢𑀸𑀯 𑀮𑁂𑀔𑀺𑀓𑀸, 𑀲𑁄𑀪𑀭𑁂 𑀲𑀼 𑀪𑀫𑀼𑀓𑀸 𑀧𑀼𑀭𑁂 𑀫𑀫;

𑀢𑀸 ¶ 𑀚𑀭𑀸𑀬 𑀯𑀮𑀺𑀪𑀺𑀧𑁆𑀧𑀮𑀫𑁆𑀩𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁭.

‘‘𑀪𑀲𑁆𑀲𑀭𑀸 𑀲𑀼𑀭𑀼𑀘𑀺𑀭𑀸 𑀬𑀣𑀸 𑀫𑀡𑀻, 𑀦𑁂𑀢𑁆𑀢𑀳𑁂𑀲𑀼𑀫𑀪𑀺𑀦𑀻𑀮𑀫𑀸𑀬𑀢𑀸;

𑀢𑁂 𑀚𑀭𑀸𑀬𑀪𑀺𑀳𑀢𑀸 𑀦 𑀲𑁄𑀪𑀭𑁂, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁮.

‘‘𑀲𑀡𑁆𑀳𑀢𑀼𑀗𑁆𑀕𑀲𑀤𑀺𑀲𑀻 ¶ 𑀘 𑀦𑀸𑀲𑀺𑀓𑀸, 𑀲𑁄𑀪𑀢𑁂 𑀲𑀼 𑀅𑀪𑀺𑀬𑁄𑀩𑁆𑀩𑀦𑀁 𑀧𑀢𑀺;

𑀲𑀸 𑀚𑀭𑀸𑀬 𑀉𑀧𑀓𑀽𑀮𑀺𑀢𑀸 𑀯𑀺𑀬, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁫𑁯.

‘‘𑀓𑀗𑁆𑀓𑀡𑀁 𑀯 𑀲𑀼𑀓𑀢𑀁 𑀲𑀼𑀦𑀺𑀝𑁆𑀞𑀺𑀢𑀁, 𑀲𑁄𑀪𑀭𑁂 𑀲𑀼 𑀫𑀫 𑀓𑀡𑁆𑀡𑀧𑀸𑀴𑀺𑀬𑁄;

𑀢𑀸 𑀚𑀭𑀸𑀬 𑀯𑀮𑀺𑀪𑀺𑀧𑁆𑀧𑀮𑀫𑁆𑀩𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁦.

‘‘𑀧𑀢𑁆𑀢𑀮𑀻𑀫𑀓𑀼𑀮𑀯𑀡𑁆𑀡𑀲𑀸𑀤𑀺𑀲𑀸, 𑀲𑁄𑀪𑀭𑁂 𑀲𑀼 𑀤𑀦𑁆𑀢𑀸 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀔𑀡𑁆𑀟𑀺𑀢𑀸 𑀘𑀸𑀲𑀺𑀢𑀸 [𑀧𑀻𑀢𑀓𑀸 (𑀲𑀻.)], 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁧.

‘‘𑀓𑀸𑀦𑀦𑀫𑁆𑀳𑀺 𑀯𑀦𑀲𑀡𑁆𑀟𑀘𑀸𑀭𑀺𑀦𑀻, 𑀓𑁄𑀓𑀺𑀮𑀸𑀯 ¶ 𑀫𑀥𑀼𑀭𑀁 𑀦𑀺𑀓𑀽𑀚𑀺𑀳𑀁;

𑀢𑀁 𑀚𑀭𑀸𑀬 𑀔𑀮𑀺𑀢𑀁 𑀢𑀳𑀺𑀁 𑀢𑀳𑀺𑀁, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁨.

‘‘𑀲𑀡𑁆𑀳𑀓𑀫𑁆𑀩𑀼𑀭𑀺𑀯 𑀲𑀼𑀧𑁆𑀧𑀫𑀚𑁆𑀚𑀺𑀢𑀸, 𑀲𑁄𑀪𑀢𑁂 𑀲𑀼 𑀕𑀻𑀯𑀸 𑀧𑀼𑀭𑁂 𑀫𑀫;

𑀲𑀸 𑀚𑀭𑀸𑀬 𑀪𑀕𑁆𑀕𑀸 [𑀪𑀜𑁆𑀚𑀺𑀢𑀸 (?)] 𑀯𑀺𑀦𑀸𑀫𑀺𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁩.

‘‘𑀯𑀝𑁆𑀝𑀧𑀮𑀺𑀖𑀲𑀤𑀺𑀲𑁄𑀧𑀫𑀸 ¶ 𑀉𑀪𑁄, 𑀲𑁄𑀪𑀭𑁂 𑀲𑀼 𑀩𑀸𑀳𑀸 𑀧𑀼𑀭𑁂 𑀫𑀫;

𑀢𑀸 𑀚𑀭𑀸𑀬 𑀬𑀣 𑀧𑀸𑀝𑀮𑀺𑀩𑁆𑀩𑀮𑀺𑀢𑀸 [𑀬𑀣𑀸 𑀧𑀸𑀝𑀮𑀺𑀧𑁆𑀧𑀮𑀺𑀢𑀸 (𑀲𑀻. 𑀲𑁆𑀬𑀸. 𑀓.)], 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁪.

‘‘𑀲𑀡𑁆𑀳𑀫𑀼𑀤𑁆𑀤𑀺𑀓𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀸, 𑀲𑁄𑀪𑀭𑁂 𑀲𑀼 𑀳𑀢𑁆𑀣𑀸 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀬𑀣𑀸 𑀫𑀽𑀮𑀫𑀽𑀮𑀺𑀓𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁫.

‘‘𑀧𑀻𑀦𑀯𑀝𑁆𑀝𑀲𑀳𑀺𑀢𑀼𑀕𑁆𑀕𑀢𑀸 ¶ 𑀉𑀪𑁄, 𑀲𑁄𑀪𑀭𑁂 [𑀲𑁄𑀪𑀢𑁂 (𑀅𑀝𑁆𑀞.)] 𑀲𑀼 𑀣𑀦𑀓𑀸 𑀧𑀼𑀭𑁂 𑀫𑀫;

𑀣𑁂𑀯𑀺𑀓𑀻𑀯 𑀮𑀫𑁆𑀩𑀦𑁆𑀢𑀺 𑀦𑁄𑀤𑀓𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 ¶ 𑀅𑀦𑀜𑁆𑀜𑀣𑀸.

𑁨𑁬𑁬.

‘‘𑀓𑀜𑁆𑀘𑀦𑀲𑁆𑀲𑀨𑀮𑀓𑀁𑀯 𑀲𑀫𑁆𑀫𑀝𑁆𑀞𑀁, 𑀲𑁄𑀪𑀢𑁂 𑀲𑀼 𑀓𑀸𑀬𑁄 𑀧𑀼𑀭𑁂 𑀫𑀫;

𑀲𑁄 𑀯𑀮𑀻𑀳𑀺 𑀲𑀼𑀔𑀼𑀫𑀸𑀳𑀺 𑀑𑀢𑀢𑁄, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁭.

‘‘𑀦𑀸𑀕𑀪𑁄𑀕𑀲𑀤𑀺𑀲𑁄𑀧𑀫𑀸 𑀉𑀪𑁄, 𑀲𑁄𑀪𑀭𑁂 𑀲𑀼 𑀊𑀭𑀽 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀬𑀣𑀸 𑀯𑁂𑀴𑀼𑀦𑀸𑀴𑀺𑀬𑁄, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁮.

‘‘𑀲𑀡𑁆𑀳𑀦𑀽𑀧𑀼𑀭𑀲𑀼𑀯𑀡𑁆𑀡𑀫𑀡𑁆𑀟𑀺𑀢𑀸 ¶ , 𑀲𑁄𑀪𑀭𑁂 𑀲𑀼 𑀚𑀗𑁆𑀖𑀸 𑀧𑀼𑀭𑁂 𑀫𑀫;

𑀢𑀸 𑀚𑀭𑀸𑀬 𑀢𑀺𑀮𑀤𑀡𑁆𑀟𑀓𑀸𑀭𑀺𑀯, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁬𑁯.

‘‘𑀢𑀽𑀮𑀧𑀼𑀡𑁆𑀡𑀲𑀤𑀺𑀲𑁄𑀧𑀫𑀸 𑀉𑀪𑁄, 𑀲𑁄𑀪𑀭𑁂 𑀲𑀼 𑀧𑀸𑀤𑀸 𑀧𑀼𑀭𑁂 𑀫𑀫;

𑀢𑁂 𑀚𑀭𑀸𑀬 𑀨𑀼𑀝𑀺𑀢𑀸 𑀯𑀮𑀻𑀫𑀢𑀸, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸.

𑁨𑁭𑁦.

‘‘𑀏𑀤𑀺𑀲𑁄 𑀅𑀳𑀼 𑀅𑀬𑀁 𑀲𑀫𑀼𑀲𑁆𑀲𑀬𑁄, 𑀚𑀚𑁆𑀚𑀭𑁄 𑀩𑀳𑀼𑀤𑀼𑀓𑁆𑀔𑀸𑀦𑀫𑀸𑀮𑀬𑁄;

𑀲𑁄𑀧𑀮𑁂𑀧𑀧𑀢𑀺𑀢𑁄 ¶ 𑀚𑀭𑀸𑀖𑀭𑁄, 𑀲𑀘𑁆𑀘𑀯𑀸𑀤𑀺𑀯𑀘𑀦𑀁 𑀅𑀦𑀜𑁆𑀜𑀣𑀸’’.

… 𑀅𑀫𑁆𑀩𑀧𑀸𑀮𑀻 𑀣𑁂𑀭𑀻….

𑁨. 𑀭𑁄𑀳𑀺𑀦𑀻𑀣𑁂𑀭𑀻𑀕𑀸𑀣𑀸

𑁨𑁭𑁧.

‘‘‘𑀲𑀫𑀡𑀸’𑀢𑀺 ¶ 𑀪𑁄𑀢𑀺 𑀲𑀼𑀧𑀺 [𑀪𑁄𑀢𑀺 𑀢𑁆𑀯𑀁 𑀲𑀬𑀲𑀺 (𑀲𑀻.), 𑀪𑁄𑀢𑀺 𑀫𑀁 𑀯𑀺𑀧𑀲𑁆𑀲𑀺 (𑀲𑁆𑀬𑀸.)], ‘𑀲𑀫𑀡𑀸’𑀢𑀺 𑀧𑀩𑀼𑀚𑁆𑀛𑀲𑀺 [𑀧𑀝𑀺𑀩𑀼𑀚𑁆𑀛𑀲𑀺 (𑀲𑀻. 𑀲𑁆𑀬𑀸.)];

𑀲𑀫𑀡𑀸𑀦𑁂𑀯 [𑀲𑀫𑀡𑀸𑀦𑀫𑁂𑀯 (𑀲𑀻. 𑀲𑁆𑀬𑀸.)] 𑀓𑀺𑀢𑁆𑀢𑁂𑀲𑀺, 𑀲𑀫𑀡𑀻 𑀦𑀽𑀦 [𑀲𑀫𑀡𑀻 𑀦𑀼 (𑀓.)] 𑀪𑀯𑀺𑀲𑁆𑀲𑀲𑀺.

𑁨𑁭𑁨.

‘‘𑀯𑀺𑀧𑀼𑀮𑀁 ¶ 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀲𑀫𑀡𑀸𑀦𑀁 𑀧𑀯𑁂𑀘𑁆𑀘𑀲𑀺 [𑀧𑀬𑀘𑁆𑀙𑀲𑀺 (𑀲𑀻.)];

𑀭𑁄𑀳𑀺𑀦𑀻 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑁂𑀦 𑀢𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁩.

‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸, 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄;

𑀆𑀲𑀁𑀲𑀼𑀓𑀸 𑀲𑀸𑀤𑀼𑀓𑀸𑀫𑀸, 𑀓𑁂𑀦 𑀢𑁂 𑀲𑀫𑀡𑀸 𑀧𑀺𑀬𑀸’’.

𑁨𑁭𑁪.

‘‘𑀘𑀺𑀭𑀲𑁆𑀲𑀁 𑀯𑀢 𑀫𑀁 𑀢𑀸𑀢, 𑀲𑀫𑀡𑀸𑀦𑀁 𑀧𑀭𑀺𑀧𑀼𑀘𑁆𑀙𑀲𑀺;

𑀢𑁂𑀲𑀁 𑀢𑁂 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀧𑀜𑁆𑀜𑀸𑀲𑀻𑀮𑀧𑀭𑀓𑁆𑀓𑀫𑀁.

𑁨𑁭𑁫.

‘‘𑀓𑀫𑁆𑀫𑀓𑀸𑀫𑀸 𑀅𑀦𑀮𑀲𑀸, 𑀓𑀫𑁆𑀫𑀲𑁂𑀝𑁆𑀞𑀲𑁆𑀲 𑀓𑀸𑀭𑀓𑀸;

𑀭𑀸𑀕𑀁 𑀤𑁄𑀲𑀁 𑀧𑀚𑀳𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁬.

‘‘𑀢𑀻𑀡𑀺 𑀧𑀸𑀧𑀲𑁆𑀲 𑀫𑀽𑀮𑀸𑀦𑀺, 𑀥𑀼𑀦𑀦𑁆𑀢𑀺 𑀲𑀼𑀘𑀺𑀓𑀸𑀭𑀺𑀦𑁄;

𑀲𑀩𑁆𑀩𑀁 𑀧𑀸𑀧𑀁 𑀧𑀳𑀻𑀦𑁂𑀲𑀁, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁭.

‘‘𑀓𑀸𑀬𑀓𑀫𑁆𑀫𑀁 𑀲𑀼𑀘𑀺 𑀦𑁂𑀲𑀁, 𑀯𑀘𑀻𑀓𑀫𑁆𑀫𑀜𑁆𑀘 𑀢𑀸𑀤𑀺𑀲𑀁;

𑀫𑀦𑁄𑀓𑀫𑁆𑀫𑀁 𑀲𑀼𑀘𑀺 𑀦𑁂𑀲𑀁, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁮.

‘‘𑀯𑀺𑀫𑀮𑀸 𑀲𑀗𑁆𑀔𑀫𑀼𑀢𑁆𑀢𑀸𑀯, 𑀲𑀼𑀤𑁆𑀥𑀸 𑀲𑀦𑁆𑀢𑀭𑀩𑀸𑀳𑀺𑀭𑀸;

𑀧𑀼𑀡𑁆𑀡𑀸 𑀲𑀼𑀓𑁆𑀓𑀸𑀦 𑀥𑀫𑁆𑀫𑀸𑀦𑀁 [𑀲𑀼𑀓𑁆𑀓𑁂𑀳𑀺 𑀥𑀫𑁆𑀫𑁂𑀳𑀺 (𑀲𑀻. 𑀲𑁆𑀬𑀸. 𑀅𑀝𑁆𑀞.)], 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁭𑁯.

‘‘𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸, 𑀅𑀭𑀺𑀬𑀸 𑀥𑀫𑁆𑀫𑀚𑀻𑀯𑀺𑀦𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁦.

‘‘𑀩𑀳𑀼𑀲𑁆𑀲𑀼𑀢𑀸 ¶ 𑀥𑀫𑁆𑀫𑀥𑀭𑀸, 𑀅𑀭𑀺𑀬𑀸 𑀥𑀫𑁆𑀫𑀚𑀻𑀯𑀺𑀦𑁄;

𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀢𑀺𑀫𑀦𑁆𑀢𑁄, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁧.

‘‘𑀤𑀽𑀭𑀗𑁆𑀕𑀫𑀸 ¶ 𑀲𑀢𑀺𑀫𑀦𑁆𑀢𑁄, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁨.

‘‘𑀬𑀲𑁆𑀫𑀸 𑀕𑀸𑀫𑀸 𑀧𑀓𑁆𑀓𑀫𑀦𑁆𑀢𑀺, 𑀦 𑀯𑀺𑀮𑁄𑀓𑁂𑀦𑁆𑀢𑀺 𑀓𑀺𑀜𑁆𑀘𑀦𑀁;

𑀅𑀦𑀧𑁂𑀓𑁆𑀔𑀸𑀯 𑀕𑀘𑁆𑀙𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁩.

‘‘𑀦 ¶ 𑀢𑁂𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺, 𑀦 𑀓𑀼𑀫𑁆𑀪𑀺𑀁 𑀦 𑀔𑀴𑁄𑀧𑀺𑀬𑀁;

𑀧𑀭𑀺𑀦𑀺𑀝𑁆𑀞𑀺𑀢𑀫𑁂𑀲𑀸𑀦𑀸, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁪.

‘‘𑀦 𑀢𑁂 𑀳𑀺𑀭𑀜𑁆𑀜𑀁 𑀕𑀡𑁆𑀳𑀦𑁆𑀢𑀺, 𑀦 𑀲𑀼𑀯𑀡𑁆𑀡𑀁 𑀦 𑀭𑀽𑀧𑀺𑀬𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸.

𑁨𑁮𑁫.

‘‘𑀦𑀸𑀦𑀸𑀓𑀼𑀮𑀸 ¶ 𑀧𑀩𑁆𑀩𑀚𑀺𑀢𑀸, 𑀦𑀸𑀦𑀸𑀚𑀦𑀧𑀤𑁂𑀳𑀺 𑀘;

𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀸𑀬𑀦𑁆𑀢𑀺 [𑀧𑀺𑀳𑀬𑀦𑁆𑀢𑀺 (𑀓.)], 𑀢𑁂𑀦 𑀫𑁂 𑀲𑀫𑀡𑀸 𑀧𑀺𑀬𑀸’’.

𑁨𑁮𑁬.

‘‘𑀅𑀢𑁆𑀣𑀸𑀬 𑀯𑀢 𑀦𑁄 𑀪𑁄𑀢𑀺, 𑀓𑀼𑀮𑁂 𑀚𑀸𑀢𑀸𑀲𑀺 𑀭𑁄𑀳𑀺𑀦𑀻;

𑀲𑀤𑁆𑀥𑀸 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑀸.

𑁨𑁮𑁭.

‘‘𑀢𑀼𑀯𑀁 𑀳𑁂𑀢𑀁 𑀧𑀚𑀸𑀦𑀸𑀲𑀺, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁;

𑀅𑀫𑁆𑀳𑀫𑁆𑀧𑀺 𑀏𑀢𑁂 𑀲𑀫𑀡𑀸, 𑀧𑀝𑀺𑀕𑀡𑁆𑀳𑀦𑁆𑀢𑀺 𑀤𑀓𑁆𑀔𑀺𑀡𑀁’’.

𑁨𑁮𑁮.

‘‘𑀧𑀢𑀺𑀝𑁆𑀞𑀺𑀢𑁄 𑀳𑁂𑀢𑁆𑀣 𑀬𑀜𑁆𑀜𑁄, 𑀯𑀺𑀧𑀼𑀮𑁄 𑀦𑁄 𑀪𑀯𑀺𑀲𑁆𑀲𑀢𑀺;

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀧𑁆𑀧𑀺𑀬𑀁.

𑁨𑁮𑁯.

‘‘𑀉𑀧𑁂𑀳𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀳𑀺 𑀲𑀻𑀮𑀸𑀦𑀺, 𑀢𑀁 𑀢𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺’’.

𑁨𑁯𑁦.

‘‘𑀉𑀧𑁂𑀫𑀺 ¶ 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀢𑀸𑀤𑀺𑀦𑀁;

𑀲𑀫𑀸𑀤𑀺𑀬𑀸𑀫𑀺 𑀲𑀻𑀮𑀸𑀦𑀺, 𑀢𑀁 𑀫𑁂 𑀅𑀢𑁆𑀣𑀸𑀬 𑀳𑁂𑀳𑀺𑀢𑀺.

𑁨𑁯𑁧.

‘‘𑀩𑁆𑀭𑀳𑁆𑀫𑀩𑀦𑁆𑀥𑀼 𑀧𑀼𑀭𑁂 𑀆𑀲𑀺𑀁, 𑀲𑁄 𑀇𑀤𑀸𑀦𑀺𑀫𑁆𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀢𑁂𑀯𑀺𑀚𑁆𑀚𑁄 𑀲𑁄𑀢𑁆𑀢𑀺𑀬𑁄 𑀘𑀫𑁆𑀳𑀺, 𑀯𑁂𑀤𑀕𑀽 𑀘𑀫𑁆𑀳𑀺 𑀦𑁆𑀳𑀸𑀢𑀓𑁄’’.

… 𑀭𑁄𑀳𑀺𑀦𑀻 𑀣𑁂𑀭𑀻….

𑁩. 𑀘𑀸𑀧𑀸𑀣𑁂𑀭𑀻𑀕𑀸𑀣𑀸

𑁨𑁯𑁨.

‘‘𑀮𑀝𑁆𑀞𑀺𑀳𑀢𑁆𑀣𑁄 𑀧𑀼𑀭𑁂 𑀆𑀲𑀺, 𑀲𑁄 𑀤𑀸𑀦𑀺 𑀫𑀺𑀕𑀮𑀼𑀤𑁆𑀤𑀓𑁄;

𑀆𑀲𑀸𑀬 𑀧𑀮𑀺𑀧𑀸 𑀖𑁄𑀭𑀸, 𑀦𑀸𑀲𑀓𑁆𑀔𑀺 𑀧𑀸𑀭𑀫𑁂𑀢𑀯𑁂.

𑁨𑁯𑁩.

‘‘𑀲𑀼𑀫𑀢𑁆𑀢𑀁 𑀫𑀁 𑀫𑀜𑁆𑀜𑀫𑀸𑀦𑀸, 𑀘𑀸𑀧𑀸 𑀧𑀼𑀢𑁆𑀢𑀫𑀢𑁄𑀲𑀬𑀺;

𑀘𑀸𑀧𑀸𑀬 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀧𑀩𑁆𑀩𑀚𑀺𑀲𑁆𑀲𑀁 𑀧𑀼𑀦𑁄𑀧𑀳𑀁.

𑁨𑁯𑁪.

‘‘𑀫𑀸 ¶ 𑀫𑁂 𑀓𑀼𑀚𑁆𑀛𑀺 𑀫𑀳𑀸𑀯𑀻𑀭, 𑀫𑀸 𑀫𑁂 𑀓𑀼𑀚𑁆𑀛𑀺 𑀫𑀳𑀸𑀫𑀼𑀦𑀺;

𑀦 𑀳𑀺 𑀓𑁄𑀥𑀧𑀭𑁂𑀢𑀲𑁆𑀲, 𑀲𑀼𑀤𑁆𑀥𑀺 𑀅𑀢𑁆𑀣𑀺 𑀓𑀼𑀢𑁄 𑀢𑀧𑁄.

𑁨𑁯𑁫.

‘‘𑀧𑀓𑁆𑀓𑀫𑀺𑀲𑁆𑀲𑀜𑁆𑀘 ¶ 𑀦𑀸𑀴𑀸𑀢𑁄, 𑀓𑁄𑀥 𑀦𑀸𑀴𑀸𑀬 𑀯𑀘𑁆𑀙𑀢𑀺;

𑀩𑀦𑁆𑀥𑀦𑁆𑀢𑀻 𑀇𑀢𑁆𑀣𑀺𑀭𑀽𑀧𑁂𑀦, 𑀲𑀫𑀡𑁂 𑀥𑀫𑁆𑀫𑀚𑀻𑀯𑀺𑀦𑁄’’ [𑀥𑀫𑁆𑀫𑀚𑀻𑀯𑀺𑀦𑁂 (𑀓.)].

𑁨𑁯𑁬.

‘‘𑀏𑀳𑀺 𑀓𑀸𑀴 𑀦𑀺𑀯𑀢𑁆𑀢𑀲𑁆𑀲𑀼, 𑀪𑀼𑀜𑁆𑀚 𑀓𑀸𑀫𑁂 𑀬𑀣𑀸 𑀧𑀼𑀭𑁂;

𑀅𑀳𑀜𑁆𑀘 𑀢𑁂 𑀯𑀲𑀻𑀓𑀢𑀸, 𑀬𑁂 𑀘 𑀫𑁂 𑀲𑀦𑁆𑀢𑀺 𑀜𑀸𑀢𑀓𑀸’’.

𑁨𑁯𑁭.

‘‘𑀏𑀢𑁆𑀢𑁄 ¶ 𑀘𑀸𑀧𑁂 𑀘𑀢𑀼𑀩𑁆𑀪𑀸𑀕𑀁, 𑀬𑀣𑀸 𑀪𑀸𑀲𑀲𑀺 𑀢𑁆𑀯𑀜𑁆𑀘 𑀫𑁂;

𑀢𑀬𑀺 𑀭𑀢𑁆𑀢𑀲𑁆𑀲 𑀧𑁄𑀲𑀲𑁆𑀲, 𑀉𑀴𑀸𑀭𑀁 𑀯𑀢 𑀢𑀁 𑀲𑀺𑀬𑀸’’.

𑁨𑁯𑁮.

‘‘𑀓𑀸𑀴𑀗𑁆𑀕𑀺𑀦𑀺𑀁𑀯 𑀢𑀓𑁆𑀓𑀸𑀭𑀺𑀁, 𑀧𑀼𑀧𑁆𑀨𑀺𑀢𑀁 𑀕𑀺𑀭𑀺𑀫𑀼𑀤𑁆𑀥𑀦𑀺;

𑀨𑀼𑀮𑁆𑀮𑀁 𑀤𑀸𑀮𑀺𑀫𑀮𑀝𑁆𑀞𑀺𑀁𑀯, 𑀅𑀦𑁆𑀢𑁄𑀤𑀻𑀧𑁂𑀯 𑀧𑀸𑀝𑀮𑀺𑀁.

𑁨𑁯𑁯.

‘‘𑀳𑀭𑀺𑀘𑀦𑁆𑀤𑀦𑀮𑀺𑀢𑁆𑀢𑀗𑁆𑀕𑀺𑀁, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑀺𑀁;

𑀢𑀁 ¶ 𑀫𑀁 𑀭𑀽𑀧𑀯𑀢𑀺𑀁 𑀲𑀦𑁆𑀢𑀺𑀁, 𑀓𑀲𑁆𑀲 𑀑𑀳𑀸𑀬 𑀕𑀘𑁆𑀙𑀲𑀺’’.

𑁩𑁦𑁦.

‘‘𑀲𑀸𑀓𑀼𑀦𑁆𑀢𑀺𑀓𑁄𑀯 𑀲𑀓𑀼𑀡𑀺𑀁 [𑀲𑀓𑀼𑀡𑀁 (𑀲𑁆𑀬𑀸.)], 𑀬𑀣𑀸 𑀩𑀦𑁆𑀥𑀺𑀢𑀼𑀫𑀺𑀘𑁆𑀙𑀢𑀺;

𑀆𑀳𑀭𑀺𑀫𑁂𑀦 𑀭𑀽𑀧𑁂𑀦, 𑀦 𑀫𑀁 𑀢𑁆𑀯𑀁 𑀩𑀸𑀥𑀬𑀺𑀲𑁆𑀲𑀲𑀺’’.

𑁩𑁦𑁧.

‘‘𑀇𑀫𑀜𑁆𑀘 𑀫𑁂 𑀧𑀼𑀢𑁆𑀢𑀨𑀮𑀁, 𑀓𑀸𑀴 𑀉𑀧𑁆𑀧𑀸𑀤𑀺𑀢𑀁 𑀢𑀬𑀸;

𑀢𑀁 𑀫𑀁 𑀧𑀼𑀢𑁆𑀢𑀯𑀢𑀺𑀁 𑀲𑀦𑁆𑀢𑀺𑀁, 𑀓𑀲𑁆𑀲 𑀑𑀳𑀸𑀬 𑀕𑀘𑁆𑀙𑀲𑀺’’.

𑁩𑁦𑁨.

‘‘𑀚𑀳𑀦𑁆𑀢𑀺 𑀧𑀼𑀢𑁆𑀢𑁂 𑀲𑀧𑁆𑀧𑀜𑁆𑀜𑀸, 𑀢𑀢𑁄 𑀜𑀸𑀢𑀻 𑀢𑀢𑁄 𑀥𑀦𑀁;

𑀧𑀩𑁆𑀩𑀚𑀦𑁆𑀢𑀺 𑀫𑀳𑀸𑀯𑀻𑀭𑀸, 𑀦𑀸𑀕𑁄 𑀙𑁂𑀢𑁆𑀯𑀸𑀯 𑀩𑀦𑁆𑀥𑀦𑀁’’.

𑁩𑁦𑁩.

‘‘𑀇𑀤𑀸𑀦𑀺 𑀢𑁂 𑀇𑀫𑀁 𑀧𑀼𑀢𑁆𑀢𑀁, 𑀤𑀡𑁆𑀟𑁂𑀦 𑀙𑀼𑀭𑀺𑀓𑀸𑀬 𑀯𑀸;

𑀪𑀽𑀫𑀺𑀬𑀁 𑀯𑀸 𑀦𑀺𑀲𑀼𑀫𑁆𑀪𑀺𑀲𑁆𑀲𑀁 [𑀦𑀺𑀲𑀼𑀫𑁆𑀪𑁂𑀬𑁆𑀬𑀁 (𑀲𑀻.)], 𑀧𑀼𑀢𑁆𑀢𑀲𑁄𑀓𑀸 𑀦 𑀕𑀘𑁆𑀙𑀲𑀺’’.

𑁩𑁦𑁪.

‘‘𑀲𑀘𑁂 𑀧𑀼𑀢𑁆𑀢𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀓𑀼𑀓𑁆𑀓𑀼𑀭𑀸𑀦𑀁 𑀧𑀤𑀸𑀳𑀺𑀲𑀺;

𑀦 𑀫𑀁 𑀧𑀼𑀢𑁆𑀢𑀓𑀢𑁆𑀢𑁂 𑀚𑀫𑁆𑀫𑀺, 𑀧𑀼𑀦𑀭𑀸𑀯𑀢𑁆𑀢𑀬𑀺𑀲𑁆𑀲𑀲𑀺’’.

𑁩𑁦𑁫.

‘‘𑀳𑀦𑁆𑀤 𑀔𑁄 𑀤𑀸𑀦𑀺 𑀪𑀤𑁆𑀤𑀦𑁆𑀢𑁂, 𑀓𑀼𑀳𑀺𑀁 𑀓𑀸𑀴 𑀕𑀫𑀺𑀲𑁆𑀲𑀲𑀺;

𑀓𑀢𑀫𑀁 ¶ 𑀕𑀸𑀫𑀦𑀺𑀕𑀫𑀁, 𑀦𑀕𑀭𑀁 𑀭𑀸𑀚𑀥𑀸𑀦𑀺𑀬𑁄’’.

𑁩𑁦𑁬.

‘‘𑀅𑀳𑀼𑀫𑁆𑀳 𑀧𑀼𑀩𑁆𑀩𑁂 𑀕𑀡𑀺𑀦𑁄, 𑀅𑀲𑁆𑀲𑀫𑀡𑀸 𑀲𑀫𑀡𑀫𑀸𑀦𑀺𑀦𑁄;

𑀕𑀸𑀫𑁂𑀦 𑀕𑀸𑀫𑀁 𑀯𑀺𑀘𑀭𑀺𑀫𑁆𑀳, 𑀦𑀕𑀭𑁂 𑀭𑀸𑀚𑀥𑀸𑀦𑀺𑀬𑁄.

𑁩𑁦𑁭.

‘‘𑀏𑀲𑁄 𑀳𑀺 𑀪𑀕𑀯𑀸 𑀩𑀼𑀤𑁆𑀥𑁄, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀧𑀸𑀡𑀺𑀦𑀁;

𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀁, 𑀲𑁄 𑀫𑁂 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺’’.

𑁩𑁦𑁮.

‘‘𑀯𑀦𑁆𑀤𑀦𑀁 ¶ 𑀤𑀸𑀦𑀺 𑀯𑀚𑁆𑀚𑀸𑀲𑀺, 𑀮𑁄𑀓𑀦𑀸𑀣𑀁 𑀅𑀦𑀼𑀢𑁆𑀢𑀭𑀁;

𑀧𑀤𑀓𑁆𑀔𑀺𑀡𑀜𑁆𑀘 𑀓𑀢𑁆𑀯𑀸𑀦, 𑀆𑀤𑀺𑀲𑁂𑀬𑁆𑀬𑀸𑀲𑀺 𑀤𑀓𑁆𑀔𑀺𑀡𑀁’’.

𑁩𑁦𑁯.

‘‘𑀏𑀢𑀁 𑀔𑁄 𑀮𑀩𑁆𑀪𑀫𑀫𑁆𑀳𑁂𑀳𑀺, 𑀬𑀣𑀸 𑀪𑀸𑀲𑀲𑀺 𑀢𑁆𑀯𑀜𑁆𑀘 𑀫𑁂;

𑀯𑀦𑁆𑀤𑀦𑀁 𑀤𑀸𑀦𑀺 𑀢𑁂 𑀯𑀚𑁆𑀚𑀁, 𑀮𑁄𑀓𑀦𑀸𑀣𑀁 𑀅𑀦𑀼𑀢𑁆𑀢𑀭𑀁;

𑀧𑀤𑀓𑁆𑀔𑀺𑀡𑀜𑁆𑀘 ¶ 𑀓𑀢𑁆𑀯𑀸𑀦, 𑀆𑀤𑀺𑀲𑀺𑀲𑁆𑀲𑀸𑀫𑀺 𑀤𑀓𑁆𑀔𑀺𑀡𑀁’’.

𑁩𑁧𑁦.

𑀢𑀢𑁄 ¶ 𑀘 𑀓𑀸𑀴𑁄 𑀧𑀓𑁆𑀓𑀸𑀫𑀺, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀲𑁄 𑀅𑀤𑁆𑀤𑀲𑀸𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁.

𑁩𑁧𑁧.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁩𑁧𑁨.

𑀢𑀲𑁆𑀲 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸, 𑀓𑀢𑁆𑀯𑀸𑀦 𑀦𑀁 [𑀓𑀢𑁆𑀯𑀸𑀦𑀳𑀁 (𑀲𑀻.)] 𑀧𑀤𑀓𑁆𑀔𑀺𑀡𑀁;

𑀘𑀸𑀧𑀸𑀬 𑀆𑀤𑀺𑀲𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

… 𑀘𑀸𑀧𑀸 𑀣𑁂𑀭𑀻….

𑁪. 𑀲𑀼𑀦𑁆𑀤𑀭𑀻𑀣𑁂𑀭𑀻𑀕𑀸𑀣𑀸

𑁩𑁧𑁩.

‘‘𑀧𑁂𑀢𑀸𑀦𑀺 𑀪𑁄𑀢𑀺 𑀧𑀼𑀢𑁆𑀢𑀸𑀦𑀺, 𑀔𑀸𑀤𑀫𑀸𑀦𑀸 𑀢𑀼𑀯𑀁 𑀧𑀼𑀭𑁂;

𑀢𑀼𑀯𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀅𑀢𑀻𑀯 𑀧𑀭𑀺𑀢𑀧𑁆𑀧𑀲𑀺.

𑁩𑁧𑁪.

‘‘𑀲𑀸𑀚𑁆𑀚 𑀲𑀩𑁆𑀩𑀸𑀦𑀺 𑀔𑀸𑀤𑀺𑀢𑁆𑀯𑀸, 𑀲𑀢𑀧𑀼𑀢𑁆𑀢𑀸𑀦𑀺 [𑀲𑀢𑁆𑀢 𑀧𑀼𑀢𑁆𑀢𑀸𑀦𑀺 (𑀲𑁆𑀬𑀸.)] 𑀩𑁆𑀭𑀸𑀳𑁆𑀫𑀡𑀻;

𑀯𑀸𑀲𑁂𑀝𑁆𑀞𑀺 𑀓𑁂𑀦 𑀯𑀡𑁆𑀡𑁂𑀦, 𑀦 𑀩𑀸𑀴𑁆𑀳𑀁 𑀧𑀭𑀺𑀢𑀧𑁆𑀧𑀲𑀺’’.

𑁩𑁧𑁫.

‘‘𑀩𑀳𑀽𑀦𑀺 𑀧𑀼𑀢𑁆𑀢𑀲𑀢𑀸𑀦𑀺, 𑀜𑀸𑀢𑀺𑀲𑀗𑁆𑀖𑀲𑀢𑀸𑀦𑀺 𑀘;

𑀔𑀸𑀤𑀺𑀢𑀸𑀦𑀺 𑀅𑀢𑀻𑀢𑀁𑀲𑁂, 𑀫𑀫 𑀢𑀼𑀬𑁆𑀳𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁩𑁧𑁬.

‘‘𑀲𑀸𑀳𑀁 𑀦𑀺𑀲𑁆𑀲𑀭𑀡𑀁 𑀜𑀢𑁆𑀯𑀸, 𑀚𑀸𑀢𑀺𑀬𑀸 𑀫𑀭𑀡𑀲𑁆𑀲 𑀘;

𑀦 ¶ 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀦 𑀘𑀸𑀧𑀺 𑀧𑀭𑀺𑀢𑀧𑁆𑀧𑀬𑀺𑀁’’.

𑁩𑁧𑁭.

‘‘𑀅𑀩𑁆𑀪𑀼𑀢𑀁 ¶ 𑀯𑀢 𑀯𑀸𑀲𑁂𑀝𑁆𑀞𑀺, 𑀯𑀸𑀘𑀁 𑀪𑀸𑀲𑀲𑀺 𑀏𑀤𑀺𑀲𑀺𑀁;

𑀓𑀲𑁆𑀲 𑀢𑁆𑀯𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀕𑀺𑀭𑀁 [𑀣𑀺𑀭𑀁 (𑀲𑀻.)] 𑀪𑀸𑀲𑀲𑀺 𑀏𑀤𑀺𑀲𑀺𑀁’’.

𑁩𑁧𑁮.

‘‘𑀏𑀲 𑀩𑁆𑀭𑀸𑀳𑁆𑀫𑀡 𑀲𑀫𑁆𑀩𑀼𑀤𑁆𑀥𑁄, 𑀦𑀕𑀭𑀁 𑀫𑀺𑀣𑀺𑀮𑀁 𑀧𑀢𑀺;

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀧𑀸𑀡𑀺𑀦𑀁.

𑁩𑁧𑁯.

‘‘𑀢𑀲𑁆𑀲 𑀩𑁆𑀭𑀳𑁆𑀫𑁂 [𑀩𑁆𑀭𑀸𑀳𑁆𑀫𑀡 (𑀲𑀻. 𑀲𑁆𑀬𑀸.)] 𑀅𑀭𑀳𑀢𑁄, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀦𑀺𑀭𑀽𑀧𑀥𑀺𑀁;

𑀢𑀢𑁆𑀣 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑀸, 𑀧𑀼𑀢𑁆𑀢𑀲𑁄𑀓𑀁 𑀩𑁆𑀬𑀧𑀸𑀦𑀼𑀤𑀺𑀁’’.

𑁩𑁨𑁦.

‘‘𑀲𑁄 ¶ 𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀺, 𑀦𑀕𑀭𑀁 𑀫𑀺𑀣𑀺𑀮𑀁 𑀧𑀢𑀺;

𑀅𑀧𑁆𑀧𑁂𑀯 𑀫𑀁 𑀲𑁄 𑀪𑀕𑀯𑀸, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑁄𑀘𑀬𑁂’’.

𑁩𑁨𑁧.

𑀅𑀤𑁆𑀤𑀲 ¶ 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁;

𑀲𑁆𑀯𑀲𑁆𑀲 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀫𑀼𑀦𑀺 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀽.

𑁩𑁨𑁨.

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁩𑁨𑁩.

𑀢𑀢𑁆𑀣 𑀯𑀺𑀜𑁆𑀜𑀸𑀢𑀲𑀤𑁆𑀥𑀫𑁆𑀫𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺;

𑀲𑀼𑀚𑀸𑀢𑁄 𑀢𑀻𑀳𑀺 𑀭𑀢𑁆𑀢𑀻𑀳𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺.

𑁩𑁨𑁪.

‘‘𑀏𑀳𑀺 𑀲𑀸𑀭𑀣𑀺 𑀕𑀘𑁆𑀙𑀸𑀳𑀺, 𑀭𑀣𑀁 𑀦𑀺𑀬𑁆𑀬𑀸𑀤𑀬𑀸𑀳𑀺𑀫𑀁;

𑀆𑀭𑁄𑀕𑁆𑀬𑀁 𑀩𑁆𑀭𑀸𑀳𑁆𑀫𑀡𑀺𑀁 𑀯𑀚𑁆𑀚 [𑀯𑀚𑁆𑀚𑀸 (𑀲𑀻.)], ‘𑀧𑀩𑁆𑀩𑀚𑀺 [𑀧𑀩𑁆𑀩𑀚𑀺𑀢𑁄 (𑀲𑀻.)] 𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀼𑀚𑀸𑀢𑁄 𑀢𑀻𑀳𑀺 𑀭𑀢𑁆𑀢𑀻𑀳𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺’’’.

𑁩𑁨𑁫.

𑀢𑀢𑁄 𑀘 𑀭𑀣𑀫𑀸𑀤𑀸𑀬, 𑀲𑀳𑀲𑁆𑀲𑀜𑁆𑀘𑀸𑀧𑀺 𑀲𑀸𑀭𑀣𑀺;

𑀆𑀭𑁄𑀕𑁆𑀬𑀁 ¶ 𑀩𑁆𑀭𑀸𑀳𑁆𑀫𑀡𑀺𑀯𑁄𑀘, ‘‘𑀧𑀩𑁆𑀩𑀚𑀺 𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀼𑀚𑀸𑀢𑁄 𑀢𑀻𑀳𑀺 𑀭𑀢𑁆𑀢𑀻𑀳𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺’’.

𑁩𑁨𑁬.

‘‘𑀏𑀢𑀜𑁆𑀘𑀸𑀳𑀁 𑀅𑀲𑁆𑀲𑀭𑀣𑀁, 𑀲𑀳𑀲𑁆𑀲𑀜𑁆𑀘𑀸𑀧𑀺 𑀲𑀸𑀭𑀣𑀺;

𑀢𑁂𑀯𑀺𑀚𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀲𑀼𑀢𑁆𑀯𑀸 [𑀜𑀢𑁆𑀯𑀸 (𑀲𑀻.)], 𑀧𑀼𑀡𑁆𑀡𑀧𑀢𑁆𑀢𑀁 𑀤𑀤𑀸𑀫𑀺 𑀢𑁂’’.

𑁩𑁨𑁭.

‘‘𑀢𑀼𑀬𑁆𑀳𑁂𑀯 𑀳𑁄𑀢𑁆𑀯𑀲𑁆𑀲𑀭𑀣𑁄, 𑀲𑀳𑀲𑁆𑀲𑀜𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀺;

𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂’’.

𑁩𑁨𑁮.

‘‘𑀳𑀢𑁆𑀣𑀻 ¶ 𑀕𑀯𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑀜𑁆𑀘, 𑀨𑀻𑀢𑀜𑁆𑀘𑀺𑀫𑀁 𑀕𑀳𑀯𑀺𑀪𑀯𑀁 𑀧𑀳𑀸𑀬;

𑀧𑀺𑀢𑀸 𑀧𑀩𑁆𑀩𑀚𑀺𑀢𑁄 𑀢𑀼𑀬𑁆𑀳𑀁, 𑀪𑀼𑀜𑁆𑀚 𑀪𑁄𑀕𑀸𑀦𑀺 𑀲𑀼𑀦𑁆𑀤𑀭𑀺; 𑀢𑀼𑀯𑀁 𑀤𑀸𑀬𑀸𑀤𑀺𑀓𑀸 𑀓𑀼𑀮𑁂’’.

𑁩𑁨𑁯.

‘‘𑀳𑀢𑁆𑀣𑀻 𑀕𑀯𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑀜𑁆𑀘, 𑀭𑀫𑁆𑀫𑀁 𑀘𑀺𑀫𑀁 𑀕𑀳𑀯𑀺𑀪𑀯𑀁 𑀧𑀳𑀸𑀬;

𑀧𑀺𑀢𑀸 𑀧𑀩𑁆𑀩𑀚𑀺𑀢𑁄 𑀫𑀬𑁆𑀳𑀁, 𑀧𑀼𑀢𑁆𑀢𑀲𑁄𑀓𑁂𑀦 𑀅𑀝𑁆𑀝𑀺𑀢𑁄;

𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀪𑀸𑀢𑀼𑀲𑁄𑀓𑁂𑀦 𑀅𑀝𑁆𑀝𑀺𑀢𑀸’’.

𑁩𑁩𑁦.

‘‘𑀲𑁄 𑀢𑁂 𑀇𑀚𑁆𑀛𑀢𑀼 𑀲𑀗𑁆𑀓𑀧𑁆𑀧𑁄, 𑀬𑀁 𑀢𑁆𑀯𑀁 𑀧𑀢𑁆𑀣𑁂𑀲𑀺 𑀲𑀼𑀦𑁆𑀤𑀭𑀻;

𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄 𑀉𑀜𑁆𑀙𑁄 𑀘, 𑀧𑀁𑀲𑀼𑀓𑀽𑀮𑀜𑁆𑀘 𑀘𑀻𑀯𑀭𑀁;

𑀏𑀢𑀸𑀦𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑀻, 𑀧𑀭𑀮𑁄𑀓𑁂 𑀅𑀦𑀸𑀲𑀯𑀸’’.

𑁩𑁩𑁧.

‘‘𑀲𑀺𑀓𑁆𑀔𑀫𑀸𑀦𑀸𑀬 ¶ 𑀫𑁂 𑀅𑀬𑁆𑀬𑁂, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂.

𑁩𑁩𑁨.

‘‘𑀢𑀼𑀯𑀁 ¶ ¶ 𑀦𑀺𑀲𑁆𑀲𑀸𑀬 𑀓𑀮𑁆𑀬𑀸𑀡𑀻, 𑀣𑁂𑀭𑀻 𑀲𑀗𑁆𑀖𑀲𑁆𑀲 𑀲𑁄𑀪𑀦𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁩𑁩.

‘‘𑀅𑀦𑀼𑀚𑀸𑀦𑀸𑀳𑀺 𑀫𑁂 𑀅𑀬𑁆𑀬𑁂, 𑀇𑀘𑁆𑀙𑁂 𑀲𑀸𑀯𑀢𑁆𑀣𑀺 𑀕𑀦𑁆𑀢𑀯𑁂;

𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂’’.

𑁩𑁩𑁪.

‘‘𑀧𑀲𑁆𑀲 𑀲𑀼𑀦𑁆𑀤𑀭𑀺 𑀲𑀢𑁆𑀣𑀸𑀭𑀁, 𑀳𑁂𑀫𑀯𑀡𑁆𑀡𑀁 𑀳𑀭𑀺𑀢𑁆𑀢𑀘𑀁;

𑀅𑀤𑀦𑁆𑀢𑀸𑀦𑀁 𑀤𑀫𑁂𑀢𑀸𑀭𑀁, 𑀲𑀫𑁆𑀩𑀼𑀤𑁆𑀥𑀫𑀓𑀼𑀢𑁄𑀪𑀬𑀁’’.

𑁩𑁩𑁫.

‘‘𑀧𑀲𑁆𑀲 𑀲𑀼𑀦𑁆𑀤𑀭𑀺𑀫𑀸𑀬𑀦𑁆𑀢𑀺𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁;

𑀯𑀻𑀢𑀭𑀸𑀕𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁.

𑁩𑁩𑁬.

‘‘𑀩𑀸𑀭𑀸𑀡𑀲𑀻𑀢𑁄 𑀦𑀺𑀓𑁆𑀔𑀫𑁆𑀫, 𑀢𑀯 𑀲𑀦𑁆𑀢𑀺𑀓𑀫𑀸𑀕𑀢𑀸;

𑀲𑀸𑀯𑀺𑀓𑀸 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀢𑀺 𑀲𑀼𑀦𑁆𑀤𑀭𑀻’’.

𑁩𑁩𑁭.

‘‘𑀢𑀼𑀯𑀁 𑀩𑀼𑀤𑁆𑀥𑁄 𑀢𑀼𑀯𑀁 𑀲𑀢𑁆𑀣𑀸, 𑀢𑀼𑀬𑁆𑀳𑀁 𑀥𑀻𑀢𑀸𑀫𑁆𑀳𑀺 𑀩𑁆𑀭𑀸𑀳𑁆𑀫𑀡;

𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸’’.

𑁩𑁩𑁮.

‘‘𑀢𑀲𑁆𑀲𑀸 ¶ 𑀢𑁂 𑀲𑁆𑀯𑀸𑀕𑀢𑀁 𑀪𑀤𑁆𑀤𑁂, 𑀢𑀢𑁄 [𑀅𑀣𑁄 (𑀓.)] 𑀢𑁂 𑀅𑀤𑀼𑀭𑀸𑀕𑀢𑀁;

𑀏𑀯𑀜𑁆𑀳𑀺 𑀤𑀦𑁆𑀢𑀸 𑀆𑀬𑀦𑁆𑀢𑀺, 𑀲𑀢𑁆𑀣𑀼 𑀧𑀸𑀤𑀸𑀦𑀺 𑀯𑀦𑁆𑀤𑀺𑀓𑀸;

𑀯𑀻𑀢𑀭𑀸𑀕𑀸 𑀯𑀺𑀲𑀁𑀬𑀼𑀢𑁆𑀢𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸’’.

… 𑀲𑀼𑀦𑁆𑀤𑀭𑀻 𑀣𑁂𑀭𑀻….

𑁫. 𑀲𑀼𑀪𑀸𑀓𑀫𑁆𑀫𑀸𑀭𑀥𑀻𑀢𑀼𑀣𑁂𑀭𑀻𑀕𑀸𑀣𑀸

𑁩𑁩𑁯.

‘‘𑀤𑀳𑀭𑀸𑀳𑀁 𑀲𑀼𑀤𑁆𑀥𑀯𑀲𑀦𑀸, 𑀬𑀁 𑀧𑀼𑀭𑁂 𑀥𑀫𑁆𑀫𑀫𑀲𑁆𑀲𑀼𑀡𑀺𑀁;

𑀢𑀲𑁆𑀲𑀸 𑀫𑁂 𑀅𑀧𑁆𑀧𑀫𑀢𑁆𑀢𑀸𑀬, 𑀲𑀘𑁆𑀘𑀸𑀪𑀺𑀲𑀫𑀬𑁄 𑀅𑀳𑀼.

𑁩𑁪𑁦.

‘‘𑀢𑀢𑁄𑀳𑀁 𑀲𑀩𑁆𑀩𑀓𑀸𑀫𑁂𑀲𑀼, 𑀪𑀼𑀲𑀁 𑀅𑀭𑀢𑀺𑀫𑀚𑁆𑀛𑀕𑀁;

𑀲𑀓𑁆𑀓𑀸𑀬𑀲𑁆𑀫𑀺𑀁 𑀪𑀬𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀫𑁂𑀯 [𑀦𑁂𑀓𑁆𑀔𑀫𑁆𑀫𑀜𑁆𑀜𑁂𑀯 (𑀲𑀻.), 𑀦𑁂𑀓𑁆𑀔𑀫𑁆𑀫𑀲𑁆𑀲𑁂𑀯 (𑀲𑁆𑀬𑀸.)] 𑀧𑀻𑀳𑀬𑁂.

𑁩𑁪𑁧.

‘‘𑀳𑀺𑀢𑁆𑀯𑀸𑀦𑀳𑀁 ¶ 𑀜𑀸𑀢𑀺𑀕𑀡𑀁, 𑀤𑀸𑀲𑀓𑀫𑁆𑀫𑀓𑀭𑀸𑀦𑀺 𑀘;

𑀕𑀸𑀫𑀔𑁂𑀢𑁆𑀢𑀸𑀦𑀺 𑀨𑀻𑀢𑀸𑀦𑀺, 𑀭𑀫𑀡𑀻𑀬𑁂 𑀧𑀫𑁄𑀤𑀺𑀢𑁂.

𑁩𑁪𑁨.

‘‘𑀧𑀳𑀸𑀬𑀳𑀁 ¶ 𑀧𑀩𑁆𑀩𑀚𑀺𑀢𑀸, 𑀲𑀸𑀧𑀢𑁂𑀬𑁆𑀬𑀫𑀦𑀧𑁆𑀧𑀓𑀁;

𑀏𑀯𑀁 𑀲𑀤𑁆𑀥𑀸𑀬 𑀦𑀺𑀓𑁆𑀔𑀫𑁆𑀫, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂.

𑁩𑁪𑁩.

‘‘𑀦𑁂𑀢𑀁 [𑀦 𑀫𑁂𑀢𑀁 (𑀲𑀻. 𑀲𑁆𑀬𑀸.)] 𑀅𑀲𑁆𑀲 𑀧𑀢𑀺𑀭𑀽𑀧𑀁, 𑀆𑀓𑀺𑀜𑁆𑀘𑀜𑁆𑀜𑀜𑁆𑀳𑀺 𑀧𑀢𑁆𑀣𑀬𑁂;

𑀬𑁄 [𑀬𑀸 (𑀲𑁆𑀬𑀸.)] 𑀚𑀸𑀢𑀭𑀽𑀧𑀁 𑀭𑀚𑀢𑀁, 𑀙𑀟𑁆𑀟𑁂𑀢𑁆𑀯𑀸 [𑀣𑀧𑁂𑀢𑁆𑀯𑀸 (𑀓.)] 𑀧𑀼𑀦𑀭𑀸𑀕𑀫𑁂 [𑀧𑀼𑀦𑀭𑀸𑀕𑀳𑁂 (𑀓.)].

𑁩𑁪𑁪.

‘‘𑀭𑀚𑀢𑀁 ¶ 𑀚𑀸𑀢𑀭𑀽𑀧𑀁 𑀯𑀸, 𑀦 𑀩𑁄𑀥𑀸𑀬 𑀦 𑀲𑀦𑁆𑀢𑀺𑀬𑀸;

𑀦𑁂𑀢𑀁 𑀲𑀫𑀡𑀲𑀸𑀭𑀼𑀧𑁆𑀧𑀁, 𑀦 𑀏𑀢𑀁 𑀅𑀭𑀺𑀬𑀤𑁆𑀥𑀦𑀁.

𑁩𑁪𑁫.

‘‘𑀮𑁄𑀪𑀦𑀁 𑀫𑀤𑀦𑀜𑁆𑀘𑁂𑀢𑀁, 𑀫𑁄𑀳𑀦𑀁 𑀭𑀚𑀯𑀟𑁆𑀠𑀦𑀁;

𑀲𑀸𑀲𑀗𑁆𑀓𑀁 𑀩𑀳𑀼𑀆𑀬𑀸𑀲𑀁, 𑀦𑀢𑁆𑀣𑀺 𑀘𑁂𑀢𑁆𑀣 𑀥𑀼𑀯𑀁 𑀞𑀺𑀢𑀺.

𑁩𑁪𑁬.

‘‘𑀏𑀢𑁆𑀣 𑀭𑀢𑁆𑀢𑀸 𑀧𑀫𑀢𑁆𑀢𑀸 𑀘, 𑀲𑀗𑁆𑀓𑀺𑀮𑀺𑀝𑁆𑀞𑀫𑀦𑀸 𑀦𑀭𑀸;

𑀅𑀜𑁆𑀜𑀫𑀜𑁆𑀜𑁂𑀦 𑀩𑁆𑀬𑀸𑀭𑀼𑀤𑁆𑀥𑀸, 𑀧𑀼𑀣𑀼 𑀓𑀼𑀩𑁆𑀩𑀦𑁆𑀢𑀺 𑀫𑁂𑀥𑀕𑀁.

𑁩𑁪𑁭.

‘‘𑀯𑀥𑁄 𑀩𑀦𑁆𑀥𑁄 𑀧𑀭𑀺𑀓𑁆𑀮𑁂𑀲𑁄, 𑀚𑀸𑀦𑀺 𑀲𑁄𑀓𑀧𑀭𑀺𑀤𑁆𑀤𑀯𑁄;

𑀓𑀸𑀫𑁂𑀲𑀼 𑀅𑀥𑀺𑀧𑀦𑁆𑀦𑀸𑀦𑀁, 𑀤𑀺𑀲𑁆𑀲𑀢𑁂 𑀩𑁆𑀬𑀲𑀦𑀁 𑀩𑀳𑀼𑀁.

𑁩𑁪𑁮.

‘‘𑀢𑀁 𑀫𑀁 𑀜𑀸𑀢𑀻 𑀅𑀫𑀺𑀢𑁆𑀢𑀸𑀯, 𑀓𑀺𑀁 𑀯𑁄 𑀓𑀸𑀫𑁂𑀲𑀼 𑀬𑀼𑀜𑁆𑀚𑀣;

𑀚𑀸𑀦𑀸𑀣 𑀫𑀁 𑀧𑀩𑁆𑀩𑀚𑀺𑀢𑀁, 𑀓𑀸𑀫𑁂𑀲𑀼 𑀪𑀬𑀤𑀲𑁆𑀲𑀺𑀦𑀺𑀁.

𑁩𑁪𑁯.

‘‘𑀦 ¶ 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦, 𑀧𑀭𑀺𑀓𑁆𑀔𑀻𑀬𑀦𑁆𑀢𑀺 𑀆𑀲𑀯𑀸;

𑀅𑀫𑀺𑀢𑁆𑀢𑀸 𑀯𑀥𑀓𑀸 𑀓𑀸𑀫𑀸, 𑀲𑀧𑀢𑁆𑀢𑀸 𑀲𑀮𑁆𑀮𑀩𑀦𑁆𑀥𑀦𑀸.

𑁩𑁫𑁦.

‘‘𑀢𑀁 ¶ 𑀫𑀁 𑀜𑀸𑀢𑀻 𑀅𑀫𑀺𑀢𑁆𑀢𑀸𑀯, 𑀓𑀺𑀁 𑀯𑁄 𑀓𑀸𑀫𑁂𑀲𑀼 𑀬𑀼𑀜𑁆𑀚𑀣;

𑀚𑀸𑀦𑀸𑀣 𑀫𑀁 𑀧𑀩𑁆𑀩𑀚𑀺𑀢𑀁, 𑀫𑀼𑀡𑁆𑀟𑀁 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀁.

𑁩𑁫𑁧.

‘‘𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑁄 𑀉𑀜𑁆𑀙𑁄 𑀘, 𑀧𑀁𑀲𑀼𑀓𑀽𑀮𑀜𑁆𑀘 𑀘𑀻𑀯𑀭𑀁;

𑀏𑀢𑀁 𑀔𑁄 𑀫𑀫 𑀲𑀸𑀭𑀼𑀧𑁆𑀧𑀁, 𑀅𑀦𑀕𑀸𑀭𑀽𑀧𑀦𑀺𑀲𑁆𑀲𑀬𑁄.

𑁩𑁫𑁨.

‘‘𑀯𑀦𑁆𑀢𑀸 𑀫𑀳𑁂𑀲𑀻𑀳𑀺 𑀓𑀸𑀫𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀔𑁂𑀫𑀝𑁆𑀞𑀸𑀦𑁂 𑀯𑀺𑀫𑀼𑀢𑁆𑀢𑀸 𑀢𑁂, 𑀧𑀢𑁆𑀢𑀸 𑀢𑁂 𑀅𑀘𑀮𑀁 𑀲𑀼𑀔𑀁.

𑁩𑁫𑁩.

‘‘𑀫𑀸𑀳𑀁 𑀓𑀸𑀫𑁂𑀳𑀺 𑀲𑀗𑁆𑀕𑀘𑁆𑀙𑀺𑀁, 𑀬𑁂𑀲𑀼 𑀢𑀸𑀡𑀁 𑀦 𑀯𑀺𑀚𑁆𑀚𑀢𑀺;

𑀅𑀫𑀺𑀢𑁆𑀢𑀸 𑀯𑀥𑀓𑀸 𑀓𑀸𑀫𑀸, 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸 𑀤𑀼𑀔𑀸.

𑁩𑁫𑁪.

‘‘𑀧𑀭𑀺𑀧𑀦𑁆𑀣𑁄 ¶ 𑀏𑀲 𑀪𑀬𑁄, 𑀲𑀯𑀺𑀖𑀸𑀢𑁄 𑀲𑀓𑀡𑁆𑀝𑀓𑁄;

𑀕𑁂𑀥𑁄 𑀲𑀼𑀯𑀺𑀲𑀫𑁄 𑀘𑁂𑀲𑁄 [𑀮𑁂𑀧𑁄 (𑀲𑀻.)], 𑀫𑀳𑀦𑁆𑀢𑁄 𑀫𑁄𑀳𑀦𑀸𑀫𑀼𑀔𑁄.

𑁩𑁫𑁫.

‘‘𑀉𑀧𑀲𑀕𑁆𑀕𑁄 𑀪𑀻𑀫𑀭𑀽𑀧𑁄, 𑀓𑀸𑀫𑀸 𑀲𑀧𑁆𑀧𑀲𑀺𑀭𑀽𑀧𑀫𑀸;

𑀬𑁂 𑀩𑀸𑀮𑀸 𑀅𑀪𑀺𑀦𑀦𑁆𑀤𑀦𑁆𑀢𑀺, 𑀅𑀦𑁆𑀥𑀪𑀽𑀢𑀸 𑀧𑀼𑀣𑀼𑀚𑁆𑀚𑀦𑀸.

𑁩𑁫𑁬.

‘‘𑀓𑀸𑀫𑀧𑀗𑁆𑀓𑁂𑀦 𑀲𑀢𑁆𑀢𑀸 𑀳𑀺, 𑀩𑀳𑀽 𑀮𑁄𑀓𑁂 𑀅𑀯𑀺𑀤𑁆𑀤𑀲𑀽;

𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀫𑀭𑀡𑀲𑁆𑀲 𑀘.

𑁩𑁫𑁭.

‘‘𑀤𑀼𑀕𑁆𑀕𑀢𑀺𑀕𑀫𑀦𑀁 𑀫𑀕𑁆𑀕𑀁, 𑀫𑀦𑀼𑀲𑁆𑀲𑀸 𑀓𑀸𑀫𑀳𑁂𑀢𑀼𑀓𑀁;

𑀩𑀳𑀼𑀁 𑀯𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀅𑀢𑁆𑀢𑀦𑁄 𑀭𑁄𑀕𑀫𑀸𑀯𑀳𑀁.

𑁩𑁫𑁮.

‘‘𑀏𑀯𑀁 ¶ 𑀅𑀫𑀺𑀢𑁆𑀢𑀚𑀦𑀦𑀸, 𑀢𑀸𑀧𑀦𑀸 𑀲𑀁𑀓𑀺𑀮𑁂𑀲𑀺𑀓𑀸;

𑀮𑁄𑀓𑀸𑀫𑀺𑀲𑀸 𑀩𑀦𑁆𑀥𑀦𑀻𑀬𑀸, 𑀓𑀸𑀫𑀸 𑀫𑀭𑀡𑀩𑀦𑁆𑀥𑀦𑀸 [𑀘𑀭𑀡𑀩𑀦𑁆𑀥𑀦𑀸 (𑀲𑀻.)].

𑁩𑁫𑁯.

‘‘𑀉𑀫𑁆𑀫𑀸𑀤𑀦𑀸 ¶ 𑀉𑀮𑁆𑀮𑀧𑀦𑀸, 𑀓𑀸𑀫𑀸 𑀘𑀺𑀢𑁆𑀢𑀧𑁆𑀧𑀫𑀤𑁆𑀤𑀺𑀦𑁄;

𑀲𑀢𑁆𑀢𑀸𑀦𑀁 𑀲𑀗𑁆𑀓𑀺𑀮𑁂𑀲𑀸𑀬, 𑀔𑀺𑀧𑁆𑀧𑀁 [𑀔𑀺𑀧𑀁 (𑀲𑀻.)] 𑀫𑀸𑀭𑁂𑀦 𑀑𑀟𑁆𑀟𑀺𑀢𑀁.

𑁩𑁬𑁦.

‘‘𑀅𑀦𑀦𑁆𑀢𑀸𑀤𑀻𑀦𑀯𑀸 𑀓𑀸𑀫𑀸, 𑀩𑀳𑀼𑀤𑀼𑀓𑁆𑀔𑀸 𑀫𑀳𑀸𑀯𑀺𑀲𑀸;

𑀅𑀧𑁆𑀧𑀲𑁆𑀲𑀸𑀤𑀸 ¶ 𑀭𑀡𑀓𑀭𑀸, 𑀲𑀼𑀓𑁆𑀓𑀧𑀓𑁆𑀔𑀯𑀺𑀲𑁄𑀲𑀦𑀸 [𑀯𑀺𑀲𑁄𑀲𑀓𑀸 (𑀲𑀻.)].

𑁩𑁬𑁧.

‘‘𑀲𑀸𑀳𑀁 𑀏𑀢𑀸𑀤𑀺𑀲𑀁 𑀓𑀢𑁆𑀯𑀸, 𑀩𑁆𑀬𑀲𑀦𑀁 𑀓𑀸𑀫𑀳𑁂𑀢𑀼𑀓𑀁;

𑀦 𑀢𑀁 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀺, 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸 𑀲𑀤𑀸.

𑁩𑁬𑁨.

‘‘𑀭𑀡𑀁 𑀓𑀭𑀺𑀢𑁆𑀯𑀸 [𑀢𑀭𑀺𑀢𑁆𑀯𑀸 (𑀲𑀻.)] 𑀓𑀸𑀫𑀸𑀦𑀁, 𑀲𑀻𑀢𑀺𑀪𑀸𑀯𑀸𑀪𑀺𑀓𑀗𑁆𑀔𑀺𑀦𑀻;

𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀲𑁆𑀲𑀸𑀫𑀺, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁂.

𑁩𑁬𑁩.

‘‘𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀅𑀭𑀺𑀬𑀝𑁆𑀞𑀗𑁆𑀕𑀺𑀓𑀁 𑀉𑀚𑀼𑀁;

𑀢𑀁 𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀬𑁂𑀦 𑀢𑀺𑀡𑁆𑀡𑀸 𑀫𑀳𑁂𑀲𑀺𑀦𑁄’’.

𑁩𑁬𑁪.

𑀇𑀫𑀁 𑀧𑀲𑁆𑀲𑀣 𑀥𑀫𑁆𑀫𑀝𑁆𑀞𑀁, 𑀲𑀼𑀪𑀁 𑀓𑀫𑁆𑀫𑀸𑀭𑀥𑀻𑀢𑀭𑀁;

𑀅𑀦𑁂𑀚𑀁 𑀉𑀧𑀲𑀫𑁆𑀧𑀚𑁆𑀚, 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀛𑀸𑀬𑀢𑀺.

𑁩𑁬𑁫.

𑀅𑀚𑁆𑀚𑀝𑁆𑀞𑀫𑀻 𑀧𑀩𑁆𑀩𑀚𑀺𑀢𑀸, 𑀲𑀤𑁆𑀥𑀸 𑀲𑀤𑁆𑀥𑀫𑁆𑀫𑀲𑁄𑀪𑀦𑀸;

𑀯𑀺𑀦𑀻𑀢𑀼𑀧𑁆𑀧𑀮𑀯𑀡𑁆𑀡𑀸𑀬, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻.

𑁩𑁬𑁬.

𑀲𑀸𑀬𑀁 ¶ 𑀪𑀼𑀚𑀺𑀲𑁆𑀲𑀸 𑀅𑀦𑀡𑀸, 𑀪𑀺𑀓𑁆𑀔𑀼𑀦𑀻 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀸;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸.

𑁩𑁬𑁭.

𑀢𑀁 𑀲𑀓𑁆𑀓𑁄 𑀤𑁂𑀯𑀲𑀗𑁆𑀖𑁂𑀦, 𑀉𑀧𑀲𑀗𑁆𑀓𑀫𑁆𑀫 𑀇𑀤𑁆𑀥𑀺𑀬𑀸;

𑀦𑀫𑀲𑁆𑀲𑀢𑀺 𑀪𑀽𑀢𑀧𑀢𑀺, 𑀲𑀼𑀪𑀁 𑀓𑀫𑁆𑀫𑀸𑀭𑀥𑀻𑀢𑀭𑀦𑁆𑀢𑀺.

… 𑀲𑀼𑀪𑀸 𑀓𑀫𑁆𑀫𑀸𑀭𑀥𑀻𑀢𑀸 𑀣𑁂𑀭𑀻….

𑀯𑀻𑀲𑀢𑀺𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁪. 𑀢𑀺𑀁𑀲𑀦𑀺𑀧𑀸𑀢𑁄

𑁧. 𑀲𑀼𑀪𑀸𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀣𑁂𑀭𑀻𑀕𑀸𑀣𑀸

𑁩𑁬𑁮.

𑀚𑀻𑀯𑀓𑀫𑁆𑀩𑀯𑀦𑀁 ¶ ¶ ¶ 𑀭𑀫𑁆𑀫𑀁, 𑀕𑀘𑁆𑀙𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁 𑀲𑀼𑀪𑀁;

𑀥𑀼𑀢𑁆𑀢𑀓𑁄 𑀲𑀦𑁆𑀦𑀺𑀯𑀸𑀭𑁂𑀲𑀺 [𑀢𑀁 𑀦𑀺𑀯𑀸𑀭𑁂𑀲𑀺 (𑀓.)], 𑀢𑀫𑁂𑀦𑀁 𑀅𑀩𑁆𑀭𑀯𑀻 𑀲𑀼𑀪𑀸.

𑁩𑁬𑁯.

‘‘𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢𑀁 𑀫𑀬𑀸, 𑀬𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺;

𑀦 𑀳𑀺 𑀧𑀩𑁆𑀩𑀚𑀺𑀢𑀸𑀬 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀫𑁆𑀨𑀼𑀲𑀦𑀸𑀬 𑀓𑀧𑁆𑀧𑀢𑀺.

𑁩𑁭𑁦.

‘‘𑀕𑀭𑀼𑀓𑁂 𑀫𑀫 𑀲𑀢𑁆𑀣𑀼𑀲𑀸𑀲𑀦𑁂, 𑀬𑀸 𑀲𑀺𑀓𑁆𑀔𑀸 𑀲𑀼𑀕𑀢𑁂𑀦 𑀤𑁂𑀲𑀺𑀢𑀸;

𑀧𑀭𑀺𑀲𑀼𑀤𑁆𑀥𑀧𑀤𑀁 ¶ 𑀅𑀦𑀗𑁆𑀕𑀡𑀁, 𑀓𑀺𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺.

𑁩𑁭𑁧.

‘‘𑀆𑀯𑀺𑀮𑀘𑀺𑀢𑁆𑀢𑁄 𑀅𑀦𑀸𑀯𑀺𑀮𑀁, 𑀲𑀭𑀚𑁄 𑀯𑀻𑀢𑀭𑀚𑀁 𑀅𑀦𑀗𑁆𑀕𑀡𑀁;

𑀲𑀩𑁆𑀩𑀢𑁆𑀣 𑀯𑀺𑀫𑀼𑀢𑁆𑀢𑀫𑀸𑀦𑀲𑀁, 𑀓𑀺𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺’’.

𑁩𑁭𑁨.

‘‘𑀤𑀳𑀭𑀸 𑀘 𑀅𑀧𑀸𑀧𑀺𑀓𑀸 𑀘𑀲𑀺, 𑀓𑀺𑀁 𑀢𑁂 𑀧𑀩𑁆𑀩𑀚𑁆𑀚𑀸 𑀓𑀭𑀺𑀲𑁆𑀲𑀢𑀺;

𑀦𑀺𑀓𑁆𑀔𑀺𑀧 𑀓𑀸𑀲𑀸𑀬𑀘𑀻𑀯𑀭𑀁, 𑀏𑀳𑀺 𑀭𑀫𑀸𑀫 𑀲𑀼𑀧𑀼𑀧𑁆𑀨𑀺𑀢𑁂 [𑀭𑀫𑀸𑀫𑀲𑁂 𑀧𑀼𑀧𑁆𑀨𑀺𑀢𑁂 (𑀲𑀻. 𑀲𑁆𑀬𑀸.)] 𑀯𑀦𑁂.

𑁩𑁭𑁩.

‘‘𑀫𑀥𑀼𑀭𑀜𑁆𑀘 𑀧𑀯𑀦𑁆𑀢𑀺 𑀲𑀩𑁆𑀩𑀲𑁄, 𑀓𑀼𑀲𑀼𑀫𑀭𑀚𑁂𑀦 𑀲𑀫𑀼𑀝𑁆𑀞𑀺𑀢𑀸 𑀤𑀼𑀫𑀸;

𑀧𑀞𑀫𑀯𑀲𑀦𑁆𑀢𑁄 𑀲𑀼𑀔𑁄 𑀉𑀢𑀼, 𑀏𑀳𑀺 𑀭𑀫𑀸𑀫 𑀲𑀼𑀧𑀼𑀧𑁆𑀨𑀺𑀢𑁂 𑀯𑀦𑁂.

𑁩𑁭𑁪.

‘‘𑀓𑀼𑀲𑀼𑀫𑀺𑀢𑀲𑀺𑀔𑀭𑀸 𑀘 𑀧𑀸𑀤𑀧𑀸, 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀫𑀸𑀮𑀼𑀢𑁂𑀭𑀺𑀢𑀸;

𑀓𑀸 𑀢𑀼𑀬𑁆𑀳𑀁 𑀭𑀢𑀺 𑀪𑀯𑀺𑀲𑁆𑀲𑀢𑀺, 𑀬𑀤𑀺 𑀏𑀓𑀸 𑀯𑀦𑀫𑁄𑀕𑀳𑀺𑀲𑁆𑀲𑀲𑀺 [𑀯𑀦𑀫𑁄𑀢𑀭𑀺𑀲𑁆𑀲𑀲𑀺 (𑀲𑀻.), 𑀯𑀦𑀫𑁄𑀕𑀸𑀳𑀺𑀲𑁆𑀲𑀲𑀺 (𑀲𑁆𑀬𑀸. 𑀓.)].

𑁩𑁭𑁫.

‘‘𑀯𑀸𑀴𑀫𑀺𑀕𑀲𑀗𑁆𑀖𑀲𑁂𑀯𑀺𑀢𑀁 ¶ , 𑀓𑀼𑀜𑁆𑀚𑀭𑀫𑀢𑁆𑀢𑀓𑀭𑁂𑀡𑀼𑀮𑁄𑀴𑀺𑀢𑀁;

𑀅𑀲𑀳𑀸𑀬𑀺𑀓𑀸 𑀕𑀦𑁆𑀢𑀼𑀫𑀺𑀘𑁆𑀙𑀲𑀺, 𑀭𑀳𑀺𑀢𑀁 𑀪𑀺𑀁𑀲𑀦𑀓𑀁 𑀫𑀳𑀸𑀯𑀦𑀁.

𑁩𑁭𑁬.

‘‘𑀢𑀧𑀦𑀻𑀬𑀓𑀢𑀸𑀯 𑀥𑀻𑀢𑀺𑀓𑀸, 𑀯𑀺𑀘𑀭𑀲𑀺 𑀘𑀺𑀢𑁆𑀢𑀮𑀢𑁂𑀯 𑀅𑀘𑁆𑀙𑀭𑀸;

𑀓𑀸𑀲𑀺𑀓𑀲𑀼𑀔𑀼𑀫𑁂𑀳𑀺 ¶ 𑀯𑀕𑁆𑀕𑀼𑀪𑀺, 𑀲𑁄𑀪𑀲𑀻 𑀲𑀼𑀯𑀲𑀦𑁂𑀳𑀺 𑀦𑀽𑀧𑀫𑁂.

𑁩𑁭𑁭.

‘‘𑀅𑀳𑀁 𑀢𑀯 𑀯𑀲𑀸𑀦𑀼𑀕𑁄 𑀲𑀺𑀬𑀁, 𑀬𑀤𑀺 𑀯𑀺𑀳𑀭𑁂𑀫𑀲𑁂 [𑀬𑀤𑀺𑀧𑀺 𑀯𑀺𑀳𑀭𑁂𑀲𑀺 (𑀓.)] 𑀓𑀸𑀦𑀦𑀦𑁆𑀢𑀭𑁂;

𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄, 𑀧𑀸𑀡𑁄 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂.

𑁩𑁭𑁮.

‘‘𑀬𑀤𑀺 𑀫𑁂 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀲𑀼𑀔𑀺𑀢𑀸 𑀏𑀳𑀺 𑀅𑀕𑀸𑀭𑀫𑀸𑀯𑀲;

𑀧𑀸𑀲𑀸𑀤𑀦𑀺𑀯𑀸𑀢𑀯𑀸𑀲𑀺𑀦𑀻, 𑀧𑀭𑀺𑀓𑀫𑁆𑀫𑀁 𑀢𑁂 𑀓𑀭𑁄𑀦𑁆𑀢𑀼 𑀦𑀸𑀭𑀺𑀬𑁄.

𑁩𑁭𑁯.

‘‘𑀓𑀸𑀲𑀺𑀓𑀲𑀼𑀔𑀼𑀫𑀸𑀦𑀺 𑀥𑀸𑀭𑀬, 𑀅𑀪𑀺𑀭𑁄𑀧𑁂𑀳𑀺 [𑀅𑀪𑀺𑀭𑁄𑀳𑁂𑀳𑀺 (𑀲𑀻.)] 𑀘 𑀫𑀸𑀮𑀯𑀡𑁆𑀡𑀓𑀁;

𑀓𑀜𑁆𑀘𑀦𑀫𑀡𑀺𑀫𑀼𑀢𑁆𑀢𑀓𑀁 ¶ 𑀩𑀳𑀼𑀁, 𑀯𑀺𑀯𑀺𑀥𑀁 𑀆𑀪𑀭𑀡𑀁 𑀓𑀭𑁄𑀫𑀺 𑀢𑁂.

𑁩𑁮𑁦.

‘‘𑀲𑀼𑀥𑁄𑀢𑀭𑀚𑀧𑀘𑁆𑀙𑀤𑀁 ¶ 𑀲𑀼𑀪𑀁, 𑀕𑁄𑀡𑀓𑀢𑀽𑀮𑀺𑀓𑀲𑀦𑁆𑀣𑀢𑀁 𑀦𑀯𑀁;

𑀅𑀪𑀺𑀭𑀼𑀳 𑀲𑀬𑀦𑀁 𑀫𑀳𑀸𑀭𑀳𑀁, 𑀘𑀦𑁆𑀤𑀦𑀫𑀡𑁆𑀟𑀺𑀢𑀲𑀸𑀭𑀕𑀦𑁆𑀥𑀺𑀓𑀁;

𑁩𑁮𑁧.

‘‘𑀉𑀧𑁆𑀧𑀮𑀁 𑀘𑀼𑀤𑀓𑀸 𑀲𑀫𑀼𑀕𑁆𑀕𑀢𑀁, 𑀬𑀣𑀸 𑀢𑀁 𑀅𑀫𑀦𑀼𑀲𑁆𑀲𑀲𑁂𑀯𑀺𑀢𑀁;

𑀏𑀯𑀁 𑀢𑁆𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻, 𑀲𑀓𑁂𑀲𑀗𑁆𑀕𑁂𑀲𑀼 𑀚𑀭𑀁 𑀕𑀫𑀺𑀲𑁆𑀲𑀲𑀺’’.

𑁩𑁮𑁨.

‘‘𑀓𑀺𑀁 ¶ 𑀢𑁂 𑀇𑀥 𑀲𑀸𑀭𑀲𑀫𑁆𑀫𑀢𑀁, 𑀓𑀼𑀡𑀧𑀧𑀽𑀭𑀫𑁆𑀳𑀺 𑀲𑀼𑀲𑀸𑀦𑀯𑀟𑁆𑀠𑀦𑁂;

𑀪𑁂𑀤𑀦𑀥𑀫𑁆𑀫𑁂 𑀓𑀴𑁂𑀯𑀭𑁂 [𑀓𑀮𑁂𑀯𑀭𑁂 (𑀲𑀻. 𑀓.)], 𑀬𑀁 𑀤𑀺𑀲𑁆𑀯𑀸 𑀯𑀺𑀫𑀦𑁄 𑀉𑀤𑀺𑀓𑁆𑀔𑀲𑀺’’.

𑁩𑁮𑁩.

‘‘𑀅𑀓𑁆𑀔𑀻𑀦𑀺 𑀘 𑀢𑀼𑀭𑀺𑀬𑀸𑀭𑀺𑀯, 𑀓𑀺𑀦𑁆𑀦𑀭𑀺𑀬𑀸𑀭𑀺𑀯 𑀧𑀩𑁆𑀩𑀢𑀦𑁆𑀢𑀭𑁂;

𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬, 𑀪𑀺𑀬𑁆𑀬𑁄 𑀓𑀸𑀫𑀭𑀢𑀻 𑀧𑀯𑀟𑁆𑀠𑀢𑀺.

𑁩𑁮𑁪.

‘‘𑀉𑀧𑁆𑀧𑀮𑀲𑀺𑀔𑀭𑁄𑀧𑀫𑀸𑀦𑀺 𑀢𑁂, 𑀯𑀺𑀫𑀮𑁂 𑀳𑀸𑀝𑀓𑀲𑀦𑁆𑀦𑀺𑀪𑁂 𑀫𑀼𑀔𑁂;

𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬 [𑀦𑀬𑀦𑀸𑀦𑀼𑀤𑀺𑀓𑁆𑀔𑀺𑀬 (𑀲𑀻.)], 𑀪𑀺𑀬𑁆𑀬𑁄 𑀓𑀸𑀫𑀕𑀼𑀡𑁄 𑀧𑀯𑀟𑁆𑀠𑀢𑀺.

𑁩𑁮𑁫.

‘‘𑀅𑀧𑀺 𑀤𑀽𑀭𑀕𑀢𑀸 𑀲𑀭𑀫𑁆𑀳𑀲𑁂, 𑀆𑀬𑀢𑀧𑀫𑁆𑀳𑁂 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁂;

𑀦 ¶ 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑀸, 𑀦𑀬𑀦𑀸 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂’’.

𑁩𑁮𑁬.

‘‘𑀅𑀧𑀣𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀺, 𑀘𑀦𑁆𑀤𑀁 𑀓𑀻𑀴𑀦𑀓𑀁 𑀕𑀯𑁂𑀲𑀲𑀺;

𑀫𑁂𑀭𑀼𑀁 𑀮𑀗𑁆𑀖𑁂𑀢𑀼𑀫𑀺𑀘𑁆𑀙𑀲𑀺, 𑀬𑁄 𑀢𑁆𑀯𑀁 𑀩𑀼𑀤𑁆𑀥𑀲𑀼𑀢𑀁 𑀫𑀕𑁆𑀕𑀬𑀲𑀺.

𑁩𑁮𑁭.

‘‘𑀦𑀢𑁆𑀣𑀺 ¶ 𑀳𑀺 𑀮𑁄𑀓𑁂 𑀲𑀤𑁂𑀯𑀓𑁂, 𑀭𑀸𑀕𑁄 𑀬𑀢𑁆𑀣𑀧𑀺 𑀤𑀸𑀦𑀺 𑀫𑁂 𑀲𑀺𑀬𑀸;

𑀦𑀧𑀺 𑀦𑀁 𑀚𑀸𑀦𑀸𑀫𑀺 𑀓𑀻𑀭𑀺𑀲𑁄, 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄.

𑁩𑁮𑁮.

‘‘𑀇𑀗𑁆𑀕𑀸𑀮𑀓𑀼𑀬𑀸𑀯 [𑀇𑀗𑁆𑀖𑀸𑀴𑀔𑀼𑀬𑀸𑀯 (𑀲𑁆𑀬𑀸.)] 𑀉𑀚𑁆𑀛𑀺𑀢𑁄, 𑀯𑀺𑀲𑀧𑀢𑁆𑀢𑁄𑀭𑀺𑀯 𑀅𑀕𑁆𑀕𑀺𑀢𑁄 𑀓𑀢𑁄 [𑀅𑀕𑁆𑀖𑀢𑁄 𑀳𑀢𑁄 (𑀲𑀻.)];

𑀦𑀧𑀺 𑀦𑀁 𑀧𑀲𑁆𑀲𑀸𑀫𑀺 𑀓𑀻𑀭𑀺𑀲𑁄, 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄.

𑁩𑁮𑁯.

‘‘𑀬𑀲𑁆𑀲𑀸 ¶ 𑀲𑀺𑀬𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀁, 𑀲𑀢𑁆𑀣𑀸 𑀯𑀸 𑀅𑀦𑀼𑀧𑀸𑀲𑀺𑀢𑁄 𑀲𑀺𑀬𑀸;

𑀢𑁆𑀯𑀁 𑀢𑀸𑀤𑀺𑀲𑀺𑀓𑀁 𑀧𑀮𑁄𑀪𑀬, 𑀚𑀸𑀦𑀦𑁆𑀢𑀺𑀁 𑀲𑁄 𑀇𑀫𑀁 𑀯𑀺𑀳𑀜𑁆𑀜𑀲𑀺.

𑁩𑁯𑁦.

‘‘𑀫𑀬𑁆𑀳𑀜𑁆𑀳𑀺 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑁂, 𑀲𑀼𑀔𑀤𑀼𑀓𑁆𑀔𑁂 𑀘 𑀲𑀢𑀻 𑀉𑀧𑀝𑁆𑀞𑀺𑀢𑀸;

𑀲𑀗𑁆𑀔𑀢𑀫𑀲𑀼𑀪𑀦𑁆𑀢𑀺 𑀚𑀸𑀦𑀺𑀬, 𑀲𑀩𑁆𑀩𑀢𑁆𑀣𑁂𑀯 𑀫𑀦𑁄 𑀦 𑀮𑀺𑀫𑁆𑀧𑀢𑀺.

𑁩𑁯𑁧.

‘‘𑀲𑀸𑀳𑀁 𑀲𑀼𑀕𑀢𑀲𑁆𑀲 𑀲𑀸𑀯𑀺𑀓𑀸, 𑀫𑀕𑁆𑀕𑀝𑁆𑀞𑀗𑁆𑀕𑀺𑀓𑀬𑀸𑀦𑀬𑀸𑀬𑀺𑀦𑀻;

𑀉𑀤𑁆𑀥𑀝𑀲𑀮𑁆𑀮𑀸 𑀅𑀦𑀸𑀲𑀯𑀸, 𑀲𑀼𑀜𑁆𑀜𑀸𑀕𑀸𑀭𑀕𑀢𑀸 𑀭𑀫𑀸𑀫𑀳𑀁.

𑁩𑁯𑁨.

‘‘𑀤𑀺𑀝𑁆𑀞𑀸 𑀳𑀺 𑀫𑀬𑀸 𑀲𑀼𑀘𑀺𑀢𑁆𑀢𑀺𑀢𑀸, 𑀲𑁄𑀫𑁆𑀪𑀸 𑀤𑀸𑀭𑀼𑀓𑀧𑀺𑀮𑁆𑀮𑀓𑀸𑀦𑀺 𑀯𑀸;

𑀢𑀦𑁆𑀢𑀻𑀳𑀺 𑀘 𑀔𑀻𑀮𑀓𑁂𑀳𑀺 𑀘, 𑀯𑀺𑀦𑀺𑀩𑀤𑁆𑀥𑀸 𑀯𑀺𑀯𑀺𑀥𑀁 𑀧𑀦𑀘𑁆𑀘𑀓𑀸.

𑁩𑁯𑁩.

‘‘𑀢𑀫𑁆𑀳𑀼𑀤𑁆𑀥𑀝𑁂 𑀢𑀦𑁆𑀢𑀺𑀔𑀻𑀮𑀓𑁂, 𑀯𑀺𑀲𑁆𑀲𑀝𑁆𑀞𑁂 𑀯𑀺𑀓𑀮𑁂 𑀧𑀭𑀺𑀓𑁆𑀭𑀺𑀢𑁂 [𑀧𑀭𑀺𑀧𑀓𑁆𑀔𑀻𑀢𑁂 (𑀲𑀻.), 𑀧𑀭𑀺𑀧𑀓𑁆𑀓𑀢𑁂 (𑀲𑁆𑀬𑀸.)];

𑀦 𑀯𑀺𑀦𑁆𑀤𑁂𑀬𑁆𑀬 𑀔𑀡𑁆𑀟𑀲𑁄 𑀓𑀢𑁂, 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂.

𑁩𑁯𑁪.

‘‘𑀢𑀣𑀽𑀧𑀫𑀸 ¶ 𑀤𑁂𑀳𑀓𑀸𑀦𑀺 𑀫𑀁, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀦𑁆𑀢𑀺;

𑀥𑀫𑁆𑀫𑁂𑀳𑀺 ¶ 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂.

𑁩𑁯𑁫.

‘‘𑀬𑀣𑀸 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁, 𑀅𑀤𑁆𑀤𑀲 𑀘𑀺𑀢𑁆𑀢𑀺𑀓𑀁 𑀪𑀺𑀢𑁆𑀢𑀺𑀬𑀸 𑀓𑀢𑀁;

𑀢𑀫𑁆𑀳𑀺 ¶ 𑀢𑁂 𑀯𑀺𑀧𑀭𑀻𑀢𑀤𑀲𑁆𑀲𑀦𑀁, 𑀲𑀜𑁆𑀜𑀸 𑀫𑀸𑀦𑀼𑀲𑀺𑀓𑀸 𑀦𑀺𑀭𑀢𑁆𑀣𑀺𑀓𑀸.

𑁩𑁯𑁬.

‘‘𑀫𑀸𑀬𑀁 ¶ 𑀯𑀺𑀬 𑀅𑀕𑁆𑀕𑀢𑁄 𑀓𑀢𑀁, 𑀲𑀼𑀧𑀺𑀦𑀦𑁆𑀢𑁂𑀯 𑀲𑀼𑀯𑀡𑁆𑀡𑀧𑀸𑀤𑀧𑀁;

𑀉𑀧𑀕𑀘𑁆𑀙𑀲𑀺 𑀅𑀦𑁆𑀥 𑀭𑀺𑀢𑁆𑀢𑀓𑀁, 𑀚𑀦𑀫𑀚𑁆𑀛𑁂𑀭𑀺𑀯 𑀭𑀼𑀧𑁆𑀧𑀭𑀽𑀧𑀓𑀁 [𑀭𑀽𑀧𑀭𑀽𑀧𑀓𑀁 (𑀓.)].

𑁩𑁯𑁭.

‘‘𑀯𑀝𑁆𑀝𑀦𑀺𑀭𑀺𑀯 𑀓𑁄𑀝𑀭𑁄𑀳𑀺𑀢𑀸, 𑀫𑀚𑁆𑀛𑁂 𑀧𑀼𑀩𑁆𑀩𑀼𑀴𑀓𑀸 𑀲𑀅𑀲𑁆𑀲𑀼𑀓𑀸;

𑀧𑀻𑀴𑀓𑁄𑀴𑀺𑀓𑀸 𑀘𑁂𑀢𑁆𑀣 𑀚𑀸𑀬𑀢𑀺, 𑀯𑀺𑀯𑀺𑀥𑀸 𑀘𑀓𑁆𑀔𑀼𑀯𑀺𑀥𑀸 𑀘 𑀧𑀺𑀡𑁆𑀟𑀺𑀢𑀸’’.

𑁩𑁯𑁮.

𑀉𑀧𑁆𑀧𑀸𑀝𑀺𑀬 𑀘𑀸𑀭𑀼𑀤𑀲𑁆𑀲𑀦𑀸, 𑀦 𑀘 𑀧𑀚𑁆𑀚𑀺𑀢𑁆𑀣 𑀅𑀲𑀗𑁆𑀕𑀫𑀸𑀦𑀲𑀸;

‘‘𑀳𑀦𑁆𑀤 𑀢𑁂 𑀘𑀓𑁆𑀔𑀼𑀁 𑀳𑀭𑀲𑁆𑀲𑀼 𑀢𑀁’’, 𑀢𑀲𑁆𑀲 𑀦𑀭𑀲𑁆𑀲 𑀅𑀤𑀸𑀲𑀺 𑀢𑀸𑀯𑀤𑁂.

𑁩𑁯𑁯.

𑀢𑀲𑁆𑀲 𑀘 𑀯𑀺𑀭𑀫𑀸𑀲𑀺 𑀢𑀸𑀯𑀤𑁂, 𑀭𑀸𑀕𑁄 𑀢𑀢𑁆𑀣 𑀔𑀫𑀸𑀧𑀬𑀻 𑀘 𑀦𑀁;

‘‘𑀲𑁄𑀢𑁆𑀣𑀺 𑀲𑀺𑀬𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀻, 𑀦 𑀧𑀼𑀦𑁄 𑀏𑀤𑀺𑀲𑀓𑀁 𑀪𑀯𑀺𑀲𑁆𑀲𑀢𑀺’’.

𑁪𑁦𑁦.

‘‘𑀆𑀲𑀸𑀤𑀺𑀬 [𑀆𑀳𑀦𑀺𑀬 (𑀲𑁆𑀬𑀸. 𑀓.)] 𑀏𑀤𑀺𑀲𑀁 𑀚𑀦𑀁, 𑀅𑀕𑁆𑀕𑀺𑀁 𑀧𑀚𑁆𑀚𑀮𑀺𑀢𑀁 𑀯 𑀮𑀺𑀗𑁆𑀕𑀺𑀬;

𑀕𑀡𑁆𑀳𑀺𑀬 𑀆𑀲𑀻𑀯𑀺𑀲𑀁 𑀯𑀺𑀬, 𑀅𑀧𑀺 𑀦𑀼 𑀲𑁄𑀢𑁆𑀣𑀺 𑀲𑀺𑀬𑀸 𑀔𑀫𑁂𑀳𑀺 𑀦𑁄’’.

𑁪𑁦𑁧.

𑀫𑀼𑀢𑁆𑀢𑀸 𑀘 𑀢𑀢𑁄 𑀲𑀸 𑀪𑀺𑀓𑁆𑀔𑀼𑀦𑀻, 𑀅𑀕𑀫𑀻 𑀩𑀼𑀤𑁆𑀥𑀯𑀭𑀲𑁆𑀲 𑀲𑀦𑁆𑀢𑀺𑀓𑀁;

𑀧𑀲𑁆𑀲𑀺𑀬 𑀯𑀭𑀧𑀼𑀜𑁆𑀜𑀮𑀓𑁆𑀔𑀡𑀁, 𑀘𑀓𑁆𑀔𑀼 𑀆𑀲𑀺 𑀬𑀣𑀸 𑀧𑀼𑀭𑀸𑀡𑀓𑀦𑁆𑀢𑀺.

… 𑀲𑀼𑀪𑀸 𑀚𑀻𑀯𑀓𑀫𑁆𑀩𑀯𑀦𑀺𑀓𑀸 𑀣𑁂𑀭𑀻….

𑀢𑀺𑀁𑀲𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁫. 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁄

𑁧. 𑀇𑀲𑀺𑀤𑀸𑀲𑀻𑀣𑁂𑀭𑀻𑀕𑀸𑀣𑀸

𑁪𑁦𑁨.

𑀦𑀕𑀭𑀫𑁆𑀳𑀺 ¶ ¶ 𑀓𑀼𑀲𑀼𑀫𑀦𑀸𑀫𑁂, 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀺 𑀧𑀣𑀯𑀺𑀬𑀸 𑀫𑀡𑁆𑀟𑁂;

𑀲𑀓𑁆𑀬𑀓𑀼𑀮𑀓𑀼𑀮𑀻𑀦𑀸𑀬𑁄, 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀳𑀺 𑀕𑀼𑀡𑀯𑀢𑀺𑀬𑁄.

𑁪𑁦𑁩.

𑀇𑀲𑀺𑀤𑀸𑀲𑀻 ¶ 𑀢𑀢𑁆𑀣 𑀏𑀓𑀸, 𑀤𑀼𑀢𑀺𑀬𑀸 𑀩𑁄𑀥𑀻𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀸 𑀘;

𑀛𑀸𑀦𑀚𑁆𑀛𑀸𑀬𑀦𑀭𑀢𑀸𑀬𑁄, 𑀩𑀳𑀼𑀲𑁆𑀲𑀼𑀢𑀸𑀬𑁄 𑀥𑀼𑀢𑀓𑀺𑀮𑁂𑀲𑀸𑀬𑁄.

𑁪𑁦𑁪.

𑀢𑀸 ¶ 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀪𑀢𑁆𑀢𑀢𑁆𑀣𑀁 [𑀪𑀢𑁆𑀢𑀢𑁆𑀢𑀁 (𑀲𑀻.)] 𑀓𑀭𑀺𑀬 𑀥𑁄𑀢𑀧𑀢𑁆𑀢𑀸𑀬𑁄;

𑀭𑀳𑀺𑀢𑀫𑁆𑀳𑀺 𑀲𑀼𑀔𑀦𑀺𑀲𑀺𑀦𑁆𑀦𑀸, 𑀇𑀫𑀸 𑀕𑀺𑀭𑀸 𑀅𑀩𑁆𑀪𑀼𑀤𑀻𑀭𑁂𑀲𑀼𑀁.

𑁪𑁦𑁫.

‘‘𑀧𑀸𑀲𑀸𑀤𑀺𑀓𑀸𑀲𑀺 𑀅𑀬𑁆𑀬𑁂, 𑀇𑀲𑀺𑀤𑀸𑀲𑀺 𑀯𑀬𑁄𑀧𑀺 𑀢𑁂 𑀅𑀧𑀭𑀺𑀳𑀻𑀦𑁄;

𑀓𑀺𑀁 𑀤𑀺𑀲𑁆𑀯𑀸𑀦 𑀩𑁆𑀬𑀸𑀮𑀺𑀓𑀁, 𑀅𑀣𑀸𑀲𑀺 𑀦𑁂𑀓𑁆𑀔𑀫𑁆𑀫𑀫𑀦𑀼𑀬𑀼𑀢𑁆𑀢𑀸’’.

𑁪𑁦𑁬.

𑀏𑀯𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸 𑀲𑀸, 𑀭𑀳𑀺𑀢𑁂 𑀥𑀫𑁆𑀫𑀤𑁂𑀲𑀦𑀸𑀓𑀼𑀲𑀮𑀸;

𑀇𑀲𑀺𑀤𑀸𑀲𑀻 𑀯𑀘𑀦𑀫𑀩𑁆𑀭𑀯𑀺, ‘‘𑀲𑀼𑀡 𑀩𑁄𑀥𑀺 𑀬𑀣𑀸𑀫𑁆𑀳𑀺 𑀧𑀩𑁆𑀩𑀚𑀺𑀢𑀸.

𑁪𑁦𑁭.

‘‘𑀉𑀚𑁆𑀚𑁂𑀦𑀺𑀬𑀸 𑀧𑀼𑀭𑀯𑀭𑁂, 𑀫𑀬𑁆𑀳𑀁 𑀧𑀺𑀢𑀸 𑀲𑀻𑀮𑀲𑀁𑀯𑀼𑀢𑁄 𑀲𑁂𑀝𑁆𑀞𑀺;

𑀢𑀲𑁆𑀲𑀫𑁆𑀳𑀺 𑀏𑀓𑀥𑀻𑀢𑀸, 𑀧𑀺𑀬𑀸 𑀫𑀦𑀸𑀧𑀸 𑀘 𑀤𑀬𑀺𑀢𑀸 𑀘.

𑁪𑁦𑁮.

‘‘𑀅𑀣 𑀫𑁂 𑀲𑀸𑀓𑁂𑀢𑀢𑁄 𑀯𑀭𑀓𑀸, 𑀆𑀕𑀘𑁆𑀙𑀼𑀫𑀼𑀢𑁆𑀢𑀫𑀓𑀼𑀮𑀻𑀦𑀸;

𑀲𑁂𑀝𑁆𑀞𑀻 𑀧𑀳𑀽𑀢𑀭𑀢𑀦𑁄, 𑀢𑀲𑁆𑀲 𑀫𑀫𑀁 𑀲𑀼𑀡𑁆𑀳𑀫𑀤𑀸𑀲𑀺 𑀢𑀸𑀢𑁄.

𑁪𑁦𑁯.

‘‘𑀲𑀲𑁆𑀲𑀼𑀬𑀸 𑀲𑀲𑁆𑀲𑀼𑀭𑀲𑁆𑀲 𑀘, 𑀲𑀸𑀬𑀁 𑀧𑀸𑀢𑀁 𑀧𑀡𑀸𑀫𑀫𑀼𑀧𑀕𑀫𑁆𑀫;

𑀲𑀺𑀭𑀲𑀸 𑀓𑀭𑁄𑀫𑀺 𑀧𑀸𑀤𑁂, 𑀯𑀦𑁆𑀤𑀸𑀫𑀺 𑀬𑀣𑀸𑀫𑁆𑀳𑀺 𑀅𑀦𑀼𑀲𑀺𑀝𑁆𑀞𑀸.

𑁪𑁧𑁦.

‘‘𑀬𑀸 ¶ 𑀫𑀬𑁆𑀳𑀁 𑀲𑀸𑀫𑀺𑀓𑀲𑁆𑀲, 𑀪𑀕𑀺𑀦𑀺𑀬𑁄 𑀪𑀸𑀢𑀼𑀦𑁄 𑀧𑀭𑀺𑀚𑀦𑁄 𑀯𑀸;

𑀢𑀫𑁂𑀓𑀯𑀭𑀓𑀫𑁆𑀧𑀺 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀕𑁆𑀕𑀸 𑀆𑀲𑀦𑀁 𑀤𑁂𑀫𑀺.

𑁪𑁧𑁧.

‘‘𑀅𑀦𑁆𑀦𑁂𑀦 𑀘 𑀧𑀸𑀦𑁂𑀦 𑀘, 𑀔𑀚𑁆𑀚𑁂𑀦 𑀘 𑀬𑀜𑁆𑀘 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀁;

𑀙𑀸𑀤𑁂𑀫𑀺 𑀉𑀧𑀦𑀬𑀸𑀫𑀺 𑀘, 𑀤𑁂𑀫𑀺 𑀘 𑀬𑀁 𑀬𑀲𑁆𑀲 𑀧𑀢𑀺𑀭𑀽𑀧𑀁.

𑁪𑁧𑁨.

‘‘𑀓𑀸𑀮𑁂𑀦 𑀉𑀧𑀝𑁆𑀞𑀳𑀺𑀢𑁆𑀯𑀸 [𑀉𑀝𑁆𑀞𑀳𑀺𑀢𑁆𑀯𑀸 (𑀲𑁆𑀬𑀸. 𑀓.), 𑀉𑀧𑀝𑁆𑀞𑀳𑀺𑀢𑀼𑀁 (?)], 𑀖𑀭𑀁 𑀲𑀫𑀼𑀧𑀕𑀫𑀸𑀫𑀺 𑀉𑀫𑁆𑀫𑀸𑀭𑁂;

𑀥𑁄𑀯𑀦𑁆𑀢𑀻 𑀳𑀢𑁆𑀣𑀧𑀸𑀤𑁂, 𑀧𑀜𑁆𑀚𑀮𑀺𑀓𑀸 𑀲𑀸𑀫𑀺𑀓𑀫𑀼𑀧𑁂𑀫𑀺.

𑁪𑁧𑁩.

‘‘𑀓𑁄𑀘𑁆𑀙𑀁 𑀧𑀲𑀸𑀤𑀁 𑀅𑀜𑁆𑀚𑀦𑀺𑀜𑁆𑀘, 𑀆𑀤𑀸𑀲𑀓𑀜𑁆𑀘 𑀕𑀡𑁆𑀳𑀺𑀢𑁆𑀯𑀸;

𑀧𑀭𑀺𑀓𑀫𑁆𑀫𑀓𑀸𑀭𑀺𑀓𑀸 ¶ 𑀯𑀺𑀬, 𑀲𑀬𑀫𑁂𑀯 𑀧𑀢𑀺𑀁 𑀯𑀺𑀪𑀽𑀲𑁂𑀫𑀺.

𑁪𑁧𑁪.

‘‘𑀲𑀬𑀫𑁂𑀯 ¶ 𑀑𑀤𑀦𑀁 𑀲𑀸𑀥𑀬𑀸𑀫𑀺, 𑀲𑀬𑀫𑁂𑀯 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻;

𑀫𑀸𑀢𑀸𑀯 𑀏𑀓𑀧𑀼𑀢𑁆𑀢𑀓𑀁, 𑀢𑀣𑀸 [𑀢𑀤𑀸 (𑀲𑀻.)] 𑀪𑀢𑁆𑀢𑀸𑀭𑀁 𑀧𑀭𑀺𑀘𑀭𑀸𑀫𑀺.

𑁪𑁧𑁫.

‘‘𑀏𑀯𑀁 𑀫𑀁 𑀪𑀢𑁆𑀢𑀺𑀓𑀢𑀁, 𑀅𑀦𑀼𑀭𑀢𑁆𑀢𑀁 𑀓𑀸𑀭𑀺𑀓𑀁 𑀦𑀺𑀳𑀢𑀫𑀸𑀦𑀁;

𑀉𑀝𑁆𑀞𑀸𑀬𑀺𑀓𑀁 [𑀉𑀝𑁆𑀞𑀸𑀳𑀺𑀓𑀁 (𑀓.)] 𑀅𑀦𑀮𑀲𑀁, 𑀲𑀻𑀮𑀯𑀢𑀺𑀁 𑀤𑀼𑀲𑁆𑀲𑀢𑁂 𑀪𑀢𑁆𑀢𑀸.

𑁪𑁧𑁬.

‘‘𑀲𑁄 𑀫𑀸𑀢𑀭𑀜𑁆𑀘 𑀧𑀺𑀢𑀭𑀜𑁆𑀘, 𑀪𑀡𑀢𑀺 ‘𑀆𑀧𑀼𑀘𑁆𑀙𑀳𑀁 𑀕𑀫𑀺𑀲𑁆𑀲𑀸𑀫𑀺;

𑀇𑀲𑀺𑀤𑀸𑀲𑀺𑀬𑀸 𑀦 𑀲𑀳 𑀯𑀘𑁆𑀙𑀁, 𑀏𑀓𑀸𑀕𑀸𑀭𑁂𑀳𑀁 [𑀏𑀓𑀖𑀭𑁂𑀧’𑀳𑀁 (?)] 𑀲𑀳 𑀯𑀢𑁆𑀣𑀼𑀁’.

𑁪𑁧𑁭.

‘‘‘𑀫𑀸 𑀏𑀯𑀁 𑀧𑀼𑀢𑁆𑀢 𑀅𑀯𑀘, 𑀇𑀲𑀺𑀤𑀸𑀲𑀻 𑀧𑀡𑁆𑀟𑀺𑀢𑀸 𑀧𑀭𑀺𑀩𑁆𑀬𑀢𑁆𑀢𑀸;

𑀉𑀝𑁆𑀞𑀸𑀬𑀺𑀓𑀸 𑀅𑀦𑀮𑀲𑀸, 𑀓𑀺𑀁 𑀢𑀼𑀬𑁆𑀳𑀁 𑀦 𑀭𑁄𑀘𑀢𑁂 𑀧𑀼𑀢𑁆𑀢’.

𑁪𑁧𑁮.

‘‘‘𑀦 ¶ 𑀘 𑀫𑁂 𑀳𑀺𑀁𑀲𑀢𑀺 𑀓𑀺𑀜𑁆𑀘𑀺, 𑀦 𑀘𑀳𑀁 𑀇𑀲𑀺𑀤𑀸𑀲𑀺𑀬𑀸 𑀲𑀳 𑀯𑀘𑁆𑀙𑀁;

𑀤𑁂𑀲𑁆𑀲𑀸𑀯 𑀫𑁂 𑀅𑀮𑀁 𑀫𑁂, 𑀅𑀧𑀼𑀘𑁆𑀙𑀸𑀳𑀁 [𑀆𑀧𑀼𑀘𑁆𑀙𑀸𑀳𑀁 (𑀲𑁆𑀬𑀸.), 𑀆𑀧𑀼𑀘𑁆𑀙𑀳𑀁-𑀦𑀸𑀧𑀼𑀘𑁆𑀙𑀳𑀁 (?)] 𑀕𑀫𑀺𑀲𑁆𑀲𑀸𑀫𑀺’.

𑁪𑁧𑁯.

‘‘𑀢𑀲𑁆𑀲 𑀯𑀘𑀦𑀁 𑀲𑀼𑀡𑀺𑀢𑁆𑀯𑀸, 𑀲𑀲𑁆𑀲𑀼 𑀲𑀲𑀼𑀭𑁄 𑀘 𑀫𑀁 𑀅𑀧𑀼𑀘𑁆𑀙𑀺𑀁𑀲𑀼;

‘𑀓𑀺𑀲𑁆𑀲 [𑀓𑀺𑀁𑀲 (?)] 𑀢𑀬𑀸 𑀅𑀧𑀭𑀤𑁆𑀥𑀁, 𑀪𑀡 𑀯𑀺𑀲𑁆𑀲𑀝𑁆𑀞𑀸 𑀬𑀣𑀸𑀪𑀽𑀢𑀁’.

𑁪𑁨𑁦.

‘‘‘𑀦𑀧𑀺𑀳𑀁 ¶ 𑀅𑀧𑀭𑀚𑁆𑀛𑀁 𑀓𑀺𑀜𑁆𑀘𑀺, 𑀦𑀧𑀺 𑀳𑀺𑀁𑀲𑁂𑀫𑀺 𑀦 𑀪𑀡𑀸𑀫𑀺 𑀤𑀼𑀩𑁆𑀩𑀘𑀦𑀁;

𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀬𑁆𑀬𑁂, 𑀬𑀁 𑀫𑀁 𑀯𑀺𑀤𑁆𑀤𑁂𑀲𑁆𑀲𑀢𑁂 𑀪𑀢𑁆𑀢𑀸’.

𑁪𑁨𑁧.

‘‘𑀢𑁂 𑀫𑀁 𑀧𑀺𑀢𑀼𑀖𑀭𑀁 𑀧𑀝𑀺𑀦𑀬𑀺𑀁𑀲𑀼, 𑀯𑀺𑀫𑀦𑀸 𑀤𑀼𑀔𑁂𑀦 𑀅𑀥𑀺𑀪𑀽𑀢𑀸;

‘𑀧𑀼𑀢𑁆𑀢𑀫𑀦𑀼𑀭𑀓𑁆𑀔𑀫𑀸𑀦𑀸, 𑀚𑀺𑀢𑀸𑀫𑁆𑀳𑀲𑁂 𑀭𑀽𑀧𑀺𑀦𑀺𑀁 𑀮𑀓𑁆𑀔𑀺𑀁’.

𑁪𑁨𑁨.

‘‘𑀅𑀣 𑀫𑀁 𑀅𑀤𑀸𑀲𑀺 𑀢𑀸𑀢𑁄, 𑀅𑀟𑁆𑀠𑀲𑁆𑀲 𑀖𑀭𑀫𑁆𑀳𑀺 𑀤𑀼𑀢𑀺𑀬𑀓𑀼𑀮𑀺𑀓𑀲𑁆𑀲;

𑀢𑀢𑁄 𑀉𑀧𑀟𑁆𑀠𑀲𑀼𑀗𑁆𑀓𑁂𑀦, 𑀬𑁂𑀦 𑀫𑀁 𑀯𑀺𑀦𑁆𑀤𑀣 𑀲𑁂𑀝𑁆𑀞𑀺.

𑁪𑁨𑁩.

‘‘𑀢𑀲𑁆𑀲𑀧𑀺 𑀖𑀭𑀫𑁆𑀳𑀺 𑀫𑀸𑀲𑀁, 𑀅𑀯𑀲𑀺𑀁 𑀅𑀣 𑀲𑁄𑀧𑀺 𑀫𑀁 𑀧𑀝𑀺𑀘𑁆𑀙𑀭𑀬𑀺 [𑀧𑀝𑀺𑀘𑁆𑀙𑀲𑀺 (𑀲𑀻. 𑀓.), 𑀧𑀝𑀺𑀘𑁆𑀙𑀢𑀺 (𑀲𑁆𑀬𑀸.), 𑀧𑀝𑀺𑀘𑁆𑀙𑀭𑀢𑀺 (𑀓.)];

𑀤𑀸𑀲𑀻𑀯 ¶ 𑀉𑀧𑀝𑁆𑀞𑀳𑀦𑁆𑀢𑀺𑀁, 𑀅𑀤𑀽𑀲𑀺𑀓𑀁 𑀲𑀻𑀮𑀲𑀫𑁆𑀧𑀦𑁆𑀦𑀁.

𑁪𑁨𑁪.

‘‘𑀪𑀺𑀓𑁆𑀔𑀸𑀬 𑀘 𑀯𑀺𑀘𑀭𑀦𑁆𑀢𑀁, 𑀤𑀫𑀓𑀁 𑀤𑀦𑁆𑀢𑀁 𑀫𑁂 𑀧𑀺𑀢𑀸 𑀪𑀡𑀢𑀺;

‘𑀳𑁄𑀳𑀺𑀲𑀺 [𑀲𑁄𑀳𑀺𑀲𑀺 (𑀲𑀩𑁆𑀩𑀢𑁆𑀣)] 𑀫𑁂 𑀚𑀸𑀫𑀸𑀢𑀸, 𑀦𑀺𑀓𑁆𑀔𑀺𑀧 𑀧𑁄𑀝𑁆𑀞𑀺𑀜𑁆𑀘 [𑀧𑁄𑀦𑁆𑀢𑀺𑀁 (𑀲𑀻. 𑀲𑁆𑀬𑀸.)] 𑀖𑀝𑀺𑀓𑀜𑁆𑀘’.

𑁪𑁨𑁫.

‘‘𑀲𑁄𑀧𑀺 𑀯𑀲𑀺𑀢𑁆𑀯𑀸 𑀧𑀓𑁆𑀔𑀁 [𑀧𑀓𑁆𑀓𑀫𑀣 (𑀲𑀻.)], 𑀅𑀣 𑀢𑀸𑀢𑀁 𑀪𑀡𑀢𑀺 ‘𑀤𑁂𑀳𑀺 𑀫𑁂 𑀧𑁄𑀝𑁆𑀞𑀺𑀁;

𑀖𑀝𑀺𑀓𑀜𑁆𑀘 𑀫𑀮𑁆𑀮𑀓𑀜𑁆𑀘, 𑀧𑀼𑀦𑀧𑀺 𑀪𑀺𑀓𑁆𑀔𑀁 𑀘𑀭𑀺𑀲𑁆𑀲𑀸𑀫𑀺’.

𑁪𑁨𑁬.

‘‘𑀅𑀣 ¶ 𑀦𑀁 𑀪𑀡𑀢𑀻 𑀢𑀸𑀢𑁄, 𑀅𑀫𑁆𑀫𑀸 𑀲𑀩𑁆𑀩𑁄 𑀘 𑀫𑁂 𑀜𑀸𑀢𑀺𑀕𑀡𑀯𑀕𑁆𑀕𑁄;

‘𑀓𑀺𑀁 𑀢𑁂 𑀦 𑀓𑀻𑀭𑀢𑀺 𑀇𑀥, 𑀪𑀡 𑀔𑀺𑀧𑁆𑀧𑀁 𑀢𑀁 𑀢𑁂 𑀓𑀭𑀺𑀳𑀺’𑀢𑀺.

𑁪𑁨𑁭.

‘‘𑀏𑀯𑀁 𑀪𑀡𑀺𑀢𑁄 𑀪𑀡𑀢𑀺, ‘𑀬𑀤𑀺 𑀫𑁂 𑀅𑀢𑁆𑀢𑀸 𑀲𑀓𑁆𑀓𑁄𑀢𑀺 𑀅𑀮𑀁 𑀫𑀬𑁆𑀳𑀁;

𑀇𑀲𑀺𑀤𑀸𑀲𑀺𑀬𑀸 𑀦 𑀲𑀳 𑀯𑀘𑁆𑀙𑀁, 𑀏𑀓𑀖𑀭𑁂𑀳𑀁 𑀲𑀳 𑀯𑀢𑁆𑀣𑀼𑀁’.

𑁪𑁨𑁮.

‘‘𑀯𑀺𑀲𑁆𑀲𑀚𑁆𑀚𑀺𑀢𑁄 𑀕𑀢𑁄 𑀲𑁄, 𑀅𑀳𑀫𑁆𑀧𑀺 𑀏𑀓𑀸𑀓𑀺𑀦𑀻 𑀯𑀺𑀘𑀺𑀦𑁆𑀢𑁂𑀫𑀺;

‘𑀆𑀧𑀼𑀘𑁆𑀙𑀺𑀢𑀽𑀦 𑀕𑀘𑁆𑀙𑀁, 𑀫𑀭𑀺𑀢𑀼𑀬𑁂 [𑀫𑀭𑀺𑀢𑀸𑀬𑁂 (𑀲𑀻.), 𑀫𑀭𑀺𑀢𑀼𑀁 (𑀲𑁆𑀬𑀸.)] 𑀯𑀸 𑀧𑀩𑁆𑀩𑀚𑀺𑀲𑁆𑀲𑀁 𑀯𑀸’.

𑁪𑁨𑁯.

‘‘𑀅𑀣 𑀅𑀬𑁆𑀬𑀸 𑀚𑀺𑀦𑀤𑀢𑁆𑀢𑀸, 𑀆𑀕𑀘𑁆𑀙𑀻 𑀕𑁄𑀘𑀭𑀸𑀬 𑀘𑀭𑀫𑀸𑀦𑀸;

𑀢𑀸𑀢𑀓𑀼𑀮𑀁 ¶ 𑀯𑀺𑀦𑀬𑀥𑀭𑀻, 𑀩𑀳𑀼𑀲𑁆𑀲𑀼𑀢𑀸 𑀲𑀻𑀮𑀲𑀫𑁆𑀧𑀦𑁆𑀦𑀸.

𑁪𑁩𑁦.

‘‘𑀢𑀁 𑀤𑀺𑀲𑁆𑀯𑀸𑀦 𑀅𑀫𑁆𑀳𑀸𑀓𑀁, 𑀉𑀝𑁆𑀞𑀸𑀬𑀸𑀲𑀦𑀁 𑀢𑀲𑁆𑀲𑀸 𑀧𑀜𑁆𑀜𑀸𑀧𑀬𑀺𑀁;

𑀦𑀺𑀲𑀺𑀦𑁆𑀦𑀸𑀬 𑀘 𑀧𑀸𑀤𑁂, 𑀯𑀦𑁆𑀤𑀺𑀢𑁆𑀯𑀸 𑀪𑁄𑀚𑀦𑀫𑀤𑀸𑀲𑀺𑀁.

𑁪𑁩𑁧.

‘‘𑀅𑀦𑁆𑀦𑁂𑀦 ¶ 𑀘 𑀧𑀸𑀦𑁂𑀦 𑀘, 𑀔𑀚𑁆𑀚𑁂𑀦 𑀘 𑀬𑀜𑁆𑀘 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀁;

𑀲𑀦𑁆𑀢𑀧𑁆𑀧𑀬𑀺𑀢𑁆𑀯𑀸 𑀅𑀯𑀘𑀁, ‘𑀅𑀬𑁆𑀬𑁂 𑀇𑀘𑁆𑀙𑀸𑀫𑀺 𑀧𑀩𑁆𑀩𑀚𑀺𑀢𑀼𑀁’.

𑁪𑁩𑁨.

‘‘𑀅𑀣 𑀫𑀁 𑀪𑀡𑀢𑀻 𑀢𑀸𑀢𑁄, ‘𑀇𑀥𑁂𑀯 𑀧𑀼𑀢𑁆𑀢𑀓 [𑀧𑀼𑀢𑁆𑀢𑀺𑀓𑁂 (𑀲𑁆𑀬𑀸. 𑀓.)] 𑀘𑀭𑀸𑀳𑀺 𑀢𑁆𑀯𑀁 𑀥𑀫𑁆𑀫𑀁;

𑀅𑀦𑁆𑀦𑁂𑀦 𑀘 𑀧𑀸𑀦𑁂𑀦 𑀘, 𑀢𑀧𑁆𑀧𑀬 𑀲𑀫𑀡𑁂 𑀤𑁆𑀯𑀺𑀚𑀸𑀢𑀻 𑀘’.

𑁪𑁩𑁩.

‘‘𑀅𑀣𑀳𑀁 𑀪𑀡𑀸𑀫𑀺 𑀢𑀸𑀢𑀁, 𑀭𑁄𑀤𑀦𑁆𑀢𑀻 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸;

‘𑀧𑀸𑀧𑀜𑁆𑀳𑀺 𑀫𑀬𑀸 𑀧𑀓𑀢𑀁, 𑀓𑀫𑁆𑀫𑀁 𑀢𑀁 𑀦𑀺𑀚𑁆𑀚𑀭𑁂𑀲𑁆𑀲𑀸𑀫𑀺’.

𑁪𑁩𑁪.

‘‘𑀅𑀣 ¶ 𑀫𑀁 𑀪𑀡𑀢𑀻 𑀢𑀸𑀢𑁄, ‘𑀧𑀸𑀧𑀼𑀡 𑀩𑁄𑀥𑀺𑀜𑁆𑀘 𑀅𑀕𑁆𑀕𑀥𑀫𑁆𑀫𑀜𑁆𑀘;

𑀦𑀺𑀩𑁆𑀩𑀸𑀦𑀜𑁆𑀘 𑀮𑀪𑀲𑁆𑀲𑀼, 𑀬𑀁 𑀲𑀘𑁆𑀙𑀺𑀓𑀭𑀻 𑀤𑁆𑀯𑀺𑀧𑀤𑀲𑁂𑀝𑁆𑀞𑁄’.

𑁪𑁩𑁫.

‘‘𑀫𑀸𑀢𑀸𑀧𑀺𑀢𑀽 𑀅𑀪𑀺𑀯𑀸𑀤𑀬𑀺𑀢𑁆𑀯𑀸, 𑀲𑀩𑁆𑀩𑀜𑁆𑀘 𑀜𑀸𑀢𑀺𑀕𑀡𑀯𑀕𑁆𑀕𑀁;

𑀲𑀢𑁆𑀢𑀸𑀳𑀁 𑀧𑀩𑁆𑀩𑀚𑀺𑀢𑀸, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀨𑀲𑁆𑀲𑀬𑀺𑀁.

𑁪𑁩𑁬.

‘‘𑀚𑀸𑀦𑀸𑀫𑀺 𑀅𑀢𑁆𑀢𑀦𑁄 𑀲𑀢𑁆𑀢, 𑀚𑀸𑀢𑀺𑀬𑁄 𑀬𑀲𑁆𑀲𑀬𑀁 𑀨𑀮𑀯𑀺𑀧𑀸𑀓𑁄;

𑀢𑀁 𑀢𑀯 𑀆𑀘𑀺𑀓𑁆𑀔𑀺𑀲𑁆𑀲𑀁, 𑀢𑀁 𑀏𑀓𑀫𑀦𑀸 𑀦𑀺𑀲𑀸𑀫𑁂𑀳𑀺.

𑁪𑁩𑁭.

‘‘𑀦𑀕𑀭𑀫𑁆𑀳𑀺 𑀏𑀭𑀓𑀘𑁆𑀙𑁂 [𑀏𑀭𑀓𑀓𑀘𑁆𑀙𑁂 (𑀲𑁆𑀬𑀸. 𑀓.)], 𑀲𑀼𑀯𑀡𑁆𑀡𑀓𑀸𑀭𑁄 𑀅𑀳𑀁 𑀧𑀳𑀽𑀢𑀥𑀦𑁄;

𑀬𑁄𑀩𑁆𑀩𑀦𑀫𑀤𑁂𑀦 𑀫𑀢𑁆𑀢𑁄 𑀲𑁄, 𑀧𑀭𑀤𑀸𑀭𑀁 𑀅𑀲𑁂𑀯𑀺𑀳𑀁.

𑁪𑁩𑁮.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀦𑀺𑀭𑀬𑀫𑁆𑀳𑀺 𑀅𑀧𑀘𑁆𑀘𑀺𑀲𑀁 𑀘𑀺𑀭𑀁;

𑀧𑀓𑁆𑀓𑁄 𑀢𑀢𑁄 𑀘 𑀉𑀝𑁆𑀞𑀳𑀺𑀢𑁆𑀯𑀸, 𑀫𑀓𑁆𑀓𑀝𑀺𑀬𑀸 𑀓𑀼𑀘𑁆𑀙𑀺𑀫𑁄𑀓𑁆𑀓𑀫𑀺𑀁.

𑁪𑁩𑁯.

‘‘𑀲𑀢𑁆𑀢𑀸𑀳𑀚𑀸𑀢𑀓𑀁 ¶ ¶ 𑀫𑀁, 𑀫𑀳𑀸𑀓𑀧𑀺 𑀬𑀽𑀣𑀧𑁄 𑀦𑀺𑀮𑁆𑀮𑀘𑁆𑀙𑁂𑀲𑀺;

𑀢𑀲𑁆𑀲𑁂𑀢𑀁 𑀓𑀫𑁆𑀫𑀨𑀮𑀁, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁦.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀓𑀸𑀮𑀁 𑀓𑀭𑀺𑀢𑁆𑀯𑀸 𑀲𑀺𑀦𑁆𑀥𑀯𑀸𑀭𑀜𑁆𑀜𑁂;

𑀓𑀸𑀡𑀸𑀬 𑀘 𑀔𑀜𑁆𑀚𑀸𑀬 𑀘, 𑀏𑀴𑀓𑀺𑀬𑀸 𑀓𑀼𑀘𑁆𑀙𑀺𑀫𑁄𑀓𑁆𑀓𑀫𑀺𑀁.

𑁪𑁪𑁧.

‘‘𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀅𑀳𑀁, 𑀦𑀺𑀮𑁆𑀮𑀘𑁆𑀙𑀺𑀢𑁄 𑀤𑀸𑀭𑀓𑁂 𑀧𑀭𑀺𑀯𑀳𑀺𑀢𑁆𑀯𑀸;

𑀓𑀺𑀫𑀺𑀦𑀸𑀯𑀝𑁆𑀝𑁄 𑀅𑀓𑀮𑁆𑀮𑁄, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁨.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀕𑁄𑀯𑀸𑀡𑀺𑀚𑀓𑀲𑁆𑀲 𑀕𑀸𑀯𑀺𑀬𑀸 𑀚𑀸𑀢𑁄;

𑀯𑀘𑁆𑀙𑁄 𑀮𑀸𑀔𑀸𑀢𑀫𑁆𑀩𑁄, 𑀦𑀺𑀮𑁆𑀮𑀘𑁆𑀙𑀺𑀢𑁄 𑀤𑁆𑀯𑀸𑀤𑀲𑁂 𑀫𑀸𑀲𑁂.

𑁪𑁪𑁩.

‘‘𑀯𑁄𑀠𑀽𑀦 [𑀢𑁂 𑀧𑀼𑀦 (𑀲𑁆𑀬𑀸. 𑀓.), 𑀯𑁄𑀥𑀼𑀦 (𑀓. 𑀅𑀝𑁆𑀞.)] 𑀦𑀗𑁆𑀕𑀮𑀫𑀳𑀁, 𑀲𑀓𑀝𑀜𑁆𑀘 𑀥𑀸𑀭𑀬𑀸𑀫𑀺;

𑀅𑀦𑁆𑀥𑁄𑀯𑀝𑁆𑀝𑁄 𑀅𑀓𑀮𑁆𑀮𑁄, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁪.

‘‘𑀲𑁄𑀳𑀁 𑀢𑀢𑁄 𑀘𑀯𑀺𑀢𑁆𑀯𑀸, 𑀯𑀻𑀣𑀺𑀬𑀸 𑀤𑀸𑀲𑀺𑀬𑀸 𑀖𑀭𑁂 𑀚𑀸𑀢𑁄;

𑀦𑁂𑀯 𑀫𑀳𑀺𑀮𑀸 𑀦 𑀧𑀼𑀭𑀺𑀲𑁄, 𑀬𑀣𑀸𑀧𑀺 𑀕𑀦𑁆𑀢𑁆𑀯𑀸𑀦 𑀧𑀭𑀤𑀸𑀭𑀁.

𑁪𑁪𑁫.

‘‘𑀢𑀺𑀁𑀲𑀢𑀺𑀯𑀲𑁆𑀲𑀫𑁆𑀳𑀺 ¶ ¶ 𑀫𑀢𑁄, 𑀲𑀸𑀓𑀝𑀺𑀓𑀓𑀼𑀮𑀫𑁆𑀳𑀺 𑀤𑀸𑀭𑀺𑀓𑀸 𑀚𑀸𑀢𑀸;

𑀓𑀧𑀡𑀫𑁆𑀳𑀺 𑀅𑀧𑁆𑀧𑀪𑁄𑀕𑁂, 𑀥𑀦𑀺𑀓 [𑀅𑀡𑀺𑀓 (𑀅𑀝𑁆𑀞.), 𑀢𑀁𑀲𑀁𑀯𑀡𑁆𑀡𑀦𑀸𑀬𑀫𑁆𑀧𑀺 𑀅𑀢𑁆𑀣𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸] 𑀧𑀼𑀭𑀺𑀲𑀧𑀸𑀢𑀩𑀳𑀼𑀮𑀫𑁆𑀳𑀺.

𑁪𑁪𑁬.

‘‘𑀢𑀁 𑀫𑀁 𑀢𑀢𑁄 𑀲𑀢𑁆𑀣𑀯𑀸𑀳𑁄, 𑀉𑀲𑁆𑀲𑀦𑁆𑀦𑀸𑀬 𑀯𑀺𑀧𑀼𑀮𑀸𑀬 𑀯𑀟𑁆𑀠𑀺𑀬𑀸;

𑀑𑀓𑀟𑁆𑀠𑀢𑀺 𑀯𑀺𑀮𑀧𑀦𑁆𑀢𑀺𑀁, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀮𑀖𑀭𑀲𑁆𑀫𑀸.

𑁪𑁪𑁭.

‘‘𑀅𑀣 𑀲𑁄𑀴𑀲𑀫𑁂 𑀯𑀲𑁆𑀲𑁂, 𑀤𑀺𑀲𑁆𑀯𑀸 𑀫𑀁 𑀧𑀢𑁆𑀢𑀬𑁄𑀩𑁆𑀩𑀦𑀁 𑀓𑀜𑁆𑀜𑀁;

𑀑𑀭𑀼𑀦𑁆𑀥𑀢𑀲𑁆𑀲 𑀧𑀼𑀢𑁆𑀢𑁄, 𑀕𑀺𑀭𑀺𑀤𑀸𑀲𑁄 𑀦𑀸𑀫 𑀦𑀸𑀫𑁂𑀦.

𑁪𑁪𑁮.

‘‘𑀢𑀲𑁆𑀲𑀧𑀺 𑀅𑀜𑁆𑀜𑀸 𑀪𑀭𑀺𑀬𑀸, 𑀲𑀻𑀮𑀯𑀢𑀻 𑀕𑀼𑀡𑀯𑀢𑀻 𑀬𑀲𑀯𑀢𑀻 𑀘;

𑀅𑀦𑀼𑀭𑀢𑁆𑀢𑀸 ¶ [𑀅𑀦𑀼𑀯𑀢𑁆𑀢𑀸 (𑀓.)] 𑀪𑀢𑁆𑀢𑀸𑀭𑀁, 𑀢𑀲𑁆𑀲𑀸𑀳𑀁 [𑀢𑀲𑁆𑀲 𑀢𑀁 (?)] 𑀯𑀺𑀤𑁆𑀤𑁂𑀲𑀦𑀫𑀓𑀸𑀲𑀺𑀁.

𑁪𑁪𑁯.

‘‘𑀢𑀲𑁆𑀲𑁂𑀢𑀁 𑀓𑀫𑁆𑀫𑀨𑀮𑀁, 𑀬𑀁 𑀫𑀁 𑀅𑀧𑀓𑀻𑀭𑀺𑀢𑀽𑀦 𑀕𑀘𑁆𑀙𑀦𑁆𑀢𑀺;

𑀤𑀸𑀲𑀻𑀯 𑀉𑀧𑀝𑁆𑀞𑀳𑀦𑁆𑀢𑀺𑀁, 𑀢𑀲𑁆𑀲𑀧𑀺 𑀅𑀦𑁆𑀢𑁄 𑀓𑀢𑁄 𑀫𑀬𑀸’’𑀢𑀺.

… 𑀇𑀲𑀺𑀤𑀸𑀲𑀻 𑀣𑁂𑀭𑀻….

𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑁧𑁬. 𑀫𑀳𑀸𑀦𑀺𑀧𑀸𑀢𑁄

𑁧. 𑀲𑀼𑀫𑁂𑀥𑀸𑀣𑁂𑀭𑀻𑀕𑀸𑀣𑀸

𑁪𑁫𑁦.

𑀫𑀦𑁆𑀢𑀸𑀯𑀢𑀺𑀬𑀸 ¶ 𑀦𑀕𑀭𑁂, 𑀭𑀜𑁆𑀜𑁄 𑀓𑁄𑀜𑁆𑀘𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸;

𑀥𑀻𑀢𑀸 𑀆𑀲𑀺𑀁 𑀲𑀼𑀫𑁂𑀥𑀸, 𑀧𑀲𑀸𑀤𑀺𑀢𑀸 𑀲𑀸𑀲𑀦𑀓𑀭𑁂𑀳𑀺.

𑁪𑁫𑁧.

𑀲𑀻𑀮𑀯𑀢𑀻 𑀘𑀺𑀢𑁆𑀢𑀓𑀣𑀸, 𑀩𑀳𑀼𑀲𑁆𑀲𑀼𑀢𑀸 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀦𑀻𑀢𑀸;

𑀫𑀸𑀢𑀸𑀧𑀺𑀢𑀭𑁄 𑀉𑀧𑀕𑀫𑁆𑀫, 𑀪𑀡𑀢𑀺 ‘‘𑀉𑀪𑀬𑁄 𑀦𑀺𑀲𑀸𑀫𑁂𑀣.

𑁪𑁫𑁨.

‘‘𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑀸𑀳𑀁, 𑀅𑀲𑀲𑁆𑀲𑀢𑀁 𑀪𑀯𑀕𑀢𑀁 𑀬𑀤𑀺𑀧𑀺 𑀤𑀺𑀩𑁆𑀩𑀁;

𑀓𑀺𑀫𑀗𑁆𑀕𑀁 𑀧𑀦 [𑀓𑀺𑀫𑀗𑁆𑀕 𑀧𑀦 (𑀲𑀻. 𑀲𑁆𑀬𑀸.), 𑀓𑀺𑀁 𑀧𑀦 (?)] 𑀢𑀼𑀘𑁆𑀙𑀸 𑀓𑀸𑀫𑀸, 𑀅𑀧𑁆𑀧𑀲𑁆𑀲𑀸𑀤𑀸 𑀩𑀳𑀼𑀯𑀺𑀖𑀸𑀢𑀸.

𑁪𑁫𑁩.

‘‘𑀓𑀸𑀫𑀸 𑀓𑀝𑀼𑀓𑀸 𑀆𑀲𑀻𑀯𑀺𑀲𑀽𑀧𑀫𑀸, 𑀬𑁂𑀲𑀼 𑀫𑀼𑀘𑁆𑀙𑀺𑀢𑀸 𑀩𑀸𑀮𑀸;

𑀢𑁂 𑀤𑀻𑀖𑀭𑀢𑁆𑀢𑀁 𑀦𑀺𑀭𑀬𑁂, 𑀲𑀫𑀧𑁆𑀧𑀺𑀢𑀸 𑀳𑀜𑁆𑀜𑀦𑁆𑀢𑁂 𑀤𑀼𑀓𑁆𑀔𑀺𑀢𑀸 [𑀳𑀜𑁆𑀜𑀭𑁂 𑀤𑀼𑀔𑀺𑀢𑀸 (?)].

𑁪𑁫𑁪.

‘‘𑀲𑁄𑀘𑀦𑁆𑀢𑀺 𑀧𑀸𑀧𑀓𑀫𑁆𑀫𑀸, 𑀯𑀺𑀦𑀺𑀧𑀸𑀢𑁂 𑀧𑀸𑀧𑀯𑀤𑁆𑀥𑀺𑀦𑁄 𑀲𑀤𑀸;

𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘, 𑀫𑀦𑀲𑀸 𑀘 𑀅𑀲𑀁𑀯𑀼𑀢𑀸 𑀩𑀸𑀮𑀸.

𑁪𑁫𑁫.

‘‘𑀩𑀸𑀮𑀸 ¶ 𑀢𑁂 𑀤𑀼𑀧𑁆𑀧𑀜𑁆𑀜𑀸, 𑀅𑀘𑁂𑀢𑀦𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀭𑀼𑀤𑁆𑀥𑀸;

𑀤𑁂𑀲𑀦𑁆𑀢𑁂 ¶ 𑀅𑀚𑀸𑀦𑀦𑁆𑀢𑀸, 𑀦 𑀩𑀼𑀚𑁆𑀛𑀭𑁂 𑀅𑀭𑀺𑀬𑀲𑀘𑁆𑀘𑀸𑀦𑀺.

𑁪𑁫𑁬.

‘‘𑀲𑀘𑁆𑀘𑀸𑀦𑀺 ¶ 𑀅𑀫𑁆𑀫 𑀩𑀼𑀤𑁆𑀥𑀯𑀭𑀤𑁂𑀲𑀺𑀢𑀸𑀦𑀺, 𑀢𑁂 𑀩𑀳𑀼𑀢𑀭𑀸 𑀅𑀚𑀸𑀦𑀦𑁆𑀢𑀸 𑀬𑁂;

𑀅𑀪𑀺𑀦𑀦𑁆𑀤𑀦𑁆𑀢𑀺 𑀪𑀯𑀕𑀢𑀁, 𑀧𑀺𑀳𑁂𑀦𑁆𑀢𑀺 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺𑀁.

𑁪𑁫𑁭.

‘‘𑀤𑁂𑀯𑁂𑀲𑀼𑀧𑀺 𑀉𑀧𑀧𑀢𑁆𑀢𑀺, 𑀅𑀲𑀲𑁆𑀲𑀢𑀸 𑀪𑀯𑀕𑀢𑁂 𑀅𑀦𑀺𑀘𑁆𑀘𑀫𑁆𑀳𑀺;

𑀦 𑀘 𑀲𑀦𑁆𑀢𑀲𑀦𑁆𑀢𑀺 𑀩𑀸𑀮𑀸, 𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀺𑀢𑀩𑁆𑀩𑀲𑁆𑀲.

𑁪𑁫𑁮.

‘‘𑀘𑀢𑁆𑀢𑀸𑀭𑁄 𑀯𑀺𑀦𑀺𑀧𑀸𑀢𑀸, 𑀤𑀼𑀯𑁂 [𑀤𑁆𑀯𑁂 (𑀲𑀩𑁆𑀩𑀢𑁆𑀣)] 𑀘 𑀕𑀢𑀺𑀬𑁄 𑀓𑀣𑀜𑁆𑀘𑀺 𑀮𑀩𑁆𑀪𑀦𑁆𑀢𑀺;

𑀦 𑀘 𑀯𑀺𑀦𑀺𑀧𑀸𑀢𑀕𑀢𑀸𑀦𑀁, 𑀧𑀩𑁆𑀩𑀚𑁆𑀚𑀸 𑀅𑀢𑁆𑀣𑀺 𑀦𑀺𑀭𑀬𑁂𑀲𑀼.

𑁪𑁫𑁯.

‘‘𑀅𑀦𑀼𑀚𑀸𑀦𑀸𑀣 𑀫𑀁 𑀉𑀪𑀬𑁄, 𑀧𑀩𑁆𑀩𑀚𑀺𑀢𑀼𑀁 𑀤𑀲𑀩𑀮𑀲𑁆𑀲 𑀧𑀸𑀯𑀘𑀦𑁂;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀖𑀝𑀺𑀲𑁆𑀲𑀁, 𑀚𑀸𑀢𑀺𑀫𑀭𑀡𑀧𑁆𑀧𑀳𑀸𑀦𑀸𑀬.

𑁪𑁬𑁦.

‘‘𑀓𑀺𑀁 𑀪𑀯𑀕𑀢𑁂 [𑀪𑀯𑀕𑀢𑁂𑀦 (𑀲𑁆𑀬𑀸.)] 𑀅𑀪𑀺𑀦𑀦𑁆𑀤𑀺𑀢𑁂𑀦, 𑀓𑀸𑀬𑀓𑀮𑀺𑀦𑀸 𑀅𑀲𑀸𑀭𑁂𑀦;

𑀪𑀯𑀢𑀡𑁆𑀳𑀸𑀬 𑀦𑀺𑀭𑁄𑀥𑀸, 𑀅𑀦𑀼𑀚𑀸𑀦𑀸𑀣 𑀧𑀩𑁆𑀩𑀚𑀺𑀲𑁆𑀲𑀸𑀫𑀺.

𑁪𑁬𑁧.

‘‘𑀩𑀼𑀤𑁆𑀥𑀸𑀦𑀁 ¶ 𑀉𑀧𑁆𑀧𑀸𑀤𑁄 𑀯𑀺𑀯𑀚𑁆𑀚𑀺𑀢𑁄, 𑀅𑀓𑁆𑀔𑀡𑁄 𑀔𑀡𑁄 𑀮𑀤𑁆𑀥𑁄;

𑀲𑀻𑀮𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀬𑀸𑀯𑀚𑀻𑀯𑀁 𑀦 𑀤𑀽𑀲𑁂𑀬𑁆𑀬𑀁’’.

𑁪𑁬𑁨.

𑀏𑀯𑀁 𑀪𑀡𑀢𑀺 𑀲𑀼𑀫𑁂𑀥𑀸, 𑀫𑀸𑀢𑀸𑀧𑀺𑀢𑀭𑁄 ‘‘𑀦 𑀢𑀸𑀯 𑀆𑀳𑀸𑀭𑀁;

𑀆𑀳𑀭𑀺𑀲𑁆𑀲𑀁 [𑀆𑀳𑀭𑀺𑀬𑀸𑀫𑀺 (𑀲𑀻.), 𑀆𑀳𑀸𑀭𑀺𑀲𑀁 (?)] 𑀕𑀳𑀝𑁆𑀞𑀸, 𑀫𑀭𑀡𑀯𑀲𑀁 𑀕𑀢𑀸𑀯 𑀳𑁂𑀲𑁆𑀲𑀸𑀫𑀺’’.

𑁪𑁬𑁩.

𑀫𑀸𑀢𑀸 𑀤𑀼𑀓𑁆𑀔𑀺𑀢𑀸 𑀭𑁄𑀤𑀢𑀺 𑀧𑀺𑀢𑀸 𑀘, 𑀅𑀲𑁆𑀲𑀸 𑀲𑀩𑁆𑀩𑀲𑁄 𑀲𑀫𑀪𑀺𑀳𑀢𑁄;

𑀖𑀝𑁂𑀦𑁆𑀢𑀺 𑀲𑀜𑁆𑀜𑀸𑀧𑁂𑀢𑀼𑀁, 𑀧𑀸𑀲𑀸𑀤𑀢𑀮𑁂 𑀙𑀫𑀸𑀧𑀢𑀺𑀢𑀁.

𑁪𑁬𑁪.

‘‘𑀉𑀝𑁆𑀞𑁂𑀳𑀺 𑀧𑀼𑀢𑁆𑀢𑀓 𑀓𑀺𑀁 𑀲𑁄𑀘𑀺𑀢𑁂𑀦, 𑀤𑀺𑀦𑁆𑀦𑀸𑀲𑀺 𑀯𑀸𑀭𑀡𑀯𑀢𑀺𑀫𑁆𑀳𑀺;

𑀭𑀸𑀚𑀸 ¶ 𑀅𑀦𑀻𑀓𑀭𑀢𑁆𑀢𑁄 [𑀅𑀡𑀻𑀓𑀤𑀢𑁆𑀢𑁄 (𑀲𑀻. 𑀲𑁆𑀬𑀸.)], 𑀅𑀪𑀺𑀭𑀽𑀧𑁄 𑀢𑀲𑁆𑀲 𑀢𑁆𑀯𑀁 𑀤𑀺𑀦𑁆𑀦𑀸.

𑁪𑁬𑁫.

‘‘𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀲𑀺, 𑀅𑀦𑀺𑀓𑀭𑀢𑁆𑀢𑀲𑁆𑀲 𑀭𑀸𑀚𑀺𑀦𑁄 𑀪𑀭𑀺𑀬𑀸;

𑀲𑀻𑀮𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸 𑀤𑀼𑀓𑁆𑀓𑀭𑀸 𑀧𑀼𑀢𑁆𑀢𑀓.

𑁪𑁬𑁬.

‘‘𑀭𑀚𑁆𑀚𑁂 𑀆𑀡𑀸𑀥𑀦𑀫𑀺𑀲𑁆𑀲𑀭𑀺𑀬𑀁, 𑀪𑁄𑀕𑀸 𑀲𑀼𑀔𑀸 𑀤𑀳𑀭𑀺𑀓𑀸𑀲𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀪𑁄𑀕𑁂, 𑀯𑀸𑀭𑁂𑀬𑁆𑀬𑀁 𑀳𑁄𑀢𑀼 𑀢𑁂 𑀧𑀼𑀢𑁆𑀢’’.

𑁪𑁬𑁭.

𑀅𑀣 𑀦𑁂 𑀪𑀡𑀢𑀺 𑀲𑀼𑀫𑁂𑀥𑀸, ‘‘𑀫𑀸 𑀏𑀤𑀺𑀲𑀺𑀓𑀸𑀦𑀺 𑀪𑀯𑀕𑀢𑀫𑀲𑀸𑀭𑀁;

𑀧𑀩𑁆𑀩𑀚𑁆𑀚𑀸 𑀯𑀸 𑀳𑁄𑀳𑀺𑀢𑀺, 𑀫𑀭𑀡𑀁 𑀯𑀸 𑀫𑁂 𑀦 𑀘𑁂𑀯 𑀯𑀸𑀭𑁂𑀬𑁆𑀬𑀁.

𑁪𑁬𑁮.

‘‘𑀓𑀺𑀫𑀺𑀯 ¶ 𑀧𑀽𑀢𑀺𑀓𑀸𑀬𑀫𑀲𑀼𑀘𑀺𑀁, 𑀲𑀯𑀦𑀕𑀦𑁆𑀥𑀁 𑀪𑀬𑀸𑀦𑀓𑀁 𑀓𑀼𑀡𑀧𑀁;

𑀅𑀪𑀺𑀲𑀁𑀯𑀺𑀲𑁂𑀬𑁆𑀬𑀁 𑀪𑀲𑁆𑀢𑀁, 𑀅𑀲𑀓𑀺𑀁 𑀧𑀕𑁆𑀖𑀭𑀺𑀢𑀁 𑀅𑀲𑀼𑀘𑀺𑀧𑀼𑀡𑁆𑀡𑀁.

𑁪𑁬𑁯.

‘‘𑀓𑀺𑀫𑀺𑀯 ¶ 𑀢𑀸𑀳𑀁 𑀚𑀸𑀦𑀦𑁆𑀢𑀻, 𑀯𑀺𑀓𑀼𑀮𑀓𑀁 𑀫𑀁𑀲𑀲𑁄𑀡𑀺𑀢𑀼𑀧𑀮𑀺𑀢𑁆𑀢𑀁;

𑀓𑀺𑀫𑀺𑀓𑀼𑀮𑀸𑀮𑀬𑀁 𑀲𑀓𑀼𑀡𑀪𑀢𑁆𑀢𑀁, 𑀓𑀴𑁂𑀯𑀭𑀁 𑀓𑀺𑀲𑁆𑀲 𑀤𑀺𑀬𑁆𑀬𑀢𑀺.

𑁪𑁭𑁦.

‘‘𑀦𑀺𑀩𑁆𑀩𑀼𑀬𑁆𑀳𑀢𑀺 𑀲𑀼𑀲𑀸𑀦𑀁, 𑀅𑀘𑀺𑀭𑀁 𑀓𑀸𑀬𑁄 𑀅𑀧𑁂𑀢𑀯𑀺𑀜𑁆𑀜𑀸𑀡𑁄;

𑀙𑀼𑀤𑁆𑀥𑁄 [𑀙𑀟𑁆𑀟𑀺𑀢𑁄 (𑀲𑁆𑀬𑀸.), 𑀙𑀼𑀝𑁆𑀞𑁄 (𑀓.)] 𑀓𑀴𑀺𑀗𑁆𑀕𑀭𑀁 𑀯𑀺𑀬, 𑀚𑀺𑀕𑀼𑀘𑁆𑀙𑀫𑀸𑀦𑁂𑀳𑀺 𑀜𑀸𑀢𑀻𑀳𑀺.

𑁪𑁭𑁧.

‘‘𑀙𑀼𑀤𑁆𑀥𑀽𑀦 [𑀙𑀟𑁆𑀟𑀽𑀦 (𑀲𑁆𑀬𑀸.), 𑀙𑀼𑀝𑁆𑀞𑀽𑀦 (𑀓.)] 𑀦𑀁 𑀲𑀼𑀲𑀸𑀦𑁂, 𑀧𑀭𑀪𑀢𑁆𑀢𑀁 𑀦𑁆𑀳𑀸𑀬𑀦𑁆𑀢𑀺 [𑀦𑁆𑀳𑀸𑀬𑀭𑁂 (?)] 𑀚𑀺𑀕𑀼𑀘𑁆𑀙𑀦𑁆𑀢𑀸;

𑀦𑀺𑀬𑀓𑀸 𑀫𑀸𑀢𑀸𑀧𑀺𑀢𑀭𑁄, 𑀓𑀺𑀁 𑀧𑀦 𑀲𑀸𑀥𑀸𑀭𑀡𑀸 𑀚𑀦𑀢𑀸.

𑁪𑁭𑁨.

‘‘𑀅𑀚𑁆𑀛𑁄𑀲𑀺𑀢𑀸 𑀅𑀲𑀸𑀭𑁂, 𑀓𑀴𑁂𑀯𑀭𑁂 𑀅𑀝𑁆𑀞𑀺𑀦𑁆𑀳𑀸𑀭𑀼𑀲𑀗𑁆𑀖𑀸𑀢𑁂;

𑀔𑁂𑀴𑀲𑁆𑀲𑀼𑀘𑁆𑀘𑀸𑀭𑀲𑁆𑀲𑀯, 𑀧𑀭𑀺𑀧𑀼𑀡𑁆𑀡𑁂 [𑀔𑁂𑀴𑀲𑁆𑀲𑀼𑀘𑁆𑀘𑀸𑀭𑀧𑀲𑁆𑀲𑀯𑀧𑀭𑀺𑀧𑀼𑀡𑁆𑀡𑁂 (𑀲𑀻.)] 𑀧𑀽𑀢𑀺𑀓𑀸𑀬𑀫𑁆𑀳𑀺.

𑁪𑁭𑁩.

‘‘𑀬𑁄 ¶ 𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸, 𑀅𑀩𑁆𑀪𑀦𑁆𑀢𑀭𑀫𑀲𑁆𑀲 𑀩𑀸𑀳𑀺𑀭𑀁 𑀓𑀬𑀺𑀭𑀸 ¶ ;

𑀕𑀦𑁆𑀥𑀲𑁆𑀲 𑀅𑀲𑀳𑀫𑀸𑀦𑀸, 𑀲𑀓𑀸𑀧𑀺 𑀫𑀸𑀢𑀸 𑀚𑀺𑀕𑀼𑀘𑁆𑀙𑁂𑀬𑁆𑀬.

𑁪𑁭𑁪.

‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀁, 𑀲𑀗𑁆𑀔𑀢𑀁 𑀚𑀸𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁;

𑀬𑁄𑀦𑀺𑀲𑁄 𑀅𑀦𑀼𑀯𑀺𑀘𑀺𑀦𑀦𑁆𑀢𑀻, 𑀯𑀸𑀭𑁂𑀬𑁆𑀬𑀁 𑀓𑀺𑀲𑁆𑀲 𑀇𑀘𑁆𑀙𑁂𑀬𑁆𑀬𑀁.

𑁪𑁭𑁫.

‘‘𑀤𑀺𑀯𑀲𑁂 𑀤𑀺𑀯𑀲𑁂 𑀢𑀺𑀲𑀢𑁆𑀢𑀺, 𑀲𑀢𑀸𑀦𑀺 𑀦𑀯𑀦𑀯𑀸 𑀧𑀢𑁂𑀬𑁆𑀬𑀼𑀁 𑀓𑀸𑀬𑀫𑁆𑀳𑀺;

𑀯𑀲𑁆𑀲𑀲𑀢𑀫𑁆𑀧𑀺 𑀘 𑀖𑀸𑀢𑁄, 𑀲𑁂𑀬𑁆𑀬𑁄 𑀤𑀼𑀓𑁆𑀔𑀲𑁆𑀲 𑀘𑁂𑀯𑀁 𑀔𑀬𑁄.

𑁪𑁭𑁬.

‘‘𑀅𑀚𑁆𑀛𑀼𑀧𑀕𑀘𑁆𑀙𑁂 𑀖𑀸𑀢𑀁, 𑀬𑁄 𑀯𑀺𑀜𑁆𑀜𑀸𑀬𑁂𑀯𑀁 𑀲𑀢𑁆𑀣𑀼𑀦𑁄 𑀯𑀘𑀦𑀁;

‘𑀤𑀻𑀖𑁄 𑀢𑁂𑀲𑀁 [𑀯𑁄 (𑀓.)] 𑀲𑀁𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀁 𑀳𑀜𑁆𑀜𑀫𑀸𑀦𑀸𑀦𑀁’.

𑁪𑁭𑁭.

‘‘𑀤𑁂𑀯𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀘, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀅𑀲𑀼𑀭𑀓𑀸𑀬𑁂;

𑀧𑁂𑀢𑁂𑀲𑀼 ¶ 𑀘 𑀦𑀺𑀭𑀬𑁂𑀲𑀼 𑀘, 𑀅𑀧𑀭𑀺𑀫𑀺𑀢𑀸 𑀤𑀺𑀲𑁆𑀲𑀭𑁂 𑀖𑀸𑀢𑀸.

𑁪𑁭𑁮.

‘‘𑀖𑀸𑀢𑀸 𑀦𑀺𑀭𑀬𑁂𑀲𑀼 𑀩𑀳𑀽, 𑀯𑀺𑀦𑀺𑀧𑀸𑀢𑀕𑀢𑀲𑁆𑀲 𑀧𑀻𑀴𑀺𑀬𑀫𑀸𑀦𑀲𑁆𑀲 [𑀓𑀺𑀮𑀺𑀲𑁆𑀲𑀫𑀸𑀦𑀲𑁆𑀲 (𑀲𑁆𑀬𑀸. 𑀓.)];

𑀤𑁂𑀯𑁂𑀲𑀼𑀧𑀺 𑀅𑀢𑁆𑀢𑀸𑀡𑀁, 𑀦𑀺𑀩𑁆𑀩𑀸𑀦𑀲𑀼𑀔𑀸 𑀧𑀭𑀁 𑀦𑀢𑁆𑀣𑀺.

𑁪𑁭𑁯.

‘‘𑀧𑀢𑁆𑀢𑀸 𑀢𑁂 𑀦𑀺𑀩𑁆𑀩𑀸𑀦𑀁, 𑀬𑁂 𑀬𑀼𑀢𑁆𑀢𑀸 𑀤𑀲𑀩𑀮𑀲𑁆𑀲 𑀧𑀸𑀯𑀘𑀦𑁂;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀖𑀝𑁂𑀦𑁆𑀢𑀺, 𑀚𑀸𑀢𑀺𑀫𑀭𑀡𑀧𑁆𑀧𑀳𑀸𑀦𑀸𑀬.

𑁪𑁮𑁦.

‘‘𑀅𑀚𑁆𑀚𑁂𑀯 𑀢𑀸𑀢𑀪𑀺𑀦𑀺𑀓𑁆𑀔𑀫𑀺𑀲𑁆𑀲𑀁, 𑀪𑁄𑀕𑁂𑀳𑀺 𑀓𑀺𑀁 𑀅𑀲𑀸𑀭𑁂𑀳𑀺;

𑀦𑀺𑀩𑁆𑀩𑀺𑀦𑁆𑀦𑀸 𑀫𑁂 𑀓𑀸𑀫𑀸, 𑀯𑀦𑁆𑀢𑀲𑀫𑀸 𑀢𑀸𑀮𑀯𑀢𑁆𑀣𑀼𑀓𑀢𑀸’’.

𑁪𑁮𑁧.

𑀲𑀸 𑀘𑁂𑀯𑀁 𑀪𑀡𑀢𑀺 𑀧𑀺𑀢𑀭𑀫𑀦𑀻𑀓𑀭𑀢𑁆𑀢𑁄 𑀘 𑀬𑀲𑁆𑀲 𑀲𑀸 𑀤𑀺𑀦𑁆𑀦𑀸;

𑀉𑀧𑀬𑀸𑀲𑀺 𑀯𑀸𑀭𑀡𑀯𑀢𑁂, 𑀯𑀸𑀭𑁂𑀬𑁆𑀬𑀫𑀼𑀧𑀝𑁆𑀞𑀺𑀢𑁂 𑀓𑀸𑀮𑁂.

𑁪𑁮𑁨.

𑀅𑀣 𑀅𑀲𑀺𑀢𑀦𑀺𑀘𑀺𑀢𑀫𑀼𑀤𑀼𑀓𑁂, 𑀓𑁂𑀲𑁂 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀬 𑀲𑀼𑀫𑁂𑀥𑀸;

𑀧𑀸𑀲𑀸𑀤𑀁 𑀧𑀺𑀤𑀳𑀺𑀢𑁆𑀯𑀸 [𑀧𑀺𑀥𑁂𑀢𑁆𑀯𑀸 (𑀲𑀻. 𑀲𑁆𑀬𑀸.), 𑀧𑀺𑀥𑀺𑀢𑁆𑀯𑀸 (𑀓.)], 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺.

𑁪𑁮𑁩.

𑀲𑀸 ¶ ¶ 𑀘 𑀢𑀳𑀺𑀁 𑀲𑀫𑀸𑀧𑀦𑁆𑀦𑀸, 𑀅𑀦𑀻𑀓𑀭𑀢𑁆𑀢𑁄 𑀘 𑀆𑀕𑀢𑁄 𑀦𑀕𑀭𑀁;

𑀧𑀸𑀲𑀸𑀤𑁂 𑀘 [𑀧𑀸𑀲𑀸𑀤𑁂𑀯 (𑀲𑀻. 𑀲𑁆𑀬𑀸.)] 𑀲𑀼𑀫𑁂𑀥𑀸, 𑀅𑀦𑀺𑀘𑁆𑀘𑀲𑀜𑁆𑀜𑀁 [𑀅𑀦𑀺𑀘𑁆𑀘𑀲𑀜𑁆𑀜𑀸 (𑀲𑀩𑁆𑀩𑀢𑁆𑀣)] 𑀲𑀼𑀪𑀸𑀯𑁂𑀢𑀺.

𑁪𑁮𑁪.

𑀲𑀸 𑀘 𑀫𑀦𑀲𑀺 𑀓𑀭𑁄𑀢𑀺, 𑀅𑀦𑀻𑀓𑀭𑀢𑁆𑀢𑁄 𑀘 𑀆𑀭𑀼𑀳𑀻 𑀢𑀼𑀭𑀺𑀢𑀁;

𑀫𑀡𑀺𑀓𑀦𑀓𑀪𑀽𑀲𑀺𑀢𑀗𑁆𑀕𑁄, 𑀓𑀢𑀜𑁆𑀚𑀮𑀻 𑀬𑀸𑀘𑀢𑀺 𑀲𑀼𑀫𑁂𑀥𑀁.

𑁪𑁮𑁫.

‘‘𑀭𑀚𑁆𑀚𑁂 𑀆𑀡𑀸𑀥𑀦𑀫𑀺𑀲𑁆𑀲𑀭𑀺𑀬𑀁, 𑀪𑁄𑀕𑀸 𑀲𑀼𑀔𑀸 𑀤𑀳𑀭𑀺𑀓𑀸𑀲𑀺;

𑀪𑀼𑀜𑁆𑀚𑀸𑀳𑀺 𑀓𑀸𑀫𑀪𑁄𑀕𑁂, 𑀓𑀸𑀫𑀲𑀼𑀔𑀸 𑀤𑀼𑀮𑁆𑀮𑀪𑀸 𑀮𑁄𑀓𑁂.

𑁪𑁮𑁬.

‘‘𑀦𑀺𑀲𑁆𑀲𑀝𑁆𑀞𑀁 ¶ 𑀢𑁂 𑀭𑀚𑁆𑀚𑀁, 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀼 𑀤𑁂𑀳𑀺 𑀤𑀸𑀦𑀸𑀦𑀺;

𑀫𑀸 𑀤𑀼𑀫𑁆𑀫𑀦𑀸 𑀅𑀳𑁄𑀲𑀺, 𑀫𑀸𑀢𑀸𑀧𑀺𑀢𑀭𑁄 𑀢𑁂 𑀤𑀼𑀓𑁆𑀔𑀺𑀢𑀸’’ [𑀫𑀸𑀢𑀸𑀧𑀺𑀢𑀭𑁄 𑀘 𑀢𑁂 𑀤𑀼𑀔𑀺𑀢𑀸 (?)].

𑁪𑁮𑁭.

𑀢𑀁 𑀢𑀁 𑀪𑀡𑀢𑀺 𑀲𑀼𑀫𑁂𑀥𑀸, 𑀓𑀸𑀫𑁂𑀳𑀺 𑀅𑀦𑀢𑁆𑀣𑀺𑀓𑀸 𑀯𑀺𑀕𑀢𑀫𑁄𑀳𑀸;

‘‘𑀫𑀸 𑀓𑀸𑀫𑁂 𑀅𑀪𑀺𑀦𑀦𑁆𑀤𑀺, 𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀧𑀲𑁆𑀲.

𑁪𑁮𑁮.

‘‘𑀘𑀸𑀢𑀼𑀤𑁆𑀤𑀻𑀧𑁄 𑀭𑀸𑀚𑀸 𑀫𑀦𑁆𑀥𑀸𑀢𑀸, 𑀆𑀲𑀺 𑀓𑀸𑀫𑀪𑁄𑀕𑀺𑀦 𑀫𑀕𑁆𑀕𑁄;

𑀅𑀢𑀺𑀢𑁆𑀢𑁄 ¶ 𑀓𑀸𑀮𑀗𑁆𑀓𑀢𑁄, 𑀦 𑀘𑀲𑁆𑀲 𑀧𑀭𑀺𑀧𑀽𑀭𑀺𑀢𑀸 𑀇𑀘𑁆𑀙𑀸.

𑁪𑁮𑁯.

‘‘𑀲𑀢𑁆𑀢 𑀭𑀢𑀦𑀸𑀦𑀺 𑀯𑀲𑁆𑀲𑁂𑀬𑁆𑀬, 𑀯𑀼𑀝𑁆𑀞𑀺𑀫𑀸 𑀤𑀲𑀤𑀺𑀲𑀸 𑀲𑀫𑀦𑁆𑀢𑁂𑀦;

𑀦 𑀘𑀢𑁆𑀣𑀺 𑀢𑀺𑀢𑁆𑀢𑀺 𑀓𑀸𑀫𑀸𑀦𑀁, 𑀅𑀢𑀺𑀢𑁆𑀢𑀸𑀯 𑀫𑀭𑀦𑁆𑀢𑀺 𑀦𑀭𑀸.

𑁪𑁯𑁦.

‘‘𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸, 𑀓𑀸𑀫𑀸 𑀲𑀧𑁆𑀧𑀲𑀺𑀭𑁄𑀧𑀫𑀸;

𑀉𑀓𑁆𑀓𑁄𑀧𑀫𑀸 𑀅𑀦𑀼𑀤𑀳𑀦𑁆𑀢𑀺, 𑀅𑀝𑁆𑀞𑀺𑀓𑀗𑁆𑀓𑀮 [𑀓𑀗𑁆𑀔𑀮 (𑀲𑀻.)] 𑀲𑀦𑁆𑀦𑀺𑀪𑀸.

𑁪𑁯𑁧.

‘‘𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀓𑀸𑀫𑀸, 𑀩𑀳𑀼𑀤𑀼𑀓𑁆𑀔𑀸 𑀫𑀳𑀸𑀯𑀺𑀲𑀸;

𑀅𑀬𑁄𑀕𑀼𑀴𑁄𑀯 𑀲𑀦𑁆𑀢𑀢𑁆𑀢𑁄, 𑀅𑀖𑀫𑀽𑀮𑀸 𑀤𑀼𑀔𑀧𑁆𑀨𑀮𑀸.

𑁪𑁯𑁨.

‘‘𑀭𑀼𑀓𑁆𑀔𑀧𑁆𑀨𑀮𑀽𑀧𑀫𑀸 𑀓𑀸𑀫𑀸, 𑀫𑀁𑀲𑀧𑁂𑀲𑀽𑀧𑀫𑀸 𑀤𑀼𑀔𑀸;

𑀲𑀼𑀧𑀺𑀦𑁄𑀧𑀫𑀸 ¶ 𑀯𑀜𑁆𑀘𑀦𑀺𑀬𑀸, 𑀓𑀸𑀫𑀸 𑀬𑀸𑀘𑀺𑀢𑀓𑀽𑀧𑀫𑀸.

𑁪𑁯𑁩.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀭𑁄𑀕𑁄 𑀕𑀡𑁆𑀟𑁄 𑀅𑀖𑀁 𑀦𑀺𑀖𑀁;

𑀅𑀗𑁆𑀕𑀸𑀭𑀓𑀸𑀲𑀼𑀲𑀤𑀺𑀲𑀸, 𑀅𑀖𑀫𑀽𑀮𑀁 𑀪𑀬𑀁 𑀯𑀥𑁄.

𑁪𑁯𑁪.

‘‘𑀏𑀯𑀁 𑀩𑀳𑀼𑀤𑀼𑀓𑁆𑀔𑀸 𑀓𑀸𑀫𑀸, 𑀅𑀓𑁆𑀔𑀸𑀢𑀸 𑀅𑀦𑁆𑀢𑀭𑀸𑀬𑀺𑀓𑀸;

𑀕𑀘𑁆𑀙𑀣 𑀦 𑀫𑁂 𑀪𑀕𑀯𑀢𑁂, 𑀯𑀺𑀲𑁆𑀲𑀸𑀲𑁄 𑀅𑀢𑁆𑀣𑀺 𑀅𑀢𑁆𑀢𑀦𑁄.

𑁪𑁯𑁫.

‘‘𑀓𑀺𑀁 𑀫𑀫 𑀧𑀭𑁄 𑀓𑀭𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀲𑀻𑀲𑀫𑁆𑀳𑀺 𑀟𑀬𑁆𑀳𑀫𑀸𑀦𑀫𑁆𑀳𑀺;

𑀅𑀦𑀼𑀩𑀦𑁆𑀥𑁂 𑀚𑀭𑀸𑀫𑀭𑀡𑁂, 𑀢𑀲𑁆𑀲 𑀖𑀸𑀢𑀸𑀬 𑀖𑀝𑀺𑀢𑀩𑁆𑀩𑀁’’.

𑁪𑁯𑁬.

𑀤𑁆𑀯𑀸𑀭𑀁 ¶ 𑀅𑀧𑀸𑀧𑀼𑀭𑀺𑀢𑁆𑀯𑀸𑀦𑀳𑀁 [𑀅𑀯𑀸𑀧𑀼𑀭𑀺𑀢𑁆𑀯𑀸𑀳𑀁 (𑀲𑀻.)], 𑀫𑀸𑀢𑀸𑀧𑀺𑀢𑀭𑁄 𑀅𑀦𑀻𑀓𑀭𑀢𑁆𑀢𑀜𑁆𑀘;

𑀤𑀺𑀲𑁆𑀯𑀸𑀦 𑀙𑀫𑀁 𑀦𑀺𑀲𑀺𑀦𑁆𑀦𑁂, 𑀭𑁄𑀤𑀦𑁆𑀢𑁂 𑀇𑀤𑀫𑀯𑁄𑀘𑀁.

𑁪𑁯𑁭.

‘‘𑀤𑀻𑀖𑁄 𑀩𑀸𑀮𑀸𑀦𑀁 𑀲𑀁𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀜𑁆𑀘 𑀭𑁄𑀤𑀢𑀁;

𑀅𑀦𑀫𑀢𑀕𑁆𑀕𑁂 𑀧𑀺𑀢𑀼 𑀫𑀭𑀡𑁂, 𑀪𑀸𑀢𑀼 𑀯𑀥𑁂 𑀅𑀢𑁆𑀢𑀦𑁄 𑀘 𑀯𑀥𑁂.

𑁪𑁯𑁮.

‘‘𑀅𑀲𑁆𑀲𑀼 𑀣𑀜𑁆𑀜𑀁 𑀭𑀼𑀥𑀺𑀭𑀁, 𑀲𑀁𑀲𑀸𑀭𑀁 𑀅𑀦𑀫𑀢𑀕𑁆𑀕𑀢𑁄 𑀲𑀭𑀣;

𑀲𑀢𑁆𑀢𑀸𑀦𑀁 𑀲𑀁𑀲𑀭𑀢𑀁, 𑀲𑀭𑀸𑀳𑀺 𑀅𑀝𑁆𑀞𑀻𑀦𑀜𑁆𑀘 𑀲𑀦𑁆𑀦𑀺𑀘𑀬𑀁.

𑁪𑁯𑁯.

‘‘𑀲𑀭 ¶ 𑀘𑀢𑀼𑀭𑁄𑀤𑀥𑀻 [𑀲𑀭𑀲𑁆𑀲𑀼 𑀘𑀢𑀼𑀭𑁄 𑀉𑀤𑀥𑀻 (?)], 𑀉𑀧𑀦𑀻𑀢𑁂 𑀅𑀲𑁆𑀲𑀼𑀣𑀜𑁆𑀜𑀭𑀼𑀥𑀺𑀭𑀫𑁆𑀳𑀺;

𑀲𑀭 𑀏𑀓𑀓𑀧𑁆𑀧𑀫𑀝𑁆𑀞𑀻𑀦𑀁, 𑀲𑀜𑁆𑀘𑀬𑀁 𑀯𑀺𑀧𑀼𑀮𑁂𑀦 𑀲𑀫𑀁.

𑁫𑁦𑁦.

‘‘𑀅𑀦𑀫𑀢𑀕𑁆𑀕𑁂 ¶ 𑀲𑀁𑀲𑀭𑀢𑁄, 𑀫𑀳𑀺𑀁 [𑀫𑀳𑀸𑀫𑀳𑀺𑀁 (?)] 𑀚𑀫𑁆𑀩𑀼𑀤𑀻𑀧𑀫𑀼𑀧𑀦𑀻𑀢𑀁;

𑀓𑁄𑀮𑀝𑁆𑀞𑀺𑀫𑀢𑁆𑀢𑀕𑀼𑀴𑀺𑀓𑀸, 𑀫𑀸𑀢𑀸 𑀫𑀸𑀢𑀼𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀺.

𑁫𑁦𑁧.

‘‘𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 [𑀲𑀭 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 (𑀲𑀻.)], 𑀉𑀧𑀦𑀻𑀢𑀁 𑀅𑀦𑀫𑀢𑀕𑁆𑀕𑀢𑁄 𑀲𑀭;

𑀘𑀢𑀼𑀭𑀗𑁆𑀕𑀼𑀮𑀺𑀓𑀸 𑀖𑀝𑀺𑀓𑀸, 𑀧𑀺𑀢𑀼𑀧𑀺𑀢𑀼𑀲𑁆𑀯𑁂𑀯 𑀦𑀧𑁆𑀧𑀳𑁄𑀦𑁆𑀢𑀺.

𑁫𑁦𑁨.

‘‘𑀲𑀭 𑀓𑀸𑀡𑀓𑀘𑁆𑀙𑀧𑀁 𑀧𑀼𑀩𑁆𑀩𑀲𑀫𑀼𑀤𑁆𑀤𑁂, 𑀅𑀧𑀭𑀢𑁄 𑀘 𑀬𑀼𑀕𑀙𑀺𑀤𑁆𑀤𑀁;

𑀲𑀺𑀭𑀁 ¶ [𑀲𑀭 (𑀲𑀻.)] 𑀢𑀲𑁆𑀲 𑀘 𑀧𑀝𑀺𑀫𑀼𑀓𑁆𑀓𑀁, 𑀫𑀦𑀼𑀲𑁆𑀲𑀮𑀸𑀪𑀫𑁆𑀳𑀺 𑀑𑀧𑀫𑁆𑀫𑀁.

𑁫𑁦𑁩.

‘‘𑀲𑀭 𑀭𑀽𑀧𑀁 𑀨𑁂𑀡𑀧𑀺𑀡𑁆𑀟𑁄𑀧𑀫𑀲𑁆𑀲, 𑀓𑀸𑀬𑀓𑀮𑀺𑀦𑁄 𑀅𑀲𑀸𑀭𑀲𑁆𑀲;

𑀔𑀦𑁆𑀥𑁂 𑀧𑀲𑁆𑀲 𑀅𑀦𑀺𑀘𑁆𑀘𑁂, 𑀲𑀭𑀸𑀳𑀺 𑀦𑀺𑀭𑀬𑁂 𑀩𑀳𑀼𑀯𑀺𑀖𑀸𑀢𑁂.

𑁫𑁦𑁪.

‘‘𑀲𑀭 𑀓𑀝𑀲𑀺𑀁 𑀯𑀟𑁆𑀠𑁂𑀦𑁆𑀢𑁂, 𑀧𑀼𑀦𑀧𑁆𑀧𑀼𑀦𑀁 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼;

𑀲𑀭 𑀓𑀼𑀫𑁆𑀪𑀻𑀮𑀪𑀬𑀸𑀦𑀺 𑀘, 𑀲𑀭𑀸𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺.

𑁫𑁦𑁫.

‘‘𑀅𑀫𑀢𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀧𑀜𑁆𑀘𑀓𑀝𑀼𑀓𑁂𑀦 𑀧𑀻𑀢𑁂𑀦;

𑀲𑀩𑁆𑀩𑀸 𑀳𑀺 𑀓𑀸𑀫𑀭𑀢𑀺𑀬𑁄, 𑀓𑀝𑀼𑀓𑀢𑀭𑀸 𑀧𑀜𑁆𑀘𑀓𑀝𑀼𑀓𑁂𑀦.

𑁫𑁦𑁬.

‘‘𑀅𑀫𑀢𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂 𑀧𑀭𑀺𑀴𑀸𑀳𑀸 [𑀲𑀧𑀭𑀺𑀴𑀸𑀳𑀸 (𑀲𑀻. 𑀅𑀝𑁆𑀞.)];

𑀲𑀩𑁆𑀩𑀸 𑀳𑀺 𑀓𑀸𑀫𑀭𑀢𑀺𑀬𑁄, 𑀚𑀮𑀺𑀢𑀸 𑀓𑀼𑀣𑀺𑀢𑀸 𑀓𑀫𑁆𑀧𑀺𑀢𑀸 𑀲𑀦𑁆𑀢𑀸𑀧𑀺𑀢𑀸.

𑁫𑁦𑁭.

‘‘𑀅𑀲𑀧𑀢𑁆𑀢𑀫𑁆𑀳𑀺 𑀲𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂 𑀩𑀳𑀼𑀲𑀧𑀢𑁆𑀢𑀸;

𑀭𑀸𑀚𑀕𑁆𑀕𑀺𑀘𑁄𑀭𑀉𑀤𑀓𑀧𑁆𑀧𑀺𑀬𑁂𑀳𑀺, 𑀲𑀸𑀥𑀸𑀭𑀡𑀸 𑀓𑀸𑀫𑀸 𑀩𑀳𑀼𑀲𑀧𑀢𑁆𑀢𑀸.

𑁫𑁦𑁮.

‘‘𑀫𑁄𑀓𑁆𑀔𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 𑀬𑁂𑀲𑀼 𑀯𑀥𑀩𑀦𑁆𑀥𑁄;

𑀓𑀸𑀫𑁂𑀲𑀼 𑀳𑀺 𑀅𑀲𑀓𑀸𑀫𑀸, 𑀯𑀥𑀩𑀦𑁆𑀥𑀤𑀼𑀔𑀸𑀦𑀺 𑀅𑀦𑀼𑀪𑁄𑀦𑁆𑀢𑀺.

𑁫𑁦𑁯.

‘‘𑀆𑀤𑀻𑀧𑀺𑀢𑀸 ¶ ¶ 𑀢𑀺𑀡𑀼𑀓𑁆𑀓𑀸, 𑀕𑀡𑁆𑀳𑀦𑁆𑀢𑀁 𑀤𑀳𑀦𑁆𑀢𑀺 𑀦𑁂𑀯 𑀫𑀼𑀜𑁆𑀘𑀦𑁆𑀢𑀁;

𑀉𑀓𑁆𑀓𑁄𑀧𑀫𑀸 𑀳𑀺 𑀓𑀸𑀫𑀸, 𑀤𑀳𑀦𑁆𑀢𑀺 𑀬𑁂 𑀢𑁂 𑀦 𑀫𑀼𑀜𑁆𑀘𑀦𑁆𑀢𑀺.

𑁫𑁧𑁦.

‘‘𑀫𑀸 𑀅𑀧𑁆𑀧𑀓𑀲𑁆𑀲 𑀳𑁂𑀢𑀼, 𑀓𑀸𑀫𑀲𑀼𑀔𑀲𑁆𑀲 𑀯𑀺𑀧𑀼𑀮𑀁 𑀚𑀳𑀻 𑀲𑀼𑀔𑀁;

𑀫𑀸 𑀧𑀼𑀣𑀼𑀮𑁄𑀫𑁄𑀯 𑀩𑀴𑀺𑀲𑀁, 𑀕𑀺𑀮𑀺𑀢𑁆𑀯𑀸 𑀧𑀘𑁆𑀙𑀸 𑀯𑀺𑀳𑀜𑁆𑀜𑀲𑀺.

𑁫𑁧𑁧.

‘‘𑀓𑀸𑀫𑀁 ¶ 𑀓𑀸𑀫𑁂𑀲𑀼 𑀤𑀫𑀲𑁆𑀲𑀼, 𑀢𑀸𑀯 𑀲𑀼𑀦𑀔𑁄𑀯 𑀲𑀗𑁆𑀔𑀮𑀸𑀩𑀤𑁆𑀥𑁄;

𑀓𑀸𑀳𑀺𑀦𑁆𑀢𑀺 𑀔𑀼 𑀢𑀁 𑀓𑀸𑀫𑀸, 𑀙𑀸𑀢𑀸 𑀲𑀼𑀦𑀔𑀁𑀯 𑀘𑀡𑁆𑀟𑀸𑀮𑀸.

𑁫𑁧𑁨.

‘‘𑀅𑀧𑀭𑀺𑀫𑀺𑀢𑀜𑁆𑀘 ¶ 𑀤𑀼𑀓𑁆𑀔𑀁, 𑀩𑀳𑀽𑀦𑀺 𑀘 𑀘𑀺𑀢𑁆𑀢𑀤𑁄𑀫𑀦𑀲𑁆𑀲𑀸𑀦𑀺;

𑀅𑀦𑀼𑀪𑁄𑀳𑀺𑀲𑀺 𑀓𑀸𑀫𑀬𑀼𑀢𑁆𑀢𑁄, 𑀧𑀝𑀺𑀦𑀺𑀲𑁆𑀲𑀚 [𑀧𑀝𑀺𑀦𑀺𑀲𑁆𑀲𑀭 (𑀲𑀻.)] 𑀅𑀤𑁆𑀥𑀼𑀯𑁂 𑀓𑀸𑀫𑁂.

𑁫𑁧𑁩.

‘‘𑀅𑀚𑀭𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂, 𑀓𑀺𑀁 𑀢𑀯 𑀓𑀸𑀫𑁂𑀳𑀺 [𑀬𑁂𑀲𑀼 𑀚𑀭𑀸𑀬 𑀘; 𑀫𑀭𑀡𑀩𑁆𑀬𑀸𑀥𑀺𑀳𑀺 𑀕𑀳𑀺𑀢𑀸 (?)] 𑀬𑁂𑀲𑀼 𑀚𑀭𑀸;

𑀫𑀭𑀡𑀩𑁆𑀬𑀸𑀥𑀺𑀕𑀳𑀺𑀢𑀸 [𑀬𑁂𑀲𑀼 𑀚𑀭𑀸𑀬 𑀘; 𑀫𑀭𑀡𑀩𑁆𑀬𑀸𑀥𑀺𑀳𑀺 𑀕𑀳𑀺𑀢𑀸 (?)], 𑀲𑀩𑁆𑀩𑀸 𑀲𑀩𑁆𑀩𑀢𑁆𑀣 𑀚𑀸𑀢𑀺𑀬𑁄.

𑁫𑁧𑁪.

‘‘𑀇𑀤𑀫𑀚𑀭𑀫𑀺𑀤𑀫𑀫𑀭𑀁 [𑀇𑀤𑀁 𑀅𑀚𑀭𑀁 𑀇𑀤𑀁 𑀅𑀫𑀭𑀁 (?)], 𑀇𑀤𑀫𑀚𑀭𑀸𑀫𑀭𑀁 𑀧𑀤𑀫𑀲𑁄𑀓𑀁;

𑀅𑀲𑀧𑀢𑁆𑀢𑀫𑀲𑀫𑁆𑀩𑀸𑀥𑀁, 𑀅𑀔𑀮𑀺𑀢𑀫𑀪𑀬𑀁 𑀦𑀺𑀭𑀼𑀧𑀢𑀸𑀧𑀁.

𑁫𑁧𑁫.

‘‘𑀅𑀥𑀺𑀕𑀢𑀫𑀺𑀤𑀁 𑀩𑀳𑀽𑀳𑀺, 𑀅𑀫𑀢𑀁 𑀅𑀚𑁆𑀚𑀸𑀧𑀺 𑀘 𑀮𑀪𑀦𑀻𑀬𑀫𑀺𑀤𑀁;

𑀬𑁄 𑀬𑁄𑀦𑀺𑀲𑁄 𑀧𑀬𑀼𑀜𑁆𑀚𑀢𑀺, 𑀦 𑀘 𑀲𑀓𑁆𑀓𑀸 𑀅𑀖𑀝𑀫𑀸𑀦𑁂𑀦’’.

𑁫𑁧𑁬.

𑀏𑀯𑀁 𑀪𑀡𑀢𑀺 𑀲𑀼𑀫𑁂𑀥𑀸, 𑀲𑀗𑁆𑀔𑀸𑀭𑀕𑀢𑁂 𑀭𑀢𑀺𑀁 𑀅𑀮𑀪𑀫𑀸𑀦𑀸;

𑀅𑀦𑀼𑀦𑁂𑀦𑁆𑀢𑀻 𑀅𑀦𑀺𑀓𑀭𑀢𑁆𑀢𑀁, 𑀓𑁂𑀲𑁂 𑀘 𑀙𑀫𑀁 𑀔𑀺𑀧𑀺 𑀲𑀼𑀫𑁂𑀥𑀸.

𑁫𑁧𑁭.

𑀉𑀝𑁆𑀞𑀸𑀬 𑀅𑀦𑀺𑀓𑀭𑀢𑁆𑀢𑁄, 𑀧𑀜𑁆𑀚𑀮𑀺𑀓𑁄 𑀬𑀸𑀘𑀺𑀢𑀲𑁆𑀲𑀸 𑀧𑀺𑀢𑀭𑀁 𑀲𑁄;

‘‘𑀯𑀺𑀲𑁆𑀲𑀚𑁆𑀚𑁂𑀣 𑀲𑀼𑀫𑁂𑀥𑀁, 𑀧𑀩𑁆𑀩𑀚𑀺𑀢𑀼𑀁 𑀯𑀺𑀫𑁄𑀓𑁆𑀔𑀲𑀘𑁆𑀘𑀤𑀲𑁆𑀲𑀸’’.

𑁫𑁧𑁮.

𑀯𑀺𑀲𑁆𑀲𑀚𑁆𑀚𑀺𑀢𑀸 𑀫𑀸𑀢𑀸𑀧𑀺𑀢𑀽𑀳𑀺, 𑀧𑀩𑁆𑀩𑀚𑀺 𑀲𑁄𑀓𑀪𑀬𑀪𑀻𑀢𑀸;

𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀅𑀕𑁆𑀕𑀨𑀮𑀁 𑀲𑀺𑀓𑁆𑀔𑀫𑀸𑀦𑀸𑀬.

𑁫𑁧𑁯.

𑀅𑀘𑁆𑀙𑀭𑀺𑀬𑀫𑀩𑁆𑀪𑀼𑀢𑀁 ¶ 𑀢𑀁, 𑀦𑀺𑀩𑁆𑀩𑀸𑀦𑀁 𑀆𑀲𑀺 𑀭𑀸𑀚𑀓𑀜𑁆𑀜𑀸𑀬;

𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑀭𑀺𑀢𑀁, 𑀬𑀣𑀸 𑀩𑁆𑀬𑀸𑀓𑀭𑀺 𑀧𑀘𑁆𑀙𑀺𑀫𑁂 𑀓𑀸𑀮𑁂.

𑁫𑁨𑁦.

‘‘𑀪𑀕𑀯𑀢𑀺 𑀓𑁄𑀡𑀸𑀕𑀫𑀦𑁂, 𑀲𑀗𑁆𑀖𑀸𑀭𑀸𑀫𑀫𑁆𑀳𑀺 𑀦𑀯𑀦𑀺𑀯𑁂𑀲𑀫𑁆𑀳𑀺;

𑀲𑀔𑀺𑀬𑁄 𑀢𑀺𑀲𑁆𑀲𑁄 𑀚𑀦𑀺𑀬𑁄, 𑀯𑀺𑀳𑀸𑀭𑀤𑀸𑀦𑀁 𑀅𑀤𑀸𑀲𑀺𑀫𑁆𑀳.

𑁫𑁨𑁧.

‘‘𑀤𑀲𑀓𑁆𑀔𑀢𑁆𑀢𑀼𑀁 𑀲𑀢𑀓𑁆𑀔𑀢𑁆𑀢𑀼𑀁, 𑀤𑀲𑀲𑀢𑀓𑁆𑀔𑀢𑁆𑀢𑀼𑀁 𑀲𑀢𑀸𑀦𑀺 𑀘 𑀲𑀢𑀓𑁆𑀔𑀢𑁆𑀢𑀼𑀁;

𑀤𑁂𑀯𑁂𑀲𑀼 ¶ 𑀉𑀧𑁆𑀧𑀚𑁆𑀚𑀺𑀫𑁆𑀳, 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑁂𑀲𑀼.

𑁫𑁨𑁨.

‘‘𑀤𑁂𑀯𑁂𑀲𑀼 𑀫𑀳𑀺𑀤𑁆𑀥𑀺𑀓𑀸 𑀅𑀳𑀼𑀫𑁆𑀳, 𑀫𑀸𑀦𑀼𑀲𑀓𑀫𑁆𑀳𑀺 𑀓𑁄 𑀧𑀦 𑀯𑀸𑀤𑁄;

𑀲𑀢𑁆𑀢𑀭𑀢𑀦𑀲𑁆𑀲 𑀫𑀳𑁂𑀲𑀻, 𑀇𑀢𑁆𑀣𑀺𑀭𑀢𑀦𑀁 𑀅𑀳𑀁 𑀆𑀲𑀺𑀁.

𑁫𑁨𑁩.

‘‘𑀲𑁄 ¶ ¶ 𑀳𑁂𑀢𑀼 𑀲𑁄 𑀧𑀪𑀯𑁄, 𑀢𑀁 𑀫𑀽𑀮𑀁 𑀲𑀸𑀯 𑀲𑀸𑀲𑀦𑁂 𑀔𑀦𑁆𑀢𑀻;

𑀢𑀁 𑀧𑀞𑀫𑀲𑀫𑁄𑀥𑀸𑀦𑀁, 𑀢𑀁 𑀥𑀫𑁆𑀫𑀭𑀢𑀸𑀬 𑀦𑀺𑀩𑁆𑀩𑀸𑀦𑀁’’.

𑁫𑁨𑁪.

𑀏𑀯𑀁 𑀓𑀭𑁄𑀦𑁆𑀢𑀺 𑀬𑁂 𑀲𑀤𑁆𑀤𑀳𑀦𑁆𑀢𑀺, 𑀯𑀘𑀦𑀁 𑀅𑀦𑁄𑀫𑀧𑀜𑁆𑀜𑀲𑁆𑀲;

𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺 𑀪𑀯𑀕𑀢𑁂, 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀯𑀺𑀭𑀚𑁆𑀚𑀦𑁆𑀢𑀻𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀲𑀼𑀫𑁂𑀥𑀸 𑀣𑁂𑀭𑀻 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.

𑀲𑀫𑀢𑁆𑀢𑀸 𑀣𑁂𑀭𑀻𑀕𑀸𑀣𑀸𑀬𑁄.

𑀕𑀸𑀣𑀸𑀲𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀲𑀻𑀢𑀺 𑀧𑀼𑀦 𑀘𑀼𑀤𑁆𑀤𑀲 [𑀕𑀸𑀣𑀸𑀲𑀗𑁆𑀔𑁆𑀬𑀸 𑀇𑀥 𑀅𑀦𑀼𑀓𑁆𑀓𑀫𑀡𑀺𑀓𑀕𑀡𑀦𑀸𑀯𑀲𑁂𑀦 𑀧𑀸𑀓𑀝𑀸];

𑀣𑁂𑀭𑀺𑀬𑁂𑀓𑀼𑀢𑁆𑀢𑀭𑀲𑀢𑀸 [𑀣𑁂𑀭𑀻𑀬𑁂𑀓𑀼𑀢𑁆𑀢𑀭𑀙𑀲𑀢𑀸 (?) 𑀢𑀺𑀁𑀲𑀫𑀢𑁆𑀢𑀸𑀧𑀺 𑀧𑀜𑁆𑀘𑀲𑀢𑀫𑀢𑁆𑀢𑀸𑀧𑀺 𑀣𑁂𑀭𑀺𑀬𑁄 𑀏𑀓𑀢𑁄 𑀆𑀕𑀢𑀸 𑀫𑀦𑀲𑀺𑀓𑀸𑀢𑀩𑁆𑀩𑀸], 𑀲𑀩𑁆𑀩𑀸 𑀢𑀸 𑀆𑀲𑀯𑀓𑁆𑀔𑀬𑀸𑀢𑀺.

𑀣𑁂𑀭𑀻𑀕𑀸𑀣𑀸𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.