📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀅𑀧𑀤𑀸𑀦-𑀅𑀝𑁆𑀞𑀓𑀣𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀲𑁂𑀝𑁆𑀞𑀁, 𑀩𑀼𑀤𑁆𑀥𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀜𑁂𑀬𑁆𑀬𑀲𑀸𑀕𑀭𑀫𑀼𑀢𑁆𑀢𑀺𑀡𑁆𑀡𑀁, 𑀢𑀺𑀡𑁆𑀡𑀁 𑀲𑀁𑀲𑀸𑀭𑀲𑀸𑀕𑀭𑀁.

𑀢𑀣𑁂𑀯 𑀧𑀭𑀫𑀁 𑀲𑀦𑁆𑀢𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀪𑀯𑀸𑀪𑀯𑀓𑀭𑀁 𑀲𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀫𑁆𑀩𑀼𑀤𑁆𑀥𑀧𑀽𑀚𑀺𑀢𑀁.

𑀢𑀣𑁂𑀯 𑀅𑀦𑀖𑀁 𑀲𑀗𑁆𑀖𑀁, 𑀅𑀲𑀗𑁆𑀕𑀁 𑀲𑀗𑁆𑀖𑀫𑀼𑀢𑁆𑀢𑀫𑀁;

𑀉𑀢𑁆𑀢𑀫𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁, 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀫𑀦𑀸𑀲𑀯𑀁.

𑀓𑀢𑁂𑀦 𑀢𑀲𑁆𑀲 𑀏𑀢𑀲𑁆𑀲, 𑀧𑀡𑀸𑀫𑁂𑀦 𑀯𑀺𑀲𑁂𑀲𑀢𑁄;

𑀭𑀢𑀦𑀢𑁆𑀢𑀬𑁂 𑀯𑀺𑀲𑁂𑀲𑁂𑀦, 𑀯𑀺𑀲𑁂𑀲𑀲𑁆𑀲𑀸𑀤𑀭𑁂𑀦 𑀫𑁂.

𑀣𑁂𑀭𑁂𑀳𑀺 𑀥𑀻𑀭𑀥𑀻𑀭𑁂𑀳𑀺, 𑀆𑀕𑀫𑀜𑁆𑀜𑀽𑀳𑀺 𑀯𑀺𑀜𑁆𑀜𑀼𑀪𑀺;

‘‘𑀅𑀧𑀤𑀸𑀦𑀝𑁆𑀞𑀓𑀣𑀸 𑀪𑀦𑁆𑀢𑁂, 𑀓𑀸𑀢𑀩𑁆𑀩𑀸’’𑀢𑀺 𑀯𑀺𑀲𑁂𑀲𑀢𑁄.

𑀧𑀼𑀦𑀧𑁆𑀧𑀼𑀦𑀸𑀤𑀭𑁂𑀦𑁂𑀯, 𑀬𑀸𑀘𑀺𑀢𑁄𑀳𑀁 𑀬𑀲𑀲𑁆𑀲𑀺𑀪𑀺;

𑀢𑀲𑁆𑀫𑀸𑀳𑀁 𑀲𑀸𑀧𑀤𑀸𑀦𑀲𑁆𑀲, 𑀅𑀧𑀤𑀸𑀦𑀲𑁆𑀲𑀲𑁂𑀲𑀢𑁄.

𑀯𑀺𑀲𑁂𑀲𑀦𑀬𑀤𑀻𑀧𑀲𑁆𑀲, 𑀤𑀻𑀧𑀺𑀲𑁆𑀲𑀁 𑀧𑀺𑀝𑀓𑀢𑁆𑀢𑀬𑁂;

𑀬𑀣𑀸 𑀧𑀸𑀴𑀺𑀦𑀬𑁂𑀦𑁂𑀯, 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀲𑀼𑀪𑀁.

𑀓𑁂𑀦 𑀓𑀢𑁆𑀣 𑀓𑀤𑀸 𑀘𑁂𑀢𑀁, 𑀪𑀸𑀲𑀺𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀓𑀺𑀫𑀢𑁆𑀣𑀁 𑀪𑀸𑀲𑀺𑀢𑀜𑁆𑀘𑁂𑀢𑀁, 𑀏𑀢𑀁 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄.

𑀦𑀺𑀤𑀸𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁, 𑀲𑀼𑀔𑀼𑀕𑁆𑀕𑀳𑀡𑀥𑀸𑀭𑀡𑀁;

𑀢𑀲𑁆𑀫𑀸 𑀢𑀁 𑀢𑀁 𑀯𑀺𑀥𑀺𑀁 𑀯𑀢𑁆𑀯𑀸, 𑀧𑀼𑀩𑁆𑀩𑀸𑀧𑀭𑀯𑀺𑀲𑁂𑀲𑀺𑀢𑀁.

𑀧𑀼𑀭𑀸 𑀲𑀻𑀳𑀴𑀪𑀸𑀲𑀸𑀬, 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀘;

𑀞𑀧𑀺𑀢𑀁 𑀢𑀁 𑀦 𑀲𑀸𑀥𑁂𑀢𑀺, 𑀲𑀸𑀥𑀽𑀦𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁.

𑀢𑀲𑁆𑀫𑀸 𑀢𑀫𑀼𑀧𑀦𑀺𑀲𑁆𑀲𑀸𑀬, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁;

𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀺𑀭𑀼𑀤𑁆𑀥𑀢𑁆𑀣𑀁, 𑀯𑀺𑀲𑁂𑀲𑀢𑁆𑀣𑀁 𑀧𑀓𑀸𑀲𑀬𑀁;

𑀯𑀺𑀲𑁂𑀲𑀯𑀡𑁆𑀡𑀦𑀁 𑀲𑁂𑀝𑁆𑀞𑀁, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀦𑁆𑀢𑀺.

𑀦𑀺𑀤𑀸𑀦𑀓𑀣𑀸

‘‘𑀓𑁂𑀦 𑀓𑀢𑁆𑀣 𑀓𑀤𑀸 𑀘𑁂𑀢𑀁, 𑀪𑀸𑀲𑀺𑀢𑀁 𑀥𑀫𑁆𑀫𑀫𑀼𑀢𑁆𑀢𑀫’’𑀦𑁆𑀢𑀺 𑀘, ‘‘𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺 𑀘 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀲𑀸 𑀧𑀦𑀸𑀬𑀁 𑀅𑀧𑀤𑀸𑀦𑀲𑁆𑀲𑀢𑁆𑀣𑀯𑀡𑁆𑀡𑀦𑀸 𑀤𑀽𑀭𑁂𑀦𑀺𑀤𑀸𑀦𑀁, 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁, 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀯𑀡𑁆𑀡𑀺𑀬𑀫𑀸𑀦𑀸 𑀬𑁂 𑀦𑀁 𑀲𑀼𑀡𑀦𑁆𑀢𑀺, 𑀢𑁂𑀳𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀯𑀺𑀜𑁆𑀜𑀸𑀢𑀢𑁆𑀢𑀸 𑀬𑀲𑁆𑀫𑀸 𑀲𑀼𑀝𑁆𑀞𑀼 𑀯𑀺𑀜𑁆𑀜𑀸𑀢𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀁 𑀢𑀸𑀦𑀺 𑀦𑀺𑀤𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀢𑀢𑁆𑀣 𑀆𑀤𑀺𑀢𑁄 𑀢𑀸𑀯 𑀢𑁂𑀲𑀁 𑀦𑀺𑀤𑀸𑀦𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀲𑁆𑀫𑀺𑀜𑁆𑀳𑀺 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀸 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑁄 𑀓𑀣𑀸𑀫𑀕𑁆𑀕𑁄 𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀧𑀦 𑀘𑀯𑀺𑀢𑁆𑀯𑀸 𑀬𑀸𑀯 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑁄 𑀓𑀣𑀸𑀫𑀕𑁆𑀕𑁄 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫. 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀧𑀦 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀯𑀺𑀳𑀭𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀮𑀩𑁆𑀪𑀢𑀻𑀢𑀺.

𑁧. 𑀤𑀽𑀭𑁂𑀦𑀺𑀤𑀸𑀦𑀓𑀣𑀸

𑀢𑀢𑁆𑀭𑀺𑀤𑀁 𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫 𑁋 𑀇𑀢𑁄 𑀓𑀺𑀭 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀅𑀫𑀭𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺, 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸, 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀅𑀜𑁆𑀜𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀺. 𑀢𑀲𑁆𑀲 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀅𑀣𑀲𑁆𑀲 𑀭𑀸𑀲𑀺𑀯𑀟𑁆𑀠𑀓𑁄 𑀅𑀫𑀘𑁆𑀘𑁄 𑀆𑀬𑀧𑁄𑀢𑁆𑀣𑀓𑀁 𑀆𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀪𑀭𑀺𑀢𑁂 𑀕𑀩𑁆𑀪𑁂 𑀯𑀺𑀯𑀭𑀺𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀢𑁂, 𑀓𑀼𑀫𑀸𑀭, 𑀫𑀸𑀢𑀼 𑀲𑀦𑁆𑀢𑀓𑀁, 𑀏𑀢𑁆𑀢𑀓𑀁 𑀧𑀺𑀢𑀼 𑀲𑀦𑁆𑀢𑀓𑀁, 𑀏𑀢𑁆𑀢𑀓𑀁 𑀅𑀬𑁆𑀬𑀓𑀧𑀬𑁆𑀬𑀓𑀸𑀦’’𑀦𑁆𑀢𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀥𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀬𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸 𑀏𑀓𑀓𑀳𑀸𑀧𑀡𑀫𑁆𑀧𑀺 𑀕𑀳𑁂𑀢𑁆𑀯𑀸 𑀦 𑀕𑀢𑀸, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺, 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀼𑀫𑁂𑀥𑀓𑀣𑀸 𑀓𑀣𑁂𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀯𑀁𑀲𑁂 𑀦𑀺𑀭𑀦𑁆𑀢𑀭𑀁 𑀆𑀕𑀢𑀸𑀬𑁂𑀯, 𑀕𑀸𑀣𑀸𑀩𑀦𑁆𑀥𑁂𑀦 𑀧𑀦 𑀆𑀕𑀢𑀢𑁆𑀢𑀸 𑀦 𑀲𑀼𑀝𑁆𑀞𑀼 𑀧𑀸𑀓𑀝𑀸, 𑀢𑀲𑁆𑀫𑀸 𑀢𑀁 𑀅𑀦𑁆𑀢𑀭𑀦𑁆𑀢𑀭𑀸 𑀕𑀸𑀣𑀸𑀲𑀫𑁆𑀩𑀦𑁆𑀥𑀤𑀻𑀧𑀓𑁂𑀳𑀺 𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀸𑀫.

𑀲𑀼𑀫𑁂𑀥𑀓𑀣𑀸

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀜𑁆𑀳𑀺 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁 ‘‘𑀅𑀫𑀭𑀯𑀢𑀻’’𑀢𑀺 𑀘 ‘‘𑀅𑀫𑀭’’𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀦𑀕𑀭𑀁 𑀅𑀳𑁄𑀲𑀺, 𑀬𑀁 𑀲𑀦𑁆𑀥𑀸𑀬 𑀩𑀼𑀤𑁆𑀥𑀯𑀁𑀲𑁂 𑀯𑀼𑀢𑁆𑀢𑀁 𑁋

‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀅𑀫𑀭𑀁 𑀦𑀸𑀫 𑀦𑀕𑀭𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁;

𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁, 𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢’’𑀦𑁆𑀢𑀺. (𑀩𑀼. 𑀯𑀁. 𑁨.𑁧-𑁨);

𑀢𑀢𑁆𑀣 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀦𑁆𑀢𑀺 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀲𑁆𑀲𑀲𑀤𑁆𑀤𑁂𑀦 𑀭𑀣𑀲𑀤𑁆𑀤𑁂𑀦 𑀪𑁂𑀭𑀺𑀲𑀤𑁆𑀤𑁂𑀦 𑀫𑀼𑀤𑀺𑀗𑁆𑀕𑀲𑀤𑁆𑀤𑁂𑀦 𑀯𑀻𑀡𑀸𑀲𑀤𑁆𑀤𑁂𑀦 𑀕𑀻𑀢𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁂𑀦 𑀲𑀫𑁆𑀫𑀲𑀤𑁆𑀤𑁂𑀦 𑀢𑀸𑀴𑀲𑀤𑁆𑀤𑁂𑀦 ‘‘𑀅𑀲𑁆𑀦𑀸𑀣 𑀧𑀺𑀯𑀣 𑀔𑀸𑀤𑀣𑀸’’𑀢𑀺 𑀤𑀲𑀫𑁂𑀦 𑀲𑀤𑁆𑀤𑁂𑀦𑀸𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁 𑀅𑀳𑁄𑀲𑀺. 𑀢𑁂𑀲𑀁 𑀧𑀦 𑀲𑀤𑁆𑀤𑀸𑀦𑀁 𑀏𑀓𑀤𑁂𑀲𑀫𑁂𑀯 𑀕𑀳𑁂𑀢𑁆𑀯𑀸 𑁋

‘‘𑀳𑀢𑁆𑀣𑀺𑀲𑀤𑁆𑀤𑀁 𑀅𑀲𑁆𑀲𑀲𑀤𑁆𑀤𑀁, 𑀪𑁂𑀭𑀺𑀲𑀗𑁆𑀔𑀭𑀣𑀸𑀦𑀺 𑀘;

𑀔𑀸𑀤𑀣 𑀧𑀺𑀯𑀣 𑀘𑁂𑀯, 𑀅𑀦𑁆𑀦𑀧𑀸𑀦𑁂𑀦 𑀖𑁄𑀲𑀺𑀢’’𑀦𑁆𑀢𑀺. 𑁋

𑀩𑀼𑀤𑁆𑀥𑀯𑀁𑀲𑁂 (𑀩𑀼. 𑀯𑀁. 𑁨.𑁩-𑁫) 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑁋

‘‘𑀦𑀕𑀭𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀲𑀩𑁆𑀩𑀓𑀫𑁆𑀫𑀫𑀼𑀧𑀸𑀕𑀢𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀁, 𑀦𑀸𑀦𑀸𑀚𑀦𑀲𑀫𑀸𑀓𑀼𑀮𑀁;

𑀲𑀫𑀺𑀤𑁆𑀥𑀁 𑀤𑁂𑀯𑀦𑀕𑀭𑀁𑀯, 𑀆𑀯𑀸𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦𑀁.

‘‘𑀦𑀕𑀭𑁂 𑀅𑀫𑀭𑀯𑀢𑀺𑀬𑀸, 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀦𑁂𑀓𑀓𑁄𑀝𑀺𑀲𑀦𑁆𑀦𑀺𑀘𑀬𑁄, 𑀧𑀳𑀽𑀢𑀥𑀦𑀥𑀜𑁆𑀜𑀯𑀸.

‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄’’𑀢𑀺. 𑁋 𑀯𑀼𑀢𑁆𑀢𑀁;

𑀅𑀣𑁂𑀓𑀤𑀺𑀯𑀲𑀁 𑀲𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀢𑀮𑁂 𑀭𑀳𑁄𑀕𑀢𑁄 𑀳𑀼𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀦𑀩𑁆𑀪𑀯𑁂, 𑀧𑀡𑁆𑀟𑀺𑀢, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀦𑀸𑀫 𑀤𑀼𑀓𑁆𑀔𑀁, 𑀢𑀣𑀸 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀲𑁆𑀲 𑀪𑁂𑀤𑀦𑀁, 𑀅𑀳𑀜𑁆𑀘 𑀚𑀸𑀢𑀺𑀥𑀫𑁆𑀫𑁄, 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀫𑀭𑀡𑀥𑀫𑁆𑀫𑁄, 𑀏𑀯𑀁𑀪𑀽𑀢𑁂𑀦 𑀫𑀬𑀸 𑀅𑀚𑀸𑀢𑀺𑀁 𑀅𑀚𑀭𑀁 𑀅𑀩𑁆𑀬𑀸𑀥𑀺𑀁 𑀅𑀫𑀭𑀡𑀁 𑀅𑀤𑀼𑀓𑁆𑀔𑀁 𑀲𑀼𑀔𑀁 𑀲𑀻𑀢𑀮𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀯𑀲𑁆𑀲𑀁 𑀪𑀯𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀸 𑀏𑀓𑁂𑀦 𑀫𑀕𑁆𑀕𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀤𑀼𑀓𑁆𑀔𑁄 𑀧𑀼𑀦𑀩𑁆𑀪𑀯𑁄 𑀦𑀸𑀫, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁.

‘‘𑀚𑀸𑀢𑀺𑀥𑀫𑁆𑀫𑁄 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺𑀥𑀫𑁆𑀫𑁄 𑀲𑀳𑀁 𑀢𑀤𑀸;

𑀅𑀚𑀭𑀁 𑀅𑀫𑀭𑀁 𑀔𑁂𑀫𑀁, 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

‘‘𑀬𑀁𑀦𑀽𑀦𑀺𑀫𑀁 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄.

‘‘𑀅𑀢𑁆𑀣𑀺 𑀳𑁂𑀳𑀺𑀢𑀺 𑀲𑁄 𑀫𑀕𑁆𑀕𑁄, 𑀦 𑀲𑁄 𑀲𑀓𑁆𑀓𑀸 𑀦 𑀳𑁂𑀢𑀼𑀬𑁂;

𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀢𑀁 𑀫𑀕𑁆𑀕𑀁, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸’’𑀢𑀺.

𑀢𑀢𑁄 𑀉𑀢𑁆𑀢𑀭𑀺𑀧𑀺 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀳𑀺 𑀮𑁄𑀓𑁂 𑀤𑀼𑀓𑁆𑀔𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀼𑀔𑀁 𑀦𑀸𑀫 𑀅𑀢𑁆𑀣𑀺, 𑀏𑀯𑀁 𑀪𑀯𑁂 𑀲𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀯𑀺𑀪𑀯𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀘 𑀉𑀡𑁆𑀳𑁂 𑀲𑀢𑀺 𑀢𑀲𑁆𑀲 𑀯𑀽𑀧𑀲𑀫𑀪𑀽𑀢𑀁 𑀲𑀻𑀢𑀮𑀫𑁆𑀧𑀺 𑀅𑀢𑁆𑀣𑀺, 𑀏𑀯𑀁 𑀭𑀸𑀕𑀕𑁆𑀕𑀺𑀆𑀤𑀻𑀦𑀁 𑀯𑀽𑀧𑀲𑀫𑁂𑀦 𑀦𑀺𑀩𑁆𑀩𑀸𑀦𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀦𑀸𑀫 𑀧𑀸𑀧𑀲𑁆𑀲 𑀮𑀸𑀫𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁄 𑀓𑀮𑁆𑀬𑀸𑀡𑁄 𑀅𑀦𑀯𑀚𑁆𑀚𑀪𑀽𑀢𑁄 𑀥𑀫𑁆𑀫𑁄𑀧𑀺 𑀅𑀢𑁆𑀣𑀺𑀬𑁂𑀯, 𑀏𑀯𑀫𑁂𑀯 𑀧𑀸𑀧𑀺𑀓𑀸𑀬 𑀚𑀸𑀢𑀺𑀬𑀸 𑀲𑀢𑀺 𑀲𑀩𑁆𑀩𑀚𑀸𑀢𑀺𑀔𑁂𑀧𑀦𑀢𑁄 𑀅𑀚𑀸𑀢𑀺𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀫𑁂𑀯𑀸’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀣𑀸𑀧𑀺 𑀤𑀼𑀓𑁆𑀔𑁂 𑀯𑀺𑀚𑁆𑀚𑀦𑁆𑀢𑁂, 𑀲𑀼𑀔𑀁 𑀦𑀸𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀁 𑀪𑀯𑁂 𑀯𑀺𑀚𑁆𑀚𑀫𑀸𑀦𑁂, 𑀯𑀺𑀪𑀯𑁄𑀧𑀺𑀘𑁆𑀙𑀺𑀢𑀩𑁆𑀩𑀓𑁄.

‘‘𑀬𑀣𑀸𑀧𑀺 𑀉𑀡𑁆𑀳𑁂 𑀯𑀺𑀚𑁆𑀚𑀦𑁆𑀢𑁂, 𑀅𑀧𑀭𑀁 𑀯𑀺𑀚𑁆𑀚𑀢𑀺 𑀲𑀻𑀢𑀮𑀁;

𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂, 𑀦𑀺𑀩𑁆𑀩𑀸𑀦𑀫𑁆𑀧𑀺𑀘𑁆𑀙𑀺𑀢𑀩𑁆𑀩𑀓𑀁.

‘‘𑀬𑀣𑀸𑀧𑀺 𑀧𑀸𑀧𑁂 𑀯𑀺𑀚𑁆𑀚𑀦𑁆𑀢𑁂, 𑀓𑀮𑁆𑀬𑀸𑀡𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀫𑁂𑀯 𑀚𑀸𑀢𑀺 𑀯𑀺𑀚𑁆𑀚𑀦𑁆𑀢𑁂, 𑀅𑀚𑀸𑀢𑀺𑀧𑀺𑀘𑁆𑀙𑀺𑀢𑀩𑁆𑀩𑀓’’𑀦𑁆𑀢𑀺.

𑀅𑀧𑀭𑀫𑁆𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀦𑀸𑀫 𑀕𑀽𑀣𑀭𑀸𑀲𑀺𑀫𑁆𑀳𑀺 𑀦𑀺𑀫𑀼𑀕𑁆𑀕𑁂𑀦 𑀧𑀼𑀭𑀺𑀲𑁂𑀦 𑀤𑀽𑀭𑀢𑁄𑀯 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀫𑀳𑀸𑀢𑀴𑀸𑀓𑀁 𑀤𑀺𑀲𑁆𑀯𑀸 ‘𑀓𑀢𑀭𑁂𑀦 𑀦𑀼 𑀔𑁄 𑀫𑀕𑁆𑀕𑁂𑀦 𑀏𑀢𑁆𑀣 𑀕𑀦𑁆𑀢𑀩𑁆𑀩’𑀦𑁆𑀢𑀺 𑀢𑀁 𑀢𑀴𑀸𑀓𑀁 𑀕𑀯𑁂𑀲𑀺𑀢𑀼𑀁 𑀬𑀼𑀢𑁆𑀢𑀁. 𑀬𑀁 𑀢𑀲𑁆𑀲 𑀅𑀕𑀯𑁂𑀲𑀦𑀁, 𑀦 𑀲𑁄 𑀢𑀴𑀸𑀓𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀏𑀯𑀁 𑀓𑀺𑀮𑁂𑀲𑀫𑀮𑀥𑁄𑀯𑀦𑁂 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀢𑀴𑀸𑀓𑁂 𑀯𑀺𑀚𑁆𑀚𑀦𑁆𑀢𑁂 𑀬𑀁 𑀢𑀲𑁆𑀲 𑀅𑀕𑀯𑁂𑀲𑀦𑀁, 𑀦 𑀲𑁄 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀢𑀴𑀸𑀓𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀬𑀣𑀸 𑀘 𑀘𑁄𑀭𑁂𑀳𑀺 𑀲𑀫𑁆𑀧𑀭𑀺𑀯𑀸𑀭𑀺𑀢𑁄 𑀧𑀼𑀭𑀺𑀲𑁄 𑀧𑀮𑀸𑀬𑀦𑀫𑀕𑁆𑀕𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀘𑁂 𑀦 𑀧𑀮𑀸𑀬𑀢𑀺, 𑀦 𑀲𑁄 𑀫𑀕𑁆𑀕𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀏𑀯𑀫𑁂𑀯 𑀓𑀺𑀮𑁂𑀲𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀳𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑁆𑀳𑀺 𑀲𑀺𑀯𑁂 𑀫𑀕𑁆𑀕𑁂 𑀫𑀕𑁆𑀕𑀲𑁆𑀲 𑀅𑀕𑀯𑁂𑀲𑀦𑀁 𑀦𑀸𑀫 𑀦 𑀫𑀕𑁆𑀕𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀬𑀣𑀸 𑀘 𑀩𑁆𑀬𑀸𑀥𑀺𑀧𑀻𑀴𑀺𑀢𑁄 𑀧𑀼𑀭𑀺𑀲𑁄 𑀯𑀺𑀚𑁆𑀚𑀫𑀸𑀦𑁂 𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀓𑁂 𑀯𑁂𑀚𑁆𑀚𑁂 𑀲𑀘𑁂 𑀢𑀁 𑀯𑁂𑀚𑁆𑀚𑀁 𑀕𑀯𑁂𑀲𑀺𑀢𑁆𑀯𑀸 𑀩𑁆𑀬𑀸𑀥𑀺𑀁 𑀦 𑀢𑀺𑀓𑀺𑀘𑁆𑀙𑀸𑀧𑁂𑀢𑀺, 𑀦 𑀲𑁄 𑀯𑁂𑀚𑁆𑀚𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀏𑀯𑀫𑁂𑀯 𑀬𑁄 𑀓𑀺𑀮𑁂𑀲𑀩𑁆𑀬𑀸𑀥𑀺𑀧𑀻𑀴𑀺𑀢𑁄 𑀓𑀺𑀮𑁂𑀲𑀯𑀽𑀧𑀲𑀫𑀫𑀕𑁆𑀕𑀓𑁄𑀯𑀺𑀤𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀆𑀘𑀭𑀺𑀬𑀁 𑀦 𑀕𑀯𑁂𑀲𑀢𑀺, 𑀢𑀲𑁆𑀲𑁂𑀯 𑀤𑁄𑀲𑁄, 𑀦 𑀓𑀺𑀮𑁂𑀲𑀯𑀺𑀦𑀸𑀲𑀓𑀲𑁆𑀲 𑀆𑀘𑀭𑀺𑀬𑀲𑁆𑀲 𑀤𑁄𑀲𑁄’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀣𑀸 𑀕𑀽𑀣𑀕𑀢𑁄 𑀧𑀼𑀭𑀺𑀲𑁄, 𑀢𑀴𑀸𑀓𑀁 𑀤𑀺𑀲𑁆𑀯𑀸𑀦 𑀧𑀽𑀭𑀺𑀢𑀁;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀢𑀴𑀸𑀓𑀲𑁆𑀲 𑀲𑁄.

‘‘𑀏𑀯𑀁 𑀓𑀺𑀮𑁂𑀲𑀫𑀮𑀥𑁄𑀯𑁂, 𑀯𑀺𑀚𑁆𑀚𑀦𑁆𑀢𑁂 𑀅𑀫𑀢𑀦𑁆𑀢𑀴𑁂;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀅𑀫𑀢𑀦𑁆𑀢𑀴𑁂.

‘‘𑀬𑀣𑀸 𑀅𑀭𑀻𑀳𑀺 𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀦𑁆𑀢𑁂 𑀕𑀫𑀦𑀫𑁆𑀧𑀣𑁂;

𑀦 𑀧𑀮𑀸𑀬𑀢𑀺 𑀲𑁄 𑀧𑀼𑀭𑀺𑀲𑁄, 𑀦 𑀤𑁄𑀲𑁄 𑀅𑀜𑁆𑀚𑀲𑀲𑁆𑀲 𑀲𑁄.

‘‘𑀏𑀯𑀁 𑀓𑀺𑀮𑁂𑀲𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀫𑀸𑀦𑁂 𑀲𑀺𑀯𑁂 𑀧𑀣𑁂;

𑀦 𑀕𑀯𑁂𑀲𑀢𑀺 𑀢𑀁 𑀫𑀕𑁆𑀕𑀁, 𑀦 𑀤𑁄𑀲𑁄 𑀲𑀺𑀯𑀫𑀜𑁆𑀚𑀲𑁂.

‘‘𑀬𑀣𑀸𑀧𑀺 𑀩𑁆𑀬𑀸𑀥𑀺𑀢𑁄 𑀧𑀼𑀭𑀺𑀲𑁄, 𑀯𑀺𑀚𑁆𑀚𑀫𑀸𑀦𑁂 𑀢𑀺𑀓𑀺𑀘𑁆𑀙𑀓𑁂;

𑀦 𑀢𑀺𑀓𑀺𑀘𑁆𑀙𑀸𑀧𑁂𑀢𑀺 𑀢𑀁 𑀩𑁆𑀬𑀸𑀥𑀺𑀁, 𑀦 𑀤𑁄𑀲𑁄 𑀲𑁄 𑀢𑀺𑀓𑀺𑀘𑁆𑀙𑀓𑁂.

‘‘𑀏𑀯𑀁 𑀓𑀺𑀮𑁂𑀲𑀩𑁆𑀬𑀸𑀥𑀻𑀳𑀺, 𑀤𑀼𑀓𑁆𑀔𑀺𑀢𑁄 𑀧𑀭𑀺𑀧𑀻𑀴𑀺𑀢𑁄;

𑀦 𑀕𑀯𑁂𑀲𑀢𑀺 𑀢𑀁 𑀆𑀘𑀭𑀺𑀬𑀁, 𑀦 𑀤𑁄𑀲𑁄 𑀲𑁄 𑀯𑀺𑀦𑀸𑀬𑀓𑁂’’𑀢𑀺.

𑀅𑀧𑀭𑀫𑁆𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀓𑀡𑁆𑀞𑁂 𑀆𑀲𑀢𑁆𑀢𑀁 𑀓𑀼𑀡𑀧𑀁 𑀙𑀟𑁆𑀟𑁂𑀢𑁆𑀯𑀸 𑀲𑀼𑀔𑀁 𑀕𑀘𑁆𑀙𑁂𑀬𑁆𑀬, 𑀏𑀯𑀁 𑀫𑀬𑀸𑀧𑀺 𑀇𑀫𑀁 𑀧𑀽𑀢𑀺𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑁂𑀦 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀬𑀣𑀸 𑀘 𑀦𑀭𑀦𑀸𑀭𑀺𑀬𑁄 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀢𑁆𑀯𑀸 𑀦 𑀢𑀁 𑀉𑀘𑁆𑀙𑀗𑁆𑀕𑁂𑀦 𑀯𑀸 𑀆𑀤𑀸𑀬, 𑀤𑀼𑀲𑁆𑀲𑀦𑁆𑀢𑁂𑀦 𑀯𑀸 𑀯𑁂𑀞𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀚𑀺𑀕𑀼𑀘𑁆𑀙𑀫𑀸𑀦𑀸 𑀧𑀦 𑀅𑀦𑀧𑁂𑀓𑁆𑀔𑀸𑀯, 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀫𑀬𑀸𑀧𑀺 𑀇𑀫𑀁 𑀧𑀽𑀢𑀺𑀓𑀸𑀬𑀁 𑀅𑀦𑀧𑁂𑀓𑁆𑀔𑁂𑀦 𑀙𑀟𑁆𑀟𑁂𑀢𑁆𑀯𑀸 𑀅𑀫𑀢𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀘 𑀦𑀸𑀯𑀺𑀓𑀸 𑀦𑀸𑀫 𑀚𑀚𑁆𑀚𑀭𑀁 𑀦𑀸𑀯𑀁 𑀅𑀦𑀧𑁂𑀓𑁆𑀔𑀸𑀯 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀅𑀳𑀫𑁆𑀧𑀺 𑀇𑀫𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀦𑁆𑀢𑀁 𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀯𑀺𑀲𑀺𑀲𑁆𑀲𑀸𑀫𑀺. 𑀬𑀣𑀸 𑀘 𑀧𑀼𑀭𑀺𑀲𑁄 𑀦𑀸𑀦𑀸𑀭𑀢𑀦𑀸𑀦𑀺 𑀆𑀤𑀸𑀬 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀭𑀢𑀦𑀦𑀸𑀲𑀪𑀬𑁂𑀦 𑀢𑁂 𑀙𑀟𑁆𑀟𑁂𑀢𑁆𑀯𑀸 𑀔𑁂𑀫𑀁 𑀫𑀕𑁆𑀕𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀓𑀭𑀚𑀓𑀸𑀬𑁄 𑀭𑀢𑀦𑀯𑀺𑀮𑁄𑀧𑀓𑀘𑁄𑀭𑀲𑀤𑀺𑀲𑁄. 𑀲𑀘𑀸𑀳𑀁 𑀏𑀢𑁆𑀣 𑀢𑀡𑁆𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀭𑀺𑀬𑀫𑀕𑁆𑀕𑀓𑀼𑀲𑀮𑀥𑀫𑁆𑀫𑀭𑀢𑀦𑀁 𑀫𑁂 𑀦𑀲𑁆𑀲𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀫𑀬𑀸 𑀇𑀫𑀁 𑀘𑁄𑀭𑀲𑀤𑀺𑀲𑀁 𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀣𑀸𑀧𑀺 𑀓𑀼𑀡𑀧𑀁 𑀧𑀼𑀭𑀺𑀲𑁄, 𑀓𑀡𑁆𑀞𑁂 𑀩𑀤𑁆𑀥𑀁 𑀚𑀺𑀕𑀼𑀘𑁆𑀙𑀺𑀬;

𑀫𑁄𑀘𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬, 𑀲𑀼𑀔𑀻 𑀲𑁂𑀭𑀻 𑀲𑀬𑀁𑀯𑀲𑀻.

‘‘𑀢𑀣𑁂𑀯𑀺𑀫𑀁 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀲𑀜𑁆𑀘𑀬𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄.

‘‘𑀬𑀣𑀸 𑀉𑀘𑁆𑀘𑀸𑀭𑀝𑁆𑀞𑀸𑀦𑀫𑁆𑀳𑀺, 𑀓𑀭𑀻𑀲𑀁 𑀦𑀭𑀦𑀸𑀭𑀺𑀬𑁄;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀅𑀦𑀢𑁆𑀣𑀺𑀓𑀸.

‘‘𑀏𑀯𑀫𑁂𑀯𑀸𑀳𑀁 𑀇𑀫𑀁 𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀺𑀲𑁆𑀲𑀁, 𑀯𑀘𑁆𑀘𑀁 𑀓𑀢𑁆𑀯𑀸 𑀬𑀣𑀸 𑀓𑀼𑀝𑀺𑀁.

‘‘𑀬𑀣𑀸𑀧𑀺 𑀚𑀚𑁆𑀚𑀭𑀁 𑀦𑀸𑀯𑀁, 𑀧𑀮𑀼𑀕𑁆𑀕𑀁 𑀉𑀤𑀕𑀸𑀳𑀺𑀦𑀺𑀁;

𑀲𑀸𑀫𑀻 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀅𑀦𑀢𑁆𑀣𑀺𑀓𑀸.

‘‘𑀏𑀯𑀫𑁂𑀯𑀸𑀳𑀁 𑀇𑀫𑀁 𑀓𑀸𑀬𑀁, 𑀦𑀯𑀘𑁆𑀙𑀺𑀤𑁆𑀤𑀁 𑀥𑀼𑀯𑀲𑁆𑀲𑀯𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀡𑁆𑀡𑀦𑀸𑀯𑀁𑀯 𑀲𑀸𑀫𑀺𑀓𑀸.

‘‘𑀬𑀣𑀸𑀧𑀺 𑀧𑀼𑀭𑀺𑀲𑁄 𑀘𑁄𑀭𑁂𑀳𑀺, 𑀕𑀘𑁆𑀙𑀦𑁆𑀢𑁄 𑀪𑀡𑁆𑀟𑀫𑀸𑀤𑀺𑀬;

𑀪𑀡𑁆𑀟𑀘𑁆𑀙𑁂𑀤𑀪𑀬𑀁 𑀤𑀺𑀲𑁆𑀯𑀸, 𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯 𑀅𑀬𑀁 𑀓𑀸𑀬𑁄, 𑀫𑀳𑀸𑀘𑁄𑀭𑀲𑀫𑁄 𑀯𑀺𑀬;

𑀧𑀳𑀸𑀬𑀺𑀫𑀁 𑀕𑀫𑀺𑀲𑁆𑀲𑀸𑀫𑀺, 𑀓𑀼𑀲𑀮𑀘𑁆𑀙𑁂𑀤𑀦𑀸 𑀪𑀬𑀸’’𑀢𑀺.

𑀏𑀯𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀦𑀸𑀦𑀸𑀯𑀺𑀥𑀸𑀳𑀺 𑀉𑀧𑀫𑀸𑀳𑀺 𑀇𑀫𑀁 𑀦𑁂𑀓𑁆𑀔𑀫𑁆𑀫𑀽𑀧𑀲𑀁𑀳𑀺𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀓𑀦𑀺𑀯𑁂𑀲𑀦𑁂 𑀅𑀧𑀭𑀺𑀫𑀺𑀢𑀪𑁄𑀕𑀓𑁆𑀔𑀦𑁆𑀥𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘 𑀧𑀳𑀸𑀬 𑀅𑀫𑀭𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀓𑁄𑀯 𑀳𑀺𑀫𑀯𑀦𑁆𑀢𑁂 𑀥𑀫𑁆𑀫𑀺𑀓𑀁 𑀦𑀸𑀫 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀡𑁆𑀡𑀲𑀸𑀮𑀜𑁆𑀘 𑀘𑀗𑁆𑀓𑀫𑀜𑁆𑀘 𑀫𑀸𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀦𑀻𑀯𑀭𑀡𑀤𑁄𑀲𑁂𑀳𑀺 𑀯𑀚𑁆𑀚𑀺𑀢𑀁 ‘‘𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑀕𑀼𑀡𑁂𑀳𑀺 𑀲𑀫𑀼𑀧𑁂𑀢𑀁 𑀅𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀁 𑀩𑀮𑀁 𑀆𑀳𑀭𑀺𑀢𑀼𑀁 𑀢𑀲𑁆𑀫𑀺𑀁 𑀅𑀲𑁆𑀲𑀫𑀧𑀤𑁂 𑀦𑀯𑀤𑁄𑀲𑀲𑀫𑀦𑁆𑀦𑀸𑀕𑀢𑀁 𑀲𑀸𑀝𑀓𑀁 𑀧𑀚𑀳𑀺𑀢𑁆𑀯𑀸, 𑀤𑁆𑀯𑀸𑀤𑀲𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁 𑀢𑀁 𑀧𑀡𑁆𑀡𑀲𑀸𑀮𑀁 𑀧𑀳𑀸𑀬 𑀤𑀲𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀥𑀜𑁆𑀜𑀯𑀺𑀓𑀢𑀺𑀁 𑀧𑀳𑀸𑀬 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀳𑀼𑀢𑁆𑀯𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑀦𑀯𑀲𑁂𑀦𑁂𑀯 𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀅𑀪𑀺𑀜𑁆𑀜𑀸𑀦𑀁 𑀮𑀸𑀪𑀻 𑀅𑀳𑁄𑀲𑀺. 𑀏𑀯𑀁 𑀢𑀁 𑀬𑀣𑀸𑀧𑀢𑁆𑀣𑀺𑀢𑀁 𑀅𑀪𑀺𑀜𑁆𑀜𑀸𑀩𑀮𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀦𑁂𑀓𑀓𑁄𑀝𑀺𑀲𑀢𑀁 𑀥𑀦𑀁;

𑀦𑀸𑀣𑀸𑀦𑀸𑀣𑀸𑀦𑀁 𑀤𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺𑀁.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀥𑀫𑁆𑀫𑀺𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

‘‘𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀁;

𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁, 𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺𑀁.

‘‘𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣, 𑀦𑀯𑀤𑁄𑀲𑀫𑀼𑀧𑀸𑀕𑀢𑀁;

𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀁, 𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢𑀁.

‘‘𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓𑀁;

𑀉𑀧𑀸𑀕𑀫𑀺𑀁 𑀭𑀼𑀓𑁆𑀔𑀫𑀽𑀮𑀁, 𑀕𑀼𑀡𑁂 𑀤𑀲𑀳𑀼𑀧𑀸𑀕𑀢𑀁.

‘‘𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀁, 𑀧𑀚𑀳𑀺𑀁 𑀦𑀺𑀭𑀯𑀲𑁂𑀲𑀢𑁄;

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀯𑀢𑁆𑀢𑀨𑀮𑀫𑀸𑀤𑀺𑀬𑀺𑀁.

‘‘𑀢𑀢𑁆𑀣𑀧𑁆𑀧𑀥𑀸𑀦𑀁 𑀧𑀤𑀳𑀺𑀁, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀩𑁆𑀪𑀦𑁆𑀢𑀭𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀅𑀪𑀺𑀜𑁆𑀜𑀸𑀩𑀮 𑀧𑀸𑀧𑀼𑀡𑀺’’𑀦𑁆𑀢𑀺.

𑀢𑀢𑁆𑀣 ‘‘𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸’’𑀢𑀺 𑀇𑀫𑀸𑀬 𑀧𑀦 𑀧𑀸𑀴𑀺𑀬𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁂𑀦 𑀅𑀲𑁆𑀲𑀫𑀧𑀡𑁆𑀡𑀲𑀸𑀮𑀘𑀗𑁆𑀓𑀫𑀸 𑀲𑀳𑀢𑁆𑀣𑀸 𑀫𑀸𑀧𑀺𑀢𑀸 𑀯𑀺𑀬 𑀯𑀼𑀢𑁆𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀫𑀳𑀸𑀲𑀢𑁆𑀢𑀜𑁆𑀳𑀺 ‘‘𑀳𑀺𑀫𑀯𑀦𑁆𑀢𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀚𑁆𑀚 𑀥𑀫𑁆𑀫𑀺𑀓𑀧𑀩𑁆𑀩𑀢𑀁 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀲𑀓𑁆𑀓𑁄 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢, 𑀅𑀬𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀦𑁆𑀢𑁄, 𑀏𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀫𑀸𑀧𑁂𑀳𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀫𑀡𑀻𑀬𑀁 𑀅𑀲𑁆𑀲𑀫𑀁, 𑀲𑀼𑀕𑀼𑀢𑁆𑀢𑀁 𑀧𑀡𑁆𑀡𑀲𑀸𑀮𑀁, 𑀫𑀦𑁄𑀭𑀫𑀁 𑀘𑀗𑁆𑀓𑀫𑀜𑁆𑀘 𑀫𑀸𑀧𑁂𑀲𑀺. 𑀪𑀕𑀯𑀸 𑀧𑀦 𑀢𑀤𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀁 𑀢𑀁 𑀅𑀲𑁆𑀲𑀫𑀧𑀤𑀁 𑀲𑀦𑁆𑀥𑀸𑀬 ‘‘𑀲𑀸𑀭𑀺𑀧𑀼𑀢𑁆𑀢, 𑀢𑀲𑁆𑀫𑀺𑀁 𑀥𑀫𑁆𑀫𑀺𑀓𑀧𑀩𑁆𑀩𑀢𑁂 𑁋

‘‘𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸;

𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢’’’𑀦𑁆𑀢𑀺. 𑁋

𑀆𑀳. 𑀢𑀢𑁆𑀣 𑀲𑀼𑀓𑀢𑁄 𑀫𑀬𑁆𑀳𑀦𑁆𑀢𑀺 𑀲𑀼𑀝𑁆𑀞𑀼 𑀓𑀢𑁄 𑀫𑀬𑀸. 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸𑀢𑀺 𑀧𑀡𑁆𑀡𑀘𑁆𑀙𑀤𑀦𑀲𑀸𑀮𑀸𑀧𑀺 𑀫𑁂 𑀲𑀼𑀫𑀸𑀧𑀺𑀢𑀸 𑀅𑀳𑁄𑀲𑀺.

𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀧𑀜𑁆𑀘𑀺𑀫𑁂 𑀘𑀗𑁆𑀓𑀫𑀤𑁄𑀲𑀸 𑀦𑀸𑀫 𑀣𑀤𑁆𑀥𑀯𑀺𑀲𑀫𑀢𑀸, 𑀅𑀦𑁆𑀢𑁄𑀭𑀼𑀓𑁆𑀔𑀢𑀸, 𑀕𑀳𑀦𑀘𑁆𑀙𑀦𑁆𑀦𑀢𑀸, 𑀅𑀢𑀺𑀲𑀫𑁆𑀩𑀸𑀥𑀢𑀸, 𑀅𑀢𑀺𑀯𑀺𑀲𑀸𑀮𑀢𑀸𑀢𑀺. 𑀣𑀤𑁆𑀥𑀯𑀺𑀲𑀫𑀪𑀽𑀫𑀺𑀪𑀸𑀕𑀲𑁆𑀫𑀺𑀜𑁆𑀳𑀺 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀲𑁆𑀲 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀺, 𑀨𑁄𑀝𑀸 𑀉𑀝𑁆𑀞𑀳𑀦𑁆𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀦 𑀮𑀪𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀚𑁆𑀚𑀢𑀺. 𑀫𑀼𑀤𑀼𑀲𑀫𑀢𑀮𑁂 𑀧𑀦 𑀨𑀸𑀲𑀼𑀯𑀺𑀳𑀸𑀭𑀁 𑀆𑀕𑀫𑁆𑀫 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀣𑀤𑁆𑀥𑀯𑀺𑀲𑀫𑀪𑀽𑀫𑀺𑀪𑀸𑀕𑀢𑀸 𑀏𑀓𑁄 𑀤𑁄𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀗𑁆𑀓𑀫𑀲𑁆𑀲 𑀅𑀦𑁆𑀢𑁄 𑀯𑀸 𑀫𑀚𑁆𑀛𑁂 𑀯𑀸 𑀓𑁄𑀝𑀺𑀬𑀁 𑀯𑀸 𑀭𑀼𑀓𑁆𑀔𑁂 𑀲𑀢𑀺 𑀧𑀫𑀸𑀤𑀫𑀸𑀕𑀫𑁆𑀫 𑀘𑀗𑁆𑀓𑀫𑀦𑁆𑀢𑀲𑁆𑀲 𑀦𑀮𑀸𑀝𑀁 𑀯𑀸 𑀲𑀻𑀲𑀁 𑀯𑀸 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀦𑁆𑀢𑁄𑀭𑀼𑀓𑁆𑀔𑀢𑀸 𑀤𑀼𑀢𑀺𑀬𑁄 𑀤𑁄𑀲𑁄. 𑀢𑀺𑀡𑀮𑀢𑀸𑀤𑀺𑀕𑀳𑀦𑀘𑁆𑀙𑀦𑁆𑀦𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀅𑀦𑁆𑀥𑀓𑀸𑀭𑀯𑁂𑀮𑀸𑀬𑀁 𑀉𑀭𑀕𑀸𑀤𑀺𑀓𑁂 𑀧𑀸𑀡𑁂 𑀅𑀓𑁆𑀓𑀫𑀺𑀢𑁆𑀯𑀸 𑀯𑀸 𑀫𑀸𑀭𑁂𑀢𑀺, 𑀢𑁂𑀳𑀺 𑀯𑀸 𑀤𑀝𑁆𑀞𑁄 𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀻𑀢𑀺 𑀕𑀳𑀦𑀘𑁆𑀙𑀦𑁆𑀦𑀢𑀸 𑀢𑀢𑀺𑀬𑁄 𑀤𑁄𑀲𑁄. 𑀅𑀢𑀺𑀲𑀫𑁆𑀩𑀸𑀥𑁂 𑀘𑀗𑁆𑀓𑀫𑁂 𑀯𑀺𑀢𑁆𑀣𑀸𑀭𑀢𑁄 𑀭𑀢𑀦𑀺𑀓𑁂 𑀯𑀸 𑀅𑀟𑁆𑀠𑀭𑀢𑀦𑀺𑀓𑁂 𑀯𑀸 𑀘𑀗𑁆𑀓𑀫𑀦𑁆𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑁂 𑀧𑀓𑁆𑀔𑀮𑀺𑀢𑁆𑀯𑀸 𑀦𑀔𑀸𑀧𑀺 𑀅𑀗𑁆𑀕𑀼𑀮𑀺𑀬𑁄𑀧𑀺 𑀪𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑀺𑀲𑀫𑁆𑀩𑀸𑀥𑀢𑀸 𑀘𑀢𑀼𑀢𑁆𑀣𑁄 𑀤𑁄𑀲𑁄. 𑀅𑀢𑀺𑀯𑀺𑀲𑀸𑀮𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺, 𑀏𑀓𑀕𑁆𑀕𑀢𑀁 𑀦 𑀮𑀪𑀢𑀻𑀢𑀺 𑀅𑀢𑀺𑀯𑀺𑀲𑀸𑀮𑀢𑀸 𑀧𑀜𑁆𑀘𑀫𑁄 𑀤𑁄𑀲𑁄. 𑀧𑀼𑀣𑀼𑀮𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀭𑀢𑀦𑀫𑀢𑁆𑀢𑀁 𑀅𑀦𑀼𑀘𑀗𑁆𑀓𑀫𑀁 𑀤𑀻𑀖𑀢𑁄 𑀲𑀝𑁆𑀞𑀺𑀳𑀢𑁆𑀣𑀁 𑀫𑀼𑀤𑀼𑀢𑀮𑀁 𑀲𑀫𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀮𑀼𑀓𑀁 𑀘𑀗𑁆𑀓𑀫𑀁 𑀯𑀝𑁆𑀝𑀢𑀺 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀤𑀻𑀧𑀧𑁆𑀧𑀲𑀸𑀤𑀓𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀘𑀗𑁆𑀓𑀫𑀁 𑀯𑀺𑀬, 𑀢𑀸𑀤𑀺𑀲𑀁 𑀢𑀁 𑀅𑀳𑁄𑀲𑀺. 𑀢𑁂𑀦𑀸𑀳 𑁋 ‘‘𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢’’𑀦𑁆𑀢𑀺.

𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀦𑁆𑀢𑀺 𑀅𑀝𑁆𑀞𑀳𑀺 𑀲𑀫𑀡𑀲𑀼𑀔𑁂𑀳𑀺 𑀉𑀧𑁂𑀢𑀁. 𑀅𑀝𑁆𑀞𑀺𑀫𑀸𑀦𑀺 𑀲𑀫𑀡𑀲𑀼𑀔𑀸𑀦𑀺 𑀦𑀸𑀫 𑀥𑀦𑀥𑀜𑁆𑀜𑀧𑀭𑀺𑀕𑁆𑀕𑀳𑀸𑀪𑀸𑀯𑁄, 𑀅𑀦𑀯𑀚𑁆𑀚𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀪𑀸𑀯𑁄, 𑀦𑀺𑀩𑁆𑀩𑀼𑀢𑀧𑀺𑀡𑁆𑀟𑀧𑀸𑀢𑀪𑀼𑀜𑁆𑀚𑀦𑀪𑀸𑀯𑁄, 𑀭𑀝𑁆𑀞𑀁 𑀧𑀻𑀴𑁂𑀢𑁆𑀯𑀸 𑀥𑀦𑀲𑀸𑀭𑀁 𑀯𑀸 𑀲𑀻𑀲𑀓𑀳𑀸𑀧𑀡𑀸𑀤𑀻𑀦𑀺 𑀯𑀸 𑀕𑀡𑁆𑀳𑀦𑁆𑀢𑁂𑀲𑀼 𑀭𑀸𑀚𑀓𑀼𑀮𑁂𑀲𑀼 𑀭𑀝𑁆𑀞𑀧𑀻𑀴𑀦𑀓𑀺𑀮𑁂𑀲𑀸𑀪𑀸𑀯𑁄, 𑀉𑀧𑀓𑀭𑀡𑁂𑀲𑀼 𑀦𑀺𑀘𑁆𑀙𑀦𑁆𑀤𑀭𑀸𑀕𑀪𑀸𑀯𑁄, 𑀘𑁄𑀭𑀯𑀺𑀮𑁄𑀧𑁂 𑀦𑀺𑀩𑁆𑀪𑀬𑀪𑀸𑀯𑁄, 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀅𑀲𑀁𑀲𑀝𑁆𑀞𑀪𑀸𑀯𑁄, 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀪𑀸𑀯𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀣𑀸 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂 𑀯𑀲𑀦𑁆𑀢𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀲𑀼𑀔𑀸𑀦𑀺 𑀯𑀺𑀦𑁆𑀤𑀺𑀢𑀼𑀁, 𑀏𑀯𑀁 𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁 𑀢𑀁 𑀅𑀲𑁆𑀲𑀫𑀁 𑀫𑀸𑀧𑁂𑀲𑀺’’𑀦𑁆𑀢𑀺.

𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺𑀦𑁆𑀢𑀺 𑀧𑀘𑁆𑀙𑀸 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂 𑀯𑀲𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀦𑀜𑁆𑀘 𑀲𑀫𑀸𑀧𑀢𑁆𑀢𑀻𑀦𑀜𑁆𑀘 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀅𑀦𑀺𑀘𑁆𑀘𑀢𑁄 𑀘 𑀤𑀼𑀓𑁆𑀔𑀢𑁄 𑀘 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀣𑀸𑀫𑀧𑁆𑀧𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀩𑀮𑀁 𑀆𑀳𑀭𑀺𑀁. 𑀬𑀣𑀸 𑀢𑀲𑁆𑀫𑀺𑀁 𑀯𑀲𑀦𑁆𑀢𑁄 𑀢𑀁 𑀩𑀮𑀁 𑀆𑀳𑀭𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀏𑀯𑀁 𑀢𑀁 𑀅𑀲𑁆𑀲𑀫𑀁 𑀅𑀪𑀺𑀜𑁆𑀜𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀩𑀮𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀫𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣, 𑀦𑀯𑀤𑁄𑀲𑀫𑀼𑀧𑀸𑀕𑀢𑀦𑁆𑀢𑀺 𑀏𑀢𑁆𑀣𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸. 𑀢𑀤𑀸 𑀓𑀺𑀭 𑀓𑀼𑀝𑀺𑀮𑁂𑀡𑀘𑀗𑁆𑀓𑀫𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀲𑀜𑁆𑀙𑀦𑁆𑀦𑀁 𑀭𑀫𑀡𑀻𑀬𑀁 𑀫𑀥𑀼𑀭𑀲𑀮𑀺𑀮𑀸𑀲𑀬𑀁 𑀅𑀧𑀕𑀢𑀯𑀸𑀴𑀫𑀺𑀕𑀪𑀺𑀁𑀲𑀦𑀓𑀲𑀓𑀼𑀡𑀁 𑀧𑀯𑀺𑀯𑁂𑀓𑀓𑁆𑀔𑀫𑀁 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀘𑀗𑁆𑀓𑀫𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀆𑀮𑀫𑁆𑀩𑀦𑀨𑀮𑀓𑀁 𑀲𑀁𑀯𑀺𑀥𑀸𑀬 𑀦𑀺𑀲𑀻𑀤𑀦𑀢𑁆𑀣𑀸𑀬 𑀘𑀗𑁆𑀓𑀫𑀯𑁂𑀫𑀚𑁆𑀛𑁂 𑀲𑀫𑀢𑀮𑀁 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀁 𑀫𑀸𑀧𑁂𑀢𑁆𑀯𑀸 𑀅𑀦𑁆𑀢𑁄 𑀧𑀡𑁆𑀡𑀲𑀸𑀮𑀸𑀬 𑀚𑀝𑀸𑀫𑀡𑁆𑀟𑀮𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀼𑀡𑁆𑀟𑀺𑀓𑀸𑀤𑀺𑀓𑁂 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑁂 𑀫𑀡𑁆𑀟𑀧𑁂 𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀲𑀗𑁆𑀔𑀧𑀸𑀦𑀻𑀬𑀲𑀭𑀸𑀯𑀸𑀦𑀺, 𑀅𑀕𑁆𑀕𑀺𑀲𑀸𑀮𑀸𑀬𑀁 𑀅𑀗𑁆𑀕𑀸𑀭𑀓𑀧𑀮𑁆𑀮𑀤𑀸𑀭𑀼𑀆𑀤𑀻𑀦𑀻𑀢𑀺 𑀏𑀯𑀁 𑀬𑀁 𑀬𑀁 𑀧𑀩𑁆𑀩𑀚𑀺𑀢𑀸𑀦𑀁 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀲𑀩𑁆𑀩𑀁 𑀫𑀸𑀧𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀪𑀺𑀢𑁆𑀢𑀺𑀬𑀁 𑁋 ‘‘𑀬𑁂 𑀓𑁂𑀘𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀇𑀫𑁂 𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀽’’𑀢𑀺 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁂 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁂 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀳𑀺𑀫𑀯𑀦𑁆𑀢𑀧𑀸𑀤𑁂 𑀕𑀺𑀭𑀺𑀓𑀦𑁆𑀤𑀭𑀸𑀦𑀼𑀲𑀸𑀭𑁂𑀦 𑀅𑀢𑁆𑀢𑀦𑁄 𑀦𑀺𑀯𑀸𑀲𑀸𑀦𑀼𑀭𑀽𑀧𑀁 𑀨𑀸𑀲𑀼𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀤𑀻𑀦𑀺𑀯𑀢𑁆𑀢𑀦𑁂 𑀯𑀺𑀲𑁆𑀲𑀓𑀫𑁆𑀫𑀦𑀺𑀫𑁆𑀫𑀺𑀢𑀁 𑀲𑀓𑁆𑀓𑀤𑀢𑁆𑀢𑀺𑀬𑀁 𑀭𑀫𑀡𑀻𑀬𑀁 𑀅𑀲𑁆𑀲𑀫𑀁 𑀤𑀺𑀲𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀁 𑀕𑀦𑁆𑀢𑁆𑀯𑀸 𑀧𑀤𑀯𑀴𑀜𑁆𑀚𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀥𑀼𑀯𑀁 𑀧𑀩𑁆𑀩𑀚𑀺𑀢𑀸 𑀥𑀼𑀭𑀕𑀸𑀫𑁂 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑀸 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀣𑁄𑀓𑀁 𑀆𑀕𑀫𑁂𑀢𑁆𑀯𑀸 ‘‘𑀅𑀢𑀺𑀯𑀺𑀬 𑀘𑀺𑀭𑀸𑀬𑀦𑁆𑀢𑀺, 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀪𑀺𑀢𑁆𑀢𑀺𑀬𑀁 𑀅𑀓𑁆𑀔𑀭𑀸𑀦𑀺 𑀯𑀸𑀘𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀸 𑀏𑀢𑁂, 𑀇𑀫𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑀸 𑀦𑀺𑀯𑀢𑁆𑀣𑀧𑀸𑀭𑀼𑀢𑀁 𑀲𑀸𑀝𑀓𑀬𑀼𑀕𑀁 𑀧𑀚𑀳𑀺. 𑀢𑁂𑀦𑀸𑀳 ‘‘𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣𑀸’’𑀢𑀺. 𑀏𑀯𑀁 𑀧𑀯𑀺𑀝𑁆𑀞𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀢𑀲𑁆𑀲𑀁 𑀧𑀡𑁆𑀡𑀲𑀸𑀮𑀸𑀬𑀁 𑀲𑀸𑀝𑀓𑀁 𑀧𑀚𑀳𑀺𑀁.

𑀦𑀯𑀤𑁄𑀲𑀫𑀼𑀧𑀸𑀕𑀢𑀦𑁆𑀢𑀺 𑀲𑀸𑀝𑀓𑀁 𑀧𑀚𑀳𑀦𑁆𑀢𑁄 𑀦𑀯 𑀤𑁄𑀲𑁂 𑀤𑀺𑀲𑁆𑀯𑀸 𑀧𑀚𑀳𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸𑀦𑀜𑁆𑀳𑀺 𑀲𑀸𑀝𑀓𑀲𑁆𑀫𑀺𑀁 𑀦𑀯 𑀤𑁄𑀲𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀫𑀳𑀕𑁆𑀖𑀪𑀸𑀯𑁄 𑀏𑀓𑁄 𑀤𑁄𑀲𑁄, 𑀧𑀭𑀧𑀝𑀺𑀩𑀤𑁆𑀥𑀢𑀸𑀬 𑀉𑀧𑁆𑀧𑀚𑁆𑀚𑀦𑀪𑀸𑀯𑁄 𑀏𑀓𑁄, 𑀧𑀭𑀺𑀪𑁄𑀕𑁂𑀦 𑀮𑀳𑀼𑀁 𑀓𑀺𑀮𑀺𑀲𑁆𑀲𑀦𑀪𑀸𑀯𑁄 𑀏𑀓𑁄, 𑀓𑀺𑀮𑀺𑀝𑁆𑀞𑁄 𑀳𑀺 𑀥𑁄𑀯𑀺𑀢𑀩𑁆𑀩𑁄 𑀘 𑀭𑀚𑀺𑀢𑀩𑁆𑀩𑁄 𑀘 𑀳𑁄𑀢𑀺, 𑀧𑀭𑀺𑀪𑁄𑀕𑁂𑀦 𑀚𑀻𑀭𑀡𑀪𑀸𑀯𑁄 𑀏𑀓𑁄, 𑀚𑀺𑀡𑁆𑀡𑀲𑁆𑀲 𑀳𑀺 𑀢𑀼𑀦𑁆𑀦𑀁 𑀯𑀸 𑀅𑀕𑁆𑀕𑀴𑀤𑀸𑀦𑀁 𑀯𑀸 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀧𑀼𑀦 𑀧𑀭𑀺𑀬𑁂𑀲𑀦𑀸𑀬 𑀤𑀼𑀭𑀪𑀺𑀲𑀫𑁆𑀪𑀯𑀪𑀸𑀯𑁄 𑀏𑀓𑁄, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀅𑀲𑀸𑀭𑀼𑀧𑁆𑀧𑀪𑀸𑀯𑁄 𑀏𑀓𑁄, 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁄 𑀏𑀓𑁄, 𑀬𑀣𑀸 𑀳𑀺 𑀦𑀁 𑀧𑀘𑁆𑀘𑀢𑁆𑀣𑀺𑀓𑀸 𑀦 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀕𑁄𑀧𑁂𑀢𑀩𑁆𑀩𑁄 𑀳𑁄𑀢𑀺, 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀪𑀽𑀲𑀦𑀝𑁆𑀞𑀸𑀦𑀪𑀸𑀯𑁄 𑀏𑀓𑁄, 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀔𑀦𑁆𑀥𑀪𑀸𑀭𑀫𑀳𑀺𑀘𑁆𑀙𑀪𑀸𑀯𑁄 𑀏𑀓𑁄𑀢𑀺.

𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀦𑁆𑀢𑀺 𑀢𑀤𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀫𑁂 𑀦𑀯 𑀤𑁄𑀲𑁂 𑀤𑀺𑀲𑁆𑀯𑀸 𑀲𑀸𑀝𑀓𑀁 𑀧𑀳𑀸𑀬 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀁, 𑀫𑀼𑀜𑁆𑀚𑀢𑀺𑀡𑀁 𑀳𑀻𑀭𑀁 𑀳𑀻𑀭𑀁 𑀓𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀁 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁆𑀣𑀸𑀬 𑀆𑀤𑀺𑀬𑀺𑀦𑁆𑀢𑀺 𑀅𑀢𑁆𑀣𑁄.

𑀤𑁆𑀯𑀸𑀤𑀲 𑀕𑀼𑀡𑀫𑀼𑀧𑀸𑀕𑀢𑀦𑁆𑀢𑀺 𑀤𑁆𑀯𑀸𑀤𑀲𑀳𑀺 𑀆𑀦𑀺𑀲𑀁𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀯𑀸𑀓𑀘𑀻𑀭𑀲𑁆𑀫𑀺𑀜𑁆𑀳𑀺 𑀤𑁆𑀯𑀸𑀤𑀲 𑀆𑀦𑀺𑀲𑀁𑀲𑀸 𑁋 𑀅𑀧𑁆𑀧𑀕𑁆𑀖𑀁 𑀲𑀼𑀦𑁆𑀤𑀭𑀁 𑀓𑀧𑁆𑀧𑀺𑀬𑀦𑁆𑀢𑀺 𑀅𑀬𑀁 𑀢𑀸𑀯 𑀏𑀓𑁄 𑀆𑀦𑀺𑀲𑀁𑀲𑁄, 𑀲𑀳𑀢𑁆𑀣𑀸 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀅𑀬𑀁 𑀤𑀼𑀢𑀺𑀬𑁄, 𑀧𑀭𑀺𑀪𑁄𑀕𑁂𑀦 𑀲𑀡𑀺𑀓𑀁 𑀓𑀺𑀮𑀺𑀲𑁆𑀲𑀢𑀺, 𑀥𑁄𑀯𑀺𑀬𑀫𑀸𑀦𑁂𑀧𑀺 𑀧𑀧𑀜𑁆𑀘𑁄 𑀦𑀢𑁆𑀣𑀻𑀢𑀺 𑀅𑀬𑀁 𑀢𑀢𑀺𑀬𑁄, 𑀧𑀭𑀺𑀪𑁄𑀕𑁂𑀦 𑀚𑀺𑀡𑁆𑀡𑁂𑀧𑀺 𑀲𑀺𑀩𑁆𑀩𑀺𑀢𑀩𑁆𑀩𑀸𑀪𑀸𑀯𑁄 𑀘𑀢𑀼𑀢𑁆𑀣𑁄, 𑀧𑀼𑀦 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀲𑀼𑀔𑁂𑀦 𑀓𑀭𑀡𑀪𑀸𑀯𑁄 𑀧𑀜𑁆𑀘𑀫𑁄, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀲𑀸𑀭𑀼𑀧𑁆𑀧𑀪𑀸𑀯𑁄 𑀙𑀝𑁆𑀞𑁄, 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀦𑀺𑀭𑀼𑀧𑀪𑁄𑀕𑀪𑀸𑀯𑁄 𑀲𑀢𑁆𑀢𑀫𑁄, 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀪𑀸𑀯𑁄 𑀅𑀝𑁆𑀞𑀫𑁄, 𑀥𑀸𑀭𑀡𑁂 𑀲𑀮𑁆𑀮𑀳𑀼𑀓𑀪𑀸𑀯𑁄 𑀦𑀯𑀫𑁄, 𑀘𑀻𑀯𑀭𑀧𑀘𑁆𑀘𑀬𑁂 𑀅𑀧𑁆𑀧𑀺𑀘𑁆𑀙𑀪𑀸𑀯𑁄 𑀤𑀲𑀫𑁄, 𑀯𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀺𑀓𑀅𑀦𑀯𑀚𑁆𑀚𑀪𑀸𑀯𑁄 𑀏𑀓𑀸𑀤𑀲𑀫𑁄, 𑀯𑀸𑀓𑀘𑀻𑀭𑁂 𑀦𑀝𑁆𑀞𑁂𑀧𑀺 𑀅𑀦𑀧𑁂𑀓𑁆𑀔𑀪𑀸𑀯𑁄 𑀤𑁆𑀯𑀸𑀤𑀲𑀫𑁄𑀢𑀺.

𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓𑀦𑁆𑀢𑀺 𑀓𑀣𑀁 𑀧𑀚𑀳𑀺𑀁? 𑀲𑁄 𑀓𑀺𑀭 𑀯𑀭𑀲𑀸𑀝𑀓𑀬𑀼𑀕𑀁 𑀑𑀫𑀼𑀜𑁆𑀘𑀦𑁆𑀢𑁄 𑀘𑀻𑀯𑀭𑀯𑀁𑀲𑁂 𑀮𑀕𑁆𑀕𑀺𑀢𑀁 𑀅𑀦𑁄𑀚𑀧𑀼𑀧𑁆𑀨𑀤𑀸𑀫𑀲𑀤𑀺𑀲𑀁 𑀭𑀢𑁆𑀢𑀁 𑀯𑀸𑀓𑀘𑀻𑀭𑀁 𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑀽𑀧𑀭𑀺 𑀅𑀧𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀯𑀸𑀓𑀘𑀻𑀭𑀁 𑀧𑀭𑀺𑀤𑀳𑀺𑀢𑁆𑀯𑀸 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀲𑀦𑁆𑀣𑀭𑀲𑀤𑀺𑀲𑀁 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀚𑀝𑀸𑀫𑀡𑁆𑀟𑀮𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀘𑀽𑀴𑀸𑀬 𑀲𑀤𑁆𑀥𑀺𑀁 𑀦𑀺𑀘𑁆𑀘𑀮𑀪𑀸𑀯𑀓𑀭𑀡𑀢𑁆𑀣𑀁 𑀲𑀸𑀭𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀫𑀼𑀢𑁆𑀢𑀸𑀚𑀸𑀮𑀲𑀤𑀺𑀲𑀸𑀬 𑀲𑀺𑀓𑁆𑀓𑀸𑀬 𑀧𑀯𑀸𑀴𑀯𑀡𑁆𑀡𑀁 𑀓𑀼𑀡𑁆𑀟𑀺𑀓𑀁 𑀑𑀤𑀳𑀺𑀢𑁆𑀯𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀗𑁆𑀓𑀁 𑀓𑀸𑀚𑀁 𑀆𑀤𑀸𑀬 𑀏𑀓𑀺𑀲𑁆𑀲𑀸 𑀓𑀸𑀚𑀓𑁄𑀝𑀺𑀬𑀸 𑀓𑀼𑀡𑁆𑀟𑀺𑀓𑀁, 𑀏𑀓𑀺𑀲𑁆𑀲𑀸 𑀅𑀗𑁆𑀓𑀼𑀲𑀧𑀘𑁆𑀙𑀺𑀢𑀺𑀤𑀡𑁆𑀟𑀓𑀸𑀤𑀻𑀦𑀺 𑀑𑀮𑀕𑁆𑀕𑁂𑀢𑁆𑀯𑀸 𑀔𑀸𑀭𑀺𑀓𑀸𑀚𑀁 𑀅𑀁𑀲𑁂 𑀓𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀢𑁆𑀢𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀝𑁆𑀞𑀺𑀳𑀢𑁆𑀣𑁂 𑀫𑀳𑀸𑀘𑀗𑁆𑀓𑀫𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀦𑁆𑀢𑁄 𑀅𑀢𑁆𑀢𑀦𑁄 𑀯𑁂𑀲𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀬𑁆𑀳𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀲𑁄𑀪𑀢𑀺 𑀯𑀢 𑀫𑁂 𑀧𑀩𑁆𑀩𑀚𑁆𑀚𑀸, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀥𑀻𑀭𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸 𑀣𑁄𑀫𑀺𑀢𑀸 𑀅𑀬𑀁 𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀧𑀳𑀻𑀦𑀁 𑀫𑁂 𑀕𑀺𑀳𑀺𑀩𑀦𑁆𑀥𑀦𑀁, 𑀦𑀺𑀓𑁆𑀔𑀦𑁆𑀢𑁄𑀲𑁆𑀫𑀺 𑀦𑁂𑀓𑁆𑀔𑀫𑁆𑀫𑀁, 𑀮𑀤𑁆𑀥𑀸 𑀫𑁂 𑀉𑀢𑁆𑀢𑀫𑀧𑀩𑁆𑀩𑀚𑁆𑀚𑀸, 𑀓𑀭𑀺𑀲𑁆𑀲𑀸𑀫𑀺 𑀲𑀫𑀡𑀥𑀫𑁆𑀫𑀁, 𑀮𑀪𑀺𑀲𑁆𑀲𑀸𑀫𑀺 𑀫𑀕𑁆𑀕𑀨𑀮𑀲𑀼𑀔’’𑀦𑁆𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀔𑀸𑀭𑀺𑀓𑀸𑀚𑀁 𑀑𑀢𑀸𑀭𑁂𑀢𑁆𑀯𑀸 𑀘𑀗𑁆𑀓𑀫𑀯𑁂𑀫𑀚𑁆𑀛𑁂 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀸𑀧𑀝𑁆𑀝𑁂 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀲𑀺𑀦𑁆𑀦𑁄 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀩𑀺𑀤𑀮𑀫𑀜𑁆𑀘𑀓𑀧𑀲𑁆𑀲𑁂 𑀓𑀝𑁆𑀞𑀢𑁆𑀣𑀭𑀺𑀓𑀸𑀬 𑀦𑀺𑀧𑀦𑁆𑀦𑁄 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀫𑀦𑀁 𑀆𑀯𑀚𑁆𑀚𑁂𑀲𑀺 𑁋 ‘‘𑀅𑀳𑀁 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀅𑀫𑀺𑀢𑀪𑁄𑀕𑀁 𑀅𑀦𑀦𑁆𑀢𑀬𑀲𑀁 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀕𑀯𑁂𑀲𑀓𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀧𑀫𑀸𑀤𑀘𑀸𑀭𑀁 𑀘𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀯𑀺𑀯𑁂𑀓𑀜𑁆𑀳𑀺 𑀧𑀳𑀸𑀬 𑀯𑀺𑀘𑀭𑀦𑁆𑀢𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀫𑀓𑁆𑀔𑀺𑀓𑀸 𑀔𑀸𑀤𑀦𑁆𑀢𑀺, 𑀇𑀤𑀸𑀦𑀺 𑀫𑀬𑀸 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀳𑀜𑁆𑀳𑀺 𑀖𑀭𑀸𑀯𑀸𑀲𑀁 𑀧𑀮𑀺𑀩𑁄𑀥𑀢𑁄 𑀤𑀺𑀲𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀅𑀬𑀜𑁆𑀘 𑀫𑀦𑀸𑀧𑀸 𑀧𑀡𑁆𑀡𑀲𑀸𑀮𑀸, 𑀩𑁂𑀮𑀼𑀯𑀧𑀓𑁆𑀓𑀯𑀡𑁆𑀡𑀸 𑀧𑀭𑀺𑀪𑀡𑁆𑀟𑀓𑀢𑀸 𑀪𑀽𑀫𑀺, 𑀭𑀚𑀢𑀯𑀡𑁆𑀡𑀸 𑀲𑁂𑀢𑀪𑀺𑀢𑁆𑀢𑀺𑀬𑁄, 𑀓𑀧𑁄𑀢𑀧𑀸𑀤𑀯𑀡𑁆𑀡𑀁 𑀧𑀡𑁆𑀡𑀘𑁆𑀙𑀤𑀦𑀁, 𑀯𑀺𑀘𑀺𑀢𑁆𑀢𑀢𑁆𑀣𑀭𑀡𑀯𑀡𑁆𑀡𑁄 𑀩𑀺𑀤𑀮𑀫𑀜𑁆𑀘𑀓𑁄, 𑀦𑀺𑀯𑀸𑀲𑀨𑀸𑀲𑀼𑀓𑀁 𑀯𑀲𑀦𑀝𑁆𑀞𑀸𑀦𑀁, 𑀦 𑀏𑀢𑁆𑀢𑁄 𑀅𑀢𑀺𑀭𑁂𑀓𑀢𑀭𑀸 𑀯𑀺𑀬 𑀫𑁂 𑀕𑁂𑀳𑀲𑀫𑁆𑀧𑀤𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀡𑁆𑀡𑀲𑀸𑀮𑀸𑀬 𑀤𑁄𑀲𑁂 𑀯𑀺𑀘𑀺𑀦𑀦𑁆𑀢𑁄 𑀅𑀝𑁆𑀞 𑀤𑁄𑀲𑁂 𑀧𑀲𑁆𑀲𑀺.

𑀧𑀡𑁆𑀡𑀲𑀸𑀮𑀧𑀭𑀺𑀪𑁄𑀕𑀲𑁆𑀫𑀺𑀜𑁆𑀳𑀺 𑀅𑀝𑁆𑀞 𑀆𑀤𑀻𑀦𑀯𑀸 𑁋 𑀫𑀳𑀸𑀲𑀫𑀸𑀭𑀫𑁆𑀪𑁂𑀦 𑀤𑀩𑁆𑀩𑀲𑀫𑁆𑀪𑀸𑀭𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀭𑀡𑀧𑀭𑀺𑀬𑁂𑀲𑀦𑀪𑀸𑀯𑁄 𑀏𑀓𑁄 𑀆𑀤𑀻𑀦𑀯𑁄, 𑀢𑀺𑀡𑀧𑀡𑁆𑀡𑀫𑀢𑁆𑀢𑀺𑀓𑀸𑀲𑀼 𑀧𑀢𑀺𑀢𑀸𑀲𑀼 𑀢𑀸𑀲𑀁 𑀧𑀼𑀦𑀧𑁆𑀧𑀼𑀦𑀁 𑀞𑀧𑁂𑀢𑀩𑁆𑀩𑀢𑀸𑀬 𑀦𑀺𑀩𑀤𑁆𑀥𑀚𑀕𑁆𑀕𑀦𑀪𑀸𑀯𑁄 𑀤𑀼𑀢𑀺𑀬𑁄, 𑀲𑁂𑀦𑀸𑀲𑀦𑀁 𑀦𑀸𑀫 𑀫𑀳𑀮𑁆𑀮𑀓𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀅𑀯𑁂𑀮𑀸𑀬 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦 𑀳𑁄𑀢𑀻𑀢𑀺 𑀉𑀝𑁆𑀞𑀸𑀧𑀦𑀻𑀬𑀪𑀸𑀯𑁄 𑀢𑀢𑀺𑀬𑁄, 𑀲𑀻𑀢𑀼𑀡𑁆𑀳𑀸𑀤𑀺𑀧𑀝𑀺𑀖𑀸𑀢𑁂𑀦 𑀓𑀸𑀬𑀲𑁆𑀲 𑀲𑀼𑀔𑀼𑀫𑀸𑀮𑀓𑀭𑀡𑀪𑀸𑀯𑁄 𑀘𑀢𑀼𑀢𑁆𑀣𑁄, 𑀕𑁂𑀳𑀁 𑀧𑀯𑀺𑀝𑁆𑀞𑁂𑀦 𑀬𑀁𑀓𑀺𑀜𑁆𑀘𑀺 𑀧𑀸𑀧𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀕𑀭𑀳𑀸𑀧𑀝𑀺𑀘𑁆𑀙𑀸𑀤𑀦𑀪𑀸𑀯𑁄 𑀧𑀜𑁆𑀘𑀫𑁄, ‘‘𑀫𑀬𑁆𑀳’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀓𑀭𑀡𑀪𑀸𑀯𑁄 𑀙𑀝𑁆𑀞𑁄, 𑀕𑁂𑀳𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀦𑀸𑀫𑁂𑀲 𑀲𑀤𑀼𑀢𑀺𑀬𑀓𑀯𑀸𑀲𑁄 𑀯𑀺𑀬𑀸𑀢𑀺 𑀲𑀢𑁆𑀢𑀫𑁄, 𑀊𑀓𑀸𑀫𑀗𑁆𑀕𑀼𑀮𑀖𑀭𑀕𑁄𑀴𑀺𑀓𑀸𑀤𑀻𑀦𑀁 𑀲𑀸𑀥𑀸𑀭𑀡𑀢𑀸𑀬 𑀩𑀳𑀼𑀲𑀸𑀥𑀸𑀭𑀡𑀪𑀸𑀯𑁄 𑀅𑀝𑁆𑀞𑀫𑁄. 𑀇𑀢𑀺 𑀇𑀫𑁂 𑀅𑀝𑁆𑀞 𑀆𑀤𑀻𑀦𑀯𑁂 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀚𑀳𑀺. 𑀢𑁂𑀦𑀸𑀳 𑁋 ‘‘𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓’’𑀦𑁆𑀢𑀺.

𑀉𑀧𑀸𑀕𑀫𑀺𑀁 𑀭𑀼𑀓𑁆𑀔𑀫𑀽𑀮𑀁, 𑀕𑀼𑀡𑁂 𑀤𑀲𑀳𑀼𑀧𑀸𑀕𑀢𑀦𑁆𑀢𑀺 𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀳𑀺 𑀕𑀼𑀡𑁂𑀳𑀺 𑀉𑀧𑁂𑀢𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀢𑁄𑀲𑁆𑀫𑀻𑀢𑀺 𑀯𑀤𑀢𑀺. 𑀢𑀢𑁆𑀭𑀺𑀫𑁂 𑀤𑀲 𑀕𑀼𑀡𑀸 𑁋 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀸 𑀏𑀓𑁄 𑀕𑀼𑀡𑁄, 𑀉𑀧𑀕𑀫𑀦𑀫𑀢𑁆𑀢𑀓𑀫𑁂𑀯 𑀳𑀺 𑀢𑀢𑁆𑀣 𑀳𑁄𑀢𑀻𑀢𑀺. 𑀅𑀧𑁆𑀧𑀝𑀺𑀚𑀕𑁆𑀕𑀦𑀢𑀸 𑀤𑀼𑀢𑀺𑀬𑁄, 𑀢𑀜𑁆𑀳𑀺 𑀲𑀫𑁆𑀫𑀝𑁆𑀞𑀫𑁆𑀧𑀺 𑀅𑀲𑀫𑁆𑀫𑀝𑁆𑀞𑀫𑁆𑀧𑀺 𑀧𑀭𑀺𑀪𑁄𑀕𑀨𑀸𑀲𑀼𑀓𑀁 𑀳𑁄𑀢𑀺𑀬𑁂𑀯. 𑀅𑀦𑀼𑀝𑁆𑀞𑀸𑀧𑀦𑀻𑀬𑀪𑀸𑀯𑁄 𑀢𑀢𑀺𑀬𑁄. 𑀕𑀭𑀳𑀁 𑀦𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀢𑁆𑀣 𑀳𑀺 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀮𑀚𑁆𑀚𑀢𑀻𑀢𑀺 𑀕𑀭𑀳𑀸𑀬 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑁄 𑀘𑀢𑀼𑀢𑁆𑀣𑁄. 𑀅𑀩𑁆𑀪𑁄𑀓𑀸𑀲𑀯𑀸𑀲𑁄 𑀯𑀺𑀬 𑀓𑀸𑀬𑀁 𑀦 𑀲𑀦𑁆𑀣𑀫𑁆𑀪𑁂𑀢𑀻𑀢𑀺 𑀓𑀸𑀬𑀲𑁆𑀲 𑀅𑀲𑀦𑁆𑀣𑀫𑁆𑀪𑀦𑀪𑀸𑀯𑁄 𑀧𑀜𑁆𑀘𑀫𑁄, 𑀧𑀭𑀺𑀕𑁆𑀕𑀳𑀓𑀭𑀡𑀸𑀪𑀸𑀯𑁄 𑀙𑀝𑁆𑀞𑁄, 𑀕𑁂𑀳𑀸𑀮𑀬𑀧𑀝𑀺𑀓𑁆𑀔𑁂𑀧𑁄 𑀲𑀢𑁆𑀢𑀫𑁄. 𑀩𑀳𑀼𑀲𑀸𑀥𑀸𑀭𑀡𑁂 𑀕𑁂𑀳𑁂 𑀯𑀺𑀬 ‘‘𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀦𑀁, 𑀦𑀺𑀓𑁆𑀔𑀫𑀣𑀸’’𑀢𑀺 𑀦𑀻𑀳𑀭𑀡𑀓𑀸𑀪𑀸𑀯𑁄 𑀅𑀝𑁆𑀞𑀫𑁄, 𑀯𑀲𑀦𑁆𑀢𑀲𑁆𑀲 𑀲𑀧𑁆𑀧𑀻𑀢𑀺𑀓𑀪𑀸𑀯𑁄 𑀦𑀯𑀫𑁄, 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀲𑀼𑀮𑀪𑀢𑀸𑀬 𑀅𑀦𑀧𑁂𑀓𑁆𑀔𑀪𑀸𑀯𑁄 𑀤𑀲𑀫𑁄𑀢𑀺 𑀇𑀫𑁂 𑀤𑀲𑀕𑀼𑀡𑁂 𑀤𑀺𑀲𑁆𑀯𑀸 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀢𑁄𑀲𑁆𑀫𑀻𑀢𑀺 𑀯𑀤𑀢𑀺.

𑀇𑀫𑀸𑀦𑀺 𑀳𑀺 𑀏𑀢𑁆𑀢𑀓𑀸𑀦𑀺 𑀓𑀸𑀭𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀲𑀫𑁆𑀧𑀢𑁆𑀢𑀕𑀸𑀫𑁂 𑀫𑀦𑀼𑀲𑁆𑀲𑀸 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀲𑁆𑀲𑀫𑀁 𑀆𑀕𑀫𑁆𑀫 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀳𑀁 ‘𑀆𑀳𑀸𑀭𑀁 𑀮𑀪𑀸𑀫𑀻’𑀢𑀺 𑀧𑀩𑁆𑀩𑀚𑀺𑀢𑁄, 𑀲𑀺𑀦𑀺𑀤𑁆𑀥𑀸𑀳𑀸𑀭𑁄 𑀦𑀸𑀫𑁂𑀲 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑁂 𑀯𑀟𑁆𑀠𑁂𑀢𑀺, 𑀆𑀳𑀸𑀭𑀫𑀽𑀮𑀓𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀯𑀸𑀧𑀺𑀢𑀭𑁄𑀧𑀺𑀢𑀥𑀜𑁆𑀜𑀦𑀺𑀩𑁆𑀩𑀢𑁆𑀢𑀓𑀁 𑀆𑀳𑀸𑀭𑀁 𑀧𑀚𑀳𑀺𑀢𑁆𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀓𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀁, 𑀧𑀚𑀳𑀺𑀁 𑀦𑀺𑀭𑀯𑀲𑁂𑀲𑀢𑁄;

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀯𑀢𑁆𑀢𑀨𑀮𑀫𑀸𑀤𑀺𑀬𑀺𑀁.

‘‘𑀢𑀢𑁆𑀣𑀧𑁆𑀧𑀥𑀸𑀦𑀁 𑀧𑀤𑀳𑀺𑀁, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀩𑁆𑀪𑀦𑁆𑀢𑀭𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀅𑀪𑀺𑀜𑁆𑀜𑀸𑀩𑀮 𑀧𑀸𑀧𑀼𑀡𑀺’’𑀦𑁆𑀢𑀺.

𑀤𑀻𑀧𑀗𑁆𑀓𑀭𑁄 𑀩𑀼𑀤𑁆𑀥𑁄

𑀏𑀯𑀁 𑀅𑀪𑀺𑀜𑁆𑀜𑀸𑀩𑀮𑀁 𑀧𑀢𑁆𑀯𑀸 𑀲𑀼𑀫𑁂𑀥𑀢𑀸𑀧𑀲𑁂 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁂 𑀤𑀻𑀧𑀗𑁆𑀓𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀚𑀸𑀢𑀺𑀩𑁄𑀥𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀲𑀼 𑀲𑀓𑀮𑀸𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺, 𑀫𑀳𑀸𑀯𑀺𑀭𑀯𑀁 𑀭𑀯𑀺, 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀲𑀼𑀫𑁂𑀥𑀢𑀸𑀧𑀲𑁄 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀦𑁂𑀯 𑀢𑀁 𑀲𑀤𑁆𑀤𑀫𑀲𑁆𑀲𑁄𑀲𑀺, 𑀦 𑀘 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀏𑀯𑀁 𑀫𑁂 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀲𑁆𑀲, 𑀯𑀲𑀻𑀪𑀽𑀢𑀲𑁆𑀲 𑀲𑀸𑀲𑀦𑁂;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

‘‘𑀉𑀧𑁆𑀧𑀚𑁆𑀚𑀦𑁆𑀢𑁂 𑀘 𑀚𑀸𑀬𑀦𑁆𑀢𑁂, 𑀩𑀼𑀚𑁆𑀛𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑁂;

𑀘𑀢𑀼𑀭𑁄 𑀦𑀺𑀫𑀺𑀢𑁆𑀢𑁂 𑀦𑀸𑀤𑁆𑀤𑀲𑀁, 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑁄’’𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀘𑀢𑀽𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀭𑀫𑁆𑀫𑀁 𑀦𑀸𑀫 𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 ‘‘𑀤𑀻𑀧𑀗𑁆𑀓𑀭𑁄 𑀓𑀺𑀭 𑀲𑀫𑀡𑀺𑀲𑁆𑀲𑀭𑁄 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀫𑁆𑀳𑀸𑀓𑀁 𑀭𑀫𑁆𑀫𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀘𑁂𑀯 𑀪𑁂𑀲𑀚𑁆𑀚𑀸𑀦𑀺 𑀯𑀢𑁆𑀣𑀘𑁆𑀙𑀸𑀤𑀦𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀬𑁂𑀦 𑀩𑀼𑀤𑁆𑀥𑁄, 𑀬𑁂𑀦 𑀥𑀫𑁆𑀫𑁄, 𑀬𑁂𑀦 𑀲𑀗𑁆𑀖𑁄, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼.

𑀢𑁂 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀦𑁆𑀢𑀸 𑀉𑀤𑀓𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀁 𑀪𑀽𑀫𑀺𑀢𑀮𑀁 𑀓𑀢𑁆𑀯𑀸 𑀭𑀚𑀢𑀧𑀝𑁆𑀝𑀯𑀡𑁆𑀡𑀁 𑀯𑀸𑀮𑀼𑀓𑀁 𑀆𑀓𑀺𑀭𑀦𑁆𑀢𑀺, 𑀮𑀸𑀚𑁂 𑀘𑁂𑀯 𑀧𑀼𑀧𑁆𑀨𑀸𑀦𑀺 𑀘 𑀯𑀺𑀓𑀺𑀭𑀦𑁆𑀢𑀺, 𑀦𑀸𑀦𑀸𑀯𑀺𑀭𑀸𑀕𑁂𑀳𑀺 𑀯𑀢𑁆𑀣𑁂𑀳𑀺 𑀥𑀚𑀧𑀝𑀸𑀓𑁂 𑀉𑀲𑁆𑀲𑀸𑀧𑁂𑀦𑁆𑀢𑀺, 𑀓𑀤𑀮𑀺𑀬𑁄 𑀘𑁂𑀯 𑀧𑀼𑀡𑁆𑀡𑀖𑀝𑀧𑀦𑁆𑀢𑀺𑀬𑁄 𑀘 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀼𑀫𑁂𑀥𑀢𑀸𑀧𑀲𑁄 𑀅𑀢𑁆𑀢𑀦𑁄 𑀅𑀲𑁆𑀲𑀫𑀧𑀤𑀸 𑀆𑀓𑀸𑀲𑀁 𑀉𑀕𑁆𑀕𑀦𑁆𑀢𑁆𑀯𑀸, 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀭𑀺𑀪𑀸𑀕𑁂𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀢𑁂 𑀳𑀝𑁆𑀞𑀢𑀼𑀝𑁆𑀞𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀪𑁄, 𑀓𑀲𑁆𑀲 𑀢𑀼𑀫𑁆𑀳𑁂 𑀇𑀥 𑀯𑀺𑀲𑀫𑀁 𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀣𑀸’’𑀢𑀺? 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀧𑀘𑁆𑀘𑀦𑁆𑀢𑀤𑁂𑀲𑀯𑀺𑀲𑀬𑁂, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀢𑀲𑁆𑀲 𑀆𑀕𑀫𑀦𑀁 𑀫𑀕𑁆𑀕𑀁, 𑀲𑁄𑀥𑁂𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀲𑁆𑀲𑀫𑀸;

𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

‘‘𑀯𑁂𑀤𑀚𑀸𑀢𑀁 𑀚𑀦𑀁 𑀤𑀺𑀲𑁆𑀯𑀸, 𑀢𑀼𑀝𑁆𑀞𑀳𑀝𑁆𑀞𑀁 𑀧𑀫𑁄𑀤𑀺𑀢𑀁;

𑀑𑀭𑁄𑀳𑀺𑀢𑁆𑀯𑀸𑀦 𑀕𑀕𑀦𑀸, 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑀢𑀸𑀯𑀤𑁂.

‘‘‘𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑀼𑀤𑀺𑀢𑁄, 𑀯𑁂𑀤𑀚𑀸𑀢𑁄 𑀫𑀳𑀸𑀚𑀦𑁄;

𑀓𑀲𑁆𑀲 𑀲𑁄𑀥𑀻𑀬𑀢𑀺 𑀫𑀕𑁆𑀕𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦’’’𑀦𑁆𑀢𑀺.

𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂 𑀲𑀼𑀫𑁂𑀥, 𑀦 𑀢𑁆𑀯𑀁 𑀚𑀸𑀦𑀸𑀲𑀺, 𑀤𑀻𑀧𑀗𑁆𑀓𑀭𑁄 𑀤𑀲𑀩𑀮𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑀬𑀺𑀫𑁆𑀳, 𑀢𑀲𑁆𑀲𑁂𑀢𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀕𑀫𑀦𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀫𑀸’’𑀢𑀺. 𑀅𑀣 𑀲𑀼𑀫𑁂𑀥𑀢𑀸𑀧𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑁄𑀢𑀺 𑀔𑁄 𑀖𑁄𑀲𑀫𑀢𑁆𑀢𑀓𑀫𑁆𑀧𑀺 𑀮𑁄𑀓𑁂 𑀤𑀼𑀮𑁆𑀮𑀪𑀁, 𑀧𑀕𑁂𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀫𑀬𑀸𑀧𑀺 𑀇𑀫𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀫𑀕𑁆𑀕𑀁 𑀅𑀮𑀗𑁆𑀓𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑁂 𑀫𑀦𑀼𑀲𑁆𑀲𑁂 𑀆𑀳 𑁋 ‘‘𑀲𑀘𑁂, 𑀪𑁄, 𑀢𑀼𑀫𑁆𑀳𑁂 𑀏𑀢𑀁 𑀫𑀕𑁆𑀕𑀁 𑀩𑀼𑀤𑁆𑀥𑀲𑁆𑀲 𑀅𑀮𑀗𑁆𑀓𑀭𑁄𑀣, 𑀫𑀬𑁆𑀳𑀫𑁆𑀧𑀺 𑀏𑀓𑀁 𑀑𑀓𑀸𑀲𑀁 𑀤𑁂𑀣, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀅𑀮𑀗𑁆𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀲𑀼𑀫𑁂𑀥𑀢𑀸𑀧𑀲𑁄 𑀇𑀤𑁆𑀥𑀺𑀫𑀸’’𑀢𑀺 𑀚𑀸𑀦𑀦𑁆𑀢𑀸 𑀉𑀤𑀓𑀪𑀺𑀦𑁆𑀦𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋 ‘‘𑀢𑁆𑀯𑀁 𑀇𑀫𑀁 𑀞𑀸𑀦𑀁 𑀅𑀮𑀗𑁆𑀓𑀭𑁄𑀳𑀻’’𑀢𑀺 𑀅𑀤𑀁𑀲𑀼. 𑀲𑀼𑀫𑁂𑀥𑁄 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑀁 𑀑𑀓𑀸𑀲𑀁 𑀇𑀤𑁆𑀥𑀺𑀬𑀸 𑀅𑀮𑀗𑁆𑀓𑀭𑀺𑀢𑀼𑀁 𑀧𑀳𑁄𑀫𑀺, 𑀏𑀯𑀁 𑀅𑀮𑀗𑁆𑀓𑀢𑁄 𑀦 𑀫𑀁 𑀧𑀭𑀺𑀢𑁄𑀲𑁂𑀲𑁆𑀲𑀢𑀺, 𑀅𑀚𑁆𑀚 𑀫𑀬𑀸 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀁𑀲𑀼𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀓𑁆𑀔𑀺𑀧𑀺.

𑀢𑀲𑁆𑀲 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀅𑀦𑀺𑀝𑁆𑀞𑀺𑀢𑁂𑀬𑁂𑀯 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀫𑀳𑀸𑀦𑀼𑀪𑀸𑀯𑀸𑀦𑀁 𑀙𑀴𑀪𑀺𑀜𑁆𑀜𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀤𑁂𑀯𑀢𑀸𑀲𑀼 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀦𑁆𑀢𑀸𑀲𑀼 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺 𑀯𑀚𑁆𑀚𑀦𑁆𑀢𑀸𑀲𑀼 𑀤𑀺𑀩𑁆𑀩𑀲𑀗𑁆𑀕𑀻𑀢𑁂𑀲𑀼 𑀧𑀯𑀢𑁆𑀢𑁂𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀫𑀸𑀦𑀼𑀲𑀓𑁂𑀳𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀘𑁂𑀯 𑀢𑀼𑀭𑀺𑀬𑁂𑀳𑀺 𑀘 𑀧𑀽𑀚𑀬𑀦𑁆𑀢𑁂𑀲𑀼 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀫𑀦𑁄𑀲𑀺𑀮𑀸𑀢𑀮𑁂 𑀯𑀺𑀚𑀫𑁆𑀪𑀫𑀸𑀦𑁄 𑀲𑀻𑀳𑁄 𑀯𑀺𑀬 𑀢𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀼𑀫𑁂𑀥𑀢𑀸𑀧𑀲𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀕𑁆𑀕𑁂𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀤𑀲𑀩𑀮𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑀼𑀭𑀜𑁆𑀚𑀺𑀢𑀁 𑀩𑁆𑀬𑀸𑀫𑀧𑁆𑀧𑀪𑀸𑀬 𑀲𑀫𑁆𑀧𑀭𑀺𑀯𑀸𑀭𑀺𑀢𑀁 𑀫𑀡𑀺𑀯𑀡𑁆𑀡𑀕𑀕𑀦𑀢𑀮𑁂 𑀦𑀸𑀦𑀧𑁆𑀧𑀓𑀸𑀭𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀆𑀯𑁂𑀴𑀸𑀯𑁂𑀴𑀪𑀽𑀢𑀸 𑀘𑁂𑀯 𑀬𑀼𑀕𑀴𑀬𑀼𑀕𑀴𑀪𑀽𑀢𑀸 𑀘 𑀙𑀩𑁆𑀩𑀡𑁆𑀡𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀁 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀚𑁆𑀚 𑀫𑀬𑀸 𑀤𑀲𑀩𑀮𑀲𑁆𑀲 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀫𑀸 𑀪𑀕𑀯𑀸 𑀓𑀮𑀮𑀁 𑀅𑀓𑁆𑀓𑀫𑀺, 𑀫𑀡𑀺𑀨𑀮𑀓𑀲𑁂𑀢𑀼𑀁 𑀧𑀦 𑀅𑀓𑁆𑀓𑀫𑀦𑁆𑀢𑁄 𑀯𑀺𑀬 𑀲𑀤𑁆𑀥𑀺𑀁 𑀘𑀢𑀽𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀫𑀫 𑀧𑀺𑀝𑁆𑀞𑀺𑀁 𑀫𑀤𑁆𑀤𑀫𑀸𑀦𑁄 𑀕𑀘𑁆𑀙𑀢𑀼, 𑀢𑀁 𑀫𑁂 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀓𑁂𑀲𑁂 𑀫𑁄𑀘𑁂𑀢𑁆𑀯𑀸 𑀅𑀚𑀺𑀦𑀘𑀫𑁆𑀫𑀚𑀝𑀸𑀫𑀡𑁆𑀟𑀮𑀯𑀸𑀓𑀘𑀻𑀭𑀸𑀦𑀺 𑀓𑀸𑀴𑀯𑀡𑁆𑀡𑁂 𑀓𑀮𑀮𑁂 𑀧𑀢𑁆𑀣𑀭𑀺𑀢𑁆𑀯𑀸 𑀫𑀡𑀺𑀨𑀮𑀓𑀲𑁂𑀢𑀼 𑀯𑀺𑀬 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑁂 𑀫𑁂 𑀧𑀼𑀝𑁆𑀞𑀸 𑀯𑀺𑀬𑀸𑀓𑀁𑀲𑀼, ‘𑀩𑀼𑀤𑁆𑀥𑁄 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲 𑀲𑁄𑀥𑀻𑀬𑀢𑀺 𑀫𑀕𑁆𑀕𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁’.

‘‘𑀩𑀼𑀤𑁆𑀥𑁄𑀢𑀺𑀯𑀘𑀦𑀁 𑀲𑀼𑀢𑁆𑀯𑀸𑀦, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀓𑀣𑀬𑀦𑁆𑀢𑁄, 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺𑀁.

‘‘𑀢𑀢𑁆𑀣 𑀞𑀢𑁆𑀯𑀸 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀢𑀼𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

‘𑀇𑀥 𑀩𑀻𑀚𑀸𑀦𑀺 𑀭𑁄𑀧𑀺𑀲𑁆𑀲𑀁, 𑀔𑀡𑁄 𑀯𑁂 𑀫𑀸 𑀉𑀧𑀘𑁆𑀘𑀕𑀸’.

‘‘𑀬𑀤𑀺 𑀩𑀼𑀤𑁆𑀥𑀲𑁆𑀲 𑀲𑁄𑀥𑁂𑀣, 𑀏𑀓𑁄𑀓𑀸𑀲𑀁 𑀤𑀤𑀸𑀣 𑀫𑁂;

𑀅𑀳𑀫𑁆𑀧𑀺 𑀲𑁄𑀥𑀬𑀺𑀲𑁆𑀲𑀸𑀫𑀺, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁.

‘‘𑀅𑀤𑀁𑀲𑀼 𑀢𑁂 𑀫𑀫𑁄𑀓𑀸𑀲𑀁, 𑀲𑁄𑀥𑁂𑀢𑀼𑀁 𑀅𑀜𑁆𑀚𑀲𑀁 𑀢𑀤𑀸;

𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, 𑀫𑀕𑁆𑀕𑀁 𑀲𑁄𑀥𑁂𑀫𑀳𑀁 𑀢𑀤𑀸.

‘‘𑀅𑀦𑀺𑀝𑁆𑀞𑀺𑀢𑁂 𑀫𑀫𑁄𑀓𑀸𑀲𑁂, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀢𑀸𑀤𑀺𑀳𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀧𑀝𑀺𑀧𑀚𑁆𑀚𑀺 𑀅𑀜𑁆𑀚𑀲𑀁 𑀚𑀺𑀦𑁄.

‘‘𑀧𑀘𑁆𑀘𑀼𑀕𑁆𑀕𑀫𑀦𑀸 𑀯𑀢𑁆𑀢𑀦𑁆𑀢𑀺, 𑀯𑀚𑁆𑀚𑀦𑁆𑀢𑀺 𑀪𑁂𑀭𑀺𑀬𑁄 𑀩𑀳𑀽;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀼𑀁.

‘‘𑀤𑁂𑀯𑀸 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀘 𑀤𑁂𑀯𑀢𑀸;

𑀉𑀪𑁄𑀧𑀺 𑀢𑁂 𑀧𑀜𑁆𑀚𑀮𑀺𑀓𑀸, 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀁.

‘‘𑀤𑁂𑀯𑀸 𑀤𑀺𑀩𑁆𑀩𑁂𑀳𑀺 𑀢𑀼𑀭𑀺𑀬𑁂𑀳𑀺, 𑀫𑀦𑀼𑀲𑁆𑀲𑀸 𑀫𑀸𑀦𑀼𑀲𑁂𑀳𑀺 𑀘;

𑀉𑀪𑁄𑀧𑀺 𑀢𑁂 𑀯𑀚𑁆𑀚𑀬𑀦𑁆𑀢𑀸, 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀁.

‘‘𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀤𑀺𑀲𑁄𑀤𑀺𑀲𑀁 𑀑𑀓𑀺𑀭𑀦𑁆𑀢𑀺, 𑀆𑀓𑀸𑀲𑀦𑀪𑀕𑀢𑀸 𑀫𑀭𑀽.

‘‘𑀤𑀺𑀩𑁆𑀩𑀁 𑀘𑀦𑁆𑀤𑀦𑀘𑀼𑀡𑁆𑀡𑀜𑁆𑀘, 𑀯𑀭𑀕𑀦𑁆𑀥𑀜𑁆𑀘 𑀓𑁂𑀯𑀮𑀁;

𑀤𑀺𑀲𑁄𑀤𑀺𑀲𑀁 𑀑𑀓𑀺𑀭𑀦𑁆𑀢𑀺, 𑀆𑀓𑀸𑀲𑀦𑀪𑀕𑀢𑀸 𑀫𑀭𑀽.

‘‘𑀘𑀫𑁆𑀧𑀓𑀁 𑀲𑀮𑀮𑀁 𑀦𑀻𑀧𑀁, 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀁;

𑀤𑀺𑀲𑁄𑀤𑀺𑀲𑀁 𑀉𑀓𑁆𑀔𑀺𑀧𑀦𑁆𑀢𑀺, 𑀪𑀽𑀫𑀺𑀢𑀮𑀕𑀢𑀸 𑀦𑀭𑀸.

‘‘𑀓𑁂𑀲𑁂 𑀫𑀼𑀜𑁆𑀘𑀺𑀢𑁆𑀯𑀸𑀳𑀁 𑀢𑀢𑁆𑀣, 𑀯𑀸𑀓𑀘𑀻𑀭𑀜𑁆𑀘 𑀘𑀫𑁆𑀫𑀓𑀁;

𑀓𑀮𑀮𑁂 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀅𑀯𑀓𑀼𑀚𑁆𑀚𑁄 𑀦𑀺𑀧𑀚𑁆𑀚𑀳𑀁.

‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀫𑀁 𑀩𑀼𑀤𑁆𑀥𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀕𑀘𑁆𑀙𑀢𑀼;

𑀫𑀸 𑀦𑀁 𑀓𑀮𑀮𑁂 𑀅𑀓𑁆𑀓𑀫𑀺𑀢𑁆𑀣, 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺.

𑀲𑁄 𑀧𑀦 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀓𑁄𑀯 𑀧𑀼𑀦 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀩𑀼𑀤𑁆𑀥𑀲𑀺𑀭𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀳𑀁 𑀇𑀘𑁆𑀙𑁂𑀬𑁆𑀬𑀁, 𑀲𑀩𑁆𑀩𑀓𑀺𑀮𑁂𑀲𑁂 𑀛𑀸𑀧𑁂𑀢𑁆𑀯𑀸 𑀲𑀗𑁆𑀖𑀦𑀯𑀓𑁄 𑀳𑀼𑀢𑁆𑀯𑀸 𑀭𑀫𑁆𑀫𑀦𑀕𑀭𑀁 𑀧𑀯𑀺𑀲𑁂𑀬𑁆𑀬𑀁, 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀦 𑀫𑁂 𑀓𑀺𑀮𑁂𑀲𑁂 𑀛𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀯𑀺𑀬 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀥𑀫𑁆𑀫𑀦𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀁𑀲𑀸𑀭𑀲𑀸𑀕𑀭𑀸 𑀉𑀢𑁆𑀢𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀁, 𑀇𑀤𑀁 𑀫𑀬𑁆𑀳𑀁 𑀧𑀢𑀺𑀭𑀽𑀧’’𑀦𑁆𑀢𑀺. 𑀢𑀢𑁄 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀧𑀣𑀯𑀺𑀬𑀁 𑀦𑀺𑀧𑀦𑁆𑀦𑀲𑁆𑀲, 𑀏𑀯𑀁 𑀫𑁂 𑀆𑀲𑀺 𑀘𑁂𑀢𑀲𑁄;

‘𑀇𑀘𑁆𑀙𑀫𑀸𑀦𑁄 𑀅𑀳𑀁 𑀅𑀚𑁆𑀚, 𑀓𑀺𑀮𑁂𑀲𑁂 𑀛𑀸𑀧𑀬𑁂 𑀫𑀫.

‘‘‘𑀓𑀺𑀁 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀩𑀼𑀤𑁆𑀥𑁄 𑀳𑁂𑀲𑁆𑀲𑀁 𑀲𑀤𑁂𑀯𑀓𑁂.

‘‘‘𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀧𑀼𑀭𑀺𑀲𑁂𑀦 𑀣𑀸𑀫𑀤𑀲𑁆𑀲𑀺𑀦𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓𑀁.

‘‘‘𑀇𑀫𑀺𑀦𑀸 𑀫𑁂 𑀅𑀥𑀺𑀓𑀸𑀭𑁂𑀦, 𑀓𑀢𑁂𑀦 𑀧𑀼𑀭𑀺𑀲𑀼𑀢𑁆𑀢𑀫𑁂;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼𑀁.

‘‘‘𑀲𑀁𑀲𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀼𑀬𑁆𑀳, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓’’’𑀦𑁆𑀢𑀺.

𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺.

𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀲𑁆𑀫𑀺𑀁𑀬𑁂𑀯 𑀳𑀺 𑀞𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦𑀸𑀕𑀲𑁆𑀲 𑀯𑀸 𑀲𑀼𑀧𑀡𑁆𑀡𑀲𑁆𑀲 𑀯𑀸 𑀤𑁂𑀯𑀢𑀸𑀬 𑀯𑀸 𑀲𑀓𑁆𑀓𑀲𑁆𑀲 𑀯𑀸 𑀧𑀢𑁆𑀣𑀦𑀸 𑀦𑁄 𑀲𑀫𑀺𑀚𑁆𑀛𑀢𑀺. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂𑀧𑀺 𑀧𑀼𑀭𑀺𑀲𑀮𑀺𑀗𑁆𑀕𑁂 𑀞𑀺𑀢𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀇𑀢𑁆𑀣𑀺𑀬𑀸 𑀯𑀸 𑀧𑀡𑁆𑀟𑀓𑀦𑀧𑀼𑀁𑀲𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀯𑀸 𑀦𑁄 𑀲𑀫𑀺𑀚𑁆𑀛𑀢𑀺. 𑀧𑀼𑀭𑀺𑀲𑀲𑁆𑀲𑀧𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲. 𑀳𑁂𑀢𑀼𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀚𑀻𑀯𑀫𑀸𑀦𑀩𑀼𑀤𑁆𑀥𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀢𑁆𑀣𑁂𑀦𑁆𑀢𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀩𑀼𑀤𑁆𑀥𑁂 𑀘𑁂𑀢𑀺𑀬𑀲𑀦𑁆𑀢𑀺𑀓𑁂 𑀯𑀸 𑀩𑁄𑀥𑀺𑀫𑀽𑀮𑁂 𑀯𑀸 𑀧𑀢𑁆𑀣𑁂𑀦𑁆𑀢𑀲𑁆𑀲 𑀦 𑀲𑀫𑀺𑀚𑁆𑀛𑀢𑀺. 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀧𑀢𑁆𑀣𑁂𑀦𑁆𑀢𑀲𑁆𑀲𑀧𑀺 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑁂 𑀞𑀺𑀢𑀲𑁆𑀲𑁂𑀯 𑀲𑀫𑀺𑀚𑁆𑀛𑀢𑀺, 𑀦𑁄 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑀲𑁆𑀲. 𑀧𑀩𑁆𑀩𑀚𑀺𑀢𑀲𑁆𑀲𑀧𑀺 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀬𑁂𑀯 𑀲𑀫𑀺𑀚𑁆𑀛𑀢𑀺, 𑀦 𑀇𑀫𑀸𑀬 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀭𑀳𑀺𑀢𑀲𑁆𑀲. 𑀕𑀼𑀡𑀲𑀫𑁆𑀧𑀦𑁆𑀦𑁂𑀦𑀧𑀺 𑀬𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲𑁂𑀯 𑀇𑀫𑀺𑀦𑀸 𑀅𑀥𑀺𑀓𑀸𑀭𑁂𑀦 𑀅𑀥𑀺𑀓𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲. 𑀅𑀥𑀺𑀓𑀸𑀭𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀬𑀲𑁆𑀲 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀅𑀢𑁆𑀣𑀸𑀬 𑀫𑀳𑀦𑁆𑀢𑁄 𑀙𑀦𑁆𑀤𑁄 𑀘 𑀉𑀲𑁆𑀲𑀸𑀳𑁄 𑀘 𑀯𑀸𑀬𑀸𑀫𑁄 𑀘 𑀧𑀭𑀺𑀬𑁂𑀝𑁆𑀞𑀺 𑀘, 𑀢𑀲𑁆𑀲𑁂𑀯 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲.

𑀢𑀢𑁆𑀭𑀺𑀤𑀁 𑀙𑀦𑁆𑀤𑀫𑀳𑀦𑁆𑀢𑀢𑀸𑀬 𑀑𑀧𑀫𑁆𑀫𑀁 𑁋 𑀲𑀘𑁂 𑀳𑀺 𑀏𑀯𑀫𑀲𑁆𑀲 𑀬𑁄 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀏𑀓𑁄𑀤𑀓𑀻𑀪𑀽𑀢𑀁 𑀅𑀢𑁆𑀢𑀦𑁄 𑀩𑀸𑀳𑀼𑀩𑀮𑁂𑀦 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀬𑁄 𑀯𑀸 𑀧𑀦 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀯𑁂𑀴𑀼𑀕𑀼𑀫𑁆𑀩𑀲𑀜𑁆𑀙𑀦𑁆𑀦𑀁 𑀯𑀺𑀬𑀽𑀳𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀧𑀤𑀲𑀸 𑀕𑀘𑁆𑀙𑀦𑁆𑀢𑁄 𑀧𑀸𑀭𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀬𑁄 𑀯𑀸 𑀧𑀦 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀲𑀢𑁆𑀢𑀺𑀬𑁄 𑀆𑀓𑁄𑀝𑁂𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀲𑀢𑁆𑀢𑀺𑀨𑀮𑀲𑀫𑀸𑀓𑀺𑀡𑁆𑀡𑀁 𑀧𑀤𑀲𑀸 𑀅𑀓𑁆𑀓𑀫𑀫𑀸𑀦𑁄 𑀧𑀸𑀭𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀬𑁄 𑀯𑀸 𑀧𑀦 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀪𑀭𑀺𑀢𑀁 𑀧𑀸𑀤𑁂𑀳𑀺 𑀫𑀤𑁆𑀤𑀫𑀸𑀦𑁄 𑀧𑀸𑀭𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀬𑁄 𑀏𑀢𑁂𑀲𑀼 𑀏𑀓𑀫𑁆𑀧𑀺 𑀅𑀢𑁆𑀢𑀦𑁄 𑀤𑀼𑀓𑁆𑀓𑀭𑀁 𑀦 𑀫𑀜𑁆𑀜𑀢𑀺, ‘‘𑀅𑀳𑀁 𑀏𑀢𑀫𑁆𑀧𑀺 𑀢𑀭𑀺𑀢𑁆𑀯𑀸 𑀯𑀸 𑀕𑀦𑁆𑀢𑁆𑀯𑀸 𑀯𑀸 𑀧𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀫𑀳𑀦𑁆𑀢𑁂𑀦 𑀙𑀦𑁆𑀤𑁂𑀦 𑀘 𑀉𑀲𑁆𑀲𑀸𑀳𑁂𑀦 𑀘 𑀯𑀸𑀬𑀸𑀫𑁂𑀦 𑀘 𑀧𑀭𑀺𑀬𑁂𑀝𑁆𑀞𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀢𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲. 𑀢𑀲𑁆𑀫𑀸 𑀲𑀼𑀫𑁂𑀥𑀢𑀸𑀧𑀲𑁄 𑀇𑀫𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸𑀯 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀤𑀻𑀧𑀗𑁆𑀓𑀭𑁄𑀧𑀺 𑀪𑀕𑀯𑀸 𑀆𑀕𑀦𑁆𑀢𑁆𑀯𑀸 𑀲𑀼𑀫𑁂𑀥𑀢𑀸𑀧𑀲𑀲𑁆𑀲 𑀲𑀻𑀲𑀪𑀸𑀕𑁂 𑀞𑀢𑁆𑀯𑀸 𑀫𑀡𑀺𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀦𑁆𑀢𑁄 𑀯𑀺𑀬 𑀧𑀜𑁆𑀘𑀯𑀡𑁆𑀡𑀧𑀲𑀸𑀤𑀲𑀫𑁆𑀧𑀦𑁆𑀦𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀁 𑀲𑀼𑀫𑁂𑀥𑀢𑀸𑀧𑀲𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀢𑀸𑀧𑀲𑁄 𑀩𑀼𑀤𑁆𑀥𑀢𑁆𑀢𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑀲𑁆𑀲 𑀧𑀢𑁆𑀣𑀦𑀸, 𑀉𑀤𑀸𑀳𑀼 𑀦𑁄’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀬𑀁 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀞𑀺𑀢𑀓𑁄𑀯 𑀧𑀭𑀺𑀲𑀫𑀚𑁆𑀛𑁂 𑀩𑁆𑀬𑀸𑀓𑀸𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂 𑀇𑀫𑀁 𑀉𑀕𑁆𑀕𑀢𑀧𑀁 𑀢𑀸𑀧𑀲𑀁 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. 𑀅𑀬𑀁 𑀩𑀼𑀤𑁆𑀥𑀢𑁆𑀢𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀇𑀫𑀲𑁆𑀲 𑀧𑀢𑁆𑀣𑀦𑀸. 𑀅𑀬𑀜𑁆𑀳𑀺 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀧𑀦𑀲𑁆𑀲 𑀅𑀢𑁆𑀢𑀪𑀸𑀯𑁂 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁 𑀦𑀺𑀯𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀅𑀕𑁆𑀕𑀲𑀸𑀯𑀓𑁄 𑀉𑀧𑀢𑀺𑀲𑁆𑀲𑁄 𑀦𑀸𑀫 𑀣𑁂𑀭𑁄, 𑀤𑀼𑀢𑀺𑀬𑀲𑀸𑀯𑀓𑁄 𑀓𑁄𑀮𑀺𑀢𑁄 𑀦𑀸𑀫, 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄 𑀆𑀦𑀦𑁆𑀤𑁄 𑀦𑀸𑀫, 𑀅𑀕𑁆𑀕𑀲𑀸𑀯𑀺𑀓𑀸 𑀔𑁂𑀫𑀸 𑀦𑀸𑀫 𑀣𑁂𑀭𑀻, 𑀤𑀼𑀢𑀺𑀬𑀲𑀸𑀯𑀺𑀓𑀸 𑀉𑀧𑁆𑀧𑀮𑀯𑀡𑁆𑀡𑀸 𑀦𑀸𑀫 𑀣𑁂𑀭𑀻 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀭𑀺𑀧𑀓𑁆𑀓𑀜𑀸𑀡𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀓𑀢𑁆𑀯𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀧𑀸𑀬𑀸𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀉𑀲𑁆𑀲𑀻𑀲𑀓𑁂 𑀫𑀁 𑀞𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘‘𑀧𑀲𑁆𑀲𑀣 𑀇𑀫𑀁 𑀢𑀸𑀧𑀲𑀁, 𑀚𑀝𑀺𑀮𑀁 𑀉𑀕𑁆𑀕𑀢𑀸𑀧𑀦𑀁;

𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁.

‘‘‘𑀅𑀚𑀧𑀸𑀮𑀭𑀼𑀓𑁆𑀔𑀫𑀽𑀮𑁂, 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀢𑀢𑁆𑀣 𑀧𑀸𑀬𑀸𑀲𑀁 𑀧𑀕𑁆𑀕𑀬𑁆𑀳, 𑀦𑁂𑀭𑀜𑁆𑀚𑀭𑀫𑀼𑀧𑁂𑀳𑀺𑀢𑀺.

‘‘‘𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀫𑁆𑀳𑀺, 𑀧𑀸𑀬𑀸𑀲𑀁 𑀅𑀤 𑀲𑁄 𑀚𑀺𑀦𑁄;

𑀧𑀝𑀺𑀬𑀢𑁆𑀢𑀯𑀭𑀫𑀕𑁆𑀕𑁂𑀦, 𑀩𑁄𑀥𑀺𑀫𑀽𑀮𑀫𑀼𑀧𑁂𑀳𑀺𑀢𑀺.

‘‘‘𑀢𑀢𑁄 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀩𑁄𑀥𑀺𑀫𑀡𑁆𑀟𑀁 𑀅𑀦𑀼𑀢𑁆𑀢𑀭𑁄;

𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

‘‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

‘‘‘𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺 𑀢𑀁 𑀚𑀺𑀦𑀁.

‘‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀻’’’𑀢𑀺. (𑀩𑀼. 𑀯𑀁. 𑁨.𑁬𑁦-𑁬𑁮);

𑀢𑀁 𑀲𑀼𑀢𑁆𑀯𑀸 𑀲𑀼𑀫𑁂𑀥𑀢𑀸𑀧𑀲𑁄 𑁋 ‘‘𑀫𑀬𑁆𑀳𑀁 𑀓𑀺𑀭 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀼𑀫𑁂𑀥𑀢𑀸𑀧𑀲𑁄 𑀓𑀺𑀭 𑀩𑀼𑀤𑁆𑀥𑀩𑀻𑀚𑀁 𑀩𑀼𑀤𑁆𑀥𑀗𑁆𑀓𑀼𑀭𑁄’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀅𑀳𑁄𑀲𑀺. 𑀏𑀯𑀜𑁆𑀘𑀲𑁆𑀲 𑀅𑀳𑁄𑀲𑀺 𑁋 ‘‘𑀬𑀣𑀸 𑀦𑀸𑀫 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸 𑀉𑀚𑀼𑀓𑁂𑀦 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀳𑁂𑀝𑁆𑀞𑀸𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀦𑁆𑀢𑀺, 𑀏𑀯𑀫𑁂𑀯 𑀫𑀬𑀫𑁆𑀧𑀺 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀫𑀕𑁆𑀕𑀨𑀮𑀁 𑀅𑀮𑀪𑀫𑀸𑀦𑀸 𑀅𑀦𑀸𑀕𑀢𑁂 𑀬𑀤𑀸 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀢𑀤𑀸 𑀢𑀯 𑀲𑀫𑁆𑀫𑀼𑀔𑀸 𑀫𑀕𑁆𑀕𑀨𑀮𑀁 𑀲𑀘𑁆𑀙𑀺𑀓𑀸𑀢𑀼𑀁 𑀲𑀫𑀢𑁆𑀣𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀦𑀁 𑀞𑀧𑀬𑀺𑀁𑀲𑀼. 𑀤𑀻𑀧𑀗𑁆𑀓𑀭𑀤𑀲𑀩𑀮𑁄𑀧𑀺 𑀩𑁄𑀥𑀺𑀲𑀢𑁆𑀢𑀁 𑀧𑀲𑀁𑀲𑀺𑀢𑁆𑀯𑀸 𑀅𑀝𑁆𑀞𑀧𑀼𑀧𑁆𑀨𑀫𑀼𑀝𑁆𑀞𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂𑀧𑀺 𑀘𑀢𑀼𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀔𑀻𑀡𑀸𑀲𑀯𑀸 𑀩𑁄𑀥𑀺𑀲𑀢𑁆𑀢𑀁 𑀕𑀦𑁆𑀥𑁂𑀳𑀺 𑀘 𑀫𑀸𑀮𑀸𑀳𑀺 𑀘 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀤𑁂𑀯𑀫𑀦𑀼𑀲𑁆𑀲𑀸 𑀧𑀦 𑀢𑀣𑁂𑀯 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀸.

𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑁂𑀲𑀁 𑀧𑀝𑀺𑀓𑁆𑀓𑀦𑁆𑀢𑀓𑀸𑀮𑁂 𑀲𑀬𑀦𑀸 𑀯𑀼𑀝𑁆𑀞𑀸𑀬 ‘‘𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀧𑁆𑀨𑀭𑀸𑀲𑀺𑀫𑀢𑁆𑀣𑀓𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀯𑀁 𑀦𑀺𑀲𑀺𑀦𑁆𑀦𑁂 𑀩𑁄𑀥𑀺𑀲𑀢𑁆𑀢𑁂 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀅𑀬𑁆𑀬 𑀲𑀼𑀫𑁂𑀥𑀢𑀸𑀧𑀲, 𑀧𑁄𑀭𑀸𑀡𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 ‘𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀺𑀲𑁆𑀲𑀸𑀫𑀸’𑀢𑀺 𑀦𑀺𑀲𑀺𑀦𑁆𑀦𑀓𑀸𑀮𑁂 𑀬𑀸𑀦𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀦𑀸𑀫 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀅𑀚𑁆𑀚 𑀧𑀸𑀢𑀼𑀪𑀽𑀢𑀸𑀦𑀺, 𑀦𑀺𑀲𑁆𑀲𑀁𑀲𑀬𑁂𑀦 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺. 𑀫𑀬𑀫𑁂𑀢𑀁 𑀚𑀸𑀦𑀸𑀫 ‘𑀬𑀲𑁆𑀲𑁂𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀓𑀦𑁆𑀢𑁂𑀦 𑀲𑁄 𑀩𑀼𑀤𑁆𑀥𑁄 𑀳𑁄𑀢𑀺’, 𑀢𑁆𑀯𑀁 𑀅𑀢𑁆𑀢𑀦𑁄 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀕𑁆𑀕𑀡𑁆𑀳𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑀸𑀳𑀺 𑀣𑀼𑀢𑀻𑀳𑀺 𑀅𑀪𑀺𑀢𑁆𑀣𑀯𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀁.

‘‘𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀘;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑀸.

‘‘𑀬𑀤𑀺𑀫𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀭𑀚𑁆𑀛𑀺𑀲𑁆𑀲𑀸𑀫 𑀲𑀸𑀲𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

‘‘𑀬𑀣𑀸 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸, 𑀧𑀝𑀺𑀢𑀺𑀢𑁆𑀣𑀁 𑀯𑀺𑀭𑀚𑁆𑀛𑀺𑀬;

𑀳𑁂𑀝𑁆𑀞𑀸 𑀢𑀺𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀢𑁆𑀢𑀭𑀦𑁆𑀢𑀺 𑀫𑀳𑀸𑀦𑀤𑀺𑀁.

‘‘𑀏𑀯𑀫𑁂𑀯 𑀫𑀬𑀁 𑀲𑀩𑁆𑀩𑁂, 𑀬𑀤𑀺 𑀫𑀼𑀜𑁆𑀘𑀸𑀫𑀺𑀫𑀁 𑀚𑀺𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

‘‘𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀤𑀓𑁆𑀔𑀺𑀡𑀁 𑀧𑀸𑀤𑀫𑀼𑀤𑁆𑀥𑀭𑀺.

‘‘𑀬𑁂 𑀢𑀢𑁆𑀣𑀸𑀲𑀼𑀁 𑀚𑀺𑀦𑀧𑀼𑀢𑁆𑀢𑀸, 𑀲𑀩𑁆𑀩𑁂 𑀧𑀤𑀓𑁆𑀔𑀺𑀡𑀫𑀓𑀁𑀲𑀼 𑀫𑀁;

𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼𑀁.

‘‘𑀤𑀲𑁆𑀲𑀦𑀁 𑀫𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀳𑀝𑁆𑀞𑀢𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀲𑀦𑀸 𑀯𑀼𑀝𑁆𑀞𑀳𑀺𑀁 𑀢𑀤𑀸.

‘‘𑀲𑀼𑀔𑁂𑀦 𑀲𑀼𑀔𑀺𑀢𑁄 𑀳𑁄𑀫𑀺, 𑀧𑀸𑀫𑁄𑀚𑁆𑀚𑁂𑀦 𑀧𑀫𑁄𑀤𑀺𑀢𑁄;

𑀧𑀻𑀢𑀺𑀬𑀸 𑀘 𑀅𑀪𑀺𑀲𑁆𑀲𑀦𑁆𑀦𑁄, 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀁 𑀢𑀤𑀸.

‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀯𑀲𑀻𑀪𑀽𑀢𑁄 𑀅𑀳𑀁 𑀛𑀸𑀦𑁂, 𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀢𑁄.

‘‘‘𑀤𑀲𑀲𑀳𑀲𑁆𑀲𑀺𑀮𑁄𑀓𑀫𑁆𑀳𑀺, 𑀇𑀲𑀬𑁄 𑀦𑀢𑁆𑀣𑀺 𑀫𑁂 𑀲𑀫𑀸;

𑀅𑀲𑀫𑁄 𑀇𑀤𑁆𑀥𑀺𑀥𑀫𑁆𑀫𑁂𑀲𑀼, 𑀅𑀮𑀪𑀺𑀁 𑀈𑀤𑀺𑀲𑀁 𑀲𑀼𑀔𑀁’.

‘‘𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂 𑀫𑀬𑁆𑀳𑀁, 𑀤𑀲𑀲𑀳𑀲𑁆𑀲𑀸𑀥𑀺𑀯𑀸𑀲𑀺𑀦𑁄;

𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑁂𑀲𑀼𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀬𑀸 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂;

𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂.

‘‘𑀲𑀻𑀢𑀁 𑀩𑁆𑀬𑀸𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀉𑀧𑀲𑀫𑁆𑀫𑀢𑀺;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀽, 𑀦𑀺𑀲𑁆𑀲𑀤𑁆𑀤𑀸 𑀳𑁄𑀦𑁆𑀢𑀺 𑀦𑀺𑀭𑀸𑀓𑀼𑀮𑀸;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀫𑀳𑀸𑀯𑀸𑀢𑀸 𑀦 𑀯𑀸𑀬𑀦𑁆𑀢𑀺, 𑀦 𑀲𑀦𑁆𑀤𑀦𑁆𑀢𑀺 𑀲𑀯𑀦𑁆𑀢𑀺𑀬𑁄;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀣𑀮𑀚𑀸 𑀤𑀓𑀚𑀸 𑀧𑀼𑀧𑁆𑀨𑀸, 𑀲𑀩𑁆𑀩𑁂 𑀧𑀼𑀧𑁆𑀨𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀮𑀢𑀸 𑀯𑀸 𑀬𑀤𑀺 𑀯𑀸 𑀭𑀼𑀓𑁆𑀔𑀸, 𑀨𑀮𑀪𑀸𑀭𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀨𑀮𑀺𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸, 𑀭𑀢𑀦𑀸 𑀚𑁄𑀢𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀭𑀢𑀦𑀸 𑀚𑁄𑀢𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀫𑀸𑀦𑀼𑀲𑀓𑀸 𑀘 𑀤𑀺𑀩𑁆𑀩𑀸 𑀘, 𑀢𑀼𑀭𑀺𑀬𑀸 𑀯𑀚𑁆𑀚𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚𑀼𑀪𑁄 𑀅𑀪𑀺𑀭𑀯𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀸 𑀕𑀕𑀦𑀸, 𑀅𑀪𑀺𑀯𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀺 𑀅𑀚𑁆𑀚 𑀧𑀯𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀫𑀳𑀸𑀲𑀫𑀼𑀤𑁆𑀤𑁄 𑀆𑀪𑀼𑀚𑀢𑀺, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀢𑀺;

𑀢𑁂𑀧𑀚𑁆𑀚𑀼𑀪𑁄 𑀅𑀪𑀺𑀭𑀯𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀦𑀺𑀭𑀬𑁂𑀧𑀺 𑀤𑀲𑀲𑀳𑀲𑁆𑀲𑁂, 𑀅𑀕𑁆𑀕𑀻 𑀦𑀺𑀩𑁆𑀩𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀦𑀺𑀩𑁆𑀩𑀼𑀢𑀸 𑀅𑀕𑁆𑀕𑀻, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀯𑀺𑀫𑀮𑁄 𑀳𑁄𑀢𑀺 𑀲𑀽𑀭𑀺𑀬𑁄, 𑀲𑀩𑁆𑀩𑀸 𑀤𑀺𑀲𑁆𑀲𑀦𑁆𑀢𑀺 𑀢𑀸𑀭𑀓𑀸;

𑀢𑁂𑀧𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀅𑀦𑁄𑀯𑀝𑁆𑀞𑁂𑀦 𑀉𑀤𑀓𑀁, 𑀫𑀳𑀺𑀬𑀸 𑀉𑀩𑁆𑀪𑀺𑀚𑁆𑀚𑀺 𑀢𑀸𑀯𑀤𑁂;

𑀢𑀫𑁆𑀧𑀚𑁆𑀚𑀼𑀩𑁆𑀪𑀺𑀚𑁆𑀚𑀢𑁂 𑀫𑀳𑀺𑀬𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀢𑀸𑀭𑀸𑀕𑀡𑀸 𑀯𑀺𑀭𑁄𑀘𑀦𑁆𑀢𑀺, 𑀦𑀓𑁆𑀔𑀢𑁆𑀢𑀸 𑀕𑀕𑀦𑀫𑀡𑁆𑀟𑀮𑁂;

𑀯𑀺𑀲𑀸𑀔𑀸 𑀘𑀦𑁆𑀤𑀺𑀫𑀸𑀬𑀼𑀢𑁆𑀢𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀩𑀺𑀮𑀸𑀲𑀬𑀸 𑀤𑀭𑀻𑀲𑀬𑀸, 𑀦𑀺𑀓𑁆𑀔𑀫𑀦𑁆𑀢𑀺 𑀲𑀓𑀸𑀲𑀬𑀸;

𑀢𑁂𑀧𑀚𑁆𑀚 𑀆𑀲𑀬𑀸 𑀙𑀼𑀤𑁆𑀥𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀦 𑀳𑁄𑀢𑀺 𑀅𑀭𑀢𑀺 𑀲𑀢𑁆𑀢𑀸𑀦𑀁, 𑀲𑀦𑁆𑀢𑀼𑀝𑁆𑀞𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀲𑀦𑁆𑀢𑀼𑀝𑁆𑀞𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀭𑁄𑀕𑀸 𑀢𑀤𑀼𑀧𑀲𑀫𑁆𑀫𑀦𑁆𑀢𑀺, 𑀚𑀺𑀖𑀘𑁆𑀙𑀸 𑀘 𑀯𑀺𑀦𑀲𑁆𑀲𑀢𑀺;

𑀢𑀸𑀦𑀺𑀧𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀭𑀸𑀕𑁄 𑀢𑀤𑀸 𑀢𑀦𑀼 𑀳𑁄𑀢𑀺, 𑀤𑁄𑀲𑁄 𑀫𑁄𑀳𑁄 𑀯𑀺𑀦𑀲𑁆𑀲𑀢𑀺;

𑀢𑁂𑀧𑀚𑁆𑀚 𑀯𑀺𑀕𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀪𑀬𑀁 𑀢𑀤𑀸 𑀦 𑀪𑀯𑀢𑀺, 𑀅𑀚𑁆𑀚𑀧𑁂𑀢𑀁 𑀧𑀤𑀺𑀲𑁆𑀲𑀢𑀺;

𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀭𑀚𑁄 𑀦𑀼𑀤𑁆𑀥𑀁𑀲𑀢𑀺 𑀉𑀤𑁆𑀥𑀁, 𑀅𑀚𑁆𑀚𑀧𑁂𑀢𑀁 𑀧𑀤𑀺𑀲𑁆𑀲𑀢𑀺;

𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀅𑀦𑀺𑀝𑁆𑀞𑀕𑀦𑁆𑀥𑁄 𑀧𑀓𑁆𑀓𑀫𑀢𑀺, 𑀤𑀺𑀩𑁆𑀩𑀕𑀦𑁆𑀥𑁄 𑀧𑀯𑀸𑀬𑀢𑀺;

𑀲𑁄𑀧𑀚𑁆𑀚 𑀯𑀸𑀬𑀢𑀺 𑀕𑀦𑁆𑀥𑁄, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀲𑀩𑁆𑀩𑁂 𑀤𑁂𑀯𑀸 𑀧𑀤𑀺𑀲𑁆𑀲𑀦𑁆𑀢𑀺, 𑀞𑀧𑀬𑀺𑀢𑁆𑀯𑀸 𑀅𑀭𑀽𑀧𑀺𑀦𑁄;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀬𑀸𑀯𑀢𑀸 𑀦𑀺𑀭𑀬𑀸 𑀦𑀸𑀫, 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀓𑀼𑀝𑁆𑀝𑀸 𑀓𑀯𑀸𑀝𑀸 𑀲𑁂𑀮𑀸 𑀘, 𑀦 𑀳𑁄𑀦𑁆𑀢𑀸𑀯𑀭𑀡𑀸 𑀢𑀤𑀸;

𑀆𑀓𑀸𑀲𑀪𑀽𑀢𑀸 𑀢𑁂𑀧𑀚𑁆𑀚, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀘𑀼𑀢𑀻 𑀘 𑀉𑀧𑀧𑀢𑁆𑀢𑀺 𑀘, 𑀔𑀡𑁂 𑀢𑀲𑁆𑀫𑀺𑀁 𑀦 𑀯𑀺𑀚𑁆𑀚𑀢𑀺;

𑀢𑀸𑀦𑀺𑀧𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

‘‘𑀤𑀴𑁆𑀳𑀁 𑀧𑀕𑁆𑀕𑀡𑁆𑀳 𑀯𑀻𑀭𑀺𑀬𑀁, 𑀫𑀸 𑀦𑀺𑀯𑀢𑁆𑀢 𑀅𑀪𑀺𑀓𑁆𑀓𑀫;

𑀫𑀬𑀫𑁆𑀧𑁂𑀢𑀁 𑀯𑀺𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁭𑁦-𑁧𑁦𑁭);

𑀩𑁄𑀥𑀺𑀲𑀢𑁆𑀢𑁄 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀘 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀜𑁆𑀘 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀫𑁄𑀖𑀯𑀘𑀦𑀸, 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀅𑀜𑁆𑀜𑀣𑀢𑁆𑀢𑀁. 𑀬𑀣𑀸 𑀳𑀺 𑀆𑀓𑀸𑀲𑁂 𑀔𑀺𑀢𑁆𑀢𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀁 𑀥𑀼𑀯𑀁, 𑀚𑀸𑀢𑀲𑁆𑀲 𑀫𑀭𑀡𑀁, 𑀭𑀢𑁆𑀢𑀺𑀓𑁆𑀔𑀬𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀁, 𑀆𑀲𑀬𑀸 𑀦𑀺𑀓𑁆𑀔𑀦𑁆𑀢𑀲𑀻𑀳𑀲𑁆𑀲 𑀲𑀻𑀳𑀦𑀸𑀤𑀦𑀤𑀦𑀁, 𑀕𑀭𑀼𑀕𑀩𑁆𑀪𑀸𑀬 𑀇𑀢𑁆𑀣𑀺𑀬𑀸 𑀪𑀸𑀭𑀫𑁄𑀭𑁄𑀧𑀦𑀁 𑀥𑀼𑀯𑀁 𑀅𑀯𑀲𑁆𑀲𑀫𑁆𑀪𑀸𑀯𑀻, 𑀏𑀯𑀫𑁂𑀯 𑀩𑀼𑀤𑁆𑀥𑀸𑀦𑀁 𑀯𑀘𑀦𑀁 𑀦𑀸𑀫 𑀥𑀼𑀯𑀁 𑀅𑀫𑁄𑀖𑀁, 𑀅𑀤𑁆𑀥𑀸 𑀅𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻𑀦 𑀘𑀽𑀪𑀬𑀁;

𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑁄𑀤𑀺𑀢𑁄, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

‘‘𑀅𑀤𑁆𑀯𑁂𑀚𑁆𑀛𑀯𑀘𑀦𑀸 𑀩𑀼𑀤𑁆𑀥𑀸, 𑀅𑀫𑁄𑀖𑀯𑀘𑀦𑀸 𑀚𑀺𑀦𑀸;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

‘‘𑀬𑀣𑀸 𑀔𑀺𑀢𑁆𑀢𑀁 𑀦𑀪𑁂 𑀮𑁂𑀟𑁆𑀟𑀼, 𑀥𑀼𑀯𑀁 𑀧𑀢𑀢𑀺 𑀪𑀽𑀫𑀺𑀬𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

‘‘𑀬𑀣𑀸𑀧𑀺 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀫𑀭𑀡𑀁 𑀥𑀼𑀯𑀲𑀲𑁆𑀲𑀢𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

‘‘𑀬𑀣𑀸 𑀭𑀢𑁆𑀢𑀺𑀓𑁆𑀔𑀬𑁂 𑀧𑀢𑁆𑀢𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

‘‘𑀬𑀣𑀸 𑀦𑀺𑀓𑁆𑀔𑀦𑁆𑀢𑀲𑀬𑀦𑀲𑁆𑀲, 𑀲𑀻𑀳𑀲𑁆𑀲 𑀦𑀤𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁.

‘‘𑀬𑀣𑀸 𑀆𑀧𑀦𑁆𑀦𑀲𑀢𑁆𑀢𑀸𑀦𑀁, 𑀪𑀸𑀭𑀫𑁄𑀭𑁄𑀧𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁦𑁮-𑁧𑁧𑁪);

𑀲𑁄 ‘‘𑀥𑀼𑀯𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀉𑀧𑀥𑀸𑀭𑁂𑀢𑀼𑀁 𑁋 ‘‘𑀓𑀳𑀁 𑀦𑀼 𑀔𑁄 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸, 𑀓𑀺𑀁 𑀉𑀤𑁆𑀥𑀁, 𑀉𑀤𑀸𑀳𑀼 𑀅𑀥𑁄, 𑀤𑀺𑀲𑀸𑀯𑀺𑀤𑀺𑀲𑀸𑀲𑀽’’𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀓𑀮𑀁 𑀥𑀫𑁆𑀫𑀥𑀸𑀢𑀼𑀁 𑀯𑀺𑀘𑀺𑀦𑀦𑁆𑀢𑁄 𑀧𑁄𑀭𑀸𑀡𑀓𑀩𑁄𑀥𑀺𑀲𑀢𑁆𑀢𑁂𑀳𑀺 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀯𑀁 𑀅𑀢𑁆𑀢𑀸𑀦𑀁 𑀑𑀯𑀤𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑁄 𑀉𑀤𑀓𑀓𑀼𑀫𑁆𑀪𑁄 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀉𑀤𑀓𑀁 𑀯𑀫𑀢𑀺𑀬𑁂𑀯, 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀯𑀫𑁂𑀯 𑀥𑀦𑀁 𑀯𑀸 𑀬𑀲𑀁 𑀯𑀸 𑀧𑀼𑀢𑁆𑀢𑀤𑀸𑀭𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 𑀲𑀩𑁆𑀩𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀤𑀤𑀫𑀸𑀦𑁄 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀳𑀦𑁆𑀤 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀬𑀸𑀯𑀢𑀸 𑀥𑀫𑁆𑀫𑀥𑀸𑀢𑀼𑀬𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀅𑀦𑀼𑀘𑀺𑀡𑁆𑀡𑀁 𑀫𑀳𑀸𑀧𑀣𑀁.

‘‘𑀇𑀫𑀁 𑀢𑁆𑀯𑀁 𑀧𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀤𑀸𑀦𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸𑀧𑀺 𑀓𑀼𑀫𑁆𑀪𑁄 𑀲𑀫𑁆𑀧𑀼𑀡𑁆𑀡𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀥𑁄𑀓𑀢𑁄;

𑀯𑀫𑀢𑁂𑀯𑀼𑀤𑀓𑀁 𑀦𑀺𑀲𑁆𑀲𑁂𑀲𑀁, 𑀦 𑀢𑀢𑁆𑀣 𑀧𑀭𑀺𑀭𑀓𑁆𑀔𑀢𑀺.

‘‘𑀢𑀣𑁂𑀯 𑀬𑀸𑀘𑀓𑁂 𑀤𑀺𑀲𑁆𑀯𑀸, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀤𑀤𑀸𑀳𑀺 𑀤𑀸𑀦𑀁 𑀦𑀺𑀲𑁆𑀲𑁂𑀲𑀁, 𑀓𑀼𑀫𑁆𑀪𑁄 𑀯𑀺𑀬 𑀅𑀥𑁄𑀓𑀢𑁄’’𑀢𑀺. (𑀩𑀼. 𑀯𑀁. 𑁨.𑁧𑁧𑁫-𑁧𑁧𑁯);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀲𑀻𑀮𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀘𑀫𑀭𑀻 𑀫𑀺𑀕𑁄 𑀦𑀸𑀫 𑀚𑀻𑀯𑀺𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀮𑀫𑁂𑀯 𑀭𑀓𑁆𑀔𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀇𑀢𑁄 𑀧𑀝𑁆𑀞𑀸𑀬 𑀚𑀻𑀯𑀺𑀢𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀻𑀮𑀫𑁂𑀯 𑀭𑀓𑁆𑀔𑀫𑀸𑀦𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀤𑀼𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀲𑀻𑀮𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸𑀧𑀺 𑀘𑀫𑀭𑀻 𑀯𑀸𑀮𑀁, 𑀓𑀺𑀲𑁆𑀫𑀺𑀜𑁆𑀘𑀺 𑀧𑀝𑀺𑀮𑀕𑁆𑀕𑀺𑀢𑀁;

𑀉𑀧𑁂𑀢𑀺 𑀫𑀭𑀡𑀁 𑀢𑀢𑁆𑀣, 𑀦 𑀯𑀺𑀓𑁄𑀧𑁂𑀢𑀺 𑀯𑀸𑀮𑀥𑀺𑀁.

‘‘𑀢𑀣𑁂𑀯 𑀘𑀢𑀽𑀲𑀼 𑀪𑀽𑀫𑀻𑀲𑀼, 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑀬;

𑀧𑀭𑀺𑀭𑀓𑁆𑀔 𑀲𑀤𑀸 𑀲𑀻𑀮𑀁, 𑀘𑀫𑀭𑀻 𑀯𑀺𑀬 𑀯𑀸𑀮𑀥𑀺’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁨𑁦-𑁧𑁨𑁪);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀘𑀺𑀭𑀁 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀫𑀸𑀦𑁄 𑀧𑀼𑀭𑀺𑀲𑁄 𑀦 𑀢𑀢𑁆𑀣 𑀲𑀺𑀦𑁂𑀳𑀁 𑀓𑀭𑁄𑀢𑀺, 𑀅𑀣 𑀔𑁄 𑀉𑀓𑁆𑀓𑀡𑁆𑀞𑀢𑀺𑀬𑁂𑀯, 𑀅𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑀪𑀯𑁂 𑀩𑀦𑁆𑀥𑀦𑀸𑀕𑀸𑀭𑀲𑀤𑀺𑀲𑁂 𑀓𑀢𑁆𑀯𑀸 𑀲𑀩𑁆𑀩𑀪𑀯𑁂𑀳𑀺 𑀉𑀓𑁆𑀓𑀡𑁆𑀞𑀺𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄𑀯 𑀳𑁄𑀳𑀺. 𑀏𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀢𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸 𑀅𑀦𑁆𑀤𑀼𑀖𑀭𑁂 𑀧𑀼𑀭𑀺𑀲𑁄, 𑀘𑀺𑀭𑀯𑀼𑀢𑁆𑀣𑁄 𑀤𑀼𑀔𑀝𑁆𑀝𑀺𑀢𑁄;

𑀦 𑀢𑀢𑁆𑀣 𑀭𑀸𑀕𑀁 𑀚𑀦𑁂𑀢𑀺, 𑀫𑀼𑀢𑁆𑀢𑀺𑀫𑁂𑀯 𑀕𑀯𑁂𑀲𑀢𑀺.

‘‘𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀲𑁆𑀲 𑀅𑀦𑁆𑀤𑀼𑀖𑀭𑀁 𑀯𑀺𑀬;

𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄 𑀳𑁄𑀳𑀺, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸’’𑀢𑀺. (𑀩𑀼. 𑀯𑀁. 𑁨.𑁧𑁨𑁫-𑁧𑁨𑁯);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀧𑀜𑁆𑀜𑀸𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺. 𑀳𑀻𑀦𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑁂𑀲𑀼 𑀓𑀜𑁆𑀘𑀺 𑀅𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀧𑀺𑀡𑁆𑀟𑀧𑀸𑀢𑀺𑀓𑁄 𑀪𑀺𑀓𑁆𑀔𑀼 𑀳𑀻𑀦𑀸𑀤𑀺𑀪𑁂𑀤𑁂𑀲𑀼 𑀓𑀼𑀮𑁂𑀲𑀼 𑀓𑀺𑀜𑁆𑀘𑀺 𑀅𑀯𑀚𑁆𑀚𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀔𑀺𑀧𑁆𑀧𑀁 𑀬𑀸𑀧𑀦𑀁 𑀮𑀪𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀲𑀩𑁆𑀩𑀧𑀡𑁆𑀟𑀺𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀘𑀢𑀼𑀢𑁆𑀣𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸𑀧𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀦𑁆𑀢𑁄, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀓𑀼𑀮𑀸𑀦𑀺 𑀦 𑀯𑀺𑀯𑀚𑁆𑀚𑁂𑀦𑁆𑀢𑁄, 𑀏𑀯𑀁 𑀮𑀪𑀢𑀺 𑀬𑀸𑀧𑀦𑀁.

‘‘𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀓𑀸𑀮𑀁, 𑀧𑀭𑀺𑀧𑀼𑀘𑁆𑀙𑀁 𑀩𑀼𑀥𑀁 𑀚𑀦𑀁;

𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁩𑁦-𑁧𑁩𑁪);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀯𑀻𑀭𑀺𑀬𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀬𑀣𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑁄 𑀳𑁄𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀲𑀩𑁆𑀩𑀪𑀯𑁂𑀲𑀼 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑁄 𑀅𑀦𑁄𑀮𑀻𑀦𑀯𑀻𑀭𑀺𑀬𑁄 𑀲𑀫𑀸𑀦𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀧𑀜𑁆𑀘𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀯𑀻𑀭𑀺𑀬𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸𑀧𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀮𑀻𑀦𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀺𑀢𑀫𑀦𑁄 𑀲𑀤𑀸.

‘‘𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀕𑁆𑀕𑀡𑁆𑀳 𑀯𑀻𑀭𑀺𑀬𑀁 𑀤𑀴𑁆𑀳𑀁;

𑀯𑀻𑀭𑀺𑀬𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁩𑁫-𑁧𑁩𑁯);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀙𑀝𑁆𑀞𑀁 𑀔𑀦𑁆𑀢𑀺𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀔𑀦𑁆𑀢𑀺𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀲𑀫𑁆𑀫𑀸𑀦𑀦𑁂𑀧𑀺 𑀅𑀯𑀫𑀸𑀦𑀦𑁂𑀧𑀺 𑀔𑀫𑁄𑀯 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀧𑀣𑀯𑀺𑀬𑀁 𑀦𑀸𑀫 𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀅𑀲𑀼𑀘𑀺𑀫𑁆𑀧𑀺, 𑀦 𑀢𑁂𑀦 𑀧𑀣𑀯𑀻 𑀲𑀺𑀦𑁂𑀳𑀁 𑀧𑀝𑀺𑀖𑀁 𑀓𑀭𑁄𑀢𑀺, 𑀔𑀫𑀢𑀺 𑀲𑀳𑀢𑀺 𑀅𑀥𑀺𑀯𑀸𑀲𑁂𑀢𑀺𑀬𑁂𑀯, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀫𑁆𑀫𑀸𑀦𑀦𑁂𑀧𑀺 𑀅𑀯𑀫𑀸𑀦𑀦𑁂𑀧𑀺 𑀔𑀫𑁄𑀯 𑀲𑀫𑀸𑀦𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀙𑀝𑁆𑀞𑀁 𑀔𑀦𑁆𑀢𑀺𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀙𑀝𑁆𑀞𑀫𑀁 𑀔𑀦𑁆𑀢𑀺𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀙𑀝𑁆𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀅𑀤𑁆𑀯𑁂𑀚𑁆𑀛𑀫𑀸𑀦𑀲𑁄, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

‘‘𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫, 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀘;

𑀲𑀩𑁆𑀩𑀁 𑀲𑀳𑀢𑀺 𑀦𑀺𑀓𑁆𑀔𑁂𑀧𑀁, 𑀦 𑀓𑀭𑁄𑀢𑀺 𑀧𑀝𑀺𑀖𑀁 𑀢𑀬𑀸.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑁂𑀲𑀁, 𑀲𑀫𑁆𑀫𑀸𑀦𑀸𑀯𑀫𑀸𑀦𑀓𑁆𑀔𑀫𑁄;

𑀔𑀦𑁆𑀢𑀺𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁪𑁦-𑁧𑁪𑁪);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀲𑀘𑁆𑀘𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀅𑀲𑀦𑀺𑀬𑀸 𑀫𑀢𑁆𑀣𑀓𑁂 𑀧𑀢𑀫𑀸𑀦𑀸𑀬𑀧𑀺 𑀥𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀙𑀦𑁆𑀤𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀦𑀸𑀫 𑀫𑀸 𑀪𑀸𑀲𑀺. 𑀬𑀣𑀸 𑀳𑀺 𑀑𑀲𑀥𑀻 𑀢𑀸𑀭𑀓𑀸 𑀦𑀸𑀫 𑀲𑀩𑁆𑀩𑀉𑀢𑀽𑀲𑀼 𑀅𑀢𑁆𑀢𑀦𑁄 𑀕𑀫𑀦𑀯𑀻𑀣𑀺𑀁 𑀚𑀳𑀺𑀢𑁆𑀯𑀸 𑀅𑀜𑁆𑀜𑀸𑀬 𑀯𑀻𑀣𑀺𑀬𑀸 𑀦 𑀕𑀘𑁆𑀙𑀢𑀺, 𑀲𑀓𑀯𑀻𑀣𑀺𑀬𑀸𑀯 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀘𑁆𑀘𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀁 𑀦𑀸𑀫 𑀅𑀯𑀤𑀦𑁆𑀢𑁄𑀬𑁂𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀲𑀢𑁆𑀢𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀅𑀤𑁆𑀯𑁂𑀚𑁆𑀛𑀯𑀘𑀦𑁄, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

‘‘𑀬𑀣𑀸𑀧𑀺 𑀑𑀲𑀥𑀻 𑀦𑀸𑀫, 𑀢𑀼𑀮𑀸𑀪𑀽𑀢𑀸 𑀲𑀤𑁂𑀯𑀓𑁂;

𑀲𑀫𑀬𑁂 𑀉𑀢𑀼𑀯𑀲𑁆𑀲𑁂 𑀯𑀸, 𑀦 𑀯𑁄𑀓𑁆𑀓𑀫𑀢𑀺 𑀯𑀻𑀣𑀺𑀢𑁄.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀘𑁆𑀘𑁂𑀲𑀼, 𑀫𑀸 𑀯𑁄𑀓𑁆𑀓𑀫𑀲𑀺 𑀯𑀻𑀣𑀺𑀢𑁄;

𑀲𑀘𑁆𑀘𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁪𑁫-𑁧𑁪𑁯);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀬𑀁 𑀅𑀥𑀺𑀝𑁆𑀞𑀸𑀲𑀺, 𑀢𑀲𑁆𑀫𑀺𑀁 𑀅𑀥𑀺𑀝𑁆𑀞𑀸𑀦𑁂 𑀦𑀺𑀘𑁆𑀘𑀮𑁄𑀯 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀧𑀩𑁆𑀩𑀢𑁄 𑀦𑀸𑀫 𑀲𑀩𑁆𑀩𑀸𑀲𑀼 𑀤𑀺𑀲𑀸𑀲𑀼 𑀯𑀸𑀢𑁂𑀳𑀺 𑀧𑀳𑀝𑁄 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺, 𑀅𑀢𑁆𑀢𑀦𑁄 𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀅𑀢𑁆𑀢𑀦𑁄 𑀅𑀥𑀺𑀝𑁆𑀞𑀸𑀦𑁂 𑀦𑀺𑀘𑁆𑀘𑀮𑁄 𑀳𑁄𑀦𑁆𑀢𑁄𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀅𑀝𑁆𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀢𑁆𑀯𑀁 𑀅𑀘𑀮𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

‘‘𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄;

𑀦 𑀓𑀫𑁆𑀧𑀢𑀺 𑀪𑀼𑀲𑀯𑀸𑀢𑁂𑀳𑀺, 𑀲𑀓𑀝𑁆𑀞𑀸𑀦𑁂𑀯 𑀢𑀺𑀝𑁆𑀞𑀢𑀺.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑁂, 𑀲𑀩𑁆𑀩𑀤𑀸 𑀅𑀘𑀮𑁄 𑀪𑀯;

𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁫𑁦-𑁧𑁫𑁪);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀫𑁂𑀢𑁆𑀢𑀸𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀳𑀺𑀢𑁂𑀲𑀼𑀧𑀺 𑀅𑀳𑀺𑀢𑁂𑀲𑀼𑀧𑀺 𑀏𑀓𑀘𑀺𑀢𑁆𑀢𑁄 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀉𑀤𑀓𑀁 𑀦𑀸𑀫 𑀧𑀸𑀧𑀚𑀦𑀲𑁆𑀲𑀧𑀺 𑀓𑀮𑁆𑀬𑀸𑀡𑀚𑀦𑀲𑁆𑀲𑀧𑀺 𑀲𑀻𑀢𑀪𑀸𑀯𑀁 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀨𑀭𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀏𑀓𑀘𑀺𑀢𑁆𑀢𑁄𑀯 𑀳𑁄𑀦𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀦𑀯𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀫𑁂𑀢𑁆𑀢𑀸𑀬 𑀅𑀲𑀫𑁄 𑀳𑁄𑀳𑀺, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸𑀧𑀺 𑀉𑀤𑀓𑀁 𑀦𑀸𑀫, 𑀓𑀮𑁆𑀬𑀸𑀡𑁂 𑀧𑀸𑀧𑀓𑁂 𑀚𑀦𑁂;

𑀲𑀫𑀁 𑀨𑀭𑀢𑀺 𑀲𑀻𑀢𑁂𑀦, 𑀧𑀯𑀸𑀳𑁂𑀢𑀺 𑀭𑀚𑁄𑀫𑀮𑀁.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀳𑀺𑀢𑀸𑀳𑀺𑀢𑁂, 𑀲𑀫𑀁 𑀫𑁂𑀢𑁆𑀢𑀸𑀬 𑀪𑀸𑀯𑀬;

𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁫𑁫-𑁧𑁫𑁯);

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀲𑀼𑀔𑁂𑀧𑀺 𑀤𑀼𑀓𑁆𑀔𑁂𑀧𑀺 𑀫𑀚𑁆𑀛𑀢𑁆𑀢𑁄𑀯 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀧𑀣𑀯𑀻 𑀦𑀸𑀫 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀧𑀓𑁆𑀔𑀺𑀧𑀫𑀸𑀦𑁂 𑀫𑀚𑁆𑀛𑀢𑁆𑀢𑀸𑀯 𑀳𑁄𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑁂𑀲𑀼 𑀫𑀚𑁆𑀛𑀢𑁆𑀢𑁄𑀯 𑀳𑁄𑀦𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

‘‘𑀇𑀫𑀁 𑀢𑁆𑀯𑀁 𑀤𑀲𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀼𑀮𑀸𑀪𑀽𑀢𑁄 𑀤𑀴𑁆𑀳𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

‘‘𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫, 𑀦𑀺𑀓𑁆𑀔𑀺𑀢𑁆𑀢𑀁 𑀅𑀲𑀼𑀘𑀺𑀁 𑀲𑀼𑀘𑀺𑀁;

𑀉𑀧𑁂𑀓𑁆𑀔𑀢𑀺 𑀉𑀪𑁄𑀧𑁂𑀢𑁂, 𑀓𑁄𑀧𑀸𑀦𑀼𑀦𑀬𑀯𑀚𑁆𑀚𑀺𑀢𑀸.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑁂, 𑀢𑀼𑀮𑀸𑀪𑀽𑀢𑁄 𑀲𑀤𑀸 𑀪𑀯;

𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. (𑀩𑀼. 𑀯𑀁. 𑁨.𑁧𑁬𑁦-𑁧𑁬𑁪);

𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀩𑁄𑀥𑀺𑀲𑀢𑁆𑀢𑁂𑀳𑀺 𑀧𑀽𑀭𑁂𑀢𑀩𑁆𑀩𑀸 𑀩𑁄𑀥𑀺𑀧𑀭𑀺𑀧𑀸𑀘𑀦𑀸 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀏𑀢𑁆𑀢𑀓𑀸𑀬𑁂𑀯, 𑀤𑀲 𑀧𑀸𑀭𑀫𑀺𑀬𑁄 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀦𑀢𑁆𑀣𑀺. 𑀇𑀫𑀸𑀧𑀺 𑀤𑀲 𑀧𑀸𑀭𑀫𑀺𑀬𑁄 𑀉𑀤𑁆𑀥𑀁 𑀆𑀓𑀸𑀲𑁂𑀧𑀺 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀧𑀣𑀯𑀺𑀬𑀫𑁆𑀧𑀺, 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼𑀧𑀺 𑀦𑀢𑁆𑀣𑀺, 𑀫𑀬𑁆𑀳𑀁𑀬𑁂𑀯 𑀧𑀦 𑀳𑀤𑀬𑀩𑁆𑀪𑀦𑁆𑀢𑀭𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀏𑀯𑀁 𑀢𑀸𑀲𑀁 𑀳𑀤𑀬𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀦𑁆𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀲𑀫𑁆𑀫𑀲𑀢𑀺, 𑀧𑀭𑀺𑀬𑀦𑁆𑀢𑁂 𑀕𑀳𑁂𑀢𑁆𑀯𑀸 𑀆𑀤𑀺𑀁 𑀧𑀸𑀧𑁂𑀢𑀺, 𑀆𑀤𑀺𑀫𑁆𑀳𑀺 𑀕𑀳𑁂𑀢𑁆𑀯𑀸 𑀧𑀭𑀺𑀬𑀦𑁆𑀢𑀁 𑀧𑀸𑀧𑁂𑀢𑀺, 𑀫𑀚𑁆𑀛𑁂 𑀕𑀳𑁂𑀢𑁆𑀯𑀸 𑀉𑀪𑀢𑁄 𑀓𑁄𑀝𑀺𑀁 𑀧𑀸𑀧𑁂𑀢𑁆𑀯𑀸 𑀑𑀲𑀸𑀧𑁂𑀢𑀺, 𑀉𑀪𑀢𑁄 𑀓𑁄𑀝𑀻𑀲𑀼 𑀕𑀳𑁂𑀢𑁆𑀯𑀸 𑀫𑀚𑁆𑀛𑀁 𑀧𑀸𑀧𑁂𑀢𑁆𑀯𑀸 𑀑𑀲𑀸𑀧𑁂𑀢𑀺. 𑀩𑀸𑀳𑀺𑀭𑀓𑀪𑀡𑁆𑀟𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀧𑀸𑀭𑀫𑀻 𑀦𑀸𑀫, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀉𑀧𑀧𑀸𑀭𑀫𑀻 𑀦𑀸𑀫, 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫𑀸𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀢𑁂𑀮𑀬𑀦𑁆𑀢𑀁 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁄 𑀯𑀺𑀬 𑀫𑀳𑀸𑀫𑁂𑀭𑀼𑀁 𑀫𑀢𑁆𑀣𑀁 𑀓𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑀁 𑀆𑀮𑀼𑀴𑁂𑀦𑁆𑀢𑁄 𑀯𑀺𑀬 𑀘 𑀲𑀫𑁆𑀫𑀲𑀢𑀺. 𑀢𑀲𑁆𑀲𑁂𑀯𑀁 𑀤𑀲 𑀧𑀸𑀭𑀫𑀺𑀬𑁄 𑀲𑀫𑁆𑀫𑀲𑀦𑁆𑀢𑀲𑁆𑀲 𑀥𑀫𑁆𑀫𑀢𑁂𑀚𑁂𑀦 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀳𑀢𑁆𑀣𑀺𑀦𑀸 𑀅𑀓𑁆𑀓𑀦𑁆𑀢𑀦𑀴𑀓𑀮𑀸𑀧𑁄 𑀯𑀺𑀬, 𑀧𑀻𑀴𑀺𑀬𑀫𑀸𑀦𑀁 𑀉𑀘𑁆𑀙𑀼𑀬𑀦𑁆𑀢𑀁 𑀯𑀺𑀬 𑀘 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀫𑀸𑀦𑀸 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺. 𑀓𑀼𑀮𑀸𑀮𑀘𑀓𑁆𑀓𑀁 𑀯𑀺𑀬 𑀢𑁂𑀮𑀬𑀦𑁆𑀢𑀘𑀓𑁆𑀓𑀁 𑀯𑀺𑀬 𑀘 𑀧𑀭𑀺𑀩𑁆𑀪𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀏𑀢𑁆𑀢𑀓𑀸𑀬𑁂𑀯 𑀢𑁂 𑀮𑁄𑀓𑁂, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸;

𑀢𑀤𑀼𑀤𑁆𑀥𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭, 𑀤𑀴𑁆𑀳𑀁 𑀢𑀢𑁆𑀣 𑀧𑀢𑀺𑀝𑁆𑀞𑀳.

‘‘𑀇𑀫𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄, 𑀲𑀪𑀸𑀯𑀭𑀲𑀮𑀓𑁆𑀔𑀡𑁂;

𑀥𑀫𑁆𑀫𑀢𑁂𑀚𑁂𑀦 𑀯𑀲𑀼𑀥𑀸, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀣.

‘‘𑀘𑀮𑀢𑀺 𑀭𑀯𑀢𑀺 𑀧𑀣𑀯𑀻, 𑀉𑀘𑁆𑀙𑀼𑀬𑀦𑁆𑀢𑀁𑀯 𑀧𑀻𑀴𑀺𑀢𑀁;

𑀢𑁂𑀮𑀬𑀦𑁆𑀢𑁂 𑀬𑀣𑀸 𑀘𑀓𑁆𑀓𑀁, 𑀏𑀯𑀁 𑀓𑀫𑁆𑀧𑀢𑀺 𑀫𑁂𑀤𑀦𑀻’’𑀢𑀺. (𑀩𑀼. 𑀯𑀁. 𑁨.𑁧𑁬𑁫-𑁧𑁬𑁭);

𑀫𑀳𑀸𑀧𑀣𑀯𑀺𑀬𑀸 𑀓𑀫𑁆𑀧𑀫𑀸𑀦𑀸𑀬 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀬𑀼𑀕𑀦𑁆𑀢𑀯𑀸𑀢𑀩𑁆𑀪𑀸𑀳𑀢𑀸 𑀫𑀳𑀸𑀲𑀸𑀮𑀸 𑀯𑀺𑀬 𑀫𑀼𑀘𑁆𑀙𑀺𑀢𑀸 𑀧𑀧𑀢𑀺𑀁𑀲𑀼. 𑀖𑀝𑀸𑀤𑀻𑀦𑀺 𑀓𑀼𑀮𑀸𑀮𑀪𑀸𑀚𑀦𑀸𑀦𑀺 𑀧𑀯𑀝𑁆𑀝𑀦𑁆𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀦𑁆𑀢𑀸𑀦𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀦𑀺 𑀅𑀳𑁂𑀲𑀼𑀁. 𑀫𑀳𑀸𑀚𑀦𑁄 𑀪𑀻𑀢𑀢𑀲𑀺𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀸 𑀦𑀸𑀕𑀸𑀯𑀝𑁆𑀝𑁄 𑀅𑀬𑀁, 𑀪𑀽𑀢𑀬𑀓𑁆𑀔𑀤𑁂𑀯𑀢𑀸𑀲𑀼 𑀅𑀜𑁆𑀜𑀢𑀭𑀸𑀯𑀝𑁆𑀝𑁄 𑀯𑀸𑀢𑀺 𑀦 𑀳𑀺 𑀫𑀬𑀁 𑀏𑀢𑀁 𑀚𑀸𑀦𑀸𑀫, 𑀅𑀧𑀺𑀘 𑀔𑁄 𑀲𑀩𑁆𑀩𑁄𑀧𑀺 𑀅𑀬𑀁 𑀫𑀳𑀸𑀚𑀦𑁄 𑀉𑀧𑀤𑁆𑀤𑀼𑀢𑁄, 𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀸𑀧𑀓𑀁 𑀪𑀯𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀓𑀮𑁆𑀬𑀸𑀡𑀁, 𑀓𑀣𑁂𑀣 𑀦𑁄 𑀏𑀢𑀁 𑀓𑀸𑀭𑀡’’𑀦𑁆𑀢𑀺 𑀆𑀳. 𑀅𑀣 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀣, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀦𑀢𑁆𑀣𑀺 𑀯𑁄 𑀇𑀢𑁄𑀦𑀺𑀤𑀸𑀦𑀁 𑀪𑀬𑀁. 𑀬𑁄 𑀲𑁄 𑀫𑀬𑀸 𑀅𑀚𑁆𑀚 ‘𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀩𑁆𑀬𑀸𑀓𑀢𑁄, 𑀲𑁄 𑀇𑀤𑀸𑀦𑀺 𑀤𑀲 𑀧𑀸𑀭𑀫𑀺𑀬𑁄 𑀲𑀫𑁆𑀫𑀲𑀢𑀺, 𑀢𑀲𑁆𑀲 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀺𑀮𑁄𑀴𑁂𑀦𑁆𑀢𑀲𑁆𑀲 𑀥𑀫𑁆𑀫𑀢𑁂𑀚𑁂𑀦 𑀲𑀓𑀮𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀧𑁆𑀧𑀳𑀸𑀭𑁂𑀦 𑀓𑀫𑁆𑀧𑀢𑀺 𑀘𑁂𑀯 𑀭𑀯𑀢𑀺 𑀘𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀸𑀯𑀢𑀸 𑀧𑀭𑀺𑀲𑀸 𑀆𑀲𑀺, 𑀩𑀼𑀤𑁆𑀥𑀲𑁆𑀲 𑀧𑀭𑀺𑀯𑁂𑀲𑀦𑁂;

𑀧𑀯𑁂𑀥𑀫𑀸𑀦𑀸 𑀲𑀸 𑀢𑀢𑁆𑀣, 𑀫𑀼𑀘𑁆𑀙𑀺𑀢𑀸 𑀲𑁂𑀲𑀺 𑀪𑀽𑀫𑀺𑀬𑀸.

‘‘𑀖𑀝𑀸𑀦𑁂𑀓𑀲𑀳𑀲𑁆𑀲𑀸𑀦𑀺, 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽;

𑀲𑀜𑁆𑀘𑀼𑀡𑁆𑀡𑀫𑀣𑀺𑀢𑀸 𑀢𑀢𑁆𑀣, 𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑀺𑀢𑀸.

‘‘𑀉𑀩𑁆𑀩𑀺𑀕𑁆𑀕𑀸 𑀢𑀲𑀺𑀢𑀸 𑀪𑀻𑀢𑀸, 𑀪𑀦𑁆𑀢𑀸 𑀩𑁆𑀬𑀣𑀺𑀢𑀫𑀸𑀦𑀲𑀸;

𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫, 𑀤𑀻𑀧𑀗𑁆𑀓𑀭𑀫𑀼𑀧𑀸𑀕𑀫𑀼𑀁.

‘‘𑀓𑀺𑀁 𑀪𑀯𑀺𑀲𑁆𑀲𑀢𑀺 𑀮𑁄𑀓𑀲𑁆𑀲, 𑀓𑀮𑁆𑀬𑀸𑀡𑀫𑀣 𑀧𑀸𑀧𑀓𑀁;

𑀲𑀩𑁆𑀩𑁄 𑀉𑀧𑀤𑁆𑀤𑀼𑀢𑁄 𑀮𑁄𑀓𑁄, 𑀢𑀁 𑀯𑀺𑀦𑁄𑀤𑁂𑀳𑀺 𑀘𑀓𑁆𑀔𑀼𑀫.

‘‘𑀢𑁂𑀲𑀁 𑀢𑀤𑀸 𑀲𑀜𑁆𑀜𑀸𑀧𑁂𑀲𑀺, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀯𑀺𑀲𑁆𑀲𑀢𑁆𑀣𑀸 𑀳𑁄𑀣 𑀫𑀸 𑀪𑀸𑀣, 𑀇𑀫𑀲𑁆𑀫𑀺𑀁 𑀧𑀣𑀯𑀺𑀓𑀫𑁆𑀧𑀦𑁂.

‘‘𑀬𑀫𑀳𑀁 𑀅𑀚𑁆𑀚 𑀩𑁆𑀬𑀸𑀓𑀸𑀲𑀺𑀁, ‘𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺’;

𑀏𑀲𑁄 𑀲𑀫𑁆𑀫𑀲𑀢𑀺 𑀥𑀫𑁆𑀫𑀁, 𑀧𑀼𑀩𑁆𑀩𑀓𑀁 𑀚𑀺𑀦𑀲𑁂𑀯𑀺𑀢𑀁.

‘‘𑀢𑀲𑁆𑀲 𑀲𑀫𑁆𑀫𑀲𑀢𑁄 𑀥𑀫𑁆𑀫𑀁, 𑀩𑀼𑀤𑁆𑀥𑀪𑀽𑀫𑀺𑀁 𑀅𑀲𑁂𑀲𑀢𑁄;

𑀢𑁂𑀦𑀸𑀬𑀁 𑀓𑀫𑁆𑀧𑀺𑀢𑀸 𑀧𑀣𑀯𑀻, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑁂’’𑀢𑀺. (𑀩𑀼. 𑀯𑀁. 𑁨.𑁧𑁬𑁮-𑁧𑁭𑁪);

𑀫𑀳𑀸𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀆𑀤𑀸𑀬 𑀭𑀫𑁆𑀫𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀫𑁆𑀫𑀦𑀕𑀭𑀫𑁂𑀯 𑀧𑀸𑀯𑀺𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑀲 𑀧𑀸𑀭𑀫𑀺𑀬𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀸𑀲𑀦𑀸 𑀯𑀼𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀫𑀦𑁄 𑀦𑀺𑀩𑁆𑀩𑀸𑀬𑀺 𑀢𑀸𑀯𑀤𑁂;

𑀲𑀩𑁆𑀩𑁂 𑀫𑀁 𑀉𑀧𑀲𑀗𑁆𑀓𑀫𑁆𑀫, 𑀧𑀼𑀦𑀸𑀧𑀺 𑀅𑀪𑀺𑀯𑀦𑁆𑀤𑀺𑀲𑀼𑀁.

‘‘𑀲𑀫𑀸𑀤𑀺𑀬𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀁, 𑀤𑀴𑁆𑀳𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀤𑀻𑀧𑀗𑁆𑀓𑀭𑀁 𑀦𑀫𑀲𑁆𑀲𑀺𑀢𑁆𑀯𑀸, 𑀆𑀲𑀦𑀸 𑀯𑀼𑀝𑁆𑀞𑀳𑀺𑀁 𑀢𑀤𑀸’’𑀢𑀺. (𑀩𑀼. 𑀯𑀁. 𑁨.𑁧𑁭𑁫-𑁧𑁭𑁬);

𑀅𑀣 𑀩𑁄𑀥𑀺𑀲𑀢𑁆𑀢𑀁 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀁 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀫𑀸𑀮𑀸𑀕𑀦𑁆𑀥𑁂𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀬𑁆𑀬 𑀲𑀼𑀫𑁂𑀥𑀢𑀸𑀧𑀲, 𑀢𑀬𑀸 𑀅𑀚𑁆𑀚 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀫𑀳𑀢𑀻 𑀧𑀢𑁆𑀣𑀦𑀸 𑀧𑀢𑁆𑀣𑀺𑀢𑀸, 𑀲𑀸 𑀢𑁂 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀢𑀼, 𑀫𑀸 𑀢𑁂 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀅𑀳𑁄𑀲𑀺, 𑀲𑀭𑀻𑀭𑁂 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀭𑁄𑀕𑁄 𑀫𑀸 𑀉𑀧𑁆𑀧𑀚𑁆𑀚𑀢𑀼, 𑀔𑀺𑀧𑁆𑀧𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀝𑀺𑀯𑀺𑀚𑁆𑀛. 𑀬𑀣𑀸 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀸 𑀲𑀫𑀬𑁂 𑀧𑀼𑀧𑁆𑀨𑀦𑁆𑀢𑀺 𑀘𑁂𑀯 𑀨𑀮𑀦𑁆𑀢𑀺 𑀘, 𑀢𑀣𑁂𑀯 𑀢𑁆𑀯𑀫𑁆𑀧𑀺 𑀢𑀁 𑀲𑀫𑀬𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀔𑀺𑀧𑁆𑀧𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁 𑀨𑀼𑀲𑀲𑁆𑀲𑀽’’𑀢𑀺𑀆𑀤𑀻𑀦𑀺 𑀣𑀼𑀢𑀺𑀫𑀗𑁆𑀕𑀮𑀸𑀦𑀺 𑀧𑀬𑀺𑀭𑀼𑀤𑀸𑀳𑀁𑀲𑀼. 𑀏𑀯𑀜𑁆𑀘 𑀧𑀬𑀺𑀭𑀼𑀤𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑁂𑀯𑀢𑀸𑀳𑀺 𑀅𑀪𑀺𑀢𑁆𑀣𑀯𑀺𑀢𑁄 𑁋 ‘‘𑀅𑀳𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀬 𑀦𑀪𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀁 𑀧𑀼𑀧𑁆𑀨𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄;

𑀲𑀫𑁄𑀓𑀺𑀭𑀦𑁆𑀢𑀺 𑀧𑀼𑀧𑁆𑀨𑁂𑀳𑀺, 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀆𑀲𑀦𑀸.

‘‘𑀯𑁂𑀤𑀬𑀦𑁆𑀢𑀺 𑀘 𑀢𑁂 𑀲𑁄𑀢𑁆𑀣𑀺𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄;

𑀫𑀳𑀦𑁆𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀢𑀁 𑀮𑀪𑀲𑁆𑀲𑀼 𑀬𑀣𑀺𑀘𑁆𑀙𑀺𑀢𑀁.

‘‘𑀲𑀩𑁆𑀩𑀻𑀢𑀺𑀬𑁄 𑀯𑀺𑀯𑀚𑁆𑀚𑀦𑁆𑀢𑀼, 𑀲𑁄𑀓𑁄 𑀭𑁄𑀕𑁄 𑀯𑀺𑀦𑀲𑁆𑀲𑀢𑀼;

𑀫𑀸 𑀢𑁂 𑀪𑀯𑀦𑁆𑀢𑁆𑀯𑀦𑁆𑀢𑀭𑀸𑀬𑀸, 𑀨𑀼𑀲 𑀔𑀺𑀧𑁆𑀧𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀬𑀣𑀸𑀧𑀺 𑀲𑀫𑀬𑁂 𑀧𑀢𑁆𑀢𑁂, 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀺𑀦𑁄 𑀤𑀼𑀫𑀸;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀤𑁆𑀥𑀜𑀸𑀡𑁂𑀦 𑀧𑀼𑀧𑁆𑀨𑀲𑀼.

‘‘𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀧𑀽𑀭𑀬𑀼𑀁 𑀤𑀲 𑀧𑀸𑀭𑀫𑀻;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀧𑀽𑀭𑀬 𑀤𑀲 𑀧𑀸𑀭𑀫𑀻.

‘‘𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀩𑁄𑀥𑀺𑀫𑀡𑁆𑀟𑀫𑁆𑀳𑀺 𑀩𑀼𑀚𑁆𑀛𑀭𑁂;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀚𑁆𑀛𑀲𑁆𑀲𑀼 𑀚𑀺𑀦𑀩𑁄𑀥𑀺𑀬𑀁.

‘‘𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀼𑀁;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬.

‘‘𑀧𑀼𑀡𑁆𑀡𑀫𑀸𑀬𑁂 𑀬𑀣𑀸 𑀘𑀦𑁆𑀤𑁄, 𑀧𑀭𑀺𑀲𑀼𑀤𑁆𑀥𑁄 𑀯𑀺𑀭𑁄𑀘𑀢𑀺;

𑀢𑀣𑁂𑀯 𑀢𑁆𑀯𑀁 𑀧𑀼𑀡𑁆𑀡𑀫𑀦𑁄, 𑀯𑀺𑀭𑁄𑀘 𑀤𑀲𑀲𑀳𑀲𑁆𑀲𑀺𑀬𑀁.

‘‘𑀭𑀸𑀳𑀼𑀫𑀼𑀢𑁆𑀢𑁄 𑀬𑀣𑀸 𑀲𑀽𑀭𑀺𑀬𑁄, 𑀢𑀸𑀧𑁂𑀦 𑀅𑀢𑀺𑀭𑁄𑀘𑀢𑀺;

𑀢𑀣𑁂𑀯 𑀮𑁄𑀓𑀸 𑀫𑀼𑀘𑁆𑀘𑀺𑀢𑁆𑀯𑀸, 𑀯𑀺𑀭𑁄𑀘 𑀲𑀺𑀭𑀺𑀬𑀸 𑀢𑀼𑀯𑀁.

‘‘𑀬𑀣𑀸 𑀬𑀸 𑀓𑀸𑀘𑀺 𑀦𑀤𑀺𑀬𑁄, 𑀑𑀲𑀭𑀦𑁆𑀢𑀺 𑀫𑀳𑁄𑀤𑀥𑀺𑀁;

𑀏𑀯𑀁 𑀲𑀤𑁂𑀯𑀓𑀸 𑀮𑁄𑀓𑀸, 𑀑𑀲𑀭𑀦𑁆𑀢𑀼 𑀢𑀯𑀦𑁆𑀢𑀺𑀓𑁂.

‘‘𑀢𑁂𑀳𑀺 𑀣𑀼𑀢𑀧𑁆𑀧𑀲𑀢𑁆𑀣𑁄 𑀲𑁄, 𑀤𑀲 𑀥𑀫𑁆𑀫𑁂 𑀲𑀫𑀸𑀤𑀺𑀬;

𑀢𑁂 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀧𑀯𑀦𑀁 𑀧𑀸𑀯𑀺𑀲𑀻 𑀢𑀤𑀸’’𑀢𑀺. (𑀩𑀼. 𑀯𑀁. 𑁨.𑁧𑁭𑁭-𑁧𑁮𑁭);

𑀲𑀼𑀫𑁂𑀥𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄𑀧𑀺 𑀔𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀭𑀡𑀸𑀤𑀻𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀭𑀫𑁆𑀫𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀦𑁆𑀢𑁄 𑀲𑀩𑁆𑀩𑀁 𑀩𑀼𑀤𑁆𑀥𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀩𑀼𑀤𑁆𑀥𑀯𑀁𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀢𑀤𑀸 𑀢𑁂 𑀪𑁄𑀚𑀬𑀺𑀢𑁆𑀯𑀸𑀦, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀉𑀧𑀕𑀘𑁆𑀙𑀼𑀁 𑀲𑀭𑀡𑀁 𑀢𑀲𑁆𑀲, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

‘‘𑀲𑀭𑀡𑀕𑀫𑀦𑁂 𑀓𑀜𑁆𑀘𑀺, 𑀦𑀺𑀯𑁂𑀲𑁂𑀲𑀺 𑀢𑀣𑀸𑀕𑀢𑁄;

𑀓𑀜𑁆𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀲𑀻𑀮𑁂 𑀤𑀲𑀯𑀺𑀥𑁂 𑀧𑀭𑀁.

‘‘𑀓𑀲𑁆𑀲𑀘𑀺 𑀤𑁂𑀢𑀺 𑀲𑀸𑀫𑀜𑁆𑀜𑀁, 𑀘𑀢𑀼𑀭𑁄 𑀨𑀮𑀫𑀼𑀢𑁆𑀢𑀫𑁂;

𑀓𑀲𑁆𑀲𑀘𑀺 𑀅𑀲𑀫𑁂 𑀥𑀫𑁆𑀫𑁂, 𑀤𑁂𑀢𑀺 𑀲𑁄 𑀧𑀝𑀺𑀲𑀫𑁆𑀪𑀺𑀤𑀸.

‘‘𑀓𑀲𑁆𑀲𑀘𑀺 𑀯𑀭𑀲𑀫𑀸𑀧𑀢𑁆𑀢𑀺𑀬𑁄, 𑀅𑀝𑁆𑀞 𑀤𑁂𑀢𑀺 𑀦𑀭𑀸𑀲𑀪𑁄;

𑀢𑀺𑀲𑁆𑀲𑁄 𑀓𑀲𑁆𑀲𑀘𑀺 𑀯𑀺𑀚𑁆𑀚𑀸𑀬𑁄, 𑀙𑀴𑀪𑀺𑀜𑁆𑀜𑀸 𑀧𑀯𑁂𑀘𑁆𑀙𑀢𑀺.

‘‘𑀢𑁂𑀦 𑀬𑁄𑀕𑁂𑀦 𑀚𑀦𑀓𑀸𑀬𑀁, 𑀑𑀯𑀤𑀢𑀺 𑀫𑀳𑀸𑀫𑀼𑀦𑀺;

𑀢𑁂𑀦 𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

‘‘𑀫𑀳𑀸𑀳𑀦𑀽𑀲𑀪𑀓𑁆𑀔𑀦𑁆𑀥𑁄, 𑀤𑀻𑀧𑀗𑁆𑀓𑀭𑀲𑀦𑀸𑀫𑀓𑁄;

𑀩𑀳𑀽 𑀚𑀦𑁂 𑀢𑀸𑀭𑀬𑀢𑀺, 𑀧𑀭𑀺𑀫𑁄𑀘𑁂𑀢𑀺 𑀤𑀼𑀕𑁆𑀕𑀢𑀺𑀁.

‘‘𑀩𑁄𑀥𑀦𑁂𑀬𑁆𑀬𑀁 𑀚𑀦𑀁 𑀤𑀺𑀲𑁆𑀯𑀸, 𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂;

𑀔𑀡𑁂𑀦 𑀉𑀧𑀕𑀦𑁆𑀢𑁆𑀯𑀸𑀦, 𑀩𑁄𑀥𑁂𑀢𑀺 𑀢𑀁 𑀫𑀳𑀸𑀫𑀼𑀦𑀺.

‘‘𑀧𑀞𑀫𑀸𑀪𑀺𑀲𑀫𑀬𑁂 𑀩𑀼𑀤𑁆𑀥𑁄, 𑀓𑁄𑀝𑀺𑀲𑀢𑀫𑀩𑁄𑀥𑀬𑀺;

𑀤𑀼𑀢𑀺𑀬𑀸𑀪𑀺𑀲𑀫𑀬𑁂 𑀦𑀸𑀣𑁄, 𑀦𑀯𑀼𑀢𑀺𑀓𑁄𑀝𑀺𑀫𑀩𑁄𑀥𑀬𑀺.

‘‘𑀬𑀤𑀸 𑀘 𑀤𑁂𑀯𑀪𑀯𑀦𑀫𑁆𑀳𑀺, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

‘‘𑀧𑀼𑀦 𑀦𑀸𑀭𑀤𑀓𑀽𑀝𑀫𑁆𑀳𑀺, 𑀧𑀯𑀺𑀯𑁂𑀓𑀕𑀢𑁂 𑀚𑀺𑀦𑁂;

𑀔𑀻𑀡𑀸𑀲𑀯𑀸 𑀯𑀻𑀢𑀫𑀮𑀸, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄.

‘‘𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀲𑀼𑀤𑀲𑁆𑀲𑀦𑀲𑀺𑀮𑀼𑀘𑁆𑀘𑀬𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀧𑀯𑀸𑀭𑁂𑀲𑀺 𑀫𑀳𑀸𑀫𑀼𑀦𑀺.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀘𑀭𑀡𑁄, 𑀧𑀜𑁆𑀘𑀸𑀪𑀺𑀜𑁆𑀜𑀸𑀲𑀼 𑀧𑀸𑀭𑀕𑀽.

‘‘𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑀸, 𑀕𑀡𑀦𑀢𑁄 𑀅𑀲𑀗𑁆𑀔𑀺𑀬𑀸.

‘‘𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁, 𑀇𑀤𑁆𑀥𑀁 𑀨𑀻𑀢𑀁 𑀅𑀳𑀽 𑀢𑀤𑀸;

𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀭𑀁 𑀲𑀼𑀯𑀺𑀲𑁄𑀥𑀺𑀢𑀁.

‘‘𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀤𑀻𑀧𑀗𑁆𑀓𑀭𑀁 𑀮𑁄𑀓𑀯𑀺𑀤𑀼𑀁 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸.

‘‘𑀬𑁂 𑀓𑁂𑀘𑀺 𑀢𑁂𑀦 𑀲𑀫𑀬𑁂𑀦, 𑀚𑀳𑀦𑁆𑀢𑀺 𑀫𑀸𑀦𑀼𑀲𑀁 𑀪𑀯𑀁;

𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀲𑁂𑀔𑀸, 𑀕𑀭𑀳𑀺𑀢𑀸 𑀪𑀯𑀦𑁆𑀢𑀺 𑀢𑁂.

‘‘𑀲𑀼𑀧𑀼𑀧𑁆𑀨𑀺𑀢𑀁 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀢𑀸𑀤𑀺𑀪𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀉𑀧𑀲𑁄𑀪𑀢𑀺 𑀲𑀩𑁆𑀩𑀤𑀸.

‘‘𑀦𑀕𑀭𑀁 𑀭𑀫𑁆𑀫𑀯𑀢𑀻 𑀦𑀸𑀫, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀫𑁂𑀥𑀸 𑀦𑀸𑀫 𑀚𑀦𑀺𑀓𑀸, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

‘‘𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀧𑀤𑀼𑀫𑀸 𑀦𑀸𑀫 𑀲𑀸 𑀦𑀸𑀭𑀻, 𑀉𑀲𑀪𑀓𑁆𑀔𑀦𑁆𑀥𑁄 𑀅𑀢𑁆𑀭𑀚𑁄.

‘‘𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑁂 𑀧𑀤𑀳𑀻 𑀚𑀺𑀦𑁄.

‘‘𑀧𑀥𑀸𑀦𑀘𑀸𑀭𑀁 𑀘𑀭𑀺𑀢𑁆𑀯𑀸𑀦, 𑀅𑀩𑀼𑀚𑁆𑀛𑀺 𑀫𑀸𑀦𑀲𑀁 𑀫𑀼𑀦𑀺;

𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺.

‘‘𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀦𑀦𑁆𑀤𑀸𑀭𑀸𑀫𑁂 𑀲𑀺𑀭𑀻𑀖𑀭𑁂;

𑀦𑀺𑀲𑀺𑀦𑁆𑀦𑁄 𑀲𑀺𑀭𑀻𑀲𑀫𑀽𑀮𑀫𑁆𑀳𑀺, 𑀅𑀓𑀸𑀲𑀺 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁.

‘‘𑀲𑀼𑀫𑀗𑁆𑀕𑀮𑁄 𑀘 𑀢𑀺𑀲𑁆𑀲𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀸𑀕𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑀲𑀼𑀦𑀦𑁆𑀤𑀸 𑀘‘‘𑀦𑀦𑁆𑀤𑀸 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀧𑀺𑀧𑁆𑀨𑀮𑀻𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀦𑀸𑀫, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀲𑀺𑀭𑀺𑀫𑀸 𑀓𑁄𑀡𑀸 𑀉𑀧𑀝𑁆𑀞𑀺𑀓𑀸, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

‘‘𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑀺 𑀤𑀻𑀧𑀭𑀼𑀓𑁆𑀔𑁄𑀯, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

‘‘𑀧𑀪𑀸 𑀯𑀺𑀥𑀸𑀯𑀢𑀺 𑀢𑀲𑁆𑀲, 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲 𑀬𑁄𑀚𑀦𑁂;

𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

‘‘𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

‘‘𑀲𑀸 𑀘 𑀇𑀤𑁆𑀥𑀺 𑀲𑁄 𑀘 𑀬𑀲𑁄, 𑀢𑀸𑀦𑀺 𑀘 𑀧𑀸𑀤𑁂𑀲𑀼 𑀘𑀓𑁆𑀓𑀭𑀢𑀦𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸𑀢𑀺.

‘‘𑀤𑀻𑀧𑀗𑁆𑀓𑀭𑁄 𑀚𑀺𑀦𑁄 𑀲𑀢𑁆𑀣𑀸, 𑀦𑀦𑁆𑀤𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀢𑀲𑁆𑀲 𑀚𑀺𑀦𑀣𑀽𑀧𑁄, 𑀙𑀢𑁆𑀢𑀺𑀁𑀲𑀼𑀩𑁆𑀩𑁂𑀥𑀬𑁄𑀚𑀦𑁄’’𑀢𑀺. (𑀩𑀼. 𑀯𑀁. 𑁩.𑁧-𑁩𑁧);

𑀓𑁄𑀡𑁆𑀟𑀜𑁆𑀜𑁄 𑀩𑀼𑀤𑁆𑀥𑁄

𑀤𑀻𑀧𑀗𑁆𑀓𑀭𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁, 𑀤𑀼𑀢𑀺𑀬𑁂 𑀓𑁄𑀝𑀺𑀲𑀳𑀲𑁆𑀲𑀁, 𑀢𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀩𑁄𑀥𑀺𑀲𑀢𑁆𑀢𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀲𑁆𑀲 𑀧𑀦 𑀭𑀫𑁆𑀫𑀯𑀢𑀻 𑀦𑀸𑀫 𑀦𑀕𑀭𑀁, 𑀲𑀼𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀲𑀼𑀚𑀸𑀢𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀪𑀤𑁆𑀤𑁄 𑀘 𑀲𑀼𑀪𑀤𑁆𑀤𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀦𑀼𑀭𑀼𑀤𑁆𑀥𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀢𑀺𑀲𑁆𑀲𑀸 𑀘 𑀉𑀧𑀢𑀺𑀲𑁆𑀲𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀓𑀮𑁆𑀬𑀸𑀡𑀺𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺.

‘‘𑀤𑀻𑀧𑀗𑁆𑀓𑀭𑀲𑁆𑀲 𑀅𑀧𑀭𑁂𑀦, 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀦𑀸𑀬𑀓𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄’’.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀬𑁂𑀯 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑁋 𑀫𑀗𑁆𑀕𑀮𑁄, 𑀲𑀼𑀫𑀦𑁄, 𑀭𑁂𑀯𑀢𑁄, 𑀲𑁄𑀪𑀺𑀢𑁄𑀢𑀺. 𑀫𑀗𑁆𑀕𑀮𑀲𑁆𑀲 𑀪𑀕𑀯𑀢𑁄 𑀢𑀻𑀲𑀼 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁂𑀲𑀼 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁, 𑀢𑀢𑀺𑀬𑁂 𑀦𑀯𑀼𑀝𑀺𑀓𑁄𑀝𑀺𑀬𑁄. 𑀯𑁂𑀫𑀸𑀢𑀺𑀓𑀪𑀸𑀢𑀸 𑀓𑀺𑀭𑀲𑁆𑀲 𑀆𑀦𑀦𑁆𑀤𑀓𑀼𑀫𑀸𑀭𑁄 𑀦𑀸𑀫 𑀦𑀯𑀼𑀢𑀺𑀓𑁄𑀝𑀺𑀲𑀗𑁆𑀔𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀲𑁄 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀧𑀼𑀩𑁆𑀩𑀘𑀭𑀺𑀢𑀁 𑀑𑀮𑁄𑀓𑁂𑀦𑁆𑀢𑁄 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀆𑀳. 𑀲𑀩𑁆𑀩𑁂 𑀢𑀗𑁆𑀔𑀡𑀜𑁆𑀜𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀣𑁂𑀭𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀅𑀬𑀫𑀲𑁆𑀲 𑀢𑀢𑀺𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

𑀬𑀣𑀸 𑀧𑀦 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀸𑀬𑁂𑀯 𑀲𑀭𑀻𑀭𑀧𑁆𑀧𑀪𑀸 𑀅𑀳𑁄𑀲𑀺, 𑀦 𑀏𑀯𑀁 𑀢𑀲𑁆𑀲. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀓𑀸𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀼𑀓𑁆𑀔𑀧𑀣𑀯𑀻𑀧𑀩𑁆𑀩𑀢𑀲𑀫𑀼𑀤𑁆𑀤𑀸𑀤𑀬𑁄 𑀅𑀦𑁆𑀢𑀫𑀲𑁄 𑀉𑀓𑁆𑀔𑀮𑀺𑀬𑀸𑀤𑀻𑀦𑀺 𑀉𑀧𑀸𑀤𑀸𑀬 𑀲𑀼𑀯𑀡𑁆𑀡𑀧𑀝𑁆𑀝𑀧𑀭𑀺𑀬𑁄𑀦𑀤𑁆𑀥𑀸 𑀯𑀺𑀬 𑀅𑀳𑁂𑀲𑀼𑀁. 𑀆𑀬𑀼𑀧𑁆𑀧𑀫𑀸𑀡𑀁 𑀧𑀦𑀲𑁆𑀲 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀬𑁄 𑀅𑀢𑁆𑀢𑀦𑁄 𑀧𑀪𑀸𑀬 𑀯𑀺𑀭𑁄𑀘𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑁂𑀦 𑀯𑀺𑀬 𑀲𑀢𑁆𑀢𑀸 𑀦𑀺𑀘𑁆𑀘𑀁 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀯𑀺𑀘𑀭𑀺𑀁𑀲𑀼. 𑀲𑀸𑀬𑀁 𑀧𑀼𑀧𑁆𑀨𑀺𑀢𑀓𑀼𑀲𑀼𑀫𑀸𑀦𑀁 𑀧𑀸𑀢𑁄 𑀘 𑀭𑀯𑀦𑀓𑀲𑀓𑀼𑀡𑀸𑀤𑀻𑀦𑀜𑁆𑀘 𑀯𑀲𑁂𑀦 𑀮𑁄𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁 𑀲𑀮𑁆𑀮𑀓𑁆𑀔𑁂𑀲𑀺.

𑀓𑀺𑀁 𑀧𑀦 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀢𑁂𑀧𑀺 𑀳𑀺 𑀆𑀓𑀗𑁆𑀔𑀫𑀸𑀦𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀸 𑀢𑀢𑁄 𑀯𑀸 𑀪𑀺𑀬𑁆𑀬𑁄 𑀆𑀪𑀸𑀬 𑀨𑀭𑁂𑀬𑁆𑀬𑀼𑀁. 𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀅𑀜𑁆𑀜𑁂𑀲𑀁 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀫𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀘𑀭𑀺𑀬𑀘𑀭𑀡𑀓𑀸𑀮𑁂 𑀯𑁂𑀲𑁆𑀲𑀦𑁆𑀢𑀭𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂𑀞𑀺𑀢𑁄 𑀲𑀧𑀼𑀢𑁆𑀢𑀤𑀸𑀭𑁄 𑀯𑀗𑁆𑀓𑀧𑀩𑁆𑀩𑀢𑀲𑀤𑀺𑀲𑁂 𑀧𑀩𑁆𑀩𑀢𑁂 𑀯𑀲𑀺. 𑀅𑀣𑁂𑀓𑁄 𑀔𑀭𑀤𑀸𑀞𑀺𑀓𑁄 𑀦𑀸𑀫 𑀬𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑁆𑀯𑁂 𑀤𑀸𑀭𑀓𑁂 𑀬𑀸𑀘𑀺. 𑀫𑀳𑀸𑀲𑀢𑁆𑀢𑁄 ‘‘𑀤𑀤𑀸𑀫𑀺, 𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑀓𑁂’’𑀢𑀺 𑀯𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀓𑀧𑀭𑀺𑀬𑀦𑁆𑀢𑀁 𑀫𑀳𑀸𑀧𑀣𑀯𑀺𑀁 𑀓𑀫𑁆𑀧𑁂𑀦𑁆𑀢𑁄 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀅𑀤𑀸𑀲𑀺. 𑀬𑀓𑁆𑀔𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀲𑀢𑁆𑀢𑀲𑁆𑀲 𑀫𑀼𑀮𑀸𑀮𑀓𑀮𑀸𑀧𑀁 𑀯𑀺𑀬 𑀤𑀸𑀭𑀓𑁂 𑀔𑀸𑀤𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀫𑀼𑀔𑁂 𑀯𑀺𑀯𑀝𑀫𑀢𑁆𑀢𑁂 𑀅𑀕𑁆𑀕𑀺𑀚𑀸𑀮𑀁 𑀯𑀺𑀬 𑀮𑁄𑀳𑀺𑀢𑀥𑀸𑀭𑀁 𑀉𑀕𑁆𑀕𑀺𑀭𑀫𑀸𑀦𑀁 𑀢𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸𑀧𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀺. ‘‘𑀲𑀼𑀤𑀺𑀦𑁆𑀦𑀁 𑀯𑀢 𑀫𑁂 𑀤𑀸𑀦’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀧𑀦𑀲𑁆𑀲 𑀲𑀭𑀻𑀭𑁂 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀲𑁄 ‘‘𑀇𑀫𑀲𑁆𑀲 𑀫𑁂 𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀢𑀲𑁆𑀲 𑀢𑀁 𑀧𑀢𑁆𑀣𑀦𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀨𑀭𑀺𑀁𑀲𑀼.

𑀅𑀧𑀭𑀫𑁆𑀧𑀺𑀲𑁆𑀲 𑀧𑀼𑀩𑁆𑀩𑀘𑀭𑀺𑀬𑀁 𑀅𑀢𑁆𑀣𑀺. 𑀲𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀬𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀡𑁆𑀟𑀓𑀤𑀻𑀧𑀺𑀓𑀸𑀯𑁂𑀞𑀦𑀦𑀺𑀬𑀸𑀫𑁂𑀦 𑀲𑀓𑀮𑀲𑀭𑀻𑀭𑀁 𑀯𑁂𑀞𑀸𑀧𑁂𑀢𑁆𑀯𑀸 𑀭𑀢𑀦𑀫𑀢𑁆𑀢𑀫𑀓𑀼𑀴𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀲𑁆𑀲𑀯𑀝𑁆𑀝𑀺𑀬𑁄 𑀚𑀸𑀮𑁂𑀢𑁆𑀯𑀸 𑀢𑀁 𑀲𑀻𑀲𑁂𑀦𑀸𑀤𑀸𑀬 𑀲𑀓𑀮𑀲𑀭𑀻𑀭𑀁 𑀚𑀸𑀮𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀲𑀓𑀮𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀏𑀯𑀁 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀸𑀬𑀫𑀦𑁆𑀢𑀲𑁆𑀲𑀸𑀧𑀺𑀲𑁆𑀲 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀲𑀼𑀫𑀁 𑀦 𑀕𑀡𑁆𑀳𑀺. 𑀧𑀤𑀼𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀥𑀫𑁆𑀫𑁄 𑀳𑀺 𑀦𑀸𑀫𑁂𑀲 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀭𑀓𑁆𑀔𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨) 𑁋

𑀇𑀫𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑁄𑀪𑀸𑀲𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀼𑀭𑀼𑀘𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀢𑁆𑀢𑀓𑁂𑀳𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄’’𑀢𑀺? ‘‘𑀓𑀺𑀢𑁆𑀢𑀓𑀸 𑀧𑀦 𑀯𑁄, 𑀪𑀦𑁆𑀢𑁂, 𑀧𑀭𑀺𑀯𑀸𑀭𑀪𑀺𑀓𑁆𑀔𑀽’’𑀢𑀺 𑀆𑀳. 𑀢𑀤𑀸 𑀲𑀢𑁆𑀣𑀼 𑀧𑀞𑀫𑀲𑀦𑁆𑀦𑀺𑀧𑀸𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑁄𑀝𑀺𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀆𑀳. ‘‘𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺𑀧𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀪𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀧𑀦 𑀓𑀣𑀁 𑀪𑀯𑀺𑀲𑁆𑀲𑀢𑀻’’𑀢𑀺?

𑀢𑀲𑁆𑀲 𑀲𑀸 𑀘𑀺𑀦𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀣𑀓𑁂 𑀞𑀺𑀢𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀲𑁆𑀲 𑀉𑀡𑁆𑀳𑀪𑀸𑀯𑀁 𑀚𑀦𑁂𑀲𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀲𑀼𑀭𑀼𑀘𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑀢𑁆𑀣𑀸𑀬 𑀘𑀺𑀦𑁆𑀢𑁂𑀲𑀺, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀟𑁆𑀠𑀓𑀺𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀳𑀢𑁆𑀣𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀲𑁆𑀲𑀘𑀺 𑀪𑀢𑀺𑀬𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀫𑀫 𑀅𑀚𑀸𑀦𑀦𑀲𑀺𑀧𑁆𑀧𑀁 𑀦𑀸𑀫 𑀦𑀢𑁆𑀣𑀺, 𑀕𑁂𑀳𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀬𑁄 𑀬𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀢𑀁 𑀓𑀸𑀢𑀼𑀁 𑀚𑀸𑀦𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑁆𑀳𑀁 𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺. ‘‘𑀓𑀺𑀁, 𑀅𑀬𑁆𑀬𑀸’’𑀢𑀺? ‘‘𑀲𑁆𑀯𑀸𑀢𑀦𑀸𑀬 𑀫𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀸. 𑀢𑁂𑀲𑀁 𑀦𑀺𑀲𑀻𑀤𑀦𑀫𑀡𑁆𑀟𑀧𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀅𑀳𑀁 𑀦𑀸𑀫 𑀓𑀭𑁂𑀬𑁆𑀬𑀁 𑀲𑀘𑁂 𑀫𑁂 𑀪𑀢𑀺𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀲𑀸𑀥𑀼 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀤𑁂𑀲𑀁 𑀑𑀮𑁄𑀓𑁂𑀲𑀺. 𑀤𑁆𑀯𑀸𑀤𑀲𑀢𑁂𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀬 𑀲𑀫𑀢𑀮𑁄 𑀅𑀳𑁄𑀲𑀺. 𑀲𑁄 ‘‘𑀏𑀢𑁆𑀢𑀓𑁂 𑀞𑀸𑀦𑁂 𑀲𑀢𑁆𑀢𑀭𑀢𑀦𑀫𑀬𑁄 𑀫𑀡𑁆𑀟𑀧𑁄 𑀉𑀝𑁆𑀞𑀳𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀢𑀸𑀯𑀤𑁂𑀯 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀡𑁆𑀟𑀧𑁄 𑀉𑀝𑁆𑀞𑀳𑀺. 𑀢𑀲𑁆𑀲 𑀲𑁄𑀯𑀡𑁆𑀡𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀭𑀚𑀢𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁, 𑀭𑀚𑀢𑀫𑀬𑁂𑀲𑀼 𑀲𑁄𑀯𑀡𑁆𑀡𑀫𑀬𑀸, 𑀫𑀡𑀺𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀧𑀯𑀸𑀴𑀫𑀬𑀸, 𑀧𑀯𑀸𑀴𑀫𑀬𑁂𑀲𑀼 𑀫𑀡𑀺𑀫𑀬𑀸, 𑀲𑀢𑁆𑀢𑀭𑀢𑀦𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑀢𑁆𑀢𑀭𑀢𑀦𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁. 𑀢𑀢𑁄 ‘‘𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑁂 𑀓𑀺𑀗𑁆𑀓𑀡𑀺𑀓𑀚𑀸𑀮𑀁 𑀑𑀮𑀫𑁆𑀩𑀢𑀽’’𑀢𑀺 𑀑𑀮𑁄𑀓𑁂𑀲𑀺. 𑀲𑀳 𑀑𑀮𑁄𑀓𑀦𑁂𑀦𑁂𑀯 𑀚𑀸𑀮𑀁 𑀑𑀮𑀫𑁆𑀩𑀺. 𑀬𑀲𑁆𑀲 𑀫𑀦𑁆𑀤𑀯𑀸𑀢𑁂𑀭𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀲𑁆𑀲𑁂𑀯 𑀢𑀽𑀭𑀺𑀬𑀲𑁆𑀲 𑀫𑀥𑀼𑀭𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺. 𑀤𑀺𑀩𑁆𑀩𑀲𑀗𑁆𑀕𑀻𑀢𑀺𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. ‘‘𑀅𑀦𑁆𑀢𑀭𑀦𑁆𑀢𑀭𑀸 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀦𑀺 𑀑𑀮𑀫𑁆𑀩𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀸𑀮𑀸𑀤𑀸𑀫𑀸𑀦𑀺 𑀑𑀮𑀫𑁆𑀩𑀺𑀁𑀲𑀼. ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀘 𑀆𑀥𑀸𑀭𑀓𑀸𑀦𑀺 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀸𑀯𑀤𑁂𑀯 𑀉𑀝𑁆𑀞𑀳𑀺𑀁𑀲𑀼. ‘‘𑀓𑁄𑀡𑁂 𑀓𑁄𑀡𑁂 𑀏𑀓𑁂𑀓𑀸 𑀉𑀤𑀓𑀘𑀸𑀝𑀺𑀬𑁄 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀉𑀤𑀓𑀘𑀸𑀝𑀺𑀬𑁄 𑀉𑀝𑁆𑀞𑀳𑀺𑀁𑀲𑀼.

𑀲𑁄 𑀏𑀢𑁆𑀢𑀓𑀁 𑀫𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀏𑀳𑀺, 𑀅𑀬𑁆𑀬, 𑀢𑀯 𑀫𑀡𑁆𑀟𑀧𑀁 𑀑𑀮𑁄𑀓𑁂𑀢𑁆𑀯𑀸 𑀫𑀬𑁆𑀳𑀁 𑀪𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑀁 𑀑𑀮𑁄𑀓𑁂𑀲𑀺. 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀘 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀡𑁆𑀟𑀧𑀁 𑀑𑀮𑁄𑀓𑁂𑀢𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀦𑀸𑀬𑀁 𑀫𑀡𑁆𑀟𑀧𑁄 𑀫𑀦𑀼𑀲𑁆𑀲𑀪𑀽𑀢𑁂𑀦 𑀓𑀢𑁄, 𑀫𑀬𑁆𑀳𑀁 𑀧𑀦 𑀅𑀚𑁆𑀛𑀸𑀲𑀬𑀁 𑀫𑀬𑁆𑀳𑀁 𑀕𑀼𑀡𑀁 𑀆𑀕𑀫𑁆𑀫 𑀅𑀤𑁆𑀥𑀸 𑀲𑀓𑁆𑀓𑀪𑀯𑀦𑀁 𑀉𑀡𑁆𑀳𑀁 𑀪𑀯𑀺𑀲𑁆𑀲𑀢𑀺. 𑀢𑀢𑁄 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 𑀅𑀬𑀁 𑀫𑀡𑁆𑀟𑀧𑁄 𑀓𑀸𑀭𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀦 𑀔𑁄 𑀧𑀦 𑀫𑁂 𑀬𑀼𑀢𑁆𑀢𑀁 𑀏𑀯𑀭𑀽𑀧𑁂 𑀫𑀡𑁆𑀟𑀧𑁂 𑀏𑀓𑀤𑀺𑀯𑀲𑀁𑀬𑁂𑀯 𑀤𑀸𑀦𑀁 𑀤𑀸𑀢𑀼𑀁, 𑀲𑀢𑁆𑀢𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀩𑀸𑀳𑀺𑀭𑀓𑀤𑀸𑀦𑀜𑁆𑀳𑀺 𑀢𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀼𑀝𑁆𑀞𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀮𑀗𑁆𑀓𑀢𑀲𑀻𑀲𑀁 𑀧𑀦 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀺𑀢𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀯𑀸 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀸𑀕𑀁 𑀦𑀺𑀲𑁆𑀲𑀸𑀬 𑀢𑀼𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀅𑀫𑁆𑀳𑀸𑀓𑀫𑁆𑀧𑀺 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀺𑀯𑀺𑀭𑀸𑀚𑀚𑀸𑀢𑀓𑁂 𑀤𑁂𑀯𑀲𑀺𑀓𑀁 𑀧𑀜𑁆𑀘𑀓𑀳𑀸𑀧𑀡𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀘 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀢𑀁 𑀤𑀸𑀦𑀁 𑀘𑀸𑀕𑀢𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀬𑀤𑀸 𑀧𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀓𑁆𑀔𑀻𑀦𑀺 𑀬𑀸𑀘𑀺, 𑀢𑀤𑀸 𑀢𑀸𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀤𑀫𑀸𑀦𑀲𑁆𑀲𑁂𑀯 𑀳𑀸𑀲𑁄 𑀉𑀧𑁆𑀧𑀚𑁆𑀚𑀺, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀅𑀜𑁆𑀜𑀣𑀢𑁆𑀢𑀁 𑀦𑀸𑀳𑁄𑀲𑀺. 𑀏𑀯𑀁 𑀤𑀺𑀦𑁆𑀦𑀤𑀸𑀦𑀁 𑀦𑀺𑀲𑁆𑀲𑀸𑀬 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄𑀧𑀺 𑀫𑀳𑀸𑀧𑀼𑀭𑀺𑀲𑁄 ‘‘𑀲𑀢𑁆𑀢𑀸𑀳𑀁 𑀫𑀬𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀡𑁆𑀟𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁 𑀦𑀸𑀫 𑀅𑀤𑀸𑀲𑀺. 𑀕𑀯𑀧𑀸𑀦𑀦𑁆𑀢𑀺 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀓𑁄𑀮𑀫𑁆𑀩𑁂 𑀔𑀻𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀦𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀖𑀦𑀧𑀸𑀓𑀧𑀓𑁆𑀓𑁂 𑀔𑀻𑀭𑁂 𑀣𑁄𑀓𑁂 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀥𑀼𑀲𑀓𑁆𑀓𑀭𑀘𑀼𑀡𑁆𑀡𑀲𑀧𑁆𑀧𑀻𑀳𑀺 𑀅𑀪𑀺𑀲𑀗𑁆𑀔𑀢𑀪𑁄𑀚𑀦𑀁 𑀯𑀼𑀘𑁆𑀘𑀢𑀺. 𑀫𑀦𑀼𑀲𑁆𑀲𑀸𑀬𑁂𑀯 𑀧𑀦 𑀧𑀭𑀺𑀯𑀺𑀲𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀤𑁂𑀯𑀸𑀧𑀺 𑀏𑀓𑀦𑁆𑀢𑀭𑀺𑀓𑀸 𑀳𑀼𑀢𑁆𑀯𑀸 𑀧𑀭𑀺𑀯𑀺𑀲𑀺𑀁𑀲𑀼. 𑀤𑁆𑀯𑀸𑀤𑀲𑀢𑁂𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀞𑀸𑀦𑀫𑁆𑀧𑀺 𑀪𑀺𑀓𑁆𑀔𑀽 𑀕𑀡𑁆𑀳𑀺𑀢𑀼𑀁 𑀦𑀧𑁆𑀧𑀳𑁄𑀲𑀺𑀬𑁂𑀯, 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀬𑁄𑀲𑀸𑀦𑀤𑀺𑀯𑀲𑁂 𑀧𑀦 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀸𑀦𑀺 𑀥𑁄𑀯𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀦𑀁 𑀧𑀽𑀭𑁂𑀢𑁆𑀯𑀸 𑀢𑀺𑀘𑀻𑀯𑀭𑁂𑀳𑀺 𑀲𑀤𑁆𑀥𑀺𑀁 𑀅𑀤𑀸𑀲𑀺, 𑀲𑀗𑁆𑀖𑀦𑀯𑀓𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀘𑀻𑀯𑀭𑀲𑀸𑀝𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋 ‘‘𑀅𑀬𑀁 𑀧𑀼𑀭𑀺𑀲𑁄 𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀓𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑁆𑀯𑀁 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀓𑀺𑀭 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀓𑁄 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀬𑁄 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀫𑀗𑁆𑀕𑀮𑁄 𑀩𑀼𑀤𑁆𑀥𑁄

𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀉𑀢𑁆𑀢𑀭𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸𑀧𑀺 𑀉𑀢𑁆𑀢𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸𑀧𑀺 𑀉𑀢𑁆𑀢𑀭𑀸 𑀦𑀸𑀫 𑀤𑁂𑀯𑀻, 𑀲𑀼𑀤𑁂𑀯𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀧𑀸𑀮𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀻𑀯𑀮𑀻 𑀘 𑀅𑀲𑁄𑀓𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺. 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀢𑀲𑁆𑀫𑀺𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑀲 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀦𑁆𑀥𑀓𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀲𑀩𑁆𑀩𑀘𑀓𑁆𑀓𑀯𑀸𑀴𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀫𑀳𑀦𑁆𑀢𑀁 𑀆𑀭𑁄𑀤𑀦𑀧𑀭𑀺𑀤𑁂𑀯𑀦𑀁 𑀅𑀳𑁄𑀲𑀺.

‘‘𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀧𑀭𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀦𑀸𑀬𑀓𑁄;

𑀢𑀫𑀁 𑀮𑁄𑀓𑁂 𑀦𑀺𑀳𑀦𑁆𑀢𑁆𑀯𑀸𑀦, 𑀥𑀫𑁆𑀫𑁄𑀓𑁆𑀓𑀫𑀪𑀺𑀥𑀸𑀭𑀬𑀻’’𑀢𑀺. (𑀩𑀼. 𑀯𑀁. 𑁫.𑁧);

𑀲𑀼𑀫𑀦𑁄 𑀩𑀼𑀤𑁆𑀥𑁄

𑀏𑀯𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀅𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀲𑀼𑀫𑀦𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁. 𑀤𑀼𑀢𑀺𑀬𑁂 𑀓𑀜𑁆𑀘𑀦𑀧𑀩𑁆𑀩𑀢𑀫𑁆𑀳𑀺 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀫𑀳𑀸𑀲𑀢𑁆𑀢𑁄 𑀅𑀢𑀼𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄. 𑀲𑁄 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀤𑀺𑀩𑁆𑀩𑀢𑀽𑀭𑀺𑀬𑁂𑀳𑀺 𑀉𑀧𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀘𑁆𑀘𑁂𑀓𑀁 𑀤𑀼𑀲𑁆𑀲𑀬𑀼𑀕𑀸𑀦𑀺 𑀤𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀫𑁂𑀔𑀮𑀁 𑀦𑀸𑀫 𑀅𑀳𑁄𑀲𑀺, 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀺𑀭𑀺𑀫𑀸 𑀦𑀸𑀫 𑀫𑀸𑀢𑀸 𑀤𑁂𑀯𑀻, 𑀲𑀭𑀡𑁄 𑀘 𑀪𑀸𑀯𑀺𑀢𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀉𑀤𑁂𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑁄𑀡𑀸 𑀘 𑀉𑀧𑀲𑁄𑀡𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀦𑀯𑀼𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀦𑀯𑀼𑀢𑀺𑀬𑁂𑀯 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺.

‘‘𑀫𑀗𑁆𑀕𑀮𑀲𑁆𑀲 𑀅𑀧𑀭𑁂𑀦, 𑀲𑀼𑀫𑀦𑁄 𑀦𑀸𑀫 𑀦𑀸𑀬𑀓𑁄;

𑀲𑀩𑁆𑀩𑀥𑀫𑁆𑀫𑁂𑀳𑀺 𑀅𑀲𑀫𑁄, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑁄’’𑀢𑀺. (𑀩𑀼. 𑀯𑀁. 𑁬.𑁧);

𑀭𑁂𑀯𑀢𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀭𑁂𑀯𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀕𑀡𑀦𑀸 𑀦𑀢𑁆𑀣𑀺, 𑀤𑀼𑀢𑀺𑀬𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀢𑀣𑀸 𑀢𑀢𑀺𑀬𑁂. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀢𑀺𑀤𑁂𑀯𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀯𑀡𑁆𑀡𑀁 𑀲𑀼𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀧𑀽𑀚𑀁 𑀅𑀓𑀸𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀥𑀜𑁆𑀜𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀯𑀺𑀧𑀼𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀯𑀺𑀧𑀼𑀮𑀸 𑀦𑀸𑀫, 𑀯𑀭𑀼𑀡𑁄 𑀘 𑀩𑁆𑀭𑀳𑁆𑀫𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀫𑁆𑀪𑀯𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀪𑀤𑁆𑀤𑀸 𑀘 𑀲𑀼𑀪𑀤𑁆𑀤𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺.

‘‘𑀲𑀼𑀫𑀦𑀲𑁆𑀲 𑀅𑀧𑀭𑁂𑀦, 𑀭𑁂𑀯𑀢𑁄 𑀦𑀸𑀫 𑀦𑀸𑀬𑀓𑁄;

𑀅𑀦𑀽𑀧𑀫𑁄 𑀅𑀲𑀤𑀺𑀲𑁄, 𑀅𑀢𑀼𑀮𑁄 𑀉𑀢𑁆𑀢𑀫𑁄 𑀚𑀺𑀦𑁄’’𑀢𑀺. (𑀩𑀼. 𑀯𑀁. 𑁭.𑁧);

𑀲𑁄𑀪𑀺𑀢𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀲𑁄𑀪𑀺𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀚𑀺𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀥𑀫𑁆𑀫𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀥𑀫𑁆𑀫𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸𑀧𑀺 𑀲𑀼𑀥𑀫𑁆𑀫𑀸 𑀦𑀸𑀫 𑀤𑁂𑀯𑀻, 𑀅𑀲𑀫𑁄 𑀘 𑀲𑀼𑀦𑁂𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀦𑁄𑀫𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀦𑀓𑀼𑀮𑀸 𑀘 𑀲𑀼𑀚𑀸𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺.

‘‘𑀭𑁂𑀯𑀢𑀲𑁆𑀲 𑀅𑀧𑀭𑁂𑀦, 𑀲𑁄𑀪𑀺𑀢𑁄 𑀦𑀸𑀫 𑀦𑀸𑀬𑀓𑁄;

𑀲𑀫𑀸𑀳𑀺𑀢𑁄 𑀲𑀦𑁆𑀢𑀘𑀺𑀢𑁆𑀢𑁄, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀩𑀼. 𑀯𑀁. 𑁮.𑁧);

𑀅𑀦𑁄𑀫𑀤𑀲𑁆𑀲𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀅𑀦𑁄𑀫𑀤𑀲𑁆𑀲𑀻, 𑀧𑀤𑀼𑀫𑁄, 𑀦𑀸𑀭𑀤𑁄𑀢𑀺. 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀅𑀝𑁆𑀞 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀲𑀢𑁆𑀢, 𑀢𑀢𑀺𑀬𑁂 𑀙. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑁄 𑀬𑀓𑁆𑀔𑀲𑁂𑀦𑀸𑀧𑀢𑀺 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀬𑀓𑁆𑀔𑀸𑀦𑀁 𑀅𑀥𑀺𑀧𑀢𑀺. 𑀲𑁄 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀘𑀦𑁆𑀤𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀬𑀲𑀯𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀬𑀲𑁄𑀥𑀭𑀸 𑀦𑀸𑀫 𑀫𑀸𑀢𑀸 𑀤𑁂𑀯𑀻, 𑀦𑀺𑀲𑀪𑁄 𑀘 𑀅𑀦𑁄𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀦𑁆𑀤𑀭𑀻 𑀘 𑀲𑀼𑀫𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀅𑀚𑁆𑀚𑀼𑀦𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀧𑀜𑁆𑀜𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺.

‘‘𑀲𑁄𑀪𑀺𑀢𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀅𑀦𑁄𑀫𑀤𑀲𑁆𑀲𑀻 𑀅𑀫𑀺𑀢𑀬𑀲𑁄, 𑀢𑁂𑀚𑀲𑁆𑀲𑀻 𑀤𑀼𑀭𑀢𑀺𑀓𑁆𑀓𑀫𑁄’’𑀢𑀺. (𑀩𑀼. 𑀯𑀁. 𑁯.𑁧);

𑀧𑀤𑀼𑀫𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀧𑀤𑀼𑀫𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀫𑀳𑀸𑀯𑀦𑀲𑀡𑁆𑀟𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀧𑀻𑀢𑀺𑀲𑀼𑀔𑁂𑀦𑁂𑀯 𑀕𑁄𑀘𑀭𑀸𑀬 𑀅𑀧𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑁄 𑀲𑀻𑀳𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀗𑁆𑀖𑀁 𑀯𑀦𑁆𑀤𑀺𑀲𑁆𑀲𑀢𑀻’’𑀢𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀪𑀺𑀓𑁆𑀔𑀽 𑀢𑀸𑀯𑀤𑁂𑀯 𑀆𑀕𑀫𑀺𑀁𑀲𑀼. 𑀲𑀻𑀳𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀫𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀧𑀤𑀼𑀫𑀲𑁆𑀲 𑀧𑀦 𑀪𑀕𑀯𑀢𑁄 𑀘𑀫𑁆𑀧𑀓𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀅𑀲𑀫𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀫𑀸𑀢𑀸 𑀅𑀲𑀫𑀸 𑀦𑀸𑀫 𑀤𑁂𑀯𑀻, 𑀲𑀸𑀮𑁄 𑀘 𑀉𑀧𑀲𑀸𑀮𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑀸𑀫𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑁄𑀡𑀭𑀼𑀓𑁆𑀔𑁄 𑀦𑀸𑀫 𑀩𑁄𑀥𑀺, 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀦𑁆𑀢𑀺.

‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀩𑀼. 𑀯. 𑁧𑁦.𑁧);

𑀦𑀸𑀭𑀤𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀦𑀸𑀭𑀤𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀝𑁆𑀞𑀲𑀼 𑀘 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑁂𑀦 𑀧𑀽𑀚𑀁 𑀅𑀓𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀥𑀜𑁆𑀜𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀅𑀦𑁄𑀫𑀸 𑀦𑀸𑀫 𑀫𑀸𑀢𑀸 𑀤𑁂𑀯𑀻, 𑀪𑀤𑁆𑀤𑀲𑀸𑀮𑁄 𑀘 𑀚𑀺𑀢𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀸𑀲𑁂𑀝𑁆𑀞𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀢𑁆𑀢𑀭𑀸 𑀘 𑀨𑀕𑁆𑀕𑀼𑀦𑀻 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑁄𑀡𑀭𑀼𑀓𑁆𑀔𑁄 𑀦𑀸𑀫 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀧𑀤𑀼𑀫𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀩𑀼. 𑀯𑀁. 𑁧𑁧.𑁧);

𑀧𑀤𑀼𑀫𑀼𑀢𑁆𑀢𑀭𑁄 𑀩𑀼𑀤𑁆𑀥𑁄

𑀦𑀸𑀭𑀤𑀩𑀼𑀤𑁆𑀥𑀲𑁆𑀲 𑀧𑀦 𑀅𑀧𑀭𑀪𑀸𑀕𑁂 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀯𑁂𑀪𑀸𑀭𑀧𑀩𑁆𑀩𑀢𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀚𑀝𑀺𑀮𑁄 𑀦𑀸𑀫 𑀫𑀳𑀸𑀭𑀝𑁆𑀞𑀺𑀬𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲 𑀲𑀘𑀻𑀯𑀭𑀁 𑀤𑀸𑀦𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀦𑀸𑀳𑁂𑀲𑀼𑀁. 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀫𑁂𑀯 𑀲𑀭𑀡𑀁 𑀅𑀕𑀫𑀁𑀲𑀼. 𑀢𑀲𑁆𑀲 𑀦𑀕𑀭𑀁 𑀳𑀁𑀲𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀆𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑁂𑀯𑀻, 𑀤𑁂𑀯𑀮𑁄 𑀘 𑀲𑀼𑀚𑀸𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀼𑀫𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀫𑀺𑀢𑀸 𑀘 𑀅𑀲𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀕𑀡𑁆𑀳𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

‘‘𑀦𑀸𑀭𑀤𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀅𑀓𑁆𑀔𑁄𑀪𑁄 𑀲𑀸𑀕𑀭𑀽𑀧𑀫𑁄’’𑀢𑀺. (𑀩𑀼. 𑀯𑀁. 𑁧𑁨.𑁧);

𑀲𑀼𑀫𑁂𑀥𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀢𑀺𑀁𑀲 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀼𑀫𑁂𑀥𑁄 𑀘 𑀲𑀼𑀚𑀸𑀢𑁄 𑀘𑀸𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀼𑀫𑁂𑀥𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀼𑀤𑀲𑁆𑀲𑀦𑀦𑀕𑀭𑁂 𑀓𑁄𑀝𑀺𑀲𑀢𑀁 𑀔𑀻𑀡𑀸𑀲𑀯𑀸 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁𑀬𑁂𑀯 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀫𑀸𑀢𑀸𑀧𑀺 𑀲𑀼𑀤𑀢𑁆𑀢𑀸 𑀦𑀸𑀫 𑀤𑁂𑀯𑀻, 𑀲𑀭𑀡𑁄 𑀘 𑀲𑀩𑁆𑀩𑀓𑀸𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀸𑀕𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑀸𑀫𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀦𑀻𑀧𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀅𑀧𑀭𑁂𑀦, 𑀲𑀼𑀫𑁂𑀥𑁄 𑀦𑀸𑀫 𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀉𑀕𑁆𑀕𑀢𑁂𑀚𑁄, 𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀫𑀼𑀦𑀻’’𑀢𑀺. (𑀩𑀼. 𑀯𑀁. 𑁧𑁩.𑁧);

𑀲𑀼𑀚𑀸𑀢𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀲𑀼𑀚𑀸𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀧𑀜𑁆𑀜𑀸𑀲𑀁, 𑀢𑀢𑀺𑀬𑁂 𑀘𑀢𑁆𑀢𑀸𑀮𑀻𑀲𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑀼𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀤𑁆𑀥𑀺𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀘𑀢𑀼𑀫𑀳𑀸𑀤𑀻𑀧𑀭𑀚𑁆𑀚𑀁 𑀤𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀭𑀝𑁆𑀞𑀼𑀧𑁆𑀧𑀸𑀤𑀁 𑀕𑀳𑁂𑀢𑁆𑀯𑀸 𑀆𑀭𑀸𑀫𑀺𑀓𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀘𑁆𑀘𑀁 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀫𑀗𑁆𑀕𑀮𑀁 𑀦𑀸𑀫 𑀅𑀳𑁄𑀲𑀺, 𑀉𑀕𑁆𑀕𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀲𑀼𑀤𑀲𑁆𑀲𑀦𑁄 𑀘 𑀲𑀼𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀦𑀸𑀭𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀦𑀸𑀕𑀸 𑀘 𑀦𑀸𑀕𑀲𑀫𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀯𑁂𑀴𑀼𑀭𑀼𑀓𑁆𑀔𑁄 𑀩𑁄𑀥𑀺. 𑀲𑁄 𑀓𑀺𑀭 𑀫𑀦𑁆𑀤𑀘𑁆𑀙𑀺𑀤𑁆𑀤𑁄 𑀖𑀦𑀓𑁆𑀔𑀦𑁆𑀥𑁄 𑀉𑀧𑀭𑀺 𑀦𑀺𑀕𑁆𑀕𑀢𑀸𑀳𑀺 𑀫𑀳𑀸𑀲𑀸𑀔𑀸𑀳𑀺 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀲𑀼𑀚𑀸𑀢𑁄 𑀦𑀸𑀫 𑀦𑀸𑀬𑀓𑁄;

𑀲𑀻𑀳𑀳𑀦𑀽𑀲𑀪𑀓𑁆𑀔𑀦𑁆𑀥𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄’’𑀢𑀺. (𑀩𑀼. 𑀯𑀁. 𑁧𑁪.𑁧);

𑀧𑀺𑀬𑀤𑀲𑁆𑀲𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀧𑀺𑀬𑀤𑀲𑁆𑀲𑀻, 𑀅𑀢𑁆𑀣𑀤𑀲𑁆𑀲𑀻, 𑀥𑀫𑁆𑀫𑀤𑀲𑁆𑀲𑀻𑀢𑀺 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀧𑀺𑀬𑀤𑀲𑁆𑀲𑀺𑀲𑁆𑀲𑀧𑀺 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑁄 𑀦𑀸𑀫 𑀫𑀸𑀡𑀯𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀗𑁆𑀕𑀢𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀤𑀺𑀦𑁆𑀦𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀘𑀦𑁆𑀤𑀸 𑀦𑀸𑀫, 𑀧𑀸𑀮𑀺𑀢𑁄 𑀘 𑀲𑀩𑁆𑀩𑀤𑀲𑁆𑀲𑀻 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑁄𑀪𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀚𑀸𑀢𑀸 𑀘 𑀥𑀫𑁆𑀫𑀤𑀺𑀦𑁆𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀓𑀓𑀼𑀥𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀁 𑀆𑀬𑀽𑀢𑀺.

‘‘𑀲𑀼𑀚𑀸𑀢𑀲𑁆𑀲 𑀅𑀧𑀭𑁂𑀦, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀅𑀲𑀫𑀲𑀫𑁄, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀬𑀲𑁄’’𑀢𑀺. (𑀩𑀼. 𑀯𑀁. 𑁧𑁫.𑁧);

𑀅𑀢𑁆𑀣𑀤𑀲𑁆𑀲𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀅𑀢𑁆𑀣𑀤𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀅𑀝𑁆𑀞𑀦𑀯𑀼𑀢𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀅𑀝𑁆𑀞𑀸𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀺, 𑀢𑀣𑀸 𑀢𑀢𑀺𑀬𑁂. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀼𑀲𑀻𑀫𑁄 𑀦𑀸𑀫 𑀫𑀳𑀺𑀤𑁆𑀥𑀺𑀓𑁄 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑀺, 𑀲𑁄𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀲𑁄𑀪𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀸𑀕𑀭𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀤𑀲𑁆𑀲𑀦𑀸 𑀦𑀸𑀫 𑀫𑀸𑀢𑀸, 𑀲𑀦𑁆𑀢𑁄 𑀘 𑀉𑀧𑀲𑀦𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀪𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀥𑀫𑁆𑀫𑀸 𑀘 𑀲𑀼𑀥𑀫𑁆𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀘𑀫𑁆𑀧𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀫𑀦𑁆𑀢𑀢𑁄 𑀲𑀩𑁆𑀩𑀓𑀸𑀮𑀁 𑀬𑁄𑀚𑀦𑀫𑀢𑁆𑀢𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀦𑁆𑀢𑀺.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀢𑁆𑀣𑀤𑀲𑁆𑀲𑀻 𑀦𑀭𑀸𑀲𑀪𑁄;

𑀫𑀳𑀸𑀢𑀫𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺. (𑀩𑀼. 𑀯𑀁. 𑁧𑁬.𑁧);

𑀥𑀫𑁆𑀫𑀤𑀲𑁆𑀲𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀥𑀫𑁆𑀫𑀤𑀲𑁆𑀲𑀻 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑁂 𑀓𑁄𑀝𑀺𑀲𑀢𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀘 𑀤𑀺𑀩𑁆𑀩𑀢𑀽𑀭𑀺𑀬𑁂𑀳𑀺 𑀘 𑀧𑀽𑀚𑀁 𑀅𑀓𑀸𑀲𑀺, 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀡𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀲𑀭𑀡𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀦𑀦𑁆𑀤𑀸 𑀦𑀸𑀫 𑀤𑁂𑀯𑀻, 𑀧𑀤𑀼𑀫𑁄 𑀘 𑀨𑀼𑀲𑁆𑀲𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀼𑀦𑁂𑀢𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀔𑁂𑀫𑀸 𑀘 𑀲𑀩𑁆𑀩𑀦𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀭𑀢𑁆𑀢𑀗𑁆𑀓𑀼𑀭𑀭𑀼𑀓𑁆𑀔𑁄 𑀩𑁄𑀥𑀺, ‘‘𑀩𑀺𑀫𑁆𑀩𑀺𑀚𑀸𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑀭𑀻𑀭𑀁 𑀧𑀦𑀲𑁆𑀲 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀥𑀫𑁆𑀫𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸, 𑀅𑀢𑀺𑀭𑁄𑀘𑀢𑀺 𑀲𑀤𑁂𑀯𑀓𑁂’’𑀢𑀺. (𑀩𑀼. 𑀯𑀁. 𑁧𑁭.𑁧);

𑀲𑀺𑀤𑁆𑀥𑀢𑁆𑀣𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀓𑁄𑀝𑀺𑀲𑀢𑀁 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀉𑀕𑁆𑀕𑀢𑁂𑀚𑁄 𑀅𑀪𑀺𑀜𑁆𑀜𑀸𑀩𑀮𑀲𑀫𑁆𑀧𑀦𑁆𑀦𑁄 𑀫𑀗𑁆𑀕𑀮𑁄 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀫𑀳𑀸𑀚𑀫𑁆𑀩𑀼𑀨𑀮𑀁 𑀆𑀳𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀯𑁂𑀪𑀸𑀭𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀨𑀲𑁆𑀲𑀸 𑀦𑀸𑀫 𑀤𑁂𑀯𑀻, 𑀲𑀫𑁆𑀩𑀮𑁄 𑀘 𑀲𑀼𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀭𑁂𑀯𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀻𑀯𑀮𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀓𑀡𑀺𑀓𑀸𑀭𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

‘‘𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀦𑀺𑀳𑀦𑀺𑀢𑁆𑀯𑀸 𑀢𑀫𑀁 𑀲𑀩𑁆𑀩𑀁, 𑀲𑀽𑀭𑀺𑀬𑁄 𑀅𑀩𑁆𑀪𑀼𑀕𑁆𑀕𑀢𑁄 𑀬𑀣𑀸’’𑀢𑀺. (𑀩𑀼. 𑀯𑀁. 𑁧𑁮.𑁧);

𑀢𑀺𑀲𑁆𑀲𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀢𑀺𑀲𑁆𑀲𑁄 𑀨𑀼𑀲𑁆𑀲𑁄𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀁 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄, 𑀢𑀢𑀺𑀬𑁂 𑀅𑀲𑀻𑀢𑀺𑀓𑁄𑀝𑀺𑀬𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑁄𑀕𑁄 𑀫𑀳𑀸𑀬𑀲𑁄 𑀲𑀼𑀚𑀸𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀺𑀤𑁆𑀥𑀺𑀓𑀪𑀸𑀯𑀁 𑀧𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀤𑀺𑀩𑁆𑀩𑀫𑀦𑁆𑀤𑀸𑀭𑀯𑀧𑀤𑀼𑀫𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀸𑀦𑀺 𑀆𑀤𑀸𑀬 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀕𑀘𑁆𑀙𑀦𑁆𑀢𑀁 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺, 𑀆𑀓𑀸𑀲𑁂 𑀧𑀼𑀧𑁆𑀨𑀯𑀺𑀢𑀸𑀦𑀁 𑀅𑀓𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀇𑀢𑁄 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀔𑁂𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀚𑀦𑀲𑀦𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀧𑀤𑀼𑀫𑀸 𑀦𑀸𑀫 𑀤𑁂𑀯𑀻, 𑀩𑁆𑀭𑀳𑁆𑀫𑀤𑁂𑀯𑁄 𑀘 𑀉𑀤𑀬𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀼𑀫𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀨𑀼𑀲𑁆𑀲𑀸 𑀘 𑀲𑀼𑀤𑀢𑁆𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀅𑀲𑀦𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀽𑀢𑀺.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀧𑀭𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄’’𑀢𑀺. (𑀩𑀼. 𑀯𑀁. 𑁧𑁯.𑁧);

𑀨𑀼𑀲𑁆𑀲𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀨𑀼𑀲𑁆𑀲𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀧𑀡𑁆𑀡𑀸𑀲, 𑀢𑀢𑀺𑀬𑁂 𑀤𑁆𑀯𑀢𑁆𑀢𑀺𑀁𑀲. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺, 𑀲𑀻𑀮𑀧𑀸𑀭𑀫𑀺𑀜𑁆𑀘 𑀧𑀽𑀭𑁂𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀓𑀸𑀲𑀺 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀺𑀭𑀺𑀫𑀸 𑀦𑀸𑀫 𑀫𑀸𑀢𑀸, 𑀲𑀼𑀭𑀓𑁆𑀔𑀺𑀢𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀪𑀺𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀘𑀸𑀮𑀸 𑀘 𑀉𑀧𑀘𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀆𑀫𑀮𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀳𑀼 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀅𑀦𑀽𑀧𑀫𑁄 𑀅𑀲𑀫𑀲𑀫𑁄, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄’’𑀢𑀺. (𑀩𑀼. 𑀯𑀁. 𑁨𑁦.𑁧);

𑀯𑀺𑀧𑀲𑁆𑀲𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀅𑀝𑁆𑀞𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀏𑀓𑀲𑀢𑀲𑀳𑀲𑁆𑀲𑀁, 𑀢𑀢𑀺𑀬𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀢𑀼𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀲𑀢𑁆𑀢𑀭𑀢𑀦𑀔𑀘𑀺𑀢𑀁 𑀲𑁄𑀯𑀡𑁆𑀡𑀫𑀬𑀁 𑀫𑀳𑀸𑀧𑀻𑀞𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀲𑁄𑀧𑀺 𑀦𑀁 ‘‘𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀫𑀸𑀢𑀸, 𑀔𑀡𑁆𑀟𑁄 𑀘 𑀢𑀺𑀲𑁆𑀲𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀲𑁄𑀓𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀘𑀦𑁆𑀤𑀸 𑀘 𑀘𑀦𑁆𑀤𑀫𑀺𑀢𑁆𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀸𑀝𑀮𑀺𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀤𑀸 𑀲𑀢𑁆𑀢 𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀅𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀨𑀼𑀲𑁆𑀲𑀲𑁆𑀲 𑀘 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀫𑁂𑀦, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸’’𑀢𑀺. (𑀩𑀼. 𑀯𑀁. 𑁨𑁧.𑁧);

𑀲𑀺𑀔𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀲𑀺𑀔𑀻 𑀘 𑀯𑁂𑀲𑁆𑀲𑀪𑀽𑀘𑀸𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀲𑀺𑀔𑀺𑀲𑁆𑀲𑀸𑀧𑀺 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀭𑀺𑀦𑁆𑀤𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀭𑀢𑀦𑀧𑀝𑀺𑀫𑀡𑁆𑀟𑀺𑀢𑀁 𑀳𑀢𑁆𑀣𑀺𑀭𑀢𑀦𑀁 𑀤𑀢𑁆𑀯𑀸 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀅𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀅𑀪𑀺𑀪𑀽 𑀘 𑀲𑀫𑁆𑀪𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀔𑁂𑀫𑀗𑁆𑀓𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀔𑀺𑀮𑀸 𑀘 𑀧𑀤𑀼𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀼𑀡𑁆𑀟𑀭𑀻𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀢𑁆𑀢𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀬𑁄𑀚𑀦𑀢𑁆𑀢𑀬𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀲𑀢𑁆𑀢𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀯𑀺𑀧𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀲𑀺𑀔𑀺𑀯𑁆𑀳𑀬𑁄 𑀆𑀲𑀺 𑀚𑀺𑀦𑁄, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀩𑀼. 𑀯𑀁. 𑁨𑁨.𑁧);

𑀯𑁂𑀲𑁆𑀲𑀪𑀽 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀯𑁂𑀲𑁆𑀲𑀪𑀽 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀅𑀲𑀻𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀤𑀼𑀢𑀺𑀬𑁂 𑀲𑀢𑁆𑀢𑀢𑀺, 𑀢𑀢𑀺𑀬𑁂 𑀲𑀝𑁆𑀞𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀭𑀢𑀦𑁂 𑀘𑀺𑀢𑁆𑀢𑀻𑀓𑀸𑀭𑀧𑀻𑀢𑀺𑀩𑀳𑀼𑀮𑁄 𑀅𑀳𑁄𑀲𑀺. 𑀲𑁄𑀧𑀺 𑀦𑀁 𑀪𑀕𑀯𑀸 ‘‘𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀧𑁆𑀧𑀢𑀻𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀬𑀲𑀯𑀢𑀻 𑀦𑀸𑀫 𑀫𑀸𑀢𑀸, 𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀉𑀧𑀲𑀦𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀬𑁄, 𑀭𑀸𑀫𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀲𑁄 𑀚𑀺𑀦𑁄’’𑀢𑀺. (𑀩𑀼. 𑀯𑀁. 𑁨𑁩.𑁧);

𑀓𑀓𑀼𑀲𑀦𑁆𑀥𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀸 𑀓𑀓𑀼𑀲𑀦𑁆𑀥𑁄, 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀸𑀢𑀺. 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀏𑀓𑁄𑀯 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄, 𑀢𑀢𑁆𑀣 𑀘𑀢𑁆𑀢𑀸𑀮𑀻𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀔𑁂𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀧𑀢𑁆𑀢𑀘𑀻𑀯𑀭𑀁 𑀫𑀳𑀸𑀤𑀸𑀦𑀜𑁆𑀘𑁂𑀯 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀸𑀦𑀺 𑀘 𑀤𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀓𑀓𑀼𑀲𑀦𑁆𑀥𑀲𑁆𑀲 𑀧𑀦 𑀪𑀕𑀯𑀢𑁄 𑀔𑁂𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀅𑀕𑁆𑀕𑀺𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀯𑀺𑀲𑀸𑀔𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀯𑀺𑀥𑀼𑀭𑁄 𑀘 𑀲𑀜𑁆𑀚𑀻𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀩𑀼𑀤𑁆𑀥𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀸𑀫𑀸 𑀘 𑀘𑀫𑁆𑀧𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑀺𑀭𑀻𑀲𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀯𑁂𑀲𑁆𑀲𑀪𑀼𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑀓𑀼𑀲𑀦𑁆𑀥𑁄 𑀦𑀸𑀫 𑀦𑀸𑀫𑁂𑀦, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄’’𑀢𑀺. (𑀩𑀼. 𑀯𑀁. 𑁨𑁪.𑁧);

𑀓𑁄𑀡𑀸𑀕𑀫𑀦𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀓𑁄𑀡𑀸𑀕𑀫𑀦𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀏𑀓𑁄𑀯 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄, 𑀢𑀢𑁆𑀣 𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀩𑁆𑀩𑀢𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀢𑁆𑀢𑀼𑀡𑁆𑀡𑀘𑀻𑀦𑀧𑀝𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀤𑀼𑀓𑀽𑀮𑀸𑀦𑀺 𑀘𑁂𑀯 𑀲𑀼𑀯𑀡𑁆𑀡𑀧𑀝𑀺𑀓𑀜𑁆𑀘 𑀤𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀲𑁄𑀪𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀬𑀜𑁆𑀜𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀉𑀢𑁆𑀢𑀭𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀪𑀺𑀬𑁆𑀬𑀲𑁄 𑀘 𑀉𑀢𑁆𑀢𑀭𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑁄𑀢𑁆𑀣𑀺𑀚𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀫𑀼𑀤𑁆𑀤𑀸 𑀘 𑀉𑀢𑁆𑀢𑀭𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀢𑀺𑀁𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀢𑀺𑀁𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀓𑀓𑀼𑀲𑀦𑁆𑀥𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑁄𑀡𑀸𑀕𑀫𑀦𑁄 𑀦𑀸𑀫 𑀚𑀺𑀦𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄’’𑀢𑀺. (𑀩𑀼. 𑀯𑀁. 𑁨𑁫.𑁧);

𑀓𑀲𑁆𑀲𑀧𑁄 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀓𑀲𑁆𑀲𑀧𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀢𑀲𑁆𑀲𑀸𑀧𑀺 𑀏𑀓𑁄𑀯 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄, 𑀢𑀢𑁆𑀣 𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀪𑀽𑀫𑀺𑀬𑀜𑁆𑀘𑁂𑀯 𑀅𑀦𑁆𑀢𑀮𑀺𑀓𑁆𑀔𑁂 𑀘 𑀧𑀸𑀓𑀝𑁄 𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀫𑀺𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀸𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀩𑀼𑀤𑁆𑀥𑀲𑀸𑀲𑀦𑀁 𑀲𑁄𑀪𑁂𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀪𑀕𑀯𑀢𑁄 𑀚𑀸𑀢𑀦𑀕𑀭𑀁 𑀩𑀸𑀭𑀸𑀡𑀲𑀻 𑀦𑀸𑀫 𑀅𑀳𑁄𑀲𑀺, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸, 𑀥𑀦𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸, 𑀢𑀺𑀲𑁆𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀦𑀼𑀴𑀸 𑀘 𑀉𑀭𑀼𑀯𑁂𑀴𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀯𑀻𑀲𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀓𑁄𑀡𑀸𑀕𑀫𑀦𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀥𑀫𑁆𑀫𑀭𑀸𑀚𑀸 𑀧𑀪𑀗𑁆𑀓𑀭𑁄’’𑀢𑀺. (𑀩𑀼. 𑀯𑀁. 𑁨𑁬.𑁧);

𑀬𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀉𑀤𑀧𑀸𑀤𑀺, 𑀢𑀲𑁆𑀫𑀺𑀁 𑀅𑀜𑁆𑀜𑁂𑀧𑀺 𑀢𑀬𑁄 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑁆𑀬𑀸𑀓𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀇𑀥 𑀦 𑀤𑀲𑁆𑀲𑀺𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀡𑁆𑀳𑀗𑁆𑀓𑀭𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀢𑀡𑁆𑀳𑀗𑁆𑀓𑀭𑁄 𑀫𑁂𑀥𑀗𑁆𑀓𑀭𑁄, 𑀅𑀣𑁄𑀧𑀺 𑀲𑀭𑀡𑀗𑁆𑀓𑀭𑁄;

𑀤𑀻𑀧𑀗𑁆𑀓𑀭𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀓𑁄𑀡𑁆𑀟𑀜𑁆𑀜𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

‘‘𑀫𑀗𑁆𑀕𑀮𑁄 𑀘 𑀲𑀼𑀫𑀦𑁄 𑀘, 𑀭𑁂𑀯𑀢𑁄 𑀲𑁄𑀪𑀺𑀢𑁄 𑀫𑀼𑀦𑀺;

𑀅𑀦𑁄𑀫𑀤𑀲𑁆𑀲𑀻 𑀧𑀤𑀼𑀫𑁄, 𑀦𑀸𑀭𑀤𑁄 𑀧𑀤𑀼𑀫𑀼𑀢𑁆𑀢𑀭𑁄.

‘‘𑀲𑀼𑀫𑁂𑀥𑁄 𑀘 𑀲𑀼𑀚𑀸𑀢𑁄 𑀘, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀅𑀢𑁆𑀣𑀤𑀲𑁆𑀲𑀻 𑀥𑀫𑁆𑀫𑀤𑀲𑁆𑀲𑀻, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄.

‘‘𑀢𑀺𑀲𑁆𑀲𑁄 𑀨𑀼𑀲𑁆𑀲𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀯𑀺𑀧𑀲𑁆𑀲𑀻 𑀲𑀺𑀔𑀻 𑀯𑁂𑀲𑁆𑀲𑀪𑀽;

𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄 𑀘𑀸𑀧𑀺 𑀦𑀸𑀬𑀓𑁄.

‘‘𑀏𑀢𑁂 𑀅𑀳𑁂𑀲𑀼𑀁 𑀲𑀫𑁆𑀩𑀼𑀤𑁆𑀥𑀸, 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸;

𑀲𑀢𑀭𑀁𑀲𑀻𑀯 𑀉𑀧𑁆𑀧𑀦𑁆𑀦𑀸, 𑀫𑀳𑀸𑀢𑀫𑀯𑀺𑀦𑁄𑀤𑀦𑀸;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀔𑀦𑁆𑀥𑀸𑀯, 𑀦𑀺𑀩𑁆𑀩𑀼𑀢𑀸 𑀢𑁂 𑀲𑀲𑀸𑀯𑀓𑀸’’𑀢𑀺.

𑀕𑁄𑀢𑀫𑁄 𑀩𑀼𑀤𑁆𑀥𑁄

𑀢𑀢𑁆𑀣 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀤𑀻𑀧𑀗𑁆𑀓𑀭𑀸𑀤𑀻𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀅𑀥𑀺𑀓𑀸𑀭𑀁 𑀓𑀭𑁄𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀆𑀕𑀢𑁄. 𑀓𑀲𑁆𑀲𑀧𑀲𑁆𑀲 𑀧𑀦 𑀪𑀕𑀯𑀢𑁄 𑀑𑀭𑀪𑀸𑀕𑁂 𑀞𑀧𑁂𑀢𑁆𑀯𑀸 𑀇𑀫𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀩𑀼𑀤𑁆𑀥𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀤𑀻𑀧𑀗𑁆𑀓𑀭𑀸𑀤𑀻𑀦𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀬𑁂𑀦𑁂𑀦 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀇𑀫𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁂𑀦 ‘‘𑀳𑀦𑁆𑀤 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄’’𑀢𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 ‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺 𑀤𑀸𑀦𑀧𑀸𑀭𑀫𑀺𑀢𑀸𑀤𑀬𑁄 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀤𑀺𑀝𑁆𑀞𑀸, 𑀧𑀽𑀭𑁂𑀦𑁆𑀢𑁄𑀬𑁂𑀯 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁄 𑀆𑀕𑀫𑀺. 𑀆𑀕𑀘𑁆𑀙𑀦𑁆𑀢𑁄 𑀘 𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀆𑀦𑀺𑀲𑀁𑀲𑀸 𑀲𑀁𑀯𑀡𑁆𑀡𑀺𑀢𑀸 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀓𑀧𑁆𑀧𑀓𑁄𑀝𑀺𑀲𑀢𑁂𑀳𑀺𑀧𑀺.

‘‘𑀅𑀯𑀻𑀘𑀺𑀫𑁆𑀳𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀮𑁄𑀓𑀦𑁆𑀢𑀭𑁂𑀲𑀼 𑀘;

𑀦𑀺𑀚𑁆𑀛𑀸𑀫𑀢𑀡𑁆𑀳𑀸 𑀔𑀼𑀧𑁆𑀧𑀺𑀧𑀸𑀲𑀸, 𑀦 𑀳𑁄𑀦𑁆𑀢𑀺 𑀓𑀸𑀮𑀓𑀜𑁆𑀚𑀺𑀓𑀸.

‘‘𑀦 𑀳𑁄𑀦𑁆𑀢𑀺 𑀔𑀼𑀤𑁆𑀤𑀓𑀸 𑀧𑀸𑀡𑀸, 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀤𑀼𑀕𑁆𑀕𑀢𑀺𑀁;

𑀚𑀸𑀬𑀫𑀸𑀦𑀸 𑀫𑀦𑀼𑀲𑁆𑀲𑁂𑀲𑀼, 𑀚𑀘𑁆𑀘𑀦𑁆𑀥𑀸 𑀦 𑀪𑀯𑀦𑁆𑀢𑀺 𑀢𑁂.

‘‘𑀲𑁄𑀢𑀯𑁂𑀓𑀮𑁆𑀮𑀢𑀸 𑀦𑀢𑁆𑀣𑀺, 𑀦 𑀪𑀯𑀦𑁆𑀢𑀺 𑀫𑀽𑀕𑀧𑀓𑁆𑀔𑀺𑀓𑀸;

𑀇𑀢𑁆𑀣𑀺𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀧𑀡𑁆𑀟𑀓𑀸.

‘‘𑀦 𑀪𑀯𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀫𑀼𑀢𑁆𑀢𑀸 𑀆𑀦𑀦𑁆𑀢𑀭𑀺𑀓𑁂𑀳𑀺, 𑀲𑀩𑁆𑀩𑀢𑁆𑀣 𑀲𑀼𑀤𑁆𑀥𑀕𑁄𑀘𑀭𑀸.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑀦𑁆𑀢𑀺, 𑀓𑀫𑁆𑀫𑀓𑀺𑀭𑀺𑀬𑀤𑀲𑁆𑀲𑀦𑀸;

𑀯𑀲𑀫𑀸𑀦𑀸𑀧𑀺 𑀲𑀕𑁆𑀕𑁂𑀲𑀼, 𑀅𑀲𑀜𑁆𑀜𑀁 𑀦𑀼𑀧𑀧𑀚𑁆𑀚𑀭𑁂.

‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼, 𑀳𑁂𑀢𑀼 𑀦𑀸𑀫 𑀦 𑀯𑀺𑀚𑁆𑀚𑀢𑀺;

𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀸 𑀲𑀧𑁆𑀧𑀼𑀭𑀺𑀲𑀸, 𑀯𑀺𑀲𑀁𑀬𑀼𑀢𑁆𑀢𑀸 𑀪𑀯𑀸𑀪𑀯𑁂;

𑀘𑀭𑀦𑁆𑀢𑀺 𑀮𑁄𑀓𑀢𑁆𑀣𑀘𑀭𑀺𑀬𑀸𑀬𑁄, 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀧𑀸𑀭𑀫𑀻’’𑀢𑀺.

𑀢𑁂 𑀆𑀦𑀺𑀲𑀁𑀲𑁂 𑀅𑀥𑀺𑀕𑀦𑁆𑀢𑁆𑀯𑀸𑀯 𑀆𑀕𑀢𑁄. 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀲𑁆𑀲 𑀘𑀲𑁆𑀲 𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑁆𑀫𑀡𑀓𑀸𑀮𑁂, 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀓𑀸𑀮𑁂, 𑀥𑀦𑀜𑁆𑀘𑀬𑀭𑀸𑀚𑀓𑀸𑀮𑁂, 𑀫𑀳𑀸𑀲𑀼𑀤𑀲𑁆𑀲𑀦𑀭𑀸𑀚𑀓𑀸𑀮𑁂, 𑀫𑀳𑀸𑀕𑁄𑀯𑀺𑀦𑁆𑀤𑀓𑀸𑀮𑁂, 𑀦𑀺𑀫𑀺𑀫𑀳𑀸𑀭𑀸𑀚𑀓𑀸𑀮𑁂, 𑀘𑀦𑁆𑀤𑀓𑀼𑀫𑀸𑀭𑀓𑀸𑀮𑁂, 𑀯𑀺𑀲𑀬𑁆𑀳𑀲𑁂𑀝𑁆𑀞𑀺𑀓𑀸𑀮𑁂, 𑀲𑀺𑀯𑀺𑀭𑀸𑀚𑀓𑀸𑀮𑁂, 𑀯𑁂𑀲𑁆𑀲𑀦𑁆𑀢𑀭𑀭𑀸𑀚𑀓𑀸𑀮𑁂𑀢𑀺 𑀤𑀸𑀦𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑁂 𑁋

‘‘𑀪𑀺𑀓𑁆𑀔𑀸𑀬 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀲𑀓𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀁;

𑀤𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀤𑀸𑀦𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁧.𑀢𑀲𑁆𑀲𑀼𑀤𑁆𑀤𑀸𑀦) 𑁋

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀤𑀸𑀦𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀢𑀣𑀸 𑀲𑀻𑀮𑀯𑀦𑀸𑀕𑀭𑀸𑀚𑀓𑀸𑀮𑁂, 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂, 𑀪𑀽𑀭𑀺𑀤𑀢𑁆𑀢𑀦𑀸𑀕𑀭𑀸𑀚𑀓𑀸𑀮𑁂, 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀓𑀸𑀮𑁂, 𑀚𑀬𑀤𑁆𑀤𑀺𑀲𑀭𑀸𑀚𑀧𑀼𑀢𑁆𑀢𑀓𑀸𑀮𑁂, 𑀅𑀮𑀻𑀦𑀲𑀢𑁆𑀢𑀼𑀓𑀼𑀫𑀸𑀭𑀓𑀸𑀮𑁂𑀢𑀺 𑀲𑀻𑀮𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀗𑁆𑀔𑀧𑀸𑀮𑀚𑀸𑀢𑀓𑁂 𑁋

‘‘𑀲𑀽𑀮𑁂𑀳𑀺 𑀯𑀺𑀚𑁆𑀛𑀬𑀦𑁆𑀢𑁄𑀧𑀺, 𑀓𑁄𑀝𑁆𑀝𑀺𑀬𑀦𑁆𑀢𑁄𑀧𑀺 𑀲𑀢𑁆𑀢𑀺𑀪𑀺;

𑀪𑁄𑀚𑀧𑀼𑀢𑁆𑀢𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀲𑀻𑀮𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁨.𑁯𑁧) 𑁋

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀲𑀻𑀮𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀢𑀣𑀸 𑀲𑁄𑀫𑀦𑀲𑁆𑀲𑀓𑀼𑀫𑀸𑀭𑀓𑀸𑀮𑁂, 𑀳𑀢𑁆𑀣𑀺𑀧𑀸𑀮𑀓𑀼𑀫𑀸𑀭𑀓𑀸𑀮𑁂, 𑀅𑀬𑁄𑀖𑀭𑀧𑀡𑁆𑀟𑀺𑀢𑀓𑀸𑀮𑁂𑀢𑀺 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑁂 𑁋

‘‘𑀫𑀳𑀸𑀭𑀚𑁆𑀚𑀁 𑀳𑀢𑁆𑀣𑀕𑀢𑀁, 𑀔𑁂𑀴𑀧𑀺𑀡𑁆𑀟𑀁𑀯 𑀙𑀟𑁆𑀟𑀬𑀺𑀁;

𑀘𑀚𑀢𑁄 𑀦 𑀳𑁄𑀢𑀺 𑀮𑀕𑁆𑀕𑀦𑀁, 𑀏𑀲𑀸 𑀫𑁂 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀦𑀺𑀲𑁆𑀲𑀗𑁆𑀕𑀢𑀸𑀬 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀢𑀣𑀸 𑀯𑀺𑀥𑀼𑀭𑀧𑀡𑁆𑀟𑀺𑀢𑀓𑀸𑀮𑁂, 𑀫𑀳𑀸𑀕𑁄𑀯𑀺𑀦𑁆𑀤𑀧𑀡𑁆𑀟𑀺𑀢𑀓𑀸𑀮𑁂, 𑀓𑀼𑀤𑁆𑀤𑀸𑀮𑀧𑀡𑁆𑀟𑀺𑀢𑀓𑀸𑀮𑁂, 𑀅𑀭𑀓𑀧𑀡𑁆𑀟𑀺𑀢𑀓𑀸𑀮𑁂, 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑀓𑀸𑀮𑁂, 𑀫𑀳𑁄𑀲𑀥𑀧𑀡𑁆𑀟𑀺𑀢𑀓𑀸𑀮𑁂𑀢𑀺 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓𑁂 𑀲𑁂𑀦𑀓𑀧𑀡𑁆𑀟𑀺𑀢𑀓𑀸𑀮𑁂 𑁋

‘‘𑀧𑀜𑁆𑀜𑀸𑀬 𑀯𑀺𑀘𑀺𑀦𑀦𑁆𑀢𑁄𑀳𑀁, 𑀩𑁆𑀭𑀸𑀳𑁆𑀫𑀡𑀁 𑀫𑁄𑀘𑀬𑀺𑀁 𑀤𑀼𑀔𑀸;

𑀧𑀜𑁆𑀜𑀸𑀬 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀧𑀜𑁆𑀜𑀸𑀧𑀸𑀭𑀫𑀻’’𑀢𑀺. 𑁋

𑀅𑀦𑁆𑀢𑁄𑀪𑀲𑁆𑀢𑀕𑀢𑀁 𑀲𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀧𑀜𑁆𑀜𑀸𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀢𑀣𑀸 𑀯𑀻𑀭𑀺𑀬𑀧𑀸𑀭𑀫𑀺𑀢𑀸𑀤𑀻𑀦𑀫𑁆𑀧𑀺 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀫𑀳𑀸𑀚𑀦𑀓𑀚𑀸𑀢𑀓𑁂 𑁋

‘‘𑀅𑀢𑀻𑀭𑀤𑀲𑁆𑀲𑀻 𑀚𑀮𑀫𑀚𑁆𑀛𑁂, 𑀳𑀢𑀸 𑀲𑀩𑁆𑀩𑁂𑀯 𑀫𑀸𑀦𑀼𑀲𑀸;

𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀦𑀢𑁆𑀣𑀺, 𑀏𑀲𑀸 𑀫𑁂 𑀯𑀻𑀭𑀺𑀬𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀲𑁆𑀲 𑀯𑀻𑀭𑀺𑀬𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓𑁂 𑁋

‘‘𑀅𑀘𑁂𑀢𑀦𑀁𑀯 𑀓𑁄𑀝𑁆𑀝𑁂𑀦𑁆𑀢𑁂, 𑀢𑀺𑀡𑁆𑀳𑁂𑀦 𑀨𑀭𑀲𑀼𑀦𑀸 𑀫𑀫𑀁;

𑀓𑀸𑀲𑀺𑀭𑀸𑀚𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀔𑀦𑁆𑀢𑀺𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀅𑀘𑁂𑀢𑀦𑀪𑀸𑀯𑁂𑀦 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀔𑀦𑁆𑀢𑀺𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀫𑀳𑀸𑀲𑀼𑀢𑀲𑁄𑀫𑀚𑀸𑀢𑀓𑁂 𑁋

‘‘𑀲𑀘𑁆𑀘𑀯𑀸𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀘𑀚𑀺𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁;

𑀫𑁄𑀘𑁂𑀲𑀺𑀁 𑀏𑀓𑀲𑀢𑀁 𑀔𑀢𑁆𑀢𑀺𑀬𑁂, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺. 𑁋

𑀏𑀯𑀁 𑀚𑀻𑀯𑀺𑀢𑀁 𑀘𑀚𑀺𑀢𑁆𑀯𑀸 𑀲𑀘𑁆𑀘𑀫𑀦𑀼𑀭𑀓𑁆𑀔𑀦𑁆𑀢𑀲𑁆𑀲 𑀲𑀘𑁆𑀘𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀫𑀽𑀕𑀧𑀓𑁆𑀔𑀚𑀸𑀢𑀓𑁂 𑁋

‘‘𑀫𑀸𑀢𑀸𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀦𑀧𑀺 𑀤𑁂𑀲𑁆𑀲𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀯𑀢𑀫𑀥𑀺𑀝𑁆𑀞𑀳𑀺’’𑀦𑁆𑀢𑀺. (𑀘𑀭𑀺𑀬𑀸. 𑁩.𑁬𑁫) 𑁋

𑀏𑀯𑀁 𑀚𑀻𑀯𑀺𑀢𑀫𑁆𑀧𑀺 𑀘𑀚𑀺𑀢𑁆𑀯𑀸 𑀯𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀲𑀼𑀯𑀡𑁆𑀡𑀲𑀸𑀫𑀚𑀸𑀢𑀓𑁂 𑁋

‘‘𑀦 𑀫𑀁 𑀓𑁄𑀘𑀺 𑀉𑀢𑁆𑀢𑀲𑀢𑀺, 𑀦𑀧𑀺𑀳𑀁 𑀪𑀸𑀬𑀸𑀫𑀺 𑀓𑀲𑁆𑀲𑀘𑀺;

𑀫𑁂𑀢𑁆𑀢𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀭𑀫𑀸𑀫𑀺 𑀧𑀯𑀦𑁂 𑀢𑀤𑀸’’𑀢𑀺. (𑀘𑀭𑀺𑀬𑀸. 𑁩.𑁧𑁧𑁩) 𑁋

𑀏𑀯𑀁 𑀚𑀻𑀯𑀺𑀢𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀫𑁂𑀢𑁆𑀢𑀸𑀬𑀦𑁆𑀢𑀲𑁆𑀲 𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀮𑁄𑀫𑀳𑀁𑀲𑀚𑀸𑀢𑀓𑁂 𑁋

‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀙𑀯𑀝𑁆𑀞𑀺𑀓𑀁 𑀉𑀧𑀦𑀺𑀥𑀸𑀬𑀳𑀁;

𑀕𑀸𑀫𑀡𑁆𑀟𑀮𑀸 𑀉𑀧𑀸𑀕𑀦𑁆𑀢𑁆𑀯𑀸, 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺𑀦𑀧𑁆𑀧𑀓’’𑀦𑁆𑀢𑀺. (𑀘𑀭𑀺𑀬𑀸. 𑁩.𑁧𑁧𑁯) 𑁋

𑀏𑀯𑀁 𑀕𑀸𑀫𑀤𑀸𑀭𑀓𑁂𑀲𑀼 𑀦𑀺𑀝𑁆𑀞𑀼𑀪𑀦𑀸𑀤𑀻𑀳𑀺 𑀘𑁂𑀯 𑀫𑀸𑀮𑀸𑀕𑀦𑁆𑀥𑀽𑀧𑀳𑀸𑀭𑀸𑀤𑀻𑀳𑀺 𑀘 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀲𑀼𑀧𑀺 𑀉𑀧𑁂𑀓𑁆𑀔𑀁 𑀅𑀦𑀢𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲 𑀅𑀢𑁆𑀣𑁄 𑀘𑀭𑀺𑀬𑀸𑀧𑀺𑀝𑀓𑀢𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀺𑀢𑁄 𑁋

‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺. (𑀘𑀭𑀺𑀬𑀸. 𑁧.𑁧𑁨𑁪) 𑁋

𑀏𑀯𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀦𑀸𑀤𑀻𑀦𑀺 𑀫𑀳𑀸𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀬𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺, 𑀏𑀢𑁆𑀢𑀓𑀁 𑀞𑀸𑀦𑀁 𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀽𑀭𑁂𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸

𑀢𑀼𑀲𑀺𑀢𑀧𑀼𑀭𑁂 𑀯𑀲𑀦𑁆𑀢𑁂𑀬𑁂𑀯 𑀧𑀦 𑀩𑁄𑀥𑀺𑀲𑀢𑁆𑀢𑁂 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 𑀉𑀤𑀧𑀸𑀤𑀺. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺 𑀫𑀳𑀦𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀧𑁆𑀧𑀓𑁄𑀮𑀸𑀳𑀮𑀁, 𑀩𑀼𑀤𑁆𑀥𑀓𑁄𑀮𑀸𑀳𑀮𑀁, 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀦𑁆𑀢𑀺. 𑀢𑀢𑁆𑀣 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀫𑀸𑀭𑀺𑀲𑀸, 𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀉𑀟𑁆𑀟𑀬𑁆𑀳𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺. 𑀇𑀤𑀁 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫. ‘‘𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀧𑀦 𑀲𑀩𑁆𑀩𑀼𑀜𑁆𑀜𑀼𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀧𑀸𑀮𑀤𑁂𑀯𑀢𑀸 ‘‘𑀇𑀢𑁄, 𑀫𑀸𑀭𑀺𑀲𑀸, 𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀺𑀬𑁄 𑀆𑀳𑀺𑀡𑁆𑀟𑀦𑁆𑀢𑀺. 𑀇𑀤𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫. ‘‘𑀯𑀲𑁆𑀲𑀲𑀢𑀲𑁆𑀲𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀢𑀸𑀬𑁄 ‘‘𑀇𑀢𑁄 𑀫𑀸𑀭𑀺𑀲𑀸 𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀺𑀬𑁄 𑀆𑀳𑀺𑀡𑁆𑀟𑀦𑁆𑀢𑀺. 𑀇𑀤𑀁 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫. 𑀇𑀫𑀸𑀦𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺 𑀫𑀳𑀦𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀢𑁂𑀲𑀼 𑀩𑀼𑀤𑁆𑀥𑀓𑁄𑀮𑀸𑀳𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀲𑀢𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀸𑀘𑀦𑁆𑀢𑀺. 𑀆𑀬𑀸𑀘𑀫𑀸𑀦𑀸 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀆𑀬𑀸𑀘𑀦𑁆𑀢𑀺. 𑀢𑀤𑀸 𑀧𑀦 𑀲𑀩𑁆𑀩𑀸𑀧𑀺 𑀢𑀸 𑀏𑀓𑁂𑀓𑀘𑀓𑁆𑀓𑀯𑀸𑀴𑁂 𑀘𑀸𑀢𑀼𑀫𑀳𑀸𑀭𑀸𑀚𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀲𑀼𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀸𑀭𑀺𑀲, 𑀢𑀼𑀫𑁆𑀳𑁂𑀳𑀺 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀳𑀺 𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀦 𑀫𑀸𑀭𑀩𑁆𑀭𑀳𑁆𑀫𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀲𑁄 𑀯𑁄 𑀤𑀸𑀦𑀺 𑀓𑀸𑀮𑁄, 𑀫𑀸𑀭𑀺𑀲, 𑀩𑀼𑀤𑁆𑀥𑀢𑁆𑀢𑀸𑀬, 𑀲𑀫𑀬𑁄, 𑀫𑀸𑀭𑀺𑀲, 𑀩𑀼𑀤𑁆𑀥𑀢𑁆𑀢𑀸𑀬𑀸’’𑀢𑀺 𑀬𑀸𑀘𑀺𑀁𑀲𑀼.

𑀅𑀣 𑀫𑀳𑀸𑀲𑀢𑁆𑀢𑁄 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀚𑀦𑁂𑀢𑁆𑀢𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀦𑀸𑀫 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ‘‘𑀓𑀸𑀮𑁄 𑀦𑀼 𑀔𑁄, 𑀅𑀓𑀸𑀮𑁄 𑀦𑀼 𑀔𑁄’’𑀢𑀺 𑀧𑀞𑀫𑀁 𑀓𑀸𑀮𑀁 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀯𑀟𑁆𑀠𑀺𑀢𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀢𑀺𑀮𑀓𑁆𑀔𑀡𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑁂𑀲𑀁 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀓𑀣𑁂𑀦𑁆𑀢𑀸𑀦𑀁 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀦𑁆𑀢𑀻’’𑀢𑀺 𑀦𑁂𑀯 𑀲𑁄𑀢𑀩𑁆𑀩𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀢𑁄 𑀊𑀦𑀆𑀬𑀼𑀓𑀸𑀮𑁄𑀧𑀺 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀺, 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸𑀦𑀜𑁆𑀘 𑀤𑀺𑀦𑁆𑀦𑁄 𑀑𑀯𑀸𑀤𑁄 𑀑𑀯𑀸𑀤𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀔𑀺𑀧𑁆𑀧𑀁 𑀯𑀺𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀯𑀲𑁆𑀲𑀲𑀢𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫. 𑀢𑀤𑀸 𑀘 𑀯𑀲𑁆𑀲𑀲𑀢𑀸𑀬𑀼𑀓𑀸𑀮𑁄, 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀓𑀸𑀮𑁄’’𑀢𑀺 𑀓𑀸𑀮𑀁 𑀧𑀲𑁆𑀲𑀺.

𑀢𑀢𑁄 𑀤𑀻𑀧𑀁 𑀯𑀺𑀮𑁄𑀓𑁂𑀦𑁆𑀢𑁄 𑀲𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀻𑀧𑀁 𑀧𑀲𑁆𑀲𑀺.

𑀢𑀢𑁄 ‘‘𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀫𑀳𑀸, 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄, 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀑𑀓𑀸𑀲𑀁 𑀯𑀺𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀁 𑀧𑀲𑁆𑀲𑀺. 𑀫𑀚𑁆𑀛𑀺𑀫𑀤𑁂𑀲𑁄 𑀦𑀸𑀫 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂’’𑀢𑀺 𑀏𑀯𑀁 𑀯𑀺𑀦𑀬𑁂 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑁄 𑀧𑀤𑁂𑀲𑁄. 𑀲𑁄 𑀆𑀬𑀸𑀫𑀢𑁄 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯 𑀬𑁄𑀚𑀦𑀲𑀢𑀸𑀦𑀻𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀅𑀕𑁆𑀕𑀲𑀸𑀯𑀓𑀸, 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄, 𑀅𑀜𑁆𑀜𑁂 𑀘 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀤𑀜𑁆𑀘𑁂𑀢𑁆𑀣 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀫𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺.

𑀢𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀦𑁆𑀢𑁄 ‘‘𑀩𑀼𑀤𑁆𑀥𑀸 𑀦𑀸𑀫 𑀯𑁂𑀲𑁆𑀲𑀓𑀼𑀮𑁂 𑀯𑀸 𑀲𑀼𑀤𑁆𑀤𑀓𑀼𑀮𑁂 𑀯𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀮𑁄𑀓𑀲𑀫𑁆𑀫𑀢𑁂 𑀧𑀦 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸𑀢𑀺 𑀤𑁆𑀯𑀻𑀲𑀼𑀬𑁂𑀯 𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀤𑀸𑀦𑀺 𑀘 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺. 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀫𑁂 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀧𑀲𑁆𑀲𑀺.

𑀢𑀢𑁄 𑀫𑀸𑀢𑀭𑀁 𑀯𑀺𑀮𑁄𑀓𑁂𑀦𑁆𑀢𑁄 ‘‘𑀩𑀼𑀤𑁆𑀥𑀫𑀸𑀢𑀸 𑀦𑀸𑀫 𑀮𑁄𑀮𑀸 𑀲𑀼𑀭𑀸𑀥𑀼𑀢𑁆𑀢𑀸 𑀦 𑀳𑁄𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀧𑀽𑀭𑀺𑀢𑀧𑀸𑀭𑀫𑀻 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸𑀬𑁂𑀯 𑀳𑁄𑀢𑀺. 𑀅𑀬𑀜𑁆𑀘 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀏𑀤𑀺𑀲𑀻, 𑀅𑀬𑀁 𑀫𑁂 𑀫𑀸𑀢𑀸 𑀪𑀯𑀺𑀲𑁆𑀲𑀢𑀺. 𑀓𑀺𑀢𑁆𑀢𑀓𑀁 𑀧𑀦𑀲𑁆𑀲𑀸 𑀆𑀬𑀽𑀢𑀺 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻’’𑀢𑀺 𑀧𑀲𑁆𑀲𑀺.

𑀇𑀢𑀺 𑀇𑀫𑀁 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 ‘‘𑀓𑀸𑀮𑁄 𑀫𑁂, 𑀫𑀸𑀭𑀺𑀲𑀸, 𑀩𑀼𑀤𑁆𑀥𑀪𑀸𑀯𑀸𑀬𑀸’’𑀢𑀺 𑀤𑁂𑀯𑀢𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀼𑀫𑁆𑀳𑁂’’𑀢𑀺 𑀢𑀸 𑀤𑁂𑀯𑀢𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀼𑀲𑀺𑀢𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀢𑀼𑀲𑀺𑀢𑀧𑀼𑀭𑁂 𑀦𑀦𑁆𑀤𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀤𑁂𑀯𑀮𑁄𑀓𑁂𑀲𑀼 𑀳𑀺 𑀦𑀦𑁆𑀤𑀦𑀯𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀣 𑀦𑀁 𑀤𑁂𑀯𑀢𑀸 ‘‘𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑁄𑀓𑀸𑀲𑀁 𑀲𑀸𑀭𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀲𑁄 𑀏𑀯𑀁 𑀤𑁂𑀯𑀢𑀸𑀳𑀺 𑀓𑀼𑀲𑀮𑀁 𑀲𑀸𑀭𑀬𑀫𑀸𑀦𑀸𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄𑀬𑁂𑀯 𑀘𑀯𑀺𑀢𑁆𑀯𑀸 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺.

𑀢𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀅𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀢𑀤𑀸 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀆𑀲𑀸𑀴𑁆𑀳𑀺𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀅𑀳𑁄𑀲𑀺, 𑀫𑀳𑀸𑀚𑀦𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀢𑀺. 𑀫𑀳𑀸𑀫𑀸𑀬𑀸𑀧𑀺 𑀤𑁂𑀯𑀻 𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀕𑀢𑀲𑀼𑀭𑀸𑀧𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀪𑀽𑀢𑀺𑀲𑀫𑁆𑀧𑀦𑁆𑀦𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀫𑀸𑀦𑀸 𑀇𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲 𑁋 𑀘𑀢𑁆𑀢𑀸𑀭𑁄 𑀓𑀺𑀭 𑀦𑀁 𑀫𑀳𑀸𑀭𑀸𑀚𑀸𑀦𑁄 𑀲𑀬𑀦𑁂𑀦𑁂𑀯 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀦𑁂𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑁂 𑀫𑀦𑁄𑀲𑀺𑀮𑀸𑀢𑀮𑁂 𑀲𑀢𑁆𑀢𑀬𑁄𑀚𑀦𑀺𑀓𑀲𑁆𑀲 𑀫𑀳𑀸𑀲𑀸𑀮𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀤𑁂𑀯𑀺𑀬𑁄 𑀆𑀕𑀦𑁆𑀢𑁆𑀯𑀸 𑀤𑁂𑀯𑀺𑀁 𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀫𑀦𑀼𑀲𑁆𑀲𑀫𑀮𑀳𑀭𑀡𑀢𑁆𑀣𑀁 𑀦𑁆𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀭𑀚𑀢𑀧𑀩𑁆𑀩𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀧𑀸𑀘𑀻𑀦𑀲𑀻𑀲𑀓𑀁 𑀤𑀺𑀩𑁆𑀩𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑁂𑀢𑀯𑀭𑀯𑀸𑀭𑀡𑁄 𑀳𑀼𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀅𑀢𑁆𑀣𑀺, 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀢𑁆𑀢𑀭𑀤𑀺𑀲𑀢𑁄 𑀆𑀕𑀫𑁆𑀫 𑀭𑀚𑀢𑀤𑀸𑀫𑀯𑀡𑁆𑀡𑀸𑀬 𑀲𑁄𑀡𑁆𑀟𑀸𑀬 𑀲𑁂𑀢𑀧𑀤𑀼𑀫𑀁 𑀕𑀳𑁂𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀦𑀤𑀺𑀢𑁆𑀯𑀸 𑀓𑀦𑀓𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀼𑀲𑀬𑀦𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀨𑀸𑀮𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀅𑀳𑁄𑀲𑀻𑀢𑀺. 𑀏𑀯𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺.

𑀧𑀼𑀦𑀤𑀺𑀯𑀲𑁂 𑀧𑀩𑀼𑀤𑁆𑀥𑀸 𑀤𑁂𑀯𑀻 𑀢𑀁 𑀲𑀼𑀧𑀺𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀘𑀢𑀼𑀲𑀝𑁆𑀞𑀺𑀫𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀧𑀸𑀫𑁄𑀓𑁆𑀔𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀕𑁄𑀫𑀬𑀳𑀭𑀺𑀢𑀽𑀧𑀮𑀺𑀢𑁆𑀢𑀸𑀬 𑀮𑀸𑀚𑀸𑀤𑀻𑀳𑀺 𑀓𑀢𑀫𑀗𑁆𑀕𑀮𑀲𑀓𑁆𑀓𑀸𑀭𑀸𑀬 𑀪𑀽𑀫𑀺𑀬𑀸 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀪𑀺𑀲𑀗𑁆𑀔𑀢𑀲𑁆𑀲 𑀯𑀭𑀧𑀸𑀬𑀸𑀲𑀲𑁆𑀲 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀻𑀳𑀺𑀬𑁂𑀯 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀅𑀤𑀸𑀲𑀺, 𑀅𑀜𑁆𑀜𑁂𑀳𑀺 𑀘 𑀅𑀳𑀢𑀯𑀢𑁆𑀣𑀓𑀧𑀺𑀮𑀕𑀸𑀯𑀺𑀤𑀸𑀦𑀸𑀤𑀻𑀳𑀺 𑀢𑁂 𑀲𑀦𑁆𑀢𑀧𑁆𑀧𑁂𑀲𑀺. 𑀅𑀣 𑀦𑁂𑀲𑀁 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑀺𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀧𑀺𑀦𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀆𑀳𑀁𑀲𑀼 𑁋 ‘‘𑀫𑀸 𑀘𑀺𑀦𑁆𑀢𑀬𑀺, 𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀢𑁂 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀘 𑀔𑁄 𑀧𑀼𑀭𑀺𑀲𑀕𑀩𑁆𑀪𑁄, 𑀦 𑀇𑀢𑁆𑀣𑀺𑀕𑀩𑁆𑀪𑁄, 𑀧𑀼𑀢𑁆𑀢𑁄 𑀢𑁂 𑀪𑀯𑀺𑀲𑁆𑀲𑀢𑀺, 𑀲𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀘𑁂 𑀅𑀕𑀸𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄’’𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑁆𑀔𑀡𑁂𑀬𑁂𑀯 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺. 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁 𑁋 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀅𑀧𑁆𑀧𑀫𑀸𑀡𑁄 𑀑𑀪𑀸𑀲𑁄 𑀨𑀭𑀺. 𑀢𑀲𑁆𑀲 𑀢𑀁 𑀲𑀺𑀭𑀺𑀁 𑀤𑀝𑁆𑀞𑀼𑀓𑀸𑀫𑀸 𑀯𑀺𑀬 𑀅𑀦𑁆𑀥𑀸 𑀘𑀓𑁆𑀔𑀽𑀦𑀺 𑀧𑀝𑀺𑀮𑀪𑀺𑀁𑀲𑀼, 𑀩𑀥𑀺𑀭𑀸 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼, 𑀫𑀽𑀕𑀸 𑀲𑀫𑀸𑀮𑀧𑀺𑀁𑀲𑀼, 𑀔𑀼𑀚𑁆𑀚𑀸 𑀉𑀚𑀼𑀕𑀢𑁆𑀢𑀸 𑀅𑀳𑁂𑀲𑀼𑀁, 𑀧𑀗𑁆𑀕𑀼𑀮𑀸 𑀧𑀤𑀲𑀸 𑀕𑀫𑀦𑀁 𑀧𑀝𑀺𑀮𑀪𑀺𑀁𑀲𑀼, 𑀩𑀦𑁆𑀥𑀦𑀕𑀢𑀸 𑀲𑀩𑁆𑀩𑀲𑀢𑁆𑀢𑀸 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀫𑀼𑀘𑁆𑀘𑀺𑀁𑀲𑀼, 𑀲𑀩𑁆𑀩𑀦𑀺𑀭𑀬𑁂𑀲𑀼 𑀅𑀕𑁆𑀕𑀻 𑀦𑀺𑀩𑁆𑀩𑀸𑀬𑀺𑀁𑀲𑀼, 𑀧𑁂𑀢𑁆𑀢𑀺𑀯𑀺𑀲𑀬𑁂𑀲𑀼 𑀔𑀼𑀧𑁆𑀧𑀺𑀧𑀸𑀲𑀸 𑀯𑀽𑀧𑀲𑀫𑀺𑀁𑀲𑀼, 𑀢𑀺𑀭𑀘𑁆𑀙𑀸𑀦𑀸𑀦𑀁 𑀪𑀬𑀁 𑀦𑀸𑀳𑁄𑀲𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀭𑁄𑀕𑁄 𑀯𑀽𑀧𑀲𑀫𑀺, 𑀲𑀩𑁆𑀩𑀲𑀢𑁆𑀢𑀸 𑀧𑀺𑀬𑀁𑀯𑀤𑀸 𑀅𑀳𑁂𑀲𑀼𑀁, 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀅𑀲𑁆𑀲𑀸 𑀳𑀲𑀺𑀁𑀲𑀼, 𑀯𑀸𑀭𑀡𑀸 𑀕𑀚𑁆𑀚𑀺𑀁𑀲𑀼, 𑀲𑀩𑁆𑀩𑀢𑀽𑀭𑀺𑀬𑀸𑀦𑀺 𑀲𑀓𑀁 𑀲𑀓𑀁 𑀦𑀺𑀦𑁆𑀦𑀸𑀤𑀁 𑀫𑀼𑀜𑁆𑀘𑀺𑀁𑀲𑀼, 𑀅𑀖𑀝𑁆𑀝𑀺𑀢𑀸𑀦𑀺𑀬𑁂𑀯 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀽𑀧𑀕𑀸𑀤𑀻𑀦𑀺 𑀆𑀪𑀭𑀡𑀸𑀦𑀺 𑀯𑀺𑀭𑀯𑀺𑀁𑀲𑀼, 𑀲𑀩𑁆𑀩𑀸 𑀤𑀺𑀲𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀲𑀢𑁆𑀢𑀸𑀦𑀁 𑀲𑀼𑀔𑀁 𑀉𑀧𑁆𑀧𑀸𑀤𑀬𑀫𑀸𑀦𑁄 𑀫𑀼𑀤𑀼𑀲𑀻𑀢𑀮𑁄 𑀯𑀸𑀢𑁄 𑀯𑀸𑀬𑀺, 𑀅𑀓𑀸𑀮𑀫𑁂𑀖𑁄 𑀯𑀲𑁆𑀲𑀺, 𑀧𑀣𑀯𑀺𑀢𑁄𑀧𑀺 𑀉𑀤𑀓𑀁 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀲𑁆𑀲𑀦𑁆𑀤𑀺, 𑀧𑀓𑁆𑀔𑀺𑀦𑁄 𑀆𑀓𑀸𑀲𑀕𑀫𑀦𑀁 𑀯𑀺𑀚𑀳𑀺𑀁𑀲𑀼, 𑀦𑀤𑀺𑀬𑁄 𑀅𑀲𑀦𑁆𑀤𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀥𑀼𑀭𑁄𑀤𑀓𑁄 𑀅𑀳𑁄𑀲𑀺, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀢𑀮𑁄 𑀅𑀳𑁄𑀲𑀺, 𑀣𑀮𑀚𑀚𑀮𑀚𑀸𑀤𑀻𑀦𑀺 𑀲𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀭𑀼𑀓𑁆𑀔𑀸𑀦𑀁 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺, 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺, 𑀮𑀢𑀸𑀲𑀼 𑀮𑀢𑀸𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀖𑀦𑀲𑀺𑀮𑀸𑀢𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀢𑀧𑀢𑁆𑀢𑀸𑀦𑀺 𑀳𑀼𑀢𑁆𑀯𑀸 𑀤𑀡𑁆𑀟𑀧𑀤𑀼𑀫𑀸𑀦𑀺 𑀦𑀸𑀫 𑀦𑀺𑀓𑁆𑀔𑀫𑀺𑀁𑀲𑀼, 𑀆𑀓𑀸𑀲𑁂 𑀑𑀮𑀫𑁆𑀩𑀓𑀧𑀤𑀼𑀫𑀸𑀦𑀺 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀲𑀫𑀦𑁆𑀢𑀢𑁄 𑀧𑀼𑀧𑁆𑀨𑀯𑀲𑁆𑀲𑀸𑀦𑀺 𑀯𑀲𑁆𑀲𑀺𑀁𑀲𑀼. 𑀆𑀓𑀸𑀲𑁂 𑀤𑀺𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀚𑁆𑀚𑀺𑀁𑀲𑀼, 𑀲𑀓𑀮𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀸𑀮𑀸𑀕𑀼𑀴𑁄 𑀯𑀺𑀬, 𑀉𑀧𑁆𑀧𑀻𑀴𑁂𑀢𑁆𑀯𑀸 𑀩𑀤𑁆𑀥𑀫𑀸𑀮𑀸𑀓𑀮𑀸𑀧𑁄 𑀯𑀺𑀬, 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀫𑀸𑀮𑀸𑀲𑀦𑀁 𑀯𑀺𑀬 𑀘 𑀏𑀓𑀫𑀸𑀮𑀸𑀫𑀸𑀮𑀺𑀦𑀻 𑀯𑀺𑀧𑁆𑀨𑀼𑀭𑀦𑁆𑀢𑀯𑀸𑀴𑀩𑀻𑀚𑀦𑀻 𑀧𑀼𑀧𑁆𑀨𑀥𑀽𑀧𑀕𑀦𑁆𑀥𑀧𑀭𑀺𑀯𑀸𑀲𑀺𑀢𑀸 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀅𑀳𑁄𑀲𑀺.

𑀏𑀯𑀁 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑁂𑀯 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁆𑀣𑀁 𑀔𑀕𑁆𑀕𑀳𑀢𑁆𑀣𑀸 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀬𑀸 𑀧𑀼𑀭𑀺𑀲𑁂𑀲𑀼 𑀭𑀸𑀕𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺, 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀘 𑀅𑀳𑁄𑀲𑀺 𑀲𑀼𑀔𑀺𑀦𑀻 𑀅𑀓𑀺𑀮𑀦𑁆𑀢𑀓𑀸𑀬𑀸. 𑀩𑁄𑀥𑀺𑀲𑀢𑁆𑀢𑀜𑁆𑀘 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀁 𑀯𑀺𑀧𑁆𑀧𑀲𑀦𑁆𑀦𑁂 𑀫𑀡𑀺𑀭𑀢𑀦𑁂 𑀆𑀯𑀼𑀢𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀺𑀬 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀘 𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀓𑀼𑀘𑁆𑀙𑀺 𑀦𑀸𑀫 𑀘𑁂𑀢𑀺𑀬𑀕𑀩𑁆𑀪𑀲𑀤𑀺𑀲𑀸 𑀳𑁄𑀢𑀺, 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀲𑀢𑁆𑀢𑁂𑀦 𑀆𑀯𑀲𑀺𑀢𑀼𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀢𑁆𑀢𑀸𑀳𑀚𑀸𑀢𑁂 𑀩𑁄𑀥𑀺𑀲𑀢𑁆𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀬𑀣𑀸 𑀘 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀤𑀲𑀫𑀸𑀲𑁂 𑀅𑀧𑁆𑀧𑀢𑁆𑀯𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀦𑀺𑀧𑀦𑁆𑀦𑀸𑀧𑀺 𑀯𑀺𑀚𑀸𑀬𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸. 𑀲𑀸 𑀧𑀦 𑀩𑁄𑀥𑀺𑀲𑀢𑁆𑀢𑀁 𑀤𑀲𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀞𑀺𑀢𑀸𑀯 𑀯𑀺𑀚𑀸𑀬𑀢𑀺. 𑀅𑀬𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀥𑀫𑁆𑀫𑀢𑀸.

𑀫𑀳𑀸𑀫𑀸𑀬𑀸𑀧𑀺 𑀤𑁂𑀯𑀻 𑀧𑀢𑁆𑀢𑁂𑀦 𑀢𑁂𑀮𑀁 𑀯𑀺𑀬 𑀤𑀲𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀜𑀸𑀢𑀺𑀖𑀭𑀁 𑀕𑀦𑁆𑀢𑀼𑀓𑀸𑀫𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀇𑀘𑁆𑀙𑀸𑀫𑀳𑀁, 𑀤𑁂𑀯, 𑀓𑀼𑀮𑀲𑀦𑁆𑀢𑀓𑀁 𑀤𑁂𑀯𑀤𑀳𑀦𑀕𑀭𑀁 𑀕𑀦𑁆𑀢𑀼’’𑀦𑁆𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀢𑁄 𑀬𑀸𑀯 𑀤𑁂𑀯𑀤𑀳𑀦𑀕𑀭𑀸 𑀫𑀕𑁆𑀕𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀓𑀤𑀮𑀺𑀧𑀼𑀡𑁆𑀡𑀖𑀝𑀥𑀚𑀧𑀝𑀸𑀓𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀺𑀁 𑀲𑁄𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑁂𑀲𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀦𑀕𑀭𑀸𑀦𑀁 𑀅𑀦𑁆𑀢𑀭𑁂 𑀉𑀪𑀬𑀦𑀕𑀭𑀯𑀸𑀲𑀻𑀦𑀫𑁆𑀧𑀺 𑀮𑀼𑀫𑁆𑀩𑀺𑀦𑀻𑀯𑀦𑀁 𑀦𑀸𑀫 𑀫𑀗𑁆𑀕𑀮𑀲𑀸𑀮𑀯𑀦𑀁 𑀅𑀢𑁆𑀣𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀲𑀸𑀔𑀸 𑀲𑀩𑁆𑀩𑀁 𑀏𑀓𑀧𑀸𑀮𑀺𑀨𑀼𑀮𑁆𑀮𑀁 𑀅𑀳𑁄𑀲𑀺, 𑀲𑀸𑀔𑀦𑁆𑀢𑀭𑁂𑀳𑀺 𑀘𑁂𑀯 𑀧𑀼𑀧𑁆𑀨𑀦𑁆𑀢𑀭𑁂𑀳𑀺 𑀘 𑀧𑀜𑁆𑀘𑀯𑀡𑁆𑀡𑀸 𑀪𑀫𑀭𑀕𑀡𑀸 𑀦𑀸𑀦𑀧𑁆𑀧𑀓𑀸𑀭𑀸 𑀘 𑀲𑀓𑀼𑀡𑀲𑀗𑁆𑀖𑀸 𑀫𑀥𑀼𑀭𑀲𑁆𑀲𑀭𑁂𑀦 𑀯𑀺𑀓𑀽𑀚𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀲𑀓𑀮𑀁 𑀮𑀼𑀫𑁆𑀩𑀺𑀦𑀻𑀯𑀦𑀁 𑀘𑀺𑀢𑁆𑀢𑀮𑀢𑀸𑀯𑀦𑀲𑀤𑀺𑀲𑀁, 𑀫𑀳𑀸𑀦𑀼𑀪𑀸𑀯𑀲𑁆𑀲 𑀭𑀜𑁆𑀜𑁄 𑀲𑀼𑀲𑀚𑁆𑀚𑀺𑀢𑀆𑀧𑀸𑀦𑀫𑀡𑁆𑀟𑀮𑀁 𑀯𑀺𑀬 𑀅𑀳𑁄𑀲𑀺. 𑀤𑁂𑀯𑀺𑀬𑀸 𑀢𑀁 𑀤𑀺𑀲𑁆𑀯𑀸 𑀲𑀸𑀮𑀯𑀦𑁂 𑀓𑀻𑀴𑀺𑀢𑀼𑀓𑀸𑀫𑀢𑀸 𑀉𑀤𑀧𑀸𑀤𑀺. 𑀅𑀫𑀘𑁆𑀘𑀸 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀲𑀸𑀮𑀯𑀦𑀁 𑀧𑀯𑀺𑀲𑀺𑀁𑀲𑀼. 𑀲𑀸 𑀫𑀗𑁆𑀕𑀮𑀲𑀸𑀮𑀫𑀽𑀮𑀁 𑀉𑀧𑀕𑀦𑁆𑀢𑁆𑀯𑀸 𑀲𑀸𑀮𑀲𑀸𑀔𑀁 𑀕𑀡𑁆𑀳𑀺𑀢𑀼𑀓𑀸𑀫𑀸 𑀅𑀳𑁄𑀲𑀺, 𑀲𑀸𑀮𑀲𑀸𑀔𑀸 𑀲𑀼𑀲𑁂𑀤𑀺𑀢𑀯𑁂𑀢𑁆𑀢𑀕𑁆𑀕𑀁 𑀯𑀺𑀬 𑀑𑀡𑀫𑀺𑀢𑁆𑀯𑀸 𑀤𑁂𑀯𑀺𑀬𑀸 𑀳𑀢𑁆𑀣𑀲𑀫𑀻𑀧𑀁 𑀉𑀧𑀕𑀜𑁆𑀙𑀺. 𑀲𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀲𑀸𑀔𑀁 𑀅𑀕𑁆𑀕𑀳𑁂𑀲𑀺. 𑀢𑀸𑀯𑀤𑁂𑀯 𑀘 𑀤𑁂𑀯𑀺𑀬𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼, 𑀅𑀣𑀲𑁆𑀲𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑁄 𑀧𑀝𑀺𑀓𑁆𑀓𑀫𑀺, 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀫𑀸𑀦𑀸𑀬 𑀏𑀯 𑀘𑀲𑁆𑀲𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀘𑀢𑁆𑀢𑀸𑀭𑁄 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑀁 𑀆𑀤𑀸𑀬 𑀲𑀫𑁆𑀧𑀢𑁆𑀢𑀸. 𑀢𑁂 𑀢𑁂𑀦 𑀲𑀼𑀯𑀡𑁆𑀡𑀚𑀸𑀮𑁂𑀦 𑀩𑁄𑀥𑀺𑀲𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀸𑀢𑀼 𑀧𑀼𑀭𑀢𑁄 𑀞𑀢𑁆𑀯𑀸 ‘‘𑀅𑀢𑁆𑀢𑀫𑀦𑀸, 𑀤𑁂𑀯𑀺, 𑀳𑁄𑀳𑀺, 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀳𑀁𑀲𑀼.

𑀬𑀣𑀸 𑀧𑀦 𑀅𑀜𑁆𑀜𑁂 𑀲𑀢𑁆𑀢𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀧𑀝𑀺𑀓𑀽𑀮𑁂𑀦 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄. 𑀲𑁄 𑀧𑀦 𑀥𑀫𑁆𑀫𑀸𑀲𑀦𑀢𑁄 𑀑𑀢𑀭𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬, 𑀦𑀺𑀲𑁆𑀲𑁂𑀡𑀺𑀢𑁄 𑀑𑀢𑀭𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀘 𑀤𑁆𑀯𑁂 𑀳𑀢𑁆𑀣𑁂 𑀤𑁆𑀯𑁂 𑀘 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀞𑀺𑀢𑀓𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄 𑀲𑀼𑀤𑁆𑀥𑁄 𑀯𑀺𑀲𑀤𑁄 𑀓𑀸𑀲𑀺𑀓𑀯𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀭𑀢𑀦𑀁 𑀯𑀺𑀬 𑀚𑁄𑀢𑁂𑀦𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀲𑀓𑁆𑀓𑀸𑀭𑀢𑁆𑀣𑀁 𑀆𑀓𑀸𑀲𑀢𑁄 𑀤𑁆𑀯𑁂 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀲𑀭𑀻𑀭𑁂 𑀉𑀢𑀼𑀁 𑀕𑀸𑀳𑀸𑀧𑁂𑀲𑀼𑀁.

𑀅𑀣 𑀦𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀫𑀗𑁆𑀕𑀮𑀲𑀫𑁆𑀫𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸 𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀕𑀡𑁆𑀳𑀺𑀁𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 ‘‘𑀫𑀳𑀸𑀧𑀼𑀭𑀺𑀲, 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄 𑀅𑀜𑁆𑀜𑁄 𑀦𑀢𑁆𑀣𑀺, 𑀓𑀼𑀢𑁂𑀢𑁆𑀣 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀘 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀤𑀲𑀧𑀺 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸𑀤𑀺𑀲𑀸’’𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁂𑀦, 𑀲𑀼𑀬𑀸𑀫𑁂𑀦 𑀯𑀸𑀴𑀩𑀻𑀚𑀦𑀺𑀁, 𑀅𑀜𑁆𑀜𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀲𑁂𑀲𑀭𑀸𑀚𑀓𑀓𑀼𑀥𑀪𑀡𑁆𑀟𑀳𑀢𑁆𑀣𑀸𑀳𑀺 𑀅𑀦𑀼𑀕𑀫𑁆𑀫𑀫𑀸𑀦𑁄. 𑀢𑀢𑁄 𑀲𑀢𑁆𑀢𑀫𑀧𑀤𑁂 𑀞𑀺𑀢𑁄 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺.

𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑀫𑀳𑁄𑀲𑀥𑀢𑁆𑀢𑀪𑀸𑀯𑁂, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀸𑀢𑀺. 𑀫𑀳𑁄𑀲𑀥𑀢𑁆𑀢𑀪𑀸𑀯𑁂 𑀓𑀺𑀭𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲𑁂𑀯 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀘𑀦𑁆𑀤𑀦𑀲𑀸𑀭𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀕𑀢𑁄. 𑀲𑁄 𑀢𑀁 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄. 𑀅𑀣 𑀦𑀁 𑀫𑀸𑀢𑀸 ‘‘𑀢𑀸𑀢, 𑀓𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀑𑀲𑀥𑀁, 𑀅𑀫𑁆𑀫𑀸’’𑀢𑀺. 𑀇𑀢𑀺 𑀑𑀲𑀥𑀁 𑀕𑀳𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 ‘‘𑀑𑀲𑀥𑀤𑀸𑀭𑀓𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀑𑀲𑀥𑀁 𑀕𑀳𑁂𑀢𑁆𑀯𑀸 𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀁𑀲𑀼, 𑀆𑀕𑀢𑀸𑀕𑀢𑀸𑀦𑀁 𑀅𑀦𑁆𑀥𑀩𑀥𑀺𑀭𑀸𑀤𑀻𑀦𑀁 𑀢𑀤𑁂𑀯 𑀲𑀩𑁆𑀩𑀭𑁄𑀕𑀯𑀽𑀧𑀲𑀫𑀸𑀬 𑀪𑁂𑀲𑀚𑁆𑀚𑀁 𑀅𑀳𑁄𑀲𑀺. 𑀢𑀢𑁄 ‘‘𑀫𑀳𑀦𑁆𑀢𑀁 𑀇𑀤𑀁 𑀑𑀲𑀥𑀁, 𑀫𑀳𑀦𑁆𑀢𑀁 𑀇𑀤𑀁 𑀑𑀲𑀥’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀯𑀘𑀦𑀁 𑀉𑀧𑀸𑀤𑀸𑀬 ‘‘𑀫𑀳𑁄𑀲𑀥𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀚𑀸𑀢𑀁. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸𑀯 ‘‘𑀅𑀢𑁆𑀣𑀺 𑀦𑀼 𑀔𑁄, 𑀅𑀫𑁆𑀫, 𑀓𑀺𑀜𑁆𑀘𑀺 𑀕𑁂𑀳𑀲𑁆𑀫𑀺𑀁, 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀲𑀥𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀁 𑀅𑀢𑁆𑀢𑀦𑁄 𑀳𑀢𑁆𑀣𑀢𑀮𑁂 𑀓𑀢𑁆𑀯𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑀸𑀧𑁂𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀇𑀫𑀁 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀬𑀣𑀸 𑀘 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑁆𑀔𑀡𑁂 𑀢𑀣𑀸 𑀚𑀸𑀢𑀺𑀓𑁆𑀔𑀡𑁂𑀧𑀺𑀲𑁆𑀲 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀮𑀼𑀫𑁆𑀩𑀺𑀦𑀻𑀯𑀦𑁂 𑀚𑀸𑀢𑁄, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀭𑀸𑀳𑀼𑀮𑀫𑀸𑀢𑀸𑀤𑁂𑀯𑀻, 𑀆𑀦𑀦𑁆𑀤𑀢𑁆𑀣𑁂𑀭𑁄,𑀙𑀦𑁆𑀦𑁄 𑀅𑀫𑀘𑁆𑀘𑁄, 𑀓𑀸𑀴𑀼𑀤𑀸𑀬𑀻 𑀅𑀫𑀘𑁆𑀘𑁄, 𑀓𑀡𑁆𑀟𑀓𑁄 𑀅𑀲𑁆𑀲𑀭𑀸𑀚𑀸, 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄, 𑀘𑀢𑀲𑁆𑀲𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀘 𑀚𑀸𑀢𑀸. 𑀢𑀢𑁆𑀣 𑀏𑀓𑀸 𑀦𑀺𑀥𑀺𑀓𑀼𑀫𑁆𑀪𑀻 𑀕𑀸𑀯𑀼𑀢𑀧𑁆𑀧𑀫𑀸𑀡𑀸, 𑀏𑀓𑀸 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑀸, 𑀏𑀓𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸, 𑀏𑀓𑀸 𑀬𑁄𑀚𑀦𑀧𑁆𑀧𑀫𑀸𑀡𑀸. 𑀕𑀫𑁆𑀪𑀻𑀭𑀢𑁄 𑀧𑀣𑀯𑀻𑀧𑀭𑀺𑀬𑀦𑁆𑀢𑀸 𑀏𑀯 𑀅𑀳𑁄𑀲𑀻𑀢𑀺. 𑀇𑀫𑁂 𑀲𑀢𑁆𑀢 𑀲𑀳𑀚𑀸𑀢𑀸 𑀦𑀸𑀫.

𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀩𑁄𑀥𑀺𑀲𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀫𑁂𑀯 𑀅𑀕𑀫𑀁𑀲𑀼. 𑀢𑀁 𑀤𑀺𑀯𑀲𑀁𑀬𑁂𑀯 𑀘 ‘‘𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀚𑀸𑀢𑁄, 𑀅𑀬𑀁 𑀓𑀼𑀫𑀸𑀭𑁄 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀳𑀝𑁆𑀞𑀢𑀼𑀝𑁆𑀞𑀸 𑀤𑁂𑀯𑀲𑀗𑁆𑀖𑀸 𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀦𑀺 𑀧𑀯𑀢𑁆𑀢𑁂𑀦𑁆𑀢𑀸 𑀓𑀻𑀴𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑀽𑀧𑀓𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀓𑀸𑀮𑀤𑁂𑀯𑀮𑁄 𑀦𑀸𑀫 𑀢𑀸𑀧𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀢𑀸 𑀤𑁂𑀯𑀢𑀸 𑀢𑀣𑀸 𑀓𑀻𑀴𑀫𑀸𑀦𑀸 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀸 𑀢𑀼𑀫𑁆𑀳𑁂 𑀏𑀯𑀁 𑀢𑀼𑀝𑁆𑀞𑀫𑀸𑀦𑀲𑀸 𑀓𑀻𑀴𑀣, 𑀫𑀬𑁆𑀳𑀫𑁆𑀧𑁂𑀢𑀁 𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺. 𑀤𑁂𑀯𑀢𑀸 𑀆𑀳𑀁𑀲𑀼 𑁋 ‘‘𑀫𑀸𑀭𑀺𑀲, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀚𑀸𑀢𑁄, 𑀲𑁄 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, ‘𑀢𑀲𑁆𑀲 𑀅𑀦𑀦𑁆𑀢𑀁 𑀩𑀼𑀤𑁆𑀥𑀮𑀻𑀴𑀁 𑀤𑀝𑁆𑀞𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀘𑁆𑀙𑀸𑀫𑀸’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀼𑀝𑁆𑀞𑀸𑀫𑁆𑀳𑀸’’𑀢𑀺. 𑀢𑀸𑀧𑀲𑁄 𑀢𑀸𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀔𑀺𑀧𑁆𑀧𑀁 𑀤𑁂𑀯𑀮𑁄𑀓𑀢𑁄 𑀑𑀭𑀼𑀬𑁆𑀳 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀧𑀼𑀢𑁆𑀢𑁄 𑀓𑀺𑀭 𑀢𑁂, 𑀫𑀳𑀸𑀭𑀸𑀚, 𑀚𑀸𑀢𑁄, 𑀧𑀲𑁆𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳. 𑀭𑀸𑀚𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀓𑀼𑀫𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀸𑀧𑁂𑀢𑀼𑀁 𑀅𑀪𑀺𑀳𑀭𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀚𑀝𑀸𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀯𑀦𑁆𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑁄 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀺. 𑀲𑀘𑁂 𑀳𑀺 𑀅𑀚𑀸𑀦𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀢𑀸𑀧𑀲𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀬𑁆𑀬𑀼𑀁, 𑀲𑀢𑁆𑀢𑀥𑀸 𑀢𑀲𑁆𑀲 𑀫𑀼𑀤𑁆𑀥𑀸 𑀨𑀮𑁂𑀬𑁆𑀬. 𑀢𑀸𑀧𑀲𑁄 ‘‘𑀦 𑀫𑁂 𑀅𑀢𑁆𑀢𑀸𑀦𑀁 𑀦𑀸𑀲𑁂𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀦𑁆𑀤𑀺.

𑀢𑀸𑀧𑀲𑁄 𑀅𑀢𑀻𑀢𑁂 𑀘𑀢𑁆𑀢𑀸𑀮𑀻𑀲 𑀓𑀧𑁆𑀧𑁂, 𑀅𑀦𑀸𑀕𑀢𑁂 𑀘𑀢𑁆𑀢𑀸𑀮𑀻𑀲𑀸𑀢𑀺 𑀅𑀲𑀻𑀢𑀺 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀦𑀺𑀲𑁆𑀲𑀁𑀲𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀲𑀺𑀢𑀁 𑀅𑀓𑀸𑀲𑀺. 𑀢𑀢𑁄 ‘‘𑀅𑀳𑀁 𑀇𑀫𑀁 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀺 𑀦𑀼 𑀔𑁄, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀦 𑀮𑀪𑀺𑀲𑁆𑀲𑀸𑀫𑀺, 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀩𑀼𑀤𑁆𑀥𑀲𑀢𑁂𑀦𑀧𑀺 𑀩𑀼𑀤𑁆𑀥𑀲𑀳𑀲𑁆𑀲𑁂𑀦𑀧𑀺 𑀕𑀦𑁆𑀢𑁆𑀯𑀸 𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀅𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁄𑀤𑀺.

𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀇𑀤𑀸𑀦𑁂𑀯 𑀳𑀲𑀺𑀢𑁆𑀯𑀸 𑀧𑀼𑀦 𑀧𑀭𑁄𑀤𑀺𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑁄, 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀧𑀼𑀘𑁆𑀙𑀺𑀁𑀲𑀼. ‘‘𑀦𑀢𑁆𑀣𑁂𑀢𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀦𑀺𑀲𑁆𑀲𑀁𑀲𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀅𑀣 𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀭𑁄𑀤𑀺𑀢𑁆𑀣𑀸’’𑀢𑀺? ‘‘𑀏𑀯𑀭𑀽𑀧𑀁 𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, ‘𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀺 𑀪𑀯𑀺𑀲𑁆𑀲𑀢𑀻’𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀲𑁄𑀘𑀦𑁆𑀢𑁄 𑀭𑁄𑀤𑀸𑀫𑀻’’𑀢𑀺 𑀆𑀳. 𑀢𑀢𑁄 𑀲𑁄 ‘‘𑀓𑀺𑀁 𑀦𑀼 𑀔𑁄 𑀫𑁂 𑀜𑀸𑀢𑀓𑁂𑀲𑀼 𑀓𑁄𑀘𑀺 𑀏𑀓𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀦𑀸𑀮𑀓𑀤𑀸𑀭𑀓𑀁 𑀅𑀤𑁆𑀤𑀲. 𑀲𑁄 𑀪𑀕𑀺𑀦𑀺𑀬𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀢𑁂 𑀧𑀼𑀢𑁆𑀢𑁄 𑀦𑀸𑀮𑀓𑁄’’𑀢𑀺? ‘‘𑀅𑀢𑁆𑀣𑀺 𑀕𑁂𑀳𑁂, 𑀅𑀬𑁆𑀬𑀸’’𑀢𑀺. ‘‘𑀧𑀓𑁆𑀓𑁄𑀲𑀸𑀳𑀺 𑀦’’𑀦𑁆𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀓𑀼𑀫𑀸𑀭𑀁 𑀆𑀳 𑁋 ‘‘𑀢𑀸𑀢, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑁂 𑀧𑀼𑀢𑁆𑀢𑁄 𑀚𑀸𑀢𑁄, 𑀩𑀼𑀤𑁆𑀥𑀗𑁆𑀓𑀼𑀭𑁄 𑀏𑀲𑁄, 𑀧𑀜𑁆𑀘𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀏𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀲𑀺, 𑀅𑀚𑁆𑀚𑁂𑀯 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑀢𑁆𑀢𑀸𑀲𑀻𑀢𑀺𑀓𑁄𑀝𑀺𑀥𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀤𑀸𑀭𑀓𑁄𑀧𑀺 ‘‘𑀦 𑀫𑀁 𑀫𑀸𑀢𑀼𑀮𑁄 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀯𑀤𑁂𑀯 𑀅𑀦𑁆𑀢𑀭𑀸𑀧𑀡𑀢𑁄 𑀓𑀸𑀲𑀸𑀬𑀸𑀦𑀺 𑀘𑁂𑀯 𑀫𑀢𑁆𑀢𑀺𑀓𑀸𑀧𑀢𑁆𑀢𑀜𑁆𑀘 𑀆𑀳𑀭𑀸𑀧𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 ‘‘𑀬𑁄 𑀮𑁄𑀓𑁂 𑀉𑀢𑁆𑀢𑀫𑀧𑀼𑀕𑁆𑀕𑀮𑁄, 𑀢𑀁 𑀉𑀤𑁆𑀤𑀺𑀲𑁆𑀲 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀸𑀪𑀺𑀫𑀼𑀔𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑀓𑀽𑀝𑁂 𑀑𑀮𑀕𑁆𑀕𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀲𑁄 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑀁 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀮𑀓𑀧𑀝𑀺𑀧𑀤𑀁 𑀓𑀣𑀸𑀧𑁂𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀓𑁆𑀓𑀝𑁆𑀞𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀲𑀢𑁆𑀢𑁂𑀯 𑀫𑀸𑀲𑁂 𑀆𑀬𑀼𑀁 𑀧𑀸𑀮𑁂𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀩𑁄𑀥𑀺𑀲𑀢𑁆𑀢𑀫𑁆𑀧𑀺 𑀔𑁄 𑀧𑀜𑁆𑀘𑀫𑀤𑀺𑀯𑀲𑁂 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 ‘‘𑀦𑀸𑀫𑀕𑁆𑀕𑀳𑀡𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀪𑀯𑀦𑀁 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀧𑀸𑀬𑀸𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀗𑁆𑀕𑀢𑁂 𑀅𑀝𑁆𑀞𑀲𑀢𑀁 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀭𑀸𑀚𑀪𑀯𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑀸𑀧𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑀓𑁆𑀔𑀡𑀸𑀦𑀺 𑀧𑀭𑀺𑀕𑁆𑀕𑀳𑀸𑀧𑁂𑀲𑀼𑀁. 𑀢𑁂𑀲𑀼 𑁋

‘‘𑀭𑀸𑀫𑁄 𑀥𑀚𑁄 𑀮𑀓𑁆𑀔𑀡𑁄 𑀘𑀸𑀧𑀺 𑀫𑀦𑁆𑀢𑀻, 𑀬𑀜𑁆𑀜𑁄 𑀲𑀼𑀪𑁄𑀚𑁄 𑀲𑀼𑀬𑀸𑀫𑁄 𑀲𑀼𑀤𑀢𑁆𑀢𑁄;

𑀏𑀢𑁂 𑀢𑀤𑀸 𑀅𑀝𑁆𑀞 𑀅𑀳𑁂𑀲𑀼𑀁 𑀩𑁆𑀭𑀸𑀳𑁆𑀫𑀡𑀸, 𑀙𑀴𑀗𑁆𑀕𑀯𑀸 𑀫𑀦𑁆𑀢𑀁 𑀯𑀺𑀬𑀸𑀓𑀭𑀺𑀁𑀲𑀽’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨𑁮𑁪) 𑁋

𑀇𑀫𑁂 𑀅𑀝𑁆𑀞𑁂𑀯 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀸 𑀅𑀳𑁂𑀲𑀼𑀁. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀲𑀼𑀧𑀺𑀦𑁄𑀧𑀺 𑀏𑀢𑁂𑀳𑁂𑀯 𑀧𑀭𑀺𑀕𑁆𑀕𑀳𑀺𑀢𑁄. 𑀢𑁂𑀲𑀼 𑀲𑀢𑁆𑀢 𑀚𑀦𑀸 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀺𑀥𑀸 𑀦𑀁 𑀩𑁆𑀬𑀸𑀓𑀭𑀺𑀁𑀲𑀼 𑁋 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀁 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀲𑀺𑀭𑀺𑀯𑀺𑀪𑀯𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀢𑁂𑀲𑀁 𑀧𑀦 𑀲𑀩𑁆𑀩𑀤𑀳𑀭𑁄 𑀕𑁄𑀢𑁆𑀢𑀢𑁄 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀭𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀫𑀲𑁆𑀲 𑀅𑀕𑀸𑀭𑀫𑀚𑁆𑀛𑁂 𑀞𑀸𑀦𑀓𑀸𑀭𑀡𑀁 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦𑁂𑀲 𑀯𑀺𑀯𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀫𑁂𑀯 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀁 𑀩𑁆𑀬𑀸𑀓𑀸𑀲𑀺. 𑀅𑀬𑀜𑁆𑀳𑀺 𑀓𑀢𑀸𑀥𑀺𑀓𑀸𑀭𑁄 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑁄 𑀧𑀜𑁆𑀜𑀸𑀬 𑀇𑀢𑀭𑁂 𑀲𑀢𑁆𑀢 𑀚𑀦𑁂 𑀅𑀪𑀺𑀪𑀯𑀺𑀢𑁆𑀯𑀸 𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀓𑀦𑁆𑀢𑀩𑀼𑀤𑁆𑀥𑀪𑀸𑀯𑀲𑀗𑁆𑀔𑀸𑀢𑀁 𑀏𑀓𑀫𑁂𑀯 𑀕𑀳𑀺𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀓𑀁 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀅𑀣𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑀸 𑀲𑀩𑁆𑀩𑀮𑁄𑀓𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺𑀓𑀭𑀢𑁆𑀢𑀸 ‘‘𑀲𑀺𑀤𑁆𑀥𑀢𑁆𑀣𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼.

𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀢𑀸𑀢𑀸, 𑀅𑀫𑁆𑀳𑁂 𑀫𑀳𑀮𑁆𑀮𑀓𑀸, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀁 𑀫𑀬𑀁 𑀲𑀫𑁆𑀪𑀸𑀯𑁂𑀬𑁆𑀬𑀸𑀫 𑀯𑀸 𑀦𑁄 𑀯𑀸, 𑀢𑀼𑀫𑁆𑀳𑁂 𑀢𑀲𑁆𑀫𑀺𑀁 𑀓𑀼𑀫𑀸𑀭𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀲𑀢𑁆𑀢𑀧𑀺 𑀚𑀦𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸, 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑁄𑀬𑁂𑀯 𑀧𑀦 𑀅𑀭𑁄𑀕𑁄 𑀅𑀳𑁄𑀲𑀺. 𑀲𑁄 𑀫𑀳𑀸𑀲𑀢𑁆𑀢𑁂 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀓𑁆𑀓𑀫𑁂𑀦 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 ‘‘𑀭𑀫𑀡𑀻𑀬𑁄 𑀯𑀢 𑀅𑀬𑀁 𑀪𑀽𑀫𑀺𑀪𑀸𑀕𑁄, 𑀅𑀮𑀁 𑀯𑀢𑀺𑀤𑀁 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀸𑀬𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁂 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑁄, 𑀲𑁄 𑀦𑀺𑀲𑁆𑀲𑀁𑀲𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀢𑀼𑀫𑁆𑀳𑀸𑀓𑀁 𑀧𑀺𑀢𑀭𑁄 𑀅𑀭𑁄𑀕𑀸 𑀅𑀲𑁆𑀲𑀼, 𑀅𑀚𑁆𑀚 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬𑀼𑀁. 𑀲𑀘𑁂 𑀢𑀼𑀫𑁆𑀳𑁂𑀧𑀺 𑀇𑀘𑁆𑀙𑁂𑀬𑁆𑀬𑀸𑀣, 𑀏𑀣, 𑀫𑀬𑀁 𑀢𑀁 𑀫𑀳𑀸𑀧𑀼𑀭𑀺𑀲𑀁 𑀅𑀦𑀼𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑁂𑀲𑀼 𑀢𑀬𑁄 𑀚𑀦𑀸 𑀦 𑀧𑀩𑁆𑀩𑀚𑀺𑀁𑀲𑀼, 𑀓𑁄𑀡𑁆𑀟𑀜𑁆𑀜𑀩𑁆𑀭𑀸𑀳𑁆𑀫𑀡𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀧𑀜𑁆𑀘𑀧𑀺 𑀚𑀦𑀸 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸 𑀦𑀸𑀫 𑀚𑀸𑀢𑀸.

𑀢𑀤𑀸 𑀧𑀦 𑀲𑀼𑀤𑁆𑀥𑁄𑀤𑀦𑀭𑀸𑀚𑀸 𑁋 ‘‘𑀓𑀺𑀁 𑀤𑀺𑀲𑁆𑀯𑀸 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀘𑀢𑁆𑀢𑀸𑀭𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺. ‘‘𑀓𑀢𑀭𑀜𑁆𑀘 𑀓𑀢𑀭𑀜𑁆𑀘𑀸’’𑀢𑀺? ‘‘𑀚𑀭𑀸𑀚𑀺𑀡𑁆𑀡𑀁, 𑀩𑁆𑀬𑀸𑀥𑀺𑀢𑀁, 𑀫𑀢𑀁, 𑀧𑀩𑁆𑀩𑀚𑀺𑀢’’𑀦𑁆𑀢𑀺. 𑀭𑀸𑀚𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀸𑀦𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀫𑀸 𑀅𑀤𑀢𑁆𑀣, 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀳𑀁 𑀫𑀫 𑀧𑀼𑀢𑁆𑀢𑀁 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀸𑀦𑀁, 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁, 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀭𑁄𑀦𑁆𑀢𑀁 𑀙𑀢𑁆𑀢𑀺𑀁𑀲𑀬𑁄𑀚𑀦𑀧𑀭𑀺𑀫𑀡𑁆𑀟𑀮𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀕𑀕𑀦𑀢𑀮𑁂 𑀯𑀺𑀘𑀭𑀫𑀸𑀦𑀁 𑀧𑀲𑁆𑀲𑀺𑀢𑀼𑀓𑀸𑀫𑁄’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀫𑁂𑀲𑀁 𑀘𑀢𑀼𑀧𑁆𑀧𑀓𑀸𑀭𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀓𑀼𑀫𑀸𑀭𑀲𑁆𑀲 𑀘𑀓𑁆𑀔𑀼𑀧𑀣𑁂 𑀆𑀕𑀫𑀦𑀦𑀺𑀯𑀸𑀭𑀡𑀢𑁆𑀣𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀸𑀯𑀼𑀢𑁂 𑀕𑀸𑀯𑀼𑀢𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀢𑀁 𑀤𑀺𑀯𑀲𑀜𑁆𑀘 𑀫𑀗𑁆𑀕𑀮𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀅𑀲𑀻𑀢𑀺𑀬𑀸 𑀜𑀸𑀢𑀺𑀓𑀼𑀮𑀲𑀳𑀲𑁆𑀲𑁂𑀲𑀼 𑀏𑀓𑀫𑁂𑀓𑁄 𑀏𑀓𑀫𑁂𑀓𑀁 𑀧𑀼𑀢𑁆𑀢𑀁 𑀧𑀝𑀺𑀚𑀸𑀦𑀺 𑁋 ‘‘𑀅𑀬𑀁 𑀩𑀼𑀤𑁆𑀥𑁄 𑀯𑀸 𑀳𑁄𑀢𑀼 𑀭𑀸𑀚𑀸 𑀯𑀸, 𑀫𑀬𑀁 𑀏𑀓𑀫𑁂𑀢𑀁 𑀧𑀼𑀢𑁆𑀢𑀁 𑀤𑀲𑁆𑀲𑀸𑀫. 𑀲𑀘𑁂𑀧𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀲𑀫𑀡𑀕𑀡𑁂𑀳𑁂𑀯 𑀧𑀭𑀺𑀯𑀸𑀭𑀺𑀢𑁄 𑀯𑀺𑀘𑀭𑀺𑀲𑁆𑀲𑀢𑀺. 𑀲𑀘𑁂𑀧𑀺 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀳𑁂𑀯 𑀧𑀼𑀭𑀓𑁆𑀔𑀢𑀧𑀭𑀺𑀯𑀸𑀭𑀺𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀢𑁆𑀢𑀫𑀭𑀽𑀧𑀲𑀫𑁆𑀧𑀦𑁆𑀦𑀸 𑀯𑀺𑀕𑀢𑀲𑀩𑁆𑀩𑀤𑁄𑀲𑀸 𑀥𑀸𑀢𑀺𑀬𑁄 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀯𑀟𑁆𑀠𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀯𑀧𑁆𑀧𑀫𑀗𑁆𑀕𑀮𑀁 𑀦𑀸𑀫 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀁 𑀲𑀓𑀮𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀭𑁄𑀦𑁆𑀢𑀺, 𑀲𑀩𑁆𑀩𑁂 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀕𑀦𑁆𑀥𑀫𑀸𑀮𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀸 𑀭𑀸𑀚𑀓𑀼𑀮𑁂 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀭𑀜𑁆𑀜𑁄 𑀓𑀫𑁆𑀫𑀦𑁆𑀢𑁂 𑀦𑀗𑁆𑀕𑀮𑀲𑀳𑀲𑁆𑀲𑀁 𑀬𑁄𑀚𑀬𑀦𑁆𑀢𑀺, 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀏𑀓𑁂𑀦𑀽𑀦𑀅𑀝𑁆𑀞𑀲𑀢𑀦𑀗𑁆𑀕𑀮𑀸𑀦𑀺 𑀲𑀤𑁆𑀥𑀺𑀁 𑀩𑀮𑀺𑀩𑀤𑁆𑀤𑀭𑀲𑁆𑀫𑀺𑀬𑁄𑀢𑁆𑀢𑁂𑀳𑀺 𑀭𑀚𑀢𑀧𑀭𑀺𑀓𑁆𑀔𑀢𑀸𑀦𑀺 𑀳𑁄𑀦𑁆𑀢𑀺. 𑀭𑀜𑁆𑀜𑁄 𑀆𑀮𑀫𑁆𑀩𑀦𑀦𑀗𑁆𑀕𑀮𑀁 𑀧𑀦 𑀭𑀢𑁆𑀢𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑀁 𑀳𑁄𑀢𑀺. 𑀩𑀮𑀺𑀩𑀤𑁆𑀤𑀸𑀦𑀁 𑀲𑀺𑀗𑁆𑀕𑀭𑀲𑁆𑀫𑀺𑀧𑀢𑁄𑀤𑀸𑀧𑀺 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑀸𑀯 𑀳𑁄𑀦𑁆𑀢𑀺. 𑀭𑀸𑀚𑀸 𑀫𑀳𑀸𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸𑀯 𑀅𑀕𑀫𑀸𑀲𑀺. 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑁂 𑀏𑀓𑁄 𑀚𑀫𑁆𑀩𑀼𑀭𑀼𑀓𑁆𑀔𑁄 𑀩𑀳𑀮𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀳𑁂𑀝𑁆𑀞𑀸 𑀓𑀼𑀫𑀸𑀭𑀲𑁆𑀲 𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀦𑀗𑁆𑀕𑀮𑀓𑀭𑀡𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀭𑀸𑀚𑀸 𑀲𑀼𑀯𑀡𑁆𑀡𑀦𑀗𑁆𑀕𑀮𑀁 𑀕𑀡𑁆𑀳𑀸𑀢𑀺, 𑀅𑀫𑀘𑁆𑀘𑀸 𑀏𑀓𑁂𑀦𑀽𑀦𑀅𑀝𑁆𑀞𑀲𑀢𑀭𑀚𑀢𑀦𑀗𑁆𑀕𑀮𑀸𑀦𑀺, 𑀓𑀲𑁆𑀲𑀓𑀸 𑀲𑁂𑀲𑀦𑀗𑁆𑀕𑀮𑀸𑀦𑀺. 𑀢𑁂 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀓𑀲𑀦𑁆𑀢𑀺. 𑀭𑀸𑀚𑀸 𑀧𑀦 𑀑𑀭𑀢𑁄 𑀯𑀸 𑀧𑀸𑀭𑀁 𑀕𑀘𑁆𑀙𑀢𑀺, 𑀧𑀸𑀭𑀢𑁄 𑀯𑀸 𑀑𑀭𑀁 𑀆𑀕𑀘𑁆𑀙𑀢𑀺.

𑀏𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀲𑀫𑁆𑀧𑀢𑁆𑀢𑀺 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀥𑀸𑀢𑀺𑀬𑁄 ‘‘𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀸𑀫𑀸’’𑀢𑀺 𑀅𑀦𑁆𑀢𑁄𑀲𑀸𑀡𑀺𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸. 𑀩𑁄𑀥𑀺𑀲𑀢𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸𑀯 𑀯𑁂𑀕𑁂𑀦 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀆𑀦𑀸𑀧𑀸𑀦𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀥𑀸𑀢𑀺𑀬𑁄 𑀔𑀚𑁆𑀚𑀪𑁄𑀚𑁆𑀚𑀦𑁆𑀢𑀭𑁂 𑀯𑀺𑀘𑀭𑀫𑀸𑀦𑀸 𑀣𑁄𑀓𑀁 𑀘𑀺𑀭𑀸𑀬𑀺𑀁𑀲𑀼. 𑀲𑁂𑀲𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀯𑀻𑀢𑀺𑀯𑀢𑁆𑀢𑀸, 𑀢𑀲𑁆𑀲 𑀧𑀦 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀙𑀸𑀬𑀸 𑀧𑀭𑀺𑀫𑀡𑁆𑀟𑀮𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀥𑀸𑀢𑀺𑀬𑁄 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀏𑀓𑀓𑁄’’𑀢𑀺 𑀯𑁂𑀕𑁂𑀦 𑀲𑀸𑀡𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀁 𑀲𑀬𑀦𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀤𑁂𑀯, 𑀓𑀼𑀫𑀸𑀭𑁄 𑀏𑀯𑀁 𑀦𑀺𑀲𑀺𑀦𑁆𑀦𑁄, 𑀅𑀜𑁆𑀜𑁂𑀲𑀁 𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀯𑀻𑀢𑀺𑀯𑀢𑁆𑀢𑀸, 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀧𑀦 𑀙𑀸𑀬𑀸 𑀧𑀭𑀺𑀫𑀡𑁆𑀟𑀮𑀸 𑀞𑀺𑀢𑀸’’𑀢𑀺. 𑀭𑀸𑀚𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀢𑁂, 𑀢𑀸𑀢, 𑀤𑀼𑀢𑀺𑀬𑀯𑀦𑁆𑀤𑀦𑀸’’𑀢𑀺 𑀧𑀼𑀢𑁆𑀢𑀁 𑀯𑀦𑁆𑀤𑀺.

𑀅𑀣 𑀅𑀦𑀼𑀓𑁆𑀓𑀫𑁂𑀦 𑀩𑁄𑀥𑀺𑀲𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀚𑀸𑀢𑁄. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑁂𑀲𑀺 𑁋 𑀏𑀓𑀁 𑀦𑀯𑀪𑀽𑀫𑀺𑀓𑀁, 𑀏𑀓𑀁 𑀲𑀢𑁆𑀢𑀪𑀽𑀫𑀺𑀓𑀁, 𑀏𑀓𑀁 𑀧𑀜𑁆𑀘𑀪𑀽𑀫𑀺𑀓𑀁, 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸 𑀘 𑀦𑀸𑀝𑀓𑀺𑀢𑁆𑀣𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑁄 𑀯𑀺𑀬 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀮𑀗𑁆𑀓𑀢𑀦𑀸𑀝𑀓𑀺𑀢𑁆𑀣𑀻𑀳𑀺 𑀧𑀭𑀺𑀯𑀼𑀢𑁄 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀉𑀢𑀼𑀯𑀸𑀭𑁂𑀦 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀯𑀺𑀳𑀸𑀲𑀺. 𑀭𑀸𑀳𑀼𑀮𑀫𑀸𑀢𑀸 𑀧𑀦𑀲𑁆𑀲 𑀤𑁂𑀯𑀻 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺.

𑀢𑀲𑁆𑀲𑁂𑀯𑀁 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀏𑀓𑀤𑀺𑀯𑀲𑀁 𑀜𑀸𑀢𑀺𑀲𑀗𑁆𑀖𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀲𑀺𑀤𑁆𑀥𑀢𑁆𑀣𑁄 𑀓𑀻𑀴𑀸𑀧𑀲𑀼𑀢𑁄𑀯 𑀯𑀺𑀘𑀭𑀢𑀺, 𑀦 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀲𑀺𑀓𑁆𑀔𑀢𑀺, 𑀲𑀗𑁆𑀕𑀸𑀫𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺? 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀢𑀯 𑀜𑀸𑀢𑀓𑀸 ‘𑀲𑀺𑀤𑁆𑀥𑀢𑁆𑀣𑁄 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀲𑀺𑀓𑁆𑀔𑀺𑀢𑁆𑀯𑀸 𑀓𑀻𑀴𑀸𑀧𑀲𑀼𑀢𑁄𑀯 𑀯𑀺𑀘𑀭𑀢𑀻’𑀢𑀺 𑀯𑀤𑀦𑁆𑀢𑀺, 𑀏𑀢𑁆𑀣 𑀓𑀺𑀁 𑀲𑀢𑁆𑀢𑀼 𑀧𑀢𑁆𑀢𑀓𑀸𑀮𑁂 𑀫𑀜𑁆𑀜𑀲𑀻’’𑀢𑀺? ‘‘𑀤𑁂𑀯, 𑀫𑀫 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀕𑀭𑁂 𑀫𑀫 𑀲𑀺𑀧𑁆𑀧𑀤𑀲𑁆𑀲𑀦𑀢𑁆𑀣𑀁 𑀪𑁂𑀭𑀺𑀁 𑀘𑀭𑀸𑀧𑁂𑀣 ‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀜𑀸𑀢𑀓𑀸𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’’𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀓𑁆𑀔𑀡𑀯𑁂𑀥𑀺𑀯𑀸𑀮𑀯𑁂𑀥𑀺𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀅𑀜𑁆𑀜𑁂𑀳𑀺 𑀥𑀦𑀼𑀕𑁆𑀕𑀳𑁂𑀳𑀺 𑀅𑀲𑀸𑀥𑀸𑀭𑀡𑀁 𑀜𑀸𑀢𑀓𑀸𑀦𑀁 𑀤𑁆𑀯𑀸𑀤𑀲𑀯𑀺𑀥𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀢𑀁 𑀲𑀭𑀪𑀗𑁆𑀕𑀚𑀸𑀢𑀓𑁂 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀸 𑀢𑀲𑁆𑀲 𑀜𑀸𑀢𑀺𑀲𑀗𑁆𑀖𑁄 𑀦𑀺𑀓𑁆𑀓𑀗𑁆𑀔𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀦𑁆𑀢𑀼𑀓𑀸𑀫𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀭𑀣𑀁 𑀬𑁄𑀚𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀫𑀳𑀸𑀭𑀳𑀁 𑀉𑀢𑁆𑀢𑀫𑀭𑀣𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀼𑀫𑀼𑀤𑀧𑀢𑁆𑀢𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀫𑀗𑁆𑀕𑀮𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀯𑁂𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀤𑁂𑀯𑀢𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑀸𑀮𑁄 𑀆𑀲𑀦𑁆𑀦𑁄, 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀤𑁂𑀯𑀧𑀼𑀢𑁆𑀢𑀁 𑀚𑀭𑀸𑀚𑀺𑀡𑁆𑀡𑀁 𑀔𑀡𑁆𑀟𑀤𑀦𑁆𑀢𑀁 𑀧𑀮𑀺𑀢𑀓𑁂𑀲𑀁 𑀯𑀗𑁆𑀓𑀁 𑀑𑀪𑀕𑁆𑀕𑀲𑀭𑀻𑀭𑀁 𑀤𑀡𑁆𑀟𑀳𑀢𑁆𑀣𑀁 𑀧𑀯𑁂𑀥𑀫𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀢𑀁 𑀩𑁄𑀥𑀺𑀲𑀢𑁆𑀢𑁄 𑀘𑁂𑀯 𑀲𑀸𑀭𑀣𑀺 𑀘 𑀧𑀲𑁆𑀲𑀦𑁆𑀢𑀺. 𑀢𑀢𑁄 𑀩𑁄𑀥𑀺𑀲𑀢𑁆𑀢𑁄, ‘‘𑀲𑀫𑁆𑀫, 𑀓𑁄 𑀦𑀸𑀫𑁂𑀲 𑀧𑀼𑀭𑀺𑀲𑁄, 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺 𑀫𑀳𑀸𑀧𑀤𑀸𑀦𑁂 (𑀤𑀻. 𑀦𑀺. 𑁨.𑁪𑁫) 𑀆𑀕𑀢𑀦𑀬𑁂𑀦 𑀲𑀸𑀭𑀣𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀥𑀺𑀭𑀢𑁆𑀣𑀼 𑀯𑀢, 𑀪𑁄, 𑀚𑀸𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀁𑀯𑀺𑀕𑁆𑀕𑀳𑀤𑀬𑁄 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀫𑁂𑀯 𑀅𑀪𑀺𑀭𑀼𑀳𑀺. 𑀭𑀸𑀚𑀸 ‘‘𑀓𑀺𑀁 𑀓𑀸𑀭𑀡𑀸 𑀫𑀫 𑀧𑀼𑀢𑁆𑀢𑁄 𑀔𑀺𑀧𑁆𑀧𑀁 𑀧𑀝𑀺𑀦𑀺𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀚𑀺𑀡𑁆𑀡𑀧𑀼𑀭𑀺𑀲𑀁 𑀤𑀺𑀲𑁆𑀯𑀸, 𑀤𑁂𑀯𑀸’’𑀢𑀺. ‘‘𑀚𑀺𑀡𑁆𑀡𑀓𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀢𑀻𑀢𑀺 𑀆𑀳𑀁𑀲𑀼, 𑀓𑀲𑁆𑀫𑀸 𑀫𑀁 𑀦𑀸𑀲𑁂𑀣, 𑀲𑀻𑀖𑀁 𑀧𑀼𑀢𑁆𑀢𑀲𑁆𑀲 𑀦𑀸𑀝𑀓𑀸𑀦𑀺 𑀲𑀚𑁆𑀚𑁂𑀣, 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀧𑀩𑁆𑀩𑀚𑁆𑀚𑀸𑀬 𑀲𑀢𑀺𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀆𑀭𑀓𑁆𑀔𑀁 𑀯𑀟𑁆𑀠𑁂𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀲𑀼 𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺.

𑀧𑀼𑀦𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀢𑀣𑁂𑀯 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀤𑁂𑀯𑀢𑀸𑀪𑀺𑀦𑀺𑀫𑁆𑀫𑀺𑀢𑀁 𑀩𑁆𑀬𑀸𑀥𑀺𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀭𑀸𑀚𑀸𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀲𑀫𑀦𑁆𑀢𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀅𑀧𑀭𑀫𑁆𑀧𑀺 𑀏𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀢𑀣𑁂𑀯 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀤𑁂𑀯𑀢𑀸𑀪𑀺𑀦𑀺𑀫𑁆𑀫𑀺𑀢𑀁 𑀓𑀸𑀮𑀗𑁆𑀓𑀢𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀭𑀸𑀚𑀸𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀅𑀧𑀭𑀁 𑀧𑀦𑁂𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀣𑁂𑀯 𑀤𑁂𑀯𑀢𑀸𑀪𑀺𑀦𑀺𑀫𑁆𑀫𑀺𑀢𑀁 𑀲𑀼𑀦𑀺𑀯𑀢𑁆𑀣𑀁 𑀲𑀼𑀧𑀸𑀭𑀼𑀢𑀁 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀸𑀫𑁂𑀲𑁄 𑀲𑀫𑁆𑀫𑀸’’𑀳𑀺 𑀲𑀸𑀭𑀣𑀺𑀁 𑀧𑀼𑀘𑁆𑀙𑀺. 𑀲𑀸𑀭𑀣𑀺 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀧𑀩𑁆𑀩𑀚𑀺𑀢𑀕𑀼𑀡𑁂 𑀯𑀸 𑀦 𑀚𑀸𑀦𑀸𑀢𑀺, 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀧𑀦 ‘‘𑀧𑀩𑁆𑀩𑀚𑀺𑀢𑁄 𑀦𑀸𑀫𑀸𑀬𑀁, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑁂 𑀯𑀡𑁆𑀡𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀩𑁆𑀩𑀚𑁆𑀚𑀸𑀬 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀤𑀻𑀖𑀪𑀸𑀡𑀓𑀸 𑀧𑀦𑀸𑀳𑀼 𑁋 ‘‘𑀘𑀢𑁆𑀢𑀸𑀭𑀺𑀧𑀺 𑀦𑀺𑀫𑀺𑀢𑁆𑀢𑀸𑀦𑀺 𑀏𑀓𑀤𑀺𑀯𑀲𑁂𑀦𑁂𑀯 𑀤𑀺𑀲𑁆𑀯𑀸 𑀅𑀕𑀫𑀸𑀲𑀻’’𑀢𑀺.

𑀲𑁄 𑀢𑀢𑁆𑀣 𑀤𑀺𑀯𑀲𑀪𑀸𑀕𑀁 𑀓𑀻𑀴𑀺𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑀼𑀓𑀸𑀫𑁄, 𑀅𑀣𑀲𑁆𑀲 𑀧𑀭𑀺𑀘𑀸𑀭𑀓𑀧𑀼𑀭𑀺𑀲𑀸 𑀦𑀸𑀦𑀸𑀯𑀡𑁆𑀡𑀸𑀦𑀺 𑀤𑀼𑀲𑁆𑀲𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑀸 𑀆𑀪𑀭𑀡𑀯𑀺𑀓𑀢𑀺𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀦𑀺 𑀘 𑀆𑀤𑀸𑀬 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀦𑀺𑀲𑀺𑀦𑁆𑀦𑀸𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑁄 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄𑀲𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑁂𑀢𑀼𑀓𑀸𑀫𑀢𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀫 𑀯𑀺𑀲𑁆𑀲𑀓𑀫𑁆𑀫, 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀅𑀚𑁆𑀚 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀅𑀬𑀫𑀲𑁆𑀲 𑀧𑀘𑁆𑀙𑀺𑀫𑁄 𑀅𑀮𑀗𑁆𑀓𑀸𑀭𑁄, 𑀢𑁆𑀯𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑁄𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑁂𑀯𑀸𑀦𑀼𑀪𑀸𑀯𑁂𑀦 𑀢𑀗𑁆𑀔𑀡𑀜𑁆𑀜𑁂𑀯 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀧𑁆𑀧𑀓𑀲𑀤𑀺𑀲𑁄 𑀳𑀼𑀢𑁆𑀯𑀸 𑀤𑀺𑀩𑁆𑀩𑀤𑀼𑀲𑁆𑀲𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀯𑁂𑀞𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦𑁂𑀯 ‘‘𑀦𑀸𑀫𑀁 𑀫𑀦𑀼𑀲𑁆𑀲𑁄, 𑀤𑁂𑀯𑀧𑀼𑀢𑁆𑀢𑁄 𑀅𑀬’’𑀦𑁆𑀢𑀺 𑀅𑀜𑁆𑀜𑀸𑀲𑀺. 𑀯𑁂𑀞𑀦𑁂𑀦 𑀯𑁂𑀞𑀺𑀢𑀫𑀢𑁆𑀢𑁂 𑀲𑀻𑀲𑁂 𑀫𑁄𑀴𑀺𑀬𑀁 𑀫𑀡𑀺𑀭𑀢𑀦𑀸𑀓𑀸𑀭𑁂𑀦 𑀤𑀼𑀲𑁆𑀲𑀲𑀳𑀲𑁆𑀲𑀁 𑀅𑀩𑁆𑀪𑀼𑀕𑁆𑀕𑀜𑁆𑀙𑀺, 𑀧𑀼𑀦 𑀯𑁂𑀞𑁂𑀦𑁆𑀢𑀲𑁆𑀲 𑀤𑀼𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀤𑀲𑀓𑁆𑀔𑀢𑁆𑀢𑀼𑀁 𑀯𑁂𑀞𑁂𑀦𑁆𑀢𑀲𑁆𑀲 𑀤𑀲 𑀤𑀼𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀩𑁆𑀪𑀼𑀕𑁆𑀕𑀘𑁆𑀙𑀺𑀁𑀲𑀼. ‘‘𑀲𑀻𑀲𑀁 𑀔𑀼𑀤𑁆𑀤𑀓𑀁, 𑀤𑀼𑀲𑁆𑀲𑀸𑀦𑀺 𑀩𑀳𑀽𑀦𑀺, 𑀓𑀣𑀁 𑀅𑀩𑁆𑀪𑀼𑀕𑁆𑀕𑀢𑀸𑀦𑀻’’𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀢𑁂𑀲𑀼 𑀳𑀺 𑀲𑀩𑁆𑀩𑀫𑀳𑀦𑁆𑀢𑀁 𑀆𑀫𑀮𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀁, 𑀅𑀯𑀲𑁂𑀲𑀸𑀦𑀺 𑀓𑀤𑀫𑁆𑀩𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸𑀦𑀺 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀓𑀺𑀜𑁆𑀚𑀓𑁆𑀔𑀕𑀯𑀘𑁆𑀙𑀺𑀢𑀁 𑀯𑀺𑀬 𑀓𑀼𑀬𑁆𑀬𑀓𑀧𑀼𑀧𑁆𑀨𑀁 𑀅𑀳𑁄𑀲𑀺.

𑀅𑀣𑀲𑁆𑀲 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀲𑀩𑁆𑀩𑀢𑀸𑀮𑀸𑀯𑀘𑀭𑁂𑀲𑀼 𑀲𑀓𑀸𑀦𑀺 𑀲𑀓𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀤𑀲𑁆𑀲𑀬𑀦𑁆𑀢𑁂𑀲𑀼, 𑀩𑁆𑀭𑀸𑀳𑁆𑀫𑀡𑁂𑀲𑀼 ‘‘𑀚𑀬𑀦𑀦𑁆𑀤𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺, 𑀲𑀼𑀢𑀫𑀗𑁆𑀕𑀮𑀺𑀓𑀸𑀤𑀻𑀲𑀼 𑀘 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀫𑀗𑁆𑀕𑀮𑀯𑀘𑀦𑀢𑁆𑀣𑀼𑀢𑀺𑀖𑁄𑀲𑁂𑀳𑀺 𑀲𑀫𑁆𑀪𑀸𑀯𑁂𑀦𑁆𑀢𑁂𑀲𑀼 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀢𑀁 𑀭𑀣𑀯𑀭𑀁 𑀅𑀪𑀺𑀭𑀼𑀳𑀺. 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀭𑀸𑀳𑀼𑀮𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸’’𑀢𑀺 𑀲𑀼𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀢𑀼𑀝𑁆𑀞𑀺𑀁 𑀦𑀺𑀯𑁂𑀤𑁂𑀣𑀸’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀆𑀳. 𑀭𑀸𑀚𑀸 ‘‘𑀓𑀺𑀁 𑀫𑁂 𑀧𑀼𑀢𑁆𑀢𑁄 𑀅𑀯𑀘𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑁂 𑀦𑀢𑁆𑀢𑀸 ‘𑀭𑀸𑀳𑀼𑀮𑀓𑀼𑀫𑀸𑀭𑁄’𑀢𑁆𑀯𑁂𑀯 𑀦𑀸𑀫 𑀳𑁄𑀢𑀽’’𑀢𑀺 𑀆𑀳.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀭𑀣𑀯𑀭𑀁 𑀆𑀭𑀼𑀬𑁆𑀳 𑀅𑀢𑀺𑀫𑀳𑀦𑁆𑀢𑁂𑀦 𑀬𑀲𑁂𑀦 𑀅𑀢𑀺𑀫𑀦𑁄𑀭𑀫𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀲𑀸𑀕𑁄𑀢𑀫𑀻 𑀦𑀸𑀫 𑀔𑀢𑁆𑀢𑀺𑀬𑀓𑀜𑁆𑀜𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀢𑀮𑀕𑀢𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀼𑀭𑀼𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀲𑀺𑀭𑀺𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀫𑀸𑀢𑀸, 𑀦𑀺𑀩𑁆𑀩𑀼𑀢𑁄 𑀦𑀽𑀦 𑀲𑁄 𑀧𑀺𑀢𑀸;

𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀦𑀸𑀭𑀻, 𑀬𑀲𑁆𑀲𑀸𑀬𑀁 𑀈𑀤𑀺𑀲𑁄 𑀧𑀢𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸); 𑁋

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀏𑀯𑀫𑀸𑀳 𑁋 ‘𑀏𑀯𑀭𑀽𑀧𑀁 𑀅𑀢𑁆𑀢𑀪𑀸𑀯𑀁 𑀧𑀲𑁆𑀲𑀦𑁆𑀢𑀺𑀬𑀸 𑀫𑀸𑀢𑀼 𑀳𑀤𑀬𑀁 𑀦𑀺𑀩𑁆𑀩𑀸𑀬𑀢𑀺, 𑀧𑀺𑀢𑀼 𑀳𑀤𑀬𑀁 𑀦𑀺𑀩𑁆𑀩𑀸𑀬𑀢𑀺, 𑀧𑀚𑀸𑀧𑀢𑀺𑀬𑀸 𑀳𑀤𑀬𑀁 𑀦𑀺𑀩𑁆𑀩𑀸𑀬𑀢𑀻’𑀢𑀺. 𑀓𑀺𑀲𑁆𑀫𑀺𑀁 𑀦𑀼 𑀔𑁄 𑀦𑀺𑀩𑁆𑀩𑀼𑀢𑁂 𑀳𑀤𑀬𑀁 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀻’’𑀢𑀺. 𑀅𑀣𑀲𑁆𑀲 𑀓𑀺𑀮𑁂𑀲𑁂𑀲𑀼 𑀯𑀺𑀭𑀢𑁆𑀢𑀫𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀕𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺, 𑀤𑁄𑀲𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺, 𑀫𑁄𑀳𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺, 𑀫𑀸𑀦𑀤𑀺𑀝𑁆𑀞𑀺𑀆𑀤𑀻𑀲𑀼 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑁂𑀲𑀼 𑀦𑀺𑀩𑁆𑀩𑀼𑀢𑁂𑀲𑀼 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀻’’𑀢𑀺. ‘‘𑀅𑀬𑀁 𑀫𑁂 𑀲𑀼𑀲𑁆𑀲𑀯𑀦𑀁 𑀲𑀸𑀯𑁂𑀢𑀺, 𑀅𑀳𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀸𑀫𑀺, 𑀅𑀚𑁆𑀚𑁂𑀯 𑀫𑀬𑀸 𑀖𑀭𑀸𑀯𑀸𑀲𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀬𑀁 𑀇𑀫𑀺𑀲𑁆𑀲𑀸 𑀆𑀘𑀭𑀺𑀬𑀪𑀸𑀕𑁄 𑀳𑁄𑀢𑀽’’𑀢𑀺 𑀓𑀡𑁆𑀞𑀢𑁄 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀫𑀼𑀢𑁆𑀢𑀸𑀳𑀸𑀭𑀁 𑀧𑁂𑀲𑁂𑀲𑀺. 𑀲𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀫𑀬𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀅𑀢𑁆𑀢𑀦𑁄 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀺. 𑀢𑀸𑀯𑀤𑁂𑀯 𑀘 𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀲𑀼𑀲𑀺𑀓𑁆𑀔𑀺𑀢𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀦𑀸𑀦𑀸𑀢𑀽𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀪𑀺𑀭𑀫𑀸𑀧𑁂𑀦𑁆𑀢𑀺𑀬𑁄 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀦𑀺 𑀧𑀬𑁄𑀚𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀮𑁂𑀲𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸𑀬 𑀦𑀘𑁆𑀘𑀸𑀤𑀻𑀲𑀼 𑀅𑀦𑀪𑀺𑀭𑀢𑁄 𑀫𑀼𑀳𑀼𑀢𑁆𑀢𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀸𑀧𑀺 𑀇𑀢𑁆𑀣𑀺𑀬𑁄 ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀦𑀘𑁆𑀘𑀸𑀤𑀻𑀦𑀺 𑀧𑀬𑁄𑀚𑁂𑀫, 𑀲𑁄 𑀦𑀺𑀤𑁆𑀤𑀁 𑀉𑀧𑀕𑀢𑁄, 𑀇𑀤𑀸𑀦𑀺 𑀓𑀺𑀫𑀢𑁆𑀣𑀁 𑀓𑀺𑀮𑀫𑀺𑀲𑁆𑀲𑀸𑀫𑀸’’𑀢𑀺 𑀕𑀳𑀺𑀢𑀕𑀳𑀺𑀢𑀸𑀦𑀺 𑀢𑀽𑀭𑀺𑀬𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼, 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑀸 𑀛𑀸𑀬𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀅𑀤𑁆𑀤𑀲 𑀢𑀸 𑀇𑀢𑁆𑀣𑀺𑀬𑁄 𑀢𑀽𑀭𑀺𑀬𑀪𑀡𑁆𑀟𑀸𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀺𑀬𑁄 𑁋 𑀏𑀓𑀘𑁆𑀘𑀸 𑀧𑀕𑁆𑀖𑀭𑀺𑀢𑀔𑁂𑀴𑀸, 𑀓𑀺𑀮𑀺𑀦𑁆𑀦𑀕𑀢𑁆𑀢𑀸, 𑀏𑀓𑀘𑁆𑀘𑀸 𑀤𑀦𑁆𑀢𑁂 𑀔𑀸𑀤𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀓𑀸𑀓𑀘𑁆𑀙𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀯𑀺𑀯𑀝𑀫𑀼𑀔𑀻, 𑀏𑀓𑀘𑁆𑀘𑀸 𑀅𑀧𑀕𑀢𑀯𑀢𑁆𑀣𑀸 𑀧𑀸𑀓𑀝𑀩𑀻𑀪𑀘𑁆𑀙𑀲𑀫𑁆𑀩𑀸𑀥𑀝𑁆𑀞𑀸𑀦𑀸. 𑀲𑁄 𑀢𑀸𑀲𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀓𑁆𑀓𑀪𑀯𑀦𑀲𑀤𑀺𑀲𑀫𑁆𑀧𑀺 𑀢𑀁 𑀫𑀳𑀸𑀢𑀮𑀁 𑀯𑀺𑀯𑀺𑀥𑀦𑀸𑀦𑀸𑀓𑀼𑀡𑀧𑀪𑀭𑀺𑀢𑀁 𑀆𑀫𑀓𑀲𑀼𑀲𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺, 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀕𑁂𑀳𑀲𑀤𑀺𑀲𑀸 𑀔𑀸𑀤𑀺𑀁𑀲𑀼 𑁋 ‘‘𑀉𑀧𑀤𑁆𑀤𑀼𑀢𑀁 𑀯𑀢, 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢, 𑀪𑁄’’𑀢𑀺 𑀉𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀅𑀢𑀺𑀯𑀺𑀬𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺.

𑀲𑁄 ‘‘𑀅𑀚𑁆𑀚𑁂𑀯 𑀫𑀬𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀬𑀦𑀸 𑀯𑀼𑀝𑁆𑀞𑀸𑀬 𑀤𑁆𑀯𑀸𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. 𑀉𑀫𑁆𑀫𑀸𑀭𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀙𑀦𑁆𑀦𑁄 𑁋 ‘‘𑀅𑀳𑀁, 𑀅𑀬𑁆𑀬𑀧𑀼𑀢𑁆𑀢, 𑀙𑀦𑁆𑀦𑁄’’𑀢𑀺 𑀆𑀳. ‘‘𑀅𑀚𑁆𑀚𑀸𑀳𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄, 𑀏𑀓𑀁 𑀫𑁂 𑀅𑀲𑁆𑀲𑀁 𑀓𑀧𑁆𑀧𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀅𑀲𑁆𑀲𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀲𑀸𑀮𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑁂𑀲𑀼 𑀚𑀮𑀦𑁆𑀢𑁂𑀲𑀼 𑀲𑀼𑀫𑀦𑀧𑀝𑁆𑀝𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀞𑀺𑀢𑀁 𑀓𑀡𑁆𑀟𑀓𑀁 𑀅𑀲𑁆𑀲𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀇𑀫𑀫𑁂𑀯 𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀡𑁆𑀟𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀓𑀧𑁆𑀧𑀺𑀬𑀫𑀸𑀦𑁄𑀯 𑀅𑀜𑁆𑀜𑀸𑀲𑀺 ‘‘𑀅𑀬𑀁 𑀓𑀧𑁆𑀧𑀦𑀸 𑀅𑀢𑀺𑀯𑀺𑀬 𑀕𑀸𑀴𑁆𑀳𑀸, 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀉𑀬𑁆𑀬𑀸𑀦𑀓𑀻𑀴𑀸𑀤𑀺𑀕𑀫𑀦𑀓𑀸𑀮𑁂 𑀓𑀧𑁆𑀧𑀦𑀸 𑀯𑀺𑀬 𑀦 𑀳𑁄𑀢𑀺, 𑀫𑀬𑁆𑀳𑀁 𑀅𑀬𑁆𑀬𑀧𑀼𑀢𑁆𑀢𑁄 𑀅𑀚𑁆𑀚 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀫𑀳𑀸𑀳𑀲𑀺𑀢𑀁 𑀳𑀲𑀺, 𑀲𑁄 𑀲𑀤𑁆𑀤𑁄 𑀲𑀓𑀮𑀦𑀕𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬. 𑀤𑁂𑀯𑀢𑀸 𑀧𑀦 𑀦𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀦 𑀓𑀲𑁆𑀲𑀘𑀺 𑀲𑁄𑀢𑀼𑀁 𑀅𑀤𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀙𑀦𑁆𑀦𑀁 𑀧𑁂𑀲𑁂𑀢𑁆𑀯𑀸𑀯 ‘‘𑀧𑀼𑀢𑁆𑀢𑀁 𑀢𑀸𑀯 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑀢𑁄 𑀉𑀝𑁆𑀞𑀸𑀬 𑀭𑀸𑀳𑀼𑀮𑀫𑀸𑀢𑀼𑀬𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑁆𑀢𑁄𑀕𑀩𑁆𑀪𑁂 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑁄 𑀛𑀸𑀬𑀢𑀺, 𑀭𑀸𑀳𑀼𑀮𑀫𑀸𑀢𑀸 𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀦𑀁 𑀧𑀼𑀧𑁆𑀨𑀸𑀦𑀁 𑀅𑀫𑁆𑀩𑀡𑀫𑀢𑁆𑀢𑁂𑀦 𑀅𑀪𑀺𑀧𑁆𑀧𑀓𑀺𑀡𑁆𑀡𑁂 𑀲𑀬𑀦𑁂 𑀧𑀼𑀢𑁆𑀢𑀲𑁆𑀲 𑀫𑀢𑁆𑀣𑀓𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀫𑁆𑀫𑀸𑀭𑁂 𑀧𑀸𑀤𑀁 𑀞𑀧𑁂𑀢𑁆𑀯𑀸 𑀞𑀺𑀢𑀓𑁄𑀯 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀤𑁂𑀯𑀺𑀬𑀸 𑀳𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀤𑁂𑀯𑀻 𑀧𑀩𑀼𑀚𑁆𑀛𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀕𑀫𑀦𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀢𑀮𑀢𑁄 𑀑𑀢𑀭𑀺. 𑀬𑀁 𑀧𑀦 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀢𑀤𑀸 𑀲𑀢𑁆𑀢𑀸𑀳𑀚𑀸𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑁂𑀲𑀝𑁆𑀞𑀓𑀣𑀸𑀲𑀼 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀤𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀸𑀲𑀸𑀤𑀢𑀮𑀸 𑀑𑀢𑀭𑀺𑀢𑁆𑀯𑀸 𑀅𑀲𑁆𑀲𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀢𑀸𑀢 𑀓𑀡𑁆𑀟𑀓, 𑀢𑁆𑀯𑀁 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀫𑀁 𑀢𑀸𑀭𑀬, 𑀅𑀳𑀁 𑀢𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀢𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀓𑀡𑁆𑀟𑀓𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺. 𑀓𑀡𑁆𑀟𑀓𑁄 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀆𑀬𑀸𑀫𑁂𑀦 𑀅𑀝𑁆𑀞𑀸𑀭𑀲𑀳𑀢𑁆𑀣𑁄 𑀳𑁄𑀢𑀺, 𑀢𑀤𑀦𑀼𑀘𑁆𑀙𑀯𑀺𑀓𑁂𑀦 𑀉𑀩𑁆𑀩𑁂𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀣𑀸𑀫𑀚𑀯𑀲𑀫𑁆𑀧𑀦𑁆𑀦𑁄 𑀲𑀩𑁆𑀩𑀲𑁂𑀢𑁄 𑀥𑁄𑀢𑀲𑀗𑁆𑀔𑀲𑀤𑀺𑀲𑁄. 𑀲𑁄 𑀲𑀘𑁂 𑀳𑀲𑁂𑀬𑁆𑀬 𑀯𑀸 𑀧𑀤𑀲𑀤𑁆𑀤𑀁 𑀯𑀸 𑀓𑀭𑁂𑀬𑁆𑀬, 𑀲𑀤𑁆𑀤𑁄 𑀲𑀓𑀮𑀦𑀕𑀭𑀁 𑀅𑀯𑀢𑁆𑀣𑀭𑁂𑀬𑁆𑀬, 𑀢𑀲𑁆𑀫𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀲 𑀬𑀣𑀸 𑀦 𑀓𑁄𑀘𑀺 𑀲𑀼𑀡𑀸𑀢𑀺, 𑀏𑀯𑀁 𑀳𑀲𑀺𑀢𑀲𑀤𑁆𑀤𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀓𑁆𑀓𑀫𑀦𑀅𑀓𑁆𑀓𑀫𑀦𑀧𑀤𑀯𑀸𑀭𑁂 𑀳𑀢𑁆𑀣𑀢𑀮𑀸𑀦𑀺 𑀉𑀧𑀦𑀸𑀫𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀯𑀭𑀲𑁆𑀲 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀕𑀢𑁄 𑀙𑀦𑁆𑀦𑀁 𑀅𑀲𑁆𑀲𑀲𑁆𑀲 𑀯𑀸𑀮𑀥𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀫𑀳𑀸𑀤𑁆𑀯𑀸𑀭𑀲𑀫𑀻𑀧𑀁 𑀧𑀢𑁆𑀢𑁄. 𑀢𑀤𑀸 𑀧𑀦 𑀭𑀸𑀚𑀸 ‘‘𑀏𑀯𑀁 𑀫𑀫 𑀧𑀼𑀢𑁆𑀢𑁄 𑀬𑀸𑀬 𑀓𑀸𑀬𑀘𑀺 𑀯𑁂𑀮𑀸𑀬 𑀦𑀕𑀭𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀻𑀲𑀼 𑀤𑁆𑀯𑀸𑀭𑀓𑀯𑀸𑀝𑁂𑀲𑀼 𑀏𑀓𑁂𑀓𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀯𑀺𑀯𑀭𑀺𑀢𑀩𑁆𑀩𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁄 𑀳𑀢𑁆𑀣𑀺𑀕𑀡𑀦𑀸𑀬 𑀓𑁄𑀝𑀺𑀲𑀳𑀲𑁆𑀲𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀲𑀺, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀓𑁄𑀝𑀺𑀲𑀳𑀲𑁆𑀲𑀧𑀼𑀭𑀺𑀲𑀸𑀦𑀁 𑀩𑀮𑀁 𑀥𑀸𑀭𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀺𑀬𑁆𑀬𑀢𑀺, 𑀅𑀚𑁆𑀚 𑀓𑀡𑁆𑀟𑀓𑀲𑁆𑀲 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀯 𑀯𑀸𑀮𑀥𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁𑀬𑁂𑀯 𑀓𑀡𑁆𑀟𑀓𑀁 𑀊𑀭𑀼𑀳𑀺 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀙𑀦𑁆𑀦𑁄𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀺𑀬𑁆𑀬𑀢𑀺, 𑀅𑀳𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀅𑀬𑁆𑀬𑀧𑀼𑀢𑁆𑀢𑀁 𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀡𑁆𑀟𑀓𑀁 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀼𑀘𑁆𑀙𑀺𑀬𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀉𑀧𑀓𑀘𑁆𑀙𑀦𑁆𑀢𑀭𑁂 𑀓𑀢𑁆𑀯𑀸 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀓𑀡𑁆𑀟𑀓𑁄𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀺𑀬𑁆𑀬𑀢𑀺, 𑀅𑀳𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀧𑀺𑀝𑁆𑀞𑁂 𑀬𑀣𑀸𑀦𑀺𑀲𑀺𑀦𑁆𑀦𑀫𑁂𑀯 𑀙𑀦𑁆𑀦𑁂𑀦 𑀯𑀸𑀮𑀥𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑁂𑀬𑁆𑀬, 𑀬𑀣𑀸𑀘𑀺𑀦𑁆𑀢𑀺𑀢𑀫𑁂𑀯 𑀢𑁂𑀲𑀼 𑀢𑀻𑀲𑀼 𑀚𑀦𑁂𑀲𑀼 𑀅𑀜𑁆𑀜𑀢𑀭𑁄 𑀲𑀫𑁆𑀧𑀸𑀤𑁂𑀬𑁆𑀬. 𑀤𑁆𑀯𑀸𑀭𑁂 𑀧𑀦 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺.

𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀩𑁄𑀥𑀺𑀲𑀢𑁆𑀢𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀆𑀳 𑁋 ‘‘𑀫𑀸𑀭𑀺𑀲, 𑀫𑀸 𑀦𑀺𑀓𑁆𑀔𑀫𑀺, 𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺, 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀲𑀺, 𑀦𑀺𑀯𑀢𑁆𑀢, 𑀫𑀸𑀭𑀺𑀲𑀸’’𑀢𑀺. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀯𑀲𑀯𑀢𑁆𑀢𑀻’’𑀢𑀺. ‘‘𑀫𑀸𑀭, 𑀚𑀸𑀦𑀸𑀫𑀳𑀁 𑀫𑀬𑁆𑀳𑀁 𑀘𑀓𑁆𑀓𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑀁, 𑀅𑀦𑀢𑁆𑀣𑀺𑀓𑁄𑀳𑀁 𑀭𑀚𑁆𑀚𑁂𑀦, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀸𑀭𑁄 ‘‘𑀇𑀢𑁄 𑀤𑀸𑀦𑀺 𑀢𑁂 𑀧𑀝𑁆𑀞𑀸𑀬 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀘𑀺𑀦𑁆𑀢𑀺𑀢𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀑𑀢𑀸𑀭𑀸𑀧𑁂𑀓𑁆𑀔𑁄 𑀙𑀸𑀬𑀸 𑀯𑀺𑀬 𑀅𑀦𑀼𑀕𑀘𑁆𑀙𑀦𑁆𑀢𑁄 𑀅𑀦𑀼𑀩𑀦𑁆𑀥𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂 𑀯𑀢𑁆𑀢𑀫𑀸𑀦𑁂, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀧𑀼𑀦 𑀦𑀕𑀭𑀁 𑀅𑀧𑀮𑁄𑀓𑁂𑀢𑀼𑀓𑀸𑀫𑁄 𑀚𑀸𑀢𑁄. 𑀏𑀯𑀜𑁆𑀘 𑀧𑀦𑀲𑁆𑀲 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂𑀬𑁂𑀯 𑁋 ‘‘𑀫𑀳𑀸𑀧𑀼𑀭𑀺𑀲, 𑀦 𑀢𑀬𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑀦𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀤𑀫𑀸𑀦𑀸 𑀯𑀺𑀬 𑀫𑀳𑀸𑀧𑀣𑀯𑀻 𑀓𑀼𑀮𑀸𑀮𑀘𑀓𑁆𑀓𑀁 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀕𑀭𑀸𑀪𑀺𑀫𑀼𑀔𑁄 𑀞𑀢𑁆𑀯𑀸 𑀦𑀕𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀣𑀯𑀺𑀧𑁆𑀧𑀤𑁂𑀲𑁂 𑀓𑀡𑁆𑀟𑀓𑀦𑀺𑀯𑀢𑁆𑀢𑀦𑀘𑁂𑀢𑀺𑀬𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀫𑀕𑁆𑀕𑀸𑀪𑀺𑀫𑀼𑀔𑀁 𑀓𑀡𑁆𑀟𑀓𑀁 𑀓𑀢𑁆𑀯𑀸 𑀧𑀸𑀬𑀸𑀲𑀺 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀉𑀴𑀸𑀭𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦. 𑀢𑀤𑀸 𑀓𑀺𑀭𑀲𑁆𑀲 𑀤𑁂𑀯𑀢𑀸 𑀧𑀼𑀭𑀢𑁄 𑀲𑀝𑁆𑀞𑀺 𑀉𑀓𑁆𑀓𑀸𑀲𑀳𑀲𑁆𑀲𑀸𑀦𑀺 𑀥𑀸𑀭𑀬𑀺𑀁𑀲𑀼, 𑀧𑀘𑁆𑀙𑀢𑁄 𑀲𑀝𑁆𑀞𑀺, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀲𑀝𑁆𑀞𑀺, 𑀯𑀸𑀫𑀧𑀲𑁆𑀲𑀢𑁄 𑀲𑀝𑁆𑀞𑀻𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀧𑀭𑀺𑀫𑀸𑀡𑀸 𑀉𑀓𑁆𑀓𑀸 𑀥𑀸𑀭𑀬𑀺𑀁𑀲𑀼. 𑀅𑀧𑀭𑀸 𑀤𑁂𑀯𑀢𑀸 𑀘 𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀘 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺 𑀫𑀸𑀮𑀸𑀳𑀺 𑀘𑀼𑀡𑁆𑀡𑁂𑀳𑀺 𑀥𑀽𑀧𑁂𑀳𑀺 𑀧𑀽𑀚𑀬𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑁂𑀳𑀺 𑀘𑁂𑀯 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑁂𑀳𑀺 𑀘 𑀖𑀦𑀫𑁂𑀖𑀯𑀼𑀝𑁆𑀞𑀺𑀓𑀸𑀮𑁂 𑀥𑀸𑀭𑀸𑀳𑀺 𑀯𑀺𑀬 𑀦𑀪𑀁 𑀦𑀺𑀭𑀦𑁆𑀢𑀭𑀁 𑀅𑀳𑁄𑀲𑀺, 𑀤𑀺𑀩𑁆𑀩𑀸𑀦𑀺 𑀲𑀁𑀕𑀻𑀢𑀸𑀦𑀺 𑀧𑀯𑀢𑁆𑀢𑀺𑀁𑀲𑀼, 𑀲𑀫𑀦𑁆𑀢𑀢𑁄 𑀅𑀝𑁆𑀞 𑀢𑀽𑀭𑀺𑀬𑀸𑀦𑀺, 𑀲𑀝𑁆𑀞𑀺 𑀢𑀽𑀭𑀺𑀬𑀸𑀦𑀻𑀢𑀺 𑀅𑀝𑁆𑀞𑀲𑀝𑁆𑀞𑀺 𑀢𑀽𑀭𑀺𑀬𑀲𑀢𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀢𑁂𑀲𑀁 𑀲𑀤𑁆𑀤𑁄 𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀬𑀁 𑀫𑁂𑀖𑀥𑀦𑀺𑀢𑀓𑀸𑀮𑁄 𑀯𑀺𑀬, 𑀬𑀼𑀕𑀦𑁆𑀥𑀭𑀓𑀼𑀘𑁆𑀙𑀺𑀬𑀁 𑀲𑀸𑀕𑀭𑀦𑀺𑀕𑁆𑀖𑁄𑀲𑀓𑀸𑀮𑁄 𑀯𑀺𑀬 𑀘 𑀯𑀢𑁆𑀢𑀢𑀺.

𑀇𑀫𑀺𑀦𑀸 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀏𑀓𑀭𑀢𑁆𑀢𑁂𑀦𑁂𑀯 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀢𑀺𑀁𑀲𑀬𑁄𑀚𑀦𑀫𑀢𑁆𑀣𑀓𑁂 𑀅𑀦𑁄𑀫𑀸𑀦𑀤𑀻𑀢𑀻𑀭𑀁 𑀧𑀸𑀧𑀼𑀡𑀺. 𑀓𑀺𑀁 𑀧𑀦 𑀅𑀲𑁆𑀲𑁄 𑀢𑀢𑁄 𑀧𑀭𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀦𑁄 𑀦 𑀲𑀓𑁆𑀓𑁄𑀢𑀺. 𑀲𑁄 𑀳𑀺 𑀏𑀓𑀁 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀦𑀸𑀪𑀺𑀬𑀸 𑀞𑀺𑀢𑀘𑀓𑁆𑀓𑀲𑁆𑀲 𑀦𑁂𑀫𑀺𑀯𑀝𑁆𑀝𑀺𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀅𑀦𑁆𑀢𑀦𑁆𑀢𑁂𑀦 𑀘𑀭𑀺𑀢𑁆𑀯𑀸 𑀧𑀼𑀭𑁂𑀧𑀸𑀢𑀭𑀸𑀲𑀫𑁂𑀯 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀲𑀫𑀢𑁆𑀣𑁄. 𑀢𑀤𑀸 𑀧𑀦 𑀤𑁂𑀯𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀳𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀑𑀲𑁆𑀲𑀝𑁆𑀞𑁂𑀳𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀬𑀸𑀯 𑀊𑀭𑀼𑀧𑁆𑀧𑀤𑁂𑀲𑀸 𑀲𑀜𑁆𑀙𑀦𑁆𑀦𑀲𑀭𑀻𑀭𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀚𑀝𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀢𑀺𑀧𑀧𑀜𑁆𑀘𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀺𑀁𑀲𑀬𑁄𑀚𑀦𑀫𑀢𑁆𑀢𑀫𑁂𑀯 𑀅𑀕𑀫𑀸𑀲𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 𑀙𑀦𑁆𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀸 𑀦𑀸𑀫 𑀅𑀬𑀁 𑀦𑀤𑀻’’𑀢𑀺? ‘‘𑀅𑀦𑁄𑀫𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑁄𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀡𑁆𑀳𑀺𑀬𑀸 𑀖𑀝𑁆𑀝𑁂𑀦𑁆𑀢𑁄 𑀅𑀲𑁆𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀅𑀲𑁆𑀲𑁄 𑀘 𑀉𑀧𑁆𑀧𑀢𑀺𑀢𑁆𑀯𑀸 𑀅𑀝𑁆𑀞𑀼𑀲𑀪𑀯𑀺𑀢𑁆𑀣𑀸𑀭𑀸𑀬 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑁂 𑀅𑀝𑁆𑀞𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀝𑁆𑀝𑀲𑀤𑀺𑀲𑁂 𑀯𑀸𑀴𑀼𑀓𑀸𑀧𑀼𑀮𑀺𑀦𑁂 𑀞𑀢𑁆𑀯𑀸 𑀙𑀦𑁆𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀫 𑀙𑀦𑁆𑀦, 𑀢𑁆𑀯𑀁 𑀫𑀬𑁆𑀳𑀁 𑀆𑀪𑀭𑀡𑀸𑀦𑀺 𑀘𑁂𑀯 𑀓𑀡𑁆𑀟𑀓𑀜𑁆𑀘 𑀆𑀤𑀸𑀬 𑀕𑀘𑁆𑀙, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑀫𑁆𑀧𑀺, 𑀤𑁂𑀯, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼𑀁, 𑀕𑀘𑁆𑀙𑁂𑀯 𑀢𑁆𑀯’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀆𑀪𑀭𑀡𑀸𑀦𑀺 𑀘𑁂𑀯 𑀓𑀡𑁆𑀟𑀓𑀜𑁆𑀘 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀬𑁆𑀳𑀁 𑀓𑁂𑀲𑀸 𑀲𑀫𑀡𑀲𑀸𑀭𑀼𑀧𑁆𑀧𑀸 𑀦 𑀳𑁄𑀦𑁆𑀢𑀺, 𑀅𑀜𑁆𑀜𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀦𑀢𑁆𑀣𑀻’’𑀢𑀺. 𑀢𑀢𑁄 ‘‘𑀲𑀬𑀫𑁂𑀯 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀫𑁄𑀴𑀺𑀬𑀸 𑀲𑀤𑁆𑀥𑀺𑀁 𑀘𑀽𑀴𑀁 𑀕𑀳𑁂𑀢𑁆𑀯𑀸 𑀙𑀺𑀦𑁆𑀤𑀺. 𑀓𑁂𑀲𑀸 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸 𑀳𑀼𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀆𑀯𑀝𑁆𑀝𑀫𑀸𑀦𑀸 𑀲𑀻𑀲𑀁 𑀅𑀮𑁆𑀮𑀻𑀬𑀺𑀁𑀲𑀼. 𑀢𑁂𑀲𑀁 𑀬𑀸𑀯𑀚𑀻𑀯𑀁 𑀢𑀤𑁂𑀯 𑀧𑀫𑀸𑀡𑀁 𑀅𑀳𑁄𑀲𑀺, 𑀫𑀲𑁆𑀲𑀼 𑀘 𑀢𑀤𑀦𑀼𑀭𑀽𑀧𑀁, 𑀧𑀼𑀦 𑀓𑁂𑀲𑀫𑀲𑁆𑀲𑀼𑀑𑀳𑀸𑀭𑀡𑀓𑀺𑀘𑁆𑀘𑀁 𑀦𑀸𑀫 𑀦𑀸𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀳 𑀫𑁄𑀴𑀺𑀬𑀸 𑀘𑀽𑀴𑀁 𑀕𑀳𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀆𑀓𑀸𑀲𑁂 𑀢𑀺𑀝𑁆𑀞𑀢𑀼. 𑀦𑁄 𑀘𑁂, 𑀪𑀽𑀫𑀺𑀬𑀁 𑀧𑀢𑀢𑀽’’𑀢𑀺 𑀅𑀦𑁆𑀢𑀮𑀺𑀓𑁆𑀔𑁂 𑀔𑀺𑀧𑀺. 𑀲𑀸 𑀘𑀽𑀴𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀞𑀸𑀦𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀬𑁄𑀚𑀦𑀺𑀬𑀭𑀢𑀦𑀘𑀗𑁆𑀓𑁄𑀝𑀓𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑀁 𑀦𑀸𑀫 𑀧𑀢𑀺𑀝𑁆𑀞𑀸𑀧𑁂𑀲𑀺.

‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁, 𑀯𑁂𑀳𑀸𑀬𑀲𑀁 𑀉𑀓𑁆𑀔𑀺𑀧𑀺 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀺, 𑀭𑀢𑀦𑀘𑀗𑁆𑀓𑁄𑀝𑀯𑀭𑁂𑀦 𑀯𑀸𑀲𑀯𑁄’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨𑁨𑁨);

𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸𑀦𑀺 𑀓𑀸𑀲𑀺𑀓𑀯𑀢𑁆𑀣𑀸𑀦𑀺 𑀫𑀬𑁆𑀳𑀁 𑀦 𑀲𑀫𑀡𑀲𑀸𑀭𑀼𑀧𑁆𑀧𑀸𑀦𑀻’’𑀢𑀺. 𑀅𑀣𑀲𑁆𑀲 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀼𑀭𑀸𑀡𑀲𑀳𑀸𑀬𑀓𑁄 𑀖𑀝𑀺𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀚𑀭𑀁 𑀅𑀧𑁆𑀧𑀢𑁆𑀢𑁂𑀦 𑀫𑀺𑀢𑁆𑀢𑀪𑀸𑀯𑁂𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀫𑁂 𑀲𑀳𑀸𑀬𑀓𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀲𑀫𑀡𑀧𑀭𑀺𑀓𑁆𑀔𑀸𑀭𑀫𑀲𑁆𑀲 𑀕𑀳𑁂𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺.

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀻 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀽𑀦𑁄’’𑀢𑀺. 𑁋

𑀇𑀫𑁂 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑁂 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁄 𑀅𑀭𑀳𑀤𑁆𑀥𑀚𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀫𑀧𑀩𑁆𑀩𑀚𑀺𑀢𑀯𑁂𑀲𑀁 𑀕𑀡𑁆𑀳𑀺𑀢𑁆𑀯𑀸 ‘‘𑀙𑀦𑁆𑀦, 𑀢𑁆𑀯𑀁 𑀫𑀫 𑀯𑀘𑀦𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀕𑁆𑀬𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀙𑀦𑁆𑀦𑁄 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀡𑁆𑀟𑀓𑁄 𑀧𑀦 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀡𑀦𑁆𑀢𑁄𑀯 ‘‘𑀦𑀢𑁆𑀣𑀺 𑀤𑀸𑀦𑀺 𑀫𑀬𑁆𑀳𑀁 𑀧𑀼𑀦 𑀲𑀸𑀫𑀺𑀦𑁄 𑀤𑀲𑁆𑀲𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀦𑁆𑀢𑁄 𑀲𑁄𑀓𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀓𑀡𑁆𑀟𑀓𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀙𑀦𑁆𑀦𑀲𑁆𑀲 𑀧𑀞𑀫𑀁 𑀏𑀓𑁄𑀯 𑀲𑁄𑀓𑁄 𑀅𑀳𑁄𑀲𑀺, 𑀓𑀡𑁆𑀟𑀓𑀲𑁆𑀲 𑀧𑀦 𑀓𑀸𑀮𑀓𑀺𑀭𑀺𑀬𑀸𑀬 𑀤𑀼𑀢𑀺𑀬𑁂𑀦 𑀲𑁄𑀓𑁂𑀦 𑀧𑀻𑀴𑀺𑀢𑁄 𑀭𑁄𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀦𑀕𑀭𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀅𑀦𑀼𑀧𑀺𑀬𑀁 𑀦𑀸𑀫 𑀅𑀫𑁆𑀩𑀯𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀧𑀤𑀲𑀸 𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀧𑀯𑀺𑀲𑀺𑀢𑁆𑀯𑀸 𑀘 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺. 𑀲𑀓𑀮𑀦𑀕𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑁂𑀦𑁂𑀯 𑀥𑀦𑀧𑀸𑀮𑀓𑁂 𑀧𑀯𑀺𑀝𑁆𑀞𑁂 𑀭𑀸𑀚𑀕𑀳𑀁 𑀯𑀺𑀬 𑀘, 𑀅𑀲𑀼𑀭𑀺𑀦𑁆𑀤𑁂 𑀧𑀯𑀺𑀝𑁆𑀞𑁂 𑀤𑁂𑀯𑀦𑀕𑀭𑀁 𑀯𑀺𑀬 𑀘 𑀲𑀗𑁆𑀔𑁄𑀪𑀁 𑀅𑀕𑀫𑀸𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀏𑀯𑀭𑀽𑀧𑁄 𑀦𑀸𑀫 𑀲𑀢𑁆𑀢𑁄 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺, ‘𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀦𑀸𑀕𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸 𑀅𑀲𑀼𑀓𑁄 𑀦𑀸𑀫 𑀏𑀲𑁄’𑀢𑀺 𑀦 𑀚𑀸𑀦𑀸𑀫𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀸𑀲𑀸𑀤𑀢𑀮𑁂 𑀞𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣, 𑀪𑀡𑁂, 𑀯𑀻𑀫𑀁𑀲𑀣, 𑀲𑀘𑁂 𑀅𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀲𑀘𑁂 𑀤𑁂𑀯𑀢𑀸 𑀪𑀯𑀺𑀲𑁆𑀲𑀢𑀺, 𑀆𑀓𑀸𑀲𑁂𑀦 𑀕𑀘𑁆𑀙𑀺𑀲𑁆𑀲𑀢𑀺, 𑀲𑀘𑁂 𑀦𑀸𑀕𑁄 𑀪𑀯𑀺𑀲𑁆𑀲𑀢𑀺, 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀮𑀤𑁆𑀥𑀁 𑀪𑀺𑀓𑁆𑀔𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺.

𑀫𑀳𑀸𑀧𑀼𑀭𑀺𑀲𑁄𑀧𑀺 𑀔𑁄 𑀫𑀺𑀲𑁆𑀲𑀓𑀪𑀢𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 ‘‘𑀅𑀮𑀁 𑀫𑁂 𑀏𑀢𑁆𑀢𑀓𑀁 𑀬𑀸𑀧𑀦𑀸𑀬𑀸’’𑀢𑀺 𑀜𑀢𑁆𑀯𑀸 𑀧𑀯𑀺𑀝𑁆𑀞𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀘𑁆𑀙𑀸𑀬𑀸𑀬𑀁 𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀆𑀭𑀤𑁆𑀥𑁄. 𑀅𑀣𑀲𑁆𑀲 𑀅𑀦𑁆𑀢𑀸𑀦𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀫𑀼𑀔𑁂𑀦 𑀦𑀺𑀓𑁆𑀔𑀫𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀲𑁄 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀏𑀯𑀭𑀽𑀧𑀲𑁆𑀲 𑀆𑀳𑀸𑀭𑀲𑁆𑀲 𑀘𑀓𑁆𑀔𑀼𑀦𑀸𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑀸𑀬 𑀢𑁂𑀦 𑀧𑀝𑀺𑀓𑀽𑀮𑀸𑀳𑀸𑀭𑁂𑀦 𑀅𑀝𑁆𑀝𑀻𑀬𑀫𑀸𑀦𑁄𑀧𑀺 𑀏𑀯𑀁 𑀅𑀢𑁆𑀢𑀦𑀸 𑀏𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺 𑁋 ‘‘𑀲𑀺𑀤𑁆𑀥𑀢𑁆𑀣, 𑀢𑁆𑀯𑀁 𑀲𑀼𑀮𑀪𑀅𑀦𑁆𑀦𑀧𑀸𑀦𑁂 𑀓𑀼𑀮𑁂 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀦𑀸𑀦𑀕𑁆𑀕𑀭𑀲𑁂𑀳𑀺 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀏𑀓𑀁 𑀧𑀁𑀲𑀼𑀓𑀽𑀮𑀺𑀓𑀁 𑀤𑀺𑀲𑁆𑀯𑀸 ‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀭𑀽𑀧𑁄 𑀳𑀼𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑁄 𑀓𑀸𑀮𑁄’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀇𑀤𑀸𑀦𑀺 𑀓𑀺𑀦𑁆𑀦𑀸𑀫𑁂𑀢𑀁 𑀓𑀭𑁄𑀲𑀻’’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑁄 𑀳𑀼𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺.

𑀭𑀸𑀚𑀧𑀼𑀭𑀺𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀤𑀽𑀢𑀯𑀘𑀦𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀭𑀺𑀬𑀸𑀧𑀣𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀸 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀳𑀁 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀣𑀬𑀦𑁆𑀢𑁄 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀆𑀳. 𑀭𑀸𑀚𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀸𑀘𑀦𑁆𑀢𑁄𑀧𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 ‘‘𑀅𑀤𑁆𑀥𑀸 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀩𑀼𑀤𑁆𑀥𑀪𑀽𑀢𑁂𑀦 𑀧𑀦 𑀢𑀬𑀸 𑀧𑀞𑀫𑀁 𑀫𑀫 𑀯𑀺𑀚𑀺𑀢𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 ‘‘𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀧𑀩𑁆𑀩𑀚𑀺 𑀘𑀓𑁆𑀔𑀼𑀫𑀸’’𑀢𑀺 𑀇𑀫𑀁 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀁 (𑀲𑀼. 𑀦𑀺. 𑁪𑁦𑁭) 𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬 𑀑𑀮𑁄𑀓𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀭𑀜𑁆𑀜𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀆𑀴𑀸𑀭𑀜𑁆𑀘 𑀓𑀸𑀮𑀸𑀫𑀁 𑀉𑀤𑀓𑀜𑁆𑀘 𑀭𑀸𑀫𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀦𑀸𑀬𑀁 𑀫𑀕𑁆𑀕𑁄 𑀩𑁄𑀥𑀸𑀬𑀸’’𑀢𑀺 𑀢𑀫𑁆𑀧𑀺 𑀲𑀫𑀸𑀧𑀢𑁆𑀢𑀺𑀪𑀸𑀯𑀦𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀢𑀦𑁄 𑀣𑀸𑀫𑀯𑀻𑀭𑀺𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑀼𑀓𑀸𑀫𑁄 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 ‘‘𑀭𑀫𑀡𑀻𑀬𑁄 𑀯𑀢𑀸𑀬𑀁 𑀪𑀽𑀫𑀺𑀪𑀸𑀕𑁄’’𑀢𑀺 𑀢𑀢𑁆𑀣𑁂𑀯 𑀯𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺. 𑀢𑁂𑀧𑀺 𑀔𑁄 𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸 𑀧𑀜𑁆𑀘𑀯𑀕𑁆𑀕𑀺𑀬𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀸 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀦𑀁 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀁 ‘‘𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀸𑀤𑀺𑀓𑀸𑀬 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀳𑀫𑀸𑀦𑀸 𑀲𑀦𑁆𑀢𑀺𑀓𑀸𑀯𑀘𑀭𑀸 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 ‘‘𑀓𑁄𑀝𑀺𑀧𑁆𑀧𑀢𑁆𑀢𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀳𑀺𑀧𑀺 𑀯𑀻𑀢𑀺𑀦𑀸𑀫𑁂𑀲𑀺, 𑀲𑀩𑁆𑀩𑀲𑁄𑀧𑀺 𑀆𑀳𑀸𑀭𑀼𑀧𑀘𑁆𑀙𑁂𑀤𑀦𑀁 𑀅𑀓𑀸𑀲𑀺. 𑀤𑁂𑀯𑀢𑀸𑀧𑀺 𑀮𑁄𑀫𑀓𑀽𑀧𑁂𑀳𑀺 𑀑𑀚𑀁 𑀉𑀧𑀲𑀁𑀳𑀭𑀫𑀸𑀦𑀸 𑀧𑀓𑁆𑀔𑀺𑀧𑀺𑀁𑀲𑀼.

𑀅𑀣𑀲𑁆𑀲 𑀢𑀸𑀬 𑀦𑀺𑀭𑀸𑀳𑀸𑀭𑀢𑀸𑀬 𑀧𑀭𑀫𑀓𑀲𑀺𑀭𑀧𑁆𑀧𑀢𑁆𑀢𑀢𑀸𑀬 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀓𑀸𑀴𑀯𑀡𑁆𑀡𑁄 𑀅𑀳𑁄𑀲𑀺, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀅𑀳𑁂𑀲𑀼𑀁. 𑀅𑀧𑁆𑀧𑁂𑀓𑀤𑀸 𑀆𑀦𑀸𑀧𑀸𑀦𑀓𑀚𑁆𑀛𑀸𑀦𑀁 𑀛𑀸𑀬𑀦𑁆𑀢𑁄 𑀫𑀳𑀸𑀯𑁂𑀤𑀦𑀸𑀪𑀺𑀢𑀼𑀦𑁆𑀦𑁄 𑀯𑀺𑀲𑀜𑁆𑀜𑀻𑀪𑀽𑀢𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀢𑀢𑀺. 𑀅𑀣 𑀦𑀁 𑀏𑀓𑀘𑁆𑀘𑀸 𑀤𑁂𑀯𑀢𑀸 ‘‘𑀓𑀸𑀮𑀗𑁆𑀓𑀢𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀤𑀦𑁆𑀢𑀺. 𑀏𑀓𑀘𑁆𑀘𑀸 ‘‘𑀯𑀺𑀳𑀸𑀭𑁄𑀢𑁆𑀯𑁂𑀯𑁂𑀲𑁄 𑀅𑀭𑀳𑀢’’𑀦𑁆𑀢𑀺 𑀘 𑀆𑀳𑀁𑀲𑀼. 𑀢𑀢𑁆𑀣 𑀬𑀸𑀲𑀁 ‘‘𑀓𑀸𑀮𑀗𑁆𑀓𑀢𑁄’’𑀢𑀺 𑀲𑀜𑁆𑀜𑀸 𑀅𑀳𑁄𑀲𑀺, 𑀢𑀸 𑀕𑀦𑁆𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀓𑀸𑀮𑀗𑁆𑀓𑀢𑁄’’𑀢𑀺. ‘‘𑀫𑀫 𑀧𑀼𑀢𑁆𑀢𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀓𑀸𑀮𑀗𑁆𑀓𑀢𑁄, 𑀅𑀳𑀼𑀢𑁆𑀯𑀸’’𑀢𑀺? ‘‘𑀩𑀼𑀤𑁆𑀥𑁄 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀧𑀥𑀸𑀦𑀪𑀽𑀫𑀺𑀬𑀁𑀬𑁂𑀯 𑀧𑀢𑀺𑀢𑁆𑀯𑀸 𑀓𑀸𑀮𑀗𑁆𑀓𑀢𑁄’’𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀭𑀸𑀚𑀸 𑁋 ‘‘𑀦𑀸𑀳𑀁 𑀲𑀤𑁆𑀤𑀳𑀸𑀫𑀺, 𑀫𑀫 𑀧𑀼𑀢𑁆𑀢𑀲𑁆𑀲 𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. ‘‘𑀓𑀲𑁆𑀫𑀸 𑀧𑀦 𑀭𑀸𑀚𑀸 𑀦 𑀲𑀤𑁆𑀤𑀳𑀢𑀻’’𑀢𑀺? 𑀓𑀸𑀮𑀤𑁂𑀯𑀮𑀢𑀸𑀧𑀲𑀯𑀦𑁆𑀤𑀸𑀧𑀦𑀤𑀺𑀯𑀲𑁂 𑀚𑀫𑁆𑀩𑀼𑀭𑀼𑀓𑁆𑀔𑀫𑀽𑀮𑁂 𑀘 𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀤𑀺𑀝𑁆𑀞𑀢𑁆𑀢𑀸.

𑀧𑀼𑀦 𑀩𑁄𑀥𑀺𑀲𑀢𑁆𑀢𑁂 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀝𑁆𑀞𑀺𑀢𑁂 𑀢𑀸 𑀤𑁂𑀯𑀢𑀸 𑀕𑀦𑁆𑀢𑁆𑀯𑀸 ‘‘𑀅𑀭𑁄𑀕𑁄 𑀢𑁂, 𑀫𑀳𑀸𑀭𑀸𑀚, 𑀧𑀼𑀢𑁆𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀚𑀸𑀦𑀸𑀫𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀅𑀫𑀭𑀡𑀪𑀸𑀯’’𑀦𑁆𑀢𑀺 𑀯𑀤𑀢𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑁂 𑀕𑀡𑁆𑀞𑀺𑀓𑀭𑀡𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 ‘‘𑀅𑀬𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀦𑀸𑀫 𑀩𑁄𑀥𑀸𑀬 𑀫𑀕𑁆𑀕𑁄 𑀦 𑀳𑁄𑀢𑀻’’𑀢𑀺 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀼𑀁 𑀕𑀸𑀫𑀦𑀺𑀕𑀫𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀳𑀸𑀭𑀁 𑀆𑀳𑀭𑀺. 𑀅𑀣𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀸𑀓𑀢𑀺𑀓𑀸𑀦𑀺 𑀅𑀳𑁂𑀲𑀼𑀁, 𑀓𑀸𑀬𑁄𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺. 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘‘𑀅𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀤𑀸𑀦𑀺 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀫𑀸𑀦𑁄 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀩𑀸𑀳𑀼𑀮𑀺𑀓𑁄 𑀏𑀲 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄, 𑀲𑀻𑀲𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑀲𑁆𑀲 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀢𑀓𑁆𑀓𑀦𑀁 𑀯𑀺𑀬 𑀅𑀫𑁆𑀳𑀸𑀓𑀁 𑀏𑀢𑀲𑁆𑀲 𑀲𑀦𑁆𑀢𑀺𑀓𑀸 𑀯𑀺𑀲𑁂𑀲𑀢𑀓𑁆𑀓𑀦𑀁, 𑀓𑀺𑀁 𑀦𑁄 𑀇𑀫𑀺𑀦𑀸’’𑀢𑀺 𑀫𑀳𑀸𑀧𑀼𑀭𑀺𑀲𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀢𑀦𑀁 𑀧𑀯𑀺𑀲𑀺𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀸𑀬𑀁 𑀲𑁂𑀦𑀸𑀦𑀺𑀕𑀫𑁂 𑀲𑁂𑀦𑀸𑀦𑀺𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑀸𑀭𑀺𑀓𑀸 𑀯𑀬𑀧𑁆𑀧𑀢𑁆𑀢𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀧𑀢𑁆𑀣𑀦𑀁 𑀅𑀓𑀸𑀲𑀺 𑁋 ‘‘𑀲𑀘𑀸𑀳𑀁 𑀲𑀫𑀚𑀸𑀢𑀺𑀓𑀁 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀢𑁂 𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸 𑀲𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺. 𑀲𑀸 𑀫𑀳𑀸𑀲𑀢𑁆𑀢𑀲𑁆𑀲 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀙𑀝𑁆𑀞𑁂 𑀯𑀲𑁆𑀲𑁂 𑀧𑀭𑀺𑀧𑀼𑀡𑁆𑀡𑁂 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀸𑀬𑀁 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀧𑀼𑀭𑁂𑀢𑀭𑀁𑀬𑁂𑀯 𑀥𑁂𑀦𑀼𑀲𑀳𑀲𑁆𑀲𑀁 𑀮𑀝𑁆𑀞𑀺𑀫𑀥𑀼𑀓𑀯𑀦𑁂 𑀘𑀭𑀸𑀧𑁂𑀢𑁆𑀯𑀸, 𑀢𑀸𑀲𑀁 𑀔𑀻𑀭𑀁 𑀧𑀜𑁆𑀘 𑀥𑁂𑀦𑀼𑀲𑀢𑀸𑀦𑀺 𑀧𑀸𑀬𑁂𑀢𑁆𑀯𑀸, 𑀢𑀸𑀲𑀁 𑀔𑀻𑀭𑀁 𑀅𑀟𑁆𑀠𑀢𑀺𑀬𑀸𑀦𑀺 𑀘 𑀲𑀢𑀸𑀦𑀻𑀢𑀺 𑀏𑀯𑀁 𑀬𑀸𑀯 𑀲𑁄𑀴𑀲𑀦𑁆𑀦𑀁 𑀥𑁂𑀦𑀽𑀦𑀁 𑀔𑀻𑀭𑀁 𑀅𑀝𑁆𑀞 𑀥𑁂𑀦𑀼𑀬𑁄 𑀧𑀺𑀯𑀦𑁆𑀢𑀺, 𑀢𑀸𑀯 𑀔𑀻𑀭𑀲𑁆𑀲 𑀩𑀳𑀮𑀢𑀜𑁆𑀘 𑀫𑀥𑀼𑀭𑀢𑀜𑁆𑀘 𑀑𑀚𑀯𑀦𑁆𑀢𑀢𑀜𑁆𑀘 𑀧𑀢𑁆𑀣𑀬𑀫𑀸𑀦𑀸 𑀔𑀻𑀭𑀧𑀭𑀺𑀯𑀢𑁆𑀢𑀦𑀁 𑀦𑀸𑀫 𑀅𑀓𑀸𑀲𑀺. 𑀲𑀸 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀤𑀺𑀯𑀲𑁂 ‘‘𑀧𑀸𑀢𑁄𑀯 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀢𑀸 𑀅𑀝𑁆𑀞 𑀥𑁂𑀦𑀼𑀬𑁄 𑀤𑀼𑀳𑀸𑀧𑁂𑀲𑀺. 𑀯𑀘𑁆𑀙𑀓𑀸 𑀥𑁂𑀦𑀽𑀦𑀁 𑀣𑀦𑀫𑀽𑀮𑀁 𑀦 𑀆𑀕𑀫𑀁𑀲𑀼, 𑀣𑀦𑀫𑀽𑀮𑁂 𑀧𑀦 𑀦𑀯𑀪𑀸𑀚𑀦𑁂𑀲𑀼 𑀉𑀧𑀦𑀻𑀢𑀫𑀢𑁆𑀢𑁂𑀲𑀼 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀔𑀻𑀭𑀥𑀸𑀭𑀸 𑀧𑀕𑁆𑀖𑀭𑀺𑀁𑀲𑀼. 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀲𑀼𑀚𑀸𑀢𑀸 𑀲𑀳𑀢𑁆𑀣𑁂𑀦𑁂𑀯 𑀔𑀻𑀭𑀁 𑀕𑀳𑁂𑀢𑁆𑀯𑀸 𑀦𑀯𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀧𑀘𑀺𑀢𑀼𑀁 𑀆𑀭𑀪𑀺.

𑀢𑀲𑁆𑀫𑀺𑀁 𑀧𑀸𑀬𑀸𑀲𑁂 𑀧𑀘𑁆𑀘𑀫𑀸𑀦𑁂 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀧𑀼𑀩𑁆𑀩𑀼𑀴𑀸 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀸𑀯𑀝𑁆𑀝𑀸 𑀳𑀼𑀢𑁆𑀯𑀸 𑀲𑀜𑁆𑀘𑀭𑀦𑁆𑀢𑀺. 𑀏𑀓𑀨𑀼𑀲𑀺𑀢𑀫𑁆𑀧𑀺 𑀩𑀳𑀺 𑀦 𑀉𑀧𑁆𑀧𑀢𑀢𑀺, 𑀉𑀤𑁆𑀥𑀦𑀢𑁄 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀥𑀽𑀫𑁄 𑀦 𑀉𑀝𑁆𑀞𑀳𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀮𑁄𑀓𑀧𑀸𑀮𑀸 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀦𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺, 𑀲𑀓𑁆𑀓𑁄 𑀅𑀮𑀸𑀢𑀸𑀦𑀺 𑀲𑀫𑀸𑀦𑁂𑀦𑁆𑀢𑁄 𑀅𑀕𑁆𑀕𑀺𑀁 𑀚𑀸𑀮𑁂𑀲𑀺. 𑀤𑁂𑀯𑀢𑀸 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀧𑁆𑀧𑀦𑀑𑀚𑀁 𑀅𑀢𑁆𑀢𑀦𑁄 𑀤𑁂𑀯𑀸𑀦𑀼𑀪𑀸𑀯𑁂𑀦 𑀤𑀡𑁆𑀟𑀓𑀩𑀤𑁆𑀥𑀁 𑀫𑀥𑀼𑀧𑀝𑀮𑀁 𑀧𑀻𑀴𑁂𑀢𑁆𑀯𑀸 𑀫𑀥𑀼𑀁 𑀕𑀡𑁆𑀳𑀫𑀸𑀦𑀸 𑀯𑀺𑀬 𑀲𑀁𑀳𑀭𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀁𑀲𑀼. 𑀅𑀜𑁆𑀜𑁂𑀲𑀼 𑀳𑀺 𑀓𑀸𑀮𑁂𑀲𑀼 𑀤𑁂𑀯𑀢𑀸 𑀓𑀩𑀴𑁂 𑀓𑀩𑀴𑁂 𑀑𑀚𑀁 𑀧𑀓𑁆𑀔𑀺𑀧𑀺𑀁𑀲𑀼, 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑀤𑀺𑀯𑀲𑁂 𑀘 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀘 𑀉𑀓𑁆𑀔𑀮𑀺𑀬𑀁𑀬𑁂𑀯 𑀧𑀓𑁆𑀔𑀺𑀧𑀺𑀁𑀲𑀼. 𑀲𑀼𑀚𑀸𑀢𑀸 𑀏𑀓𑀤𑀺𑀯𑀲𑁂𑀬𑁂𑀯 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀸𑀓𑀝𑀸𑀦𑀺 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀤𑀺𑀲𑁆𑀯𑀸 𑀧𑀼𑀡𑁆𑀡𑀁 𑀦𑀸𑀫 𑀤𑀸𑀲𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀫 𑀧𑀼𑀡𑁆𑀡𑁂, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀢𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀸, 𑀫𑀬𑀸 𑀳𑀺 𑀏𑀢𑁆𑀢𑀓𑁂 𑀓𑀸𑀮𑁂 𑀏𑀯𑀭𑀽𑀧𑀁 𑀅𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀤𑁂𑀯𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀼𑀭𑀺𑀢𑀢𑀼𑀭𑀺𑀢𑀸 𑀭𑀼𑀓𑁆𑀔𑀫𑀽𑀮𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀢𑀲𑁆𑀫𑀺𑀁 𑀭𑀢𑁆𑀢𑀺𑀪𑀸𑀕𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 (𑀅. 𑀦𑀺. 𑁫.𑁧𑁯𑁬) 𑀤𑀺𑀲𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀦𑀺𑀲𑁆𑀲𑀁𑀲𑀬𑀁 𑀅𑀚𑁆𑀚𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑀁 𑀆𑀕𑀫𑀬𑀫𑀸𑀦𑁄 𑀧𑀸𑀢𑁄𑀯 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺, 𑀅𑀢𑁆𑀢𑀦𑁄 𑀧𑀪𑀸𑀬 𑀲𑀓𑀮𑀁 𑀭𑀼𑀓𑁆𑀔𑀫𑀽𑀮𑀁 𑀑𑀪𑀸𑀲𑀬𑀫𑀸𑀦𑁄. 𑀅𑀣 𑀔𑁄 𑀲𑀸 𑀧𑀼𑀡𑁆𑀡𑀸 𑀆𑀕𑀦𑁆𑀢𑁆𑀯𑀸 𑀅𑀤𑁆𑀤𑀲 𑀩𑁄𑀥𑀺𑀲𑀢𑁆𑀢𑀁 𑀭𑀼𑀓𑁆𑀔𑀫𑀽𑀮𑁂 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁, 𑀲𑀭𑀻𑀭𑀢𑁄 𑀘𑀲𑁆𑀲 𑀦𑀺𑀓𑁆𑀔𑀦𑁆𑀢𑀸𑀳𑀺 𑀧𑀪𑀸𑀳𑀺 𑀲𑀓𑀮𑀭𑀼𑀓𑁆𑀔𑀁 𑀲𑀼𑀯𑀡𑁆𑀡𑀯𑀡𑁆𑀡𑀁. 𑀤𑀺𑀲𑁆𑀯𑀸𑀦𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀢𑀸 𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀲𑀳𑀢𑁆𑀣𑁂𑀦𑁂𑀯 𑀩𑀮𑀺𑀓𑀫𑁆𑀫𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦𑀺𑀲𑀺𑀦𑁆𑀦𑀸 𑀫𑀜𑁆𑀜𑁂’’𑀢𑀺 𑀉𑀩𑁆𑀩𑁂𑀕𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀯𑁂𑀕𑁂𑀦 𑀆𑀕𑀦𑁆𑀢𑁆𑀯𑀸 𑀲𑀼𑀚𑀸𑀢𑀸𑀬 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.

𑀲𑀼𑀚𑀸𑀢𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑀸 𑀳𑀼𑀢𑁆𑀯𑀸 ‘‘𑀅𑀚𑁆𑀚 𑀤𑀸𑀦𑀺 𑀧𑀝𑁆𑀞𑀸𑀬 𑀫𑀫 𑀚𑁂𑀝𑁆𑀞𑀥𑀻𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀸𑀳𑀻’’𑀢𑀺 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀤𑀸𑀲𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀪𑀸𑀯𑀁 𑀧𑀸𑀧𑀼𑀡𑀦𑀤𑀺𑀯𑀲𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀏𑀓𑀸 𑀲𑀼𑀯𑀡𑁆𑀡𑀧𑀸𑀢𑀺 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀸 ‘‘𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀧𑀸𑀬𑀸𑀲𑀁 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀸𑀬𑀸𑀲𑀁 𑀧𑀓𑁆𑀔𑀺𑀧𑀺𑀢𑀼𑀓𑀸𑀫𑀸 𑀧𑀓𑁆𑀓𑀪𑀸𑀚𑀦𑀁 𑀆𑀯𑀚𑁆𑀚𑁂𑀲𑀺. 𑀲𑀩𑁆𑀩𑁄 𑀧𑀸𑀬𑀸𑀲𑁄 𑀧𑀤𑀼𑀫𑀧𑀢𑁆𑀢𑀢𑁄 𑀉𑀤𑀓𑀁 𑀯𑀺𑀬 𑀯𑀢𑁆𑀢𑀺𑀢𑁆𑀯𑀸 𑀧𑀸𑀢𑀺𑀬𑀁 𑀧𑀢𑀺𑀝𑁆𑀞𑀸𑀲𑀺, 𑀏𑀓𑀧𑀸𑀢𑀺𑀧𑀽𑀭𑀫𑀢𑁆𑀢𑁄𑀯 𑀅𑀳𑁄𑀲𑀺. 𑀲𑀸 𑀢𑀁 𑀧𑀸𑀢𑀺𑀁 𑀅𑀜𑁆𑀜𑀸𑀬 𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀑𑀤𑀸𑀢𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀲𑀬𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀢𑁆𑀢𑀪𑀸𑀯𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀁 𑀧𑀸𑀢𑀺𑀁 𑀅𑀢𑁆𑀢𑀦𑁄 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀆𑀦𑀼𑀪𑀸𑀯𑁂𑀦 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀩𑀮𑀯𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀭𑀼𑀓𑁆𑀔𑀤𑁂𑀯𑀢𑀸’’𑀢𑀺 𑀲𑀜𑁆𑀜𑀸𑀬 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑁄𑀦𑀢𑀸 𑀕𑀦𑁆𑀢𑁆𑀯𑀸 𑀲𑀻𑀲𑀢𑁄 𑀧𑀸𑀢𑀺𑀁 𑀑𑀢𑀸𑀭𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀕𑀦𑁆𑀥𑀧𑀼𑀧𑁆𑀨𑀯𑀸𑀲𑀺𑀢𑀁 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀖𑀝𑀺𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀤𑀺𑀦𑁆𑀦𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀩𑁄𑀥𑀺𑀲𑀢𑁆𑀢𑀁 𑀅𑀯𑀺𑀚𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀅𑀤𑀲𑁆𑀲𑀦𑀁 𑀕𑀢𑁄, 𑀩𑁄𑀥𑀺𑀲𑀢𑁆𑀢𑁄 𑀧𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀉𑀤𑀓𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀼𑀚𑀸𑀢𑀸 𑀲𑀳𑁂𑀯 𑀧𑀸𑀢𑀺𑀬𑀸 𑀧𑀸𑀬𑀸𑀲𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺, 𑀫𑀳𑀸𑀧𑀼𑀭𑀺𑀲𑁄 𑀲𑀼𑀚𑀸𑀢𑀁 𑀑𑀮𑁄𑀓𑁂𑀲𑀺. 𑀲𑀸 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀬𑁆𑀬, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀘𑁆𑀘𑀢𑁆𑀢𑀸, 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀓𑀭𑁄𑀣𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀣𑀸 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀦𑀺𑀧𑁆𑀨𑀦𑁆𑀦𑁄, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀦𑀺𑀧𑁆𑀨𑀚𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀫𑁆𑀧𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀼𑀭𑀸𑀡𑀓𑀧𑀡𑁆𑀡𑀁 𑀯𑀺𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀸𑀯 𑀧𑀓𑁆𑀓𑀸𑀫𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸 𑀯𑀼𑀝𑁆𑀞𑀸𑀬 𑀭𑀼𑀓𑁆𑀔𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀢𑀺𑀁 𑀆𑀤𑀸𑀬 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀅𑀦𑁂𑀓𑁂𑀲𑀁 𑀩𑁄𑀥𑀺𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀦𑀝𑁆𑀞𑀸𑀦𑀁 𑀲𑀼𑀧𑀢𑀺𑀝𑁆𑀞𑀺𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲𑀸 𑀢𑀻𑀭𑁂 𑀧𑀸𑀢𑀺𑀁 𑀞𑀧𑁂𑀢𑁆𑀯𑀸 𑀲𑀼𑀧𑀢𑀺𑀝𑁆𑀞𑀺𑀢𑀢𑀺𑀢𑁆𑀣𑁂 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀦𑁂𑀓𑀩𑀼𑀤𑁆𑀥𑀲𑀢𑀲𑀳𑀲𑁆𑀲𑀸𑀦𑀁 𑀦𑀺𑀯𑀸𑀲𑀦𑀁 𑀅𑀭𑀳𑀤𑁆𑀥𑀚𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀝𑁆𑀞𑀺𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑁂 𑀏𑀓𑀽𑀦𑀧𑀡𑁆𑀡𑀸𑀲𑀧𑀺𑀡𑁆𑀟𑁂 𑀓𑀢𑁆𑀯𑀸 𑀲𑀩𑁆𑀩𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺. 𑀲𑁄𑀬𑁂𑀯𑀲𑁆𑀲 𑀩𑀼𑀤𑁆𑀥𑀪𑀽𑀢𑀲 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀯𑀲𑀦𑁆𑀢𑀲𑁆𑀲 𑀏𑀓𑀽𑀦𑀧𑀡𑁆𑀡𑀸𑀲𑀤𑀺𑀯𑀲𑀸𑀦𑀺 𑀆𑀳𑀸𑀭𑁄 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀜𑁆𑀜𑁄 𑀆𑀳𑀸𑀭𑁄 𑀦𑀢𑁆𑀣𑀺, 𑀦 𑀦𑁆𑀳𑀸𑀦𑀁, 𑀦 𑀫𑀼𑀔𑀥𑁄𑀯𑀦𑀁, 𑀦 𑀲𑀭𑀻𑀭𑀯𑀴𑀜𑁆𑀚𑁄, 𑀛𑀸𑀦𑀲𑀼𑀔𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀁 𑀧𑀦 𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀅𑀬𑀁 𑀧𑀸𑀢𑀺 𑀧𑀝𑀺𑀲𑁄𑀢𑀁 𑀕𑀘𑁆𑀙𑀢𑀼, 𑀦𑁄 𑀘𑁂 𑀪𑀯𑀺𑀲𑁆𑀲𑀸𑀫𑀺, 𑀅𑀦𑀼𑀲𑁄𑀢𑀁 𑀕𑀘𑁆𑀙𑀢𑀽’’𑀢𑀺 𑀯𑀢𑁆𑀯𑀸 𑀦𑀤𑀻𑀲𑁄𑀢𑁂 𑀧𑀓𑁆𑀔𑀺𑀧𑀺. 𑀲𑀸 𑀲𑁄𑀢𑀁 𑀙𑀺𑀦𑁆𑀤𑀫𑀸𑀦𑀸 𑀦𑀤𑀻𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀫𑀚𑁆𑀛𑀝𑁆𑀞𑀸𑀦𑁂𑀦𑁂𑀯 𑀚𑀯𑀲𑀫𑁆𑀧𑀦𑁆𑀦𑁄 𑀅𑀲𑁆𑀲𑁄 𑀯𑀺𑀬 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀝𑁆𑀞𑀸𑀦𑀁 𑀧𑀝𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀆𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀓𑀸𑀴𑀦𑀸𑀕𑀭𑀸𑀚𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀧𑀸𑀢𑀺𑀬𑁄 ‘‘𑀓𑀺𑀮𑀺 𑀓𑀺𑀮𑀻’’𑀢𑀺 𑀭𑀯𑀁 𑀓𑀸𑀭𑀬𑀫𑀸𑀦𑀸 𑀧𑀳𑀭𑀺𑀢𑁆𑀯𑀸 𑀢𑀸𑀲𑀁 𑀲𑀩𑁆𑀩𑀳𑁂𑀝𑁆𑀞𑀺𑀫𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀓𑀸𑀴𑁄 𑀦𑀸𑀕𑀭𑀸𑀚𑀸 𑀢 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀳𑀺𑀬𑁆𑀬𑁄 𑀏𑀓𑁄 𑀩𑀼𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑀺, 𑀧𑀼𑀦 𑀅𑀚𑁆𑀚 𑀏𑀓𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀦𑁂𑀓𑁂𑀳𑀺 𑀧𑀤𑀲𑀢𑁂𑀳𑀺 𑀣𑀼𑀢𑀺𑀬𑁄 𑀯𑀤𑀫𑀸𑀦𑁄 𑀉𑀝𑁆𑀞𑀸𑀲𑀺. 𑀢𑀲𑁆𑀲 𑀓𑀺𑀭 𑀫𑀳𑀸𑀧𑀣𑀯𑀺𑀬𑀸 𑀏𑀓𑀬𑁄𑀚𑀦𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀆𑀭𑁄𑀳𑀦𑀓𑀸𑀮𑁄 𑀅𑀚𑁆𑀚 𑀯𑀸 𑀳𑀺𑀬𑁆𑀬𑁄 𑀯𑀸 𑀲𑀤𑀺𑀲𑁄 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑀤𑀻𑀢𑀻𑀭𑀫𑁆𑀳𑀺 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑀢𑁄 𑀫𑀼𑀘𑁆𑀘𑀦𑀓𑀸𑀮𑁂 𑀤𑁂𑀯𑀢𑀸𑀳𑀺 𑀅𑀮𑀗𑁆𑀓𑀢𑁂𑀦 𑀅𑀝𑁆𑀞𑀽𑀲𑀪𑀯𑀺𑀢𑁆𑀣𑀸𑀭𑁂𑀦 𑀫𑀕𑁆𑀕𑁂𑀦 𑀲𑀻𑀳𑁄 𑀯𑀺𑀬 𑀯𑀺𑀚𑀫𑁆𑀪𑀫𑀸𑀦𑁄 𑀩𑁄𑀥𑀺𑀭𑀼𑀓𑁆𑀔𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀦𑀸𑀕𑀬𑀓𑁆𑀔𑀲𑀼𑀧𑀡𑁆𑀡𑀸𑀤𑀬𑁄 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀺𑀁𑀲𑀼, 𑀤𑀺𑀩𑁆𑀩𑀲𑀁𑀕𑀻𑀢𑀸𑀤𑀻𑀦𑀺 𑀧𑀯𑀢𑁆𑀢𑀬𑀺𑀁𑀲𑀼, 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀕𑀦𑁆𑀥𑀸 𑀏𑀓𑀫𑀸𑀮𑀸 𑀏𑀓𑀲𑀸𑀥𑀼𑀓𑀸𑀭𑀸 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄𑀢𑁆𑀣𑀺𑀬𑁄 𑀦𑀸𑀫 𑀢𑀺𑀡𑀳𑀸𑀭𑀓𑁄 𑀢𑀺𑀡𑀁 𑀆𑀤𑀸𑀬 𑀧𑀝𑀺𑀧𑀣𑁂 𑀆𑀕𑀘𑁆𑀙𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀆𑀓𑀸𑀭𑀁 𑀜𑀢𑁆𑀯𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀺𑀡𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀁 𑀲𑀫𑁆𑀩𑁄𑀥𑀺𑀧𑀸𑀧𑀼𑀡𑀦𑀝𑁆𑀞𑀸𑀦𑀁 𑀦 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺, 𑀢𑀢𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀞𑀺𑀢𑀝𑁆𑀞𑀺𑀢𑀝𑁆𑀞𑀸𑀦𑁂 𑀓𑀺𑀭𑀲𑁆𑀲 𑀦𑁂𑀫𑀺𑀯𑀝𑁆𑀝𑀺𑀧𑀭𑀺𑀬𑀦𑁆𑀢𑁂 𑀅𑀓𑁆𑀓𑀦𑁆𑀢𑀁 𑀦𑀸𑀪𑀺𑀬𑀸 𑀧𑀢𑀺𑀝𑁆𑀞𑀺𑀢𑀫𑀳𑀸𑀲𑀓𑀝𑀘𑀓𑁆𑀓𑀁 𑀯𑀺𑀬 𑀫𑀳𑀸𑀧𑀣𑀯𑀻 𑀑𑀦𑀢𑀼𑀦𑁆𑀦𑀢𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀫𑁆𑀧𑀺 𑀲𑀫𑁆𑀩𑁄𑀥𑀺𑀧𑀸𑀧𑀼𑀡𑀦𑀝𑁆𑀞𑀸𑀦𑀁 𑀦 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀫𑁆𑀧𑀺 𑀲𑀫𑁆𑀩𑁄𑀥𑀺𑀧𑀸𑀧𑀼𑀡𑀦𑀝𑁆𑀞𑀸𑀦𑀁 𑀦 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀧𑀦 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀁 𑀅𑀳𑁄𑀲𑀺, 𑀢𑀁 𑀦𑁂𑀯 𑀙𑀫𑁆𑀪𑀢𑀺, 𑀦 𑀓𑀫𑁆𑀧𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀁 𑀅𑀘𑀮𑀝𑁆𑀞𑀸𑀦𑀁 𑀓𑀺𑀮𑁂𑀲𑀧𑀜𑁆𑀚𑀭𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀜𑀢𑁆𑀯𑀸 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀲𑀺, 𑀢𑀸𑀯𑀤𑁂𑀯 𑀘𑀼𑀤𑁆𑀤𑀲𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺. 𑀢𑀸𑀦𑀺𑀧𑀺 𑀔𑁄 𑀢𑀺𑀡𑀸𑀦𑀺 𑀢𑀣𑀸𑀭𑀽𑀧𑁂𑀦 𑀲𑀡𑁆𑀞𑀸𑀦𑁂𑀦 𑀲𑀡𑁆𑀞𑀳𑀺𑀁𑀲𑀼, 𑀬𑀣𑀸𑀭𑀽𑀧𑀁 𑀲𑀼𑀓𑀼𑀲𑀮𑁄 𑀘𑀺𑀢𑁆𑀢𑀓𑀸𑀭𑁄 𑀯𑀸 𑀧𑁄𑀢𑁆𑀣𑀓𑀸𑀭𑁄 𑀯𑀸 𑀆𑀮𑀺𑀔𑀺𑀢𑀼𑀫𑁆𑀧𑀺 𑀲𑀫𑀢𑁆𑀣𑁄 𑀦𑀢𑁆𑀣𑀺. 𑀩𑁄𑀥𑀺𑀲𑀢𑁆𑀢𑁄 𑀩𑁄𑀥𑀺𑀓𑁆𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀤𑀴𑁆𑀳𑀫𑀸𑀦𑀲𑁄 𑀳𑀼𑀢𑁆𑀯𑀸 𑁋

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼;

𑀉𑀧𑀲𑀼𑀲𑁆𑀲𑀢𑀼 𑀦𑀺𑀲𑁆𑀲𑁂𑀲𑀁, 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢𑀁. (𑀅. 𑀦𑀺. 𑁨.𑁫; 𑀫. 𑀦𑀺. 𑁨.𑁧𑁮𑁪) 𑁋

‘𑀦 𑀢𑁆𑀯𑁂𑀯𑀸𑀳𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’’𑀢𑀺 𑀅𑀲𑀦𑀺𑀲𑀢𑀲𑀦𑁆𑀦𑀺𑀧𑀸𑀢𑁂𑀦𑀧𑀺 𑀅𑀪𑁂𑀚𑁆𑀚𑀭𑀽𑀧𑀁 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀫𑀸𑀭𑁄 𑀧𑀸𑀧𑀺𑀫𑀸 𑁋 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀫𑀬𑁆𑀳𑀁 𑀯𑀲𑀁 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄, 𑀦 𑀤𑀸𑀦𑀺𑀲𑁆𑀲 𑀅𑀢𑀺𑀓𑁆𑀓𑀫𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀸𑀭𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀫𑀸𑀭𑀖𑁄𑀲𑀦𑀁 𑀦𑀸𑀫 𑀖𑁄𑀲𑀸𑀧𑁂𑀢𑁆𑀯𑀸 𑀫𑀸𑀭𑀩𑀮𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺. 𑀲𑀸 𑀫𑀸𑀭𑀲𑁂𑀦𑀸 𑀫𑀸𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀸 𑀳𑁄𑀢𑀺, 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀢𑁄 𑀘 𑀤𑁆𑀯𑀸𑀤𑀲𑀬𑁄𑀚𑀦𑀸, 𑀧𑀘𑁆𑀙𑀢𑁄 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀞𑀺𑀢𑀸, 𑀉𑀤𑁆𑀥𑀁 𑀦𑀯𑀬𑁄𑀚𑀦𑀼𑀩𑁆𑀩𑁂𑀥𑀸 𑀳𑁄𑀢𑀺, 𑀬𑀲𑁆𑀲𑀸 𑀉𑀦𑁆𑀦𑀤𑀦𑁆𑀢𑀺𑀬𑀸 𑀉𑀦𑁆𑀦𑀸𑀤𑀲𑀤𑁆𑀤𑁄 𑀬𑁄𑀚𑀦𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄𑀯𑀺𑀬 𑀲𑀽𑀬𑀢𑀺. 𑀅𑀣 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀕𑀺𑀭𑀺𑀫𑁂𑀔𑀮𑀁 𑀦𑀸𑀫 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀼𑀥𑀸𑀦𑀺 𑀅𑀕𑁆𑀕𑀳𑁂𑀲𑀺. 𑀅𑀯𑀲𑁂𑀲𑀸𑀬𑀧𑀺 𑀫𑀸𑀭𑀧𑀭𑀺𑀲𑀸𑀬 𑀤𑁆𑀯𑁂 𑀚𑀦𑀸 𑀏𑀓𑀲𑀤𑀺𑀲𑀸 𑀏𑀓𑀲𑀤𑀺𑀲𑀁 𑀆𑀯𑀼𑀥𑀁 𑀕𑀡𑁆𑀳𑀦𑁆𑀢𑀸 𑀦𑀸𑀳𑁂𑀲𑀼𑀁. 𑀦𑀸𑀦𑀸𑀯𑀡𑁆𑀡𑀸 𑀦𑀸𑀦𑀧𑁆𑀧𑀓𑀸𑀭𑀫𑀼𑀔𑀸 𑀳𑀼𑀢𑁆𑀯𑀸 𑀦𑀸𑀦𑀸𑀯𑀼𑀥𑀸𑀦𑀺 𑀕𑀡𑁆𑀳𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀸 𑀆𑀕𑀫𑀁𑀲𑀼.

𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺𑀬𑁄 𑀯𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀥𑀫𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀲𑀗𑁆𑀔𑁄 𑀯𑀻𑀲𑀳𑀢𑁆𑀣𑀲𑀢𑀺𑀓𑁄 𑀳𑁄𑀢𑀺, 𑀲𑀓𑀺𑀁 𑀯𑀸𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀥𑀫𑀺𑀬𑀫𑀸𑀦𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀤𑁆𑀤𑀁 𑀓𑀭𑀺𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑁄 𑀳𑁄𑀢𑀺. 𑀫𑀳𑀸𑀓𑀸𑀴𑀦𑀸𑀕𑀭𑀸𑀚𑀸 𑀅𑀢𑀺𑀭𑁂𑀓𑀧𑀤𑀲𑀢𑁂𑀦 𑀯𑀡𑁆𑀡𑀁 𑀯𑀡𑁆𑀡𑁂𑀦𑁆𑀢𑁄𑀯 𑀅𑀝𑁆𑀞𑀸𑀲𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀫𑀸𑀭𑀩𑀮𑁂 𑀧𑀦 𑀩𑁄𑀥𑀺𑀫𑀡𑁆𑀟𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀢𑁂𑀲𑀁 𑀏𑀓𑁄𑀧𑀺 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀓𑀸𑀴𑁄 𑀦𑀸𑀫 𑀦𑀸𑀕𑀭𑀸𑀚𑀸𑀧𑀺 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀫𑀜𑁆𑀚𑁂𑀭𑀺𑀓𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀦𑁆𑀦𑁄. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀧𑀺 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀧𑀺𑀝𑁆𑀞𑀺𑀬𑀁 𑀓𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀝𑁆𑀞𑀸𑀲𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀏𑀓𑀤𑁂𑀯𑀢𑀸𑀧𑀺 𑀞𑀸𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀸𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀏𑀓𑀓𑁄𑀯 𑀦𑀺𑀲𑀻𑀤𑀺.

𑀫𑀸𑀭𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀳 𑁋 ‘‘𑀢𑀸𑀢𑀸, 𑀲𑀼𑀤𑁆𑀥𑁄𑀤𑀦𑀧𑀼𑀢𑁆𑀢𑁂𑀦 𑀲𑀺𑀤𑁆𑀥𑀢𑁆𑀣𑁂𑀦 𑀲𑀤𑀺𑀲𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀁 𑀲𑀫𑁆𑀫𑀼𑀔𑀸 𑀬𑀼𑀤𑁆𑀥𑀁 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀧𑀘𑁆𑀙𑀸𑀪𑀸𑀕𑁂𑀦 𑀤𑀲𑁆𑀲𑀸𑀫𑀸’’𑀢𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 𑀢𑀻𑀡𑀺 𑀧𑀲𑁆𑀲𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀤𑁂𑀯𑀢𑀸𑀦𑀁 𑀧𑀮𑀸𑀢𑀢𑁆𑀢𑀸 𑀲𑀼𑀜𑁆𑀜𑀸𑀦𑀺 𑀅𑀤𑁆𑀤𑀲. 𑀧𑀼𑀦 𑀉𑀢𑁆𑀢𑀭𑀧𑀲𑁆𑀲𑁂𑀦 𑀫𑀸𑀭𑀩𑀮𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀏𑀢𑁆𑀢𑀓𑁄 𑀚𑀦𑁄 𑀫𑀁 𑀏𑀓𑀓𑀁 𑀲𑀦𑁆𑀥𑀸𑀬 𑀫𑀳𑀦𑁆𑀢𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀬𑁆𑀳𑀁 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀜𑀸𑀢𑀓𑁄 𑀦𑀢𑁆𑀣𑀺, 𑀇𑀫𑀸 𑀧𑀦 𑀤𑀲 𑀧𑀸𑀭𑀫𑀺𑀬𑁄𑀯 𑀫𑀬𑁆𑀳𑀁 𑀤𑀻𑀖𑀭𑀢𑁆𑀢𑀁 𑀧𑀼𑀝𑁆𑀞𑀧𑀭𑀺𑀚𑀦𑀲𑀤𑀺𑀲𑀸. 𑀢𑀲𑁆𑀫𑀸 𑀫𑀬𑀸 𑀧𑀸𑀭𑀫𑀺𑀬𑁄𑀯 𑀩𑀮𑀕𑁆𑀕𑀁 𑀓𑀢𑁆𑀯𑀸 𑀧𑀸𑀭𑀫𑀺𑀲𑀢𑁆𑀣𑁂𑀦𑁂𑀯 𑀧𑀳𑀭𑀺𑀢𑁆𑀯𑀸 𑀇𑀫𑀁 𑀩𑀮𑀓𑀸𑀬𑀁 𑀯𑀺𑀤𑁆𑀥𑀁𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑀫𑀸𑀦𑁄 𑀦𑀺𑀲𑀻𑀤𑀺.

𑀅𑀣 𑀔𑁄 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑁋 ‘‘𑀯𑀸𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀣𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀤𑁆𑀥𑀬𑁄𑀚𑀦𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀯𑀦𑀕𑀘𑁆𑀙𑀭𑀼𑀓𑁆𑀔𑀸𑀤𑀻𑀦𑀺 𑀉𑀤𑁆𑀥𑀁𑀫𑀽𑀮𑀸𑀦𑀺 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀕𑀸𑀫𑀦𑀺𑀕𑀫𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑁂 𑀓𑀸𑀢𑀼𑀁 𑀲𑀫𑀢𑁆𑀣𑀸𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀯𑀺𑀳𑀢𑀸𑀦𑀼𑀪𑀸𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀻𑀯𑀭𑀓𑀡𑁆𑀡𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑁋 ‘‘𑀉𑀤𑀓𑁂𑀦 𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀸𑀤𑀺𑀪𑁂𑀤𑀸 𑀯𑀮𑀸𑀳𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀺𑀁𑀲𑀼. 𑀯𑀼𑀝𑁆𑀞𑀺𑀥𑀸𑀭𑀸𑀯𑁂𑀕𑁂𑀦 𑀧𑀣𑀯𑀻 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀸 𑀅𑀳𑁄𑀲𑀺. 𑀯𑀦𑀭𑀼𑀓𑁆𑀔𑀸𑀤𑀻𑀦𑀁 𑀉𑀧𑀭𑀺𑀪𑀸𑀕𑁂𑀦 𑀫𑀳𑀸𑀫𑁂𑀖𑁄 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀘𑀻𑀯𑀭𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀕𑀳𑀡𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀧𑀸𑀲𑀸𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀫𑀳𑀦𑁆𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀥𑀽𑀫𑀸𑀬𑀦𑁆𑀢𑀸𑀦𑀺 𑀧𑀚𑁆𑀚𑀮𑀦𑁆𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀤𑀺𑀩𑁆𑀩𑀫𑀸𑀮𑀸𑀕𑀼𑀴𑀪𑀸𑀯𑀁 𑀆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀳𑀭𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀏𑀓𑀢𑁄𑀥𑀸𑀭𑀸 𑀉𑀪𑀢𑁄𑀥𑀸𑀭𑀸 𑀅𑀲𑀺𑀲𑀢𑁆𑀢𑀺𑀔𑀼𑀭𑀧𑁆𑀧𑀸𑀤𑀬𑁄 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀅𑀗𑁆𑀕𑀸𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀓𑀺𑀁𑀲𑀼𑀓𑀯𑀡𑁆𑀡𑀸 𑀅𑀗𑁆𑀕𑀸𑀭𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀯𑀺𑀓𑀺𑀭𑀺𑀁𑀲𑀼. 𑀢𑀢𑁄 𑀓𑀼𑀓𑁆𑀓𑀼𑀴𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀘𑁆𑀘𑀼𑀡𑁆𑀳𑁄 𑀅𑀕𑁆𑀕𑀺𑀯𑀡𑁆𑀡𑁄 𑀓𑀼𑀓𑁆𑀓𑀼𑀴𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀘𑀦𑁆𑀤𑀦𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀦𑀺𑀧𑀢𑀢𑀺. 𑀢𑀢𑁄 𑀯𑀸𑀮𑀼𑀓𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀢𑀺𑀲𑀼𑀔𑀼𑀫𑀸 𑀯𑀸𑀮𑀼𑀓𑀸 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀓𑀮𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀢𑀁 𑀓𑀮𑀮𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀯𑀺𑀮𑁂𑀧𑀦𑀁 𑀳𑀼𑀢𑁆𑀯𑀸 𑀦𑀺𑀧𑀢𑀢𑀺. 𑀢𑀢𑁄 ‘‘𑀇𑀫𑀺𑀦𑀸 𑀪𑀺𑀁𑀲𑁂𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀥𑀓𑀸𑀭𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀫𑀳𑀸𑀢𑀫𑀁 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀯𑀺𑀳𑀢𑀁 𑀯𑀺𑀬 𑀅𑀦𑁆𑀥𑀓𑀸𑀭𑀁 𑀅𑀦𑁆𑀢𑀭𑀥𑀸𑀬𑀺.

𑀏𑀯𑀁 𑀲𑁄 𑀫𑀸𑀭𑁄 𑀇𑀫𑀸𑀳𑀺 𑀦𑀯𑀳𑀺 𑀯𑀸𑀢𑀯𑀲𑁆𑀲𑀧𑀸𑀲𑀸𑀡𑀧𑀳𑀭𑀡𑀅𑀗𑁆𑀕𑀸𑀭𑀓𑀼𑀓𑁆𑀓𑀼𑀴𑀯𑀸𑀮𑀼𑀓𑀸𑀓𑀮𑀮𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 𑀩𑁄𑀥𑀺𑀲𑀢𑁆𑀢𑀁 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑁋 ‘‘𑀓𑀺𑀁, 𑀪𑀡𑁂, 𑀢𑀺𑀝𑁆𑀞𑀣, 𑀇𑀫𑀁 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀁 𑀕𑀡𑁆𑀳𑀣 𑀳𑀦𑀣 𑀧𑀮𑀸𑀧𑁂𑀣𑀸’’𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀕𑀺𑀭𑀺𑀫𑁂𑀔𑀮𑀲𑁆𑀲 𑀳𑀢𑁆𑀣𑀺𑀦𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄 𑀘𑀓𑁆𑀓𑀸𑀯𑀼𑀥𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀺𑀤𑁆𑀥𑀢𑁆𑀣, 𑀉𑀝𑁆𑀞𑁂𑀳𑀺 𑀏𑀢𑀲𑁆𑀫𑀸 𑀧𑀮𑁆𑀮𑀗𑁆𑀓𑀸, 𑀦𑀸𑀬𑀁 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑀁 𑀏𑀲 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀯𑁄𑀘 𑁋 ‘‘𑀫𑀸𑀭, 𑀦𑁂𑀯 𑀢𑀬𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀦 𑀉𑀧𑀧𑀸𑀭𑀫𑀺𑀬𑁄, 𑀦 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄, 𑀦𑀸𑀧𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸 𑀧𑀭𑀺𑀘𑁆𑀘𑀢𑁆𑀢𑀸, 𑀦 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀦 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀦 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸 𑀧𑀽𑀭𑀺𑀢𑀸, 𑀲𑀩𑁆𑀩𑀸 𑀢𑀸 𑀫𑀬𑀸𑀬𑁂𑀯 𑀧𑀽𑀭𑀺𑀢𑀸, 𑀢𑀲𑁆𑀫𑀸 𑀦𑀸𑀬𑀁 𑀧𑀮𑁆𑀮𑀗𑁆𑀓𑁄 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑁂𑀯𑁂𑀲𑁄 𑀧𑀸𑀧𑀼𑀡𑀸𑀢𑀻’’𑀢𑀺.

𑀫𑀸𑀭𑁄 𑀓𑀼𑀤𑁆𑀥𑁄 𑀓𑁄𑀥𑀯𑁂𑀕𑀁 𑀅𑀲𑀳𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀓𑁆𑀓𑀸𑀯𑀼𑀥𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀢𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀦𑁆𑀢𑀲𑁆𑀲𑁂𑀯 𑀉𑀧𑀭𑀺𑀪𑀸𑀕𑁂 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀓𑀺𑀭 𑀔𑀼𑀭𑀥𑀸𑀭𑀁 𑀘𑀓𑁆𑀓𑀸𑀯𑀼𑀥𑀁 𑀅𑀜𑁆𑀜𑀤𑀸 𑀓𑀼𑀤𑁆𑀥𑁂𑀦 𑀯𑀺𑀲𑁆𑀲𑀝𑁆𑀞𑀁 𑀏𑀓𑀕𑁆𑀖𑀦𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀯𑀁𑀲𑀓𑀴𑀻𑀭𑁂 𑀯𑀺𑀬 𑀙𑀺𑀦𑁆𑀤𑀦𑁆𑀢𑀁 𑀕𑀘𑁆𑀙𑀢𑀺. 𑀇𑀤𑀸𑀦𑀺 𑀧𑀦 𑀢𑀲𑁆𑀫𑀺𑀁 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀞𑀺𑀢𑁂 𑀅𑀯𑀲𑁂𑀲𑀸 𑀫𑀸𑀭𑀧𑀭𑀺𑀲𑀸 ‘‘𑀇𑀤𑀸𑀦𑀺 𑀲𑀺𑀤𑁆𑀥𑀢𑁆𑀣𑁄 𑀧𑀮𑁆𑀮𑀗𑁆𑀓𑀢𑁄 𑀯𑀼𑀝𑁆𑀞𑀸𑀬 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀲𑁂𑀮𑀓𑀽𑀝𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁, 𑀢𑀸𑀦𑀺𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀫𑀸𑀮𑀸𑀕𑀼𑀴𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀁𑀲𑀼. 𑀤𑁂𑀯𑀢𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀝𑁆𑀞𑁄 𑀯𑀢, 𑀪𑁄, 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄, 𑀓𑀺𑀁 𑀦𑀼 𑀔𑁄 𑀲𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀧𑀢𑁆𑀢𑀧𑀮𑁆𑀮𑀗𑁆𑀓𑁄 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀞𑀺𑀢𑀁 𑀫𑀸𑀭𑀁 𑀆𑀳 𑁋 ‘‘𑀫𑀸𑀭, 𑀢𑀼𑀬𑁆𑀳𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀓𑁄 𑀲𑀓𑁆𑀔𑀻’’𑀢𑀺. 𑀫𑀸𑀭𑁄 ‘‘𑀇𑀫𑁂 𑀏𑀢𑁆𑀢𑀓𑀸𑀯 𑀚𑀦𑀸 𑀲𑀓𑁆𑀔𑀺𑀦𑁄’’𑀢𑀺 𑀫𑀸𑀭𑀩𑀮𑀸𑀪𑀺𑀫𑀼𑀔𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀸𑀭𑀧𑀭𑀺𑀲𑀸𑀬 ‘‘𑀅𑀳𑀁 𑀲𑀓𑁆𑀔𑀺, 𑀅𑀳𑀁 𑀲𑀓𑁆𑀔𑀻’’𑀢𑀺 𑀧𑀯𑀢𑁆𑀢𑀲𑀤𑁆𑀤𑁄 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑀲𑀤𑀺𑀲𑁄 𑀅𑀳𑁄𑀲𑀺. 𑀅𑀣 𑀫𑀸𑀭𑁄 𑀫𑀳𑀸𑀧𑀼𑀭𑀺𑀲𑀁 𑀆𑀳 𑁋 ‘‘𑀲𑀺𑀤𑁆𑀥𑀢𑁆𑀣, 𑀢𑀼𑀬𑁆𑀳𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀓𑁄 𑀲𑀓𑁆𑀔𑀻’’𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀢𑀼𑀬𑁆𑀳𑀁 𑀢𑀸𑀯 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀲𑀘𑁂𑀢𑀦𑀸 𑀲𑀓𑁆𑀔𑀺𑀦𑁄, 𑀫𑀬𑁆𑀳𑀁 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀘𑁂𑀢𑀦𑁄 𑀓𑁄𑀘𑀺 𑀲𑀓𑁆𑀔𑀺 𑀦𑀸𑀫 𑀦𑀢𑁆𑀣𑀺, 𑀢𑀺𑀝𑁆𑀞𑀢𑀼 𑀢𑀸𑀯 𑀫𑁂 𑀅𑀯𑀲𑁂𑀲𑀅𑀢𑁆𑀢𑀪𑀸𑀯𑁂𑀲𑀼 𑀤𑀺𑀦𑁆𑀦𑀤𑀸𑀦𑀁, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀞𑀢𑁆𑀯𑀸 𑀫𑀬𑁆𑀳𑀁 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀲𑁆𑀲 𑀢𑀸𑀯 𑀤𑀺𑀦𑁆𑀦𑀪𑀸𑀯𑁂 𑀅𑀘𑁂𑀢𑀦𑀸𑀧𑀺 𑀅𑀬𑀁 𑀖𑀦𑀫𑀳𑀸𑀧𑀣𑀯𑀻 𑀲𑀓𑁆𑀔𑀻’’𑀢𑀺 𑀘𑀻𑀯𑀭𑀕𑀩𑁆𑀪𑀦𑁆𑀢𑀭𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 ‘‘𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀫𑀬𑁆𑀳𑀁 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀢𑁆𑀯𑀁 𑀲𑀓𑁆𑀔𑀺, 𑀦 𑀲𑀓𑁆𑀔𑀻’’𑀢𑀺 𑀫𑀳𑀸𑀧𑀣𑀯𑀺𑀬𑀸𑀪𑀺𑀫𑀼𑀔𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀫𑀳𑀸𑀧𑀣𑀯𑀻 ‘‘𑀅𑀳𑀁 𑀢𑁂 𑀢𑀤𑀸 𑀲𑀓𑁆𑀔𑀻’’𑀢𑀺 𑀯𑀺𑀭𑀯𑀲𑀢𑁂𑀦 𑀯𑀺𑀭𑀯𑀲𑀳𑀲𑁆𑀲𑁂𑀦 𑀯𑀺𑀭𑀯𑀲𑀢𑀲𑀳𑀲𑁆𑀲𑁂𑀦 𑀫𑀸𑀭𑀩𑀮𑀁 𑀅𑀯𑀢𑁆𑀣𑀭𑀫𑀸𑀦𑀸 𑀯𑀺𑀬 𑀉𑀦𑁆𑀦𑀤𑀺.

𑀢𑀢𑁄 𑀫𑀳𑀸𑀧𑀼𑀭𑀺𑀲𑁂 ‘‘𑀤𑀺𑀦𑁆𑀦𑀁 𑀢𑁂, 𑀲𑀺𑀤𑁆𑀥𑀢𑁆𑀣, 𑀫𑀳𑀸𑀤𑀸𑀦𑀁 𑀉𑀢𑁆𑀢𑀫𑀤𑀸𑀦’’𑀦𑁆𑀢𑀺 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀁 𑀲𑀫𑁆𑀫𑀲𑀦𑁆𑀢𑁂 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀕𑀺𑀭𑀺𑀫𑁂𑀔𑀮𑀳𑀢𑁆𑀣𑀻 𑀚𑀡𑁆𑀡𑀼𑀓𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺, 𑀫𑀸𑀭𑀧𑀭𑀺𑀲𑀸 𑀤𑀺𑀲𑀸𑀯𑀺𑀤𑀺𑀲𑀸 𑀧𑀮𑀸𑀬𑀺𑀁𑀲𑀼, 𑀤𑁆𑀯𑁂 𑀏𑀓𑀫𑀕𑁆𑀕𑁂𑀦 𑀕𑀢𑀸 𑀦𑀸𑀫 𑀦𑀢𑁆𑀣𑀺, 𑀲𑀻𑀲𑀸𑀪𑀭𑀡𑀸𑀦𑀺 𑀘𑁂𑀯 𑀦𑀺𑀯𑀢𑁆𑀣𑀯𑀲𑀦𑀸𑀦𑀺 𑀘 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀤𑀺𑀲𑀸𑀳𑀺𑀬𑁂𑀯 𑀧𑀮𑀸𑀬𑀺𑀁𑀲𑀼. 𑀢𑀢𑁄 𑀤𑁂𑀯𑀲𑀗𑁆𑀖𑀸 𑀧𑀮𑀸𑀬𑀫𑀸𑀦𑀁 𑀫𑀸𑀭𑀩𑀮𑀁 𑀤𑀺𑀲𑁆𑀯𑀸 ‘‘𑀫𑀸𑀭𑀲𑁆𑀲 𑀧𑀭𑀸𑀚𑀬𑁄 𑀚𑀸𑀢𑁄, 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀚𑀬𑁄 𑀚𑀸𑀢𑁄, 𑀚𑀬𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀤𑁂𑀯𑀢𑀸 𑀤𑁂𑀯𑀢𑀸𑀦𑀁, 𑀦𑀸𑀕𑀸 𑀦𑀸𑀕𑀸𑀦𑀁, 𑀲𑀼𑀧𑀡𑁆𑀡𑀸 𑀲𑀼𑀧𑀡𑁆𑀡𑀸𑀦𑀁, 𑀩𑁆𑀭𑀳𑁆𑀫𑀸𑀦𑁄 𑀩𑁆𑀭𑀳𑁆𑀫𑀸𑀦𑀁 𑀖𑁄𑀲𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀆𑀕𑀫𑀁𑀲𑀼.

𑀏𑀯𑀁 𑀕𑀢𑁂𑀲𑀼 𑀧𑀦 𑀢𑁂𑀲𑀼 𑁋

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀤𑁂𑀯𑀕𑀡𑀸 𑀫𑀳𑁂𑀲𑀺𑀦𑁄.

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀦𑀸𑀕𑀕𑀡𑀸 𑀫𑀳𑁂𑀲𑀺𑀦𑁄.

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀲𑀼𑀧𑀡𑁆𑀡𑀲𑀗𑁆𑀖𑀸𑀧𑀺 𑀫𑀳𑁂𑀲𑀺𑀦𑁄.

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀩𑁆𑀭𑀳𑁆𑀫𑀕𑀡𑀸 𑀫𑀳𑁂𑀲𑀺𑀦𑁄’’𑀢𑀺. 𑁋

𑀅𑀯𑀲𑁂𑀲𑀸 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀧𑀽𑀚𑀬𑀫𑀸𑀦𑀸 𑀦𑀸𑀦𑀧𑁆𑀧𑀓𑀸𑀭𑀸 𑀘 𑀣𑀼𑀢𑀺𑀬𑁄 𑀯𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀥𑀭𑀫𑀸𑀦𑁂𑀬𑁂𑀯 𑀲𑀽𑀭𑀺𑀬𑁂 𑀫𑀳𑀸𑀧𑀼𑀭𑀺𑀲𑁄 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀘𑀻𑀯𑀭𑀽𑀧𑀭𑀺 𑀧𑀢𑀫𑀸𑀦𑁂𑀳𑀺 𑀩𑁄𑀥𑀺𑀭𑀼𑀓𑁆𑀔𑀗𑁆𑀓𑀼𑀭𑁂𑀳𑀺 𑀭𑀢𑁆𑀢𑀧𑀯𑀸𑀴𑀤𑀮𑁂𑀳𑀺 𑀯𑀺𑀬 𑀧𑀽𑀚𑀺𑀬𑀫𑀸𑀦𑁄 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀲𑀺. 𑀅𑀣𑀲𑁆𑀲 𑀤𑁆𑀯𑀸𑀤𑀲𑀧𑀤𑀺𑀓𑀁 𑀧𑀘𑁆𑀘𑀬𑀸𑀓𑀸𑀭𑀁 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀫𑁆𑀫𑀲𑀦𑁆𑀢𑀲𑁆𑀲 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀲𑀗𑁆𑀓𑀫𑁆𑀧𑀺.

𑀫𑀳𑀸𑀧𑀼𑀭𑀺𑀲𑁂 𑀧𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁂 𑀲𑀓𑀮𑀸 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀅𑀳𑁄𑀲𑀺. 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀧𑀳𑀭𑀦𑁆𑀢𑀺, 𑀢𑀣𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀧𑀳𑀭𑀦𑁆𑀢𑀺, 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀧𑀳𑀭𑀦𑁆𑀢𑀺, 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀧𑀳𑀭𑀦𑁆𑀢𑀺, 𑀧𑀣𑀯𑀺𑀢𑀮𑁂 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸 𑀩𑁆𑀭𑀳𑁆𑀫𑀮𑁄𑀓𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼, 𑀩𑁆𑀭𑀳𑁆𑀫𑀮𑁄𑀓𑁂 𑀩𑀤𑁆𑀥𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸 𑀧𑀣𑀯𑀺𑀢𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀤𑀲𑀲𑀳𑀲𑁆𑀲𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀧𑀼𑀧𑁆𑀨𑀽𑀧𑀕𑀸 𑀭𑀼𑀓𑁆𑀔𑀸 𑀧𑀼𑀧𑁆𑀨𑀁 𑀕𑀡𑁆𑀳𑀺𑀁𑀲𑀼, 𑀨𑀮𑀽𑀧𑀕𑀸 𑀭𑀼𑀓𑁆𑀔𑀸 𑀨𑀮𑀧𑀺𑀡𑁆𑀟𑀺𑀪𑀸𑀭𑀲𑀳𑀺𑀢𑀸 𑀅𑀳𑁂𑀲𑀼𑀁. 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺, 𑀮𑀢𑀸𑀲𑀼 𑀮𑀢𑀸𑀧𑀤𑀼𑀫𑀸𑀦𑀺, 𑀆𑀓𑀸𑀲𑁂 𑀑𑀮𑀫𑁆𑀩𑀓𑀧𑀤𑀼𑀫𑀸𑀦𑀺, 𑀖𑀦𑀲𑀺𑀮𑀸𑀢𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀢𑀧𑀢𑁆𑀢𑀸𑀦𑀺 𑀳𑀼𑀢𑁆𑀯𑀸 𑀤𑀡𑁆𑀟𑀓𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀸𑀮𑀸𑀕𑀼𑀴𑀸 𑀯𑀺𑀬 𑀲𑀼𑀲𑀦𑁆𑀣𑀢𑀧𑀼𑀧𑁆𑀨𑀲𑀦𑁆𑀣𑀸𑀭𑁄 𑀯𑀺𑀬 𑀘 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀸 𑀅𑀳𑁄𑀲𑀺. 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀲𑀼 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀸 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸 𑀲𑀢𑁆𑀢𑀲𑀽𑀭𑀺𑀬𑀧𑁆𑀧𑀪𑀸𑀳𑀺𑀧𑀺𑀅𑀦𑁄𑀪𑀸𑀲𑀺𑀢𑀧𑀼𑀩𑁆𑀩𑀸 𑀢𑀤𑀸 𑀏𑀓𑁄𑀪𑀸𑀲𑀸 𑀅𑀳𑁂𑀲𑀼𑀁. 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀫𑀳𑀸𑀲𑀫𑀼𑀤𑁆𑀤𑁄 𑀫𑀥𑀼𑀭𑁄𑀤𑀓𑁄 𑀅𑀳𑁄𑀲𑀺, 𑀦𑀤𑀺𑀬𑁄 𑀦 𑀧𑀯𑀢𑁆𑀢𑀺𑀁𑀲𑀼, 𑀚𑀘𑁆𑀘𑀦𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀺𑀁𑀲𑀼, 𑀚𑀸𑀢𑀺𑀩𑀥𑀺𑀭𑀸 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼, 𑀚𑀸𑀢𑀺𑀧𑀻𑀞𑀲𑀧𑁆𑀧𑀺𑀦𑁄 𑀧𑀤𑀲𑀸 𑀕𑀘𑁆𑀙𑀺𑀁𑀲𑀼, 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀁𑀲𑀼.

𑀏𑀯𑀁 𑀅𑀧𑀭𑀺𑀫𑀸𑀡𑁂𑀦 𑀲𑀺𑀭𑀺𑀯𑀺𑀪𑀯𑁂𑀦 𑀧𑀽𑀚𑀺𑀬𑀫𑀸𑀦𑁄 𑀫𑀳𑀸𑀧𑀼𑀭𑀺𑀲𑁄 𑀅𑀦𑁂𑀓𑀧𑁆𑀧𑀓𑀸𑀭𑁂𑀲𑀼 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪);

𑀇𑀢𑀺 𑀢𑀼𑀲𑀺𑀢𑀪𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀬𑀁 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀺, 𑀏𑀢𑁆𑀢𑀓𑀁 𑀞𑀸𑀦𑀁 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀓𑀣𑀸

‘‘𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀧𑀦 ‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’. ‘𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’𑀦𑁆𑀢𑀺 𑀘 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂𑀬𑁂𑀯 𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀧𑀦 𑀢𑀫𑁆𑀧𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀉𑀤𑀸𑀦𑀜𑁆𑀳𑀺 𑀉𑀤𑀸𑀦𑁂𑀢𑁆𑀯𑀸 𑀚𑀬𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀇𑀫𑀲𑁆𑀲 𑀧𑀮𑁆𑀮𑀗𑁆𑀓𑀲𑁆𑀲 𑀓𑀸𑀭𑀡𑀸 𑀲𑀦𑁆𑀥𑀸𑀯𑀺𑀁, 𑀏𑀢𑁆𑀢𑀓𑀁 𑀫𑁂 𑀓𑀸𑀮𑀁 𑀇𑀫𑀲𑁆𑀲𑁂𑀯 𑀧𑀮𑁆𑀮𑀗𑁆𑀓𑀲𑁆𑀲 𑀓𑀸𑀭𑀡𑀸 𑀅𑀮𑀗𑁆𑀓𑀢𑀲𑀻𑀲𑀁 𑀕𑀻𑀯𑀸𑀬 𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁, 𑀲𑀼𑀅𑀜𑁆𑀚𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀳𑀤𑀬𑀫𑀁𑀲𑀜𑁆𑀘 𑀉𑀧𑁆𑀧𑀸𑀝𑁂𑀯𑀸 𑀤𑀺𑀦𑁆𑀦𑀁, 𑀚𑀸𑀮𑀻𑀓𑀼𑀫𑀸𑀭𑀲𑀤𑀺𑀲𑀸 𑀧𑀼𑀢𑁆𑀢𑀸, 𑀓𑀡𑁆𑀳𑀸𑀚𑀺𑀦𑀓𑀼𑀫𑀸𑀭𑀺𑀲𑀤𑀺𑀲𑀸 𑀥𑀻𑀢𑀭𑁄, 𑀫𑀤𑁆𑀤𑀻𑀤𑁂𑀯𑀺𑀲𑀤𑀺𑀲𑀸 𑀪𑀭𑀺𑀬𑀸𑀬𑁄 𑀘 𑀧𑀭𑁂𑀲𑀁 𑀤𑀸𑀲𑀢𑁆𑀣𑀸𑀬 𑀤𑀺𑀦𑁆𑀦𑀸. 𑀅𑀬𑀁 𑀫𑁂 𑀧𑀮𑁆𑀮𑀗𑁆𑀓𑁄 𑀚𑀬𑀧𑀮𑁆𑀮𑀗𑁆𑀓𑁄 𑀣𑀺𑀭𑀧𑀮𑁆𑀮𑀗𑁆𑀓𑁄, 𑀏𑀢𑁆𑀣 𑀫𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀗𑁆𑀓𑀧𑁆𑀧𑀸 𑀧𑀭𑀺𑀧𑀼𑀡𑁆𑀡𑀸, 𑀦 𑀢𑀸𑀯 𑀇𑀢𑁄 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑁄 𑀲𑀢𑁆𑀢𑀸𑀳𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧).

𑀅𑀣 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 ‘‘𑀅𑀚𑁆𑀚𑀸𑀧𑀺 𑀦𑀽𑀦 𑀲𑀺𑀤𑁆𑀥𑀢𑁆𑀣𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀧𑀮𑁆𑀮𑀗𑁆𑀓𑀲𑁆𑀫𑀺𑀜𑁆𑀳𑀺 𑀆𑀮𑀬𑀁 𑀦 𑀯𑀺𑀚𑀳𑀢𑀻’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀲𑀢𑁆𑀣𑀸 𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀁 𑀜𑀢𑁆𑀯𑀸 𑀢𑀸𑀲𑀁 𑀯𑀺𑀢𑀓𑁆𑀓𑀯𑀽𑀧𑀲𑀫𑀢𑁆𑀣𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀳𑀺 𑀓𑀢𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀜𑀸𑀢𑀺𑀲𑀫𑀸𑀕𑀫𑁂 𑀓𑀢𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀧𑀸𑀣𑀺𑀓𑀧𑀼𑀢𑁆𑀢𑀲𑀫𑀸𑀕𑀫𑁂 𑀓𑀢𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀲𑀩𑁆𑀩𑀁 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀢𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀁 𑀅𑀳𑁄𑀲𑀺.

𑀏𑀯𑀁 𑀲𑀢𑁆𑀣𑀸 𑀇𑀫𑀺𑀦𑀸 𑀧𑀸𑀝𑀺𑀳𑀸𑀭𑀺𑀬𑁂𑀦 𑀤𑁂𑀯𑀢𑀸𑀦𑀁 𑀯𑀺𑀢𑀓𑁆𑀓𑀁 𑀯𑀽𑀧𑀲𑀫𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀢𑁄 𑀈𑀲𑀓𑀁 𑀧𑀸𑀘𑀻𑀦𑀦𑀺𑀲𑁆𑀲𑀺𑀢𑁂 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀢 𑀫𑁂 𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀤𑁆𑀥’’𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀩𑀮𑀸𑀥𑀺𑀕𑀫𑀝𑁆𑀞𑀸𑀦𑀁 𑀧𑀮𑁆𑀮𑀗𑁆𑀓𑀁 𑀩𑁄𑀥𑀺𑀭𑀼𑀓𑁆𑀔𑀜𑁆𑀘 𑀅𑀦𑀺𑀫𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀅𑀦𑀺𑀫𑀺𑀲𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀅𑀣 𑀲𑀢𑁆𑀣𑀸 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀢𑁄 𑀆𑀬𑀢𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀁 𑀞𑀸𑀦𑀁 𑀭𑀢𑀦𑀘𑀗𑁆𑀓𑀫𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁.

𑀘𑀢𑀼𑀢𑁆𑀣𑁂 𑀧𑀦 𑀲𑀢𑁆𑀢𑀸𑀳𑁂 𑀩𑁄𑀥𑀺𑀢𑁄 𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀤𑁂𑀯𑀢𑀸 𑀭𑀢𑀦𑀖𑀭𑀁 𑀫𑀸𑀧𑀬𑀺𑀁𑀲𑀼. 𑀢𑀢𑁆𑀣 𑀪𑀕𑀯𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀆𑀪𑀺𑀥𑀫𑁆𑀫𑀺𑀓𑀸 𑀧𑀦𑀸𑀳𑀼 𑁋 ‘‘𑀭𑀢𑀦𑀖𑀭𑀁 𑀦𑀸𑀫 𑀦 𑀲𑀢𑁆𑀢𑀭𑀢𑀦𑀫𑀬𑀁 𑀕𑁂𑀳𑀁, 𑀲𑀢𑁆𑀢𑀦𑁆𑀦𑀁 𑀧𑀦 𑀧𑀓𑀭𑀡𑀸𑀦𑀁 𑀲𑀫𑁆𑀫𑀲𑀺𑀢𑀝𑁆𑀞𑀸𑀦𑀁 ‘𑀭𑀢𑀦𑀖𑀭’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀉𑀪𑁄𑀧𑁂𑀢𑁂 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀕𑀳𑁂𑀢𑀩𑁆𑀩𑀫𑁂𑀯. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀢𑀁 𑀞𑀸𑀦𑀁 𑀭𑀢𑀦𑀖𑀭𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀏𑀯𑀁 𑀲𑀢𑁆𑀣𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀘𑀢𑁆𑀢𑀸𑀭𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭𑀸𑀧𑀺 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀑𑀢𑀸𑀭𑀸𑀧𑁂𑀓𑁆𑀔𑁄𑀧𑀺 𑀇𑀫𑀲𑁆𑀲 𑀦 𑀓𑀺𑀜𑁆𑀘𑀺 𑀔𑀮𑀺𑀢𑀁 𑀅𑀤𑁆𑀤𑀲𑀁, 𑀅𑀢𑀺𑀓𑁆𑀓𑀦𑁆𑀢𑁄𑀤𑀸𑀦𑀺 𑀏𑀲 𑀫𑀫 𑀯𑀲’’𑀦𑁆𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀫𑀳𑀸𑀫𑀕𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄𑀴𑀲 𑀓𑀸𑀭𑀡𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀪𑀽𑀫𑀺𑀬𑀁 𑀲𑁄𑀴𑀲 𑀮𑁂𑀔𑀸 𑀆𑀓𑀟𑁆𑀠𑀺 𑁋 ‘‘𑀅𑀳𑀁 𑀏𑀲𑁄 𑀯𑀺𑀬 𑀤𑀸𑀦𑀧𑀸𑀭𑀫𑀺𑀁 𑀦 𑀧𑀽𑀭𑁂𑀲𑀺𑀁, 𑀢𑁂𑀦𑀫𑁆𑀳𑀺 𑀇𑀫𑀺𑀦𑀸 𑀲𑀤𑀺𑀲𑁄 𑀦 𑀚𑀸𑀢𑁄’’𑀢𑀺 𑀏𑀓𑀁 𑀮𑁂𑀔𑀁 𑀆𑀓𑀟𑁆𑀠𑀺. 𑀢𑀣𑀸 ‘‘𑀅𑀳𑀁 𑀏𑀲𑁄 𑀯𑀺𑀬 𑀲𑀻𑀮𑀧𑀸𑀭𑀫𑀺𑀁…𑀧𑁂… 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁, 𑀧𑀜𑁆𑀜𑀸𑀧𑀸𑀭𑀫𑀺𑀁, 𑀯𑀻𑀭𑀺𑀬𑀧𑀸𑀭𑀫𑀺𑀁, 𑀔𑀦𑁆𑀢𑀺𑀧𑀸𑀭𑀫𑀺𑀁, 𑀲𑀘𑁆𑀘𑀧𑀸𑀭𑀫𑀺𑀁, 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁, 𑀫𑁂𑀢𑁆𑀢𑀸𑀧𑀸𑀭𑀫𑀺𑀁, 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀦 𑀧𑀽𑀭𑁂𑀲𑀺𑀁, 𑀢𑁂𑀦𑀫𑁆𑀳𑀺 𑀇𑀫𑀺𑀦𑀸 𑀲𑀤𑀺𑀲𑁄 𑀦 𑀚𑀸𑀢𑁄’’𑀢𑀺 𑀤𑀲𑀫𑀁 𑀮𑁂𑀔𑀁 𑀆𑀓𑀟𑁆𑀠𑀺. 𑀢𑀣𑀸 ‘‘𑀅𑀳𑀁 𑀏𑀲𑁄 𑀯𑀺𑀬 𑀅𑀲𑀸𑀥𑀸𑀭𑀡𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀲𑁆𑀲 𑀧𑀝𑀺𑀯𑁂𑀥𑀸𑀬 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀤𑀲 𑀧𑀸𑀭𑀫𑀺𑀬𑁄 𑀦 𑀧𑀽𑀭𑁂𑀲𑀺𑀁, 𑀢𑁂𑀦𑀫𑁆𑀳𑀺 𑀇𑀫𑀺𑀦𑀸 𑀲𑀤𑀺𑀲𑁄 𑀦 𑀚𑀸𑀢𑁄’’𑀢𑀺 𑀏𑀓𑀸𑀤𑀲𑀫𑀁 𑀮𑁂𑀔𑀁 𑀆𑀓𑀟𑁆𑀠𑀺. 𑀢𑀣𑀸 ‘‘𑀅𑀳𑀁 𑀏𑀲𑁄 𑀯𑀺𑀬 𑀅𑀲𑀸𑀥𑀸𑀭𑀡𑀲𑁆𑀲 𑀆𑀲𑀬𑀸𑀦𑀼𑀲𑀬𑀜𑀸𑀡𑀲𑁆𑀲…𑀧𑁂… 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀜𑀸𑀡𑀲𑁆𑀲, 𑀅𑀦𑀸𑀯𑀭𑀡𑀜𑀸𑀡𑀲𑁆𑀲, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀯𑁂𑀥𑀸𑀬 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀤𑀲 𑀧𑀸𑀭𑀫𑀺𑀬𑁄 𑀦 𑀧𑀽𑀭𑁂𑀲𑀺𑀁, 𑀢𑁂𑀦𑀫𑁆𑀳𑀺 𑀇𑀫𑀺𑀦𑀸 𑀲𑀤𑀺𑀲𑁄 𑀦 𑀚𑀸𑀢𑁄’’𑀢𑀺 𑀲𑁄𑀴𑀲𑀫𑀁 𑀮𑁂𑀔𑀁 𑀆𑀓𑀟𑁆𑀠𑀺. 𑀏𑀯𑀁 𑀫𑀸𑀭𑁄 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀫𑀕𑁆𑀕𑁂 𑀲𑁄𑀴𑀲 𑀮𑁂𑀔𑀸 𑀆𑀓𑀟𑁆𑀠𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀢𑀡𑁆𑀳𑀸, 𑀅𑀭𑀢𑀺, 𑀭𑀕𑀸 𑀘𑀸𑀢𑀺 𑀢𑀺𑀲𑁆𑀲𑁄 𑀫𑀸𑀭𑀥𑀻𑀢𑀭𑁄 (𑀲𑀁. 𑀦𑀺. 𑁧.𑁧𑁬𑁧) ‘‘𑀧𑀺𑀢𑀸 𑀦𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀦𑀼 𑀔𑁄 𑀏𑀢𑀭𑀳𑀻’’𑀢𑀺 𑀑𑀮𑁄𑀓𑀬𑀫𑀸𑀦𑀸 𑀢𑀁 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀁 𑀪𑀽𑀫𑀺𑀁 𑀮𑁂𑀔𑀫𑀸𑀦𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀫𑀸, 𑀢𑀸𑀢, 𑀢𑁆𑀯𑀁 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀅𑀫𑁆𑀫𑀸, 𑀅𑀬𑀁 𑀫𑀳𑀸𑀲𑀫𑀡𑁄 𑀫𑀬𑁆𑀳𑀁 𑀯𑀲𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀏𑀢𑁆𑀢𑀓𑀁 𑀓𑀸𑀮𑀁 𑀑𑀮𑁄𑀓𑁂𑀦𑁆𑀢𑁄 𑀑𑀢𑀸𑀭𑀫𑀲𑁆𑀲 𑀤𑀝𑁆𑀞𑀼𑀁 𑀦𑀸𑀲𑀓𑁆𑀔𑀺𑀁, 𑀢𑁂𑀦𑀫𑁆𑀳𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄’’𑀢𑀺. ‘‘𑀬𑀤𑀺 𑀏𑀯𑀁 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀬𑀫𑁂𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀆𑀤𑀸𑀬 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀦 𑀲𑀓𑁆𑀓𑀸, 𑀅𑀫𑁆𑀫𑀸, 𑀏𑀲 𑀓𑁂𑀦𑀘𑀺 𑀯𑀲𑁂 𑀓𑀸𑀢𑀼𑀁, 𑀅𑀘𑀮𑀸𑀬 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑁄 𑀏𑀲 𑀧𑀼𑀭𑀺𑀲𑁄’’𑀢𑀺. ‘‘𑀢𑀸𑀢, 𑀫𑀬𑀁 𑀇𑀢𑁆𑀣𑀺𑀬𑁄 𑀦𑀸𑀫, 𑀇𑀤𑀸𑀦𑁂𑀯 𑀦𑀁 𑀭𑀸𑀕𑀧𑀸𑀲𑀸𑀤𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺 𑀆𑀳𑀁𑀲𑀼. 𑀪𑀕𑀯𑀸 𑀦𑁂𑀯 𑀢𑀸𑀲𑀁 𑀯𑀘𑀦𑀁 𑀫𑀦𑀲𑀺 𑀅𑀓𑀸𑀲𑀺, 𑀦 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀯𑁂𑀓𑀲𑀼𑀔𑀜𑁆𑀜𑁂𑀯 𑀅𑀦𑀼𑀪𑀯𑀦𑁆𑀢𑁄 𑀦𑀺𑀲𑀻𑀤𑀺.

𑀧𑀼𑀦 𑀫𑀸𑀭𑀥𑀻𑀢𑀭𑁄 ‘‘𑀉𑀘𑁆𑀘𑀸𑀯𑀘𑀸 𑀔𑁄 𑀧𑀼𑀭𑀺𑀲𑀸𑀦𑀁 𑀅𑀥𑀺𑀧𑁆𑀧𑀸𑀬𑀸, 𑀓𑁂𑀲𑀜𑁆𑀘𑀺 𑀓𑀼𑀫𑀸𑀭𑀺𑀓𑀸𑀲𑀼 𑀧𑁂𑀫𑀁 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀧𑀞𑀫𑀯𑀬𑁂 𑀞𑀺𑀢𑀸𑀲𑀼, 𑀓𑁂𑀲𑀜𑁆𑀘𑀺 𑀫𑀚𑁆𑀛𑀺𑀫𑀯𑀬𑁂 𑀞𑀺𑀢𑀸𑀲𑀼, 𑀓𑁂𑀲𑀜𑁆𑀘𑀺 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀸𑀲𑀼, 𑀬𑀁𑀦𑀽𑀦 𑀫𑀬𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀭𑀽𑀧𑁂𑀳𑀺 𑀧𑀮𑁄𑀪𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀸𑀫𑀸’’𑀢𑀺 𑀏𑀓𑀫𑁂𑀓𑀸 𑀓𑀼𑀫𑀸𑀭𑀺𑀓𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀓𑀁 𑀲𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀺𑀓𑀸, 𑀅𑀯𑀺𑀚𑀸𑀢𑀸, 𑀲𑀓𑀺𑀁𑀯𑀺𑀚𑀸𑀢𑀸, 𑀤𑀼𑀯𑀺𑀚𑀸𑀢𑀸, 𑀫𑀚𑁆𑀛𑀺𑀫𑀺𑀢𑁆𑀣𑀺𑀬𑁄, 𑀫𑀳𑀺𑀢𑁆𑀣𑀺𑀬𑁄 𑀘 𑀳𑀼𑀢𑁆𑀯𑀸 𑀙𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺 𑀆𑀳𑀁𑀲𑀼. 𑀢𑀫𑁆𑀧𑀺 𑀪𑀕𑀯𑀸 𑀦 𑀫𑀦𑀲𑀸𑀓𑀸𑀲𑀺, 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄. 𑀓𑁂𑀘𑀺 𑀧𑀦𑀸𑀘𑀭𑀺𑀬𑀸 𑀯𑀤𑀦𑁆𑀢𑀺 𑁋 ‘‘𑀢𑀸 𑀫𑀳𑀺𑀢𑁆𑀣𑀺𑀪𑀸𑀯𑁂𑀦 𑀉𑀧𑀕𑀢𑀸 𑀤𑀺𑀲𑁆𑀯𑀸 𑀪𑀕𑀯𑀸 𑁋 ‘𑀏𑀢𑀸 𑀔𑀡𑁆𑀟𑀤𑀦𑁆𑀢𑀸 𑀧𑀮𑀺𑀢𑀓𑁂𑀲𑀸 𑀳𑁄𑀦𑁆𑀢𑀽’𑀢𑀺 𑀅𑀥𑀺𑀝𑁆𑀞𑀸𑀲𑀻’’𑀢𑀺. 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀪𑀕𑀯𑀸 𑀏𑀯𑀭𑀽𑀧𑀁 𑀅𑀥𑀺𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀧𑀦 ‘‘𑀅𑀧𑁂𑀣 𑀢𑀼𑀫𑁆𑀳𑁂, 𑀓𑀺𑀁 𑀤𑀺𑀲𑁆𑀯𑀸 𑀏𑀯𑀁 𑀯𑀸𑀬𑀫𑀣, 𑀏𑀯𑀭𑀽𑀧𑀁 𑀦𑀸𑀫 𑀅𑀯𑀻𑀢𑀭𑀸𑀕𑀸𑀤𑀻𑀦𑀁 𑀧𑀼𑀭𑀢𑁄 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀭𑀸𑀕𑁄 𑀧𑀳𑀻𑀦𑁄, 𑀤𑁄𑀲𑁄 𑀧𑀳𑀻𑀦𑁄, 𑀫𑁄𑀳𑁄 𑀧𑀳𑀻𑀦𑁄’’𑀢𑀺 𑀅𑀢𑁆𑀢𑀦𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀆𑀭𑀩𑁆𑀪 𑁋

‘‘𑀬𑀲𑁆𑀲 𑀚𑀺𑀢𑀁 𑀦𑀸𑀯𑀚𑀻𑀬𑀢𑀺, 𑀚𑀺𑀢𑀫𑀲𑁆𑀲 𑀦𑁄𑀬𑀸𑀢𑀺 𑀓𑁄𑀘𑀺 𑀮𑁄𑀓𑁂;

𑀢𑀁 𑀩𑀼𑀤𑁆𑀥𑀫𑀦𑀦𑁆𑀢𑀕𑁄𑀘𑀭𑀁, 𑀅𑀧𑀤𑀁 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣.

‘‘𑀬𑀲𑁆𑀲 𑀚𑀸𑀮𑀺𑀦𑀻 𑀯𑀺𑀲𑀢𑁆𑀢𑀺𑀓𑀸, 𑀢𑀡𑁆𑀳𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀦𑁂𑀢𑀯𑁂;

𑀢𑀁 𑀩𑀼𑀤𑁆𑀥𑀫𑀦𑀦𑁆𑀢𑀕𑁄𑀘𑀭𑀁, 𑀅𑀧𑀤𑀁 𑀓𑁂𑀦 𑀧𑀤𑁂𑀦 𑀦𑁂𑀲𑁆𑀲𑀣𑀸’’𑀢𑀺. (𑀥. 𑀧. 𑁧𑁭𑁯-𑁧𑁮𑁦) 𑁋

𑀇𑀫𑀸 𑀥𑀫𑁆𑀫𑀧𑀤𑁂 𑀩𑀼𑀤𑁆𑀥𑀯𑀕𑁆𑀕𑁂 𑀤𑁆𑀯𑁂 𑀕𑀸𑀣𑀸 𑀯𑀤𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀸 ‘‘𑀲𑀘𑁆𑀘𑀁 𑀓𑀺𑀭 𑀦𑁄 𑀧𑀺𑀢𑀸 𑀅𑀯𑁄𑀘, ‘𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀦 𑀭𑀸𑀕𑁂𑀦 𑀲𑀼𑀯𑀸𑀦𑀬𑁄’’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁧.𑁧𑁬𑁧) 𑀯𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀆𑀕𑀫𑀺𑀁𑀲𑀼.

𑀪𑀕𑀯𑀸𑀧𑀺 𑀢𑀢𑁆𑀣𑁂𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑁄 𑀫𑀼𑀘𑀮𑀺𑀦𑁆𑀤𑀫𑀽𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀬 𑀉𑀧𑁆𑀧𑀦𑁆𑀦𑀸𑀬 𑀲𑀻𑀢𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀫𑀼𑀘𑀮𑀺𑀦𑁆𑀤𑁂𑀦 𑀦𑀸𑀫 𑀦𑀸𑀕𑀭𑀸𑀚𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀲𑀫𑁆𑀩𑀸𑀥𑀸𑀬 𑀕𑀦𑁆𑀥𑀓𑀼𑀝𑀺𑀬𑀁 𑀯𑀺𑀳𑀭𑀦𑁆𑀢𑁄 𑀯𑀺𑀬 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀸𑀚𑀸𑀬𑀢𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁆𑀣𑀧𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄𑀬𑁂𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢 𑀲𑀢𑁆𑀢𑀸𑀳𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺. 𑀏𑀢𑁆𑀣𑀦𑁆𑀢𑀭𑁂 𑀦𑁂𑀯 𑀫𑀼𑀔𑀥𑁄𑀯𑀦𑀁, 𑀦 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁, 𑀦 𑀆𑀳𑀸𑀭𑀓𑀺𑀘𑁆𑀘𑀁 𑀅𑀳𑁄𑀲𑀺, 𑀛𑀸𑀦𑀲𑀼𑀔𑀨𑀮𑀲𑀼𑀔𑁂𑀦𑁂𑀯 𑀘 𑀯𑀻𑀢𑀺𑀦𑀸𑀫𑁂𑀲𑀺.

𑀅𑀣𑀲𑁆𑀲 𑀢𑀲𑁆𑀫𑀺𑀁 𑀲𑀢𑁆𑀢𑀲𑀢𑁆𑀢𑀸𑀳𑀫𑀢𑁆𑀣𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀢𑀺𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 ‘‘𑀫𑀼𑀔𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀕𑀤𑀳𑀭𑀻𑀢𑀓𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀲𑀢𑁆𑀣𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺, 𑀢𑁂𑀦𑀲𑁆𑀲 𑀲𑀭𑀻𑀭𑀯𑀴𑀜𑁆𑀚𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀓𑁆𑀓𑁄𑀬𑁂𑀯 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀜𑁆𑀘𑁂𑀯 𑀫𑀼𑀔𑀥𑁄𑀯𑀦𑁄𑀤𑀓𑀜𑁆𑀘 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸𑀯 𑀅𑀦𑁄𑀢𑀢𑁆𑀢𑀤𑀳𑁄𑀤𑀓𑁂𑀦 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀭𑀸𑀚𑀸𑀬𑀢𑀦𑀫𑀽𑀮𑁂 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀢𑀧𑀼𑀲𑁆𑀲 𑀪𑀮𑁆𑀮𑀺𑀓𑀸 𑀦𑀸𑀫 𑀤𑁆𑀯𑁂 𑀯𑀸𑀡𑀺𑀚𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀉𑀓𑁆𑀓𑀮𑀸 𑀚𑀦𑀧𑀤𑀸 𑀫𑀚𑁆𑀛𑀺𑀫𑀤𑁂𑀲𑀁 𑀕𑀘𑁆𑀙𑀦𑁆𑀢𑀸 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬 𑀲𑀓𑀝𑀸𑀦𑀺 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀲𑀢𑁆𑀣𑀼 𑀆𑀳𑀸𑀭𑀲𑀫𑁆𑀧𑀸𑀤𑀦𑁂 𑀉𑀲𑁆𑀲𑀸𑀳𑀺𑀢𑀸 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀆𑀤𑀸𑀬 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀆𑀳𑀸𑀭𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀧𑀸𑀬𑀸𑀲𑀧𑀝𑀺𑀕𑁆𑀕𑀳𑀡𑀤𑀺𑀯𑀲𑁂𑀬𑁂𑀯 𑀧𑀢𑁆𑀢𑀲𑁆𑀲 𑀅𑀦𑁆𑀢𑀭𑀳𑀺𑀢𑀢𑁆𑀢𑀸 ‘‘𑀦 𑀔𑁄 𑀢𑀣𑀸𑀕𑀢𑀸 𑀳𑀢𑁆𑀣𑁂𑀲𑀼 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑁂 𑀧𑀢𑁆𑀢𑁂 𑀉𑀧𑀦𑀸𑀫𑁂𑀲𑀼𑀁, 𑀪𑀕𑀯𑀸 𑀢𑁂 𑀧𑀝𑀺𑀓𑁆𑀔𑀺𑀧𑀺. 𑀧𑀼𑀦 𑀫𑀼𑀕𑁆𑀕𑀯𑀡𑁆𑀡𑀲𑁂𑀮𑀫𑀬𑁂 𑀘𑀢𑁆𑀢𑀸𑀭𑁄 𑀧𑀢𑁆𑀢𑁂 𑀉𑀧𑀦𑀸𑀫𑁂𑀲𑀼𑀁. 𑀪𑀕𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀫𑀳𑀸𑀭𑀸𑀚𑀸𑀦𑀁 𑀲𑀤𑁆𑀥𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀘𑀢𑁆𑀢𑀸𑀭𑁄𑀧𑀺 𑀧𑀢𑁆𑀢𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀞𑀧𑁂𑀢𑁆𑀯𑀸 ‘‘𑀏𑀓𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀼𑀔𑀯𑀝𑁆𑀝𑀺𑀬𑀁 𑀧𑀜𑁆𑀜𑀸𑀬𑀫𑀸𑀦𑀮𑁂𑀔𑀸 𑀳𑀼𑀢𑁆𑀯𑀸 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑁂𑀦 𑀏𑀓𑀢𑁆𑀢𑀁 𑀉𑀧𑀕𑀫𑀺𑀁𑀲𑀼. 𑀪𑀕𑀯𑀸 𑀢𑀲𑁆𑀫𑀺𑀁 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀆𑀳𑀸𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀢𑁂 𑀤𑁆𑀯𑁂 𑀪𑀸𑀢𑀭𑁄 𑀯𑀸𑀡𑀺𑀚𑀸 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀤𑁆𑀯𑁂𑀯𑀸𑀘𑀺𑀓𑀸 𑀉𑀧𑀸𑀲𑀓𑀸 𑀅𑀳𑁂𑀲𑀼𑀁. 𑀅𑀣 𑀦𑁂𑀲𑀁 ‘‘𑀏𑀓𑀁 𑀦𑁄, 𑀪𑀦𑁆𑀢𑁂, 𑀧𑀭𑀺𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀸𑀦𑀁 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀅𑀢𑁆𑀢𑀦𑁄 𑀲𑀻𑀲𑀁 𑀧𑀭𑀸𑀫𑀲𑀺𑀢𑁆𑀯𑀸 𑀓𑁂𑀲𑀥𑀸𑀢𑀼𑀬𑁄 𑀅𑀤𑀸𑀲𑀺. 𑀢𑁂 𑀅𑀢𑁆𑀢𑀦𑁄 𑀦𑀕𑀭𑁂 𑀢𑀸 𑀥𑀸𑀢𑀼𑀬𑁄 𑀲𑀼𑀯𑀡𑁆𑀡𑀲𑀫𑀼𑀕𑁆𑀕𑀲𑁆𑀲 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀼𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑁂𑀯 𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀢𑁆𑀢𑀦𑀸 𑀅𑀥𑀺𑀕𑀢𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑁄 𑁋 ‘‘𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄’’𑀢𑀺 𑀧𑀭𑁂𑀲𑀁 𑀅𑀤𑁂𑀲𑁂𑀢𑀼𑀓𑀸𑀫𑀢𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄’’𑀢𑀺 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀦𑀺𑀫𑁆𑀫𑀸𑀦𑀭𑀢𑀺𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀤𑁂𑀲𑀦𑀁 𑀆𑀬𑀸𑀘𑀺.

𑀲𑀢𑁆𑀣𑀸 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀆𑀴𑀸𑀭𑁄 𑀧𑀡𑁆𑀟𑀺𑀢𑁄, 𑀲𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀁 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 𑀉𑀤𑀓𑀁 𑀆𑀯𑀚𑁆𑀚𑁂𑀲𑀺. 𑀢𑀲𑁆𑀲𑀸𑀧𑀺 𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀩𑀳𑀽𑀧𑀓𑀸𑀭𑀸 𑀔𑁄 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽’’𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀭𑀩𑁆𑀪 𑀫𑀦𑀲𑀺 𑀓𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀢𑁂 𑀏𑀢𑀭𑀳𑀺 𑀯𑀺𑀳𑀭𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂’’𑀢𑀺 𑀜𑀢𑁆𑀯𑀸 𑀓𑀢𑀺𑀧𑀸𑀳𑀁 𑀩𑁄𑀥𑀺𑀫𑀡𑁆𑀟𑀲𑀸𑀫𑀦𑁆𑀢𑀸𑀬𑁂𑀯 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀯𑀺𑀳𑀭𑀺𑀢𑁆𑀯𑀸 ‘‘𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀘𑁆𑀘𑀽𑀲𑀲𑀫𑀬𑁂 𑀧𑀘𑁆𑀘𑀼𑀝𑁆𑀞𑀸𑀬 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀓𑀸𑀮𑀲𑁆𑀲𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀓𑀁 𑀦𑀸𑀫 𑀆𑀚𑀻𑀯𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀲𑀸𑀬𑀦𑁆𑀳𑀲𑀫𑀬𑁂 𑀇𑀲𑀺𑀧𑀢𑀦𑀁 𑀲𑀫𑁆𑀧𑀸𑀧𑀼𑀡𑀺.

𑀧𑀜𑁆𑀘𑀯𑀕𑁆𑀕𑀺𑀬𑀸 𑀢𑀣𑀸𑀕𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀆𑀯𑀼𑀲𑁄, 𑀲𑀫𑀡𑁄 𑀕𑁄𑀢𑀫𑁄 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀓𑀸𑀬𑁄 𑀧𑀻𑀡𑀺𑀦𑁆𑀤𑁆𑀭𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀇𑀫𑀲𑁆𑀲 𑀯𑀦𑁆𑀤𑀦𑀸𑀤𑀻𑀦𑀺 𑀦 𑀓𑀭𑀺𑀲𑁆𑀲𑀸𑀫, 𑀫𑀳𑀸𑀓𑀼𑀮𑀧𑁆𑀧𑀲𑀼𑀢𑁄 𑀔𑁄 𑀧𑀦𑁂𑀲 𑀆𑀲𑀦𑀸𑀪𑀺𑀳𑀸𑀭𑀁 𑀅𑀭𑀳𑀢𑀺, 𑀢𑁂𑀦𑀲𑁆𑀲 𑀆𑀲𑀦𑀫𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼. 𑀪𑀕𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀚𑀸𑀦𑀦𑀲𑀫𑀢𑁆𑀣𑁂𑀦 𑀜𑀸𑀡𑁂𑀦 ‘‘𑀓𑀺𑀁 𑀦𑀼 𑀔𑁄 𑀇𑀫𑁂 𑀘𑀺𑀦𑁆𑀢𑀬𑀺𑀁𑀲𑀽’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀁 𑀅𑀜𑁆𑀜𑀸𑀲𑀺. 𑀅𑀣 𑀢𑁂𑀲𑀼 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀨𑀭𑀡𑀲𑀫𑀢𑁆𑀣𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀑𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀨𑀭𑀺. 𑀢𑁂 𑀪𑀕𑀯𑀢𑀸 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀲𑀁𑀨𑀼𑀝𑁆𑀞𑀸 𑀢𑀣𑀸𑀕𑀢𑁂 𑀉𑀧𑀲𑀗𑁆𑀓𑀫𑀦𑁆𑀢𑁂 𑀲𑀓𑀸𑀬 𑀓𑀢𑀺𑀓𑀸𑀬 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀅𑀓𑀁𑀲𑀼. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀧𑀦𑀲𑁆𑀲 𑀅𑀚𑀸𑀦𑀦𑁆𑀢𑀸 𑀓𑁂𑀯𑀮𑀁 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀺𑀁𑀲𑀼.

𑀅𑀣 𑀦𑁂 𑀪𑀕𑀯𑀸 𑁋 ‘‘𑀫𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀁 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀣. 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀜𑀸𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑀬𑁄𑀕𑁂 𑀯𑀢𑁆𑀢𑀫𑀸𑀦𑁂 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑁂 𑀆𑀫𑀦𑁆𑀢𑁂𑀢𑁆𑀯𑀸 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀙𑀜𑀸𑀡𑀯𑀺𑀚𑀫𑁆𑀪𑀦𑀁 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 (𑀫𑀳𑀸𑀯. 𑁧𑁩 𑀆𑀤𑀬𑁄; 𑀲𑀁. 𑀦𑀺. 𑁫.𑁧𑁦𑁮𑁧) 𑀤𑁂𑀲𑁂𑀲𑀺. 𑀢𑁂𑀲𑀼 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀦𑁆𑀢𑁄 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀯𑀧𑁆𑀧𑀢𑁆𑀣𑁂𑀭𑀁 𑀑𑀯𑀤𑀦𑁆𑀢𑁄 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺, 𑀲𑁂𑀲𑀸 𑀘𑀢𑁆𑀢𑀸𑀭𑁄𑀧𑀺 𑀧𑀺𑀡𑁆𑀟𑀸𑀬 𑀘𑀭𑀺𑀁𑀲𑀼. 𑀯𑀧𑁆𑀧𑀢𑁆𑀣𑁂𑀭𑁄 𑀧𑀼𑀩𑁆𑀩𑀡𑁆𑀳𑁂𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀧𑀼𑀦𑀤𑀺𑀯𑀲𑁂 𑀪𑀤𑁆𑀤𑀺𑀬𑀢𑁆𑀣𑁂𑀭𑀁, 𑀧𑀼𑀦𑀤𑀺𑀯𑀲𑁂 𑀫𑀳𑀸𑀦𑀸𑀫𑀢𑁆𑀣𑁂𑀭𑀁, 𑀧𑀼𑀦𑀤𑀺𑀯𑀲𑁂 𑀅𑀲𑁆𑀲𑀚𑀺𑀢𑁆𑀣𑁂𑀭𑀦𑁆𑀢𑀺 𑀲𑀩𑁆𑀩𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀜𑁆𑀘𑀫𑀺𑀬𑀁 𑀧𑀓𑁆𑀔𑀲𑁆𑀲 𑀧𑀜𑁆𑀘𑀧𑀺 𑀣𑁂𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀁 (𑀫𑀳𑀸𑀯. 𑁨𑁦 𑀆𑀤𑀬𑁄; 𑀲𑀁. 𑀦𑀺. 𑁩.𑁫𑁯) 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀧𑀺 𑀣𑁂𑀭𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀢𑀁 𑀭𑀢𑁆𑀢𑀺𑀪𑀸𑀕𑁂 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 ‘‘𑀏𑀳𑀺 𑀬𑀲𑀸’’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀭𑀢𑁆𑀢𑀺𑀪𑀸𑀕𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀧𑀼𑀦𑀤𑀺𑀯𑀲𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀅𑀧𑀭𑁂𑀧𑀺 𑀢𑀲𑁆𑀲 𑀲𑀳𑀸𑀬𑀓𑁂 𑀘𑀢𑀼𑀧𑀜𑁆𑀜𑀸𑀲𑀚𑀦𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺.

𑀏𑀯𑀁 𑀮𑁄𑀓𑁂 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑁂𑀲𑀼 𑀚𑀸𑀢𑁂𑀲𑀼 𑀲𑀢𑁆𑀣𑀸 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 ‘‘𑀘𑀭𑀣 𑀪𑀺𑀓𑁆𑀔𑀯𑁂 𑀘𑀸𑀭𑀺𑀓’’𑀦𑁆𑀢𑀺 𑀲𑀝𑁆𑀞𑀺𑀪𑀺𑀓𑁆𑀔𑀽 𑀤𑀺𑀲𑀸𑀲𑀼 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀉𑀭𑀼𑀯𑁂𑀮𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲𑀪𑀤𑁆𑀤𑀯𑀕𑁆𑀕𑀺𑀬𑀓𑀼𑀫𑀸𑀭𑁂 𑀯𑀺𑀦𑁂𑀲𑀺. 𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀲𑀩𑁆𑀩𑀼𑀢𑁆𑀢𑀫𑁄 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀢𑁂𑀧𑀺 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦𑁂𑀯 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑀺𑀲𑀸𑀲𑀼 𑀧𑁂𑀲𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 𑀲𑀳𑀲𑁆𑀲𑀚𑀝𑀺𑀮𑀧𑀭𑀺𑀯𑀸𑀭𑁂 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 𑀯𑀺𑀦𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸 𑀕𑀬𑀸𑀲𑀻𑀲𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 (𑀫𑀳𑀸𑀯. 𑁫𑁪) 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 ‘‘𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀤𑀺𑀦𑁆𑀦𑀧𑀝𑀺𑀜𑁆𑀜𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀦𑀕𑀭𑀽𑀧𑀘𑀸𑀭𑁂 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀉𑀬𑁆𑀬𑀸𑀦𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑀸 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀦𑀳𑀼𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀧𑀭𑀺𑀯𑀼𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀓𑁆𑀓𑀯𑀺𑀘𑀺𑀢𑁆𑀢𑀢𑀮𑁂𑀲𑀼 𑀲𑀼𑀯𑀡𑁆𑀡𑀧𑀝𑁆𑀝𑀯𑀺𑀢𑀸𑀦𑀁 𑀯𑀺𑀬 𑀧𑀪𑀸𑀲𑀫𑀼𑀤𑀬𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀲𑀼 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬.

𑀅𑀣 𑀔𑁄 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀫𑀳𑀸𑀲𑀫𑀡𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀉𑀤𑀸𑀳𑀼 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀫𑀳𑀸𑀲𑀫𑀡𑁂’’𑀢𑀺. 𑀪𑀕𑀯𑀸 𑀢𑁂𑀲𑀁 𑀘𑁂𑀢𑀲𑁆𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀫𑁂𑀯 𑀤𑀺𑀲𑁆𑀯𑀸 𑀉𑀭𑀼𑀯𑁂𑀮𑀯𑀸𑀲𑀺, 𑀧𑀳𑀸𑀲𑀺 𑀅𑀕𑁆𑀕𑀺𑀁 𑀓𑀺𑀲𑀓𑁄𑀯𑀤𑀸𑀦𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀓𑀲𑁆𑀲𑀧 𑀏𑀢𑀫𑀢𑁆𑀣𑀁, 𑀓𑀣𑀁 𑀧𑀳𑀻𑀦𑀁 𑀢𑀯 𑀅𑀕𑁆𑀕𑀺𑀳𑀼𑀢𑁆𑀢’’𑀦𑁆𑀢𑀺. 𑁋

𑀣𑁂𑀭𑁄𑀧𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑁋

‘‘𑀭𑀽𑀧𑁂 𑀘 𑀲𑀤𑁆𑀤𑁂 𑀘 𑀅𑀣𑁄 𑀭𑀲𑁂 𑀘, 𑀓𑀸𑀫𑀺𑀢𑁆𑀣𑀺𑀬𑁄 𑀘𑀸𑀪𑀺𑀯𑀤𑀦𑁆𑀢𑀺 𑀬𑀜𑁆𑀜𑀸;

𑀏𑀢𑀁 𑀫𑀮𑀦𑁆𑀢𑀻 𑀉𑀧𑀥𑀻𑀲𑀼 𑀜𑀢𑁆𑀯𑀸, 𑀢𑀲𑁆𑀫𑀸 𑀦 𑀬𑀺𑀝𑁆𑀞𑁂 𑀦 𑀳𑀼𑀢𑁂 𑀅𑀭𑀜𑁆𑀚𑀺’’𑀦𑁆𑀢𑀺. (𑀫𑀳𑀸𑀯. 𑁫𑁫) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀯𑀓𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀢𑀣𑀸𑀕𑀢𑀲𑁆𑀲 𑀧𑀸𑀤𑀧𑀺𑀝𑁆𑀞𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀯𑀢𑁆𑀯𑀸 𑀏𑀓𑀢𑀸𑀮𑀁 𑀤𑁆𑀯𑀺𑀢𑀸𑀮𑀁 𑀢𑀺𑀢𑀸𑀮𑀦𑁆𑀢𑀺 𑀬𑀸𑀯 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀑𑀭𑀼𑀬𑁆𑀳 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀅𑀳𑁄 𑀫𑀳𑀸𑀦𑀼𑀪𑀸𑀯𑀸 𑀩𑀼𑀤𑁆𑀥𑀸, 𑀏𑀯𑀜𑁆𑀳𑀺 𑀣𑀸𑀫𑀕𑀢𑀤𑀺𑀝𑁆𑀞𑀺𑀓𑁄 𑀦𑀸𑀫 ‘𑀅𑀭𑀳𑀸’𑀢𑀺 𑀫𑀜𑁆𑀜𑀫𑀸𑀦𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄𑀧𑀺 𑀤𑀺𑀝𑁆𑀞𑀺𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 𑀤𑀫𑀺𑀢𑁄’’𑀢𑀺 𑀲𑀢𑁆𑀣𑀼 𑀕𑀼𑀡𑀓𑀣𑀁𑀬𑁂𑀯 𑀓𑀣𑁂𑀲𑀺. 𑀪𑀕𑀯𑀸 ‘‘𑀦𑀸𑀳𑀁 𑀇𑀤𑀸𑀦𑀺𑀬𑁂𑀯 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀤𑀫𑁂𑀫𑀺, 𑀅𑀢𑀻𑀢𑁂𑀧𑀺 𑀏𑀲 𑀫𑀬𑀸 𑀤𑀫𑀺𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁧𑁫𑁩 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀭𑀸𑀚𑀸 𑀏𑀓𑀸𑀤𑀲𑀳𑀺 𑀦𑀳𑀼𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀏𑀓𑀦𑀳𑀼𑀢𑀁 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀧𑀜𑁆𑀘 𑀅𑀲𑁆𑀲𑀸𑀲𑀓𑁂 𑀧𑀯𑁂𑀤𑁂𑀢𑁆𑀯𑀸 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺.

𑀧𑀼𑀦𑀤𑀺𑀯𑀲𑁂 𑀬𑁂𑀳𑀺 𑀘 𑀪𑀕𑀯𑀸 𑀳𑀺𑀬𑁆𑀬𑁄 𑀤𑀺𑀝𑁆𑀞𑁄, 𑀬𑁂𑀳𑀺 𑀘 𑀅𑀤𑀺𑀝𑁆𑀞𑁄, 𑀢𑁂 𑀲𑀩𑁆𑀩𑁂𑀧𑀺 𑀭𑀸𑀚𑀕𑀳𑀯𑀸𑀲𑀺𑀦𑁄 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑀸 𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀁 𑀤𑀝𑁆𑀞𑀼𑀓𑀸𑀫𑀸 𑀧𑀸𑀢𑁄𑀯 𑀭𑀸𑀚𑀕𑀳𑀢𑁄 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀅𑀕𑀫𑀁𑀲𑀼. 𑀢𑀺𑀕𑀸𑀯𑀼𑀢𑁄 𑀫𑀕𑁆𑀕𑁄 𑀦𑀧𑁆𑀧𑀳𑁄𑀲𑀺, 𑀲𑀓𑀮𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀤𑀲𑀩𑀮𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀧𑀲𑁆𑀲𑀦𑁆𑀢𑁄𑀧𑀺 𑀢𑀺𑀢𑁆𑀢𑀺𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀯𑀡𑁆𑀡𑀪𑀽𑀫𑀺 𑀦𑀸𑀫𑁂𑀲𑀸. 𑀏𑀯𑀭𑀽𑀧𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀪𑀕𑀯𑀢𑁄 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀸𑀤𑀺𑀧𑁆𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀭𑀽𑀧𑀓𑀸𑀬𑀲𑀺𑀭𑀻 𑀯𑀡𑁆𑀡𑁂𑀢𑀩𑁆𑀩𑀸. 𑀏𑀯𑀁 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀤𑀲𑀩𑀮𑀲𑁆𑀲 𑀲𑀭𑀻𑀭𑀁 𑀧𑀲𑁆𑀲𑀫𑀸𑀦𑁂𑀦 𑀫𑀳𑀸𑀚𑀦𑁂𑀦 𑀦𑀺𑀭𑀦𑁆𑀢𑀭𑀁 𑀨𑀼𑀝𑁂 𑀉𑀬𑁆𑀬𑀸𑀦𑁂 𑀘 𑀕𑀫𑀦𑀫𑀕𑁆𑀕𑁂 𑀘 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀦𑀺𑀓𑁆𑀔𑀫𑀦𑁄𑀓𑀸𑀲𑁄 𑀦𑀸𑀳𑁄𑀲𑀺. 𑀢𑀁 𑀤𑀺𑀯𑀲𑀁 𑀓𑀺𑀭 𑀪𑀕𑀯𑀢𑁄 𑀪𑀢𑁆𑀢𑀁 𑀙𑀺𑀦𑁆𑀦𑀁 𑀪𑀯𑁂𑀬𑁆𑀬, 𑀢𑀲𑁆𑀫𑀸 ‘‘𑀢𑀁 𑀫𑀸 𑀅𑀳𑁄𑀲𑀻’’𑀢𑀺 𑀲𑀓𑁆𑀓𑀲𑁆𑀲 𑀦𑀺𑀲𑀺𑀦𑁆𑀦𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑀫𑀸𑀦𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀧𑀝𑀺𑀲𑀁𑀬𑀼𑀢𑁆𑀢𑀸 𑀣𑀼𑀢𑀺𑀬𑁄 𑀯𑀤𑀫𑀸𑀦𑁄 𑀤𑀲𑀩𑀮𑀲𑁆𑀲 𑀧𑀼𑀭𑀢𑁄 𑀑𑀢𑀭𑀺𑀢𑁆𑀯𑀸 𑀤𑁂𑀯𑀸𑀦𑀼𑀪𑀸𑀯𑁂𑀦 𑀑𑀓𑀸𑀲𑀁 𑀓𑀢𑁆𑀯𑀸 𑁋

‘‘𑀤𑀦𑁆𑀢𑁄 𑀤𑀦𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀫𑀼𑀢𑁆𑀢𑁄 𑀫𑀼𑀢𑁆𑀢𑁂𑀳𑀺…𑀧𑁂….

‘‘𑀢𑀺𑀡𑁆𑀡𑁄 𑀢𑀺𑀡𑁆𑀡𑁂𑀳𑀺…𑀧𑁂….

‘‘𑀲𑀦𑁆𑀢𑁄 𑀲𑀦𑁆𑀢𑁂𑀳𑀺…𑀧𑁂… 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀤𑀲𑀯𑀸𑀲𑁄 𑀤𑀲𑀩𑀮𑁄, 𑀤𑀲𑀥𑀫𑁆𑀫𑀯𑀺𑀤𑀽 𑀤𑀲𑀪𑀺 𑀘𑀼𑀧𑁂𑀢𑁄;

𑀲𑁄 𑀤𑀲𑀲𑀢𑀧𑀭𑀺𑀯𑀸𑀭𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸’’𑀢𑀺. (𑀫𑀳𑀸𑀯. 𑁫𑁮) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀢𑁆𑀣𑀼 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀧𑀼𑀭𑀢𑁄 𑀧𑀸𑀬𑀸𑀲𑀺. 𑀢𑀤𑀸 𑀫𑀳𑀸𑀚𑀦𑁄 𑀫𑀸𑀡𑀯𑀓𑀲𑁆𑀲 𑀭𑀽𑀧𑀲𑀺𑀭𑀺𑀁 𑀤𑀺𑀲𑁆𑀯𑀸 ‘‘𑀅𑀢𑀺𑀯𑀺𑀬 𑀅𑀪𑀺𑀭𑀽𑀧𑁄 𑀯𑀢𑀸𑀬𑀁 𑀫𑀸𑀡𑀯𑀓𑁄, 𑀦 𑀔𑁄 𑀧𑀦 𑀅𑀫𑁆𑀳𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀼𑀢𑁄 𑀅𑀬𑀁 𑀫𑀸𑀡𑀯𑀓𑁄, 𑀓𑀲𑁆𑀲 𑀯𑀸 𑀅𑀬’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 𑁋

‘‘𑀬𑁄 𑀥𑀻𑀭𑁄 𑀲𑀩𑁆𑀩𑀥𑀺 𑀤𑀦𑁆𑀢𑁄, 𑀲𑀼𑀤𑁆𑀥𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀢𑀲𑁆𑀲𑀸𑀳𑀁 𑀧𑀭𑀺𑀘𑀸𑀭𑀓𑁄’’𑀢𑀺. 𑁋 𑀕𑀸𑀣𑀫𑀸𑀳;

𑀲𑀢𑁆𑀣𑀸 𑀲𑀓𑁆𑀓𑁂𑀦 𑀓𑀢𑁄𑀓𑀸𑀲𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀻𑀡𑀺 𑀭𑀢𑀦𑀸𑀦𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀯𑁂𑀮𑀸𑀬 𑀯𑀸 𑀅𑀯𑁂𑀮𑀸𑀬 𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀜𑁆𑀘 𑀦𑀸𑀫 𑀅𑀢𑀺𑀤𑀽𑀭𑁂, 𑀇𑀤𑀁 𑀧𑀦 𑀅𑀫𑁆𑀳𑀸𑀓𑀁 𑀯𑁂𑀴𑀼𑀯𑀦𑀼𑀬𑁆𑀬𑀸𑀦𑀁 𑀦𑀸𑀢𑀺𑀤𑀽𑀭𑀁 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀩𑀼𑀤𑁆𑀥𑀸𑀭𑀳𑀁 𑀲𑁂𑀦𑀸𑀲𑀦𑀁. 𑀇𑀤𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀽’’𑀢𑀺 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀧𑀼𑀧𑁆𑀨𑀕𑀦𑁆𑀥𑀯𑀸𑀲𑀺𑀢𑀁 𑀫𑀡𑀺𑀯𑀡𑁆𑀡𑀁 𑀉𑀤𑀓𑀫𑀸𑀤𑀸𑀬 𑀯𑁂𑀴𑀼𑀯𑀦𑀼𑀬𑁆𑀬𑀸𑀦𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀤𑀲𑀩𑀮𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀲𑀺. 𑀢𑀲𑁆𑀫𑀺𑀁 𑀆𑀭𑀸𑀫𑁂 𑀧𑀝𑀺𑀕𑁆𑀕𑀳𑀺𑀢𑁂𑀬𑁂𑀯 ‘‘𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀻’’𑀢𑀺 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺. 𑀚𑀫𑁆𑀩𑀼𑀤𑀻𑀧𑀢𑀮𑀲𑁆𑀫𑀺𑀜𑁆𑀳𑀺 𑀞𑀧𑁂𑀢𑁆𑀯𑀸 𑀯𑁂𑀴𑀼𑀯𑀦𑀁 𑀅𑀜𑁆𑀜𑀁 𑀫𑀳𑀸𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸 𑀕𑀳𑀺𑀢𑀲𑁂𑀦𑀸𑀲𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂𑀧𑀺 𑀞𑀧𑁂𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀅𑀜𑁆𑀜𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸 𑀕𑀳𑀺𑀢𑀲𑁂𑀦𑀸𑀲𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑀢𑁆𑀣𑀸 𑀯𑁂𑀴𑀼𑀯𑀦𑀸𑀭𑀸𑀫𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀯𑁂𑀴𑀼𑀯𑀦𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑀸𑀢𑀺 𑀤𑁆𑀯𑁂 𑀧𑀭𑀺𑀩𑁆𑀩𑀸𑀚𑀓𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺 𑀅𑀫𑀢𑀁 𑀧𑀭𑀺𑀬𑁂𑀲𑀫𑀸𑀦𑀸. 𑀢𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺𑀆𑀤𑀺𑀕𑀸𑀣𑀁 (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭 𑁧.𑁧.𑁨𑁮𑁬) 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀲𑀳𑀸𑀬𑀓𑀲𑁆𑀲 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲𑀧𑀺 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺. 𑀲𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑁂 𑀉𑀪𑁄𑀧𑀺 𑀲𑀜𑁆𑀘𑀬𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀼 𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀢𑁆𑀢𑀸𑀳𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀟𑁆𑀠𑀫𑀸𑀲𑁂𑀦. 𑀉𑀪𑁄𑀧𑀺 𑀢𑁂 𑀲𑀢𑁆𑀣𑀸 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀲𑀦𑁆𑀦𑀺𑀧𑀸𑀢𑀁 𑀅𑀓𑀸𑀲𑀺.

𑀢𑀣𑀸𑀕𑀢𑁂 𑀧𑀦 𑀢𑀲𑁆𑀫𑀺𑀜𑁆𑀜𑁂𑀯 𑀯𑁂𑀴𑀼𑀯𑀦𑀼𑀬𑁆𑀬𑀸𑀦𑁂 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑁄 𑀓𑀺𑀭 𑀫𑁂 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀪𑀡𑁂, 𑀢𑁆𑀯𑀁 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀫𑀫 𑀯𑀘𑀦𑁂𑀦 ‘𑀧𑀺𑀢𑀸 𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀤𑀝𑁆𑀞𑀼𑀓𑀸𑀫𑁄’𑀢𑀺 𑀯𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀏𑀳𑀻’’𑀢𑀺 𑀆𑀳. 𑀲𑁄 ‘‘𑀏𑀯𑀁, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀔𑀺𑀧𑁆𑀧𑀫𑁂𑀯 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬𑀁 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀲𑁄 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦’’𑀦𑁆𑀢𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑀣𑀸𑀞𑀺𑀢𑁄𑀯 𑀲𑀤𑁆𑀥𑀺𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀕𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀩𑁆𑀩𑁂 𑀢𑀗𑁆𑀔𑀡𑀜𑁆𑀜𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀭𑀺𑀬𑀸 𑀦𑀸𑀫 𑀫𑀚𑁆𑀛𑀢𑁆𑀢𑀸𑀯 𑀳𑁄𑀦𑁆𑀢𑀻𑀢𑀺, 𑀲𑁄 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦𑀁 𑀤𑀲𑀩𑀮𑀲𑁆𑀲 𑀦 𑀓𑀣𑁂𑀲𑀺. 𑀭𑀸𑀚𑀸 𑁋 ‘‘𑀦𑁂𑀯 𑀕𑀢𑁄 𑀆𑀕𑀘𑁆𑀙𑀢𑀺, 𑀦 𑀲𑀸𑀲𑀦𑀁 𑀲𑀼𑀬𑁆𑀬𑀢𑀻’’𑀢𑀺 ‘‘𑀏𑀳𑀺 𑀪𑀡𑁂, 𑀢𑁆𑀯𑀁 𑀕𑀘𑁆𑀙𑀸’’𑀢𑀺 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀜𑁆𑀜𑀁 𑀅𑀫𑀘𑁆𑀘𑀁 𑀧𑁂𑀲𑁂𑀲𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀼𑀦 𑀭𑀸𑀚𑀸 ‘‘𑀏𑀳𑀺 𑀪𑀡𑁂, 𑀢𑁆𑀯𑀁 𑀕𑀘𑁆𑀙, 𑀢𑁆𑀯𑀁 𑀕𑀘𑁆𑀙𑀸’’𑀢𑀺 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀧𑀭𑁂𑀧𑀺 𑀲𑀢𑁆𑀢 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀢𑁂 𑀲𑀩𑁆𑀩𑁂 𑀦𑀯 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀦𑀯 𑀅𑀫𑀘𑁆𑀘𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀸 𑀢𑀢𑁆𑀣𑁂𑀯 𑀯𑀺𑀳𑀭𑀺𑀁𑀲𑀼.

𑀭𑀸𑀚𑀸 𑀲𑀸𑀲𑀦𑀫𑀢𑁆𑀢𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀁 𑀅𑀮𑀪𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁆𑀢𑀓𑀸𑀧𑀺 𑀚𑀦𑀸 𑀫𑀬𑀺 𑀲𑀺𑀦𑁂𑀳𑀸𑀪𑀸𑀯𑁂𑀦 𑀲𑀸𑀲𑀦𑀫𑀢𑁆𑀢𑀫𑁆𑀧𑀺 𑀦 𑀧𑀘𑁆𑀘𑀸𑀳𑀭𑀺𑀁𑀲𑀼, 𑀓𑁄 𑀦𑀼 𑀔𑁄 𑀫𑁂 𑀲𑀸𑀲𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀁 𑀭𑀸𑀚𑀩𑀮𑀁 𑀑𑀮𑁄𑀓𑁂𑀦𑁆𑀢𑁄 𑀓𑀸𑀴𑀼𑀤𑀸𑀬𑀺𑀁 𑀅𑀤𑁆𑀤𑀲. 𑀲𑁄 𑀓𑀺𑀭 𑀭𑀜𑁆𑀜𑁄 𑀲𑀩𑁆𑀩𑀢𑁆𑀣𑀲𑀸𑀥𑀓𑁄 𑀅𑀩𑁆𑀪𑀦𑁆𑀢𑀭𑀺𑀓𑁄 𑀅𑀢𑀺𑀯𑀺𑀬 𑀯𑀺𑀲𑁆𑀲𑀸𑀲𑀺𑀓𑁄 𑀅𑀫𑀘𑁆𑀘𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑁂 𑀚𑀸𑀢𑁄 𑀲𑀳𑀧𑀁𑀲𑀼𑀓𑀻𑀴𑀓𑁄 𑀲𑀳𑀸𑀬𑁄. 𑀅𑀣 𑀦𑀁 𑀭𑀸𑀚𑀸 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢 𑀓𑀸𑀴𑀼𑀤𑀸𑀬𑀺, 𑀅𑀳𑀁 𑀫𑀫 𑀧𑀼𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀦𑀯𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀦 𑀦𑀯 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺𑀁, 𑀢𑁂𑀲𑀼 𑀏𑀓𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀸𑀲𑀦𑀫𑀢𑁆𑀢𑀁 𑀆𑀭𑁄𑀘𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀤𑀼𑀚𑁆𑀚𑀸𑀦𑁄 𑀔𑁄 𑀧𑀦 𑀫𑁂 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀚𑀻𑀯𑀫𑀸𑀦𑁄𑀬𑁂𑀯𑀸𑀳𑀁 𑀧𑀼𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄. 𑀲𑀓𑁆𑀔𑀺𑀲𑁆𑀲𑀲𑀺 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯, 𑀲𑀘𑁂 𑀧𑀩𑁆𑀩𑀚𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀧𑀩𑁆𑀩𑀚𑀺𑀢𑁄 𑀯𑀸 𑀫𑀬𑁆𑀳𑀁 𑀧𑀼𑀢𑁆𑀢𑀁 𑀤𑀲𑁆𑀲𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀆𑀤𑀸𑀬 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀳𑀸𑀲𑀺.

𑀲𑀢𑁆𑀣𑀸 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀅𑀦𑁆𑀢𑁄𑀯𑀲𑁆𑀲𑀁 𑀇𑀲𑀺𑀧𑀢𑀦𑁂 𑀯𑀲𑀺𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀬𑁄 𑀫𑀸𑀲𑁂 𑀯𑀲𑀦𑁆𑀢𑁄 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 𑀯𑀺𑀦𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀨𑀼𑀲𑁆𑀲𑀫𑀸𑀲𑀧𑀼𑀡𑁆𑀡𑀫𑀸𑀬𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀤𑁆𑀯𑁂 𑀫𑀸𑀲𑁂 𑀯𑀲𑀺. 𑀏𑀢𑁆𑀢𑀸𑀯𑀢𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀧𑀜𑁆𑀘 𑀫𑀸𑀲𑀸 𑀚𑀸𑀢𑀸, 𑀲𑀓𑀮𑁄 𑀳𑁂𑀫𑀦𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀆𑀕𑀢𑀤𑀺𑀯𑀲𑀢𑁄 𑀲𑀢𑁆𑀢𑀝𑁆𑀞𑀤𑀺𑀯𑀲𑀸 𑀯𑀻𑀢𑀺𑀯𑀢𑁆𑀢𑀸. 𑀣𑁂𑀭𑁄 𑀨𑀕𑁆𑀕𑀼𑀡𑀫𑀸𑀲𑀧𑀼𑀡𑁆𑀡𑀫𑀸𑀬𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀓𑁆𑀓𑀦𑁆𑀢𑁄 𑀤𑀸𑀦𑀺 𑀳𑁂𑀫𑀦𑁆𑀢𑁄, 𑀯𑀲𑀦𑁆𑀢𑀲𑀫𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀫𑀦𑀼𑀲𑁆𑀲𑁂𑀳𑀺 𑀲𑀲𑁆𑀲𑀸𑀤𑀻𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀳𑀺 𑀫𑀕𑁆𑀕𑀸 𑀤𑀺𑀦𑁆𑀦𑀸, 𑀳𑀭𑀺𑀢𑀢𑀺𑀡𑀲𑀜𑁆𑀙𑀦𑁆𑀦𑀸 𑀧𑀣𑀯𑀻, 𑀲𑀼𑀧𑀼𑀧𑁆𑀨𑀺𑀢𑀸 𑀯𑀦𑀲𑀡𑁆𑀟𑀸, 𑀧𑀝𑀺𑀧𑀚𑁆𑀚𑀦𑀓𑁆𑀔𑀫𑀸 𑀫𑀕𑁆𑀕𑀸, 𑀓𑀸𑀮𑁄 𑀤𑀲𑀩𑀮𑀲𑁆𑀲 𑀜𑀸𑀢𑀺𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺. 𑀅𑀣 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋

‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬;

𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀪𑀸𑀕𑀻 𑀭𑀲𑀸𑀦𑀁…𑀧𑁂…. (𑀣𑁂𑀭𑀕𑀸. 𑁫𑁨𑁭);

‘‘𑀦𑀸𑀢𑀺𑀲𑀻𑀢𑀁 𑀦𑀸𑀢𑀺𑀉𑀡𑁆𑀳𑀁, 𑀦𑀸𑀢𑀺𑀤𑀼𑀩𑁆𑀪𑀺𑀓𑁆𑀔𑀙𑀸𑀢𑀓𑀁;

𑀲𑀤𑁆𑀤𑀮𑀸 𑀳𑀭𑀺𑀢𑀸 𑀪𑀽𑀫𑀺, 𑀏𑀲 𑀓𑀸𑀮𑁄 𑀫𑀳𑀸𑀫𑀼𑀦𑀻’’𑀢𑀺. 𑁋

𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 𑀤𑀲𑀩𑀮𑀲𑁆𑀲 𑀓𑀼𑀮𑀦𑀕𑀭𑀕𑀫𑀦𑀯𑀡𑁆𑀡𑀁 𑀯𑀡𑁆𑀡𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑁋 ‘‘𑀓𑀺𑀁 𑀦𑀼 𑀔𑁄, 𑀉𑀤𑀸𑀬𑀺, 𑀫𑀥𑀼𑀭𑀲𑁆𑀲𑀭𑁂𑀦 𑀕𑀫𑀦𑀯𑀡𑁆𑀡𑀁 𑀯𑀡𑁆𑀡𑁂𑀲𑀻’’𑀢𑀺 𑀆𑀳. ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂 𑀧𑀲𑁆𑀲𑀺𑀢𑀼𑀓𑀸𑀫𑁄, 𑀓𑀭𑁄𑀣 𑀜𑀸𑀢𑀓𑀸𑀦𑀁 𑀲𑀗𑁆𑀕𑀳’’𑀦𑁆𑀢𑀺. ‘‘𑀲𑀸𑀥𑀼, 𑀉𑀤𑀸𑀬𑀺, 𑀓𑀭𑀺𑀲𑁆𑀲𑀸𑀫𑀺 𑀜𑀸𑀢𑀓𑀸𑀦𑀁 𑀲𑀗𑁆𑀕𑀳𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀳𑀺, 𑀕𑀫𑀺𑀬𑀯𑀢𑁆𑀢𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀢𑁂𑀲𑀁 𑀆𑀭𑁄𑀘𑁂𑀲𑀺.

𑀪𑀕𑀯𑀸 𑀅𑀗𑁆𑀕𑀫𑀕𑀥𑀯𑀸𑀲𑀻𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀤𑀲𑀳𑀺 𑀲𑀳𑀲𑁆𑀲𑁂𑀳𑀺, 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻𑀦𑀁 𑀤𑀲𑀳𑀺 𑀲𑀳𑀲𑁆𑀲𑁂𑀳𑀻𑀢𑀺 𑀲𑀩𑁆𑀩𑁂𑀳𑁂𑀯 𑀯𑀻𑀲𑀢𑀺𑀲𑀳𑀲𑁆𑀲𑁂𑀳𑀺 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀁 𑀕𑀘𑁆𑀙𑀢𑀺. ‘‘𑀭𑀸𑀚𑀕𑀳𑀢𑁄 𑀲𑀝𑁆𑀞𑀺𑀬𑁄𑀚𑀦𑀁 𑀓𑀧𑀺𑀮𑀯𑀢𑁆𑀣𑀼𑀁 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀣𑁂𑀭𑁄𑀧𑀺 ‘‘𑀪𑀕𑀯𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀭𑀸𑀚𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀲𑁆𑀲 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀉𑀝𑁆𑀞𑀸𑀬 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. ‘‘𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚, 𑀢𑀸𑀢𑀸’’𑀢𑀺. ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀳𑀁 𑀧𑀦, 𑀢𑀸𑀢, 𑀲𑀢𑁆𑀣𑀸’’𑀢𑀺? ‘‘𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀘𑀸𑀭𑀺𑀓𑀁 𑀦𑀺𑀓𑁆𑀔𑀦𑁆𑀢𑁄, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀇𑀫𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀯 𑀫𑀫 𑀧𑀼𑀢𑁆𑀢𑁄 𑀇𑀫𑀁 𑀦𑀕𑀭𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀯𑀲𑁆𑀲 𑀇𑀢𑁄𑀯 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀳𑀭𑀣𑀸’’𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺. 𑀭𑀸𑀚𑀸 𑀣𑁂𑀭𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀧𑀢𑁆𑀢𑀁 𑀕𑀦𑁆𑀥𑀘𑀼𑀡𑁆𑀡𑁂𑀦 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀉𑀢𑁆𑀢𑀫𑀲𑁆𑀲 𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 ‘‘𑀢𑀣𑀸𑀕𑀢𑀲𑁆𑀲 𑀤𑁂𑀣𑀸’’𑀢𑀺 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀣𑁂𑀭𑁄 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀧𑀢𑁆𑀢𑀁 𑀆𑀓𑀸𑀲𑁂 𑀔𑀺𑀧𑀺𑀢𑁆𑀯𑀸 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑀢𑁆𑀣𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀣𑁂𑀭𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺. 𑀲𑀢𑁆𑀣𑀸𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀜𑁆𑀜𑁄𑀬𑁂𑀯 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀣𑁂𑀭𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀤𑀺𑀯𑀲𑁂 𑀤𑀺𑀯𑀲𑁂 ‘‘𑀅𑀚𑁆𑀚 𑀪𑀕𑀯𑀸 𑀏𑀢𑁆𑀢𑀓𑀁 𑀆𑀕𑀢𑁄, 𑀅𑀚𑁆𑀚 𑀏𑀢𑁆𑀢𑀓’’𑀦𑁆𑀢𑀺 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀘 𑀓𑀣𑀸𑀬 𑀲𑀓𑀮𑀁 𑀭𑀸𑀚𑀓𑀼𑀮𑀁 𑀲𑀢𑁆𑀣𑀼𑀤𑀲𑁆𑀲𑀦𑀁 𑀯𑀺𑀦𑀸𑀬𑁂𑀯 𑀲𑀢𑁆𑀣𑀭𑀺 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀁 𑀅𑀓𑀸𑀲𑀺. 𑀢𑁂𑀦𑁂𑀯 𑀦𑀁 𑀪𑀕𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀬𑀤𑀺𑀤𑀁 𑀓𑀸𑀴𑀼𑀤𑀸𑀬𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁫) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀲𑀸𑀓𑀺𑀬𑀸𑀧𑀺 𑀔𑁄 𑀅𑀦𑀼𑀧𑁆𑀧𑀢𑁆𑀢𑁂 𑀪𑀕𑀯𑀢𑀺 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀯𑀲𑀦𑀝𑁆𑀞𑀸𑀦𑀁 𑀯𑀻𑀫𑀁𑀲𑀫𑀸𑀦𑀸 ‘‘𑀦𑀺𑀕𑁆𑀭𑁄𑀥𑀲𑀓𑁆𑀓𑀲𑁆𑀲 𑀆𑀭𑀸𑀫𑁄 𑀭𑀫𑀡𑀻𑀬𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣 𑀲𑀩𑁆𑀩𑀁 𑀧𑀝𑀺𑀚𑀕𑁆𑀕𑀦𑀯𑀺𑀥𑀺𑀁 𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀳𑀢𑁆𑀣𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂 𑀤𑀳𑀭𑀤𑀳𑀭𑁂 𑀦𑀸𑀕𑀭𑀤𑀸𑀭𑀓𑁂 𑀘 𑀦𑀸𑀕𑀭𑀤𑀸𑀭𑀺𑀓𑀸𑀬𑁄 𑀘 𑀧𑀞𑀫𑀁 𑀧𑀳𑀺𑀡𑀺𑀁𑀲𑀼, 𑀢𑀢𑁄 𑀭𑀸𑀚𑀓𑀼𑀫𑀸𑀭𑁂 𑀘 𑀭𑀸𑀚𑀓𑀼𑀫𑀸𑀭𑀺𑀓𑀸𑀬𑁄 𑀘, 𑀢𑁂𑀲𑀁 𑀅𑀦𑀦𑁆𑀢𑀭𑀸 𑀲𑀸𑀫𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑀪𑀕𑀯𑀦𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁆𑀣 𑀪𑀕𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀸𑀓𑀺𑀬𑀸 𑀦𑀸𑀫 𑀫𑀸𑀦𑀚𑀸𑀢𑀺𑀓𑀸 𑀫𑀸𑀦𑀢𑁆𑀣𑀤𑁆𑀥𑀸, 𑀢𑁂 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀅𑀫𑁆𑀳𑁂𑀳𑀺 𑀤𑀳𑀭𑀢𑀭𑁄, 𑀅𑀫𑁆𑀳𑀸𑀓𑀁 𑀓𑀦𑀺𑀝𑁆𑀞𑁄, 𑀪𑀸𑀕𑀺𑀦𑁂𑀬𑁆𑀬𑁄, 𑀧𑀼𑀢𑁆𑀢𑁄, 𑀦𑀢𑁆𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀳𑀭𑀤𑀳𑀭𑁂 𑀭𑀸𑀚𑀓𑀼𑀫𑀸𑀭𑁂 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂 𑀯𑀦𑁆𑀤𑀣, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀧𑀺𑀝𑁆𑀞𑀺𑀢𑁄 𑀦𑀺𑀲𑀻𑀤𑀺𑀲𑁆𑀲𑀸𑀫𑀸’’𑀢𑀺.

𑀢𑁂𑀲𑀼 𑀏𑀯𑀁 𑀅𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀪𑀕𑀯𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀦 𑀫𑀁 𑀜𑀸𑀢𑀬𑁄 𑀯𑀦𑁆𑀤𑀦𑁆𑀢𑀺, 𑀳𑀦𑁆𑀤 𑀤𑀸𑀦𑀺 𑀢𑁂 𑀯𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀻𑀲𑁂 𑀧𑀸𑀤𑀧𑀁𑀲𑀼𑀁 𑀑𑀓𑀺𑀭𑀫𑀸𑀦𑁄 𑀯𑀺𑀬 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀚𑀸𑀢𑀤𑀺𑀯𑀲𑁂 𑀓𑀸𑀮𑀤𑁂𑀯𑀮𑀲𑁆𑀲 𑀯𑀦𑁆𑀤𑀦𑀢𑁆𑀣𑀁 𑀉𑀧𑀦𑀻𑀢𑀸𑀦𑀁 𑀯𑁄𑀧𑀸𑀤𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀺𑀢𑁂 𑀤𑀺𑀲𑁆𑀯𑀸𑀧𑀺 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀯𑀦𑁆𑀤𑀺𑀁, 𑀅𑀬𑀁 𑀫𑁂 𑀧𑀞𑀫𑀯𑀦𑁆𑀤𑀦𑀸. 𑀯𑀧𑁆𑀧𑀫𑀗𑁆𑀕𑀮𑀤𑀺𑀯𑀲𑁂 𑀘 𑀚𑀫𑁆𑀩𑀼𑀘𑁆𑀙𑀸𑀬𑀸𑀬 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀸𑀦𑀁 𑀯𑁄𑀚𑀫𑁆𑀩𑀼𑀘𑁆𑀙𑀸𑀬𑀸𑀬 𑀅𑀧𑀭𑀺𑀯𑀢𑁆𑀢𑀦𑀁 𑀤𑀺𑀲𑁆𑀯𑀸𑀧𑀺 𑀧𑀸𑀤𑁂 𑀯𑀦𑁆𑀤𑀺𑀁, 𑀅𑀬𑀁 𑀫𑁂 𑀤𑀼𑀢𑀺𑀬𑀯𑀦𑁆𑀤𑀦𑀸. 𑀇𑀤𑀸𑀦𑀺 𑀧𑀦 𑀇𑀫𑀁 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸𑀧𑀺 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀯𑀦𑁆𑀤𑀸𑀫𑀺, 𑀅𑀬𑀁 𑀫𑁂 𑀢𑀢𑀺𑀬𑀯𑀦𑁆𑀤𑀦𑀸’’𑀢𑀺. 𑀭𑀜𑁆𑀜𑀸 𑀧𑀦 𑀯𑀦𑁆𑀤𑀺𑀢𑁂 𑀪𑀕𑀯𑀦𑁆𑀢𑀁 𑀅𑀯𑀦𑁆𑀤𑀺𑀢𑁆𑀯𑀸 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀏𑀓𑀲𑀸𑀓𑀺𑀬𑁄𑀧𑀺 𑀦𑀸𑀳𑁄𑀲𑀺, 𑀲𑀩𑁆𑀩𑁂 𑀯𑀦𑁆𑀤𑀺𑀁𑀲𑀼𑀬𑁂𑀯.

𑀇𑀢𑀺 𑀪𑀕𑀯𑀸 𑀜𑀸𑀢𑀬𑁄 𑀯𑀦𑁆𑀤𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀺𑀦𑁆𑀦𑁂 𑀪𑀕𑀯𑀢𑀺 𑀲𑀺𑀔𑀸𑀧𑀢𑁆𑀢𑁄 𑀜𑀸𑀢𑀺𑀲𑀫𑀸𑀕𑀫𑁄 𑀅𑀳𑁄𑀲𑀺, 𑀲𑀩𑁆𑀩𑁂 𑀏𑀓𑀕𑁆𑀕𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀫𑀳𑀸𑀫𑁂𑀖𑁄 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀢𑀫𑁆𑀩𑀯𑀡𑁆𑀡𑀁 𑀉𑀤𑀓𑀁 𑀳𑁂𑀝𑁆𑀞𑀸 𑀯𑀺𑀭𑀯𑀦𑁆𑀢𑀁 𑀕𑀘𑁆𑀙𑀢𑀺, 𑀢𑁂𑀫𑀺𑀢𑀼𑀓𑀸𑀫𑁄𑀯 𑀢𑁂𑀫𑁂𑀢𑀺, 𑀅𑀢𑁂𑀫𑀺𑀢𑀼𑀓𑀸𑀫𑀲𑁆𑀲 𑀲𑀭𑀻𑀭𑁂 𑀏𑀓𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀦 𑀧𑀢𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀚𑀸𑀢𑀸 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁, 𑀅𑀳𑁄 𑀅𑀩𑁆𑀪𑀼𑀢’’𑀦𑁆𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 ‘‘𑀦 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀢𑀺, 𑀅𑀢𑀻𑀢𑁂𑀧𑀺 𑀯𑀲𑁆𑀲𑀻’’𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀲𑀺. 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀉𑀝𑁆𑀞𑀸𑀬 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀏𑀓𑁄𑀧𑀺 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀕𑀢𑁄 𑀦𑀸𑀫 𑀦𑀢𑁆𑀣𑀺.

𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀓𑀧𑀺𑀮𑀯𑀢𑁆𑀣𑀼𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀁 𑀦 𑀓𑁄𑀘𑀺 𑀕𑀦𑁆𑀢𑁆𑀯𑀸 𑀦𑀺𑀫𑀦𑁆𑀢𑁂𑀲𑀺, 𑀦 𑀧𑀢𑁆𑀢𑀁 𑀯𑀸 𑀅𑀕𑁆𑀕𑀳𑁂𑀲𑀺. 𑀪𑀕𑀯𑀸 𑀇𑀦𑁆𑀤𑀔𑀻𑀮𑁂 𑀞𑀺𑀢𑁄𑀯 𑀆𑀯𑀚𑁆𑀚𑁂𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀧𑀼𑀩𑁆𑀩𑀩𑀼𑀤𑁆𑀥𑀸 𑀓𑀼𑀮𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀁𑀲𑀼, 𑀓𑀺𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀇𑀲𑁆𑀲𑀭𑀚𑀦𑀸𑀦𑀁 𑀖𑀭𑀸𑀦𑀺 𑀅𑀕𑀫𑀁𑀲𑀼, 𑀉𑀤𑀸𑀳𑀼 𑀲𑀧𑀤𑀸𑀦𑀘𑀸𑀭𑀺𑀓𑀁 𑀘𑀭𑀺𑀁𑀲𑀽’’𑀢𑀺? 𑀢𑀢𑁄 𑀏𑀓𑀩𑀼𑀤𑁆𑀥𑀲𑁆𑀲𑀧𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀫𑀦𑀁 𑀅𑀤𑀺𑀲𑁆𑀯𑀸 ‘‘𑀫𑀬𑀸𑀧𑀺 𑀤𑀸𑀦𑀺 𑀅𑀬𑀫𑁂𑀯 𑀢𑁂𑀲𑀁 𑀯𑀁𑀲𑁄 𑀧𑀕𑁆𑀕𑀳𑁂𑀢𑀩𑁆𑀩𑁄, 𑀆𑀬𑀢𑀺𑀜𑁆𑀘 𑀫𑀫 𑀲𑀸𑀯𑀓𑀸 𑀫𑀫𑀜𑁆𑀜𑁂𑀯 𑀅𑀦𑀼𑀲𑀺𑀓𑁆𑀔𑀦𑁆𑀢𑀸 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀓𑁄𑀝𑀺𑀬𑀁 𑀦𑀺𑀯𑀺𑀝𑁆𑀞𑀕𑁂𑀳𑀢𑁄 𑀧𑀝𑁆𑀞𑀸𑀬 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺. ‘‘𑀅𑀬𑁆𑀬𑁄 𑀓𑀺𑀭 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺 𑀤𑁆𑀯𑀺𑀪𑀽𑀫𑀺𑀓𑀢𑀺𑀪𑀽𑀫𑀺𑀓𑀸𑀤𑀻𑀲𑀼 𑀧𑀸𑀲𑀸𑀤𑁂𑀲𑀼 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀫𑀳𑀸𑀚𑀦𑁄 𑀤𑀲𑁆𑀲𑀦𑀩𑁆𑀬𑀸𑀯𑀝𑁄 𑀅𑀳𑁄𑀲𑀺.

𑀭𑀸𑀳𑀼𑀮𑀫𑀸𑀢𑀸𑀧𑀺 𑀤𑁂𑀯𑀻 𑁋 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀓𑀺𑀭 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀤𑀻𑀳𑀺 𑀯𑀺𑀘𑀭𑀺𑀢𑁆𑀯𑀸 𑀇𑀤𑀸𑀦𑀺 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀸𑀲𑀦𑁄 𑀓𑀧𑀸𑀮𑀳𑀢𑁆𑀣𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀲𑁄𑀪𑀢𑀺 𑀦𑀼 𑀔𑁄’’𑀢𑀺 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀪𑀕𑀯𑀦𑁆𑀢𑀁 𑀦𑀸𑀦𑀸𑀯𑀺𑀭𑀸𑀕𑀲𑀫𑀼𑀚𑁆𑀚𑀮𑀸𑀬 𑀲𑀭𑀻𑀭𑀧𑁆𑀧𑀪𑀸𑀬 𑀦𑀕𑀭𑀯𑀻𑀣𑀺𑀬𑁄 𑀑𑀪𑀸𑀲𑁂𑀢𑁆𑀯𑀸 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀲𑀫𑀼𑀧𑀩𑁆𑀬𑀽𑀴𑁆𑀳𑀸𑀬 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀪𑀸𑀲𑀺𑀢𑀸𑀬 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀸𑀬 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀉𑀡𑁆𑀳𑀻𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀸𑀤𑀢𑀮𑀸 𑁋

‘‘𑀲𑀺𑀦𑀺𑀤𑁆𑀥𑀦𑀻𑀮𑀫𑀼𑀤𑀼𑀓𑀼𑀜𑁆𑀘𑀺𑀢𑀓𑁂𑀲𑁄, 𑀲𑀽𑀭𑀺𑀬𑀦𑀺𑀫𑁆𑀫𑀮𑀢𑀮𑀸𑀪𑀺𑀦𑀮𑀸𑀝𑁄;

𑀬𑀼𑀢𑁆𑀢𑀢𑀼𑀗𑁆𑀕𑀫𑀼𑀤𑀼𑀓𑀸𑀬𑀢𑀦𑀸𑀲𑁄, 𑀭𑀁𑀲𑀺𑀚𑀸𑀮𑀯𑀺𑀓𑀲𑀺𑀢𑁄 𑀦𑀭𑀲𑀻𑀳𑁄’’𑀢𑀺. 𑁋

𑀏𑀯𑀫𑀸𑀤𑀺𑀓𑀸𑀳𑀺 𑀤𑀲𑀳𑀺 𑀦𑀭𑀲𑀻𑀳𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀳𑀢𑁆𑀣𑁂𑀦 𑀲𑀸𑀝𑀓𑀁 𑀲𑀡𑁆𑀟𑀧𑁂𑀦𑁆𑀢𑁄 𑀢𑀼𑀭𑀺𑀢𑀢𑀼𑀭𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀢𑁆𑀯𑀸 𑀆𑀳 𑁋 ‘‘𑀓𑀺𑀦𑁆𑀦𑀼 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑁂 𑀮𑀚𑁆𑀚𑀸𑀧𑁂𑀣, 𑀓𑀺𑀫𑀢𑁆𑀣𑀁 𑀧𑀺𑀡𑁆𑀟𑀸𑀬 𑀘𑀭𑀣, 𑀓𑀺𑀁 ‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦 𑀲𑀓𑁆𑀓𑀸 𑀪𑀢𑁆𑀢𑀁 𑀮𑀤𑁆𑀥𑀼’𑀦𑁆𑀢𑀺 𑀲𑀜𑁆𑀜𑀁 𑀓𑀭𑀺𑀢𑁆𑀣𑀸’’𑀢𑀺? ‘‘𑀯𑀁𑀲𑀘𑀸𑀭𑀺𑀢𑁆𑀢𑀫𑁂𑀢𑀁, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓’’𑀦𑁆𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀯𑀁𑀲𑁄 𑀦𑀸𑀫 𑀫𑀳𑀸𑀲𑀫𑁆𑀫𑀢𑀔𑀢𑁆𑀢𑀺𑀬𑀯𑀁𑀲𑁄, 𑀏𑀢𑁆𑀣 𑀘 𑀏𑀓𑀔𑀢𑁆𑀢𑀺𑀬𑁄𑀧𑀺 𑀪𑀺𑀓𑁆𑀔𑀸𑀘𑀭𑀓𑁄 𑀦𑀸𑀫 𑀦𑀢𑁆𑀣𑀻’’𑀢𑀺. ‘‘𑀅𑀬𑀁, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑀯𑀁𑀲𑁄 𑀦𑀸𑀫 𑀢𑀯 𑀯𑀁𑀲𑁄. 𑀅𑀫𑁆𑀳𑀸𑀓𑀁 𑀧𑀦 ‘𑀤𑀻𑀧𑀗𑁆𑀓𑀭𑁄 𑀓𑁄𑀡𑁆𑀟𑀜𑁆𑀜𑁄…𑀧𑁂… 𑀓𑀲𑁆𑀲𑀧𑁄’𑀢𑀺 𑀅𑀬𑀁 𑀩𑀼𑀤𑁆𑀥𑀯𑀁𑀲𑁄 𑀦𑀸𑀫. 𑀏𑀢𑁂 𑀘 𑀅𑀜𑁆𑀜𑁂 𑀘 𑀅𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑀸 𑀩𑀼𑀤𑁆𑀥𑀸 𑀪𑀺𑀓𑁆𑀔𑀸𑀘𑀸𑀭𑁂𑀦𑁂𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀼’’𑀦𑁆𑀢𑀺 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 𑁋

‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀥𑀫𑁆𑀫𑀁 𑀲𑀼𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘𑀸’’𑀢𑀺. (𑀥. 𑀧. 𑁧𑁬𑁮) 𑁋

𑀇𑀫𑀁 𑀕𑀸𑀣𑀫𑀸𑀳. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

‘‘𑀥𑀫𑁆𑀫𑀜𑁆𑀘𑀭𑁂 𑀲𑀼𑀘𑀭𑀺𑀢𑀁, 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘𑀸’’𑀢𑀺. (𑀥. 𑀧. 𑁧𑁬𑁯) 𑁋

𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀫𑀭𑀡𑀲𑀫𑀬𑁂 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑁄𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀜𑁆𑀜𑀯𑀸𑀲𑁂𑀦 𑀧𑀥𑀸𑀦𑀸𑀦𑀼𑀬𑁄𑀕𑀓𑀺𑀘𑁆𑀘𑀁 𑀭𑀜𑁆𑀜𑁄 𑀦𑀸𑀳𑁄𑀲𑀺. 𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸𑀬𑁂𑀯 𑀧𑀦 𑀪𑀕𑀯𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀧𑀭𑀺𑀲𑀁 𑀪𑀕𑀯𑀦𑁆𑀢𑀁 𑀫𑀳𑀸𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺. 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀁 𑀇𑀢𑁆𑀣𑀸𑀕𑀸𑀭𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺 𑀞𑀧𑁂𑀢𑁆𑀯𑀸 𑀭𑀸𑀳𑀼𑀮𑀫𑀸𑀢𑀭𑀁. 𑀲𑀸 𑀧𑀦 ‘‘𑀕𑀘𑁆𑀙, 𑀅𑀬𑁆𑀬𑀧𑀼𑀢𑁆𑀢𑀁 𑀯𑀦𑁆𑀤𑀸𑀳𑀻’’𑀢𑀺 𑀧𑀭𑀺𑀚𑀦𑁂𑀦 𑀯𑀼𑀘𑁆𑀘𑀫𑀸𑀦𑀸𑀧𑀺 ‘‘𑀲𑀘𑁂 𑀫𑀬𑁆𑀳𑀁 𑀕𑀼𑀡𑁄 𑀅𑀢𑁆𑀣𑀺, 𑀲𑀬𑀫𑁂𑀯 𑀫𑀫 𑀲𑀦𑁆𑀢𑀺𑀓𑀁 𑀅𑀬𑁆𑀬𑀧𑀼𑀢𑁆𑀢𑁄 𑀆𑀕𑀫𑀺𑀲𑁆𑀲𑀢𑀺, 𑀆𑀕𑀢𑀫𑁂𑀯 𑀦𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦 𑀅𑀕𑀫𑀸𑀲𑀺.

𑀪𑀕𑀯𑀸 𑀭𑀸𑀚𑀸𑀦𑀁 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀥𑀻𑀢𑀸𑀬 𑀲𑀺𑀭𑀺𑀕𑀩𑁆𑀪𑀁 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀥𑀻𑀢𑀸 𑀬𑀣𑀸𑀭𑀼𑀘𑀺 𑀯𑀦𑁆𑀤𑀫𑀸𑀦𑀸 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 𑀧𑀸𑀤𑀧𑀺𑀝𑁆𑀞𑀺𑀬𑀁 𑀲𑀻𑀲𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑀣𑀸𑀚𑁆𑀛𑀸𑀲𑀬𑀁 𑀯𑀦𑁆𑀤𑀺. 𑀭𑀸𑀚𑀸 𑀭𑀸𑀚𑀥𑀻𑀢𑀸𑀬 𑀪𑀕𑀯𑀢𑀺 𑀲𑀺𑀦𑁂𑀳𑀩𑀳𑀼𑀫𑀸𑀦𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀲𑀺 𑁋 ‘‘𑀪𑀦𑁆𑀢𑁂, 𑀫𑀫 𑀥𑀻𑀢𑀸 ‘𑀢𑀼𑀫𑁆𑀳𑁂𑀳𑀺 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑀺𑀢𑀸𑀦𑀻’𑀢𑀺 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑀸 𑀚𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀏𑀓𑀪𑀢𑁆𑀢𑀺𑀓𑀪𑀸𑀯𑀁 𑀲𑀼𑀢𑁆𑀯𑀸 𑀏𑀓𑀪𑀢𑁆𑀢𑀺𑀓𑀸𑀯 𑀚𑀸𑀢𑀸, 𑀢𑀼𑀫𑁆𑀳𑁂𑀳𑀺 𑀫𑀳𑀸𑀲𑀬𑀦𑀲𑁆𑀲 𑀙𑀟𑁆𑀟𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀧𑀝𑁆𑀝𑀺𑀓𑀸𑀫𑀜𑁆𑀘𑀓𑁂𑀬𑁂𑀯 𑀦𑀺𑀧𑀦𑁆𑀦𑀸, 𑀢𑀼𑀫𑁆𑀳𑀸𑀓𑀁 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀯𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 𑀯𑀺𑀭𑀢𑀫𑀸𑀮𑀸𑀕𑀦𑁆𑀥𑀸𑀯 𑀚𑀸𑀢𑀸, 𑀅𑀢𑁆𑀢𑀦𑁄 𑀜𑀸𑀢𑀓𑁂𑀳𑀺 ‘𑀫𑀬𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’𑀢𑀺 𑀲𑀸𑀲𑀦𑁂 𑀧𑁂𑀲𑀺𑀢𑁂𑀧𑀺 𑀢𑁂𑀲𑀼 𑀏𑀓𑀜𑀸𑀢𑀓𑀫𑁆𑀧𑀺 𑀦 𑀑𑀮𑁄𑀓𑁂𑀲𑀺, 𑀏𑀯𑀁 𑀕𑀼𑀡𑀲𑀫𑁆𑀧𑀦𑁆𑀦𑀸 𑀫𑁂, 𑀪𑀦𑁆𑀢𑁂, 𑀥𑀻𑀢𑀸’’𑀢𑀺. ‘‘𑀅𑀦𑀘𑁆𑀙𑀭𑀺𑀬𑀁, 𑀫𑀳𑀸𑀭𑀸𑀚, 𑀅𑀬𑀁 𑀇𑀤𑀸𑀦𑀺 𑀢𑀬𑀸 𑀭𑀓𑁆𑀔𑀺𑀬𑀫𑀸𑀦𑀸 𑀭𑀸𑀚𑀥𑀻𑀢𑀸 𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀅𑀢𑁆𑀢𑀸𑀦𑀁 𑀭𑀓𑁆𑀔𑁂𑀬𑁆𑀬, 𑀏𑀲𑀸 𑀧𑀼𑀩𑁆𑀩𑁂 𑀅𑀦𑀸𑀭𑀓𑁆𑀔𑀸 𑀧𑀩𑁆𑀩𑀢𑀧𑀸𑀤𑁂 𑀯𑀺𑀘𑀭𑀫𑀸𑀦𑀸 𑀅𑀧𑀭𑀺𑀧𑀓𑁆𑀓𑁂𑀧𑀺 𑀜𑀸𑀡𑁂 𑀅𑀢𑁆𑀢𑀸𑀦𑀁 𑀭𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀧𑀼𑀦𑀤𑀺𑀯𑀲𑁂 𑀧𑀦 𑀦𑀦𑁆𑀤𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀕𑁂𑀳𑀧𑁆𑀧𑀯𑁂𑀲𑀦𑀯𑀺𑀯𑀸𑀳𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁄 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀚𑀦𑀧𑀤𑀓𑀮𑁆𑀬𑀸𑀡𑀻 𑀓𑀼𑀫𑀸𑀭𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀲𑁄 𑀪𑀕𑀯𑀦𑁆𑀢𑀁 ‘‘𑀧𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀫𑀸𑀦𑁄 𑀯𑀺𑀳𑀸𑀭𑀁𑀬𑁂𑀯 𑀅𑀕𑀫𑀸𑀲𑀺. 𑀢𑀁 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀪𑀕𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀇𑀢𑀺 𑀪𑀕𑀯𑀸 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀳𑀼𑀮𑀫𑀸𑀢𑀸𑀧𑀺 𑀓𑀼𑀫𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀧𑀲𑁆𑀲, 𑀢𑀸𑀢, 𑀏𑀢𑀁 𑀯𑀻𑀲𑀢𑀺𑀲𑀳𑀲𑁆𑀲𑀲𑀫𑀡𑀧𑀭𑀺𑀯𑀼𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀩𑁆𑀭𑀳𑁆𑀫𑀭𑀽𑀧𑀯𑀡𑁆𑀡𑀁 𑀲𑀫𑀡𑀁, 𑀅𑀬𑀁 𑀢𑁂 𑀧𑀺𑀢𑀸, 𑀏𑀢𑀲𑁆𑀲 𑀫𑀳𑀦𑁆𑀢𑀸 𑀦𑀺𑀥𑀬𑁄 𑀅𑀳𑁂𑀲𑀼𑀁 𑀢𑁆𑀬𑀲𑁆𑀲 𑀦𑀺𑀓𑁆𑀔𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀧𑀲𑁆𑀲𑀸𑀫, 𑀕𑀘𑁆𑀙, 𑀦𑀁 𑀤𑀸𑀬𑀚𑁆𑀚𑀁 𑀬𑀸𑀘𑀸𑀳𑀺 𑁋 ‘𑀅𑀳𑀁, 𑀢𑀸𑀢, 𑀓𑀼𑀫𑀸𑀭𑁄 𑀅𑀪𑀺𑀲𑁂𑀓𑀁 𑀧𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀸𑀫𑀺, 𑀥𑀦𑁂𑀦 𑀫𑁂 𑀅𑀢𑁆𑀣𑁄, 𑀥𑀦𑀁 𑀫𑁂 𑀤𑁂𑀳𑀺. 𑀲𑀸𑀫𑀺𑀓𑁄 𑀳𑀺 𑀧𑀼𑀢𑁆𑀢𑁄 𑀧𑀺𑀢𑀼𑀲𑀦𑁆𑀢𑀓𑀲𑁆𑀲𑀸’’’𑀢𑀺. 𑀓𑀼𑀫𑀸𑀭𑁄 𑀘 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸𑀯 𑀧𑀺𑀢𑀼𑀲𑀺𑀦𑁂𑀳𑀁 𑀮𑀪𑀺𑀢𑁆𑀯𑀸 𑀳𑀝𑁆𑀞𑀘𑀺𑀢𑁆𑀢𑁄 ‘‘𑀲𑀼𑀔𑀸 𑀢𑁂, 𑀲𑀫𑀡, 𑀙𑀸𑀬𑀸’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀯𑀤𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀓𑀼𑀫𑀸𑀭𑁄𑀧𑀺 ‘‘𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀺, 𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀻’’𑀢𑀺 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺. 𑀦 𑀪𑀕𑀯𑀸 𑀓𑀼𑀫𑀸𑀭𑀁 𑀦𑀺𑀯𑀢𑁆𑀢𑀸𑀧𑁂𑀲𑀺, 𑀧𑀭𑀺𑀚𑀦𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀺 𑀲𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀆𑀭𑀸𑀫𑀫𑁂𑀯 𑀅𑀕𑀫𑀸𑀲𑀺.

𑀢𑀢𑁄 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁 𑀅𑀬𑀁 𑀧𑀺𑀢𑀼𑀲𑀦𑁆𑀢𑀓𑀁 𑀥𑀦𑀁 𑀇𑀘𑁆𑀙𑀢𑀺, 𑀢𑀁 𑀯𑀝𑁆𑀝𑀸𑀦𑀼𑀕𑀢𑀁 𑀲𑀯𑀺𑀖𑀸𑀢𑀁, 𑀳𑀦𑁆𑀤𑀲𑁆𑀲 𑀫𑁂 𑀩𑁄𑀥𑀺𑀫𑀡𑁆𑀟𑁂 𑀧𑀝𑀺𑀮𑀤𑁆𑀥𑀁 𑀲𑀢𑁆𑀢𑀯𑀺𑀥𑀁 𑀅𑀭𑀺𑀬𑀥𑀦𑀁 𑀤𑁂𑀫𑀺, 𑀮𑁄𑀓𑀼𑀢𑁆𑀢𑀭𑀤𑀸𑀬𑀚𑁆𑀚𑀲𑁆𑀲 𑀦𑀁 𑀲𑀸𑀫𑀺𑀓𑀁 𑀓𑀭𑁄𑀫𑀻’’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀭𑀸𑀳𑀼𑀮𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀧𑀩𑁆𑀩𑀚𑀺𑀢𑁂 𑀘 𑀧𑀦 𑀓𑀼𑀫𑀸𑀭𑁂 𑀭𑀜𑁆𑀜𑁄 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀺, 𑀢𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀭𑀁 𑀬𑀸𑀘𑀺. 𑀪𑀕𑀯𑀸 𑀘 𑀢𑀲𑁆𑀲 𑀯𑀭𑀁 𑀤𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑁂 𑀭𑀸𑀚𑀦𑀺𑀯𑁂𑀲𑀦𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂𑀦 𑀭𑀜𑁆𑀜𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀓𑀸𑀮𑁂 𑀏𑀓𑀸 𑀤𑁂𑀯𑀢𑀸 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀧𑀼𑀢𑁆𑀢𑁄 𑀢𑁂 𑀓𑀸𑀮𑀗𑁆𑀓𑀢𑁄’𑀢𑀺 𑀆𑀳, 𑀢𑀲𑁆𑀲𑀸 𑀯𑀘𑀦𑀁 𑀅𑀲𑀤𑁆𑀤𑀳𑀦𑁆𑀢𑁄 ‘𑀦 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀲𑀫𑁆𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀻’𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑁂 𑀇𑀤𑀸𑀦𑀺 𑀓𑀺𑀁 𑀲𑀤𑁆𑀤𑀳𑀺𑀲𑁆𑀲𑀣, 𑀬𑁂 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂𑀧𑀺 𑀅𑀝𑁆𑀞𑀺𑀓𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘𑀧𑀼𑀢𑁆𑀢𑁄 𑀢𑁂 𑀫𑀢𑁄’𑀢𑀺 𑀯𑀼𑀢𑁆𑀢𑁂 𑀦 𑀲𑀤𑁆𑀤𑀳𑀺𑀢𑁆𑀣𑀸’’𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀇𑀢𑀺 𑀪𑀕𑀯𑀸 𑀧𑀺𑀢𑀭𑀁 𑀢𑀻𑀲𑀼 𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀻𑀢𑀯𑀦𑁂 𑀯𑀺𑀳𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀡𑁆𑀟𑀁 𑀆𑀤𑀸𑀬 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀬𑀲𑀳𑀸𑀬𑀓𑀲𑁆𑀲 𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑁂 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀯𑀺𑀯𑀝𑁂𑀦 𑀤𑁆𑀯𑀸𑀭𑁂𑀦 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬, 𑀤𑀼𑀢𑀺𑀬𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀆𑀕𑀫𑀦𑀢𑁆𑀣𑀸𑀬 𑀲𑀢𑁆𑀣𑀼 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀝𑁆𑀞𑀸𑀦𑁂 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀬𑁄𑀚𑀦𑀺𑀓𑁂 𑀬𑁄𑀚𑀦𑀺𑀓𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀚𑁂𑀢𑀯𑀦𑀁 𑀓𑁄𑀝𑀺𑀲𑀦𑁆𑀣𑀸𑀭𑁂𑀦 𑀅𑀝𑁆𑀞𑀸𑀭𑀲𑀳𑀺 𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀓𑀺𑀡𑀺𑀢𑁆𑀯𑀸 𑀦𑀯𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺. 𑀲𑁄 𑀫𑀚𑁆𑀛𑁂 𑀤𑀲𑀩𑀮𑀲𑁆𑀲 𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀲𑀺, 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀏𑀓𑀲𑀦𑁆𑀦𑀺𑀯𑁂𑀲𑀦𑁂 𑀆𑀯𑀸𑀲𑁂 𑀏𑀓𑀓𑀼𑀝𑀺𑀓𑀤𑁆𑀯𑀺𑀓𑀼𑀝𑀺𑀓𑀳𑀁𑀲𑀯𑀝𑁆𑀝𑀓𑀤𑀻𑀖𑀭𑀲𑁆𑀲𑀲𑀸𑀮𑀸𑀫𑀡𑁆𑀟𑀧𑀸𑀤𑀺𑀯𑀲𑁂𑀦 𑀲𑁂𑀲𑀲𑁂𑀦𑀸𑀲𑀦𑀸𑀦𑀺 𑀧𑁄𑀓𑁆𑀔𑀭𑀡𑀺𑀘𑀗𑁆𑀓𑀫𑀦𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀘𑀸𑀢𑀺 𑀅𑀝𑁆𑀞𑀸𑀭𑀲𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀫𑀦𑁄𑀭𑀫𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀆𑀕𑀫𑀦𑀢𑁆𑀣𑀸𑀬 𑀤𑀽𑀢𑀁 𑀧𑀸𑀳𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀦𑀕𑀭𑀁 𑀧𑀸𑀧𑀼𑀡𑀺.

𑀫𑀳𑀸𑀲𑁂𑀝𑁆𑀞𑀺𑀧𑀺 𑀔𑁄 𑀯𑀺𑀳𑀸𑀭𑀫𑀳𑀁 𑀲𑀚𑁆𑀚𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀚𑁂𑀢𑀯𑀦𑀁 𑀧𑀯𑀺𑀲𑀦𑀤𑀺𑀯𑀲𑁂 𑀧𑀼𑀢𑁆𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀳𑁂𑀯 𑀧𑀜𑁆𑀘𑀳𑀺 𑀓𑀼𑀫𑀸𑀭𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑁂𑀲𑁂𑀲𑀺. 𑀲𑁄 𑀲𑀧𑀭𑀺𑀯𑀸𑀭𑁄 𑀧𑀜𑁆𑀘𑀯𑀡𑁆𑀡𑀯𑀢𑁆𑀣𑀲𑀫𑀼𑀚𑁆𑀚𑀮𑀸𑀦𑀺 𑀧𑀜𑁆𑀘 𑀥𑀚𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀼𑀭𑀢𑁄 𑀅𑀳𑁄𑀲𑀺, 𑀢𑁂𑀲𑀁 𑀧𑀘𑁆𑀙𑀢𑁄 𑀫𑀳𑀸𑀲𑀼𑀪𑀤𑁆𑀤𑀸 𑀘𑀽𑀴𑀲𑀼𑀪𑀤𑁆𑀤𑀸𑀢𑀺 𑀤𑁆𑀯𑁂 𑀲𑁂𑀝𑁆𑀞𑀺𑀥𑀻𑀢𑀭𑁄 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀡𑁆𑀡𑀖𑀝𑁂 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼, 𑀢𑀸𑀲𑀁 𑀧𑀘𑁆𑀙𑀢𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀧𑀜𑁆𑀘𑀳𑀺 𑀫𑀸𑀢𑀼𑀕𑀸𑀫𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀡𑁆𑀡𑀧𑀸𑀢𑀺𑀬𑁄 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺, 𑀲𑀩𑁆𑀩𑁂𑀲𑀁 𑀧𑀘𑁆𑀙𑀢𑁄 𑀫𑀳𑀸𑀲𑁂𑀝𑁆𑀞𑀺 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑁄 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑁂𑀳𑁂𑀯 𑀧𑀜𑁆𑀘𑀳𑀺 𑀲𑁂𑀝𑁆𑀞𑀺𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀅𑀩𑁆𑀪𑀼𑀕𑁆𑀕𑀜𑁆𑀙𑀺. 𑀪𑀕𑀯𑀸 𑀇𑀫𑀁 𑀉𑀧𑀸𑀲𑀓𑀧𑀭𑀺𑀲𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀲𑀼𑀯𑀡𑁆𑀡𑀭𑀲𑀲𑁂𑀓𑀲𑀺𑀜𑁆𑀘𑀦𑀸𑀦𑀺 𑀯𑀺𑀬 𑀯𑀦𑀦𑁆𑀢𑀭𑀸𑀦𑀺 𑀓𑀼𑀭𑀼𑀫𑀸𑀦𑁄 𑀅𑀦𑀦𑁆𑀢𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀅𑀧𑀭𑀺𑀫𑀸𑀡𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀚𑁂𑀢𑀯𑀦𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀆𑀧𑀼𑀘𑁆𑀙𑀺 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺, 𑀕𑀳𑀧𑀢𑀺, 𑀇𑀫𑀁 𑀯𑀺𑀳𑀸𑀭𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀫𑀳𑀸𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀤𑀸𑀬 𑀤𑀲𑀩𑀮𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 ‘‘𑀇𑀫𑀁 𑀚𑁂𑀢𑀯𑀦𑀯𑀺𑀳𑀸𑀭𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀅𑀤𑀸𑀲𑀺. 𑀲𑀢𑁆𑀣𑀸 𑀯𑀺𑀳𑀸𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

‘‘𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

‘‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

‘‘𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. (𑀘𑀽𑀴𑀯. 𑁨𑁯𑁫) 𑁋

𑀯𑀺𑀳𑀸𑀭𑀸𑀦𑀺𑀲𑀁𑀲𑀁 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀫𑀳𑀁 𑀆𑀭𑀪𑀺. 𑀯𑀺𑀲𑀸𑀔𑀸𑀬 𑀯𑀺𑀳𑀸𑀭𑀫𑀳𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑁄, 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀧𑀦 𑀯𑀺𑀳𑀸𑀭𑀫𑀳𑁄 𑀦𑀯𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀸𑀲𑀺. 𑀯𑀺𑀳𑀸𑀭𑀫𑀳𑁂𑀧𑀺 𑀅𑀝𑁆𑀞𑀸𑀭𑀲𑁂𑀯 𑀓𑁄𑀝𑀺𑀬𑁄 𑀧𑀭𑀺𑀘𑁆𑀘𑀸𑀕𑀁 𑀅𑀕𑀫𑀁𑀲𑀼. 𑀇𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀲𑀗𑁆𑀔𑀁 𑀥𑀦𑀁 𑀧𑀭𑀺𑀘𑁆𑀘𑀚𑀺.

𑀅𑀢𑀻𑀢𑁂 𑀧𑀦 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀧𑀼𑀦𑀩𑁆𑀩𑀲𑀼𑀫𑀺𑀢𑁆𑀢𑁄 𑀦𑀸𑀫 𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀬𑁄𑀚𑀦𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀲𑀺𑀔𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀲𑀺𑀭𑀺𑀯𑀟𑁆𑀠𑁄 𑀦𑀸𑀫 𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀨𑀸𑀮𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑁄𑀢𑁆𑀣𑀺𑀬𑁄 𑀦𑀸𑀫 𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀳𑀢𑁆𑀣𑀺𑀧𑀤𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀘𑁆𑀘𑀼𑀢𑁄 𑀦𑀸𑀫 𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀉𑀕𑁆𑀕𑁄 𑀦𑀸𑀫 𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀓𑀘𑁆𑀙𑀧𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀟𑁆𑀠𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀼𑀫𑀗𑁆𑀕𑀮𑁄 𑀦𑀸𑀫 𑀲𑁂𑀝𑁆𑀞𑀺 𑀲𑀼𑀯𑀡𑁆𑀡𑀬𑀝𑁆𑀞𑀺𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑁄𑀴𑀲𑀓𑀭𑀻𑀲𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀦𑀸𑀫 𑀲𑁂𑀝𑁆𑀞𑀺 𑀓𑀳𑀸𑀧𑀡𑀓𑁄𑀝𑀺𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀲𑀺. 𑀇𑀤𑀁 𑀓𑀺𑀭 𑀞𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀫𑁂𑀯.

𑀇𑀢𑀺 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀺𑀢𑁄 𑀬𑀸𑀯 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀸 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀪𑀕𑀯𑀸 𑀯𑀺𑀳𑀸𑀲𑀺, 𑀇𑀤𑀁 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀭𑀸𑀧𑀤𑀸𑀦𑀁

𑁧. 𑀩𑀼𑀤𑁆𑀥𑀯𑀕𑁆𑀕𑁄

𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀯𑀡𑁆𑀡𑀦𑀸

𑁫.

‘‘𑀅𑀣 𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀺, 𑀲𑀼𑀡𑀸𑀣 𑀲𑀼𑀤𑁆𑀥𑀫𑀸𑀦𑀲𑀸;

𑀢𑀺𑀁𑀲𑀧𑀸𑀭𑀫𑀺𑀲𑀫𑁆𑀧𑀼𑀡𑁆𑀡𑀸, 𑀥𑀫𑁆𑀫𑀭𑀸𑀚𑀸 𑀅𑀲𑀗𑁆𑀔𑀺𑀬𑀸’’𑀢𑀺. 𑁋

𑀏𑀢𑁆𑀣 𑀅𑀣𑀸𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀽𑀧𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑀧𑀤𑀁, 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀬𑀼𑀢𑁆𑀢𑀦𑀺𑀧𑀸𑀢𑀤𑁆𑀯𑀬𑁂𑀲𑀼 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀦𑀺𑀧𑀸𑀢𑀧𑀤𑀁. 𑀅𑀣 𑀯𑀸 𑁋

‘‘𑀅𑀥𑀺𑀓𑀸𑀭𑁂 𑀫𑀗𑁆𑀕𑀮𑁂 𑀘𑁂𑀯, 𑀦𑀺𑀧𑁆𑀨𑀦𑁆𑀦𑀢𑁆𑀣𑁂𑀯𑀥𑀸𑀭𑀡𑁂;

𑀅𑀦𑀦𑁆𑀢𑀭𑁂𑀧𑀕𑀫𑀦𑁂, 𑀅𑀣-𑀲𑀤𑁆𑀤𑁄 𑀧𑀯𑀢𑁆𑀢𑀢𑀺’’.

𑀢𑀣𑀸 𑀳𑀺 𑁋

‘‘𑀅𑀥𑀺𑀓𑀺𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀁, 𑀅𑀥𑀺𑀅𑀢𑁆𑀣𑀁 𑀯𑀺𑀪𑀸𑀲𑀢𑀺;

𑀲𑁂𑀝𑁆𑀞𑀚𑁂𑀝𑁆𑀞𑀓𑀪𑀸𑀯𑁂𑀦, 𑀅𑀥𑀺𑀓𑀸𑀭𑁄 𑀯𑀺𑀥𑀻𑀬𑀢𑁂’’𑀢𑀺. 𑁋

𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀥𑀫𑁆𑀫𑀸𑀦𑀁 𑀅𑀥𑀺𑀓𑀺𑀘𑁆𑀘𑀢𑁄, 𑀲𑁂𑀝𑁆𑀞𑀚𑁂𑀝𑁆𑀞𑀢𑁄 𑀅𑀥𑀺𑀓𑀸𑀭𑀝𑁆𑀞𑁂𑀦 𑀅𑀣-𑀲𑀤𑁆𑀤𑁂𑀦 𑀬𑀼𑀢𑁆𑀢𑀫𑀧𑀤𑀸𑀦𑀸𑀦𑀻𑀢𑀺. 𑀢𑀺𑀯𑀺𑀥𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀽𑀚𑀸𑀫𑀗𑁆𑀕𑀮𑀲𑀪𑀸𑀯𑀢𑁄 ‘‘𑀧𑀽𑀚𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦𑀁, 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺 𑀯𑀘𑀦𑀢𑁄 (𑀔𑀼. 𑀧𑀸. 𑁫.𑁩; 𑀲𑀼. 𑀦𑀺. 𑁨𑁬𑁨) 𑀫𑀗𑁆𑀕𑀮𑀝𑁆𑀞𑁂𑀦 𑀅𑀣-𑀲𑀤𑁆𑀤𑁂𑀦 𑀬𑀼𑀢𑁆𑀢𑀫𑀧𑀤𑀸𑀦𑀸𑀦𑀻𑀢𑀺. 𑀩𑀼𑀤𑁆𑀥𑀸𑀤𑀻𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀓𑀺𑀘𑁆𑀘𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀺𑀧𑁆𑀨𑀦𑁆𑀦𑀢𑁄 𑀦𑀺𑀧𑁆𑀨𑀦𑁆𑀦𑀝𑁆𑀞𑁂𑀦 𑀅𑀣-𑀲𑀤𑁆𑀤𑁂𑀦 𑀬𑀼𑀢𑁆𑀢𑀫𑀧𑀤𑀸𑀦𑀸𑀦𑀻𑀢𑀺. 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀸𑀤𑀺𑀓𑀼𑀲𑀮𑀢𑁄 𑀅𑀜𑁆𑀜𑀓𑀼𑀲𑀮𑀸𑀦𑀁 𑀅𑀪𑀸𑀯𑀢𑁄 𑀅𑀯𑀥𑀸𑀭𑀡𑀝𑁆𑀞𑁂𑀦 𑀦𑀺𑀯𑀸𑀭𑀡𑀝𑁆𑀞𑁂𑀦 𑀅𑀣-𑀲𑀤𑁆𑀤𑁂𑀦 𑀬𑀼𑀢𑁆𑀢𑀫𑀧𑀤𑀸𑀦𑀸𑀦𑀻𑀢𑀺. 𑀔𑀼𑀤𑁆𑀤𑀓𑀧𑀸𑀞𑀲𑀗𑁆𑀕𑀳𑀸𑀦𑀦𑁆𑀢𑀭𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀦𑀦𑁆𑀢𑀭𑀝𑁆𑀞𑁂𑀦 𑀅𑀣-𑀲𑀤𑁆𑀤𑁂𑀦 𑀬𑀼𑀢𑁆𑀢𑀫𑀧𑀤𑀸𑀦𑀸𑀦𑀻𑀢𑀺. 𑀇𑀢𑁄 𑀔𑀼𑀤𑁆𑀤𑀓𑀧𑀸𑀞𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀧𑀕𑀫𑀦𑀝𑁆𑀞𑁂𑀦 𑀅𑀣-𑀲𑀤𑁆𑀤𑁂𑀦 𑀬𑀼𑀢𑁆𑀢𑀫𑀧𑀤𑀸𑀦𑀸𑀦𑀻𑀢𑀺.

𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀩𑀼𑀤𑁆𑀥𑁄, 𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁 𑀩𑁄𑀥𑁄𑀢𑀺 𑀅𑀦𑀢𑁆𑀣𑀦𑁆𑀢𑀭𑀫𑁂𑀢𑀁. 𑀬𑀣𑀸 𑀦𑀻𑀮𑀸𑀤𑀺𑀯𑀡𑁆𑀡𑀬𑁄𑀕𑀢𑁄 𑀧𑀝𑁄 ‘‘𑀦𑀻𑀮𑁄 𑀧𑀝𑁄, 𑀭𑀢𑁆𑀢𑁄 𑀧𑀝𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀬𑁄𑀕𑀢𑁄 𑀩𑀼𑀤𑁆𑀥𑁄. 𑀅𑀣 𑀯𑀸 ‘‘𑀩𑁄𑀥𑀺’’𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑁂𑀦 𑀜𑀸𑀡𑁂𑀦 𑀲𑀓𑀮𑀤𑀺𑀬𑀟𑁆𑀠𑀲𑀳𑀲𑁆𑀲𑀓𑀺𑀮𑁂𑀲𑀸𑀭𑀺𑀕𑀡𑁂 𑀔𑁂𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀦𑀢𑁄 𑀜𑀸𑀡𑀁 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄. 𑀢𑁂𑀦𑁂𑀯 𑀜𑀸𑀡𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀘𑀢𑀽𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀜𑀸𑀡𑀲𑁆𑀲𑀸𑀥𑀺𑀕𑀢𑀢𑁆𑀢𑀸 𑀘 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀬𑀫𑀓𑀧𑀸𑀝𑀺𑀳𑀻𑀭𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡- 𑀅𑀦𑀸𑀯𑀭𑀡𑀆𑀲𑀬𑀸𑀦𑀼𑀲𑀬𑀸𑀤𑀺𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀁 𑀲𑀫𑀥𑀺𑀕𑀢𑀢𑁆𑀢𑀸 𑀘 𑀏𑀓𑀸𑀬𑀧𑀺 𑀥𑀫𑁆𑀫𑀤𑁂𑀲𑀦𑀸𑀬 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀲𑀢𑁆𑀢𑀦𑀺𑀓𑀸𑀬𑁂 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀧𑀸𑀧𑀦𑀢𑁄 𑀘 𑀢𑀤𑁂𑀯 𑀜𑀸𑀡𑀁 𑀩𑀼𑀤𑁆𑀥𑀸𑀦𑀫𑁂𑀯𑀸𑀥𑀺𑀓𑀪𑀸𑀯𑀢𑁄 𑀢𑁂𑀲𑀫𑁂𑀯 𑀲𑀫𑁆𑀩𑀼𑀤𑁆𑀥𑀸𑀦𑀁 𑀅𑀧𑀤𑀸𑀦𑀁 𑀓𑀸𑀭𑀡𑀁 𑀩𑀼𑀤𑁆𑀥𑀸𑀧𑀤𑀸𑀦𑀁. 𑀢𑀜𑁆𑀳𑀺 𑀤𑀼𑀯𑀺𑀥𑀁 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀦 𑀦 𑀢𑀣𑀸 𑀓𑀸𑀢𑀼𑀁 𑀲𑀫𑀢𑁆𑀣𑀸, 𑀅𑀦𑁆𑀦𑀸𑀤𑀺𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀸𑀧𑀺 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀧𑀽𑀭𑁂𑀦𑁆𑀢𑀼 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸.

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀧𑀽𑀭𑁂𑀦𑁆𑀢𑀼 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑀸, 𑀫𑀡𑀺 𑀚𑁄𑀢𑀺𑀭𑀲𑁄 𑀬𑀣𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀓𑀣𑀸; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁯𑁨; 𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀻𑀯𑀢𑁆𑀣𑀼) 𑁋

𑀇𑀫𑀸𑀳𑀺 𑀤𑁆𑀯𑀻𑀳𑀺𑀬𑁂𑀯 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀤𑁂𑀲𑁂𑀦𑁆𑀢𑀸𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑀢𑁆𑀢𑀦𑀺𑀓𑀸𑀬𑁂 𑀩𑁄𑀥𑁂𑀢𑀼𑀁 𑀦 𑀲𑀓𑁆𑀓𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀤𑀺𑀲𑀸 𑀳𑀼𑀢𑁆𑀯𑀸 𑀧𑀸𑀝𑀺𑀏𑀓𑁆𑀓𑀁 𑀯𑀺𑀲𑀼𑀁 𑀩𑀼𑀤𑁆𑀥𑀸𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀢𑁂𑀲𑀁 𑀅𑀧𑀤𑀸𑀦𑀁 𑀓𑀸𑀭𑀡𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀁.

𑀘𑀺𑀭𑀁 𑀞𑀺𑀢𑀸𑀢𑀺 𑀣𑁂𑀭𑀸. 𑀅𑀣 𑀯𑀸 𑀣𑀺𑀭𑀢𑀭𑀲𑀻𑀮𑀸𑀘𑀸𑀭𑀫𑀤𑁆𑀤𑀯𑀸𑀤𑀺𑀕𑀼𑀡𑁂𑀳𑀺 𑀬𑀼𑀢𑁆𑀢𑀸𑀢𑀺 𑀣𑁂𑀭𑀸. 𑀅𑀣 𑀯𑀸 𑀣𑀺𑀭𑀯𑀭𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀳𑀺 𑀬𑀼𑀢𑁆𑀢𑀸𑀢𑀺 𑀣𑁂𑀭𑀸. 𑀅𑀣 𑀯𑀸 𑀣𑀺𑀭𑀢𑀭𑀲𑀗𑁆𑀔𑀸𑀢𑀧𑀡𑀻𑀢𑀸𑀦𑀼𑀢𑁆𑀢𑀭𑀲𑀦𑁆𑀢𑀺𑀦𑀺𑀩𑁆𑀩𑀸𑀦𑀫𑀥𑀺𑀕𑀢𑀸𑀢𑀺 𑀣𑁂𑀭𑀸, 𑀣𑁂𑀭𑀸𑀦𑀁 𑀅𑀧𑀤𑀸𑀦𑀸𑀦𑀺 𑀣𑁂𑀭𑀸𑀧𑀤𑀸𑀦𑀸𑀦𑀺. 𑀢𑀣𑀸 𑀢𑀸𑀤𑀺𑀕𑀼𑀡𑁂𑀳𑀺 𑀬𑀼𑀢𑁆𑀢𑀸𑀢𑀺 𑀣𑁂𑀭𑀻, 𑀣𑁂𑀭𑀻𑀦𑀁 𑀅𑀧𑀤𑀸𑀦𑀸𑀦𑀺 𑀣𑁂𑀭𑀻𑀧𑀤𑀸𑀦𑀸𑀦𑀺. 𑀢𑁂𑀲𑀼 𑀩𑀼𑀤𑁆𑀥𑀸𑀧𑀤𑀸𑀦𑁂 𑀧𑀜𑁆𑀘𑁂𑀯 𑀅𑀧𑀤𑀸𑀦𑀸𑀦𑀺, 𑀧𑀜𑁆𑀘𑁂𑀯 𑀲𑀼𑀢𑁆𑀢𑀦𑁆𑀢𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀧𑀜𑁆𑀘𑁂𑀯 𑀅𑀧𑀤𑀸𑀦𑀸𑀦𑀺, 𑀧𑀜𑁆𑀘 𑀲𑀼𑀢𑁆𑀢𑀸𑀦𑀺 𑀬𑀲𑁆𑀲 𑀘;

𑀇𑀤𑀁 𑀩𑀼𑀤𑁆𑀥𑀸𑀧𑀤𑀸𑀦𑀦𑁆𑀢𑀺, 𑀧𑀞𑀫𑀁 𑀅𑀦𑀼𑀮𑁄𑀫𑀢𑁄’’𑀢𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑁂𑀧𑀺 𑀧𑀜𑁆𑀘𑁂𑀯 𑀅𑀧𑀤𑀸𑀦𑀸𑀦𑀺, 𑀧𑀜𑁆𑀘𑁂𑀯 𑀲𑀼𑀢𑁆𑀢𑀦𑁆𑀢𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀧𑀜𑁆𑀘𑁂𑀯 𑀅𑀧𑀤𑀸𑀦𑀸𑀦𑀺, 𑀧𑀜𑁆𑀘 𑀲𑀼𑀢𑁆𑀢𑀸𑀦𑀺 𑀬𑀲𑁆𑀲 𑀘;

𑀇𑀤𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀦𑁆𑀢𑀺, 𑀤𑀼𑀢𑀺𑀬𑀁 𑀅𑀦𑀼𑀮𑁄𑀫𑀢𑁄’’𑀢𑀺.

𑀣𑁂𑀭𑀸𑀧𑀤𑀸𑀦𑁂𑀲𑀼 𑀤𑀲𑀸𑀥𑀺𑀓𑀧𑀜𑁆𑀘𑀲𑀢𑀸𑀧𑀤𑀸𑀦𑀸𑀦𑀺, 𑀯𑀕𑁆𑀕𑀢𑁄 𑀏𑀓𑀧𑀜𑁆𑀜𑀸𑀲 𑀯𑀕𑁆𑀕𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀧𑀜𑁆𑀘𑀲𑀢𑀤𑀲𑀧𑀤𑀸𑀦𑀸𑀦𑀺, 𑀏𑀓𑀧𑀜𑁆𑀜𑀸𑀲 𑀯𑀕𑁆𑀕𑀢𑁄;

𑀇𑀤𑀁 𑀣𑁂𑀭𑀸𑀧𑀤𑀸𑀦𑀦𑁆𑀢𑀺, 𑀢𑀢𑀺𑀬𑀁 𑀅𑀦𑀼𑀮𑁄𑀫𑀢𑁄’’𑀢𑀺.

𑀣𑁂𑀭𑀻𑀅𑀧𑀤𑀸𑀦𑁂𑀲𑀼 𑀘𑀢𑁆𑀢𑀸𑀮𑀻𑀲𑀁 𑀅𑀧𑀤𑀸𑀦𑀸𑀦𑀺, 𑀯𑀕𑁆𑀕𑀢𑁄 𑀘𑀢𑀼𑀭𑁄 𑀯𑀕𑁆𑀕𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀘𑀢𑁆𑀢𑀸𑀮𑀻𑀲𑀁𑀧𑀤𑀸𑀦𑀸𑀦𑀺, 𑀘𑀢𑀼𑀯𑀕𑁆𑀕𑀸𑀦𑀺 𑀬𑀲𑁆𑀲 𑀘;

𑀇𑀤𑀁 𑀣𑁂𑀭𑀻𑀧𑀤𑀸𑀦𑀦𑁆𑀢𑀺, 𑀘𑀢𑀼𑀢𑁆𑀣𑀁 𑀅𑀦𑀼𑀮𑁄𑀫𑀢𑁄’’𑀢𑀺.

𑀅𑀧𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀧𑀤𑀸𑀦-𑀲𑀤𑁆𑀤𑁄 𑀓𑀸𑀭𑀡𑀕𑀳𑀡𑀅𑀧𑀕𑀫𑀦𑀧𑀝𑀺𑀧𑀸𑀝𑀺𑀅𑀓𑁆𑀓𑁄𑀲𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀏𑀲 ‘‘𑀔𑀢𑁆𑀢𑀺𑀬𑀸𑀦𑀁 𑀅𑀧𑀤𑀸𑀦𑀁, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀓𑀸𑀭𑀡𑁂 𑀤𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀸𑀦𑀁 𑀓𑀸𑀭𑀡𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀧𑀸𑀲𑀓𑀸𑀦𑀁 𑀅𑀧𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀕𑀳𑀡𑁂 𑀤𑀺𑀲𑁆𑀲𑀢𑀺, 𑀲𑀁𑀲𑀼𑀝𑁆𑀞𑀼 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀸𑀡𑀺𑀚𑀸𑀦𑀁 𑀅𑀧𑀤𑀸𑀦𑀁, 𑀲𑀼𑀤𑁆𑀤𑀸𑀦𑀁 𑀅𑀧𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀅𑀧𑀕𑀫𑀦𑁂 𑀤𑀺𑀲𑁆𑀲𑀢𑀺, 𑀢𑀢𑁄 𑀢𑀢𑁄 𑀢𑁂𑀲𑀁 𑀅𑀧𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀺𑀡𑁆𑀟𑀧𑀸𑀢𑀺𑀓𑁄 𑀪𑀺𑀓𑁆𑀔𑀼 𑀲𑀧𑀤𑀸𑀦𑀘𑀸𑀭𑀯𑀲𑁂𑀦 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺𑀆𑀤𑀻𑀲𑀼 𑀧𑀝𑀺𑀧𑀸𑀝𑀺𑀬𑀸 𑀤𑀺𑀲𑁆𑀲𑀢𑀺, 𑀖𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸, 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸𑀢𑀺 𑀅𑀧𑀤𑀸𑀦𑁂𑀢𑀻’’𑀢𑀺𑀆𑀤𑀻𑀲𑀼 𑀅𑀓𑁆𑀓𑁄𑀲𑀦𑁂 𑀤𑀺𑀲𑁆𑀲𑀢𑀺, 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀓𑀸𑀭𑀡𑁂 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀅𑀧𑀤𑀸𑀦𑀸𑀦𑀺 𑀩𑀼𑀤𑁆𑀥𑀸𑀧𑀤𑀸𑀦𑀺, 𑀩𑀼𑀤𑁆𑀥𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀕𑀗𑁆𑀕𑀸𑀯𑀸𑀮𑀼𑀓𑀽𑀧𑀫𑀸𑀦𑀁 𑀅𑀦𑁂𑀓𑁂𑀲𑀁 𑀩𑀼𑀤𑁆𑀥𑀸𑀦𑀁 𑀤𑀸𑀦𑀧𑀸𑀭𑀫𑀺𑀢𑀸𑀤𑀺𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀢𑀸 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀅𑀥𑀺𑀓𑀸𑀭𑀸𑀤𑀻𑀲𑀼 𑀬𑀼𑀢𑁆𑀢𑀅𑀧𑀤𑀸𑀦𑀸𑀦𑀺 𑀲𑀼𑀤𑁆𑀥𑀫𑀸𑀦𑀲𑀸 𑀲𑀼𑀡𑀸𑀣𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀲𑀼𑀤𑁆𑀥𑀫𑀸𑀦𑀲𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀔𑁂𑀧𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀼𑀤𑁆𑀥𑀫𑀸𑀦𑀲𑀸 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀲𑀼𑀤𑁆𑀥𑀳𑀤𑀬𑀸 𑀧𑀜𑁆𑀘𑀲𑀢𑀸 𑀔𑀻𑀡𑀸𑀲𑀯𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀲𑀪𑀸𑀬𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀼𑀡𑀸𑀣, 𑀑𑀳𑀺𑀢𑀲𑁄𑀢𑀸 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀧𑀦 ‘‘𑀅𑀧𑀤𑀸𑀦𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀣𑁂𑀭𑀸𑀧𑀤𑀸𑀦𑀣𑁂𑀭𑀻𑀅𑀧𑀤𑀸𑀦𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 ‘‘𑀅𑀣 𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀻’’𑀢𑀺 𑀯𑀘𑀦𑀁 𑀔𑀦𑁆𑀥𑀬𑀫𑀓𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀲𑀗𑁆𑀔𑀸𑀭𑀅𑀦𑀼𑀲𑀬𑀬𑀫𑀓𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀧𑀥𑀸𑀦𑀯𑀲𑁂𑀦 𑀆𑀤𑀺𑀯𑀲𑁂𑀦 𑀘 ‘‘𑀫𑀽𑀮𑀬𑀫𑀓’’𑀦𑁆𑀢𑀺 𑀯𑀘𑀦𑀁 𑀯𑀺𑀬, 𑀢𑁂𑀭𑀲𑀲𑀗𑁆𑀖𑀸𑀤𑀺𑀲𑁂𑀲𑀤𑁆𑀯𑁂𑀅𑀦𑀺𑀬𑀢𑀢𑀺𑀁𑀲𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀧𑀥𑀸𑀦𑀯𑀲𑁂𑀦 𑀆𑀤𑀺𑀯𑀲𑁂𑀦 𑀘 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑁄’’𑀢𑀺 𑀯𑀘𑀦𑀁 𑀯𑀺𑀬 𑀘 𑀇𑀥𑀸𑀧𑀺 𑀧𑀥𑀸𑀦𑀯𑀲𑁂𑀦 𑀆𑀤𑀺𑀯𑀲𑁂𑀦 𑀘 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀡𑁆𑀡𑀸𑀕𑀫𑁄…𑀧𑁂… 𑀧𑀜𑁆𑀘𑀯𑀺𑀥𑀁 𑀦𑀺𑀭𑀼𑀢𑁆𑀢’’𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 ‘‘𑀢𑁂𑀲𑀼 𑀯𑀼𑀤𑁆𑀥𑀺𑀮𑁄𑀧𑀸𑀕𑀫𑀯𑀺𑀓𑀸𑀭𑀯𑀺𑀧𑀭𑀻𑀢𑀸𑀤𑁂𑀲𑀸 𑀘𑀸’’𑀢𑀺 𑀲𑀼𑀢𑁆𑀢𑁂𑀦 𑀯𑀸 𑀢𑀢𑀺𑀬𑀢𑁆𑀣𑀯𑀸𑀘𑀓𑀲𑁆𑀲 𑀲𑀫𑁆𑀫𑀸𑀢𑀺𑀦𑀺𑀧𑀸𑀢𑀧𑀤𑀲𑁆𑀲, 𑀲𑀬𑀁𑀲𑀤𑁆𑀤𑀢𑁆𑀣𑀯𑀸𑀘𑀓𑀲𑁆𑀲 𑀲-𑀦𑁆𑀢𑀺𑀉𑀧𑀲𑀕𑁆𑀕𑀧𑀤𑀲𑁆𑀲 𑀘 𑀮𑁄𑀧𑀁 𑀓𑀢𑁆𑀯𑀸 𑀓𑀺𑀢𑀦𑁆𑀢𑀯𑀸𑀘𑀻𑀩𑀼𑀤𑁆𑀥𑀲𑀤𑁆𑀤𑀫𑁂𑀯 𑀕𑀳𑁂𑀢𑁆𑀯𑀸 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀯𑀺𑀲𑀼𑀤𑁆𑀥𑀚𑀦𑀯𑀺𑀮𑀸𑀲𑀺𑀦𑀺𑀬𑀸 𑀅𑀧𑀤𑀸𑀦-𑀅𑀝𑁆𑀞𑀓𑀣𑀸𑀬

𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀩𑀼𑀤𑁆𑀥𑀅𑀧𑀤𑀸𑀦𑀯𑀡𑁆𑀡𑀦𑀸

𑀇𑀤𑀸𑀦𑀺 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀸𑀦𑀦𑁆𑀢𑀭𑀁 𑀅𑀧𑀤𑀸𑀦𑀝𑁆𑀞𑀓𑀣𑀁 𑀓𑀣𑁂𑀢𑀼𑀓𑀸𑀫𑁄 𑁋

‘‘𑀲𑀧𑀤𑀸𑀦𑀁 𑀅𑀧𑀤𑀸𑀦𑀁, 𑀯𑀺𑀘𑀺𑀢𑁆𑀭𑀦𑀬𑀤𑁂𑀲𑀦𑀁;

𑀬𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑁆𑀫𑀺𑀁, 𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑁂𑀲𑀬𑁄;

𑀢𑀲𑁆𑀲 𑀤𑀸𑀦𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄’’𑀢𑀺.

𑀢𑀢𑁆𑀣 𑀬𑀁 𑀅𑀧𑀤𑀸𑀦𑀁 𑀢𑀸𑀯 ‘‘𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀏𑀓𑀯𑀺𑀫𑀼𑀢𑁆𑀢𑀺𑀭𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑀭𑀲𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑁆𑀯𑀺𑀥𑀸𑀲𑀗𑁆𑀕𑀳𑁂 𑀥𑀫𑁆𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑁂𑀲𑀼 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀯𑀺𑀦𑀬𑀸𑀪𑀺𑀥𑀫𑁆𑀫𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀤𑀻𑀖𑀦𑀺𑀓𑀸𑀬𑀫𑀚𑁆𑀛𑀺𑀫𑀲𑀁𑀬𑀼𑀢𑁆𑀢𑀅𑀗𑁆𑀕𑀼𑀢𑁆𑀢𑀭𑀔𑀼𑀤𑁆𑀤𑀓𑀦𑀺𑀓𑀸𑀬𑁂𑀲𑀼 𑀧𑀜𑁆𑀘𑀲𑀼 𑀔𑀼𑀤𑁆𑀤𑀓𑀦𑀺𑀓𑀸𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀲𑀼 𑀲𑀸𑀲𑀦𑀗𑁆𑀕𑁂𑀲𑀼 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀁.

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀬𑁂𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀥𑀫𑁆𑀫𑀓𑁆𑀔𑀦𑁆𑀥𑁂𑀲𑀼 𑀓𑀢𑀺𑀧𑀬𑀥𑀫𑁆𑀫𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀳𑁄𑀢𑀻𑀢𑀺.

𑀇𑀤𑀸𑀦𑀺 𑀢𑀁 𑀅𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀁𑀲𑀧𑀸𑀭𑀫𑀺𑀲𑀫𑁆𑀧𑀼𑀡𑁆𑀡𑀸, 𑀥𑀫𑁆𑀫𑀭𑀸𑀚𑀸 𑀅𑀲𑀗𑁆𑀔𑀺𑀬𑀸’’𑀢𑀺 𑀆𑀳. 𑀢𑀢𑁆𑀣 𑀤𑀲𑀧𑀸𑀭𑀫𑀺𑀢𑀸𑀯 𑀧𑀘𑁆𑀙𑀺𑀫𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀯𑀲𑁂𑀦 𑀤𑀲𑀧𑀸𑀭𑀫𑀻𑀤𑀲𑀉𑀧𑀧𑀸𑀭𑀫𑀻𑀤𑀲𑀧𑀭𑀫𑀢𑁆𑀣𑀧𑀸𑀭𑀫𑀻𑀦𑀁 𑀯𑀲𑁂𑀦 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀻. 𑀢𑀸𑀳𑀺 𑀲𑀁𑀲𑀼𑀝𑁆𑀞𑀼 𑀧𑀼𑀡𑁆𑀡𑀸 𑀲𑀫𑁆𑀧𑀼𑀡𑁆𑀡𑀸 𑀲𑀫𑀦𑁆𑀦𑀸𑀕𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀅𑀚𑁆𑀛𑀸𑀧𑀦𑁆𑀦𑀸 𑀲𑀁𑀬𑀼𑀢𑁆𑀢𑀸𑀢𑀺 𑀢𑀺𑀁𑀲𑀧𑀸𑀭𑀫𑀺𑀲𑀫𑁆𑀧𑀼𑀡𑁆𑀡𑀸. 𑀲𑀓𑀮𑀮𑁄𑀓𑀢𑁆𑀢𑀬𑀯𑀸𑀲𑀺𑀦𑁂 𑀲𑀢𑁆𑀢𑀦𑀺𑀓𑀸𑀬𑁂 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀳𑀺 𑀘𑀢𑀽𑀳𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀳𑀺 𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀯𑀸 𑀏𑀓𑀘𑀺𑀢𑁆𑀢𑀪𑀸𑀯𑁂𑀦 𑀅𑀢𑁆𑀢𑀦𑁄 𑀘 𑀓𑀸𑀬𑁂 𑀭𑀜𑁆𑀚𑁂𑀦𑁆𑀢𑀺 𑀅𑀮𑁆𑀮𑀻𑀬𑀸𑀧𑁂𑀦𑁆𑀢𑀻𑀢𑀺 𑀭𑀸𑀚𑀸𑀦𑁄, 𑀥𑀫𑁆𑀫𑁂𑀦 𑀭𑀸𑀚𑀸𑀦𑁄 𑀥𑀫𑁆𑀫𑀭𑀸𑀚𑀸, 𑀇𑀢𑁆𑀣𑀫𑁆𑀪𑀽𑀢𑀸 𑀩𑀼𑀤𑁆𑀥𑀸. 𑀤𑀲𑀲𑀢𑀁 𑀲𑀳𑀲𑁆𑀲𑀁 𑀤𑀲𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀤𑀲𑀲𑀢𑀲𑀳𑀲𑁆𑀲𑀁 𑀓𑁄𑀝𑀺 𑀧𑀓𑁄𑀝𑀺 𑀓𑁄𑀝𑀺𑀧𑁆𑀧𑀓𑁄𑀝𑀺 𑀦𑀳𑀼𑀢𑀁 𑀦𑀺𑀦𑁆𑀦𑀳𑀼𑀢𑀁 𑀅𑀓𑁆𑀔𑁄𑀪𑀺𑀡𑀺 𑀩𑀺𑀦𑁆𑀤𑀼 𑀅𑀩𑁆𑀩𑀼𑀤𑀁 𑀦𑀺𑀭𑀩𑁆𑀩𑀼𑀤𑀁 𑀅𑀳𑀳𑀁 𑀅𑀩𑀩𑀁 𑀅𑀝𑀝𑀁 𑀲𑁄𑀕𑀦𑁆𑀥𑀺𑀓𑀁 𑀉𑀧𑁆𑀧𑀮𑀁 𑀓𑀼𑀫𑀼𑀤𑀁 𑀧𑀼𑀡𑁆𑀟𑀭𑀺𑀓𑀁 𑀧𑀤𑀼𑀫𑀁 𑀓𑀣𑀸𑀦𑀁 𑀫𑀳𑀸𑀓𑀣𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀯𑀲𑁂𑀦 𑀅𑀲𑀗𑁆𑀔𑀺𑀬𑀸 𑀲𑀗𑁆𑀔𑀸𑀭𑀳𑀺𑀢𑀸 𑀥𑀫𑁆𑀫𑀭𑀸𑀚𑀸𑀦𑁄 𑀅𑀢𑀻𑀢𑀸 𑀯𑀺𑀕𑀢𑀸 𑀦𑀺𑀭𑀼𑀤𑁆𑀥𑀸 𑀅𑀩𑁆𑀪𑀢𑁆𑀣𑀁 𑀕𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬. 𑀢𑁂𑀲𑀼 𑀅𑀢𑀻𑀢𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀜𑁆𑀘 𑀅𑀢𑁆𑀢𑀦𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑀸 𑀳𑀼𑀢𑁆𑀯𑀸 𑀓𑀢𑀲𑀫𑁆𑀪𑀸𑀭𑀜𑁆𑀘 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 ‘‘𑀲𑀫𑁆𑀩𑁄𑀥𑀺𑀁 𑀩𑀼𑀤𑁆𑀥𑀲𑁂𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀪𑁄 𑀆𑀦𑀦𑁆𑀤, 𑀫𑀫 𑀅𑀧𑀤𑀸𑀦𑀁 𑀲𑀼𑀡𑁄𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀦𑀦𑁆𑀤, 𑀅𑀳𑀁 𑀧𑀼𑀩𑁆𑀩𑁂 𑀩𑁄𑀥𑀺𑀲𑀫𑁆𑀪𑀸𑀭𑀧𑀽𑀭𑀡𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑀼𑀢𑁆𑀯𑀸 𑀲𑁂𑀝𑁆𑀞𑀸𑀦𑀁 𑀧𑀲𑀝𑁆𑀞𑀸𑀦𑀁 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀩𑁄𑀥𑀺𑀁 𑀘𑀢𑀼𑀲𑀘𑁆𑀘𑀫𑀕𑁆𑀕𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀸 𑀲𑀺𑀭𑀲𑀸 𑀅𑀪𑀺𑀯𑀸𑀤𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀲𑀗𑁆𑀖𑁂 𑀲𑀸𑀯𑀓𑀲𑀗𑁆𑀖𑀲𑀳𑀺𑀢𑁂 𑀮𑁄𑀓𑀦𑀸𑀬𑀓𑁂 𑀮𑁄𑀓𑀚𑁂𑀝𑁆𑀞𑁂 𑀩𑀼𑀤𑁆𑀥𑁂 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀉𑀪𑁄𑀳𑀺 𑀳𑀢𑁆𑀣𑀧𑀼𑀝𑁂𑀳𑀺 𑀦𑀫𑀲𑁆𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀲𑀻𑀲𑁂𑀦 𑀅𑀪𑀺𑀯𑀸𑀤𑀬𑁂 𑀆𑀤𑀭𑁂𑀦 𑀣𑁄𑀫𑀦𑀁 𑀓𑀢𑁆𑀯𑀸 𑀧𑀡𑀸𑀫𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄.

𑁭. 𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑁂𑀲𑀽𑀢𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀩𑀼𑀤𑁆𑀥𑀔𑁂𑀢𑁆𑀢𑁂𑀲𑀼, 𑀆𑀓𑀸𑀲𑀝𑁆𑀞𑀸 𑀆𑀓𑀸𑀲𑀕𑀢𑀸, 𑀪𑀽𑀫𑀝𑁆𑀞𑀸 𑀪𑀽𑀫𑀺𑀢𑀮𑀕𑀢𑀸, 𑀯𑁂𑀴𑀼𑀭𑀺𑀬𑀸𑀤𑀬𑁄 𑀲𑀢𑁆𑀢 𑀭𑀢𑀦𑀸 𑀅𑀲𑀗𑁆𑀔𑀺𑀬𑀸 𑀲𑀗𑁆𑀔𑀸𑀭𑀳𑀺𑀢𑀸, 𑀬𑀸𑀯𑀢𑀸 𑀬𑀢𑁆𑀢𑀓𑀸, 𑀯𑀺𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀫𑀦𑀲𑀸 𑀘𑀺𑀢𑁆𑀢𑁂𑀦 𑀲𑀫𑀸𑀳𑀭𑁂, 𑀲𑀁 𑀲𑀼𑀝𑁆𑀞𑀼 𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄, 𑀫𑀫 𑀧𑀸𑀲𑀸𑀤𑀲𑁆𑀲 𑀲𑀸𑀫𑀦𑁆𑀢𑀸 𑀭𑀸𑀲𑀺𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄.

𑁮. 𑀢𑀢𑁆𑀣 𑀭𑀽𑀧𑀺𑀬𑀪𑀽𑀫𑀺𑀬𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑁂𑀓𑀪𑀽𑀫𑀺𑀫𑁆𑀳𑀺 𑀧𑀸𑀲𑀸𑀤𑁂 𑀭𑀽𑀧𑀺𑀬𑀫𑀬𑀁 𑀭𑀚𑀢𑀫𑀬𑀁 𑀪𑀽𑀫𑀺𑀁 𑀦𑀺𑀫𑁆𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀳𑀁 𑀭𑀢𑀦𑀫𑀬𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀦𑀺𑀫𑁆𑀫𑀺𑀢𑀁 𑀅𑀦𑁂𑀓𑀲𑀢𑀪𑀽𑀫𑀺𑀓𑀁 𑀧𑀸𑀲𑀸𑀤𑀁 𑀉𑀩𑁆𑀩𑀺𑀤𑁆𑀥𑀁 𑀉𑀕𑁆𑀕𑀢𑀁 𑀦𑀪𑀫𑀼𑀕𑁆𑀕𑀢𑀁 𑀆𑀓𑀸𑀲𑁂 𑀚𑁄𑀢𑀫𑀸𑀦𑀁 𑀫𑀸𑀧𑀬𑀺𑀦𑁆𑀢𑀺 𑀅𑀢𑁆𑀣𑁄.

𑁯. 𑀢𑀫𑁂𑀯 𑀧𑀸𑀲𑀸𑀤𑀁 𑀯𑀡𑁆𑀡𑁂𑀦𑁆𑀢𑁄 ‘‘𑀯𑀺𑀘𑀺𑀢𑁆𑀢𑀣𑀫𑁆𑀪’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀯𑀺𑀘𑀺𑀢𑁆𑀢𑁂𑀳𑀺 𑀅𑀦𑁂𑀓𑁂𑀳𑀺 𑀫𑀲𑀸𑀭𑀕𑀮𑁆𑀮𑀸𑀤𑀺𑀯𑀡𑁆𑀡𑁂𑀳𑀺 𑀣𑀫𑁆𑀪𑁂𑀳𑀺 𑀉𑀲𑁆𑀲𑀸𑀧𑀺𑀢𑀁 𑀲𑀼𑀓𑀢𑀁 𑀲𑀼𑀝𑁆𑀞𑀼 𑀓𑀢𑀁 𑀮𑀓𑁆𑀔𑀡𑀬𑀼𑀢𑁆𑀢𑀁 𑀆𑀭𑁄𑀳𑀧𑀭𑀺𑀡𑀸𑀳𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀁 𑀅𑀦𑁂𑀓𑀓𑁄𑀝𑀺𑀲𑀢𑀕𑁆𑀖𑀦𑀢𑁄𑀭𑀡𑀦𑀺𑀫𑁆𑀫𑀺𑀢𑀢𑁆𑀢𑀸 𑀫𑀳𑀸𑀭𑀳𑀁. 𑀧𑀼𑀦𑀧𑀺 𑀓𑀺𑀁 𑀯𑀺𑀲𑀺𑀝𑁆𑀞𑀁? 𑀓𑀦𑀓𑀫𑀬𑀲𑀗𑁆𑀖𑀸𑀝𑀁 𑀲𑀼𑀯𑀡𑁆𑀡𑁂𑀳𑀺 𑀓𑀢𑀢𑀼𑀮𑀸𑀲𑀗𑁆𑀖𑀸𑀝𑀯𑀮𑀬𑁂𑀳𑀺 𑀬𑀼𑀢𑁆𑀢𑀁, 𑀢𑀢𑁆𑀣 𑀉𑀲𑁆𑀲𑀸𑀧𑀺𑀢𑀓𑁄𑀦𑁆𑀢𑁂𑀳𑀺 𑀘 𑀙𑀢𑁆𑀢𑁂𑀳𑀺 𑀘 𑀫𑀡𑁆𑀟𑀺𑀢𑀁 𑀲𑁄𑀪𑀺𑀢𑀁 𑀧𑀸𑀲𑀸𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦. 𑀧𑀼𑀦𑀧𑀺 𑀧𑀸𑀲𑀸𑀤𑀲𑁆𑀲𑁂𑀯 𑀲𑁄𑀪𑀁 𑀯𑀡𑁆𑀡𑁂𑀦𑁆𑀢𑁄 ‘‘𑀧𑀞𑀫𑀸 𑀯𑁂𑀴𑀼𑀭𑀺𑀬𑀸 𑀪𑀽𑀫𑀻’’𑀢𑁆𑀬𑀸𑀤𑀺𑀫𑀸𑀳. 𑀢𑀲𑁆𑀲 𑀅𑀦𑁂𑀓𑀲𑀢𑀪𑀽𑀫𑀺𑀧𑀸𑀲𑀸𑀤𑀲𑁆𑀲 𑀲𑀼𑀪𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀅𑀩𑁆𑀪𑀲𑀫𑀸 𑀯𑀮𑀸𑀳𑀓𑀧𑀝𑀮𑀲𑀤𑀺𑀲𑀸 𑀯𑀺𑀫𑀮𑀸 𑀦𑀺𑀫𑁆𑀫𑀮𑀸 𑀯𑁂𑀴𑀼𑀭𑀺𑀬𑀫𑀡𑀺𑀫𑀬𑀸 𑀦𑀻𑀮𑀯𑀡𑁆𑀡𑀸 𑀧𑀞𑀫𑀸 𑀪𑀽𑀫𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀚𑀮𑀚𑀦𑀴𑀺𑀦𑀧𑀤𑀼𑀫𑁂𑀳𑀺 𑀆𑀓𑀺𑀡𑁆𑀡𑀸 𑀲𑀫𑀗𑁆𑀕𑀻𑀪𑀽𑀢𑀸 𑀯𑀭𑀸𑀬 𑀉𑀢𑁆𑀢𑀫𑀸𑀬 𑀓𑀜𑁆𑀘𑀦𑀪𑀽𑀫𑀺𑀬𑀸 𑀲𑀼𑀯𑀡𑁆𑀡𑀪𑀽𑀫𑀺𑀬𑀸𑀯 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄.

𑁧𑁧. 𑀢𑀲𑁆𑀲𑁂𑀯 𑀧𑀸𑀲𑀸𑀤𑀲𑁆𑀲 𑀓𑀸𑀘𑀺 𑀪𑀽𑀫𑀺 𑀧𑀯𑀸𑀴𑀁𑀲𑀸 𑀧𑀯𑀸𑀴𑀓𑁄𑀝𑁆𑀞𑀸𑀲𑀸 𑀧𑀯𑀸𑀴𑀯𑀡𑁆𑀡𑀸, 𑀓𑀸𑀘𑀺 𑀪𑀽𑀫𑀺 𑀮𑁄𑀳𑀺𑀢𑀓𑀸 𑀮𑁄𑀳𑀺𑀢𑀯𑀡𑁆𑀡𑀸, 𑀓𑀸𑀘𑀺 𑀪𑀽𑀫𑀺 𑀲𑀼𑀪𑀸 𑀫𑀦𑁄𑀳𑀭𑀸 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸 𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀫𑀸𑀦𑀸, 𑀓𑀸𑀘𑀺 𑀪𑀽𑀫𑀺 𑀤𑀲 𑀤𑀺𑀲𑀸 𑀑𑀪𑀸𑀲𑀢𑀻𑀢𑀺 𑀅𑀢𑁆𑀣𑁄.

𑁧𑁨. 𑀢𑀲𑁆𑀫𑀺𑀁𑀬𑁂𑀯 𑀧𑀸𑀲𑀸𑀤𑁂 𑀦𑀺𑀬𑁆𑀬𑀽𑀳𑀸 𑀦𑀺𑀕𑁆𑀕𑀢𑀧𑀫𑀼𑀔𑀲𑀸𑀮𑀸 𑀘 𑀲𑀼𑀯𑀺𑀪𑀢𑁆𑀢𑀸 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸 𑀓𑁄𑀝𑁆𑀞𑀸𑀲𑀢𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑀸 𑀲𑀻𑀳𑀧𑀜𑁆𑀚𑀭𑀸 𑀲𑀻𑀳𑀤𑁆𑀯𑀸𑀭𑀸 𑀘. 𑀘𑀢𑀼𑀭𑁄 𑀯𑁂𑀤𑀺𑀓𑀸𑀢𑀺 𑀘𑀢𑀽𑀳𑀺 𑀯𑁂𑀤𑀺𑀓𑀸𑀯𑀮𑀬𑁂𑀳𑀺 𑀚𑀸𑀮𑀓𑀯𑀸𑀝𑁂𑀳𑀺 𑀘 𑀫𑀦𑁄𑀭𑀫𑀸 𑀫𑀦𑀅𑀮𑁆𑀮𑀻𑀬𑀦𑀓𑀸 𑀕𑀦𑁆𑀥𑀸𑀯𑁂𑀴𑀸 𑀕𑀦𑁆𑀥𑀤𑀸𑀫𑀸 𑀘 𑀑𑀮𑀫𑁆𑀩𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁩. 𑀢𑀲𑁆𑀫𑀺𑀁𑀬𑁂𑀯 𑀧𑀸𑀲𑀸𑀤𑁂 𑀲𑀢𑁆𑀢𑀭𑀢𑀦𑀪𑀽𑀲𑀺𑀢𑀸 𑀲𑀢𑁆𑀢𑀭𑀢𑀦𑁂𑀳𑀺 𑀲𑁄𑀪𑀺𑀢𑀸 𑀓𑀽𑀝𑀸𑀕𑀸𑀭𑀸. 𑀓𑀺𑀁 𑀪𑀽𑀢𑀸? 𑀦𑀻𑀮𑀸 𑀦𑀻𑀮𑀯𑀡𑁆𑀡𑀸, 𑀧𑀻𑀢𑀸 𑀧𑀻𑀢𑀯𑀡𑁆𑀡𑀸 𑀲𑀼𑀯𑀡𑁆𑀡𑀯𑀡𑁆𑀡𑀸, 𑀮𑁄𑀳𑀺𑀢𑀓𑀸 𑀮𑁄𑀳𑀺𑀢𑀓𑀯𑀡𑁆𑀡𑀸 𑀭𑀢𑁆𑀢𑀯𑀡𑁆𑀡𑀸, 𑀑𑀤𑀸𑀢𑀸 𑀑𑀤𑀸𑀢𑀯𑀡𑁆𑀡𑀸 𑀲𑁂𑀢𑀯𑀡𑁆𑀡𑀸, 𑀲𑀼𑀤𑁆𑀥𑀓𑀸𑀴𑀓𑀸 𑀅𑀫𑀺𑀲𑁆𑀲𑀓𑀸𑀴𑀯𑀡𑁆𑀡𑀸, 𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀸 𑀓𑀽𑀝𑀸𑀕𑀸𑀭𑀯𑀭𑁂𑀳𑀺 𑀓𑀡𑁆𑀡𑀺𑀓𑀓𑀽𑀝𑀸𑀕𑀸𑀭𑀯𑀭𑁂𑀳𑀺 𑀉𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄 𑀲𑁄 𑀧𑀸𑀲𑀸𑀤𑁄𑀢𑀺 𑀅𑀢𑁆𑀣𑁄.

𑁧𑁪. 𑀢𑀲𑁆𑀫𑀺𑀁𑀬𑁂𑀯 𑀧𑀸𑀲𑀸𑀤𑁂 𑀑𑀮𑁄𑀓𑀫𑀬𑀸 𑀉𑀤𑁆𑀥𑀫𑁆𑀫𑀼𑀔𑀸 𑀧𑀤𑀼𑀫𑀸 𑀲𑀼𑀧𑀼𑀧𑁆𑀨𑀺𑀢𑀸 𑀧𑀤𑀼𑀫𑀸 𑀲𑁄𑀪𑀦𑁆𑀢𑀺, 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀯𑀸𑀴𑀫𑀺𑀕𑀕𑀡𑁂𑀳𑀺 𑀘 𑀳𑀁𑀲𑀓𑁄𑀜𑁆𑀘𑀫𑀬𑀽𑀭𑀸𑀤𑀺𑀧𑀓𑁆𑀔𑀺𑀲𑀫𑀽𑀳𑁂𑀳𑀺 𑀘 𑀲𑁄𑀪𑀺𑀢𑁄 𑀲𑁄 𑀧𑀸𑀲𑀸𑀤𑁄𑀢𑀺 𑀅𑀢𑁆𑀣𑁄. 𑀅𑀢𑀺𑀉𑀘𑁆𑀘𑁄 𑀳𑀼𑀢𑁆𑀯𑀸 𑀦𑀪𑀫𑀼𑀕𑁆𑀕𑀢𑀢𑁆𑀢𑀸 𑀦𑀓𑁆𑀔𑀢𑁆𑀢𑀢𑀸𑀭𑀓𑀸𑀳𑀺 𑀆𑀓𑀺𑀡𑁆𑀡𑁄 𑀘𑀦𑁆𑀤𑀲𑀽𑀭𑁂𑀳𑀺 𑀘𑀦𑁆𑀤𑀲𑀽𑀭𑀺𑀬𑀭𑀽𑀧𑁂𑀳𑀺 𑀘 𑀫𑀡𑁆𑀟𑀺𑀢𑁄 𑀲𑁄 𑀧𑀸𑀲𑀸𑀤𑁄𑀢𑀺 𑀅𑀢𑁆𑀣𑁄.

𑁧𑁫. 𑀲𑁄 𑀏𑀯 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀲𑀸𑀤𑁄 𑀳𑁂𑀫𑀚𑀸𑀮𑁂𑀦 𑀲𑀼𑀯𑀡𑁆𑀡𑀚𑀸𑀮𑁂𑀦 𑀲𑀜𑁆𑀙𑀦𑁆𑀦𑀸, 𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀓𑀸𑀬𑀼𑀢𑁄 𑀲𑀼𑀯𑀡𑁆𑀡𑀓𑀺𑀗𑁆𑀓𑀡𑀺𑀓𑀚𑀸𑀮𑁂𑀳𑀺 𑀬𑀼𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀫𑀦𑁄𑀭𑀫𑀸 𑀫𑀦𑀮𑁆𑀮𑀻𑀬𑀦𑀓𑀸 𑀲𑁄𑀡𑁆𑀡𑀫𑀸𑀮𑀸 𑀲𑀼𑀯𑀡𑁆𑀡𑀧𑀼𑀧𑁆𑀨𑀧𑀦𑁆𑀢𑀺𑀬𑁄 𑀯𑀸𑀢𑀯𑁂𑀕𑁂𑀦 𑀯𑀸𑀢𑀧𑁆𑀧𑀳𑀸𑀭𑁂𑀦 𑀓𑀽𑀚𑀦𑁆𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬. 𑀫𑀜𑁆𑀚𑁂𑀝𑁆𑀞𑀓𑀁 𑀫𑀜𑁆𑀚𑀺𑀝𑁆𑀞𑀯𑀡𑁆𑀡𑀁, 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀯𑀡𑁆𑀡𑀁, 𑀧𑀻𑀢𑀓𑀁 𑀧𑀻𑀢𑀯𑀡𑁆𑀡𑀁, 𑀳𑀭𑀺𑀧𑀺𑀜𑁆𑀚𑀭𑀁 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀜𑁆𑀚𑀭𑀯𑀡𑁆𑀡𑀜𑁆𑀘 𑀥𑀚𑀁 𑀦𑀸𑀦𑀸𑀭𑀗𑁆𑀕𑁂𑀳𑀺 𑀅𑀦𑁂𑀓𑁂𑀳𑀺 𑀯𑀡𑁆𑀡𑁂𑀳𑀺, 𑀲𑀫𑁆𑀧𑀻𑀢𑀁 𑀭𑀜𑁆𑀚𑀺𑀢𑀁 𑀥𑀚𑀁, 𑀉𑀲𑁆𑀲𑀺𑀢𑀁 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀉𑀲𑁆𑀲𑀸𑀧𑀺𑀢𑀁. 𑀥𑀚𑀫𑀸𑀮𑀺𑀦𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀥𑀚𑀫𑀸𑀮𑀸𑀬𑀼𑀢𑁆𑀢𑁄 𑀲𑁄 𑀧𑀸𑀲𑀸𑀤𑁄𑀢𑀺 𑀅𑀢𑁆𑀣𑁄.

𑁧𑁭. 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀅𑀢𑁆𑀣𑀭𑀡𑀸𑀤𑀬𑁄 𑀯𑀡𑁆𑀡𑁂𑀦𑁆𑀢𑁄 ‘‘𑀦 𑀦𑀁 𑀩𑀳𑀽’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀦𑀁 𑀧𑀸𑀲𑀸𑀤𑀁 𑀩𑀳𑀽𑀳𑀺 𑀅𑀯𑀺𑀚𑁆𑀚𑀫𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀦𑀸𑀦𑀸𑀲𑀬𑀦𑀯𑀺𑀘𑀺𑀢𑁆𑀢𑀸 𑀅𑀦𑁂𑀓𑁂𑀳𑀺 𑀅𑀢𑁆𑀣𑀭𑀡𑁂𑀳𑀺 𑀯𑀺𑀘𑀺𑀢𑁆𑀢𑀸 𑀲𑁄𑀪𑀺𑀢𑀸 𑀫𑀜𑁆𑀘𑀧𑀻𑀞𑀸𑀤𑀺𑀲𑀬𑀦𑀸 𑀅𑀦𑁂𑀓𑀲𑀢𑀸 𑀅𑀦𑁂𑀓𑀲𑀢𑀲𑀗𑁆𑀔𑁆𑀬𑀸, 𑀓𑀺𑀁 𑀪𑀽𑀢𑀸? 𑀨𑀮𑀺𑀓𑀸 𑀨𑀮𑀺𑀓𑀫𑀡𑀺𑀫𑀬𑀸 𑀨𑀮𑀺𑀓𑀸𑀳𑀺 𑀓𑀢𑀸, 𑀭𑀚𑀢𑀸𑀫𑀬𑀸 𑀭𑀚𑀢𑁂𑀳𑀺 𑀓𑀢𑀸, 𑀫𑀡𑀺𑀫𑀬𑀸 𑀦𑀻𑀮𑀫𑀡𑀻𑀳𑀺 𑀓𑀢𑀸, 𑀮𑁄𑀳𑀺𑀢𑀗𑁆𑀕𑀸 𑀭𑀢𑁆𑀢𑀚𑀸𑀢𑀺𑀫𑀡𑀻𑀳𑀺 𑀓𑀢𑀸, 𑀫𑀲𑀸𑀭𑀕𑀮𑁆𑀮𑀫𑀬𑀸 𑀓𑀩𑀭𑀯𑀡𑁆𑀡𑀫𑀡𑀻𑀳𑀺 𑀓𑀢𑀸, 𑀲𑀡𑁆𑀳𑀓𑀸𑀲𑀺𑀓𑀲𑀦𑁆𑀣𑀢𑀸 𑀲𑀡𑁆𑀳𑁂𑀳𑀺 𑀲𑀼𑀔𑀼𑀫𑁂𑀳𑀺 𑀓𑀸𑀲𑀺𑀓𑀯𑀢𑁆𑀣𑁂𑀳𑀺 𑀅𑀢𑁆𑀣𑀢𑀸.

𑁧𑁮. 𑀧𑀸𑀯𑀼𑀭𑀸𑀢𑀺 𑀧𑀸𑀯𑀼𑀭𑀡𑀸. 𑀓𑀻𑀤𑀺𑀲𑀸? 𑀓𑀫𑁆𑀩𑀮𑀸 𑀮𑁄𑀫𑀲𑀼𑀢𑁆𑀢𑁂𑀳𑀺 𑀓𑀢𑀸, 𑀤𑀼𑀓𑀽𑀮𑀸 𑀤𑀼𑀓𑀽𑀮𑀧𑀝𑁂𑀳𑀺 𑀓𑀢𑀸, 𑀘𑀻𑀦𑀸 𑀘𑀻𑀦𑀧𑀝𑁂𑀳𑀺 𑀓𑀢𑀸, 𑀧𑀢𑁆𑀢𑀼𑀡𑁆𑀡𑀸 𑀧𑀢𑁆𑀢𑀼𑀡𑁆𑀡𑀤𑁂𑀲𑁂 𑀚𑀸𑀢𑀧𑀝𑁂𑀳𑀺 𑀓𑀢𑀸, 𑀧𑀡𑁆𑀟𑀼 𑀧𑀡𑁆𑀟𑀼𑀯𑀡𑁆𑀡𑀸, 𑀯𑀺𑀘𑀺𑀢𑁆𑀢𑀢𑁆𑀣𑀭𑀡𑀁 𑀅𑀦𑁂𑀓𑁂𑀳𑀺 𑀅𑀢𑁆𑀣𑀭𑀡𑁂𑀳𑀺 𑀧𑀸𑀯𑀼𑀭𑀡𑁂𑀳𑀺 𑀘 𑀯𑀺𑀘𑀺𑀢𑁆𑀢𑀁, 𑀲𑀩𑁆𑀩𑀁 𑀲𑀬𑀦𑀁, 𑀫𑀦𑀲𑀸 𑀘𑀺𑀢𑁆𑀢𑁂𑀦, 𑀅𑀳𑀁 𑀧𑀜𑁆𑀜𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁯. 𑀢𑀤𑁂𑀯 𑀧𑀸𑀲𑀸𑀤𑀁 𑀯𑀡𑁆𑀡𑁂𑀦𑁆𑀢𑁄 ‘‘𑀢𑀸𑀲𑀼 𑀢𑀸𑀲𑁆𑀯𑁂𑀯 𑀪𑀽𑀫𑀻𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀦𑀓𑀽𑀝𑀮𑀗𑁆𑀓𑀢𑀦𑁆𑀢𑀺 𑀭𑀢𑀦𑀫𑀬𑀓𑀽𑀝𑁂𑀳𑀺 𑀭𑀢𑀦𑀓𑀡𑁆𑀡𑀺𑀓𑀸𑀳𑀺 𑀅𑀮𑀗𑁆𑀓𑀢𑀁 𑀲𑁄𑀪𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀡𑀺𑀯𑁂𑀭𑁄𑀘𑀦𑀸 𑀉𑀓𑁆𑀓𑀸𑀢𑀺 𑀯𑁂𑀭𑁄𑀘𑀦𑀫𑀡𑀻𑀳𑀺 𑀭𑀢𑁆𑀢𑀫𑀡𑀻𑀳𑀺 𑀓𑀢𑀸, 𑀉𑀓𑁆𑀓𑀸 𑀤𑀡𑁆𑀟𑀧𑀤𑀻𑀧𑀸. 𑀥𑀸𑀭𑀬𑀦𑁆𑀢𑀸 𑀲𑀼𑀢𑀺𑀝𑁆𑀞𑀭𑁂𑀢𑀺 𑀆𑀓𑀸𑀲𑁂 𑀲𑀼𑀝𑁆𑀞𑀼 𑀥𑀸𑀭𑀬𑀦𑁆𑀢𑀸 𑀕𑀡𑁆𑀳𑀦𑁆𑀢𑀸 𑀅𑀦𑁂𑀓𑀲𑀢𑀚𑀦𑀸 𑀲𑀼𑀝𑁆𑀞𑀼 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁦. 𑀧𑀼𑀦 𑀢𑀤𑁂𑀯 𑀧𑀸𑀲𑀸𑀤𑀁 𑀯𑀡𑁆𑀡𑁂𑀦𑁆𑀢𑁄 ‘‘𑀲𑁄𑀪𑀦𑁆𑀢𑀺 𑀏𑀲𑀺𑀓𑀸𑀣𑀫𑁆𑀪𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀺𑀓𑀸𑀣𑀫𑁆𑀪𑀸 𑀦𑀸𑀫 𑀦𑀕𑀭𑀤𑁆𑀯𑀸𑀭𑁂 𑀲𑁄𑀪𑀦𑀢𑁆𑀣𑀸𑀬 𑀦𑀺𑀔𑀸𑀢𑀸 𑀣𑀫𑁆𑀪𑀸, 𑀲𑀼𑀪𑀸 𑀇𑀝𑁆𑀞𑀸, 𑀓𑀜𑁆𑀘𑀦𑀢𑁄𑀭𑀡𑀸 𑀲𑀼𑀯𑀡𑁆𑀡𑀫𑀬𑀸, 𑀚𑀫𑁆𑀩𑁄𑀦𑀤𑀸 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀫𑀬𑀸 𑀘, 𑀲𑀸𑀭𑀫𑀬𑀸 𑀔𑀤𑀺𑀭𑀭𑀼𑀓𑁆𑀔𑀲𑀸𑀭𑀫𑀬𑀸 𑀘 𑀭𑀚𑀢𑀫𑀬𑀸 𑀘 𑀢𑁄𑀭𑀡𑀸 𑀲𑁄𑀪𑀦𑁆𑀢𑀺, 𑀏𑀲𑀺𑀓𑀸 𑀘 𑀢𑁄𑀭𑀡𑀸 𑀘 𑀢𑀁 𑀧𑀸𑀲𑀸𑀤𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁧. 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀲𑀼𑀯𑀺𑀪𑀢𑁆𑀢𑀸 𑀅𑀦𑁂𑀓𑀸 𑀲𑀦𑁆𑀥𑀻 𑀓𑀯𑀸𑀝𑁂𑀳𑀺 𑀘 𑀅𑀕𑁆𑀕𑀴𑁂𑀳𑀺 𑀘 𑀘𑀺𑀢𑁆𑀢𑀺𑀢𑀸 𑀲𑁄𑀪𑀺𑀢𑀸 𑀲𑀦𑁆𑀥𑀺𑀧𑀭𑀺𑀓𑁆𑀔𑁂𑀧𑀸 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀉𑀪𑀢𑁄𑀢𑀺 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼, 𑀧𑀼𑀡𑁆𑀡𑀖𑀝𑀸 𑀅𑀦𑁂𑀓𑁂𑀳𑀺 𑀧𑀤𑀼𑀫𑁂𑀳𑀺 𑀅𑀦𑁂𑀓𑁂𑀳𑀺 𑀘 𑀉𑀧𑁆𑀧𑀮𑁂𑀳𑀺, 𑀲𑀁𑀬𑀼𑀢𑀸 𑀧𑀼𑀡𑁆𑀡𑀸 𑀢𑀁 𑀧𑀸𑀲𑀸𑀤𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁨-𑁨𑁩. 𑀏𑀯𑀁 𑀧𑀸𑀲𑀸𑀤𑀲𑁆𑀲 𑀲𑁄𑀪𑀁 𑀯𑀡𑁆𑀡𑁂𑀢𑁆𑀯𑀸 𑀭𑀢𑀦𑀫𑀬𑀁 𑀧𑀸𑀲𑀸𑀤𑀜𑁆𑀘 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀢𑀻𑀢𑁂 𑀲𑀩𑁆𑀩𑀩𑀼𑀤𑁆𑀥𑁂 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑀻𑀢𑁂𑀢𑀺 𑀅𑀢𑀺𑀓𑁆𑀓𑀦𑁆𑀢𑁂 𑀯𑀺𑀕𑀢𑁂 𑀓𑀸𑀮𑁂 𑀚𑀸𑀢𑁂 𑀪𑀽𑀢𑁂, 𑀲𑀲𑀗𑁆𑀖𑁂 𑀲𑀸𑀯𑀓𑀲𑀫𑀽𑀳𑀲𑀳𑀺𑀢𑁂, 𑀲𑀩𑁆𑀩𑁂 𑀮𑁄𑀓𑀦𑀸𑀬𑀓𑁂 𑀩𑀼𑀤𑁆𑀥𑁂 𑀲𑀪𑀸𑀯𑁂𑀦 𑀧𑀓𑀢𑀺𑀯𑀡𑁆𑀡𑁂𑀦 𑀭𑀽𑀧𑁂𑀦 𑀲𑀡𑁆𑀞𑀸𑀦𑁂𑀦 𑀘, 𑀲𑀲𑀸𑀯𑀓𑁂 𑀲𑀸𑀯𑀓𑀲𑀳𑀺𑀢𑁂, 𑀩𑀼𑀤𑁆𑀥𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀤𑁆𑀯𑀸𑀭𑁂𑀦 𑀧𑀸𑀲𑀸𑀤𑁄 𑀧𑀯𑀺𑀲𑀺𑀢𑀩𑁆𑀩𑁄 𑀳𑁄𑀢𑀺, 𑀢𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀲𑀲𑀸𑀯𑀓𑀸 𑀲𑀩𑁆𑀩𑁂 𑀩𑀼𑀤𑁆𑀥𑀸 𑀲𑀩𑁆𑀩𑀲𑁄𑀡𑁆𑀡𑀫𑀬𑁂 𑀲𑀓𑀮𑀲𑀼𑀯𑀡𑁆𑀡𑀫𑀬𑁂, 𑀧𑀻𑀞𑁂 𑀦𑀺𑀲𑀺𑀦𑁆𑀦𑀸 𑀅𑀭𑀺𑀬𑀫𑀡𑁆𑀟𑀮𑀸 𑀅𑀭𑀺𑀬𑀲𑀫𑀽𑀳𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁨𑁪-𑁨𑁫. 𑀏𑀢𑀭𑀳𑀺 𑀯𑀢𑁆𑀢𑀫𑀸𑀦𑁂 𑀓𑀸𑀮𑁂 𑀅𑀦𑀼𑀢𑁆𑀢𑀭𑀸 𑀉𑀢𑁆𑀢𑀭𑀯𑀺𑀭𑀳𑀺𑀢𑀸 𑀬𑁂 𑀘 𑀩𑀼𑀤𑁆𑀥𑀸 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑁂 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀦𑁂𑀓𑀲𑀢𑁂 𑀲𑀬𑀫𑁆𑀪𑀽 𑀲𑀬𑀫𑁂𑀯 𑀪𑀽𑀢𑁂 𑀅𑀜𑁆𑀜𑀸𑀘𑀭𑀺𑀬𑀭𑀳𑀺𑀢𑁂, 𑀅𑀧𑀭𑀸𑀚𑀺𑀢𑁂 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑁂𑀳𑀺 𑀅𑀧𑀭𑀸𑀚𑀺𑀢𑁂, 𑀚𑀬𑀫𑀸𑀧𑀦𑁆𑀦𑁂 𑀲𑀦𑁆𑀢𑀧𑁆𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀦𑀁 𑀫𑀬𑁆𑀳𑀁 𑀧𑀸𑀲𑀸𑀤𑀁 𑀅𑀢𑀻𑀢𑀓𑀸𑀮𑁂 𑀘 𑀯𑀢𑁆𑀢𑀫𑀸𑀦𑀓𑀸𑀮𑁂 𑀘, 𑀲𑀩𑁆𑀩𑁂 𑀩𑀼𑀤𑁆𑀥𑀸 𑀲𑀫𑀸𑀭𑀼𑀳𑀼𑀁 𑀲𑀁 𑀲𑀼𑀝𑁆𑀞𑀼 𑀆𑀭𑀼𑀳𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁨𑁬. 𑀬𑁂 𑀤𑀺𑀩𑁆𑀩𑀸 𑀤𑀺𑀯𑀺 𑀪𑀯𑀸 𑀤𑀺𑀩𑁆𑀩𑀸 𑀤𑁂𑀯𑀮𑁄𑀓𑁂 𑀚𑀸𑀢𑀸, 𑀬𑁂 𑀘 𑀩𑀳𑀽 𑀓𑀧𑁆𑀧𑀭𑀼𑀓𑁆𑀔𑀸 𑀅𑀢𑁆𑀣𑀺. 𑀬𑁂 𑀘 𑀫𑀸𑀦𑀼𑀲𑀸 𑀫𑀦𑀼𑀲𑁆𑀲𑁂 𑀚𑀸𑀢𑀸 𑀬𑁂 𑀘 𑀩𑀳𑀽 𑀓𑀧𑁆𑀧𑀭𑀼𑀓𑁆𑀔𑀸 𑀅𑀢𑁆𑀣𑀺, 𑀢𑀢𑁄 𑀲𑀩𑁆𑀩𑀁 𑀤𑀼𑀲𑁆𑀲𑀁 𑀲𑀫𑀸𑀳𑀦𑁆𑀢𑁆𑀯𑀸 𑀲𑀁 𑀲𑀼𑀝𑁆𑀞𑀼 𑀆𑀳𑀭𑀺𑀢𑁆𑀯𑀸 𑀢𑁂𑀘𑀻𑀯𑀭𑀸𑀦𑀺 𑀓𑀸𑀭𑁂𑀢𑁆𑀯𑀸 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀢𑀺𑀘𑀻𑀯𑀭𑁂𑀳𑀺 𑀅𑀘𑁆𑀙𑀸𑀤𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁭. 𑀏𑀯𑀁 𑀢𑀺𑀘𑀻𑀯𑀭𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀸𑀭𑀼𑀧𑀸𑀧𑁂𑀢𑁆𑀯𑀸 𑀢𑁂𑀲𑀁 𑀦𑀺𑀲𑀺𑀦𑁆𑀦𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀫𑁆𑀧𑀦𑁆𑀦𑀁 𑀫𑀥𑀼𑀭𑀁 𑀔𑀚𑁆𑀚𑀁 𑀔𑀸𑀤𑀺𑀢𑀩𑁆𑀩𑀁 𑀧𑀽𑀯𑀸𑀤𑀺 𑀓𑀺𑀜𑁆𑀘𑀺, 𑀫𑀥𑀼𑀭𑀁 𑀪𑁄𑀚𑁆𑀚𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀆𑀳𑀸𑀭𑀜𑁆𑀘, 𑀫𑀥𑀼𑀭𑀁 𑀲𑀸𑀬𑀦𑀻𑀬𑀁 𑀮𑁂𑀳𑀦𑀻𑀬𑀜𑁆𑀘, 𑀲𑀫𑁆𑀧𑀦𑁆𑀦𑀁 𑀫𑀥𑀼𑀭𑀁 𑀧𑀺𑀯𑀺𑀢𑀩𑁆𑀩𑀁 𑀅𑀝𑁆𑀞𑀧𑀸𑀦𑀜𑁆𑀘, 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀆𑀳𑀸𑀭𑀜𑁆𑀘, 𑀲𑀼𑀪𑁂 𑀲𑀼𑀦𑁆𑀤𑀭𑁂 𑀫𑀡𑀺𑀫𑀬𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀲𑀁 𑀲𑀼𑀝𑁆𑀞𑀼 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺𑀁 𑀧𑀝𑀺𑀕𑁆𑀕𑀳𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁮. 𑀲𑀩𑁆𑀩𑁂 𑀢𑁂 𑀅𑀭𑀺𑀬𑀫𑀡𑁆𑀟𑀮𑀸 𑀲𑀩𑁆𑀩𑁂 𑀢𑁂 𑀅𑀭𑀺𑀬𑀲𑀫𑀽𑀳𑀸, 𑀤𑀺𑀩𑁆𑀩𑀘𑀓𑁆𑀔𑀼 𑀲𑀫𑀸 𑀳𑀼𑀢𑁆𑀯𑀸 𑀫𑀝𑁆𑀞𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸 𑀫𑀝𑁆𑀞𑀸 𑀓𑀺𑀮𑁂𑀲𑁂𑀳𑀺 𑀭𑀳𑀺𑀢𑀢𑁆𑀢𑀸 𑀲𑀺𑀮𑀺𑀝𑁆𑀞𑀸 𑀲𑁄𑀪𑀫𑀸𑀦𑀸 𑀘𑀻𑀯𑀭𑀲𑀁𑀬𑀼𑀢𑀸 𑀢𑀺𑀘𑀻𑀯𑀭𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑀸 𑀫𑀥𑀼𑀭𑀲𑀓𑁆𑀔𑀭𑀸𑀳𑀺 𑀘 𑀢𑁂𑀮𑁂𑀦 𑀘 𑀫𑀥𑀼𑀨𑀸𑀡𑀺𑀢𑁂𑀳𑀺 𑀘 𑀧𑀭𑀫𑀦𑁆𑀦𑁂𑀦 𑀉𑀢𑁆𑀢𑀫𑁂𑀦 𑀅𑀦𑁆𑀦𑁂𑀦 𑀘 𑀫𑀬𑀸 𑀢𑀧𑁆𑀧𑀺𑀢𑀸 𑀅𑀧𑁆𑀧𑀺𑀢𑀸 𑀧𑀭𑀺𑀧𑀽𑀭𑀺𑀢𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁨𑁯. 𑀢𑁂 𑀏𑀯𑀁 𑀲𑀦𑁆𑀢𑀧𑁆𑀧𑀺𑀢𑀸 𑀅𑀭𑀺𑀬𑀫𑀡𑁆𑀟𑀮𑀸 𑀭𑀢𑀦𑀕𑀩𑁆𑀪𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀦𑀺𑀫𑁆𑀫𑀺𑀢𑀕𑀩𑁆𑀪𑀁 𑀕𑁂𑀳𑀁, 𑀧𑀯𑀺𑀲𑀺𑀢𑁆𑀯𑀸 𑀕𑀼𑀳𑀸𑀲𑀬𑀸 𑀕𑀼𑀳𑀸𑀬𑀁 𑀲𑀬𑀫𑀸𑀦𑀸, 𑀓𑁂𑀲𑀭𑀻𑀯 𑀓𑁂𑀲𑀭𑀲𑀻𑀳𑀸 𑀇𑀯, 𑀫𑀳𑀸𑀭𑀳𑀫𑁆𑀳𑀺 𑀲𑀬𑀦𑁂 𑀅𑀦𑀕𑁆𑀖𑁂 𑀫𑀜𑁆𑀘𑁂, 𑀲𑀻𑀳𑀲𑁂𑀬𑁆𑀬𑀫𑀓𑀧𑁆𑀧𑀬𑀼𑀁 𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀦𑁆𑀢𑁄 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀤𑀓𑁆𑀔𑀺𑀡𑀳𑀢𑁆𑀣𑀁 𑀲𑀻𑀲𑀽𑀧𑀥𑀸𑀦𑀁 𑀓𑀢𑁆𑀯𑀸 𑀯𑀸𑀫𑀳𑀢𑁆𑀣𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀯𑀸𑀮𑀥𑀺𑀁 𑀅𑀦𑁆𑀢𑀭𑀲𑀢𑁆𑀣𑀺𑀬𑀁 𑀓𑀢𑁆𑀯𑀸 𑀦𑀺𑀘𑁆𑀘𑀮𑁄 𑀲𑀬𑀢𑀺, 𑀏𑀯𑀁 𑀲𑁂𑀬𑁆𑀬𑀁 𑀓𑀧𑁆𑀧𑀬𑀼𑀁 𑀓𑀭𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁩𑁦. 𑀢𑁂 𑀏𑀯𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀚𑀸𑀦𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑁆𑀧𑀦𑁆𑀦𑀸. 𑀲𑀫𑀼𑀝𑁆𑀞𑀸𑀬 𑀲𑀁 𑀲𑀼𑀝𑁆𑀞𑀼 𑀉𑀝𑁆𑀞𑀳𑀺𑀢𑁆𑀯𑀸 𑀲𑀬𑀦𑁂 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀼𑀁 𑀊𑀭𑀼𑀩𑀤𑁆𑀥𑀸𑀲𑀦𑀁 𑀓𑀭𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁩𑁧. 𑀕𑁄𑀘𑀭𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀕𑁄𑀘𑀭𑀁 𑀆𑀭𑀫𑁆𑀫𑀡𑀪𑀽𑀢𑀁 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑀸 𑀛𑀸𑀦𑀭𑀢𑀺𑀬𑀸 𑀲𑀁 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄, 𑀅𑀜𑁆𑀜𑁂 𑀥𑀫𑁆𑀫𑀸𑀦𑀺 𑀤𑁂𑀲𑁂𑀦𑁆𑀢𑀻𑀢𑀺 𑀢𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀅𑀜𑁆𑀜𑁂 𑀏𑀓𑀘𑁆𑀘𑁂 𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑀺, 𑀅𑀜𑁆𑀜𑁂 𑀏𑀓𑀘𑁆𑀘𑁂 𑀇𑀤𑁆𑀥𑀺𑀬𑀸 𑀧𑀞𑀫𑀸𑀤𑀺𑀚𑁆𑀛𑀸𑀦𑀓𑀻𑀴𑀸𑀬 𑀓𑀻𑀴𑀦𑁆𑀢𑀺 𑀭𑀫𑀦𑁆𑀢𑀺.

𑁩𑁨. 𑀅𑀜𑁆𑀜𑁂 𑀏𑀓𑀘𑁆𑀘𑁂 𑀅𑀪𑀺𑀜𑁆𑀜𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀯𑀲𑀺𑀪𑀸𑀯𑀺𑀢𑀸 𑀯𑀲𑀻𑀓𑀭𑀺𑀁𑀲𑀼, 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀲𑀼 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀅𑀥𑀺𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑀸𑀳𑀺 𑀧𑀜𑁆𑀘𑀯𑀲𑀺𑀢𑀸𑀳𑀺 𑀯𑀲𑀻𑀪𑀸𑀯𑀁 𑀇𑀢𑀸 𑀕𑀢𑀸 𑀧𑀢𑁆𑀢𑀸 𑀅𑀪𑀺𑀜𑁆𑀜𑀸𑀬𑁄, 𑀅𑀧𑁆𑀧𑁂𑀦𑁆𑀢𑀺 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀅𑀜𑁆𑀜𑁂 𑀏𑀓𑀘𑁆𑀘𑁂 𑀅𑀦𑁂𑀓𑀲𑀳𑀲𑁆𑀲𑀺𑀬𑁄 𑀯𑀺𑀓𑀼𑀩𑁆𑀩𑀦𑀸𑀦𑀺 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀦𑀺 𑀯𑀺𑀓𑀼𑀩𑁆𑀩𑀦𑁆𑀢𑀺 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁩. 𑀩𑀼𑀤𑁆𑀥𑀸𑀧𑀺 𑀩𑀼𑀤𑁆𑀥𑁂𑀢𑀺 𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀁 𑀆𑀭𑀫𑁆𑀫𑀡𑀪𑀽𑀢𑀁 𑀧𑀜𑁆𑀳𑀁 𑀩𑀼𑀤𑁆𑀥𑀸 𑀩𑀼𑀤𑁆𑀥𑁂 𑀧𑀼𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀩𑀼𑀤𑁆𑀥𑀸 𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀬 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀲𑀼𑀔𑀼𑀫𑀁, 𑀞𑀸𑀦𑀁 𑀓𑀸𑀭𑀡𑀁, 𑀧𑀜𑁆𑀜𑀸𑀬 𑀯𑀺𑀦𑀺𑀩𑀼𑀚𑁆𑀛𑀭𑁂 𑀯𑀺𑀲𑁂𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀩𑀼𑀚𑁆𑀛𑀦𑁆𑀢𑀺.

𑁩𑁪. 𑀢𑀤𑀸 𑀫𑀫 𑀧𑀸𑀲𑀸𑀤𑁂 𑀲𑀦𑁆𑀦𑀺𑀧𑀢𑀺𑀢𑀸 𑀲𑀸𑀯𑀓𑀸𑀧𑀺 𑀩𑀼𑀤𑁆𑀥𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀩𑀼𑀤𑁆𑀥𑀸 𑀲𑀸𑀯𑀓𑁂 𑀲𑀺𑀲𑁆𑀲𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀢𑁂 𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺.

𑁩𑁫. 𑀧𑀼𑀦 𑀢𑁂 𑀲𑀩𑁆𑀩𑁂 𑀏𑀓𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀲𑀺𑀲𑁆𑀲𑀸 𑀧𑀭𑀺𑀘𑀸𑀭𑀓𑀸 𑀦𑀺𑀲𑁆𑀲𑀺𑀢𑀓𑀸 𑀏𑀢𑁂 𑀲𑀩𑁆𑀩𑁂, 𑀲𑀓𑀸𑀬 𑀲𑀓𑀸𑀬 𑀭𑀢𑀺𑀬𑀸 𑀭𑀫𑀫𑀸𑀦𑀸 𑀲𑀮𑁆𑀮𑀻𑀦𑀸 𑀫𑀫 𑀧𑀸𑀲𑀸𑀤𑁂 𑀅𑀪𑀺𑀭𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁬. 𑀏𑀯𑀁 𑀢𑀲𑁆𑀫𑀺𑀁 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀢𑀺𑀮𑁄𑀓𑀯𑀺𑀚𑀬𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 ‘‘𑀙𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀼 𑀭𑀢𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀦𑀸 𑀲𑀢𑁆𑀢𑀭𑀢𑀦𑀫𑀬𑀸, 𑀙𑀢𑁆𑀢𑀸 𑀓𑀜𑁆𑀘𑀦𑀸𑀯𑁂𑀴𑀧𑀦𑁆𑀢𑀺𑀓𑀸 𑀲𑀼𑀯𑀡𑁆𑀡𑀚𑀸𑀮𑁂𑀳𑀺 𑀑𑀮𑀫𑁆𑀩𑀺𑀢𑀸 𑀢𑀺𑀝𑁆𑀞𑀦𑁆𑀢𑀼. 𑀫𑀼𑀢𑁆𑀢𑀸𑀚𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑀸 𑀫𑀼𑀢𑁆𑀢𑀸𑀚𑀸𑀮𑁂𑀳𑀺 𑀧𑀭𑀺𑀯𑀸𑀭𑀺𑀢𑀸, 𑀲𑀩𑁆𑀩𑁂 𑀙𑀢𑁆𑀢𑀸 𑀫𑀫 𑀫𑀢𑁆𑀣𑀓𑁂 𑀫𑀼𑀤𑁆𑀥𑀦𑀺, 𑀥𑀸𑀭𑁂𑀦𑁆𑀢𑀽𑀢𑀺 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀬𑁂𑀯 𑀙𑀢𑁆𑀢𑀸 𑀧𑀸𑀢𑀼𑀪𑀽𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁭. 𑀲𑁄𑀡𑁆𑀡𑀢𑀸𑀭𑀓𑀘𑀺𑀢𑁆𑀢𑀺𑀢𑀸 𑀲𑀼𑀯𑀡𑁆𑀡𑀢𑀸𑀭𑀓𑀸𑀳𑀺 𑀤𑀤𑁆𑀤𑀮𑁆𑀮𑀫𑀸𑀦𑀸 𑀘𑁂𑀮𑀯𑀺𑀢𑀸𑀦𑀸 𑀪𑀯𑀦𑁆𑀢𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀼. 𑀯𑀺𑀘𑀺𑀢𑁆𑀢𑀸 𑀅𑀦𑁂𑀓𑀯𑀡𑁆𑀡𑀸, 𑀫𑀮𑁆𑀬𑀯𑀺𑀢𑀢𑀸 𑀧𑀼𑀧𑁆𑀨𑀧𑀢𑁆𑀣𑀝𑀸, 𑀲𑀩𑁆𑀩𑁂 𑀅𑀦𑁂𑀓𑀯𑀺𑀢𑀸𑀦𑀸, 𑀫𑀢𑁆𑀣𑀓𑁂 𑀦𑀺𑀲𑀻𑀤𑀦𑀝𑁆𑀞𑀸𑀦𑀲𑁆𑀲 𑀉𑀧𑀭𑀺𑀪𑀸𑀕𑁂 𑀥𑀸𑀭𑁂𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁩𑁮-𑁪𑁦. 𑀫𑀮𑁆𑀬𑀤𑀸𑀫𑁂𑀳𑀺 𑀅𑀦𑁂𑀓𑀲𑀼𑀕𑀦𑁆𑀥𑀧𑀼𑀧𑁆𑀨𑀤𑀸𑀫𑁂𑀳𑀺 𑀯𑀺𑀢𑀢𑀸 𑀧𑀭𑀺𑀓𑀺𑀡𑁆𑀡𑀸, 𑀕𑀦𑁆𑀥𑀤𑀸𑀫𑁂𑀳𑀺 𑀘𑀦𑁆𑀤𑀦𑀓𑀼𑀗𑁆𑀓𑀼𑀫𑀢𑀕𑀭𑀸𑀤𑀺𑀲𑀼𑀕𑀦𑁆𑀥𑀤𑀸𑀫𑁂𑀳𑀺, 𑀲𑁄𑀪𑀺𑀢𑀸 𑀧𑁄𑀓𑁆𑀔𑀭𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀲𑁆𑀲𑀤𑀸𑀫𑁂𑀳𑀺 𑀧𑀢𑁆𑀢𑀼𑀡𑁆𑀡𑀘𑀻𑀦𑀸𑀤𑀺𑀅𑀦𑀕𑁆𑀖𑀤𑀼𑀲𑁆𑀲𑀤𑀸𑀫𑁂𑀳𑀺, 𑀧𑀭𑀺𑀓𑀺𑀡𑁆𑀡𑀸 𑀲𑀢𑁆𑀢𑀭𑀢𑀦𑀤𑀸𑀫𑁂𑀳𑀺 𑀪𑀽𑀲𑀺𑀢𑀸 𑀅𑀮𑀗𑁆𑀓𑀢𑀸 𑀧𑁄𑀓𑁆𑀔𑀭𑀡𑀻, 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀸 𑀘𑀫𑁆𑀧𑀓𑀲𑀴𑀮𑀲𑁄𑀕𑀦𑁆𑀥𑀺𑀓𑀸𑀤𑀺𑀲𑀼𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀅𑀪𑀺𑀓𑀺𑀡𑁆𑀡𑀸 𑀲𑀼𑀝𑁆𑀞𑀼 𑀯𑀺𑀘𑀺𑀢𑁆𑀢𑀸 𑀲𑁄𑀪𑀺𑀢𑀸. 𑀧𑀼𑀦𑀭𑀧𑀺 𑀓𑀺𑀁 𑀪𑀽𑀢𑀸 𑀧𑁄𑀓𑁆𑀔𑀭𑀡𑀻? 𑀲𑀼𑀭𑀪𑀺𑀕𑀦𑁆𑀥𑀲𑀼𑀕𑀦𑁆𑀥𑁂𑀳𑀺 𑀪𑀽𑀲𑀺𑀢𑀸 𑀯𑀸𑀲𑀺𑀢𑀸. 𑀲𑀫𑀦𑁆𑀢𑀢𑁄 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀮𑀗𑁆𑀓𑀢𑀸 𑀧𑀜𑁆𑀘𑀳𑀺 𑀅𑀗𑁆𑀕𑀼𑀮𑁂𑀳𑀺 𑀮𑀺𑀫𑁆𑀧𑀺𑀢𑀕𑀦𑁆𑀥𑁂𑀳𑀺 𑀅𑀮𑀗𑁆𑀓𑀢𑀸, 𑀳𑁂𑀫𑀘𑁆𑀙𑀤𑀦𑀙𑀸𑀤𑀺𑀢𑀸 𑀲𑀼𑀯𑀡𑁆𑀡𑀙𑀤𑀦𑁂𑀳𑀺 𑀲𑀼𑀯𑀡𑁆𑀡𑀯𑀺𑀢𑀸𑀦𑁂𑀳𑀺 𑀙𑀸𑀤𑀺𑀢𑀸, 𑀧𑀸𑀲𑀸𑀤𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀸 𑀧𑁄𑀓𑁆𑀔𑀭𑀡𑀺𑀬𑁄 𑀧𑀤𑀼𑀫𑁂𑀳𑀺 𑀘 𑀉𑀧𑁆𑀧𑀮𑁂𑀳𑀺 𑀘 𑀲𑀼𑀝𑁆𑀞𑀼 𑀲𑀦𑁆𑀣𑀢𑀸 𑀧𑀢𑁆𑀣𑀝𑀸 𑀲𑀼𑀯𑀡𑁆𑀡𑀭𑀽𑀧𑁂 𑀲𑀼𑀯𑀡𑁆𑀡𑀯𑀡𑁆𑀡𑀸, 𑀔𑀸𑀬𑀦𑁆𑀢𑀼, 𑀧𑀤𑁆𑀫𑀭𑁂𑀡𑀼𑀭𑀚𑀼𑀕𑁆𑀕𑀢𑀸 𑀧𑀤𑀼𑀫𑀭𑁂𑀡𑀽𑀳𑀺 𑀥𑀽𑀮𑀻𑀳𑀺 𑀘 𑀆𑀓𑀺𑀡𑁆𑀡𑀸 𑀧𑁄𑀓𑁆𑀔𑀭𑀡𑀺𑀬𑁄 𑀲𑁄𑀪𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁧. 𑀫𑀫 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄 𑀧𑀸𑀤𑀧𑀸 𑀘𑀫𑁆𑀧𑀓𑀸𑀤𑀬𑁄 𑀭𑀼𑀓𑁆𑀔𑀸 𑀲𑀩𑁆𑀩𑁂 𑀧𑀼𑀧𑁆𑀨𑀦𑁆𑀢𑀼 𑀏𑀢𑁂 𑀧𑀼𑀧𑁆𑀨𑀭𑀼𑀓𑁆𑀔𑀸. 𑀲𑀬𑀫𑁂𑀯 𑀧𑀼𑀧𑁆𑀨𑀸 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀕𑀴𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀪𑀯𑀦𑀁 𑀑𑀓𑀺𑀭𑀼𑀁, 𑀑𑀓𑀺𑀡𑁆𑀡𑀸 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀓𑀭𑁄𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁨. 𑀢𑀢𑁆𑀣 𑀢𑀲𑁆𑀫𑀺𑀁 𑀫𑀫 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁂 𑀲𑀺𑀔𑀺𑀦𑁄 𑀫𑀬𑀽𑀭𑀸 𑀦𑀘𑁆𑀘𑀦𑁆𑀢𑀽, 𑀤𑀺𑀩𑁆𑀩𑀳𑀁𑀲𑀸 𑀤𑁂𑀯𑀢𑀸𑀳𑀁𑀲𑀸, 𑀧𑀓𑀽𑀚𑀭𑁂 𑀲𑀤𑁆𑀤𑀁 𑀓𑀭𑁄𑀦𑁆𑀢𑀼, 𑀓𑀭𑀯𑀻𑀓𑀸 𑀘 𑀫𑀥𑀼𑀭𑀲𑀤𑁆𑀤𑀸 𑀓𑁄𑀓𑀺𑀮𑀸 𑀕𑀸𑀬𑀦𑁆𑀢𑀼 𑀕𑀻𑀢𑀯𑀸𑀓𑁆𑀬𑀁 𑀓𑀭𑁄𑀦𑁆𑀢𑀼, 𑀅𑀧𑀭𑁂 𑀅𑀦𑀼𑀢𑁆𑀢𑀸 𑀘 𑀤𑀺𑀚𑀲𑀗𑁆𑀖𑀸 𑀧𑀓𑁆𑀔𑀺𑀦𑁄 𑀲𑀫𑀽𑀳𑀸 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄 𑀫𑀥𑀼𑀭𑀭𑀯𑀁 𑀭𑀯𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁩. 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀓𑁄 𑀲𑀩𑁆𑀩𑀸 𑀆𑀢𑀢𑀯𑀺𑀢𑀢𑀸𑀤𑀬𑁄 𑀪𑁂𑀭𑀺𑀬𑁄 𑀯𑀚𑁆𑀚𑀦𑁆𑀢𑀼 𑀳𑀜𑁆𑀜𑀦𑁆𑀢𑀼, 𑀲𑀩𑁆𑀩𑀸 𑀢𑀸 𑀅𑀦𑁂𑀓𑀢𑀦𑁆𑀢𑀺𑀬𑁄 𑀯𑀻𑀡𑀸 𑀭𑀲𑀦𑁆𑀢𑀼 𑀲𑀤𑁆𑀤𑀁 𑀓𑀭𑁄𑀦𑁆𑀢𑀼, 𑀲𑀩𑁆𑀩𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 𑀲𑀗𑁆𑀕𑀻𑀢𑀺𑀬𑁄 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄 𑀯𑀢𑁆𑀢𑀦𑁆𑀢𑀼 𑀧𑀯𑀢𑁆𑀢𑀦𑁆𑀢𑀼 𑀕𑀸𑀬𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁪-𑁫. 𑀬𑀸𑀯𑀢𑀸 𑀬𑀢𑁆𑀢𑀓𑁂 𑀞𑀸𑀦𑁂 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂 𑀢𑀢𑁄 𑀧𑀭𑁂 𑀘𑀓𑁆𑀓𑀯𑀸𑀴𑁂, 𑀚𑁄𑀢𑀺𑀲𑀫𑁆𑀧𑀦𑁆𑀦𑀸 𑀧𑀪𑀸𑀲𑀫𑁆𑀧𑀦𑁆𑀦𑀸 𑀅𑀘𑁆𑀙𑀺𑀦𑁆𑀦𑀸 𑀫𑀳𑀦𑁆𑀢𑀸 𑀲𑀫𑀦𑁆𑀢𑀢𑁄 𑀭𑀢𑀦𑀸𑀫𑀬𑀸 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀓𑀢𑀸 𑀔𑀘𑀺𑀢𑀸 𑀲𑁄𑀡𑁆𑀡𑀧𑀮𑁆𑀮𑀗𑁆𑀓𑀸 𑀲𑀼𑀯𑀡𑁆𑀡𑀧𑀮𑁆𑀮𑀗𑁆𑀓𑀸 𑀢𑀺𑀝𑁆𑀞𑀦𑁆𑀢𑀼, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄 𑀤𑀻𑀧𑀭𑀼𑀓𑁆𑀔𑀸 𑀧𑀤𑀻𑀧𑀥𑀸𑀭𑀡𑀸 𑀢𑁂𑀮𑀭𑀼𑀓𑁆𑀔𑀸 𑀚𑀮𑀦𑁆𑀢𑀼, 𑀧𑀤𑀻𑀧𑁂𑀳𑀺 𑀧𑀚𑁆𑀚𑀮𑀦𑁆𑀢𑀼, 𑀤𑀲𑀲𑀳𑀲𑁆𑀲𑀺𑀧𑀭𑀫𑁆𑀧𑀭𑀸 𑀤𑀲𑀲𑀳𑀲𑁆𑀲𑀻𑀦𑀁 𑀧𑀭𑀫𑁆𑀧𑀭𑀸 𑀤𑀲𑀲𑀳𑀲𑁆𑀲𑀺𑀬𑁄 𑀏𑀓𑀧𑀚𑁆𑀚𑁄𑀢𑀸 𑀏𑀓𑀧𑀤𑀻𑀧𑀸 𑀯𑀺𑀬 𑀪𑀯𑀦𑁆𑀢𑀼 𑀉𑀚𑁆𑀚𑁄𑀢𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁬. 𑀦𑀘𑁆𑀘𑀕𑀻𑀢𑁂𑀲𑀼 𑀙𑁂𑀓𑀸 𑀕𑀡𑀺𑀓𑀸 𑀦𑀘𑁆𑀘𑀺𑀢𑁆𑀣𑀺𑀬𑁄 𑀘 𑀮𑀸𑀲𑀺𑀓𑀸 𑀫𑀼𑀔𑁂𑀦 𑀲𑀤𑁆𑀤𑀓𑀸𑀭𑀺𑀓𑀸 𑀘 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄 𑀦𑀘𑁆𑀘𑀦𑁆𑀢𑀼, 𑀅𑀘𑁆𑀙𑀭𑀸𑀕𑀡𑀸 𑀤𑁂𑀯𑀺𑀢𑁆𑀣𑀺𑀲𑀫𑀽𑀳𑀸 𑀦𑀘𑁆𑀘𑀦𑁆𑀢𑀼, 𑀦𑀸𑀦𑀸𑀭𑀗𑁆𑀕𑀸 𑀅𑀦𑁂𑀓𑀯𑀡𑁆𑀡𑀸 𑀦𑀸𑀦𑀸𑀭𑀗𑁆𑀕𑀫𑀡𑁆𑀟𑀮𑀸 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄 𑀦𑀘𑁆𑀘𑀦𑁆𑀢𑀼, 𑀧𑀤𑀺𑀲𑁆𑀲𑀦𑁆𑀢𑀼 𑀧𑀸𑀓𑀝𑀸 𑀳𑁄𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁭. 𑀢𑀤𑀸 𑀅𑀳𑀁 𑀢𑀺𑀮𑁄𑀓𑀯𑀺𑀚𑀬𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑀼𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑁂 𑀤𑀼𑀫𑀕𑁆𑀕𑁂 𑀭𑀼𑀓𑁆𑀔𑀕𑁆𑀕𑁂 𑀧𑀩𑁆𑀩𑀢𑀕𑁆𑀕𑁂 𑀳𑀺𑀫𑀯𑀦𑁆𑀢𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸𑀤𑀻𑀦𑀁 𑀅𑀕𑁆𑀕𑁂 𑀲𑀺𑀦𑁂𑀭𑀽𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀘 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀯𑀺𑀘𑀺𑀢𑁆𑀢𑀁 𑀅𑀦𑁂𑀓𑀯𑀡𑁆𑀡𑀯𑀺𑀘𑀺𑀢𑁆𑀢𑀁 𑀧𑀜𑁆𑀘𑀯𑀡𑁆𑀡𑀺𑀓𑀁 𑀦𑀻𑀮𑀧𑀻𑀢𑀸𑀤𑀺𑀧𑀜𑁆𑀘𑀯𑀡𑁆𑀡𑀁 𑀲𑀩𑁆𑀩𑀁 𑀥𑀚𑀁 𑀉𑀲𑁆𑀲𑀸𑀧𑁂𑀫𑀻𑀢𑀺 𑀅𑀢𑁆𑀣𑁄.

𑁪𑁮. 𑀦𑀭𑀸 𑀮𑁄𑀓𑀦𑁆𑀢𑀭𑀸 𑀦𑀭𑀸 𑀘 𑀦𑀸𑀕𑀮𑁄𑀓𑀢𑁄 𑀦𑀸𑀕𑀸 𑀘 𑀤𑁂𑀯𑀮𑁄𑀓𑀢𑁄 𑀕𑀦𑁆𑀥𑀩𑁆𑀩𑀸 𑀘 𑀤𑁂𑀯𑀸 𑀘 𑀲𑀩𑁆𑀩𑁂 𑀉𑀧𑁂𑀦𑁆𑀢𑀼 𑀉𑀧𑀕𑀘𑁆𑀙𑀦𑁆𑀢𑀼, 𑀢𑁂 𑀦𑀭𑀸𑀤𑀬𑁄 𑀦𑀫𑀲𑁆𑀲𑀦𑁆𑀢𑀸 𑀫𑀫 𑀦𑀫𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀧𑀜𑁆𑀚𑀮𑀺𑀓𑀸 𑀓𑀢𑀳𑀢𑁆𑀣𑀧𑀼𑀝𑀸 𑀫𑀫 𑀯𑁂𑀚𑀬𑀦𑁆𑀢𑀁 𑀧𑀸𑀲𑀸𑀤𑀁 𑀧𑀭𑀺𑀯𑀸𑀭𑀬𑀼𑀦𑁆𑀢𑀺 𑀅𑀢𑁆𑀣𑁄.

𑁪𑁯. 𑀏𑀯𑀁 𑀲𑁄 𑀢𑀺𑀮𑁄𑀓𑀯𑀺𑀚𑀬𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀧𑀸𑀲𑀸𑀤𑀲𑁆𑀲 𑀘 𑀅𑀢𑁆𑀢𑀦𑁄 𑀘 𑀆𑀦𑀼𑀪𑀸𑀯𑀁 𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀲𑀫𑁆𑀧𑀢𑁆𑀢𑀺𑀓𑀢𑀧𑀼𑀜𑁆𑀜𑀨𑀮𑀁 𑀲𑀫𑀸𑀤𑀧𑁂𑀦𑁆𑀢𑁄 ‘‘𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀓𑀫𑁆𑀫𑀲𑀗𑁆𑀔𑀸𑀢𑀁 𑀓𑀺𑀭𑀺𑀬𑀁 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀫𑀫 𑀫𑀬𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀫𑀦𑀲𑀸 𑀯𑀸 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀢𑀁 𑀢𑀺𑀤𑀲𑁂 𑀲𑀼𑀓𑀢𑀁 𑀲𑀼𑀝𑁆𑀞𑀼 𑀓𑀢𑀁, 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑁫𑁦. 𑀧𑀼𑀦 𑀲𑀫𑀸𑀤𑀧𑁂𑀦𑁆𑀢𑁄 ‘‘𑀬𑁂 𑀲𑀢𑁆𑀢𑀸 𑀲𑀜𑁆𑀜𑀺𑀦𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂 𑀲𑀢𑁆𑀢𑀸 𑀫𑀦𑀼𑀲𑁆𑀲𑀸 𑀯𑀸 𑀤𑁂𑀯𑀸 𑀯𑀸 𑀩𑁆𑀭𑀳𑁆𑀫𑀸𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀲𑀜𑁆𑀜𑀸𑀲𑀳𑀺𑀢𑀸 𑀅𑀢𑁆𑀣𑀺, 𑀬𑁂 𑀘 𑀲𑀢𑁆𑀢𑀸 𑀅𑀲𑀜𑁆𑀜𑀺𑀦𑁄 𑀲𑀜𑁆𑀜𑀸𑀭𑀳𑀺𑀢𑀸 𑀅𑀲𑀜𑁆𑀜𑀸 𑀲𑀢𑁆𑀢𑀸 𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀬𑁆𑀳𑀁 𑀫𑀬𑀸 𑀓𑀢𑀁 𑀧𑀼𑀜𑁆𑀜𑀨𑀮𑀁, 𑀪𑀸𑀕𑀻 𑀪𑀯𑀦𑁆𑀢𑀼 𑀧𑀼𑀜𑁆𑀜𑀯𑀦𑁆𑀢𑀸 𑀳𑁄𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁫𑁧. 𑀧𑀼𑀦𑀧𑀺 𑀲𑀫𑀸𑀤𑀧𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 ‘‘𑀬𑁂𑀲𑀁 𑀓𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀫𑀬𑀸 𑀓𑀢𑀁 𑀧𑀼𑀜𑁆𑀜𑀁 𑀬𑁂𑀳𑀺 𑀦𑀭𑀦𑀸𑀕𑀕𑀦𑁆𑀥𑀩𑁆𑀩𑀤𑁂𑀯𑁂𑀳𑀺 𑀲𑀼𑀯𑀺𑀤𑀺𑀢𑀁 𑀜𑀸𑀢𑀁, 𑀢𑁂𑀲𑀁 𑀫𑀬𑀸 𑀤𑀺𑀦𑁆𑀦𑀁 𑀧𑀼𑀜𑁆𑀜𑀨𑀮𑀁, 𑀢𑀲𑁆𑀫𑀺𑀁 𑀫𑀬𑀸 𑀓𑀢𑁂 𑀧𑀼𑀜𑁆𑀜𑁂 𑀤𑀺𑀦𑁆𑀦𑀪𑀸𑀯𑀁 𑀬𑁂 𑀦𑀭𑀸𑀤𑀬𑁄 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀢𑀁 𑀦𑀺𑀯𑁂𑀤𑀬𑀼𑀁 𑀆𑀭𑁄𑀘𑀬𑀼𑀦𑁆𑀢𑀺 𑀅𑀢𑁆𑀣𑁄.

𑁫𑁨. 𑀲𑀩𑁆𑀩𑀮𑁄𑀓𑀫𑁆𑀳𑀺 𑀬𑁂 𑀲𑀢𑁆𑀢𑀸 𑀆𑀳𑀸𑀭𑀦𑀺𑀲𑁆𑀲𑀺𑀢𑀸 𑀚𑀻𑀯𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀦𑀼𑀜𑁆𑀜𑀁 𑀪𑁄𑀚𑀦𑀁 𑀲𑀩𑁆𑀩𑀁 𑀫𑀫 𑀘𑁂𑀢𑀲𑀸 𑀫𑀫 𑀘𑀺𑀢𑁆𑀢𑁂𑀦 𑀮𑀪𑀦𑁆𑀢𑀼, 𑀫𑀫 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀮𑀪𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁫𑁩. 𑀫𑀦𑀲𑀸 𑀧𑀲𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀬𑀁 𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁 𑀢𑀲𑁆𑀫𑀺𑀁 𑀤𑀸𑀦𑁂 𑀘𑀺𑀢𑁆𑀢𑁂𑀦 𑀧𑀲𑀸𑀤𑀁 𑀆𑀯𑀳𑀺𑀁 𑀉𑀧𑁆𑀧𑀸𑀤𑁂𑀲𑀺𑀁. 𑀲𑀩𑁆𑀩𑀲𑀫𑁆𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀸 𑀧𑀝𑀺𑀏𑀓𑁆𑀓𑀸 𑀚𑀺𑀦𑀲𑀸𑀯𑀓𑀸 𑀘 𑀫𑀬𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑀸 𑀧𑀽𑀚𑀺𑀢𑀸.

𑁫𑁪. 𑀲𑀼𑀓𑀢𑁂𑀦 𑀢𑁂𑀦 𑀓𑀫𑁆𑀫𑁂𑀦 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑁂𑀦 𑀓𑀼𑀲𑀮𑀓𑀫𑁆𑀫𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘 𑀘𑀺𑀢𑁆𑀢𑁂𑀦 𑀓𑀢𑀧𑀢𑁆𑀣𑀦𑀸𑀳𑀺 𑀘, 𑀫𑀸𑀦𑀼𑀲𑀁 𑀤𑁂𑀳𑀁 𑀫𑀦𑀼𑀲𑁆𑀲𑀲𑀭𑀻𑀭𑀁, 𑀚𑀳𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸, 𑀅𑀳𑀁 𑀢𑀸𑀯𑀢𑀺𑀁𑀲𑀁 𑀤𑁂𑀯𑀮𑁄𑀓𑀁 𑀅𑀕𑀘𑁆𑀙𑀺𑀁 𑀅𑀕𑀫𑀸𑀲𑀺𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁫. 𑀢𑀢𑁄 𑀢𑀺𑀮𑁄𑀓𑀯𑀺𑀚𑀬𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀓𑀸𑀮𑀗𑁆𑀓𑀢𑁄, 𑀢𑀢𑁄 𑀧𑀝𑁆𑀞𑀸𑀬 𑀆𑀕𑀢𑁂 𑀤𑀼𑀯𑁂 𑀪𑀯𑁂 𑀤𑁆𑀯𑁂 𑀚𑀸𑀢𑀺𑀬𑁄 𑀧𑀚𑀸𑀦𑀸𑀫𑀺 𑀤𑁂𑀯𑀢𑁆𑀢𑁂 𑀤𑁂𑀯𑀢𑁆𑀢𑀪𑀸𑀯𑁂 𑀫𑀸𑀦𑀼𑀲𑁂 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀘, 𑀢𑀢𑁄 𑀚𑀸𑀢𑀺𑀤𑁆𑀯𑀬𑀢𑁄 𑀅𑀜𑁆𑀜𑀁 𑀕𑀢𑀺𑀁 𑀅𑀜𑁆𑀜𑀁 𑀉𑀧𑀧𑀢𑁆𑀢𑀺𑀁 𑀦 𑀚𑀸𑀦𑀸𑀫𑀺 𑀦 𑀧𑀲𑁆𑀲𑀸𑀫𑀺, 𑀫𑀦𑀲𑀸 𑀘𑀺𑀢𑁆𑀢𑁂𑀦 𑀧𑀢𑁆𑀣𑀦𑀸𑀨𑀮𑀁 𑀧𑀢𑁆𑀣𑀺𑀢𑀧𑀢𑁆𑀣𑀦𑀸𑀨𑀮𑀦𑁆𑀢𑀺 𑀅𑀢𑁆𑀣𑁄.

𑁫𑁬. 𑀤𑁂𑀯𑀸𑀦𑀁 𑀅𑀥𑀺𑀓𑁄 𑀳𑁄𑀫𑀻𑀢𑀺 𑀬𑀤𑀺 𑀤𑁂𑀯𑁂𑀲𑀼 𑀚𑀸𑀢𑁄, 𑀆𑀬𑀼𑀯𑀡𑁆𑀡𑀩𑀮𑀢𑁂𑀚𑁂𑀳𑀺 𑀤𑁂𑀯𑀸𑀦𑀁 𑀅𑀥𑀺𑀓𑁄 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑁄, 𑀫𑀦𑀼𑀚𑀸𑀥𑀺𑀧𑁄 𑀫𑀦𑀼𑀲𑁆𑀲𑀸𑀦𑀁 𑀅𑀥𑀺𑀧𑀢𑀺 𑀇𑀲𑁆𑀲𑀭𑁄 𑀪𑀯𑀸𑀫𑀺, 𑀢𑀣𑀸 𑀭𑀸𑀚𑀪𑀽𑀢𑁄 𑀅𑀪𑀺𑀭𑀽𑀧𑁂𑀦 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘 𑀮𑀓𑁆𑀔𑀡𑁂𑀦 𑀆𑀭𑁄𑀳𑀧𑀭𑀺𑀡𑀸𑀳𑀸𑀤𑀺𑀮𑀓𑁆𑀔𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄 𑀲𑀫𑁆𑀧𑀼𑀡𑁆𑀡𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀧𑀜𑁆𑀜𑀸𑀬 𑀧𑀭𑀫𑀢𑁆𑀣𑀚𑀸𑀦𑀦𑀧𑀜𑁆𑀜𑀸𑀬 𑀅𑀲𑀫𑁄 𑀲𑀫𑀭𑀳𑀺𑀢𑁄, 𑀫𑀬𑀸 𑀲𑀤𑀺𑀲𑁄 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁫𑁭. 𑀫𑀬𑀸 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁂𑀦 𑀧𑀼𑀜𑁆𑀜𑀨𑀮𑁂𑀦 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀲𑁂𑀝𑁆𑀞𑀁 𑀧𑀲𑀝𑁆𑀞𑀁 𑀫𑀥𑀼𑀭𑀁 𑀯𑀺𑀯𑀺𑀥𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀪𑁄𑀚𑀦𑀜𑁆𑀘 𑀅𑀦𑀧𑁆𑀧𑀓𑀁 𑀩𑀳𑀼𑀲𑀢𑁆𑀢𑀭𑀢𑀦𑀜𑁆𑀘 𑀯𑀺𑀯𑀺𑀥𑀸𑀦𑀺, 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀧𑀢𑁆𑀢𑀼𑀡𑁆𑀡𑀓𑁄𑀲𑁂𑀬𑁆𑀬𑀸𑀤𑀺𑀯𑀢𑁆𑀣𑀸𑀦𑀺 𑀘 𑀦𑀪𑀸 𑀆𑀓𑀸𑀲𑀢𑁄 𑀫𑀁 𑀫𑀫 𑀲𑀦𑁆𑀢𑀺𑀓𑀁 𑀔𑀺𑀧𑁆𑀧𑀁 𑀲𑀻𑀖𑀁 𑀉𑀧𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺.

𑁫𑁮-𑁬𑁬. 𑀧𑀣𑀩𑁆𑀬𑀸 𑀧𑀣𑀯𑀺𑀬𑀸 𑀧𑀩𑁆𑀩𑀢𑁂 𑀘 𑀆𑀓𑀸𑀲𑁂 𑀘 𑀉𑀤𑀓𑁂 𑀘 𑀯𑀦𑁂 𑀘 𑀬𑀁 𑀬𑀁 𑀬𑀢𑁆𑀣 𑀬𑀢𑁆𑀣 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺 𑀦𑀺𑀓𑁆𑀔𑀺𑀧𑀸𑀫𑀺, 𑀢𑀢𑁄 𑀢𑀢𑁄 𑀤𑀺𑀩𑁆𑀩𑀸 𑀪𑀓𑁆𑀔𑀸 𑀤𑀺𑀩𑁆𑀩𑀸 𑀆𑀳𑀸𑀭𑀸 𑀫𑀁 𑀫𑀫 𑀲𑀦𑁆𑀢𑀺𑀓𑀁 𑀉𑀧𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺, 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀬𑀣𑀸𑀓𑁆𑀓𑀫𑀁 𑀲𑀩𑁆𑀩𑁂 𑀭𑀢𑀦𑀸. 𑀲𑀩𑁆𑀩𑁂 𑀘𑀦𑁆𑀤𑀦𑀸𑀤𑀬𑁄 𑀕𑀦𑁆𑀥𑀸. 𑀲𑀩𑁆𑀩𑁂 𑀬𑀸𑀦𑀸 𑀯𑀸𑀳𑀦𑀸. 𑀲𑀩𑁆𑀩𑁂 𑀘𑀫𑁆𑀧𑀓𑀦𑀸𑀕𑀧𑀼𑀦𑁆𑀦𑀸𑀕𑀸𑀤𑀬𑁄 𑀫𑀸𑀮𑀸 𑀧𑀼𑀧𑁆𑀨𑀸. 𑀲𑀩𑁆𑀩𑁂 𑀅𑀮𑀗𑁆𑀓𑀸𑀭𑀸 𑀆𑀪𑀭𑀡𑀸. 𑀲𑀩𑁆𑀩𑀸 𑀤𑀺𑀩𑁆𑀩𑀓𑀜𑁆𑀜𑀸. 𑀲𑀩𑁆𑀩𑁂 𑀫𑀥𑀼𑀲𑀓𑁆𑀔𑀭𑀸. 𑀲𑀩𑁆𑀩𑁂 𑀧𑀽𑀧𑀸𑀤𑀬𑁄 𑀔𑀚𑁆𑀚𑀸 𑀔𑀸𑀤𑀺𑀢𑀩𑁆𑀩𑀸 𑀫𑀁 𑀫𑀫 𑀲𑀦𑁆𑀢𑀺𑀓𑀁 𑀉𑀧𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺.

𑁬𑁭-𑁬𑁮. 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸𑀢𑀺 𑀉𑀢𑁆𑀢𑀫𑀘𑀢𑀼𑀫𑀕𑁆𑀕𑀜𑀸𑀡𑀧𑀢𑁆𑀢𑀺𑀬𑀸 𑀧𑀸𑀧𑀼𑀡𑀦𑀢𑁆𑀣𑀸𑀬. 𑀫𑀬𑀸 𑀬𑀁 𑀉𑀢𑁆𑀢𑀫𑀤𑀸𑀦𑀁 𑀓𑀢𑀁 𑀧𑀽𑀭𑀺𑀢𑀁, 𑀢𑁂𑀦 𑀉𑀢𑁆𑀢𑀫𑀤𑀸𑀦𑁂𑀦 𑀲𑁂𑀮𑀲𑀗𑁆𑀔𑀸𑀢𑀁 𑀧𑀩𑁆𑀩𑀢𑀁 𑀲𑀓𑀮𑀁 𑀏𑀓𑀦𑀺𑀦𑁆𑀦𑀸𑀤𑀁 𑀓𑀭𑁄𑀦𑁆𑀢𑁄 𑀩𑀳𑀮𑀁 𑀕𑀺𑀭𑀁 𑀧𑀼𑀣𑀼𑀮𑀁 𑀖𑁄𑀲𑀁 𑀕𑀚𑁆𑀚𑁂𑀦𑁆𑀢𑁄, 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀓𑀮𑀁 𑀫𑀦𑀼𑀲𑁆𑀲𑀤𑁂𑀯𑀮𑁄𑀓𑀁 𑀳𑀸𑀲𑀬𑀦𑁆𑀢𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑁄 𑀮𑁄𑀓𑁂 𑀲𑀓𑀮𑀮𑁄𑀓𑀢𑁆𑀢𑀬𑁂 𑀯𑀺𑀯𑀝𑁆𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀅𑀳𑀁 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁯. 𑀤𑀺𑀲𑀸 𑀤𑀲𑀯𑀺𑀥𑀸 𑀮𑁄𑀓𑁂𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑁂 𑀤𑀲𑀯𑀺𑀥𑀸 𑀤𑀲𑀓𑁄𑀝𑁆𑀞𑀸𑀲𑀸 𑀤𑀺𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀓𑁄𑀝𑁆𑀞𑀸𑀲𑁂 𑀬𑀸𑀬𑀢𑁄 𑀬𑀸𑀬𑀦𑁆𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀓𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀢𑀲𑁆𑀫𑀺𑀁 𑀫𑀬𑀸 𑀕𑀢𑀕𑀢𑀝𑁆𑀞𑀸𑀦𑁂 𑀤𑀺𑀲𑀸𑀪𑀸𑀕𑁂 𑀯𑀸 𑀩𑀼𑀤𑁆𑀥𑀔𑁂𑀢𑁆𑀢𑀸 𑀩𑀼𑀤𑁆𑀥𑀯𑀺𑀲𑀬𑀸 𑀅𑀲𑀗𑁆𑀔𑀺𑀬𑀸 𑀲𑀗𑁆𑀔𑀸𑀭𑀳𑀺𑀢𑀸.

𑁭𑁦. 𑀧𑀪𑀸 𑀧𑀓𑀺𑀢𑁆𑀢𑀺𑀢𑀸𑀢𑀺 𑀢𑀤𑀸 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀸𑀮𑁂 𑀫𑀬𑁆𑀳𑀁 𑀧𑀪𑀸 𑀘𑀓𑁆𑀓𑀭𑀢𑀦𑀫𑀡𑀺𑀭𑀢𑀦𑀸𑀤𑀻𑀦𑀁 𑀧𑀪𑀸 𑀆𑀮𑁄𑀓𑀸 𑀬𑀫𑀓𑀸 𑀬𑀼𑀕𑀴𑀬𑀼𑀕𑀴𑀸 𑀳𑀼𑀢𑁆𑀯𑀸 𑀭𑀁𑀲𑀺𑀯𑀸𑀳𑀦𑀸 𑀭𑀁𑀲𑀺𑀁 𑀫𑀼𑀜𑁆𑀘𑀫𑀸𑀦𑀸 𑀧𑀓𑀺𑀢𑁆𑀢𑀺𑀢𑀸 𑀧𑀸𑀓𑀝𑀸, 𑀏𑀢𑁆𑀣𑀦𑁆𑀢𑀭𑁂 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑀦𑁆𑀢𑀭𑁂 𑀭𑀁𑀲𑀺𑀚𑀸𑀮𑀁 𑀭𑀁𑀲𑀺𑀲𑀫𑀽𑀳𑀁, 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀩𑀳𑀼𑀢𑀭𑁄 𑀪𑀯𑁂 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁭𑁧. 𑀏𑀢𑁆𑀢𑀓𑁂 𑀮𑁄𑀓𑀥𑀸𑀢𑀼𑀫𑁆𑀳𑀻𑀢𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 𑀚𑀦𑀸 𑀫𑀁 𑀧𑀲𑁆𑀲𑀦𑁆𑀢𑀼 𑀤𑀓𑁆𑀔𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂 𑀤𑁂𑀯𑀸 𑀬𑀸𑀯 𑀩𑁆𑀭𑀳𑁆𑀫𑀦𑀺𑀯𑁂𑀲𑀦𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑀼 𑀅𑀦𑀼𑀓𑀽𑀮𑀸 𑀪𑀯𑀦𑁆𑀢𑀼.

𑁭𑁨. 𑀯𑀺𑀲𑀺𑀝𑁆𑀞𑀫𑀥𑀼𑀦𑀸𑀤𑁂𑀦𑀸𑀢𑀺 𑀯𑀺𑀲𑀝𑁆𑀞𑁂𑀦 𑀫𑀥𑀼𑀭𑁂𑀦 𑀦𑀸𑀤𑁂𑀦, 𑀅𑀫𑀢𑀪𑁂𑀭𑀺𑀫𑀸𑀳𑀦𑀺𑀦𑁆𑀢𑀺 𑀅𑀫𑀢𑀪𑁂𑀭𑀺𑀁 𑀤𑁂𑀯𑀤𑀼𑀦𑁆𑀤𑀼𑀪𑀺𑀁 𑀧𑀳𑀭𑀺𑀁, 𑀏𑀢𑁆𑀣𑀦𑁆𑀢𑀭𑁂 𑀏𑀢𑀲𑁆𑀫𑀺𑀁 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑁂 𑀚𑀦𑀸 𑀫𑀦 𑀫𑀥𑀼𑀭𑀁 𑀕𑀺𑀭𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀼 𑀫𑀦𑀲𑀺 𑀓𑀭𑁄𑀦𑁆𑀢𑀼.

𑁭𑁩. 𑀥𑀫𑁆𑀫𑀫𑁂𑀖𑁂𑀦 𑀯𑀲𑁆𑀲𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀸𑀫𑀬𑁂𑀦 𑀦𑀸𑀤𑁂𑀦 𑀢𑀩𑁆𑀩𑁄𑀳𑀸𑀭𑀧𑀭𑀫𑀢𑁆𑀣𑀕𑀫𑁆𑀪𑀻𑀭𑀫𑀥𑀼𑀭𑀲𑀼𑀔𑀼𑀫𑀢𑁆𑀣𑀯𑀲𑁆𑀲𑁂 𑀯𑀲𑁆𑀲𑀦𑁆𑀢𑁂 𑀯𑀲𑁆𑀲𑀫𑀸𑀦𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑁂 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀆𑀤𑀬𑁄 𑀅𑀦𑀸𑀲𑀯𑀸 𑀦𑀺𑀓𑁆𑀓𑀺𑀮𑁂𑀲𑀸 𑀳𑁄𑀦𑁆𑀢𑀼 𑀪𑀯𑀦𑁆𑀢𑀼. 𑀬𑁂𑀢𑁆𑀣 𑀧𑀘𑁆𑀙𑀺𑀫𑀓𑀸 𑀲𑀢𑁆𑀢𑀸𑀢𑀺 𑀏𑀢𑁆𑀣 𑀏𑀢𑁂𑀲𑀼 𑀭𑀸𑀲𑀺𑀪𑀽𑀢𑁂𑀲𑀼 𑀘𑀢𑀽𑀲𑀼 𑀧𑀭𑀺𑀲𑀲𑀢𑁆𑀢𑁂𑀲𑀼 𑀬𑁂 𑀲𑀢𑁆𑀢𑀸 𑀧𑀘𑁆𑀙𑀺𑀫𑀓𑀸 𑀕𑀼𑀡𑀯𑀲𑁂𑀦 𑀳𑁂𑀝𑁆𑀞𑀺𑀫𑀓𑀸, 𑀢𑁂 𑀲𑀩𑁆𑀩𑁂 𑀲𑁄𑀢𑀸𑀧𑀦𑁆𑀦𑀸 𑀪𑀯𑀦𑁆𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁪. 𑀢𑀤𑀸 𑀢𑀺𑀮𑁄𑀓𑀯𑀺𑀚𑀬𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀸𑀮𑁂 𑀤𑀸𑀢𑀩𑁆𑀩𑀓𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁, 𑀤𑀸𑀦𑀁 𑀓𑀢𑁆𑀯𑀸, 𑀅𑀲𑁂𑀲𑀢𑁄 𑀦𑀺𑀲𑁆𑀲𑁂𑀲𑁂𑀦, 𑀲𑀻𑀮𑀁 𑀲𑀻𑀮𑀧𑀸𑀭𑀫𑀺𑀁, 𑀧𑀽𑀭𑁂𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑁂 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸𑀬, 𑀧𑀸𑀭𑀫𑀺𑀁 𑀓𑁄𑀝𑀺𑀁 𑀧𑀢𑁆𑀯𑀸, 𑀉𑀢𑁆𑀢𑀫𑀁 𑀲𑀫𑁆𑀩𑁄𑀥𑀺𑀁 𑀘𑀢𑀼𑀫𑀕𑁆𑀕𑀜𑀸𑀡𑀁, 𑀧𑀢𑁆𑀢𑁄 𑀪𑀯𑀸𑀫𑀺 𑀪𑀯𑁂𑀬𑁆𑀬𑀁.

𑁭𑁫. 𑀧𑀡𑁆𑀟𑀺𑀢𑁂 𑀧𑀜𑁆𑀜𑀯𑀦𑁆𑀢𑁂 𑀫𑁂𑀥𑀸𑀯𑀺𑀦𑁄 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑀢𑁆𑀢𑀩𑁆𑀩𑀁? 𑀓𑀺𑀁 𑀦 𑀓𑀢𑁆𑀢𑀩𑁆𑀩𑀁? 𑀓𑀺𑀁 𑀓𑀼𑀲𑀮𑀁? 𑀓𑀺𑀁 𑀅𑀓𑀼𑀲𑀮𑀁? 𑀓𑀺𑀁 𑀓𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀤𑁆𑀯𑀬𑀲𑁆𑀲 𑀪𑀸𑀕𑀻 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀏𑀯𑀁 𑀧𑀜𑁆𑀜𑀸𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀢𑁆𑀯𑀸 𑀯𑀻𑀭𑀺𑀬𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀅𑀯𑀺𑀘𑁆𑀙𑀺𑀦𑁆𑀦𑀁 𑀯𑀻𑀭𑀺𑀬𑀁 𑀓𑀢𑁆𑀯𑀸, 𑀯𑀻𑀭𑀺𑀬𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀓𑀮𑀯𑀺𑀭𑀼𑀤𑁆𑀥𑀚𑀦𑁂𑀳𑀺 𑀓𑀢𑀅𑀦𑀸𑀤𑀭𑀸𑀥𑀺𑀯𑀸𑀲𑀦𑀸𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀁 𑀓𑁄𑀝𑀺𑀁 𑀕𑀦𑁆𑀢𑁆𑀯𑀸 𑀔𑀦𑁆𑀢𑀺𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀉𑀢𑁆𑀢𑀫𑀁 𑀲𑀫𑁆𑀩𑁄𑀥𑀺𑀁 𑀉𑀢𑁆𑀢𑀫𑀁 𑀲𑀫𑁆𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀢𑁄 𑀪𑀯𑀸𑀫𑀺 𑀪𑀯𑁂𑀬𑁆𑀬𑀁.

𑁭𑁬. 𑀓𑀢𑁆𑀯𑀸 𑀤𑀴𑁆𑀳𑀫𑀥𑀺𑀝𑁆𑀞𑀸𑀦𑀦𑁆𑀢𑀺 ‘‘𑀫𑀫 𑀲𑀭𑀻𑀭𑀚𑀻𑀯𑀺𑀢𑁂𑀲𑀼 𑀯𑀺𑀦𑀲𑁆𑀲𑀦𑁆𑀢𑁂𑀲𑀼𑀧𑀺 𑀧𑀼𑀜𑁆𑀜𑀓𑀫𑁆𑀫𑀢𑁄 𑀦 𑀯𑀺𑀭𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀮𑀯𑀲𑁂𑀦 𑀤𑀴𑁆𑀳𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀓𑀢𑁆𑀯𑀸 ‘‘𑀲𑀻𑀲𑁂 𑀙𑀺𑀚𑁆𑀚𑀫𑀸𑀦𑁂𑀧𑀺 𑀫𑀼𑀲𑀸𑀯𑀸𑀤𑀁 𑀦 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀲𑀘𑁆𑀘𑀧𑀸𑀭𑀫𑀺𑀢𑀸𑀬 𑀓𑁄𑀝𑀺𑀁 𑀧𑀽𑀭𑀺𑀬 𑀧𑀽𑀭𑁂𑀢𑁆𑀯𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀻 𑀅𑀯𑁂𑀭𑀸’’𑀢𑀺𑀆𑀤𑀺𑀦𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀸𑀬 𑀓𑁄𑀝𑀺𑀁 𑀧𑀢𑁆𑀯𑀸 𑀉𑀢𑁆𑀢𑀫𑀁 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁭𑁭. 𑀲𑀚𑀻𑀯𑀓𑀸𑀚𑀻𑀯𑀓𑀯𑀢𑁆𑀣𑀽𑀦𑀁 𑀮𑀸𑀪𑁂 𑀘 𑀢𑁂𑀲𑀁 𑀅𑀮𑀸𑀪𑁂 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑁂 𑀘𑁂𑀯 𑀢𑀣𑀸 𑀤𑀼𑀓𑁆𑀔𑁂 𑀘 𑀲𑀸𑀤𑀭𑀚𑀦𑁂𑀳𑀺 𑀓𑀢𑁂, 𑀲𑀫𑁆𑀫𑀸𑀦𑁂 𑀘𑁂𑀯 𑀑𑀫𑀸𑀦𑁂, 𑀘 𑀲𑀩𑁆𑀩𑀢𑁆𑀣 𑀲𑀫𑀓𑁄 𑀲𑀫𑀸𑀦𑀫𑀸𑀦𑀲𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀉𑀢𑁆𑀢𑀫𑀁 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄 𑀧𑀸𑀧𑀼𑀡𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁭𑁮. 𑀓𑁄𑀲𑀚𑁆𑀚𑀁 𑀓𑀼𑀲𑀻𑀢𑀪𑀸𑀯𑀁, 𑀪𑀬𑀢𑁄 𑀪𑀬𑀯𑀲𑁂𑀦 ‘‘𑀅𑀧𑀸𑀬𑀤𑀼𑀓𑁆𑀔𑀪𑀸𑀕𑀻’’𑀢𑀺 𑀤𑀺𑀲𑁆𑀯𑀸 𑀜𑀢𑁆𑀯𑀸 𑀅𑀓𑁄𑀲𑀚𑁆𑀚𑀁 𑀅𑀓𑀼𑀲𑀻𑀢𑀪𑀸𑀯𑀁 𑀅𑀮𑀻𑀦𑀯𑀼𑀢𑁆𑀢𑀺𑀁, 𑀯𑀻𑀭𑀺𑀬𑀁 𑀔𑁂𑀫𑀢𑁄 𑀔𑁂𑀫𑀯𑀲𑁂𑀦 ‘‘𑀦𑀺𑀩𑁆𑀩𑀸𑀦𑀕𑀸𑀫𑀻’’𑀢𑀺 𑀤𑀺𑀲𑁆𑀯𑀸 𑀜𑀢𑁆𑀯𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀳𑁄𑀣 𑀪𑀯𑀣. 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻 𑀏𑀲𑀸 𑀩𑀼𑀤𑁆𑀥𑀸𑀦𑀁 𑀅𑀦𑀼𑀲𑀺𑀝𑁆𑀞𑀺.

𑁭𑁯. 𑀯𑀺𑀯𑀸𑀤𑀁 𑀪𑀬𑀢𑁄 𑀤𑀺𑀲𑁆𑀯𑀸𑀢𑀺 𑀯𑀺𑀯𑀸𑀤𑀁 𑀓𑀮𑀳𑀁 𑀪𑀬𑀢𑁄 𑀤𑀺𑀲𑁆𑀯𑀸 ‘‘𑀅𑀧𑀸𑀬𑀪𑀸𑀕𑀻’’𑀢𑀺 𑀤𑀺𑀲𑁆𑀯𑀸 𑀜𑀢𑁆𑀯𑀸 𑀅𑀯𑀺𑀯𑀸𑀤𑀁 𑀯𑀺𑀯𑀸𑀤𑀢𑁄 𑀯𑀺𑀭𑀫𑀡𑀁 ‘‘𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀻’’𑀢𑀺, 𑀔𑁂𑀫𑀢𑁄 𑀤𑀺𑀲𑁆𑀯𑀸 𑀜𑀢𑁆𑀯𑀸 𑀲𑀫𑀕𑁆𑀕𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀔𑀺𑀮𑀸 𑀲𑀺𑀮𑀺𑀝𑁆𑀞𑀸 𑀫𑁂𑀢𑁆𑀢𑀸𑀬 𑀥𑀼𑀭𑀕𑀢𑀸𑀬 𑀲𑁄𑀪𑀫𑀸𑀦𑀸 𑀳𑁄𑀣𑀸𑀢𑀺 𑀅𑀢𑁆𑀣𑁄. 𑀏𑀲𑀸 𑀓𑀣𑀸 𑀫𑀦𑁆𑀢𑀦𑀸 𑀉𑀤𑀻𑀭𑀡𑀸 𑀩𑀼𑀤𑁆𑀥𑀸𑀦𑀁 𑀅𑀦𑀼𑀲𑀸𑀲𑀦𑀻 𑀑𑀯𑀸𑀤𑀤𑀸𑀦𑀁.

𑁮𑁦. 𑀧𑀫𑀸𑀤𑀁 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀢𑀺𑀯𑀺𑀧𑁆𑀧𑀯𑀸𑀲𑁂𑀦 𑀯𑀺𑀳𑀭𑀡𑀁 𑀪𑀬𑀢𑁄 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂𑀲𑀼 𑀤𑀼𑀓𑁆𑀔𑀺𑀢𑀤𑀼𑀭𑀽𑀧𑀅𑀧𑁆𑀧𑀦𑁆𑀦𑀧𑀸𑀦𑀢𑀸𑀤𑀺𑀲𑀁𑀯𑀢𑁆𑀢𑀦𑀓𑀁 𑀅𑀧𑀸𑀬𑀸𑀤𑀺𑀕𑀫𑀦𑀜𑁆𑀘𑀸’’𑀢𑀺 𑀤𑀺𑀲𑁆𑀯𑀸 𑀜𑀢𑁆𑀯𑀸, 𑀅𑀧𑁆𑀧𑀫𑀸𑀤𑀁 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀲𑀢𑀺𑀬𑀸 𑀯𑀺𑀳𑀭𑀡𑀁, 𑀔𑁂𑀫𑀢𑁄 𑀯𑀟𑁆𑀠𑀺𑀢𑁄 ‘‘𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀼𑀡𑀦’’𑀦𑁆𑀢𑀺 𑀤𑀺𑀲𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀝𑁆𑀞𑀅𑀯𑀬𑀯𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀕𑁆𑀕𑀁 𑀅𑀥𑀺𑀕𑀫𑀽𑀧𑀸𑀬𑀁 𑀪𑀸𑀯𑁂𑀣 𑀯𑀟𑁆𑀠𑁂𑀣 𑀫𑀦𑀲𑀺 𑀓𑀭𑁄𑀣, 𑀏𑀲𑀸 𑀓𑀣𑀸 𑀪𑀸𑀲𑀦𑀸 𑀉𑀤𑀻𑀭𑀡𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻 𑀩𑀼𑀤𑁆𑀥𑀸𑀦𑀁 𑀅𑀦𑀼𑀲𑀺𑀝𑁆𑀞𑀻𑀢𑀺 𑀅𑀢𑁆𑀣𑁄.

𑁮𑁧. 𑀲𑀫𑀸𑀕𑀢𑀸 𑀩𑀳𑀽 𑀩𑀼𑀤𑁆𑀥𑀸𑀢𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀫𑀸𑀕𑀢𑀸 𑀭𑀸𑀲𑀺𑀪𑀽𑀢𑀸, 𑀲𑀩𑁆𑀩𑀲𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀅𑀭𑀳𑀦𑁆𑀢𑀸 𑀘 𑀔𑀻𑀡𑀸𑀲𑀯𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀲𑀫𑀸𑀕𑀢𑀸 𑀭𑀸𑀲𑀺𑀪𑀽𑀢𑀸. 𑀢𑀲𑁆𑀫𑀸 𑀢𑁂 𑀩𑀼𑀤𑁆𑀥𑁂 𑀘 𑀅𑀭𑀳𑀦𑁆𑀢𑁂 𑀘 𑀯𑀦𑁆𑀤𑀫𑀸𑀦𑁂 𑀯𑀦𑁆𑀤𑀦𑀸𑀭𑀳𑁂 𑀦𑀫𑀲𑁆𑀲𑀣 𑀅𑀗𑁆𑀕𑀧𑀘𑁆𑀘𑀗𑁆𑀕𑀦𑀫𑀓𑁆𑀓𑀸𑀭𑁂𑀦 𑀦𑀫𑀲𑁆𑀲𑀣 𑀯𑀦𑁆𑀤𑀣.

𑁮𑁨. 𑀏𑀯𑀁 𑀇𑀫𑀺𑀦𑀸 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀘𑀺𑀦𑁆𑀢𑀺𑀬𑀸 𑀘𑀺𑀦𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸, 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸𑀢𑀺 𑀩𑀼𑀤𑁆𑀥𑁂𑀳𑀺 𑀤𑁂𑀲𑀺𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺𑀆𑀤𑀬𑁄 𑀥𑀫𑁆𑀫𑀸, 𑀩𑀼𑀤𑁆𑀥𑀸𑀦𑀁 𑀯𑀸 𑀲𑀪𑀸𑀯𑀸 𑀅𑀘𑀺𑀦𑁆𑀢𑀺𑀬𑀸 𑀘𑀺𑀦𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸, 𑀅𑀘𑀺𑀦𑁆𑀢𑀺𑀬𑁂 𑀘𑀺𑀦𑁆𑀢𑀸𑀯𑀺𑀲𑀬𑀸𑀢𑀺𑀓𑁆𑀓𑀦𑁆𑀢𑁂 𑀧𑀲𑀦𑁆𑀦𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀧𑀸𑀓𑁄 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀘𑀺𑀦𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀲𑀗𑁆𑀔𑁆𑀬𑀸𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺 𑀪𑀯𑀢𑀺.

𑀇𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀬𑀣𑀸 𑀅𑀤𑁆𑀥𑀸𑀦𑀕𑀸𑀫𑀺𑀦𑁄 ‘‘𑀫𑀕𑁆𑀕𑀁 𑀦𑁄 𑀆𑀘𑀺𑀓𑁆𑀔𑀸’’𑀢𑀺 𑀧𑀼𑀝𑁆𑀞𑁂𑀦 ‘‘𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀫𑀕𑁆𑀕𑁂𑀦 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀫𑀼𑀜𑁆𑀘𑀺𑀢𑁂𑀦 𑀅𑀧𑀭𑁂𑀦 𑀯𑀸𑀫𑀫𑀕𑁆𑀕𑁂𑀦 𑀕𑀢𑀸𑀧𑀺 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀸𑀧𑀤𑀸𑀦𑀁 𑀓𑀼𑀲𑀮𑀸𑀧𑀤𑀸𑀦𑀯𑀲𑁂𑀦 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀅𑀓𑀼𑀲𑀮𑀸𑀧𑀤𑀸𑀦𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑀼𑀁 𑀇𑀤𑀁 𑀧𑀜𑁆𑀳𑀓𑀫𑁆𑀫𑀁 𑁋

‘‘𑀤𑀼𑀓𑁆𑀓𑀭𑀜𑁆𑀘 𑀅𑀩𑁆𑀪𑀓𑁆𑀔𑀸𑀦𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀧𑀼𑀦𑀸𑀧𑀭𑀁;

𑀅𑀩𑁆𑀪𑀓𑁆𑀔𑀸𑀦𑀁 𑀲𑀺𑀮𑀸𑀯𑁂𑀥𑁄, 𑀲𑀓𑀮𑀺𑀓𑀸𑀧𑀺 𑀘 𑀯𑁂𑀤𑀦𑀸.

‘‘𑀦𑀸𑀴𑀸𑀕𑀺𑀭𑀺 𑀲𑀢𑁆𑀢𑀘𑁆𑀙𑁂𑀤𑁄, 𑀲𑀻𑀲𑀤𑀼𑀓𑁆𑀔𑀁 𑀬𑀯𑀔𑀸𑀤𑀦𑀁;

𑀧𑀺𑀝𑁆𑀞𑀺𑀤𑀼𑀓𑁆𑀔𑀫𑀢𑀻𑀲𑀸𑀭𑁄, 𑀇𑀫𑁂 𑀅𑀓𑀼𑀲𑀮𑀓𑀸𑀭𑀡𑀸’’𑀢𑀺.

𑀅𑀢𑁆𑀣 𑀧𑀞𑀫𑀧𑀜𑁆𑀳𑁂 𑁋 𑀤𑀼𑀓𑁆𑀓𑀭𑀦𑁆𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸. 𑀅𑀢𑀻𑀢𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀯𑀲𑁂𑀦 𑀲𑀸𑀲𑀦𑁂 𑀅𑀧𑁆𑀧𑀲𑀦𑁆𑀦𑁄 𑀢𑀲𑁆𑀲 𑀪𑀕𑀯𑀢𑁄 𑀧𑀺𑀮𑁄𑀢𑀺𑀓𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 ‘‘𑀓𑀲𑁆𑀲𑀧𑁄 𑀪𑀕𑀯𑀸’’𑀢𑀺 𑀲𑀼𑀢𑁆𑀯𑀸 ‘‘𑀓𑀼𑀢𑁄 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀲𑁆𑀲 𑀩𑁄𑀥𑀺, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸’’𑀢𑀺 𑀆𑀳. 𑀲𑁄 𑀢𑁂𑀦 𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑁂𑀓𑀚𑀸𑀢𑀺𑀲𑀢𑁂𑀲𑀼 𑀦𑀭𑀓𑀸𑀤𑀺𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀅𑀦𑀦𑁆𑀢𑀭𑀁 𑀢𑁂𑀦𑁂𑀯 𑀮𑀤𑁆𑀥𑀩𑁆𑀬𑀸𑀓𑀭𑀡𑁂𑀦 𑀓𑀫𑁆𑀫𑁂𑀦 𑀚𑀸𑀢𑀺𑀲𑀁𑀲𑀸𑀭𑀁 𑀔𑁂𑀧𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀁 𑀧𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄. 𑀤𑁂𑀯𑀢𑀸𑀬𑀸𑀘𑀦𑁂𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀓𑁆𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀢𑁆𑀢𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀁 𑀧𑀳𑀸𑀬 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀲𑀼𑀦𑀺𑀲𑀺𑀢𑁂𑀦𑀸𑀲𑀺𑀦𑀸 𑀲𑀫𑀓𑀼𑀝𑀓𑁂𑀲𑀓𑀮𑀸𑀧𑀁 𑀙𑀺𑀦𑁆𑀤𑀺𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑀸 𑀆𑀦𑀻𑀢𑁂 𑀇𑀤𑁆𑀥𑀺𑀫𑀬𑁂 𑀓𑀧𑁆𑀧𑀲𑁆𑀲 𑀲𑀡𑁆𑀞𑀸𑀦𑀓𑀸𑀮𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑁂 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀩𑁄𑀥𑀺𑀜𑀸𑀡𑀤𑀲𑁆𑀲𑀦𑀲𑁆𑀲 𑀢𑀸𑀯 𑀅𑀧𑀭𑀺𑀧𑀓𑁆𑀓𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀸𑀬 𑀫𑀕𑁆𑀕𑀸𑀫𑀕𑁆𑀕𑀁 𑀅𑀚𑀸𑀦𑀺𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀉𑀭𑀼𑀯𑁂𑀮𑀚𑀦𑀧𑀤𑁂 𑀏𑀓𑀸𑀳𑀸𑀭𑀏𑀓𑀸𑀮𑁄𑀧𑀏𑀓𑀧𑀼𑀕𑁆𑀕𑀮𑀏𑀓𑀫𑀕𑁆𑀕𑀏𑀓𑀸𑀲𑀦𑀪𑁄𑀚𑀦𑀯𑀲𑁂𑀦 𑀅𑀝𑁆𑀞𑀺𑀘𑀫𑁆𑀫𑀦𑀳𑀸𑀭𑀼𑀲𑁂𑀲𑀁 𑀦𑀺𑀫𑁆𑀫𑀁𑀲𑀭𑀼𑀥𑀺𑀭𑀧𑁂𑀢𑀭𑀽𑀧𑀲𑀤𑀺𑀲𑀲𑀭𑀻𑀭𑁄 𑀧𑀥𑀸𑀦𑀲𑀼𑀢𑁆𑀢𑁂 (𑀲𑀼. 𑀦𑀺. 𑁪𑁨𑁭 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀥𑀸𑀦𑀁 𑀫𑀳𑀸𑀯𑀻𑀭𑀺𑀬𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀺. 𑀲𑁄 𑀇𑀫𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 ‘‘𑀲𑀫𑁆𑀩𑁄𑀥𑀺𑀬𑀸 𑀫𑀕𑁆𑀕𑀁 𑀦 𑀳𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀧𑀡𑀻𑀢𑀸𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀻𑀡𑀺𑀦𑁆𑀤𑁆𑀭𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁄 𑀓𑀫𑁂𑀦 𑀩𑁄𑀥𑀺𑀫𑀡𑁆𑀟𑀫𑀼𑀧𑀕𑀦𑁆𑀢𑁆𑀯𑀸 𑀧𑀜𑁆𑀘 𑀫𑀸𑀭𑁂 𑀚𑀺𑀦𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄𑀢𑀺.

‘‘𑀅𑀯𑀘𑀸𑀳𑀁 𑀚𑁄𑀢𑀺𑀧𑀸𑀮𑁄, 𑀲𑀼𑀕𑀢𑀁 𑀓𑀲𑁆𑀲𑀧𑀁 𑀢𑀤𑀸;

𑀓𑀼𑀢𑁄 𑀦𑀼 𑀩𑁄𑀥𑀺 𑀫𑀼𑀡𑁆𑀟𑀲𑁆𑀲, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀩𑀳𑀼𑀁;

𑀙𑀩𑁆𑀩𑀲𑁆𑀲𑀸𑀦𑀼𑀭𑀼𑀯𑁂𑀮𑀸𑀬𑀁, 𑀢𑀢𑁄 𑀩𑁄𑀥𑀺𑀫𑀧𑀸𑀧𑀼𑀡𑀺𑀁.

‘‘𑀦𑀸𑀳𑀁 𑀏𑀢𑁂𑀦 𑀫𑀕𑁆𑀕𑁂𑀦, 𑀧𑀸𑀧𑀼𑀡𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀼𑀫𑁆𑀫𑀕𑁆𑀕𑁂𑀦 𑀕𑀯𑁂𑀲𑀺𑀲𑁆𑀲𑀁, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀯𑀸𑀭𑀺𑀢𑁄.

‘‘𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀻𑀡𑁄, 𑀲𑀩𑁆𑀩𑀲𑀦𑁆𑀢𑀸𑀧𑀯𑀚𑁆𑀚𑀺𑀢𑁄;

𑀅𑀲𑁄𑀓𑁄 𑀅𑀦𑀼𑀧𑀸𑀬𑀸𑀲𑁄, 𑀦𑀺𑀩𑁆𑀩𑀸𑀬𑀺𑀲𑁆𑀲𑀫𑀦𑀸𑀲𑀯𑁄’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁯𑁨-𑁯𑁫);

𑀤𑀼𑀢𑀺𑀬𑀧𑀜𑁆𑀳𑁂 𑁋 𑀅𑀩𑁆𑀪𑀓𑁆𑀔𑀸𑀦𑀦𑁆𑀢𑀺 𑀅𑀪𑀺 𑀅𑀓𑁆𑀔𑀸𑀦𑀁 𑀧𑀭𑀺𑀪𑀸𑀲𑀦𑀁. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀲𑀼𑀤𑁆𑀤𑀓𑀼𑀮𑁂 𑀚𑀸𑀢𑁄 𑀅𑀧𑀸𑀓𑀝𑁄 𑀅𑀧𑁆𑀧𑀲𑀺𑀤𑁆𑀥𑁄 𑀫𑀼𑀦𑀸𑀴𑀺 𑀦𑀸𑀫 𑀥𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀝𑀺𑀯𑀲𑀢𑀺. 𑀢𑀤𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀲𑀼𑀭𑀪𑀺 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀢𑀲𑁆𑀲 𑀲𑀫𑀻𑀧𑀝𑁆𑀞𑀸𑀦𑀁 𑀧𑀸𑀧𑀼𑀡𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀬𑀁 𑀲𑀫𑀡𑁄’’𑀢𑀺𑀆𑀤𑀺𑀦𑀸 𑀅𑀩𑁆𑀪𑀸𑀘𑀺𑀓𑁆𑀔𑀺. 𑀲𑁄 𑀢𑁂𑀦 𑀅𑀓𑀼𑀲𑀮𑀦𑀺𑀲𑁆𑀲𑀦𑁆𑀤𑁂𑀦 𑀦𑀭𑀓𑀸𑀤𑀻𑀲𑀼 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀬𑀤𑀸 𑀢𑀺𑀢𑁆𑀣𑀺𑀬𑀸 𑀧𑀞𑀫𑀢𑀭𑀁 𑀪𑀕𑀯𑀢𑁄 𑀢𑀼𑀲𑀺𑀢𑀪𑀯𑀦𑁂 𑀯𑀲𑀦𑀲𑀫𑀬𑁂 𑀘 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀲𑀓𑀮𑀚𑀦𑀁 𑀯𑀜𑁆𑀘𑁂𑀢𑁆𑀯𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄 𑀤𑀻𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀢𑀤𑀸 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀫𑁂𑀦 𑀩𑀼𑀤𑁆𑀥𑁄 𑀚𑀸𑀢𑁄. 𑀢𑀺𑀢𑁆𑀣𑀺𑀬𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀯𑀺𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 𑀕𑀗𑁆𑀕𑀸𑀬 𑀚𑀸𑀮𑀁 𑀩𑀦𑁆𑀥𑀺𑀢𑁆𑀯𑀸 𑀓𑀻𑀴𑀦𑁆𑀢𑁄 𑀭𑀢𑁆𑀢𑀘𑀦𑁆𑀤𑀦𑀖𑀝𑀺𑀓𑀁 𑀤𑀺𑀲𑁆𑀯𑀸 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀘𑀦𑁆𑀤𑀦𑀸𑀦𑀺 𑀩𑀳𑀽𑀦𑀺, 𑀇𑀫𑀁 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀢𑁂𑀦 𑀪𑀫𑀓𑀸𑀭𑁂𑀳𑀺 𑀧𑀢𑁆𑀢𑀁 𑀮𑀺𑀔𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀮𑀕𑁆𑀕𑁂𑀢𑁆𑀯𑀸 ‘‘𑀬𑁂 𑀇𑀫𑀁 𑀧𑀢𑁆𑀢𑀁 𑀇𑀤𑁆𑀥𑀺𑀬𑀸 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀢𑁂𑀲𑀁 𑀪𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺.

𑀢𑀤𑀸 𑀢𑀺𑀢𑁆𑀣𑀺𑀬𑀸 ‘‘𑀦𑀝𑁆𑀞𑀫𑁆𑀳𑀸 𑀤𑀸𑀦𑀺 𑀦𑀝𑁆𑀞𑀫𑁆𑀳𑀸 𑀤𑀸𑀦𑀻’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀓𑀧𑀭𑀺𑀲𑀁 𑀏𑀯𑀫𑀸𑀳 𑁋 ‘‘𑀅𑀳𑀁 𑀯𑁂𑀴𑀼𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀉𑀮𑁆𑀮𑀗𑁆𑀕𑀦𑀸𑀓𑀸𑀭𑀁 𑀓𑀭𑁄𑀫𑀺, ‘𑀢𑀼𑀫𑁆𑀳𑁂 𑀙𑀯𑀤𑀸𑀭𑀼𑀫𑀬𑀁 𑀧𑀢𑁆𑀢𑀁 𑀧𑀝𑀺𑀘𑁆𑀘 𑀫𑀸 𑀇𑀤𑁆𑀥𑀺𑀁 𑀓𑀭𑁄𑀣𑀸’𑀢𑀺 𑀫𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀯𑀸𑀭𑁂𑀣𑀸’’𑀢𑀺, 𑀢𑁂 𑀢𑀣𑀸 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼.

𑀢𑀤𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀢𑀺𑀕𑀸𑀯𑀼𑀢𑁂 𑀲𑁂𑀮𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀕𑀡𑁆𑀳𑀦𑀢𑁆𑀣𑀸𑀬 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀸 𑀢𑀁 𑀓𑁄𑀮𑀸𑀳𑀮𑀁 𑀲𑀼𑀡𑀺𑀁𑀲𑀼. 𑀢𑁂𑀲𑀼 𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀁 ‘‘𑀢𑁆𑀯𑀁 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀧𑀢𑁆𑀢𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀬𑁂𑀯 𑀪𑀕𑀯𑀢𑀸 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀸, 𑀢𑀼𑀫𑁆𑀳𑁂𑀯 𑀕𑀡𑁆𑀳𑀣𑀸’’𑀢𑀺 𑀆𑀳. 𑀢𑀣𑀸𑀧𑀺 ‘‘𑀫𑀬𑀸 𑀆𑀡𑀢𑁆𑀢𑁄 𑀢𑁆𑀯𑀫𑁂𑀯 𑀕𑀡𑁆𑀳𑀸𑀳𑀻’’𑀢𑀺 𑀆𑀡𑀢𑁆𑀢𑁄 𑀅𑀢𑁆𑀢𑀦𑀸 𑀞𑀺𑀢𑀁 𑀢𑀺𑀕𑀸𑀯𑀼𑀢𑀁 𑀲𑁂𑀮𑀧𑀩𑁆𑀩𑀢𑀁 𑀧𑀸𑀤𑀢𑀮𑁂 𑀮𑀕𑁆𑀕𑁂𑀢𑁆𑀯𑀸 𑀉𑀓𑁆𑀔𑀮𑀺𑀬𑀸 𑀧𑀺𑀥𑀸𑀦𑀁 𑀯𑀺𑀬 𑀲𑀓𑀮𑀭𑀸𑀚𑀕𑀳𑀦𑀕𑀭𑀁 𑀙𑀸𑀤𑁂𑀲𑀺, 𑀢𑀤𑀸 𑀦𑀕𑀭𑀯𑀸𑀲𑀺𑀦𑁄 𑀨𑀴𑀺𑀓𑀧𑀩𑁆𑀩𑀢𑁂 𑀆𑀯𑀼𑀢𑀁 𑀭𑀢𑁆𑀢𑀲𑀼𑀢𑁆𑀢𑀫𑀺𑀯 𑀢𑀁 𑀣𑁂𑀭𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀪𑀦𑁆𑀢𑁂 𑀪𑀸𑀭𑀤𑁆𑀯𑀸𑀚, 𑀅𑀫𑁆𑀳𑁂 𑀭𑀓𑁆𑀔𑀣𑀸’’𑀢𑀺 𑀉𑀕𑁆𑀖𑁄𑀲𑀬𑀺𑀁𑀲𑀼, 𑀪𑀻𑀢𑀸 𑀲𑀼𑀧𑁆𑀧𑀸𑀤𑀻𑀦𑀺 𑀲𑀻𑀲𑁂 𑀅𑀓𑀁𑀲𑀼. 𑀢𑀤𑀸 𑀣𑁂𑀭𑁄 𑀢𑀁 𑀧𑀩𑁆𑀩𑀢𑀁 𑀞𑀺𑀢𑀝𑁆𑀞𑀸𑀦𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀢𑀁 𑀧𑀢𑁆𑀢𑀁 𑀅𑀕𑁆𑀕𑀳𑁂𑀲𑀺, 𑀢𑀤𑀸 𑀦𑀕𑀭𑀯𑀸𑀲𑀺𑀦𑁄 𑀫𑀳𑀸𑀓𑁄𑀮𑀸𑀳𑀮𑀫𑀓𑀁𑀲𑀼.

𑀪𑀕𑀯𑀸 𑀯𑁂𑀴𑀼𑀯𑀦𑀸𑀭𑀸𑀫𑁂 𑀦𑀺𑀲𑀺𑀦𑁆𑀦𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀏𑀲𑁄 𑀲𑀤𑁆𑀤𑁄’’𑀢𑀺 𑀆𑀦𑀦𑁆𑀤𑀁 𑀧𑀼𑀘𑁆𑀙𑀺. ‘‘𑀪𑀸𑀭𑀤𑁆𑀯𑀸𑀚𑁂𑀦, 𑀪𑀦𑁆𑀢𑁂, 𑀧𑀢𑁆𑀢𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑀦𑁆𑀢𑀼𑀝𑁆𑀞𑀸 𑀦𑀕𑀭𑀯𑀸𑀲𑀺𑀦𑁄 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀫𑀓𑀁𑀲𑀽’’𑀢𑀺 𑀆𑀳. 𑀢𑀤𑀸 𑀪𑀕𑀯𑀸 𑀆𑀬𑀢𑀺𑀁 𑀧𑀭𑀽𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀢𑀁 𑀧𑀢𑁆𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀪𑁂𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀦𑀼𑀧𑀧𑀺𑀲𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑀸𑀧𑁂𑀲𑀺, 𑀤𑀸𑀧𑁂𑀢𑁆𑀯𑀸 𑀘 𑀧𑀦 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸 𑀓𑀸𑀢𑀩𑁆𑀩𑀸, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁨 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺.

𑀢𑀢𑁄 𑀢𑀺𑀢𑁆𑀣𑀺𑀬𑀸 ‘‘𑀲𑀫𑀡𑁂𑀦 𑀓𑀺𑀭 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑁂 𑀚𑀻𑀯𑀺𑀢𑀳𑁂𑀢𑀼𑀧𑀺 𑀢𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺, 𑀫𑀬𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀭𑀸𑀲𑀺𑀪𑀽𑀢𑀸 𑀓𑁄𑀮𑀸𑀳𑀮𑀫𑀓𑀁𑀲𑀼. 𑀅𑀣 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀪𑀕𑀯𑀦𑁆𑀢𑀫𑁂𑀯𑀫𑀸𑀳 𑁋 ‘‘𑀢𑀺𑀢𑁆𑀣𑀺𑀬𑀸, 𑀪𑀦𑁆𑀢𑁂, ‘𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀻’’𑀢𑀺. ‘‘𑀅𑀳𑀫𑁆𑀧𑀺, 𑀫𑀳𑀸𑀭𑀸𑀚, 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. ‘‘𑀢𑀫𑁂𑀯, 𑀫𑀳𑀸𑀭𑀸𑀚, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀯𑀼𑀬𑁆𑀬𑀸𑀦𑁂 𑀅𑀫𑁆𑀩𑀨𑀮𑀸𑀤𑀻𑀦𑀺 𑀔𑀸𑀤𑀦𑁆𑀢𑀸𑀦𑀁 ‘𑀏𑀢𑁆𑀢𑀓𑁄 𑀤𑀡𑁆𑀟𑁄’𑀢𑀺 𑀤𑀡𑁆𑀟𑀁 𑀞𑀧𑁂𑀦𑁆𑀢𑁄 𑀢𑀯𑀸𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀞𑀧𑁂𑀲𑀻’’𑀢𑀺. ‘‘𑀦 𑀫𑀬𑁆𑀳𑀁, 𑀪𑀦𑁆𑀢𑁂, 𑀤𑀡𑁆𑀟𑁄’’𑀢𑀺. ‘‘𑀏𑀯𑀁, 𑀫𑀳𑀸𑀭𑀸𑀚, 𑀦 𑀫𑀬𑁆𑀳𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀅𑀢𑁆𑀣𑀻’’𑀢𑀺. ‘‘𑀓𑀢𑁆𑀣, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀢𑀺𑀢𑁆𑀣𑀺𑀬𑀸 ‘‘𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀺𑀭 𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀦𑀕𑀭𑀲𑁆𑀲 𑀲𑀸𑀫𑀦𑁆𑀢𑀸 𑀅𑀫𑁆𑀩𑀭𑀼𑀓𑁆𑀔𑁂 𑀙𑁂𑀤𑀸𑀧𑁂𑀲𑀼𑀁, 𑀦𑀸𑀕𑀭𑀸 𑀫𑀳𑀸𑀅𑀗𑁆𑀕𑀡𑀝𑁆𑀞𑀸𑀦𑁂 𑀫𑀜𑁆𑀘𑀸𑀢𑀺𑀫𑀜𑁆𑀘𑀁 𑀅𑀝𑁆𑀝𑀸𑀤𑀬𑁄 𑀩𑀦𑁆𑀥𑀺𑀁𑀲𑀼, 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀭𑀸𑀲𑀺𑀪𑀽𑀢𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀫𑁂𑀯 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑁂𑀲𑀤𑀺𑀲𑀸𑀲𑀼𑀧𑀺 𑀢𑀤𑀦𑀼𑀭𑀽𑀧𑁂𑀦𑀸𑀓𑀸𑀭𑁂𑀦 𑀲𑀦𑁆𑀦𑀺𑀧𑀢𑀺𑀁𑀲𑀼.

𑀪𑀕𑀯𑀸𑀧𑀺 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀲𑀺𑀬𑀁 𑀧𑀸𑀢𑁄𑀯 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀡𑁆𑀟𑁄 𑀦𑀸𑀫 𑀉𑀬𑁆𑀬𑀸𑀦𑀧𑀸𑀮𑁄 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁂 𑀲𑀼𑀧𑀓𑁆𑀓𑀁 𑀅𑀫𑁆𑀩𑀨𑀮𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀳𑀁 𑀇𑀫𑀁 𑀭𑀜𑁆𑀜𑁄 𑀤𑀤𑁂𑀬𑁆𑀬𑀁, 𑀓𑀳𑀸𑀧𑀡𑀸𑀤𑀺𑀲𑀸𑀭𑀁 𑀮𑀪𑁂𑀬𑁆𑀬𑀁, 𑀪𑀕𑀯𑀢𑁄 𑀉𑀧𑀦𑀸𑀫𑀺𑀢𑁂 𑀧𑀦 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀲𑀫𑁆𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺. 𑀪𑀕𑀯𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀡𑀸𑀧𑁂𑀲𑀺 𑁋 ‘‘𑀇𑀫𑀁 𑀨𑀮𑀁 𑀫𑀤𑁆𑀤𑀺𑀢𑁆𑀯𑀸 𑀧𑀸𑀦𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀸 𑀅𑀫𑁆𑀩𑀭𑀲𑀁 𑀧𑀺𑀯𑀺𑀢𑁆𑀯𑀸 𑀅𑀫𑁆𑀩𑀝𑁆𑀞𑀺𑀁 𑀉𑀬𑁆𑀬𑀸𑀦𑀧𑀸𑀮𑀲𑁆𑀲 𑀤𑀢𑁆𑀯𑀸 ‘‘𑀇𑀫𑀁 𑀭𑁄𑀧𑁂𑀳𑀻’’𑀢𑀺 𑀆𑀳. 𑀲𑁄 𑀯𑀸𑀮𑀼𑀓𑀁 𑀯𑀺𑀬𑀽𑀳𑀺𑀢𑁆𑀯𑀸 𑀢𑀁 𑀭𑁄𑀧𑁂𑀲𑀺, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀓𑀼𑀡𑁆𑀟𑀺𑀓𑀸𑀬 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀫𑁆𑀩𑀗𑁆𑀓𑀼𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑀸𑀔𑀸𑀯𑀺𑀝𑀧𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀪𑀭𑀺𑀢𑁄 𑀧𑀜𑁆𑀜𑀸𑀬𑀺𑀢𑁆𑀣. 𑀧𑀢𑀺𑀢𑀁 𑀅𑀫𑁆𑀩𑀨𑀮𑀁 𑀔𑀸𑀤𑀦𑁆𑀢𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀔𑀬𑀁 𑀧𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀅𑀣 𑀪𑀕𑀯𑀸 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀢𑁄 𑀬𑀸𑀯 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀁, 𑀢𑀸𑀯 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀫𑀳𑀸𑀫𑁂𑀭𑀼𑀫𑀼𑀤𑁆𑀥𑀦𑀺 𑀭𑀢𑀦𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀅𑀦𑁂𑀓𑀧𑀭𑀺𑀲𑀸𑀳𑀺 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀦𑁆𑀢𑁄 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀫𑀳𑀸𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀢𑁂 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀢𑁆𑀯𑀸 𑀧𑀸𑀝𑀺𑀳𑀻𑀭𑀸𑀯𑀲𑀸𑀦𑁂 𑀧𑀼𑀭𑀺𑀫𑀩𑀼𑀤𑁆𑀥𑀸𑀘𑀺𑀡𑁆𑀡𑀯𑀲𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀲𑁆𑀲𑀁𑀯𑀼𑀝𑁆𑀞𑁄 𑀦𑀺𑀭𑀦𑁆𑀢𑀭𑀁 𑀢𑁂𑀫𑀸𑀲𑀁 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀸𑀢𑀼𑀧𑁆𑀧𑀫𑀼𑀔𑀸𑀦𑀁 𑀅𑀦𑁂𑀓𑀤𑁂𑀯𑀢𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀥𑀺𑀕𑀫𑀦𑀁 𑀓𑀢𑁆𑀯𑀸, 𑀯𑀼𑀝𑁆𑀞𑀯𑀲𑁆𑀲𑁄 𑀤𑁂𑀯𑁄𑀭𑁄𑀳𑀦𑀁 𑀓𑀢𑁆𑀯𑀸 𑀅𑀦𑁂𑀓𑀤𑁂𑀯𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀼𑀢𑁄 𑀲𑀗𑁆𑀓𑀲𑁆𑀲𑀧𑀼𑀭𑀤𑁆𑀯𑀸𑀭𑀁 𑀑𑀭𑀼𑀬𑁆𑀳 𑀮𑁄𑀓𑀸𑀦𑀼𑀕𑁆𑀕𑀳𑀁 𑀅𑀓𑀸𑀲𑀺. 𑀢𑀤𑀸 𑀪𑀕𑀯𑀢𑁄 𑀮𑀸𑀪𑀲𑀓𑁆𑀓𑀸𑀭𑁄 𑀚𑀫𑁆𑀩𑀼𑀤𑀻𑀧𑀫𑀚𑁆𑀛𑁄𑀢𑁆𑀣𑀭𑀫𑀸𑀦𑁄 𑀧𑀜𑁆𑀘𑀫𑀳𑀸𑀕𑀗𑁆𑀕𑀸 𑀯𑀺𑀬 𑀅𑀳𑁄𑀲𑀺.

𑀅𑀣 𑀢𑀺𑀢𑁆𑀣𑀺𑀬𑀸 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀤𑀸 𑀢𑁂𑀲𑀁 𑀉𑀧𑀸𑀲𑀺𑀓𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀦𑀸𑀫 𑀅𑀢𑀺𑀯𑀺𑀬 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑀸 𑀢𑁂 𑀢𑀣𑀸 𑀦𑀺𑀲𑀺𑀦𑁆𑀦𑁂 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀏𑀯𑀁𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀪𑀕𑀺𑀦𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸𑀲𑀻’’𑀢𑀺? ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀪𑀕𑀺𑀦𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀸𑀤𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑀸, 𑀦𑀕𑀭𑀯𑀸𑀲𑀺𑀦𑁄 𑀅𑀫𑁆𑀳𑁂 𑀦 𑀓𑀺𑀜𑁆𑀘𑀺 𑀫𑀜𑁆𑀜𑀦𑁆𑀢𑀻’’𑀢𑀺. ‘‘𑀫𑀬𑀸 𑀏𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀢𑀬𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 ‘‘𑀦 𑀫𑀬𑁆𑀳𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑀻 𑀯𑀺𑀓𑀸𑀮𑁂 𑀚𑁂𑀢𑀯𑀦𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀺𑀢𑁆𑀣𑀺𑀬𑀸𑀦𑀁 𑀉𑀧𑀲𑁆𑀲𑀬𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄 𑀦𑀕𑀭𑀯𑀸𑀲𑀻𑀦𑀁 𑀕𑀦𑁆𑀥𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀦𑀢𑁆𑀣𑀸𑀬 𑀕𑀫𑀦𑀲𑀫𑀬𑁂 𑀚𑁂𑀢𑀯𑀦𑀸 𑀯𑀺𑀬 𑀦𑀺𑀓𑁆𑀔𑀦𑁆𑀢𑀸, ‘‘𑀓𑀢𑁆𑀣 𑀲𑀬𑀺𑀢𑀸’’𑀢𑀺 𑀧𑀼𑀝𑁆𑀞𑀸 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀫𑀫 𑀲𑀬𑀺𑀢𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸 𑀓𑀫𑁂𑀦 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀼𑀘𑁆𑀙𑀺𑀢𑀸 ‘‘𑀲𑀫𑀡𑁂𑀦𑀸𑀳𑀁 𑀕𑁄𑀢𑀫𑁂𑀦 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀲𑀬𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸’’𑀢𑀺 𑀆𑀳. 𑀢𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀲𑀤𑁆𑀤𑀳𑀺𑀁𑀲𑀼, 𑀧𑀡𑁆𑀟𑀺𑀢𑀸 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀦 𑀲𑀤𑁆𑀤𑀳𑀺𑀁𑀲𑀼. 𑀏𑀓𑀤𑀺𑀯𑀲𑀁 𑀲𑀸 𑀤𑀸𑀭𑀼𑀫𑀡𑁆𑀟𑀮𑀁 𑀉𑀤𑀭𑁂 𑀩𑀦𑁆𑀥𑀺𑀢𑁆𑀯𑀸 𑀉𑀧𑀭𑀺 𑀭𑀢𑁆𑀢𑀧𑀝𑀁 𑀧𑀭𑀺𑀤𑀳𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳 𑁋 ‘‘𑀪𑁄 𑀲𑀫𑀡, 𑀢𑁆𑀯𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀼𑀬𑁆𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀤𑀸𑀭𑀓𑀕𑀩𑁆𑀪𑀺𑀦𑀺𑀬𑀸 𑀫𑀬𑁆𑀳𑀁 𑀮𑀲𑀼𑀡𑀫𑀭𑀺𑀘𑀸𑀤𑀻𑀦𑀺 𑀦 𑀯𑀺𑀘𑀸𑀭𑁂𑀲𑀻’’𑀢𑀺? ‘‘𑀢𑀣𑀸𑀪𑀸𑀯𑀁, 𑀪𑀕𑀺𑀦𑀺, 𑀢𑁆𑀯𑀜𑁆𑀘𑁂𑀯 𑀧𑀚𑀸𑀦𑀸𑀲𑀺, 𑀅𑀳𑀜𑁆𑀘𑀸’’𑀢𑀺. 𑀲𑀸 ‘‘𑀏𑀯𑀫𑁂𑀯 𑀫𑁂𑀣𑀼𑀦𑀲𑀁𑀲𑀕𑁆𑀕𑀲𑀫𑀬𑀁 𑀤𑁆𑀯𑁂𑀬𑁂𑀯 𑀚𑀸𑀦𑀦𑁆𑀢𑀺, 𑀦 𑀅𑀜𑁆𑀜𑁂’’𑀢𑀺 𑀆𑀳.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀤𑁆𑀯𑁂 𑀤𑁂𑀯𑀧𑀼𑀢𑁆𑀢𑁂 𑀆𑀡𑀸𑀧𑁂𑀲𑀺 𑁋 ‘‘𑀢𑀼𑀫𑁆𑀳𑁂𑀲𑀼 𑀏𑀓𑁄 𑀫𑀽𑀲𑀺𑀓𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀤𑀸𑀭𑀼𑀫𑀡𑁆𑀟𑀮𑀲𑁆𑀲 𑀩𑀦𑁆𑀥𑀦𑀁 𑀙𑀺𑀦𑁆𑀤𑀢𑀼, 𑀏𑀓𑁄 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀭𑀼𑀢𑀧𑀝𑀁 𑀉𑀤𑁆𑀥𑀁 𑀔𑀺𑀧𑀢𑀽’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀤𑀸𑀭𑀼𑀫𑀡𑁆𑀟𑀮𑀁 𑀧𑀢𑀫𑀸𑀦𑀁 𑀢𑀲𑁆𑀲𑀸 𑀧𑀸𑀤𑀧𑀺𑀝𑁆𑀞𑀺𑀁 𑀪𑀺𑀦𑁆𑀤𑀺. 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀧𑀼𑀣𑀼𑀚𑁆𑀚𑀦𑀸 𑀲𑀩𑁆𑀩𑁂 ‘‘𑀅𑀭𑁂, 𑀤𑀼𑀝𑁆𑀞𑀘𑁄𑀭𑀺, 𑀢𑁆𑀯𑀁 𑀏𑀯𑀭𑀽𑀧𑀲𑁆𑀲 𑀮𑁄𑀓𑀢𑁆𑀢𑀬𑀲𑀸𑀫𑀺𑀦𑁄 𑀏𑀯𑀭𑀽𑀧𑀁 𑀅𑀩𑁆𑀪𑀓𑁆𑀔𑀸𑀦𑀁 𑀅𑀓𑀸𑀲𑀻’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀏𑀓𑁂𑀓𑀫𑀼𑀝𑁆𑀞𑀺𑀧𑀳𑀸𑀭𑀁 𑀤𑀢𑁆𑀯𑀸 𑀲𑀪𑀸𑀬 𑀦𑀻𑀳𑀭𑀺𑀁𑀲𑀼, 𑀤𑀲𑁆𑀲𑀦𑀸𑀢𑀺𑀓𑁆𑀓𑀦𑁆𑀢𑀸𑀬 𑀧𑀣𑀯𑀻 𑀯𑀺𑀯𑀭𑀫𑀤𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀯𑀻𑀘𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀓𑀼𑀮𑀤𑀢𑁆𑀢𑀺𑀓𑁂𑀦 𑀭𑀢𑁆𑀢𑀓𑀫𑁆𑀩𑀮𑁂𑀦𑁂𑀯 𑀢𑀁 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀧𑀓𑁆𑀔𑀺𑀧𑀺, 𑀪𑀕𑀯𑀢𑁄 𑀮𑀸𑀪𑀲𑀓𑁆𑀓𑀸𑀭𑁄 𑀅𑀢𑀺𑀭𑁂𑀓𑀢𑀭𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀩𑁆𑀩𑀸𑀪𑀺𑀪𑀼𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀲𑀸𑀯𑀓𑁄;

𑀢𑀁 𑀅𑀩𑁆𑀪𑀓𑁆𑀔𑀸𑀬 𑀦𑀺𑀭𑀬𑁂, 𑀘𑀺𑀭𑀁 𑀲𑀁𑀲𑀭𑀺𑀢𑀁 𑀫𑀬𑀸.

‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀫𑀦𑀼𑀲𑁆𑀲𑀪𑀸𑀯𑀁 𑀮𑀤𑁆𑀥𑀸𑀳𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀩𑀳𑀼𑀁 𑀮𑀪𑀺𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀫𑀫𑀁;

𑀅𑀩𑁆𑀪𑀸𑀘𑀺𑀓𑁆𑀔𑀺 𑀅𑀪𑀽𑀢𑁂𑀦, 𑀚𑀦𑀓𑀸𑀬𑀲𑁆𑀲 𑀅𑀕𑁆𑀕𑀢𑁄’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁭𑁦-𑁭𑁨);

𑀢𑀢𑀺𑀬𑀧𑀜𑁆𑀳𑁂 𑁋 𑀅𑀩𑁆𑀪𑀓𑁆𑀔𑀸𑀦𑀦𑁆𑀢𑀺 𑀅𑀪𑀺 𑀅𑀓𑁆𑀔𑀸𑀦𑀁 𑀅𑀓𑁆𑀓𑁄𑀲𑀦𑀁. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀅𑀧𑀸𑀓𑀝𑀚𑀸𑀢𑀺𑀬𑀁 𑀉𑀧𑁆𑀧𑀦𑁆𑀦𑁄 𑀫𑀼𑀦𑀸𑀴𑀺 𑀦𑀸𑀫 𑀥𑀼𑀢𑁆𑀢𑁄 𑀳𑀼𑀢𑁆𑀯𑀸 𑀤𑀼𑀚𑁆𑀚𑀦𑀲𑀁𑀲𑀕𑁆𑀕𑀩𑀮𑁂𑀦 𑀲𑀼𑀭𑀪𑀺𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 ‘‘𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀬𑀁 𑀪𑀺𑀓𑁆𑀔𑀽’’𑀢𑀺 𑀅𑀓𑁆𑀓𑁄𑀲𑀺. 𑀲𑁄 𑀢𑁂𑀦 𑀅𑀓𑀼𑀲𑀮𑁂𑀦 𑀯𑀘𑀻𑀓𑀫𑁆𑀫𑁂𑀦 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀤𑀲𑀧𑀸𑀭𑀫𑀺𑀢𑀸𑀲𑀁𑀲𑀺𑀤𑁆𑀥𑀺𑀩𑀮𑁂𑀦 𑀩𑀼𑀤𑁆𑀥𑁄 𑀚𑀸𑀢𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀧𑀼𑀦 𑀢𑀺𑀢𑁆𑀣𑀺𑀬𑀸 𑀉𑀲𑁆𑀲𑀸𑀳𑀚𑀸𑀢𑀸 𑁋 ‘‘𑀓𑀣𑀁 𑀦𑀼 𑀔𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀬𑀲𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀤𑀸 𑀲𑀼𑀦𑁆𑀤𑀭𑀻 𑀦𑀸𑀫𑁂𑀓𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸 𑀢𑀼𑀡𑁆𑀳𑀻𑀪𑀽𑀢𑁂 𑀓𑀺𑀜𑁆𑀘𑀺 𑀅𑀯𑀤𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀫𑀬𑁆𑀳𑀁 𑀤𑁄𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀅𑀫𑁆𑀳𑁂 𑀯𑀺𑀳𑁂𑀞𑀺𑀬𑀫𑀸𑀦𑁂 𑀢𑁆𑀯𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀯𑀺𑀳𑀭𑀺𑀲𑁆𑀲𑀲𑀺, 𑀇𑀤𑀁 𑀢𑀯 𑀤𑁄𑀲𑁄’’𑀢𑀺. ‘‘𑀏𑀯𑀫𑀳𑀁 𑀢𑀢𑁆𑀣 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀢𑁆𑀯𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑀦𑀬𑁂𑀦 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀲𑀬𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸’’𑀢𑀺 𑀯𑀢𑁆𑀯𑀸 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀢𑀺𑀢𑁆𑀣𑀺𑀬𑀸𑀧𑀺 ‘‘𑀧𑀲𑁆𑀲𑀣, 𑀪𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀫𑁆𑀫’’𑀦𑁆𑀢𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀫𑀼𑀦𑀸𑀴𑀺 𑀦𑀸𑀫𑀳𑀁 𑀥𑀼𑀢𑁆𑀢𑁄, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀼𑀭𑀪𑀺𑀁, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀩𑀳𑀽 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀤𑀼𑀓𑁆𑀔𑀁 𑀯𑁂𑀤𑁂𑀲𑀺 𑀯𑁂𑀤𑀦𑀁.

‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀫𑀬𑀸 𑀮𑀤𑁆𑀥𑀁, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁬𑁭-𑁬𑁯);

𑀘𑀢𑀼𑀢𑁆𑀣𑀧𑀜𑁆𑀳𑁂 𑁋 𑀅𑀩𑁆𑀪𑀓𑁆𑀔𑀸𑀦𑀁 𑀅𑀪𑀺 𑀯𑀺𑀲𑁂𑀲𑁂𑀦 𑀅𑀓𑁆𑀓𑁄𑀲𑀦𑀁 𑀧𑀭𑀺𑀪𑀸𑀲𑀦𑀁. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀩𑀳𑀼𑀲𑁆𑀲𑀼𑀢𑁄 𑀩𑀳𑀽𑀳𑀺 𑀲𑀓𑁆𑀓𑀢𑁄 𑀧𑀽𑀚𑀺𑀢𑁄 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀩𑀳𑀼𑀫𑀸𑀡𑀯𑁂 𑀫𑀦𑁆𑀢𑁂 𑀯𑀸𑀘𑁂𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀏𑀓𑁄 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀢𑀸𑀧𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 𑀇𑀲𑁆𑀲𑀸𑀧𑀓𑀢𑁄 𑀢𑀁 𑀅𑀤𑀽𑀲𑀓𑀁 𑀇𑀲𑀺𑀁 ‘‘𑀓𑀸𑀫𑀪𑁄𑀕𑀻 𑀓𑀼𑀳𑀓𑁄 𑀅𑀬𑀁 𑀇𑀲𑀻’’𑀢𑀺 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀅𑀢𑁆𑀢𑀦𑁄 𑀲𑀺𑀲𑁆𑀲𑁂 𑀘 𑀆𑀳 𑁋 ‘‘𑀅𑀬𑀁 𑀇𑀲𑀺 𑀏𑀯𑀭𑀽𑀧𑁄 𑀅𑀦𑀸𑀘𑀸𑀭𑀓𑁄’’𑀢𑀺. 𑀢𑁂𑀧𑀺 𑀢𑀣𑁂𑀯 𑀅𑀓𑁆𑀓𑁄𑀲𑀺𑀁𑀲𑀼 𑀧𑀭𑀺𑀪𑀸𑀲𑀺𑀁𑀲𑀼. 𑀲𑁄 𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑀯𑀺𑀧𑀸𑀓𑁂𑀦 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀆𑀓𑀸𑀲𑁂 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀧𑀸𑀓𑀝𑁄 𑀚𑀸𑀢𑁄. 𑀢𑀣𑁂𑀯 𑀢𑀺𑀢𑁆𑀣𑀺𑀬𑀸 𑀅𑀩𑁆𑀪𑀓𑁆𑀔𑀸𑀦𑁂𑀦𑀧𑀺 𑀅𑀲𑀦𑁆𑀢𑀼𑀝𑁆𑀞𑀸 𑀧𑀼𑀦𑀧𑀺 𑀲𑀼𑀦𑁆𑀤𑀭𑀺𑀬𑀸 𑀅𑀩𑁆𑀪𑀓𑁆𑀔𑀸𑀦𑀁 𑀓𑀸𑀭𑁂𑀢𑁆𑀯𑀸 𑀲𑀼𑀭𑀸𑀥𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑀲𑀫𑀻𑀧𑁂 𑀫𑀸𑀮𑀸𑀓𑀘𑀯𑀭𑁂𑀦 𑀙𑀸𑀤𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀼𑀁. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀢𑀢𑁄 𑀢𑀺𑀢𑁆𑀣𑀺𑀬𑀸 ‘‘𑀲𑀼𑀦𑁆𑀤𑀭𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀧𑀭𑀺𑀬𑁂𑀲𑀣𑀸’’𑀢𑀺 𑀆𑀳. 𑀢𑁂 𑀅𑀢𑁆𑀢𑀦𑀸 𑀧𑀸𑀢𑀺𑀢𑀝𑁆𑀞𑀸𑀦𑀢𑁄 𑀕𑀳𑁂𑀢𑁆𑀯𑀸 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀧𑀲𑁆𑀲𑀣, 𑀪𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀁 𑀓𑀫𑁆𑀫’’𑀦𑁆𑀢𑀺 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀓𑀮𑀦𑀕𑀭𑁂 𑀅𑀯𑀡𑁆𑀡𑀁 𑀉𑀕𑁆𑀖𑁄𑀲𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀲𑀼𑀦𑁆𑀤𑀭𑀺𑀁 𑀆𑀫𑀓𑀲𑀼𑀲𑀸𑀦𑁂 𑀅𑀝𑁆𑀝𑀓𑁂 𑀞𑀧𑁂𑀲𑀼𑀁. 𑀭𑀸𑀚𑀸 ‘‘𑀲𑀼𑀦𑁆𑀤𑀭𑀺𑀫𑀸𑀭𑀓𑁂 𑀧𑀭𑀺𑀬𑁂𑀲𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑀤𑀸 𑀥𑀼𑀢𑁆𑀢𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 ‘‘𑀢𑁆𑀯𑀁 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀲𑀺, 𑀢𑁆𑀯𑀁 𑀫𑀸𑀭𑁂𑀲𑀻’’𑀢𑀺 𑀓𑀮𑀳𑀁 𑀓𑀭𑀺𑀁𑀲𑀼. 𑀭𑀸𑀚𑀧𑀼𑀭𑀺𑀲𑀸 𑀢𑁂 𑀥𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀓𑀺𑀁, 𑀪𑀡𑁂, 𑀢𑀼𑀫𑁆𑀳𑁂𑀳𑀺 𑀲𑀼𑀦𑁆𑀤𑀭𑀻 𑀫𑀸𑀭𑀺𑀢𑀸’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑁂𑀳𑀺 𑀆𑀡𑀢𑁆𑀢𑀸’’𑀢𑀺? ‘‘𑀢𑀺𑀢𑁆𑀣𑀺𑀬𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀺𑀢𑁆𑀣𑀺𑀬𑁂 𑀆𑀳𑀭𑀸𑀧𑁂𑀢𑁆𑀯𑀸 𑀩𑀦𑁆𑀥𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀡𑁂, ‘𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀢𑁆𑀣𑀸𑀬 𑀅𑀫𑁆𑀳𑁂𑀳𑀺 𑀲𑀬𑀫𑁂𑀯 𑀲𑀼𑀦𑁆𑀤𑀭𑀻 𑀫𑀸𑀭𑀸𑀧𑀺𑀢𑀸, 𑀪𑀕𑀯𑀸 𑀢𑀲𑁆𑀲 𑀲𑀸𑀯𑀓𑀸 𑀘 𑀅𑀓𑀸𑀭𑀓𑀸’𑀢𑀺 𑀉𑀕𑁆𑀖𑁄𑀲𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀅𑀓𑀁𑀲𑀼. 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀦𑀺𑀓𑁆𑀓𑀗𑁆𑀔𑀸 𑀅𑀳𑁂𑀲𑀼𑀁. 𑀭𑀸𑀚𑀸 𑀢𑀺𑀢𑁆𑀣𑀺𑀬𑁂 𑀘 𑀥𑀼𑀢𑁆𑀢𑁂 𑀘 𑀫𑀸𑀭𑀸𑀧𑁂𑀢𑁆𑀯𑀸 𑀙𑀟𑁆𑀟𑀸𑀧𑁂𑀢𑀺. 𑀢𑀢𑁄 𑀪𑀕𑀯𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀮𑀸𑀪𑀲𑀓𑁆𑀓𑀸𑀭𑁄 𑀯𑀟𑁆𑀠𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀩𑁆𑀭𑀸𑀳𑁆𑀫𑀡𑁄 𑀲𑀼𑀢𑀯𑀸 𑀆𑀲𑀺𑀁, 𑀅𑀳𑀁 𑀲𑀓𑁆𑀓𑀢𑀧𑀽𑀚𑀺𑀢𑁄;

𑀫𑀳𑀸𑀯𑀦𑁂 𑀧𑀜𑁆𑀘𑀲𑀢𑁂, 𑀫𑀦𑁆𑀢𑁂 𑀯𑀸𑀘𑁂𑀫𑀺 𑀫𑀸𑀡𑀯𑁂.

‘‘𑀢𑀢𑁆𑀣𑀸𑀕𑀢𑁄 𑀇𑀲𑀺 𑀪𑀻𑀫𑁄, 𑀧𑀜𑁆𑀘𑀸𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀜𑁆𑀘𑀸𑀳𑀁 𑀆𑀕𑀢𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

‘‘𑀢𑀢𑁄𑀳𑀁 𑀅𑀯𑀘𑀁 𑀲𑀺𑀲𑁆𑀲𑁂, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺;

𑀫𑀬𑁆𑀳𑀫𑁆𑀧𑀺 𑀪𑀸𑀲𑀫𑀸𑀦𑀲𑁆𑀲, 𑀅𑀦𑀼𑀫𑁄𑀤𑀺𑀁𑀲𑀼 𑀫𑀸𑀡𑀯𑀸.

‘‘𑀢𑀢𑁄 𑀫𑀸𑀡𑀯𑀓𑀸 𑀲𑀩𑁆𑀩𑁂, 𑀪𑀺𑀓𑁆𑀔𑀫𑀸𑀦𑀁 𑀓𑀼𑀮𑁂 𑀓𑀼𑀮𑁂;

𑀫𑀳𑀸𑀚𑀦𑀲𑁆𑀲 𑀆𑀳𑀁𑀲𑀼, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸 𑀇𑀫𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀮𑀪𑀼𑀁 𑀲𑀩𑁆𑀩𑁂, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁭𑁩-𑁭𑁭);

𑀧𑀜𑁆𑀘𑀫𑁂 𑀧𑀜𑁆𑀳𑁂 𑁋 𑀲𑀺𑀮𑀸𑀯𑁂𑀥𑁄𑀢𑀺 𑀆𑀳𑀢𑀘𑀺𑀢𑁆𑀢𑁄 𑀲𑀺𑀮𑀁 𑀧𑀯𑀺𑀚𑁆𑀛𑀺. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀘 𑀓𑀦𑀺𑀝𑁆𑀞𑀪𑀸𑀢𑀸 𑀘 𑀏𑀓𑀧𑀺𑀢𑀼𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀤𑀸𑀲𑁂 𑀧𑀝𑀺𑀘𑁆𑀘 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀩𑀮𑀯𑀪𑀸𑀯𑁂𑀦 𑀓𑀦𑀺𑀝𑁆𑀞𑀪𑀸𑀢𑀭𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀧𑀸𑀲𑀸𑀡𑀁 𑀧𑀯𑀺𑀚𑁆𑀛𑁂𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀦𑀭𑀓𑀸𑀤𑀻𑀲𑀼 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑁄 𑀚𑀸𑀢𑁄. 𑀤𑁂𑀯𑀤𑀢𑁆𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀫𑀸𑀢𑀼𑀮𑁄 𑀧𑀼𑀩𑁆𑀩𑁂 𑀲𑁂𑀭𑀺𑀯𑀸𑀡𑀺𑀚𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀯𑀸𑀡𑀺𑀚𑁄 𑀅𑀳𑁄𑀲𑀺, 𑀢𑁂 𑀏𑀓𑀁 𑀧𑀝𑁆𑀝𑀦𑀕𑀸𑀫𑀁 𑀧𑀢𑁆𑀯𑀸 ‘‘𑀢𑁆𑀯𑀁 𑀏𑀓𑀯𑀻𑀣𑀺𑀁 𑀕𑀡𑁆𑀳𑀸𑀳𑀺, 𑀅𑀳𑀫𑁆𑀧𑀺 𑀏𑀓𑀯𑀻𑀣𑀺𑀁 𑀕𑀡𑁆𑀳𑀸𑀫𑀻’’𑀢𑀺 𑀤𑁆𑀯𑁂𑀧𑀺 𑀧𑀯𑀺𑀝𑁆𑀞𑀸. 𑀢𑁂𑀲𑀼 𑀤𑁂𑀯𑀤𑀢𑁆𑀢𑀲𑁆𑀲 𑀧𑀯𑀺𑀝𑁆𑀞𑀯𑀻𑀣𑀺𑀬𑀁 𑀚𑀺𑀡𑁆𑀡𑀲𑁂𑀝𑁆𑀞𑀺𑀪𑀭𑀺𑀬𑀸 𑀘 𑀦𑀢𑁆𑀢𑀸 𑀘 𑀤𑁆𑀯𑁂𑀬𑁂𑀯 𑀅𑀳𑁂𑀲𑀼𑀁, 𑀢𑁂𑀲𑀁 𑀫𑀳𑀦𑁆𑀢𑀁 𑀲𑀼𑀯𑀡𑁆𑀡𑀣𑀸𑀮𑀓𑀁 𑀫𑀮𑀕𑁆𑀕𑀳𑀺𑀢𑀁 𑀪𑀸𑀚𑀦𑀦𑁆𑀢𑀭𑁂 𑀞𑀧𑀺𑀢𑀁 𑀳𑁄𑀢𑀺, 𑀢𑀁 𑀲𑀼𑀯𑀡𑁆𑀡𑀣𑀸𑀮𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀻 ‘‘𑀇𑀫𑀁 𑀣𑀸𑀮𑀓𑀁 𑀕𑀳𑁂𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀤𑁂𑀣𑀸’’𑀢𑀺 𑀆𑀳. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀽𑀘𑀺𑀬𑀸 𑀮𑁂𑀔𑀁 𑀓𑀟𑁆𑀠𑀺𑀢𑁆𑀯𑀸 𑀲𑀼𑀯𑀡𑁆𑀡𑀣𑀸𑀮𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀣𑁄𑀓𑀁 𑀤𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀢𑁄. 𑀅𑀣 𑀩𑁄𑀥𑀺𑀲𑀢𑁆𑀢𑀁 𑀤𑁆𑀯𑀸𑀭𑀲𑀫𑀻𑀧𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀦𑀢𑁆𑀢𑀸, 𑀅𑀬𑁆𑀬𑁂, 𑀫𑀬𑁆𑀳𑀁 𑀓𑀘𑁆𑀙𑀧𑀼𑀝𑀁 𑀧𑀺𑀴𑀦𑁆𑀥𑀦𑀁 𑀤𑁂𑀣𑀸’’𑀢𑀺. 𑀲𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀁 𑀣𑀸𑀮𑀓𑀁 𑀤𑀢𑁆𑀯𑀸 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀦𑀢𑁆𑀢𑀸𑀬 𑀓𑀘𑁆𑀙𑀧𑀼𑀝𑀁 𑀧𑀺𑀴𑀦𑁆𑀥𑀦𑀁 𑀤𑁂𑀣𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀣𑀸𑀮𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀢𑁂𑀦 𑀯𑀜𑁆𑀘𑀺𑀢𑀸’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀲𑀺𑀩𑁆𑀩𑀓𑀸𑀬 𑀞𑀧𑀺𑀢𑀅𑀝𑁆𑀞𑀓𑀳𑀸𑀧𑀡𑁂 𑀅𑀯𑀲𑁂𑀲𑀪𑀡𑁆𑀟𑀜𑁆𑀘 𑀤𑀢𑁆𑀯𑀸 𑀓𑀘𑁆𑀙𑀧𑀼𑀝𑀁 𑀧𑀺𑀴𑀦𑁆𑀥𑀦𑀁 𑀓𑀼𑀫𑀸𑀭𑀺𑀓𑀸𑀬 𑀳𑀢𑁆𑀣𑁂 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑁄 𑀯𑀸𑀡𑀺𑀚𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺. ‘‘𑀢𑀸𑀢, 𑀢𑁆𑀯𑀁 𑀦 𑀕𑀡𑁆𑀳𑀺𑀢𑁆𑀣, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀇𑀤𑀜𑁆𑀘𑀺𑀤𑀜𑁆𑀘 𑀤𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀕𑀢𑁄’’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸𑀯 𑀳𑀤𑀬𑁂𑀦 𑀨𑀸𑀮𑀺𑀢𑁂𑀦 𑀯𑀺𑀬 𑀥𑀸𑀯𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀸𑀯𑀁 𑀆𑀭𑀼𑀬𑁆𑀳 𑀧𑀓𑁆𑀔𑀦𑁆𑀤𑀺. 𑀲𑁄 ‘‘𑀢𑀺𑀝𑁆𑀞, 𑀫𑀸 𑀧𑀮𑀸𑀬𑀺 𑀫𑀸 𑀧𑀮𑀸𑀬𑀻’’𑀢𑀺 𑀯𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀢𑀁 𑀦𑀸𑀲𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺.

𑀲𑁄 𑀧𑀢𑁆𑀣𑀦𑀸𑀯𑀲𑁂𑀦 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀳𑁂𑀞𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀓𑁆𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀫𑁂𑀦 𑀪𑀕𑀯𑀢𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂 𑀅𑀦𑀼𑀭𑀼𑀤𑁆𑀥𑀸𑀤𑀻𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀮𑀸𑀪𑀻 𑀳𑀼𑀢𑁆𑀯𑀸 𑀧𑀸𑀓𑀝𑁄 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀺 𑁋 ‘‘𑀪𑀦𑁆𑀢𑁂, 𑀲𑀩𑁆𑀩𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀺𑀡𑁆𑀟𑀧𑀸𑀢𑀺𑀓𑀸𑀤𑀻𑀦𑀺 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀢𑀼, 𑀲𑀓𑀮𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑀫 𑀪𑀸𑀭𑁄 𑀳𑁄𑀢𑀽’’𑀢𑀺. 𑀪𑀕𑀯𑀸 𑀦 𑀅𑀦𑀼𑀚𑀸𑀦𑀺. 𑀤𑁂𑀯𑀤𑀢𑁆𑀢𑁄 𑀯𑁂𑀭𑀁 𑀩𑀦𑁆𑀥𑀺𑀢𑁆𑀯𑀸 𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀪𑀕𑀯𑀦𑁆𑀢𑀁 𑀫𑀸𑀭𑁂𑀢𑀼𑀓𑀸𑀫𑁄 𑀏𑀓𑀤𑀺𑀯𑀲𑀁 𑀯𑁂𑀪𑀸𑀭𑀧𑀩𑁆𑀩𑀢𑀧𑀸𑀤𑁂 𑀞𑀺𑀢𑀲𑁆𑀲 𑀪𑀕𑀯𑀢𑁄 𑀉𑀧𑀭𑀺 𑀞𑀺𑀢𑁄 𑀧𑀩𑁆𑀩𑀢𑀓𑀽𑀝𑀁 𑀧𑀯𑀺𑀤𑁆𑀥𑁂𑀲𑀺. 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀅𑀧𑀭𑁄 𑀧𑀩𑁆𑀩𑀢𑀓𑀽𑀝𑁄 𑀢𑀁 𑀧𑀢𑀫𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂𑀲𑀁 𑀖𑀝𑁆𑀝𑀦𑁂𑀦 𑀉𑀝𑁆𑀞𑀺𑀢𑀸 𑀧𑀧𑀝𑀺𑀓𑀸 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀧𑀺𑀝𑁆𑀞𑀺𑀬𑀁 𑀧𑀳𑀭𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀯𑁂𑀫𑀸𑀢𑀼𑀪𑀸𑀢𑀭𑀁 𑀧𑀼𑀩𑁆𑀩𑁂, 𑀥𑀦𑀳𑁂𑀢𑀼 𑀳𑀦𑀺𑀁 𑀅𑀳𑀁;

𑀧𑀓𑁆𑀔𑀺𑀧𑀺𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀲𑀺𑀮𑀸𑀬 𑀘 𑀅𑀧𑀺𑀁𑀲𑀬𑀺𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀤𑁂𑀯𑀤𑀢𑁆𑀢𑁄 𑀲𑀺𑀮𑀁 𑀔𑀺𑀧𑀺;

𑀅𑀗𑁆𑀕𑀼𑀝𑁆𑀞𑀁 𑀧𑀺𑀁𑀲𑀬𑀻 𑀧𑀸𑀤𑁂, 𑀫𑀫 𑀧𑀸𑀲𑀸𑀡𑀲𑀓𑁆𑀔𑀭𑀸’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁭𑁮-𑁭𑁯);

𑀙𑀝𑁆𑀞𑀧𑀜𑁆𑀳𑁂 𑁋 𑀲𑀓𑀮𑀺𑀓𑀸𑀯𑁂𑀥𑁄𑀢𑀺 𑀲𑀓𑀮𑀺𑀓𑀸𑀬 𑀖𑀝𑁆𑀝𑀦𑀁. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀤𑀳𑀭𑀓𑀸𑀮𑁂 𑀫𑀳𑀸𑀯𑀻𑀣𑀺𑀬𑀁 𑀓𑀻𑀴𑀫𑀸𑀦𑁄 𑀯𑀻𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀼𑀡𑁆𑀟𑀓𑁄 𑀲𑀫𑀡𑁄 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺 𑀧𑀸𑀲𑀸𑀡𑀲𑀓𑀮𑀺𑀓𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀸𑀤𑀧𑀺𑀝𑁆𑀞𑀺𑀬𑀁 𑀔𑀺𑀧𑀺. 𑀧𑀸𑀤𑀧𑀺𑀝𑁆𑀞𑀺𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀭𑀼𑀳𑀺𑀭𑀁 𑀦𑀺𑀓𑁆𑀔𑀫𑀺. 𑀲𑁄 𑀢𑁂𑀦 𑀧𑀸𑀧𑀓𑀫𑁆𑀫𑁂𑀦 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀩𑀼𑀤𑁆𑀥𑀪𑀽𑀢𑁄𑀧𑀺 𑀓𑀫𑁆𑀫𑀧𑀺𑀮𑁄𑀢𑀺𑀓𑀯𑀲𑁂𑀦 𑀧𑀸𑀤𑀧𑀺𑀝𑁆𑀞𑀺𑀬𑀁 𑀧𑀸𑀲𑀸𑀡𑀲𑀓𑀮𑀺𑀓𑀖𑀝𑁆𑀝𑀦𑁂𑀦 𑀭𑀼𑀳𑀺𑀭𑀼𑀧𑁆𑀧𑀸𑀤𑀁 𑀮𑀪𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀧𑀼𑀭𑁂𑀳𑀁 𑀤𑀸𑀭𑀓𑁄 𑀳𑀼𑀢𑁆𑀯𑀸, 𑀓𑀻𑀴𑀫𑀸𑀦𑁄 𑀫𑀳𑀸𑀧𑀣𑁂;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀫𑀕𑁆𑀕𑁂 𑀲𑀓𑀮𑀺𑀓𑀁 𑀔𑀺𑀧𑀺𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀯𑀥𑀢𑁆𑀣𑀁 𑀫𑀁 𑀤𑁂𑀯𑀤𑀢𑁆𑀢𑁄, 𑀅𑀪𑀺𑀫𑀸𑀭𑁂 𑀧𑀬𑁆𑀬𑁄𑀚𑀬𑀻’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁦-𑁮𑁧);

𑀲𑀢𑁆𑀢𑀫𑀧𑀜𑁆𑀳𑁂 𑁋 𑀦𑀸𑀴𑀸𑀕𑀺𑀭𑀻𑀢𑀺 𑀥𑀦𑀧𑀸𑀮𑀓𑁄 𑀳𑀢𑁆𑀣𑀻 𑀫𑀸𑀭𑀡𑀢𑁆𑀣𑀸𑀬 𑀧𑁂𑀲𑀺𑀢𑁄. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀕𑁄𑀧𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀯𑀺𑀘𑀭𑀫𑀸𑀦𑁄 𑀫𑀳𑀸𑀧𑀣𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀆𑀕𑀘𑁆𑀙𑀢𑀺 𑀅𑀬𑀁 𑀫𑀼𑀡𑁆𑀟𑀓𑁄’’𑀢𑀺 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄 𑀳𑀢𑁆𑀣𑀺𑀦𑀸 𑀆𑀲𑀸𑀤𑁂𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀅𑀧𑀸𑀬𑁂𑀲𑀼 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑁄 𑀚𑀸𑀢𑁄. 𑀤𑁂𑀯𑀤𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸𑀦𑀁 𑀲𑀳𑀸𑀬𑀁 𑀓𑀢𑁆𑀯𑀸 ‘‘𑀢𑁆𑀯𑀁, 𑀫𑀳𑀸𑀭𑀸𑀚, 𑀧𑀺𑀢𑀭𑀁 𑀖𑀸𑀢𑁂𑀢𑁆𑀯𑀸 𑀭𑀸𑀚𑀸 𑀳𑁄𑀳𑀺, 𑀅𑀳𑀁 𑀩𑀼𑀤𑁆𑀥𑀁 𑀫𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀜𑁆𑀜𑁄 𑀅𑀦𑀼𑀜𑁆𑀜𑀸𑀢𑀸𑀬 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑁋 ‘‘𑀲𑁆𑀯𑁂 𑀢𑀼𑀫𑁆𑀳𑁂 𑀦𑀸𑀴𑀸𑀕𑀺𑀭𑀺𑀁 𑀲𑁄𑀴𑀲𑀲𑀼𑀭𑀸𑀖𑀝𑁂 𑀧𑀸𑀬𑁂𑀢𑁆𑀯𑀸 𑀪𑀕𑀯𑀢𑁄 𑀧𑀺𑀡𑁆𑀟𑀸𑀬 𑀘𑀭𑀡𑀯𑁂𑀮𑀸𑀬𑀁 𑀧𑁂𑀲𑁂𑀣𑀸’’𑀢𑀺 𑀳𑀢𑁆𑀣𑀺𑀕𑁄𑀧𑀓𑁂 𑀆𑀡𑀸𑀧𑁂𑀲𑀺. 𑀲𑀓𑀮𑀦𑀕𑀭𑀁 𑀫𑀳𑀸𑀓𑁄𑀮𑀸𑀳𑀮𑀁 𑀅𑀳𑁄𑀲𑀺, ‘‘𑀩𑀼𑀤𑁆𑀥𑀦𑀸𑀕𑁂𑀦 𑀳𑀢𑁆𑀣𑀺𑀦𑀸𑀕𑀲𑁆𑀲 𑀬𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀉𑀪𑀢𑁄 𑀭𑀸𑀚𑀯𑀻𑀣𑀺𑀬𑀁 𑀫𑀜𑁆𑀘𑀸𑀢𑀺𑀫𑀜𑁆𑀘𑀁 𑀩𑀦𑁆𑀥𑀺𑀢𑁆𑀯𑀸 𑀧𑀸𑀢𑁄𑀯 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀪𑀕𑀯𑀸𑀧𑀺 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀦𑀸𑀴𑀸𑀕𑀺𑀭𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀯𑀻𑀣𑀺𑀘𑀘𑁆𑀘𑀭𑀸𑀤𑀬𑁄 𑀯𑀺𑀥𑀫𑁂𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀢𑀤𑀸 𑀏𑀓𑀸 𑀇𑀢𑁆𑀣𑀻 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀯𑀻𑀣𑀺𑀢𑁄 𑀯𑀻𑀣𑀺𑀁 𑀕𑀘𑁆𑀙𑀢𑀺, 𑀳𑀢𑁆𑀣𑀻 𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀅𑀦𑀼𑀩𑀦𑁆𑀥𑀺. 𑀪𑀕𑀯𑀸 ‘‘𑀦𑀸𑀴𑀸𑀕𑀺𑀭𑀺, 𑀦 𑀢𑀁 𑀳𑀦𑀢𑁆𑀣𑀸𑀬 𑀧𑁂𑀲𑀺𑀢𑁄, 𑀇𑀥𑀸𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀸𑀪𑀺𑀫𑀼𑀔𑁄 𑀥𑀸𑀯𑀺. 𑀪𑀕𑀯𑀸 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀦𑀦𑁆𑀢𑀲𑀢𑁆𑀢𑁂𑀲𑀼 𑀨𑀭𑀡𑀸𑀭𑀳𑀁 𑀫𑁂𑀢𑁆𑀢𑀁 𑀏𑀓𑀲𑁆𑀫𑀺𑀁𑀬𑁂𑀯 𑀦𑀸𑀴𑀸𑀕𑀺𑀭𑀺𑀫𑁆𑀳𑀺 𑀨𑀭𑀺. 𑀲𑁄 𑀪𑀕𑀯𑀢𑁄 𑀫𑁂𑀢𑁆𑀢𑀸𑀬 𑀨𑀼𑀝𑁄 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺. 𑀪𑀕𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀳𑀢𑁆𑀣𑀁 𑀞𑀧𑁂𑀲𑀺. 𑀢𑀤𑀸 𑀤𑁂𑀯𑀩𑁆𑀭𑀳𑁆𑀫𑀸𑀤𑀬𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑀘𑀺𑀢𑁆𑀢𑀸 𑀧𑀼𑀧𑁆𑀨𑀧𑀭𑀸𑀕𑀸𑀤𑀻𑀳𑀺 𑀧𑀽𑀚𑁂𑀲𑀼𑀁. 𑀲𑀓𑀮𑀦𑀕𑀭𑁂 𑀚𑀡𑁆𑀡𑀼𑀓𑀫𑀢𑁆𑀢𑀸 𑀥𑀦𑀭𑀸𑀲𑀬𑁄 𑀅𑀳𑁂𑀲𑀼𑀁. 𑀭𑀸𑀚𑀸 ‘‘𑀧𑀘𑁆𑀙𑀺𑀫𑀤𑁆𑀯𑀸𑀭𑁂 𑀥𑀦𑀸𑀦𑀺 𑀦𑀕𑀭𑀯𑀸𑀲𑀻𑀦𑀁 𑀳𑁄𑀦𑁆𑀢𑀼, 𑀧𑀼𑀭𑀢𑁆𑀣𑀺𑀫𑀤𑁆𑀯𑀸𑀭𑁂 𑀥𑀦𑀸𑀦𑀺 𑀭𑀸𑀚𑀪𑀡𑁆𑀟𑀸𑀕𑀸𑀭𑁂 𑀳𑁄𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀲𑀩𑁆𑀩𑁂 𑀢𑀣𑀸 𑀓𑀭𑀺𑀁𑀲𑀼. 𑀢𑀤𑀸 𑀦𑀸𑀴𑀸𑀕𑀺𑀭𑀺 𑀥𑀦𑀧𑀸𑀮𑁄 𑀦𑀸𑀫 𑀅𑀳𑁄𑀲𑀺. 𑀪𑀕𑀯𑀸 𑀯𑁂𑀴𑀼𑀯𑀦𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀳𑀢𑁆𑀣𑀸𑀭𑁄𑀳𑁄 𑀧𑀼𑀭𑁂 𑀆𑀲𑀺𑀁, 𑀧𑀘𑁆𑀘𑁂𑀓𑀫𑀼𑀦𑀺𑀫𑀼𑀢𑁆𑀢𑀫𑀁;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀢𑀁, 𑀆𑀲𑀸𑀤𑁂𑀲𑀺𑀁 𑀕𑀚𑁂𑀦𑀳𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀪𑀦𑁆𑀢𑁄 𑀦𑀸𑀴𑀸𑀕𑀺𑀭𑀻 𑀕𑀚𑁄;

𑀕𑀺𑀭𑀺𑀩𑁆𑀩𑀚𑁂 𑀧𑀼𑀭𑀯𑀭𑁂, 𑀤𑀸𑀭𑀼𑀡𑁄 𑀲𑀫𑀼𑀧𑀸𑀕𑀫𑀻’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁨-𑁮𑁩);

𑀅𑀝𑁆𑀞𑀫𑀧𑀜𑁆𑀳𑁂 𑁋 𑀲𑀢𑁆𑀣𑀘𑁆𑀙𑁂𑀤𑁄𑀢𑀺 𑀲𑀢𑁆𑀣𑁂𑀦 𑀕𑀡𑁆𑀟𑀨𑀸𑀮𑀦𑀁 𑀓𑀼𑀞𑀸𑀭𑀸𑀬 𑀲𑀢𑁆𑀣𑁂𑀦 𑀙𑁂𑀤𑁄. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀧𑀘𑁆𑀘𑀦𑁆𑀢𑀤𑁂𑀲𑁂 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀤𑀼𑀚𑁆𑀚𑀦𑀲𑀁𑀲𑀕𑁆𑀕𑀯𑀲𑁂𑀦 𑀧𑀘𑁆𑀘𑀦𑁆𑀢𑀤𑁂𑀲𑁂 𑀯𑀸𑀲𑀯𑀲𑁂𑀦 𑀘 𑀥𑀼𑀢𑁆𑀢𑁄 𑀲𑀸𑀳𑀲𑀺𑀓𑁄 𑀏𑀓𑀤𑀺𑀯𑀲𑀁 𑀔𑀕𑁆𑀕𑀳𑀢𑁆𑀣𑁄 𑀧𑀢𑁆𑀢𑀺𑀓𑁄𑀯 𑀦𑀕𑀭𑁂 𑀯𑀺𑀘𑀭𑀦𑁆𑀢𑁄 𑀦𑀺𑀭𑀸𑀧𑀭𑀸𑀥𑁂 𑀚𑀦𑁂 𑀔𑀕𑁆𑀕𑁂𑀦 𑀨𑀸𑀮𑁂𑀦𑁆𑀢𑁄 𑀅𑀕𑀫𑀸𑀲𑀺. 𑀲𑁄 𑀢𑁂𑀦 𑀧𑀸𑀧𑀓𑀫𑁆𑀫𑀯𑀺𑀧𑀸𑀓𑁂𑀦 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑀪𑀽𑀢𑁄𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁂𑀯𑀤𑀢𑁆𑀢𑁂𑀦 𑀔𑀺𑀢𑁆𑀢𑀧𑀸𑀲𑀸𑀡𑀲𑀓𑁆𑀔𑀮𑀺𑀓𑀧𑀳𑀸𑀭𑁂𑀦 𑀉𑀝𑁆𑀞𑀺𑀢𑀕𑀡𑁆𑀟𑁄 𑀅𑀳𑁄𑀲𑀺. 𑀚𑀻𑀯𑀓𑁄 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀢𑀁 𑀕𑀡𑁆𑀟𑀁 𑀨𑀸𑀮𑁂𑀲𑀺. 𑀯𑁂𑀭𑀺𑀘𑀺𑀢𑁆𑀢𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁 𑀅𑀦𑀦𑁆𑀢𑀭𑀺𑀓𑀁 𑀅𑀳𑁄𑀲𑀺, 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀚𑀻𑀯𑀓𑀲𑁆𑀲 𑀕𑀡𑁆𑀟𑀨𑀸𑀮𑀦𑀁 𑀧𑀼𑀜𑁆𑀜𑀫𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀭𑀸𑀚𑀸𑀳𑀁 𑀧𑀢𑁆𑀢𑀺𑀓𑁄 𑀆𑀲𑀺𑀁, 𑀲𑀢𑁆𑀢𑀺𑀬𑀸 𑀧𑀼𑀭𑀺𑀲𑁂 𑀳𑀦𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀧𑀘𑁆𑀘𑀺𑀲𑀁 𑀪𑀼𑀲𑀁.

‘‘𑀓𑀫𑁆𑀫𑀼𑀦𑁄 𑀢𑀲𑁆𑀲 𑀲𑁂𑀲𑁂𑀦, 𑀇𑀤𑀸𑀦𑀺 𑀲𑀓𑀮𑀁 𑀫𑀫;

𑀧𑀸𑀤𑁂 𑀙𑀯𑀺𑀁 𑀧𑀓𑀧𑁆𑀧𑁂𑀲𑀺, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀻’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁪-𑁮𑁫);

𑀦𑀯𑀫𑁂 𑀧𑀜𑁆𑀳𑁂 𑁋 ‘‘𑀲𑀻𑀲𑀤𑀼𑀓𑁆𑀔𑀦𑁆𑀢𑀺 𑀲𑀻𑀲𑀸𑀩𑀸𑀥𑁄 𑀲𑀻𑀲𑀯𑁂𑀤𑀦𑀸. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀓𑁂𑀯𑀝𑁆𑀝𑀕𑀸𑀫𑁂 𑀓𑁂𑀯𑀝𑁆𑀝𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀓𑁂𑀯𑀝𑁆𑀝𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀫𑀘𑁆𑀙𑀫𑀸𑀭𑀡𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀫𑀘𑁆𑀙𑁂 𑀫𑀸𑀭𑁂𑀦𑁆𑀢𑁂 𑀤𑀺𑀲𑁆𑀯𑀸 𑀢𑀢𑁆𑀣 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺, 𑀲𑀳𑀕𑀢𑀸𑀧𑀺 𑀢𑀣𑁂𑀯 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑀬𑀺𑀁𑀲𑀼. 𑀲𑁄 𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑁂𑀦 𑀘𑀢𑀼𑀭𑀸𑀧𑀸𑀬𑁂 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀢𑁂𑀳𑀺 𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀫𑁂𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀢𑁄𑀧𑀺 𑀲𑀬𑀁 𑀲𑀻𑀲𑀸𑀩𑀸𑀥𑀁 𑀧𑀘𑁆𑀘𑀦𑀼𑀪𑁄𑀲𑀺. 𑀢𑁂 𑀘 𑀲𑀓𑁆𑀬𑀭𑀸𑀚𑀸𑀦𑁄 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑀯𑀺𑀟𑀟𑀽𑀪𑀯𑀢𑁆𑀣𑀼) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀟𑀟𑀽𑀪𑀲𑀗𑁆𑀕𑀸𑀫𑁂 𑀲𑀩𑁆𑀩𑁂 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀳𑀁 𑀓𑁂𑀯𑀝𑁆𑀝𑀕𑀸𑀫𑀲𑁆𑀫𑀺𑀁, 𑀅𑀳𑀼𑀁 𑀓𑁂𑀯𑀝𑁆𑀝𑀤𑀸𑀭𑀓𑁄;

𑀫𑀘𑁆𑀙𑀓𑁂 𑀖𑀸𑀢𑀺𑀢𑁂 𑀤𑀺𑀲𑁆𑀯𑀸, 𑀚𑀦𑀬𑀺𑀁 𑀲𑁄𑀫𑀦𑀲𑁆𑀲𑀓𑀁.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀲𑀻𑀲𑀤𑀼𑀓𑁆𑀔𑀁 𑀅𑀳𑀽 𑀫𑀫;

𑀲𑀩𑁆𑀩𑁂 𑀲𑀓𑁆𑀓𑀸 𑀘 𑀳𑀜𑁆𑀜𑀺𑀁𑀲𑀼, 𑀬𑀤𑀸 𑀳𑀦𑀺 𑀯𑀺𑀝𑀝𑀽𑀪𑁄’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁬-𑁮𑁭);

𑀤𑀲𑀫𑀧𑀜𑁆𑀳𑁂 𑁋 𑀬𑀯𑀔𑀸𑀤𑀦𑀦𑁆𑀢𑀺 𑀯𑁂𑀭𑀜𑁆𑀚𑀸𑀬𑀁 𑀬𑀯𑀢𑀡𑁆𑀟𑀼𑀮𑀔𑀸𑀤𑀦𑀁. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀚𑀸𑀢𑀺𑀯𑀲𑁂𑀦 𑀘 𑀅𑀦𑁆𑀥𑀩𑀸𑀮𑀪𑀸𑀯𑁂𑀦 𑀘 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑁂 𑀫𑀥𑀼𑀭𑀦𑁆𑀦𑀧𑀸𑀦𑁂 𑀲𑀸𑀮𑀺𑀪𑁄𑀚𑀦𑀸𑀤𑀬𑁄 𑀘 𑀪𑀼𑀜𑁆𑀚𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀭𑁂 𑀫𑀼𑀡𑁆𑀟𑀓𑀲𑀫𑀡𑀸, 𑀬𑀯𑀁 𑀔𑀸𑀤𑀣, 𑀫𑀸 𑀲𑀸𑀮𑀺𑀪𑁄𑀚𑀦𑀁 𑀪𑀼𑀜𑁆𑀚𑀣𑀸’’𑀢𑀺 𑀅𑀓𑁆𑀓𑁄𑀲𑀺. 𑀲𑁄 𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑀯𑀺𑀧𑀸𑀓𑁂𑀦 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀘𑀢𑀼𑀭𑀸𑀧𑀸𑀬𑁂 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀓𑀫𑁂𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀮𑁄𑀓𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀘𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀕𑀸𑀫𑀲𑀫𑀻𑀧𑁂 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀁 𑀧𑀼𑀘𑀺𑀫𑀦𑁆𑀤𑀭𑀼𑀓𑁆𑀔𑀫𑀽𑀮𑀁 𑀧𑀸𑀧𑀼𑀡𑀺. 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀪𑀕𑀯𑀦𑁆𑀢𑀁 𑀚𑀺𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀥𑁂𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀅𑀣 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀓𑀮𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀕𑀸𑀫𑀯𑀸𑀲𑀻𑀦𑀁 𑀫𑀸𑀭𑀸𑀯𑀝𑁆𑀝𑀦𑀁 𑀅𑀓𑀸𑀲𑀺. 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀪𑀕𑀯𑀢𑁄 𑀫𑀸𑀭𑀸𑀯𑀝𑁆𑀝𑀦𑀯𑀲𑁂𑀦 𑀏𑀓𑁄𑀧𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀁 𑀤𑀸𑀢𑀸 𑀦𑀸𑀳𑁄𑀲𑀺. 𑀪𑀕𑀯𑀸 𑀢𑀼𑀘𑁆𑀙𑀧𑀢𑁆𑀢𑁄𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀼𑀦𑀸𑀕𑀜𑁆𑀙𑀺. 𑀢𑀲𑁆𑀫𑀺𑀁 𑀏𑀯𑀁 𑀆𑀕𑀢𑁂 𑀢𑀢𑁆𑀣𑁂𑀯 𑀦𑀺𑀯𑀼𑀝𑁆𑀞𑀸 𑀅𑀲𑁆𑀲𑀯𑀸𑀡𑀺𑀚𑀸 𑀢𑀁 𑀤𑀺𑀯𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀅𑀲𑁆𑀲𑀲𑀢𑀸𑀦𑀁 𑀪𑀢𑁆𑀢𑀢𑁄 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀬𑀯𑀁 𑀓𑁄𑀝𑁆𑀝𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂𑀲𑀼 𑀧𑀓𑁆𑀔𑀺𑀧𑀺𑀁𑀲𑀼. 𑀲𑀓𑀮𑀲𑁆𑀲 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀼𑀚𑀸𑀢𑀸𑀬 𑀧𑀸𑀬𑀸𑀲𑀧𑀘𑀦𑀤𑀺𑀯𑀲𑁂 𑀯𑀺𑀬 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀺, 𑀏𑀯𑀁 𑀢𑁂𑀫𑀸𑀲𑀁 𑀬𑀯𑀁 𑀧𑀭𑀺𑀪𑀼𑀜𑁆𑀚𑀺. 𑀢𑁂𑀫𑀸𑀲𑀘𑁆𑀘𑀬𑁂𑀦 𑀫𑀸𑀭𑀸𑀯𑀝𑁆𑀝𑀦𑁂 𑀯𑀺𑀕𑀢𑁂 𑀧𑀯𑀸𑀭𑀡𑀸𑀤𑀺𑀯𑀲𑁂 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀭𑀺𑀢𑁆𑀯𑀸 𑀫𑀳𑀸𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀬𑀺𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸 𑀘 𑀪𑀼𑀜𑁆𑀚𑀣 𑀲𑀸𑀮𑀬𑁄.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀫𑀸𑀲𑀁 𑀔𑀸𑀤𑀺𑀢𑀁 𑀬𑀯𑀁;

𑀦𑀺𑀫𑀦𑁆𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺𑀁 𑀢𑀤𑀸’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁮-𑁮𑁯);

𑀏𑀓𑀸𑀤𑀲𑀫𑀧𑀜𑁆𑀳𑁂 𑁋 𑀧𑀺𑀝𑁆𑀞𑀺𑀤𑀼𑀓𑁆𑀔𑀦𑁆𑀢𑀺 𑀧𑀺𑀝𑁆𑀞𑀺𑀆𑀩𑀸𑀥𑁄. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀓𑀺𑀜𑁆𑀘𑀺 𑀭𑀲𑁆𑀲𑀥𑀸𑀢𑀼𑀓𑁄 𑀅𑀳𑁄𑀲𑀺. 𑀢𑁂𑀦 𑀲𑀫𑀬𑁂𑀦 𑀏𑀓𑁄 𑀫𑀮𑁆𑀮𑀬𑀼𑀤𑁆𑀥𑀬𑁄𑀥𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀫𑀮𑁆𑀮𑀬𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑁂 𑀧𑀼𑀭𑀺𑀲𑁂 𑀧𑀸𑀢𑁂𑀢𑁆𑀯𑀸 𑀚𑀬𑀧𑁆𑀧𑀢𑁆𑀢𑁄 𑀓𑀫𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑀦𑀦𑀕𑀭𑀁 𑀧𑀢𑁆𑀯𑀸 𑀢𑀲𑁆𑀫𑀺𑀫𑁆𑀧𑀺 𑀚𑀦𑁂 𑀧𑀸𑀢𑁂𑀢𑁆𑀯𑀸 𑀕𑀦𑁆𑀢𑀼𑀫𑀸𑀭𑀤𑁆𑀥𑁄. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑁂 𑀏𑀲 𑀚𑀬𑀁 𑀧𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀢𑀢𑁆𑀣 𑀦𑀕𑀭𑀫𑀡𑁆𑀟𑀮𑀫𑀸𑀕𑀫𑁆𑀫 𑀅𑀧𑁆𑀧𑁄𑀝𑁂𑀢𑁆𑀯𑀸 𑀆𑀕𑀘𑁆𑀙 𑀫𑀬𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀸𑀢𑀺. 𑀲𑁄 𑀳𑀲𑀺𑀢𑁆𑀯𑀸 ‘‘𑀅𑀳𑀁 𑀫𑀳𑀦𑁆𑀢𑁂 𑀧𑀼𑀭𑀺𑀲𑁂 𑀧𑀸𑀢𑁂𑀲𑀺𑀁, 𑀅𑀬𑀁 𑀭𑀲𑁆𑀲𑀥𑀸𑀢𑀼𑀓𑁄 𑀯𑀸𑀫𑀦𑀓𑁄 𑀫𑀫 𑀏𑀓𑀳𑀢𑁆𑀣𑀲𑁆𑀲𑀸𑀧𑀺 𑀦𑀧𑁆𑀧𑀳𑁄𑀢𑀻’’𑀢𑀺 𑀅𑀧𑁆𑀧𑁄𑀝𑁂𑀢𑁆𑀯𑀸 𑀦𑀤𑀺𑀢𑁆𑀯𑀸 𑀆𑀕𑀘𑁆𑀙𑀺. 𑀢𑁂 𑀉𑀪𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀳𑀢𑁆𑀣𑀁 𑀧𑀭𑀸𑀫𑀲𑀺𑀁𑀲𑀼, 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀪𑀫𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀦𑁆𑀢𑁄 𑀔𑀦𑁆𑀥𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀸 𑀅𑀧𑁆𑀧𑁄𑀝𑁂𑀢𑁆𑀯𑀸 𑀯𑀢𑁆𑀣𑀸𑀪𑀭𑀡𑀸𑀤𑀻𑀳𑀺 𑀩𑁄𑀥𑀺𑀲𑀢𑁆𑀢𑀁 𑀧𑀽𑀚𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀫𑀮𑁆𑀮𑀬𑁄𑀥𑀁 𑀉𑀚𑀼𑀁 𑀲𑀬𑀸𑀧𑁂𑀢𑁆𑀯𑀸 𑀔𑀦𑁆𑀥𑀝𑁆𑀞𑀺𑀁 𑀉𑀚𑀼𑀓𑀁 𑀓𑀢𑁆𑀯𑀸 ‘‘𑀕𑀘𑁆𑀙 𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀫𑀸 𑀓𑀭𑁄𑀲𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀲𑀭𑀻𑀭𑀲𑀻𑀲𑀸𑀤𑀺 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑀪𑀽𑀢𑁄𑀧𑀺 𑀧𑀺𑀝𑁆𑀞𑀺𑀭𑀼𑀚𑀸𑀤𑀺𑀤𑀼𑀓𑁆𑀔𑀫𑀦𑀼𑀪𑁄𑀲𑀺. 𑀢𑀲𑁆𑀫𑀸 𑀓𑀤𑀸𑀘𑀺 𑀧𑀺𑀝𑁆𑀞𑀺𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 ‘‘𑀇𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑀬𑀁 𑀲𑀼𑀕𑀢𑀘𑀻𑀯𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀬𑀢𑀺, 𑀓𑀫𑁆𑀫𑀧𑀺𑀮𑁄𑀢𑀺𑀓𑀁 𑀦𑀸𑀫 𑀩𑀼𑀤𑁆𑀥𑀫𑀧𑀺 𑀦 𑀫𑀼𑀜𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀺𑀩𑁆𑀩𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀫𑀮𑁆𑀮𑀧𑀼𑀢𑁆𑀢𑀁 𑀦𑀺𑀳𑁂𑀞𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀺𑀝𑁆𑀞𑀺𑀤𑀼𑀓𑁆𑀔𑀁 𑀅𑀳𑀽 𑀫𑀫𑀸’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁯𑁦);

𑀤𑁆𑀯𑀸𑀤𑀲𑀫𑀧𑀜𑁆𑀳𑁂 𑁋 𑀅𑀢𑀺𑀲𑀸𑀭𑁄𑀢𑀺 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀯𑀺𑀭𑁂𑀘𑀦𑀁. 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑁂𑀚𑁆𑀚𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀭𑁄𑀕𑁂𑀦 𑀯𑀺𑀘𑁆𑀙𑀺𑀢𑀁 𑀢𑀺𑀓𑀺𑀘𑁆𑀙𑀦𑁆𑀢𑁄 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀢𑀺𑀓𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀤𑀸𑀦𑁂 𑀧𑀫𑀸𑀤𑀫𑀸𑀕𑀫𑁆𑀫 𑀅𑀧𑀭𑀁 𑀑𑀲𑀥𑀁 𑀤𑀢𑁆𑀯𑀸 𑀯𑀫𑀦𑀯𑀺𑀭𑁂𑀘𑀦𑀁 𑀅𑀓𑀸𑀲𑀺. 𑀲𑁂𑀝𑁆𑀞𑀺 𑀩𑀳𑀼𑀥𑀦𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀩𑀸𑀥𑁂𑀦 𑀯𑀺𑀘𑁆𑀙𑀺𑀢𑁄 𑀅𑀳𑁄𑀲𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀧𑀘𑀺𑀢𑀲𑀽𑀓𑀭𑀫𑀤𑁆𑀤𑀯𑀲𑁆𑀲 𑀲𑀓𑀮𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑁂𑀦 𑀆𑀳𑀸𑀭𑁂𑀦 𑀲𑀳 𑀪𑀼𑀢𑁆𑀢𑀓𑁆𑀔𑀡𑁂 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀯𑀺𑀭𑁂𑀘𑀦𑀁 𑀅𑀳𑁄𑀲𑀺. 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀔𑀬𑀫𑀕𑀫𑀸𑀲𑀺. 𑀪𑀕𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀦𑀺𑀲𑀻𑀤𑀦𑁆𑀢𑁄 𑀧𑀺𑀧𑀸𑀲𑀺𑀢𑁄 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑁂𑀦 𑀓𑀼𑀲𑀺𑀦𑀸𑀭𑀁 𑀧𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀓𑀫𑁆𑀫𑀧𑀺𑀮𑁄𑀢𑀺𑀓𑀁 𑀏𑀯𑀭𑀽𑀧𑀁 𑀮𑁄𑀓𑀢𑁆𑀢𑀬𑀲𑀸𑀫𑀺𑀫𑁆𑀧𑀺 𑀦 𑀯𑀺𑀚𑀳𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀺𑀓𑀺𑀘𑁆𑀙𑀓𑁄 𑀅𑀳𑀁 𑀆𑀲𑀺𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀭𑁂𑀘𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀳𑁄𑀢𑀺 𑀧𑀓𑁆𑀔𑀦𑁆𑀤𑀺𑀓𑀸 𑀫𑀫𑀸𑀢𑀺.

‘‘𑀏𑀯𑀁 𑀚𑀺𑀦𑁄 𑀯𑀺𑀬𑀸𑀓𑀸𑀲𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀕𑁆𑀕𑀢𑁄;

𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀅𑀦𑁄𑀢𑀢𑁆𑀢𑁂 𑀫𑀳𑀸𑀲𑀭𑁂’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁯𑁧, 𑁯𑁬);

𑀏𑀯𑀁 𑀧𑀝𑀺𑀜𑁆𑀜𑀸𑀢𑀧𑀜𑁆𑀳𑀸𑀦𑀁, 𑀫𑀸𑀢𑀺𑀓𑀸𑀞𑀧𑀦𑀯𑀲𑁂𑀦 𑀅𑀓𑀼𑀲𑀮𑀸𑀧𑀤𑀸𑀦𑀁 𑀲𑀫𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀇𑀢𑁆𑀣𑀁 𑀲𑀼𑀤𑀦𑁆𑀢𑀺 𑀇𑀢𑁆𑀣𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑁄 𑀧𑀤𑀧𑀽𑀭𑀡𑀢𑁆𑀣𑁂 𑀆𑀕𑀢𑁄. 𑀪𑀕𑀯𑀸 𑀪𑀸𑀕𑁆𑀬𑀲𑀫𑁆𑀧𑀦𑁆𑀦𑁄 𑀧𑀽𑀭𑀺𑀢𑀧𑀸𑀭𑀫𑀺𑀫𑀳𑀸𑀲𑀢𑁆𑀢𑁄 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺. 𑁋

𑀏𑀯𑀫𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀤𑁂𑀯𑀸𑀢𑀺𑀤𑁂𑀯𑁄 𑀲𑀓𑁆𑀓𑀸𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀢𑀺𑀩𑁆𑀭𑀳𑁆𑀫𑀸 𑀩𑀼𑀤𑁆𑀥𑀸𑀢𑀺𑀩𑀼𑀤𑁆𑀥𑁄 𑀲𑁄 𑀫𑀳𑀸𑀓𑀸𑀭𑀼𑀡𑀺𑀓𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀘𑀭𑀺𑀬𑀁 𑀩𑀼𑀤𑁆𑀥𑀓𑀸𑀭𑀡𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀧𑀸𑀓𑀝𑀁 𑀓𑀼𑀭𑀼𑀫𑀸𑀦𑁄 𑀩𑀼𑀤𑁆𑀥𑀸𑀧𑀤𑀸𑀦𑀺𑀬𑀁 𑀦𑀸𑀫 𑀩𑀼𑀤𑁆𑀥𑀓𑀸𑀭𑀡𑀧𑀓𑀸𑀲𑀓𑀁 𑀦𑀸𑀫 𑀥𑀫𑁆𑀫𑀧𑀭𑀺𑀬𑀸𑀬𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺𑀢𑁆𑀣 𑀓𑀣𑁂𑀲𑀻𑀢𑀺.

𑀇𑀢𑀺 𑀯𑀺𑀲𑀼𑀤𑁆𑀥𑀚𑀦𑀯𑀺𑀮𑀸𑀲𑀺𑀦𑀺𑀬𑀸 𑀅𑀧𑀤𑀸𑀦-𑀅𑀝𑁆𑀞𑀓𑀣𑀸𑀬

𑀩𑀼𑀤𑁆𑀥𑀅𑀧𑀤𑀸𑀦𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨.𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀢𑁄 𑀅𑀦𑀦𑁆𑀢𑀭𑀁 𑀅𑀧𑀤𑀸𑀦𑀁 𑀲𑀗𑁆𑀕𑀸𑀬𑀦𑁆𑀢𑁄 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑀸 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀅𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀁 𑀲𑀼𑀡𑀸𑀣𑀸’’𑀢𑀺 𑀆𑀳. 𑀢𑁂𑀲𑀁 𑀅𑀧𑀤𑀸𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑁮𑁩. ‘‘𑀲𑀼𑀡𑀸𑀣𑀸’’𑀢𑀺 𑀯𑀼𑀢𑁆𑀢𑀧𑀤𑀁 𑀉𑀧𑁆𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀧𑀓𑀸𑀲𑁂𑀦𑁆𑀢𑁄 ‘‘𑀢𑀣𑀸𑀕𑀢𑀁 𑀚𑁂𑀢𑀯𑀦𑁂 𑀯𑀲𑀦𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑁂𑀢𑀓𑀼𑀫𑀸𑀭𑀲𑁆𑀲 𑀦𑀸𑀫𑀯𑀲𑁂𑀦 𑀢𑀣𑀸𑀲𑀜𑁆𑀜𑀺𑀢𑁂 𑀯𑀺𑀳𑀸𑀭𑁂 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀯𑀸 𑀯𑀲𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀬𑀣𑀸 𑀧𑀼𑀭𑀺𑀫𑀓𑀸 𑀯𑀺𑀧𑀲𑁆𑀲𑀺𑀆𑀤𑀬𑁄 𑀩𑀼𑀤𑁆𑀥𑀸 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀆𑀕𑀢𑀸, 𑀢𑀣𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀢𑀁 𑀢𑀣𑀸𑀕𑀢𑀁 𑀚𑁂𑀢𑀯𑀦𑁂 𑀯𑀲𑀦𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀤𑁂𑀳𑀫𑀼𑀦𑀻𑀢𑀺 𑀯𑁂𑀤𑁂𑀳𑀭𑀝𑁆𑀞𑁂 𑀚𑀸𑀢𑀸 𑀯𑁂𑀤𑁂𑀳𑀻, 𑀯𑁂𑀤𑁂𑀳𑀺𑀬𑀸 𑀧𑀼𑀢𑁆𑀢𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑁄. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀇𑀢𑁄 𑀕𑀢𑁄 𑀧𑀯𑀢𑁆𑀢𑁄𑀢𑀺 𑀫𑀼𑀦𑀺. 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘 𑀲𑁄 𑀫𑀼𑀦𑀺 𑀘𑁂𑀢𑀺 ‘‘𑀯𑁂𑀤𑁂𑀳𑀺𑀧𑀼𑀢𑁆𑀢𑀫𑀼𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀯𑀡𑁆𑀡𑀸𑀕𑀫𑁄’’𑀢𑀺𑀆𑀤𑀺𑀦𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀇-𑀓𑀸𑀭𑀲𑁆𑀲 𑀅𑀢𑁆𑀢𑀁 𑀧𑀼𑀢𑁆𑀢-𑀲𑀤𑁆𑀤𑀲𑁆𑀲 𑀘 𑀮𑁄𑀧𑀁 𑀓𑀢𑁆𑀯𑀸 ‘‘𑀯𑁂𑀤𑁂𑀳𑀫𑀼𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑀺𑀫𑀦𑁆𑀢𑀸𑀦𑀁 𑀥𑀺𑀢𑀺𑀫𑀦𑁆𑀢𑀸𑀦𑀁 𑀕𑀢𑀺𑀫𑀦𑁆𑀢𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀦𑀢𑀗𑁆𑀕𑁄 𑀦𑀫𑀦𑀓𑀸𑀬𑀗𑁆𑀕𑁄 𑀅𑀜𑁆𑀚𑀮𑀺𑀓𑁄 𑀳𑀼𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀓𑀻𑀤𑀺𑀲𑀸 𑀳𑁄𑀦𑁆𑀢𑀻’’𑀢𑀺 𑀅𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑁂𑀳𑀺 𑀳𑁂𑀢𑀼𑀪𑀺 𑀓𑁂𑀳𑀺 𑀓𑀸𑀭𑀡𑁂𑀳𑀺 𑀪𑀯𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀻𑀭𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺.

𑁮𑁪-𑁮𑁫. 𑀢𑀢𑁄 𑀧𑀭𑀁 𑀯𑀺𑀲𑁆𑀲𑀚𑁆𑀚𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑀸𑀳 𑀲𑀩𑁆𑀩𑀜𑁆𑀜𑀼𑀯𑀭𑁄 𑀫𑀳𑁂𑀲𑀻’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀁 𑀅𑀢𑀻𑀢𑀸𑀤𑀺𑀪𑁂𑀤𑀁 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀜𑁆𑀜𑀽 𑀘 𑀲𑁄 𑀯𑀭𑁄 𑀉𑀢𑁆𑀢𑀫𑁄 𑀘𑁂𑀢𑀺 𑀲𑀩𑁆𑀩𑀜𑁆𑀜𑀼𑀯𑀭𑁄. 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁, 𑀲𑀫𑀸𑀥𑀺𑀓𑁆𑀔𑀦𑁆𑀥𑀁, 𑀧𑀜𑁆𑀜𑀸𑀓𑁆𑀔𑀦𑁆𑀥𑀁, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁, 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀫𑀳𑁂𑀲𑀺. 𑀆𑀦𑀦𑁆𑀤𑀪𑀤𑁆𑀤𑀁 𑀫𑀥𑀼𑀭𑁂𑀦 𑀲𑀭𑁂𑀦 𑀢𑀤𑀸 𑀢𑀲𑁆𑀫𑀺𑀁 𑀧𑀼𑀘𑁆𑀙𑀺𑀢𑀓𑀸𑀮𑁂 𑀆𑀳 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑁄 𑀆𑀦𑀦𑁆𑀤, 𑀬𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼 𑀧𑀼𑀩𑁆𑀩𑁂𑀲𑀼 𑀅𑀢𑀻𑀢𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸 𑀚𑀺𑀦𑀲𑀸𑀲𑀦𑁂𑀲𑀼 𑀅𑀮𑀤𑁆𑀥𑀫𑁄𑀓𑁆𑀔𑀸 𑀅𑀧𑁆𑀧𑀢𑁆𑀢𑀦𑀺𑀩𑁆𑀩𑀸𑀦𑀸. 𑀢𑁂 𑀲𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀥𑀻𑀭𑀸 𑀇𑀥 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀁𑀯𑁂𑀕𑀫𑀼𑀔𑁂𑀦 𑀏𑀓𑀧𑀼𑀕𑁆𑀕𑀮𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀚𑀸𑀢𑀸𑀢𑀺 𑀅𑀢𑁆𑀣𑁄. 𑀲𑀼𑀢𑀺𑀓𑁆𑀔𑀧𑀜𑁆𑀜𑀸 𑀲𑀼𑀝𑁆𑀞𑀼 𑀢𑀺𑀓𑁆𑀔𑀧𑀜𑁆𑀜𑀸. 𑀯𑀺𑀦𑀸𑀧𑀺 𑀩𑀼𑀤𑁆𑀥𑁂𑀳𑀺 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀳𑀺 𑀭𑀳𑀺𑀢𑀸 𑀅𑀧𑀺. 𑀧𑀭𑀺𑀢𑁆𑀢𑀓𑁂𑀦𑀧𑀺 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀆𑀭𑀫𑁆𑀫𑀡𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀝𑀺𑀏𑀓𑁆𑀓𑀁 𑀩𑁄𑀥𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀦𑁆𑀢𑀭𑀁 𑀩𑁄𑀥𑀺𑀁 𑀅𑀦𑀼𑀧𑀸𑀧𑀼𑀡𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺.

𑁮𑁬. 𑀲𑀩𑁆𑀩𑀫𑁆𑀳𑀺 𑀮𑁄𑀓𑀫𑁆𑀳𑀺 𑀲𑀓𑀮𑀲𑁆𑀫𑀺𑀁 𑀮𑁄𑀓𑀢𑁆𑀢𑀬𑁂 𑀫𑀫𑀁 𑀞𑀧𑁂𑀢𑁆𑀯𑀸 𑀫𑀁 𑀯𑀺𑀳𑀸𑀬 𑀧𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑁄𑀯 𑀲𑀤𑀺𑀲𑁄 𑀏𑀯 𑀦𑀢𑁆𑀣𑀺, 𑀢𑁂𑀲𑀁 𑀫𑀳𑀸𑀫𑀼𑀦𑀻𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀇𑀫𑀁 𑀯𑀡𑁆𑀡𑀁 𑀇𑀫𑀁 𑀕𑀼𑀡𑀁 𑀧𑀤𑁂𑀲𑀫𑀢𑁆𑀢𑀁 𑀲𑀗𑁆𑀔𑁂𑀧𑀫𑀢𑁆𑀢𑀁 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀸𑀥𑀼 𑀲𑀸𑀥𑀼𑀓𑀁 𑀯𑀓𑁆𑀔𑀸𑀫𑀺 𑀓𑀣𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁮𑁭. 𑀅𑀦𑀸𑀘𑀭𑀺𑀬𑀓𑀸 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀩𑀼𑀤𑁆𑀥𑀸𑀦𑀁 𑀅𑀢𑁆𑀢𑀦𑀸𑀯 𑀧𑀝𑀺𑀯𑀺𑀤𑁆𑀥𑀸𑀦𑀁 𑀇𑀲𑀻𑀦𑀁 𑀅𑀦𑁆𑀢𑀭𑁂 𑀫𑀳𑀸𑀇𑀲𑀻𑀦𑀁 𑀫𑀥𑀽𑀯𑀔𑀼𑀤𑁆𑀤𑀁 𑀔𑀼𑀤𑁆𑀤𑀓𑀫𑀥𑀼𑀧𑀝𑀮𑀁 𑀇𑀯 𑀲𑀸𑀥𑀽𑀦𑀺 𑀫𑀥𑀼𑀭𑀸𑀦𑀺 𑀯𑀸𑀓𑁆𑀬𑀸𑀦𑀺 𑀉𑀤𑀸𑀦𑀯𑀘𑀦𑀸𑀦𑀺 𑀅𑀦𑀼𑀢𑁆𑀢𑀭𑀁 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀪𑁂𑀲𑀚𑀁 𑀑𑀲𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑀬𑀦𑁆𑀢𑀸 𑀇𑀘𑁆𑀙𑀦𑁆𑀢𑀸 𑀲𑀩𑁆𑀩𑁂 𑀢𑀼𑀫𑁆𑀳𑁂 𑀲𑀼𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀧𑁆𑀧𑀲𑀦𑁆𑀦𑀫𑀦𑀸 𑀲𑀼𑀡𑀸𑀣 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄.

𑁮𑁮-𑁮𑁯. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀫𑀸𑀕𑀢𑀸𑀦𑀦𑁆𑀢𑀺 𑀭𑀸𑀲𑀺𑀪𑀽𑀢𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁. 𑀅𑀭𑀺𑀝𑁆𑀞𑁄, 𑀉𑀧𑀭𑀺𑀝𑁆𑀞𑁄, 𑀢𑀕𑀭𑀲𑀺𑀔𑀺, 𑀬𑀲𑀲𑁆𑀲𑀻, 𑀲𑀼𑀤𑀲𑁆𑀲𑀦𑁄, 𑀧𑀺𑀬𑀤𑀲𑁆𑀲𑀻, 𑀕𑀦𑁆𑀥𑀸𑀭𑁄, 𑀧𑀺𑀡𑁆𑀟𑁄𑀮𑁄, 𑀉𑀧𑀸𑀲𑀪𑁄, 𑀦𑀺𑀣𑁄, 𑀢𑀣𑁄, 𑀲𑀼𑀢𑀯𑀸, 𑀪𑀸𑀯𑀺𑀢𑀢𑁆𑀢𑁄, 𑀲𑀼𑀫𑁆𑀪𑁄, 𑀲𑀼𑀪𑁄, 𑀫𑁂𑀣𑀼𑀮𑁄, 𑀅𑀝𑁆𑀞𑀫𑁄, 𑀲𑀼𑀫𑁂𑀥𑁄, 𑀅𑀦𑀻𑀖𑁄, 𑀲𑀼𑀤𑀸𑀞𑁄, 𑀳𑀺𑀗𑁆𑀕𑀼, 𑀳𑀺𑀗𑁆𑀕𑁄, 𑀤𑁆𑀯𑁂𑀚𑀸𑀮𑀺𑀦𑁄, 𑀅𑀝𑁆𑀞𑀓𑁄, 𑀓𑁄𑀲𑀮𑁄, 𑀲𑀼𑀩𑀸𑀳𑀼, 𑀉𑀧𑀦𑁂𑀫𑀺𑀲𑁄, 𑀦𑁂𑀫𑀺𑀲𑁄, 𑀲𑀦𑁆𑀢𑀘𑀺𑀢𑁆𑀢𑁄, 𑀲𑀘𑁆𑀘𑁄, 𑀢𑀣𑁄, 𑀯𑀺𑀭𑀚𑁄, 𑀧𑀡𑁆𑀟𑀺𑀢𑁄, 𑀓𑀸𑀮𑁄, 𑀉𑀧𑀓𑀸𑀮𑁄, 𑀯𑀺𑀚𑀺𑀢𑁄, 𑀚𑀺𑀢𑁄, 𑀅𑀗𑁆𑀕𑁄, 𑀧𑀗𑁆𑀕𑁄, 𑀕𑀼𑀢𑁆𑀢𑀺𑀚𑁆𑀚𑀺𑀢𑁄, 𑀧𑀲𑁆𑀲𑀻, 𑀚𑀳𑀻, 𑀉𑀧𑀥𑀺𑀁, 𑀤𑀼𑀓𑁆𑀔𑀫𑀽𑀮𑀁, 𑀅𑀧𑀭𑀸𑀚𑀺𑀢𑁄, 𑀲𑀭𑀪𑀗𑁆𑀕𑁄, 𑀮𑁄𑀫𑀳𑀁𑀲𑁄, 𑀉𑀘𑁆𑀘𑀗𑁆𑀕𑀫𑀸𑀬𑁄, 𑀅𑀲𑀺𑀢𑁄, 𑀅𑀦𑀸𑀲𑀯𑁄, 𑀫𑀦𑁄𑀫𑀬𑁄, 𑀫𑀸𑀦𑀘𑁆𑀙𑀺𑀤𑁄, 𑀩𑀦𑁆𑀥𑀼𑀫𑀸, 𑀢𑀤𑀸𑀥𑀺𑀫𑀼𑀢𑁆𑀢𑁄, 𑀯𑀺𑀫𑀮𑁄, 𑀓𑁂𑀢𑀼𑀫𑀸, 𑀓𑁄𑀢𑀼𑀫𑁆𑀩𑀭𑀗𑁆𑀕𑁄, 𑀫𑀸𑀢𑀗𑁆𑀕𑁄, 𑀅𑀭𑀺𑀬𑁄, 𑀅𑀘𑁆𑀘𑀼𑀢𑁄, 𑀅𑀘𑁆𑀘𑀼𑀢𑀕𑀸𑀫𑀺, 𑀩𑁆𑀬𑀸𑀫𑀓𑁄, 𑀲𑀼𑀫𑀗𑁆𑀕𑀮𑁄, 𑀤𑀺𑀩𑁆𑀩𑀺𑀮𑁄 𑀘𑀸𑀢𑀺𑀆𑀤𑀻𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀁 𑀬𑀸𑀦𑀺 𑀅𑀧𑀤𑀸𑀦𑀸𑀦𑀺 𑀧𑀭𑀫𑁆𑀧𑀭𑀁 𑀧𑀘𑁆𑀘𑁂𑀓𑀁 𑀩𑁆𑀬𑀸𑀓𑀭𑀡𑀸𑀦𑀺 𑀬𑁄 𑀘 𑀆𑀤𑀻𑀦𑀯𑁄 𑀬𑀜𑁆𑀘 𑀯𑀺𑀭𑀸𑀕𑀯𑀢𑁆𑀣𑀼𑀁 𑀅𑀦𑀮𑁆𑀮𑀻𑀬𑀦𑀓𑀸𑀭𑀡𑀁 𑀬𑀣𑀸 𑀘 𑀬𑁂𑀦 𑀓𑀸𑀭𑀡𑁂𑀦 𑀩𑁄𑀥𑀺𑀁 𑀅𑀦𑀼𑀧𑀸𑀧𑀼𑀡𑀺𑀁𑀲𑀼 𑀘𑀢𑀼𑀫𑀕𑁆𑀕𑀜𑀸𑀡𑀁 𑀧𑀘𑁆𑀘𑀓𑁆𑀔𑀁 𑀓𑀭𑀺𑀁𑀲𑀼. 𑀲𑀭𑀸𑀕𑀯𑀢𑁆𑀣𑀼𑀲𑀽𑀢𑀺 𑀲𑀼𑀝𑁆𑀞𑀼 𑀅𑀮𑁆𑀮𑀻𑀬𑀺𑀢𑀩𑁆𑀩𑀯𑀢𑁆𑀣𑀽𑀲𑀼 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀯𑀺𑀭𑀸𑀕𑀲𑀜𑁆𑀜𑀻 𑀯𑀺𑀭𑀢𑁆𑀢𑀲𑀜𑁆𑀜𑀯𑀦𑁆𑀢𑁄 𑀭𑀢𑁆𑀢𑀫𑁆𑀳𑀺 𑀮𑁄𑀓𑀫𑁆𑀳𑀺 𑀅𑀮𑁆𑀮𑀻𑀬𑀦𑀲𑀪𑀸𑀯𑀮𑁄𑀓𑁂 𑀯𑀺𑀭𑀢𑀘𑀺𑀢𑁆𑀢𑀸 𑀅𑀦𑀮𑁆𑀮𑀻𑀬𑀦𑀫𑀦𑀸 𑀳𑀺𑀢𑁆𑀯𑀸 𑀧𑀧𑀜𑁆𑀘𑁂𑀢𑀺 𑀭𑀸𑀕𑁄 𑀧𑀧𑀜𑁆𑀘𑀁 𑀤𑁄𑀲𑁄 𑀧𑀧𑀜𑁆𑀘𑀁 𑀲𑀩𑁆𑀩𑀓𑀺𑀮𑁂𑀲𑀸 𑀧𑀧𑀜𑁆𑀘𑀸𑀢𑀺 𑀧𑀧𑀜𑁆𑀘𑀲𑀗𑁆𑀔𑀸𑀢𑁂 𑀓𑀺𑀮𑁂𑀲𑁂 𑀳𑀺𑀢𑁆𑀯𑀸 𑀚𑀺𑀬 𑀨𑀦𑁆𑀤𑀺𑀢𑀸𑀦𑀻𑀢𑀺 𑀨𑀦𑁆𑀤𑀺𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀚𑀺𑀦𑀺𑀢𑁆𑀯𑀸 𑀢𑀣𑁂𑀯 𑀢𑁂𑀦 𑀓𑀸𑀭𑀡𑁂𑀦 𑀏𑀯𑀁 𑀩𑁄𑀥𑀺𑀁 𑀅𑀦𑀼𑀧𑀸𑀧𑀼𑀡𑀺𑀁𑀲𑀼 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀧𑀘𑁆𑀘𑀓𑁆𑀔𑀁 𑀓𑀭𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁯𑁦-𑁯𑁧. 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺 𑀢𑀚𑁆𑀚𑀦𑀨𑀸𑀮𑀦𑀯𑀥𑀩𑀦𑁆𑀥𑀦𑀁 𑀦𑀺𑀥𑀸𑀬 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀅𑀜𑁆𑀜𑀢𑀭𑀁 𑀓𑀜𑁆𑀘𑀺 𑀏𑀓𑀫𑁆𑀧𑀺 𑀲𑀢𑁆𑀢𑀁 𑀅𑀯𑀺𑀳𑁂𑀞𑀬𑀁 𑀅𑀯𑀺𑀳𑁂𑀞𑀬𑀦𑁆𑀢𑁄 𑀅𑀤𑀼𑀓𑁆𑀔𑀸𑀧𑁂𑀦𑁆𑀢𑁄 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀦𑀲𑀪𑀸𑀯𑁄. 𑀅𑀣 𑀯𑀸 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺 𑀲𑀩𑁆𑀩𑁂𑀲𑀽𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁. 𑀪𑀽𑀢𑁂𑀲𑀽𑀢𑀺 𑀪𑀽𑀢𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸 𑀘 𑀣𑀸𑀯𑀭𑀸 𑀘. 𑀬𑁂𑀲𑀁 𑀢𑀲𑀺𑀡𑀸 𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀅𑀧𑁆𑀧𑀳𑀻𑀦𑀸, 𑀢𑁂 𑀢𑀲𑀸. 𑀓𑀺𑀁 𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸? 𑀢𑀲𑀦𑁆𑀢𑀺 𑀉𑀢𑁆𑀢𑀲𑀦𑁆𑀢𑀺 𑀧𑀭𑀺𑀢𑀲𑀦𑁆𑀢𑀺 𑀪𑀸𑀬𑀦𑁆𑀢𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀁 𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸. 𑀬𑁂𑀲𑀁 𑀢𑀲𑀺𑀡𑀸 𑀢𑀡𑁆𑀳𑀸 𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀧𑀳𑀻𑀦𑀸, 𑀢𑁂 𑀣𑀸𑀯𑀭𑀸. 𑀓𑀺𑀁 𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸? 𑀣𑀺𑀭𑀦𑁆𑀢𑀺 𑀦 𑀢𑀲𑀦𑁆𑀢𑀺 𑀦 𑀉𑀢𑁆𑀢𑀲𑀦𑁆𑀢𑀺 𑀦 𑀧𑀭𑀺𑀢𑀲𑀦𑁆𑀢𑀺 𑀦 𑀪𑀸𑀬𑀦𑁆𑀢𑀺 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀁 𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸.

𑀢𑀬𑁄 𑀤𑀡𑁆𑀟𑀸 𑁋 𑀓𑀸𑀬𑀤𑀡𑁆𑀟𑁄, 𑀯𑀘𑀻𑀤𑀡𑁆𑀟𑁄, 𑀫𑀦𑁄𑀤𑀡𑁆𑀟𑁄𑀢𑀺. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀡𑁆𑀟𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀡𑁆𑀟𑁄, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀡𑁆𑀟𑁄. 𑀲𑀩𑁆𑀩𑁂𑀲𑀼 𑀲𑀓𑀮𑁂𑀲𑀼 𑀪𑀽𑀢𑁂𑀲𑀼 𑀲𑀢𑁆𑀢𑁂𑀲𑀼 𑀢𑀁 𑀢𑀺𑀯𑀺𑀥𑀁 𑀤𑀡𑁆𑀟𑀁 𑀦𑀺𑀥𑀸𑀬 𑀦𑀺𑀤𑀳𑀺𑀢𑁆𑀯𑀸 𑀑𑀭𑁄𑀧𑀬𑀺𑀢𑁆𑀯𑀸 𑀲𑀫𑁄𑀭𑁄𑀧𑀬𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀳𑀺𑀁𑀲𑀦𑀢𑁆𑀣𑀁 𑀅𑀕𑀳𑁂𑀢𑁆𑀯𑀸𑀢𑀺 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁. 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀦𑁆𑀢𑀺 𑀏𑀓𑀫𑁂𑀓𑀫𑁆𑀧𑀺 𑀲𑀢𑁆𑀢𑀁 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀦𑁆𑀤𑀼𑀬𑀸 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀯𑀺𑀳𑁂𑀞𑀬𑀦𑁆𑀢𑁄, 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀦𑁆𑀤𑀼𑀬𑀸 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀯𑀺𑀳𑁂𑀞𑀬𑀁 𑀅𑀯𑀺𑀳𑁂𑀞𑀬𑀦𑁆𑀢𑁄 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀧𑀼𑀢𑁆𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄, 𑀤𑀺𑀦𑁆𑀦𑀓𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀲𑀳𑀸𑀬𑀦𑁆𑀢𑀺 𑀲𑀳𑀸𑀬𑁄 𑀯𑀼𑀘𑁆𑀘𑀢𑀺 𑀬𑁂𑀦 𑀲𑀳 𑀆𑀕𑀫𑀦𑀁 𑀨𑀸𑀲𑀼, 𑀕𑀫𑀦𑀁 𑀨𑀸𑀲𑀼, 𑀞𑀸𑀦𑀁 𑀨𑀸𑀲𑀼, 𑀦𑀺𑀲𑀚𑁆𑀚𑀸 𑀨𑀸𑀲𑀼, 𑀆𑀮𑀧𑀦𑀁 𑀨𑀸𑀲𑀼, 𑀲𑀮𑁆𑀮𑀧𑀦𑀁 𑀨𑀸𑀲𑀼, 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀧𑀼𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑁂𑀬𑁆𑀬 𑀦 𑀲𑀸𑀤𑀺𑀬𑁂𑀬𑁆𑀬 𑀦 𑀧𑀢𑁆𑀣𑁂𑀬𑁆𑀬 𑀦 𑀧𑀺𑀳𑀬𑁂𑀬𑁆𑀬 𑀦𑀸𑀪𑀺𑀚𑀧𑁆𑀧𑁂𑀬𑁆𑀬, 𑀓𑀼𑀢𑁄 𑀫𑀺𑀢𑁆𑀢𑀁 𑀯𑀸 𑀲𑀦𑁆𑀤𑀺𑀝𑁆𑀞𑀁 𑀯𑀸 𑀲𑀫𑁆𑀪𑀢𑁆𑀢𑀁 𑀯𑀸 𑀲𑀳𑀸𑀬𑀁 𑀯𑀸 𑀇𑀘𑁆𑀙𑁂𑀬𑁆𑀬 𑀲𑀸𑀤𑀺𑀬𑁂𑀬𑁆𑀬 𑀧𑀢𑁆𑀣𑁂𑀬𑁆𑀬 𑀧𑀺𑀳𑀬𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁. 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄? 𑀲𑁄 𑀳𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀜𑀸𑀢𑀺𑀧𑀮𑀺𑀩𑁄𑀥𑀁, 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁, 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑁆𑀫 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄𑀯 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑀏𑀯𑀁 𑀲𑁄 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀫𑀸𑀭𑀁 𑀲𑀲𑁂𑀦𑀓𑀁 𑀦𑀫𑀼𑀘𑀺𑀁 𑀓𑀡𑁆𑀳𑀁 𑀧𑀫𑀢𑁆𑀢𑀩𑀦𑁆𑀥𑀼𑀁 𑀯𑀺𑀥𑀫𑁂𑀢𑁆𑀯𑀸 𑀘 𑀢𑀡𑁆𑀳𑀸𑀚𑀸𑀮𑀺𑀦𑀺𑀁 𑀯𑀺𑀲𑀭𑀺𑀢𑀁 𑀯𑀺𑀲𑀢𑁆𑀢𑀺𑀓𑀁 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀺𑀁 𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀺.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺. (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀫𑀳𑀸𑀦𑀺. 𑁧𑁯𑁧) 𑁋

𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄? 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄? 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁩𑁮𑁪; 𑀫𑀳𑀸𑀦𑀺. 𑁧𑁯𑁧) 𑁋

𑀏𑀯𑀁 𑀲𑁄 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄? 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 (𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧). 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀩𑀼𑀚𑁆𑀛𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀩𑀼𑀚𑁆𑀛𑀺, ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀩𑀼𑀚𑁆𑀛𑀺, ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀩𑀼𑀚𑁆𑀛𑀺, ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀩𑀼𑀚𑁆𑀛𑀺, ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀩𑀼𑀚𑁆𑀛𑀺, ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀩𑀼𑀚𑁆𑀛𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺. ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺. ‘‘𑀇𑀫𑁂 𑀆𑀲𑀯𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘…𑀧𑁂… 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑀼𑀚𑁆𑀛𑀺.

𑀅𑀣 𑀯𑀸 𑀬𑀁 𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀦𑀼𑀩𑀼𑀚𑁆𑀛𑀺𑀢𑀩𑁆𑀩𑀁 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀨𑀲𑁆𑀲𑀺𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀺 𑀅𑀦𑀼𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀺 𑀲𑀫𑁆𑀩𑀼𑀚𑁆𑀛𑀺 𑀅𑀥𑀺𑀕𑀜𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀻𑀢𑀺, 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀘𑀭𑁂𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑁋 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀆𑀬𑀢𑀦𑀘𑀭𑀺𑀬𑀸, 𑀲𑀢𑀺𑀘𑀭𑀺𑀬𑀸, 𑀲𑀫𑀸𑀥𑀺𑀘𑀭𑀺𑀬𑀸, 𑀜𑀸𑀡𑀘𑀭𑀺𑀬𑀸, 𑀫𑀕𑁆𑀕𑀘𑀭𑀺𑀬𑀸, 𑀧𑀢𑁆𑀢𑀺𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸. 𑀇𑀭𑀺𑀬𑀸𑀧𑀣𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼, 𑀆𑀬𑀢𑀦𑀘𑀭𑀺𑀬𑀸𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼, 𑀲𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼, 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀛𑀸𑀦𑁂𑀲𑀼, 𑀜𑀸𑀡𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼, 𑀫𑀕𑁆𑀕𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼, 𑀧𑀢𑁆𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼, 𑀮𑁄𑀓𑀢𑁆𑀣𑀘𑀭𑀺𑀬𑀸𑀢𑀺 𑀢𑀣𑀸𑀕𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼, 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀲𑀼, 𑀧𑀤𑁂𑀲𑀢𑁄 𑀲𑀸𑀯𑀓𑁂𑀲𑀼.

𑀇𑀭𑀺𑀬𑀸𑀧𑀣𑀘𑀭𑀺𑀬𑀸 𑀘 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁, 𑀆𑀬𑀢𑀦𑀘𑀭𑀺𑀬𑀸 𑀘 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁, 𑀲𑀢𑀺𑀘𑀭𑀺𑀬𑀸 𑀘 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁, 𑀲𑀫𑀸𑀥𑀺𑀘𑀭𑀺𑀬𑀸 𑀘 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁, 𑀜𑀸𑀡𑀘𑀭𑀺𑀬𑀸 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁, 𑀫𑀕𑁆𑀕𑀘𑀭𑀺𑀬𑀸 𑀘 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁, 𑀧𑀢𑁆𑀢𑀺𑀘𑀭𑀺𑀬𑀸 𑀘 𑀅𑀥𑀺𑀕𑀢𑀨𑀮𑀸𑀦𑀁, 𑀮𑁄𑀓𑀢𑁆𑀣𑀘𑀭𑀺𑀬𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁, 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸𑀦𑀁, 𑀧𑀤𑁂𑀲𑀢𑁄 𑀲𑀸𑀯𑀓𑀸𑀦𑀁. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀢𑀦𑀦𑁆𑀢𑀺 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀺. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀤𑀲𑁆𑀲𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀅𑀪𑀺𑀦𑀺𑀭𑁄𑀧𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀧𑀭𑀺𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸𑀬, 𑀲𑀫𑀼𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀯𑁄𑀤𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀧𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀉𑀧𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀢𑀺𑀬𑀸, 𑀅𑀯𑀺𑀓𑁆𑀔𑁂𑀧𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀬𑀣𑀸 𑀔𑀕𑁆𑀕𑀲𑁆𑀲 𑀦𑀸𑀫 𑀯𑀺𑀲𑀸𑀡𑀁 𑀏𑀓𑀫𑁂𑀯 𑀳𑁄𑀢𑀺, 𑀅𑀤𑀼𑀢𑀺𑀬𑀁, 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀓𑁆𑀓𑀧𑁆𑀧𑁄 𑀢𑀲𑁆𑀲𑀤𑀺𑀲𑁄 𑀢𑀧𑁆𑀧𑀝𑀺𑀪𑀸𑀕𑁄. 𑀬𑀣𑀸 𑀅𑀢𑀺𑀮𑁄𑀡𑀁 𑀯𑀼𑀘𑁆𑀘𑀢𑀺 𑀮𑁄𑀡𑀓𑀧𑁆𑀧𑁄, 𑀅𑀢𑀺𑀢𑀺𑀢𑁆𑀢𑀓𑀁 𑀯𑀼𑀘𑁆𑀘𑀢𑀺 𑀢𑀺𑀢𑁆𑀢𑀓𑀧𑁆𑀧𑁄, 𑀅𑀢𑀺𑀫𑀥𑀼𑀭𑀁 𑀯𑀼𑀘𑁆𑀘𑀢𑀺 𑀫𑀥𑀼𑀭𑀓𑀧𑁆𑀧𑁄, 𑀅𑀢𑀺𑀉𑀡𑁆𑀳𑀁 𑀯𑀼𑀘𑁆𑀘𑀢𑀺 𑀅𑀕𑁆𑀕𑀺𑀓𑀧𑁆𑀧𑁄, 𑀅𑀢𑀺𑀲𑀻𑀢𑀁 𑀯𑀼𑀘𑁆𑀘𑀢𑀺 𑀳𑀺𑀫𑀓𑀧𑁆𑀧𑁄, 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄 𑀯𑀼𑀘𑁆𑀘𑀢𑀺 𑀲𑀫𑀼𑀤𑁆𑀤𑀓𑀧𑁆𑀧𑁄, 𑀫𑀳𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀲𑀸𑀯𑀓𑁄 𑀯𑀼𑀘𑁆𑀘𑀢𑀺 𑀲𑀢𑁆𑀣𑀼𑀓𑀧𑁆𑀧𑁄𑀢𑀺. 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄, 𑀔𑀕𑁆𑀕𑀯𑀺𑀲𑀸𑀡𑀲𑀤𑀺𑀲𑁄 𑀔𑀕𑁆𑀕𑀯𑀺𑀲𑀸𑀡𑀧𑀝𑀺𑀪𑀸𑀕𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀫𑀼𑀢𑁆𑀢𑀩𑀦𑁆𑀥𑀦𑁄 𑀲𑀫𑁆𑀫𑀸 𑀮𑁄𑀓𑁂 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳𑀼 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑁋

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄; 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑁂 𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀘 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀧𑀼𑀢𑁆𑀢𑁂𑀲𑀼 𑀧𑁂𑀫𑀁 𑀯𑀺𑀧𑀼𑀮𑀜𑁆𑀘 𑀳𑁄𑀢𑀺;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺, 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄;

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

‘‘𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀁, 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸;

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀧𑀪𑀲𑁆𑀲𑀭𑀸𑀦𑀺, 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀺;

𑀲𑀗𑁆𑀖𑀝𑁆𑀝𑀫𑀸𑀦𑀸𑀦𑀺 𑀤𑀼𑀯𑁂 𑀪𑀼𑀚𑀲𑁆𑀫𑀺𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳𑀸 𑀫𑀫𑀲𑁆𑀲, 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸;

𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀈𑀢𑀻 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀁;

𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀁, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘;

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀩𑁆𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸, 𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄;

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀅𑀝𑁆𑀞𑀸𑀦𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁;

𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄;

𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀦𑀺𑀮𑁆𑀮𑁄𑀮𑀼𑀧𑁄 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄, 𑀦𑀺𑀫𑁆𑀫𑀓𑁆𑀔 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄;

𑀦𑀺𑀭𑀸𑀲𑀬𑁄 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁;

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣, 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁;

𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂, 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄;

𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁, 𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀺;

𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀗𑁆𑀕𑁄 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀁, 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀪𑀺𑀬𑁆𑀬𑁄;

𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺, 𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻,

𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽 𑀦 𑀘 𑀧𑀸𑀤𑀮𑁄𑀮𑁄, 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄;

𑀅𑀦𑀯𑀲𑁆𑀲𑀼𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑁄;

𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄, 𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻;

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄, 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂;

𑀅𑀦𑀺𑀲𑁆𑀲𑀺𑀢𑁄 𑀙𑁂𑀚𑁆𑀚 𑀲𑀺𑀦𑁂𑀳𑀤𑁄𑀲𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀜𑁆𑀘 𑀤𑀼𑀓𑁆𑀔𑀁, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁;

𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸, 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺;

𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀧𑀝𑀺𑀲𑀮𑁆𑀮𑀸𑀦𑀁 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀼, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄, 𑀅𑀦𑁂𑀴𑀫𑀽𑀕𑁄 𑀲𑀼𑀢𑀯𑀸 𑀲𑀢𑀻𑀫𑀸;

𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄;

𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀫𑁆𑀧𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻;

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂;

𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺;

𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

‘‘𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸, 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸;

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀅𑀲𑀼𑀘𑀻𑀫𑀦𑀼𑀲𑁆𑀲𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀽𑀢𑀺 𑀔𑀕𑁆𑀕𑀯𑀺𑀲𑀸𑀡𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀩𑁆𑀩𑀲𑀼𑀢𑁆𑀢𑀸𑀦𑀁 𑀘𑀢𑀼𑀩𑁆𑀩𑀺𑀥𑀸 𑀉𑀧𑁆𑀧𑀢𑁆𑀢𑀺 𑁋 𑀅𑀢𑁆𑀢𑀚𑁆𑀛𑀸𑀲𑀬𑀢𑁄, 𑀧𑀭𑀚𑁆𑀛𑀸𑀲𑀬𑀢𑁄, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄, 𑀧𑀼𑀘𑁆𑀙𑀸𑀯𑀲𑀺𑀢𑁄𑀢𑀺. 𑀢𑀢𑁆𑀣 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀲𑁆𑀲 𑀅𑀯𑀺𑀲𑁂𑀲𑁂𑀦 𑀧𑀼𑀘𑁆𑀙𑀸𑀯𑀲𑀺𑀢𑁄 𑀉𑀧𑁆𑀧𑀢𑁆𑀢𑀺. 𑀯𑀺𑀲𑁂𑀲𑁂𑀦 𑀧𑀦 𑀬𑀲𑁆𑀫𑀸 𑀏𑀢𑁆𑀣 𑀓𑀸𑀘𑀺 𑀕𑀸𑀣𑀸 𑀢𑁂𑀦 𑀢𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀧𑀼𑀝𑁆𑀞𑁂𑀦 𑀯𑀼𑀢𑁆𑀢𑀸, 𑀓𑀸𑀘𑀺 𑀅𑀧𑀼𑀝𑁆𑀞𑁂𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀦𑀬𑀸𑀦𑀼𑀭𑀽𑀧𑀁 𑀉𑀤𑀸𑀦𑀁𑀬𑁂𑀯 𑀉𑀤𑀸𑀦𑁂𑀦𑁆𑀢𑁂𑀦, 𑀢𑀲𑁆𑀫𑀸 𑀓𑀸𑀬𑀘𑀺 𑀕𑀸𑀣𑀸𑀬 𑀧𑀼𑀘𑁆𑀙𑀸𑀯𑀲𑀺𑀢𑁄, 𑀓𑀸𑀬𑀘𑀺 𑀅𑀢𑁆𑀢𑀚𑁆𑀛𑀸𑀲𑀬𑀢𑁄 𑀉𑀧𑁆𑀧𑀢𑁆𑀢𑀺. 𑀢𑀢𑁆𑀣 𑀬𑀸 𑀅𑀬𑀁 𑀅𑀯𑀺𑀲𑁂𑀲𑁂𑀦 𑀧𑀼𑀘𑁆𑀙𑀸𑀯𑀲𑀺𑀢𑁄 𑀉𑀧𑁆𑀧𑀢𑁆𑀢𑀺, 𑀲𑀸 𑀆𑀤𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋

𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀩𑀼𑀤𑁆𑀥𑀸𑀦𑀁 𑀧𑀢𑁆𑀣𑀦𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀘 𑀤𑀺𑀲𑁆𑀲𑀢𑀺, 𑀢𑀣𑀸 𑀲𑀸𑀯𑀓𑀸𑀦𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦 𑀤𑀺𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺? 𑀲𑁄 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑁂𑀦 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀲𑀼𑀢𑁆𑀢𑀁 𑀅𑀪𑀸𑀲𑀺 𑁋

‘‘𑀧𑀜𑁆𑀘𑀺𑀫𑁂, 𑀆𑀦𑀦𑁆𑀤, 𑀆𑀦𑀺𑀲𑀁𑀲𑀸 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘𑁂𑀯 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺. 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘𑁂𑀯 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀅𑀣 𑀫𑀭𑀡𑀓𑀸𑀮𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺. 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀲𑀫𑀸𑀦𑁄 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺. 𑀅𑀣 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺. 𑀅𑀣 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀢𑁆𑀯𑀸 𑀧𑀼𑀦 𑀆𑀳 𑁋

‘‘𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀦𑀸𑀫, 𑀆𑀦𑀦𑁆𑀤, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀩𑁆𑀩𑁂𑀲𑀁 𑀧𑀢𑁆𑀣𑀦𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀘 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺.

𑀲𑁄 𑀆𑀳 𑁋 ‘‘𑀩𑀼𑀤𑁆𑀥𑀸𑀦𑀁, 𑀪𑀦𑁆𑀢𑁂, 𑀧𑀢𑁆𑀣𑀦𑀸 𑀓𑀻𑀯 𑀘𑀺𑀭𑀁 𑀯𑀝𑁆𑀝𑀢𑀻’’𑀢𑀺. 𑀩𑀼𑀤𑁆𑀥𑀸𑀦𑀁, 𑀆𑀦𑀦𑁆𑀤, 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀚𑁆𑀛𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀅𑀝𑁆𑀞 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁂 𑀘 𑀪𑁂𑀤𑀸 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀯𑀲𑁂𑀦 𑀜𑀸𑀢𑀩𑁆𑀩𑀸. 𑀧𑀜𑁆𑀜𑀸𑀥𑀺𑀓𑀸𑀦𑀜𑁆𑀳𑀺 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺, 𑀧𑀜𑁆𑀜𑀸 𑀢𑀺𑀓𑁆𑀔𑀸. 𑀲𑀤𑁆𑀥𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀚𑁆𑀛𑀺𑀫𑀸 𑀳𑁄𑀢𑀺, 𑀲𑀤𑁆𑀥𑀸 𑀢𑀺𑀓𑁆𑀔𑀸. 𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀲𑀤𑁆𑀥𑀸 𑀧𑀜𑁆𑀜𑀸 𑀫𑀦𑁆𑀤𑀸 𑀳𑁄𑀢𑀺, 𑀯𑀻𑀭𑀺𑀬𑀁 𑀢𑀺𑀓𑁆𑀔𑀦𑁆𑀢𑀺. 𑀅𑀧𑁆𑀧𑀢𑁆𑀯𑀸 𑀧𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 𑀤𑀸𑀦𑀁 𑀤𑁂𑀦𑁆𑀢𑁄𑀧𑀺 𑀢𑀤𑀦𑀼𑀭𑀽𑀧𑁂 𑀲𑀻𑀮𑀸𑀤𑀺𑀧𑀸𑀭𑀫𑀺𑀥𑀫𑁆𑀫𑁂 𑀆𑀘𑀺𑀦𑀦𑁆𑀢𑁄𑀧𑀺 𑀅𑀦𑁆𑀢𑀭𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀜𑀸𑀡𑀁 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺, 𑀯𑁂𑀧𑀼𑀮𑁆𑀮𑀁 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀧𑀸𑀓𑀁 𑀦 𑀕𑀘𑁆𑀙𑀢𑀻𑀢𑀺. 𑀬𑀣𑀸 𑀦𑀸𑀫 𑀢𑀺𑀫𑀸𑀲𑀘𑀢𑀼𑀫𑀸𑀲𑀧𑀜𑁆𑀘𑀫𑀸𑀲𑀘𑁆𑀘𑀬𑁂𑀦 𑀦𑀺𑀧𑁆𑀨𑀚𑁆𑀚𑀦𑀓𑀁 𑀲𑀲𑁆𑀲𑀁 𑀢𑀁 𑀢𑀁 𑀓𑀸𑀮𑀁 𑀅𑀧𑁆𑀧𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀢𑀓𑁆𑀔𑀢𑁆𑀢𑀼𑀁 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀓𑁂𑀴𑀸𑀬𑀦𑁆𑀢𑁄𑀧𑀺 𑀉𑀤𑀓𑁂𑀦 𑀲𑀺𑀜𑁆𑀘𑀦𑁆𑀢𑁄𑀧𑀺 𑀅𑀦𑁆𑀢𑀭𑀸 𑀧𑀓𑁆𑀔𑁂𑀦 𑀯𑀸 𑀫𑀸𑀲𑁂𑀦 𑀯𑀸 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑀲𑁆𑀲𑀁 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺, 𑀯𑁂𑀧𑀼𑀮𑁆𑀮𑀁 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀧𑀸𑀓𑀁 𑀦 𑀕𑀘𑁆𑀙𑀢𑀻𑀢𑀺. 𑀏𑀯𑀫𑁂𑀯𑀁 𑀅𑀧𑁆𑀧𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀅𑀦𑁆𑀢𑀭𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯 𑀓𑀸𑀮𑀁 𑀧𑀸𑀭𑀫𑀺𑀧𑀽𑀭𑀡𑀁 𑀓𑀸𑀢𑀩𑁆𑀩𑀁 𑀜𑀸𑀡𑀧𑀭𑀺𑀧𑀸𑀓𑀢𑁆𑀣𑀸𑀬. 𑀏𑀢𑁆𑀢𑀓𑁂𑀦𑀸𑀧𑀺 𑀘 𑀓𑀸𑀮𑁂𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀢𑁄 𑀅𑀪𑀺𑀦𑀻𑀳𑀸𑀭𑀓𑀭𑀡𑁂 𑀅𑀝𑁆𑀞 𑀲𑀫𑁆𑀧𑀢𑁆𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑀸. 𑀅𑀬𑀜𑁆𑀳𑀺 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀺’’. (𑀩𑀼. 𑀯𑀁. 𑁨.𑁫𑁯);

𑀅𑀪𑀺𑀦𑀻𑀳𑀸𑀭𑁄𑀢𑀺 𑀫𑀽𑀮𑀧𑀡𑀺𑀥𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺. 𑀅𑀜𑁆𑀜𑀢𑁆𑀭 𑀳𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀅𑀯𑀲𑁂𑀲𑀚𑀸𑀢𑀻𑀲𑀼 𑀤𑁂𑀯𑀚𑀸𑀢𑀺𑀬𑀫𑁆𑀧𑀺 𑀞𑀺𑀢𑀲𑁆𑀲 𑀧𑀡𑀺𑀥𑀺 𑀦 𑀇𑀚𑁆𑀛𑀢𑀺, 𑀢𑀢𑁆𑀣 𑀞𑀺𑀢𑁂𑀦 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀦𑁆𑀢𑁂𑀦 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀫𑀦𑀼𑀲𑁆𑀲𑀢𑁆𑀢𑀁𑀬𑁂𑀯 𑀧𑀢𑁆𑀣𑁂𑀢𑀩𑁆𑀩𑀁, 𑀢𑀢𑁆𑀣 𑀞𑀢𑁆𑀯𑀸 𑀧𑀡𑀺𑀥𑀺 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀫𑀺𑀚𑁆𑀛𑀢𑀺. 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀧𑀼𑀭𑀺𑀲𑀪𑀸𑀯𑁄. 𑀫𑀸𑀢𑀼𑀕𑀸𑀫𑀦𑀧𑀼𑀁𑀲𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀜𑁆𑀳𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀁 𑀞𑀺𑀢𑀸𑀦𑀫𑁆𑀧𑀺 𑀧𑀡𑀺𑀥𑀺 𑀦 𑀇𑀚𑁆𑀛𑀢𑀺. 𑀢𑀢𑁆𑀣 𑀞𑀺𑀢𑁂𑀦 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁂𑀦 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀧𑀼𑀭𑀺𑀲𑀪𑀸𑀯𑁄𑀬𑁂𑀯 𑀧𑀢𑁆𑀣𑁂𑀢𑀩𑁆𑀩𑁄, 𑀢𑀢𑁆𑀣 𑀞𑀢𑁆𑀯𑀸 𑀧𑀡𑀺𑀥𑀺 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀫𑀺𑀚𑁆𑀛𑀢𑀺. 𑀳𑁂𑀢𑀽𑀢𑀺 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺. 𑀬𑁄 𑀳𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀸𑀬𑀫𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄, 𑀢𑀲𑁆𑀲 𑀧𑀡𑀺𑀥𑀺 𑀲𑀫𑀺𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀦𑀢𑁆𑀢𑀪𑀸𑀯𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺. 𑀲𑀢𑁆𑀣𑀸𑀭𑀤𑀲𑁆𑀲𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀸𑀤𑀲𑁆𑀲𑀦𑀁. 𑀏𑀯𑀜𑁆𑀳𑀺 𑀇𑀚𑁆𑀛𑀢𑀺, 𑀦𑁄 𑀅𑀜𑁆𑀜𑀣𑀸 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀤𑀻𑀧𑀗𑁆𑀓𑀭𑀁 𑀲𑀫𑁆𑀫𑀼𑀔𑀸 𑀤𑀺𑀲𑁆𑀯𑀸 𑀧𑀡𑀺𑀥𑀺𑀁 𑀅𑀓𑀸𑀲𑀺. 𑀧𑀩𑁆𑀩𑀚𑁆𑀚𑀸𑀢𑀺 𑀅𑀦𑀕𑀸𑀭𑀺𑀬𑀪𑀸𑀯𑁄. 𑀲𑁄 𑀘 𑀔𑁄 𑀲𑀸𑀲𑀦𑁂 𑀯𑀸 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀯𑀸𑀤𑀺𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀦𑀺𑀓𑀸𑀬𑁂 𑀯𑀸 𑀯𑀝𑁆𑀝𑀢𑀺 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀲𑀼𑀫𑁂𑀥𑁄 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀧𑀡𑀺𑀥𑀺𑀁 𑀅𑀓𑀸𑀲𑀺. 𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀛𑀸𑀦𑀸𑀤𑀺𑀕𑀼𑀡𑀧𑀝𑀺𑀮𑀸𑀪𑁄. 𑀧𑀩𑁆𑀩𑀚𑀺𑀢𑀲𑁆𑀲𑀧𑀺 𑀳𑀺 𑀕𑀼𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀇𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑀧𑀜𑁆𑀘𑀸𑀪𑀺𑀜𑁆𑀜𑁄 𑀘 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀘 𑀳𑀼𑀢𑁆𑀯𑀸 𑀧𑀡𑀺𑀥𑁂𑀲𑀺. 𑀅𑀥𑀺𑀓𑀸𑀭𑁄𑀢𑀺 𑀅𑀥𑀺𑀓𑀓𑀸𑀭𑁄, 𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀸𑀤𑀺𑀧𑀭𑀺𑀘𑁆𑀘𑀸𑀕𑀜𑁆𑀳𑀺 𑀓𑀢𑁆𑀯𑀸 𑀧𑀡𑀺𑀤𑀳𑀢𑁄𑀬𑁂𑀯 𑀇𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲 𑀬𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲. 𑀲𑁄 𑀳𑀺 𑁋

‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀫𑀁 𑀩𑀼𑀤𑁆𑀥𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀕𑀘𑁆𑀙𑀢𑀼;

𑀫𑀸 𑀦𑀁 𑀓𑀮𑀮𑁂 𑀅𑀓𑁆𑀓𑀫𑀺𑀢𑁆𑀣, 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁩);

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀡𑀺𑀥𑁂𑀲𑀺. 𑀙𑀦𑁆𑀤𑀢𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸. 𑀲𑀸 𑀬𑀲𑁆𑀲 𑀩𑀮𑀯𑀢𑀻 𑀳𑁄𑀢𑀺, 𑀢𑀲𑁆𑀲 𑀇𑀚𑁆𑀛𑀢𑀺 𑀧𑀡𑀺𑀥𑀺. 𑀲𑀸 𑀘 𑀲𑀘𑁂 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀓𑁄 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀬𑁄 ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀼𑀁 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀩𑀮𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀬𑀤𑀺 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀅𑀗𑁆𑀕𑀸𑀭𑀸𑀦𑀁 𑀧𑀽𑀭𑀁 𑀅𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀺, 𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀲𑀢𑁆𑀢𑀺𑀲𑀽𑀮𑁂𑀳𑀺 𑀆𑀓𑀺𑀡𑁆𑀡𑀁 𑀅𑀓𑁆𑀓𑀫𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀺, 𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀲𑀫𑀢𑀺𑀢𑁆𑀢𑀺𑀓𑀁 𑀉𑀤𑀓𑀧𑀼𑀡𑁆𑀡𑀁 𑀉𑀢𑁆𑀢𑀭𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀺, 𑀓𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀦𑀺𑀭𑀦𑁆𑀢𑀭𑀁 𑀯𑁂𑀴𑀼𑀕𑀼𑀫𑁆𑀩𑀲𑀜𑁆𑀙𑀦𑁆𑀦𑀁 𑀫𑀤𑁆𑀤𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀇𑀘𑁆𑀙𑀢𑀻’’𑀢𑀺, 𑀢𑀁 𑀲𑀼𑀢𑁆𑀯𑀸 𑀬𑁄 ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀼𑀁 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀩𑀮𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀭𑀽𑀧𑁂𑀦 𑀘 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀧𑀡𑀺𑀥𑁂𑀲𑀻𑀢𑀺.

𑀏𑀯𑀁 𑀲𑀫𑀺𑀤𑁆𑀥𑀸𑀪𑀺𑀦𑀻𑀳𑀸𑀭𑁄 𑀘 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀅𑀪𑀩𑁆𑀩𑀝𑁆𑀞𑀸𑀦𑀸𑀦𑀺 𑀦 𑀉𑀧𑁂𑀢𑀺. 𑀲𑁄 𑀳𑀺 𑀢𑀢𑁄 𑀧𑀪𑀼𑀢𑀺 𑀦 𑀚𑀘𑁆𑀘𑀦𑁆𑀥𑁄 𑀳𑁄𑀢𑀺 𑀦 𑀚𑀘𑁆𑀘𑀧𑀥𑀺𑀭𑁄, 𑀦 𑀉𑀫𑁆𑀫𑀢𑁆𑀢𑀓𑁄, 𑀦 𑀏𑀴𑀫𑀼𑀕𑁄, 𑀦 𑀧𑀻𑀞𑀲𑀧𑁆𑀧𑀺, 𑀦 𑀫𑀺𑀮𑀓𑁆𑀔𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀦 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀦𑀸𑀲𑁆𑀲 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀦 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀦 𑀓𑀼𑀝𑁆𑀞𑀻 𑀳𑁄𑀢𑀺, 𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀯𑀝𑁆𑀝𑀓𑀢𑁄 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁄 𑀳𑀢𑁆𑀣𑀺𑀢𑁄 𑀅𑀥𑀺𑀓𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀦 𑀔𑀼𑀧𑁆𑀧𑀺𑀧𑀸𑀲𑀺𑀓𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀓𑀸𑀮𑀓𑀜𑁆𑀘𑀺𑀓𑀸𑀲𑀼𑀭𑁂𑀲𑀼, 𑀦 𑀅𑀯𑀻𑀘𑀺𑀦𑀺𑀭𑀬𑁂, 𑀦 𑀮𑁄𑀓𑀦𑁆𑀢𑀭𑀺𑀓𑁂𑀲𑀼 𑀉𑀧𑁆𑀧𑀚𑁆𑀚𑀢𑀺. 𑀓𑀸𑀫𑀸𑀯𑀘𑀭𑁂𑀲𑀼 𑀧𑀦 𑀦 𑀫𑀸𑀭𑁄 𑀳𑁄𑀢𑀺, 𑀭𑀽𑀧𑀸𑀯𑀘𑀭𑁂𑀲𑀼 𑀦 𑀅𑀲𑀜𑁆𑀜𑀻𑀪𑀯𑁂, 𑀦 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀭𑀽𑀧𑀪𑀯𑁂𑀲𑀼, 𑀦 𑀅𑀜𑁆𑀜𑀁 𑀘𑀓𑁆𑀓𑀯𑀸𑀴𑀁 𑀲𑀗𑁆𑀓𑀫𑀢𑀺.

𑀬𑀸 𑀘𑀺𑀫𑀸 𑀉𑀲𑁆𑀲𑀸𑀳𑁄 𑀘 𑀉𑀫𑁆𑀫𑀗𑁆𑀕𑁄 𑀘 𑀅𑀯𑀢𑁆𑀣𑀸𑀦𑀜𑁆𑀘 𑀳𑀺𑀢𑀘𑀭𑀺𑀬𑀸 𑀘𑀸𑀢𑀺 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄, 𑀢𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀢𑀢𑁆𑀣 𑁋

‘‘𑀉𑀲𑁆𑀲𑀸𑀳𑁄 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁, 𑀉𑀫𑁆𑀫𑀗𑁆𑀕𑁄 𑀧𑀜𑁆𑀜𑀸 𑀧𑀯𑀼𑀘𑁆𑀘𑀢𑀺;

𑀅𑀯𑀢𑁆𑀣𑀸𑀦𑀁 𑀅𑀥𑀺𑀝𑁆𑀞𑀸𑀦𑀁, 𑀳𑀺𑀢𑀘𑀭𑀺𑀬𑀸 𑀫𑁂𑀢𑁆𑀢𑀸𑀪𑀸𑀯𑀦𑀸’’𑀢𑀺. 𑁋

𑀯𑁂𑀤𑀺𑀢𑀩𑁆𑀩𑀸. 𑀬𑁂 𑀘 𑀇𑀫𑁂 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑁄, 𑀅𑀮𑁄𑀪𑀚𑁆𑀛𑀸𑀲𑀬𑁄, 𑀅𑀤𑁄𑀲𑀚𑁆𑀛𑀸𑀲𑀬𑁄, 𑀅𑀫𑁄𑀳𑀚𑁆𑀛𑀸𑀲𑀬𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑁄𑀢𑀺 𑀙 𑀅𑀚𑁆𑀛𑀸𑀲𑀬𑀸 𑀩𑁄𑀥𑀺𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀓𑀸𑀫𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀗𑁆𑀕𑀡𑀺𑀓𑀸𑀬 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀮𑁄𑀪𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀮𑁄𑀪𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀤𑁄𑀲𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀤𑁄𑀲𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀫𑁄𑀳𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀫𑁄𑀳𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀩𑁆𑀩𑀪𑀯𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀦 𑀓𑀻𑀯 𑀘𑀺𑀭𑀁 𑀧𑀢𑁆𑀣𑀦𑀸 𑀯𑀝𑁆𑀝𑀢𑀻𑀢𑀺? 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀢𑀢𑁄 𑀑𑀭𑀁 𑀦 𑀲𑀓𑁆𑀓𑀸, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀓𑁂𑀦𑀸𑀧𑀺 𑀘 𑀓𑀸𑀮𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀢𑁄 𑀅𑀪𑀺𑀦𑀻𑀳𑀸𑀭𑀓𑀭𑀡𑁂 𑀧𑀜𑁆𑀘 𑀲𑀫𑁆𑀧𑀢𑁆𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀲𑀜𑁆𑀳𑀺 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀯𑀺𑀕𑀢𑀸𑀲𑀯𑀤𑀲𑁆𑀲𑀦𑀁;

𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸, 𑀏𑀢𑁂 𑀅𑀪𑀺𑀦𑀻𑀳𑀸𑀭𑀓𑀸𑀭𑀡𑀸’’.

𑀢𑀢𑁆𑀣 𑀯𑀺𑀕𑀢𑀸𑀲𑀯𑀤𑀲𑁆𑀲𑀦𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣 ‘‘𑀲𑀸𑀯𑀓𑀸𑀦𑀁 𑀧𑀢𑁆𑀣𑀦𑀸 𑀓𑀺𑀢𑁆𑀢𑀓𑀁 𑀯𑀝𑁆𑀝𑀢𑀻’’𑀢𑀺? 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁂𑀯. 𑀢𑀣𑀸 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀓𑀲𑁆𑀲 𑀧𑀼𑀢𑁆𑀢𑀲𑁆𑀲 𑀘𑀸𑀢𑀺, 𑀢𑀢𑁄 𑀑𑀭𑀁 𑀦 𑀲𑀓𑁆𑀓𑀸, 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀁 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸𑀢𑀺 𑀤𑁆𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀬𑁂𑀯 𑀅𑀪𑀺𑀦𑀻𑀳𑀸𑀭𑁄 𑀳𑁄𑀢𑀺.

𑀏𑀯𑀁 𑀇𑀫𑀸𑀬 𑀧𑀢𑁆𑀣𑀦𑀸𑀬 𑀇𑀫𑀺𑀦𑀸 𑀘 𑀅𑀪𑀺𑀦𑀻𑀳𑀸𑀭𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀓𑀸𑀮𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀸 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀼𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁, 𑀅𑀕𑁆𑀕𑀲𑀸𑀯𑀓𑀸 𑀧𑀦 𑀩𑀼𑀤𑁆𑀥𑀸 𑀯𑀺𑀬 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀲𑁆𑀯𑁂𑀯. 𑀲𑀩𑁆𑀩𑀩𑀼𑀤𑁆𑀥𑀸 𑀲𑀁𑀯𑀝𑁆𑀝𑀫𑀸𑀦𑁂 𑀓𑀧𑁆𑀧𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀯𑀝𑁆𑀝𑀫𑀸𑀦𑁂 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀢𑁂 𑀧𑀦 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀼𑀤𑁆𑀥𑀸 𑀲𑀬𑀜𑁆𑀘 𑀩𑀼𑀚𑁆𑀛𑀦𑁆𑀢𑀺, 𑀧𑀭𑁂 𑀘 𑀩𑁄𑀥𑁂𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀬𑀫𑁂𑀯 𑀩𑀼𑀚𑁆𑀛𑀦𑁆𑀢𑀺, 𑀦 𑀧𑀭𑁂 𑀩𑁄𑀥𑁂𑀦𑁆𑀢𑀺. 𑀅𑀢𑁆𑀣𑀭𑀲𑀫𑁂𑀯 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀦 𑀥𑀫𑁆𑀫𑀭𑀲𑀁. 𑀦 𑀳𑀺 𑀢𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀜𑁆𑀜𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀤𑁂𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀫𑀽𑀕𑁂𑀦 𑀤𑀺𑀝𑁆𑀞𑀲𑀼𑀧𑀺𑀦𑁄 𑀯𑀺𑀬 𑀯𑀦𑀘𑀭𑀓𑁂𑀦 𑀦𑀕𑀭𑁂 𑀲𑀸𑀬𑀺𑀢𑀩𑁆𑀬𑀜𑁆𑀚𑀦𑀭𑀲𑁄 𑀯𑀺𑀬 𑀘 𑀦𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺. 𑀲𑀩𑁆𑀩𑀁 𑀇𑀤𑁆𑀥𑀺𑀲𑀫𑀸𑀧𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀁 𑀧𑀸𑀧𑀼𑀡𑀦𑁆𑀢𑀺. 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀩𑀼𑀤𑁆𑀥𑀸𑀦𑀁 𑀳𑁂𑀝𑁆𑀞𑀸 𑀲𑀸𑀯𑀓𑀸𑀦𑀁 𑀉𑀧𑀭𑀺 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, ‘‘𑀘𑀺𑀢𑁆𑀢𑀲𑀮𑁆𑀮𑁂𑀔𑁄 𑀓𑀸𑀢𑀩𑁆𑀩𑁄, 𑀯𑁄𑀲𑀸𑀦𑀁 𑀦𑀸𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑁆𑀤𑁂𑀲𑁂𑀦 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀅𑀚𑁆𑀚 𑀉𑀧𑁄𑀲𑀣𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀸, 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀸 𑀘 𑀕𑀦𑁆𑀥𑀫𑀸𑀤𑀦𑁂 𑀫𑀜𑁆𑀚𑀽𑀲𑀓𑀭𑀼𑀓𑁆𑀔𑀫𑀽𑀮𑁂 𑀭𑀢𑀦𑀫𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺. 𑀏𑀯𑀁 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀧𑀢𑁆𑀣𑀦𑀜𑁆𑀘 𑀅𑀪𑀺𑀦𑀻𑀳𑀸𑀭𑀜𑁆𑀘 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀸𑀬 𑀧𑀢𑁆𑀣𑀦𑀸𑀬 𑀇𑀫𑀺𑀦𑀸 𑀘 𑀅𑀪𑀺𑀦𑀻𑀳𑀸𑀭𑁂𑀦 𑀲𑀫𑀼𑀤𑀸𑀕𑀢𑁂 𑀢𑁂 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑀣𑁂𑀢𑀼𑀁 ‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀫𑀁 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀅𑀬𑀁 𑀢𑀸𑀯 𑀅𑀯𑀺𑀲𑁂𑀲𑁂𑀦 𑀧𑀼𑀘𑁆𑀙𑀸𑀯𑀲𑀺𑀢𑁄 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺.

𑀇𑀤𑀸𑀦𑀺 𑀯𑀺𑀲𑁂𑀲𑁂𑀦 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀣 𑀇𑀫𑀺𑀲𑁆𑀲𑀸 𑀢𑀸𑀯 𑀕𑀸𑀣𑀸𑀬 𑀏𑀯𑀁 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀬𑀁 𑀓𑀺𑀭 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀁 𑀑𑀕𑀸𑀳𑀦𑁆𑀢𑁄 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑁄 𑀳𑀼𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀏𑀢𑀁 𑀓𑀺𑀭 𑀯𑀢𑁆𑀢𑀁 𑀅𑀧𑀭𑀺𑀧𑀽𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀓𑀺𑀁 𑀧𑀦𑁂𑀢𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀦𑀸𑀫? 𑀳𑀭𑀡𑀧𑀘𑁆𑀘𑀸𑀳𑀭𑀡𑀦𑁆𑀢𑀺. 𑀢𑀁 𑀬𑀣𑀸 𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀣𑀸 𑀓𑀣𑁂𑀲𑁆𑀲𑀸𑀫.

𑀇𑀥 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀧𑀘𑁆𑀘𑀸𑀳𑀭𑀢𑀺 𑀦 𑀳𑀭𑀢𑀺, 𑀏𑀓𑀘𑁆𑀘𑁄 𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀧𑀕𑁂𑀯 𑀯𑀼𑀝𑁆𑀞𑀸𑀬 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀧𑀽𑀭𑁂𑀢𑁆𑀯𑀸 𑀧𑀸𑀦𑀻𑀬𑀫𑀸𑀴𑁂 𑀞𑀧𑁂𑀢𑁆𑀯𑀸 𑀆𑀘𑀭𑀺𑀬𑀯𑀢𑁆𑀢𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀢𑁆𑀯𑀸 𑀤𑁆𑀯𑁂𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀲𑁄 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑁂𑀮𑀁 𑀜𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸 𑀧𑀢𑁆𑀢𑀁 𑀅𑀁𑀲𑁂 𑀆𑀮𑀕𑁆𑀕𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀜𑁆𑀘 𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀕𑀸𑀫𑀲𑀫𑀻𑀧𑁂 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀏𑀯𑀁 𑀧𑀯𑀺𑀝𑁆𑀞𑁄 𑀘 𑀮𑀸𑀪𑀻 𑀪𑀺𑀓𑁆𑀔𑀼 𑀧𑀼𑀜𑁆𑀜𑀯𑀸 𑀉𑀧𑀸𑀲𑀓𑁂𑀳𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀉𑀧𑀝𑁆𑀞𑀸𑀓𑀓𑀼𑀮𑁂 𑀯𑀸 𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀬𑀁 𑀯𑀸 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑀸𑀲𑀓𑁂𑀳𑀺 𑀢𑀁 𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀬𑀫𑀸𑀦𑁄 𑀢𑁂𑀲𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀯𑀺𑀓𑁆𑀔𑁂𑀧𑁂𑀦 𑀘 𑀢𑀁 𑀫𑀦𑀲𑀺𑀓𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀢𑀺. 𑀯𑀺𑀳𑀸𑀭𑀁 𑀆𑀕𑀢𑁄𑀧𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀺, 𑀥𑀫𑁆𑀫𑀁 𑀪𑀡𑀢𑀺, 𑀢𑀁 𑀢𑀁 𑀩𑁆𑀬𑀸𑀧𑀸𑀭𑀜𑁆𑀘 𑀆𑀧𑀚𑁆𑀚𑀢𑀺. 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀧𑀼𑀭𑀺𑀫𑀬𑀸𑀫𑀫𑁆𑀧𑀺 𑀫𑀚𑁆𑀛𑀺𑀫𑀬𑀸𑀫𑀫𑁆𑀧𑀺 𑀏𑀯𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀧𑀜𑁆𑀘𑁂𑀢𑁆𑀯𑀸 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀸𑀪𑀺𑀪𑀽𑀢𑁄 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀲𑀬𑀢𑀺, 𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻’’𑀢𑀺.

𑀬𑁄 𑀧𑀦 𑀩𑁆𑀬𑀸𑀥𑀺𑀩𑀳𑀼𑀮𑁄 𑀳𑁄𑀢𑀺, 𑀪𑀼𑀢𑁆𑀢𑀸𑀳𑀸𑀭𑁄 𑀧𑀘𑁆𑀘𑀽𑀲𑀲𑀫𑀬𑁂 𑀦 𑀲𑀫𑁆𑀫𑀸 𑀧𑀭𑀺𑀡𑀫𑀢𑀺. 𑀧𑀕𑁂𑀯 𑀯𑀼𑀝𑁆𑀞𑀸𑀬 𑀬𑀣𑀸𑀯𑀼𑀢𑁆𑀢𑀁 𑀯𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺 𑀓𑀸𑀢𑀼𑀁, 𑀅𑀜𑁆𑀜𑀤𑀢𑁆𑀣𑀼 𑀬𑀸𑀕𑀼𑀁 𑀯𑀸 𑀔𑀚𑁆𑀚𑀓𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀪𑀢𑁆𑀢𑀁 𑀯𑀸 𑀧𑀢𑁆𑀣𑀬𑀫𑀸𑀦𑁄 𑀓𑀸𑀮𑀲𑁆𑀲𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀯𑀺𑀲𑀢𑀺. 𑀢𑀢𑁆𑀣 𑀬𑀸𑀕𑀼𑀁 𑀯𑀸 𑀔𑀚𑁆𑀚𑀓𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀪𑀢𑁆𑀢𑀁 𑀯𑀸 𑀮𑀤𑁆𑀥𑀸 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀯𑀺𑀲𑁂𑀲𑀁 𑀧𑀢𑁆𑀯𑀸 𑀯𑀸 𑀅𑀧𑀢𑁆𑀯𑀸 𑀯𑀸 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀢𑁂𑀦𑁂𑀯 𑀫𑀦𑀲𑀺𑀓𑀸𑀭𑁂𑀦 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀘𑁆𑀘𑀸𑀳𑀭𑀢𑀺 𑀦 𑀳𑀭𑀢𑀻’’𑀢𑀺. 𑀏𑀤𑀺𑀲𑀸 𑀳𑀺 𑀪𑀺𑀓𑁆𑀔𑀽 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀲𑀻𑀳𑀴𑀤𑀻𑀧𑁂𑀬𑁂𑀯 𑀢𑁂𑀲𑀼 𑀢𑁂𑀲𑀼 𑀕𑀸𑀫𑁂𑀲𑀼 𑀆𑀲𑀦𑀲𑀸𑀮𑀸𑀬𑀁 𑀢𑀁 𑀆𑀲𑀦𑀁 𑀦𑀢𑁆𑀣𑀺, 𑀬𑀢𑁆𑀣 𑀪𑀺𑀓𑁆𑀔𑀽 𑀦𑀺𑀲𑀺𑀦𑁆𑀦𑀸 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀢𑀸.

𑀬𑁄 𑀧𑀦 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄, 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀦𑀩𑀤𑁆𑀥𑀘𑀺𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀫𑀦𑀦𑀼𑀬𑀼𑀢𑁆𑀢𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀕𑀺𑀳𑀻𑀳𑀺 𑀲𑀤𑁆𑀥𑀺𑀁 𑀓𑀣𑀸𑀧𑀧𑀜𑁆𑀘𑁂𑀦 𑀧𑀧𑀜𑁆𑀘𑀺𑀢𑁄 𑀢𑀼𑀘𑁆𑀙𑀓𑁄𑀯 𑀦𑀺𑀓𑁆𑀔𑀫𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻’’𑀢𑀺.

𑀬𑁄 𑀧𑀦 𑀧𑀕𑁂𑀯 𑀯𑀼𑀝𑁆𑀞𑀸𑀬 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀯𑀢𑁆𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀤𑀼𑀯𑀺𑀥𑀁 𑁋 𑀲𑀩𑁆𑀩𑀢𑁆𑀣𑀓𑀜𑁆𑀘 𑀧𑀸𑀭𑀺𑀳𑀸𑀭𑀺𑀬𑀜𑁆𑀘. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀓𑀁 𑀦𑀸𑀫 𑀫𑁂𑀢𑁆𑀢𑀸 𑀘 𑀫𑀭𑀡𑀸𑀦𑀼𑀲𑁆𑀲𑀢𑀺 𑀘. 𑀢𑀜𑁆𑀳𑀺 𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 ‘‘𑀲𑀩𑁆𑀩𑀢𑁆𑀣𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑁂𑀢𑁆𑀢𑀸 𑀦𑀸𑀫 𑀆𑀯𑀸𑀲𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀆𑀯𑀸𑀲𑁂𑀲𑀼 𑀳𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀢𑁂𑀦 𑀨𑀸𑀲𑀼 𑀅𑀲𑀗𑁆𑀖𑀝𑁆𑀞𑁄 𑀯𑀺𑀳𑀭𑀢𑀺. 𑀤𑁂𑀯𑀢𑀸𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀤𑁂𑀯𑀢𑀸𑀳𑀺 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀢𑁂𑀳𑀺 𑀫𑀫𑀸𑀬𑀺𑀢𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀸𑀘𑀭𑀺𑀬𑀸𑀤𑀻𑀲𑀼 𑀫𑀦𑀼𑀲𑁆𑀲𑁂𑀳𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀫𑀭𑀡𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀬 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀁 𑀧𑀳𑀸𑀬 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺.

𑀬𑀁 𑀧𑀦 𑀲𑀤𑀸 𑀧𑀭𑀺𑀳𑀭𑀺𑀢𑀩𑁆𑀩𑀁 𑀘𑀭𑀺𑀬𑀸𑀦𑀼𑀓𑀽𑀮𑁂𑀦 𑀕𑀳𑀺𑀢𑀁. 𑀢𑀁 𑀤𑀲𑀸𑀲𑀼𑀪𑀓𑀲𑀺𑀡𑀸𑀦𑀼𑀲𑁆𑀲𑀢𑀻𑀲𑀼 𑀅𑀜𑁆𑀜𑀢𑀭𑀁, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑁂𑀯 𑀯𑀸, 𑀢𑀁 𑀲𑀤𑀸 𑀧𑀭𑀺𑀳𑀭𑀺𑀢𑀩𑁆𑀩𑀢𑁄 𑀭𑀓𑁆𑀔𑀺𑀢𑀩𑁆𑀩𑀢𑁄 𑀪𑀸𑀯𑁂𑀢𑀩𑁆𑀩𑀢𑁄 𑀘 ‘‘𑀧𑀸𑀭𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺𑀧𑀺 𑀢𑀤𑁂𑀯. 𑀅𑀢𑁆𑀣𑀓𑀸𑀫𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀢𑀫𑁆𑀧𑀺 𑀏𑀓𑀢𑁄 𑀯𑀲𑀦𑁆𑀢𑀸 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀺 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀦 𑀇𑀡𑀝𑁆𑀝𑀸 𑀦 𑀪𑀬𑀝𑁆𑀝𑀸 𑀦 𑀚𑀻𑀯𑀺𑀓𑀸𑀧𑀓𑀢𑀸 𑀧𑀩𑁆𑀩𑀚𑀺𑀢𑀸, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀧𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸. 𑀢𑀲𑁆𑀫𑀸 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑁂 𑀕𑀫𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣, 𑀞𑀸𑀦𑁂, 𑀦𑀺𑀲𑀚𑁆𑀚𑀸𑀬, 𑀲𑀬𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑁂 𑀲𑀬𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺.

𑀢𑁂 𑀏𑀯𑀁 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸 𑀅𑀟𑁆𑀠𑀉𑀲𑀪𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀦𑁆𑀢𑀭𑁂𑀲𑀼 𑀧𑀸𑀲𑀸𑀡𑀸 𑀳𑁄𑀦𑁆𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀓𑀲𑁆𑀲𑀘𑀺 𑀕𑀫𑀦𑁂 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑁆𑀣𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀲𑁄 ‘‘𑀅𑀬𑀁 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀉𑀧𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀁 𑀚𑀸𑀦𑀸𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂 𑀏𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁄𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀻𑀢𑀺. 𑀲𑁄𑀬𑁂𑀯 𑀦𑀬𑁄 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀢𑀁 𑀓𑀺𑀮𑁂𑀲𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀕𑀘𑁆𑀙𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀢𑀺. 𑀉𑀤𑁆𑀥𑀭𑀢𑀺 𑀘𑁂, 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀭𑀺𑀫𑀧𑀤𑁂𑀲𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀆𑀮𑀺𑀦𑁆𑀤𑀓𑀯𑀸𑀲𑀻 𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀯𑀺𑀬.

𑀲𑁄 𑀓𑀺𑀭 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀏𑀯𑀁 𑀯𑀺𑀳𑀸𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀲𑀼𑀤𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀲𑀦𑁆𑀢𑀸 𑀘 𑀯𑀧𑀦𑁆𑀢𑀸 𑀘 𑀫𑀤𑁆𑀤𑀦𑁆𑀢𑀸 𑀘 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀘 𑀣𑁂𑀭𑀁 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀣𑁂𑀭𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄 𑀫𑀕𑁆𑀕𑀫𑀽𑀴𑁆𑀳𑁄, 𑀉𑀤𑀸𑀳𑀼 𑀓𑀺𑀜𑁆𑀘𑀺 𑀧𑀫𑀼𑀝𑁆𑀞𑁄’’𑀢𑀺 𑀲𑀫𑀼𑀮𑁆𑀮𑀧𑀦𑁆𑀢𑀺. 𑀲𑁄 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀻𑀲𑀢𑀺𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀧𑀢𑁆𑀢𑀤𑀺𑀯𑀲𑁂𑀬𑁂𑀯𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀗𑁆𑀕𑀼𑀮𑀻𑀳𑀺 𑀤𑀻𑀧𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀉𑀧𑀝𑁆𑀞𑀸𑀦𑀁 𑀆𑀕𑀫𑀺𑀁𑀲𑀼. 𑀢𑀜𑁆𑀘 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀯𑀦𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀤𑀼𑀢𑀺𑀬𑀤𑀺𑀯𑀲𑁂 𑀧𑀼𑀘𑁆𑀙𑀺 𑁋 ‘‘𑀭𑀢𑁆𑀢𑀺𑀪𑀸𑀕𑁂 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀑𑀪𑀸𑀲𑁄 𑀅𑀳𑁄𑀲𑀺, 𑀓𑀺𑀁 𑀲𑁄’’𑀢𑀺? 𑀣𑁂𑀭𑁄 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 ‘‘𑀑𑀪𑀸𑀲𑁄 𑀦𑀸𑀫 𑀤𑀻𑀧𑁄𑀪𑀸𑀲𑁄𑀧𑀺 𑀳𑁄𑀢𑀺 𑀫𑀡𑀺𑀑𑀪𑀸𑀲𑁄𑀧𑀻’’𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀲𑁄 ‘‘𑀧𑀝𑀺𑀘𑁆𑀙𑀸𑀤𑁂𑀣 𑀢𑀼𑀫𑁆𑀳𑁂’’𑀢𑀺 𑀦𑀺𑀩𑀤𑁆𑀥𑁄 ‘‘𑀆𑀫𑀸’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀆𑀭𑁄𑀘𑁂𑀲𑀺.

𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀘. 𑀲𑁄𑀧𑀺 𑀓𑀺𑀭 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 ‘‘𑀧𑀞𑀫𑀁 𑀢𑀸𑀯 𑀪𑀕𑀯𑀢𑁄 𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀲𑀺, 𑀧𑀼𑀦 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀉𑀤𑁆𑀥𑀝𑁂 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀕𑀸𑀯𑀻 𑀦𑀼 𑀔𑁄 𑀧𑀩𑁆𑀩𑀚𑀺𑀢𑁄 𑀦𑀼 𑀔𑁄’’𑀢𑀺 𑀆𑀲𑀗𑁆𑀓𑀦𑀻𑀬𑀧𑁆𑀧𑀤𑁂𑀲𑁂 𑀞𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀓𑀘𑁆𑀙𑀓𑀦𑁆𑀢𑀭𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀢𑀺 ‘‘𑀪𑀺𑀓𑁆𑀔𑀁 𑀯𑀸 𑀤𑀸𑀢𑀼𑀁 𑀯𑀦𑁆𑀤𑀺𑀢𑀼𑀁 𑀯𑀸 𑀉𑀧𑀕𑀢𑁂 𑀫𑀦𑀼𑀲𑁆𑀲𑁂 ‘𑀤𑀻𑀖𑀸𑀬𑀼𑀓𑀸 𑀳𑁄𑀣𑀸’𑀢𑀺 𑀯𑀘𑀦𑀫𑀢𑁆𑀢𑁂𑀦𑀸𑀧𑀺 𑀫𑀸 𑀫𑁂 𑀓𑀫𑁆𑀫𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑁄 𑀅𑀳𑁄𑀲𑀻’’𑀢𑀺. 𑀲𑀘𑁂 𑀧𑀦 𑀦𑀁 ‘‘𑀅𑀚𑁆𑀚, 𑀪𑀦𑁆𑀢𑁂, 𑀓𑀺𑀁 𑀲𑀢𑁆𑀢𑀫𑀻, 𑀉𑀤𑀸𑀳𑀼 𑀅𑀝𑁆𑀞𑀫𑀻’’𑀢𑀺 𑀤𑀺𑀯𑀲𑀁 𑀧𑀼𑀘𑁆𑀙𑀦𑁆𑀢𑀺, 𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀲𑀘𑁂 𑀤𑀺𑀯𑀲𑀧𑀼𑀘𑁆𑀙𑀓𑀸 𑀦 𑀳𑁄𑀦𑁆𑀢𑀺, 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀁 𑀕𑀸𑀫𑀤𑁆𑀯𑀸𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸𑀯 𑀬𑀸𑀢𑀺.

𑀲𑀻𑀳𑀴𑀤𑀻𑀧𑁂 𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀸 𑀧𑀜𑁆𑀜𑀸𑀲 𑀪𑀺𑀓𑁆𑀔𑀽 𑀯𑀺𑀬 𑀘. 𑀢𑁂 𑀓𑀺𑀭 𑀯𑀲𑁆𑀲𑀽𑀧𑀦𑀸𑀬𑀺𑀓𑀉𑀧𑁄𑀲𑀣𑀤𑀺𑀯𑀲𑁂 𑀓𑀢𑀺𑀓𑀯𑀢𑁆𑀢𑀁 𑀅𑀓𑀁𑀲𑀼 𑁋 ‘‘𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀦 𑀅𑀜𑁆𑀜𑀫𑀜𑁆𑀜𑀁 𑀆𑀮𑀧𑀺𑀲𑁆𑀲𑀸𑀫𑀸’’𑀢𑀺. 𑀕𑀸𑀫𑀜𑁆𑀘 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀸 𑀕𑀸𑀫𑀤𑁆𑀯𑀸𑀭𑁂 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀧𑀯𑀺𑀲𑀺𑀁𑀲𑀼, 𑀤𑀺𑀯𑀲𑁂 𑀧𑀼𑀘𑁆𑀙𑀺𑀢𑁂 𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀲𑀼𑀁, 𑀅𑀧𑀼𑀘𑁆𑀙𑀺𑀢𑁂 𑀕𑀸𑀫𑀤𑁆𑀯𑀸𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀫𑀁𑀲𑀼. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀦𑀺𑀝𑁆𑀞𑀼𑀪𑀦𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀚𑀸𑀦𑀺𑀁𑀲𑀼 𑁋 ‘‘𑀅𑀚𑁆𑀚 𑀏𑀓𑁄 𑀆𑀕𑀢𑁄, 𑀅𑀚𑁆𑀚 𑀤𑁆𑀯𑁂’’𑀢𑀺. 𑀏𑀯𑀜𑁆𑀘 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑁂 𑀅𑀫𑁆𑀳𑁂𑀳𑁂𑀯 𑀲𑀤𑁆𑀥𑀺𑀁 𑀦 𑀲𑀮𑁆𑀮𑀧𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑀜𑁆𑀜𑀫𑁆𑀧𑀺, 𑀬𑀤𑀺 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀦 𑀲𑀮𑁆𑀮𑀧𑀦𑁆𑀢𑀺, 𑀅𑀤𑁆𑀥𑀸 𑀯𑀺𑀯𑀸𑀤𑀚𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀲𑀩𑁆𑀩𑁂 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀧𑀜𑁆𑀜𑀸𑀲𑀸𑀬 𑀪𑀺𑀓𑁆𑀔𑀽𑀲𑀼 𑀯𑀲𑁆𑀲𑀁 𑀉𑀧𑀕𑀢𑁂𑀲𑀼 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀓𑁄𑀓𑀸𑀲𑁂 𑀦𑀸𑀤𑁆𑀤𑀲𑀁𑀲𑀼. 𑀢𑀢𑁄 𑀢𑁂𑀲𑀼 𑀬𑁄 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄, 𑀲𑁄 𑀏𑀯𑀫𑀸𑀳 𑁋 ‘‘𑀦, 𑀪𑁄, 𑀓𑀮𑀳𑀓𑀸𑀭𑀓𑀸𑀦𑀁 𑀯𑀲𑀦𑁄𑀓𑀸𑀲𑁄 𑀈𑀤𑀺𑀲𑁄 𑀳𑁄𑀢𑀺, 𑀲𑀼𑀲𑀫𑁆𑀫𑀝𑁆𑀞𑀁 𑀘𑁂𑀢𑀺𑀬𑀗𑁆𑀕𑀡𑀁 𑀩𑁄𑀥𑀺𑀬𑀗𑁆𑀕𑀡𑀁, 𑀲𑀼𑀦𑀺𑀓𑁆𑀔𑀺𑀢𑁆𑀢𑀸 𑀲𑀫𑁆𑀫𑀚𑁆𑀚𑀦𑀺𑀬𑁄, 𑀲𑀽𑀧𑀝𑁆𑀞𑀧𑀺𑀢𑀁 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬’’𑀦𑁆𑀢𑀺, 𑀢𑁂 𑀢𑀢𑁄 𑀦𑀺𑀯𑀢𑁆𑀢𑀸. 𑀢𑁂𑀧𑀺 𑀪𑀺𑀓𑁆𑀔𑀽 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀼𑀁.

𑀏𑀯𑀁 𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀯𑀺𑀬 𑀘 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀢𑁆𑀣 𑀲𑀼𑀭𑀸𑀲𑁄𑀡𑁆𑀟𑀥𑀼𑀢𑁆𑀢𑀸𑀤𑀬𑁄 𑀓𑀮𑀳𑀓𑀸𑀭𑀓𑀸 𑀘𑀡𑁆𑀟𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀦𑀢𑁆𑀣𑀺, 𑀢𑀁 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀢𑁆𑀣 𑀘 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦 𑀢𑀼𑀭𑀺𑀢𑀢𑀼𑀭𑀺𑀢𑁄 𑀚𑀯𑁂𑀦 𑀕𑀘𑁆𑀙𑀢𑀺, 𑀚𑀯𑀦𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀁 𑀦𑀸𑀫 𑀦𑀢𑁆𑀣𑀺, 𑀯𑀺𑀲𑀫𑀪𑀽𑀫𑀺𑀪𑀸𑀕𑀧𑁆𑀧𑀢𑁆𑀢𑀁 𑀧𑀦 𑀉𑀤𑀓𑀪𑀭𑀺𑀢𑀲𑀓𑀝𑀫𑀺𑀯 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀦𑀼𑀖𑀭𑀁 𑀧𑀯𑀺𑀝𑁆𑀞𑁄 𑀘 𑀤𑀸𑀢𑀼𑀓𑀸𑀫𑀁 𑀯𑀸 𑀅𑀤𑀸𑀢𑀼𑀓𑀸𑀫𑀁 𑀯𑀸 𑀲𑀮𑁆𑀮𑀓𑁆𑀔𑁂𑀢𑀼𑀁 𑀢𑀤𑀦𑀼𑀭𑀽𑀧𑀁 𑀓𑀸𑀮𑀁 𑀆𑀕𑀫𑁂𑀦𑁆𑀢𑁄 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀢𑀺𑀭𑀽𑀧𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀓𑁆𑀔𑀩𑁆𑀪𑀜𑁆𑀚𑀦𑀯𑀡𑀸𑀮𑁂𑀧𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬…𑀧𑁂… 𑀪𑀼𑀢𑁆𑀢𑀸𑀯𑀻 𑀘 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀪𑀢𑁆𑀢𑀓𑀺𑀮𑀫𑀣𑀁 𑀯𑀺𑀦𑁄𑀤𑁂𑀢𑁆𑀯𑀸 𑀬𑀣𑀸 𑀧𑀼𑀭𑁂𑀪𑀢𑁆𑀢𑀁, 𑀏𑀯𑀁 𑀧𑀘𑁆𑀙𑀸𑀪𑀢𑁆𑀢𑀁, 𑀧𑀼𑀭𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘𑀸’’𑀢𑀺. 𑀏𑀯𑀫𑁂𑀢𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀏𑀢𑀁 𑀧𑀽𑀭𑁂𑀦𑁆𑀢𑁄 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀞𑀫𑀯𑀬𑁂 𑀏𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀧𑀞𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀫𑀭𑀡𑀲𑀫𑀬𑁂 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀫𑀭𑀡𑀲𑀫𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀼𑀡𑀸𑀢𑀺, 𑀅𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀦𑁄 𑀘𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀣 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀩𑀸𑀳𑀺𑀬𑁄, 𑀫𑀳𑀸𑀧𑀜𑁆𑀜𑁄 𑀯𑀸 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄𑀢𑀺.

𑀅𑀬𑀁 𑀧𑀦 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑁄 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀢𑀁 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀓𑀼𑀲𑀮𑀸 𑀇𑀢𑁆𑀣𑀺𑀬𑁄 𑀢𑀤𑀳𑁂𑀯 𑀕𑀩𑁆𑀪𑀲𑀡𑁆𑀞𑀸𑀦𑀁 𑀚𑀸𑀦𑀦𑁆𑀢𑀺. 𑀲𑀸 𑀘 𑀢𑀸𑀲𑀁 𑀅𑀜𑁆𑀜𑀢𑀭𑀸, 𑀢𑀲𑁆𑀫𑀸 𑀏𑀲𑀸𑀧𑀺 𑀢𑀁 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀁 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺. 𑀥𑀫𑁆𑀫𑀢𑀸 𑀏𑀲𑀸, 𑀬𑀁 𑀧𑀼𑀜𑁆𑀜𑀯𑀦𑁆𑀢𑁂 𑀲𑀢𑁆𑀢𑁂 𑀕𑀩𑁆𑀪𑁂 𑀉𑀧𑁆𑀧𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀕𑀩𑁆𑀪𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀢𑀲𑁆𑀫𑀸 𑀭𑀸𑀚𑀸 𑀢𑀲𑁆𑀲𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀢𑀢𑁄 𑀧𑀪𑀼𑀢𑀺 𑀦𑀸𑀘𑁆𑀘𑀼𑀡𑁆𑀳𑀁 𑀓𑀺𑀜𑁆𑀘𑀺 𑀅𑀚𑁆𑀛𑁄𑀳𑀭𑀺𑀢𑀼𑀁 𑀮𑀪𑀢𑀺, 𑀦𑀸𑀢𑀺𑀲𑀻𑀢𑀁 𑀦𑀸𑀘𑁆𑀘𑀫𑁆𑀩𑀺𑀮𑀁 𑀦𑀸𑀢𑀺𑀮𑁄𑀡𑀁 𑀦𑀸𑀢𑀺𑀓𑀝𑀼𑀓𑀁 𑀦𑀸𑀢𑀺𑀢𑀺𑀢𑁆𑀢𑀓𑀁. 𑀅𑀘𑁆𑀘𑀼𑀡𑁆𑀳𑁂 𑀳𑀺 𑀫𑀸𑀢𑀭𑀸 𑀅𑀚𑁆𑀛𑁄𑀳𑀝𑁂 𑀕𑀩𑁆𑀪𑀲𑁆𑀲 𑀮𑁄𑀳𑀓𑀼𑀫𑁆𑀪𑀺𑀯𑀸𑀲𑁄 𑀯𑀺𑀬 𑀳𑁄𑀢𑀺, 𑀅𑀢𑀺𑀲𑀻𑀢𑁂 𑀮𑁄𑀓𑀦𑁆𑀢𑀭𑀺𑀓𑀯𑀸𑀲𑁄 𑀯𑀺𑀬, 𑀅𑀘𑁆𑀘𑀫𑁆𑀩𑀺𑀮𑀮𑁄𑀡𑀓𑀝𑀼𑀓𑀢𑀺𑀢𑁆𑀢𑀓𑁂𑀲𑀼 𑀪𑀼𑀢𑁆𑀢𑁂𑀲𑀼 𑀲𑀢𑁆𑀣𑁂𑀦 𑀨𑀸𑀮𑁂𑀢𑁆𑀯𑀸 𑀅𑀫𑁆𑀩𑀺𑀮𑀸𑀤𑀻𑀳𑀺 𑀲𑀺𑀢𑁆𑀢𑀸𑀦𑀺 𑀯𑀺𑀬 𑀤𑀸𑀭𑀓𑀲𑁆𑀲 𑀅𑀗𑁆𑀕𑀸𑀦𑀺 𑀢𑀺𑀩𑁆𑀩𑀯𑁂𑀤𑀦𑀸𑀦𑀺 𑀳𑁄𑀦𑁆𑀢𑀺. 𑀅𑀢𑀺𑀘𑀗𑁆𑀓𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀲𑀬𑀦𑀢𑁄𑀧𑀺 𑀦𑀁 𑀦𑀺𑀯𑀸𑀭𑁂𑀦𑁆𑀢𑀺 ‘‘𑀓𑀼𑀘𑁆𑀙𑀺𑀕𑀢𑀲𑁆𑀲 𑀲𑀜𑁆𑀘𑀮𑀦𑀤𑀼𑀓𑁆𑀔𑀁 𑀫𑀸 𑀅𑀳𑁄𑀲𑀻’’𑀢𑀺. 𑀫𑀼𑀤𑀼𑀓𑀢𑁆𑀣𑀭𑀡𑀢𑁆𑀣𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀦𑀸𑀤𑀻𑀦𑀺 𑀫𑀢𑁆𑀢𑀸𑀬 𑀓𑀸𑀢𑀼𑀁 𑀮𑀪𑀢𑀺, 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀁 𑀲𑀸𑀤𑀼𑀁 𑀲𑀧𑁆𑀧𑀸𑀬𑀁 𑀅𑀦𑁆𑀦𑀧𑀸𑀦𑀁 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀯 𑀦𑀁 𑀘𑀗𑁆𑀓𑀫𑀸𑀧𑁂𑀦𑁆𑀢𑀺 𑀦𑀺𑀲𑀻𑀤𑀸𑀧𑁂𑀦𑁆𑀢𑀺 𑀯𑀼𑀝𑁆𑀞𑀸𑀧𑁂𑀦𑁆𑀢𑀺.

𑀲𑀸 𑀏𑀯𑀁 𑀧𑀭𑀺𑀳𑀭𑀺𑀬𑀫𑀸𑀦𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀲𑀽𑀢𑀺𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺 𑀧𑀓𑁆𑀓𑀢𑁂𑀮𑀫𑀤𑁆𑀤𑀺𑀢𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀺𑀲𑀤𑀺𑀲𑀁 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀽𑀧𑁂𑀢𑀁. 𑀢𑀢𑁄 𑀦𑀁 𑀧𑀜𑁆𑀘𑀫𑀤𑀺𑀯𑀲𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁, 𑀭𑀸𑀚𑀸 𑀢𑀼𑀝𑁆𑀞𑁄 𑀙𑀲𑀝𑁆𑀞𑀺𑀬𑀸 𑀥𑀸𑀢𑀻𑀳𑀺 𑀉𑀧𑀝𑁆𑀞𑀸𑀧𑁂𑀲𑀺. 𑀲𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀯𑀟𑁆𑀠𑀫𑀸𑀦𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀦𑀁 𑀭𑀸𑀚𑀸 𑀭𑀚𑁆𑀚𑁂𑀦 𑀅𑀪𑀺𑀲𑀺𑀜𑁆𑀘𑀺, 𑀯𑀺𑀯𑀺𑀥𑀦𑀸𑀝𑀓𑀸𑀳𑀺 𑀘 𑀉𑀧𑀝𑁆𑀞𑀸𑀧𑁂𑀲𑀺. 𑀅𑀪𑀺𑀲𑀺𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀸𑀫𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀻𑀲𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼. 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀧𑀼𑀩𑁆𑀩𑁂 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀢𑀸𑀦𑀺 𑀧𑀭𑀺𑀳𑀸𑀬𑀦𑁆𑀢𑀸𑀦𑀺 𑀲𑀝𑁆𑀞𑀺 𑀅𑀳𑁂𑀲𑀼𑀁, 𑀢𑀢𑁄 𑀧𑀭𑀺𑀳𑀸𑀬𑀦𑁆𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀁, 𑀲𑀩𑁆𑀩𑀧𑀭𑀺𑀳𑀸𑀬𑀦𑀓𑀸𑀮𑁂 𑀧𑀦 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀅𑀬𑀜𑁆𑀘 𑀩𑁆𑀭𑀳𑁆𑀫𑀤𑀢𑁆𑀢𑁄 𑀲𑀩𑁆𑀩𑀧𑀭𑀺𑀳𑀸𑀬𑀦𑀓𑀸𑀮𑁂 𑀉𑀧𑁆𑀧𑀚𑁆𑀚𑀺, 𑀢𑁂𑀦𑀲𑁆𑀲 𑀯𑀻𑀲𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀯𑀻𑀲𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀭𑀣𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀑𑀭𑁄𑀥𑀸 𑀘 𑀦𑀸𑀝𑀓𑀺𑀢𑁆𑀣𑀺𑀬𑁄 𑀘, 𑀯𑀻𑀲𑀢𑀺 𑀅𑀫𑀘𑁆𑀘𑀲𑀳𑀲𑁆𑀲𑀸𑀦𑀺.

𑀲𑁄 𑀫𑀳𑀸𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁄𑀬𑁂𑀯 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄, 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀬𑀲𑁆𑀫𑀸 𑀧𑀦 𑀅𑀪𑀺𑀲𑀺𑀢𑁆𑀢𑀭𑀜𑁆𑀜𑀸 𑀦𑀸𑀫 𑀅𑀯𑀲𑁆𑀲𑀁 𑀅𑀝𑁆𑀝𑀓𑀭𑀡𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀏𑀓𑀤𑀺𑀯𑀲𑀁 𑀧𑀕𑁂𑀯 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀢𑀢𑁆𑀣 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁 𑀅𑀓𑀁𑀲𑀼, 𑀲𑁄 ‘‘𑀅𑀬𑀁 𑀲𑀤𑁆𑀤𑁄 𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀧𑀸𑀲𑀸𑀤𑀢𑀮𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄 𑀦𑀸𑀲𑀓𑁆𑀔𑀺 𑀅𑀧𑁆𑀧𑁂𑀢𑀼𑀁 𑀭𑀚𑁆𑀚𑀯𑀺𑀓𑁆𑀔𑁂𑀧𑁂𑀦 𑀲𑀫𑀸𑀧𑀢𑁆𑀢𑀺 𑀧𑀭𑀺𑀳𑀻𑀦𑀸. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀭𑀚𑁆𑀚𑀁 𑀯𑀭𑀁, 𑀉𑀤𑀸𑀳𑀼 𑀲𑀫𑀡𑀥𑀫𑁆𑀫𑁄’’𑀢𑀺? 𑀢𑀢𑁄 ‘‘𑀭𑀚𑁆𑀚𑀲𑀼𑀔𑀁 𑀧𑀭𑀺𑀢𑁆𑀢𑀁 𑀅𑀦𑁂𑀓𑀸𑀤𑀻𑀦𑀯𑀁, 𑀲𑀫𑀡𑀥𑀫𑁆𑀫𑀲𑀼𑀔𑀁 𑀧𑀦 𑀯𑀺𑀧𑀼𑀮𑀁 𑀅𑀦𑁂𑀓𑀸𑀦𑀺𑀲𑀁𑀲𑀁 𑀉𑀢𑁆𑀢𑀫𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑀜𑁆𑀘𑀸’’𑀢𑀺 𑀜𑀢𑁆𑀯𑀸 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 ‘‘𑀇𑀫𑀁 𑀭𑀚𑁆𑀚𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀦𑀼𑀲𑀸𑀲, 𑀫𑀸 𑀔𑁄 𑀅𑀥𑀫𑁆𑀫𑀓𑀸𑀭𑀁 𑀓𑀸𑀭𑁂𑀲𑀻’’𑀢𑀺 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑀺, 𑀦 𑀓𑁄𑀘𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀪𑀢𑀺 𑀅𑀜𑁆𑀜𑀢𑁆𑀭 𑀫𑀼𑀔𑀥𑁄𑀯𑀦𑀤𑀦𑁆𑀢𑀓𑀝𑁆𑀞𑀤𑀸𑀬𑀓𑀪𑀢𑁆𑀢𑀦𑀻𑀳𑀸𑀭𑀓𑀸𑀤𑀻𑀳𑀺.

𑀢𑀢𑁄 𑀅𑀤𑁆𑀥𑀫𑀸𑀲𑀫𑀢𑁆𑀢𑁂 𑀯𑀻𑀢𑀺𑀓𑁆𑀓𑀦𑁆𑀢𑁂 𑀫𑀳𑁂𑀲𑀻 𑀧𑀼𑀘𑁆𑀙𑀺 𑁋 ‘‘𑀭𑀸𑀚𑀸 𑀉𑀬𑁆𑀬𑀸𑀦𑀕𑀫𑀦𑀩𑀮𑀤𑀲𑁆𑀲𑀦𑀦𑀸𑀝𑀓𑀸𑀤𑀻𑀲𑀼 𑀓𑀢𑁆𑀣𑀘𑀺 𑀦 𑀤𑀺𑀲𑁆𑀲𑀢𑀺, 𑀓𑀼𑀳𑀺𑀁 𑀕𑀢𑁄’’𑀢𑀺? 𑀢𑀲𑁆𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀸 𑀅𑀫𑀘𑁆𑀘𑀲𑁆𑀲 𑀧𑀸𑀳𑁂𑀲𑀺 𑁋 ‘‘𑀭𑀚𑁆𑀚𑁂 𑀧𑀝𑀺𑀘𑁆𑀙𑀺𑀢𑁂 𑀅𑀳𑀫𑁆𑀧𑀺 𑀧𑀝𑀺𑀘𑁆𑀙𑀺𑀢𑀸 𑀳𑁄𑀫𑀺, 𑀏𑀢𑀼 𑀫𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑀽’’𑀢𑀺. 𑀲𑁄 𑀉𑀪𑁄 𑀓𑀡𑁆𑀡𑁂 𑀣𑀓𑁂𑀢𑁆𑀯𑀸 ‘‘𑀅𑀲𑀯𑀦𑀻𑀬𑀫𑁂𑀢’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀲𑀸 𑀧𑀼𑀦𑀧𑀺 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑁂𑀲𑁂𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀁 𑀲𑀦𑁆𑀢𑀚𑁆𑀚𑀸𑀧𑁂𑀲𑀺 ‘‘𑀬𑀤𑀺 𑀦 𑀓𑀭𑁄𑀲𑀺, 𑀞𑀸𑀦𑀸𑀧𑀺 𑀢𑀁 𑀘𑀸𑀯𑁂𑀫𑀺. 𑀚𑀻𑀯𑀺𑀢𑀸𑀧𑀺 𑀢𑀁 𑀯𑁄𑀭𑁄𑀧𑁂𑀫𑀻’’𑀢𑀺. 𑀲𑁄 𑀪𑀻𑀢𑁄 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀤𑀴𑁆𑀳𑀦𑀺𑀘𑁆𑀙𑀬𑁄, 𑀓𑀤𑀸𑀘𑀺 𑀏𑀯𑀫𑁆𑀧𑀺 𑀓𑀸𑀭𑀸𑀧𑁂𑀬𑁆𑀬𑀸’’𑀢𑀺. 𑀏𑀓𑀤𑀺𑀯𑀲𑀁 𑀭𑀳𑁄 𑀕𑀦𑁆𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀺𑀭𑀺𑀲𑀬𑀦𑁂 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀧𑀼𑀜𑁆𑀜𑀯𑀢𑀻 𑀲𑀼𑀔𑀲𑀫𑁆𑀨𑀲𑁆𑀲𑀸, 𑀲𑁄 𑀢𑀲𑁆𑀲𑀸 𑀲𑀫𑁆𑀨𑀲𑁆𑀲𑀭𑀸𑀕𑁂𑀦 𑀭𑀢𑁆𑀢𑁄 𑀢𑀢𑁆𑀣 𑀅𑀪𑀺𑀓𑁆𑀔𑀡𑀁 𑀲𑀗𑁆𑀓𑀺𑀢𑀲𑀗𑁆𑀓𑀺𑀢𑁄𑀯 𑀅𑀕𑀫𑀸𑀲𑀺. 𑀅𑀦𑀼𑀓𑁆𑀓𑀫𑁂𑀦 𑀅𑀢𑁆𑀢𑀦𑁄 𑀖𑀭𑀲𑀸𑀫𑀺𑀓𑁄 𑀯𑀺𑀬 𑀦𑀺𑀩𑁆𑀩𑀺𑀲𑀗𑁆𑀓𑁄 𑀧𑀯𑀺𑀲𑀺𑀢𑀼𑀫𑀸𑀭𑀤𑁆𑀥𑁄.

𑀢𑀢𑁄 𑀭𑀸𑀚𑀫𑀦𑀼𑀲𑁆𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀦 𑀲𑀤𑁆𑀤𑀳𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀆𑀭𑁄𑀘𑁂𑀲𑀼𑀁, 𑀢𑀢𑁄 𑀭𑀸𑀚𑀸 𑀦𑀺𑀮𑀻𑀦𑁄 𑀲𑀬𑀫𑁂𑀯 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀢𑁂 ‘‘𑀅𑀬𑀁 𑀭𑀸𑀚𑀸𑀧𑀭𑀸𑀥𑀺𑀓𑁄 𑀳𑀢𑁆𑀣𑀘𑁆𑀙𑁂𑀤𑀁 𑀅𑀭𑀳𑀢𑀺, 𑀧𑀸𑀤𑀘𑁆𑀙𑁂𑀤𑀁 𑀅𑀭𑀳𑀢𑀻’’𑀢𑀺 𑀬𑀸𑀯 𑀲𑀽𑀮𑁂 𑀉𑀢𑁆𑀢𑀸𑀲𑀦𑀁, 𑀢𑀸𑀯 𑀲𑀩𑁆𑀩𑀓𑀫𑁆𑀫𑀓𑀸𑀭𑀡𑀸𑀦𑀺 𑀦𑀺𑀤𑁆𑀤𑀺𑀲𑀺𑀁𑀲𑀼. 𑀭𑀸𑀚𑀸 ‘‘𑀏𑀢𑀲𑁆𑀲 𑀯𑀥𑀩𑀦𑁆𑀥𑀦𑀢𑀸𑀴𑀦𑁂 𑀫𑀬𑁆𑀳𑀁 𑀯𑀺𑀳𑀺𑀁𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂 𑀧𑀸𑀡𑀸𑀢𑀺𑀧𑀸𑀢𑁄 𑀪𑀯𑁂𑀬𑁆𑀬, 𑀥𑀦𑀳𑀭𑀡𑁂 𑀅𑀤𑀺𑀦𑁆𑀦𑀸𑀤𑀸𑀦𑀁 𑀪𑀯𑁂𑀬𑁆𑀬, 𑀅𑀮𑀁 𑀏𑀯𑀭𑀽𑀧𑁂𑀳𑀺 𑀓𑀢𑁂𑀳𑀺, 𑀇𑀫𑀁 𑀫𑀫 𑀭𑀚𑁆𑀚𑀸 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 𑀢𑀁 𑀦𑀺𑀩𑁆𑀩𑀺𑀲𑀬𑀁 𑀅𑀓𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀥𑀦𑀲𑀸𑀭𑀜𑁆𑀘 𑀧𑀼𑀢𑁆𑀢𑀤𑀸𑀭𑀜𑁆𑀘 𑀕𑀳𑁂𑀢𑁆𑀯𑀸 𑀧𑀭𑀯𑀺𑀲𑀬𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀭𑀸𑀚𑀸 𑀲𑀼𑀢𑁆𑀯𑀸 ‘‘𑀓𑀺𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀇𑀘𑁆𑀙𑀸𑀫𑀺 𑀢𑀁 𑀉𑀧𑀝𑁆𑀞𑀸𑀢𑀼’’𑀦𑁆𑀢𑀺. 𑀲𑁄 𑀢𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀫𑀘𑁆𑀘𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀮𑀤𑁆𑀥𑀯𑀺𑀲𑁆𑀲𑀸𑀲𑁄 𑀢𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀭𑀸𑀚, 𑀅𑀫𑀓𑁆𑀔𑀺𑀓𑀁 𑀫𑀥𑀼𑀁 𑀧𑀲𑁆𑀲𑀸𑀫𑀺, 𑀢𑀁 𑀔𑀸𑀤𑀦𑁆𑀢𑁄 𑀦𑀢𑁆𑀣𑀻’’𑀢𑀺. 𑀭𑀸𑀚𑀸 ‘‘𑀓𑀺𑀁 𑀏𑀢𑀁 𑀉𑀧𑁆𑀧𑀡𑁆𑀟𑁂𑀢𑀼𑀓𑀸𑀫𑁄 𑀪𑀡𑀢𑀻’’𑀢𑀺 𑀦 𑀲𑀼𑀡𑀸𑀢𑀺. 𑀲𑁄 𑀅𑀦𑁆𑀢𑀭𑀁 𑀮𑀪𑀺𑀢𑁆𑀯𑀸 𑀧𑀼𑀦𑀧𑀺 𑀲𑀼𑀝𑁆𑀞𑀼𑀢𑀭𑀁 𑀯𑀡𑁆𑀡𑁂𑀢𑁆𑀯𑀸 𑀅𑀯𑁄𑀘. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀓𑀺𑀁 𑀫𑀁 𑀦𑁂𑀢𑁆𑀯𑀸 𑀫𑀸𑀭𑁂𑀢𑀼𑀓𑀸𑀫𑁄𑀲𑀻’’𑀢𑀺 𑀆𑀳. 𑀲𑁄 ‘‘𑀫𑀸, 𑀤𑁂𑀯, 𑀏𑀯𑀁 𑀅𑀯𑀘, 𑀬𑀤𑀺 𑀦 𑀲𑀤𑁆𑀤𑀳𑀲𑀺, 𑀫𑀦𑀼𑀲𑁆𑀲𑁂 𑀧𑁂𑀲𑁂𑀳𑀻’’𑀢𑀺. 𑀲𑁄 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀕𑁄𑀧𑀼𑀭𑀁 𑀔𑀡𑀺𑀢𑁆𑀯𑀸 𑀭𑀜𑁆𑀜𑁄 𑀲𑀬𑀦𑀖𑀭𑁂 𑀉𑀝𑁆𑀞𑀳𑀺𑀁𑀲𑀼.

𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑀺𑀲𑁆𑀲 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀘𑁄𑀭𑀸 𑀫𑀬𑀁, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀢𑁂𑀲𑀁 𑀥𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀫𑀸 𑀧𑀼𑀦 𑀏𑀯𑀁 𑀅𑀓𑀢𑁆𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀧𑀼𑀦𑀧𑀺 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀢𑀣𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀲𑀻𑀮𑀯𑀸 𑀭𑀸𑀚𑀸’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀻𑀫𑀦𑁆𑀢𑀭𑁂 𑀏𑀓𑀁 𑀦𑀕𑀭𑀁 𑀉𑀧𑀕𑀫𑁆𑀫 𑀢𑀢𑁆𑀣 𑀅𑀫𑀘𑁆𑀘𑀲𑁆𑀲 𑀧𑀸𑀳𑁂𑀲𑀺 ‘‘𑀦𑀕𑀭𑀁 𑀯𑀸 𑀫𑁂 𑀤𑁂𑀳𑀺, 𑀬𑀼𑀤𑁆𑀥𑀁 𑀯𑀸’’𑀢𑀺. 𑀲𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀆𑀡𑀸𑀧𑁂𑀢𑀼, 𑀤𑁂𑀯, ‘𑀓𑀺𑀁 𑀬𑀼𑀚𑁆𑀛𑀸𑀫𑀺, 𑀉𑀤𑀸𑀳𑀼 𑀦𑀕𑀭𑀁 𑀤𑁂𑀫𑀻’’’𑀢𑀺. 𑀭𑀸𑀚𑀸 ‘‘𑀦 𑀬𑀼𑀚𑁆𑀛𑀺𑀢𑀩𑁆𑀩𑀁, 𑀦𑀕𑀭𑀁 𑀤𑀢𑁆𑀯𑀸 𑀇𑀥𑀸𑀕𑀘𑁆𑀙𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀧𑀝𑀺𑀭𑀸𑀚𑀸𑀧𑀺 𑀢𑀁 𑀦𑀕𑀭𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀦𑀕𑀭𑁂𑀲𑀼𑀧𑀺 𑀢𑀣𑁂𑀯 𑀤𑀽𑀢𑀁 𑀧𑁂𑀲𑁂𑀲𑀺. 𑀢𑁂𑀧𑀺 𑀅𑀫𑀘𑁆𑀘𑀸 𑀢𑀣𑁂𑀯 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 ‘‘𑀦 𑀬𑀼𑀚𑁆𑀛𑀺𑀢𑀩𑁆𑀩𑀁, 𑀇𑀥𑀸𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀸 𑀩𑀸𑀭𑀸𑀡𑀲𑀺𑀁 𑀆𑀕𑀫𑀁𑀲𑀼.

𑀢𑀢𑁄 𑀅𑀫𑀘𑁆𑀘𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀢𑁂𑀦 𑀲𑀳 𑀬𑀼𑀚𑁆𑀛𑀫𑀸’’𑀢𑀺. 𑀭𑀸𑀚𑀸 ‘‘𑀫𑀫 𑀧𑀸𑀡𑀸𑀢𑀺𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸𑀭𑁂𑀲𑀺. 𑀅𑀫𑀘𑁆𑀘𑀸 ‘‘𑀫𑀬𑀁, 𑀫𑀳𑀸𑀭𑀸𑀚, 𑀢𑀁 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀦𑀸𑀦𑀸𑀉𑀧𑀸𑀬𑁂𑀳𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀏𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀕𑀦𑁆𑀢𑀼𑀫𑀸𑀭𑀤𑁆𑀥𑀸. 𑀭𑀸𑀚𑀸 ‘‘𑀲𑀘𑁂 𑀲𑀢𑁆𑀢𑀫𑀸𑀭𑀡𑀧𑁆𑀧𑀳𑀭𑀡𑀯𑀺𑀮𑀼𑀫𑁆𑀧𑀦𑀓𑀫𑁆𑀫𑀁 𑀦 𑀓𑀭𑁄𑀣, 𑀕𑀘𑁆𑀙𑀸𑀫𑀻’’𑀢𑀺 𑀪𑀡𑀢𑀺. 𑀅𑀫𑀘𑁆𑀘𑀸 ‘‘𑀦, 𑀤𑁂𑀯, 𑀓𑀭𑁄𑀫, 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀮𑀸𑀧𑁂𑀫𑀸’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀖𑀝𑁂𑀲𑀼 𑀤𑀻𑀧𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀢𑁆𑀢𑀺𑀁 𑀕𑀘𑁆𑀙𑀺𑀁𑀲𑀼. 𑀧𑀝𑀺𑀭𑀸𑀚𑀸 𑀢𑀁 𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀲𑀫𑀻𑀧𑁂 𑀦𑀕𑀭𑀁 𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀦𑁆𑀢𑀺 𑀭𑀢𑁆𑀢𑀺𑀁 𑀲𑀦𑁆𑀦𑀸𑀳𑀁 𑀫𑁄𑀘𑀸𑀧𑁂𑀢𑁆𑀯𑀸 𑀧𑀫𑀢𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦. 𑀢𑀢𑁄 𑀅𑀫𑀘𑁆𑀘𑀸 𑀩𑁆𑀭𑀳𑁆𑀫𑀤𑀢𑁆𑀢𑀭𑀸𑀚𑀸𑀦𑀁 𑀆𑀤𑀸𑀬 𑀧𑀝𑀺𑀭𑀜𑁆𑀜𑁄 𑀔𑀦𑁆𑀥𑀸𑀯𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀖𑀝𑁂𑀳𑀺 𑀤𑀻𑀧𑁂 𑀦𑀻𑀳𑀭𑀸𑀧𑁂𑀢𑁆𑀯𑀸 𑀏𑀓𑀧𑀚𑁆𑀚𑁄𑀢𑀁 𑀓𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀅𑀓𑀁𑀲𑀼. 𑀧𑀝𑀺𑀭𑀜𑁆𑀜𑁄 𑀅𑀫𑀘𑁆𑀘𑁄 𑀫𑀳𑀸𑀩𑀮𑀓𑀸𑀬𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀅𑀢𑁆𑀢𑀦𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺 𑀅𑀫𑀓𑁆𑀔𑀺𑀓𑀁 𑀫𑀥𑀼𑀁 𑀔𑀸𑀤𑀸𑀳𑀻’’𑀢𑀺 𑀫𑀳𑀸𑀲𑀤𑁆𑀤𑀁 𑀅𑀓𑀸𑀲𑀺. 𑀢𑀣𑀸 𑀤𑀼𑀢𑀺𑀬𑁄𑀧𑀺 𑀢𑀢𑀺𑀬𑁄𑀧𑀺. 𑀧𑀝𑀺𑀭𑀸𑀚𑀸 𑀢𑁂𑀦 𑀲𑀤𑁆𑀤𑁂𑀦 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀪𑀬𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀺. 𑀉𑀓𑁆𑀓𑀼𑀝𑁆𑀞𑀺𑀲𑀢𑀸𑀦𑀺 𑀧𑀯𑀢𑁆𑀢𑀺𑀁𑀲𑀼. 𑀲𑁄 ‘‘𑀧𑀭𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀅𑀫𑀺𑀢𑁆𑀢𑀳𑀢𑁆𑀣𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀢𑀁 𑀢𑀁 𑀯𑀺𑀧𑁆𑀧𑀮𑀧𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀥𑀫𑁆𑀫𑀺𑀓𑁄 𑀭𑀸𑀚𑀸, 𑀉𑀧𑀭𑁄𑀥𑀁 𑀦 𑀓𑀭𑁂𑀬𑁆𑀬 𑀕𑀦𑁆𑀢𑁆𑀯𑀸 𑀔𑀫𑀸𑀧𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 ‘‘𑀔𑀫, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀅𑀧𑀭𑀸𑀥’’𑀦𑁆𑀢𑀺 𑀆𑀳. 𑀭𑀸𑀚𑀸 𑀢𑀁 𑀑𑀯𑀤𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀔𑀫𑀸𑀫𑀺 𑀢𑁂’’𑀢𑀺 𑀆𑀳. 𑀲𑁄 𑀭𑀜𑁆𑀜𑀸 𑀏𑀯𑀁 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀫𑀻𑀧𑁂𑀬𑁂𑀯 𑀚𑀦𑀧𑀤𑁂 𑀭𑀚𑁆𑀚𑀁 𑀮𑀪𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁.

𑀅𑀣 𑀩𑁆𑀭𑀳𑁆𑀫𑀤𑀢𑁆𑀢𑁄 𑀤𑁆𑀯𑁂𑀧𑀺 𑀲𑁂𑀦𑀸 𑀲𑀫𑁆𑀫𑁄𑀤𑀫𑀸𑀦𑀸 𑀏𑀓𑀢𑁄 𑀞𑀺𑀢𑀸 𑀤𑀺𑀲𑁆𑀯𑀸 ‘‘𑀫𑀫𑁂𑀯𑁂𑀓𑀲𑁆𑀲 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀸𑀬 𑀅𑀲𑁆𑀫𑀺𑀁 𑀫𑀳𑀸𑀚𑀦𑀓𑀸𑀬𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀩𑀺𑀦𑁆𑀤𑀼 𑀦 𑀉𑀧𑁆𑀧𑀦𑁆𑀦𑀁, 𑀅𑀳𑁄 𑀲𑀸𑀥𑀼, 𑀅𑀳𑁄 𑀲𑀼𑀝𑁆𑀞𑀼, 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼, 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀚𑀸 𑀳𑁄𑀦𑁆𑀢𑀽’’𑀢𑀺 𑀫𑁂𑀢𑁆𑀢𑀸𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀲𑀘𑁆𑀙𑀺𑀓𑀢𑁆𑀯𑀸 𑀲𑀬𑀫𑁆𑀪𑀼𑀢𑀁 𑀧𑀸𑀧𑀼𑀡𑀺. 𑀢𑀁 𑀫𑀕𑁆𑀕𑀨𑀮𑀲𑀼𑀔𑁂𑀦 𑀲𑀼𑀔𑀺𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀁 𑀅𑀫𑀘𑁆𑀘𑀸 𑀧𑀡𑀺𑀧𑀸𑀢𑀁 𑀓𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀬𑀸𑀦𑀓𑀸𑀮𑁄, 𑀫𑀳𑀸𑀭𑀸𑀚, 𑀯𑀺𑀚𑀺𑀢𑀩𑀮𑀓𑀸𑀬𑀲𑁆𑀲 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀧𑀭𑀸𑀚𑀺𑀢𑀩𑀮𑀓𑀸𑀬𑀲𑁆𑀲 𑀪𑀢𑁆𑀢𑀧𑀭𑀺𑀩𑁆𑀩𑀬𑁄 𑀤𑀸𑀢𑀩𑁆𑀩𑁄’’𑀢𑀺. 𑀲𑁄 𑀆𑀳 𑁋 ‘‘𑀦𑀸𑀳𑀁, 𑀪𑀡𑁂, 𑀭𑀸𑀚𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫𑀸𑀳’’𑀦𑁆𑀢𑀺. ‘‘𑀓𑀺𑀁 𑀤𑁂𑀯𑁄 𑀪𑀡𑀢𑀺, 𑀦 𑀏𑀤𑀺𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺. ‘‘𑀓𑀻𑀤𑀺𑀲𑀸, 𑀪𑀡𑁂, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺? ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀤𑁆𑀯𑀗𑁆𑀕𑀼𑀮𑀓𑁂𑀲𑀫𑀲𑁆𑀲𑀽 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀬𑀼𑀢𑁆𑀢𑀸 𑀪𑀯𑀦𑁆𑀢𑀻’’𑀢𑀺. 𑀲𑁄 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀲𑀻𑀲𑀁 𑀧𑀭𑀸𑀫𑀲𑀺, 𑀢𑀸𑀯𑀤𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀧𑀩𑁆𑀩𑀚𑀺𑀢𑀯𑁂𑀲𑁄 𑀧𑀸𑀢𑀼𑀭𑀳𑁄𑀲𑀺. 𑀤𑁆𑀯𑀗𑁆𑀕𑀼𑀮𑀓𑁂𑀲𑀫𑀲𑁆𑀲𑀼 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑀲𑀤𑀺𑀲𑁄 𑀅𑀳𑁄𑀲𑀺. 𑀲𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑁂 𑀦𑀺𑀲𑀻𑀤𑀺. 𑀅𑀫𑀘𑁆𑀘𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑀫𑁆𑀫𑀝𑁆𑀞𑀸𑀦𑀁, 𑀓𑀣𑀁 𑀅𑀥𑀺𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀬𑀢𑁄 𑀅𑀲𑁆𑀲 𑀫𑁂𑀢𑁆𑀢𑀸𑀛𑀸𑀦𑀓𑀫𑁆𑀫𑀝𑁆𑀞𑀸𑀦𑀁 𑀅𑀳𑁄𑀲𑀺, 𑀢𑀜𑁆𑀘 𑀯𑀺𑀧𑀲𑁆𑀲𑀦𑀁 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀉𑀤𑀸𑀦𑀕𑀸𑀣𑀜𑁆𑀘 𑀩𑁆𑀬𑀸𑀓𑀭𑀡𑀕𑀸𑀣𑀜𑁆𑀘 𑀇𑀫𑀁𑀬𑁂𑀯 𑀕𑀸𑀣𑀁 𑀅𑀪𑀸𑀲𑀺 ‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀽𑀢𑀺 𑀅𑀦𑀯𑀲𑁂𑀲𑁂𑀲𑀼. 𑀪𑀽𑀢𑁂𑀲𑀽𑀢𑀺 𑀲𑀢𑁆𑀢𑁂𑀲𑀼. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫. 𑀦𑀺𑀥𑀸𑀬𑀸𑀢𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀤𑀡𑁆𑀟𑀦𑁆𑀢𑀺 𑀓𑀸𑀬𑀯𑀘𑀻𑀫𑀦𑁄𑀤𑀡𑁆𑀟𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀜𑁆𑀳𑀺 𑀤𑀡𑁆𑀟𑀬𑀢𑀻𑀢𑀺 𑀤𑀡𑁆𑀟𑀁, 𑀩𑀸𑀥𑁂𑀢𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀜𑁆𑀘. 𑀧𑀳𑀭𑀡𑀤𑀡𑁆𑀟𑁄 𑀏𑀯 𑀯𑀸 𑀤𑀡𑁆𑀟𑁄, 𑀢𑀁 𑀦𑀺𑀥𑀸𑀬𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀳𑁂𑀞𑀬𑀦𑁆𑀢𑀺 𑀅𑀯𑀺𑀳𑁂𑀞𑀬𑀦𑁆𑀢𑁄. 𑀅𑀜𑁆𑀜𑀢𑀭𑀫𑁆𑀧𑀻𑀢𑀺 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀲𑀩𑁆𑀩𑀪𑀽𑀢𑀸𑀦𑀁. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀭𑀚𑁄, 𑀔𑁂𑀢𑁆𑀢𑀚𑁄, 𑀤𑀺𑀦𑁆𑀦𑀓𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀼𑀢𑁆𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀼𑀢𑁆𑀢𑀁 𑀦 𑀇𑀘𑁆𑀙𑁂𑀬𑁆𑀬. 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀲𑀳𑀸𑀬𑀁 𑀧𑀦 𑀇𑀘𑁆𑀙𑁂𑀬𑁆𑀬𑀸𑀢𑀺 𑀓𑀼𑀢𑁄 𑀏𑀯 𑀏𑀢𑀁.

𑀏𑀓𑁄𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄, 𑀏𑀓𑀦𑁆𑀢𑀯𑀺𑀕𑀢𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄. 𑀲𑀫𑀡𑀲𑀳𑀲𑁆𑀲𑀲𑁆𑀲𑀸𑀧𑀺 𑀳𑀺 𑀫𑀚𑁆𑀛𑁂 𑀯𑀢𑁆𑀢𑀫𑀸𑀦𑁄 𑀕𑀺𑀳𑀺𑀲𑀁𑀬𑁄𑀚𑀦𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀏𑀓𑁄, 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄. 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀇𑀭𑀺𑀬𑀢𑀺 𑀯𑀢𑁆𑀢𑀢𑀻𑀢𑀺 𑀏𑀯𑀁 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺. (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺.𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭) 𑁋

𑀏𑀯𑀁 𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 𑀏𑀓𑁄. 𑀲𑀩𑁆𑀩𑀓𑀺𑀮𑁂𑀲𑀸𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀏𑀯𑀁 𑀏𑀓𑀦𑁆𑀢𑀯𑀺𑀕𑀢𑀓𑀺𑀮𑁂𑀲𑁄𑀢𑀺 𑀏𑀓𑁄. 𑀅𑀦𑀸𑀘𑀭𑀺𑀬𑀓𑁄 𑀳𑀼𑀢𑁆𑀯𑀸 𑀲𑀬𑀫𑁆𑀪𑀽 𑀲𑀸𑀫𑀁𑀬𑁂𑀯 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀯𑀁 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀘𑀭𑁂𑀢𑀺 𑀬𑀸 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀆𑀬𑀢𑀦𑀘𑀭𑀺𑀬𑀸, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀢𑀺𑀘𑀭𑀺𑀬𑀸, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺𑀘𑀭𑀺𑀬𑀸, 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀜𑀸𑀡𑀘𑀭𑀺𑀬𑀸, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀫𑀕𑁆𑀕𑀘𑀭𑀺𑀬𑀸, 𑀅𑀥𑀺𑀕𑀢𑀧𑁆𑀨𑀮𑀸𑀦𑀁 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼 𑀧𑀢𑁆𑀢𑀺𑀘𑀭𑀺𑀬𑀸, 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀢𑀢𑁆𑀣 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀭𑀺𑀬𑀸𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑀇𑀭𑀺𑀬𑀸𑀧𑀣𑀘𑀭𑀺𑀬𑀸’’𑀢𑀺 (𑀧𑀝𑀺. 𑀫. 𑁧.𑁧𑁯𑁭; 𑁩.𑁨𑁮) 𑀯𑀺𑀢𑁆𑀣𑀸𑀭𑁄. 𑀢𑀸𑀳𑀺 𑀘𑀭𑀺𑀬𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀸 𑀇𑀫𑀸 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀳𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑁂𑀦 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀢𑀦𑁆𑀢𑀻𑀢𑀺 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀻𑀢𑀺 (𑀧𑀝𑀺. 𑀫. 𑁧.𑁧𑁯𑁭; 𑁩.𑁨𑁮) 𑀏𑀯𑀁 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑀯𑀼𑀢𑁆𑀢𑀸, 𑀢𑀸𑀳𑀺𑀧𑀺 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀏𑀢𑁆𑀣 𑀔𑀕𑁆𑀕𑀯𑀺𑀲𑀸𑀡𑀁 𑀦𑀸𑀫 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀁. 𑀓𑀧𑁆𑀧-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀧𑀓𑀸𑀲𑀬𑀺𑀲𑁆𑀲𑀸𑀫, 𑀇𑀥 𑀧𑀦𑀸𑀬𑀁 ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢, 𑀪𑁄, 𑀓𑀺𑀭 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁬𑁦) 𑀯𑀺𑀬 𑀧𑀝𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀔𑀕𑁆𑀕𑀯𑀺𑀲𑀸𑀡𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀥𑀺𑀧𑁆𑀧𑀸𑀬𑀸𑀦𑀼𑀲𑀦𑁆𑀥𑀺𑀢𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁆𑀯𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀤𑀡𑁆𑀟𑁄 𑀪𑀽𑀢𑁂𑀲𑀼 𑀧𑀯𑀢𑁆𑀢𑀺𑀬𑀫𑀸𑀦𑁄 𑀅𑀳𑀺𑀢𑁄 𑀳𑁄𑀢𑀺, 𑀢𑀁 𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀦𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀫𑁂𑀢𑁆𑀢𑀸𑀬 𑀧𑀭𑀳𑀺𑀢𑀽𑀧𑀲𑀁𑀳𑀸𑀭𑁂𑀦 𑀘 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀏𑀯 𑀘 𑀬𑀣𑀸 𑀅𑀦𑀺𑀳𑀺𑀢𑀤𑀡𑁆𑀟𑀸 𑀲𑀢𑁆𑀢𑀸 𑀪𑀽𑀢𑀸𑀦𑀺 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀯𑀺𑀳𑁂𑀞𑀬𑀦𑁆𑀢𑀺, 𑀢𑀣𑀸 𑀅𑀯𑀺𑀳𑁂𑀞𑀬𑀁, 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁 𑀇𑀫𑀁 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀫𑀸𑀕𑀫𑁆𑀫 𑀬𑀤𑁂𑀯 𑀢𑀢𑁆𑀣 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀕𑀢𑀁 𑀢𑀜𑁆𑀘 𑀢𑀤𑀦𑀼𑀲𑀸𑀭𑁂𑀦𑁂𑀯 𑀢𑀤𑀜𑁆𑀜𑀜𑁆𑀘 𑀲𑀗𑁆𑀔𑀸𑀭𑀕𑀢𑀁 𑀯𑀺𑀧𑀲𑁆𑀲𑀺𑀢𑁆𑀯𑀸 𑀇𑀫𑀁 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀅𑀬𑀁 𑀢𑀸𑀯 𑀅𑀥𑀺𑀧𑁆𑀧𑀸𑀬𑁄.

𑀅𑀬𑀁 𑀧𑀦 𑀅𑀦𑀼𑀲𑀦𑁆𑀥𑀺 𑁋 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺? 𑀢𑀢𑁄 𑀢𑁂𑀦 ‘‘𑀧𑀼𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀜𑀢𑁆𑀯𑀸 ‘‘𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑁂 𑀤𑀸𑀦𑀺, 𑀪𑀦𑁆𑀢𑁂, 𑀧𑀚𑀳𑀣 𑀦 𑀇𑀘𑁆𑀙𑀣𑀸’’𑀢𑀺. 𑀅𑀣 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀆𑀳 ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬𑀸’’𑀢𑀺 𑀲𑀩𑁆𑀩𑀁. 𑀢𑀢𑁆𑀭𑀸𑀥𑀺𑀧𑁆𑀧𑀸𑀬𑁄 𑁋 𑀅𑀳𑀁 𑀇𑀤𑀸𑀦𑀺 𑀅𑀢𑁆𑀭𑀚𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀧𑀼𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑁂𑀬𑁆𑀬𑀁, 𑀓𑀼𑀢𑁄 𑀧𑀦 𑀢𑀼𑀫𑁆𑀳𑀸𑀤𑀺𑀲𑀁 𑀲𑀳𑀸𑀬𑀁. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀲𑀼𑀧𑀺 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀁 𑀫𑀸𑀤𑀺𑀲𑁄 𑀯𑀸 𑀳𑁄𑀢𑀼𑀁 𑀇𑀘𑁆𑀙𑀢𑀺, 𑀲𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀅𑀣 𑀯𑀸 𑀢𑁂𑀳𑀺 ‘‘𑀅𑀫𑁆𑀳𑁂 𑀤𑀸𑀦𑀺, 𑀪𑀦𑁆𑀢𑁂, 𑀧𑀚𑀳𑀣 𑀦 𑀇𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀏𑀓𑀘𑀭𑀺𑀬𑀸𑀬 𑀕𑀼𑀡𑀁 𑀤𑀺𑀲𑁆𑀯𑀸 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. 𑀏𑀯𑀁 𑀯𑀢𑁆𑀯𑀸 𑀧𑁂𑀓𑁆𑀔𑀫𑀸𑀦𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀁 𑀅𑀕𑀫𑀸𑀲𑀺.

𑀕𑀦𑁆𑀥𑀫𑀸𑀤𑀦𑁄 𑀦𑀸𑀫 𑀳𑀺𑀫𑀯𑀢𑀺 𑀘𑀽𑀴𑀓𑀸𑀴𑀧𑀩𑁆𑀩𑀢𑀁 𑀫𑀳𑀸𑀓𑀸𑀴𑀧𑀩𑁆𑀩𑀢𑀁 𑀦𑀸𑀕𑀧𑀮𑀺𑀯𑁂𑀞𑀦𑀁 𑀘𑀦𑁆𑀤𑀕𑀩𑁆𑀪𑀁 𑀲𑀽𑀭𑀺𑀬𑀕𑀩𑁆𑀪𑀁 𑀲𑀼𑀯𑀡𑁆𑀡𑀧𑀲𑁆𑀲𑀁 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀦𑁆𑀢𑀺 𑀲𑀢𑁆𑀢 𑀧𑀩𑁆𑀩𑀢𑁂 𑀅𑀢𑀺𑀓𑁆𑀓𑀫𑁆𑀫 𑀳𑁄𑀢𑀺. 𑀢𑀢𑁆𑀣 𑀦𑀦𑁆𑀤𑀫𑀽𑀮𑀓𑀁 𑀦𑀸𑀫 𑀧𑀩𑁆𑀪𑀸𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑀦𑁄𑀓𑀸𑀲𑁄, 𑀢𑀺𑀲𑁆𑀲𑁄 𑀘 𑀕𑀼𑀳𑀸𑀬𑁄 𑁋 𑀲𑀼𑀯𑀡𑁆𑀡𑀕𑀼𑀳𑀸, 𑀫𑀡𑀺𑀕𑀼𑀳𑀸, 𑀭𑀚𑀢𑀕𑀼𑀳𑀸𑀢𑀺. 𑀢𑀢𑁆𑀣 𑀫𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀫𑀜𑁆𑀚𑀽𑀲𑀓𑁄 𑀦𑀸𑀫 𑀭𑀼𑀓𑁆𑀔𑁄 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦, 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀲𑁄 𑀬𑀢𑁆𑀢𑀓𑀸𑀦𑀺 𑀉𑀤𑀓𑁂 𑀯𑀸 𑀣𑀮𑁂 𑀯𑀸 𑀧𑀼𑀧𑁆𑀨𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀼𑀧𑁆𑀨𑀬𑀢𑀺, 𑀯𑀺𑀲𑁂𑀲𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀕𑀫𑀦𑀤𑀺𑀯𑀲𑁂. 𑀢𑀲𑁆𑀲𑀽𑀧𑀭𑀺𑀢𑁄 𑀲𑀩𑁆𑀩𑀭𑀢𑀦𑀫𑀸𑀴𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀚𑁆𑀚𑀦𑀓𑀯𑀸𑀢𑁄 𑀓𑀘𑀯𑀭𑀁 𑀙𑀟𑁆𑀟𑁂𑀢𑀺, 𑀲𑀫𑀓𑀭𑀡𑀯𑀸𑀢𑁄 𑀲𑀩𑁆𑀩𑀭𑀢𑀦𑀫𑀬𑀯𑀸𑀮𑀼𑀓𑀁 𑀲𑀫𑀁 𑀓𑀭𑁄𑀢𑀺, 𑀲𑀺𑀜𑁆𑀘𑀦𑀓𑀯𑀸𑀢𑁄 𑀅𑀦𑁄𑀢𑀢𑁆𑀢𑀤𑀳𑀢𑁄 𑀆𑀦𑁂𑀢𑁆𑀯𑀸 𑀉𑀤𑀓𑀁 𑀲𑀺𑀜𑁆𑀘𑀢𑀺, 𑀲𑀼𑀕𑀦𑁆𑀥𑀓𑀭𑀡𑀯𑀸𑀢𑁄 𑀳𑀺𑀫𑀯𑀦𑁆𑀢𑀢𑁄 𑀲𑀩𑁆𑀩𑁂𑀲𑀁 𑀲𑀼𑀕𑀦𑁆𑀥𑀭𑀼𑀓𑁆𑀔𑀸𑀦𑀁 𑀕𑀦𑁆𑀥𑁂 𑀆𑀦𑁂𑀢𑀺, 𑀑𑀘𑀺𑀦𑀓𑀯𑀸𑀢𑁄 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀸𑀢𑁂𑀢𑀺, 𑀲𑀦𑁆𑀣𑀭𑀓𑀯𑀸𑀢𑁄 𑀲𑀩𑁆𑀩𑀢𑁆𑀣 𑀲𑀦𑁆𑀣𑀭𑀢𑀺. 𑀲𑀤𑀸 𑀲𑀼𑀧𑀜𑁆𑀜𑀢𑁆𑀢𑀸𑀦𑁂𑀯 𑀘𑁂𑀢𑁆𑀣 𑀆𑀲𑀦𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀼𑀧𑁆𑀧𑀸𑀤𑀤𑀺𑀯𑀲𑁂, 𑀉𑀧𑁄𑀲𑀣𑀤𑀺𑀯𑀲𑁂 𑀘 𑀲𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀧𑀓𑀢𑀺. 𑀅𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀢𑀺. 𑀢𑀢𑁄 𑀲𑀘𑁂 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀜𑁆𑀜𑁂𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑁂𑀧𑀺 𑀢𑀗𑁆𑀔𑀡𑁂𑀬𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀦𑁆𑀢𑀺. 𑀦𑀺𑀲𑀻𑀤𑀺𑀢𑁆𑀯𑀸 𑀘 𑀓𑀺𑀜𑁆𑀘𑀺𑀤𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑀺. 𑀢𑀢𑁄 𑀲𑀗𑁆𑀖𑀢𑁆𑀣𑁂𑀭𑁄 𑀅𑀥𑀼𑀦𑀸𑀕𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀩𑁆𑀩𑁂𑀲𑀁 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 ‘‘𑀓𑀣𑀫𑀥𑀺𑀕𑀢’’𑀦𑁆𑀢𑀺 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, 𑀢𑀤𑀸𑀧𑀺 𑀲𑁄 𑀢𑀫𑁂𑀯 𑀅𑀢𑁆𑀢𑀦𑁄 𑀉𑀤𑀸𑀦𑀩𑁆𑀬𑀸𑀓𑀭𑀡𑀕𑀸𑀣𑀁 𑀪𑀸𑀲𑀢𑀺. 𑀧𑀼𑀦 𑀪𑀕𑀯𑀸𑀧𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀼𑀝𑁆𑀞𑁄 𑀢𑀫𑁂𑀯 𑀕𑀸𑀣𑀁 𑀪𑀸𑀲𑀢𑀺. 𑀆𑀦𑀦𑁆𑀤𑁄𑀧𑀺 𑀲𑀗𑁆𑀕𑀻𑀢𑀺𑀬𑀦𑁆𑀢𑀺 𑀏𑀯𑀁 𑀏𑀓𑁂𑀓𑀸 𑀕𑀸𑀣𑀸 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀅𑀪𑀺𑀲𑀫𑁆𑀩𑀼𑀤𑁆𑀥𑀝𑁆𑀞𑀸𑀦𑁂, 𑀫𑀜𑁆𑀚𑀽𑀲𑀓𑀫𑀸𑀴𑁂, 𑀆𑀦𑀦𑁆𑀤𑁂𑀦 𑀧𑀼𑀘𑁆𑀙𑀺𑀢𑀓𑀸𑀮𑁂, 𑀲𑀗𑁆𑀕𑀻𑀢𑀺𑀬𑀦𑁆𑀢𑀺 𑀘𑀢𑀼𑀓𑁆𑀔𑀢𑁆𑀢𑀼𑀁 𑀪𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀧𑀞𑀫𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁨. 𑀲𑀁𑀲𑀕𑁆𑀕𑀚𑀸𑀢𑀲𑁆𑀲𑀸𑀢𑀺 𑀕𑀸𑀣𑀸 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀞𑀫𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀮𑀓𑁆𑀔𑀡𑀲𑀫𑁆𑀫𑀲𑀦𑀁 𑀓𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀅𑀦𑀥𑀺𑀕𑀫𑁆𑀫 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀟𑁆𑀠𑀫𑀸𑀦𑁄 𑀬𑀢𑁄 𑀧𑀪𑀼𑀢𑀺 ‘‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀯𑀺𑀲𑁂𑀲𑀁 𑀅𑀜𑁆𑀜𑀸𑀲𑀺. 𑀢𑀤𑀼𑀧𑀸𑀤𑀸𑀬 𑀇𑀢𑁆𑀣𑀻𑀦𑀁 𑀳𑀢𑁆𑀣𑁂 𑀦 𑀭𑀫𑀢𑀺, 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑀫𑀡𑁆𑀟𑀦𑀸𑀤𑀺𑀫𑀢𑁆𑀢𑀫𑁆𑀧𑀺 𑀦 𑀲𑀸𑀤𑀺𑀬𑀢𑀺. 𑀢𑀁 𑀧𑀼𑀭𑀺𑀲𑀸 𑀏𑀯 𑀧𑁄𑀲𑁂𑀦𑁆𑀢𑀺. 𑀣𑀜𑁆𑀜𑀧𑀸𑀬𑀦𑀓𑀸𑀮𑁂 𑀥𑀸𑀢𑀺𑀬𑁄 𑀓𑀜𑁆𑀘𑀼𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀭𑀺𑀲𑀯𑁂𑀲𑁂𑀦 𑀣𑀜𑁆𑀜𑀁 𑀧𑀸𑀬𑁂𑀦𑁆𑀢𑀺. 𑀲𑁄 𑀇𑀢𑁆𑀣𑀻𑀦𑀁 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀭𑁄𑀤𑀢𑀺, 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄𑀧𑀺 𑀇𑀢𑁆𑀣𑀺𑀬𑁄 𑀧𑀲𑁆𑀲𑀺𑀢𑀼𑀁 𑀦 𑀇𑀘𑁆𑀙𑀢𑀺. 𑀢𑁂𑀦 𑀢𑀁 𑀅𑀦𑀺𑀢𑁆𑀣𑀺𑀕𑀦𑁆𑀥𑁄𑀢𑁆𑀯𑁂𑀯 𑀲𑀜𑁆𑀚𑀸𑀦𑀺𑀁𑀲𑀼.

𑀢𑀲𑁆𑀫𑀺𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁂 𑀚𑀸𑀢𑁂 𑀭𑀸𑀚𑀸 ‘‘𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀦𑀸𑀦𑀸𑀓𑀼𑀮𑁂𑀳𑀺 𑀢𑀲𑁆𑀲 𑀅𑀦𑀼𑀭𑀽𑀧𑀸 𑀓𑀜𑁆𑀜𑀸𑀬𑁄 𑀆𑀦𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 ‘‘𑀓𑀼𑀫𑀸𑀭𑀁 𑀭𑀫𑀸𑀧𑁂𑀳𑀻’’𑀢𑀺. 𑀅𑀫𑀘𑁆𑀘𑁄 𑀉𑀧𑀸𑀬𑁂𑀦 𑀢𑀁 𑀭𑀫𑀸𑀧𑁂𑀢𑀼𑀓𑀸𑀫𑁄 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀧𑀬𑁄𑀚𑀸𑀧𑁂𑀲𑀺. 𑀓𑀼𑀫𑀸𑀭𑁄 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀲𑁆𑀲𑁂𑀲𑁄 𑀲𑀤𑁆𑀤𑁄’’𑀢𑀺 𑀆𑀳. 𑀅𑀫𑀘𑁆𑀘𑁄 ‘‘𑀢𑀯𑁂𑀲𑁄, 𑀤𑁂𑀯, 𑀦𑀸𑀝𑀓𑀺𑀢𑁆𑀣𑀻𑀦𑀁 𑀲𑀤𑁆𑀤𑁄, 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀈𑀤𑀺𑀲𑀸𑀦𑀺 𑀦𑀸𑀝𑀓𑀸𑀦𑀺 𑀳𑁄𑀦𑁆𑀢𑀺. 𑀅𑀪𑀺𑀭𑀫, 𑀤𑁂𑀯, 𑀫𑀳𑀸𑀧𑀼𑀜𑁆𑀜𑁄𑀲𑀺 𑀢𑁆𑀯’’𑀦𑁆𑀢𑀺 𑀆𑀳. 𑀓𑀼𑀫𑀸𑀭𑁄 𑀅𑀫𑀘𑁆𑀘𑀁 𑀤𑀡𑁆𑀟𑁂𑀦 𑀢𑀸𑀴𑀸𑀧𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺. 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀓𑀼𑀫𑀸𑀭𑀲𑁆𑀲 𑀫𑀸𑀢𑀭𑀸 𑀲𑀳 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀔𑀫𑀸𑀧𑁂𑀢𑁆𑀯𑀸 𑀧𑀼𑀦 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺. 𑀓𑀼𑀫𑀸𑀭𑁄 𑀢𑁂𑀳𑀺 𑀅𑀢𑀺𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀲𑁂𑀝𑁆𑀞𑀲𑀼𑀯𑀡𑁆𑀡𑀁 𑀤𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑁂 𑀆𑀡𑀸𑀧𑁂𑀲𑀺 ‘‘𑀲𑀼𑀦𑁆𑀤𑀭𑀁 𑀇𑀢𑁆𑀣𑀺𑀭𑀽𑀧𑀁 𑀓𑀭𑁄𑀣𑀸’’𑀢𑀺. 𑀢𑁂 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀇𑀢𑁆𑀣𑀺𑀭𑀽𑀧𑀁 𑀓𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀓𑀼𑀫𑀸𑀭𑁄 𑀤𑀺𑀲𑁆𑀯𑀸 𑀯𑀺𑀫𑁆𑀳𑀬𑁂𑀦 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑁂𑀲𑁂𑀲𑀺 𑁋 ‘‘𑀬𑀤𑀺 𑀈𑀤𑀺𑀲𑀺𑀁 𑀇𑀢𑁆𑀣𑀺𑀁 𑀮𑀪𑀺𑀲𑁆𑀲𑀸𑀫𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀫𑀳𑀸𑀧𑀼𑀜𑁆𑀜𑁄, 𑀅𑀯𑀲𑁆𑀲𑀁 𑀢𑁂𑀦 𑀲𑀳 𑀓𑀢𑀧𑀼𑀜𑁆𑀜𑀸 𑀓𑀸𑀘𑀺 𑀤𑀸𑀭𑀺𑀓𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀲𑀼𑀯𑀡𑁆𑀡𑀭𑀽𑀧𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀅𑀧𑁆𑀧𑁂𑀲𑀼𑀁 𑁋 ‘‘𑀕𑀘𑁆𑀙𑀣, 𑀈𑀤𑀺𑀲𑀺𑀁 𑀤𑀸𑀭𑀺𑀓𑀁 𑀕𑀯𑁂𑀲𑀣𑀸’’𑀢𑀺. 𑀢𑁂 𑀢𑀁 𑀕𑀳𑁂𑀢𑁆𑀯𑀸 𑀲𑁄𑀴𑀲𑀫𑀳𑀸𑀚𑀦𑀧𑀤𑁂 𑀯𑀺𑀘𑀭𑀦𑁆𑀢𑀸 𑀢𑀁 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀸𑀤𑀻𑀲𑀼 𑀬𑀢𑁆𑀣 𑀬𑀢𑁆𑀣 𑀚𑀦𑀲𑀫𑀽𑀳𑀁 𑀧𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑁂𑀯𑀢𑀁 𑀯𑀺𑀬 𑀲𑀼𑀯𑀡𑁆𑀡𑀭𑀽𑀧𑀁 𑀞𑀧𑁂𑀢𑁆𑀯𑀸 𑀦𑀸𑀦𑀸𑀧𑀼𑀧𑁆𑀨𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀺 ‘‘𑀬𑀤𑀺 𑀓𑁂𑀦𑀘𑀺 𑀏𑀯𑀭𑀽𑀧𑀸 𑀤𑀺𑀝𑁆𑀞𑀧𑀼𑀩𑁆𑀩𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺? 𑀏𑀢𑁂𑀦𑀼𑀧𑀸𑀬𑁂𑀦 𑀅𑀜𑁆𑀜𑀢𑁆𑀭 𑀫𑀤𑁆𑀤𑀭𑀝𑁆𑀞𑀸 𑀲𑀩𑁆𑀩𑀚𑀦𑀧𑀤𑁂 𑀆𑀳𑀺𑀡𑁆𑀟𑀺𑀢𑁆𑀯𑀸 𑀢𑀁 ‘‘𑀔𑀼𑀤𑁆𑀤𑀓𑀭𑀝𑁆𑀞’’𑀦𑁆𑀢𑀺 𑀅𑀯𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀧𑀞𑀫𑀁 𑀅𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼.

𑀢𑀢𑁄 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀤𑁆𑀤𑀭𑀝𑁆𑀞𑀫𑁆𑀧𑀺 𑀢𑀸𑀯 𑀕𑀘𑁆𑀙𑀸𑀫, 𑀫𑀸 𑀦𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀝𑁆𑀞𑁂𑀧𑀺 𑀭𑀸𑀚𑀸 𑀧𑀼𑀦 𑀧𑁂𑀲𑁂𑀲𑀻’’𑀢𑀺 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀅𑀕𑀫𑀁𑀲𑀼. 𑀲𑀸𑀕𑀮𑀦𑀕𑀭𑁂 𑀘 𑀫𑀤𑁆𑀤𑀯𑁄 𑀦𑀸𑀫 𑀭𑀸𑀚𑀸. 𑀢𑀲𑁆𑀲 𑀥𑀻𑀢𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺. 𑀢𑀲𑁆𑀲𑀸 𑀯𑀡𑁆𑀡𑀤𑀸𑀲𑀺𑀬𑁄 𑀦𑁆𑀳𑀸𑀦𑁄𑀤𑀓𑀢𑁆𑀣𑀸𑀬 𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀅𑀫𑀘𑁆𑀘𑁂𑀳𑀺 𑀞𑀧𑀺𑀢𑀁 𑀢𑀁 𑀲𑀼𑀯𑀡𑁆𑀡𑀭𑀽𑀧𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀅𑀫𑁆𑀳𑁂 𑀉𑀤𑀓𑀢𑁆𑀣𑀸𑀬 𑀧𑁂𑀲𑁂𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀻 𑀲𑀬𑀫𑁂𑀯 𑀆𑀕𑀢𑀸’’𑀢𑀺 𑀪𑀡𑀦𑁆𑀢𑀺𑀬𑁄 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀦𑀸𑀬𑀁 𑀲𑀸𑀫𑀺𑀦𑀻, 𑀅𑀫𑁆𑀳𑀸𑀓𑀁 𑀲𑀸𑀫𑀺𑀦𑀻 𑀇𑀢𑁄 𑀅𑀪𑀺𑀭𑀽𑀧𑀢𑀭𑀸’’𑀢𑀺 𑀆𑀳𑀁𑀲𑀼. 𑀅𑀫𑀘𑁆𑀘𑀸 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑀼𑀭𑀽𑀧𑁂𑀦 𑀦𑀬𑁂𑀦 𑀤𑀸𑀭𑀺𑀓𑀁 𑀬𑀸𑀘𑀺𑀁𑀲𑀼. 𑀲𑁄𑀧𑀺 𑀅𑀤𑀸𑀲𑀺. 𑀢𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀸𑀳𑁂𑀲𑀼𑀁 𑁋 ‘‘𑀮𑀤𑁆𑀥𑀸, 𑀤𑁂𑀯, 𑀓𑀼𑀫𑀸𑀭𑀺𑀓𑀸, 𑀲𑀸𑀫𑀁 𑀆𑀕𑀘𑁆𑀙𑀣, 𑀉𑀤𑀸𑀳𑀼 𑀅𑀫𑁆𑀳𑁂𑀯 𑀆𑀦𑁂𑀫𑀸’’𑀢𑀺. 𑀲𑁄 ‘‘𑀫𑀬𑀺 𑀆𑀕𑀘𑁆𑀙𑀦𑁆𑀢𑁂 𑀚𑀦𑀧𑀤𑀧𑀻𑀴𑀸 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂𑀯 𑀦𑀁 𑀆𑀦𑁂𑀣𑀸’’𑀢𑀺 𑀧𑁂𑀲𑁂𑀲𑀺.

𑀅𑀫𑀘𑁆𑀘𑀸𑀧𑀺 𑀤𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀧𑀸𑀳𑁂𑀲𑀼𑀁 𑁋 ‘‘𑀮𑀤𑁆𑀥𑀸 𑀲𑀼𑀯𑀡𑁆𑀡𑀭𑀽𑀧𑀲𑀤𑀺𑀲𑀸 𑀓𑀼𑀫𑀸𑀭𑀺𑀓𑀸’’𑀢𑀺. 𑀓𑀼𑀫𑀸𑀭𑁄 𑀲𑀼𑀢𑁆𑀯𑀸𑀯 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀞𑀫𑀚𑁆𑀛𑀸𑀦𑀸 𑀧𑀭𑀺𑀳𑀸𑀬𑀺. 𑀲𑁄 𑀤𑀽𑀢𑀧𑀭𑀫𑁆𑀧𑀭𑀸𑀬 𑀧𑁂𑀲𑁂𑀲𑀺 𑁋 ‘‘𑀲𑀻𑀖𑀁 𑀆𑀦𑁂𑀣, 𑀲𑀻𑀖𑀁 𑀆𑀦𑁂𑀣𑀸’’𑀢𑀺. 𑀢𑁂 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀩𑀳𑀺𑀦𑀕𑀭𑁂 𑀞𑀺𑀢𑀸 𑀭𑀜𑁆𑀜𑁄 𑀧𑁂𑀲𑁂𑀲𑀼𑀁 𑁋 ‘‘𑀅𑀚𑁆𑀚𑁂𑀯 𑀧𑀯𑀺𑀲𑀺𑀢𑀩𑁆𑀩𑀁, 𑀦𑁄’’𑀢𑀺. 𑀭𑀸𑀚𑀸 ‘‘𑀲𑁂𑀝𑁆𑀞𑀓𑀼𑀮𑀸 𑀆𑀦𑀻𑀢𑀸 𑀤𑀸𑀭𑀺𑀓𑀸, 𑀫𑀗𑁆𑀕𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑁂𑀦 𑀧𑀯𑁂𑀲𑁂𑀲𑁆𑀲𑀸𑀫, 𑀉𑀬𑁆𑀬𑀸𑀦𑀁 𑀢𑀸𑀯 𑀦𑀁 𑀦𑁂𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀅𑀓𑀁𑀲𑀼. 𑀲𑀸 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑀸 𑀓𑀼𑀫𑀸𑀭𑀺𑀓𑀸 𑀬𑀸𑀦𑀼𑀕𑁆𑀖𑀸𑀝𑁂𑀦 𑀉𑀩𑁆𑀩𑀸𑀴𑁆𑀳𑀸 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑁂𑀦 𑀉𑀧𑁆𑀧𑀦𑁆𑀦𑀯𑀸𑀢𑀭𑁄𑀕𑀸 𑀫𑀺𑀮𑀸𑀢𑀫𑀸𑀮𑀸 𑀯𑀺𑀬 𑀳𑀼𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀓𑀸𑀮𑀫𑀓𑀸𑀲𑀺. 𑀅𑀫𑀘𑁆𑀘𑀸 ‘‘𑀲𑀓𑁆𑀓𑀸𑀭𑀸 𑀧𑀭𑀺𑀪𑀝𑁆𑀞𑀫𑁆𑀳𑀸’’𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. 𑀭𑀸𑀚𑀸 𑀘 𑀦𑀸𑀕𑀭𑀸 𑀘 ‘‘𑀓𑀼𑀮𑀯𑀁𑀲𑁄 𑀯𑀺𑀦𑀝𑁆𑀞𑁄’’𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. 𑀲𑀓𑀮𑀦𑀕𑀭𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀓𑀼𑀫𑀸𑀭𑀲𑁆𑀲 𑀲𑀼𑀢𑀫𑀢𑁆𑀢𑁂𑀬𑁂𑀯 𑀫𑀳𑀸𑀲𑁄𑀓𑁄 𑀉𑀤𑀧𑀸𑀤𑀺.

𑀢𑀢𑁄 𑀓𑀼𑀫𑀸𑀭𑁄 𑀲𑁄𑀓𑀲𑁆𑀲 𑀫𑀽𑀮𑀁 𑀔𑀦𑀺𑀢𑀼𑀁 𑀆𑀭𑀤𑁆𑀥𑁄. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑁄𑀓𑁄 𑀦𑀸𑀫 𑀦 𑀅𑀚𑀸𑀢𑀲𑁆𑀲 𑀳𑁄𑀢𑀺, 𑀚𑀸𑀢𑀲𑁆𑀲 𑀧𑀦 𑀳𑁄𑀢𑀺. 𑀢𑀲𑁆𑀫𑀸 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀲𑁄𑀓𑁄. 𑀚𑀸𑀢𑀺 𑀧𑀦 𑀓𑀺𑀁 𑀧𑀝𑀺𑀘𑁆𑀘𑀸𑀢𑀺? 𑀪𑀯𑀁 𑀧𑀝𑀺𑀘𑁆𑀘 𑀚𑀸𑀢𑀻’’𑀢𑀺. 𑀏𑀯𑀁 𑀧𑀼𑀩𑁆𑀩𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑀺𑀲𑁆𑀯𑀸 𑀧𑀼𑀦 𑀅𑀦𑀼𑀮𑁄𑀫𑀜𑁆𑀘 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀅𑀫𑀘𑁆𑀘𑀸 𑀢𑀁 𑀫𑀕𑁆𑀕𑀨𑀮𑀲𑀼𑀔𑁂𑀦 𑀲𑀼𑀔𑀺𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀢𑀫𑀸𑀦𑀲𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀡𑀺𑀧𑀸𑀢𑀁 𑀓𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀫𑀸 𑀲𑁄𑀘𑀺, 𑀤𑁂𑀯, 𑀫𑀳𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑁄, 𑀅𑀜𑁆𑀜𑀁 𑀢𑀢𑁄 𑀲𑀼𑀦𑁆𑀤𑀭𑀢𑀭𑀁 𑀓𑀜𑁆𑀜𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺. 𑀲𑁄 𑀆𑀳 𑁋 ‘‘𑀦 𑀲𑁄𑀘𑀸𑀫𑀺, 𑀦𑀺𑀲𑁆𑀲𑁄𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀳’’𑀦𑁆𑀢𑀺. 𑀇𑀢𑁄 𑀧𑀭𑀁 𑀲𑀩𑁆𑀩𑀁 𑀯𑀼𑀢𑁆𑀢𑀧𑀼𑀭𑀺𑀫𑀕𑀸𑀣𑀸𑀲𑀤𑀺𑀲𑀫𑁂𑀯 𑀞𑀧𑁂𑀢𑁆𑀯𑀸 𑀕𑀸𑀣𑀸𑀯𑀡𑁆𑀡𑀦𑀁.

𑀕𑀸𑀣𑀸𑀯𑀡𑁆𑀡𑀦𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀁𑀲𑀕𑁆𑀕𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀲𑀁𑀲𑀕𑁆𑀕𑀲𑁆𑀲. 𑀢𑀢𑁆𑀣 𑀤𑀲𑁆𑀲𑀦𑀲𑀯𑀦𑀓𑀸𑀬𑀲𑀫𑀼𑀮𑁆𑀮𑀧𑀦𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀲𑀁𑀲𑀕𑁆𑀕𑁄. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀤𑀺𑀲𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀣 𑀲𑀻𑀳𑀴𑀤𑀻𑀧𑁂 𑀓𑀸𑀴𑀤𑀻𑀖𑀯𑀸𑀧𑀻 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀓𑀮𑁆𑀬𑀸𑀡𑀯𑀺𑀳𑀸𑀭𑀯𑀸𑀲𑀺𑀤𑀻𑀖𑀪𑀸𑀡𑀓𑀤𑀳𑀭𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑀁 𑀅𑀮𑀪𑀺𑀢𑁆𑀯𑀸 𑀓𑀸𑀮𑀗𑁆𑀓𑀢𑀸 𑀓𑀼𑀝𑀼𑀫𑁆𑀩𑀺𑀬𑀥𑀻𑀢𑀸 𑀘 𑀢𑀲𑁆𑀲𑀸 𑀦𑀺𑀯𑀸𑀲𑀦𑀘𑁄𑀴𑀔𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀁 𑀯𑀢𑁆𑀣𑀁 𑀥𑀸𑀭𑀺𑀦𑀺𑀬𑀸 𑀦𑀸𑀫 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦𑀸𑀮𑀪𑀺’’𑀦𑁆𑀢𑀺 𑀨𑀮𑀺𑀢𑀳𑀤𑀬𑁄 𑀓𑀸𑀮𑀗𑁆𑀓𑀢𑁄. 𑀲𑁄 𑀏𑀯 𑀤𑀳𑀭𑁄 𑀘 𑀦𑀺𑀤𑀲𑁆𑀲𑀦𑀁.

𑀧𑀭𑁂𑀳𑀺 𑀧𑀦 𑀓𑀣𑀺𑀬𑀫𑀸𑀦𑀁 𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀯𑀸 𑀳𑀲𑀺𑀢𑀮𑀧𑀺𑀢𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀭𑀸𑀧𑀺 𑀕𑀺𑀭𑀺𑀕𑀸𑀫𑀯𑀸𑀲𑀺𑀓𑀫𑁆𑀫𑀸𑀭𑀥𑀻𑀢𑀸𑀬 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀧𑀤𑀼𑀫𑀲𑁆𑀲𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀫𑀸𑀮𑀁 𑀆𑀭𑁄𑀧𑁂𑀢𑁆𑀯𑀸 𑀉𑀘𑁆𑀘𑀸𑀲𑀤𑁆𑀤𑁂𑀦 𑀕𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀓𑀸𑀫𑀭𑀸𑀕𑁂𑀦 𑀯𑀺𑀲𑁂𑀲𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀩𑁆𑀬𑀲𑀦𑀁 𑀧𑀢𑁆𑀢𑁄 𑀧𑀜𑁆𑀘𑀕𑁆𑀕𑀴𑀮𑁂𑀡𑀯𑀸𑀲𑀻 𑀢𑀺𑀲𑁆𑀲𑀤𑀳𑀭𑁄 𑀦𑀺𑀤𑀲𑁆𑀲𑀦𑀁.

𑀅𑀜𑁆𑀜𑀫𑀜𑁆𑀜𑀁 𑀅𑀗𑁆𑀕𑀧𑀭𑀸𑀫𑀲𑀦𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫. 𑀥𑀫𑁆𑀫𑀪𑀸𑀲𑀦𑀤𑀳𑀭𑀪𑀺𑀓𑁆𑀔𑀼 𑀘 𑀭𑀸𑀚𑀥𑀻𑀢𑀸 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀫𑀳𑀸𑀯𑀺𑀳𑀸𑀭𑁂 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀥𑀫𑁆𑀫𑀁 𑀪𑀸𑀲𑀢𑀺. 𑀢𑀢𑁆𑀣 𑀫𑀳𑀸𑀚𑀦𑁄 𑀆𑀕𑀢𑁄, 𑀭𑀸𑀚𑀸𑀧𑀺 𑀅𑀕𑁆𑀕𑀫𑀳𑁂𑀲𑀺𑀬𑀸 𑀭𑀸𑀚𑀥𑀻𑀢𑀸𑀬 𑀘 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀢𑀢𑁄 𑀭𑀸𑀚𑀥𑀻𑀢𑀸𑀬 𑀢𑀲𑁆𑀲 𑀭𑀽𑀧𑀜𑁆𑀘 𑀲𑀭𑀜𑁆𑀘 𑀆𑀕𑀫𑁆𑀫 𑀩𑀮𑀯𑀭𑀸𑀕𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀤𑀳𑀭𑀲𑁆𑀲𑀸𑀧𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀭𑀸𑀫𑀲𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀁𑀲𑀼. 𑀧𑀼𑀦 𑀲𑀸𑀡𑀺𑀧𑀸𑀓𑀸𑀭𑀁 𑀅𑀧𑀦𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑀸 𑀤𑁆𑀯𑁂𑀧𑀺 𑀓𑀸𑀮𑀗𑁆𑀓𑀢𑁂𑀬𑁂𑀯 𑀅𑀤𑁆𑀤𑀲𑀁𑀲𑀽𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀆𑀮𑀧𑀦𑀲𑀫𑀼𑀮𑁆𑀮𑀧𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀧𑀦 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀓𑀭𑀡𑁂 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀤𑁆𑀯𑀻𑀲𑀼𑀧𑀺 𑀏𑀢𑁂𑀲𑀼 𑀧𑀸𑀭𑀸𑀚𑀺𑀓𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀻 𑀘 𑀦𑀺𑀤𑀲𑁆𑀲𑀦𑀁. 𑀫𑀭𑀺𑀘𑀯𑀝𑁆𑀝𑀺𑀦𑀸𑀫𑀫𑀳𑀸𑀯𑀺𑀳𑀸𑀭𑀫𑀳𑁂 𑀓𑀺𑀭 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀭𑀸𑀚𑀸 𑀫𑀳𑀸𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀉𑀪𑀢𑁄𑀲𑀗𑁆𑀖𑀁 𑀧𑀭𑀺𑀯𑀺𑀲𑀢𑀺. 𑀢𑀢𑁆𑀣 𑀉𑀡𑁆𑀳𑀬𑀸𑀕𑀼𑀬𑀸 𑀤𑀺𑀦𑁆𑀦𑀸𑀬 𑀲𑀗𑁆𑀖𑀦𑀯𑀓𑀲𑀸𑀫𑀡𑁂𑀭𑀻 𑀅𑀦𑀸𑀥𑀸𑀭𑀓𑀲𑁆𑀲 𑀲𑀗𑁆𑀖𑀦𑀯𑀓𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀤𑀦𑁆𑀢𑀯𑀮𑀬𑀁 𑀤𑀢𑁆𑀯𑀸 𑀲𑀫𑀼𑀮𑁆𑀮𑀧𑀦𑀫𑀓𑀸𑀲𑀺. 𑀢𑁂 𑀉𑀪𑁄𑀧𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀸 𑀳𑀼𑀢𑁆𑀯𑀸 𑀧𑀭𑀢𑀻𑀭𑀁 𑀕𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀼𑀮𑁆𑀮𑀧𑀦𑁂𑀦 𑀧𑀼𑀩𑁆𑀩𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀸𑀯𑀤𑁂𑀯 𑀲𑀜𑁆𑀚𑀸𑀢𑀲𑀺𑀦𑁂𑀳𑀸 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀸 𑀅𑀳𑁂𑀲𑀼𑀦𑁆𑀢𑀺. 𑀏𑀯𑀁 𑀧𑀜𑁆𑀘𑀯𑀺𑀥𑁂 𑀲𑀁𑀲𑀕𑁆𑀕𑁂 𑀬𑁂𑀦 𑀓𑁂𑀦𑀘𑀺 𑀲𑀁𑀲𑀕𑁆𑀕𑁂𑀦 𑀚𑀸𑀢𑀲𑀁𑀲𑀕𑁆𑀕𑀲𑁆𑀲 𑀪𑀯𑀢𑀺 𑀲𑁆𑀦𑁂𑀳𑁄, 𑀧𑀼𑀭𑀺𑀫𑀭𑀸𑀕𑀧𑀘𑁆𑀘𑀬𑁄 𑀩𑀮𑀯𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺 𑀢𑀫𑁂𑀯 𑀲𑁆𑀦𑁂𑀳𑀁 𑀅𑀦𑀼𑀕𑀘𑁆𑀙𑀦𑁆𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀲𑁄𑀓𑀧𑀭𑀺𑀤𑁂𑀯𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀁 𑀇𑀤𑀁 𑀤𑀼𑀓𑁆𑀔𑀁 𑀧𑀳𑁄𑀢𑀺 𑀧𑀪𑀯𑀢𑀺 𑀚𑀸𑀬𑀢𑀺.

𑀅𑀧𑀭𑁂 ‘‘𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀲𑀁𑀲𑀕𑁆𑀕𑁄’’𑀢𑀺 𑀪𑀡𑀦𑁆𑀢𑀺. 𑀢𑀢𑁄 𑀲𑁆𑀦𑁂𑀳𑁄, 𑀲𑁆𑀦𑁂𑀳𑀤𑀼𑀓𑁆𑀔𑀫𑀺𑀤𑀦𑁆𑀢𑀺. 𑀏𑀯𑀫𑀢𑁆𑀣𑀧𑁆𑀧𑀪𑁂𑀤𑀁 𑀇𑀫𑀁 𑀅𑀟𑁆𑀠𑀕𑀸𑀣𑀁 𑀯𑀢𑁆𑀯𑀸 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋 ‘‘𑀲𑁆𑀯𑀸𑀬𑀁 𑀬𑀫𑀺𑀤𑀁 𑀲𑁆𑀦𑁂𑀳𑀦𑁆𑀯𑀬𑀁 𑀲𑁄𑀓𑀸𑀤𑀺𑀤𑀼𑀓𑁆𑀔𑀁 𑀧𑀳𑁄𑀢𑀺, 𑀢𑀫𑁂𑀯 𑀲𑁆𑀦𑁂𑀳𑀁 𑀅𑀦𑀼𑀕𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮𑀁 𑀔𑀦𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑁂𑀳𑀺 𑀤𑀸𑀦𑀺, 𑀪𑀦𑁆𑀢𑁂, 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺? 𑀢𑀢𑁄 𑀲𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀯𑀸 𑀅𑀜𑁆𑀜𑀢𑀭𑁄 𑀯𑀸 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀲𑀩𑁆𑀩𑁄𑀧𑀺 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. 𑀏𑀢𑁆𑀣 𑀘 𑀬𑀁 𑀢𑀁 ‘‘𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀲𑀦𑁆𑀥𑀸𑀬 ‘‘𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀲𑀁𑀲𑀕𑁆𑀕𑁂𑀦 ‘𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀢𑀺 𑀲𑁆𑀦𑁂𑀳𑁄, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺’, 𑀏𑀯𑀁 𑀬𑀣𑀸𑀪𑀽𑀢𑀁 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄 𑀅𑀳𑀫𑀥𑀺𑀕𑀢𑁄𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁆𑀦𑁂𑀳𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀲𑀩𑁆𑀩𑀁 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀲𑀁𑀲𑀕𑁆𑀕𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁩. 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀲𑀫𑀡𑀥𑀫𑁆𑀫𑁄 𑀯𑀭𑁄, 𑀭𑀚𑁆𑀚𑀁 𑀯𑀭’’𑀦𑁆𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀅𑀫𑀘𑁆𑀘𑀸 ‘‘𑀥𑀫𑁆𑀫𑁂𑀦 𑀲𑀫𑁂𑀦 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀸𑀧𑀺 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀥𑀫𑁆𑀫𑁂𑀦 𑀓𑀭𑁄𑀦𑁆𑀢𑀺. 𑀢𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑁂 𑀧𑀭𑀸𑀚𑀬𑀦𑁆𑀢𑀸 𑀏𑀓𑀤𑀸 𑀅𑀜𑁆𑀜𑀢𑀭𑀁 𑀭𑀸𑀚𑀯𑀮𑁆𑀮𑀪𑀁 𑀧𑀭𑀸𑀚𑁂𑀲𑀼𑀁. 𑀲𑁄 𑀭𑀜𑁆𑀜𑁄 𑀪𑀢𑁆𑀢𑀓𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀬𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁄 𑀫𑀳𑀸𑀚𑀦𑀸 𑁋 ‘‘𑀅𑀫𑀘𑁆𑀘𑀸, 𑀤𑁂𑀯, 𑀲𑀸𑀫𑀺𑀓𑁂 𑀅𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑀻’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀸 𑀫𑀳𑀸𑀬𑀼𑀤𑁆𑀥𑀁 𑀯𑀺𑀬 𑀅𑀓𑀁𑀲𑀼. 𑀅𑀣 𑀭𑀸𑀚𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸 𑀯𑀼𑀝𑁆𑀞𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑀼𑀁 𑀦𑀺𑀲𑀺𑀦𑁆𑀦𑁄. 𑀢𑁂𑀦 𑀲𑀤𑁆𑀤𑁂𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀅𑀧𑁆𑀧𑁂𑀢𑀼𑀁. 𑀲𑁄 ‘‘𑀓𑀺𑀁 𑀫𑁂 𑀭𑀚𑁆𑀚𑁂𑀦, 𑀲𑀫𑀡𑀥𑀫𑁆𑀫𑁄 𑀯𑀭’’𑀦𑁆𑀢𑀺 𑀭𑀚𑁆𑀚𑀲𑀼𑀔𑀁 𑀧𑀳𑀸𑀬 𑀧𑀼𑀦 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀧𑀼𑀘𑁆𑀙𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀫𑀺𑀢𑁆𑀢𑀸. 𑀲𑀼𑀳𑀤𑀬𑀪𑀸𑀯𑁂𑀦 𑀲𑀼𑀳𑀚𑁆𑀚𑀸. 𑀓𑁂𑀘𑀺 𑀏𑀓𑀦𑁆𑀢𑀳𑀺𑀢𑀓𑀸𑀫𑀢𑀸𑀬 𑀫𑀺𑀢𑁆𑀢𑀸𑀯 𑀳𑁄𑀦𑁆𑀢𑀺 𑀦 𑀲𑀼𑀳𑀚𑁆𑀚𑀸. 𑀓𑁂𑀘𑀺 𑀕𑀫𑀦𑀸𑀕𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀲𑀫𑀼𑀮𑁆𑀮𑀸𑀧𑀸𑀤𑀻𑀲𑀼, 𑀳𑀤𑀬𑀲𑀼𑀔𑀚𑀦𑀦𑁂𑀦 𑀲𑀼𑀳𑀚𑁆𑀚𑀸𑀯 𑀳𑁄𑀦𑁆𑀢𑀺, 𑀦 𑀫𑀺𑀢𑁆𑀢𑀸. 𑀓𑁂𑀘𑀺 𑀢𑀤𑀼𑀪𑀬𑀯𑀲𑁂𑀦 𑀲𑀼𑀳𑀚𑁆𑀚𑀸 𑀘𑁂𑀯 𑀫𑀺𑀢𑁆𑀢𑀸 𑀘 𑀳𑁄𑀦𑁆𑀢𑀺. 𑀢𑁂 𑀤𑀼𑀯𑀺𑀥𑀸 𑀅𑀕𑀸𑀭𑀺𑀬𑀸 𑀘 𑀅𑀦𑀕𑀸𑀭𑀺𑀬𑀸 𑀘. 𑀢𑀢𑁆𑀣 𑀅𑀕𑀸𑀭𑀺𑀬𑀸 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀉𑀧𑀓𑀸𑀭𑁄 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀅𑀦𑀼𑀓𑀫𑁆𑀧𑀓𑁄𑀢𑀺. 𑀅𑀦𑀕𑀸𑀭𑀺𑀬𑀸 𑀯𑀺𑀲𑁂𑀲𑁂𑀦 𑀅𑀢𑁆𑀣𑀓𑁆𑀔𑀸𑀬𑀺𑀦𑁄 𑀏𑀯. 𑀢𑁂 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀫𑀢𑁆𑀢𑀁 𑀭𑀓𑁆𑀔𑀢𑀺, 𑀧𑀫𑀢𑁆𑀢𑀲𑁆𑀲 𑀲𑀸𑀧𑀢𑁂𑀬𑁆𑀬𑀁 𑀭𑀓𑁆𑀔𑀢𑀺, 𑀪𑀻𑀢𑀲𑁆𑀲 𑀲𑀭𑀡𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀢𑀤𑁆𑀤𑀺𑀕𑀼𑀡𑀁 𑀪𑁄𑀕𑀁 𑀅𑀦𑀼𑀧𑁆𑀧𑀤𑁂𑀢𑀺’’ (𑀤𑀻. 𑀦𑀺. 𑁩.𑁨𑁬𑁧).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀺, 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀺, 𑀚𑀻𑀯𑀺𑀢𑀁𑀧𑀺𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺’’ (𑀤𑀻. 𑀦𑀺. 𑁩.𑁨𑁬𑁨).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀦𑀼𑀓𑀫𑁆𑀧𑀓𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀯𑁂𑀦𑀲𑁆𑀲 𑀦 𑀦𑀦𑁆𑀤𑀢𑀺, 𑀪𑀯𑁂𑀦𑀲𑁆𑀲 𑀦𑀦𑁆𑀤𑀢𑀺, 𑀅𑀯𑀡𑁆𑀡𑀁 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀯𑀡𑁆𑀡𑀁 𑀪𑀡𑀫𑀸𑀦𑀁 𑀧𑀲𑀁𑀲𑀢𑀺’’ (𑀤𑀻. 𑀦𑀺. 𑁩.𑁨𑁬𑁪).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀢𑁆𑀣𑀓𑁆𑀔𑀸𑀬𑀻 𑀫𑀺𑀢𑁆𑀢𑀸 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀧𑀸 𑀦𑀺𑀯𑀸𑀭𑁂𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀢𑀺, 𑀅𑀲𑁆𑀲𑀼𑀢𑀁 𑀲𑀸𑀯𑁂𑀢𑀺, 𑀲𑀕𑁆𑀕𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁩).

𑀢𑁂𑀲𑁆𑀯𑀺𑀥 𑀅𑀕𑀸𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸, 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀬𑀼𑀚𑁆𑀚𑀦𑁆𑀢𑀺. 𑀢𑁂 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀅𑀦𑀼𑀤𑀬𑀫𑀸𑀦𑁄, 𑀢𑁂𑀲𑀁 𑀲𑀼𑀔𑀁 𑀉𑀧𑀲𑀁𑀳𑀭𑀺𑀢𑀼𑀓𑀸𑀫𑁄 𑀤𑀼𑀓𑁆𑀔𑀁 𑀅𑀧𑀳𑀭𑀺𑀢𑀼𑀓𑀸𑀫𑁄 𑀘.

𑀳𑀸𑀧𑁂𑀢𑀺 𑀅𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀯𑀲𑁂𑀦 𑀢𑀺𑀯𑀺𑀥𑀁, 𑀢𑀣𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀉𑀪𑀬𑀢𑁆𑀣𑀯𑀲𑁂𑀦𑀸𑀧𑀺 𑀢𑀺𑀯𑀺𑀥𑀁 𑀅𑀢𑁆𑀣𑀁 𑀮𑀤𑁆𑀥𑀯𑀺𑀦𑀸𑀲𑀦𑁂𑀦 𑀅𑀮𑀤𑁆𑀥𑀸𑀦𑀼𑀧𑁆𑀧𑀸𑀤𑀦𑁂𑀦𑀸𑀢𑀺 𑀤𑁆𑀯𑀺𑀥𑀸𑀧𑀺 𑀳𑀸𑀧𑁂𑀢𑀺 𑀯𑀺𑀦𑀸𑀲𑁂𑀢𑀺. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 ‘‘𑀅𑀳𑀁 𑀇𑀫𑀁 𑀯𑀺𑀦𑀸 𑀦 𑀚𑀻𑀯𑀸𑀫𑀺, 𑀏𑀲 𑀫𑁂 𑀕𑀢𑀺, 𑀏𑀲 𑀫𑁂 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄𑀧𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. ‘‘𑀇𑀫𑁂 𑀫𑀁 𑀯𑀺𑀦𑀸 𑀦 𑀚𑀻𑀯𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀕𑀢𑀺, 𑀅𑀳𑀁 𑀢𑁂𑀲𑀁 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄𑀧𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀇𑀥 𑀧𑀦 𑀏𑀯𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀢𑀁 𑀪𑀬𑀦𑁆𑀢𑀺 𑀏𑀢𑀁 𑀅𑀢𑁆𑀣𑀳𑀸𑀧𑀦𑀪𑀬𑀁, 𑀅𑀢𑁆𑀢𑀦𑁄 𑀲𑀫𑀸𑀧𑀢𑁆𑀢𑀺𑀳𑀸𑀦𑀺𑀁 𑀲𑀦𑁆𑀥𑀸𑀬𑀸𑀳. 𑀲𑀦𑁆𑀣𑀯𑁂𑀢𑀺 𑀢𑀺𑀯𑀺𑀥𑁄 𑀲𑀦𑁆𑀣𑀯𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦. 𑀢𑀢𑁆𑀣 𑀅𑀝𑁆𑀞𑀲𑀢𑀧𑀪𑁂𑀤𑀸𑀧𑀺 𑀢𑀡𑁆𑀳𑀸 𑀢𑀡𑁆𑀳𑀸𑀲𑀦𑁆𑀣𑀯𑁄, 𑀤𑁆𑀯𑀸𑀲𑀝𑁆𑀞𑀺𑀪𑁂𑀤𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀦𑁆𑀣𑀯𑁄, 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀦𑀸 𑀫𑀺𑀢𑁆𑀢𑀲𑀦𑁆𑀣𑀯𑁄. 𑀢𑁂𑀲𑀼 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀳𑀺𑀲𑁆𑀲 𑀲𑀫𑀸𑀧𑀢𑁆𑀢𑀺 𑀧𑀭𑀺𑀳𑀻𑀦𑀸. 𑀢𑁂𑀦𑀸𑀳 𑁋 ‘‘𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄 𑀅𑀳𑀁 𑀅𑀥𑀺𑀕𑀢𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀫𑀺𑀢𑁆𑀢𑀲𑀼𑀳𑀚𑁆𑀚𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁪. 𑀯𑀁𑀲𑁄 𑀯𑀺𑀲𑀸𑀮𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀢𑀬𑁄 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀩𑀸𑀭𑀸𑀡𑀲𑀺𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀢𑀭𑁂 𑀤𑁆𑀯𑁂 𑀧𑀘𑁆𑀘𑀦𑁆𑀢𑀭𑀸𑀚𑀓𑀼𑀮𑁂𑀲𑀼. 𑀢𑁂 𑀉𑀪𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀼𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀲𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀫𑀬𑀁 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀅𑀦𑀼𑀧𑁆𑀧𑀢𑁆𑀢𑀸’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀘𑀭𑀺𑀬𑀁 𑀅𑀤𑁆𑀤𑀲𑀁𑀲𑀼. 𑀢𑀢𑁄 ‘‘𑀢𑀢𑀺𑀬𑁄 𑀓𑀼𑀳𑀺’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀕𑀼𑀡𑁂 𑀲𑀭𑀺𑀢𑁆𑀯𑀸 ‘‘𑀲𑁄 𑀧𑀓𑀢𑀺𑀬𑀸𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀫𑁆𑀳𑀸𑀓𑀁𑀬𑁂𑀯 𑀑𑀯𑀸𑀤𑀓𑁄 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄 𑀧𑀸𑀧𑀕𑀭𑀳𑀻, 𑀳𑀦𑁆𑀤, 𑀦𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀆𑀭𑁄𑀘𑁂𑀫𑀸’’𑀢𑀺 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑀸 𑀢𑀁 𑀏𑀓𑀤𑀺𑀯𑀲𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀯𑁂𑀴𑀼𑀕𑀼𑀫𑁆𑀩𑀫𑀽𑀮𑁂 𑀅𑀝𑁆𑀞𑀁𑀲𑀼. 𑀫𑀳𑀸𑀚𑀦𑁄 𑀅𑀢𑀺𑀢𑁆𑀢𑁄 𑀭𑀸𑀚𑀤𑀲𑁆𑀲𑀦𑁂𑀦 𑀭𑀸𑀚𑀸𑀦𑀁 𑀉𑀮𑁆𑀮𑁄𑀓𑁂𑀢𑀺. 𑀢𑀢𑁄 𑀭𑀸𑀚𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀫𑀫 𑀤𑀲𑁆𑀲𑀦𑁂 𑀩𑁆𑀬𑀸𑀧𑀸𑀭𑀁 𑀦 𑀓𑀭𑁄𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀤𑁆𑀤𑀓𑁆𑀔𑀺. 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀘𑀲𑁆𑀲 𑀢𑁂𑀲𑀼 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀑𑀭𑀼𑀬𑁆𑀳 𑀲𑀦𑁆𑀢𑁂𑀦 𑀆𑀘𑀸𑀭𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀁 𑀦𑀸𑀫 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀫𑀬𑀁, 𑀫𑀳𑀸𑀭𑀸𑀚, 𑀅𑀲𑀚𑁆𑀚𑀫𑀸𑀦𑀸 𑀦𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀪𑀦𑁆𑀢𑁂, 𑀅𑀲𑀚𑁆𑀚𑀫𑀸𑀦𑀸𑀢𑀺 𑀏𑀢𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺? ‘‘𑀅𑀮𑀕𑁆𑀕𑀦𑀢𑁆𑀣𑁄, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀯𑁂𑀴𑀼𑀕𑀼𑀫𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀇𑀫𑀁 𑀯𑁂𑀴𑀼𑀕𑀼𑀫𑁆𑀩𑀁 𑀲𑀩𑁆𑀩𑀲𑁄 𑀫𑀽𑀮𑀔𑀦𑁆𑀥𑀲𑀸𑀔𑀸𑀦𑀼𑀲𑀸𑀔𑀸𑀳𑀺 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀁 𑀅𑀲𑀺𑀳𑀢𑁆𑀣𑁄 𑀧𑀼𑀭𑀺𑀲𑁄 𑀫𑀽𑀮𑁂 𑀙𑁂𑀢𑁆𑀯𑀸 𑀆𑀯𑀺𑀜𑁆𑀙𑀦𑁆𑀢𑁄 𑀦 𑀲𑀓𑁆𑀓𑀼𑀡𑁂𑀬𑁆𑀬 𑀉𑀤𑁆𑀥𑀭𑀺𑀢𑀼𑀁, 𑀏𑀯𑀫𑁂𑀯 𑀢𑁆𑀯𑀁 𑀅𑀦𑁆𑀢𑁄 𑀘 𑀩𑀳𑀺 𑀘 𑀚𑀝𑀸𑀬 𑀚𑀝𑀺𑀢𑁄 𑀆𑀲𑀢𑁆𑀢𑀯𑀺𑀲𑀢𑁆𑀢𑁄 𑀢𑀢𑁆𑀣 𑀯𑀺𑀮𑀕𑁆𑀕𑁄. 𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦𑀲𑁆𑀲 𑀯𑁂𑀫𑀚𑁆𑀛𑀕𑀢𑁄𑀧𑀺 𑀅𑀬𑀁 𑀯𑀁𑀲𑀓𑀴𑀻𑀭𑁄 𑀅𑀲𑀜𑁆𑀚𑀸𑀢𑀲𑀸𑀔𑀢𑁆𑀢𑀸 𑀓𑁂𑀦𑀘𑀺 𑀅𑀮𑀕𑁆𑀕𑁄𑀯 𑀞𑀺𑀢𑁄, 𑀲𑀓𑁆𑀓𑀸 𑀘 𑀧𑀦 𑀅𑀕𑁆𑀕𑁂 𑀯𑀸 𑀫𑀽𑀮𑁂 𑀯𑀸 𑀙𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑀼𑀁, 𑀏𑀯𑀫𑁂𑀯 𑀫𑀬𑀁 𑀓𑀢𑁆𑀣𑀘𑀺 𑀅𑀲𑀚𑁆𑀚𑀫𑀸𑀦𑀸 𑀲𑀩𑁆𑀩𑀸 𑀤𑀺𑀲𑀸 𑀕𑀘𑁆𑀙𑀸𑀫𑀸’’𑀢𑀺 𑀢𑀸𑀯𑀤𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀲𑁆𑀲𑀢𑁄 𑀏𑀯 𑀭𑀜𑁆𑀜𑁄 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀁 𑀅𑀲𑀚𑁆𑀚𑀫𑀸𑀦𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀢𑀢𑁆𑀣𑁂𑀯 𑀞𑀺𑀢𑁄 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀯𑀁𑀲𑁄𑀢𑀺 𑀯𑁂𑀴𑀼. 𑀯𑀺𑀲𑀸𑀮𑁄𑀢𑀺 𑀯𑀺𑀢𑁆𑀣𑀺𑀡𑁆𑀡𑁄. 𑀯-𑀓𑀸𑀭𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀏𑀯-𑀓𑀸𑀭𑁄 𑀯𑀸 𑀅𑀬𑀁, 𑀲𑀦𑁆𑀥𑀺𑀯𑀲𑁂𑀦 𑀏𑀢𑁆𑀣 𑀏-𑀓𑀸𑀭𑁄 𑀦𑀝𑁆𑀞𑀸. 𑀢𑀲𑁆𑀲 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀘𑁆𑀙𑀸 𑀬𑁄𑀚𑁂𑀲𑁆𑀲𑀸𑀫. 𑀬𑀣𑀸𑀢𑀺 𑀧𑀝𑀺𑀪𑀸𑀕𑁂. 𑀯𑀺𑀲𑀢𑁆𑀢𑁄𑀢𑀺 𑀮𑀕𑁆𑀕𑁄 𑀚𑀝𑀺𑀢𑁄 𑀲𑀁𑀲𑀺𑀩𑁆𑀩𑀺𑀢𑁄. 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘𑀸𑀢𑀺 𑀧𑀼𑀢𑁆𑀢𑀥𑀻𑀢𑀼𑀪𑀭𑀺𑀬𑀸𑀲𑀼. 𑀬𑀸 𑀅𑀧𑁂𑀓𑁆𑀔𑀸𑀢𑀺 𑀬𑀸 𑀢𑀡𑁆𑀳𑀸 𑀬𑁄 𑀲𑀺𑀦𑁂𑀳𑁄. 𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄𑀢𑀺 𑀯𑀁𑀲𑀓𑀴𑀻𑀭𑁄 𑀯𑀺𑀬 𑀅𑀮𑀕𑁆𑀕𑀫𑀸𑀦𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀯𑀁𑀲𑁄 𑀯𑀺𑀲𑀸𑀮𑁄 𑀯𑀺𑀲𑀢𑁆𑀢𑁄 𑀏𑀯 𑀳𑁄𑀢𑀺, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸, 𑀲𑀸𑀧𑀺 𑀏𑀯𑀁 𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀺𑀲𑀢𑁆𑀢𑀸 𑀏𑀯. 𑀲𑁆𑀯𑀸𑀳𑀁 𑀢𑀸𑀬 𑀅𑀧𑁂𑀓𑁆𑀔𑀸𑀬 𑀅𑀧𑁂𑀓𑁆𑀔𑀯𑀸 𑀯𑀺𑀲𑀸𑀮𑁄 𑀯𑀁𑀲𑁄 𑀯𑀺𑀬 𑀯𑀺𑀲𑀢𑁆𑀢𑁄𑀢𑀺 𑀏𑀯𑀁 𑀅𑀧𑁂𑀓𑁆𑀔𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀅𑀧𑁂𑀓𑁆𑀔𑀁 𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀦𑁆𑀢𑁄 𑀅𑀬𑀁 𑀯𑀁𑀲𑀓𑀴𑀻𑀭𑁄𑀯 𑀭𑀽𑀧𑀸𑀤𑀻𑀲𑀼 𑀯𑀸 𑀮𑀸𑀪𑀸𑀤𑀻𑀲𑀼 𑀯𑀸 𑀓𑀸𑀫𑀪𑀯𑀸𑀤𑀻𑀲𑀼 𑀯𑀸 𑀤𑀺𑀝𑁆𑀞𑀸𑀤𑀻𑀲𑀼 𑀯𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀅𑀲𑀚𑁆𑀚𑀫𑀸𑀦𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀁𑀲𑀓𑁆𑀓𑀴𑀻𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁫. 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀬𑁄𑀕𑀸𑀯𑀘𑀭𑁄 𑀓𑀸𑀮𑀁 𑀓𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂. 𑀲𑁄 𑀲𑀼𑀪𑀕𑁄 𑀅𑀳𑁄𑀲𑀺, 𑀢𑀢𑁄 𑀧𑀭𑀤𑀸𑀭𑀺𑀓𑁄 𑀳𑀼𑀢𑁆𑀯𑀸 𑀓𑀸𑀮𑀗𑁆𑀓𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀺𑀭𑀬𑀢𑁄 𑀆𑀕𑀢𑀸𑀦𑀁 𑀲𑀢𑁆𑀢𑀸𑀦𑀁 𑀕𑀢𑁆𑀢𑀸𑀦𑀺 𑀉𑀡𑁆𑀳𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀟𑀬𑁆𑀳𑀫𑀸𑀦𑁂𑀦 𑀉𑀤𑀭𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀁 𑀕𑀩𑁆𑀪𑀁 𑀥𑀸𑀭𑁂𑀢𑁆𑀯𑀸 𑀓𑀸𑀮𑁂𑀦 𑀤𑀸𑀭𑀺𑀓𑀁 𑀯𑀺𑀚𑀸𑀬𑀺. 𑀲𑀸 𑀚𑀸𑀢𑀤𑀺𑀯𑀲𑀢𑁄 𑀧𑀪𑀼𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑁂𑀲𑀩𑀦𑁆𑀥𑀼𑀧𑀭𑀺𑀚𑀦𑀸𑀦𑀜𑁆𑀘 𑀤𑁂𑀲𑁆𑀲𑀸 𑀅𑀳𑁄𑀲𑀺. 𑀯𑀬𑀧𑁆𑀧𑀢𑁆𑀢𑀸 𑀘 𑀬𑀫𑁆𑀳𑀺 𑀓𑀼𑀮𑁂 𑀤𑀺𑀦𑁆𑀦𑀸, 𑀢𑀢𑁆𑀣𑀸𑀧𑀺 𑀲𑀸𑀫𑀺𑀓𑀲𑀲𑁆𑀲𑀼𑀲𑀲𑀼𑀭𑀸𑀦𑀁 𑀤𑁂𑀲𑁆𑀲𑀸𑀯 𑀅𑀳𑁄𑀲𑀺 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸. 𑀅𑀣 𑀦𑀓𑁆𑀔𑀢𑁆𑀢𑁂 𑀖𑁄𑀲𑀺𑀢𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀓𑀻𑀴𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀯𑁂𑀲𑀺𑀁 𑀆𑀦𑁂𑀢𑁆𑀯𑀸 𑀓𑀻𑀴𑀢𑀺. 𑀲𑀸 𑀢𑀁 𑀤𑀸𑀲𑀻𑀦𑀁 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀦𑀼𑀦𑀬𑀺𑀢𑁆𑀯𑀸 𑀘 𑀆𑀳 𑁋 ‘‘𑀅𑀬𑁆𑀬𑀧𑀼𑀢𑁆𑀢, 𑀇𑀢𑁆𑀣𑀻 𑀦𑀸𑀫 𑀲𑀘𑁂𑀧𑀺 𑀤𑀲𑀦𑁆𑀦𑀁 𑀭𑀸𑀚𑀽𑀦𑀁 𑀓𑀦𑀺𑀝𑁆𑀞𑀸 𑀳𑁄𑀢𑀺, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀯𑀸 𑀥𑀻𑀢𑀸, 𑀢𑀣𑀸𑀧𑀺 𑀲𑀸𑀫𑀺𑀓𑀲𑁆𑀲 𑀧𑁂𑀲𑀦𑀓𑀭𑀸 𑀳𑁄𑀢𑀺. 𑀲𑀸𑀫𑀺𑀓𑁂 𑀅𑀦𑀸𑀮𑀧𑀦𑁆𑀢𑁂 𑀲𑀽𑀮𑁂 𑀆𑀭𑁄𑀧𑀺𑀢𑀸 𑀯𑀺𑀬 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑀘𑁂 𑀅𑀳𑀁 𑀅𑀦𑀼𑀕𑁆𑀕𑀳𑀸𑀭𑀳𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀸, 𑀦𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸. 𑀅𑀢𑁆𑀢𑀦𑁄 𑀜𑀸𑀢𑀺𑀓𑀼𑀮𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑁋 ‘‘𑀳𑁄𑀢𑀼, 𑀪𑀤𑁆𑀤𑁂, 𑀫𑀸 𑀲𑁄𑀘𑀺 𑀓𑀻𑀴𑀦𑀲𑀚𑁆𑀚𑀸 𑀳𑁄𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀲𑁂𑀝𑁆𑀞𑀺𑀥𑀻𑀢𑀸 𑀢𑀸𑀯𑀢𑁆𑀢𑀓𑁂𑀦 𑀲𑀮𑁆𑀮𑀸𑀧𑀫𑀢𑁆𑀢𑁂𑀦 𑀉𑀲𑁆𑀲𑀸𑀳𑀚𑀸𑀢𑀸 ‘‘𑀲𑁆𑀯𑁂 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀁 𑀔𑀚𑁆𑀚𑀪𑁄𑀚𑁆𑀚𑀁 𑀧𑀝𑀺𑀬𑀸𑀤𑁂𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀓𑀻𑀴𑀦𑀝𑁆𑀞𑀸𑀦𑀁 𑀕𑀢𑁄. 𑀲𑀸 ‘‘𑀇𑀤𑀸𑀦𑀺 𑀧𑁂𑀲𑁂𑀲𑁆𑀲𑀢𑀺, 𑀇𑀤𑀸𑀦𑀺 𑀧𑁂𑀲𑁂𑀲𑁆𑀲𑀢𑀻’’𑀢𑀺 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀻 𑀦𑀺𑀲𑀺𑀦𑁆𑀦𑀸 𑀉𑀲𑁆𑀲𑀽𑀭𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀸 𑀢𑀁 𑀲𑀩𑁆𑀩𑀁 𑀧𑀝𑀺𑀬𑀸𑀤𑀺𑀢𑀁 𑀆𑀤𑀸𑀬 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑀼𑀁 𑀆𑀭𑀤𑁆𑀥𑀸.

𑀅𑀣 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 ‘‘𑀓𑀢𑁆𑀣 𑀅𑀚𑁆𑀚 𑀪𑀺𑀓𑁆𑀔𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀲𑁂𑀝𑁆𑀞𑀺𑀥𑀻𑀢𑀭𑀁 𑀤𑀺𑀲𑁆𑀯𑀸 ‘‘𑀫𑀬𑀺 𑀇𑀫𑀺𑀲𑁆𑀲𑀸 𑀲𑀤𑁆𑀥𑀸𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀩𑁆𑀪𑀸𑀭𑀲𑀫𑀻𑀧𑁂 𑀲𑀝𑁆𑀞𑀺𑀬𑁄𑀚𑀦𑀫𑀦𑁄𑀲𑀺𑀮𑀸𑀢𑀮𑁂 𑀞𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀝𑀺𑀧𑀣𑁂 𑀑𑀭𑀼𑀬𑁆𑀳 𑀩𑀸𑀭𑀸𑀡𑀲𑀺𑀁 𑀅𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸𑀯 𑀤𑀸𑀲𑀺𑀬𑁄 𑀲𑁂𑀝𑁆𑀞𑀺𑀥𑀻𑀢𑀸𑀬 𑀆𑀭𑁄𑀘𑁂𑀲𑀼𑀁. 𑀲𑀸 𑀬𑀸𑀦𑀸 𑀑𑀭𑀼𑀬𑁆𑀳 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀲𑀩𑁆𑀩𑀭𑀲𑀲𑀫𑁆𑀧𑀦𑁆𑀦𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀽𑀭𑁂𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀺 𑀧𑀤𑀼𑀫𑀧𑀼𑀧𑁆𑀨𑀁 𑀓𑀢𑁆𑀯𑀸 𑀧𑀼𑀧𑁆𑀨𑀓𑀮𑀸𑀧𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀧𑁆𑀨𑀓𑀮𑀸𑀧𑀳𑀢𑁆𑀣𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺 𑁋 ‘‘𑀪𑀦𑁆𑀢𑁂, 𑀬𑀣𑀸 𑀇𑀤𑀁 𑀧𑀼𑀧𑁆𑀨𑀁, 𑀏𑀯𑀸𑀳𑀁 𑀬𑀢𑁆𑀣 𑀬𑀢𑁆𑀣 𑀉𑀧𑀧𑀚𑁆𑀚𑀸𑀫𑀺, 𑀢𑀢𑁆𑀣 𑀢𑀢𑁆𑀣 𑀫𑀳𑀸𑀚𑀦𑀲𑁆𑀲 𑀧𑀺𑀬𑀸 𑀪𑀯𑁂𑀬𑁆𑀬𑀁 𑀫𑀦𑀸𑀧𑀸’’𑀢𑀺. 𑀏𑀯𑀁 𑀧𑀢𑁆𑀣𑁂𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀧𑀢𑁆𑀣𑁂𑀲𑀺 𑁋 ‘‘𑀪𑀦𑁆𑀢𑁂, 𑀤𑀼𑀓𑁆𑀔𑁄 𑀕𑀩𑁆𑀪𑀯𑀸𑀲𑁄, 𑀢𑀁 𑀅𑀦𑀼𑀧𑀕𑀫𑁆𑀫 𑀧𑀤𑀼𑀫𑀧𑀼𑀧𑁆𑀨𑁂 𑀏𑀯 𑀧𑀝𑀺𑀲𑀦𑁆𑀥𑀺 𑀪𑀯𑁂𑀬𑁆𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀧𑀢𑁆𑀣𑁂𑀲𑀺 𑁋 ‘‘𑀪𑀦𑁆𑀢𑁂, 𑀚𑁂𑀕𑀼𑀘𑁆𑀙𑁄 𑀫𑀸𑀢𑀼𑀕𑀸𑀫𑁄, 𑀘𑀓𑁆𑀓𑀯𑀢𑁆𑀢𑀺𑀥𑀻𑀢𑀸𑀧𑀺 𑀧𑀭𑀯𑀲𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀅𑀳𑀁 𑀇𑀢𑁆𑀣𑀺𑀪𑀸𑀯𑀁 𑀅𑀦𑀼𑀧𑀕𑀫𑁆𑀫 𑀧𑀼𑀭𑀺𑀲𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀘𑀢𑀼𑀢𑁆𑀣𑀫𑁆𑀧𑀺 𑀧𑀢𑁆𑀣𑁂𑀲𑀺 𑁋 ‘‘𑀪𑀦𑁆𑀢𑁂, 𑀇𑀫𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀺𑀬𑁄𑀲𑀸𑀦𑁂 𑀢𑀼𑀫𑁆𑀳𑁂𑀳𑀺 𑀧𑀢𑁆𑀢𑀁 𑀅𑀫𑀢𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀘𑀢𑀼𑀭𑁄 𑀧𑀡𑀺𑀥𑀻 𑀓𑀢𑁆𑀯𑀸 𑀢𑀁 𑀧𑀤𑀼𑀫𑀧𑀼𑀧𑁆𑀨𑀓𑀮𑀸𑀧𑀁 𑀧𑀽𑀚𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀼𑀧𑁆𑀨𑀲𑀤𑀺𑀲𑁄 𑀏𑀯 𑀫𑁂 𑀕𑀦𑁆𑀥𑁄 𑀘𑁂𑀯 𑀯𑀡𑁆𑀡𑁄 𑀘 𑀳𑁄𑀢𑀽’’𑀢𑀺 𑀇𑀫𑀁 𑀧𑀜𑁆𑀘𑀫𑀁 𑀧𑀡𑀺𑀥𑀺𑀁 𑀅𑀓𑀸𑀲𑀺.

𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀢𑁆𑀢𑀜𑁆𑀘 𑀧𑀼𑀧𑁆𑀨𑀓𑀮𑀸𑀧𑀜𑁆𑀘 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 ‘‘𑀲𑁂𑀝𑁆𑀞𑀺𑀥𑀻𑀢𑀸 𑀫𑀁 𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸𑀬 𑀢𑀁 𑀧𑀲𑁆𑀲𑀦𑁆𑀢𑀺𑀬𑀸 𑀫𑀳𑀢𑀻 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀪𑀯𑀦𑁆𑀢𑀭𑁂 𑀓𑀢𑀁 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀅𑀦𑁄𑀓𑀸𑀲𑀢𑀸𑀬 𑀧𑀭𑀺𑀓𑁆𑀔𑀻𑀡𑀁 𑀘𑀺𑀜𑁆𑀘𑀫𑁆𑀩𑀺𑀮𑀥𑁄𑀢𑀢𑀫𑁆𑀩𑀮𑁄𑀳𑀪𑀸𑀚𑀦𑀫𑀺𑀯 𑀲𑀼𑀤𑁆𑀥𑀸 𑀚𑀸𑀢𑀸. 𑀢𑀸𑀯𑀤𑁂𑀯𑀲𑁆𑀲𑀸 𑀧𑀢𑀺𑀓𑀼𑀮𑁂 𑀜𑀸𑀢𑀺𑀓𑀼𑀮𑁂 𑀘 𑀲𑀩𑁆𑀩𑁄 𑀚𑀦𑁄 𑀢𑀼𑀝𑁆𑀞𑁄. ‘‘𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀺𑀬𑀯𑀘𑀦𑀸𑀦𑀺 𑀘 𑀧𑀡𑁆𑀡𑀸𑀓𑀸𑀭𑀸𑀦𑀺 𑀘 𑀧𑁂𑀲𑁂𑀲𑀺. 𑀲𑀸𑀫𑀺𑀓𑁄𑀧𑀺 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺 𑁋 ‘‘𑀲𑁂𑀝𑁆𑀞𑀺𑀥𑀻𑀢𑀭𑀁 𑀲𑀻𑀖𑀁 𑀆𑀦𑁂𑀣, 𑀅𑀳𑀁 𑀯𑀺𑀲𑁆𑀲𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀆𑀕𑀢𑁄’’𑀢𑀺. 𑀢𑀢𑁄 𑀧𑀪𑀼𑀢𑀺 𑀘 𑀦𑀁 𑀉𑀭𑁂 𑀯𑀺𑀮𑀺𑀢𑁆𑀢𑀘𑀦𑁆𑀤𑀦𑀁 𑀯𑀺𑀬 𑀆𑀫𑀼𑀢𑁆𑀢𑀫𑀼𑀢𑁆𑀢𑀸𑀳𑀸𑀭𑀁 𑀯𑀺𑀬 𑀧𑀼𑀧𑁆𑀨𑀫𑀸𑀮𑀸 𑀯𑀺𑀬 𑀘 𑀧𑀺𑀬𑀸𑀬𑀦𑁆𑀢𑁄 𑀧𑀭𑀺𑀳𑀭𑀺. 𑀲𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀇𑀲𑁆𑀲𑀭𑀺𑀬𑀪𑁄𑀕𑀬𑀼𑀢𑁆𑀢𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀼𑀭𑀺𑀲𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀧𑀤𑀼𑀫𑀧𑀼𑀧𑁆𑀨𑁂 𑀉𑀧𑁆𑀧𑀚𑁆𑀚𑀺. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀕𑀘𑁆𑀙𑀦𑁆𑀢𑁄𑀧𑀺 𑀧𑀤𑀼𑀫𑀧𑀼𑀧𑁆𑀨𑀕𑀩𑁆𑀪𑁂 𑀏𑀯 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀦𑁆𑀢𑁄𑀧𑀺 𑀦𑀺𑀲𑀻𑀤𑀦𑁆𑀢𑁄𑀧𑀺 𑀲𑀬𑀦𑁆𑀢𑁄𑀧𑀺 𑀧𑀤𑀼𑀫𑀧𑀼𑀧𑁆𑀨𑀕𑀩𑁆𑀪𑁂𑀬𑁂𑀯 𑀲𑀬𑀢𑀺. ‘‘𑀫𑀳𑀸𑀧𑀤𑀼𑀫𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀘 𑀦𑀁 𑀯𑁄𑀳𑀭𑀺𑀁𑀲𑀼. 𑀏𑀯𑀁 𑀲𑁄 𑀢𑁂𑀦 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀙 𑀤𑁂𑀯𑀮𑁄𑀓𑁂 𑀏𑀯 𑀲𑀁𑀲𑀭𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀲𑀼 𑀏𑀓𑀸𑀧𑀺 𑀧𑀼𑀢𑁆𑀢𑀁 𑀦 𑀮𑀪𑀢𑀺. 𑀅𑀫𑀘𑁆𑀘𑀸 𑀭𑀸𑀚𑀸𑀦𑀁 𑀯𑀺𑀜𑁆𑀜𑀸𑀧𑁂𑀲𑀼𑀁 𑁋 ‘‘𑀤𑁂𑀯, 𑀓𑀼𑀮𑀯𑀁𑀲𑀸𑀦𑀼𑀧𑀸𑀮𑀓𑁄 𑀧𑀼𑀢𑁆𑀢𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀢𑁆𑀭𑀚𑁂 𑀅𑀯𑀺𑀚𑁆𑀚𑀫𑀸𑀦𑁂 𑀔𑁂𑀢𑁆𑀢𑀚𑁄𑀧𑀺 𑀓𑀼𑀮𑀯𑀁𑀲𑀥𑀭𑁄 𑀳𑁄𑀢𑀻’’𑀢𑀺. 𑀅𑀣 𑀭𑀸𑀚𑀸 ‘‘𑀞𑀧𑁂𑀢𑁆𑀯𑀸 𑀫𑀳𑁂𑀲𑀺𑀁 𑀅𑀯𑀲𑁂𑀲𑀸 𑀇𑀢𑁆𑀣𑀺𑀬𑁄 𑀲𑀢𑁆𑀢𑀸𑀳𑀁 𑀥𑀫𑁆𑀫𑀦𑀸𑀝𑀓𑀁 𑀓𑀭𑁄𑀣𑀸’’𑀢𑀺 𑀬𑀣𑀸𑀓𑀸𑀫𑀁 𑀩𑀳𑀺 𑀘𑀭𑀸𑀧𑁂𑀲𑀺, 𑀢𑀣𑀸𑀧𑀺 𑀧𑀼𑀢𑁆𑀢𑀁 𑀦𑀸𑀮𑀢𑁆𑀣. 𑀧𑀼𑀦 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀫𑀳𑁂𑀲𑀻 𑀦𑀸𑀫 𑀧𑀼𑀜𑁆𑀜𑁂𑀦 𑀘 𑀧𑀜𑁆𑀜𑀸𑀬 𑀘 𑀲𑀩𑁆𑀩𑀇𑀢𑁆𑀣𑀻𑀦𑀁 𑀅𑀕𑁆𑀕𑀸, 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑁄 𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬𑀸’’𑀢𑀺. 𑀭𑀸𑀚𑀸 𑀫𑀳𑁂𑀲𑀺𑀬𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀸 𑀆𑀳 𑁋 ‘‘𑀫𑀳𑀸𑀭𑀸𑀚, 𑀬𑀸 𑀇𑀢𑁆𑀣𑀻 𑀲𑀻𑀮𑀯𑀢𑀻 𑀲𑀘𑁆𑀘𑀯𑀸𑀤𑀺𑀦𑀻, 𑀲𑀸 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬, 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀸𑀬 𑀓𑀼𑀢𑁄 𑀧𑀼𑀢𑁆𑀢𑁄’’𑀢𑀺 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀲𑀺, 𑀲𑀻𑀮𑀯𑀢𑀺𑀬𑀸 𑀭𑀸𑀚𑀥𑀻𑀢𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀆𑀯𑀚𑁆𑀚𑁂𑀦𑁆𑀢𑀺𑀬𑀸 𑀧𑀼𑀢𑁆𑀢𑀧𑀢𑁆𑀣𑀦𑀸𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀲𑀁𑀓𑀫𑁆𑀧𑀺.

𑀅𑀣 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑁋 ‘‘𑀲𑀻𑀮𑀯𑀢𑀺𑀬𑀸 𑀭𑀸𑀚𑀥𑀻𑀢𑀸𑀬 𑀧𑀼𑀢𑁆𑀢𑀯𑀭𑀁 𑀤𑁂𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑁂𑀯𑀺𑀬𑀸 𑀲𑀫𑁆𑀫𑀼𑀔𑁂 𑀞𑀺𑀢𑁄 ‘‘𑀓𑀺𑀁 𑀯𑀭𑁂𑀲𑀺, 𑀤𑁂𑀯𑀻’’𑀢𑀺? ‘‘𑀧𑀼𑀢𑁆𑀢𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀤𑀫𑁆𑀫𑀺 𑀢𑁂, 𑀤𑁂𑀯𑀺, 𑀧𑀼𑀢𑁆𑀢𑀁, 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀯𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀔𑀻𑀡𑀸𑀬𑀼𑀓𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀬𑀁 𑀫𑀳𑀸𑀧𑀤𑀼𑀫𑁄 𑀉𑀧𑀭𑀺𑀤𑁂𑀯𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀯𑀺𑀫𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀢 𑀫𑀳𑀸𑀧𑀤𑀼𑀫, 𑀫𑀦𑀼𑀲𑁆𑀲𑀮𑁄𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀬𑀸𑀘𑀺. 𑀲𑁄 ‘‘𑀫𑀸 𑀏𑀯𑀁, 𑀫𑀳𑀸𑀭𑀸𑀚, 𑀪𑀡, 𑀚𑁂𑀕𑀼𑀘𑁆𑀙𑀺𑀢𑁄 𑀫𑀦𑀼𑀲𑁆𑀲𑀮𑁄𑀓𑁄’’𑀢𑀺. ‘‘𑀢𑀸𑀢, 𑀢𑁆𑀯𑀁 𑀫𑀦𑀼𑀲𑁆𑀲𑀮𑁄𑀓𑁂 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄, 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀩𑁆𑀩𑀸, 𑀕𑀘𑁆𑀙, 𑀢𑀸𑀢𑀸’’𑀢𑀺. ‘‘𑀤𑀼𑀓𑁆𑀔𑁄, 𑀫𑀳𑀸𑀭𑀸𑀚, 𑀕𑀩𑁆𑀪𑀯𑀸𑀲𑁄, 𑀦 𑀲𑀓𑁆𑀓𑁄𑀫𑀺 𑀢𑀢𑁆𑀣 𑀯𑀲𑀺𑀢𑀼’’𑀦𑁆𑀢𑀺. ‘‘𑀢𑀸𑀢, 𑀢𑁂 𑀕𑀩𑁆𑀪𑀯𑀸𑀲𑁄 𑀦𑀢𑁆𑀣𑀺, 𑀢𑀣𑀸 𑀳𑀺 𑀢𑁆𑀯𑀁 𑀓𑀫𑁆𑀫𑀫𑀓𑀸𑀲𑀺, 𑀬𑀣𑀸 𑀧𑀤𑀼𑀫𑀕𑀩𑁆𑀪𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺, 𑀕𑀘𑁆𑀙, 𑀢𑀸𑀢𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀅𑀥𑀺𑀯𑀸𑀲𑁂𑀲𑀺.

𑀲𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀁 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀜𑁆𑀘 𑀭𑀢𑁆𑀢𑀺𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑁂𑀲𑀻 𑀲𑀼𑀧𑀺𑀦𑀦𑁆𑀢𑁂𑀦 𑀯𑀻𑀲𑀢𑀺𑀇𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀁 𑀧𑀤𑀼𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀤𑁆𑀥𑀸 𑀯𑀺𑀬 𑀅𑀳𑁄𑀲𑀺. 𑀲𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀻𑀮𑀸𑀦𑀺 𑀭𑀓𑁆𑀔𑀫𑀸𑀦𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀤𑀼𑀫𑀧𑀼𑀧𑁆𑀨𑀁 𑀅𑀤𑁆𑀤𑀲, 𑀢𑀁 𑀦𑁂𑀯 𑀢𑀻𑀭𑁂 𑀳𑁄𑀢𑀺 𑀦 𑀕𑀫𑁆𑀪𑀻𑀭𑁂. 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀘𑀲𑁆𑀲𑀸 𑀢𑀢𑁆𑀣 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀲𑀸 𑀲𑀬𑀁 𑀏𑀯 𑀑𑀢𑀭𑀺𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀅𑀕𑁆𑀕𑀳𑁂𑀲𑀺, 𑀧𑀼𑀧𑁆𑀨𑁂 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀧𑀢𑁆𑀢𑀸𑀦𑀺 𑀯𑀺𑀓𑀲𑀺𑀁𑀲𑀼. 𑀢𑀢𑁆𑀣 𑀲𑀼𑀯𑀡𑁆𑀡𑀧𑀝𑀺𑀫𑀁 𑀯𑀺𑀬 𑀤𑀸𑀭𑀓𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸𑀯 ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀭𑀜𑁆𑀜𑁄 𑀘 𑀧𑁂𑀲𑁂𑀲𑀺. 𑀭𑀸𑀚𑀸 𑀲𑀼𑀢𑁆𑀯𑀸 ‘‘𑀓𑀢𑁆𑀣 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀮𑀤𑁆𑀥𑁄𑀓𑀸𑀲𑀁 𑀲𑀼𑀢𑁆𑀯𑀸 ‘‘𑀉𑀬𑁆𑀬𑀸𑀦𑀜𑁆𑀘 𑀧𑁄𑀓𑁆𑀔𑀭𑀡𑀺𑀬𑀁 𑀧𑀤𑀼𑀫𑀜𑁆𑀘 𑀅𑀫𑁆𑀳𑀸𑀓𑀁𑀬𑁂𑀯, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀔𑁂𑀢𑁆𑀢𑁂 𑀚𑀸𑀢𑀢𑁆𑀢𑀸 𑀔𑁂𑀢𑁆𑀢𑀚𑁄 𑀦𑀸𑀫𑀸𑀬𑀁 𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀇𑀢𑁆𑀣𑀺𑀬𑁄 𑀥𑀸𑀢𑀺𑀓𑀺𑀘𑁆𑀘𑀁 𑀓𑀸𑀭𑁂𑀲𑀺. 𑀬𑀸 𑀬𑀸 𑀓𑀼𑀫𑀸𑀭𑀲𑁆𑀲 𑀭𑀼𑀘𑀺𑀁 𑀜𑀢𑁆𑀯𑀸 𑀧𑀢𑁆𑀣𑀺𑀢𑀁 𑀧𑀢𑁆𑀣𑀺𑀢𑀁 𑀔𑀸𑀤𑀦𑀻𑀬𑀁 𑀔𑀸𑀤𑀸𑀧𑁂𑀢𑀺, 𑀲𑀸 𑀲𑀸 𑀲𑀳𑀲𑁆𑀲𑀁 𑀮𑀪𑀢𑀺. 𑀲𑀓𑀮𑀩𑀸𑀭𑀸𑀡𑀲𑀻 𑀘𑀮𑀺𑀢𑀸, 𑀲𑀩𑁆𑀩𑁄 𑀚𑀦𑁄 𑀓𑀼𑀫𑀸𑀭𑀲𑁆𑀲 𑀧𑀡𑁆𑀡𑀸𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺. 𑀓𑀼𑀫𑀸𑀭𑁄 𑀢𑀁 𑀢𑀁 𑀅𑀢𑀺𑀦𑁂𑀢𑁆𑀯𑀸 ‘‘𑀇𑀫𑀁 𑀔𑀸𑀤, 𑀇𑀫𑀁 𑀪𑀼𑀜𑁆𑀚𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀪𑁄𑀚𑀦𑁂𑀦 𑀉𑀩𑁆𑀩𑀸𑀴𑁆𑀳𑁄 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀕𑁄𑀧𑀼𑀭𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀮𑀸𑀔𑀸𑀕𑀼𑀴𑀓𑁂𑀦 𑀓𑀻𑀴𑀢𑀺.

𑀢𑀤𑀸 𑀅𑀜𑁆𑀜𑀢𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀩𑀸𑀭𑀸𑀡𑀲𑀺𑀁 𑀦𑀺𑀲𑁆𑀲𑀸𑀬 𑀇𑀲𑀺𑀧𑀢𑀦𑁂 𑀯𑀲𑀢𑀺. 𑀲𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀲𑁂𑀦𑀸𑀲𑀦𑀯𑀢𑁆𑀢𑀲𑀭𑀻𑀭𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 ‘‘𑀅𑀚𑁆𑀚 𑀓𑀢𑁆𑀣 𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀓𑀼𑀫𑀸𑀭𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀲 𑀧𑀼𑀩𑁆𑀩𑁂 𑀓𑀺𑀁 𑀓𑀫𑁆𑀫𑀁 𑀓𑀭𑀻’’𑀢𑀺 𑀯𑀻𑀫𑀁𑀲𑀦𑁆𑀢𑁄 ‘‘𑀫𑀸𑀤𑀺𑀲𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀘𑀢𑀲𑁆𑀲𑁄 𑀧𑀢𑁆𑀣𑀦𑀸 𑀧𑀢𑁆𑀣𑁂𑀲𑀺, 𑀢𑀢𑁆𑀣 𑀢𑀺𑀲𑁆𑀲𑁄 𑀲𑀺𑀤𑁆𑀥𑀸, 𑀏𑀓𑀸 𑀢𑀸𑀯 𑀦 𑀲𑀺𑀚𑁆𑀛𑀢𑀺, 𑀢𑀲𑁆𑀲 𑀉𑀧𑀸𑀬𑁂𑀦 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀫𑀻’’𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀓𑀼𑀫𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀫𑀡, 𑀫𑀸 𑀇𑀥 𑀆𑀕𑀘𑁆𑀙𑀺, 𑀇𑀫𑁂 𑀳𑀺 𑀢𑀫𑁆𑀧𑀺 ‘𑀇𑀫𑀁 𑀔𑀸𑀤, 𑀇𑀫𑀁 𑀪𑀼𑀜𑁆𑀚𑀸’𑀢𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀆𑀳. 𑀲𑁄 𑀏𑀓𑀯𑀘𑀦𑁂𑀦𑁂𑀯 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 𑀧𑀭𑀺𑀚𑀦𑀁 𑀆𑀳 𑁋 ‘‘𑀅𑀬𑀁 𑀲𑀫𑀡𑁄 𑀫𑀬𑀸 𑀯𑀼𑀢𑁆𑀢𑀫𑀢𑁆𑀢𑁄𑀯 𑀦𑀺𑀯𑀢𑁆𑀢𑁄, 𑀓𑀼𑀤𑁆𑀥𑁄 𑀦𑀼 𑀔𑁄 𑀫𑀫𑀸’’𑀢𑀺. 𑀲𑁄 𑀢𑁂𑀳𑀺 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀓𑁄𑀥𑀧𑀭𑀸𑀬𑀡𑀸 𑀳𑁄𑀦𑁆𑀢𑀺, 𑀧𑀭𑁂𑀦 𑀧𑀲𑀦𑁆𑀦𑀫𑀦𑁂𑀦 𑀬𑀁 𑀤𑀺𑀦𑁆𑀦𑀁, 𑀢𑁂𑀦 𑀬𑀸𑀧𑁂𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀧𑀺 ‘‘𑀤𑀼𑀝𑁆𑀞𑁄 𑀏𑀯𑀭𑀽𑀧𑁄 𑀦𑀸𑀫 𑀲𑀫𑀡𑁄, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀢𑁆𑀯𑀸 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀫𑀺𑀕𑀬𑀽𑀣𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀦𑁆𑀦𑀸𑀫𑁂𑀢𑁂’’𑀢𑀺? ‘‘𑀏𑀢𑁂, 𑀲𑀸𑀫𑀺, 𑀫𑀺𑀕𑀸 𑀦𑀸𑀫𑀸’’𑀢𑀺. ‘‘𑀏𑀢𑁂𑀲𑀁 ‘𑀇𑀫𑀁 𑀔𑀸𑀤𑀣, 𑀇𑀫𑀁 𑀪𑀼𑀜𑁆𑀚𑀣, 𑀇𑀫𑀁 𑀲𑀸𑀬𑀣𑀸’𑀢𑀺 𑀯𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀺, 𑀲𑀸𑀫𑀺, 𑀬𑀢𑁆𑀣 𑀢𑀺𑀡𑁄𑀤𑀓𑀁 𑀲𑀼𑀮𑀪𑀁 𑀢𑀢𑁆𑀣 𑀯𑀲𑀦𑁆𑀢𑀻’’𑀢𑀺.

𑀓𑀼𑀫𑀸𑀭𑁄 ‘‘𑀬𑀣𑀸 𑀇𑀫𑁂 𑀅𑀭𑀓𑁆𑀔𑀺𑀬𑀫𑀸𑀦𑀸𑀯 𑀬𑀢𑁆𑀣 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀺, 𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀁 𑀯𑀲𑁂𑀬𑁆𑀬’’𑀦𑁆𑀢𑀺 𑀏𑀢𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀢𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 𑀲𑁂𑀦𑀸𑀲𑀦𑀫𑀕𑁆𑀕𑀜𑁆𑀘 𑀘𑀗𑁆𑀓𑀫𑀦𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀝𑁆𑀞𑀁 𑀓𑀢𑁆𑀯𑀸 𑀏𑀓𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑀗𑁆𑀓𑀫𑀺𑀢𑁆𑀯𑀸 𑀧𑀤𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑁄𑀓𑀸𑀲𑀜𑁆𑀘 𑀧𑀡𑁆𑀡𑀲𑀸𑀮𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀝𑁆𑀞𑀁 𑀓𑀢𑁆𑀯𑀸 𑀧𑀯𑀺𑀲𑀦𑀧𑀤𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑀧𑀤𑀦𑀺𑀓𑁆𑀔𑁂𑀧𑀁 𑀅𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀢𑁆𑀭 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀝𑁆𑀞𑀓𑀢𑀁 𑀤𑀺𑀲𑁆𑀯𑀸 ‘‘𑀯𑀲𑀢𑀺 𑀫𑀜𑁆𑀜𑁂 𑀏𑀢𑁆𑀣 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄’’𑀢𑀺 𑀧𑀭𑀺𑀚𑀦𑁂𑀦 𑀪𑀸𑀲𑀺𑀢𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀧𑀸𑀢𑁄𑀧𑀺 𑀲𑁄 𑀲𑀫𑀡𑁄 𑀤𑀼𑀲𑁆𑀲𑀢𑀺, 𑀇𑀤𑀸𑀦𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀳𑀺 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀅𑀓𑁆𑀓𑀦𑁆𑀢𑀁 𑀤𑀺𑀲𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀤𑀼𑀲𑁆𑀲𑁂𑀬𑁆𑀬, 𑀇𑀥𑁂𑀯 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣𑀸’’𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀑𑀭𑀼𑀬𑁆𑀳 𑀏𑀓𑀓𑁄𑀯 𑀲𑁂𑀦𑀸𑀲𑀦𑀁 𑀧𑀯𑀺𑀝𑁆𑀞𑁄 𑀯𑀢𑁆𑀢𑀲𑀻𑀲𑁂𑀦 𑀲𑀼𑀲𑀫𑁆𑀫𑀝𑁆𑀞𑁄𑀓𑀸𑀲𑁂 𑀧𑀤𑀦𑀺𑀓𑁆𑀔𑁂𑀧𑀁 𑀤𑀺𑀲𑁆𑀯𑀸 ‘‘𑀲𑁄 𑀤𑀸𑀦𑀸𑀬𑀁 𑀲𑀫𑀡𑁄 𑀏𑀢𑁆𑀣 𑀘𑀗𑁆𑀓𑀫𑀦𑁆𑀢𑁄 𑀦 𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀘𑀺𑀦𑁆𑀢𑁂𑀲𑀺, 𑀅𑀤𑁆𑀥𑀸𑀬𑀁 𑀅𑀢𑁆𑀢𑀦𑁄 𑀳𑀺𑀢𑀫𑁂𑀯 𑀘𑀺𑀦𑁆𑀢𑁂𑀲𑀺 𑀫𑀜𑁆𑀜𑁂’’𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀽𑀭𑀻𑀓𑀢𑀧𑀼𑀣𑀼𑀯𑀺𑀢𑀓𑁆𑀓𑁄 𑀕𑀦𑁆𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀜𑁆𑀚𑀸𑀢𑀏𑀓𑀕𑁆𑀕𑁄 𑀳𑀼𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀅𑀥𑀺𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀭𑁄𑀳𑀺𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁄 𑀕𑀕𑀦𑀢𑀮𑁂 𑀦𑀺𑀲𑀺𑀦𑁆𑀦𑁄 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣 𑀫𑀺𑀕𑁄𑀢𑀺 𑀤𑁆𑀯𑁂 𑀫𑀺𑀕𑀸 𑁋 𑀏𑀡𑀻𑀫𑀺𑀕𑁄 𑀘 𑀧𑀲𑀤𑀫𑀺𑀕𑁄 𑀘. 𑀅𑀧𑀺𑀘 𑀲𑀩𑁆𑀩𑁂𑀲𑀁 𑀆𑀭𑀜𑁆𑀜𑀺𑀓𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀧𑀲𑀤𑀫𑀺𑀕𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀤𑀦𑁆𑀢𑀺. 𑀅𑀭𑀜𑁆𑀜𑀫𑁆𑀳𑀻𑀢𑀺 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁, 𑀇𑀥 𑀧𑀦 𑀉𑀬𑁆𑀬𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀉𑀬𑁆𑀬𑀸𑀦𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀢𑀺 𑀧𑀝𑀺𑀪𑀸𑀕𑁂. 𑀅𑀩𑀤𑁆𑀥𑁄𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀅𑀩𑀤𑁆𑀥𑁄, 𑀏𑀢𑁂𑀦 𑀯𑀺𑀲𑁆𑀲𑀢𑁆𑀣𑀘𑀭𑀺𑀬𑀁 𑀤𑀻𑀧𑁂𑀢𑀺. 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀯𑁄𑀘𑀭𑀸𑀬𑀸𑀢𑀺 𑀬𑁂𑀦 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀦𑁆𑀢𑀼𑀫𑀺𑀘𑁆𑀙𑀢𑀺, 𑀢𑁂𑀦 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑁄𑀘𑀭𑀸𑀬 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀓𑁄 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺, 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺, 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺, 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄, 𑀪𑀺𑀓𑁆𑀔𑀯𑁂, 𑀮𑀼𑀤𑁆𑀤𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁆𑀢𑀫𑀓𑀸𑀲𑀺 𑀫𑀸𑀭𑀁 𑀅𑀧𑀤𑀁, 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’’𑀢𑀺 (𑀫. 𑀦𑀺. 𑁧.𑁨𑁮𑁭; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁫) 𑀯𑀺𑀢𑁆𑀣𑀸𑀭𑁄.

𑀲𑁂𑀭𑀺𑀢𑀦𑁆𑀢𑀺 𑀲𑀘𑁆𑀙𑀦𑁆𑀤𑀯𑀼𑀢𑁆𑀢𑀺𑀢𑀁 𑀅𑀧𑀭𑀸𑀬𑀢𑁆𑀢𑀢𑀁 𑀯𑀸, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀅𑀩𑀤𑁆𑀥𑁄 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬, 𑀢𑀣𑀸 𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀢𑀡𑁆𑀳𑀸𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀏𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺. 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑁄 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄 𑀏𑀓𑁄 𑀘𑀭𑁂𑀢𑀺.

𑀫𑀺𑀕𑁄𑀅𑀭𑀜𑁆𑀜𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁬. 𑀆𑀫𑀦𑁆𑀢𑀦𑀸 𑀳𑁄𑀢𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀫𑀳𑀸𑀉𑀧𑀝𑁆𑀞𑀸𑀦𑀲𑀫𑀬𑁂 𑀅𑀫𑀘𑁆𑀘𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀅𑀫𑀘𑁆𑀘𑁄 ‘‘𑀤𑁂𑀯, 𑀲𑁄𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀏𑀓𑀫𑀦𑁆𑀢𑀁 𑀕𑀫𑀦𑀁 𑀬𑀸𑀘𑀺. 𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀅𑀕𑀫𑀸𑀲𑀺. 𑀧𑀼𑀦 𑀏𑀓𑁄 𑀫𑀳𑀸𑀉𑀧𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀬𑀸𑀘𑀺, 𑀏𑀓𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀁, 𑀏𑀓𑁄 𑀅𑀲𑁆𑀲𑀧𑀺𑀝𑁆𑀞𑀺𑀬𑀁 𑀦𑀺𑀲𑀺𑀦𑁆𑀦𑀁, 𑀏𑀓𑁄 𑀲𑀼𑀯𑀡𑁆𑀡𑀭𑀣𑁂 𑀦𑀺𑀲𑀺𑀦𑁆𑀦𑀁, 𑀏𑀓𑁄 𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀁 𑀬𑀸𑀘𑀺. 𑀭𑀸𑀚𑀸 𑀢𑀢𑁄 𑀑𑀭𑁄𑀳𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀧𑀭𑁄 𑀚𑀦𑀧𑀤𑀘𑀸𑀭𑀺𑀓𑀁 𑀕𑀘𑁆𑀙𑀦𑁆𑀢𑀁 𑀬𑀸𑀘𑀺, 𑀢𑀲𑁆𑀲𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳 𑀏𑀓𑀫𑀦𑁆𑀢𑀁 𑀅𑀕𑀫𑀸𑀲𑀺. 𑀏𑀯𑀁 𑀲𑁄 𑀢𑁂𑀳𑀺 𑀦𑀺𑀩𑁆𑀩𑀺𑀦𑁆𑀦𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺. 𑀅𑀫𑀘𑁆𑀘𑀸 𑀇𑀲𑁆𑀲𑀭𑀺𑀬𑁂𑀦 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀅𑀲𑀼𑀓𑀁 𑀦𑀸𑀫, 𑀫𑀳𑀸𑀭𑀸𑀚, 𑀚𑀦𑀧𑀤𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺. 𑀭𑀸𑀚𑀸 𑀢𑀁 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀪𑀼𑀜𑁆𑀚𑀢𑀻’’𑀢𑀺 𑀪𑀡𑀢𑀺. 𑀲𑁄 𑀭𑀜𑁆𑀜𑁄 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 ‘‘𑀕𑀘𑁆𑀙𑀸𑀫𑀳𑀁 𑀢𑀁 𑀚𑀦𑀧𑀤𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀸𑀫𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀮𑀳𑀁 𑀓𑀢𑁆𑀯𑀸 𑀧𑀼𑀦 𑀉𑀪𑁄𑀧𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑁄𑀲𑀁 𑀆𑀭𑁄𑀘𑁂𑀦𑁆𑀢𑀺. 𑀭𑀸𑀚𑀸 ‘‘𑀦 𑀲𑀓𑁆𑀓𑀸 𑀇𑀫𑁂 𑀢𑁄𑀲𑁂𑀢𑀼’’𑀦𑁆𑀢𑀺 𑀢𑁂𑀲𑀁 𑀮𑁄𑀪𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀧𑀼𑀭𑀺𑀫𑀦𑀬𑁂𑀦 𑀇𑀫𑀁 𑀉𑀤𑀸𑀦𑀁 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀳𑀸𑀬𑀫𑀚𑁆𑀛𑁂 𑀞𑀺𑀢𑀲𑁆𑀲 𑀤𑀺𑀯𑀸𑀲𑁂𑀬𑁆𑀬𑀲𑀗𑁆𑀔𑀸𑀢𑁂 𑀯𑀸𑀲𑁂 𑀘, 𑀫𑀳𑀸𑀉𑀧𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀞𑀸𑀦𑁂 𑀘, 𑀉𑀬𑁆𑀬𑀸𑀦𑀕𑀫𑀦𑀲𑀗𑁆𑀔𑀸𑀢𑁂 𑀕𑀫𑀦𑁂 𑀘, 𑀚𑀦𑀧𑀤𑀘𑀸𑀭𑀺𑀓𑀲𑀗𑁆𑀔𑀸𑀢𑀸𑀬 𑀘𑀸𑀭𑀺𑀓𑀸𑀬 𑀘, ‘‘𑀇𑀤𑀁 𑀫𑁂 𑀲𑀼𑀡, 𑀇𑀤𑀁 𑀫𑁂 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀣𑀸 𑀢𑀣𑀸 𑀆𑀫𑀦𑁆𑀢𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀳𑀁 𑀢𑀢𑁆𑀣 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀬𑀸𑀬𑀁 𑀅𑀭𑀺𑀬𑀚𑀦𑀲𑁂𑀯𑀺𑀢𑀸 𑀅𑀦𑁂𑀓𑀸𑀦𑀺𑀲𑀁𑀲𑀸 𑀏𑀓𑀦𑁆𑀢𑀲𑀼𑀔𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀮𑁄𑀪𑀸𑀪𑀺𑀪𑀽𑀢𑁂𑀳𑀺 𑀲𑀩𑁆𑀩𑀓𑀸𑀧𑀼𑀭𑀺𑀲𑁂𑀳𑀺 𑀅𑀦𑀪𑀺𑀧𑀢𑁆𑀣𑀺𑀢𑀸 𑀧𑀩𑁆𑀩𑀚𑁆𑀚𑀸, 𑀢𑀁 𑀅𑀦𑀪𑀺𑀚𑁆𑀛𑀺𑀢𑀁 𑀧𑀭𑁂𑀲𑀁 𑀅𑀯𑀲𑀯𑀢𑁆𑀢𑀦𑁂𑀦 𑀪𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦 𑀲𑁂𑀭𑀺𑀢𑀜𑁆𑀘 𑀧𑁂𑀓𑁆𑀔𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀲𑁆𑀫𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀫𑀦𑁆𑀢𑀦𑀸𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁭. 𑀔𑀺𑀟𑁆𑀟𑀸𑀭𑀢𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀏𑀓𑀧𑀼𑀢𑁆𑀢𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄 𑀧𑀸𑀡𑀲𑀫𑁄, 𑀭𑀸𑀚𑀸 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀧𑀼𑀢𑁆𑀢𑀓𑀁 𑀕𑀳𑁂𑀢𑁆𑀯𑀸𑀯 𑀯𑀢𑁆𑀢𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀞𑀧𑁂𑀢𑁆𑀯𑀸 𑀕𑀢𑁄. 𑀓𑀼𑀫𑀸𑀭𑁄𑀧𑀺 𑀢𑀁 𑀤𑀺𑀯𑀲𑀁𑀬𑁂𑀯 𑀉𑀧𑁆𑀧𑀦𑁆𑀦𑁂𑀦 𑀩𑁆𑀬𑀸𑀥𑀺𑀦𑀸 𑀫𑀢𑁄. 𑀅𑀫𑀘𑁆𑀘𑀸 ‘‘𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀭𑀜𑁆𑀜𑁄 𑀳𑀤𑀬𑀫𑁆𑀧𑀺 𑀨𑀮𑁂𑀬𑁆𑀬𑀸’’𑀢𑀺 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀦𑀁 𑀛𑀸𑀧𑁂𑀲𑀼𑀁. 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀧𑀼𑀢𑁆𑀢𑀁 𑀦𑁂𑀯 𑀲𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀦𑁆𑀳𑀸𑀦𑀪𑁄𑀚𑀦𑀯𑁂𑀮𑀸𑀲𑀼. 𑀅𑀣 𑀪𑀼𑀢𑁆𑀢𑀸𑀯𑀻 𑀦𑀺𑀲𑀺𑀦𑁆𑀦𑁄 𑀲𑀭𑀺𑀢𑁆𑀯𑀸 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀣𑀸’’𑀢𑀺 𑀆𑀳. 𑀢𑀲𑁆𑀲 𑀅𑀦𑀼𑀭𑀽𑀧𑁂𑀦 𑀯𑀺𑀥𑀸𑀦𑁂𑀦 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀲𑁄𑀓𑀸𑀪𑀺𑀪𑀽𑀢𑁄 𑀦𑀺𑀲𑀺𑀦𑁆𑀦𑁄 𑀏𑀯𑀁 𑀬𑁄𑀦𑀺𑀲𑁄 𑀫𑀦𑀲𑀸𑀓𑀸𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀫𑁆𑀫𑀲𑀦𑁆𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁂𑀲𑀁 𑀲𑀁𑀲𑀕𑁆𑀕𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 𑀞𑀧𑁂𑀢𑁆𑀯𑀸 𑀕𑀸𑀣𑀸𑀬𑀢𑁆𑀣𑀯𑀡𑁆𑀡𑀦𑀁.

𑀅𑀢𑁆𑀣𑀯𑀡𑁆𑀡𑀦𑀸 𑀧𑀦 𑁋 𑀔𑀺𑀟𑁆𑀟𑀸𑀢𑀺 𑀓𑀻𑀴𑀦𑀸. 𑀲𑀸 𑀤𑀼𑀯𑀺𑀥𑀸 𑀳𑁄𑀢𑀺 𑀓𑀸𑀬𑀺𑀓𑀸 𑀘 𑀯𑀸𑀘𑀲𑀺𑀓𑀸 𑀘. 𑀢𑀢𑁆𑀣 𑀓𑀸𑀬𑀺𑀓𑀸 𑀦𑀸𑀫 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀲𑁆𑀲𑁂𑀳𑀺𑀧𑀺 𑀭𑀣𑁂𑀳𑀺𑀧𑀺 𑀥𑀦𑀽𑀳𑀺𑀧𑀺 𑀣𑀭𑀽𑀳𑀺𑀧𑀻𑀢𑀺 𑀏𑀯𑀫𑀸𑀤𑀺. 𑀯𑀸𑀘𑀲𑀺𑀓𑀸 𑀦𑀸𑀫 𑀕𑀻𑀢𑀁 𑀲𑀺𑀮𑁄𑀓𑀪𑀡𑀦𑀁 𑀫𑀼𑀔𑀪𑁂𑀭𑀺𑀆𑀮𑀫𑁆𑀩𑀭𑀪𑁂𑀭𑀻𑀢𑀺 𑀏𑀯𑀫𑀸𑀤𑀺. 𑀭𑀢𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺. 𑀯𑀺𑀧𑀼𑀮𑀦𑁆𑀢𑀺 𑀬𑀸𑀯 𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀳𑀘𑁆𑀘 𑀞𑀸𑀦𑁂𑀦 𑀲𑀓𑀮𑀢𑁆𑀢𑀪𑀸𑀯𑀩𑁆𑀬𑀸𑀧𑀓𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀅𑀦𑀼𑀲𑀦𑁆𑀥𑀺𑀬𑁄𑀚𑀦𑀸𑀧𑀺 𑀘𑁂𑀢𑁆𑀣 𑀲𑀁𑀲𑀕𑁆𑀕𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀢𑀢𑁄 𑀧𑀭𑀜𑁆𑀘 𑀲𑀩𑁆𑀩𑀁.

𑀔𑀺𑀟𑁆𑀟𑀸𑀭𑀢𑀺𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁮. 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑁄𑀲𑀺, 𑀲𑁂𑀲𑀸 𑀧𑀸𑀓𑀢𑀺𑀓𑀭𑀸𑀚𑀸𑀦𑁄. 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀼𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀲𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀁𑀲𑀓𑁆𑀓𑀴𑀻𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀢𑀦𑁄 𑀓𑀫𑁆𑀫𑀜𑁆𑀘 𑀲𑀳𑀸𑀬𑀜𑁆𑀘 𑀆𑀯𑀚𑁆𑀚𑁂𑀢𑁆𑀯𑀸 𑀜𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀧𑀸𑀬𑁂𑀦 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀼𑀁 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑀺. 𑀲𑁄 𑀘 𑀭𑀸𑀚𑀸 𑀢𑀺𑀓𑁆𑀔𑀢𑁆𑀢𑀼𑀁 𑀭𑀢𑁆𑀢𑀺𑀬𑀸 𑀉𑀩𑁆𑀩𑀺𑀚𑁆𑀚𑀢𑀺, 𑀪𑀻𑀢𑁄 𑀯𑀺𑀲𑁆𑀲𑀭𑀁 𑀓𑀭𑁄𑀢𑀺, 𑀫𑀳𑀸𑀢𑀮𑁂 𑀥𑀸𑀯𑀢𑀺. 𑀧𑀼𑀭𑁄𑀳𑀺𑀢𑁂𑀦 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺𑀢𑁄𑀧𑀺 ‘‘𑀓𑀼𑀢𑁄 𑀫𑁂, 𑀆𑀘𑀭𑀺𑀬, 𑀲𑀼𑀔’’𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀧𑀼𑀭𑁄𑀳𑀺𑀢𑁄𑀧𑀺 ‘‘𑀅𑀬𑀁 𑀭𑁄𑀕𑁄 𑀦 𑀲𑀓𑁆𑀓𑀸 𑀬𑁂𑀦 𑀓𑁂𑀦𑀘𑀺 𑀉𑀤𑁆𑀥𑀁 𑀯𑀺𑀭𑁂𑀘𑀦𑀸𑀤𑀺𑀦𑀸 𑀪𑁂𑀲𑀚𑁆𑀚𑀓𑀫𑁆𑀫𑁂𑀦 𑀯𑀺𑀦𑁂𑀢𑀼𑀁, 𑀫𑀬𑁆𑀳𑀁 𑀧𑀦 𑀔𑀸𑀤𑀦𑀽𑀧𑀸𑀬𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀭𑀚𑁆𑀚𑀳𑀸𑀦𑀺𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀤𑀻𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀏𑀢𑀁, 𑀫𑀳𑀸𑀭𑀸𑀚𑀸’’𑀢𑀺 𑀭𑀸𑀚𑀸𑀦𑀁 𑀲𑀼𑀝𑁆𑀞𑀼𑀢𑀭𑀁 𑀉𑀩𑁆𑀩𑁂𑀚𑁂𑀢𑁆𑀯𑀸 ‘‘𑀢𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀁 𑀏𑀢𑁆𑀢𑀓𑁂 𑀘 𑀏𑀢𑁆𑀢𑀓𑁂 𑀘 𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀤𑀬𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀜𑁆𑀘 𑀤𑀓𑁆𑀔𑀺𑀡𑀁 𑀤𑀢𑁆𑀯𑀸 𑀬𑀜𑁆𑀜𑁄 𑀬𑀚𑀺𑀢𑀩𑁆𑀩𑁄’’𑀢𑀺 𑀬𑀜𑁆𑀜𑀬𑀚𑀦𑁂 𑀲𑀫𑀸𑀤𑀧𑁂𑀲𑀺.

𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀦𑁂𑀓𑀸𑀦𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀬𑀜𑁆𑀜𑀢𑁆𑀣𑀸𑀬 𑀲𑀫𑁆𑀧𑀺𑀡𑁆𑀟𑀺𑀬𑀫𑀸𑀦𑀸𑀦𑀺 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂 𑀤𑀼𑀩𑁆𑀩𑁄𑀥𑀦𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀧𑀝𑀺𑀓𑀘𑁆𑀘𑁂𑀯 𑀕𑀦𑁆𑀢𑁆𑀯𑀸 𑀧𑁂𑀓𑁆𑀔𑀸𑀫𑀸’’𑀢𑀺 𑀯𑀁𑀲𑀓𑁆𑀓𑀴𑀻𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀆𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀸 𑀭𑀸𑀚𑀗𑁆𑀕𑀡𑁂 𑀧𑀝𑀺𑀧𑀸𑀝𑀺𑀬𑀸 𑀅𑀕𑀫𑀁𑀲𑀼. 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑀬𑀫𑀸𑀦𑁄 𑀢𑁂 𑀅𑀤𑁆𑀤𑀓𑁆𑀔𑀺, 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀘𑀲𑁆𑀲 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁂 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀁, 𑀫𑀳𑀸𑀭𑀸𑀚, 𑀘𑀸𑀢𑀼𑀤𑁆𑀤𑀺𑀲𑀸 𑀦𑀸𑀫𑀸’’𑀢𑀺. ‘‘𑀪𑀦𑁆𑀢𑁂, 𑀘𑀸𑀢𑀼𑀤𑁆𑀤𑀺𑀲𑀸𑀢𑀺 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺? ‘‘𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀢𑁆𑀣𑀘𑀺 𑀓𑀼𑀢𑁄𑀘𑀺 𑀪𑀬𑀁 𑀯𑀸 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀯𑀸 𑀅𑀫𑁆𑀳𑀸𑀓𑀁 𑀦𑀢𑁆𑀣𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀢𑀁 𑀪𑀬𑀁 𑀓𑀺𑀁 𑀓𑀸𑀭𑀡𑀸 𑀦 𑀳𑁄𑀢𑀻’’𑀢𑀺? ‘‘𑀫𑀬𑀁, 𑀫𑀳𑀸𑀭𑀸𑀚, 𑀫𑁂𑀢𑁆𑀢𑀁 𑀪𑀸𑀯𑁂𑀫, 𑀓𑀭𑀼𑀡𑀁 𑀪𑀸𑀯𑁂𑀫, 𑀫𑀼𑀤𑀺𑀢𑀁 𑀪𑀸𑀯𑁂𑀫, 𑀉𑀧𑁂𑀓𑁆𑀔𑀁 𑀪𑀸𑀯𑁂𑀫. 𑀢𑁂𑀦 𑀦𑁄 𑀢𑀁 𑀪𑀬𑀁 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀁𑀲𑀼.

𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀲𑀫𑀡𑀸 ‘𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀪𑀬𑀁 𑀦 𑀳𑁄𑀢𑀻’𑀢𑀺 𑀪𑀡𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀅𑀦𑁂𑀓𑀲𑀳𑀲𑁆𑀲𑀧𑀸𑀡𑀯𑀥𑀁 𑀯𑀡𑁆𑀡𑀬𑀦𑁆𑀢𑀺, 𑀓𑁂𑀲𑀁 𑀦𑀼 𑀔𑁄 𑀯𑀘𑀦𑀁 𑀲𑀘𑁆𑀘’’𑀦𑁆𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑀡𑀸 𑀲𑀼𑀤𑁆𑀥𑁂𑀦 𑀅𑀲𑀼𑀤𑁆𑀥𑀁 𑀥𑁄𑀯𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀅𑀲𑀼𑀤𑁆𑀥𑁂𑀦 𑀅𑀲𑀼𑀤𑁆𑀥𑀁. 𑀦 𑀲𑀓𑁆𑀓𑀸 𑀔𑁄 𑀧𑀦 𑀅𑀲𑀼𑀤𑁆𑀥𑁂𑀦 𑀅𑀲𑀼𑀤𑁆𑀥𑀁 𑀥𑁄𑀯𑀺𑀢𑀼𑀁, 𑀧𑀩𑁆𑀩𑀚𑀺𑀢𑀸𑀦𑀁 𑀏𑀯 𑀯𑀘𑀦𑀁 𑀲𑀘𑁆𑀘’’𑀦𑁆𑀢𑀺. 𑀲𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀢𑁆𑀢𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀳𑀺𑀢𑀨𑀭𑀡𑁂𑀦 𑀘𑀺𑀢𑁆𑀢𑁂𑀦 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 𑁋 ‘‘𑀲𑀩𑁆𑀩𑁂 𑀧𑀸𑀡𑁂 𑀫𑀼𑀜𑁆𑀘𑀣, 𑀲𑀻𑀢𑀸𑀦𑀺 𑀧𑀸𑀦𑀻𑀬𑀸𑀦𑀺 𑀧𑀺𑀯𑀦𑁆𑀢𑀼, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀼, 𑀲𑀻𑀢𑁄 𑀘 𑀯𑀸𑀢𑁄 𑀢𑁂𑀲𑀁 𑀉𑀧𑀯𑀸𑀬𑀢𑀽’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼.

𑀢𑀢𑁄 𑀭𑀸𑀚𑀸 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀯𑀘𑀦𑁂𑀦 𑀧𑀸𑀧𑀓𑀫𑁆𑀫𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀅𑀫𑀘𑁆𑀘𑁂𑀳𑀺 𑀘 𑀪𑁄𑀚𑀦𑀯𑁂𑀮𑀸𑀬𑀁 ‘‘𑀪𑀼𑀜𑁆𑀚, 𑀫𑀳𑀸𑀭𑀸𑀚, 𑀓𑀸𑀮𑁄’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁 𑀭𑀸𑀚𑀸’’𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀯𑀢𑁆𑀯𑀸 𑀇𑀫𑀁 𑀉𑀤𑀸𑀦𑀩𑁆𑀬𑀸𑀓𑀭𑀡𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀬𑀣𑀸𑀲𑀼𑀔𑀯𑀺𑀳𑀸𑀭𑀻, ‘‘𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀯𑀸 𑀦𑀬𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬 𑀨𑀭𑀺𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀘𑀸𑀢𑀼𑀤𑁆𑀤𑀺𑀲𑁄. 𑀢𑀸𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀢𑁆𑀣𑀘𑀺 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦 𑀧𑀝𑀺𑀳𑀦𑀢𑀻𑀢𑀺 𑀅𑀧𑁆𑀧𑀝𑀺𑀖𑁄. 𑀲𑀦𑁆𑀢𑀼𑀲𑁆𑀲𑀫𑀸𑀦𑁄𑀢𑀺 𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀲𑀦𑁆𑀢𑁄𑀲𑀲𑁆𑀲 𑀯𑀲𑁂𑀦 𑀲𑀦𑁆𑀢𑀼𑀲𑁆𑀲𑀓𑁄 𑀘. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀦 𑀧𑀘𑁆𑀘𑀬𑁂𑀦. 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻𑀢𑀺 𑀏𑀢𑁆𑀣 𑀧𑀭𑀺𑀲𑁆𑀲𑀬𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀺, 𑀧𑀭𑀺𑀳𑀸𑀧𑁂𑀦𑁆𑀢𑀺 𑀯𑀸 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀁, 𑀢𑀸𑀦𑀺 𑀯𑀸 𑀧𑀝𑀺𑀘𑁆𑀘 𑀲𑀬𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀩𑀸𑀳𑀺𑀭𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑀸𑀦𑀜𑁆𑀘 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀓𑀸𑀬𑀘𑀺𑀢𑁆𑀢𑀼𑀧𑀤𑁆𑀤𑀯𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀧𑀭𑀺𑀲𑁆𑀲𑀬𑁂 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀘 𑀯𑀻𑀭𑀺𑀬𑀸𑀤𑀻𑀳𑀺 𑀥𑀫𑁆𑀫𑁂𑀳𑀺 𑀘 𑀲𑀳𑀢𑀻𑀢𑀺 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀣𑀤𑁆𑀥𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 𑀅𑀙𑀫𑁆𑀪𑀻. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑁂 𑀘𑀢𑁆𑀢𑀸𑀭𑁄 𑀲𑀫𑀡𑀸, 𑀏𑀯𑀁 𑀇𑀢𑀭𑀻𑀢𑀭𑁂𑀦 𑀧𑀘𑁆𑀘𑀬𑁂𑀦 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀏𑀢𑁆𑀣 𑀧𑀝𑀺𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑁂 𑀲𑀦𑁆𑀢𑁄𑀲𑁂 𑀞𑀺𑀢𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀘𑀸𑀢𑀼𑀤𑁆𑀤𑀺𑀲𑁄, 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀧𑀝𑀺𑀳𑀦𑀦𑀪𑀬𑀸𑀪𑀸𑀯𑁂𑀦 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺. 𑀲𑁄 𑀘𑀸𑀢𑀼𑀤𑁆𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸, 𑀅𑀧𑁆𑀧𑀝𑀺𑀖𑀢𑁆𑀢𑀸 𑀅𑀙𑀫𑁆𑀪𑀻 𑀘 𑀳𑁄𑀢𑀻𑀢𑀺 𑀏𑀯𑀁 𑀧𑀝𑀺𑀧𑀢𑁆𑀢𑀺𑀕𑀼𑀡𑀁 𑀤𑀺𑀲𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀅𑀣 𑀯𑀸 𑀢𑁂 𑀲𑀫𑀡𑀸 𑀯𑀺𑀬 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦 𑀯𑀼𑀢𑁆𑀢𑀦𑀬𑁂𑀦 𑀘𑀸𑀢𑀼𑀤𑁆𑀤𑀺𑀲𑁄 𑀳𑁄𑀢𑀻𑀢𑀺 𑀜𑀢𑁆𑀯𑀸 𑀏𑀯𑀁 𑀘𑀸𑀢𑀼𑀤𑁆𑀤𑀺𑀲𑀪𑀸𑀯𑀁 𑀧𑀢𑁆𑀣𑀬𑀦𑁆𑀢𑁄 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀕𑀢𑁄𑀫𑁆𑀳𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀈𑀤𑀺𑀲𑀁 𑀞𑀸𑀦𑀁 𑀧𑀢𑁆𑀣𑀬𑀦𑁆𑀢𑁄 𑀘𑀸𑀢𑀼𑀤𑁆𑀤𑀺𑀲𑀢𑀸𑀬 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀧𑁆𑀧𑀝𑀺𑀖𑀢𑀸𑀬 𑀘 𑀅𑀙𑀫𑁆𑀪𑀻 𑀳𑀼𑀢𑁆𑀯𑀸 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀘𑀸𑀢𑀼𑀤𑁆𑀤𑀺𑀲𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁯. 𑀤𑀼𑀲𑁆𑀲𑀗𑁆𑀕𑀳𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀻 𑀓𑀸𑀮𑀫𑀓𑀸𑀲𑀺. 𑀢𑀢𑁄 𑀯𑀻𑀢𑀺𑀯𑀢𑁆𑀢𑁂𑀲𑀼 𑀲𑁄𑀓𑀤𑀺𑀯𑀲𑁂𑀲𑀼 𑀏𑀓𑀤𑀺𑀯𑀲𑀁 𑀅𑀫𑀘𑁆𑀘𑀸 ‘‘𑀭𑀸𑀚𑀽𑀦𑀁 𑀦𑀸𑀫 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀅𑀕𑁆𑀕𑀫𑀳𑁂𑀲𑀻 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸𑀥𑀼 𑀤𑁂𑀯𑁄 𑀅𑀜𑁆𑀜𑀫𑁆𑀧𑀺 𑀤𑁂𑀯𑀺𑀁 𑀆𑀦𑁂𑀢𑀽’’𑀢𑀺 𑀬𑀸𑀘𑀺𑀁𑀲𑀼. 𑀭𑀸𑀚𑀸 ‘‘𑀢𑁂𑀦 𑀳𑀺, 𑀪𑀡𑁂, 𑀚𑀸𑀦𑀸𑀣𑀸’’𑀢𑀺 𑀆𑀳. 𑀢𑁂 𑀧𑀭𑀺𑀬𑁂𑀲𑀦𑁆𑀢𑀸 𑀲𑀸𑀫𑀦𑁆𑀢𑀭𑀚𑁆𑀚𑁂 𑀭𑀸𑀚𑀸 𑀫𑀢𑁄, 𑀢𑀲𑁆𑀲 𑀤𑁂𑀯𑀻 𑀭𑀚𑁆𑀚𑀁 𑀅𑀦𑀼𑀲𑀸𑀲𑀢𑀺, 𑀲𑀸 𑀘 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺, 𑀅𑀫𑀘𑁆𑀘𑀸 ‘‘𑀅𑀬𑀁 𑀭𑀜𑁆𑀜𑁄 𑀅𑀦𑀼𑀭𑀽𑀧𑀸’’𑀢𑀺 𑀜𑀢𑁆𑀯𑀸 𑀢𑀁 𑀬𑀸𑀘𑀺𑀁𑀲𑀼. 𑀲𑀸 ‘‘𑀕𑀩𑁆𑀪𑀺𑀦𑀻 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀸 𑀳𑁄𑀢𑀺. 𑀲𑀘𑁂 𑀆𑀕𑀫𑁂𑀣, 𑀬𑀸𑀯 𑀯𑀺𑀚𑀸𑀬𑀸𑀫𑀺, 𑀏𑀯𑀁 𑀲𑀸𑀥𑀼. 𑀦𑁄 𑀘𑁂, 𑀅𑀜𑁆𑀜𑀁 𑀧𑀭𑀺𑀬𑁂𑀲𑀣𑀸’’𑀢𑀺 𑀆𑀳. 𑀢𑁂 𑀭𑀜𑁆𑀜𑁄𑀧𑀺 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀕𑀩𑁆𑀪𑀺𑀦𑀻𑀧𑀺 𑀳𑁄𑀢𑀼, 𑀆𑀦𑁂𑀣𑀸’’𑀢𑀺 𑀆𑀳. 𑀢𑁂 𑀆𑀦𑁂𑀲𑀼𑀁. 𑀭𑀸𑀚𑀸 𑀢𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀲𑀩𑁆𑀩𑀁 𑀫𑀳𑁂𑀲𑀺𑀬𑀸 𑀪𑁄𑀕𑀁 𑀅𑀤𑀸𑀲𑀺, 𑀢𑀲𑁆𑀲𑀸 𑀧𑀭𑀺𑀚𑀦𑀸𑀦𑀜𑁆𑀘 𑀦𑀸𑀦𑀸𑀯𑀺𑀥𑁂𑀳𑀺 𑀧𑀡𑁆𑀡𑀸𑀓𑀸𑀭𑁂𑀳𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸 𑀓𑀸𑀮𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀭𑀸𑀚𑀸 𑀢𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀺𑀬 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀅𑀗𑁆𑀓𑁂 𑀘 𑀉𑀭𑁂 𑀘 𑀓𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀤𑀸 𑀤𑁂𑀯𑀺𑀬𑀸 𑀧𑀭𑀺𑀚𑀦𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀭𑀸𑀚𑀸 𑀅𑀢𑀺𑀯𑀺𑀬 𑀲𑀗𑁆𑀕𑀡𑁆𑀳𑀸𑀢𑀺, 𑀓𑀼𑀫𑀸𑀭𑁂 𑀅𑀢𑀺𑀯𑀺𑀲𑁆𑀲𑀸𑀲𑀁 𑀓𑀭𑁄𑀢𑀺, 𑀳𑀦𑁆𑀤, 𑀦𑀁 𑀧𑀭𑀺𑀪𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺.

𑀢𑀢𑁄 𑀓𑀼𑀫𑀸𑀭𑀁 𑀆𑀳𑀁𑀲𑀼 𑁋 ‘‘𑀢𑁆𑀯𑀁, 𑀢𑀸𑀢, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀦 𑀇𑀫𑀲𑁆𑀲 𑀭𑀜𑁆𑀜𑁄 𑀧𑀼𑀢𑁆𑀢𑁄. 𑀫𑀸 𑀏𑀢𑁆𑀣 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀻’’𑀢𑀺. 𑀅𑀣 𑀓𑀼𑀫𑀸𑀭𑁄 ‘‘𑀏𑀳𑀺 𑀧𑀼𑀢𑁆𑀢𑀸’’𑀢𑀺 𑀭𑀜𑁆𑀜𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 𑀳𑀢𑁆𑀣𑁂𑀦 𑀆𑀓𑀟𑁆𑀠𑀺𑀬𑀫𑀸𑀦𑁄𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀭𑀸𑀚𑀸𑀦𑀁 𑀦 𑀅𑀮𑁆𑀮𑀻𑀬𑀢𑀺. 𑀭𑀸𑀚𑀸 ‘‘𑀓𑀺𑀁 𑀓𑀸𑀭𑀡’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀏𑀢𑁂 𑀫𑀬𑀸 𑀲𑀗𑁆𑀕𑀳𑀺𑀢𑀸𑀧𑀺 𑀧𑀝𑀺𑀓𑁆𑀓𑀽𑀮𑀯𑀼𑀢𑁆𑀢𑀺𑀦𑁄 𑀏𑀯𑀸’’𑀢𑀺 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄. ‘‘𑀭𑀸𑀚𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀅𑀫𑀘𑁆𑀘𑀧𑀭𑀺𑀚𑀦𑀸𑀧𑀺 𑀩𑀳𑀽 𑀧𑀩𑁆𑀩𑀚𑀺𑀁𑀲𑀼. 𑀲𑀧𑀭𑀺𑀚𑀦𑁄 𑀭𑀸𑀚𑀸 𑀧𑀩𑁆𑀩𑀚𑀺𑀢𑁄𑀧𑀺 𑀫𑀦𑀼𑀲𑁆𑀲𑀸 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀉𑀧𑀦𑁂𑀦𑁆𑀢𑀺, 𑀭𑀸𑀚𑀸 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀬𑀣𑀸𑀯𑀼𑀟𑁆𑀠𑀁 𑀤𑀸𑀧𑁂𑀲𑀺. 𑀢𑀢𑁆𑀣 𑀬𑁂 𑀲𑀼𑀦𑁆𑀤𑀭𑀁 𑀮𑀪𑀦𑁆𑀢𑀺, 𑀢𑁂 𑀢𑀼𑀲𑁆𑀲𑀦𑁆𑀢𑀺. 𑀇𑀢𑀭𑁂 𑀉𑀚𑁆𑀛𑀸𑀬𑀦𑁆𑀢𑀺 ‘‘𑀫𑀬𑀁 𑀧𑀭𑀺𑀯𑁂𑀡𑀸𑀤𑀻𑀦𑀺 𑀲𑀫𑁆𑀫𑀚𑁆𑀚𑀦𑁆𑀢𑀸 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺, 𑀮𑀽𑀔𑀪𑀢𑁆𑀢𑀁 𑀚𑀺𑀡𑁆𑀡𑀯𑀢𑁆𑀣𑀜𑁆𑀘 𑀮𑀪𑀸𑀫𑀸’’𑀢𑀺. 𑀲𑁄 𑀢𑀫𑁆𑀧𑀺 𑀜𑀢𑁆𑀯𑀸 ‘‘𑀇𑀫𑁂 𑀬𑀣𑀸𑀯𑀼𑀟𑁆𑀠𑀁 𑀤𑀻𑀬𑀫𑀸𑀦𑀸𑀧𑀺 𑀉𑀚𑁆𑀛𑀸𑀬𑀦𑁆𑀢𑀺, 𑀅𑀳𑁄 𑀤𑀼𑀲𑁆𑀲𑀗𑁆𑀕𑀳𑀸 𑀧𑀭𑀺𑀲𑀸’’𑀢𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀏𑀓𑁄𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀢𑁆𑀣 𑀆𑀕𑀢𑁂𑀳𑀺 𑀘 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁄 𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀲𑀸 𑀅𑀢𑁆𑀣𑀢𑁄 𑀧𑀸𑀓𑀝𑀸 𑀏𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀬𑁂 𑀅𑀲𑀦𑁆𑀢𑁄𑀲𑀸𑀪𑀺𑀪𑀽𑀢𑀸, 𑀢𑀣𑀸𑀯𑀺𑀥𑀸 𑀏𑀯 𑀘 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸. 𑀏𑀢𑀸𑀳𑀁 𑀤𑀼𑀲𑁆𑀲𑀗𑁆𑀕𑀳𑀪𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀥𑀺𑀕𑀢𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑀼𑀲𑁆𑀲𑀗𑁆𑀕𑀳𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁦. 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀘𑀸𑀢𑀼𑀫𑀸𑀲𑀺𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀕𑀺𑀫𑁆𑀳𑀸𑀦𑀁 𑀧𑀞𑀫𑁂 𑀫𑀸𑀲𑁂 𑀉𑀬𑁆𑀬𑀸𑀦𑀁 𑀕𑀢𑁄. 𑀢𑀢𑁆𑀣 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀦𑀻𑀮𑀖𑀦𑀧𑀢𑁆𑀢𑀲𑀜𑁆𑀙𑀦𑁆𑀦𑀁 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀓𑁄𑀯𑀺𑀴𑀸𑀭𑀫𑀽𑀮𑁂 𑀫𑀫 𑀲𑀬𑀦𑀁 𑀧𑀜𑁆𑀜𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀧𑀼𑀦 𑀕𑀺𑀫𑁆𑀳𑀸𑀦𑀁 𑀫𑀚𑁆𑀛𑀺𑀫𑁂 𑀫𑀸𑀲𑁂 𑀉𑀬𑁆𑀬𑀸𑀦𑀁 𑀕𑀢𑁄, 𑀢𑀤𑀸 𑀓𑁄𑀯𑀺𑀴𑀸𑀭𑁄 𑀧𑀼𑀧𑁆𑀨𑀺𑀢𑁄 𑀳𑁄𑀢𑀺, 𑀢𑀤𑀸𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀧𑀼𑀦𑀧𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀕𑀢𑁄, 𑀢𑀤𑀸 𑀓𑁄𑀯𑀺𑀴𑀸𑀭𑁄 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀲𑀼𑀓𑁆𑀔𑀭𑀼𑀓𑁆𑀔𑁄 𑀯𑀺𑀬 𑀳𑁄𑀢𑀺, 𑀢𑀤𑀸𑀧𑀺 𑀭𑀸𑀚𑀸 𑀅𑀤𑀺𑀲𑁆𑀯𑀸𑀯 𑀢𑀁 𑀭𑀼𑀓𑁆𑀔𑀁 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 𑀢𑀢𑁆𑀣𑁂𑀯 𑀲𑁂𑀬𑁆𑀬𑀁 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀚𑀸𑀦𑀦𑁆𑀢𑀸𑀧𑀺 𑀭𑀜𑁆𑀜𑁄 𑀆𑀡𑀢𑁆𑀢𑀺𑀬𑀸 𑀢𑀢𑁆𑀣 𑀲𑀬𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀲𑁄 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑁄 𑀢𑀁 𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀅𑀭𑁂, 𑀅𑀬𑀁 𑀧𑀼𑀩𑁆𑀩𑁂 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀫𑀡𑀺𑀫𑀬𑁄 𑀯𑀺𑀬 𑀅𑀪𑀺𑀭𑀽𑀧𑀤𑀲𑁆𑀲𑀦𑁄 𑀅𑀳𑁄𑀲𑀺, 𑀢𑀢𑁄 𑀫𑀡𑀺𑀯𑀡𑁆𑀡𑀲𑀸𑀔𑀦𑁆𑀢𑀭𑁂 𑀞𑀧𑀺𑀢𑀧𑀯𑀸𑀴𑀗𑁆𑀓𑀼𑀭𑀲𑀤𑀺𑀲𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀲𑁆𑀲𑀺𑀭𑀺𑀓𑀤𑀲𑁆𑀲𑀦𑁄 𑀅𑀳𑁄𑀲𑀺, 𑀫𑀼𑀢𑁆𑀢𑀚𑀸𑀮𑀲𑀤𑀺𑀲𑀯𑀸𑀮𑀺𑀓𑀸𑀓𑀺𑀡𑁆𑀡𑁄 𑀘𑀲𑁆𑀲 𑀳𑁂𑀝𑁆𑀞𑀸𑀪𑀽𑀫𑀺𑀪𑀸𑀕𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑁄 𑀭𑀢𑁆𑀢𑀓𑀫𑁆𑀩𑀮𑀲𑀦𑁆𑀣𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀦𑀸𑀫𑀚𑁆𑀚 𑀲𑀼𑀓𑁆𑀔𑀭𑀼𑀓𑁆𑀔𑁄 𑀯𑀺𑀬 𑀲𑀸𑀔𑀸𑀫𑀢𑁆𑀢𑀸𑀯𑀲𑁂𑀲𑁄 𑀞𑀺𑀢𑁄, 𑀅𑀳𑁄 𑀚𑀭𑀸𑀬 𑀉𑀧𑀳𑀢𑁄 𑀓𑁄𑀯𑀺𑀴𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀦𑀼𑀧𑀸𑀤𑀺𑀡𑁆𑀡𑀫𑁆𑀧𑀺 𑀢𑀸𑀬 𑀚𑀭𑀸𑀬 𑀳𑀜𑁆𑀜𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀉𑀧𑀸𑀤𑀺𑀡𑁆𑀡’’𑀦𑁆𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑀤𑀦𑀼𑀲𑀸𑀭𑁂𑀦𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀘 𑀯𑀺𑀧𑀲𑁆𑀲𑀦𑁆𑀢𑁄𑀯 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀓𑁄𑀯𑀺𑀴𑀸𑀭𑁄 𑀯𑀺𑀬 𑀅𑀧𑀕𑀢𑀕𑀺𑀳𑀺𑀩𑁆𑀬𑀜𑁆𑀚𑀦𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀬𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀫𑀺𑀁 𑀲𑀬𑀦𑀢𑀮𑁂 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄𑀬𑁂𑀯 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀢𑁄 𑀕𑀫𑀦𑀓𑀸𑀮𑁂 𑀅𑀫𑀘𑁆𑀘𑁂𑀳𑀺 ‘‘𑀓𑀸𑀮𑁄, 𑀤𑁂𑀯, 𑀕𑀦𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁 𑀭𑀸𑀚𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀓𑁂𑀲𑀫𑀲𑁆𑀲𑀼𑀑𑀤𑀸𑀢𑀯𑀢𑁆𑀣𑀸𑀮𑀗𑁆𑀓𑀸𑀭𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀧𑀼𑀢𑁆𑀢𑀤𑀸𑀭𑀤𑀸𑀲𑀺𑀤𑀸𑀲𑀸𑀤𑀻𑀦𑀺. 𑀏𑀢𑀸𑀦𑀺 𑀕𑀺𑀳𑀺𑀪𑀸𑀯𑀁 𑀩𑁆𑀬𑀜𑁆𑀚𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄𑀢𑀺 𑀧𑀢𑀺𑀢𑀧𑀢𑁆𑀢𑁄. 𑀙𑁂𑀢𑁆𑀯𑀸𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀺𑀢𑁆𑀯𑀸. 𑀯𑀻𑀭𑁄𑀢𑀺 𑀫𑀕𑁆𑀕𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀕𑀺𑀳𑀺𑀩𑀦𑁆𑀥𑀦𑀸𑀦𑀻𑀢𑀺 𑀓𑀸𑀫𑀩𑀦𑁆𑀥𑀦𑀸𑀦𑀺. 𑀓𑀸𑀫𑀸 𑀳𑀺 𑀕𑀺𑀳𑀻𑀦𑀁 𑀩𑀦𑁆𑀥𑀦𑀸𑀦𑀺. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑀬𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀥𑀺𑀕𑀢𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑁄𑀯𑀺𑀴𑀸𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁦𑁧-𑁨. 𑀲𑀘𑁂 𑀮𑀪𑁂𑀣𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀤𑁆𑀯𑁂 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀓𑀦𑀺𑀝𑁆𑀞𑁄 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀢𑁂 𑀏𑀓𑀤𑀺𑀯𑀲𑀁𑀬𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀏𑀓𑀤𑀺𑀯𑀲𑀫𑁂𑀯 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀳𑀧𑀁𑀲𑀼𑀓𑀻𑀴𑀓𑀸 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀧𑀜𑁆𑀜𑀯𑀸 𑀅𑀳𑁄𑀲𑀺. 𑀲𑁄 𑀭𑀸𑀚𑀧𑀼𑀢𑁆𑀢𑀁 𑀆𑀳 𑁋 ‘‘𑀲𑀫𑁆𑀫, 𑀢𑁆𑀯𑀁 𑀢𑀯 𑀧𑀺𑀢𑀼𑀦𑁄 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀮𑀪𑀺𑀲𑁆𑀲𑀲𑀺, 𑀅𑀳𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁, 𑀲𑀼𑀲𑀺𑀓𑁆𑀔𑀺𑀢𑁂𑀦 𑀘 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀢𑀼𑀁 𑀲𑀓𑁆𑀓𑀸, 𑀏𑀳𑀺 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀉𑀪𑁄𑀧𑀺 𑀬𑀜𑁆𑀜𑁄𑀧𑀘𑀺𑀢𑀸 𑀳𑀼𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀪𑀺𑀓𑁆𑀔𑀁 𑀘𑀭𑀫𑀸𑀦𑀸 𑀧𑀘𑁆𑀘𑀦𑁆𑀢𑀚𑀦𑀧𑀤𑀕𑀸𑀫𑀁 𑀕𑀢𑀸. 𑀢𑀜𑁆𑀘 𑀕𑀸𑀫𑀁 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀉𑀲𑁆𑀲𑀸𑀳𑀚𑀸𑀢𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀉𑀧𑀦𑀸𑀫𑁂𑀢𑁆𑀯𑀸 𑀧𑀽𑀚𑁂𑀦𑁆𑀢𑀺. 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀳𑁂𑀳𑀺 𑀲𑀤𑀺𑀲𑀸 𑀉𑀘𑁆𑀘𑀸𑀓𑀼𑀮𑀺𑀓𑀸 𑀦𑀸𑀫 𑀦𑀢𑁆𑀣𑀺, 𑀅𑀧𑀺 𑀘 𑀧𑀦𑀺𑀫𑁂 𑀫𑀦𑀼𑀲𑁆𑀲𑀸 𑀬𑀤𑀺 𑀇𑀘𑁆𑀙𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀤𑁂𑀦𑁆𑀢𑀺, 𑀬𑀤𑀺 𑀦𑀺𑀘𑁆𑀙𑀦𑁆𑀢𑀺, 𑀦 𑀤𑁂𑀦𑁆𑀢𑀺, 𑀇𑀫𑁂𑀲𑀁 𑀧𑀦 𑀧𑀩𑁆𑀩𑀚𑀺𑀢𑀸𑀦𑀁 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀅𑀤𑁆𑀥𑀸 𑀏𑀢𑁂 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀦𑁆𑀢𑀺, 𑀳𑀦𑁆𑀤, 𑀦𑁂𑀲𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀫𑀸’’𑀢𑀺. 𑀢𑁂 𑀫𑀦𑀼𑀲𑁆𑀲𑁂𑀲𑀼 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀬𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀺𑀧𑁆𑀧𑀁 𑀚𑀸𑀦𑀸𑀣, 𑀢𑀁 𑀅𑀫𑁆𑀳𑁂𑀳𑀺 𑀲𑀺𑀓𑁆𑀔𑀸𑀧𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀦 𑀲𑀓𑁆𑀓𑀸 𑀅𑀧𑀩𑁆𑀩𑀚𑀺𑀢𑁂𑀦 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀢𑁂 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀢𑀢𑁄 𑀦𑁂𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀏𑀯𑀁 𑀯𑁄 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀏𑀓𑀻𑀪𑀸𑀯𑀸𑀪𑀺𑀭𑀢𑀺 𑀦𑀺𑀧𑁆𑀨𑀢𑁆𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀏𑀓𑁂𑀦 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀏𑀓𑁂𑀦 𑀞𑀸𑀢𑀩𑁆𑀩𑀁, 𑀏𑀓𑁂𑀦 𑀲𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀧𑀡𑁆𑀡𑀲𑀸𑀮𑀁 𑀅𑀤𑀁𑀲𑀼, 𑀢𑀢𑁄 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀪𑀼𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑀁 𑀮𑀤𑁆𑀥𑀸 𑀛𑀸𑀦𑀁 𑀧𑀝𑀺𑀮𑀪𑀺. 𑀭𑀸𑀚𑀧𑀼𑀢𑁆𑀢𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀲𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀇𑀥 𑀦𑀺𑀲𑀻𑀤𑀸’’𑀢𑀺. 𑀲𑁄 𑀢𑀢𑁆𑀣 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳 𑁋 ‘‘𑀇𑀫𑀲𑁆𑀲 𑀓𑀺𑀭, 𑀲𑀫𑁆𑀫, 𑀲𑀺𑀧𑁆𑀧𑀲𑁆𑀲 𑀏𑀓𑀻𑀪𑀸𑀯𑀸𑀪𑀺𑀭𑀢𑀺 𑀦𑀺𑀧𑁆𑀨𑀢𑁆𑀢𑀻’’𑀢𑀺? 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 ‘‘𑀏𑀯𑀁, 𑀲𑀫𑁆𑀫, 𑀢𑁂𑀦 𑀳𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀏𑀯 𑀕𑀘𑁆𑀙, 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀦𑀺𑀧𑁆𑀨𑀢𑁆𑀢𑀺’’𑀦𑁆𑀢𑀺 𑀆𑀳. 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑀫𑀼𑀳𑀼𑀢𑁆𑀢𑀓𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑁄.

𑀢𑀢𑁄 𑀦𑀁 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀢𑀣𑁂𑀯 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀢𑁆𑀢𑀦𑁄 𑀘 𑀓𑀫𑁆𑀫𑀁 𑀳𑀸𑀧𑁂𑀢𑀺 𑀫𑀫 𑀘, 𑀇𑀥𑀸𑀪𑀺𑀓𑁆𑀔𑀡𑀁 𑀆𑀕𑀘𑁆𑀙𑀢𑀻’’𑀢𑀺. 𑀲𑁄 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑁆𑀫 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄. 𑀇𑀢𑀭𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬𑁂𑀯 𑀦𑀺𑀲𑀺𑀦𑁆𑀦𑁄 𑀧𑀼𑀦𑀧𑀺 𑀫𑀼𑀳𑀼𑀢𑁆𑀢𑀓𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀫𑀕𑁆𑀕𑀦𑁆𑀢𑁄𑀧𑀺 𑀢𑀁 𑀅𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑁄 𑀕𑀳𑀝𑁆𑀞𑀓𑀸𑀮𑁂 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀢𑁄𑀧𑀺 𑀫𑀁 𑀤𑀝𑁆𑀞𑀼𑀁 𑀦 𑀮𑀪𑀢𑀺, 𑀲𑁄 𑀤𑀸𑀦𑀺 𑀫𑀬𑀺 𑀆𑀕𑀢𑁂 𑀤𑀲𑁆𑀲𑀦𑀫𑁆𑀧𑀺 𑀅𑀤𑀸𑀢𑀼𑀓𑀸𑀫𑁄 𑀅𑀧𑀓𑁆𑀓𑀫𑀺. 𑀅𑀳𑁄 𑀅𑀭𑁂, 𑀘𑀺𑀢𑁆𑀢, 𑀦 𑀮𑀚𑁆𑀚𑀲𑀺, 𑀬𑀁 𑀫𑀁 𑀘𑀢𑀼𑀓𑁆𑀔𑀢𑁆𑀢𑀼𑀁 𑀇𑀥𑀸𑀦𑁂𑀲𑀺, 𑀦 𑀲𑁄 𑀤𑀸𑀦𑀺 𑀢𑁂 𑀯𑀲𑁂 𑀯𑀢𑁆𑀢𑀺𑀲𑁆𑀲𑀸𑀫𑀺, 𑀅𑀜𑁆𑀜𑀤𑀢𑁆𑀣𑀼 𑀢𑀁𑀬𑁂𑀯 𑀫𑀫 𑀯𑀲𑁂 𑀯𑀢𑁆𑀢𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀇𑀢𑀭𑁄𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀢𑁂 𑀉𑀪𑁄𑀧𑀺 𑀫𑀦𑁄𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀇𑀫𑀸 𑀉𑀤𑀸𑀦𑀕𑀸𑀣𑀸𑀬𑁄 𑀅𑀪𑀸𑀲𑀺𑀁𑀲𑀼.

𑀢𑀢𑁆𑀣 𑀦𑀺𑀧𑀓𑀦𑁆𑀢𑀺 𑀧𑀓𑀢𑀺𑀦𑀺𑀧𑀓𑀁 𑀧𑀡𑁆𑀟𑀺𑀢𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀺𑀓𑀼𑀲𑀮𑀁. 𑀲𑀸𑀥𑀼𑀯𑀺𑀳𑀸𑀭𑀺𑀦𑁆𑀢𑀺 𑀅𑀧𑁆𑀧𑀦𑀸𑀯𑀺𑀳𑀸𑀭𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀁. 𑀥𑀻𑀭𑀦𑁆𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀁. 𑀢𑀢𑁆𑀣 𑀦𑀺𑀧𑀓𑀢𑁆𑀢𑁂𑀦 𑀥𑀺𑀢𑀺𑀲𑀫𑁆𑀧𑀤𑀸 𑀯𑀼𑀢𑁆𑀢𑀸. 𑀇𑀥 𑀧𑀦 𑀥𑀺𑀢𑀺𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀥𑀺𑀢𑀺 𑀦𑀸𑀫 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸, ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀧𑀯𑀢𑁆𑀢𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀺𑀘 𑀥𑀺𑀓𑁆𑀓𑀢𑀧𑀸𑀧𑁄𑀢𑀺𑀧𑀺 𑀥𑀻𑀭𑁄. 𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬𑀸𑀢𑀺 𑀬𑀣𑀸 𑀧𑀓𑀢𑀺𑀭𑀸𑀚𑀸 ‘‘𑀯𑀺𑀚𑀺𑀢𑀁 𑀭𑀝𑁆𑀞𑀁 𑀅𑀦𑀢𑁆𑀣𑀸𑀯𑀳’’𑀦𑁆𑀢𑀺 𑀜𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀏𑀓𑁄 𑀘𑀭𑀢𑀺, 𑀏𑀯𑀁 𑀩𑀸𑀮𑀲𑀳𑀸𑀬𑀁 𑀧𑀳𑀸𑀬 𑀏𑀓𑁄 𑀘𑀭𑁂. 𑀅𑀣 𑀯𑀸 𑀭𑀸𑀚𑀸𑀯 𑀭𑀝𑁆𑀞𑀦𑁆𑀢𑀺 𑀬𑀣𑀸 𑀲𑀼𑀢𑀲𑁄𑀫𑁄 𑀭𑀸𑀚𑀸 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬 𑀏𑀓𑁄 𑀘𑀭𑀺, 𑀬𑀣𑀸 𑀘 𑀫𑀳𑀸𑀚𑀦𑀓𑁄 𑀭𑀸𑀚𑀸, 𑀏𑀯𑀁 𑀏𑀓𑁄 𑀘𑀭𑀻𑀢𑀺 𑀅𑀬𑀫𑁆𑀧𑀺 𑀢𑀲𑁆𑀲 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀲𑀳𑀸𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁩. 𑀅𑀤𑁆𑀥𑀸 𑀧𑀲𑀁𑀲𑀸𑀫𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀬𑀸𑀯 𑀆𑀓𑀸𑀲𑀢𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀲𑀚𑁆𑀚𑀸, 𑀢𑀸𑀯 𑀘𑀸𑀢𑀼𑀤𑁆𑀤𑀺𑀲𑀕𑀸𑀣𑀸𑀬 𑀉𑀧𑁆𑀧𑀢𑁆𑀢𑀺𑀲𑀤𑀺𑀲𑀸 𑀏𑀯 𑀉𑀧𑁆𑀧𑀢𑁆𑀢𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀲𑁄 𑀭𑀸𑀚𑀸 𑀭𑀢𑁆𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀩𑁆𑀩𑀺𑀚𑁆𑀚𑀺, 𑀦 𑀢𑀣𑀸 𑀅𑀬𑀁, 𑀦𑁂𑀯𑀲𑁆𑀲 𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀳𑁄𑀲𑀺. 𑀲𑁄 𑀆𑀓𑀸𑀲𑀢𑀮𑁂 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀁, 𑀫𑀳𑀸𑀭𑀸𑀚, 𑀅𑀦𑀯𑀚𑁆𑀚𑀪𑁄𑀚𑀺𑀦𑁄 𑀦𑀸𑀫𑀸’’𑀢𑀺. ‘‘𑀪𑀦𑁆𑀢𑁂, 𑀅𑀦𑀯𑀚𑁆𑀚𑀪𑁄𑀚𑀺𑀦𑁄𑀢𑀺 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺? ‘‘𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸 𑀮𑀤𑁆𑀥𑀸 𑀦𑀺𑀩𑁆𑀩𑀺𑀓𑀸𑀭𑀸 𑀪𑀼𑀜𑁆𑀚𑀸𑀫, 𑀫𑀳𑀸𑀭𑀸𑀚𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑁂 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀁 ‘𑀏𑀤𑀺𑀲𑀸 𑀯𑀸 𑀦𑁄 𑀯𑀸’’’𑀢𑀺? 𑀢𑀁 𑀤𑀺𑀯𑀲𑀁 𑀓𑀡𑀸𑀚𑀓𑁂𑀦 𑀩𑀺𑀮𑀗𑁆𑀕𑀤𑀼𑀢𑀺𑀬𑁂𑀦 𑀧𑀭𑀺𑀯𑀺𑀲𑀺. 𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀫𑀢𑀁 𑀯𑀺𑀬 𑀦𑀺𑀩𑁆𑀩𑀺𑀓𑀸𑀭𑀸 𑀪𑀼𑀜𑁆𑀚𑀺𑀁𑀲𑀼. 𑀭𑀸𑀚𑀸 ‘‘𑀇𑀫𑁂 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀏𑀓𑀤𑀺𑀯𑀲𑀁 𑀦𑀺𑀩𑁆𑀩𑀺𑀓𑀸𑀭𑀸 𑀳𑁄𑀦𑁆𑀢𑀺, 𑀧𑀼𑀦 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯𑀸𑀓𑀸𑀲𑀺. 𑀢𑁂𑀧𑀺 𑀢𑀣𑁂𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀭𑀸𑀚𑀸 ‘‘𑀲𑀼𑀦𑁆𑀤𑀭𑀁 𑀤𑀢𑁆𑀯𑀸 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀧𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑁆𑀯𑁂 𑀤𑀺𑀯𑀲𑁂 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀡𑀻𑀢𑁂𑀦 𑀅𑀢𑀺𑀯𑀺𑀘𑀺𑀢𑁆𑀭𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺. 𑀢𑁂𑀧𑀺 𑀢𑀣𑁂𑀯 𑀦𑀺𑀩𑁆𑀩𑀺𑀓𑀸𑀭𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀭𑀜𑁆𑀜𑁄 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀭𑀸𑀚𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 ‘‘𑀅𑀦𑀯𑀚𑁆𑀚𑀪𑁄𑀚𑀺𑀦𑁄 𑀏𑀢𑁂, 𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀯𑀚𑁆𑀚𑀪𑁄𑀚𑀻 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑁆𑀚𑀁 𑀲𑀫𑀸𑀤𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀫𑀜𑁆𑀚𑀽𑀲𑀓𑀭𑀼𑀓𑁆𑀔𑀫𑀽𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀯𑀺𑀪𑀸𑀯𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀲𑀸 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀓𑁂𑀯𑀮𑀁 𑀧𑀦 𑀲𑀳𑀸𑀬𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣 𑀅𑀲𑁂𑀔𑁂𑀳𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀦𑁆𑀦𑀸 𑀲𑀳𑀸𑀬𑀸 𑀏𑀯 𑀲𑀳𑀸𑀬𑀲𑀫𑁆𑀧𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀬𑀸 𑀅𑀬𑀁 𑀯𑀼𑀢𑁆𑀢𑀸 𑀲𑀳𑀸𑀬𑀲𑀫𑁆𑀧𑀤𑀸, 𑀢𑀁 𑀲𑀳𑀸𑀬𑀲𑀫𑁆𑀧𑀤𑀁 𑀅𑀤𑁆𑀥𑀸 𑀧𑀲𑀁𑀲𑀸𑀫, 𑀏𑀓𑀁𑀲𑁂𑀦𑁂𑀯 𑀣𑁄𑀫𑁂𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁? 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸𑀢𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀲𑀻𑀮𑀸𑀤𑀻𑀳𑀺 𑀲𑁂𑀝𑁆𑀞𑁂 𑀲𑁂𑀯𑀫𑀸𑀦𑀲𑁆𑀲 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀦𑁆𑀢𑀺. 𑀲𑀫𑁂 𑀲𑁂𑀯𑀫𑀸𑀦𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀲𑀸𑀥𑀸𑀭𑀡𑁂𑀦 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀯𑀺𑀦𑁄𑀤𑀦𑁂𑀦 𑀘 𑀮𑀤𑁆𑀥𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀏𑀢𑁂 𑀧𑀦 𑀲𑀳𑀸𑀬𑀓𑁂 𑀲𑁂𑀝𑁆𑀞𑁂 𑀘 𑀲𑀫𑁂 𑀘 𑀅𑀮𑀤𑁆𑀥𑀸 𑀓𑀼𑀳𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀢𑀢𑁆𑀣 𑀘 𑀧𑀝𑀺𑀖𑀸𑀦𑀼𑀦𑀬𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀅𑀦𑀯𑀚𑁆𑀚𑀪𑁄𑀚𑀻 𑀳𑀼𑀢𑁆𑀯𑀸 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀅𑀳𑀫𑁆𑀧𑀺 𑀏𑀯𑀁 𑀘𑀭𑀦𑁆𑀢𑁄 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺.

𑀅𑀤𑁆𑀥𑀸𑀧𑀲𑀁𑀲𑀸𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁪. 𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀸 𑀕𑀺𑀫𑁆𑀳𑀲𑀫𑀬𑁂 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀅𑀳𑁄𑀲𑀺, 𑀲𑀦𑁆𑀢𑀺𑀓𑁂 𑀘𑀲𑁆𑀲 𑀯𑀡𑁆𑀡𑀤𑀸𑀲𑀻 𑀕𑁄𑀲𑀻𑀢𑀘𑀦𑁆𑀤𑀦𑀁 𑀧𑀺𑀲𑀢𑀺. 𑀢𑀲𑁆𑀲𑀸 𑀏𑀓𑀩𑀸𑀳𑀸𑀬 𑀏𑀓𑀁 𑀲𑀼𑀯𑀡𑁆𑀡𑀯𑀮𑀬𑀁, 𑀏𑀓𑀩𑀸𑀳𑀸𑀬 𑀤𑁆𑀯𑁂. 𑀢𑀸𑀦𑀺 𑀲𑀗𑁆𑀖𑀝𑁆𑀝𑁂𑀦𑁆𑀢𑀺, 𑀇𑀢𑀭𑀁 𑀦 𑀲𑀗𑁆𑀖𑀝𑁆𑀝𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀯𑀫𑁂𑀯 𑀕𑀡𑀯𑀸𑀲𑁂 𑀲𑀗𑁆𑀖𑀝𑁆𑀝𑀦𑀸, 𑀏𑀓𑀯𑀸𑀲𑁂 𑀅𑀲𑀗𑁆𑀖𑀝𑁆𑀝𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀤𑀸𑀲𑀺𑀁 𑀑𑀮𑁄𑀓𑁂𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀤𑁂𑀯𑀻 𑀢𑀁 𑀩𑀻𑀚𑀬𑀦𑁆𑀢𑀻 𑀞𑀺𑀢𑀸 𑀳𑁄𑀢𑀺. 𑀲𑀸 ‘‘𑀯𑀡𑁆𑀡𑀤𑀸𑀲𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀜𑁆𑀜𑁂 𑀭𑀸𑀚𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀤𑀸𑀲𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀧𑀺𑀲𑀺𑀢𑀼𑀫𑀸𑀭𑀤𑁆𑀥𑀸. 𑀅𑀣𑀲𑁆𑀲𑀸 𑀘 𑀉𑀪𑁄𑀲𑀼 𑀩𑀸𑀳𑀸𑀲𑀼 𑀅𑀦𑁂𑀓𑁂 𑀲𑀼𑀯𑀡𑁆𑀡𑀯𑀮𑀬𑀸, 𑀢𑁂 𑀲𑀗𑁆𑀖𑀝𑁆𑀝𑀬𑀦𑁆𑀢𑀸 𑀫𑀳𑀸𑀲𑀤𑁆𑀤𑀁 𑀚𑀦𑀬𑀺𑀁𑀲𑀼. 𑀭𑀸𑀚𑀸 𑀅𑀢𑀺𑀲𑀼𑀝𑁆𑀞𑀼𑀢𑀭𑀁 𑀦𑀺𑀩𑁆𑀩𑀺𑀦𑁆𑀤𑁄 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄𑀬𑁂𑀯 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀁 𑀅𑀦𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑀁 𑀦𑀺𑀧𑀦𑁆𑀦𑀁 𑀘𑀦𑁆𑀤𑀦𑀳𑀢𑁆𑀣𑀸 𑀤𑁂𑀯𑀻 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀮𑀺𑀫𑁆𑀧𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀲𑁄 ‘‘𑀅𑀧𑁂𑀳𑀺, 𑀫𑀸 𑀆𑀮𑀺𑀫𑁆𑀧𑀸𑀳𑀻’’𑀢𑀺 𑀆𑀳. 𑀲𑀸 ‘‘𑀓𑀺𑀲𑁆𑀲, 𑀫𑀳𑀸𑀭𑀸𑀚𑀸’’𑀢𑀺? 𑀲𑁄 ‘‘𑀦𑀸𑀳𑀁, 𑀭𑀸𑀚𑀸’’𑀢𑀺. 𑀏𑀯𑀫𑁂𑀢𑁂𑀲𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 𑀉𑀧𑀲𑀗𑁆𑀓𑀫𑀺𑀁𑀲𑀼, 𑀢𑁂𑀳𑀺𑀧𑀺 𑀫𑀳𑀸𑀭𑀸𑀚𑀯𑀸𑀤𑁂𑀦 𑀆𑀮𑀧𑀺𑀢𑁄 ‘‘𑀦𑀸𑀳𑀁, 𑀪𑀡𑁂, 𑀭𑀸𑀚𑀸’’𑀢𑀺 𑀆𑀳. 𑀲𑁂𑀲𑀁 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀅𑀬𑀁 𑀧𑀦 𑀕𑀸𑀣𑀸𑀯𑀡𑁆𑀡𑀦𑀸 𑁋 𑀢𑀢𑁆𑀣 𑀤𑀺𑀲𑁆𑀯𑀸𑀢𑀺 𑀑𑀮𑁄𑀓𑁂𑀢𑁆𑀯𑀸. 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀓𑀜𑁆𑀘𑀦𑀲𑁆𑀲. ‘‘𑀯𑀮𑀬𑀸𑀦𑀻’’𑀢𑀺 𑀧𑀸𑀞𑀲𑁂𑀲𑁄. 𑀲𑀸𑀯𑀲𑁂𑀲𑀧𑀤𑀢𑁆𑀣𑁄 𑀳𑀺 𑀅𑀬𑀁 𑀅𑀢𑁆𑀣𑁄. 𑀧𑀪𑀲𑁆𑀲𑀭𑀸𑀦𑀻𑀢𑀺 𑀧𑀪𑀸𑀲𑀦𑀲𑀻𑀮𑀸𑀦𑀺, 𑀚𑀼𑀢𑀺𑀫𑀦𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀤𑀺𑀲𑁆𑀯𑀸 𑀪𑀼𑀚𑀲𑁆𑀫𑀺𑀁 𑀲𑀼𑀯𑀡𑁆𑀡𑀲𑁆𑀲 𑀯𑀮𑀬𑀸𑀦𑀺 ‘‘𑀕𑀡𑀯𑀸𑀲𑁂 𑀲𑀢𑀺 𑀲𑀗𑁆𑀖𑀝𑁆𑀝𑀦𑀸, 𑀏𑀓𑀯𑀸𑀲𑁂 𑀅𑀲𑀗𑁆𑀖𑀝𑁆𑀝𑀦𑀸’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀼𑀯𑀡𑁆𑀡𑀯𑀮𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁫. 𑀏𑀯𑀁 𑀤𑀼𑀢𑀺𑀬𑁂𑀦𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑀳𑀭𑁄𑀯 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 𑁋 ‘‘𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀭𑀚𑁆𑀚𑀁 𑀧𑀭𑀺𑀳𑀭𑀣, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀫𑀘𑁆𑀘𑀸 𑁋 ‘‘𑀫𑀳𑀸𑀭𑀸𑀚, 𑀅𑀭𑀸𑀚𑀓𑀁 𑀭𑀚𑁆𑀚𑀁 𑀅𑀫𑁆𑀳𑁂𑀳𑀺 𑀦 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀁 𑀲𑀸𑀫𑀦𑁆𑀢𑀭𑀸𑀚𑀸𑀦𑁄 𑀆𑀕𑀫𑁆𑀫 𑀯𑀺𑀮𑀼𑀫𑁆𑀧𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀏𑀓𑁄𑀧𑀺 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀆𑀕𑀫𑁂𑀳𑀻’’𑀢𑀺 𑀲𑀜𑁆𑀜𑀸𑀧𑁂𑀲𑀼𑀁. 𑀫𑀼𑀤𑀼𑀘𑀺𑀢𑁆𑀢𑁄 𑀭𑀸𑀚𑀸 𑀅𑀥𑀺𑀯𑀸𑀲𑁂𑀲𑀺. 𑀅𑀣 𑀤𑁂𑀯𑀻 𑀕𑀩𑁆𑀪𑀁 𑀕𑀡𑁆𑀳𑀺. 𑀭𑀸𑀚𑀸 𑀧𑀼𑀦 𑀢𑁂 𑀆𑀡𑀸𑀧𑁂𑀲𑀺 𑁋 ‘‘𑀤𑁂𑀯𑀻 𑀕𑀩𑁆𑀪𑀺𑀦𑀻, 𑀧𑀼𑀢𑁆𑀢𑀁 𑀚𑀸𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀚𑁆𑀚𑀁 𑀧𑀭𑀺𑀳𑀭𑀣, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀫𑀘𑁆𑀘𑀸 ‘‘𑀤𑀼𑀚𑁆𑀚𑀸𑀦𑀁, 𑀫𑀳𑀸𑀭𑀸𑀚, 𑀏𑀢𑀁, 𑀬𑀁 𑀤𑁂𑀯𑀻 𑀧𑀼𑀢𑁆𑀢𑀁 𑀯𑀸 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀥𑀻𑀢𑀭𑀁 𑀯𑀸𑀢𑀺, 𑀢𑀸𑀯 𑀯𑀺𑀚𑀸𑀬𑀦𑀓𑀸𑀮𑀁 𑀆𑀕𑀫𑁂𑀳𑀻’’𑀢𑀺 𑀧𑀼𑀦𑀧𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀲𑀼𑀁. 𑀅𑀣 𑀲𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀤𑀸𑀧𑀺 𑀭𑀸𑀚𑀸 𑀢𑀣𑁂𑀯 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀧𑀼𑀦𑀧𑀺 𑀭𑀸𑀚𑀸𑀦𑀁 𑁋 ‘‘𑀆𑀕𑀫𑁂𑀳𑀺, 𑀫𑀳𑀸𑀭𑀸𑀚, 𑀬𑀸𑀯 𑀧𑀝𑀺𑀩𑀮𑁄 𑀳𑁄𑀢𑀻’’𑀢𑀺 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀲𑀜𑁆𑀜𑀸𑀧𑁂𑀲𑀼𑀁. 𑀢𑀢𑁄 𑀓𑀼𑀫𑀸𑀭𑁂 𑀧𑀝𑀺𑀩𑀮𑁂 𑀚𑀸𑀢𑁂 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀧𑀝𑀺𑀩𑀮𑁄 𑀤𑀸𑀦𑀺 𑀅𑀬𑀁, 𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀝𑀺𑀧𑀚𑁆𑀚𑀣𑀸’’𑀢𑀺 𑀅𑀫𑀘𑁆𑀘𑀸𑀦𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 𑀓𑀸𑀲𑀸𑀬𑀯𑀢𑁆𑀣𑀸𑀤𑀬𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀆𑀳𑀭𑀸𑀧𑁂𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑁂 𑀏𑀯 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀚𑀦𑀓𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄. 𑀲𑀩𑁆𑀩𑀧𑀭𑀺𑀚𑀦𑁄 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀫𑀸𑀦𑁄 𑀭𑀸𑀚𑀸𑀦𑀁 𑀅𑀦𑀼𑀩𑀦𑁆𑀥𑀺. 𑀲𑁄 𑀭𑀸𑀚𑀸 𑀬𑀸𑀯 𑀅𑀢𑁆𑀢𑀦𑁄 𑀭𑀚𑁆𑀚𑀲𑀻𑀫𑀸, 𑀢𑀸𑀯 𑀕𑀦𑁆𑀢𑁆𑀯𑀸 𑀓𑀢𑁆𑀢𑀭𑀤𑀡𑁆𑀟𑁂𑀦 𑀮𑁂𑀔𑀁 𑀆𑀓𑀟𑁆𑀠𑀺𑀢𑁆𑀯𑀸 𑁋 ‘‘𑀅𑀬𑀁 𑀮𑁂𑀔𑀸 𑀦𑀸𑀢𑀺𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 𑀆𑀳. 𑀫𑀳𑀸𑀚𑀦𑁄 𑀮𑁂𑀔𑀸𑀬 𑀲𑀻𑀲𑀁 𑀓𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑁄 𑀧𑀭𑀺𑀤𑁂𑀯𑀫𑀸𑀦𑁄 ‘‘𑀢𑀼𑀬𑁆𑀳𑀁 𑀤𑀸𑀦𑀺, 𑀢𑀸𑀢, 𑀭𑀜𑁆𑀜𑁄 𑀆𑀡𑀸, 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀓𑀼𑀫𑀸𑀭𑀁 𑀮𑁂𑀔𑀁 𑀅𑀢𑀺𑀓𑁆𑀓𑀫𑀸𑀧𑁂𑀲𑀺. 𑀓𑀼𑀫𑀸𑀭𑁄 ‘‘𑀢𑀸𑀢, 𑀢𑀸𑀢𑀸’’𑀢𑀺 𑀥𑀸𑀯𑀺𑀢𑁆𑀯𑀸 𑀭𑀸𑀚𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀸 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀳𑀸𑀚𑀦𑀁 𑀧𑀭𑀺𑀳𑀭𑀦𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺𑀁, 𑀓𑀺𑀁 𑀤𑀸𑀦𑀺 𑀏𑀓𑀁 𑀤𑀸𑀭𑀓𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀢𑀢𑁆𑀣 𑀧𑀼𑀩𑁆𑀩𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀯𑀲𑀺𑀢𑀧𑀡𑁆𑀡𑀲𑀸𑀮𑀁 𑀤𑀺𑀲𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦.

𑀢𑀢𑁄 𑀓𑀼𑀫𑀸𑀭𑁄 𑀯𑀭𑀲𑀬𑀦𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑁄 𑀢𑀺𑀡𑀲𑀦𑁆𑀣𑀸𑀭𑀓𑁂 𑀯𑀸 𑀭𑀚𑁆𑀚𑀼𑀫𑀜𑁆𑀘𑀓𑁂 𑀯𑀸 𑀲𑀬𑀫𑀸𑀦𑁄 𑀭𑁄𑀤𑀢𑀺. 𑀲𑀻𑀢𑀯𑀸𑀢𑀸𑀤𑀻𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘‘𑀲𑀻𑀢𑀁 𑀢𑀸𑀢 𑀉𑀡𑁆𑀳𑀁 𑀢𑀸𑀢 𑀫𑀓𑀲𑀸 𑀢𑀸𑀢 𑀟𑀁𑀲𑀦𑁆𑀢𑀺. 𑀙𑀸𑀢𑁄𑀫𑁆𑀳𑀺 𑀢𑀸𑀢, 𑀧𑀺𑀧𑀸𑀲𑀺𑀢𑁄𑀫𑁆𑀳𑀺 𑀢𑀸𑀢𑀸’’𑀢𑀺 𑀯𑀤𑀢𑀺. 𑀭𑀸𑀚𑀸 𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑁄𑀬𑁂𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀤𑀺𑀯𑀸𑀧𑀺𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀁 𑀉𑀧𑀦𑀸𑀫𑁂𑀲𑀺, 𑀓𑀼𑀫𑀸𑀭𑁄 𑀫𑀺𑀲𑁆𑀲𑀓𑀪𑀢𑁆𑀢𑀁 𑀓𑀗𑁆𑀕𑀼𑀯𑀭𑀓𑀫𑀼𑀕𑁆𑀕𑀸𑀤𑀺𑀩𑀳𑀼𑀮𑀁 𑀅𑀘𑁆𑀙𑀸𑀤𑁂𑀦𑁆𑀢𑀫𑁆𑀧𑀺 𑀢𑀁 𑀚𑀺𑀖𑀘𑁆𑀙𑀸𑀯𑀲𑁂𑀦 𑀪𑀼𑀜𑁆𑀚𑀫𑀸𑀦𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀉𑀡𑁆𑀳𑁂 𑀞𑀧𑀺𑀢𑀧𑀤𑀼𑀫𑀁 𑀯𑀺𑀬 𑀫𑀺𑀮𑀸𑀬𑀺. 𑀭𑀸𑀚𑀸 𑀧𑀦 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀦𑀺𑀩𑁆𑀩𑀺𑀓𑀸𑀭𑁄 𑀪𑀼𑀜𑁆𑀚𑀢𑀺. 𑀢𑀢𑁄 𑀲𑁄 𑀓𑀼𑀫𑀸𑀭𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀆𑀳 𑁋 ‘‘𑀦𑀕𑀭𑁂, 𑀢𑀸𑀢, 𑀧𑀡𑀻𑀢𑀸𑀳𑀸𑀭𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. 𑀓𑀼𑀫𑀸𑀭𑁄 ‘‘𑀆𑀫, 𑀢𑀸𑀢𑀸’’𑀢𑀺. 𑀢𑀢𑁄 𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀦𑀺𑀯𑀢𑁆𑀢𑀺. 𑀓𑀼𑀫𑀸𑀭𑀫𑀸𑀢𑀸𑀧𑀺 𑀤𑁂𑀯𑀻 ‘‘𑀦 𑀤𑀸𑀦𑀺 𑀭𑀸𑀚𑀸 𑀓𑀼𑀫𑀸𑀭𑀁 𑀕𑀡𑁆𑀳𑀺𑀢𑁆𑀯𑀸 𑀅𑀭𑀜𑁆𑀜𑁂 𑀘𑀺𑀭𑀁 𑀯𑀲𑀺𑀲𑁆𑀲𑀢𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀦𑀺𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑀸 𑀓𑀢𑁆𑀢𑀭𑀤𑀡𑁆𑀟𑁂𑀦 𑀮𑀺𑀔𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀢𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀯𑀢𑀺𑀬𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘‘𑀏𑀢𑁆𑀣 𑀢𑁂, 𑀢𑀸𑀢, 𑀫𑀸𑀢𑀸 𑀦𑀺𑀲𑀺𑀦𑁆𑀦𑀸, 𑀕𑀘𑁆𑀙𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀬𑀸𑀯 𑀲𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀉𑀤𑀺𑀓𑁆𑀔𑀦𑁆𑀢𑁄 𑀅𑀝𑁆𑀞𑀸𑀲𑀺 𑁋 ‘‘𑀫𑀸 𑀳𑁂𑀯 𑀦𑀁 𑀓𑁄𑀘𑀺 𑀯𑀺𑀳𑁂𑀞𑁂𑀬𑁆𑀬𑀸’’𑀢𑀺. 𑀓𑀼𑀫𑀸𑀭𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀥𑀸𑀯𑀦𑁆𑀢𑁄 𑀅𑀕𑀫𑀸𑀲𑀺.

𑀆𑀭𑀓𑁆𑀔𑀧𑀼𑀭𑀺𑀲𑀸 𑀓𑀼𑀫𑀸𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀤𑁂𑀯𑀺𑀬𑀸 𑀆𑀭𑁄𑀘𑁂𑀲𑀺. 𑀤𑁂𑀯𑀻 𑀯𑀻𑀲𑀢𑀺𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀲𑀺. 𑀭𑀜𑁆𑀜𑁄 𑀘 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. ‘‘𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀭𑀸𑀚𑀸𑀧𑀺 𑀢𑀸𑀯𑀤𑁂𑀯 𑀲𑀓𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀭𑀸𑀚𑀸𑀦𑀁 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑀢𑁄 𑀤𑁂𑀯𑀻 𑀦𑀺𑀭𑀸𑀲𑀸𑀯 𑀳𑀼𑀢𑁆𑀯𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀭𑀸𑀚𑀸𑀧𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀯𑀸 𑀫𑀜𑁆𑀚𑀽𑀲𑀓𑀭𑀼𑀓𑁆𑀔𑀫𑀽𑀮𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺. 𑀲𑀸 𑀅𑀢𑁆𑀣𑀢𑁄 𑀉𑀢𑁆𑀢𑀸𑀦𑀸 𑀏𑀯.

𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑁆𑀯𑀸𑀬𑀁 𑀏𑀓𑁂𑀦 𑀤𑀼𑀢𑀺𑀬𑁂𑀦 𑀓𑀼𑀫𑀸𑀭𑁂𑀦 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀦𑀺𑀯𑁂𑀤𑁂𑀦𑁆𑀢𑁂𑀦 𑀲𑀳𑀯𑀸𑀲𑁂𑀦 𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀫𑀫 𑀯𑀸𑀘𑀸𑀪𑀺𑀮𑀸𑀧𑁄 𑀢𑀲𑁆𑀫𑀺𑀁 𑀲𑀺𑀦𑁂𑀳𑀯𑀲𑁂𑀦 𑀅𑀪𑀺𑀲𑀚𑁆𑀚𑀦𑀸 𑀯𑀸 𑀚𑀸𑀢𑀸. 𑀲𑀘𑀸𑀳𑀁 𑀇𑀫𑀁 𑀦 𑀧𑀭𑀺𑀘𑁆𑀘𑀚𑀸𑀫𑀺, 𑀢𑀢𑁄 𑀆𑀬𑀢𑀺𑀫𑁆𑀧𑀺 𑀢𑀣𑁂𑀯 𑀳𑁂𑀲𑁆𑀲𑀢𑀺, 𑀬𑀣𑀸 𑀇𑀤𑀸𑀦𑀺, 𑀏𑀯𑀁 𑀤𑀼𑀢𑀺𑀬𑁂𑀦 𑀲𑀳 𑀫𑀫𑀲𑁆𑀲 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸. ‘‘𑀉𑀪𑀬𑀫𑁆𑀧𑁂𑀢𑀁 𑀅𑀦𑁆𑀢𑀭𑀸𑀬𑀓𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲𑀸’’𑀢𑀺 𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀫𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀬𑀢𑀺𑀪𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁬. 𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑀳𑀭𑁄𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺. 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀲𑁄 𑀤𑀳𑀭𑁄𑀯 𑀲𑀫𑀸𑀦𑁄 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺, 𑀢𑁂 𑀦𑀁 𑀦𑀺𑀯𑀸𑀭𑁂𑀦𑁆𑀢𑀺. 𑀲𑁄 𑀢𑀣𑁂𑀯 𑀦𑀺𑀩𑀦𑁆𑀥𑀢𑀺. 𑀧𑀼𑀦𑀧𑀺 𑀦𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀢𑁆𑀯𑀁, 𑀢𑀸𑀢, 𑀲𑀼𑀔𑀼𑀫𑀸𑀮𑁄, 𑀤𑀼𑀓𑁆𑀓𑀭𑀸 𑀧𑀩𑁆𑀩𑀚𑁆𑀚𑀸, 𑀔𑀼𑀭𑀥𑀸𑀭𑀸𑀬 𑀉𑀧𑀭𑀺 𑀘𑀗𑁆𑀓𑀫𑀦𑀲𑀤𑀺𑀲𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀦𑀺𑀯𑀸𑀭𑁂𑀦𑁆𑀢𑀺. 𑀲𑁄 𑀢𑀣𑁂𑀯 𑀦𑀺𑀩𑀦𑁆𑀥𑀢𑀺. 𑀢𑁂 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑀸𑀬𑀁 𑀧𑀩𑁆𑀩𑀚𑀢𑀺, 𑀅𑀫𑁆𑀳𑀸𑀓𑀁 𑀤𑁄𑀫𑀦𑀲𑁆𑀲𑀁 𑀳𑁄𑀢𑀺. 𑀲𑀘𑁂 𑀦𑀁 𑀦𑀺𑀯𑀸𑀭𑁂𑀫, 𑀏𑀢𑀲𑁆𑀲 𑀤𑁄𑀫𑀦𑀲𑁆𑀲𑀁 𑀳𑁄𑀢𑀺. 𑀅𑀧𑀺𑀘 𑀅𑀫𑁆𑀳𑀸𑀓𑀁 𑀤𑁄𑀫𑀦𑀲𑁆𑀲𑀁 𑀳𑁄𑀢𑀼, 𑀫𑀸 𑀘 𑀏𑀢𑀲𑁆𑀲𑀸’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼. 𑀢𑀢𑁄 𑀲𑁄 𑀲𑀩𑁆𑀩𑀁 𑀧𑀭𑀺𑀚𑀦𑀁 𑀧𑀭𑀺𑀤𑁂𑀯𑀫𑀸𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀢𑀲𑁆𑀲 𑀉𑀴𑀸𑀭𑀲𑁂𑀦𑀸𑀲𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀫𑀜𑁆𑀘𑀓𑁂 𑀢𑀝𑁆𑀝𑀺𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀲𑀬𑀺. 𑀲𑁄 𑀯𑀭𑀲𑀬𑀦𑁂 𑀓𑀢𑀧𑀭𑀺𑀘𑀬𑁄 𑀲𑀩𑁆𑀩𑀭𑀢𑁆𑀢𑀺𑀁 𑀅𑀢𑀺𑀤𑀼𑀓𑁆𑀔𑀺𑀢𑁄 𑀅𑀳𑁄𑀲𑀺. 𑀧𑀪𑀸𑀢𑁂 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀢𑁆𑀣 𑀯𑀼𑀟𑁆𑀠𑀸 𑀅𑀕𑁆𑀕𑀸𑀲𑀦𑀜𑁆𑀘 𑀅𑀕𑁆𑀕𑀧𑀺𑀡𑁆𑀟𑀜𑁆𑀘 𑀮𑀪𑀦𑁆𑀢𑀺, 𑀦𑀯𑀓𑀸 𑀬𑀁𑀓𑀺𑀜𑁆𑀘𑀺𑀤𑁂𑀯 𑀆𑀲𑀦𑀮𑀽𑀔𑀁 𑀪𑁄𑀚𑀦𑀜𑁆𑀘. 𑀲𑁄 𑀢𑁂𑀦 𑀮𑀽𑀔𑀪𑁄𑀚𑀦𑁂𑀦𑀸𑀧𑀺 𑀅𑀢𑀺𑀤𑀼𑀓𑁆𑀔𑀺𑀢𑁄 𑀅𑀳𑁄𑀲𑀺. 𑀲𑁄 𑀓𑀢𑀺𑀧𑀸𑀳𑀁𑀬𑁂𑀯 𑀓𑀺𑀲𑁄 𑀤𑀼𑀩𑁆𑀩𑀡𑁆𑀡𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀺𑀚𑁆𑀚𑀺, 𑀬𑀣𑀸 𑀢𑀁 𑀅𑀧𑀭𑀺𑀧𑀓𑁆𑀓𑀕𑀢𑁂 𑀲𑀫𑀡𑀥𑀫𑁆𑀫𑁂. 𑀢𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺. 𑀲𑁄 𑀓𑀢𑀺𑀧𑀸𑀳𑀁𑀬𑁂𑀯 𑀩𑀮𑀁 𑀕𑀳𑁂𑀢𑁆𑀯𑀸 𑀧𑀼𑀦𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀢𑀢𑁄 𑀤𑀼𑀢𑀺𑀬𑀫𑁆𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀦𑀧𑀺 𑀉𑀧𑁆𑀧𑀩𑁆𑀩𑀚𑀺. 𑀢𑀢𑀺𑀬𑀯𑀸𑀭𑁂 𑀧𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀯𑀺𑀧𑀲𑁆𑀲𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀇𑀫𑀫𑁂𑀯 𑀩𑁆𑀬𑀸𑀓𑀭𑀡𑀕𑀸𑀣𑀫𑁆𑀧𑀺 𑀅𑀪𑀸𑀲𑀺.

𑀢𑀢𑁆𑀣 𑀓𑀸𑀫𑀸𑀢𑀺 𑀤𑁆𑀯𑁂 𑀓𑀸𑀫𑀸 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀺𑀮𑁂𑀲𑀓𑀸𑀫𑁄 𑀘. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑁄 𑀦𑀸𑀫 𑀧𑀺𑀬𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀥𑀫𑁆𑀫𑁄, 𑀓𑀺𑀮𑁂𑀲𑀓𑀸𑀫𑁄 𑀦𑀸𑀫 𑀲𑀩𑁆𑀩𑁄 𑀭𑀸𑀕𑀧𑁆𑀧𑀪𑁂𑀤𑁄. 𑀇𑀥 𑀧𑀦 𑀯𑀢𑁆𑀣𑀼𑀓𑀸𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀭𑀽𑀧𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀯𑀲𑁂𑀦 𑀘𑀺𑀢𑁆𑀭𑀸. 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀫𑀥𑀼𑀭𑀸. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀫𑀦𑀁 𑀭𑀫𑀸𑀧𑁂𑀦𑁆𑀢𑀻𑀢𑀺 𑀫𑀦𑁄𑀭𑀫𑀸. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀯𑀺𑀥𑁂𑀦 𑀭𑀽𑀧𑁂𑀦, 𑀅𑀦𑁂𑀓𑀯𑀺𑀥𑁂𑀦 𑀲𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀳𑀺 𑀭𑀽𑀧𑀸𑀤𑀺𑀯𑀲𑁂𑀦 𑀘𑀺𑀢𑁆𑀭𑀸, 𑀭𑀽𑀧𑀸𑀤𑀻𑀲𑀼𑀧𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀭𑀽𑀧𑀸. 𑀏𑀯𑀁 𑀢𑁂𑀦 𑀢𑁂𑀦 𑀯𑀺𑀭𑀽𑀧𑀭𑀽𑀧𑁂𑀦 𑀢𑀣𑀸 𑀢𑀣𑀸 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁, 𑀧𑀩𑁆𑀩𑀚𑁆𑀚𑀸𑀬 𑀅𑀪𑀺𑀭𑀫𑀺𑀢𑀼𑀁 𑀦 𑀤𑁂𑀦𑁆𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀯𑀸 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀫𑀕𑀸𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀸𑀫𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁭. 𑀈𑀢𑀻 𑀘𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀭𑀜𑁆𑀜𑁄 𑀕𑀡𑁆𑀟𑁄 𑀉𑀤𑀧𑀸𑀤𑀺, 𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀟𑁆𑀠𑀦𑁆𑀢𑀺. 𑀯𑁂𑀚𑁆𑀚𑀸 ‘‘𑀲𑀢𑁆𑀣𑀓𑀫𑁆𑀫𑁂𑀦 𑀯𑀺𑀦𑀸 𑀨𑀸𑀲𑀼 𑀦 𑀳𑁄𑀢𑀻’’𑀢𑀺 𑀪𑀡𑀦𑁆𑀢𑀺. 𑀭𑀸𑀚𑀸 𑀢𑁂𑀲𑀁 𑀅𑀪𑀬𑀁 𑀤𑀢𑁆𑀯𑀸 𑀲𑀢𑁆𑀣𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀺. 𑀢𑁂 𑀢𑀁 𑀨𑀸𑀮𑁂𑀢𑁆𑀯𑀸 𑀧𑀼𑀩𑁆𑀩𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀦𑀺𑀯𑁂𑀤𑀦𑀁 𑀓𑀢𑁆𑀯𑀸 𑀯𑀡𑀁 𑀧𑀺𑀮𑁄𑀢𑀺𑀓𑁂𑀦 𑀩𑀦𑁆𑀥𑀺𑀁𑀲𑀼. 𑀮𑀽𑀔𑀫𑀁𑀲𑀸𑀳𑀸𑀭𑁂𑀲𑀼 𑀘 𑀦𑀁 𑀲𑀫𑁆𑀫𑀸 𑀑𑀯𑀤𑀺𑀁𑀲𑀼. 𑀭𑀸𑀚𑀸 𑀮𑀽𑀔𑀪𑁄𑀚𑀦𑁂𑀦 𑀓𑀺𑀲𑀲𑀭𑀻𑀭𑁄 𑀅𑀳𑁄𑀲𑀺, 𑀕𑀡𑁆𑀟𑁄 𑀘𑀲𑁆𑀲 𑀫𑀺𑀮𑀸𑀬𑀺. 𑀲𑁄 𑀨𑀸𑀲𑀼𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀲𑀺𑀦𑀺𑀤𑁆𑀥𑀸𑀳𑀸𑀭𑀁 𑀪𑀼𑀜𑁆𑀚𑀺, 𑀢𑁂𑀦 𑀲𑀜𑁆𑀚𑀸𑀢𑀩𑀮𑁄 𑀯𑀺𑀲𑀬𑁂𑀬𑁂𑀯 𑀧𑀝𑀺𑀲𑁂𑀯𑀺, 𑀢𑀲𑁆𑀲 𑀕𑀡𑁆𑀟𑁄 𑀧𑀼𑀭𑀺𑀫𑀲𑀪𑀸𑀯𑀫𑁂𑀯 𑀲𑀫𑁆𑀧𑀸𑀧𑀼𑀡𑀺. 𑀏𑀯𑀁 𑀬𑀸𑀯 𑀢𑀺𑀓𑁆𑀔𑀢𑁆𑀢𑀼𑀁 𑀲𑀢𑁆𑀣𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑁂𑀚𑁆𑀚𑁂𑀳𑀺 𑀧𑀭𑀺𑀯𑀚𑁆𑀚𑀺𑀢𑁄 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀢𑁆𑀢𑀳𑀺 𑀯𑀲𑁆𑀲𑁂𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀪𑀸𑀲𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺.

𑀢𑀢𑁆𑀣 𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀪𑀸𑀕𑀻𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸𑀧𑀺 𑀏𑀢𑁂 𑀅𑀦𑁂𑀓𑀩𑁆𑀬𑀲𑀦𑀸𑀯𑀳𑀝𑁆𑀞𑁂𑀦 𑀅𑀦𑀢𑁆𑀣𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑁂𑀦 𑀘 𑀈𑀢𑀺. 𑀕𑀡𑁆𑀟𑁄𑀧𑀺 𑀅𑀲𑀼𑀘𑀺𑀁 𑀧𑀕𑁆𑀖𑀭𑀢𑀺, 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀭𑀺𑀪𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀸 𑀏𑀢𑁂 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀭𑀺𑀪𑀺𑀦𑁆𑀦𑀪𑀸𑀯𑀢𑁄 𑀘 𑀕𑀡𑁆𑀟𑁄. 𑀉𑀧𑀤𑁆𑀤𑀯𑀢𑀻𑀢𑀺 𑀉𑀧𑀤𑁆𑀤𑀯𑁄, 𑀅𑀦𑀢𑁆𑀣𑀁 𑀚𑀦𑁂𑀦𑁆𑀢𑁄 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄, 𑀭𑀸𑀕𑀕𑀡𑁆𑀟𑀸𑀤𑀻𑀦𑀫𑁂𑀢𑀫𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸𑀧𑁂𑀢𑁂 𑀅𑀯𑀺𑀤𑀺𑀢𑀦𑀺𑀩𑁆𑀩𑀸𑀦𑀢𑁆𑀣𑀸𑀯𑀳𑀳𑁂𑀢𑀼𑀢𑀸𑀬 𑀲𑀩𑁆𑀩𑀼𑀧𑀤𑁆𑀤𑀯𑀓𑀫𑁆𑀫𑀧𑀭𑀺𑀯𑀢𑁆𑀣𑀼𑀢𑀸𑀬 𑀘 𑀉𑀧𑀤𑁆𑀤𑀯𑁄. 𑀬𑀲𑁆𑀫𑀸 𑀧𑀦𑁂𑀢𑁂 𑀓𑀺𑀮𑁂𑀲𑀸𑀢𑀼𑀭𑀪𑀸𑀯𑀁 𑀚𑀦𑁂𑀦𑁆𑀢𑀸 𑀲𑀻𑀮𑀲𑀗𑁆𑀔𑀸𑀢𑀁 𑀆𑀭𑁄𑀕𑁆𑀬𑀁 𑀮𑁄𑀮𑀼𑀧𑁆𑀧𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀸 𑀧𑀸𑀓𑀢𑀺𑀓𑀫𑁂𑀯 𑀆𑀭𑁄𑀕𑁆𑀬𑀁 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀆𑀭𑁄𑀕𑁆𑀬𑀯𑀺𑀮𑀼𑀫𑁆𑀧𑀦𑀝𑁆𑀞𑁂𑀦 𑀭𑁄𑀕𑁄. 𑀅𑀩𑁆𑀪𑀦𑁆𑀢𑀭𑀫𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀧𑀦 𑀅𑀦𑁆𑀢𑁄𑀢𑀼𑀤𑀦𑀝𑁆𑀞𑁂𑀦 𑀘 𑀤𑀼𑀦𑁆𑀦𑀻𑀳𑀭𑀡𑀻𑀬𑀝𑁆𑀞𑁂𑀦 𑀘 𑀲𑀮𑁆𑀮𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑀬𑀸𑀯𑀳𑀦𑀢𑁄 𑀪𑀬𑀁. 𑀫𑁂 𑀏𑀢𑀦𑁆𑀢𑀺 𑀫𑁂𑀢𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀈𑀢𑀺𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁮. 𑀲𑀻𑀢𑀜𑁆𑀘𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀲𑀻𑀢𑀸𑀮𑀼𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀢𑀺𑀡𑀓𑀼𑀝𑀺𑀓𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀲𑀻𑀢𑁂 𑀲𑀻𑀢𑀁, 𑀉𑀡𑁆𑀳𑁂 𑀤𑀡𑁆𑀳𑀫𑁂𑀯 𑀳𑁄𑀢𑀺 𑀅𑀩𑁆𑀪𑁄𑀓𑀸𑀲𑀢𑁆𑀢𑀸 𑀧𑀤𑁂𑀲𑀲𑁆𑀲. 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀸 𑀬𑀸𑀯𑀤𑀢𑁆𑀣𑀁 𑀦 𑀮𑀩𑁆𑀪𑀢𑀺, 𑀧𑀸𑀦𑀻𑀬𑀫𑁆𑀧𑀺 𑀤𑀼𑀮𑁆𑀮𑀪𑀁, 𑀯𑀸𑀢𑀸𑀢𑀧𑀟𑀁𑀲𑀲𑀭𑀻𑀲𑀧𑀸𑀧𑀺 𑀩𑀸𑀥𑁂𑀦𑁆𑀢𑀺. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀢𑁄 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀲𑀫𑁆𑀧𑀦𑁆𑀦𑁄 𑀧𑀤𑁂𑀲𑁄, 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀏𑀢𑁂 𑀧𑀭𑀺𑀲𑁆𑀲𑀬𑀸 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀢𑀢𑁆𑀣 𑀕𑀘𑁆𑀙𑁂𑀬𑁆𑀬𑀁, 𑀨𑀸𑀲𑀼𑀓𑀁 𑀯𑀺𑀳𑀭𑀦𑁆𑀢𑁂𑀦 𑀲𑀓𑁆𑀓𑀸 𑀲𑀼𑀔𑀫𑀥𑀺𑀕𑀦𑁆𑀢𑀼’’𑀦𑁆𑀢𑀺? 𑀢𑀲𑁆𑀲 𑀧𑀼𑀦 𑀅𑀳𑁄𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀧𑀘𑁆𑀘𑀬𑀕𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀏𑀯𑀭𑀽𑀧𑀜𑁆𑀘 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀺, 𑀦 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦 𑀅𑀕𑀫𑀸𑀲𑀺. 𑀏𑀯𑀁 𑀬𑀸𑀯𑀢𑀢𑀺𑀬𑀓𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀲𑀺. 𑀢𑀢𑁄 𑀢𑀢𑁆𑀣𑁂𑀯 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀪𑀸𑀲𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺.

𑀢𑀢𑁆𑀣 𑀲𑀻𑀢𑀜𑁆𑀘𑀸𑀢𑀺 𑀲𑀻𑀢𑀁 𑀤𑀼𑀯𑀺𑀥𑀁 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀜𑁆𑀘 𑀩𑀸𑀳𑀺𑀭𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀜𑁆𑀘, 𑀢𑀣𑀸 𑀉𑀡𑁆𑀳𑀫𑁆𑀧𑀺. 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀤𑀻𑀖𑀚𑀸𑀢𑀺𑀓𑀸 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀻𑀢𑀸𑀮𑀼𑀓𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁯. 𑀦𑀸𑀕𑁄𑀯𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀗𑁆𑀓𑀢𑁄 𑀦𑀺𑀭𑀬𑁂 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀏𑀯 𑀧𑀘𑁆𑀘𑀺𑀢𑁆𑀯𑀸, 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀳𑀢𑁆𑀣𑀺𑀬𑁄𑀦𑀺𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀧𑀤𑀼𑀫𑀯𑀡𑁆𑀡𑀲𑀓𑀮𑀲𑀭𑀻𑀭𑁄 𑀉𑀴𑀸𑀭𑁄 𑀬𑀽𑀣𑀧𑀢𑀺 𑀫𑀳𑀸𑀦𑀸𑀕𑁄 𑀅𑀳𑁄𑀲𑀺. 𑀢𑀲𑁆𑀲 𑀑𑀪𑀕𑁆𑀕𑁄𑀪𑀕𑁆𑀕𑀲𑀸𑀔𑀸𑀪𑀗𑁆𑀕𑀸𑀦𑀺 𑀳𑀢𑁆𑀣𑀺𑀙𑀸𑀧𑀸𑀯 𑀔𑀸𑀤𑀦𑁆𑀢𑀺, 𑀑𑀕𑀸𑀳𑁂𑀧𑀺 𑀦𑀁 𑀳𑀢𑁆𑀣𑀺𑀦𑀺𑀬𑁄 𑀓𑀤𑁆𑀤𑀫𑁂𑀦 𑀯𑀺𑀮𑀺𑀫𑁆𑀧𑀺𑀁𑀲𑀼, 𑀲𑀩𑁆𑀩𑀁 𑀧𑀸𑀮𑀺𑀮𑁂𑀬𑁆𑀬𑀓𑀦𑀸𑀕𑀲𑁆𑀲𑁂𑀯 𑀅𑀳𑁄𑀲𑀺. 𑀲𑁄 𑀬𑀽𑀣𑀸 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀦𑀁 𑀧𑀤𑀸𑀦𑀼𑀲𑀸𑀭𑁂𑀦 𑀬𑀽𑀣𑀸 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀧𑀓𑁆𑀓𑀦𑁆𑀢𑀫𑁆𑀧𑀺 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯. 𑀢𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀦𑀢𑁆𑀢𑀓𑁄 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀬𑀁𑀦𑀽𑀦𑀸𑀳𑀁 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀬𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑁂𑀬𑁆𑀬𑀁. 𑀢𑀢𑁆𑀭 𑀲𑁄 𑀫𑀁 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀭𑀢𑁆𑀢𑀺𑀬𑀁 𑀦𑀺𑀤𑁆𑀤𑀼𑀧𑀕𑀢𑁂 𑀬𑀽𑀣𑁂 𑀬𑀽𑀣𑀁 𑀧𑀳𑀸𑀬 𑀢𑀫𑁂𑀯 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀳𑀢𑁆𑀣𑀺𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀲𑀺. 𑀳𑀢𑁆𑀣𑀻 𑀭𑀸𑀚𑀸𑀦𑀫𑁂𑀯 𑀅𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀭𑀸𑀚𑀸 ‘‘𑀫𑀁 𑀅𑀪𑀺𑀫𑀼𑀔𑁄 𑀏𑀢𑀻’’𑀢𑀺 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀳𑀢𑁆𑀣𑀻 ‘‘𑀯𑀺𑀚𑁆𑀛𑁂𑀬𑁆𑀬𑀸𑀧𑀺 𑀫𑀁 𑀏𑀲𑁄’’𑀢𑀺 𑀫𑀸𑀦𑀼𑀲𑀺𑀓𑀸𑀬 𑀯𑀸𑀘𑀸𑀬 ‘‘𑀩𑁆𑀭𑀳𑁆𑀫𑀤𑀢𑁆𑀢, 𑀫𑀸 𑀫𑀁 𑀯𑀺𑀚𑁆𑀛, 𑀅𑀳𑀁 𑀢𑁂 𑀅𑀬𑁆𑀬𑀓𑁄’’𑀢𑀺 𑀆𑀳. 𑀭𑀸𑀚𑀸 ‘‘𑀓𑀺𑀁 𑀪𑀡𑀲𑀻’’𑀢𑀺 𑀲𑀩𑁆𑀩𑀁 𑀧𑀼𑀘𑁆𑀙𑀺. 𑀳𑀢𑁆𑀣𑀻𑀧𑀺 𑀭𑀚𑁆𑀚𑁂 𑀘 𑀦𑀭𑀓𑁂 𑀘 𑀳𑀢𑁆𑀣𑀺𑀬𑁄𑀦𑀺𑀬𑀜𑁆𑀘 𑀧𑀯𑀢𑁆𑀢𑀺𑀁 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀼𑀦𑁆𑀤𑀭𑀁 𑀫𑀸 𑀪𑀸𑀬𑀺, 𑀫𑀸 𑀓𑀜𑁆𑀘𑀺 𑀪𑀺𑀁𑀲𑀸𑀧𑁂𑀳𑀻’’𑀢𑀺 𑀳𑀢𑁆𑀣𑀺𑀦𑁄 𑀯𑀝𑁆𑀝𑀜𑁆𑀘 𑀆𑀭𑀓𑁆𑀔𑀓𑁂 𑀘 𑀳𑀢𑁆𑀣𑀺𑀪𑀡𑁆𑀟𑁂 𑀘 𑀉𑀧𑀝𑁆𑀞𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 ‘‘𑀅𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣𑀸𑀧𑀺 𑀕𑀡𑀲𑀁𑀯𑀸𑀲𑀲𑀗𑁆𑀖𑀝𑁆𑀝𑀦𑀁 𑀅𑀲𑀳𑀦𑁆𑀢𑁄 𑀇𑀥𑀸𑀕𑀢𑁄𑀲𑀺, 𑀅𑀳𑁄 𑀤𑀼𑀓𑁆𑀔𑁄𑀯 𑀕𑀡𑀲𑀁𑀯𑀸𑀲𑁄, 𑀏𑀓𑀻𑀪𑀸𑀯𑁄 𑀏𑀯 𑀧𑀦 𑀲𑀼𑀔𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑀁 𑀅𑀫𑀘𑁆𑀘𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀡𑀺𑀧𑀸𑀢𑀁 𑀓𑀢𑁆𑀯𑀸 ‘‘𑀬𑀸𑀦𑀓𑀸𑀮𑁄, 𑀫𑀳𑀸𑀭𑀸𑀚𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 ‘‘𑀦𑀸𑀳𑀁, 𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀲𑀸 𑀧𑀤𑀢𑁆𑀣𑀢𑁄 𑀧𑀸𑀓𑀝𑀸 𑀏𑀯.

𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀲𑀸 𑀘 𑀔𑁄 𑀬𑀼𑀢𑁆𑀢𑀺𑀯𑀲𑁂𑀦𑁂𑀯, 𑀦 𑀅𑀦𑀼𑀲𑁆𑀲𑀯𑀯𑀲𑁂𑀦. 𑀬𑀣𑀸 𑀅𑀬𑀁 𑀳𑀢𑁆𑀣𑀻 𑀅𑀭𑀺𑀬𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀤𑀦𑁆𑀢𑀢𑁆𑀢𑀸 𑀅𑀤𑀦𑁆𑀢𑀪𑀽𑀫𑀺𑀁 𑀦𑀸𑀕𑀘𑁆𑀙𑀢𑀻𑀢𑀺 𑀯𑀸, 𑀲𑀭𑀻𑀭𑀫𑀳𑀦𑁆𑀢𑀢𑀸𑀬 𑀯𑀸 𑀦𑀸𑀕𑁄, 𑀏𑀯𑀁 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀺𑀬𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀤𑀦𑁆𑀢𑀢𑁆𑀢𑀸 𑀅𑀤𑀦𑁆𑀢𑀪𑀽𑀫𑀺𑀁 𑀦𑀸𑀕𑀫𑀦𑁂𑀦, 𑀆𑀕𑀼𑀫𑀓𑀭𑀡𑁂𑀦, 𑀧𑀼𑀦 𑀇𑀢𑁆𑀣𑀢𑁆𑀢𑀁 𑀅𑀦𑀸𑀕𑀫𑀦𑁂𑀦 𑀘 𑀕𑀼𑀡𑀲𑀭𑀻𑀭𑀫𑀳𑀦𑁆𑀢𑀢𑀸𑀬 𑀯𑀸 𑀦𑀸𑀕𑁄 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸 𑀏𑀓𑀘𑀭𑀺𑀬𑀲𑀼𑀔𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀕𑀡𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀏𑀓𑀯𑀺𑀳𑀸𑀭𑀲𑀼𑀔𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂 𑀅𑀢𑁆𑀢𑀦𑁄 𑀬𑀣𑀸 𑀬𑀣𑀸 𑀲𑀼𑀔𑀁, 𑀢𑀣𑀸 𑀢𑀣𑀸 𑀬𑀢𑁆𑀢𑀓𑀁 𑀯𑀸 𑀇𑀘𑁆𑀙𑀸𑀫𑀺, 𑀢𑀢𑁆𑀢𑀓𑀁 𑀅𑀭𑀜𑁆𑀜𑁂 𑀦𑀺𑀯𑀸𑀲𑀁 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀏𑀓𑁄 𑀘𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀘𑁂𑀲 𑀲𑀼𑀲𑀡𑁆𑀞𑀺𑀢𑀓𑁆𑀔𑀦𑁆𑀥𑀫𑀳𑀦𑁆𑀢𑀢𑀸𑀬 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀅𑀲𑁂𑀔𑀲𑀻𑀮𑀓𑁆𑀔𑀦𑁆𑀥𑀫𑀳𑀦𑁆𑀢𑀢𑀸𑀬 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀧𑀤𑀼𑀫𑀲𑀤𑀺𑀲𑀕𑀢𑁆𑀢𑀢𑀸𑀬 𑀯𑀸, 𑀧𑀤𑀼𑀫𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑀸𑀬 𑀯𑀸 𑀧𑀤𑀼𑀫𑀻, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀧𑀤𑀼𑀫𑀲𑀤𑀺𑀲𑀉𑀚𑀼𑀓𑀢𑀸𑀬 𑀯𑀸, 𑀅𑀭𑀺𑀬𑀚𑀸𑀢𑀺𑀧𑀤𑀼𑀫𑁂 𑀉𑀧𑁆𑀧𑀦𑁆𑀦𑀢𑀸𑀬 𑀯𑀸 𑀧𑀤𑀼𑀫𑀻 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀣𑀸𑀫𑀩𑀮𑀸𑀤𑀻𑀳𑀺 𑀉𑀴𑀸𑀭𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸𑀤𑀻𑀳𑀺 𑀲𑀻𑀮𑀲𑀫𑀸𑀥𑀺𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀤𑀻𑀳𑀺 𑀯𑀸 𑀉𑀴𑀸𑀭𑁄 𑀪𑀯𑁂𑀬𑁆𑀬𑀦𑁆𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺.

𑀦𑀸𑀕𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁦. 𑀅𑀝𑁆𑀞𑀸𑀦𑀢𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀧𑀼𑀢𑁆𑀢𑁄 𑀤𑀳𑀭𑁄 𑀏𑀯 𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺. 𑀫𑀸𑀢𑀸𑀧𑀺𑀢𑀭𑁄 𑀦𑀁 𑀦𑀺𑀯𑀸𑀭𑁂𑀦𑁆𑀢𑀺. 𑀲𑁄 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀦𑀺𑀩𑀦𑁆𑀥𑀢𑀺𑀬𑁂𑀯 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀬 𑀲𑀩𑁆𑀩𑀁 𑀯𑀢𑁆𑀯𑀸 𑀅𑀦𑀼𑀚𑀸𑀦𑀺𑀁𑀲𑀼. ‘‘𑀧𑀩𑁆𑀩𑀚𑀺𑀢𑁆𑀯𑀸 𑀘 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀚𑀸𑀦𑀸𑀧𑁂𑀲𑀼𑀁, 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀲𑁆𑀲 𑀫𑀸𑀢𑀸 𑀧𑀸𑀢𑁄𑀯 𑀯𑀻𑀲𑀢𑀺𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀯𑀼𑀢𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀅𑀦𑁆𑀢𑀭𑀸 𑀔𑀚𑁆𑀚𑀓𑀸𑀤𑀻𑀦𑀺 𑀘 𑀔𑀸𑀤𑀸𑀧𑁂𑀢𑁆𑀯𑀸 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀮𑁆𑀮𑀧𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀢𑀺. 𑀧𑀺𑀢𑀸𑀧𑀺 𑀫𑀚𑁆𑀛𑀦𑁆𑀳𑀺𑀓𑁂 𑀆𑀕𑀦𑁆𑀢𑁆𑀯𑀸 𑀢𑀁 𑀪𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀯𑀲𑀁 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀮𑁆𑀮𑀧𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀚𑀕𑁆𑀕𑀦𑀓𑀧𑀼𑀭𑀺𑀲𑁂 𑀞𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀢𑀺. 𑀲𑁄 𑀏𑀯𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀯𑀺𑀯𑀺𑀢𑁆𑀢𑁄 𑀯𑀺𑀳𑀭𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀤𑀺𑀘𑁆𑀘𑀩𑀦𑁆𑀥𑀼 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀺𑀳𑀭𑀢𑀺. 𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀅𑀤𑁆𑀤𑀲 𑁋 ‘‘𑀅𑀬𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑀼𑀁 𑀅𑀲𑀓𑁆𑀔𑀺, 𑀚𑀝𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀢𑀢𑁄 𑀧𑀭𑀁 𑀆𑀯𑀚𑁆𑀚𑀺 𑁋 ‘‘𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀦𑀺𑀩𑁆𑀩𑀺𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺. 𑀅𑀣 ‘‘𑀥𑀫𑁆𑀫𑀢𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀢𑀺𑀘𑀺𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀲𑁆𑀲 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑀦𑁄𑀲𑀺𑀮𑀸𑀢𑀮𑀢𑁄 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀧𑀭𑀺𑀲𑀸 𑀤𑀺𑀲𑁆𑀯𑀸 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀕𑀢𑁄, 𑀫𑀳𑀸𑀭𑀸𑀚𑀸’’𑀢𑀺 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀇𑀤𑀸𑀦𑀺 𑀫𑁂 𑀧𑀼𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀅𑀦𑀼𑀓𑁆𑀓𑀡𑁆𑀞𑀺𑀢𑁄 𑀯𑀲𑀺𑀲𑁆𑀲𑀢𑀻’’𑀢𑀺 𑀧𑀫𑀼𑀤𑀺𑀢𑀫𑀦𑁄 𑀳𑀼𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀸𑀲𑀁 𑀬𑀸𑀘𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀤𑀺𑀯𑀸𑀯𑀺𑀳𑀸𑀭𑀘𑀗𑁆𑀓𑀫𑀸𑀤𑀺𑀲𑀩𑁆𑀩𑀁 𑀓𑀸𑀭𑁂𑀢𑁆𑀯𑀸 𑀯𑀸𑀲𑁂𑀲𑀺. 𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀓𑀼𑀫𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀢𑁄’’𑀢𑀺. ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀈𑀤𑀺𑀲𑀸 𑀳𑁄𑀦𑁆𑀢𑀻’’𑀢𑀺. 𑀅𑀣 ‘‘𑀪𑀦𑁆𑀢𑁂, 𑀓𑀻𑀤𑀺𑀲𑀸 𑀳𑁄𑀦𑁆𑀢𑀺, 𑀓𑀺𑀁 𑀫𑀬𑁆𑀳𑀁 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁆𑀯𑀁 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀦 𑀧𑁂𑀓𑁆𑀔𑀲𑀺, 𑀦𑀦𑀼 𑀢𑁂 𑀫𑀸𑀢𑀸 𑀯𑀻𑀲𑀢𑀺𑀲𑀳𑀲𑁆𑀲𑀺𑀢𑁆𑀣𑀻𑀢𑀺 𑀲𑀤𑁆𑀥𑀺𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀆𑀕𑀘𑁆𑀙𑀦𑁆𑀢𑀻 𑀉𑀬𑁆𑀬𑀸𑀦𑀁 𑀅𑀯𑀺𑀯𑀺𑀢𑁆𑀢𑀁 𑀓𑀭𑁄𑀢𑀺, 𑀧𑀺𑀢𑀸 𑀘𑀲𑁆𑀲 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀲𑀸𑀬𑀦𑁆𑀳𑀲𑀫𑀬𑁂 𑀚𑀕𑁆𑀕𑀦𑀓𑀧𑀭𑀺𑀲𑀸 𑀲𑀓𑀮𑀁 𑀭𑀢𑁆𑀢𑀺𑀁, 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀢𑀯 𑀲𑀤𑀺𑀲𑀸 𑀦 𑀳𑁄𑀦𑁆𑀢𑀺, 𑀈𑀤𑀺𑀲𑀸 𑀧𑀦 𑀳𑁄𑀦𑁆𑀢𑀻’’𑀢𑀺 𑀢𑀢𑁆𑀣 𑀞𑀺𑀢𑀲𑁆𑀲𑁂𑀯 𑀇𑀤𑁆𑀥𑀺𑀬𑀸 𑀳𑀺𑀫𑀯𑀦𑁆𑀢𑁂 𑀅𑀜𑁆𑀜𑀢𑀭𑀁 𑀯𑀺𑀳𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑁂 𑀘 𑀘𑀗𑁆𑀓𑀫𑀦𑁆𑀢𑁂 𑀘 𑀭𑀚𑀦𑀓𑀓𑀫𑁆𑀫𑀲𑀽𑀘𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀘 𑀤𑀺𑀲𑁆𑀯𑀸 𑀆𑀳 𑁋 ‘‘𑀢𑀼𑀫𑁆𑀳𑁂 𑀇𑀥 𑀦𑀸𑀕𑀘𑁆𑀙𑀣, 𑀧𑀩𑁆𑀩𑀚𑁆𑀚𑀸 𑀘 𑀢𑀼𑀫𑁆𑀳𑁂𑀳𑀺 𑀅𑀦𑀼𑀜𑁆𑀜𑀸𑀢𑀸’’𑀢𑀺? ‘‘𑀆𑀫, 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸, 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀫𑀡𑀸 𑀦𑀸𑀫 𑀅𑀢𑁆𑀢𑀦𑁄 𑀦𑀺𑀲𑁆𑀲𑀭𑀡𑀁 𑀓𑀸𑀢𑀼𑀁, 𑀧𑀤𑁂𑀲𑀜𑁆𑀘 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀕𑀦𑁆𑀢𑀼𑀁 𑀮𑀪𑀦𑁆𑀢𑀺, 𑀏𑀢𑁆𑀢𑀓𑀁𑀯 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀅𑀝𑁆𑀞𑀸𑀦 𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀇𑀫𑀁 𑀉𑀧𑀟𑁆𑀠𑀼𑀕𑀸𑀣𑀁 𑀯𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁄𑀬𑁂𑀯 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀏𑀯𑀁 𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀆𑀭𑀓𑁆𑀔𑀧𑀼𑀭𑀺𑀲𑁄𑀧𑀺 ‘‘𑀲𑀬𑀺𑀢𑁄 𑀓𑀼𑀫𑀸𑀭𑁄, 𑀇𑀤𑀸𑀦𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀫𑀢𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀲𑁄 𑀢𑀲𑁆𑀲 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑀢𑁆𑀭 𑀘 𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀝𑁆𑀞𑀸𑀦𑀁 𑀕𑀢𑁄. 𑀢𑀢𑁆𑀭 𑀘 ‘‘𑀓𑀣𑀫𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀯𑀼𑀢𑁆𑀢𑀁 𑀉𑀧𑀟𑁆𑀠𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀝𑁆𑀞𑀸𑀦 𑀢𑀦𑁆𑀢𑀺 𑀅𑀝𑁆𑀞𑀸𑀦𑀁 𑀢𑀁, 𑀅𑀓𑀸𑀭𑀡𑀁 𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄 ‘‘𑀅𑀭𑀺𑀬𑀲𑀘𑁆𑀘𑀸𑀦 𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁫.𑁧𑁧; 𑀲𑀼. 𑀦𑀺. 𑁨𑁭𑁦) 𑀯𑀺𑀬. 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲𑀸𑀢𑀺 𑀕𑀡𑀸𑀪𑀺𑀭𑀢𑀲𑁆𑀲. 𑀬𑀦𑁆𑀢𑀺 𑀓𑀸𑀭𑀡𑀯𑀘𑀦𑀫𑁂𑀢𑀁 ‘‘𑀬𑀁 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁩𑁦) 𑀯𑀺𑀬. 𑀨𑀲𑁆𑀲𑀬𑁂𑀢𑀺 𑀅𑀥𑀺𑀕𑀘𑁆𑀙𑁂. 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀁. 𑀲𑀸 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀲𑀫𑀬𑁂 𑀏𑀯 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 ‘‘𑀲𑀸𑀫𑀬𑀺𑀓𑀸 𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁. 𑀅𑀝𑁆𑀞𑀸𑀦𑀁 𑀢𑀁, 𑀦 𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑁂𑀦 𑀓𑀸𑀭𑀡𑁂𑀦 𑀯𑀺𑀫𑀼𑀢𑁆𑀢𑀺𑀁 𑀨𑀲𑁆𑀲𑀬𑁂 𑀇𑀢𑀺 𑀏𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫 𑀲𑀗𑁆𑀕𑀡𑀺𑀓𑀸𑀭𑀢𑀺𑀁 𑀧𑀳𑀸𑀬 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀆𑀳. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀝𑁆𑀞𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁧𑁧. 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀲𑀻𑀢𑀸𑀤𑀻𑀦𑀁 𑀧𑀝𑀺𑀖𑀸𑀢𑀓𑀸𑀦𑀺 𑀉𑀡𑁆𑀳𑀸𑀤𑀻𑀦𑀺 𑀅𑀢𑁆𑀣𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀯𑀁 𑀯𑀝𑁆𑀝𑀧𑀝𑀺𑀖𑀸𑀢𑀓𑀁 𑀯𑀺𑀯𑀝𑁆𑀝𑀁, 𑀦𑁄’’𑀢𑀺? 𑀲𑁄 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀯𑀺𑀯𑀝𑁆𑀝𑀁 𑀚𑀸𑀦𑀸𑀣𑀸’’𑀢𑀺? 𑀢𑁂 ‘‘𑀚𑀸𑀦𑀸𑀫, 𑀫𑀳𑀸𑀭𑀸𑀚𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀢’’𑀦𑁆𑀢𑀺? 𑀢𑀢𑁄 ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀲𑁆𑀲𑀢𑀼𑀘𑁆𑀙𑁂𑀤𑀁 𑀓𑀣𑁂𑀲𑀼𑀁. 𑀭𑀸𑀚𑀸 ‘‘𑀇𑀫𑁂 𑀦 𑀚𑀸𑀦𑀦𑁆𑀢𑀺, 𑀲𑀩𑁆𑀩𑁂𑀧𑀺𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸’’𑀢𑀺 𑀲𑀬𑀫𑁂𑀯 𑀢𑁂𑀲𑀁 𑀯𑀺𑀮𑁄𑀫𑀢𑀜𑁆𑀘 𑀅𑀬𑀼𑀢𑁆𑀢𑀢𑀜𑁆𑀘 𑀤𑀺𑀲𑁆𑀯𑀸 ‘‘𑀯𑀝𑁆𑀝𑀧𑀝𑀺𑀖𑀸𑀢𑀓𑀁 𑀯𑀺𑀯𑀝𑁆𑀝𑀁 𑀅𑀢𑁆𑀣𑀺, 𑀢𑀁 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀇𑀫𑀜𑁆𑀘 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀩𑁆𑀬𑀸𑀓𑀭𑀡𑀕𑀸𑀣𑀜𑁆𑀘.

𑀢𑀲𑁆𑀲𑀢𑁆𑀣𑁄 𑁋 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑀸𑀦𑀺 𑀳𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀲𑀽𑀓𑀝𑁆𑀞𑁂𑀦 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀮𑁄𑀫𑀝𑁆𑀞𑁂𑀦 𑀘 𑀯𑀺𑀲𑀽𑀓𑀸𑀦𑀺, 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀯𑀺𑀲𑀽𑀓𑀸𑀦𑀺, 𑀤𑀺𑀝𑁆𑀞𑀺 𑀏𑀯 𑀯𑀸 𑀯𑀺𑀲𑀽𑀓𑀸𑀦𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺. 𑀉𑀧𑀸𑀢𑀺𑀯𑀢𑁆𑀢𑁄𑀢𑀺 𑀤𑀲𑁆𑀲𑀦𑀫𑀕𑁆𑀕𑁂𑀦 𑀅𑀢𑀺𑀓𑁆𑀓𑀦𑁆𑀢𑁄. 𑀧𑀢𑁆𑀢𑁄 𑀦𑀺𑀬𑀸𑀫𑀦𑁆𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑀸𑀬 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀢𑀸𑀬 𑀘 𑀦𑀺𑀬𑀢𑀪𑀸𑀯𑀁 𑀅𑀥𑀺𑀕𑀢𑁄, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀯𑀸 𑀧𑀞𑀫𑀫𑀕𑁆𑀕𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀞𑀫𑀫𑀕𑁆𑀕𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀘 𑀢𑀲𑁆𑀲 𑀧𑀝𑀺𑀮𑀸𑀪𑁄 𑀘 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀧𑀝𑀺𑀮𑀤𑁆𑀥𑀫𑀕𑁆𑀕𑁄𑀢𑀺 𑀇𑀫𑀺𑀦𑀸 𑀲𑁂𑀲𑀫𑀕𑁆𑀕𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀻𑀢𑀺 𑀉𑀧𑁆𑀧𑀦𑁆𑀦𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄 𑀅𑀫𑁆𑀳𑀺. 𑀏𑀢𑁂𑀦 𑀨𑀮𑀁 𑀤𑀲𑁆𑀲𑁂𑀢𑀺. 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺 𑀅𑀜𑁆𑀜𑁂𑀳𑀺 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀦 𑀦𑁂𑀢𑀩𑁆𑀩𑁄. 𑀏𑀢𑁂𑀦 𑀲𑀬𑀫𑁆𑀪𑀼𑀢𑀁 𑀤𑀲𑁆𑀲𑁂𑀢𑀺, 𑀧𑀢𑁆𑀢𑁂 𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂 𑀅𑀜𑁆𑀜𑀦𑁂𑀬𑁆𑀬𑀢𑀸𑀬 𑀅𑀪𑀸𑀯𑀸 𑀲𑀬𑀁𑀯𑀲𑀺𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀯𑀸 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀆𑀤𑀺𑀫𑀕𑁆𑀕𑁂𑀦 𑀦𑀺𑀬𑀸𑀫𑀁 𑀧𑀢𑁆𑀢𑁄, 𑀲𑁂𑀲𑁂𑀳𑀺 𑀧𑀝𑀺𑀮𑀤𑁆𑀥𑀫𑀕𑁆𑀕𑁄, 𑀨𑀮𑀜𑀸𑀡𑁂𑀦 𑀉𑀧𑁆𑀧𑀦𑁆𑀦𑀜𑀸𑀡𑁄, 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀦𑀸𑀯 𑀅𑀥𑀺𑀕𑀢𑁄𑀢𑀺 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑀺𑀝𑁆𑀞𑀻𑀯𑀺𑀲𑀽𑀓𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁨. 𑀦𑀺𑀮𑁆𑀮𑁄𑀮𑀼𑀧𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀲𑀽𑀤𑁄 𑀅𑀦𑁆𑀢𑀭𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺 𑀫𑀦𑀼𑀜𑁆𑀜𑀤𑀲𑁆𑀲𑀦𑀁 𑀲𑀸𑀤𑀼𑀭𑀲𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀫𑁂 𑀭𑀸𑀚𑀸 𑀥𑀦𑀫𑀦𑀼𑀧𑁆𑀧𑀸𑀤𑁂𑀬𑁆𑀬𑀸’’𑀢𑀺. 𑀢𑀁 𑀭𑀜𑁆𑀜𑁄 𑀕𑀦𑁆𑀥𑁂𑀦𑁂𑀯 𑀪𑁄𑀢𑁆𑀢𑀼𑀓𑀫𑁆𑀬𑀢𑀁 𑀚𑀦𑁂𑀲𑀺, 𑀫𑀼𑀔𑁂 𑀔𑁂𑀴𑀁 𑀉𑀧𑁆𑀧𑀸𑀤𑁂𑀢𑀺. 𑀧𑀞𑀫𑀓𑀩𑀴𑁂 𑀧𑀦 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀲𑀢𑁆𑀢𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀅𑀫𑀢𑁂𑀦𑁂𑀯 𑀨𑀼𑀲𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀲𑀽𑀤𑁄 ‘‘𑀇𑀤𑀸𑀦𑀺 𑀫𑁂 𑀤𑀲𑁆𑀲𑀢𑀺, 𑀇𑀤𑀸𑀦𑀺 𑀫𑁂 𑀤𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀭𑀸𑀚𑀸𑀧𑀺 ‘‘𑀲𑀓𑁆𑀓𑀸𑀭𑀸𑀭𑀳𑁄 𑀲𑀽𑀤𑁄’’𑀢𑀺 𑀘𑀺𑀦𑁆𑀢𑁂𑀲𑀺, ‘‘𑀭𑀲𑀁 𑀲𑀸𑀬𑀺𑀢𑁆𑀯𑀸 𑀧𑀦 𑀲𑀓𑁆𑀓𑀭𑁄𑀦𑁆𑀢𑀁 𑀫𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑁂𑀬𑁆𑀬 ‘𑀮𑁄𑀮𑁄 𑀅𑀬𑀁 𑀭𑀸𑀚𑀸 𑀭𑀲𑀕𑀭𑀼𑀓𑁄’’’𑀢𑀺 𑀦 𑀓𑀺𑀜𑁆𑀘𑀺 𑀅𑀪𑀡𑀺. 𑀏𑀯𑀁 𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀁, 𑀢𑀸𑀯 𑀲𑀽𑀤𑁄 ‘‘𑀇𑀤𑀸𑀦𑀺 𑀤𑀲𑁆𑀲𑀢𑀺, 𑀇𑀤𑀸𑀦𑀺 𑀤𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀭𑀸𑀚𑀸𑀧𑀺 𑀅𑀯𑀡𑁆𑀡𑀪𑀬𑁂𑀦 𑀦 𑀓𑀺𑀜𑁆𑀘𑀺 𑀅𑀪𑀡𑀺. 𑀢𑀢𑁄 𑀲𑀽𑀤𑁄 ‘‘𑀦𑀢𑁆𑀣𑀺 𑀫𑀜𑁆𑀜𑁂 𑀇𑀫𑀲𑁆𑀲 𑀭𑀜𑁆𑀜𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡’’𑀦𑁆𑀢𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀅𑀲𑀸𑀤𑀼𑀭𑀲𑀁 𑀉𑀧𑀦𑀸𑀫𑁂𑀲𑀺. 𑀭𑀸𑀚𑀸 𑀪𑀼𑀜𑁆𑀚𑀦𑁆𑀢𑁄 ‘‘𑀦𑀺𑀕𑁆𑀕𑀳𑀸𑀭𑀳𑁄 𑀯𑀢, 𑀪𑁄, 𑀅𑀚𑁆𑀚 𑀲𑀽𑀤𑁄’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀯𑀡𑁆𑀡𑀪𑀬𑁂𑀦 𑀦 𑀓𑀺𑀜𑁆𑀘𑀺 𑀅𑀪𑀡𑀺. 𑀢𑀢𑁄 𑀲𑀽𑀤𑁄 ‘‘𑀭𑀸𑀚𑀸 𑀦𑁂𑀯 𑀲𑀼𑀦𑁆𑀤𑀭𑀁 𑀦𑀸𑀲𑀼𑀦𑁆𑀤𑀭𑀁 𑀚𑀸𑀦𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀩𑁆𑀩𑀬𑀁 𑀅𑀢𑁆𑀢𑀦𑀸𑀯 𑀕𑀳𑁂𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀧𑀘𑀺𑀢𑁆𑀯𑀸 𑀭𑀜𑁆𑀜𑁄 𑀤𑁂𑀢𑀺. 𑀭𑀸𑀚𑀸 ‘‘𑀅𑀳𑁄 𑀯𑀢 𑀮𑁄𑀪𑁄, 𑀅𑀳𑀁 𑀦𑀸𑀫 𑀯𑀻𑀲𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀇𑀫𑀲𑁆𑀲 𑀮𑁄𑀪𑁂𑀦 𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀻’’𑀢𑀺 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀦𑀺𑀮𑁆𑀮𑁄𑀮𑀼𑀧𑁄𑀢𑀺 𑀅𑀮𑁄𑀮𑀼𑀧𑁄. 𑀬𑁄 𑀳𑀺 𑀭𑀲𑀢𑀡𑁆𑀳𑀸𑀪𑀺𑀪𑀽𑀢𑁄 𑀳𑁄𑀢𑀺, 𑀲𑁄 𑀪𑀼𑀲𑀁 𑀮𑀼𑀧𑁆𑀧𑀢𑀺 𑀧𑀼𑀦𑀧𑁆𑀧𑀼𑀦𑀁 𑀮𑀼𑀧𑁆𑀧𑀢𑀺, 𑀢𑁂𑀦 ‘‘𑀮𑁄𑀮𑀼𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀏𑀲 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦𑀺𑀮𑁆𑀮𑁄𑀮𑀼𑀧𑁄’’𑀢𑀺 𑀆𑀳. 𑀦𑀺𑀓𑁆𑀓𑀼𑀳𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑀲𑁆𑀲 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼 𑀦𑀢𑁆𑀣𑀺, 𑀲𑁄 ‘‘𑀦𑀺𑀓𑁆𑀓𑀼𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀲𑁆𑀲𑀸 𑀧𑀦 𑀕𑀸𑀣𑀸𑀬 𑀫𑀦𑀼𑀜𑁆𑀜𑀪𑁄𑀚𑀦𑀸𑀤𑀻𑀲𑀼 𑀯𑀺𑀫𑁆𑀳𑀬𑀫𑀦𑀸𑀧𑀚𑁆𑀚𑀦𑀢𑁄 𑀦𑀺𑀓𑁆𑀓𑀼𑀳𑁄𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀧𑀺𑀧𑀸𑀲𑁄𑀢𑀺 𑀏𑀢𑁆𑀣 𑀧𑀸𑀢𑀼𑀫𑀺𑀘𑁆𑀙𑀸 𑀧𑀺𑀧𑀸𑀲𑀸, 𑀢𑀲𑁆𑀲𑀸 𑀅𑀪𑀸𑀯𑁂𑀦 𑀦𑀺𑀧𑁆𑀧𑀺𑀧𑀸𑀲𑁄, 𑀲𑀸𑀤𑀼𑀭𑀲𑀮𑁄𑀪𑁂𑀦 𑀪𑁄𑀢𑁆𑀢𑀼𑀓𑀫𑁆𑀬𑀢𑀸𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀫𑁆𑀫𑀓𑁆𑀔𑁄𑀢𑀺 𑀏𑀢𑁆𑀣 𑀧𑀭𑀕𑀼𑀡𑀯𑀺𑀦𑀸𑀲𑀦𑀮𑀓𑁆𑀔𑀡𑁄 𑀫𑀓𑁆𑀔𑁄, 𑀢𑀲𑁆𑀲 𑀅𑀪𑀸𑀯𑁂𑀦 𑀦𑀺𑀫𑁆𑀫𑀓𑁆𑀔𑁄. 𑀅𑀢𑁆𑀢𑀦𑁄 𑀕𑀺𑀳𑀺𑀓𑀸𑀮𑁂 𑀲𑀽𑀤𑀲𑁆𑀲 𑀕𑀼𑀡𑀫𑀓𑁆𑀔𑀦𑀸𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄 𑀢𑀬𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀘 𑀢𑀻𑀡𑀻𑀢𑀺 𑀙 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀅𑀧𑁆𑀧𑀲𑀦𑁆𑀦𑀝𑁆𑀞𑁂𑀦 𑀲𑀓𑀪𑀸𑀯𑀁 𑀯𑀺𑀚𑀳𑀸𑀧𑁂𑀢𑁆𑀯𑀸 𑀧𑀭𑀪𑀸𑀯𑀁 𑀕𑀡𑁆𑀳𑀸𑀧𑀦𑀝𑁆𑀞𑁂𑀦 𑀓𑀲𑀝𑀝𑁆𑀞𑁂𑀦 𑀘 ‘‘𑀓𑀲𑀸𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀓𑀲𑀸𑀯𑀸? 𑀭𑀸𑀕𑀓𑀲𑀸𑀯𑁄, 𑀤𑁄𑀲𑀓𑀲𑀸𑀯𑁄, 𑀫𑁄𑀳𑀓𑀲𑀸𑀯𑁄. 𑀇𑀫𑁂 𑀢𑀬𑁄 𑀓𑀲𑀸𑀯𑀸. 𑀢𑀢𑁆𑀣 𑀓𑀢𑀫𑁂 𑀅𑀧𑀭𑁂𑀧𑀺 𑀢𑀬𑁄 𑀓𑀲𑀸𑀯𑀸? 𑀓𑀸𑀬𑀓𑀲𑀸𑀯𑁄, 𑀯𑀘𑀻𑀓𑀲𑀸𑀯𑁄, 𑀫𑀦𑁄𑀓𑀲𑀸𑀯𑁄’’𑀢𑀺 (𑀯𑀺𑀪. 𑁯𑁨𑁪).

𑀢𑁂𑀲𑀼 𑀫𑁄𑀳𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀓𑀲𑀸𑀯𑀸𑀦𑀁 𑀢𑁂𑀲𑀜𑁆𑀘 𑀲𑀩𑁆𑀩𑁂𑀲𑀁 𑀫𑀽𑀮𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀦𑀺𑀤𑁆𑀥𑀦𑁆𑀢𑀢𑁆𑀢𑀸 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄. 𑀢𑀺𑀡𑁆𑀡𑀁 𑀏𑀯 𑀯𑀸 𑀓𑀸𑀬𑀯𑀘𑀻𑀫𑀦𑁄𑀓𑀲𑀸𑀯𑀸𑀦𑀁 𑀫𑁄𑀳𑀲𑁆𑀲 𑀘 𑀦𑀺𑀤𑁆𑀥𑀦𑁆𑀢𑀢𑁆𑀢𑀸 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄. 𑀇𑀢𑀭𑁂𑀲𑀼 𑀦𑀺𑀮𑁆𑀮𑁄𑀮𑀼𑀧𑀢𑀸𑀤𑀻𑀳𑀺 𑀭𑀸𑀕𑀓𑀲𑀸𑀯𑀲𑁆𑀲, 𑀦𑀺𑀫𑁆𑀫𑀓𑁆𑀔𑀢𑀸𑀬 𑀤𑁄𑀲𑀓𑀲𑀸𑀯𑀲𑁆𑀲 𑀦𑀺𑀤𑁆𑀥𑀦𑁆𑀢𑀪𑀸𑀯𑁄 𑀲𑀺𑀤𑁆𑀥𑁄 𑀏𑀯. 𑀦𑀺𑀭𑀸𑀲𑀬𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸𑀢𑀺 𑀲𑀓𑀮𑀮𑁄𑀓𑁂, 𑀢𑀻𑀲𑀼 𑀪𑀯𑁂𑀲𑀼 𑀤𑁆𑀯𑀸𑀤𑀲𑀲𑀼 𑀯𑀸 𑀆𑀬𑀢𑀦𑁂𑀲𑀼 𑀪𑀯𑀯𑀺𑀪𑀯𑀢𑀡𑁆𑀳𑀸𑀯𑀺𑀭𑀳𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀢𑀬𑁄𑀧𑀺 𑀧𑀸𑀤𑁂 𑀯𑀢𑁆𑀯𑀸 𑀏𑀓𑁄 𑀘𑀭𑁂𑀢𑀺 𑀏𑀓𑁄 𑀘𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄.

𑀦𑀺𑀮𑁆𑀮𑁄𑀮𑀼𑀧𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁩. 𑀧𑀸𑀧𑀁 𑀲𑀳𑀸𑀬𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀫𑀦𑀼𑀲𑁆𑀲𑁂 𑀓𑁄𑀝𑁆𑀞𑀸𑀕𑀸𑀭𑀢𑁄 𑀧𑀼𑀭𑀸𑀡𑀥𑀜𑁆𑀜𑀸𑀤𑀻𑀦𑀺 𑀩𑀳𑀺𑀤𑁆𑀥𑀸 𑀦𑀻𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑀡𑁂, 𑀇𑀤’’𑀦𑁆𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀅𑀫𑀘𑁆𑀘𑀸 ‘‘𑀇𑀤𑀸𑀦𑀺, 𑀫𑀳𑀸𑀭𑀸𑀚, 𑀦𑀯𑀥𑀜𑁆𑀜𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀑𑀓𑀸𑀲𑀁 𑀓𑀸𑀢𑀼𑀁 𑀇𑀫𑁂 𑀫𑀦𑀼𑀲𑁆𑀲𑀸 𑀧𑀼𑀭𑀸𑀡𑀥𑀜𑁆𑀜𑀸𑀤𑀻𑀦𑀺 𑀙𑀟𑁆𑀟𑁂𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀓𑀺𑀁, 𑀪𑀡𑁂, 𑀇𑀢𑁆𑀣𑀸𑀕𑀸𑀭𑀩𑀮𑀓𑀸𑀬𑀸𑀤𑀻𑀦𑀁 𑀯𑀢𑁆𑀢𑀁 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀆𑀳. ‘‘𑀆𑀫, 𑀫𑀳𑀸𑀭𑀸𑀚, 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀤𑀸𑀦𑀲𑀸𑀮𑀁 𑀓𑀸𑀭𑁂𑀣, 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀫𑀸 𑀇𑀫𑀸𑀦𑀺 𑀥𑀜𑁆𑀜𑀸𑀦𑀺 𑀅𑀦𑀼𑀧𑀓𑀸𑀭𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺. 𑀢𑀢𑁄 𑀦𑀁 𑀅𑀜𑁆𑀜𑀢𑀭𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀫𑀘𑁆𑀘𑁄 ‘‘𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀆𑀭𑀩𑁆𑀪 𑀬𑀸𑀯 ‘‘𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀭𑀸𑀚𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀓𑁄𑀝𑁆𑀞𑀸𑀕𑀸𑀭𑁂 𑀯𑀺𑀮𑀼𑀫𑁆𑀧𑀦𑁆𑀢𑁂 𑀤𑀺𑀲𑁆𑀯𑀸 𑀢𑀣𑁂𑀯 𑀆𑀡𑀸𑀧𑁂𑀲𑀺. 𑀲𑁄𑀧𑀺 𑀢𑀢𑀺𑀬𑀫𑁆𑀧𑀺 𑀦𑀁 ‘‘𑀫𑀳𑀸𑀭𑀸𑀚, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀬𑀤𑀺𑀤𑀁 𑀤𑀸𑀦’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀲𑁄 ‘‘𑀅𑀭𑁂, 𑀅𑀳𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀦 𑀮𑀪𑀸𑀫𑀺 𑀤𑀸𑀢𑀼𑀁, 𑀓𑀺𑀁 𑀫𑁂 𑀇𑀫𑁂𑀳𑀺 𑀧𑀸𑀧𑀲𑀳𑀸𑀬𑁂𑀳𑀻’’𑀢𑀺 𑀦𑀺𑀩𑁆𑀩𑀺𑀦𑁆𑀦𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺. 𑀢𑀜𑁆𑀘 𑀧𑀸𑀧𑀲𑀳𑀸𑀬𑀁 𑀕𑀭𑀳𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀫𑀸𑀳.

𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀤𑀲𑀯𑀢𑁆𑀣𑀼𑀓𑀸𑀬 𑀧𑀸𑀧𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑁄, 𑀧𑀭𑁂𑀲𑀫𑁆𑀧𑀺 𑀅𑀦𑀢𑁆𑀣𑀁 𑀧𑀲𑁆𑀲𑀢𑀻𑀢𑀺 𑀅𑀦𑀢𑁆𑀣𑀤𑀲𑁆𑀲𑀻, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀫𑁆𑀳𑀺 𑀘 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑁄, 𑀢𑀁 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁. 𑀲𑀬𑀁 𑀦 𑀲𑁂𑀯𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂𑀦 𑀢𑀁 𑀦 𑀲𑁂𑀯𑁂𑀬𑁆𑀬. 𑀬𑀤𑀺 𑀧𑀦 𑀧𑀭𑀲𑁆𑀲 𑀯𑀲𑁄 𑀳𑁄𑀢𑀺, 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀲𑀼𑀢𑀦𑁆𑀢𑀺 𑀧𑀲𑀝𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀧𑀫𑀢𑁆𑀢𑀦𑁆𑀢𑀺 𑀓𑀸𑀫𑀕𑀼𑀡𑁂𑀲𑀼 𑀯𑁄𑀲𑁆𑀲𑀝𑁆𑀞𑀘𑀺𑀢𑁆𑀢𑀁, 𑀓𑀼𑀲𑀮𑀪𑀸𑀯𑀦𑀸𑀭𑀳𑀺𑀢𑀁 𑀯𑀸. 𑀢𑀁 𑀏𑀯𑀭𑀽𑀧𑀁 𑀲𑀳𑀸𑀬𑀁 𑀦 𑀲𑁂𑀯𑁂 𑀦 𑀪𑀚𑁂 𑀦 𑀧𑀬𑀺𑀭𑀼𑀧𑀸𑀲𑁂, 𑀅𑀜𑁆𑀜𑀤𑀢𑁆𑀣𑀼 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀧𑀸𑀧𑀲𑀳𑀸𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁪. 𑀩𑀳𑀼𑀲𑁆𑀲𑀼𑀢𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀅𑀝𑁆𑀞 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀅𑀦𑀯𑀚𑁆𑀚𑀪𑁄𑀚𑀻𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀸𑀚𑀸 𑀆𑀳 𑁋 ‘‘𑀓𑁂 𑀢𑀼𑀫𑁆𑀳𑁂’’𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀫𑀬𑀁, 𑀫𑀳𑀸𑀭𑀸𑀚, 𑀩𑀳𑀼𑀲𑁆𑀲𑀼𑀢𑀸 𑀦𑀸𑀫𑀸’’𑀢𑀺. 𑀭𑀸𑀚𑀸 ‘‘𑀅𑀳𑀁 𑀲𑀼𑀢𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫, 𑀲𑀼𑀢𑁂𑀦 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀸𑀫𑀺, 𑀳𑀦𑁆𑀤, 𑀦𑁂𑀲𑀁 𑀲𑀦𑁆𑀢𑀺𑀓𑁂 𑀯𑀺𑀘𑀺𑀢𑁆𑀭𑀦𑀬𑀥𑀫𑁆𑀫𑀤𑁂𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀫𑀦𑁄 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀥𑀫𑁆𑀫𑀓𑀣𑀁, 𑀪𑀦𑁆𑀢𑁂, 𑀓𑀣𑁂𑀣𑀸’’𑀢𑀺 𑀆𑀳. 𑀲𑁄 ‘‘𑀲𑀼𑀔𑀺𑀢𑁄 𑀳𑁄𑀢𑀼, 𑀫𑀳𑀸𑀭𑀸𑀚, 𑀭𑀸𑀕𑀓𑁆𑀔𑀬𑁄 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀺𑀢𑁄. 𑀭𑀸𑀚𑀸 ‘‘𑀅𑀬𑀁 𑀦 𑀩𑀳𑀼𑀲𑁆𑀲𑀼𑀢𑁄, 𑀤𑀼𑀢𑀺𑀬𑁄 𑀩𑀳𑀼𑀲𑁆𑀲𑀼𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁆𑀯𑁂 𑀢𑀲𑁆𑀲 𑀯𑀺𑀘𑀺𑀢𑁆𑀭𑀥𑀫𑁆𑀫𑀤𑁂𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀲𑀺. 𑀏𑀯𑀁 𑀬𑀸𑀯 𑀲𑀩𑁆𑀩𑁂𑀲𑀁 𑀧𑀝𑀺𑀧𑀸𑀝𑀺 𑀕𑀘𑁆𑀙𑀢𑀺, 𑀢𑀸𑀯 𑀦𑀺𑀫𑀦𑁆𑀢𑁂𑀲𑀺, 𑀢𑁂 𑀲𑀩𑁆𑀩𑁂𑀧𑀺 ‘‘𑀤𑁄𑀲𑀓𑁆𑀔𑀬𑁄 𑀳𑁄𑀢𑀼, 𑀫𑁄𑀳𑀓𑁆𑀔𑀬𑁄, 𑀕𑀢𑀺𑀓𑁆𑀔𑀬𑁄, 𑀪𑀯𑀓𑁆𑀔𑀬𑁄, 𑀯𑀝𑁆𑀝𑀓𑁆𑀔𑀬𑁄, 𑀉𑀧𑀥𑀺𑀓𑁆𑀔𑀬𑁄, 𑀢𑀡𑁆𑀳𑀓𑁆𑀔𑀬𑁄 𑀳𑁄𑀢𑀽’’𑀢𑀺 𑀏𑀯𑀁 𑀏𑀓𑁂𑀓𑀧𑀤𑀁 𑀯𑀺𑀲𑁂𑀲𑁂𑀢𑁆𑀯𑀸 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯 𑀯𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼.

𑀢𑀢𑁄 𑀭𑀸𑀚𑀸 𑁋 ‘‘𑀇𑀫𑁂 ‘𑀩𑀳𑀼𑀲𑁆𑀲𑀼𑀢𑀸 𑀫𑀬’𑀦𑁆𑀢𑀺 𑀪𑀡𑀦𑁆𑀢𑀺, 𑀦 𑀘 𑀢𑁂𑀲𑀁 𑀯𑀺𑀘𑀺𑀢𑁆𑀭𑀓𑀣𑀸, 𑀓𑀺𑀫𑁂𑀢𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑁂𑀲𑀁 𑀯𑀘𑀦𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀢𑀼𑀫𑀸𑀭𑀤𑁆𑀥𑁄. 𑀅𑀣 ‘‘𑀭𑀸𑀕𑀓𑁆𑀔𑀬𑁄 𑀳𑁄𑀢𑀽’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀭𑀸𑀕𑁂 𑀔𑀻𑀡𑁂 𑀤𑁄𑀲𑁄𑀧𑀺 𑀫𑁄𑀳𑁄𑀧𑀺 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀧𑀺 𑀓𑀺𑀮𑁂𑀲𑀸 𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺 ‘‘𑀦𑀺𑀧𑁆𑀧𑀭𑀺𑀬𑀸𑀬𑀩𑀳𑀼𑀲𑁆𑀲𑀼𑀢𑀸 𑀇𑀫𑁂 𑀲𑀫𑀡𑀸. 𑀬𑀣𑀸𑀧𑀺 𑀳𑀺 𑀧𑀼𑀭𑀺𑀲𑁂𑀦 𑀫𑀳𑀸𑀧𑀣𑀯𑀺𑀁 𑀯𑀸 𑀆𑀓𑀸𑀲𑀁 𑀯𑀸 𑀅𑀗𑁆𑀕𑀼𑀮𑀺𑀬𑀸 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀦 𑀅𑀗𑁆𑀕𑀼𑀮𑀺𑀫𑀢𑁆𑀢𑁄𑀯 𑀧𑀤𑁂𑀲𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺. 𑀅𑀧𑀺 𑀘 𑀔𑁄 𑀧𑀦 𑀲𑀓𑀮𑀧𑀣𑀯𑀻 𑀆𑀓𑀸𑀲𑀸 𑀏𑀯 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀏𑀯𑀁 𑀇𑀫𑁂𑀳𑀺 𑀏𑀓𑁂𑀓𑀁 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑁆𑀢𑁂𑀳𑀺 𑀅𑀧𑀭𑀺𑀫𑀸𑀡𑀸 𑀅𑀢𑁆𑀣𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀻’’𑀢𑀺. 𑀢𑀢𑁄 𑀲𑁄 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀩𑀳𑀼𑀲𑁆𑀲𑀼𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀣𑀸𑀭𑀽𑀧𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀧𑀢𑁆𑀣𑁂𑀦𑁆𑀢𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀩𑀳𑀼𑀲𑁆𑀲𑀼𑀢𑀦𑁆𑀢𑀺 𑀤𑀼𑀯𑀺𑀥𑁄 𑀩𑀳𑀼𑀲𑁆𑀲𑀼𑀢𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀢𑁆𑀣𑀢𑁄 𑀦𑀺𑀔𑀺𑀮𑁄 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁄 𑀘, 𑀫𑀕𑁆𑀕𑀨𑀮𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀧𑀝𑀺𑀯𑁂𑀥𑀓𑁄 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁄 𑀘. 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄. 𑀉𑀴𑀸𑀭𑁂𑀳𑀺 𑀧𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀴𑀸𑀭𑁄. 𑀬𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀬𑀼𑀢𑁆𑀢𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀧𑀝𑀺𑀪𑀸𑀦𑀯𑀸. 𑀧𑀭𑀺𑀬𑀢𑁆𑀢𑀺𑀧𑀭𑀺𑀧𑀼𑀘𑁆𑀙𑀸𑀥𑀺𑀕𑀫𑀯𑀲𑁂𑀦 𑀯𑀸 𑀢𑀺𑀯𑀺𑀥𑁄 𑀧𑀝𑀺𑀪𑀸𑀦𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀳𑀺 𑀧𑀭𑀺𑀬𑀢𑁆𑀢𑀺 𑀧𑀝𑀺𑀪𑀸𑀢𑀺, 𑀲𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀅𑀢𑁆𑀣𑀜𑁆𑀘 𑀜𑀸𑀡𑀜𑁆𑀘 𑀮𑀓𑁆𑀔𑀡𑀜𑁆𑀘 𑀞𑀸𑀦𑀸𑀝𑁆𑀞𑀸𑀦𑀜𑁆𑀘 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀭𑀺𑀧𑀼𑀘𑁆𑀙𑀸 𑀧𑀝𑀺𑀪𑀸𑀢𑀺, 𑀲𑁄 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀫𑀕𑁆𑀕𑀸𑀤𑀬𑁄 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀲𑁄 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸. 𑀢𑀁 𑀏𑀯𑀭𑀽𑀧𑀁 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁. 𑀢𑀢𑁄 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀉𑀪𑀬𑀢𑁆𑀣𑀪𑁂𑀤𑀢𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀪𑁂𑀤𑀢𑁄 𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺, 𑀢𑀢𑁄 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀓𑀗𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀦𑁂𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸 𑀏𑀯𑀁 𑀓𑀢𑀲𑀩𑁆𑀩𑀓𑀺𑀘𑁆𑀘𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀩𑀳𑀼𑀲𑁆𑀲𑀼𑀢𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁫. 𑀔𑀺𑀟𑁆𑀟𑀁 𑀭𑀢𑀺𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀯𑀺𑀪𑀽𑀲𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀸𑀢𑁄𑀯 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀦𑀸𑀦𑀸𑀯𑀺𑀥𑀯𑀺𑀪𑀽𑀲𑀦𑁂𑀳𑀺 𑀅𑀢𑁆𑀢𑀸𑀦𑀁 𑀯𑀺𑀪𑀽𑀲𑀸𑀧𑁂𑀢𑁆𑀯𑀸 𑀫𑀳𑀸𑀆𑀤𑀸𑀲𑁂 𑀲𑀓𑀮𑀁 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀬𑀁 𑀦 𑀇𑀘𑁆𑀙𑀢𑀺, 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑁂𑀦 𑀯𑀺𑀪𑀽𑀲𑀦𑁂𑀦 𑀯𑀺𑀪𑀽𑀲𑀸𑀧𑁂𑀢𑀺. 𑀢𑀲𑁆𑀲 𑀏𑀓𑀤𑀺𑀯𑀲𑀁 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀪𑀢𑁆𑀢𑀯𑁂𑀮𑀸 𑀫𑀚𑁆𑀛𑀦𑁆𑀳𑀺𑀓𑀸 𑀲𑀫𑁆𑀧𑀢𑁆𑀢𑀸. 𑀯𑀺𑀧𑁆𑀧𑀓𑀢𑀯𑀺𑀪𑀽𑀲𑀺𑀢𑁄𑀯 𑀤𑀼𑀲𑁆𑀲𑀧𑀝𑁆𑀝𑁂𑀦 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀜𑁆𑀙𑀺. 𑀧𑀼𑀦𑀧𑀺 𑀉𑀝𑁆𑀞𑀳𑀺𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑁄 𑀲𑀽𑀭𑀺𑀬𑁄 𑀑𑀕𑁆𑀕𑀢𑁄. 𑀏𑀯𑀁 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀢𑀺𑀬𑀤𑀺𑀯𑀲𑁂𑀧𑀺. 𑀅𑀣𑀲𑁆𑀲 𑀏𑀯𑀁 𑀫𑀡𑁆𑀟𑀦𑀧𑁆𑀧𑀲𑀼𑀢𑀲𑁆𑀲 𑀧𑀺𑀝𑁆𑀞𑀺𑀭𑁄𑀕𑁄 𑀉𑀤𑀧𑀸𑀤𑀺. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑁄 𑀭𑁂, 𑀅𑀳𑀁 𑀲𑀩𑁆𑀩𑀣𑀸𑀫𑁂𑀦 𑀯𑀺𑀪𑀽𑀲𑀦𑁆𑀢𑁄𑀧𑀺 𑀇𑀫𑀲𑁆𑀫𑀺𑀁 𑀓𑀧𑁆𑀧𑀓𑁂 𑀯𑀺𑀪𑀽𑀲𑀦𑁂 𑀅𑀲𑀦𑁆𑀢𑀼𑀝𑁆𑀞𑁄 𑀮𑁄𑀪𑀁 𑀉𑀧𑁆𑀧𑀸𑀤𑁂𑀲𑀺𑀁, 𑀮𑁄𑀪𑁄 𑀘 𑀦𑀸𑀫𑁂𑀲 𑀅𑀧𑀸𑀬𑀕𑀫𑀦𑀻𑀬𑁄 𑀥𑀫𑁆𑀫𑁄, 𑀳𑀦𑁆𑀤𑀸𑀳𑀁 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣 𑀔𑀺𑀟𑁆𑀟𑀸 𑀘 𑀭𑀢𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀯. 𑀓𑀸𑀫𑀲𑀼𑀔𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀲𑀼𑀔𑀁. 𑀯𑀢𑁆𑀣𑀼𑀓𑀸𑀫𑀸𑀧𑀺 𑀳𑀺 𑀲𑀼𑀔𑀲𑁆𑀲 𑀯𑀺𑀲𑀬𑀸𑀤𑀺𑀪𑀸𑀯𑁂𑀦 ‘‘𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀅𑀢𑁆𑀣𑀺 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁩.𑁬𑁦). 𑀏𑀯𑀫𑁂𑀢𑀁 𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀇𑀫𑀲𑁆𑀫𑀺𑀁 𑀑𑀓𑀸𑀲𑀮𑁄𑀓𑁂 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀮𑀦𑁆𑀢𑀺 𑀅𑀓𑀢𑁆𑀯𑀸, 𑀏𑀢𑀁 𑀢𑀧𑁆𑀧𑀓𑀦𑁆𑀢𑀺 𑀯𑀸 𑀲𑀸𑀭𑀪𑀽𑀢𑀦𑁆𑀢𑀺 𑀯𑀸 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀅𑀦𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑁂𑀦 𑀅𑀦𑀮𑀗𑁆𑀓𑀭𑀡𑁂𑀦 𑀅𑀦𑀧𑁂𑀓𑁆𑀔𑀡𑀲𑀻𑀮𑁄 𑀅𑀧𑀺𑀳𑀸𑀮𑀼𑀓𑁄 𑀦𑀺𑀢𑁆𑀢𑀡𑁆𑀳𑁄. 𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻𑀢𑀺 𑀢𑀢𑁆𑀣 𑀯𑀺𑀪𑀽𑀢𑀸 𑀤𑀼𑀯𑀺𑀥𑀸 𑁋 𑀅𑀕𑀸𑀭𑀺𑀓𑀯𑀺𑀪𑀽𑀲𑀸 𑀘 𑀅𑀦𑀕𑀸𑀭𑀺𑀓𑀯𑀺𑀪𑀽𑀲𑀸 𑀘. 𑀲𑀸𑀝𑀓𑀯𑁂𑀞𑀦𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀺𑀪𑀽𑀲𑀸 𑀅𑀕𑀸𑀭𑀺𑀓𑀯𑀺𑀪𑀽𑀲𑀸 𑀦𑀸𑀫. 𑀧𑀢𑁆𑀢𑀫𑀡𑁆𑀟𑀦𑀸𑀤𑀺𑀯𑀺𑀪𑀽𑀲𑀸 𑀅𑀦𑀕𑀸𑀭𑀺𑀓𑀯𑀺𑀪𑀽𑀲𑀸. 𑀯𑀺𑀪𑀽𑀲𑀸 𑀏𑀯 𑀯𑀺𑀪𑀽𑀲𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀺𑀪𑀽𑀲𑀝𑁆𑀞𑀸𑀦𑀸 𑀢𑀺𑀯𑀺𑀥𑀸𑀬 𑀯𑀺𑀭𑀢𑀺𑀬𑀸 𑀯𑀺𑀭𑀢𑁄. 𑀅𑀯𑀺𑀢𑀣𑀯𑀘𑀦𑀢𑁄 𑀲𑀘𑁆𑀘𑀯𑀸𑀤𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀪𑀽𑀲𑀝𑁆𑀞𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁬. 𑀧𑀼𑀢𑁆𑀢𑀜𑁆𑀘 𑀤𑀸𑀭𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀳𑀭𑀓𑀸𑀮𑁂𑀬𑁂𑀯 𑀅𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀦𑁆𑀢𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀩𑀳𑀽𑀦𑀁 𑀤𑀼𑀓𑁆𑀔𑀁 𑀓𑀭𑁄𑀫𑀺, 𑀓𑀺𑀁 𑀫𑁂 𑀏𑀓𑀪𑀢𑁆𑀢𑀢𑁆𑀣𑀸𑀬 𑀇𑀫𑀺𑀦𑀸 𑀧𑀸𑀧𑁂𑀦, 𑀳𑀦𑁆𑀤, 𑀲𑀼𑀔𑀫𑀼𑀧𑁆𑀧𑀸𑀤𑁂𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀥𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀭𑀚𑀢𑀚𑀸𑀢𑀭𑀽𑀧𑀸𑀤𑀻𑀦𑀺 𑀭𑀢𑀦𑀸𑀦𑀺. 𑀥𑀜𑁆𑀜𑀸𑀦𑀻𑀢𑀺 𑀲𑀸𑀮𑀺𑀯𑀻𑀳𑀺𑀬𑀯𑀕𑁄𑀥𑀼𑀫𑀓𑀗𑁆𑀕𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑀧𑁆𑀧𑀪𑁂𑀤𑀸𑀦𑀺 𑀲𑀢𑁆𑀢 𑀲𑁂𑀲𑀸𑀧𑀭𑀡𑁆𑀡𑀸𑀦𑀺 𑀘. 𑀩𑀦𑁆𑀥𑀯𑀸𑀦𑀻𑀢𑀺 𑀜𑀸𑀢𑀺𑀩𑀦𑁆𑀥𑀼𑀕𑁄𑀢𑁆𑀢𑀩𑀦𑁆𑀥𑀼𑀫𑀺𑀢𑁆𑀢𑀩𑀦𑁆𑀥𑀼𑀲𑀺𑀧𑁆𑀧𑀩𑀦𑁆𑀥𑀼𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀩𑀦𑁆𑀥𑀯𑁂. 𑀬𑀣𑁄𑀥𑀺𑀓𑀸𑀦𑀻𑀢𑀺 𑀲𑀓𑀲𑀓𑀑𑀥𑀺𑀯𑀲𑁂𑀦 𑀞𑀺𑀢𑀸𑀦𑀺𑀬𑁂𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀼𑀢𑁆𑀢𑀤𑀸𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁭. 𑀲𑀗𑁆𑀕𑁄 𑀏𑀲𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀧𑀸𑀤𑀮𑁄𑀮𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀧𑀸𑀢𑁄𑀯 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀸𑀦𑀺 𑀦𑀸𑀝𑀓𑀸𑀦𑀺 𑀧𑀲𑁆𑀲𑀢𑀺. 𑀢𑀺𑀯𑀺𑀥𑀸 𑀦𑀸𑀫 𑀦𑀸𑀝𑀓𑀸 𑀧𑀼𑀩𑁆𑀩𑀭𑀸𑀚𑀢𑁄 𑀆𑀕𑀢𑀁, 𑀅𑀦𑀦𑁆𑀢𑀭𑀭𑀸𑀚𑀢𑁄 𑀆𑀕𑀢𑀁, 𑀅𑀢𑁆𑀢𑀦𑁄 𑀓𑀸𑀮𑁂 𑀉𑀝𑁆𑀞𑀺𑀢𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀤𑀳𑀭𑀦𑀸𑀝𑀓𑀧𑀸𑀲𑀸𑀤𑀁 𑀕𑀢𑁄. 𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 ‘‘𑀭𑀸𑀚𑀸𑀦𑀁 𑀭𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀅𑀘𑁆𑀙𑀭𑀸𑀬𑁄 𑀯𑀺𑀬 𑀅𑀢𑀺𑀫𑀦𑁄𑀳𑀭𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀁 𑀧𑀬𑁄𑀚𑁂𑀲𑀼𑀁. 𑀭𑀸𑀚𑀸 ‘‘𑀅𑀦𑀘𑁆𑀙𑀭𑀺𑀬𑀫𑁂𑀢𑀁 𑀤𑀳𑀭𑀸𑀦’’𑀦𑁆𑀢𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀫𑀚𑁆𑀛𑀺𑀫𑀦𑀸𑀝𑀓𑀧𑀸𑀲𑀸𑀤𑀁 𑀕𑀢𑁄, 𑀢𑀸𑀧𑀺 𑀦𑀸𑀝𑀓𑀺𑀢𑁆𑀣𑀺𑀬𑁄 𑀢𑀣𑁂𑀯 𑀅𑀓𑀁𑀲𑀼. 𑀲𑁄 𑀢𑀢𑁆𑀣𑀧𑀺 𑀢𑀣𑁂𑀯 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀫𑀳𑀮𑁆𑀮𑀓𑀦𑀸𑀝𑀓𑀧𑀸𑀲𑀸𑀤𑀁 𑀕𑀢𑁄, 𑀢𑀸𑀧𑀺 𑀢𑀣𑁂𑀯 𑀅𑀓𑀁𑀲𑀼. 𑀭𑀸𑀚𑀸 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀅𑀢𑀻𑀢𑀸𑀦𑀁 𑀢𑀸𑀲𑀁 𑀫𑀳𑀮𑁆𑀮𑀓𑀪𑀸𑀯𑁂𑀦 𑀅𑀝𑁆𑀞𑀺𑀓𑀻𑀴𑀦𑀲𑀤𑀺𑀲𑀁 𑀦𑀘𑁆𑀘𑀁 𑀤𑀺𑀲𑁆𑀯𑀸 𑀕𑀻𑀢𑀜𑁆𑀘 𑀅𑀫𑀥𑀼𑀭𑀁 𑀲𑀼𑀢𑁆𑀯𑀸 𑀧𑀼𑀦𑀤𑁂𑀯 𑀤𑀳𑀭𑀦𑀸𑀝𑀓𑀧𑀸𑀲𑀸𑀤𑀁, 𑀧𑀼𑀦 𑀫𑀚𑁆𑀛𑀺𑀫𑀦𑀸𑀝𑀓𑀧𑀸𑀲𑀸𑀤𑀦𑁆𑀢𑀺 𑀏𑀯𑀫𑁆𑀧𑀺 𑀯𑀺𑀘𑀭𑀺𑀢𑁆𑀯𑀸 𑀓𑀢𑁆𑀣𑀘𑀺 𑀅𑀲𑀦𑁆𑀢𑀼𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀅𑀘𑁆𑀙𑀭𑀸𑀬𑁄 𑀯𑀺𑀬 𑀫𑀁 𑀭𑀫𑀸𑀧𑁂𑀢𑀼𑀓𑀸𑀫𑀸 𑀲𑀩𑁆𑀩𑀣𑀸𑀫𑁂𑀦 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀁 𑀧𑀬𑁄𑀚𑁂𑀲𑀼𑀁. 𑀲𑁆𑀯𑀸𑀳𑀁 𑀓𑀢𑁆𑀣𑀘𑀺 𑀅𑀲𑀦𑁆𑀢𑀼𑀝𑁆𑀞𑁄 𑀮𑁄𑀪𑀁 𑀯𑀟𑁆𑀠𑁂𑀫𑀺. 𑀮𑁄𑀪𑁄 𑀘 𑀦𑀸𑀫𑁂𑀲 𑀅𑀧𑀸𑀬𑀕𑀫𑀦𑀻𑀬𑁄 𑀥𑀫𑁆𑀫𑁄, 𑀳𑀦𑁆𑀤𑀸𑀳𑀁 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀗𑁆𑀕𑁄 𑀏𑀲𑁄𑀢𑀺 𑀅𑀢𑁆𑀢𑀦𑁄 𑀉𑀧𑀪𑁄𑀕𑀁 𑀦𑀺𑀤𑁆𑀤𑀺𑀲𑀢𑀺. 𑀲𑁄 𑀳𑀺 𑀲𑀚𑁆𑀚𑀦𑁆𑀢𑀺 𑀢𑀢𑁆𑀣 𑀧𑀸𑀡𑀺𑀦𑁄 𑀓𑀤𑁆𑀤𑀫𑁂 𑀧𑀯𑀺𑀝𑁆𑀞𑁄 𑀳𑀢𑁆𑀣𑀻 𑀯𑀺𑀬𑀸𑀢𑀺 𑀲𑀗𑁆𑀕𑁄. 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑀪𑁄𑀕𑀓𑀸𑀮𑁂 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀓𑀸𑀫𑀸𑀯𑀘𑀭𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁄 𑀯𑀸 𑀮𑀸𑀫𑀓𑀝𑁆𑀞𑁂𑀦 𑀲𑁄𑀔𑁆𑀬𑀁 𑀧𑀭𑀺𑀢𑁆𑀢𑀁, 𑀯𑀺𑀚𑁆𑀚𑀼𑀧𑁆𑀧𑀪𑀸𑀬 𑀑𑀪𑀸𑀲𑀺𑀢𑀦𑀘𑁆𑀘𑀤𑀲𑁆𑀲𑀦𑀲𑀼𑀔𑀁 𑀇𑀯 𑀇𑀢𑁆𑀢𑀭𑀁, 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀪𑀺𑀬𑁆𑀬𑁄𑀢𑀺 𑀏𑀢𑁆𑀣 𑀘 𑀬𑁆𑀯𑀸𑀬𑀁 ‘‘𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀯𑀼𑀢𑁆𑀢𑁄, 𑀲𑁄 𑀬𑀫𑀺𑀤𑀁 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄, 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀬𑀤𑀺 𑀫𑀼𑀤𑁆𑀤𑀸𑀬 𑀬𑀤𑀺 𑀕𑀡𑀦𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 (𑀫. 𑀦𑀺. 𑁧.𑁧𑁬𑁭) 𑀦𑀬𑁂𑀦𑁂𑀢𑁆𑀣 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁, 𑀢𑀁 𑀉𑀧𑀦𑀺𑀥𑀸𑀬 𑀅𑀧𑁆𑀧𑁄 𑀉𑀤𑀓𑀩𑀺𑀦𑁆𑀤𑀼𑀫𑀢𑁆𑀢𑁄 𑀳𑁄𑀢𑀺, 𑀅𑀣 𑀔𑁄 𑀤𑀼𑀓𑁆𑀔𑀫𑁂𑀯 𑀪𑀺𑀬𑁆𑀬𑁄 𑀩𑀳𑀼, 𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀲𑀤𑀺𑀲𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀪𑀺𑀬𑁆𑀬𑁄’’𑀢𑀺. 𑀕𑀴𑁄 𑀏𑀲𑁄𑀢𑀺 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀆𑀓𑀟𑁆𑀠𑀦𑀯𑀲𑁂𑀦 𑀩𑀴𑀺𑀲𑁄 𑀯𑀺𑀬 𑀏𑀲𑁄, 𑀬𑀤𑀺𑀤𑀁 𑀧𑀜𑁆𑀘𑀓𑀸𑀫𑀕𑀼𑀡𑀸. 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸 𑀩𑀼𑀤𑁆𑀥𑀺𑀫𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀲𑀩𑁆𑀩𑀫𑁂𑀢𑀁 𑀧𑀳𑀸𑀬 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀲𑀗𑁆𑀕𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁮. 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀦𑀺𑀯𑀢𑁆𑀢𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑁄 𑀅𑀚𑀺𑀦𑀺𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀘𑁆𑀘𑀁 𑀆𑀭𑀤𑁆𑀥𑁄 𑀅𑀦𑀺𑀝𑁆𑀞𑀧𑁂𑀢𑁆𑀯𑀸 𑀦 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦𑀁 𑀏𑀯𑀁 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀤𑀯𑀟𑀸𑀳𑁄 𑀉𑀝𑁆𑀞𑀸𑀲𑀺. 𑀲𑁄 𑀅𑀕𑁆𑀕𑀺 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀳𑀭𑀺𑀢𑀸𑀦𑀺 𑀘 𑀢𑀺𑀡𑀸𑀤𑀻𑀦𑀺 𑀤𑀳𑀦𑁆𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑁄 𑀏𑀯 𑀕𑀘𑁆𑀙𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀢𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. ‘‘𑀬𑀣𑀸𑀬𑀁 𑀤𑀯𑀟𑀸𑀳𑁄, 𑀏𑀯𑀫𑁂𑀯 𑀏𑀓𑀸𑀤𑀲𑀯𑀺𑀥𑁄 𑀅𑀕𑁆𑀕𑀺 𑀲𑀩𑁆𑀩𑁂 𑀲𑀢𑁆𑀢𑁂 𑀤𑀳𑀦𑁆𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑁄 𑀕𑀘𑁆𑀙𑀢𑀺 𑀫𑀳𑀸𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀬𑀁 𑀅𑀕𑁆𑀕𑀺 𑀯𑀺𑀬 𑀅𑀭𑀺𑀬𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀓𑀺𑀮𑁂𑀲𑁂 𑀤𑀳𑀦𑁆𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑁄 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺? 𑀢𑀢𑁄 𑀫𑀼𑀳𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀓𑁂𑀯𑀝𑁆𑀝𑁂 𑀅𑀤𑁆𑀤𑀲 𑀦𑀤𑀺𑀬𑀁 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁂. 𑀢𑁂𑀲𑀁 𑀚𑀸𑀮𑀦𑁆𑀢𑀭𑁂 𑀧𑀯𑀺𑀝𑁆𑀞𑁄 𑀏𑀓𑁄 𑀫𑀳𑀸𑀫𑀘𑁆𑀙𑁄 𑀚𑀸𑀮𑀁 𑀪𑁂𑀢𑁆𑀯𑀸 𑀧𑀮𑀸𑀬𑀺. 𑀢𑁂 ‘‘𑀫𑀘𑁆𑀙𑁄 𑀚𑀸𑀮𑀁 𑀪𑁂𑀢𑁆𑀯𑀸 𑀕𑀢𑁄’’𑀢𑀺 𑀲𑀤𑁆𑀤𑀫𑀓𑀁𑀲𑀼. 𑀭𑀸𑀚𑀸 𑀢𑀫𑁆𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀚𑀸𑀮𑀁 𑀪𑁂𑀢𑁆𑀯𑀸 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺? 𑀲𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀸𑀓𑀸𑀲𑀺, 𑀇𑀫𑀜𑁆𑀘 𑀉𑀤𑀸𑀦𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀸 𑀤𑀼𑀢𑀺𑀬𑀧𑀸𑀤𑁂 𑀚𑀸𑀮𑀦𑁆𑀢𑀺 𑀲𑀼𑀢𑁆𑀢𑀫𑀬𑀁 𑀯𑀼𑀘𑁆𑀘𑀢𑀺. 𑀅𑀫𑁆𑀩𑀽𑀢𑀺 𑀉𑀤𑀓𑀁, 𑀢𑀢𑁆𑀣 𑀘𑀭𑀢𑀻𑀢𑀺 𑀅𑀫𑁆𑀩𑀼𑀘𑀸𑀭𑀻, 𑀫𑀘𑁆𑀙𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀮𑀺𑀮𑁂 𑀅𑀫𑁆𑀩𑀼𑀘𑀸𑀭𑀻 𑀲𑀮𑀺𑀮𑀫𑁆𑀩𑀼𑀘𑀸𑀭𑀻. 𑀢𑀲𑁆𑀫𑀺𑀁 𑀦𑀤𑀻𑀲𑀮𑀺𑀮𑁂 𑀚𑀸𑀮𑀁 𑀪𑁂𑀢𑁆𑀯𑀸 𑀕𑀢𑀅𑀫𑁆𑀩𑀼𑀘𑀸𑀭𑀻𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑀧𑀸𑀤𑁂 𑀤𑀟𑁆𑀠𑀦𑁆𑀢𑀺 𑀤𑀟𑁆𑀠𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀬𑀣𑀸 𑀅𑀕𑁆𑀕𑀺 𑀤𑀟𑁆𑀠𑀝𑁆𑀞𑀸𑀦𑀁 𑀧𑀼𑀦 𑀦 𑀦𑀺𑀯𑀢𑁆𑀢𑀢𑀺, 𑀦 𑀢𑀢𑁆𑀣 𑀪𑀺𑀬𑁆𑀬𑁄 𑀆𑀕𑀘𑁆𑀙𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀓𑀸𑀫𑀕𑀼𑀡𑀝𑁆𑀞𑀸𑀦𑀁 𑀅𑀦𑀺𑀯𑀢𑁆𑀢𑀫𑀸𑀦𑁄 𑀢𑀢𑁆𑀣 𑀪𑀺𑀬𑁆𑀬𑁄 𑀅𑀦𑀸𑀕𑀘𑁆𑀙𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀦𑁆𑀤𑀸𑀮𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁯. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀘𑀓𑁆𑀔𑀼𑀮𑁄𑀮𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀸𑀤𑀮𑁄𑀮𑀩𑁆𑀭𑀳𑁆𑀫𑀤𑀢𑁆𑀢𑁄 𑀯𑀺𑀬 𑀦𑀸𑀝𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑁄 𑀅𑀲𑀦𑁆𑀢𑀼𑀝𑁆𑀞𑁄 𑀢𑀢𑁆𑀣 𑀢𑀢𑁆𑀣 𑀕𑀘𑁆𑀙𑀢𑀺. 𑀅𑀬𑀁 𑀢𑀁 𑀢𑀁 𑀦𑀸𑀝𑀓𑀁 𑀤𑀺𑀲𑁆𑀯𑀸 𑀅𑀢𑀻𑀯 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀦𑀸𑀝𑀓𑀤𑀲𑁆𑀲𑀦𑀧𑀭𑀺𑀯𑀢𑁆𑀢𑀦𑁂𑀦 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀓𑀺𑀭 𑀦𑀸𑀝𑀓𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑀁 𑀅𑀜𑁆𑀜𑀢𑀭𑀁 𑀓𑀼𑀝𑀼𑀫𑁆𑀩𑀺𑀬𑀪𑀭𑀺𑀬𑀁 𑀤𑀺𑀲𑁆𑀯𑀸 𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀢𑁄 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 ‘‘𑀅𑀭𑁂, 𑀅𑀳𑀁 𑀇𑀫𑀁 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑁄 𑀅𑀧𑀸𑀬𑀧𑀭𑀺𑀧𑀽𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀳𑀦𑁆𑀤, 𑀦𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀧𑀝𑀺𑀧𑀢𑁆𑀢𑀺𑀁 𑀕𑀭𑀳𑀦𑁆𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀕𑀼𑀡𑀤𑀻𑀧𑀺𑀓𑀁 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀼, 𑀲𑀢𑁆𑀢𑀕𑀻𑀯𑀝𑁆𑀞𑀺𑀓𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀧𑀭𑀺𑀯𑀚𑁆𑀚𑀦𑀕𑀳𑁂𑀢𑀩𑁆𑀩𑀤𑀲𑁆𑀲𑀦𑀢𑁆𑀣𑀁 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑀼 𑀳𑀦𑀼𑀓𑀝𑁆𑀞𑀺𑀦𑀸 𑀳𑀤𑀬𑀝𑁆𑀞𑀺𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑁄. 𑀏𑀯𑀜𑁆𑀳𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸 𑀦 𑀲𑀫𑀡𑀲𑀸𑀭𑀼𑀧𑁆𑀧𑀸 𑀳𑁄𑀢𑀺. 𑀦 𑀘 𑀧𑀸𑀤𑀮𑁄𑀮𑁄𑀢𑀺 𑀏𑀓𑀲𑁆𑀲 𑀤𑀼𑀢𑀺𑀬𑁄, 𑀤𑁆𑀯𑀺𑀦𑁆𑀦𑀁 𑀢𑀢𑀺𑀬𑁄𑀢𑀺 𑀏𑀯𑀁 𑀕𑀡𑀫𑀚𑁆𑀛𑀁 𑀧𑀯𑀺𑀲𑀺𑀢𑀼𑀓𑀸𑀫𑀢𑀸𑀬 𑀓𑀡𑁆𑀟𑀽𑀬𑀫𑀸𑀦𑀧𑀸𑀤𑁄 𑀯𑀺𑀬 𑀅𑀪𑀯𑀦𑁆𑀢𑁄, 𑀤𑀻𑀖𑀘𑀸𑀭𑀺𑀓𑀅𑀦𑀺𑀯𑀢𑁆𑀢𑀘𑀸𑀭𑀺𑀓𑀯𑀺𑀭𑀢𑁄. 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀇𑀥 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀸𑀯𑀲𑁂𑀲𑀯𑀲𑁂𑀦 𑀘 𑀕𑁄𑀧𑀺𑀢𑀺𑀦𑁆𑀤𑁆𑀭𑀺𑀬𑁄. 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄𑀢𑀺 𑀫𑀸𑀦𑀲𑀁 𑀏𑀯 𑀫𑀸𑀦𑀲𑀸𑀦𑀁, 𑀢𑀁 𑀭𑀓𑁆𑀔𑀺𑀢𑀫𑀲𑁆𑀲𑀸𑀢𑀺 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄. 𑀬𑀣𑀸 𑀓𑀺𑀮𑁂𑀲𑁂𑀳𑀺 𑀦 𑀯𑀺𑀮𑀼𑀧𑁆𑀧𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂𑀲𑀼 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀺𑀮𑁂𑀲𑀅𑀦𑁆𑀯𑀲𑁆𑀲𑀯𑀯𑀺𑀭𑀳𑀺𑀢𑁄. 𑀅𑀧𑀭𑀺𑀟𑀬𑁆𑀳𑀫𑀸𑀦𑁄𑀢𑀺 𑀓𑀺𑀮𑁂𑀲𑀕𑁆𑀕𑀻𑀳𑀺 𑀅𑀧𑀭𑀺𑀟𑀬𑁆𑀳𑀫𑀸𑀦𑁄. 𑀩𑀳𑀺𑀤𑁆𑀥𑀸 𑀯𑀸 𑀅𑀦𑀯𑀲𑁆𑀲𑀼𑀢𑁄, 𑀅𑀚𑁆𑀛𑀢𑁆𑀢𑀁 𑀅𑀧𑀭𑀺𑀟𑀬𑁆𑀳𑀫𑀸𑀦𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁦. 𑀑𑀳𑀸𑀭𑀬𑀺𑀢𑁆𑀯𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑁄𑀧𑀺 𑀘𑀸𑀢𑀼𑀫𑀸𑀲𑀺𑀓𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀘𑀢𑀼𑀫𑀸𑀲𑁂 𑀘𑀢𑀼𑀫𑀸𑀲𑁂 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀕𑀺𑀫𑁆𑀳𑀸𑀦𑀁 𑀫𑀚𑁆𑀛𑀺𑀫𑀫𑀸𑀲𑁂 𑀉𑀬𑁆𑀬𑀸𑀦𑀁 𑀧𑀯𑀺𑀲𑀦𑁆𑀢𑁄 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀧𑀢𑁆𑀢𑀲𑀜𑁆𑀙𑀦𑁆𑀦𑀁 𑀧𑀼𑀧𑁆𑀨𑀸𑀮𑀗𑁆𑀓𑀢𑀲𑀸𑀔𑀸𑀯𑀺𑀝𑀧𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀁 𑀤𑀺𑀲𑁆𑀯𑀸 𑀏𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀢𑀢𑁄 ‘‘𑀭𑀜𑁆𑀜𑀸 𑀅𑀕𑁆𑀕𑀧𑀼𑀧𑁆𑀨𑀁 𑀕𑀳𑀺𑀢’’𑀦𑁆𑀢𑀺 𑀅𑀜𑁆𑀜𑀢𑀭𑁄𑀧𑀺 𑀅𑀫𑀘𑁆𑀘𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀺𑀢𑁄 𑀏𑀓𑀫𑁂𑀯 𑀧𑀼𑀧𑁆𑀨𑀁 𑀅𑀕𑁆𑀕𑀳𑁂𑀲𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀲𑀩𑁆𑀩𑁄 𑀩𑀮𑀓𑀸𑀬𑁄 𑀅𑀕𑁆𑀕𑀳𑁂𑀲𑀺. 𑀧𑀼𑀧𑁆𑀨𑁂𑀳𑀺 𑀅𑀦𑀲𑁆𑀲𑀸𑀤𑁂𑀦𑁆𑀢𑀸 𑀧𑀢𑁆𑀢𑀫𑁆𑀧𑀺 𑀕𑀡𑁆𑀳𑀺𑀁𑀲𑀼. 𑀲𑁄 𑀭𑀼𑀓𑁆𑀔𑁄 𑀦𑀺𑀧𑁆𑀧𑀢𑁆𑀢𑀧𑀼𑀧𑁆𑀨𑁄 𑀔𑀦𑁆𑀥𑀫𑀢𑁆𑀢𑁄𑀯 𑀅𑀳𑁄𑀲𑀺. 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑁂 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀢𑁄 𑀅𑀬𑀁 𑀭𑀼𑀓𑁆𑀔𑁄, 𑀫𑀫𑀸𑀕𑀫𑀦𑀯𑁂𑀮𑀸𑀬 𑀫𑀡𑀺𑀯𑀡𑁆𑀡𑀲𑀸𑀔𑀦𑁆𑀢𑀭𑁂𑀲𑀼 𑀧𑀯𑀸𑀴𑀲𑀤𑀺𑀲𑀧𑀼𑀧𑁆𑀨𑀸𑀮𑀗𑁆𑀓𑀢𑁄 𑀅𑀳𑁄𑀲𑀺, 𑀇𑀤𑀸𑀦𑀺 𑀦𑀺𑀧𑁆𑀧𑀢𑁆𑀢𑀧𑀼𑀧𑁆𑀨𑁄 𑀚𑀸𑀢𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀢𑀲𑁆𑀲𑁂𑀯 𑀅𑀯𑀺𑀤𑀽𑀭𑁂 𑀅𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑀁 𑀲𑀜𑁆𑀙𑀦𑁆𑀦𑀧𑀮𑀸𑀲𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀭𑀼𑀓𑁆𑀔𑁄 𑀧𑀼𑀧𑁆𑀨𑀪𑀭𑀺𑀢𑀲𑀸𑀔𑀢𑁆𑀢𑀸 𑀩𑀳𑀼𑀚𑀦𑀲𑁆𑀲 𑀮𑁄𑀪𑀦𑀻𑀬𑁄 𑀅𑀳𑁄𑀲𑀺, 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦𑁂𑀯 𑀩𑁆𑀬𑀲𑀦𑀁 𑀧𑀢𑁆𑀢𑁄. 𑀅𑀬𑀁 𑀧𑀦𑀜𑁆𑀜𑁄 𑀅𑀮𑁄𑀪𑀦𑀻𑀬𑀢𑁆𑀢𑀸 𑀢𑀣𑁂𑀯 𑀞𑀺𑀢𑁄. 𑀇𑀤𑀜𑁆𑀘𑀸𑀧𑀺 𑀭𑀚𑁆𑀚𑀁 𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑁄 𑀯𑀺𑀬 𑀮𑁄𑀪𑀦𑀻𑀬𑀁, 𑀪𑀺𑀓𑁆𑀔𑀼𑀪𑀸𑀯𑁄 𑀧𑀦 𑀅𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑁄 𑀯𑀺𑀬 𑀅𑀮𑁄𑀪𑀦𑀻𑀬𑁄. 𑀢𑀲𑁆𑀫𑀸 𑀬𑀸𑀯 𑀇𑀤𑀫𑁆𑀧𑀺 𑀅𑀬𑀁 𑀭𑀼𑀓𑁆𑀔𑁄 𑀯𑀺𑀬 𑀦 𑀯𑀺𑀮𑀼𑀧𑁆𑀧𑀢𑀺, 𑀢𑀸𑀯 𑀅𑀬𑀫𑀜𑁆𑀜𑁄 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀏𑀯𑀁 𑀓𑀸𑀲𑀸𑀯𑁂𑀦 𑀲𑀜𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀲𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀧𑀸𑀤𑀲𑁆𑀲 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑁄 𑀳𑀼𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀧𑀸𑀭𑀺𑀘𑁆𑀙𑀢𑁆𑀢𑀓𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁨𑁧. 𑀭𑀲𑁂𑀲𑀽𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀉𑀬𑁆𑀬𑀸𑀦𑁂 𑀅𑀫𑀘𑁆𑀘𑀧𑀼𑀢𑁆𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀁 𑀓𑀻𑀴𑀢𑀺. 𑀢𑀲𑁆𑀲 𑀲𑀽𑀤𑁄 𑀲𑀩𑁆𑀩𑀫𑀁𑀲𑀸𑀦𑀁 𑀭𑀲𑀁 𑀕𑀳𑁂𑀢𑁆𑀯𑀸 𑀅𑀢𑀻𑀯 𑀲𑀼𑀲𑀗𑁆𑀔𑀢𑀁 𑀅𑀫𑀢𑀓𑀧𑁆𑀧𑀁 𑀅𑀦𑁆𑀢𑀭𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀲𑁄 𑀢𑀢𑁆𑀣 𑀕𑁂𑀥𑀫𑀸𑀧𑀦𑁆𑀦𑁄 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸𑀯 𑀪𑀼𑀜𑁆𑀚𑀺. 𑀉𑀤𑀓𑀁 𑀓𑀻𑀴𑀦𑁆𑀢𑁄 𑀅𑀢𑀺𑀯𑀺𑀓𑀸𑀮𑁂 𑀦𑀺𑀓𑁆𑀔𑀦𑁆𑀢𑁄 𑀲𑀻𑀖𑀁 𑀲𑀻𑀖𑀁 𑀪𑀼𑀜𑁆𑀚𑀺. 𑀬𑁂𑀳𑀺 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀪𑀼𑀜𑁆𑀚𑀢𑀺, 𑀦 𑀢𑁂𑀲𑀁 𑀓𑀜𑁆𑀘𑀺 𑀲𑀭𑀺. 𑀅𑀣 𑀧𑀘𑁆𑀙𑀸 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀳𑁄! 𑀫𑀬𑀸 𑀧𑀸𑀧𑀁 𑀓𑀢𑀁, 𑀬𑁆𑀯𑀸𑀬𑀁 𑀭𑀲𑀢𑀡𑁆𑀳𑀸𑀪𑀺𑀪𑀽𑀢𑁄 𑀲𑀩𑁆𑀩𑀚𑀦𑀁 𑀯𑀺𑀲𑁆𑀲𑀭𑀺𑀢𑁆𑀯𑀸 𑀏𑀓𑀓𑁄𑀯 𑀪𑀼𑀜𑁆𑀚𑀺𑀁, 𑀳𑀦𑁆𑀤, 𑀦𑀁 𑀭𑀲𑀢𑀡𑁆𑀳𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀧𑀝𑀺𑀧𑀢𑁆𑀢𑀺𑀁 𑀕𑀭𑀳𑀦𑁆𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀕𑀼𑀡𑀤𑀻𑀧𑀺𑀓𑀁 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀭𑀲𑁂𑀲𑀽𑀢𑀺 𑀅𑀫𑁆𑀩𑀺𑀮𑀫𑀥𑀼𑀭𑀢𑀺𑀢𑁆𑀢𑀓𑀓𑀝𑀼𑀓𑀮𑁄𑀡𑀔𑀸𑀭𑀺𑀓𑀓𑀲𑀸𑀯𑀸𑀤𑀺𑀪𑁂𑀤𑁂𑀲𑀼 𑀲𑀸𑀬𑀦𑀻𑀬𑁂𑀲𑀼. 𑀕𑁂𑀥𑀁 𑀅𑀓𑀭𑀦𑁆𑀢𑀺 𑀕𑀺𑀤𑁆𑀥𑀺𑀁 𑀅𑀓𑀭𑁄𑀦𑁆𑀢𑁄, 𑀢𑀡𑁆𑀳𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁄𑀮𑁄𑀢𑀺 ‘‘𑀇𑀤𑀁 𑀲𑀸𑀬𑀺𑀲𑁆𑀲𑀸𑀫𑀺, 𑀇𑀤𑀁 𑀲𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀭𑀲𑀯𑀺𑀲𑁂𑀲𑁂𑀲𑀼 𑀅𑀦𑀸𑀓𑀼𑀮𑁄. 𑀅𑀦𑀜𑁆𑀜𑀧𑁄𑀲𑀻𑀢𑀺 𑀧𑁄𑀲𑁂𑀢𑀩𑁆𑀩𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀯𑀺𑀭𑀳𑀺𑀢𑁄. 𑀓𑀸𑀬𑀲𑀦𑁆𑀥𑀸𑀭𑀡𑀫𑀢𑁆𑀢𑁂𑀦 𑀲𑀦𑁆𑀢𑀼𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀯𑀸 𑀧𑀼𑀩𑁆𑀩𑁂 𑀉𑀬𑁆𑀬𑀸𑀦𑁂 𑀭𑀲𑁂𑀲𑀼 𑀕𑁂𑀥𑀓𑀭𑀡𑀲𑀻𑀮𑁄 𑀅𑀜𑁆𑀜𑀧𑁄𑀲𑀻 𑀆𑀲𑀺𑀁, 𑀏𑀯𑀁 𑀅𑀳𑀼𑀢𑁆𑀯𑀸 𑀬𑀸𑀬 𑀢𑀡𑁆𑀳𑀸𑀬 𑀮𑁄𑀮𑁄 𑀳𑀼𑀢𑁆𑀯𑀸 𑀭𑀲𑁂𑀲𑀼 𑀕𑁂𑀥𑀁 𑀓𑀭𑁄𑀢𑀺, 𑀢𑀁 𑀢𑀡𑁆𑀳𑀁 𑀳𑀺𑀢𑁆𑀯𑀸 𑀆𑀬𑀢𑀺𑀁 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀅𑀜𑁆𑀜𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲𑀸𑀦𑀺𑀩𑁆𑀩𑀢𑁆𑀢𑀸𑀧𑀦𑁂𑀦 𑀅𑀦𑀜𑁆𑀜𑀧𑁄𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀢𑁆𑀣𑀪𑀜𑁆𑀚𑀦𑀓𑀝𑁆𑀞𑁂𑀦 𑀓𑀺𑀮𑁂𑀲𑀸 ‘‘𑀅𑀜𑁆𑀜𑁂’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀧𑁄𑀲𑀦𑁂𑀦 𑀅𑀦𑀜𑁆𑀜𑀧𑁄𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀧𑀤𑀸𑀦𑀘𑀸𑀭𑀻𑀢𑀺 𑀅𑀯𑁄𑀓𑁆𑀓𑀫𑁆𑀫𑀘𑀸𑀭𑀻 𑀅𑀦𑀼𑀧𑀼𑀩𑁆𑀩𑀘𑀸𑀭𑀻, 𑀖𑀭𑀧𑀝𑀺𑀧𑀸𑀝𑀺𑀁 𑀅𑀙𑀟𑁆𑀟𑁂𑀢𑁆𑀯𑀸 𑀅𑀟𑁆𑀠𑀓𑀼𑀮𑀜𑁆𑀘 𑀤𑀮𑀺𑀤𑁆𑀤𑀓𑀼𑀮𑀜𑁆𑀘 𑀦𑀺𑀭𑀦𑁆𑀢𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀺𑀮𑁂𑀲𑀯𑀲𑁂𑀦 𑀅𑀮𑀕𑁆𑀕𑀘𑀺𑀢𑁆𑀢𑁄, 𑀘𑀦𑁆𑀤𑁄𑀧𑀫𑁄 𑀦𑀺𑀘𑁆𑀘𑀦𑀯𑀓𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀭𑀲𑀕𑁂𑀥𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁨. 𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀧𑀞𑀫𑀚𑁆𑀛𑀸𑀦𑀮𑀸𑀪𑀻 𑀅𑀳𑁄𑀲𑀺. 𑀲𑁄 𑀛𑀸𑀦𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀧𑀜𑁆𑀘𑀸𑀯𑀭𑀡𑀸𑀦𑀻𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀏𑀯, 𑀢𑀸𑀦𑀺 𑀉𑀭𑀕𑀲𑀼𑀢𑁆𑀢𑁂 (𑀲𑀼. 𑀦𑀺. 𑁧 𑀆𑀤𑀬𑁄) 𑀅𑀢𑁆𑀣𑀢𑁄 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀅𑀩𑁆𑀪𑀸𑀤𑀬𑁄 𑀯𑀺𑀬 𑀘𑀦𑁆𑀤𑀲𑀽𑀭𑀺𑀬𑁂 𑀘𑁂𑀢𑁄 𑀆𑀯𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀯𑀭𑀡𑀸𑀦𑀺 𑀘𑁂𑀢𑀲𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀧𑀳𑀸𑀬 𑀯𑀺𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀉𑀧𑀕𑀫𑁆𑀫 𑀘𑀺𑀢𑁆𑀢𑀁 𑀯𑀺𑀩𑀸𑀥𑁂𑀦𑁆𑀢𑁂 𑀅𑀓𑀼𑀲𑀮𑀥𑀫𑁆𑀫𑁂, 𑀯𑀢𑁆𑀣𑁄𑀧𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁭𑁦 𑀆𑀤𑀬𑁄) 𑀯𑀼𑀢𑁆𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀯𑀸. 𑀩𑁆𑀬𑀧𑀦𑀼𑀚𑁆𑀚𑀸𑀢𑀺 𑀧𑀦𑀼𑀤𑀺𑀢𑁆𑀯𑀸, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀧𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑁂. 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀦𑁆𑀦𑁄 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀦𑀺𑀲𑁆𑀲𑀺𑀢𑁄, 𑀲𑁂𑀲𑀫𑀕𑁆𑀕𑁂𑀳𑀺 𑀙𑁂𑀢𑁆𑀯𑀸 𑀢𑁂𑀥𑀸𑀢𑀼𑀓𑀁 𑀲𑀺𑀦𑁂𑀳𑀤𑁄𑀲𑀁, 𑀢𑀡𑁆𑀳𑀸𑀭𑀸𑀕𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀦𑁂𑀳𑁄 𑀏𑀯 𑀳𑀺 𑀕𑀼𑀡𑀧𑀝𑀺𑀧𑀓𑁆𑀔𑀢𑁄 𑀲𑀺𑀦𑁂𑀳𑀤𑁄𑀲𑁄𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀯𑀭𑀡𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁩. 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 𑀅𑀳𑁄𑀲𑀺. 𑀲𑁄𑀧𑀺 𑀛𑀸𑀦𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦𑀸𑀢𑀺 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸, 𑀙𑀟𑁆𑀟𑁂𑀢𑁆𑀯𑀸 𑀯𑀺𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀜𑁆𑀘 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀺𑀓𑀁 𑀲𑀸𑀢𑀸𑀲𑀸𑀢𑀁. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀦𑁆𑀢𑀺 𑀘𑁂𑀢𑀲𑀺𑀓𑀁 𑀲𑀸𑀢𑀸𑀲𑀸𑀢𑀁. 𑀉𑀧𑁂𑀓𑁆𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁. 𑀲𑀫𑀣𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀁 𑀏𑀯. 𑀯𑀺𑀲𑀼𑀤𑁆𑀥𑀦𑁆𑀢𑀺 𑀧𑀜𑁆𑀘𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀗𑁆𑀔𑀸𑀢𑁂𑀳𑀺 𑀦𑀯𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀢𑀺𑀲𑀼𑀤𑁆𑀥𑀁, 𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀫𑀺𑀯 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀼𑀩𑁆𑀩𑁂𑀯, 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀤𑀼𑀓𑁆𑀔𑀁 𑀢𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀲𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀦 𑀆𑀤𑀺𑀢𑁄 𑀯𑀼𑀢𑁆𑀢𑀁 𑀘-𑀓𑀸𑀭𑀁 𑀧𑀭𑀢𑁄 𑀦𑁂𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀜𑁆𑀘 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀧𑀼𑀩𑁆𑀩𑁂𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀢𑁂𑀦 𑀲𑁄𑀫𑀦𑀲𑁆𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂, 𑀤𑁄𑀫𑀦𑀲𑁆𑀲𑀜𑁆𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀏𑀢𑀸𑀦𑀺 𑀳𑀺 𑀏𑀢𑁂𑀲𑀁 𑀧𑀭𑀺𑀬𑀸𑀬𑀢𑁄 𑀧𑀳𑀸𑀦𑀝𑁆𑀞𑀸𑀦𑀸𑀦𑀺. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀤𑀼𑀓𑁆𑀔𑀲𑁆𑀲 𑀧𑀞𑀫𑀚𑁆𑀛𑀸𑀦𑀁, 𑀤𑁄𑀫𑀦𑀲𑁆𑀲𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀁, 𑀲𑀼𑀔𑀲𑁆𑀲 𑀢𑀢𑀺𑀬𑀚𑁆𑀛𑀸𑀦𑀁, 𑀲𑁄𑀫𑀦𑀲𑁆𑀲𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀳𑀸𑀦𑀝𑁆𑀞𑀸𑀦𑀁. 𑀬𑀣𑀸𑀳 𑁋 ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀓𑀁 (𑀲𑀁. 𑀦𑀺. 𑁫.𑁫𑁧𑁦) 𑀲𑀩𑁆𑀩𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁬𑁫) 𑀯𑀼𑀢𑁆𑀢𑀁. 𑀬𑀣𑀸 𑀧𑀼𑀩𑁆𑀩𑁂𑀯𑀸𑀢𑀺 𑀢𑀻𑀲𑀼 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀸𑀦𑀺 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸 𑀏𑀯𑀫𑁂𑀢𑁆𑀣 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑁄𑀫𑀦𑀲𑁆𑀲𑀁 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁 𑀏𑀓𑁄 𑀘𑀭𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀯𑀺𑀧𑀺𑀝𑁆𑀞𑀺𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁪. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀧𑀘𑁆𑀘𑀦𑁆𑀢𑀭𑀸𑀚𑀸 𑀲𑀳𑀲𑁆𑀲𑀬𑁄𑀥𑀩𑀮𑀓𑀸𑀬𑁄 𑀭𑀚𑁆𑀚𑁂𑀦 𑀔𑀼𑀤𑁆𑀤𑀓𑁄, 𑀧𑀜𑁆𑀜𑀸𑀬 𑀫𑀳𑀦𑁆𑀢𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 ‘‘𑀓𑀺𑀜𑁆𑀘𑀸𑀧𑀺 𑀅𑀳𑀁 𑀔𑀼𑀤𑁆𑀤𑀓𑁄 𑀭𑀚𑁆𑀚𑁂𑀦, 𑀧𑀜𑁆𑀜𑀯𑀢𑀸 𑀧𑀦 𑀲𑀓𑁆𑀓𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀕𑀳𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀫𑀦𑁆𑀢𑀭𑀜𑁆𑀜𑁄 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀫𑁂 𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀢𑀢𑁄 𑀲𑁄 𑀅𑀢𑁆𑀢𑀦𑁄 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑀸 𑀢𑀼𑀫𑁆𑀳𑁂 𑀅𑀦𑀸𑀧𑀼𑀘𑁆𑀙𑀸𑀬𑁂𑀯 𑀲𑀸𑀳𑀲𑀁 𑀓𑀫𑁆𑀫𑀁 𑀓𑀢𑀁, 𑀅𑀫𑀼𑀓𑀲𑁆𑀲 𑀭𑀜𑁆𑀜𑁄 𑀏𑀯𑀁 𑀧𑁂𑀲𑀺𑀢𑀁, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀲𑁄 𑀤𑀽𑀢𑁄 𑀦𑀺𑀯𑀢𑁆𑀢𑁂𑀢𑀼’’𑀦𑁆𑀢𑀺. ‘‘𑀦 𑀲𑀓𑁆𑀓𑀸, 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀬𑀤𑀺 𑀏𑀯𑀁 𑀯𑀺𑀦𑀸𑀲𑀺𑀢𑀫𑁆𑀳𑀸 𑀢𑀬𑀸, 𑀢𑁂𑀦 𑀳𑀺 𑀤𑀼𑀓𑁆𑀔𑀁 𑀅𑀜𑁆𑀜𑀲𑁆𑀲 𑀲𑀢𑁆𑀣𑁂𑀦 𑀫𑀭𑀺𑀢𑀼𑀁, 𑀳𑀦𑁆𑀤, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀫𑀭𑀸𑀫, 𑀅𑀢𑁆𑀢𑀸𑀦𑀁 𑀧𑀳𑀭𑀺𑀢𑁆𑀯𑀸 𑀫𑀭𑀸𑀫, 𑀉𑀩𑁆𑀩𑀦𑁆𑀥𑀸𑀫, 𑀯𑀺𑀲𑀁 𑀔𑀸𑀤𑀸𑀫𑀸’’𑀢𑀺. 𑀏𑀯𑀁 𑀏𑀢𑁂𑀲𑀼 𑀏𑀓𑀫𑁂𑀓𑁄 𑀫𑀭𑀡𑀫𑁂𑀯 𑀲𑀁𑀯𑀡𑁆𑀡𑁂𑀢𑀺. 𑀢𑀢𑁄 𑀭𑀸𑀚𑀸 ‘‘𑀓𑀺𑀁 𑀫𑁂 𑀇𑀫𑁂𑀳𑀺, 𑀅𑀢𑁆𑀣𑀺, 𑀪𑀡𑁂, 𑀫𑀬𑁆𑀳𑀁 𑀬𑁄𑀥𑀸’’𑀢𑀺 𑀆𑀳. 𑀅𑀣 ‘‘𑀅𑀳𑀁 𑀫𑀳𑀸𑀭𑀸𑀚 𑀬𑁄𑀥𑁄, 𑀅𑀳𑀁 𑀫𑀳𑀸𑀭𑀸𑀚 𑀬𑁄𑀥𑁄’’𑀢𑀺 𑀬𑁄𑀥𑀲𑀳𑀲𑁆𑀲𑀁 𑀉𑀝𑁆𑀞𑀳𑀺.

𑀭𑀸𑀚𑀸 ‘‘𑀏𑀢𑁂 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀁 𑀘𑀺𑀢𑀓𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑀸, 𑀪𑀡𑁂, 𑀇𑀤𑀁 𑀲𑀸𑀳𑀲𑀁 𑀓𑀢𑀁, 𑀢𑀁 𑀫𑁂 𑀅𑀫𑀘𑁆𑀘𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀲𑁆𑀯𑀸𑀳𑀁 𑀘𑀺𑀢𑀓𑀁 𑀧𑀯𑀺𑀲𑀺𑀲𑁆𑀲𑀸𑀫𑀺. 𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀯𑀺𑀲𑀺𑀲𑁆𑀲𑀢𑀺, 𑀓𑁂𑀦 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀲𑀢𑀸 𑀬𑁄𑀥𑀸 𑀉𑀝𑁆𑀞𑀳𑀺𑀁𑀲𑀼 ‘‘𑀫𑀬𑀁, 𑀫𑀳𑀸𑀭𑀸𑀚, 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀭𑀸𑀚𑀸 𑀇𑀢𑀭𑁂 𑀧𑀜𑁆𑀘𑀲𑀢𑁂 𑀆𑀳 𑁋 ‘‘𑀢𑀼𑀫𑁆𑀳𑁂 𑀤𑀸𑀦𑀺, 𑀢𑀸𑀢𑀸, 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀢𑁂 𑀆𑀳𑀁𑀲𑀼 𑁋 ‘‘𑀦𑀸𑀬𑀁, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀓𑀸𑀭𑁄, 𑀇𑀢𑁆𑀣𑀺𑀘𑀭𑀺𑀬𑀸 𑀏𑀲𑀸, 𑀅𑀧𑀺𑀘 𑀫𑀳𑀸𑀭𑀸𑀚𑁂𑀦 𑀧𑀝𑀺𑀭𑀜𑁆𑀜𑁄 𑀤𑀽𑀢𑁄 𑀧𑁂𑀲𑀺𑀢𑁄, 𑀢𑁂 𑀫𑀬𑀁 𑀢𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀭𑀸𑀚𑀸 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀢𑀼𑀫𑁆𑀳𑁂𑀳𑀺 𑀫𑀫 𑀚𑀻𑀯𑀺𑀢’’𑀦𑁆𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀢𑁂𑀦 𑀬𑁄𑀥𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀕𑀦𑁆𑀢𑁆𑀯𑀸 𑀭𑀚𑁆𑀚𑀲𑀻𑀫𑀸𑀬 𑀦𑀺𑀲𑀻𑀤𑀺.

𑀲𑁄𑀧𑀺 𑀧𑀝𑀺𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀭𑁂, 𑀲𑁄 𑀔𑀼𑀤𑁆𑀤𑀓𑀭𑀸𑀚𑀸 𑀫𑀫 𑀤𑀸𑀲𑀲𑁆𑀲𑀸𑀧𑀺 𑀦𑀧𑁆𑀧𑀳𑁄𑀢𑀻’’𑀢𑀺 𑀤𑀼𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑀁 𑀩𑀮𑀓𑀸𑀬𑀁 𑀆𑀤𑀸𑀬 𑀬𑀼𑀚𑁆𑀛𑀺𑀢𑀼𑀁 𑀦𑀺𑀓𑁆𑀔𑀫𑀺. 𑀔𑀼𑀤𑁆𑀤𑀓𑀭𑀸𑀚𑀸 𑀢𑀁 𑀅𑀩𑁆𑀪𑀼𑀬𑁆𑀬𑀸𑀢𑀁 𑀤𑀺𑀲𑁆𑀯𑀸 𑀩𑀮𑀓𑀸𑀬𑀁 𑀆𑀳 𑁋 ‘‘𑀢𑀸𑀢𑀸, 𑀢𑀼𑀫𑁆𑀳𑁂 𑀦 𑀩𑀳𑀼𑀓𑀸, 𑀲𑀩𑁆𑀩𑁂 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀇𑀫𑀲𑁆𑀲 𑀭𑀜𑁆𑀜𑁄 𑀧𑀼𑀭𑀢𑁄 𑀉𑀚𑀼𑀓𑀁 𑀏𑀯 𑀕𑀘𑁆𑀙𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀅𑀣𑀲𑁆𑀲 𑀲𑀸 𑀲𑁂𑀦𑀸 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑀭𑀫𑀤𑀸𑀲𑀺. 𑀢𑁂 𑀢𑀁 𑀭𑀸𑀚𑀸𑀦𑀁 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀜𑁆𑀜𑁄 ‘‘𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀤𑀁𑀲𑀼. 𑀧𑀝𑀺𑀭𑀸𑀚𑀸 𑀢𑀁 𑀅𑀪𑀬𑀁 𑀬𑀸𑀘𑀺. 𑀭𑀸𑀚𑀸 𑀢𑀲𑁆𑀲 𑀅𑀪𑀬𑀁 𑀤𑀢𑁆𑀯𑀸 𑀲𑀧𑀣𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀢𑁂𑀦 𑀲𑀳 𑀅𑀜𑁆𑀜𑀁 𑀭𑀸𑀚𑀸𑀦𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀚𑁆𑀚𑀲𑀻𑀫𑀸𑀬 𑀞𑀢𑁆𑀯𑀸 𑀧𑁂𑀲𑁂𑀲𑀺 𑁋 ‘‘𑀭𑀚𑁆𑀚𑀁 𑀯𑀸 𑀫𑁂 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀲𑁄 ‘‘𑀅𑀳𑀁 𑀏𑀓𑀬𑀼𑀤𑁆𑀥𑀫𑁆𑀧𑀺 𑀦 𑀲𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀅𑀦𑁆𑀢𑁂 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀫𑁆𑀧𑀺 𑀅𑀕𑁆𑀕𑀳𑁂𑀲𑀺.

𑀲𑁄 𑀏𑀓𑀲𑀢𑀭𑀸𑀚𑀧𑀭𑀺𑀯𑀼𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀔𑀼𑀤𑁆𑀤𑀓𑁄 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀜𑀸𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀫𑀡𑁆𑀟𑀮𑀲𑁆𑀲 𑀇𑀲𑁆𑀲𑀭𑁄 𑀭𑀸𑀚𑀸 𑀚𑀸𑀢𑁄. 𑀢𑀁 𑀔𑁄 𑀧𑀦 𑀫𑁂 𑀜𑀸𑀡𑀁 𑀮𑁄𑀓𑀺𑀬𑀯𑀻𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀺𑀦𑀸 𑀜𑀸𑀡𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀕𑀯𑁂𑀲𑁂𑀬𑁆𑀬’’𑀦𑁆𑀢𑀺. 𑀢𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀭𑀚𑁆𑀚𑀁 𑀤𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀜𑁆𑀘 𑀲𑀓𑀚𑀦𑀧𑀤𑁂𑀬𑁂𑀯 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀆𑀭𑀤𑁆𑀥𑀁 𑀯𑀻𑀭𑀺𑀬𑀁 𑀅𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑁄. 𑀏𑀢𑁂𑀦 𑀅𑀢𑁆𑀢𑀦𑁄 𑀫𑀳𑀸𑀯𑀻𑀭𑀺𑀬𑀢𑀁 𑀤𑀲𑁆𑀲𑁂𑀢𑀺. 𑀧𑀭𑀫𑀢𑁆𑀣𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀧𑀭𑀫𑀢𑁆𑀣𑀲𑁆𑀲 𑀧𑀢𑁆𑀢𑀺 𑀧𑀭𑀫𑀢𑁆𑀣𑀧𑀢𑁆𑀢𑀺, 𑀢𑀲𑁆𑀲𑀸 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸. 𑀏𑀢𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀧𑀢𑁆𑀢𑀩𑁆𑀩𑀁 𑀨𑀮𑀁 𑀤𑀲𑁆𑀲𑁂𑀢𑀺. 𑀅𑀮𑀻𑀦𑀘𑀺𑀢𑁆𑀢𑁄𑀢𑀺 𑀏𑀢𑁂𑀦 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀮𑀻𑀦𑀢𑀁 𑀤𑀲𑁆𑀲𑁂𑀢𑀺. 𑀅𑀓𑀼𑀲𑀻𑀢𑀯𑀼𑀢𑁆𑀢𑀻𑀢𑀺 𑀏𑀢𑁂𑀦 𑀞𑀸𑀦𑀘𑀗𑁆𑀓𑀫𑀸𑀤𑀻𑀲𑀼 𑀓𑀸𑀬𑀲𑁆𑀲 𑀅𑀦𑀯𑀲𑀻𑀤𑀦𑀁 𑀤𑀲𑁆𑀲𑁂𑀢𑀺. 𑀤𑀴𑁆𑀳𑀦𑀺𑀓𑁆𑀓𑀫𑁄𑀢𑀺 𑀏𑀢𑁂𑀦 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀧𑀯𑀢𑁆𑀢𑀁 𑀧𑀤𑀳𑀦𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺, 𑀬𑀁 𑀢𑀁 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀤𑀻𑀲𑀼 𑀧𑀤𑀳𑀦𑁆𑀢𑁄 ‘‘𑀓𑀸𑀬𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀏𑀢𑁂𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀢𑀫𑁆𑀧𑀺 𑀤𑀴𑁆𑀳𑀜𑁆𑀘 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀕𑀢𑀢𑁆𑀢𑀸, 𑀦𑀺𑀓𑁆𑀓𑀫𑁄 𑀘 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀸 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄𑀧𑀺 𑀤𑀴𑁆𑀳𑁄 𑀦𑀺𑀓𑁆𑀓𑀫𑁄 𑀅𑀲𑁆𑀲𑀸𑀢𑀺 ‘‘𑀤𑀴𑁆𑀳𑀦𑀺𑀓𑁆𑀓𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀣𑀸𑀫𑀩𑀮𑀽𑀧𑀧𑀦𑁆𑀦𑁄𑀢𑀺 𑀫𑀕𑁆𑀕𑀓𑁆𑀔𑀡𑁂 𑀓𑀸𑀬𑀣𑀸𑀫𑁂𑀦 𑀘 𑀜𑀸𑀡𑀩𑀮𑁂𑀦 𑀘 𑀉𑀧𑀧𑀦𑁆𑀦𑁄. 𑀅𑀣 𑀯𑀸 𑀣𑀸𑀫𑀪𑀽𑀢𑁂𑀦 𑀩𑀮𑁂𑀦 𑀉𑀧𑀧𑀦𑁆𑀦𑁄, 𑀣𑀺𑀭𑀜𑀸𑀡𑀩𑀮𑀽𑀧𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑁄𑀕𑀁 𑀤𑀻𑀧𑁂𑀦𑁆𑀢𑁄 𑀬𑁄𑀕𑀧𑀥𑀸𑀦𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀼𑀩𑁆𑀩𑀪𑀸𑀕𑀫𑀚𑁆𑀛𑀺𑀫𑀉𑀓𑁆𑀓𑀝𑁆𑀞𑀯𑀻𑀭𑀺𑀬𑀯𑀲𑁂𑀦 𑀯𑀸 𑀢𑀬𑁄𑀧𑀺 𑀧𑀸𑀤𑀸 𑀬𑁄𑀚𑁂𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀆𑀭𑀤𑁆𑀥𑀯𑀻𑀭𑀺𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁫. 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀆𑀯𑀭𑀡𑀕𑀸𑀣𑀸𑀬 𑀯𑀺𑀬 𑀉𑀧𑁆𑀧𑀢𑁆𑀢𑀺, 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄. 𑀅𑀢𑁆𑀣𑀯𑀡𑁆𑀡𑀦𑀸𑀬 𑀧𑀦𑀲𑁆𑀲𑀸 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀮𑁆𑀮𑀸𑀦𑀁, 𑀏𑀓𑀫𑀦𑁆𑀢𑀲𑁂𑀯𑀺𑀢𑀸 𑀏𑀓𑀻𑀪𑀸𑀯𑁄 𑀓𑀸𑀬𑀯𑀺𑀯𑁂𑀓𑁄𑀢𑀺 𑀅𑀢𑁆𑀣𑁄. 𑀛𑀸𑀦𑀦𑁆𑀢𑀺 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 ‘‘𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀲𑀢𑁆𑀢𑀲𑀜𑁆𑀜𑀸𑀤𑀺𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 ‘‘𑀛𑀸𑀦’’𑀦𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀫𑁂𑀢𑀁 𑀧𑀝𑀺𑀲𑀮𑁆𑀮𑀸𑀦𑀜𑁆𑀘 𑀛𑀸𑀦𑀜𑁆𑀘 𑀅𑀭𑀺𑀜𑁆𑀘𑀫𑀸𑀦𑁄 𑀅𑀚𑀳𑀫𑀸𑀦𑁄 𑀅𑀦𑀺𑀲𑁆𑀲𑀚𑁆𑀚𑀫𑀸𑀦𑁄. 𑀥𑀫𑁆𑀫𑁂𑀲𑀽𑀢𑀺 𑀯𑀺𑀧𑀲𑁆𑀲𑀦𑀽𑀧𑀕𑁂𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼. 𑀦𑀺𑀘𑁆𑀘𑀦𑁆𑀢𑀺 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁. 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀦𑁂𑀦 𑀅𑀦𑀼𑀕𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀘𑀭𑀫𑀸𑀦𑁄. 𑀅𑀣 𑀯𑀸 𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀥𑀫𑁆𑀫𑀸𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑁄 𑀥𑀫𑁆𑀫𑁄𑀢𑀺 𑀅𑀦𑀼𑀥𑀫𑁆𑀫𑁄, 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 ‘‘𑀥𑀫𑁆𑀫𑀸𑀦𑀁 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 ‘‘𑀥𑀫𑁆𑀫𑁂𑀲𑀽’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀽𑀢𑀺 𑀢𑀸𑀬 𑀅𑀦𑀼𑀥𑀫𑁆𑀫𑀘𑀸𑀭𑀺𑀢𑀸𑀲𑀗𑁆𑀔𑀸𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀺𑀤𑁄𑀲𑀁 𑀢𑀻𑀲𑀼 𑀪𑀯𑁂𑀲𑀼 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀏𑀯𑀁 𑀇𑀫𑀸𑀬 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀲𑀺𑀔𑀸𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑁄𑀢𑀺 𑀯𑀢𑁆𑀢𑀩𑁆𑀩𑁄 𑀏𑀓𑁄 𑀘𑀭𑁂𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑀮𑁆𑀮𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁬. 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀢𑀲𑁆𑀲 𑀲𑀭𑀻𑀭𑀲𑁄𑀪𑀸𑀬 𑀆𑀯𑀚𑁆𑀚𑀺𑀢𑀳𑀤𑀬𑀸 𑀲𑀢𑁆𑀢𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀫𑁂𑀯 𑀉𑀮𑁆𑀮𑁄𑀓𑁂𑀦𑁆𑀢𑀺, 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀧𑀺, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀕𑀘𑁆𑀙𑀦𑁆𑀢𑀸𑀧𑀺. 𑀧𑀓𑀢𑀺𑀬𑀸 𑀏𑀯 𑀳𑀺 𑀩𑀼𑀤𑁆𑀥𑀤𑀲𑁆𑀲𑀦𑁂 𑀧𑀼𑀡𑁆𑀡𑀘𑀦𑁆𑀤𑀲𑀫𑀼𑀤𑁆𑀤𑀭𑀸𑀚𑀤𑀲𑁆𑀲𑀦𑁂 𑀘 𑀅𑀢𑀺𑀢𑁆𑀢𑁄 𑀮𑁄𑀓𑁄. 𑀅𑀣 𑀅𑀜𑁆𑀜𑀢𑀭𑀸 𑀓𑀼𑀝𑀼𑀫𑁆𑀩𑀺𑀬𑀪𑀭𑀺𑀬𑀸𑀧𑀺 𑀉𑀧𑀭𑀺𑀧𑀸𑀲𑀸𑀤𑀕𑀢𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀚𑀸𑀦𑀸𑀳𑀺 𑀢𑀸𑀯, 𑀪𑀡𑁂, ‘𑀅𑀬𑀁 𑀇𑀢𑁆𑀣𑀻 𑀲𑀲𑀸𑀫𑀺𑀓𑀸 𑀯𑀸 𑀅𑀲𑀸𑀫𑀺𑀓𑀸 𑀯𑀸’’’𑀢𑀺? 𑀲𑁄 𑀜𑀢𑁆𑀯𑀸 ‘‘𑀲𑀲𑀸𑀫𑀺𑀓𑀸, 𑀤𑁂𑀯𑀸’’𑀢𑀺 𑀆𑀭𑁄𑀘𑁂𑀲𑀺. 𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸 𑀯𑀻𑀲𑀢𑀺𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀬𑁄 𑀤𑁂𑀯𑀘𑁆𑀙𑀭𑀸𑀬𑁄 𑀯𑀺𑀬 𑀫𑀁 𑀏𑀯 𑀏𑀓𑀁 𑀅𑀪𑀺𑀭𑀫𑀸𑀧𑁂𑀦𑁆𑀢𑀺, 𑀲𑁄 𑀤𑀸𑀦𑀸𑀳𑀁 𑀏𑀢𑀸𑀧𑀺 𑀅𑀢𑀼𑀲𑁆𑀲𑀺𑀢𑁆𑀯𑀸 𑀧𑀭𑀲𑁆𑀲 𑀇𑀢𑁆𑀣𑀺𑀬𑀸 𑀢𑀡𑁆𑀳𑀁 𑀉𑀧𑁆𑀧𑀸𑀤𑁂𑀲𑀺𑀁. 𑀲𑀸 𑀉𑀧𑁆𑀧𑀦𑁆𑀦𑀸 𑀅𑀧𑀸𑀬𑀫𑁂𑀯 𑀆𑀓𑀟𑁆𑀠𑀢𑀻’’𑀢𑀺 𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 ‘‘𑀳𑀦𑁆𑀤, 𑀦𑀁 𑀦𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀏𑀯𑀁 𑀤𑀺𑀝𑁆𑀞𑀸𑀤𑀻𑀦𑀯𑀸𑀬 𑀯𑀸 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀺𑀁. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀸𑀢𑀘𑁆𑀘𑀓𑀸𑀭𑀻, 𑀲𑀓𑁆𑀓𑀘𑁆𑀘𑀓𑀸𑀭𑀻. 𑀅𑀦𑁂𑀴𑀫𑀽𑀕𑁄𑀢𑀺 𑀅𑀮𑀸𑀮𑀸𑀫𑀼𑀔𑁄. 𑀅𑀣 𑀯𑀸 𑀅𑀦𑁂𑀴𑁄 𑀘 𑀅𑀫𑀽𑀕𑁄 𑀘, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀺𑀢𑀲𑀼𑀔𑀲𑀫𑁆𑀧𑀸𑀧𑀓𑀁 𑀲𑀼𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀢𑀯𑀸, 𑀆𑀕𑀫𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀻𑀫𑀸𑀢𑀺 𑀘𑀺𑀭𑀓𑀢𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀺𑀢𑀸. 𑀲𑀗𑁆𑀔𑀸𑀢𑀥𑀫𑁆𑀫𑁄𑀢𑀺 𑀥𑀫𑁆𑀫𑀽𑀧𑀧𑀭𑀺𑀓𑁆𑀔𑀸𑀬 𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑁄. 𑀦𑀺𑀬𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑁄. 𑀧𑀥𑀸𑀦𑀯𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀏𑀲 𑀧𑀸𑀞𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀫𑁂𑀯 𑀢𑁂𑀳𑀺 𑀅𑀧𑁆𑀧𑀫𑀸𑀤𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀬𑀸𑀫𑀲𑀫𑁆𑀧𑀸𑀧𑀓𑁂𑀦 𑀧𑀥𑀸𑀦𑁂𑀦 𑀧𑀥𑀸𑀦𑀯𑀸, 𑀢𑁂𑀦 𑀧𑀥𑀸𑀦𑁂𑀦 𑀲𑀫𑁆𑀧𑀢𑁆𑀢𑀦𑀺𑀬𑀸𑀫𑀢𑁄 𑀦𑀺𑀬𑀢𑁄, 𑀢𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀢𑀥𑀫𑁆𑀫𑁄. 𑀅𑀭𑀳𑀸 𑀳𑀺 𑀧𑀼𑀦 𑀲𑀗𑁆𑀔𑀸𑀢𑀩𑁆𑀩𑀸𑀪𑀸𑀯𑀢𑁄 ‘‘𑀲𑀗𑁆𑀔𑀸𑀢𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥𑀸’’𑀢𑀺 (𑀲𑀼. 𑀦𑀺. 𑁧𑁦𑁪𑁪; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀢𑀡𑁆𑀳𑀓𑁆𑀔𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁭. 𑀲𑀻𑀳𑁄𑀯𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑀲𑁆𑀲 𑀓𑀺𑀭 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑀽𑀭𑁂 𑀉𑀬𑁆𑀬𑀸𑀦𑀁 𑀳𑁄𑀢𑀺, 𑀲𑁄 𑀧𑀕𑁂𑀯 𑀉𑀝𑁆𑀞𑀸𑀬 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑀸𑀦𑀸 𑀑𑀭𑀼𑀬𑁆𑀳 𑀉𑀤𑀓𑀝𑁆𑀞𑀸𑀦𑀁 𑀉𑀧𑀕𑀢𑁄 ‘‘𑀫𑀼𑀔𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀜𑁆𑀘 𑀧𑀤𑁂𑀲𑁂 𑀲𑀻𑀳𑀻 𑀲𑀻𑀳𑀧𑁄𑀢𑀓𑀁 𑀚𑀦𑁂𑀢𑁆𑀯𑀸 𑀕𑁄𑀘𑀭𑀸𑀬 𑀕𑀢𑀸. 𑀭𑀸𑀚𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀻𑀳𑀧𑁄𑀢𑀓𑁄, 𑀤𑁂𑀯𑀸’’𑀢𑀺 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀻𑀳𑁄 𑀓𑀺𑀭 𑀓𑀲𑁆𑀲𑀘𑀺 𑀦 𑀪𑀸𑀬𑀢𑀻’’𑀢𑀺 𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑀼𑀁 𑀪𑁂𑀭𑀺𑀆𑀤𑀻𑀦𑀺 𑀆𑀓𑁄𑀝𑀸𑀧𑁂𑀲𑀺, 𑀲𑀻𑀳𑀧𑁄𑀢𑀓𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺 𑀢𑀣𑁂𑀯 𑀲𑀬𑀺. 𑀅𑀣 𑀬𑀸𑀯𑀢𑀢𑀺𑀬𑀁 𑀆𑀓𑁄𑀝𑀸𑀧𑁂𑀲𑀺. 𑀲𑁄 𑀢𑀢𑀺𑀬𑀯𑀸𑀭𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀣𑁂𑀯 𑀲𑀬𑀺. 𑀅𑀣 𑀭𑀸𑀚𑀸 ‘‘𑀬𑀸𑀯𑀲𑁆𑀲 𑀫𑀸𑀢𑀸 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑀤𑀳𑀼𑀚𑀸𑀢𑁄𑀧𑀺 𑀲𑀻𑀳𑀧𑁄𑀢𑀓𑁄 𑀦 𑀲𑀦𑁆𑀢𑀲𑀢𑀺 𑀦 𑀪𑀸𑀬𑀢𑀺, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀭𑀺𑀢𑀸𑀲𑀁 𑀙𑀟𑁆𑀟𑁂𑀢𑁆𑀯𑀸 𑀦 𑀲𑀦𑁆𑀢𑀲𑁂𑀬𑁆𑀬𑀁 𑀦 𑀪𑀸𑀬𑁂𑀬𑁆𑀬’’𑀦𑁆𑀢𑀺? 𑀲𑁄 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀧𑀼𑀦 𑀓𑁂𑀯𑀝𑁆𑀝𑁂𑀳𑀺 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀲𑀸𑀔𑀸𑀲𑀼 𑀩𑀦𑁆𑀥𑀺𑀢𑁆𑀯𑀸 𑀧𑀲𑀸𑀭𑀺𑀢𑁂 𑀚𑀸𑀮𑁂 𑀯𑀸𑀢𑀁 𑀅𑀲𑀗𑁆𑀕𑀁𑀬𑁂𑀯 𑀕𑀘𑁆𑀙𑀫𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑁄𑀳𑀚𑀸𑀮𑀁 𑀨𑀸𑀮𑁂𑀢𑁆𑀯𑀸 𑀏𑀯𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺?

𑀅𑀣 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀯𑀸𑀢𑀩𑁆𑀪𑀸𑀳𑀢𑀸𑀦𑀺 𑀧𑀤𑀼𑀫𑀸𑀦𑀺 𑀑𑀦𑀫𑀺𑀢𑁆𑀯𑀸 𑀉𑀤𑀓𑀁 𑀨𑀼𑀲𑀺𑀢𑁆𑀯𑀸 𑀯𑀸𑀢𑀯𑀺𑀕𑀫𑁂 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀺𑀢𑀸𑀦𑀺 𑀉𑀤𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀬𑀣𑀸 𑀏𑀢𑀸𑀦𑀺 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀮𑁄𑀓𑁂 𑀚𑀸𑀢𑁄 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑁄 𑀢𑀺𑀝𑁆𑀞𑁂𑀬𑁆𑀬’’𑀦𑁆𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 ‘‘𑀬𑀣𑀸 𑀲𑀻𑀳𑁄 𑀯𑀸𑀢𑁄 𑀧𑀤𑀼𑀫𑀸𑀦𑀺, 𑀏𑀯𑀁 𑀅𑀲𑀦𑁆𑀢𑀲𑀦𑁆𑀢𑁂𑀦 𑀅𑀲𑀚𑁆𑀚𑀫𑀸𑀦𑁂𑀦 𑀅𑀦𑀼𑀧𑀮𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀲𑀻𑀳𑁄𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑁋 𑀢𑀺𑀡𑀲𑀻𑀳𑁄, 𑀧𑀡𑁆𑀟𑀼𑀲𑀻𑀳𑁄, 𑀓𑀸𑀴𑀲𑀻𑀳𑁄, 𑀓𑁂𑀲𑀭𑀲𑀻𑀳𑁄𑀢𑀺. 𑀢𑁂𑀲𑀁 𑀓𑁂𑀲𑀭𑀲𑀻𑀳𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀯𑀸𑀢𑁄 𑀧𑀼𑀭𑀢𑁆𑀣𑀺𑀫𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄. 𑀧𑀤𑀼𑀫𑀁 𑀭𑀢𑁆𑀢𑀲𑁂𑀢𑀸𑀤𑀺𑀯𑀲𑁂𑀦. 𑀢𑁂𑀲𑀼 𑀬𑁄 𑀓𑁄𑀘𑀺 𑀯𑀸𑀢𑁄 𑀬𑀁 𑀓𑀺𑀜𑁆𑀘𑀺 𑀧𑀤𑀼𑀫𑀜𑁆𑀘 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣 𑀬𑀲𑁆𑀫𑀸 𑀲𑀦𑁆𑀢𑀸𑀲𑁄 𑀦𑀸𑀫 𑀅𑀢𑁆𑀢𑀲𑀺𑀦𑁂𑀳𑁂𑀦 𑀳𑁄𑀢𑀺, 𑀅𑀢𑁆𑀢𑀲𑀺𑀦𑁂𑀳𑁄 𑀘 𑀦𑀸𑀫 𑀢𑀡𑁆𑀳𑀸𑀮𑁂𑀧𑁄, 𑀲𑁄𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀸 𑀮𑁄𑀪𑁂𑀦 𑀳𑁄𑀢𑀺, 𑀲𑁄𑀧𑀺 𑀘 𑀢𑀡𑁆𑀳𑀸𑀬𑁂𑀯. 𑀲𑀚𑁆𑀚𑀦𑀁 𑀧𑀦 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀸𑀤𑀺𑀯𑀺𑀭𑀳𑀺𑀢𑀲𑁆𑀲 𑀫𑁄𑀳𑁂𑀦 𑀳𑁄𑀢𑀺, 𑀫𑁄𑀳𑁄 𑀘 𑀅𑀯𑀺𑀚𑁆𑀚𑀸. 𑀢𑀢𑁆𑀣 𑀲𑀫𑀣𑁂𑀦 𑀢𑀡𑁆𑀳𑀸𑀬 𑀧𑀳𑀸𑀦𑀁, 𑀯𑀺𑀧𑀲𑁆𑀲𑀦𑀸𑀬 𑀅𑀯𑀺𑀚𑁆𑀚𑀸𑀬. 𑀢𑀲𑁆𑀫𑀸 𑀲𑀫𑀣𑁂𑀦 𑀅𑀢𑁆𑀢𑀲𑀺𑀦𑁂𑀳𑀁 𑀧𑀳𑀸𑀬 𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀻𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀺𑀧𑀲𑁆𑀲𑀦𑀸𑀬 𑀫𑁄𑀳𑀁 𑀧𑀳𑀸𑀬 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑁄, 𑀲𑀫𑀣𑁂𑀦𑁂𑀯 𑀮𑁄𑀪𑀁 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀤𑀺𑀝𑁆𑀞𑀺𑀜𑁆𑀘 𑀧𑀳𑀸𑀬, 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀲𑀩𑁆𑀩𑀪𑀯𑀪𑁄𑀕𑀮𑁄𑀪𑁂𑀦 𑀅𑀮𑀺𑀧𑁆𑀧𑀫𑀸𑀦𑁄. 𑀏𑀢𑁆𑀣 𑀘 𑀲𑀫𑀣𑀲𑁆𑀲 𑀲𑀻𑀮𑀁 𑀧𑀤𑀝𑁆𑀞𑀸𑀦𑀁, 𑀲𑀫𑀣𑁄 𑀲𑀫𑀸𑀥𑀺𑀲𑁆𑀲, 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀏𑀯𑀁 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀲𑀺𑀤𑁆𑀥𑁂𑀲𑀼 𑀢𑀬𑁄 𑀔𑀦𑁆𑀥𑀸 𑀲𑀺𑀤𑁆𑀥𑀸𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀽𑀭𑁄 𑀳𑁄𑀢𑀺. 𑀲𑁄 𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑀼𑀚𑁆𑀛𑀺𑀢𑀼𑀓𑀸𑀫𑀢𑀸𑀬 𑀦 𑀲𑀦𑁆𑀢𑀲𑀢𑀺, 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀧𑀝𑀺𑀯𑀺𑀤𑁆𑀥𑀲𑀪𑀸𑀯𑁄 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑀪𑁂𑀤𑁂 𑀦 𑀲𑀚𑁆𑀚𑀢𑀺, 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀯𑀻𑀢𑀭𑀸𑀕𑁄 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀭𑀸𑀕𑁂𑀦 𑀦 𑀮𑀺𑀧𑁆𑀧𑀢𑀺. 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀢𑀺𑀡𑁆𑀡𑀜𑁆𑀘 𑀅𑀓𑀼𑀲𑀮𑀫𑀽𑀮𑀸𑀦𑀁 𑀧𑀳𑀸𑀦𑀯𑀲𑁂𑀦 𑀅𑀲𑀦𑁆𑀢𑀲𑀦𑁆𑀢𑁄 𑀅𑀲𑀚𑁆𑀚𑀫𑀸𑀦𑁄 𑀅𑀮𑀺𑀧𑁆𑀧𑀫𑀸𑀦𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀻𑀳𑀸𑀤𑀺𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁮. 𑀲𑀻𑀳𑁄 𑀬𑀣𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀸𑀫𑀸𑀦𑀼𑀕𑀸𑀫𑀺𑀫𑀕𑁆𑀕𑀁 𑀙𑀟𑁆𑀟𑁂𑀢𑁆𑀯𑀸 𑀉𑀚𑀼𑀁 𑀅𑀝𑀯𑀺𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀕𑀘𑁆𑀙𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀲𑀻𑀳𑁄 𑀩𑀸𑀮𑀲𑀽𑀭𑀺𑀬𑀸𑀢𑀧𑀁 𑀢𑀧𑁆𑀧𑀫𑀸𑀦𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀻𑀳𑁄 𑀓𑀺𑀭 𑀦 𑀲𑀦𑁆𑀢𑀲𑀢𑀻’’𑀢𑀺 𑀪𑁂𑀭𑀺𑀧𑀡𑀯𑀸𑀤𑀺𑀲𑀤𑁆𑀤𑀁 𑀓𑀸𑀭𑀸𑀧𑁂𑀲𑀺, 𑀲𑀻𑀳𑁄 𑀢𑀣𑁂𑀯 𑀦𑀺𑀧𑀚𑁆𑀚𑀺. 𑀤𑀼𑀢𑀺𑀬𑀫𑁆𑀧𑀺 𑀓𑀸𑀭𑀸𑀧𑁂𑀲𑀺, 𑀲𑀻𑀳𑁄 𑀢𑀣𑁂𑀯 𑀦𑀺𑀧𑀚𑁆𑀚𑀺. 𑀢𑀢𑀺𑀬𑀫𑁆𑀧𑀺 𑀓𑀸𑀭𑀸𑀧𑁂𑀲𑀺, 𑀢𑀤𑀸 ‘‘𑀲𑀻𑀳𑁄 𑀫𑀫 𑀧𑀝𑀺𑀲𑀢𑁆𑀢𑀼 𑀅𑀢𑁆𑀣𑀻’’𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀺. 𑀢𑀁 𑀲𑀼𑀢𑁆𑀯𑀸 𑀳𑀢𑁆𑀣𑀸𑀭𑁄𑀳𑀸𑀤𑀬𑁄 𑀳𑀢𑁆𑀣𑀺𑀆𑀤𑀻𑀳𑀺 𑀑𑀭𑁄𑀳𑀺𑀢𑁆𑀯𑀸 𑀢𑀺𑀡𑀕𑀳𑀦𑀸𑀦𑀺 𑀧𑀯𑀺𑀝𑁆𑀞𑀸, 𑀳𑀢𑁆𑀣𑀺𑀅𑀲𑁆𑀲𑀕𑀡𑀸 𑀤𑀺𑀲𑀸𑀯𑀺𑀤𑀺𑀲𑀸 𑀧𑀮𑀸𑀢𑀸. 𑀭𑀜𑁆𑀜𑁄 𑀳𑀢𑁆𑀣𑀻𑀧𑀺 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀯𑀦𑀕𑀳𑀦𑀸𑀦𑀺 𑀧𑁄𑀣𑀬𑀫𑀸𑀦𑁄 𑀧𑀮𑀸𑀬𑀺. 𑀭𑀸𑀚𑀸 𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀼𑀓𑁆𑀔𑀲𑀸𑀔𑀸𑀬 𑀑𑀮𑀫𑁆𑀩𑀺𑀢𑁆𑀯𑀸 𑀧𑀣𑀯𑀺𑀁 𑀧𑀢𑀺𑀢𑁆𑀯𑀸 𑀏𑀓𑀧𑀤𑀺𑀓𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀼𑀘𑁆𑀙𑀺 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀲𑀤𑁆𑀤𑀫𑀲𑁆𑀲𑀼𑀢𑁆𑀣𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀲𑁆𑀲 𑀲𑀤𑁆𑀤𑀁, 𑀪𑀦𑁆𑀢𑁂’’𑀢𑀺? ‘‘𑀧𑀞𑀫𑀁 𑀪𑁂𑀭𑀺𑀲𑀗𑁆𑀔𑀸𑀤𑀻𑀦𑀁, 𑀧𑀘𑁆𑀙𑀸 𑀲𑀻𑀳𑀲𑁆𑀲𑀸’’𑀢𑀺. ‘‘𑀦 𑀪𑀸𑀬𑀺𑀢𑁆𑀣, 𑀪𑀦𑁆𑀢𑁂’’𑀢𑀺. ‘‘𑀦 𑀫𑀬𑀁, 𑀫𑀳𑀸𑀭𑀸𑀚, 𑀓𑀲𑁆𑀲𑀘𑀺 𑀲𑀤𑁆𑀤𑀲𑁆𑀲 𑀪𑀸𑀬𑀸𑀫𑀸’’𑀢𑀺. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀫𑀬𑁆𑀳𑀫𑁆𑀧𑀺 𑀏𑀤𑀺𑀲𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺. ‘‘𑀧𑀩𑁆𑀩𑀚𑀸𑀫𑀺, 𑀪𑀦𑁆𑀢𑁂’’𑀢𑀺. 𑀢𑀢𑁄 𑀦𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀲𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀲𑀳𑀦𑀸 𑀘 𑀳𑀦𑀦𑀸 𑀘 𑀲𑀻𑀖𑀚𑀯𑀢𑁆𑀢𑀸 𑀘 𑀲𑀻𑀳𑁄. 𑀓𑁂𑀲𑀭𑀲𑀻𑀳𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀤𑀸𑀞𑀸 𑀩𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀤𑀸𑀞𑀩𑀮𑀻. 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬𑀸𑀢𑀺 𑀉𑀪𑀬𑀁 𑀘𑀸𑀭𑀻-𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑀩𑁆𑀩𑀁 𑀧𑀲𑀬𑁆𑀳𑀘𑀸𑀭𑀻 𑀅𑀪𑀺𑀪𑀼𑀬𑁆𑀬𑀘𑀸𑀭𑀻𑀢𑀺. 𑀢𑀢𑁆𑀣 𑀧𑀲𑀬𑁆𑀳 𑀦𑀺𑀕𑁆𑀕𑀳𑁂𑀢𑁆𑀯𑀸 𑀘𑀭𑀡𑁂𑀦 𑀧𑀲𑀬𑁆𑀳𑀘𑀸𑀭𑀻, 𑀅𑀪𑀺𑀪𑀯𑀺𑀢𑁆𑀯𑀸 𑀲𑀦𑁆𑀢𑀸𑀲𑁂𑀢𑁆𑀯𑀸 𑀯𑀲𑀻𑀓𑀢𑁆𑀯𑀸 𑀘𑀭𑀡𑁂𑀦 𑀅𑀪𑀺𑀪𑀼𑀬𑁆𑀬𑀘𑀸𑀭𑀻. 𑀲𑁆𑀯𑀸𑀬𑀁 𑀓𑀸𑀬𑀩𑀮𑁂𑀦 𑀧𑀲𑀬𑁆𑀳𑀘𑀸𑀭𑀻, 𑀢𑁂𑀚𑀲𑀸 𑀅𑀪𑀺𑀪𑀼𑀬𑁆𑀬𑀘𑀸𑀭𑀻, 𑀢𑀢𑁆𑀣 𑀲𑀘𑁂 𑀓𑁄𑀘𑀺 𑀯𑀤𑁂𑀬𑁆𑀬 𑁋 ‘‘𑀓𑀺𑀁 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻’’𑀢𑀺, 𑀢𑀢𑁄 𑀫𑀺𑀕𑀸𑀦𑀦𑁆𑀢𑀺 𑀲𑀸𑀫𑀺𑀯𑀘𑀦𑀁 𑀉𑀧𑀬𑁄𑀕𑀢𑁆𑀣𑁂 𑀓𑀢𑁆𑀯𑀸 ‘‘𑀫𑀺𑀕𑁂 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻’’𑀢𑀺 𑀧𑀝𑀺𑀯𑀢𑁆𑀢𑀩𑁆𑀩𑀁. 𑀧𑀦𑁆𑀢𑀸𑀦𑀻𑀢𑀺 𑀤𑀽𑀭𑀸𑀦𑀺. 𑀲𑁂𑀦𑀸𑀲𑀦𑀸𑀦𑀻𑀢𑀺 𑀯𑀲𑀦𑀝𑁆𑀞𑀸𑀦𑀸𑀦𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀤𑀸𑀞𑀩𑀮𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁯. 𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀦𑁆𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀜𑁆𑀜𑀢𑀭𑁄 𑀓𑀺𑀭 𑀭𑀸𑀚𑀸 𑀫𑁂𑀢𑁆𑀢𑀸𑀤𑀺𑀛𑀸𑀦𑀮𑀸𑀪𑀻 𑀅𑀳𑁄𑀲𑀺. 𑀲𑁄 ‘‘𑀛𑀸𑀦𑀲𑀼𑀔𑀦𑁆𑀢𑀭𑀸𑀬𑁄 𑀭𑀚𑁆𑀚’’𑀦𑁆𑀢𑀺 𑀛𑀸𑀦𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀪𑀯𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺𑀢𑀲𑀼𑀔𑀽𑀧𑀦𑀬𑀦𑀓𑀸𑀫𑀢𑀸 𑀫𑁂𑀢𑁆𑀢𑀸. ‘‘𑀅𑀳𑁄 𑀯𑀢 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀳𑀺𑀢𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀓𑀭𑀼𑀡𑀸. ‘‘𑀫𑁄𑀤𑀦𑁆𑀢𑀺 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸, 𑀫𑁄𑀤𑀦𑁆𑀢𑀺 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺𑀢𑀲𑀼𑀔𑀸𑀯𑀺𑀧𑁆𑀧𑀬𑁄𑀕𑀓𑀸𑀫𑀢𑀸 𑀫𑀼𑀤𑀺𑀢𑀸. ‘‘𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺 𑀲𑀼𑀔𑀤𑀼𑀓𑁆𑀔𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀉𑀧𑁂𑀓𑁆𑀔𑀸. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀫𑁂𑀢𑁆𑀢𑀁 𑀯𑀢𑁆𑀯𑀸 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸, 𑀫𑀼𑀤𑀺𑀢𑀸 𑀘 𑀧𑀘𑁆𑀙𑀸. 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀘𑀢𑀲𑁆𑀲𑁄𑀧𑀺 𑀏𑀢𑀸 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂’’𑀢𑀺.

𑀢𑀢𑁆𑀣 𑀆𑀲𑁂𑀯𑀫𑀸𑀦𑁄𑀢𑀺 𑀢𑀺𑀲𑁆𑀲𑁄 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦, 𑀉𑀧𑁂𑀓𑁆𑀔𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀪𑀸𑀯𑀬𑀫𑀸𑀦𑁄. 𑀓𑀸𑀮𑁂𑀢𑀺 𑀫𑁂𑀢𑁆𑀢𑀁 𑀆𑀲𑁂𑀯𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀓𑀭𑀼𑀡𑀁, 𑀢𑀢𑁄 𑀯𑀼𑀝𑁆𑀞𑀸𑀬 𑀫𑀼𑀤𑀺𑀢𑀁, 𑀢𑀢𑁄 𑀇𑀢𑀭𑀢𑁄 𑀯𑀸 𑀦𑀺𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀉𑀧𑁂𑀓𑁆𑀔𑀁 𑀆𑀲𑁂𑀯𑀫𑀸𑀦𑁄 𑀏𑀯 ‘‘𑀓𑀸𑀮𑁂 𑀆𑀲𑁂𑀯𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀆𑀲𑁂𑀯𑀺𑀢𑀼𑀁 𑀯𑀸 𑀨𑀸𑀲𑀼𑀓𑀓𑀸𑀮𑁂. 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄𑀢𑀺 𑀤𑀲𑀲𑀼 𑀤𑀺𑀲𑀸𑀲𑀼 𑀲𑀩𑁆𑀩𑁂𑀦 𑀲𑀢𑁆𑀢𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄. 𑀫𑁂𑀢𑁆𑀢𑀸𑀤𑀻𑀦𑀜𑁆𑀳𑀺 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀲𑀢𑁆𑀢𑁂𑀲𑀼 𑀘 𑀯𑀺𑀭𑁄𑀥𑀺𑀪𑀽𑀢𑁄 𑀧𑀝𑀺𑀖𑁄 𑀯𑀽𑀧𑀲𑀫𑁆𑀫𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄’’𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀫𑁂𑀢𑁆𑀢𑀸𑀤𑀺𑀓𑀣𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁨𑁫𑁧) 𑀯𑀼𑀢𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀅𑀧𑁆𑀧𑀫𑀜𑁆𑀜𑀸𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩𑁦. 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘𑀸𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀭𑀸𑀚𑀕𑀳𑀁 𑀓𑀺𑀭 𑀦𑀺𑀲𑁆𑀲𑀸𑀬 𑀫𑀸𑀢𑀗𑁆𑀕𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁. 𑀅𑀣 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀤𑁂𑀯𑀢𑀸𑀬𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀽𑀚𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺𑀬𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀸𑀭𑀺𑀲𑀸, 𑀫𑀸𑀭𑀺𑀲𑀸, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀪𑀡𑀺𑀁𑀲𑀼. 𑀲𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀓𑁆𑀔𑀬𑀁 𑀤𑀺𑀲𑁆𑀯𑀸 𑀳𑀺𑀫𑀯𑀦𑁆𑀢𑁂 𑀫𑀳𑀸𑀧𑀧𑀸𑀢𑁄 𑀦𑀸𑀫 𑀧𑀩𑁆𑀩𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁. 𑀢𑀢𑁆𑀣 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀧𑀼𑀩𑁆𑀩𑁂 𑀧𑀭𑀺𑀦𑀺𑀩𑁆𑀩𑀼𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀝𑁆𑀞𑀺𑀲𑀗𑁆𑀖𑀸𑀢𑀁 𑀧𑀧𑀸𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀸 𑀉𑀭𑀕𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀯. 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺, 𑀢𑀸𑀦𑀺 𑀘 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀲𑀦𑁆𑀤𑀸𑀮𑀬𑀺𑀢𑁆𑀯𑀸. 𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀻𑀢𑀺 𑀚𑀻𑀯𑀺𑀢𑀲𑀗𑁆𑀔𑀬𑁄 𑀯𑀼𑀘𑁆𑀘𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀭𑀺𑀪𑁂𑀤𑁄. 𑀢𑀲𑁆𑀫𑀺𑀜𑁆𑀘 𑀚𑀻𑀯𑀺𑀢𑀲𑀗𑁆𑀔𑀬𑁂 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀧𑀳𑀻𑀦𑀢𑁆𑀢𑀸 𑀅𑀲𑀦𑁆𑀢𑀲𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑁄𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀚𑀻𑀯𑀺𑀢𑀲𑀗𑁆𑀔𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩𑁧. 𑀪𑀚𑀦𑁆𑀢𑀻𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀆𑀤𑀺𑀕𑀸𑀣𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀨𑀻𑀢𑀁 𑀭𑀚𑁆𑀚𑀁 𑀲𑀫𑀦𑀼𑀲𑀸𑀲𑀢𑀺. 𑀢𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀯𑀢𑁆𑀢𑀦𑁆𑀢𑀺. 𑀯𑀻𑀲𑀢𑀺𑀲𑀳𑀲𑁆𑀲𑀺𑀢𑁆𑀣𑀺𑀬𑁄 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. 𑀅𑀫𑀘𑁆𑀘𑀸 ‘‘𑀦 𑀤𑀸𑀦𑀸𑀬𑀁 𑀭𑀸𑀚𑀸 𑀚𑀻𑀯𑀺𑀲𑁆𑀲𑀢𑀺, 𑀳𑀦𑁆𑀤, 𑀫𑀬𑀁 𑀅𑀢𑁆𑀢𑀦𑁄 𑀲𑀭𑀡𑀁 𑀕𑀯𑁂𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀧𑀝𑁆𑀞𑀸𑀦𑀁 𑀬𑀸𑀘𑀺𑀁𑀲𑀼. 𑀢𑁂 𑀢𑀢𑁆𑀣 𑀉𑀧𑀝𑁆𑀞𑀳𑀦𑁆𑀢𑀺𑀬𑁂𑀯, 𑀦 𑀓𑀺𑀜𑁆𑀘𑀺 𑀮𑀪𑀦𑁆𑀢𑀺. 𑀭𑀸𑀚𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀓𑀼𑀳𑀺’’𑀦𑁆𑀢𑀺? 𑀢𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸𑀯 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑁂𑀧𑀺 𑀅𑀫𑀘𑁆𑀘𑀸 ‘‘𑀭𑀸𑀚𑀸 𑀯𑀼𑀝𑁆𑀞𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀮𑀪𑀫𑀸𑀦𑀸 𑀧𑀭𑀫𑁂𑀦 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀻𑀴𑀺𑀢𑀸 𑀧𑀼𑀦𑀤𑁂𑀯 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀢𑁂𑀦 𑀘 𑀭𑀜𑁆𑀜𑀸 ‘‘𑀓𑀼𑀳𑀺𑀁, 𑀢𑀸𑀢𑀸, 𑀢𑀼𑀫𑁆𑀳𑁂 𑀕𑀢𑀸’’𑀢𑀺 𑀯𑀼𑀢𑁆𑀢𑀸 𑀆𑀳𑀁𑀲𑀼 𑁋 ‘‘𑀤𑁂𑀯𑀁 𑀤𑀼𑀩𑁆𑀩𑀮𑀁 𑀤𑀺𑀲𑁆𑀯𑀸 𑀆𑀚𑀻𑀯𑀺𑀓𑀪𑀬𑁂𑀦𑀫𑁆𑀳𑀸 𑀅𑀲𑀼𑀓𑀁 𑀦𑀸𑀫 𑀚𑀦𑀧𑀤𑀁 𑀕𑀢𑀸’’𑀢𑀺. 𑀭𑀸𑀚𑀸 𑀲𑀻𑀲𑀁 𑀘𑀸𑀮𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀢𑀫𑁂𑀯 𑀆𑀩𑀸𑀥𑀁 𑀤𑀲𑁆𑀲𑁂𑀲𑁆𑀲𑀁, 𑀓𑀺𑀁 𑀧𑀼𑀦𑀧𑀺 𑀏𑀯𑀁 𑀓𑀭𑁂𑀬𑁆𑀬𑀼𑀁, 𑀦𑁄’’𑀢𑀺? 𑀲𑁄 𑀧𑀼𑀩𑁆𑀩𑁂 𑀭𑁄𑀕𑁂𑀦 𑀨𑀼𑀝𑁆𑀞𑁄 𑀯𑀺𑀬 𑀩𑀸𑀴𑁆𑀳𑀁 𑀯𑁂𑀤𑀦𑀁 𑀤𑀲𑁆𑀲𑁂𑀦𑁆𑀢𑁄 𑀕𑀺𑀮𑀸𑀦𑀸𑀮𑀬𑀁 𑀅𑀓𑀸𑀲𑀺. 𑀇𑀢𑁆𑀣𑀺𑀬𑁄 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀲𑀩𑁆𑀩𑀁 𑀅𑀓𑀁𑀲𑀼. 𑀢𑁂𑀧𑀺 𑀅𑀫𑀘𑁆𑀘𑀸 𑀢𑀣𑁂𑀯 𑀧𑀼𑀦 𑀩𑀳𑀼𑀢𑀭𑀁 𑀚𑀦𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀏𑀯𑀁 𑀭𑀸𑀚𑀸 𑀬𑀸𑀯𑀢𑀢𑀺𑀬𑀁 𑀲𑀩𑁆𑀩𑀁 𑀧𑀼𑀩𑁆𑀩𑀲𑀤𑀺𑀲𑀁 𑀅𑀓𑀸𑀲𑀺, 𑀢𑁂𑀧𑀺 𑀢𑀣𑁂𑀯 𑀧𑀓𑁆𑀓𑀫𑀺𑀁𑀲𑀼. 𑀢𑀢𑁄 𑀘𑀢𑀼𑀢𑁆𑀣𑀫𑁆𑀧𑀺 𑀢𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀭𑀸𑀚𑀸 𑁋 ‘‘𑀅𑀳𑁄! 𑀇𑀫𑁂 𑀤𑀼𑀓𑁆𑀓𑀭𑀁 𑀅𑀓𑀁𑀲𑀼, 𑀬𑁂 𑀫𑀁 𑀩𑁆𑀬𑀸𑀥𑀺𑀢𑀁 𑀧𑀳𑀸𑀬 𑀅𑀦𑀧𑁂𑀓𑁆𑀔𑀸 𑀧𑀓𑁆𑀓𑀫𑀺𑀁𑀲𑀽’’𑀢𑀺 𑀦𑀺𑀩𑁆𑀩𑀺𑀦𑁆𑀦𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀇𑀫𑀁 𑀉𑀤𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀪𑀚𑀦𑁆𑀢𑀻𑀢𑀺 𑀲𑀭𑀻𑀭𑁂𑀦 𑀅𑀮𑁆𑀮𑀻𑀬𑀦𑁆𑀢𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀲𑁂𑀯𑀦𑁆𑀢𑀻𑀢𑀺 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀻𑀳𑀺 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀢𑀸𑀬 𑀘 𑀧𑀭𑀺𑀘𑀭𑀦𑁆𑀢𑀺. 𑀓𑀸𑀭𑀡𑀁 𑀅𑀢𑁆𑀣𑁄 𑀏𑀢𑁂𑀲𑀦𑁆𑀢𑀺 𑀓𑀸𑀭𑀡𑀢𑁆𑀣𑀸, 𑀪𑀚𑀦𑀸𑀬 𑀘 𑀲𑁂𑀯𑀦𑀸𑀬 𑀘 𑀦𑀸𑀜𑁆𑀜𑀁 𑀓𑀸𑀭𑀡𑀫𑀢𑁆𑀣𑀺, 𑀅𑀢𑁆𑀣𑁄 𑀏𑀯 𑀦𑁂𑀲𑀁 𑀓𑀸𑀭𑀡𑀁, 𑀅𑀢𑁆𑀣𑀳𑁂𑀢𑀼 𑀲𑁂𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸𑀢𑀺 ‘‘𑀇𑀢𑁄 𑀓𑀺𑀜𑁆𑀘𑀺 𑀮𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀅𑀢𑁆𑀢𑀧𑀝𑀺𑀮𑀸𑀪𑀓𑀸𑀭𑀡𑁂𑀦 𑀦𑀺𑀓𑁆𑀓𑀸𑀭𑀡𑀸, 𑀓𑁂𑀯𑀮𑀁 𑁋

‘‘𑀉𑀧𑀓𑀸𑀭𑁄 𑀘 𑀬𑁄 𑀫𑀺𑀢𑁆𑀢𑁄, 𑀬𑁄 𑀫𑀺𑀢𑁆𑀢𑁄 𑀲𑀼𑀔𑀤𑀼𑀓𑁆𑀔𑀓𑁄;

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑁄 𑀫𑀺𑀢𑁆𑀢𑁄, 𑀬𑁄 𑀫𑀺𑀢𑁆𑀢𑁄 𑀅𑀦𑀼𑀓𑀫𑁆𑀧𑀓𑁄’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀁 𑀯𑀼𑀢𑁆𑀢𑁂𑀦 𑀅𑀭𑀺𑀬𑁂𑀦 𑀫𑀺𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸. 𑀅𑀢𑁆𑀢𑀝𑁆𑀞𑀧𑀜𑁆𑀜𑀸𑀢𑀺 𑀅𑀢𑁆𑀢𑀦𑀺 𑀞𑀺𑀢𑀸 𑀏𑀢𑁂𑀲𑀁 𑀧𑀜𑁆𑀜𑀸. 𑀅𑀢𑁆𑀢𑀸𑀦𑀫𑁂𑀯 𑀑𑀮𑁄𑀓𑁂𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀢𑀢𑁆𑀣𑀧𑀜𑁆𑀜𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀣𑀫𑁂𑀯 𑀑𑀮𑁄𑀓𑁂𑀢𑀺, 𑀦 𑀧𑀭𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀢𑁆𑀣𑀧𑀜𑁆𑀜𑀸’’𑀢𑀺 𑀅𑀬𑀫𑁆𑀧𑀺 𑀓𑀺𑀭 𑀧𑁄𑀭𑀸𑀡𑀧𑀸𑀞𑁄, 𑀢𑀲𑁆𑀲 𑀲𑀫𑁆𑀧𑀢𑀺 𑀤𑀺𑀝𑁆𑀞𑁂𑀬𑁂𑀯 𑀅𑀢𑁆𑀣𑁂 𑀏𑀢𑁂𑀲𑀁 𑀧𑀜𑁆𑀜𑀸, 𑀦 𑀆𑀬𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀁𑀬𑁂𑀯 𑀑𑀮𑁄𑀓𑁂𑀢𑀺, 𑀦 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀺𑀦𑀸 𑀅𑀦𑀭𑀺𑀬𑁂𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸.

𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀔𑀕𑁆𑀕𑁂𑀦 𑀭𑀼𑀓𑁆𑀔𑀸𑀤𑀬𑁄 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀲𑀓𑀲𑀺𑀗𑁆𑀕𑁂𑀦 𑀧𑀩𑁆𑀩𑀢𑀸𑀤𑀬𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀼𑀭𑀼𑀫𑀸𑀦𑁄 𑀯𑀺𑀘𑀭𑀢𑀻𑀢𑀺 𑀔𑀕𑁆𑀕𑀯𑀺𑀲𑀸𑀡𑁄. 𑀯𑀺𑀲𑀲𑀤𑀺𑀲𑀸 𑀆𑀡𑀸𑀢𑀺 𑀯𑀺𑀲𑀸𑀡𑀸. 𑀔𑀕𑁆𑀕𑀁 𑀯𑀺𑀬𑀸𑀢𑀺 𑀔𑀕𑁆𑀕𑀁. 𑀔𑀕𑁆𑀕𑀁 𑀯𑀺𑀲𑀸𑀡𑀁 𑀬𑀲𑁆𑀲 𑀫𑀺𑀕𑀲𑁆𑀲 𑀲𑁄𑀬𑀁 𑀫𑀺𑀕𑁄 𑀔𑀕𑁆𑀕𑀯𑀺𑀲𑀸𑀡𑁄, 𑀢𑀲𑁆𑀲 𑀔𑀕𑁆𑀕𑀯𑀺𑀲𑀸𑀡𑀲𑁆𑀲 𑀓𑀧𑁆𑀧𑁄 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀔𑀕𑁆𑀕𑀯𑀺𑀲𑀸𑀡𑀲𑀤𑀺𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀲𑀳𑀸𑀬𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁩𑁨. 𑀯𑀺𑀲𑀼𑀤𑁆𑀥𑀲𑀻𑀮𑀸𑀢𑀺 𑀯𑀺𑀲𑁂𑀲𑁂𑀦 𑀲𑀼𑀤𑁆𑀥𑀲𑀻𑀮𑀸, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀼𑀤𑁆𑀥𑀲𑀻𑀮𑀸. 𑀲𑀼𑀯𑀺𑀲𑀼𑀤𑁆𑀥𑀧𑀜𑁆𑀜𑀸𑀢𑀺 𑀲𑀼𑀝𑁆𑀞𑀼 𑀯𑀺𑀲𑀼𑀤𑁆𑀥𑀧𑀜𑁆𑀜𑀸, 𑀭𑀸𑀕𑀸𑀤𑀺𑀯𑀺𑀭𑀳𑀺𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀫𑀕𑁆𑀕𑀨𑀮𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑀜𑁆𑀜𑀸. 𑀲𑀫𑀸𑀳𑀺𑀢𑀸𑀢𑀺 𑀲𑀁 𑀲𑀼𑀝𑁆𑀞𑀼 𑀆𑀳𑀺𑀢𑀸, 𑀲𑀦𑁆𑀢𑀺𑀓𑁂 𑀞𑀧𑀺𑀢𑀘𑀺𑀢𑁆𑀢𑀸. 𑀚𑀸𑀕𑀭𑀺𑀬𑀸𑀦𑀼𑀬𑀼𑀢𑁆𑀢𑀸𑀢𑀺 𑀚𑀸𑀕𑀭𑀡𑀁 𑀚𑀸𑀕𑀭𑁄, 𑀦𑀺𑀤𑁆𑀤𑀸𑀢𑀺𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀚𑀸𑀕𑀭𑀲𑁆𑀲 𑀪𑀸𑀯𑁄 𑀚𑀸𑀕𑀭𑀺𑀬𑀁, 𑀚𑀸𑀕𑀭𑀺𑀬𑁂 𑀅𑀦𑀼𑀬𑀼𑀢𑁆𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑀼𑀢𑁆𑀢𑀸. 𑀯𑀺𑀧𑀲𑁆𑀲𑀓𑀸𑀢𑀺 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑀲𑀻𑀮𑀸, 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀯𑀺𑀲𑁂𑀲𑀤𑀲𑁆𑀲𑀻𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑀸𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀯𑀸 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑀲𑀻𑀮𑀸. 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀕𑀢𑁂𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀕𑀢𑁂 𑀲𑀫𑁆𑀧𑀬𑀼𑀢𑁆𑀢𑁂 𑀅𑀭𑀺𑀬𑀥𑀫𑁆𑀫𑁂. 𑀯𑀺𑀚𑀜𑁆𑀜𑀸𑀢𑀺 𑀯𑀺𑀲𑁂𑀲𑁂𑀦 𑀚𑀜𑁆𑀜𑀸, 𑀚𑀸𑀦𑀦𑁆𑀢𑀸𑀢𑀺 𑀅𑀢𑁆𑀣𑁄.

𑁧𑁩𑁩. 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀜𑁆𑀘𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀜𑁆𑀘 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀜𑁆𑀘, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀜𑁆𑀘. 𑀆𑀲𑁂𑀯𑀬𑀺𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸. 𑀬𑁂 𑀓𑀢𑀲𑀫𑁆𑀪𑀸𑀭𑀸 𑀥𑀻𑀭𑀸 𑀚𑀦𑀸 𑀚𑀺𑀦𑀲𑀸𑀲𑀦𑀫𑁆𑀳𑀺 𑀲𑀸𑀯𑀓𑀢𑁆𑀢𑀁 𑀲𑀸𑀯𑀓𑀪𑀸𑀯𑀁 𑀦 𑀯𑀚𑀦𑁆𑀢𑀺 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑁂 𑀥𑀻𑀭𑀸 𑀓𑀢𑀲𑀫𑁆𑀪𑀸𑀭𑀸 𑀲𑀬𑀫𑁆𑀪𑀽 𑀲𑀬𑀫𑁂𑀯 𑀪𑀽𑀢𑀸 𑀧𑀘𑁆𑀘𑁂𑀓𑀚𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀯𑀦𑁆𑀢𑀺.

𑁧𑁩𑁪. 𑀓𑀺𑀁 𑀪𑀽𑀢𑀸? 𑀫𑀳𑀦𑁆𑀢𑀥𑀫𑁆𑀫𑀸 𑀧𑀽𑀭𑀺𑀢𑀫𑀳𑀸𑀲𑀫𑁆𑀪𑀸𑀭𑀸 𑀩𑀳𑀼𑀥𑀫𑁆𑀫𑀓𑀸𑀬𑀸 𑀅𑀦𑁂𑀓𑀥𑀫𑁆𑀫𑀲𑀪𑀸𑀯𑀲𑀭𑀻𑀭𑀸. 𑀧𑀼𑀦𑀧𑀺 𑀓𑀺𑀁 𑀪𑀽𑀢𑀸? 𑀘𑀺𑀢𑁆𑀢𑀺𑀲𑁆𑀲𑀭𑀸 𑀘𑀺𑀢𑁆𑀢𑀕𑀢𑀺𑀓𑀸 𑀛𑀸𑀦𑀲𑀫𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀤𑀼𑀓𑁆𑀔𑁄𑀖𑀢𑀺𑀡𑁆𑀡𑀸 𑀲𑀓𑀮𑀲𑀁𑀲𑀸𑀭𑀑𑀖𑀁 𑀢𑀺𑀡𑁆𑀡𑀸 𑀅𑀢𑀺𑀓𑁆𑀓𑀦𑁆𑀢𑀸 𑀉𑀤𑀕𑁆𑀕𑀘𑀺𑀢𑁆𑀢𑀸 𑀓𑁄𑀥𑀫𑀸𑀦𑀸𑀤𑀺𑀓𑀺𑀮𑁂𑀲𑀯𑀺𑀭𑀳𑀺𑀢𑀢𑁆𑀢𑀸 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑀸 𑀲𑀦𑁆𑀢𑀫𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀫𑀢𑁆𑀣𑀤𑀲𑁆𑀲𑀻 𑀧𑀜𑁆𑀘𑀓𑁆𑀔𑀦𑁆𑀥𑀤𑁆𑀯𑀸𑀤𑀲𑀸𑀬𑀢𑀦𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀧𑀭𑀫𑀢𑁆𑀣𑀁 𑀉𑀢𑁆𑀢𑀫𑀢𑁆𑀣𑀁 𑀤𑀲𑁆𑀲𑀦𑀲𑀻𑀮𑀸. 𑀅𑀘𑀮𑀸𑀪𑀻𑀢𑀝𑁆𑀞𑁂𑀦 𑀲𑀻𑀳𑁄𑀧𑀫𑀸 𑀲𑀻𑀳𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀸 𑀔𑀕𑁆𑀕𑀯𑀺𑀲𑀸𑀡𑀫𑀺𑀕𑀲𑀺𑀗𑁆𑀕𑀲𑀤𑀺𑀲𑀸 𑀕𑀡𑀲𑀗𑁆𑀕𑀡𑀺𑀓𑀸𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑁧𑁩𑁫. 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀲𑀓𑀲𑀓𑀸𑀭𑀫𑁆𑀫𑀡𑁂 𑀅𑀧𑁆𑀧𑀯𑀢𑁆𑀢𑀦𑀢𑁄 𑀲𑀦𑁆𑀢𑀲𑀪𑀸𑀯𑀇𑀦𑁆𑀤𑁆𑀭𑀺𑀬𑀸. 𑀲𑀦𑁆𑀢𑀫𑀦𑀸𑀢𑀺 𑀲𑀦𑁆𑀢𑀘𑀺𑀢𑁆𑀢𑀸, 𑀦𑀺𑀓𑁆𑀓𑀺𑀮𑁂𑀲𑀪𑀸𑀯𑁂𑀦 𑀲𑀦𑁆𑀢𑀲𑀪𑀸𑀯𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀻𑀢𑀺 𑀲𑀼𑀝𑁆𑀞𑀼 𑀏𑀓𑀕𑁆𑀕𑀘𑀺𑀢𑁆𑀢𑀸. 𑀧𑀘𑁆𑀘𑀦𑁆𑀢𑀲𑀢𑁆𑀢𑁂𑀲𑀼 𑀧𑀢𑀺𑀧𑁆𑀧𑀘𑀸𑀭𑀸𑀢𑀺 𑀧𑀘𑁆𑀘𑀦𑁆𑀢𑀚𑀦𑀧𑀤𑁂𑀲𑀼 𑀲𑀢𑁆𑀢𑁂𑀲𑀼 𑀤𑀬𑀸𑀓𑀭𑀼𑀡𑀸𑀤𑀻𑀳𑀺 𑀧𑀢𑀺𑀘𑀭𑀡𑀲𑀻𑀮𑀸. 𑀤𑀻𑀧𑀸 𑀧𑀭𑀢𑁆𑀣 𑀇𑀥 𑀯𑀺𑀚𑁆𑀚𑀮𑀦𑁆𑀢𑀸𑀢𑀺 𑀲𑀓𑀮𑀮𑁄𑀓𑀸𑀦𑀼𑀕𑁆𑀕𑀳𑀓𑀭𑀡𑁂𑀦 𑀧𑀭𑀮𑁄𑀓𑁂 𑀘 𑀇𑀥𑀮𑁄𑀓𑁂 𑀘 𑀯𑀺𑀚𑁆𑀚𑀮𑀦𑁆𑀢𑀸 𑀤𑀻𑀧𑀸 𑀧𑀤𑀻𑀧𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀢𑀢𑀁 𑀳𑀺𑀢𑀸𑀫𑁂𑀢𑀺 𑀇𑀫𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀢𑀢𑀁 𑀲𑀩𑁆𑀩𑀓𑀸𑀮𑀁 𑀲𑀓𑀮𑀮𑁄𑀓𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀢𑀺 𑀅𑀢𑁆𑀣𑁄.

𑁧𑁩𑁬. 𑀧𑀳𑀻𑀦𑀲𑀩𑁆𑀩𑀸𑀯𑀭𑀡𑀸 𑀚𑀦𑀺𑀦𑁆𑀤𑀸𑀢𑀺 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀚𑀦𑀸𑀦𑀁 𑀇𑀦𑁆𑀤𑀸 𑀉𑀢𑁆𑀢𑀫𑀸 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀧𑀜𑁆𑀘𑀸𑀯𑀭𑀡𑀸𑀦𑀁 𑀧𑀳𑀻𑀦𑀢𑁆𑀢𑀸 𑀧𑀳𑀻𑀦𑀲𑀩𑁆𑀩𑀸𑀯𑀭𑀡𑀸. 𑀖𑀦𑀓𑀜𑁆𑀘𑀦𑀸𑀪𑀸𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀧𑀪𑀸 𑀲𑀤𑀺𑀲𑀆𑀪𑀸𑀯𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀁𑀲𑀬𑀁 𑀮𑁄𑀓𑀲𑀼𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀏𑀓𑀦𑁆𑀢𑁂𑀦 𑀮𑁄𑀓𑀲𑁆𑀲 𑀲𑀼𑀤𑀓𑁆𑀔𑀺𑀡𑀸𑀬 𑀅𑀕𑁆𑀕𑀤𑀸𑀦𑀲𑁆𑀲 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀭𑀳𑀸 𑀬𑀼𑀢𑁆𑀢𑀸, 𑀦𑀺𑀓𑁆𑀓𑀺𑀮𑁂𑀲𑀢𑁆𑀢𑀸 𑀲𑀼𑀦𑁆𑀤𑀭𑀤𑀸𑀦𑀧𑀝𑀺𑀕𑁆𑀕𑀳𑀡𑀸𑀭𑀳𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀢𑀢𑀧𑁆𑀧𑀺𑀢𑀸𑀫𑁂𑀢𑀺 𑀇𑀫𑁂 𑀧𑀘𑁆𑀘𑁂𑀓𑀜𑀸𑀡𑀸𑀥𑀺𑀕𑀫𑀸 𑀩𑀼𑀤𑁆𑀥𑀸 𑀲𑀢𑀢𑀁 𑀦𑀺𑀘𑁆𑀘𑀓𑀸𑀮𑀁 𑀅𑀧𑁆𑀧𑀺𑀢𑀸 𑀲𑀼𑀳𑀺𑀢𑀸 𑀧𑀭𑀺𑀧𑀼𑀡𑁆𑀡𑀸, 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀸𑀧𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀭𑀺𑀧𑀼𑀡𑁆𑀡𑀸𑀢𑀺 𑀅𑀢𑁆𑀣𑁄.

𑁧𑁩𑁭. 𑀧𑀢𑀺𑀏𑀓𑀸 𑀯𑀺𑀲𑀼𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀯𑀺𑀲𑀤𑀺𑀲𑀸 𑀅𑀜𑁆𑀜𑁂 𑀅𑀲𑀸𑀥𑀸𑀭𑀡𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀅𑀣 𑀯𑀸 𑁋

‘‘𑀉𑀧𑀲𑀕𑁆𑀕𑀸 𑀦𑀺𑀧𑀸𑀢𑀸 𑀘, 𑀧𑀘𑁆𑀘𑀬𑀸 𑀘 𑀇𑀫𑁂 𑀢𑀬𑁄;

𑀦𑁂𑀓𑁂𑀦𑁂𑀓𑀢𑁆𑀣𑀯𑀺𑀲𑀬𑀸, 𑀇𑀢𑀺 𑀦𑁂𑀭𑀼𑀢𑁆𑀢𑀺𑀓𑀸𑀩𑁆𑀭𑀯𑀼’’𑀦𑁆𑀢𑀺. 𑁋

𑀯𑀼𑀢𑁆𑀢𑀢𑁆𑀢𑀸 𑀧𑀢𑀺𑀲𑀤𑁆𑀤𑀲𑁆𑀲 𑀏𑀓𑀉𑀧𑀲𑀕𑁆𑀕𑀢𑀸 𑀧𑀢𑀺 𑀧𑀥𑀸𑀦𑁄 𑀳𑀼𑀢𑁆𑀯𑀸 𑀲𑀸𑀫𑀺𑀪𑀽𑀢𑁄 𑀅𑀦𑁂𑀓𑁂𑀲𑀁 𑀤𑀸𑀬𑀓𑀸𑀦𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀆𑀳𑀸𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀲𑁆𑀲 𑀧𑀸𑀧𑀼𑀡𑀦𑀢𑁄. 𑀢𑀣𑀸 𑀳𑀺 𑀅𑀦𑁆𑀦𑀪𑀸𑀭𑀲𑁆𑀲 𑀪𑀢𑁆𑀢𑀪𑀸𑀕𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀤𑁂𑀯𑀢𑀸𑀳𑀺 𑀲𑀸𑀥𑀼𑀓𑀸𑀭𑀁 𑀤𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀢𑀁 𑀤𑀼𑀕𑁆𑀕𑀢𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀸𑀧𑁂𑀢𑁆𑀯𑀸 𑀓𑁄𑀝𑀺𑀲𑀗𑁆𑀔𑀥𑀦𑀼𑀧𑁆𑀧𑀸𑀤𑀦𑁂𑀦 𑀘, 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑁂 (𑀚𑀸. 𑀅𑀝𑁆𑀞. 𑁧.𑁧.𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸) 𑀫𑀸𑀭𑁂𑀦 𑀦𑀺𑀫𑁆𑀫𑀺𑀢𑀔𑀤𑀺𑀭𑀗𑁆𑀕𑀸𑀭𑀓𑀽𑀧𑁄𑀧𑀭𑀺𑀉𑀝𑁆𑀞𑀺𑀢𑀧𑀤𑀼𑀫𑀓𑀡𑁆𑀡𑀺𑀓𑀁 𑀫𑀤𑁆𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑀕𑀫𑀦𑁂𑀦 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑁂𑀦 𑀘, 𑀧𑀤𑀼𑀫𑀯𑀢𑀻𑀅𑀕𑁆𑀕𑀫𑀳𑁂𑀲𑀻𑀧𑀼𑀢𑁆𑀢𑀸𑀦𑀁 𑀫𑀳𑀸𑀚𑀦𑀓𑀭𑀜𑁆𑀜𑁄 𑀤𑁂𑀯𑀺𑀬𑀸 𑀆𑀭𑀸𑀥𑀦𑁂𑀦 𑀕𑀦𑁆𑀥𑀫𑀸𑀤𑀦𑀢𑁄 𑀆𑀓𑀸𑀲𑁂𑀦 𑀆𑀕𑀫𑁆𑀫 𑀤𑀸𑀦𑀧𑀝𑀺𑀕𑁆𑀕𑀳𑀡𑁂𑀦 𑀫𑀳𑀸𑀚𑀦𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀤𑁂𑀯𑀺𑀬𑀸 𑀘 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑁂𑀦 𑀘, 𑀢𑀣𑀸 𑀅𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀙𑀸𑀢𑀓𑀪𑀬𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑁂 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀙𑀸𑀢𑀓𑀪𑀬𑀁 𑀧𑀝𑀺𑀘𑁆𑀘 𑀧𑀽𑀭𑁂𑀢𑁆𑀯𑀸 𑀭𑀓𑁆𑀔𑀺𑀢𑁂 𑀲𑀝𑁆𑀞𑀺𑀲𑀳𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑁂 𑀯𑀻𑀳𑀬𑁄 𑀔𑁂𑀧𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀔𑀸𑀢𑀥𑀜𑁆𑀜𑀸𑀦𑀺 𑀘 𑀘𑀸𑀝𑀺𑀲𑀳𑀲𑁆𑀲𑁂𑀲𑀼 𑀧𑀽𑀭𑀺𑀢𑀥𑀜𑁆𑀜𑀸𑀦𑀺 𑀘 𑀔𑁂𑀧𑁂𑀢𑁆𑀯𑀸 𑀲𑀓𑀮𑀧𑀸𑀲𑀸𑀤𑀪𑀺𑀢𑁆𑀢𑀻𑀲𑀼 𑀫𑀢𑁆𑀢𑀺𑀓𑀸𑀳𑀺 𑀫𑀤𑁆𑀤𑀺𑀢𑁆𑀯𑀸 𑀮𑀺𑀫𑁆𑀧𑀺𑀢𑀥𑀜𑁆𑀜𑀸𑀦𑀺 𑀘 𑀔𑁂𑀧𑁂𑀢𑁆𑀯𑀸 𑀢𑀤𑀸 𑀦𑀸𑀴𑀺𑀫𑀢𑁆𑀢𑀫𑁂𑀯𑀸𑀯𑀲𑀺𑀝𑁆𑀞𑀁 ‘‘𑀇𑀤𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀚𑁆𑀚 𑀫𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀬𑀦𑁆𑀢𑀲𑁆𑀲 𑀕𑀦𑁆𑀥𑀫𑀸𑀤𑀦𑀢𑁄 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀫𑀸𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀑𑀓𑀺𑀭𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑁂𑀝𑁆𑀞𑀺𑀲𑁆𑀲 𑀧𑀜𑁆𑀘𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑁂𑀳𑀺 𑀲𑀳 𑀧𑀭𑀺𑀪𑀼𑀜𑁆𑀚𑀺. 𑀢𑀤𑀸 𑀪𑀢𑁆𑀢𑀧𑀘𑀺𑀢𑀉𑀓𑁆𑀔𑀮𑀺𑀁, 𑀧𑀺𑀤𑀳𑀺𑀢𑁆𑀯𑀸 𑀞𑀧𑁂𑀲𑀼𑀁.

𑀦𑀺𑀤𑁆𑀤𑀫𑁄𑀓𑁆𑀓𑀦𑁆𑀢𑀲𑁆𑀲 𑀲𑁂𑀝𑁆𑀞𑀺𑀦𑁄 𑀙𑀸𑀢𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀢𑁆𑀢𑁂 𑀆𑀘𑀸𑀫𑀓𑀪𑀢𑁆𑀢𑀫𑀢𑁆𑀢𑀁 𑀑𑀮𑁄𑀓𑁂𑀳𑀻’’𑀢𑀺. 𑀲𑀼𑀲𑀺𑀓𑁆𑀔𑀺𑀢𑀸 𑀲𑀸 ‘‘𑀲𑀩𑁆𑀩𑀁 𑀤𑀺𑀦𑁆𑀦𑀁 𑀦𑀦𑀽’’𑀢𑀺 𑀅𑀯𑀢𑁆𑀯𑀸 𑀉𑀓𑁆𑀔𑀮𑀺𑀬𑀸 𑀧𑀺𑀥𑀸𑀦𑀁 𑀯𑀺𑀯𑀭𑀺. 𑀲𑀸 𑀉𑀓𑁆𑀔𑀮𑀺 𑀢𑀗𑁆𑀔𑀡𑁂𑀯 𑀲𑀼𑀫𑀦𑀧𑀼𑀧𑁆𑀨𑀫𑀓𑀼𑀴𑀲𑀤𑀺𑀲𑀲𑁆𑀲 𑀲𑀼𑀕𑀦𑁆𑀥𑀲𑀸𑀮𑀺𑀪𑀢𑁆𑀢𑀲𑁆𑀲 𑀧𑀽𑀭𑀺𑀢𑀸 𑀅𑀳𑁄𑀲𑀺. 𑀲𑀸 𑀘 𑀲𑁂𑀝𑁆𑀞𑀺 𑀘 𑀲𑀦𑁆𑀢𑀼𑀝𑁆𑀞𑀸 𑀲𑀬𑀜𑁆𑀘 𑀲𑀓𑀮𑀕𑁂𑀳𑀯𑀸𑀲𑀺𑀦𑁄 𑀘 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀘 𑀪𑀼𑀜𑁆𑀚𑀺𑀁𑀲𑀼. 𑀤𑀩𑁆𑀩𑀺𑀬𑀸 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀼𑀦 𑀧𑀽𑀭𑀺𑀢𑀁. 𑀲𑀓𑀮𑀲𑀝𑁆𑀞𑀺𑀲𑀳𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑁂𑀲𑀼 𑀲𑀼𑀕𑀦𑁆𑀥𑀲𑀸𑀮𑀺𑀬𑁄 𑀧𑀽𑀭𑁂𑀲𑀼𑀁. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀢𑁄𑀬𑁂𑀯 𑀥𑀜𑁆𑀜𑀩𑀻𑀚𑀸𑀦𑀺 𑀕𑀳𑁂𑀢𑁆𑀯𑀸 𑀲𑀼𑀔𑀺𑀢𑀸 𑀚𑀸𑀢𑀸. 𑀏𑀯𑀫𑀸𑀤𑀻𑀲𑀼 𑀅𑀦𑁂𑀓𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀲𑀼𑀔𑁄𑀢𑀭𑀡𑀧𑀭𑀺𑀧𑀸𑀮𑀦𑀲𑀕𑁆𑀕𑀫𑁄𑀓𑁆𑀔𑀧𑀸𑀧𑀦𑁂𑀲𑀼 𑀧𑀢𑀺 𑀲𑀸𑀫𑀺𑀪𑀽𑀢𑁄 𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀼𑀪𑀸𑀲𑀺𑀢𑀸𑀦𑀻𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀯𑀲𑁂𑀦 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸𑀦𑀺 𑀓𑀣𑀺𑀢𑀸𑀦𑀺 𑀯𑀘𑀦𑀸𑀦𑀺. 𑀘𑀭𑀦𑁆𑀢𑀺 𑀮𑁄𑀓𑀫𑁆𑀳𑀺 𑀲𑀤𑁂𑀯𑀓𑀫𑁆𑀳𑀻𑀢𑀺 𑀤𑁂𑀯𑀮𑁄𑀓𑀲𑀳𑀺𑀢𑁂 𑀲𑀢𑁆𑀢𑀮𑁄𑀓𑁂 𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀯𑀸 𑀢𑀣𑀸 𑀬𑁂 𑀦 𑀓𑀭𑁄𑀦𑁆𑀢𑀺 𑀩𑀸𑀮𑀸𑀢𑀺 𑀢𑀣𑀸𑀭𑀽𑀧𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀼𑀪𑀸𑀲𑀺𑀢𑀯𑀘𑀦𑀁 𑀬𑁂 𑀩𑀸𑀮𑀸 𑀚𑀦𑀸 𑀦 𑀓𑀭𑁄𑀦𑁆𑀢𑀺 𑀦 𑀫𑀦𑀲𑀺 𑀓𑀭𑁄𑀦𑁆𑀢𑀺, 𑀢𑁂 𑀩𑀸𑀮𑀸 𑀤𑀼𑀓𑁆𑀔𑁂𑀲𑀼 𑀲𑀁𑀲𑀸𑀭𑀤𑀼𑀓𑁆𑀔𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀥𑀸𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁩𑁮. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀼𑀪𑀸𑀲𑀺𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸𑀦𑀺 𑀘𑀢𑀼𑀭𑀸𑀧𑀸𑀬𑀢𑁄 𑀫𑀼𑀘𑁆𑀘𑀦𑀢𑁆𑀣𑀸𑀬 𑀪𑀸𑀲𑀺𑀢𑀸𑀦𑀺 𑀯𑀘𑀦𑀸𑀦𑀺. 𑀓𑀺𑀁 𑀪𑀽𑀢𑀸𑀦𑀺? 𑀅𑀯𑀲𑁆𑀲𑀯𑀦𑁆𑀢𑀁 𑀧𑀕𑁆𑀖𑀦𑁆𑀢𑀁 𑀔𑀼𑀤𑁆𑀤𑀁 𑀫𑀥𑀼𑀁 𑀬𑀣𑀸 𑀫𑀥𑀼𑀭𑀯𑀘𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀬𑁂 𑀧𑀝𑀺𑀧𑀢𑁆𑀢𑀺𑀬𑀼𑀢𑁆𑀢𑀸 𑀧𑀡𑁆𑀟𑀺𑀢𑀚𑀦𑀸𑀧𑀺 𑀧𑀝𑀺𑀧𑀢𑁆𑀢𑀻𑀲𑀼 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀦𑁆𑀢𑀸 𑀢𑀣𑀸𑀭𑀽𑀧𑀁 𑀫𑀥𑀼𑀭𑀯𑀘𑀦𑀁 𑀲𑀼𑀢𑁆𑀯𑀸 𑀯𑀘𑀦𑀓𑀭𑀸 𑀪𑀯𑀦𑁆𑀢𑀺, 𑀢𑁂 𑀧𑀡𑁆𑀟𑀺𑀢𑀚𑀦𑀸 𑀲𑀘𑁆𑀘𑀤𑀲𑀸 𑀘𑀢𑀼𑀲𑀘𑁆𑀘𑀤𑀲𑁆𑀲𑀺𑀦𑁄 𑀲𑀧𑀜𑁆𑀜𑀸 𑀧𑀜𑁆𑀜𑀸𑀲𑀳𑀺𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁩𑁯. 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀚𑀺𑀦𑁂𑀳𑀺 𑀪𑀸𑀲𑀺𑀢𑀸𑀢𑀺 𑀓𑀺𑀮𑁂𑀲𑁂 𑀚𑀺𑀦𑀦𑁆𑀢𑀺 𑀚𑀺𑀦𑀺𑀁𑀲𑀽𑀢𑀺 𑀚𑀺𑀦𑀸, 𑀢𑁂𑀳𑀺 𑀚𑀺𑀦𑁂𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀯𑀼𑀢𑁆𑀢𑀸 𑀪𑀸𑀲𑀺𑀢𑀸 𑀓𑀣𑀺𑀢𑀸. 𑀓𑀣𑀸 𑀉𑀴𑀸𑀭𑀸 𑀑𑀚𑀯𑀦𑁆𑀢𑀸 𑀧𑀸𑀓𑀝𑀸 𑀲𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀸, 𑀓𑀣𑀸 𑀲𑀓𑁆𑀬𑀲𑀻𑀳𑁂𑀦 𑀲𑀓𑁆𑀬𑀭𑀸𑀚𑀯𑀁𑀲𑀲𑀻𑀳𑁂𑀦 𑀕𑁄𑀢𑀫𑁂𑀦 𑀢𑀣𑀸𑀕𑀢𑁂𑀦 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑀪𑀽𑀢𑁂𑀦 𑀦𑀭𑀼𑀢𑁆𑀢𑀫𑁂𑀦 𑀦𑀭𑀸𑀦𑀁 𑀉𑀢𑁆𑀢𑀫𑁂𑀦 𑀲𑁂𑀝𑁆𑀞𑁂𑀦 𑀧𑀓𑀸𑀲𑀺𑀢𑀸 𑀧𑀸𑀓𑀝𑀻𑀓𑀢𑀸 𑀤𑁂𑀲𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀫𑀢𑁆𑀣𑀦𑁆𑀢𑀺 𑀆𑀳 ‘‘𑀥𑀫𑁆𑀫𑀯𑀺𑀚𑀸𑀦𑀦𑀢𑁆𑀣’’𑀦𑁆𑀢𑀺. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀯𑀺𑀲𑁂𑀲𑁂𑀦 𑀚𑀸𑀦𑀸𑀧𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑁧𑁪𑁦. 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀇𑀫𑀸𑀦𑀺 𑀢𑁂𑀲𑀦𑁆𑀢𑀺 𑀮𑁄𑀓𑀸𑀦𑀼𑀓𑀫𑁆𑀧𑀢𑀸𑀬 𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀇𑀫𑀸𑀦𑀺 𑀯𑀘𑀦𑀸𑀦𑀺 𑀇𑀫𑀸 𑀕𑀸𑀣𑀸𑀬𑁄. 𑀢𑁂𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀺𑀓𑀼𑀩𑁆𑀩𑀺𑀢𑀸𑀦𑀺 𑀯𑀺𑀲𑁂𑀲𑁂𑀦 𑀓𑀼𑀩𑁆𑀩𑀺𑀢𑀸𑀦𑀺 𑀪𑀸𑀲𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀁𑀯𑁂𑀕𑀲𑀗𑁆𑀕𑀫𑀢𑀺𑀯𑀟𑁆𑀠𑀦𑀢𑁆𑀣𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀁 𑀲𑀁𑀯𑁂𑀕𑀯𑀟𑁆𑀠𑀦𑀢𑁆𑀣𑀜𑁆𑀘 𑀅𑀲𑀗𑁆𑀕𑀯𑀟𑁆𑀠𑀦𑀢𑁆𑀣𑀁 𑀏𑀓𑀻𑀪𑀸𑀯𑀯𑀟𑁆𑀠𑀦𑀢𑁆𑀣𑀜𑁆𑀘 𑀫𑀢𑀺𑀯𑀟𑁆𑀠𑀦𑀢𑁆𑀣𑀁 𑀧𑀜𑁆𑀜𑀸𑀯𑀟𑁆𑀠𑀦𑀢𑁆𑀣𑀜𑁆𑀘 𑀲𑀬𑀫𑁆𑀪𑀼𑀲𑀻𑀳𑁂𑀦 𑀅𑀦𑀸𑀘𑀭𑀺𑀬𑀓𑁂𑀦 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀪𑀽𑀢𑁂𑀦 𑀚𑀸𑀢𑁂𑀦 𑀧𑀝𑀺𑀯𑀺𑀤𑁆𑀥𑁂𑀦 𑀲𑀻𑀳𑁂𑀦 𑀅𑀪𑀻𑀢𑁂𑀦 𑀕𑁄𑀢𑀫𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀇𑀫𑀸𑀦𑀺 𑀯𑀘𑀦𑀸𑀦𑀺 𑀧𑀓𑀸𑀲𑀺𑀢𑀸𑀦𑀺, 𑀇𑀫𑀸 𑀕𑀸𑀣𑀸𑀬𑁄 𑀧𑀓𑀸𑀲𑀺𑀢𑀸 𑀯𑀺𑀯𑀭𑀺𑀢𑀸 𑀉𑀢𑁆𑀢𑀸𑀦𑀻𑀓𑀢𑀸𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀧𑀭𑀺𑀲𑀫𑀸𑀧𑀦𑀢𑁆𑀣𑁂 𑀦𑀺𑀧𑀸𑀢𑁄.

𑀇𑀢𑀺 𑀯𑀺𑀲𑀼𑀤𑁆𑀥𑀚𑀦𑀯𑀺𑀮𑀸𑀲𑀺𑀦𑀺𑀬𑀸 𑀅𑀧𑀤𑀸𑀦-𑀅𑀝𑁆𑀞𑀓𑀣𑀸𑀬

𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁧. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀤𑀦𑀦𑁆𑀢𑀭𑀁 𑀣𑁂𑀭𑀸𑀧𑀤𑀸𑀦𑀲𑀗𑁆𑀕𑀳𑀕𑀸𑀣𑀸𑀬𑁄 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀅𑀣 𑀣𑁂𑀭𑀸𑀧𑀤𑀸𑀦𑀁 𑀲𑀼𑀡𑀸𑀣𑀸’’𑀢𑀺 𑀆𑀳. 𑀅𑀣-𑀅𑀧𑀤𑀸𑀦-𑀲𑀤𑁆𑀤𑀸𑀦𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀏𑀢𑁆𑀣 𑀣𑁂𑀭-𑀲𑀤𑁆𑀤𑁄 𑀧𑀦𑀸𑀬𑀁 𑀓𑀸𑀮𑀣𑀺𑀭𑀧𑀜𑁆𑀜𑀢𑁆𑀢𑀺𑀦𑀸𑀫𑀥𑁂𑀬𑁆𑀬𑀚𑁂𑀝𑁆𑀞𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. 𑀢𑀣𑀸 𑀳𑀺 ‘‘𑀣𑁂𑀭𑁄𑀯𑀲𑁆𑀲𑀺𑀓𑀸𑀦𑀺 𑀧𑀽𑀢𑀻𑀦𑀺 𑀘𑀼𑀡𑁆𑀡𑀓𑀚𑀸𑀢𑀸𑀦𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁯; 𑀫. 𑀦𑀺. 𑁧.𑁧𑁧𑁨) 𑀓𑀸𑀮𑁂, 𑀣𑁂𑀭𑁄𑀯𑀲𑁆𑀲𑀺𑀓𑀸𑀦𑀺 𑀘𑀺𑀭𑀓𑀸𑀮𑀁 𑀑𑀯𑀲𑁆𑀲𑀺𑀓𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀣𑁂𑀭𑁄𑀧𑀺 𑀢𑀸𑀯 𑀫𑀳𑀸’’𑀇𑀘𑁆𑀘𑀸𑀤𑀻𑀲𑀼 𑀣𑀺𑀭𑁂 𑀣𑀺𑀭𑀲𑀻𑀮𑁄𑀢𑀺 𑀅𑀢𑁆𑀣𑁄. ‘‘𑀣𑁂𑀭𑀓𑁄 𑀅𑀬𑀫𑀸𑀬𑀲𑁆𑀫𑀸 𑀫𑀳𑀮𑁆𑀮𑀓𑁄’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁, 𑀮𑁄𑀓𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀘𑀼𑀦𑁆𑀤𑀢𑁆𑀣𑁂𑀭𑁄 𑀨𑀼𑀲𑁆𑀲𑀢𑁆𑀣𑁂𑀭𑁄’’𑀢𑀺𑀆𑀤𑀻𑀲𑀼 𑀦𑀸𑀫𑀥𑁂𑀬𑁆𑀬𑁂, 𑀏𑀯𑀁 𑀓𑀢𑀦𑀸𑀫𑁄𑀢𑀺 𑀅𑀢𑁆𑀣𑁄. ‘‘𑀣𑁂𑀭𑁄 𑀘𑀸𑀬𑀁 𑀓𑀼𑀫𑀸𑀭𑁄 𑀫𑀫 𑀧𑀼𑀢𑁆𑀢𑁂𑀲𑀽’’𑀢𑀺𑀆𑀤𑀻𑀲𑀼 𑀚𑁂𑀝𑁆𑀞𑁂, 𑀚𑁂𑀝𑁆𑀞𑁄 𑀓𑀼𑀫𑀸𑀭𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀸𑀬𑀁 𑀓𑀸𑀮𑁂 𑀘 𑀣𑀺𑀭𑁂 𑀘 𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀘𑀺𑀭𑀁 𑀓𑀸𑀮𑀁 𑀞𑀺𑀢𑁄𑀢𑀺 𑀣𑁂𑀭𑁄, 𑀣𑀺𑀭𑀢𑀭𑀲𑀻𑀮𑀸𑀘𑀸𑀭𑀫𑀤𑁆𑀤𑀯𑀸𑀤𑀺𑀕𑀼𑀡𑀸𑀪𑀺𑀬𑀼𑀢𑁆𑀢𑁄 𑀯𑀸 𑀣𑁂𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀣𑁂𑀭𑁄 𑀘 𑀣𑁂𑀭𑁄 𑀘𑁂𑀢𑀺 𑀣𑁂𑀭𑀸, 𑀣𑁂𑀭𑀸𑀦𑀁 𑀅𑀧𑀤𑀸𑀦𑀁 𑀓𑀸𑀭𑀡𑀁 𑀣𑁂𑀭𑀸𑀧𑀤𑀸𑀦𑀁, 𑀢𑀁 𑀣𑁂𑀭𑀸𑀧𑀤𑀸𑀦𑀁 𑀲𑀼𑀡𑀸𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂, 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺𑀆𑀤𑀺 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁, 𑀢𑀲𑁆𑀲𑀸𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀘 𑀯𑀢𑁆𑀣𑀼 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋

𑀅𑀢𑀻𑀢𑁂 𑀓𑀺𑀭 𑀇𑀢𑁄 𑀓𑀧𑁆𑀧𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑁂 𑀏𑀓𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑁆𑀣𑀓𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀫𑁂𑀦 𑀲𑀭𑀤𑀫𑀸𑀡𑀯𑁄 𑀦𑀸𑀫 𑀅𑀳𑁄𑀲𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀫𑁂𑀦 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀓𑁄 𑀦𑀸𑀫 𑀅𑀳𑁄𑀲𑀺. 𑀢𑁂 𑀉𑀪𑁄𑀧𑀺 𑀲𑀳𑀧𑀁𑀲𑀼𑀓𑀻𑀴𑀦𑀲𑀳𑀸𑀬𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀲𑀭𑀤𑀫𑀸𑀡𑀯𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀫𑀭𑀡𑀁 𑀦𑀸𑀫 𑀏𑀓𑀦𑁆𑀢𑀺𑀓𑀁, 𑀢𑀲𑁆𑀫𑀸 𑀫𑀬𑀸 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸 𑀯𑀺𑀫𑁄𑀓𑁆𑀔𑀫𑀕𑁆𑀕𑁄 𑀕𑀯𑁂𑀲𑀺𑀢𑀩𑁆𑀩𑁄’’𑀢𑀺 𑀲𑀳𑀸𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫, 𑀅𑀳𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑁄. 𑀓𑀺𑀁 𑀢𑁆𑀯𑀁 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀳𑁄𑀢𑀼 𑀅𑀳𑀫𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀲𑀫𑁆𑀧𑀺 𑀚𑀝𑀺𑀮𑀸𑀦𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀢𑁂 𑀲𑀩𑁆𑀩𑁂𑀧𑀺 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑀺𑀲𑀼𑀁.

𑀢𑁂𑀦 𑀲𑀫𑀬𑁂𑀦 𑀅𑀦𑁄𑀫𑀤𑀲𑁆𑀲𑀻 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀲𑀢𑁆𑀢𑁂 𑀲𑀁𑀲𑀸𑀭𑀫𑀳𑁄𑀖𑀢𑁄 𑀢𑀸𑀭𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀭𑀤𑀢𑀸𑀧𑀲𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀲𑀗𑁆𑀕𑀳𑀁 𑀓𑀢𑁆𑀢𑀼𑀓𑀸𑀫𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 ‘‘𑀩𑀼𑀤𑁆𑀥𑀪𑀸𑀯𑀁 𑀫𑁂 𑀚𑀸𑀦𑀸𑀢𑀽’’𑀢𑀺 𑀢𑀸𑀧𑀲𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀭𑀤𑀢𑀸𑀧𑀲𑁄 𑀲𑀢𑁆𑀣𑀼 𑀲𑀭𑀻𑀭𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀬𑁂𑀯𑀸𑀬’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀲𑀭𑀤𑀢𑀸𑀧𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀚𑀝𑀺𑀮𑀸 𑀧𑀡𑀻𑀢𑀧𑀡𑀻𑀢𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀨𑀮𑀸𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑀲𑀸𑀤𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀢𑁆𑀣𑀼 𑀘 𑀦𑀺𑀲𑀺𑀦𑁆𑀦𑀸𑀓𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀫𑀬𑀁 𑀧𑀼𑀩𑁆𑀩𑁂 ‘𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀓𑁄𑀘𑀺 𑀦𑀢𑁆𑀣𑀻’𑀢𑀺 𑀫𑀜𑁆𑀜𑀸𑀫, 𑀅𑀬𑀁 𑀧𑀦 𑀧𑀼𑀭𑀺𑀲𑁄 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀫𑀜𑁆𑀜𑁂’’𑀢𑀺 𑀆𑀳𑀁𑀲𑀼. 𑀓𑀺𑀁 𑀯𑀤𑁂𑀣, 𑀢𑀸𑀢𑀸, 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀁 𑀲𑀫𑀁 𑀓𑀸𑀢𑀼𑀁 𑀇𑀘𑁆𑀙𑀣, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀫𑀁 𑀢𑀼𑀮𑀁 𑀫𑀸 𑀓𑀭𑀺𑀢𑁆𑀣𑀸𑀢𑀺. 𑀅𑀣 𑀢𑁂 𑀢𑀸𑀧𑀲𑀸 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀬𑀸𑀯 𑀫𑀳𑀸 𑀯𑀢𑀸𑀬𑀁 𑀧𑀼𑀭𑀺𑀲𑀼𑀢𑁆𑀢𑀫𑁄’’𑀢𑀺 𑀲𑀩𑁆𑀩𑁂𑀯 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀁𑀲𑀼.

𑀅𑀣 𑀢𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀢𑀸𑀢𑀸, 𑀲𑀢𑁆𑀣𑀼 𑀅𑀦𑀼𑀘𑁆𑀙𑀯𑀺𑀓𑁄 𑀦𑁄 𑀤𑁂𑀬𑁆𑀬𑀥𑀫𑁆𑀫𑁄 𑀦𑀢𑁆𑀣𑀺, 𑀲𑀢𑁆𑀣𑀸 𑀘 𑀪𑀺𑀓𑁆𑀔𑀸𑀘𑀭𑀯𑁂𑀮𑀸𑀬 𑀇𑀥𑀸𑀕𑀢𑁄, 𑀳𑀦𑁆𑀤, 𑀫𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀬𑀣𑀸𑀩𑀮𑀁 𑀤𑀲𑁆𑀲𑀸𑀫. 𑀢𑀼𑀫𑁆𑀳𑁂𑀳𑀺 𑀬𑀁 𑀬𑀁 𑀧𑀡𑀻𑀢𑀁 𑀨𑀮𑀸𑀨𑀮𑀁 𑀆𑀪𑀢𑀁, 𑀢𑀁 𑀢𑀁 𑀆𑀳𑀭𑀣𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀲𑀬𑀁 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸𑀭𑀸 𑀨𑀮𑀸𑀨𑀮𑁂 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀢𑀸𑀧𑀲𑁄 𑀉𑀤𑀓𑀫𑁆𑀧𑀺 𑀲𑀬𑀫𑁂𑀯 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀪𑁄𑀚𑀦𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀲𑀩𑁆𑀩𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀸𑀯𑀤𑁂𑀯 𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀸𑀭𑀸 𑀅𑀕𑁆𑀕𑀲𑀸𑀯𑀓𑀸 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼.

𑀢𑀢𑁄 𑀲𑀭𑀤𑀢𑀸𑀧𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀼𑀧𑁆𑀨𑀸𑀲𑀦𑁂𑀦 𑀧𑀽𑀚𑀸 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀼𑀧𑁆𑀨𑀸𑀦𑀺 𑀆𑀳𑀭𑀣𑀸’’𑀢𑀺. 𑀢𑁂 𑀢𑀸𑀯𑀤𑁂𑀯 𑀇𑀤𑁆𑀥𑀺𑀬𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁, 𑀉𑀪𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀢𑀺𑀕𑀸𑀯𑀼𑀢𑀁, 𑀲𑁂𑀲𑀪𑀺𑀓𑁆𑀔𑀽𑀦𑀁 𑀅𑀟𑁆𑀠𑀬𑁄𑀚𑀦𑀺𑀓𑀸𑀤𑀺𑀪𑁂𑀤𑀁, 𑀲𑀗𑁆𑀖𑀦𑀯𑀓𑀲𑁆𑀲 𑀉𑀲𑀪𑀫𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀏𑀯𑀁 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀲𑀭𑀤𑀢𑀸𑀧𑀲𑁄 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀇𑀫𑀁 𑀧𑀼𑀧𑁆𑀨𑀸𑀲𑀦𑀁 𑀅𑀢𑀺𑀭𑀼𑀳𑀣𑀸’’𑀢𑀺 𑀆𑀳. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀼𑀧𑁆𑀨𑀸𑀲𑀦𑁂. 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑁂𑀲𑀪𑀺𑀓𑁆𑀔𑀽 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 ‘‘𑀢𑁂𑀲𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’’𑀢𑀺 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀫𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀧𑀺 𑀲𑁂𑀲𑀪𑀺𑀓𑁆𑀔𑀽𑀧𑀺 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀁𑀲𑀼. 𑀢𑀸𑀧𑀲𑁄 𑀲𑀢𑁆𑀢𑀸𑀳𑀁 𑀦𑀺𑀭𑀦𑁆𑀢𑀭𑀁 𑀲𑀢𑁆𑀣𑀼 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀇𑀢𑀭𑁂 𑀯𑀦𑀫𑀽𑀮𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀓𑀸𑀮𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀁 𑀦𑀺𑀲𑀪𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀧𑀲𑀸𑀦𑀁 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀣𑁂𑀭𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸 𑀢𑁂𑀲𑀁 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀢𑀲𑁆𑀲 𑀤𑁂𑀲𑀦𑀸𑀯𑀲𑀸𑀦𑁂 𑀲𑀢𑁆𑀣𑀸 𑀤𑀼𑀢𑀺𑀬𑀁 𑀅𑀕𑁆𑀕𑀲𑀸𑀯𑀓𑀁 𑀅𑀦𑁄𑀫𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀫𑁆𑀧𑀺 𑀇𑀫𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀳𑀻’’𑀢𑀺. 𑀲𑁄𑀧𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑁂𑀲𑀦𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦𑀸𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀞𑀧𑁂𑀢𑁆𑀯𑀸 𑀲𑀭𑀤𑀢𑀸𑀧𑀲𑀁 𑀅𑀯𑀲𑁂𑀲𑀸 𑀲𑀩𑁆𑀩𑁂𑀧𑀺 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 𑀢𑁂 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂 𑀢𑀸𑀯𑀤𑁂𑀯 𑀅𑀦𑁆𑀢𑀭𑀳𑀺𑀢𑀢𑀸𑀧𑀲𑀯𑁂𑀲𑀸 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀯𑀺𑀬 𑀅𑀳𑁂𑀲𑀼𑀁.

𑀲𑀭𑀤𑀢𑀸𑀧𑀲𑁄 𑀧𑀦 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀬𑀁 𑀦𑀺𑀲𑀪𑀢𑁆𑀣𑁂𑀭𑁄 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀤𑁂𑀲𑀦𑀸𑀓𑀸𑀮𑁂 𑀉𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑀢𑀸𑀬 𑀅𑀜𑁆𑀜𑀯𑀺𑀳𑀺𑀢𑁄 𑀳𑀼𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀣𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀲𑀭𑀤𑀢𑀸𑀧𑀲𑁄𑀧𑀺 𑀲𑀳𑀸𑀬𑀲𑁆𑀲 𑀲𑀺𑀭𑀺𑀯𑀟𑁆𑀠𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀫𑁆𑀫, 𑀫𑀬𑀸 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀕𑁄𑀢𑀫𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀢𑁆𑀯𑀫𑁆𑀧𑀺 𑀢𑀲𑁆𑀲 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀳𑀻’’𑀢𑀺. 𑀲𑀺𑀭𑀺𑀯𑀟𑁆𑀠𑁄 𑀢𑀁 𑀉𑀧𑀤𑁂𑀲𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀘𑁆𑀙𑀤𑀦𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀲𑀭𑀤𑀢𑀸𑀧𑀲𑁂𑀦 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀫𑀳𑀸𑀭𑀳𑁂𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀤𑀼𑀢𑀺𑀬𑀲𑀸𑀯𑀓𑀪𑀸𑀯𑀸𑀬 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀩𑁆𑀬𑀸𑀓𑀭𑀺𑀢𑁆𑀯𑀸 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀺𑀭𑀺𑀯𑀟𑁆𑀠𑁄 𑀳𑀝𑁆𑀞𑀧𑀳𑀝𑁆𑀞𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀭𑀤𑀢𑀸𑀧𑀲𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑀸 𑀓𑀫𑁆𑀫𑀁 𑀦 𑀓𑀣𑀺𑀢𑀁. 𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀭𑀤𑀢𑀸𑀧𑀲𑁄 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀉𑀧𑀢𑀺𑀲𑁆𑀲𑀸𑀕𑀸𑀫𑁂 𑀭𑀽𑀧𑀲𑀸𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀁𑀤𑀺𑀯𑀲𑀫𑁂𑀯𑀲𑁆𑀲 𑀲𑀳𑀸𑀬𑁄𑀧𑀺 𑀭𑀸𑀚𑀕𑀳𑀲𑁆𑀲𑁂𑀯 𑀅𑀯𑀺𑀤𑀽𑀭𑁂 𑀓𑁄𑀮𑀺𑀢𑀕𑀸𑀫𑁂 𑀫𑁄𑀕𑁆𑀕𑀮𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀫𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑁄𑀕𑁆𑀕𑀮𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀫𑁄𑀕𑁆𑀕𑀮𑀺𑀕𑁄𑀢𑁆𑀢𑁂𑀦 𑀚𑀸𑀢𑁄𑀢𑀺 𑀯𑀸 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀅𑀣 𑀯𑀸 𑀫𑀸𑀢𑀼𑀓𑀼𑀫𑀸𑀭𑀺𑀓𑀓𑀸𑀮𑁂 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀁 𑁋 ‘‘𑀫𑀸 𑀉𑀕𑁆𑀕𑀮𑀺 𑀫𑀸 𑀉𑀕𑁆𑀕𑀮𑀻’’𑀢𑀺 𑀯𑀘𑀦𑀫𑀼𑀧𑀸𑀤𑀸𑀬 ‘‘𑀫𑀼𑀕𑁆𑀕𑀮𑀻’’𑀢𑀺 𑀦𑀸𑀫𑀁. 𑀢𑀲𑁆𑀲𑀸 𑀫𑀼𑀕𑁆𑀕𑀮𑀺𑀬𑀸 𑀧𑀼𑀢𑁆𑀢𑁄𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀅𑀣 𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀫𑀕𑁆𑀕𑀲𑁆𑀲 𑀮𑀸𑀪𑁂 𑀆𑀤𑀸𑀦𑁂 𑀧𑀝𑀺𑀯𑀺𑀚𑁆𑀛𑀦𑁂 𑀅𑀮𑀁 𑀲𑀫𑀢𑁆𑀣𑁄𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺. 𑀢𑀸𑀦𑀺 𑀓𑀺𑀭 𑀤𑁆𑀯𑁂 𑀓𑀼𑀮𑀸𑀦𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀆𑀩𑀤𑁆𑀥𑀲𑀳𑀸𑀬𑀸𑀦𑁂𑀯. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀏𑀓𑀤𑀺𑀯𑀲𑀫𑁂𑀯 𑀕𑀩𑁆𑀪𑀧𑀭𑀺𑀳𑀸𑀭𑀫𑀤𑀁𑀲𑀼. 𑀤𑀲𑀫𑀸𑀲𑀘𑁆𑀘𑀬𑁂𑀦 𑀚𑀸𑀢𑀸𑀦𑀫𑁆𑀧𑀺 𑀢𑁂𑀲𑀁 𑀙𑀲𑀝𑁆𑀞𑀺 𑀥𑀸𑀢𑀺𑀬𑁄 𑀧𑀝𑁆𑀞𑀧𑁂𑀲𑀼𑀁. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀭𑀽𑀧𑀲𑀸𑀭𑀻𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀧𑀢𑀺𑀲𑁆𑀲𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀉𑀧𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀇𑀢𑀭𑀲𑁆𑀲 𑀓𑁄𑀮𑀺𑀢𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀓𑁄𑀮𑀺𑀢𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀧𑀸𑀭𑀁 𑀅𑀕𑀫𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀢𑁂 𑀭𑀸𑀚𑀕𑀳𑁂 𑀕𑀺𑀭𑀕𑁆𑀕𑀲𑀫𑀚𑁆𑀚𑀁 𑀧𑀲𑁆𑀲𑀦𑁆𑀢𑀸 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀸 ‘‘𑀲𑀩𑁆𑀩𑁂𑀧𑀺𑀫𑁂 𑀑𑀭𑀁 𑀯𑀲𑁆𑀲𑀲𑀢𑀸𑀯 𑀫𑀘𑁆𑀘𑀼𑀫𑀼𑀔𑀁 𑀧𑀯𑀺𑀲𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀅𑀫𑁆𑀳𑁂𑀳𑀺 𑀫𑁄𑀓𑁆𑀔𑀥𑀫𑁆𑀫𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀢𑀜𑁆𑀘 𑀧𑀭𑀺𑀬𑁂𑀲𑀦𑁆𑀢𑁂𑀳𑀺 𑀏𑀓𑀸 𑀧𑀩𑁆𑀩𑀚𑁆𑀚𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀧𑀜𑁆𑀘𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀜𑁆𑀘𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀜𑁆𑀘𑀬𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀢𑁂 𑀓𑀢𑀺𑀧𑀸𑀳𑁂𑀦𑁂𑀯 𑀲𑀩𑁆𑀩𑀁 𑀲𑀜𑁆𑀘𑀬𑀲𑁆𑀲 𑀲𑀫𑀬𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀤𑀺𑀲𑁆𑀯𑀸 𑀢𑀢𑁄 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀡𑁆𑀟𑀺𑀢𑀲𑀫𑁆𑀫𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀢𑁂 𑀢𑁂𑀳𑀺 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀅𑀜𑁆𑀜𑀤𑀢𑁆𑀣𑀼 𑀢𑁂𑀬𑁂𑀯 𑀢𑁂𑀲𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀏𑀯𑀁 𑀢𑁂 𑀫𑁄𑀓𑁆𑀔𑀁 𑀧𑀭𑀺𑀬𑁂𑀲𑀦𑁆𑀢𑀸 𑀓𑀢𑀺𑀓𑀁 𑀅𑀓𑀁𑀲𑀼 𑁋 ‘‘𑀅𑀫𑁆𑀳𑁂𑀲𑀼 𑀬𑁄 𑀧𑀞𑀫𑀁 𑀅𑀫𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀽’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀲𑀢𑁆𑀣𑀭𑀺 𑀧𑀞𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀧𑀼𑀩𑁆𑀩𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀺𑀓𑁂 𑀲𑀳𑀲𑁆𑀲𑀚𑀝𑀺𑀮𑁂 𑀤𑀫𑁂𑀢𑁆𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂 𑀏𑀓𑀤𑀺𑀯𑀲𑀁 𑀉𑀧𑀢𑀺𑀲𑁆𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀕𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀢𑁆𑀣𑁂𑀭𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦 𑀫𑀬𑀸 𑀏𑀯𑀭𑀽𑀧𑁄 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄 𑀧𑀩𑁆𑀩𑀚𑀺𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀲𑀦𑁆𑀢𑀥𑀫𑁆𑀫𑁂𑀦 𑀦𑀸𑀫 𑀏𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀆𑀬𑀲𑁆𑀫𑀦𑁆𑀢𑀁 𑀉𑀤𑀺𑀓𑁆𑀔𑀦𑁆𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀣𑁂𑀭𑁄𑀧𑀺 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀢𑀺𑀭𑀽𑀧𑀁 𑀑𑀓𑀸𑀲𑀁 𑀕𑀢𑁄. 𑀧𑀭𑀺𑀩𑁆𑀩𑀸𑀚𑀓𑁄 𑀅𑀢𑁆𑀢𑀦𑁄 𑀧𑀭𑀺𑀩𑁆𑀩𑀸𑀚𑀓𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲 𑀅𑀢𑁆𑀢𑀦𑁄 𑀓𑀼𑀡𑁆𑀟𑀺𑀓𑀸𑀬 𑀉𑀤𑀓𑀁 𑀅𑀤𑀸𑀲𑀺. 𑀏𑀯𑀁 𑀲𑁄 𑀆𑀘𑀭𑀺𑀬𑀯𑀢𑁆𑀢𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑁋 ‘‘𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀧𑀤𑀺𑀲𑀺. 𑀧𑀼𑀦 𑀢𑁂𑀦 ‘‘𑀓𑀺𑀁 𑀯𑀸𑀤𑀻 𑀧𑀦𑀸𑀬𑀲𑁆𑀫𑀢𑁄 𑀲𑀢𑁆𑀣𑀸’’𑀢𑀺 𑀧𑀼𑀝𑁆𑀞𑁄 ‘‘𑀇𑀫𑀲𑁆𑀲 𑀲𑀸𑀲𑀦𑀲𑁆𑀲 𑀕𑀫𑁆𑀪𑀻𑀭𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀦𑀯𑀓𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸 𑀲𑀗𑁆𑀔𑁂𑀧𑀯𑀲𑁂𑀦 𑀘𑀲𑁆𑀲 𑀲𑀸𑀲𑀦𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭 𑁧.𑁧.𑁨𑁮𑁬) 𑀕𑀸𑀣𑀫𑀸𑀳. 𑀧𑀭𑀺𑀩𑁆𑀩𑀸𑀚𑀓𑁄 𑀧𑀞𑀫𑀧𑀤𑀤𑁆𑀯𑀬𑀫𑁂𑀯 𑀲𑀼𑀢𑁆𑀯𑀸 𑀲𑀳𑀲𑁆𑀲𑀦𑀬𑀲𑀫𑁆𑀧𑀦𑁆𑀦𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀇𑀢𑀭𑀁 𑀧𑀤𑀤𑁆𑀯𑀬𑀁 𑀲𑁄𑀢𑀸𑀧𑀦𑁆𑀦𑀓𑀸𑀮𑁂 𑀦𑀺𑀝𑁆𑀞𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀭𑀺𑀯𑀺𑀲𑁂𑀲𑁂 𑀅𑀧𑀯𑀢𑁆𑀢𑀦𑁆𑀢𑁂 ‘‘𑀪𑀯𑀺𑀲𑁆𑀲𑀢𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀣𑁂𑀭𑀁 𑀆𑀳 𑁋 ‘‘𑀫𑀸, 𑀪𑀦𑁆𑀢𑁂, 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑀬𑀺𑀢𑁆𑀣, 𑀏𑀢𑁆𑀢𑀓𑀫𑁂𑀯 𑀅𑀮𑀁, 𑀓𑀳𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀯𑀲𑀢𑀻’’𑀢𑀺? ‘‘𑀯𑁂𑀴𑀼𑀯𑀦𑁂’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀘𑁆𑀙𑀣, 𑀅𑀳𑀁 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀓𑀢𑀧𑀝𑀺𑀜𑁆𑀜𑀁 𑀫𑁄𑀘𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀅𑀕𑀫𑀸𑀲𑀺.

𑀓𑁄𑀮𑀺𑀢𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀼𑀔𑀯𑀡𑁆𑀡𑁄 𑀦 𑀅𑀜𑁆𑀜𑀤𑀺𑀯𑀲𑁂𑀲𑀼 𑀯𑀺𑀬 𑀅𑀤𑁆𑀥𑀸𑀦𑁂𑀦 𑀅𑀫𑀢𑀁 𑀅𑀥𑀺𑀕𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑁂𑀦𑁂𑀯𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑀁 𑀲𑀫𑁆𑀪𑀸𑀯𑁂𑀢𑁆𑀯𑀸 𑀅𑀫𑀢𑀸𑀥𑀺𑀕𑀫𑀁 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 ‘‘𑀆𑀯𑀼𑀲𑁄, 𑀅𑀫𑀢𑀫𑀥𑀺𑀕𑀢’’𑀦𑁆𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀮𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀆𑀳 𑁋 ‘‘𑀓𑀳𑀁 𑀦𑁄 𑀲𑀢𑁆𑀣𑀸’’𑀢𑀺? ‘‘𑀯𑁂𑀴𑀼𑀯𑀦𑁂’’𑀢𑀺. ‘‘𑀢𑁂𑀦 𑀳𑀺, 𑀆𑀯𑀼𑀲𑁄, 𑀆𑀬𑀸𑀫, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀉𑀧𑀢𑀺𑀲𑁆𑀲𑁄 𑀲𑀩𑁆𑀩𑀓𑀸𑀮𑀫𑁆𑀧𑀺 𑀆𑀘𑀭𑀺𑀬𑀧𑀽𑀚𑀓𑁄𑀯, 𑀢𑀲𑁆𑀫𑀸 𑀲𑀜𑁆𑀘𑀬𑀲𑁆𑀲 𑀲𑀢𑁆𑀣𑀼 𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀢𑀫𑁆𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀲𑁄 𑀮𑀸𑀪𑀸𑀲𑀸𑀧𑀓𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀦 𑀲𑀓𑁆𑀓𑁄𑀫𑀺 𑀘𑀸𑀝𑀺 𑀳𑀼𑀢𑁆𑀯𑀸 𑀉𑀤𑀓𑀲𑀺𑀜𑁆𑀘𑀦𑀁 𑀳𑁄𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑁂 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀢𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀯𑀢𑁆𑀢𑀫𑀸𑀦𑁂𑀳𑀺 𑀅𑀟𑁆𑀠𑀼𑀢𑁂𑀬𑁆𑀬𑀲𑀢𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑁂 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑁂 𑀲𑀸𑀯𑀓𑀬𑀼𑀕𑀁 𑀪𑀯𑀺𑀲𑁆𑀲𑀢𑀺, 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀧𑀭𑀺𑀲𑀸𑀬 𑀘𑀭𑀺𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀬𑀣𑀸 𑀢𑁂𑀲𑀁 𑀏𑀯𑀁 𑀅𑀕𑁆𑀕𑀲𑀸𑀯𑀓𑀸𑀦𑀫𑁆𑀧𑀺 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀆𑀕𑀢𑀫𑁂𑀯. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀁 𑀧𑀦 𑀦 𑀦𑀺𑀝𑁆𑀞𑀸𑀲𑀺. 𑀓𑀲𑁆𑀫𑀸? 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀳𑀦𑁆𑀢𑀢𑀸𑀬.

𑀢𑁂𑀲𑀼 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀩𑁆𑀩𑀚𑀺𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀕𑀥𑀭𑀝𑁆𑀞𑁂 𑀓𑀮𑁆𑀮𑀯𑀸𑀮𑀕𑀸𑀫𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀣𑀺𑀦𑀫𑀺𑀤𑁆𑀥𑁂 𑀑𑀓𑁆𑀓𑀫𑀦𑁆𑀢𑁂 𑀲𑀢𑁆𑀣𑀸𑀭𑀸 𑀲𑀁𑀯𑁂𑀚𑀺𑀢𑁄 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀡𑀦𑁆𑀢𑁄 𑀏𑀯 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁 𑀅𑀥𑀺𑀕𑀦𑁆𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀩𑁆𑀩𑀚𑁆𑀚𑀸𑀬 𑀅𑀤𑁆𑀥𑀫𑀸𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀭𑀸𑀚𑀕𑀳𑁂 𑀲𑀽𑀓𑀭𑀔𑀢𑀮𑁂𑀡𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑁂 (𑀫. 𑀦𑀺. 𑁨.𑁨𑁦𑁧 𑀆𑀤𑀬𑁄) 𑀤𑁂𑀲𑀺𑀬𑀫𑀸𑀦𑁂 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀭𑀲𑁆𑀲 𑀯𑀟𑁆𑀠𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀯𑀺𑀬 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺. 𑀇𑀢𑀺 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀢𑁆𑀣𑀼 𑀲𑀫𑀻𑀧𑁂 𑀏𑀯 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁.

𑀏𑀯𑀁 𑀧𑀢𑁆𑀢𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀓𑁂𑀦 𑀓𑀫𑁆𑀫𑁂𑀦 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀜𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 ‘‘𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪𑁧.

‘‘𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂, 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸’’𑀢𑀺.

𑀢𑀢𑁆𑀣 𑀳𑀺𑀫𑀯𑀦𑁆𑀢𑀲𑁆𑀲𑀸𑀢𑀺 𑀳𑀺𑀫𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺𑀫𑀯𑀸, 𑀢𑀲𑁆𑀲 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀲𑀫𑀻𑀧𑁂, 𑀳𑀺𑀫𑀸𑀮𑀬𑀧𑀝𑀺𑀩𑀤𑁆𑀥𑀯𑀦𑁂𑀳𑀺 𑀅𑀢𑁆𑀣𑁄. 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀏𑀯𑀁𑀦𑀸𑀫𑀓𑁄 𑀧𑀁𑀲𑀼𑀫𑀺𑀲𑁆𑀲𑀓𑀧𑀩𑁆𑀩𑀢𑁄. 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀦𑁆𑀢𑀺 𑀢𑀲𑁆𑀫𑀺𑀁 𑀮𑀫𑁆𑀩𑀓𑁂 𑀧𑀩𑁆𑀩𑀢𑁂 𑀫𑀬𑁆𑀳𑀁 𑀫𑀫𑀢𑁆𑀣𑀸𑀬 𑀓𑀢𑁄 𑀅𑀲𑁆𑀲𑀫𑁄 𑀅𑀭𑀜𑁆𑀜𑀯𑀸𑀲𑁄 𑀆𑀲𑀫𑀦𑁆𑀢𑀢𑁄 𑀲𑀫𑁄𑀢𑀺 𑀅𑀲𑁆𑀲𑀫𑁄. 𑀦𑀢𑁆𑀣𑀺 𑀧𑀯𑀺𑀝𑁆𑀞𑀸𑀦𑀁 𑀲𑀫𑁄 𑀧𑀭𑀺𑀲𑁆𑀲𑀫𑁄 𑀏𑀢𑁆𑀣𑀸𑀢𑀺 𑀯𑀸 𑀅𑀲𑁆𑀲𑀫𑁄, 𑀲𑁄 𑀇𑀢𑁆𑀣𑀫𑁆𑀪𑀽𑀢𑁄 𑀅𑀭𑀜𑁆𑀜𑀯𑀸𑀲𑁄 𑀲𑀼𑀝𑁆𑀞𑀼 𑀓𑀢𑁄, 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀓𑀼𑀝𑀺𑀫𑀡𑁆𑀟𑀧𑀸𑀤𑀺𑀯𑀲𑁂𑀦 𑀲𑀼𑀦𑁆𑀤𑀭𑁂𑀦𑀸𑀓𑀸𑀭𑁂𑀦 𑀓𑀢𑁄𑀢𑀺 𑀅𑀢𑁆𑀣𑁄. 𑀧𑀡𑁆𑀡𑀲𑀸𑀮𑀸𑀢𑀺 𑀉𑀲𑀻𑀭𑀧𑀩𑁆𑀩𑀚𑀸𑀤𑀻𑀳𑀺 𑀧𑀡𑁆𑀡𑁂𑀳𑀺 𑀙𑀸𑀤𑀺𑀢𑀸 𑀦𑀺𑀯𑀲𑀦𑀧𑀡𑁆𑀡𑀲𑀸𑀮𑀸𑀢𑀺 𑀅𑀢𑁆𑀣𑁄.

𑁧𑁪𑁨.

‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀼𑀲𑀼𑀤𑁆𑀥𑀧𑀼𑀮𑀺𑀦𑀸𑀓𑀺𑀡𑁆𑀡𑀸, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀉𑀢𑁆𑀢𑀸𑀦𑀓𑀽𑀮𑀸𑀢𑀺 𑀅𑀕𑀫𑁆𑀪𑀻𑀭𑀸 𑀦𑀤𑀻. 𑀲𑀼𑀧𑀢𑀺𑀢𑁆𑀣𑀸𑀢𑀺 𑀲𑀼𑀦𑁆𑀤𑀭𑀧𑀢𑀺𑀢𑁆𑀣𑀸. 𑀫𑀦𑁄𑀭𑀫𑀸 𑀫𑀦𑀮𑁆𑀮𑀻𑀦𑀸 𑀫𑀦𑀸𑀧𑀸. 𑀲𑀼𑀲𑀼𑀤𑁆𑀥𑀧𑀼𑀮𑀺𑀦𑀸𑀓𑀺𑀡𑁆𑀡𑀸𑀢𑀺 𑀲𑀼𑀝𑁆𑀞𑀼 𑀥𑀯𑀮𑀫𑀼𑀢𑁆𑀢𑀸𑀤𑀮𑀲𑀤𑀺𑀲𑀯𑀸𑀮𑀼𑀓𑀸𑀓𑀺𑀡𑁆𑀡𑀸 𑀕𑀳𑀦𑀻𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀲𑀸 𑀇𑀢𑁆𑀣𑀫𑁆𑀪𑀽𑀢𑀸 𑀦𑀤𑀺𑀓𑀸 𑀓𑀼𑀦𑁆𑀦𑀤𑀻 𑀫𑀫𑀲𑁆𑀲𑀫𑀁 𑀫𑀬𑁆𑀳𑀁 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 𑀲𑀫𑀻𑀧𑁂 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. ‘‘𑀅𑀲𑁆𑀲𑀫’’𑀦𑁆𑀢𑀺 𑀘 𑀲𑀢𑁆𑀢𑀫𑁆𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁩.

‘‘𑀅𑀲𑀓𑁆𑀔𑀭𑀸 𑀅𑀧𑀩𑁆𑀪𑀸𑀭𑀸, 𑀲𑀸𑀤𑀼 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸;

𑀲𑀦𑁆𑀤𑀢𑀻 𑀦𑀤𑀺𑀓𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀅𑀲𑀓𑁆𑀔𑀭𑀸𑀢𑀺 ‘‘𑀧𑀼𑀮𑀺𑀦𑀸𑀓𑀺𑀡𑁆𑀡𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀲𑀓𑁆𑀔𑀭𑀸 𑀲𑀓𑁆𑀔𑀭𑀯𑀺𑀭𑀳𑀺𑀢𑀸. 𑀅𑀧𑀩𑁆𑀪𑀸𑀭𑀸𑀢𑀺 𑀧𑀩𑁆𑀪𑀸𑀭𑀯𑀺𑀭𑀳𑀺𑀢𑀸, 𑀅𑀕𑀫𑁆𑀪𑀻𑀭𑀓𑀽𑀮𑀸𑀢𑀺 𑀅𑀢𑁆𑀣𑁄. 𑀲𑀸𑀤𑀼 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸𑀢𑀺 𑀲𑀸𑀤𑀼𑀭𑀲𑁄𑀤𑀓𑀸 𑀤𑀼𑀕𑁆𑀕𑀦𑁆𑀥𑀭𑀳𑀺𑀢𑀸 𑀫𑀬𑁆𑀳𑀁 𑀅𑀲𑁆𑀲𑀫𑀧𑀤𑀁 𑀲𑁄𑀪𑀬𑀦𑁆𑀢𑀻 𑀦𑀤𑀺𑀓𑀸 𑀔𑀼𑀤𑁆𑀤𑀓𑀦𑀤𑀻 𑀲𑀦𑁆𑀤𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁪.

‘‘𑀓𑀼𑀫𑁆𑀪𑀻𑀮𑀸 𑀫𑀓𑀭𑀸 𑀘𑁂𑀢𑁆𑀣, 𑀲𑀼𑀲𑀼𑀫𑀸𑀭𑀸 𑀘 𑀓𑀘𑁆𑀙𑀧𑀸;

𑀲𑀦𑁆𑀤𑀢𑀺 𑀦𑀤𑀺𑀓𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀓𑀼𑀫𑁆𑀪𑀻𑀮𑀫𑀘𑁆𑀙𑀸 𑀫𑀓𑀭𑀫𑀘𑁆𑀙𑀸 𑀘 𑀲𑀼𑀲𑀼𑀫𑀸𑀭𑀸 𑀘𑀡𑁆𑀟𑀫𑀘𑁆𑀙𑀸 𑀘 𑀓𑀘𑁆𑀙𑀧𑀫𑀘𑁆𑀙𑀸 𑀘 𑀏𑀢𑁆𑀣 𑀏𑀢𑀺𑀲𑁆𑀲𑀁 𑀦𑀤𑀺𑀬𑀁 𑀓𑀻𑀴𑀦𑁆𑀢𑀸 𑀅𑀳𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀫𑀲𑁆𑀲𑀫𑀁 𑀲𑁄𑀪𑀬𑀦𑁆𑀢𑀸 𑀦𑀤𑀺𑀓𑀸 𑀔𑀼𑀤𑁆𑀤𑀓𑀦𑀤𑀻 𑀲𑀦𑁆𑀤𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁪𑁫.

‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀯𑀕𑁆𑀕𑀴𑀸 𑀧𑀧𑀢𑀸𑀬𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁’’.

𑀧𑀸𑀞𑀻𑀦𑀫𑀘𑁆𑀙𑀸 𑀘 𑀧𑀸𑀯𑀼𑀲𑀸 𑀫𑀘𑁆𑀙𑀸 𑀘 𑀩𑀮𑀚𑀫𑀘𑁆𑀙𑀸 𑀘 𑀫𑀼𑀜𑁆𑀚𑀫𑀘𑁆𑀙𑀸 𑀭𑁄𑀳𑀺𑀢𑀫𑀘𑁆𑀙𑀸 𑀘 𑀯𑀕𑁆𑀕𑀴𑀫𑀘𑁆𑀙𑀸 𑀘 𑀏𑀢𑁂 𑀲𑀩𑁆𑀩𑁂 𑀫𑀘𑁆𑀙𑀚𑀸𑀢𑀺𑀓𑀸 𑀇𑀢𑁄 𑀘𑀺𑀢𑁄 𑀘 𑀧𑀧𑀢𑀸𑀬𑀦𑁆𑀢𑀸 𑀦𑀤𑀺𑀬𑀸 𑀲𑀤𑁆𑀥𑀺𑀁 𑀧𑀯𑀢𑁆𑀢𑀦𑁆𑀢𑀸 𑀫𑀫 𑀅𑀲𑁆𑀲𑀫𑀧𑀤𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁬.

‘‘𑀉𑀪𑁄 𑀓𑀽𑀮𑁂𑀲𑀼 𑀦𑀤𑀺𑀬𑀸, 𑀧𑀼𑀧𑁆𑀨𑀺𑀦𑁄 𑀨𑀮𑀺𑀦𑁄 𑀤𑀼𑀫𑀸;

𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀉𑀪𑁄 𑀓𑀽𑀮𑁂𑀲𑀽𑀢𑀺 𑀢𑀲𑁆𑀲𑀸 𑀦𑀤𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀥𑀼𑀯𑀧𑀼𑀧𑁆𑀨𑀺𑀦𑁄 𑀥𑀼𑀯𑀨𑀮𑀺𑀦𑁄 𑀭𑀼𑀓𑁆𑀔𑀸 𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀸 𑀦𑀤𑀺𑀬𑀸 𑀉𑀪𑁄 𑀢𑀻𑀭𑁂 𑀳𑁂𑀝𑁆𑀞𑀸 𑀑𑀦𑀫𑀦𑁆𑀢𑀸 𑀫𑀫 𑀅𑀲𑁆𑀲𑀫𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁭.

‘‘𑀅𑀫𑁆𑀩𑀸 𑀲𑀸𑀮𑀸 𑀘 𑀢𑀺𑀮𑀓𑀸, 𑀧𑀸𑀝𑀮𑀻 𑀲𑀺𑀦𑁆𑀤𑀼𑀯𑀸𑀭𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂’’.

𑀢𑀢𑁆𑀣 𑀅𑀫𑁆𑀩𑀸𑀢𑀺 𑀫𑀥𑀼𑀧𑀺𑀡𑁆𑀟𑀺𑀅𑀫𑁆𑀩𑀸 𑀘 𑀲𑀸𑀮𑀭𑀼𑀓𑁆𑀔𑀸 𑀘 𑀢𑀺𑀮𑀓𑀭𑀼𑀓𑁆𑀔𑀸 𑀘 𑀧𑀸𑀝𑀮𑀺𑀭𑀼𑀓𑁆𑀔𑀸 𑀘 𑀲𑀺𑀦𑁆𑀤𑀼𑀯𑀸𑀭𑀓𑀭𑀼𑀓𑁆𑀔𑀸 𑀘 𑀏𑀢𑁂 𑀭𑀼𑀓𑁆𑀔𑀸 𑀦𑀺𑀘𑁆𑀘𑀓𑀸𑀮𑀁 𑀧𑀼𑀧𑁆𑀨𑀺𑀢𑀸 𑀧𑀼𑀧𑁆𑀨𑀦𑁆𑀢𑀸. 𑀤𑀺𑀩𑁆𑀩𑀸 𑀕𑀦𑁆𑀥𑀸 𑀇𑀯 𑀫𑀫 𑀅𑀲𑁆𑀲𑀫𑁂 𑀲𑀼𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀯𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁮.

‘‘𑀘𑀫𑁆𑀧𑀓𑀸 𑀲𑀴𑀮𑀸 𑀦𑀻𑀧𑀸, 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂’’.

𑀢𑀢𑁆𑀣 𑀘𑀫𑁆𑀧𑀓𑀭𑀼𑀓𑁆𑀔𑀸 𑀘 𑀲𑀴𑀮𑀭𑀼𑀓𑁆𑀔𑀸 𑀘 𑀲𑀼𑀯𑀡𑁆𑀡𑀯𑀝𑁆𑀝𑀮𑀲𑀤𑀺𑀲𑀧𑀼𑀧𑁆𑀨𑀸 𑀦𑀻𑀧𑀭𑀼𑀓𑁆𑀔𑀸 𑀘 𑀦𑀸𑀕𑀭𑀼𑀓𑁆𑀔𑀸 𑀘 𑀧𑀼𑀦𑁆𑀦𑀸𑀕𑀭𑀼𑀓𑁆𑀔𑀸 𑀘 𑀲𑀼𑀕𑀦𑁆𑀥𑀬𑀦𑁆𑀢𑀸 𑀓𑁂𑀢𑀓𑀭𑀼𑀓𑁆𑀔𑀸 𑀘 𑀏𑀢𑁂 𑀲𑀩𑁆𑀩𑁂 𑀭𑀼𑀓𑁆𑀔𑀸 𑀤𑀺𑀩𑁆𑀩𑀸 𑀕𑀦𑁆𑀥𑀸𑀭𑀺𑀯 𑀫𑀫 𑀅𑀲𑁆𑀲𑀫𑁂 𑀧𑀼𑀧𑁆𑀨𑀺𑀢𑀸 𑀨𑀼𑀮𑁆𑀮𑀺𑀢𑀸 𑀲𑀫𑁆𑀧𑀯𑀦𑁆𑀢𑀺 𑀲𑀼𑀕𑀦𑁆𑀥𑀁 𑀲𑀼𑀝𑁆𑀞𑀼 𑀧𑀯𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁯.

𑀅𑀲𑁄𑀓𑀸 𑀘‘‘𑀅𑀥𑀺𑀫𑀼𑀢𑁆𑀢𑀸 𑀅𑀲𑁄𑀓𑀸 𑀘, 𑀪𑀕𑀺𑀦𑀻𑀫𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀅𑀗𑁆𑀓𑁄𑀮𑀸 𑀩𑀺𑀫𑁆𑀩𑀺𑀚𑀸𑀮𑀸 𑀘, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂’’.

𑀢𑀢𑁆𑀣 𑀧𑀼𑀧𑁆𑀨𑀺𑀢𑀸 𑀅𑀥𑀺𑀫𑀼𑀢𑁆𑀢𑀓𑀭𑀼𑀓𑁆𑀔𑀸 𑀘 𑀧𑀼𑀧𑁆𑀨𑀺𑀢𑀸 𑀅𑀲𑁄𑀓𑀭𑀼𑀓𑁆𑀔𑀸 𑀘 𑀧𑀼𑀧𑁆𑀨𑀺𑀢𑀸 𑀪𑀕𑀺𑀦𑀻𑀫𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸 𑀅𑀗𑁆𑀓𑁄𑀮𑀸 𑀘 𑀧𑀼𑀧𑁆𑀨𑀺𑀢𑀸 𑀩𑀺𑀫𑁆𑀩𑀺𑀚𑀸𑀮𑀸 𑀘 𑀏𑀢𑁂 𑀭𑀼𑀓𑁆𑀔𑀸 𑀫𑀫 𑀅𑀲𑁆𑀲𑀫𑁂 𑀨𑀼𑀮𑁆𑀮𑀺𑀢𑀸 𑀲𑁄𑀪𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁫𑁦.

‘‘𑀓𑁂𑀢𑀓𑀸 𑀓𑀦𑁆𑀤𑀮𑀺 𑀘𑁂𑀯, 𑀕𑁄𑀥𑀼𑀓𑀸 𑀢𑀺𑀡𑀲𑀽𑀮𑀺𑀓𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀓𑁂𑀢𑀓𑀸𑀢𑀺 𑀲𑀼𑀕𑀦𑁆𑀥𑀓𑁂𑀢𑀓𑀕𑀘𑁆𑀙𑀸 𑀘. 𑀓𑀦𑁆𑀤𑀮𑀺𑀭𑀼𑀓𑁆𑀔𑀸 𑀘 𑀕𑁄𑀥𑀼𑀓𑀭𑀼𑀓𑁆𑀔𑀸 𑀘 𑀢𑀺𑀡𑀲𑀽𑀮𑀺𑀓𑀕𑀘𑁆𑀙𑀸 𑀘 𑀏𑀢𑁂 𑀲𑀩𑁆𑀩𑁂 𑀭𑀼𑀓𑁆𑀔𑀚𑀸𑀢𑀺𑀓𑀸 𑀤𑀺𑀩𑁆𑀩𑀕𑀦𑁆𑀥𑀁 𑀧𑀯𑀸𑀬𑀫𑀸𑀦𑀸 𑀫𑀫 𑀅𑀲𑁆𑀲𑀫𑀁 𑀲𑀓𑀮𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁧.

‘‘𑀓𑀡𑀺𑀓𑀸𑀭𑀸 𑀓𑀡𑁆𑀡𑀺𑀓𑀸 𑀘, 𑀅𑀲𑀦𑀸 𑀅𑀚𑁆𑀚𑀼𑀦𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁’’.

𑀏𑀢𑁂 𑀓𑀡𑀺𑀓𑀸𑀭𑀸𑀤𑀬𑁄 𑀭𑀼𑀓𑁆𑀔𑀸 𑀫𑀫 𑀅𑀲𑁆𑀲𑀫𑀁 𑀲𑀓𑀮𑀁 𑀲𑁄𑀪𑀬𑀦𑁆𑀢𑀸 𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀸𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁫𑁨.

‘‘𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀓𑁄𑀯𑀺𑀴𑀸𑀭𑀸 𑀘 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁’’.

𑀧𑀼𑀦𑁆𑀦𑀸𑀕𑀸𑀤𑀬𑁄 𑀭𑀼𑀓𑁆𑀔𑀸 𑀤𑀺𑀩𑁆𑀩𑀕𑀦𑁆𑀥𑀁 𑀧𑀯𑀸𑀬𑀫𑀸𑀦𑀸 𑀫𑀫 𑀅𑀲𑁆𑀲𑀫𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁩.

‘‘𑀉𑀤𑁆𑀤𑀸𑀮𑀓𑀸 𑀘 𑀓𑀼𑀝𑀚𑀸, 𑀓𑀤𑀫𑁆𑀩𑀸 𑀯𑀓𑀼𑀮𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁’’.

𑀉𑀤𑁆𑀤𑀸𑀮𑀓𑀸𑀤𑀬𑁄 𑀭𑀼𑀓𑁆𑀔𑀸 𑀤𑀺𑀩𑁆𑀩𑀕𑀦𑁆𑀥𑀁 𑀯𑀸𑀬𑀫𑀸𑀦𑀸 𑀫𑀫 𑀅𑀲𑁆𑀲𑀫𑀁 𑀲𑁄𑀪𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁫𑁪.

‘‘𑀆𑀴𑀓𑀸 𑀇𑀲𑀺𑀫𑀼𑀕𑁆𑀕𑀸 𑀘, 𑀓𑀤𑀮𑀺𑀫𑀸𑀢𑀼𑀮𑀼𑀗𑁆𑀕𑀺𑀬𑁄;

𑀕𑀦𑁆𑀥𑁄𑀤𑀓𑁂𑀦 𑀲𑀁𑀯𑀟𑁆𑀠𑀸, 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀺 𑀢𑁂’’.

𑀢𑀢𑁆𑀣 𑀏𑀢𑁂 𑀆𑀴𑀓𑀸𑀤𑀬𑁄 𑀕𑀘𑁆𑀙𑀸 𑀘𑀦𑁆𑀤𑀦𑀸𑀤𑀺𑀲𑀼𑀕𑀦𑁆𑀥𑀕𑀦𑁆𑀥𑁄𑀤𑀓𑁂𑀦 𑀯𑀟𑁆𑀠𑀺𑀢𑁆𑀯𑀸 𑀲𑀼𑀯𑀡𑁆𑀡𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀸 𑀫𑀫 𑀅𑀲𑁆𑀲𑀫𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁫.

‘‘𑀅𑀜𑁆𑀜𑁂 𑀧𑀼𑀧𑁆𑀨𑀦𑁆𑀢𑀺 𑀧𑀤𑀼𑀫𑀸, 𑀅𑀜𑁆𑀜𑁂 𑀚𑀸𑀬𑀦𑁆𑀢𑀺 𑀓𑁂𑀲𑀭𑀻;

𑀅𑀜𑁆𑀜𑁂 𑀑𑀧𑀼𑀧𑁆𑀨𑀸 𑀧𑀤𑀼𑀫𑀸, 𑀧𑀼𑀧𑁆𑀨𑀺𑀢𑀸 𑀢𑀴𑀸𑀓𑁂 𑀢𑀤𑀸’’.

𑀢𑀢𑁆𑀣 𑀅𑀜𑁆𑀜𑁂 𑀧𑀼𑀧𑁆𑀨𑀦𑁆𑀢𑀺 𑀧𑀤𑀼𑀫𑀸𑀢𑀺 𑀫𑀫 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 𑀢𑀴𑀸𑀓𑁂 𑀅𑀜𑁆𑀜𑁂 𑀏𑀓𑀘𑁆𑀘𑁂 𑀧𑀤𑀼𑀫𑀸 𑀧𑀼𑀧𑁆𑀨𑀦𑁆𑀢𑀺, 𑀏𑀓𑀘𑁆𑀘𑁂 𑀓𑁂𑀲𑀭𑀻 𑀧𑀤𑀼𑀫𑀸 𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀓𑀘𑁆𑀘𑁂 𑀧𑀤𑀼𑀫𑀸 𑀑𑀧𑀼𑀧𑁆𑀨𑀸 𑀯𑀺𑀕𑀮𑀺𑀢𑀧𑀢𑁆𑀢𑀓𑁂𑀲𑀭𑀸𑀢𑀺 𑀅𑀢𑁆𑀣𑁄.

𑁧𑁫𑁬.

‘‘𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀧𑀤𑀼𑀫𑀸, 𑀦𑀺𑀤𑁆𑀥𑀸𑀯𑀦𑁆𑀢𑀺 𑀫𑀼𑀴𑀸𑀮𑀺𑀬𑁄;

𑀲𑀺𑀗𑁆𑀖𑀸𑀝𑀺𑀧𑀢𑁆𑀢𑀫𑀸𑀓𑀺𑀡𑁆𑀡𑀸, 𑀲𑁄𑀪𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸’’.

𑀢𑀢𑁆𑀣 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀧𑀤𑀼𑀫𑀸𑀢𑀺 𑀢𑀤𑀸 𑀢𑀸𑀧𑀲𑁂𑀦 𑀳𑀼𑀢𑁆𑀯𑀸 𑀫𑀫 𑀯𑀲𑀦𑀲𑀫𑀬𑁂 𑀏𑀓𑀘𑁆𑀘𑁂 𑀧𑀤𑀼𑀫𑀸 𑀢𑀴𑀸𑀓𑀩𑁆𑀪𑀦𑁆𑀢𑀭𑁂 𑀫𑀓𑀼𑀴𑀧𑀼𑀧𑁆𑀨𑀸𑀤𑀬𑁄 𑀕𑀡𑁆𑀳𑀦𑁆𑀢𑀺. 𑀫𑀼𑀴𑀸𑀮𑀺𑀬𑁄 𑀧𑀤𑀼𑀫𑀫𑀽𑀮𑀸 𑀦𑀺𑀤𑁆𑀥𑀸𑀯𑀦𑁆𑀢𑀺 𑀇𑀢𑁄 𑀓𑀤𑁆𑀤𑀫𑀩𑁆𑀪𑀦𑁆𑀢𑀭𑀢𑁄 𑀳𑀢𑁆𑀣𑀺𑀤𑀸𑀞𑀸 𑀯𑀺𑀬 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀧𑀼𑀧𑁆𑀨𑀫𑀸𑀓𑀺𑀡𑁆𑀡𑀸 𑀕𑀳𑀦𑀻𑀪𑀽𑀢𑀸 𑀲𑀺𑀗𑁆𑀖𑀸𑀝𑀺𑀬𑁄 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁭.

‘‘𑀦𑀬𑀺𑀢𑀸 𑀅𑀫𑁆𑀩𑀕𑀦𑁆𑀥𑀻 𑀘, 𑀉𑀢𑁆𑀢𑀮𑀻 𑀩𑀦𑁆𑀥𑀼𑀚𑀻𑀯𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀢𑀴𑀸𑀓𑁂 𑀢𑀤𑀸’’.

𑀢𑀤𑀸 𑀫𑀫 𑀯𑀲𑀦𑀲𑀫𑀬𑁂 𑀢𑀴𑀸𑀓𑀲𑁆𑀲 𑀲𑀫𑀻𑀧𑁂 𑀦𑀬𑀺𑀢𑀸 𑀘 𑀕𑀘𑁆𑀙𑀸 𑀅𑀫𑁆𑀩𑀕𑀦𑁆𑀥𑀻 𑀘 𑀕𑀘𑁆𑀙𑀸 𑀉𑀢𑁆𑀢𑀮𑀻 𑀦𑀸𑀫 𑀕𑀘𑁆𑀙𑀸 𑀘 𑀩𑀦𑁆𑀥𑀼𑀚𑀻𑀯𑀓𑀸 𑀘 𑀏𑀢𑁂 𑀲𑀩𑁆𑀩𑁂 𑀕𑀘𑁆𑀙𑀸 𑀧𑀼𑀧𑁆𑀨𑀺𑀢𑀸 𑀧𑀼𑀧𑁆𑀨𑀥𑀸𑀭𑀺𑀢𑀸 𑀲𑀼𑀕𑀦𑁆𑀥𑀯𑀸𑀳𑀓𑀸 𑀢𑀴𑀸𑀓𑀁 𑀲𑁄𑀪𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁮.

‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀲𑀁𑀕𑀼𑀮𑀸 𑀫𑀕𑁆𑀕𑀼𑀭𑀸 𑀘𑁂𑀯, 𑀯𑀲𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸’’.

𑀢𑀤𑀸 𑀫𑀫 𑀯𑀲𑀦𑀲𑀫𑀬𑁂 𑀦𑀺𑀩𑁆𑀪𑀻𑀢𑀸 𑀧𑀸𑀞𑀻𑀦𑀸𑀤𑀬𑁄 𑀫𑀘𑁆𑀙𑀸 𑀢𑀴𑀸𑀓𑁂 𑀯𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁫𑁯.

‘‘𑀓𑀼𑀫𑁆𑀪𑀻𑀮𑀸 𑀲𑀼𑀲𑀼𑀫𑀸𑀭𑀸 𑀘, 𑀢𑀦𑁆𑀢𑀺𑀕𑀸𑀳𑀸 𑀘 𑀭𑀓𑁆𑀔𑀲𑀸;

𑀑𑀕𑀼𑀳𑀸 𑀅𑀚𑀕𑀭𑀸 𑀘, 𑀯𑀲𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸’’.

𑀢𑀤𑀸 𑀫𑀫 𑀯𑀲𑀦𑀲𑀫𑀬𑁂 𑀫𑀫 𑀅𑀲𑁆𑀲𑀫𑀲𑀫𑀻𑀧𑁂 𑀢𑀴𑀸𑀓𑁂 𑀏𑀢𑁂 𑀓𑀼𑀫𑁆𑀪𑀻𑀮𑀸𑀤𑀬𑁄 𑀫𑀘𑁆𑀙𑀸 𑀦𑀺𑀩𑁆𑀪𑀻𑀢𑀸 𑀦𑀺𑀭𑀽𑀧𑀤𑁆𑀤𑀯𑀸 𑀯𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬𑁦.

‘‘𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀓𑁄𑀓𑀺𑀮𑀸 𑀲𑀼𑀓𑀲𑀸𑀴𑀺𑀓𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀢𑀢𑁆𑀣 𑀫𑀫 𑀅𑀲𑁆𑀲𑀫𑀲𑀫𑀻𑀧𑁂 𑀲𑀭𑀁 𑀦𑀺𑀲𑁆𑀲𑀸𑀬 𑀧𑀸𑀭𑁂𑀯𑀢𑀸𑀧𑀓𑁆𑀔𑀻 𑀘 𑀭𑀯𑀺𑀳𑀁𑀲𑀸𑀧𑀓𑁆𑀔𑀻 𑀘 𑀦𑀤𑀻𑀘𑀭𑀸 𑀘𑀓𑁆𑀓𑀯𑀸𑀓𑀧𑀓𑁆𑀔𑀻 𑀘 𑀓𑁄𑀓𑀺𑀮𑀸𑀧𑀓𑁆𑀔𑀻 𑀘 𑀲𑀼𑀓𑀧𑀓𑁆𑀔𑀻 𑀘 𑀲𑀸𑀴𑀺𑀓𑀸𑀧𑀓𑁆𑀔𑀻 𑀘 𑀢𑀁 𑀲𑀭𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬𑁧.

‘‘𑀓𑀼𑀓𑀼𑀢𑁆𑀣𑀓𑀸 𑀓𑀼𑀴𑀻𑀭𑀓𑀸, 𑀯𑀦𑁂 𑀧𑁄𑀓𑁆𑀔𑀭𑀲𑀸𑀢𑀓𑀸;

𑀤𑀺𑀦𑁆𑀤𑀺𑀪𑀸 𑀲𑀼𑀯𑀧𑁄𑀢𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀢𑀢𑁆𑀣 𑀓𑀼𑀓𑀼𑀢𑁆𑀣𑀓𑀸𑀢𑀺 𑀏𑀯𑀁𑀦𑀸𑀫𑀺𑀓𑀸 𑀧𑀓𑁆𑀔𑀻 𑀘. 𑀓𑀼𑀴𑀻𑀭𑀓𑀸𑀢𑀺 𑀏𑀯𑀁𑀦𑀸𑀫𑀺𑀓𑀸 𑀧𑀓𑁆𑀔𑀻 𑀘. 𑀯𑀦𑁂 𑀧𑁄𑀓𑁆𑀔𑀭𑀲𑀸𑀢𑀓𑀸 𑀧𑀓𑁆𑀔𑀻 𑀘 𑀤𑀺𑀦𑁆𑀤𑀺𑀪𑀸 𑀧𑀓𑁆𑀔𑀻 𑀘 𑀲𑀼𑀯𑀧𑁄𑀢𑀸 𑀧𑀓𑁆𑀔𑀻 𑀘 𑀏𑀢𑁂 𑀲𑀩𑁆𑀩𑁂 𑀧𑀓𑁆𑀔𑀺𑀦𑁄 𑀢𑀁 𑀫𑀫 𑀅𑀲𑁆𑀲𑀫𑀲𑀫𑀻𑀧𑁂 𑀲𑀭𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬𑁨.

‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀓𑁄𑀓𑀺𑀮𑀸 𑀢𑀫𑁆𑀩𑀘𑀽𑀴𑀓𑀸;

𑀧𑀫𑁆𑀫𑀓𑀸 𑀚𑀻𑀯𑀁𑀚𑀻𑀯𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀲𑀩𑁆𑀩𑁂 𑀏𑀢𑁂 𑀳𑀁𑀲𑀸𑀤𑀬𑁄 𑀧𑀓𑁆𑀔𑀺𑀦𑁄 𑀢𑀁 𑀲𑀭𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺 𑀚𑀻𑀯𑀺𑀓𑀁 𑀧𑀸𑀮𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁩.

‘‘𑀓𑁄𑀲𑀺𑀓𑀸 𑀧𑁄𑀝𑁆𑀞𑀲𑀻𑀲𑀸 𑀘, 𑀓𑀼𑀭𑀭𑀸 𑀲𑁂𑀦𑀓𑀸 𑀩𑀳𑀽;

𑀫𑀳𑀸𑀓𑀸𑀴𑀸 𑀘 𑀲𑀓𑀼𑀡𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀢𑀢𑁆𑀣 𑀓𑁄𑀲𑀺𑀓𑀸 𑀘 𑀧𑀓𑁆𑀔𑀻 𑀧𑁄𑀝𑁆𑀞𑀲𑀻𑀲𑀸 𑀘 𑀧𑀓𑁆𑀔𑀻 𑀓𑀼𑀭𑀭𑀸 𑀘 𑀧𑀓𑁆𑀔𑀻 𑀲𑁂𑀦𑀓𑀸 𑀘 𑀧𑀓𑁆𑀔𑀻 𑀫𑀳𑀸𑀓𑀸𑀴𑀸 𑀘 𑀧𑀓𑁆𑀔𑀻 𑀣𑀮𑁂 𑀩𑀳𑀽 𑀧𑀓𑁆𑀔𑀺𑀦𑁄 𑀢𑀁 𑀲𑀭𑀁 𑀢𑀲𑁆𑀲 𑀲𑀭𑀲𑁆𑀲 𑀲𑀫𑀻𑀧𑁂 𑀚𑀻𑀯𑀦𑁆𑀢𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁪.

‘‘𑀧𑀲𑀤𑀸 𑀘 𑀯𑀭𑀸𑀳𑀸 𑀘, 𑀘𑀫𑀭𑀸 𑀕𑀡𑁆𑀟𑀓𑀸 𑀩𑀳𑀽;

𑀭𑁄𑀳𑀺𑀘𑁆𑀘𑀸 𑀲𑀼𑀓𑀧𑁄𑀢𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀢𑀢𑁆𑀣 𑀧𑀲𑀤𑀸𑀤𑀬𑁄 𑀏𑀢𑁂 𑀫𑀺𑀕𑀸 𑀢𑀁 𑀲𑀭𑀁 𑀢𑀲𑁆𑀫𑀺𑀁 𑀲𑀭𑀲𑀫𑀻𑀧𑁂, 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀚𑀻𑀯𑀺𑀢𑀁 𑀧𑀭𑀺𑀧𑀸𑀮𑁂𑀦𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁫.

‘‘𑀲𑀻𑀳𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀢𑀺𑀥𑀸 𑀧𑀪𑀺𑀦𑁆𑀦𑀫𑀸𑀢𑀗𑁆𑀕𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀏𑀢𑁂 𑀲𑀻𑀳𑀸𑀤𑀬𑁄 𑀘𑀢𑀼𑀧𑁆𑀧𑀤𑀸 𑀲𑀭𑀲𑀫𑀻𑀧𑁂 𑀉𑀧𑀤𑁆𑀤𑀯𑀭𑀳𑀺𑀢𑀸 𑀚𑀻𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬𑁬.

‘‘𑀓𑀺𑀦𑁆𑀦𑀭𑀸 𑀯𑀸𑀦𑀭𑀸 𑀘𑁂𑀯, 𑀅𑀣𑁄𑀧𑀺 𑀯𑀦𑀓𑀫𑁆𑀫𑀺𑀓𑀸;

𑀘𑁂𑀢𑀸 𑀘 𑀮𑀼𑀤𑁆𑀤𑀓𑀸 𑀘𑁂𑀯, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁’’.

𑀏𑀢𑁆𑀣 𑀏𑀢𑁂 𑀏𑀯𑀁𑀦𑀸𑀫𑀺𑀓𑀸 𑀓𑀺𑀦𑁆𑀦𑀭𑀸𑀤𑀬𑁄 𑀲𑀢𑁆𑀢𑀸 𑀢𑀲𑁆𑀫𑀺𑀁 𑀲𑀭𑀲𑀫𑀻𑀧𑁂 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁭.

‘‘𑀢𑀺𑀦𑁆𑀤𑀼𑀓𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀫𑀥𑀼𑀓𑁂𑀓𑀸 𑀲𑀼𑀫𑀸𑀭𑀺𑀬𑁄;

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀏𑀢𑁂 𑀢𑀺𑀦𑁆𑀤𑀼𑀓𑀸𑀤𑀬𑁄 𑀭𑀼𑀓𑁆𑀔𑀸 𑀥𑀼𑀯𑀁 𑀳𑁂𑀫𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀸𑀦𑀲𑀗𑁆𑀔𑀸𑀢𑁂 𑀓𑀸𑀮𑀢𑁆𑀢𑀬𑁂 𑀫𑀫 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀫𑀥𑀼𑀭𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬𑁮.

‘‘𑀓𑁄𑀲𑀫𑁆𑀩𑀸 𑀲𑀴𑀮𑀸 𑀦𑀺𑀫𑁆𑀩𑀸, 𑀲𑀸𑀤𑀼𑀨𑀮𑀲𑀫𑀸𑀬𑀼𑀢𑀸;

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁’’.

𑀢𑀢𑁆𑀣 𑀏𑀢𑁂 𑀓𑁄𑀲𑀫𑁆𑀩𑀸𑀤𑀬𑁄 𑀭𑀼𑀓𑁆𑀔𑀸 𑀲𑀸𑀭𑀨𑀮𑀸 𑀫𑀥𑀼𑀭𑀨𑀮𑀸 𑀉𑀢𑁆𑀢𑀫𑀨𑀮𑀸 𑀲𑀫𑀸𑀬𑀼𑀢𑀸 𑀲𑀁 𑀲𑀼𑀝𑁆𑀞𑀼 𑀆𑀬𑀼𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀦𑀺𑀘𑁆𑀘𑀁 𑀨𑀮𑀥𑀸𑀭𑀺𑀦𑁄 𑀫𑀫 𑀅𑀲𑁆𑀲𑀫𑀲𑀫𑀻𑀧𑁂 𑀲𑁄𑀪𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁯.

‘‘𑀳𑀭𑀻𑀢𑀓𑀸 𑀆𑀫𑀮𑀓𑀸, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀸;

𑀓𑁄𑀮𑀸 𑀪𑀮𑁆𑀮𑀸𑀢𑀓𑀸 𑀩𑀺𑀮𑁆𑀮𑀸, 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀺 𑀢𑁂’’.

𑀢𑁂 𑀳𑀭𑀻𑀢𑀓𑀸𑀤𑀬𑁄 𑀭𑀼𑀓𑁆𑀔𑀸 𑀫𑀫 𑀅𑀲𑁆𑀲𑀫𑀲𑀫𑀻𑀧𑁂 𑀚𑀸𑀢𑀸 𑀦𑀺𑀘𑁆𑀘𑀁 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁭𑁦.

‘‘𑀆𑀮𑀼𑀯𑀸 𑀘 𑀓𑀴𑀫𑁆𑀩𑀸 𑀘, 𑀩𑀺𑀴𑀸𑀮𑀻𑀢𑀓𑁆𑀓𑀴𑀸𑀦𑀺 𑀘;

𑀚𑀻𑀯𑀓𑀸 𑀲𑀼𑀢𑀓𑀸 𑀘𑁂𑀯, 𑀩𑀳𑀽𑀓𑀸 𑀫𑀫 𑀅𑀲𑁆𑀲𑀫𑁂’’.

𑀏𑀢𑁂 𑀆𑀮𑀼𑀯𑀸𑀤𑀬𑁄 𑀫𑀽𑀮𑀨𑀮𑀸 𑀔𑀼𑀤𑁆𑀤𑀸 𑀫𑀥𑀼𑀭𑀲𑀸 𑀫𑀫 𑀅𑀲𑁆𑀲𑀫𑀲𑀫𑀻𑀧𑁂 𑀩𑀳𑀽 𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁭𑁧.

‘‘𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺, 𑀢𑀴𑀸𑀓𑀸𑀲𑀼𑀁 𑀲𑀼𑀦𑀺𑀫𑁆𑀫𑀺𑀢𑀸;

𑀅𑀘𑁆𑀙𑁄𑀤𑀓𑀸 𑀲𑀻𑀢𑀚𑀮𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸’’.

𑀢𑀢𑁆𑀣 𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺 𑀅𑀲𑁆𑀲𑀫𑀲𑁆𑀲 𑀲𑀫𑀻𑀧𑁂 𑀲𑀼𑀦𑀺𑀫𑁆𑀫𑀺𑀢𑀸 𑀲𑀼𑀝𑁆𑀞𑀼 𑀆𑀭𑁄𑀳𑀦𑀑𑀭𑁄𑀳𑀦𑀓𑁆𑀔𑀫𑀁 𑀓𑀢𑁆𑀯𑀸 𑀦𑀺𑀫𑁆𑀫𑀺𑀢𑀸 𑀅𑀘𑁆𑀙𑁄𑀤𑀓𑀸 𑀯𑀺𑀧𑁆𑀧𑀲𑀦𑁆𑀦𑁄𑀤𑀓𑀸 𑀲𑀻𑀢𑀚𑀮𑀸 𑀲𑀻𑀢𑁄𑀤𑀓𑀸 𑀲𑀼𑀧𑀢𑀺𑀢𑁆𑀣𑀸 𑀲𑀼𑀦𑁆𑀤𑀭𑀢𑀺𑀢𑁆𑀣𑀸 𑀫𑀦𑁄𑀭𑀫𑀸 𑀲𑁄𑀫𑀦𑀲𑁆𑀲𑀓𑀭𑀸 𑀢𑀴𑀸𑀓𑀸 𑀆𑀲𑀼𑀁 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁧𑁭𑁨.

‘‘𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑀸𑀬𑀼𑀢𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀤𑀺𑀩𑁆𑀩𑀕𑀦𑁆𑀥𑁄𑀧𑀯𑀸𑀬𑀢𑀺’’.

𑀢𑀢𑁆𑀣 𑀧𑀤𑀼𑀫𑁂𑀳𑀺 𑀘 𑀉𑀧𑁆𑀧𑀮𑁂𑀳𑀺 𑀘 𑀲𑀜𑁆𑀙𑀦𑁆𑀦𑀸 𑀧𑀭𑀺𑀧𑀼𑀡𑁆𑀡𑀸 𑀧𑀼𑀡𑁆𑀟𑀭𑀻𑀓𑁂𑀳𑀺 𑀲𑀫𑀸𑀬𑀼𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀫𑀦𑁆𑀤𑀸𑀮𑀓𑁂𑀳𑀺 𑀘 𑀲𑀜𑁆𑀙𑀦𑁆𑀦𑀸 𑀕𑀳𑀦𑀻𑀪𑀽𑀢𑀸 𑀢𑀴𑀸𑀓𑀸 𑀤𑀺𑀩𑁆𑀩𑀕𑀦𑁆𑀥𑀸𑀦𑀺 𑀉𑀧𑀯𑀸𑀬𑀦𑁆𑀢𑀺 𑀲𑀫𑀦𑁆𑀢𑀢𑁄 𑀯𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁭𑁩.

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁂, 𑀧𑀼𑀧𑁆𑀨𑀺𑀢𑁂 𑀨𑀮𑀺𑀢𑁂 𑀯𑀦𑁂;

𑀲𑀼𑀓𑀢𑁂 𑀅𑀲𑁆𑀲𑀫𑁂 𑀭𑀫𑁆𑀫𑁂, 𑀯𑀺𑀳𑀭𑀸𑀫𑀺 𑀅𑀳𑀁 𑀢𑀤𑀸’’.

𑀢𑀢𑁆𑀣 𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁂𑀢𑀺 𑀅𑀩𑁆𑀩𑁂𑀳𑀺 𑀦𑀤𑀺𑀓𑀸𑀤𑀺𑀅𑀯𑀬𑀯𑁂𑀳𑀺 𑀲𑀫𑁆𑀧𑀦𑁆𑀦𑁂 𑀧𑀭𑀺𑀧𑀼𑀡𑁆𑀡𑁂 𑀧𑀼𑀧𑁆𑀨𑀨𑀮𑀭𑀼𑀓𑁆𑀔𑁂𑀳𑀺 𑀕𑀳𑀦𑀻𑀪𑀽𑀢𑁂 𑀯𑀦𑁂 𑀲𑀼𑀓𑀢𑁂 𑀭𑀫𑀡𑀻𑀬𑁂 𑀅𑀲𑁆𑀲𑀫𑁂 𑀅𑀭𑀜𑁆𑀜𑀸𑀯𑀸𑀲𑁂 𑀢𑀤𑀸 𑀢𑀸𑀧𑀲𑀪𑀽𑀢𑀓𑀸𑀮𑁂 𑀅𑀳𑀁 𑀯𑀺𑀳𑀭𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 𑀅𑀲𑁆𑀲𑀫𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁧𑁭𑁪.

‘‘𑀲𑀻𑀮𑀯𑀸 𑀯𑀢𑀲𑀫𑁆𑀧𑀦𑁆𑀦𑁄, 𑀛𑀸𑀬𑀻 𑀛𑀸𑀦𑀭𑀢𑁄 𑀲𑀤𑀸;

𑀧𑀜𑁆𑀘𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀲𑀼𑀭𑀼𑀘𑀺 𑀦𑀸𑀫 𑀢𑀸𑀧𑀲𑁄’’𑀢𑀺. 𑁋 𑀆𑀳;

𑀢𑀢𑁆𑀣 𑀲𑀻𑀮𑀯𑀸𑀢𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑀤𑀺𑀲𑁂𑀳𑀺 𑀧𑀜𑁆𑀘𑀳𑀺 𑀲𑀻𑀮𑁂𑀳𑀺 𑀲𑀫𑁆𑀧𑀼𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀖𑀭𑀸𑀯𑀸𑀲𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀯𑀸 𑀦 𑀲𑁂𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀢𑀲𑀫𑀸𑀤𑀸𑀦𑁂𑀦 𑀲𑀫𑁆𑀧𑀦𑁆𑀦𑁄. 𑀛𑀸𑀬𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀳𑀺 𑀛𑀸𑀬𑀻 𑀛𑀸𑀬𑀦𑀲𑀻𑀮𑁄. 𑀛𑀸𑀦𑀭𑀢𑁄𑀢𑀺 𑀏𑀢𑁂𑀲𑀼 𑀛𑀸𑀦𑁂𑀲𑀼 𑀭𑀢𑁄 𑀅𑀮𑁆𑀮𑀻𑀦𑁄 𑀲𑀤𑀸 𑀲𑀫𑁆𑀧𑀼𑀡𑁆𑀡𑁄. 𑀧𑀜𑁆𑀘𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄𑀢𑀺 𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀤𑀺𑀩𑁆𑀩𑀘𑀓𑁆𑀔𑀼𑀲𑀗𑁆𑀔𑀸𑀢𑀸𑀳𑀺 𑀧𑀜𑁆𑀘𑀳𑀺 𑀅𑀪𑀺𑀜𑁆𑀜𑀸𑀳𑀺 𑀯𑀺𑀲𑁂𑀲𑀧𑀜𑁆𑀜𑀸𑀳𑀺 𑀩𑀮𑀲𑀫𑁆𑀧𑀦𑁆𑀦𑁄, 𑀧𑀭𑀺𑀧𑀼𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀦𑀸𑀫𑁂𑀦 𑀲𑀼𑀭𑀼𑀘𑀺 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀯𑀺𑀳𑀭𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀢𑀓𑁂𑀦 𑀅𑀢𑁆𑀢𑀦𑁄 𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁧𑁭𑁫.

‘‘𑀘𑀢𑀼𑀯𑀻𑀲𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀼𑀁;

𑀲𑀩𑁆𑀩𑁂 𑀫𑀁 𑀩𑁆𑀭𑀸𑀳𑁆𑀫𑀡𑀸 𑀏𑀢𑁂, 𑀚𑀸𑀢𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄’’𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 𑀏𑀢𑁂 𑀲𑀩𑁆𑀩𑁂 𑀘𑀢𑀼𑀯𑀻𑀲𑀢𑀺𑀲𑀳𑀲𑁆𑀲𑀩𑁆𑀭𑀸𑀳𑁆𑀫𑀡𑀸 𑀫𑀬𑁆𑀳𑀁 𑀲𑀺𑀲𑁆𑀲𑀸 𑀚𑀸𑀢𑀺𑀫𑀦𑁆𑀢𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀬𑀲𑀲𑁆𑀲𑀺𑀦𑁄 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸 𑀫𑀁 𑀉𑀧𑀝𑁆𑀞𑀳𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁭𑁬.

‘‘𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀦𑀺𑀖𑀡𑁆𑀟𑀼𑀲𑀓𑁂𑀝𑀼𑀪𑁂;

𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑀸’’.

𑀢𑀢𑁆𑀣 𑀮𑀓𑁆𑀔𑀡𑁂𑀢𑀺 𑀮𑀓𑁆𑀔𑀡𑀲𑀢𑁆𑀣𑁂. 𑀲𑀩𑁆𑀩𑀮𑁄𑀓𑀺𑀬𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑀼𑀓𑁆𑀔𑀺𑀢𑀸 𑀪𑀯𑀦𑁆𑀢𑀺, 𑀇𑀫𑁂𑀳𑀺 𑀲𑀼𑀔𑀺𑀢𑀸 𑀪𑀯𑀦𑁆𑀢𑀻’’𑀢𑀺 𑀮𑀓𑁆𑀔𑀡𑀁 𑀚𑀸𑀦𑀸𑀢𑀺. 𑀢𑀧𑁆𑀧𑀓𑀸𑀲𑀓𑁄 𑀕𑀦𑁆𑀣𑁄 𑀮𑀓𑁆𑀔𑀡𑀁, 𑀢𑀲𑁆𑀫𑀺𑀁 𑀮𑀓𑁆𑀔𑀡𑁂 𑀘. 𑀇𑀢𑀺𑀳𑀸𑀲𑁂𑀢𑀺 ‘‘𑀇𑀢𑀺𑀳 𑀆𑀲 𑀇𑀢𑀺𑀳 𑀆𑀲𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀧𑀝𑀺𑀤𑀻𑀧𑀓𑁂 𑀕𑀦𑁆𑀣𑁂. 𑀮𑀓𑁆𑀔𑀡𑁂 𑀘 𑀇𑀢𑀺𑀳𑀸𑀲𑁂 𑀘 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀻𑀦𑀁 𑀦𑀸𑀫𑀧𑁆𑀧𑀓𑀸𑀲𑀓𑀕𑀦𑁆𑀣𑀁 ‘‘𑀦𑀺𑀖𑀡𑁆𑀟𑀽’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀝𑀽𑀪𑁂𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑀸𑀦𑀁 𑀓𑀯𑀻𑀦𑀁 𑀉𑀧𑀓𑀸𑀭𑀓𑁄 𑀕𑀦𑁆𑀣𑁄. 𑀦𑀺𑀖𑀡𑁆𑀟𑀼𑀬𑀸 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀦𑀺𑀖𑀡𑁆𑀟𑀼, 𑀓𑁂𑀝𑀼𑀪𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀓𑁂𑀝𑀼𑀪𑀁, 𑀢𑀲𑁆𑀫𑀺𑀁 𑀲𑀦𑀺𑀖𑀡𑁆𑀟𑀼𑀲𑀓𑁂𑀝𑀼𑀪𑁂 𑀯𑁂𑀤𑀢𑁆𑀢𑀬𑁂 𑀧𑀸𑀭𑀫𑀺𑀁 𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀤𑀓𑀸𑀢𑀺 𑀦𑀸𑀫𑀧𑀤𑀲𑀫𑀸𑀲𑀢𑀤𑁆𑀥𑀺𑀢𑀸𑀔𑁆𑀬𑀸𑀢𑀓𑀺𑀢𑀓𑀸𑀤𑀺𑀧𑀤𑁂𑀲𑀼 𑀙𑁂𑀓𑀸. 𑀯𑁂𑀬𑁆𑀬𑀸𑀓𑀭𑀡𑀸𑀦𑀺 𑀘𑀦𑁆𑀤𑀧𑀸𑀡𑀺𑀦𑀻𑀬𑀓𑀮𑀸𑀧𑀸𑀤𑀺𑀩𑁆𑀬𑀸𑀓𑀭𑀡𑁂 𑀙𑁂𑀓𑀸. 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑀸𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑁂 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀯𑁂𑀤𑀢𑁆𑀢𑀬𑁂 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑀸 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁧𑁭𑁭.

‘‘𑀉𑀧𑁆𑀧𑀸𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼, 𑀮𑀓𑁆𑀔𑀡𑁂𑀲𑀼 𑀘 𑀓𑁄𑀯𑀺𑀤𑀸;

𑀧𑀣𑀩𑁆𑀬𑀸 𑀪𑀽𑀫𑀦𑁆𑀢𑀮𑀺𑀓𑁆𑀔𑁂, 𑀫𑀫 𑀲𑀺𑀲𑁆𑀲𑀸 𑀲𑀼𑀲𑀺𑀓𑁆𑀔𑀺𑀢𑀸’’.

𑀢𑀢𑁆𑀣 𑀉𑀓𑁆𑀓𑀸𑀧𑀸𑀢𑀪𑀽𑀫𑀺𑀓𑀫𑁆𑀧𑀸𑀤𑀺𑀓𑁂𑀲𑀼 𑀉𑀧𑁆𑀧𑀸𑀢𑁂𑀲𑀼 𑀘 𑀲𑀼𑀪𑀦𑀺𑀫𑀺𑀢𑁆𑀢𑀸𑀲𑀼𑀪𑀦𑀺𑀫𑀺𑀢𑁆𑀢𑁂𑀲𑀼 𑀘 𑀇𑀢𑁆𑀣𑀺𑀮𑀓𑁆𑀔𑀡𑀧𑀼𑀭𑀺𑀲𑀮𑀓𑁆𑀔𑀡𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀘 𑀓𑁄𑀯𑀺𑀤𑀸 𑀙𑁂𑀓𑀸. 𑀧𑀣𑀯𑀺𑀬𑀸 𑀘 𑀪𑀽𑀫𑀺𑀬𑀸 𑀘 𑀲𑀓𑀮𑀮𑁄𑀓𑁂 𑀘 𑀅𑀦𑁆𑀢𑀮𑀺𑀓𑁆𑀔𑁂 𑀆𑀓𑀸𑀲𑁂 𑀘𑀸𑀢𑀺 𑀲𑀩𑁆𑀩𑀢𑁆𑀣 𑀫𑀫 𑀲𑀺𑀲𑁆𑀲𑀸 𑀲𑀼𑀲𑀺𑀓𑁆𑀔𑀺𑀢𑀸.

𑁧𑁭𑁮.

‘‘𑀅𑀧𑁆𑀧𑀺𑀘𑁆𑀙𑀸 𑀦𑀺𑀧𑀓𑀸 𑀏𑀢𑁂, 𑀅𑀧𑁆𑀧𑀸𑀳𑀸𑀭𑀸 𑀅𑀮𑁄𑀮𑀼𑀧𑀸;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸’’.

𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑀸𑀢𑀺 𑀅𑀧𑁆𑀧𑀓𑁂𑀦𑀸𑀧𑀺 𑀬𑀸𑀧𑁂𑀦𑁆𑀢𑀸. 𑀦𑀺𑀧𑀓𑀸𑀢𑀺 𑀦𑁂𑀧𑀓𑁆𑀓𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀅𑀧𑁆𑀧𑀸𑀳𑀸𑀭𑀸𑀢𑀺 𑀏𑀓𑀸𑀳𑀸𑀭𑀸 𑀏𑀓𑀪𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀮𑁄𑀮𑀼𑀧𑀸𑀢𑀺 𑀮𑁄𑀮𑀼𑀧𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀦𑀓𑀸. 𑀮𑀸𑀪𑀸𑀮𑀸𑀪𑁂𑀦𑀸𑀢𑀺 𑀮𑀸𑀪𑁂𑀦 𑀅𑀮𑀸𑀪𑁂𑀦 𑀘 𑀲𑀦𑁆𑀢𑀼𑀝𑁆𑀞𑀸 𑀲𑁄𑀫𑀦𑀲𑁆𑀲𑀸 𑀏𑀢𑁂 𑀫𑀫 𑀲𑀺𑀲𑁆𑀲𑀸 𑀲𑀤𑀸 𑀦𑀺𑀘𑁆𑀘𑀓𑀸𑀮𑀁 𑀫𑀁 𑀧𑀭𑀺𑀯𑀸𑀭𑁂𑀦𑁆𑀢𑀺 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁭𑁯.

‘‘𑀛𑀸𑀬𑀻 𑀛𑀸𑀦𑀭𑀢𑀸 𑀥𑀻𑀭𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀆𑀓𑀺𑀜𑁆𑀘𑀜𑁆𑀜𑀁 𑀧𑀢𑁆𑀣𑀬𑀦𑁆𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸’’.

𑀢𑀢𑁆𑀣 𑀛𑀸𑀬𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀛𑀸𑀬𑀦𑀲𑀻𑀮𑀸 𑀯𑀸. 𑀛𑀸𑀦𑀭𑀢𑀸𑀢𑀺 𑀢𑁂𑀲𑀼 𑀘 𑀛𑀸𑀦𑁂𑀲𑀼 𑀭𑀢𑀸 𑀅𑀮𑁆𑀮𑀻𑀦𑀸. 𑀥𑀻𑀭𑀸𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀸. 𑀲𑀦𑁆𑀢𑀘𑀺𑀢𑁆𑀢𑀸𑀢𑀺 𑀯𑀽𑀧𑀲𑀦𑁆𑀢𑀫𑀦𑀸. 𑀲𑀫𑀸𑀳𑀺𑀢𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀸. 𑀆𑀓𑀺𑀜𑁆𑀘𑀜𑁆𑀜𑀦𑁆𑀢𑀺 𑀦𑀺𑀧𑁆𑀧𑀮𑀺𑀩𑁄𑀥𑀪𑀸𑀯𑀁. 𑀧𑀢𑁆𑀣𑀬𑀦𑁆𑀢𑀸𑀢𑀺 𑀇𑀘𑁆𑀙𑀦𑁆𑀢𑀸. 𑀇𑀢𑁆𑀣𑀫𑁆𑀪𑀽𑀢𑀸 𑀫𑁂 𑀲𑀺𑀲𑁆𑀲𑀸 𑀲𑀤𑀸 𑀫𑀁 𑀧𑀭𑀺𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁦.

‘‘𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑀸;

𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀥𑀻𑀭𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸’’.

𑀢𑀢𑁆𑀣 𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀢𑀺 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀲𑀼 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑀸 𑀧𑀽𑀭𑀺𑀢𑀸𑀢𑀺 𑀅𑀢𑁆𑀣𑁄. 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑀸𑀢𑀺 𑀩𑀼𑀤𑁆𑀥𑀸𑀦𑀼𑀜𑁆𑀜𑀸𑀢𑀸𑀬 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑁂 𑀆𑀳𑀸𑀭𑁂 𑀭𑀢𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀮𑀺𑀓𑁆𑀔𑀘𑀭𑀸𑀢𑀺 𑀅𑀦𑁆𑀢𑀮𑀺𑀓𑁆𑀔𑁂𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀥𑀻𑀭𑀸𑀢𑀺 𑀣𑀺𑀭𑀪𑀽𑀢𑀸 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀧𑀭𑀺𑀲𑁆𑀲𑀬𑁂 𑀅𑀘𑁆𑀙𑀫𑁆𑀪𑀺𑀢𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑀸 𑀫𑀫 𑀢𑀸𑀧𑀲𑀸 𑀲𑀤𑀸 𑀫𑀁 𑀧𑀭𑀺𑀯𑀸𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁮𑁧.

‘‘𑀲𑀁𑀯𑀼𑀢𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼, 𑀅𑀦𑁂𑀚𑀸 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑀸;

𑀅𑀲𑀁𑀲𑀝𑁆𑀞𑀸 𑀘 𑀢𑁂 𑀥𑀻𑀭𑀸, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸’’.

𑀢𑀢𑁆𑀣 𑀘𑀓𑁆𑀔𑀸𑀤𑀻𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀁𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸, 𑀭𑀓𑁆𑀔𑀺𑀢𑀕𑁄𑀧𑀺𑀢𑀤𑁆𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀚𑀸 𑀦𑀺𑀢𑁆𑀢𑀡𑁆𑀳𑀸 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑀸 𑀕𑁄𑀧𑀺𑀢𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀸 𑀅𑀲𑀁𑀲𑀝𑁆𑀞𑀸 𑀜𑀸𑀢𑀻𑀳𑀺 𑀕𑀳𑀝𑁆𑀞𑁂𑀳𑀺 𑀅𑀫𑀺𑀲𑁆𑀲𑀻𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀭𑀸𑀲𑀤𑀸𑀢𑀺 𑀤𑀼𑀝𑁆𑀞𑀼 𑀆𑀲𑀤𑀸, 𑀆𑀲𑀸𑀤𑁂𑀢𑀼𑀁 𑀖𑀝𑁆𑀝𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀅𑀬𑁄𑀕𑁆𑀕𑀸𑀢𑀺 𑀅𑀢𑁆𑀣𑁄.

𑁧𑁮𑁨.

‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀚𑁆𑀚𑀸𑀬, 𑀞𑀸𑀦𑀘𑀗𑁆𑀓𑀫𑀦𑁂𑀦 𑀘;

𑀯𑀻𑀢𑀺𑀦𑀸𑀫𑁂𑀦𑁆𑀢𑀺 𑀢𑁂 𑀭𑀢𑁆𑀢𑀺𑀁, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸’’.

𑀢𑀢𑁆𑀣 𑀫𑀫 𑀲𑀺𑀲𑁆𑀲𑀸 𑀧𑀮𑁆𑀮𑀗𑁆𑀓𑁂𑀦 𑀊𑀭𑀼𑀩𑀤𑁆𑀥𑀸𑀲𑀦𑁂𑀦 𑀲𑁂𑀬𑁆𑀬𑀁 𑀯𑀺𑀳𑀸𑀬 𑀦𑀺𑀲𑀚𑁆𑀚𑀸𑀬 𑀘 𑀞𑀸𑀦𑁂𑀦 𑀘 𑀘𑀗𑁆𑀓𑀫𑁂𑀦 𑀘 𑀲𑀓𑀮𑀁 𑀭𑀢𑁆𑀢𑀺𑀁 𑀯𑀺𑀲𑁂𑀲𑁂𑀦 𑀅𑀢𑀺𑀦𑀸𑀫𑁂𑀦𑁆𑀢𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁩.

‘‘𑀭𑀚𑀦𑀻𑀬𑁂 𑀦 𑀭𑀚𑁆𑀚𑀦𑁆𑀢𑀺, 𑀤𑀼𑀲𑁆𑀲𑀦𑀻𑀬𑁂 𑀦 𑀤𑀼𑀲𑁆𑀲𑀭𑁂;

𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀦𑁆𑀢𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸’’.

𑀢𑁂 𑀇𑀢𑁆𑀣𑀫𑁆𑀪𑀽𑀢𑀸 𑀫𑀫 𑀲𑀺𑀲𑁆𑀲𑀸 𑀢𑀸𑀧𑀲𑀸 𑀭𑀚𑀦𑀻𑀬𑁂 𑀭𑀚𑁆𑀚𑀺𑀢𑀩𑁆𑀩𑁂 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀭𑀚𑁆𑀚𑀦𑁆𑀢𑀺 𑀭𑀚𑁆𑀚𑀁 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀤𑀼𑀲𑁆𑀲𑀦𑀻𑀬𑁂 𑀤𑀼𑀲𑁆𑀲𑀺𑀢𑀩𑁆𑀩𑁂 𑀤𑁄𑀲𑀁 𑀉𑀧𑁆𑀧𑀸𑀤𑁂𑀢𑀼𑀁 𑀬𑀼𑀢𑁆𑀢𑁂 𑀯𑀢𑁆𑀣𑀼𑀫𑁆𑀳𑀺 𑀦 𑀤𑀼𑀲𑁆𑀲𑀭𑁂 𑀤𑁄𑀲𑀁 𑀦 𑀓𑀭𑁄𑀦𑁆𑀢𑀺. 𑀫𑁄𑀳𑀦𑀻𑀬𑁂 𑀫𑁄𑀳𑀺𑀢𑀼𑀁 𑀬𑀼𑀢𑁆𑀢𑁂 𑀯𑀢𑁆𑀣𑀼𑀫𑁆𑀳𑀺 𑀦 𑀫𑀼𑀬𑁆𑀳𑀦𑁆𑀢𑀺 𑀫𑁄𑀳𑀁 𑀦 𑀓𑀭𑁄𑀦𑁆𑀢𑀺, 𑀧𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁮𑁪.

‘‘𑀇𑀤𑁆𑀥𑀺𑀁 𑀯𑀻𑀫𑀁𑀲𑀫𑀸𑀦𑀸 𑀢𑁂, 𑀯𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀺𑀓𑀁;

𑀧𑀣𑀯𑀺𑀁 𑀢𑁂 𑀧𑀓𑀫𑁆𑀧𑁂𑀦𑁆𑀢𑀺, 𑀲𑀸𑀭𑀫𑁆𑀪𑁂𑀦 𑀤𑀼𑀭𑀸𑀲𑀤𑀸’’.

𑀢𑁂 𑀫𑀫 𑀲𑀺𑀲𑁆𑀲𑀸 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀓𑀁 (𑀧𑀝𑀺. 𑀫. 𑁧.𑁧𑁦𑁨) 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀦𑀺𑀘𑁆𑀘𑀓𑀸𑀮𑀺𑀓𑀁 𑀯𑀻𑀫𑀁𑀲𑀫𑀸𑀦𑀸 𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀫𑀫 𑀲𑀺𑀲𑁆𑀲𑀸 𑀆𑀓𑀸𑀲𑁂𑀧𑀺 𑀉𑀤𑀓𑁂𑀧𑀺 𑀧𑀣𑀯𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑀁 𑀧𑀓𑀫𑁆𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀭𑀫𑁆𑀪𑁂𑀦 𑀬𑀼𑀕𑀕𑁆𑀕𑀸𑀳𑁂𑀦 𑀓𑀮𑀳𑀓𑀭𑀡𑁂𑀦 𑀦 𑀆𑀲𑀸𑀤𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁧𑁮𑁫.

‘‘𑀓𑀻𑀴𑀫𑀸𑀦𑀸 𑀘 𑀢𑁂 𑀲𑀺𑀲𑁆𑀲𑀸, 𑀓𑀻𑀴𑀦𑁆𑀢𑀺 𑀛𑀸𑀦𑀓𑀻𑀴𑀺𑀢𑀁;

𑀚𑀫𑁆𑀩𑀼𑀢𑁄 𑀨𑀮𑀫𑀸𑀦𑁂𑀦𑁆𑀢𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸’’.

𑀢𑁂 𑀫𑀫 𑀲𑀺𑀲𑁆𑀲𑀸 𑀓𑀻𑀴𑀫𑀸𑀦𑀸 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀻𑀴𑀁 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺 𑀭𑀫𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀚𑀫𑁆𑀩𑀼𑀢𑁄 𑀨𑀮𑀫𑀸𑀦𑁂𑀦𑁆𑀢𑀻𑀢𑀺 𑀳𑀺𑀫𑀯𑀦𑁆𑀢𑀫𑁆𑀳𑀺 𑀲𑀢𑀬𑁄𑀚𑀦𑀼𑀩𑁆𑀩𑁂𑀥𑀚𑀫𑁆𑀩𑀼𑀭𑀼𑀓𑁆𑀔𑀢𑁄 𑀖𑀝𑀧𑁆𑀧𑀫𑀸𑀡𑀁 𑀚𑀫𑁆𑀩𑀼𑀨𑀮𑀁 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀆𑀦𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁮𑁬.

‘‘𑀅𑀜𑁆𑀜𑁂 𑀕𑀘𑁆𑀙𑀦𑁆𑀢𑀺 𑀕𑁄𑀬𑀸𑀦𑀁, 𑀅𑀜𑁆𑀜𑁂 𑀧𑀼𑀩𑁆𑀩𑀯𑀺𑀤𑁂𑀳𑀓𑀁;

𑀅𑀜𑁆𑀜𑁂 𑀘 𑀉𑀢𑁆𑀢𑀭𑀓𑀼𑀭𑀼𑀁, 𑀏𑀲𑀦𑀸𑀬 𑀤𑀼𑀭𑀸𑀲𑀤𑀸’’.

𑀢𑁂𑀲𑀁 𑀫𑀫 𑀲𑀺𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀅𑀜𑁆𑀜𑁂 𑀏𑀓𑀘𑁆𑀘𑁂 𑀕𑁄𑀬𑀸𑀦𑀁 𑀅𑀧𑀭𑀕𑁄𑀬𑀸𑀦𑀁 𑀤𑀻𑀧𑀁 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀧𑀼𑀩𑁆𑀩𑀯𑀺𑀤𑁂𑀳𑀓𑀁 𑀤𑀻𑀧𑀁 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀉𑀢𑁆𑀢𑀭𑀓𑀼𑀭𑀼𑀁 𑀤𑀻𑀧𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀤𑀼𑀭𑀸𑀲𑀤𑀸 𑀏𑀢𑁂𑀲𑀼 𑀞𑀸𑀦𑁂𑀲𑀼 𑀏𑀲𑀦𑀸𑀬 𑀕𑀯𑁂𑀲𑀦𑀸𑀬 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀸𑀬 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁭.

‘‘𑀧𑀼𑀭𑀢𑁄 𑀧𑁂𑀲𑁂𑀦𑁆𑀢𑀺 𑀔𑀸𑀭𑀺𑀁, 𑀧𑀘𑁆𑀙𑀢𑁄 𑀘 𑀯𑀚𑀦𑁆𑀢𑀺 𑀢𑁂;

𑀘𑀢𑀼𑀯𑀻𑀲𑀲𑀳𑀲𑁆𑀲𑁂𑀳𑀺, 𑀙𑀸𑀤𑀺𑀢𑀁 𑀳𑁄𑀢𑀺 𑀅𑀫𑁆𑀩𑀭𑀁’’.

𑀢𑁂 𑀫𑀫 𑀲𑀺𑀲𑁆𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀫𑀸𑀦𑀸 𑀔𑀸𑀭𑀺𑀁 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀪𑀭𑀺𑀢𑀁 𑀓𑀸𑀚𑀁 𑀧𑀼𑀭𑀢𑁄 𑀧𑁂𑀲𑁂𑀦𑁆𑀢𑀺 𑀧𑀞𑀫𑀁 𑀅𑀪𑀺𑀫𑀼𑀔𑀜𑁆𑀘 𑀢𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀢𑀲𑁆𑀲 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀕𑀘𑁆𑀙𑀫𑀸𑀦𑁂𑀳𑀺 𑀘𑀢𑀼𑀯𑀻𑀲𑀲𑀳𑀲𑁆𑀲𑁂𑀳𑀺 𑀢𑀸𑀧𑀲𑁂𑀳𑀺 𑀅𑀫𑁆𑀩𑀭𑀁 𑀆𑀓𑀸𑀲𑀢𑀮𑀁 𑀙𑀸𑀤𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁮.

‘‘𑀅𑀕𑁆𑀕𑀺𑀧𑀸𑀓𑀻 𑀅𑀦𑀕𑁆𑀕𑀻 𑀘, 𑀤𑀦𑁆𑀢𑁄𑀤𑀼𑀓𑁆𑀔𑀮𑀺𑀓𑀸𑀧𑀺 𑀘;

𑀅𑀲𑁆𑀫𑁂𑀦 𑀓𑁄𑀝𑁆𑀝𑀺𑀢𑀸 𑀓𑁂𑀘𑀺, 𑀧𑀯𑀢𑁆𑀢𑀨𑀮𑀪𑁄𑀚𑀦𑀸’’.

𑀢𑀢𑁆𑀣 𑀓𑁂𑀘𑀺 𑀏𑀓𑀘𑁆𑀘𑁂 𑀫𑀫 𑀲𑀺𑀲𑁆𑀲𑀸 𑀅𑀕𑁆𑀕𑀺𑀧𑀸𑀓𑀻 𑀨𑀮𑀸𑀨𑀮𑀧𑀡𑁆𑀡𑀸𑀤𑀬𑁄 𑀧𑀘𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀏𑀓𑀘𑁆𑀘𑁂 𑀅𑀦𑀕𑁆𑀕𑀻 𑀅𑀕𑁆𑀕𑀻𑀳𑀺 𑀅𑀧𑀘𑀺𑀢𑁆𑀯𑀸 𑀆𑀫𑀓𑀫𑁂𑀯 𑀔𑀸𑀤𑀦𑁆𑀢𑀺, 𑀏𑀓𑀘𑁆𑀘𑁂 𑀤𑀦𑁆𑀢𑀺𑀓𑀸 𑀤𑀦𑁆𑀢𑁂𑀳𑀺𑀬𑁂𑀯 𑀢𑀘𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀏𑀓𑀘𑁆𑀘𑁂 𑀉𑀤𑀼𑀓𑁆𑀔𑀮𑀺𑀓𑀸 𑀉𑀤𑀼𑀓𑁆𑀔𑀮𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀏𑀓𑀘𑁆𑀘𑁂 𑀅𑀲𑁆𑀫𑁂𑀦 𑀓𑁄𑀝𑁆𑀝𑀺𑀢𑀸 𑀧𑀸𑀲𑀸𑀡𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀏𑀓𑀘𑁆𑀘𑁂 𑀲𑀬𑀁𑀧𑀢𑀺𑀢𑀨𑀮𑀸𑀳𑀸𑀭𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁯.

‘‘𑀉𑀤𑀓𑁄𑀭𑁄𑀳𑀡𑀸 𑀓𑁂𑀘𑀺, 𑀲𑀸𑀬𑀁 𑀧𑀸𑀢𑁄 𑀲𑀼𑀘𑀻𑀭𑀢𑀸;

𑀢𑁄𑀬𑀸𑀪𑀺𑀲𑁂𑀘𑀦𑀓𑀭𑀸, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸’’.

𑀤𑀼𑀭𑀸𑀲𑀤𑀸 𑀫𑀫 𑀲𑀺𑀲𑁆𑀲𑀸 𑀓𑁂𑀘𑀺 𑀲𑀼𑀘𑀻𑀭𑀢𑀸 𑀲𑀼𑀤𑁆𑀥𑀺𑀓𑀸𑀫𑀸 𑀲𑀸𑀬𑀁 𑀧𑀸𑀢𑁄 𑀘 𑀉𑀤𑀓𑁄𑀭𑁄𑀳𑀡𑀸 𑀉𑀤𑀓𑀧𑀯𑁂𑀲𑀓𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀢𑁄𑀬𑀸𑀪𑀺𑀲𑁂𑀘𑀦𑀓𑀭𑀸 𑀉𑀤𑀓𑁂𑀦 𑀅𑀢𑁆𑀢𑀦𑀺 𑀅𑀪𑀺𑀲𑀺𑀜𑁆𑀘𑀦𑀓𑀭𑀸𑀢𑀺 𑀅𑀢𑁆𑀣𑁄.

𑁧𑁯𑁦.

‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀕𑀦𑁆𑀥𑀺𑀢𑀸 𑀲𑀻𑀮𑀕𑀦𑁆𑀥𑁂𑀦, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸’’.

𑀢𑀢𑁆𑀣 𑀢𑁂 𑀤𑀼𑀭𑀸𑀲𑀤𑀸 𑀫𑀫 𑀲𑀺𑀲𑁆𑀲𑀸 𑀓𑀘𑁆𑀙𑁂𑀲𑀼 𑀉𑀪𑀬𑀓𑀘𑁆𑀙𑁂𑀲𑀼 𑀘 𑀳𑀢𑁆𑀣𑀧𑀸𑀤𑁂𑀲𑀼 𑀘 𑀧𑀭𑀽𑀴𑁆𑀳𑀸 𑀲𑀜𑁆𑀚𑀸𑀢𑀸, 𑀤𑀻𑀖𑀦𑀔𑀮𑁄𑀫𑀸𑀢𑀺 𑀅𑀢𑁆𑀣𑁄. 𑀔𑀼𑀭𑀓𑀫𑁆𑀫𑀭𑀳𑀺𑀢𑀢𑁆𑀢𑀸 𑀅𑀫𑀡𑁆𑀟𑀺𑀢𑀸 𑀅𑀧𑀲𑀸𑀥𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀗𑁆𑀓𑀤𑀦𑁆𑀢𑀸𑀢𑀺 𑀇𑀝𑁆𑀞𑀓𑀘𑀼𑀡𑁆𑀡𑀔𑀻𑀭𑀧𑀸𑀲𑀸𑀡𑀘𑀼𑀡𑁆𑀡𑀸𑀤𑀻𑀳𑀺 𑀥𑀯𑀮𑀫𑀓𑀢𑀢𑁆𑀢𑀸 𑀫𑀮𑀕𑁆𑀕𑀳𑀺𑀢𑀤𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀭𑀚𑀲𑁆𑀲𑀺𑀭𑀸𑀢𑀺 𑀢𑁂𑀮𑀫𑀓𑁆𑀔𑀦𑀸𑀤𑀺𑀭𑀳𑀺𑀢𑀢𑁆𑀢𑀸 𑀥𑀽𑀮𑀻𑀳𑀺 𑀫𑀓𑁆𑀔𑀺𑀢𑀲𑀻𑀲𑀸𑀢𑀺 𑀅𑀢𑁆𑀣𑁄. 𑀕𑀦𑁆𑀥𑀺𑀢𑀸 𑀲𑀻𑀮𑀕𑀦𑁆𑀥𑁂𑀦𑀸𑀢𑀺 𑀛𑀸𑀦𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑀻𑀮𑁂𑀦 𑀲𑀫𑀗𑁆𑀕𑀻𑀪𑀽𑀢𑀢𑁆𑀢𑀸 𑀮𑁄𑀓𑀺𑀬𑀲𑀻𑀮𑀕𑀦𑁆𑀥𑁂𑀦 𑀲𑀩𑁆𑀩𑀢𑁆𑀣 𑀲𑀼𑀕𑀦𑁆𑀥𑀻𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸𑀢𑀺 𑀇𑀫𑁂𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀆𑀲𑀸𑀤𑁂𑀢𑀼𑀁 𑀖𑀝𑁆𑀝𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀫𑀫 𑀲𑀺𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁧.

‘‘𑀧𑀸𑀢𑁄𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, 𑀚𑀝𑀺𑀮𑀸 𑀉𑀕𑁆𑀕𑀢𑀸𑀧𑀦𑀸;

𑀮𑀸𑀪𑀸𑀮𑀸𑀪𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀕𑀘𑁆𑀙𑀦𑁆𑀢𑀺 𑀅𑀫𑁆𑀩𑀭𑁂 𑀢𑀤𑀸’’.

𑀢𑀢𑁆𑀣 𑀧𑀸𑀢𑁄𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀢𑀺 𑀲𑀢𑁆𑀢𑀫𑁆𑀬𑀢𑁆𑀣𑁂 𑀢𑁄𑀧𑀘𑁆𑀘𑀬𑁄, 𑀧𑀸𑀢𑀭𑀸𑀲𑀓𑀸𑀮𑁂𑀬𑁂𑀯 𑀫𑀫 𑀲𑀦𑁆𑀢𑀺𑀓𑁂 𑀭𑀸𑀲𑀺𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀉𑀕𑁆𑀕𑀢𑀸𑀧𑀦𑀸 𑀧𑀸𑀓𑀝𑀢𑀧𑀸 𑀧𑀢𑁆𑀣𑀝𑀢𑀧𑀸 𑀚𑀝𑀺𑀮𑀸 𑀚𑀝𑀸𑀥𑀸𑀭𑀺𑀦𑁄 𑀢𑀸𑀧𑀲𑀸. 𑀮𑀸𑀪𑀸𑀮𑀸𑀪𑀁 𑀧𑀓𑀺𑀢𑁆𑀢𑁂𑀢𑁆𑀯𑀸 𑀔𑀼𑀤𑁆𑀤𑀓𑁂 𑀘 𑀫𑀳𑀦𑁆𑀢𑁂 𑀘 𑀮𑀸𑀪𑁂 𑀧𑀸𑀓𑀝𑁂 𑀓𑀢𑁆𑀯𑀸 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀫𑁆𑀩𑀭𑁂 𑀆𑀓𑀸𑀲𑀢𑀮𑁂 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁨. 𑀧𑀼𑀦 𑀢𑁂𑀲𑀁𑀬𑁂𑀯 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑁄 𑀏𑀢𑁂𑀲𑀁 𑀧𑀓𑁆𑀓𑀫𑀦𑁆𑀢𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀓𑀸𑀲𑁂 𑀯𑀸 𑀣𑀮𑁂 𑀯𑀸 𑀧𑀓𑁆𑀓𑀫𑀦𑁆𑀢𑀸𑀦𑀁 𑀕𑀘𑁆𑀙𑀦𑁆𑀢𑀸𑀦𑀁 𑀏𑀢𑁂𑀲𑀁 𑀢𑀸𑀧𑀲𑀸𑀦𑀁 𑀯𑀸𑀓𑀘𑀻𑀭𑀚𑀦𑀺𑀢𑁄 𑀫𑀳𑀸𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀤𑀺𑀢𑀸 𑀳𑁄𑀦𑁆𑀢𑀺 𑀤𑁂𑀯𑀢𑀸𑀢𑀺 𑀏𑀯𑀁 𑀫𑀳𑀸𑀲𑀤𑁆𑀤𑀁 𑀧𑀯𑀢𑁆𑀢𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀅𑀚𑀺𑀦𑀘𑀫𑁆𑀫𑀲𑀤𑁆𑀤𑁂𑀦 𑀲𑀦𑁆𑀢𑀼𑀝𑁆𑀞𑀸 ‘‘𑀲𑀸𑀥𑀼 𑀲𑀸𑀥𑀼, 𑀅𑀬𑁆𑀬𑀸’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀤𑁂𑀯𑀢𑀸 𑀫𑀼𑀤𑀺𑀢𑀸 𑀲𑀦𑁆𑀢𑀼𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁩. 𑀤𑀺𑀲𑁄𑀤𑀺𑀲𑀦𑁆𑀢𑀺 𑀢𑁂 𑀇𑀲𑀬𑁄 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀆𑀓𑀸𑀲𑀘𑀸𑀭𑀺𑀦𑁄 𑀤𑀓𑁆𑀔𑀺𑀡𑀸𑀤𑀺𑀲𑀸𑀦𑀼𑀤𑀺𑀲𑀁 𑀧𑀓𑁆𑀓𑀫𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀓𑁂 𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑀸𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀩𑀮𑁂𑀦 𑀯𑀸 𑀛𑀸𑀦𑀩𑀮𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸 𑀬𑀤𑀺𑀘𑁆𑀙𑀓𑀁 𑀬𑀢𑁆𑀣 𑀬𑀢𑁆𑀣 𑀕𑀦𑁆𑀢𑀼𑀓𑀸𑀫𑀸, 𑀢𑀢𑁆𑀣 𑀢𑀢𑁆𑀣𑁂𑀯 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁪. 𑀧𑀼𑀦 𑀢𑁂𑀲𑀫𑁂𑀯𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑀓𑀸 𑀏𑀢𑁂𑀢𑀺𑀆𑀤𑀺𑀫𑀸𑀳. 𑀢𑀤𑀸 𑀏𑀢𑁂 𑀲𑀩𑁆𑀩𑀢𑁆𑀣 𑀇𑀘𑁆𑀙𑀸𑀘𑀸𑀭𑀸 𑀧𑀣𑀯𑀻𑀓𑀫𑁆𑀧𑀓𑀸 𑀫𑁂𑀤𑀦𑀻𑀲𑀜𑁆𑀘𑀮𑀦𑀚𑀸𑀢𑀺𑀓𑀸 𑀦𑀪𑀘𑀸𑀭𑀺𑀦𑁄 𑀆𑀓𑀸𑀲𑀘𑀸𑀭𑀺𑀦𑁄. 𑀉𑀕𑁆𑀕𑀢𑁂𑀚𑀸𑀢𑀺 𑀉𑀕𑁆𑀕𑀢𑀢𑁂𑀚𑀸 𑀧𑀢𑁆𑀣𑀝𑀢𑁂𑀚𑀸 𑀤𑀼𑀧𑁆𑀧𑀲𑀳𑀸 𑀧𑀲𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀤𑀼𑀧𑁆𑀧𑀲𑀳𑀸. 𑀲𑀸𑀕𑀭𑁄𑀯 𑀅𑀔𑁄𑀪𑀺𑀬𑀸𑀢𑀺 𑀅𑀜𑁆𑀜𑁂𑀳𑀺 𑀅𑀔𑁄𑀪𑀺𑀬𑁄 𑀅𑀦𑀸𑀮𑀼𑀴𑀺𑀢𑁄 𑀲𑀸𑀕𑀭𑁄 𑀇𑀯 𑀲𑀫𑀼𑀤𑁆𑀤𑁄 𑀯𑀺𑀬 𑀅𑀜𑁆𑀜𑁂𑀳𑀺 𑀅𑀔𑁄𑀪𑀺𑀬𑀸 𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁫. 𑀞𑀸𑀦𑀘𑀗𑁆𑀓𑀫𑀺𑀦𑁄 𑀓𑁂𑀘𑀻𑀢𑀺 𑀢𑁂𑀲𑀁 𑀫𑀫 𑀲𑀺𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀏𑀓𑀘𑁆𑀘𑁂 𑀇𑀲𑀬𑁄 𑀞𑀸𑀦𑀺𑀭𑀺𑀬𑀸𑀧𑀣𑀘𑀗𑁆𑀓𑀫𑀦𑀺𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀸, 𑀏𑀓𑀘𑁆𑀘𑁂 𑀇𑀲𑀬𑁄 𑀦𑁂𑀲𑀚𑁆𑀚𑀺𑀓𑀸 𑀦𑀺𑀲𑀚𑁆𑀚𑀺𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀸, 𑀏𑀓𑀘𑁆𑀘𑁂 𑀇𑀲𑀬𑁄 𑀧𑀯𑀢𑁆𑀢𑀪𑁄𑀚𑀦𑀸 𑀲𑀬𑀁𑀧𑀢𑀺𑀢𑀧𑀡𑁆𑀡𑀸𑀳𑀸𑀭𑀸 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀤𑀼𑀭𑀸𑀲𑀤𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁬. 𑀢𑁂 𑀲𑀩𑁆𑀩𑁂 𑀣𑁄𑀫𑁂𑀦𑁆𑀢𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸 𑀲𑀢𑁆𑀢𑀸 𑀲𑀼𑀔𑀻 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀲𑀺𑀦𑁂𑀳𑀮𑀓𑁆𑀔𑀡𑀸𑀬 𑀫𑁂𑀢𑁆𑀢𑀸𑀬 𑀨𑀭𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀺, 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀏𑀢𑁂 𑀫𑀫 𑀲𑀺𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂 𑀢𑁂 𑀇𑀲𑀬𑁄 𑀲𑀩𑁆𑀩𑀧𑀸𑀡𑀺𑀦𑀁 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀳𑀺𑀢𑁂𑀲𑀻 𑀳𑀺𑀢𑀕𑀯𑁂𑀲𑀓𑀸. 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀅𑀢𑁆𑀢𑀸𑀦𑀁 𑀦 𑀉𑀓𑁆𑀓𑀁𑀲𑀓𑀸 𑀅𑀫𑀸𑀦𑀺𑀦𑁄 𑀓𑀲𑁆𑀲𑀘𑀺 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀦 𑀯𑀫𑁆𑀪𑁂𑀦𑁆𑀢𑀺 𑀦𑀻𑀘𑀁 𑀓𑀢𑁆𑀯𑀸 𑀦 𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁯𑁭. 𑀢𑁂 𑀫𑀫 𑀲𑀺𑀲𑁆𑀲𑀸 𑀲𑀻𑀮𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀕𑀼𑀡𑀬𑀼𑀢𑁆𑀢𑀢𑁆𑀢𑀸 𑀲𑀻𑀳𑀭𑀸𑀚𑀸 𑀇𑀯 𑀅𑀘𑁆𑀙𑀫𑁆𑀪𑀻𑀢𑀸 𑀦𑀺𑀩𑁆𑀪𑀬𑀸, 𑀕𑀚𑀭𑀸𑀚𑀸 𑀇𑀯 𑀳𑀢𑁆𑀣𑀺𑀭𑀸𑀚𑀸 𑀯𑀺𑀬 𑀣𑀸𑀫𑀯𑀸 𑀲𑀭𑀻𑀭𑀩𑀮𑀛𑀸𑀦𑀩𑀮𑀲𑀫𑁆𑀧𑀦𑁆𑀦𑀸 𑀩𑁆𑀬𑀕𑁆𑀖𑀭𑀸𑀚𑀸 𑀇𑀯, 𑀤𑀼𑀭𑀸𑀲𑀤𑀸 𑀖𑀝𑁆𑀝𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁯𑁮. 𑀢𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀲𑁆𑀲 𑀤𑀲𑁆𑀲𑀦𑀮𑁂𑀲𑁂𑀦 𑀧𑀓𑀸𑀲𑁂𑀦𑁆𑀢𑁄 𑀯𑀺𑀚𑁆𑀚𑀸𑀥𑀭𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀦𑁆𑀢𑀲𑀚𑁆𑀛𑀸𑀬𑀸𑀤𑀺𑀯𑀺𑀚𑁆𑀚𑀸𑀥𑀭𑀸 𑀘 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀻𑀲𑀼 𑀯𑀲𑀦𑁆𑀢𑀸 𑀪𑀼𑀫𑁆𑀫𑀤𑁂𑀯𑀢𑀸 𑀘 𑀪𑀽𑀫𑀝𑁆𑀞𑀣𑀮𑀝𑁆𑀞𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀤𑁂𑀯𑀸 𑀘 𑀘𑀡𑁆𑀟𑀸 𑀭𑀓𑁆𑀔𑀲𑀸 𑀘 𑀓𑀼𑀫𑁆𑀪𑀡𑁆𑀟𑀸 𑀤𑁂𑀯𑀸 𑀘 𑀤𑀸𑀦𑀯𑀸 𑀤𑁂𑀯𑀸 𑀘 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀦𑀺𑀫𑁆𑀫𑀸𑀦𑀲𑀫𑀢𑁆𑀣𑀸 𑀕𑀭𑀼𑀴𑀸 𑀘 𑀢𑀁 𑀲𑀭𑀁 𑀉𑀧𑀚𑀻𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀫𑀺𑀁 𑀲𑀭𑁂 𑀲𑀭𑀲𑁆𑀲 𑀲𑀫𑀻𑀧𑁂 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁯𑁯. 𑀧𑀼𑀦𑀧𑀺 𑀢𑁂𑀲𑀁𑀬𑁂𑀯 𑀅𑀢𑁆𑀢𑀦𑁄 𑀲𑀺𑀲𑁆𑀲𑀢𑀸𑀧𑀲𑀸𑀦𑀁 𑀕𑀼𑀡𑁂 𑀯𑀡𑁆𑀡𑁂𑀦𑁆𑀢𑁄 𑀢𑁂 𑀚𑀝𑀸 𑀔𑀸𑀭𑀺𑀪𑀭𑀺𑀢𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀔𑀸𑀭𑀺𑀪𑀸𑀭𑀦𑁆𑀢𑀺 𑀉𑀤𑀜𑁆𑀘𑀦𑀓𑀫𑀡𑁆𑀟𑀮𑀼𑀆𑀤𑀺𑀓𑀁 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀁.

𑁨𑁦𑁭. 𑀧𑀼𑀦𑀧𑀺 𑀅𑀢𑁆𑀢𑀦𑁄 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑁄 𑀉𑀧𑁆𑀧𑀸𑀢𑁂 𑀲𑀼𑀧𑀺𑀦𑁂 𑀘𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑀢𑁆𑀢𑀸 𑀦𑀓𑁆𑀔𑀢𑁆𑀢𑀧𑀸𑀞𑁂 𑀘 𑀙𑁂𑀓𑀢𑁆𑀢𑀸 ‘‘𑀇𑀫𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑀦𑀓𑁆𑀔𑀢𑁆𑀢𑀁 𑀲𑀼𑀪𑀁 𑀅𑀲𑀼𑀪’’𑀦𑁆𑀢𑀺 𑀉𑀧𑁆𑀧𑀸𑀢𑀮𑀓𑁆𑀔𑀡𑁂 𑀘 𑀲𑀼𑀧𑀺𑀦𑁂 𑀘 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁂𑀦 ‘‘𑀇𑀤𑀁 𑀲𑀼𑀧𑀺𑀦𑀁 𑀲𑀼𑀪𑀁, 𑀇𑀤𑀁 𑀅𑀲𑀼𑀪’’𑀦𑁆𑀢𑀺 𑀲𑀼𑀧𑀺𑀦𑀦𑀺𑀧𑁆𑀨𑀢𑁆𑀢𑀺𑀓𑀣𑀦𑁂 𑀘 𑀲𑀩𑁆𑀩𑁂𑀲𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀧𑀸𑀤𑀮𑀓𑁆𑀔𑀡𑀓𑀣𑀦𑁂 𑀘 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀯𑀢𑁆𑀢𑀫𑀸𑀦𑀁 𑀫𑀦𑁆𑀢𑀧𑀤𑀁 𑀮𑀓𑁆𑀔𑀡𑀫𑀦𑁆𑀢𑀓𑁄𑀝𑁆𑀞𑀸𑀲𑀁 𑀲𑀩𑁆𑀩𑀁 𑀅𑀳𑀁 𑀢𑀤𑀸 𑀫𑀫 𑀢𑀸𑀧𑀲𑀓𑀸𑀮𑁂 𑀥𑀸𑀭𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁦𑁮. 𑀅𑀢𑁆𑀢𑀦𑁄 𑀩𑁆𑀬𑀸𑀓𑀭𑀡𑀁 𑀩𑀼𑀤𑁆𑀥𑀕𑀼𑀡𑀧𑀼𑀩𑁆𑀩𑀗𑁆𑀕𑀫𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀑𑀫𑀓𑀦𑁆𑀢𑀺 𑀅𑀦𑁄𑀫𑀁. 𑀫𑀁𑀲𑀘𑀓𑁆𑀔𑀼𑀤𑀺𑀩𑁆𑀩𑀘𑀓𑁆𑀔𑀼𑀲𑀫𑀦𑁆𑀢𑀘𑀓𑁆𑀔𑀼𑀥𑀫𑁆𑀫𑀘𑀓𑁆𑀔𑀼𑀩𑀼𑀤𑁆𑀥𑀘𑀓𑁆𑀔𑀽𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀲𑁆𑀲𑀦𑀁 𑀤𑀲𑁆𑀲𑀦𑀁 𑀦𑀸𑀫, 𑀅𑀦𑁄𑀫𑀁 𑀤𑀲𑁆𑀲𑀦𑀁 𑀬𑀲𑁆𑀲 𑀪𑀕𑀯𑀢𑁄 𑀲𑁄 𑀪𑀕𑀯𑀸 𑀅𑀦𑁄𑀫𑀤𑀲𑁆𑀲𑀻. 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀮𑁄𑀓𑀲𑁆𑀲 𑀚𑁂𑀝𑁆𑀞𑀲𑁂𑀝𑁆𑀞𑀢𑁆𑀢𑀸 𑀮𑁄𑀓𑀚𑁂𑀝𑁆𑀞𑁄 𑀉𑀲𑀪𑁄 𑀦𑀺𑀲𑀪𑁄 𑀆𑀲𑀪𑁄𑀢𑀺 𑀢𑀬𑁄 𑀕𑀯𑀚𑁂𑀝𑁆𑀞𑀓𑀸. 𑀢𑀢𑁆𑀣 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀦𑀺𑀲𑀪𑁄, 𑀕𑀯𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀆𑀲𑀪𑁄, 𑀦𑀭𑀸𑀦𑀁 𑀆𑀲𑀪𑁄 𑀦𑀭𑀸𑀲𑀪𑁄 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀥𑀫𑁆𑀫𑁄, 𑀲𑀫𑁆𑀩𑀼𑀤𑁆𑀥𑁄 𑀯𑀺𑀯𑁂𑀓𑀓𑀸𑀫𑁄 𑀏𑀓𑀻𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀳𑀺𑀫𑀸𑀮𑀬𑀧𑀩𑁆𑀩𑀢𑀁 𑀉𑀧𑀸𑀕𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁦𑁯. 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀦𑁆𑀢𑀺 𑀳𑀺𑀫𑀯𑀦𑁆𑀢𑀲𑀫𑀻𑀧𑀁 𑀑𑀕𑀸𑀳𑁂𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁧𑁦-𑁧. 𑀚𑀮𑀺𑀢𑀁 𑀚𑀮𑀫𑀸𑀦𑀁 𑀇𑀦𑁆𑀤𑀻𑀯𑀭𑀧𑀼𑀧𑁆𑀨𑀁 𑀇𑀯, 𑀳𑀼𑀢𑀸𑀲𑀦𑀁 𑀳𑁄𑀫𑀲𑁆𑀲 𑀆𑀲𑀦𑀁, 𑀆𑀤𑀺𑀢𑁆𑀢𑀁 𑀆𑀪𑀸𑀬𑀼𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀇𑀯, 𑀕𑀕𑀦𑁂 𑀆𑀓𑀸𑀲𑁂 𑀚𑁄𑀢𑀫𑀸𑀦𑀁 𑀯𑀺𑀚𑁆𑀚𑀼 𑀇𑀯, 𑀲𑀼𑀝𑁆𑀞𑀼 𑀨𑀼𑀮𑁆𑀮𑀁 𑀲𑀸𑀮𑀭𑀸𑀚𑀁 𑀇𑀯, 𑀦𑀺𑀲𑀺𑀦𑁆𑀦𑀁 𑀮𑁄𑀓𑀦𑀸𑀬𑀓𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧𑁩. 𑀤𑁂𑀯𑀸𑀦𑀁 𑀤𑁂𑀯𑁄 𑀤𑁂𑀯𑀤𑁂𑀯𑁄, 𑀢𑀁 𑀤𑁂𑀯𑀤𑁂𑀯𑀁 𑀤𑀺𑀲𑁆𑀯𑀸𑀦 𑀢𑀲𑁆𑀲 𑀮𑀓𑁆𑀔𑀡𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀜𑁆𑀚𑀸𑀦𑀦𑀓𑀸𑀭𑀡𑀁. ‘‘𑀩𑀼𑀤𑁆𑀥𑁄 𑀦𑀼 𑀔𑁄 𑀦 𑀯𑀸 𑀩𑀼𑀤𑁆𑀥𑁄’’𑀢𑀺 𑀉𑀧𑀥𑀸𑀭𑀬𑀺𑀁 𑀯𑀺𑀘𑀸𑀭𑁂𑀲𑀺𑀁. 𑀘𑀓𑁆𑀔𑀼𑀫𑀁 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢𑀁 𑀚𑀺𑀦𑀁 𑀓𑁂𑀦 𑀓𑀸𑀭𑀡𑁂𑀦 𑀧𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧𑁪. 𑀘𑀭𑀡𑀼𑀢𑁆𑀢𑀫𑁂 𑀉𑀢𑁆𑀢𑀫𑀧𑀸𑀤𑀢𑀮𑁂 𑀲𑀳𑀲𑁆𑀲𑀸𑀭𑀸𑀦𑀺 𑀘𑀓𑁆𑀓𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀢𑀲𑁆𑀲 𑀪𑀕𑀯𑀢𑁄 𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀢𑀣𑀸𑀕𑀢𑁂 𑀦𑀺𑀝𑁆𑀞𑀁 𑀕𑀘𑁆𑀙𑀺𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺, 𑀦𑀺𑀲𑁆𑀲𑀦𑁆𑀤𑁂𑀳𑁄 𑀆𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁧𑁮. 𑀲𑀬𑀫𑁆𑀪𑀽 𑀲𑀬𑀫𑁂𑀯 𑀪𑀽𑀢𑀸. 𑀅𑀫𑀺𑀢𑁄𑀤𑀬 𑀅𑀫𑀺𑀢𑀸𑀦𑀁 𑀅𑀧𑀭𑀺𑀫𑀸𑀡𑀸𑀦𑀁 𑀕𑀼𑀡𑀸𑀦𑀁 𑀉𑀤𑀬 𑀉𑀝𑁆𑀞𑀸𑀦𑀝𑁆𑀞𑀸𑀦, 𑀇𑀤𑀁 𑀧𑀤𑀤𑁆𑀯𑀬𑀁 𑀆𑀮𑀧𑀦𑀫𑁂𑀯. 𑀇𑀫𑀁 𑀮𑁄𑀓𑀁 𑀇𑀫𑀁 𑀲𑀢𑁆𑀢𑀮𑁄𑀓𑀁 𑀲𑀁 𑀲𑀼𑀝𑁆𑀞𑀼 𑀉𑀤𑁆𑀥𑀭𑀲𑀺 𑀲𑀁𑀲𑀸𑀭𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑀁 𑀧𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀢𑁂 𑀲𑀩𑁆𑀩𑁂 𑀲𑀢𑁆𑀢𑀸 𑀢𑀯 𑀤𑀲𑁆𑀲𑀦𑀁 𑀆𑀕𑀫𑁆𑀫 𑀆𑀕𑀦𑁆𑀢𑁆𑀯𑀸 𑀓𑀗𑁆𑀔𑀸𑀲𑁄𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀫𑀳𑁄𑀖𑀁 𑀢𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧𑁯. 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀢𑀸𑀧𑀲𑁄 𑀢𑀼𑀯𑀁 𑀲𑀢𑁆𑀣𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣, 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀢𑀼𑀯𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀢𑁆𑀣𑀸 𑀆𑀘𑀭𑀺𑀬𑁄 𑀉𑀢𑁆𑀢𑀫𑀝𑁆𑀞𑁂𑀦 𑀢𑁆𑀯𑀫𑁂𑀯 𑀓𑁂𑀢𑀼 𑀉𑀘𑁆𑀘𑁄, 𑀲𑀓𑀮𑀮𑁄𑀓𑁂 𑀧𑀓𑀸𑀲𑀦𑀝𑁆𑀞𑁂𑀦 𑀢𑁆𑀯𑀫𑁂𑀯 𑀥𑀚𑁄, 𑀮𑁄𑀓𑀢𑁆𑀢𑀬𑁂 𑀉𑀕𑁆𑀕𑀢𑀢𑁆𑀢𑀸 𑀢𑁆𑀯𑀫𑁂𑀯 𑀬𑀽𑀧𑁄 𑀉𑀲𑁆𑀲𑀸𑀧𑀺𑀢𑀣𑀫𑁆𑀪𑀲𑀤𑀺𑀲𑁄, 𑀧𑀸𑀡𑀺𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀢𑁆𑀯𑀫𑁂𑀯 𑀧𑀭𑀸𑀬𑀡𑁄 𑀉𑀢𑁆𑀢𑀫𑀕𑀫𑀦𑀻𑀬𑀝𑁆𑀞𑀸𑀦𑀁 𑀢𑁆𑀯𑀫𑁂𑀯 𑀧𑀢𑀺𑀝𑁆𑀞𑀸 𑀧𑀢𑀺𑀝𑁆𑀞𑀝𑁆𑀞𑀸𑀦𑀁 𑀮𑁄𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄 𑀢𑁆𑀯𑀫𑁂𑀯 𑀤𑀻𑀧𑁄 𑀢𑁂𑀮𑀧𑀤𑀻𑀧𑁄 𑀯𑀺𑀬, 𑀤𑁆𑀯𑀺𑀧𑀤𑀼𑀢𑁆𑀢𑀫𑁄 𑀤𑁆𑀯𑀺𑀧𑀤𑀸𑀦𑀁 𑀤𑁂𑀯𑀩𑁆𑀭𑀳𑁆𑀫𑀫𑀦𑀼𑀲𑁆𑀲𑀸𑀦𑀁 𑀉𑀢𑁆𑀢𑀫𑁄 𑀲𑁂𑀝𑁆𑀞𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁦. 𑀧𑀼𑀦 𑀪𑀕𑀯𑀦𑁆𑀢𑀁𑀬𑁂𑀯 𑀣𑁄𑀫𑁂𑀦𑁆𑀢𑁄 𑀲𑀓𑁆𑀓𑀸 𑀲𑀫𑀼𑀤𑁆𑀤𑁂 𑀉𑀤𑀓𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀆𑀴𑁆𑀳𑀓𑁂𑀦 𑀧𑀫𑁂𑀢𑀼𑀁 𑀫𑀺𑀦𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀢𑀯 𑀜𑀸𑀡𑀁 ‘‘𑀏𑀢𑁆𑀢𑀓𑀁 𑀧𑀫𑀸𑀡’’𑀦𑁆𑀢𑀺 𑀧𑀫𑁂𑀢𑀯𑁂 𑀫𑀺𑀦𑀺𑀢𑀼𑀁 𑀦 𑀢𑁆𑀯𑁂𑀯 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑁨𑁨𑁧. 𑀢𑀼𑀮𑀫𑀡𑁆𑀟𑀮𑁂 𑀢𑀼𑀮𑀧𑀜𑁆𑀚𑀭𑁂 𑀞𑀧𑁂𑀢𑁆𑀯𑀸 𑀧𑀣𑀯𑀺𑀁 𑀫𑁂𑀤𑀦𑀺𑀁 𑀥𑀸𑀭𑁂𑀢𑀼𑀁 𑀲𑀓𑁆𑀓𑀸, 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀢𑀯 𑀜𑀸𑀡𑀁 𑀥𑀸𑀭𑁂𑀢𑀼𑀁 𑀦 𑀢𑀼 𑀏𑀯 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁨. 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀆𑀓𑀸𑀲𑁄 𑀲𑀓𑀮𑀦𑁆𑀢𑀮𑀺𑀓𑁆𑀔𑀁 𑀭𑀚𑁆𑀚𑀼𑀬𑀸 𑀯𑀸 𑀅𑀗𑁆𑀕𑀼𑀮𑁂𑀦 𑀯𑀸 𑀫𑀺𑀦𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀢𑀯 𑀧𑀦 𑀜𑀸𑀡𑀁 𑀜𑀸𑀡𑀸𑀓𑀸𑀲𑀁 𑀦 𑀢𑀼 𑀏𑀯 𑀧𑀫𑁂𑀢𑀯𑁂 𑀫𑀺𑀦𑀺𑀢𑀼𑀁 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑁨𑁨𑁩. 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀦𑁆𑀢𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀲𑀸𑀕𑀭𑁂 𑀅𑀔𑀺𑀮𑀁 𑀉𑀤𑀓𑀜𑁆𑀘, 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀁 𑀅𑀔𑀺𑀮𑀁 𑀧𑀣𑀯𑀺𑀜𑁆𑀘 𑀚𑀳𑁂 𑀚𑀳𑁂𑀬𑁆𑀬 𑀅𑀢𑀺𑀓𑁆𑀓𑀫𑁂𑀬𑁆𑀬 𑀲𑀫𑀁 𑀓𑀭𑁂𑀬𑁆𑀬 𑀩𑀼𑀤𑁆𑀥𑀲𑁆𑀲 𑀜𑀸𑀡𑀁 𑀉𑀧𑀸𑀤𑀸𑀬 𑀕𑀳𑁂𑀢𑁆𑀯𑀸 𑀢𑀼𑀮𑁂𑀬𑁆𑀬 𑀲𑀫𑀁 𑀓𑀭𑁂𑀬𑁆𑀬. 𑀉𑀧𑀫𑀸𑀢𑁄 𑀉𑀧𑀫𑀸𑀯𑀲𑁂𑀦 𑀦 𑀬𑀼𑀚𑁆𑀚𑀭𑁂 𑀦 𑀬𑁄𑀚𑁂𑀬𑁆𑀬𑀼𑀁. 𑀜𑀸𑀡𑀫𑁂𑀯 𑀅𑀥𑀺𑀓𑀦𑁆𑀢𑀺 𑀅𑀢𑁆𑀣𑁄.

𑁨𑁨𑁪. 𑀘𑀓𑁆𑀔𑀼𑀫 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢, 𑀆𑀮𑀧𑀦𑀫𑁂𑀢𑀁. 𑀲𑀳 𑀤𑁂𑀯𑁂𑀳𑀺 𑀧𑀯𑀢𑁆𑀢𑀲𑁆𑀲 𑀮𑁄𑀓𑀲𑁆𑀲, 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀲𑀤𑁂𑀯𑀓𑁂 𑀮𑁄𑀓𑀲𑁆𑀫𑀺𑀁 𑀅𑀦𑁆𑀢𑀭𑁂 𑀬𑁂𑀲𑀁 𑀬𑀢𑁆𑀢𑀓𑀸𑀦𑀁 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀏𑀢𑁂 𑀢𑀢𑁆𑀢𑀓𑀸 𑀲𑀘𑀺𑀢𑁆𑀢𑀓𑀸 𑀲𑀢𑁆𑀢𑀸 𑀢𑀯 𑀜𑀸𑀡𑀫𑁆𑀳𑀺 𑀅𑀦𑁆𑀢𑁄𑀚𑀸𑀮𑀕𑀢𑀸 𑀜𑀸𑀡𑀚𑀸𑀮𑀲𑁆𑀫𑀺𑀁 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀜𑀸𑀡𑀚𑀸𑀮𑁂𑀦 𑀲𑀩𑁆𑀩𑀲𑀢𑁆𑀢𑁂 𑀧𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑁨𑁨𑁫. 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀓, 𑀢𑁆𑀯𑀁 𑀬𑁂𑀦 𑀜𑀸𑀡𑁂𑀦 𑀘𑀢𑀼𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀓𑀮𑀁 𑀉𑀢𑁆𑀢𑀫𑀁 𑀩𑁄𑀥𑀺𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄 𑀅𑀲𑀺 𑀪𑀯𑀲𑀺, 𑀢𑁂𑀦 𑀜𑀸𑀡𑁂𑀦 𑀧𑀭𑀢𑀺𑀢𑁆𑀣𑀺𑀬𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀲𑀻 𑀅𑀪𑀺𑀪𑀯𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁬. 𑀢𑁂𑀦 𑀢𑀸𑀧𑀲𑁂𑀦 𑀣𑁄𑀫𑀺𑀢𑀸𑀓𑀸𑀭𑀁 𑀧𑀓𑀸𑀲𑁂𑀦𑁆𑀢𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀣𑁂𑀭𑀸 𑀇𑀫𑀸 𑀕𑀸𑀣𑀸 𑀣𑀯𑀺𑀢𑁆𑀯𑀸𑀦𑀸𑀢𑀺 𑀆𑀳𑀁𑀲𑀼. 𑀢𑀢𑁆𑀣 𑀇𑀫𑀸 𑀕𑀸𑀣𑀸𑀢𑀺 𑀏𑀢𑁆𑀢𑀓𑀸𑀳𑀺 𑀕𑀸𑀣𑀸𑀳𑀺 𑀣𑀯𑀺𑀢𑁆𑀯𑀸𑀦 𑀣𑁄𑀫𑀦𑀁 𑀓𑀢𑁆𑀯𑀸𑀦 𑀦𑀸𑀫𑁂𑀦 𑀲𑀼𑀭𑀼𑀘𑀺 𑀦𑀸𑀫 𑀢𑀸𑀧𑀲𑁄 𑀲𑁂𑀲𑀝𑁆𑀞𑀓𑀣𑀸𑀲𑀼 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁮𑁯-𑁧𑁯𑁦; 𑀥. 𑀧. 𑀅𑀝𑁆𑀞. 𑁧.𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼) 𑀧𑀦 ‘‘𑀲𑀭𑀤𑀫𑀸𑀡𑀯𑁄’’𑀢𑀺 𑀆𑀕𑀢𑁄. 𑀲𑁄 𑀅𑀝𑁆𑀞𑀓𑀣𑀸𑀦𑀬𑀢𑁄 𑀧𑀸𑀞𑁄𑀬𑁂𑀯 𑀧𑀫𑀸𑀡𑀁, 𑀅𑀣 𑀯𑀸 𑀲𑀼𑀦𑁆𑀤𑀭𑀸 𑀭𑀼𑀘𑀺 𑀅𑀚𑁆𑀛𑀸𑀲𑀬𑁄 𑀦𑀺𑀩𑁆𑀩𑀸𑀦𑀸𑀮𑀬𑁄 𑀅𑀲𑁆𑀲𑀸𑀢𑀺 𑀲𑀼𑀭𑀼𑀘𑀺. 𑀲𑀭𑀢𑀺 𑀕𑀘𑁆𑀙𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑀸𑀬 𑀧𑀯𑀢𑁆𑀢𑀢𑀻𑀢𑀺 𑀲𑀭𑀤𑁄, 𑀇𑀢𑀺 𑀤𑁆𑀯𑀬𑀫𑁆𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀲𑁄 𑀲𑀼𑀭𑀼𑀘𑀺𑀢𑀸𑀧𑀲𑁄 𑀅𑀚𑀺𑀦𑀘𑀫𑁆𑀫𑀁 𑀧𑀢𑁆𑀣𑀭𑀺𑀢𑁆𑀯𑀸𑀦 𑀧𑀣𑀯𑀺𑀬𑀁 𑀦𑀺𑀲𑀻𑀤𑀺, 𑀅𑀘𑁆𑀘𑀸𑀲𑀦𑁆𑀦𑀸𑀤𑀬𑁄 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀲𑀭𑀤𑁄 𑀦𑀺𑀲𑀻𑀤𑀻𑀢𑀺 𑀅𑀢𑁆𑀣𑁄.

𑁨𑁨𑁭. 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀢𑀸𑀧𑀲𑁄 𑀢𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑁂𑀯 𑀣𑁄𑀫𑁂𑀦𑁆𑀢𑁄 𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀕𑀺𑀭𑀺𑀭𑀸𑀚𑀸 𑀫𑁂𑀭𑀼𑀧𑀩𑁆𑀩𑀢𑀭𑀸𑀚𑀸, 𑀫𑀳𑀡𑁆𑀡𑀯𑁂 𑀲𑀸𑀕𑀭𑁂 𑀅𑀚𑁆𑀛𑁄𑀕𑀸𑀴𑁆𑀳𑁄 𑀅𑀥𑀺𑀑𑀕𑀸𑀴𑁆𑀳𑁄 𑀧𑀯𑀺𑀝𑁆𑀞𑁄, 𑀢𑀸𑀯𑀤𑁂𑀯 𑀢𑀢𑁆𑀢𑀓𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀅𑀘𑁆𑀘𑀼𑀕𑁆𑀕𑀢𑁄 𑀅𑀢𑀺𑀉𑀕𑁆𑀕𑀢𑁄 𑀇𑀤𑀸𑀦𑀺 𑀧𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁮. 𑀢𑀸𑀯 𑀅𑀘𑁆𑀘𑀼𑀕𑁆𑀕𑀢𑁄 𑀢𑀣𑀸 𑀅𑀢𑀺𑀉𑀕𑁆𑀕𑀢𑁄 𑀦𑁂𑀭𑀼, 𑀲𑁄 𑀫𑀳𑀸𑀦𑁂𑀭𑀼 𑀆𑀬𑀢𑁄 𑀉𑀘𑁆𑀘𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀏𑀯𑀁 𑀫𑀳𑀦𑁆𑀢𑁄 𑀦𑁂𑀭𑀼𑀭𑀸𑀚𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀺𑀬𑁄 𑀲𑀗𑁆𑀔𑀸𑀡𑀼𑀪𑁂𑀤𑁂𑀦 𑀘𑀼𑀡𑁆𑀡𑀺𑀢𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁄 𑀅𑀲𑀺.

𑁨𑁨𑁯. 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀢𑀯 𑀜𑀸𑀡𑀁 𑀮𑀓𑁆𑀔𑁂 𑀞𑀧𑀺𑀬𑀫𑀸𑀦𑀫𑁆𑀳𑀺 𑀜𑀸𑀡𑁂 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸 𑀏𑀓𑁂𑀓𑀁 𑀩𑀺𑀦𑁆𑀤𑀼𑀁 𑀓𑀢𑁆𑀯𑀸 𑀞𑀧𑀺𑀢𑁂 𑀢𑀤𑁂𑀯 𑀫𑀳𑀸𑀦𑁂𑀭𑀼𑀲𑁆𑀲 𑀘𑀼𑀡𑁆𑀡𑀁 𑀔𑀬𑀁 𑀕𑀘𑁆𑀙𑁂𑀬𑁆𑀬, 𑀢𑀯 𑀜𑀸𑀡𑀁 𑀧𑀫𑁂𑀢𑀯𑁂 𑀧𑀫𑀸𑀡𑀁 𑀓𑀸𑀢𑀼𑀁 𑀏𑀯 𑀦 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁦. 𑀲𑀼𑀔𑀼𑀫𑀘𑁆𑀙𑀺𑀓𑁂𑀦 𑀲𑀼𑀔𑀼𑀫𑀘𑁆𑀙𑀺𑀤𑁆𑀤𑁂𑀦 𑀚𑀸𑀮𑁂𑀦 𑀬𑁄 𑀲𑀓𑀮𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀧𑀭𑀺𑀓𑁆𑀔𑀺𑀧𑁂 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀁 𑀓𑀭𑁂𑀬𑁆𑀬, 𑀏𑀯𑀁 𑀧𑀭𑀺𑀓𑁆𑀔𑀺𑀢𑁂 𑀬𑁂 𑀓𑁂𑀘𑀺 𑀧𑀸𑀡𑀸 𑀉𑀤𑀓𑁂 𑀚𑀸𑀢𑀸 𑀲𑀩𑁆𑀩𑁂 𑀢𑁂 𑀅𑀦𑁆𑀢𑁄𑀚𑀸𑀮𑀕𑀢𑀸 𑀲𑀺𑀬𑀼𑀁 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄.

𑁨𑁩𑁧. 𑀢𑀫𑀼𑀧𑀫𑁂𑀬𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 𑀢𑀣𑁂𑀯 𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀉𑀤𑀚𑀸 𑀧𑀸𑀡𑀸 𑀅𑀦𑁆𑀢𑁄𑀚𑀸𑀮𑀕𑀢𑀸 𑀳𑁄𑀦𑁆𑀢𑀺, 𑀢𑀣𑁂𑀯 𑀫𑀳𑀸𑀯𑀻𑀭 𑀫𑀳𑀸𑀩𑁄𑀥𑀺𑀅𑀥𑀺𑀕𑀫𑀸𑀬 𑀯𑀻𑀭𑀺𑀬𑀓𑀭. 𑀬𑁂 𑀓𑁂𑀘𑀺 𑀧𑀼𑀣𑀼 𑀅𑀦𑁂𑀓𑀸 𑀢𑀺𑀢𑁆𑀣𑀺𑀬𑀸 𑀫𑀺𑀘𑁆𑀙𑀸 𑀢𑀺𑀢𑁆𑀣𑀓𑀭𑀸 𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑀸 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀕𑀳𑀦𑀁 𑀧𑀯𑀺𑀝𑁆𑀞𑀸 𑀧𑀭𑀸𑀫𑀸𑀲𑁂𑀦 𑀲𑀪𑀸𑀯𑀢𑁄 𑀧𑀭𑀢𑁄 𑀆𑀫𑀲𑀦𑀮𑀓𑁆𑀔𑀡𑀸𑀬 𑀤𑀺𑀝𑁆𑀞𑀺𑀬𑀸 𑀫𑁄𑀳𑀺𑀢𑀸 𑀧𑀺𑀳𑀺𑀢𑀸 𑀲𑀦𑁆𑀢𑀺.

𑁨𑁩𑁨. 𑀢𑀯 𑀲𑀼𑀤𑁆𑀥𑁂𑀦 𑀦𑀺𑀓𑁆𑀓𑀺𑀮𑁂𑀲𑁂𑀦 𑀜𑀸𑀡𑁂𑀦 𑀅𑀦𑀸𑀯𑀭𑀡𑀤𑀲𑁆𑀲𑀺𑀦𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀆𑀯𑀭𑀡𑀭𑀳𑀺𑀢𑀤𑀲𑁆𑀲𑀦𑀲𑀻𑀮𑁂𑀦 𑀏𑀢𑁂 𑀲𑀩𑁆𑀩𑁂 𑀢𑀺𑀢𑁆𑀣𑀺𑀬𑀸 𑀅𑀦𑁆𑀢𑁄𑀚𑀸𑀮𑀕𑀢𑀸 𑀜𑀸𑀡𑀚𑀸𑀮𑀲𑁆𑀲𑀦𑁆𑀢𑁄 𑀧𑀯𑁂𑀲𑀺𑀢𑀸 𑀯𑀸 𑀢𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀡𑀁 𑀢𑁂 𑀦𑀸𑀢𑀺𑀯𑀢𑁆𑀢𑀭𑁂𑀢𑀺 𑀢𑀯 𑀜𑀸𑀡𑀁 𑀢𑁂 𑀢𑀺𑀢𑁆𑀣𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁩𑁩. 𑀏𑀯𑀁 𑀯𑀼𑀢𑁆𑀢𑀣𑁄𑀫𑀦𑀸𑀯𑀲𑀸𑀦𑁂 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀩𑁆𑀬𑀸𑀓𑀭𑀡𑀸𑀭𑀩𑁆𑀪𑀁 𑀤𑀲𑁆𑀲𑁂𑀢𑀼𑀁 𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀺𑀁 𑀲𑀫𑀬𑁂 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀣𑁄𑀫𑁂𑀲𑀺, 𑀢𑀲𑁆𑀫𑀺𑀁 𑀣𑁄𑀫𑀦𑀸𑀬 𑀧𑀭𑀺𑀬𑁄𑀲𑀸𑀦𑀓𑀸𑀮𑁂 𑀲𑀗𑁆𑀔𑁆𑀬𑀸𑀢𑀺𑀓𑁆𑀓𑀦𑁆𑀢𑀧𑀭𑀺𑀯𑀸𑀭𑀢𑀸𑀬 𑀫𑀳𑀸𑀬𑀲𑁄 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸 𑀓𑀺𑀮𑁂𑀲𑀫𑀸𑀭𑀸𑀤𑀻𑀦𑀁 𑀚𑀺𑀢𑀢𑁆𑀢𑀸 𑀚𑀺𑀦𑁄. 𑀲𑀫𑀸𑀥𑀺𑀫𑁆𑀳𑀸 𑀅𑀧𑁆𑀧𑀺𑀢𑀲𑀫𑀸𑀥𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁪-𑁫. 𑀢𑀲𑁆𑀲 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀫𑀼𑀦𑀺𑀦𑁄 𑀫𑁄𑀦𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀦𑀺𑀲𑀪𑁄 𑀦𑀸𑀫 𑀲𑀸𑀯𑀓𑁄 𑀲𑀦𑁆𑀢𑀘𑀺𑀢𑁆𑀢𑁂𑀳𑀺 𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑀫𑀸𑀦𑀲𑁂𑀳𑀺 𑀢𑀸𑀤𑀻𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀲𑀪𑀸𑀯𑀢𑁆𑀢𑀸, 𑀢𑀸𑀤𑀺𑀪𑀺 𑀔𑀻𑀡𑀸𑀲𑀯𑁂𑀳𑀺 𑀲𑀼𑀤𑁆𑀥𑁂𑀳𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀸𑀤𑀺𑀬𑀼𑀢𑁆𑀢𑁂𑀳𑀺 𑀙𑀴𑀪𑀺𑀜𑁆𑀜𑁂𑀳𑀺 𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀲𑀪𑀸𑀯𑁂𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀩𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀁, 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁 𑀉𑀧𑁂𑀲𑀺, 𑀢𑀸𑀯𑀤𑁂𑀯 𑀲𑀫𑀻𑀧𑀁 𑀅𑀕𑀫𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁬. 𑀢𑁂 𑀢𑀣𑀸 𑀆𑀕𑀢𑀸 𑀲𑀫𑀸𑀦𑀸 𑀢𑀢𑁆𑀣 𑀪𑀕𑀯𑀢𑁄 𑀲𑀫𑀻𑀧𑁂. 𑀅𑀦𑁆𑀢𑀮𑀺𑀓𑁆𑀔𑁂 𑀆𑀓𑀸𑀲𑁂 𑀞𑀺𑀢𑀸 𑀪𑀕𑀯𑀦𑁆𑀢𑀁 𑀧𑀤𑀓𑁆𑀔𑀺𑀡𑀁 𑀅𑀓𑀁𑀲𑀼. 𑀢𑁂 𑀲𑀩𑁆𑀩𑁂 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀆𑀓𑀸𑀲𑀢𑁄 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀑𑀢𑀭𑀼𑀁 𑀑𑀭𑁄𑀳𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁭. 𑀧𑀼𑀦 𑀩𑁆𑀬𑀸𑀓𑀭𑀡𑀤𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀓𑀸𑀭𑀡𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀢𑀁 𑀧𑀸𑀢𑀼𑀓𑀭𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁪𑁧. 𑀬𑁄 𑀫𑀁 𑀧𑀼𑀧𑁆𑀨𑁂𑀦𑀸𑀢𑀺 𑀬𑁄 𑀢𑀸𑀧𑀲𑁄 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀅𑀦𑁂𑀓𑀧𑀼𑀧𑁆𑀨𑁂𑀦 𑀫𑀁 𑀧𑀽𑀚𑁂𑀲𑀺, 𑀜𑀸𑀡𑀜𑁆𑀘 𑀫𑁂 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀣𑀯𑀺 𑀣𑁄𑀫𑁂𑀲𑀺, 𑀢𑀫𑀳𑀦𑁆𑀢𑀺 𑀢𑀁 𑀢𑀸𑀧𑀲𑀁 𑀅𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀺, 𑀫𑀫 𑀪𑀸𑀲𑀢𑁄 𑀪𑀸𑀲𑀦𑁆𑀢𑀲𑁆𑀲 𑀯𑀘𑀦𑀁 𑀲𑀼𑀡𑁄𑀣 𑀲𑀯𑀦𑀯𑀺𑀲𑀬𑀁 𑀓𑀭𑁄𑀣 𑀫𑀦𑀲𑀺 𑀓𑀭𑁄𑀣.

𑁨𑁫𑁦. 𑀧𑀘𑁆𑀙𑀺𑀫𑁂 𑀪𑀯𑀲𑀫𑁆𑀧𑀢𑁆𑀢𑁂𑀢𑀺 𑀩𑁆𑀬𑀸𑀓𑀭𑀡𑀁 𑀤𑀤𑀫𑀸𑀦𑁄 𑀪𑀕𑀯𑀸 𑀆𑀳. 𑀢𑀢𑁆𑀣 𑀧𑀘𑁆𑀙𑀺𑀫𑁂 𑀧𑀭𑀺𑀬𑁄𑀲𑀸𑀦𑀪𑀽𑀢𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂 𑀲𑀢𑀺. 𑀫𑀦𑀼𑀲𑁆𑀲𑀢𑁆𑀢𑀁 𑀫𑀦𑀼𑀲𑁆𑀲𑀚𑀸𑀢𑀺𑀁 𑀕𑀫𑀺𑀲𑁆𑀲𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀲𑀸𑀭𑀥𑀦𑀲𑀸𑀭𑀯𑀬𑀲𑀸𑀭𑀓𑀼𑀮𑀲𑀸𑀭𑀪𑁄𑀕𑀲𑀸𑀭𑀧𑀼𑀜𑁆𑀜𑀲𑀸𑀭𑀸𑀤𑀻𑀳𑀺 𑀲𑀸𑀭𑁂𑀳𑀺 𑀲𑀸𑀭𑀯𑀦𑁆𑀢𑀢𑀸𑀬 𑀲𑀸𑀭𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀓𑀼𑀘𑁆𑀙𑀺𑀦𑀸 𑀥𑀸𑀭𑀬𑀺𑀲𑁆𑀲𑀢𑀺.

𑁨𑁫𑁩. 𑀩𑁆𑀬𑀸𑀓𑀭𑀡𑀫𑀽𑀮𑀫𑀸𑀭𑀪𑀺 𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂𑀢𑀺. 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀻 𑀧𑀽𑀭𑀺𑀢𑀸, 𑀢𑀣𑀸𑀧𑀺 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀅𑀦𑁆𑀢𑀭𑀓𑀧𑁆𑀧𑀸𑀦𑀺 𑀉𑀧𑀸𑀤𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁫𑁪. ‘‘𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀅𑀕𑁆𑀕𑀲𑀸𑀯𑀓𑁄’’𑀢𑀺 𑀩𑁆𑀬𑀸𑀓𑀭𑀡𑀫𑀤𑀸𑀲𑀺, 𑀩𑁆𑀬𑀸𑀓𑀭𑀡𑀁 𑀤𑀢𑁆𑀯𑀸 𑀢𑀁 𑀣𑁄𑀫𑁂𑀦𑁆𑀢𑁄 𑀲𑁄 𑀪𑀕𑀯𑀸 𑀅𑀬𑀁 𑀪𑀸𑀕𑀻𑀭𑀣𑀻𑀢𑀺𑀆𑀤𑀺𑀫𑀸𑀳. 𑀕𑀗𑁆𑀕𑀸, 𑀬𑀫𑀼𑀦𑀸, 𑀲𑀭𑀪𑀽, 𑀫𑀳𑀻, 𑀅𑀘𑀺𑀭𑀯𑀢𑀻𑀢𑀺 𑀇𑀫𑀸𑀲𑀁 𑀧𑀜𑁆𑀘𑀦𑁆𑀦𑀁 𑀕𑀗𑁆𑀕𑀸𑀦𑀁 𑀅𑀦𑁆𑀢𑀭𑁂 𑀅𑀬𑀁 𑀪𑀸𑀕𑀻𑀭𑀣𑀻 𑀦𑀸𑀫 𑀧𑀞𑀫𑀫𑀳𑀸𑀕𑀗𑁆𑀕𑀸 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸 𑀳𑀺𑀫𑀯𑀦𑁆𑀢𑀢𑁄 𑀆𑀕𑀢𑀸 𑀅𑀦𑁄𑀢𑀢𑁆𑀢𑀤𑀳𑀢𑁄 𑀧𑀪𑀯𑀸, 𑀫𑀳𑁄𑀤𑀥𑀺𑀁 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑀁 𑀅𑀧𑁆𑀧𑀬𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀫𑀳𑀸𑀲𑀫𑀼𑀤𑁆𑀤𑀁 𑀫𑀳𑀸𑀲𑀸𑀕𑀭𑀁 𑀅𑀧𑁆𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀬𑀣𑀸, 𑀢𑀣𑀸 𑀏𑀯 𑀅𑀬𑀁 𑀲𑀸𑀭𑀺𑀧𑀼𑀢𑁆𑀢𑁄 𑀲𑀓𑁂 𑀢𑀻𑀲𑀼 𑀯𑀺𑀲𑀸𑀭𑀤𑁄 𑀅𑀢𑁆𑀢𑀦𑁄 𑀓𑀼𑀮𑁂 𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑀻𑀲𑀼 𑀯𑁂𑀤𑁂𑀲𑀼 𑀯𑀺𑀲𑀸𑀭𑀤𑁄 𑀅𑀧𑀓𑁆𑀔𑀮𑀺𑀢𑀜𑀸𑀡𑁄 𑀧𑀢𑁆𑀣𑀝𑀜𑀸𑀡𑁄. 𑀧𑀜𑁆𑀜𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀯𑀓𑀜𑀸𑀡𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀕𑀦𑁆𑀢𑁆𑀯𑀸, 𑀧𑀸𑀡𑀺𑀦𑁂 𑀲𑀩𑁆𑀩𑀲𑀢𑁆𑀢𑁂 𑀢𑀧𑁆𑀧𑀬𑀺𑀲𑁆𑀲𑀢𑀺 𑀲𑀦𑁆𑀢𑀧𑁆𑀧𑁂𑀲𑁆𑀲𑀢𑀺 𑀲𑀼𑀳𑀺𑀢𑁆𑀢𑀪𑀸𑀯𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁨𑁫𑁭. 𑀳𑀺𑀫𑀯𑀦𑁆𑀢𑀫𑀼𑀧𑀸𑀤𑀸𑀬𑀸𑀢𑀺 𑀳𑀺𑀫𑀸𑀮𑀬𑀧𑀩𑁆𑀩𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀫𑀳𑁄𑀤𑀥𑀺𑀁 𑀫𑀳𑀸𑀲𑀫𑀼𑀤𑁆𑀤𑀁 𑀉𑀤𑀓𑀪𑀸𑀭𑀁 𑀲𑀸𑀕𑀭𑀁 𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀏𑀢𑁆𑀣𑀦𑁆𑀢𑀭𑁂 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀲𑀸𑀕𑀭𑀸𑀦𑀁 𑀫𑀚𑁆𑀛𑁂 𑀬𑀁 𑀧𑀼𑀮𑀺𑀦𑀁 𑀬𑀢𑁆𑀢𑀓𑀸 𑀯𑀸𑀮𑀼𑀓𑀭𑀸𑀲𑀺 𑀅𑀢𑁆𑀣𑀺, 𑀕𑀡𑀦𑀸𑀢𑁄 𑀕𑀡𑀦𑀯𑀲𑁂𑀦 𑀅𑀲𑀗𑁆𑀔𑀺𑀬𑀁 𑀲𑀗𑁆𑀔𑁆𑀬𑀸𑀢𑀺𑀓𑁆𑀓𑀦𑁆𑀢𑀁.

𑁨𑁫𑁮. 𑀢𑀫𑁆𑀧𑀺 𑀲𑀓𑁆𑀓𑀸 𑀅𑀲𑁂𑀲𑁂𑀦𑀸𑀢𑀺 𑀢𑀁 𑀧𑀼𑀮𑀺𑀦𑀫𑁆𑀧𑀺 𑀦𑀺𑀲𑁂𑀲𑁂𑀦 𑀲𑀗𑁆𑀔𑀸𑀢𑀼𑀁 𑀲𑀓𑁆𑀓𑀸 𑀲𑀓𑁆𑀓𑀼𑀡𑁂𑀬𑁆𑀬 𑀪𑀯𑁂𑀬𑁆𑀬, 𑀲𑀸 𑀕𑀡𑀦𑀸 𑀬𑀣𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀜𑁆𑀜𑀸𑀬 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀦 𑀢𑁆𑀯𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁨𑁫𑁯. 𑀮𑀓𑁆𑀔𑁂…𑀧𑁂… 𑀪𑀯𑀺𑀲𑁆𑀲𑀢𑀻𑀢𑀺 𑀮𑀓𑁆𑀔𑁂 𑀜𑀸𑀡𑀮𑀓𑁆𑀔𑁂 𑀜𑀸𑀡𑀲𑁆𑀲 𑀏𑀓𑀲𑁆𑀫𑀺𑀁 𑀓𑀮𑁂 𑀞𑀧𑀺𑀬𑀫𑀸𑀦𑀫𑁆𑀳𑀺 𑀞𑀧𑀺𑀢𑁂 𑀲𑀢𑀺 𑀕𑀗𑁆𑀕𑀸𑀬 𑀯𑀸𑀮𑀼𑀓𑀸 𑀔𑀻𑀬𑁂 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁬𑁦. 𑀫𑀳𑀸𑀲𑀫𑀼𑀤𑁆𑀤𑁂𑀢𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀘𑀢𑀼𑀫𑀳𑀸𑀲𑀸𑀕𑀭𑁂 𑀊𑀫𑀺𑀬𑁄 𑀕𑀸𑀯𑀼𑀢𑀸𑀤𑀺𑀪𑁂𑀤𑀸 𑀢𑀭𑀗𑁆𑀕𑀭𑀸𑀲𑀬𑁄 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸 𑀲𑀗𑁆𑀔𑁆𑀬𑀸𑀯𑀺𑀭𑀳𑀺𑀢𑀸 𑀬𑀣𑀸 𑀳𑁄𑀦𑁆𑀢𑀺, 𑀢𑀣𑁂𑀯 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀜𑁆𑀜𑀸𑀬 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀦 𑀳𑁂𑀲𑁆𑀲𑀢𑀺 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁬𑁧. 𑀲𑁄 𑀏𑀯𑀁 𑀧𑀜𑁆𑀜𑀯𑀸 𑀲𑀸𑀭𑀺𑀧𑀼𑀢𑁆𑀢𑁄 𑀕𑁄𑀢𑀫𑀕𑁄𑀢𑁆𑀢𑀢𑁆𑀢𑀸 𑀕𑁄𑀢𑀫𑀁 𑀲𑀓𑁆𑀬𑀓𑀼𑀮𑁂 𑀚𑁂𑀝𑁆𑀞𑀓𑀁 𑀲𑀓𑁆𑀬𑀧𑀼𑀗𑁆𑀕𑀯𑀁 𑀲𑀫𑁆𑀩𑀼𑀤𑁆𑀥𑀁 𑀆𑀭𑀸𑀥𑀬𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀲𑀻𑀮𑀸𑀘𑀸𑀭𑀸𑀤𑀻𑀳𑀺 𑀘𑀺𑀢𑁆𑀢𑀸𑀭𑀸𑀥𑀦𑀁 𑀓𑀢𑁆𑀯𑀸 𑀧𑀜𑁆𑀜𑀸𑀬 𑀲𑀸𑀯𑀓𑀜𑀸𑀡𑀲𑁆𑀲 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑁄 𑀳𑁂𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁬𑁨. 𑀲𑁄 𑀏𑀯𑀁 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀢𑁄 𑀲𑀓𑁆𑀬𑀧𑀼𑀢𑁆𑀢𑁂𑀦 𑀪𑀕𑀯𑀢𑀸 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀲𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑀁 𑀧𑀸𑀓𑀝𑀁 𑀓𑀢𑀁 𑀥𑀫𑁆𑀫𑀘𑀓𑁆𑀓𑀁 𑀲𑀤𑁆𑀥𑀫𑁆𑀫𑀁 𑀅𑀦𑀼𑀯𑀢𑁆𑀢𑁂𑀲𑁆𑀲𑀢𑀺 𑀅𑀯𑀺𑀦𑀲𑁆𑀲𑀫𑀸𑀦𑀁 𑀥𑀸𑀭𑁂𑀲𑁆𑀲𑀢𑀺. 𑀥𑀫𑁆𑀫𑀯𑀼𑀝𑁆𑀞𑀺𑀬𑁄 𑀥𑀫𑁆𑀫𑀤𑁂𑀲𑀦𑀸𑀲𑀗𑁆𑀔𑀸𑀢𑀸 𑀯𑀼𑀝𑁆𑀞𑀺𑀬𑁄 𑀯𑀲𑁆𑀲𑁂𑀦𑁆𑀢𑁄 𑀤𑁂𑀲𑁂𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑁄 𑀯𑀺𑀯𑀭𑀦𑁆𑀢𑁄 𑀯𑀺𑀪𑀚𑀦𑁆𑀢𑁄 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁨𑁬𑁩. 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄 𑀪𑀕𑀯𑀸 𑀏𑀢𑀁 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬 𑀯𑀺𑀲𑁂𑀲𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀭𑀺𑀬𑀧𑀼𑀕𑁆𑀕𑀮𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀕𑁆𑀕𑀝𑁆𑀞𑀸𑀦𑁂 𑀲𑀓𑀮𑀧𑀜𑁆𑀜𑀸𑀤𑀺𑀕𑀼𑀡𑀕𑀡𑀸𑀪𑀺𑀭𑀫𑁂 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁬𑁪. 𑀏𑀯𑀁 𑀲𑁄 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀅𑀳𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑁄𑀢𑀺 𑀯𑀺𑀫𑁆𑀳𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀢𑁆𑀣𑀼𑀦𑁄 𑀕𑀭𑀼𑀦𑁄 𑀲𑀼𑀓𑀢𑀁 𑀲𑀼𑀝𑁆𑀞𑀼 𑀓𑀢𑀁 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀁 𑀅𑀳𑁄 𑀯𑀺𑀫𑁆𑀳𑀬𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀪𑀕𑀯𑀢𑁄 𑀅𑀳𑀁 𑀓𑀸𑀭𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀲𑀓𑀮𑀕𑀼𑀡𑀕𑀡𑁂 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄 𑀧𑀭𑀫𑀁 𑀓𑁄𑀝𑀺𑀁 𑀲𑀫𑁆𑀧𑀢𑁆𑀢𑁄, 𑀲𑁄 𑀪𑀕𑀯𑀸 𑀅𑀳𑁄 𑀯𑀺𑀫𑁆𑀳𑀬𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁬𑁫. 𑀅𑀧𑀭𑀺𑀫𑁂𑀬𑁆𑀬𑁂𑀢𑀺 𑀲𑀗𑁆𑀔𑁆𑀬𑀸𑀢𑀺𑀓𑁆𑀓𑀦𑁆𑀢𑀓𑀸𑀮𑀲𑁆𑀫𑀺𑀁 𑀓𑀢𑀁 𑀓𑀼𑀲𑀮𑀓𑀫𑁆𑀫𑀁, 𑀫𑁂 𑀫𑀬𑁆𑀳𑀁 𑀇𑀥 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂 𑀨𑀮𑀁 𑀯𑀺𑀧𑀸𑀓𑀁 𑀤𑀲𑁆𑀲𑁂𑀲𑀺. 𑀲𑀼𑀫𑀼𑀢𑁆𑀢𑁄 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑁄 𑀙𑁂𑀓𑁂𑀦 𑀥𑀦𑀼𑀕𑁆𑀕𑀳𑁂𑀦 𑀔𑀺𑀢𑁆𑀢𑁄 𑀲𑀭𑀯𑁂𑀕𑁄 𑀇𑀯 𑀅𑀳𑀁 𑀢𑁂𑀦 𑀧𑀼𑀜𑁆𑀜𑀨𑀮𑁂𑀦 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀛𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁬𑁬. 𑀅𑀢𑁆𑀢𑀦𑁄 𑀏𑀯 𑀯𑀻𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑁄 𑀅𑀲𑀗𑁆𑀔𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀗𑁆𑀔𑀢𑀦𑁆𑀢𑀺 𑀦 𑀲𑀗𑁆𑀔𑀢𑀁, 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀫𑁆𑀫 𑀦 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀪𑀸𑀯𑁂𑀦 𑀅𑀘𑀮𑀁 𑀓𑀢𑀲𑀫𑁆𑀪𑀸𑀭𑀸𑀦𑀁 𑀧𑀢𑀺𑀝𑁆𑀞𑀝𑁆𑀞𑁂𑀦 𑀧𑀤𑀁 𑀕𑀯𑁂𑀲𑀦𑁆𑀢𑁄 𑀧𑀭𑀺𑀬𑁂𑀲𑀦𑁆𑀢𑁄 𑀲𑀩𑁆𑀩𑁂 𑀢𑀺𑀢𑁆𑀣𑀺𑀬𑁂 𑀲𑀓𑀮𑁂 𑀢𑀺𑀢𑁆𑀣𑀓𑀭𑁂 𑀤𑀺𑀝𑁆𑀞𑀼𑀧𑁆𑀧𑀸𑀤𑀓𑁂 𑀧𑀼𑀕𑁆𑀕𑀮𑁂 𑀯𑀺𑀘𑀺𑀦𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀏𑀲𑀸𑀳𑀁 𑀏𑀲𑁄 𑀅𑀳𑀁 𑀪𑀯𑁂 𑀓𑀸𑀫𑀪𑀯𑀸𑀤𑀺𑀓𑁂 𑀪𑀯𑁂 𑀲𑀁𑀲𑀭𑀺𑀁 𑀧𑀭𑀺𑀩𑁆𑀪𑀫𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁬𑁭-𑁮. 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑁄 𑀬𑀣𑀸𑀧𑀺 𑀩𑁆𑀬𑀸𑀥𑀺𑀢𑁄 𑀧𑁄𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀬𑀸𑀥𑀺𑀢𑁄𑀢𑀺 𑀩𑁆𑀬𑀸𑀥𑀺𑀦𑀸 𑀧𑀻𑀴𑀺𑀢𑁄 𑀧𑁄𑀲𑁄 𑀧𑀼𑀭𑀺𑀲𑁄 𑀑𑀲𑀥𑀁 𑀧𑀭𑀺𑀬𑁂𑀲𑁂𑀬𑁆𑀬 𑀬𑀣𑀸, 𑀢𑀣𑀸 𑀅𑀳𑀁 𑀅𑀲𑀗𑁆𑀔𑀢𑀁 𑀅𑀫𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀦𑁆𑀢𑁄 𑀅𑀩𑁆𑀩𑁄𑀓𑀺𑀡𑁆𑀡𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀦𑀺𑀭𑀦𑁆𑀢𑀭𑀁, 𑀧𑀜𑁆𑀘𑀲𑀢𑀁 𑀚𑀸𑀢𑀺𑀧𑀜𑁆𑀘𑀲𑀢𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁭𑁧. 𑀓𑀼𑀢𑀺𑀢𑁆𑀣𑁂 𑀲𑀜𑁆𑀘𑀭𑀺𑀁 𑀅𑀳𑀦𑁆𑀢𑀺 𑀮𑀸𑀫𑀓𑁂 𑀢𑀺𑀢𑁆𑀣𑁂 𑀕𑀫𑀦𑀫𑀕𑁆𑀕𑁂 𑀅𑀳𑀁 𑀲𑀜𑁆𑀘𑀭𑀺𑀁.

𑁨𑁭𑁨. 𑀲𑀸𑀭𑀢𑁆𑀣𑀺𑀓𑁄 𑀧𑁄𑀲𑁄 𑀲𑀸𑀭𑀕𑀯𑁂𑀲𑀻 𑀧𑀼𑀭𑀺𑀲𑁄. 𑀓𑀤𑀮𑀺𑀁 𑀙𑁂𑀢𑁆𑀯𑀸𑀦 𑀨𑀸𑀮𑀬𑁂𑀢𑀺 𑀓𑀤𑀮𑀺𑀓𑁆𑀔𑀦𑁆𑀥𑀁 𑀙𑁂𑀢𑁆𑀯𑀸 𑀤𑁆𑀯𑁂𑀥𑀸 𑀨𑀸𑀮𑁂𑀬𑁆𑀬. 𑀦 𑀢𑀢𑁆𑀣 𑀲𑀸𑀭𑀁 𑀯𑀺𑀦𑁆𑀤𑁂𑀬𑁆𑀬𑀸𑀢𑀺 𑀨𑀸𑀮𑁂𑀢𑁆𑀯𑀸 𑀘 𑀧𑀦 𑀢𑀢𑁆𑀣 𑀓𑀤𑀮𑀺𑀓𑁆𑀔𑀦𑁆𑀥𑁂 𑀲𑀸𑀭𑀁 𑀦 𑀯𑀺𑀦𑁆𑀤𑁂𑀬𑁆𑀬 𑀦 𑀮𑀪𑁂𑀬𑁆𑀬, 𑀲𑁄 𑀧𑀼𑀭𑀺𑀲𑁄 𑀲𑀸𑀭𑁂𑀦 𑀭𑀺𑀢𑁆𑀢𑀓𑁄 𑀢𑀼𑀘𑁆𑀙𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁭𑁩. 𑀬𑀣𑀸 𑀓𑀤𑀮𑀺𑀓𑁆𑀔𑀦𑁆𑀥𑁄 𑀲𑀸𑀭𑁂𑀦 𑀭𑀺𑀢𑁆𑀢𑁄 𑀢𑀼𑀘𑁆𑀙𑁄, 𑀢𑀣𑁂𑀯 𑀢𑀣𑀸 𑀏𑀯 𑀮𑁄𑀓𑁂 𑀢𑀺𑀢𑁆𑀣𑀺𑀬𑀸 𑀦𑀸𑀦𑀸𑀤𑀺𑀝𑁆𑀞𑀺𑀕𑀢𑀺𑀓𑀸 𑀩𑀳𑀼𑀚𑁆𑀚𑀦𑀸 𑀅𑀲𑀗𑁆𑀔𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀭𑀺𑀢𑁆𑀢𑀸 𑀢𑀼𑀘𑁆𑀙𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑁨𑁭𑁪. 𑀧𑀘𑁆𑀙𑀺𑀫𑀪𑀯𑁂 𑀧𑀭𑀺𑀬𑁄𑀲𑀸𑀦𑀚𑀸𑀢𑀺𑀬𑀁 𑀩𑁆𑀭𑀳𑁆𑀫𑀩𑀦𑁆𑀥𑀼 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑁄 𑀅𑀳𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀪𑁄𑀕𑀁 𑀙𑀟𑁆𑀟𑁂𑀢𑁆𑀯𑀸𑀦𑀸𑀢𑀺 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀔𑁂𑀴𑀧𑀺𑀡𑁆𑀟𑀁 𑀇𑀯 𑀙𑀟𑁆𑀟𑁂𑀢𑁆𑀯𑀸, 𑀅𑀦𑀕𑀸𑀭𑀺𑀬𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀯𑀺𑀭𑀳𑀺𑀢𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀁 𑀧𑀝𑀺𑀧𑀚𑁆𑀚𑀺𑀦𑁆𑀢𑀺 𑀅𑀢𑁆𑀣𑁄.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁭𑁫-𑁭. 𑀅𑀚𑁆𑀛𑀸𑀬𑀓𑁄…𑀧𑁂… 𑀫𑀼𑀦𑀺𑀁 𑀫𑁄𑀦𑁂 𑀲𑀫𑀸𑀳𑀺𑀢𑀦𑁆𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀫𑁄𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀺, 𑀢𑀲𑁆𑀫𑀺𑀁 𑀫𑁄𑀦𑁂 𑀲𑀫𑁆𑀫𑀸 𑀆𑀳𑀺𑀢𑀁 𑀞𑀧𑀺𑀢𑀁 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀕𑀼𑀲𑀗𑁆𑀔𑀸𑀢𑀁 𑀧𑀸𑀧𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄, 𑀅𑀲𑁆𑀲𑀚𑀺𑀢𑁆𑀣𑁂𑀭𑁄, 𑀢𑀁 𑀫𑀳𑀸𑀦𑀸𑀕𑀁 𑀲𑀼𑀝𑁆𑀞𑀼 𑀨𑀼𑀮𑁆𑀮𑀁 𑀯𑀺𑀓𑀲𑀺𑀢𑀧𑀤𑀼𑀫𑀁 𑀬𑀣𑀸 𑀯𑀺𑀭𑁄𑀘𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁨𑁭𑁮-𑁨𑁮𑁧. 𑀤𑀺𑀲𑁆𑀯𑀸 𑀫𑁂…𑀧𑁂… 𑀧𑀼𑀘𑁆𑀙𑀺𑀢𑀼𑀁 𑀅𑀫𑀢𑀁 𑀧𑀤𑀦𑁆𑀢𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁮𑁨. 𑀯𑀻𑀣𑀺𑀦𑁆𑀢𑀭𑁂𑀢𑀺 𑀯𑀻𑀣𑀺𑀅𑀦𑁆𑀢𑀭𑁂 𑀅𑀦𑀼𑀧𑁆𑀧𑀢𑁆𑀢𑀁 𑀲𑀫𑁆𑀧𑀢𑁆𑀢𑀁 𑀉𑀧𑀕𑀢𑀁 𑀢𑀁 𑀣𑁂𑀭𑀁 𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀅𑀳𑀁 𑀧𑀼𑀘𑁆𑀙𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮𑁪. 𑀓𑀻𑀤𑀺𑀲𑀁 𑀢𑁂 𑀫𑀳𑀸𑀯𑀻𑀭𑀸𑀢𑀺 𑀲𑀓𑀮𑀥𑀺𑀢𑀺𑀧𑀼𑀭𑀺𑀲𑀲𑀸𑀲𑀦𑁂 𑀅𑀭𑀳𑀦𑁆𑀢𑀸𑀦𑀫𑀦𑁆𑀢𑀭𑁂 𑀧𑀞𑀫𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑁂, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀫𑀳𑀸𑀯𑀻𑀭, 𑀅𑀦𑀼𑀚𑀸𑀢𑀧𑀭𑀺𑀯𑀸𑀭𑀩𑀳𑀼𑀮𑀢𑀸𑀬 𑀫𑀳𑀸𑀬𑀲 𑀢𑁂 𑀢𑀯 𑀩𑀼𑀤𑁆𑀥𑀲𑁆𑀲 𑀓𑀻𑀤𑀺𑀲𑀁 𑀲𑀸𑀲𑀦𑀁 𑀥𑀫𑁆𑀫𑀁 𑀥𑀫𑁆𑀫𑀤𑁂𑀲𑀦𑀸𑀲𑀗𑁆𑀔𑀸𑀢𑀁 𑀲𑀸𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄 𑀪𑀤𑁆𑀭𑀫𑀼𑀔, 𑀫𑁂 𑀫𑀬𑁆𑀳𑀁 𑀲𑀸𑀥𑀼 𑀪𑀤𑁆𑀤𑀓𑀁 𑀲𑀸𑀲𑀦𑀁 𑀓𑀣𑀬𑀲𑁆𑀲𑀼 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄.

𑁨𑁮𑁫. 𑀢𑀢𑁄 𑀓𑀣𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀫𑁂 𑀧𑀼𑀝𑁆𑀞𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀅𑀲𑁆𑀲𑀚𑀺𑀢𑁆𑀣𑁂𑀭𑁄, 𑀫𑁂 𑀫𑀬𑀸 𑀧𑀼𑀝𑁆𑀞𑁄 ‘‘𑀲𑀸𑀲𑀦𑀁 𑀓𑀻𑀤𑀺𑀲’’𑀦𑁆𑀢𑀺 𑀓𑀣𑀺𑀢𑁄 𑀲𑀩𑁆𑀩𑀁 𑀓𑀣𑀁 𑀓𑀣𑁂𑀲𑀺. 𑀲𑀩𑁆𑀩𑀁 𑀲𑀸𑀲𑀦𑀁 𑀲𑀢𑁆𑀣𑀕𑀫𑁆𑀪𑀻𑀭𑀢𑀸𑀬 𑀕𑀫𑁆𑀪𑀻𑀭𑀁 𑀤𑁂𑀲𑀦𑀸𑀥𑀫𑁆𑀫𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀬 𑀕𑀫𑁆𑀪𑀻𑀭𑀁 𑀧𑀭𑀫𑀢𑁆𑀣𑀲𑀘𑁆𑀘𑀯𑀺𑀪𑀸𑀯𑀺𑀢𑀸𑀤𑀺𑀯𑀲𑁂𑀦 𑀦𑀺𑀧𑀼𑀡𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀳𑀦𑁆𑀢𑀸𑀭𑀁 𑀯𑀺𑀦𑀸𑀲𑀓𑀭𑀁 𑀲𑀩𑁆𑀩𑀲𑁆𑀲 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀅𑀧𑀦𑀼𑀤𑀦𑀁 𑀔𑁂𑀧𑀦𑀓𑀭𑀁 𑀥𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮𑁬. 𑀢𑁂𑀦 𑀓𑀣𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂 𑀥𑀫𑁆𑀫𑀸𑀢𑀺𑀆𑀤𑀺𑀫𑀸𑀳. 𑀳𑁂𑀢𑀼𑀧𑁆𑀧𑀪𑀯𑀸 𑀳𑁂𑀢𑀼𑀢𑁄 𑀓𑀸𑀭𑀡𑀢𑁄 𑀉𑀧𑁆𑀧𑀦𑁆𑀦𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸, 𑀬𑁂 𑀥𑀫𑁆𑀫𑀸 𑀬𑁂 𑀲𑀧𑁆𑀧𑀘𑁆𑀘𑀬𑀸 𑀲𑀪𑀸𑀯𑀥𑀫𑁆𑀫𑀸 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀁 𑀓𑀸𑀭𑀡𑀁 𑀢𑀣𑀸𑀕𑀢𑁄 𑀆𑀳 𑀓𑀣𑁂𑀲𑀺. 𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄𑀢𑀺 𑀢𑁂𑀲𑀁 𑀳𑁂𑀢𑀼𑀥𑀫𑁆𑀫𑀸𑀦𑀁 𑀬𑁄 𑀦𑀺𑀭𑁄𑀥𑁄 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁄, 𑀏𑀯𑀁𑀯𑀸𑀤𑀻 𑀫𑀳𑀸𑀲𑀫𑀡𑁄𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑀧𑀭𑀺𑀯𑀸𑀭𑀫𑀳𑀦𑁆𑀢𑀢𑀸𑀬 𑀲𑀫𑀺𑀢𑀧𑀸𑀧𑀢𑁆𑀢𑀸 𑀯𑀺𑀤𑁆𑀥𑀁𑀲𑀺𑀢𑀧𑀸𑀧𑀢𑁆𑀢𑀸 𑀘 𑀫𑀳𑀸𑀲𑀫𑀡𑁄 𑀪𑀕𑀯𑀸 𑀏𑀯𑀁𑀯𑀸𑀤𑀻 𑀳𑁂𑀢𑀼𑀯𑀽𑀧𑀲𑀫𑀦𑀸𑀤𑀺𑀯𑀤𑀦𑀲𑀻𑀮𑁄 𑀓𑀣𑁂𑀢𑀸𑀢𑀺 𑀅𑀢𑁆𑀣𑁄.

𑁨𑁮𑁭. 𑀢𑀢𑁄 𑀯𑀼𑀢𑁆𑀢𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀓𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀫𑁂𑀯.

𑁨𑁮𑁯. 𑀏𑀲𑁂𑀯 𑀥𑀫𑁆𑀫𑁄 𑀬𑀤𑀺𑀢𑀸𑀯𑀤𑁂𑀯𑀸𑀢𑀺 𑀲𑀘𑁂𑀧𑀺 𑀇𑀢𑁄 𑀉𑀢𑁆𑀢𑀭𑀺𑀁 𑀦𑀢𑁆𑀣𑀺, 𑀏𑀢𑁆𑀢𑀓𑀫𑁂𑀯 𑀇𑀤𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁂𑀯 𑀧𑀢𑁆𑀢𑀩𑁆𑀩𑀁. 𑀢𑀣𑀸 𑀏𑀲𑁄 𑀏𑀯 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀩𑁆𑀬𑀣 𑀧𑀝𑀺𑀯𑀺𑀤𑁆𑀥𑀣 𑀢𑀼𑀫𑁆𑀳𑁂 𑀅𑀲𑁄𑀓𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁. 𑀅𑀫𑁆𑀳𑁂𑀳𑀺 𑀦𑀸𑀫 𑀇𑀤𑀁 𑀧𑀤𑀁 𑀩𑀳𑀼𑀓𑁂𑀳𑀺 𑀓𑀧𑁆𑀧𑀦𑀳𑀼𑀢𑁂𑀳𑀺 𑀅𑀤𑀺𑀝𑁆𑀞𑀫𑁂𑀯 𑀅𑀩𑁆𑀪𑀢𑀻𑀢𑀁.

𑁨𑁯𑁦. 𑀬𑁆𑀯𑀸𑀳𑀁 𑀥𑀫𑁆𑀫𑀁 𑀕𑀯𑁂𑀲𑀦𑁆𑀢𑁄𑀢𑀺 𑀬𑁄 𑀅𑀳𑀁 𑀥𑀫𑁆𑀫𑀁 𑀲𑀦𑁆𑀢𑀺𑀧𑀤𑀁 𑀕𑀯𑁂𑀲𑀦𑁆𑀢𑁄 𑀧𑀭𑀺𑀬𑁂𑀲𑀦𑁆𑀢𑁄 𑀓𑀼𑀢𑀺𑀢𑁆𑀣𑁂 𑀓𑀼𑀘𑁆𑀙𑀺𑀢𑀢𑀺𑀢𑁆𑀣𑁂 𑀦𑀺𑀦𑁆𑀤𑀺𑀢𑀩𑁆𑀩𑀢𑀺𑀢𑁆𑀣𑁂 𑀲𑀜𑁆𑀘𑀭𑀺𑀁 𑀧𑀭𑀺𑀩𑁆𑀪𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀲𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀅𑀢𑁆𑀣𑁄 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑁄 𑀲𑀫𑁆𑀧𑀢𑁆𑀢𑁄, 𑀇𑀤𑀸𑀦𑀺 𑀧𑀦 𑀫𑁂 𑀫𑀬𑁆𑀳𑀁 𑀦𑀧𑁆𑀧𑀫𑀚𑁆𑀚𑀺𑀢𑀼𑀁 𑀅𑀧𑁆𑀧𑀫𑀸𑀤𑁂𑀦 𑀪𑀯𑀺𑀢𑀼𑀁 𑀓𑀸𑀮𑁄𑀢𑀺 𑀅𑀢𑁆𑀣𑁄.

𑁨𑁯𑁧. 𑀅𑀳𑀁 𑀅𑀲𑁆𑀲𑀚𑀺𑀦𑀸 𑀣𑁂𑀭𑁂𑀦 𑀢𑁄𑀲𑀺𑀢𑁄 𑀓𑀢𑀲𑁄𑀫𑀦𑀲𑁆𑀲𑁄, 𑀅𑀘𑀮𑀁 𑀦𑀺𑀘𑁆𑀘𑀮𑀁 𑀦𑀺𑀩𑁆𑀩𑀸𑀦𑀧𑀤𑀁, 𑀧𑀢𑁆𑀯𑀸𑀦 𑀧𑀸𑀧𑀼𑀡𑀺𑀢𑁆𑀯𑀸 𑀲𑀳𑀸𑀬𑀓𑀁 𑀓𑁄𑀮𑀺𑀢𑀫𑀸𑀡𑀯𑀁 𑀕𑀯𑁂𑀲𑀦𑁆𑀢𑁄 𑀧𑀭𑀺𑀬𑁂𑀲𑀦𑁆𑀢𑁄 𑀅𑀲𑁆𑀲𑀫𑀧𑀤𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁯𑁨. 𑀤𑀽𑀭𑀢𑁄𑀯 𑀫𑀫𑀁 𑀤𑀺𑀲𑁆𑀯𑀸𑀢𑀺 𑀅𑀲𑁆𑀲𑀫𑀧𑀤𑀢𑁄 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀫𑀫𑀁 𑀤𑀺𑀲𑁆𑀯𑀸 𑀲𑀼𑀲𑀺𑀓𑁆𑀔𑀺𑀢𑁄 𑀫𑁂 𑀫𑀫 𑀲𑀳𑀸𑀬𑁄 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀇𑀭𑀺𑀬𑀸𑀧𑀣𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄 𑀇𑀤𑀁 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀯𑀘𑀦𑀁 𑀅𑀩𑁆𑀭𑀯𑀺 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄.

𑁨𑁯𑁩. 𑀪𑁄 𑀲𑀳𑀸𑀬, 𑀧𑀲𑀦𑁆𑀦𑀫𑀼𑀔𑀦𑁂𑀢𑁆𑀢𑀸𑀲𑀺 𑀧𑀲𑀦𑁆𑀦𑁂𑀳𑀺 𑀲𑁄𑀪𑀦𑁂𑀳𑀺 𑀤𑀤𑁆𑀤𑀮𑁆𑀮𑀫𑀸𑀦𑁂𑀳𑀺 𑀫𑀼𑀔𑀦𑁂𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀺. 𑀫𑀼𑀦𑀺𑀪𑀸𑀯𑁄 𑀇𑀯 𑀢𑁂 𑀤𑀺𑀲𑁆𑀲𑀢𑀺 𑀧𑀜𑁆𑀜𑀸𑀬𑀢𑀺. 𑀇𑀢𑁆𑀣𑀫𑁆𑀪𑀽𑀢𑁄 𑀢𑁆𑀯𑀁 𑀅𑀫𑀢𑀸𑀥𑀺𑀕𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀢𑁄 𑀅𑀲𑀺, 𑀓𑀘𑁆𑀘𑀺 𑀅𑀘𑁆𑀘𑀼𑀢𑀁 𑀦𑀺𑀩𑁆𑀩𑀸𑀦𑀧𑀤𑀁 𑀅𑀥𑀺𑀕𑀢𑁄 𑀅𑀥𑀺𑀕𑀘𑁆𑀙𑀻𑀢𑀺 𑀧𑀼𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄.

𑁨𑁯𑁪. 𑀲𑀼𑀪𑀸𑀦𑀼𑀭𑀽𑀧𑁄 𑀆𑀬𑀸𑀲𑀻𑀢𑀺 𑀲𑀼𑀪𑀲𑁆𑀲 𑀧𑀲𑀦𑁆𑀦𑀯𑀡𑁆𑀡𑀲𑁆𑀲 𑀅𑀦𑀼𑀭𑀽𑀧𑁄 𑀳𑀼𑀢𑁆𑀯𑀸 𑀆𑀬𑀸𑀲𑀺 𑀆𑀕𑀘𑁆𑀙𑀲𑀺. 𑀆𑀦𑁂𑀜𑁆𑀚𑀓𑀸𑀭𑀺𑀢𑁄 𑀯𑀺𑀬𑀸𑀢𑀺 𑀢𑁄𑀫𑀭𑀸𑀤𑀻𑀳𑀺 𑀓𑀸𑀭𑀺𑀢𑁄 𑀆𑀦𑁂𑀜𑁆𑀚𑁄 𑀳𑀢𑁆𑀣𑀻 𑀯𑀺𑀬 𑀤𑀦𑁆𑀢𑁄𑀯 𑀢𑀻𑀳𑀺 𑀫𑀸𑀲𑁂𑀳𑀺 𑀲𑀼𑀲𑀺𑀓𑁆𑀔𑀺𑀢𑁄 𑀇𑀯 𑀩𑀸𑀳𑀺𑀢𑀧𑀸𑀧𑀢𑁆𑀢𑀸, 𑀩𑁆𑀭𑀸𑀳𑁆𑀫𑀡 𑀤𑀦𑁆𑀢𑀤𑀫𑀣𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄 𑀦𑀺𑀩𑁆𑀩𑀸𑀦𑀧𑀤𑁂 𑀉𑀧𑀲𑀦𑁆𑀢𑁄 𑀅𑀲𑀻𑀢𑀺 𑀧𑀼𑀘𑁆𑀙𑀺.

𑁨𑁯𑁫. 𑀢𑁂𑀦 𑀧𑀼𑀝𑁆𑀞𑁄 𑀅𑀫𑀢𑀁 𑀫𑀬𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁯𑁯. 𑀅𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄𑀢𑀺 ‘‘𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀺𑀢𑀧𑀢𑁆𑀣𑀦𑀸𑀬 𑀓𑁄𑀝𑀺𑀁 𑀅𑀧𑁆𑀧𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀅𑀢𑁆𑀣𑁄. 𑀓𑀼𑀢𑀺𑀢𑁆𑀣𑁂 𑀅𑀕𑀦𑁆𑀢𑀩𑁆𑀩𑀫𑀕𑁆𑀕𑁂 𑀅𑀳𑀁 𑀲𑀜𑁆𑀘𑀭𑀺𑀁 𑀧𑀭𑀺𑀩𑁆𑀪𑀫𑀺𑀁. 𑀪𑀦𑁆𑀢𑁂 𑀕𑁄𑀢𑀫, 𑀮𑁄𑀓𑀚𑁂𑀝𑁆𑀞 𑀢𑀯 𑀤𑀲𑁆𑀲𑀦𑀁 𑀆𑀕𑀫𑁆𑀫 𑀧𑀢𑁆𑀯𑀸, 𑀫𑀫 𑀲𑀗𑁆𑀓𑀧𑁆𑀧𑁄 𑀫𑀬𑁆𑀳𑀁 𑀧𑀢𑁆𑀣𑀦𑀸 𑀧𑀽𑀭𑀺𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀸𑀥𑀺𑀕𑀫𑁂𑀦 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀧𑀸𑀧𑀼𑀡𑀦𑁂𑀦 𑀧𑀭𑀺𑀧𑀼𑀡𑁆𑀡𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁦𑁦. 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬𑀸𑀢𑀺 𑀧𑀣𑀯𑀺𑀬𑀁 𑀦𑀺𑀩𑁆𑀩𑀢𑁆𑀢𑀸 𑀲𑀫𑀬𑁂 𑀳𑁂𑀫𑀦𑁆𑀢𑀓𑀸𑀮𑁂 𑀧𑀼𑀧𑁆𑀨𑀦𑁆𑀢𑀺 𑀯𑀺𑀓𑀲𑀦𑁆𑀢𑀺, 𑀤𑀺𑀩𑁆𑀩𑀕𑀦𑁆𑀥𑀸 𑀲𑀼𑀕𑀦𑁆𑀥𑀸 𑀲𑀼𑀝𑁆𑀞𑀼 𑀧𑀯𑀦𑁆𑀢𑀺 𑀧𑀯𑀸𑀬𑀦𑁆𑀢𑀺, 𑀲𑀩𑁆𑀩𑀧𑀸𑀡𑀺𑀦𑀁 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑁂 𑀢𑁄𑀲𑁂𑀦𑁆𑀢𑀺 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁂 𑀓𑀭𑁄𑀦𑁆𑀢𑀺 𑀬𑀣𑀸.

𑁩𑁦𑁧. 𑀢𑀣𑁂𑀯𑀸𑀳𑀁 𑀫𑀳𑀸𑀯𑀻𑀭𑀸𑀢𑀺 𑀫𑀳𑀸𑀯𑀻𑀭𑀺𑀬𑀯𑀦𑁆𑀢𑀲𑀓𑁆𑀬𑀓𑀼𑀮𑀧𑀲𑀼𑀢𑀫𑀳𑀸𑀧𑀭𑀺𑀯𑀸𑀭 𑀢𑁂 𑀢𑀯 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀬 𑀅𑀳𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀧𑀼𑀧𑁆𑀨𑀺𑀢𑀼𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀯𑀺𑀓𑀲𑀺𑀢𑀼𑀁 𑀲𑀫𑀬𑀁 𑀓𑀸𑀮𑀁 𑀏𑀲𑀸𑀫𑀺 𑀕𑀯𑁂𑀲𑀸𑀫𑀺 𑀢𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁦𑁨. 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑁄𑀘𑀦𑀢𑁄 𑀯𑀸 𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀼𑀧𑁆𑀨𑀁 𑀏𑀲𑀦𑁆𑀢𑁄 𑀕𑀯𑁂𑀲𑁂𑀦𑁆𑀢𑁄, 𑀢𑀜𑁆𑀘 𑀔𑁄 𑀪𑀯𑀲𑀁𑀲𑀸𑀭𑀫𑁄𑀘𑀦𑀁 𑀓𑀸𑀫𑀪𑀯𑀸𑀤𑀺𑀪𑀯𑁂𑀲𑀼 𑀲𑀁𑀲𑀭𑀡𑀁 𑀕𑀫𑀦𑀁 𑀪𑀯𑀲𑀁𑀲𑀸𑀭𑀁, 𑀢𑀢𑁄 𑀫𑁄𑀘𑀦𑀁 𑀪𑀯𑀲𑀁𑀲𑀸𑀭𑀫𑁄𑀘𑀦𑀁. 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀮𑀸𑀪𑁂𑀦𑀸𑀢𑀺 𑀯𑀺𑀫𑀼𑀘𑁆𑀘𑀦𑀁 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀓𑀢𑀲𑀫𑁆𑀪𑀸𑀭𑀸 𑀏𑀢𑀸𑀬𑀸𑀢𑀺 𑀯𑀺𑀫𑀼𑀢𑁆𑀢𑀺, 𑀅𑀕𑁆𑀕𑀨𑀮𑀁. 𑀧𑀼𑀧𑁆𑀨𑀦𑁆𑀢𑀺 𑀯𑀺𑀓𑀲𑀦𑁆𑀢𑀺 𑀯𑁂𑀦𑁂𑀬𑁆𑀬𑀸 𑀏𑀢𑁂𑀦𑀸𑀢𑀺 𑀧𑀼𑀧𑁆𑀨𑀁. 𑀯𑀺𑀫𑀼𑀢𑁆𑀢𑀺 𑀏𑀯 𑀧𑀼𑀧𑁆𑀨𑀁 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀁. 𑀮𑀪𑀦𑀁 𑀮𑀸𑀪𑁄, 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀲𑁆𑀲 𑀮𑀸𑀪𑁄 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀮𑀸𑀪𑁄. 𑀢𑁂𑀦 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀮𑀸𑀪𑁂𑀦 𑀅𑀥𑀺𑀕𑀫𑀦𑁂𑀦 𑀲𑀩𑁆𑀩𑀧𑀸𑀡𑀺𑀦𑀁 𑀲𑀩𑁆𑀩𑀲𑀢𑁆𑀢𑁂 𑀢𑁄𑀲𑁂𑀫𑀺 𑀲𑁄𑀫𑀦𑀲𑁆𑀲𑀁 𑀧𑀸𑀧𑁂𑀫𑀻𑀢𑀺 𑀅𑀢𑁆𑀣𑁄.

𑁩𑁦𑁩. ‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀻’’𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀫 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢 𑀬𑀢𑁆𑀢𑀓𑁂 𑀞𑀸𑀦𑁂 𑀭𑀢𑀦𑀲𑀼𑀢𑁆𑀢𑀸𑀤𑀻𑀦𑀁 𑀧𑀭𑀺𑀢𑁆𑀢𑀸𑀦𑀁 𑀆𑀡𑀸 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀺, 𑀢𑀢𑁆𑀢𑀓𑁂 𑀲𑀢𑀲𑀳𑀲𑁆𑀲𑀓𑁄𑀝𑀺𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁂 𑀩𑀼𑀤𑁆𑀥𑀔𑁂𑀢𑁆𑀢𑁂 𑀞𑀧𑁂𑀢𑁆𑀯𑀸𑀦 𑀫𑀳𑀸𑀫𑀼𑀦𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀲𑀢𑁆𑀢𑁂𑀲𑀼 𑀅𑀜𑁆𑀜𑁄 𑀓𑁄𑀘𑀺 𑀢𑀯 𑀧𑀼𑀢𑁆𑀢𑀲𑁆𑀲 𑀢𑀼𑀬𑁆𑀳𑀁 𑀧𑀼𑀢𑁆𑀢𑁂𑀦 𑀫𑀬𑀸 𑀧𑀜𑁆𑀜𑀸𑀬 𑀲𑀤𑀺𑀲𑁄 𑀲𑀫𑁄 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁩𑁦𑁮. 𑀧𑀝𑀺𑀧𑀦𑁆𑀦𑀸𑀢𑀺 𑀘𑀢𑀼𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀘 𑀨𑀮𑀝𑁆𑀞𑀸 𑀅𑀭𑀳𑀢𑁆𑀢𑀨𑀮𑁂 𑀞𑀺𑀢𑀸 𑀘 𑀲𑁂𑀔𑀸 𑀨𑀮𑀲𑀫𑀗𑁆𑀕𑀺𑀦𑁄 𑀳𑁂𑀝𑁆𑀞𑀺𑀫𑁂𑀳𑀺 𑀢𑀻𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀘 𑀏𑀢𑁂 𑀅𑀝𑁆𑀞 𑀅𑀭𑀺𑀬𑀪𑀺𑀓𑁆𑀔𑀽, 𑀉𑀢𑁆𑀢𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀆𑀲𑀻𑀲𑀓𑀸 𑀕𑀯𑁂𑀲𑀓𑀸, 𑀢𑀁 𑀧𑀜𑁆𑀜𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁦. 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀓𑀼𑀲𑀮𑀸 𑀙𑁂𑀓𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸𑀬𑀯𑀟𑁆𑀠𑀦𑀸𑀬 𑀭𑀢𑀸 𑀅𑀮𑁆𑀮𑀻𑀦𑀸.

𑁩𑁧𑁪

. 𑀉𑀴𑀼𑀭𑀸𑀚𑀸𑀯 𑀢𑀸𑀭𑀓𑀭𑀸𑀚𑀸 𑀇𑀯 𑀘 𑀲𑁄𑀪𑀲𑀺.

𑁩𑁧𑁫. 𑀭𑀼𑀓𑁆𑀔𑀧𑀩𑁆𑀩𑀢𑀭𑀢𑀦𑀲𑀢𑁆𑀢𑀸𑀤𑀬𑁄 𑀥𑀸𑀭𑁂𑀢𑀻𑀢𑀺 𑀥𑀭𑀡𑀻, 𑀥𑀭𑀡𑀺𑀬𑀁 𑀭𑀼𑀳𑀸 𑀲𑀜𑁆𑀚𑀸𑀢𑀸 𑀯𑀟𑁆𑀠𑀺𑀢𑀸 𑀘𑀸𑀢𑀺 𑀥𑀭𑀡𑀻𑀭𑀼𑀳𑀸 𑀭𑀼𑀓𑁆𑀔𑀸. 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀭𑀼𑀳𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀯𑁂𑀧𑀼𑀮𑁆𑀮𑀢𑀁 𑀯𑀺𑀧𑀼𑀮𑀪𑀸𑀯𑀁 𑀧𑀭𑀺𑀧𑀽𑀭𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺, 𑀢𑁂 𑀭𑀼𑀓𑁆𑀔𑀸 𑀓𑀫𑁂𑀦 𑀨𑀮𑀁 𑀤𑀲𑁆𑀲𑀬𑀦𑁆𑀢𑀺 𑀨𑀮𑀥𑀸𑀭𑀺𑀦𑁄 𑀳𑁄𑀦𑁆𑀢𑀺.

𑁩𑁧𑁭-𑁯. 𑀧𑀼𑀦𑀧𑀺 𑀪𑀕𑀯𑀦𑁆𑀢𑀫𑁂𑀯 𑀣𑁄𑀫𑁂𑀦𑁆𑀢𑁄 𑀲𑀺𑀦𑁆𑀥𑀼 𑀲𑀭𑀲𑁆𑀲𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀺𑀦𑁆𑀥𑀼𑀯𑀸𑀤𑀺 𑀦𑀸𑀫 𑀕𑀗𑁆𑀕𑀸 𑀘 𑀲𑀭𑀲𑁆𑀲𑀢𑀻 𑀦𑀸𑀫 𑀕𑀗𑁆𑀕𑀸 𑀘 𑀦𑀦𑁆𑀤𑀺𑀬𑀕𑀗𑁆𑀕𑀸 𑀘 𑀘𑀦𑁆𑀤𑀪𑀸𑀕𑀸𑀕𑀗𑁆𑀕𑀸 𑀘 𑀕𑀗𑁆𑀕𑀸 𑀦𑀸𑀫 𑀕𑀗𑁆𑀕𑀸 𑀘 𑀬𑀫𑀼𑀦𑀸 𑀦𑀸𑀫 𑀕𑀗𑁆𑀕𑀸 𑀘 𑀲𑀭𑀪𑀽 𑀦𑀸𑀫 𑀕𑀗𑁆𑀕𑀸 𑀘 𑀫𑀳𑀻 𑀦𑀸𑀫 𑀕𑀗𑁆𑀕𑀸 𑀘. 𑀲𑀦𑁆𑀤𑀫𑀸𑀦𑀸𑀦𑀁 𑀕𑀘𑁆𑀙𑀦𑁆𑀢𑀻𑀦𑀁 𑀏𑀢𑀸𑀲𑀁 𑀕𑀗𑁆𑀕𑀸𑀦𑀁 𑀲𑀸𑀕𑀭𑁄𑀯 𑀲𑀫𑀼𑀤𑁆𑀤𑁄 𑀏𑀯 𑀲𑀫𑁆𑀧𑀝𑀺𑀘𑁆𑀙𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀺. 𑀢𑀤𑀸 𑀏𑀢𑀸 𑀲𑀩𑁆𑀩𑀕𑀗𑁆𑀕𑀸 𑀧𑀼𑀭𑀺𑀫𑀁 𑀦𑀸𑀫𑀁 𑀲𑀺𑀦𑁆𑀥𑀼𑀯𑀸𑀤𑀺𑀕𑀗𑁆𑀕𑀸𑀢𑁆𑀬𑀸𑀤𑀺𑀓𑀁 𑀧𑀼𑀭𑀺𑀫𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀁 𑀚𑀳𑀦𑁆𑀢𑀺 𑀙𑀟𑁆𑀟𑁂𑀦𑁆𑀢𑀺 𑀲𑀸𑀕𑀭𑁄𑀢𑁂𑀯 𑀲𑀸𑀕𑀭𑁄 𑀇𑀢𑀺 𑀏𑀯 𑀜𑀸𑀬𑀢𑀺 𑀧𑀸𑀓𑀝𑀸 𑀪𑀯𑀢𑀺 𑀬𑀣𑀸. 𑀢𑀣𑁂𑀯 𑀢𑀣𑀸 𑀏𑀯 𑀇𑀫𑁂 𑀘𑀢𑀼𑀩𑁆𑀩𑀡𑁆𑀡𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀓𑀼𑀮𑀸 𑀢𑀯𑀦𑁆𑀢𑀺𑀓𑁂 𑀢𑀯 𑀅𑀦𑁆𑀢𑀺𑀓𑁂 𑀲𑀫𑀻𑀧𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀢𑁆𑀢𑀓𑀸𑀲𑀸𑀬𑀘𑀻𑀯𑀭𑀥𑀸𑀭𑀺𑀦𑁄 𑀧𑀭𑀺𑀘𑀭𑀦𑁆𑀢𑀸 𑀧𑀼𑀭𑀺𑀫𑀁 𑀦𑀸𑀫𑀁 𑀔𑀢𑁆𑀢𑀺𑀬𑀸𑀤𑀺𑀦𑀸𑀫𑀥𑁂𑀬𑁆𑀬𑀁 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀁 𑀚𑀳𑀦𑁆𑀢𑀺 𑀘𑀚𑀦𑁆𑀢𑀺, 𑀩𑀼𑀤𑁆𑀥𑀧𑀼𑀢𑁆𑀢𑀸𑀢𑀺 𑀩𑀼𑀤𑁆𑀥𑀲𑁆𑀲 𑀑𑀭𑀲𑀸𑀢𑀺 𑀜𑀸𑀬𑀭𑁂 𑀧𑀸𑀓𑀝𑀸 𑀪𑀯𑁂𑀬𑁆𑀬𑀼𑀁.

𑁩𑁨𑁦-𑁪. 𑀘𑀦𑁆𑀤𑁄 𑀘𑀦𑁆𑀤𑀫𑀡𑁆𑀟𑀮𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀭𑀚𑁄 𑀥𑀼𑀫𑁄 𑀭𑀸𑀳𑀽𑀢𑀺 𑀧𑀜𑁆𑀘𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀯𑀺𑀫𑀮𑁄 𑀯𑀺𑀕𑀢𑀫𑀮𑁄 𑀦𑀺𑀫𑁆𑀫𑀮𑁄, 𑀆𑀓𑀸𑀲𑀥𑀸𑀢𑀼𑀬𑀸 𑀆𑀓𑀸𑀲𑀕𑀩𑁆𑀪𑁂 𑀕𑀘𑁆𑀙𑀁 𑀕𑀘𑁆𑀙𑀦𑁆𑀢𑁄, 𑀲𑀩𑁆𑀩𑁂 𑀢𑀸𑀭𑀓𑀲𑀫𑀽𑀳𑁂 𑀆𑀪𑀸𑀬 𑀫𑀤𑁆𑀤𑀫𑀸𑀦𑁄 𑀮𑁄𑀓𑁂 𑀅𑀢𑀺𑀭𑁄𑀘𑀢𑀺 𑀤𑀤𑁆𑀤𑀮𑁆𑀮𑀢𑀺 𑀬𑀣𑀸. 𑀢𑀣𑁂𑀯 𑀢𑀣𑀸 𑀏𑀯 𑀢𑁆𑀯𑀁…𑀧𑁂….

𑁩𑁨𑁫-𑁭. 𑀉𑀤𑀓𑁂 𑀚𑀸𑀢𑀸 𑀉𑀤𑀓𑁂 𑀲𑀁𑀯𑀟𑁆𑀠𑀸 𑀓𑀼𑀫𑀼𑀤𑀸 𑀫𑀦𑁆𑀤𑀸𑀮𑀓𑀸 𑀘 𑀩𑀳𑀽 𑀲𑀗𑁆𑀔𑀸𑀢𑀺𑀓𑁆𑀓𑀦𑁆𑀢𑀸, 𑀢𑁄𑀬𑁂𑀦 𑀉𑀤𑀓𑁂𑀦 𑀓𑀤𑁆𑀤𑀫𑀓𑀮𑀮𑁂𑀦 𑀘 𑀉𑀧𑀮𑀺𑀫𑁆𑀧𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀺 𑀬𑀣𑀸, 𑀢𑀣𑁂𑀯 𑀩𑀳𑀼𑀓𑀸 𑀲𑀢𑁆𑀢𑀸 𑀅𑀧𑀭𑀺𑀫𑀸𑀡𑀸 𑀲𑀢𑁆𑀢𑀸 𑀮𑁄𑀓𑁂 𑀚𑀸𑀢𑀸 𑀲𑀁𑀯𑀟𑁆𑀠𑀸 𑀭𑀸𑀕𑁂𑀦 𑀘 𑀤𑁄𑀲𑁂𑀦 𑀘 𑀅𑀝𑁆𑀝𑀺𑀢𑀸 𑀩𑀦𑁆𑀥𑀺𑀢𑀸 𑀯𑀺𑀭𑀽𑀳𑀭𑁂 𑀯𑀺𑀭𑀼𑀳𑀦𑁆𑀢𑀺. 𑀓𑀤𑁆𑀤𑀫𑁂 𑀓𑀼𑀫𑀼𑀤𑀁 𑀬𑀣𑀸 𑀯𑀺𑀭𑀼𑀳𑀢𑀺 𑀲𑀜𑁆𑀚𑀸𑀬𑀢𑀺. 𑀓𑁂𑀲𑀭𑀻𑀢𑀺 𑀧𑀤𑀼𑀫𑀁.

𑁩𑁨𑁯-𑁩𑁦. 𑀭𑀫𑁆𑀫𑀓𑁂 𑀫𑀸𑀲𑁂𑀢𑀺 𑀓𑀢𑁆𑀢𑀺𑀓𑀫𑀸𑀲𑁂 ‘‘𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀯𑀸𑀭𑀺𑀚𑀸 𑀧𑀤𑀼𑀫𑀧𑀼𑀧𑁆𑀨𑀸𑀤𑀬𑁄 𑀩𑀳𑀽 𑀧𑀼𑀧𑁆𑀨𑀸 𑀧𑀼𑀧𑁆𑀨𑀦𑁆𑀢𑀺 𑀯𑀺𑀓𑀲𑀦𑁆𑀢𑀺, 𑀢𑀁 𑀫𑀸𑀲𑀁 𑀢𑀁 𑀓𑀢𑁆𑀢𑀺𑀓𑀫𑀸𑀲𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀯𑀸𑀭𑀺𑀚𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀬𑁄 𑀧𑀼𑀧𑁆𑀨𑀦𑀸𑀬 𑀲𑁄𑀢𑀺 𑀲𑁄 𑀓𑀢𑁆𑀢𑀺𑀓𑀫𑀸𑀲𑁄 𑀧𑀼𑀧𑁆𑀨𑀦𑀸𑀬 𑀯𑀺𑀓𑀲𑀦𑀸𑀬 𑀲𑀫𑀬𑁄 𑀓𑀸𑀮𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀼𑀧𑁆𑀨𑀦𑁆𑀢𑀺 𑀢𑀣𑁂𑀯 𑀢𑁆𑀯𑀁, 𑀲𑀓𑁆𑀬𑀧𑀼𑀢𑁆𑀢, 𑀧𑀼𑀧𑁆𑀨𑀺𑀢𑁄 𑀯𑀺𑀓𑀲𑀺𑀢𑁄 𑀅𑀲𑀺. 𑀧𑀼𑀧𑁆𑀨𑀺𑀢𑁄 𑀢𑁂 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀢𑁂 𑀢𑀼𑀬𑁆𑀳𑀁 𑀲𑀺𑀲𑁆𑀲𑀸 𑀓𑀢𑀲𑀫𑁆𑀪𑀸𑀭𑀸 𑀪𑀺𑀓𑁆𑀔𑀽 𑀯𑀺𑀫𑀼𑀢𑁆𑀢𑀺𑀬𑀸 𑀅𑀭𑀳𑀢𑁆𑀢𑀨𑀮𑀜𑀸𑀡𑁂𑀦 𑀧𑀼𑀧𑁆𑀨𑀺𑀢𑁄 𑀯𑀺𑀓𑀲𑀺𑀢𑁄. 𑀬𑀣𑀸 𑀯𑀸𑀭𑀺𑀚𑀁 𑀧𑀤𑀼𑀫𑀁 𑀧𑀼𑀧𑁆𑀨𑀦𑀲𑀫𑀬𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀣𑀸 𑀢𑁂 𑀲𑀸𑀲𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁩𑁩-𑁪. 𑀬𑀣𑀸𑀧𑀺 𑀲𑁂𑀮𑁄 𑀳𑀺𑀫𑀯𑀸𑀢𑀺 𑀳𑀺𑀫𑀯𑀸 𑀦𑀸𑀫 𑀲𑁂𑀮𑀫𑀬𑀧𑀩𑁆𑀩𑀢𑁄. 𑀲𑀩𑁆𑀩𑀧𑀸𑀡𑀺𑀦𑀁 𑀲𑀩𑁆𑀩𑁂𑀲𑀁 𑀩𑁆𑀬𑀸𑀥𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀑𑀲𑀥𑁄 𑀑𑀲𑀥𑀯𑀦𑁆𑀢𑁄 𑀲𑀩𑁆𑀩𑀦𑀸𑀕𑀸𑀦𑀁 𑀲𑀩𑁆𑀩𑀅𑀲𑀼𑀭𑀸𑀦𑀁 𑀲𑀩𑁆𑀩𑀤𑁂𑀯𑀸𑀦𑀜𑁆𑀘 𑀆𑀮𑀬𑁄 𑀅𑀕𑀸𑀭𑀪𑀽𑀢𑁄 𑀬𑀣𑀸, 𑀢𑀣𑁂𑀯 𑀢𑁆𑀯𑀁, 𑀫𑀳𑀸𑀯𑀻𑀭, 𑀲𑀩𑁆𑀩𑀧𑀸𑀡𑀺𑀦𑀁 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀻𑀳𑀺 𑀧𑀫𑁄𑀘𑀦𑀢𑁄 𑀑𑀲𑀥𑁄 𑀯𑀺𑀬. 𑀬𑀣𑀸 𑀲𑁄 𑀳𑀺𑀫𑀯𑀸 𑀦𑀸𑀕𑀸𑀤𑀻𑀦𑀁 𑀆𑀮𑀬𑁄, 𑀢𑀣𑀸 𑀢𑁂𑀯𑀺𑀚𑁆𑀚𑀸𑀬 𑀘 𑀙𑀴𑀪𑀺𑀜𑁆𑀜𑀸𑀬 𑀘 𑀇𑀤𑁆𑀥𑀺𑀬𑀸 𑀘 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑀸 𑀧𑀢𑁆𑀢𑀸 𑀢𑀼𑀯𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀉𑀧𑀫𑀸𑀉𑀧𑀫𑁂𑀬𑁆𑀬𑀯𑀲𑁂𑀦 𑀕𑀸𑀣𑀸𑀦𑀁 𑀲𑀫𑁆𑀩𑀦𑁆𑀥𑀦𑀬𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑁩𑁪𑁨. 𑀆𑀲𑀬𑀸𑀦𑀼𑀲𑀬𑀁 𑀜𑀢𑁆𑀯𑀸𑀢𑀺 𑀏𑀢𑁆𑀣 𑀆𑀲𑀬𑁄𑀢𑀺 𑀅𑀚𑁆𑀛𑀸𑀲𑀬𑁄 𑀘𑀭𑀺𑀬𑀸, 𑀅𑀦𑀼𑀲𑀬𑁄𑀢𑀺 𑀣𑀸𑀫𑀕𑀢𑀓𑀺𑀮𑁂𑀲𑁄. ‘‘𑀅𑀬𑀁 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀤𑁄𑀲𑀘𑀭𑀺𑀢𑁄, 𑀅𑀬𑀁 𑀫𑁄𑀳𑀘𑀭𑀺𑀢𑁄’’𑀢𑀺𑀆𑀤𑀺𑀦𑀸 𑀆𑀲𑀬𑀜𑁆𑀘 𑀅𑀦𑀼𑀲𑀬𑀁 𑀓𑀺𑀮𑁂𑀲𑀧𑀯𑀢𑁆𑀢𑀺𑀜𑁆𑀘 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀩𑀮𑀸𑀩𑀮𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑁆𑀯𑀸𑀓𑀸𑀭𑁄 𑀤𑁆𑀯𑀸𑀓𑀸𑀭𑁄 𑀲𑀼𑀯𑀺𑀜𑁆𑀜𑀸𑀧𑀬𑁄 𑀤𑀼𑀯𑀺𑀜𑁆𑀜𑀸𑀧𑀬𑁄𑀢𑀺 𑀏𑀯𑀁 𑀩𑀮𑀸𑀩𑀮𑀁 𑀚𑀸𑀦𑀺𑀢𑁆𑀯𑀸. 𑀪𑀩𑁆𑀩𑀸𑀪𑀩𑁆𑀩𑁂 𑀯𑀺𑀤𑀺𑀢𑁆𑀯𑀸𑀦𑀸𑀢𑀺 ‘‘𑀫𑀬𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀬𑀁 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀲𑀫𑀢𑁆𑀣𑁄, 𑀅𑀬𑀁 𑀧𑀼𑀕𑁆𑀕𑀮𑁄 𑀅𑀪𑀩𑁆𑀩𑁄’’𑀢𑀺 𑀯𑀺𑀤𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀢𑁆𑀯𑀁 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑁄 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀲𑀻𑀳𑀦𑀸𑀤𑁂𑀦 𑀅𑀪𑀻𑀢𑀦𑀸𑀤𑁂𑀦 𑀕𑀚𑁆𑀚𑀲𑀺 𑀲𑀓𑀮𑀁 𑀘𑀓𑁆𑀓𑀯𑀸𑀴𑀁 𑀏𑀓𑀦𑀺𑀦𑁆𑀦𑀸𑀤𑀁 𑀓𑀭𑁄𑀲𑀺.

𑁩𑁪𑁩-𑁪. 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀢𑀺 𑀲𑀫𑀦𑁆𑀢𑀸 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀧𑀭𑀺𑀲𑀸 𑀦𑀺𑀲𑀺𑀦𑁆𑀦𑀸 𑀪𑀯𑁂𑀬𑁆𑀬. 𑀢𑁂 𑀏𑀯𑀁 𑀦𑀺𑀲𑀺𑀦𑁆𑀦𑀸 𑀦𑀸𑀦𑀸𑀤𑀺𑀝𑁆𑀞𑀻 𑀅𑀦𑁂𑀓𑀤𑀲𑁆𑀲𑀦𑀕𑀸𑀳𑀺𑀦𑁄 𑀯𑀺𑀯𑀤𑀫𑀸𑀦𑀸 𑀤𑁆𑀯𑁂𑀴𑁆𑀳𑀓𑀚𑀸𑀢𑀸 𑀯𑀺𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀬 𑀤𑀼𑀩𑀼𑀤𑁆𑀥𑀺𑀙𑀺𑀦𑁆𑀤𑀦𑀢𑁆𑀣𑀸𑀬 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀫𑀜𑁆𑀜𑀸𑀬 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀑𑀧𑀫𑁆𑀫𑀓𑀼𑀲𑀮𑁄 𑀉𑀧𑀫𑀸𑀉𑀧𑀫𑁂𑀬𑁆𑀬𑁂𑀲𑀼 𑀤𑀓𑁆𑀔𑁄 𑀢𑁆𑀯𑀁, 𑀫𑀼𑀦𑀺, 𑀏𑀓𑀁 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄𑀯 𑀏𑀓𑁂𑀦𑁂𑀯 𑀧𑀜𑁆𑀳𑀓𑀣𑀦𑁂𑀦 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑀸𑀦𑀁 𑀧𑀸𑀡𑀻𑀦𑀁 𑀯𑀺𑀫𑀢𑀺𑀁 𑀲𑀁𑀲𑀬𑀁 𑀙𑀺𑀦𑁆𑀤𑀲𑀺 𑀦𑀺𑀓𑁆𑀓𑀗𑁆𑀔𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁪𑁫. 𑀉𑀧𑀤𑀺𑀲𑀲𑀤𑀺𑀲𑁂𑀳𑁂𑀯𑀸𑀢𑀺 𑀏𑀢𑁆𑀣 𑀉𑀤𑀓𑀲𑁆𑀲 𑀉𑀧𑀭𑀺 𑀤𑀺𑀲𑁆𑀲𑀦𑁆𑀢𑀺 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀉𑀧𑀤𑀺𑀲𑀸, 𑀲𑁂𑀯𑀸𑀮𑀸. 𑀉𑀧𑀤𑀺𑀲𑁂𑀳𑀺 𑀲𑀤𑀺𑀲𑀸 𑀉𑀧𑀤𑀺𑀲𑀲𑀤𑀺𑀲𑀸, 𑀫𑀦𑀼𑀲𑁆𑀲𑀸. 𑀬𑀣𑀸 𑀳𑀺 𑀉𑀧𑀤𑀺𑀲𑀸 𑀲𑁂𑀯𑀸𑀮𑀸 𑀉𑀤𑀓𑀁 𑀅𑀤𑀺𑀲𑁆𑀲𑀫𑀸𑀦𑀁 𑀓𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀯𑀲𑀼𑀥𑀸 𑀧𑀣𑀯𑀻 𑀢𑁂𑀳𑀺 𑀉𑀧𑀤𑀺𑀲𑀲𑀤𑀺𑀲𑁂𑀳𑀺 𑀏𑀯 𑀫𑀦𑀼𑀲𑁆𑀲𑁂𑀳𑀺 𑀦𑀺𑀭𑀦𑁆𑀢𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂𑀳𑀺 𑀧𑀽𑀭𑀺𑀢𑀸 𑀪𑀯𑁂𑀬𑁆𑀬. 𑀢𑁂 𑀲𑀩𑁆𑀩𑁂𑀯 𑀧𑀣𑀯𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸 𑀫𑀦𑀼𑀲𑁆𑀲𑀸 𑀧𑀜𑁆𑀚𑀮𑀺𑀓𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑀺𑀢𑀸 𑀓𑀺𑀢𑁆𑀢𑀬𑀼𑀁 𑀮𑁄𑀓𑀦𑀸𑀬𑀓𑀁 𑀮𑁄𑀓𑀦𑀸𑀬𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀕𑀼𑀡𑀁 𑀓𑀣𑁂𑀬𑁆𑀬𑀼𑀁.

𑁩𑁪𑁬. 𑀢𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀓𑀧𑁆𑀧𑀁 𑀯𑀸 𑀲𑀓𑀮𑀁 𑀓𑀧𑁆𑀧𑀁 𑀓𑀺𑀢𑁆𑀢𑀬𑀦𑁆𑀢𑀸 𑀕𑀼𑀡𑀁 𑀓𑀣𑁂𑀦𑁆𑀢𑀸𑀧𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀕𑀼𑀡𑁂𑀳𑀺 𑀓𑀺𑀢𑁆𑀢𑀬𑀼𑀁. 𑀢𑀣𑀸𑀧𑀺 𑀢𑁂 𑀲𑀩𑁆𑀩𑁂 𑀧𑀭𑀺𑀫𑁂𑀢𑀼𑀁 𑀕𑀼𑀡𑀧𑀫𑀸𑀡𑀁 𑀓𑀣𑁂𑀢𑀼𑀁 𑀦 𑀧𑀧𑁆𑀧𑁂𑀬𑁆𑀬𑀼𑀁 𑀦 𑀲𑀫𑁆𑀧𑀸𑀧𑀼𑀡𑁂𑀬𑁆𑀬𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀁. 𑀅𑀧𑁆𑀧𑀫𑁂𑀬𑁆𑀬𑁄 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀧𑀭𑀺𑀫𑁂𑀬𑁆𑀬𑁄 𑀕𑀼𑀡𑀸𑀢𑀺𑀭𑁂𑀓𑁄. 𑀏𑀢𑁂𑀦 𑀕𑀼𑀡𑀫𑀳𑀦𑁆𑀢𑀢𑀁 𑀤𑀻𑀧𑁂𑀢𑀺.

𑁩𑁪𑁭. 𑀲𑀓𑁂𑀦 𑀣𑀸𑀫𑁂𑀦 𑀅𑀢𑁆𑀢𑀦𑁄 𑀩𑀮𑁂𑀦 𑀳𑁂𑀝𑁆𑀞𑀸 𑀉𑀧𑀫𑀸𑀉𑀧𑀫𑁂𑀬𑁆𑀬𑀯𑀲𑁂𑀦 𑀚𑀺𑀦𑁄 𑀚𑀺𑀢𑀓𑀺𑀮𑁂𑀲𑁄 𑀩𑀼𑀤𑁆𑀥𑁄 𑀫𑀬𑀸 𑀓𑀺𑀢𑁆𑀢𑀺𑀢𑁄 𑀣𑁄𑀫𑀺𑀢𑁄 𑀬𑀣𑀸 𑀅𑀳𑁄𑀲𑀺, 𑀏𑀯𑀫𑁂𑀯 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀓𑀧𑁆𑀧𑀓𑁄𑀝𑀻𑀧𑀺 𑀓𑀧𑁆𑀧𑀓𑁄𑀝𑀺𑀲𑀢𑁂𑀧𑀺 𑀓𑀺𑀢𑁆𑀢𑁂𑀦𑁆𑀢𑀸 𑀧𑀓𑀺𑀢𑁆𑀢𑀬𑀼𑀁 𑀓𑀣𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄.

𑁩𑁪𑁮. 𑀧𑀼𑀦𑀧𑀺 𑀕𑀼𑀡𑀸𑀦𑀁 𑀅𑀧𑁆𑀧𑀫𑀸𑀡𑀢𑀁 𑀤𑀻𑀧𑁂𑀢𑀼𑀁 𑀲𑀘𑁂 𑀳𑀺 𑀓𑁄𑀘𑀺 𑀤𑁂𑀯𑁄 𑀯𑀸𑀢𑀺𑀆𑀤𑀺𑀫𑀸𑀳. 𑀧𑀽𑀭𑀺𑀢𑀁 𑀧𑀭𑀺𑀓𑀟𑁆𑀠𑁂𑀬𑁆𑀬𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀧𑀽𑀭𑀺𑀢𑀉𑀤𑀓𑀁 𑀲𑀫𑀦𑁆𑀢𑀢𑁄 𑀆𑀓𑀟𑁆𑀠𑁂𑀬𑁆𑀬. 𑀲𑁄 𑀧𑀼𑀕𑁆𑀕𑀮𑁄 𑀯𑀺𑀖𑀸𑀢𑀁 𑀤𑀼𑀓𑁆𑀔𑀫𑁂𑀯 𑀮𑀪𑁂𑀬𑁆𑀬 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁫𑁦. 𑀯𑀢𑁆𑀢𑁂𑀫𑀺 𑀚𑀺𑀦𑀲𑀸𑀲𑀦𑀦𑁆𑀢𑀺 𑀚𑀺𑀦𑁂𑀦 𑀪𑀸𑀲𑀺𑀢𑀁 𑀲𑀓𑀮𑀁 𑀧𑀺𑀝𑀓𑀢𑁆𑀢𑀬𑀁 𑀯𑀢𑁆𑀢𑁂𑀫𑀺 𑀧𑀯𑀢𑁆𑀢𑁂𑀫𑀺 𑀭𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁂𑀦𑀸𑀧𑀢𑀻𑀢𑀺 𑀥𑀫𑁆𑀫𑁂𑀦 𑀧𑀜𑁆𑀜𑀸𑀬 𑀪𑀕𑀯𑀢𑁄 𑀘𑀢𑀼𑀧𑀭𑀺𑀲𑀲𑀗𑁆𑀔𑀸𑀢𑀸𑀬 𑀧𑀭𑀺𑀲𑀸𑀬 𑀧𑀢𑀺 𑀧𑀥𑀸𑀦𑁄𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺. 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑁄 𑀯𑀺𑀬 𑀲𑀓𑀮𑀁 𑀩𑀼𑀤𑁆𑀥𑀲𑀸𑀲𑀦𑀁 𑀧𑀸𑀮𑁂𑀫𑀻𑀢𑀺 𑀅𑀢𑁆𑀣𑁄.

𑁩𑁫𑁨-𑁩. 𑀅𑀢𑁆𑀢𑀦𑁄 𑀲𑀁𑀲𑀸𑀭𑀧𑀭𑀺𑀩𑁆𑀪𑀫𑀁 𑀤𑀲𑁆𑀲𑁂𑀦𑁆𑀢𑁄 𑀬𑁄 𑀓𑁄𑀘𑀺 𑀫𑀦𑀼𑀚𑁄 𑀪𑀸𑀭𑀦𑁆𑀢𑀺𑀆𑀤𑀺𑀫𑀸𑀳. 𑀬𑁄 𑀓𑁄𑀘𑀺 𑀫𑀦𑀼𑀚𑁄 𑀫𑀸𑀦𑀼𑀲𑁄 𑀪𑀸𑀭𑀁 𑀲𑀻𑀲𑀪𑀸𑀭𑀁 𑀫𑀢𑁆𑀣𑀓𑁂 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀥𑀸𑀭𑁂𑀬𑁆𑀬 𑀯𑀳𑁂𑀬𑁆𑀬, 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀲𑁄 𑀫𑀦𑀼𑀚𑁄 𑀢𑁂𑀦 𑀪𑀸𑀭𑁂𑀦 𑀤𑀼𑀓𑁆𑀔𑀺𑀢𑁄 𑀧𑀻𑀴𑀺𑀢𑁄 𑀅𑀢𑀺𑀪𑀽𑀢𑁄 𑀅𑀲𑁆𑀲 𑀪𑀯𑁂𑀬𑁆𑀬. 𑀪𑀸𑀭𑁄 𑀪𑀭𑀺𑀢𑀪𑀸𑀭𑁄 𑀪𑀭𑀺𑀢𑁄 𑀅𑀢𑀻𑀯 𑀪𑀸𑀭𑀺𑀢𑁄. 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀅𑀳𑀁 𑀭𑀸𑀕𑀕𑁆𑀕𑀺𑀤𑁄𑀲𑀕𑁆𑀕𑀺𑀫𑁄𑀳𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀫𑀸𑀦𑁄, 𑀕𑀺𑀭𑀺𑀁 𑀉𑀤𑁆𑀥𑀭𑀺𑀢𑁄 𑀬𑀣𑀸 𑀫𑀳𑀸𑀫𑁂𑀭𑀼𑀧𑀩𑁆𑀩𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑁂 𑀞𑀧𑀺𑀢𑁄 𑀪𑀯𑀪𑀸𑀭𑁂𑀦 𑀪𑀯𑀲𑀁𑀲𑀸𑀭𑀼𑀧𑁆𑀧𑀢𑁆𑀢𑀺𑀪𑀸𑀭𑁂𑀦, 𑀪𑀭𑀺𑀢𑁄 𑀤𑀼𑀓𑁆𑀔𑀺𑀢𑁄 𑀪𑀯𑁂𑀲𑀼 𑀲𑀁𑀲𑀭𑀺𑀁 𑀧𑀭𑀺𑀩𑁆𑀪𑀫𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁫𑁪. 𑀑𑀭𑁄𑀧𑀺𑀢𑁄 𑀘 𑀫𑁂 𑀪𑀸𑀭𑁄𑀢𑀺 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄 𑀪𑀯𑀪𑀸𑀭𑁄 𑀫𑀬𑀸 𑀑𑀭𑁄𑀧𑀺𑀢𑁄 𑀦𑀺𑀓𑁆𑀔𑀺𑀢𑁆𑀢𑁄. 𑀪𑀯𑀸 𑀉𑀕𑁆𑀖𑀸𑀝𑀺𑀢𑀸 𑀫𑀬𑀸𑀢𑀺 𑀲𑀩𑁆𑀩𑁂 𑀦𑀯 𑀪𑀯𑀸 𑀫𑀬𑀸 𑀯𑀺𑀤𑁆𑀥𑀁𑀲𑀺𑀢𑀸. 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀬𑀁 𑀓𑀭𑀡𑀻𑀬𑀁 𑀓𑀢𑁆𑀢𑀩𑁆𑀩𑀁 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀫𑀬𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁫𑁫. 𑀧𑀼𑀦 𑀅𑀢𑁆𑀢𑀦𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀯𑀢𑀸 𑀬𑀢𑁆𑀢𑀓𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁂 𑀩𑀼𑀤𑁆𑀥𑀔𑁂𑀢𑁆𑀢𑁂 𑀲𑀓𑁆𑀬𑀧𑀼𑀗𑁆𑀕𑀯𑀁 𑀲𑀓𑁆𑀬𑀓𑀼𑀮𑀚𑁂𑀝𑁆𑀞𑀓𑀁 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀲𑀢𑁆𑀢𑁂𑀲𑀼 𑀓𑁄𑀘𑀺𑀧𑀺 𑀧𑀜𑁆𑀜𑀸𑀬 𑀫𑁂 𑀫𑀬𑀸 𑀲𑀫𑁄 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 𑁋 ‘‘𑀅𑀳𑀁 𑀅𑀕𑁆𑀕𑁄𑀫𑁆𑀳𑀺 𑀧𑀜𑁆𑀜𑀸𑀬, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺.

𑁩𑁫𑁬. 𑀧𑀼𑀦 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀫𑀸𑀥𑀺𑀫𑁆𑀳𑀻𑀢𑁆𑀬𑀸𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁩𑁬𑁦. 𑀛𑀸𑀦𑀯𑀺𑀫𑁄𑀓𑁆𑀔𑀸𑀦𑀔𑀺𑀧𑁆𑀧𑀧𑀝𑀺𑀮𑀸𑀪𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀛𑀸𑀦𑀸𑀦𑀁 𑀮𑁄𑀓𑀢𑁄 𑀯𑀺𑀫𑀼𑀘𑁆𑀘𑀦𑀢𑁄 ‘‘𑀯𑀺𑀫𑁄𑀓𑁆𑀔’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀸𑀦𑀜𑁆𑀘 𑀔𑀺𑀧𑁆𑀧𑀮𑀸𑀪𑀻 𑀲𑀻𑀖𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑁩𑁬𑁨. 𑀏𑀯𑀁 𑀫𑀳𑀸𑀦𑀼𑀪𑀸𑀯𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀕𑀸𑀭𑀯𑀩𑀳𑀼𑀫𑀸𑀦𑀢𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀯𑀺𑀲𑁄𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑁆𑀥𑀢𑀯𑀺𑀲𑁄 𑀉𑀧𑁆𑀧𑀸𑀝𑀺𑀢𑀖𑁄𑀭𑀯𑀺𑀲𑁄 𑀲𑀧𑁆𑀧𑁄 𑀇𑀯 𑀙𑀺𑀦𑁆𑀦𑀯𑀺𑀲𑀸𑀡𑁄𑀯 𑀙𑀺𑀦𑁆𑀤𑀺𑀢𑀲𑀺𑀗𑁆𑀕𑁄 𑀉𑀲𑀪𑁄 𑀇𑀯 𑀅𑀳𑀁 𑀇𑀤𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀫𑀸𑀦𑀤𑀧𑁆𑀧𑁄𑀯 𑀙𑀟𑁆𑀟𑀺𑀢𑀕𑁄𑀢𑁆𑀢𑀫𑀤𑀸𑀤𑀺𑀫𑀸𑀦𑀤𑀧𑁆𑀧𑁄𑀯 𑀕𑀡𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑀁 𑀕𑀭𑀼𑀕𑀸𑀭𑀯𑁂𑀦 𑀆𑀤𑀭𑀩𑀳𑀼𑀫𑀸𑀦𑁂𑀦 𑀉𑀧𑁂𑀫𑀺 𑀉𑀧𑀕𑀘𑁆𑀙𑀸𑀫𑀺.

𑁩𑁬𑁩. 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀫𑀳𑀢𑁆𑀢𑀢𑀁 𑀧𑀓𑀸𑀲𑁂𑀦𑁆𑀢𑁄 𑀬𑀤𑀺𑀭𑀽𑀧𑀺𑀦𑀻𑀢𑀺𑀆𑀤𑀺𑀫𑀸𑀳. 𑀏𑀯𑀭𑀽𑀧𑀸 𑀫𑁂 𑀫𑀳𑀢𑀻 𑀧𑀜𑁆𑀜𑀸 𑀅𑀭𑀽𑀧𑀺𑀦𑀻 𑀲𑀫𑀸𑀦𑀸 𑀬𑀤𑀺 𑀭𑀽𑀧𑀺𑀦𑀻 𑀪𑀯𑁂𑀬𑁆𑀬, 𑀢𑀤𑀸 𑀫𑁂 𑀫𑀫 𑀧𑀜𑁆𑀜𑀸 𑀯𑀲𑀼𑀧𑀢𑀻𑀦𑀁 𑀧𑀣𑀯𑀺𑀲𑁆𑀲𑀭𑀸𑀦𑀁 𑀭𑀸𑀚𑀽𑀦𑀁 𑀲𑀫𑁂𑀬𑁆𑀬 𑀲𑀫𑀸 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀫𑀳𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀼𑀩𑁆𑀩𑁂 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀅𑀦𑁄𑀫𑀤𑀲𑁆𑀲𑀺𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀫𑀬𑀸 𑀓𑀢𑀸𑀬 𑀜𑀸𑀡𑀣𑁄𑀫𑀦𑀸𑀬 𑀨𑀮𑀁 𑀏𑀢𑀁 𑀫𑀫 𑀧𑀜𑁆𑀜𑀸𑀫𑀳𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁬𑁪. 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀏𑀢𑁆𑀣 𑀘𑀓𑁆𑀓-𑀲𑀤𑁆𑀤𑁄 𑀧𑀦𑀸𑀬𑀁 ‘‘𑀘𑀢𑀼𑀘𑀓𑁆𑀓𑀬𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀸𑀳𑀦𑁂 𑀯𑀢𑁆𑀢𑀢𑀺. ‘‘𑀧𑀯𑀢𑁆𑀢𑀺𑀢𑁂 𑀘 𑀧𑀦 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑁂’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁭; 𑀲𑀁. 𑀦𑀺. 𑁫.𑁧𑁦𑁮𑁧) 𑀤𑁂𑀲𑀦𑀸𑀬𑀁. ‘‘𑀘𑀓𑁆𑀓𑀁 𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁭.𑁧𑁪𑁯) 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀁. ‘‘𑀘𑀓𑁆𑀓𑀁 𑀯𑀢𑁆𑀢𑁂𑀢𑀺 𑀅𑀳𑁄𑀭𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀇𑀭𑀺𑀬𑀸𑀧𑀣𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀔𑀼𑀭𑀘𑀓𑁆𑀓𑁂 ‘‘𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀘𑀓𑁆𑀓𑀸𑀦𑀼𑀪𑀸𑀯𑁂𑀦 𑀯𑀢𑁆𑀢𑀦𑀓𑁄’’𑀢𑀺𑀆𑀤𑀻𑀲𑀼 (𑀇𑀢𑀺𑀯𑀼. 𑁨𑁨; 𑀤𑀻. 𑀦𑀺. 𑁧.𑁨𑁫𑁮) 𑀭𑀢𑀦𑀘𑀓𑁆𑀓𑁂. 𑀇𑀥 𑀧𑀦𑀸𑀬𑀁 𑀤𑁂𑀲𑀦𑀸𑀬𑀁. 𑀢𑀸𑀤𑀺𑀦𑀸 𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 𑀲𑀓𑁆𑀬𑀧𑀼𑀢𑁆𑀢𑁂𑀦 𑀕𑁄𑀢𑀫𑀲𑀫𑁆𑀩𑀼𑀤𑁆𑀥𑁂𑀦 𑀧𑀯𑀢𑁆𑀢𑀺𑀢𑀁 𑀤𑁂𑀲𑀺𑀢𑀁 𑀧𑀺𑀝𑀓𑀢𑁆𑀢𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀘𑀓𑁆𑀓𑀁 𑀅𑀳𑀁 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑁂𑀦 𑀅𑀦𑀼𑀯𑀢𑁆𑀢𑁂𑀫𑀺 𑀅𑀦𑀼𑀕𑀦𑁆𑀢𑁆𑀯𑀸 𑀯𑀢𑁆𑀢𑁂𑀫𑀺, 𑀤𑁂𑀲𑁂𑀫𑀺 𑀤𑁂𑀲𑀦𑀁 𑀓𑀭𑁄𑀫𑀺. 𑀇𑀤𑀁 𑀅𑀦𑀼𑀯𑀢𑁆𑀢𑀦𑀁 𑀤𑁂𑀲𑀺𑀢𑀲𑁆𑀲 𑀅𑀦𑀼𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀤𑁂𑀲𑀦𑀁 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀓𑀢𑀸𑀬 𑀜𑀸𑀡𑀣𑁄𑀫𑀦𑀸𑀬 𑀨𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁬𑁫. 𑀢𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀼𑀜𑁆𑀜𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀫𑀸 𑀫𑁂 𑀓𑀤𑀸𑀘𑀺 𑀧𑀸𑀧𑀺𑀘𑁆𑀙𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀺𑀘𑁆𑀙𑁄 𑀮𑀸𑀫𑀓𑀸𑀬 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀸𑀧𑀘𑀸𑀭𑀻 𑀧𑀼𑀕𑁆𑀕𑀮𑁄 𑀘 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑁂 𑀓𑀼𑀲𑀻𑀢𑁄 𑀘 𑀛𑀸𑀦𑀲𑀫𑀸𑀥𑀺𑀫𑀕𑁆𑀕𑀪𑀸𑀯𑀦𑀸𑀤𑀻𑀲𑀼 𑀳𑀻𑀦𑀯𑀻𑀭𑀺𑀬𑁄 𑀘 𑀕𑀦𑁆𑀣𑀥𑀼𑀭𑀯𑀺𑀧𑀲𑁆𑀲𑀦𑀸𑀥𑀼𑀭𑀯𑀺𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀲𑁆𑀲𑀼𑀢𑁄 𑀘 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀲𑀼 𑀆𑀘𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑀸𑀘𑀸𑀭𑁄 𑀘 𑀧𑀼𑀕𑁆𑀕𑀮𑁄 𑀓𑀤𑀸𑀘𑀺 𑀓𑀸𑀮𑁂 𑀓𑀢𑁆𑀣𑀘𑀺 𑀞𑀸𑀦𑁂 𑀫𑁂 𑀫𑀬𑀸 𑀲𑀳 𑀲𑀫𑁂𑀢𑁄 𑀲𑀫𑀸𑀕𑀢𑁄 𑀫𑀸 𑀅𑀳𑀼 𑀫𑀸 𑀪𑀯𑀢𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁬𑁬. 𑀩𑀳𑀼𑀲𑁆𑀲𑀼𑀢𑁄𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀤𑀼𑀯𑀺𑀥𑁄 𑀩𑀳𑀼𑀲𑁆𑀲𑀼𑀢𑁄 𑀘 𑀧𑀼𑀕𑁆𑀕𑀮𑁄. 𑀫𑁂𑀥𑀸𑀯𑀻𑀢𑀺 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀘. 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀻𑀮𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑀲𑀻𑀮𑀸𑀤𑀻𑀲𑀼 𑀲𑀼𑀝𑁆𑀞𑀼 𑀆𑀳𑀺𑀢𑁄 𑀞𑀧𑀺𑀢𑀘𑀺𑀢𑁆𑀢𑁄 𑀘. 𑀘𑁂𑀢𑁄𑀲𑀫𑀣𑀸𑀦𑀼𑀬𑀼𑀢𑁆𑀢𑁄𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀻𑀪𑀸𑀯𑀫𑀦𑀼𑀬𑀼𑀢𑁆𑀢𑁄 𑀘 𑀧𑀼𑀕𑁆𑀕𑀮𑁄. 𑀅𑀧𑀺 𑀫𑀼𑀤𑁆𑀥𑀦𑀺 𑀢𑀺𑀝𑁆𑀞𑀢𑀼 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀫𑀬𑁆𑀳𑀁 𑀫𑀼𑀤𑁆𑀥𑀦𑀺 𑀲𑀺𑀭𑀲𑀺 𑀅𑀧𑀺 𑀢𑀺𑀝𑁆𑀞𑀢𑀽𑀢𑀺 𑀅𑀢𑁆𑀣𑁄.

𑁩𑁬𑁭. 𑀅𑀢𑁆𑀢𑀦𑁄 𑀮𑀤𑁆𑀥𑀨𑀮𑀸𑀦𑀺𑀲𑀁𑀲𑀁 𑀯𑀢𑁆𑀯𑀸 𑀢𑀢𑁆𑀣𑀜𑁆𑀜𑁂 𑀦𑀺𑀬𑁄𑀚𑁂𑀦𑁆𑀢𑁄 𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁩𑁬𑁮-𑁯. 𑀬𑀫𑀳𑀦𑁆𑀢𑀺 𑀬𑀁 𑀅𑀲𑁆𑀲𑀚𑀺𑀢𑁆𑀣𑁂𑀭𑀁 𑀅𑀳𑀁 𑀧𑀞𑀫𑀁 𑀆𑀤𑀺𑀫𑁆𑀳𑀺 𑀤𑀺𑀲𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀯𑀺𑀫𑀮𑁄 𑀫𑀮𑀭𑀳𑀺𑀢𑁄 𑀅𑀳𑀼𑀁 𑀅𑀳𑁄𑀲𑀺, 𑀲𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑁄 𑀫𑁂 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀺𑀓𑁆𑀔𑀸𑀧𑀓𑁄 𑀅𑀳𑀼𑀁. 𑀅𑀳𑀁 𑀢𑀲𑁆𑀲 𑀲𑀯𑀦𑀸𑀬 𑀅𑀦𑀼𑀲𑀸𑀲𑀦𑁂𑀦 𑀅𑀚𑁆𑀚 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀳𑀼𑀁. 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀼 𑀕𑀼𑀡𑁂𑀲𑀼 𑀧𑀸𑀭𑀫𑀺𑀁 𑀧𑀢𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑁄 𑀅𑀦𑀸𑀲𑀯𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀺𑀳𑀭𑀸𑀫𑀺.

𑁩𑁭𑁦. 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂 𑀲𑀕𑀸𑀭𑀯𑀁 𑀤𑀲𑁆𑀲𑁂𑀦𑁆𑀢𑁄 𑀬𑁄 𑀫𑁂 𑀆𑀘𑀭𑀺𑀬𑁄𑀢𑀺𑀆𑀤𑀺𑀫𑀸𑀳. 𑀬𑁄 𑀅𑀲𑁆𑀲𑀚𑀺 𑀦𑀸𑀫 𑀣𑁂𑀭𑁄 𑀲𑀢𑁆𑀣𑀼 𑀲𑀸𑀯𑀓𑁄 𑀫𑁂 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀆𑀲𑀺 𑀅𑀳𑁄𑀲𑀺, 𑀲𑁄 𑀣𑁂𑀭𑁄 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀬𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀯𑀲𑀢𑀺, 𑀅𑀳𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀉𑀲𑁆𑀲𑀻𑀲𑀫𑁆𑀳𑀺 𑀲𑀻𑀲𑀼𑀧𑀭𑀺𑀪𑀸𑀕𑁂 𑀓𑀭𑁄𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁭𑁧. 𑀢𑀢𑁄 𑀅𑀢𑁆𑀢𑀦𑁄 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀫𑀫 𑀓𑀫𑁆𑀫𑀦𑁆𑀢𑀺𑀆𑀤𑀺𑀫𑀸𑀳. 𑀕𑁄𑀢𑀫𑁄 𑀪𑀕𑀯𑀸 𑀲𑀓𑁆𑀬𑀧𑀼𑀗𑁆𑀕𑀯𑁄 𑀲𑀓𑁆𑀬𑀓𑀼𑀮𑀓𑁂𑀢𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀫𑀫 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦 𑀜𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀅𑀕𑁆𑀕𑀝𑁆𑀞𑀸𑀦𑁂 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑁂 𑀫𑀁 𑀞𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁭𑁪. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀘, 𑀢𑀸𑀲𑀁 𑀪𑁂𑀤𑁄 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁭𑁬; 𑀯𑀺𑀪. 𑁭𑁧𑁮) 𑀯𑀼𑀢𑁆𑀢𑁄𑀬𑁂𑀯. 𑀘𑀢𑀼𑀫𑀕𑁆𑀕𑀘𑀢𑀼𑀨𑀮𑀯𑀲𑁂𑀦 𑀯𑀸 𑀭𑀽𑀧𑀸𑀭𑀽𑀧𑀛𑀸𑀦𑀯𑀲𑁂𑀦 𑀯𑀸 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀲𑀁𑀲𑀸𑀭𑀯𑀺𑀫𑀼𑀘𑁆𑀘𑀦𑀥𑀫𑁆𑀫𑀸 𑀘 𑀇𑀤𑁆𑀥𑀺𑀯𑀺𑀥𑀸𑀤𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄 𑀘 𑀲𑀘𑁆𑀙𑀺𑀓𑀢𑀸 𑀧𑀘𑁆𑀘𑀓𑁆𑀔𑀁 𑀓𑀢𑀸. 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀅𑀦𑀼𑀲𑀺𑀝𑁆𑀞𑀺 𑀑𑀯𑀸𑀤𑀲𑀗𑁆𑀔𑀸𑀢𑀁 𑀲𑀸𑀲𑀦𑀁 𑀓𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀦𑀺𑀧𑁆𑀨𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀢𑁆𑀣𑀁 𑀲𑀼𑀤𑀦𑁆𑀢𑀺 𑀏𑀢𑁆𑀣 𑀇𑀢𑁆𑀣𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀲𑀓𑀮𑀲𑀸𑀭𑀺𑀧𑀼𑀢𑁆𑀢𑀸𑀧𑀤𑀸𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀼𑀤𑀦𑁆𑀢𑀺 𑀧𑀤𑀧𑀽𑀭𑀡𑁂 𑀦𑀺𑀧𑀸𑀢𑁄. 𑀆𑀬𑀲𑁆𑀫𑀸𑀢𑀺 𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁. 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀫𑀸𑀢𑀼 𑀦𑀸𑀫𑀯𑀲𑁂𑀦 𑀓𑀢𑀦𑀸𑀫𑀥𑁂𑀬𑁆𑀬𑁄 𑀣𑁂𑀭𑁄. 𑀇𑀫𑀸 𑀕𑀸𑀣𑀸𑀬𑁄𑀢𑀺 𑀇𑀫𑀸 𑀲𑀓𑀮𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀧𑀤𑀸𑀦𑀕𑀸𑀣𑀸𑀬𑁄 𑀅𑀪𑀸𑀲𑀺 𑀓𑀣𑁂𑀲𑀺. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀲𑀓𑀮𑀁 𑀲𑀸𑀭𑀺𑀧𑀼𑀢𑁆𑀢𑀸𑀧𑀤𑀸𑀦𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁨. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸𑀢𑁆𑀬𑀸𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀜𑁆𑀘 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂𑀢𑀺𑀆𑀤𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀫𑁂𑀯. 𑀣𑁂𑀭𑁄 𑀳𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀕𑀥𑀭𑀝𑁆𑀞𑁂 𑀓𑀮𑁆𑀮𑀯𑀸𑀮𑀕𑀸𑀫𑀓𑀁 𑀉𑀧𑀦𑀺𑀲𑁆𑀲𑀸𑀬 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀣𑀺𑀦𑀫𑀺𑀤𑁆𑀥𑁂 𑀑𑀓𑁆𑀓𑀫𑀦𑁆𑀢𑁂 𑀲𑀢𑁆𑀣𑀸𑀭𑀸 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀫𑀸 𑀢𑀼𑀘𑁆𑀙𑁄 𑀢𑀯 𑀯𑀸𑀬𑀸𑀫𑁄’’𑀢𑀺𑀆𑀤𑀺𑀦𑀸 𑀲𑀁𑀯𑁂𑀚𑀺𑀢𑁄 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀪𑀕𑀯𑀢𑀸 𑀯𑀼𑀘𑁆𑀘𑀫𑀸𑀦𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀡𑀦𑁆𑀢𑁄 𑀏𑀯 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁 𑀅𑀥𑀺𑀕𑀦𑁆𑀢𑁆𑀯𑀸 𑀅𑀕𑁆𑀕𑀨𑀮𑀓𑁆𑀔𑀡𑁂 𑀲𑀸𑀯𑀓𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺.

𑁩𑁭𑁫. 𑀏𑀯𑀁 𑀤𑀼𑀢𑀺𑀬𑀲𑀸𑀯𑀓𑀪𑀸𑀯𑀁 𑀧𑀢𑁆𑀯𑀸 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀬𑀁 𑀅𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀑𑀫𑀁 𑀅𑀮𑀸𑀫𑀓𑀁 𑀤𑀲𑁆𑀲𑀦𑀁 𑀧𑀲𑁆𑀲𑀦𑀁 𑀅𑀲𑁆𑀲𑀸𑀢𑀺 𑀅𑀦𑁄𑀫𑀤𑀲𑁆𑀲𑀻. 𑀢𑀲𑁆𑀲 𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀲𑀭𑀻𑀭𑀢𑁆𑀢𑀸 𑀲𑀓𑀮𑀁 𑀤𑀺𑀯𑀲𑀁 𑀲𑀓𑀮𑀁 𑀫𑀸𑀲𑀁 𑀲𑀓𑀮𑀁 𑀲𑀁𑀯𑀘𑁆𑀙𑀭𑀁 𑀲𑀁𑀯𑀘𑁆𑀙𑀭𑀲𑀢𑀲𑀳𑀲𑁆𑀲𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀁 𑀤𑀲𑁆𑀲𑀦𑀦𑁆𑀢𑀺, 𑀅𑀦𑁄𑀫𑀁 𑀅𑀮𑀸𑀫𑀓𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀦𑀲𑀻𑀮𑁄𑀢𑀺 𑀯𑀸 ‘‘𑀅𑀦𑁄𑀫𑀤𑀲𑁆𑀲𑀻’’𑀢𑀺 𑀮𑀤𑁆𑀥𑀦𑀸𑀫𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸. 𑀮𑁄𑀓𑀚𑁂𑀝𑁆𑀞𑁄𑀢𑀺 𑀲𑀓𑀮𑀲𑀢𑁆𑀢𑀮𑁄𑀓𑀲𑁆𑀲 𑀚𑁂𑀝𑁆𑀞𑁄 𑀧𑀥𑀸𑀦𑁄. 𑀆𑀲𑀪𑀲𑀤𑀺𑀲𑀢𑁆𑀢𑀸 𑀆𑀲𑀪𑁄, 𑀦𑀭𑀸𑀦𑀁 𑀆𑀲𑀪𑁄 𑀦𑀭𑀸𑀲𑀪𑁄. 𑀲𑁄 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄 𑀤𑁂𑀯𑀲𑀫𑀽𑀳𑁂𑀳𑀺 𑀧𑀭𑀺𑀯𑀸𑀭𑀺𑀢𑁄. 𑀳𑀺𑀫𑀯𑀦𑁆𑀢𑀫𑁆𑀳𑀺 𑀯𑀺𑀳𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁭𑁬. 𑀬𑀤𑀸 𑀤𑀼𑀢𑀺𑀬𑀲𑀸𑀯𑀓𑀪𑀸𑀯𑀸𑀬 𑀤𑀼𑀢𑀺𑀬𑀯𑀸𑀭𑁂 𑀧𑀢𑁆𑀣𑀦𑀁 𑀅𑀓𑀸𑀲𑀺, 𑀢𑀤𑀸 𑀦𑀸𑀫𑁂𑀦 𑀯𑀭𑀼𑀡𑁄 𑀦𑀸𑀫 𑀅𑀳𑀁 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀭𑀼𑀡𑁄 𑀦𑀸𑀫 𑀦𑀸𑀫𑁂𑀦, 𑀦𑀸𑀕𑀭𑀸𑀚𑀸 𑀅𑀳𑀁 𑀢𑀤𑀸’’𑀢𑀺. 𑀓𑀸𑀫𑀭𑀽𑀧𑀻𑀢𑀺 𑀬𑀤𑀺𑀘𑁆𑀙𑀺𑀢𑀓𑀸𑀫𑀦𑀺𑀫𑁆𑀫𑀸𑀦𑀲𑀻𑀮𑁄. 𑀯𑀺𑀓𑀼𑀩𑁆𑀩𑀸𑀫𑀻𑀢𑀺 𑀯𑀺𑀯𑀺𑀥𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀭𑁄𑀫𑀺. 𑀫𑀳𑁄𑀤𑀥𑀺𑀦𑀺𑀯𑀸𑀲𑀳𑀦𑁆𑀢𑀺 𑀫𑀜𑁆𑀚𑁂𑀭𑀺𑀓𑀸 𑀦𑀸𑀕𑀸, 𑀪𑀽𑀫𑀺𑀕𑀢𑀸 𑀦𑀸𑀕𑀸, 𑀧𑀩𑁆𑀩𑀢𑀝𑁆𑀞𑀸 𑀦𑀸𑀕𑀸, 𑀕𑀗𑁆𑀕𑀸𑀯𑀳𑁂𑀬𑁆𑀬𑀸 𑀦𑀸𑀕𑀸, 𑀲𑀸𑀫𑀼𑀤𑁆𑀤𑀺𑀓𑀸 𑀦𑀸𑀕𑀸𑀢𑀺 𑀇𑀫𑁂𑀲𑀁 𑀦𑀸𑀕𑀸𑀦𑀁 𑀅𑀦𑁆𑀢𑀭𑁂 𑀲𑀸𑀫𑀼𑀤𑁆𑀤𑀺𑀓𑀦𑀸𑀕𑁄 𑀅𑀳𑀁 𑀫𑀳𑁄𑀤𑀥𑀺𑀫𑁆𑀳𑀺 𑀲𑀫𑀼𑀤𑁆𑀤𑁂 𑀦𑀺𑀯𑀸𑀲𑀺𑀁, 𑀯𑀸𑀲𑀁 𑀓𑀧𑁆𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁭𑁭. 𑀲𑀗𑁆𑀕𑀡𑀺𑀬𑀁 𑀕𑀡𑀁 𑀳𑀺𑀢𑁆𑀯𑀸𑀢𑀺 𑀦𑀺𑀘𑁆𑀘𑀧𑀭𑀺𑀯𑀸𑀭𑀪𑀽𑀢𑀁 𑀲𑀓𑀧𑀭𑀺𑀯𑀸𑀭𑀁 𑀦𑀸𑀕𑀲𑀫𑀽𑀳𑀁 𑀳𑀺𑀢𑁆𑀯𑀸 𑀯𑀺𑀦𑀸 𑀳𑀼𑀢𑁆𑀯𑀸. 𑀢𑀽𑀭𑀺𑀬𑀁 𑀧𑀝𑁆𑀞𑀧𑁂𑀲𑀳𑀦𑁆𑀢𑀺 𑀅𑀳𑀁 𑀢𑀽𑀭𑀺𑀬𑀁 𑀧𑀝𑁆𑀞𑀧𑁂𑀲𑀺𑀁, 𑀯𑀚𑁆𑀚𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀼𑀤𑁆𑀥𑀁 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀅𑀦𑁄𑀫𑀤𑀲𑁆𑀲𑀺𑀲𑀫𑁆𑀩𑀼𑀤𑁆𑀥𑀁 𑀲𑀫𑀦𑁆𑀢𑀢𑁄 𑀲𑁂𑀯𑀫𑀸𑀦𑀸 𑀅𑀘𑁆𑀙𑀭𑀸 𑀦𑀸𑀕𑀫𑀸𑀡𑀯𑀺𑀓𑀸 𑀯𑀸𑀤𑁂𑀲𑀼𑀁 𑀤𑀺𑀩𑁆𑀩𑀯𑀸𑀤𑁂𑀳𑀺 𑀕𑀻𑀢𑀸 𑀯𑀸𑀓𑁆𑀬𑀸𑀤𑀻𑀳𑀺 𑀯𑀸𑀤𑁂𑀲𑀼𑀁 𑀮𑀤𑁆𑀥𑀸𑀦𑀼𑀭𑀽𑀧𑀢𑁄 𑀯𑀚𑁆𑀚𑁂𑀲𑀼𑀁 𑀢𑀤𑀸𑀢𑀺 𑀅𑀢𑁆𑀣𑁄.

𑁩𑁭𑁮. 𑀯𑀚𑁆𑀚𑀫𑀸𑀦𑁂𑀲𑀼 𑀢𑀽𑀭𑁂𑀲𑀽𑀢𑀺 𑀫𑀦𑀼𑀲𑁆𑀲𑀦𑀸𑀕𑀢𑀽𑀭𑀺𑀬𑁂𑀲𑀼 𑀧𑀜𑁆𑀘𑀗𑁆𑀕𑀺𑀓𑁂𑀲𑀼 𑀯𑀚𑁆𑀚𑀫𑀸𑀦𑁂𑀲𑀼. 𑀤𑁂𑀯𑀸 𑀢𑀽𑀭𑀸𑀦𑀺 𑀯𑀚𑁆𑀚𑀬𑀼𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀤𑀺𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀚𑁆𑀚𑀺𑀁𑀲𑀼 𑀯𑀸𑀤𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀺𑀦𑁆𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦𑀸𑀢𑀺 𑀉𑀪𑀺𑀦𑁆𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀪𑁂𑀭𑀺𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀢𑀺𑀮𑁄𑀓𑀕𑀭𑀼𑀲𑀫𑀸𑀦𑁄𑀧𑀺 𑀩𑀼𑀤𑁆𑀥𑁄 𑀲𑀫𑁆𑀧𑀩𑀼𑀚𑁆𑀛𑀣 𑀚𑀸𑀦𑀸𑀢𑀺 𑀲𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁯. 𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀲𑀸𑀯𑀓𑀲𑀗𑁆𑀖𑀁 𑀲𑀫𑁆𑀩𑀼𑀤𑁆𑀥𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸. 𑀲𑀓𑀪𑀯𑀦𑀦𑁆𑀢𑀺 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀁 𑀉𑀧𑀸𑀕𑀫𑀺𑀁. 𑀕𑀦𑁆𑀢𑁆𑀯𑀸 𑀘 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀦𑀸𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀓𑀼𑀝𑀺𑀫𑀡𑁆𑀟𑀧𑀲𑀬𑀦𑀦𑀺𑀲𑀻𑀤𑀦𑀝𑁆𑀞𑀸𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀸𑀮𑀫𑀸𑀭𑁄𑀘𑀬𑀺𑀁 𑀅𑀳𑀦𑁆𑀢𑀺 𑀏𑀯𑀁 𑀓𑀢𑀧𑀼𑀩𑁆𑀩𑀯𑀺𑀥𑀸𑀦𑁄 𑀅𑀳𑀁 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺 𑀓𑀸𑀮𑀁 𑀆𑀭𑁄𑀘𑀬𑀺𑀁 𑀯𑀺𑀜𑁆𑀜𑀸𑀧𑁂𑀲𑀺𑀁.

𑁩𑁮𑁦. 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀻𑀢𑀺 𑀢𑀤𑀸 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀮𑁄𑀓𑀦𑀸𑀬𑀓𑁄 𑀲𑀩𑁆𑀩𑀸 𑀤𑀺𑀲𑀸 𑀑𑀪𑀸𑀲𑁂𑀦𑁆𑀢𑁄 𑀫𑁂 𑀪𑀯𑀦𑀁 𑀉𑀧𑀸𑀕𑀫𑀺 𑀲𑀫𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁩𑁮𑁧. 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀯𑀺𑀝𑁆𑀞𑀁 𑀪𑀕𑀯𑀦𑁆𑀢𑀁 𑀪𑁄𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀉𑀧𑀯𑀺𑀝𑁆𑀞𑀁 𑀫𑀳𑀸𑀯𑀻𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁩𑁮𑁬. 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄𑀢𑀺 𑀑𑀓𑁆𑀓𑀸𑀓𑀭𑀜𑁆𑀜𑁄 𑀧𑀭𑀫𑁆𑀧𑀭𑀸𑀕𑀢𑀭𑀸𑀚𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀭𑀸𑀚𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀯𑀸 𑀕𑁄𑀢𑁆𑀢𑁂𑀦 𑀕𑁄𑀢𑁆𑀢𑀯𑀲𑁂𑀦 𑀕𑁄𑀢𑀫𑁄 𑀦𑀸𑀫 𑀲𑀢𑁆𑀣𑀸 𑀫𑀦𑀼𑀲𑁆𑀲𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁩𑁮𑁮. 𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦𑀸𑀢𑀺 𑀲𑁄 𑀦𑀸𑀕𑀭𑀸𑀚𑀸 𑀧𑀘𑁆𑀙𑀸 𑀧𑀘𑁆𑀙𑀺𑀫𑀪𑀯𑁂 𑀓𑀼𑀲𑀮𑀫𑀽𑀮𑁂𑀦 𑀧𑀼𑀜𑁆𑀜𑀲𑀫𑁆𑀪𑀸𑀭𑁂𑀦 𑀘𑁄𑀤𑀺𑀢𑁄 𑀉𑀬𑁆𑀬𑁄𑀚𑀺𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄 𑀳𑁂𑀲𑁆𑀲𑀢𑀻𑀢𑀺 𑀩𑁆𑀬𑀸𑀓𑀭𑀡𑀫𑀓𑀸𑀲𑀺.

𑁩𑁮𑁯. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀯𑀻𑀭𑀺𑀬𑀯𑀸. 𑀧𑀳𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑁂 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄𑀢𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 (𑀅. 𑀦𑀺. 𑁧.𑁧𑁮𑁦, 𑁧𑁯𑁦) 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀆𑀤𑀻𑀲𑀼 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄 𑀧𑀢𑁆𑀢𑁄. 𑀲𑀩𑁆𑀩𑀸𑀲𑀯𑁂𑀢𑀺 𑀆 𑀲𑀫𑀦𑁆𑀢𑀢𑁄 𑀲𑀯𑀦𑀢𑁄 𑀧𑀯𑀢𑁆𑀢𑀦𑀢𑁄 ‘‘𑀆𑀲𑀯𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀓𑀸𑀫𑀪𑀯𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀥𑀫𑁆𑀫𑁂 𑀲𑀩𑁆𑀩𑁂 𑀧𑀭𑀺𑀜𑁆𑀜𑀸𑀬 𑀲𑀫𑀦𑁆𑀢𑀢𑁄 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀅𑀦𑀸𑀲𑀯𑁄 𑀦𑀺𑀓𑁆𑀓𑀺𑀮𑁂𑀲𑁄. 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀓𑀺𑀮𑁂𑀲𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁯𑁦. 𑀏𑀯𑀁 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀯𑀲𑁂𑀦 𑀮𑀤𑁆𑀥𑀩𑁆𑀬𑀸𑀓𑀭𑀡𑀁 𑀯𑀢𑁆𑀯𑀸 𑀧𑀼𑀦 𑀧𑀸𑀧𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑁄 𑀧𑀸𑀧𑀫𑀺𑀢𑁆𑀢𑁄𑀧𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀫𑀺𑀢𑁆𑀢𑁂 𑀧𑀸𑀧𑀓𑁂 𑀮𑀸𑀫𑀓𑁂 𑀫𑀺𑀢𑁆𑀢𑁂 𑀉𑀧𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀬𑁂 𑀓𑀢𑁆𑀯𑀸 𑀢𑁂𑀳𑀺 𑀲𑀁𑀲𑀕𑁆𑀕𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀸𑀬𑀫𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀢𑀺𑀢𑁆𑀣𑀺𑀬𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑁂𑀲𑀼𑀁 𑁋 ‘‘𑀚𑀸𑀦𑀸𑀣𑀸𑀯𑀼𑀲𑁄, 𑀓𑁂𑀦 𑀓𑀸𑀭𑀡𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺? ‘‘𑀦 𑀚𑀸𑀦𑀸𑀫’’. ‘‘𑀢𑀼𑀫𑁆𑀳𑁂 𑀧𑀦 𑀦 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀚𑀸𑀦𑀸𑀫’’ 𑁋 𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀏𑀓𑀁 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄. 𑀲𑁄 𑀳𑀺 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑁂𑀯𑀢𑀸𑀳𑀺 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀲𑀺 𑁋 ‘‘𑀇𑀤𑀁 𑀦𑀸𑀫 𑀓𑀢𑁆𑀯𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑀦𑁆𑀢𑀻’’𑀢𑀺. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀦𑀫𑁆𑀧𑀺 𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀲𑀺 𑁋 ‘‘𑀇𑀤𑀁 𑀦𑀸𑀫 𑀓𑀢𑁆𑀯𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀦𑁆𑀢𑀺. 𑀲𑀘𑁂 𑀢𑀁 𑀫𑀸𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫, 𑀲𑁄 𑀮𑀸𑀪𑀲𑀓𑁆𑀓𑀸𑀭𑁄 𑀅𑀫𑁆𑀳𑀸𑀓𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀅𑀢𑁆𑀣𑁂𑀲𑁄 𑀉𑀧𑀸𑀬𑁄𑀢𑀺 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 ‘‘𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀢𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀲𑀫𑀸𑀤𑀧𑁂𑀢𑁆𑀯𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀧𑀼𑀭𑀺𑀲𑀖𑀸𑀢𑀓𑁂 𑀘𑁄𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦𑀸𑀫 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀓𑀸𑀴𑀲𑀺𑀮𑀸𑀬𑀁 𑀯𑀲𑀢𑀺, 𑀢𑀼𑀫𑁆𑀳𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀫𑀸𑀭𑁂𑀣𑀸’’𑀢𑀺 𑀢𑁂𑀲𑀁 𑀢𑀁 𑀲𑀳𑀲𑁆𑀲𑀁 𑀅𑀤𑀁𑀲𑀼. 𑀘𑁄𑀭𑀸 𑀥𑀦𑀮𑀸𑀪𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀣𑁂𑀭𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀭𑀺𑀯𑀸𑀭𑁂𑀲𑀼𑀁. 𑀣𑁂𑀭𑁄 𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀜𑁆𑀘𑀺𑀓𑀘𑁆𑀙𑀺𑀤𑁆𑀤𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀘𑁄𑀭𑀸 𑀢𑀁 𑀤𑀺𑀯𑀲𑀁 𑀣𑁂𑀭𑀁 𑀅𑀤𑀺𑀲𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀣𑁂𑀭𑁄 𑀜𑀢𑁆𑀯𑀸 𑀓𑀡𑁆𑀡𑀺𑀓𑀸𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀏𑀯𑀁 𑀢𑁂 𑀧𑀞𑀫𑀫𑀸𑀲𑁂𑀧𑀺, 𑀫𑀚𑁆𑀛𑀺𑀫𑀫𑀸𑀲𑁂𑀧𑀺 𑀣𑁂𑀭𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀧𑀘𑁆𑀙𑀺𑀫𑀫𑀸𑀲𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀣𑁂𑀭𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀆𑀓𑀟𑁆𑀠𑀦𑀪𑀸𑀯𑀁 𑀜𑀢𑁆𑀯𑀸 𑀦 𑀅𑀧𑀕𑀘𑁆𑀙𑀺. 𑀘𑁄𑀭𑀸 𑀢𑀁 𑀧𑀳𑀭𑀦𑁆𑀢𑀸 𑀢𑀡𑁆𑀟𑀼𑀮𑀓𑀫𑀢𑁆𑀢𑀸𑀦𑀺 𑀅𑀝𑁆𑀞𑀻𑀦𑀺 𑀓𑀭𑁄𑀦𑁆𑀢𑀸 𑀪𑀺𑀦𑁆𑀤𑀺𑀁𑀲𑀼. 𑀅𑀣 𑀦𑀁 ‘‘𑀫𑀢𑁄’’𑀢𑀺 𑀲𑀜𑁆𑀜𑀸𑀬 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑀧𑀺𑀝𑁆𑀞𑁂 𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀣𑁂𑀭𑁄, ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀪𑀸𑀯𑀁 𑀛𑀸𑀦𑀯𑁂𑀞𑀦𑁂𑀦 𑀯𑁂𑀞𑁂𑀢𑁆𑀯𑀸 𑀆𑀓𑀸𑀲𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀢𑁆𑀣 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀻’’𑀢𑀺? ‘‘𑀓𑀸𑀴𑀲𑀺𑀮𑀸𑀧𑀤𑁂𑀲𑀁, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦, 𑀫𑀬𑁆𑀳𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀬𑀸𑀳𑀺. 𑀢𑀸𑀤𑀺𑀲𑀲𑁆𑀲 𑀳𑀺 𑀫𑁂 𑀲𑀸𑀯𑀓𑀲𑁆𑀲 𑀦 𑀤𑀸𑀦𑀺 𑀤𑀲𑁆𑀲𑀦𑀁 𑀅𑀢𑁆𑀣𑀻’’𑀢𑀺. 𑀲𑁄 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀦𑀸𑀦𑀧𑁆𑀧𑀓𑀸𑀭𑀸 𑀇𑀤𑁆𑀥𑀺𑀬𑁄 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀸𑀴𑀲𑀺𑀮𑀸𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. ‘‘𑀣𑁂𑀭𑀁 𑀓𑀺𑀭 𑀘𑁄𑀭𑀸 𑀫𑀸𑀭𑁂𑀲𑀼’’𑀦𑁆𑀢𑀺 𑀅𑀬𑀁 𑀓𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀢𑁆𑀣𑀭𑀺.

𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀘𑁄𑀭𑁂 𑀧𑀭𑀺𑀬𑁂𑀲𑀦𑀢𑁆𑀣𑀸𑀬 𑀘𑀭𑀧𑀼𑀭𑀺𑀲𑁂 𑀧𑀬𑁄𑀚𑁂𑀲𑀺. 𑀢𑁂𑀲𑀼 𑀘𑁄𑀭𑁂𑀲𑀼 𑀲𑀼𑀭𑀸𑀧𑀸𑀦𑁂 𑀲𑀼𑀭𑀁 𑀧𑀺𑀯𑀦𑁆𑀢𑁂𑀲𑀼 𑀫𑀤𑁆𑀤𑁂𑀲𑀼 𑀏𑀓𑁄 𑀏𑀓𑀲𑁆𑀲 𑀧𑀺𑀝𑁆𑀞𑀺𑀁 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀲𑁄 𑀢𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 ‘‘𑀅𑀫𑁆𑀪𑁄 𑀤𑀼𑀩𑁆𑀩𑀺𑀦𑀻𑀢 𑀢𑁆𑀯𑀁, 𑀓𑀲𑁆𑀫𑀸 𑀫𑁂 𑀧𑀺𑀝𑁆𑀞𑀺𑀁 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀲𑀺, 𑀓𑀺𑀁 𑀧𑀦, 𑀅𑀭𑁂 𑀤𑀼𑀝𑁆𑀞𑀘𑁄𑀭, 𑀢𑀬𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀞𑀫𑀁 𑀧𑀳𑀢𑁄’’𑀢𑀺 𑀆𑀳. ‘‘𑀓𑀺𑀁 𑀧𑀦 𑀢𑁆𑀯𑀁 𑀫𑀬𑀸 𑀧𑀞𑀫𑀁 𑀧𑀳𑀢𑀪𑀸𑀯𑀁 𑀦 𑀚𑀸𑀦𑀸𑀲𑀻’’𑀢𑀺? 𑀏𑀯𑀁 𑀏𑀢𑁂𑀲𑀁 ‘‘𑀫𑀬𑀸 𑀧𑀳𑀢𑁄, 𑀫𑀬𑀸 𑀧𑀳𑀢𑁄’’𑀢𑀺 𑀯𑀤𑀦𑁆𑀢𑀸𑀦𑀁 𑀲𑀼𑀢𑁆𑀯𑀸 𑀢𑁂 𑀘𑀭𑀧𑀼𑀭𑀺𑀲𑀸 𑀲𑀩𑁆𑀩𑁂 𑀢𑁂 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀢𑁂 𑀘𑁄𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂𑀳𑀺 𑀣𑁂𑀭𑁄 𑀫𑀸𑀭𑀺𑀢𑁄’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑁂𑀳𑀺 𑀢𑀼𑀫𑁆𑀳𑁂 𑀉𑀬𑁆𑀬𑁄𑀚𑀺𑀢𑀸’’𑀢𑀺? ‘‘𑀦𑀕𑁆𑀕𑀲𑀫𑀡𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀧𑀜𑁆𑀘𑀲𑀢𑁂 𑀦𑀕𑁆𑀕𑀲𑀫𑀡𑁂 𑀕𑀸𑀳𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑁂𑀳𑀺 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀗𑁆𑀕𑀡𑁂 𑀦𑀸𑀪𑀺𑀧𑀫𑀸𑀡𑁂𑀲𑀼 𑀆𑀯𑀸𑀝𑁂𑀲𑀼 𑀦𑀺𑀔𑀡𑀸𑀧𑁂𑀢𑁆𑀯𑀸 𑀧𑀮𑀸𑀮𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀸𑀧𑁂𑀲𑀺. 𑀅𑀣 𑀦𑁂𑀲𑀁 𑀛𑀸𑀫𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀅𑀬𑀦𑀗𑁆𑀕𑀮𑁂𑀳𑀺 𑀓𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑁂 𑀔𑀡𑁆𑀟𑀸𑀔𑀡𑁆𑀟𑀁 𑀓𑀸𑀭𑀸𑀧𑁂𑀲𑀺. 𑀢𑀤𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀅𑀦𑀦𑀼𑀭𑀽𑀧𑀫𑀭𑀡𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲𑁂𑀯 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀦𑀼𑀭𑀽𑀧𑀁 𑀫𑀭𑀡𑀁, 𑀧𑀼𑀩𑁆𑀩𑁂 𑀧𑀦 𑀢𑁂𑀦 𑀓𑀢𑀓𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀫𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀧𑀦𑀲𑁆𑀲, 𑀪𑀦𑁆𑀢𑁂, 𑀧𑀼𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀧𑀼𑀝𑁆𑀞𑁄 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺.

𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀬𑀫𑁂𑀯 𑀓𑁄𑀝𑁆𑀝𑀦𑀧𑀘𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀢𑀸𑀢, 𑀢𑁆𑀯𑀁 𑀏𑀓𑀓𑁄𑀯 𑀕𑁂𑀳𑁂 𑀘 𑀅𑀭𑀜𑁆𑀜𑁂 𑀘 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀺𑀮𑀫𑀲𑀺, 𑀏𑀓𑀁 𑀢𑁂 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸, 𑀬𑀸𑀯 𑀢𑀼𑀫𑁆𑀳𑁂 𑀚𑀻𑀯𑀣, 𑀢𑀸𑀯 𑀯𑁄 𑀲𑀳𑀢𑁆𑀣𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀼𑀁. 𑀲𑀸 𑀓𑀢𑀺𑀧𑀸𑀳𑀫𑁂𑀯 𑀢𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀙𑀸 𑀢𑁂𑀲𑀁 𑀤𑀲𑁆𑀲𑀦𑀫𑀧𑀺 𑀅𑀦𑀺𑀘𑁆𑀙𑀦𑁆𑀢𑀻 𑁋 ‘‘𑀦 𑀲𑀓𑁆𑀓𑀸 𑀢𑀯 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀺𑀢𑀼’’𑀦𑁆𑀢𑀺 𑀉𑀚𑁆𑀛𑀸𑀬𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀓𑀣𑀁 𑀅𑀕𑁆𑀕𑀡𑁆𑀳𑀦𑁆𑀢𑁂 𑀢𑀲𑁆𑀲 𑀩𑀳𑀺𑀕𑀢𑀓𑀸𑀮𑁂 𑀫𑀓𑀘𑀺𑀯𑀸𑀓𑀔𑀡𑁆𑀟𑀸𑀦𑀺 𑀘 𑀬𑀸𑀕𑀼𑀨𑁂𑀡𑀓𑁂 𑀘 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀆𑀓𑀺𑀭𑀺𑀢𑁆𑀯𑀸 𑀢𑁂𑀦𑀸𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀝𑁆𑀞𑀸 ‘‘𑀇𑀫𑁂𑀲𑀁 𑀫𑀳𑀮𑁆𑀮𑀓𑀅𑀦𑁆𑀥𑀸𑀦𑀁 𑀏𑀢𑀁 𑀓𑀫𑁆𑀫𑀁, 𑀲𑀩𑁆𑀩𑀁 𑀕𑁂𑀳𑀁 𑀓𑀺𑀮𑀺𑀝𑁆𑀞𑀸 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀦 𑀲𑀓𑁆𑀓𑀸 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀺𑀢𑀼’’𑀦𑁆𑀢𑀺 𑀏𑀯𑀁 𑀢𑀸𑀬 𑀧𑀼𑀦𑀧𑁆𑀧𑀼𑀦𑀁 𑀓𑀣𑀺𑀬𑀫𑀸𑀦𑀸𑀬 𑀏𑀯𑀭𑀽𑀧𑁄𑀧𑀺 𑀧𑀽𑀭𑀺𑀢𑀧𑀸𑀭𑀫𑀻 𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺. 𑀲𑁄 ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑀺 𑀦𑁂𑀲𑀁 𑀓𑀢𑁆𑀢𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀢𑁂 𑀪𑁄𑀚𑁂𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸, 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀜𑀸𑀢𑀓𑀸 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀬𑀸𑀦𑀓𑀁 𑀆𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀝𑀯𑀺𑀫𑀚𑁆𑀛𑀁 𑀧𑀢𑁆𑀢𑀓𑀸𑀮𑁂 ‘‘𑀢𑀸𑀢, 𑀭𑀲𑁆𑀫𑀺𑀬𑁄 𑀕𑀡𑁆𑀳𑀣, 𑀕𑁄𑀡𑀸 𑀤𑀡𑁆𑀟𑀲𑀜𑁆𑀜𑀸𑀬 𑀕𑀫𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑁄𑀭𑀸 𑀯𑀲𑀦𑁆𑀢𑀺, 𑀅𑀳𑀁 𑀑𑀢𑀭𑀺𑀢𑁆𑀯𑀸 𑀘𑀭𑀸𑀫𑀻’’𑀢𑀺 𑀧𑀺𑀢𑀼 𑀳𑀢𑁆𑀣𑁂 𑀭𑀲𑁆𑀫𑀺𑀬𑁄 𑀤𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀲𑀤𑁆𑀤𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑁄𑀭𑀸𑀦𑀁 𑀉𑀝𑁆𑀞𑀺𑀢𑀲𑀤𑁆𑀤𑀫𑀓𑀸𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀘𑁄𑀭𑀸 𑀉𑀝𑁆𑀞𑀺𑀢𑀸’’𑀢𑀺 𑀲𑀜𑁆𑀜𑀸𑀬 ‘‘𑀢𑀸𑀢, 𑀘𑁄𑀭𑀸 𑀉𑀝𑁆𑀞𑀺𑀢𑀸, 𑀫𑀳𑀮𑁆𑀮𑀓𑀸 𑀫𑀬𑀁, 𑀢𑁆𑀯𑀁 𑀅𑀢𑁆𑀢𑀸𑀦𑀫𑁂𑀯 𑀭𑀓𑁆𑀔𑀸𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀯𑀺𑀭𑀯𑀦𑁆𑀢𑁂𑀧𑀺 𑀘𑁄𑀭𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀓𑁄𑀝𑁆𑀝𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀅𑀝𑀯𑀺𑀬𑀁 𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺.

𑀲𑀢𑁆𑀣𑀸 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀦𑁂𑀓𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀸𑀯 𑀧𑀓𑁆𑀓𑀸𑀯𑀲𑁂𑀲𑁂𑀦 𑀅𑀢𑁆𑀢𑀪𑀸𑀯𑀲𑀢𑁂 𑀏𑀯𑀫𑁂𑀯 𑀓𑁄𑀝𑁆𑀝𑁂𑀢𑁆𑀯𑀸 𑀲𑀁𑀘𑀼𑀡𑁆𑀡𑁄 𑀫𑀭𑀡𑀁 𑀧𑀢𑁆𑀢𑁄, 𑀏𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀭𑀽𑀧𑀫𑁂𑀯 𑀫𑀭𑀡𑀁 𑀮𑀤𑁆𑀥𑀁. 𑀧𑀜𑁆𑀘𑀳𑀺 𑀘𑁄𑀭𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀢𑀺𑀢𑁆𑀣𑀺𑀬𑀲𑀢𑀸𑀦𑀺𑀧𑀺 𑀫𑀫 𑀧𑀼𑀢𑁆𑀢𑀁 𑀅𑀧𑁆𑀧𑀤𑀼𑀝𑁆𑀞𑀁 𑀤𑀼𑀲𑁆𑀲𑁂𑀢𑁆𑀯𑀸 𑀅𑀦𑀼𑀭𑀽𑀧𑀫𑁂𑀯 𑀫𑀭𑀡𑀁 𑀮𑀪𑀺𑀁𑀲𑀼. 𑀅𑀧𑁆𑀧𑀤𑀼𑀝𑁆𑀞𑁂𑀲𑀼 𑀳𑀺 𑀧𑀤𑀼𑀲𑁆𑀲𑀦𑁆𑀢𑁄 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺𑀬𑁂𑀯𑀸’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀬𑁄 𑀤𑀡𑁆𑀟𑁂𑀦 𑀅𑀤𑀡𑁆𑀟𑁂𑀲𑀼, 𑀅𑀧𑁆𑀧𑀤𑀼𑀝𑁆𑀞𑁂𑀲𑀼 𑀤𑀼𑀲𑁆𑀲𑀢𑀺;

𑀤𑀲𑀦𑁆𑀦𑀫𑀜𑁆𑀜𑀢𑀭𑀁 𑀞𑀸𑀦𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀕𑀘𑁆𑀙𑀢𑀺.

‘‘𑀯𑁂𑀤𑀦𑀁 𑀨𑀭𑀼𑀲𑀁 𑀚𑀸𑀦𑀺𑀁, 𑀲𑀭𑀻𑀭𑀲𑁆𑀲 𑀯 𑀪𑁂𑀤𑀦𑀁;

𑀕𑀭𑀼𑀓𑀁 𑀯𑀸𑀧𑀺 𑀆𑀩𑀸𑀥𑀁, 𑀘𑀺𑀢𑁆𑀢𑀓𑁆𑀔𑁂𑀧𑀁 𑀯 𑀧𑀸𑀧𑀼𑀡𑁂.

‘‘𑀭𑀸𑀚𑀢𑁄 𑀯𑀸 𑀉𑀧𑀲𑀕𑁆𑀕𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀯 𑀤𑀸𑀭𑀼𑀡𑀁;

𑀧𑀭𑀺𑀓𑁆𑀔𑀬𑀁 𑀯 𑀜𑀸𑀢𑀻𑀦𑀁, 𑀪𑁄𑀕𑀸𑀦𑀁 𑀯 𑀧𑀪𑀗𑁆𑀕𑀼𑀦𑀁.

‘‘𑀅𑀣𑀯𑀲𑁆𑀲 𑀅𑀕𑀸𑀭𑀸𑀦𑀺, 𑀅𑀕𑁆𑀕𑀺 𑀟𑀳𑀢𑀺 𑀧𑀸𑀯𑀓𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺. (𑀥. 𑀧. 𑁧𑁩𑁭-𑁧𑁪𑁦);

𑁩𑁯𑁩. 𑀧𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀢𑀺 𑀧𑀓𑀸𑀭𑁂𑀦 𑀯𑀺𑀯𑁂𑀓𑀁 𑀏𑀓𑀻𑀪𑀸𑀯𑀁 𑀅𑀦𑀼𑀬𑀼𑀢𑁆𑀢𑁄 𑀬𑁄𑀚𑀺𑀢𑁄 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄. 𑀲𑀫𑀸𑀥𑀺𑀪𑀸𑀯𑀦𑀸𑀭𑀢𑁄𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀪𑀸𑀯𑀦𑀸𑀬 𑀭𑀢𑁄 𑀅𑀮𑁆𑀮𑀻𑀦𑁄 𑀘. 𑀲𑀩𑁆𑀩𑀸𑀲𑀯𑁂 𑀲𑀓𑀮𑀓𑀺𑀮𑁂𑀲𑁂, 𑀧𑀭𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸, 𑀅𑀦𑀸𑀲𑀯𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀺𑀳𑀭𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁯𑁪. 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀲𑁆𑀲 𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀥𑀭𑀡𑀺𑀫𑁆𑀧𑀺 𑀲𑀼𑀕𑀫𑁆𑀪𑀻𑀭𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀭𑀸𑀬𑀫𑀦𑀼𑀧𑀼𑀩𑁆𑀩𑀻𑀓𑀣𑀸 𑁋 𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄 𑀉𑀬𑁆𑀬𑁄𑀚𑀺𑀢𑁄. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑁂𑀓𑁆𑀔𑀢𑁄𑀢𑀺 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲. 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀻𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀓𑀸𑀭𑀺𑀢𑀁 𑀲𑀳𑀲𑁆𑀲𑀢𑁆𑀣𑀫𑁆𑀪𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀸𑀧𑀸𑀲𑀸𑀤𑀁 𑀅𑀢𑁆𑀢𑀦𑁄 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑁂𑀲𑀺𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀧𑀼𑀩𑁆𑀩𑀸𑀭𑀸𑀫𑁂 𑀬𑀣𑀸𑀯𑀼𑀢𑁆𑀢𑀧𑀸𑀲𑀸𑀤𑁂 𑀪𑀕𑀯𑀢𑀺 𑀯𑀺𑀳𑀭𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀦𑀯𑀓𑀢𑀭𑀸 𑀪𑀺𑀓𑁆𑀔𑀽 𑀉𑀧𑀭𑀺𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑀸 𑀲𑀢𑁆𑀣𑀸𑀭𑀫𑁆𑀧𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀢𑀼𑀫𑀸𑀭𑀤𑁆𑀥𑀸. 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀢𑁂 𑀲𑀁𑀯𑁂𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀪𑀽𑀢𑁂 𑀓𑀸𑀢𑀼𑀓𑀸𑀫𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀲𑀺 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀦𑀯𑁂 𑀪𑀺𑀓𑁆𑀔𑀽 𑀢𑀺𑀭𑀘𑁆𑀙𑀸𑀦𑀓𑀣𑀫𑀦𑀼𑀬𑀼𑀢𑁆𑀢𑁂’’𑀢𑀺 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀆𑀧𑁄𑀓𑀲𑀺𑀡𑀸𑀭𑀫𑁆𑀫𑀡𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀧𑀸𑀲𑀸𑀤𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀉𑀤𑀓𑀁 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀧𑀸𑀲𑀸𑀤𑀫𑀢𑁆𑀣𑀓𑁂 𑀣𑀼𑀧𑀺𑀓𑀁 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀧𑀳𑀭𑀺, 𑀧𑀸𑀲𑀸𑀤𑁄 𑀑𑀦𑀫𑀺𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀅𑀝𑁆𑀞𑀸𑀲𑀺. 𑀧𑀼𑀦𑀧𑀺 𑀧𑀳𑀭𑀺, 𑀅𑀧𑀭𑁂𑀦𑀧𑀺 𑀧𑀲𑁆𑀲𑁂𑀦 𑀅𑀝𑁆𑀞𑀸𑀲𑀺. 𑀢𑁂 𑀪𑀺𑀓𑁆𑀔𑀽 𑀪𑀻𑀢𑀸 𑀲𑀁𑀯𑀺𑀕𑁆𑀕𑀸 𑀧𑀸𑀲𑀸𑀤𑀲𑁆𑀲 𑀧𑀢𑀦𑀪𑀬𑁂𑀦 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀫𑀻𑀧𑁂 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑁂𑀲𑀼 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀨𑀮𑁂, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀨𑀮𑁂, 𑀓𑁂𑀘𑀺 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀲𑀸𑀤𑀓𑀫𑁆𑀧𑀦𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄.

𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀦𑁆𑀢𑀺 𑀲𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑁄 𑀅𑀦𑁂𑀓𑀲𑀳𑀲𑁆𑀲𑀦𑀺𑀬𑁆𑀬𑀽𑀳𑀓𑀽𑀝𑀸𑀕𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁂 𑀅𑀲𑀼𑀭𑁂 𑀚𑀺𑀦𑀺𑀢𑁆𑀯𑀸 𑀲𑀓𑁆𑀓𑁂 𑀤𑁂𑀯𑀸𑀦𑀫𑀺𑀦𑁆𑀤𑁂 𑀦𑀕𑀭𑀫𑀚𑁆𑀛𑁂 𑀞𑀺𑀢𑁂 𑀉𑀝𑁆𑀞𑀺𑀢𑁄 𑀯𑀺𑀚𑀬𑀦𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀯𑁂𑀚𑀬𑀦𑁆𑀢𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀧𑀸𑀲𑀸𑀤𑁄, 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀯𑁂𑀚𑀬𑀦𑁆𑀢𑀧𑀸𑀲𑀸𑀤’’𑀦𑁆𑀢𑀺, 𑀢𑀫𑁆𑀧𑀺 𑀅𑀬𑀁 𑀣𑁂𑀭𑁄 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑁂𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀕𑀯𑀦𑁆𑀢𑀁 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀭𑀽𑀧𑀁 𑀕𑀫𑁆𑀪𑀻𑀭𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀪𑀕𑀯𑀢𑀸 𑀘 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀓𑀺𑀁 𑀦𑀼 𑀔𑁄 𑀚𑀸𑀦𑀺𑀢𑁆𑀯𑀸 𑀕𑀢𑁄, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸. 𑀬𑀁𑀦𑀽𑀦𑀸𑀳𑀁 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺? 𑀲𑁄 𑀢𑀸𑀯𑀤𑁂𑀯 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑀓𑁆𑀓𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀓𑁆𑀔𑁂𑀧𑀁 𑀅𑀓𑀸𑀲𑀺. 𑀣𑁂𑀭𑁄 𑀢𑀲𑁆𑀲 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀁 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀺;

𑀇𑀤𑁆𑀥𑀺𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀲𑀁𑀯𑁂𑀚𑁂𑀲𑀺 𑀘 𑀤𑁂𑀯𑀢𑀸’’𑀢𑀺. (𑀫. 𑀦𑀺. 𑁧.𑁫𑁧𑁩);

𑀅𑀬𑀁 𑀧𑀦𑀢𑁆𑀣𑁄 𑁋 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁩𑁯𑁦 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀓𑀫𑁆𑀧𑀺𑀢𑀸𑀓𑀸𑀭𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. ‘‘𑀲𑀓𑁆𑀓𑀁 𑀲𑁄 𑀧𑀭𑀺𑀧𑀼𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁫𑁧𑁩) 𑀬𑀣𑀸𑀯𑀼𑀢𑁆𑀢𑀫𑁂𑀯 𑀣𑁂𑀭𑀲𑁆𑀲 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀧𑀼𑀘𑁆𑀙𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀅𑀧𑀸𑀯𑀼𑀲𑁄, 𑀚𑀸𑀦𑀸𑀲𑀺, 𑀢𑀡𑁆𑀳𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑁄’’𑀢𑀺? 𑀢𑀲𑁆𑀲 𑀲𑀓𑁆𑀓𑁄 𑀯𑀺𑀬𑀸𑀓𑀸𑀲𑀺. 𑀇𑀤𑀁 𑀣𑁂𑀭𑁂𑀦 𑀧𑀸𑀲𑀸𑀤𑀓𑀫𑁆𑀧𑀦𑁂 𑀓𑀢𑁂 𑀲𑀁𑀯𑀺𑀕𑁆𑀕𑀳𑀤𑀬𑁂𑀦 𑀧𑀫𑀸𑀤𑀁 𑀧𑀳𑀸𑀬 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀜𑁆𑀳𑀲𑁆𑀲 𑀩𑁆𑀬𑀸𑀓𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀳𑀺 𑀲𑁄 𑀢𑀤𑀸 𑀓𑀣𑁂𑀲𑀺. 𑀢𑁂𑀦𑀸𑀳 𑁋 ‘‘𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣’’𑀦𑁆𑀢𑀺 (𑀫. 𑀦𑀺. 𑁧.𑁫𑁧𑁩). 𑀢𑀢𑁆𑀣 𑀲𑀓𑁆𑀓𑀁 𑀲𑁄 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀲𑀓𑁆𑀓𑀁 𑀤𑁂𑀯𑀭𑀸𑀚𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀸𑀬 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀕𑀳𑀺𑀢𑀪𑀸𑀯𑀁 𑀧𑀼𑀘𑁆𑀙𑀺. 𑀅𑀢𑀻𑀢𑀢𑁆𑀣𑁂 𑀳𑀺 𑀇𑀤𑀁 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀅𑀧𑀸𑀯𑀼𑀲𑁄, 𑀚𑀸𑀦𑀸𑀲𑀻𑀢𑀺 𑀆𑀯𑀼𑀲𑁄, 𑀅𑀧𑀺 𑀚𑀸𑀦𑀸𑀲𑀺, 𑀓𑀺𑀁 𑀚𑀸𑀦𑀸𑀲𑀺? 𑀢𑀡𑁆𑀳𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑁄𑀢𑀺 (𑀫. 𑀦𑀺. 𑁧.𑁫𑁧𑁩) 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑁄 𑀲𑀢𑁆𑀣𑀸𑀭𑀸 𑀢𑀼𑀬𑁆𑀳𑀁 𑀤𑁂𑀲𑀺𑀢𑀸, 𑀢𑀣𑀸 ‘‘𑀓𑀺𑀁 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀢𑀺. 𑀢𑀡𑁆𑀳𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑁄𑀢𑀺 𑀯𑀸 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀲𑀼𑀢𑁆𑀢𑀲𑁆𑀲 𑀤𑁂𑀲𑀦𑀁 𑀧𑀼𑀘𑁆𑀙𑀢𑀺.

𑀩𑁆𑀭𑀳𑁆𑀫𑀸𑀦𑀦𑁆𑀢𑀺 𑀫𑀳𑀸𑀩𑁆𑀭𑀳𑁆𑀫𑀸𑀦𑀁. 𑀲𑀼𑀥𑀫𑁆𑀫𑀸𑀬𑀸𑀪𑀺𑀢𑁄 𑀲𑀪𑀦𑁆𑀢𑀺 (𑀫. 𑀦𑀺. 𑁧.𑁫𑁧𑁩) 𑀲𑀼𑀥𑀫𑁆𑀫𑀸𑀬 𑀲𑀪𑀸𑀬. 𑀅𑀬𑀁 𑀧𑀦 𑀩𑁆𑀭𑀳𑁆𑀫𑀮𑁄𑀓𑁂 𑀲𑀼𑀥𑀫𑁆𑀫𑀸 𑀲𑀪𑀸, 𑀦 𑀢𑀸𑀯𑀢𑀺𑀁𑀲𑀪𑀯𑀦𑁂. 𑀲𑀼𑀥𑀫𑁆𑀫𑀸𑀲𑀪𑀸𑀯𑀺𑀭𑀳𑀺𑀢𑁄 𑀤𑁂𑀯𑀮𑁄𑀓𑁄 𑀦𑀸𑀫 𑀦𑀢𑁆𑀣𑀺. ‘‘𑀅𑀚𑁆𑀚𑀸𑀧𑀺 𑀢𑁂, 𑀆𑀯𑀼𑀲𑁄, 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀽’’𑀢𑀺 𑀇𑀫𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸. 𑀲𑀢𑁆𑀣𑀼 𑀇𑀥𑀸𑀕𑀫𑀦𑀢𑁄 𑀧𑀼𑀩𑁆𑀩𑁂 𑀬𑀸 𑀢𑀼𑀬𑁆𑀳𑀁 𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀓𑀺𑀁 𑀅𑀚𑁆𑀚𑀸𑀧𑀺 𑀇𑀤𑀸𑀦𑀺𑀧𑀺 𑀲𑀸 𑀤𑀺𑀝𑁆𑀞𑀺 𑀦 𑀯𑀺𑀕𑀢𑀸𑀢𑀺? 𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀻𑀢𑀺𑀧𑀢𑀦𑁆𑀢𑀁 𑀫𑀳𑀸𑀓𑀧𑁆𑀧𑀺𑀦𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀲𑀸𑀯𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀲𑁆𑀲 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀲𑀸𑀯𑀓𑀲𑁆𑀲 𑀪𑀕𑀯𑀢𑁄 𑀑𑀓𑀸𑀲𑀁 𑀧𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀕𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀲𑀼𑀥𑀫𑁆𑀫𑀸𑀬 𑀲𑀪𑀸𑀬 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀲𑁆𑀲 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑁄, 𑀲𑁄 𑀇𑀥 𑀆𑀕𑀦𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑀺𑀢𑁆𑀢𑀫𑀜𑁆𑀜𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀫𑀢𑁆𑀣𑀓𑁂 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀑𑀪𑀸𑀲𑀁 𑀫𑀼𑀜𑁆𑀘𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀦𑀁 𑀆𑀕𑀫𑀦𑀁 𑀘𑀺𑀦𑁆𑀢𑁂𑀲𑀺. 𑀲𑀳 𑀘𑀺𑀦𑁆𑀢𑀦𑁂𑀦 𑀢𑁂𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀤𑀺𑀲𑀸𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑀓𑀮𑀩𑁆𑀭𑀳𑁆𑀫𑀮𑁄𑀓𑁄 𑀏𑀓𑁄𑀪𑀸𑀲𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀩𑁆𑀭𑀳𑁆𑀫𑀼𑀦𑁄 𑀓𑀮𑁆𑀮𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀘𑀢𑀼𑀲𑀘𑁆𑀘𑀧𑀓𑀸𑀲𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑁂𑀓𑀸𑀦𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀘𑁄𑀤𑁂𑀦𑁆𑀢𑁄 𑀅𑀚𑁆𑀚𑀸𑀧𑀺 𑀢𑁂, 𑀆𑀯𑀼𑀲𑁄, 𑀲𑀸 𑀤𑀺𑀝𑁆𑀞𑀻𑀢𑀺 𑀕𑀸𑀣𑀫𑀸𑀳. 𑀅𑀬𑀁 𑀧𑀦𑀢𑁆𑀣𑁄 𑀩𑀓𑀩𑁆𑀭𑀳𑁆𑀫𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁧.𑁧𑁭𑁫) 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀁 𑀳𑁂𑀢𑀁 (𑀲𑀁. 𑀦𑀺. 𑁧.𑁧𑁭𑁬) 𑁋

‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘𑀦𑀢𑁆𑀣𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑁄 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸.

‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 ‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’𑀢𑀺? 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’𑀢𑀺? 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’𑀢𑀺? 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’𑀢𑀺? 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀉𑀢𑁆𑀢𑀭𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄’’.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀚𑁆𑀚𑀸𑀧𑀺 𑀢𑁂 𑀆𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭’’𑀦𑁆𑀢𑀺.

‘‘𑀦 𑀫𑁂 𑀫𑀸𑀭𑀺𑀲 𑀲𑀸 𑀤𑀺𑀝𑁆𑀞𑀺, 𑀬𑀸 𑀫𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀸𑀫𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁;

𑀲𑁆𑀯𑀸𑀳𑀁 𑀅𑀚𑁆𑀚 𑀓𑀣𑀁 𑀯𑀚𑁆𑀚𑀁, 𑀅𑀳𑀁 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄’’𑀢𑀺.

‘‘𑀅𑀣 𑀔𑁄 𑀪𑀕𑀯𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 𑀢𑁆𑀯𑀁, 𑀫𑀸𑀭𑀺𑀲, 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀯𑀁 𑀯𑀤𑁂𑀳𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀜𑁆𑀜𑁂𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀲𑁆𑀲𑀧𑁄 𑀓𑀧𑁆𑀧𑀺𑀦𑁄 𑀅𑀦𑀼𑀭𑀼𑀤𑁆𑀥𑁄’’𑀢𑀺? ‘𑀏𑀯𑀁, 𑀫𑀸𑀭𑀺𑀲𑀸’𑀢𑀺 𑀔𑁄 𑀲𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁄 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘𑀅𑀢𑁆𑀣𑀺 𑀦𑀼 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀜𑁆𑀜𑁂𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀲𑁆𑀲𑀧𑁄 𑀓𑀧𑁆𑀧𑀺𑀦𑁄 𑀅𑀦𑀼𑀭𑀼𑀤𑁆𑀥𑁄’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸’’𑀢𑀺.

‘‘𑀅𑀣 𑀔𑁄 𑀲𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀬𑁂𑀦 𑀲𑁄 𑀩𑁆𑀭𑀳𑁆𑀫𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘𑀆𑀬𑀲𑁆𑀫𑀸 𑀫𑀸𑀭𑀺𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀯𑀫𑀸𑀳 𑁋

‘‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸’’’𑀢𑀺. 𑁋

𑀇𑀤𑀫𑀯𑁄𑀘 𑀲𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁄. 𑀅𑀢𑁆𑀢𑀫𑀦𑁄 𑀘 𑀲𑁄 𑀩𑁆𑀭𑀳𑁆𑀫𑀸 𑀢𑀲𑁆𑀲 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺 (𑀲𑀁. 𑀦𑀺. 𑁧.𑁧𑁭𑁬).

𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀬𑀁 𑀧𑀦𑀢𑁆𑀣𑁄 𑀩𑀓𑀩𑁆𑀭𑀳𑁆𑀫𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄’’𑀢𑀺.

𑀫𑀳𑀸𑀦𑁂𑀭𑀼𑀦𑁄 𑀓𑀽𑀝𑀦𑁆𑀢𑀺 (𑀫. 𑀦𑀺. 𑁧.𑁫𑁧𑁩) 𑀓𑀽𑀝𑀲𑀻𑀲𑁂𑀦 𑀲𑀓𑀮𑀫𑁂𑀯 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀯𑀤𑀲𑀺. 𑀯𑀺𑀫𑁄𑀓𑁆𑀔𑁂𑀦 𑀅𑀧𑀲𑁆𑀲𑀬𑀻𑀢𑀺 (𑀫. 𑀦𑀺. 𑁧.𑁫𑁧𑁩) 𑀛𑀸𑀦𑀯𑀺𑀫𑁄𑀓𑁆𑀔𑁂𑀦 𑀦𑀺𑀲𑁆𑀲𑀬𑁂𑀦 𑀅𑀪𑀺𑀜𑁆𑀜𑀸𑀬𑁂𑀦 𑀧𑀲𑁆𑀲𑀬𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀦𑀦𑁆𑀢𑀺 (𑀫. 𑀦𑀺. 𑁧.𑁫𑁧𑁩) 𑀚𑀫𑁆𑀩𑀼𑀤𑀻𑀧𑀁. 𑀲𑁄 𑀳𑀺 𑀯𑀦𑀩𑀸𑀳𑀼𑀮𑁆𑀮𑀢𑀸𑀬 ‘‘𑀯𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀚𑀫𑁆𑀩𑀼𑀫𑀡𑁆𑀟𑀲𑁆𑀲 𑀇𑀲𑁆𑀲𑀭𑁄’’𑀢𑀺. 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀦𑁆𑀢𑀺 (𑀫. 𑀦𑀺. 𑁧.𑁫𑁧𑁩) 𑀧𑀼𑀩𑁆𑀩𑀯𑀺𑀤𑁂𑀳𑀝𑁆𑀞𑀸𑀦𑀜𑁆𑀘 𑀧𑀼𑀩𑁆𑀩𑀯𑀺𑀤𑁂𑀳𑀦𑁆𑀢𑀺 𑀅𑀢𑁆𑀣𑁄. 𑀬𑁂 𑀘 𑀪𑀽𑀫𑀺𑀲𑀬𑀸 𑀦𑀭𑀸𑀢𑀺 (𑀫. 𑀦𑀺. 𑁧.𑁫𑁧𑁩) 𑀪𑀽𑀫𑀺𑀲𑀬𑀸 𑀦𑀭𑀸 𑀦𑀸𑀫 𑀅𑀧𑀭𑀕𑁄𑀬𑀸𑀦𑀉𑀢𑁆𑀢𑀭𑀓𑀼𑀭𑀼𑀓𑀸 𑀘 𑀫𑀦𑀼𑀲𑁆𑀲𑀸. 𑀢𑁂 𑀳𑀺 𑀕𑁂𑀳𑀸𑀪𑀸𑀯𑀢𑁄 ‘‘𑀪𑀽𑀫𑀺𑀲𑀬𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀧𑀺 𑀲𑀩𑁆𑀩𑁂 𑀅𑀧𑀲𑁆𑀲𑀬𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑀢𑁆𑀣𑁄 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑁂𑀦 𑀤𑀻𑀧𑁂𑀢𑀩𑁆𑀩𑁄 𑁋 𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁𑀤𑀺𑀯𑀲𑀜𑁆𑀘 𑀪𑀕𑀯𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦𑀦𑁆𑀤𑁄𑀧𑀦𑀦𑁆𑀤𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀺. 𑀪𑀕𑀯𑀸 ‘‘𑀅𑀬𑀁 𑀦𑀸𑀕𑀭𑀸𑀚𑀸 𑀫𑀬𑁆𑀳𑀁 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀲𑀭𑀡𑀕𑀫𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀧𑁆𑀧𑀲𑀦𑁆𑀦𑁄, 𑀓𑁄 𑀦𑀼 𑀔𑁄 𑀇𑀫𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀫𑁄𑀘𑁂𑀬𑁆𑀬𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀅𑀤𑁆𑀤𑀲. 𑀢𑀢𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀆𑀭𑁄𑀘𑁂𑀳𑀺 𑁋 ‘𑀢𑀣𑀸𑀕𑀢𑁄 𑀤𑁂𑀯𑀘𑀸𑀭𑀺𑀓𑀁 𑀕𑀘𑁆𑀙𑀢𑀻’’’𑀢𑀺. 𑀢𑀁𑀤𑀺𑀯𑀲𑀜𑁆𑀘 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲 𑀆𑀧𑀸𑀦𑀪𑀽𑀫𑀺𑀁 𑀲𑀚𑁆𑀚𑀬𑀺𑀁𑀲𑀼. 𑀲𑁄 𑀤𑀺𑀩𑁆𑀩𑀭𑀢𑀦𑀧𑀮𑁆𑀮𑀗𑁆𑀓𑁂 𑀤𑀺𑀩𑁆𑀩𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁄 𑀢𑀺𑀯𑀺𑀥𑀦𑀸𑀝𑀓𑁂𑀳𑀺 𑀘𑁂𑀯 𑀦𑀸𑀕𑀧𑀭𑀺𑀲𑀸𑀬 𑀘 𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑀪𑀸𑀚𑀦𑁂𑀲𑀼 𑀉𑀧𑀝𑁆𑀞𑀸𑀧𑀺𑀢𑀅𑀦𑁆𑀦𑀧𑀸𑀦𑀁 𑀑𑀮𑁄𑀓𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑀣𑀸 𑀦𑀸𑀕𑀭𑀸𑀚𑀸 𑀧𑀲𑁆𑀲𑀢𑀺, 𑀢𑀣𑀸 𑀓𑀢𑁆𑀯𑀸 𑀢𑀲𑁆𑀲 𑀯𑀺𑀫𑀸𑀦𑀫𑀢𑁆𑀣𑀓𑁂𑀦𑁂𑀯 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 ‘‘𑀇𑀫𑁂 𑀳𑀺 𑀦𑀸𑀫 𑀫𑀼𑀡𑁆𑀟𑀲𑀫𑀡𑀓𑀸 𑀅𑀫𑁆𑀳𑀸𑀓𑀁 𑀉𑀧𑀭𑀺𑀪𑀯𑀦𑁂𑀦 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀯𑀦𑀁 𑀧𑀯𑀺𑀲𑀦𑁆𑀢𑀺𑀧𑀺 𑀦𑀺𑀓𑁆𑀔𑀫𑀦𑁆𑀢𑀺𑀧𑀺, 𑀦 𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀇𑀫𑁂𑀲𑀁 𑀅𑀫𑁆𑀳𑀸𑀓𑀁 𑀫𑀢𑁆𑀣𑀓𑁂 𑀧𑀸𑀤𑀧𑀁𑀲𑀼𑀁 𑀑𑀓𑀺𑀭𑀦𑁆𑀢𑀸𑀦𑀁 𑀕𑀦𑁆𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀲𑀺𑀦𑁂𑀭𑀼𑀧𑀸𑀤𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀺𑀦𑁂𑀭𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀯𑀓𑀼𑀚𑁆𑀚𑁂𑀦 𑀨𑀡𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀤𑀲𑁆𑀲𑀦𑀁 𑀕𑀫𑁂𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀩𑁆𑀩𑁂, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑁄 𑀲𑀺𑀦𑁂𑀭𑀼𑀁 𑀧𑀲𑁆𑀲𑀸𑀫𑀺, 𑀲𑀺𑀦𑁂𑀭𑀼𑀧𑀭𑀺𑀪𑀡𑁆𑀟𑀁 𑀧𑀲𑁆𑀲𑀸𑀫𑀺, 𑀢𑀸𑀯𑀢𑀺𑀁𑀲𑀁 𑀧𑀲𑁆𑀲𑀸𑀫𑀺, 𑀯𑁂𑀚𑀬𑀦𑁆𑀢𑀁 𑀧𑀲𑁆𑀲𑀸𑀫𑀺, 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀥𑀚𑀁 𑀧𑀲𑁆𑀲𑀸𑀫𑀺. 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑀁 𑀏𑀢𑀭𑀳𑀺 𑀦𑁂𑀯 𑀲𑀺𑀦𑁂𑀭𑀼𑀁 𑀧𑀲𑁆𑀲𑀸𑀫𑀺…𑀧𑁂… 𑀦 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀥𑀚𑀁 𑀧𑀲𑁆𑀲𑀸𑀫𑀻’’𑀢𑀺. ‘‘𑀅𑀬𑀁, 𑀭𑀝𑁆𑀞𑀧𑀸𑀮, 𑀦𑀦𑁆𑀤𑁄𑀧𑀦𑀦𑁆𑀤𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀢𑀼𑀫𑁆𑀳𑀸𑀓𑀁 𑀓𑀼𑀧𑀺𑀢𑁄 𑀲𑀺𑀦𑁂𑀭𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀞𑀺𑀢𑁄’’𑀢𑀺. ‘‘𑀤𑀫𑁂𑀫𑀺 𑀦𑀁, 𑀪𑀦𑁆𑀢𑁂’’𑀢𑀺. 𑀦 𑀪𑀕𑀯𑀸 𑀦𑀁 𑀅𑀦𑀼𑀚𑀸𑀦𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄, 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀉𑀝𑁆𑀞𑀳𑀺𑀁𑀲𑀼. 𑀪𑀕𑀯𑀸 𑀅𑀦𑀼𑀚𑀸𑀦𑀺.

𑀅𑀯𑀲𑀸𑀦𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀤𑀫𑁂𑀫𑀺 𑀦’’𑀦𑁆𑀢𑀺 𑀆𑀳. ‘‘𑀤𑀫𑁂𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺 𑀪𑀕𑀯𑀸 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀦𑀸𑀕𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀦𑁆𑀤𑁄𑀧𑀦𑀦𑁆𑀤𑀁 𑀘𑀼𑀤𑁆𑀤𑀲𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀨𑀡𑀫𑀢𑁆𑀣𑀓𑁂 𑀅𑀢𑁆𑀢𑀦𑁄 𑀨𑀡𑀁 𑀞𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀦𑀸 𑀲𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀧𑀻𑀴𑁂𑀲𑀺. 𑀦𑀸𑀕𑀭𑀸𑀚𑀸 𑀥𑀽𑀫𑀸𑀬𑀺. 𑀣𑁂𑀭𑁄𑀧𑀺 ‘‘𑀦 𑀢𑀼𑀬𑁆𑀳𑀁𑀬𑁂𑀯 𑀲𑀭𑀻𑀭𑁂 𑀥𑀽𑀫𑁄 𑀅𑀢𑁆𑀣𑀺, 𑀫𑀬𑁆𑀳𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀥𑀽𑀫𑀸𑀬𑀺. 𑀦𑀸𑀕𑀭𑀸𑀚𑀲𑁆𑀲 𑀥𑀽𑀫𑁄 𑀣𑁂𑀭𑀁 𑀦 𑀩𑀸𑀥𑀢𑀺, 𑀣𑁂𑀭𑀲𑁆𑀲 𑀧𑀦 𑀥𑀽𑀫𑁄 𑀦𑀸𑀕𑀭𑀸𑀚𑀁 𑀩𑀸𑀥𑀢𑀺. 𑀢𑀢𑁄 𑀦𑀸𑀕𑀭𑀸𑀚𑀸 𑀧𑀚𑁆𑀚𑀮𑀺, 𑀣𑁂𑀭𑁄𑀧𑀺 ‘‘𑀦 𑀢𑀼𑀬𑁆𑀳𑀁𑀬𑁂𑀯 𑀲𑀭𑀻𑀭𑁂 𑀅𑀕𑁆𑀕𑀺 𑀅𑀢𑁆𑀣𑀺, 𑀫𑀬𑁆𑀳𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀧𑀚𑁆𑀚𑀮𑀺. 𑀦𑀸𑀕𑀭𑀸𑀚𑀲𑁆𑀲 𑀢𑁂𑀚𑁄 𑀣𑁂𑀭𑀁 𑀦 𑀩𑀸𑀥𑀢𑀺, 𑀣𑁂𑀭𑀲𑁆𑀲 𑀧𑀦 𑀢𑁂𑀚𑁄 𑀦𑀸𑀕𑀭𑀸𑀚𑀸𑀦𑀁 𑀩𑀸𑀥𑀢𑀺. 𑀦𑀸𑀕𑀭𑀸𑀚𑀸 𑁋 ‘‘𑀅𑀬𑀁 𑀫𑀁 𑀲𑀺𑀦𑁂𑀭𑀼𑀦𑀸 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀥𑀽𑀫𑀸𑀬𑀢𑀺 𑀘𑁂𑀯 𑀧𑀚𑁆𑀚𑀮𑀢𑀺 𑀘𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑁄, 𑀢𑀼𑀯𑀁 𑀓𑁄𑀲𑀻’’𑀢𑀺 𑀧𑀝𑀺𑀧𑀼𑀘𑁆𑀙𑀺. ‘‘𑀅𑀳𑀁 𑀔𑁄, 𑀦𑀦𑁆𑀤, 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. ‘‘𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀪𑀺𑀓𑁆𑀔𑀼𑀪𑀸𑀯𑁂𑀦 𑀢𑀺𑀝𑁆𑀞𑀸𑀳𑀻’’𑀢𑀺.

𑀣𑁂𑀭𑁄 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀢𑀲𑁆𑀲 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀸𑀫𑀓𑀡𑁆𑀡𑀲𑁄𑀢𑁂𑀦 𑀦𑀺𑀓𑁆𑀔𑀫𑀺, 𑀯𑀸𑀫𑀓𑀡𑁆𑀡𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑁂𑀦 𑀦𑀺𑀓𑁆𑀔𑀫𑀺. 𑀢𑀣𑀸 𑀤𑀓𑁆𑀔𑀺𑀡𑀦𑀸𑀲𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀸𑀫𑀦𑀸𑀲𑀲𑁄𑀢𑁂𑀦 𑀦𑀺𑀓𑁆𑀔𑀫𑀺, 𑀯𑀸𑀫𑀦𑀸𑀲𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀦𑀸𑀲𑀲𑁄𑀢𑁂𑀦 𑀦𑀺𑀓𑁆𑀔𑀫𑀺. 𑀢𑀢𑁄 𑀦𑀸𑀕𑀭𑀸𑀚𑀸 𑀫𑀼𑀔𑀁 𑀯𑀺𑀯𑀭𑀺, 𑀣𑁂𑀭𑁄 𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀧𑀸𑀘𑀻𑀦𑁂𑀦 𑀘 𑀧𑀘𑁆𑀙𑀺𑀫𑁂𑀦 𑀘 𑀘𑀗𑁆𑀓𑀫𑀢𑀺. 𑀪𑀕𑀯𑀸 𑁋 ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀫𑀦𑀲𑀺 𑀓𑀭𑁄𑀳𑀺, 𑀫𑀳𑀺𑀤𑁆𑀥𑀺𑀓𑁄 𑀦𑀸𑀕𑁄’’𑀢𑀺 𑀆𑀳. 𑀣𑁂𑀭𑁄 ‘‘𑀫𑀬𑁆𑀳𑀁 𑀔𑁄, 𑀪𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀦𑀦𑁆𑀤𑁄𑀧𑀦𑀦𑁆𑀤𑁄, 𑀅𑀳𑀁 𑀦𑀦𑁆𑀤𑁄𑀧𑀦𑀦𑁆𑀤𑀲𑀤𑀺𑀲𑀸𑀦𑀁 𑀦𑀸𑀕𑀭𑀸𑀚𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀤𑀫𑁂𑀬𑁆𑀬’’𑀦𑁆𑀢𑀺𑀆𑀤𑀺𑀫𑀸𑀳.

𑀦𑀸𑀕𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀯𑀺𑀲𑀦𑁆𑀢𑁄 𑀢𑀸𑀯 𑀫𑁂 𑀦 𑀤𑀺𑀝𑁆𑀞𑁄, 𑀦𑀺𑀓𑁆𑀔𑀫𑀦𑀓𑀸𑀮𑁂 𑀤𑀸𑀦𑀺 𑀦𑀁 𑀤𑀸𑀞𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀺𑀓𑁆𑀔𑀫𑀣, 𑀪𑀦𑁆𑀢𑁂, 𑀫𑀸 𑀫𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀦𑁆𑀢𑁄 𑀩𑀸𑀥𑀬𑀺𑀢𑁆𑀣𑀸’’𑀢𑀺 𑀆𑀳. 𑀣𑁂𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀸𑀲𑀺. 𑀦𑀸𑀕𑀭𑀸𑀚𑀸 ‘‘𑀅𑀬𑀁 𑀲𑁄’’𑀢𑀺 𑀤𑀺𑀲𑁆𑀯𑀸 𑀦𑀸𑀲𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑀺, 𑀣𑁂𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀮𑁄𑀫𑀓𑀽𑀧𑀫𑁆𑀧𑀺𑀲𑁆𑀲 𑀯𑀸𑀢𑁄 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀓𑀺𑀭 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀼𑀁, 𑀇𑀫𑀁 𑀧𑀦 𑀞𑀸𑀦𑀁 𑀧𑀢𑁆𑀯𑀸 𑀏𑀯𑀁 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀦𑁄 𑀳𑀼𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀲𑀁 𑀪𑀕𑀯𑀸 𑀦𑀸𑀕𑀭𑀸𑀚𑀤𑀫𑀦𑀁 𑀦𑀸𑀦𑀼𑀚𑀸𑀦𑀺.

𑀦𑀸𑀕𑀭𑀸𑀚𑀸 ‘‘𑀅𑀳𑀁 𑀇𑀫𑀲𑁆𑀲 𑀲𑀫𑀡𑀲𑁆𑀲 𑀦𑀸𑀲𑀯𑀸𑀢𑁂𑀦 𑀮𑁄𑀫𑀓𑀽𑀧𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀫𑀳𑀺𑀤𑁆𑀥𑀺𑀓𑁄 𑀲𑁄 𑀲𑀫𑀡𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀼𑀧𑀡𑁆𑀡𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀼𑀧𑀡𑁆𑀡𑀯𑀸𑀢𑀁 𑀤𑀲𑁆𑀲𑁂𑀦𑁆𑀢𑁄 𑀦𑀸𑀕𑀭𑀸𑀚𑀸𑀦𑀁 𑀅𑀦𑀼𑀩𑀦𑁆𑀥𑀺. 𑀦𑀸𑀕𑀭𑀸𑀚𑀸 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀣𑁂𑀭𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺. 𑀣𑁂𑀭𑁄 ‘‘𑀲𑀢𑁆𑀣𑀸, 𑀦𑀦𑁆𑀤, 𑀆𑀕𑀢𑁄, 𑀏𑀳𑀺 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀸𑀕𑀭𑀸𑀚𑀸𑀦𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑀁 𑀓𑀢𑁆𑀯𑀸 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀦𑀸𑀕𑀭𑀸𑀚𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀪𑀕𑀯𑀸 ‘‘𑀲𑀼𑀔𑀻 𑀳𑁄𑀳𑀺, 𑀦𑀸𑀕𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀓𑀺𑀁, 𑀪𑀦𑁆𑀢𑁂, 𑀅𑀢𑀺𑀤𑀺𑀯𑀸 𑀆𑀕𑀢𑀢𑁆𑀣𑀸’’𑀢𑀺 𑀆𑀳. ‘‘𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀘 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲 𑀘 𑀲𑀗𑁆𑀕𑀸𑀫𑁄 𑀅𑀳𑁄𑀲𑀻’’𑀢𑀺. ‘‘𑀓𑀲𑁆𑀲 𑀧𑀦, 𑀪𑀦𑁆𑀢𑁂, 𑀚𑀬𑁄, 𑀓𑀲𑁆𑀲 𑀧𑀭𑀸𑀚𑀬𑁄’’𑀢𑀺? ‘‘𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀚𑀬𑁄, 𑀦𑀦𑁆𑀤𑀲𑁆𑀲 𑀧𑀭𑀸𑀚𑀬𑁄’’𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀢𑁆𑀢𑀸𑀳𑀁 𑀏𑀓𑀧𑀝𑀺𑀧𑀸𑀝𑀺𑀬𑀸 𑀪𑀢𑁆𑀢𑀁 𑀲𑀢𑁆𑀢𑀸𑀳𑀁 𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑁂𑀦 𑀤𑀻𑀧𑁂𑀢𑀩𑁆𑀩𑁄’’𑀢𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀓𑀸𑀭𑀺𑀢𑀲𑀳𑀲𑁆𑀲𑀕𑀩𑁆𑀪𑀧𑀝𑀺𑀫𑀡𑁆𑀟𑀺𑀢𑁂 𑀧𑀸𑀲𑀸𑀤𑁂 𑀪𑀕𑀯𑀢𑀺 𑀯𑀺𑀳𑀭𑀦𑁆𑀢𑁂…𑀧𑁂… 𑀲𑀁𑀯𑁂𑀚𑁂𑀲𑀺 𑀘 𑀤𑁂𑀯𑀢𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀥𑀭𑀡𑀺𑀫𑁆𑀧𑀺 𑀲𑀼𑀕𑀫𑁆𑀪𑀻𑀭𑀁, 𑀩𑀳𑀮𑀁 𑀤𑀼𑀧𑁆𑀧𑀥𑀁𑀲𑀺𑀬𑀁;

𑀯𑀸𑀫𑀗𑁆𑀕𑀼𑀝𑁆𑀞𑁂𑀦 𑀔𑁄𑀪𑁂𑀬𑁆𑀬𑀁, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄’’𑀢𑀺.

𑀢𑀢𑁆𑀣 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄𑀢𑀺 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀆𑀤𑀺𑀇𑀤𑁆𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄 𑀧𑀢𑁆𑀢𑁄.

𑁩𑁯𑁫. 𑀅𑀲𑁆𑀫𑀺𑀫𑀸𑀦𑀦𑁆𑀢𑀺 𑀅𑀳𑀫𑀲𑁆𑀫𑀺 𑀧𑀜𑁆𑀜𑀸𑀲𑀻𑀮𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀺 𑀅𑀲𑁆𑀫𑀺𑀫𑀸𑀦𑀁 𑀦 𑀧𑀲𑁆𑀲𑀸𑀫𑀺 𑀦 𑀅𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀤𑀻𑀧𑁂𑀦𑁆𑀢𑁄 𑀫𑀸𑀦𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀆𑀳. 𑀲𑀸𑀫𑀡𑁂𑀭𑁂 𑀉𑀧𑀸𑀤𑀸𑀬𑀸𑀢𑀺 𑀲𑀸𑀫𑀡𑁂𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀓𑀮𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀕𑀭𑀼𑀘𑀺𑀢𑁆𑀢𑀁 𑀕𑀸𑀭𑀯𑀘𑀺𑀢𑁆𑀢𑀁 𑀆𑀤𑀭𑀩𑀳𑀼𑀫𑀸𑀦𑀁 𑀅𑀳𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄.

𑁩𑁯𑁬. 𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂𑀢𑀺 𑀇𑀢𑁄 𑀅𑀫𑁆𑀳𑀸𑀓𑀁 𑀉𑀧𑁆𑀧𑀦𑁆𑀦𑀓𑀧𑁆𑀧𑀢𑁄 𑀅𑀦𑁆𑀢𑀭𑀓𑀧𑁆𑀧𑀸𑀤𑀻𑀳𑀺 𑀅𑀧𑀭𑀺𑀫𑁂𑀬𑁆𑀬𑁂 𑀏𑀓𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀉𑀧𑀭𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂𑀢𑀺 𑀅𑀢𑁆𑀣𑁄. 𑀬𑀁 𑀓𑀫𑁆𑀫𑀫𑀪𑀺𑀦𑀻𑀳𑀭𑀺𑀦𑁆𑀢𑀺 𑀅𑀕𑁆𑀕𑀲𑀸𑀯𑀓𑀪𑀸𑀯𑀲𑁆𑀲 𑀧𑀤𑀁 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀧𑀽𑀭𑁂𑀲𑀺𑀁. 𑀢𑀸𑀳𑀁 𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄𑀢𑀺 𑀅𑀳𑀁 𑀢𑀁 𑀲𑀸𑀯𑀓𑀪𑀽𑀫𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀅𑀲𑁆𑀫𑀺 𑀅𑀫𑁆𑀳𑀻𑀢𑀺 𑀅𑀢𑁆𑀣𑁄.

𑁩𑁯𑁭. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀬𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀇𑀤𑁆𑀥𑀺𑀯𑀺𑀥𑀸𑀤𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄 𑀫𑁂 𑀫𑀬𑀸 𑀲𑀘𑁆𑀙𑀺𑀓𑀢𑀸 𑀧𑀘𑁆𑀘𑀓𑁆𑀔𑀁 𑀓𑀢𑀸. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑀁 𑀲𑀸𑀲𑀦𑀁 𑀫𑀬𑀸 𑀓𑀢𑀁 𑀲𑀻𑀮𑀧𑀝𑀺𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀧𑀭𑀺𑀬𑁄𑀲𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀓𑁆𑀓𑀫𑁂𑀦. 𑀏𑀯𑀁 𑀲𑁄 𑀏𑀓𑀲𑁆𑀲𑁂𑀯 𑀅𑀦𑁄𑀫𑀤𑀲𑁆𑀲𑀻𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑁆𑀬𑀸𑀓𑀭𑀡𑀁 𑀮𑀪𑀺. 𑀓𑀣𑀁? 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀢𑀢𑁄 𑀘𑀼𑀢𑁄 𑀲𑀸𑀫𑀼𑀤𑁆𑀤𑀺𑀓𑁂 𑀦𑀸𑀕𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀤𑀻𑀖𑀸𑀬𑀼𑀓𑀪𑀸𑀯𑁂𑀦 𑀉𑀧𑀳𑀸𑀭𑀁 𑀓𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀫𑀳𑀸𑀧𑀽𑀚𑀁 𑀅𑀓𑀸𑀲𑀺. 𑀢𑀤𑀸𑀧𑀺 𑀪𑀕𑀯𑀸 𑀩𑁆𑀬𑀸𑀓𑀭𑀡𑀁 𑀓𑀣𑁂𑀲𑀺. 𑀲𑀼𑀤𑀦𑁆𑀢𑀺 𑀧𑀤𑀧𑀽𑀭𑀡𑁂 𑀦𑀺𑀧𑀸𑀢𑁄. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀫𑀸 𑀅𑀧𑀤𑀸𑀦𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣 𑀓𑀣𑁂𑀲𑀺. 𑀇𑀢𑀻𑀢𑀺 𑀧𑀭𑀺𑀲𑀫𑀸𑀧𑀦𑀢𑁆𑀣𑁂 𑀦𑀺𑀧𑀸𑀢𑁄.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁩. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑁆𑀬𑀸𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀯𑁂𑀤𑁂𑀳𑁄 𑀦𑀸𑀫 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀳𑁄𑀲𑀺. 𑀲𑁄 𑀩𑀼𑀤𑁆𑀥𑀫𑀸𑀫𑀓𑁄, 𑀥𑀫𑁆𑀫𑀫𑀸𑀫𑀓𑁄, 𑀲𑀗𑁆𑀖𑀫𑀸𑀫𑀓𑁄, 𑀉𑀧𑀸𑀲𑀓𑁄 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀜𑁆𑀘 𑀔𑀡𑁂 𑀲𑀢𑁆𑀣𑀸 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑀁 𑀦𑀸𑀫 𑀢𑀢𑀺𑀬𑀲𑀸𑀯𑀓𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀦𑀺𑀲𑀪𑁄’’𑀢𑀺 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀉𑀧𑀸𑀲𑀓𑁄 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀫𑀳𑀸𑀚𑀦𑁂 𑀉𑀝𑁆𑀞𑀸𑀬 𑀕𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. ‘‘𑀫𑀳𑀸 𑀔𑁄, 𑀉𑀧𑀸𑀲𑀓, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺. ‘‘𑀓𑀺𑀢𑁆𑀢𑀓𑁄, 𑀪𑀦𑁆𑀢𑁂’’𑀢𑀺? ‘‘𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲’’𑀦𑁆𑀢𑀺. ‘‘𑀪𑀦𑁆𑀢𑁂, 𑀏𑀓𑀁 𑀲𑀸𑀫𑀡𑁂𑀭𑀫𑁆𑀧𑀺 𑀯𑀺𑀳𑀸𑀭𑁂 𑀅𑀲𑁂𑀲𑁂𑀢𑁆𑀯𑀸 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀓𑁄 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀜𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀼 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀸𑀲𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀤𑀓𑁆𑀔𑀺𑀡𑁄𑀤𑀓𑀸𑀯𑀲𑀸𑀦𑁂 𑀬𑀸𑀕𑀼𑀆𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀅𑀓𑀸𑀲𑀺. 𑀉𑀧𑀸𑀲𑀓𑁄𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀫𑁂𑀯 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀉𑀧𑀸𑀲𑀓𑁄 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀅𑀤𑀸𑀲𑀺. ‘‘𑀪𑀦𑁆𑀢𑁂, 𑀇𑀥𑁂𑀯 𑀧𑀯𑀺𑀲𑀣, 𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀦 𑀯𑀝𑁆𑀝𑀺𑀲𑁆𑀲𑀢𑀺, 𑀉𑀧𑀸𑀲𑀓𑀸’’𑀢𑀺. 𑀲𑁄 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀣𑁂𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄, 𑀪𑀦𑁆𑀢𑁂, ‘𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀯𑀺𑀲𑀺𑀢𑀼𑀁 𑀦 𑀇𑀘𑁆𑀙𑀺. 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂𑀳𑀺 𑀅𑀢𑀺𑀭𑁂𑀓𑀕𑀼𑀡𑁄’’𑀢𑀺? 𑀩𑀼𑀤𑁆𑀥𑀸𑀦𑀜𑁆𑀘 𑀯𑀡𑁆𑀡𑀫𑀘𑁆𑀙𑁂𑀭𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀢𑁆𑀣𑀸 𑀏𑀯𑀫𑀸𑀳 𑁋 ‘‘𑀉𑀧𑀸𑀲𑀓, 𑀫𑀬𑀁 𑀪𑀺𑀓𑁆𑀔𑀁 𑀆𑀕𑀫𑀬𑀫𑀸𑀦𑀸 𑀕𑁂𑀳𑁂 𑀦𑀺𑀲𑀻𑀤𑀸𑀫, 𑀲𑁄 𑀪𑀺𑀓𑁆𑀔𑀼 𑀦 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀉𑀤𑀺𑀓𑁆𑀔𑀢𑀺. 𑀫𑀬𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀸𑀫, 𑀲𑁄 𑀅𑀭𑀜𑁆𑀜𑁂𑀬𑁂𑀯 𑀯𑀲𑀢𑀺. 𑀫𑀬𑀁 𑀙𑀦𑁆𑀦𑁂 𑀯𑀲𑀸𑀫, 𑀲𑁄 𑀅𑀩𑁆𑀪𑁄𑀓𑀸𑀲𑁂𑀬𑁂𑀯 𑀯𑀲𑀢𑀻’’𑀢𑀺 𑀪𑀕𑀯𑀸 ‘‘𑀅𑀬𑀜𑁆𑀘 𑀅𑀬𑀜𑁆𑀘𑁂𑀢𑀲𑁆𑀲 𑀕𑀼𑀡𑁄’’𑀢𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.

𑀉𑀧𑀸𑀲𑀓𑁄𑀧𑀺 𑀧𑀓𑀢𑀺𑀬𑀸 𑀚𑀮𑀫𑀸𑀦𑀤𑀻𑀧𑁄 𑀢𑁂𑀮𑁂𑀦 𑀆𑀲𑀺𑀢𑁆𑀢𑁄 𑀯𑀺𑀬 𑀲𑀼𑀝𑁆𑀞𑀼𑀢𑀭𑀁 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀅𑀜𑁆𑀜𑀸𑀬 𑀲𑀫𑁆𑀧𑀢𑁆𑀢𑀺𑀬𑀸, 𑀬𑀁𑀦𑀽𑀦𑀸𑀳𑀁 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑀪𑀸𑀯𑀢𑁆𑀣𑀸𑀬 𑀧𑀢𑁆𑀣𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀦𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢 𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀺𑀘𑀻𑀯𑀭𑀸𑀦𑀺 𑀤𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀲𑀢𑁆𑀢 𑀤𑀺𑀯𑀲𑁂 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁, 𑀇𑀫𑀺𑀦𑀸𑀳𑀁 𑀦 𑀅𑀜𑁆𑀜𑀁 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀯𑀸 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀯𑀸 𑀧𑀢𑁆𑀣𑁂𑀫𑀺, 𑀇𑀤𑀁 𑀧𑀦 𑀫𑁂 𑀓𑀫𑁆𑀫𑀁 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁂𑀦 𑀧𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀦𑀢𑁆𑀣𑀸𑀬 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑀪𑀸𑀯𑀲𑁆𑀲 𑀅𑀥𑀺𑀓𑀸𑀭𑁄 𑀳𑁄𑀢𑀽’’𑀢𑀺. 𑀲𑀢𑁆𑀣𑀸 ‘‘𑀫𑀳𑀦𑁆𑀢𑀁 𑀞𑀸𑀦𑀁 𑀇𑀫𑀺𑀦𑀸 𑀧𑀢𑁆𑀣𑀺𑀢𑀁, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀫𑀦𑀸𑀧𑀁 𑀢𑁂 𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀅𑀦𑀸𑀕𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀯𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑁆𑀯𑀁 𑀢𑀢𑀺𑀬𑀲𑀸𑀯𑀓𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 ‘‘𑀩𑀼𑀤𑁆𑀥𑀸𑀦𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀢𑁆𑀢𑀩𑁆𑀩𑀁 𑀯𑀺𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀫𑀜𑁆𑀜𑀺𑀢𑁆𑀣. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀸𑀬 𑀭𑀓𑁆𑀔𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀮𑀁𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀚𑀺𑀡𑁆𑀡𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀥𑀫𑁆𑀫𑀁 𑀓𑀣𑁂𑀲𑀺, 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀢𑀸 ‘‘𑀲𑀢𑁆𑀣𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀲𑀸𑀲𑀦𑀁 𑀅𑀲𑁆𑀲𑁄𑀲𑀺. 𑀢𑀲𑁆𑀲 𑀦𑀺𑀯𑀸𑀲𑀦𑀲𑀸𑀝𑀓𑁄 𑀏𑀓𑁄𑀬𑁂𑀯, 𑀢𑀣𑀸 𑀩𑁆𑀭𑀸𑀳𑁆𑀫𑀡𑀺𑀬𑀸. 𑀧𑀸𑀭𑀼𑀧𑀦𑀁 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀫𑁂𑀯. 𑀲𑁄 𑀲𑀓𑀮𑀦𑀕𑀭𑁂 ‘‘𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑁂𑀦𑀘𑀺𑀤𑁂𑀯 𑀓𑀺𑀘𑁆𑀘𑁂𑀦 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀩𑁆𑀭𑀸𑀳𑁆𑀫𑀡𑀺𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀩𑁆𑀭𑀸𑀳𑁆𑀫𑀡𑀻𑀦𑀁 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀲𑀬𑀁 𑀕𑁂𑀳𑁂 𑀅𑀘𑁆𑀙𑀢𑀺, 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑁄 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀪𑁄𑀢𑀺, 𑀓𑀺𑀁 𑀢𑁆𑀯𑀁 𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀤𑀺𑀯𑀸’’𑀢𑀺? ‘‘𑀲𑀸𑀫𑀺, 𑀅𑀳𑀁 𑀫𑀸𑀢𑀼𑀕𑀸𑀫𑁄 𑀪𑀻𑀭𑀼𑀓𑀚𑀸𑀢𑀺𑀓𑀸 𑀭𑀢𑁆𑀢𑀺𑀁 𑀲𑁄𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀤𑀺𑀯𑀸 𑀲𑁄𑀲𑁆𑀲𑀸𑀫𑀻’’𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑀢𑁆𑀣𑀸 𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀁 𑀫𑀦𑁆𑀣𑀁 𑀓𑀢𑁆𑀯𑀸 𑀲𑀸𑀕𑀭𑀁 𑀦𑀺𑀫𑁆𑀫𑀦𑁆𑀣𑁂𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀧𑀭𑀺𑀬𑀦𑁆𑀢𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀞𑀫𑀬𑀸𑀫𑁂𑀬𑁂𑀯 𑀲𑀓𑀮𑀲𑀭𑀻𑀭𑀁 𑀧𑀽𑀭𑀬𑀫𑀸𑀦𑀸 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀸𑀭𑀼𑀢𑀯𑀢𑁆𑀣𑀁 𑀲𑀗𑁆𑀖𑀭𑀺𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀆𑀤𑀻𑀦𑀯𑀲𑀳𑀲𑁆𑀲𑀁 𑀤𑀲𑁆𑀲𑀬𑀫𑀸𑀦𑀁 𑀫𑀘𑁆𑀙𑁂𑀭𑀁 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀼𑀬𑁆𑀳𑀜𑁆𑀘 𑀏𑀓𑀫𑁂𑀯 𑀯𑀢𑁆𑀣𑀁, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀸𑀭𑀼𑀧𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀸𑀭𑀼𑀧𑀺𑀢𑁆𑀯𑀸 𑀩𑀳𑀺 𑀯𑀺𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀲𑀩𑁆𑀩𑀣𑀸𑀧𑀺 𑀅𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀫𑀚𑁆𑀛𑀺𑀫𑀬𑀸𑀫𑁂𑀢𑀺 𑀢𑀣𑁂𑀯 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑁂𑀯 𑀅𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀢𑀣𑁂𑀯 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀤𑀸 𑀲𑁄 𑀫𑀘𑁆𑀙𑁂𑀭𑀁 𑀚𑀺𑀦𑀺𑀢𑁆𑀯𑀸 𑀯𑀢𑁆𑀣𑀁 𑀲𑀗𑁆𑀖𑀭𑀺𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺. 𑀢𑀢𑁄 𑀯𑀸𑀫𑀳𑀢𑁆𑀣𑀁 𑀆𑀪𑀼𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀅𑀧𑁆𑀨𑁄𑀝𑁂𑀢𑁆𑀯𑀸 ‘‘𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀦𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀥𑀫𑁆𑀫𑀸𑀲𑀦𑀲𑁆𑀲 𑀧𑀘𑁆𑀙𑀢𑁄 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀭𑀜𑁆𑀜𑁄 𑀘 𑀦𑀸𑀫 ‘‘𑀚𑀺𑀢𑀁 𑀫𑁂’’𑀢𑀺 𑀲𑀤𑁆𑀤𑁄 𑀅𑀫𑀦𑀸𑀧𑁄 𑀳𑁄𑀢𑀺. 𑀭𑀸𑀚𑀸 𑀧𑀼𑀭𑀺𑀲𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙, 𑀪𑀡𑁂, 𑀏𑀢𑀁 𑀧𑀼𑀘𑁆𑀙 𑁋 ‘𑀓𑀺𑀁 𑀲𑁄 𑀯𑀤𑀢𑀻’’’𑀢𑀺? 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁄 ‘‘𑀅𑀯𑀲𑁂𑀲𑀸 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺 𑀆𑀭𑀼𑀬𑁆𑀳 𑀅𑀲𑀺𑀘𑀫𑁆𑀫𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀲𑁂𑀦𑀁 𑀚𑀺𑀦𑀦𑁆𑀢𑀺, 𑀦 𑀢𑀁 𑀅𑀘𑁆𑀙𑀭𑀺𑀬𑀁. 𑀅𑀳𑀁 𑀧𑀦 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀲𑁆𑀲 𑀓𑀽𑀝𑀕𑁄𑀡𑀲𑁆𑀲 𑀫𑀼𑀕𑁆𑀕𑀭𑁂𑀦 𑀲𑀻𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀁 𑀧𑀮𑀸𑀧𑁂𑀦𑁆𑀢𑁄 𑀯𑀺𑀬 𑀫𑀘𑁆𑀙𑁂𑀭𑀘𑀺𑀢𑁆𑀢𑀁 𑀚𑀺𑀦𑀺𑀢𑁆𑀯𑀸 𑀧𑀸𑀭𑀼𑀢𑀯𑀢𑁆𑀣𑀁 𑀤𑀲𑀩𑀮𑀲𑁆𑀲 𑀅𑀤𑀸𑀲𑀺𑀁, 𑀢𑀁 𑀫𑁂 𑀚𑀺𑀢𑀁 𑀫𑀘𑁆𑀙𑁂𑀭𑀁 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀆𑀳. 𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀫𑁆𑀳𑁂, 𑀪𑀡𑁂, 𑀤𑀲𑀩𑀮𑀲𑁆𑀲 𑀅𑀦𑀼𑀭𑀽𑀧𑀁 𑀦 𑀚𑀸𑀦𑀸𑀫, 𑀩𑁆𑀭𑀸𑀳𑁆𑀫𑀡𑁄 𑀚𑀸𑀦𑀸𑀢𑀻’’𑀢𑀺 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀯𑀢𑁆𑀣𑀬𑀼𑀕𑀁 𑀧𑁂𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀫𑀬𑁆𑀳𑀁 𑀢𑀼𑀡𑁆𑀳𑀻 𑀦𑀺𑀲𑀺𑀦𑁆𑀦𑀲𑁆𑀲 𑀧𑀞𑀫𑀁 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑁂 𑀓𑀣𑁂𑀦𑁆𑀢𑀲𑁆𑀲 𑀅𑀤𑀸𑀲𑀺, 𑀲𑀢𑁆𑀣𑀼 𑀕𑀼𑀡𑁂 𑀧𑀝𑀺𑀘𑁆𑀘 𑀇𑀤𑀁 𑀉𑀧𑁆𑀧𑀦𑁆𑀦𑀁, 𑀲𑀢𑁆𑀣𑀼𑀬𑁂𑀯 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀢𑀫𑁆𑀧𑀺 𑀯𑀢𑁆𑀣𑀬𑀼𑀕𑀁 𑀤𑀲𑀩𑀮𑀲𑁆𑀲 𑀅𑀤𑀸𑀲𑀺. 𑀭𑀸𑀚𑀸 ‘‘𑀓𑀺𑀁 𑀩𑁆𑀭𑀸𑀳𑁆𑀫𑀡𑁂𑀦 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀫𑁆𑀧𑀺 𑀢𑁂𑀦 𑀯𑀢𑁆𑀣𑀬𑀼𑀕𑀁 𑀢𑀣𑀸𑀕𑀢𑀲𑁆𑀲𑁂𑀯 𑀤𑀺𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀅𑀜𑁆𑀜𑀸𑀦𑀺𑀧𑀺 𑀤𑁆𑀯𑁂 𑀯𑀢𑁆𑀣𑀬𑀼𑀕𑀸𑀦𑀺 𑀧𑁂𑀲𑁂𑀲𑀺, 𑀲𑁄 𑀢𑀸𑀦𑀺𑀧𑀺 𑀲𑀢𑁆𑀣𑀼 𑀅𑀤𑀸𑀲𑀺. 𑀧𑀼𑀦 𑀭𑀸𑀚𑀸 ‘𑀅𑀜𑁆𑀜𑀸𑀦𑀺𑀧𑀺 𑀘𑀢𑁆𑀢𑀸𑀭𑀻’𑀢𑀺 𑀏𑀯𑀁 𑀯𑀢𑁆𑀯𑀸 𑀬𑀸𑀯 𑀏𑀯𑀁 𑀤𑁆𑀯𑀢𑁆𑀢𑀺𑀁𑀲 𑀯𑀢𑁆𑀣𑀬𑀼𑀕𑀸𑀦𑀺 𑀧𑁂𑀲𑁂𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀕𑀳𑀡𑀁 𑀯𑀺𑀬 𑀳𑁄𑀢𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀓𑀁, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀏𑀓𑀦𑁆𑀢𑀺 𑀤𑁆𑀯𑁂 𑀯𑀢𑁆𑀣𑀬𑀼𑀕𑀸𑀦𑀺 𑀕𑀳𑁂𑀢𑁆𑀯𑀸, 𑀢𑀺𑀁𑀲 𑀬𑀼𑀕𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀲𑀢𑁆𑀣𑀼 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄.

𑀅𑀣 𑀢𑀁 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀲𑀻𑀢𑀲𑀫𑀬𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀅𑀢𑁆𑀢𑀦𑁄 𑀧𑀸𑀭𑀼𑀢𑀁 𑀭𑀢𑁆𑀢𑀓𑀫𑁆𑀩𑀮𑀁 𑀤𑀢𑁆𑀯𑀸 𑀆𑀳 𑁋 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀧𑀸𑀭𑀼𑀧𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺. 𑀲𑁄 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀓𑀫𑁆𑀩𑀮𑁂𑀦 𑀇𑀫𑀲𑁆𑀫𑀺𑀁 𑀧𑀽𑀢𑀺𑀓𑀸𑀬𑁂 𑀉𑀧𑀦𑀻𑀢𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀢𑀣𑀸𑀕𑀢𑀲𑁆𑀲 𑀫𑀜𑁆𑀘𑀲𑁆𑀲 𑀉𑀧𑀭𑀺 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀓𑀫𑁆𑀩𑀮𑁂 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀓𑀫𑁆𑀩𑀮𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀭𑀸𑀚𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 𑀲𑀜𑁆𑀚𑀸𑀦𑀺𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀏𑀲 𑀓𑀫𑁆𑀩𑀮𑁄, 𑀅𑀫𑁆𑀳𑁂𑀳𑀺 𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀦𑁆𑀦𑁄’’𑀢𑀺. ‘‘𑀢𑀼𑀫𑁆𑀳𑁂𑀳𑀺, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑁄 𑀧𑀽𑀚𑀺𑀢𑁄, 𑀩𑁆𑀭𑀸𑀳𑁆𑀫𑀡𑁂𑀦 𑀫𑀬𑀁 𑀧𑀽𑀚𑀺𑀢𑀸’’𑀢𑀺. 𑀭𑀸𑀚𑀸 ‘‘𑀩𑁆𑀭𑀸𑀳𑁆𑀫𑀡𑁄 𑀬𑀼𑀢𑁆𑀢𑀁 𑀅𑀜𑁆𑀜𑀸𑀲𑀺, 𑀦 𑀫𑀬’’𑀦𑁆𑀢𑀺 𑀧𑀲𑀻𑀤𑀺𑀢𑁆𑀯𑀸 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀪𑀽𑀢𑀁, 𑀢𑀁 𑀲𑀩𑁆𑀩𑀁 𑀅𑀝𑁆𑀞𑀝𑁆𑀞𑀓𑀁 𑀓𑀢𑁆𑀯𑀸 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄𑀧𑀺 ‘‘𑀅𑀝𑁆𑀞𑀝𑁆𑀞𑀓𑀁 𑀦𑀸𑀫 𑀘𑀢𑀼𑀲𑀝𑁆𑀞𑀺 𑀳𑁄𑀢𑀻’’𑀢𑀺 𑀘𑀢𑀼𑀲𑀝𑁆𑀞𑀺𑀲𑀮𑀸𑀓𑀪𑀢𑁆𑀢𑀸𑀦𑀺 𑀉𑀧𑀝𑁆𑀞𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀧𑀼𑀦 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀪𑀕𑀯𑀢𑁄 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀓𑀲𑁆𑀲𑀧𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀯𑀟𑁆𑀠𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀚𑀗𑁆𑀖𑀯𑀺𑀳𑀸𑀭𑀁 𑀯𑀺𑀘𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀤𑀻𑀢𑀻𑀭𑁂 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀦𑀼𑀯𑀸𑀢𑁂 𑀅𑀧𑁆𑀧𑀳𑁄𑀦𑁆𑀢𑁂 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑁂𑀢𑀼𑀫𑀸𑀭𑀤𑁆𑀥𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑁂𑀣𑀸’’𑀢𑀺 𑀆𑀳. ‘‘𑀅𑀦𑀼𑀯𑀸𑀢𑁄 𑀦𑀧𑁆𑀧𑀳𑁄𑀢𑀻’’𑀢𑀺. ‘‘𑀇𑀫𑀺𑀦𑀸, 𑀪𑀦𑁆𑀢𑁂, 𑀓𑀭𑁄𑀣𑀸’’𑀢𑀺 𑀉𑀢𑁆𑀢𑀭𑀺𑀲𑀸𑀝𑀓𑀁 𑀤𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀓𑀸𑀘𑀺 𑀳𑀸𑀦𑀺 𑀫𑀸 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺.

𑀖𑀭𑁂𑀧𑀺𑀲𑁆𑀲 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀓𑀮𑀳𑀁 𑀓𑀭𑁄𑀦𑁆𑀢𑀺𑀬𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀪𑀕𑀺𑀦𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀁 𑀲𑀦𑁆𑀥𑀸𑀬 𑁋 ‘‘𑀏𑀯𑀭𑀽𑀧𑀁 𑀩𑀸𑀮𑀁 𑀬𑁄𑀚𑀦𑀲𑀢𑁂 𑀧𑀭𑀺𑀯𑀚𑁆𑀚𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀲𑀸 𑀕𑁂𑀳𑀗𑁆𑀕𑀡𑁂 𑀞𑀺𑀢𑀸 𑀲𑀼𑀢𑁆𑀯𑀸 ‘‘𑀇𑀫𑀸𑀬 𑀤𑀺𑀦𑁆𑀦𑀪𑀢𑁆𑀢𑀁 𑀏𑀲 𑀫𑀸 𑀪𑀼𑀜𑁆𑀚𑀢𑀽’’𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀇𑀢𑀭𑀸 𑀤𑀺𑀲𑁆𑀯𑀸 ‘‘𑀩𑀸𑀮𑁂, 𑀫𑀁 𑀢𑀸𑀯 𑀅𑀓𑁆𑀓𑁄𑀲 𑀯𑀸 𑀧𑀳𑀭 𑀯𑀸, 𑀏𑀯𑀭𑀽𑀧𑀲𑁆𑀲 𑀧𑀦 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀢𑁄 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀁 𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀆𑀳. 𑀅𑀣𑀲𑁆𑀲 𑀪𑀭𑀺𑀬𑀸𑀬 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀚𑁆𑀚𑀺. 𑀲𑀸 ‘‘𑀢𑀺𑀝𑁆𑀞𑀣, 𑀪𑀦𑁆𑀢𑁂’’𑀢𑀺 𑀓𑀮𑀮𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑁂𑀦 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀡𑀻𑀢𑀪𑀢𑁆𑀢𑀲𑁆𑀲 𑀘𑀢𑀼𑀫𑀥𑀼𑀭𑀲𑁆𑀲 𑀘 𑀧𑀽𑀭𑁂𑀢𑁆𑀯𑀸 𑀉𑀧𑀭𑀺 𑀆𑀲𑀺𑀢𑁆𑀢𑁂𑀦 𑀧𑀤𑀼𑀫𑀕𑀩𑁆𑀪𑀯𑀡𑁆𑀡𑁂𑀦 𑀲𑀧𑁆𑀧𑀺𑀦𑀸 𑀯𑀺𑀚𑁆𑀚𑁄𑀢𑀫𑀸𑀦𑀁 𑀧𑀢𑁆𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀬𑀣𑀸 𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀑𑀪𑀸𑀲𑀚𑀸𑀢𑁄, 𑀏𑀯𑀁 𑀑𑀪𑀸𑀲𑀚𑀸𑀢𑀁 𑀫𑁂 𑀲𑀭𑀻𑀭𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀦𑀼𑀫𑁄𑀤𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑁂𑀧𑀺 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀧𑀼𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀉𑀧𑀸𑀲𑀓𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀇𑀢𑀭𑀸𑀧𑀺 𑀢𑀸𑀤𑀺𑀲𑀲𑁆𑀲𑁂𑀯 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀢𑀫𑁂𑀯 𑀲𑁂𑀝𑁆𑀞𑀺𑀥𑀻𑀢𑀭𑀁 𑀆𑀦𑀬𑀺𑀁𑀲𑀼. 𑀢𑀲𑁆𑀲𑀸 𑀧𑀼𑀩𑁆𑀩𑁂 𑀅𑀦𑀺𑀝𑁆𑀞𑀯𑀺𑀧𑀸𑀓𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀢𑀺𑀓𑀼𑀮𑀁 𑀧𑀯𑀺𑀝𑁆𑀞𑀫𑀢𑁆𑀢𑀸𑀬 𑀉𑀫𑁆𑀫𑀸𑀭𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀲𑀓𑀮𑀁 𑀕𑁂𑀳𑀁 𑀉𑀕𑁆𑀖𑀸𑀝𑀺𑀢𑀯𑀘𑁆𑀘𑀓𑀽𑀧𑁄 𑀯𑀺𑀬 𑀤𑀼𑀕𑁆𑀕𑀦𑁆𑀥𑀁 𑀚𑀸𑀢𑀁. 𑀓𑀼𑀫𑀸𑀭𑁄 ‘‘𑀓𑀲𑁆𑀲𑀸𑀬𑀁 𑀕𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁂𑀝𑁆𑀞𑀺𑀓𑀜𑁆𑀜𑀸𑀬𑀸’’𑀢𑀺 𑀲𑀼𑀢𑁆𑀯𑀸 ‘‘𑀦𑀻𑀳𑀭𑀣 𑀦’’𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀓𑀼𑀮𑀖𑀭𑀁 𑀧𑁂𑀲𑁂𑀲𑀺. 𑀲𑀸 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀝𑀺𑀦𑀺𑀯𑀢𑁆𑀢𑀺.

𑀢𑁂𑀦 𑀲𑀫𑀬𑁂𑀦 𑀓𑀲𑁆𑀲𑀧𑀤𑀲𑀩𑀮𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀲𑀢𑀲𑀳𑀲𑀕𑁆𑀖𑀦𑀺𑀓𑀸𑀳𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀬𑁄𑀚𑀦𑀼𑀩𑁆𑀩𑁂𑀥𑀁 𑀘𑁂𑀢𑀺𑀬𑀁 𑀆𑀭𑀪𑀺𑀁𑀲𑀼. 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀓𑀭𑀺𑀬𑀫𑀸𑀦𑁂 𑀲𑀸 𑀲𑁂𑀝𑁆𑀞𑀺𑀥𑀻𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀝𑀺𑀦𑀺𑀯𑀢𑁆𑀢𑀸, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀆𑀪𑀭𑀡𑀪𑀡𑁆𑀟𑀁 𑀪𑀜𑁆𑀚𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀺𑀝𑁆𑀞𑀓𑀁 𑀓𑀸𑀭𑁂𑀲𑀺 𑀭𑀢𑀦𑀸𑀬𑀢𑀁 𑀯𑀺𑀤𑀢𑁆𑀣𑀺𑀯𑀺𑀢𑁆𑀣𑀺𑀡𑁆𑀡𑀁 𑀘𑀢𑀼𑀭𑀗𑁆𑀕𑀼𑀮𑀼𑀩𑁆𑀩𑁂𑀥𑀁. 𑀢𑀢𑁄 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞 𑀉𑀧𑁆𑀧𑀮𑀧𑀼𑀧𑁆𑀨𑀳𑀢𑁆𑀣𑀓𑁂 𑀆𑀤𑀸𑀬 𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑀁 𑀕𑀢𑀸. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀏𑀓𑀸 𑀇𑀝𑁆𑀞𑀓𑀸𑀧𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀘𑁆𑀙𑀫𑀸𑀦𑀸 𑀖𑀝𑀦𑀺𑀝𑁆𑀞𑀓𑀸𑀬 𑀊𑀦𑀸 𑀳𑁄𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀯𑀟𑁆𑀠𑀓𑀺𑀁 𑀆𑀳 ‘‘𑀇𑀫𑀁 𑀫𑁂 𑀇𑀝𑁆𑀞𑀓𑀁 𑀏𑀢𑁆𑀣 𑀞𑀧𑁂𑀣𑀸’’𑀢𑀺. ‘‘𑀅𑀫𑁆𑀫 𑀪𑀤𑁆𑀤𑀓𑁂, 𑀓𑀸𑀮𑁂 𑀆𑀕𑀢𑀸𑀲𑀺, 𑀲𑀬𑀫𑁂𑀯 𑀞𑀧𑁂𑀳𑀻’’𑀢𑀺. 𑀲𑀸 𑀆𑀭𑀼𑀬𑁆𑀳 𑀢𑁂𑀮𑁂𑀦 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀁 𑀬𑁄𑀚𑁂𑀢𑁆𑀯𑀸 𑀢𑁂𑀦 𑀩𑀦𑁆𑀥𑀦𑁂𑀦 𑀇𑀝𑁆𑀞𑀓𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀉𑀧𑀭𑀺 𑀅𑀝𑁆𑀞𑀳𑀺 𑀉𑀧𑁆𑀧𑀮𑀧𑀼𑀧𑁆𑀨𑀳𑀢𑁆𑀣𑀓𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀼, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀸 𑀬𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀕𑁂𑀳𑀁 𑀦𑀻𑀢𑀸, 𑀢𑀲𑁆𑀲 𑀢𑀁 𑀆𑀭𑀩𑁆𑀪 𑀲𑀢𑀺 𑀉𑀤𑀧𑀸𑀤𑀺. 𑀦𑀕𑀭𑁂𑀧𑀺 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀳𑁄𑀢𑀺. 𑀲𑁄 𑀉𑀧𑀝𑁆𑀞𑀸𑀓𑁂 𑀆𑀳 ‘‘𑀇𑀥 𑀆𑀦𑀻𑀢𑀸 𑀲𑁂𑀝𑁆𑀞𑀺𑀥𑀻𑀢𑀸 𑀓𑀼𑀳𑀺’’𑀦𑁆𑀢𑀺? ‘‘𑀓𑀼𑀮𑀕𑁂𑀳𑁂, 𑀲𑀸𑀫𑀻’’𑀢𑀺. ‘‘𑀆𑀦𑁂𑀣 𑀦𑀁, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸. ‘‘𑀓𑀺𑀁, 𑀢𑀸𑀢𑀸, 𑀆𑀕𑀢𑀢𑁆𑀣𑀸’’𑀢𑀺 𑀢𑀸𑀬 𑀧𑀼𑀝𑁆𑀞𑀸 𑀢𑀲𑁆𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. ‘‘𑀢𑀸𑀢𑀸, 𑀫𑀬𑀸 𑀆𑀪𑀭𑀡𑀪𑀡𑁆𑀟𑁂𑀳𑀺 𑀘𑁂𑀢𑀺𑀬𑀁 𑀧𑀽𑀚𑀺𑀢𑀁, 𑀆𑀪𑀭𑀡𑀁 𑀫𑁂 𑀦𑀢𑁆𑀣𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. ‘‘𑀆𑀦𑁂𑀣 𑀦𑀁, 𑀧𑀺𑀴𑀦𑁆𑀥𑀦𑀁 𑀮𑀪𑀺𑀲𑁆𑀲𑀢𑀻’’𑀢𑀺. 𑀢𑁂 𑀢𑀁 𑀆𑀦𑀬𑀺𑀁𑀲𑀼. 𑀢𑀲𑁆𑀲𑀸 𑀲𑀳 𑀕𑁂𑀳𑀧𑀯𑁂𑀲𑀦𑁂𑀦 𑀲𑀓𑀮𑀕𑁂𑀳𑀁 𑀘𑀦𑁆𑀤𑀦𑀕𑀦𑁆𑀥𑁄 𑀘𑁂𑀯 𑀉𑀧𑁆𑀧𑀮𑀕𑀦𑁆𑀥𑁄 𑀘 𑀯𑀸𑀬𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀧𑀼𑀘𑁆𑀙𑀺 𑁋 ‘‘𑀪𑀤𑁆𑀤𑁂, 𑀢𑀯 𑀲𑀭𑀻𑀭𑀢𑁄 𑀧𑀞𑀫𑀁 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀺, 𑀇𑀤𑀸𑀦𑀺 𑀧𑀦 𑀢𑁂 𑀲𑀭𑀻𑀭𑀢𑁄 𑀘𑀦𑁆𑀤𑀦𑀕𑀦𑁆𑀥𑁄, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺, 𑀓𑀺𑀫𑁂𑀢’’𑀦𑁆𑀢𑀺? 𑀲𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀯𑀢 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀧𑀲𑀻𑀤𑀺𑀢𑁆𑀯𑀸 𑀬𑁄𑀚𑀦𑀺𑀓𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀓𑀫𑁆𑀩𑀮𑀓𑀜𑁆𑀘𑀼𑀓𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀭𑀣𑀘𑀓𑁆𑀓𑀧𑀫𑀸𑀡𑁂𑀳𑀺 𑀲𑀼𑀯𑀡𑁆𑀡𑀧𑀤𑀼𑀫𑁂𑀳𑀺 𑀅𑀮𑀗𑁆𑀓𑀭𑀺. 𑀢𑁂𑀲𑀁 𑀤𑁆𑀯𑀸𑀤𑀲𑀳𑀢𑁆𑀣𑀸 𑀑𑀮𑀫𑁆𑀩𑀓𑀸 𑀳𑁄𑀦𑁆𑀢𑀺.

𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸, 𑀧𑀼𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀭𑀸𑀚𑀓𑀼𑀮𑁂 𑀚𑁂𑀝𑁆𑀞𑀭𑀸𑀚𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀲𑀼 𑀯𑀬𑀧𑁆𑀧𑀢𑁆𑀢𑁂𑀲𑀼 𑀓𑀼𑀫𑀸𑀭𑀲𑁆𑀲 𑀯𑀲𑀦𑀕𑀸𑀫𑁂 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁. 𑀲𑁄 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀲𑀸𑀝𑀓𑀁 𑀫𑁂 𑀤𑁂𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀥𑁄𑀢𑀯𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. ‘‘𑀅𑀫𑁆𑀫, 𑀣𑀽𑀮𑀫𑀺𑀤’’𑀦𑁆𑀢𑀺 𑀆𑀳. 𑀲𑀸 𑀅𑀜𑁆𑀜𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀬𑀸𑀤𑀺𑀲𑁂 𑀕𑁂𑀳𑁂 𑀫𑀬𑀁 𑀚𑀸𑀢𑀸, 𑀦𑀢𑁆𑀣𑀺 𑀦𑁄 𑀇𑀢𑁄 𑀲𑀼𑀔𑀼𑀫𑀢𑀭𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀼𑀜𑁆𑀜’’𑀦𑁆𑀢𑀺. ‘‘𑀢𑁂𑀦 𑀳𑀺 𑀮𑀪𑀦𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀧𑀼𑀢𑁆𑀢, 𑀅𑀳𑀁 𑀅𑀚𑁆𑀚𑁂𑀯 𑀢𑀼𑀬𑁆𑀳𑀁 𑀩𑀸𑀭𑀸𑀡𑀲𑀺𑀦𑀕𑀭𑀭𑀚𑁆𑀚𑀧𑀝𑀺𑀮𑀸𑀪𑀁 𑀇𑀘𑁆𑀙𑀸𑀫𑀻’’𑀢𑀺. 𑀲𑁄 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀕𑀘𑁆𑀙, 𑀢𑀸𑀢𑀸’’𑀢𑀺. 𑀲𑁄 𑀧𑀦 𑀧𑀼𑀜𑁆𑀜𑀦𑀺𑀬𑀸𑀫𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑁄 𑀘 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀸𑀮𑀗𑁆𑀓𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺.

𑀅𑀫𑀘𑁆𑀘𑀸 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀭𑀜𑁆𑀜𑁄 𑀏𑀓𑀸 𑀥𑀻𑀢𑀸𑀯 𑀅𑀢𑁆𑀣𑀺, 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀭𑀸𑀚𑀓𑀁 𑀭𑀚𑁆𑀚𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀓𑁄 𑀭𑀸𑀚𑀸 𑀪𑀯𑀺𑀢𑀼𑀁 𑀅𑀭𑀳𑀢𑀻’’𑀢𑀺? ‘‘𑀢𑁆𑀯𑀁 𑀳𑁄𑀳𑀺, 𑀢𑁆𑀯𑀁 𑀳𑁄𑀳𑀻’’𑀢𑀺. 𑀧𑀼𑀭𑁄𑀳𑀺𑀢𑁄 𑀆𑀳 𑁋 ‘‘𑀩𑀳𑀼𑀁 𑀑𑀮𑁄𑀓𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀓𑀼𑀫𑀼𑀤𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀧𑀜𑁆𑀘𑀯𑀺𑀥𑀭𑀸𑀚𑀓𑀓𑀼𑀥𑀪𑀡𑁆𑀟𑀁 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀢𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀢𑁄 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀭𑀣𑁄 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. ‘‘𑀧𑀭𑀺𑀘𑀬𑁂𑀦 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀦𑀺𑀯𑀢𑁆𑀢𑁂𑀫𑀸’’𑀢𑀺 𑀓𑁂𑀘𑀺 𑀆𑀳𑀁𑀲𑀼. 𑀧𑀼𑀭𑁄𑀳𑀺𑀢𑁄 ‘‘𑀫𑀸 𑀦𑀺𑀯𑀢𑁆𑀢𑀬𑀺𑀢𑁆𑀣𑀸’’𑀢𑀺 𑀆𑀳. 𑀭𑀣𑁄 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀭𑀼𑀳𑀦𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀼𑀭𑁄𑀳𑀺𑀢𑁄 𑀧𑀸𑀭𑀼𑀧𑀦𑀓𑀡𑁆𑀡𑀁 𑀅𑀧𑀦𑁂𑀢𑁆𑀯𑀸 𑀧𑀸𑀤𑀢𑀮𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀢𑀺𑀝𑁆𑀞𑀢𑀼 𑀅𑀬𑀁 𑀤𑀻𑀧𑁄, 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀏𑀲 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀢𑀺.

𑀅𑀣 𑀓𑀼𑀫𑀸𑀭𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀓𑁂𑀦 𑀓𑀫𑁆𑀫𑁂𑀦 𑀆𑀕𑀢𑀢𑁆𑀣𑀸’’𑀢𑀺 𑀆𑀳. ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀭𑀸𑀚𑀸 𑀯𑁄 𑀓𑀳’’𑀦𑁆𑀢𑀺? ‘‘𑀤𑁂𑀯𑀢𑁆𑀢𑀁 𑀕𑀢𑁄, 𑀲𑀸𑀫𑀻’’𑀢𑀺. ‘‘𑀓𑀢𑀺 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺? ‘‘𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺. ‘‘𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀦𑀢𑁆𑀣𑀻’’𑀢𑀺? ‘‘𑀥𑀻𑀢𑀸 𑀅𑀢𑁆𑀣𑀺, 𑀤𑁂𑀯, 𑀧𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺 𑀓𑀭𑀺𑀲𑁆𑀲𑀸𑀫𑀺 𑀭𑀚𑁆𑀚’’𑀦𑁆𑀢𑀺. 𑀢𑁂 𑀢𑀸𑀯𑀤𑁂𑀯 𑀅𑀪𑀺𑀲𑁂𑀓𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀆𑀦𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼. 𑀅𑀣𑀲𑁆𑀲 𑀓𑀢𑀸𑀪𑀺𑀲𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀯𑀢𑁆𑀣𑀁 𑀉𑀧𑀦𑀬𑀺𑀁𑀲𑀼. 𑀲𑁄 ‘‘𑀓𑀺𑀫𑀺𑀤𑀁, 𑀢𑀸𑀢𑀸’’𑀢𑀺 𑀆𑀳. ‘‘𑀦𑀺𑀯𑀸𑀲𑀦𑀯𑀢𑁆𑀣𑀁, 𑀤𑁂𑀯𑀸’’𑀢𑀺. ‘‘𑀦𑀦𑀼, 𑀢𑀸𑀢𑀸, 𑀣𑀽𑀮’’𑀦𑁆𑀢𑀺? ‘‘𑀫𑀦𑀼𑀲𑁆𑀲𑀧𑀭𑀺𑀪𑁄𑀕𑀯𑀢𑁆𑀣𑁂𑀲𑀼 𑀇𑀢𑁄 𑀫𑀼𑀤𑀼𑀢𑀭𑀁 𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀦𑀺𑀯𑀸𑀲𑁂𑀲𑀻’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀦 𑀫𑀜𑁆𑀜𑁂 𑀧𑀼𑀜𑁆𑀜𑀯𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸’’𑀢𑀺 ‘‘𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀳𑀭𑀣, 𑀮𑀪𑀺𑀲𑁆𑀲𑀸𑀫𑀺 𑀯𑀢𑁆𑀣’’𑀦𑁆𑀢𑀺 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀧𑀼𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀺𑀲𑀸𑀬𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀅𑀝𑁆𑀞𑀅𑀝𑁆𑀞𑀓𑀁 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀏𑀓𑀁 𑀤𑀺𑀩𑁆𑀩𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀦𑀦𑁆𑀤𑀭𑀜𑁆𑀜𑁄 𑀯𑀺𑀚𑀺𑀢𑁂 𑀲𑀼𑀢𑁆𑀢𑀓𑀦𑁆𑀢𑀺𑀓𑀸 𑀇𑀢𑁆𑀣𑀺𑀬𑁄 ‘𑀫𑀸 𑀲𑀼𑀢𑁆𑀢𑀁 𑀓𑀦𑁆𑀢𑀺𑀁𑀲𑀽’𑀢𑀺 𑀏𑀯𑀁 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀤𑁂𑀯𑀻 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀯𑀢 𑀢𑀧𑀲𑁆𑀲𑀻’’𑀢𑀺 𑀓𑀸𑀭𑀼𑀜𑁆𑀜𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. ‘‘𑀓𑀺𑀫𑀺𑀤𑀁, 𑀤𑁂𑀯𑀻’’𑀢𑀺 𑀧𑀼𑀝𑁆𑀞𑀸 ‘‘𑀅𑀢𑀺𑀫𑀳𑀢𑀻, 𑀤𑁂𑀯, 𑀢𑁂 𑀲𑀫𑁆𑀧𑀢𑁆𑀢𑀺, 𑀅𑀢𑀻𑀢𑁂 𑀩𑀼𑀤𑁆𑀥𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑀓𑀮𑁆𑀬𑀸𑀡𑀲𑁆𑀲 𑀨𑀮𑀁, 𑀇𑀤𑀸𑀦𑀺 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀬𑀁 𑀧𑀼𑀜𑁆𑀜𑀁 𑀦 𑀓𑀭𑁄𑀣𑀸’’𑀢𑀺 𑀆𑀳. 𑀓𑀲𑁆𑀲 𑀤𑀲𑁆𑀲𑀸𑀫, 𑀲𑀻𑀮𑀯𑀦𑁆𑀢𑁄 𑀦𑀢𑁆𑀣𑀻𑀢𑀺. ‘‘𑀅𑀲𑀼𑀜𑁆𑀜𑁄, 𑀤𑁂𑀯, 𑀚𑀫𑁆𑀩𑀼𑀤𑀻𑀧𑁄 𑀅𑀭𑀳𑀦𑁆𑀢𑁂𑀳𑀺; 𑀢𑀼𑀫𑁆𑀳𑁂, 𑀤𑁂𑀯, 𑀤𑀸𑀦𑀁 𑀲𑀚𑁆𑀚𑁂𑀣, 𑀅𑀳𑀁 𑀅𑀭𑀳𑀦𑁆𑀢𑁂 𑀮𑀘𑁆𑀙𑀸𑀫𑀻’’𑀢𑀺 𑀆𑀳. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀤𑀸𑀦𑀁 𑀲𑀚𑁆𑀚𑀸𑀧𑁂𑀲𑀺. 𑀤𑁂𑀯𑀻 𑀧𑀸𑀢𑁄𑀯 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀉𑀧𑀭𑀺𑀧𑀸𑀲𑀸𑀤𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀲𑀘𑁂 𑀏𑀢𑀺𑀲𑁆𑀲𑀸𑀬 𑀤𑀺𑀲𑀸𑀬 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀲𑁆𑀯𑁂 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀳. 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀅𑀭𑀳𑀦𑁆𑀢𑁄 𑀦𑀸𑀳𑁂𑀲𑀼𑀁, 𑀢𑀁 𑀲𑀓𑁆𑀓𑀸𑀭𑀁 𑀓𑀧𑀡𑀬𑀸𑀘𑀓𑀸𑀦𑀁 𑀅𑀤𑀁𑀲𑀼.

𑀧𑀼𑀦𑀤𑀺𑀯𑀲𑁂 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀲𑀚𑁆𑀚𑁂𑀢𑁆𑀯𑀸 𑀢𑀣𑁂𑀯 𑀤𑀓𑁆𑀔𑀺𑀡𑁂𑀬𑁆𑀬𑀁 𑀦𑀸𑀮𑀢𑁆𑀣, 𑀧𑀼𑀦𑀤𑀺𑀯𑀲𑁂𑀧𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂 𑀢𑀣𑁂𑀯. 𑀉𑀢𑁆𑀢𑀭𑀤𑁆𑀯𑀸𑀭𑁂 𑀲𑀚𑁆𑀚𑀺𑀢𑀤𑀺𑀯𑀲𑁂𑀦 𑀧𑀦 𑀤𑁂𑀯𑀺𑀬𑀸 𑀢𑀣𑁂𑀯 𑀦𑀺𑀫𑀦𑁆𑀢𑁂𑀦𑁆𑀢𑀺𑀬𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑀸𑀦𑀁 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀚𑁂𑀝𑁆𑀞𑀓𑁄 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀸𑀢𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀸𑀭𑀺𑀲𑀸, 𑀦𑀦𑁆𑀤𑀭𑀸𑀚𑀸 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑁂𑀢𑀺, 𑀅𑀥𑀺𑀯𑀸𑀲𑁂𑀣 𑀢𑀲𑁆𑀲𑀸’’𑀢𑀺. 𑀢𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀑𑀢𑀭𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 ‘‘𑀧𑀜𑁆𑀘𑀲𑀢𑀸, 𑀤𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀆𑀕𑀢𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀤𑁆𑀥𑀺𑀁 𑀤𑁂𑀯𑀺𑀬𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁆𑀭 𑀦𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲, 𑀤𑁂𑀯𑀻 𑀲𑀗𑁆𑀖𑀦𑀯𑀓𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 ‘‘𑀅𑀬𑁆𑀬𑀸, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺, 𑀫𑀬𑀜𑁆𑀘 𑀧𑀼𑀜𑁆𑀜𑁂𑀦 𑀦 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀻, 𑀅𑀫𑁆𑀳𑀸𑀓𑀁 𑀬𑀸𑀯𑀚𑀻𑀯𑀁 𑀇𑀥 𑀦𑀺𑀯𑀸𑀲𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀜𑁆𑀘 𑀧𑀡𑁆𑀡𑀲𑀸𑀮𑀸𑀲𑀢𑀸𑀦𑀺, 𑀧𑀜𑁆𑀘 𑀘𑀗𑁆𑀓𑀫𑀦𑀲𑀢𑀸𑀦𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁.

𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀭𑀸𑀚𑀸 ‘‘𑀅𑀳𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀫𑀸 𑀧𑀫𑀚𑁆𑀚𑀸’’𑀢𑀺 𑀤𑁂𑀯𑀺𑀁 𑀑𑀯𑀤𑀺𑀢𑁆𑀯𑀸 𑀕𑀢𑁄. 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀡𑀸. 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀛𑀸𑀦𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀬𑁂 𑀆𑀮𑀫𑁆𑀩𑀦𑀨𑀮𑀓𑀁 𑀆𑀮𑀫𑁆𑀩𑀺𑀢𑁆𑀯𑀸 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁂𑀲𑀸𑀧𑀻𑀢𑀺 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸. 𑀧𑀼𑀦𑀤𑀺𑀯𑀲𑁂 𑀤𑁂𑀯𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀥𑀽𑀧𑀁 𑀯𑀸𑀲𑁂𑀢𑁆𑀯𑀸 𑀢𑁂𑀲𑀁 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑀻 𑀦𑀺𑀲𑀺𑀦𑁆𑀦𑀸 𑀆𑀕𑀫𑀦𑀁 𑀅𑀤𑀺𑀲𑁆𑀯𑀸 𑀧𑀼𑀭𑀺𑀲𑁂 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙𑀣, 𑀢𑀸𑀢𑀸, 𑀚𑀸𑀦𑀸𑀣 𑀓𑀺𑀁 𑀅𑀬𑁆𑀬𑀸𑀦𑀁 𑀅𑀨𑀸𑀲𑀼𑀓’’𑀦𑁆𑀢𑀺? 𑀢𑁂 𑀕𑀦𑁆𑀢𑁆𑀯𑀸 𑀫𑀳𑀸𑀧𑀤𑀼𑀫𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁆𑀣 𑀢𑀁 𑀅𑀧𑀲𑁆𑀲𑀦𑁆𑀢𑀸 𑀘𑀗𑁆𑀓𑀫𑀦𑀁 𑀕𑀦𑁆𑀢𑁆𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀸𑀮𑁄, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. 𑀧𑀭𑀺𑀦𑀺𑀩𑁆𑀩𑀼𑀢𑀲𑀭𑀻𑀭𑀁 𑀓𑀺𑀁 𑀓𑀣𑁂𑀲𑁆𑀲𑀢𑀺, 𑀢𑁂 ‘‘𑀦𑀺𑀤𑁆𑀤𑀸𑀬𑀢𑀺 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀤𑁂 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀧𑀸𑀤𑀸𑀦𑀁 𑀲𑀻𑀢𑀮𑀢𑀸𑀬 𑀘𑁂𑀯 𑀣𑀤𑁆𑀥𑀢𑀸𑀬 𑀘 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀜𑀢𑁆𑀯𑀸 𑀧𑀼𑀦 𑀢𑀢𑀺𑀬𑀲𑁆𑀲𑀸𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀭𑀸𑀚𑀓𑀼𑀮𑀁 𑀆𑀕𑀫𑀺𑀁𑀲𑀼. ‘‘𑀓𑀳𑀁, 𑀢𑀸𑀢𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺 𑀧𑀼𑀝𑁆𑀞𑀸 ‘‘𑀧𑀭𑀺𑀦𑀺𑀩𑁆𑀩𑀼𑀢𑀸, 𑀤𑁂𑀯𑀻’’𑀢𑀺 𑀆𑀳𑀁𑀲𑀼. 𑀤𑁂𑀯𑀻 𑀓𑀦𑁆𑀤𑀦𑁆𑀢𑀻 𑀭𑁄𑀤𑀦𑁆𑀢𑀻 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀸𑀕𑀭𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀥𑀼𑀓𑀻𑀴𑀺𑀢𑀁 𑀓𑀸𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀆𑀕𑀢𑀁 𑀤𑁂𑀯𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀪𑀤𑁆𑀤𑁂, 𑀢𑁆𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀦 𑀧𑀫𑀚𑁆𑀚𑀲𑀺, 𑀦𑀺𑀭𑁄𑀕𑀸 𑀘 𑀅𑀬𑁆𑀬𑀸’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑀸, 𑀤𑁂𑀯𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀭𑀽𑀧𑀸𑀦𑀫𑁆𑀧𑀺 𑀧𑀡𑁆𑀟𑀺𑀢𑀸𑀦𑀁 𑀫𑀭𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀫𑁆𑀳𑀸𑀓𑀁 𑀓𑀼𑀢𑁄 𑀫𑁄𑀓𑁆𑀔𑀸’’𑀢𑀺? 𑀲𑁄 𑀦𑀕𑀭𑀁 𑀅𑀧𑀯𑀺𑀲𑀺𑀢𑁆𑀯𑀸 𑀉𑀬𑁆𑀬𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀬𑀁 𑀲𑀫𑀡𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀤𑁂𑀯𑀻𑀧𑀺 ‘‘𑀭𑀜𑁆𑀜𑁂 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀉𑀬𑁆𑀬𑀸𑀦𑁂 𑀧𑀩𑁆𑀩𑀚𑀺. 𑀤𑁆𑀯𑁂𑀧𑀺 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀢𑁂𑀲𑀼 𑀢𑀢𑁆𑀣𑁂𑀯 𑀯𑀲𑀦𑁆𑀢𑁂𑀲𑀼 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀭𑀺 𑀢𑀢𑁆𑀣 𑀧𑀝𑀺𑀯𑀲𑀦𑁆𑀢𑁂 𑀅𑀬𑀁 𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀅𑀬𑀁 𑀪𑀤𑁆𑀤𑀓𑀸𑀧𑀺𑀮𑀸𑀦𑀻 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀓𑁄𑀲𑀺𑀬𑀕𑁄𑀢𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀁 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀫𑀸𑀦𑀸𑀦𑀁 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀯𑀻𑀲𑀢𑀺𑀫𑁂, 𑀪𑀤𑁆𑀤𑀸𑀬 𑀲𑁄𑀴𑀲𑀫𑁂 𑀯𑀬𑁂 𑀲𑀫𑁆𑀧𑀢𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀯𑀬𑀧𑁆𑀧𑀢𑁆𑀢𑁄, 𑀓𑀼𑀮𑀯𑀁𑀲𑀁 𑀧𑀢𑀺𑀝𑁆𑀞𑀧𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀅𑀢𑀺𑀯𑀺𑀬 𑀦𑀺𑀧𑁆𑀧𑀻𑀴𑀺𑀬𑀺𑀁𑀲𑀼. 𑀫𑀸𑀡𑀯𑁄 𑀆𑀳 𑁋 ‘‘𑀫𑀬𑁆𑀳𑀁 𑀲𑁄𑀢𑀧𑀣𑁂 𑀏𑀯𑀭𑀽𑀧𑀁 𑀓𑀣𑀁 𑀫𑀸 𑀓𑀣𑀬𑀺𑀢𑁆𑀣, 𑀅𑀳𑀁 𑀬𑀸𑀯 𑀢𑀼𑀫𑁆𑀳𑁂 𑀥𑀭𑀣, 𑀢𑀸𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀓𑀢𑀺𑀧𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀓𑀣𑀬𑀺𑀁𑀲𑀼. 𑀲𑁄𑀧𑀺 𑀧𑀼𑀦 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸 𑀦𑀺𑀭𑀦𑁆𑀢𑀭𑀁 𑀓𑀣𑁂𑀢𑀺𑀬𑁂𑀯.

𑀫𑀸𑀡𑀯𑁄 ‘‘𑀫𑀸𑀢𑀭𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑁂𑀳𑀺 𑀇𑀢𑁆𑀣𑀺𑀭𑀽𑀧𑀓𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀫𑀚𑁆𑀚𑀦𑀖𑀝𑁆𑀝𑀦𑀸𑀤𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂 𑀢𑀁 𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀯𑀡𑁆𑀡𑀲𑀫𑁆𑀧𑀦𑁆𑀦𑁂𑀳𑀺 𑀧𑀼𑀧𑁆𑀨𑁂𑀳𑀺 𑀘𑁂𑀯 𑀦𑀸𑀦𑀸𑀮𑀗𑁆𑀓𑀸𑀭𑁂𑀳𑀺 𑀘 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 ‘‘𑀅𑀫𑁆𑀫, 𑀏𑀯𑀭𑀽𑀧𑀁 𑀆𑀭𑀫𑁆𑀫𑀡𑀁 𑀮𑀪𑀦𑁆𑀢𑁄 𑀕𑁂𑀳𑁂 𑀯𑀲𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑁄 𑀦 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀧𑀼𑀜𑁆𑀜𑀯𑀸 𑀤𑀺𑀦𑁆𑀦𑀤𑀸𑀦𑁄 𑀓𑀢𑀸𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑁂 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀦 𑀏𑀓𑀓𑁄𑀯 𑀅𑀓𑀸𑀲𑀺, 𑀅𑀤𑁆𑀥𑀸 𑀏𑀢𑁂𑀦 𑀲𑀳 𑀓𑀢𑀧𑀼𑀜𑁆𑀜𑀸 𑀲𑀼𑀯𑀡𑁆𑀡𑀭𑀽𑀧𑀓𑀧𑀝𑀺𑀪𑀸𑀕𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀪𑁄𑀕𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀬𑀢𑁆𑀣 𑀅𑀫𑁆𑀳𑁂𑀳𑀺 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀤𑀺𑀲𑀫𑀸𑀦𑀓𑀼𑀮𑁂 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀲𑁆𑀲𑀣, 𑀢𑀢𑁆𑀣 𑀇𑀤𑀫𑁂𑀯 𑀲𑀼𑀯𑀡𑁆𑀡𑀭𑀽𑀧𑀓𑀁 𑀲𑀘𑁆𑀘𑀸𑀓𑀸𑀭𑀁 𑀓𑀢𑁆𑀯𑀸 𑀤𑁂𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺.

𑀢𑁂 ‘‘𑀅𑀫𑁆𑀳𑀸𑀓𑀁 𑀦𑀸𑀫 𑀏𑀢𑀁 𑀓𑀫𑁆𑀫’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀓𑀢𑁆𑀣 𑀮𑀪𑀺𑀲𑁆𑀲𑀸𑀫, 𑀫𑀤𑁆𑀤𑀭𑀝𑁆𑀞𑀁 𑀦𑀸𑀫 𑀇𑀢𑁆𑀣𑀸𑀕𑀸𑀭𑀁, 𑀫𑀤𑁆𑀤𑀭𑀝𑁆𑀞𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀅𑀕𑀫𑀁𑀲𑀼. 𑀅𑀢𑁆𑀣 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀦𑁆𑀳𑀸𑀦𑀢𑀺𑀢𑁆𑀣𑁂 𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀪𑀤𑁆𑀤𑀸𑀬 𑀥𑀸𑀢𑀻 𑀪𑀤𑁆𑀤𑀁 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀬𑀁 𑀦𑁆𑀳𑀸𑀬𑀺𑀢𑀼𑀁 𑀉𑀤𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀤𑀺𑀲𑁆𑀯𑀸 ‘‘𑀓𑀺𑀲𑁆𑀲𑀸𑀬𑀁 𑀅𑀯𑀺𑀦𑀻𑀢𑀸 𑀇𑀥𑀸𑀕𑀦𑁆𑀢𑁆𑀯𑀸 𑀞𑀺𑀢𑀸’’𑀢𑀺 𑀧𑀺𑀝𑁆𑀞𑀺𑀧𑀲𑁆𑀲𑁂 𑀧𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀜𑀢𑁆𑀯𑀸 ‘‘𑀅𑀬𑁆𑀬𑀥𑀻𑀢𑀸 𑀫𑁂𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺, 𑀅𑀬𑀁 𑀧𑀦 𑀅𑀬𑁆𑀬𑀥𑀻𑀢𑀸𑀬 𑀦𑀺𑀯𑀸𑀲𑀦𑀧𑀝𑀺𑀕𑁆𑀕𑀳𑀺𑀢𑀸𑀬𑀧𑀺 𑀅𑀲𑀤𑀺𑀲𑀸’’𑀢𑀺 𑀆𑀳. 𑀅𑀣 𑀦𑀁 𑀢𑁂 𑀩𑁆𑀭𑀸𑀳𑁆𑀫𑀡𑀸 ‘‘𑀏𑀯𑀭𑀽𑀧𑀸 𑀓𑀺𑀭 𑀢𑁂 𑀲𑀸𑀫𑀺𑀥𑀻𑀢𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 ‘‘𑀇𑀫𑀸𑀬 𑀲𑀼𑀯𑀡𑁆𑀡𑀧𑀝𑀺𑀫𑀸𑀬 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀫𑀬𑁆𑀳𑀁 𑀅𑀬𑁆𑀬𑀥𑀻𑀢𑀸 𑀅𑀪𑀺𑀭𑀽𑀧𑀢𑀭𑀸’’, 𑀢𑀣𑀸 𑀳𑀺 ‘‘𑀅𑀧𑁆𑀧𑀤𑀻𑀧𑁂𑀧𑀺 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑀸 𑀲𑀭𑀻𑀭𑁄𑀪𑀸𑀲𑁂𑀦 𑀢𑀫𑀁 𑀯𑀺𑀥𑀫𑀢𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀭𑀽𑀧𑀓𑀁 𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀥𑀸𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀓𑁄𑀲𑀺𑀬𑀕𑁄𑀢𑁆𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀕𑀫𑀦𑀁 𑀆𑀭𑁄𑀘𑀬𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀕𑀸𑀫𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀢𑁄 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀆𑀕𑀢𑀫𑁆𑀳𑀸’’𑀢𑀺 𑀆𑀳𑀁𑀲𑀼. ‘‘𑀲𑀸𑀥𑀼, 𑀢𑀸𑀢𑀸, 𑀅𑀫𑁆𑀳𑁂𑀳𑀺 𑀲𑀫𑀚𑀸𑀢𑀺𑀕𑁄𑀢𑁆𑀢𑀯𑀺𑀪𑀯𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄, 𑀤𑀲𑁆𑀲𑀸𑀫 𑀤𑀸𑀭𑀺𑀓’’𑀦𑁆𑀢𑀺 𑀧𑀡𑁆𑀡𑀸𑀓𑀸𑀭𑀁 𑀕𑀡𑁆𑀳𑀺. 𑀢𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀮𑀤𑁆𑀥𑀸 𑀦𑁄 𑀪𑀤𑁆𑀤𑀸 𑀦𑀸𑀫 𑀤𑀸𑀭𑀺𑀓𑀸, 𑀓𑀢𑁆𑀢𑀩𑁆𑀩𑀁 𑀚𑀸𑀦𑀸𑀣𑀸’’𑀢𑀺. 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀆𑀭𑁄𑀘𑀬𑀺𑀁𑀲𑀼 ‘‘𑀮𑀤𑁆𑀥𑀸 𑀤𑀸𑀭𑀺𑀓𑀸’’𑀢𑀺. 𑀧𑀺𑀧𑁆𑀧𑀮𑀺𑀫𑀸𑀡𑀯𑁄 ‘‘𑀅𑀳𑀁 ‘𑀦 𑀮𑀪𑀺𑀲𑁆𑀲𑀦𑁆𑀢𑀻’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀇𑀫𑁂 ‘𑀮𑀤𑁆𑀥𑀸’𑀢𑀺 𑀧𑁂𑀲𑁂𑀦𑁆𑀢𑀺, 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀧𑀡𑁆𑀡𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀳𑁄𑀕𑀢𑁄 𑀧𑀡𑁆𑀡𑀁 𑀮𑀺𑀔𑀺 ‘‘𑀪𑀤𑁆𑀤𑀸 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀦𑀼𑀭𑀽𑀧𑀁 𑀧𑀢𑀺𑀁 𑀮𑀪𑀢𑀼, 𑀅𑀳𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀅𑀳𑁄𑀲𑀻’’𑀢𑀺. 𑀪𑀤𑁆𑀤𑀸𑀧𑀺 ‘‘𑀅𑀲𑀼𑀓𑀲𑁆𑀲 𑀓𑀺𑀭 𑀫𑀁 𑀤𑀸𑀢𑀼𑀓𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀭𑀳𑁄𑀕𑀢𑀸 𑀧𑀡𑁆𑀡𑀁 𑀮𑀺𑀔𑀺 𑁋 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀦𑀼𑀭𑀽𑀧𑀁 𑀤𑀸𑀭𑀺𑀓𑀁 𑀮𑀪𑀢𑀼, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀪𑀯𑀸𑀳𑀻’’𑀢𑀺. 𑀤𑁆𑀯𑁂𑀧𑀺 𑀧𑀡𑁆𑀡𑀸𑀦𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. ‘‘𑀇𑀤𑀁 𑀓𑀲𑁆𑀲 𑀧𑀡𑁆𑀡’’𑀦𑁆𑀢𑀺? ‘‘𑀧𑀺𑀧𑁆𑀧𑀮𑀺𑀫𑀸𑀡𑀯𑁂𑀦 𑀪𑀤𑁆𑀤𑀸𑀬 𑀧𑀳𑀺𑀢’’𑀦𑁆𑀢𑀺. ‘‘𑀇𑀤𑀁 𑀓𑀲𑁆𑀲𑀸’’𑀢𑀺? ‘‘𑀪𑀤𑁆𑀤𑀸𑀬 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀧𑀳𑀺𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀢𑁂 𑀤𑁆𑀯𑁂𑀧𑀺 𑀯𑀸𑀘𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀤𑀸𑀭𑀓𑀸𑀦𑀁 𑀓𑀫𑁆𑀫’’𑀦𑁆𑀢𑀺 𑀨𑀸𑀮𑁂𑀢𑁆𑀯𑀸 𑀅𑀭𑀜𑁆𑀜𑁂 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀢𑀁𑀲𑀫𑀸𑀦𑀁 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀇𑀢𑁄 𑀏𑀢𑁆𑀢𑁄 𑀘 𑀧𑁂𑀲𑁂𑀲𑀼𑀁. 𑀇𑀢𑀺 𑀓𑀼𑀫𑀸𑀭𑀲𑁆𑀲 𑀓𑀼𑀫𑀸𑀭𑀺𑀓𑀸𑀬 𑀘 𑀲𑀤𑀺𑀲𑀁 𑀧𑀡𑁆𑀡𑀁 𑀮𑁄𑀓𑀲𑁆𑀲𑀸𑀤𑀭𑀳𑀺𑀢𑀫𑁂𑀯𑀸𑀢𑀺 𑀅𑀦𑀺𑀘𑁆𑀙𑀫𑀸𑀦𑀸𑀦𑀫𑁆𑀧𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺.

𑀢𑀁𑀤𑀺𑀯𑀲𑀫𑁂𑀯 𑀧𑀺𑀧𑁆𑀧𑀮𑀺𑀫𑀸𑀡𑀯𑁄𑀧𑀺 𑀪𑀤𑁆𑀤𑀁 𑀏𑀓𑀁 𑀧𑀼𑀧𑁆𑀨𑀤𑀸𑀫𑀁 𑀕𑀡𑁆𑀳𑀸𑀧𑁂𑀲𑀺. 𑀪𑀤𑁆𑀤𑀸𑀧𑀺 𑀢𑀸𑀦𑀺 𑀲𑀬𑀦𑀫𑀚𑁆𑀛𑁂 𑀞𑀧𑁂𑀲𑀺. 𑀉𑀪𑁄𑀧𑀺 𑀪𑀼𑀢𑁆𑀢𑀲𑀸𑀬𑀫𑀸𑀲𑀸 𑀲𑀬𑀦𑀁 𑀆𑀭𑀼𑀳𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀢𑁂𑀲𑀼 𑀫𑀸𑀡𑀯𑁄 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀦𑀁 𑀆𑀭𑀼𑀳𑀺, 𑀪𑀤𑁆𑀤𑀸 𑀯𑀸𑀫𑀧𑀲𑁆𑀲𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀆𑀳 𑁋 ‘‘𑀬𑀲𑁆𑀲 𑀧𑀲𑁆𑀲𑁂 𑀧𑀼𑀧𑁆𑀨𑀸𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀢𑀲𑁆𑀲 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀺𑀚𑀸𑀦𑀺𑀲𑁆𑀲𑀸𑀫, 𑀇𑀫𑀁 𑀧𑀼𑀧𑁆𑀨𑀤𑀸𑀫𑀁 𑀦 𑀅𑀮𑁆𑀮𑀻𑀬𑀺𑀢𑀩𑁆𑀩’’𑀦𑁆𑀢𑀺. 𑀢𑁂 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑀲𑀫𑁆𑀨𑀲𑁆𑀲𑀪𑀬𑁂𑀦 𑀲𑀓𑀮𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀦𑁆𑀢𑀸𑀯 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀤𑀺𑀯𑀸 𑀧𑀦 𑀳𑀲𑀺𑀢𑀫𑀢𑁆𑀢𑀫𑁆𑀧𑀺 𑀦𑀸𑀓𑀁𑀲𑀼. 𑀢𑁂 𑀮𑁄𑀓𑀸𑀫𑀺𑀲𑁂𑀦 𑀅𑀲𑀁𑀲𑀝𑁆𑀞𑀸 𑀬𑀸𑀯 𑀫𑀸𑀢𑀸𑀧𑀺𑀢𑀭𑁄 𑀥𑀭𑀦𑁆𑀢𑀺, 𑀢𑀸𑀯 𑀓𑀼𑀝𑀼𑀫𑁆𑀩𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀢𑁂𑀲𑀼 𑀓𑀸𑀮𑀗𑁆𑀓𑀢𑁂𑀲𑀼 𑀯𑀺𑀘𑀸𑀭𑀬𑀺𑀁𑀲𑀼. 𑀫𑀳𑀢𑀻 𑀫𑀸𑀡𑀯𑀲𑁆𑀲 𑀲𑀫𑁆𑀧𑀢𑁆𑀢𑀺. 𑀏𑀓𑀤𑀺𑀯𑀲𑀁 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀙𑀟𑁆𑀟𑁂𑀢𑀩𑁆𑀩𑀁 𑀲𑀼𑀯𑀡𑁆𑀡𑀘𑀼𑀡𑁆𑀡𑀁 𑀏𑀯 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀸𑀤𑀲𑀦𑀸𑀴𑀺𑀫𑀢𑁆𑀢𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀬𑀦𑁆𑀢𑀩𑀤𑁆𑀥𑀸𑀦𑀺 𑀲𑀝𑁆𑀞𑀺 𑀫𑀳𑀸𑀢𑀴𑀸𑀓𑀸𑀦𑀺, 𑀓𑀫𑁆𑀫𑀦𑁆𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄, 𑀅𑀦𑀼𑀭𑀸𑀥𑀧𑀼𑀭𑀧𑁆𑀧𑀫𑀸𑀡𑀸 𑀘𑀼𑀤𑁆𑀤𑀲𑀕𑀸𑀫𑀸, 𑀘𑀼𑀤𑁆𑀤𑀲 𑀳𑀢𑁆𑀣𑀸𑀦𑀻𑀓𑀸𑀦𑀺, 𑀘𑀼𑀤𑁆𑀤𑀲 𑀅𑀲𑁆𑀲𑀸𑀦𑀻𑀓𑀸𑀦𑀺, 𑀘𑀼𑀤𑁆𑀤𑀲 𑀭𑀣𑀸𑀦𑀻𑀓𑀸𑀦𑀺.

𑀲𑁄 𑀏𑀓𑀤𑀺𑀯𑀲𑀁 𑀅𑀮𑀗𑁆𑀓𑀢𑀅𑀲𑁆𑀲𑀁 𑀆𑀭𑀼𑀬𑁆𑀳 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀔𑁂𑀢𑁆𑀢𑀓𑁄𑀝𑀺𑀬𑀁 𑀞𑀺𑀢𑁄 𑀦𑀗𑁆𑀕𑀮𑁂𑀳𑀺 𑀙𑀺𑀦𑁆𑀦𑀝𑁆𑀞𑀸𑀦𑀢𑁄 𑀓𑀸𑀓𑀸𑀤𑀬𑁄 𑀲𑀓𑀼𑀡𑁂 𑀕𑀡𑁆𑀟𑀼𑀧𑁆𑀧𑀸𑀤𑀸𑀤𑀺𑀓𑁂 𑀧𑀸𑀡𑀓𑁂 𑀉𑀤𑁆𑀥𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀢𑀸𑀢𑀸, 𑀇𑀫𑁂 𑀓𑀺𑀁 𑀔𑀸𑀤𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀕𑀡𑁆𑀟𑀼𑀧𑁆𑀧𑀸𑀤𑁂, 𑀅𑀬𑁆𑀬𑀸’’𑀢𑀺. ‘‘𑀏𑀢𑁂𑀳𑀺 𑀓𑀢𑀧𑀸𑀧𑀁 𑀓𑀲𑁆𑀲 𑀳𑁄𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑀸’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀏𑀢𑁂𑀳𑀺 𑀓𑀢𑀧𑀸𑀧𑀁 𑀫𑀬𑁆𑀳𑀁 𑀳𑁄𑀢𑀺, 𑀓𑀺𑀁 𑀫𑁂 𑀓𑀭𑀺𑀲𑁆𑀲𑀢𑀺 𑀲𑀢𑁆𑀢𑀅𑀲𑀻𑀢𑀺𑀓𑁄𑀝𑀺𑀥𑀦𑀁, 𑀤𑁆𑀯𑀸𑀤𑀲𑀬𑁄𑀚𑀦𑀓𑀫𑁆𑀫𑀦𑁆𑀢𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀬𑀦𑁆𑀢𑀩𑀤𑁆𑀥𑀸𑀦𑀺 𑀢𑀴𑀸𑀓𑀸𑀦𑀺, 𑀓𑀺𑀁 𑀘𑀼𑀤𑁆𑀤𑀲 𑀕𑀸𑀫𑀸𑀦𑀺, 𑀲𑀩𑁆𑀩𑀫𑁂𑀢𑀁 𑀪𑀤𑁆𑀤𑀸𑀬 𑀓𑀸𑀧𑀺𑀮𑀸𑀦𑀺𑀬𑀸 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀢𑀲𑁆𑀫𑀺𑀁 𑀔𑀡𑁂 𑀅𑀦𑁆𑀢𑀭𑀯𑀢𑁆𑀣𑀼𑀲𑁆𑀫𑀺𑀁 𑀢𑀬𑁄 𑀢𑀺𑀮𑀓𑀼𑀫𑁆𑀪𑁂 𑀧𑀢𑁆𑀣𑀭𑀺𑀢𑁆𑀯𑀸 𑀥𑀸𑀢𑀻𑀳𑀺 𑀧𑀭𑀺𑀯𑀼𑀢𑀸 𑀦𑀺𑀲𑀺𑀦𑁆𑀦𑀸 𑀓𑀸𑀓𑁂 𑀢𑀺𑀮𑀧𑀸𑀡𑀓𑁂 𑀔𑀸𑀤𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀫𑀸, 𑀓𑀺𑀁 𑀇𑀫𑁂 𑀔𑀸𑀤𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀸𑀡𑀓𑁂, 𑀅𑀬𑁆𑀬𑁂’’𑀢𑀺. ‘‘𑀅𑀓𑀼𑀲𑀮𑀁 𑀓𑀲𑁆𑀲 𑀳𑁄𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑁂’’𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀘𑀢𑀼𑀳𑀢𑁆𑀣𑀁 𑀯𑀢𑁆𑀣𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀬𑀤𑀺 𑀧𑀦𑁂𑀢𑀁 𑀏𑀢𑁂𑀳𑀺 𑀓𑀢𑀁 𑀅𑀓𑀼𑀲𑀮𑀁 𑀫𑀬𑁆𑀳𑀁 𑀳𑁄𑀢𑀺, 𑀪𑀯𑀲𑀳𑀲𑁆𑀲𑁂𑀦𑀧𑀺 𑀯𑀝𑁆𑀝𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸, 𑀅𑀬𑁆𑀬𑀧𑀼𑀢𑁆𑀢𑁂 𑀆𑀕𑀢𑀫𑀢𑁆𑀢𑁂𑀬𑁂𑀯 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀫𑀸𑀡𑀯𑁄 𑀆𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺, 𑀅𑀣𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀦𑀼𑀘𑁆𑀙𑀯𑀺𑀓𑀪𑁄𑀚𑀦𑀁 𑀉𑀧𑀦𑀬𑀺𑀁𑀲𑀼. 𑀤𑁆𑀯𑁂𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀚𑀦𑁂 𑀦𑀺𑀓𑁆𑀔𑀦𑁆𑀢𑁂 𑀭𑀳𑁄𑀕𑀢𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀫𑀸𑀡𑀯𑁄 𑀪𑀤𑁆𑀤𑀁 𑀆𑀳 𑁋 ‘‘𑀪𑀤𑁆𑀤𑁂, 𑀇𑀫𑀁 𑀖𑀭𑀁 𑀆𑀕𑀘𑁆𑀙𑀦𑁆𑀢𑀻 𑀓𑀺𑀢𑁆𑀢𑀓𑀁 𑀥𑀦𑀫𑀸𑀳𑀭𑀲𑀻’’𑀢𑀺? ‘‘𑀧𑀜𑁆𑀘𑀧𑀡𑁆𑀡𑀸𑀲 𑀲𑀓𑀝𑀲𑀳𑀲𑁆𑀲𑀸𑀦𑀺, 𑀅𑀬𑁆𑀬𑀸’’𑀢𑀺. ‘‘𑀲𑀩𑁆𑀩𑀁 𑀢𑀁, 𑀬𑀸 𑀘 𑀇𑀫𑀲𑁆𑀫𑀺𑀁 𑀖𑀭𑁂 𑀲𑀢𑁆𑀢𑀸𑀲𑀻𑀢𑀺 𑀓𑁄𑀝𑀺𑀬𑁄 𑀬𑀦𑁆𑀢𑀩𑀤𑁆𑀥𑀸𑀦𑀺 𑀲𑀝𑁆𑀞𑀺 𑀢𑀴𑀸𑀓𑀸𑀦𑀻𑀢𑀺 𑀏𑀯𑀫𑀸𑀤𑀺𑀪𑁂𑀤𑀸 𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀢𑀼𑀬𑁆𑀳𑁂𑀯 𑀦𑀺𑀬𑁆𑀬𑀸𑀢𑁂𑀫𑀻’’𑀢𑀺. ‘‘𑀢𑀼𑀫𑁆𑀳𑁂 𑀧𑀦 𑀓𑀼𑀳𑀺𑀁 𑀕𑀘𑁆𑀙𑀣, 𑀅𑀬𑁆𑀬𑀸’’𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀬𑁆𑀬, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀲𑀁 𑀆𑀤𑀺𑀢𑁆𑀢𑀧𑀡𑁆𑀡𑀓𑀼𑀝𑀺 𑀯𑀺𑀬 𑀢𑀬𑁄 𑀪𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 𑀓𑀸𑀲𑀸𑀬𑀭𑀲𑀧𑀻𑀢𑀸𑀦𑀺 𑀘𑀻𑀯𑀭𑀸𑀦𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀘 𑀆𑀳𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀓𑁂𑀲𑁂 𑀑𑀳𑀸𑀭𑁂𑀢𑁆𑀯𑀸 ‘‘𑀬𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀢𑁂 𑀉𑀤𑁆𑀤𑀺𑀲𑁆𑀲 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀣𑀯𑀺𑀓𑀸𑀲𑀼 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀧𑀸𑀲𑀸𑀤𑀢𑁄 𑀑𑀢𑀭𑀺𑀁𑀲𑀼. 𑀕𑁂𑀳𑁂 𑀤𑀸𑀲𑁂𑀲𑀼 𑀘 𑀓𑀫𑁆𑀫𑀓𑀸𑀭𑁂𑀲𑀼 𑀘 𑀦 𑀓𑁄𑀘𑀺 𑀲𑀜𑁆𑀚𑀸𑀦𑀺.

𑀅𑀣 𑀦𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀲𑀕𑀸𑀫𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂 𑀆𑀓𑀧𑁆𑀧𑀓𑀼𑀢𑀯𑀲𑁂𑀦 𑀤𑀸𑀲𑀕𑀸𑀫𑀯𑀸𑀲𑀺𑀦𑁄 𑀲𑀜𑁆𑀚𑀸𑀦𑀺𑀁𑀲𑀼. 𑀢𑁂 𑀭𑁄𑀤𑀦𑁆𑀢𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀓𑀺𑀁 𑀅𑀫𑁆𑀳𑁂 𑀅𑀦𑀸𑀣𑁂 𑀓𑀭𑁄𑀣, 𑀅𑀬𑁆𑀬𑀸’’𑀢𑀺 𑀆𑀳𑀁𑀲𑀼. ‘‘𑀫𑀬𑀁, 𑀪𑀡𑁂, ‘𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀧𑀡𑁆𑀡𑀲𑀸𑀮𑀸 𑀯𑀺𑀬𑀸’𑀢𑀺 𑀧𑀩𑁆𑀩𑀚𑀺𑀫𑁆𑀳, 𑀲𑀘𑁂 𑀢𑀼𑀫𑁆𑀳𑁂𑀲𑀼 𑀏𑀓𑁂𑀓𑀁 𑀪𑀼𑀚𑀺𑀲𑁆𑀲𑀁 𑀓𑀭𑁄𑀫, 𑀯𑀲𑁆𑀲𑀲𑀢𑀫𑁆𑀧𑀺 𑀦𑀧𑁆𑀧𑀳𑁄𑀢𑀺. 𑀢𑀼𑀫𑁆𑀳𑁂𑀯 𑀢𑀼𑀫𑁆𑀳𑀸𑀓𑀁 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀪𑀼𑀚𑀺𑀲𑁆𑀲𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀭𑁄𑀤𑀦𑁆𑀢𑀸𑀦𑀁𑀬𑁂𑀯 𑀧𑀓𑁆𑀓𑀫𑀺𑀁𑀲𑀼.

𑀣𑁂𑀭𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀲𑀓𑀮𑀚𑀫𑁆𑀩𑀼𑀤𑀻𑀧𑀕𑁆𑀖𑀦𑀺𑀓𑀸 𑀇𑀢𑁆𑀣𑀻 𑀫𑀬𑁆𑀳𑀁 𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀺, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀓𑁄𑀘𑀺𑀤𑁂𑀯 𑀏𑀯𑀁 𑀘𑀺𑀦𑁆𑀢𑁂𑀬𑁆𑀬 ‘𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑀻’𑀢𑀺. 𑀏𑀯𑀁 𑀓𑁄𑀘𑀺 𑀧𑀸𑀧𑀓𑁂𑀦 𑀫𑀦𑀲𑀸 𑀧𑀤𑀽𑀲𑁂𑀢𑁆𑀯𑀸 𑀅𑀧𑀸𑀬𑀧𑀽𑀭𑀓𑁄 𑀪𑀯𑁂𑀬𑁆𑀬, 𑀇𑀫𑀁 𑀧𑀳𑀸𑀬 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀤𑁆𑀯𑁂𑀥𑀸𑀧𑀣𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀪𑀤𑁆𑀤𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀆𑀳 𑁋 ‘‘𑀪𑀤𑁆𑀤𑁂, 𑀢𑀸𑀤𑀺𑀲𑀺𑀁 𑀇𑀢𑁆𑀣𑀺𑀁 𑀫𑀫 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’𑀢𑀺 𑀅𑀫𑁆𑀳𑁂𑀲𑀼 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀚𑀦𑁄 𑀅𑀧𑀸𑀬𑀧𑀽𑀭𑀓𑁄 𑀪𑀯𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀤𑁆𑀯𑁂𑀥𑀸𑀧𑀣𑁂 𑀢𑁆𑀯𑀁 𑀏𑀢𑀁 𑀕𑀡𑁆𑀳, 𑀅𑀳𑀁 𑀏𑀓𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀆𑀫, 𑀅𑀬𑁆𑀬, 𑀫𑀸𑀢𑀼𑀕𑀸𑀫𑁄 ‘𑀧𑀩𑁆𑀩𑀚𑀺𑀢𑀸𑀦𑀁 𑀧𑀮𑀺𑀩𑁄𑀥𑁄, 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀦 𑀪𑀯𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀬𑁆𑀬𑀼’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀲𑀢𑀲𑀳𑀲𑁆𑀲𑀓𑀧𑁆𑀧𑀧𑀫𑀸𑀡𑁂 𑀅𑀤𑁆𑀥𑀸𑀦𑁂 𑀓𑀢𑁄 𑀫𑀺𑀢𑁆𑀢𑀲𑀦𑁆𑀣𑀯𑁄 𑀅𑀚𑁆𑀚 𑀪𑀺𑀚𑁆𑀚𑀢𑀺, 𑀢𑀼𑀫𑁆𑀳𑁂𑀯 𑀤𑀓𑁆𑀔𑀺𑀡𑀸 𑀦𑀸𑀫, 𑀢𑀼𑀫𑁆𑀳𑀸𑀓𑀁 𑀤𑀓𑁆𑀔𑀺𑀡𑀫𑀕𑁆𑀕𑁄 𑀯𑀝𑁆𑀝𑀢𑀺, 𑀫𑀬𑀁 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀯𑀸𑀫𑀚𑀸𑀢𑀺𑀓𑀸, 𑀅𑀫𑁆𑀳𑀸𑀓𑀁 𑀯𑀸𑀫𑀫𑀕𑁆𑀕𑁄 𑀯𑀝𑁆𑀝𑀢𑀻’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂𑀲𑀁 𑀤𑁆𑀯𑁂𑀥𑀸𑀪𑀽𑀢𑀓𑀸𑀮𑁂 𑀅𑀬𑀁 𑀫𑀳𑀸𑀧𑀣𑀯𑀻 ‘‘𑀅𑀳𑀁 𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀧𑀩𑁆𑀩𑀢𑀸𑀤𑀬𑁄 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀧𑀺 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀯𑀺𑀭𑀯𑀫𑀸𑀦𑀸 𑀅𑀓𑀫𑁆𑀧𑀺𑀢𑁆𑀣. 𑀆𑀓𑀸𑀲𑁂 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀺, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄 𑀉𑀦𑁆𑀦𑀸𑀤𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑁂 𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀧𑀣𑀯𑀻𑀓𑀫𑁆𑀧𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀲𑁆𑀲 𑀦𑀼 𑀔𑁄 𑀧𑀣𑀯𑀻 𑀓𑀫𑁆𑀧𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀘 𑀪𑀤𑁆𑀤𑀸 𑀘 𑀓𑀸𑀧𑀺𑀮𑀸𑀦𑀻 𑀫𑀁 𑀉𑀤𑁆𑀤𑀺𑀲𑁆𑀲 𑀅𑀧𑁆𑀧𑀫𑁂𑀬𑁆𑀬𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀢𑁂𑀲𑀁 𑀯𑀺𑀬𑁄𑀕𑀝𑁆𑀞𑀸𑀦𑁂 𑀉𑀪𑀺𑀦𑁆𑀦𑀁 𑀕𑀼𑀡𑀩𑀮𑁂𑀦 𑀅𑀬𑀁 𑀧𑀣𑀯𑀻𑀓𑀫𑁆𑀧𑁄 𑀚𑀸𑀢𑁄, 𑀫𑀬𑀸𑀧𑀺 𑀏𑀢𑁂𑀲𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀓𑀜𑁆𑀘𑀺 𑀅𑀦𑀸𑀧𑀼𑀘𑁆𑀙𑀸 𑀢𑀺𑀕𑀸𑀯𑀼𑀢𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀮𑀦𑁆𑀤𑀸𑀬 𑀘 𑀅𑀦𑁆𑀢𑀭𑁂 𑀩𑀳𑀼𑀧𑀼𑀢𑁆𑀢𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀦𑀺𑀲𑀺𑀦𑁆𑀦𑁄 𑀧𑀦 𑀅𑀜𑁆𑀜𑀢𑀭𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀅𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀸 𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀇𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀡𑁆𑀡𑀘𑁆𑀙𑀢𑁆𑀢𑀲𑀓𑀝𑀘𑀓𑁆𑀓𑀓𑀽𑀝𑀸𑀕𑀸𑀭𑀸𑀤𑀺𑀧𑁆𑀧𑀫𑀸𑀡𑀸 𑀩𑀼𑀤𑁆𑀥𑀭𑀁𑀲𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀭𑀦𑁆𑀢𑀺𑀬𑁄 𑀯𑀺𑀥𑀸𑀯𑀦𑁆𑀢𑀺𑀬𑁄 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑀉𑀕𑁆𑀕𑀫𑀦𑀓𑀸𑀮𑀁 𑀯𑀺𑀬 𑀓𑀼𑀭𑀼𑀫𑀸𑀦𑀸 𑀢𑀁 𑀯𑀦𑀦𑁆𑀢𑀭𑀁 𑀏𑀓𑁄𑀪𑀸𑀲𑀁 𑀅𑀓𑀁𑀲𑀼. 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀲𑀫𑀼𑀚𑁆𑀚𑀮𑀢𑀸𑀭𑀸𑀕𑀡𑁂𑀦 𑀯𑀺𑀬 𑀕𑀕𑀦𑀁, 𑀲𑀼𑀧𑀼𑀧𑁆𑀨𑀺𑀢𑀓𑀫𑀮𑀓𑀼𑀯𑀮𑀬𑁂𑀦 𑀯𑀺𑀬 𑀲𑀮𑀺𑀮𑀁 𑀯𑀦𑀦𑁆𑀢𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀧𑀓𑀢𑀺𑀬𑀸 𑀲𑁂𑀢𑁄 𑀳𑁄𑀢𑀺, 𑀧𑀢𑁆𑀢𑀸𑀦𑀺 𑀦𑀻𑀮𑀸𑀦𑀺 𑀧𑀓𑁆𑀓𑀸𑀦𑀺 𑀭𑀢𑁆𑀢𑀸𑀦𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀩𑁆𑀩𑁄 𑀦𑀺𑀕𑁆𑀭𑁄𑀥𑁄 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀅𑀳𑁄𑀲𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀅𑀳𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑁄 𑀕𑀦𑁆𑀢𑁆𑀯𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺, 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀆𑀳. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 ‘‘𑀓𑀲𑁆𑀲𑀧, 𑀲𑀘𑁂 𑀢𑁆𑀯𑀁 𑀇𑀫𑀁 𑀦𑀺𑀧𑀘𑁆𑀘𑀓𑀸𑀭𑀁 𑀫𑀳𑀸𑀧𑀣𑀯𑀺𑀬𑀸 𑀓𑀭𑁂𑀬𑁆𑀬𑀸𑀲𑀺, 𑀲𑀸𑀧𑀺 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀣𑀸𑀕𑀢𑀲𑁆𑀲 𑀧𑀦 𑀏𑀯𑀁 𑀕𑀼𑀡𑀫𑀳𑀦𑁆𑀢𑀢𑀁 𑀚𑀸𑀦𑀢𑀸 𑀢𑀬𑀸 𑀓𑀢𑁄 𑀦𑀺𑀧𑀘𑁆𑀘𑀓𑀸𑀭𑁄 𑀫𑀬𑁆𑀳𑀁 𑀮𑁄𑀫𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀺𑀲𑀻𑀤, 𑀓𑀲𑁆𑀲𑀧, 𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀤𑀢𑁆𑀯𑀸 𑀘 𑀩𑀳𑀼𑀧𑀼𑀢𑁆𑀢𑀦𑀺𑀕𑁆𑀭𑁄𑀥𑀫𑀽𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀭𑀻𑀭𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀁, 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁, 𑀲𑁄 𑀓𑀜𑁆𑀘𑀦𑀦𑀸𑀯𑀸𑀬 𑀧𑀘𑁆𑀙𑀸𑀩𑀤𑁆𑀥𑁄 𑀯𑀺𑀬 𑀲𑀢𑁆𑀣𑀼 𑀧𑀤𑀸𑀦𑀼𑀧𑀤𑀺𑀓𑀁 𑀅𑀦𑀼𑀕𑀜𑁆𑀙𑀺. 𑀲𑀢𑁆𑀣𑀸 𑀣𑁄𑀓𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀚𑁆𑀚𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀣𑁂𑀭𑁄 ‘‘𑀲𑀢𑁆𑀣𑀸 𑀦𑀺𑀲𑀻𑀤𑀺𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀧𑀺𑀮𑁄𑀢𑀺𑀓𑀁 𑀲𑀗𑁆𑀖𑀸𑀝𑀺𑀁 𑀘𑀢𑀼𑀕𑁆𑀕𑀼𑀡𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀲𑀺.

𑀲𑀢𑁆𑀣𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀁, 𑀓𑀲𑁆𑀲𑀧, 𑀧𑀝𑀧𑀺𑀮𑁄𑀢𑀺𑀓𑀸 𑀲𑀗𑁆𑀖𑀸𑀝𑀻’’𑀢𑀺 𑀆𑀳 (𑀲𑀁. 𑀦𑀺. 𑁨.𑁧𑁫𑁪). 𑀲𑁄 ‘‘𑀲𑀢𑁆𑀣𑀸 𑀫𑁂 𑀲𑀗𑁆𑀖𑀸𑀝𑀺𑀬𑀸 𑀫𑀼𑀤𑀼𑀪𑀸𑀯𑀁 𑀓𑀣𑁂𑀲𑀺, 𑀧𑀸𑀭𑀼𑀧𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀧𑀸𑀭𑀼𑀧𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀆𑀳. ‘‘𑀓𑀺𑀁 𑀢𑁆𑀯𑀁 𑀧𑀸𑀭𑀼𑀧𑀺𑀲𑁆𑀲𑀲𑀺, 𑀓𑀲𑁆𑀲𑀧𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀁 𑀮𑀪𑀦𑁆𑀢𑁄 𑀧𑀸𑀭𑀼𑀧𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀓𑀲𑁆𑀲𑀧, 𑀇𑀫𑀁 𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 𑀥𑀸𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀫𑀬𑀸 𑀳𑀺 𑀇𑀫𑀲𑁆𑀲 𑀧𑀁𑀲𑀼𑀓𑀽𑀮𑀲𑁆𑀲 𑀕𑀳𑀺𑀢𑀤𑀺𑀯𑀲𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺, 𑀇𑀫𑀁 𑀩𑀼𑀤𑁆𑀥𑀧𑀭𑀺𑀪𑁄𑀕𑀚𑀺𑀡𑁆𑀡𑀘𑀻𑀯𑀭𑀁 𑀦𑀸𑀫 𑀦 𑀲𑀓𑁆𑀓𑀸 𑀧𑀭𑀺𑀢𑁆𑀢𑀕𑀼𑀡𑁂𑀦 𑀥𑀸𑀭𑁂𑀢𑀼𑀁, 𑀧𑀝𑀺𑀩𑀮𑁂𑀦𑁂𑀯𑀺𑀤𑀁 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀲𑀫𑀢𑁆𑀣𑁂𑀦 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑁂𑀦 𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀲𑀺.

𑀏𑀯𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀣𑁂𑀭𑀲𑁆𑀲 𑀘𑀻𑀯𑀭𑀁 𑀪𑀕𑀯𑀸 𑀧𑀸𑀭𑀼𑀧𑀺, 𑀲𑀢𑁆𑀣𑀼 𑀘𑀻𑀯𑀭𑀁 𑀣𑁂𑀭𑁄. 𑀢𑀲𑁆𑀫𑀺𑀁 𑀔𑀡𑁂 𑀅𑀘𑁂𑀢𑀦𑀸𑀧𑀺 𑀅𑀬𑀁 𑀫𑀳𑀸𑀧𑀣𑀯𑀻 ‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀅𑀓𑀢𑁆𑀣, 𑀅𑀢𑁆𑀢𑀦𑁄 𑀧𑀸𑀭𑀼𑀢𑀘𑀻𑀯𑀭𑀁 𑀲𑀸𑀯𑀓𑁂𑀦 𑀧𑀭𑀺𑀯𑀢𑁆𑀢𑀺𑀢𑀧𑀼𑀩𑁆𑀩𑀁 𑀦𑀸𑀫 𑀦𑀸𑀳𑁄𑀲𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺. 𑀣𑁂𑀭𑁄𑀧𑀺 ‘‘𑀮𑀤𑁆𑀥𑀁 𑀫𑁂 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑀻𑀯𑀭𑀁, 𑀓𑀺𑀁 𑀫𑁂 𑀇𑀤𑀸𑀦𑀺 𑀉𑀢𑁆𑀢𑀭𑀺 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀉𑀦𑁆𑀦𑀢𑀺𑀁 𑀅𑀓𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂𑀬𑁂𑀯 𑀢𑁂𑀭𑀲 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀲𑀢𑁆𑀢𑀤𑀺𑀯𑀲𑀫𑀢𑁆𑀢𑀁 𑀧𑀼𑀣𑀼𑀚𑁆𑀚𑀦𑁄 𑀅𑀳𑁄𑀲𑀺. 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀽𑀧𑀫𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺, 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑁄 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑁄’’𑀢𑀺 (𑀲𑀁. 𑀦𑀺. 𑁨.𑁧𑁪𑁬) 𑀏𑀯𑀫𑀸𑀤𑀺𑀦𑀸 𑀧𑀲𑀁𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁧) 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁩𑁯𑁮. 𑀏𑀯𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀫𑀳𑀸𑀲𑀸𑀯𑀓𑀪𑀸𑀯𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦𑀁 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀼𑀫𑀼𑀢𑁆𑀢𑀭𑀲𑁆𑀲𑀸𑀢𑀺 𑀢𑀲𑁆𑀲 𑀓𑀺𑀭 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀸𑀤𑀸𑀦𑀁 𑀦𑀺𑀓𑁆𑀔𑁂𑀧𑀦𑀲𑀫𑀬𑁂 𑀅𑀓𑁆𑀓𑀦𑁆𑀢𑀓𑁆𑀓𑀦𑁆𑀢𑀧𑀸𑀤𑁂 𑀲𑀢𑀲𑀳𑀲𑁆𑀲𑀧𑀢𑁆𑀢𑀸 𑀧𑀤𑀼𑀫𑀸 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼. 𑀢𑀲𑁆𑀫𑀸𑀲𑁆𑀲 𑀢𑀁 𑀦𑀸𑀫𑀁 𑀅𑀳𑁄𑀲𑀺. 𑀲𑀓𑀮𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀏𑀓𑁂𑀓𑁂𑀦 𑀲𑀢𑀲𑀢𑀧𑀼𑀜𑁆𑀜𑁂 𑀓𑀢𑁂 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀲𑀢𑀕𑀼𑀡𑀧𑀼𑀜𑁆𑀜𑀸𑀦𑀁 𑀓𑀢𑀢𑁆𑀢𑀸 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀧𑀥𑀸𑀦𑀪𑀽𑀢𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀢𑀸𑀤𑀺𑀦𑁄. 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀪𑀽𑀢𑁂 𑀪𑀕𑀯𑀢𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁂, 𑀅𑀤𑀲𑁆𑀲𑀦𑀁 𑀕𑀢𑁂𑀢𑀺 𑀅𑀢𑁆𑀣𑁄. 𑀧𑀽𑀚𑀁 𑀓𑀼𑀩𑁆𑀩𑀦𑁆𑀢𑀺 𑀲𑀦𑁆𑀣𑀼𑀦𑁄𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀲𑀦𑀢𑁄 ‘‘𑀲𑀢𑁆𑀣𑀸’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀪𑀕𑀯𑀢𑁄 𑀲𑀸𑀥𑀼𑀓𑀻𑀴𑀁 𑀓𑀻𑀴𑀦𑁆𑀢𑀸 𑀧𑀽𑀚𑀁 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁯𑁯. 𑀅𑀕𑁆𑀕𑀺𑀁 𑀘𑀺𑀦𑀦𑁆𑀢𑀻 𑀚𑀦𑀢𑀸𑀢𑀺 𑀚𑀦𑀲𑀫𑀽𑀳𑀸 𑀆𑀴𑀸𑀳𑀦𑀢𑁆𑀣𑀸𑀬 𑀅𑀕𑁆𑀕𑀺𑀁 𑀘𑀺𑀦𑀦𑁆𑀢𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀸 𑀆𑀲𑀫𑀦𑁆𑀢𑀢𑁄 𑀫𑁄𑀤𑀺𑀢𑀸 𑀲𑀦𑁆𑀢𑀼𑀝𑁆𑀞𑀸 𑀧𑀓𑀸𑀭𑁂𑀦 𑀫𑁄𑀤𑀺𑀢𑀸 𑀲𑀦𑁆𑀢𑀼𑀝𑁆𑀞𑀸 𑀧𑀽𑀚𑀁 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀼 𑀲𑀁𑀯𑁂𑀕𑀚𑀸𑀢𑁂𑀲𑀽𑀢𑀺 𑀢𑁂𑀲𑀼 𑀚𑀦𑀲𑀫𑀽𑀳𑁂𑀲𑀼 𑀲𑀁𑀯𑁂𑀕𑀧𑁆𑀧𑀢𑁆𑀢𑁂𑀲𑀼 𑀉𑀢𑁆𑀭𑀸𑀲𑀁 𑀮𑀪𑀦𑁆𑀢𑁂𑀲𑀼 𑀫𑁂 𑀫𑀬𑁆𑀳𑀁 𑀧𑀻𑀢𑀺 𑀳𑀸𑀲𑁄 𑀉𑀤𑀧𑀚𑁆𑀚𑀣 𑀧𑀸𑀢𑀼𑀪𑀯𑀻𑀢𑀺 𑀅𑀢𑁆𑀣𑁄.

𑁪𑁦𑁦. 𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸𑀢𑀺 𑀫𑀫 𑀩𑀦𑁆𑀥𑀼𑀲𑀳𑀸𑀬𑁂 𑀲𑀫𑀸𑀦𑁂𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸. 𑀫𑀳𑀸𑀯𑀻𑀭𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀻𑀢𑀺 𑀇𑀤𑀁 𑀯𑀘𑀦𑀁 𑀅𑀩𑁆𑀭𑀯𑀺𑀁 𑀓𑀣𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀦𑁆𑀤 𑀧𑀽𑀚𑀁 𑀓𑀭𑁄𑀫𑀲𑁂𑀢𑀺 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀓𑀸𑀭𑀡𑁂𑀦 𑀫𑀬𑀁 𑀲𑀩𑁆𑀩𑁂 𑀲𑀫𑀸𑀕𑀢𑀸 𑀧𑀽𑀚𑀁 𑀓𑀭𑁄𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀢𑀺 𑀦𑀺𑀧𑀸𑀢𑁄.

𑁪𑁦𑁧. 𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸𑀢𑀺 𑀢𑁂 𑀫𑀫 𑀜𑀸𑀢𑀺𑀫𑀺𑀢𑁆𑀢𑀸 𑀲𑀸𑀥𑀼 𑀇𑀢𑀺 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁 𑀇𑀢𑀺 𑀧𑀝𑀺𑀲𑀼𑀡𑀺𑀢𑁆𑀯𑀸 𑀫𑀫 𑀯𑀘𑀦𑀁 𑀲𑀫𑁆𑀧𑀝𑀺𑀙𑀺𑀢𑁆𑀯𑀸 𑀫𑁂 𑀫𑀬𑁆𑀳𑀁 𑀪𑀺𑀬𑁆𑀬𑁄 𑀅𑀢𑀺𑀭𑁂𑀓𑀁 𑀳𑀸𑀲𑀁 𑀧𑀻𑀢𑀺𑀁 𑀚𑀦𑀺𑀁𑀲𑀼 𑀉𑀧𑁆𑀧𑀸𑀤𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁪𑁦𑁨. 𑀢𑀢𑁄 𑀅𑀢𑁆𑀢𑀦𑁄 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑀁 𑀤𑀲𑁆𑀲𑁂𑀦𑁆𑀢𑁄 𑀩𑀼𑀤𑁆𑀥𑀲𑁆𑀫𑀺𑀁 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀲𑀢𑀳𑀢𑁆𑀣𑀁 𑀉𑀕𑁆𑀕𑀢𑀁 𑀉𑀩𑁆𑀩𑀺𑀤𑁆𑀥𑀁 𑀤𑀺𑀬𑀟𑁆𑀠𑀳𑀢𑁆𑀣𑀲𑀢𑀁 𑀯𑀺𑀢𑁆𑀣𑀢𑀁, 𑀯𑀺𑀫𑀸𑀦𑀁 𑀦𑀪𑀲𑀺 𑀆𑀓𑀸𑀲𑁂 𑀉𑀕𑁆𑀕𑀢𑀁 𑀅𑀕𑁆𑀖𑀺𑀬𑀁, 𑀲𑀼𑀓𑀢𑀁 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀓𑀢𑀁, 𑀓𑀢𑁆𑀯𑀸 𑀓𑀸𑀭𑁂𑀢𑁆𑀯𑀸 𑀘 𑀧𑀼𑀜𑁆𑀜𑀲𑀜𑁆𑀘𑀬𑀁 𑀧𑀼𑀜𑁆𑀜𑀭𑀸𑀲𑀺𑀁 𑀓𑀸𑀳𑀸𑀲𑀺𑀁 𑀅𑀓𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁩. 𑀓𑀢𑁆𑀯𑀸𑀦 𑀅𑀕𑁆𑀖𑀺𑀬𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑁂𑀢𑀺𑀬𑀧𑀽𑀚𑀦𑀝𑁆𑀞𑀸𑀦𑁂 𑀢𑀸𑀮𑀧𑀦𑁆𑀢𑀻𑀳𑀺 𑀢𑀸𑀮𑀧𑀸𑀴𑀻𑀳𑀺 𑀘𑀺𑀢𑁆𑀢𑀺𑀢𑀁 𑀲𑁄𑀪𑀺𑀢𑀁 𑀅𑀕𑁆𑀖𑀺𑀬𑀁 𑀓𑀢𑁆𑀯𑀸𑀦 𑀓𑀸𑀭𑁂𑀢𑁆𑀯𑀸 𑀘 𑀲𑀓𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀽𑀚𑀬𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀩𑀼𑀤𑁆𑀥𑀥𑀸𑀢𑀼𑀦𑀺𑀥𑀸𑀧𑀺𑀢𑀁 𑀘𑁂𑀢𑀺𑀬𑀁 𑀧𑀽𑀚𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁪. 𑀢𑀲𑁆𑀲 𑀘𑁂𑀢𑀺𑀬𑀲𑁆𑀲 𑀫𑀳𑀺𑀫𑀁 𑀤𑀲𑁆𑀲𑁂𑀦𑁆𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯𑀸𑀢𑀺 𑀆𑀓𑀸𑀲𑁂 𑀚𑀮𑀫𑀸𑀦𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀅𑀕𑁆𑀕𑀺𑀭𑀸𑀲𑀺 𑀇𑀯 𑀢𑀁 𑀘𑁂𑀢𑀺𑀬𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀚𑀮𑀢𑀺 𑀨𑀼𑀮𑁆𑀮𑀺𑀢𑁄 𑀯𑀺𑀓𑀲𑀺𑀢𑀧𑀼𑀧𑁆𑀨𑁄 𑀲𑀸𑀮𑀭𑀼𑀓𑁆𑀔𑀭𑀸𑀚𑀸 𑀇𑀯 𑀆𑀓𑀸𑀲𑁂 𑀇𑀦𑁆𑀤𑀮𑀝𑁆𑀞𑀻𑀯 𑀇𑀦𑁆𑀤𑀥𑀦𑀼 𑀇𑀯 𑀘 𑀘𑀢𑀼𑀤𑁆𑀤𑀺𑀲𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀑𑀪𑀸𑀲𑀢𑀺 𑀯𑀺𑀚𑁆𑀚𑁄𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁫. 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀚𑁄𑀢𑀫𑀸𑀦𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀘𑀺𑀢𑁆𑀢𑀁 𑀫𑀦𑀁 𑀧𑀲𑀸𑀤𑁂𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀓𑀢𑁆𑀯𑀸 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀩𑀳𑀼𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀓𑀼𑀲𑀮𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸𑀦 ‘‘𑀥𑀸𑀢𑀼𑀕𑀩𑁆𑀪𑁂 𑀘 𑀲𑀸𑀲𑀦𑁂 𑀘 𑀏𑀢𑁆𑀢𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀫𑀬𑀸 𑀓𑀢𑀸𑀦𑀻’’𑀢𑀺 𑀏𑀯𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦 𑀓𑀸𑀮𑀁𑀓𑀢𑁆𑀯𑀸 𑀢𑀺𑀤𑀲𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀅𑀳𑀁 𑀉𑀧𑀧𑀚𑁆𑀚𑀺𑀁 𑀚𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁬. 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀤𑁂𑀯𑀮𑁄𑀓𑁂 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀳𑀲𑁆𑀲𑀬𑀼𑀢𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀬𑀯𑀸𑀳𑀺𑀁 𑀲𑀺𑀦𑁆𑀥𑀯𑀲𑀳𑀲𑁆𑀲𑀬𑁄𑀚𑀺𑀢𑀁 𑀤𑀺𑀩𑁆𑀩𑀭𑀣𑀁 𑀅𑀥𑀺𑀝𑁆𑀞𑀺𑀢𑁄. 𑀲𑀢𑁆𑀢𑀳𑀺 𑀪𑀽𑀫𑀻𑀳𑀺 𑀲𑀁 𑀲𑀼𑀝𑁆𑀞𑀼 𑀉𑀕𑁆𑀕𑀢𑀁 𑀉𑀩𑁆𑀩𑀺𑀤𑁆𑀥𑀁 𑀉𑀘𑁆𑀘𑀁 𑀫𑀬𑁆𑀳𑀁 𑀪𑀯𑀦𑀁 𑀯𑀺𑀫𑀸𑀦𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁪𑁦𑁭. 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀸 𑀲𑀓𑀮𑀲𑁄𑀯𑀡𑁆𑀡𑀫𑀬𑀸𑀦𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀅𑀳𑀼𑀁 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀓𑀢𑁂𑀚𑁂𑀦 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑀸 𑀤𑀲 𑀤𑀺𑀲𑀸 𑀧𑀪𑀸𑀲𑀬𑀁 𑀑𑀪𑀸𑀲𑁂𑀦𑁆𑀢𑀸𑀦𑀺 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁮. 𑀢𑀲𑁆𑀫𑀺𑀁 𑀫𑀬𑁆𑀳𑀁 𑀧𑀸𑀢𑀼𑀪𑀽𑀢𑀯𑀺𑀫𑀸𑀦𑁂 𑀅𑀜𑁆𑀜𑁂𑀧𑀺 𑀦𑀺𑀬𑁆𑀬𑀽𑀳𑀸 𑀧𑀫𑀼𑀔𑀲𑀸𑀮𑀸𑀬𑁄 𑀲𑀦𑁆𑀢𑀺 𑀯𑀺𑀚𑁆𑀚𑀦𑁆𑀢𑀺. 𑀓𑀺𑀁 𑀪𑀽𑀢𑀸? 𑀮𑁄𑀳𑀺𑀢𑀗𑁆𑀕𑀫𑀬𑀸 𑀭𑀢𑁆𑀢𑀫𑀡𑀺𑀫𑀬𑀸 𑀢𑀤𑀸 𑀢𑁂𑀧𑀺 𑀦𑀺𑀬𑁆𑀬𑀽𑀳𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀆𑀪𑀸𑀬 𑀧𑀪𑀸𑀬 𑀚𑁄𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁧𑁦. 𑀲𑀩𑁆𑀩𑁂 𑀤𑁂𑀯𑁂 𑀲𑀓𑀮𑀙𑀤𑁂𑀯𑀮𑁄𑀓𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺 𑀅𑀪𑀺𑀪𑀯𑀸𑀫𑀺. 𑀓𑀲𑁆𑀲 𑀨𑀮𑀦𑁆𑀢𑀺 𑀘𑁂? 𑀫𑀬𑀸 𑀓𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀇𑀤𑀁 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑁪𑁧𑁧. 𑀢𑀢𑁄 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁄 𑀓𑀧𑁆𑀧𑀢𑁄 𑀳𑁂𑀝𑁆𑀞𑀸 𑀲𑀝𑁆𑀞𑀺𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀘𑀸𑀢𑀼𑀭𑀦𑁆𑀢𑁄 𑀘𑀢𑀼𑀫𑀳𑀸𑀤𑀻𑀧𑀯𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀲𑀩𑁆𑀩𑀁 𑀧𑀘𑁆𑀘𑀢𑁆𑀣𑀺𑀓𑀁 𑀯𑀺𑀚𑀺𑀢𑀯𑀦𑁆𑀢𑁄 𑀅𑀳𑀁 𑀉𑀩𑁆𑀩𑀺𑀤𑁆𑀥𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀧𑀣𑀯𑀺𑀁 𑀆𑀯𑀲𑀺𑀁 𑀭𑀚𑁆𑀚𑀁 𑀓𑀸𑀭𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁧𑁨-𑁪. 𑀢𑀣𑁂𑀯 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺 𑀧𑀜𑁆𑀘𑀩𑀼𑀤𑁆𑀥𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀪𑀤𑁆𑀤𑀓𑁂 𑀦𑀸𑀫 𑀓𑀧𑁆𑀧𑁂. 𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀢𑀺𑀁𑀲𑀚𑀸𑀢𑀺𑀬𑀸 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄 𑀧𑀥𑀸𑀦𑁄 𑀘𑀓𑁆𑀓𑀭𑀢𑀦𑀸𑀤𑀻𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄 𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀅𑀢𑁆𑀢𑀦𑁄 𑀓𑀫𑁆𑀫𑁂 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀪𑀺𑀭𑀤𑁆𑀥𑁄 𑀅𑀮𑁆𑀮𑀻𑀦𑁄 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀅𑀫𑁆𑀳𑀻 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀅𑀦𑀼𑀪𑀽𑀢𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸𑀧𑀺 𑀪𑀯𑀦𑀁 𑀫𑀬𑁆𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀺𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀫𑁆𑀳𑀺 𑀫𑀬𑁆𑀳𑀁 𑀪𑀯𑀦𑀁 𑀫𑀫 𑀧𑀸𑀲𑀸𑀤𑀁 𑀇𑀦𑁆𑀤𑀮𑀝𑁆𑀞𑀻𑀯 𑀉𑀕𑁆𑀕𑀢𑀁 𑀆𑀓𑀸𑀲𑁂 𑀞𑀺𑀢𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀚𑁆𑀚𑀼𑀮𑁆𑀮𑀢𑀸 𑀇𑀯 𑀉𑀕𑁆𑀕𑀢𑀁 𑀲𑀢𑁆𑀢𑀪𑀽𑀫𑀺𑀓𑀸𑀤𑀺𑀪𑁂𑀤𑁂𑀳𑀺 𑀉𑀘𑁆𑀘𑀁 𑀆𑀬𑀸𑀫𑀢𑁄 𑀤𑀻𑀖𑀢𑁄 𑀘 𑀉𑀘𑁆𑀘𑀢𑁄 𑀘 𑀘𑀢𑀼𑀯𑀻𑀲𑀢𑀺𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀁 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀫𑀦𑀁 𑀅𑀮𑁆𑀮𑀻𑀦𑀪𑀸𑀯𑁂𑀦 𑀭𑀫𑁆𑀫𑀡𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀤𑀴𑁆𑀳𑁂𑀳𑀺 𑀤𑁆𑀯𑀸𑀤𑀲𑀳𑀢𑁆𑀣𑁂𑀳𑀺 𑀯𑀸 𑀢𑀺𑀁𑀲𑀳𑀢𑁆𑀣𑁂𑀳𑀺 𑀯𑀸 𑀉𑀘𑁆𑀘𑁂𑀳𑀺 𑀧𑀸𑀓𑀸𑀭𑀢𑁄𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁪𑁧𑁫-𑁨𑁦. 𑀢𑀤𑀟𑁆𑀠𑀓𑀁 𑀢𑀢𑁄 𑀅𑀟𑁆𑀠𑀓𑀁 𑀅𑀟𑁆𑀠𑀢𑀺𑀬𑀲𑀢𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀺𑀢𑁆𑀢𑀸 𑀧𑀡𑁆𑀡𑀯𑀻𑀲𑀢𑀻𑀢𑀺 𑀯𑀻𑀲𑀢𑀺𑀆𑀧𑀡𑀧𑀓𑁆𑀔𑀺𑀢𑁆𑀢𑀁 𑀦𑀺𑀭𑀦𑁆𑀢𑀭𑀁 𑀯𑀻𑀣𑀺𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀽𑀢𑁄𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀲𑀼𑀚𑀸𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁪. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀫𑁂𑀥𑀁 𑀪𑀕𑀯𑀦𑁆𑀢𑀸𑀳𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀯𑀬𑀧𑁆𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀤𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀉𑀢𑁆𑀢𑀫𑀸𑀦𑀺 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄𑀧𑀺 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀢𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂 𑀩𑀳𑀼𑀓𑀁𑀲𑀧𑀸𑀢𑀺𑀬𑁄 𑀤𑀻𑀧𑀭𑀼𑀓𑁆𑀔𑁂𑀳𑀺 𑀤𑀻𑀧𑀓𑀧𑀮𑁆𑀮𑀺𑀓𑀸𑀳𑀺 𑀘 ‘‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀽’’𑀢𑀺 𑀉𑀴𑀸𑀭𑀁 𑀤𑀻𑀧𑀧𑀽𑀚𑀁 𑀅𑀓𑀸𑀲𑀺. 𑀏𑀯𑀁 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀦𑀺𑀝𑁆𑀞𑀺𑀢𑁂 𑀬𑁄𑀚𑀦𑀺𑀓𑁂 𑀓𑀦𑀓𑀣𑀽𑀧𑁂 𑀩𑀳𑀼𑀓𑀁𑀲𑀧𑀸𑀢𑀺𑀬𑁄 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀘 𑀏𑀓𑁂𑀓𑀁 𑀕𑀼𑀴𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀸 𑀫𑀼𑀔𑀯𑀝𑁆𑀝𑀺𑀁 𑀨𑀼𑀲𑀸𑀧𑁂𑀦𑁆𑀢𑁄 𑀘𑁂𑀢𑀺𑀬𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀅𑀢𑁆𑀢𑀦𑀸 𑀕𑀳𑀺𑀢𑀓𑀁𑀲𑀧𑀸𑀢𑀺𑀁 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀳𑀲𑁆𑀲𑀯𑀝𑁆𑀝𑀺𑀬𑁄 𑀚𑀸𑀮𑀸𑀧𑁂𑀢𑁆𑀯𑀸 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀘𑁂𑀢𑀺𑀬𑀁 𑀅𑀦𑀼𑀧𑀭𑀺𑀬𑀸𑀬𑀺.

𑀏𑀯𑀁 𑀢𑀲𑁆𑀫𑀺𑀫𑁆𑀧𑀺 𑀅𑀢𑁆𑀢𑀪𑀸𑀯𑁂 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀭𑀸𑀡𑀲𑀺𑀬𑀁𑀬𑁂𑀯 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀅𑀦𑁆𑀦𑀪𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀲𑀼𑀫𑀦𑀲𑁂𑀝𑁆𑀞𑀺𑀲𑁆𑀲 𑀦𑀸𑀫 𑀕𑁂𑀳𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀢𑀺. 𑀏𑀓𑀤𑀺𑀯𑀲𑀁 𑀲𑁄 𑀉𑀧𑀭𑀺𑀝𑁆𑀞𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀢𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀻𑀦𑀕𑀭𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀞𑀧𑀺𑀢𑀁 𑀪𑀸𑀕𑀪𑀢𑁆𑀢𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀸𑀢𑀼𑀓𑀸𑀫𑁄 𑀆𑀭𑀪𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀅𑀢𑁆𑀢𑀦𑁄 𑀪𑀸𑀕𑀪𑀢𑁆𑀢𑀜𑁆𑀘 𑀢𑀢𑁆𑀣𑁂𑀯 𑀧𑀓𑁆𑀔𑀺𑀧𑀺. 𑀲𑁄 𑀢𑀁 𑀦𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀤𑀺𑀯𑀲𑀁 𑀲𑀼𑀫𑀦𑀲𑁂𑀝𑁆𑀞𑀺𑀲𑁆𑀲 𑀙𑀢𑁆𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑁋 ‘‘𑀅𑀳𑁄 𑀤𑀸𑀦𑀁, 𑀧𑀭𑀫𑀤𑀸𑀦𑀁, 𑀉𑀧𑀭𑀺𑀝𑁆𑀞𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀫𑀳𑀸𑀲𑀤𑁆𑀤𑁂𑀦 𑀅𑀦𑀼𑀫𑁄𑀤𑀺. 𑀢𑀁 𑀲𑀼𑀢𑁆𑀯𑀸 𑀲𑀼𑀫𑀦𑀲𑁂𑀝𑁆𑀞𑀺 𑁋 ‘‘𑀏𑀯𑀁 𑀤𑁂𑀯𑀢𑀸𑀬 𑀅𑀦𑀼𑀫𑁄𑀤𑀺𑀢𑀁 𑀇𑀤𑀫𑁂𑀯 𑀉𑀢𑁆𑀢𑀫𑀤𑀸𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀧𑀢𑁆𑀢𑀺𑀁 𑀬𑀸𑀘𑀺. 𑀅𑀦𑁆𑀦𑀪𑀸𑀭𑁄 𑀧𑀦 𑀢𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺. 𑀢𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑀲𑁂𑀝𑁆𑀞𑀺 𑀢𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀢𑀼𑀬𑁆𑀳𑀁 𑀲𑀳𑀢𑁆𑀣𑁂𑀦 𑀓𑀫𑁆𑀫𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀢𑀺𑀭𑀽𑀧𑀁 𑀕𑁂𑀳𑀁 𑀓𑀢𑁆𑀯𑀸 𑀦𑀺𑀘𑁆𑀘𑀁 𑀯𑀲𑀸𑀳𑀻’’𑀢𑀺 𑀆𑀳.

𑀬𑀲𑁆𑀫𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁄 𑀢𑀁 𑀤𑀺𑀯𑀲𑀫𑁂𑀯 𑀉𑀴𑀸𑀭𑀯𑀺𑀧𑀸𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀫𑀦𑀲𑁂𑀝𑁆𑀞𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀦 𑀢𑀁 𑀆𑀤𑀭𑀯𑀲𑁂𑀦 𑀑𑀮𑁄𑀓𑁂𑀲𑀺. 𑀲𑁂𑀝𑁆𑀞𑀺 𑁋 ‘‘𑀫𑀳𑀸𑀭𑀸𑀚, 𑀅𑀬𑀁 𑀑𑀮𑁄𑀓𑁂𑀢𑀩𑁆𑀩𑀬𑀼𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀤𑀸 𑀢𑁂𑀦 𑀓𑀢𑀓𑀫𑁆𑀫𑀁 𑀅𑀢𑁆𑀢𑀦𑀸𑀧𑀺𑀲𑁆𑀲 𑀲𑀳𑀲𑁆𑀲𑀤𑀺𑀦𑁆𑀦𑀪𑀸𑀯𑀜𑁆𑀘 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀕𑁂𑀳𑀁 𑀓𑀢𑁆𑀯𑀸 𑀯𑀲𑀸𑀳𑀻’’𑀢𑀺 𑀕𑁂𑀳𑀝𑁆𑀞𑀸𑀦𑀫𑀲𑁆𑀲 𑀆𑀡𑀸𑀧𑁂𑀲𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀲𑁄𑀥𑀸𑀧𑁂𑀦𑁆𑀢𑀲𑁆𑀲 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀢𑀸 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀩𑁆𑀩𑀁 𑀥𑀦𑀁 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀭𑀸𑀲𑀺𑀓𑀢𑀁 𑀤𑀺𑀲𑁆𑀯𑀸 𑁋 ‘‘𑀏𑀢𑁆𑀢𑀓𑀁 𑀥𑀦𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀲𑁆𑀲 𑀕𑁂𑀳𑁂 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀓𑀲𑁆𑀲𑀘𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀅𑀬𑀁 𑀅𑀦𑁆𑀦𑀪𑀸𑀭𑁄 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀫𑀳𑀸𑀥𑀦𑀲𑁂𑀝𑁆𑀞𑀺 𑀦𑀸𑀫 𑀳𑁄𑀢𑀽’’𑀢𑀺 𑀢𑀁 𑀤𑀺𑀯𑀲𑀫𑁂𑀯 𑀢𑀲𑁆𑀲 𑀲𑁂𑀝𑁆𑀞𑀺𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑀺.

𑀲𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀤𑀻𑀖𑀭𑀢𑁆𑀢𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀚𑁆𑀚𑀦𑀓𑀓𑀸𑀮𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀼𑀓𑁆𑀓𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀚𑀸𑀢𑀲𑁆𑀲 𑀅𑀦𑀼𑀭𑀼𑀤𑁆𑀥𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀪𑀕𑀯𑀢𑁄 𑀘𑀽𑀴𑀧𑀺𑀢𑀼 𑀧𑀼𑀢𑁆𑀢𑁄 𑀧𑀭𑀫𑀲𑀼𑀔𑀼𑀫𑀸𑀮𑁄 𑀫𑀳𑀸𑀧𑀼𑀜𑁆𑀜𑁄 𑀅𑀳𑁄𑀲𑀺. 𑀲𑀼𑀯𑀡𑁆𑀡𑀧𑀸𑀢𑀺𑀬𑀁𑀬𑁂𑀯 𑀘𑀲𑁆𑀲 𑀪𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀅𑀣𑀲𑁆𑀲 𑀫𑀸𑀢𑀸 𑀏𑀓𑀤𑀺𑀯𑀲𑀁 ‘‘𑀫𑀫 𑀧𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀧𑀤𑀁 𑀦 𑀚𑀸𑀦𑀸𑀢𑀺, 𑀢𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀢𑀼𑀘𑁆𑀙𑀓𑀁𑀬𑁂𑀯 𑀅𑀜𑁆𑀜𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀺𑀤𑀳𑀺𑀢𑁆𑀯𑀸 𑀢𑀲𑁆𑀲 𑀧𑁂𑀲𑁂𑀲𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁂𑀯𑀢𑀸 𑀢𑀁, 𑀤𑀺𑀩𑁆𑀩𑀧𑀽𑀯𑁂𑀳𑀺 𑀧𑀽𑀭𑁂𑀲𑀼𑀁. 𑀏𑀯𑀁 𑀫𑀳𑀸𑀧𑀼𑀜𑁆𑀜𑁄 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀅𑀮𑀗𑁆𑀓𑀢𑀦𑀸𑀝𑀓𑀺𑀢𑁆𑀣𑀻𑀳𑀺 𑀧𑀭𑀺𑀯𑀼𑀢𑁄 𑀤𑁂𑀯𑁄 𑀯𑀺𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺.

𑀅𑀫𑁆𑀳𑀸𑀓𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀺𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀩𑁄𑀥𑀺𑀫𑀡𑁆𑀟𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀸𑀲𑀺. 𑀢𑀤𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑁋 ‘‘𑀧𑀼𑀢𑁆𑀢𑁄 𑀓𑀺𑀭 𑀫𑁂 𑀭𑀸𑀚𑀕𑀳𑀁 𑀅𑀦𑀼𑀧𑁆𑀧𑀢𑁆𑀢𑁄; 𑀕𑀘𑁆𑀙𑀣, 𑀪𑀡𑁂, 𑀫𑀫 𑀧𑀼𑀢𑁆𑀢𑀁 𑀆𑀦𑁂𑀣𑀸’’𑀢𑀺 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂 𑀤𑀲 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀢𑁂 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀼 𑀉𑀤𑀸𑀬𑀺𑀢𑁆𑀣𑁂𑀭𑁂𑀦 𑀘𑀸𑀭𑀺𑀓𑀸𑀕𑀫𑀦𑀁 𑀆𑀬𑀸𑀘𑀺𑀢𑁄 𑀪𑀕𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀕𑀦𑁆𑀢𑁆𑀯𑀸 𑀜𑀸𑀢𑀺𑀲𑀫𑀸𑀕𑀫𑁂 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀯𑀺𑀘𑀺𑀢𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑁆𑀯𑀸 𑀫𑀳𑀸𑀚𑀦𑀁 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀕𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀼𑀮𑀦𑀕𑀭𑀁 𑀆𑀕𑀢𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡’’𑀦𑁆𑀢𑀺 𑀆𑀯𑀚𑁆𑀚𑀫𑀸𑀦𑁄 ‘‘𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀆𑀘𑀺𑀡𑁆𑀡’’𑀦𑁆𑀢𑀺 𑀜𑀢𑁆𑀯𑀸 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀭𑀸𑀚𑀸 ‘‘𑀧𑀼𑀢𑁆𑀢𑁄 𑀢𑁂 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀼𑀭𑀺𑀢𑀢𑀼𑀭𑀺𑀢𑁄 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁 𑀜𑀸𑀢𑀺𑀲𑀗𑁆𑀕𑀳𑀁 𑀓𑀢𑁆𑀯𑀸 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀢𑁄 𑀫𑀮𑁆𑀮𑀭𑀝𑁆𑀞𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀺𑀬𑀫𑁆𑀩𑀯𑀦𑀁 𑀧𑀸𑀧𑀼𑀡𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀲𑀸𑀓𑀺𑀬𑀕𑀡𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀳 𑁋 ‘‘𑀲𑀘𑁂 𑀫𑀫 𑀧𑀼𑀢𑁆𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀭𑀸𑀚𑀸 𑀅𑀪𑀯𑀺𑀲𑁆𑀲 𑀘𑀓𑁆𑀓𑀯𑀢𑁆𑀢𑀻 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀔𑀢𑁆𑀢𑀺𑀬𑀕𑀡𑀧𑀭𑀺𑀯𑀸𑀭𑁄, 𑀦𑀢𑁆𑀢𑀸𑀧𑀺 𑀫𑁂 𑀭𑀸𑀳𑀼𑀮𑀓𑀼𑀫𑀸𑀭𑁄 𑀔𑀢𑁆𑀢𑀺𑀬𑀕𑀡𑁂𑀦 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀘𑀭𑀺𑀲𑁆𑀲, 𑀢𑀼𑀫𑁆𑀳𑁂𑀧𑀺 𑀏𑀢𑀫𑀢𑁆𑀣𑀁 𑀚𑀸𑀦𑀸𑀣. 𑀇𑀤𑀸𑀦𑀺 𑀧𑀦 𑀫𑀫 𑀧𑀼𑀢𑁆𑀢𑁄 𑀩𑀼𑀤𑁆𑀥𑁄 𑀚𑀸𑀢𑁄, 𑀔𑀢𑁆𑀢𑀺𑀬𑀸𑀯𑀸𑀲𑁆𑀲 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀼, 𑀢𑀼𑀫𑁆𑀳𑁂 𑀏𑀓𑁂𑀓𑀓𑀼𑀮𑀢𑁄 𑀏𑀓𑁂𑀓𑀁 𑀤𑀸𑀭𑀓𑀁 𑀤𑁂𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑁆𑀯𑁂𑀅𑀲𑀻𑀢𑀺𑀲𑀳𑀲𑁆𑀲𑀔𑀢𑁆𑀢𑀺𑀬𑀓𑀼𑀫𑀸𑀭𑀸 𑀧𑀩𑁆𑀩𑀚𑀺𑀁𑀲𑀼.

𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀓𑀼𑀝𑀼𑀫𑁆𑀩𑀲𑀸𑀫𑀺𑀓𑁄, 𑀲𑁄 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀁 𑀅𑀦𑀼𑀭𑀼𑀤𑁆𑀥𑀁 𑀲𑀓𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀏𑀢𑀭𑀳𑀺, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀲𑀓𑁆𑀬𑀓𑀼𑀫𑀸𑀭𑀸 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀦𑁆𑀢𑀺, 𑀅𑀫𑁆𑀳𑀸𑀓𑀜𑁆𑀘 𑀓𑀼𑀮𑀸 𑀦𑀢𑁆𑀣𑀺 𑀓𑁄𑀘𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀢𑁂𑀦 𑀳𑀺 𑀢𑁆𑀯𑀁 𑀯𑀸 𑀧𑀩𑁆𑀩𑀚𑀸𑀳𑀺, 𑀅𑀳𑀁 𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀦𑀼𑀭𑀼𑀤𑁆𑀥𑁄 𑀖𑀭𑀸𑀯𑀸𑀲𑁂 𑀭𑀼𑀘𑀺𑀁 𑀅𑀓𑀢𑁆𑀯𑀸 𑀅𑀢𑁆𑀢𑀲𑀢𑁆𑀢𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀦𑀼𑀓𑁆𑀓𑀫𑁄 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁩𑁦 𑀆𑀤𑀬𑁄) 𑀆𑀕𑀢𑁄𑀬𑁂𑀯. 𑀏𑀯𑀁 𑀅𑀦𑀼𑀧𑀺𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁂𑀲𑀼 𑀧𑀦 𑀢𑁂𑀲𑀼 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀯𑀲𑁆𑀲𑁂 𑀪𑀤𑁆𑀤𑀺𑀬𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀤𑀺𑀩𑁆𑀩𑀘𑀓𑁆𑀔𑀼𑀁 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀤𑁂𑀯𑀤𑀢𑁆𑀢𑁄 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀪𑀕𑀼𑀢𑁆𑀣𑁂𑀭𑁄 𑀘 𑀓𑀺𑀫𑀺𑀮𑀢𑁆𑀣𑁂𑀭𑁄 𑀘 𑀧𑀘𑁆𑀙𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀣𑁂𑀭𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀕𑀢𑀝𑁆𑀞𑀸𑀦𑁂𑀲𑀼 𑀧𑀼𑀩𑁆𑀩𑀧𑀢𑁆𑀣𑀦𑀸𑀪𑀺𑀦𑀻𑀳𑀸𑀭𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀭𑀝𑁆𑀞𑁂 𑀧𑀸𑀘𑀻𑀦𑀯𑀁𑀲𑀤𑀸𑀬𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑀺, 𑀅𑀝𑁆𑀞𑀫𑁂 𑀓𑀺𑀮𑀫𑀢𑀺. 𑀲𑀢𑁆𑀣𑀸 ‘‘𑀅𑀦𑀼𑀭𑀼𑀤𑁆𑀥𑁄 𑀅𑀝𑁆𑀞𑀫𑁂 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀓𑀺𑀮𑀫𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀲𑁆𑀲 𑀲𑀗𑁆𑀓𑀧𑁆𑀧𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀧𑀽𑀭𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀓𑀣𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀪𑁂𑀲𑀓𑀮𑀸𑀯𑀦𑀫𑁂𑀯 𑀕𑀢𑁄.

𑀣𑁂𑀭𑁄 𑀢𑀣𑀸𑀕𑀢𑁂 𑀕𑀢𑀫𑀢𑁆𑀢𑁂𑀬𑁂𑀯 𑀢𑁂𑀯𑀺𑀚𑁆𑀚𑁄 𑀫𑀳𑀸𑀔𑀻𑀡𑀸𑀲𑀯𑁄 𑀳𑀼𑀢𑁆𑀯𑀸 ‘‘𑀲𑀢𑁆𑀣𑀸 𑀫𑀬𑁆𑀳𑀁 𑀫𑀦𑀁 𑀚𑀸𑀦𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀅𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺, 𑀲𑁄 𑀘 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄’’𑀢𑀺 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀤𑁂𑀲𑀦𑀁 𑀅𑀢𑁆𑀢𑀦𑁄 𑀘 𑀧𑀝𑀺𑀯𑁂𑀥𑀥𑀫𑁆𑀫𑀁 𑀆𑀭𑀩𑁆𑀪 𑀇𑀫𑀸 𑀉𑀤𑀸𑀦𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀫𑀦𑁄𑀫𑀬𑁂𑀦 𑀓𑀸𑀬𑁂𑀦, 𑀇𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑀺.

‘‘𑀬𑀤𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄, 𑀢𑀢𑁄 𑀉𑀢𑁆𑀢𑀭𑀺 𑀤𑁂𑀲𑀬𑀺;

𑀦𑀺𑀧𑁆𑀧𑀧𑀜𑁆𑀘𑀭𑀢𑁄 𑀩𑀼𑀤𑁆𑀥𑁄, 𑀦𑀺𑀧𑁆𑀧𑀧𑀜𑁆𑀘𑀫𑀤𑁂𑀲𑀬𑀺.

‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀣𑁂𑀭𑀕𑀸. 𑁯𑁦𑁧-𑁯𑁦𑁩);

𑀅𑀣 𑀦𑀁 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄 ‘‘𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀭𑀼𑀤𑁆𑀥𑁄 𑀅𑀕𑁆𑀕𑁄’’𑀢𑀺 (𑀅. 𑀦𑀺. 𑁧.𑁧𑁯𑁨) 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁪𑁨𑁧. 𑀏𑀯𑀁 𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀫𑁂𑀥𑀁 𑀪𑀕𑀯𑀦𑁆𑀢𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀉𑀧𑀝𑁆𑀞𑀸𑀧𑀦𑀧𑀜𑁆𑀜𑀸 𑀫𑀕𑁆𑀕𑀨𑀮𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀲𑀗𑁆𑀔𑀸𑀢𑀸 𑀫𑁂𑀥𑀸 𑀬𑀲𑁆𑀲 𑀪𑀕𑀯𑀢𑁄 𑀲𑁄 𑀲𑀼𑀫𑁂𑀥𑁄, 𑀢𑀁 𑀲𑀼𑀫𑁂𑀥𑀁 𑀪𑀸𑀕𑁆𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀪𑀕𑀯𑀦𑁆𑀢𑀁 𑀮𑁄𑀓𑀲𑁆𑀲 𑀚𑁂𑀝𑁆𑀞𑀁 𑀲𑁂𑀝𑁆𑀞𑀁 𑀧𑀥𑀸𑀦𑀪𑀽𑀢𑀁 𑀲𑀁𑀲𑀸𑀭𑀢𑁄 𑀧𑀞𑀫𑀁 𑀦𑀺𑀕𑁆𑀕𑀢𑀁 𑀦𑀭𑀸𑀦𑀁 𑀆𑀲𑀪𑀁 𑀧𑀼𑀭𑁂𑀘𑀸𑀭𑀺𑀓𑀁 𑀯𑀽𑀧𑀓𑀝𑁆𑀞𑀁 𑀯𑀺𑀯𑁂𑀓𑀪𑀽𑀢𑀁 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑁄 𑀅𑀧𑀕𑀢𑀁 𑀯𑀺𑀳𑀭𑀦𑁆𑀢𑀁 𑀅𑀳𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁨𑁨. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀬𑀫𑁂𑀯 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀩𑀼𑀤𑁆𑀥𑀁, 𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦𑀸𑀢𑀺 𑀤𑀲𑀗𑁆𑀕𑀼𑀮𑀺𑀧𑀼𑀝𑀁 𑀫𑀼𑀤𑁆𑀥𑀦𑀺 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁪𑁩𑁦. 𑀤𑀺𑀯𑀸 𑀭𑀢𑁆𑀢𑀺𑀜𑁆𑀘 𑀧𑀲𑁆𑀲𑀸𑀫𑀻𑀢𑀺 𑀢𑀤𑀸 𑀤𑁂𑀯𑀮𑁄𑀓𑁂 𑀘 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀉𑀧𑁆𑀧𑀦𑁆𑀦𑀓𑀸𑀮𑁂 𑀫𑀁𑀲𑀘𑀓𑁆𑀔𑀼𑀦𑀸 𑀲𑀫𑀦𑁆𑀢𑀢𑁄 𑀬𑁄𑀚𑀦𑀁 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁪𑁩𑁧. 𑀲𑀳𑀲𑁆𑀲𑀮𑁄𑀓𑀁 𑀜𑀸𑀡𑁂𑀦𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀼 𑀲𑀸𑀲𑀦𑁂𑀢𑀺 𑀇𑀤𑀸𑀦𑀺 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂. 𑀤𑀻𑀧𑀤𑀸𑀦𑀲𑁆𑀲 𑀤𑀻𑀧𑀧𑀽𑀚𑀸𑀬 𑀇𑀤𑀁 𑀨𑀮𑀁, 𑀇𑀫𑀺𑀦𑀸 𑀨𑀮𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀁 𑀅𑀦𑀼𑀧𑁆𑀧𑀢𑁆𑀢𑁄 𑀧𑀝𑀺𑀮𑀤𑁆𑀥𑁄 𑀉𑀧𑁆𑀧𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁫. 𑀧𑀼𑀡𑁆𑀡𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀁𑀲𑀯𑀢𑀻𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄. 𑀅𑀧𑀭𑀪𑀸𑀕𑁂 𑀧𑀤𑀼𑀫𑀼𑀢𑁆𑀢𑀭𑁂 𑀪𑀕𑀯𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀩𑁄𑀥𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀸𑀧𑀺 𑀅𑀦𑀸𑀕𑀢𑁂 𑀏𑀯𑀭𑀽𑀧𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁂𑀲𑀦𑀸𑀯𑀲𑀸𑀦𑁂 𑀉𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀅𑀳𑀁 𑀇𑀫𑀺𑀦𑀸 𑀅𑀥𑀺𑀓𑀸𑀭𑁂𑀦 𑀦 𑀅𑀜𑁆𑀜𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀫𑀺, 𑀬𑀣𑀸 𑀧𑀦𑁂𑀲𑁄 𑀪𑀺𑀓𑁆𑀔𑀼 𑀲𑀢𑁆𑀢𑀫𑀤𑀺𑀯𑀲𑀫𑀢𑁆𑀣𑀓𑁂 𑀢𑀼𑀫𑁆𑀳𑁂𑀳𑀺 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀏𑀯𑀁 𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀅𑀦𑀸𑀕𑀢𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁆𑀯𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺.

𑀲𑁄 𑀬𑀸𑀯𑀢𑀸𑀬𑀼𑀓𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀲𑀫𑁆𑀪𑀭𑀦𑁆𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀤𑁄𑀡𑀯𑀢𑁆𑀣𑀼𑀦𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀼𑀡𑁆𑀡𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀲𑀢𑁆𑀣𑀭𑀺 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀲𑀩𑁆𑀩𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀼𑀮𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸𑀬𑁂𑀯 𑀑𑀳𑀺𑀬𑀺𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀢𑀲𑁆𑀲 𑀧𑀦 𑀧𑀼𑀡𑁆𑀡𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀧𑀜𑁆𑀘𑀲𑀢𑀸 𑀅𑀳𑁂𑀲𑀼𑀁. 𑀣𑁂𑀭𑁄 𑀢𑁂 𑀤𑀲𑀓𑀣𑀸𑀯𑀢𑁆𑀣𑀽𑀳𑀺 𑀑𑀯𑀤𑀺. 𑀢𑁂𑀧𑀺 𑀲𑀩𑁆𑀩𑁂 𑀤𑀲𑀓𑀣𑀸𑀯𑀢𑁆𑀣𑀽𑀳𑀺 𑀑𑀯𑀤𑀺𑀢𑀸 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀜𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀫𑀬𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑀸, 𑀤𑀲𑀦𑁆𑀦𑀜𑁆𑀘 𑀓𑀣𑀸𑀯𑀢𑁆𑀣𑀽𑀦𑀁 𑀮𑀸𑀪𑀺𑀦𑁄, 𑀲𑀫𑀬𑁄 𑀤𑀸𑀦𑀺 𑀦𑁄 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀣𑁂𑀭𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀢𑀁 𑀲𑀢𑁆𑀣𑀸 𑀚𑀸𑀦𑀸𑀢𑀺. 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀤𑀲𑀓𑀣𑀸𑀯𑀢𑁆𑀣𑀽𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀤𑁂𑀲𑁂𑀫𑀺, 𑀫𑀬𑀺 𑀘 𑀕𑀘𑁆𑀙𑀦𑁆𑀢𑁂 𑀲𑀩𑁆𑀩𑁂𑀧𑀺𑀫𑁂 𑀪𑀺𑀓𑁆𑀔𑀽 𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀫𑁂 𑀕𑀡𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀅𑀬𑀼𑀢𑁆𑀢𑀁 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁, 𑀇𑀫𑁂 𑀢𑀸𑀯 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁 𑀕𑀘𑁆𑀙𑀦𑁆𑀢𑀽’’𑀢𑀺. 𑀅𑀣 𑀢𑁂 𑀏𑀯𑀫𑀸𑀳 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀲𑁆𑀲𑀣, 𑀫𑀫 𑀯𑀘𑀦𑁂𑀦 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂 𑀯𑀦𑁆𑀤𑀣, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀕𑀢𑀫𑀕𑁆𑀕𑁂𑀦 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀧𑀺 𑀣𑁂𑀭𑀸 𑀲𑀩𑁆𑀩𑁂 𑀤𑀲𑀩𑀮𑀲𑁆𑀲 𑀚𑀸𑀢𑀺𑀪𑀽𑀫𑀺𑀭𑀝𑁆𑀞𑀯𑀸𑀲𑀺𑀦𑁄 𑀲𑀩𑁆𑀩𑁂 𑀔𑀻𑀡𑀸𑀲𑀯𑀸 𑀲𑀩𑁆𑀩𑁂 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀑𑀯𑀸𑀤𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑁆𑀫 𑀭𑀸𑀚𑀕𑀳𑁂 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀦𑁆𑀢𑀺 𑀪𑀕𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀘 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀢𑁂𑀳𑀺 ‘‘𑀚𑀸𑀢𑀺𑀪𑀽𑀫𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀢𑀺𑀪𑀽𑀫𑀺𑀬𑀁 𑀚𑀸𑀢𑀺𑀪𑀽𑀫𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀏𑀯𑀁 𑀲𑀫𑁆𑀪𑀸𑀯𑀺𑀢𑁄 ‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’’’𑀢𑀺 (𑀫. 𑀦𑀺. 𑁧.𑁨𑁫𑁨) 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺. 𑀢𑁂𑀧𑀺 ‘‘𑀧𑀼𑀡𑁆𑀡𑁄 𑀦𑀸𑀫, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄’’𑀢𑀺 𑀆𑀭𑁄𑀘𑀬𑀺𑀁𑀲𑀼.

𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑀁 𑀤𑀲𑁆𑀲𑀦𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀭𑀸𑀚𑀕𑀳𑀢𑁄 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀤𑀲𑀩𑀮𑀲𑁆𑀲 𑀢𑀢𑁆𑀣 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀢𑀣𑀸𑀕𑀢𑀁 𑀲𑀫𑁆𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀣𑁂𑀭𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀢𑁆𑀣𑀸𑀬 𑀅𑀦𑁆𑀥𑀯𑀦𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀢𑀲𑁆𑀲𑀸𑀕𑀫𑀦𑀁 𑀲𑀼𑀢𑁆𑀯𑀸 𑀲𑀻𑀲𑀸𑀦𑀼𑀮𑁄𑀓𑀺𑀓𑁄 𑀕𑀦𑁆𑀢𑁆𑀯𑀸 𑀑𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀢𑀁 𑀯𑀺𑀲𑀼𑀤𑁆𑀥𑀺𑀓𑁆𑀓𑀫𑀁 (𑀫. 𑀦𑀺. 𑁧.𑁨𑁫𑁭) 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀭𑀣𑀯𑀺𑀦𑀻𑀢𑀽𑀧𑀫𑀸𑀬 𑀅𑀢𑀺𑀯𑀺𑀬 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀫𑀦𑀼𑀫𑁄𑀤𑀺𑀁𑀲𑀼.

𑁪𑁩𑁪. 𑀅𑀣 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀧𑀼𑀡𑁆𑀡𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁬) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀲𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀯𑀺𑀪𑀸𑀯𑁂𑀦𑁆𑀢𑁄 𑀅𑀚𑁆𑀛𑀸𑀬𑀓𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀸𑀬𑀓𑁄𑀢𑀺 𑀅𑀦𑁂𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀘𑁂𑀢𑀸 𑀲𑀺𑀓𑁆𑀔𑀸𑀧𑁂𑀢𑀸. 𑀫𑀦𑁆𑀢𑀥𑀭𑁄𑀢𑀺 𑀫𑀦𑁆𑀢𑀸𑀦𑀁 𑀥𑀸𑀭𑁂𑀢𑀸𑀢𑀺 𑀅𑀢𑁆𑀣𑁄, 𑀯𑁂𑀤𑀲𑀗𑁆𑀔𑀸𑀢𑀲𑁆𑀲 𑀘𑀢𑀼𑀢𑁆𑀣𑀯𑁂𑀤𑀲𑁆𑀲 𑀲𑀚𑁆𑀛𑀸𑀬𑀦𑀲𑀯𑀦𑀤𑀸𑀦𑀸𑀦𑀁 𑀯𑀲𑁂𑀦 𑀥𑀸𑀭𑁂𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀜𑀸𑀡𑁂𑀦 𑀥𑀸𑀭𑁂𑀢𑀩𑁆𑀩𑀢𑀸 ‘‘𑀯𑁂𑀤𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀲𑀼 𑀢𑀻𑀲𑀼 𑀯𑁂𑀤𑀕𑀦𑁆𑀣𑁂𑀲𑀼 𑀧𑀸𑀭𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀼𑀭𑀓𑁆𑀔𑀢𑁄𑀫𑁆𑀳𑀺 𑀲𑀺𑀲𑁆𑀲𑁂𑀳𑀻𑀢𑀺 𑀫𑀫 𑀦𑀺𑀘𑁆𑀘𑀧𑀭𑀺𑀯𑀸𑀭𑀪𑀽𑀢𑁂𑀳𑀺 𑀲𑀺𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀳𑀁 𑀅𑀫𑁆𑀳𑀺. 𑀉𑀧𑀕𑀘𑁆𑀙𑀺𑀁 𑀦𑀭𑀼𑀢𑁆𑀢𑀫𑀦𑁆𑀢𑀺 𑀦𑀭𑀸𑀦𑀁 𑀉𑀢𑁆𑀢𑀫𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁, 𑀲𑀫𑀻𑀧𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁪𑁩𑁮. 𑀅𑀪𑀺𑀥𑀫𑁆𑀫𑀦𑀬𑀜𑁆𑀜𑀽𑀳𑀦𑁆𑀢𑀺 𑀅𑀳𑀁 𑀢𑀤𑀸 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀓𑀸𑀮𑁂 𑀅𑀪𑀺𑀥𑀫𑁆𑀫𑀦𑀬𑀓𑁄𑀯𑀺𑀤𑁄𑀢𑀺 𑀅𑀢𑁆𑀣𑁄. 𑀓𑀣𑀸𑀯𑀢𑁆𑀣𑀼𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑁂 𑀯𑀺𑀲𑀼𑀤𑁆𑀥𑀺𑀬𑀸 𑀙𑁂𑀓𑁄, 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀺𑀓𑀣𑀸𑀤𑀻𑀲𑀼 𑀤𑀲𑀲𑀼 𑀓𑀣𑀸𑀯𑀢𑁆𑀣𑀽𑀲𑀼 𑀯𑀸 𑀙𑁂𑀓𑁄, 𑀢𑀸𑀬 𑀓𑀣𑀸𑀯𑀢𑁆𑀣𑀼𑀯𑀺𑀲𑀼𑀤𑁆𑀥𑀺𑀬𑀸 𑀲𑀩𑁆𑀩𑁂𑀲𑀁 𑀬𑀢𑀺𑀚𑀦𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦 𑀩𑁄𑀥𑁂𑀢𑁆𑀯𑀸𑀦 𑀅𑀦𑀸𑀲𑀯𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀺𑀳𑀭𑀸𑀫𑀺 𑀯𑀸𑀲𑀁 𑀓𑀧𑁆𑀧𑁂𑀫𑀺.

𑁪𑁩𑁯. 𑀇𑀢𑁄 𑀧𑀜𑁆𑀘𑀲𑀢𑁂 𑀓𑀧𑁆𑀧𑁂𑀢𑀺 𑀇𑀢𑁄 𑀧𑀜𑁆𑀘𑀩𑀼𑀤𑁆𑀥𑀧𑀝𑀺𑀫𑀡𑁆𑀟𑀺𑀢𑀢𑁄 𑀪𑀤𑁆𑀤𑀓𑀧𑁆𑀧𑀢𑁄 𑀧𑀜𑁆𑀘𑀲𑀢𑁂 𑀓𑀧𑁆𑀧𑁂 𑀲𑀼𑀧𑁆𑀧𑀓𑀸𑀲𑀓𑀸 𑀲𑀼𑀝𑁆𑀞𑀼 𑀧𑀸𑀓𑀝𑀸 𑀘𑀓𑁆𑀓𑀭𑀢𑀦𑀸𑀤𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑁆𑀧𑀦𑁆𑀦𑀸 𑀚𑀫𑁆𑀩𑀼𑀤𑀻𑀧𑀸𑀤𑀺𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸 𑀧𑀥𑀸𑀦𑀸 𑀘𑀢𑀼𑀭𑁄 𑀘𑀢𑁆𑀢𑀸𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀼𑀡𑁆𑀡𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁬. 𑀉𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀳𑀁𑀲𑀯𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺.

𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑁆𑀧𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄. 𑀉𑀧𑀸𑀮𑀻𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀅𑀦𑀼𑀭𑀼𑀤𑁆𑀥𑀸𑀤𑀻𑀦𑀁 𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁 𑀧𑀺𑀬𑀲𑀳𑀸𑀬𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑁂 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁂 𑀧𑀩𑁆𑀩𑀚𑁆𑀚𑀸𑀬 𑀦𑀺𑀓𑁆𑀔𑀫𑀦𑁆𑀢𑁂𑀳𑀺 𑀙𑀳𑀺 𑀔𑀢𑁆𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁 𑀧𑀸𑀴𑀺𑀬𑀁 (𑀘𑀽𑀴𑀯. 𑁩𑁩𑁦 𑀆𑀤𑀬𑁄) 𑀆𑀕𑀢𑀫𑁂𑀯. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀅𑀭𑀜𑁆𑀜𑀯𑀸𑀲𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀆𑀳. ‘‘𑀪𑀺𑀓𑁆𑀔𑀼 𑀅𑀭𑀜𑁆𑀜𑁂 𑀯𑀲𑀦𑁆𑀢𑀲𑁆𑀲 𑀏𑀓𑀫𑁂𑀯 𑀥𑀼𑀭𑀁 𑀯𑀟𑁆𑀠𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀦 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀥𑀼𑀭𑀜𑁆𑀘 𑀕𑀦𑁆𑀣𑀥𑀼𑀭𑀜𑁆𑀘 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’’𑀢𑀺. 𑀲𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸𑀧𑀺 𑀦𑀁 𑀲𑀬𑀫𑁂𑀯 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀪𑀸𑀭𑀼𑀓𑀘𑁆𑀙𑀯𑀢𑁆𑀣𑀼𑀁 𑀅𑀚𑁆𑀚𑀼𑀓𑀯𑀢𑁆𑀣𑀼𑀁 𑀓𑀼𑀫𑀸𑀭𑀓𑀲𑁆𑀲𑀧𑀯𑀢𑁆𑀣𑀼𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀯𑀺𑀦𑀺𑀘𑁆𑀙𑀺𑀦𑀺. 𑀲𑀢𑁆𑀣𑀸 𑀏𑀓𑁂𑀓𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁂 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀢𑀬𑁄 𑀯𑀺𑀦𑀺𑀘𑁆𑀙𑀬𑁂 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁪𑁪𑁧. 𑀏𑀯𑀁 𑀲𑁄 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀢𑀁 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀳𑀁𑀲𑀯𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀁𑀲𑀯𑀢𑀺𑀬𑀸𑀢𑀺 𑀳𑀁𑀲𑀸𑀯𑀝𑁆𑀝𑀆𑀓𑀸𑀭𑁂𑀦 𑀯𑀢𑀺 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁄 𑀬𑀲𑁆𑀫𑀺𑀁 𑀦𑀕𑀭𑁂, 𑀢𑀁 𑀦𑀕𑀭𑀁 𑀳𑀁𑀲𑀯𑀢𑀻. 𑀅𑀣 𑀯𑀸 𑀅𑀦𑁂𑀓𑀲𑀗𑁆𑀔𑀸 𑀳𑀁𑀲𑀸 𑀢𑀴𑀸𑀓𑀧𑁄𑀓𑁆𑀔𑀭𑀡𑀻𑀲𑀭𑀧𑀮𑁆𑀮𑀮𑀸𑀤𑀻𑀲𑀼 𑀦𑀺𑀯𑀲𑀦𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀫𑀸𑀦𑀸 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀁𑀲𑀯𑀢𑀻, 𑀢𑀲𑁆𑀲𑀸 𑀳𑀁𑀲𑀯𑀢𑀺𑀬𑀸. 𑀲𑀼𑀚𑀸𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀼𑀝𑁆𑀞𑀼 𑀚𑀸𑀢𑁄𑀢𑀺 𑀲𑀼𑀚𑀸𑀢𑁄, ‘‘𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄’’𑀢𑀺 𑀯𑀘𑀦𑀢𑁄 𑀅𑀕𑀭𑀳𑀺𑀢𑁄 𑀳𑀼𑀢𑁆𑀯𑀸 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀅𑀲𑀻𑀢𑀺𑀓𑁄𑀝𑀺𑀦𑀺𑀘𑀬𑁄𑀢𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀭𑀸𑀲𑀺𑀓𑁄 𑀧𑀳𑀽𑀢𑀥𑀦𑀥𑀜𑁆𑀜𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀥𑀦𑀥𑀜𑁆𑀜𑀯𑀸 𑀩𑁆𑀭𑀸𑀳𑁆𑀫𑀡𑁄 𑀲𑀼𑀚𑀸𑀢𑁄 𑀦𑀸𑀫 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁪𑁨. 𑀧𑀼𑀦𑀧𑀺 𑀢𑀲𑁆𑀲𑁂𑀯 𑀫𑀳𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀚𑁆𑀛𑀸𑀬𑀓𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀸𑀬𑀓𑁄𑀢𑀺 𑀧𑀭𑁂𑀲𑀁 𑀯𑁂𑀤𑀢𑁆𑀢𑀬𑀸𑀤𑀺𑀁 𑀯𑀸𑀘𑁂𑀢𑀸. 𑀫𑀦𑁆𑀢𑀥𑀭𑁄𑀢𑀺 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀅𑀣𑀩𑁆𑀩𑀦𑀯𑁂𑀤𑀩𑁆𑀬𑀸𑀓𑀭𑀡𑀸𑀤𑀺𑀚𑀸𑀦𑀦𑀧𑀜𑁆𑀜𑀯𑀸𑀢𑀺 𑀅𑀢𑁆𑀣𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑁂𑀢𑀺 𑀮𑀓𑁆𑀔𑀡𑀲𑀢𑁆𑀣𑁂, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀘𑀓𑁆𑀓𑀯𑀢𑁆𑀢𑀺𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀤𑀺𑀲𑁆𑀲𑀫𑀸𑀦𑀮𑀓𑁆𑀔𑀡𑀧𑀓𑀸𑀲𑀦𑀓𑀕𑀦𑁆𑀣𑁂 𑀘𑀸𑀢𑀺 𑀅𑀢𑁆𑀣𑁄. 𑀇𑀢𑀺𑀳𑀸𑀲𑁂𑀢𑀺 ‘‘𑀇𑀢𑀺𑀳 𑀆𑀲 𑀇𑀢𑀺𑀳 𑀆𑀲𑀸’’𑀢𑀺 𑀧𑁄𑀭𑀸𑀡𑀓𑀣𑀸𑀧𑁆𑀧𑀓𑀸𑀲𑀓𑁂 𑀕𑀦𑁆𑀣𑁂. 𑀲𑀥𑀫𑁆𑀫𑁂𑀢𑀺 𑀲𑀓𑀥𑀫𑁆𑀫𑁂 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄 𑀧𑀭𑀺𑀬𑁄𑀲𑀸𑀦𑀁 𑀓𑁄𑀝𑀺𑀁 𑀕𑀢𑁄 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁪𑁪𑁩. 𑀧𑀭𑀺𑀩𑁆𑀩𑀸𑀚𑀸𑀢𑀺 𑀬𑁂 𑀦𑀺𑀕𑀡𑁆𑀞𑀲𑀸𑀯𑀓𑀸, 𑀢𑁂 𑀲𑀩𑁆𑀩𑁂 𑀦𑀸𑀦𑀸𑀤𑀺𑀝𑁆𑀞𑀺𑀓𑀸 𑀢𑀤𑀸 𑀫𑀳𑀺𑀬𑀸 𑀧𑀣𑀯𑀻𑀢𑀮𑁂 𑀘𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁪𑁫. 𑀬𑀸𑀯 𑀬𑀢𑁆𑀢𑀓𑀁 𑀓𑀸𑀮𑀁 𑀚𑀺𑀦𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀢𑀢𑁆𑀢𑀓𑀁 𑀓𑀸𑀮𑀁 𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁪𑁪𑁬. 𑀅𑀘𑁆𑀘𑀬𑁂𑀦 𑀅𑀳𑁄𑀭𑀢𑁆𑀢𑀦𑁆𑀢𑀺 𑀅𑀳𑁄 𑀘 𑀭𑀢𑁆𑀢𑀺 𑀘 𑀅𑀳𑁄𑀭𑀢𑁆𑀢𑀁, 𑀩𑀳𑀽𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀢𑀺𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁪𑁫𑁪. 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄𑀢𑀺 𑀫𑀦𑁆𑀢𑀸𑀡𑀻𑀦𑀸𑀫𑀸𑀬 𑀓𑀧𑁆𑀧𑀓𑀥𑀻𑀢𑀼𑀬𑀸 𑀧𑀼𑀢𑁆𑀢𑁄, 𑀫𑀸𑀲𑀧𑀼𑀡𑁆𑀡𑀢𑀸𑀬 𑀤𑀺𑀯𑀲𑀧𑀼𑀡𑁆𑀡𑀢𑀸𑀬 𑀧𑀼𑀡𑁆𑀡𑁄𑀢𑀺 𑀮𑀤𑁆𑀥𑀦𑀸𑀫𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀲𑀢𑁆𑀣𑀼𑀲𑁆𑀲 𑀲𑀸𑀯𑀓𑁄 𑀳𑁂𑀲𑁆𑀲𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁫𑁫. 𑀏𑀯𑀁 𑀓𑀺𑀢𑁆𑀢𑀬𑀺 𑀲𑁄 𑀩𑀼𑀤𑁆𑀥𑁄𑀢𑀺 𑀲𑁄 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀏𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀲𑀼𑀦𑀦𑁆𑀤𑀁 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀲𑁄𑀫𑀦𑀲𑁆𑀲𑀤𑀸𑀬𑀓𑀁 𑀓𑀺𑀢𑁆𑀢𑀬𑀺 𑀩𑁆𑀬𑀸𑀓𑀭𑀡𑀫𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀁 𑀚𑀦𑀁 𑀲𑀓𑀮𑀚𑀦𑀲𑀫𑀽𑀳𑀁 𑀲𑀸𑀥𑀼𑀓𑀁 𑀳𑀸𑀲𑀬𑀦𑁆𑀢𑁄 𑀲𑁄𑀫𑀦𑀲𑁆𑀲𑀁 𑀓𑀭𑁄𑀦𑁆𑀢𑁄 𑀲𑀓𑀁 𑀩𑀮𑀁 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑀬𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁫𑁬. 𑀢𑀢𑁄 𑀅𑀦𑀦𑁆𑀢𑀭𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀅𑀜𑁆𑀜𑀸𑀧𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀓𑀢𑀜𑁆𑀚𑀮𑀻𑀢𑀺𑀆𑀤𑀺𑀫𑀸𑀳. 𑀢𑀤𑀸 𑀢𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀼𑀭𑀺𑀫𑀓𑀸𑀮𑁂 𑀲𑀼𑀦𑀦𑁆𑀤𑀁 𑀢𑀸𑀧𑀲𑀁 𑀓𑀢𑀜𑁆𑀚𑀮𑀺𑀧𑀼𑀝𑀸 𑀲𑀩𑁆𑀩𑁂 𑀚𑀦𑀸 𑀦𑀫𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑁂 𑀓𑀸𑀭𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀏𑀯𑀁 𑀲𑁄 𑀲𑀩𑁆𑀩𑀚𑀦𑀧𑀽𑀚𑀺𑀢𑁄𑀧𑀺 𑀲𑀫𑀸𑀦𑁄 ‘‘𑀧𑀽𑀚𑀺𑀢𑁄𑀫𑁆𑀳𑀻’’𑀢𑀺 𑀫𑀸𑀦𑀁 𑀅𑀓𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀥𑀺𑀓𑀁 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑀺𑀁 𑀚𑀸𑀢𑀺𑀁 𑀲𑁄𑀥𑁂𑀲𑀺 𑀧𑀭𑀺𑀲𑀼𑀤𑁆𑀥𑀫𑀓𑀸𑀲𑀻𑀢𑀺 𑀅𑀢𑁆𑀣𑁄.

𑁪𑁫𑁭. 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑀦𑁆𑀢𑀺 𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀸𑀘𑀁, 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀁 𑀓𑀢𑁆𑀯𑀸 ‘‘𑀯𑀘’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀦𑀸𑀫𑁂𑀦 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀁 𑀫𑀼𑀦𑀺𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀕𑁄𑀢𑀫𑀁 𑀪𑀕𑀯𑀦𑁆𑀢𑀁 𑀧𑀲𑁆𑀲𑀸𑀫𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀓𑀸𑀭𑀁 𑀅𑀥𑀺𑀓𑀓𑀺𑀘𑁆𑀘𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀓𑀲𑁆𑀲𑀸𑀫𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑁂 𑀫𑀬𑁆𑀳𑀁 𑀲𑀗𑁆𑀓𑀧𑁆𑀧𑁄 𑀘𑁂𑀢𑀦𑀸𑀫𑀦𑀲𑀺𑀓𑀸𑀭𑁄 𑀅𑀳𑀼 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁫𑁮. 𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦𑀸𑀢𑀺 ‘‘𑀅𑀳𑀁 𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸. 𑀓𑀺𑀭𑀺𑀬𑀁 𑀘𑀺𑀦𑁆𑀢𑀬𑀺𑀁 𑀫𑀫𑀸𑀢𑀺 ‘‘𑀫𑀬𑀸 𑀓𑀻𑀤𑀺𑀲𑀁 𑀧𑀼𑀜𑁆𑀜𑀁 𑀓𑀢𑁆𑀢𑀩𑁆𑀩𑀁 𑀦𑀼 𑀔𑁄’’𑀢𑀺 𑀓𑀺𑀭𑀺𑀬𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀘𑀺𑀦𑁆𑀢𑀬𑀺𑀦𑁆𑀢𑀺 𑀅𑀢𑁆𑀣𑁄. 𑀓𑁆𑀬𑀸𑀳𑀁 𑀓𑀫𑁆𑀫𑀁 𑀆𑀘𑀭𑀸𑀫𑀻𑀢𑀺 𑀅𑀳𑀁 𑀓𑀻𑀤𑀺𑀲𑀁 𑀧𑀼𑀜𑁆𑀜𑀓𑀫𑁆𑀫𑀁 𑀆𑀘𑀭𑀸𑀫𑀺 𑀧𑀽𑀭𑁂𑀫𑀺 𑀦𑀼 𑀔𑁄𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑁂 𑀲𑀓𑀮𑀧𑀼𑀜𑁆𑀜𑀲𑁆𑀲 𑀪𑀸𑀚𑀦𑀪𑀽𑀢𑁂 𑀭𑀢𑀦𑀢𑁆𑀢𑀬𑁂𑀢𑀺 𑀅𑀢𑁆𑀣𑁄.

𑁪𑁫𑁯. 𑀅𑀬𑀜𑁆𑀘 𑀧𑀸𑀞𑀺𑀓𑁄 𑀪𑀺𑀓𑁆𑀔𑀽𑀢𑀺 𑀅𑀬𑀁 𑀪𑀺𑀓𑁆𑀔𑀼 𑀲𑀭𑀪𑀜𑁆𑀜𑀯𑀲𑁂𑀦 𑀕𑀦𑁆𑀣𑀧𑀸𑀞𑀧𑀞𑀦𑀢𑁄 𑀯𑀸𑀘𑀦𑀢𑁄 ‘‘𑀧𑀸𑀞𑀺𑀓𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀪𑀺𑀓𑁆𑀔𑀼. 𑀩𑀼𑀤𑁆𑀥𑀲𑀸𑀲𑀦𑁂 𑀲𑀩𑁆𑀩𑁂𑀲𑀁 𑀧𑀸𑀞𑀻𑀦𑀁 𑀧𑀸𑀞𑀓𑀯𑀸𑀘𑀓𑀸𑀦𑀁 𑀅𑀦𑁆𑀢𑀭𑁂 𑀯𑀺𑀦𑀬𑁂 𑀘 𑀅𑀕𑁆𑀕𑀦𑀺𑀓𑁆𑀔𑀺𑀢𑁆𑀢𑁄 𑀅𑀕𑁆𑀕𑁄 𑀇𑀢𑀺 𑀞𑀧𑀺𑀢𑁄. 𑀢𑀁 𑀞𑀸𑀦𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀁 𑀅𑀳𑀁 𑀧𑀢𑁆𑀣𑀬𑁂 𑀧𑀢𑁆𑀣𑁂𑀫𑀻𑀢𑀺 𑀅𑀢𑁆𑀣𑁄.

𑁪𑁬𑁦. 𑀢𑀢𑁄 𑀧𑀭𑀁 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀇𑀤𑀁 𑀫𑁂 𑀅𑀫𑀺𑀢𑀁 𑀪𑁄𑀕𑀦𑁆𑀢𑀺𑀆𑀤𑀺𑀫𑀸𑀳. 𑀫𑁂 𑀫𑀬𑁆𑀳𑀁 𑀅𑀫𑀺𑀢𑀁 𑀧𑀫𑀸𑀡𑀯𑀺𑀭𑀳𑀺𑀢𑀁 𑀪𑁄𑀕𑀭𑀸𑀲𑀺𑀁 𑀅𑀓𑁆𑀔𑁄𑀪𑀁 𑀔𑁄𑀪𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀲𑀸𑀕𑀭𑀽𑀧𑀫𑀁 𑀲𑀸𑀕𑀭𑀲𑀤𑀺𑀲𑀁 𑀢𑁂𑀦 𑀪𑁄𑀕𑁂𑀦 𑀢𑀸𑀤𑀺𑀲𑁂𑀦 𑀥𑀦𑁂𑀦 𑀩𑀼𑀤𑁆𑀥𑀲𑁆𑀲 𑀆𑀭𑀸𑀫𑀁 𑀫𑀸𑀧𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁪𑁭𑁪. 𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄 𑀢𑁂𑀦 𑀲𑀼𑀝𑁆𑀞𑀼 𑀫𑀸𑀧𑀺𑀢𑀁 𑀓𑀸𑀭𑀺𑀢𑀁 𑀲𑀗𑁆𑀖𑀸𑀭𑀸𑀫𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀲𑁆𑀲𑀸𑀭𑀸𑀫𑀲𑁆𑀲𑀸𑀦𑀺𑀲𑀁𑀲𑀤𑀻𑀧𑀓𑀁 𑀇𑀤𑀁 𑀯𑀘𑀦𑀁 𑀅𑀩𑁆𑀭𑀯𑀺 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁭𑁫. 𑀓𑀣𑀁? 𑀬𑁄 𑀲𑁄𑀢𑀺 𑀬𑁄 𑀲𑀗𑁆𑀖𑀸𑀭𑀸𑀫𑀤𑀸𑀬𑀓𑁄 𑀢𑀸𑀧𑀲𑁄 𑀲𑀼𑀫𑀸𑀧𑀺𑀢𑀁 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑀧𑀸𑀲𑀸𑀤𑀳𑀫𑁆𑀫𑀺𑀬𑀧𑀸𑀓𑀸𑀭𑀸𑀤𑀺𑀦𑀸 𑀲𑀼𑀝𑁆𑀞𑀼 𑀲𑀚𑁆𑀚𑀺𑀢𑀁 𑀲𑀗𑁆𑀖𑀸𑀭𑀸𑀫𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺 𑀧-𑀓𑀸𑀭𑁂𑀦 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀅𑀤𑀸𑀲𑀺. 𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀢𑀁 𑀢𑀸𑀧𑀲𑀁 𑀅𑀳𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀺, 𑀉𑀢𑁆𑀢𑀸𑀦𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄𑀢𑀺 𑀪𑀸𑀲𑀦𑁆𑀢𑀲𑁆𑀲 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀡𑀸𑀣, 𑀑𑀳𑀺𑀢𑀲𑁄𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄.

𑁪𑁭𑁬. 𑀢𑁂𑀦 𑀤𑀺𑀦𑁆𑀦𑀸𑀭𑀸𑀫𑀲𑁆𑀲 𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁪𑁭𑁭. 𑀲𑀗𑁆𑀖𑀸𑀭𑀸𑀫𑀲𑁆𑀲𑀺𑀤𑀁 𑀨𑀮𑀦𑁆𑀢𑀺 𑀇𑀤𑀁 𑀆𑀬𑀢𑀺𑀁 𑀅𑀦𑀼𑀪𑀯𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀇𑀝𑁆𑀞𑀨𑀮𑀁 𑀲𑀗𑁆𑀖𑀸𑀭𑀸𑀫𑀤𑀸𑀦𑀲𑁆𑀲 𑀨𑀮𑀁 𑀯𑀺𑀧𑀸𑀓𑀦𑁆𑀢𑀺 𑀅𑀢𑁆𑀣𑁄.

𑁪𑁭𑁮. 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀙𑀲𑀳𑀲𑁆𑀲𑀸𑀦𑀺 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀲𑀫𑀮𑀗𑁆𑀓𑀢𑀸 𑀲𑀼𑀝𑁆𑀞𑀼 𑀅𑀮𑀗𑁆𑀓𑀢𑀸 𑀲𑀚𑁆𑀚𑀺𑀢𑀸 𑀦𑀸𑀭𑀺𑀬𑁄 𑀇𑀢𑁆𑀣𑀺𑀬𑁄 𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸𑀢𑀺 𑀯𑀺𑀘𑀺𑀢𑁆𑀢𑁂𑀳𑀺 𑀅𑀦𑁂𑀓𑀭𑀽𑀧𑁂𑀳𑀺 𑀯𑀢𑁆𑀣𑁂𑀳𑀺 𑀆𑀪𑀭𑀡𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀸. 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀢𑀺 𑀑𑀮𑀫𑁆𑀩𑀺𑀢𑀫𑀼𑀢𑁆𑀢𑀸𑀳𑀸𑀭𑀫𑀡𑀺𑀓𑀜𑁆𑀘𑀺𑀢𑀓𑀡𑁆𑀡𑀸𑀢𑀺 𑀅𑀢𑁆𑀣𑁄.

𑁪𑁭𑁯. 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀭𑀽𑀧𑀲𑁄𑀪𑀸𑀢𑀺𑀲𑀬𑀁 𑀯𑀡𑁆𑀡𑁂𑀦𑁆𑀢𑁄 𑀆𑀴𑀸𑀭𑀧𑀫𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀴𑀸𑀭𑀸𑀦𑀺 𑀫𑀳𑀦𑁆𑀢𑀸𑀦𑀺 𑀅𑀓𑁆𑀔𑀻𑀦𑀺 𑀫𑀡𑀺𑀕𑀼𑀴𑀲𑀤𑀺𑀲𑀸𑀦𑀺 𑀬𑀸𑀲𑀁 𑀇𑀢𑁆𑀣𑀻𑀦𑀁 𑀢𑀸 𑀆𑀴𑀸𑀭𑀧𑀫𑁆𑀳𑀸 𑀪𑀫𑀭𑀸𑀦𑀫𑀺𑀯 𑀫𑀦𑁆𑀤𑀮𑁄𑀘𑀦𑀸𑀢𑀺 𑀅𑀢𑁆𑀣𑁄. 𑀳𑀲𑀼𑀮𑀸 𑀳𑀸𑀲𑀧𑀓𑀢𑀺, 𑀮𑀻𑀮𑀸𑀯𑀺𑀮𑀸𑀲𑀸𑀢𑀺 𑀅𑀢𑁆𑀣𑁄. 𑀲𑀼𑀲𑀜𑁆𑀜𑀸𑀢𑀺 𑀲𑀼𑀦𑁆𑀤𑀭𑀲𑀜𑁆𑀜𑀺𑀢𑀩𑁆𑀩𑀲𑀭𑀻𑀭𑀸𑀯𑀬𑀯𑀸. 𑀢𑀦𑀼𑀫𑀚𑁆𑀛𑀺𑀫𑀸𑀢𑀺 𑀔𑀼𑀤𑁆𑀤𑀓𑀉𑀤𑀭𑀧𑀤𑁂𑀲𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁪𑁮𑁪. 𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄𑀢𑀺 𑀢𑀲𑁆𑀲 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄 𑀥𑀫𑁆𑀫𑀓𑁄𑀝𑁆𑀞𑀸𑀲𑀪𑀸𑀕𑀻. 𑀑𑀭𑀲𑁄𑀢𑀺 𑀉𑀭𑀲𑀺 𑀚𑀸𑀢𑁄, 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀤𑀲𑀯𑀺𑀥𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀁 𑀓𑀡𑁆𑀞𑀢𑀸𑀮𑀼𑀑𑀝𑁆𑀞𑀸𑀤𑀺𑀧𑀜𑁆𑀘𑀝𑁆𑀞𑀸𑀦𑁂 𑀖𑀝𑁆𑀝𑁂𑀢𑁆𑀯𑀸 𑀤𑁂𑀲𑀺𑀢𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀞𑀺𑀢𑀪𑀸𑀯𑁂𑀦 𑀉𑀭𑀲𑀺 𑀚𑀸𑀢𑀧𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑀺𑀫𑁆𑀫𑀺𑀢𑁄𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀦𑀺𑀫𑁆𑀫𑀺𑀢𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀉𑀧𑀸𑀮𑀺 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀓𑀺𑀜𑁆𑀘𑀸𑀧𑀺 𑀲𑁄 𑀫𑀸𑀢𑀼 𑀦𑀸𑀫𑁂𑀦 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀦𑀸𑀫𑁄, 𑀅𑀦𑀼𑀭𑀼𑀤𑁆𑀥𑀸𑀤𑀻𑀳𑀺 𑀧𑀦 𑀲𑀳 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑀢𑁆𑀢𑀸 𑀔𑀢𑁆𑀢𑀺𑀬𑀸𑀦𑀁 𑀉𑀧𑀲𑀫𑀻𑀧𑁂 𑀅𑀮𑁆𑀮𑀻𑀦𑁄 𑀬𑀼𑀢𑁆𑀢𑁄 𑀓𑀸𑀬𑀘𑀺𑀢𑁆𑀢𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀉𑀧𑀸𑀮𑀻𑀢𑀺 𑀦𑀸𑀫𑁂𑀦 𑀲𑀢𑁆𑀣𑀼 𑀲𑀸𑀯𑀓𑁄 𑀳𑁂𑀲𑁆𑀲𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁪𑁮𑁫. 𑀯𑀺𑀦𑀬𑁂 𑀧𑀸𑀭𑀫𑀺𑀁 𑀧𑀢𑁆𑀯𑀸𑀢𑀺 𑀯𑀺𑀦𑀬𑀧𑀺𑀝𑀓𑁂 𑀓𑁄𑀝𑀺𑀁 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸. 𑀞𑀸𑀦𑀸𑀝𑁆𑀞𑀸𑀦𑁂 𑀘 𑀓𑁄𑀯𑀺𑀤𑁄𑀢𑀺 𑀓𑀸𑀭𑀡𑀸𑀓𑀸𑀭𑀡𑁂 𑀘 𑀤𑀓𑁆𑀔𑁄 𑀙𑁂𑀓𑁄𑀢𑀺 𑀅𑀢𑁆𑀣𑁄. 𑀚𑀺𑀦𑀲𑀸𑀲𑀦𑀁 𑀥𑀸𑀭𑁂𑀦𑁆𑀢𑁄𑀢𑀺 𑀚𑀺𑀦𑁂𑀦 𑀯𑀼𑀢𑁆𑀢𑀸𑀦𑀼𑀲𑀸𑀲𑀦𑀺𑀁 𑀚𑀺𑀦𑀲𑁆𑀲 𑀧𑀺𑀝𑀓𑀢𑁆𑀢𑀬𑀁 𑀯𑀸𑀘𑀦𑀲𑀯𑀦𑀘𑀺𑀦𑁆𑀢𑀦𑀥𑀸𑀭𑀡𑀸𑀤𑀺𑀯𑀲𑁂𑀦 𑀥𑀸𑀭𑁂𑀦𑁆𑀢𑁄, 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀺𑀲𑁆𑀲𑀢𑀺𑀦𑀸𑀲𑀯𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀺𑀲𑁆𑀲𑀢𑀺 𑀧𑀯𑀢𑁆𑀢𑁂𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁪𑁮𑁭. 𑀅𑀧𑀭𑀺𑀫𑁂𑀬𑁆𑀬𑀼𑀧𑀸𑀤𑀸𑀬𑀸𑀢𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑁂 𑀆𑀤𑀺𑀁 𑀓𑀢𑁆𑀯𑀸. 𑀧𑀢𑁆𑀣𑁂𑀫𑀺 𑀢𑀯 𑀲𑀸𑀲𑀦𑀦𑁆𑀢𑀺 ‘‘𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀢𑀼𑀬𑁆𑀳𑀁 𑀲𑀸𑀲𑀦𑀁 𑀧𑀢𑁆𑀣𑁂𑀫𑀺 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁄 𑀫𑁂 𑀅𑀢𑁆𑀣𑁄𑀢𑀺 𑀲𑁄 𑀏𑀢𑀤𑀕𑁆𑀕𑀝𑁆𑀞𑀸𑀦𑀦𑁆𑀢𑀭𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀫𑁂 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄𑀢𑀺 𑀲𑀩𑁆𑀩𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀔𑀬𑁄 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄.

𑁪𑁮𑁮. 𑀭𑀸𑀚𑀤𑀡𑁆𑀟𑁂𑀦 𑀢𑀚𑁆𑀚𑀺𑀢𑁄 𑀧𑀻𑀴𑀺𑀢𑁄 𑀲𑀽𑀮𑀸𑀯𑀼𑀢𑁄 𑀲𑀽𑀮𑁂 𑀆𑀯𑀼𑀢𑁄 𑀆𑀯𑀼𑀡𑀺𑀢𑁄 𑀧𑁄𑀲𑁄 𑀧𑀼𑀭𑀺𑀲𑁄 𑀲𑀽𑀮𑁂 𑀲𑀸𑀢𑀁 𑀫𑀥𑀼𑀭𑀲𑀼𑀔𑀁 𑀅𑀯𑀺𑀦𑁆𑀤𑀦𑁆𑀢𑁄 𑀦𑀸𑀦𑀼𑀪𑀯𑀦𑁆𑀢𑁄 𑀧𑀭𑀺𑀫𑀼𑀢𑁆𑀢𑀺𑀁𑀯 𑀧𑀭𑀺𑀫𑁄𑀘𑀦𑀫𑁂𑀯 𑀇𑀘𑁆𑀙𑀢𑀺 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁮𑁯-𑁯𑁦. 𑀫𑀳𑀸𑀯𑀻𑀭 𑀯𑀻𑀭𑀸𑀦𑀫𑀦𑁆𑀢𑀭𑁂 𑀯𑀻𑀭𑀼𑀢𑁆𑀢𑀫 𑀅𑀳𑀁 𑀪𑀯𑀤𑀡𑁆𑀟𑁂𑀦 𑀚𑀸𑀢𑀺𑀤𑀡𑁆𑀟𑁂𑀦, 𑀢𑀚𑁆𑀚𑀺𑀢𑁄 𑀧𑀻𑀴𑀺𑀢𑁄 𑀓𑀫𑁆𑀫𑀲𑀽𑀮𑀸𑀯𑀼𑀢𑁄 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀽𑀮𑀲𑁆𑀫𑀺𑀁 𑀆𑀯𑀼𑀢𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄, 𑀧𑀺𑀧𑀸𑀲𑀸𑀯𑁂𑀤𑀦𑀸𑀬 𑀧𑀺𑀧𑀸𑀲𑀸𑀢𑀼𑀭𑀪𑀸𑀯𑁂𑀦 𑀅𑀝𑁆𑀝𑀺𑀢𑁄 𑀅𑀪𑀺𑀪𑀽𑀢𑁄 𑀤𑀼𑀓𑁆𑀔𑀸𑀧𑀺𑀢𑁄 𑀪𑀯𑁂 𑀲𑀸𑀢𑀁 𑀲𑀁𑀲𑀸𑀭𑁂 𑀫𑀥𑀼𑀭𑀁 𑀲𑀼𑀔𑀁 𑀦 𑀯𑀺𑀦𑁆𑀤𑀸𑀫𑀺 𑀦 𑀮𑀪𑀸𑀫𑀺. 𑀭𑀸𑀕𑀕𑁆𑀕𑀺𑀤𑁄𑀲𑀕𑁆𑀕𑀺𑀫𑁄𑀳𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺, 𑀦𑀭𑀓𑀕𑁆𑀕𑀺𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺𑀤𑀼𑀓𑁆𑀔𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺 𑀯𑀸 𑀢𑀻𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀦𑁆𑀢𑁄 𑀧𑀭𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀘𑁆𑀘𑀦𑀼𑀧𑀸𑀬𑀁 𑀕𑀯𑁂𑀲𑀸𑀫𑀺 𑀧𑀭𑀺𑀬𑁂𑀲𑀸𑀫𑀺 𑀢𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀭𑀸𑀚𑀤𑀡𑁆𑀟𑀁 𑀇𑀢𑁄 𑀕𑀢𑁄 𑀧𑀢𑁆𑀢𑁄 𑀧𑀭𑀺𑀫𑀼𑀢𑁆𑀢𑀺𑀁 𑀕𑀯𑁂𑀲𑀢𑀺, 𑀢𑀣𑀸 𑀅𑀳𑀁 𑀪𑀯𑀤𑀡𑁆𑀟𑀧𑁆𑀧𑀢𑁆𑀢𑁄 𑀧𑀭𑀺𑀫𑀼𑀢𑁆𑀢𑀺𑀁 𑀕𑀯𑁂𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯𑁧-𑁨. 𑀧𑀼𑀦 𑀲𑀁𑀲𑀸𑀭𑀢𑁄 𑀫𑁄𑀘𑀦𑀁 𑀉𑀧𑀫𑁄𑀧𑀫𑁂𑀬𑁆𑀬𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸 𑀯𑀺𑀲𑀸𑀤𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑁂𑀦 𑀲𑀧𑁆𑀧𑀯𑀺𑀲𑁂𑀦 𑀆 𑀲𑀫𑀦𑁆𑀢𑀢𑁄 𑀤𑀁𑀲𑀻𑀬𑀺𑀢𑁆𑀣 𑀤𑀝𑁆𑀞𑁄 𑀳𑁄𑀢𑀻𑀢𑀺 𑀯𑀺𑀲𑀸𑀤𑁄, 𑀲𑀧𑁆𑀧𑀤𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀺𑀲𑀁 𑀳𑀮𑀸𑀳𑀮𑀯𑀺𑀲𑀁 𑀅𑀤𑀢𑀺 𑀕𑀺𑀮𑀢𑀻𑀢𑀺 𑀯𑀺𑀲𑀸𑀤𑁄, 𑀯𑀺𑀲𑀔𑀸𑀤𑀓𑁄𑀢𑀺 𑀅𑀢𑁆𑀣𑁄. 𑀬𑁄 𑀧𑀼𑀭𑀺𑀲𑁄 𑀯𑀺𑀲𑀸𑀤𑁄, 𑀢𑁂𑀦 𑀢𑀸𑀤𑀺𑀲𑁂𑀦 𑀯𑀺𑀲𑁂𑀦 𑀧𑀭𑀺𑀧𑀻𑀴𑀺𑀢𑁄, 𑀢𑀲𑁆𑀲 𑀯𑀺𑀲𑀲𑁆𑀲 𑀯𑀺𑀖𑀸𑀢𑀸𑀬 𑀯𑀺𑀦𑀸𑀲𑀸𑀬 𑀉𑀧𑀸𑀬𑀦𑀁 𑀉𑀧𑀸𑀬𑀪𑀽𑀢𑀁 𑀅𑀕𑀤𑀁 𑀑𑀲𑀥𑀁 𑀕𑀯𑁂𑀲𑁂𑀬𑁆𑀬 𑀧𑀭𑀺𑀬𑁂𑀲𑁂𑀬𑁆𑀬, 𑀢𑀁 𑀕𑀯𑁂𑀲𑀫𑀸𑀦𑁄 𑀯𑀺𑀲𑀖𑀸𑀢𑀓𑀁 𑀯𑀺𑀲𑀦𑀸𑀲𑀓𑀁 𑀅𑀕𑀤𑀁 𑀑𑀲𑀥𑀁 𑀧𑀲𑁆𑀲𑁂𑀬𑁆𑀬 𑀤𑀓𑁆𑀔𑁂𑀬𑁆𑀬. 𑀲𑁄 𑀢𑀁 𑀅𑀢𑁆𑀢𑀦𑁄 𑀤𑀺𑀝𑁆𑀞𑀁 𑀑𑀲𑀥𑀁 𑀧𑀺𑀯𑀺𑀢𑁆𑀯𑀸 𑀯𑀺𑀲𑀫𑁆𑀳𑀸 𑀯𑀺𑀲𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀫𑁄𑀘𑀦𑀓𑀸𑀭𑀡𑀸 𑀲𑀼𑀔𑀻 𑀅𑀲𑁆𑀲 𑀪𑀯𑁂𑀬𑁆𑀬 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯𑁩. 𑀢𑀣𑁂𑀯𑀸𑀳𑀦𑁆𑀢𑀺 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀲𑁄 𑀦𑀭𑁄 𑀯𑀺𑀲𑀳𑀢𑁄, 𑀲𑀯𑀺𑀲𑁂𑀦 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀯𑀺𑀲𑀔𑀸𑀤𑀓𑁄 𑀯𑀸 𑀑𑀲𑀥𑀁 𑀧𑀺𑀯𑀺𑀢𑁆𑀯𑀸 𑀲𑀼𑀔𑀻 𑀪𑀯𑁂𑀬𑁆𑀬, 𑀢𑀣𑁂𑀯 𑀢𑁂𑀦 𑀧𑀓𑀸𑀭𑁂𑀦 𑀅𑀳𑀁 𑀅𑀯𑀺𑀚𑁆𑀚𑀸𑀬 𑀫𑁄𑀳𑁂𑀦 𑀲𑀁 𑀲𑀼𑀝𑁆𑀞𑀼 𑀧𑀻𑀴𑀺𑀢𑁄. 𑀲𑀤𑁆𑀥𑀫𑁆𑀫𑀸𑀕𑀤𑀫𑁂𑀲𑀳𑀦𑁆𑀢𑀺 𑀅𑀳𑀁 𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀁 𑀑𑀲𑀥𑀁 𑀏𑀲𑀁 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁪𑁯𑁪-𑁫. 𑀥𑀫𑁆𑀫𑀸𑀕𑀤𑀁 𑀕𑀯𑁂𑀲𑀦𑁆𑀢𑁄𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀯𑀺𑀲𑀲𑁆𑀲 𑀯𑀺𑀦𑀸𑀲𑀸𑀬 𑀥𑀫𑁆𑀫𑁄𑀲𑀥𑀁 𑀕𑀯𑁂𑀲𑀦𑁆𑀢𑁄. 𑀅𑀤𑁆𑀤𑀓𑁆𑀔𑀺𑀁 𑀲𑀓𑁆𑀬𑀲𑀸𑀲𑀦𑀦𑁆𑀢𑀺 𑀲𑀓𑁆𑀬𑀯𑀁𑀲𑀧𑀪𑀯𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀲𑀦𑀁 𑀲𑀤𑁆𑀤𑀓𑁆𑀔𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀁 𑀲𑀩𑁆𑀩𑁄𑀲𑀥𑀸𑀦𑀁 𑀢𑀦𑁆𑀢𑀺 𑀲𑀩𑁆𑀩𑁂𑀲𑀁 𑀑𑀲𑀥𑀸𑀦𑀁 𑀅𑀦𑁆𑀢𑀭𑁂 𑀢𑀁 𑀲𑀓𑁆𑀬𑀲𑀸𑀲𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑁄𑀲𑀥𑀁 𑀅𑀕𑁆𑀕𑀁 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑀮𑁆𑀮𑀯𑀺𑀦𑁄𑀤𑀦𑀦𑁆𑀢𑀺 𑀭𑀸𑀕𑀲𑀮𑁆𑀮𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀲𑀮𑁆𑀮𑀸𑀦𑀁 𑀯𑀺𑀦𑁄𑀤𑀦𑀁 𑀯𑀽𑀧𑀲𑀫𑀓𑀭𑀁 𑀥𑀫𑁆𑀫𑁄𑀲𑀥𑀁 𑀥𑀫𑁆𑀫𑀲𑀗𑁆𑀔𑀸𑀢𑀁 𑀑𑀲𑀥𑀁 𑀧𑀺𑀯𑀺𑀢𑁆𑀯𑀸 𑀲𑀩𑁆𑀩𑀁 𑀯𑀺𑀲𑀁 𑀲𑀓𑀮𑀲𑀁𑀲𑀸𑀭𑀤𑀼𑀓𑁆𑀔𑀯𑀺𑀲𑀁 𑀲𑀫𑀽𑀳𑀦𑀺𑀁 𑀦𑀸𑀲𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀚𑀭𑀸𑀫𑀭𑀦𑁆𑀢𑀺 𑀢𑀁 𑀤𑀼𑀓𑁆𑀔𑀯𑀺𑀲𑀁 𑀲𑀫𑀽𑀳𑀦𑀺𑀢𑁆𑀯𑀸 𑀅𑀚𑀭𑀁 𑀚𑀭𑀸𑀯𑀺𑀭𑀳𑀺𑀢𑀁 𑀅𑀫𑀭𑀁 𑀫𑀭𑀡𑀯𑀺𑀭𑀳𑀺𑀢𑀁 𑀲𑀻𑀢𑀺𑀪𑀸𑀯𑀁 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀺𑀭𑀳𑀺𑀢𑀢𑁆𑀢𑀸 𑀲𑀻𑀢𑀮𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀅𑀳𑀁 𑀨𑀲𑁆𑀲𑀬𑀺𑀁 𑀧𑀘𑁆𑀘𑀓𑁆𑀔𑀫𑀓𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯𑁬. 𑀧𑀼𑀦 𑀓𑀺𑀮𑁂𑀲𑀢𑀫𑀲𑁆𑀲 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸 𑀪𑀽𑀢𑀝𑁆𑀝𑀺𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀪𑀽𑀢𑀝𑁆𑀝𑀺𑀢𑁄 𑀪𑀽𑀢𑁂𑀦 𑀬𑀓𑁆𑀔𑁂𑀦 𑀅𑀝𑁆𑀝𑀺𑀢𑁄 𑀧𑀻𑀴𑀺𑀢𑁄 𑀧𑁄𑀲𑁄 𑀧𑀼𑀭𑀺𑀲𑁄 𑀪𑀽𑀢𑀕𑁆𑀕𑀸𑀳𑁂𑀦 𑀬𑀓𑁆𑀔𑀕𑁆𑀕𑀸𑀳𑁂𑀦 𑀧𑀻𑀴𑀺𑀢𑁄 𑀤𑀼𑀓𑁆𑀔𑀺𑀢𑁄 𑀪𑀽𑀢𑀲𑁆𑀫𑀸 𑀬𑀓𑁆𑀔𑀕𑁆𑀕𑀸𑀳𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸 𑀫𑁄𑀘𑀦𑀢𑁆𑀣𑀸𑀬 𑀪𑀽𑀢𑀯𑁂𑀚𑁆𑀚𑀁 𑀕𑀯𑁂𑀲𑁂𑀬𑁆𑀬.

𑁪𑁯𑁭. 𑀢𑀁 𑀕𑀯𑁂𑀲𑀫𑀸𑀦𑁄 𑀘 𑀪𑀽𑀢𑀯𑀺𑀚𑁆𑀚𑀸𑀬 𑀲𑀼𑀝𑁆𑀞𑀼 𑀓𑁄𑀯𑀺𑀤𑀁 𑀙𑁂𑀓𑀁 𑀪𑀽𑀢𑀯𑁂𑀚𑁆𑀚𑀁 𑀧𑀲𑁆𑀲𑁂𑀬𑁆𑀬, 𑀲𑁄 𑀪𑀽𑀢𑀯𑁂𑀚𑁆𑀚𑁄 𑀢𑀲𑁆𑀲 𑀬𑀓𑁆𑀔𑀕𑁆𑀕𑀳𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀯𑁂𑀲𑀪𑀽𑀢𑀁 𑀯𑀺𑀳𑀦𑁂 𑀯𑀺𑀦𑀸𑀲𑁂𑀬𑁆𑀬, 𑀲𑀫𑀽𑀮𑀜𑁆𑀘 𑀫𑀽𑀮𑁂𑀦 𑀲𑀳 𑀆𑀬𑀢𑀺𑀁 𑀅𑀦𑀸𑀲𑁂𑀯𑀓𑀁 𑀓𑀢𑁆𑀯𑀸 𑀯𑀺𑀦𑀸𑀲𑀬𑁂 𑀯𑀺𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯𑁮. 𑀫𑀳𑀸𑀯𑀻𑀭 𑀯𑀻𑀭𑀼𑀢𑁆𑀢𑀫 𑀢𑀫𑀕𑁆𑀕𑀸𑀳𑁂𑀦 𑀓𑀺𑀮𑁂𑀲𑀦𑁆𑀥𑀓𑀸𑀭𑀕𑁆𑀕𑀸𑀳𑁂𑀦 𑀧𑀻𑀴𑀺𑀢𑁄 𑀅𑀳𑀁 𑀢𑀣𑁂𑀯 𑀢𑁂𑀦 𑀧𑀓𑀸𑀭𑁂𑀦𑁂𑀯 𑀢𑀫𑀢𑁄 𑀓𑀺𑀮𑁂𑀲𑀦𑁆𑀥𑀓𑀸𑀭𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸 𑀫𑁄𑀘𑀦𑀢𑁆𑀣𑀸𑀬 𑀜𑀸𑀡𑀸𑀮𑁄𑀓𑀁 𑀧𑀜𑁆𑀜𑀸𑀆𑀮𑁄𑀓𑀁 𑀕𑀯𑁂𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯𑁯. 𑀅𑀣 𑀢𑀤𑀦𑀦𑁆𑀢𑀭𑀁 𑀓𑀺𑀮𑁂𑀲𑀢𑀫𑀲𑁄𑀥𑀦𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀦𑀸𑀲𑀓𑀁 𑀲𑀓𑁆𑀬𑀫𑀼𑀦𑀺𑀁 𑀅𑀤𑁆𑀤𑀲𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀲𑀓𑁆𑀬𑀫𑀼𑀦𑀺 𑀫𑁂 𑀫𑀬𑁆𑀳𑀁 𑀢𑀫𑀁 𑀅𑀦𑁆𑀥𑀓𑀸𑀭𑀁 𑀓𑀺𑀮𑁂𑀲𑀢𑀺𑀫𑀺𑀭𑀁 𑀪𑀽𑀢𑀯𑁂𑀚𑁆𑀚𑁄𑀯 𑀪𑀽𑀢𑀓𑀁 𑀬𑀓𑁆𑀔𑀕𑁆𑀕𑀳𑀺𑀢𑀁 𑀇𑀯 𑀯𑀺𑀦𑁄𑀤𑁂𑀲𑀺 𑀤𑀽𑀭𑀻 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁦. 𑀲𑁄 𑀅𑀳𑀁 𑀏𑀯𑀁 𑀯𑀺𑀫𑀼𑀢𑁆𑀢𑁄 𑀲𑀁𑀲𑀸𑀭𑀲𑁄𑀢𑀁 𑀲𑀁𑀲𑀸𑀭𑀧𑀯𑀸𑀳𑀁 𑀲𑀁 𑀲𑀼𑀝𑁆𑀞𑀼 𑀙𑀺𑀦𑁆𑀤𑀺𑀁 𑀙𑁂𑀤𑁂𑀲𑀺𑀁, 𑀢𑀡𑁆𑀳𑀸𑀲𑁄𑀢𑀁 𑀢𑀡𑁆𑀳𑀸𑀫𑀳𑁄𑀖𑀁 𑀦𑀺𑀯𑀸𑀭𑀬𑀺𑀁 𑀦𑀺𑀭𑀯𑀲𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀁 𑀉𑀕𑁆𑀖𑀸𑀝𑀬𑀺𑀁 𑀲𑀩𑁆𑀩𑀦𑁆𑀢𑀺 𑀓𑀸𑀫𑀪𑀯𑀸𑀤𑀺𑀓𑀁 𑀲𑀩𑁆𑀩𑀁 𑀦𑀯𑀪𑀯𑀁 𑀉𑀕𑁆𑀖𑀸𑀝𑀬𑀺𑀁 𑀯𑀺𑀦𑀸𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀫𑀽𑀮𑀢𑁄 𑀯𑀺𑀦𑀸𑀲𑁂𑀦𑁆𑀢𑁄 𑀪𑀽𑀢𑀯𑁂𑀚𑁆𑀚𑁄 𑀇𑀯 𑀫𑀽𑀮𑀢𑁄 𑀉𑀕𑁆𑀖𑀸𑀝𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁧. 𑀢𑀢𑁄 𑀦𑀺𑀩𑁆𑀩𑀸𑀦𑀧𑀭𑀺𑀬𑁂𑀲𑀦𑀸𑀬 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀭𑀼𑀁 𑀪𑀸𑀭𑀺𑀬𑀁 𑀦𑀸𑀕𑀁 𑀕𑀺𑀮𑀢𑀻𑀢𑀺 𑀕𑀭𑀼𑀴𑁄. 𑀕𑀭𑀼𑀁 𑀯𑀸 𑀦𑀸𑀕𑀁 𑀮𑀸𑀢𑀺 𑀆𑀤𑀤𑀸𑀢𑀻𑀢𑀺 𑀕𑀭𑀼𑀴𑁄, 𑀕𑀭𑀼𑀴𑀭𑀸𑀚𑀸. 𑀅𑀢𑁆𑀢𑀦𑁄 𑀪𑀓𑁆𑀔𑀁 𑀲𑀓𑀕𑁄𑀘𑀭𑀁 𑀧𑀦𑁆𑀦𑀕𑀁 𑀧𑀓𑀸𑀭𑁂𑀦 𑀧𑀭𑀳𑀢𑁆𑀣𑀁 𑀦 𑀕𑀘𑁆𑀙𑀢𑀻𑀢𑀺 𑀧𑀦𑁆𑀦𑀕𑁄𑀢𑀺 𑀮𑀤𑁆𑀥𑀦𑀸𑀫𑀁 𑀦𑀸𑀕𑀁 𑀕𑀳𑀡𑀢𑁆𑀣𑀸𑀬 𑀑𑀧𑀢𑀢𑀺 𑀅𑀯𑀧𑀢𑀢𑀺, 𑀲𑀫𑀦𑁆𑀢𑀸 𑀲𑀫𑀦𑁆𑀢𑀢𑁄 𑀬𑁄𑀚𑀦𑀲𑀢𑀁 𑀲𑀢𑀬𑁄𑀚𑀦𑀧𑁆𑀧𑀫𑀸𑀡𑀁 𑀫𑀳𑀸𑀲𑀭𑀁 𑀫𑀳𑀸𑀲𑀫𑀼𑀤𑁆𑀤𑀁 𑀅𑀢𑁆𑀢𑀦𑁄 𑀧𑀓𑁆𑀔𑀯𑀸𑀢𑁂𑀳𑀺 𑀯𑀺𑀓𑁆𑀔𑁄𑀪𑁂𑀢𑀺 𑀆𑀮𑁄𑀴𑁂𑀢𑀺 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁨. 𑀲𑁄 𑀲𑀼𑀧𑀡𑁆𑀡𑁄 𑀯𑀺𑀳𑀗𑁆𑀕𑀫𑁄 𑀯𑁂𑀳𑀸𑀲𑀕𑀫𑀦𑀲𑀻𑀮𑁄 𑀧𑀦𑁆𑀦𑀕𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀅𑀥𑁄𑀲𑀻𑀲𑀁 𑀑𑀮𑀫𑁆𑀩𑁂𑀢𑁆𑀯𑀸 𑀯𑀺𑀳𑁂𑀞𑀬𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀯𑀺𑀥𑁂𑀦 𑀳𑁂𑀞𑀦𑁂𑀦 𑀳𑁂𑀞𑁂𑀦𑁆𑀢𑁄 𑀆𑀤𑀸𑀬 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀓𑀸𑀫𑀁 𑀬𑀢𑁆𑀣 𑀕𑀦𑁆𑀢𑀼𑀓𑀸𑀫𑁄, 𑀢𑀢𑁆𑀣 𑀧𑀓𑁆𑀓𑀫𑀢𑀺 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁩. 𑀪𑀦𑁆𑀢𑁂 𑀫𑀳𑀸𑀯𑀻𑀭, 𑀬𑀣𑀸 𑀕𑀭𑀼𑀴𑁄 𑀩𑀮𑀻 𑀩𑀮𑀯𑀸 𑀧𑀦𑁆𑀦𑀕𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀢𑀣𑀸 𑀏𑀯 𑀅𑀳𑀁 𑀅𑀲𑀗𑁆𑀔𑀢𑀁 𑀧𑀘𑁆𑀘𑀬𑁂𑀳𑀺 𑀅𑀓𑀢𑀁 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀦𑁆𑀢𑁄 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀯𑀲𑁂𑀦 𑀧𑀭𑀺𑀬𑁂𑀲𑀦𑁆𑀢𑁄 𑀤𑁄𑀲𑁂 𑀲𑀓𑀮𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑁂 𑀯𑀺𑀓𑁆𑀔𑀸𑀮𑀬𑀺𑀁 𑀯𑀺𑀲𑁂𑀲𑁂𑀦 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀲𑁄𑀥𑁂𑀲𑀺𑀁 𑀅𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁪. 𑀬𑀣𑀸 𑀕𑀭𑀼𑀴𑁄 𑀧𑀦𑁆𑀦𑀕𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀅𑀳𑀁 𑀥𑀫𑁆𑀫𑀯𑀭𑀁 𑀉𑀢𑁆𑀢𑀫𑀥𑀫𑁆𑀫𑀁 𑀤𑀺𑀝𑁆𑀞𑁄 𑀧𑀲𑁆𑀲𑀦𑁆𑀢𑁄 𑀏𑀢𑀁 𑀲𑀦𑁆𑀢𑀺𑀧𑀤𑀁 𑀦𑀺𑀩𑁆𑀩𑀸𑀦𑀧𑀤𑀁 𑀅𑀦𑀼𑀢𑁆𑀢𑀭𑀁 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀫𑀕𑁆𑀕𑀨𑀮𑁂𑀳𑀺 𑀆𑀤𑀸𑀬 𑀕𑀳𑁂𑀢𑁆𑀯𑀸 𑀯𑀴𑀜𑁆𑀚𑁂𑀢𑁆𑀯𑀸 𑀯𑀺𑀳𑀭𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁫. 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲 𑀤𑀼𑀮𑁆𑀮𑀪𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀆𑀲𑀸 𑀇𑀘𑁆𑀙𑀸 𑀏𑀢𑀺𑀲𑁆𑀲𑀁 𑀮𑀢𑀸𑀬𑀁 𑀅𑀢𑁆𑀣𑀻𑀢𑀺 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸, 𑀘𑀺𑀢𑁆𑀢𑀮𑀢𑀸𑀯𑀦𑁂 𑀅𑀦𑁂𑀓𑀯𑀺𑀘𑀺𑀢𑁆𑀢𑀸𑀳𑀺 𑀮𑀢𑀸𑀳𑀺 𑀕𑀳𑀦𑀻𑀪𑀽𑀢𑁂 𑀯𑀦𑁂 𑀉𑀬𑁆𑀬𑀸𑀦𑁂 𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀮𑀢𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀏𑀓𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑁂 𑀏𑀓𑀁 𑀨𑀮𑀁 𑀕𑀡𑁆𑀳𑀸𑀢𑀺.

𑁫𑁦𑁬. 𑀢𑀁 𑀤𑁂𑀯𑀸𑀢𑀺 𑀢𑀁 𑀆𑀲𑀸𑀯𑀢𑀺𑀁 𑀮𑀢𑀁 𑀢𑀸𑀯 𑀤𑀽𑀭𑀨𑀮𑀁 𑀢𑀢𑁆𑀢𑀓𑀁 𑀘𑀺𑀭𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀨𑀮𑀁 𑀕𑀡𑁆𑀳𑀦𑁆𑀢𑀁 𑀲𑀁𑀯𑀺𑀚𑁆𑀚𑀫𑀸𑀦𑀁 𑀤𑁂𑀯𑀸 𑀢𑀸𑀯𑀢𑀺𑀁𑀲𑀤𑁂𑀯𑀢𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀪𑀚𑀦𑁆𑀢𑀺, 𑀲𑀸 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀼𑀢𑁆𑀢𑀫𑀸 𑀮𑀢𑀸𑀦𑀁 𑀅𑀦𑁆𑀢𑀭𑁂 𑀉𑀢𑁆𑀢𑀫𑀮𑀢𑀸 𑀏𑀯𑀁 𑀤𑁂𑀯𑀸𑀦𑀁 𑀧𑀺𑀬𑀸 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁭. 𑀲𑀢𑀲𑀳𑀲𑁆𑀲𑀼𑀧𑀸𑀤𑀸𑀬𑀸𑀢𑀺 𑀲𑀢𑀲𑀳𑀲𑁆𑀲𑀲𑀁𑀯𑀘𑁆𑀙𑀭𑀁 𑀆𑀤𑀺𑀁 𑀓𑀢𑁆𑀯𑀸. 𑀢𑀸𑀳𑀁 𑀧𑀭𑀺𑀘𑀭𑁂 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀪𑀦𑁆𑀢𑁂, 𑀫𑀼𑀦𑀺 𑀜𑀸𑀡𑀯𑀦𑁆𑀢 𑀲𑀩𑁆𑀩𑀜𑁆𑀜𑀼, 𑀅𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀧𑀭𑀺𑀘𑀭𑁂 𑀧𑀬𑀺𑀭𑀼𑀧𑀸𑀲𑀸𑀫𑀺. 𑀲𑀸𑀬𑀁𑀧𑀸𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀲𑀸𑀬𑀦𑁆𑀳𑀲𑀫𑀬𑀜𑁆𑀘 𑀧𑀼𑀩𑁆𑀩𑀡𑁆𑀳𑀲𑀫𑀬𑀜𑁆𑀘𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀦𑀫𑀲𑁆𑀲𑀸𑀫𑀺 𑀧𑀡𑀸𑀫𑀁 𑀓𑀭𑁄𑀫𑀺. 𑀬𑀣𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀯𑀺𑀬 𑀆𑀲𑀸𑀯𑀢𑀻𑀮𑀢𑀁 𑀲𑀸𑀬𑀁𑀧𑀸𑀢𑀜𑁆𑀘 𑀧𑀬𑀺𑀭𑀼𑀧𑀸𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁮. 𑀅𑀯𑀜𑁆𑀛𑀸 𑀧𑀸𑀭𑀺𑀘𑀭𑀺𑀬𑀸𑀢𑀺 𑀬𑀲𑁆𑀫𑀸 𑀩𑀼𑀤𑁆𑀥𑀤𑀲𑁆𑀲𑀦𑀳𑁂𑀢𑀼 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺 𑀅𑀳𑁄𑀲𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀧𑀸𑀭𑀺𑀘𑀭𑀺𑀬𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀓𑀺𑀭𑀺𑀬𑀸 𑀅𑀯𑀜𑁆𑀛𑀸 𑀅𑀢𑀼𑀘𑁆𑀙𑀸 𑀦𑀫𑀲𑁆𑀲𑀦𑀸 𑀧𑀡𑀸𑀫𑀓𑀺𑀭𑀺𑀬𑀸 𑀘 𑀅𑀫𑁄𑀖𑀸 𑀅𑀢𑀼𑀘𑁆𑀙𑀸. 𑀢𑀣𑀸 𑀳𑀺 𑀤𑀽𑀭𑀸𑀕𑀢𑀁 𑀤𑀽𑀭𑀢𑁄 𑀲𑀁𑀲𑀸𑀭𑀤𑁆𑀥𑀸𑀦𑀢𑁄 𑀆𑀕𑀢𑀫𑁆𑀧𑀺, 𑀲𑀦𑁆𑀢𑀁 𑀲𑀁𑀯𑀺𑀚𑁆𑀚𑀫𑀸𑀦𑀁 𑀔𑀡𑁄𑀬𑀁 𑀅𑀬𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄 𑀦 𑀯𑀺𑀭𑀸𑀥𑀬𑀺 𑀦𑀸𑀢𑀺𑀓𑁆𑀓𑀫𑀺, 𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦 𑀕𑀢𑁄𑀢𑀺 𑀅𑀢𑁆𑀣𑁄.

𑁫𑁦𑁯. 𑀩𑀼𑀤𑁆𑀥𑀤𑀲𑁆𑀲𑀦𑀳𑁂𑀢𑀼 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀅𑀳𑀁 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀪𑀯𑁂 𑀫𑀫 𑀧𑀝𑀺𑀲𑀦𑁆𑀥𑀺𑀁 𑀯𑀺𑀘𑀺𑀦𑀦𑁆𑀢𑁄 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀦 𑀧𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀭𑀽𑀧𑀥𑀺 𑀔𑀦𑁆𑀥𑀽𑀧𑀥𑀺𑀓𑀺𑀮𑁂𑀲𑀽𑀧𑀥𑀻𑀳𑀺 𑀯𑀺𑀭𑀳𑀺𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀦𑀸𑀪𑀽𑀢𑁄 𑀉𑀧𑀲𑀦𑁆𑀢𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀲𑀦𑁆𑀢𑀫𑀸𑀦𑀲𑁄 𑀘𑀭𑀸𑀫𑀺 𑀅𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁧𑁦. 𑀧𑀼𑀦 𑀅𑀢𑁆𑀢𑀦𑁄 𑀩𑀼𑀤𑁆𑀥𑀤𑀲𑁆𑀲𑀦𑀸𑀬 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀧𑀺 𑀧𑀤𑀼𑀫𑀁 𑀦𑀸𑀫𑀸𑀢𑀺𑀆𑀤𑀺𑀫𑀸𑀳. 𑀲𑀽𑀭𑀺𑀬𑀭𑀁𑀲𑁂𑀦 𑀲𑀽𑀭𑀺𑀬𑀭𑀁𑀲𑀺𑀲𑀫𑁆𑀨𑀲𑁆𑀲𑁂𑀦 𑀬𑀣𑀸 𑀧𑀤𑀼𑀫𑀁 𑀦𑀸𑀫 𑀅𑀧𑀺 𑀧𑀼𑀧𑁆𑀨𑀢𑀺 𑀯𑀺𑀓𑀲𑀢𑀺 𑀫𑀳𑀸𑀯𑀻𑀭 𑀯𑀻𑀭𑀼𑀢𑁆𑀢𑀫 𑀅𑀳𑀁 𑀢𑀣𑀸 𑀏𑀯 𑀩𑀼𑀤𑁆𑀥𑀭𑀁𑀲𑁂𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑀭𑀁𑀲𑀺𑀧𑁆𑀧𑀪𑀸𑀯𑁂𑀦 𑀧𑀼𑀧𑁆𑀨𑀺𑀢𑁄𑀢𑀺 𑀅𑀢𑁆𑀣𑁄.

𑁫𑁧𑁧-𑁧𑁨. 𑀧𑀼𑀦 𑀩𑀼𑀤𑁆𑀥𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀤𑀻𑀧𑁂𑀦𑁆𑀢𑁄 𑀬𑀣𑀸 𑀩𑀮𑀸𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀮𑀸𑀓𑀬𑁄𑀦𑀺𑀫𑁆𑀳𑀺 𑀩𑀮𑀸𑀓𑀚𑀸𑀢𑀺𑀬𑀁 𑀲𑀤𑀸 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀧𑀼𑀫𑀸 𑀧𑀼𑀭𑀺𑀲𑁄 𑀬𑀣𑀸 𑀦 𑀯𑀺𑀚𑁆𑀚𑀢𑀺. 𑀧𑀼𑀫𑁂 𑀅𑀯𑀺𑀚𑁆𑀚𑀫𑀸𑀦𑁂 𑀓𑀣𑀁 𑀩𑀮𑀸𑀓𑀸𑀦𑀁 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀘𑁂? 𑀫𑁂𑀖𑁂𑀲𑀼 𑀕𑀚𑁆𑀚𑀫𑀸𑀦𑁂𑀲𑀼 𑀲𑀤𑁆𑀤𑀁 𑀓𑀭𑁄𑀦𑁆𑀢𑁂𑀲𑀼 𑀫𑁂𑀖𑀕𑀚𑁆𑀚𑀦𑀁 𑀲𑀼𑀢𑁆𑀯𑀸 𑀢𑀸 𑀩𑀮𑀸𑀓𑀺𑀦𑀺𑀬𑁄 𑀲𑀤𑀸 𑀲𑀩𑁆𑀩𑀓𑀸𑀮𑁂 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀅𑀡𑁆𑀟𑀁 𑀥𑀸𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀸𑀯 𑀬𑀢𑁆𑀢𑀓𑀁 𑀓𑀸𑀮𑀁 𑀫𑁂𑀖𑁄 𑀦 𑀕𑀚𑁆𑀚𑀢𑀺 𑀫𑁂𑀖𑁄 𑀲𑀤𑁆𑀤𑀁 𑀦 𑀓𑀭𑁄𑀢𑀺, 𑀢𑀸𑀯 𑀢𑀢𑁆𑀢𑀓𑀁 𑀓𑀸𑀮𑀁 𑀘𑀺𑀭𑀁 𑀘𑀺𑀭𑀓𑀸𑀮𑁂𑀦 𑀕𑀩𑁆𑀪𑀁 𑀅𑀡𑁆𑀟𑀁 𑀥𑀸𑀭𑁂𑀦𑁆𑀢𑀺. 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀫𑁂𑀖𑁄 𑀧𑀯𑀲𑁆𑀲𑀢𑀺 𑀧𑀓𑀸𑀭𑁂𑀦 𑀕𑀚𑁆𑀚𑀺𑀢𑁆𑀯𑀸 𑀯𑀲𑁆𑀲𑀢𑀺 𑀯𑀼𑀝𑁆𑀞𑀺𑀥𑀸𑀭𑀁 𑀧𑀕𑁆𑀖𑀭𑀢𑀺, 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀪𑀸𑀭𑀢𑁄 𑀕𑀩𑁆𑀪𑀥𑀸𑀭𑀡𑀢𑁄 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀅𑀡𑁆𑀟𑀁 𑀧𑀸𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁫𑁧𑁩. 𑀢𑀢𑁄 𑀧𑀭𑀁 𑀉𑀧𑀫𑁂𑀬𑁆𑀬𑀲𑀫𑁆𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀫𑁂𑀖𑁂𑀦 𑀯𑁄𑀳𑀸𑀭𑀧𑀭𑀫𑀢𑁆𑀣𑀤𑁂𑀲𑀦𑀸𑀲𑀗𑁆𑀔𑀸𑀢𑀫𑁂𑀖𑁂𑀦 𑀕𑀚𑁆𑀚𑀢𑁄 𑀕𑀚𑁆𑀚𑀦𑁆𑀢𑀲𑁆𑀲 𑀤𑁂𑀲𑁂𑀦𑁆𑀢𑀲𑁆𑀲 𑀥𑀫𑁆𑀫𑀫𑁂𑀖𑀲𑁆𑀲 𑀲𑀤𑁆𑀤𑁂𑀦 𑀖𑁄𑀲𑀸𑀦𑀼𑀲𑀸𑀭𑁂𑀦 𑀅𑀳𑀁 𑀢𑀤𑀸 𑀥𑀫𑁆𑀫𑀕𑀩𑁆𑀪𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀲𑀫𑁆𑀪𑀸𑀭𑀕𑀩𑁆𑀪𑀁 𑀅𑀕𑀡𑁆𑀳𑀺𑀁 𑀕𑀳𑁂𑀲𑀺𑀁 𑀢𑀣𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁧𑁪. 𑀲𑀢𑀲𑀳𑀲𑁆𑀲𑀼𑀧𑀸𑀤𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀼𑀜𑁆𑀜𑀕𑀩𑁆𑀪𑀁 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀅𑀳𑀁 𑀥𑀭𑁂𑀫𑀺 𑀧𑀽𑀭𑁂𑀫𑀺. 𑀬𑀸𑀯 𑀥𑀫𑁆𑀫𑀫𑁂𑀖𑁄 𑀥𑀫𑁆𑀫𑀤𑁂𑀲𑀦𑀸 𑀦 𑀕𑀚𑁆𑀚𑀢𑀺 𑀩𑀼𑀤𑁆𑀥𑁂𑀦 𑀦 𑀤𑁂𑀲𑀻𑀬𑀢𑀺, 𑀢𑀸𑀯 𑀅𑀳𑀁 𑀪𑀸𑀭𑀢𑁄 𑀲𑀁𑀲𑀸𑀭𑀕𑀩𑁆𑀪𑀪𑀸𑀭𑀢𑁄 𑀦𑀧𑁆𑀧𑀫𑀼𑀘𑁆𑀘𑀸𑀫𑀺 𑀦 𑀫𑁄𑀘𑁂𑀫𑀺 𑀦 𑀯𑀺𑀲𑀼𑀁 𑀪𑀯𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁧𑁫. 𑀪𑀦𑁆𑀢𑁂, 𑀲𑀓𑁆𑀬𑀫𑀼𑀦𑀺 𑀲𑀓𑁆𑀬𑀯𑀁𑀲𑀧𑁆𑀧𑀪𑀯 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀢𑀯 𑀧𑀺𑀢𑀼 𑀭𑀫𑁆𑀫𑁂 𑀭𑀫𑀡𑀻𑀬𑁂 𑀓𑀧𑀺𑀮𑀯𑀢𑁆𑀣𑀯𑁂 𑀓𑀧𑀺𑀮𑀯𑀢𑁆𑀣𑀼𑀦𑀸𑀫𑀓𑁂 𑀦𑀕𑀭𑁂 𑀢𑀼𑀯𑀁 𑀥𑀫𑁆𑀫𑀫𑁂𑀖𑁂𑀦 𑀕𑀚𑁆𑀚𑀢𑀺 𑀖𑁄𑀲𑁂𑀢𑀺, 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀳𑀁 𑀪𑀸𑀭𑀢𑁄 𑀲𑀁𑀲𑀸𑀭𑀕𑀩𑁆𑀪𑀪𑀸𑀭𑀢𑁄 𑀧𑀭𑀺𑀫𑀼𑀘𑁆𑀘𑀺𑀁 𑀫𑀼𑀢𑁆𑀢𑁄 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁧𑁬. 𑀢𑀢𑁄 𑀧𑀭𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢𑁂 𑀫𑀕𑁆𑀕𑀨𑀮𑁂 𑀤𑀲𑁆𑀲𑁂𑀦𑁆𑀢𑁄 𑀲𑀼𑀜𑁆𑀜𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀅𑀢𑁆𑀢𑀦𑀺𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀜𑁆𑀘 𑀭𑀸𑀕𑀤𑁄𑀲𑀫𑁄𑀳𑀲𑀩𑁆𑀩𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀸𑀦𑀁 𑀅𑀪𑀸𑀯𑀢𑁄, 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀜𑁆𑀘 𑀢𑀡𑁆𑀳𑀸𑀧𑀡𑀺𑀥𑀺𑀲𑁆𑀲 𑀅𑀪𑀸𑀯𑀢𑁄, 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀜𑁆𑀘 𑀅𑀭𑀺𑀬𑀫𑀕𑁆𑀕𑀁 𑀅𑀥𑀺𑀕𑀜𑁆𑀙𑀺𑀁 𑀪𑀸𑀯𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀭𑁄 𑀘 𑀨𑀮𑁂 𑀲𑀩𑁆𑀩𑁂𑀢𑀺 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀩𑁆𑀩𑀸𑀦𑀺 𑀲𑀘𑁆𑀙𑀺 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂𑀯𑀁 𑀯𑀺𑀚𑀝𑀬𑀺𑀁 𑀅𑀳𑀦𑁆𑀢𑀺 𑀅𑀳𑀁 𑀏𑀯𑀁 𑀲𑀩𑁆𑀩𑀥𑀫𑁆𑀫𑁂 𑀚𑀝𑀁 𑀕𑀳𑀦𑀁 𑀯𑀺𑀚𑀝𑀬𑀺𑀁 𑀯𑀺𑀤𑁆𑀥𑀁𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁧𑁭. 𑀢𑀢𑁄 𑀧𑀭𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀅𑀧𑀭𑀺𑀫𑁂𑀬𑁆𑀬𑀼𑀧𑀸𑀤𑀸𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀧𑀭𑀺𑀫𑁂𑀬𑁆𑀬𑁄𑀢𑀺 𑀅𑀧𑀭𑀺𑀫𑁂𑀬𑁆𑀬𑁄, 𑀲𑀁𑀯𑀘𑁆𑀙𑀭𑀕𑀡𑀦𑀯𑀲𑁂𑀦 𑀧𑀫𑁂𑀢𑀼𑀁 𑀲𑀗𑁆𑀔𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀢𑀁 𑀅𑀧𑀭𑀺𑀫𑁂𑀬𑁆𑀬𑀁 𑀓𑀧𑁆𑀧𑀁 𑀉𑀧𑀸𑀤𑀸𑀬 𑀆𑀤𑀺𑀁 𑀓𑀢𑁆𑀯𑀸 𑀢𑀯 𑀲𑀸𑀲𑀦𑀁 𑀢𑀼𑀬𑁆𑀳𑀁 𑀲𑀸𑀲𑀦𑀁 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑁂𑀫𑀺. 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀧𑀢𑁆𑀣𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀫𑁂 𑀅𑀢𑁆𑀣𑁄𑀢𑀺 𑀲𑁄 𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀫𑁂 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑁄 𑀦𑀺𑀧𑁆𑀨𑀸𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀧𑀤𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀁 𑀅𑀥𑀺𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁧𑁮. 𑀲𑁄 𑀅𑀳𑀁 𑀅𑀥𑀺𑀕𑀢𑀢𑁆𑀢𑀸 𑀯𑀺𑀦𑀬𑁂 𑀯𑀺𑀦𑀬𑀧𑀺𑀝𑀓𑁂 𑀧𑀸𑀭𑀫𑀺𑀁 𑀧𑀢𑁆𑀢𑁄 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑁄. 𑀬𑀣𑀸𑀧𑀺 𑀧𑀸𑀞𑀺𑀓𑁄 𑀇𑀲𑀻𑀢𑀺 𑀬𑀣𑀸 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑁄 𑀇𑀲𑀺 𑀪𑀺𑀓𑁆𑀔𑀼 𑀧𑀸𑀞𑀺𑀓𑁄 𑀧𑀸𑀓𑀝𑁄 𑀅𑀳𑁄𑀲𑀺, 𑀢𑀣𑁂𑀯𑀸𑀳𑀦𑁆𑀢𑀺 𑀅𑀢𑁆𑀣𑁄. 𑀦 𑀫𑁂 𑀲𑀫𑀲𑀫𑁄 𑀅𑀢𑁆𑀣𑀻𑀢𑀺 𑀯𑀺𑀦𑀬𑀥𑀸𑀭𑀺𑀢𑀸𑀬 𑀫𑁂 𑀫𑀬𑀸 𑀲𑀫𑀲𑀫𑁄 𑀲𑀫𑀸𑀦𑁄 𑀅𑀜𑁆𑀜𑁄 𑀦 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑀁 𑀲𑀸𑀲𑀦𑀁 𑀥𑀸𑀭𑁂𑀫𑀺 𑀧𑀽𑀭𑁂𑀫𑀻𑀢𑀺 𑀅𑀢𑁆𑀣𑁄.

𑁫𑁧𑁯. 𑀧𑀼𑀦𑀧𑀺 𑀅𑀢𑁆𑀢𑀦𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀦𑀬𑁂 𑀔𑀦𑁆𑀥𑀓𑁂 𑀘𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀦𑀬𑁂𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂. 𑀔𑀦𑁆𑀥𑀓𑁂𑀢𑀺 𑀫𑀳𑀸𑀯𑀕𑁆𑀕𑀘𑀽𑀴𑀯𑀕𑁆𑀕𑁂. 𑀢𑀺𑀓𑀘𑁆𑀙𑁂𑀤𑁂 𑀘𑀸𑀢𑀺 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀓𑁂 𑀘. 𑀧𑀜𑁆𑀘𑀫𑁂𑀢𑀺 𑀧𑀭𑀺𑀯𑀸𑀭𑁂 𑀘. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀫𑀬𑁆𑀳𑀁 𑀯𑀺𑀫𑀢𑀺 𑀤𑁆𑀯𑁂𑀴𑁆𑀳𑀓𑀁 𑀦𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀅𑀓𑁆𑀔𑀭𑁂𑀢𑀺 𑀯𑀺𑀦𑀬𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑁂 𑀅-𑀓𑀸𑀭𑀸𑀤𑀺𑀓𑁂 𑀅𑀓𑁆𑀔𑀭𑁂. 𑀩𑁆𑀬𑀜𑁆𑀚𑀦𑁂𑀢𑀺 𑀓-𑀓𑀸𑀭𑀸𑀤𑀺𑀓𑁂 𑀩𑁆𑀬𑀜𑁆𑀚𑀦𑁂 𑀯𑀸 𑀫𑁂 𑀯𑀺𑀫𑀢𑀺 𑀲𑀁𑀲𑀬𑁄 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁨𑁦. 𑀦𑀺𑀕𑁆𑀕𑀳𑁂 𑀧𑀝𑀺𑀓𑀫𑁆𑀫𑁂 𑀘𑀸𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀦𑀺𑀕𑁆𑀕𑀳𑁂 𑀘 𑀲𑀸𑀧𑀢𑁆𑀢𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀯𑀸𑀲𑀤𑀸𑀦𑀸𑀤𑀺𑀓𑁂 𑀧𑀝𑀺𑀓𑀫𑁆𑀫𑁂 𑀘 𑀞𑀸𑀦𑀸𑀝𑁆𑀞𑀸𑀦𑁂 𑀘 𑀓𑀸𑀭𑀡𑁂 𑀘 𑀅𑀓𑀸𑀭𑀡𑁂 𑀘 𑀓𑁄𑀯𑀺𑀤𑁄 𑀙𑁂𑀓𑁄𑀢𑀺 𑀅𑀢𑁆𑀣𑁄. 𑀑𑀲𑀸𑀭𑀡𑁂 𑀘 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀑𑀲𑀸𑀭𑀡𑁂 𑀧𑀯𑁂𑀲𑀦𑁂 𑀘. 𑀯𑀼𑀝𑁆𑀞𑀸𑀧𑀦𑁂 𑀘 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑀦𑁂 𑀦𑀺𑀭𑀸𑀧𑀢𑁆𑀢𑀺𑀓𑀭𑀡𑁂 𑀘 𑀙𑁂𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀢𑁄𑀢𑀺 𑀲𑀩𑁆𑀩𑀲𑁆𑀫𑀺𑀁 𑀯𑀺𑀦𑀬𑀓𑀫𑁆𑀫𑁂 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑁄, 𑀤𑀓𑁆𑀔𑁄 𑀙𑁂𑀓𑁄𑀢𑀺 𑀅𑀢𑁆𑀣𑁄.

𑁫𑁨𑁧. 𑀯𑀺𑀦𑀬𑁂 𑀔𑀦𑁆𑀥𑀓𑁂 𑀘𑀸𑀧𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀺𑀦𑀬𑁂 𑀘 𑀔𑀦𑁆𑀥𑀓𑁂 𑀘, 𑀧𑀤𑀁 𑀲𑀼𑀢𑁆𑀢𑀧𑀤𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑁆𑀞𑀧𑁂𑀢𑁆𑀯𑀸. 𑀉𑀪𑀢𑁄 𑀯𑀺𑀦𑀺𑀯𑁂𑀞𑁂𑀢𑁆𑀯𑀸𑀢𑀺 𑀯𑀺𑀦𑀬𑀢𑁄 𑀔𑀦𑁆𑀥𑀓𑀢𑁄 𑀘𑀸𑀢𑀺 𑀉𑀪𑀬𑀢𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀚𑀝𑁂𑀢𑁆𑀯𑀸 𑀦𑀬𑀁 𑀆𑀳𑀭𑀺𑀢𑁆𑀯𑀸. 𑀭𑀲𑀢𑁄𑀢𑀺 𑀓𑀺𑀘𑁆𑀘𑀢𑁄. 𑀑𑀲𑀭𑁂𑀬𑁆𑀬𑀁 𑀑𑀲𑀸𑀭𑀡𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄.

𑁫𑁨𑁨. 𑀦𑀺𑀭𑀼𑀢𑁆𑀢𑀺𑀬𑀸 𑀘 𑀓𑀼𑀲𑀮𑁄𑀢𑀺 ‘‘𑀭𑀼𑀓𑁆𑀔𑁄 𑀧𑀝𑁄 𑀓𑀼𑀫𑁆𑀪𑁄 𑀫𑀸𑀮𑀸 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑁄𑀳𑀸𑀭𑁂𑀲𑀼 𑀙𑁂𑀓𑁄. 𑀅𑀢𑁆𑀣𑀸𑀦𑀢𑁆𑀣𑁂 𑀘 𑀓𑁄𑀯𑀺𑀤𑁄𑀢𑀺 𑀅𑀢𑁆𑀣𑁂 𑀯𑀟𑁆𑀠𑀺𑀬𑀁 𑀅𑀦𑀢𑁆𑀣𑁂 𑀳𑀸𑀦𑀺𑀬𑀜𑁆𑀘 𑀓𑁄𑀯𑀺𑀤𑁄 𑀤𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀅𑀦𑀜𑁆𑀜𑀸𑀢𑀁 𑀫𑀬𑀸 𑀦𑀢𑁆𑀣𑀻𑀢𑀺 𑀯𑀺𑀦𑀬𑀧𑀺𑀝𑀓𑁂 𑀲𑀓𑀮𑁂 𑀯𑀸 𑀧𑀺𑀝𑀓𑀢𑁆𑀢𑀬𑁂 𑀫𑀬𑀸 𑀅𑀦𑀜𑁆𑀜𑀸𑀢𑀁 𑀅𑀯𑀺𑀤𑀺𑀢𑀁 𑀅𑀧𑀸𑀓𑀝𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀏𑀓𑀕𑁆𑀕𑁄 𑀲𑀢𑁆𑀣𑀼 𑀲𑀸𑀲𑀦𑁂𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀅𑀳𑀫𑁂𑀯 𑀏𑀓𑁄 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄𑀢𑀺 𑀅𑀢𑁆𑀣𑁄.

𑁫𑁨𑁩. 𑀭𑀽𑀧𑀤𑀓𑁆𑀔𑁂 𑀅𑀳𑀁 𑀅𑀚𑁆𑀚𑀸𑀢𑀺 𑀅𑀚𑁆𑀚 𑀏𑀢𑀭𑀳𑀺 𑀓𑀸𑀮𑁂 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀸𑀯𑀘𑀦𑁂 𑀅𑀳𑀁 𑀭𑀽𑀧𑀤𑀓𑁆𑀔𑁂 𑀭𑀽𑀧𑀤𑀲𑁆𑀲𑀦𑁂 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀤𑀲𑁆𑀲𑀦𑁂 𑀲𑀩𑁆𑀩𑀁 𑀓𑀗𑁆𑀔𑀁 𑀲𑀓𑀮𑀁 𑀲𑀁𑀲𑀬𑀁 𑀯𑀺𑀦𑁄𑀤𑁂𑀫𑀺 𑀯𑀺𑀦𑀸𑀲𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀺𑀦𑁆𑀤𑀸𑀫𑀺 𑀲𑀩𑁆𑀩𑀲𑀁𑀲𑀬𑀦𑁆𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀓𑀁 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑀓𑀸𑀮𑀢𑁆𑀢𑀬𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀁 𑀲𑁄𑀴𑀲𑀯𑀺𑀥𑀁 𑀓𑀗𑁆𑀔𑀁 𑀙𑀺𑀦𑁆𑀤𑀸𑀫𑀺 𑀯𑀽𑀧𑀲𑀫𑁂𑀫𑀺 𑀲𑀩𑁆𑀩𑀲𑁄 𑀯𑀺𑀤𑁆𑀥𑀁𑀲𑁂𑀫𑀻𑀢𑀺 𑀅𑀢𑁆𑀣𑁄.

𑁫𑁨𑁪. 𑀧𑀤𑀁 𑀅𑀦𑀼𑀧𑀤𑀜𑁆𑀘𑀸𑀧𑀻𑀢𑀺 𑀧𑀤𑀁 𑀧𑀼𑀩𑁆𑀩𑀧𑀤𑀜𑁆𑀘 𑀅𑀦𑀼𑀧𑀤𑀁 𑀧𑀭𑀧𑀤𑀜𑁆𑀘 𑀅𑀓𑁆𑀔𑀭𑀁 𑀏𑀓𑁂𑀓𑀫𑀓𑁆𑀔𑀭𑀜𑁆𑀘 𑀩𑁆𑀬𑀜𑁆𑀚𑀦𑀁 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀯𑀺𑀥𑀸𑀦𑀜𑁆𑀘. 𑀦𑀺𑀤𑀸𑀦𑁂𑀢𑀺 𑀢𑁂𑀦 𑀲𑀫𑀬𑁂𑀦𑀸𑀢𑀺𑀆𑀤𑀺𑀓𑁂 𑀦𑀺𑀤𑀸𑀦𑁂 𑀘. 𑀧𑀭𑀺𑀬𑁄𑀲𑀸𑀦𑁂𑀢𑀺 𑀦𑀺𑀕𑀫𑀦𑁂. 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄𑀢𑀺 𑀲𑀩𑁆𑀩𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀙𑁂𑀓𑁄𑀢𑀺 𑀅𑀢𑁆𑀣𑁄.

𑁫𑁨𑁫. 𑀢𑀢𑁄 𑀧𑀭𑀁 𑀪𑀕𑀯𑀢𑁄𑀬𑁂𑀯 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑁄 𑀬𑀣𑀸𑀧𑀺 𑀭𑀸𑀚𑀸 𑀩𑀮𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀩𑀮𑀯𑀸 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁄 𑀲𑁂𑀦𑀸𑀩𑀮𑀲𑀫𑁆𑀧𑀦𑁆𑀦𑁄 𑀯𑀸 𑀭𑀸𑀚𑀸, 𑀧𑀭𑀁 𑀧𑀭𑁂𑀲𑀁 𑀧𑀝𑀺𑀭𑀸𑀚𑀽𑀦𑀁 𑀲𑁂𑀦𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀲𑁆𑀲𑁂𑀲𑀢𑁄 𑀕𑀳𑁂𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 𑀯𑀸, 𑀢𑀧𑁂 𑀢𑀧𑁂𑀬𑁆𑀬 𑀲𑀦𑁆𑀢𑀧𑁂𑀬𑁆𑀬 𑀤𑀼𑀓𑁆𑀔𑀸𑀧𑁂𑀬𑁆𑀬. 𑀯𑀺𑀚𑀺𑀦𑀺𑀢𑁆𑀯𑀸𑀦 𑀲𑀗𑁆𑀕𑀸𑀫𑀦𑁆𑀢𑀺 𑀲𑀗𑁆𑀕𑀸𑀫𑀁 𑀧𑀭𑀲𑁂𑀦𑀸𑀬 𑀲𑀫𑀸𑀕𑀫𑀁 𑀬𑀼𑀤𑁆𑀥𑀁 𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀲𑁂𑀲𑁂𑀦 𑀚𑀺𑀦𑀺𑀢𑁆𑀯𑀸 𑀚𑀬𑀁 𑀧𑀢𑁆𑀯𑀸. 𑀦𑀕𑀭𑀁 𑀢𑀢𑁆𑀣 𑀫𑀸𑀧𑀬𑁂𑀢𑀺 𑀢𑀢𑁆𑀣 𑀢𑀲𑁆𑀫𑀺𑀁 𑀯𑀺𑀚𑀺𑀢𑀝𑁆𑀞𑀸𑀦𑁂 𑀦𑀕𑀭𑀁 𑀧𑀸𑀲𑀸𑀤𑀳𑀫𑁆𑀫𑀺𑀬𑀸𑀤𑀺𑀯𑀺𑀪𑀽𑀲𑀺𑀢𑀁 𑀯𑀲𑀦𑀝𑁆𑀞𑀸𑀦𑀁 𑀫𑀸𑀧𑀬𑁂 𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁫𑁨𑁬. 𑀧𑀸𑀓𑀸𑀭𑀁 𑀧𑀭𑀺𑀔𑀜𑁆𑀘𑀸𑀧𑀻𑀢𑀺 𑀢𑀢𑁆𑀣 𑀫𑀸𑀧𑀺𑀢𑀦𑀕𑀭𑁂 𑀧𑀸𑀓𑀸𑀭𑀁 𑀲𑀼𑀥𑀸𑀥𑀯𑀮𑀇𑀝𑁆𑀞𑀓𑀸𑀫𑀬𑀧𑀸𑀓𑀸𑀭𑀜𑁆𑀘 𑀓𑀸𑀭𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀔𑀜𑁆𑀘𑀸𑀧𑀺 𑀓𑀤𑁆𑀤𑀫𑀧𑀭𑀺𑀔𑀁, 𑀉𑀤𑀓𑀧𑀭𑀺𑀔𑀁, 𑀲𑀼𑀓𑁆𑀔𑀧𑀭𑀺𑀔𑀜𑁆𑀘 𑀅𑀧𑀺 𑀓𑀸𑀭𑀬𑁂. 𑀏𑀲𑀺𑀓𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀦𑁆𑀢𑀺 𑀦𑀕𑀭𑀲𑁄𑀪𑀦𑀢𑁆𑀣𑀁 𑀉𑀲𑁆𑀲𑀸𑀧𑀺𑀢𑀏𑀲𑀺𑀓𑀸𑀣𑀫𑁆𑀪𑀜𑁆𑀘 𑀫𑀳𑀦𑁆𑀢𑀁 𑀓𑁄𑀝𑁆𑀞𑀓𑀜𑁆𑀘 𑀘𑀢𑀼𑀪𑀽𑀫𑀓𑀸𑀤𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀜𑁆𑀘 𑀓𑀸𑀭𑀬𑁂. 𑀅𑀝𑁆𑀝𑀸𑀮𑀓𑁂 𑀘 𑀯𑀺𑀯𑀺𑀥𑁂𑀢𑀺 𑀘𑀢𑀼𑀪𑀽𑀫𑀓𑀸𑀤𑀺𑀪𑁂𑀤𑁂 𑀅𑀢𑀺𑀉𑀘𑁆𑀘𑀅𑀝𑁆𑀝𑀸𑀮𑀓𑁂 𑀘 𑀯𑀺𑀯𑀺𑀥𑁂 𑀦𑀸𑀦𑀧𑁆𑀧𑀓𑀸𑀭𑀓𑁂 𑀩𑀳𑀽 𑀓𑀸𑀭𑀬𑁂 𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁨𑁭. 𑀲𑀺𑀗𑁆𑀖𑀸𑀝𑀓𑀁 𑀘𑀘𑁆𑀘𑀭𑀜𑁆𑀘𑀸𑀢𑀺 𑀦 𑀓𑁂𑀯𑀮𑀁 𑀧𑀸𑀓𑀸𑀭𑀸𑀤𑀬𑁄 𑀓𑀸𑀭𑀬𑁂, 𑀲𑀺𑀗𑁆𑀖𑀸𑀝𑀓𑀁 𑀘𑀢𑀼𑀫𑀕𑁆𑀕𑀲𑀦𑁆𑀥𑀺𑀜𑁆𑀘 𑀘𑀘𑁆𑀘𑀭𑀁 𑀅𑀦𑁆𑀢𑀭𑀸𑀯𑀻𑀣𑀺𑀜𑁆𑀘 𑀓𑀸𑀭𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀯𑀺𑀪𑀢𑁆𑀢𑀦𑁆𑀢𑀭𑀸𑀧𑀡𑀦𑁆𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀁 𑀯𑀺𑀪𑀸𑀕𑀢𑁄 𑀓𑁄𑀝𑁆𑀞𑀸𑀲𑀯𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑀁 𑀅𑀦𑁂𑀓𑀸𑀧𑀡𑀲𑀳𑀲𑁆𑀲𑀁 𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀭𑀬𑁂𑀬𑁆𑀬 𑀲𑀪𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀸𑀧𑀺𑀢𑀦𑀕𑀭𑁂 𑀲𑀪𑀁 𑀥𑀫𑁆𑀫𑀸𑀥𑀺𑀓𑀭𑀡𑀲𑀸𑀮𑀁 𑀓𑀸𑀭𑀬𑁂. 𑀅𑀢𑁆𑀣𑀸𑀦𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀯𑀟𑁆𑀠𑀺𑀜𑁆𑀘 𑀅𑀯𑀟𑁆𑀠𑀺𑀜𑁆𑀘 𑀯𑀺𑀦𑀺𑀘𑁆𑀙𑀬𑀓𑀭𑀡𑀢𑁆𑀣𑀁 𑀯𑀺𑀦𑀺𑀘𑁆𑀙𑀬𑀲𑀸𑀮𑀁 𑀓𑀸𑀭𑀬𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁨𑁮. 𑀦𑀺𑀕𑁆𑀖𑀸𑀢𑀢𑁆𑀣𑀁 𑀅𑀫𑀺𑀢𑁆𑀢𑀸𑀦𑀦𑁆𑀢𑀺 𑀧𑀝𑀺𑀭𑀸𑀚𑀽𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀁. 𑀙𑀺𑀤𑁆𑀤𑀸𑀙𑀺𑀤𑁆𑀤𑀜𑁆𑀘 𑀚𑀸𑀦𑀺𑀢𑀼𑀦𑁆𑀢𑀺 𑀤𑁄𑀲𑀜𑁆𑀘 𑀅𑀤𑁄𑀲𑀜𑁆𑀘 𑀚𑀸𑀦𑀺𑀢𑀼𑀁. 𑀩𑀮𑀓𑀸𑀬𑀲𑁆𑀲 𑀭𑀓𑁆𑀔𑀸𑀬𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀩𑀮𑀓𑀸𑀬𑀲𑁆𑀲 𑀲𑁂𑀦𑀸𑀲𑀫𑀽𑀳𑀲𑁆𑀲 𑀆𑀭𑀓𑁆𑀔𑀡𑀢𑁆𑀣𑀸𑀬 𑀲𑁄 𑀦𑀕𑀭𑀲𑀸𑀫𑀺𑀓𑁄 𑀭𑀸𑀚𑀸, 𑀲𑁂𑀦𑀸𑀧𑀘𑁆𑀘𑀁 𑀲𑁂𑀦𑀸𑀧𑀢𑀺𑀁 𑀲𑁂𑀦𑀸𑀦𑀸𑀬𑀓𑀁 𑀫𑀳𑀸𑀫𑀢𑁆𑀢𑀁 𑀞𑀧𑁂𑀢𑀺 𑀞𑀸𑀦𑀦𑁆𑀢𑀭𑁂 𑀧𑀢𑀺𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄.

𑁫𑁨𑁯. 𑀆𑀭𑀓𑁆𑀔𑀢𑁆𑀣𑀸𑀬 𑀪𑀡𑁆𑀟𑀲𑁆𑀲𑀸𑀢𑀺 𑀚𑀸𑀢𑀭𑀽𑀧𑀭𑀚𑀢𑀫𑀼𑀢𑁆𑀢𑀸𑀫𑀡𑀺𑀆𑀤𑀺𑀭𑀸𑀚𑀪𑀡𑁆𑀟𑀲𑁆𑀲 𑀆𑀭𑀓𑁆𑀔𑀡𑀢𑁆𑀣𑀸𑀬 𑀲𑀫𑀦𑁆𑀢𑀢𑁄 𑀕𑁄𑀧𑀦𑀢𑁆𑀣𑀸𑀬 𑀫𑁂 𑀫𑀬𑁆𑀳𑀁 𑀪𑀡𑁆𑀟𑀁 𑀫𑀸 𑀯𑀺𑀦𑀲𑁆𑀲𑀻𑀢𑀺 𑀦𑀺𑀥𑀸𑀦𑀓𑀼𑀲𑀮𑀁 𑀭𑀓𑁆𑀔𑀡𑁂 𑀓𑀼𑀲𑀮𑀁 𑀙𑁂𑀓𑀁 𑀦𑀭𑀁 𑀧𑀼𑀭𑀺𑀲𑀁 𑀪𑀡𑁆𑀟𑀭𑀓𑁆𑀔𑀁 𑀪𑀡𑁆𑀟𑀭𑀓𑁆𑀔𑀦𑁆𑀢𑀁 𑀲𑁄 𑀭𑀸𑀚𑀸 𑀪𑀡𑁆𑀟𑀸𑀕𑀸𑀭𑁂 𑀞𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁩𑁦. 𑀫𑀫𑀢𑁆𑀢𑁄 𑀳𑁄𑀢𑀺 𑀬𑁄 𑀭𑀜𑁆𑀜𑁄𑀢𑀺 𑀬𑁄 𑀧𑀡𑁆𑀟𑀺𑀢𑁄 𑀭𑀜𑁆𑀜𑁄 𑀫𑀫𑀢𑁆𑀢𑁄 𑀫𑀸𑀫𑀓𑁄 𑀧𑀓𑁆𑀔𑀧𑀸𑀢𑁄 𑀳𑁄𑀢𑀺. 𑀯𑀼𑀤𑁆𑀥𑀺𑀁 𑀬𑀲𑁆𑀲 𑀘 𑀇𑀘𑁆𑀙𑀢𑀻𑀢𑀺 𑀅𑀲𑁆𑀲 𑀭𑀜𑁆𑀜𑁄 𑀯𑀼𑀤𑁆𑀥𑀺𑀜𑁆𑀘 𑀯𑀺𑀭𑀽𑀴𑁆𑀳𑀺𑀁 𑀬𑁄 𑀇𑀘𑁆𑀙𑀢𑀺 𑀓𑀸𑀫𑁂𑀢𑀺, 𑀢𑀲𑁆𑀲 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀭𑀸𑀚𑀸 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀬𑀸𑀥𑀺𑀧𑀘𑁆𑀘𑀁 𑀤𑁂𑀢𑀺 𑀫𑀺𑀢𑁆𑀢𑀲𑁆𑀲 𑀫𑀺𑀢𑁆𑀢𑀪𑀸𑀯𑀲𑁆𑀲 𑀧𑀝𑀺𑀧𑀚𑁆𑀚𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁩𑁧. 𑀉𑀧𑁆𑀧𑀸𑀢𑁂𑀲𑀽𑀢𑀺 𑀉𑀓𑁆𑀓𑀸𑀧𑀸𑀢𑀤𑀺𑀲𑀸𑀟𑀸𑀳𑀸𑀤𑀺𑀉𑀧𑁆𑀧𑀸𑀢𑁂𑀲𑀼 𑀘. 𑀦𑀺𑀫𑀺𑀢𑁆𑀢𑁂𑀲𑀽𑀢𑀺 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀸𑀤𑀻𑀲𑀼 ‘‘𑀇𑀤𑀁 𑀦𑀺𑀫𑀺𑀢𑁆𑀢𑀁 𑀲𑀼𑀪𑀁, 𑀇𑀤𑀁 𑀦𑀺𑀫𑀺𑀢𑁆𑀢𑀁 𑀅𑀲𑀼𑀪’’𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀚𑀸𑀦𑀦𑀲𑀢𑁆𑀣𑁂𑀲𑀼 𑀘. 𑀮𑀓𑁆𑀔𑀡𑁂𑀲𑀼 𑀘𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀧𑀸𑀤𑀮𑀓𑁆𑀔𑀡𑀚𑀸𑀦𑀦𑀲𑀢𑁆𑀣𑁂𑀲𑀼 𑀘 𑀓𑁄𑀯𑀺𑀤𑀁 𑀙𑁂𑀓𑀁 𑀅𑀚𑁆𑀛𑀸𑀬𑀓𑀁 𑀅𑀦𑁂𑀓𑁂𑀲𑀁 𑀲𑀺𑀲𑁆𑀲𑀸𑀦𑀁 𑀩𑁆𑀬𑀸𑀓𑀭𑀡𑀯𑀸𑀘𑀓𑀁 𑀫𑀦𑁆𑀢𑀥𑀭𑀁 𑀯𑁂𑀤𑀢𑁆𑀢𑀬𑀲𑀗𑁆𑀔𑀸𑀢𑀫𑀦𑁆𑀢𑀥𑀸𑀭𑀓𑀁 𑀧𑀡𑁆𑀟𑀺𑀢𑀁 𑀲𑁄 𑀭𑀸𑀚𑀸 𑀧𑁄𑀭𑁄𑀳𑀺𑀘𑁆𑀘𑁂 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁩𑁨. 𑀏𑀢𑁂𑀳𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁂𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀅𑀗𑁆𑀕𑁂𑀳𑀺 𑀅𑀯𑀬𑀯𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄 𑀲𑁄 𑀭𑀸𑀚𑀸 ‘‘𑀔𑀢𑁆𑀢𑀺𑀬𑁄’’𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑀸 𑀭𑀓𑁆𑀔𑀦𑁆𑀢𑀺 𑀭𑀸𑀚𑀸𑀦𑀦𑁆𑀢𑀺 𑀏𑀢𑁂 𑀲𑁂𑀦𑀸𑀧𑀘𑁆𑀘𑀸𑀤𑀬𑁄 𑀅𑀫𑀘𑁆𑀘𑀸 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀢𑀁 𑀭𑀸𑀚𑀸𑀦𑀁 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺. 𑀓𑀺𑀫𑀺𑀯? 𑀘𑀓𑁆𑀓𑀯𑀸𑀓𑁄𑀯 𑀤𑀼𑀓𑁆𑀔𑀺𑀢𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀲𑀓𑀜𑀸𑀢𑀺𑀁 𑀭𑀓𑁆𑀔𑀦𑁆𑀢𑁄 𑀘𑀓𑁆𑀓𑀯𑀸𑀓𑁄 𑀧𑀓𑁆𑀔𑀻 𑀇𑀯𑀸𑀢𑀺 𑀅𑀢𑁆𑀣𑁄.

𑁫𑁩𑁩. 𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭𑀸𑀢𑀺 𑀯𑀻𑀭𑀼𑀢𑁆𑀢𑀫, 𑀬𑀣𑀸 𑀲𑁄 𑀭𑀸𑀚𑀸 𑀲𑁂𑀦𑀸𑀧𑀘𑁆𑀘𑀸𑀤𑀺𑀅𑀗𑁆𑀕𑀲𑀫𑁆𑀧𑀦𑁆𑀦𑁄 𑀦𑀕𑀭𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀧𑀝𑀺𑀯𑀲𑀢𑀺, 𑀢𑀣𑁂𑀯 𑀢𑀼𑀯𑀁 𑀳𑀢𑀸𑀫𑀺𑀢𑁆𑀢𑁄 𑀦𑀺𑀳𑀢𑀧𑀘𑁆𑀘𑀢𑁆𑀣𑀺𑀓𑁄 𑀔𑀢𑁆𑀢𑀺𑀬𑁄 𑀇𑀯 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀳 𑀤𑁂𑀯𑁂𑀳𑀺 𑀧𑀯𑀢𑁆𑀢𑀫𑀸𑀦𑀲𑁆𑀲 𑀮𑁄𑀓𑀲𑁆𑀲 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀸𑀚𑀸 𑀤𑀲𑀧𑀸𑀭𑀫𑀺𑀢𑀸𑀥𑀫𑁆𑀫𑀧𑀭𑀺𑀧𑀽𑀭𑀡𑁂𑀦 𑀭𑀸𑀚𑀪𑀽𑀢𑀢𑁆𑀢𑀸 ‘‘𑀥𑀫𑁆𑀫𑀭𑀸𑀚𑀸’’𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁩𑁪. 𑀢𑀺𑀢𑁆𑀣𑀺𑀬𑁂 𑀦𑀻𑀳𑀭𑀺𑀢𑁆𑀯𑀸𑀦𑀸𑀢𑀺 𑀥𑀫𑁆𑀫𑀭𑀸𑀚𑀪𑀸𑀯𑁂𑀦 𑀧𑀝𑀺𑀧𑀓𑁆𑀔𑀪𑀽𑀢𑁂 𑀲𑀓𑀮𑀢𑀺𑀢𑁆𑀣𑀺𑀬𑁂 𑀦𑀻𑀳𑀭𑀺𑀢𑁆𑀯𑀸 𑀦𑀺𑀲𑁆𑀲𑁂𑀲𑁂𑀦 𑀳𑀭𑀺𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀲𑀲𑁂𑀦𑀓𑀁 𑀥𑀸𑀭𑀜𑁆𑀘𑀸𑀧𑀺 𑀲𑁂𑀦𑀸𑀬 𑀲𑀳 𑀯𑀲𑀯𑀢𑁆𑀢𑀺𑀫𑀸𑀭𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸. 𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸𑀢𑀺 𑀢𑀫𑀲𑀗𑁆𑀔𑀸𑀢𑀁 𑀫𑁄𑀳𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀯𑀺𑀤𑁆𑀥𑀁𑀲𑁂𑀢𑁆𑀯𑀸. 𑀥𑀫𑁆𑀫𑀦𑀕𑀭𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑀁, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀩𑀮𑀩𑁄𑀚𑁆𑀛𑀗𑁆𑀕𑀕𑀫𑁆𑀪𑀻𑀭𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀥𑀫𑁆𑀫𑀲𑀗𑁆𑀔𑀸𑀢𑀁 𑀯𑀸 𑀦𑀕𑀭𑀁 𑀅𑀫𑀸𑀧𑀬𑀺 𑀦𑀺𑀫𑁆𑀫𑀺𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀅𑀢𑁆𑀣𑁄.

𑁫𑁩𑁫. 𑀲𑀻𑀮𑀁 𑀧𑀸𑀓𑀸𑀭𑀓𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑀺𑀢𑁂 𑀥𑀫𑁆𑀫𑀦𑀕𑀭𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀸𑀓𑀸𑀭𑀁. 𑀜𑀸𑀡𑀁 𑀢𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑀦𑁆𑀢𑀺 𑀢𑁂 𑀢𑀼𑀬𑁆𑀳𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀆𑀲𑀬𑀸𑀦𑀼𑀲𑀬𑀜𑀸𑀡𑀅𑀦𑀸𑀕𑀢𑀁𑀲𑀜𑀸𑀡𑀅𑀢𑀻𑀢𑀁𑀲𑀜𑀸𑀡𑀸𑀤𑀺𑀓𑀫𑁂𑀯 𑀜𑀸𑀡𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸 𑀢𑁂 𑀏𑀲𑀺𑀓𑀸 𑀯𑀻𑀭𑀸𑀢𑀺, 𑀪𑀦𑁆𑀢𑁂, 𑀅𑀲𑀺𑀣𑀺𑀮𑀧𑀭𑀓𑁆𑀓𑀫 𑀢𑁂 𑀢𑀼𑀬𑁆𑀳𑀁 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀪𑀼𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀓𑀸𑀭𑀡𑀸 𑀲𑀤𑁆𑀤𑀳𑀦𑀲𑀤𑁆𑀥𑀸 𑀉𑀲𑁆𑀲𑀸𑀧𑀺𑀢𑀅𑀮𑀗𑁆𑀓𑀸𑀭𑀅𑀮𑀗𑁆𑀓𑀢𑀣𑀫𑁆𑀪𑁄𑀢𑀺 𑀅𑀢𑁆𑀣𑁄. 𑀤𑁆𑀯𑀸𑀭𑀧𑀸𑀮𑁄 𑀘 𑀲𑀁𑀯𑀭𑁄𑀢𑀺 𑀢𑁂 𑀢𑀼𑀬𑁆𑀳𑀁 𑀙𑀤𑁆𑀯𑀸𑀭𑀺𑀓𑀲𑀁𑀯𑀭𑁄 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀤𑁆𑀯𑀸𑀭𑀧𑀸𑀮𑁄 𑀤𑁆𑀯𑀸𑀭𑀭𑀓𑁆𑀔𑀓𑁄𑀢𑀺 𑀅𑀢𑁆𑀣𑁄.

𑁫𑁩𑁬. 𑀲𑀢𑀺𑀧𑀝𑁆𑀞𑀸𑀦𑀫𑀝𑁆𑀝𑀸𑀮𑀦𑁆𑀢𑀺 𑀢𑁂 𑀢𑀼𑀬𑁆𑀳𑀁 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀅𑀝𑁆𑀝𑀸𑀮𑀫𑀼𑀡𑁆𑀟𑀘𑁆𑀙𑀤𑀦𑀁. 𑀧𑀜𑁆𑀜𑀸 𑀢𑁂 𑀘𑀘𑁆𑀘𑀭𑀁 𑀫𑀼𑀦𑁂𑀢𑀺, 𑀪𑀦𑁆𑀢𑁂, 𑀫𑀼𑀦𑁂 𑀜𑀸𑀡𑀯𑀦𑁆𑀢 𑀢𑁂 𑀢𑀼𑀬𑁆𑀳𑀁 𑀧𑀸𑀝𑀺𑀳𑀸𑀭𑀺𑀬𑀸𑀤𑀺𑀅𑀦𑁂𑀓𑀯𑀺𑀥𑀸 𑀧𑀜𑁆𑀜𑀸 𑀘𑀘𑁆𑀘𑀭𑀁 𑀫𑀕𑁆𑀕𑀲𑀫𑁄𑀥𑀸𑀦𑀁 𑀦𑀕𑀭𑀯𑀻𑀣𑀻𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀧𑀸𑀤𑀜𑁆𑀘 𑀲𑀺𑀗𑁆𑀖𑀸𑀝𑀦𑁆𑀢𑀺 𑀢𑀼𑀬𑁆𑀳𑀁 𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀲𑀺𑀗𑁆𑀖𑀸𑀝𑀁 𑀘𑀢𑀼𑀫𑀕𑁆𑀕𑀲𑀦𑁆𑀢𑀺. 𑀥𑀫𑁆𑀫𑀯𑀻𑀣𑀺 𑀲𑀼𑀫𑀸𑀧𑀺𑀢𑀦𑁆𑀢𑀺 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑀸𑀬 𑀯𑀻𑀣𑀺𑀬𑀸 𑀲𑀼𑀝𑁆𑀞𑀼 𑀫𑀸𑀧𑀺𑀢𑀁 𑀲𑀚𑁆𑀚𑀺𑀢𑀁, 𑀢𑀁 𑀥𑀫𑁆𑀫𑀦𑀕𑀭𑀦𑁆𑀢𑀺 𑀅𑀢𑁆𑀣𑁄.

𑁫𑁩𑁭. 𑀲𑀼𑀢𑁆𑀢𑀦𑁆𑀢𑀁 𑀅𑀪𑀺𑀥𑀫𑁆𑀫𑀜𑁆𑀘𑀸𑀢𑀺 𑀢𑀯 𑀢𑀼𑀬𑁆𑀳𑀁 𑀏𑀢𑁆𑀣 𑀥𑀫𑁆𑀫𑀦𑀕𑀭𑁂 𑀲𑀼𑀢𑁆𑀢𑀦𑁆𑀢𑀁 𑀅𑀪𑀺𑀥𑀫𑁆𑀫𑀁 𑀯𑀺𑀦𑀬𑀜𑁆𑀘 𑀓𑁂𑀯𑀮𑀁 𑀲𑀓𑀮𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑀁 𑀦𑀯𑀗𑁆𑀕𑀁 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑀲𑀪𑀸 𑀥𑀫𑁆𑀫𑀸𑀥𑀺𑀓𑀭𑀡𑀲𑀸𑀮𑀸𑀢𑀺 𑀅𑀢𑁆𑀣𑁄.

𑁫𑁩𑁮. 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀲𑀼𑀜𑁆𑀜𑀢𑀯𑀺𑀳𑀸𑀭𑀜𑁆𑀘, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀜𑁆𑀘. 𑀯𑀺𑀳𑀸𑀭𑀜𑁆𑀘𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀅𑀧𑁆𑀧𑀡𑀺𑀳𑀺𑀢𑀯𑀺𑀳𑀸𑀭𑀜𑁆𑀘. 𑀆𑀦𑁂𑀜𑁆𑀚𑀜𑁆𑀘𑀸𑀢𑀺 𑀅𑀘𑀮𑀁 𑀅𑀨𑀦𑁆𑀤𑀺𑀢𑀁 𑀘𑀢𑀼𑀲𑀸𑀫𑀜𑁆𑀜𑀨𑀮𑀲𑀗𑁆𑀔𑀸𑀢𑀁 𑀆𑀦𑁂𑀜𑁆𑀚𑀯𑀺𑀳𑀸𑀭𑀜𑁆𑀘. 𑀦𑀺𑀭𑁄𑀥𑁄 𑀘𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀜𑁆𑀘. 𑀏𑀲𑀸 𑀥𑀫𑁆𑀫𑀓𑀼𑀝𑀻 𑀢𑀯𑀸𑀢𑀺 𑀏𑀲𑀸 𑀲𑀩𑁆𑀩𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀗𑁆𑀔𑀸𑀢𑀸 𑀢𑀯 𑀢𑀼𑀬𑁆𑀳𑀁 𑀥𑀫𑁆𑀫𑀓𑀼𑀝𑀺 𑀯𑀲𑀦𑀕𑁂𑀳𑀦𑁆𑀢𑀺 𑀅𑀢𑁆𑀣𑁄.

𑁫𑁩𑁯. 𑀧𑀜𑁆𑀜𑀸𑀬 𑀅𑀕𑁆𑀕𑁄 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀲𑁂𑀦 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀕𑁆𑀕𑁄. 𑀇𑀢𑀺 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑁄 𑀞𑀧𑀺𑀢𑁄 𑀣𑁂𑀭𑁄 𑀧𑀝𑀺𑀪𑀸𑀦𑁂 𑀘 𑀧𑀜𑁆𑀜𑀸𑀬 𑀓𑀢𑁆𑀢𑀩𑁆𑀩𑁂 𑀓𑀺𑀘𑁆𑀘𑁂, 𑀬𑀼𑀢𑁆𑀢𑀫𑀼𑀢𑁆𑀢𑀧𑀝𑀺𑀪𑀸𑀦𑁂 𑀯𑀸 𑀓𑁄𑀯𑀺𑀤𑁄 𑀙𑁂𑀓𑁄 𑀦𑀸𑀫𑁂𑀦 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀧𑀸𑀓𑀝𑁄 𑀢𑀯 𑀢𑀼𑀬𑁆𑀳𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑀬𑀸 𑀤𑁂𑀲𑀺𑀢𑀲𑁆𑀲 𑀧𑀺𑀝𑀓𑀢𑁆𑀢𑀬𑀥𑀫𑁆𑀫𑀲𑀫𑀽𑀳𑀲𑁆𑀲 𑀥𑀸𑀭𑀡𑀢𑁄 𑀧𑀢𑀺 𑀧𑀥𑀸𑀦𑁄 𑀳𑀼𑀢𑁆𑀯𑀸 𑀲𑁂𑀦𑀸𑀓𑀺𑀘𑁆𑀘𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑁫𑁪𑁦. 𑀘𑀼𑀢𑀽𑀧𑀧𑀸𑀢𑀓𑀼𑀲𑀮𑁄𑀢𑀺 𑀪𑀦𑁆𑀢𑁂 𑀫𑀼𑀦𑀺, 𑀘𑀼𑀢𑀽𑀧𑀧𑀸𑀢𑁂 𑀘𑀼𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸 𑀘 𑀓𑀼𑀲𑀮𑁄 𑀙𑁂𑀓𑁄. 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄𑀢𑀺 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁩𑁮; 𑀧𑀝𑀺. 𑀫. 𑁧.𑁧𑁦𑁨) 𑀯𑀼𑀢𑁆𑀢𑀸𑀬 𑀇𑀤𑁆𑀥𑀺𑀧𑁆𑀧𑀪𑁂𑀤𑀸𑀬 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄 𑀧𑀢𑁆𑀢𑁄 𑀦𑀸𑀫𑁂𑀦 𑀓𑁄𑀮𑀺𑀢𑁄 𑀦𑀸𑀫 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑁄𑀭𑁄𑀳𑀺𑀘𑁆𑀘𑁄 𑀢𑀯 𑀢𑀼𑀬𑁆𑀳𑀁 𑀧𑀼𑀭𑁄𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁪𑁧. 𑀧𑁄𑀭𑀸𑀡𑀓𑀯𑀁𑀲𑀥𑀭𑁄𑀢𑀺 𑀪𑀦𑁆𑀢𑁂 𑀫𑀼𑀦𑁂, 𑀜𑀸𑀡𑀯𑀦𑁆𑀢𑀁 𑀧𑁄𑀭𑀸𑀡𑀲𑁆𑀲 𑀯𑀁𑀲𑀲𑁆𑀲 𑀥𑀸𑀭𑀓𑁄, 𑀧𑀭𑀫𑁆𑀧𑀭𑀚𑀸𑀦𑀦𑀓𑁄 𑀯𑀸 𑀉𑀕𑁆𑀕𑀢𑁂𑀚𑁄 𑀧𑀸𑀓𑀝𑀢𑁂𑀚𑁄, 𑀤𑀼𑀭𑀸𑀲𑀤𑁄 𑀆𑀲𑀸𑀤𑁂𑀢𑀼𑀁 𑀖𑀝𑁆𑀝𑁂𑀢𑀼𑀁 𑀤𑀼𑀓𑁆𑀔𑁄 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀥𑀼𑀢𑀯𑀸𑀤𑀺𑀕𑀼𑀡𑁂𑀦𑀕𑁆𑀕𑁄𑀢𑀺 𑀢𑁂𑀘𑀻𑀯𑀭𑀺𑀓𑀗𑁆𑀕𑀸𑀤𑀻𑀦𑀺 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀯𑀤𑀢𑀺 𑀑𑀯𑀤𑀢𑀻𑀢𑀺 𑀥𑀼𑀢𑀯𑀸𑀤𑀻𑀕𑀼𑀡𑁂𑀦 𑀥𑀼𑀢𑀗𑁆𑀕𑀕𑀼𑀡𑁂𑀦 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀢𑀯 𑀢𑀼𑀬𑁆𑀳𑀁 𑀅𑀓𑁆𑀔𑀤𑀲𑁆𑀲𑁄 𑀯𑁄𑀳𑀸𑀭𑀓𑀭𑀡𑁂 𑀧𑀥𑀸𑀦𑁄𑀢𑀺 𑀅𑀢𑁆𑀣𑁄.

𑁫𑁪𑁨. 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄𑀢𑀺 𑀪𑀦𑁆𑀢𑁂 𑀫𑀼𑀦𑁂, 𑀩𑀳𑀽𑀦𑀁 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀁 𑀲𑀼𑀢𑀢𑁆𑀢𑀸 𑀪𑀕𑀯𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀘 𑀉𑀕𑁆𑀕𑀳𑀺𑀢𑀢𑁆𑀢𑀸 𑀩𑀳𑀼𑀲𑁆𑀲𑀼𑀢𑁄 𑀅𑀦𑁂𑀓𑁂𑀲𑀁 𑀙𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀦𑀁 𑀆𑀕𑀫𑀥𑀫𑁆𑀫𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀜𑁆𑀘 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀥𑀸𑀭𑀡𑀢𑁄 𑀥𑀫𑁆𑀫𑀥𑀭𑁄 𑀆𑀦𑀦𑁆𑀤𑁄. 𑀲𑀩𑁆𑀩𑀧𑀸𑀞𑀻 𑀘 𑀲𑀸𑀲𑀦𑁂𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀲𑀩𑁆𑀩𑁂𑀲𑀁 𑀧𑀸𑀞𑀻𑀦𑀁 𑀧𑀞𑀦𑁆𑀢𑀸𑀦𑀁 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑁄 𑀲𑁂𑀝𑁆𑀞𑁄𑀢𑀺 𑀲𑀩𑁆𑀩𑀧𑀸𑀞𑀻 𑀦𑀸𑀫𑁂𑀦 𑀆𑀦𑀦𑁆𑀤𑁄 𑀦𑀸𑀫 𑀣𑁂𑀭𑁄. 𑀥𑀫𑁆𑀫𑀸𑀭𑀓𑁆𑀔𑁄 𑀢𑀯𑀸𑀢𑀺 𑀢𑀯 𑀢𑀼𑀬𑁆𑀳𑀁 𑀥𑀫𑁆𑀫𑀲𑁆𑀲 𑀧𑀺𑀝𑀓𑀢𑁆𑀢𑀬𑀥𑀫𑁆𑀫𑀪𑀡𑁆𑀟𑀲𑁆𑀲 𑀆𑀭𑀓𑁆𑀔𑁄 𑀭𑀓𑁆𑀔𑀓𑁄 𑀧𑀸𑀮𑀓𑁄, 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀅𑀢𑁆𑀣𑁄.

𑁫𑁪𑁩. 𑀏𑀢𑁂 𑀲𑀩𑁆𑀩𑁂 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀪𑀕𑀯𑀸 𑀪𑀕𑁆𑀬𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀢𑁂 𑀲𑀸𑀭𑀺𑀧𑀼𑀢𑁆𑀢𑀸𑀤𑀬𑁄 𑀫𑀳𑀸𑀦𑀼𑀪𑀸𑀯𑁂𑀧𑀺 𑀣𑁂𑀭𑁂 𑀅𑀢𑀺𑀓𑁆𑀓𑀫𑁆𑀫 𑀯𑀚𑁆𑀚𑁂𑀢𑁆𑀯𑀸 𑀫𑀫𑀁𑀬𑁂𑀯 𑀧𑀫𑁂𑀲𑀺 𑀧𑀫𑀸𑀡𑀁 𑀅𑀓𑀸𑀲𑀺, 𑀫𑀦𑀲𑀺 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀦𑀺𑀘𑁆𑀙𑀬𑀁 𑀫𑁂 𑀧𑀸𑀤𑀸𑀲𑀻𑀢𑀺 𑀯𑀺𑀦𑀬𑀜𑁆𑀜𑀽𑀳𑀺 𑀧𑀡𑁆𑀟𑀺𑀢𑁂𑀳𑀺 𑀤𑁂𑀲𑀺𑀢𑀁 𑀧𑀓𑀸𑀲𑀺𑀢𑀁 𑀯𑀺𑀦𑀬𑁂 𑀯𑀺𑀦𑀺𑀘𑁆𑀙𑀬𑀁 𑀤𑁄𑀲𑀯𑀺𑀘𑀸𑀭𑀡𑀁 𑀫𑁂 𑀫𑀬𑁆𑀳𑀁 𑀪𑀕𑀯𑀸 𑀧𑀸𑀤𑀸𑀲𑀺 𑀧𑀓𑀸𑀭𑁂𑀦 𑀅𑀤𑀸𑀲𑀺, 𑀫𑀬𑁆𑀳𑀫𑁂𑀯 𑀪𑀸𑀭𑀁 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁪𑁪. 𑀬𑁄 𑀓𑁄𑀘𑀺 𑀯𑀺𑀦𑀬𑁂 𑀧𑀜𑁆𑀳𑀦𑁆𑀢𑀺 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑀸𑀯𑀓𑁄 𑀯𑀺𑀦𑀬𑀦𑀺𑀲𑁆𑀲𑀺𑀢𑀁 𑀧𑀜𑁆𑀳𑀁 𑀫𑀁 𑀧𑀼𑀘𑁆𑀙𑀢𑀺, 𑀢𑀢𑁆𑀣 𑀢𑀲𑁆𑀫𑀺𑀁 𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀫𑁂 𑀫𑀬𑁆𑀳𑀁 𑀘𑀺𑀦𑁆𑀢𑀦𑀸 𑀯𑀺𑀫𑀢𑀺 𑀓𑀗𑁆𑀔𑀸 𑀦𑀢𑁆𑀣𑀺. 𑀢𑀜𑁆𑀳𑁂𑀯𑀢𑁆𑀣𑀁 𑀢𑀁 𑀏𑀯 𑀧𑀼𑀘𑁆𑀙𑀺𑀢𑀁 𑀅𑀢𑁆𑀣𑀁 𑀅𑀳𑀁 𑀓𑀣𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁪𑁫. 𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀻𑀢𑀺 𑀬𑀸𑀯𑀢𑀸 𑀬𑀢𑁆𑀢𑀓𑁂 𑀞𑀸𑀦𑁂 𑀩𑀼𑀤𑁆𑀥𑀲𑁆𑀲 𑀆𑀡𑀸𑀔𑁂𑀢𑁆𑀢𑁂 𑀢𑀁 𑀫𑀳𑀸𑀫𑀼𑀦𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀦𑀬𑁂 𑀯𑀺𑀦𑀬𑀧𑀺𑀝𑀓𑁂 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀓𑀭𑀡𑁂 𑀯𑀸 𑀫𑀸𑀤𑀺𑀲𑁄 𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀺, 𑀅𑀳𑀫𑁂𑀯 𑀅𑀕𑁆𑀕𑁄, 𑀪𑀺𑀬𑁆𑀬𑁄 𑀫𑀫𑀸𑀥𑀺𑀓𑁄 𑀓𑀼𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁪𑁬. 𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀕𑁄𑀢𑀫𑁄 𑀪𑀕𑀯𑀸 𑀏𑀯𑀁 𑀕𑀚𑁆𑀚𑀢𑀺 𑀲𑀻𑀳𑀦𑀸𑀤𑀁 𑀓𑀭𑁄𑀢𑀺. 𑀓𑀣𑀁? 𑀯𑀺𑀦𑀬𑁂 𑀉𑀪𑀢𑁄𑀯𑀺𑀪𑀗𑁆𑀕𑁂, 𑀔𑀦𑁆𑀥𑀓𑁂𑀲𑀼 𑀫𑀳𑀸𑀯𑀕𑁆𑀕𑀘𑀽𑀴𑀯𑀕𑁆𑀕𑁂𑀲𑀼, 𑀘-𑀲𑀤𑁆𑀤𑁂𑀦 𑀧𑀭𑀺𑀯𑀸𑀭𑁂, 𑀉𑀧𑀸𑀮𑀺𑀲𑁆𑀲 𑀉𑀧𑀸𑀮𑀺𑀦𑀸 𑀲𑀫𑁄 𑀲𑀤𑀺𑀲𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀕𑀚𑁆𑀚𑀢𑀺.

𑁫𑁪𑁭. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀁 𑀩𑀼𑀤𑁆𑀥𑀪𑀡𑀺𑀢𑀁 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁 𑀦𑀯𑀗𑁆𑀕𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀲𑀢𑁆𑀣𑀼𑀲𑀸𑀲𑀦𑀁 𑀲𑀢𑁆𑀣𑀼𑀦𑀸 𑀧𑀓𑀸𑀲𑀺𑀢𑀁 𑀲𑀩𑁆𑀩𑀁 𑀯𑀺𑀦𑀬𑁄𑀕𑀥𑀁 𑀢𑀁 𑀯𑀺𑀦𑀬𑁂 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀯𑀺𑀦𑀬𑀫𑀽𑀮𑀓𑀁 𑀇𑀘𑁆𑀘𑁂𑀯𑀁 𑀧𑀲𑁆𑀲𑀺𑀦𑁄 𑀧𑀲𑁆𑀲𑀦𑁆𑀢𑀲𑁆𑀲.

𑁫𑁪𑁮. 𑀫𑀫 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦𑀸𑀢𑀺 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄 𑀲𑀓𑁆𑀬𑀯𑀁𑀲𑀧𑁆𑀧𑀥𑀸𑀦𑁄, 𑀫𑀫 𑀓𑀫𑁆𑀫𑀁 𑀫𑀬𑁆𑀳𑀁 𑀧𑀼𑀩𑁆𑀩𑀧𑀢𑁆𑀣𑀦𑀸𑀓𑀫𑁆𑀫𑀁 𑀅𑀢𑀻𑀢𑀁𑀲𑀜𑀸𑀡𑁂𑀦 𑀲𑀭𑀺𑀢𑁆𑀯𑀸𑀦 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀕𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮) 𑀫𑀁 𑀏𑀢𑀤𑀕𑁆𑀕𑁂 𑀞𑀸𑀦𑁂 𑀞𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁪𑁯. 𑀲𑀢𑀲𑀳𑀲𑁆𑀲𑀼𑀧𑀸𑀤𑀸𑀬𑀸𑀢𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀁 𑀇𑀫𑀁 𑀞𑀸𑀦𑀁 𑀅𑀧𑀢𑁆𑀣𑀬𑀺𑀁 𑀧𑀢𑁆𑀣𑁂𑀲𑀺𑀁, 𑀲𑁄 𑀫𑁂 𑀅𑀢𑁆𑀣𑁄 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑁄 𑀅𑀥𑀺𑀕𑀢𑁄 𑀧𑀝𑀺𑀮𑀤𑁆𑀥𑁄 𑀯𑀺𑀦𑀬𑁂 𑀧𑀸𑀭𑀫𑀺𑀁 𑀕𑀢𑁄 𑀓𑁄𑀝𑀺𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁫𑁫𑁦. 𑀲𑀓𑁆𑀬𑀸𑀦𑀁 𑀲𑀓𑁆𑀬𑀯𑀁𑀲𑀭𑀸𑀚𑀽𑀦𑀁 𑀦𑀦𑁆𑀤𑀺𑀚𑀦𑀦𑁄 𑀲𑁄𑀫𑀦𑀲𑁆𑀲𑀓𑀸𑀭𑀓𑁄 𑀅𑀳𑀁 𑀧𑀼𑀭𑁂 𑀧𑀼𑀩𑁆𑀩𑁂 𑀓𑀧𑁆𑀧𑀓𑁄 𑀆𑀲𑀺𑀁 𑀅𑀳𑁄𑀲𑀺𑀁, 𑀢𑀁 𑀚𑀸𑀢𑀺𑀁 𑀢𑀁 𑀓𑀼𑀮𑀁 𑀢𑀁 𑀬𑁄𑀦𑀺𑀁 𑀯𑀺𑀚𑀳𑀺𑀢𑁆𑀯𑀸 𑀯𑀺𑀲𑁂𑀲𑁂𑀦 𑀚𑀳𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀫𑀳𑁂𑀲𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄 𑀚𑀸𑀢𑁄 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀲𑀸𑀲𑀦𑀥𑀸𑀭𑀡𑀢𑁄𑀢𑀺 𑀅𑀢𑁆𑀣𑁄.

𑁫𑁫𑁧. 𑀢𑀢𑁄 𑀧𑀭𑀁 𑀅𑀢𑁆𑀢𑀦𑁄 𑀤𑀸𑀲𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀇𑀢𑁄 𑀤𑀼𑀢𑀺𑀬𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁄 𑀪𑀤𑁆𑀤𑀓𑀧𑁆𑀧𑀢𑁄 𑀳𑁂𑀝𑁆𑀞𑀸 𑀤𑀼𑀢𑀺𑀬𑁂 𑀓𑀧𑁆𑀧𑁂 𑀦𑀸𑀫𑁂𑀦 𑀅𑀜𑁆𑀚𑀲𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀏𑀓𑁄 𑀭𑀸𑀚𑀸 𑀅𑀦𑀦𑁆𑀢𑀢𑁂𑀚𑁄 𑀲𑀗𑁆𑀔𑁆𑀬𑀸𑀢𑀺𑀓𑁆𑀓𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀧𑀭𑀺𑀯𑀸𑀭𑁄 𑀫𑀳𑀤𑁆𑀥𑀦𑁄 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀥𑀦𑀯𑀸 𑀪𑀽𑀫𑀺𑀧𑀸𑀮𑁄 𑀧𑀣𑀯𑀻𑀧𑀸𑀮𑀓𑁄 𑀭𑀓𑁆𑀔𑀓𑁄 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫𑁨. 𑀢𑀲𑁆𑀲 𑀭𑀜𑁆𑀜𑁄𑀢𑀺 𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀭𑀸𑀚𑀺𑀦𑁄 𑀧𑀼𑀢𑁆𑀢𑁄 𑀅𑀳𑀁 𑀘𑀦𑁆𑀤𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄 𑀅𑀳𑀁 𑀚𑀸𑀢𑀺𑀫𑀤𑁂𑀦 𑀘 𑀬𑀲𑀫𑀤𑁂𑀦 𑀘 𑀪𑁄𑀕𑀫𑀤𑁂𑀦 𑀘 𑀉𑀧𑀢𑁆𑀣𑀤𑁆𑀥𑁄 𑀣𑀫𑁆𑀪𑀺𑀢𑁄 𑀉𑀦𑁆𑀦𑀢𑁄𑀢𑀺 𑀅𑀢𑁆𑀣𑁄.

𑁫𑁫𑁩. 𑀦𑀸𑀕𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀲𑀢𑀲𑀳𑀲𑁆𑀲𑀳𑀢𑁆𑀣𑀺𑀦𑁄 𑀫𑀸𑀢𑀗𑁆𑀕𑀸 𑀫𑀸𑀢𑀗𑁆𑀕𑀓𑀼𑀮𑁂 𑀚𑀸𑀢𑀸 𑀢𑀺𑀥𑀸 𑀧𑀪𑀺𑀦𑁆𑀦𑀸 𑀅𑀓𑁆𑀔𑀺𑀓𑀡𑁆𑀡𑀓𑁄𑀲𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀪𑀺𑀦𑁆𑀦𑀸 𑀫𑀤𑀕𑀴𑀺𑀢𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸 𑀲𑀩𑁆𑀩𑁂𑀳𑀺 𑀳𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀸 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀫𑀁 𑀧𑀭𑀺𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫𑁪. 𑀲𑀩𑀮𑁂𑀳𑀺 𑀧𑀭𑁂𑀢𑁄𑀳𑀦𑁆𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀳𑀁 𑀲𑀩𑀮𑁂𑀳𑀺 𑀅𑀢𑁆𑀢𑀦𑁄 𑀲𑁂𑀦𑀸𑀩𑀮𑁂𑀳𑀺 𑀧𑀭𑁂𑀢𑁄 𑀧𑀭𑀺𑀯𑀸𑀭𑀺𑀢𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑀼𑀓𑀸𑀫𑀓𑁄 𑀇𑀘𑁆𑀙𑀦𑁆𑀢𑁄 𑀲𑀺𑀭𑀺𑀓𑀁 𑀦𑀸𑀫 𑀦𑀸𑀕𑀁 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫𑁫. 𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑀲𑀁𑀯𑀭𑀸𑀤𑀺𑀧𑀦𑁆𑀦𑀭𑀲𑀘𑀭𑀡𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀕𑀼𑀢𑁆𑀢𑀤𑁆𑀯𑀸𑀭𑁄 𑀧𑀺𑀳𑀺𑀢𑀘𑀓𑁆𑀔𑀸𑀤𑀺𑀙𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄 𑀲𑀼𑀝𑁆𑀞𑀼 𑀭𑀓𑁆𑀔𑀺𑀢𑀓𑀸𑀬𑀘𑀺𑀢𑁆𑀢𑁄 𑀤𑁂𑀯𑀮𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀫𑀫 𑀫𑀬𑁆𑀳𑀁 𑀧𑀼𑀭𑀢𑁄 𑀲𑀫𑁆𑀫𑀼𑀔𑁂 𑀆𑀕𑀘𑁆𑀙𑀺 𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁄.

𑁫𑁫𑁬. 𑀧𑁂𑀲𑁂𑀢𑁆𑀯𑀸 𑀲𑀺𑀭𑀺𑀓𑀁 𑀦𑀸𑀕𑀦𑁆𑀢𑀺 𑀢𑀁 𑀆𑀕𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀅𑀳𑀁 𑀲𑀺𑀭𑀺𑀓𑀁 𑀦𑀸𑀫 𑀦𑀸𑀕𑀁 𑀅𑀪𑀺𑀫𑀼𑀔𑀁 𑀧𑁂𑀲𑁂𑀢𑁆𑀯𑀸 𑀩𑀼𑀤𑁆𑀥𑀁 𑀆𑀲𑀸𑀤𑀬𑀺𑀁 𑀖𑀝𑁆𑀝𑁂𑀲𑀺𑀁 𑀧𑀤𑀼𑀲𑁆𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀲𑀜𑁆𑀚𑀸𑀢𑀓𑁄𑀧𑁄 𑀲𑁄𑀢𑀺 𑀢𑀢𑁄 𑀢𑀲𑁆𑀫𑀸 𑀫𑀬𑀸 𑀅𑀢𑀻𑀯 𑀧𑀻𑀴𑁂𑀢𑁆𑀯𑀸 𑀧𑁂𑀲𑀺𑀢𑀢𑁆𑀢𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀫𑀬𑀺 𑀲𑀜𑁆𑀚𑀸𑀢𑀓𑁄𑀧𑁄 𑀧𑀤𑀁 𑀅𑀢𑁆𑀢𑀦𑁄 𑀧𑀸𑀤𑀁 𑀦𑀼𑀤𑁆𑀥𑀭𑀢𑁂 𑀦 𑀉𑀤𑁆𑀥𑀭𑀢𑀺, 𑀦𑀺𑀘𑁆𑀘𑀮𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁫𑁫𑁭. 𑀦𑀸𑀕𑀁 𑀤𑀼𑀝𑁆𑀞𑀫𑀦𑀁 𑀤𑀺𑀲𑁆𑀯𑀸𑀢𑀺 𑀤𑀼𑀝𑁆𑀞𑀫𑀦𑀁 𑀓𑀼𑀤𑁆𑀥𑀘𑀺𑀢𑁆𑀢𑀁 𑀦𑀸𑀤𑀁 𑀤𑀺𑀲𑁆𑀯𑀸 𑀅𑀳𑀁 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑁄𑀧𑀁 𑀅𑀓𑀸𑀲𑀺𑀁 𑀤𑁄𑀲𑀁 𑀉𑀧𑁆𑀧𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀲𑀬𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀤𑁂𑀯𑀮𑀁 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀯𑀺𑀳𑁂𑀲𑀬𑀺𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀅𑀳𑀁 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫𑁮. 𑀲𑀸𑀢𑀁 𑀢𑀢𑁆𑀣 𑀦 𑀯𑀺𑀦𑁆𑀤𑀸𑀫𑀻𑀢𑀺 𑀢𑀲𑁆𑀫𑀺𑀁 𑀆𑀲𑀸𑀤𑀦𑁂 𑀲𑀸𑀢𑀁 𑀦 𑀯𑀺𑀦𑁆𑀤𑀸𑀫𑀺. 𑀆𑀲𑀸𑀤𑀦𑀦𑀺𑀫𑀺𑀢𑁆𑀢𑀁 𑀫𑀥𑀼𑀭𑀁 𑀲𑀼𑀔𑀁 𑀦 𑀮𑀪𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀺𑀭𑁄 𑀧𑀚𑁆𑀚𑀮𑀺𑀢𑁄 𑀬𑀣𑀸𑀢𑀺 𑀲𑀺𑀭𑁄 𑀫𑀫 𑀲𑀻𑀲𑀁 𑀧𑀚𑁆𑀚𑀮𑀺𑀢𑁄 𑀬𑀣𑀸 𑀧𑀚𑁆𑀚𑀮𑀫𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀴𑀸𑀳𑁂𑀦 𑀟𑀬𑁆𑀳𑀸𑀫𑀻𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑁄𑀧𑀲𑁆𑀲 𑀓𑀢𑀢𑁆𑀢𑀸 𑀧𑀘𑁆𑀙𑀸𑀦𑀼𑀢𑀸𑀧𑀧𑀭𑀺𑀴𑀸𑀳𑁂𑀦 𑀟𑀬𑁆𑀳𑀸𑀫𑀺 𑀉𑀡𑁆𑀳𑀘𑀺𑀢𑁆𑀢𑁄 𑀳𑁄𑀫𑀻𑀢𑀺 𑀅𑀢𑁆𑀣𑁄.

𑁫𑁫𑁯. 𑀲𑀲𑀸𑀕𑀭𑀦𑁆𑀢𑀸𑀢𑀺 𑀢𑁂𑀦𑁂𑀯 𑀧𑀸𑀧𑀓𑀫𑁆𑀫𑀩𑀮𑁂𑀦 𑀲𑀲𑀸𑀕𑀭𑀦𑁆𑀢𑀸 𑀲𑀸𑀕𑀭𑀧𑀭𑀺𑀬𑁄𑀲𑀸𑀦𑀸 𑀲𑀓𑀮𑀫𑀳𑀸𑀧𑀣𑀯𑀻 𑀫𑁂 𑀫𑀬𑁆𑀳𑀁 𑀆𑀤𑀺𑀢𑁆𑀢𑀸 𑀯𑀺𑀬 𑀚𑀮𑀺𑀢𑀸 𑀯𑀺𑀬 𑀳𑁄𑀢𑀺 𑀔𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀺𑀢𑀼 𑀲𑀦𑁆𑀢𑀺𑀓𑀼𑀧𑀸𑀕𑀫𑁆𑀫𑀸𑀢𑀺 𑀏𑀯𑀁 𑀪𑀬𑁂 𑀉𑀧𑁆𑀧𑀦𑁆𑀦𑁂 𑀅𑀳𑀁 𑀅𑀢𑁆𑀢𑀦𑁄 𑀧𑀺𑀢𑀼 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀉𑀧𑀸𑀕𑀫𑁆𑀫 𑀉𑀧𑀕𑀦𑁆𑀢𑁆𑀯𑀸 𑀇𑀤𑀁 𑀯𑀘𑀦𑀁 𑀅𑀩𑁆𑀭𑀯𑀺𑀁 𑀓𑀣𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁬𑁦. 𑀆𑀲𑀻𑀯𑀺𑀲𑀁𑀯 𑀓𑀼𑀧𑀺𑀢𑀦𑁆𑀢𑀺 𑀆𑀲𑀻𑀯𑀺𑀲𑀁 𑀲𑀩𑁆𑀩𑀁 𑀓𑀼𑀧𑀺𑀢𑀁 𑀓𑀼𑀤𑁆𑀥𑀁 𑀇𑀯 𑀚𑀮𑀫𑀸𑀦𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀇𑀯 𑀫𑀢𑁆𑀢𑀁 𑀢𑀺𑀥𑀸 𑀧𑀪𑀺𑀦𑁆𑀦𑀁 𑀤𑀦𑁆𑀢𑀺𑀁 𑀤𑀦𑁆𑀢𑀯𑀦𑁆𑀢𑀁 𑀓𑀼𑀜𑁆𑀚𑀭𑀁 𑀉𑀢𑁆𑀢𑀫𑀁 𑀳𑀢𑁆𑀣𑀺𑀁 𑀇𑀯 𑀘 𑀆𑀕𑀢𑀁 𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀬𑀫𑁆𑀪𑀼𑀁 𑀲𑀬𑀫𑁂𑀯 𑀩𑀼𑀤𑁆𑀥𑀪𑀽𑀢𑀁 𑀅𑀳𑀁 𑀆𑀲𑀸𑀤𑀬𑀺𑀁 𑀖𑀝𑁆𑀝𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁬𑁧. 𑀆𑀲𑀸𑀤𑀺𑀢𑁄 𑀫𑀬𑀸 𑀩𑀼𑀤𑁆𑀥𑁄𑀢𑀺 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀬𑀸 𑀆𑀲𑀸𑀤𑀺𑀢𑁄 𑀖𑀝𑁆𑀝𑀺𑀢𑁄 𑀖𑁄𑀭𑁄 𑀅𑀜𑁆𑀜𑁂𑀳𑀺 𑀖𑀝𑁆𑀝𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀖𑁄𑀭𑁄, 𑀉𑀕𑁆𑀕𑀢𑀧𑁄 𑀧𑀸𑀓𑀝𑀢𑀧𑁄 𑀚𑀺𑀦𑁄 𑀧𑀜𑁆𑀘 𑀫𑀸𑀭𑁂 𑀚𑀺𑀢𑀯𑀸 𑀏𑀯𑀁𑀕𑀼𑀡𑀲𑀫𑁆𑀧𑀦𑁆𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀬𑀸 𑀖𑀝𑁆𑀝𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀼𑀭𑀸 𑀲𑀩𑁆𑀩𑁂 𑀯𑀺𑀦𑀲𑁆𑀲𑀸𑀫𑀸𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑀢𑀅𑀦𑀸𑀤𑀭𑁂𑀦 𑀲𑀩𑁆𑀩𑁂 𑀫𑀬𑀁 𑀯𑀺𑀦𑀲𑁆𑀲𑀸𑀫 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀦𑀲𑁆𑀲𑀸𑀫, 𑀪𑀲𑁆𑀫𑀸 𑀯𑀺𑀬 𑀪𑀯𑀸𑀫𑀸𑀢𑀺 𑀅𑀢𑁆𑀣𑁄. 𑀔𑀫𑀸𑀧𑁂𑀲𑁆𑀲𑀸𑀫 𑀢𑀁 𑀫𑀼𑀦𑀺𑀦𑁆𑀢𑀺 𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀫𑀼𑀦𑀺𑀁 𑀬𑀸𑀯 𑀦 𑀯𑀺𑀦𑀲𑁆𑀲𑀸𑀫, 𑀢𑀸𑀯 𑀔𑀫𑀸𑀧𑁂𑀲𑁆𑀲𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁬𑁨. 𑀦𑁄 𑀘𑁂 𑀢𑀁 𑀦𑀺𑀚𑁆𑀛𑀸𑀧𑁂𑀲𑁆𑀲𑀸𑀫𑀸𑀢𑀺 𑀅𑀢𑁆𑀢𑀤𑀦𑁆𑀢𑀁 𑀤𑀫𑀺𑀢𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀏𑀓𑀕𑁆𑀕𑀘𑀺𑀢𑁆𑀢𑀁 𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑁄 𑀘𑁂 𑀦𑀺𑀚𑁆𑀛𑀸𑀧𑁂𑀲𑁆𑀲𑀸𑀫 𑀔𑀫𑀸𑀧𑁂𑀲𑁆𑀲𑀸𑀫. 𑀑𑀭𑁂𑀦 𑀲𑀢𑁆𑀢𑀤𑀺𑀯𑀲𑀸 𑀲𑀢𑁆𑀢𑀤𑀺𑀯𑀲𑀢𑁄 𑀑𑀭𑀪𑀸𑀕𑁂 𑀲𑀢𑁆𑀢𑀤𑀺𑀯𑀲𑁂 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑁆𑀧𑀼𑀡𑁆𑀡𑀁 𑀭𑀝𑁆𑀞𑀁 𑀫𑁂 𑀲𑀩𑁆𑀩𑀁 𑀯𑀺𑀥𑀫𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀺.

𑁫𑁬𑁩. 𑀲𑀼𑀫𑁂𑀔𑀮𑁄 𑀓𑁄𑀲𑀺𑀬𑁄 𑀘𑀸𑀢𑀺 𑀏𑀢𑁂 𑀲𑀼𑀫𑁂𑀔𑀮𑀸𑀤𑀬𑁄 𑀘𑀢𑁆𑀢𑀸𑀭𑁄 𑀭𑀸𑀚𑀸𑀦𑁄 𑀇𑀲𑀬𑁄 𑀆𑀲𑀸𑀤𑀬𑀺𑀢𑁆𑀯𑀸 𑀖𑀝𑁆𑀝𑁂𑀢𑁆𑀯𑀸 𑀅𑀦𑀸𑀤𑀭𑀁 𑀓𑀢𑁆𑀯𑀸 𑀲𑀭𑀝𑁆𑀞𑀓𑀸 𑀲𑀳 𑀭𑀝𑁆𑀞𑀚𑀦𑀧𑀤𑀯𑀸𑀲𑀻𑀳𑀺 𑀤𑀼𑀕𑁆𑀕𑀢𑀸 𑀯𑀺𑀦𑀸𑀲𑀁 𑀕𑀢𑀸𑀢𑀺 𑀅𑀢𑁆𑀣𑁄.

𑁫𑁬𑁪. 𑀬𑀤𑀸 𑀓𑀼𑀧𑁆𑀧𑀦𑁆𑀢𑀺 𑀇𑀲𑀬𑁄𑀢𑀺 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀜𑁆𑀜𑀢𑀸 𑀓𑀸𑀬𑀲𑀜𑁆𑀜𑀫𑀸𑀤𑀻𑀳𑀺 𑀲𑀜𑁆𑀜𑀢𑀸 𑀲𑀦𑁆𑀢𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀉𑀢𑁆𑀢𑀫𑀘𑀸𑀭𑀺𑀦𑁄 𑀲𑁂𑀝𑁆𑀞𑀘𑀸𑀭𑀺𑀦𑁄 𑀇𑀲𑀬𑁄 𑀓𑀼𑀧𑁆𑀧𑀦𑁆𑀢𑀺 𑀤𑁄𑀫𑀦𑀲𑁆𑀲𑀸 𑀪𑀯𑀦𑁆𑀢𑀺, 𑀢𑀤𑀸 𑀲𑀲𑀸𑀕𑀭𑀁 𑀲𑀧𑀩𑁆𑀩𑀢𑀁 𑀲𑀤𑁂𑀯𑀓𑀁 𑀮𑁄𑀓𑀁 𑀯𑀺𑀦𑀸𑀲𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁬𑁫. 𑀢𑀺𑀬𑁄𑀚𑀦𑀲𑀳𑀲𑁆𑀲𑀫𑁆𑀳𑀻𑀢𑀺 𑀢𑁂𑀲𑀁 𑀇𑀲𑀻𑀦𑀁 𑀆𑀦𑀼𑀪𑀸𑀯𑀁 𑀜𑀢𑁆𑀯𑀸 𑀢𑁂 𑀔𑀫𑀸𑀧𑁂𑀢𑀼𑀁 𑀅𑀘𑁆𑀘𑀬𑀁 𑀅𑀧𑀭𑀸𑀥𑀁 𑀤𑁂𑀲𑀦𑀢𑁆𑀣𑀸𑀬 𑀧𑀓𑀸𑀲𑀦𑀢𑁆𑀣𑀸𑀬 𑀢𑀺𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀧𑀼𑀭𑀺𑀲𑁂 𑀲𑀦𑁆𑀦𑀺𑀧𑀸𑀢𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀬𑀫𑁆𑀪𑀼𑀁 𑀉𑀧𑀲𑀗𑁆𑀓𑀫𑀺𑀦𑁆𑀢𑀺 𑀲𑀬𑀫𑁆𑀪𑀼𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀁 𑀲𑀫𑀻𑀧𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁬𑁬. 𑀅𑀮𑁆𑀮𑀯𑀢𑁆𑀣𑀸𑀢𑀺 𑀫𑀬𑀸 𑀲𑀤𑁆𑀥𑀺𑀁 𑀭𑀸𑀲𑀺𑀪𑀽𑀢𑀸 𑀲𑀩𑁆𑀩𑁂 𑀚𑀦𑀸 𑀅𑀮𑁆𑀮𑀯𑀢𑁆𑀣𑀸 𑀉𑀤𑀓𑁂𑀦 𑀢𑀺𑀦𑁆𑀢𑀯𑀢𑁆𑀣𑀉𑀢𑁆𑀢𑀭𑀸𑀲𑀗𑁆𑀕𑀸 𑀅𑀮𑁆𑀮𑀲𑀺𑀭𑀸 𑀢𑀺𑀦𑁆𑀢𑀓𑁂𑀲𑀸 𑀧𑀜𑁆𑀚𑀮𑀻𑀓𑀢𑀸 𑀫𑀼𑀤𑁆𑀥𑀦𑀺 𑀓𑀢𑀅𑀜𑁆𑀚𑀮𑀺𑀧𑀼𑀝𑀸 𑀩𑀼𑀤𑁆𑀥𑀲𑁆𑀲 𑀧𑀘𑁆𑀘𑁂𑀓𑀫𑀼𑀦𑀺𑀦𑁄 𑀧𑀸𑀤𑁂 𑀧𑀸𑀤𑀲𑀫𑀻𑀧𑁂 𑀦𑀺𑀧𑀢𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀇𑀤𑀁 𑀯𑀘𑀦𑀫𑀩𑁆𑀭𑀯𑀼𑀦𑁆𑀢𑀺 ‘‘𑀔𑀫𑀲𑁆𑀲𑀼 𑀢𑁆𑀯𑀁, 𑀫𑀳𑀸𑀯𑀻𑀭𑀸’’𑀢𑀺𑀆𑀤𑀺𑀓𑀁 𑀯𑀘𑀦𑀁 𑀅𑀩𑁆𑀭𑀯𑀼𑀁 𑀓𑀣𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁫𑁬𑁭. 𑀫𑀳𑀸𑀯𑀻𑀭 𑀯𑀻𑀭𑀼𑀢𑁆𑀢𑀫 𑀪𑀦𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥, 𑀫𑀬𑀸 𑀢𑀼𑀫𑁆𑀳𑁂𑀲𑀼 𑀅𑀜𑁆𑀜𑀸𑀡𑁂𑀦 𑀓𑀢𑀁 𑀅𑀧𑀭𑀸𑀥𑀁 𑀔𑀫𑀲𑁆𑀲𑀼 𑀢𑁆𑀯𑀁 𑀯𑀺𑀦𑁄𑀤𑁂𑀳𑀺, 𑀫𑀸 𑀫𑀦𑀲𑀺 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀚𑀦𑁄 𑀚𑀦𑀲𑀫𑀽𑀳𑁄 𑀢𑀁 𑀪𑀕𑀯𑀦𑁆𑀢𑀁 𑀅𑀪𑀺 𑀯𑀺𑀲𑁂𑀲𑁂𑀦 𑀬𑀸𑀘𑀢𑀺. 𑀧𑀭𑀺𑀴𑀸𑀳𑀁 𑀤𑁄𑀲𑀫𑁄𑀳𑁂𑀳𑀺 𑀓𑀢𑀘𑀺𑀢𑁆𑀢𑀤𑀼𑀓𑁆𑀔𑀧𑀭𑀺𑀴𑀸𑀳𑀁 𑀅𑀫𑁆𑀳𑀸𑀓𑀁 𑀯𑀺𑀦𑁄𑀤𑁂𑀳𑀺 𑀢𑀦𑀼𑀁 𑀓𑀭𑁄𑀳𑀺, 𑀦𑁄 𑀅𑀫𑁆𑀳𑀸𑀓𑀁 𑀭𑀝𑁆𑀞𑀁 𑀲𑀓𑀮𑀭𑀝𑁆𑀞𑀚𑀦𑀧𑀤𑀯𑀸𑀲𑀺𑀦𑁄 𑀫𑀸 𑀯𑀺𑀦𑀸𑀲𑀬 𑀫𑀸 𑀯𑀺𑀦𑀸𑀲𑁂𑀳𑀻𑀢𑀺 𑀅𑀢𑁆𑀣𑁄.

𑁫𑁬𑁮. 𑀲𑀤𑁂𑀯𑀫𑀸𑀦𑀼𑀲𑀸 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀫𑀸𑀦𑀼𑀲𑀸 𑀲𑀤𑁂𑀯𑀸 𑀲𑀤𑀸𑀦𑀯𑀸 𑀧𑀳𑀸𑀭𑀸𑀤𑀸𑀤𑀻𑀳𑀺 𑀅𑀲𑀼𑀭𑁂𑀳𑀺 𑀲𑀳 𑀲𑀭𑀓𑁆𑀔𑀲𑀸 𑀅𑀬𑁄𑀫𑀬𑁂𑀦 𑀓𑀽𑀝𑁂𑀦 𑀫𑀳𑀸𑀫𑀼𑀕𑁆𑀕𑀭𑁂𑀦 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀫𑁂 𑀲𑀺𑀭𑀁 𑀫𑀬𑁆𑀳𑀁 𑀫𑀢𑁆𑀣𑀓𑀁 𑀪𑀺𑀦𑁆𑀤𑁂𑀬𑁆𑀬𑀼𑀁 𑀧𑀤𑀸𑀮𑁂𑀬𑁆𑀬𑀼𑀁.

𑁫𑁬𑁯. 𑀢𑀢𑁄 𑀧𑀭𑀁 𑀩𑀼𑀤𑁆𑀥𑀸𑀦𑀁 𑀔𑀫𑀺𑀢𑀪𑀸𑀯𑀜𑁆𑀘 𑀓𑁄𑀧𑀸𑀪𑀸𑀯𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 𑀤𑀓𑁂 𑀅𑀕𑁆𑀕𑀺 𑀦 𑀲𑀡𑁆𑀞𑀸𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀉𑀤𑀓𑁂 𑀅𑀕𑁆𑀕𑀺 𑀦 𑀲𑀡𑁆𑀞𑀸𑀢𑀺 𑀦 𑀧𑀢𑀺𑀝𑁆𑀞𑀸𑀢𑀺, 𑀬𑀣𑀸 𑀩𑀻𑀚𑀁 𑀲𑁂𑀮𑁂 𑀲𑀺𑀮𑀸𑀫𑀬𑁂 𑀧𑀩𑁆𑀩𑀢𑁂 𑀦 𑀯𑀺𑀭𑀼𑀳𑀢𑀺, 𑀬𑀣𑀸 𑀅𑀕𑀤𑁂 𑀑𑀲𑀥𑁂 𑀓𑀺𑀫𑀺 𑀧𑀸𑀡𑀓𑁄 𑀦 𑀲𑀡𑁆𑀞𑀸𑀢𑀺. 𑀢𑀣𑀸 𑀓𑁄𑀧𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑁄 𑀤𑀼𑀫𑁆𑀫𑀦𑀢𑀸 𑀩𑀼𑀤𑁆𑀥𑁂 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦 𑀚𑀸𑀬𑀢𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁫𑁭𑁦. 𑀧𑀼𑀦𑀧𑀺 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀬𑀣𑀸 𑀘 𑀪𑀽𑀫𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀘 𑀪𑀽𑀫𑀺 𑀧𑀣𑀯𑀻 𑀅𑀘𑀮𑀸 𑀦𑀺𑀘𑁆𑀘𑀮𑀸, 𑀢𑀣𑀸 𑀩𑀼𑀤𑁆𑀥𑁄 𑀅𑀘𑀮𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀲𑀸𑀕𑀭𑁄 𑀫𑀳𑀸𑀲𑀫𑀼𑀤𑁆𑀤𑁄 𑀅𑀧𑁆𑀧𑀫𑁂𑀬𑁆𑀬𑁄 𑀧𑀫𑁂𑀢𑀼𑀁 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄, 𑀢𑀣𑀸 𑀩𑀼𑀤𑁆𑀥𑁄 𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀆𑀓𑀸𑀲𑁄 𑀅𑀨𑀼𑀝𑁆𑀞𑀸𑀓𑀸𑀲𑁄 𑀅𑀦𑀦𑁆𑀢𑀓𑁄 𑀧𑀭𑀺𑀬𑁄𑀲𑀸𑀦𑀭𑀳𑀺𑀢𑁄, 𑀏𑀯𑀁 𑀢𑀣𑀸 𑀩𑀼𑀤𑁆𑀥𑁄 𑀅𑀓𑁆𑀔𑁄𑀪𑀺𑀬𑁄 𑀔𑁄𑀪𑁂𑀢𑀼𑀁 𑀆𑀮𑁄𑀴𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄.

𑁫𑁭𑁧. 𑀢𑀢𑁄 𑀧𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀔𑀫𑀦𑀯𑀘𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀤𑀸 𑀔𑀦𑁆𑀢𑀸 𑀫𑀳𑀸𑀯𑀻𑀭𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑀸𑀯𑀻𑀭𑀸 𑀉𑀢𑁆𑀢𑀫𑀯𑀻𑀭𑀺𑀬𑀯𑀦𑁆𑀢𑀸 𑀩𑀼𑀤𑁆𑀥𑀸 𑀢𑀧𑀲𑁆𑀲𑀺𑀦𑁄 𑀧𑀸𑀧𑀸𑀦𑀁 𑀢𑀧𑀦𑀢𑁄 ‘‘𑀢𑀧𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀔𑀦𑁆𑀢𑀸 𑀘 𑀔𑀦𑁆𑀢𑀺𑀬𑀸 𑀘 𑀲𑀫𑁆𑀧𑀦𑁆𑀦𑀸 𑀔𑀫𑀺𑀢𑀸 𑀘 𑀧𑀭𑁂𑀲𑀁 𑀅𑀧𑀭𑀸𑀥𑀁 𑀔𑀫𑀺𑀢𑀸 𑀲𑀳𑀺𑀢𑀸 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀦𑁆𑀢𑀸𑀦𑀁 𑀔𑀫𑀺𑀢𑀸𑀦𑀜𑁆𑀘𑀸𑀢𑀺 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀔𑀦𑁆𑀢𑀸𑀦𑀁 𑀔𑀦𑁆𑀢𑀺𑀬𑀸 𑀬𑀼𑀢𑁆𑀢𑀸𑀦𑀁 𑀔𑀫𑀺𑀢𑀸𑀦𑀁 𑀧𑀭𑀸𑀧𑀭𑀸𑀥𑀔𑀫𑀺𑀢𑀸𑀦𑀁 𑀲𑀳𑀺𑀢𑀸𑀦𑀜𑁆𑀘 𑀕𑀫𑀦𑀁 𑀙𑀦𑁆𑀤𑀸𑀤𑀻𑀳𑀺 𑀅𑀕𑀢𑀺𑀕𑀫𑀦𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁫𑁭𑁨. 𑀇𑀢𑀺 𑀇𑀤𑀁 𑀯𑀘𑀦𑀁 𑀯𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀴𑀸𑀳𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀤𑀸𑀳𑀁 𑀯𑀺𑀦𑁄𑀤𑀬𑀁 𑀯𑀺𑀦𑁄𑀤𑀬𑀦𑁆𑀢𑁄 𑀫𑀳𑀸𑀚𑀦𑀲𑁆𑀲 𑀧𑀼𑀭𑀢𑁄 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀲𑀭𑀸𑀚𑀓𑀲𑁆𑀲 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑁆𑀫𑀼𑀔𑀢𑁄 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀦𑀪𑀁 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀫𑀺 𑀉𑀕𑁆𑀕𑀜𑁆𑀙𑀻𑀢𑀺 𑀅𑀢𑁆𑀣𑁄.

𑁫𑁭𑁩. 𑀢𑁂𑀦 𑀓𑀫𑁆𑀫𑁂𑀦𑀳𑀁 𑀥𑀻𑀭𑀸𑀢𑀺 𑀥𑀻𑀭 𑀥𑀺𑀢𑀺𑀲𑀫𑁆𑀧𑀦𑁆𑀦 𑀅𑀳𑀁 𑀢𑁂𑀦 𑀓𑀫𑁆𑀫𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀓𑀢𑁂𑀦 𑀅𑀦𑀸𑀤𑀭𑀓𑀫𑁆𑀫𑁂𑀦 𑀇𑀫𑀲𑁆𑀫𑀺𑀁 𑀧𑀘𑁆𑀙𑀺𑀫𑀢𑁆𑀢𑀪𑀯𑁂 𑀳𑀻𑀦𑀢𑁆𑀢𑀁 𑀮𑀸𑀫𑀓𑀪𑀸𑀯𑀁 𑀭𑀸𑀚𑀽𑀦𑀁 𑀓𑀧𑁆𑀧𑀓𑀓𑀫𑁆𑀫𑀓𑀭𑀡𑀚𑀸𑀢𑀺𑀁 𑀅𑀚𑁆𑀛𑀼𑀧𑀸𑀕𑀢𑁄 𑀲𑀫𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀢𑀺𑀓𑁆𑀓𑀫𑁆𑀫 𑀢𑀁 𑀚𑀸𑀢𑀺𑀦𑁆𑀢𑀺 𑀢𑀁 𑀧𑀭𑀸𑀬𑀢𑁆𑀢𑀚𑀸𑀢𑀺𑀁 𑀲𑀁 𑀲𑀼𑀝𑁆𑀞𑀼 𑀅𑀢𑀺𑀓𑁆𑀓𑀫𑁆𑀫 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀧𑀸𑀯𑀺𑀲𑀺𑀁 𑀅𑀪𑀬𑀁 𑀧𑀼𑀭𑀦𑁆𑀢𑀺 𑀪𑀬𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀧𑀼𑀭𑀁 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀁 𑀧𑀸𑀯𑀺𑀲𑀺𑀁 𑀧𑀯𑀺𑀝𑁆𑀞𑁄 𑀆𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁭𑁪. 𑀢𑀤𑀸𑀧𑀺 𑀫𑀁 𑀫𑀳𑀸𑀯𑀻𑀭𑀸𑀢𑀺 𑀯𑀻𑀭𑀼𑀢𑁆𑀢𑀫 𑀢𑀤𑀸𑀧𑀺 𑀢𑀲𑁆𑀫𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀆𑀲𑀸𑀤𑀦𑀲𑀫𑀬𑁂 𑀅𑀧𑀺 𑀲𑀬𑀫𑁆𑀪𑀽 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀭𑀺𑀴𑀸𑀳𑀁 𑀆𑀲𑀸𑀤𑀦𑀳𑁂𑀢𑀼 𑀉𑀧𑁆𑀧𑀦𑁆𑀦𑀁 𑀓𑀸𑀬𑀘𑀺𑀢𑁆𑀢𑀤𑀭𑀣𑀁 𑀯𑀺𑀦𑁄𑀤𑁂𑀲𑀺 𑀤𑀽𑀭𑀻𑀅𑀓𑀸𑀲𑀺. 𑀟𑀬𑁆𑀳𑀫𑀸𑀦𑀁 𑀢𑀢𑁄 𑀏𑀯 𑀧𑀘𑁆𑀙𑀸𑀦𑀼𑀢𑀸𑀧𑁂𑀦 𑀓𑀼𑀓𑁆𑀓𑀼𑀘𑁆𑀘𑁂𑀦 𑀟𑀬𑁆𑀳𑀫𑀸𑀦𑀁 𑀲𑀦𑁆𑀢𑀧𑀦𑁆𑀢𑀁 𑀫𑀁 𑀲𑀼𑀲𑀡𑁆𑀞𑀺𑀢𑀁 𑀤𑁄𑀲𑀁 𑀤𑁄𑀲𑀢𑁄 𑀤𑀲𑁆𑀲𑀦𑁂 𑀲𑀼𑀝𑁆𑀞𑀼 𑀲𑀡𑁆𑀞𑀺𑀢𑀁 𑀤𑀺𑀲𑁆𑀯𑀸 𑀔𑀫𑀸𑀧𑀬𑀺 𑀢𑀁 𑀅𑀧𑀭𑀸𑀥𑀁 𑀅𑀥𑀺𑀯𑀸𑀲𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁭𑁫. 𑀅𑀚𑁆𑀚𑀸𑀧𑀺 𑀫𑀁 𑀫𑀳𑀸𑀯𑀻𑀭𑀸𑀢𑀺 𑀯𑀻𑀭𑀼𑀢𑁆𑀢𑀫, 𑀅𑀚𑁆𑀚𑀸𑀧𑀺 𑀢𑀼𑀬𑁆𑀳𑀁 𑀲𑀫𑀸𑀕𑀫𑀓𑀸𑀮𑁂 𑀅𑀧𑀺, 𑀢𑀺𑀳𑀕𑁆𑀕𑀻𑀪𑀺 𑀭𑀸𑀕𑀕𑁆𑀕𑀺𑀤𑁄𑀲𑀕𑁆𑀕𑀺𑀫𑁄𑀳𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺 𑀯𑀸 𑀦𑀺𑀭𑀬𑀕𑁆𑀕𑀺𑀧𑁂𑀢𑀕𑁆𑀕𑀺𑀲𑀁𑀲𑀸𑀭𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺 𑀯𑀸 𑀢𑀻𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀫𑀸𑀦𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑀁 𑀫𑀁 𑀪𑀕𑀯𑀸 𑀲𑀻𑀢𑀺𑀪𑀸𑀯𑀁 𑀤𑁄𑀫𑀦𑀲𑁆𑀲𑀯𑀺𑀦𑀸𑀲𑁂𑀦 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑀁 𑀲𑀻𑀢𑀺𑀪𑀸𑀯𑀁 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀅𑀧𑀸𑀧𑀬𑀺 𑀲𑀫𑁆𑀧𑀸𑀧𑁂𑀲𑀺. 𑀢𑀬𑁄 𑀅𑀕𑁆𑀕𑀻 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀢𑁂 𑀢𑀬𑁄 𑀅𑀕𑁆𑀕𑀻 𑀦𑀺𑀩𑁆𑀩𑀸𑀧𑁂𑀲𑀺 𑀯𑀽𑀧𑀲𑀫𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁭𑁬. 𑀏𑀯𑀁 𑀅𑀢𑁆𑀢𑀦𑁄 𑀳𑀻𑀦𑀸𑀧𑀤𑀸𑀦𑀁 𑀪𑀕𑀯𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑁂𑀧𑀺 𑀢𑀲𑁆𑀲 𑀲𑀯𑀦𑁂 𑀦𑀺𑀬𑁄𑀚𑁂𑀢𑁆𑀯𑀸 𑀑𑀯𑀤𑀦𑁆𑀢𑁄 ‘‘𑀬𑁂𑀲𑀁 𑀲𑁄𑀢𑀸𑀯𑀥𑀸𑀦𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀲𑀁 𑀢𑀼𑀫𑁆𑀳𑀸𑀓𑀁 𑀲𑁄𑀢𑀸𑀯𑀥𑀸𑀦𑀁 𑀲𑁄𑀢𑀲𑁆𑀲 𑀅𑀯𑀥𑀸𑀦𑀁 𑀞𑀧𑀦𑀁 𑀅𑀢𑁆𑀣𑀺 𑀯𑀺𑀚𑁆𑀚𑀢𑀺, 𑀢𑁂 𑀢𑀼𑀫𑁆𑀳𑁂 𑀪𑀸𑀲𑀢𑁄 𑀲𑀸𑀲𑀦𑁆𑀢𑀲𑁆𑀲 𑀫𑀫 𑀯𑀘𑀦𑀁 𑀲𑀼𑀡𑀸𑀣 𑀫𑀦𑀲𑀺 𑀓𑀭𑁄𑀣. 𑀅𑀢𑁆𑀣𑀁 𑀢𑀼𑀫𑁆𑀳𑀁 𑀧𑀯𑀓𑁆𑀔𑀸𑀫𑀻𑀢𑀺 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀫𑀫 𑀫𑀬𑀸 𑀤𑀺𑀝𑁆𑀞𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀧𑀭𑀫𑀢𑁆𑀣𑀁 𑀢𑀼𑀫𑁆𑀳𑀸𑀓𑀁 𑀧𑀯𑀓𑁆𑀔𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁭𑁭. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀬𑀫𑁆𑀪𑀼𑀁 𑀢𑀁 𑀯𑀺𑀫𑀸𑀦𑁂𑀢𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀬𑀫𑁆𑀪𑀼𑀁 𑀲𑀬𑀫𑁂𑀯 𑀪𑀽𑀢𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀁 𑀲𑀦𑁆𑀢𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀯𑀺𑀫𑀸𑀦𑁂𑀢𑁆𑀯𑀸 𑀅𑀦𑀸𑀤𑀭𑀁 𑀓𑀢𑁆𑀯𑀸 𑀢𑁂𑀦 𑀓𑀫𑁆𑀫𑁂𑀦 𑀓𑀢𑁂𑀦𑀸𑀓𑀼𑀲𑀮𑁂𑀦 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑀓𑀸𑀮𑁂 𑀅𑀳𑀁 𑀦𑀻𑀘𑀬𑁄𑀦𑀺𑀬𑀁 𑀧𑀭𑀸𑀬𑀢𑁆𑀢𑀚𑀸𑀢𑀺𑀬𑀁 𑀓𑀧𑁆𑀧𑀓𑀚𑀸𑀢𑀺𑀬𑀁 𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀅𑀫𑁆𑀳𑀺 𑀪𑀯𑀸𑀫𑀺.

𑁫𑁭𑁮. 𑀫𑀸 𑀯𑁄 𑀔𑀡𑀁 𑀯𑀺𑀭𑀸𑀥𑁂𑀣𑀸𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑀁 𑀯𑁄 𑀢𑀼𑀫𑁆𑀳𑁂 𑀫𑀸 𑀯𑀺𑀭𑀸𑀥𑁂𑀣 𑀕𑀴𑀺𑀢𑀁 𑀫𑀸 𑀓𑀭𑁄𑀣, 𑀳𑀺 𑀲𑀘𑁆𑀘𑀁 𑀔𑀡𑀸𑀢𑀻𑀢𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀢𑁆𑀢𑀸 𑀲𑁄𑀘𑀭𑁂 𑀲𑁄𑀘𑀦𑁆𑀢𑀺, ‘‘𑀫𑀬𑀁 𑀅𑀮𑀓𑁆𑀔𑀺𑀓𑀸 𑀤𑀼𑀫𑁆𑀫𑁂𑀥𑀸 𑀪𑀯𑀸𑀫𑀸’’𑀢𑀺 𑀏𑀯𑀁 𑀲𑁄𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀤𑀢𑁆𑀣𑁂 𑀅𑀢𑁆𑀢𑀦𑁄 𑀅𑀢𑁆𑀣𑁂 𑀯𑀼𑀟𑁆𑀠𑀺𑀬𑀁 𑀯𑀸𑀬𑀫𑁂𑀬𑁆𑀬𑀸𑀣 𑀯𑀻𑀭𑀺𑀬𑀁 𑀓𑀭𑁄𑀣. 𑀯𑁄 𑀢𑀼𑀫𑁆𑀳𑁂𑀳𑀺 𑀔𑀡𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄 𑀲𑀫𑀬𑁄 𑀧𑀝𑀺𑀧𑀸𑀤𑀺𑀢𑁄 𑀦𑀺𑀧𑁆𑀨𑀸𑀤𑀺𑀢𑁄 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁫𑁭𑁯. 𑀢𑀢𑁄 𑀧𑀭𑀁 𑀲𑀁𑀲𑀸𑀭𑀕𑀢𑀸𑀦𑀁 𑀆𑀤𑀻𑀦𑀯𑀁 𑀉𑀧𑀫𑀸𑀉𑀧𑀫𑁂𑀬𑁆𑀬𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀏𑀓𑀘𑁆𑀘𑀸𑀦𑀜𑁆𑀘 𑀯𑀫𑀦𑀦𑁆𑀢𑀺𑀆𑀤𑀺𑀫𑀸𑀳. 𑀏𑀓𑀘𑁆𑀘𑀸𑀦𑀁 𑀓𑁂𑀲𑀜𑁆𑀘𑀺 𑀧𑀼𑀕𑁆𑀕𑀮𑀸𑀦𑀁 𑀯𑀫𑀦𑀁 𑀉𑀤𑁆𑀥𑀁 𑀉𑀕𑁆𑀕𑀺𑀭𑀡𑀁 𑀏𑀓𑀘𑁆𑀘𑀸𑀦𑀁 𑀯𑀺𑀭𑁂𑀘𑀦𑀁 𑀅𑀥𑁄𑀧𑀕𑁆𑀖𑀭𑀡𑀁 𑀏𑀓𑁂 𑀏𑀓𑀘𑁆𑀘𑀸𑀦𑀁 𑀳𑀮𑀸𑀳𑀮𑀁 𑀯𑀺𑀲𑀁 𑀫𑀼𑀘𑁆𑀙𑀸𑀓𑀭𑀡𑀯𑀺𑀲𑀁, 𑀏𑀓𑀘𑁆𑀘𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀑𑀲𑀥𑀁 𑀭𑀓𑁆𑀔𑀦𑀼𑀧𑀸𑀬𑀁 𑀪𑀕𑀯𑀸 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀅𑀓𑁆𑀔𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁮𑁦. 𑀯𑀫𑀦𑀁 𑀧𑀝𑀺𑀧𑀦𑁆𑀦𑀸𑀦𑀦𑁆𑀢𑀺 𑀧𑀝𑀺𑀧𑀦𑁆𑀦𑀸𑀦𑀁 𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀯𑀫𑀦𑀁 𑀲𑀁𑀲𑀸𑀭𑀙𑀟𑁆𑀟𑀦𑀁 𑀲𑀁𑀲𑀸𑀭𑀫𑁄𑀘𑀦𑀁 𑀪𑀕𑀯𑀸 𑀅𑀓𑁆𑀔𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀨𑀮𑀝𑁆𑀞𑀸𑀦𑀁 𑀨𑀮𑁂 𑀞𑀺𑀢𑀸𑀦𑀁 𑀯𑀺𑀭𑁂𑀘𑀦𑀁 𑀲𑀁𑀲𑀸𑀭𑀧𑀕𑁆𑀖𑀭𑀡𑀁 𑀅𑀓𑁆𑀔𑀸𑀲𑀺. 𑀨𑀮𑀮𑀸𑀪𑀻𑀦𑀁 𑀨𑀮𑀁 𑀮𑀪𑀺𑀢𑁆𑀯𑀸 𑀞𑀺𑀢𑀸𑀦𑀁 𑀦𑀺𑀩𑁆𑀩𑀸𑀦𑀑𑀲𑀥𑀁 𑀅𑀓𑁆𑀔𑀸𑀲𑀺. 𑀕𑀯𑁂𑀲𑀻𑀦𑀁 𑀫𑀦𑀼𑀲𑁆𑀲𑀤𑁂𑀯𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀕𑀯𑁂𑀲𑀻𑀦𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀁 𑀧𑀼𑀜𑁆𑀜𑀔𑁂𑀢𑁆𑀢𑀪𑀽𑀢𑀁 𑀲𑀗𑁆𑀖𑀁 𑀅𑀓𑁆𑀔𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁮𑁧. 𑀲𑀸𑀲𑀦𑁂𑀦 𑀯𑀺𑀭𑀼𑀤𑁆𑀥𑀸𑀦𑀦𑁆𑀢𑀺 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀸𑀦𑀁 𑀳𑀮𑀸𑀳𑀮𑀁 𑀓𑀼𑀢𑀽𑀳𑀮𑀁 𑀧𑀸𑀧𑀁 𑀅𑀓𑀼𑀲𑀮𑀁 𑀅𑀓𑁆𑀔𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀆𑀲𑀻𑀯𑀺𑀲𑁄𑀢𑀺 𑀅𑀲𑁆𑀲𑀤𑁆𑀥𑀸𑀦𑀁 𑀓𑀢𑀧𑀸𑀧𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀁𑀲𑀸𑀭𑁂 𑀤𑀼𑀓𑁆𑀔𑀸𑀯𑀳𑀦𑀢𑁄 𑀆𑀲𑀻𑀯𑀺𑀲𑀲𑀤𑀺𑀲𑀁 𑀬𑀣𑀸 𑀆𑀲𑀻𑀯𑀺𑀲𑁄 𑀤𑀺𑀝𑁆𑀞𑀫𑀢𑁆𑀢𑁂𑀦 𑀪𑀲𑁆𑀫𑀓𑀭𑀡𑀢𑁄 𑀤𑀺𑀝𑁆𑀞𑀯𑀺𑀲𑁄 𑀲𑀧𑁆𑀧𑁄 𑀅𑀢𑁆𑀢𑀦𑀸 𑀤𑀝𑁆𑀞𑀁 𑀦𑀭𑀁 𑀛𑀸𑀧𑁂𑀢𑀺 𑀟𑀬𑁆𑀳𑀢𑀺 𑀤𑀼𑀓𑁆𑀔𑀸𑀧𑁂𑀢𑀺. 𑀢𑀁 𑀦𑀭𑀁 𑀢𑀁 𑀅𑀲𑁆𑀲𑀤𑁆𑀥𑀁 𑀓𑀢𑀧𑀸𑀧𑀁 𑀦𑀭𑀁 𑀳𑀮𑀸𑀳𑀮𑀯𑀺𑀲𑀁 𑀏𑀯𑀁 𑀛𑀸𑀧𑁂𑀢𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀟𑀬𑁆𑀳𑀢𑀺 𑀲𑁄𑀲𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁮𑁨. 𑀲𑀓𑀺𑀁 𑀧𑀻𑀢𑀁 𑀳𑀮𑀸𑀳𑀮𑀦𑁆𑀢𑀺 𑀯𑀺𑀲𑀁 𑀳𑀮𑀸𑀳𑀮𑀁 𑀧𑀻𑀢𑀁 𑀲𑀓𑀺𑀁 𑀏𑀓𑀯𑀸𑀭𑀁 𑀚𑀻𑀯𑀺𑀢𑀁 𑀉𑀧𑀭𑀼𑀦𑁆𑀥𑀢𑀺 𑀦𑀸𑀲𑁂𑀢𑀺. 𑀲𑀸𑀲𑀦𑁂𑀦 𑀲𑀸𑀲𑀦𑀫𑁆𑀳𑀺 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀧𑀭𑀸𑀥𑀁 𑀓𑀢𑁆𑀯𑀸 𑀧𑀼𑀕𑁆𑀕𑀮𑁄 𑀓𑀧𑁆𑀧𑀓𑁄𑀝𑀺𑀫𑁆𑀳𑀺 𑀓𑁄𑀝𑀺𑀲𑀗𑁆𑀔𑁆𑀬𑁂 𑀓𑀧𑁆𑀧𑁂𑀧𑀺 𑀟𑀬𑁆𑀳𑀢𑀺 𑀦𑀺𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄.

𑁫𑁮𑁩. 𑀏𑀯𑀁 𑀅𑀲𑁆𑀲𑀤𑁆𑀥𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀨𑀮𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀔𑀦𑁆𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀩𑀼𑀤𑁆𑀥𑁄 𑀯𑀫𑀦𑀸𑀤𑀻𑀦𑀺 𑀅𑀓𑁆𑀔𑀸𑀲𑀺, 𑀲𑁄 𑀩𑀼𑀤𑁆𑀥𑁄 𑀔𑀦𑁆𑀢𑀺𑀬𑀸 𑀔𑀫𑀦𑁂𑀦 𑀘 𑀅𑀯𑀺𑀳𑀺𑀁𑀲𑀸𑀬 𑀲𑀢𑁆𑀢𑀸𑀦𑀁 𑀅𑀯𑀺𑀳𑀺𑀁𑀲𑀦𑁂𑀦 𑀘 𑀫𑁂𑀢𑁆𑀢𑀘𑀺𑀢𑁆𑀢𑀯𑀢𑀸𑀬 𑀘 𑀫𑁂𑀢𑁆𑀢𑀘𑀺𑀢𑁆𑀢𑀯𑀦𑁆𑀢𑀪𑀸𑀯𑁂𑀦 𑀘 𑀲𑀤𑁂𑀯𑀓𑀁 𑀲𑀳 𑀤𑁂𑀯𑁂𑀳𑀺 𑀯𑀢𑁆𑀢𑀫𑀸𑀦𑀁 𑀮𑁄𑀓𑀁 𑀢𑀸𑀭𑁂𑀢𑀺 𑀅𑀢𑀺𑀓𑁆𑀓𑀫𑀸𑀧𑁂𑀢𑀺 𑀦𑀺𑀩𑁆𑀩𑀸𑀧𑁂𑀢𑀺, 𑀢𑀲𑁆𑀫𑀸 𑀓𑀸𑀭𑀡𑀸 𑀩𑀼𑀤𑁆𑀥𑀸 𑀯𑁄 𑀢𑀼𑀫𑁆𑀳𑁂𑀳𑀺 𑀅𑀯𑀺𑀭𑀸𑀥𑀺𑀬𑀸 𑀯𑀺𑀭𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸, 𑀩𑀼𑀤𑁆𑀥𑀲𑀸𑀲𑀦𑁂 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣𑀸𑀢𑀺 𑀅𑀢𑁆𑀣𑁄.

𑁫𑁮𑁪. 𑀮𑀸𑀪𑁂 𑀘 𑀅𑀮𑀸𑀪𑁂 𑀘 𑀦 𑀲𑀚𑁆𑀚𑀦𑁆𑀢𑀺 𑀦 𑀪𑀚𑀦𑁆𑀢𑀺 𑀦 𑀮𑀕𑁆𑀕𑀦𑁆𑀢𑀺. 𑀲𑀫𑁆𑀫𑀸𑀦𑀦𑁂 𑀆𑀤𑀭𑀓𑀭𑀡𑁂 𑀘 𑀯𑀺𑀫𑀸𑀦𑀦𑁂 𑀅𑀦𑀸𑀤𑀭𑀓𑀭𑀡𑁂 𑀘 𑀅𑀘𑀮𑀸 𑀧𑀣𑀯𑀻𑀲𑀤𑀺𑀲𑀸 𑀩𑀼𑀤𑁆𑀥𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀓𑀸𑀭𑀡𑀸 𑀢𑁂 𑀩𑀼𑀤𑁆𑀥𑀸 𑀢𑀼𑀫𑁆𑀳𑁂𑀳𑀺 𑀦 𑀯𑀺𑀭𑁄𑀥𑀺𑀬𑀸 𑀦 𑀯𑀺𑀭𑁄𑀥𑁂𑀢𑀩𑁆𑀩𑀸 𑀯𑀺𑀭𑀼𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁫𑁮𑁫. 𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑀢𑁆𑀢𑀢𑀁 𑀤𑀲𑁆𑀲𑁂𑀦𑁆𑀢𑁄 𑀤𑁂𑀯𑀤𑀢𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀥𑀓𑀸𑀯𑀥𑀓𑁂𑀲𑀼 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀲𑀫𑀓𑁄 𑀲𑀫𑀫𑀸𑀦𑀲𑁄 𑀫𑀼𑀦𑀺 𑀩𑀼𑀤𑁆𑀥𑀫𑀼𑀦𑀻𑀢𑀺 𑀅𑀢𑁆𑀣𑁄.

𑁫𑁮𑁬. 𑀏𑀢𑁂𑀲𑀁 𑀧𑀝𑀺𑀖𑁄 𑀦𑀢𑁆𑀣𑀻𑀢𑀺 𑀏𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀧𑀝𑀺𑀖𑁄 𑀘𑀡𑁆𑀟𑀺𑀓𑁆𑀓𑀁 𑀤𑁄𑀲𑀘𑀺𑀢𑁆𑀢𑀢𑀁 𑀦𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀭𑀸𑀕𑁄𑀫𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀇𑀫𑁂𑀲𑀁 𑀩𑀼𑀤𑁆𑀥𑀸𑀦𑀁 𑀭𑀸𑀕𑁄𑀧𑀺 𑀭𑀚𑁆𑀚𑀦𑀁 𑀅𑀮𑁆𑀮𑀻𑀬𑀦𑀁 𑀦 𑀯𑀺𑀚𑁆𑀚𑀢𑀺, 𑀦 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀓𑀸𑀭𑀡𑀸, 𑀯𑀥𑀓𑀲𑁆𑀲 𑀘 𑀑𑀭𑀲𑀲𑁆𑀲 𑀘𑀸𑀢𑀺 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀲𑀫𑀘𑀺𑀢𑁆𑀢𑁄 𑀩𑀼𑀤𑁆𑀥𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁮𑁭. 𑀧𑀼𑀦𑀧𑀺 𑀩𑀼𑀤𑁆𑀥𑀸𑀦𑀁𑀬𑁂𑀯 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀧𑀦𑁆𑀣𑁂 𑀤𑀺𑀲𑁆𑀯𑀸𑀦 𑀓𑀸𑀲𑀸𑀯𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀻𑀴𑁆𑀳𑀫𑀓𑁆𑀔𑀺𑀢𑀁 𑀕𑀽𑀣𑀲𑀫𑁆𑀫𑀺𑀲𑁆𑀲𑀁 𑀓𑀸𑀲𑀸𑀯𑀁 𑀓𑀲𑀸𑀯𑁂𑀦 𑀭𑀚𑀺𑀢𑀁 𑀘𑀻𑀯𑀭𑀁 𑀇𑀲𑀺𑀤𑁆𑀥𑀚𑀁 𑀅𑀭𑀺𑀬𑀸𑀦𑀁 𑀥𑀚𑀁 𑀧𑀭𑀺𑀓𑁆𑀔𑀸𑀭𑀁, 𑀧𑀦𑁆𑀣𑁂 𑀫𑀕𑁆𑀕𑁂 𑀙𑀟𑁆𑀟𑀺𑀢𑀁 𑀤𑀺𑀲𑁆𑀯𑀸𑀦 𑀧𑀲𑁆𑀲𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀤𑀲𑀗𑁆𑀕𑀼𑀮𑀺𑀲𑀫𑁄𑀥𑀸𑀦𑀁 𑀅𑀜𑁆𑀚𑀮𑀺𑀧𑀼𑀝𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀲𑀺𑀭𑀲𑀸 𑀲𑀺𑀭𑁂𑀦 𑀯𑀦𑁆𑀤𑀺𑀢𑀩𑁆𑀩𑀁 𑀇𑀲𑀺𑀤𑁆𑀥𑀚𑀁 𑀅𑀭𑀳𑀢𑁆𑀢𑀤𑁆𑀥𑀚𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀤𑀻𑀧𑀓𑀁 𑀘𑀻𑀯𑀭𑀁 𑀦𑀫𑀲𑁆𑀲𑀺𑀢𑀩𑁆𑀩𑀁 𑀫𑀸𑀦𑁂𑀢𑀩𑁆𑀩𑀁 𑀧𑀽𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁫𑁮𑁮. 𑀅𑀩𑁆𑀪𑀢𑀻𑀢𑀸𑀢𑀺 𑀅𑀪𑀺 𑀅𑀢𑁆𑀣𑀗𑁆𑀕𑀢𑀸 𑀦𑀺𑀩𑁆𑀩𑀼𑀢𑀸. 𑀬𑁂 𑀘 𑀩𑀼𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀇𑀤𑀸𑀦𑀺 𑀚𑀸𑀢𑀸 𑀘 𑀬𑁂 𑀩𑀼𑀤𑁆𑀥𑀸 𑀅𑀦𑀸𑀕𑀢𑀸 𑀅𑀚𑀸𑀢𑀸 𑀅𑀪𑀽𑀢𑀸 𑀅𑀦𑀺𑀩𑁆𑀩𑀢𑁆𑀢𑀸 𑀅𑀧𑀸𑀢𑀼𑀪𑀽𑀢𑀸 𑀘 𑀬𑁂 𑀩𑀼𑀤𑁆𑀥𑀸. 𑀥𑀚𑁂𑀦𑀸𑀦𑁂𑀦 𑀲𑀼𑀚𑁆𑀛𑀦𑁆𑀢𑀻𑀢𑀺 𑀅𑀦𑁂𑀦 𑀇𑀲𑀺𑀤𑁆𑀥𑀚𑁂𑀦 𑀘𑀻𑀯𑀭𑁂𑀦 𑀏𑀢𑁂 𑀩𑀼𑀤𑁆𑀥𑀸 𑀲𑀼𑀚𑁆𑀛𑀦𑁆𑀢𑀺 𑀯𑀺𑀲𑀼𑀤𑁆𑀥𑀸 𑀪𑀯𑀦𑁆𑀢𑀺 𑀲𑁄𑀪𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀦 𑀓𑀸𑀭𑀡𑁂𑀦 𑀏𑀢𑁂 𑀩𑀼𑀤𑁆𑀥𑀸 𑀦𑀫𑀲𑁆𑀲𑀺𑀬𑀸 𑀦𑀫𑀲𑁆𑀲𑀺𑀢𑀩𑁆𑀩𑀸 𑀯𑀦𑁆𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀏𑀢𑀁 𑀦𑀫𑀲𑁆𑀲𑀺𑀬’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀏𑀢𑀁 𑀇𑀲𑀺𑀤𑁆𑀥𑀚𑀁 𑀦𑀫𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁫𑁮𑁯. 𑀢𑀢𑁄 𑀧𑀭𑀁 𑀅𑀢𑁆𑀢𑀦𑁄 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀼𑀓𑀧𑁆𑀧𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑁆𑀣𑀼𑀓𑀧𑁆𑀧𑀁 𑀩𑀼𑀤𑁆𑀥𑀲𑀤𑀺𑀲𑀁 𑀲𑀼𑀯𑀺𑀦𑀬𑀁 𑀲𑀼𑀦𑁆𑀤𑀭𑀯𑀺𑀦𑀬𑀁 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀤𑁆𑀯𑀸𑀭𑀢𑁆𑀢𑀬𑀤𑀫𑀦𑀁 𑀳𑀤𑀬𑁂𑀦 𑀘𑀺𑀢𑁆𑀢𑁂𑀦 𑀅𑀳𑀁 𑀥𑀸𑀭𑁂𑀫𑀺 𑀲𑀯𑀦𑀥𑀸𑀭𑀡𑀸𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀁 𑀯𑀺𑀦𑀬𑀧𑀺𑀝𑀓𑀁 𑀦𑀫𑀲𑁆𑀲𑀫𑀸𑀦𑁄 𑀯𑀦𑁆𑀤𑀫𑀸𑀦𑁄 𑀯𑀺𑀦𑀬𑁂 𑀆𑀤𑀭𑀁 𑀓𑀼𑀭𑀼𑀫𑀸𑀦𑁄 𑀯𑀺𑀳𑀭𑀺𑀲𑁆𑀲𑀸𑀫𑀺 𑀲𑀩𑁆𑀩𑀤𑀸 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀯𑀸𑀲𑀁 𑀓𑀧𑁆𑀧𑁂𑀫𑀻𑀢𑀺 𑀅𑀢𑁆𑀣𑁄.

𑁫𑁯𑁦. 𑀯𑀺𑀦𑀬𑁄 𑀆𑀲𑀬𑁄 𑀫𑀬𑁆𑀳𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀁 𑀫𑀬𑁆𑀳𑀁 𑀑𑀓𑀸𑀲𑀪𑀽𑀢𑀁 𑀲𑀯𑀦𑀥𑀸𑀭𑀡𑀫𑀦𑀲𑀺𑀓𑀭𑀡𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀧𑀯𑀢𑁆𑀢𑀦𑀯𑀲𑁂𑀦 𑀑𑀓𑀸𑀲𑀪𑀽𑀢𑀁 𑀕𑁂𑀳𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀦𑀬𑁄 𑀞𑀸𑀦𑀘𑀗𑁆𑀓𑀫𑀦𑁆𑀢𑀺 𑀯𑀺𑀦𑀬𑁄 𑀫𑀬𑁆𑀳𑀁 𑀲𑀯𑀦𑀸𑀤𑀺𑀓𑀺𑀘𑁆𑀘𑀓𑀭𑀡𑁂𑀦 𑀞𑀺𑀢𑀝𑁆𑀞𑀸𑀦𑀜𑁆𑀘 𑀘𑀗𑁆𑀓𑀫𑀦𑀝𑁆𑀞𑀸𑀦𑀜𑁆𑀘. 𑀓𑀧𑁆𑀧𑁂𑀫𑀺 𑀯𑀺𑀦𑀬𑁂 𑀯𑀸𑀲𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑁂 𑀯𑀺𑀦𑀬𑀢𑀦𑁆𑀢𑀺𑀬𑀸 𑀲𑀯𑀦𑀥𑀸𑀭𑀡𑀧𑀯𑀢𑁆𑀢𑀦𑀯𑀲𑁂𑀦 𑀯𑀸𑀲𑀁 𑀲𑀬𑀦𑀁 𑀓𑀧𑁆𑀧𑁂𑀫𑀺 𑀓𑀭𑁄𑀫𑀺. 𑀯𑀺𑀦𑀬𑁄 𑀫𑀫 𑀕𑁄𑀘𑀭𑁄𑀢𑀺 𑀯𑀺𑀦𑀬𑀧𑀺𑀝𑀓𑀁 𑀫𑀬𑁆𑀳𑀁 𑀕𑁄𑀘𑀭𑁄 𑀆𑀳𑀸𑀭𑁄 𑀪𑁄𑀚𑀦𑀁 𑀦𑀺𑀘𑁆𑀘𑀁 𑀥𑀸𑀭𑀡𑀫𑀦𑀲𑀺𑀓𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁫𑁯𑁧. 𑀯𑀺𑀦𑀬𑁂 𑀧𑀸𑀭𑀫𑀺𑀧𑁆𑀧𑀢𑁆𑀢𑁄𑀢𑀺 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑁄. 𑀲𑀫𑀣𑁂 𑀘𑀸𑀧𑀺 𑀓𑁄𑀯𑀺𑀤𑁄𑀢𑀺 𑀧𑀸𑀭𑀸𑀚𑀺𑀓𑀸𑀤𑀺𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀲𑀫𑀣𑁂 𑀯𑀽𑀧𑀲𑀫𑁂 𑀘 𑀯𑀼𑀝𑁆𑀞𑀸𑀦𑁂 𑀘 𑀓𑁄𑀯𑀺𑀤𑁄 𑀙𑁂𑀓𑁄, 𑀅𑀥𑀺𑀓𑀭𑀡𑀲𑀫𑀣𑁂 𑀯𑀸 𑁋

‘‘𑀯𑀺𑀯𑀸𑀤𑀁 𑀅𑀦𑀼𑀯𑀸𑀤𑀜𑁆𑀘, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀢𑀣𑀸;

𑀓𑀺𑀘𑁆𑀘𑀸𑀥𑀺𑀓𑀭𑀡𑀜𑁆𑀘𑁂𑀯, 𑀘𑀢𑀼𑀭𑀸𑀥𑀺𑀓𑀭𑀡𑀸 𑀫𑀢𑀸’’𑀢𑀺. 𑁋

𑀯𑀼𑀢𑁆𑀢𑀸𑀥𑀺𑀓𑀭𑀡𑁂𑀲𑀼 𑀘 𑁋

‘‘𑀲𑀫𑁆𑀫𑀼𑀔𑀸 𑀲𑀢𑀺𑀯𑀺𑀦𑀬𑁄, 𑀅𑀫𑀽𑀴𑁆𑀳𑀧𑀝𑀺𑀜𑁆𑀜𑀸𑀓𑀭𑀡𑀁;

𑀬𑁂𑀪𑀼𑀬𑁆𑀬 𑀢𑀲𑁆𑀲𑀧𑀸𑀧𑀺𑀬𑁆𑀬, 𑀢𑀺𑀡𑀯𑀢𑁆𑀣𑀸𑀭𑀓𑁄 𑀢𑀣𑀸’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀥𑀺𑀓𑀭𑀡𑀲𑀫𑀣𑁂𑀲𑀼 𑀅𑀢𑀺𑀓𑁄𑀯𑀺𑀤𑁄 𑀙𑁂𑀓𑁄𑀢𑀺 𑀅𑀢𑁆𑀣𑁄. 𑀉𑀧𑀸𑀮𑀺 𑀢𑀁 𑀫𑀳𑀸𑀯𑀻𑀭𑀸𑀢𑀺 𑀪𑀦𑁆𑀢𑁂 𑀫𑀳𑀸𑀯𑀻𑀭, 𑀘𑀢𑀽𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀸𑀬 𑀯𑀻𑀭𑀺𑀬𑀯𑀦𑁆𑀢 𑀲𑀢𑁆𑀣𑀼𑀦𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀲𑀸𑀲𑀓𑀲𑁆𑀲 𑀢𑀁 𑀢𑀯 𑀧𑀸𑀤𑁂 𑀧𑀸𑀤𑀬𑀼𑀕𑁂 𑀉𑀧𑀸𑀮𑀺 𑀪𑀺𑀓𑁆𑀔𑀼 𑀯𑀦𑁆𑀤𑀢𑀺 𑀧𑀡𑀸𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑁫𑁯𑁨. 𑀲𑁄 𑀅𑀳𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁 𑀦𑀫𑀲𑁆𑀲𑀫𑀸𑀦𑁄 𑀧𑀡𑀸𑀫𑀁 𑀓𑀼𑀭𑀼𑀫𑀸𑀦𑁄 𑀥𑀫𑁆𑀫𑀲𑁆𑀲 𑀘 𑀢𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀲𑁆𑀲 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀲𑀼𑀥𑀫𑁆𑀫𑀢𑀁 𑀲𑀼𑀦𑁆𑀤𑀭𑀥𑀫𑁆𑀫𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀥𑀫𑁆𑀫𑀜𑁆𑀘 𑀦𑀫𑀲𑁆𑀲𑀫𑀸𑀦𑁄 𑀕𑀸𑀫𑀢𑁄 𑀕𑀸𑀫𑀁 𑀧𑀼𑀭𑀢𑁄 𑀧𑀼𑀦𑀁 𑀦𑀕𑀭𑀢𑁄 𑀦𑀕𑀭𑀁 𑀯𑀺𑀘𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁯𑁩. 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀦𑁆𑀢𑀺 𑀫𑀬𑀸 𑀧𑀝𑀺𑀯𑀺𑀤𑁆𑀥𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀫𑀬𑁆𑀳𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀲𑀩𑁆𑀩𑁂 𑀤𑀺𑀬𑀟𑁆𑀠𑀲𑀳𑀲𑁆𑀲𑀲𑀗𑁆𑀔𑀸 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀯𑀺𑀤𑁆𑀥𑀁𑀲𑀺𑀢𑀸. 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸𑀢𑀺 𑀓𑀸𑀫𑀪𑀯𑀸𑀤𑀬𑁄 𑀲𑀩𑁆𑀩𑁂 𑀦𑀯 𑀪𑀯𑀸 𑀫𑀬𑀸 𑀲𑀫𑀽𑀳𑀢𑀸 𑀲𑀁 𑀲𑀼𑀝𑁆𑀞𑀼 𑀊𑀳𑀢𑀸 𑀔𑁂𑀧𑀺𑀢𑀸 𑀯𑀺𑀤𑁆𑀥𑀁𑀲𑀺𑀢𑀸. 𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸𑀢𑀺 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀲𑀩𑁆𑀩𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀧𑀭𑀺𑀲𑀫𑀦𑁆𑀢𑀢𑁄 𑀔𑀬𑀁 𑀧𑀸𑀧𑀺𑀢𑀸. 𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂 𑀧𑀼𑀦𑀩𑁆𑀪𑀯𑁄 𑀧𑀼𑀦𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀪𑀯𑁄 𑀪𑀯𑀦𑀁 𑀚𑀸𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁫𑁯𑁪. 𑀉𑀢𑁆𑀢𑀭𑀺 𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀲𑁆𑀯𑀸𑀕𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀉𑀢𑁆𑀢𑀫𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀻𑀧𑁂 𑀏𑀓𑀦𑀕𑀭𑁂 𑀯𑀸 𑀫𑀫 𑀆𑀕𑀫𑀦𑀁 𑀲𑁆𑀯𑀸𑀕𑀢𑀁 𑀲𑀼𑀝𑁆𑀞𑀼 𑀆𑀕𑀫𑀦𑀁 𑀲𑀼𑀦𑁆𑀤𑀭𑀸𑀕𑀫𑀦𑀁 𑀯𑀢 𑀏𑀓𑀦𑁆𑀢𑁂𑀦 𑀆𑀲𑀺 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀆𑀲𑀯𑀓𑁆𑀔𑀬𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸 𑀲𑀫𑁆𑀧𑀢𑁆𑀢𑀸, 𑀧𑀘𑁆𑀘𑀓𑁆𑀔𑀁 𑀓𑀢𑀸𑀢𑀺 𑀅𑀢𑁆𑀣𑁄. 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀅𑀦𑀼𑀲𑀺𑀝𑁆𑀞𑀺 𑀲𑀸𑀲𑀦𑀁 𑀓𑀢𑀁 𑀦𑀺𑀧𑁆𑀨𑀸𑀤𑀺𑀢𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀥𑀺𑀕𑀫𑁂𑀦 𑀲𑀫𑁆𑀧𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁫𑁯𑁫. 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀘𑀢𑀲𑁆𑀲𑁄 𑀧𑀜𑁆𑀜𑀸𑀬𑁄 𑀲𑀘𑁆𑀙𑀺𑀓𑀢𑀸 𑀧𑀘𑁆𑀘𑀓𑁆𑀔𑀁 𑀓𑀢𑀸. 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂𑀢𑀺 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀺 𑀨𑀮𑀜𑀸𑀡𑀸𑀦𑀻𑀢𑀺 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀦𑀽𑀧𑀸𑀬𑀸 𑀲𑀘𑁆𑀙𑀺𑀓𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸𑀢𑀺 𑁋

‘‘𑀇𑀤𑁆𑀥𑀺𑀯𑀺𑀥𑀁 𑀤𑀺𑀩𑁆𑀩𑀲𑁄𑀢𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀓𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀜𑁆𑀘, 𑀤𑀺𑀩𑁆𑀩𑀘𑀓𑁆𑀔𑀸𑀲𑀯𑀓𑁆𑀔𑀬’’𑀦𑁆𑀢𑀺. 𑁋

𑀇𑀫𑀸 𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸 𑀧𑀘𑁆𑀘𑀓𑁆𑀔𑀁 𑀓𑀢𑀸. 𑀇𑀫𑁂𑀲𑀁 𑀜𑀸𑀡𑀸𑀦𑀁 𑀲𑀘𑁆𑀙𑀺𑀓𑀭𑀡𑁂𑀦 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀲𑀼𑀤𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀣𑁂𑀭𑁄𑀢𑀺 𑀣𑀺𑀭𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀲𑀸𑀯𑀓𑁄 𑀇𑀫𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀤𑀻𑀧𑀺𑀓𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣 𑀓𑀣𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀉𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁭. 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀁 𑀓𑀺𑀭 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀧𑀞𑀫𑀁 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 𑀪𑀸𑀯𑀺𑀦𑀺𑀁 𑀲𑀫𑁆𑀧𑀢𑁆𑀢𑀺𑀁 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀘𑁂𑀢𑀺𑀬𑁂 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑁂 𑀅𑀦𑁆𑀢𑁄𑀘𑁂𑀢𑀺𑀬𑁂 𑀭𑀢𑀦𑀖𑀭𑀁 𑀓𑀸𑀭𑀸𑀧𑁂𑀲𑀺, 𑀘𑁂𑀢𑀺𑀬𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀳𑀲𑁆𑀲𑀭𑀢𑀦𑀕𑁆𑀖𑀺𑀓𑀸𑀦𑀺 𑀘 𑀓𑀸𑀭𑁂𑀲𑀺.

𑀲𑁄 𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀓𑀸𑀮𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀳𑀼𑀢𑁆𑀯𑀸 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑁂 𑀔𑁂𑀢𑁆𑀢𑁂 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀸𑀬𑀸𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀫𑀥𑀼𑀲𑀧𑁆𑀧𑀺𑀲𑀓𑁆𑀓𑀭𑀸𑀤𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀼𑀦 𑀧𑀽𑀭𑀢𑀺. 𑀧𑀼𑀣𑀼𑀓𑀓𑀸𑀮𑁂 𑀧𑀼𑀣𑀼𑀓𑀕𑁆𑀕𑀁 𑀦𑀸𑀫 𑀅𑀤𑀸𑀲𑀺. 𑀮𑀸𑀬𑀦𑁂 𑀮𑀸𑀬𑀦𑀕𑁆𑀕𑀁, 𑀯𑁂𑀡𑀺𑀓𑀭𑀡𑁂 𑀯𑁂𑀡𑀕𑁆𑀕𑀁, 𑀓𑀮𑀸𑀧𑀸𑀤𑀺𑀓𑀭𑀡𑁂 𑀓𑀮𑀸𑀧𑀕𑁆𑀕𑀁, 𑀔𑀮𑀕𑁆𑀕𑀁, 𑀪𑀡𑁆𑀟𑀕𑁆𑀕𑀁, 𑀫𑀺𑀦𑀕𑁆𑀕𑀁 𑀓𑁄𑀝𑁆𑀞𑀕𑁆𑀕𑀦𑁆𑀢𑀺 𑀏𑀯𑀁 𑀏𑀓𑀲𑀲𑁆𑀲𑁂 𑀦𑀯 𑀯𑀸𑀭𑁂 𑀅𑀕𑁆𑀕𑀤𑀸𑀦𑀁 𑀅𑀤𑀸𑀲𑀺, 𑀢𑀫𑁆𑀧𑀺 𑀲𑀲𑁆𑀲𑀁 𑀅𑀢𑀺𑀭𑁂𑀓𑀢𑀭𑀁 𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀺.

𑀏𑀯𑀁 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀤𑁄𑀡𑀯𑀢𑁆𑀣𑀼𑀦𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀓𑁄𑀡𑁆𑀟𑀜𑁆𑀜𑁄𑀢𑀺 𑀕𑁄𑀢𑁆𑀢𑀢𑁄 𑀆𑀕𑀢𑀁 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀮𑀓𑁆𑀔𑀡𑀫𑀦𑁆𑀢𑁂𑀲𑀼 𑀘 𑀧𑀸𑀭𑀁 𑀅𑀕𑀫𑀸𑀲𑀺. 𑀢𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀝𑁆𑀞𑀼𑀢𑁆𑀢𑀭𑀲𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀧𑀦𑀻𑀢𑁂𑀲𑀼 𑀬𑁂 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀡𑀢𑁆𑀣𑀁 𑀫𑀳𑀸𑀢𑀮𑀁 𑀉𑀧𑀦𑀻𑀢𑀸. 𑀲𑁄 𑀢𑁂𑀲𑀼 𑀲𑀩𑁆𑀩𑀦𑀯𑀓𑁄 𑀳𑀼𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀮𑀓𑁆𑀔𑀡𑀦𑀺𑀧𑁆𑀨𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀓𑀁𑀲𑁂𑀦 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀉𑀤𑀺𑀓𑁆𑀔𑀦𑁆𑀢𑁄 𑀯𑀺𑀘𑀭𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀜𑀸𑀡𑀧𑀭𑀺𑀧𑀸𑀓𑀁 𑀕𑀦𑁆𑀢𑁆𑀯𑀸 𑀏𑀓𑀽𑀦𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀧𑀥𑀸𑀦𑀁 𑀧𑀤𑀳𑀺. 𑀢𑀤𑀸 𑀓𑁄𑀡𑁆𑀟𑀜𑁆𑀜𑁄 𑀫𑀸𑀡𑀯𑁄 𑀫𑀳𑀸𑀲𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑁂𑀳𑀺 𑀯𑀧𑁆𑀧𑀫𑀸𑀡𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀧𑀜𑁆𑀘𑀫𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀢𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑀲𑁆𑀲 𑀑𑀴𑀸𑀭𑀺𑀓𑀸𑀳𑀸𑀭𑀧𑀭𑀺𑀪𑁄𑀕𑁂𑀦 𑀦𑀺𑀩𑁆𑀩𑀺𑀦𑁆𑀦𑁄 𑀅𑀧𑀓𑁆𑀓𑀫𑀺𑀢𑁆𑀯𑀸 𑀇𑀲𑀺𑀧𑀢𑀦𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑁄 𑀑𑀴𑀸𑀭𑀺𑀓𑀸𑀳𑀸𑀭𑀧𑀭𑀺𑀪𑁄𑀕𑁂𑀦 𑀮𑀤𑁆𑀥𑀓𑀸𑀬𑀩𑀮𑁄 𑀯𑁂𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬𑀁 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 (𑀫𑀳𑀸𑀯. 𑁧𑁩 𑀆𑀤𑀬𑁄; 𑀲𑀁. 𑀦𑀺. 𑁫.𑁧𑁦𑁮𑁧) 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀧𑀜𑁆𑀘𑀫𑀺𑀬𑀁 𑀧𑀓𑁆𑀔𑀲𑁆𑀲 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 (𑀫𑀳𑀸𑀯. 𑁨𑁦 𑀆𑀤𑀬𑁄; 𑀲𑀁. 𑀦𑀺. 𑁩.𑁫𑁯) 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺.

𑁫𑁯𑁬. 𑀏𑀯𑀁 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀳𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀅𑀥𑀺𑀕𑀢𑁄𑀫𑁆𑀳𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀉𑀤𑀸𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀮𑁄𑀓𑀚𑁂𑀝𑁆𑀞𑀁 𑀯𑀺𑀦𑀸𑀬𑀓𑀦𑁆𑀢𑀺 𑀲𑀓𑀮𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀚𑁂𑀝𑁆𑀞𑀁 𑀧𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀲𑀁𑀲𑀸𑀭𑀲𑀸𑀕𑀭𑀲𑁆𑀲 𑀧𑀭𑀢𑀻𑀭𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀦𑁂𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀢𑀁 𑀯𑀺𑀦𑀸𑀬𑀓𑀁. 𑀩𑀼𑀤𑁆𑀥𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀽𑀫𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀩𑀼𑀤𑁆𑀥𑀪𑀽𑀫𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀧𑀝𑀺𑀯𑀺𑀤𑁆𑀥𑁄𑀢𑀺 𑀩𑀼𑀤𑁆𑀥𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄, 𑀢𑀁 𑀩𑀼𑀤𑁆𑀥𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀁, 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀁 𑀩𑀼𑀤𑁆𑀥𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀞𑀫𑀁 𑀅𑀤𑁆𑀤𑀲𑀁 𑀅𑀳𑀦𑁆𑀢𑀺 𑀧𑀞𑀫𑀁 𑀯𑁂𑀲𑀸𑀔𑀧𑀼𑀡𑁆𑀡𑀫𑀺𑀬𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀩𑀼𑀤𑁆𑀥𑀪𑀽𑀢𑀁 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁 𑀅𑀳𑀁 𑀅𑀤𑁆𑀤𑀓𑁆𑀔𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁯𑁭. 𑀬𑀸𑀯𑀢𑀸 𑀩𑁄𑀥𑀺𑀬𑀸 𑀫𑀽𑀮𑁂𑀢𑀺 𑀬𑀢𑁆𑀢𑀓𑀸 𑀩𑁄𑀥𑀺𑀭𑀼𑀓𑁆𑀔𑀲𑀫𑀻𑀧𑁂 𑀬𑀓𑁆𑀔𑀸 𑀲𑀫𑀸𑀕𑀢𑀸 𑀭𑀸𑀲𑀺𑀪𑀽𑀢𑀸 𑀲𑀫𑁆𑀩𑀼𑀤𑁆𑀥𑀁 𑀩𑀼𑀤𑁆𑀥𑀪𑀽𑀢𑀁 𑀢𑀁 𑀩𑀼𑀤𑁆𑀥𑀁 𑀧𑀜𑁆𑀚𑀮𑀻𑀓𑀢𑀸 𑀤𑀲𑀗𑁆𑀕𑀼𑀮𑀺𑀲𑀫𑁄𑀥𑀸𑀦𑀁 𑀅𑀜𑁆𑀚𑀮𑀺𑀧𑀼𑀝𑀁 𑀲𑀺𑀭𑀲𑀺 𑀞𑀧𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑀺 𑀦𑀫𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁯𑁮. 𑀲𑀩𑁆𑀩𑁂 𑀤𑁂𑀯𑀸 𑀢𑀼𑀝𑁆𑀞𑀫𑀦𑀸𑀢𑀺 𑀩𑀼𑀤𑁆𑀥𑀪𑀽𑀢𑀝𑁆𑀞𑀸𑀦𑀁 𑀆𑀕𑀢𑀸 𑀢𑁂 𑀲𑀩𑁆𑀩𑁂 𑀤𑁂𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑀸 𑀆𑀓𑀸𑀲𑁂 𑀲𑀜𑁆𑀘𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀥𑀓𑀸𑀭𑀢𑀫𑁄𑀦𑀼𑀤𑁄𑀢𑀺 𑀅𑀢𑀺𑀯𑀺𑀬 𑀅𑀦𑁆𑀥𑀓𑀸𑀭𑀁 𑀫𑁄𑀳𑀁 𑀦𑀼𑀤𑁄 𑀔𑁂𑀧𑀦𑁄 𑀅𑀬𑀁 𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁫𑁯𑁯. 𑀢𑁂𑀲𑀁 𑀳𑀸𑀲𑀧𑀭𑁂𑀢𑀸𑀦𑀦𑁆𑀢𑀺 𑀳𑀸𑀲𑁂𑀳𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀢𑁂𑀲𑀁 𑀤𑁂𑀯𑀸𑀦𑀁 𑀫𑀳𑀸𑀦𑀸𑀤𑁄 𑀫𑀳𑀸𑀖𑁄𑀲𑁄 𑀅𑀯𑀢𑁆𑀢𑀣 𑀧𑀯𑀢𑁆𑀢𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂 𑀓𑀺𑀮𑁂𑀲𑁂 𑀲𑀁𑀓𑀺𑀮𑁂𑀲𑁂 𑀥𑀫𑁆𑀫𑁂 𑀛𑀸𑀧𑀬𑀺𑀲𑁆𑀲𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁦𑁦. 𑀤𑁂𑀯𑀸𑀦𑀁 𑀕𑀺𑀭𑀫𑀜𑁆𑀜𑀸𑀬𑀸𑀢𑀺 𑀯𑀸𑀘𑀸𑀬 𑀣𑀼𑀢𑀺𑀯𑀘𑀦𑁂𑀦 𑀲𑀳 𑀉𑀤𑀻𑀭𑀺𑀢𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀚𑀸𑀦𑀺𑀢𑁆𑀯𑀸 𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 𑀆𑀤𑀺𑀪𑀺𑀓𑁆𑀔𑀁 𑀧𑀞𑀫𑀁 𑀆𑀳𑀸𑀭𑀁 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀳𑀁 𑀅𑀤𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁦𑁨. 𑀲𑀢𑁆𑀢𑀸𑀳𑀁 𑀅𑀪𑀺𑀦𑀺𑀓𑁆𑀔𑀫𑁆𑀫𑀸𑀢𑀺 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀩𑁄𑀥𑀺𑀁 𑀅𑀚𑁆𑀛𑀕𑀫𑀁 𑀅𑀥𑀺𑀕𑀜𑁆𑀙𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀫𑁂 𑀧𑀞𑀫𑀁 𑀪𑀢𑁆𑀢𑀦𑁆𑀢𑀺 𑀇𑀤𑀁 𑀪𑀢𑁆𑀢𑀁 𑀲𑀭𑀻𑀭𑀬𑀸𑀧𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲 𑀉𑀢𑁆𑀢𑀫𑀘𑀸𑀭𑀺𑀲𑁆𑀲 𑀫𑁂 𑀫𑀬𑁆𑀳𑀁 𑀇𑀫𑀺𑀦𑀸 𑀤𑁂𑀯𑀧𑀼𑀢𑁆𑀢𑁂𑀦 𑀧𑀞𑀫𑀁 𑀤𑀺𑀦𑁆𑀦𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁬𑁦𑁩. 𑀢𑀼𑀲𑀺𑀢𑀸 𑀳𑀺 𑀇𑀥𑀸𑀕𑀦𑁆𑀢𑁆𑀯𑀸𑀢𑀺 𑀢𑀼𑀲𑀺𑀢𑀪𑀯𑀦𑀢𑁄 𑀇𑀥 𑀫𑀦𑀼𑀲𑁆𑀲𑀮𑁄𑀓𑁂 𑀆𑀕𑀦𑁆𑀢𑁆𑀯𑀸 𑀬𑁄 𑀤𑁂𑀯𑀧𑀼𑀢𑁆𑀢𑁄 𑀫𑁂 𑀫𑀫 𑀪𑀺𑀓𑁆𑀔𑀁 𑀉𑀧𑀸𑀦𑀬𑀺 𑀅𑀤𑀸𑀲𑀺, 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀓𑀣𑁂𑀲𑁆𑀲𑀸𑀫𑀺 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀺. 𑀪𑀸𑀲𑀢𑁄 𑀪𑀸𑀲𑀦𑁆𑀢𑀲𑁆𑀲 𑀫𑀫 𑀯𑀘𑀦𑀁 𑀲𑀼𑀡𑀸𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄 𑀧𑀭𑀁 𑀅𑀦𑀼𑀢𑁆𑀢𑀸𑀦𑀧𑀤𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁬𑁦𑁭. 𑀢𑀺𑀤𑀲𑀸𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑀸. 𑀅𑀕𑀸𑀭𑀸𑀢𑀺 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀩𑁆𑀭𑀸𑀳𑁆𑀫𑀡𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙 𑀲𑀁𑀯𑀘𑁆𑀙𑀭𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁂𑀦 𑀩𑁄𑀥𑀺𑀲𑀢𑁆𑀢𑁂𑀦 𑀲𑀳 𑀯𑀲𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁦𑁮. 𑀢𑀢𑁄 𑀲𑀢𑁆𑀢𑀫𑀓𑁂 𑀯𑀲𑁆𑀲𑁂𑀢𑀺 𑀢𑀢𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂. 𑀩𑀼𑀤𑁆𑀥𑁄 𑀲𑀘𑁆𑀘𑀁 𑀓𑀣𑁂𑀲𑁆𑀲𑀢𑀻𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸 𑀲𑀢𑁆𑀢𑀫𑀲𑀁𑀯𑀘𑁆𑀙𑀭𑁂 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀲𑀘𑁆𑀘𑀲𑀗𑁆𑀔𑀸𑀢𑀁 𑀘𑀢𑀼𑀲𑀘𑁆𑀘𑀁 𑀓𑀣𑁂𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀦𑀸𑀫𑁂𑀦 𑀕𑁄𑀢𑁆𑀢𑀦𑀸𑀫𑀯𑀲𑁂𑀦 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫. 𑀧𑀞𑀫𑀁 𑀲𑀘𑁆𑀙𑀺𑀓𑀸𑀳𑀺𑀢𑀻𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀫𑀦𑁆𑀢𑀭𑁂 𑀧𑀞𑀫𑀁 𑀆𑀤𑀺𑀢𑁄 𑀏𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀁 𑀲𑀘𑁆𑀙𑀺𑀓𑀸𑀳𑀺𑀢𑀺 𑀧𑀘𑁆𑀘𑀓𑁆𑀔𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁦𑁯. 𑀦𑀺𑀓𑁆𑀔𑀦𑁆𑀢𑁂𑀦𑀸𑀦𑀼𑀧𑀩𑁆𑀩𑀚𑀺𑀦𑁆𑀢𑀺 𑀦𑀺𑀓𑁆𑀔𑀦𑁆𑀢𑁂𑀦 𑀩𑁄𑀥𑀺𑀲𑀢𑁆𑀢𑁂𑀦 𑀲𑀳 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀩𑁆𑀩𑀚𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀅𑀦𑀼𑀧𑀩𑁆𑀩𑀚𑀺𑀢𑁆𑀯𑀸 𑀫𑀬𑀸 𑀧𑀥𑀸𑀦𑀁 𑀯𑀻𑀭𑀺𑀬𑀁 𑀲𑀼𑀓𑀢𑀁 𑀲𑀼𑀝𑁆𑀞𑀼 𑀓𑀢𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑁂 𑀛𑀸𑀧𑀦𑀢𑁆𑀣𑀸𑀬𑀸𑀢𑀺 𑀓𑀺𑀮𑁂𑀲𑁂 𑀲𑁄𑀲𑀦𑀢𑁆𑀣𑀸𑀬 𑀯𑀺𑀤𑁆𑀥𑀁𑀲𑀦𑀢𑁆𑀣𑀸𑀬 𑀅𑀦𑀕𑀸𑀭𑀺𑀬𑀁 𑀅𑀕𑀸𑀭𑀲𑁆𑀲 𑀅𑀳𑀺𑀢𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀯𑀺𑀭𑀳𑀺𑀢𑀁 𑀲𑀸𑀲𑀦𑀁 𑀧𑀩𑁆𑀩𑀚𑀺𑀁 𑀧𑀝𑀺𑀧𑀚𑁆𑀚𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁧𑁦. 𑀅𑀪𑀺𑀕𑀦𑁆𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽𑀢𑀺 𑀲𑀩𑁆𑀩𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀲𑀗𑁆𑀔𑀸𑀭𑀯𑀺𑀓𑀸𑀭𑀮𑀓𑁆𑀔𑀡𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀜𑁂𑀬𑁆𑀬𑀁 𑀯𑀸 𑀚𑀸𑀦𑀦𑁆𑀢𑁄 𑀤𑁂𑀯𑁂𑀳𑀺 𑀲𑀳 𑀯𑀢𑁆𑀢𑀫𑀸𑀦𑁂 𑀲𑀢𑁆𑀢 𑀮𑁄𑀓𑁂 𑀩𑀼𑀤𑁆𑀥𑁄 𑀫𑀺𑀕𑀸𑀭𑀜𑁆𑀜𑀁 𑀫𑀺𑀕𑀤𑀸𑀬 𑀯𑀺𑀳𑀸𑀭𑀁 𑀅𑀪𑀺𑀕𑀦𑁆𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑁂 𑀫𑀬𑀸 𑀲𑀘𑁆𑀙𑀺𑀓𑀢𑁂𑀦 𑀇𑀫𑀺𑀦𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀫𑀢𑀪𑁂𑀭𑀺𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀪𑁂𑀭𑀺𑀁 𑀅𑀳𑀭𑀺 𑀧𑀳𑀭𑀺 𑀤𑀲𑁆𑀲𑁂𑀲𑀻𑀢𑀺 𑀅𑀢𑁆𑀣𑁄.

𑁬𑁧𑁧. 𑀲𑁄 𑀤𑀸𑀦𑀻𑀢𑀺 𑀲𑁄 𑀅𑀳𑀁 𑀧𑀞𑀫𑀁 𑀲𑁄𑀢𑀸𑀧𑀦𑁆𑀦𑁄 𑀇𑀤𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀫𑀢𑀁 𑀲𑀦𑁆𑀢𑀁 𑀯𑀽𑀧𑀲𑀦𑁆𑀢𑀲𑀪𑀸𑀯𑀁 𑀧𑀤𑀁 𑀧𑀚𑁆𑀚𑀺𑀢𑀩𑁆𑀩𑀁 𑀧𑀸𑀧𑀼𑀡𑀺𑀢𑀩𑁆𑀩𑀁, 𑀅𑀦𑀼𑀢𑁆𑀢𑀭𑀁 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬𑀸𑀢𑀺 𑀓𑀸𑀫𑀸𑀲𑀯𑀸𑀤𑀬𑁄 𑀲𑀩𑁆𑀩𑁂 𑀆𑀲𑀯𑁂 𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀚𑀳𑀺𑀢𑁆𑀯𑀸 𑀅𑀦𑀸𑀲𑀯𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀺𑀳𑀭𑀸𑀫𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀸𑀲𑀁 𑀓𑀧𑁆𑀧𑁂𑀫𑀺. 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄𑀢𑁆𑀬𑀸𑀤𑀬𑁄 𑀕𑀸𑀣𑀸𑀬𑁄 𑀯𑀼𑀢𑁆𑀢𑀢𑁆𑀣𑀸𑀬𑁂𑀯.

𑀅𑀣 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀞𑀫𑀁 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀜𑁆𑀜𑀽𑀦𑀁 𑀬𑀤𑀺𑀤𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑀺 (𑀅. 𑀦𑀺. 𑁧.𑁧𑁮𑁮) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀲𑁄 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀅𑀢𑁆𑀢𑀦𑀺 𑀓𑀭𑀺𑀬𑀫𑀸𑀦𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁, 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀆𑀓𑀺𑀡𑁆𑀡𑀯𑀺𑀳𑀸𑀭𑀜𑁆𑀘 𑀧𑀭𑀺𑀳𑀭𑀺𑀢𑀼𑀓𑀸𑀫𑁄, 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀯𑀺𑀳𑀭𑀺𑀢𑀼𑀓𑀸𑀫𑁄 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀫𑁆𑀧𑀺 𑀧𑀧𑀜𑁆𑀘𑀁 𑀫𑀜𑁆𑀜𑀫𑀸𑀦𑁄 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀙𑀤𑁆𑀤𑀦𑁆𑀢𑁂𑀳𑀺 𑀦𑀸𑀕𑁂𑀳𑀺 𑀉𑀧𑀝𑁆𑀞𑀺𑀬𑀫𑀸𑀦𑁄 𑀙𑀤𑁆𑀤𑀦𑁆𑀢𑀤𑀳𑀢𑀻𑀭𑁂 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀲𑀺. 𑀏𑀯𑀁 𑀢𑀢𑁆𑀣 𑀯𑀲𑀦𑁆𑀢𑀁 𑀣𑁂𑀭𑀁 𑀏𑀓𑀤𑀺𑀯𑀲𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀏𑀯𑀫𑀸𑀳 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺. 𑀣𑁂𑀭𑁄 𑀢𑀲𑁆𑀲 𑀘𑀢𑀼𑀲𑀘𑁆𑀘𑀕𑀩𑁆𑀪𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀅𑀫𑀢𑁄𑀕𑀥𑀁 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀧𑀯𑁂𑀤𑁂𑀦𑁆𑀢𑁄 𑁋

‘‘𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀫𑀳𑀸𑀭𑀲𑀁;

𑀯𑀺𑀭𑀸𑀕𑁄 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀅𑀦𑀼𑀧𑀸𑀤𑀸𑀬 𑀲𑀩𑁆𑀩𑀲𑁄’’𑀢𑀺. (𑀣𑁂𑀭𑀕𑀸. 𑁬𑁭𑁩) 𑁋

𑀣𑀼𑀢𑀺𑀁 𑀅𑀓𑀸𑀲𑀺. 𑀣𑁂𑀭𑁄 𑀙𑀤𑁆𑀤𑀦𑁆𑀢𑀤𑀳𑀢𑀻𑀭𑁂 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀉𑀧𑀓𑀝𑁆𑀞𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁮. 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀻𑀳𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀕𑀼𑀳𑀸𑀬𑀁 𑀯𑀺𑀳𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀕𑁆𑀕𑀳𑀁 𑀓𑀸𑀢𑀼𑀁 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑀓𑀸𑀮𑁂 𑀢𑀲𑁆𑀲 𑀲𑀬𑀦𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀻𑀳𑁄 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑁄 𑀕𑀼𑀳𑀤𑁆𑀯𑀸𑀭𑁂 𑀞𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀚𑀮𑀚𑀣𑀮𑀚𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄 𑀪𑀕𑀯𑀢𑁄 𑀆𑀭𑀓𑁆𑀔𑀡𑀢𑁆𑀣𑀸𑀬 𑀅𑀜𑁆𑀜𑁂 𑀯𑀸𑀴𑀫𑀺𑀕𑁂 𑀅𑀧𑀦𑁂𑀢𑀼𑀁 𑀢𑀻𑀲𑀼 𑀯𑁂𑀮𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀩𑀼𑀤𑁆𑀥𑀕𑀢𑀸𑀬 𑀲𑀢𑀺𑀬𑀸 𑀅𑀝𑁆𑀞𑀸𑀲𑀺. 𑀬𑀣𑀸 𑀧𑀞𑀫𑀤𑀺𑀯𑀲𑁂, 𑀏𑀯𑀁 𑀲𑀢𑁆𑀢𑀸𑀳𑀁 𑀧𑀽𑀚𑁂𑀲𑀺. 𑀪𑀕𑀯𑀸 ‘‘𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀝𑁆𑀝𑀺𑀲𑁆𑀲𑀢𑀺 𑀇𑀫𑀲𑁆𑀲 𑀏𑀢𑁆𑀢𑀓𑁄 𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀕𑀢𑁄.

𑀲𑀻𑀳𑁄 𑀩𑀼𑀤𑁆𑀥𑀯𑀺𑀬𑁄𑀕𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀦𑀕𑀭𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀓𑁄𑀲𑀫𑁆𑀩𑀺𑀬𑀁 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀪𑀸𑀭𑀤𑁆𑀯𑀸𑀚𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀦𑁆𑀢𑁄 𑀫𑀳𑀕𑁆𑀖𑀲𑀪𑀸𑀯𑁂𑀦 𑀅𑀦𑀦𑀼𑀭𑀽𑀧𑀸𑀘𑀸𑀭𑀢𑁆𑀢𑀸 𑀢𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀮𑀸𑀪𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀲𑀢𑁆𑀣𑀸𑀭𑀸 𑀉𑀧𑀸𑀬𑁂𑀦 𑀫𑀢𑁆𑀢𑀜𑁆𑀜𑀼𑀢𑀸𑀬 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀙𑀴𑀪𑀺𑀜𑁆𑀜𑁄 𑀧𑀦 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 ‘‘𑀬𑀁 𑀲𑀸𑀯𑀓𑁂𑀳𑀺 𑀧𑀢𑁆𑀢𑀩𑁆𑀩𑀁, 𑀢𑀁 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢’’𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 ‘‘𑀬𑀲𑁆𑀲 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀓𑀗𑁆𑀔𑀸 𑀅𑀢𑁆𑀣𑀺, 𑀲𑁄 𑀫𑀁 𑀧𑀼𑀘𑁆𑀙𑀢𑀽’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀺. 𑀢𑁂𑀦 𑀢𑀁 𑀪𑀕𑀯𑀸 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀻𑀳𑀦𑀸𑀤𑀺𑀓𑀸𑀦𑀁 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁫) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑁬𑁧𑁩. 𑀏𑀯𑀁 𑀏𑀢𑀤𑀕𑁆𑀕𑀁 𑀞𑀸𑀦𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀫𑁆𑀫𑀸𑀧𑀤𑀸𑀦𑀁 𑀯𑀺𑀪𑀸𑀯𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀧𑀼𑀭𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀢𑀺 𑀳𑀺𑀫𑀸𑀮𑀬𑀧𑀩𑁆𑀩𑀢𑀢𑁄 𑀧𑀼𑀩𑁆𑀩𑀤𑀺𑀲𑀸𑀪𑀸𑀕𑁂𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀓𑀽𑀝𑁂 𑀯𑀲𑀻 𑀢𑀤𑀸𑀢𑀺 𑀬𑀤𑀸 𑀅𑀳𑀁 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀲𑀫𑀻𑀧𑁂 𑀯𑀲𑀸𑀫𑀺, 𑀢𑀤𑀸 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀅𑀦𑁂𑀓𑁂𑀳𑀺 𑀘 𑀑𑀲𑀥𑁂𑀳𑀺, 𑀅𑀦𑁂𑀓𑁂𑀳𑀺 𑀘 𑀭𑀢𑀦𑁂𑀳𑀺 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀓𑀽𑀝𑁂 𑀘𑀺𑀢𑁆𑀢𑀧𑀩𑁆𑀩𑀢𑀲𑀺𑀔𑀭𑁂 𑀯𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁧𑁪. 𑀅𑀪𑀻𑀢𑀭𑀽𑀧𑁄 𑀢𑀢𑁆𑀣𑀸𑀲𑀺𑀦𑁆𑀢𑀺 𑀅𑀪𑀻𑀢𑀲𑀪𑀸𑀯𑁄 𑀦𑀺𑀩𑁆𑀪𑀬𑀲𑀪𑀸𑀯𑁄 𑀫𑀺𑀕𑀭𑀸𑀚𑀸 𑀢𑀢𑁆𑀣 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀓𑁆𑀓𑀫𑁄𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀓𑀫𑁄 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄. 𑀬𑀲𑁆𑀲 𑀲𑀤𑁆𑀤𑀁 𑀲𑀼𑀡𑀺𑀢𑁆𑀯𑀸𑀦𑀸𑀢𑀺 𑀬𑀲𑁆𑀲 𑀫𑀺𑀕𑀭𑀜𑁆𑀜𑁄 𑀲𑀻𑀳𑀦𑀸𑀤𑀁 𑀲𑀼𑀢𑁆𑀯𑀸 𑀩𑀳𑀼𑀚𑁆𑀚𑀦𑀸 𑀩𑀳𑀼𑀲𑀢𑁆𑀢𑀸 𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀯𑀺𑀲𑁂𑀲𑁂𑀦 𑀔𑀫𑁆𑀪𑀦𑁆𑀢𑀺 𑀪𑀸𑀬𑀦𑁆𑀢𑀺.

𑁬𑁧𑁫. 𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳𑀸𑀢𑀺 𑀪𑀕𑀯𑀢𑀺 𑀧𑀲𑀸𑀤𑁂𑀦 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀧𑀼𑀧𑁆𑀨𑀁 𑀟𑀁𑀲𑀺𑀢𑁆𑀯𑀸. 𑀦𑀭𑀸𑀲𑀪𑀁 𑀦𑀭𑀸𑀦𑀁 𑀆𑀲𑀪𑀁 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀲𑀫𑁆𑀩𑀼𑀤𑁆𑀥𑀁 𑀉𑀧𑀕𑀘𑁆𑀙𑀺𑀁, 𑀲𑀫𑀻𑀧𑀁 𑀅𑀕𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀝𑁆𑀞𑀺𑀢𑀲𑁆𑀲 𑀲𑀫𑀸𑀥𑀺𑀫𑁆𑀳𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀢𑀁 𑀧𑀼𑀧𑁆𑀨𑀁 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁧𑁬. 𑀘𑀢𑀼𑀤𑁆𑀤𑀺𑀲𑀁 𑀦𑀫𑀲𑁆𑀲𑀺𑀢𑁆𑀯𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀦𑀫𑀲𑁆𑀲𑀺𑀢𑁆𑀯𑀸 𑀲𑀓𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀆𑀤𑀭𑁂𑀦 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀻𑀳𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀅𑀦𑀤𑀺𑀁 𑀖𑁄𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁧𑁭. 𑀢𑀢𑁄 𑀩𑀼𑀤𑁆𑀥𑁂𑀦 𑀤𑀺𑀦𑁆𑀦𑀩𑁆𑀬𑀸𑀓𑀭𑀡𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁬𑁧𑁮. 𑀯𑀤𑀢𑀁 𑀲𑁂𑀝𑁆𑀞𑁄𑀢𑀺 ‘‘𑀫𑀬𑀁 𑀩𑀼𑀤𑁆𑀥𑀸, 𑀫𑀬𑀁 𑀩𑀼𑀤𑁆𑀥𑀸’’𑀢𑀺 𑀯𑀤𑀦𑁆𑀢𑀸𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀩𑀼𑀤𑁆𑀥𑁄 𑀆𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀆𑀕𑀢𑀲𑁆𑀲 𑀪𑀕𑀯𑀢𑁄 𑀢𑀁 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫 𑀲𑀼𑀡𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑁬𑁧𑁯. 𑀢𑁂𑀲𑀁 𑀳𑀸𑀲𑀧𑀭𑁂𑀢𑀸𑀦𑀦𑁆𑀢𑀺 𑀳𑀸𑀲𑁂𑀳𑀺 𑀲𑁄𑀫𑀦𑀲𑁆𑀲𑁂𑀳𑀺 𑀧𑀭𑁂𑀢𑀸𑀦𑀁 𑀅𑀪𑀺𑀪𑀽𑀢𑀸𑀦𑀁 𑀲𑀫𑀦𑁆𑀦𑀸𑀕𑀢𑀸𑀦𑀁 𑀢𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀮𑁄𑀓𑀦𑀸𑀬𑀓𑁄𑀢𑀺 𑀮𑁄𑀓𑀲𑁆𑀲 𑀦𑀸𑀬𑀓𑁄 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀸𑀧𑀓𑁄 𑀫𑀫 𑀲𑀤𑁆𑀤𑀁 𑀫𑀬𑁆𑀳𑀁 𑀲𑀻𑀳𑀦𑀸𑀤𑀁 𑀧𑀓𑀺𑀢𑁆𑀢𑁂𑀲𑀺 𑀧𑀓𑀸𑀲𑁂𑀲𑀺 𑀓𑀣𑁂𑀲𑀺, 𑀤𑀻𑀖𑀤𑀲𑁆𑀲𑀻 𑀅𑀦𑀸𑀕𑀢𑀓𑀸𑀮𑀤𑀲𑁆𑀲𑀻 𑀫𑀳𑀸𑀫𑀼𑀦𑀺 𑀫𑀼𑀦𑀻𑀦𑀫𑀦𑁆𑀢𑀭𑁂 𑀫𑀳𑀦𑁆𑀢𑁄 𑀫𑀼𑀦𑀺. 𑀲𑁂𑀲𑀕𑀸𑀣𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁬𑁨𑁨. 𑀦𑀸𑀫𑁂𑀦 𑀧𑀤𑀼𑀫𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸 𑀘𑀢𑀼𑀲𑀝𑁆𑀞𑀺𑀬𑀸 𑀚𑀸𑀢𑀺𑀬𑀸 𑀇𑀲𑁆𑀲𑀭𑀺𑀬𑀁 𑀇𑀲𑁆𑀲𑀭𑀪𑀸𑀯𑀁 𑀭𑀚𑁆𑀚𑀁 𑀓𑀸𑀭𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁨𑁩. 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺 𑀲𑀸𑀫𑁆𑀬𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀁 𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀢𑁆𑀣𑁄.

𑁬𑁨𑁪. 𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂𑀢𑀺 𑀢𑁂𑀦 𑀕𑁄𑀢𑀫𑁂𑀦 𑀪𑀕𑀯𑀢𑀸 𑀧𑀺𑀝𑀓𑀢𑁆𑀢𑀬𑁂 𑀧𑀓𑀸𑀲𑀺𑀢𑁂 𑀤𑁂𑀲𑀺𑀢𑁂𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀻𑀢𑀺 𑀢𑀤𑀸 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀬𑀁 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀜𑁆𑀜𑀸 𑀅𑀪𑀺𑀦𑀺𑀓𑁆𑀔𑀫𑁆𑀫𑀸𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁨𑁫. 𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀢𑀺 𑀯𑀻𑀭𑀺𑀬𑀓𑀭𑀡𑀢𑁆𑀣𑀁 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀉𑀧𑀥𑀺𑀲𑀗𑁆𑀔𑀸𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀦𑀺𑀭𑀼𑀧𑀥𑀺. 𑀓𑀺𑀮𑁂𑀲𑀤𑀭𑀣𑀸𑀦𑀁 𑀅𑀪𑀸𑀯𑁂𑀦 𑀉𑀧𑀲𑀦𑁆𑀢𑁄. 𑀲𑀩𑁆𑀩𑀸𑀲𑀯𑁂 𑀲𑀓𑀮𑀸𑀲𑀯𑁂 𑀧𑀭𑀺𑀜𑁆𑀜𑀸𑀬 𑀧𑀳𑀸𑀬 𑀅𑀦𑀸𑀲𑀯𑁄 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁨𑁬. 𑀯𑀺𑀚𑀦𑁂 𑀧𑀦𑁆𑀢𑀲𑁂𑀬𑁆𑀬𑀫𑁆𑀳𑀻𑀢𑀺 𑀚𑀦𑀲𑀫𑁆𑀩𑀸𑀥𑀭𑀳𑀺𑀢𑁂 𑀤𑀽𑀭𑀸𑀭𑀜𑁆𑀜𑀲𑁂𑀦𑀸𑀲𑀦𑁂𑀢𑀺 𑀅𑀢𑁆𑀣𑁄. 𑀯𑀸𑀴𑀫𑀺𑀕𑀲𑀫𑀸𑀓𑀼𑀮𑁂𑀢𑀺 𑀓𑀸𑀴𑀲𑀻𑀳𑀸𑀤𑀻𑀳𑀺 𑀘𑀡𑁆𑀟𑀫𑀺𑀕𑀲𑀗𑁆𑀕𑁂𑀳𑀺 𑀆𑀓𑀼𑀮𑁂 𑀲𑀁𑀓𑀺𑀡𑁆𑀡𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺.

𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁯. 𑀔𑀤𑀺𑀭𑀯𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀦𑀸𑀫𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀔𑀤𑀺𑀭𑀯𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀢𑀺𑀢𑁆𑀣𑀦𑀸𑀯𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀕𑀗𑁆𑀕𑀸𑀬 𑀧𑀬𑀸𑀕𑀢𑀺𑀢𑁆𑀣𑁂 𑀢𑀺𑀢𑁆𑀣𑀦𑀸𑀯𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀲𑀸𑀯𑀓𑀲𑀗𑁆𑀖𑀁 𑀪𑀕𑀯𑀦𑁆𑀢𑀁 𑀕𑀗𑁆𑀕𑀸𑀢𑀻𑀭𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀦𑀸𑀯𑀸𑀲𑀗𑁆𑀖𑀸𑀝𑀁 𑀬𑁄𑀚𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀽𑀚𑀸𑀲𑀓𑁆𑀓𑀸𑀭𑁂𑀦 𑀧𑀭𑀢𑀻𑀭𑀁 𑀧𑀸𑀧𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸𑀭𑀸 𑀆𑀭𑀜𑁆𑀜𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀧𑀢𑁆𑀣𑀦𑀸𑀬 𑀅𑀯𑀜𑁆𑀛𑀪𑀸𑀯𑀁 𑀩𑁆𑀬𑀸𑀓𑀸𑀲𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑀭𑀝𑁆𑀞𑁂 𑀦𑀸𑀮𑀓𑀕𑀸𑀫𑁂 𑀭𑀽𑀧𑀲𑀸𑀭𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀫𑀬𑁆𑀳𑀁 𑀚𑁂𑀝𑁆𑀞𑀪𑀸𑀢𑀸 𑀅𑀬𑁆𑀬𑁄 𑀉𑀧𑀢𑀺𑀲𑁆𑀲𑁄 𑀇𑀫𑀁 𑀯𑀺𑀪𑀯𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑁂𑀦 𑀯𑀦𑁆𑀢𑀁 𑀔𑁂𑀴𑀧𑀺𑀡𑁆𑀟𑀁 𑀓𑀣𑀸𑀳𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀚𑀸𑀢𑀲𑀁𑀯𑁂𑀕𑁄 𑀧𑀸𑀲𑀁 𑀅𑀦𑀼𑀧𑀕𑀘𑁆𑀙𑀫𑀸𑀦𑀫𑀺𑀕𑁄 𑀯𑀺𑀬 𑀜𑀸𑀢𑀓𑁂 𑀯𑀜𑁆𑀘𑁂𑀢𑁆𑀯𑀸 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀓𑀦𑀺𑀝𑁆𑀞𑀪𑀸𑀯𑀁 𑀦𑀺𑀯𑁂𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀬 𑀙𑀦𑁆𑀤𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀲𑀼𑀁. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀔𑀤𑀺𑀭𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀲𑁆𑀲𑀫𑀦𑁆𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀭𑀳𑀸 𑀅𑀳𑁄𑀲𑀺. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀜𑁆𑀘 𑀯𑀦𑁆𑀤𑀺𑀢𑀼𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀚𑁂𑀢𑀯𑀦𑁂 𑀯𑀺𑀳𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀆𑀭𑀜𑁆𑀜𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀭𑀜𑁆𑀜𑀓𑀸𑀦𑀁 𑀬𑀤𑀺𑀤𑀁 𑀭𑁂𑀯𑀢𑁄’’𑀢𑀺 (𑀅. 𑀦𑀺. 𑁧.𑁧𑁯𑁮, 𑁨𑁦𑁩).

𑁬𑁨𑁮. 𑀏𑀯𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀕𑀗𑁆𑀕𑀸 𑀪𑀸𑀕𑀻𑀭𑀣𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀗𑁆𑀕𑀸𑀢𑀺 𑀕𑀸𑀬𑀫𑀸𑀦𑀸 𑀖𑁄𑀲𑀁 𑀓𑀼𑀭𑀼𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 𑀕𑀗𑁆𑀕𑀸. 𑀅𑀣 𑀯𑀸 𑀕𑁄 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀲𑁆𑀫𑀺𑀁 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀕𑀗𑁆𑀕𑀸. 𑀅𑀦𑁄𑀢𑀢𑁆𑀢𑀤𑀳𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀆𑀯𑀝𑁆𑀝𑀕𑀗𑁆𑀕𑀸𑀢𑀺 𑀘 𑀧𑀩𑁆𑀩𑀢𑀫𑀢𑁆𑀣𑀓𑁂𑀦 𑀕𑀢𑀝𑁆𑀞𑀸𑀦𑁂 𑀩𑀳𑀮𑀕𑀗𑁆𑀕𑀸𑀢𑀺 𑀘 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀉𑀫𑀗𑁆𑀕𑀕𑀗𑁆𑀕𑀸𑀢𑀺 𑀘 𑀢𑀢𑁄 𑀩𑀳𑀮𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀁 𑀆𑀓𑀸𑀲𑁂𑀦 𑀕𑀢𑀝𑁆𑀞𑀸𑀦𑁂 𑀆𑀓𑀸𑀲𑀕𑀗𑁆𑀕𑀸𑀢𑀺 𑀘 𑀢𑀲𑁆𑀲𑀸 𑀧𑀢𑀺𑀢𑀝𑁆𑀞𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀚𑀸𑀢𑀁 𑀧𑀜𑁆𑀘 𑀬𑁄𑀚𑀦𑀁 𑀧𑁄𑀓𑁆𑀔𑀭𑀡𑀻𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀧𑀦 𑀧𑀜𑁆𑀘𑀗𑁆𑀕𑀼𑀮𑀺 𑀯𑀺𑀬 𑀧𑀜𑁆𑀘 𑀥𑀸𑀭𑀸 𑀳𑀼𑀢𑁆𑀯𑀸 𑀕𑀗𑁆𑀕𑀸 𑀬𑀫𑀼𑀦𑀸 𑀲𑀭𑀪𑀽 𑀫𑀳𑀻 𑀅𑀘𑀺𑀭𑀯𑀢𑀻𑀢𑀺 𑀧𑀜𑁆𑀘 𑀦𑀸𑀫𑀸 𑀳𑀼𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀁 𑀧𑀜𑁆𑀘 𑀪𑀸𑀕𑀁 𑀧𑀜𑁆𑀘 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀧𑀜𑁆𑀘 𑀪𑀸𑀕𑁂 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀇𑀢𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀪𑀸𑀕𑀻𑀭𑀣𑀻. 𑀕𑀗𑁆𑀕𑀸 𑀘 𑀲𑀸 𑀪𑀸𑀕𑀻𑀭𑀣𑀻 𑀘𑁂𑀢𑀺 𑀕𑀗𑁆𑀕𑀸𑀪𑀸𑀕𑀻𑀭𑀣𑀻. ‘‘𑀪𑀸𑀕𑀻𑀭𑀣𑀻 𑀕𑀗𑁆𑀕𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀼𑀩𑁆𑀩𑀘𑀭𑀺𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸𑀢𑀺 𑀲𑀢𑁆𑀢𑁂 𑀳𑀺𑀁𑀲𑀢𑀺 𑀲𑀻𑀢𑁂𑀦 𑀳𑀦𑀢𑀺 𑀫𑀣𑁂𑀢𑀺 𑀆𑀮𑁄𑀴𑁂𑀢𑀻𑀢𑀺 𑀳𑀺𑀫𑁄, 𑀳𑀺𑀫𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺𑀫𑀯𑀸, 𑀢𑀢𑁄 𑀳𑀺𑀫𑀯𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀪𑀸𑀯𑀺𑀢𑀸 𑀧𑀯𑀢𑁆𑀢𑀸 𑀲𑀦𑁆𑀤𑀫𑀸𑀦𑀸𑀢𑀺 𑀳𑀺𑀫𑀯𑀦𑁆𑀢𑀧𑀪𑀸𑀯𑀺𑀢𑀸. 𑀓𑀼𑀢𑀺𑀢𑁆𑀣𑁂 𑀦𑀸𑀯𑀺𑀓𑁄 𑀆𑀲𑀺𑀦𑁆𑀢𑀺 𑀢𑀲𑁆𑀲𑀸 𑀕𑀗𑁆𑀕𑀸𑀬 𑀘𑀡𑁆𑀟𑀲𑁄𑀢𑀲𑀫𑀸𑀧𑀦𑁆𑀦𑁂 𑀯𑀺𑀲𑀫𑀢𑀺𑀢𑁆𑀣𑁂 𑀓𑁂𑀯𑀝𑁆𑀝𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀦𑀸𑀯𑀺𑀓𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀑𑀭𑀺𑀫𑁂 𑀘 𑀢𑀭𑀺𑀁 𑀅𑀳𑀦𑁆𑀢𑀺 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀫𑀦𑀼𑀲𑁆𑀲𑁂 𑀧𑀸𑀭𑀺𑀫𑀸 𑀢𑀻𑀭𑀸 𑀑𑀭𑀺𑀫𑀁 𑀢𑀻𑀭𑀁 𑀅𑀳𑀁 𑀢𑀭𑀺𑀁 𑀢𑀸𑀭𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁨𑁯. 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀬𑀓𑁄𑀢𑀺 𑀤𑁆𑀯𑀺𑀧𑀤𑀸𑀦𑀁 𑀉𑀢𑁆𑀢𑀫𑁄 𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀁 𑀦𑀸𑀬𑀓𑁄 𑀧𑀸𑀧𑀦𑀓𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑁄 𑀫𑀫 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑁄. 𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀕𑀗𑁆𑀕𑀸𑀲𑁄𑀢𑀁 𑀢𑀭𑀺𑀢𑀼𑀁 𑀢𑀺𑀢𑁆𑀣𑀁 𑀧𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁩𑁦. 𑀩𑀳𑀽 𑀦𑀸𑀯𑀸 𑀲𑀫𑀸𑀦𑁂𑀢𑁆𑀯𑀸𑀢𑀺 𑀲𑀫𑁆𑀧𑀢𑁆𑀢𑀁 𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀯𑀟𑁆𑀠𑀓𑀻𑀳𑀺 𑀲𑀼𑀝𑁆𑀞𑀼 𑀲𑀗𑁆𑀔𑀢𑀁 𑀓𑀢𑀁 𑀦𑀺𑀧𑁆𑀨𑀸𑀤𑀺𑀢𑀁 𑀩𑀳𑀽 𑀦𑀸𑀯𑀸𑀬𑁄 𑀲𑀫𑀸𑀦𑁂𑀢𑁆𑀯𑀸 𑀤𑁆𑀯𑁂 𑀤𑁆𑀯𑁂 𑀦𑀸𑀯𑀸𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀢𑀲𑁆𑀲𑀸 𑀦𑀸𑀯𑀸𑀬 𑀉𑀧𑀭𑀺 𑀫𑀡𑁆𑀟𑀧𑀙𑀤𑀦𑀁 𑀓𑀢𑁆𑀯𑀸 𑀦𑀭𑀸𑀲𑀪𑀁 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁 𑀧𑀝𑀺𑀫𑀸𑀦𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁩𑁧. 𑀆𑀕𑀦𑁆𑀢𑁆𑀯𑀸𑀦 𑀘 𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀯𑀁 𑀲𑀗𑁆𑀖𑀝𑀺𑀢𑀸𑀬 𑀦𑀸𑀯𑀸𑀬 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸𑀦 𑀢𑀜𑁆𑀘 𑀦𑀸𑀯𑀓𑀁 𑀦𑀸𑀯𑀫𑀼𑀢𑁆𑀢𑀫𑀁 𑀆𑀭𑀼𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀭𑀺𑀫𑀚𑁆𑀛𑁂 𑀞𑀺𑀢𑁄 𑀲𑀢𑁆𑀣𑀸𑀢𑀺 𑀦𑀸𑀯𑀫𑀸𑀭𑀽𑀴𑁆𑀳𑁄 𑀲𑀢𑁆𑀣𑀸 𑀕𑀗𑁆𑀕𑀸𑀚𑀮𑀫𑀚𑁆𑀛𑁂 𑀞𑀺𑀢𑁄 𑀲𑀫𑀸𑀦𑁄 𑀇𑀫𑀸 𑀲𑁄𑀫𑀦𑀲𑁆𑀲𑀧𑀝𑀺𑀲𑀁𑀬𑀼𑀢𑁆𑀢𑀕𑀸𑀣𑀸 𑀅𑀪𑀸𑀲𑀣 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁩𑁨. 𑀬𑁄 𑀲𑁄 𑀢𑀸𑀭𑁂𑀲𑀺 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀬𑁄 𑀲𑁄 𑀦𑀸𑀯𑀺𑀓𑁄 𑀕𑀗𑁆𑀕𑀸𑀲𑁄𑀢𑀸𑀬 𑀲𑀫𑁆𑀩𑀼𑀤𑁆𑀥𑀁 𑀅𑀢𑀸𑀭𑁂𑀲𑀺. 𑀲𑀗𑁆𑀖𑀜𑁆𑀘𑀸𑀧𑀺 𑀅𑀦𑀸𑀲𑀯𑀦𑁆𑀢𑀺 𑀦 𑀓𑁂𑀯𑀮𑀫𑁂𑀯 𑀲𑀫𑁆𑀩𑀼𑀤𑁆𑀥𑀁 𑀢𑀸𑀭𑁂𑀲𑀺, 𑀅𑀦𑀸𑀲𑀯𑀁 𑀦𑀺𑀓𑁆𑀓𑀺𑀮𑁂𑀲𑀁 𑀲𑀗𑁆𑀖𑀜𑁆𑀘𑀸𑀧𑀺 𑀢𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀘𑀺𑀢𑁆𑀢𑀧𑀲𑀸𑀤𑁂𑀦𑀸𑀢𑀺 𑀢𑁂𑀦 𑀦𑀸𑀯𑀸𑀧𑀸𑀚𑀦𑀓𑀸𑀮𑁂 𑀉𑀧𑁆𑀧𑀦𑁆𑀦𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀧𑀲𑀸𑀤𑁂𑀦 𑀤𑁂𑀯𑀮𑁄𑀓𑁂 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀭𑀫𑀺𑀲𑁆𑀲𑀢𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁩𑁩. 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑁂 𑀩𑁆𑀬𑀫𑁆𑀳𑀦𑁆𑀢𑀺 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀢𑁂 𑀢𑀼𑀬𑁆𑀳𑀁 𑀩𑁆𑀬𑀫𑁆𑀳𑀁 𑀯𑀺𑀫𑀸𑀦𑀁 𑀲𑀼𑀓𑀢𑀁 𑀲𑀼𑀝𑁆𑀞𑀼 𑀦𑀺𑀩𑁆𑀩𑀢𑁆𑀢𑀁 𑀦𑀸𑀯𑀲𑀡𑁆𑀞𑀺𑀢𑀁 𑀦𑀸𑀯𑀸𑀲𑀡𑁆𑀞𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀧𑀸𑀢𑀼𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀆𑀓𑀸𑀲𑁂 𑀧𑀼𑀧𑁆𑀨𑀙𑀤𑀦𑀦𑁆𑀢𑀺 𑀦𑀸𑀯𑀸𑀬 𑀉𑀧𑀭𑀺𑀫𑀡𑁆𑀟𑀧𑀓𑀢𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀩𑁆𑀩𑀤𑀸 𑀕𑀢𑀕𑀢𑀝𑁆𑀞𑀸𑀦𑁂 𑀆𑀓𑀸𑀲𑁂 𑀧𑀼𑀧𑁆𑀨𑀙𑀤𑀦𑀁 𑀥𑀸𑀭𑀬𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁩𑁪. 𑀅𑀝𑁆𑀞𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀻𑀢𑀺 𑀇𑀢𑁄 𑀧𑀼𑀜𑁆𑀜𑀓𑀭𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀧𑀡𑁆𑀡𑀸𑀲𑀓𑀧𑁆𑀧𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀸𑀫𑁂𑀦 𑀢𑀸𑀭𑀓𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀔𑀢𑁆𑀢𑀺𑀬𑁄 𑀘𑀸𑀢𑀼𑀭𑀦𑁆𑀢𑁄 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀇𑀲𑁆𑀲𑀭𑁄 𑀯𑀺𑀚𑀺𑀢𑀸𑀯𑀻 𑀚𑀺𑀢𑀯𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀕𑀸𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀯.

𑁬𑁩𑁭. 𑀭𑁂𑀯𑀢𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀭𑁂𑀯𑀢𑀻𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑀢𑁆𑀢𑀸 ‘‘𑀭𑁂𑀯𑀢𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀩𑁆𑀭𑀳𑁆𑀫𑀩𑀦𑁆𑀥𑀼 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀪𑀽𑀢𑁄 𑀪𑀯𑀺𑀲𑁆𑀲𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁩𑁯. 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺.

𑁬𑁪𑁦. 𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀦𑁆𑀢𑀺 𑀏𑀯𑀁 𑀧𑀤𑀼𑀫𑀼𑀢𑁆𑀢𑀭𑁂𑀦 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑀅𑀳𑀁 𑀓𑀫𑁂𑀦 𑀧𑀸𑀭𑀫𑀺𑀢𑀸𑀓𑁄𑀝𑀺𑀁 𑀧𑀢𑁆𑀯𑀸 𑀫𑁂 𑀫𑀬𑁆𑀳𑀁 𑀯𑀻𑀭𑀺𑀬𑀁 𑀅𑀲𑀺𑀣𑀺𑀮𑀯𑀻𑀭𑀺𑀬𑀁 𑀥𑀼𑀭𑀥𑁄𑀭𑀬𑁆𑀳𑀁 𑀥𑀼𑀭𑀯𑀸𑀳𑀁 𑀥𑀼𑀭𑀸𑀥𑀸𑀭𑀁 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀦𑀺𑀩𑁆𑀪𑀬𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀯𑀸𑀳𑀦𑀁 𑀆𑀯𑀳𑀦𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀦𑁆𑀢𑀺 𑀇𑀤𑀸𑀦𑀸𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂 𑀧𑀭𑀺𑀬𑁄𑀲𑀸𑀦𑀲𑀭𑀻𑀭𑀁 𑀥𑀸𑀭𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀚𑀸𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀽𑀧𑀘𑀸𑀮𑀸’’𑀢𑀺 𑀢𑀺𑀲𑁆𑀲𑀦𑁆𑀦𑀁 𑀪𑀕𑀺𑀦𑀻𑀦𑀁 𑀧𑀼𑀢𑁆𑀢𑁂 ‘‘𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀽𑀧𑀘𑀸𑀮𑀸’’𑀢𑀺 𑀢𑀬𑁄 𑀪𑀸𑀕𑀺𑀦𑁂𑀬𑁆𑀬𑁂 𑀆𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀲𑀺. 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀁𑀲𑀼.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀣𑁂𑀭𑀲𑁆𑀲 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀲𑀼𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑁋 ‘‘𑀭𑁂𑀯𑀢𑀲𑁆𑀲 𑀕𑀺𑀮𑀸𑀦𑀧𑀼𑀘𑁆𑀙𑀦𑀁 𑀅𑀥𑀺𑀕𑀫𑀧𑀼𑀘𑁆𑀙𑀦𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀕𑀜𑁆𑀙𑀺. 𑀭𑁂𑀯𑀢𑀢𑁆𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀸𑀫𑀡𑁂𑀭𑀸𑀦𑀁 𑀲𑀢𑀼𑀧𑁆𑀧𑀸𑀤𑀯𑀲𑁂𑀦 𑀑𑀯𑀤𑀺𑀬𑀫𑀸𑀦𑁄 𑀘𑀸𑀮𑁂𑀢𑀺𑀕𑀸𑀣𑀁 𑀅𑀪𑀸𑀲𑀺𑀢𑁆𑀣. 𑀢𑀢𑁆𑀣 𑀘𑀸𑀮𑁂 𑀉𑀧𑀘𑀸𑀮𑁂 𑀲𑀻𑀲𑀽𑀧𑀘𑀸𑀮𑁂𑀢𑀺 𑀢𑁂𑀲𑀁 𑀆𑀮𑀧𑀦𑀁. 𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀽𑀧𑀘𑀸𑀮𑀸𑀢𑀺 𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀸 𑀢𑀬𑁄 𑀤𑀸𑀭𑀓𑀸 𑀧𑀩𑁆𑀩𑀚𑀺𑀢𑀸𑀧𑀺 𑀢𑀣𑀸 𑀯𑁄𑀳𑀭𑀺𑀬𑁆𑀬𑀦𑁆𑀢𑀺. ‘‘𑀘𑀸𑀮𑀻, 𑀉𑀧𑀘𑀸𑀮𑀻, 𑀲𑀻𑀲𑀽𑀧𑀘𑀸𑀮𑀻𑀢𑀺 𑀢𑁂𑀲𑀁 𑀦𑀸𑀫𑀸𑀦𑀻’’𑀢𑀺 𑀘 𑀯𑀤𑀦𑁆𑀢𑀺. 𑀬𑀤𑀢𑁆𑀣𑀁 ‘‘𑀘𑀸𑀮𑁂’’𑀢𑀺𑀆𑀤𑀺𑀦𑀸 𑀆𑀫𑀦𑁆𑀢𑀦𑀁 𑀓𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑀺𑀲𑁆𑀲𑀢𑀸 𑀦𑀼 𑀔𑁄 𑀯𑀺𑀳𑀭𑀣𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀆𑀳 𑁋 ‘‘𑀆𑀕𑀢𑁄 𑀯𑁄 𑀯𑀸𑀮𑀁 𑀯𑀺𑀬 𑀯𑁂𑀥𑀻’’𑀢𑀺. 𑀧𑀢𑀺𑀲𑁆𑀲𑀢𑀸𑀢𑀺 𑀧𑀢𑀺𑀲𑁆𑀲𑀢𑀺𑀓𑀸. 𑀔𑁄𑀢𑀺 𑀅𑀯𑀥𑀸𑀭𑀡𑁂. 𑀆𑀕𑀢𑁄𑀢𑀺 𑀆𑀕𑀜𑁆𑀙𑀺. 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁. 𑀯𑀸𑀮𑀁 𑀯𑀺𑀬 𑀯𑁂𑀥𑀻𑀢𑀺 𑀯𑀸𑀮𑀯𑁂𑀥𑀺 𑀯𑀺𑀬. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀺𑀓𑁆𑀔𑀚𑀯𑀦𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀯𑀸𑀮𑀯𑁂𑀥𑀺𑀭𑀽𑀧𑁄 𑀲𑀢𑁆𑀣𑀼𑀓𑀧𑁆𑀧𑁄 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼𑀮𑀢𑁆𑀣𑁂𑀭𑁄 𑀆𑀕𑀢𑁄, 𑀢𑀲𑁆𑀫𑀸 𑀲𑀫𑀡𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑀼𑀢𑁆𑀢𑀸 𑀏𑀯 𑀳𑀼𑀢𑁆𑀯𑀸 𑀯𑀺𑀳𑀭𑀣, 𑀬𑀣𑀸𑀥𑀺𑀕𑀢𑁂 𑀯𑀺𑀳𑀸𑀭𑁂 𑀅𑀧𑁆𑀧𑀫𑀢𑁆𑀢𑀸 𑀪𑀯𑀣𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑁂 𑀲𑀸𑀫𑀡𑁂𑀭𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀯𑀢𑁆𑀢𑀁 𑀓𑀢𑁆𑀯𑀸 𑀉𑀪𑀺𑀦𑁆𑀦𑀁 𑀫𑀸𑀢𑀼𑀮𑀢𑁆𑀣𑁂𑀭𑀸𑀦𑀁 𑀧𑀝𑀺𑀲𑀦𑁆𑀣𑀸𑀭𑀯𑁂𑀮𑀸𑀬𑀁 𑀦𑀸𑀢𑀺𑀤𑀽𑀭𑁂 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀭𑁂𑀯𑀢𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀢𑁂 𑀲𑀸𑀫𑀡𑁂𑀭𑁂 𑀉𑀧𑀲𑀗𑁆𑀓𑀫𑀺. 𑀢𑁂 𑀢𑀣𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀲𑁆𑀲 𑀓𑀢𑀢𑁆𑀢𑀸 𑀣𑁂𑀭𑁂 𑀉𑀧𑀲𑀗𑁆𑀓𑀫𑀦𑁆𑀢𑁂 𑀉𑀝𑁆𑀞𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑁋 ‘‘𑀓𑀢𑀭𑀓𑀢𑀭𑀯𑀺𑀳𑀸𑀭𑁂𑀦 𑀯𑀺𑀳𑀭𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀇𑀫𑀸𑀬 𑀇𑀫𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀤𑀸𑀭𑀓𑁂𑀧𑀺 𑀏𑀯𑀁 𑀯𑀺𑀦𑁂𑀦𑁆𑀢𑁄 𑁋 ‘‘𑀫𑀬𑁆𑀳𑀁 𑀪𑀸𑀢𑀺𑀓𑁄 𑀲𑀘𑁆𑀘𑀯𑀸𑀤𑀻 𑀯𑀢 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺 𑀣𑁂𑀭𑀁 𑀧𑀲𑀁𑀲𑀦𑁆𑀢𑁄 𑀧𑀓𑁆𑀓𑀸𑀫𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀔𑀤𑀺𑀭𑀯𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩-𑁧𑁦. 𑀆𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀼𑀫𑀦𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀧𑀺𑀢𑀸 𑀧𑀦𑀲𑁆𑀲 𑀦𑀦𑁆𑀤𑀭𑀸𑀚𑀸 𑀦𑀸𑀫. 𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀲𑀼𑀫𑀦𑀓𑀼𑀫𑀸𑀭𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀳𑀁𑀲𑀯𑀢𑀻𑀦𑀕𑀭𑀢𑁄 𑀯𑀻𑀲𑀬𑁄𑀚𑀦𑀲𑀢𑁂 𑀞𑀸𑀦𑁂 𑀪𑁄𑀕𑀦𑀕𑀭𑀁 𑀅𑀤𑀸𑀲𑀺. 𑀲𑁄 𑀓𑀤𑀸𑀘𑀺 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘 𑀧𑀺𑀢𑀭𑀜𑁆𑀘 𑀧𑀲𑁆𑀲𑀢𑀺. 𑀢𑀤𑀸 𑀭𑀸𑀚𑀸 𑀲𑀢𑁆𑀣𑀸𑀭𑀜𑁆𑀘 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀲𑀬𑀫𑁂𑀯 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺, 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀢𑀼𑀁 𑀦 𑀤𑁂𑀢𑀺.

𑀢𑁂𑀦 𑀲𑀫𑀬𑁂𑀦 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄 𑀅𑀳𑁄𑀲𑀺. 𑀓𑀼𑀫𑀸𑀭𑁄 𑀢𑀲𑁆𑀲 𑀓𑀼𑀧𑀺𑀢𑀪𑀸𑀯𑀁 𑀭𑀜𑁆𑀜𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀢𑀁 𑀯𑀽𑀧𑀲𑀫𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀯𑀭𑀁 𑀢𑁂 𑀢𑀸𑀯 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀢𑁂𑀫𑀸𑀲𑀁 𑀉𑀧𑀝𑁆𑀞𑀳𑀦𑁆𑀢𑁄 𑀚𑀻𑀯𑀺𑀢𑀁 𑀅𑀯𑀜𑁆𑀛𑀁 𑀓𑀸𑀢𑀼𑀁 𑀇𑀘𑁆𑀙𑀸𑀫𑀻’’𑀢𑀺 𑀆𑀳. ‘‘𑀏𑀢𑀁 𑀦 𑀲𑀓𑁆𑀓𑀸, 𑀅𑀜𑁆𑀜𑀁 𑀯𑀤𑁂𑀳𑀻’’𑀢𑀺. ‘‘𑀤𑁂𑀯, 𑀔𑀢𑁆𑀢𑀺𑀬𑀸𑀦𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦𑀢𑁆𑀣𑀺, 𑀏𑀢𑀁 𑀫𑁂 𑀤𑁂𑀳𑀺, 𑀦 𑀫𑀬𑁆𑀳𑀁 𑀅𑀜𑁆𑀜𑁂𑀦𑀢𑁆𑀣𑁄, 𑀲𑀘𑁂 𑀲𑀢𑁆𑀣𑀸 𑀅𑀦𑀼𑀚𑀸𑀦𑀸𑀢𑀺, 𑀤𑀺𑀦𑁆𑀦𑀫𑁂𑀯𑀸’’𑀢𑀺. 𑀲𑁄 ‘‘𑀲𑀢𑁆𑀣𑀼 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀢𑁄. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄, 𑀤𑀲𑁆𑀲𑁂𑀣 𑀫’’𑀦𑁆𑀢𑀺. 𑀪𑀺𑀓𑁆𑀔𑀽 ‘‘𑀲𑀼𑀫𑀦𑁄 𑀦𑀸𑀫 𑀣𑁂𑀭𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁, 𑀪𑀦𑁆𑀢𑁂, 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀅𑀣 𑀣𑁂𑀭𑁄 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀭𑀸𑀚𑀧𑀼𑀢𑁆𑀢𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀩𑀳𑀺 𑀆𑀲𑀦𑀁 𑀧𑀜𑁆𑀜𑀧𑁂𑀳𑀻’’𑀢𑀺. 𑀣𑁂𑀭𑁄 𑀧𑀼𑀦𑀧𑀺 𑀩𑀼𑀤𑁆𑀥𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲 𑀩𑀳𑀺𑀧𑀭𑀺𑀯𑁂𑀡𑁂 𑀧𑀸𑀢𑀼𑀪𑀯𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀓𑀼𑀫𑀸𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀦𑁆𑀢𑁄 𑀯𑀢𑀸𑀬𑀁 𑀪𑀺𑀓𑁆𑀔𑀽’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺.

𑀪𑀕𑀯𑀸𑀧𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀭𑀸𑀚𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀣𑁂𑀭𑁄 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀯𑀮𑁆𑀮𑀪𑁄 𑀫𑀜𑁆𑀜𑁂’’𑀢𑀺? ‘‘𑀆𑀫, 𑀓𑀼𑀫𑀸𑀭, 𑀯𑀮𑁆𑀮𑀪𑁄’’𑀢𑀺. ‘‘𑀓𑀺𑀁 𑀓𑀢𑁆𑀯𑀸, 𑀪𑀦𑁆𑀢𑁂, 𑀏𑀲 𑀯𑀮𑁆𑀮𑀪𑁄’’𑀢𑀺? ‘‘𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸’’𑀢𑀺. ‘‘𑀪𑀕𑀯𑀸, 𑀅𑀳𑀫𑁆𑀧𑀺 𑀅𑀬𑀁 𑀣𑁂𑀭𑁄 𑀯𑀺𑀬 𑀅𑀦𑀸𑀕𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄 𑀳𑁄𑀢𑀼𑀓𑀸𑀫𑁄’’𑀢𑀺 𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀔𑀦𑁆𑀥𑀸𑀯𑀸𑀭𑁂 𑀪𑀢𑁆𑀢𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂, ‘‘𑀪𑀦𑁆𑀢𑁂, 𑀫𑀬𑀸 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀢𑀼𑀫𑁆𑀳𑀸𑀓𑀁 𑀢𑁂𑀫𑀸𑀲𑀁 𑀧𑀝𑀺𑀚𑀕𑁆𑀕𑀦𑀯𑀭𑁄 𑀮𑀤𑁆𑀥𑁄, 𑀢𑁂𑀫𑀸𑀲𑀁 𑀫𑁂 𑀯𑀲𑁆𑀲𑀸𑀯𑀸𑀲𑀁 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑀁 𑀪𑀕𑀯𑀦𑁆𑀢𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀲𑀦𑀸𑀦𑀼𑀘𑁆𑀙𑀯𑀺𑀓𑁂 𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀲𑀸𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀲𑀫𑀻𑀧𑁂 𑀲𑀢𑀲𑀳𑀲𑁆𑀲𑁂𑀦 𑀓𑀻𑀢𑁂 𑀲𑁄𑀪𑀦𑀦𑀸𑀫𑀓𑁂 𑀉𑀬𑁆𑀬𑀸𑀦𑁂 𑀲𑀢𑀲𑀳𑀲𑁆𑀲𑁂𑀦 𑀓𑀸𑀭𑀺𑀢𑀁 𑀯𑀺𑀳𑀸𑀭𑀁 𑀧𑀯𑁂𑀲𑀸𑀧𑁂𑀢𑁆𑀯𑀸 𑁋

‘‘𑀲𑀢𑀲𑀳𑀲𑁆𑀲𑁂𑀦 𑀫𑁂 𑀓𑀻𑀢𑀁, 𑀲𑀢𑀲𑀳𑀲𑁆𑀲𑁂𑀦 𑀓𑀸𑀭𑀺𑀢𑀁;

𑀲𑁄𑀪𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁, 𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑀻’’𑀢𑀺. 𑁋

𑀉𑀤𑀓𑀁 𑀧𑀸𑀢𑁂𑀲𑀺. 𑀲𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀲𑀢𑁆𑀣𑀼 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀤𑀸𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀧𑀼𑀢𑁆𑀢𑀤𑀸𑀭𑁂 𑀅𑀫𑀘𑁆𑀘𑁂 𑀘 𑀤𑀸𑀦𑁂 𑀓𑀺𑀘𑁆𑀘𑀓𑀭𑀡𑁂 𑀘 𑀦𑀺𑀬𑁄𑀚𑁂𑀢𑁆𑀯𑀸 𑀲𑀬𑀁 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑀫𑀻𑀧𑁂𑀬𑁂𑀯 𑀯𑀲𑀦𑁆𑀢𑁄 𑀏𑀯𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀲𑀢𑁆𑀣𑀸𑀭𑀁 𑀢𑁂𑀫𑀸𑀲𑀁 𑀉𑀧𑀝𑁆𑀞𑀳𑀺. 𑀉𑀧𑀓𑀝𑁆𑀞𑀸𑀬 𑀧𑀦 𑀧𑀯𑀸𑀭𑀡𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀸𑀤𑀫𑀽𑀮𑁂 𑀢𑀺𑀘𑀻𑀯𑀭𑁂 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀬𑀤𑁂𑀢𑀁 𑀫𑀬𑀸 𑀔𑀦𑁆𑀥𑀸𑀯𑀸𑀭𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀁 𑀓𑀢𑀁, 𑀦 𑀢𑀁 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀓𑀢𑀁, 𑀅𑀣 𑀔𑁄 𑀅𑀳𑀫𑁆𑀧𑀺 𑀲𑀼𑀫𑀦𑀢𑁆𑀣𑁂𑀭𑁄 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀓𑁄 𑀯𑀮𑁆𑀮𑀪𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀢𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀧𑀭𑀫𑁆𑀧𑀺 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀉𑀴𑀸𑀭𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀉𑀢𑁆𑀢𑀭𑀲𑀸𑀝𑀓𑀁 𑀓𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀧𑀼𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀢𑁂 𑀪𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀗𑁆𑀕𑀮𑀼𑀬𑁆𑀬𑀸𑀦𑁂 𑀅𑀝𑁆𑀞 𑀧𑀡𑁆𑀡𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀦𑀺𑀲𑀻𑀤𑀦𑀢𑁆𑀣𑀸𑀬 𑀅𑀝𑁆𑀞 𑀲𑀩𑁆𑀩𑀭𑀢𑀦𑀫𑀬𑀧𑀻𑀞𑁂 𑀘𑁂𑀯 𑀫𑀡𑀺𑀆𑀥𑀸𑀭𑀓𑁂 𑀘 𑀧𑀝𑀺𑀬𑀸𑀤𑁂𑀢𑁆𑀯𑀸 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺, 𑀏𑀢𑀸𑀦𑀺 𑀧𑀸𑀓𑀝𑀸𑀦𑀺.

𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑁂 𑀜𑀸𑀢𑀓𑁂 𑀆𑀦𑀦𑁆𑀤𑀺𑀢𑁂 𑀓𑀭𑁄𑀦𑁆𑀢𑁄 𑀚𑀸𑀢𑁄𑀢𑀺 𑀆𑀦𑀦𑁆𑀤𑁄𑀢𑁆𑀯𑁂𑀯 𑀦𑀸𑀫𑀁 𑀮𑀪𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀬𑀧𑁆𑀧𑀢𑁆𑀢𑁄 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀧𑀞𑀫𑀁 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀪𑀕𑀯𑀢𑀺 𑀢𑀲𑁆𑀲 𑀧𑀭𑀺𑀯𑀸𑀭𑀢𑁆𑀣𑀁 𑀧𑀩𑁆𑀩𑀚𑀺𑀢𑀼𑀁 𑀦𑀺𑀓𑁆𑀔𑀫𑀦𑁆𑀢𑁂𑀳𑀺 𑀪𑀤𑁆𑀤𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀸 𑀉𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀦𑀸𑀕𑀲𑀫𑀸𑀮𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀢𑀺, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀦𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄, 𑀏𑀓𑀤𑀸 𑀲𑀸𑀕𑀢𑁄, 𑀏𑀓𑀤𑀸 𑀫𑁂𑀖𑀺𑀬𑁄, 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀦𑀸𑀭𑀸𑀥𑀬𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀫𑀳𑀮𑁆𑀮𑀓𑁄 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀫𑀬𑁆𑀳𑀁 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀯𑀺𑀚𑀸𑀦𑀣𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀫𑀳𑀸𑀲𑀸𑀯𑀓𑀸 ‘‘𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀳𑀺𑀁𑀲𑀼 𑀞𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁. 𑀢𑁂𑀧𑀺 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺.

𑀆𑀦𑀦𑁆𑀤𑁄 𑀧𑀦 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀢𑁆𑀯𑀫𑁆𑀧𑀺 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺. ‘‘𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀼𑀧𑀝𑁆𑀞𑀸𑀦𑀁 𑀦𑀸𑀫 𑀓𑀻𑀤𑀺𑀲𑀁 𑀳𑁄𑀢𑀺? 𑀲𑀘𑁂 𑀭𑀼𑀘𑁆𑀘𑀢𑀺, 𑀲𑀢𑁆𑀣𑀸 𑀲𑀬𑀫𑁂𑀯 𑀯𑀓𑁆𑀔𑀢𑀻’’𑀢𑀺. 𑀅𑀣 𑀪𑀕𑀯𑀸 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄 𑀅𑀜𑁆𑀜𑁂𑀳𑀺 𑀉𑀲𑁆𑀲𑀸𑀳𑁂𑀢𑀩𑁆𑀩𑁄, 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁄 𑀪𑀺𑀓𑁆𑀔𑀽 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺, 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀦𑀺𑀫𑀦𑁆𑀢𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀏𑀢𑁆𑀢𑀓𑁂 𑀕𑀼𑀡𑁂 𑀮𑀪𑀢𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀓𑁄 𑀪𑀸𑀭𑁄’’𑀢𑀺 𑀉𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑀸, ‘‘𑀲𑀘𑁂, 𑀪𑀦𑁆𑀢𑁂, 𑀪𑀕𑀯𑀸 𑀫𑀬𑀸 𑀕𑀳𑀺𑀢𑀁 𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑀸𑀳𑀁 𑀤𑁂𑀲𑀦𑁆𑀢𑀭𑀢𑁄 𑀆𑀕𑀢𑀸𑀕𑀢𑁂 𑀢𑀸𑀯𑀤𑁂𑀯 𑀤𑀲𑁆𑀲𑁂𑀢𑀼𑀁 𑀮𑀪𑀸𑀫𑀺, 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯𑀤𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 𑀮𑀪𑀸𑀫𑀺, 𑀲𑀘𑁂 𑀪𑀕𑀯𑀸 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀧𑀼𑀦 𑀫𑀬𑁆𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀲𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺’’. ‘‘𑀏𑀢𑁆𑀢𑀓𑀫𑁆𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀦𑀼𑀕𑁆𑀕𑀳𑀁 𑀦 𑀮𑀪𑀢𑀻’’𑀢𑀺 𑀉𑀧𑀯𑀸𑀤𑀫𑁄𑀘𑀦𑀢𑁆𑀣𑀜𑁆𑀘𑁂𑀯 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀪𑀸𑀯𑀧𑀭𑀺𑀧𑀽𑀭𑀡𑀢𑁆𑀣𑀜𑁆𑀘 𑀇𑀫𑀸 𑀘𑀢𑀲𑁆𑀲𑁄 𑀬𑀸𑀘𑀦𑀸𑀢𑀺 𑀇𑀫𑁂 𑀅𑀝𑁆𑀞 𑀯𑀭𑁂 𑀕𑀳𑁂𑀢𑁆𑀯𑀸 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀯 𑀞𑀸𑀦𑀦𑁆𑀢𑀭𑀲𑁆𑀲 𑀅𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀁 𑀧𑀸𑀧𑀼𑀡𑀺.

𑀲𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀩𑀮𑀁 𑀤𑀼𑀯𑀺𑀥𑁂𑀦 𑀉𑀤𑀓𑁂𑀦 𑀢𑀺𑀯𑀺𑀥𑁂𑀦 𑀤𑀦𑁆𑀢𑀓𑀝𑁆𑀞𑁂𑀦 𑀳𑀢𑁆𑀣𑀧𑀸𑀤𑀧𑀭𑀺𑀓𑀫𑁆𑀫𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑁂𑀦 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀺𑀘𑁆𑀘𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 𑁋 ‘‘𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀲𑀢𑁆𑀣𑀼 𑀇𑀤𑀁 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀺𑀯𑀲𑀪𑀸𑀕𑀁 𑀲𑀦𑁆𑀢𑀺𑀓𑀸𑀯𑀘𑀭𑁄 𑀳𑀼𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀫𑀳𑀦𑁆𑀢𑀁 𑀤𑀡𑁆𑀟𑀤𑀻𑀧𑀺𑀓𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀦𑀯𑀯𑀸𑀭𑁂 𑀅𑀦𑀼𑀧𑀭𑀺𑀬𑀸𑀬𑀢𑀺 𑀲𑀢𑁆𑀣𑀭𑀺 𑀧𑀓𑁆𑀓𑁄𑀲𑀦𑁆𑀢𑁂 𑀧𑀝𑀺𑀯𑀘𑀦𑀤𑀸𑀦𑀸𑀬, 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑁆𑀣𑀁. 𑀅𑀣 𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀲𑀁𑀲𑀺𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑀸𑀦𑀁 𑀲𑀢𑀺𑀫𑀦𑁆𑀢𑀸𑀦𑀁 𑀕𑀢𑀺𑀫𑀦𑁆𑀢𑀸𑀦𑀁 𑀥𑀺𑀢𑀺𑀫𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀏𑀯𑀁 𑀲𑀢𑁆𑀣𑀸𑀭𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀽𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑁄𑀲𑀸𑀭𑀓𑁆𑀔𑁄 𑀅𑀬𑀁 𑀫𑀳𑀸𑀣𑁂𑀭𑁄 𑀲𑁂𑀔𑁄𑀯 𑀲𑀫𑀸𑀦𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀪𑀺𑀓𑁆𑀔𑀽𑀳𑀺 𑀲𑀫𑀼𑀢𑁆𑀢𑁂𑀚𑀺𑀢𑁄 𑀤𑁂𑀯𑀢𑀸𑀬 𑀘 𑀲𑀁𑀯𑁂𑀚𑀺𑀢𑁄 ‘‘𑀲𑁆𑀯𑁂𑀬𑁂𑀯 𑀘 𑀤𑀸𑀦𑀺 𑀥𑀫𑁆𑀫𑀲𑀗𑁆𑀕𑀻𑀢𑀺 𑀓𑀸𑀢𑀩𑁆𑀩𑀸, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀬𑀁 𑀲𑁂𑀔𑁄 𑀲𑀓𑀭𑀡𑀻𑀬𑁄 𑀅𑀲𑁂𑀔𑁂𑀳𑀺 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀥𑀫𑁆𑀫𑀁 𑀕𑀸𑀬𑀺𑀢𑀼𑀁 𑀲𑀦𑁆𑀦𑀺𑀧𑀸𑀢𑀁 𑀕𑀦𑁆𑀢𑀼’’𑀦𑁆𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑀗𑁆𑀓𑀫𑁂 𑀯𑀻𑀭𑀺𑀬𑀲𑀫𑀢𑀁 𑀅𑀮𑀪𑀺𑀢𑁆𑀯𑀸 𑀢𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀺𑀢𑀼𑀓𑀸𑀫𑁄 𑀓𑀸𑀬𑀁 𑀆𑀯𑀝𑁆𑀝𑁂𑀲𑀺. 𑀅𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀁, 𑀧𑀸𑀤𑀸 𑀘 𑀪𑀽𑀫𑀺𑀢𑁄 𑀫𑀼𑀢𑁆𑀢𑀫𑀢𑁆𑀢𑀸, 𑀏𑀓𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺, 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺.

𑁬𑁪𑁪. 𑀏𑀯𑀁 𑀙𑀴𑀪𑀺𑀜𑁆𑀜𑀸𑀤𑀺𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁄 𑀉𑀧𑀝𑁆𑀞𑀸𑀓𑀸𑀤𑀺𑀕𑀼𑀡𑁂𑀳𑀺 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀭𑀸𑀫𑀤𑁆𑀯𑀸𑀭𑀸𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀯𑀺𑀳𑀸𑀭𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀲𑀫𑀻𑀧𑁂 𑀓𑀢𑀫𑀡𑁆𑀟𑀧𑀫𑀚𑁆𑀛𑁂 𑀲𑀼𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀫𑀳𑀸𑀫𑀼𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀲𑁆𑀲𑀦𑁆𑀢𑁄 𑀅𑀫𑀢𑀁 𑀯𑀼𑀝𑁆𑀞𑀺𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀸𑀫𑀳𑀸𑀅𑀫𑀢𑀥𑀸𑀭𑀸𑀳𑀺 𑀥𑀫𑁆𑀫𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑁄. 𑀦𑀺𑀩𑁆𑀩𑀸𑀧𑁂𑀲𑀺 𑀫𑀳𑀸𑀚𑀦𑀦𑁆𑀢𑀺 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀕𑀢𑀓𑀺𑀮𑁂𑀲𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀲𑀺 𑀯𑀽𑀧𑀲𑀫𑁂𑀲𑀺, 𑀫𑀳𑀸𑀚𑀦𑀁 𑀦𑀺𑀩𑁆𑀩𑀸𑀦𑀸𑀫𑀢𑀧𑀸𑀦𑁂𑀦 𑀲𑀦𑁆𑀢𑀺𑀁 𑀲𑀻𑀢𑀺𑀪𑀸𑀯𑀁 𑀧𑀸𑀧𑁂𑀲𑀻𑀢𑀺 𑀅𑀢𑁆𑀣𑁄.

𑁬𑁪𑁫. 𑀲𑀢𑀲𑀳𑀲𑁆𑀲𑀁 𑀢𑁂 𑀥𑀻𑀭𑀸𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀇𑀤𑁆𑀥𑀺𑀯𑀺𑀥𑀸𑀤𑀺𑀜𑀸𑀡𑀓𑁄𑀝𑁆𑀞𑀸𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀔𑀡𑁂𑀦 𑀕𑀦𑁆𑀢𑀼𑀁 𑀲𑀫𑀢𑁆𑀣𑀸𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀺𑀤𑁆𑀥𑀺𑀓𑀸𑀢𑁂 𑀥𑀻𑀭𑀸 𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀸 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻𑀢𑀺 𑀓𑀢𑁆𑀣𑀘𑀺 𑀅𑀦𑀧𑀕𑀢𑀸 𑀙𑀸𑀬𑀸 𑀇𑀯 𑀢𑀁 𑀲𑀫𑁆𑀩𑀼𑀤𑁆𑀥𑀁 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀦𑁆𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁬𑁪𑁬. 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀆𑀲𑀺𑀦𑁆𑀢𑀺 𑀢𑀤𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀲𑀫𑀬𑁂 𑀅𑀳𑀁 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀢𑀘𑁆𑀙𑀢𑁆𑀢𑀁 𑀯𑀭𑀼𑀢𑁆𑀢𑀫𑀦𑁆𑀢𑀺 𑀧𑀢𑁆𑀣𑁂𑀢𑀩𑁆𑀩𑀁 𑀉𑀢𑁆𑀢𑀫𑀁 𑀲𑁂𑀢𑀘𑁆𑀙𑀢𑁆𑀢𑀁 𑀫𑀫 𑀫𑀢𑁆𑀣𑀓𑁂 𑀥𑀸𑀭𑀬𑀦𑁆𑀢𑁄 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀘𑀸𑀭𑀼𑀭𑀽𑀧𑀁 𑀤𑀺𑀲𑁆𑀯𑀸𑀦𑀸𑀢𑀺 𑀲𑀼𑀦𑁆𑀤𑀭𑀁 𑀘𑀸𑀭𑀼𑀁 𑀫𑀦𑁄𑀳𑀭𑀭𑀽𑀧𑀯𑀦𑁆𑀢𑀁 𑀥𑀫𑁆𑀫𑀁 𑀤𑁂𑀲𑀺𑀬𑀫𑀸𑀦𑀁 𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀫𑁂 𑀫𑀬𑁆𑀳𑀁 𑀯𑀺𑀢𑁆𑀢𑀺 𑀲𑀦𑁆𑀢𑀼𑀝𑁆𑀞𑀺 𑀲𑁄𑀫𑀦𑀲𑁆𑀲𑀁 𑀉𑀤𑀧𑀚𑁆𑀚𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁬𑁪𑁭. 𑀑𑀭𑀼𑀬𑁆𑀳 𑀳𑀢𑁆𑀣𑀺𑀓𑁆𑀔𑀦𑁆𑀥𑀫𑁆𑀳𑀸𑀢𑀺 𑀢𑀁 𑀪𑀕𑀯𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑀺𑀢𑁄 𑀑𑀭𑀼𑀬𑁆𑀳 𑀑𑀭𑁄𑀳𑀺𑀢𑁆𑀯𑀸 𑀦𑀭𑀸𑀲𑀪𑀁 𑀦𑀭𑀯𑀲𑀪𑀁 𑀉𑀧𑀕𑀘𑁆𑀙𑀺𑀁 𑀲𑀫𑀻𑀧𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀭𑀢𑀦𑀫𑀬𑀙𑀢𑁆𑀢𑀁 𑀫𑁂𑀢𑀺 𑀭𑀢𑀦𑀪𑀽𑀲𑀺𑀢𑀁 𑀫𑁂 𑀫𑀬𑁆𑀳𑀁 𑀙𑀢𑁆𑀢𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀫𑀢𑁆𑀣𑀓𑁂 𑀥𑀸𑀭𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁪𑁮. 𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸𑀢𑀺 𑀫𑀬𑁆𑀳𑀁 𑀧𑀲𑀸𑀤𑁂𑀦 𑀉𑀧𑁆𑀧𑀦𑁆𑀦𑀁 𑀲𑀗𑁆𑀓𑀧𑁆𑀧𑀁 𑀜𑀢𑁆𑀯𑀸 𑀇𑀲𑀻𑀦𑀁 𑀅𑀦𑁆𑀢𑀭𑁂 𑀫𑀳𑀦𑁆𑀢𑀪𑀽𑀢𑁄 𑀲𑁄 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸. 𑀢𑀁 𑀓𑀣𑀁 𑀞𑀧𑀬𑀺𑀢𑁆𑀯𑀸𑀦𑀸𑀢𑀺 𑀢𑀁 𑀅𑀢𑁆𑀢𑀦𑀸 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀓𑀣𑀁 𑀞𑀧𑁂𑀢𑁆𑀯𑀸 𑀫𑀫 𑀩𑁆𑀬𑀸𑀓𑀭𑀡𑀢𑁆𑀣𑀸𑀬 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄.

𑁬𑁪𑁯. 𑀓𑀣𑀦𑁆𑀢𑀺 𑀘𑁂? 𑀬𑁄 𑀲𑁄𑀢𑀺𑀆𑀤𑀺𑀫𑀸𑀳. 𑀲𑁄𑀡𑁆𑀡𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁 𑀙𑀢𑁆𑀢𑀁 𑀬𑁄 𑀲𑁄 𑀭𑀸𑀚𑀓𑀼𑀫𑀸𑀭𑁄 𑀫𑁂 𑀫𑀢𑁆𑀣𑀓𑁂 𑀥𑀸𑀭𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀢𑀁 𑀭𑀸𑀚𑀓𑀼𑀫𑀸𑀭𑀁 𑀅𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀺. 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄𑀢𑀺 𑀪𑀸𑀲𑀦𑁆𑀢𑀲𑁆𑀲 𑀫𑀫 𑀯𑀘𑀦𑀁 𑀲𑀼𑀡𑁄𑀣 𑀑𑀳𑀺𑀢𑀲𑁄𑀢𑀸 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄.

𑁬𑁫𑁦. 𑀇𑀢𑁄 𑀕𑀦𑁆𑀢𑁆𑀯𑀸 𑀅𑀬𑀁 𑀧𑁄𑀲𑁄𑀢𑀺 𑀅𑀬𑀁 𑀭𑀸𑀚𑀓𑀼𑀫𑀸𑀭𑁄 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑁄 𑀢𑀼𑀲𑀺𑀢𑀁 𑀕𑀦𑁆𑀢𑁆𑀯𑀸 𑀆𑀯𑀲𑀺𑀲𑁆𑀲𑀢𑀺 𑀢𑀢𑁆𑀣 𑀯𑀺𑀳𑀭𑀺𑀲𑁆𑀲𑀢𑀺. 𑀢𑀢𑁆𑀣 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄 𑀧𑀭𑀺𑀯𑀸𑀭𑀺𑀢𑁄 𑀢𑀼𑀲𑀺𑀢𑀪𑀯𑀦𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁫𑁧. 𑀘𑀢𑀼𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀦𑁆𑀢𑀺 𑀢𑀼𑀲𑀺𑀢𑀪𑀯𑀦𑀢𑁄 𑀘𑀯𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀦𑁆𑀦𑁄 𑀘𑀢𑀼𑀢𑁆𑀢𑀺𑀁𑀲𑀯𑀸𑀭𑁂 𑀤𑁂𑀯𑀺𑀦𑁆𑀤𑁄 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀮𑀸𑀥𑀺𑀧𑁄 𑀅𑀝𑁆𑀞𑀲𑀢𑀦𑁆𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀩𑀮𑀸𑀥𑀺𑀧𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀅𑀥𑀺𑀧𑁄 𑀧𑀥𑀸𑀦𑁄 𑀅𑀝𑁆𑀞𑀲𑀢𑀚𑀸𑀢𑀻𑀲𑀼 𑀧𑀤𑁂𑀲𑀭𑀸𑀚𑀸 𑀳𑀼𑀢𑁆𑀯𑀸 𑀯𑀲𑀼𑀥𑀁 𑀅𑀦𑁂𑀓𑀭𑀢𑀦𑀯𑀭𑀁 𑀧𑀣𑀯𑀺𑀁 𑀆𑀯𑀲𑀺𑀲𑁆𑀲𑀢𑀺 𑀧𑀼𑀣𑀩𑁆𑀬𑀁 𑀯𑀺𑀳𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁫𑁨. 𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀦𑁆𑀢𑀺 𑀅𑀝𑁆𑀞𑀧𑀜𑁆𑀜𑀸𑀲𑀚𑀸𑀢𑀻𑀲𑀼 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀺𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀧𑀣𑀯𑀺𑀬𑀸 𑀯𑀺𑀧𑀼𑀮𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀤𑁂𑀲𑀭𑀚𑁆𑀚𑀁 𑀓𑀸𑀭𑀬𑀺𑀲𑁆𑀲𑀢𑀺.

𑁬𑁫𑁪. 𑀲𑀓𑁆𑀬𑀸𑀦𑀁 𑀓𑀼𑀮𑀓𑁂𑀢𑀼𑀲𑁆𑀲𑀸𑀢𑀺 𑀲𑀓𑁆𑀬𑀭𑀸𑀚𑀽𑀦𑀁 𑀓𑀼𑀮𑀲𑁆𑀲 𑀥𑀚𑀪𑀽𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀜𑀸𑀢𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁫𑁫. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀯𑀸. 𑀦𑀺𑀧𑀓𑁄𑀢𑀺 𑀦𑁂𑀧𑀓𑁆𑀓𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀩𑀸𑀳𑀼𑀲𑀘𑁆𑀘𑁂𑀲𑀼 𑀩𑀳𑀼𑀲𑁆𑀲𑀼𑀢𑀪𑀸𑀯𑁂𑀲𑀼 𑀧𑀺𑀝𑀓𑀢𑁆𑀢𑀬𑀥𑀸𑀭𑀡𑁂𑀲𑀼 𑀓𑁄𑀯𑀺𑀤𑁄 𑀙𑁂𑀓𑁄. 𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀦𑀯𑀜𑁆𑀜𑀢𑁆𑀢𑀺𑀓𑁄 𑀅𑀣𑀤𑁆𑀥𑁄 𑀓𑀸𑀬𑀧𑀸𑀕𑀩𑁆𑀩𑀺𑀬𑀸𑀤𑀺𑀣𑀤𑁆𑀥𑀪𑀸𑀯𑀯𑀺𑀭𑀳𑀺𑀢𑁄 𑀲𑀩𑁆𑀩𑀧𑀸𑀞𑀻 𑀲𑀓𑀮𑀧𑀺𑀝𑀓𑀢𑁆𑀢𑀬𑀥𑀸𑀭𑀻 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁫𑁬. 𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄𑀢𑀺 𑀲𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀻𑀭𑀺𑀬𑀓𑀭𑀡𑀸𑀬 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀻𑀢𑀺 𑀭𑀸𑀕𑀽𑀧𑀥𑀺𑀤𑁄𑀲𑀽𑀧𑀥𑀺𑀫𑁄𑀳𑀽𑀧𑀥𑀻𑀳𑀺 𑀯𑀺𑀭𑀳𑀺𑀢𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀉𑀧𑀲𑀦𑁆𑀢𑁄 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄.

𑁬𑁫𑁭. 𑀲𑀦𑁆𑀢𑀺 𑀆𑀭𑀜𑁆𑀜𑀓𑀸𑀢𑀺 𑀅𑀭𑀜𑁆𑀜𑁂 𑀪𑀯𑀸 𑀫𑀳𑀸𑀯𑀦𑁂 𑀚𑀸𑀢𑀸. 𑀲𑀝𑁆𑀞𑀺𑀳𑀸𑀬𑀦𑀸𑀢𑀺 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂 𑀳𑀸𑀬𑀦𑀩𑀮𑀸. 𑀢𑀺𑀥𑀸 𑀧𑀪𑀺𑀦𑁆𑀦𑀸𑀢𑀺 𑀅𑀓𑁆𑀔𑀺𑀓𑀡𑁆𑀡𑀓𑁄𑀲𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀪𑀺𑀦𑁆𑀦𑀫𑀤𑀸. 𑀫𑀸𑀢𑀗𑁆𑀕𑀸𑀢𑀺 𑀫𑀸𑀢𑀗𑁆𑀕𑀳𑀢𑁆𑀣𑀺𑀓𑀼𑀮𑁂 𑀚𑀸𑀢𑀸. 𑀈𑀲𑀸𑀤𑀦𑁆𑀢𑀸𑀢𑀺 𑀭𑀣𑀻𑀲𑀸𑀲𑀤𑀺𑀲𑀤𑀦𑁆𑀢𑀸. 𑀉𑀭𑀽𑀴𑁆𑀳𑀯𑀸 𑀭𑀸𑀚𑀯𑀸𑀳𑀦𑀸. 𑀓𑀼𑀜𑁆𑀚𑀭𑀲𑀗𑁆𑀔𑀸𑀢𑀸 𑀦𑀸𑀕𑀸 𑀳𑀢𑁆𑀣𑀺𑀭𑀸𑀚𑀸𑀦𑁄 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀬𑀣𑀸, 𑀢𑀣𑀸 𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑀸 𑀧𑀡𑁆𑀟𑀺𑀢𑀸 𑀫𑀳𑀺𑀤𑁆𑀥𑀺𑀓𑀸 𑀅𑀭𑀳𑀦𑁆𑀢𑀦𑀸𑀕𑀸 𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀅𑀭𑀳𑀦𑁆𑀢𑀦𑀸𑀕𑀸 𑀩𑀼𑀤𑁆𑀥𑀦𑀸𑀕𑀭𑀸𑀚𑀲𑁆𑀲. 𑀦 𑀳𑁄𑀦𑁆𑀢𑀺 𑀧𑀡𑀺𑀥𑀺𑀫𑁆𑀳𑀺 𑀢𑁂𑀢𑀺 𑀢𑁂 𑀧𑀡𑀺𑀥𑀺𑀫𑁆𑀳𑀺 𑀢𑀸𑀤𑀺𑀲𑀸 𑀦 𑀳𑁄𑀦𑁆𑀢𑀺, 𑀓𑀺𑀁 𑀲𑀩𑁆𑀩𑁂 𑀢𑁂 𑀪𑀬𑀪𑀻𑀢𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀏𑀢𑁆𑀢𑀸𑀯𑀢𑀸 𑀧𑀞𑀫𑀸 𑀩𑀼𑀤𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀅𑀧𑀤𑀸𑀦-𑀅𑀝𑁆𑀞𑀓𑀣𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑀣𑁂𑀭𑀸𑀧𑀤𑀸𑀦𑀁

𑁨. 𑀲𑀻𑀳𑀸𑀲𑀦𑀺𑀬𑀯𑀕𑁆𑀕𑁄

𑁧. 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀥𑀭𑀫𑀸𑀦𑁂 𑀪𑀕𑀯𑀢𑀺 𑀤𑁂𑀯𑀮𑁄𑀓𑁂 𑀯𑀲𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑁄 𑀲𑀸𑀭𑀻𑀭𑀺𑀓𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀫𑁂 𑀅𑀮𑀸𑀪𑀸, 𑀪𑀕𑀯𑀢𑁄 𑀥𑀭𑀫𑀸𑀦𑁂 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑁂𑀢𑀺𑀬𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀲𑀩𑁆𑀩𑀭𑀢𑀦𑀫𑀬𑀁 𑀤𑁂𑀯𑀢𑀸𑀦𑀺𑀫𑁆𑀫𑀺𑀢𑀲𑀤𑀺𑀲𑀁 𑀥𑀫𑁆𑀫𑀸𑀲𑀦𑁂 𑀲𑀻𑀳𑀸𑀲𑀦𑀁 𑀓𑀸𑀭𑁂𑀢𑁆𑀯𑀸 𑀚𑀻𑀯𑀫𑀸𑀦𑀓𑀩𑀼𑀤𑁆𑀥𑀲𑁆𑀲 𑀯𑀺𑀬 𑀧𑀽𑀚𑁂𑀲𑀺. 𑀢𑀲𑁆𑀲𑀼𑀧𑀭𑀺 𑀕𑁂𑀳𑀫𑁆𑀧𑀺 𑀤𑀺𑀩𑁆𑀩𑀯𑀺𑀫𑀸𑀦𑀫𑀺𑀯 𑀓𑀸𑀭𑁂𑀲𑀺, 𑀧𑀸𑀤𑀝𑁆𑀞𑀧𑀦𑀧𑀸𑀤𑀧𑀻𑀞𑀫𑁆𑀧𑀺 𑀓𑀸𑀭𑁂𑀲𑀺. 𑀏𑀯𑀁 𑀬𑀸𑀯𑀚𑀻𑀯𑀁 𑀤𑀻𑀧𑀥𑀽𑀧𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀅𑀦𑁂𑀓𑀯𑀺𑀥𑀁 𑀧𑀽𑀚𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀙 𑀓𑀸𑀫𑀲𑀕𑁆𑀕𑁂 𑀅𑀧𑀭𑀸𑀧𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀗𑁆𑀔𑁆𑀬𑀸𑀢𑀺𑀓𑁆𑀓𑀦𑁆𑀢𑀁 𑀧𑀤𑁂𑀲𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀏𑀢𑁆𑀣𑀦𑁆𑀢𑀭𑁂 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧. 𑀏𑀯𑀁 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑁄𑀓𑀲𑁆𑀲 𑀦𑀸𑀣𑁄 𑀧𑀥𑀸𑀦𑁄𑀢𑀺 𑀮𑁄𑀓𑀦𑀸𑀣𑁄, 𑀮𑁄𑀓𑀢𑁆𑀢𑀬𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀦𑀸𑀣𑁂 𑀲𑀺𑀤𑁆𑀥𑀢𑁆𑀣𑀫𑁆𑀳𑀺 𑀦𑀺𑀩𑁆𑀩𑀼𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀢𑁆𑀣𑀸𑀭𑀺𑀢𑁂 𑀧𑀸𑀯𑀘𑀦𑁂𑀢𑀺 𑀧𑀸𑀯𑀘𑀦𑁂 𑀧𑀺𑀝𑀓𑀢𑁆𑀢𑀬𑁂 𑀯𑀺𑀢𑁆𑀣𑀸𑀭𑀺𑀢𑁂 𑀧𑀢𑁆𑀣𑀝𑁂 𑀧𑀸𑀓𑀝𑁂𑀢𑀺 𑀅𑀢𑁆𑀣𑁄. 𑀩𑀸𑀳𑀼𑀚𑀜𑁆𑀜𑀫𑁆𑀳𑀺 𑀲𑀸𑀲𑀦𑁂𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑀓𑁄𑀝𑀺𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀳𑀺 𑀩𑀳𑀼𑀚𑀦𑁂𑀳𑀺 𑀜𑀸𑀢𑁂 𑀅𑀥𑀺𑀕𑀢𑁂𑀢𑀺 𑀅𑀢𑁆𑀣𑁄.

𑁨-𑁩. 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄𑀢𑀺 𑀢𑀤𑀸 𑀅𑀳𑀁 𑀩𑀼𑀤𑁆𑀥𑀲𑁆𑀲 𑀥𑀭𑀫𑀸𑀦𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁄 𑀦𑀺𑀩𑁆𑀩𑀼𑀢𑁂 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀉𑀧𑀧𑀦𑁆𑀦𑁄 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀭𑀻𑀭𑀺𑀓𑀥𑀸𑀢𑀼𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀬𑀼𑀢𑁆𑀢𑀫𑀦𑁄 𑀲𑀼𑀦𑁆𑀤𑀭𑀫𑀦𑁄 ‘‘𑀅𑀳𑁄 𑀫𑀫𑀸𑀕𑀫𑀦𑀁 𑀲𑁆𑀯𑀸𑀕𑀫𑀦’’𑀦𑁆𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑀩𑀳𑀼𑀫𑀸𑀦𑁄 ‘‘𑀫𑀬𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀏𑀓𑀁 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀢𑁄 𑀘𑁂𑀢𑀺𑀬𑀲𑀫𑀻𑀧𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀭𑀢𑀦𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸𑀯 𑀲𑀻𑀳𑀸𑀲𑀦𑀁 𑀅𑀓𑀸𑀲𑀺. 𑀢𑀢𑁆𑀭 𑀦𑀺𑀲𑀺𑀦𑁆𑀦𑀲𑁆𑀲 𑀧𑀸𑀤𑀝𑁆𑀞𑀧𑀦𑀢𑁆𑀣𑀸𑀬 𑀧𑀸𑀤𑀧𑀻𑀞𑀜𑁆𑀘 𑀓𑀸𑀭𑁂𑀲𑀺. 𑀲𑀻𑀳𑀸𑀲𑀦𑀲𑁆𑀲 𑀅𑀢𑁂𑀫𑀦𑀢𑁆𑀣𑀸𑀬 𑀢𑀲𑁆𑀲𑀼𑀧𑀭𑀺 𑀖𑀭𑀜𑁆𑀘 𑀓𑀸𑀭𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀻𑀳𑀸𑀲𑀦𑀫𑀓𑀸𑀲𑀳𑀁…𑀧𑁂… 𑀖𑀭𑀁 𑀢𑀢𑁆𑀣 𑀅𑀓𑀸𑀲𑀳’’𑀦𑁆𑀢𑀺. 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦𑀸𑀢𑀺 𑀥𑀭𑀫𑀸𑀦𑀲𑁆𑀲 𑀯𑀺𑀬 𑀪𑀕𑀯𑀢𑁄 𑀲𑀻𑀳𑀸𑀲𑀦𑀁 𑀫𑀬𑀸 𑀓𑀢𑀁, 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦. 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀦𑁆𑀢𑀺 𑀢𑀼𑀲𑀺𑀢𑀪𑀯𑀦𑁂 𑀉𑀧𑀧𑀚𑁆𑀚𑀺𑀦𑁆𑀢𑀺 𑀅𑀢𑁆𑀣𑁄.

𑁪. 𑀆𑀬𑀸𑀫𑁂𑀦 𑀘𑀢𑀼𑀩𑁆𑀩𑀻𑀲𑀸𑀢𑀺 𑀢𑀢𑁆𑀭𑀼𑀧𑀧𑀦𑁆𑀦𑀲𑁆𑀲 𑀤𑁂𑀯𑀪𑀽𑀢𑀲𑁆𑀲 𑀲𑀢𑁄 𑀫𑀬𑁆𑀳𑀁 𑀲𑀼𑀓𑀢𑀁 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀧𑀸𑀢𑀼𑀪𑀽𑀢𑀁 𑀆𑀬𑀸𑀫𑁂𑀦 𑀉𑀘𑁆𑀘𑀢𑁄 𑀘𑀢𑀼𑀩𑁆𑀩𑀻𑀲𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦 𑀢𑀺𑀭𑀺𑀬𑀢𑁄 𑀘𑀢𑀼𑀤𑁆𑀤𑀲𑀬𑁄𑀚𑀦𑀁 𑀢𑀸𑀯𑀤𑁂𑀯 𑀦𑀺𑀩𑁆𑀩𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀆𑀲𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁯. 𑀘𑀢𑀼𑀦𑁆𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂𑀢𑀺 𑀇𑀢𑁄 𑀓𑀧𑁆𑀧𑀢𑁄 𑀘𑀢𑀼𑀦𑀯𑀼𑀢𑁂 𑀓𑀧𑁆𑀧𑁂 𑀬𑀁 𑀓𑀫𑁆𑀫𑀁 𑀅𑀓𑀭𑀺𑀁 𑀅𑀓𑀸𑀲𑀺𑀁, 𑀢𑀤𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀩𑀮𑁂𑀦 𑀓𑀜𑁆𑀘𑀺 𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦 𑀅𑀦𑀼𑀪𑀽𑀢𑀧𑀼𑀩𑁆𑀩𑀸 𑀓𑀸𑀘𑀺 𑀤𑀼𑀕𑁆𑀕𑀢𑀻𑀢𑀺 𑀅𑀢𑁆𑀣𑁄.

𑁧𑁦. 𑀢𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂𑀢𑀺 𑀇𑀢𑁄 𑀓𑀧𑁆𑀧𑀢𑁄 𑀢𑁂𑀲𑀢𑁆𑀢𑀢𑀺𑀓𑀧𑁆𑀧𑁂. 𑀇𑀦𑁆𑀤𑀦𑀸𑀫𑀸 𑀢𑀬𑁄 𑀚𑀦𑀸𑀢𑀺 𑀇𑀦𑁆𑀤𑀦𑀸𑀫𑀓𑀸 𑀢𑀬𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀢𑀻𑀲𑀼 𑀚𑀸𑀢𑀻𑀲𑀼 𑀇𑀦𑁆𑀤𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂𑀢𑀺 𑀇𑀢𑁄 𑀤𑁆𑀯𑁂𑀲𑀢𑁆𑀢𑀢𑀺𑀓𑀧𑁆𑀧𑁂. 𑀲𑀼𑀫𑀦𑀦𑀸𑀫𑀓𑀸 𑀢𑀬𑁄 𑀚𑀦𑀸 𑀢𑀺𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀅𑀳𑁂𑀲𑀼𑀁.

𑁧𑁧. 𑀲𑀫𑀲𑀢𑁆𑀢𑀢𑀺𑀢𑁄 𑀓𑀧𑁆𑀧𑁂𑀢𑀺 𑀇𑀢𑁄 𑀓𑀧𑁆𑀧𑀢𑁄 𑀅𑀦𑀽𑀦𑀸𑀥𑀺𑀓𑁂 𑀲𑀢𑁆𑀢𑀢𑀺𑀫𑁂 𑀓𑀧𑁆𑀧𑁂 𑀯𑀭𑀼𑀡𑀦𑀸𑀫𑀓𑀸 𑀯𑀭𑀼𑀡𑁄 𑀘𑀓𑁆𑀓𑀯𑀢𑁆𑀢𑀻𑀢𑀺 𑀏𑀯𑀁𑀦𑀸𑀫𑀓𑀸 𑀢𑀬𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀘𑀓𑁆𑀓𑀭𑀢𑀦𑀲𑀫𑁆𑀧𑀦𑁆𑀦𑀸 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀏𑀓𑀢𑁆𑀣𑀫𑁆𑀪𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀏𑀓𑀢𑁆𑀣𑀫𑁆𑀪𑀤𑀸𑀬𑀓𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀦𑀓𑀫𑁆𑀫𑀺𑀓𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀩𑁆𑀩𑁂 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀉𑀧𑀸𑀲𑀓𑀸 𑀏𑀓𑀘𑁆𑀙𑀦𑁆𑀤𑀸 ‘‘𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀲𑀸𑀮𑀁 𑀓𑀭𑁄𑀫𑀸’’𑀢𑀺 𑀤𑀩𑁆𑀩𑀲𑀫𑁆𑀪𑀸𑀭𑀢𑁆𑀣𑀸𑀬 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀏𑀓𑀁 𑀣𑀫𑁆𑀪𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀢𑁂 𑀲𑀩𑁆𑀩𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀏𑀓𑀁 𑀲𑀸𑀭𑀫𑀬𑀁 𑀣𑀫𑁆𑀪𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀅𑀤𑀸𑀲𑀺. 𑀲𑁄 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀤𑁂𑀯 𑀫𑀽𑀮𑀁 𑀓𑀢𑁆𑀯𑀸 𑀅𑀜𑁆𑀜𑀸𑀦𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑀭𑀸𑀧𑀭𑀁 𑀙𑀲𑀼 𑀓𑀸𑀫𑀸𑀯𑀘𑀭𑁂𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀅𑀕𑁆𑀕𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑁂𑀓𑀯𑀸𑀭𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀤𑁂𑀲𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁩. 𑀲𑁄 𑀏𑀯𑀁 𑀧𑀢𑁆𑀢𑀅𑀭𑀳𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀪𑀕𑁆𑀬𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀫𑀳𑀸𑀧𑀽𑀕𑀕𑀡𑁄𑀢𑀺 𑀫𑀳𑀸𑀉𑀧𑀸𑀲𑀓𑀲𑀫𑀽𑀳𑁄 𑀅𑀳𑀼 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀲𑀭𑀡𑀁 𑀕𑀢𑀸 𑀘 𑀢𑁂 𑀩𑀼𑀤𑁆𑀥𑀦𑁆𑀢𑀺 ‘‘𑀩𑀼𑀤𑁆𑀥𑀁 𑀲𑀭𑀡’’𑀦𑁆𑀢𑀺 𑀕𑀢𑀸 𑀪𑀚𑀺𑀁𑀲𑀼 𑀚𑀸𑀦𑀺𑀁𑀲𑀼 𑀯𑀸 𑀢𑁂 𑀉𑀧𑀸𑀲𑀓𑀸. 𑀢𑀣𑀸𑀕𑀢𑀁 𑀲𑀤𑁆𑀤𑀳𑀦𑁆𑀢𑀺 𑀩𑀼𑀤𑁆𑀥𑀕𑀼𑀡𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀞𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁪. 𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀢𑁆𑀯𑀸𑀢𑀺 𑀲𑀩𑁆𑀩𑁂 𑀲𑀫𑀸𑀕𑀫𑁆𑀫 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀫𑀸𑀴𑀁 𑀉𑀧𑀝𑁆𑀞𑀸𑀦𑀲𑀸𑀮𑀁 𑀲𑀢𑁆𑀣𑀼𑀦𑁄 𑀅𑀢𑁆𑀣𑀸𑀬 𑀓𑀼𑀩𑁆𑀩𑀦𑁆𑀢𑀺 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀩𑁆𑀩𑀲𑀫𑁆𑀪𑀸𑀭𑁂𑀲𑀼 𑀏𑀓𑀢𑁆𑀣𑀫𑁆𑀪𑀁 𑀅𑀮𑀪𑀦𑁆𑀢𑀸 𑀩𑁆𑀭𑀳𑀸𑀯𑀦𑁂 𑀫𑀳𑀸𑀯𑀦𑁂 𑀯𑀺𑀘𑀺𑀦𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁫. 𑀢𑁂𑀳𑀁 𑀅𑀭𑀜𑁆𑀜𑁂 𑀤𑀺𑀲𑁆𑀯𑀸𑀦𑀸𑀢𑀺 𑀅𑀳𑀁 𑀢𑁂 𑀉𑀧𑀸𑀲𑀓𑁂 𑀅𑀭𑀜𑁆𑀜𑁂 𑀤𑀺𑀲𑁆𑀯𑀸𑀦 𑀕𑀡𑀁 𑀲𑀫𑀽𑀳𑀁 𑀉𑀧𑀕𑀫𑁆𑀫 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦 𑀤𑀲𑀗𑁆𑀕𑀼𑀮𑀺𑀲𑀫𑁄𑀥𑀸𑀦𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀅𑀳𑀁 𑀕𑀡𑀁 𑀉𑀧𑀸𑀲𑀓𑀲𑀫𑀽𑀳𑀁 ‘‘𑀢𑀼𑀫𑁆𑀳𑁂 𑀇𑀫𑀁 𑀯𑀦𑀁 𑀓𑀺𑀫𑀢𑁆𑀣𑀁 𑀆𑀕𑀢𑀢𑁆𑀣𑀸’’𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀭𑀺𑀧𑀼𑀘𑁆𑀙𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬. 𑀢𑁂 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸 𑀫𑁂 𑀫𑀬𑀸 𑀧𑀼𑀝𑁆𑀞𑀸 ‘‘𑀫𑀸𑀴𑀁 𑀫𑀬𑀁 𑀓𑀢𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀓𑀢𑁆𑀣𑀫𑁆𑀪𑁄 𑀅𑀫𑁆𑀳𑁂𑀳𑀺 𑀦 𑀮𑀩𑁆𑀪𑀢𑀻’’𑀢𑀺 𑀯𑀺𑀬𑀸𑀓𑀁𑀲𑀼 𑀯𑀺𑀲𑁂𑀲𑁂𑀦 𑀓𑀣𑀬𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁭. 𑀫𑀫𑀁 𑀫𑀬𑁆𑀳𑀁 𑀏𑀓𑀢𑁆𑀣𑀫𑁆𑀪𑀁 𑀤𑁂𑀣, 𑀅𑀳𑀁 𑀢𑀁 𑀤𑀲𑁆𑀲𑀸𑀫𑀺 𑀲𑀢𑁆𑀣𑀼𑀦𑁄 𑀲𑀦𑁆𑀢𑀺𑀓𑀁 𑀅𑀳𑀁 𑀣𑀫𑁆𑀪𑀁 𑀆𑀳𑀭𑀺𑀲𑁆𑀲𑀸𑀫𑀺, 𑀢𑁂 𑀪𑀯𑀦𑁆𑀢𑁄 𑀣𑀫𑁆𑀪𑀳𑀭𑀡𑁂 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀉𑀲𑁆𑀲𑀸𑀳𑀭𑀳𑀺𑀢𑀸 𑀪𑀯𑀦𑁆𑀢𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁪. 𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀻𑀢𑀺 𑀬𑀁 𑀬𑀁 𑀬𑁄𑀦𑀺𑀁 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁 𑀉𑀧𑀕𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀏𑀓𑀢𑁆𑀣𑀫𑁆𑀪𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀽𑀚𑀸𑀲𑀓𑁆𑀓𑀸𑀭𑀩𑀳𑀼𑀮𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀏𑀯𑀭𑀽𑀧𑁄 𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀥𑀫𑁆𑀫𑀢𑀸𑀬 𑀦𑀸𑀫 𑀦𑀤𑀺𑀬𑀸 𑀫𑀳𑀦𑁆𑀢𑁄 𑀓𑀘𑁆𑀙𑀧𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀦𑀤𑀺𑀁 𑀢𑀭𑀺𑀢𑀼𑀁 𑀢𑀻𑀭𑁂 𑀞𑀺𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀪𑀕𑀯𑀦𑁆𑀢𑀁 𑀢𑀸𑀭𑁂𑀢𑀼𑀓𑀸𑀫𑁄 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺. 𑀲𑁄 𑀳𑀝𑁆𑀞𑀢𑀼𑀝𑁆𑀞𑁄 𑀯𑁂𑀕𑁂𑀦 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀲𑀻𑀖𑀢𑀭𑀁 𑀧𑀭𑀢𑀻𑀭𑀁 𑀧𑀸𑀧𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀯𑀤𑀦𑁆𑀢𑁄 𑀪𑀸𑀯𑀺𑀦𑀺𑀁 𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀜𑀸𑀢𑀺𑀲𑀗𑁆𑀖𑀁 𑀦𑀦𑁆𑀤𑀬𑀦𑁆𑀢𑁄 𑀚𑀸𑀢𑁄𑀢𑀺 ‘‘𑀦𑀦𑁆𑀤𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀪𑀕𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀕𑀸𑀣𑀸𑀬 𑀧𑀺𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 ‘‘𑀥𑀫𑁆𑀫𑀜𑁆𑀘𑀭𑁂 𑀲𑀼𑀘𑀭𑀺𑀢’’𑀦𑁆𑀢𑀺 (𑀥. 𑀧. 𑁧𑁬𑁯) 𑀕𑀸𑀣𑀸𑀬 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀭𑀸𑀚𑀸𑀦𑀁 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀕𑁂𑀳𑀧𑀯𑁂𑀲𑀦𑀆𑀯𑀸𑀳𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀢𑁆𑀣𑀸 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀯𑀺𑀳𑀸𑀭𑀁 𑀕𑀢𑁄, 𑀢𑀁 𑀧𑀢𑁆𑀢𑀳𑀢𑁆𑀣𑀁 𑀯𑀺𑀳𑀸𑀭𑀁 𑀆𑀕𑀢𑀁 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀣𑀸𑀧𑀩𑁆𑀩𑀸𑀚𑀺𑀢𑀢𑁆𑀢𑀸𑀬𑁂𑀯 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑀁 𑀜𑀢𑁆𑀯𑀸 𑀉𑀧𑀸𑀬𑁂𑀦 𑀢𑀲𑁆𑀲 𑀢𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺. 𑀲𑁄 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀧𑀼𑀦 𑀤𑀺𑀯𑀲𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦𑀁, 𑀫𑀼𑀜𑁆𑀘𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. 𑀪𑀕𑀯𑀸𑀧𑀺 ‘‘𑀬𑀤𑁂𑀯 𑀢𑁂, 𑀦𑀦𑁆𑀤, 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀢𑀤𑀸𑀳𑀁 𑀫𑀼𑀢𑁆𑀢𑁄 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺 𑀆𑀳. 𑀅𑀣𑀲𑁆𑀲 𑀪𑀕𑀯𑀸 𑀲𑀯𑀺𑀲𑁂𑀲𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀜𑀢𑁆𑀯𑀸 𑀢𑀁 𑀕𑀼𑀡𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁩𑁦) 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀪𑀸𑀯𑁂𑀦 𑀦𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀣𑁂𑀭𑁄 𑀳𑀺 ‘‘𑀇𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑀳𑀁 𑀲𑀼𑀝𑁆𑀞𑀼 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀁 𑀅𑀕𑀫𑀸𑀲𑀺.

𑁨𑁭. 𑀏𑀯𑀁 𑀲𑁄 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀯𑀢𑁆𑀣𑀁 𑀔𑁄𑀫𑀁 𑀫𑀬𑀸 𑀤𑀺𑀦𑁆𑀦𑀦𑁆𑀢𑀺 𑀔𑁄𑀫𑀭𑀝𑁆𑀞𑁂 𑀚𑀸𑀢𑀁 𑀯𑀢𑁆𑀣𑀁 𑀪𑀕𑀯𑀢𑀺 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀕𑀸𑀭𑀯𑀩𑀳𑀼𑀫𑀸𑀦𑁂𑀦 𑀫𑀬𑀸 𑀧𑀭𑀫𑀲𑀼𑀔𑀼𑀫𑀁 𑀔𑁄𑀫𑀯𑀢𑁆𑀣𑀁 𑀤𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀬𑀫𑁆𑀪𑀼𑀲𑁆𑀲𑀸𑀢𑀺 𑀲𑀬𑀫𑁂𑀯 𑀪𑀽𑀢𑀲𑁆𑀲 𑀚𑀸𑀢𑀲𑁆𑀲 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑀲𑁆𑀲. 𑀫𑀳𑁂𑀲𑀺𑀦𑁄𑀢𑀺 𑀫𑀳𑀦𑁆𑀢𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀏𑀲𑀺 𑀕𑀯𑁂𑀲𑀻𑀢𑀺 𑀫𑀳𑁂𑀲𑀺, 𑀢𑀲𑁆𑀲 𑀫𑀳𑁂𑀲𑀺𑀦𑁄 𑀲𑀬𑀫𑁆𑀪𑀼𑀲𑁆𑀲 𑀘𑀻𑀯𑀭𑀢𑁆𑀣𑀸𑀬 𑀔𑁄𑀫𑀯𑀢𑁆𑀣𑀁 𑀫𑀬𑀸 𑀤𑀺𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮. 𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀻𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀲𑀸𑀫𑁆𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀯𑀢𑁆𑀣𑀤𑀸𑀬𑀓𑀲𑁆𑀲 𑀫𑁂 𑀤𑀸𑀦𑀨𑀮𑀁 𑀯𑀺𑀲𑁂𑀲𑁂𑀦 𑀅𑀓𑀸𑀲𑀺 𑀓𑀣𑁂𑀲𑀺 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄𑀢𑀺 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄. ‘‘𑀚𑀮𑀭𑀼𑀢𑁆𑀢𑀫𑀦𑀸𑀬𑀓𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀚𑀮𑀫𑀸𑀦𑀸𑀦𑀁 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀉𑀢𑁆𑀢𑀫𑀦𑀸𑀬𑀓𑁄 𑀧𑀥𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀯𑀢𑁆𑀣𑀤𑀸𑀦𑁂𑀦𑀸𑀢𑀺 𑀇𑀫𑀺𑀦𑀸 𑀯𑀢𑁆𑀣𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑁆𑀯𑀁 𑀅𑀦𑀸𑀕𑀢𑁂 𑀳𑁂𑀫𑀯𑀡𑁆𑀡𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀪𑀯𑀺𑀲𑁆𑀲𑀲𑀺.

𑁨𑁯. 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀢𑀺 𑀤𑀺𑀩𑁆𑀩𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸. 𑀓𑀼𑀲𑀮𑀫𑀽𑀮𑁂𑀳𑀺 𑀘𑁄𑀤𑀺𑀢𑁄𑀢𑀺 𑀓𑀼𑀲𑀮𑀸𑀯𑀬𑀯𑁂𑀳𑀺 𑀓𑀼𑀲𑀮𑀓𑁄𑀝𑁆𑀞𑀸𑀲𑁂𑀳𑀺 𑀘𑁄𑀤𑀺𑀢𑁄 𑀧𑁂𑀲𑀺𑀢𑁄, ‘‘𑀢𑁆𑀯𑀁 𑀇𑀫𑀺𑀦𑀸 𑀧𑀼𑀜𑁆𑀜𑁂𑀦 𑀲𑀢𑁆𑀣𑀼 𑀓𑀼𑀮𑀁 𑀧𑀲𑀯𑀸𑀳𑀻’’𑀢𑀺 𑀧𑁂𑀲𑀺𑀢𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀓𑀦𑀺𑀝𑁆𑀞𑁄 𑀢𑁆𑀯𑀁 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁦. 𑀭𑀸𑀕𑀭𑀢𑁆𑀢𑁄 𑀲𑀼𑀔𑀲𑀻𑀮𑁄𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀭𑀢𑁆𑀢𑁄 𑀅𑀮𑁆𑀮𑀻𑀦𑁄 𑀓𑀸𑀬𑀲𑀼𑀔𑀘𑀺𑀢𑁆𑀢𑀲𑀼𑀔𑀸𑀦𑀼𑀪𑀯𑀦𑀲𑀪𑀸𑀯𑁄. 𑀓𑀸𑀫𑁂𑀲𑀼 𑀕𑁂𑀥𑀫𑀸𑀬𑀼𑀢𑁄𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀕𑁂𑀥𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀆𑀬𑀼𑀢𑁄 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄 𑀲𑀦𑁆𑀢𑁄, 𑀢𑀤𑀸 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀓𑀸𑀫𑁂𑀲𑀼 𑀕𑁂𑀥𑀺𑀢𑁄, 𑀢𑀤𑀸 𑀢𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀪𑀸𑀢𑀼𑀓𑁂𑀦 𑀕𑁄𑀢𑀫𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄 𑀧𑀩𑁆𑀩𑀚𑁆𑀚𑀸𑀬 𑀉𑀬𑁆𑀬𑁄𑀚𑀺𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁧. 𑀧𑀩𑁆𑀩𑀚𑀺𑀢𑁆𑀯𑀸𑀦 𑀢𑁆𑀯𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀢𑁆𑀯𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀲𑀮𑀫𑀽𑀮𑁂𑀦 𑀫𑀽𑀮𑀪𑀽𑀢𑁂𑀦 𑀧𑀼𑀜𑁆𑀜𑀲𑀫𑁆𑀪𑀸𑀭𑁂𑀦 𑀘𑁄𑀤𑀺𑀢𑁄 𑀪𑀸𑀯𑀦𑀸𑀬𑀁 𑀦𑀺𑀬𑁄𑀚𑀺𑀢𑁄 𑀲𑀩𑁆𑀩𑀸𑀲𑀯𑁂 𑀲𑀓𑀮𑀸𑀲𑀯𑁂 𑀧𑀭𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀅𑀦𑀸𑀫𑀬𑁄 𑀦𑀺𑀤𑁆𑀤𑀼𑀓𑁆𑀔𑁄 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺 𑀅𑀤𑀲𑁆𑀲𑀦𑀁 𑀧𑀸𑀧𑁂𑀲𑁆𑀲𑀲𑀺, 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀫𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑁩𑁨. 𑀲𑀢𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺 𑀇𑀢𑁄 𑀓𑀧𑁆𑀧𑀢𑁄 𑀧𑀼𑀩𑁆𑀩𑁂 𑀲𑀢𑀓𑀧𑁆𑀧𑀸𑀥𑀺𑀓𑁂 𑀲𑀳𑀲𑁆𑀲𑀫𑁂 𑀓𑀧𑁆𑀧𑀫𑁆𑀳𑀺 𑀘𑁂𑀴𑀦𑀸𑀫𑀓𑀸 𑀘𑀢𑁆𑀢𑀸𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀻𑀢𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀲𑀝𑁆𑀞𑀺 𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀳𑁂𑀝𑁆𑀞𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀉𑀧𑀘𑁂𑀴𑀸 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀘𑀢𑀽𑀲𑀼 𑀚𑀸𑀢𑀻𑀲𑀼 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁩𑁩. 𑀧𑀜𑁆𑀘𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺 𑀧𑀜𑁆𑀘𑀓𑀧𑁆𑀧𑀸𑀥𑀺𑀓𑁂 𑀲𑀳𑀲𑁆𑀲𑀫𑁂 𑀓𑀧𑁆𑀧𑀫𑁆𑀳𑀺 𑀘𑁂𑀴𑀸 𑀦𑀸𑀫 𑀘𑀢𑁆𑀢𑀸𑀭𑁄 𑀚𑀦𑀸 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑁆𑀧𑀦𑁆𑀦𑀸 𑀲𑀫𑀗𑁆𑀕𑀻𑀪𑀽𑀢𑀸 𑀚𑀫𑁆𑀩𑀼𑀤𑀻𑀧𑀅𑀧𑀭𑀕𑁄𑀬𑀸𑀦𑀉𑀢𑁆𑀢𑀭𑀓𑀼𑀭𑀼𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑀲𑀗𑁆𑀔𑀸𑀢𑁂 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸 𑀧𑀥𑀸𑀦𑀸 𑀯𑀺𑀲𑀼𑀁 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀬𑀤𑁂𑀢𑁆𑀣 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀓𑀦𑀺𑀧𑀸𑀢𑁂 𑀫𑀳𑀸𑀧𑀦𑁆𑀣𑀓𑀯𑀢𑁆𑀣𑀼𑀲𑁆𑀫𑀺𑀁 (𑀣𑁂𑀭𑀕𑀸. 𑁫𑁧𑁦 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀲𑀓𑁆𑀓𑀸 𑀘𑀽𑀴𑀧𑀦𑁆𑀣𑀓𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀼𑀔𑁂 𑀧𑀢𑀺𑀝𑁆𑀞𑀸𑀧𑁂𑀢𑀼’’𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀅𑀬𑁆𑀬𑀓𑀁 𑀥𑀦𑀲𑁂𑀝𑁆𑀞𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀲𑀘𑁂, 𑀫𑀳𑀸𑀲𑁂𑀝𑁆𑀞𑀺, 𑀅𑀦𑀼𑀚𑀸𑀦𑀸𑀣, 𑀅𑀳𑀁 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀬𑁆𑀬’’𑀦𑁆𑀢𑀺. ‘‘𑀧𑀩𑁆𑀩𑀸𑀚𑁂𑀣, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀪𑀸𑀢𑀼 𑀲𑀦𑁆𑀢𑀺𑀓𑁂 𑁋

‘‘𑀧𑀤𑀼𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁, 𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁, 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁨𑁩; 𑀅. 𑀦𑀺. 𑁫.𑁧𑁯𑁫) 𑁋

𑀕𑀸𑀣𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀉𑀕𑁆𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀕𑀳𑀺𑀢𑀫𑁆𑀧𑀺 𑀳𑀤𑀬𑁂 𑀦 𑀢𑀺𑀝𑁆𑀞𑀢𑀺. 𑀅𑀣 𑀦𑀁 𑀫𑀳𑀸𑀧𑀦𑁆𑀣𑀓𑁄, ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀪𑀩𑁆𑀩𑁄, 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀫𑁆𑀧𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀦 𑀢𑁆𑀯𑀁 𑀓𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀲𑀺, 𑀦𑀺𑀓𑁆𑀔𑀫 𑀇𑀢𑁄’’𑀢𑀺 𑀲𑁄 𑀣𑁂𑀭𑁂𑀦 𑀧𑀡𑀸𑀫𑀺𑀓𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑁂 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀢𑁆𑀣𑀸 𑀚𑀻𑀯𑀓𑀫𑁆𑀩𑀯𑀦𑁂 𑀯𑀺𑀳𑀭𑀢𑀺. 𑀅𑀣 𑀚𑀻𑀯𑀓𑁄 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀳𑀻’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀧𑀦𑁆𑀣𑀓𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀳𑁄𑀢𑀺. 𑀲𑁄 ‘‘𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀪𑀺𑀓𑁆𑀔𑀁 𑀧𑀝𑀺𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁄 ‘‘𑀘𑀽𑀴𑀧𑀦𑁆𑀣𑀓𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀧𑀝𑀺𑀘𑁆𑀙𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀓𑁆𑀔𑁂𑀤𑀁 𑀜𑀢𑁆𑀯𑀸 ‘‘𑀘𑀽𑀴𑀧𑀦𑁆𑀣𑀓𑁄 𑀫𑀬𑀸 𑀓𑀢𑁂𑀦 𑀉𑀧𑀸𑀬𑁂𑀦 𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀺𑀁, 𑀧𑀦𑁆𑀣𑀓, 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀸𑀢𑀸 𑀫𑀁, 𑀪𑀦𑁆𑀢𑁂, 𑀧𑀡𑀸𑀫𑁂𑀢𑀻’’𑀢𑀺 𑀆𑀳. ‘‘𑀧𑀦𑁆𑀣𑀓, 𑀫𑀸 𑀘𑀺𑀦𑁆𑀢𑀬𑀺, 𑀫𑀫 𑀲𑀸𑀲𑀦𑁂 𑀢𑀼𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀏𑀳𑀺 𑀇𑀫𑀁 𑀕𑀳𑁂𑀢𑁆𑀯𑀸 ‘𑀭𑀚𑁄𑀳𑀭𑀡𑀁, 𑀭𑀚𑁄𑀳𑀭𑀡’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀇𑀤𑁆𑀥𑀺𑀬𑀸 𑀲𑀼𑀤𑁆𑀥𑀁 𑀘𑁄𑀴𑀓𑁆𑀔𑀡𑁆𑀟𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀁 𑀘𑁄𑀴𑀓𑁆𑀔𑀡𑁆𑀟𑀁 ‘‘𑀭𑀚𑁄𑀳𑀭𑀡𑀁, 𑀭𑀚𑁄𑀳𑀭𑀡’’𑀦𑁆𑀢𑀺 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀲 𑀢𑀁 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀓𑀺𑀮𑀺𑀝𑁆𑀞𑀥𑀸𑀢𑀼𑀓𑀁 𑀚𑀸𑀢𑀁, 𑀧𑀼𑀦 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀉𑀓𑁆𑀔𑀮𑀺𑀧𑀭𑀺𑀧𑀼𑀜𑁆𑀙𑀦𑀲𑀤𑀺𑀲𑀁 𑀚𑀸𑀢𑀁. 𑀲𑁄 𑀜𑀸𑀡𑀧𑀭𑀺𑀧𑀸𑀓𑀢𑁆𑀢𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀘𑁄𑀴𑀓𑁆𑀔𑀡𑁆𑀟𑀁 𑀧𑀓𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀁, 𑀇𑀫𑀁 𑀉𑀧𑀸𑀤𑀺𑀡𑁆𑀡𑀓𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀓𑀺𑀮𑀺𑀝𑁆𑀞𑀁 𑀅𑀜𑁆𑀜𑀣𑀸 𑀚𑀸𑀢𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀬𑀣𑀸𑀧𑁂𑀢𑀁, 𑀏𑀯𑀁 𑀘𑀺𑀢𑁆𑀢𑀫𑁆𑀧𑀻’’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀦𑀺𑀫𑀺𑀢𑁆𑀢𑁂 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀧𑀢𑁆𑀢𑀲𑁆𑀲𑁂𑀯𑀲𑁆𑀲 𑀢𑁂𑀧𑀺𑀝𑀓𑀁 𑀧𑀜𑁆𑀘𑀸𑀪𑀺𑀜𑁆𑀜𑀸 𑀘 𑀆𑀕𑀫𑀺𑀁𑀲𑀼.

𑀲𑀢𑁆𑀣𑀸 𑀏𑀓𑀽𑀦𑁂𑀳𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀚𑀻𑀯𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀘𑀽𑀴𑀧𑀦𑁆𑀣𑀓𑁄 𑀧𑀦 𑀅𑀢𑁆𑀢𑀦𑁄 𑀪𑀺𑀓𑁆𑀔𑀸𑀬 𑀅𑀧𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀏𑀯 𑀦 𑀕𑀢𑁄. 𑀚𑀻𑀯𑀓𑁄 𑀬𑀸𑀕𑀼𑀁 𑀤𑀸𑀢𑀼𑀁 𑀆𑀭𑀪𑀺. 𑀲𑀢𑁆𑀣𑀸 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀚𑀻𑀯𑀓𑀸’’𑀢𑀺. 𑀲𑁄 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂, 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀁 𑀅𑀬𑁆𑀬𑀁 𑀕𑀳𑁂𑀢𑁆𑀯𑀸 𑀏𑀳𑀻’’𑀢𑀺. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑁄𑀧𑀺 𑀭𑀽𑀧𑁂𑀦 𑀓𑀺𑀭𑀺𑀬𑀸𑀬 𑀘 𑀏𑀓𑀫𑁆𑀧𑀺 𑀏𑀓𑁂𑀦 𑀅𑀲𑀤𑀺𑀲𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀧𑀼𑀭𑀺𑀲𑁄 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀩𑀳𑀼𑀪𑀸𑀯𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀚𑀻𑀯𑀓𑀲𑁆𑀲 𑀓𑀣𑁂𑀲𑀺 𑁋 ‘‘𑀇𑀫𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑀸 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀩𑀳𑀼𑀢𑀭𑁄, 𑀧𑀓𑁆𑀓𑁄𑀲𑀺𑀢𑀩𑁆𑀩𑀁 𑀅𑀬𑁆𑀬𑀁 𑀦 𑀚𑀸𑀦𑀸𑀫𑀻’’𑀢𑀺. 𑀚𑀻𑀯𑀓𑁄 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑁄 𑀦𑀸𑀫𑁄, 𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽’’𑀢𑀺? ‘‘𑀘𑀽𑀴𑀧𑀦𑁆𑀣𑀓𑁄 𑀦𑀸𑀫, 𑀚𑀻𑀯𑀓𑀸’’𑀢𑀺. ‘‘𑀕𑀘𑁆𑀙, 𑀪𑀡𑁂, ‘𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀓𑀢𑀭𑁄’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀆𑀦𑁂𑀳𑀻’’𑀢𑀺. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀓𑀢𑀭𑁄, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄, 𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑁆𑀧𑀺 𑀓𑀣𑁂𑀲𑀺. 𑀲𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀚𑀻𑀯𑀓𑀲𑁆𑀲 𑀆𑀭𑁄𑀘𑁂𑀲𑀺 𑀚𑀻𑀯𑀓𑁄 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀢𑁆𑀢𑀸 ‘‘𑀇𑀤𑁆𑀥𑀺𑀫𑀸 𑀫𑀜𑁆𑀜𑁂, 𑀅𑀬𑁆𑀬𑁄’’𑀢𑀺 𑀦𑀬𑀢𑁄 𑀜𑀢𑁆𑀯𑀸 ‘‘𑀕𑀘𑁆𑀙, 𑀪𑀡𑁂, 𑀧𑀞𑀫𑀁 𑀓𑀣𑁂𑀦𑁆𑀢𑀁 𑀅𑀬𑁆𑀬𑀫𑁂𑀯 ‘𑀢𑀼𑀫𑁆𑀳𑁂 𑀲𑀢𑁆𑀣𑀸 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑁂 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑀸𑀯𑀤𑁂𑀯 𑀦𑀺𑀫𑁆𑀫𑀺𑀢𑀪𑀺𑀓𑁆𑀔𑀽 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀲𑁄 𑀣𑁂𑀭𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀢𑀲𑁆𑀫𑀺𑀁 𑀔𑀡𑁂 𑀬𑀸𑀕𑀼𑀜𑁆𑀘 𑀔𑀚𑁆𑀚𑀓𑀸𑀤𑀺𑀪𑁂𑀤𑀜𑁆𑀘 𑀧𑀝𑀺𑀕𑁆𑀕𑀡𑁆𑀳𑀺. 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀘𑀽𑀴𑀧𑀦𑁆𑀣𑀓𑀁 𑀆𑀡𑀸𑀧𑁂𑀲𑀺 ‘‘𑀅𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀲𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑀲𑀺𑀦𑁂𑀭𑀼𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀫𑀦𑁆𑀣𑁂𑀦𑁆𑀢𑁄 𑀯𑀺𑀬 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀗𑁆𑀔𑁄𑀪𑁂𑀦𑁆𑀢𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀦𑁆𑀢𑁄 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀤𑀲𑀩𑀮𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀸 𑀉𑀤𑀧𑀸𑀤𑀺 ‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀏𑀓𑀕𑀸𑀣𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀫𑁆𑀧𑀺 𑀮𑀳𑀼𑀓𑁂𑀦 𑀔𑀡𑁂𑀦𑁂𑀯 𑀏𑀯𑀁 𑀫𑀳𑀺𑀤𑁆𑀥𑀺𑀓𑀁 𑀅𑀓𑀁𑀲𑀽’𑀢𑀺, 𑀢𑀣𑀸 𑀳𑀺 𑀚𑀻𑀯𑀓𑀲𑁆𑀲 𑀦𑀺𑀯𑁂𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 ‘𑀏𑀯𑀁 𑀘𑀽𑀴𑀧𑀦𑁆𑀣𑀓𑀲𑁆𑀲 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁, 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸’𑀢𑀺 𑀜𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸, ‘𑀧𑀦𑁆𑀣𑀓, 𑀦𑁂𑀯𑀸𑀬𑀁 𑀧𑀺𑀮𑁄𑀢𑀺𑀓𑀸 𑀓𑀺𑀮𑀺𑀝𑁆𑀞𑀸 𑀭𑀚𑀸𑀦𑀼𑀓𑀺𑀡𑁆𑀡𑀸, 𑀇𑀢𑁄 𑀧𑀦 𑀅𑀜𑁆𑀜𑁄𑀧𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀁𑀓𑀺𑀮𑁂𑀲𑁄 𑀭𑀚𑁄’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 𑀪𑀺𑀓𑁆𑀔𑀯𑁄, 𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 𑀭𑀚𑁄…𑀧𑁂… 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀫𑁄𑀳𑁄 𑀭𑀚𑁄…𑀧𑁂… 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂’’𑀢𑀺. (𑀫𑀳𑀸𑀦𑀺. 𑁨𑁦𑁯; 𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭𑁪) 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀽𑀴𑀧𑀦𑁆𑀣𑀓𑁄 𑀲𑀳𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀺𑀁 𑀯𑀤𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀁 𑀦𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀘𑀽𑀴𑀧𑀦𑁆𑀣𑀓𑁂𑀦 𑀇𑀤𑀸𑀦𑀺 𑀫𑀬𑁆𑀳𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀮𑁄𑀓𑀼𑀢𑁆𑀣𑀭𑀤𑀸𑀬𑀚𑁆𑀚𑀁 𑀮𑀤𑁆𑀥𑀁, 𑀧𑀼𑀩𑁆𑀩𑁂 𑀧𑀦 𑀮𑁄𑀓𑀺𑀬𑀤𑀸𑀬𑀚𑁆𑀚𑀁 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀁 (𑀚𑀸. 𑁧.𑁧.𑁪) 𑀓𑀣𑁂𑀲𑀺. 𑀅𑀧𑀭𑀪𑀸𑀕𑁂 𑀦𑀁 𑀲𑀢𑁆𑀣𑀸 𑀅𑀭𑀺𑀬𑀕𑀡𑀧𑀭𑀺𑀯𑀼𑀢𑁄 𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑀸𑀦𑀜𑁆𑀘 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁩𑁫. 𑀏𑀯𑀁 𑀲𑁄 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀧𑀤𑀤𑁆𑀯𑀬𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀲𑁄𑀢𑀺 𑀲𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀕𑀡𑀫𑁆𑀳𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀫𑀽𑀳𑀢𑁄 𑀯𑀽𑀧𑀓𑀝𑁆𑀞𑁄 𑀯𑀺𑀲𑀼𑀁 𑀪𑀽𑀢𑁄 𑀯𑀺𑀯𑁂𑀓𑀁 𑀉𑀧𑀕𑀢𑁄. 𑀢𑀤𑀸 𑀫𑀫 𑀢𑀸𑀧𑀲𑀓𑀸𑀮𑁂 𑀳𑀺𑀫𑀯𑀦𑁆𑀢𑁂 𑀳𑀺𑀫𑀸𑀮𑀬𑀧𑀩𑁆𑀩𑀢𑀲𑀫𑀻𑀧𑁂 𑀯𑀲𑀺 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀯𑀺𑀳𑀸𑀲𑀻𑀢𑀺 𑀅𑀢𑁆𑀣𑁄.

𑁩𑁬. 𑀅𑀳𑀫𑁆𑀧𑀺…𑀧𑁂… 𑀢𑀤𑀸𑀢𑀺 𑀬𑀤𑀸 𑀲𑁄 𑀪𑀕𑀯𑀸 𑀳𑀺𑀫𑀯𑀦𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑀺, 𑀢𑀤𑀸 𑀅𑀳𑀫𑁆𑀧𑀺 𑀳𑀺𑀫𑀯𑀦𑁆𑀢𑀲𑀫𑀻𑀧𑁂 𑀓𑀢𑀅𑀲𑁆𑀲𑀫𑁂 𑀆 𑀲𑀫𑀦𑁆𑀢𑀢𑁄 𑀓𑀸𑀬𑀘𑀺𑀢𑁆𑀢𑀧𑀻𑀴𑀸𑀲𑀗𑁆𑀔𑀸𑀢𑀸 𑀧𑀭𑀺𑀲𑁆𑀲𑀬𑀸 𑀲𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀲𑁆𑀲𑀫𑁄𑀢𑀺 𑀮𑀤𑁆𑀥𑀦𑀸𑀫𑁂 𑀅𑀭𑀜𑁆𑀜𑀸𑀯𑀸𑀲𑁂 𑀯𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑀺𑀭𑀸𑀕𑀢𑀁 𑀫𑀳𑀸𑀯𑀻𑀭𑀦𑁆𑀢𑀺 𑀅𑀘𑀺𑀭𑀁 𑀆𑀕𑀢𑀁 𑀫𑀳𑀸𑀯𑀻𑀭𑀺𑀬𑀯𑀦𑁆𑀢𑀁 𑀮𑁄𑀓𑀦𑀸𑀬𑀓𑀁 𑀧𑀥𑀸𑀦𑀁 𑀢𑀁 𑀪𑀕𑀯𑀦𑁆𑀢𑀁 𑀉𑀧𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀆𑀕𑀢𑀓𑁆𑀔𑀡𑁂𑀬𑁂𑀯 𑀉𑀧𑀸𑀕𑀫𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁭. 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀏𑀯𑀁 𑀉𑀧𑀕𑀘𑁆𑀙𑀦𑁆𑀢𑁄 𑀘 𑀧𑀤𑀼𑀫𑀼𑀧𑁆𑀧𑀮𑀧𑀼𑀧𑁆𑀨𑀸𑀤𑀻𑀳𑀺 𑀙𑀸𑀤𑀺𑀢𑀁 𑀧𑀼𑀧𑁆𑀨𑀫𑀬𑀁 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀭𑀸𑀲𑀪𑀁 𑀦𑀭𑀸𑀦𑀁 𑀲𑁂𑀝𑁆𑀞𑀁 𑀪𑀕𑀯𑀦𑁆𑀢𑀁 𑀙𑀸𑀤𑁂𑀦𑁆𑀢𑁄 𑀉𑀧𑀕𑀘𑁆𑀙𑀺𑀁 𑀲𑀫𑀻𑀧𑀁 𑀕𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀦𑁆𑀢𑀺 𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀅𑀦𑁆𑀢𑀭𑀸𑀬𑀁 𑀅𑀳𑀁 𑀅𑀓𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁮. 𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳𑀸𑀢𑀺 𑀢𑀁 𑀲𑀼𑀲𑀚𑁆𑀚𑀺𑀢𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀳𑀁 𑀪𑀕𑀯𑀢𑁄 𑀅𑀤𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀢𑀁 𑀫𑀬𑀸 𑀤𑀺𑀦𑁆𑀦𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀲𑀫𑁆𑀧𑀝𑀺𑀘𑁆𑀙𑀺, 𑀲𑀸𑀤𑀭𑀁 𑀲𑀸𑀤𑀺𑀬𑀻𑀢𑀺 𑀅𑀢𑁆𑀣𑁄.

𑁪𑁧. 𑀲𑀢𑀧𑀢𑁆𑀢𑀙𑀢𑁆𑀢𑀁 𑀧𑀕𑁆𑀕𑀬𑁆𑀳𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀤𑀼𑀫𑀧𑀼𑀧𑁆𑀨𑁂 𑀲𑀢𑀲𑀢𑀧𑀢𑁆𑀢𑀸𑀦𑀁 𑀯𑀲𑁂𑀦 𑀲𑀢𑀧𑀢𑁆𑀢𑁂𑀳𑀺 𑀧𑀤𑀼𑀫𑀧𑀼𑀧𑁆𑀨𑁂𑀳𑀺 𑀙𑀸𑀤𑀺𑀢𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀧𑀓𑀸𑀭𑁂𑀦 𑀆𑀤𑀭𑁂𑀦 𑀕𑀳𑁂𑀢𑁆𑀯𑀸 𑀢𑀸𑀧𑀲𑁄 𑀫𑀫 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀢𑀁 𑀢𑀸𑀧𑀲𑀁 𑀅𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀫𑀫 𑀪𑀸𑀲𑀢𑁄 𑀪𑀸𑀲𑀫𑀸𑀦𑀲𑁆𑀲 𑀯𑀘𑀦𑀁 𑀲𑀼𑀡𑁄𑀣 𑀫𑀦𑀲𑀺 𑀓𑀭𑁄𑀣.

𑁪𑁨. 𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀸𑀦𑀻𑀢𑀺 𑀇𑀫𑀺𑀦𑀸 𑀧𑀼𑀧𑁆𑀨𑀘𑁆𑀙𑀢𑁆𑀢𑀤𑀸𑀦𑁂𑀦 𑀧𑀜𑁆𑀘𑀯𑀻𑀲𑀢𑀺𑀯𑀸𑀭𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀢𑁆𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘𑀸𑀢𑀺 𑀘𑀢𑀼𑀢𑁆𑀢𑀺𑀁𑀲𑀢𑀺𑀯𑀸𑀭𑁂 𑀫𑀦𑀼𑀲𑁆𑀲𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺.

𑁪𑁩. 𑀬𑀁 𑀬𑀁 𑀬𑁄𑀦𑀺𑀦𑁆𑀢𑀺 𑀫𑀦𑀼𑀲𑁆𑀲𑀬𑁄𑀦𑀺𑀆𑀤𑀻𑀲𑀼 𑀬𑀁 𑀬𑀁 𑀚𑀸𑀢𑀺𑀁 𑀲𑀁𑀲𑀭𑀢𑀺 𑀕𑀘𑁆𑀙𑀢𑀺 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀣 𑀢𑀢𑁆𑀣 𑀬𑁄𑀦𑀺𑀬𑀁 𑀅𑀩𑁆𑀪𑁄𑀓𑀸𑀲𑁂 𑀲𑀼𑀜𑁆𑀜𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀞𑀺𑀢𑀁 𑀯𑀸 𑀧𑀤𑀼𑀫𑀁 𑀥𑀸𑀭𑀬𑀺𑀲𑁆𑀲𑀢𑀺 𑀉𑀧𑀭𑀺 𑀙𑀸𑀤𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁪𑁫. 𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂𑀢𑀺 𑀢𑁂𑀦 𑀪𑀕𑀯𑀢𑁄 𑀲𑀓𑀮𑀧𑀺𑀝𑀓𑀢𑁆𑀢𑀬𑁂 𑀧𑀓𑀸𑀲𑀺𑀢𑁂 𑀤𑀻𑀧𑀺𑀢𑁂 𑀫𑀦𑀼𑀲𑁆𑀲𑀢𑁆𑀢𑀁 𑀫𑀦𑀼𑀲𑁆𑀲𑀚𑀸𑀢𑀺𑀁 𑀮𑀪𑀺𑀲𑁆𑀲𑀢𑀺 𑀉𑀧𑀧𑀚𑁆𑀚𑀺𑀲𑁆𑀲𑀢𑀺. 𑀫𑀦𑁄𑀫𑀬𑀫𑁆𑀳𑀺 𑀓𑀸𑀬𑀫𑁆𑀳𑀻𑀢𑀺 𑀫𑀦𑁂𑀦 𑀛𑀸𑀦𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑁄𑀢𑀺 𑀫𑀦𑁄𑀫𑀬𑁄, 𑀬𑀣𑀸 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀣𑀸 𑀓𑀸𑀬𑀁 𑀧𑀯𑀢𑁆𑀢𑁂𑀢𑀺 𑀘𑀺𑀢𑁆𑀢𑀕𑀢𑀺𑀓𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁆𑀳𑀺 𑀫𑀦𑁄𑀫𑀬𑁂 𑀓𑀸𑀬𑀫𑁆𑀳𑀺 𑀲𑁄 𑀢𑀸𑀧𑀲𑁄 𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀳𑀼𑀢𑁆𑀯𑀸 𑀉𑀢𑁆𑀢𑀫𑁄 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁫𑁨. 𑀲𑀭𑀺𑀁 𑀓𑁄𑀓𑀦𑀤𑀁 𑀅𑀳𑀦𑁆𑀢𑀺 𑀅𑀳𑀁 𑀪𑀕𑀯𑀢𑁄 𑀦𑀺𑀫𑁆𑀫𑀺𑀢𑀘𑁄𑀴𑀓𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀓𑁄𑀓𑀦𑀤𑀁 𑀧𑀤𑀼𑀫𑀁 𑀲𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂𑀢𑀺 𑀢𑀲𑁆𑀫𑀺𑀁 𑀓𑁄𑀓𑀦𑀤𑁂 𑀧𑀤𑀼𑀫𑁂 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀅𑀥𑀺𑀫𑀼𑀘𑁆𑀘𑀺 𑀅𑀮𑁆𑀮𑀻𑀦𑁄, 𑀢𑀢𑁄 𑀅𑀳𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁩. 𑀅𑀳𑀁 𑀫𑀦𑁄𑀫𑀬𑁂𑀲𑀼 𑀘𑀺𑀢𑁆𑀢𑀕𑀢𑀺𑀓𑁂𑀲𑀼 𑀓𑀸𑀬𑁂𑀲𑀼 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀼 𑀧𑀸𑀭𑀫𑀺𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄 𑀧𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀪𑀸𑀯𑁂𑀦 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀢𑀲𑁆𑀲 𑀣𑀽𑀧𑀁 𑀧𑀽𑀚𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀳𑀸𑀚𑀦𑀁 𑀧𑀜𑁆𑀘𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀦𑀁 𑀅𑀓𑀸𑀲𑀺. 𑀲𑁄 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀧𑀺𑀮𑀺𑀦𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀯𑀘𑁆𑀙𑁄𑀢𑀺 𑀕𑁄𑀢𑁆𑀢𑀁. 𑀲𑁄 𑀅𑀧𑀭𑀪𑀸𑀕𑁂 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀁𑀲𑀸𑀭𑁂 𑀧𑀦 𑀲𑀁𑀯𑁂𑀕𑀩𑀳𑀼𑀮𑀢𑀸𑀬 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀽𑀴𑀕𑀦𑁆𑀥𑀸𑀭𑀁 𑀦𑀸𑀫 𑀯𑀺𑀚𑁆𑀚𑀁 𑀲𑀸𑀥𑁂𑀢𑁆𑀯𑀸 𑀢𑀸𑀬 𑀯𑀺𑀚𑁆𑀚𑀸𑀬 𑀆𑀓𑀸𑀲𑀘𑀸𑀭𑀻 𑀧𑀭𑀘𑀺𑀢𑁆𑀢𑀯𑀺𑀤𑀽 𑀘 𑀳𑀼𑀢𑁆𑀯𑀸 𑀭𑀸𑀚𑀕𑀳𑁂 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑁄 𑀧𑀝𑀺𑀯𑀲𑀢𑀺.

𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀉𑀧𑀕𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑀲𑁆𑀲 𑀲𑀸 𑀯𑀺𑀚𑁆𑀚𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀼𑀢𑀁 𑀔𑁄 𑀧𑀦𑁂𑀢𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 ‘𑀬𑀢𑁆𑀣 𑀫𑀳𑀸𑀕𑀦𑁆𑀥𑀸𑀭𑀯𑀺𑀚𑁆𑀚𑀸 𑀥𑀭𑀢𑀺, 𑀢𑀢𑁆𑀣 𑀘𑀽𑀴𑀕𑀦𑁆𑀥𑀸𑀭𑀯𑀺𑀚𑁆𑀚𑀸 𑀦 𑀲𑀫𑁆𑀧𑀚𑁆𑀚𑀢𑀻’𑀢𑀺 𑀲𑀫𑀡𑀲𑁆𑀲 𑀧𑀦 𑀕𑁄𑀢𑀫𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀸𑀬𑀁 𑀫𑀫 𑀯𑀺𑀚𑁆𑀚𑀸 𑀲𑀫𑁆𑀧𑀚𑁆𑀚𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀸𑀕𑀦𑁆𑀥𑀸𑀭𑀯𑀺𑀚𑁆𑀚𑀁 𑀚𑀸𑀦𑀸𑀢𑀺, 𑀬𑀁𑀦𑀽𑀦𑀸𑀳𑀁 𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀫𑀳𑀸𑀲𑀫𑀡, 𑀢𑀯 𑀲𑀦𑁆𑀢𑀺𑀓𑁂 𑀏𑀓𑀁 𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑀺𑀢𑀼𑀓𑀸𑀫𑁄, 𑀑𑀓𑀸𑀲𑀁 𑀫𑁂 𑀓𑀭𑁄𑀳𑀻’’𑀢𑀺. ‘‘𑀢𑁂𑀦 𑀳𑀺 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀯𑀺𑀚𑁆𑀚𑀸𑀬 𑀧𑀭𑀺𑀓𑀫𑁆𑀫𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀩𑁆𑀩𑀚𑀺. 𑀢𑀲𑁆𑀲 𑀪𑀕𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀘𑀭𑀺𑀢𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀦𑀘𑀺𑀭𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁫𑁫. 𑀬𑀸 𑀧𑀦 𑀧𑀼𑀭𑀺𑀫𑀚𑀸𑀢𑀺𑀬𑀁 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸 𑀤𑁂𑀯𑀢𑀸, 𑀢𑀸 𑀓𑀢𑀜𑁆𑀜𑀼𑀢𑀁 𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑀸 𑀲𑀸𑀬𑀁 𑀧𑀸𑀢𑀁 𑀣𑁂𑀭𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀦𑀁 𑀪𑀕𑀯𑀸 𑀤𑁂𑀯𑀢𑀸𑀦𑀁 𑀅𑀢𑀺𑀯𑀺𑀬 𑀧𑀺𑀬𑀫𑀦𑀸𑀧𑀪𑀸𑀯𑁂𑀦 𑀅𑀕𑁆𑀕𑀪𑀸𑀯𑁂 𑀞𑀧𑁂𑀲𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀁 𑀬𑀤𑀺𑀤𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁫). 𑀏𑀯𑀁 𑀲𑁄 𑀧𑀢𑁆𑀢𑀅𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀸𑀫𑀭𑀽𑀧𑀸𑀭𑀽𑀧𑀮𑁄𑀓𑀲𑁆𑀲 𑀦𑀸𑀣𑁄 𑀧𑀥𑀸𑀦𑁄𑀢𑀺 𑀮𑁄𑀓𑀦𑀸𑀣𑁄. 𑀫𑁂𑀥𑀸 𑀯𑀼𑀘𑁆𑀘𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀅𑀦𑀸𑀯𑀭𑀡𑀜𑀸𑀡𑀸𑀤𑀬𑁄, 𑀲𑀼𑀦𑁆𑀤𑀭𑀸, 𑀧𑀲𑀝𑁆𑀞𑀸 𑀯𑀸 𑀫𑁂𑀥𑀸 𑀬𑀲𑁆𑀲 𑀲𑁄 𑀲𑀼𑀫𑁂𑀥𑁄, 𑀅𑀕𑁆𑀕𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀅𑀕𑁆𑀕𑀧𑀼𑀕𑁆𑀕𑀮𑁄, 𑀢𑀲𑁆𑀫𑀺𑀁 𑀲𑀼𑀫𑁂𑀥𑁂 𑀮𑁄𑀓𑀦𑀸𑀬𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁂 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁂 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄𑀢𑀺 𑀲𑀤𑁆𑀥𑀸𑀬 𑀧𑀲𑀸𑀤𑀺𑀢𑀘𑀺𑀢𑁆𑀢𑁄 𑀲𑁄𑀫𑀦𑀲𑁆𑀲𑁂𑀦 𑀲𑀼𑀦𑁆𑀤𑀭𑀫𑀦𑁄 𑀅𑀳𑀁 𑀢𑀲𑁆𑀲 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀣𑀽𑀧𑀧𑀽𑀚𑀁 𑀘𑁂𑀢𑀺𑀬𑀧𑀽𑀚𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁬. 𑀬𑁂 𑀘 𑀔𑀻𑀡𑀸𑀲𑀯𑀸 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀬𑁂 𑀘 𑀔𑀻𑀡𑀸𑀲𑀯𑀸 𑀧𑀳𑀻𑀦𑀓𑀺𑀮𑁂𑀲𑀸 𑀙𑀴𑀪𑀺𑀜𑁆𑀜𑀸 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑀸 𑀫𑀳𑀺𑀤𑁆𑀥𑀺𑀓𑀸 𑀫𑀳𑀦𑁆𑀢𑁂𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀔𑀻𑀡𑀸𑀲𑀯𑁂 𑀅𑀳𑀁 𑀢𑀢𑁆𑀣 𑀲𑀫𑀸𑀦𑁂𑀢𑁆𑀯𑀸 𑀲𑀼𑀝𑁆𑀞𑀼 𑀆𑀤𑀭𑁂𑀦 𑀆𑀦𑁂𑀢𑁆𑀯𑀸 𑀲𑀗𑁆𑀖𑀪𑀢𑁆𑀢𑀁 𑀲𑀓𑀮𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁 𑀅𑀓𑀸𑀲𑀺𑀁 𑀢𑁂𑀲𑀁 𑀪𑁄𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁭. 𑀉𑀧𑀝𑁆𑀞𑀸𑀓𑁄 𑀢𑀤𑀸 𑀅𑀳𑀽𑀢𑀺 𑀢𑀤𑀸 𑀫𑀫 𑀲𑀗𑁆𑀖𑀪𑀢𑁆𑀢𑀤𑀸𑀦𑀓𑀸𑀮𑁂 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀦𑀸𑀫𑁂𑀦 𑀲𑀼𑀫𑁂𑀥𑁄 𑀦𑀸𑀫 𑀉𑀧𑀝𑁆𑀞𑀸𑀓𑀲𑀸𑀯𑀓𑁄 𑀅𑀳𑀼 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀲𑀸𑀯𑀓𑁄 𑀫𑀬𑁆𑀳𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀅𑀦𑀼𑀫𑁄𑀤𑀺𑀢𑁆𑀣 𑀅𑀦𑀼𑀫𑁄𑀤𑀺𑀢𑁄 𑀆𑀦𑀺𑀲𑀁𑀲𑀁 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄.

𑁫𑁮. 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦𑀸𑀢𑀺 𑀢𑁂𑀦 𑀣𑀽𑀧𑀧𑀽𑀚𑀸𑀓𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀤𑁂𑀯𑀮𑁄𑀓𑁂 𑀤𑀺𑀩𑁆𑀩𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀺𑀁 𑀉𑀧𑀕𑀢𑁄 𑀅𑀲𑁆𑀫𑀻𑀢𑀺 𑀅𑀢𑁆𑀣𑁄, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀙 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀤𑁂𑀯𑀘𑁆𑀙𑀭𑀸𑀬𑁄 𑀫𑁂 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀭𑀫𑀺𑀁𑀲𑀼 𑀭𑀫𑀸𑀧𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁯. 𑀫𑀫𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀢𑀸 𑀅𑀘𑁆𑀙𑀭𑀸𑀬𑁄 𑀲𑀩𑁆𑀩𑀓𑀸𑀫𑁂𑀳𑀺 𑀤𑀺𑀩𑁆𑀩𑁂𑀳𑀺 𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸𑀫𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀺𑀬𑁄 𑀫𑀫𑀁 𑀏𑀯 𑀅𑀦𑀼𑀯𑀢𑁆𑀢𑀦𑁆𑀢𑀺 𑀫𑀫 𑀯𑀘𑀦𑀁 𑀅𑀦𑀼𑀓𑀭𑁄𑀦𑁆𑀢𑀺 𑀲𑀤𑀸 𑀦𑀺𑀘𑁆𑀘𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀭𑀸𑀳𑀼𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀲𑁂𑀦𑀸𑀲𑀦𑀯𑀺𑀲𑁄𑀥𑀦𑀯𑀺𑀚𑁆𑀚𑁄𑀢𑀦𑀸𑀤𑀺𑀓𑀁 𑀉𑀴𑀸𑀭𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀁 𑀧𑀝𑀺𑀘𑁆𑀘 𑀬𑀲𑁄𑀥𑀭𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀭𑀸𑀳𑀼𑀮𑁄𑀢𑀺 𑀮𑀤𑁆𑀥𑀦𑀸𑀫𑁄 𑀫𑀳𑀢𑀸 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀺. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁 𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁦𑁫) 𑀆𑀕𑀢𑀫𑁂𑀯. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀼𑀮𑀤𑁆𑀥𑁄𑀯𑀸𑀤𑁄 𑀧𑀭𑀺𑀧𑀓𑁆𑀓𑀜𑀸𑀡𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

‘‘𑀉𑀪𑀬𑁂𑀦𑁂𑀯 𑀲𑀫𑁆𑀧𑀦𑁆𑀦𑁄, 𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽;

𑀬𑀜𑁆𑀘𑀫𑁆𑀳𑀺 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲, 𑀬𑀜𑁆𑀘 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸.

‘‘𑀬𑀜𑁆𑀘 𑀫𑁂 𑀆𑀲𑀯𑀸 𑀔𑀻𑀡𑀸, 𑀬𑀜𑁆𑀘 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄;

𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀢𑁂𑀯𑀺𑀚𑁆𑀚𑁄 𑀅𑀫𑀢𑀤𑁆𑀤𑀲𑁄.

‘‘𑀓𑀸𑀫𑀦𑁆𑀥𑀸 𑀚𑀸𑀮𑀧𑀘𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀦𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸 𑀫𑀼𑀔𑁂.

‘‘𑀢𑀁 𑀓𑀸𑀫𑀁 𑀅𑀳𑀫𑀼𑀚𑁆𑀛𑀺𑀢𑁆𑀯𑀸, 𑀙𑁂𑀢𑁆𑀯𑀸 𑀫𑀸𑀭𑀲𑁆𑀲 𑀩𑀦𑁆𑀥𑀦𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺. (𑀣𑁂𑀭𑀕𑀸. 𑁨𑁯𑁫-𑁨𑁯𑁮);

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀉𑀪𑀬𑁂𑀦𑁂𑀯 𑀲𑀫𑁆𑀧𑀦𑁆𑀦𑁄𑀢𑀺 𑀚𑀸𑀢𑀺𑀲𑀫𑁆𑀧𑀤𑀸 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀸𑀢𑀺 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽𑀢𑀺 ‘‘𑀭𑀸𑀳𑀼𑀮𑀪𑀤𑁆𑀤𑁄’’𑀢𑀺 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀜𑁆𑀚𑀸𑀦𑀦𑁆𑀢𑀺. 𑀢𑀲𑁆𑀲 𑀳𑀺 𑀚𑀸𑀢𑀲𑀸𑀲𑀦𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦, ‘‘𑀭𑀸𑀳𑀼, 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀁 𑀉𑀧𑀸𑀤𑀸𑀬 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀭𑀸𑀳𑀼𑀮𑁄’’𑀢𑀺 𑀦𑀸𑀫𑀁 𑀕𑀡𑁆𑀳𑀺. 𑀢𑀢𑁆𑀣 𑀆𑀤𑀺𑀢𑁄 𑀧𑀺𑀢𑀭𑀸 𑀯𑀼𑀢𑁆𑀢𑀧𑀭𑀺𑀬𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀆𑀳 𑁋 ‘‘𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽’’𑀢𑀺. 𑀪𑀤𑁆𑀤𑁄𑀢𑀺 𑀧𑀲𑀁𑀲𑀸𑀯𑀘𑀦𑀫𑁂𑀯. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀢𑀁 𑀲𑀺𑀓𑁆𑀔𑀸𑀓𑀸𑀫𑀪𑀸𑀯𑁂𑀦 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀬𑀤𑀺𑀤𑀁 𑀭𑀸𑀳𑀼𑀮𑁄’’𑀢𑀺 (𑀅. 𑀦𑀺. 𑁧.𑁨𑁦𑁯).

𑁬𑁮. 𑀏𑀯𑀁 𑀲𑁄 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀲𑀢𑁆𑀢𑀪𑀽𑀫𑀺𑀫𑁆𑀳𑀺 𑀧𑀸𑀲𑀸𑀤𑁂𑀢𑀺 𑀧𑀲𑀸𑀤𑀁 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀻𑀢𑀺 𑀧𑀸𑀲𑀸𑀤𑁄. 𑀉𑀧𑀭𑀽𑀧𑀭𑀺 𑀞𑀺𑀢𑀸 𑀲𑀢𑁆𑀢 𑀪𑀽𑀫𑀺𑀬𑁄 𑀬𑀲𑁆𑀫𑀺𑀁 𑀧𑀸𑀲𑀸𑀤𑁂 𑀲𑁄𑀬𑀁 𑀲𑀢𑁆𑀢𑀪𑀽𑀫𑀺, 𑀢𑀲𑁆𑀫𑀺𑀁 𑀲𑀢𑁆𑀢𑀪𑀽𑀫𑀺𑀫𑁆𑀳𑀺 𑀧𑀸𑀲𑀸𑀤𑁂. 𑀆𑀤𑀸𑀲𑀁 𑀲𑀦𑁆𑀣𑀭𑀺𑀁 𑀅𑀳𑀦𑁆𑀢𑀺 𑀆𑀤𑀸𑀲𑀢𑀮𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀮𑁄𑀓𑀚𑁂𑀝𑁆𑀞𑀲𑁆𑀲 𑀪𑀕𑀯𑀢𑁄 𑀢𑀸𑀤𑀺𑀦𑁄 𑀅𑀳𑀁 𑀲𑀦𑁆𑀣𑀭𑀁 𑀅𑀤𑀸𑀲𑀺𑀁, 𑀲𑀦𑁆𑀣𑀭𑀺𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁯. 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀻𑀢𑀺 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀓𑀺𑀡𑁆𑀡𑁄 𑀧𑀭𑀺𑀯𑀼𑀢𑁄. 𑀤𑁆𑀯𑀺𑀧𑀤𑀺𑀦𑁆𑀤𑁄 𑀤𑁆𑀯𑀺𑀧𑀤𑀸𑀦𑀁 𑀇𑀦𑁆𑀤𑁄 𑀲𑀸𑀫𑀺 𑀦𑀭𑀸𑀲𑀪𑁄 𑀫𑀳𑀸𑀫𑀼𑀦𑀺 𑀕𑀦𑁆𑀥𑀓𑀼𑀝𑀺𑀁 𑀢𑁂𑀳𑀺 𑀲𑀳 𑀉𑀧𑀸𑀕𑀫𑀺 𑀧𑀸𑀯𑀺𑀲𑀻𑀢𑀺 𑀅𑀢𑁆𑀣𑁄.

𑁭𑁦. 𑀯𑀺𑀭𑁄𑀘𑁂𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀦𑁆𑀢𑀺 𑀢𑀁 𑀕𑀦𑁆𑀥𑀓𑀼𑀝𑀺𑀁 𑀲𑁄𑀪𑀬𑀫𑀸𑀦𑁄 𑀤𑁂𑀯𑀸𑀦𑀁 𑀤𑁂𑀯𑁄 𑀤𑁂𑀯𑀤𑁂𑀯𑁄 𑀦𑀭𑀸𑀦𑀁 𑀆𑀲𑀪𑁄 𑀦𑀭𑀸𑀲𑀪𑁄 𑀚𑁂𑀝𑁆𑀞𑁄 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀸 𑀩𑁆𑀬𑀸𑀓𑀭𑀡𑀕𑀸𑀣𑀸𑀬𑁄 𑀅𑀪𑀸𑀲𑀣 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁧. 𑀬𑁂𑀦𑀸𑀬𑀁 𑀚𑁄𑀢𑀺𑀢𑀸 𑀲𑁂𑀬𑁆𑀬𑀸𑀢𑀺 𑀬𑁂𑀦 𑀉𑀧𑀸𑀲𑀓𑁂𑀦 𑀅𑀬𑀁 𑀧𑀸𑀲𑀸𑀤𑀲𑀗𑁆𑀔𑀸𑀢𑀸 𑀲𑁂𑀬𑁆𑀬𑀸 𑀚𑁄𑀢𑀺𑀢𑀸 𑀧𑀪𑀸𑀲𑀺𑀢𑀸 𑀧𑀚𑁆𑀚𑀮𑀺𑀢𑀸. 𑀆𑀤𑀸𑀲𑁄𑀯 𑀓𑀁𑀲𑀮𑁄𑀳𑀫𑀬𑀁 𑀆𑀤𑀸𑀲𑀢𑀮𑀁 𑀇𑀯 𑀲𑀼𑀝𑁆𑀞𑀼 𑀲𑀫𑀁 𑀓𑀢𑁆𑀯𑀸 𑀲𑀦𑁆𑀣𑀢𑀸. 𑀢𑀁 𑀉𑀧𑀸𑀲𑀓𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁮𑁧. 𑀅𑀝𑁆𑀞𑀸𑀦𑀫𑁂𑀢𑀁 𑀬𑀁 𑀢𑀸𑀤𑀻𑀢𑀺 𑀬𑀁 𑀬𑁂𑀦 𑀓𑀸𑀭𑀡𑁂𑀦 𑀢𑀸𑀤𑀻 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀲𑀪𑀸𑀯𑀢𑁆𑀢𑀸 𑀢𑀸𑀤𑀻 𑀅𑀕𑀸𑀭𑁂 𑀖𑀭𑀸𑀯𑀸𑀲𑁂 𑀭𑀢𑀺𑀁 𑀅𑀮𑁆𑀮𑀻𑀦𑀪𑀸𑀯𑀁 𑀅𑀚𑁆𑀛𑀕𑀸 𑀧𑀸𑀧𑀼𑀡𑀺, 𑀏𑀢𑀁 𑀓𑀸𑀭𑀡𑀁 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄.

𑁮𑁨. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸𑀢𑀺 𑀖𑀭𑀸𑀯𑀸𑀲𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀢𑀺𑀡𑀤𑀮𑀫𑀺𑀯 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀼𑀩𑁆𑀩𑀢𑁄 𑀲𑀼𑀲𑀺𑀓𑁆𑀔𑀺𑀢𑁄 𑀧𑀩𑁆𑀩𑀚𑀺𑀲𑁆𑀲𑀢𑀺. 𑀭𑀸𑀳𑀼𑀮𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀁 𑀓𑀼𑀫𑀸𑀭𑀲𑁆𑀲 𑀚𑀸𑀢𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀺𑀢𑀭𑀸 𑀲𑀺𑀤𑁆𑀥𑀢𑁆𑀣𑁂𑀦, ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀦𑀸𑀫𑀢𑁆𑀢𑀸 𑀭𑀸𑀳𑀼𑀮𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀬𑀣𑀸 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀯𑀺𑀫𑀸𑀦𑀧𑀪𑀸𑀬 𑀓𑀺𑀮𑀺𑀝𑁆𑀞𑀓𑀭𑀡𑁂𑀦 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀉𑀧𑁂𑀢𑀺 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀸𑀬𑀁 𑀫𑀫 𑀅𑀪𑀺𑀦𑀺𑀓𑁆𑀔𑀫𑀦𑀧𑀩𑁆𑀩𑀚𑁆𑀚𑀸𑀤𑀻𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑁄𑀭𑀺𑀯 𑀚𑀸𑀢𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, ‘‘𑀭𑀸𑀳𑀼 𑀚𑀸𑀢𑁄𑀢𑀺 𑀆𑀳𑀸’’𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀭𑀳𑀸 𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑁄 𑀢𑀸𑀤𑀺𑀲𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀯𑀺𑀧𑀲𑁆𑀲𑀦𑀸𑀬𑀁 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀅𑀭𑀳𑀸 𑀔𑀻𑀡𑀸𑀲𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁮𑁩. 𑀓𑀺𑀓𑀻𑀯 𑀅𑀡𑁆𑀟𑀁 𑀭𑀓𑁆𑀔𑁂𑀬𑁆𑀬𑀸𑀢𑀺 𑀅𑀡𑁆𑀟𑀁 𑀩𑀻𑀚𑀁 𑀭𑀓𑁆𑀔𑀫𑀸𑀦𑀸 𑀓𑀺𑀓𑀻 𑀲𑀓𑀼𑀡𑀻 𑀇𑀯 𑀅𑀧𑁆𑀧𑀫𑀢𑁆𑀢𑁄 𑀲𑀻𑀮𑀁 𑀭𑀓𑁆𑀔𑁂𑀬𑁆𑀬, 𑀘𑀸𑀫𑀭𑀻 𑀯𑀺𑀬 𑀯𑀸𑀮𑀥𑀺𑀦𑁆𑀢𑀺 𑀯𑀸𑀮𑀁 𑀭𑀓𑁆𑀔𑀫𑀸𑀦𑀸 𑀓𑀡𑁆𑀟𑀓𑁂𑀲𑀼 𑀯𑀸𑀮𑁂 𑀮𑀕𑁆𑀕𑀦𑁆𑀢𑁂 𑀪𑀺𑀦𑁆𑀤𑀦𑀪𑀬𑁂𑀦 𑀅𑀦𑀸𑀓𑀟𑁆𑀠𑀺𑀢𑁆𑀯𑀸 𑀫𑀭𑀫𑀸𑀦𑀸 𑀘𑀸𑀫𑀭𑀻 𑀯𑀺𑀬 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀻𑀮𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀭𑀓𑁆𑀔𑁂𑀬𑁆𑀬. 𑀦𑀺𑀧𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑁂𑀦 𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀺𑀧𑀓𑁄 𑀔𑀡𑁆𑀟𑀙𑀺𑀤𑁆𑀤𑀸𑀤𑀺𑀪𑀸𑀯𑀁 𑀅𑀧𑀸𑀧𑁂𑀢𑁆𑀯𑀸 𑀭𑀓𑁆𑀔𑀡𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑁄 𑀪𑀕𑀯𑀸 𑀩𑁆𑀬𑀸𑀓𑀭𑀡𑀫𑀓𑀸𑀲𑀺. 𑀲𑁄 𑀏𑀯𑀁 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀏𑀓𑀤𑀺𑀯𑀲𑀁 𑀯𑀺𑀯𑁂𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀲𑁄𑀫𑀦𑀲𑁆𑀲𑀯𑀲𑁂𑀦 𑀏𑀯𑀁 𑀭𑀓𑁆𑀔𑀺𑀁 𑀫𑀳𑀸𑀫𑀼𑀦𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀭𑀸𑀳𑀼𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀦𑀸𑀮𑀓𑀕𑀸𑀫𑁂 𑀭𑀽𑀧𑀲𑀸𑀭𑀻 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀉𑀧𑀲𑁂𑀦𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀬 𑀏𑀓𑀯𑀲𑁆𑀲𑀺𑀓𑁄 ‘‘𑀅𑀭𑀺𑀬𑀕𑀩𑁆𑀪𑀁 𑀯𑀟𑁆𑀠𑁂𑀫𑀻’’𑀢𑀺 𑀏𑀓𑀁 𑀓𑀼𑀮𑀧𑀼𑀢𑁆𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀲𑀢𑁆𑀣𑀸𑀭𑀸 𑀘𑀲𑁆𑀲 𑀢𑀲𑁆𑀲 𑀅𑀯𑀲𑁆𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄’’𑀢𑀺 (𑀫𑀳𑀸𑀯. 𑁭𑁫) 𑀕𑀭𑀳𑀺𑀢𑁄 ‘‘𑀇𑀤𑀸𑀦𑀸𑀳𑀁 𑀬𑀤𑀺 𑀧𑀭𑀺𑀲𑀁 𑀦𑀺𑀲𑁆𑀲𑀸𑀬 𑀲𑀢𑁆𑀣𑀸𑀭𑀸 𑀕𑀭𑀳𑀺𑀢𑁄, 𑀧𑀭𑀺𑀲𑀁𑀬𑁂𑀯 𑀧𑀦 𑀦𑀺𑀲𑁆𑀲𑀸𑀬 𑀲𑀢𑁆𑀣𑀼 𑀧𑀲𑀸𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀲𑀬𑀫𑁆𑀧𑀺 𑀲𑀩𑁆𑀩𑁂 𑀥𑀼𑀢𑀗𑁆𑀕𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀅𑀜𑁆𑀜𑁂𑀧𑀺 𑀢𑀤𑀢𑁆𑀣𑀸𑀬 𑀲𑀫𑀸𑀤𑀧𑁂𑀲𑀺, 𑀢𑁂𑀦 𑀦𑀁 𑀪𑀕𑀯𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑁄𑀲𑀫𑁆𑀩𑀺𑀬𑀁 𑀓𑀮𑀳𑁂 𑀉𑀧𑁆𑀧𑀦𑁆𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀤𑁆𑀯𑀺𑀥𑀸𑀪𑀽𑀢𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀓𑀮𑀳𑀁 𑀧𑀭𑀺𑀯𑀚𑁆𑀚𑀺𑀢𑀼𑀓𑀸𑀫𑁂𑀦 ‘‘𑀏𑀢𑀭𑀳𑀺 𑀔𑁄 𑀓𑀮𑀳𑁄 𑀉𑀧𑁆𑀧𑀦𑁆𑀦𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘 𑀤𑁆𑀯𑀺𑀥𑀸𑀪𑀽𑀢𑁄, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀝𑁆𑀞𑁄 𑀯𑀺𑀯𑁂𑀓𑀯𑀸𑀲𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀲𑀺. 𑀏𑀯𑀁 𑀣𑁂𑀭𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀑𑀯𑀸𑀤𑀤𑀸𑀦𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀢𑀣𑀸 𑀧𑀝𑀺𑀧𑀦𑁆𑀦𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑁮𑁬. 𑀲𑁄 𑀏𑀯𑀁 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀧𑀩𑁆𑀪𑀸𑀭𑀫𑁆𑀳𑀺 𑀦𑀺𑀲𑀻𑀤𑀦𑁆𑀢𑀦𑁆𑀢𑀺 𑀧𑀼𑀭𑀢𑁄 𑀪𑀸𑀭𑀁 𑀦𑀫𑀺𑀢𑀁 𑀑𑀦𑀫𑀺𑀢𑀦𑁆𑀢𑀺 𑀧𑀩𑁆𑀪𑀸𑀭𑀁 𑀯𑀺𑀯𑁂𑀓𑀓𑀸𑀫𑀁 𑀯𑀦𑀫𑀚𑁆𑀛𑁂 𑀲𑀬𑀁𑀚𑀸𑀢𑀧𑀩𑁆𑀩𑀢𑀧𑀩𑁆𑀪𑀸𑀭𑁂 𑀦𑀺𑀲𑀺𑀦𑁆𑀦𑀁 𑀦𑀭𑀼𑀢𑁆𑀢𑀫𑀁 𑀪𑀕𑀯𑀦𑁆𑀢𑀁 𑀅𑀳𑀁 𑀉𑀧𑀕𑀘𑁆𑀙𑀺𑀁 𑀲𑀫𑀻𑀧𑀁 𑀕𑀢𑁄𑀢𑀺 𑀅𑀢𑁆𑀣𑁄.

𑁮𑁭. 𑀓𑀡𑀺𑀓𑀸𑀭𑀧𑀼𑀧𑁆𑀨 𑀤𑀺𑀲𑁆𑀯𑀸𑀢𑀺 𑀢𑀣𑀸 𑀉𑀧𑀕𑀘𑁆𑀙𑀦𑁆𑀢𑁄 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀲𑀼𑀧𑀼𑀧𑁆𑀨𑀺𑀢𑀁 𑀓𑀡𑀺𑀓𑀸𑀭𑀁 𑀤𑀺𑀲𑁆𑀯𑀸. 𑀯𑀡𑁆𑀝𑁂 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀢𑀣𑀸𑀕𑀢𑀲𑁆𑀲 𑀤𑀺𑀝𑁆𑀞𑀓𑀸𑀮𑁂 𑀢𑀁 𑀧𑀼𑀧𑁆𑀨𑀁 𑀯𑀡𑁆𑀝𑁂 𑀯𑀡𑁆𑀝𑀲𑁆𑀫𑀺𑀁 𑀙𑁂𑀢𑁆𑀯𑀸𑀦 𑀙𑀺𑀦𑁆𑀤𑀺𑀢𑁆𑀯𑀸𑀦. 𑀅𑀮𑀗𑁆𑀓𑀭𑀺𑀢𑁆𑀯𑀸 𑀙𑀢𑁆𑀢𑀫𑁆𑀳𑀻𑀢𑀺 𑀢𑁂𑀦 𑀧𑀼𑀧𑁆𑀨𑁂𑀦 𑀙𑀢𑁆𑀢𑀁 𑀙𑀸𑀤𑁂𑀢𑁆𑀯𑀸. 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀦𑁆𑀢𑀺 𑀧𑀩𑁆𑀪𑀸𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀼𑀤𑁆𑀥𑀦𑀺 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁮𑁮. 𑀧𑀺𑀡𑁆𑀟𑀧𑀸𑀢𑀜𑁆𑀘 𑀧𑀸𑀤𑀸𑀲𑀺𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀓𑀸𑀭𑁂𑀦 𑀅𑀤𑀸𑀲𑀺𑀁 𑀪𑁄𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀫𑀦𑁆𑀦𑀁 𑀲𑀼𑀪𑁄𑀚𑀦𑀦𑁆𑀢𑀺 𑀲𑀼𑀦𑁆𑀤𑀭𑀪𑁄𑀚𑀦𑀲𑀗𑁆𑀔𑀸𑀢𑀁 𑀧𑀭𑀫𑀦𑁆𑀦𑀁 𑀉𑀢𑁆𑀢𑀫𑀸𑀳𑀸𑀭𑀁. 𑀩𑀼𑀤𑁆𑀥𑁂𑀦 𑀦𑀯𑀫𑁂 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀯𑁂𑀓𑀝𑁆𑀞𑀸𑀦𑁂 𑀩𑀼𑀤𑁆𑀥𑁂𑀦 𑀲𑀳 𑀦𑀯𑀫𑁂 𑀅𑀝𑁆𑀞 𑀲𑀫𑀡𑁂 𑀲𑀫𑀺𑀢𑀧𑀸𑀧𑁂 𑀔𑀻𑀡𑀸𑀲𑀯𑀪𑀺𑀓𑁆𑀔𑀽 𑀪𑁄𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀬𑀁 𑀯𑀤𑀦𑁆𑀢𑀺 𑀲𑀼𑀫𑁂𑀥𑁄𑀢𑀺 𑀬𑀁 𑀕𑁄𑀢𑀫𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀪𑀽𑀭𑀺𑀧𑀜𑁆𑀜𑀁 𑀧𑀣𑀯𑀺𑀲𑀫𑀸𑀦𑀁 𑀧𑀜𑁆𑀜𑀁 𑀲𑀼𑀫𑁂𑀥𑀁 𑀲𑀼𑀦𑁆𑀤𑀭𑀁 𑀲𑀩𑁆𑀩𑀜𑁆𑀜𑀼𑀢𑀸𑀤𑀺𑀧𑀜𑁆𑀜𑀯𑀦𑁆𑀢𑀁. 𑀲𑀼𑀫𑁂𑀥𑁄 𑀇𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄 𑀇𑀢𑀺 𑀯𑀤𑀦𑁆𑀢𑀺 𑀧𑀡𑁆𑀟𑀺𑀢𑀸 𑀇𑀢𑁄 𑀓𑀧𑁆𑀧𑀢𑁄 𑀲𑀢𑀲𑀳𑀲𑁆𑀲𑁂 𑀓𑀧𑁆𑀧𑁂 𑀏𑀲𑁄 𑀕𑁄𑀢𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀺𑀢𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀓𑀫𑁆𑀫𑀺𑀓𑁂𑀦 𑀤𑀲𑁆𑀲𑀺𑀢𑀁 𑀅𑀧𑀭𑀺𑀫𑀸𑀡𑀁 𑀯𑀁𑀲𑀸𑀦𑀼𑀕𑀢𑀁 𑀥𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀏𑀢𑁆𑀢𑀓𑀁 𑀥𑀦𑀭𑀸𑀲𑀺𑀁 𑀫𑀬𑁆𑀳𑀁 𑀧𑀺𑀢𑀼𑀅𑀬𑁆𑀬𑀓𑀧𑀬𑁆𑀬𑀓𑀸𑀤𑀬𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄 𑀅𑀪𑀺𑀜𑁆𑀜𑀸𑀮𑀸𑀪𑀺𑀁 𑀏𑀓𑀁 𑀢𑀸𑀧𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀦 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑁂 𑀦𑀺𑀬𑁄𑀚𑀺𑀢𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀓𑀼𑀮𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀲𑀫𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑀗𑁆𑀔𑀸𑀢𑀁 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀲𑀺. 𑀅𑀣 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀣𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀲𑀺. 𑀲𑀢𑁆𑀣𑀸 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑁂𑀦𑀯𑀼𑀢𑁂 𑀓𑀧𑁆𑀧𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑁂𑀲𑀼 𑀢𑀻𑀲𑀼 𑀭𑀸𑀚𑀧𑀼𑀢𑁆𑀢𑁂𑀲𑀼 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀢𑁂𑀲𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀲𑀳𑀸𑀬𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀩𑀳𑀼𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀼𑀭𑀝𑁆𑀞𑁂 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑀺𑀕𑀫𑁂 𑀭𑀝𑁆𑀞𑀧𑀸𑀮𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀭𑀝𑁆𑀞𑀧𑀸𑀮𑁄𑀢𑀺 𑀯𑀁𑀲𑀸𑀦𑀼𑀕𑀢𑀫𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑀺𑀢𑁄 𑀫𑀳𑀦𑁆𑀢𑁂 𑀘 𑀬𑀲𑁂 𑀧𑀢𑀺𑀝𑁆𑀞𑀸𑀧𑀺𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑁄𑀢𑀺.

𑀅𑀣 𑀪𑀕𑀯𑀸 𑀓𑀼𑀭𑀼𑀭𑀝𑁆𑀞𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀅𑀦𑀼𑀧𑀸𑀧𑀼𑀡𑀺. 𑀢𑀁 𑀲𑀼𑀢𑁆𑀯𑀸 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀲𑀢𑁆𑀢𑀸𑀳𑀁 𑀪𑀢𑁆𑀢𑀘𑁆𑀙𑁂𑀤𑀁 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀢𑀼𑀁 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀮𑀪𑀺𑀢𑁆𑀯𑀸 𑀢𑀁 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀺𑀢𑀭𑀸 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀇𑀢𑁆𑀣𑀸𑀕𑀸𑀭𑀚𑀦𑁂 𑀉𑀧𑀕𑀦𑁆𑀢𑁆𑀯𑀸 ‘‘𑀓𑀻𑀤𑀺𑀲𑀸 𑀦𑀸𑀫 𑀢𑀸, 𑀅𑀬𑁆𑀬𑀧𑀼𑀢𑁆𑀢, 𑀅𑀘𑁆𑀙𑀭𑀸𑀬𑁄, 𑀬𑀸𑀲𑀁 𑀢𑁆𑀯𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀻’’𑀢𑀺𑀆𑀤𑀻𑀦𑀺 (𑀫. 𑀦𑀺. 𑁨.𑁩𑁦𑁧) 𑀯𑀢𑁆𑀯𑀸 𑀧𑀮𑁄𑀪𑀦𑀓𑀫𑁆𑀫𑀁 𑀓𑀸𑀢𑀼𑀁 𑀆𑀭𑀤𑁆𑀥𑁂 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘;

𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀁, 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀺.

‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀁;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀅𑀝𑁆𑀞𑀸𑀧𑀤𑀓𑀢𑀸 𑀓𑁂𑀲𑀸, 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀑𑀤𑀳𑀺 𑀫𑀺𑀕𑀯𑁄 𑀧𑀸𑀲𑀁, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀓𑀦𑁆𑀤𑀦𑁆𑀢𑁂 𑀫𑀺𑀕𑀩𑀦𑁆𑀥𑀓𑁂.

‘‘𑀙𑀺𑀦𑁆𑀦𑁄 𑀧𑀸𑀲𑁄 𑀫𑀺𑀕𑀯𑀲𑁆𑀲, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀲𑁄𑀘𑀦𑁆𑀢𑁂 𑀫𑀺𑀕𑀮𑀼𑀤𑁆𑀤𑀓𑁂’’𑀢𑀺. (𑀫. 𑀦𑀺. 𑁨.𑁩𑁦𑁨; 𑀣𑁂𑀭𑀕𑀸. 𑁭𑁬𑁯-𑁭𑁭𑁫);

𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀇𑀫𑀸 𑀕𑀸𑀣𑀸 𑀯𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀫𑀺𑀕𑀸𑀚𑀺𑀦𑀯𑀦𑀼𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀣𑁂𑀭𑀲𑁆𑀲 𑀓𑀺𑀭 𑀧𑀺𑀢𑀸 𑀲𑀢𑁆𑀢𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀅𑀕𑁆𑀕𑀴𑀁 𑀤𑀸𑀧𑁂𑀢𑁆𑀯𑀸 𑀫𑀮𑁆𑀮𑁂 𑀆𑀡𑀸𑀧𑁂𑀲𑀺 ‘‘𑀦𑀺𑀓𑁆𑀔𑀫𑀺𑀢𑀼𑀁 𑀫𑀸 𑀤𑁂𑀣, 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑀸𑀧𑁂𑀣𑀸’’𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀅𑀣 𑀭𑀸𑀚𑀸 𑀓𑁄𑀭𑀩𑁆𑀬𑁄 𑀣𑁂𑀭𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 ‘‘𑀇𑀥, 𑀪𑁄 𑀭𑀝𑁆𑀞𑀧𑀸𑀮, 𑀧𑀩𑁆𑀩𑀚𑀦𑁆𑀢𑁄 𑀩𑁆𑀬𑀸𑀥𑀺𑀧𑀸𑀭𑀺𑀚𑀼𑀜𑁆𑀜𑀁 𑀯𑀸 𑀚𑀭𑀸𑀪𑁄𑀕𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀁 𑀯𑀸 𑀧𑀢𑁆𑀢𑁄 𑀧𑀩𑁆𑀩𑀚𑀢𑀺, 𑀢𑁆𑀯𑀁 𑀧𑀦 𑀓𑀺𑀜𑁆𑀘𑀺𑀧𑀺 𑀧𑀸𑀭𑀺𑀚𑀼𑀜𑁆𑀜𑀁 𑀅𑀦𑀼𑀧𑀕𑀢𑁄 𑀏𑀯 𑀓𑀲𑁆𑀫𑀸 𑀧𑀩𑁆𑀩𑀚𑀲𑀻’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀣𑁂𑀭𑁄 ‘‘𑀉𑀧𑀦𑀺𑀬𑁆𑀬𑀢𑀺 𑀮𑁄𑀓𑁄 𑀅𑀤𑁆𑀥𑀼𑀯𑁄, 𑀅𑀢𑀸𑀡𑁄 𑀮𑁄𑀓𑁄 𑀅𑀦𑀪𑀺𑀲𑁆𑀲𑀭𑁄, 𑀅𑀲𑀭𑀡𑁄 𑀮𑁄𑀓𑁄 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀅𑀢𑁆𑀢𑀦𑀸 𑀯𑀺𑀤𑀺𑀢𑀪𑀸𑀯𑀁 𑀓𑀣𑁂𑀢𑁆𑀯𑀸 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀅𑀦𑀼𑀕𑀻𑀢𑀺𑀁 𑀓𑀣𑁂𑀦𑁆𑀢𑁄 𑁋

‘‘𑀧𑀲𑁆𑀲𑀸𑀫𑀺 𑀮𑁄𑀓𑁂 𑀲𑀥𑀦𑁂 𑀫𑀦𑀼𑀲𑁆𑀲𑁂, 𑀮𑀤𑁆𑀥𑀸𑀦 𑀯𑀺𑀢𑁆𑀢𑀁 𑀦 𑀤𑀤𑀦𑁆𑀢𑀺 𑀫𑁄𑀳𑀸;

𑀮𑀼𑀤𑁆𑀥𑀸 𑀥𑀦𑀁 𑀲𑀦𑁆𑀦𑀺𑀘𑀬𑀁 𑀓𑀭𑁄𑀦𑁆𑀢𑀺, 𑀪𑀺𑀬𑁆𑀬𑁄𑀯 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑀦𑁆𑀢𑀺.

‘‘𑀭𑀸𑀚𑀸 𑀧𑀲𑀬𑁆𑀳𑀧𑁆𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀲𑀲𑀸𑀕𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀦𑁆𑀢𑁄;

𑀑𑀭𑀁 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀢𑁆𑀢𑀭𑀽𑀧𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀧𑀺 𑀧𑀢𑁆𑀣𑀬𑁂𑀣.

‘‘𑀭𑀸𑀚𑀸 𑀘 𑀅𑀜𑁆𑀜𑁂 𑀘 𑀩𑀳𑀽 𑀫𑀦𑀼𑀲𑁆𑀲𑀸, 𑀅𑀯𑀻𑀢𑀢𑀡𑁆𑀳𑀸 𑀫𑀭𑀡𑀁 𑀉𑀧𑁂𑀦𑁆𑀢𑀺;

𑀊𑀦𑀸𑀯 𑀳𑀼𑀢𑁆𑀯𑀸𑀦 𑀚𑀳𑀦𑁆𑀢𑀺 𑀤𑁂𑀳𑀁, 𑀓𑀸𑀫𑁂𑀳𑀺 𑀮𑁄𑀓𑀫𑁆𑀳𑀺 𑀦 𑀳𑀢𑁆𑀣𑀺 𑀢𑀺𑀢𑁆𑀢𑀺.

‘‘𑀓𑀦𑁆𑀤𑀦𑁆𑀢𑀺 𑀦𑀁 𑀜𑀸𑀢𑀻 𑀧𑀓𑀺𑀭𑀺𑀬 𑀓𑁂𑀲𑁂, ‘𑀅𑀳𑁄 𑀯𑀢𑀸 𑀦𑁄 𑀅𑀫𑀭𑀸’𑀢𑀺 𑀘𑀸𑀳𑀼;

𑀯𑀢𑁆𑀣𑁂𑀦 𑀦𑀁 𑀧𑀸𑀭𑀼𑀢𑀁 𑀦𑀻𑀳𑀭𑀺𑀢𑁆𑀯𑀸, 𑀘𑀺𑀢𑀁 𑀲𑀫𑁄𑀥𑀸𑀬 𑀢𑀢𑁄 𑀟𑀳𑀦𑁆𑀢𑀺.

‘‘𑀲𑁄 𑀟𑀬𑁆𑀳𑀢𑀺 𑀲𑀽𑀮𑁂𑀳𑀺 𑀢𑀼𑀚𑁆𑀚𑀫𑀸𑀦𑁄, 𑀏𑀓𑁂𑀦 𑀯𑀢𑁆𑀣𑁂𑀦 𑀧𑀳𑀸𑀬 𑀪𑁄𑀕𑁂;

𑀦 𑀫𑀻𑀬𑀫𑀸𑀦𑀲𑁆𑀲 𑀪𑀯𑀦𑁆𑀢𑀺 𑀢𑀸𑀡𑀸, 𑀜𑀸𑀢𑀻 𑀘 𑀫𑀺𑀢𑁆𑀢𑀸 𑀅𑀣 𑀯𑀸 𑀲𑀳𑀸𑀬𑀸.

‘‘𑀤𑀸𑀬𑀸𑀤𑀓𑀸 𑀢𑀲𑁆𑀲 𑀥𑀦𑀁 𑀳𑀭𑀦𑁆𑀢𑀺, 𑀲𑀢𑁆𑀢𑁄 𑀧𑀦 𑀕𑀘𑁆𑀙𑀢𑀺 𑀬𑁂𑀦 𑀓𑀫𑁆𑀫𑀁;

𑀦 𑀫𑀻𑀬𑀫𑀸𑀦𑀁 𑀥𑀦𑀫𑀦𑁆𑀯𑁂𑀢𑀺 𑀓𑀺𑀜𑁆𑀘𑀺, 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀥𑀦𑀜𑁆𑀘 𑀭𑀝𑁆𑀞𑀁.

‘‘𑀦 𑀤𑀻𑀖𑀫𑀸𑀬𑀼𑀁 𑀮𑀪𑀢𑁂 𑀥𑀦𑁂𑀦, 𑀦 𑀘𑀸𑀧𑀺 𑀯𑀺𑀢𑁆𑀢𑁂𑀦 𑀚𑀭𑀁 𑀯𑀺𑀳𑀦𑁆𑀢𑀺;

𑀅𑀧𑁆𑀧𑀁 𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸, 𑀅𑀲𑀲𑁆𑀲𑀢𑀁 𑀯𑀺𑀧𑁆𑀧𑀭𑀺𑀡𑀸𑀫𑀥𑀫𑁆𑀫𑀁.

‘‘𑀅𑀟𑁆𑀠𑀸 𑀤𑀮𑀺𑀤𑁆𑀤𑀸 𑀘 𑀨𑀼𑀲𑀦𑁆𑀢𑀺 𑀨𑀲𑁆𑀲𑀁, 𑀩𑀸𑀮𑁄 𑀘 𑀥𑀻𑀭𑁄 𑀘 𑀢𑀣𑁂𑀯 𑀨𑀼𑀝𑁆𑀞𑁄;

𑀩𑀸𑀮𑁄 𑀳𑀺 𑀩𑀸𑀮𑁆𑀬𑀸 𑀯𑀥𑀺𑀢𑁄𑀯 𑀲𑁂𑀢𑀺, 𑀥𑀻𑀭𑁄 𑀘 𑀦𑁄 𑀯𑁂𑀥𑀢𑀺 𑀨𑀲𑁆𑀲𑀨𑀼𑀝𑁆𑀞𑁄.

‘‘𑀢𑀲𑁆𑀫𑀸 𑀳𑀺 𑀧𑀜𑁆𑀜𑀸𑀯 𑀥𑀦𑁂𑀦 𑀲𑁂𑀬𑁆𑀬𑀸, 𑀬𑀸𑀬 𑀯𑁄𑀲𑀸𑀦𑀫𑀺𑀥𑀸𑀥𑀺𑀕𑀘𑁆𑀙𑀢𑀺;

𑀅𑀩𑁆𑀬𑁄𑀲𑀺𑀢𑀢𑁆𑀢𑀸 𑀳𑀺 𑀪𑀯𑀸𑀪𑀯𑁂𑀲𑀼, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺 𑀫𑁄𑀳𑀸.

‘‘𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁, 𑀲𑀁𑀲𑀸𑀭𑀫𑀸𑀧𑀚𑁆𑀚𑀧𑀭𑀫𑁆𑀧𑀭𑀸𑀬;

𑀢𑀲𑁆𑀲𑀧𑁆𑀧𑀧𑀜𑁆𑀜𑁄 𑀅𑀪𑀺𑀲𑀤𑁆𑀤𑀳𑀦𑁆𑀢𑁄, 𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁.

‘‘𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀧𑀸𑀧𑀥𑀫𑁆𑀫𑁄;

𑀏𑀯𑀁 𑀧𑀚𑀸 𑀧𑁂𑀘𑁆𑀘 𑀧𑀭𑀫𑁆𑀳𑀺 𑀮𑁄𑀓𑁂, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀧𑀸𑀧𑀥𑀫𑁆𑀫𑁄.

‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚.

‘‘𑀤𑀼𑀫𑀧𑁆𑀨𑀮𑀸𑀦𑀻𑀯 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀟𑁆𑀠𑀸 𑀘 𑀲𑀭𑀻𑀭𑀪𑁂𑀤𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄.

‘‘𑀲𑀤𑁆𑀥𑀸𑀬𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀉𑀧𑁂𑀢𑁄 𑀚𑀺𑀦𑀲𑀸𑀲𑀦𑁂;

𑀅𑀯𑀜𑁆𑀛𑀸 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀅𑀦𑀡𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦𑀁.

‘‘𑀓𑀸𑀫𑁂 𑀆𑀤𑀺𑀢𑁆𑀢𑀢𑁄 𑀤𑀺𑀲𑁆𑀯𑀸, 𑀚𑀸𑀢𑀭𑀽𑀧𑀸𑀦𑀺 𑀲𑀢𑁆𑀣𑀢𑁄;

𑀕𑀩𑁆𑀪𑀸𑀯𑁄𑀓𑁆𑀓𑀦𑁆𑀢𑀺𑀢𑁄 𑀤𑀼𑀓𑁆𑀔𑀁, 𑀦𑀺𑀭𑀬𑁂𑀲𑀼 𑀫𑀳𑀩𑁆𑀪𑀬𑀁.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀲𑀁𑀯𑁂𑀕𑀁 𑀅𑀮𑀪𑀺𑀁 𑀢𑀤𑀸;

𑀲𑁄𑀳𑀁 𑀯𑀺𑀤𑁆𑀥𑁄 𑀢𑀤𑀸 𑀲𑀦𑁆𑀢𑁄, 𑀲𑀫𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁.

‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺. (𑀣𑁂𑀭𑀕𑀸. 𑁭𑁭𑁬-𑁭𑁯𑁩) 𑁋

𑀇𑀫𑀸 𑀕𑀸𑀣𑀸 𑀅𑀯𑁄𑀘. 𑀏𑀯𑀁 𑀣𑁂𑀭𑁄 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀕𑀢𑁄. 𑀲𑀢𑁆𑀣𑀸 𑀘 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁯𑁭-𑁮. 𑀏𑀯𑀁 𑀲𑁄 𑀣𑁂𑀭𑁄 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀯𑀭𑀦𑀸𑀕𑁄 𑀫𑀬𑀸 𑀤𑀺𑀦𑁆𑀦𑁄𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀧𑀲𑀻𑀤𑀺𑀢𑁆𑀯𑀸 𑀯𑀭𑁄 𑀉𑀢𑁆𑀢𑀫𑁄 𑀲𑁂𑀝𑁆𑀞𑁄 𑀈𑀲𑀸𑀤𑀦𑁆𑀢𑁄 𑀭𑀣𑀻𑀲𑀸𑀲𑀤𑀺𑀲𑀤𑀦𑁆𑀢𑁄 𑀉𑀭𑀽𑀴𑁆𑀳𑀯𑀸 𑀪𑀸𑀭𑀯𑀳𑁄 𑀭𑀸𑀚𑀸𑀭𑀳𑁄 𑀯𑀸. 𑀲𑁂𑀢𑀘𑁆𑀙𑀢𑁆𑀢𑁄𑀧𑀲𑁄𑀪𑀺𑀢𑁄𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀉𑀲𑁆𑀲𑀸𑀧𑀺𑀢𑀲𑁂𑀢𑀘𑁆𑀙𑀢𑁆𑀢𑁂𑀦 𑀉𑀧𑀲𑁂𑀯𑀺𑀢𑁄 𑀲𑁄𑀪𑀫𑀸𑀦𑁄. 𑀧𑀼𑀦𑀧𑀺 𑀓𑀺𑀁 𑀯𑀺𑀲𑀺𑀝𑁆𑀞𑁄 𑀯𑀭𑀦𑀸𑀕𑁄? 𑀲𑀓𑀧𑁆𑀧𑀦𑁄 𑀳𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑁄. 𑀲𑀗𑁆𑀖𑀸𑀭𑀸𑀫𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀲𑀦𑀢𑁆𑀣𑀸𑀬 𑀆𑀭𑀸𑀫𑀁 𑀯𑀺𑀳𑀸𑀭𑀁 𑀅𑀓𑀸𑀭𑀬𑀺𑀁 𑀓𑀸𑀭𑁂𑀲𑀺𑀁.

𑁯𑁯. 𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀻𑀢𑀺 𑀢𑀲𑁆𑀫𑀺𑀁 𑀓𑀸𑀭𑀸𑀧𑀺𑀢𑁂 𑀯𑀺𑀳𑀸𑀭𑀩𑁆𑀪𑀦𑁆𑀢𑀭𑁂 𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺 𑀧𑀸𑀲𑀸𑀤𑀸𑀦𑀺 𑀘 𑀅𑀳𑀁 𑀅𑀓𑀸𑀭𑀬𑀺𑀁 𑀓𑀸𑀭𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀫𑀳𑁄𑀖𑀤𑀸𑀦𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀲𑀳𑀺𑀢𑀁 𑀫𑀳𑁄𑀖𑀲𑀤𑀺𑀲𑀁 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀫𑀳𑁂𑀲𑀺𑀦𑁄 𑀫𑀼𑀦𑀺𑀦𑁄 𑀦𑀺𑀬𑁆𑀬𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁦𑁦. 𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄𑀢𑀺 𑀘𑀢𑀼𑀭𑀸𑀲𑀗𑁆𑀔𑁆𑀬𑁂𑀬𑁆𑀬𑀲𑀢𑀲𑀳𑀲𑁆𑀲𑁂𑀲𑀼 𑀓𑀧𑁆𑀧𑁂𑀲𑀼 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀉𑀲𑁆𑀲𑀸𑀳𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑁂𑀦 𑀫𑀳𑀸𑀯𑀻𑀭𑁄 𑀲𑀬𑀫𑁆𑀪𑀽 𑀲𑀬𑀫𑁂𑀯 𑀪𑀽𑀢𑁄 𑀚𑀸𑀢𑁄 𑀮𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀧𑀼𑀕𑁆𑀕𑀮𑁄 𑀅𑀦𑀼𑀫𑁄𑀤𑀺 𑀯𑀺𑀳𑀸𑀭𑀸𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑀩𑁆𑀩𑁂 𑀚𑀦𑁂 𑀳𑀸𑀲𑀬𑀦𑁆𑀢𑁄𑀢𑀺 𑀲𑀓𑀮𑀸𑀦𑀦𑁆𑀢𑀸𑀧𑀭𑀺𑀫𑀸𑀡𑁂 𑀤𑁂𑀯𑀫𑀦𑀼𑀲𑁆𑀲𑁂 𑀳𑀸𑀲𑀬𑀦𑁆𑀢𑁄 𑀲𑀦𑁆𑀢𑀼𑀝𑁆𑀞𑁂 𑀓𑀼𑀭𑀼𑀫𑀸𑀦𑁄 𑀅𑀫𑀢𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑀺 𑀧𑀓𑀸𑀲𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.

𑁧𑁦𑁧. 𑀢𑀁 𑀫𑁂 𑀯𑀺𑀬𑀸𑀓𑀸𑀲𑀻𑀢𑀺 𑀢𑀁 𑀫𑀬𑁆𑀳𑀁 𑀓𑀢𑀧𑀼𑀜𑁆𑀜𑀁 𑀩𑀮𑀁 𑀯𑀺𑀲𑁂𑀲𑁂𑀦 𑀧𑀸𑀓𑀝𑀁 𑀅𑀓𑀸𑀲𑀺. 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄𑀢𑀺 𑀚𑀮𑁂 𑀚𑀸𑀢𑀁 𑀚𑀮𑀚𑀁 𑀧𑀤𑀼𑀫𑀁, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄𑀢𑀺 𑀅𑀢𑁆𑀣𑁄. ‘‘𑀚𑀮𑀦𑀼𑀢𑁆𑀢𑀫𑀦𑀸𑀬𑀓𑁄’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀪𑀸𑀬 𑀚𑀮𑀦𑁆𑀢𑀻𑀢𑀺 𑀚𑀮𑀦𑀸, 𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑁂𑀯𑀩𑁆𑀭𑀳𑁆𑀫𑀸𑀦𑁄, 𑀢𑁂𑀲𑀁 𑀚𑀮𑀦𑀸𑀦𑀁 𑀉𑀢𑁆𑀢𑀫𑁄𑀢𑀺 𑀚𑀮𑀦𑀼𑀢𑁆𑀢𑀫𑁄. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀦𑀸𑀬𑀓𑁄 𑀉𑀢𑁆𑀢𑀫𑁄𑀢𑀺 𑀦𑀸𑀬𑀓𑁄, 𑀲𑀫𑁆𑀪𑀸𑀭𑀯𑀦𑁆𑀢𑁂 𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀁 𑀦𑁂𑀢𑀺 𑀧𑀸𑀧𑁂𑀢𑀻𑀢𑀺 𑀯𑀸 𑀦𑀸𑀬𑀓𑁄, 𑀚𑀮𑀦𑀼𑀢𑁆𑀢𑀫𑁄 𑀘 𑀲𑁄 𑀦𑀸𑀬𑀓𑁄 𑀘𑀸𑀢𑀺 𑀚𑀮𑀦𑀼𑀢𑁆𑀢𑀫𑀦𑀸𑀬𑀓𑁄. 𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀲𑁄𑀧𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀪𑀸𑀭𑀁 𑀲𑁄𑀥𑀬𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑁄𑀧𑀸𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀜𑁆𑀜𑀢𑀭𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀩𑀻𑀚𑀧𑀽𑀭𑀨𑀮𑀸𑀦𑀺 𑀲𑀢𑁆𑀣𑀼 𑀉𑀧𑀦𑁂𑀲𑀺, 𑀧𑀭𑀺𑀪𑀼𑀜𑁆𑀚𑀺 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀲𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀗𑁆𑀖𑁂 𑀘 𑀅𑀪𑀺𑀧𑁆𑀧𑀲𑀦𑁆𑀦𑁄 𑀲𑀮𑀸𑀓𑀪𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀗𑁆𑀖𑀼𑀤𑁆𑀤𑁂𑀲𑀯𑀲𑁂𑀦 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀬𑀸𑀯𑀢𑀸𑀬𑀼𑀓𑀁 𑀔𑀻𑀭𑀪𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀢𑁂𑀳𑀺 𑀧𑀼𑀜𑁆𑀜𑁂𑀳𑀺 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀦𑁆𑀢𑁄 𑀏𑀓𑀤𑀸 𑀫𑀦𑀼𑀲𑁆𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀔𑀻𑀭𑀪𑀢𑁆𑀢𑀁 𑀅𑀤𑀸𑀲𑀺.

𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀧𑀭𑀺𑀩𑁆𑀪𑀫𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀼𑀭𑀺𑀫𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀸𑀬 𑀤𑀼𑀕𑁆𑀕𑀢𑀺𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀢𑀁 𑀤𑀲𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀧𑀓𑁆𑀓𑁂 𑀕𑀩𑁆𑀪𑁂 𑀯𑀺𑀚𑀸𑀬𑀦𑀓𑀸𑀮𑁂 𑀯𑀺𑀚𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀫𑀼𑀘𑁆𑀙𑀁 𑀆𑀧𑀚𑁆𑀚𑀺𑀢𑁆𑀯𑀸 𑀩𑀳𑀼𑀯𑁂𑀮𑀁 𑀫𑀢𑀸 𑀯𑀺𑀬 𑀦𑀺𑀧𑀚𑁆𑀚𑀺. 𑀜𑀸𑀢𑀓𑀸 ‘‘𑀫𑀢𑀸’’𑀢𑀺 𑀲𑀜𑁆𑀜𑀸𑀬 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀯𑀸𑀢𑀯𑀼𑀝𑁆𑀞𑀺𑀬𑀸 𑀉𑀝𑁆𑀞𑀺𑀢𑀸𑀬 𑀅𑀕𑁆𑀕𑀺𑀁 𑀅𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀤𑀸𑀭𑀓𑁄 𑀧𑀘𑁆𑀙𑀺𑀫𑀪𑀯𑀺𑀓𑀢𑁆𑀢𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦𑁂𑀯 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀫𑀸𑀢𑀸 𑀧𑀦 𑀓𑀸𑀮𑀫𑀓𑀸𑀲𑀺. 𑀤𑁂𑀯𑀢𑀸 𑀫𑀦𑀼𑀲𑁆𑀲𑀭𑀽𑀧𑁂𑀦𑀼𑀧𑀕𑀫𑁆𑀫 𑀢𑀁 𑀕𑀳𑁂𑀢𑁆𑀯𑀸 𑀲𑀼𑀲𑀸𑀦𑀕𑁄𑀧𑀓𑀲𑁆𑀲 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀓𑀸𑀮𑀁 𑀧𑀢𑀺𑀭𑀽𑀧𑁂𑀦 𑀆𑀳𑀸𑀭𑁂𑀦 𑀧𑁄𑀲𑁂𑀲𑀺. 𑀢𑀢𑁄 𑀧𑀭𑀁 𑀲𑀼𑀲𑀸𑀦𑀕𑁄𑀧𑀓𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀯𑀟𑁆𑀠𑁂𑀲𑀺. 𑀲𑁄 𑀢𑀣𑀸 𑀯𑀟𑁆𑀠𑁂𑀦𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁂𑀦 𑀲𑀼𑀧𑁆𑀧𑀺𑀬𑁂𑀦 𑀦𑀸𑀫 𑀤𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 𑀯𑀺𑀘𑀭𑀺. 𑀢𑀲𑁆𑀲 𑀲𑀼𑀲𑀸𑀦𑁂 𑀚𑀸𑀢𑀲𑀁𑀯𑀟𑁆𑀠𑀪𑀸𑀯𑀢𑁄 𑀲𑁄𑀧𑀸𑀓𑁄𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀢𑀯𑀲𑁆𑀲𑀺𑀓𑀁 𑀢𑀁 𑀪𑀕𑀯𑀸 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀯𑁂𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄𑀕𑀢𑀁 𑀤𑀺𑀲𑁆𑀯𑀸 𑀲𑀼𑀲𑀸𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀤𑀸𑀭𑀓𑁄 𑀧𑀼𑀩𑁆𑀩𑀳𑁂𑀢𑀼𑀦𑀸 𑀘𑁄𑀤𑀺𑀬𑀫𑀸𑀦𑁄 𑀧𑀲𑀦𑁆𑀦𑀫𑀸𑀦𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀺𑀢𑀭𑀸 ‘‘𑀅𑀦𑀼𑀜𑁆𑀜𑀸𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁄 𑀧𑀺𑀢𑀭𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀢𑀲𑁆𑀲 𑀧𑀺𑀢𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀣, 𑀪𑀦𑁆𑀢𑁂’’𑀢𑀺 𑀅𑀦𑀼𑀚𑀸𑀦𑀺, 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀕𑀯𑀸 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀦𑀺𑀬𑁄𑀚𑁂𑀲𑀺. 𑀲𑁄 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀼𑀲𑀸𑀦𑁂 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀅𑀭𑀳𑀸 𑀳𑀼𑀢𑁆𑀯𑀸𑀧𑀺 𑀅𑀜𑁆𑀜𑁂𑀲𑀁 𑀲𑁄𑀲𑀸𑀦𑀺𑀓𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀧𑀺 𑀏𑀓𑀧𑀼𑀢𑁆𑀢𑀲𑁆𑀫𑀺’’𑀦𑁆𑀢𑀺 (𑀣𑁂𑀭𑀕𑀸. 𑁩𑁩) 𑀕𑀸𑀣𑀁 𑀅𑀪𑀸𑀲𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀏𑀓𑀧𑀼𑀢𑁆𑀢𑀓𑁂 𑀧𑀺𑀬𑁂 𑀫𑀦𑀸𑀧𑁂 𑀫𑀸𑀢𑀸 𑀧𑀺𑀢𑀸 𑀘 𑀓𑀼𑀲𑀮𑀻 𑀏𑀓𑀦𑁆𑀢𑀳𑀺𑀢𑁂𑀲𑀻 𑀪𑀯𑁂𑀬𑁆𑀬, 𑀏𑀯𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸𑀲𑀼 𑀲𑀩𑁆𑀩𑀸𑀲𑀼 𑀤𑀺𑀲𑀸𑀲𑀼 𑀓𑀸𑀫𑀪𑀯𑀸𑀤𑀺𑀪𑁂𑀤𑁂𑀲𑀼 𑀯𑀸 𑀲𑀩𑁆𑀩𑁂𑀲𑀼 𑀪𑀯𑁂𑀲𑀼 𑀤𑀳𑀭𑀸𑀤𑀺𑀪𑁂𑀤𑀸𑀲𑀼 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼𑀧𑀺 𑀞𑀺𑀢𑁂𑀲𑀼 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀏𑀓𑀦𑁆𑀢𑀳𑀺𑀢𑁂𑀲𑀺𑀢𑀸𑀬 𑀓𑀼𑀲𑀮𑀻 𑀪𑀯𑁂𑀬𑁆𑀬 ‘‘𑀫𑀺𑀢𑁆𑀢𑁄, 𑀉𑀤𑀸𑀲𑀺𑀦𑁄, 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀲𑀻𑀫𑀁 𑀅𑀓𑀢𑁆𑀯𑀸 𑀲𑀻𑀫𑀸𑀬 𑀲𑀫𑁆𑀪𑁂𑀤𑀯𑀲𑁂𑀦 𑀲𑀩𑁆𑀩𑀢𑁆𑀣 𑀏𑀓𑀭𑀲𑀁 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬𑀸𑀢𑀺 𑀇𑀫𑀁 𑀧𑀦 𑀕𑀸𑀣𑀁 𑀯𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬𑀸𑀣, 𑀬𑁂 𑀢𑁂 𑀪𑀕𑀯𑀢𑀸 ‘𑀲𑀼𑀔𑀁 𑀲𑀼𑀧𑀢𑀻’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧𑁧.𑁧𑁫; 𑀧𑀭𑀺. 𑁩𑁩𑁧; 𑀫𑀺. 𑀧. 𑁪.𑁪.𑁬) 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸 𑀘 𑀯𑀼𑀢𑁆𑀢𑀸, 𑀏𑀓𑀁𑀲𑁂𑀦 𑀢𑁂𑀲𑀁 𑀪𑀸𑀕𑀺𑀦𑁄 𑀪𑀯𑀣𑀸’’𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺.

𑁧𑁧𑁨. 𑀏𑀯𑀁 𑀲𑁄 𑀧𑀢𑁆𑀢𑀨𑀮𑀸𑀥𑀺𑀕𑀫𑁄 𑀅𑀢𑁆𑀢𑀦𑁄 𑀓𑀢𑀧𑀼𑀜𑁆𑀜𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀧𑀩𑁆𑀪𑀸𑀭𑀁 𑀲𑁄𑀥𑀬𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀩𑁆𑀪𑀸𑀭𑀦𑁆𑀢𑀺 𑀲𑀺𑀮𑀸𑀧𑀩𑁆𑀩𑀢𑀲𑁆𑀲 𑀯𑀺𑀯𑁂𑀓𑀝𑁆𑀞𑀸𑀦𑀁, 𑀢𑀁 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀢𑁆𑀢𑀸 𑀇𑀝𑁆𑀞𑀓𑀧𑀸𑀓𑀸𑀭𑀁 𑀓𑀢𑁆𑀯𑀸 𑀤𑁆𑀯𑀸𑀭𑀓𑀯𑀸𑀝𑀁 𑀬𑁄𑀚𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀯𑀲𑀦𑀢𑁆𑀣𑀸𑀬 𑀅𑀤𑀸𑀲𑀺, 𑀧𑀓𑀸𑀭𑁂𑀦 𑀪𑀭𑁄 𑀧𑀢𑁆𑀣𑁂𑀢𑀩𑁆𑀩𑁄𑀢𑀺 𑀧𑀩𑁆𑀪𑀸𑀭𑁄, 𑀢𑀁 𑀲𑁄𑀥𑀬𑀦𑁆𑀢𑀲𑁆𑀲 𑀫𑀫 𑀲𑀦𑁆𑀢𑀺𑀓𑀁 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀕𑀯𑀸 𑀆𑀕𑀘𑁆𑀙𑀺 𑀧𑀸𑀧𑀼𑀡𑀺.

𑁧𑁧𑁩. 𑀩𑀼𑀤𑁆𑀥𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸𑀢𑀺 𑀏𑀯𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀢𑀸𑀤𑀺𑀦𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀲𑀪𑀸𑀯𑀢𑁆𑀢𑀸 𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑀲𑁆𑀲 𑀮𑁄𑀓𑀚𑁂𑀝𑁆𑀞𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀣𑀭𑀁 𑀢𑀺𑀡𑀧𑀡𑁆𑀡𑀸𑀤𑀺𑀲𑀦𑁆𑀣𑀭𑀁 𑀓𑀝𑁆𑀞𑀢𑁆𑀣𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀲𑀦𑀁 𑀧𑀼𑀧𑁆𑀨𑀫𑀬𑀁 𑀆𑀲𑀦𑀁 𑀅𑀳𑀁 𑀅𑀤𑀸𑀲𑀺𑀁.

𑁧𑁧𑁪. 𑀧𑀼𑀧𑁆𑀨𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁂 𑀧𑀼𑀧𑁆𑀨𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑁄 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸. 𑀫𑀫𑀜𑁆𑀘 𑀕𑀢𑀺𑀫𑀜𑁆𑀜𑀸𑀬𑀸𑀢𑀺 𑀫𑀬𑁆𑀳𑀁 𑀕𑀢𑀺𑀁 𑀆𑀬𑀢𑀺𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀅𑀦𑀺𑀘𑁆𑀘𑀢𑀁 𑀅𑀦𑀺𑀘𑁆𑀘𑀪𑀸𑀯𑀁 𑀉𑀤𑀸𑀳𑀭𑀺 𑀓𑀣𑁂𑀲𑀺.

𑁧𑁧𑁫. 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸𑀢𑀺 𑀯𑀢 𑀏𑀓𑀦𑁆𑀢𑁂𑀦 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑁂𑀳𑀺 𑀲𑀫𑁂𑀘𑁆𑀘 𑀲𑀫𑀸𑀕𑀦𑁆𑀢𑁆𑀯𑀸 𑀓𑀭𑀻𑀬𑀫𑀸𑀦𑀸 𑀲𑀩𑁆𑀩𑁂 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑀸 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀦𑀲𑁆𑀲𑀦𑀲𑀪𑀸𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀸𑀢𑀼𑀪𑀯𑀺𑀢𑁆𑀯𑀸 𑀏𑀢𑁂 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀯𑀺𑀲𑁂𑀲𑁂𑀦 𑀉𑀧𑀲𑀫𑁄 𑀲𑀼𑀔𑁄, 𑀢𑁂𑀲𑀁 𑀯𑀽𑀧𑀲𑀫𑀓𑀭𑀁 𑀦𑀺𑀩𑁆𑀩𑀸𑀦𑀫𑁂𑀯 𑀏𑀓𑀦𑁆𑀢𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁬. 𑀇𑀤𑀁 𑀯𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽𑀢𑀺 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀓𑁄 𑀪𑀕𑀯𑀸 𑀮𑁄𑀓𑀸𑀦𑀁 𑀚𑁂𑀝𑁆𑀞𑁄 𑀯𑀼𑀟𑁆𑀠𑁄 𑀦𑀭𑀸𑀦𑀁 𑀆𑀲𑀪𑁄 𑀧𑀥𑀸𑀦𑁄 𑀯𑀻𑀭𑁄 𑀇𑀤𑀁 𑀅𑀦𑀺𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀯𑀢𑁆𑀯𑀸𑀦 𑀓𑀣𑁂𑀢𑁆𑀯𑀸 𑀅𑀫𑁆𑀩𑀭𑁂 𑀆𑀓𑀸𑀲𑁂 𑀳𑀁𑀲𑀭𑀸𑀚𑀸 𑀇𑀯 𑀦𑀪𑀁 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁭. 𑀲𑀓𑀁 𑀤𑀺𑀝𑁆𑀞𑀺𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀅𑀚𑁆𑀛𑀸𑀲𑀬𑀁 𑀚𑀳𑀺𑀢𑁆𑀯𑀸𑀦 𑀧𑀳𑀸𑀬. 𑀪𑀸𑀯𑀬𑀸𑀦𑀺𑀘𑁆𑀘𑀲𑀜𑁆𑀜𑀳𑀦𑁆𑀢𑀺 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺 𑀧𑀯𑀢𑁆𑀢𑀲𑀜𑁆𑀜𑀁 𑀅𑀳𑀁 𑀪𑀸𑀯𑀬𑀺𑀁 𑀯𑀟𑁆𑀠𑁂𑀲𑀺𑀁 𑀫𑀦𑀲𑀺 𑀅𑀓𑀸𑀲𑀺𑀁. 𑀢𑀢𑁆𑀣 𑀓𑀸𑀮𑀁 𑀓𑀢𑁄 𑀅𑀳𑀦𑁆𑀢𑀺 𑀢𑀢𑁆𑀣 𑀢𑀺𑀲𑁆𑀲𑀁 𑀚𑀸𑀢𑀺𑀬𑀁 𑀢𑀢𑁄 𑀚𑀸𑀢𑀺𑀢𑁄 𑀅𑀳𑀁 𑀓𑀸𑀮𑀁 𑀓𑀢𑁄 𑀫𑀢𑁄.

𑁧𑁧𑁮. 𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸𑀢𑀺 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸. 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄𑀢𑀺 𑀧𑀼𑀭𑀸𑀡𑀓𑀼𑀲𑀮𑀫𑀽𑀮𑁂𑀦, 𑀫𑀽𑀮𑀪𑀽𑀢𑁂𑀦 𑀓𑀼𑀲𑀮𑁂𑀦 𑀯𑀸 𑀘𑁄𑀤𑀺𑀢𑁄 𑀲𑀜𑁆𑀘𑁄𑀤𑀺𑀢𑁄. 𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂𑀢𑀺 𑀧𑀭𑀺𑀬𑁄𑀲𑀸𑀦𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂 𑀧𑀸𑀧𑀼𑀡𑀺𑀢𑁂. 𑀲𑀧𑀸𑀓𑀬𑁄𑀦𑀼𑀧𑀸𑀕𑀫𑀺𑀦𑁆𑀢𑀺 𑀲𑀓𑀁 𑀧𑀘𑀺𑀢𑀪𑀢𑁆𑀢𑀁 𑀲𑀧𑀸𑀓𑀁 𑀬𑁄𑀦𑀺𑀁 𑀉𑀧𑀸𑀕𑀫𑀺𑀁. 𑀬𑀲𑁆𑀲 𑀓𑀼𑀮𑀲𑁆𑀲 𑀅𑀢𑁆𑀢𑀦𑁄 𑀧𑀘𑀺𑀢𑀪𑀢𑁆𑀢𑀁 𑀅𑀜𑁆𑀜𑁂𑀳𑀺 𑀅𑀪𑀼𑀜𑁆𑀚𑀦𑀻𑀬𑀁, 𑀢𑀲𑁆𑀫𑀺𑀁 𑀘𑀡𑁆𑀟𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀸 𑀯𑀼𑀘𑁆𑀘𑀢𑀺 𑀲𑀼𑀦𑀔𑁄, 𑀲𑀼𑀦𑀔𑁄𑀘𑁆𑀙𑀺𑀝𑁆𑀞𑀪𑀢𑁆𑀢𑀪𑀼𑀜𑁆𑀚𑀦𑀓𑀘𑀡𑁆𑀟𑀸𑀮𑀓𑀼𑀮𑁂 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑁄𑀧𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀺𑀬𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀦𑁆𑀳𑀢𑁆𑀯𑀸 𑀏𑀓𑀘𑀻𑀯𑀭𑀁 𑀞𑀺𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀧𑁆𑀨𑁄𑀝𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀢𑀸𑀤𑀺𑀲𑁂𑀦 𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀲𑀼𑀫𑀗𑁆𑀕𑀮𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀔𑀼𑀚𑁆𑀚𑀓𑀸𑀲𑀺𑀢𑀦𑀗𑁆𑀕𑀮𑀓𑀼𑀤𑁆𑀤𑀸𑀮𑀧𑀭𑀺𑀓𑁆𑀔𑀸𑀭𑁄 𑀳𑀼𑀢𑁆𑀯𑀸 𑀓𑀲𑀺𑀬𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀫𑀳𑀸𑀤𑀸𑀦𑁂 𑀧𑀯𑀢𑁆𑀢𑀺𑀬𑀫𑀸𑀦𑁂 𑀤𑀸𑀦𑀽𑀧𑀓𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀤𑀥𑀺𑀖𑀝𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀪𑀺𑀓𑁆𑀔𑀽𑀦𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀔𑀼𑀫𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑀺, 𑀬𑀁𑀦𑀽𑀦𑀸𑀳𑀫𑁆𑀧𑀺 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀫𑀳𑀸𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑀸𑀥𑀺𑀧𑁆𑀧𑀸𑀬𑀁 𑀦𑀺𑀯𑁂𑀤𑁂𑀲𑀺. 𑀲𑁄 𑀢𑀁 𑀓𑀭𑀼𑀡𑀸𑀬𑀦𑁆𑀢𑁄 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀏𑀓𑀓𑀯𑀺𑀳𑀸𑀭𑁂 𑀦𑀺𑀩𑁆𑀩𑀺𑀦𑁆𑀦𑁄 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑁄 𑀜𑀸𑀢𑀺𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀔𑁂𑀢𑁆𑀢𑀁 𑀓𑀲𑀦𑁆𑀢𑁂 𑀓𑀺𑀮𑀺𑀝𑁆𑀞𑀯𑀢𑁆𑀣𑀦𑀺𑀯𑀢𑁆𑀣𑁂 𑀲𑀫𑀦𑁆𑀢𑀢𑁄 𑀭𑀚𑁄𑀓𑀺𑀡𑁆𑀡𑀲𑀭𑀻𑀭𑁂 𑀯𑀸𑀢𑀸𑀢𑀧𑁂𑀦 𑀲𑀼𑀲𑁆𑀲𑀦𑁆𑀢𑁂 𑀔𑁂𑀢𑁆𑀢𑀁 𑀓𑀲𑁆𑀲𑀓𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀫𑀳𑀦𑁆𑀢𑀁 𑀯𑀢𑀺𑀫𑁂 𑀲𑀢𑁆𑀢𑀸 𑀚𑀻𑀯𑀺𑀓𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺. 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀘𑀲𑁆𑀲 𑀬𑀣𑀸𑀕𑀳𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀦𑁆𑀢𑁆𑀯𑀸 𑀯𑀺𑀯𑁂𑀓𑀁 𑀮𑀪𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁨𑁪. 𑀏𑀯𑀁 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀳𑀼𑀢𑀺𑀦𑁆𑀢𑀺 𑀅𑀦𑁆𑀦𑀧𑀸𑀦𑀸𑀤𑀺𑀅𑀦𑁂𑀓𑀯𑀺𑀥𑀁 𑀧𑀽𑀚𑀸𑀲𑀓𑁆𑀓𑀸𑀭𑀽𑀧𑀓𑀭𑀡𑀁. 𑀬𑀺𑀝𑁆𑀞𑀼𑀓𑀸𑀫𑁄𑀢𑀺 𑀬𑀚𑀺𑀢𑀼𑀓𑀸𑀫𑁄, 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄 𑀅𑀳𑀁. 𑀧𑀝𑀺𑀬𑀸𑀤𑁂𑀢𑁆𑀯𑀸𑀦 𑀪𑁄𑀚𑀦𑀦𑁆𑀢𑀺 𑀆𑀳𑀸𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸. 𑀩𑁆𑀭𑀸𑀳𑁆𑀫𑀡𑁂 𑀧𑀝𑀺𑀫𑀸𑀦𑁂𑀦𑁆𑀢𑁄𑀢𑀺 𑀧𑀝𑀺𑀕𑁆𑀕𑀸𑀳𑀓𑁂 𑀲𑀼𑀤𑁆𑀥𑀧𑀩𑁆𑀩𑀚𑀺𑀢𑁂 𑀧𑀭𑀺𑀬𑁂𑀲𑀦𑁆𑀢𑁄. 𑀯𑀺𑀲𑀸𑀮𑁂 𑀫𑀸𑀴𑀓𑁂 𑀞𑀺𑀢𑁄𑀢𑀺 𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀧𑀼𑀮𑀺𑀦𑀢𑀮𑀸𑀪𑀺𑀭𑀸𑀫𑁂 𑀯𑀺𑀧𑀼𑀮𑁂 𑀫𑀸𑀴𑀓𑁂 𑀞𑀺𑀢𑁄.

𑁧𑁨𑁫-𑁭. 𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀻𑀲𑀼 𑀫𑀳𑀸𑀬𑀲𑀁 𑀫𑀳𑀸𑀧𑀭𑀺𑀯𑀸𑀭𑀁 𑀲𑀩𑁆𑀩𑀮𑁄𑀓𑀁 𑀲𑀓𑀮𑀲𑀢𑁆𑀢𑀮𑁄𑀓𑀁 𑀯𑀺𑀦𑁂𑀢𑀸𑀦𑀁 𑀯𑀺𑀲𑁂𑀲𑁂𑀦 𑀦𑁂𑀢𑀸𑀭𑀁 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀁 𑀲𑀬𑀫𑁆𑀪𑀼𑀁 𑀲𑀬𑀫𑁂𑀯 𑀪𑀽𑀢𑀁 𑀅𑀦𑀸𑀘𑀭𑀺𑀬𑀓𑀁 𑀅𑀕𑁆𑀕𑀧𑀼𑀕𑁆𑀕𑀮𑀁 𑀲𑁂𑀝𑁆𑀞𑀧𑀼𑀕𑁆𑀕𑀮𑀁 𑀪𑀕𑀯𑀦𑁆𑀢𑀁 𑀪𑀕𑁆𑀬𑀯𑀦𑁆𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀚𑀼𑀢𑀺𑀫𑀦𑁆𑀢𑀁 𑀦𑀻𑀮𑀧𑀻𑀢𑀸𑀤𑀺𑀧𑀪𑀸𑀲𑀫𑁆𑀧𑀦𑁆𑀦𑀁 𑀲𑀸𑀯𑀓𑁂𑀳𑀺 𑀧𑀼𑀭𑀓𑁆𑀔𑀢𑀁 𑀧𑀭𑀺𑀯𑀸𑀭𑀺𑀢𑀁 𑀆𑀤𑀺𑀘𑁆𑀘𑀫𑀺𑀯 𑀲𑀽𑀭𑀺𑀬𑀫𑀺𑀯 𑀭𑁄𑀘𑀦𑁆𑀢𑀁 𑀲𑁄𑀪𑀫𑀸𑀦𑀁 𑀭𑀣𑀺𑀬𑀁 𑀯𑀻𑀣𑀺𑀬𑀁 𑀧𑀝𑀺𑀧𑀦𑁆𑀦𑀓𑀁 𑀕𑀘𑁆𑀙𑀦𑁆𑀢𑀁 𑀧𑀺𑀬𑀤𑀲𑁆𑀲𑀺𑀁 𑀦𑀸𑀫 𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦𑀸𑀢𑀺 𑀩𑀦𑁆𑀥𑀜𑁆𑀚𑀮𑀺𑀧𑀼𑀝𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀲𑀓𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀪𑀕𑀯𑀢𑁄 𑀕𑀼𑀡𑁂 𑀧𑀲𑀸𑀤𑁂𑀲𑀺𑀁 𑀧𑀲𑀦𑁆𑀦𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀫𑀦𑀲𑀸𑀯 𑀦𑀺𑀫𑀦𑁆𑀢𑁂𑀲𑀺𑀦𑁆𑀢𑀺 𑀘𑀺𑀢𑁆𑀢𑁂𑀦 𑀧𑀯𑀸𑀭𑁂𑀲𑀺𑀁. 𑀆𑀕𑀘𑁆𑀙𑀢𑀼 𑀫𑀳𑀸𑀫𑀼𑀦𑀻𑀢𑀺 𑀫𑀳𑀺𑀢𑁄 𑀧𑀽𑀚𑀸𑀭𑀳𑁄 𑀫𑀼𑀦𑀺 𑀪𑀕𑀯𑀸 𑀫𑀫 𑀦𑀺𑀯𑁂𑀲𑀦𑀁 𑀆𑀕𑀘𑁆𑀙𑀢𑀼.

𑁧𑁨𑁮. 𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸𑀢𑀺 𑀫𑀬𑁆𑀳𑀁 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑀁 𑀜𑀢𑁆𑀯𑀸 𑀮𑁄𑀓𑁂 𑀲𑀢𑁆𑀢𑀮𑁄𑀓𑁂 𑀅𑀦𑀼𑀢𑁆𑀢𑀭𑁄 𑀉𑀢𑁆𑀢𑀭𑀯𑀺𑀭𑀳𑀺𑀢𑁄 𑀲𑀢𑁆𑀣𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀫𑀫 𑀤𑁆𑀯𑀸𑀭𑀁 𑀫𑀬𑁆𑀳𑀁 𑀕𑁂𑀳𑀤𑁆𑀯𑀸𑀭𑀁 𑀉𑀧𑀸𑀕𑀫𑀺 𑀲𑀫𑁆𑀧𑀸𑀧𑀼𑀡𑀺.

𑁧𑁨𑁯. 𑀢𑀲𑁆𑀲 𑀲𑀫𑁆𑀧𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀏𑀯𑀁 𑀦𑀫𑀓𑁆𑀓𑀸𑀭𑀫𑀓𑀸𑀲𑀺𑀁. 𑀧𑀼𑀭𑀺𑀲𑀸𑀚𑀜𑁆𑀜 𑀧𑀼𑀭𑀺𑀲𑀸𑀦𑀁 𑀆𑀚𑀜𑁆𑀜, 𑀲𑁂𑀝𑁆𑀞, 𑀫𑀫 𑀦𑀫𑀓𑁆𑀓𑀸𑀭𑁄 𑀢𑁂 𑀢𑀼𑀬𑁆𑀳𑀁 𑀅𑀢𑁆𑀣𑀼 𑀪𑀯𑀢𑀼. 𑀧𑀼𑀭𑀺𑀲𑀼𑀢𑁆𑀢𑀫 𑀧𑀼𑀭𑀺𑀲𑀸𑀦𑀁 𑀉𑀢𑁆𑀢𑀫 𑀅𑀥𑀺𑀓𑀕𑀼𑀡𑀯𑀺𑀲𑀺𑀝𑁆𑀞 𑀢𑁂 𑀢𑀼𑀬𑁆𑀳𑀁 𑀫𑀫 𑀦𑀫𑀓𑁆𑀓𑀸𑀭𑁄 𑀅𑀢𑁆𑀣𑀼. 𑀧𑀸𑀲𑀸𑀤𑀁 𑀧𑀲𑀸𑀤𑀚𑀦𑀓𑀁 𑀫𑀫 𑀦𑀺𑀯𑁂𑀲𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀻𑀳𑀸𑀲𑀦𑁂 𑀉𑀢𑁆𑀢𑀫𑀸𑀲𑀦𑁂 𑀦𑀺𑀲𑀻𑀤𑀢𑀦𑁆𑀢𑀺 𑀆𑀬𑀸𑀘𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁦. 𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀸𑀭𑁄𑀢𑀺 𑀲𑀬𑀁 𑀤𑁆𑀯𑀸𑀭𑀢𑁆𑀢𑀬𑁂𑀦 𑀤𑀦𑁆𑀢𑁄 𑀢𑀣𑀸 𑀤𑀦𑁆𑀢𑀸𑀳𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀲𑀗𑁆𑀔𑀸𑀢𑀸𑀳𑀺 𑀘𑀢𑀽𑀳𑀺 𑀧𑀭𑀺𑀲𑀸𑀳𑀺 𑀧𑀭𑀺𑀯𑀸𑀭𑀺𑀢𑁄. 𑀢𑀺𑀡𑁆𑀡𑁄 𑀢𑀸𑀭𑀬𑀢𑀁 𑀯𑀭𑁄𑀢𑀺 𑀲𑀬𑀁 𑀢𑀺𑀡𑁆𑀡𑁄 𑀲𑀁𑀲𑀸𑀭𑀢𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀓𑁆𑀔𑀦𑁆𑀢𑁄 𑀢𑀸𑀭𑀬𑀢𑀁 𑀢𑀸𑀭𑀬𑀦𑁆𑀢𑀸𑀦𑀁 𑀯𑀺𑀲𑀺𑀝𑁆𑀞𑀧𑀼𑀕𑁆𑀕𑀮𑀸𑀦𑀁 𑀯𑀭𑁄 𑀉𑀢𑁆𑀢𑀫𑁄 𑀪𑀕𑀯𑀸 𑀫𑀫𑀸𑀭𑀸𑀥𑀦𑁂𑀦 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀯𑀭𑀸𑀲𑀦𑁂 𑀉𑀢𑁆𑀢𑀫𑀸𑀲𑀦𑁂 𑀦𑀺𑀲𑀻𑀤𑀺 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺.

𑁧𑁩𑁧. 𑀬𑀁 𑀫𑁂 𑀅𑀢𑁆𑀣𑀺 𑀲𑀓𑁂 𑀕𑁂𑀳𑁂𑀢𑀺 𑀅𑀢𑁆𑀢𑀦𑁄 𑀕𑁂𑀳𑁂 𑀬𑀁 𑀆𑀫𑀺𑀲𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀲𑀫𑁆𑀧𑀸𑀤𑀺𑀢𑀁 𑀭𑀸𑀲𑀺𑀓𑀢𑀁 𑀅𑀢𑁆𑀣𑀺. 𑀢𑀸𑀳𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀢𑀁 𑀆𑀫𑀺𑀲𑀁 𑀧𑀸𑀤𑀸𑀲𑀺𑀁 𑀧-𑀓𑀸𑀭𑁂𑀦 𑀆𑀤𑀭𑁂𑀦 𑀯𑀸 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀻𑀢𑀺 𑀅𑀢𑁆𑀢𑀦𑁄 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀧𑀲𑁆𑀲𑀦𑁆𑀦𑀘𑀺𑀢𑁆𑀢𑁄 𑀕𑀳𑁂𑀢𑁆𑀯𑀸 𑀧𑀸𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁨. 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀲𑀸𑀤𑀺𑀢𑀫𑀦𑀲𑀗𑁆𑀓𑀧𑁆𑀧𑁄 𑀲𑀼𑀫𑀦𑁄 𑀲𑀼𑀦𑁆𑀤𑀭𑀫𑀦𑁄. 𑀯𑁂𑀤𑀚𑀸𑀢𑁄 𑀚𑀸𑀢𑀯𑁂𑀤𑁄 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑁄 𑀓𑀢𑀜𑁆𑀚𑀮𑀻 𑀲𑀺𑀭𑀲𑀺 𑀞𑀧𑀺𑀢𑀅𑀜𑁆𑀚𑀮𑀺𑀧𑀼𑀝𑁄 𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀫𑀲𑁆𑀲𑀸𑀫𑀺 𑀲𑁂𑀝𑁆𑀞𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀡𑀸𑀫𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄. 𑀅𑀳𑁄 𑀩𑀼𑀤𑁆𑀥𑀲𑁆𑀲𑀼𑀴𑀸𑀭𑀢𑀸𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀲𑁆𑀲 𑀲𑀢𑁆𑀣𑀼𑀦𑁄 𑀉𑀴𑀸𑀭𑀢𑀸 𑀫𑀳𑀦𑁆𑀢𑀪𑀸𑀯𑁄 𑀅𑀳𑁄 𑀅𑀘𑁆𑀙𑀭𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁩. 𑀅𑀝𑁆𑀞𑀦𑁆𑀦𑀁 𑀧𑀬𑀺𑀭𑀽𑀧𑀸𑀲𑀢𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀸𑀦𑀁 𑀪𑀼𑀜𑁆𑀚𑀁 𑀪𑀼𑀜𑁆𑀚𑀦𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀅𑀦𑁆𑀢𑀭𑁂 𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄𑀯 𑀩𑀳𑀽𑀢𑀺 𑀅𑀢𑁆𑀣𑁄. 𑀢𑀼𑀬𑁆𑀳𑁂𑀯𑁂𑀲𑁄 𑀆𑀦𑀼𑀪𑀸𑀯𑁄𑀢𑀺 𑀏𑀲𑁄 𑀆𑀓𑀸𑀲𑀘𑀭𑀡𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀸𑀤𑀺𑀆𑀦𑀼𑀪𑀸𑀯𑁄 𑀢𑀼𑀬𑁆𑀳𑁂𑀯 𑀢𑀼𑀬𑁆𑀳𑀁 𑀏𑀯 𑀆𑀦𑀼𑀪𑀸𑀯𑁄, 𑀦𑀸𑀜𑁆𑀜𑁂𑀲𑀁. 𑀲𑀭𑀡𑀁 𑀢𑀁 𑀉𑀧𑁂𑀫𑀳𑀦𑁆𑀢𑀺 𑀢𑀁 𑀇𑀢𑁆𑀣𑀫𑁆𑀪𑀽𑀢𑀁 𑀢𑀼𑀯𑀁 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀦𑀦𑁆𑀢𑀺 𑀉𑀧𑁂𑀫𑀺 𑀕𑀘𑁆𑀙𑀸𑀫𑀺 𑀚𑀸𑀦𑀸𑀫𑀺 𑀯𑀸𑀢𑀺 𑀅𑀢𑁆𑀣𑁄.

𑁧𑁩𑁪. 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄 𑀧𑀺𑀬𑀤𑀲𑁆𑀲𑀻 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀸 𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀪𑀸𑀲𑀣 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀼𑀢𑀺𑀬𑀲𑁆𑀲 𑀲𑀻𑀳𑀸𑀲𑀦𑀯𑀕𑁆𑀕𑀲𑁆𑀲 𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀲𑀼𑀪𑀽𑀢𑀺𑀯𑀕𑁆𑀕𑁄

𑁧. 𑀲𑀼𑀪𑀽𑀢𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀪𑀽𑀢𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀧𑀤𑀼𑀫𑀼𑀢𑁆𑀢𑀭𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀳𑀁𑀲𑀯𑀢𑀻𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀦𑀦𑁆𑀤𑀫𑀸𑀡𑀯𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀪𑀽𑀢𑁂𑀳𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀫𑀸𑀡𑀯𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀢𑀧𑀸𑀤𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀢𑁂𑀧𑀺 𑀦𑀘𑀺𑀭𑀲𑁆𑀲𑁂𑀯 𑀛𑀸𑀦𑀮𑀸𑀪𑀺𑀦𑁄 𑀅𑀳𑁂𑀲𑀼𑀁.

𑀢𑁂𑀦 𑀘 𑀲𑀫𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀳𑀁𑀲𑀯𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀦𑀦𑁆𑀤𑀢𑀸𑀧𑀲𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀚𑀝𑀺𑀮𑀸𑀦𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁, 𑀦𑀦𑁆𑀤𑀢𑀸𑀧𑀲𑀲𑁆𑀲 𑀘 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀸𑀯𑀓𑀝𑁆𑀞𑀸𑀦𑀦𑁆𑀢𑀭𑀲𑁆𑀲 𑀧𑀢𑁆𑀣𑀦𑀁 𑀤𑀺𑀲𑁆𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀜𑁆𑀜𑀁 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀏𑀓𑀘𑀭𑁄 𑀦𑀦𑁆𑀤𑀢𑀸𑀧𑀲𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂𑀲𑀼 ‘‘𑀩𑀼𑀤𑁆𑀥𑀪𑀸𑀯𑀁 𑀫𑁂 𑀚𑀸𑀦𑀸𑀢𑀽’’𑀢𑀺 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀦𑀦𑁆𑀤𑀢𑀸𑀧𑀲𑀲𑁆𑀲 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀦𑀦𑁆𑀤𑀢𑀸𑀧𑀲𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘𑁂𑀯 𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀜𑁆𑀘 𑀤𑀺𑀲𑁆𑀯𑀸 𑀮𑀓𑁆𑀔𑀡𑀫𑀦𑁆𑀢𑁂 𑀲𑀫𑁆𑀫𑀲𑀺𑀢𑁆𑀯𑀸 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀩𑁆𑀩𑀚𑀦𑁆𑀢𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑁂𑀤𑁄 𑀲𑀩𑁆𑀩𑀜𑁆𑀜𑀽 𑀩𑀼𑀤𑁆𑀥𑁄 𑀳𑁄𑀢𑀺, 𑀅𑀬𑀁 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄’’𑀢𑀺 𑀜𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀦𑁆𑀤𑀢𑀸𑀧𑀲𑁄𑀧𑀺 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀚𑀝𑀺𑀮𑀸 𑀧𑀡𑀻𑀢𑀧𑀡𑀻𑀢𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀨𑀮𑀸𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀸 𑀩𑀼𑀤𑁆𑀥𑀸𑀦𑀜𑁆𑀘𑁂𑀯 𑀆𑀘𑀭𑀺𑀬𑀲𑁆𑀲 𑀘 𑀦𑀺𑀲𑀺𑀦𑁆𑀦𑀸𑀓𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀆𑀘𑀭𑀺𑀬, 𑀫𑀬𑀁 ‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀦𑀢𑁆𑀣𑀻’𑀢𑀺 𑀯𑀺𑀘𑀭𑀸𑀫, 𑀅𑀬𑀁 𑀧𑀦 𑀧𑀼𑀭𑀺𑀲𑁄 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀫𑀜𑁆𑀜𑁂’’𑀢𑀺. 𑀦𑀦𑁆𑀤𑀢𑀸𑀧𑀲𑁄 𑁋 ‘‘𑀢𑀸𑀢𑀸, 𑀓𑀺𑀁 𑀯𑀤𑁂𑀣, 𑀢𑀼𑀫𑁆𑀳𑁂 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀁 𑀉𑀧𑀫𑁂𑀢𑀼𑀁 𑀇𑀘𑁆𑀙𑀣, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀫𑀸 𑀫𑀁 𑀉𑀧𑀫𑀺𑀢𑁆𑀣𑀸’’𑀢𑀺 𑀆𑀳. 𑀅𑀣 𑀢𑁂 𑀢𑀸𑀧𑀲𑀸 𑁋 ‘‘𑀲𑀘𑁂 𑀅𑀬𑀁 𑀑𑀭𑀓𑁄 𑀅𑀪𑀯𑀺𑀲𑁆𑀲, 𑀦 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀏𑀯𑀁 𑀉𑀧𑀫𑀁 𑀆𑀳𑀭𑁂𑀬𑁆𑀬. 𑀬𑀸𑀯 𑀫𑀳𑀸𑀯𑀢𑀸𑀬𑀁 𑀧𑀼𑀭𑀺𑀲𑀸𑀚𑀸𑀦𑀻𑀬𑁄’’𑀢𑀺 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀲𑀺𑀭𑀲𑀸 𑀯𑀦𑁆𑀤𑀺𑀁𑀲𑀼. 𑀅𑀣 𑀢𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁄 𑀤𑁂𑀬𑁆𑀬𑀥𑀫𑁆𑀫𑁄 𑀦𑀢𑁆𑀣𑀺, 𑀪𑀕𑀯𑀸 𑀘 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀇𑀥𑀸𑀕𑀢𑁄, 𑀢𑀲𑁆𑀫𑀸 𑀫𑀬𑀁 𑀬𑀣𑀸𑀩𑀮𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀸𑀫, 𑀢𑀼𑀫𑁆𑀳𑁂𑀳𑀺 𑀬𑀁 𑀬𑀁 𑀧𑀡𑀻𑀢𑀁 𑀨𑀮𑀸𑀨𑀮𑀁 𑀆𑀪𑀢𑀁, 𑀢𑀁 𑀢𑀁 𑀆𑀳𑀭𑀣𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 𑀥𑁄𑀯𑀺𑀢𑁆𑀯𑀸 𑀲𑀬𑀁 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸𑀭𑀸 𑀨𑀮𑀸𑀨𑀮𑁂 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀢𑀸𑀧𑀲𑁄 𑀉𑀤𑀓𑀫𑁆𑀧𑀺 𑀲𑀬𑀫𑁂𑀯 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀪𑁄𑀚𑀦𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀭𑀺 𑀲𑀩𑁆𑀩𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀔𑀻𑀡𑀸𑀲𑀯𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣 𑀦𑀦𑁆𑀤𑀢𑀸𑀧𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀩𑀼𑀤𑁆𑀥𑀸𑀦𑀁 𑀦𑀺𑀲𑀺𑀦𑁆𑀦𑀸𑀲𑀦𑀫𑁆𑀧𑀺 𑀦𑀻𑀘𑀁, 𑀲𑀫𑀡𑀲𑀢𑀲𑀳𑀲𑁆𑀲𑀲𑁆𑀲𑀧𑀺 𑀆𑀲𑀦𑀁 𑀦𑀢𑁆𑀣𑀺. 𑀢𑀼𑀫𑁆𑀳𑁂𑀳𑀺 𑀅𑀚𑁆𑀚 𑀉𑀴𑀸𑀭𑀁 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀧𑀩𑁆𑀩𑀢𑀧𑀸𑀤𑀢𑁄 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀣𑀸’’𑀢𑀺 𑀆𑀳. 𑀅𑀘𑀺𑀦𑁆𑀢𑁂𑀬𑁆𑀬𑀢𑁆𑀢𑀸 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀢𑁂 𑀫𑀼𑀳𑀼𑀢𑁆𑀢𑁂𑀦𑁂𑀯 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀅𑀕𑁆𑀕𑀲𑀸𑀯𑀓𑀸𑀦𑀁 𑀢𑀺𑀕𑀸𑀯𑀼𑀢𑀁, 𑀲𑁂𑀲𑀪𑀺𑀓𑁆𑀔𑀽𑀦𑀁 𑀅𑀟𑁆𑀠𑀬𑁄𑀚𑀦𑀸𑀤𑀺𑀪𑁂𑀤𑀁, 𑀲𑀗𑁆𑀖𑀦𑀯𑀓𑀲𑁆𑀲 𑀉𑀲𑀪𑀫𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀏𑀯𑀁 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀦𑀦𑁆𑀤𑀢𑀸𑀧𑀲𑁄 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀇𑀫𑀁 𑀧𑀼𑀧𑁆𑀨𑀸𑀲𑀦𑀁 𑀆𑀭𑀼𑀬𑁆𑀳 𑀦𑀺𑀲𑀻𑀤𑀣𑀸’’𑀢𑀺 𑀆𑀳. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀼𑀧𑁆𑀨𑀸𑀲𑀦𑁂. 𑀏𑀯𑀁 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀭𑀺 𑀲𑀢𑁆𑀣𑀼 𑀆𑀓𑀸𑀭𑀁 𑀜𑀢𑁆𑀯𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀦𑀦𑁆𑀤𑀢𑀸𑀧𑀲𑁄 𑀫𑀳𑀦𑁆𑀢𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀢𑁆𑀣𑀓𑁂 𑀥𑀸𑀭𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 ‘‘𑀢𑀸𑀧𑀲𑀸𑀦𑀁 𑀅𑀬𑀁 𑀲𑀓𑁆𑀓𑀸𑀭𑁄 𑀫𑀳𑀧𑁆𑀨𑀮𑁄 𑀳𑁄𑀢𑀽’’𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀫𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀪𑀺𑀓𑁆𑀔𑀽𑀧𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁𑀲𑀼. 𑀢𑀣𑀸𑀕𑀢𑁂 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀦𑀫𑀽𑀮𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀓𑀸𑀮𑁂 𑀩𑀼𑀤𑁆𑀥𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀁𑀲𑀼. 𑀦𑀦𑁆𑀤𑀢𑀸𑀧𑀲𑁄 𑀧𑀦 𑀪𑀺𑀓𑁆𑀔𑀸𑀘𑀸𑀭𑀫𑁆𑀧𑀺 𑀅𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄𑀬𑁂𑀯 𑀲𑀢𑁆𑀢𑀸𑀳𑀁 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀲𑀺.

𑀲𑀢𑁆𑀣𑀸 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀬 𑀅𑀭𑀡𑀯𑀺𑀳𑀸𑀭𑀺𑀅𑀗𑁆𑀕𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀗𑁆𑀕𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀏𑀓𑀁 𑀲𑀸𑀯𑀓𑀁 ‘‘𑀇𑀲𑀺𑀕𑀡𑀲𑁆𑀲 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀧𑀝𑀺𑀮𑀤𑁆𑀥𑀫𑀳𑀸𑀮𑀸𑀪𑁄 𑀫𑀳𑀸𑀬𑁄𑀥𑁄 𑀯𑀺𑀬 𑀢𑀼𑀝𑁆𑀞𑀫𑀸𑀦𑀲𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀞𑀢𑁆𑀯𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀢𑀲𑁆𑀲 𑀤𑁂𑀲𑀦𑀸𑀯𑀲𑀸𑀦𑁂 𑀲𑀢𑁆𑀣𑀸 𑀲𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀢𑁆𑀣𑀼 𑀤𑁂𑀲𑀦𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀢𑀸𑀧𑀲𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 𑁋 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂𑀲𑀁 𑀢𑀸𑀯𑀤𑁂𑀯 𑀓𑁂𑀲𑀫𑀲𑁆𑀲𑀽 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀲𑀭𑀻𑀭𑁂 𑀧𑀝𑀺𑀫𑀼𑀓𑁆𑀓𑀸𑀯 𑀅𑀳𑁂𑀲𑀼𑀁. 𑀢𑁂 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑀸 𑀯𑀺𑀬 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀦𑀦𑁆𑀤𑀢𑀸𑀧𑀲𑁄 𑀧𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸𑀬 𑀯𑀺𑀲𑁂𑀲𑀁 𑀦𑀸𑀥𑀺𑀕𑀜𑁆𑀙𑀺. 𑀢𑀲𑁆𑀲 𑀓𑀺𑀭 𑀅𑀭𑀡𑀯𑀺𑀳𑀸𑀭𑀺𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀁 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑁋 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀇𑀫𑀺𑀦𑀸 𑀲𑀸𑀯𑀓𑁂𑀦 𑀮𑀤𑁆𑀥𑀕𑀼𑀡𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀲𑁄 𑀢𑁂𑀦 𑀯𑀺𑀢𑀓𑁆𑀓𑁂𑀦 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀣𑀸𑀕𑀢𑀁 𑀧𑀦 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀫𑁆𑀫𑀼𑀔𑁂 𑀞𑀺𑀢𑁄 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀬𑁂𑀦 𑀪𑀺𑀓𑁆𑀔𑀼𑀦𑀸 𑀇𑀲𑀺𑀕𑀡𑀲𑁆𑀲 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀸 𑀓𑀢𑀸, 𑀓𑁄 𑀦𑀸𑀫𑀸𑀬𑀁 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂’’𑀢𑀺? ‘‘𑀅𑀭𑀡𑀯𑀺𑀳𑀸𑀭𑀺𑀅𑀗𑁆𑀕𑁂𑀦 𑀘 𑀤𑀓𑁆𑀔𑀺𑀡𑁂𑀬𑁆𑀬𑀗𑁆𑀕𑁂𑀦 𑀘 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀽’’𑀢𑀺. ‘‘𑀪𑀦𑁆𑀢𑁂, 𑀬𑁆𑀯𑀸𑀬𑀁 𑀫𑀬𑀸 𑀲𑀢𑁆𑀢𑀸𑀳𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁂𑀦 𑀲𑀓𑁆𑀓𑀸𑀭𑁄 𑀓𑀢𑁄, 𑀢𑁂𑀦 𑀅𑀥𑀺𑀓𑀸𑀭𑁂𑀦 𑀅𑀜𑁆𑀜𑀁 𑀲𑀫𑁆𑀧𑀢𑁆𑀢𑀺𑀁 𑀦 𑀧𑀢𑁆𑀣𑁂𑀫𑀺, 𑀅𑀦𑀸𑀕𑀢𑁂 𑀧𑀦 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀬𑀁 𑀣𑁂𑀭𑁄 𑀯𑀺𑀬 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺.

𑀲𑀢𑁆𑀣𑀸 ‘‘𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀲𑁆𑀲 𑀢𑀸𑀧𑀲𑀲𑁆𑀲 𑀧𑀢𑁆𑀣𑀦𑀸’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀺𑀚𑁆𑀛𑀦𑀓𑀪𑀸𑀯𑀁 𑀤𑀺𑀲𑁆𑀯𑀸, ‘‘𑀢𑀸𑀧𑀲, 𑀦 𑀢𑁂 𑀅𑀬𑀁 𑀧𑀢𑁆𑀣𑀦𑀸 𑀫𑁄𑀖𑀁 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀦𑀦𑁆𑀤𑀢𑀸𑀧𑀲𑁄 𑀬𑀸𑀯 𑀘𑀓𑁆𑀔𑀼𑀧𑀣𑀁 𑀦 𑀲𑀫𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄𑀯 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁄 𑀧𑀦 𑀘𑀼𑀢𑁄 𑀅𑀧𑀭𑀸𑀦𑀺𑀧𑀺 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀜𑁆𑀜𑀓𑁄𑀯 𑀅𑀳𑁄𑀲𑀺, 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀜𑁆𑀜𑀓𑁄 𑀳𑀼𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀲𑀺. 𑀏𑀢𑀁 𑀓𑀺𑀭 𑀯𑀢𑁆𑀢𑀁 𑀅𑀧𑀭𑀺𑀧𑀽𑀭𑁂𑀢𑁆𑀯𑀸 𑀫𑀳𑀸𑀲𑀸𑀯𑀓𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀦 𑀆𑀕𑀫𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀏𑀯𑀁 𑀲𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀧𑀤𑁂𑀲𑀭𑀸𑀚𑀸 𑀘 𑀳𑀼𑀢𑁆𑀯𑀸 𑀉𑀴𑀸𑀭𑀁 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀲𑀼𑀫𑀦𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀦𑀺𑀝𑁆𑀞𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀼𑀪𑀽𑀢𑀻𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑁂𑀴𑀼𑀯𑀦𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀲𑀻𑀢𑀯𑀦𑁂 𑀯𑀺𑀳𑀸𑀲𑀺. 𑀢𑀤𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑁂𑀝𑁆𑀞𑀺 𑀲𑀸𑀯𑀢𑁆𑀣𑀺𑀬𑀁 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀲𑀻𑀢𑀯𑀦𑁂 𑀯𑀺𑀳𑀭𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀲𑀸𑀯𑀢𑁆𑀣𑀺𑀁 𑀆𑀕𑀫𑀦𑀢𑁆𑀣𑀸𑀬 𑀬𑀸𑀘𑀺𑀢𑁆𑀯𑀸 𑀢𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑁂 𑀫𑀕𑁆𑀕𑁂 𑀬𑁄𑀚𑀦𑁂 𑀬𑁄𑀚𑀦𑁂 𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀳𑀸𑀭𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑀁 𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀉𑀬𑁆𑀬𑀸𑀦𑀪𑀽𑀫𑀺𑀁 𑀓𑁄𑀝𑀺𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀢𑀢𑁆𑀣 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀯𑀺𑀳𑀸𑀭𑀫𑀳𑀤𑀺𑀯𑀲𑁂 𑀅𑀬𑀁 𑀲𑀼𑀪𑀽𑀢𑀺𑀓𑀼𑀝𑀼𑀫𑁆𑀩𑀺𑀓𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀤𑁆𑀥𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀸 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑁂𑀢𑁆𑀢𑀸𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀲𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀸 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀅𑀭𑀡𑀯𑀺𑀳𑀸𑀭𑀻𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀬𑀲𑁆𑀫𑀸 𑀘 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀖𑀭𑁂 𑀖𑀭𑁂 𑀫𑁂𑀢𑁆𑀢𑀸𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀪𑀺𑀓𑁆𑀔𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 ‘‘𑀏𑀯𑀁 𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺, 𑀢𑀲𑁆𑀫𑀸 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀢𑁂𑀦 𑀦𑀁 𑀪𑀕𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀭𑀡𑀯𑀺𑀳𑀸𑀭𑀻𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀜𑁆𑀘 𑀬𑀤𑀺𑀤𑀁 𑀲𑀼𑀪𑀽𑀢𑀻’’𑀢𑀺 (𑀅. 𑀦𑀺. 𑁧.𑁧𑁯𑁮, 𑁨𑁦𑁧) 𑀤𑁆𑀯𑀬𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀏𑀯𑀫𑀬𑀁 𑀫𑀳𑀸𑀣𑁂𑀭𑁄 𑀅𑀢𑁆𑀢𑀦𑀸 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀨𑀮𑀲𑁆𑀲 𑀫𑀢𑁆𑀣𑀓𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀮𑁄𑀓𑁂 𑀅𑀪𑀺𑀜𑁆𑀜𑀸𑀢𑁄 𑀅𑀪𑀺𑀮𑀓𑁆𑀔𑀺𑀢𑁄 𑀳𑀼𑀢𑁆𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺.

𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀣𑁂𑀭𑀲𑁆𑀲 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣, 𑀯𑀲𑀦𑀝𑁆𑀞𑀸𑀦𑀁 𑀯𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 𑀯𑀺𑀲𑁆𑀲𑀭𑀺. 𑀣𑁂𑀭𑁄 𑀲𑁂𑀦𑀸𑀲𑀦𑀁 𑀅𑀮𑀪𑀦𑁆𑀢𑁄 𑀅𑀩𑁆𑀪𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀲𑀺. 𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑁂𑀦 𑀤𑁂𑀯𑁄 𑀦 𑀯𑀲𑁆𑀲𑀢𑀺. 𑀫𑀦𑀼𑀲𑁆𑀲𑀸 𑀅𑀯𑀼𑀝𑁆𑀞𑀺𑀢𑀸𑀬 𑀉𑀧𑀤𑁆𑀤𑀼𑀢𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀉𑀓𑁆𑀓𑀼𑀝𑁆𑀞𑀺𑀁 𑀅𑀓𑀁𑀲𑀼. 𑀭𑀸𑀚𑀸 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀤𑁂𑀯𑁄 𑀦 𑀯𑀲𑁆𑀲𑀢𑀻’’𑀢𑀺 𑀯𑀻𑀫𑀁𑀲𑀦𑁆𑀢𑁄 ‘‘𑀣𑁂𑀭𑀲𑁆𑀲 𑀅𑀩𑁆𑀪𑁄𑀓𑀸𑀲𑀯𑀸𑀲𑁂𑀦 𑀫𑀜𑁆𑀜𑁂 𑀦 𑀯𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀓𑀼𑀝𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 ‘‘𑀇𑀫𑀺𑀲𑁆𑀲𑀁, 𑀪𑀦𑁆𑀢𑁂, 𑀧𑀡𑁆𑀡𑀓𑀼𑀝𑀺𑀬𑀁 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀣𑁂𑀭𑁄 𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀢𑀤𑀸 𑀤𑁂𑀯𑁄 𑀣𑁄𑀓𑀁 𑀣𑁄𑀓𑀁 𑀨𑀼𑀲𑀸𑀬𑀢𑀺, 𑀦 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑀯𑁂𑀘𑁆𑀙𑀢𑀺. 𑀅𑀣 𑀣𑁂𑀭𑁄 𑀮𑁄𑀓𑀲𑁆𑀲 𑀅𑀯𑀼𑀝𑁆𑀞𑀺𑀓𑀪𑀬𑀁 𑀯𑀺𑀥𑀫𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀼𑀓𑀲𑁆𑀲 𑀧𑀭𑀺𑀲𑁆𑀲𑀬𑀲𑁆𑀲 𑀅𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀙𑀦𑁆𑀦𑀸 𑀫𑁂 𑀓𑀼𑀝𑀺𑀓𑀸’’𑀢𑀺 (𑀣𑁂𑀭𑀕𑀸. 𑁧) 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀣𑁂𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁂 𑀫𑀳𑀸𑀣𑁂𑀭𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑀻𑀢𑀺? 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀦𑀥𑀺𑀕𑀢𑀧𑀼𑀩𑁆𑀩𑀁 𑀧𑀭𑀫𑀕𑀫𑁆𑀪𑀻𑀭𑀁 𑀅𑀢𑀺𑀯𑀺𑀬 𑀲𑀦𑁆𑀢𑀁 𑀧𑀡𑀻𑀢𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀻𑀢𑀺𑀯𑁂𑀕𑀲𑀫𑀼𑀲𑁆𑀲𑀸𑀳𑀺𑀢𑀉𑀤𑀸𑀦𑀤𑀻𑀧𑀦𑀢𑁆𑀣𑀁 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀜𑁆𑀘 𑀧𑀭𑀫𑀧𑁆𑀧𑀺𑀘𑁆𑀙𑀸 𑀅𑀭𑀺𑀬𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑀺. 𑀬𑀣𑀸 𑀢𑀁 𑀮𑁄𑀓𑀦𑀸𑀣𑁄 𑀩𑁄𑀥𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧𑁦.𑁨𑁧; 𑀫. 𑀦𑀺. 𑁧. 𑁧𑁪𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀢𑁆𑀢𑀦𑁄 𑀕𑀼𑀡𑁂 𑀧𑀓𑀸𑀲𑁂𑀢𑀺. 𑀏𑀯𑀫𑀬𑀁 𑀣𑁂𑀭𑀲𑁆𑀲 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀕𑀸𑀣𑀸𑀧𑀺 𑀅𑀳𑁄𑀲𑀻𑀢𑀺.

𑁧. 𑀏𑀯𑀁 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀘 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺𑀫𑀯𑀦𑁆𑀢𑀲𑁆𑀲𑀸𑀢𑀺 𑀳𑀺𑀫𑀸𑀮𑀬𑀧𑀩𑁆𑀩𑀢𑀲𑁆𑀲 𑀅𑀯𑀺𑀤𑀽𑀭𑁂 𑀆𑀲𑀦𑁆𑀦𑁂 𑀲𑀫𑀻𑀧𑁂 𑀧𑀩𑁆𑀩𑀢𑀧𑀸𑀤𑁂 𑀫𑀦𑀼𑀲𑁆𑀲𑀸𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀲𑀜𑁆𑀘𑀭𑀡𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀦𑀺𑀲𑀪𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀧𑀩𑁆𑀩𑀢𑀸𑀦𑀁 𑀚𑁂𑀝𑁆𑀞𑀢𑁆𑀢𑀸 𑀦𑀸𑀫𑁂𑀦 𑀦𑀺𑀲𑀪𑁄 𑀦𑀸𑀫 𑀲𑁂𑀮𑀫𑀬𑀧𑀩𑁆𑀩𑀢𑁄 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀦𑁆𑀢𑀺 𑀢𑀢𑁆𑀣 𑀧𑀩𑁆𑀩𑀢𑁂 𑀫𑀬𑁆𑀳𑀁 𑀯𑀲𑀦𑀢𑁆𑀣𑀸𑀬 𑀅𑀲𑁆𑀲𑀫𑁄 𑀅𑀭𑀜𑁆𑀜𑀸𑀯𑀸𑀲𑁄 𑀲𑀼𑀝𑁆𑀞𑀼 𑀓𑀢𑁄. 𑀓𑀼𑀝𑀺𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀯𑀢𑀺𑀧𑀭𑀺𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀓𑀢𑁄𑀢𑀺 𑀅𑀢𑁆𑀣𑁄. 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸𑀢𑀺 𑀧𑀡𑁆𑀡𑁂𑀳𑀺 𑀙𑀸𑀤𑀺𑀢𑀸 𑀲𑀸𑀮𑀸 𑀫𑀬𑁆𑀳𑀁 𑀦𑀺𑀯𑀸𑀲𑀦𑀢𑁆𑀣𑀸𑀬 𑀲𑀼𑀝𑁆𑀞𑀼 𑀫𑀸𑀧𑀺𑀢𑀸 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀅𑀢𑁆𑀣𑁄.

𑁨. 𑀓𑁄𑀲𑀺𑀬𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀥𑁂𑀬𑁆𑀬𑁂𑀦 𑀓𑁄𑀲𑀺𑀬𑁄 𑀦𑀸𑀫. 𑀉𑀕𑁆𑀕𑀢𑀸𑀧𑀦𑁄 𑀧𑀸𑀓𑀝𑀢𑀧𑁄 𑀖𑁄𑀭𑀢𑀧𑁄. 𑀏𑀓𑀸𑀓𑀺𑀬𑁄 𑀅𑀜𑁆𑀜𑁂𑀲𑀁 𑀅𑀪𑀸𑀯𑀸 𑀅𑀳𑀁 𑀏𑀯 𑀏𑀓𑁄. 𑀅𑀤𑀼𑀢𑀺𑀬𑁄 𑀤𑀼𑀢𑀺𑀬𑀢𑀸𑀧𑀲𑀭𑀳𑀺𑀢𑁄 𑀚𑀝𑀺𑀮𑁄 𑀚𑀝𑀸𑀥𑀸𑀭𑀻 𑀢𑀸𑀧𑀲𑁄 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀦𑀺𑀲𑀪𑁂 𑀧𑀩𑁆𑀩𑀢𑁂 𑀯𑀲𑀸𑀫𑀺 𑀯𑀺𑀳𑀭𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩. 𑀨𑀮𑀁 𑀫𑀽𑀮𑀜𑁆𑀘 𑀧𑀡𑁆𑀡𑀜𑁆𑀘, 𑀦 𑀪𑀼𑀜𑁆𑀚𑀸𑀫𑀺 𑀅𑀳𑀁 𑀢𑀤𑀸𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀦𑀺𑀲𑀪𑀧𑀩𑁆𑀩𑀢𑁂 𑀯𑀲𑀦𑀓𑀸𑀮𑁂 𑀢𑀺𑀡𑁆𑀟𑀼𑀓𑀸𑀤𑀺𑀨𑀮𑀁 𑀫𑀼𑀴𑀸𑀮𑀸𑀤𑀺𑀫𑀽𑀮𑀁, 𑀓𑀸𑀭𑀧𑀡𑁆𑀡𑀸𑀤𑀺𑀧𑀡𑁆𑀡𑀜𑁆𑀘 𑀭𑀼𑀓𑁆𑀔𑀢𑁄 𑀑𑀘𑀺𑀦𑀺𑀢𑁆𑀯𑀸 𑀦 𑀪𑀼𑀜𑁆𑀚𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀢𑀺 𑀓𑀣𑀁 𑀚𑀻𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀯𑀢𑁆𑀢𑀁𑀯 𑀲𑀼𑀧𑀸𑀢𑀸𑀳𑀦𑁆𑀢𑀺 𑀆𑀳. 𑀢𑀢𑁆𑀣 𑀧𑀯𑀢𑁆𑀢𑀁 𑀲𑀬𑀫𑁂𑀯 𑀚𑀸𑀢𑀁 𑀲𑀼𑀧𑀸𑀢𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀢𑀺𑀢𑀁 𑀧𑀡𑁆𑀡𑀸𑀤𑀺𑀓𑀁 𑀦𑀺𑀲𑁆𑀲𑀸𑀬 𑀆𑀳𑀸𑀭𑀁 𑀓𑀢𑁆𑀯𑀸 𑀅𑀳𑀁 𑀢𑀸𑀯𑀤𑁂 𑀢𑀲𑁆𑀫𑀺𑀁 𑀓𑀸𑀮𑁂 𑀚𑀻𑀯𑀸𑀫𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀯𑀢𑁆𑀢𑀧𑀡𑁆𑀟𑀼𑀧𑀡𑁆𑀡𑀸𑀦𑀻’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲 𑀲𑀬𑀫𑁂𑀯 𑀧𑀢𑀺𑀢𑀸𑀦𑀺 𑀧𑀡𑁆𑀟𑀼𑀧𑀡𑁆𑀡𑀸𑀦𑀺 𑀭𑀼𑀓𑁆𑀔𑀧𑀢𑁆𑀢𑀸𑀦𑀺 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀸𑀫𑀻𑀢𑀺 𑀅𑀢𑁆𑀣𑁄.

𑁪. 𑀦𑀸𑀳𑀁 𑀓𑁄𑀧𑁂𑀫𑀺 𑀆𑀚𑀻𑀯𑀦𑁆𑀢𑀺 𑀅𑀳𑀁 𑀚𑀻𑀯𑀺𑀢𑀁 𑀘𑀚𑀫𑀸𑀦𑁄𑀧𑀺 𑀧𑀭𑀺𑀘𑁆𑀘𑀸𑀕𑀁 𑀓𑀼𑀭𑀼𑀫𑀸𑀦𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀨𑀮𑀫𑀽𑀮𑀸𑀤𑀺𑀆𑀳𑀸𑀭𑀧𑀭𑀺𑀬𑁂𑀲𑀦𑀸𑀬 𑀲𑀫𑁆𑀫𑀸 𑀆𑀚𑀻𑀯𑀁 𑀦 𑀓𑁄𑀧𑁂𑀫𑀺 𑀦 𑀦𑀸𑀲𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀭𑀸𑀥𑁂𑀫𑀺 𑀲𑀓𑀁 𑀘𑀺𑀢𑁆𑀢𑀦𑁆𑀢𑀺 𑀲𑀓𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀫𑀦𑀁 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀆𑀭𑀸𑀥𑁂𑀫𑀺 𑀧𑀲𑀸𑀤𑁂𑀫𑀺. 𑀯𑀺𑀯𑀚𑁆𑀚𑁂𑀫𑀺 𑀅𑀦𑁂𑀲𑀦𑀦𑁆𑀢𑀺 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀅𑀦𑁂𑀲𑀦𑀁 𑀅𑀬𑀼𑀢𑁆𑀢𑀧𑀭𑀺𑀬𑁂𑀲𑀦𑀁 𑀯𑀺𑀯𑀚𑁆𑀚𑁂𑀫𑀺 𑀤𑀽𑀭𑀁 𑀓𑀭𑁄𑀫𑀺.

𑁫. 𑀭𑀸𑀕𑀽𑀧𑀲𑀁𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀫𑀫 𑀭𑀸𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀲𑀬𑀫𑁂𑀯 𑀅𑀢𑁆𑀢𑀦𑀸𑀬𑁂𑀯 𑀧𑀘𑁆𑀘𑀯𑁂𑀓𑁆𑀔𑀸𑀫𑀺 𑀜𑀸𑀡𑁂𑀦 𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀯𑀺𑀦𑁄𑀤𑁂𑀫𑀺. 𑀏𑀓𑀕𑁆𑀕𑁄 𑀢𑀁 𑀤𑀫𑁂𑀫𑀳𑀦𑁆𑀢𑀺 𑀅𑀳𑀁 𑀏𑀓𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂 𑀅𑀕𑁆𑀕𑁄 𑀲𑀫𑀸𑀳𑀺𑀢𑁄 𑀢𑀁 𑀭𑀸𑀕𑀘𑀺𑀢𑁆𑀢𑀁 𑀤𑀫𑁂𑀫𑀺 𑀤𑀫𑀦𑀁 𑀓𑀭𑁄𑀫𑀺.

𑁬. 𑀭𑀚𑁆𑀚𑀲𑁂 𑀭𑀚𑁆𑀚𑀦𑀻𑀬𑁂 𑀘𑀸𑀢𑀺 𑀭𑀚𑁆𑀚𑀦𑀻𑀬𑁂 𑀅𑀮𑁆𑀮𑀻𑀬𑀺𑀢𑀩𑁆𑀩𑁂 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁 𑀭𑀚𑁆𑀚𑀲𑁂 𑀅𑀮𑁆𑀮𑀻𑀦𑁄 𑀅𑀲𑀺 𑀪𑀯𑀲𑀺. 𑀤𑀼𑀲𑁆𑀲𑀦𑀻𑀬𑁂 𑀘 𑀤𑀼𑀲𑁆𑀲𑀲𑁂𑀢𑀺 𑀤𑀽𑀲𑀺𑀢𑀩𑁆𑀩𑁂 𑀤𑁄𑀲𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀤𑀽𑀲𑀓𑁄 𑀅𑀲𑀺. 𑀫𑀼𑀬𑁆𑀳𑀲𑁂 𑀫𑁄𑀳𑀦𑀻𑀬𑁂 𑀘𑀸𑀢𑀺 𑀫𑁄𑀳𑀺𑀢𑀩𑁆𑀩𑁂 𑀫𑁄𑀳𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀫𑁄𑀬𑁆𑀳𑀲𑀺 𑀫𑀽𑀴𑁆𑀳𑁄 𑀅𑀲𑀺 𑀪𑀯𑀲𑀺. 𑀢𑀲𑁆𑀫𑀸 𑀢𑀼𑀯𑀁 𑀯𑀦𑀸 𑀯𑀦𑀢𑁄 𑀅𑀭𑀜𑁆𑀜𑀯𑀸𑀲𑀢𑁄 𑀦𑀺𑀓𑁆𑀔𑀫𑀲𑁆𑀲𑀼 𑀅𑀧𑀕𑀘𑁆𑀙𑀸𑀳𑀻𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀤𑀫𑁂𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁪. 𑀢𑀺𑀫𑁆𑀩𑀭𑀽𑀲𑀓𑀯𑀡𑁆𑀡𑀸𑀪𑁄𑀢𑀺 𑀲𑀼𑀯𑀡𑁆𑀡𑀢𑀺𑀫𑁆𑀩𑀭𑀽𑀲𑀓𑀯𑀡𑁆𑀡𑀸𑀪𑁄, 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀼𑀪𑀽𑀢𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀉𑀧𑀯𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑀯𑀸𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀤𑁂𑀯𑀦𑀸𑀕𑀕𑀭𑀼𑀴𑀓𑀼𑀫𑁆𑀪𑀡𑁆𑀟𑀬𑀓𑁆𑀔𑀕𑀦𑁆𑀥𑀩𑁆𑀩𑁂𑀳𑀺 𑀲𑀢𑁆𑀢𑀭𑀢𑀦𑀫𑀬𑁂 𑀲𑀢𑁆𑀢𑀬𑁄𑀚𑀦𑀺𑀓𑁂 𑀣𑀽𑀧𑁂 𑀓𑀢𑁂 𑀢𑀢𑁆𑀣 𑀲𑀼𑀥𑁄𑀢𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀲𑀸𑀝𑀓𑀁 𑀯𑁂𑀴𑀕𑁆𑀕𑁂 𑀮𑀕𑁆𑀕𑁂𑀢𑁆𑀯𑀸 𑀆𑀩𑀦𑁆𑀥𑀺𑀢𑁆𑀯𑀸 𑀥𑀚𑀁 𑀓𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀅𑀪𑀺𑀲𑀫𑁆𑀫𑀢𑀓𑁄 𑀦𑀸𑀫 𑀬𑀓𑁆𑀔𑀲𑁂𑀦𑀸𑀧𑀢𑀺 𑀤𑁂𑀯𑁂𑀳𑀺 𑀘𑁂𑀢𑀺𑀬𑀧𑀽𑀚𑀸𑀭𑀓𑁆𑀔𑀡𑀢𑁆𑀣𑀁 𑀞𑀧𑀺𑀢𑁄 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀢𑀁 𑀆𑀓𑀸𑀲𑁂 𑀥𑀸𑀭𑁂𑀦𑁆𑀢𑁄 𑀘𑁂𑀢𑀺𑀬𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑀯𑀸𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀚𑁂𑀢𑀯𑀦𑀧𑀝𑀺𑀕𑁆𑀕𑀳𑀡𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀬𑀤𑀸 𑀪𑀕𑀯𑀢𑁄 𑀅𑀨𑀸𑀲𑀼 𑀅𑀳𑁄𑀲𑀺, 𑀢𑀤𑀸 𑀣𑁂𑀭𑁄 𑀉𑀡𑁆𑀳𑁄𑀤𑀓𑀁 𑀢𑀣𑀸𑀭𑀽𑀧𑀁 𑀧𑀸𑀦𑀓𑀜𑁆𑀘 𑀪𑁂𑀲𑀚𑁆𑀚𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺. 𑀢𑁂𑀦𑀲𑁆𑀲 𑀲𑀢𑁆𑀣𑀼𑀦𑁄 𑀭𑁄𑀕𑁄 𑀯𑀽𑀧𑀲𑀫𑀺. 𑀢𑀲𑁆𑀲 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑁫𑁨. 𑀏𑀯𑀁 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀥𑀺𑀕𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀧𑀸𑀭𑀕𑀽 𑀧𑀭𑀺𑀬𑁄𑀲𑀸𑀦𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀧𑀢𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄 𑀚𑀺𑀢𑀧𑀜𑁆𑀘𑀫𑀸𑀭𑁄 𑀪𑀕𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀇𑀯 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀁𑀲𑀺𑀬𑁄 𑀚𑀮𑀺𑀢𑁆𑀯𑀸 𑀲𑀩𑁆𑀩𑀮𑁄𑀓𑀁 𑀥𑀫𑁆𑀫𑀧𑀚𑁆𑀚𑁄𑀢𑁂𑀦 𑀑𑀪𑀸𑀲𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄 𑀲𑀼𑀝𑁆𑀞𑀼 𑀩𑀼𑀤𑁆𑀥𑁄 𑀅𑀯𑀺𑀚𑁆𑀚𑀸𑀦𑀺𑀤𑁆𑀤𑀽𑀧𑀕𑀢𑀸𑀬 𑀧𑀚𑀸𑀬 𑀲𑀯𑀸𑀲𑀦𑀸𑀬 𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀧𑀝𑀺𑀩𑀼𑀤𑁆𑀥𑁄 𑀯𑀺𑀓𑀲𑀺𑀢𑀦𑁂𑀢𑁆𑀢𑀧𑀗𑁆𑀓𑀚𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄 𑀅𑀤𑀲𑁆𑀲𑀦𑀁 𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁭. 𑀚𑀗𑁆𑀖𑀸𑀢𑀺 𑀘𑁂𑀢𑀺𑀬𑀓𑀭𑀡𑀓𑀸𑀮𑁂 𑀉𑀧𑀘𑀺𑀦𑀺𑀢𑀩𑁆𑀩𑀸𑀦𑀁 𑀇𑀝𑁆𑀞𑀓𑀸𑀦𑀁 𑀞𑀧𑀦𑀢𑁆𑀣𑀸𑀬, 𑀦𑀺𑀩𑀦𑁆𑀥𑀺𑀬𑀫𑀸𑀦𑀲𑁄𑀧𑀸𑀦𑀧𑀦𑁆𑀢𑀺.

𑁮𑁮. 𑀲𑀼𑀥𑁄𑀢𑀁 𑀭𑀚𑀓𑁂𑀦𑀸𑀳𑀦𑁆𑀢𑀺 𑀯𑀢𑁆𑀣𑀥𑁄𑀯𑀓𑁂𑀦 𑀧𑀼𑀭𑀺𑀲𑁂𑀦 𑀲𑀼𑀝𑁆𑀞𑀼 𑀥𑁄𑀯𑀺𑀢𑀁 𑀲𑀼𑀯𑀺𑀲𑀼𑀤𑁆𑀥𑀓𑀢𑀁, 𑀉𑀢𑁆𑀢𑀭𑁂𑀬𑁆𑀬𑀧𑀝𑀁 𑀫𑀫 𑀉𑀢𑁆𑀢𑀭𑀲𑀸𑀝𑀓𑀁 𑀅𑀳𑀁 𑀯𑁂𑀴𑀕𑁆𑀕𑁂 𑀮𑀕𑁆𑀕𑀺𑀢𑁆𑀯𑀸 𑀥𑀚𑀁 𑀓𑀢𑁆𑀯𑀸 𑀉𑀓𑁆𑀔𑀺𑀧𑀺𑀁, 𑀅𑀫𑁆𑀩𑀭𑁂 𑀆𑀓𑀸𑀲𑁂 𑀉𑀲𑁆𑀲𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀉𑀧𑀯𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑁆𑀥𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀸𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑁄 𑀧𑀩𑁆𑀩𑀚𑀺𑀢𑀼𑀁 𑀦 𑀮𑀪𑀸𑀫𑀺, 𑀬𑀁𑀦𑀽𑀦𑀸𑀳𑀁 𑀢𑀻𑀡𑀺 𑀲𑀭𑀡𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀏𑀯𑀁 𑀤𑀼𑀕𑁆𑀕𑀢𑀺𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀪𑀁 𑀦𑀸𑀫 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀻𑀡𑀺 𑀲𑀭𑀡𑀸𑀦𑀺 𑀕𑀡𑁆𑀳𑀺. 𑀲𑁄 𑀢𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁄 𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀦𑀕𑀭𑁂 𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀤𑀸𑀭𑀓𑁂𑀳𑀺 𑀧𑀭𑀺𑀯𑀼𑀢𑁄 𑀏𑀓𑀁 𑀲𑀗𑁆𑀖𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀏𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀭𑀡𑀸𑀦𑀺 𑀅𑀤𑀸𑀲𑀺. 𑀲𑁄 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀭𑀓𑁆𑀔𑀺𑀢𑀸𑀦𑀺 𑀲𑀭𑀡𑀸𑀦𑀺 𑀲𑀭𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀁 𑀪𑀕𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺.

𑁧𑁦𑁬. 𑀲𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀸𑀢𑀼 𑀉𑀧𑀝𑁆𑀞𑀸𑀓𑁄 𑀅𑀳𑀼𑀦𑁆𑀢𑀺 𑀅𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀓𑁄 𑀪𑀭𑀓𑁄 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦𑁮. 𑀢𑀫𑀦𑁆𑀥𑀓𑀸𑀭𑀧𑀺𑀳𑀺𑀢𑀸𑀢𑀺 𑀫𑁄𑀳𑀦𑁆𑀥𑀓𑀸𑀭𑁂𑀦 𑀧𑀺𑀳𑀺𑀢𑀸 𑀙𑀸𑀤𑀺𑀢𑀸. 𑀢𑀺𑀯𑀺𑀥𑀕𑁆𑀕𑀻𑀳𑀺 𑀟𑀬𑁆𑀳𑀭𑁂𑀢𑀺 𑀭𑀸𑀕𑀕𑁆𑀕𑀺𑀤𑁄𑀲𑀕𑁆𑀕𑀺𑀫𑁄𑀳𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀭𑁂 𑀟𑀬𑁆𑀳𑀦𑁆𑀢𑀺 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁪. 𑀅𑀝𑁆𑀞 𑀳𑁂𑀢𑀽 𑀮𑀪𑀸𑀫𑀳𑀦𑁆𑀢𑀺 𑀅𑀝𑁆𑀞 𑀓𑀸𑀭𑀡𑀸𑀦𑀺 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀸𑀦𑀺 𑀓𑀸𑀭𑀡𑀸𑀦𑀺 𑀮𑀪𑀸𑀫𑀺 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀘𑀦𑁆𑀤𑀯𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀭𑀺𑀫𑀪𑀯𑁂 𑀓𑀢𑀸𑀓𑀼𑀲𑀮𑀓𑀫𑁆𑀫𑀸𑀦𑀼𑀭𑀽𑀧𑁂𑀦 𑀤𑀮𑀺𑀤𑁆𑀤𑁄 𑀳𑀼𑀢𑁆𑀯𑀸 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁄 𑀧𑀭𑁂𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑁄 𑀲𑀁𑀲𑀸𑀭𑁂 𑀆𑀤𑀻𑀦𑀯𑀁 𑀜𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀧𑀺 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑁆𑀲 𑀦𑀺𑀲𑀪𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀺. 𑀤𑀻𑀖𑀸𑀬𑀼𑀓𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀲𑀻𑀮𑀁 𑀧𑀭𑀺𑀧𑀸𑀮𑁂𑀲𑀺. 𑀢𑁂𑀦 𑀓𑀫𑁆𑀫𑁂𑀦 𑀲𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀫𑀸𑀢𑀸𑀧𑀺𑀢𑀭𑁄 𑀲𑀻𑀮𑀁 𑀲𑀫𑀸𑀤𑀺𑀬𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑀻𑀮𑀁 𑀲𑀭𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺.

𑁧𑁩𑁪. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀉𑀤𑀸𑀦𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀘𑀦𑁆𑀤𑀯𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀪𑀢𑀓𑁄 𑀆𑀲𑀳𑀁 𑀢𑀤𑀸𑀢𑀺 𑀢𑀤𑀸 𑀫𑀫 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀅𑀳𑀁 𑀪𑀢𑀓𑁄 𑀪𑀢𑀺𑀬𑀸 𑀓𑀫𑁆𑀫𑀓𑀸𑀭𑀓𑁄 𑀆𑀲𑀺𑀁 𑀅𑀳𑁄𑀲𑀺𑀁. 𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄𑀢𑀺 𑀪𑀢𑀺𑀬𑀸 𑀧𑀭𑁂𑀲𑀁 𑀓𑀫𑁆𑀫𑀓𑀭𑀡𑁂 𑀆𑀬𑀼𑀢𑁆𑀢𑁄 𑀬𑁄𑀚𑀺𑀢𑁄 𑀑𑀓𑀸𑀲𑀸𑀪𑀸𑀯𑁂𑀦 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀦𑀢𑁆𑀣𑀸𑀬 𑀅𑀳𑀁 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀸𑀫𑀺.

𑁧𑁩𑁫. 𑀫𑀳𑀦𑁆𑀥𑀓𑀸𑀭𑀧𑀺𑀳𑀺𑀢𑀸𑀢𑀺 𑀫𑀳𑀦𑁆𑀢𑁂𑀳𑀺 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀳𑀺 𑀧𑀺𑀳𑀺𑀢𑀸 𑀲𑀁𑀯𑀼𑀢𑀸 𑀣𑀓𑀺𑀢𑀸. 𑀢𑀺𑀯𑀺𑀥𑀕𑁆𑀕𑀻𑀳𑀺 𑀟𑀬𑁆𑀳𑀭𑁂𑀢𑀺 𑀦𑀭𑀓𑀕𑁆𑀕𑀺𑀧𑁂𑀢𑀕𑁆𑀕𑀺𑀲𑀁𑀲𑀸𑀭𑀕𑁆𑀕𑀺𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀦𑁆𑀢𑀺. 𑀅𑀳𑀁 𑀧𑀦 𑀓𑁂𑀦 𑀉𑀧𑀸𑀬𑁂𑀦 𑀓𑁂𑀦 𑀓𑀸𑀭𑀡𑁂𑀦 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁬. 𑀤𑁂𑀬𑁆𑀬𑀥𑀫𑁆𑀫𑁄 𑀅𑀦𑁆𑀦𑀧𑀸𑀦𑀸𑀤𑀺𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢𑁆𑀣𑀼 𑀫𑀬𑁆𑀳𑀁 𑀦𑀢𑁆𑀣𑀺, 𑀢𑀲𑁆𑀲𑀸𑀪𑀸𑀯𑁂𑀦 𑀅𑀳𑀁 𑀯𑀭𑀸𑀓𑁄 𑀤𑀼𑀓𑁆𑀔𑀺𑀢𑁄 𑀪𑀢𑀓𑁄 𑀪𑀢𑀺𑀬𑀸 𑀚𑀻𑀯𑀦𑀓𑁄 𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀲𑀻𑀮𑀁 𑀭𑀓𑁆𑀔𑁂𑀬𑁆𑀬𑀁 𑀧𑀭𑀺𑀧𑀽𑀭𑀬𑀦𑁆𑀢𑀺 𑀧𑀜𑁆𑀘𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀧𑀽𑀭𑁂𑀦𑁆𑀢𑁄 𑀬𑀁𑀦𑀽𑀦 𑀭𑀓𑁆𑀔𑁂𑀬𑁆𑀬𑀁 𑀲𑀸𑀥𑀼𑀓𑀁 𑀪𑀤𑁆𑀤𑀓𑀁 𑀲𑀼𑀦𑁆𑀤𑀭𑀁 𑀓𑀢𑁆𑀯𑀸 𑀧𑀭𑀺𑀧𑀸𑀮𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁧𑁪𑁮. 𑀲𑁆𑀯𑀸𑀳𑀁 𑀬𑀲𑀫𑀦𑀼𑀪𑀯𑀺𑀦𑁆𑀢𑀺 𑀲𑁄 𑀅𑀳𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺𑀁 𑀢𑁂𑀲𑀁 𑀲𑀻𑀮𑀸𑀦𑀁 𑀯𑀸𑀳𑀲𑀸 𑀆𑀦𑀼𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀓𑁄𑀝𑀺𑀫𑁆𑀧𑀺 𑀢𑁂𑀲𑀁 𑀲𑀻𑀮𑀸𑀦𑀁 𑀨𑀮𑀁 𑀓𑀺𑀢𑁆𑀢𑁂𑀦𑁆𑀢𑁄 𑀏𑀓𑀓𑁄𑀝𑁆𑀞𑀸𑀲𑀫𑁂𑀯 𑀓𑀺𑀢𑁆𑀢𑀬𑁂 𑀧𑀸𑀓𑀝𑀁 𑀓𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀩𑁆𑀬𑀸𑀫𑀧𑁆𑀧𑀪𑀸𑀫𑀡𑁆𑀟𑀮𑁄𑀧𑀲𑁄𑀪𑀺𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀦𑁂𑀢𑁆𑀯𑀸 𑀯𑀭𑀅𑀦𑁆𑀦𑀧𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑁄𑀚𑁂𑀲𑀺. 𑀲𑁄 𑀢𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀦𑀸𑀫𑀯𑀲𑁂𑀦 𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑀦𑀸𑀫𑁄 𑀅𑀳𑁄𑀲𑀺.

𑁧𑁫𑁫-𑁬. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀏𑀯𑀁 𑀫𑀬𑀸 𑀇𑀫𑀺𑀦𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀼𑀪𑀸𑀯𑁂𑀦 𑀧𑀢𑁆𑀢𑀁 𑀅𑀭𑀳𑀢𑁆𑀢’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀉𑀤𑀸𑀦𑀯𑀲𑁂𑀦 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀯𑀡𑁆𑀡𑀲𑁆𑀲 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀪𑀕𑀯𑀢𑁄 𑀲𑁄𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁 𑀲𑀺𑀤𑁆𑀥𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂𑀢𑀺 𑀯𑁂𑀲𑁆𑀲𑀸𑀦𑀁 𑀆𑀧𑀡𑀧𑀦𑁆𑀢𑀻𑀦𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀕𑀘𑁆𑀙𑀫𑀸𑀦𑀁. 𑀓𑀜𑁆𑀘𑀦𑀕𑁆𑀖𑀺𑀬𑀲𑀁𑀓𑀸𑀲𑀦𑁆𑀢𑀺 𑀲𑀼𑀯𑀡𑁆𑀡𑀢𑁄𑀭𑀡𑀲𑀤𑀺𑀲𑀁 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁂𑀳𑀺 𑀲𑀫𑁆𑀧𑀦𑁆𑀦𑀁 𑀮𑁄𑀓𑀧𑀚𑁆𑀚𑁄𑀢𑀁 𑀲𑀓𑀮𑀮𑁄𑀓𑀤𑀻𑀧𑀪𑀽𑀢𑀁 𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀸𑀡𑀯𑀺𑀭𑀳𑀺𑀢𑀁 𑀅𑀦𑁄𑀧𑀫𑀁 𑀉𑀧𑀫𑀸𑀯𑀺𑀭𑀳𑀺𑀢𑀁 𑀚𑀼𑀢𑀺𑀦𑁆𑀥𑀭𑀁 𑀧𑀪𑀸𑀥𑀸𑀭𑀁 𑀦𑀻𑀮𑀧𑀻𑀢𑀸𑀤𑀺𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀥𑀸𑀭𑀓𑀁 𑀲𑀺𑀤𑁆𑀥𑀢𑁆𑀣𑀁 𑀤𑀺𑀲𑁆𑀯𑀸 𑀧𑀭𑀫𑀁 𑀉𑀢𑁆𑀢𑀫𑀁 𑀧𑀻𑀢𑀺𑀁 𑀅𑀮𑀢𑁆𑀣𑀁 𑀅𑀮𑀪𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀥𑀽𑀧𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀥𑀽𑀧𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀺𑀤𑁆𑀥𑀢𑁆𑀣𑁂 𑀪𑀕𑀯𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀬𑀁 𑀘𑀦𑁆𑀤𑀦𑀸𑀕𑀭𑀼𑀓𑀸𑀴𑀸𑀦𑀼𑀲𑀸𑀭𑀺𑀆𑀤𑀺𑀦𑀸 𑀓𑀢𑁂𑀳𑀺 𑀅𑀦𑁂𑀓𑁂𑀳𑀺 𑀥𑀽𑀧𑁂𑀳𑀺 𑀥𑀽𑀧𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀧𑀽𑀚𑀦𑀻𑀬𑁄 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀼𑀪𑀸𑀯𑁂𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑀢𑀥𑀽𑀧𑀧𑀽𑀚𑀸𑀧𑀼𑀜𑁆𑀜𑀢𑁆𑀢𑀸 𑀦𑀸𑀫𑁂𑀦 𑀥𑀽𑀧𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀲𑀩𑁆𑀩𑀢𑁆𑀣 𑀧𑀸𑀓𑀝𑁄. 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀲𑀺𑀤𑁆𑀥𑁄 𑀧𑀭𑀺𑀧𑀼𑀡𑁆𑀡𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀕𑀼𑀡𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲 𑀪𑀕𑀯𑀢𑁄 𑀲𑁄𑀬𑀁 𑀲𑀺𑀤𑁆𑀥𑀢𑁆𑀣𑁄, 𑀢𑀲𑁆𑀲 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀪𑀕𑁆𑀬𑀸𑀤𑀺𑀕𑀼𑀡𑀯𑀦𑁆𑀢𑀲𑁆𑀲 𑀮𑁄𑀓𑀚𑁂𑀝𑁆𑀞𑀲𑁆𑀲 𑀲𑀓𑀮𑀮𑁄𑀓𑀼𑀢𑁆𑀢𑀫𑀲𑁆𑀲 𑀢𑀸𑀤𑀺𑀦𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀢𑀸𑀤𑀺𑀲𑀲𑁆𑀲 𑀅𑀘𑀮𑀲𑀪𑀸𑀯𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀥𑀽𑀧𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀸𑀲𑀦𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀧𑀼𑀭𑀸𑀡𑀯𑀸𑀮𑀼𑀓𑀁 𑀅𑀧𑀦𑁂𑀢𑁆𑀯𑀸 𑀦𑀯𑀁 𑀫𑀼𑀢𑁆𑀢𑀸𑀤𑀮𑀲𑀤𑀺𑀲𑀧𑀡𑁆𑀟𑀭𑀧𑀼𑀮𑀺𑀦𑀁 𑀑𑀓𑀺𑀭𑀺𑀢𑁆𑀯𑀸 𑀫𑀸𑀴𑀓𑀁 𑀅𑀮𑀗𑁆𑀓𑀭𑀺. 𑀢𑁂𑀦 𑀓𑀫𑁆𑀫𑁂𑀦 𑀲𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀭𑀢𑀦𑁂𑀳𑀺 𑀯𑀺𑀚𑁆𑀚𑁄𑀢𑀫𑀸𑀦𑁂 𑀅𑀦𑁂𑀓𑀬𑁄𑀚𑀦𑁂 𑀓𑀦𑀓𑀯𑀺𑀫𑀸𑀦𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀅𑀢𑁆𑀢𑀦𑁄 𑀓𑀢𑀧𑀼𑀜𑁆𑀜𑀦𑀸𑀫𑀲𑀤𑀺𑀲𑁂𑀦 𑀦𑀸𑀫𑁂𑀦 𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁧𑁬𑁫. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀺𑀥𑀁 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻, 𑀯𑀺𑀯𑀺𑀘𑁆𑀘 𑀧𑀲𑁆𑀲𑀢𑀻𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀯𑀺𑀯𑀺𑀥𑁂 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀧𑀲𑁆𑀲𑀢𑀻𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀯𑀺𑀯𑀺𑀥𑁂 𑀯𑁄𑀳𑀸𑀭𑀧𑀭𑀫𑀢𑁆𑀣𑀸𑀤𑀺𑀪𑁂𑀤𑁂 𑀧𑀲𑁆𑀲𑀢𑀻𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂 𑀉𑀢𑁆𑀢𑀫𑁂 𑀩𑁄𑀥𑀺𑀭𑀼𑀓𑁆𑀔𑀫𑀡𑁆𑀟𑀮𑀫𑀸𑀴𑀓𑁂 𑀧𑀼𑀭𑀸𑀡𑀧𑀼𑀮𑀺𑀦𑀁 𑀯𑀸𑀮𑀼𑀓𑀁 𑀙𑀟𑁆𑀟𑁂𑀢𑁆𑀯𑀸 𑀲𑀼𑀤𑁆𑀥𑀁 𑀧𑀡𑁆𑀟𑀭𑀁 𑀧𑀼𑀮𑀺𑀦𑀁 𑀆𑀓𑀺𑀭𑀺𑀁 𑀲𑀦𑁆𑀣𑀭𑀺𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀉𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀘𑀦𑁆𑀤𑀪𑀸𑀕𑀸𑀦𑀤𑀺𑀬𑀁 𑀲𑀼𑀲𑀼𑀫𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀦𑀤𑀻𑀢𑀻𑀭𑀁 𑀉𑀧𑀕𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀸𑀭𑀁 𑀦𑁂𑀢𑀼𑀓𑀸𑀫𑁄 𑀢𑀻𑀭𑀲𑀫𑀻𑀧𑁂𑀬𑁂𑀯 𑀦𑀺𑀧𑀚𑁆𑀚𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀧𑀺𑀝𑁆𑀞𑀺𑀬𑀁 𑀧𑀸𑀤𑁂 𑀞𑀧𑁂𑀲𑀺. 𑀲𑁄 𑀢𑀼𑀝𑁆𑀞𑁄 𑀉𑀤𑀕𑁆𑀕𑁄 𑀧𑀻𑀢𑀺𑀯𑁂𑀕𑁂𑀦 𑀫𑀳𑀼𑀲𑁆𑀲𑀸𑀳𑁄 𑀳𑀼𑀢𑁆𑀯𑀸 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀲𑀻𑀖𑁂𑀦 𑀚𑀯𑁂𑀦 𑀪𑀕𑀯𑀦𑁆𑀢𑀁 𑀧𑀭𑀢𑀻𑀭𑀁 𑀦𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀜𑀢𑁆𑀯𑀸 ‘‘𑀅𑀬𑀁 𑀇𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑁂 𑀅𑀫𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀢𑀣𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀢𑁆𑀢𑀺𑀬𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 ‘‘𑀅𑀫𑀢𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀩𑁆𑀩𑀸𑀚𑀓𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀳𑀼𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀤𑀺𑀝𑁆𑀞𑀻𑀦𑀁 𑀅𑀯𑀺𑀲𑁄𑀥𑀺𑀢𑀢𑁆𑀢𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀗𑁆𑀔𑁂𑀧𑁂𑀦 𑀑𑀯𑀸𑀤𑀁 𑀬𑀸𑀘𑀺. 𑀲𑀢𑁆𑀣𑀸𑀧𑀺 𑀢𑀲𑁆𑀲, ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀉𑀢𑁆𑀢𑀺𑀬, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁩𑁮𑁨) 𑀲𑀗𑁆𑀔𑁂𑀧𑁂𑀦𑁂𑀯 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀼 𑀑𑀯𑀸𑀤𑁂 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺. 𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺. 𑀉𑀧𑁆𑀧𑀦𑁆𑀦𑁂 𑀆𑀩𑀸𑀥𑁂 𑀚𑀸𑀢𑀲𑀁𑀯𑁂𑀕𑁄 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀁 𑀜𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁬𑁯. 𑀏𑀯𑀁 𑀲𑁄 𑀓𑀢𑀲𑀫𑁆𑀪𑀸𑀭𑀸𑀦𑀼𑀭𑀽𑀧𑁂𑀦 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺 𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀧𑀼𑀮𑀺𑀦𑀢𑀮𑁂𑀳𑀺 𑀘 𑀧𑀪𑀸𑀲𑀫𑁆𑀧𑀦𑁆𑀦𑀧𑀲𑀦𑁆𑀦𑀫𑀥𑀼𑀭𑁄𑀤𑀓𑀧𑀭𑀺𑀧𑀼𑀡𑁆𑀡𑀢𑀸𑀬 𑀘 𑀘𑀦𑁆𑀤𑀧𑁆𑀧𑀪𑀸𑀓𑀺𑀭𑀡𑀲𑀲𑁆𑀲𑀺𑀭𑀻𑀓𑀸𑀪𑀸 𑀦𑀤𑀫𑀸𑀦𑀸 𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 𑀘𑀦𑁆𑀤𑀪𑀸𑀕𑀸𑀦𑀤𑀻, 𑀢𑀲𑁆𑀲𑀸 𑀘𑀦𑁆𑀤𑀪𑀸𑀕𑀸𑀦𑀤𑀺𑀬𑀸 𑀢𑀻𑀭𑁂 𑀲𑀼𑀲𑀼𑀫𑀸𑀭𑁄 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀼𑀲𑀼𑀫𑀸𑀭𑁄𑀢𑀺 𑀔𑀼𑀤𑁆𑀤𑀓𑀫𑀘𑁆𑀙𑀕𑀼𑀫𑁆𑀩𑁂 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑁄 𑀫𑀸𑀭𑁂𑀢𑀻𑀢𑀺 𑀲𑀼𑀲𑀼𑀫𑀸𑀭𑁄, 𑀘𑀡𑁆𑀟𑀫𑀘𑁆𑀙𑁄 𑀓𑀼𑀫𑁆𑀪𑀻𑀮𑁄𑀢𑀺 𑀅𑀢𑁆𑀣𑁄. 𑀲𑀪𑁄𑀚𑀦𑀧𑀲𑀼𑀢𑁄𑀳𑀦𑁆𑀢𑀺 𑀅𑀳𑀁 𑀲𑀪𑁄𑀚𑀦𑁂 𑀲𑀓𑀕𑁄𑀘𑀭𑁂 𑀧𑀲𑀼𑀢𑁄 𑀩𑁆𑀬𑀸𑀯𑀝𑁄. 𑀦𑀤𑀻𑀢𑀺𑀢𑁆𑀣𑀁 𑀅𑀕𑀘𑁆𑀙𑀳𑀦𑁆𑀢𑀺 𑀪𑀕𑀯𑀢𑁄 𑀆𑀕𑀫𑀦𑀓𑀸𑀮𑁂 𑀅𑀳𑀁 𑀦𑀤𑀻𑀢𑀺𑀢𑁆𑀣𑀁 𑀅𑀕𑀘𑁆𑀙𑀺𑀁 𑀧𑀢𑁆𑀢𑁄𑀫𑁆𑀳𑀺.

𑁧𑁭𑁦. 𑀲𑀺𑀤𑁆𑀥𑀢𑁆𑀣𑁄 𑀢𑀫𑁆𑀳𑀺 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀫𑀫 𑀢𑀺𑀢𑁆𑀣𑀕𑀫𑀦𑀓𑀸𑀮𑁂 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸 𑀅𑀕𑁆𑀕𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀢𑁆𑀢𑁂𑀲𑀼 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀲𑀬𑀫𑁆𑀪𑀽 𑀲𑀬𑀫𑁂𑀯 𑀪𑀽𑀢𑁄 𑀚𑀸𑀢𑁄 𑀩𑀼𑀤𑁆𑀥𑀪𑀽𑀢𑁄 𑀲𑁄 𑀪𑀕𑀯𑀸 𑀦𑀤𑀺𑀁 𑀢𑀭𑀺𑀢𑀼𑀓𑀸𑀫𑁄 𑀦𑀤𑀻𑀢𑀻𑀭𑀁 𑀉𑀧𑀸𑀕𑀫𑀺.

𑁧𑁭𑁨. 𑀧𑁂𑀢𑁆𑀢𑀺𑀓𑀁 𑀯𑀺𑀲𑀬𑀁 𑀫𑀬𑁆𑀳𑀦𑁆𑀢𑀺 𑀫𑀬𑁆𑀳𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀻𑀳𑀺 𑀧𑀭𑀫𑁆𑀧𑀭𑀸𑀦𑀻𑀢𑀁, 𑀬𑀤𑀺𑀤𑀁 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀫𑀳𑀸𑀦𑀼𑀪𑀸𑀯𑀸𑀦𑀁 𑀢𑀭𑀡𑀦𑁆𑀢𑀺 𑀅𑀢𑁆𑀣𑁄.

𑁧𑁭𑁩. 𑀫𑀫 𑀉𑀕𑁆𑀕𑀚𑁆𑀚𑀦𑀁 𑀲𑀼𑀢𑁆𑀯𑀸𑀢𑀺 𑀫𑀬𑁆𑀳𑀁 𑀉𑀕𑁆𑀕𑀚𑁆𑀚𑀦𑀁 𑀆𑀭𑀸𑀥𑀦𑀁 𑀲𑀼𑀢𑁆𑀯𑀸 𑀫𑀳𑀸𑀫𑀼𑀦𑀺 𑀪𑀕𑀯𑀸 𑀅𑀪𑀺𑀭𑀼𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀉𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀏𑀓𑀜𑁆𑀚𑀮𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀏𑀓𑀜𑁆𑀚𑀮𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀦𑀻𑀬𑁄 𑀳𑀼𑀢𑁆𑀯𑀸 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀯𑀲𑁂𑀦 𑀏𑀓𑀜𑁆𑀚𑀮𑀺𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁧𑁮𑁦. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀤𑀺𑀲𑁆𑀯𑀸 𑀉𑀤𑀸𑀦𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀧𑀲𑁆𑀲𑀺𑀁 𑀲𑀢𑁆𑀣𑀯𑀸𑀳𑀕𑁆𑀕𑀦𑁆𑀢𑀺 𑀯𑀸𑀡𑀺𑀚𑁂 𑀓𑀦𑁆𑀢𑀸𑀭𑀸 𑀯𑀳𑀢𑀺 𑀢𑀸𑀭𑁂𑀢𑀻𑀢𑀺 𑀲𑀢𑁆𑀣𑀯𑀸𑀳𑁄. 𑀯𑀸𑀴𑀓𑀦𑁆𑀢𑀸𑀭𑀸 𑀘𑁄𑀴𑀓𑀦𑁆𑀢𑀸𑀭𑀸 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀸 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀸 𑀬𑀓𑁆𑀔𑀓𑀦𑁆𑀢𑀸𑀭𑀸 𑀅𑀧𑁆𑀧𑀪𑀓𑁆𑀔𑀓𑀦𑁆𑀢𑀸𑀭𑀸 𑀘 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀓𑁄 𑀲𑁄? 𑀯𑀸𑀡𑀺𑀚𑀚𑁂𑀝𑁆𑀞𑀓𑁄. 𑀲𑀢𑁆𑀣𑀯𑀸𑀳𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. 𑀢𑀣𑀸 𑀳𑀺 𑀲𑁄 𑀢𑀺𑀯𑀺𑀥𑀁 𑀩𑁄𑀥𑀺𑀁 𑀧𑀢𑁆𑀣𑀬𑀦𑁆𑀢𑁂 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁂 𑀲𑀢𑁆𑀢𑁂 𑀚𑀸𑀢𑀺𑀓𑀦𑁆𑀢𑀸𑀭𑀸 𑀚𑀭𑀸𑀓𑀦𑁆𑀢𑀸𑀭𑀸 𑀩𑁆𑀬𑀸𑀥𑀺𑀓𑀦𑁆𑀢𑀸𑀭𑀸 𑀫𑀭𑀡𑀓𑀦𑁆𑀢𑀸𑀭𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀓𑀦𑁆𑀢𑀸𑀭𑀸 𑀘 𑀲𑀩𑁆𑀩𑀲𑁆𑀫𑀸 𑀲𑀁𑀲𑀸𑀭𑀓𑀦𑁆𑀢𑀸𑀭𑀸 𑀘 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀦𑀺𑀩𑁆𑀩𑀸𑀦𑀣𑀮𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀯𑀸𑀳𑁄 𑀘 𑀲𑁄 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀧𑀥𑀸𑀦𑁄 𑀘𑀸𑀢𑀺 𑀲𑀢𑁆𑀣𑀯𑀸𑀳𑀕𑁆𑀕𑁄, 𑀢𑀁 𑀲𑀢𑁆𑀣𑀯𑀸𑀳𑀕𑁆𑀕𑀁 𑀯𑀺𑀧𑀲𑁆𑀲𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀭𑀯𑀭𑀁 𑀯𑀺𑀦𑀸𑀬𑀓𑀦𑁆𑀢𑀺 𑀦𑀭𑀸𑀦𑀁 𑀅𑀦𑁆𑀢𑀭𑁂 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑁄𑀢𑀺 𑀦𑀭𑀯𑀻𑀭𑁄, 𑀢𑀁. 𑀯𑀺𑀲𑁂𑀲𑁂𑀦 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁂 𑀲𑀢𑁆𑀢𑁂 𑀦𑁂𑀢𑀺 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀸𑀧𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀢𑀁.

𑁧𑁮𑁧. 𑀅𑀤𑀦𑁆𑀢𑀤𑀫𑀦𑀁 𑀢𑀸𑀤𑀺𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀸𑀤𑀺𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺 𑀅𑀤𑀦𑁆𑀢𑁂 𑀲𑀢𑁆𑀢𑁂 𑀤𑀫𑁂𑀢𑀻𑀢𑀺 𑀅𑀤𑀦𑁆𑀢𑀤𑀫𑀦𑁄, 𑀢𑀁. 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁄𑀢𑀺 𑀢𑀸𑀤𑀻, 𑀢𑀁. 𑀫𑀳𑀸𑀯𑀸𑀤𑀺𑀁 𑀫𑀳𑀸𑀫𑀢𑀺𑀦𑁆𑀢𑀺 𑀲𑀓𑀲𑀫𑀬𑀧𑀭𑀲𑀫𑀬𑀯𑀸𑀤𑀻𑀦𑀁 𑀅𑀦𑁆𑀢𑀭𑁂 𑀅𑀢𑁆𑀢𑀦𑀸 𑀲𑀫𑀥𑀺𑀓𑀧𑀼𑀕𑁆𑀕𑀮𑀯𑀺𑀭𑀳𑀺𑀢𑀢𑁆𑀢𑀸 𑀫𑀳𑀸𑀯𑀸𑀤𑀻, 𑀫𑀳𑀢𑀻 𑀧𑀣𑀯𑀺𑀲𑀫𑀸𑀦𑀸 𑀫𑁂𑀭𑀼𑀲𑀫𑀸𑀦𑀸 𑀘 𑀫𑀢𑀺 𑀬𑀲𑁆𑀲 𑀲𑁄 𑀫𑀳𑀸𑀫𑀢𑀺, 𑀢𑀁 𑀫𑀳𑀸𑀯𑀸𑀤𑀺𑀁 𑀫𑀳𑀸𑀫𑀢𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀇𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀏𑀓𑀜𑁆𑀚𑀮𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀔𑁄𑀫𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀔𑁄𑀫𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑁄 𑀭𑀢𑀦𑀢𑁆𑀢𑀬𑀫𑀸𑀫𑀓𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀔𑁄𑀫𑀤𑀼𑀲𑁆𑀲𑁂𑀦 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑀤𑁂𑀯 𑀫𑀽𑀮𑀁 𑀓𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀙𑀲𑀼 𑀤𑁂𑀯𑁂𑀲𑀼 𑀅𑀧𑀭𑀸𑀧𑀭𑀁 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀅𑀦𑁂𑀓𑀯𑀺𑀥𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀭𑀺𑀧𑀸𑀓𑀕𑀢𑁂 𑀧𑀼𑀜𑁆𑀜𑀲𑀫𑁆𑀪𑀸𑀭𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀔𑁄𑀫𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁧𑁮𑁪. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀦𑁆𑀥𑀼 𑀯𑀼𑀘𑁆𑀘𑀢𑀺 𑀜𑀸𑀢𑀓𑁄, 𑀢𑁂 𑀩𑀦𑁆𑀥𑀽 𑀬𑀲𑁆𑀫𑀺𑀁 𑀦𑀕𑀭𑁂 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑀺𑀢𑀸 𑀯𑀲𑀦𑁆𑀢𑀺, 𑀢𑀁 𑀦𑀕𑀭𑀁 ‘‘𑀩𑀦𑁆𑀥𑀼𑀫𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀭𑁄𑀧𑁂𑀫𑀺 𑀩𑀻𑀚𑀲𑀫𑁆𑀧𑀤𑀦𑁆𑀢𑀺 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀩𑀻𑀚𑀲𑀫𑁆𑀧𑀢𑁆𑀢𑀺𑀁 𑀭𑁄𑀧𑁂𑀫𑀺 𑀧𑀝𑁆𑀞𑀧𑁂𑀫𑀻𑀢𑀺 𑀅𑀢𑁆𑀣𑁄.

𑀔𑁄𑀫𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀢𑀢𑀺𑀬𑀲𑁆𑀲 𑀲𑀼𑀪𑀽𑀢𑀺𑀯𑀕𑁆𑀕𑀲𑁆𑀲 𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀘𑀢𑀼𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀼𑀡𑁆𑀟𑀥𑀸𑀦𑀯𑀕𑁆𑀕𑁄

𑁧. 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀢𑁆𑀢𑀸𑀳𑀁 𑀧𑀝𑀺𑀲𑀮𑁆𑀮𑀻𑀦𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀢𑁆𑀢𑀦𑀬𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀧𑀺𑀜𑁆𑀚𑀭𑀁 𑀫𑀳𑀦𑁆𑀢𑀁 𑀓𑀤𑀮𑀺𑀨𑀮𑀓𑀡𑁆𑀡𑀺𑀓𑀁 𑀉𑀧𑀦𑁂𑀲𑀺, 𑀢𑀁 𑀪𑀕𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀏𑀓𑀸𑀤𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀘𑀢𑀼𑀯𑀻𑀲𑀢𑀺𑀯𑀸𑀭𑁂 𑀘 𑀭𑀸𑀚𑀸 𑀅𑀳𑁄𑀲𑀺 𑀘𑀓𑁆𑀓𑀯𑀢𑁆𑀢𑀻.

𑀲𑁄 𑀏𑀯𑀁 𑀅𑀧𑀭𑀸𑀧𑀭𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀪𑀼𑀫𑁆𑀫𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀘 𑀦𑀸𑀫 𑀦 𑀅𑀦𑁆𑀯𑀤𑁆𑀥𑀫𑀸𑀲𑀺𑀓𑁄 𑀉𑀧𑁄𑀲𑀣𑁄 𑀳𑁄𑀢𑀺. 𑀢𑀣𑀸 𑀳𑀺 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀙𑀩𑁆𑀩𑀲𑁆𑀲𑀦𑁆𑀢𑀭𑁂 𑀙𑀩𑁆𑀩𑀲𑁆𑀲𑀦𑁆𑀢𑀭𑁂 𑀉𑀧𑁄𑀲𑀣𑁄 𑀅𑀳𑁄𑀲𑀺, 𑀓𑀲𑁆𑀲𑀧𑀤𑀲𑀩𑀮𑁄 𑀧𑀦 𑀙𑀝𑁆𑀞𑁂 𑀙𑀝𑁆𑀞𑁂 𑀫𑀸𑀲𑁂 𑀧𑀸𑀢𑀺𑀫𑁄𑀓𑁆𑀔𑀁 𑀑𑀲𑀸𑀭𑁂𑀲𑀺, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀑𑀲𑀸𑀭𑀡𑀓𑀸𑀮𑁂 𑀤𑀺𑀲𑀸𑀯𑀸𑀲𑀺𑀓𑀸 𑀤𑁆𑀯𑁂 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 ‘‘𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀪𑀼𑀫𑁆𑀫𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀺 𑀅𑀢𑀺𑀯𑀺𑀬 𑀤𑀴𑁆𑀳𑀸, 𑀓𑀺𑀁 𑀦𑀼 𑀔𑁄 𑀪𑁂𑀤𑀓𑁂 𑀲𑀢𑀺 𑀪𑀺𑀚𑁆𑀚𑁂𑀬𑁆𑀬, 𑀦 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺. 𑀢𑁂𑀲𑀁 𑀑𑀓𑀸𑀲𑀁 𑀑𑀮𑁄𑀓𑀬𑀫𑀸𑀦𑀸 𑀢𑁂𑀲𑀁 𑀅𑀯𑀺𑀤𑀽𑀭𑁂 𑀕𑀘𑁆𑀙𑀢𑀺.

𑀅𑀣𑁂𑀓𑁄 𑀣𑁂𑀭𑁄 𑀏𑀓𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀲𑀭𑀻𑀭𑀯𑀴𑀜𑁆𑀚𑀦𑀢𑁆𑀣𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀥𑁄𑀢𑀳𑀢𑁆𑀣𑀧𑀸𑀤𑁄 𑀳𑀼𑀢𑁆𑀯𑀸 𑀕𑀼𑀫𑁆𑀩𑀲𑀫𑀻𑀧𑀢𑁄 𑀦𑀺𑀓𑁆𑀔𑀫𑀢𑀺. 𑀪𑀼𑀫𑁆𑀫𑀤𑁂𑀯𑀢𑀸 𑀢𑀲𑁆𑀲 𑀣𑁂𑀭𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀉𑀢𑁆𑀢𑀫𑀭𑀽𑀧𑀸 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀓𑁂𑀲𑁂 𑀯𑀺𑀥𑀼𑀦𑀺𑀢𑁆𑀯𑀸 𑀲𑀁𑀯𑀺𑀥𑀸𑀬 𑀩𑀦𑁆𑀥𑀦𑁆𑀢𑀻 𑀯𑀺𑀬 𑀧𑀺𑀝𑁆𑀞𑀺𑀬𑀁 𑀧𑀁𑀲𑀼𑀁 𑀧𑀼𑀜𑁆𑀙𑀫𑀸𑀦𑀸 𑀯𑀺𑀬 𑀲𑀸𑀝𑀓𑀁 𑀲𑀁𑀯𑀺𑀥𑀸𑀬 𑀦𑀺𑀯𑀸𑀲𑀬𑀫𑀸𑀦𑀸 𑀯𑀺𑀬 𑀘 𑀳𑀼𑀢𑁆𑀯𑀸 𑀣𑁂𑀭𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑀸 𑀳𑀼𑀢𑁆𑀯𑀸 𑀕𑀼𑀫𑁆𑀩𑀢𑁄 𑀦𑀺𑀓𑁆𑀔𑀦𑁆𑀢𑀸. 𑀏𑀓𑀫𑀦𑁆𑀢𑁂 𑀞𑀺𑀢𑁄 𑀲𑀳𑀸𑀬𑀓𑀢𑁆𑀣𑁂𑀭𑁄 𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸𑀯 𑀤𑁄𑀫𑀦𑀲𑁆𑀲𑀚𑀸𑀢𑁄 ‘‘𑀦𑀝𑁆𑀞𑁄 𑀤𑀸𑀦𑀺 𑀫𑁂 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀤𑀻𑀖𑀭𑀢𑁆𑀢𑀸𑀦𑀼𑀕𑀢𑁄 𑀲𑀺𑀦𑁂𑀳𑁄, 𑀲𑀘𑀸𑀳𑀁 𑀏𑀯𑀁𑀯𑀺𑀥𑀪𑀸𑀯𑀁 𑀚𑀸𑀦𑁂𑀬𑁆𑀬𑀁, 𑀏𑀢𑁆𑀢𑀓𑀁 𑀓𑀸𑀮𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀦 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁𑀬𑁂𑀯 𑀦𑀁 ‘‘𑀕𑀡𑁆𑀳𑀸𑀳𑀸𑀯𑀼𑀲𑁄, 𑀢𑀼𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁, 𑀢𑀸𑀤𑀺𑀲𑁂𑀦 𑀧𑀸𑀧𑁂𑀦 𑀲𑀤𑁆𑀥𑀺𑀁 𑀏𑀓𑀫𑀕𑁆𑀕𑁂𑀦 𑀦 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑁄 𑀳𑀤𑀬𑀁 𑀢𑀺𑀔𑀺𑀡𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀺𑀤𑁆𑀥𑀁 𑀯𑀺𑀬 𑀅𑀳𑁄𑀲𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀆𑀯𑀼𑀲𑁄, 𑀓𑀺𑀦𑁆𑀦𑀸𑀫𑁂𑀢𑀁 𑀯𑀤𑀲𑀺, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀼𑀓𑁆𑀓𑀝𑀫𑀢𑁆𑀢𑀫𑁆𑀧𑀺 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀫𑀺, 𑀢𑁆𑀯𑀁 𑀧𑀦 𑀫𑀁 𑀅𑀚𑁆𑀚 ‘𑀧𑀸𑀧𑁄’𑀢𑀺 𑀯𑀤𑀲𑀺, 𑀓𑀺𑀁 𑀢𑁂 𑀤𑀺𑀝𑁆𑀞𑀦𑁆𑀢𑀺, 𑀓𑀺𑀁 𑀅𑀜𑁆𑀜𑁂𑀦 𑀤𑀺𑀝𑁆𑀞𑁂𑀦, 𑀓𑀺𑀁 𑀢𑁆𑀯𑀁 𑀏𑀯𑀁𑀯𑀺𑀥𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑁂𑀢𑀁, 𑀆𑀯𑀼𑀲𑁄, 𑀫𑀬𑁆𑀳𑀁, 𑀦𑀸𑀳𑀁 𑀏𑀯𑀭𑀽𑀧𑀁 𑀫𑀸𑀢𑀼𑀕𑀸𑀫𑀁 𑀧𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀬𑀸𑀯𑀢𑀢𑀺𑀬𑀁 𑀓𑀣𑁂𑀦𑁆𑀢𑀲𑁆𑀲𑀸𑀧𑀺 𑀇𑀢𑀭𑁄 𑀣𑁂𑀭𑁄 𑀓𑀣𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁𑀬𑁂𑀯 𑀪𑀽𑀢𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀫𑀕𑁆𑀕𑁂𑀦 𑀅𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀇𑀢𑀭𑁄𑀧𑀺 𑀪𑀺𑀓𑁆𑀔𑀼 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁𑀬𑁂𑀯 𑀕𑀢𑁄.

𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀁 𑀧𑀯𑀺𑀲𑀦𑀯𑁂𑀮𑀸𑀬 𑀲𑁄 𑀪𑀺𑀓𑁆𑀔𑀼 𑀢𑀁 𑀪𑀺𑀓𑁆𑀔𑀼𑀁 𑀉𑀧𑁄𑀲𑀣𑀕𑁆𑀕𑁂 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀉𑀧𑁄𑀲𑀣𑀕𑁆𑀕𑁂 𑀏𑀯𑀭𑀽𑀧𑁄 𑀦𑀸𑀫 𑀧𑀸𑀧𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀦𑀸𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀸𑀲𑀺. 𑀅𑀣 𑀪𑀼𑀫𑁆𑀫𑀤𑁂𑀯𑀢𑀸 ‘‘𑀪𑀸𑀭𑀺𑀬𑀁 𑀫𑀬𑀸 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀫𑀳𑀮𑁆𑀮𑀓𑀉𑀧𑀸𑀲𑀓𑀯𑀡𑁆𑀡𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁄’’𑀢𑀺 𑀆𑀳. ‘‘𑀉𑀧𑀸𑀲𑀓, 𑀇𑀫𑀁 𑀉𑀧𑁄𑀲𑀣𑀕𑁆𑀕𑀁 𑀏𑀓𑁄 𑀧𑀸𑀧𑀪𑀺𑀓𑁆𑀔𑀼 𑀧𑀯𑀺𑀝𑁆𑀞𑁄, ‘𑀅𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀦 𑀓𑀭𑁄𑀫𑀻’𑀢𑀺 𑀩𑀳𑀺 𑀞𑀺𑀢𑁄𑀫𑁆𑀳𑀻’’𑀢𑀺. ‘‘𑀪𑀦𑁆𑀢𑁂, 𑀫𑀸 𑀏𑀯𑀁 𑀕𑀡𑁆𑀳𑀣, 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀏𑀲 𑀪𑀺𑀓𑁆𑀔𑀼, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀳𑀁. 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀻𑀫𑀁𑀲𑀦𑀢𑁆𑀣𑀸𑀬 ‘𑀤𑀴𑁆𑀳𑀸 𑀦𑀼 𑀔𑁄 𑀇𑀫𑁂𑀲𑀁 𑀣𑁂𑀭𑀸𑀦𑀁 𑀫𑁂𑀢𑁆𑀢𑀺, 𑀦𑁄 𑀤𑀴𑁆𑀳𑀸’𑀢𑀺 𑀪𑀺𑀚𑁆𑀚𑀦𑀸𑀪𑀺𑀚𑁆𑀚𑀦𑀪𑀸𑀯𑀁 𑀑𑀮𑁄𑀓𑁂𑀦𑁆𑀢𑁂𑀦 𑀢𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺. ‘‘𑀓𑁄 𑀧𑀦 𑀢𑁆𑀯𑀁, 𑀲𑀧𑁆𑀧𑀼𑀭𑀺𑀲𑀸’’𑀢𑀺? ‘‘𑀅𑀳𑀁 𑀏𑀓𑀸 𑀪𑀼𑀫𑁆𑀫𑀤𑁂𑀯𑀢𑀸, 𑀪𑀦𑁆𑀢𑁂’’𑀢𑀺. 𑀤𑁂𑀯𑀧𑀼𑀢𑁆𑀢𑁄 𑀓𑀣𑁂𑀦𑁆𑀢𑁄𑀬𑁂𑀯 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀧𑀢𑀺𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀔𑀫𑀣, 𑀣𑁂𑀭𑀲𑁆𑀲 𑀏𑀲𑁄 𑀤𑁄𑀲𑁄 𑀦𑀢𑁆𑀣𑀺, 𑀉𑀧𑁄𑀲𑀣𑀁 𑀓𑀭𑁄𑀣𑀸’’𑀢𑀺 𑀣𑁂𑀭𑀁 𑀬𑀸𑀘𑀺𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀲𑁄 𑀣𑁂𑀭𑁄 𑀉𑀧𑁄𑀲𑀣𑀁 𑀢𑀸𑀯 𑀏𑀓𑀝𑁆𑀞𑀸𑀦𑁂 𑀅𑀓𑀸𑀲𑀺. 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀧𑀦 𑀧𑀼𑀦 𑀢𑁂𑀦 𑀲𑀤𑁆𑀥𑀺𑀁 𑀦 𑀏𑀓𑀝𑁆𑀞𑀸𑀦𑁂 𑀯𑀲𑀺. 𑀇𑀫𑀲𑁆𑀲 𑀣𑁂𑀭𑀲𑁆𑀲 𑀤𑁄𑀲𑀁 𑀦 𑀓𑀣𑁂𑀲𑀺. 𑀅𑀧𑀭𑀪𑀸𑀕𑁂 𑀘𑀼𑀤𑀺𑀢𑀓𑀢𑁆𑀣𑁂𑀭𑁄 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀪𑀼𑀫𑁆𑀫𑀤𑁂𑀯𑀢𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀅𑀧𑀸𑀬𑀢𑁄 𑀦 𑀫𑀼𑀘𑁆𑀘𑀺𑀢𑁆𑀣. 𑀲𑀘𑁂 𑀧𑀦 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀓𑀢𑁄 𑀤𑁄𑀲𑁄 𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀢𑀺. 𑀲𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀥𑀸𑀦𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺. 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀓𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀇𑀢𑁆𑀣𑀻 𑀢𑀲𑁆𑀫𑀺𑀁 𑀕𑀸𑀫𑀁 𑀧𑀯𑀺𑀲𑀦𑁆𑀢𑁂 𑀲𑀤𑁆𑀥𑀺𑀁𑀬𑁂𑀯 𑀧𑀯𑀺𑀲𑀢𑀺, 𑀦𑀺𑀓𑁆𑀔𑀫𑀦𑁆𑀢𑁂 𑀦𑀺𑀓𑁆𑀔𑀫𑀢𑀺, 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁂𑀧𑀺 𑀲𑀤𑁆𑀥𑀺𑀁 𑀧𑀯𑀺𑀲𑀢𑀺, 𑀢𑀺𑀝𑁆𑀞𑀦𑁆𑀢𑁂𑀧𑀺 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀦𑀺𑀘𑁆𑀘𑀸𑀦𑀼𑀩𑀦𑁆𑀥𑀸 𑀧𑀜𑁆𑀜𑀸𑀬𑀢𑀺. 𑀣𑁂𑀭𑁄 𑀢𑀁 𑀦 𑀧𑀲𑁆𑀲𑀢𑀺. 𑀢𑀲𑁆𑀲 𑀧𑀦 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀸 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀲𑀺.

𑀕𑀸𑀫𑁂 𑀬𑀸𑀕𑀼𑀪𑀺𑀓𑁆𑀔𑀁 𑀤𑀤𑀫𑀸𑀦𑀸 𑀇𑀢𑁆𑀣𑀺𑀬𑁄, ‘‘𑀪𑀦𑁆𑀢𑁂, 𑀅𑀬𑀁 𑀏𑀓𑁄 𑀬𑀸𑀕𑀼𑀉𑀴𑀼𑀗𑁆𑀓𑁄 𑀢𑀼𑀫𑁆𑀳𑀸𑀓𑀁, 𑀏𑀓𑁄 𑀇𑀫𑀺𑀲𑁆𑀲𑀸 𑀅𑀫𑁆𑀳𑀸𑀓𑀁 𑀲𑀳𑀸𑀬𑀺𑀓𑀸𑀬𑀸’’𑀢𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀣𑁂𑀭𑀲𑁆𑀲 𑀫𑀳𑀢𑀻 𑀯𑀺𑀳𑁂𑀲𑀸 𑀳𑁄𑀢𑀺. 𑀯𑀺𑀳𑀸𑀭𑀕𑀢𑀫𑁆𑀧𑀺 𑀦𑀁 𑀲𑀸𑀫𑀡𑁂𑀭𑀸 𑀘𑁂𑀯 𑀤𑀳𑀭𑀪𑀺𑀓𑁆𑀔𑀽 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀥𑀸𑀦𑁄 𑀓𑁄𑀡𑁆𑀟𑁄 𑀚𑀸𑀢𑁄’’𑀢𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀅𑀣𑀲𑁆𑀲 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀓𑀼𑀡𑁆𑀟𑀥𑀸𑀦𑁄 𑀣𑁂𑀭𑁄𑀢𑀺 𑀦𑀸𑀫𑀁 𑀚𑀸𑀢𑀁. 𑀲𑁄 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀢𑁂𑀳𑀺 𑀓𑀭𑀺𑀬𑀫𑀸𑀦𑀁 𑀓𑁂𑀴𑀺𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀫𑁆𑀫𑀸𑀤𑀁 𑀕𑀳𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑁄𑀡𑁆𑀟𑀸, 𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀓𑁄𑀡𑁆𑀟𑁄, 𑀆𑀘𑀭𑀺𑀬𑁄 𑀓𑁄𑀡𑁆𑀟𑁄’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀼𑀡𑁆𑀟𑀥𑀸𑀦𑁄, 𑀪𑀦𑁆𑀢𑁂, 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀏𑀯𑀁 𑀨𑀭𑀼𑀲𑀯𑀸𑀘𑀁 𑀯𑀤𑀢𑀻’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀥𑀸𑀦, 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀨𑀭𑀼𑀲𑀯𑀸𑀘𑀁 𑀯𑀤𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑁂𑀦 ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 𑁋 ‘‘𑀓𑀲𑁆𑀫𑀸 𑀏𑀯𑀁 𑀯𑀤𑀲𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀦𑀺𑀩𑀤𑁆𑀥𑀁 𑀯𑀺𑀳𑁂𑀲𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀁 𑀓𑀣𑁂𑀫𑀻’’𑀢𑀺. ‘‘𑀢𑁆𑀯𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀬𑀸𑀯𑀚𑁆𑀚𑀤𑀺𑀯𑀲𑀸 𑀚𑀻𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀧𑀼𑀦 𑀏𑀯𑀁 𑀨𑀭𑀼𑀲𑀯𑀸𑀘𑀁 𑀫𑀸 𑀯𑀤 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀆𑀳 𑁋

‘‘𑀫𑀸𑀯𑁄𑀘 𑀨𑀭𑀼𑀲𑀁 𑀓𑀜𑁆𑀘𑀺, 𑀯𑀼𑀢𑁆𑀢𑀸 𑀧𑀝𑀺𑀯𑀤𑁂𑀬𑁆𑀬𑀼 𑀢𑀁;

𑀤𑀼𑀓𑁆𑀔𑀸 𑀳𑀺 𑀲𑀸𑀭𑀫𑁆𑀪𑀓𑀣𑀸, 𑀧𑀝𑀺𑀤𑀡𑁆𑀟𑀸 𑀨𑀼𑀲𑁂𑀬𑁆𑀬𑀼 𑀢𑀁.

‘‘𑀲𑀘𑁂 𑀦𑁂𑀭𑁂𑀲𑀺 𑀅𑀢𑁆𑀢𑀸𑀦𑀁, 𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸;

𑀏𑀲 𑀧𑀢𑁆𑀢𑁄𑀲𑀺 𑀦𑀺𑀩𑁆𑀩𑀸𑀦𑀁, 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺. (𑀥. 𑀧. 𑁧𑁩𑁩-𑁧𑁩𑁪) 𑁋

𑀇𑀫𑀜𑁆𑀘 𑀧𑀦 𑀢𑀲𑁆𑀲 𑀣𑁂𑀭𑀲𑁆𑀲 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀯𑀺𑀘𑀭𑀡𑀪𑀸𑀯𑀁 𑀓𑁄𑀲𑀮𑀭𑀜𑁆𑀜𑁄𑀧𑀺 𑀓𑀣𑀬𑀺𑀁𑀲𑀼. 𑀭𑀸𑀚𑀸 ‘‘𑀕𑀘𑁆𑀙𑀣, 𑀪𑀡𑁂, 𑀦𑀁 𑀯𑀻𑀫𑀁𑀲𑀣𑀸’’𑀢𑀺 𑀧𑁂𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀫𑀦𑁆𑀤𑁂𑀦𑁂𑀯 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 𑀲𑀽𑀘𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑀸𑀧𑀺 𑀇𑀢𑁆𑀣𑀻 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀞𑀺𑀢𑀸 𑀯𑀺𑀬 𑀧𑀜𑁆𑀜𑀸𑀬𑀢𑀺.

𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺 𑀢𑀁 𑀓𑀸𑀭𑀡’’𑀦𑁆𑀢𑀺 𑀢𑀲𑁆𑀲𑀸 𑀞𑀺𑀢𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑀸 𑀢𑀲𑁆𑀫𑀺𑀁 𑀆𑀕𑀘𑁆𑀙𑀦𑁆𑀢𑁂 𑀣𑁂𑀭𑀲𑁆𑀲 𑀯𑀲𑀦𑀧𑀡𑁆𑀡𑀲𑀸𑀮𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀏𑀯 𑀧𑀡𑁆𑀡𑀲𑀸𑀮𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀑𑀮𑁄𑀓𑁂𑀦𑁆𑀢𑁄 𑀅𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀫𑀸𑀢𑀼𑀕𑀸𑀫𑁄, 𑀣𑁂𑀭𑀲𑁆𑀲 𑀏𑀓𑁄 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 𑀧𑀞𑀫𑀁 𑀣𑁂𑀭𑀲𑁆𑀲 𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄𑀧𑀺 𑀣𑁂𑀭𑀁 𑀅𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀽𑀢𑀪𑀸𑀯𑀁 𑀜𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣𑀸’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀯𑀝𑁆𑀝𑀢𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. ‘‘𑀚𑀸𑀦𑀸𑀫𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀓𑀣𑀁, 𑀏𑀯𑀭𑀽𑀧𑁂𑀦𑀼𑀧𑀓𑁆𑀓𑀺𑀮𑁂𑀲𑁂𑀦 𑀲𑀤𑁆𑀥𑀺𑀁 𑀘𑀭𑀦𑁆𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀓𑁂 𑀦𑀸𑀫 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀯𑁄 𑀓𑀢𑁆𑀣𑀘𑀺 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀳𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀦𑀺𑀩𑀤𑁆𑀥𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀺. 𑀣𑁂𑀭𑁄 𑀭𑀸𑀚𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀁 𑀮𑀪𑀺𑀢𑁆𑀯𑀸 𑀪𑁄𑀚𑀦𑀲𑀧𑁆𑀧𑀸𑀬𑁂𑀦 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀇𑀢𑁆𑀣𑀻 𑀅𑀦𑁆𑀢𑀭𑀥𑀸𑀬𑀺.

𑀢𑀤𑀸 𑀫𑀳𑀸𑀲𑀼𑀪𑀤𑁆𑀤𑀸 𑀉𑀕𑁆𑀕𑀦𑀕𑀭𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂 𑀯𑀲𑀫𑀸𑀦𑀸 ‘‘𑀲𑀢𑁆𑀣𑀸 𑀫𑀁 𑀅𑀦𑀼𑀓𑀫𑁆𑀧𑀢𑀽’’𑀢𑀺 𑀉𑀧𑁄𑀲𑀣𑀗𑁆𑀕𑀁 𑀅𑀥𑀺𑀝𑁆𑀞𑀸𑀬 𑀦𑀺𑀭𑀸𑀫𑀕𑀦𑁆𑀥𑀸 𑀳𑀼𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀢𑀮𑁂 𑀞𑀺𑀢𑀸 ‘‘𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀅𑀦𑁆𑀢𑀭𑁂 𑀅𑀝𑁆𑀞𑀢𑁆𑀯𑀸 𑀤𑀲𑀩𑀮𑀲𑁆𑀲 𑀫𑀢𑁆𑀣𑀓𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀼, 𑀤𑀲𑀩𑀮𑁄 𑀇𑀫𑀸𑀬 𑀲𑀜𑁆𑀜𑀸𑀬 𑀲𑁆𑀯𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀼𑀫𑀦𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀼𑀧𑁆𑀨𑀸𑀦𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀲𑀢𑁆𑀣𑀼 𑀫𑀢𑁆𑀣𑀓𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 𑀢𑀁 𑀲𑀼𑀫𑀦𑀧𑀼𑀧𑁆𑀨𑀯𑀺𑀢𑀸𑀦𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀲𑀼𑀪𑀤𑁆𑀤𑀸𑀬 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀦𑀦𑁆𑀤, 𑀫𑀬𑀁 𑀅𑀚𑁆𑀚 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀸𑀫, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀤𑀢𑁆𑀯𑀸 𑀅𑀭𑀺𑀬𑀸𑀦𑀁𑀬𑁂𑀯 𑀲𑀮𑀸𑀓𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀚𑁆𑀚 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀢𑀺. 𑀧𑀼𑀣𑀼𑀚𑁆𑀚𑀦𑀸 𑀫𑀸 𑀕𑀡𑁆𑀳𑀦𑁆𑀢𑀼, 𑀅𑀭𑀺𑀬𑀸𑀯 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺. 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑁋 ‘‘𑀆𑀳𑀭𑀸𑀯𑀼𑀲𑁄, 𑀲𑀮𑀸𑀓’’𑀦𑁆𑀢𑀺 𑀧𑀞𑀫𑀁𑀬𑁂𑀯 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀆𑀦𑀦𑁆𑀤𑁄 ‘‘𑀲𑀢𑁆𑀣𑀸 𑀢𑀸𑀤𑀺𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀮𑀸𑀓𑀁 𑀦 𑀤𑀸𑀧𑁂𑀢𑀺, 𑀅𑀭𑀺𑀬𑀸𑀦𑀁𑀬𑁂𑀯 𑀤𑀸𑀧𑁂𑀢𑀻’’𑀢𑀺 𑀯𑀺𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀲𑀮𑀸𑀓𑀁 𑀤𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀓𑀼𑀡𑁆𑀟𑀥𑀸𑀦𑀲𑁆𑀲 𑀲𑀮𑀸𑀓𑀸 𑀤𑀸𑀢𑀼𑀁 𑀦 𑀬𑀼𑀢𑁆𑀢𑀸, 𑀅𑀣 𑀲𑀢𑁆𑀣𑀸 𑀧𑀝𑀺𑀩𑀸𑀳𑁂𑀬𑁆𑀬, 𑀪𑀯𑀺𑀲𑁆𑀲𑀢𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 ‘‘𑀓𑀼𑀡𑁆𑀟𑀥𑀸𑀦𑀲𑁆𑀲 𑀲𑀮𑀸𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺. 𑀓𑀼𑀡𑁆𑀟𑀥𑀸𑀦𑁄 𑀢𑀲𑁆𑀲 𑀧𑀼𑀭𑀸𑀕𑀫𑀦𑀸 𑀏𑀯 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀆𑀳𑀭𑀸𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀣𑀸 𑀫𑀁 𑀚𑀸𑀦𑀸𑀢𑀺, 𑀫𑀸𑀤𑀺𑀲𑀁 𑀪𑀺𑀓𑁆𑀔𑀼𑀁 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀁 𑀦 𑀲𑀢𑁆𑀣𑀸 𑀯𑀸𑀭𑁂𑀢𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀲𑀮𑀸𑀓𑀁 𑀕𑀡𑁆𑀳𑀺. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀬𑀲𑁆𑀫𑀸 𑀅𑀬𑀁 𑀣𑁂𑀭𑁄 𑀭𑀸𑀚𑀸𑀦𑀁 𑀉𑀧𑀢𑁆𑀣𑀫𑁆𑀪𑀁 𑀮𑀪𑀺𑀢𑁆𑀯𑀸 𑀲𑀧𑁆𑀧𑀸𑀬𑀸𑀳𑀸𑀭𑀧𑀝𑀺𑀮𑀸𑀪𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀏𑀯𑀁𑀪𑀽𑀢𑀲𑁆𑀲𑀸𑀧𑀺 𑀇𑀫𑀲𑁆𑀲 𑀣𑁂𑀭𑀲𑁆𑀲 𑀕𑀼𑀡𑁂 𑀅𑀚𑀸𑀦𑀦𑁆𑀢𑀸 𑀬𑁂 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 ‘‘𑀅𑀬𑀁 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑁂𑀲𑀁 𑀢𑀁 𑀯𑀺𑀫𑀢𑀺𑀯𑀺𑀥𑀫𑀦𑀢𑁆𑀣𑀁 𑀣𑁂𑀭𑁄 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀧𑀜𑁆𑀘 𑀙𑀺𑀦𑁆𑀤𑁂’’𑀢𑀺 𑀕𑀸𑀣𑀁 𑀅𑀪𑀸𑀲𑀺.

𑁧. 𑀏𑀯𑀁 𑀲𑁄 𑀧𑀽𑀭𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀼𑀭𑀽𑀧𑁂𑀦 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀢𑀸𑀳𑀁 𑀧𑀝𑀺𑀲𑀮𑁆𑀮𑀻𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑁆𑀣𑀸𑀳𑀁 𑀲𑀢𑁆𑀢𑀤𑀺𑀯𑀲𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀧𑀝𑀺𑀲𑀮𑁆𑀮𑀻𑀦𑀁 𑀯𑀺𑀯𑁂𑀓𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀲𑀸𑀕𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑁄𑀪𑀺𑀢𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀸𑀕𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀦𑀸𑀫𑁂𑀦 𑀲𑁄𑀪𑀺𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄. 𑀲𑁄 𑀏𑀓𑀤𑀺𑀯𑀲𑀁 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀲𑁄𑀪𑀫𑀸𑀦𑀁 𑀉𑀬𑁆𑀬𑀸𑀦𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑀻𑀯 𑀧𑀲𑀦𑁆𑀦𑀫𑀸𑀦𑀲𑁄 𑀅𑀦𑁂𑀓𑁂𑀳𑀺 𑀉𑀧𑀸𑀬𑁂𑀳𑀺 𑀅𑀦𑁂𑀓𑁂𑀳𑀺 𑀕𑀼𑀡𑀯𑀡𑁆𑀡𑁂𑀳𑀺 𑀣𑁄𑀫𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀣𑁄𑀫𑀦𑀁 𑀲𑀼𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀸𑀕𑀢𑁄 𑀦𑀸𑀫 𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀡𑀁 𑀅𑀤𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀓𑀧𑁆𑀧𑀲𑀢𑀲𑀳𑀲𑁆𑀲𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑁄𑀫𑀦𑀲𑁆𑀲𑀁 𑀯𑀟𑁆𑀠𑁂𑀦𑁆𑀢𑁄 𑀲𑀼𑀚𑀸𑀢𑁄 𑀆𑀕𑀢𑁄𑀢𑀺 𑀲𑀸𑀕𑀢𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄.

𑁧𑁭. 𑀏𑀯𑀁 𑀲𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀼𑀭𑀽𑀧𑁂𑀦 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑁄𑀪𑀺𑀢𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀤𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀧𑀭𑀺𑀧𑀽𑀭𑀡𑀲𑀫𑀬𑁂 𑀦𑀸𑀫𑁂𑀦 𑀲𑁄𑀪𑀺𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧. 𑀯𑀺𑀧𑀣𑀸 𑀉𑀤𑁆𑀥𑀭𑀺𑀢𑁆𑀯𑀸𑀦𑀸𑀢𑀺 𑀯𑀺𑀭𑀼𑀤𑁆𑀥𑀧𑀣𑀸 𑀓𑀼𑀫𑀕𑁆𑀕𑀸, 𑀉𑀧𑁆𑀧𑀣𑀸 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸. 𑀧𑀣𑀁 𑀆𑀘𑀺𑀓𑁆𑀔𑀲𑁂𑀢𑀺, 𑀪𑀦𑁆𑀢𑁂, 𑀲𑀩𑁆𑀩𑀜𑁆𑀜𑀼 𑀢𑀼𑀯𑀁 𑀧𑀣𑀁 𑀲𑀧𑁆𑀧𑀼𑀭𑀺𑀲𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀦𑀼𑀧𑀸𑀬𑀁 𑀆𑀘𑀺𑀓𑁆𑀔𑀲𑁂 𑀓𑀣𑁂𑀲𑀺 𑀤𑁂𑀲𑁂𑀲𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀺𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀸𑀕𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀦𑀸𑀣𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀘𑁆𑀘𑀸𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀚𑁆𑀚𑀸𑀥𑀭𑁄 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀡𑀺𑀓𑀸𑀭𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀅𑀓𑀸𑀲𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑀁 𑀤𑀲𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀬 𑀧𑀽𑀚𑀁 𑀓𑀢𑁆𑀯𑀸 ‘‘𑀪𑀕𑀯𑀸 𑀫𑀬𑁆𑀳𑀁 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀭𑀁 𑀅𑀓𑀸𑀲𑀺. 𑀢𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀚𑁆𑀚𑁂𑀦𑀺𑀬𑀁 𑀭𑀜𑁆𑀜𑁄 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀢𑁆𑀢𑀦𑁄 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀓𑀜𑁆𑀘𑀦𑀫𑀸𑀡𑀯𑁄𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀪𑀺. 𑀲𑁄 𑀕𑁄𑀢𑁆𑀢𑀯𑀲𑁂𑀦 𑀓𑀘𑁆𑀘𑀸𑀦𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣.

𑀭𑀸𑀚𑀸 𑀘𑀡𑁆𑀟𑀧𑀚𑁆𑀚𑁄𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀲𑀼𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀇𑀥𑀸𑀦𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀅𑀢𑁆𑀢𑀝𑁆𑀞𑀫𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀕𑀢𑁄. 𑀢𑀲𑁆𑀲 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀲𑀢𑁆𑀢𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀲𑀳𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂 𑀢𑀸𑀯𑀤𑁂𑀯 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀓𑁂𑀲𑀫𑀲𑁆𑀲𑀼𑀓𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀏𑀯𑀁 𑀣𑁂𑀭𑁄 𑀲𑀤𑀢𑁆𑀣𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀯𑀦𑁆𑀤𑀺𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀇𑀘𑁆𑀙𑀢𑀻’’𑀢𑀺 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑁆𑀯𑀁𑀬𑁂𑀯 𑀪𑀺𑀓𑁆𑀔𑀼 𑀢𑀢𑁆𑀣 𑀕𑀘𑁆𑀙, 𑀢𑀬𑀺 𑀕𑀢𑁂𑀧𑀺 𑀭𑀸𑀚𑀸 𑀧𑀲𑀻𑀤𑀺𑀲𑁆𑀲𑀢𑀻’’𑀢𑀺 𑀆𑀳. 𑀣𑁂𑀭𑁄 𑀅𑀢𑁆𑀢𑀝𑁆𑀞𑀫𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑀸𑀤𑁂𑀢𑁆𑀯𑀸 𑀅𑀯𑀦𑁆𑀢𑀻𑀲𑀼 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀕𑀢𑁄.

𑁩𑁧. 𑀏𑀯𑀁 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁭) 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀦𑀸𑀣𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀼𑀫𑀁 𑀦𑀸𑀫 𑀘𑁂𑀢𑀺𑀬𑀦𑁆𑀢𑀺 𑀧𑀤𑀼𑀫𑁂𑀳𑀺 𑀙𑀸𑀤𑀺𑀢𑀢𑁆𑀢𑀸 𑀯𑀸 𑀧𑀤𑀼𑀫𑀸𑀓𑀸𑀭𑁂𑀳𑀺 𑀓𑀢𑀢𑁆𑀢𑀸 𑀯𑀸 𑀪𑀕𑀯𑀢𑁄 𑀯𑀲𑀦𑀕𑀦𑁆𑀥𑀓𑀼𑀝𑀺𑀯𑀺𑀳𑀸𑀭𑁄𑀯 𑀧𑀽𑀚𑀦𑀻𑀬𑀪𑀸𑀯𑁂𑀦 𑀘𑁂𑀢𑀺𑀬𑀁, 𑀬𑀣𑀸 ‘‘𑀕𑁄𑀢𑀫𑀓𑀘𑁂𑀢𑀺𑀬𑀁, 𑀆𑀴𑀯𑀓𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀬𑀓𑁆𑀔𑀸𑀦𑀁 𑀦𑀺𑀯𑀲𑀦𑀝𑁆𑀞𑀸𑀦𑀁 𑀧𑀽𑀚𑀦𑀻𑀬𑀝𑁆𑀞𑀸𑀦𑀢𑁆𑀢𑀸 𑀘𑁂𑀢𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀁 𑀪𑀕𑀯𑀢𑁄 𑀯𑀲𑀦𑀝𑁆𑀞𑀸𑀦𑀁 𑀘𑁂𑀢𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀥𑀸𑀢𑀼𑀦𑀺𑀥𑀸𑀬𑀓𑀘𑁂𑀢𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀽𑀦𑀁 𑀅𑀪𑀸𑀯𑀸 𑀥𑀸𑀢𑀼𑀘𑁂𑀢𑀺𑀬𑀁 𑀅𑀓𑀭𑀺. 𑀲𑀺𑀮𑀸𑀲𑀦𑀁 𑀓𑀸𑀭𑀬𑀺𑀢𑁆𑀯𑀸𑀢𑀺 𑀢𑀲𑁆𑀲𑀸 𑀧𑀤𑀼𑀫𑀦𑀸𑀫𑀺𑀓𑀸𑀬 𑀕𑀦𑁆𑀥𑀓𑀼𑀝𑀺𑀬𑀸 𑀧𑀼𑀧𑁆𑀨𑀸𑀥𑀸𑀭𑀢𑁆𑀣𑀸𑀬 𑀳𑁂𑀝𑁆𑀞𑀸 𑀨𑀮𑀺𑀓𑀫𑀬𑀁 𑀲𑀺𑀮𑀸𑀲𑀦𑀁 𑀓𑀸𑀭𑁂𑀢𑁆𑀯𑀸. 𑀲𑀼𑀯𑀡𑁆𑀡𑁂𑀦𑀸𑀪𑀺𑀮𑁂𑀧𑀬𑀺𑀦𑁆𑀢𑀺 𑀢𑀁 𑀲𑀺𑀮𑀸𑀲𑀦𑀁 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑁂𑀦 𑀅𑀪𑀺𑀯𑀺𑀲𑁂𑀲𑁂𑀦 𑀮𑁂𑀧𑀬𑀺𑀁 𑀙𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁨. 𑀭𑀢𑀦𑀸𑀫𑀬𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀓𑀢𑀁 𑀙𑀢𑁆𑀢𑀁 𑀧𑀕𑁆𑀕𑀬𑁆𑀳 𑀫𑀼𑀤𑁆𑀥𑀦𑀺 𑀥𑀸𑀭𑁂𑀢𑁆𑀯𑀸 𑀯𑀸𑀴𑀩𑀻𑀚𑀦𑀺𑀜𑁆𑀘 𑀲𑁂𑀢𑀧𑀯𑀭𑀘𑀸𑀫𑀭𑀺𑀜𑁆𑀘 𑀧𑀕𑁆𑀕𑀬𑁆𑀳 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁. 𑀮𑁄𑀓𑀩𑀦𑁆𑀥𑀼𑀲𑁆𑀲 𑀢𑀸𑀤𑀺𑀦𑁄𑀢𑀺 𑀲𑀓𑀮𑀮𑁄𑀓𑀩𑀦𑁆𑀥𑀼𑀲𑀤𑀺𑀲𑀲𑁆𑀲 𑀢𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀲𑁆𑀲 𑀩𑀼𑀤𑁆𑀥𑀲𑁆𑀲 𑀥𑀸𑀭𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀚𑁆𑀚𑀁 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺.

𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀅𑀫𑀘𑁆𑀘𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑀁𑀬𑁂𑀯 𑀚𑀸𑀢𑁄𑀢𑀺 𑀢𑀁 𑀤𑀺𑀯𑀲𑀁𑀬𑁂𑀯 𑀦𑀁 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀢𑁆𑀣𑀸𑀬 𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀩𑁄𑀥𑀺𑀭𑀼𑀓𑁆𑀔𑁄, 𑀭𑀸𑀳𑀼𑀮𑀫𑀸𑀢𑀸, 𑀘𑀢𑁆𑀢𑀸𑀭𑁄 𑀦𑀺𑀥𑀻, 𑀆𑀭𑁄𑀳𑀦𑀳𑀢𑁆𑀣𑀻, 𑀅𑀲𑁆𑀲𑀓𑀡𑁆𑀟𑀓𑁄, 𑀆𑀦𑀦𑁆𑀤𑁄, 𑀙𑀦𑁆𑀦𑁄, 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑁂 𑀲𑀢𑁆𑀢 𑀏𑀓𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀲𑀳𑀚𑀸𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀲𑀓𑀮𑀦𑀕𑀭𑀲𑁆𑀲 𑀉𑀤𑀕𑁆𑀕𑀘𑀺𑀢𑁆𑀢𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀉𑀤𑀸𑀬𑀺𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀣𑁄𑀓𑀁 𑀓𑀸𑀴𑀥𑀸𑀢𑀼𑀓𑀢𑁆𑀢𑀸 𑀧𑀦 𑀓𑀸𑀴𑀼𑀤𑀸𑀬𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀼𑀤𑁆𑀥𑀺𑀁 𑀅𑀕𑀫𑀸𑀲𑀺.

𑀅𑀧𑀭𑀪𑀸𑀕𑁂 𑀮𑁄𑀓𑀦𑀸𑀣𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀏𑀓𑀁 𑀅𑀫𑀘𑁆𑀘𑀁 ‘‘𑀧𑀼𑀢𑁆𑀢𑀁 𑀫𑁂 𑀇𑀥𑀸𑀦𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑁂 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀩𑁆𑀩𑁂 𑀢𑀗𑁆𑀔𑀡𑀜𑁆𑀜𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀭𑀺𑀬𑀸 𑀫𑀚𑁆𑀛𑀢𑁆𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦𑀁 𑀤𑀲𑀩𑀮𑀲𑁆𑀲 𑀦 𑀓𑀣𑁂𑀲𑀺. 𑀭𑀸𑀚𑀸 ‘‘𑀦𑁂𑀯 𑀕𑀢𑁄 𑀆𑀕𑀘𑁆𑀙𑀢𑀺, 𑀦 𑀲𑀸𑀲𑀦𑀁 𑀲𑀼𑀬𑁆𑀬𑀢𑀻’’𑀢𑀺 𑀅𑀧𑀭𑀁 𑀅𑀫𑀘𑁆𑀘𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀫𑁆𑀧𑀺 𑀢𑀣𑀸 𑀧𑀝𑀺𑀧𑀦𑁆𑀦𑁂 𑀅𑀧𑀭𑀫𑁆𑀧𑀺 𑀧𑁂𑀲𑁂𑀲𑀻𑀢𑀺 𑀏𑀯𑀁 𑀦𑀯𑀳𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀦𑀯 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁆𑀢𑀓𑀸 𑀚𑀦𑀸 𑀫𑀬𑀺 𑀲𑀺𑀦𑁂𑀳𑀸𑀪𑀸𑀯𑁂𑀦 𑀤𑀲𑀩𑀮𑀲𑁆𑀲 𑀇𑀥𑀸𑀕𑀫𑀦𑀢𑁆𑀣𑀸𑀬 𑀦 𑀓𑀺𑀜𑁆𑀘𑀺 𑀓𑀣𑀬𑀺𑀁𑀲𑀼, 𑀅𑀬𑀁 𑀔𑁄 𑀉𑀤𑀸𑀬𑀺 𑀤𑀲𑀩𑀮𑁂𑀦 𑀲𑀫𑀯𑀬𑁄, 𑀲𑀳𑀧𑀁𑀲𑀼𑀓𑀻𑀴𑀺𑀓𑁄, 𑀫𑀬𑀺 𑀘 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀇𑀫𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀇𑀥𑀸𑀦𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀲𑀺. 𑀲𑁄 𑀧𑀦 𑀕𑀘𑁆𑀙𑀦𑁆𑀢𑁄 ‘‘𑀲𑀘𑀸𑀳𑀁, 𑀤𑁂𑀯, 𑀧𑀩𑁆𑀩𑀚𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀇𑀥𑀸𑀦𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀤𑀲𑁆𑀲𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀯𑁂𑀮𑀸𑀬𑀁 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 ‘‘𑀦 𑀢𑀸𑀯𑀸𑀬𑀁 𑀤𑀲𑀩𑀮𑀲𑁆𑀲 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀓𑀸𑀮𑁄, 𑀯𑀲𑀦𑁆𑀢𑁂 𑀧𑀦 𑀉𑀧𑀕𑀢𑁂 𑀧𑀼𑀧𑁆𑀨𑀺𑀢𑁂 𑀯𑀦𑀲𑀡𑁆𑀟𑁂 𑀳𑀭𑀺𑀢𑀢𑀺𑀡𑀲𑀜𑁆𑀙𑀦𑁆𑀦𑀸𑀬 𑀪𑀽𑀫𑀺𑀬𑀸 𑀕𑀫𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁄 𑀯𑀲𑀦𑁆𑀢𑁂 𑀲𑀫𑁆𑀧𑀢𑁆𑀢𑁂 𑀲𑀢𑁆𑀣𑀼 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀕𑀫𑀦𑀫𑀕𑁆𑀕𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑁋

‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬;

𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀪𑀸𑀕𑀻 𑀭𑀣𑀸𑀦𑀁.

‘‘𑀤𑀼𑀫𑀸𑀦𑀺 𑀨𑀼𑀮𑁆𑀮𑀸𑀦𑀺 𑀫𑀦𑁄𑀭𑀫𑀸𑀦𑀺, 𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸 𑀧𑀯𑀦𑁆𑀢𑀺;

𑀧𑀢𑁆𑀢𑀁 𑀧𑀳𑀸𑀬 𑀨𑀮𑀫𑀸𑀲𑀲𑀸𑀦𑀸, 𑀓𑀸𑀮𑁄 𑀇𑀢𑁄 𑀧𑀓𑁆𑀓𑀫𑀦𑀸𑀬 𑀯𑀻𑀭.

‘‘𑀦𑁂𑀯𑀸𑀢𑀺𑀲𑀻𑀢𑀁 𑀦 𑀧𑀦𑀸𑀢𑀺𑀉𑀡𑁆𑀳𑀁, 𑀲𑀼𑀔𑀸 𑀉𑀢𑀼 𑀅𑀤𑁆𑀥𑀦𑀺𑀬𑀸 𑀪𑀤𑀦𑁆𑀢𑁂;

𑀧𑀲𑁆𑀲𑀦𑁆𑀢𑀼 𑀢𑀁 𑀲𑀸𑀓𑀺𑀬𑀸 𑀓𑁄𑀴𑀺𑀬𑀸 𑀘, 𑀧𑀘𑁆𑀙𑀸𑀫𑀼𑀔𑀁 𑀭𑁄𑀳𑀺𑀦𑀺𑀬𑀁 𑀢𑀭𑀦𑁆𑀢𑀁.

‘‘𑀆𑀲𑀸𑀬 𑀓𑀲𑀢𑁂 𑀔𑁂𑀢𑁆𑀢𑀁, 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀺;

𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀺, 𑀲𑀫𑀼𑀤𑁆𑀤𑀁 𑀥𑀦𑀳𑀸𑀭𑀓𑀸;

𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀺, 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀼. (𑀣𑁂𑀭𑀕𑀸. 𑁫𑁨𑁭-𑁫𑁩𑁦);

‘‘𑀦𑀸𑀢𑀺𑀲𑀻𑀢𑀁 𑀦𑀸𑀢𑀺𑀉𑀡𑁆𑀳𑀁, 𑀦𑀸𑀢𑀺𑀤𑀼𑀩𑁆𑀪𑀺𑀓𑁆𑀔𑀙𑀸𑀢𑀓𑀁;

𑀲𑀤𑁆𑀤𑀮𑀸 𑀳𑀭𑀺𑀢𑀸 𑀪𑀽𑀫𑀺, 𑀏𑀲 𑀓𑀸𑀮𑁄 𑀫𑀳𑀸𑀫𑀼𑀦𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁨𑁫);

‘‘𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀧𑀼𑀦𑀧𑁆𑀧𑀼𑀦𑀁 𑀥𑀜𑁆𑀜𑀫𑀼𑀧𑁂𑀢𑀺 𑀭𑀝𑁆𑀞𑀁.

‘‘𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑀓𑀸 𑀘𑀭𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑁆𑀧𑀢𑀻 𑀤𑀤𑀦𑁆𑀢𑀺;

𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑁆𑀧𑀢𑀻 𑀤𑀤𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀁.

‘‘𑀯𑀻𑀭𑁄 𑀳𑀯𑁂 𑀲𑀢𑁆𑀢𑀬𑀼𑀕𑀁 𑀧𑀼𑀦𑁂𑀢𑀺, 𑀬𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄;

𑀫𑀜𑁆𑀜𑀸𑀫𑀳𑀁 𑀲𑀓𑁆𑀓𑀢𑀺 𑀤𑁂𑀯𑀤𑁂𑀯𑁄, 𑀢𑀬𑀸 𑀳𑀺 𑀚𑀸𑀢𑁄 𑀫𑀼𑀦𑀺 𑀲𑀘𑁆𑀘𑀦𑀸𑀫𑁄.

‘‘𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀧𑀺𑀢𑀸 𑀫𑀳𑁂𑀲𑀺𑀦𑁄, 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸 𑀧𑀦 𑀫𑀸𑀬𑀦𑀸𑀫𑀸;

𑀬𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀬 𑀓𑀼𑀘𑁆𑀙𑀺𑀦𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀢𑀺𑀤𑀺𑀯𑀫𑁆𑀳𑀺 𑀫𑁄𑀤𑀢𑀺.

‘‘𑀲𑀸 𑀕𑁄𑀢𑀫𑀻 𑀓𑀸𑀮𑀓𑀢𑀸 𑀇𑀢𑁄 𑀘𑀼𑀢𑀸, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀲𑀸 𑀫𑁄𑀤𑀢𑀺 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺, 𑀧𑀭𑀺𑀯𑀸𑀭𑀺𑀢𑀸 𑀤𑁂𑀯𑀕𑀡𑁂𑀳𑀺 𑀢𑁂𑀳𑀻’’𑀢𑀺. (𑀣𑁂𑀭𑀕𑀸. 𑁫𑁩𑁧-𑁫𑁩𑁫);

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀅𑀗𑁆𑀕𑀸𑀭𑀺𑀦𑁄𑀢𑀺 𑀅𑀗𑁆𑀕𑀸𑀭𑀸𑀦𑀺 𑀯𑀺𑀬𑀸𑀢𑀺 𑀅𑀗𑁆𑀕𑀸𑀭𑀸𑀦𑀺. 𑀅𑀗𑁆𑀕𑀸𑀭𑀸𑀦𑀺 𑀭𑀢𑁆𑀢𑀧𑀯𑀸𑀴𑀯𑀡𑁆𑀡𑀸𑀦𑀺 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀸𑀦𑀺, 𑀢𑀸𑀦𑀺 𑀏𑀢𑁂𑀲𑀁 𑀲𑀦𑁆𑀢𑀻𑀢𑀺 𑀅𑀗𑁆𑀕𑀸𑀭𑀺𑀦𑁄, 𑀅𑀪𑀺𑀮𑁄𑀳𑀺𑀢𑀓𑀼𑀲𑀼𑀫𑀓𑀺𑀲𑀮𑀬𑁂𑀳𑀺 𑀅𑀗𑁆𑀕𑀸𑀭𑀯𑀼𑀝𑁆𑀞𑀺𑀲𑀫𑁆𑀧𑀭𑀺𑀓𑀺𑀡𑁆𑀡𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀤𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂. 𑀤𑀼𑀫𑀸𑀢𑀺 𑀭𑀼𑀓𑁆𑀔𑀸. 𑀪𑀤𑀦𑁆𑀢𑁂𑀢𑀺 𑀪𑀤𑁆𑀤𑀁 𑀅𑀦𑁆𑀢𑁂 𑀏𑀢𑀲𑁆𑀲𑀸𑀢𑀺, ‘‘𑀪𑀤𑀦𑁆𑀢𑁂’’𑀢𑀺 𑀏𑀓𑀲𑁆𑀲 𑀤-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄, 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀜𑁆𑀘 𑀅𑀕𑁆𑀕𑀪𑀽𑀢𑁄 𑀲𑀢𑁆𑀣𑀸. 𑀢𑀲𑁆𑀫𑀸, 𑀪𑀤𑀦𑁆𑀢𑁂𑀢𑀺 𑀲𑀢𑁆𑀣𑀼 𑀆𑀮𑀧𑀦𑀫𑁂𑀯, 𑀧𑀘𑁆𑀘𑀢𑁆𑀢𑀯𑀘𑀦𑀜𑁆𑀘𑁂𑀢𑀁 𑀏𑀓𑀸𑀭𑀦𑁆𑀢𑀁 ‘‘𑀲𑀼𑀕𑀢𑁂 𑀧𑀝𑀺𑀓𑀫𑁆𑀫𑁂 𑀲𑀼𑀔𑁂 𑀤𑀼𑀓𑁆𑀔𑁂 𑀚𑀻𑀯𑁂’’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀥 𑀧𑀦 𑀲𑀫𑁆𑀩𑁄𑀥𑀦𑀝𑁆𑀞𑁂 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁, ‘‘𑀪𑀤𑀦𑁆𑀢𑁂𑀢𑀺 𑀆𑀮𑀧𑀦’’𑀦𑁆𑀢𑀺. ‘‘𑀪𑀤𑁆𑀤𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀧𑀤𑀦𑁆𑀢𑀭𑀫𑁂𑀓’’𑀦𑁆𑀢𑀺 𑀓𑁂𑀘𑀺. 𑀨𑀮𑀸𑀦𑀺 𑀏𑀲𑀦𑁆𑀢𑀻𑀢𑀺 𑀨𑀮𑁂𑀲𑀺𑀦𑁄. 𑀅𑀘𑁂𑀢𑀦𑁂𑀧𑀺 𑀳𑀺 𑀲𑀘𑁂𑀢𑀦𑀓𑀺𑀭𑀺𑀬𑀁 𑀆𑀳. 𑀏𑀯𑀁 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀪𑀕𑀯𑀸 𑀢𑀢𑁆𑀣 𑀕𑀫𑀦𑁂 𑀩𑀳𑀽𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀁 𑀤𑀺𑀲𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀢𑁄 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀓𑀧𑀺𑀮𑀯𑀢𑁆𑀣𑀼𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀣𑁂𑀭𑁄 𑀇𑀤𑁆𑀥𑀺𑀬𑀸 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀆𑀓𑀸𑀲𑁂 𑀞𑀺𑀢𑁄𑀯 𑀅𑀤𑀺𑀝𑁆𑀞𑀧𑀼𑀩𑁆𑀩𑀯𑁂𑀲𑀁 𑀤𑀺𑀲𑁆𑀯𑀸 𑀭𑀜𑁆𑀜𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀅𑀫𑀘𑁆𑀘𑀧𑀼𑀢𑁆𑀢𑀁 𑀢𑀬𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑀁 𑀫𑀁 𑀦 𑀚𑀸𑀦𑀸𑀲𑀺, 𑀢𑁆𑀯𑀁 𑀏𑀯𑀁 𑀧𑀦 𑀚𑀸𑀦𑀸𑀳𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀺 𑀲𑀓𑁆𑀓, 𑀥𑀫𑁆𑀫𑁂𑀦 𑀫𑁂 𑀕𑁄𑀢𑀫 𑀅𑀬𑁆𑀬𑀓𑁄𑀲𑀻’’𑀢𑀺. (𑀣𑁂𑀭𑀕𑀸. 𑁫𑁩𑁬) 𑁋

𑀕𑀸𑀣𑀫𑀸𑀳.

𑀢𑀢𑁆𑀣 𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀑𑀭𑀲𑁆𑀲 𑀧𑀼𑀢𑁆𑀢𑁄 𑀅𑀫𑁆𑀳𑀺. 𑀅𑀲𑀬𑁆𑀳𑀲𑀸𑀳𑀺𑀦𑁄𑀢𑀺 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀞𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀁 𑀅𑀜𑁆𑀜𑁂𑀳𑀺 𑀲𑀳𑀺𑀢𑀼𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀬𑁆𑀳𑀲𑁆𑀲 𑀲𑀓𑀮𑀲𑁆𑀲 𑀩𑁄𑀥𑀺𑀲𑀫𑁆𑀪𑀸𑀭𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀸𑀥𑀺𑀓𑀸𑀭𑀲𑁆𑀲 𑀘 𑀲𑀳𑀦𑀢𑁄 𑀯𑀳𑀦𑀢𑁄, 𑀢𑀢𑁄 𑀧𑀭𑀫𑁆𑀧𑀺 𑀅𑀜𑁆𑀜𑁂𑀳𑀺 𑀲𑀳𑀺𑀢𑀼𑀁 𑀅𑀪𑀺𑀪𑀯𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀬𑁆𑀳𑀸𑀦𑀁 𑀧𑀜𑁆𑀘𑀦𑁆𑀦𑀁 𑀫𑀸𑀭𑀸𑀦𑀁 𑀲𑀳𑀦𑀢𑁄 𑀅𑀪𑀺𑀪𑀯𑀦𑀢𑁄, 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀯𑀺𑀪𑀸𑀕𑀸𑀯𑀩𑁄𑀥𑀦𑁂𑀦 𑀬𑀣𑀸𑀭𑀳𑀁 𑀯𑁂𑀦𑁂𑀬𑁆𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀅𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑁂𑀳𑀺 𑀅𑀲𑀬𑁆𑀳𑀲𑁆𑀲 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲 𑀲𑀳𑀦𑀢𑁄, 𑀢𑀢𑁆𑀣 𑀯𑀸 𑀲𑀸𑀥𑀼𑀓𑀸𑀭𑀺𑀪𑀸𑀯𑀢𑁄 𑀅𑀲𑀬𑁆𑀳𑀲𑀸𑀳𑀺𑀦𑁄. 𑀅𑀗𑁆𑀕𑀻𑀭𑀲𑀲𑁆𑀲𑀸𑀢𑀺 𑀅𑀗𑁆𑀕𑀻𑀓𑀢𑀲𑀻𑀮𑀸𑀤𑀺𑀲𑀫𑁆𑀧𑀢𑁆𑀢𑀺𑀓𑀲𑁆𑀲. 𑀅𑀗𑁆𑀕𑀫𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀡𑀓𑀑𑀪𑀸𑀲𑀲𑁆𑀲𑀸𑀢𑀺 𑀅𑀧𑀭𑁂. 𑀓𑁂𑀘𑀺 𑀧𑀦 ‘‘𑀅𑀗𑁆𑀕𑀻𑀭𑀲𑁄, 𑀲𑀺𑀤𑁆𑀥𑀢𑁆𑀣𑁄𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀧𑀺𑀢𑀭𑀸𑀬𑁂𑀯 𑀕𑀳𑀺𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑁆𑀧𑀝𑀺𑀫𑀲𑁆𑀲𑀸𑀢𑀺 𑀅𑀦𑀽𑀧𑀫𑀲𑁆𑀲. 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀦𑁄. 𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀻𑀢𑀺 𑀅𑀭𑀺𑀬𑀚𑀸𑀢𑀺𑀯𑀲𑁂𑀦 𑀫𑀬𑁆𑀳𑀁 𑀧𑀺𑀢𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀮𑁄𑀓𑀯𑁄𑀳𑀸𑀭𑁂𑀦 𑀢𑁆𑀯𑀁 𑀧𑀺𑀢𑀸 𑀅𑀲𑀺. 𑀲𑀓𑁆𑀓𑀸𑀢𑀺 𑀚𑀸𑀢𑀺𑀯𑀲𑁂𑀦 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀲𑀪𑀸𑀯𑁂𑀦 𑀅𑀭𑀺𑀬𑀚𑀸𑀢𑀺 𑀮𑁄𑀓𑀺𑀬𑀚𑀸𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀚𑀸𑀢𑀻𑀦𑀁 𑀲𑀪𑀸𑀯𑀲𑀫𑁄𑀥𑀸𑀦𑁂𑀦. 𑀕𑁄𑀢𑀫𑀸𑀢𑀺 𑀭𑀸𑀚𑀸𑀦𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀅𑀬𑁆𑀬𑀓𑁄𑀲𑀻𑀢𑀺 𑀧𑀺𑀢𑀸𑀫𑀳𑁄 𑀅𑀲𑀺. 𑀏𑀢𑁆𑀣 𑀘 ‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄 𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀏𑀯𑀁 𑀧𑀦 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁂𑀦 𑀭𑀜𑁆𑀜𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀲𑁆𑀲 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑁂 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀕𑀦𑁆𑀢𑀼𑀓𑀸𑀫𑀢𑁆𑀣, 𑀪𑀼𑀜𑁆𑀚𑀣𑀸’’𑀢𑀺 𑀘 𑀯𑀼𑀢𑁆𑀢𑁂, ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀳𑀁 𑀧𑀦 𑀲𑀢𑁆𑀣𑀸’’𑀢𑀺? ‘‘𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄’’𑀢𑀺. ‘‘𑀢𑀼𑀫𑁆𑀳𑁂 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀣, 𑀅𑀜𑁆𑀜𑀁 𑀪𑀕𑀯𑀢𑁄 𑀳𑀭𑀺𑀲𑁆𑀲𑀣. 𑀬𑀸𑀯 𑀘 𑀫𑀫 𑀧𑀼𑀢𑁆𑀢𑁄 𑀇𑀫𑀁 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀢𑀸𑀯𑀲𑁆𑀲 𑀇𑀢𑁄 𑀧𑀺𑀡𑁆𑀟𑀧𑀸𑀢𑀁 𑀳𑀭𑀣𑀸’’𑀢𑀺 𑀯𑀼𑀢𑁆𑀢𑁂 𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀧𑀭𑀺𑀲𑀸𑀬 𑀘 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀼 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀓𑀮𑀭𑀸𑀚𑀦𑀺𑀯𑁂𑀲𑀦𑀁 𑀭𑀢𑀦𑀢𑁆𑀢𑀬𑁂 𑀅𑀪𑀺𑀧𑁆𑀧𑀲𑀦𑁆𑀦𑀁 𑀓𑀭𑁄𑀦𑁆𑀢𑁄 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀲𑀢𑁆𑀣𑀼 𑀆𑀳𑀭𑀺𑀢𑀩𑁆𑀩𑀪𑀢𑁆𑀢𑀧𑀼𑀡𑁆𑀡𑀁 𑀧𑀢𑁆𑀢𑀁 𑀆𑀓𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑀢𑁆𑀣𑀸 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀏𑀯𑀁 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀪𑀕𑀯𑀢𑁄 𑀭𑀸𑀚𑀕𑁂𑀳𑀢𑁄𑀬𑁂𑀯 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀣 𑀦𑀁 𑀪𑀕𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀧𑀺𑀢𑀼𑀦𑁄 𑀲𑀓𑀮𑀦𑀺𑀯𑁂𑀲𑀦𑀁 𑀧𑀲𑀸𑀤𑁂𑀢𑀻’’𑀢𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀤𑀺𑀤𑀁 𑀓𑀸𑀴𑀼𑀤𑀸𑀬𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁫) 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁪𑁮-𑁯. 𑀏𑀯𑀁 𑀲𑁄 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀼𑀭𑀽𑀧𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀅𑀧𑀭𑀭𑀝𑁆𑀞𑀁 𑀕𑀫𑀦𑀢𑁆𑀣𑀸𑀬 𑀤𑀽𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲. 𑀘𑀭𑀢𑁄 𑀘𑀸𑀭𑀺𑀓𑀁 𑀢𑀤𑀸𑀢𑀺 𑀅𑀦𑁆𑀢𑁄𑀫𑀡𑁆𑀟𑀮𑀁 𑀫𑀚𑁆𑀛𑁂𑀫𑀡𑁆𑀟𑀮𑀁 𑀩𑀳𑀺𑀫𑀡𑁆𑀟𑀮𑀦𑁆𑀢𑀺 𑀢𑀻𑀡𑀺 𑀫𑀡𑁆𑀟𑀮𑀸𑀦𑀺 𑀢𑀤𑀸 𑀘𑀸𑀭𑀺𑀓𑀁 𑀘𑀭𑀢𑁄 𑀘𑀭𑀦𑁆𑀢𑀲𑁆𑀲 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀼𑀨𑀼𑀮𑁆𑀮𑀁 𑀲𑀼𑀝𑁆𑀞𑀼 𑀨𑀼𑀮𑁆𑀮𑀁 𑀧𑀩𑁄𑀥𑀺𑀢𑀁 𑀕𑀬𑁆𑀳 𑀕𑀳𑁂𑀢𑁆𑀯𑀸 𑀦 𑀓𑁂𑀯𑀮𑀫𑁂𑀯 𑀧𑀤𑀼𑀫𑀁, 𑀉𑀧𑁆𑀧𑀮𑀜𑁆𑀘 𑀫𑀮𑁆𑀮𑀺𑀓𑀁 𑀯𑀺𑀓𑀲𑀺𑀢𑀁 𑀅𑀳𑀁 𑀕𑀬𑁆𑀳 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀧𑀽𑀭𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀫𑀦𑁆𑀦𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀧𑀭𑀫𑀁 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀫𑀥𑀼𑀭𑀁 𑀲𑀩𑁆𑀩𑀲𑀼𑀧𑀓𑁆𑀓𑀁 𑀲𑀸𑀮𑀺𑀑𑀤𑀦𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼𑀦𑁄 𑀅𑀤𑀸𑀲𑀺𑀁 𑀪𑁄𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁯𑁭. 𑀲𑀓𑁆𑀬𑀸𑀦𑀁 𑀦𑀦𑁆𑀤𑀺𑀚𑀦𑀦𑁄𑀢𑀺 𑀲𑀓𑁆𑀬𑀭𑀸𑀚𑀓𑀼𑀮𑀸𑀦𑀁 𑀪𑀕𑀯𑀢𑁄 𑀜𑀸𑀢𑀻𑀦𑀁 𑀆𑀭𑁄𑀳𑀧𑀭𑀺𑀡𑀸𑀳𑀭𑀽𑀧𑀬𑁄𑀩𑁆𑀩𑀦𑀯𑀘𑀦𑀸𑀮𑀧𑀦𑀲𑀫𑁆𑀧𑀢𑁆𑀢𑀺𑀬𑀸 𑀦𑀦𑁆𑀤𑀁 𑀢𑀼𑀝𑁆𑀞𑀺𑀁 𑀚𑀦𑁂𑀦𑁆𑀢𑁄 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀻𑀢𑀺 𑀜𑀸𑀢𑁄 𑀧𑀸𑀓𑀝𑁄 𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀫𑁄𑀖𑀭𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑁄𑀖𑀭𑀸𑀚𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀆𑀓𑀗𑁆𑀔𑀦𑁆𑀢𑁄 𑀧𑀡𑀺𑀥𑀸𑀦𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀧𑀼𑀦 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀚𑁆𑀚𑀸𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀏𑀓𑀤𑀺𑀯𑀲𑀁 𑀅𑀢𑁆𑀣𑀤𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀭𑀣𑀺𑀬𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 ‘‘𑀬𑀸𑀯𑀢𑀸 𑀭𑀽𑀧𑀺𑀦𑁄 𑀲𑀢𑁆𑀣𑀸’’𑀢𑀺𑀆𑀤𑀻𑀳𑀺 𑀙𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀫𑀥𑀼𑀁 𑀉𑀧𑀦𑁂𑀲𑀺. 𑀲𑀢𑁆𑀣𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀪𑀕𑀯𑀢𑁄 𑀓𑀸𑀮𑁂 𑀓𑀝𑁆𑀞𑀯𑀸𑀳𑀦𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀫𑀘𑁆𑀘𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀢𑁂𑀦 𑀲𑀢𑁆𑀣𑀼 𑀆𑀦𑀬𑀦𑀢𑁆𑀣𑀸𑀬 𑀧𑁂𑀲𑀺𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑁄𑀖𑀭𑀸𑀚𑀸𑀢𑀺 𑀮𑀤𑁆𑀥𑀦𑀸𑀫𑁄 𑀩𑀸𑀯𑀭𑀻𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀲𑀁𑀯𑁂𑀕𑀚𑀸𑀢𑁄 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀸𑀧𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀚𑀺𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑁄 𑀢𑁂𑀲𑀁 𑀧𑀦𑁆𑀦𑀭𑀲𑀫𑁄 𑀳𑀼𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑀢𑁆𑀣𑀮𑀽𑀔𑀁 𑀲𑀼𑀢𑁆𑀢𑀮𑀽𑀔𑀁 𑀭𑀚𑀦𑀮𑀽𑀔𑀦𑁆𑀢𑀺 𑀯𑀺𑀲𑁂𑀲𑁂𑀦 𑀢𑀺𑀯𑀺𑀥𑁂𑀦𑀧𑀺 𑀮𑀽𑀔𑁂𑀦 𑀲𑀫𑀦𑁆𑀦𑀸𑀕𑀢𑀁 𑀧𑀁𑀲𑀼𑀓𑀽𑀮𑀁 𑀥𑀸𑀭𑁂𑀲𑀺. 𑀢𑁂𑀦 𑀦𑀁 𑀲𑀢𑁆𑀣𑀸 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁬𑁪. 𑀏𑀯𑀁 𑀲𑁄 𑀧𑀡𑀺𑀥𑀸𑀦𑀸𑀦𑀼𑀭𑀽𑀧𑁂𑀦 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀲𑀫𑁆𑀪𑀸𑀭𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁭𑁩. 𑀧𑀼𑀝𑀓𑀁 𑀧𑀽𑀭𑀬𑀺𑀢𑁆𑀯𑀸𑀦𑀸𑀢𑀺 𑀧𑀼𑀝𑀓𑀁 𑀯𑀼𑀘𑁆𑀘𑀢𑀺 𑀯𑀸𑀭𑀓𑀁, 𑀖𑀝𑀁 𑀯𑀸. 𑀅𑀦𑁂𑀴𑀓𑀁 𑀦𑀺𑀤𑁆𑀤𑁄𑀲𑀁 𑀫𑀓𑁆𑀔𑀺𑀓𑀡𑁆𑀟𑀯𑀺𑀭𑀳𑀺𑀢𑀁 𑀔𑀼𑀤𑁆𑀤𑀫𑀥𑀼𑀦𑀸 𑀖𑀝𑀁 𑀧𑀽𑀭𑁂𑀢𑁆𑀯𑀸 𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳 𑀧𑀓𑀸𑀭𑁂𑀦 𑀆𑀤𑀭𑁂𑀦 𑀕𑀳𑁂𑀢𑁆𑀯𑀸 𑀫𑀳𑁂𑀲𑀺𑀦𑁄 𑀪𑀕𑀯𑀢𑁄 𑀉𑀧𑀦𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀫𑁄𑀖𑀭𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸). 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀫𑁆𑀳𑀺 𑀮𑁄𑀓𑀦𑀸𑀣𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀘𑁆𑀙𑀽𑀳𑀺 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀲𑀦𑁆𑀢𑀺𑀧𑀤𑀁 𑀧𑀡𑀺𑀥𑁂𑀲𑀺. 𑀲𑁄 𑀢𑀢𑁄 𑀘𑀼𑀢𑁄 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁮𑁪. 𑀏𑀯𑀁 𑀓𑀢𑀲𑀫𑁆𑀪𑀸𑀭𑀯𑀲𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀮𑀲𑀼𑀡𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀮𑀲𑀼𑀡𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀏𑀲𑁄𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀯𑀦𑁂 𑀯𑀲𑀦𑁆𑀢𑁄 𑀩𑀳𑀽𑀦𑀺 𑀮𑀲𑀼𑀡𑀸𑀦𑀺 𑀭𑁄𑀧𑁂𑀢𑁆𑀯𑀸 𑀢𑀤𑁂𑀯 𑀯𑀦𑀫𑀽𑀮𑀨𑀮𑀜𑁆𑀘 𑀔𑀸𑀤𑀦𑁆𑀢𑁄 𑀯𑀺𑀳𑀸𑀲𑀺. 𑀲𑁄 𑀩𑀳𑀽𑀦𑀺 𑀮𑀲𑀼𑀡𑀸𑀦𑀺 𑀓𑀸𑀚𑁂𑀦𑀸𑀤𑀸𑀬 𑀫𑀦𑀼𑀲𑁆𑀲𑀧𑀣𑀁 𑀆𑀳𑀭𑀺𑀢𑁆𑀯𑀸 𑀧𑀲𑀦𑁆𑀦𑁄 𑀤𑀸𑀦𑀁 𑀤𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀤𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀁 𑀲𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑁂𑀦𑁂𑀯 𑀧𑀼𑀜𑁆𑀜𑀩𑀮𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀓𑀫𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀧𑁆𑀧𑀦𑁆𑀦𑁄 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀧𑀼𑀩𑁆𑀩𑀓𑀫𑁆𑀫𑀯𑀲𑁂𑀦 𑀮𑀲𑀼𑀡𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁮𑁯. 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺𑀫𑀸𑀮𑀬𑀧𑀩𑁆𑀩𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀫𑀦𑀼𑀲𑁆𑀲𑀸𑀦𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑁂 𑀬𑀤𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀉𑀤𑀧𑀸𑀤𑀺, 𑀢𑀤𑀸 𑀅𑀳𑀁 𑀢𑀸𑀧𑀲𑁄 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀲𑀼𑀡𑀁 𑀉𑀧𑀚𑀻𑀯𑀸𑀫𑀻𑀢𑀺 𑀭𑀢𑁆𑀢𑀮𑀲𑀼𑀡𑀁 𑀭𑁄𑀧𑁂𑀢𑁆𑀯𑀸 𑀢𑀤𑁂𑀯 𑀕𑁄𑀘𑀭𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀲𑀼𑀡𑀁 𑀫𑀬𑁆𑀳𑀪𑁄𑀚𑀦’’𑀦𑁆𑀢𑀺.

𑁯𑁦. 𑀔𑀸𑀭𑀺𑀬𑁄 𑀧𑀽𑀭𑀬𑀺𑀢𑁆𑀯𑀸𑀦𑀸𑀢𑀺 𑀢𑀸𑀧𑀲𑀪𑀸𑀚𑀦𑀸𑀦𑀺 𑀮𑀲𑀼𑀡𑁂𑀦 𑀧𑀽𑀭𑀬𑀺𑀢𑁆𑀯𑀸 𑀓𑀸𑀚𑁂𑀦𑀸𑀤𑀸𑀬 𑀲𑀗𑁆𑀖𑀸𑀭𑀸𑀫𑀁 𑀲𑀗𑁆𑀖𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀳𑁂𑀫𑀦𑁆𑀢𑀸𑀤𑀻𑀲𑀼 𑀢𑀻𑀲𑀼 𑀓𑀸𑀮𑁂𑀲𑀼 𑀲𑀗𑁆𑀖𑀲𑁆𑀲 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀯𑀲𑀦𑀯𑀺𑀳𑀸𑀭𑀁 𑀅𑀕𑀘𑁆𑀙𑀺𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀳𑀁 𑀲𑀦𑁆𑀢𑀼𑀝𑁆𑀞𑁄 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀲𑀗𑁆𑀖𑀲𑁆𑀲 𑀮𑀲𑀼𑀡𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁯𑁧. 𑀯𑀺𑀧𑀲𑁆𑀲𑀺𑀲𑁆𑀲…𑀧𑁂… 𑀦𑀺𑀭𑀢𑀲𑁆𑀲𑀳𑀦𑁆𑀢𑀺 𑀦𑀭𑀸𑀦𑀁 𑀅𑀕𑁆𑀕𑀲𑁆𑀲 𑀲𑁂𑀝𑁆𑀞𑀲𑁆𑀲 𑀅𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀦𑀺𑀭𑀢𑁄 𑀦𑀺𑀲𑁆𑀲𑁂𑀲𑁂𑀦 𑀭𑀢𑁄 𑀅𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀲𑁆𑀲…𑀧𑁂… 𑀫𑁄𑀤𑀳𑀦𑁆𑀢𑀺 𑀅𑀳𑀁 𑀲𑀗𑁆𑀖𑀲𑁆𑀲 𑀮𑀲𑀼𑀡𑀤𑀸𑀦𑀁 𑀤𑀢𑁆𑀯𑀸 𑀲𑀕𑁆𑀕𑀫𑁆𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀆𑀬𑀼𑀓𑀧𑁆𑀧𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀫𑁄𑀤𑀺𑀁, 𑀲𑀦𑁆𑀢𑀼𑀝𑁆𑀞𑁄 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀮𑀲𑀼𑀡𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀆𑀬𑀸𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀆𑀬𑀸𑀕𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀯𑀟𑁆𑀠𑀓𑀻𑀦𑀁 𑀫𑀽𑀮𑀁 𑀤𑀢𑁆𑀯𑀸 𑀅𑀢𑀺𑀫𑀦𑁄𑀳𑀭𑀁 𑀤𑀻𑀖𑀁 𑀪𑁄𑀚𑀦𑀲𑀸𑀮𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀪𑁄𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀯𑀲𑁂𑀦 𑀆𑀬𑀸𑀕𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁯𑁪. 𑀏𑀯𑀁 𑀲𑁄 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀯𑀲𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀩𑁆𑀩𑀼𑀢𑁂𑀢𑀺 𑀯𑀤𑀢𑀁 ‘‘𑀫𑀬𑀁 𑀩𑀼𑀤𑁆𑀥𑀸’’𑀢𑀺 𑀯𑀤𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀯𑀭𑁂 𑀉𑀢𑁆𑀢𑀫𑁂 𑀲𑀺𑀔𑀺𑀫𑁆𑀳𑀺 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀅𑀢𑁆𑀣𑁄. 𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀲𑀤𑁆𑀥𑀢𑀸𑀬 𑀳𑀝𑁆𑀞𑀧𑀳𑀝𑁆𑀞𑁄 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀘𑀺𑀢𑁆𑀢𑀢𑀸𑀬 𑀧𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀉𑀢𑁆𑀢𑀫𑀁 𑀣𑀽𑀧𑀁 𑀲𑁂𑀝𑁆𑀞𑀁 𑀘𑁂𑀢𑀺𑀬𑀁 𑀅𑀯𑀦𑁆𑀤𑀺𑀁 𑀧𑀡𑀸𑀫𑀬𑀺𑀦𑁆𑀢𑀺 𑀅𑀢𑁆𑀣𑁄.

𑁯𑁫. 𑀯𑀟𑁆𑀠𑀓𑀻𑀳𑀺 𑀓𑀣𑀸𑀧𑁂𑀢𑁆𑀯𑀸𑀢𑀺 ‘‘𑀪𑁄𑀚𑀦𑀲𑀸𑀮𑀸𑀬 𑀧𑀫𑀸𑀡𑀁 𑀓𑀺𑀢𑁆𑀢𑀓’’𑀦𑁆𑀢𑀺 𑀧𑀫𑀸𑀡𑀁 𑀓𑀣𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀽𑀮𑀁 𑀤𑀢𑁆𑀯𑀸𑀦𑀳𑀁 𑀢𑀤𑀸𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀳𑀁 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀢𑁂𑀲𑀁 𑀯𑀟𑁆𑀠𑀓𑀻𑀦𑀁 𑀫𑀽𑀮𑀁 𑀤𑀢𑁆𑀯𑀸 𑀆𑀬𑀸𑀕𑀁 𑀆𑀬𑀢𑀁 𑀤𑀻𑀖𑀁 𑀪𑁄𑀚𑀦𑀲𑀸𑀮𑀁 𑀅𑀳𑀁 𑀲𑀦𑁆𑀢𑀼𑀝𑁆𑀞𑁄 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀓𑀸𑀭𑀧𑁂𑀲𑀳𑀁 𑀓𑀸𑀭𑀸𑀧𑁂𑀲𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑁯𑁭. 𑀆𑀬𑀸𑀕𑀲𑁆𑀲 𑀇𑀤𑀁 𑀨𑀮𑀦𑁆𑀢𑀺 𑀪𑁄𑀚𑀦𑀲𑀸𑀮𑀤𑀸𑀦𑀲𑁆𑀲 𑀇𑀤𑀁 𑀯𑀺𑀧𑀸𑀓𑀦𑁆𑀢𑀺 𑀅𑀢𑁆𑀣𑁄.

𑀆𑀬𑀸𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀥𑀫𑁆𑀫𑀘𑀓𑁆𑀓𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀥𑀫𑁆𑀫𑀘𑀓𑁆𑀓𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑀺𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀫𑀳𑀸𑀪𑁄𑀕𑁄, 𑀲𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑀤𑁆𑀥𑀸𑀚𑀸𑀢𑁄 𑀥𑀫𑁆𑀫𑀲𑀪𑀸𑀬𑀁 𑀥𑀫𑁆𑀫𑀸𑀲𑀦𑀲𑁆𑀲 𑀧𑀺𑀝𑁆𑀞𑀺𑀢𑁄 𑀭𑀢𑀦𑀫𑀬𑀁 𑀥𑀫𑁆𑀫𑀘𑀓𑁆𑀓𑀁 𑀓𑀸𑀭𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂𑀲𑀼 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀓𑀫𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀉𑀧𑁆𑀧𑀦𑁆𑀦𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀜𑁆𑀚𑀸𑀢𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀦𑀸𑀫𑀲𑀤𑀺𑀲𑀦𑀸𑀫𑁂𑀦 𑀥𑀫𑁆𑀫𑀘𑀓𑁆𑀓𑀺𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀚𑀸𑀢𑁄 𑀅𑀳𑁄𑀲𑀺.

𑁧𑁦𑁨. 𑀲𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀼𑀭𑀽𑀧𑁂𑀦 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀲𑀻𑀳𑀸𑀲𑀦𑀲𑁆𑀲 𑀲𑀫𑁆𑀫𑀼𑀔𑀸𑀢𑀺 𑀲𑀻𑀳𑀲𑁆𑀲 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀲𑁆𑀲 𑀲𑀫𑁆𑀫𑀼𑀔𑀸 𑀩𑀼𑀤𑁆𑀥𑀸𑀲𑀦𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄, 𑀥𑀫𑁆𑀫𑀘𑀓𑁆𑀓𑀁 𑀫𑁂 𑀞𑀧𑀺𑀢𑀦𑁆𑀢𑀺 𑀫𑀬𑀸 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑁂𑀦 𑀉𑀪𑀢𑁄 𑀲𑀻𑀳𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀫𑀚𑁆𑀛𑁂 𑀆𑀤𑀸𑀲𑀲𑀤𑀺𑀲𑀁 𑀓𑀸𑀭𑁂𑀢𑁆𑀯𑀸 𑀓𑀢𑀁 𑀥𑀫𑁆𑀫𑀘𑀓𑁆𑀓𑀁 𑀞𑀧𑀺𑀢𑀁 𑀧𑀽𑀚𑀺𑀢𑀁. 𑀓𑀺𑀁 𑀪𑀽𑀢𑀁? 𑀯𑀺𑀜𑁆𑀜𑀽𑀳𑀺 𑀫𑁂𑀥𑀸𑀯𑀻𑀳𑀺 ‘‘𑀅𑀢𑀻𑀯 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀡𑁆𑀡𑀺𑀢𑀁 𑀣𑁄𑀫𑀺𑀢𑀁 𑀲𑀼𑀓𑀢𑀁 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦𑁩. 𑀘𑀸𑀭𑀼𑀯𑀡𑁆𑀡𑁄𑀯 𑀲𑁄𑀪𑀸𑀫𑀻𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄 𑀇𑀯 𑀲𑁄𑀪𑀸𑀫𑀺 𑀯𑀺𑀭𑁄𑀘𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀯𑀡𑁆𑀡𑁂𑀳𑀺 𑀲𑁄𑀪𑀸𑀫𑀻’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀚𑀸𑀢𑀺𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀯𑀡𑁆𑀡𑁂𑀳𑀺 𑀲𑁄𑀪𑀸𑀫𑀺 𑀯𑀺𑀭𑁄𑀘𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀬𑁄𑀕𑁆𑀕𑀩𑀮𑀯𑀸𑀳𑀦𑁄𑀢𑀺 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀤𑀻𑀳𑀺 𑀬𑁄𑀕𑁆𑀕𑁂𑀳𑀺 𑀘 𑀲𑁂𑀦𑀸𑀧𑀢𑀺𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀲𑁂𑀯𑀓𑁂𑀳𑀺 𑀩𑀮𑁂𑀳𑀺 𑀘 𑀳𑀢𑁆𑀣𑀺𑀅𑀲𑁆𑀲𑀭𑀣𑀲𑀗𑁆𑀔𑀸𑀢𑁂𑀳𑀺 𑀯𑀸𑀳𑀦𑁂𑀳𑀺 𑀘 𑀲𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀩𑀳𑀼𑀚𑁆𑀚𑀦𑀸 𑀩𑀳𑀯𑁄 𑀫𑀦𑀼𑀲𑁆𑀲𑀸 𑀅𑀦𑀼𑀬𑀦𑁆𑀢𑀸 𑀫𑀫𑀸𑀦𑀼𑀯𑀢𑁆𑀢𑀦𑁆𑀢𑀸 𑀦𑀺𑀘𑁆𑀘𑀁 𑀦𑀺𑀘𑁆𑀘𑀓𑀸𑀮𑀁 𑀧𑀭𑀺𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀥𑀫𑁆𑀫𑀘𑀓𑁆𑀓𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀓𑀧𑁆𑀧𑀭𑀼𑀓𑁆𑀔𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀧𑁆𑀧𑀭𑀼𑀓𑁆𑀔𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁫𑁭𑁬). 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀽𑀧𑀸𑀬𑀪𑀽𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀯𑀺𑀘𑀺𑀢𑁆𑀢𑀁 𑀲𑀼𑀯𑀡𑁆𑀡𑀫𑀬𑀁 𑀓𑀧𑁆𑀧𑀭𑀼𑀓𑁆𑀔𑀁 𑀓𑀸𑀭𑁂𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀘𑁂𑀢𑀺𑀬𑀲𑁆𑀲 𑀲𑀫𑁆𑀫𑀼𑀔𑁂 𑀞𑀧𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀏𑀯𑀭𑀽𑀧𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀓𑀫𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀲𑀢𑁆𑀣𑀼 𑀆𑀭𑀸𑀥𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀦𑀸𑀫𑁂𑀦 𑀓𑀧𑁆𑀧𑀭𑀼𑀓𑁆𑀔𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁧𑁦𑁮. 𑀲𑁄 𑀏𑀯𑀁 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀣𑀽𑀧𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸𑀢𑀺 𑀲𑁂𑀝𑁆𑀞𑀲𑁆𑀲 𑀉𑀢𑁆𑀢𑀫𑀲𑁆𑀲 𑀥𑀸𑀢𑀼𑀦𑀺𑀳𑀺𑀢𑀣𑀽𑀧𑀲𑁆𑀲 𑀘𑁂𑀢𑀺𑀬𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀯𑀺𑀘𑀺𑀢𑁆𑀢𑀤𑀼𑀲𑁆𑀲𑁂 𑀅𑀦𑁂𑀓𑀯𑀡𑁆𑀡𑁂𑀳𑀺 𑀯𑀺𑀲𑀫𑁂𑀦 𑀯𑀺𑀲𑀤𑀺𑀲𑁂𑀦 𑀘𑀺𑀢𑁆𑀢𑁂𑀦 𑀫𑀦𑁄𑀳𑀭𑁂 𑀘𑀺𑀦𑀧𑀝𑁆𑀝𑀲𑁄𑀫𑀸𑀭𑀧𑀝𑁆𑀝𑀸𑀤𑀺𑀓𑁂 𑀤𑀼𑀲𑁆𑀲𑁂. 𑀮𑀕𑁂𑀢𑁆𑀯𑀸 𑀑𑀮𑀕𑁆𑀕𑁂𑀢𑁆𑀯𑀸 𑀓𑀧𑁆𑀧𑀭𑀼𑀓𑁆𑀔𑀁 𑀞𑀧𑁂𑀲𑀺𑀁 𑀅𑀳𑀁 𑀧𑀢𑀺𑀝𑁆𑀞𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀧𑁆𑀧𑀭𑀼𑀓𑁆𑀔𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀉𑀧𑀸𑀮𑀺𑀯𑀕𑁆𑀕𑁄

𑁧. 𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀏𑀲𑁄 𑀳𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑁄 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀧𑀼𑀡𑁆𑀡𑀘𑀦𑁆𑀤𑀫𑀺𑀯 𑀯𑀺𑀭𑁄𑀘𑀫𑀸𑀦𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀚𑀺𑀦𑀘𑀫𑁆𑀫𑀁 𑀅𑀁𑀲𑁂 𑀓𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀓𑁄𑀯 𑀤𑀲𑀦𑀔𑀲𑀫𑁄𑀥𑀸𑀦𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀅𑀦𑁂𑀓𑀸𑀳𑀺 𑀉𑀧𑀫𑀸𑀳𑀺 𑀅𑀦𑁂𑀓𑁂𑀳𑀺 𑀣𑀼𑀢𑀺𑀯𑀘𑀦𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 𑁋 ‘‘𑀅𑀬𑀁 𑀢𑀸𑀧𑀲𑁄 𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀦𑀬𑁂 𑀢𑀺𑀔𑀺𑀡𑀧𑀜𑁆𑀜𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀡𑀫𑀤𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀸𑀢𑀼𑀮𑀲𑁆𑀲 𑀉𑀧𑀸𑀮𑀺𑀢𑁆𑀣𑁂𑀭𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀫𑀻𑀧𑁂 𑀯𑀲𑀺𑀢𑀢𑁆𑀢𑀸 𑀯𑀺𑀦𑀬𑀧𑀜𑁆𑀳𑁂 𑀢𑀺𑀔𑀺𑀡𑀜𑀸𑀡𑁄 𑀅𑀳𑁄𑀲𑀺. 𑀅𑀣 𑀪𑀕𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀧𑀜𑁆𑀳𑁂 𑀢𑀺𑀔𑀺𑀡𑀧𑀜𑁆𑀜𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀤𑀺𑀤𑀁 𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀻’’𑀢𑀺 𑀢𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁧. 𑀲𑁄 𑀏𑀯𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆 𑀲𑀫𑀦𑁆𑀢𑀢𑁄 𑀬𑀸𑀯𑀪𑀯𑀕𑁆𑀕𑀸 𑀲𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸. 𑀓𑀸𑀫𑀸𑀲𑀯𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀢𑁂 𑀔𑀻𑀡𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀯𑀺𑀤𑁆𑀥𑀁𑀲𑀺𑀢𑀸 𑀬𑁂𑀳𑀺 𑀢𑁂𑀢𑀺 𑀔𑀻𑀡𑀸𑀲𑀯𑀸, 𑀢𑁂𑀬𑁂𑀯 𑀲𑀳𑀲𑁆𑀲𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑀸, 𑀢𑁂𑀳𑀺 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺. 𑀧𑀭𑁂𑀢𑁄 𑀧𑀭𑀺𑀯𑀼𑀢𑁄 𑀮𑁄𑀓𑀦𑀸𑀬𑀓𑁄 𑀮𑁄𑀓𑀲𑁆𑀲 𑀦𑀺𑀩𑁆𑀩𑀸𑀦𑀧𑀸𑀧𑀦𑀓𑁄 𑀯𑀺𑀯𑁂𑀓𑀁 𑀅𑀦𑀼𑀬𑀼𑀢𑁆𑀢𑁄 𑀧𑀝𑀺𑀲𑀮𑁆𑀮𑀺𑀢𑀼𑀁 𑀏𑀓𑀻𑀪𑀯𑀺𑀢𑀼𑀁 𑀕𑀘𑁆𑀙𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁨. 𑀅𑀚𑀺𑀦𑁂𑀦 𑀦𑀺𑀯𑀢𑁆𑀣𑁄𑀳𑀦𑁆𑀢𑀺 𑀅𑀳𑀁 𑀅𑀚𑀺𑀦𑀫𑀺𑀕𑀘𑀫𑁆𑀫𑁂𑀦 𑀧𑀝𑀺𑀘𑁆𑀙𑀦𑁆𑀦𑁄, 𑀅𑀚𑀺𑀦𑀘𑀫𑁆𑀫𑀯𑀲𑀦𑁄𑀢𑀺 𑀅𑀢𑁆𑀣𑁄. 𑀢𑀺𑀤𑀡𑁆𑀟𑀧𑀭𑀺𑀥𑀸𑀭𑀓𑁄𑀢𑀺 𑀓𑀼𑀡𑁆𑀟𑀺𑀓𑀝𑁆𑀞𑀧𑀦𑀢𑁆𑀣𑀸𑀬 𑀢𑀺𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀩𑁆𑀬𑀽𑀴𑁆𑀳𑀁 𑀧𑀭𑀺𑀯𑀸𑀭𑀺𑀢𑀁 𑀮𑁄𑀓𑀦𑀸𑀬𑀓𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑀺𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀪𑀕𑀯𑀢𑁄 𑀘𑀗𑁆𑀓𑀫𑀦𑀢𑁆𑀣𑀸𑀬 𑀲𑁄𑀪𑀦𑀁 𑀘𑀗𑁆𑀓𑀫𑀁 𑀓𑀸𑀭𑁂𑀢𑁆𑀯𑀸 𑀲𑀼𑀥𑀸𑀧𑀭𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀆𑀤𑀸𑀲𑀢𑀮𑀫𑀺𑀯 𑀲𑀫𑀁 𑀯𑀺𑀚𑁆𑀚𑁄𑀢𑀫𑀸𑀦𑀁 𑀓𑀢𑁆𑀯𑀸 𑀤𑀻𑀧𑀥𑀽𑀧𑀧𑀼𑀧𑁆𑀨𑀸𑀤𑀻𑀳𑀺 𑀲𑀚𑁆𑀚𑁂𑀢𑁆𑀯𑀸 𑀪𑀕𑀯𑀢𑁄 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀧𑀽𑀚𑁂𑀲𑀺. 𑀲𑁄 𑀏𑀯𑀁 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁆𑀣 𑀧𑀸𑀴𑀺𑀬𑀸 𑀯𑀼𑀢𑁆𑀢𑀦𑀬𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀦𑁆𑀢𑀭𑀸 𑀑𑀓𑁆𑀓𑀸𑀓𑀓𑀼𑀮𑀧𑁆𑀧𑀲𑀼𑀢𑁄𑀢𑀺 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀬𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀙𑀺𑀫𑀪𑀯𑁂 𑀧𑀦 𑀓𑁄𑀮𑀺𑀬𑀭𑀸𑀚𑀯𑀁𑀲𑁂 𑀚𑀸𑀢𑁄 𑀯𑀬𑀧𑁆𑀧𑀢𑁆𑀢𑁄 𑀓𑁄𑀝𑀺𑀅𑀕𑁆𑀖𑀦𑀓𑀲𑁆𑀲 𑀓𑀡𑁆𑀡𑀧𑀺𑀴𑀦𑁆𑀥𑀦𑀲𑁆𑀲 𑀥𑀸𑀭𑀺𑀢𑀢𑁆𑀢𑀸 𑀓𑁄𑀝𑀺𑀓𑀡𑁆𑀡𑁄𑀢𑀺, 𑀓𑀼𑀝𑀺𑀓𑀡𑁆𑀡𑁄𑀢𑀺 𑀘 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁄 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁨𑁫. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁄𑀫𑀤𑀲𑁆𑀲𑀺𑀲𑁆𑀲𑀸𑀢𑀺 𑀅𑀦𑁄𑀫𑀁 𑀅𑀮𑀸𑀫𑀓𑀁 𑀲𑀼𑀦𑁆𑀤𑀭𑀁 𑀤𑀲𑁆𑀲𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀩𑁆𑀬𑀸𑀫𑀧𑁆𑀧𑀪𑀸𑀫𑀡𑁆𑀟𑀮𑁄𑀧𑀲𑁄𑀪𑀺𑀢𑀢𑁆𑀢𑀸 𑀆𑀭𑁄𑀳𑀧𑀭𑀺𑀡𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀤𑀲𑁆𑀲𑀦𑀻𑀬𑀁 𑀲𑀭𑀻𑀭𑀁 𑀬𑀲𑁆𑀲 𑀪𑀕𑀯𑀢𑁄 𑀲𑁄 𑀅𑀦𑁄𑀫𑀤𑀲𑁆𑀲𑀻, 𑀢𑀲𑁆𑀲 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀦𑁄𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀲𑀪𑀸𑀯𑀲𑁆𑀲. 𑀲𑀼𑀥𑀸𑀬 𑀮𑁂𑀧𑀦𑀁 𑀓𑀢𑁆𑀯𑀸𑀢𑀺 𑀲𑀼𑀥𑀸𑀬 𑀅𑀯𑀮𑀺𑀢𑁆𑀢𑀁 𑀓𑀢𑁆𑀯𑀸 𑀤𑀻𑀧𑀥𑀽𑀧𑀧𑀼𑀧𑁆𑀨𑀥𑀚𑀧𑀝𑀸𑀓𑀸𑀤𑀻𑀳𑀺 𑀘 𑀅𑀮𑀗𑁆𑀓𑀢𑀁 𑀘𑀗𑁆𑀓𑀫𑀁 𑀓𑀸𑀭𑀬𑀺𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸𑀦𑀁 𑀅𑀢𑁆𑀣𑁄 𑀧𑀸𑀴𑀺𑀬𑀸 𑀅𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯.

𑁩𑁫. 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀥𑀦𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀬𑀲𑀁 𑀥𑀸𑀭𑁂𑀢𑀻𑀢𑀺 𑀬𑀲𑁄𑀥𑀭𑁄, 𑀲𑀩𑁆𑀩𑁂 𑀏𑀢𑁂 𑀲𑀢𑁆𑀢𑀲𑀢𑁆𑀢𑀢𑀺𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀬𑀲𑁄𑀥𑀭𑀦𑀸𑀫𑁂𑀦 𑀏𑀓𑀦𑀸𑀫𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁨. 𑀅𑀗𑁆𑀕𑀻𑀭𑀲𑁄𑀢𑀺 𑀅𑀗𑁆𑀕𑀢𑁄 𑀲𑀭𑀻𑀭𑀢𑁄 𑀦𑀺𑀕𑁆𑀕𑀢𑀸 𑀭𑀲𑁆𑀫𑀺 𑀬𑀲𑁆𑀲 𑀲𑁄 𑀅𑀗𑁆𑀕𑀻𑀭𑀲𑁄, 𑀙𑀦𑁆𑀤𑀤𑁄𑀲𑀫𑁄𑀳𑀪𑀬𑀸𑀕𑀢𑀻𑀳𑀺 𑀯𑀸 𑀧𑀸𑀧𑀸𑀘𑀸𑀭𑀯𑀲𑁂𑀦 𑀯𑀸 𑀘𑀢𑀼𑀭𑀸𑀧𑀸𑀬𑀁 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄, 𑀫𑀳𑀦𑁆𑀢𑁄 𑀧𑀽𑀚𑀺𑀢𑁄 𑀘 𑀲𑁄 𑀦𑀸𑀕𑁄 𑀘𑁂𑀢𑀺 𑀫𑀳𑀸𑀦𑀸𑀕𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑀪𑀤𑁆𑀤𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀪𑀤𑁆𑀤𑀺𑀬𑀲𑁆𑀲 𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑀺𑀢𑁄 𑀦𑀕𑀭𑀯𑀸𑀲𑀺𑀦𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀓𑀸𑀫𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀣𑀽𑀮𑀧𑀝𑀮𑀺𑀓𑀸𑀤𑀺𑀅𑀦𑁂𑀓𑀸𑀦𑀺 𑀫𑀳𑀸𑀭𑀳𑀸𑀦𑀺 𑀲𑀬𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂 𑀪𑀕𑀯𑀢𑀺 𑀲𑀲𑀗𑁆𑀖𑁂 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀪𑁄𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑁄 𑀏𑀯𑀁 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀸𑀴𑀺𑀕𑁄𑀥𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀆𑀭𑁄𑀳𑀧𑀭𑀺𑀡𑀸𑀳𑀳𑀢𑁆𑀣𑀧𑀸𑀤𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀪𑀤𑁆𑀤𑀢𑁆𑀢𑀸 𑀘 𑀓𑀸𑀴𑀺𑀕𑁄𑀥𑀸𑀬 𑀤𑁂𑀯𑀺𑀬𑀸 𑀧𑀼𑀢𑁆𑀢𑀢𑁆𑀢𑀸 𑀘 𑀪𑀤𑁆𑀤𑀺𑀬𑁄 𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑁄𑀢𑀺 𑀧𑀸𑀓𑀝𑁄. 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀆𑀭𑀸𑀥𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁫𑁪. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀫𑁂𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀫𑀺𑀚𑁆𑀚𑀢𑀺 𑀲𑀺𑀦𑁂𑀳𑀢𑀺 𑀦𑀦𑁆𑀤𑀢𑀺 𑀲𑀩𑁆𑀩𑀲𑀢𑁆𑀢𑁂𑀢𑀺 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀸𑀬 𑀲𑀳𑀕𑀢𑀁 𑀘𑀺𑀢𑁆𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀁, 𑀢𑀁 𑀬𑀲𑁆𑀲 𑀪𑀕𑀯𑀢𑁄 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀁. 𑀫𑀳𑀸𑀫𑀼𑀦𑀺𑀦𑁆𑀢𑀺 𑀲𑀓𑀮𑀪𑀺𑀓𑁆𑀔𑀽𑀦𑀁 𑀫𑀳𑀦𑁆𑀢𑀢𑁆𑀢𑀸 𑀫𑀳𑀸𑀫𑀼𑀦𑀺, 𑀢𑀁 𑀧𑀤𑀼𑀫𑀼𑀢𑁆𑀢𑀭𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀦𑀢𑀸 𑀲𑀩𑁆𑀩𑀸𑀢𑀺 𑀲𑀩𑁆𑀩𑁄 𑀚𑀦𑀓𑀸𑀬𑁄, 𑀲𑀩𑁆𑀩𑀦𑀕𑀭𑀯𑀸𑀲𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀮𑁄𑀓𑀕𑁆𑀕𑀦𑀸𑀬𑀓𑀦𑁆𑀢𑀺 𑀲𑀓𑀮𑀮𑁄𑀓𑀲𑁆𑀲 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀦𑀺𑀩𑁆𑀩𑀸𑀦𑀲𑁆𑀲 𑀦𑀬𑀦𑀢𑁄 𑀧𑀸𑀧𑀦𑀢𑁄 𑀦𑀸𑀬𑀓𑀁 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁 𑀚𑀦𑀢𑀸 𑀉𑀧𑁂𑀢𑀺 𑀲𑀫𑀻𑀧𑀁 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫. 𑀲𑀢𑁆𑀢𑀼𑀓𑀜𑁆𑀘 𑀩𑀤𑁆𑀥𑀓𑀜𑁆𑀘𑀸𑀢𑀺 𑀩𑀤𑁆𑀥𑀲𑀢𑁆𑀢𑀼𑀅𑀩𑀤𑁆𑀥𑀲𑀢𑁆𑀢𑀼𑀲𑀗𑁆𑀔𑀸𑀢𑀁 𑀆𑀫𑀺𑀲𑀁. 𑀅𑀣 𑀯𑀸 𑀪𑀢𑁆𑀢𑀧𑀽𑀧𑀔𑀚𑁆𑀚𑀪𑁄𑀚𑁆𑀚𑀬𑀸𑀕𑀼𑀆𑀤𑀬𑁄 𑀬𑀸𑀯𑀓𑀸𑀮𑀺𑀓𑀢𑁆𑀢𑀸 𑀆𑀫𑀺𑀲𑀁 𑀧𑀸𑀦𑀪𑁄𑀚𑀦𑀜𑁆𑀘 𑀕𑀳𑁂𑀢𑁆𑀯𑀸 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂 𑀲𑀢𑁆𑀣𑀼𑀦𑁄 𑀤𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁮. 𑀆𑀲𑀦𑀁 𑀩𑀼𑀤𑁆𑀥𑀬𑀼𑀢𑁆𑀢𑀓𑀦𑁆𑀢𑀺 𑀩𑀼𑀤𑁆𑀥𑀬𑁄𑀕𑁆𑀕𑀁 𑀩𑀼𑀤𑁆𑀥𑀸𑀭𑀳𑀁 𑀩𑀼𑀤𑁆𑀥𑀸𑀦𑀼𑀘𑁆𑀙𑀯𑀺𑀓𑀁 𑀲𑀢𑁆𑀢𑀭𑀢𑀦𑀫𑀬𑀁 𑀆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀦𑀬𑀸𑀦𑀼𑀬𑁄𑀕𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑀪𑀤𑁆𑀤𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀲𑀦𑁆𑀦𑀺𑀝𑁆𑀞𑀸𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀭𑀜𑁆𑀜𑁂 𑀓𑀼𑀝𑀺𑀓𑀁 𑀓𑀢𑁆𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀦𑁆𑀦𑀺𑀝𑁆𑀞𑀸𑀧𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀩𑀦𑁆𑀥𑀦𑁂𑀦 𑀩𑀤𑁆𑀥𑁄 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀦𑁆𑀢𑀭𑁂 𑀅𑀭𑀜𑁆𑀜𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑀢𑀸𑀬 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀅𑀣 𑀲𑁄 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑀢𑁆𑀣𑀸𑀬 𑀢𑀺𑀡𑀲𑀦𑁆𑀣𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀅𑀦𑁂𑀓𑁂𑀳𑀺 𑀫𑀥𑀼𑀭𑁂𑀳𑀺 𑀢𑀺𑀡𑁆𑀟𑀼𑀓𑀸𑀤𑀻𑀳𑀺 𑀨𑀮𑀸𑀨𑀮𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑁄 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀧𑀩𑁆𑀩𑀚𑀺𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀔𑀼𑀭𑀕𑁆𑀕𑁂 𑀅𑀭𑀳𑀢𑁆𑀢𑀨𑀮𑀧𑁆𑀧𑀢𑁆𑀢𑀺𑀬𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑁂𑀦𑁂𑀯 𑀲𑀦𑁆𑀢𑀺𑀧𑀤𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀲𑀼𑀝𑁆𑀞𑀼 𑀞𑀺𑀢𑀢𑁆𑀢𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁭𑁦. 𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀭𑀜𑁆𑀜𑁂 𑀓𑀼𑀝𑀺𑀓𑀁 𑀓𑀢𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀭𑀜𑁆𑀜𑁂𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀪𑀬𑁂𑀦 𑀫𑀦𑀼𑀲𑁆𑀲𑀸 𑀏𑀢𑁆𑀣 𑀦 𑀭𑀚𑁆𑀚𑀦𑁆𑀢𑀺 𑀦 𑀭𑀫𑀦𑁆𑀢𑀺 𑀦 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀅𑀭𑀜𑁆𑀜𑀁, 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂. 𑀓𑀼𑀝𑀺𑀓𑀦𑁆𑀢𑀺 𑀢𑀺𑀡𑀘𑁆𑀙𑀤𑀦𑀓𑀼𑀝𑀺𑀓𑀁 𑀓𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑀭𑁂 𑀯𑀲𑀸𑀫𑀺 𑀯𑀸𑀲𑀁 𑀓𑀧𑁆𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀮𑀸𑀪𑁂𑀦 𑀘 𑀅𑀮𑀸𑀪𑁂𑀦 𑀘 𑀬𑀲𑁂𑀦 𑀘 𑀅𑀬𑀲𑁂𑀦 𑀘 𑀲𑀦𑁆𑀢𑀼𑀝𑁆𑀞𑁄 𑀯𑀺𑀳𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁨. 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑀦𑁆𑀢𑀺 𑀚𑀮𑁂 𑀚𑀸𑀢𑀁 𑀚𑀮𑀚𑀁, 𑀧𑀤𑀼𑀫𑀁, 𑀚𑀮𑀚𑀁 𑀉𑀢𑁆𑀢𑀫𑀁 𑀚𑀮𑀚𑀼𑀢𑁆𑀢𑀫𑀁, 𑀚𑀮𑀚𑀼𑀢𑁆𑀢𑀫𑁂𑀦 𑀲𑀫𑀸𑀦𑀁 𑀦𑀸𑀫𑀁 𑀬𑀲𑁆𑀲 𑀲𑁄 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄, 𑀢𑀁 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑀁 𑀩𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀴𑀺𑀦𑀬𑀸𑀦𑀼𑀬𑁄𑀕𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀦𑁆𑀦𑀺𑀝𑁆𑀞𑀸𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀯𑀺𑀳𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀉𑀧𑁆𑀧𑀮𑀳𑀢𑁆𑀣𑀸𑀦𑀺 𑀆𑀦𑁂𑀲𑀼𑀁. 𑀲𑁄 𑀢𑁂𑀳𑀺 𑀧𑀜𑁆𑀘𑀉𑀧𑁆𑀧𑀮𑀳𑀢𑁆𑀣𑁂𑀳𑀺 𑀯𑀻𑀣𑀺𑀬𑀁 𑀘𑀭𑀫𑀸𑀦𑀁 𑀲𑀼𑀫𑁂𑀥𑀁 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀢𑀸𑀦𑀺 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀙𑀸𑀬𑀁 𑀓𑀼𑀭𑀼𑀫𑀸𑀦𑀸𑀦𑀺 𑀢𑀣𑀸𑀕𑀢𑁂𑀦𑁂𑀯 𑀲𑀤𑁆𑀥𑀺𑀁 𑀕𑀘𑁆𑀙𑀺𑀁𑀲𑀼. 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀬𑀸𑀯𑀚𑀻𑀯𑀁 𑀢𑀤𑁂𑀯 𑀧𑀼𑀜𑁆𑀜𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀓𑀢𑀓𑀼𑀲𑀮𑀦𑀸𑀫𑁂𑀦 𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁭𑁭. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀧𑀜𑁆𑀜𑀸𑀬 𑀤𑀺𑀝𑁆𑀞𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀫𑁂𑀥𑁄𑀢𑀺 𑀲𑀼𑀦𑁆𑀤𑀭𑀸 𑀫𑁂𑀥𑀸 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀧𑀜𑁆𑀜𑀸 𑀬𑀲𑁆𑀲 𑀲𑁄 𑀪𑀕𑀯𑀸 𑀲𑀼𑀫𑁂𑀥𑁄 𑀲𑀫𑁆𑀩𑀼𑀤𑁆𑀥𑁄 𑀅𑀦𑁆𑀢𑀭𑀸𑀧𑀡𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀅𑀥𑁄𑀔𑀺𑀢𑁆𑀢𑀘𑀓𑁆𑀔𑀼. 𑀫𑀺𑀢𑀪𑀸𑀡𑀻𑀢𑀺 𑀧𑀫𑀸𑀡𑀁 𑀜𑀢𑁆𑀯𑀸 𑀪𑀡𑀦𑀲𑀻𑀮𑁄, 𑀧𑀫𑀸𑀡𑀁 𑀚𑀸𑀦𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀧𑀤𑀼𑀫𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀤𑀼𑀫𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀘𑀺𑀢𑀓𑀁 𑀧𑀤𑀼𑀫𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺. 𑀲𑁄 𑀢𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀜𑁆𑀘𑀸𑀢𑀺 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀢𑀲𑁆𑀲 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀭𑀦𑁆𑀢𑀲𑁆𑀲 𑀯𑀺𑀳𑀸𑀭𑁄 𑀧𑀤𑀼𑀫𑀧𑀼𑀧𑁆𑀨𑁂𑀳𑀺 𑀙𑀸𑀤𑀻𑀬𑀢𑀺, 𑀢𑁂𑀦 𑀲𑁄 𑀧𑀤𑀼𑀫𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁮𑁩. 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀩𑁆𑀩𑀼𑀢𑁂𑀢𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺, 𑀯𑀺𑀧𑀲𑁆𑀲𑀺𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑁂 𑀘𑀺𑀢𑀫𑀸𑀦𑀺𑀬𑀫𑀸𑀦𑁂 𑀘𑀺𑀢𑀓𑁂 𑀆𑀭𑁄𑀧𑀺𑀢𑁂 𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀓𑀮𑀸𑀧𑀁 𑀅𑀳𑀁 𑀕𑀳𑁂𑀢𑁆𑀯𑀸 𑀘𑀺𑀢𑀓𑀁 𑀆𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀤𑀼𑀫𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀳𑀢𑁆𑀣𑀺𑀤𑀡𑁆𑀟𑀲𑀼𑀯𑀡𑁆𑀡𑀸𑀤𑀻𑀳𑀺 𑀲𑀬𑀦𑀢𑁆𑀣𑀸𑀬 𑀫𑀜𑁆𑀘𑀁 𑀓𑀸𑀭𑁂𑀢𑁆𑀯𑀸 𑀅𑀦𑀕𑁆𑀖𑁂𑀳𑀺 𑀯𑀺𑀘𑀺𑀢𑁆𑀢𑀢𑁆𑀣𑀭𑀡𑁂𑀳𑀺 𑀅𑀢𑁆𑀣𑀭𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀲𑁄 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀪𑀯𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑀺𑀩𑁆𑀩𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁮𑁮. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀉𑀘𑁆𑀘𑀯𑀢𑁆𑀣𑀼𑀓𑀁 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀁 𑀭𑀚𑀢𑀭𑀸𑀲𑀺𑀲𑀤𑀺𑀲𑀁 𑀲𑁄𑀪𑀫𑀸𑀦𑀁 𑀘𑀗𑁆𑀓𑀫𑀁 𑀓𑀸𑀭𑁂𑀢𑁆𑀯𑀸 𑀫𑀼𑀢𑁆𑀢𑀤𑀮𑀲𑀤𑀺𑀲𑀁 𑀲𑁂𑀢𑀧𑀼𑀮𑀺𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀪𑀕𑀯𑀢𑁄 𑀅𑀤𑀸𑀲𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀘𑀗𑁆𑀓𑀫𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘 𑀧𑀦 𑀲𑀼𑀔𑀁 𑀓𑀸𑀬𑀘𑀺𑀢𑁆𑀢𑀲𑀫𑀸𑀥𑀺𑀁 𑀅𑀧𑁆𑀧𑁂𑀢𑁆𑀯𑀸 ‘‘𑀅𑀬𑀁 𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑁄 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁯𑁩. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑀸 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀤𑀲𑁆𑀲𑀺𑀲𑁆𑀲𑀸𑀢𑀺 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀦𑀺𑀩𑁆𑀩𑀸𑀦𑀁 𑀤𑀓𑁆𑀔𑀢𑀺 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑀤𑀲𑁆𑀲𑀻, 𑀅𑀣 𑀯𑀸 𑀅𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀦𑀲𑀻𑀮𑁄 𑀚𑀸𑀦𑀦𑀲𑀻𑀮𑁄𑀢𑀺 𑀅𑀢𑁆𑀣𑀤𑀲𑁆𑀲𑀻, 𑀢𑀲𑁆𑀲 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄 𑀫𑁄𑀦𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀕𑀯𑀢𑁄 𑀫𑀦𑁄𑀭𑀫𑀁 𑀫𑀦𑀮𑁆𑀮𑀻𑀦𑀁 𑀪𑀸𑀯𑀦𑀻𑀬𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀘𑀗𑁆𑀓𑀫𑀁 𑀓𑀸𑀭𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀲𑀼𑀪𑀤𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀪𑀤𑁆𑀤𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀦𑀢𑁆𑀣𑀸𑀬 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀖𑀭𑀩𑀦𑁆𑀥𑀦𑁂𑀦 𑀩𑀤𑁆𑀥𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑀁 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀬𑁄 𑀘 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀦𑀺𑀕𑁆𑀕𑀼𑀡𑁆𑀟𑀺𑀓𑁂𑀝𑀓𑀦𑀻𑀮𑀓𑀸𑀲𑁄𑀓𑀸𑀲𑀺𑀢𑀸𑀤𑀺𑀅𑀦𑁂𑀓𑁂𑀳𑀺 𑀲𑀼𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀸𑀤𑀻𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂𑀲𑀼 𑀘 𑀲𑀼𑀕𑀦𑁆𑀥𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑀺𑀢𑁄 𑀅𑀳𑁄𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸𑀧𑀺 𑀬𑀸𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀢𑀸𑀯 𑀅𑀮𑀤𑁆𑀥𑀩𑀼𑀤𑁆𑀥𑀤𑀲𑁆𑀲𑀦𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑀓𑀸𑀮𑁂𑀬𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀲𑀼𑀪𑀤𑁆𑀤𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁧𑁦𑁧. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄…𑀧𑁂… 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄𑀢𑀺 𑀇𑀤𑀁 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄𑀯 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺.

𑀧𑀜𑁆𑀘𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁧𑁫. 𑀲𑁄 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀩𑁆𑀩𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀏𑀓𑀕𑁆𑀕𑁄𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄. 𑀲𑀼𑀲𑀫𑀸𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄, 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀲𑁆𑀲 𑀑𑀭𑀲𑁄 𑀧𑀼𑀢𑁆𑀢𑁄𑀢𑀺 𑀩𑀼𑀤𑁆𑀥𑀲𑁆𑀲 𑀉𑀭𑀲𑀸 𑀳𑀤𑀬𑁂𑀦 𑀦𑀺𑀕𑁆𑀕𑀢𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀲𑀼𑀢𑁆𑀯𑀸 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀚𑁄𑀫𑁆𑀳𑀺 𑀲𑀼𑀦𑀺𑀫𑁆𑀫𑀺𑀢𑁄𑀢𑀺 𑀥𑀫𑁆𑀫𑀢𑁄 𑀓𑀫𑁆𑀫𑀝𑁆𑀞𑀸𑀦𑀥𑀫𑁆𑀫𑀢𑁄 𑀚𑀸𑀢𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀲𑀼𑀦𑀺𑀫𑁆𑀫𑀺𑀢𑁄 𑀲𑀼𑀝𑁆𑀞𑀼 𑀦𑀺𑀧𑁆𑀨𑀸𑀤𑀺𑀢𑀲𑀩𑁆𑀩𑀓𑀺𑀘𑁆𑀘𑁄 𑀅𑀫𑁆𑀳𑀺 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁧𑁬. 𑀥𑀫𑁆𑀫𑀭𑀸𑀚𑀁 𑀉𑀧𑀕𑀫𑁆𑀫𑀸𑀢𑀺 𑀥𑀫𑁆𑀫𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀭𑀸𑀚𑀸𑀦𑀁 𑀇𑀲𑁆𑀲𑀭𑀪𑀽𑀢𑀁 𑀪𑀕𑀯𑀦𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑀼𑀘𑁆𑀙𑀺𑀁 𑀧𑀜𑁆𑀳𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀬𑀦𑁆𑀢𑁄 𑀘 𑀫𑁂 𑀧𑀜𑁆𑀳𑀦𑁆𑀢𑀺 𑀏𑀲𑁄 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀫𑁂 𑀫𑀬𑁆𑀳𑀁 𑀧𑀜𑁆𑀳𑀁 𑀓𑀣𑀬𑀦𑁆𑀢𑁄 𑀩𑁆𑀬𑀸𑀓𑀭𑁄𑀦𑁆𑀢𑁄. 𑀥𑀫𑁆𑀫𑀲𑁄𑀢𑀁 𑀉𑀧𑀸𑀦𑀬𑀻𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀲𑀗𑁆𑀔𑀸𑀢𑀁 𑀥𑀫𑁆𑀫𑀲𑁄𑀢𑀁 𑀥𑀫𑁆𑀫𑀧𑀯𑀸𑀳𑀁 𑀉𑀧𑀸𑀦𑀬𑀺 𑀧𑀸𑀯𑀺𑀲𑀻𑀢𑀺 𑀅𑀢𑁆𑀣𑁄.

𑁧𑁧𑁮. 𑀚𑀮𑀚𑀼𑀢𑁆𑀢𑀫𑀦𑀸𑀬𑀓𑁄𑀢𑀺 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄 𑀫-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 𑀓𑀢𑀯𑁄𑀳𑀸𑀭𑁄. 𑀦𑀺𑀩𑁆𑀩𑀸𑀬𑀺 𑀅𑀦𑀼𑀧𑀸𑀤𑀸𑀦𑁄𑀢𑀺 𑀉𑀧𑀸𑀤𑀸𑀦𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀺 𑀦 𑀧𑀜𑁆𑀜𑀸𑀬𑀺 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺, 𑀫𑀦𑀼𑀲𑁆𑀲𑀮𑁄𑀓𑀸𑀤𑀻𑀲𑀼 𑀓𑀢𑁆𑀣𑀘𑀺𑀧𑀺 𑀅𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀤𑀻𑀧𑁄𑀯 𑀢𑁂𑀮𑀲𑀗𑁆𑀔𑀬𑀸𑀢𑀺 𑀯𑀝𑁆𑀝𑀺𑀢𑁂𑀮𑀸𑀦𑀁 𑀲𑀗𑁆𑀔𑀬𑀸 𑀅𑀪𑀸𑀯𑀸 𑀧𑀤𑀻𑀧𑁄 𑀇𑀯 𑀦𑀺𑀩𑁆𑀩𑀸𑀬𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁯. 𑀲𑀢𑁆𑀢𑀬𑁄𑀚𑀦𑀺𑀓𑀁 𑀆𑀲𑀻𑀢𑀺 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀭𑀢𑀦𑀫𑀬𑀁 𑀣𑀽𑀧𑀁 𑀲𑀢𑁆𑀢𑀬𑁄𑀚𑀦𑀼𑀩𑁆𑀩𑁂𑀥𑀁 𑀆𑀲𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀥𑀚𑀁 𑀢𑀢𑁆𑀣 𑀅𑀧𑀽𑀚𑁂𑀲𑀺𑀦𑁆𑀢𑀺 𑀢𑀢𑁆𑀣 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀲𑀩𑁆𑀩𑀪𑀤𑁆𑀤𑀁 𑀲𑀩𑁆𑀩𑀢𑁄 𑀪𑀤𑁆𑀤𑀁 𑀲𑀩𑁆𑀩𑀲𑁄 𑀫𑀦𑁄𑀭𑀫𑀁 𑀥𑀚𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁨𑁦. 𑀓𑀲𑁆𑀲𑀧𑀲𑁆𑀲 𑀘 𑀩𑀼𑀤𑁆𑀥𑀲𑁆𑀲𑀸𑀢𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀆𑀕𑀢𑀲𑁆𑀲 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀢𑁄 𑀫𑁂 𑀫𑀬𑁆𑀳𑀁 𑀑𑀭𑀲𑁄 𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀦𑀸𑀫 𑀓𑀲𑁆𑀲𑀧𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀚𑀺𑀦𑀲𑀸𑀲𑀦𑁂 𑀩𑀼𑀤𑁆𑀥𑀲𑀸𑀲𑀦𑁂 𑀤𑀸𑀬𑀸𑀤𑁄 𑀆𑀲𑀺 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁨𑁧. 𑀢𑀲𑁆𑀲 𑀳𑀻𑀦𑁂𑀦 𑀫𑀦𑀲𑀸𑀢𑀺 𑀢𑀲𑁆𑀲 𑀫𑀫 𑀧𑀼𑀢𑁆𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀳𑀻𑀦𑁂𑀦 𑀮𑀸𑀫𑀓𑁂𑀦 𑀫𑀦𑀲𑀸 𑀘𑀺𑀢𑁆𑀢𑁂𑀦 𑀅𑀪𑀤𑁆𑀤𑀓𑀁 𑀅𑀲𑀼𑀦𑁆𑀤𑀭𑀁 𑀅𑀬𑀼𑀢𑁆𑀢𑀓𑀁 ‘‘𑀅𑀦𑁆𑀢𑀓𑁄 𑀧𑀘𑁆𑀙𑀺𑀫𑁄’’𑀢𑀺 𑀯𑀸𑀘𑀁 𑀯𑀘𑀦𑀁 𑀅𑀪𑀸𑀲𑀺𑀁 𑀓𑀣𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦𑀸𑀢𑀺 𑀢𑁂𑀦 𑀅𑀭𑀳𑀦𑁆𑀢𑀪𑀓𑁆𑀔𑀸𑀦𑀲𑀗𑁆𑀔𑀸𑀢𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦. 𑀧𑀘𑁆𑀙𑀺𑀫𑁂 𑀅𑀤𑁆𑀤𑀲𑀁 𑀚𑀺𑀦𑀦𑁆𑀢𑀺 𑀧𑀘𑁆𑀙𑀺𑀫𑁂 𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀫𑀮𑁆𑀮𑀸𑀦𑀁 𑀉𑀧𑀯𑀢𑁆𑀢𑀦𑁂 𑀲𑀸𑀮𑀯𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑀁 𑀚𑀺𑀦𑀁 𑀚𑀺𑀢𑀲𑀩𑁆𑀩𑀫𑀸𑀭𑀁 𑀅𑀫𑁆𑀳𑀸𑀓𑀁 𑀕𑁄𑀢𑀫𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀘𑁆𑀙𑀸 𑀫𑁂 𑀆𑀲𑀺 𑀪𑀤𑁆𑀤𑀓’’𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 𑀧𑀘𑁆𑀙𑀸 𑀢𑀲𑁆𑀲 𑀪𑀕𑀯𑀢𑁄 𑀅𑀯𑀲𑀸𑀦𑀓𑀸𑀮𑁂 𑀦𑀺𑀩𑁆𑀩𑀸𑀦𑀸𑀲𑀦𑁆𑀦𑀓𑀸𑀮𑁂 𑀫𑁂 𑀫𑀬𑁆𑀳𑀁 𑀪𑀤𑁆𑀤𑀓𑀁 𑀲𑀼𑀦𑁆𑀤𑀭𑀁 𑀘𑀢𑀼𑀲𑀘𑁆𑀘𑀧𑀝𑀺𑀯𑀺𑀚𑁆𑀛𑀦𑀁 𑀆𑀲𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁧𑁨𑁨. 𑀧𑀩𑁆𑀩𑀸𑀚𑁂𑀲𑀺 𑀫𑀳𑀸𑀯𑀻𑀭𑁄𑀢𑀺 𑀫𑀳𑀸𑀯𑀻𑀭𑀺𑀬𑁄 𑀲𑀩𑁆𑀩𑀲𑀢𑁆𑀢𑀳𑀺𑀢𑁄 𑀓𑀭𑀼𑀡𑀸𑀬𑀼𑀢𑁆𑀢𑁄 𑀚𑀺𑀢𑀫𑀸𑀭𑁄 𑀫𑀼𑀦𑀺 𑀫𑀮𑁆𑀮𑀸𑀦𑀁 𑀉𑀧𑀯𑀢𑁆𑀢𑀦𑁂 𑀲𑀸𑀮𑀯𑀦𑁂 𑀧𑀘𑁆𑀙𑀺𑀫𑁂 𑀲𑀬𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀲𑀬𑀺𑀢𑁄𑀯 𑀫𑀁 𑀧𑀩𑁆𑀩𑀸𑀚𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁨𑁩. 𑀅𑀚𑁆𑀚𑁂𑀯 𑀤𑀸𑀦𑀺 𑀧𑀩𑁆𑀩𑀚𑁆𑀚𑀸𑀢𑀺 𑀅𑀚𑁆𑀚 𑀏𑀯 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀬𑁂𑀯 𑀫𑀫 𑀧𑀩𑁆𑀩𑀚𑁆𑀚𑀸, 𑀢𑀣𑀸 𑀅𑀚𑁆𑀚 𑀏𑀯 𑀉𑀧𑀲𑀫𑁆𑀧𑀤𑀸, 𑀅𑀚𑁆𑀚 𑀏𑀯 𑀤𑁆𑀯𑀺𑀧𑀤𑀼𑀢𑁆𑀢𑀫𑀲𑁆𑀲 𑀲𑀫𑁆𑀫𑀼𑀔𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀼𑀪𑀤𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀘𑀼𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀘𑀼𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀲𑀢𑁆𑀢𑀭𑀢𑀦𑀫𑀬𑀁 𑀲𑀼𑀯𑀡𑁆𑀡𑀕𑁆𑀖𑀺𑀬𑀁 𑀓𑀸𑀭𑁂𑀢𑁆𑀯𑀸 𑀲𑀼𑀫𑀦𑀧𑀼𑀧𑁆𑀨𑁂𑀳𑀺 𑀙𑀸𑀤𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑀁 𑀲𑀫𑀼𑀕𑁆𑀕𑀦𑁆𑀢𑁆𑀯𑀸 𑀯𑀺𑀢𑀸𑀦𑀸𑀓𑀸𑀭𑁂𑀦 𑀅𑀝𑁆𑀞𑀁𑀲𑀼. 𑀅𑀣 𑀦𑀁 𑀪𑀕𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀪𑀕𑀯𑀢𑁄 𑀲𑀸𑀲𑀦𑁂 𑀘𑀼𑀦𑁆𑀤𑁄 𑀦𑀸𑀫 𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑁄 𑀓𑀫𑁂𑀦 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀭𑀽𑀧𑀲𑀸𑀭𑀺𑀬𑀸 𑀧𑀼𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀆𑀭𑁄𑀳𑀧𑀭𑀺𑀡𑀸𑀳𑀭𑀽𑀧𑀯𑀬𑀸𑀦𑀁 𑀲𑀼𑀦𑁆𑀤𑀭𑀢𑀸𑀬 𑀲𑀓𑀸𑀭𑀲𑁆𑀲 𑀘𑀓𑀸𑀭𑀁 𑀓𑀢𑁆𑀯𑀸 𑀘𑀼𑀦𑁆𑀤𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀧𑀩𑁆𑀩𑀚𑁆𑀚𑀸𑀬 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀪𑀸𑀢𑀼𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁨𑁫. 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀕𑁆𑀖𑀺𑀬𑀦𑁆𑀢𑀺𑀆𑀤𑀬𑁄𑀧𑀺 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁧𑁨𑁮. 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀺𑀲𑁂𑀲𑁂𑀦 𑀫𑀕𑁆𑀕𑀸𑀥𑀺𑀕𑀫𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀔𑁂𑀧𑀺𑀢𑀢𑁆𑀢𑀸 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀅𑀲𑀁𑀲𑀬𑁄 𑀲𑀫𑁆𑀩𑀼𑀤𑁆𑀥𑁄. 𑀢𑀺𑀡𑁆𑀡𑁄𑀖𑁂𑀳𑀺 𑀧𑀼𑀭𑀓𑁆𑀔𑀢𑁄𑀢𑀺 𑀓𑀸𑀫𑁄𑀖𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁 𑀢𑀺𑀡𑁆𑀡𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀑𑀖𑀢𑀺𑀡𑁆𑀡𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀧𑀼𑀭𑀓𑁆𑀔𑀢𑁄 𑀧𑀭𑀺𑀯𑀸𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀓𑀭𑀡𑀕𑀸𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁧𑁩𑁯. 𑀉𑀧𑀝𑁆𑀞𑀳𑀺𑀁 𑀫𑀳𑀸𑀯𑀻𑀭𑀦𑁆𑀢𑀺 𑀉𑀢𑁆𑀢𑀫𑀢𑁆𑀣𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸 𑀧𑀸𑀧𑀼𑀡𑀦𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑁂𑀲𑀼 𑀘𑀢𑀼𑀭𑀸𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀓𑀧𑁆𑀧𑁂𑀲𑀼 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀓𑀢𑀯𑀻𑀭𑀺𑀬𑀢𑁆𑀢𑀸 𑀫𑀳𑀸𑀯𑀻𑀭𑀁 𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺𑀁 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂 𑀘 𑀧𑁂𑀲𑀮𑁂 𑀩𑀳𑀽𑀢𑀺 𑀦 𑀓𑁂𑀯𑀮𑀫𑁂𑀯 𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺𑀁, 𑀧𑁂𑀲𑀮𑁂 𑀧𑀺𑀬𑀲𑀻𑀮𑁂 𑀲𑀻𑀮𑀯𑀦𑁆𑀢𑁂 𑀅𑀜𑁆𑀜𑁂 𑀘 𑀩𑀳𑀼𑀅𑀕𑁆𑀕𑀧𑁆𑀧𑀢𑁆𑀢𑁂 𑀲𑀸𑀯𑀓𑁂, 𑀫𑁂 𑀫𑀬𑁆𑀳𑀁 𑀪𑀸𑀢𑀭𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀜𑁆𑀘 𑀉𑀧𑀝𑁆𑀞𑀳𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁪𑁦. 𑀪𑀸𑀢𑀭𑀁 𑀫𑁂 𑀉𑀧𑀝𑁆𑀞𑀳𑀺𑀢𑁆𑀯𑀸𑀢𑀺 𑀫𑀬𑁆𑀳𑀁 𑀪𑀸𑀢𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀪𑀕𑀯𑀢𑁄 𑀧𑀞𑀫𑀁 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀢𑀲𑁆𑀲 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀧𑀢𑁆𑀢𑀫𑁆𑀳𑀺 𑀑𑀓𑀺𑀭𑀺𑀢𑁆𑀯𑀸 𑀮𑁄𑀓𑀚𑁂𑀝𑁆𑀞𑀲𑁆𑀲 𑀦𑀭𑀸𑀦𑀁 𑀆𑀲𑀪𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑁂𑀲𑀺𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁪𑁧. 𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳𑀸𑀢𑀺 𑀢𑀁 𑀫𑀳𑀸 𑀤𑀺𑀦𑁆𑀦𑀁 𑀥𑀸𑀢𑀼𑀁 𑀲𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀢𑀁 𑀥𑀸𑀢𑀼𑀁 𑀲𑀁𑀲𑀼𑀝𑁆𑀞𑀼 𑀤𑀲𑁆𑀲𑀬𑀦𑁆𑀢𑁄 𑀅𑀕𑁆𑀕𑀲𑀸𑀯𑀓𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀓𑀺𑀢𑁆𑀢𑀬𑀺 𑀧𑀓𑀸𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀼𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀩𑀻𑀚𑀦𑀺𑀯𑀕𑁆𑀕𑁄

𑁧. 𑀯𑀺𑀥𑀽𑀧𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀺𑀥𑀽𑀧𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀧𑀽𑀭𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀤𑁆𑀥𑀸𑀚𑀸𑀢𑁄 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀕𑀺𑀫𑁆𑀳𑀓𑀸𑀮𑁂 𑀲𑀼𑀯𑀡𑁆𑀡𑀭𑀚𑀢𑀫𑀼𑀢𑁆𑀢𑀸𑀫𑀡𑀺𑀫𑀬𑀁 𑀩𑀻𑀚𑀦𑀺𑀁 𑀓𑀸𑀭𑁂𑀢𑁆𑀯𑀸 𑀪𑀕𑀯𑀢𑁄 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀲 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑁆𑀯𑀸 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧. 𑀲𑁄 ‘‘𑀓𑁂𑀦 𑀫𑀬𑀸 𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀬𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀩𑀻𑀚𑀦𑀺𑀓𑀸 𑀫𑀬𑀸 𑀤𑀺𑀦𑁆𑀦𑀸𑀢𑀺 𑀯𑀺𑀲𑁂𑀲𑁂𑀦 𑀲𑀦𑁆𑀢𑀸𑀧𑀬𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀧𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑀺 𑀲𑀻𑀢𑀮𑀁 𑀯𑀸𑀢𑀁 𑀚𑀦𑁂𑀢𑀻𑀢𑀺 𑀩𑀻𑀚𑀦𑀻, 𑀩𑀻𑀚𑀦𑀻𑀬𑁂𑀯 𑀩𑀻𑀚𑀦𑀺𑀓𑀸, 𑀲𑀸 𑀲𑀢𑁆𑀢𑀭𑀢𑀦𑀫𑀬𑀸 𑀯𑀺𑀚𑁆𑀚𑁄𑀢𑀫𑀸𑀦𑀸 𑀩𑀻𑀚𑀦𑀺𑀓𑀸 𑀫𑀬𑀸 𑀓𑀸𑀭𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀸𑀢𑀺 𑀅𑀢𑁆𑀣𑁄.

𑀯𑀺𑀥𑀽𑀧𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀲𑀢𑀭𑀁𑀲𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀉𑀘𑁆𑀘𑀺𑀬𑀁 𑀲𑁂𑀮𑀫𑀸𑀭𑀼𑀬𑁆𑀳𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀢𑀭𑀁𑀲𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀓𑁆𑀓𑀝𑀩𑁆𑀬𑀸𑀓𑀭𑀡𑁂 𑀯𑁂𑀤𑀢𑁆𑀢𑀬𑁂 𑀘 𑀧𑀸𑀭𑀗𑁆𑀕𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑀢𑀸𑀬 𑀉𑀘𑁆𑀘𑀁 𑀏𑀓𑀁 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀚𑀮𑀺𑀢𑀕𑁆𑀕𑀺𑀓𑁆𑀔𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺. 𑀢𑀁 𑀢𑀣𑀸𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀸𑀧𑀲𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀣𑁄𑀫𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀢𑁄 𑀘𑀼𑀢𑁄 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀲𑀢𑀭𑀁𑀲𑀻 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀫𑁆𑀧𑀺 𑀲𑀫𑁆𑀧𑀢𑁆𑀢𑀺𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀩𑁆𑀩𑀧𑀼𑀜𑁆𑀜𑀲𑀫𑁆𑀪𑀸𑀭𑀯𑀲𑁂𑀦 𑀜𑀸𑀡𑀲𑁆𑀲 𑀧𑀭𑀺𑀧𑀓𑁆𑀓𑀢𑁆𑀢𑀸 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁮-𑁯. 𑀲𑁄 ‘‘𑀅𑀳𑀁 𑀓𑁂𑀦 𑀓𑀫𑁆𑀫𑁂𑀦 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀲𑀦𑁆𑀢𑀺𑀧𑀤𑀁 𑀅𑀦𑀼𑀧𑁆𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀲𑀭𑀫𑀸𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀉𑀤𑀸𑀦𑀯𑀲𑁂𑀦 𑀧𑀓𑀸𑀲𑁂𑀦𑁆𑀢𑁄 𑀉𑀘𑁆𑀘𑀺𑀬𑀁 𑀲𑁂𑀮𑀫𑀸𑀭𑀼𑀬𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀘𑁆𑀘𑀺𑀬𑀦𑁆𑀢𑀺 𑀉𑀘𑁆𑀘𑀁 𑀲𑁂𑀮𑀫𑀬𑀁 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀦𑀺𑀲𑀻𑀤𑀺 𑀧𑀤𑀼𑀫𑀼𑀢𑁆𑀢𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀩𑁆𑀩𑀢𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀻𑀢𑀺 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀲𑁆𑀲 𑀧𑀩𑁆𑀩𑀢𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽𑀢𑀺 𑀫𑀦𑁆𑀢𑀲𑀗𑁆𑀔𑀸𑀢𑀲𑁆𑀲 𑀯𑁂𑀤𑀢𑁆𑀢𑀬𑀲𑁆𑀲 𑀧𑀸𑀭𑀁 𑀧𑀭𑀺𑀬𑁄𑀲𑀸𑀦𑀁 𑀓𑁄𑀝𑀺𑀁 𑀕𑀢𑁄 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺 𑀅𑀬𑀁 𑀫𑀦𑁆𑀢𑀧𑀸𑀭𑀕𑀽𑀢𑀺. 𑀉𑀧𑀯𑀺𑀝𑁆𑀞𑀁 𑀫𑀳𑀸𑀯𑀻𑀭𑀦𑁆𑀢𑀺 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀦𑀺𑀲𑀺𑀦𑁆𑀦𑀁 𑀯𑀻𑀭𑀯𑀦𑁆𑀢𑀁 𑀚𑀺𑀦𑀁, 𑀓𑀺𑀁 𑀯𑀺𑀲𑀺𑀝𑁆𑀞𑀁? 𑀤𑁂𑀯𑀤𑁂𑀯𑀁 𑀲𑀓𑀮𑀙𑀓𑀸𑀫𑀸𑀯𑀘𑀭𑀩𑁆𑀭𑀳𑁆𑀫𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑀁 𑀦𑀭𑀸𑀲𑀪𑀁 𑀦𑀭𑀸𑀦𑀁 𑀆𑀲𑀢𑀁 𑀲𑁂𑀝𑁆𑀞𑀁 𑀮𑁄𑀓𑀦𑀸𑀬𑀓𑀁 𑀲𑀓𑀮𑀲𑀢𑁆𑀢𑀮𑁄𑀓𑀁 𑀦𑀬𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀦𑁆𑀢𑀁 𑀅𑀳𑀁 𑀅𑀜𑁆𑀚𑀮𑀺𑀁 𑀤𑀲𑀦𑀔𑀲𑀫𑁄𑀥𑀸𑀦𑀜𑁆𑀚𑀮𑀺𑀧𑀼𑀝𑀁 𑀲𑀺𑀭𑀲𑀺 𑀫𑀼𑀤𑁆𑀥𑀦𑀺 𑀧𑀕𑁆𑀕𑀳𑁂𑀢𑁆𑀯𑀸𑀦 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀦𑁆𑀣𑀯𑀺𑀁 𑀲𑀼𑀝𑁆𑀞𑀼𑀁 𑀣𑁄𑀫𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁨. 𑀅𑀪𑀸𑀲𑀣𑀸𑀢𑀺 ‘‘𑀬𑁂𑀦𑀸𑀬𑀁 𑀅𑀜𑁆𑀚𑀮𑀻 𑀤𑀺𑀦𑁆𑀦𑁄…𑀧𑁂… 𑀅𑀭𑀳𑀸 𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀢𑀭𑀁𑀲𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀲𑀼𑀔𑀫𑀦𑀼𑀪𑀯𑀦𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀤𑀦𑁆𑀢𑀲𑀼𑀯𑀡𑁆𑀡𑀭𑀚𑀢𑀫𑀼𑀢𑁆𑀢𑀫𑀡𑀺𑀫𑀬𑀁 𑀫𑀳𑀸𑀭𑀳𑀁 𑀫𑀜𑁆𑀘𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑀻𑀦𑀧𑀝𑁆𑀝𑀓𑀫𑁆𑀩𑀮𑀸𑀤𑀻𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 𑀲𑀬𑀦𑀢𑁆𑀣𑀸𑀬 𑀪𑀕𑀯𑀢𑁄 𑀅𑀤𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀲𑀬𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀢𑀤𑀦𑀼𑀭𑀽𑀧𑀁 𑀆𑀓𑀸𑀲𑀕𑀫𑀦𑀲𑀼𑀔𑀲𑁂𑀬𑁆𑀬𑀸𑀤𑀺𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁦. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁨𑁧. 𑀲𑀼𑀔𑁂𑀢𑁆𑀢𑁂 𑀩𑀻𑀚𑀲𑀫𑁆𑀧𑀤𑀸𑀢𑀺 𑀬𑀣𑀸 𑀢𑀺𑀡𑀓𑀘𑀯𑀭𑀭𑀳𑀺𑀢𑁂 𑀓𑀤𑁆𑀤𑀫𑀸𑀤𑀺𑀲𑀫𑁆𑀧𑀦𑁆𑀦𑁂 𑀲𑀼𑀔𑁂𑀢𑁆𑀢𑁂 𑀯𑀼𑀢𑁆𑀢𑀩𑀻𑀚𑀸𑀦𑀺 𑀲𑀸𑀤𑀼𑀨𑀮𑀸𑀦𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀏𑀯𑀫𑁂𑀯 𑀭𑀸𑀕𑀤𑁄𑀲𑀸𑀤𑀺𑀤𑀺𑀬𑀟𑁆𑀠𑀲𑀳𑀲𑁆𑀲𑀓𑀺𑀮𑁂𑀲𑀲𑀗𑁆𑀔𑀸𑀢𑀢𑀺𑀡𑀓𑀘𑀯𑀭𑀭𑀳𑀺𑀢𑁂 𑀲𑀼𑀤𑁆𑀥𑀲𑀦𑁆𑀢𑀸𑀦𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀯𑀼𑀢𑁆𑀢𑀤𑀸𑀦𑀸𑀦𑀺 𑀅𑀧𑁆𑀧𑀸𑀦𑀺𑀧𑀺 𑀲𑀫𑀸𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀫𑀼𑀦𑀺𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀦𑀕𑀭𑀯𑀸𑀲𑀺𑀦𑁄 𑀩𑁄𑀥𑀺𑀧𑀽𑀚𑀁 𑀓𑀼𑀭𑀼𑀫𑀸𑀦𑁂 𑀤𑀺𑀲𑁆𑀯𑀸 𑀯𑀺𑀘𑀺𑀢𑁆𑀢𑀖𑀝𑁂 𑀘𑀦𑁆𑀤𑀦𑀓𑀧𑁆𑀧𑀼𑀭𑀸𑀕𑀭𑀼𑀆𑀤𑀺𑀫𑀺𑀲𑁆𑀲𑀓𑀲𑀼𑀕𑀦𑁆𑀥𑁄𑀤𑀓𑁂𑀦 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀅𑀪𑀺𑀲𑀺𑀜𑁆𑀘𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀯𑁄 𑀫𑀳𑀸𑀥𑀸𑀭𑀸𑀳𑀺 𑀧𑀯𑀲𑁆𑀲𑀺. 𑀢𑀤𑀸 𑀲𑁄 𑀅𑀲𑀦𑀺𑀯𑁂𑀕𑁂𑀦 𑀓𑀸𑀮𑀁 𑀓𑀢𑁄. 𑀢𑁂𑀦𑁂𑀯 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁆𑀣𑁂𑀯 𑀞𑀺𑀢𑁄 ‘‘𑀅𑀳𑁄 𑀩𑀼𑀤𑁆𑀥𑁄, 𑀅𑀳𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀏𑀯𑀁 𑀲𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀴𑀸𑀳𑀯𑀺𑀧𑁆𑀧𑀫𑀼𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀻𑀢𑀺𑀪𑀸𑀯𑀫𑀼𑀧𑀕𑀢𑁄 𑀲𑀼𑀔𑀺𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀭𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑁂𑀦 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁨𑁫. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑀭𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀽𑀢𑀺 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀧𑀽𑀚𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀢𑁆𑀢𑀁 𑀖𑀝𑀫𑀸𑀤𑀸𑀬𑀸𑀢𑀺 𑀅𑀦𑁂𑀓𑁂𑀳𑀺 𑀘𑀺𑀢𑁆𑀢𑀓𑀫𑁆𑀫𑀲𑀼𑀯𑀡𑁆𑀡𑀓𑀫𑁆𑀫𑁂𑀳𑀺 𑀯𑀺𑀘𑀺𑀢𑁆𑀢𑀁 𑀲𑁄𑀪𑀫𑀸𑀦𑀁 𑀕𑀦𑁆𑀥𑁄𑀤𑀓𑀧𑀼𑀡𑁆𑀡𑀁 𑀖𑀝𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑀦𑁆𑀥𑁄𑀤𑀓𑀫𑀤𑀸𑀲𑀳𑀦𑁆𑀢𑀺 𑀕𑀦𑁆𑀥𑁄𑀤𑀓𑀁 𑀅𑀤𑀸𑀲𑀺𑀁, 𑀅𑀳𑀁 𑀕𑀦𑁆𑀥𑁄𑀤𑀓𑁂𑀦 𑀅𑀪𑀺𑀲𑀺𑀜𑁆𑀘𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁬. 𑀦𑁆𑀳𑀸𑀦𑀓𑀸𑀮𑁂 𑀘 𑀩𑁄𑀥𑀺𑀬𑀸𑀢𑀺 𑀩𑁄𑀥𑀺𑀬𑀸 𑀧𑀽𑀚𑀸𑀓𑀭𑀡𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀑𑀧𑀯𑀬𑁆𑀳𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀑𑀧𑀯𑀬𑁆𑀳𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀚𑀺𑀦𑀸𑀤𑀺𑀘𑁆𑀘𑁂 𑀮𑁄𑀓𑁂 𑀧𑀸𑀢𑀼𑀪𑀽𑀢𑁂 𑀏𑀓𑀲𑁆𑀫𑀺𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀖𑀭𑀸𑀯𑀸𑀲𑀁 𑀯𑀲𑀫𑀸𑀦𑁄 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀲𑀢𑁆𑀣𑀭𑀺 𑀧𑀲𑀸𑀤𑀩𑀳𑀼𑀫𑀸𑀦𑁄 𑀆𑀚𑀸𑀦𑀻𑀬𑁂𑀦 𑀲𑀺𑀦𑁆𑀥𑀯𑁂𑀦 𑀧𑀽𑀚𑀁 𑀅𑀓𑀸𑀲𑀺, 𑀧𑀽𑀚𑁂𑀢𑁆𑀯𑀸 𑀘 𑀧𑀦 ‘‘𑀩𑀼𑀤𑁆𑀥𑀸𑀤𑀻𑀦𑀁 𑀲𑀫𑀡𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀦 𑀓𑀧𑁆𑀧𑀦𑁆𑀢𑀺, 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀢𑀤𑀕𑁆𑀖𑀦𑀓𑁂𑀦 𑀓𑀳𑀸𑀧𑀡𑁂𑀦 𑀓𑀧𑁆𑀧𑀺𑀬𑀁 𑀓𑀧𑁆𑀧𑀸𑀲𑀺𑀓𑀓𑀫𑁆𑀩𑀮𑀓𑁄𑀚𑀯𑀸𑀤𑀺𑀓𑀁 𑀘𑀻𑀯𑀭𑀁 𑀓𑀧𑁆𑀧𑀽𑀭𑀢𑀓𑁆𑀓𑁄𑀮𑀸𑀤𑀺𑀓𑀁 𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀜𑁆𑀘 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀅𑀦𑁂𑀓𑀯𑀸𑀳𑀦𑀲𑀫𑁆𑀧𑀦𑁆𑀦𑁄 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺, 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀯𑀲𑁂𑀦 𑀑𑀧𑀯𑀬𑁆𑀳𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁩𑁩. 𑀲𑁄 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀇𑀤𑀁 𑀫𑀬𑀸 𑀲𑀦𑁆𑀢𑀺𑀧𑀤𑀁 𑀅𑀥𑀺𑀕𑀢’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀧𑀼𑀩𑁆𑀩𑀓𑀫𑁆𑀫𑀁 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀉𑀤𑀸𑀦𑀯𑀲𑁂𑀦 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀆𑀚𑀸𑀦𑀻𑀬𑀫𑀤𑀸𑀲𑀳𑀦𑁆𑀢𑀺 𑀆𑀚𑀸𑀦𑀻𑀬𑀁 𑀉𑀢𑁆𑀢𑀫𑀚𑀸𑀢𑀺𑀲𑀺𑀦𑁆𑀥𑀯𑀁 𑀅𑀳𑀁 𑀅𑀤𑀸𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁫. 𑀲𑀧𑀢𑁆𑀢𑀪𑀸𑀭𑁄𑀢𑀺 𑀲𑀲𑁆𑀲 𑀅𑀢𑁆𑀢𑀦𑁄 𑀧𑀢𑁆𑀢𑀸𑀦𑀺 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸𑀦𑀺 𑀪𑀸𑀭𑀸𑀦𑀺 𑀬𑀲𑁆𑀲 𑀲𑁄 𑀲𑀧𑀢𑁆𑀢𑀪𑀸𑀭𑁄, 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁩𑁬. 𑀔𑀫𑀦𑀻𑀬𑀫𑀤𑀸𑀲𑀳𑀦𑁆𑀢𑀺 𑀔𑀫𑀦𑀻𑀬𑀬𑁄𑀕𑁆𑀕𑀁 𑀘𑀻𑀯𑀭𑀸𑀤𑀺𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀅𑀢𑁆𑀣𑁄.

𑁪𑁦. 𑀘𑀭𑀺𑀫𑁄𑀢𑀺 𑀧𑀭𑀺𑀬𑁄𑀲𑀸𑀦𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 𑀪𑀯𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀑𑀧𑀯𑀬𑁆𑀳𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀲𑀧𑀭𑀺𑀯𑀸𑀭𑀸𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀧𑀭𑀺𑀯𑀸𑀭𑀸𑀲𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀲𑁄𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀤𑀸𑀦𑀨𑀮𑀁 𑀲𑀤𑁆𑀤𑀳𑀦𑁆𑀢𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑁂𑀦 𑀪𑀕𑀯𑀢𑁄 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀺, 𑀤𑀢𑁆𑀯𑀸 𑀘 𑀧𑀦 𑀪𑁄𑀚𑀦𑀲𑀸𑀮𑀸𑀬𑀁 𑀪𑁄𑀚𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑀸𑀲𑀦𑀁 𑀚𑀸𑀢𑀺𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀳𑀺 𑀅𑀮𑀗𑁆𑀓𑀭𑀺. 𑀪𑀕𑀯𑀸 𑀘 𑀪𑀢𑁆𑀢𑀸𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀦𑁂𑀓𑀯𑀺𑀥𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁩. 𑀲𑁄 𑀏𑀯𑀁 𑀧𑀢𑁆𑀢𑀲𑀦𑁆𑀢𑀺𑀧𑀤𑁄 ‘‘𑀓𑁂𑀦 𑀦𑀼 𑀔𑁄 𑀧𑀼𑀜𑁆𑀜𑁂𑀦 𑀇𑀤𑀁 𑀲𑀦𑁆𑀢𑀺𑀧𑀤𑀁 𑀅𑀦𑀼𑀧𑁆𑀧𑀢𑁆𑀢’’𑀦𑁆𑀢𑀺 𑀜𑀸𑀡𑁂𑀦 𑀉𑀧𑀥𑀸𑀭𑁂𑀦𑁆𑀢𑁄 𑀧𑀼𑀩𑁆𑀩𑀓𑀫𑁆𑀫𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀳𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀸𑀦𑀁 𑀧𑀺𑀡𑁆𑀟𑀸𑀦𑀁 𑀓𑀩𑀴𑀁 𑀓𑀩𑀴𑀁 𑀓𑀢𑁆𑀯𑀸 𑀧𑀸𑀢𑀩𑁆𑀩𑀢𑁄 𑀔𑀸𑀤𑀺𑀢𑀩𑁆𑀩𑀢𑁄 𑀆𑀳𑀸𑀭𑁄 𑀧𑀺𑀡𑁆𑀟𑀧𑀸𑀢𑁄, 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀕𑀯𑀢𑁄 𑀅𑀤𑀸𑀲𑀺𑀁, 𑀪𑀕𑀯𑀦𑁆𑀢𑀁 𑀪𑁄𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁪𑁪. 𑀅𑀓𑀺𑀢𑁆𑀢𑀬𑀺 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀫𑀬𑀸 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀲𑁆𑀲 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀻𑀢𑀺 𑀅𑀢𑁆𑀣𑁄.

𑁪𑁮. 𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀁𑀯𑀼𑀢𑁄 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀽𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀭𑀽𑀧𑀸𑀤𑀻𑀳𑀺 𑀕𑁄𑀧𑀺𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀜𑁆𑀘 𑀕𑁄𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀧𑀭𑀺𑀯𑀸𑀭𑀸𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑁂 𑀯𑀲𑀦𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀫𑀳𑀸𑀚𑀦𑁂𑀳𑀺 𑀩𑁄𑀥𑀺𑀧𑀽𑀚𑀁 𑀓𑀬𑀺𑀭𑀫𑀸𑀦𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀩𑁄𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀲𑀩𑁆𑀩𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀪𑀯𑁂 𑀚𑀮𑀫𑀸𑀦𑁄 𑀚𑁄𑀢𑀺𑀲𑀫𑁆𑀧𑀦𑁆𑀦𑀯𑀺𑀫𑀸𑀦𑀸𑀤𑀻𑀲𑀼 𑀯𑀲𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺, 𑀤𑀻𑀧𑀧𑀽𑀚𑀸𑀦𑀺𑀲𑁆𑀲𑀦𑁆𑀤𑁂𑀦 𑀤𑀻𑀧𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁫𑁦. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀉𑀚𑀼𑀤𑀺𑀝𑁆𑀞𑀺 𑀅𑀳𑁄𑀲𑀳𑀦𑁆𑀢𑀺 𑀯𑀗𑁆𑀓𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀙𑀟𑁆𑀟𑁂𑀢𑁆𑀯𑀸 𑀉𑀚𑀼 𑀅𑀯𑀗𑁆𑀓𑀁 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀧𑀸𑀧𑀼𑀡𑀦𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁧. 𑀧𑀤𑀻𑀧𑀤𑀸𑀦𑀁 𑀧𑀸𑀤𑀸𑀲𑀺𑀦𑁆𑀢𑀺 𑀏𑀢𑁆𑀣 𑀧𑀓𑀸𑀭𑁂𑀦 𑀤𑀺𑀩𑁆𑀩𑀢𑀺 𑀚𑁄𑀢𑀢𑀻𑀢𑀺 𑀧𑀤𑀻𑀧𑁄, 𑀢𑀲𑁆𑀲 𑀤𑀸𑀦𑀁 𑀧𑀤𑀻𑀧𑀤𑀸𑀦𑀁, 𑀢𑀁 𑀅𑀤𑀸𑀲𑀺𑀁 𑀧𑀤𑀻𑀧𑀧𑀽𑀚𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀜𑁆𑀘𑀤𑀻𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀥𑀚𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀥𑀚𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀲𑀼𑀦𑁆𑀤𑀭𑁂𑀳𑀺 𑀅𑀦𑁂𑀓𑁂𑀳𑀺 𑀯𑀢𑁆𑀣𑁂𑀳𑀺 𑀥𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀚𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀉𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀽𑀚𑀦𑀺𑀬𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑀺𑀢𑁆𑀯𑀸 𑀫𑀳𑀸𑀪𑁄𑀕𑁄 𑀬𑀲𑀯𑀸 𑀲𑀤𑁆𑀥𑀸𑀚𑀸𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁫𑁭. 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀬𑁂𑀯. 𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀬𑀼𑀢𑁆𑀢𑀢𑁆𑀢𑀸 𑀳𑀝𑁆𑀞𑁄 𑀧𑀭𑀺𑀧𑀼𑀡𑁆𑀡𑀭𑀽𑀧𑀓𑀸𑀬𑁄 𑀲𑀤𑁆𑀥𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀢𑀸𑀬 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀲𑀦𑁆𑀢𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀥𑀚𑀫𑀸𑀭𑁄𑀧𑀬𑀺𑀁 𑀅𑀳𑀦𑁆𑀢𑀺 𑀥𑀼𑀦𑀸𑀢𑀺 𑀓𑀫𑁆𑀧𑀢𑀺 𑀘𑀮𑀢𑀻𑀢𑀺 𑀥𑀚𑀁, 𑀢𑀁 𑀥𑀚𑀁 𑀆𑀭𑁄𑀧𑀬𑀺𑀁 𑀯𑁂𑀴𑀕𑁆𑀕𑁂 𑀮𑀕𑁆𑀕𑁂𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁫𑁮-𑁯. 𑀧𑀢𑀺𑀢𑀧𑀢𑁆𑀢𑀸𑀦𑀺 𑀕𑀡𑁆𑀳𑀺𑀢𑁆𑀯𑀸𑀢𑀺 𑀧𑀢𑀺𑀢𑀸𑀦𑀺 𑀩𑁄𑀥𑀺𑀧𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀳𑀁 𑀩𑀳𑀺 𑀙𑀟𑁆𑀟𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀼𑀤𑁆𑀥𑀁 𑀩𑀳𑀺𑀲𑀼𑀤𑁆𑀥𑀦𑁆𑀢𑀺 𑀅𑀦𑁆𑀢𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀦𑀸𑀫𑀓𑀸𑀬𑀢𑁄 𑀘 𑀩𑀳𑀺 𑀘𑀓𑁆𑀔𑀼𑀲𑁄𑀢𑀸𑀤𑀺𑀭𑀽𑀧𑀓𑀸𑀬𑀢𑁄 𑀘 𑀲𑀼𑀤𑁆𑀥𑀺𑀁 𑀅𑀥𑀺 𑀯𑀺𑀲𑁂𑀲𑁂𑀦 𑀫𑀼𑀢𑁆𑀢𑀁 𑀓𑀺𑀮𑁂𑀲𑀢𑁄 𑀯𑀺𑀫𑀼𑀢𑁆𑀢𑀁 𑀅𑀦𑀸𑀲𑀯𑀁 𑀲𑀫𑁆𑀩𑀼𑀤𑁆𑀥𑀁 𑀯𑀺𑀬 𑀲𑀫𑁆𑀫𑀼𑀔𑀸 𑀉𑀢𑁆𑀢𑀫𑀁 𑀩𑁄𑀥𑀺𑀁 𑀅𑀯𑀦𑁆𑀤𑀺𑀁 𑀧𑀡𑀸𑀫𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀥𑀚𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀧𑀤𑀼𑀫𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀓𑀼𑀲𑀮𑀲𑀫𑁆𑀪𑀸𑀭𑁄 𑀧𑀤𑀼𑀫𑀼𑀢𑁆𑀢𑀭𑀫𑀼𑀦𑀺𑀦𑀸 𑀥𑀫𑁆𑀫𑀧𑀚𑁆𑀚𑁄𑀢𑁂 𑀚𑁄𑀢𑀫𑀸𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀪𑁄𑀕𑀲𑀫𑁆𑀧𑀦𑁆𑀦𑁄𑀢𑀺 𑀧𑀸𑀓𑀝𑁄. 𑀲𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀥𑀚𑁂𑀦 𑀲𑀳 𑀧𑀤𑀼𑀫𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀲𑀥𑀚𑀁 𑀢𑀁 𑀧𑀤𑀼𑀫𑀓𑀮𑀸𑀧𑀁 𑀆𑀓𑀸𑀲𑀫𑀼𑀓𑁆𑀔𑀺𑀧𑀺𑀁, 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀳𑁄𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀥𑀚𑀫𑀺𑀯 𑀙𑀓𑀸𑀫𑀸𑀯𑀘𑀭𑁂 𑀧𑀸𑀓𑀝𑁄 𑀧𑀽𑀚𑀺𑀢𑁄 𑀘 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀧𑀜𑁆𑀘𑀯𑀲𑁆𑀲𑀺𑀓𑁄𑀯 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀧𑀤𑀼𑀫𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁬𑁭. 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀢𑀣𑀁 𑀅𑀯𑀺𑀢𑀣𑀁 𑀅𑀯𑀺𑀧𑀭𑀻𑀢𑀁 𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀫𑀸𑀳𑀝𑀸𑀦𑀻𑀢𑀺 𑀘𑀢𑀼𑀲𑀘𑁆𑀘𑀁, 𑀢𑀁 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄 𑀮𑁄𑀓𑁂 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀭𑀥𑀫𑁆𑀫𑀧𑁆𑀧𑀯𑀢𑁆𑀢𑀓𑁄𑀢𑀺 𑀉𑀢𑁆𑀢𑀫𑀥𑀫𑁆𑀫𑀧𑁆𑀧𑀯𑀢𑁆𑀢𑀓𑁄 𑀧𑀓𑀸𑀲𑀓𑁄𑀢𑀺 𑀅𑀢𑁆𑀣𑁄. 𑀅𑀫𑀢𑀁 𑀯𑀼𑀝𑁆𑀞𑀺𑀦𑁆𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀯𑀼𑀝𑁆𑀞𑀺𑀥𑀸𑀭𑀁 𑀧𑀯𑀲𑁆𑀲𑀦𑁆𑀢𑁄 𑀧𑀕𑁆𑀖𑀭𑀦𑁆𑀢𑁄 𑀲𑀤𑁂𑀯𑀓𑀁 𑀮𑁄𑀓𑀁 𑀢𑁂𑀫𑁂𑀦𑁆𑀢𑁄 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀥𑀫𑁆𑀫𑀯𑀲𑁆𑀲𑀁 𑀯𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁬𑁮. 𑀲𑀥𑀚𑀁 𑀧𑀤𑀼𑀫𑀁 𑀕𑀬𑁆𑀳𑀸𑀢𑀺 𑀥𑀚𑁂𑀦 𑀲𑀳 𑀏𑀓𑀢𑁄 𑀓𑀢𑁆𑀯𑀸 𑀧𑀤𑀼𑀫𑀁 𑀧𑀤𑀼𑀫𑀓𑀮𑀸𑀧𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀟𑁆𑀠𑀓𑁄𑀲𑁂 𑀞𑀺𑀢𑁄 𑀅𑀳𑀦𑁆𑀢𑀺 𑀉𑀪𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀤𑀼𑀫𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀅𑀲𑀦𑀩𑁄𑀥𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀲𑀦𑀩𑁄𑀥𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀼𑀔𑀧𑁆𑀧𑀢𑁆𑀢𑁄 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀅𑀲𑀦𑀩𑁄𑀥𑀺𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀺𑀢𑀩𑁄𑀥𑀺𑀢𑀭𑀼𑀡𑁂 𑀕𑀳𑁂𑀢𑁆𑀯𑀸 𑀩𑁄𑀥𑀺𑀁 𑀭𑁄𑀧𑁂𑀲𑀺, 𑀬𑀣𑀸 𑀦 𑀯𑀺𑀦𑀲𑁆𑀲𑀢𑀺 𑀢𑀣𑀸 𑀉𑀤𑀓𑀸𑀲𑀺𑀜𑁆𑀘𑀦𑀸𑀤𑀺𑀓𑀫𑁆𑀫𑁂𑀦 𑀭𑀓𑁆𑀔𑀺𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀭𑀺𑀧𑀓𑁆𑀓𑀲𑀫𑁆𑀪𑀸𑀭𑀢𑁆𑀢𑀸 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀧𑀼𑀭𑀸𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀅𑀲𑀦𑀩𑁄𑀥𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁭𑁮. 𑀲𑁄 𑀧𑀼𑀩𑁆𑀩𑀲𑀫𑁆𑀪𑀸𑀭𑀫𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀬𑀸𑀢𑀺 𑀫𑀸𑀢𑀼𑀕𑀩𑁆𑀪𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀯𑀲𑁆𑀲𑁄 𑀧𑀭𑀺𑀧𑀼𑀡𑁆𑀡𑀲𑀭𑀤𑁄 𑀅𑀳𑀁 𑀮𑁄𑀓𑀦𑀸𑀬𑀓𑀁 𑀢𑀺𑀲𑁆𑀲𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄𑀢𑀺 𑀧𑀓𑀸𑀭𑁂𑀦 𑀧𑀲𑀦𑁆𑀦𑀅𑀦𑀸𑀮𑀼𑀴𑀺𑀢𑀅𑀯𑀺𑀓𑀫𑁆𑀧𑀺𑀢𑀘𑀺𑀢𑁆𑀢𑁄, 𑀲𑀼𑀫𑀦𑁄 𑀲𑀼𑀦𑁆𑀤𑀭𑀫𑀦𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁭𑁯. 𑀢𑀺𑀲𑁆𑀲𑀲𑁆𑀲𑀸𑀳𑀁 𑀪𑀕𑀯𑀢𑁄𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄𑀢𑀺 𑀢𑀺𑀲𑁆𑀲𑁄, 𑀲𑁄 𑀫𑀸𑀢𑀼𑀕𑀩𑁆𑀪𑀢𑁄, 𑀫𑀦𑀼𑀲𑁆𑀲𑀚𑀸𑀢𑀺𑀢𑁄, 𑀧𑀜𑁆𑀘𑀓𑁆𑀔𑀦𑁆𑀥𑀢𑁄 𑀘 𑀫𑀼𑀢𑁆𑀢𑁄 𑀳𑀼𑀢𑁆𑀯𑀸 𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀩𑀼𑀤𑁆𑀥𑁄 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀢𑀸𑀤𑀺𑀦𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀅𑀲𑀦𑀩𑁄𑀥𑀺𑀁 𑀉𑀢𑁆𑀢𑀫𑀁 𑀭𑁄𑀧𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁦. 𑀅𑀲𑀦𑁄 𑀦𑀸𑀫𑀥𑁂𑀬𑁆𑀬𑁂𑀦𑀸𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀦𑀸𑀫𑀲𑀜𑁆𑀜𑀸𑀬 𑀅𑀲𑀦𑁄 𑀦𑀸𑀫 𑀅𑀲𑀦𑀭𑀼𑀓𑁆𑀔𑁄 𑀩𑁄𑀥𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀥𑀭𑀡𑀻𑀭𑀼𑀳𑀧𑀸𑀤𑀧𑁄𑀢𑀺 𑀯𑀮𑁆𑀮𑀺𑀭𑀼𑀓𑁆𑀔𑀧𑀩𑁆𑀩𑀢𑀕𑀗𑁆𑀕𑀸𑀲𑀸𑀕𑀭𑀸𑀤𑀬𑁄 𑀥𑀸𑀭𑁂𑀢𑀻𑀢𑀺 𑀥𑀭𑀡𑀻, 𑀓𑀸 𑀲𑀸? 𑀧𑀣𑀯𑀻, 𑀢𑀲𑁆𑀲𑀁 𑀭𑀼𑀳𑀢𑀺 𑀧𑀢𑀺𑀝𑁆𑀞𑀳𑀢𑀻𑀢𑀺 𑀥𑀭𑀡𑀻𑀭𑀼𑀳𑁄, 𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄, 𑀧𑀸𑀤𑀲𑀗𑁆𑀔𑀸𑀢𑁂𑀦 𑀫𑀽𑀮𑁂𑀦 𑀲𑀺𑀜𑁆𑀘𑀺𑀢𑁄𑀤𑀓𑀁 𑀧𑀺𑀯𑀢𑀺 𑀆𑀧𑁄𑀭𑀲𑀁 𑀲𑀺𑀦𑁂𑀳𑀁 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀥𑀭𑀡𑀻𑀭𑀼𑀳𑁄 𑀘 𑀲𑁄 𑀧𑀸𑀤𑀧𑁄 𑀘𑀸𑀢𑀺 𑀥𑀭𑀡𑀻𑀭𑀼𑀳𑀧𑀸𑀤𑀧𑁄, 𑀢𑀁 𑀉𑀢𑁆𑀢𑀫𑀁 𑀅𑀲𑀦𑀁 𑀩𑁄𑀥𑀺𑀁 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀧𑀭𑀺𑀘𑀭𑀺𑀁 𑀧𑁄𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁮𑁧. 𑀧𑀼𑀧𑁆𑀨𑀺𑀢𑀁 𑀧𑀸𑀤𑀧𑀁 𑀤𑀺𑀲𑁆𑀯𑀸𑀢𑀺 𑀢𑀁 𑀫𑀬𑀸 𑀧𑁄𑀲𑀺𑀢𑀁 𑀅𑀲𑀦𑀩𑁄𑀥𑀺𑀭𑀼𑀓𑁆𑀔𑀁 𑀧𑀼𑀧𑁆𑀨𑀺𑀢𑀁 𑀅𑀘𑁆𑀙𑀭𑀬𑁄𑀕𑁆𑀕𑀪𑀽𑀢𑀧𑀼𑀧𑁆𑀨𑀢𑁆𑀢𑀸 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀓𑀭𑀡𑀁 𑀤𑀺𑀲𑁆𑀯𑀸 𑀲𑀓𑀁 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀦𑁆𑀢𑁄 𑀧𑀓𑀸𑀭𑁂𑀦 𑀓𑀣𑀬𑀦𑁆𑀢𑁄 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀲𑀦𑀩𑁄𑀥𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀙𑀝𑁆𑀞𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀲𑀓𑀘𑀺𑀦𑁆𑀢𑀦𑀺𑀬𑀯𑀕𑁆𑀕𑁄

𑁧. 𑀲𑀓𑀘𑀺𑀦𑁆𑀢𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀯𑀦𑀁 𑀓𑀸𑀦𑀦𑀁 𑀤𑀺𑀲𑁆𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀓𑀘𑀺𑀦𑁆𑀢𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀢𑀲𑁆𑀲 𑀪𑀕𑀯𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑁄 𑀥𑀭𑀫𑀸𑀦𑀁 𑀪𑀕𑀯𑀦𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀯𑀺𑀯𑁂𑀓𑀁 𑀭𑀫𑀡𑀻𑀬𑀁 𑀏𑀓𑀁 𑀯𑀦𑀁 𑀧𑀢𑁆𑀯𑀸 𑀢𑀢𑁆𑀣𑁂𑀯𑁂𑀓𑀸𑀬 𑀓𑀦𑁆𑀤𑀭𑀸𑀬 𑀧𑀼𑀮𑀺𑀦𑀘𑁂𑀢𑀺𑀬𑀁 𑀓𑀢𑁆𑀯𑀸 𑀪𑀕𑀯𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 𑀲𑀥𑀸𑀢𑀼𑀓𑀲𑀜𑁆𑀜𑀜𑁆𑀘 𑀓𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀧𑀭𑀺𑀘𑀭𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀤𑁆𑀯𑀻𑀲𑀼 𑀅𑀕𑁆𑀕𑀁 𑀅𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀕𑁆𑀕𑀜𑁆𑀘 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺.

𑁧. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀯𑀦𑀁 𑀓𑀸𑀦𑀦𑀁 𑀤𑀺𑀲𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀦𑀦𑁆𑀢𑀺 𑀧𑀓𑀸𑀭𑁂𑀦 𑀯𑀦𑀁 𑀧𑀢𑁆𑀣𑀝𑀁 𑀯𑀺𑀢𑁆𑀣𑀺𑀡𑁆𑀡𑀁 𑀕𑀳𑀦𑀪𑀽𑀢𑀦𑁆𑀢𑀺 𑀧𑀯𑀦𑀁. 𑀓𑀸𑀦𑀦𑀁 𑀅𑀯𑀓𑀼𑀘𑁆𑀙𑀺𑀢𑀁 𑀆𑀦𑀦𑀁 𑀅𑀯𑀳𑀦𑀁 𑀲𑀢𑀢𑀁 𑀲𑀻𑀳𑀩𑁆𑀬𑀕𑁆𑀖𑀬𑀓𑁆𑀔𑀭𑀓𑁆𑀔𑀲𑀫𑀤𑁆𑀤𑀳𑀢𑁆𑀣𑀺𑀅𑀲𑁆𑀲𑀲𑀼𑀧𑀡𑁆𑀡𑀉𑀭𑀕𑁂𑀳𑀺 𑀯𑀺𑀳𑀗𑁆𑀕𑀕𑀡𑀲𑀤𑁆𑀤𑀓𑀼𑀓𑁆𑀓𑀼𑀝𑀓𑁄𑀓𑀺𑀮𑁂𑀳𑀺 𑀯𑀸 𑀩𑀳𑀮𑀦𑁆𑀢𑀺 𑀓𑀸𑀦𑀦𑀁, 𑀢𑀁 𑀓𑀸𑀦𑀦𑀲𑀗𑁆𑀔𑀸𑀢𑀁 𑀧𑀯𑀦𑀁 𑀫𑀦𑀼𑀲𑁆𑀲𑀲𑀤𑁆𑀤𑀯𑀺𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀲𑀤𑁆𑀤𑀁 𑀦𑀺𑀲𑁆𑀲𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀸𑀯𑀺𑀮𑀦𑁆𑀢𑀺 𑀦 𑀆𑀯𑀺𑀮𑀁 𑀉𑀧𑀤𑁆𑀤𑀯𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀲𑀻𑀦𑀁 𑀅𑀦𑀼𑀘𑀺𑀡𑁆𑀡𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀳𑀦𑁆𑀢𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑀸𑀦𑀁 𑀇𑀲𑀻𑀦𑀁 𑀅𑀦𑀼𑀘𑀺𑀡𑁆𑀡𑀁 𑀦𑀺𑀲𑁂𑀯𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀦𑁆𑀢𑀺 𑀆𑀳𑀼𑀦𑀁 𑀯𑀼𑀘𑁆𑀘𑀢𑀺 𑀧𑀽𑀚𑀸𑀲𑀓𑁆𑀓𑀸𑀭𑀁 𑀧𑀝𑀺𑀕𑁆𑀕𑀳𑀁 𑀕𑁂𑀳𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄.

𑁨. 𑀣𑀽𑀧𑀁 𑀓𑀢𑁆𑀯𑀸𑀦 𑀯𑁂𑀴𑀼𑀦𑀸𑀢𑀺 𑀯𑁂𑀴𑀼𑀧𑁂𑀲𑀺𑀓𑀸𑀳𑀺 𑀘𑁂𑀢𑀺𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀧𑀼𑀧𑁆𑀨𑀁 𑀲𑀫𑁄𑀓𑀺𑀭𑀺𑀦𑁆𑀢𑀺 𑀘𑀫𑁆𑀧𑀓𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀫𑁄𑀓𑀺𑀭𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀚𑀻𑀯𑀫𑀸𑀦𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀇𑀯 𑀦𑀺𑀫𑁆𑀫𑀺𑀢𑀁 𑀉𑀧𑁆𑀧𑀸𑀤𑀺𑀢𑀁 𑀘𑁂𑀢𑀺𑀬𑀁 𑀅𑀳𑀁 𑀅𑀪𑀺 𑀯𑀺𑀲𑁂𑀲𑁂𑀦 𑀯𑀦𑁆𑀤𑀺𑀁 𑀧𑀡𑀸𑀫𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀓𑀘𑀺𑀦𑁆𑀢𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀅𑀯𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀳𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀯𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀉𑀧𑀭𑀺 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀜𑁆𑀘 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀆 𑀲𑀫𑀦𑁆𑀢𑀢𑁄 𑀓𑀸𑀲𑀢𑀺 𑀤𑀺𑀧𑁆𑀧𑀢𑀻𑀢𑀺 𑀆𑀓𑀸𑀲𑁄, 𑀢𑀲𑁆𑀫𑀺𑀁 𑀆𑀓𑀸𑀲𑁂 𑀧𑀼𑀧𑁆𑀨𑀸𑀦𑀁 𑀅𑀯𑀓𑀺𑀭𑀺𑀢𑀢𑁆𑀢𑀸 𑀅𑀯𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁭. 𑀏𑀯𑀁 𑀧𑀢𑁆𑀢𑀲𑀦𑁆𑀢𑀺𑀧𑀤𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀳𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀳𑀸𑀭𑀸𑀢𑀺 𑀯𑀺𑀲𑁂𑀲𑁂𑀦 𑀳𑀭𑀢𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀅𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀆𑀳𑀭𑀢𑀺 𑀧𑀯𑀢𑁆𑀢𑁂𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄, 𑀢𑀲𑁆𑀫𑀸 𑀯𑀺𑀳𑀸𑀭𑀸 𑀅𑀪𑀺 𑀯𑀺𑀲𑁂𑀲𑁂𑀦 𑀦𑀺𑀓𑁆𑀔𑀫𑁆𑀫 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀅𑀩𑁆𑀪𑀼𑀝𑁆𑀞𑀸𑀲𑀺 𑀘 𑀘𑀗𑁆𑀓𑀫𑁂𑀢𑀺 𑀘𑀗𑁆𑀓𑀫𑀦𑀢𑁆𑀣𑀸𑀬 𑀲𑀝𑁆𑀞𑀺𑀭𑀢𑀦𑁂 𑀘𑀗𑁆𑀓𑀫𑁂 𑀅𑀪𑀺𑀯𑀺𑀲𑁂𑀲𑁂𑀦 𑀉𑀝𑁆𑀞𑀸𑀲𑀺, 𑀅𑀪𑀺𑀭𑀼𑀳𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄𑀢𑀺 𑀢𑀲𑁆𑀫𑀺𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀲𑀘𑁆𑀘𑀲𑀗𑁆𑀔𑀸𑀢𑀁 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀅𑀫𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀤𑁂𑀲𑁂𑀦𑁆𑀢𑁄 𑀯𑀺𑀪𑀚𑀦𑁆𑀢𑁄 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑁄 𑀢𑀲𑁆𑀫𑀺𑀁 𑀘𑀗𑁆𑀓𑀫𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁮. 𑀲𑀺𑀔𑀺𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄𑀢𑀺 𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀲𑁆𑀲 𑀲𑀺𑀔𑀺𑀲𑁆𑀲 𑀩𑀼𑀤𑁆𑀥𑀲𑁆𑀲 𑀕𑀺𑀭𑀁 𑀲𑀤𑁆𑀤𑀁 𑀖𑁄𑀲𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀦𑀸𑀦𑀸𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀦𑀸𑀕𑀧𑀼𑀦𑁆𑀦𑀸𑀕𑀸𑀤𑀺𑀅𑀦𑁂𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸. 𑀆𑀓𑀸𑀲𑀫𑁆𑀳𑀺 𑀲𑀫𑁄𑀓𑀺𑀭𑀺𑀦𑁆𑀢𑀺 𑀘𑀗𑁆𑀓𑀫𑀦𑁆𑀢𑀲𑁆𑀲 𑀪𑀕𑀯𑀢𑁄 𑀫𑀼𑀤𑁆𑀥𑀦𑀺 𑀆𑀓𑀸𑀲𑁂 𑀑𑀓𑀺𑀭𑀺𑀁 𑀧𑀽𑀚𑁂𑀲𑀺𑀁.

𑁯. 𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤𑀸𑀢𑀺 𑀤𑁆𑀯𑀺𑀧𑀤𑀸𑀦𑀁 𑀤𑁂𑀯𑀩𑁆𑀭𑀳𑁆𑀫𑀫𑀦𑀼𑀲𑁆𑀲𑀸𑀦𑀁 𑀇𑀦𑁆𑀤 𑀧𑀥𑀸𑀦𑀪𑀽𑀢. 𑀦𑀭𑀸𑀲𑀪 𑀦𑀭𑀸𑀦𑀁 𑀆𑀲𑀪𑀪𑀽𑀢. 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀘𑀮𑀁 𑀞𑀸𑀦𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀅𑀫𑁆𑀳𑀺 𑀪𑀯𑀸𑀫𑀺. 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀦𑁆𑀢𑀺 𑀤𑀺𑀩𑁆𑀩𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀚𑀬𑀜𑁆𑀘 𑀘𑀢𑀼𑀭𑀸𑀧𑀸𑀬𑀤𑀼𑀓𑁆𑀔𑀲𑀗𑁆𑀔𑀸𑀢𑀁 𑀧𑀭𑀸𑀚𑀬𑀜𑁆𑀘 𑀳𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀯𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑁄.

𑁩. 𑀧𑀘𑁆𑀘𑀸𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀦𑁆𑀥𑀼𑀬𑀸 𑀦𑀤𑀺𑀬𑀸 𑀢𑀻𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀘𑁆𑀘𑀸𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀺𑀦𑁆𑀥𑀼𑀬𑀸 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀘𑀓𑁆𑀓𑀯𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀧𑀼𑀩𑁆𑀩𑀲𑀫𑁆𑀪𑀸𑀭𑀬𑀼𑀢𑁆𑀢𑀢𑁆𑀢𑀸 𑀧𑀸𑀡𑀺𑀦𑁄 𑀅𑀔𑀸𑀤𑀦𑁆𑀢𑁄 𑀲𑁂𑀯𑀸𑀮𑀫𑁂𑀯 𑀪𑀓𑁆𑀔𑀬𑀦𑁆𑀢𑁄 𑀘𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀧𑀲𑁆𑀲𑀺𑀪𑀕𑀯𑀸 𑀲𑀢𑁆𑀢𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀘𑀓𑁆𑀓𑀯𑀸𑀓𑁄 𑀯𑀺𑀚𑁆𑀚𑁄𑀢𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑀼𑀡𑁆𑀟𑁂𑀦 𑀲𑀸𑀮𑀭𑀼𑀓𑁆𑀔𑀢𑁄 𑀲𑀸𑀮𑀧𑀼𑀧𑁆𑀨𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀕𑀫𑁆𑀫 𑀧𑀽𑀚𑁂𑀲𑀺. 𑀲𑁄 𑀢𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀅𑀧𑀭𑀸𑀧𑀭𑀁 𑀙𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀼𑀩𑁆𑀩𑀘𑀭𑀺𑀢𑀯𑀲𑁂𑀦 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺, 𑀘𑀓𑁆𑀓𑀯𑀸𑀓𑁄 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀫𑀸𑀳𑀭𑀺𑀢𑁆𑀯𑀸 𑀧𑀽𑀚𑀺𑀢𑀢𑁆𑀢𑀸 𑀧𑀼𑀩𑁆𑀩𑀧𑀼𑀜𑁆𑀜𑀦𑀸𑀫𑁂𑀦 𑀧𑀘𑁆𑀘𑀸𑀕𑀫𑀦𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁧𑁩. 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀦𑁆𑀥𑀼𑀬𑀸 𑀦𑀤𑀺𑀬𑀸 𑀢𑀻𑀭𑁂𑀢𑀺𑀆𑀤𑀺𑀫𑀸𑀳. 𑀲𑀻𑀢𑀺 𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀥𑀼𑀦𑀸𑀢𑀺 𑀓𑀫𑁆𑀧𑀢𑀻𑀢𑀺 𑀲𑀺𑀦𑁆𑀥𑀼, 𑀦𑀤𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀦𑀤𑀺. 𑀘𑀓𑁆𑀓𑀯𑀸𑀓𑁄 𑀅𑀳𑀁 𑀢𑀤𑀸𑀢𑀺 𑀘𑀓𑁆𑀓𑀁 𑀲𑀻𑀖𑀁 𑀕𑀘𑁆𑀙𑀦𑁆𑀢𑀁 𑀇𑀯 𑀉𑀤𑀓𑁂 𑀯𑀸 𑀣𑀮𑁂 𑀯𑀸 𑀆𑀓𑀸𑀲𑁂 𑀯𑀸 𑀲𑀻𑀖𑀁 𑀯𑀸𑀢𑀺 𑀕𑀘𑁆𑀙𑀢𑀻𑀢𑀺 𑀘𑀓𑁆𑀓𑀯𑀸𑀓𑁄. 𑀢𑀤𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀓𑀸𑀮𑁂 𑀅𑀳𑀁 𑀘𑀓𑁆𑀓𑀯𑀸𑀓𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀲𑁂𑀯𑀸𑀮𑀪𑀓𑁆𑀔𑁄𑀳𑀦𑁆𑀢𑀺 𑀅𑀜𑁆𑀜𑀕𑁄𑀘𑀭𑀅𑀫𑀺𑀲𑁆𑀲𑀢𑁆𑀢𑀸 𑀲𑀼𑀤𑁆𑀥𑀲𑁂𑀯𑀸𑀮𑀫𑁂𑀯 𑀔𑀸𑀤𑀦𑁆𑀢𑁄 𑀅𑀳𑀁 𑀯𑀲𑀸𑀫𑀺. 𑀧𑀸𑀧𑁂𑀲𑀼 𑀘 𑀲𑀼𑀲𑀜𑁆𑀜𑀢𑁄𑀢𑀺 𑀧𑀼𑀩𑁆𑀩𑀯𑀸𑀲𑀦𑀸𑀯𑀲𑁂𑀦 𑀧𑀸𑀧𑀓𑀭𑀡𑁂 𑀲𑀼𑀝𑁆𑀞𑀼 𑀲𑀜𑁆𑀜𑀢𑁄 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀜𑁆𑀜𑀢𑁄 𑀲𑀼𑀲𑀺𑀓𑁆𑀔𑀺𑀢𑁄.

𑁧𑁪. 𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀯𑀺𑀭𑀳𑀺𑀢𑀢𑁆𑀢𑀸 𑀯𑀺𑀭𑀚𑀁 𑀦𑀺𑀓𑁆𑀓𑀺𑀮𑁂𑀲𑀁 𑀩𑀼𑀤𑁆𑀥𑀁 𑀅𑀤𑁆𑀤𑀲𑀁 𑀅𑀤𑁆𑀤𑀓𑁆𑀔𑀺𑀁. 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂𑀢𑀺 𑀅𑀦𑀺𑀮𑀜𑁆𑀚𑀲𑁂 𑀆𑀓𑀸𑀲𑀧𑀣𑁂 𑀕𑀘𑁆𑀙𑀦𑁆𑀢𑀁 𑀩𑀼𑀤𑁆𑀥𑀁. 𑀢𑀼𑀡𑁆𑀟𑁂𑀦 𑀫𑀬𑁆𑀳𑀁 𑀫𑀼𑀔𑀢𑀼𑀡𑁆𑀟𑁂𑀦 𑀢𑀸𑀮𑀁 𑀲𑀸𑀮𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳 𑀧𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲𑀸𑀪𑀺𑀭𑁄𑀧𑀬𑀺𑀁 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀘𑁆𑀘𑀸𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀉𑀲𑀪𑀁 𑀧𑀯𑀭𑀁 𑀯𑀻𑀭𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄 𑀦𑀸𑀫𑁂𑀦 𑀲𑁂𑀮𑀩𑁆𑀭𑀸𑀳𑁆𑀫𑀡𑁄𑀢𑀺 𑀧𑀸𑀓𑀝𑁄 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀘𑀸𑀢𑀺 𑀲𑀬𑀁 𑀲𑁄𑀪𑀫𑀸𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀅𑀦𑁂𑀓𑀸𑀳𑀺 𑀉𑀧𑀫𑀸𑀳𑀺 𑀣𑁄𑀫𑀦𑀁 𑀧𑀓𑀸𑀲𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀲𑀓𑁆𑀓𑀫𑀸𑀭𑀸𑀤𑀬𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀙𑀴𑀪𑀺𑀜𑁆𑀜𑀧𑁆𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄 𑀅𑀳𑁄𑀲𑀺, 𑀩𑀼𑀤𑁆𑀥𑀲𑁆𑀲 𑀣𑀼𑀢𑀺𑀬𑀸 𑀲𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀧𑁆𑀧𑀲𑀸𑀤𑀓𑀭𑀡𑀢𑁄 𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁨𑁦. 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀉𑀲𑀪𑀁 𑀧𑀯𑀭𑀁 𑀯𑀻𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀲𑀪𑀦𑁆𑀢𑀺 𑀯𑀲𑀪𑁄 𑀦𑀺𑀲𑀪𑁄 𑀯𑀺𑀲𑀪𑁄 𑀆𑀲𑀪𑁄𑀢𑀺 𑀘𑀢𑁆𑀢𑀸𑀭𑁄 𑀚𑁂𑀝𑁆𑀞𑀧𑀼𑀗𑁆𑀕𑀯𑀸. 𑀢𑀢𑁆𑀣 𑀕𑀯𑀲𑀢𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀦𑀺𑀲𑀪𑁄, 𑀕𑀯𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀺𑀲𑀪𑁄, 𑀕𑀯𑀓𑁄𑀝𑀺𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀆𑀲𑀪𑁄𑀢𑀺 𑀘 𑀬𑀲𑁆𑀲 𑀓𑀲𑁆𑀲𑀘𑀺 𑀣𑀼𑀢𑀺𑀁 𑀓𑀭𑁄𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀩𑀳𑀼𑀲𑁆𑀲𑀼𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀜𑁆𑀜𑀸𑀯𑀲𑁂𑀦 𑀣𑀼𑀢𑀺𑀁 𑀓𑀭𑁄𑀦𑁆𑀢𑀺, 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀸𑀓𑀸𑀭𑁂𑀦 𑀣𑀼𑀢𑀺𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀏𑀓𑁄𑀧𑀺 𑀦𑀢𑁆𑀣𑀺. 𑀅𑀧𑁆𑀧𑀫𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁, 𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂, 𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩) 𑁋

𑀆𑀤𑀺𑀓𑀁. 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 𑀫𑀼𑀔𑀸𑀭𑀽𑀴𑁆𑀳𑀯𑀲𑁂𑀦 𑀏𑀓𑀧𑀲𑀻𑀤𑀦𑀯𑀲𑁂𑀦 ‘‘𑀆𑀲𑀪’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀉𑀲𑀪’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀭𑀺𑀢𑀩𑁆𑀩𑁄 𑀧𑀢𑁆𑀣𑁂𑀢𑀩𑁆𑀩𑁄𑀢𑀺 𑀯𑀭𑁄. 𑀅𑀦𑁂𑀓𑁂𑀲𑀼 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀓𑀢𑀯𑀻𑀭𑀺𑀬𑀢𑁆𑀢𑀸 𑀯𑀻𑀭𑁄. 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑀁 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀫𑀳𑁂𑀲𑀻, 𑀢𑀁 𑀫𑀳𑁂𑀲𑀺𑀁 𑀩𑀼𑀤𑁆𑀥𑀁. 𑀯𑀺𑀲𑁂𑀲𑁂𑀦 𑀓𑀺𑀮𑁂𑀲𑀔𑀦𑁆𑀥𑀫𑀸𑀭𑀸𑀤𑀬𑁄 𑀫𑀸𑀭𑁂 𑀚𑀺𑀢𑀯𑀸𑀢𑀺 𑀯𑀺𑀚𑀺𑀢𑀸𑀯𑀻, 𑀢𑀁 𑀯𑀺𑀚𑀺𑀢𑀸𑀯𑀺𑀦𑀁 𑀲𑀫𑁆𑀩𑀼𑀤𑁆𑀥𑀁. 𑀲𑀼𑀯𑀡𑁆𑀡𑀲𑁆𑀲 𑀯𑀡𑁆𑀡𑁄 𑀇𑀯 𑀯𑀡𑁆𑀡𑁄 𑀬𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀓𑁄 𑀦𑀸𑀫 𑀲𑀢𑁆𑀢𑁄 𑀦𑀧𑁆𑀧𑀲𑀻𑀤𑀢𑀻𑀢𑀺.

𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑀲𑁆𑀫𑀺𑀁 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀢𑀲𑁆𑀫𑀺𑀁 𑀧𑀝𑀺𑀯𑀲𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀲𑁆𑀲𑀪𑀽 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑁄 𑀳𑀺𑀫𑀯𑀦𑁆𑀢𑀫𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀧𑀲𑀦𑁆𑀦𑀫𑀸𑀦𑀲𑁄 𑀪𑀺𑀲𑀫𑀼𑀴𑀸𑀮𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑁄𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀳𑀢𑁆𑀣𑀺𑀬𑁄𑀦𑀺𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀢𑁆𑀢𑀫𑀸𑀕𑀢𑁄 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀳𑀸𑀪𑁄𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺, 𑀲𑁄 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀦𑀸𑀫𑁂𑀦 𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁨𑁯. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑁆𑀲𑀪𑀽𑀢𑀺 𑀯𑁂𑀲𑁆𑀲𑀁 𑀪𑀼𑀦𑀸𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀯𑁂𑀲𑁆𑀲𑀪𑀽. 𑀅𑀣 𑀯𑀸 𑀯𑁂𑀲𑁆𑀲𑁂 𑀯𑀸𑀡𑀺𑀚𑀓𑀫𑁆𑀫𑁂 𑀯𑀸 𑀓𑀸𑀫𑀭𑀸𑀕𑀸𑀤𑀺𑀓𑁂 𑀯𑀸 𑀓𑀼𑀲𑀮𑀸𑀤𑀺𑀓𑀫𑁆𑀫𑁂 𑀯𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀯𑀸 𑀪𑀼𑀦𑀸𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑁂𑀲𑁆𑀲𑀪𑀽, 𑀲𑁄 𑀦𑀸𑀫𑁂𑀦 𑀯𑁂𑀲𑁆𑀲𑀪𑀽 𑀦𑀸𑀫 𑀪𑀕𑀯𑀸. 𑀇𑀲𑀻𑀦𑀁 𑀢𑀢𑀺𑀬𑁄 𑀅𑀳𑀽𑀢𑀺 𑀓𑀼𑀲𑀮𑀥𑀫𑁆𑀫𑁂 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀇𑀲𑀺, ‘‘𑀯𑀺𑀧𑀲𑁆𑀲𑀻, 𑀲𑀺𑀔𑀻, 𑀯𑁂𑀲𑁆𑀲𑀪𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑀺𑀬𑁄 𑀇𑀲𑀺 𑀢𑀢𑀺𑀬𑁄 𑀪𑀕𑀯𑀸 𑀅𑀳𑀼 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀓𑀸𑀦𑀦𑀁 𑀯𑀦𑀫𑁄𑀕𑁆𑀕𑀬𑁆𑀳𑀸𑀢𑀺 𑀓𑀸𑀦𑀦𑀲𑀗𑁆𑀔𑀸𑀢𑀁 𑀯𑀦𑀁 𑀑𑀕𑀬𑁆𑀳 𑀑𑀕𑀳𑁂𑀢𑁆𑀯𑀸 𑀧𑀸𑀯𑀺𑀲𑀻𑀢𑀺 𑀅𑀢𑁆𑀣𑁄.

𑁩𑁦. 𑀪𑀺𑀲𑀫𑀼𑀴𑀸𑀮𑀁 𑀕𑀡𑁆𑀳𑀺𑀢𑁆𑀯𑀸𑀢𑀺 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀙𑀸𑀢𑀓𑀁 𑀪𑀺𑀲𑀢𑀺 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀪𑀺𑀲𑀁, 𑀓𑁄 𑀲𑁄? 𑀧𑀤𑀼𑀫𑀓𑀦𑁆𑀤𑁄, 𑀪𑀺𑀲𑀜𑁆𑀘 𑀫𑀼𑀴𑀸𑀮𑀜𑁆𑀘 𑀪𑀺𑀲𑀫𑀼𑀴𑀸𑀮𑀁, 𑀢𑀁 𑀪𑀺𑀲𑀫𑀼𑀴𑀸𑀮𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩𑁧. 𑀓𑀭𑁂𑀦 𑀘 𑀧𑀭𑀸𑀫𑀝𑁆𑀞𑁄𑀢𑀺 𑀢𑀁 𑀫𑀬𑀸 𑀤𑀺𑀦𑁆𑀦𑀤𑀸𑀦𑀁, 𑀯𑁂𑀲𑁆𑀲𑀪𑀽𑀯𑀭𑀩𑀼𑀤𑁆𑀥𑀺𑀦𑀸 𑀉𑀢𑁆𑀢𑀫𑀩𑀼𑀤𑁆𑀥𑀺𑀦𑀸 𑀯𑁂𑀲𑁆𑀲𑀪𑀼𑀦𑀸 𑀓𑀭𑁂𑀦 𑀳𑀢𑁆𑀣𑀢𑀮𑁂𑀦 𑀧𑀭𑀸𑀫𑀝𑁆𑀞𑁄 𑀓𑀢𑀲𑀫𑁆𑀨𑀲𑁆𑀲𑁄 𑀅𑀳𑁄𑀲𑀺. 𑀲𑀼𑀔𑀸𑀳𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀫𑀁 𑀢𑁂𑀦 𑀓𑀼𑀢𑁄𑀢𑁆𑀢𑀭𑀺𑀦𑁆𑀢𑀺 𑀢𑁂𑀦 𑀲𑀼𑀔𑁂𑀦 𑀲𑀫𑀁 𑀲𑀼𑀔𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀢𑁄 𑀉𑀢𑁆𑀢𑀭𑀺𑀁 𑀢𑀢𑁄 𑀧𑀭𑀁 𑀢𑀢𑁄 𑀅𑀥𑀺𑀓𑀁 𑀲𑀼𑀔𑀁 𑀓𑀼𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺.

𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀕𑀺𑀭𑀺𑀤𑀼𑀕𑁆𑀕𑀘𑀭𑁄 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀦𑁂𑀲𑀸𑀤𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀫𑀺𑀕𑀲𑀽𑀓𑀭𑀸𑀤𑀬𑁄 𑀯𑀥𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀤𑀸 𑀮𑁄𑀓𑀦𑀸𑀣𑁄 𑀮𑁄𑀓𑀸𑀦𑀼𑀕𑁆𑀕𑀳𑀁 𑀲𑀢𑁆𑀢𑀸𑀦𑀼𑀤𑁆𑀤𑀬𑀢𑀜𑁆𑀘 𑀧𑀝𑀺𑀘𑁆𑀘 𑀳𑀺𑀫𑀯𑀦𑁆𑀢𑀫𑀕𑀫𑀸𑀲𑀺. 𑀢𑀤𑀸 𑀲𑁄 𑀦𑁂𑀲𑀸𑀤𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀢𑁆𑀢𑀦𑁄 𑀔𑀸𑀤𑀦𑀢𑁆𑀣𑀸𑀬 𑀆𑀦𑀻𑀢𑀁 𑀯𑀭𑀫𑀥𑀼𑀭𑀫𑀁𑀲𑀁 𑀅𑀤𑀸𑀲𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬, 𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀢𑀢𑁄 𑀘𑀼𑀢𑁄 𑀲𑀼𑀕𑀢𑀻𑀲𑀼 𑀲𑀁𑀲𑀭𑀦𑁆𑀢𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁬. 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀧𑀜𑁆𑀘𑀸𑀪𑀺𑀜𑁆𑀜𑀸𑀤𑀺𑀪𑁂𑀤𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀕𑀺𑀭𑀺𑀤𑀼𑀕𑁆𑀕𑀘𑀭𑁄 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀕𑀺𑀭𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀕𑀺𑀭𑀺, 𑀓𑁄 𑀲𑁄? 𑀲𑀺𑀮𑀸𑀧𑀁𑀲𑀼𑀫𑀬𑀧𑀩𑁆𑀩𑀢𑁄, 𑀤𑀼𑀝𑁆𑀞𑀼 𑀤𑀼𑀓𑁆𑀔𑁂𑀦 𑀕𑀫𑀦𑀻𑀬𑀁 𑀤𑀼𑀕𑁆𑀕𑀁, 𑀕𑀺𑀭𑀻𑀳𑀺 𑀤𑀼𑀕𑁆𑀕𑀁 𑀕𑀺𑀭𑀺𑀤𑀼𑀕𑁆𑀕𑀁, 𑀤𑀼𑀕𑁆𑀕𑀫𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀕𑀺𑀭𑀺𑀤𑀼𑀕𑁆𑀕𑁂 𑀧𑀩𑁆𑀩𑀢𑀦𑁆𑀢𑀭𑁂 𑀘𑀭𑁄 𑀘𑀭𑀡𑀲𑀻𑀮𑁄 𑀆𑀲𑀺𑀁 𑀅𑀳𑁄𑀲𑀺𑀁. 𑀅𑀪𑀺𑀚𑀸𑀢𑁄𑀯 𑀓𑁂𑀲𑀭𑀻𑀢𑀺 𑀅𑀪𑀺 𑀯𑀺𑀲𑁂𑀲𑁂𑀦 𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀓𑁂𑀲𑀭𑀻𑀯 𑀓𑁂𑀲𑀭𑀲𑀻𑀳𑁄 𑀇𑀯 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁 𑀘𑀭𑀸𑀫𑀻𑀢𑀺 𑀅𑀢𑁆𑀣𑁄.

𑁪𑁦. 𑀕𑀺𑀭𑀺𑀤𑀼𑀕𑁆𑀕𑀁 𑀧𑀯𑀺𑀲𑀺𑀁 𑀅𑀳𑀦𑁆𑀢𑀺 𑀅𑀳𑀁 𑀢𑀤𑀸 𑀢𑁂𑀦 𑀫𑀁𑀲𑀤𑀸𑀦𑁂𑀦 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀩𑁆𑀩𑀢𑀦𑁆𑀢𑀭𑀁 𑀧𑀸𑀯𑀺𑀲𑀺𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀯𑀢𑁆𑀣𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀓𑁆𑀔𑀺𑀚𑀸𑀢𑁄 𑀢𑀤𑀸 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀢𑁆𑀣𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀼𑀧𑀡𑁆𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀕𑀘𑁆𑀙𑀦𑁆𑀢𑀁 𑀅𑀢𑁆𑀣𑀤𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀧𑀡𑁆𑀡𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀳𑀕𑁆𑀖𑀁 𑀤𑀺𑀩𑁆𑀩𑀯𑀢𑁆𑀣𑀁 𑀆𑀤𑀸𑀬 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀲𑁄𑀧𑀺 𑀪𑀕𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀲𑀩𑁆𑀩𑀢𑁆𑀣 𑀫𑀳𑀕𑁆𑀖𑀁 𑀯𑀢𑁆𑀣𑀸𑀪𑀭𑀡𑀁 𑀮𑀤𑁆𑀥𑀁, 𑀢𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀯𑀢𑁆𑀣𑀘𑁆𑀙𑀸𑀬𑀸𑀬 𑀕𑀢𑀕𑀢𑀝𑁆𑀞𑀸𑀦𑁂 𑀯𑀲𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑁄 𑀅𑀳𑁄𑀲𑀺, 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀯𑀢𑁆𑀣𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁪𑁫. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀓𑁆𑀔𑀺𑀚𑀸𑀢𑁄 𑀢𑀤𑀸 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀓𑁆𑀔𑀺𑀚𑀸𑀢𑁄𑀢𑀺 𑀧𑀓𑁆𑀔𑀦𑁆𑀤𑀢𑀺 𑀉𑀧𑀮𑀯𑀢𑀺 𑀲𑀓𑀼𑀡𑁄 𑀏𑀢𑁂𑀦𑀸𑀢𑀺 𑀧𑀓𑁆𑀔𑀁, 𑀧𑀓𑁆𑀔𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀓𑁆𑀔𑀻, 𑀧𑀓𑁆𑀔𑀺𑀬𑁄𑀦𑀺𑀬𑀁 𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀧𑀡𑁆𑀡𑁄𑀢𑀺 𑀲𑀼𑀦𑁆𑀤𑀭𑀁 𑀧𑀡𑁆𑀡𑀁 𑀧𑀢𑁆𑀢𑀁 𑀬𑀲𑁆𑀲 𑀲𑁄 𑀲𑀼𑀧𑀡𑁆𑀡𑁄, 𑀯𑀸𑀢𑀕𑁆𑀕𑀸𑀳𑀲𑀼𑀯𑀡𑁆𑀡𑀯𑀡𑁆𑀡𑀚𑀮𑀫𑀸𑀦𑀧𑀢𑁆𑀢𑀫𑀳𑀸𑀪𑀸𑀭𑁄𑀢𑀺 𑀅𑀢𑁆𑀣𑁄. 𑀕𑀭𑀼𑀴𑀸𑀥𑀺𑀧𑁄𑀢𑀺 𑀦𑀸𑀕𑁂 𑀕𑀡𑁆𑀳𑀦𑀢𑁆𑀣𑀸𑀬 𑀕𑀭𑀼𑀁 𑀪𑀸𑀭𑀁 𑀧𑀸𑀲𑀸𑀡𑀁 𑀕𑀺𑀴𑀦𑁆𑀢𑀻𑀢𑀺 𑀕𑀭𑀼𑀴𑀸, 𑀕𑀭𑀼𑀴𑀸𑀦𑀁 𑀅𑀥𑀺𑀧𑁄 𑀭𑀸𑀚𑀸𑀢𑀺 𑀕𑀭𑀼𑀴𑀸𑀥𑀺𑀧𑁄, 𑀯𑀺𑀭𑀚𑀁 𑀩𑀼𑀤𑁆𑀥𑀁 𑀅𑀤𑁆𑀤𑀲𑀸𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀢𑁆𑀣𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀅𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀸𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀳𑀺𑀫𑀯𑀦𑁆𑀢𑁂 𑀓𑀧𑀺𑀭𑀸𑀚𑀸 𑀳𑀼𑀢𑁆𑀯𑀸 𑀧𑀝𑀺𑀯𑀲𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀳𑀺𑀫𑀯𑀦𑁆𑀢𑀫𑀕𑀫𑀸𑀲𑀺. 𑀅𑀣 𑀲𑁄 𑀓𑀧𑀺𑀭𑀸𑀚𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀫𑀥𑀼𑀭𑀁 𑀅𑀫𑁆𑀩𑀨𑀮𑀁 𑀔𑀼𑀤𑁆𑀤𑀫𑀥𑀼𑀦𑀸 𑀅𑀤𑀸𑀲𑀺. 𑀅𑀣 𑀪𑀕𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀁 𑀲𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀲𑁄 𑀲𑁄𑀫𑀦𑀲𑁆𑀲𑀲𑀫𑁆𑀧𑀦𑁆𑀦𑀳𑀤𑀬𑁄 𑀢𑁂𑀦𑁂𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑀭𑀸𑀧𑀭𑀁 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀧𑀼𑀩𑁆𑀩𑀧𑀼𑀜𑁆𑀜𑀦𑀸𑀫𑁂𑀦 𑀅𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁫𑁩. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑀸 𑀓𑀢𑀓𑀼𑀲𑀮𑀩𑀻𑀚𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀫𑁂𑀢𑁆𑀢𑀸𑀬 𑀅𑀨𑀭𑀺 𑀮𑁄𑀓𑁂, 𑀅𑀧𑁆𑀧𑀫𑀸𑀡𑁂 𑀦𑀺𑀭𑀽𑀧𑀥𑀻𑀢𑀺 𑀲𑁄 𑀪𑀕𑀯𑀸 𑀲𑀩𑁆𑀩𑀮𑁄𑀓𑁂 𑀅𑀧𑁆𑀧𑀫𑀸𑀡𑁂 𑀲𑀢𑁆𑀢𑁂 ‘‘𑀲𑀼𑀔𑀻 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀺𑀭𑀼𑀧𑀥𑀺 𑀉𑀧𑀥𑀺𑀯𑀺𑀭𑀳𑀺𑀢𑀁 𑀓𑀢𑁆𑀯𑀸 𑀫𑁂𑀢𑁆𑀢𑀸𑀬 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀅𑀨𑀭𑀺 𑀧𑀢𑁆𑀣𑀭𑀺 𑀯𑀟𑁆𑀠𑁂𑀲𑀻𑀢𑀺 𑀅𑀢𑁆𑀣𑁄.

𑁫𑁪. 𑀓𑀧𑀺 𑀅𑀳𑀁 𑀢𑀤𑀸 𑀆𑀲𑀺𑀦𑁆𑀢𑀺 𑀢𑀤𑀸 𑀢𑀲𑁆𑀲𑀸𑀕𑀫𑀦𑀓𑀸𑀮𑁂 𑀓𑀧𑀺𑀭𑀸𑀚𑀸 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀲𑀼𑀫𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀫𑀦𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀸𑀮𑀸𑀓𑀸𑀭𑀲𑁆𑀲 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀪𑀕𑀯𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀫𑀦𑀫𑀸𑀮𑀸𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑀺𑀢𑁆𑀯𑀸 𑀲𑀼𑀫𑀦𑀦𑀸𑀫𑁂𑀦 𑀧𑀸𑀓𑀝𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁬𑁨. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀫𑀦𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀲𑀼𑀦𑁆𑀤𑀭𑀁 𑀫𑀦𑀁 𑀘𑀺𑀢𑁆𑀢𑀁 𑀬𑀲𑁆𑀲 𑀲𑁄 𑀲𑀼𑀫𑀦𑁄. 𑀲𑀤𑁆𑀥𑀸𑀧𑀲𑀸𑀤𑀩𑀳𑀼𑀫𑀸𑀦𑁂𑀦 𑀬𑀼𑀢𑁆𑀢𑁄 𑀦𑀸𑀫𑁂𑀦 𑀲𑀼𑀫𑀦𑁄 𑀦𑀸𑀫 𑀫𑀸𑀮𑀸𑀓𑀸𑀭𑁄 𑀢𑀤𑀸 𑀅𑀳𑀁 𑀅𑀳𑁄𑀲𑀺𑀁.

𑁬𑁩. 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄𑀢𑀺 𑀲𑀺𑀔𑀸 𑀫𑀼𑀤𑁆𑀥𑀸 𑀓𑀸𑀲𑀢𑀻𑀢𑀺 𑀲𑀺𑀔𑀻. 𑀅𑀣 𑀯𑀸 𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀧𑀬𑁄𑀕𑁂 𑀔𑀸𑀤𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀲𑀺𑀔𑀻, 𑀓𑀸 𑀲𑀸? 𑀅𑀕𑁆𑀕𑀺𑀲𑀺𑀔𑀸, 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀲𑀺𑀔𑀸𑀬 𑀤𑀺𑀧𑁆𑀧𑀦𑀢𑁄 𑀲𑀺𑀔𑀻. 𑀬𑀣𑀸 𑀅𑀕𑁆𑀕𑀺𑀲𑀺𑀔𑀸 𑀚𑁄𑀢𑀢𑀺 𑀧𑀸𑀓𑀝𑀸 𑀳𑁄𑀢𑀺, 𑀲𑀺𑀔𑀻 𑀧𑀢𑁆𑀢𑀢𑀺𑀡𑀓𑀝𑁆𑀞𑀧𑀮𑀸𑀲𑀸𑀤𑀺𑀓𑁂 𑀤𑀳𑀢𑀺, 𑀏𑀯𑀫𑀬𑀫𑁆𑀧𑀺 𑀪𑀕𑀯𑀸 𑀦𑀻𑀮𑀧𑀻𑀢𑀸𑀤𑀺𑀭𑀁𑀲𑀻𑀳𑀺 𑀚𑁄𑀢𑀢𑀺 𑀲𑀓𑀮𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀧𑀸𑀓𑀝𑁄 𑀳𑁄𑀢𑀺. 𑀲𑀓𑀲𑀦𑁆𑀢𑀸𑀦𑀕𑀢𑀲𑀩𑁆𑀩𑀓𑀺𑀮𑁂𑀲𑁂 𑀲𑁄𑀲𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀺 𑀛𑀸𑀧𑁂𑀢𑀻𑀢𑀺 𑀯𑁄𑀳𑀸𑀭𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁, 𑀢𑀲𑁆𑀲 𑀲𑀺𑀔𑀺𑀦𑁄. 𑀲𑀓𑀮𑀮𑁄𑀓𑀲𑁆𑀲 𑀩𑀦𑁆𑀥𑀼𑀜𑀸𑀢𑀓𑁄𑀢𑀺 𑀮𑁄𑀓𑀩𑀦𑁆𑀥𑀼, 𑀢𑀲𑁆𑀲 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄 𑀪𑀕𑀯𑀢𑁄 𑀲𑀼𑀫𑀦𑀧𑀼𑀧𑁆𑀨𑀁 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀲𑀼𑀫𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀼𑀧𑁆𑀨𑀘𑀗𑁆𑀓𑁄𑀝𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀪𑀻𑀢𑀭𑀽𑀧𑀁 𑀲𑀻𑀳𑀁 𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀧𑁆𑀨𑀘𑀗𑁆𑀓𑁄𑀝𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀫𑀳𑀸𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀲𑀦𑁆𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀅𑀦𑁄𑀚𑀧𑀼𑀧𑁆𑀨𑀫𑁄𑀘𑀺𑀦𑀺𑀢𑁆𑀯𑀸 𑀘𑀗𑁆𑀓𑁄𑀝𑀓𑀁 𑀧𑀽𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 ‘‘𑀪𑀕𑀯𑀸, 𑀇𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀯𑀡𑁆𑀡𑁄 𑀧𑀽𑀚𑀦𑀻𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁬𑁮-𑁯. 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀪𑀻𑀢𑀭𑀽𑀧𑀁 𑀲𑀻𑀳𑀁 𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀳𑀦𑁆𑀢𑀺 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀤𑀬𑁄 𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀲𑀻𑀳𑁄, 𑀅𑀪𑀻𑀢𑀭𑀽𑀧𑁄 𑀅𑀪𑀻𑀢𑀲𑀪𑀸𑀯𑁄, 𑀢𑀁 𑀅𑀪𑀻𑀢𑀭𑀽𑀧𑀁 𑀲𑀻𑀳𑀁 𑀇𑀯 𑀦𑀺𑀲𑀺𑀦𑁆𑀦𑀁 𑀧𑀽𑀚𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀓𑁆𑀔𑀻𑀦𑀁 𑀅𑀕𑁆𑀕𑀁 𑀕𑀭𑀼𑀴𑀭𑀸𑀚𑀁 𑀇𑀯 𑀧𑀯𑀭𑀁 𑀉𑀢𑁆𑀢𑀫𑀁 𑀩𑁆𑀬𑀕𑁆𑀖𑀭𑀸𑀚𑀁 𑀇𑀯 𑀅𑀪𑀺 𑀯𑀺𑀲𑁂𑀲𑁂𑀦 𑀚𑀸𑀢𑀁 𑀲𑀩𑁆𑀩𑀲𑀻𑀳𑀸𑀦𑀁 𑀯𑀺𑀲𑁂𑀲𑀁 𑀓𑁂𑀲𑀭𑀲𑀻𑀳𑀁 𑀇𑀯 𑀢𑀺𑀮𑁄𑀓𑀲𑁆𑀲 𑀲𑀭𑀡𑀁 𑀲𑀺𑀔𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀓𑀺𑀁 𑀪𑀽𑀢𑀁? 𑀅𑀦𑁂𑀚𑀁 𑀦𑀺𑀓𑁆𑀓𑀺𑀮𑁂𑀲𑀁 𑀔𑀦𑁆𑀥𑀫𑀸𑀭𑀸𑀤𑀻𑀳𑀺 𑀅𑀧𑀭𑀸𑀚𑀺𑀢𑀁 𑀦𑀺𑀲𑀺𑀦𑁆𑀦𑀁 𑀲𑀺𑀔𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀸𑀭𑀡𑀸𑀦𑀕𑁆𑀕𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀫𑀸𑀭𑀡𑁂 𑀲𑁄𑀲𑀦𑁂 𑀯𑀺𑀤𑁆𑀥𑀁𑀲𑀦𑁂 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀢𑁂𑀲𑀁 𑀅𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁 𑀧𑀭𑀺𑀯𑀸𑀭𑀺𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀺𑀔𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁦. 𑀘𑀗𑁆𑀓𑁄𑀝𑀓𑁂 𑀞𑀧𑁂𑀢𑁆𑀯𑀸𑀦𑀸𑀢𑀺 𑀉𑀢𑁆𑀢𑀫𑀁 𑀅𑀦𑁄𑀚𑀧𑀼𑀧𑁆𑀨𑀁 𑀓𑀭𑀡𑁆𑀟𑀓𑁂 𑀧𑀽𑀭𑁂𑀢𑁆𑀯𑀸 𑀲𑀺𑀔𑀻𑀲𑀫𑁆𑀩𑀼𑀤𑁆𑀥𑀁 𑀲𑁂𑀝𑁆𑀞𑀁 𑀲𑀫𑁄𑀓𑀺𑀭𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀧𑁆𑀨𑀘𑀗𑁆𑀓𑁄𑀝𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀢𑁆𑀢𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀦𑀸𑀕𑀲𑀫𑀸𑀮𑀯𑀕𑁆𑀕𑁄

𑁧. 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀆𑀧𑀸𑀝𑀮𑀺𑀁 𑀅𑀳𑀁 𑀧𑀼𑀧𑁆𑀨𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀣𑀸𑀭𑀽𑀧𑀲𑀚𑁆𑀚𑀦𑀲𑀁𑀲𑀕𑁆𑀕𑀲𑁆𑀲 𑀅𑀮𑀸𑀪𑁂𑀦 𑀲𑀢𑁆𑀣𑀭𑀺 𑀥𑀭𑀫𑀸𑀦𑀓𑀸𑀮𑁂 𑀤𑀲𑁆𑀲𑀦𑀲𑀯𑀦𑀧𑀽𑀚𑀸𑀓𑀫𑁆𑀫𑀫𑀓𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀭𑀻𑀭𑀺𑀓𑀥𑀸𑀢𑀼𑀁 𑀦𑀺𑀤𑀳𑀺𑀢𑁆𑀯𑀸 𑀓𑀢𑀘𑁂𑀢𑀺𑀬𑀫𑁆𑀳𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀧𑀸𑀝𑀮𑀺𑀧𑀼𑀧𑁆𑀨𑀁 𑀧𑀽𑀚𑁂𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀢𑀢𑁄 𑀓𑀸𑀮𑀁 𑀓𑀢𑁄 𑀢𑀼𑀲𑀺𑀢𑀸𑀤𑀻𑀲𑀼 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀸𑀕𑀭𑀼𑀓𑁆𑀔𑀧𑀮𑁆𑀮𑀯𑀓𑁄𑀫𑀴𑀲𑀤𑀺𑀲𑀲𑀭𑀻𑀭𑀢𑁆𑀢𑀸 𑀦𑀸𑀕𑀲𑀫𑀸𑀮𑁄𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀥𑁂𑀬𑁆𑀬𑁄 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧. 𑀲𑁄 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀆𑀧𑀸𑀝𑀮𑀺𑀁 𑀅𑀳𑀁 𑀧𑀼𑀧𑁆𑀨𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀧𑀸𑀝𑀮𑀺𑀦𑁆𑀢𑀺 𑀆 𑀲𑀫𑀦𑁆𑀢𑀢𑁄, 𑀆𑀤𑀭𑁂𑀦 𑀯𑀸 𑀧𑀸𑀝𑀮𑀺𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀅𑀳𑀁 𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑁂𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀚𑁆𑀛𑀺𑀢𑀁 𑀲𑀼𑀫𑀳𑀸𑀧𑀣𑁂𑀢𑀺 𑀲𑀩𑁆𑀩𑀦𑀕𑀭𑀯𑀸𑀲𑀻𑀦𑀁 𑀯𑀦𑁆𑀤𑀦𑀧𑀽𑀚𑀦𑀢𑁆𑀣𑀸𑀬 𑀫𑀳𑀸𑀧𑀣𑁂 𑀦𑀕𑀭𑀫𑀚𑁆𑀛𑁂 𑀯𑀻𑀣𑀺𑀬𑀁 𑀉𑀚𑁆𑀛𑀺𑀢𑀁 𑀉𑀝𑁆𑀞𑀸𑀧𑀺𑀢𑀁, 𑀇𑀝𑁆𑀞𑀓𑀓𑀫𑁆𑀫𑀲𑀼𑀥𑀸𑀓𑀫𑁆𑀫𑀸𑀤𑀻𑀳𑀺 𑀦𑀺𑀧𑁆𑀨𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀧𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀓𑁆𑀓𑀦𑁆𑀢𑀜𑁆𑀘 𑀧𑀤𑀁 𑀤𑀺𑀲𑁆𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀤𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀉𑀧𑀸𑀲𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀪𑀕𑀯𑀢𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀤𑀲𑁆𑀲𑀺𑀢𑀁 𑀧𑀤𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀯𑀦𑁆𑀤𑀦𑀧𑀽𑀚𑀦𑀸𑀤𑀺𑀩𑀳𑀼𑀫𑀸𑀦𑀫𑀓𑀸𑀲𑀺. 𑀲𑁄 𑀢𑁂𑀦𑁂𑀯 𑀲𑀼𑀔𑁂𑀢𑁆𑀢𑁂 𑀲𑀼𑀓𑀢𑁂𑀦 𑀧𑀼𑀜𑁆𑀜𑁂𑀦 𑀢𑀢𑁄 𑀘𑀼𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑁄 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀲𑀩𑁆𑀩𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺, 𑀧𑀼𑀭𑀸𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀧𑀤𑀲𑀜𑁆𑀜𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁫. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀓𑁆𑀓𑀦𑁆𑀢𑀜𑁆𑀘 𑀧𑀤𑀁 𑀤𑀺𑀲𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀓𑁆𑀓𑀦𑁆𑀢𑀦𑁆𑀢𑀺 𑀅𑀓𑁆𑀓𑀫𑀺𑀢𑀁 𑀤𑀲𑁆𑀲𑀺𑀢𑀁. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀤𑀸 𑀘𑀢𑀼𑀭𑀗𑁆𑀕𑀼𑀮𑁄𑀧𑀭𑀺𑀬𑁂𑀯 𑀕𑀫𑀦𑀁, 𑀅𑀬𑀁 𑀧𑀦 𑀢𑀲𑁆𑀲 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀢𑀁 𑀜𑀢𑁆𑀯𑀸 ‘‘𑀏𑀲𑁄 𑀇𑀫𑀁 𑀧𑀲𑁆𑀲𑀢𑀽’’𑀢𑀺 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺, 𑀢𑀲𑁆𑀫𑀸 𑀲𑁄 𑀢𑀲𑁆𑀫𑀺𑀁 𑀧𑀲𑀻𑀤𑀺𑀢𑁆𑀯𑀸 𑀯𑀦𑁆𑀤𑀦𑀧𑀽𑀚𑀦𑀸𑀤𑀺𑀲𑀓𑁆𑀓𑀸𑀭𑀫𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑀼𑀫𑀕𑁆𑀕𑁂 𑀧𑀁𑀲𑀼𑀓𑀽𑀮𑀺𑀓𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀤𑀼𑀫𑀕𑁆𑀕𑁂 𑀮𑀕𑁆𑀕𑀺𑀢𑀁 𑀪𑀕𑀯𑀢𑁄 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀅𑀭𑀳𑀤𑁆𑀥𑀚’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀦𑁆𑀤𑀦𑀧𑀽𑀚𑀦𑀸𑀤𑀺𑀲𑀓𑁆𑀓𑀸𑀭𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁯. 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀸𑀥𑀺𑀕𑀫𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀤𑀼𑀫𑀕𑁆𑀕𑁂 𑀧𑀁𑀲𑀼𑀓𑀽𑀮𑀺𑀓𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀼𑀦𑀸𑀢𑀺 𑀓𑀫𑁆𑀧𑀢𑀻𑀢𑀺 𑀤𑀼𑀫𑁄. 𑀤𑀼𑀳𑀢𑀺 𑀧𑀽𑀭𑁂𑀢𑀺 𑀆𑀓𑀸𑀲𑀢𑀮𑀦𑁆𑀢𑀺 𑀯𑀸 𑀤𑀼𑀫𑁄, 𑀤𑀼𑀫𑀲𑁆𑀲 𑀅𑀕𑁆𑀕𑁄 𑀓𑁄𑀝𑀻𑀢𑀺 𑀤𑀼𑀫𑀕𑁆𑀕𑁄, 𑀢𑀲𑁆𑀫𑀺𑀁 𑀤𑀼𑀫𑀕𑁆𑀕𑁂. 𑀧𑀁𑀲𑀼𑀫𑀺𑀯 𑀧𑀝𑀺𑀓𑁆𑀓𑀽𑀮𑀪𑀸𑀯𑀁 𑀅𑀫𑀦𑀼𑀜𑁆𑀜𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀧𑀁𑀲𑀼𑀓𑀽𑀮𑀫𑁂𑀯 𑀧𑀁𑀲𑀼𑀓𑀽𑀮𑀺𑀓𑀁, 𑀲𑀢𑁆𑀣𑀼𑀦𑁄 𑀧𑀁𑀲𑀼𑀓𑀽𑀮𑀁 𑀤𑀼𑀫𑀕𑁆𑀕𑁂 𑀮𑀕𑁆𑀕𑀺𑀢𑀁 𑀤𑀺𑀲𑁆𑀯𑀸 𑀅𑀳𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑀁 𑀧𑀁𑀲𑀼𑀓𑀽𑀮𑀁 𑀅𑀯𑀦𑁆𑀤𑀺𑀁 𑀧𑀡𑀸𑀫𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀪𑀺𑀲𑀸𑀮𑀼𑀯𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀓𑀸𑀦𑀦𑀁 𑀯𑀦𑀫𑁄𑀕𑁆𑀕𑀬𑁆𑀳𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀪𑀺𑀲𑀸𑀮𑀼𑀯𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑀲𑁆𑀲 𑀲𑀫𑀻𑀧𑁂 𑀅𑀭𑀜𑁆𑀜𑀸𑀯𑀸𑀲𑁂 𑀯𑀲𑀦𑁆𑀢𑁄 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀯𑀺𑀯𑁂𑀓𑀯𑀲𑁂𑀦𑀸𑀕𑀢𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀜𑁆𑀘𑀪𑀺𑀲𑀸𑀮𑀼𑀯𑁂 𑀅𑀤𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀸𑀤𑀻𑀲𑀼 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀧𑀘𑁆𑀙𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄 𑀢𑀁 𑀧𑀳𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁩. 𑀲𑁄 𑀢𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀓𑀸𑀦𑀦𑀁 𑀯𑀦𑀫𑁄𑀕𑁆𑀕𑀬𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀯𑀲𑀸𑀫𑀺 𑀯𑀺𑀧𑀺𑀦𑁂 𑀅𑀳𑀦𑁆𑀢𑀺 𑀯𑀺𑀯𑁂𑀓𑀯𑀸𑀲𑁄 𑀅𑀳𑀁 𑀯𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀪𑀺𑀲𑀸𑀮𑀼𑀯𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀙𑀝𑁆𑀞𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀔𑀡𑁆𑀟𑁄 𑀦𑀸𑀫𑀸𑀲𑀺 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀫𑀸𑀦𑀲𑁄 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀔𑀡𑁆𑀟𑀁 𑀦𑀸𑀫 𑀅𑀕𑁆𑀕𑀲𑀸𑀯𑀓𑀁 𑀪𑀺𑀓𑁆𑀔𑀸𑀬 𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 𑀲𑀤𑁆𑀤𑀳𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀫𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀺𑀡𑁆𑀟𑀧𑀸𑀢𑀲𑁆𑀲 𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑁆𑀢𑀸 𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁧𑁮. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀔𑀡𑁆𑀟𑁄 𑀦𑀸𑀫𑀸𑀲𑀺 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑀢𑁆𑀣𑁂𑀭𑀲𑁆𑀲 𑀓𑀺𑀮𑁂𑀲𑀸𑀦𑀁 𑀔𑀡𑁆𑀟𑀺𑀢𑀢𑁆𑀢𑀸 𑀔𑀡𑁆𑀟𑁄𑀢𑀺 𑀦𑀸𑀫𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀢𑀺𑀡𑀲𑀦𑁆𑀣𑀭𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀡𑀲𑀦𑁆𑀣𑀭𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀕𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀧𑀝𑀺𑀯𑀲𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀺𑀲𑁆𑀲𑁄 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀅𑀣 𑀔𑁄 𑀲𑁄 𑀢𑀸𑀧𑀲𑁄 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀞𑀺𑀢𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑀺𑀡𑀁 𑀮𑀸𑀬𑀺𑀢𑁆𑀯𑀸 𑀢𑀺𑀡𑀲𑀦𑁆𑀣𑀭𑀁 𑀓𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀳𑀼𑀫𑀸𑀦𑀸𑀤𑀭𑁂𑀦 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀓𑀼𑀝𑀺𑀓𑁄 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀦𑁂𑀓𑀯𑀺𑀥𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁨. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀫𑀳𑀸𑀚𑀸𑀢𑀲𑁆𑀲𑀭𑁄𑀢𑀺 𑀏𑀢𑁆𑀣 𑀧𑀦 𑀲𑀭𑀦𑁆𑀢𑀺 𑀏𑀢𑁆𑀣 𑀧𑀸𑀦𑀻𑀬𑀢𑁆𑀣𑀺𑀓𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀤𑀬𑁄 𑀲𑀢𑁆𑀢𑀸𑀢𑀺 𑀲𑀭𑀁, 𑀅𑀣 𑀯𑀸 𑀲𑀭𑀦𑁆𑀢𑀺 𑀏𑀢𑁆𑀣 𑀦𑀤𑀻𑀓𑀦𑁆𑀤𑀭𑀸𑀤𑀬𑁄𑀢𑀺 𑀲𑀭𑀁, 𑀫𑀳𑀦𑁆𑀢𑁄 𑀘 𑀲𑁄 𑀲𑀬𑀫𑁂𑀯 𑀚𑀸𑀢𑀢𑁆𑀢𑀸 𑀲𑀭𑁄 𑀘𑁂𑀢𑀺 𑀫𑀳𑀸𑀚𑀸𑀢𑀲𑁆𑀲𑀭𑁄. 𑀅𑀦𑁄𑀢𑀢𑁆𑀢𑀙𑀤𑁆𑀤𑀦𑁆𑀢𑀤𑀳𑀸𑀤𑀬𑁄 𑀯𑀺𑀬 𑀅𑀧𑀸𑀓𑀝𑀦𑀸𑀫𑀢𑁆𑀢𑀸 ‘‘𑀫𑀳𑀸𑀚𑀸𑀢𑀲𑁆𑀲𑀭𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀢𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑁄𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀼𑀧𑁆𑀨𑁂 𑀲𑀢𑀲𑀢𑀧𑀢𑁆𑀢𑀸𑀦𑀁 𑀯𑀲𑁂𑀦 𑀲𑀢𑀧𑀢𑁆𑀢𑁄, 𑀲𑀢𑀧𑀢𑁆𑀢𑀲𑁂𑀢𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑁄 𑀕𑀳𑀦𑀻𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀲𑀓𑀼𑀡𑀫𑀸𑀮𑀬𑁄𑀢𑀺 𑀅𑀦𑁂𑀓𑁂 𑀳𑀁𑀲𑀓𑀼𑀓𑁆𑀓𑀼𑀝𑀓𑀼𑀓𑁆𑀓𑀼𑀳𑀤𑁂𑀡𑁆𑀟𑀺𑀪𑀸𑀤𑀬𑁄 𑀏𑀓𑀢𑁄 𑀓𑀼𑀡𑀦𑁆𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀻𑀢𑀺 𑀲𑀓𑀼𑀡𑀸𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀧𑀓𑁆𑀔𑀻𑀦𑀁 𑀆𑀮𑀬𑁄 𑀆𑀥𑀸𑀭𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀺𑀡𑀲𑀦𑁆𑀣𑀭𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀪𑀕𑀯𑀢𑁄 𑀘𑀻𑀯𑀭𑀓𑀫𑁆𑀫𑀁 𑀓𑀸𑀢𑀼𑀁 𑀧𑀜𑁆𑀘 𑀲𑀽𑀘𑀺𑀬𑁄 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀧𑀼𑀜𑁆𑀜𑀫𑀦𑀼𑀪𑀯𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀢𑀺𑀓𑁆𑀔𑀧𑀜𑁆𑀜𑁄 𑀳𑀼𑀢𑁆𑀯𑀸 𑀧𑀸𑀓𑀝𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄 𑀢𑀺𑀓𑁆𑀔𑀧𑀜𑁆𑀜𑀢𑀸𑀬 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁩𑁦. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀜𑁆𑀜𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀅𑀦𑁆𑀢𑀭𑀦𑁆𑀢𑀭𑀁 𑀧𑀦𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁩𑁧. 𑀧𑀜𑁆𑀘𑀲𑀽𑀘𑀻 𑀫𑀬𑀸 𑀤𑀺𑀦𑁆𑀦𑀸𑀢𑀺 𑀏𑀢𑁆𑀣 𑀲𑀽𑀘𑀢𑀺 𑀙𑀺𑀤𑁆𑀤𑀁 𑀓𑀭𑁄𑀢𑀺 𑀯𑀺𑀚𑁆𑀛𑀢𑀻𑀢𑀺 𑀲𑀽𑀘𑀺, 𑀧𑀜𑁆𑀘𑀫𑀢𑁆𑀢𑀸 𑀲𑀽𑀘𑀻 𑀧𑀜𑁆𑀘𑀲𑀽𑀘𑀻 𑀫𑀬𑀸 𑀤𑀺𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀓𑀼𑀲𑀮𑀸𑀓𑀼𑀲𑀮𑀜𑁆𑀜𑀽 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀸𑀝𑀮𑀺𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀩𑀳𑀼𑀥𑀸 𑀲𑀼𑀔𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀦𑁆𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁬. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀢𑀭𑀸𑀧𑀡𑁂𑀢𑀺 𑀆 𑀲𑀫𑀦𑁆𑀢𑀢𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀓𑀁 𑀪𑀡𑁆𑀟𑀁 𑀧𑀡𑁂𑀦𑁆𑀢𑀺 𑀯𑀺𑀓𑁆𑀓𑀺𑀡𑀦𑁆𑀢𑀺 𑀧𑀢𑁆𑀣𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀧𑀡𑀁, 𑀆𑀧𑀡𑀲𑁆𑀲 𑀅𑀦𑁆𑀢𑀭𑀁 𑀯𑀻𑀣𑀻𑀢𑀺 𑀅𑀦𑁆𑀢𑀭𑀸𑀧𑀡𑀁, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀸𑀧𑀡𑁂. 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀜𑁆𑀘𑀦𑀕𑁆𑀖𑀺𑀬𑀲𑀁𑀓𑀸𑀲𑀁 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁 𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀸𑀝𑀮𑀺𑀧𑀼𑀧𑁆𑀨𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀞𑀺𑀢𑀜𑁆𑀚𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀞𑀺𑀢𑀜𑁆𑀚𑀮𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣𑀼𑀧𑁆𑀧𑀦𑁆𑀦𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀧𑀼𑀭𑀸𑀓𑀢𑁂𑀦 𑀏𑀓𑁂𑀦 𑀓𑀫𑁆𑀫𑀘𑁆𑀙𑀺𑀤𑁆𑀤𑁂𑀦 𑀦𑁂𑀲𑀸𑀤𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀫𑀺𑀕𑀲𑀽𑀓𑀭𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀦𑁂𑀲𑀸𑀤𑀓𑀫𑁆𑀫𑁂𑀦 𑀅𑀭𑀜𑁆𑀜𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀺𑀲𑁆𑀲𑁄 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀳𑀺𑀫𑀯𑀦𑁆𑀢𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁂𑀳𑀺 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀳𑀺 𑀘 𑀚𑀮𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀡𑀸𑀫𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀦𑁆𑀣𑀭𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀯𑁄 𑀕𑀚𑁆𑀚𑀦𑁆𑀢𑁄 𑀅𑀲𑀦𑀺 𑀧𑀢𑀺, 𑀢𑀢𑁄 𑀫𑀭𑀡𑀲𑀫𑀬𑁂 𑀩𑀼𑀤𑁆𑀥𑀫𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀼𑀦𑀜𑁆𑀚𑀮𑀺𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀔𑁂𑀢𑁆𑀢𑁂 𑀓𑀢𑀓𑀼𑀲𑀮𑀢𑁆𑀢𑀸 𑀅𑀓𑀼𑀲𑀮𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀼𑀭𑀸𑀓𑀢𑀯𑀸𑀲𑀦𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁨. 𑀲𑁄 𑀢𑀢𑁄 𑀧𑀭𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀺𑀕𑀮𑀼𑀤𑁆𑀤𑁄𑀢𑀺 𑀫𑀺𑀕𑀸𑀦𑀁 𑀫𑀸𑀭𑀡𑀁 𑀉𑀧𑀕𑀘𑁆𑀙𑀢𑀻𑀢𑀺 𑀫𑀺𑀕𑀮𑀼𑀤𑁆𑀤𑁄. 𑀫𑀺𑀕𑀦𑁆𑀢𑀺 𑀲𑀻𑀖𑀁 𑀯𑀸𑀢𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑀺 𑀥𑀸𑀯𑀦𑁆𑀢𑀻𑀢𑀺 𑀫𑀺𑀕𑀸, 𑀢𑁂𑀲𑀁 𑀫𑀺𑀕𑀸𑀦𑀁 𑀫𑀸𑀭𑀡𑁂 𑀮𑀼𑀤𑁆𑀤𑁄 𑀤𑀸𑀭𑀼𑀡𑁄 𑀮𑁄𑀪𑀻𑀢𑀺 𑀫𑀺𑀕𑀮𑀼𑀤𑁆𑀤𑁄. 𑀲𑁄 𑀅𑀳𑀁 𑀧𑀼𑀭𑁂 𑀪𑀕𑀯𑀢𑁄 𑀤𑀲𑁆𑀲𑀦𑀲𑀫𑀬𑁂 𑀫𑀺𑀕𑀮𑀼𑀤𑁆𑀤𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀜𑁆𑀜𑁂 𑀓𑀸𑀦𑀦𑁂𑀢𑀺 𑀅𑀭𑀢𑀺 𑀕𑀘𑁆𑀙𑀢𑀺 𑀫𑀺𑀕𑀲𑀫𑀽𑀳𑁄 𑀏𑀢𑁆𑀣𑀸𑀢𑀺 𑀅𑀭𑀜𑁆𑀜𑀁, 𑀅𑀣 𑀯𑀸 𑀆 𑀲𑀫𑀦𑁆𑀢𑀢𑁄 𑀭𑀚𑁆𑀚𑀦𑁆𑀢𑀺 𑀢𑀢𑁆𑀣 𑀯𑀺𑀯𑁂𑀓𑀸𑀪𑀺𑀭𑀢𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀫𑀳𑀸𑀲𑀸𑀭𑀧𑁆𑀧𑀢𑁆𑀢𑀸 𑀲𑀧𑁆𑀧𑀼𑀭𑀺𑀲𑀸𑀢𑀺 𑀅𑀭𑀜𑁆𑀜𑀁. 𑀓𑀸 𑀓𑀼𑀘𑁆𑀙𑀺𑀢𑀸𑀓𑀸𑀭𑁂𑀦 𑀯𑀸 𑀪𑀬𑀸𑀦𑀓𑀸𑀓𑀸𑀭𑁂𑀦 𑀯𑀸 𑀦𑀤𑀦𑁆𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀆𑀦𑀦𑁆𑀢𑀺 𑀯𑀺𑀦𑁆𑀤𑀦𑁆𑀢𑀻𑀢𑀺 𑀯𑀸 𑀓𑀸𑀦𑀦𑀁, 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀤𑁆𑀤𑀲𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀉𑀧𑀕𑀢𑀁 𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲𑀁 𑀅𑀤𑁆𑀤𑀓𑁆𑀔𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑀁 𑀧𑀼𑀭𑁂 𑀅𑀳𑁄𑀲𑀺 𑀅𑀯𑀺𑀤𑀽𑀭𑁂, 𑀢𑀲𑁆𑀫𑀸 𑀫𑀦𑁄𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀁 𑀧𑀸𑀧𑁂𑀢𑀺 𑀅𑀧𑁆𑀧𑁂𑀢𑀻𑀢𑀺 𑀅𑀢𑁆𑀣𑁄.

𑁪𑁪. 𑀢𑀢𑁄 𑀫𑁂 𑀅𑀲𑀦𑀻𑀧𑀸𑀢𑁄𑀢𑀺 𑀆 𑀲𑀫𑀦𑁆𑀢𑀢𑁄 𑀲𑀦𑀦𑁆𑀢𑁄 𑀕𑀚𑁆𑀚𑀦𑁆𑀢𑁄 𑀧𑀢𑀢𑀻𑀢𑀺 𑀅𑀲𑀦𑀺, 𑀅𑀲𑀦𑀺𑀬𑀸 𑀧𑀸𑀢𑁄 𑀧𑀢𑀦𑀁 𑀅𑀲𑀦𑀻𑀧𑀸𑀢𑁄, 𑀤𑁂𑀯𑀤𑀡𑁆𑀟𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀞𑀺𑀢𑀜𑁆𑀚𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀢𑀺𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀧𑀤𑀼𑀫𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀫𑀸𑀮𑀸𑀓𑀸𑀭𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀸𑀮𑀸𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀦𑁂𑀓𑀯𑀺𑀥𑀸𑀦𑀺 𑀚𑀮𑀚𑀣𑀮𑀚𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀇𑀫𑀸𑀦𑀺 𑀢𑀸𑀯 𑀧𑀼𑀧𑁆𑀨𑀸𑀦𑀺 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀲𑀳𑀲𑁆𑀲𑀁 𑀯𑀸 𑀥𑀦𑀁 𑀕𑀸𑀫𑀸𑀤𑀺𑀓𑀁 𑀯𑀸 𑀤𑀤𑁂𑀬𑁆𑀬, 𑀮𑁄𑀓𑀦𑀸𑀣𑀁 𑀧𑀦 𑀧𑀽𑀚𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀫𑀢𑀥𑀦𑀁 𑀮𑀪𑀸𑀫𑀺, 𑀓𑀺𑀁 𑀫𑁂 𑀏𑀢𑁂𑀲𑀼 𑀲𑀼𑀦𑁆𑀤𑀭’’𑀦𑁆𑀢𑀺 𑀢𑁂𑀦 ‘‘𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀬𑁄 𑀦𑀺𑀧𑁆𑀨𑀸𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀡𑁆𑀡𑀯𑀦𑁆𑀢𑀁 𑀅𑀢𑀻𑀯 𑀭𑀢𑁆𑀢𑀧𑀼𑀧𑁆𑀨𑀢𑁆𑀢𑀬𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀢𑀸𑀦𑀺 𑀕𑀦𑁆𑀢𑁆𑀯𑀸 𑀆𑀓𑀸𑀲𑀁 𑀙𑀸𑀤𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀦𑀕𑀭𑀯𑀸𑀲𑀺𑀦𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁮. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽𑀢𑀺 𑀲𑀩𑁆𑀩𑁂𑀲𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀧𑀘𑁆𑀘𑀓𑁆𑀔𑀁 𑀓𑀢𑁄𑀢𑀺 𑀅𑀢𑁆𑀣𑁄. 𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀼𑀢𑁄𑀢𑀺 𑀲𑀬𑀁 𑀓𑀸𑀬𑀯𑀸𑀘𑀸𑀤𑀻𑀳𑀺 𑀤𑀦𑁆𑀢𑁄 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀳𑀺 𑀲𑀸𑀯𑀓𑁂𑀳𑀺 𑀧𑀭𑀺𑀯𑀼𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑀯𑀲𑁂𑀦 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀺𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀅𑀝𑁆𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀢𑀺𑀫𑀺𑀭𑀯𑀕𑁆𑀕𑁄

𑁧. 𑀢𑀺𑀫𑀺𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀫𑀺𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀲𑀫𑀻𑀧𑁂 𑀯𑀲𑀢𑀺, 𑀯𑀺𑀯𑁂𑀓𑀓𑀸𑀫𑀢𑀸𑀬 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀕𑀼𑀡𑀁 𑀧𑀲𑀻𑀤𑀺𑀢𑁆𑀯𑀸 𑀢𑀺𑀫𑀺𑀭𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀦𑁆𑀢𑁄 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀅𑀦𑀼𑀪𑁄𑀢𑀁 𑀯𑀚𑀸𑀫𑀳𑀦𑁆𑀢𑀺 𑀕𑀗𑁆𑀕𑀸𑀬 𑀆𑀲𑀦𑁆𑀦𑁂 𑀯𑀲𑀦𑀪𑀸𑀯𑁂𑀦 𑀲𑀩𑁆𑀩𑀢𑁆𑀣 𑀭𑀫𑁆𑀫𑀪𑀸𑀯𑁂𑀦 𑀕𑀗𑁆𑀕𑀸𑀢𑁄 𑀳𑁂𑀝𑁆𑀞𑀸 𑀲𑁄𑀢𑀸𑀦𑀼𑀲𑀸𑀭𑁂𑀦 𑀅𑀳𑀁 𑀯𑀚𑀸𑀫𑀺 𑀕𑀘𑁆𑀙𑀸𑀫𑀺 𑀢𑀢𑁆𑀣 𑀢𑀢𑁆𑀣 𑀯𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀲𑀺𑀦𑁆𑀦𑀁 𑀲𑀫𑀡𑀁 𑀤𑀺𑀲𑁆𑀯𑀸𑀢𑀺 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑁄𑀲𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄.

𑁨. 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸𑀢𑀺 𑀅𑀬𑀁 𑀪𑀕𑀯𑀸 𑀲𑀬𑀁 𑀢𑀺𑀡𑁆𑀡𑁄 𑀲𑀩𑁆𑀩𑀲𑀢𑁆𑀢𑁂 𑀢𑀸𑀭𑀬𑀺𑀲𑁆𑀲𑀢𑀺 𑀲𑀁𑀲𑀸𑀭𑀢𑁄 𑀉𑀢𑁆𑀢𑀸𑀭𑁂𑀢𑀺 𑀲𑀬𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀳𑀺 𑀤𑀫𑀺𑀢𑁄 𑀅𑀬𑀁 𑀪𑀕𑀯𑀸 𑀧𑀭𑁂 𑀤𑀫𑁂𑀢𑀺.

𑁩. 𑀲𑀬𑀁 𑀅𑀲𑁆𑀲𑀢𑁆𑀣𑁄 𑀅𑀲𑁆𑀲𑀸𑀲𑀫𑁆𑀧𑀢𑁆𑀢𑁄, 𑀓𑀺𑀮𑁂𑀲𑀧𑀭𑀺𑀴𑀸𑀳𑀢𑁄 𑀫𑀼𑀢𑁆𑀢𑁄 𑀲𑀩𑁆𑀩𑀲𑀢𑁆𑀢𑁂 𑀅𑀲𑁆𑀲𑀸𑀲𑁂𑀢𑀺, 𑀲𑀦𑁆𑀢𑀪𑀸𑀯𑀁 𑀆𑀧𑀸𑀧𑁂𑀢𑀺. 𑀲𑀬𑀁 𑀲𑀦𑁆𑀢𑁄 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄 𑀧𑀭𑁂𑀲𑀁 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑀁 𑀧𑀸𑀧𑁂𑀢𑀺. 𑀲𑀬𑀁 𑀫𑀼𑀢𑁆𑀢𑁄 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀺𑀢𑁄 𑀧𑀭𑁂 𑀲𑀁𑀲𑀸𑀭𑀢𑁄 𑀫𑁄𑀘𑀬𑀺𑀲𑁆𑀲𑀢𑀺. 𑀲𑁄 𑀅𑀬𑀁 𑀪𑀕𑀯𑀸 𑀲𑀬𑀁 𑀦𑀺𑀩𑁆𑀩𑀼𑀢𑁄 𑀓𑀺𑀮𑁂𑀲𑀕𑁆𑀕𑀻𑀳𑀺 𑀦𑀺𑀩𑁆𑀩𑀼𑀢𑁄 𑀧𑀭𑁂𑀲𑀫𑁆𑀧𑀺 𑀓𑀺𑀮𑁂𑀲𑀕𑁆𑀕𑀻𑀳𑀺 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀅𑀳𑀁 𑀢𑀤𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁪. 𑀕𑀳𑁂𑀢𑁆𑀯𑀸 𑀢𑀺𑀫𑀺𑀭𑀧𑀼𑀧𑁆𑀨𑀦𑁆𑀢𑀺 𑀲𑀓𑀮𑀁 𑀯𑀦𑀦𑁆𑀢𑀁 𑀦𑀻𑀮𑀓𑀸𑀴𑀭𑀁𑀲𑀻𑀳𑀺 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀓𑀼𑀭𑀼𑀫𑀸𑀦𑀁 𑀔𑀸𑀬𑀢𑀻𑀢𑀺 𑀢𑀺𑀫𑀺𑀭𑀁 𑀧𑀼𑀧𑁆𑀨𑀁 𑀢𑀁 𑀕𑀳𑁂𑀢𑁆𑀯𑀸 𑀓𑀡𑁆𑀡𑀺𑀓𑀸𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀫𑀢𑁆𑀣𑀓𑁂 𑀲𑀻𑀲𑀲𑁆𑀲 𑀉𑀧𑀭𑀺 𑀆𑀓𑀸𑀲𑁂 𑀑𑀓𑀺𑀭𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀺𑀫𑀺𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀭𑀸𑀓𑀢𑀯𑀸𑀲𑀦𑀸𑀯𑀲𑁂𑀦 𑀲𑀤𑁆𑀥𑀸𑀚𑀸𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂𑀬𑁂𑀯 𑀧𑀩𑁆𑀩𑀚𑀺𑀢𑁄 𑀪𑀕𑀯𑀢𑁄 𑀧𑀡𑀸𑀫𑀓𑀭𑀡𑁂𑀦𑁂𑀯 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑀻𑀯 𑀦𑀻𑀮𑀫𑀡𑀺𑀧𑁆𑀧𑀪𑀸𑀦𑀺 𑀦𑀗𑁆𑀕𑀮𑀓𑀲𑀺𑀢𑀝𑁆𑀞𑀸𑀦𑁂 𑀉𑀝𑁆𑀞𑀺𑀢𑀲𑀢𑁆𑀢𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀧𑀽𑀚𑁂𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁦. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀢𑀺 𑀫𑀸𑀢𑀼𑀕𑀩𑁆𑀪𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀲𑀢𑁆𑀢𑀯𑀲𑁆𑀲𑀺𑀓𑁄𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀦𑁆𑀢𑀺 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀆𑀕𑀸𑀭𑀺𑀬𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀦𑀢𑁆𑀣𑀺 𑀆𑀕𑀸𑀭𑀺𑀬𑀦𑁆𑀢𑀺 𑀅𑀦𑀕𑀸𑀭𑀺𑀬𑀁, 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄.

𑁧𑁨. 𑀲𑀼𑀕𑀢𑀸𑀦𑀼𑀕𑀢𑀁 𑀫𑀕𑁆𑀕𑀦𑁆𑀢𑀺 𑀩𑀼𑀤𑁆𑀥𑁂𑀦 𑀕𑀢𑀁 𑀫𑀕𑁆𑀕𑀁. 𑀅𑀣 𑀯𑀸 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀯𑀲𑁂𑀦 𑀳𑀝𑁆𑀞𑀫𑀸𑀦𑀲𑁄 𑀢𑀼𑀝𑁆𑀞𑀘𑀺𑀢𑁆𑀢𑁄 𑀧𑀽𑀚𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄𑀳𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁 𑀧𑀽𑀭𑀬𑀫𑀸𑀦𑁄 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀧𑀻𑀴𑀺𑀢𑁄 𑀧𑀭𑀫𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀢𑀤𑀸 𑀪𑀕𑀯𑀸 𑀢𑀲𑁆𑀲 𑀓𑀸𑀭𑀼𑀜𑁆𑀜𑁂𑀦 𑀢𑀢𑁆𑀣 𑀅𑀕𑀫𑀸𑀲𑀺. 𑀅𑀣 𑀲𑁄 𑀦𑀺𑀧𑀦𑁆𑀦𑀓𑁄𑀯 𑀉𑀝𑁆𑀞𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀧𑀡𑀸𑀫𑀁 𑀅𑀓𑀸𑀲𑀺. 𑀲𑁄 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀪𑀯𑀦𑁂 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀏𑀯𑀁 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺, 𑀧𑀼𑀭𑀸𑀓𑀢𑀧𑀼𑀜𑁆𑀜𑀯𑀲𑁂𑀦 𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁧𑁬. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑁄 𑀑𑀮𑁄𑀓𑁂𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀼𑀳𑀢𑀺 𑀧𑀝𑀺𑀭𑀼𑀳𑀢𑀺 𑀉𑀤𑁆𑀥𑀫𑀼𑀤𑁆𑀥𑀁 𑀆𑀭𑁄𑀳𑀢𑀻𑀢𑀺 𑀭𑀼𑀓𑁆𑀔𑁄, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀥𑀺𑀢𑁄 𑀧𑀭𑀫𑁂𑀦 𑀘𑀸𑀢𑀺 𑀧𑀭𑀫𑁂𑀦 𑀅𑀥𑀺𑀓𑁂𑀦 𑀔𑀭𑁂𑀦 𑀓𑀓𑁆𑀔𑀴𑁂𑀦 𑀩𑁆𑀬𑀸𑀥𑀺𑀦𑀸 𑀭𑁄𑀕𑁂𑀦 𑀩𑁆𑀬𑀸𑀥𑀺𑀢𑁄, 𑀩𑁆𑀬𑀸𑀥𑀺𑀦𑀸 𑀅𑀳𑀁 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀫𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑁄𑀫𑁆𑀳𑀻𑀢𑀺 𑀧𑀭𑀫𑀁 𑀅𑀥𑀺𑀓𑀁 𑀓𑀸𑀭𑀼𑀜𑁆𑀜𑀁 𑀤𑀻𑀦𑀪𑀸𑀯𑀁 𑀤𑀼𑀓𑁆𑀔𑀺𑀢𑀪𑀸𑀯𑀁 𑀧𑀢𑁆𑀢𑁄𑀫𑁆𑀳𑀺 𑀅𑀭𑀜𑁆𑀜𑁂 𑀓𑀸𑀦𑀦𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁦. 𑀧𑀜𑁆𑀘𑁂𑀯𑀸𑀲𑀼𑀁 𑀫𑀳𑀸𑀲𑀺𑀔𑀸𑀢𑀺 𑀲𑀺𑀭𑀲𑀺 𑀧𑀺𑀴𑀦𑁆𑀥𑀦𑀢𑁆𑀣𑁂𑀦 𑀲𑀺𑀔𑀸 𑀯𑀼𑀘𑁆𑀘𑀢𑀺 𑀘𑀽𑀴𑀸. 𑀫𑀡𑀻𑀢𑀺 𑀚𑁄𑀢𑀫𑀸𑀦𑀁 𑀫𑀓𑀼𑀝𑀁 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀺𑀔𑁄, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀏𑀓𑀦𑀸𑀫𑀓𑀸 𑀧𑀜𑁆𑀘𑁂𑀯 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀲𑀼𑀁 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀺𑀧𑀦𑁆𑀦𑀜𑁆𑀚𑀮𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀪𑀺𑀪𑀽 𑀦𑀸𑀫 𑀲𑁄 𑀪𑀺𑀓𑁆𑀔𑀽𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀇𑀤𑁆𑀥𑀻𑀲𑀼 𑀘 𑀯𑀲𑀻𑀪𑀸𑀯𑀁 𑀧𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑁆𑀫𑀺𑀁 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀪𑀺𑀪𑀽 𑀦𑀸𑀫 𑀅𑀕𑁆𑀕𑀲𑀸𑀯𑀓𑁄 𑀯𑀺𑀯𑁂𑀓𑀸𑀪𑀺𑀭𑀢𑁄 𑀳𑀺𑀫𑀯𑀦𑁆𑀢𑀫𑀕𑀫𑀸𑀲𑀺. 𑀅𑀣 𑀲𑁄 𑀢𑀸𑀧𑀲𑁄 𑀢𑀁 𑀅𑀕𑁆𑀕𑀲𑀸𑀯𑀓𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀞𑀺𑀢𑀧𑀩𑁆𑀩𑀢𑀁 𑀆𑀭𑀼𑀳𑀦𑁆𑀢𑁄 𑀧𑀩𑁆𑀩𑀢𑀲𑁆𑀲 𑀳𑁂𑀝𑁆𑀞𑀸𑀢𑀮𑀢𑁄 𑀲𑀼𑀕𑀦𑁆𑀥𑀸𑀦𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀸𑀦𑀺 𑀲𑀢𑁆𑀢 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀅𑀣 𑀲𑁄 𑀣𑁂𑀭𑁄 𑀢𑀲𑁆𑀲𑀸𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑁄𑀧𑀺 𑀢𑀸𑀧𑀲𑁄 𑀲𑀓𑀲𑁆𑀲𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀏𑀓𑁂𑀦 𑀅𑀚𑀕𑀭𑁂𑀦 𑀧𑀻𑀴𑀺𑀢𑁄 𑀅𑀧𑀭𑀪𑀸𑀕𑁂 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀢𑁂𑀦𑁂𑀯 𑀉𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀙𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀔𑁂𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁨𑁨. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀪𑀺𑀪𑀽 𑀦𑀸𑀫 𑀲𑁄 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀫𑀸𑀥𑀻𑀳𑀺 𑀧𑀭𑁂 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀽, 𑀔𑀦𑁆𑀥𑀫𑀸𑀭𑀸𑀤𑀺𑀫𑀸𑀭𑁂 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀯𑀸 𑀅𑀪𑀺𑀪𑀽, 𑀲𑀲𑀦𑁆𑀢𑀸𑀦𑀧𑀭𑀲𑀦𑁆𑀢𑀸𑀦𑀕𑀢𑀓𑀺𑀮𑁂𑀲𑁂 𑀅𑀪𑀺𑀪𑀯𑀢𑀺 𑀯𑀺𑀳𑁂𑀲𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀯𑀸 𑀅𑀪𑀺𑀪𑀽. 𑀪𑀺𑀓𑁆𑀔𑀦𑀲𑀻𑀮𑁄 𑀬𑀸𑀘𑀦𑀲𑀻𑀮𑁄𑀢𑀺 𑀪𑀺𑀓𑁆𑀔𑀼, 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀯𑀸 𑀪𑀺𑀓𑁆𑀔𑀼. 𑀅𑀪𑀺𑀪𑀽 𑀦𑀸𑀫 𑀅𑀕𑁆𑀕𑀲𑀸𑀯𑀓𑁄 𑀲𑁄 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄, 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁭. 𑀅𑀚𑀕𑀭𑁄 𑀫𑀁 𑀧𑀻𑀴𑁂𑀲𑀻𑀢𑀺 𑀢𑀣𑀸𑀭𑀽𑀧𑀁 𑀲𑀻𑀮𑀲𑀫𑁆𑀧𑀦𑁆𑀦𑀁 𑀛𑀸𑀦𑀲𑀫𑁆𑀧𑀦𑁆𑀦𑀁 𑀢𑀸𑀧𑀲𑀁 𑀧𑀼𑀩𑁆𑀩𑁂 𑀓𑀢𑀧𑀸𑀧𑁂𑀦 𑀯𑁂𑀭𑁂𑀦 𑀘 𑀫𑀳𑀦𑁆𑀢𑁄 𑀅𑀚𑀕𑀭𑀲𑀧𑁆𑀧𑁄 𑀧𑀻𑀴𑁂𑀲𑀺. 𑀲𑁄 𑀢𑁂𑀦𑁂𑀯 𑀉𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑁄 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀆𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀥𑁄𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀚𑀺𑀦𑀘𑀫𑁆𑀫𑀥𑀭𑁄 𑀳𑀺𑀫𑀯𑀦𑁆𑀢𑀫𑁆𑀳𑀺 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀳𑀺𑀫𑀯𑀦𑁆𑀢𑀫𑀕𑀫𑀸𑀲𑀺. 𑀅𑀣 𑀲𑁄 𑀢𑀸𑀧𑀲𑁄 𑀢𑀫𑀼𑀧𑀕𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀻𑀲𑀼 𑀧𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀜𑁆𑀘𑀗𑁆𑀕𑁂𑀦 𑀦𑀫𑀓𑁆𑀓𑀸𑀭𑀫𑀓𑀸𑀲𑀺. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀇𑀢𑁄 𑀘𑀼𑀢𑁄 𑀢𑀼𑀲𑀺𑀢𑀸𑀤𑀻𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀢𑁆𑀣𑀸𑀤𑀻𑀦𑀯𑀁 𑀤𑀺𑀲𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁦. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀩𑁆𑀩𑀢𑁂𑀢𑀺 𑀧𑀓𑀸𑀭𑁂𑀦 𑀩𑁆𑀭𑀽𑀳𑀢𑀺 𑀯𑀟𑁆𑀠𑁂𑀢𑀻𑀢𑀺 𑀧𑀩𑁆𑀩𑀢𑁄, 𑀳𑀺𑀫𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺𑀫𑀯𑀦𑁆𑀢𑁄, 𑀳𑀺𑀫𑀯𑀦𑁆𑀢𑁄 𑀘 𑀲𑁄 𑀧𑀩𑁆𑀩𑀢𑁄 𑀘𑀸𑀢𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄. 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀯𑀘𑀦𑀲𑀼𑀔𑀢𑁆𑀣𑀁 ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑀫𑁆𑀳𑀺 𑀧𑀩𑁆𑀩𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺𑀁 𑀧𑀼𑀭𑁂 𑀅𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀦𑀬𑀸𑀦𑀼𑀲𑀸𑀭𑁂𑀦 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀤𑀼𑀢𑀺𑀬𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀤𑀼𑀢𑀺𑀬𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀓𑀼𑀲𑀮𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀢𑁆𑀣 𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂 𑀯𑀲𑀦𑁆𑀢𑁄 𑀯𑀸𑀓𑀘𑀻𑀭𑀦𑀺𑀯𑀲𑀦𑁄 𑀯𑀺𑀯𑁂𑀓𑀲𑀼𑀔𑁂𑀦 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄 𑀨𑀼𑀲𑁆𑀲𑀁 𑀪𑀕𑀯𑀦𑁆𑀢𑀁 𑀢𑀁 𑀧𑀤𑁂𑀲𑀁 𑀲𑀫𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀇𑀢𑁄 𑀘𑀺𑀢𑁄 𑀯𑀺𑀥𑀸𑀯𑀦𑁆𑀢𑀺𑀬𑁄 𑀤𑀡𑁆𑀟𑀤𑀻𑀧𑀺𑀓𑀸𑀦𑀺𑀓𑁆𑀔𑀦𑁆𑀢𑀯𑀺𑀧𑁆𑀨𑀼𑀭𑀦𑁆𑀢𑀫𑀺𑀯 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀧𑀲𑀦𑁆𑀦𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀢𑁂𑀦𑁂𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀼𑀩𑁆𑀩𑀯𑀸𑀲𑀦𑀸𑀯𑀲𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁫. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀼𑀢𑀺𑀬𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀓𑀼𑀲𑀮𑀲𑀫𑁆𑀪𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀼𑀔𑀧𑁆𑀧𑀢𑁆𑀢𑁄 𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀔𑀭𑀸𑀚𑀺𑀦𑀘𑀫𑁆𑀫𑀥𑀸𑀭𑀻 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀨𑀼𑀲𑁆𑀲𑀁 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀲𑀫𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀫𑀥𑀼𑀭𑀸𑀦𑀺 𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀪𑁄𑀚𑁂𑀲𑀺. 𑀲𑁄 𑀢𑁂𑀦𑁂𑀯 𑀓𑀼𑀲𑀮𑁂𑀦 𑀤𑁂𑀯𑀮𑁄𑀓𑀸𑀤𑀻𑀲𑀼 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁯. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁆𑀳𑀺 𑀅𑀭𑀜𑁆𑀜𑀸𑀯𑀸𑀲𑁂 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀅𑀦𑀼𑀓𑀫𑁆𑀧𑀸𑀬 𑀉𑀧𑀕𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀸𑀤𑀻𑀲𑀼 𑀙𑀲𑀼 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀘 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁪𑁩. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀩𑁄𑀥𑀺𑀲𑀺𑀜𑁆𑀘𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑁄𑀥𑀺𑀲𑀺𑀜𑁆𑀘𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀲𑀦𑀁 𑀲𑁄𑀪𑀬𑀦𑁆𑀢𑁄 𑀫𑀳𑀸𑀚𑀦𑁂 𑀩𑁄𑀥𑀺𑀧𑀽𑀚𑀁 𑀓𑀼𑀭𑀼𑀫𑀸𑀦𑁂 𑀤𑀺𑀲𑁆𑀯𑀸 𑀅𑀦𑁂𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀼𑀕𑀦𑁆𑀥𑁄𑀤𑀓𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁬. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀛𑀸𑀦𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑁂𑀲𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻, 𑀯𑀺𑀲𑁂𑀲𑁂𑀦 𑀪𑀩𑁆𑀩𑀸𑀪𑀩𑁆𑀩𑀚𑀦𑁂 𑀧𑀲𑁆𑀲𑀢𑀻𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀯𑀺𑀧𑀲𑁆𑀲𑀦𑁆𑀢𑁄 𑀘𑀢𑀼𑀲𑀘𑁆𑀘𑀁 𑀧𑀲𑁆𑀲𑀦𑀤𑀓𑁆𑀔𑀦𑀲𑀻𑀮𑁄𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀸𑀧𑀺 𑀫𑀳𑀸𑀩𑁄𑀥𑀻𑀢𑀺 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑀫𑁂𑀢𑁆𑀣 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀓𑀡𑀺𑀓𑀸𑀭𑀧𑀸𑀤𑀧𑀭𑀼𑀓𑁆𑀔𑁄𑀧𑀺 𑀩𑁄𑀥𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺, 𑀫𑀳𑀺𑀢𑁄 𑀘 𑀲𑁄 𑀤𑁂𑀯𑀩𑁆𑀭𑀳𑁆𑀫𑀦𑀭𑀸𑀲𑀼𑀭𑁂𑀳𑀺 𑀩𑁄𑀥𑀺 𑀘𑁂𑀢𑀺 𑀫𑀳𑀸𑀩𑁄𑀥𑀺, 𑀫𑀳𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀩𑁄𑀥𑀻𑀢𑀺 𑀯𑀸 𑀫𑀳𑀸𑀩𑁄𑀥𑀺, 𑀢𑀲𑁆𑀲 𑀫𑀳𑁄 𑀧𑀽𑀚𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀩𑁄𑀥𑀺𑀲𑀺𑀜𑁆𑀘𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀤𑀼𑀫𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑁄𑀓𑁆𑀔𑀭𑀯𑀦𑀁 𑀧𑀯𑀺𑀝𑁆𑀞𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀤𑀼𑀫𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀤𑀼𑀫𑀲𑀫𑁆𑀧𑀦𑁆𑀦𑀁 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀲𑀫𑀼𑀴𑀸𑀮𑁂 𑀔𑀸𑀤𑀦𑁆𑀢𑁄 𑀧𑁄𑀓𑁆𑀔𑀭𑀡𑀺𑀬𑀸 𑀅𑀯𑀺𑀤𑀽𑀭𑁂 𑀕𑀘𑁆𑀙𑀫𑀸𑀦𑀁 𑀨𑀼𑀲𑁆𑀲𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑀢𑁄 𑀧𑀤𑀼𑀫𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺, 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀲𑀸𑀭𑁄 𑀲𑀫𑀡𑀥𑀫𑁆𑀫𑀁 𑀧𑀽𑀭𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀪𑀯𑀦𑀫𑀮𑀁 𑀓𑀼𑀭𑀼𑀫𑀸𑀦𑁄 𑀯𑀺𑀬 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀓𑀫𑁂𑀦 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀘 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁫𑁧. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑁄𑀓𑁆𑀔𑀭𑀯𑀦𑀁 𑀧𑀯𑀺𑀝𑁆𑀞𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀓𑀸𑀭𑁂𑀦 𑀦𑀴𑀤𑀡𑁆𑀟𑀧𑀢𑁆𑀢𑀸𑀤𑀻𑀳𑀺 𑀔𑀭𑀦𑁆𑀢𑀻𑀢𑀺 𑀧𑁄𑀓𑁆𑀔𑀭𑀸, 𑀧𑁄𑀓𑁆𑀔𑀭𑀸𑀦𑀁 𑀲𑀫𑀼𑀝𑁆𑀞𑀺𑀢𑀝𑁆𑀞𑁂𑀦 𑀲𑀫𑀽𑀳𑀦𑁆𑀢𑀺 𑀧𑁄𑀓𑁆𑀔𑀭𑀯𑀦𑀁, 𑀧𑀤𑀼𑀫𑀕𑀘𑁆𑀙𑀲𑀡𑁆𑀟𑁂𑀳𑀺 𑀫𑀡𑁆𑀟𑀺𑀢𑀁 𑀫𑀚𑁆𑀛𑀁 𑀧𑀯𑀺𑀝𑁆𑀞𑁄 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀤𑀼𑀫𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀦𑀯𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀲𑀼𑀥𑀸𑀯𑀕𑁆𑀕𑁄

𑁧. 𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀧𑀼𑀜𑁆𑀜𑀁 𑀓𑀸𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀢𑀲𑁆𑀲 𑀥𑀸𑀢𑀼𑀁 𑀦𑀺𑀤𑀳𑀺𑀢𑁆𑀯𑀸 𑀘𑁂𑀢𑀺𑀬𑁂 𑀓𑀭𑀻𑀬𑀫𑀸𑀦𑁂 𑀲𑀼𑀥𑀸𑀧𑀺𑀡𑁆𑀟𑀫𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑀢𑁄 𑀧𑀝𑁆𑀞𑀸𑀬 𑀏𑀢𑁆𑀣𑀦𑁆𑀢𑀭𑁂 𑀘𑀢𑀼𑀭𑀸𑀧𑀸𑀬𑀫𑀤𑀺𑀲𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧-𑁨. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀽𑀚𑀸𑀭𑀳𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀽𑀚𑀸𑀭𑀳𑀸 𑀦𑀸𑀫 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸𑀘𑀭𑀺𑀬𑀼𑀧𑀚𑁆𑀛𑀸𑀬𑀫𑀸𑀢𑀸𑀧𑀺𑀢𑀼𑀕𑀭𑀼𑀆𑀤𑀬𑁄, 𑀢𑁂𑀲𑀼 𑀧𑀽𑀚𑀸𑀭𑀳𑁂𑀲𑀼 𑀫𑀸𑀮𑀸𑀤𑀺𑀧𑀤𑀼𑀫𑀯𑀢𑁆𑀣𑀸𑀪𑀭𑀡𑀘𑀢𑀼𑀧𑀘𑁆𑀘𑀬𑀸𑀤𑀻𑀳𑀺 𑀧𑀽𑀚𑀬𑀢𑁄 𑀧𑀽𑀚𑀬𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀁 𑀲𑀳𑀲𑁆𑀲𑀲𑀢𑀲𑀳𑀲𑁆𑀲𑀸𑀤𑀺𑀯𑀲𑁂𑀦 𑀲𑀗𑁆𑀔𑁆𑀬𑀁 𑀓𑀸𑀢𑀼𑀁 𑀓𑁂𑀦𑀘𑀺 𑀫𑀳𑀸𑀦𑀼𑀪𑀸𑀯𑁂𑀦𑀸𑀧𑀺 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀫𑁂𑀯 𑀥𑀭𑀫𑀸𑀦𑁂 𑀩𑀼𑀤𑁆𑀥𑀸𑀤𑀬𑁄 𑀧𑀽𑀚𑀬𑀢𑁄, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀪𑀕𑀯𑀢𑁄 𑀘𑁂𑀢𑀺𑀬𑀧𑀝𑀺𑀫𑀸𑀩𑁄𑀥𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩. 𑀢𑀁 𑀤𑀻𑀧𑁂𑀢𑀼𑀁 𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀦𑁆𑀦𑀫𑀧𑀺 𑀤𑀻𑀧𑀸𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀅𑀧𑀭𑀕𑁄𑀬𑀸𑀦𑀉𑀢𑁆𑀢𑀭𑀓𑀼𑀭𑀼𑀧𑀼𑀩𑁆𑀩𑀯𑀺𑀤𑁂𑀳𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀢𑀤𑀦𑀼𑀕𑀢𑀸𑀦𑀁 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀸𑀦𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀇𑀲𑁆𑀲𑀭𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀓𑀺𑀲𑁆𑀲𑀸 𑀧𑀽𑀚𑀦𑀸𑀬𑁂𑀢𑀦𑁆𑀢𑀺 𑀥𑀸𑀢𑀼𑀕𑀩𑁆𑀪𑁂 𑀘𑁂𑀢𑀺𑀬𑁂 𑀓𑀢𑀸𑀬 𑀏𑀓𑀺𑀲𑁆𑀲𑀸 𑀧𑀽𑀚𑀸𑀬 𑀏𑀢𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀢𑁆𑀢𑀭𑀢𑀦𑀸𑀤𑀺𑀓𑀁 𑀲𑀓𑀮𑀁 𑀥𑀦𑀁. 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀦𑁆𑀢𑀺 𑀘𑁂𑀢𑀺𑀬𑁂 𑀓𑀢𑀧𑀽𑀚𑀸𑀬 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀯𑀺𑀪𑀢𑁆𑀢𑀲𑁆𑀲 𑀲𑁄𑀴𑀲𑀫𑀓𑁄𑀝𑁆𑀞𑀸𑀲𑀲𑁆𑀲 𑀦 𑀅𑀕𑁆𑀖𑀢𑀻𑀢𑀺 𑀅𑀢𑁆𑀣𑁄.

𑁪. 𑀲𑀺𑀤𑁆𑀥𑀢𑁆𑀣𑀲𑁆𑀲…𑀧𑁂… 𑀨𑀮𑀺𑀢𑀦𑁆𑀢𑀭𑁂𑀢𑀺 𑀦𑀭𑀸𑀦𑀁 𑀅𑀕𑁆𑀕𑀲𑁆𑀲 𑀲𑁂𑀝𑁆𑀞𑀲𑁆𑀲 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀘𑁂𑀢𑀺𑀬𑁂 𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀲𑀼𑀥𑀸𑀓𑀫𑁆𑀫𑁂 𑀓𑀭𑀻𑀬𑀫𑀸𑀦𑁂 𑀧𑀭𑀺𑀘𑁆𑀙𑁂𑀤𑀸𑀦𑀁 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀯𑁂𑀫𑀚𑁆𑀛𑁂, 𑀅𑀣 𑀯𑀸 𑀧𑀼𑀧𑁆𑀨𑀤𑀸𑀦𑀝𑁆𑀞𑀸𑀦𑀸𑀦𑀁 𑀅𑀦𑁆𑀢𑀭𑁂 𑀨𑀮𑀦𑁆𑀢𑀺𑀬𑀸 𑀫𑀬𑀸 𑀲𑀼𑀥𑀸𑀧𑀺𑀡𑁆𑀟𑁄 𑀤𑀺𑀦𑁆𑀦𑁄 𑀫𑀓𑁆𑀔𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀼𑀥𑀸𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀲𑀼𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀲𑁆𑀲𑀲𑁆𑀲 𑀮𑁄𑀓𑀦𑀸𑀣𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀼𑀜𑁆𑀜𑀁 𑀉𑀧𑀘𑀺𑀦𑀺𑀢𑁆𑀯𑀸 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀼 𑀦𑀺𑀲𑀻𑀤𑀦𑀢𑁆𑀣𑀸𑀬 𑀧𑀭𑀺𑀲𑀼𑀤𑁆𑀥𑀁 𑀲𑀺𑀮𑀺𑀝𑁆𑀞𑀁 𑀓𑀝𑁆𑀞𑀫𑀬𑀫𑀦𑀕𑁆𑀖𑀧𑀻𑀞𑀫𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀼𑀕𑀢𑀺𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁮. 𑀲𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀮𑁄𑀓𑀦𑀸𑀣𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀅𑀟𑁆𑀠𑀘𑁂𑀴𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀲𑁆𑀲𑀲𑁆𑀲𑀸𑀳𑀁 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀟𑁆𑀠𑀘𑁂𑀴𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑁂𑀦𑀸𑀓𑀼𑀲𑀮𑁂𑀦 𑀓𑀫𑁆𑀫𑁂𑀦 𑀤𑀼𑀕𑁆𑀕𑀢𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀫𑁆𑀫𑀤𑁂𑀲𑀦𑀁 𑀜𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀘𑀻𑀯𑀭𑀢𑁆𑀣𑀸𑀬 𑀅𑀟𑁆𑀠𑀪𑀸𑀕𑀁 𑀏𑀓𑀁 𑀤𑀼𑀲𑁆𑀲𑀫𑀤𑀸𑀲𑀺. 𑀲𑁄 𑀢𑁂𑀦𑁂𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀻𑀦𑀁 𑀅𑀕𑁆𑀕𑀪𑀽𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀅𑀤𑁆𑀥𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁪. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀲𑁆𑀲𑀲𑁆𑀲𑀸𑀳𑀁 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀟𑁆𑀠𑀘𑁂𑀴𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀓𑀫𑁆𑀫𑀸𑀭𑁄𑀳𑀁 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁆𑀢𑀭𑀦𑁆𑀢𑀭𑀸 𑀓𑀼𑀲𑀮𑀩𑀻𑀚𑀸𑀦𑀺 𑀧𑀽𑀭𑁂𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀦𑁆𑀢𑀭𑀦𑁆𑀢𑀭𑀸 𑀓𑀢𑁂𑀦 𑀏𑀓𑁂𑀦 𑀓𑀫𑁆𑀫𑀘𑁆𑀙𑀺𑀤𑁆𑀤𑁂𑀦 𑀓𑀫𑁆𑀫𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀘𑀻𑀯𑀭𑀲𑀺𑀩𑁆𑀩𑀦𑀢𑁆𑀣𑀸𑀬 𑀲𑀽𑀘𑀺𑀤𑀸𑀦𑀫𑀤𑀸𑀲𑀺, 𑀢𑁂𑀦 𑀧𑀼𑀜𑁆𑀜𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑁄 𑀘𑀓𑁆𑀓𑀯𑀢𑁆𑀢𑀸𑀤𑀬𑁄 𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀢𑀺𑀓𑁆𑀔𑀧𑀜𑁆𑀜𑁄 𑀯𑀚𑀻𑀭𑀜𑀸𑀡𑁄 𑀅𑀳𑁄𑀲𑀺. 𑀲𑁄 𑀓𑀫𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀳𑀤𑁆𑀥𑀦𑁄 𑀲𑀤𑁆𑀥𑀸𑀚𑀸𑀢𑁄 𑀢𑀺𑀓𑁆𑀔𑀧𑀜𑁆𑀜𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑁂𑀬𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁯. 𑀲𑁄 𑀅𑀭𑀳𑀸 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀓𑀫𑁆𑀫𑀸𑀭𑁄𑀳𑀁 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀸𑀭𑁄𑀢𑀺 𑀅𑀬𑁄𑀓𑀫𑁆𑀫𑀮𑁄𑀳𑀓𑀫𑁆𑀫𑀸𑀤𑀺𑀦𑀸 𑀓𑀫𑁆𑀫𑁂𑀦 𑀚𑀻𑀯𑀢𑀺 𑀭𑀼𑀳𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀆𑀧𑀚𑁆𑀚𑀢𑀻𑀢𑀺 𑀓𑀫𑁆𑀫𑀸𑀭𑁄, 𑀧𑀼𑀩𑁆𑀩𑁂 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀓𑀫𑁆𑀫𑀸𑀭𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀽𑀘𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀕𑀦𑁆𑀥𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀦𑁆𑀥𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀳𑁄𑀲𑀺. 𑀲𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀘𑀦𑁆𑀤𑀦𑀸𑀕𑀭𑀼𑀓𑀧𑁆𑀧𑀽𑀭𑀓𑀲𑁆𑀲𑀢𑀼𑀭𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀲𑀼𑀕𑀦𑁆𑀥𑀸𑀦𑀺 𑀯𑀟𑁆𑀠𑁂𑀢𑁆𑀯𑀸 𑀲𑀢𑁆𑀣𑀼 𑀕𑀦𑁆𑀥𑀣𑀽𑀧𑀁 𑀓𑀸𑀭𑁂𑀲𑀺. 𑀢𑀲𑁆𑀲𑀼𑀧𑀭𑀺 𑀲𑀼𑀫𑀦𑀧𑀼𑀧𑁆𑀨𑁂𑀳𑀺 𑀙𑀸𑀤𑁂𑀲𑀺, 𑀩𑀼𑀤𑁆𑀥𑀜𑁆𑀘 𑀅𑀝𑁆𑀞𑀗𑁆𑀕𑀦𑀫𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁪. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀕𑀦𑁆𑀥𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁆𑀢𑀭𑀸 𑀓𑁂𑀦𑀘𑀺 𑀅𑀓𑀼𑀲𑀮𑀘𑁆𑀙𑀺𑀤𑁆𑀤𑁂𑀦 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀦𑁂𑀲𑀸𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀫𑀺𑀕𑀮𑀼𑀤𑁆𑀤𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀢𑀤𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀸𑀝𑀮𑀺𑀩𑁄𑀥𑀺𑀁 𑀲𑀫𑁆𑀧𑀼𑀡𑁆𑀡𑀧𑀢𑁆𑀢𑀧𑀮𑁆𑀮𑀯𑀁 𑀳𑀭𑀺𑀢𑀯𑀡𑁆𑀡𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁 𑀤𑀺𑀲𑁆𑀯𑀸 𑀢𑀻𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀼𑀭𑀸𑀡𑀧𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀧𑀸𑀝𑀮𑀺𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀧𑀭𑀸𑀧𑀭𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑁄 𑀢𑀢𑁆𑀣 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑁄𑀫𑀦𑀲𑁆𑀲𑀳𑀤𑀬𑁄 𑀕𑁂𑀳𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁧. 𑀲𑁄 𑀏𑀯𑀁 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀭𑀡𑀸𑀬 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀫𑀺𑀕𑁄, 𑀅𑀣 𑀯𑀸 𑀫𑀕𑀬𑀫𑀸𑀦𑁄 𑀇𑀳𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀺𑀕𑁄, 𑀫𑀺𑀕𑀸𑀦𑀁 𑀫𑀸𑀭𑀡𑁂 𑀮𑀼𑀤𑁆𑀤𑁄 𑀮𑁄𑀪𑀻 𑀕𑁂𑀥𑁄𑀢𑀺 𑀫𑀺𑀕𑀮𑀼𑀤𑁆𑀤𑁄, 𑀧𑀼𑀭𑁂 𑀫𑀬𑁆𑀳𑀁 𑀧𑀼𑀜𑁆𑀜𑀓𑀭𑀡𑀲𑀫𑀬𑁂 𑀓𑀸𑀦𑀦𑀲𑀗𑁆𑀔𑀸𑀢𑁂 𑀫𑀳𑀸𑀅𑀭𑀜𑁆𑀜𑁂 𑀫𑀺𑀕𑀮𑀼𑀤𑁆𑀤𑁄 𑀆𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀝𑀮𑀺𑀁 𑀳𑀭𑀺𑀢𑀁 𑀤𑀺𑀲𑁆𑀯𑀸𑀢𑀺 𑀢𑀢𑁆𑀣 𑀧𑀓𑀸𑀭𑁂𑀦 𑀢𑀮𑁂𑀦 𑀭𑀢𑁆𑀢𑀯𑀡𑁆𑀡𑁂𑀦 𑀪𑀯𑀢𑀻𑀢𑀺 𑀧𑀸𑀝𑀮𑀺, 𑀧𑀼𑀧𑁆𑀨𑀸𑀦𑀁 𑀭𑀢𑁆𑀢𑀯𑀡𑁆𑀡𑀢𑀸𑀬 𑀧𑀸𑀝𑀮𑀻𑀢𑀺 𑀯𑁄𑀳𑀸𑀭𑁄, 𑀧𑀢𑁆𑀢𑀸𑀦𑀁 𑀳𑀭𑀺𑀢𑀢𑀸𑀬 𑀳𑀭𑀺𑀢𑀁 𑀦𑀻𑀮𑀯𑀡𑁆𑀡𑀁 𑀧𑀸𑀝𑀮𑀺𑀩𑁄𑀥𑀺𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀫𑀥𑀼𑀧𑀺𑀡𑁆𑀟𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀯𑀦𑁂 𑀓𑀸𑀦𑀦𑁂 𑀤𑀺𑀲𑁆𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀥𑀼𑀧𑀺𑀡𑁆𑀟𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀦𑁂𑀲𑀸𑀤𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀫𑀳𑀸𑀅𑀭𑀜𑁆𑀜𑁂 𑀧𑀝𑀺𑀯𑀲𑀢𑀺. 𑀢𑀤𑀸 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀲𑀫𑁆𑀧𑀢𑁆𑀢𑀁 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑀫𑀸𑀥𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀢𑀲𑁆𑀲 𑀲𑀼𑀫𑀥𑀼𑀭𑀁 𑀫𑀥𑀼𑀫𑀤𑀸𑀲𑀺. 𑀢𑀢𑁆𑀣 𑀘 𑀧𑀲𑀦𑁆𑀦𑀫𑀸𑀦𑀲𑁄 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁭. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀯𑀦𑁂 𑀓𑀸𑀦𑀦𑁂 𑀤𑀺𑀲𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀦𑁂𑀢𑀺 𑀯𑀺𑀲𑁂𑀲𑁂𑀦 𑀯𑀦𑀁 𑀧𑀢𑁆𑀣𑀝𑀁 𑀯𑀺𑀯𑀦𑀁, 𑀳𑀢𑁆𑀣𑀺𑀅𑀲𑁆𑀲𑀭𑀣𑀲𑀤𑁆𑀤𑁂𑀳𑀺 𑀪𑁂𑀭𑀺𑀲𑀤𑁆𑀤𑁂𑀳𑀺 𑀘 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺 𑀘 𑀯𑀺𑀕𑀢𑀁 𑀩𑁆𑀬𑀸𑀧𑀕𑀢𑀦𑁆𑀢𑀺 𑀅𑀢𑁆𑀣𑁄, 𑀓𑀸𑀦𑀦𑀲𑀗𑁆𑀔𑀸𑀢𑁂 𑀫𑀳𑀸𑀅𑀭𑀜𑁆𑀜𑁂 𑀯𑀺𑀯𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀲𑀥𑀺𑀁𑀯 𑀯𑀺𑀭𑁄𑀘𑀦𑁆𑀢𑀦𑁆𑀢𑀺 𑀪𑀯𑀯𑀟𑁆𑀠𑀓𑀺𑀚𑀦𑀸𑀦𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀑𑀲𑀥𑀁. 𑀑𑀚𑀸𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀧𑀝𑀺𑀘𑁆𑀘 𑀬𑀸𑀬 𑀢𑀸𑀭𑀓𑀸𑀬 𑀉𑀕𑁆𑀕𑀢𑀸𑀬 𑀉𑀤𑁆𑀥𑀭𑀦𑁆𑀢𑀺 𑀕𑀡𑁆𑀳𑀦𑁆𑀢𑀻𑀢𑀺 𑀲𑀸 𑀑𑀲𑀥𑀺. 𑀑𑀲𑀥𑀺𑀢𑀸𑀭𑀓𑀸 𑀇𑀯 𑀯𑀺𑀭𑁄𑀘𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀑𑀲𑀥𑀺𑀁𑀯 𑀯𑀺𑀭𑁄𑀘𑀦𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀥𑀼𑀧𑀺𑀡𑁆𑀟𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀲𑁂𑀦𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑁂𑀦𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀯𑀦𑀦𑁆𑀢𑀭𑀁 𑀲𑀫𑁆𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀧𑀡𑀸𑀫𑀁 𑀓𑀢𑁆𑀯𑀸 𑀧𑀡𑁆𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀲𑁆𑀲 𑀲𑀫𑀦𑁆𑀢𑀢𑁄 𑀪𑀺𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀧𑀼𑀧𑁆𑀨𑀧𑀽𑀚𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁫. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑁂𑀦𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀤𑀝𑁆𑀞𑀩𑁆𑀩𑀸.

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀗𑁆𑀔𑀥𑀫𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀅𑀢𑁆𑀢𑀦𑁄 𑀲𑀺𑀧𑁆𑀧𑁂 𑀲𑀗𑁆𑀔𑀥𑀫𑀦𑁂 𑀙𑁂𑀓𑁄 𑀅𑀳𑁄𑀲𑀺, 𑀦𑀺𑀘𑁆𑀘𑀓𑀸𑀮𑀁 𑀪𑀕𑀯𑀢𑁄 𑀲𑀗𑁆𑀔𑀁 𑀥𑀫𑁂𑀢𑁆𑀯𑀸 𑀲𑀗𑁆𑀔𑀲𑀤𑁆𑀤𑁂𑀦𑁂𑀯 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀸𑀓𑀝𑁄 𑀫𑀳𑀸𑀖𑁄𑀲𑁄 𑀫𑀳𑀸𑀦𑀸𑀤𑀻 𑀫𑀥𑀼𑀭𑀲𑁆𑀲𑀭𑁄 𑀅𑀳𑁄𑀲𑀺, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀧𑀸𑀓𑀝𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀥𑀼𑀭𑀲𑁆𑀲𑀭𑁄𑀢𑀺 𑀧𑀸𑀓𑀝𑁄, 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺, 𑀅𑀧𑀭𑀪𑀸𑀕𑁂 𑀫𑀥𑀼𑀭𑀲𑁆𑀲𑀭𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁫𑁧. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀳𑁄𑀲𑀺𑀁 𑀲𑀗𑁆𑀔𑀥𑀫𑀓𑁄𑀢𑀺 𑀲𑀁 𑀲𑀼𑀝𑁆𑀞𑀼 𑀔𑀦𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀲𑀗𑁆𑀔𑁄, 𑀲𑀫𑀼𑀤𑁆𑀤𑀚𑀮𑀧𑀭𑀺𑀬𑀦𑁆𑀢𑁂 𑀘𑀭𑀫𑀸𑀦𑁄 𑀕𑀘𑁆𑀙𑀢𑀺 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀲𑀗𑁆𑀔𑀁 𑀥𑀫𑀢𑀺 𑀖𑁄𑀲𑀁 𑀓𑀭𑁄𑀢𑀻𑀢𑀺 𑀲𑀗𑁆𑀔𑀥𑀫𑀓𑁄, 𑀲𑁄𑀳𑀁 𑀲𑀗𑁆𑀔𑀥𑀫𑀓𑁄𑀯 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁧. 𑀪𑀺𑀓𑁆𑀔𑀤𑀸𑀬𑀺𑀯𑀕𑁆𑀕𑁄

𑁧. 𑀪𑀺𑀓𑁆𑀔𑀸𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀪𑀺𑀓𑁆𑀔𑀸𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀤𑁆𑀥𑀸𑀚𑀸𑀢𑁄 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀁 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀆𑀳𑀸𑀭𑀫𑀤𑀸𑀲𑀺. 𑀪𑀕𑀯𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦𑁂𑀯 𑀓𑀼𑀲𑀮𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀯𑀭𑀸 𑀅𑀪𑀺𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀧𑀓𑀸𑀭𑁂𑀦 𑀯𑀭𑀺𑀢𑀩𑁆𑀩𑀁 𑀧𑀢𑁆𑀣𑁂𑀢𑀩𑁆𑀩𑀦𑁆𑀢𑀺 𑀧𑀯𑀭𑀁, 𑀭𑀫𑁆𑀫𑀪𑀽𑀢𑀢𑁄 𑀯𑀺𑀯𑁂𑀓𑀪𑀽𑀢𑀢𑁄 𑀲𑀓𑀯𑀺𑀳𑀸𑀭𑀢𑁄 𑀅𑀪𑀺 𑀯𑀺𑀲𑁂𑀲𑁂𑀦 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀸𑀦𑀸 𑀦𑀺𑀩𑁆𑀩𑀸𑀦𑀫𑀸𑀕𑀢𑀦𑁆𑀢𑀺 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁, 𑀯𑀸𑀦𑀦𑀸𑀫𑀁 𑀢𑀡𑁆𑀳𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀧𑀳𑀸𑀬 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁨. 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦𑀸𑀢𑀺 𑀓𑀭𑀢𑀮𑁂𑀦 𑀕𑀳𑁂𑀢𑀩𑁆𑀩𑀸 𑀤𑀩𑁆𑀩𑀺 𑀓𑀝𑀘𑁆𑀙𑀼, 𑀪𑀺𑀓𑁆𑀔𑀻𑀬𑀢𑀺 𑀆𑀬𑀸𑀘𑀻𑀬𑀢𑀻𑀢𑀺 𑀪𑀺𑀓𑁆𑀔𑀸, 𑀅𑀪𑀺 𑀯𑀺𑀲𑁂𑀲𑁂𑀦 𑀔𑀸𑀤𑀺𑀢𑀩𑁆𑀩𑀸 𑀪𑀓𑁆𑀔𑀺𑀢𑀩𑁆𑀩𑀸𑀢𑀺 𑀯𑀸 𑀪𑀺𑀓𑁆𑀔𑀸, 𑀓𑀝𑀘𑁆𑀙𑀼𑀦𑀸 𑀕𑀳𑁂𑀢𑀩𑁆𑀩𑀸 𑀪𑀺𑀓𑁆𑀔𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀸, 𑀤𑀩𑁆𑀩𑀺𑀬𑀸 𑀪𑀢𑁆𑀢𑀁 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀪𑀺𑀓𑁆𑀔𑀸𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀜𑀸𑀡𑀲𑀜𑁆𑀜𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀜𑀸𑀡𑀲𑀜𑁆𑀜𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀲𑀸𑀤𑀭𑁄 𑀲𑀸𑀮𑀬𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀖𑁄𑀲𑀧𑀫𑀸𑀡𑀢𑁆𑀢𑀸 𑀪𑀕𑀯𑀢𑁄 𑀜𑀸𑀡𑁂 𑀧𑀲𑀦𑁆𑀦𑁄 𑀧𑀜𑁆𑀘𑀗𑁆𑀕𑀅𑀝𑁆𑀞𑀗𑁆𑀕𑀦𑀫𑀓𑁆𑀓𑀸𑀭𑀯𑀲𑁂𑀦 𑀧𑀡𑀸𑀫𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂𑀲𑀼 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀦𑁆𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀚𑀸𑀢𑁄 𑀢𑀢𑁆𑀣𑀕𑁆𑀕𑀪𑀽𑀢𑀸 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀤𑀸𑀤𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁭. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀦𑀺𑀲𑀪𑀸𑀚𑀸𑀦𑀺𑀬𑀁 𑀬𑀣𑀸𑀢𑀺 𑀕𑀯𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑁄 𑀦𑀺𑀲𑀪𑁄, 𑀦𑀺𑀲𑀪𑁄 𑀘 𑀲𑁄 𑀆𑀚𑀸𑀦𑀺𑀬𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀘𑁂𑀢𑀺 𑀦𑀺𑀲𑀪𑀸𑀚𑀸𑀦𑀺𑀬𑁄. 𑀬𑀣𑀸 𑀦𑀺𑀲𑀪𑀸𑀚𑀸𑀦𑀺𑀬𑁄, 𑀢𑀣𑁂𑀯 𑀪𑀕𑀯𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀯𑀺𑀲𑀬𑀲𑀜𑁆𑀜𑀸𑀢𑀁 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀅𑀦𑀼𑀧𑀫𑁂𑀬𑁆𑀬𑁄 𑀳𑀺 𑀪𑀕𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀜𑀸𑀡𑀲𑀜𑁆𑀜𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀉𑀧𑁆𑀧𑀮𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀯𑀭𑀸𑀬𑀁 𑀦𑀺𑀯𑀸𑀲𑀻𑀳𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑁆𑀧𑀮𑀳𑀢𑁆𑀣𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀓𑀼𑀲𑀮𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀸𑀮𑀸𑀓𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀫𑀸𑀮𑀸𑀓𑀸𑀭𑀓𑀫𑁆𑀫𑁂𑀦 𑀅𑀦𑁂𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑁄 𑀪𑀕𑀯𑀦𑁆𑀢𑀁 𑀭𑀢𑀦𑀕𑁆𑀖𑀺𑀓𑀫𑀺𑀯 𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 𑀭𑀢𑁆𑀢𑀼𑀧𑁆𑀧𑀮𑀓𑀮𑀸𑀧𑁂𑀦 𑀧𑀽𑀚𑁂𑀲𑀺. 𑀲𑁄 𑀢𑀢𑁄 𑀘𑀼𑀢𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀲𑀼𑀕𑀢𑀻𑀲𑀼 𑀧𑀼𑀜𑁆𑀜𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁩. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀯𑀭𑀸𑀬𑀁 𑀦𑀺𑀯𑀸𑀲𑀻𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀯𑀭𑀸𑀢𑀺 𑀢𑀻𑀳𑀺 𑀯𑀸𑀭𑁂𑀳𑀺 𑀓𑀸𑀭𑀺𑀢𑀁 𑀲𑀜𑁆𑀘𑀭𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀦𑀕𑀭𑀁, 𑀢𑀲𑁆𑀲𑀁 𑀢𑀺𑀯𑀭𑀸𑀬𑀁 𑀦𑀺𑀯𑀸𑀲𑀻, 𑀯𑀲𑀦𑀲𑀻𑀮𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀕𑁂𑀳𑁂 𑀯𑀸 𑀯𑀲𑀦𑁆𑀢𑁄 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀳𑁄𑀲𑀺𑀁 𑀫𑀸𑀮𑀺𑀓𑁄 𑀢𑀤𑀸𑀢𑀺 𑀢𑀤𑀸 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀼𑀜𑁆𑀜𑀲𑀫𑁆𑀪𑀸𑀭𑀓𑀭𑀡𑀲𑀫𑀬𑁂 𑀫𑀸𑀮𑀺𑀓𑁄 𑀫𑀸𑀮𑀸𑀓𑀸𑀭𑁄𑀯 𑀧𑀼𑀧𑁆𑀨𑀸𑀦𑀺 𑀓𑀬𑀯𑀺𑀓𑁆𑀓𑀬𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁪. 𑀧𑀼𑀧𑁆𑀨𑀳𑀢𑁆𑀣𑀫𑀤𑀸𑀲𑀳𑀦𑁆𑀢𑀺 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀉𑀧𑁆𑀧𑀮𑀓𑀮𑀸𑀧𑀁 𑀅𑀤𑀸𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀉𑀧𑁆𑀧𑀮𑀳𑀢𑁆𑀣𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀧𑀤𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀤𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀲𑀼𑀫𑀦𑀧𑀼𑀧𑁆𑀨𑁂𑀦 𑀧𑀸𑀤𑀫𑀽𑀮𑁂 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑁧𑁯. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀚𑀸𑀢𑀺𑀧𑀼𑀧𑁆𑀨𑀫𑀤𑀸𑀲𑀳𑀦𑁆𑀢𑀺 𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨𑀁 𑀅𑀤𑀸𑀲𑀺𑀁 𑀅𑀳𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀲𑀼𑀫𑀦𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑁄 𑀯𑀺𑀓𑀲𑀫𑀸𑀦𑁄𑀬𑁂𑀯 𑀲𑀼𑀫𑀦𑀁 𑀚𑀦𑀸𑀦𑀁 𑀲𑁄𑀫𑀦𑀲𑁆𑀲𑀁 𑀓𑀭𑁄𑀢𑀻𑀢𑀺 𑀲𑀼𑀫𑀦𑀁, 𑀧𑀼𑀧𑁆𑀨𑀦𑀝𑁆𑀞𑁂𑀦 𑀯𑀺𑀓𑀲𑀦𑀝𑁆𑀞𑁂𑀦 𑀧𑀼𑀧𑁆𑀨𑀁, 𑀲𑀼𑀫𑀦𑀜𑁆𑀘 𑀢𑀁 𑀧𑀼𑀧𑁆𑀨𑀜𑁆𑀘𑀸𑀢𑀺 𑀲𑀼𑀫𑀦𑀧𑀼𑀧𑁆𑀨𑀁, 𑀢𑀸𑀦𑀺 𑀲𑀼𑀫𑀦𑀧𑀼𑀧𑁆𑀨𑀸𑀦𑀺 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀅𑀳𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀤𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀫𑀼𑀝𑁆𑀞𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀤𑀲𑁆𑀲𑀦𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀼𑀝𑁆𑀞𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀸𑀮𑀸𑀓𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨𑀸𑀦𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀑𑀓𑀺𑀭𑀺𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀓𑀼𑀲𑀮𑀲𑀫𑁆𑀪𑀸𑀭𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑁄 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀼𑀩𑁆𑀩𑀯𑀸𑀲𑀦𑀸𑀯𑀲𑁂𑀦 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁪-𑁨𑁫. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀤𑀲𑁆𑀲𑀦𑁄𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀭𑀽𑀧𑀲𑀡𑁆𑀞𑀸𑀦𑀬𑁄𑀩𑁆𑀩𑀜𑁆𑀜𑀲𑁄𑀪𑀦𑁂𑀦 𑀲𑀼𑀦𑁆𑀤𑀭𑁄 𑀤𑀲𑁆𑀲𑀦𑁄𑀢𑀺 𑀲𑀼𑀤𑀲𑁆𑀲𑀦𑁄, 𑀦𑀸𑀫𑁂𑀦 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀫𑀸𑀮𑀸𑀓𑀸𑀭𑁄 𑀳𑀼𑀢𑁆𑀯𑀸 𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨𑁂𑀳𑀺 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀼𑀝𑁆𑀞𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀧𑀽𑀭𑀺𑀢𑀓𑀼𑀲𑀮𑀲𑀜𑁆𑀘𑀬𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀧𑀭𑀺𑀧𑀽𑀭𑀺𑀬𑀫𑀸𑀦𑁄 𑀧𑀼𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀓𑀼𑀲𑀮𑀸𑀓𑀼𑀲𑀮𑀁 𑀚𑀸𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀆𑀓𑀸𑀲𑁂 𑀕𑀘𑁆𑀙𑀢𑁄 𑀦𑀺𑀓𑁆𑀔𑀦𑁆𑀢𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀻𑀲𑀼 𑀧𑀲𑀦𑁆𑀦𑁄 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀢𑁂𑀦 𑀧𑀽𑀚𑀺𑀢𑀁 𑀉𑀤𑀓𑀁 𑀭𑀚𑀢𑀩𑀼𑀩𑁆𑀩𑀼𑀮𑀁 𑀯𑀺𑀬 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀲𑁄 𑀅𑀪𑀺𑀧𑁆𑀧𑀲𑀦𑁆𑀦𑁄 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀢𑀼𑀲𑀺𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁯. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀖𑀢𑀸𑀲𑀦𑀁𑀯 𑀚𑀮𑀺𑀢𑀦𑁆𑀢𑀺 𑀖𑀢𑀁 𑀯𑀼𑀘𑁆𑀘𑀢𑀺 𑀲𑀧𑁆𑀧𑀺, 𑀖𑀢𑀲𑁆𑀲 𑀆𑀲𑀦𑀁 𑀆𑀥𑀸𑀭𑀦𑁆𑀢𑀺 𑀖𑀢𑀸𑀲𑀦𑀁, 𑀅𑀕𑁆𑀕𑀺, 𑀅𑀣 𑀯𑀸 𑀢𑀁 𑀅𑀲𑀢𑀺 𑀪𑀼𑀜𑁆𑀚𑀢𑀻𑀢𑀺 𑀖𑀢𑀸𑀲𑀦𑀁, 𑀅𑀕𑁆𑀕𑀺𑀬𑁂𑀯. 𑀬𑀣𑀸 𑀖𑀢𑁂 𑀆𑀲𑀺𑀢𑁆𑀢𑁂 𑀅𑀕𑁆𑀕𑀺𑀫𑁆𑀳𑀺 𑀅𑀕𑁆𑀕𑀺𑀲𑀺𑀔𑀸 𑀅𑀢𑀻𑀯 𑀚𑀮𑀢𑀺, 𑀏𑀯𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀇𑀯 𑀚𑀮𑀫𑀸𑀦𑀁 𑀪𑀕𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀦𑁆𑀢𑀺 𑀳𑀼𑀢𑀁 𑀯𑀼𑀘𑁆𑀘𑀢𑀺 𑀧𑀽𑀚𑀸𑀲𑀓𑁆𑀓𑀸𑀭𑁂, 𑀳𑀼𑀢𑀲𑁆𑀲 𑀧𑀽𑀚𑀸𑀲𑀓𑁆𑀓𑀸𑀭𑀲𑁆𑀲 𑀆𑀲𑀦𑀦𑁆𑀢𑀺 𑀳𑀼𑀢𑀸𑀲𑀦𑀁, 𑀚𑀮𑀫𑀸𑀦𑀁 𑀲𑀽𑀭𑀺𑀬𑀁 𑀇𑀯 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀩𑁆𑀬𑀸𑀫𑀧𑁆𑀧𑀪𑀸𑀫𑀡𑁆𑀟𑀮𑁂𑀳𑀺 𑀯𑀺𑀚𑁆𑀚𑁄𑀢𑀫𑀸𑀦𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁 𑀅𑀦𑀺𑀮𑀜𑁆𑀚𑀲𑁂 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀦𑀴𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀴𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀏𑀲𑁄𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀓𑀸𑀫𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀢𑀢𑁆𑀣𑀸𑀕𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀯𑀦𑁆𑀤𑀺𑀢𑁆𑀯𑀸 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀦𑀴𑀫𑀸𑀮𑁂𑀳𑀺 𑀩𑀻𑀚𑀦𑀺𑀁 𑀓𑀢𑁆𑀯𑀸 𑀩𑀻𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬, 𑀅𑀦𑀼𑀫𑁄𑀤𑀦𑀜𑁆𑀘 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀧𑀭𑀺𑀴𑀸𑀳𑀲𑀦𑁆𑀢𑀸𑀧𑀯𑀺𑀯𑀚𑁆𑀚𑀺𑀢𑁄 𑀓𑀸𑀬𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀢𑁆𑀢𑁄 𑀅𑀦𑁂𑀓𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁬. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁩𑁭. 𑀦𑀴𑀫𑀸𑀮𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀦𑀴𑀢𑀺 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀳𑀼𑀢𑁆𑀯𑀸 𑀯𑁂𑀴𑀼𑀯𑀁𑀲𑀢𑁄𑀧𑀺 𑀢𑀦𑀼𑀓𑁄 𑀲𑀮𑁆𑀮𑀳𑀼𑀓𑁄 𑀚𑀸𑀢𑁄𑀢𑀺 𑀦𑀴𑁄, 𑀦𑀴𑀲𑁆𑀲 𑀫𑀸𑀮𑀸 𑀧𑀼𑀧𑁆𑀨𑀁 𑀦𑀴𑀫𑀸𑀮𑀁, 𑀢𑁂𑀦 𑀦𑀴𑀫𑀸𑀮𑁂𑀦 𑀩𑀻𑀚𑀦𑀺𑀁 𑀓𑀸𑀭𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀻𑀚𑀺𑀲𑁆𑀲𑀢𑀺 𑀚𑀦𑀺𑀲𑁆𑀲𑀢𑀺 𑀯𑀸𑀢𑁄 𑀅𑀦𑁂𑀦𑀸𑀢𑀺 𑀩𑀻𑀚𑀦𑀻, 𑀢𑀁 𑀩𑀻𑀚𑀦𑀺𑀁 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑁂𑀲𑀺𑀁, 𑀧𑀝𑀺𑀕𑁆𑀕𑀳𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀦𑀴𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀢𑁆𑀢𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀆𑀲𑀦𑀼𑀧𑀝𑁆𑀞𑀸𑀳𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀓𑀸𑀦𑀦𑀁 𑀯𑀦𑀫𑁄𑀕𑁆𑀕𑀬𑁆𑀳𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀆𑀲𑀦𑀼𑀧𑀝𑁆𑀞𑀸𑀳𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀢𑀢𑁆𑀣 𑀤𑁄𑀲𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀢𑀢𑁆𑀣 𑀲𑀫𑁆𑀧𑀢𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀲𑀻𑀳𑀸𑀲𑀦𑀁 𑀅𑀤𑀸𑀲𑀺, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀫𑀸𑀮𑀸𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀉𑀘𑁆𑀘𑀓𑀼𑀮𑀺𑀓𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀓𑀸𑀮𑀦𑁆𑀢𑀭𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁭. 𑀲𑁄 𑀅𑀭𑀳𑀸 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀓𑀸𑀦𑀦𑀁 𑀯𑀦𑀫𑁄𑀕𑁆𑀕𑀬𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺.

𑀆𑀲𑀦𑀼𑀧𑀝𑁆𑀞𑀸𑀳𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀩𑀺𑀴𑀸𑀮𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀺𑀴𑀸𑀮𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀢𑀢𑁆𑀣𑀸𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀅𑀢𑀻𑀯 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑁄 𑀆𑀮𑀼𑀯𑀸𑀤𑀻𑀳𑀺 𑀬𑀸𑀧𑁂𑀦𑁆𑀢𑁄 𑀯𑀲𑀢𑀺. 𑀢𑀤𑀸 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀳𑀺𑀫𑀯𑀦𑁆𑀢𑀁 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀯𑀦𑁆𑀤𑀺𑀢𑁆𑀯𑀸 𑀩𑀺𑀴𑀸𑀮𑀺𑀬𑁄 𑀕𑀳𑁂𑀢𑁆𑀯𑀸 𑀧𑀢𑁆𑀢𑁂 𑀑𑀓𑀺𑀭𑀺. 𑀢𑀁 𑀢𑀣𑀸𑀕𑀢𑁄 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀬𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁫𑁩. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀓𑀼𑀲𑀮𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀆𑀮𑀼𑀯𑀓𑀭𑀫𑁆𑀪𑀸𑀤𑀬𑁄 𑀢𑁂𑀲𑀁 𑀢𑁂𑀲𑀁 𑀓𑀦𑁆𑀤𑀚𑀸𑀢𑀻𑀦𑀁 𑀦𑀸𑀫𑀸𑀦𑁂𑀯𑀸𑀢𑀺.

𑀩𑀺𑀴𑀸𑀮𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀭𑁂𑀡𑀼𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑁂𑀡𑀼𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀦𑀸𑀕𑀧𑀼𑀧𑁆𑀨𑀓𑁂𑀲𑀭𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀅𑀣 𑀪𑀕𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺.

𑁬𑁨-𑁩. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀲𑀢𑀭𑀁𑀲𑀺𑀁𑀯 𑀪𑀸𑀡𑀼𑀫𑀦𑁆𑀢𑀺 𑀲𑀢𑀫𑀢𑁆𑀢𑀸 𑀲𑀢𑀧𑁆𑀧𑀫𑀸𑀡𑀸 𑀭𑀁𑀲𑀺 𑀧𑀪𑀸 𑀬𑀲𑁆𑀲 𑀲𑀽𑀭𑀺𑀬𑀲𑁆𑀲 𑀲𑁄 𑀲𑀢𑀭𑀁𑀲𑀺, 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀲𑀢𑀭𑀁𑀲𑀻𑀢𑀺 𑀯𑀼𑀢𑁆𑀢𑀁, 𑀅𑀦𑁂𑀓𑀲𑀢𑀲𑁆𑀲 𑀅𑀦𑁂𑀓𑀲𑀢𑀲𑀳𑀲𑁆𑀲𑀭𑀁𑀲𑀻𑀢𑀺 𑀅𑀢𑁆𑀣𑁄. 𑀪𑀸𑀡𑀼 𑀯𑀼𑀘𑁆𑀘𑀢𑀺 𑀧𑀪𑀸, 𑀪𑀸𑀡𑀼 𑀧𑀪𑀸 𑀬𑀲𑁆𑀲 𑀲𑁄 𑀪𑀸𑀡𑀼𑀫𑀸, 𑀪𑀸𑀡𑀼𑀫𑀲𑀗𑁆𑀔𑀸𑀢𑀁 𑀲𑀽𑀭𑀺𑀬𑀁 𑀇𑀯 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑁂𑀲𑀭𑀁 𑀦𑀸𑀕𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀭𑁂𑀡𑀼𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀏𑀓𑀸𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁨. 𑀫𑀳𑀸𑀧𑀭𑀺𑀯𑀸𑀭𑀯𑀕𑁆𑀕𑁄

𑁧. 𑀫𑀳𑀸𑀧𑀭𑀺𑀯𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀳𑀸𑀧𑀭𑀺𑀯𑀸𑀭𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑀲𑀫𑀬𑁂 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑁂𑀓𑀬𑀓𑁆𑀔𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀏𑀓𑀲𑁆𑀫𑀺𑀁 𑀔𑀼𑀤𑁆𑀤𑀓𑀤𑀻𑀧𑁂 𑀤𑀺𑀩𑁆𑀩𑀲𑀼𑀔𑀫𑀦𑀼𑀪𑀯𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀤𑀻𑀧𑁂 𑀘𑁂𑀢𑀺𑀬𑀸𑀪𑀺𑀲𑁄𑀪𑀺𑀢𑁄 𑀯𑀺𑀳𑀸𑀭𑁄 𑀅𑀢𑁆𑀣𑀺, 𑀢𑀢𑁆𑀣 𑀪𑀕𑀯𑀸 𑀅𑀕𑀫𑀸𑀲𑀺. 𑀅𑀣 𑀲𑁄 𑀬𑀓𑁆𑀔𑀲𑁂𑀦𑀸𑀥𑀺𑀧𑀢𑀺 𑀢𑀁 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀕𑀢𑀪𑀸𑀯𑀁 𑀤𑀺𑀲𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑁂𑀳𑀺 𑀧𑀽𑀚𑁂𑀲𑀺, 𑀲𑀧𑀭𑀺𑀯𑀸𑀭𑁄 𑀲𑀭𑀡𑀫𑀕𑀫𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀅𑀕𑁆𑀕𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧-𑁨. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑁂𑀲𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻, 𑀯𑀺𑀯𑀺𑀥𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀧𑀲𑁆𑀲𑀢𑀻𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀯𑀺𑀯𑀺𑀥𑁂 𑀅𑀦𑁂𑀓𑀧𑁆𑀧𑀓𑀸𑀭𑁂 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀲𑁆𑀲𑀢𑀻𑀢𑀺 𑀯𑀸 𑀯𑀺𑀧𑀲𑁆𑀲𑀻, 𑀲𑁄 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀤𑀻𑀧𑀘𑁂𑀢𑀺𑀬𑀁 𑀤𑀻𑀧𑁂 𑀧𑀽𑀚𑀦𑀻𑀬𑀝𑁆𑀞𑀸𑀦𑀁 𑀯𑀺𑀳𑀸𑀭𑀫𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀳𑀸𑀧𑀭𑀺𑀯𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀢𑁆𑀣𑀤𑀲𑁆𑀲𑀻 𑀚𑀺𑀦𑀯𑀭𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀢𑀴𑀸𑀓𑀲𑀫𑀻𑀧𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀳𑀸𑀬𑀺𑀢𑀼𑀓𑀸𑀫𑁄 𑀢𑀲𑁆𑀲 𑀢𑀴𑀸𑀓𑀲𑁆𑀲 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀏𑀓𑀘𑀻𑀯𑀭𑁄 𑀚𑀮𑀫𑀸𑀦𑁄 𑀩𑁆𑀭𑀳𑁆𑀫𑀸 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀲𑀼𑀯𑀡𑁆𑀡𑀩𑀺𑀫𑁆𑀩𑀁 𑀯𑀺𑀬 𑀅𑀝𑁆𑀞𑀸𑀲𑀺. 𑀅𑀣 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀜𑁆𑀚𑀮𑀺𑀓𑁄 𑀣𑁄𑀫𑀦𑀫𑀓𑀸𑀲𑀺, 𑀅𑀢𑁆𑀢𑀦𑁄 𑀤𑀺𑀩𑁆𑀩𑀕𑀻𑀢𑀢𑀽𑀭𑀺𑀬𑁂𑀳𑀺 𑀉𑀧𑀳𑀸𑀭𑀜𑁆𑀘 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁧. 𑀲𑁄 𑀧𑀘𑁆𑀙𑀸 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀻 𑀚𑀺𑀦𑀯𑀭𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀤𑀓𑁆𑀔𑀢𑀺 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑀤𑀲𑁆𑀲𑀻, 𑀅𑀣 𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀢𑀼𑀭𑀸𑀭𑀺𑀬𑀲𑀘𑁆𑀘𑀲𑀗𑁆𑀔𑀸𑀢𑀁 𑀅𑀢𑁆𑀣𑀧𑀬𑁄𑀚𑀦𑀁 𑀤𑀲𑁆𑀲𑀦𑀲𑀻𑀮𑁄𑀢𑀺 𑀅𑀢𑁆𑀣𑀤𑀲𑁆𑀲𑀻, 𑀓𑀺𑀮𑁂𑀲𑁂 𑀅𑀚𑀺𑀦𑀺 𑀚𑀺𑀦𑀸𑀢𑀺 𑀚𑀺𑀦𑀺𑀲𑁆𑀲𑀢𑀻𑀢𑀺 𑀚𑀺𑀦𑁄. 𑀯𑀭𑀺𑀢𑀩𑁆𑀩𑁄 𑀧𑀢𑁆𑀣𑁂𑀢𑀩𑁆𑀩𑁄 𑀲𑀩𑁆𑀩𑀲𑀢𑁆𑀢𑁂𑀳𑀻𑀢𑀺 𑀯𑀭𑁄, 𑀅𑀢𑁆𑀣𑀤𑀲𑁆𑀲𑀻 𑀚𑀺𑀦𑁄 𑀘 𑀲𑁄 𑀯𑀭𑁄 𑀘𑀸𑀢𑀺 𑀅𑀢𑁆𑀣𑀤𑀲𑁆𑀲𑀻 𑀚𑀺𑀦𑀯𑀭𑁄. 𑀮𑁄𑀓𑀚𑁂𑀝𑁆𑀞𑁄𑀢𑀺 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀮𑁄𑀓𑀻𑀬𑀢𑀺 𑀧𑀲𑁆𑀲𑀻𑀬𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀸𑀭𑀧𑁆𑀧𑀢𑁆𑀢𑁄𑀢𑀺 𑀯𑀸 𑀮𑁄𑀓𑁄, 𑀮𑁄𑀓𑁄 𑀘 𑀮𑁄𑀓𑁄 𑀘 𑀮𑁄𑀓𑁄 𑀘𑀸𑀢𑀺 𑀮𑁄𑀓𑁄. 𑀏𑀓𑀲𑁂𑀲𑀲𑀫𑀸𑀲𑀯𑀲𑁂𑀦 ‘‘𑀮𑁄𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀮𑁄𑀓𑁄’’𑀢𑀺 𑀯𑀼𑀢𑁆𑀢𑁄. 𑀮𑁄𑀓𑀲𑁆𑀲 𑀚𑁂𑀝𑁆𑀞𑁄 𑀮𑁄𑀓𑀚𑁂𑀝𑁆𑀞𑁄, 𑀲𑁄 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀉𑀪𑀺𑀦𑁆𑀦𑀁 𑀤𑁂𑀯𑀭𑀸𑀚𑀽𑀦𑀦𑁆𑀢𑁆𑀬𑀸𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁂 𑀪𑀕𑀯𑀢𑀺 𑀉𑀧𑁆𑀧𑀦𑁆𑀦𑁂 𑀅𑀬𑀁 𑀳𑀺𑀫𑀯𑀦𑁆𑀢𑁂 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀫𑀺𑀁 𑀅𑀧𑀭𑁂𑀦 𑀬𑀓𑁆𑀔𑀤𑁂𑀯𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀢𑁆𑀣𑀸𑀬 𑀉𑀧𑀝𑁆𑀞𑀺𑀢𑁂 𑀤𑁆𑀯𑁂 𑀅𑀦𑁂𑀓𑀬𑀓𑁆𑀔𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀨𑀮𑀓𑀸𑀯𑀼𑀥𑀸𑀤𑀺𑀳𑀢𑁆𑀣𑀸 𑀲𑀗𑁆𑀕𑀸𑀫𑀢𑁆𑀣𑀸𑀬 𑀲𑀫𑀼𑀧𑀩𑁆𑀬𑀽𑀴𑁆𑀳𑀸 𑀅𑀳𑁂𑀲𑀼𑀁. 𑀢𑀤𑀸 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀓𑀸𑀲𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀧𑀭𑀺𑀯𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁂𑀯𑀭𑀸𑀚𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀢𑁂 𑀲𑀩𑁆𑀩𑁂 𑀨𑀮𑀓𑀸𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀭𑀯𑀩𑀳𑀼𑀫𑀸𑀦𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀭𑀡𑀫𑀕𑀫𑀁𑀲𑀼. 𑀢𑁂𑀲𑀁 𑀅𑀬𑀁 𑀧𑀞𑀫𑀁 𑀲𑀭𑀡𑀫𑀕𑀫𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁦. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀉𑀪𑀺𑀦𑁆𑀦𑀁 𑀤𑁂𑀯𑀭𑀸𑀚𑀽𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀘𑀺𑀮𑁄𑀫𑀔𑀭𑀮𑁄𑀫𑀆𑀴𑀯𑀓𑀓𑀼𑀫𑁆𑀪𑀻𑀭𑀓𑀼𑀯𑁂𑀭𑀸𑀤𑀬𑁄 𑀯𑀺𑀬 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀸 𑀤𑁆𑀯𑁂 𑀬𑀓𑁆𑀔𑀭𑀸𑀚𑀸𑀦𑁄 𑀅𑀜𑁆𑀜𑀸𑀧𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀪𑀺𑀦𑁆𑀦𑀁 𑀤𑁂𑀯𑀭𑀸𑀚𑀽𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀗𑁆𑀕𑀸𑀫𑁄 𑀲𑀫𑀼𑀧𑀝𑁆𑀞𑀺𑀢𑁄𑀢𑀺 𑀲𑀁 𑀲𑀼𑀝𑁆𑀞𑀼 𑀕𑀸𑀫𑁄 𑀓𑀮𑀳𑀢𑁆𑀣𑀸𑀬 𑀉𑀧𑀕𑀫𑀦𑀦𑁆𑀢𑀺 𑀲𑀗𑁆𑀕𑀸𑀫𑁄, 𑀲𑁄 𑀲𑀗𑁆𑀕𑀸𑀫𑁄 𑀲𑀁 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑁄, 𑀏𑀓𑀝𑁆𑀞𑀸𑀦𑁂 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀳𑁄𑀲𑀺 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀲𑀁 𑀲𑀼𑀝𑁆𑀞𑀼 𑀉𑀧𑀲𑀫𑀻𑀧𑁂 𑀭𑀸𑀲𑀺𑀪𑀽𑀢𑁄𑀢𑀺 𑀅𑀢𑁆𑀣𑁄.

𑁨𑁧. 𑀲𑀁𑀯𑁂𑀚𑁂𑀲𑀺 𑀫𑀳𑀸𑀚𑀦𑀦𑁆𑀢𑀺 𑀢𑁂𑀲𑀁 𑀭𑀸𑀲𑀺𑀪𑀽𑀢𑀸𑀦𑀁 𑀬𑀓𑁆𑀔𑀸𑀦𑀁 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀸𑀬 𑀲𑀁 𑀲𑀼𑀝𑁆𑀞𑀼 𑀯𑁂𑀚𑁂𑀲𑀺, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀕𑀡𑁆𑀳𑀸𑀧𑁂𑀲𑀺 𑀯𑀺𑀜𑁆𑀜𑀸𑀧𑁂𑀲𑀺 𑀩𑁄𑀥𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀏𑀓𑀸𑀲𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀭𑀼𑀡𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀏𑀓𑀸𑀲𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀭𑀼𑀡𑁄 𑀦𑀸𑀫 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀕𑀻𑀢𑀯𑀸𑀤𑀺𑀢𑁂𑀳𑀺 𑀘 𑀉𑀧𑀝𑁆𑀞𑀬𑀫𑀸𑀦𑁄 𑀲𑀧𑀭𑀺𑀯𑀸𑀭𑁄 𑀧𑀽𑀚𑁂𑀲𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑀁 𑀩𑀼𑀤𑁆𑀥𑀤𑀲𑁆𑀲𑀦𑀁 𑀯𑀺𑀬 𑀲𑀩𑁆𑀩𑀢𑀽𑀭𑀺𑀬𑀢𑀸𑀴𑀸𑀯𑀘𑀭𑁂𑀳𑀺 𑀲𑀧𑀭𑀺𑀯𑀸𑀭𑁄 𑀉𑀧𑀳𑀸𑀭𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀢𑀢𑁄 𑀓𑀸𑀮𑀗𑁆𑀓𑀢𑁆𑀯𑀸 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀏𑀯𑀁 𑀤𑁂𑀯𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀫𑀦𑀼𑀲𑁆𑀲𑀪𑀽𑀢𑁄 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁧. 𑀲𑁄 𑀧𑀘𑁆𑀙𑀸 𑀲𑀓𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀢𑀁 𑀢𑀣𑀢𑁄 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀭𑀼𑀡𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀸 𑀅𑀳𑀁 𑀲𑀫𑁆𑀩𑁄𑀥𑀦𑀢𑁆𑀣𑀸𑀬 𑀩𑀼𑀤𑁆𑀥𑀁 𑀩𑁄𑀥𑀺𑀜𑁆𑀘 𑀧𑀽𑀚𑁂𑀲𑀺𑀁, 𑀢𑀤𑀸 𑀯𑀭𑀼𑀡𑁄 𑀦𑀸𑀫 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁪. 𑀥𑀭𑀡𑀻𑀭𑀼𑀳𑀧𑀸𑀤𑀧𑀦𑁆𑀢𑀺 𑀏𑀢𑁆𑀣 𑀭𑀼𑀓𑁆𑀔𑀮𑀢𑀸𑀧𑀩𑁆𑀩𑀢𑀲𑀢𑁆𑀣𑀭𑀢𑀦𑀸𑀤𑀬𑁄 𑀥𑀸𑀭𑁂𑀢𑀻𑀢𑀺 𑀥𑀭𑀡𑀻, 𑀢𑀲𑁆𑀫𑀺𑀁 𑀭𑀼𑀳𑀢𑀺 𑀧𑀢𑀺𑀝𑁆𑀞𑀳𑀢𑀻𑀢𑀺 𑀥𑀭𑀡𑀻𑀭𑀼𑀳𑁄. 𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄, 𑀲𑀺𑀜𑁆𑀘𑀺𑀢𑀲𑀺𑀜𑁆𑀘𑀺𑀢𑁄𑀤𑀓𑀁 𑀧𑀸𑀤𑁂𑀦 𑀫𑀽𑀮𑁂𑀦 𑀧𑀺𑀯𑀢𑀺 𑀭𑀼𑀓𑁆𑀔𑀓𑁆𑀔𑀦𑁆𑀥𑀲𑀸𑀔𑀸𑀯𑀺𑀝𑀧𑁂𑀳𑀺 𑀆𑀧𑁄𑀭𑀲𑀁 𑀧𑀢𑁆𑀣𑀭𑀺𑀬𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀥𑀭𑀡𑀻𑀭𑀼𑀳𑀧𑀸𑀤𑀧𑀁 𑀩𑁄𑀥𑀺𑀭𑀼𑀓𑁆𑀔𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁫. 𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄𑀢𑀺 𑀅𑀢𑁆𑀢𑀦𑁄 𑀓𑀼𑀲𑀮𑀓𑀫𑁆𑀫𑁂𑀦 𑀅𑀪𑀺𑀭𑀤𑁆𑀥𑁄 𑀧𑀲𑀦𑁆𑀦𑁄 𑀉𑀢𑁆𑀢𑀫𑁂 𑀩𑁄𑀥𑀺𑀫𑁆𑀳𑀺 𑀧𑀲𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀏𑀓𑀸𑀲𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀲𑀼𑀯𑀡𑁆𑀡𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀯𑀡𑁆𑀡𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀪𑀽𑀫𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀘𑀢𑀽𑀳𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺. 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑁂 𑀲𑀼𑀯𑀡𑁆𑀡𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀙𑀸𑀤𑁂𑀲𑀼𑀁, 𑀲𑀼𑀯𑀡𑁆𑀡𑀧𑀪𑀸 𑀘 𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀧𑀪𑀸 𑀘 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀳𑀸𑀑𑀪𑀸𑀲𑁄 𑀅𑀳𑁄𑀲𑀺. 𑀲𑁄 𑀅𑀢𑀺𑀭𑁂𑀓𑀢𑀭𑀁 𑀧𑀲𑀦𑁆𑀦𑁄 𑀲𑀓𑀪𑀯𑀦𑀁 𑀕𑀢𑁄𑀧𑀺 𑀲𑀭𑀢𑀺𑀬𑁂𑀯. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀼𑀲𑀺𑀢𑀪𑀯𑀦𑀸𑀤𑀺𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁦. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁪𑁪. 𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸𑀦𑀸𑀢𑀺 𑀩𑀮𑀯𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀧𑀸𑀫𑁄𑀚𑁆𑀚𑀁 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀺 𑀑𑀤𑀕𑁆𑀬𑀁 𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁯, 𑁮𑁬; 𑀫𑀳𑀸𑀦𑀺. 𑁧) 𑀯𑀺𑀬 𑀅𑀢𑁆𑀢𑀫𑀦𑀢𑀸 𑀲𑀓𑀪𑀸𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀼𑀯𑀡𑁆𑀡𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀲𑀸𑀫𑀺 𑀭𑀸𑀚𑀸𑀬𑀢𑀦𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁄 𑀧𑀭𑀁 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀭𑀸𑀚𑀸𑀬𑀢𑀦𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀧𑀭𑀺𑀯𑀸𑀭𑁄 𑀕𑀦𑁆𑀥𑀤𑀻𑀧𑀥𑀽𑀧𑀧𑀼𑀧𑁆𑀨𑀪𑁂𑀭𑀺𑀆𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀆𑀴𑀳𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀻𑀧𑀸𑀤𑀻𑀦𑀺 𑀧𑀽𑀚𑁂𑀢𑁆𑀯𑀸 𑀅𑀦𑁂𑀓𑁂𑀳𑀺 𑀢𑀽𑀭𑀺𑀬𑁂𑀳𑀺 𑀅𑀦𑁂𑀓𑁂𑀳𑀺 𑀯𑀸𑀤𑀺𑀢𑁂𑀳𑀺 𑀢𑀁 𑀧𑀽𑀚𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀓𑀪𑀯𑀦𑀁 𑀉𑀧𑀯𑀺𑀝𑁆𑀞𑁄𑀧𑀺 𑀪𑀕𑀯𑀦𑁆𑀢𑀫𑁂𑀯 𑀲𑀭𑀺𑀢𑁆𑀯𑀸 𑀲𑀫𑁆𑀫𑀼𑀔𑀸 𑀯𑀺𑀬 𑀯𑀦𑁆𑀤𑀢𑀺. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀭𑀸𑀚𑀸𑀬𑀢𑀦𑀢𑁄 𑀓𑀸𑀮𑀁 𑀓𑀢𑁄 𑀢𑀼𑀲𑀺𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁯. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀲𑀸𑀫𑀺 𑀭𑀸𑀚𑀸𑀬𑀢𑀦𑁂𑀢𑀺𑀆𑀤𑀺𑀫𑀸𑀳. 𑀭𑀸𑀚𑀸𑀬𑀢𑀦𑁂𑀢𑀺 𑀤𑁂𑀯𑀭𑀸𑀚𑀽𑀦𑀁 𑀆𑀬𑀢𑀦𑀁 𑀭𑀸𑀚𑀸𑀬𑀢𑀦𑀁, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀦𑀸𑀫𑀥𑁂𑀬𑁆𑀬𑁄 𑀯𑀸. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻𑀢𑀺 𑀧𑀭𑀺𑀲𑀫𑀦𑁆𑀢𑀢𑁄 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀧𑀭𑀺𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀲𑁆𑀲 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦. 𑀘𑀺𑀢𑀓𑀁 𑀅𑀕𑀫𑀸𑀲𑀳𑀦𑁆𑀢𑀺 𑀘𑀦𑁆𑀤𑀦𑀸𑀕𑀭𑀼𑀤𑁂𑀯𑀤𑀸𑀭𑀼𑀓𑀧𑁆𑀧𑀽𑀭𑀢𑀓𑁆𑀓𑁄𑀮𑀸𑀤𑀺𑀲𑀼𑀕𑀦𑁆𑀥𑀤𑀸𑀭𑀽𑀳𑀺 𑀘𑀺𑀢𑀁 𑀭𑀸𑀲𑀺𑀕𑀢𑀦𑁆𑀢𑀺 𑀘𑀺𑀢𑀁, 𑀘𑀺𑀢𑀫𑁂𑀯 𑀘𑀺𑀢𑀓𑀁, 𑀩𑀼𑀤𑁆𑀥𑀕𑀸𑀭𑀯𑁂𑀦 𑀘𑀺𑀢𑀓𑀁 𑀧𑀽𑀚𑀦𑀢𑁆𑀣𑀸𑀬 𑀘𑀺𑀢𑀓𑀲𑁆𑀲 𑀲𑀫𑀻𑀧𑀁 𑀅𑀳𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀢𑀓𑀺𑀘𑁆𑀘𑀁 𑀤𑀲𑁆𑀲𑁂𑀦𑁆𑀢𑁄 𑀢𑀽𑀭𑀺𑀬𑀁 𑀢𑀢𑁆𑀣 𑀯𑀸𑀤𑁂𑀢𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀬𑀤𑀸 𑀯𑀺𑀧𑀲𑁆𑀲𑀻 𑀮𑁄𑀓𑀕𑁆𑀕𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀪𑀽𑀫𑀝𑁆𑀞𑀓𑀯𑀺𑀫𑀸𑀦𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀆𑀬𑀼𑀲𑀗𑁆𑀔𑀸𑀭𑀁 𑀯𑁄𑀲𑁆𑀲𑀚𑁆𑀚𑀺. 𑀅𑀣 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀲𑀸𑀕𑀭𑀧𑀩𑁆𑀩𑀢𑀸 𑀧𑀓𑀫𑁆𑀧𑀺𑀢𑁆𑀣. 𑀢𑀤𑀸 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀪𑀯𑀦𑀫𑁆𑀧𑀺 𑀓𑀫𑁆𑀧𑀺𑀢𑁆𑀣. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀲𑀁𑀲𑀬𑀚𑀸𑀢𑁄 𑁋 ‘‘𑀓𑀺𑀁 𑀦𑀼 𑀔𑁄 𑀧𑀣𑀯𑀻𑀓𑀫𑁆𑀧𑀸𑀬 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀪𑀸𑀯𑀁 𑀜𑀢𑁆𑀯𑀸 𑀫𑀳𑀸𑀲𑁄𑀓𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀤𑀸 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀅𑀲𑁆𑀲𑀸𑀲𑁂𑀲𑀺. 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀢𑀢𑁄 𑀘𑀼𑀢𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁫𑁭. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀬𑀤𑀸 𑀯𑀺𑀧𑀲𑁆𑀲𑀻 𑀮𑁄𑀓𑀕𑁆𑀕𑁄𑀢𑀺𑀆𑀤𑀺𑀫𑀸𑀳. 𑀆𑀬𑀼𑀲𑀗𑁆𑀔𑀸𑀭𑀫𑁄𑀲𑁆𑀲𑀚𑁆𑀚𑀻𑀢𑀺 𑀆 𑀲𑀫𑀦𑁆𑀢𑀢𑁄 𑀬𑀼𑀦𑁄𑀢𑀺 𑀧𑀸𑀮𑁂𑀢𑀺 𑀲𑀢𑁆𑀢𑁂𑀢𑀺 𑀆𑀬𑀼, 𑀆𑀬𑀼𑀲𑁆𑀲 𑀲𑀗𑁆𑀔𑀸𑀭𑁄 𑀭𑀸𑀲𑀺𑀪𑀸𑀯𑁄 𑀆𑀬𑀼𑀲𑀗𑁆𑀔𑀸𑀭𑁄, 𑀢𑀁 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑁆𑀚𑀺 𑀧𑀭𑀺𑀘𑁆𑀘𑀚𑀺 𑀚𑀳𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂. 𑀚𑀮𑀫𑁂𑀔𑀮𑀸𑀲𑀸𑀕𑀭𑁄𑀤𑀓𑀫𑁂𑀔𑀮𑀸𑀲𑀳𑀺𑀢𑀸 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀣𑀯𑀻 𑀓𑀫𑁆𑀧𑀺𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁮. 𑀑𑀢𑀢𑀁 𑀯𑀺𑀢𑁆𑀣𑀢𑀁 𑀫𑀬𑁆𑀳𑀦𑁆𑀢𑀺 𑀫𑀬𑁆𑀳𑀁 𑀪𑀯𑀦𑀁 𑀑𑀢𑀢𑀁 𑀯𑀺𑀢𑁆𑀣𑀢𑀁 𑀘𑀺𑀢𑁆𑀢𑀁 𑀯𑀺𑀘𑀺𑀢𑁆𑀢𑀁 𑀲𑀼𑀘𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀦𑁂𑀓𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀯𑀺𑀘𑀺𑀢𑁆𑀢𑀁 𑀲𑁄𑀪𑀫𑀸𑀦𑀁 𑀧𑀓𑀫𑁆𑀧𑀺𑀢𑁆𑀣 𑀧𑀓𑀸𑀭𑁂𑀦 𑀓𑀫𑁆𑀧𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀫𑀕𑁆𑀕𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀕𑁆𑀕𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁄 𑀑𑀭𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀫𑀕𑁆𑀕𑀫𑀽𑀴𑁆𑀳𑀸𑀦𑀁 𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑀸𑀦𑀁 𑀢𑀲𑁆𑀲 𑀲𑀸𑀯𑀓𑀸𑀦𑀁 𑀪𑁄𑀚𑁂𑀢𑁆𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀲𑀩𑁆𑀩𑀢𑁆𑀣 𑀅𑀫𑀽𑀴𑁆𑀳𑁄 𑀲𑀜𑁆𑀜𑀯𑀸 𑀅𑀳𑁄𑀲𑀺. 𑀅𑀣 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑁂 𑀅𑀦𑀮𑁆𑀮𑀻𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁬𑁬. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀲𑀸𑀯𑀓𑀸 𑀯𑀦𑀘𑀸𑀭𑀺𑀦𑁄𑀢𑀺 𑀪𑀕𑀯𑀢𑁄 𑀯𑀼𑀢𑁆𑀢𑀯𑀘𑀦𑀁 𑀲𑀫𑁆𑀫𑀸 𑀆𑀤𑀭𑁂𑀦 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸, 𑀅𑀣 𑀯𑀸 𑀪𑀕𑀯𑀢𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀲𑀼𑀡𑀦𑁆𑀢𑀻𑀢𑀺 𑀲𑀸𑀯𑀓𑀸. 𑀯𑀦𑀘𑀸𑀭𑀺𑀦𑁄 𑀯𑀦𑁂 𑀯𑀺𑀘𑀭𑀡𑀓𑀸 𑀲𑀸𑀯𑀓𑀸 𑀯𑀺𑀧𑁆𑀧𑀦𑀝𑁆𑀞𑀸 𑀫𑀕𑁆𑀕𑀫𑀽𑀴𑁆𑀳𑀸 𑀫𑀳𑀸𑀅𑀭𑀜𑁆𑀜𑁂 𑀅𑀦𑁆𑀥𑀸𑀯 𑀘𑀓𑁆𑀔𑀼𑀯𑀺𑀭𑀳𑀺𑀢𑀸𑀯 𑀅𑀦𑀼𑀲𑀼𑀬𑁆𑀬𑀭𑁂 𑀯𑀺𑀘𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀕𑁆𑀕𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀢𑁆𑀣𑀤𑀲𑁆𑀲𑀺𑀫𑁆𑀳𑀺 𑀲𑀼𑀕𑀢𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀤𑀲𑁆𑀲𑀦𑀲𑁆𑀲 𑀅𑀮𑀤𑁆𑀥𑀢𑁆𑀢𑀸 𑀧𑀘𑁆𑀙𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀲𑁄𑀓𑀧𑁆𑀧𑀢𑁆𑀢𑁄 𑀯𑀺𑀳𑀸𑀲𑀺. 𑀢𑀤𑀸 𑀳𑀺𑀲𑁆𑀲 𑀪𑀕𑀯𑀢𑁄 𑀲𑀸𑀕𑀢𑁄 𑀦𑀸𑀫 𑀅𑀕𑁆𑀕𑀲𑀸𑀯𑀓𑁄 𑀅𑀦𑀼𑀲𑀸𑀲𑀦𑁆𑀢𑁄 𑀪𑀕𑀯𑀢𑁄 𑀲𑀸𑀭𑀻𑀭𑀺𑀓𑀥𑀸𑀢𑀼𑀧𑀽𑀚𑀸 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀓𑀢𑀧𑀽𑀚𑀸 𑀯𑀺𑀬 𑀘𑀺𑀢𑁆𑀢𑀧𑁆𑀧𑀲𑀸𑀤𑀯𑀲𑀸 𑀫𑀳𑀧𑁆𑀨𑀮𑀁 𑀪𑀯𑀢𑀻’’𑀢𑀺 𑀯𑀢𑁆𑀯𑀸 ‘‘𑀣𑀽𑀧𑀁 𑀓𑀭𑁄𑀳𑀻’’𑀢𑀺 𑀦𑀺𑀬𑁄𑀚𑀺𑀢𑁄 𑀣𑀽𑀧𑀁 𑀓𑀸𑀭𑁂𑀲𑀺, 𑀢𑀁 𑀧𑀽𑀚𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀓𑁆𑀓𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁭𑁨. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀫𑁆𑀳𑀺 𑀲𑀼𑀕𑀢𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀬𑀓𑁆𑀔𑀬𑁄𑀦𑀺𑀁 𑀉𑀧𑀧𑀚𑁆𑀚𑀺𑀦𑁆𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀢𑀦𑁄 𑀲𑀓𑀸𑀲𑀁 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑁂 𑀔𑀸𑀤𑀦𑁆𑀢𑀸 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀬𑀓𑁆𑀔𑀸, 𑀬𑀓𑁆𑀔𑀸𑀦𑀁 𑀬𑁄𑀦𑀺 𑀚𑀸𑀢𑀻𑀢𑀺 𑀬𑀓𑁆𑀔𑀬𑁄𑀦𑀺, 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁭𑁩. 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂 𑀆𑀲𑀻𑀢𑀺 𑀫𑁂 𑀫𑀬𑀸 𑀮𑀤𑁆𑀥𑀬𑀲𑀁 𑀤𑀼𑀮𑁆𑀮𑀤𑁆𑀥𑀁, 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀓𑁆𑀓𑀸𑀭𑀁 𑀅𑀓𑀢𑀢𑁆𑀢𑀸 𑀯𑀺𑀭𑀸𑀥𑁂𑀢𑁆𑀯𑀸 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀧𑁆𑀧𑀪𑀸𑀢𑀦𑁆𑀢𑀺 𑀤𑀼𑀝𑁆𑀞𑀼 𑀧𑀪𑀸𑀢𑀁 𑀭𑀢𑁆𑀢𑀺𑀬𑀸 𑀧𑀪𑀸𑀢𑀓𑀭𑀡𑀁, 𑀫𑀬𑁆𑀳𑀁 𑀦 𑀲𑀼𑀝𑁆𑀞𑀼𑀁 𑀧𑀪𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀭𑀼𑀝𑁆𑀞𑀺𑀢𑀦𑁆𑀢𑀺 𑀤𑀼𑀉𑀝𑁆𑀞𑀺𑀢𑀁, 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀁 𑀫𑀬𑁆𑀳𑀁 𑀤𑀼𑀉𑀕𑁆𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀚𑀸𑀢𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀚𑀸𑀬𑀁 𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀚𑀸𑀢𑀺𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀓𑁆𑀔𑀢𑁆𑀢𑀧𑀸𑀞𑀓𑁂𑀳𑀺 𑀯𑀺𑀧𑀲𑁆𑀲𑀺𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀼𑀢𑁆𑀢𑀮𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀓𑀺𑀭 𑀓𑀼𑀫𑀸𑀭𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀓𑀮𑀮𑁄𑀓𑀲𑁆𑀲 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀲𑀼𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑁂 𑀲𑀁𑀲𑀸𑀭𑀢𑁄 𑀉𑀤𑁆𑀥𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀁 𑀪𑀕𑀯𑀦𑁆𑀢𑀁 𑀓𑀼𑀫𑀸𑀭𑀓𑀸𑀮𑁂𑀬𑁂𑀯 𑀩𑀼𑀤𑁆𑀥𑀲𑁆𑀲 𑀯𑀺𑀬 𑀫𑀳𑀸𑀧𑀽𑀚𑀫𑀓𑀸𑀲𑀺. 𑀧𑀘𑁆𑀙𑀸 𑀓𑀫𑁂𑀦 𑀓𑀼𑀫𑀸𑀭𑀓𑀸𑀮𑀁 𑀭𑀸𑀚𑀓𑀼𑀫𑀸𑀭𑀓𑀸𑀮𑀁 𑀭𑀚𑁆𑀚𑀓𑀸𑀮𑀦𑁆𑀢𑀺 𑀓𑀸𑀮𑀢𑁆𑀢𑀬𑀫𑀢𑀺𑀓𑁆𑀓𑀫𑁆𑀫 𑀩𑀼𑀤𑁆𑀥𑁂 𑀚𑀸𑀢𑁂𑀧𑀺 𑀫𑀳𑀸𑀧𑀽𑀚𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀤𑀺𑀩𑁆𑀩𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀧𑀘𑁆𑀙𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀸𑀤𑀺𑀫𑀦𑀼𑀲𑁆𑀲𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂𑀬𑁂𑀯 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁮𑁨. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀚𑀸𑀬𑀁 𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁮𑁪. 𑀦𑁂𑀫𑀺𑀢𑁆𑀢𑀸𑀦𑀁 𑀲𑀼𑀡𑀺𑀢𑁆𑀯𑀸𑀦𑀸𑀢𑀺 𑀏𑀢𑁆𑀣 𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁 𑀲𑀼𑀔𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀳𑁂𑀢𑀼𑀁 𑀚𑀸𑀦𑀦𑁆𑀢𑀻𑀢𑀺 𑀦𑁂𑀫𑀺𑀢𑁆𑀢𑀸, 𑀢𑁂𑀲𑀁 𑀦𑁂𑀫𑀺𑀢𑁆𑀢𑀸𑀦𑀁 𑀦𑀓𑁆𑀔𑀢𑁆𑀢𑀧𑀸𑀞𑀓𑀸𑀦𑀁 𑀯𑀘𑀦𑀁 𑀲𑀼𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀚𑀸𑀢𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑁆𑀯𑀸𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁩. 𑀲𑁂𑀭𑁂𑀬𑁆𑀬𑀯𑀕𑁆𑀕𑁄

𑁧. 𑀲𑁂𑀭𑁂𑀬𑁆𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑁂𑀭𑁂𑀬𑁆𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁄 𑀧𑀭𑁂𑀲𑀼 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀇𑀢𑀺𑀳𑀸𑀲𑀸𑀤𑀺𑀲𑀓𑀮𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂𑀲𑀼 𑀓𑁄𑀝𑀺𑀧𑁆𑀧𑀢𑁆𑀢𑁄 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀅𑀩𑁆𑀪𑁄𑀓𑀸𑀲𑁂 𑀲𑀧𑀭𑀺𑀯𑀸𑀭𑁄 𑀞𑀺𑀢𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑁂𑀭𑁂𑀬𑁆𑀬𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀦𑁆𑀢𑁄 𑀧𑀽𑀚𑁂𑀲𑀺. 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀞𑀢𑁆𑀯𑀸 𑀧𑀘𑁆𑀙𑀸 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀲𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑀻𑀯 𑀧𑀲𑀦𑁆𑀦𑀫𑀸𑀦𑀲𑁄 𑀢𑁂𑀦𑁂𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀫𑀦𑀼𑀲𑁆𑀲𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀭𑀸𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁩. 𑀲𑁂𑀭𑁂𑀬𑁆𑀬𑀓𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀲𑀺𑀭𑀺𑀲𑁂 𑀪𑀯𑀁 𑀚𑀸𑀢𑀺𑀧𑀼𑀧𑁆𑀨𑀁 𑀲𑁂𑀭𑁂𑀬𑁆𑀬𑀁, 𑀲𑁂𑀭𑁂𑀬𑁆𑀬𑀫𑁂𑀯 𑀲𑁂𑀭𑁂𑀬𑁆𑀬𑀓𑀁, 𑀢𑀁 𑀲𑁂𑀭𑁂𑀬𑁆𑀬𑀓𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀚𑀸𑀢𑀺𑀲𑀼𑀫𑀦𑀫𑀓𑀼𑀴𑀘𑀫𑁆𑀧𑀓𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀽𑀚𑁂𑀢𑀼𑀁 𑀓𑀸𑀮𑀁 𑀦𑀢𑁆𑀣𑀺𑀢𑀸𑀬 𑀢𑀢𑁆𑀣 𑀲𑀫𑁆𑀧𑀢𑁆𑀢𑀁 𑀢𑀁 𑀲𑁂𑀭𑁂𑀬𑁆𑀬𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑁂𑀭𑁂𑀬𑁆𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀧𑀼𑀧𑁆𑀨𑀣𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀧𑁆𑀨𑀣𑀽𑀧𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀕𑁂𑀳𑀁 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳𑀕𑀢𑁂𑀳𑀺 𑀧𑀜𑁆𑀘𑀲𑀺𑀲𑁆𑀲𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑀼𑀓𑁆𑀓𑀼𑀭𑀦𑀸𑀫𑀧𑀩𑁆𑀩𑀢𑀲𑀫𑀻𑀧𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀧𑀝𑀺𑀯𑀲𑀢𑀺. 𑀢𑀤𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑀁 𑀲𑀼𑀢𑁆𑀯𑀸 𑀲𑀺𑀲𑁆𑀲𑁂𑀳𑀺 𑀲𑀳 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀓𑁂𑀦𑀘𑀺 𑀩𑁆𑀬𑀸𑀥𑀺𑀦𑀸 𑀧𑀻𑀴𑀺𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀲𑁆𑀲𑀲𑀦𑁆𑀢𑀺𑀓𑀸 𑀩𑀼𑀤𑁆𑀥𑀲𑁆𑀲𑀸𑀦𑀼𑀪𑀸𑀯𑀁 𑀮𑀓𑁆𑀔𑀡𑀜𑁆𑀘 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀳𑀺𑀫𑀯𑀦𑁆𑀢𑀢𑁄 𑀘𑀫𑁆𑀧𑀓𑀸𑀲𑁄𑀓𑀢𑀺𑀮𑀓𑀓𑁂𑀝𑀓𑀸𑀤𑁆𑀬𑀦𑁂𑀓𑁂 𑀧𑀼𑀧𑁆𑀨𑁂 𑀆𑀳𑀭𑀸𑀧𑁂𑀢𑁆𑀯𑀸 𑀣𑀽𑀧𑀁 𑀓𑀢𑁆𑀯𑀸 𑀩𑀼𑀤𑁆𑀥𑀁 𑀯𑀺𑀬 𑀧𑀽𑀚𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺. 𑀅𑀣 𑀢𑁂 𑀲𑀺𑀲𑁆𑀲𑀸 𑀢𑀲𑁆𑀲 𑀆𑀴𑀳𑀦𑀁 𑀓𑀢𑁆𑀯𑀸 𑀩𑀼𑀤𑁆𑀥𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀧𑀸𑀓𑀝𑀻𑀓𑀭𑀡𑀫𑀓𑀸𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁦. 𑀅𑀣 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀼𑀓𑁆𑀓𑀼𑀭𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀧𑀩𑁆𑀩𑀢𑀲𑁆𑀲 𑀲𑀺𑀔𑀭𑀁 𑀓𑀼𑀓𑁆𑀓𑀼𑀭𑀸𑀓𑀸𑀭𑁂𑀦 𑀲𑀼𑀦𑀔𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑀢𑁆𑀢𑀸 ‘‘𑀓𑀼𑀓𑁆𑀓𑀼𑀭𑀧𑀩𑁆𑀩𑀢𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄, 𑀢𑀲𑁆𑀲 𑀲𑀫𑀻𑀧𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀧𑀜𑁆𑀘𑀢𑀸𑀧𑀲𑀲𑀳𑀲𑁆𑀲𑁂𑀳𑀺 𑀲𑀳 𑀯𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀦𑀬𑀸𑀦𑀼𑀲𑀸𑀭𑁂𑀦 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀼𑀧𑁆𑀨𑀣𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀧𑀸𑀬𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀸𑀬𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀳𑀢𑁆𑀣𑀺𑀅𑀲𑁆𑀲𑀥𑀦𑀥𑀜𑁆𑀜𑀲𑀢𑁆𑀢𑀭𑀢𑀦𑀸𑀤𑀺𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀲𑀳𑀲𑁆𑀲𑀫𑀢𑁆𑀢𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑁄 𑀓𑀸𑀭𑁂𑀢𑁆𑀯𑀸 𑀢𑀲𑁆𑀫𑀺𑀁 𑀔𑀻𑀭𑀧𑀸𑀬𑀲𑀲𑀳𑀲𑁆𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀢𑀸 𑀲𑀩𑁆𑀩𑀸 𑀕𑀸𑀳𑀸𑀧𑁂𑀢𑁆𑀯𑀸 𑀲𑀺𑀫𑁆𑀩𑀮𑀺𑀯𑀦𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀓𑀸𑀲𑁂 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀘𑀗𑁆𑀓𑀫𑀢𑀺. 𑀲𑁄 𑀧𑀦 𑀲𑁂𑀝𑁆𑀞𑀺 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑀻𑀯 𑀧𑀲𑀦𑁆𑀦𑁄 𑀧𑀸𑀢𑀺𑀬𑁄 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀭𑁄𑀘𑁂𑀲𑀺 𑀧𑀝𑀺𑀕𑁆𑀕𑀳𑀡𑀸𑀬. 𑀅𑀣 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀧𑀝𑀺𑀕𑁆𑀕𑀳𑁂𑀲𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘 𑀧𑀦 𑀢𑀲𑁆𑀲 𑀲𑁄𑀫𑀦𑀼𑀲𑁆𑀲𑀼𑀧𑁆𑀧𑀸𑀤𑀦𑀢𑁆𑀣𑀁 𑀲𑀳𑀲𑁆𑀲𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀪𑀼𑀜𑁆𑀚𑀺, 𑀢𑀤𑀯𑀲𑁂𑀲𑀁 𑀅𑀦𑁂𑀓𑀲𑀳𑀲𑁆𑀲𑀪𑀺𑀓𑁆𑀔𑀽 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁬. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀓𑀼𑀲𑀮𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀢𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁨𑁮. 𑀘𑀗𑁆𑀓𑀫𑀁 𑀲𑀼𑀲𑀫𑀸𑀭𑀽𑀴𑁆𑀳𑁄𑀢𑀺 𑀘𑀤𑀺𑀦𑀦𑁆𑀢𑁄 𑀧𑀤𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 𑀓𑀫𑀢𑀺 𑀕𑀘𑁆𑀙𑀢𑀻𑀢𑀺 𑀘𑀗𑁆𑀓𑀫𑀁, 𑀘𑀗𑁆𑀓𑀫𑀲𑁆𑀲 𑀧𑀤𑀯𑀺𑀓𑁆𑀔𑁂𑀧𑀲𑁆𑀲 𑀆𑀥𑀸𑀭𑀪𑀽𑀢𑀧𑀣𑀯𑀺𑀧𑀤𑁂𑀲𑁄 𑀘𑀗𑁆𑀓𑀫𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄, 𑀏𑀢𑀁 𑀘𑀗𑁆𑀓𑀫𑀁𑀲𑀼 𑀯𑀺𑀲𑁂𑀲𑁂𑀦 𑀆𑀭𑀽𑀴𑁆𑀳𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑁆𑀩𑀭𑁂 𑀅𑀦𑀺𑀮𑀸𑀬𑀦𑁂𑀢𑀺 𑀯𑀭𑀻𑀬𑀢𑀺 𑀙𑀸𑀤𑀺𑀬𑀢𑀺 𑀅𑀦𑁂𑀦𑀸𑀢𑀺 𑀯𑀭𑀁, 𑀦 𑀩𑀭𑀦𑁆𑀢𑀺 𑀅𑀫𑁆𑀩𑀭𑀁, 𑀲𑁂𑀢𑀯𑀢𑁆𑀣𑀲𑀤𑀺𑀲𑀁 𑀆𑀓𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀦𑀺𑀮𑀻𑀬𑀦𑀁 𑀕𑁄𑀧𑀦𑀁 𑀏𑀢𑁆𑀣𑀸𑀢𑀺 𑀅𑀦𑀺𑀮𑀁, 𑀆 𑀲𑀫𑀦𑁆𑀢𑀢𑁄 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀅𑀦𑁂𑀦 𑀇𑀤𑁆𑀥𑀺𑀫𑀦𑁆𑀢𑁄𑀢𑀺 𑀆𑀬𑀦𑀁, 𑀅𑀦𑀺𑀮𑀜𑁆𑀘 𑀢𑀁 𑀆𑀬𑀦𑀜𑁆𑀘𑁂𑀢𑀺 𑀅𑀦𑀺𑀮𑀸𑀬𑀦𑀁, 𑀢𑀲𑁆𑀫𑀺𑀁 𑀅𑀫𑁆𑀩𑀭𑁂 𑀅𑀦𑀺𑀮𑀸𑀬𑀦𑁂 𑀘𑀗𑁆𑀓𑀫𑀁 𑀫𑀸𑀧𑀬𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀸𑀬𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀦𑀺𑀩𑁆𑀩𑀸𑀦𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀻𑀪𑀕𑀯𑀢𑁄 𑀓𑀸𑀮𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀤𑀺𑀩𑁆𑀩𑀲𑀼𑀔𑀫𑀦𑀼𑀪𑀯𑀦𑁆𑀢𑁄 𑀯𑀺𑀬 𑀫𑀦𑀼𑀲𑁆𑀲𑀲𑀼𑀔𑀫𑀦𑀼𑀪𑀯𑀦𑁆𑀢𑁄 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀧𑀸𑀲𑀸𑀤𑀯𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀤𑀸 𑀪𑀕𑀯𑀸 𑀲𑀼𑀯𑀡𑁆𑀡𑀫𑀳𑀸𑀫𑁂𑀭𑀼 𑀯𑀺𑀬 𑀯𑀻𑀣𑀺𑀬𑀸 𑀯𑀺𑀘𑀭𑀢𑀺, 𑀢𑀁 𑀯𑀺𑀘𑀭𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀼𑀕𑀦𑁆𑀥𑁄𑀤𑀓𑁂𑀦 𑀪𑀕𑀯𑀦𑁆𑀢𑀁 𑀑𑀲𑀺𑀜𑁆𑀘𑀫𑀸𑀦𑁄 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑁂𑀦 𑀅𑀦𑀮𑁆𑀮𑀻𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁫. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀲𑀸𑀤𑁄𑀢𑀺 𑀧𑀲𑀸𑀤𑀁 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀧𑀸𑀲𑀸𑀤𑁄, 𑀫𑀸𑀮𑀸𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀲𑀼𑀯𑀡𑁆𑀡𑀓𑀫𑁆𑀫𑀸𑀤𑁆𑀬𑀦𑁂𑀓𑀯𑀺𑀘𑀺𑀢𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀯𑀺𑀝𑁆𑀞𑀸𑀦𑀁 𑀚𑀦𑀸𑀦𑀁 𑀧𑀲𑀸𑀤𑀁 𑀚𑀦𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑁄 𑀘 𑀲𑁄 𑀧𑀢𑁆𑀣𑁂𑀢𑀩𑁆𑀩𑀝𑁆𑀞𑁂𑀦 𑀯𑀭𑁄 𑀘𑀸𑀢𑀺 𑀧𑀸𑀲𑀸𑀤𑀯𑀭𑁄, 𑀢𑀲𑁆𑀫𑀺𑀁 𑀧𑀸𑀲𑀸𑀤𑀯𑀭𑁂 𑀦𑀺𑀲𑀚𑁆𑀚 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀚𑀺𑀦𑀯𑀭𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀕𑀦𑁆𑀥𑁄𑀤𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀲𑀫𑁆𑀫𑀼𑀔𑀸𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀚𑀸𑀬𑀫𑀸𑀦𑁂 𑀯𑀺𑀧𑀲𑁆𑀲𑀺𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀫𑁆𑀫𑀼𑀔𑀸𑀣𑀯𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂𑀬𑁂𑀯 𑀲𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀯𑀺𑀧𑀲𑁆𑀲𑀺𑀫𑁆𑀳𑀺 𑀩𑁄𑀥𑀺𑀲𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀸𑀦𑀺 𑀯𑁂𑀤𑀢𑁆𑀢𑀬𑁂 𑀤𑀺𑀲𑁆𑀲𑀫𑀸𑀦𑀸𑀦𑀺 𑀢𑀸𑀦𑀺 𑀭𑀸𑀚𑀧𑁆𑀧𑀫𑀼𑀔𑀲𑁆𑀲 𑀚𑀦𑀓𑀸𑀬𑀲𑁆𑀲 𑀯𑀺𑀧𑀲𑁆𑀲𑀻𑀩𑁄𑀥𑀺𑀲𑀢𑁆𑀢𑀲𑁆𑀲 𑀮𑀓𑁆𑀔𑀡𑀜𑁆𑀘 𑀩𑀼𑀤𑁆𑀥𑀪𑀸𑀯𑀜𑁆𑀘 𑀩𑁆𑀬𑀸𑀓𑀭𑀺𑀢𑁆𑀯𑀸 𑀚𑀦𑀸𑀦𑀁 𑀫𑀸𑀦𑀲𑀁 𑀦𑀺𑀩𑁆𑀩𑀸𑀧𑁂𑀲𑀺, 𑀅𑀦𑁂𑀓𑀸𑀦𑀺 𑀘 𑀣𑀼𑀢𑀺𑀯𑀘𑀦𑀸𑀦𑀺 𑀦𑀺𑀯𑁂𑀤𑁂𑀲𑀺. 𑀲𑁄 𑀢𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺. 𑀓𑀢𑀓𑀼𑀲𑀮𑀦𑀸𑀫𑁂𑀦 𑀲𑀫𑁆𑀫𑀼𑀔𑀸𑀣𑀯𑀺𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁪𑁧. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀚𑀸𑀬𑀫𑀸𑀦𑁂 𑀯𑀺𑀧𑀲𑁆𑀲𑀺𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀯𑀺𑀧𑀲𑁆𑀲𑀺𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀚𑀸𑀬𑀫𑀸𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁂 𑀅𑀳𑀁 𑀧𑀸𑀢𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁 𑀩𑀼𑀤𑁆𑀥𑀪𑀸𑀯𑀲𑁆𑀲 𑀳𑁂𑀢𑀼𑀁 𑀩𑁆𑀬𑀸𑀓𑀭𑀺𑀁 𑀓𑀣𑁂𑀲𑀺𑀁, 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀧𑀸𑀓𑀝𑀸𑀦𑀺 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀫𑁆𑀫𑀼𑀔𑀸𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀓𑀼𑀲𑀼𑀫𑀸𑀲𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀥𑀜𑁆𑀜𑀯𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀼𑀲𑀼𑀫𑀸𑀲𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀁 𑀕𑀢𑁄 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀓𑁄𑀝𑀺𑀧𑁆𑀧𑀢𑁆𑀢𑁄 𑀲𑀓𑀧𑀭𑀲𑀫𑀬𑀓𑀼𑀲𑀮𑁄 𑀫𑀸𑀢𑀸𑀧𑀺𑀢𑀭𑁄 𑀧𑀽𑀚𑁂𑀢𑀼𑀓𑀸𑀫𑁄 𑀧𑀜𑁆𑀘 𑀉𑀧𑁆𑀧𑀮𑀓𑀮𑀸𑀧𑁂 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀦𑀻𑀮𑀧𑀻𑀢𑀸𑀤𑀺𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀘 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑀖𑀭𑁂 𑀫𑀸𑀢𑀼 𑀅𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀕𑀳𑁂𑀢𑁆𑀯𑀸 𑀲𑀧𑀭𑀺𑀯𑀸𑀭𑀁 𑀪𑀕𑀯𑀦𑁆𑀢𑀁 𑀲𑀳𑀢𑁆𑀣𑁂𑀦 𑀲𑀦𑁆𑀢𑀧𑁆𑀧𑁂𑀦𑁆𑀢𑁄 𑀪𑁄𑀚𑁂𑀲𑀺. 𑀪𑁄𑀚𑀦𑀸𑀯𑀲𑀸𑀦𑁂 𑀏𑀓𑀁 𑀉𑀧𑁆𑀧𑀮𑀳𑀢𑁆𑀣𑀁 𑀅𑀤𑀸𑀲𑀺. 𑀢𑁂𑀦 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸𑀧𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑀸𑀫𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑁄𑀕𑀬𑀲𑁂𑀳𑀺 𑀯𑀟𑁆𑀠𑀺𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁬𑁫. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀥𑀜𑁆𑀜𑀯𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀥𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀦𑀁 𑀅𑀦𑁂𑀓𑁂𑀲𑀁 𑀓𑀼𑀮𑀸𑀦𑀁 𑀆𑀓𑀭𑀢𑁆𑀢𑀸 𑀥𑀜𑁆𑀜𑀯𑀢𑀻, 𑀅𑀣 𑀯𑀸 𑀫𑀼𑀢𑁆𑀢𑀸𑀫𑀡𑀺𑀆𑀤𑀺𑀲𑀢𑁆𑀢𑀭𑀢𑀦𑀸𑀦𑀁 𑀲𑀢𑁆𑀢𑀯𑀺𑀥𑀥𑀜𑁆𑀜𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀦𑀁 𑀆𑀓𑀭𑀢𑁆𑀢𑀸 𑀥𑀜𑁆𑀜𑀯𑀢𑀻, 𑀅𑀣 𑀯𑀸 𑀥𑀜𑁆𑀜𑀸𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀆𑀭𑀸𑀫𑀯𑀺𑀳𑀸𑀭𑀸𑀤𑀻𑀦𑀁 𑀆𑀓𑀭𑀢𑁆𑀢𑀸 𑀥𑀜𑁆𑀜𑀯𑀢𑀻, 𑀢𑀲𑁆𑀲𑀸 𑀥𑀜𑁆𑀜𑀯𑀢𑀺𑀬𑀸. 𑀦𑀕𑀭𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺 𑀏𑀢𑁆𑀣 𑀉𑀧𑀪𑁄𑀕𑀧𑀭𑀺𑀪𑁄𑀕𑀢𑁆𑀣𑀺𑀓𑀸 𑀚𑀦𑀸𑀢𑀺 𑀦𑀕𑀭𑀁, 𑀦 𑀕𑀘𑁆𑀙𑀢𑀻𑀢𑀺 𑀯𑀸 𑀦𑀕𑀁, 𑀭𑀸𑀚𑀬𑀼𑀯𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀁. 𑀦𑀕𑀁 𑀭𑀸𑀢𑀺 𑀆𑀤𑀤𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀦𑀕𑀭𑀁, 𑀭𑀸𑀚𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀲𑀫𑀽𑀳𑀪𑀽𑀢𑀁 𑀧𑀸𑀓𑀸𑀭𑀧𑀭𑀺𑀔𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁 𑀦𑀕𑀭𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀦𑀕𑀭𑁂 𑀬𑀤𑀸 𑀅𑀳𑀁 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀩𑁆𑀬𑀸𑀓𑀭𑀡𑀁 𑀅𑀮𑀪𑀺𑀁, 𑀢𑀤𑀸 𑀢𑀲𑁆𑀫𑀺𑀁 𑀥𑀜𑁆𑀜𑀯𑀢𑀺𑀬𑀸 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀼𑀲𑀼𑀫𑀸𑀲𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀯𑁂𑀤𑀢𑁆𑀢𑀬𑀸𑀤𑀺𑀲𑀓𑀲𑀺𑀧𑁆𑀧𑁂𑀲𑀼 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁂𑀓𑁂𑀲𑀁 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺𑀁 𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀲𑀓𑀲𑀺𑀧𑁆𑀧𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀅𑀤𑀺𑀲𑁆𑀯𑀸 𑀢𑀢𑁆𑀣 𑀘 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀲𑀳 𑀲𑀺𑀲𑁆𑀲𑁂𑀳𑀺 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀪𑀺𑀓𑁆𑀔𑀸𑀬 𑀘𑀭𑀫𑀸𑀦𑁄 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀢𑀁 𑀧𑀤𑁂𑀲𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀼𑀝𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀭𑀼𑀓𑁆𑀔𑀕𑁆𑀕𑁂 𑀮𑀕𑁆𑀕𑀺𑀢𑀸𑀦𑀺 𑀫𑀥𑀼𑀭𑀸𑀦𑀺 𑀧𑀤𑀼𑀫𑀨𑀮𑀸𑀦𑀺 𑀫𑀥𑀼𑀦𑀸 𑀲𑀳 𑀅𑀤𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀢𑁆𑀣𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀨𑀮𑀤𑀸𑀦𑀸𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁭𑁫. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑁂𑀢𑀺 𑀘𑀺𑀦𑁆𑀢𑁂𑀢𑀻𑀢𑀺 𑀅𑀚𑁆𑀛𑀸𑀬𑀺, 𑀅𑀚𑁆𑀛𑀸𑀬𑀺𑀬𑁂𑀯 𑀅𑀚𑁆𑀛𑀸𑀬𑀓𑁄. 𑀏𑀢𑁆𑀣 𑀳𑀺 𑀅𑀓𑀸𑀭𑁄 ‘‘𑀧𑀝𑀺𑀲𑁂𑀥𑁂 𑀯𑀼𑀤𑁆𑀥𑀺𑀢𑀩𑁆𑀪𑀸𑀯𑁂…𑀧𑁂… 𑀅𑀓𑀸𑀭𑁄 𑀯𑀺𑀭𑀳𑀧𑁆𑀧𑀓𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀅𑀢𑁆𑀣𑁂𑀲𑀼 𑀢𑀩𑁆𑀪𑀸𑀯𑁂 𑀯𑀢𑁆𑀢𑀢𑀺. 𑀲𑀺𑀲𑁆𑀲𑀸𑀦𑀁 𑀲𑀯𑀦𑀥𑀸𑀭𑀡𑀸𑀤𑀺𑀯𑀲𑁂𑀦 𑀳𑀺𑀢𑀁 𑀅𑀚𑁆𑀛𑁂𑀢𑀺 𑀘𑀺𑀦𑁆𑀢𑁂𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀢𑀻𑀢𑀺 𑀅𑀚𑁆𑀛𑀸𑀬𑀓𑁄, 𑀘𑀺𑀦𑁆𑀢𑀓𑁄𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀁 𑀲𑀩𑁆𑀩𑀁 𑀫𑀦𑁆𑀢𑀁 𑀫𑀦𑁂𑀦 𑀥𑀸𑀭𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀫𑀦𑁆𑀢𑀥𑀭𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽𑀢𑀺 𑀯𑁂𑀤𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀯𑁂𑀤𑁂𑀦 𑀯𑁂𑀤𑀺𑀢𑀩𑁆𑀩𑀸 𑀩𑀼𑀚𑁆𑀛𑀺𑀢𑀩𑁆𑀩𑀸𑀢𑀺 𑀯𑁂𑀤𑀸, 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀲𑀗𑁆𑀔𑀸𑀢𑀸 𑀢𑀬𑁄 𑀕𑀦𑁆𑀣𑀸, 𑀢𑁂𑀲𑀁 𑀯𑁂𑀤𑀸𑀦𑀁 𑀧𑀸𑀭𑀁 𑀧𑀭𑀺𑀬𑁄𑀲𑀸𑀦𑀁 𑀓𑁄𑀝𑀺𑀁 𑀕𑀢𑁄 𑀧𑀢𑁆𑀢𑁄𑀢𑀺 𑀧𑀸𑀭𑀕𑀽. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺

𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀜𑀸𑀡𑀲𑀜𑁆𑀜𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀜𑀸𑀡𑀲𑀜𑁆𑀜𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀦𑁆𑀢𑀭𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀧𑀭𑀺𑀲𑀼𑀤𑁆𑀥𑀁 𑀧𑀡𑁆𑀟𑀭𑀁 𑀧𑀼𑀮𑀺𑀦𑀢𑀮𑀁 𑀤𑀺𑀲𑁆𑀯𑀸 ‘‘𑀈𑀤𑀺𑀲𑀸 𑀧𑀭𑀺𑀲𑀼𑀤𑁆𑀥𑀸 𑀩𑀼𑀤𑁆𑀥𑀸, 𑀈𑀤𑀺𑀲𑀁𑀯 𑀧𑀭𑀺𑀲𑀼𑀤𑁆𑀥𑀁 𑀩𑀼𑀤𑁆𑀥𑀜𑀸𑀡’’𑀦𑁆𑀢𑀺 𑀩𑀼𑀤𑁆𑀥𑀜𑁆𑀘 𑀢𑀲𑁆𑀲 𑀜𑀸𑀡𑀜𑁆𑀘 𑀅𑀦𑀼𑀲𑁆𑀲𑀭𑀺 𑀣𑁄𑀫𑁂𑀲𑀺 𑀘.

𑁮𑁪. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀼𑀮𑀺𑀦𑀁 𑀲𑁄𑀪𑀦𑀁 𑀤𑀺𑀲𑁆𑀯𑀸𑀢𑀺 𑀧𑀭𑀺𑀧𑀼𑀡𑁆𑀡𑀓𑀢𑀁 𑀯𑀺𑀬 𑀧𑀼𑀮𑀸𑀓𑀸𑀭𑁂𑀦 𑀧𑀭𑀺𑀲𑁄𑀥𑀺𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀞𑀺𑀢𑀦𑁆𑀢𑀺 𑀧𑀼𑀮𑀺𑀦𑀁, 𑀲𑁄𑀪𑀦𑀁 𑀯𑀸𑀮𑀼𑀓𑀁 𑀤𑀺𑀲𑁆𑀯𑀸 𑀲𑁂𑀝𑁆𑀞𑀁 𑀩𑀼𑀤𑁆𑀥𑀁 𑀅𑀦𑀼𑀲𑁆𑀲𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀜𑀸𑀡𑀲𑀜𑁆𑀜𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀕𑀡𑁆𑀞𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀡𑁆𑀞𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀉𑀧𑀪𑁄𑀕𑀧𑀭𑀺𑀪𑁄𑀕𑁂𑀳𑀺 𑀅𑀦𑀽𑀦𑁄 𑀏𑀓𑀤𑀺𑀯𑀲𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀲𑀕𑀡𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀮𑀸𑀚𑀸𑀧𑀜𑁆𑀘𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺. 𑀲𑁄 𑀢𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁯𑁧. 𑀲𑁄 𑀏𑀓𑀤𑀺𑀯𑀲𑀁 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀇𑀫𑀺𑀦𑀸 𑀓𑀼𑀲𑀮𑁂𑀦𑀸𑀳𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄’’𑀢𑀺 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀕𑀡𑁆𑀞𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀤𑀼𑀫𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀤𑀼𑀫𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀩𑀼𑀤𑁆𑀥𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀁 𑀅𑀮𑀪𑀺𑀢𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀕𑁄𑀢𑀫𑀓𑀁 𑀦𑀸𑀫 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦𑁂𑀯 𑀯𑀺𑀳𑀸𑀲𑀺. 𑀢𑀤𑀸 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀢𑁆𑀢𑁂 𑀲𑀁𑀲𑀸𑀭𑀢𑁄 𑀉𑀤𑁆𑀥𑀭𑀦𑁆𑀢𑁄 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀳𑀺𑀫𑀯𑀦𑁆𑀢𑀁 𑀅𑀕𑀫𑀸𑀲𑀺. 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀓𑀲𑀺𑀲𑁆𑀲𑁂 𑀲𑀫𑀸𑀦𑁂𑀢𑁆𑀯𑀸 𑀢𑁂𑀳𑀺 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁯𑁭. 𑀲𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀕𑁄𑀢𑀫𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀅𑀦𑁂𑀓𑁂𑀲𑀁 𑀬𑀓𑁆𑀔𑀤𑁂𑀯𑀢𑀸𑀦𑀁 𑀆𑀯𑀸𑀲𑀪𑀸𑀯𑁂𑀦 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀕𑁄𑀢𑀫𑀲𑁆𑀲 𑀪𑀯𑀦𑀢𑁆𑀢𑀸 𑀕𑁄𑀢𑀫𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀯𑀢𑁆𑀢𑀢𑀺 𑀢𑀺𑀝𑁆𑀞𑀢𑀻𑀢𑀺 𑀧𑀩𑁆𑀩𑀢𑁄. 𑀦𑀸𑀕𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑁄𑀢𑀺 𑀭𑀼𑀳𑀢𑀺 𑀢𑀺𑀝𑁆𑀞𑀢𑀻𑀢𑀺 𑀭𑀼𑀓𑁆𑀔𑁄. 𑀅𑀣 𑀯𑀸 𑀧𑀣𑀯𑀺𑀁 𑀔𑀦𑀦𑁆𑀢𑁄 𑀉𑀤𑁆𑀥𑀁 𑀭𑀼𑀳𑀢𑀻𑀢𑀺 𑀭𑀼𑀓𑁆𑀔𑁄, 𑀦𑀸𑀦𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 𑀘𑀫𑁆𑀧𑀓𑀓𑀧𑁆𑀧𑀽𑀭𑀦𑀸𑀕𑀅𑀕𑀭𑀼𑀘𑀦𑁆𑀤𑀦𑀸𑀤𑀬𑁄 𑀭𑀼𑀓𑁆𑀔𑀸𑀢𑀺 𑀦𑀸𑀦𑀸𑀭𑀼𑀓𑁆𑀔𑀸, 𑀢𑁂𑀳𑀺 𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑁄 𑀧𑀭𑀺𑀓𑀺𑀡𑁆𑀡𑁄 𑀕𑁄𑀢𑀫𑁄 𑀧𑀩𑁆𑀩𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀪𑀽𑀢𑀕𑀡𑀸𑀮𑀬𑁄𑀢𑀺 𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀘𑀸𑀢𑀺 𑀪𑀽𑀢𑀸, 𑀫𑀳𑀦𑁆𑀢𑀸 𑀘 𑀢𑁂 𑀪𑀽𑀢𑀸 𑀘𑀸𑀢𑀺 𑀫𑀳𑀸𑀪𑀽𑀢𑀸, 𑀫𑀳𑀸𑀪𑀽𑀢𑀸𑀦𑀁 𑀕𑀡𑁄 𑀲𑀫𑀽𑀳𑁄𑀢𑀺 𑀫𑀳𑀸𑀪𑀽𑀢𑀕𑀡𑁄, 𑀫𑀳𑀸𑀪𑀽𑀢𑀕𑀡𑀲𑁆𑀲 𑀆𑀮𑀬𑁄 𑀧𑀢𑀺𑀝𑁆𑀞𑀸𑀢𑀺 𑀫𑀳𑀸𑀪𑀽𑀢𑀕𑀡𑀸𑀮𑀬𑁄.

𑁯𑁮. 𑀯𑁂𑀫𑀚𑁆𑀛𑀫𑁆𑀳𑀺 𑀘 𑀢𑀲𑁆𑀲𑀸𑀲𑀻𑀢𑀺 𑀢𑀲𑁆𑀲 𑀕𑁄𑀢𑀫𑀲𑁆𑀲 𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂 𑀅𑀩𑁆𑀪𑀦𑁆𑀢𑀭𑁂 𑀅𑀲𑁆𑀲𑀫𑁄 𑀅𑀪𑀺𑀦𑀺𑀫𑁆𑀫𑀺𑀢𑁄 𑀦𑀺𑀧𑁆𑀨𑀸𑀤𑀺𑀢𑁄 𑀓𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀤𑀼𑀫𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀢𑁂𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁪. 𑀲𑁄𑀪𑀺𑀢𑀯𑀕𑁆𑀕𑁄

𑁧. 𑀲𑁄𑀪𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑁄𑀪𑀺𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀲𑁄𑀫𑀦𑀲𑁆𑀲𑁂𑀦 𑀧𑀲𑀦𑁆𑀦𑀫𑀸𑀦𑀲𑁄 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀣𑁄𑀫𑁂𑀲𑀺. 𑀲𑁄 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀫𑀦𑀼𑀲𑁆𑀲𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀭𑀳𑀸 𑀅𑀳𑁄𑀲𑀺.

𑁧. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑁄𑀪𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀢𑁆𑀣𑀢𑀸𑀬 𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀓𑀢𑀧𑀼𑀜𑁆𑀜𑀽𑀧𑀘𑀬𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀯𑀺𑀢𑁆𑀣𑀢𑀸𑀬 𑀦𑀸𑀫 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀧𑀺𑀮𑀓𑁆𑀔𑀼𑀨𑀮𑀺𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀢𑀲𑁆𑀲𑀸 𑀢𑀻𑀭𑁂 𑀦𑀺𑀲𑀺𑀦𑁆𑀦𑀁 𑀚𑀮𑀫𑀸𑀦𑀅𑀕𑁆𑀕𑀺𑀲𑀺𑀔𑀁 𑀇𑀯 𑀲𑀺𑀔𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑁂𑀢𑀓𑀻𑀧𑀼𑀧𑁆𑀨𑀁 𑀯𑀡𑁆𑀝𑁂𑀦𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀧𑀽𑀚𑁂𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀬𑁂𑀦 𑀜𑀸𑀡𑁂𑀦 𑀢𑁆𑀯𑀁 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀚𑀸𑀢𑁄, 𑀢𑀁 𑀜𑀸𑀡𑀁 𑀅𑀳𑀁 𑀧𑀽𑀚𑁂𑀫𑀻’’𑀢𑀺. 𑀅𑀣 𑀪𑀕𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁦. 𑀲𑁄 𑀅𑀢𑁆𑀢𑀦𑁄 𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀢𑁆𑀣𑀢𑀸𑀬 𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀢𑁆𑀣𑀢𑀸𑀬𑀸𑀢𑀺 𑀯𑀺𑀢𑁆𑀣𑀭𑀢𑀺 𑀧𑀢𑁆𑀣𑀭𑀢𑀺 𑀯𑀺𑀢𑁆𑀣𑀺𑀡𑁆𑀡𑀸 𑀳𑁄𑀢𑀻𑀢𑀺 𑀯𑀺𑀢𑁆𑀣𑀢𑀸, 𑀦𑀤𑀦𑁆𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺 𑀇𑀢𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀦𑀤𑀻, 𑀦𑀤𑀺𑀁 𑀢𑀭𑀦𑁆𑀢𑀸 𑀏𑀢𑀁 𑀧𑀢𑁆𑀯𑀸 𑀢𑀺𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀢𑀻𑀭𑀁, 𑀢𑀲𑁆𑀲𑀸 𑀯𑀺𑀢𑁆𑀣𑀢𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀢𑀻𑀭𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀓𑁂𑀢𑀓𑀺𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸𑀢𑀺 𑀓𑀼𑀘𑁆𑀙𑀺𑀢𑀸𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀸𑀦𑀁 𑀳𑀢𑁆𑀣𑀁 𑀓𑀡𑁆𑀟𑀓𑁄 𑀙𑀺𑀦𑁆𑀤𑀢𑀺 𑀯𑀺𑀚𑁆𑀛𑀢𑀻𑀢𑀺 𑀓𑁂𑀢𑀁, 𑀓𑁂𑀢𑀲𑁆𑀲 𑀏𑀲𑀸 𑀓𑁂𑀢𑀓𑀻𑀧𑀼𑀧𑁆𑀨𑀁, 𑀢𑀁 𑀤𑀺𑀲𑁆𑀯𑀸 𑀯𑀡𑁆𑀝𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧. 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄𑀢𑀺 𑀲𑀺𑀔𑀻 𑀯𑀼𑀘𑁆𑀘𑀢𑀺 𑀅𑀕𑁆𑀕𑀺, 𑀲𑀺𑀔𑀻𑀲𑀤𑀺𑀲𑀸 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑀸 𑀚𑀮𑀫𑀸𑀦𑀸 𑀙𑀩𑁆𑀩𑀡𑁆𑀡𑀖𑀦𑀭𑀁𑀲𑀺𑀬𑁄 𑀬𑀲𑁆𑀲 𑀲𑁄 𑀲𑀺𑀔𑀻, 𑀮𑁄𑀓𑀲𑁆𑀲 𑀲𑀓𑀮𑀮𑁄𑀓𑀢𑁆𑀢𑀬𑀲𑁆𑀲 𑀩𑀦𑁆𑀥𑀼 𑀜𑀸𑀢𑀓𑁄𑀢𑀺 𑀮𑁄𑀓𑀩𑀦𑁆𑀥𑀼, 𑀢𑀲𑁆𑀲 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄 𑀓𑁂𑀢𑀓𑀻𑀧𑀼𑀧𑁆𑀨𑀁 𑀯𑀡𑁆𑀝𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀘𑀦𑁆𑀤𑀦𑀧𑀽𑀚𑀦𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀘𑀦𑁆𑀤𑀦𑀧𑀽𑀚𑀦𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑁂 𑀘𑀦𑁆𑀤𑀪𑀸𑀕𑀸𑀦𑀤𑀺𑀬𑀸 𑀲𑀫𑀻𑀧𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀧𑀼𑀧𑁆𑀨𑀪𑀓𑁆𑀔𑁄 𑀧𑀼𑀧𑁆𑀨𑀦𑀺𑀯𑀲𑀦𑁄 𑀘𑀦𑁆𑀤𑀦𑀅𑀕𑀭𑀼𑀆𑀤𑀻𑀲𑀼 𑀕𑀦𑁆𑀥𑀯𑀺𑀪𑀽𑀲𑀺𑀢𑁄 𑀳𑀺𑀫𑀯𑀦𑁆𑀢𑁂 𑀪𑀼𑀫𑁆𑀫𑀤𑁂𑀯𑀢𑀸 𑀯𑀺𑀬 𑀉𑀬𑁆𑀬𑀸𑀦𑀓𑀻𑀴𑀚𑀮𑀓𑀻𑀴𑀸𑀤𑀺𑀅𑀦𑁂𑀓𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀅𑀢𑁆𑀣𑀤𑀲𑁆𑀲𑀻 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀓𑀺𑀦𑁆𑀦𑀭𑁄 𑀢𑀁 𑀪𑀕𑀯𑀦𑁆𑀢𑀁 𑀯𑀺𑀚𑁆𑀚𑁄𑀢𑀫𑀸𑀦𑀁 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀕𑀦𑁆𑀥𑀘𑀦𑁆𑀤𑀦𑁂𑀦 𑀧𑀽𑀚𑁂𑀲𑀺. 𑀢𑀲𑁆𑀲 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑁧𑁭. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀢𑁂𑀦 𑀲𑁄𑀫𑀦𑀲𑁆𑀲𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑀭𑀸𑀧𑀭𑀁 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀧𑀤𑁂𑀲𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀦𑁆𑀤𑀁 𑀫𑀦𑀁 𑀭𑀼𑀘𑀺𑀁 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀯𑀺𑀬 𑀚𑀸𑀢𑁄𑀢𑀺 𑀘𑀦𑁆𑀤𑁄. 𑀘𑀦𑁆𑀤𑀫𑀡𑁆𑀟𑀮𑁂𑀦 𑀧𑀲𑀦𑁆𑀦𑀦𑀺𑀫𑁆𑀫𑀮𑁄𑀤𑀓𑁂𑀦 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀫𑀼𑀢𑁆𑀢𑀸𑀤𑀮𑀲𑀤𑀺𑀲𑀲𑀦𑁆𑀣𑀭𑀥𑀯𑀮𑀧𑀼𑀮𑀺𑀦𑀢𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀦𑁆𑀤𑁂𑀦 𑀪𑀸𑀕𑀸 𑀲𑀤𑀺𑀲𑀸𑀢𑀺 𑀘𑀦𑁆𑀤𑀪𑀸𑀕𑀸, 𑀢𑀲𑁆𑀲𑀸 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀘𑀦𑁆𑀤𑀦𑀧𑀽𑀚𑀦𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀅𑀝𑁆𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀫𑀳𑀸𑀪𑁄𑀕𑁄 𑀫𑀳𑀸𑀬𑀲𑁄 𑀤𑀸𑀦𑀸𑀪𑀺𑀭𑀢𑁄 𑀅𑀳𑁄𑀲𑀺. 𑀏𑀓𑀤𑀺𑀯𑀲𑀁 𑀲𑁄 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀇𑀫𑁂 𑀬𑀸𑀘𑀓𑀸 𑀦𑀸𑀫 ‘𑀅𑀳𑀁 𑀤𑀸𑀦𑀁 𑀦 𑀮𑀤𑁆𑀥𑁄𑀲𑁆𑀫𑀻’𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽’’𑀢𑀺 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀲𑀺. 𑀢𑀤𑀸 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀲𑀧𑀭𑀺𑀯𑀸𑀭𑁄 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀓𑀲𑀺𑀲𑁆𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀽𑀚𑁂𑀲𑀺. 𑀢𑀸𑀦𑀺 𑀲𑀓𑀮𑀦𑀕𑀭𑀁 𑀙𑀸𑀤𑁂𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀝𑁆𑀞𑀁𑀲𑀼.

𑁨𑁬. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀭𑀳𑁄𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀳𑁄𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀲𑀼𑀜𑁆𑀜𑀓𑀸𑀮𑁂 𑀫𑀚𑁆𑀛𑀺𑀫𑀤𑁂𑀲𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀓𑁂𑀯𑀮𑀁 𑀉𑀤𑀭𑀁 𑀧𑀽𑀭𑁂𑀢𑁆𑀯𑀸 𑀓𑁄𑀥𑀫𑀤𑀫𑀸𑀦𑀸𑀤𑀬𑁄 𑀅𑀓𑀼𑀲𑀮𑁂𑀬𑁂𑀯 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑁂𑀓𑀢𑀸𑀧𑀲𑀲𑀢𑀧𑀭𑀺𑀯𑀸𑀭𑁄 𑀯𑀲𑀪𑀧𑀩𑁆𑀩𑀢𑀲𑀫𑀻𑀧𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀢𑀻𑀡𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀳𑀺𑀫𑀯𑀦𑁆𑀢𑁂𑀬𑁂𑀯 𑀯𑀲𑀫𑀸𑀦𑁄 ‘‘𑀅𑀳𑀁 𑀏𑀢𑁆𑀢𑀓𑀸𑀦𑀁 𑀲𑀺𑀲𑁆𑀲𑀸𑀦𑀁 𑀆𑀘𑀭𑀺𑀬𑁄𑀢𑀺 𑀲𑀫𑁆𑀫𑀢𑁄 𑀕𑀭𑀼𑀝𑁆𑀞𑀸𑀦𑀺𑀬𑁄 𑀕𑀭𑀼𑀓𑀸𑀢𑀩𑁆𑀩𑁄 𑀯𑀦𑁆𑀤𑀦𑀻𑀬𑁄, 𑀆𑀘𑀭𑀺𑀬𑁄 𑀫𑁂 𑀦𑀢𑁆𑀣𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀢𑁂 𑀲𑀩𑁆𑀩𑁂 𑀲𑀺𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑁂 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀲𑀬𑀁 𑀏𑀓𑀓𑁄 𑀭𑀳𑁄 𑀯𑀺𑀯𑁂𑀓𑀝𑁆𑀞𑀸𑀦𑁂𑀯 𑀦𑀺𑀲𑀺𑀦𑁆𑀦𑁄 𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀩𑀼𑀤𑁆𑀥𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀸𑀮𑀸𑀬𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑁩𑁪. 𑀲𑁄 𑀢𑀢𑁆𑀣 𑀛𑀸𑀦𑀲𑀼𑀔𑁂𑀦 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀓𑀸𑀫𑁂𑀲𑀼 𑀅𑀦𑀮𑁆𑀮𑀻𑀦𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀧𑀩𑁆𑀩𑀚𑀺𑀢𑁆𑀯𑀸 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀯𑀲𑀪𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀁 𑀯𑀺𑀦𑀸 𑀲𑁂𑀲𑀧𑀩𑁆𑀩𑀢𑀸𑀦𑀁 𑀉𑀘𑁆𑀘𑀢𑀭𑀪𑀸𑀯𑁂𑀦 𑀲𑁂𑀝𑁆𑀞𑀢𑀭𑀪𑀸𑀯𑁂𑀦 𑀯𑀲𑀪𑁄𑀢𑀺 𑀲𑀗𑁆𑀔𑀁 𑀕𑀢𑁄 𑀧𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀳𑁄𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀘𑀫𑁆𑀧𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀓𑀡𑀺𑀓𑀸𑀭𑀁𑀯 𑀚𑁄𑀢𑀦𑁆𑀢𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀘𑀫𑁆𑀧𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀦𑁆𑀢𑀭𑁂 𑀯𑀲𑀦𑁆𑀢𑁄 𑀯𑁂𑀲𑁆𑀲𑀪𑀼𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀺𑀲𑁆𑀲𑁂𑀳𑀺 𑀆𑀦𑀻𑀢𑁂𑀳𑀺 𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑁄 𑀢𑁂𑀦𑁂𑀯 𑀓𑀼𑀲𑀮𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀖𑀭𑀸𑀯𑀸𑀲𑁂 𑀅𑀦𑀮𑁆𑀮𑀻𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁧. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀓𑀡𑀺𑀓𑀸𑀭𑀁𑀯 𑀚𑁄𑀢𑀦𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀡𑀺𑀓𑀸𑀭𑀦𑁆𑀢𑀺 𑀲𑀓𑀮𑀧𑀢𑁆𑀢𑀧𑀮𑀸𑀲𑀸𑀦𑀺 𑀧𑀭𑀺𑀪𑀚𑁆𑀚 𑀧𑀸𑀢𑁂𑀢𑁆𑀯𑀸 𑀧𑀼𑀧𑁆𑀨𑀕𑀳𑀡𑀲𑀫𑀬𑁂 𑀓𑀡𑁆𑀡𑀺𑀓𑀸𑀩𑀤𑁆𑀥𑁄 𑀳𑀼𑀢𑁆𑀯𑀸 𑀧𑀼𑀧𑁆𑀨𑀫𑀓𑀼𑀴𑀸𑀦𑀁 𑀕𑀳𑀡𑀢𑁄 𑀓𑀡𑁆𑀡𑀺𑀓𑀸𑀓𑀸𑀭𑁂𑀦 𑀧𑀓𑀢𑁄𑀢𑀺 𑀓𑀡𑀺𑀓𑀸𑀭𑁄, ‘‘𑀓𑀡𑁆𑀡𑀺𑀓𑀸𑀭𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀓𑀲𑁆𑀲 𑀧𑀼𑀩𑁆𑀩 𑀡-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀓𑀡𑀺𑀓𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀼𑀧𑁆𑀨𑀺𑀢𑀁 𑀓𑀡𑀺𑀓𑀸𑀭𑀭𑀼𑀓𑁆𑀔𑀁 𑀇𑀯 𑀚𑁄𑀢𑀦𑁆𑀢𑀁 𑀩𑀼𑀤𑁆𑀥𑀁 𑀅𑀤𑁆𑀤𑀲𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀫𑁆𑀧𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀅𑀢𑁆𑀣𑀲𑀦𑁆𑀤𑀲𑁆𑀲𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀲𑀸𑀮𑀫𑀸𑀴𑁂 𑀆𑀲𑀻𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀢𑁆𑀣𑀲𑀦𑁆𑀤𑀲𑁆𑀲𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀓𑀢𑀧𑀼𑀜𑁆𑀜𑀽𑀧𑀘𑀬𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀕𑁂𑀳𑀁 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀭𑀫𑀡𑀻𑀬𑁂 𑀞𑀸𑀦𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀧𑀝𑀺𑀯𑀲𑀢𑀺, 𑀢𑀤𑀸 𑀲𑀢𑁆𑀢𑀸𑀦𑀼𑀓𑀫𑁆𑀧𑀸𑀬 𑀳𑀺𑀫𑀯𑀦𑁆𑀢𑀫𑀸𑀕𑀢𑀁 𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀯𑀦𑁆𑀤𑀺𑀢𑁆𑀯𑀸 𑀣𑀼𑀢𑀺𑀯𑀘𑀦𑁂𑀳𑀺 𑀣𑁄𑀫𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀬𑀸𑀯𑀢𑀸𑀬𑀼𑀓𑀁 𑀓𑀢𑁆𑀯𑀸 𑀓𑀸𑀮𑀗𑁆𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁪𑁭. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀲𑀸𑀮𑀫𑀸𑀴𑁂 𑀆𑀲𑀻𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑀸𑀮𑀫𑀸𑀴𑁂𑀢𑀺 𑀯𑀺𑀲𑀸𑀮𑀁 𑀧𑀢𑁆𑀣𑀝𑀁 𑀯𑀺𑀢𑁆𑀣𑀺𑀡𑁆𑀡𑀁 𑀫𑀳𑀦𑁆𑀢𑀁 𑀫𑀸𑀴𑀁 𑀯𑀺𑀲𑀸𑀮𑀫𑀸𑀴𑀁, 𑀢𑀲𑁆𑀫𑀺𑀁 𑀯𑀺𑀲𑀸𑀮𑀫𑀸𑀴𑁂 𑀆𑀲𑀻𑀦𑁄 𑀦𑀺𑀲𑀺𑀦𑁆𑀦𑁄 𑀅𑀳𑀁 𑀮𑁄𑀓𑀦𑀸𑀬𑀓𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀢𑁆𑀣𑀲𑀦𑁆𑀤𑀲𑁆𑀲𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀏𑀓𑀧𑀲𑀸𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀸𑀭𑀤𑁄 𑀇𑀢𑀺 𑀫𑁂 𑀦𑀸𑀫𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀏𑀓𑀧𑀲𑀸𑀤𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀓𑀢𑀓𑀼𑀲𑀮𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀓𑁂𑀲𑀯𑁄𑀢𑀺 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀢𑀺𑀯𑀺𑀬 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀓𑁆𑀓𑀸𑀫𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁫𑁫. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀓𑀢𑀓𑀼𑀲𑀮𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀸𑀭𑀤𑁄 𑀇𑀢𑀺 𑀫𑁂 𑀦𑀸𑀫𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀭𑀤𑁄𑀢𑀺 𑀚𑀸𑀢𑀺𑀯𑀲𑁂𑀦 𑀲𑀼𑀤𑁆𑀥𑀲𑀭𑀻𑀭𑀢𑁆𑀢𑀸 𑀦𑀢𑁆𑀣𑀺 𑀭𑀚𑁄 𑀥𑀽𑀮𑀺 𑀫𑀮𑀁 𑀏𑀢𑀲𑁆𑀲𑀸𑀢𑀺 𑀦𑀸𑀭𑀤𑁄, 𑀚-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸 𑀦𑀸𑀭𑀤𑁄𑀢𑀺 𑀓𑀼𑀮𑀤𑀢𑁆𑀢𑀺𑀓𑀁 𑀦𑀸𑀫𑀁. 𑀓𑁂𑀲𑀯𑁄𑀢𑀺 𑀓𑀺𑀲𑀯𑀘𑁆𑀙𑀕𑁄𑀢𑁆𑀢𑁂 𑀚𑀸𑀢𑀢𑁆𑀢𑀸 𑀓𑁂𑀲𑀯𑁄 𑀦𑀸𑀭𑀤𑀓𑁂𑀲𑀯𑁄 𑀇𑀢𑀺 𑀫𑀁 𑀚𑀦𑀸 𑀯𑀺𑀤𑀽 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀏𑀓𑀧𑀲𑀸𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀲𑀸𑀮𑀧𑀼𑀧𑁆𑀨𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀫𑀺𑀕𑀭𑀸𑀚𑀸 𑀢𑀤𑀸 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀸𑀮𑀧𑀼𑀧𑁆𑀨𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀓𑀢𑀓𑀼𑀲𑀮𑀲𑀜𑁆𑀘𑀬𑁄 𑀓𑁂𑀦𑀘𑀺 𑀓𑀫𑁆𑀫𑀘𑁆𑀙𑀺𑀤𑁆𑀤𑁂𑀦 𑀳𑀺𑀫𑀯𑀦𑁆𑀢𑁂 𑀲𑀻𑀳𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑁂𑀓𑀲𑀻𑀳𑀧𑀭𑀺𑀯𑀸𑀭𑁄 𑀯𑀺𑀳𑀸𑀲𑀺. 𑀢𑀤𑀸 𑀲𑀺𑀔𑀻 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀳𑀺𑀫𑀯𑀦𑁆𑀢𑀁 𑀅𑀕𑀫𑀸𑀲𑀺. 𑀲𑀻𑀳𑁄 𑀢𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀸𑀔𑀸𑀪𑀗𑁆𑀕𑁂𑀦 𑀲𑀓𑀡𑁆𑀡𑀺𑀓𑀲𑀸𑀮𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑁬𑁦. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀫𑀺𑀕𑀭𑀸𑀚𑀸 𑀢𑀤𑀸 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀭𑀡𑀁 𑀕𑀘𑁆𑀙𑀦𑁆𑀢𑀻𑀢𑀺 𑀫𑀺𑀕𑀸, 𑀅𑀣 𑀯𑀸 𑀖𑀸𑀲𑀁 𑀫𑀕𑁆𑀕𑀦𑁆𑀢𑀺 𑀕𑀯𑁂𑀲𑀦𑁆𑀢𑀻𑀢𑀺 𑀫𑀺𑀕𑀸, 𑀫𑀺𑀕𑀸𑀦𑀁 𑀭𑀸𑀚𑀸 𑀫𑀺𑀕𑀭𑀸𑀚𑀸. 𑀲𑀓𑀮𑀘𑀢𑀼𑀧𑁆𑀧𑀤𑀸𑀦𑀁 𑀭𑀸𑀚𑀪𑀸𑀯𑁂 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀫𑀺𑀕𑁂 𑀆𑀤𑀺𑀁 𑀓𑀢𑁆𑀯𑀸 𑀫𑀺𑀕𑀭𑀸𑀚𑀸𑀢𑀺 𑀯𑀼𑀢𑁆𑀢𑀁. 𑀬𑀤𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑀧𑀼𑀧𑁆𑀨𑀁 𑀲𑀸𑀮𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸 𑀧𑀽𑀚𑁂𑀲𑀺𑀁, 𑀢𑀤𑀸 𑀅𑀳𑀁 𑀫𑀺𑀕𑀭𑀸𑀚𑀸 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁨. 𑀲𑀓𑁄𑀲𑀁 𑀧𑀼𑀧𑁆𑀨𑀫𑀸𑀳𑀭𑀺𑀦𑁆𑀢𑀺 𑀲𑀓𑀡𑁆𑀡𑀺𑀓𑀁 𑀲𑀸𑀮𑀧𑀼𑀧𑁆𑀨𑀁 𑀆𑀳𑀭𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀸𑀮𑀧𑀼𑀧𑁆𑀨𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀭𑁄𑀥𑀓𑁄 𑀢𑀤𑀸 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀦𑁂𑀲𑀸𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀳𑀺𑀫𑀯𑀦𑁆𑀢𑁂 𑀏𑀓𑀲𑁆𑀫𑀺𑀁 𑀧𑀩𑁆𑀪𑀸𑀭𑁂 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀯𑀲𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀢𑁆𑀣 𑀕𑀢𑀁 𑀲𑀺𑀔𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀸𑀬𑀁 𑀧𑀸𑀢𑀁 𑀦𑀫𑀲𑁆𑀲𑀫𑀸𑀦𑁄 𑀓𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀅𑀧𑀲𑁆𑀲𑀦𑁆𑀢𑁄 𑀫𑀥𑀼𑀭𑀸𑀦𑀺 𑀧𑀺𑀬𑀸𑀮𑀨𑀮𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀸 𑀢𑀸𑀦𑀺 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀦𑁂𑀲𑀸𑀤𑁄 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀲𑀭𑀻𑀭𑁄 𑀧𑀸𑀧𑀓𑀫𑁆𑀫𑁂 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀫𑀽𑀮𑀨𑀮𑀸𑀳𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑁬𑁬. 𑀲𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀅𑀦𑁂𑀓𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀢𑁆𑀣 𑀅𑀦𑀪𑀺𑀭𑀢𑁄 𑀕𑁂𑀳𑀁 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀓𑀢𑀨𑀮𑀤𑀸𑀦𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀭𑁄𑀥𑀓𑁄 𑀢𑀤𑀸 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀸 𑀅𑀳𑀁 𑀧𑀺𑀬𑀸𑀮𑀨𑀮𑀁 𑀤𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀢𑀤𑀸 𑀅𑀳𑀁 𑀧𑀭𑁄𑀥𑀓𑁄 𑀆𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑁄𑀥𑀓𑁄𑀢𑀺 𑀧𑀭𑀲𑀢𑁆𑀢𑀭𑁄𑀥𑀓𑁄 𑀯𑀺𑀳𑁂𑀲𑀓𑁄. ‘‘𑀧𑀭𑀭𑁄𑀥𑀓𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀧𑀼𑀩𑁆𑀩𑀲𑁆𑀲 𑀭-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀧𑀭𑁄𑀥𑀓𑁄’’𑀢𑀺 𑀯𑀼𑀢𑁆𑀢𑀁.

𑁬𑁯. 𑀧𑀭𑀺𑀘𑀸𑀭𑀺𑀁 𑀯𑀺𑀦𑀸𑀬𑀓𑀦𑁆𑀢𑀺 𑀢𑀁 𑀦𑀺𑀩𑁆𑀩𑀸𑀦𑀧𑀸𑀧𑀓𑀁 𑀲𑀢𑁆𑀣𑀸𑀭𑀁, ‘‘𑀪𑀦𑁆𑀢𑁂, 𑀇𑀫𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀧𑀯𑀸𑀭𑀺𑀁 𑀦𑀺𑀫𑀦𑁆𑀢𑁂𑀲𑀺𑀁 𑀆𑀭𑀸𑀥𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀘𑀼𑀤𑁆𑀤𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁫. 𑀙𑀢𑁆𑀢𑀯𑀕𑁆𑀕𑁄

𑁧. 𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀥𑀭𑀫𑀸𑀦𑀲𑁆𑀲 𑀪𑀕𑀯𑀢𑁄 𑀅𑀤𑀺𑀝𑁆𑀞𑀢𑁆𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 ‘‘𑀅𑀳𑁄 𑀫𑀫 𑀧𑀭𑀺𑀳𑀸𑀦𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀫 𑀚𑀸𑀢𑀺𑀁 𑀲𑀨𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀙𑀢𑁆𑀢𑀸𑀥𑀺𑀙𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼𑀁 𑀦𑀺𑀳𑀺𑀢𑀥𑀸𑀢𑀼𑀕𑀩𑁆𑀪𑀁 𑀧𑀽𑀚𑁂𑀲𑀺. 𑀅𑀧𑀭𑀪𑀸𑀕𑁂 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀢𑀫𑁂𑀯 𑀥𑀸𑀢𑀼𑀕𑀩𑁆𑀪𑀁 𑀧𑀽𑀚𑁂𑀲𑀺. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀢𑁆𑀢𑀸𑀢𑀺𑀙𑀢𑁆𑀢𑀦𑁆𑀢𑀺 𑀙𑀸𑀤𑀺𑀬𑀢𑀺 𑀲𑀁𑀯𑀭𑀺𑀬𑀢𑀺 𑀆𑀢𑀧𑀸𑀤𑀺𑀦𑁆𑀢𑀺 𑀙𑀢𑁆𑀢𑀁, 𑀙𑀢𑁆𑀢𑀲𑁆𑀲 𑀅𑀢𑀺𑀙𑀢𑁆𑀢𑀁 𑀙𑀢𑁆𑀢𑀲𑁆𑀲 𑀉𑀧𑀭𑀺 𑀓𑀢𑀙𑀢𑁆𑀢𑀁 𑀙𑀢𑁆𑀢𑀸𑀢𑀺𑀙𑀢𑁆𑀢𑀁, 𑀙𑀢𑁆𑀢𑀲𑁆𑀲 𑀉𑀧𑀭𑀽𑀧𑀭𑀺 𑀙𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀦𑁆𑀢𑀺 𑀣𑀽𑀧𑀺𑀬𑀢𑀺 𑀭𑀸𑀲𑀺𑀓𑀭𑀻𑀬𑀢𑀻𑀢𑀺 𑀣𑀽𑀧𑁄, 𑀅𑀣 𑀯𑀸 𑀣𑀽𑀧𑀢𑀺 𑀣𑀺𑀭𑀪𑀸𑀯𑁂𑀦 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀫𑀸𑀦𑁄 𑀧𑀢𑀺𑀝𑁆𑀞𑀸𑀢𑀻𑀢𑀺 𑀣𑀽𑀧𑁄, 𑀢𑀲𑁆𑀫𑀺𑀁 𑀣𑀽𑀧𑀫𑁆𑀳𑀺 𑀫𑀬𑀸 𑀓𑀸𑀭𑀺𑀢𑀁 𑀙𑀢𑁆𑀢𑀁 𑀉𑀧𑀭𑀽𑀧𑀭𑀺 𑀞𑀧𑀦𑀯𑀲𑁂𑀦 𑀅𑀪𑀺 𑀯𑀺𑀲𑁂𑀲𑁂𑀦 𑀆𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨. 𑀧𑀼𑀧𑁆𑀨𑀘𑁆𑀙𑀤𑀦𑀁 𑀓𑀢𑁆𑀯𑀸𑀦𑀸𑀢𑀺 𑀯𑀺𑀓𑀲𑀺𑀢𑁂𑀳𑀺 𑀲𑀼𑀕𑀦𑁆𑀥𑁂𑀳𑀺 𑀅𑀦𑁂𑀓𑁂𑀳𑀺 𑀨𑀼𑀧𑁆𑀨𑁂𑀳𑀺 𑀙𑀤𑀦𑀁 𑀙𑀢𑁆𑀢𑀼𑀧𑀭𑀺 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀣𑀫𑁆𑀪𑀸𑀭𑁄𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀣𑀫𑁆𑀪𑀸𑀭𑁄𑀧𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀥𑀸𑀢𑀼𑀕𑀩𑁆𑀪𑀫𑀸𑀴𑀓𑁂 𑀣𑀫𑁆𑀪𑀁 𑀦𑀺𑀔𑀦𑀺𑀢𑁆𑀯𑀸 𑀥𑀚𑀁 𑀆𑀭𑁄𑀧𑁂𑀲𑀺. 𑀩𑀳𑀽𑀦𑀺 𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨𑀸𑀦𑀺 𑀕𑀦𑁆𑀣𑀺𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀬𑀸 𑀆𑀭𑁄𑀳𑀺𑀢𑁆𑀯𑀸 𑀧𑀽𑀚𑁂𑀲𑀺.

𑁫. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀤𑀳𑀭𑀓𑀸𑀮𑀢𑁄 𑀧𑀪𑀼𑀢𑀺 𑀧𑀽𑀚𑀦𑀻𑀬𑁄 𑀲𑀸𑀲𑀦𑁂 𑀩𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺 𑀲𑀓𑀮𑀮𑁄𑀓𑀲𑁆𑀲 𑀦𑀸𑀣𑁂 𑀧𑀥𑀸𑀦𑀪𑀽𑀢𑁂 𑀧𑀝𑀺𑀲𑀭𑀡𑁂 𑀘 𑀲𑀢𑁆𑀣𑀭𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀤𑀻𑀧𑀲𑀺𑀔𑀸 𑀯𑀺𑀬 𑀅𑀤𑀲𑁆𑀲𑀦𑀁 𑀕𑀢𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀤𑀲𑁆𑀲𑀻𑀦𑀭𑀸𑀲𑀪𑁂𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀲𑁆𑀲𑀢𑀻𑀢𑀺 𑀥𑀫𑁆𑀫𑀤𑀲𑁆𑀲𑀻, 𑀅𑀣 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑁂 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀤𑀲𑁆𑀲𑀦𑀲𑀻𑀮𑁄 𑀧𑀲𑁆𑀲𑀦𑀲𑀻𑀮𑁄𑀢𑀺 𑀥𑀫𑁆𑀫𑀤𑀲𑁆𑀲𑀻, 𑀦𑀭𑀸𑀦𑀁 𑀆𑀲𑀪𑁄 𑀧𑀯𑀭𑁄 𑀉𑀢𑁆𑀢𑀫𑁄𑀢𑀺 𑀦𑀭𑀸𑀲𑀪𑁄, 𑀥𑀫𑁆𑀫𑀤𑀲𑁆𑀲𑀻 𑀘 𑀲𑁄 𑀦𑀭𑀸𑀲𑀪𑁄 𑀘𑁂𑀢𑀺 𑀥𑀫𑁆𑀫𑀤𑀲𑁆𑀲𑀻𑀦𑀭𑀸𑀲𑀪𑁄, 𑀢𑀲𑁆𑀫𑀺𑀁 𑀥𑀫𑁆𑀫𑀤𑀲𑁆𑀲𑀻𑀦𑀭𑀸𑀲𑀪𑁂. 𑀆𑀭𑁄𑀧𑁂𑀲𑀺𑀁 𑀥𑀚𑀁 𑀣𑀫𑁆𑀪𑀦𑁆𑀢𑀺 𑀘𑁂𑀢𑀺𑀬𑀫𑀸𑀴𑀓𑁂 𑀣𑀫𑁆𑀪𑀁 𑀦𑀺𑀔𑀦𑀺𑀢𑁆𑀯𑀸 𑀢𑀢𑁆𑀣 𑀥𑀚𑀁 𑀆𑀭𑁄𑀧𑁂𑀲𑀺𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬. 𑀦𑀺𑀲𑁆𑀲𑁂𑀡𑀺𑀁 𑀫𑀸𑀧𑀬𑀺𑀢𑁆𑀯𑀸𑀦𑀸𑀢𑀺 𑀦𑀺𑀲𑁆𑀲𑀸𑀬 𑀢𑀁 𑀇𑀡𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀆𑀭𑁄𑀳𑀦𑁆𑀢𑀺 𑀉𑀧𑀭𑀻𑀢𑀺 𑀦𑀺𑀲𑁆𑀲𑁂𑀡𑀺, 𑀢𑀁 𑀦𑀺𑀲𑁆𑀲𑁂𑀡𑀺𑀁 𑀫𑀸𑀧𑀬𑀺𑀢𑁆𑀯𑀸 𑀓𑀸𑀭𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀣𑀽𑀧𑀲𑁂𑀝𑁆𑀞𑀁 𑀲𑀫𑀸𑀭𑀼𑀳𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀸𑀢𑀺𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀚𑀸𑀬𑀫𑀸𑀦𑀫𑁂𑀯 𑀚𑀦𑀸𑀦𑀁 𑀲𑀼𑀦𑁆𑀤𑀭𑀁 𑀫𑀦𑀁 𑀓𑀭𑁄𑀢𑀻𑀢𑀺 𑀚𑀸𑀢𑀺𑀲𑀼𑀫𑀦𑀁, 𑀚𑀸𑀢𑀺𑀲𑀼𑀫𑀦𑀫𑁂𑀯 𑀧𑀼𑀧𑁆𑀨𑀁 ‘‘𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀲𑀼𑀫𑀦𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀚𑀸𑀢𑀺𑀧𑀼𑀧𑁆𑀨’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀚𑀸𑀢𑀺𑀲𑀼𑀫𑀦𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀕𑀦𑁆𑀣𑀺𑀢𑁆𑀯𑀸 𑀣𑀽𑀧𑀫𑁆𑀳𑀺 𑀆𑀭𑁄𑀧𑀬𑀺𑀁, 𑀆𑀭𑁄𑀧𑁂𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀣𑀫𑁆𑀪𑀸𑀭𑁄𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀺𑀬𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀢𑀲𑁆𑀲 𑀘𑁂𑀢𑀺𑀬𑁂 𑀯𑀮𑀬𑀁 𑀓𑀸𑀭𑁂𑀲𑀺, 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀭𑀺𑀧𑀽𑀭𑁂𑀢𑁆𑀯𑀸 𑀫𑀳𑀸𑀧𑀽𑀚𑀁 𑀓𑀸𑀭𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀧𑀽𑀚𑀦𑀻𑀬𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀉𑀪𑀬𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁦. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀺𑀬𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂𑀢𑀺 𑀧𑀺𑀬𑀁 𑀲𑁄𑀫𑀦𑀲𑁆𑀲𑀸𑀓𑀸𑀭𑀁 𑀤𑀲𑁆𑀲𑀦𑀁 𑀬𑀲𑁆𑀲 𑀲𑁄 𑀧𑀺𑀬𑀤𑀲𑁆𑀲𑀻, 𑀆𑀭𑁄𑀳𑀧𑀭𑀺𑀡𑀸𑀳𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀫𑀡𑁆𑀟𑀮𑁂𑀳𑀺 𑀲𑀸𑀥𑀼 𑀫𑀳𑀸𑀚𑀦𑀧𑁆𑀧𑀲𑀸𑀤𑀁 𑀚𑀦𑀬𑀦𑀸𑀓𑀸𑀭𑀤𑀲𑁆𑀲𑀦𑁄𑀢𑀺 𑀅𑀢𑁆𑀣𑁄. 𑀦𑀭𑀸𑀦𑀁 𑀉𑀢𑁆𑀢𑀫𑁄𑀢𑀺 𑀦𑀭𑀼𑀢𑁆𑀢𑀫𑁄, 𑀧𑀺𑀬𑀤𑀲𑁆𑀲𑀻 𑀘 𑀲𑁄 𑀦𑀭𑀼𑀢𑁆𑀢𑀫𑁄 𑀘𑁂𑀢𑀺 𑀧𑀺𑀬𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁄, 𑀢𑀲𑁆𑀫𑀺𑀁 𑀧𑀺𑀬𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂 𑀦𑀺𑀩𑁆𑀩𑀼𑀢𑁂 𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀫𑀼𑀢𑁆𑀢𑀯𑁂𑀤𑀺𑀁 𑀅𑀳𑀁 𑀅𑀓𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀧𑁆𑀨𑀸𑀥𑀸𑀭𑀢𑁆𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀯𑁂𑀤𑀺𑀓𑀸𑀯𑀮𑀬𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁧. 𑀫𑀡𑀻𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀫𑀡𑀢𑀺 𑀚𑁄𑀢𑀢𑀺 𑀧𑀪𑀸𑀲𑀢𑀻𑀢𑀺 𑀫𑀡𑀺, 𑀅𑀣 𑀯𑀸 𑀚𑀦𑀸𑀦𑀁 𑀫𑀦𑀁 𑀧𑀽𑀭𑁂𑀦𑁆𑀢𑁄 𑀲𑁄𑀫𑀦𑀲𑁆𑀲𑀁 𑀓𑀭𑁄𑀦𑁆𑀢𑁄 𑀇𑀢𑁄 𑀕𑀢𑁄 𑀧𑀯𑀢𑁆𑀢𑁄𑀢𑀺 𑀫𑀡𑀺, 𑀚𑀸𑀢𑀺𑀭𑀗𑁆𑀕𑀫𑀡𑀺𑀯𑁂𑀴𑀼𑀭𑀺𑀬𑀫𑀡𑀺𑀆𑀤𑀻𑀳𑀺 𑀅𑀦𑁂𑀓𑁂𑀳𑀺 𑀫𑀡𑀻𑀳𑀺 𑀓𑀢𑀯𑁂𑀤𑀺𑀓𑀸𑀯𑀮𑀬𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀢𑁆𑀢𑀫𑀁 𑀫𑀳𑀸𑀧𑀽𑀚𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀲𑀧𑀭𑀺𑀯𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀧𑀭𑀺𑀯𑀸𑀭𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀳𑁄𑀲𑀺. 𑀅𑀣 𑀧𑀤𑀼𑀫𑀼𑀢𑁆𑀢𑀭𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀚𑀦𑁄 𑀢𑀲𑁆𑀲 𑀥𑀸𑀢𑀼𑀁 𑀦𑀺𑀤𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀓𑀸𑀭𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀬𑀁 𑀉𑀧𑀸𑀲𑀓𑁄 𑀢𑀲𑁆𑀲𑀼𑀧𑀭𑀺 𑀘𑀦𑁆𑀤𑀦𑀲𑀸𑀭𑁂𑀦 𑀘𑁂𑀢𑀺𑀬𑀖𑀭𑀁 𑀓𑀭𑀺𑀢𑁆𑀯𑀸 𑀫𑀳𑀸𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀓𑀼𑀲𑀮𑀁 𑀓𑀢𑁆𑀯𑀸 𑀲𑀤𑁆𑀥𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁫-𑁮. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀫𑀢𑁆𑀢𑀦𑁆𑀢𑀺 𑀮𑀸𑀫𑀓𑀪𑀸𑀯𑀁 𑀦𑀻𑀘𑀪𑀸𑀯𑀁 𑀤𑀼𑀓𑁆𑀔𑀺𑀢𑀪𑀸𑀯𑀁 𑀯𑀸 𑀦 𑀧𑀲𑁆𑀲𑀸𑀫𑀺 𑀦 𑀚𑀸𑀦𑀸𑀫𑀺, 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄 𑀫𑀬𑀸 𑀦𑀻𑀘𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀧𑀭𑀺𑀯𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀫𑀳𑀺𑀢𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀘𑁂𑀢𑀺𑀬𑀫𑀳𑁂 𑀯𑀢𑁆𑀢𑀫𑀸𑀦𑁂 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑀁 𑀉𑀫𑀸𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀤𑀺𑀩𑁆𑀩𑀫𑀸𑀦𑀼𑀲𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀩𑀳𑀼𑀮𑀁 𑀦𑀻𑀮𑀯𑀡𑁆𑀡𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁨𑁧. 𑀲𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀫𑀳𑀺𑀢𑁂𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀮𑁄𑀓𑀫𑀳𑀺𑀢𑁂𑀢𑀺 𑀮𑁄𑀓𑁂𑀳𑀺 𑀫𑀳𑀺𑀢𑁄 𑀧𑀽𑀚𑀺𑀢𑁄𑀢𑀺 𑀮𑁄𑀓𑀫𑀳𑀺𑀢𑁄, 𑀢𑀲𑁆𑀫𑀺𑀁 𑀮𑁄𑀓𑀫𑀳𑀺𑀢𑁂 𑀲𑀺𑀤𑁆𑀥𑀢𑁆𑀣𑀫𑁆𑀳𑀺 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀳𑀼𑀢𑀻𑀦𑀁𑀧𑀝𑀺𑀕𑁆𑀕𑀳𑁂𑀢𑀺 𑀆𑀳𑀼𑀢𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀧𑀽𑀚𑀸𑀲𑀓𑁆𑀓𑀸𑀭𑀸, 𑀢𑁂𑀲𑀁 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀭𑀳𑀢𑀻𑀢𑀺 𑀆𑀳𑀼𑀢𑀻𑀦𑀁𑀧𑀝𑀺𑀕𑁆𑀕𑀳𑁄, 𑀅𑀮𑀼𑀢𑁆𑀢𑀓𑀺𑀢𑀦𑁆𑀢𑀲𑀫𑀸𑀲𑁄, 𑀢𑀲𑁆𑀫𑀺𑀁 𑀆𑀳𑀼𑀢𑀻𑀦𑀁𑀧𑀝𑀺𑀕𑁆𑀕𑀳𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀅𑀢𑁆𑀣𑁄.

𑁨𑁨. 𑀉𑀫𑀸𑀧𑀼𑀧𑁆𑀨𑀦𑁆𑀢𑀺 𑀉𑀤𑁆𑀥𑀫𑀼𑀤𑁆𑀥𑀁 𑀦𑀻𑀮𑀧𑀪𑀁 𑀫𑀼𑀜𑁆𑀘𑀫𑀸𑀦𑀁 𑀧𑀼𑀧𑁆𑀨𑀢𑀺 𑀯𑀺𑀓𑀲𑀢𑀻𑀢𑀺 𑀉𑀫𑀸𑀧𑀼𑀧𑁆𑀨𑀁, 𑀢𑀁 𑀉𑀫𑀸𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑁂 𑀧𑀽𑀚𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀅𑀦𑀼𑀮𑁂𑀧𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀦𑁄𑀫𑀤𑀲𑁆𑀲𑀻𑀫𑀼𑀦𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀦𑀼𑀮𑁂𑀧𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀢𑀲𑁆𑀲 𑀪𑀕𑀯𑀢𑁄 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀯𑁂𑀤𑀺𑀓𑀸𑀯𑀮𑀬𑀁 𑀓𑀸𑀭𑁂𑀢𑁆𑀯𑀸 𑀲𑀼𑀥𑀸𑀓𑀫𑁆𑀫𑀜𑁆𑀘 𑀓𑀸𑀭𑁂𑀢𑁆𑀯𑀸 𑀯𑀸𑀮𑀼𑀓𑀲𑀦𑁆𑀣𑀭𑀡𑀁 𑀤𑀤𑁆𑀤𑀴𑁆𑀳𑀫𑀸𑀦𑀁 𑀭𑀚𑀢𑀯𑀺𑀫𑀸𑀦𑀫𑀺𑀯 𑀓𑀸𑀭𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀔𑀧𑁆𑀧𑀢𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀭𑀚𑀢𑀯𑀺𑀫𑀸𑀦𑀭𑀚𑀢𑀕𑁂𑀳𑀭𑀚𑀢𑀧𑀸𑀲𑀸𑀤𑁂𑀲𑀼 𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀫𑀦𑀼𑀬𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁬. 𑀲𑁄 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀦𑀼 𑀔𑁄 𑀓𑀼𑀲𑀮𑀁 𑀓𑀢𑁆𑀯𑀸 𑀫𑀬𑀸 𑀅𑀬𑀁 𑀯𑀺𑀲𑁂𑀲𑁄 𑀅𑀥𑀺𑀕𑀢𑁄’’𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀁 𑀚𑀸𑀦𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀻𑀫𑀼𑀦𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁄𑀫𑀁 𑀅𑀮𑀸𑀫𑀓𑀁 𑀤𑀲𑁆𑀲𑀦𑀁 𑀤𑀲𑁆𑀲𑀦𑀻𑀬𑀁 𑀲𑀭𑀻𑀭𑀁 𑀬𑀲𑁆𑀲 𑀲𑁄 𑀅𑀦𑁄𑀫𑀤𑀲𑁆𑀲𑀻, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀯𑀺𑀭𑀸𑀚𑀺𑀢𑀲𑀭𑀻𑀭𑀢𑁆𑀢𑀸 𑀲𑀼𑀦𑁆𑀤𑀭𑀤𑀲𑁆𑀲𑀦𑁄𑀢𑀺 𑀅𑀢𑁆𑀣𑁄. 𑀲𑀼𑀥𑀸𑀬 𑀧𑀺𑀡𑁆𑀟𑀁 𑀤𑀢𑁆𑀯𑀸𑀦𑀸𑀢𑀺 𑀩𑁄𑀥𑀺𑀖𑀭𑁂 𑀯𑁂𑀤𑀺𑀓𑀸𑀯𑀮𑀬𑀁 𑀓𑀸𑀭𑁂𑀢𑁆𑀯𑀸 𑀲𑀓𑀮𑁂 𑀩𑁄𑀥𑀺𑀖𑀭𑁂 𑀲𑀼𑀥𑀸𑀮𑁂𑀧𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀸𑀡𑀺𑀓𑀫𑁆𑀫𑀁 𑀅𑀓𑀸𑀲𑀳𑀦𑁆𑀢𑀺 𑀲𑀸𑀭𑀓𑀝𑁆𑀞𑁂𑀦 𑀨𑀮𑀓𑀧𑀸𑀡𑀺𑀬𑁄 𑀓𑀢𑁆𑀯𑀸 𑀢𑀸𑀳𑀺 𑀧𑀸𑀡𑀻𑀳𑀺 𑀫𑀝𑁆𑀞𑀓𑀫𑁆𑀫𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀦𑀼𑀮𑁂𑀧𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀫𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀉𑀢𑁆𑀢𑀭𑀺𑀢𑁆𑀯𑀸𑀦 𑀦𑀤𑀺𑀓𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀮𑁄𑀓𑀲𑀫𑁆𑀫𑀢𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀏𑀓𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀯𑀦𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀇𑀤𑀸𑀦𑀺 𑀫𑀬𑀸 𑀪𑀕𑀯𑀢𑁄 𑀫𑀕𑁆𑀕𑀁 𑀲𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀤𑀸𑀮𑀜𑁆𑀘 𑀧𑀺𑀝𑀓𑀜𑁆𑀘 𑀆𑀤𑀸𑀬 𑀪𑀕𑀯𑀢𑁄 𑀕𑀫𑀦𑀫𑀕𑁆𑀕𑀁 𑀲𑀫𑀁 𑀓𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀫𑀕𑁆𑀕𑀸𑀮𑀗𑁆𑀓𑀸𑀭𑀓𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀽𑀚𑀦𑀻𑀬𑁄 𑀪𑀯𑁂𑀬𑁆𑀬𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 ‘‘𑀬𑀣𑀸𑀥𑀺𑀧𑁆𑀧𑀸𑀬𑀁 𑀲𑀫𑀺𑀚𑁆𑀛𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁩𑁨-𑁩. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀅𑀳𑁄𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀸𑀓𑀝𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀉𑀢𑁆𑀢𑀭𑀺𑀢𑁆𑀯𑀸𑀦 𑀦𑀤𑀺𑀓𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀤𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺 𑀕𑀘𑁆𑀙𑀢𑀻𑀢𑀺 𑀦𑀤𑀻, 𑀦𑀤𑀻𑀬𑁂𑀯 𑀦𑀤𑀺𑀓𑀸, 𑀢𑀁 𑀦𑀤𑀺𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀤𑀸𑀮𑀧𑀺𑀝𑀓𑀫𑀸𑀤𑀸𑀬𑀸𑀢𑀺 𑀓𑀼 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀁 𑀯𑀺𑀤𑀸𑀮𑀦𑁂 𑀧𑀤𑀸𑀮𑀦𑁂 𑀙𑀺𑀦𑁆𑀤𑀦𑁂 𑀅𑀮𑀦𑁆𑀢𑀺 𑀓𑀼𑀤𑀸𑀮𑀁, 𑀧𑀺𑀝𑀓𑀁 𑀯𑀼𑀘𑁆𑀘𑀢𑀺 𑀧𑀁𑀲𑀼𑀯𑀸𑀮𑀺𑀓𑀸𑀤𑀺𑀯𑀸𑀳𑀓𑀁, 𑀢𑀸𑀮𑀧𑀡𑁆𑀡𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀓𑀢𑀪𑀸𑀚𑀦𑀁, 𑀓𑀼𑀤𑀸𑀮𑀜𑁆𑀘 𑀧𑀺𑀝𑀓𑀜𑁆𑀘 𑀓𑀼𑀤𑀸𑀮𑀧𑀺𑀝𑀓𑀁, 𑀢𑀁 𑀆𑀤𑀸𑀬 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀨𑀮𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀬𑀸𑀦𑀓𑀸𑀭𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀨𑀮𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀟𑁆𑀠𑀓𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀘𑀦𑁆𑀤𑀦𑁂𑀦 𑀆𑀮𑀫𑁆𑀩𑀦𑀨𑀮𑀓𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀅𑀤𑀸𑀲𑀺. 𑀪𑀕𑀯𑀸 𑀢𑀲𑁆𑀲𑀸𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑁩𑁭. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀓𑀸𑀮𑁂 𑀘𑀺𑀢𑁆𑀢𑀲𑀼𑀔𑀧𑀻𑀡𑀺𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀬𑀸𑀦𑀓𑀸𑀭𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀦𑀓𑀸𑀭𑁄𑀢𑀺 𑀬𑀦𑁆𑀢𑀺 𑀏𑀢𑁂𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀦𑁆𑀢𑀺 𑀬𑀸𑀦𑀁, 𑀢𑀁 𑀓𑀭𑁄𑀢𑀻𑀢𑀺 𑀬𑀸𑀦𑀓𑀸𑀭𑁄, 𑀧𑀼𑀭𑁂 𑀩𑀼𑀤𑁆𑀥𑀤𑀲𑁆𑀲𑀦𑀲𑀫𑀬𑁂 𑀅𑀳𑀁 𑀬𑀸𑀦𑀓𑀸𑀭𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀦𑁆𑀤𑀦𑀁 𑀨𑀮𑀓𑀁 𑀓𑀢𑁆𑀯𑀸𑀢𑀺 𑀘𑀦𑁆𑀤𑀢𑀺 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑀻𑀢𑀺 𑀘𑀦𑁆𑀤𑀦𑀁. 𑀅𑀣 𑀯𑀸 𑀘𑀦𑁆𑀤𑀦𑁆𑀢𑀺 𑀲𑀼𑀕𑀦𑁆𑀥𑀯𑀸𑀲𑀦𑀢𑁆𑀣𑀁 𑀲𑀭𑀻𑀭𑀁 𑀯𑀺𑀮𑀺𑀫𑁆𑀧𑀦𑁆𑀢𑀺 𑀏𑀢𑁂𑀦𑀸𑀢𑀺 𑀘𑀦𑁆𑀤𑀦𑀁, 𑀢𑀁 𑀆𑀮𑀫𑁆𑀩𑀦𑀨𑀮𑀓𑀁 𑀓𑀢𑁆𑀯𑀸. 𑀮𑁄𑀓𑀩𑀦𑁆𑀥𑀼𑀦𑁄𑀢𑀺 𑀲𑀓𑀮𑀮𑁄𑀓𑀲𑁆𑀲 𑀩𑀦𑁆𑀥𑀼 𑀜𑀸𑀢𑀺𑀪𑀽𑀢𑁄𑀢𑀺 𑀮𑁄𑀓𑀩𑀦𑁆𑀥𑀼, 𑀢𑀲𑁆𑀲 𑀮𑁄𑀓𑀩𑀦𑁆𑀥𑀼𑀦𑁄 𑀲𑀢𑁆𑀣𑀼𑀲𑁆𑀲 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀨𑀮𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀯𑀝𑀁𑀲𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀝𑀁𑀲𑀓𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀫𑀼𑀦𑀺𑀦𑁆𑀤𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀯𑀦𑁂 𑀯𑀺𑀳𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀫𑁂𑀥𑁄 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑀢𑀸𑀬 𑀢𑀁 𑀯𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀲𑁄 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀯𑀺𑀓𑀲𑀺𑀢𑀁 𑀲𑀴𑀮𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀯𑀝𑀁𑀲𑀓𑀸𑀓𑀸𑀭𑁂𑀦 𑀕𑀦𑁆𑀣𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀢𑁆𑀣𑀸𑀬 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀚𑀸𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁪𑁩. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑁄𑀢𑀺 𑀚𑀦𑀸𑀓𑀺𑀡𑁆𑀡𑀢𑀁 𑀧𑀳𑀸𑀬 𑀚𑀦𑀯𑀺𑀯𑁂𑀓𑀁 𑀘𑀺𑀢𑁆𑀢𑀯𑀺𑀯𑁂𑀓𑀜𑁆𑀘 𑀅𑀦𑀼𑀩𑁆𑀭𑀽𑀳𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑀺 𑀧𑀸𑀯𑀺𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀯𑀝𑀁𑀲𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀮𑁆𑀮𑀗𑁆𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀮𑁆𑀮𑀗𑁆𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀓𑀢𑀧𑀼𑀜𑁆𑀜𑀽𑀧𑀘𑀬𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀫𑀳𑀸𑀪𑁄𑀕𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀢𑁆𑀢𑀭𑀢𑀦𑀫𑀬𑀁 𑀧𑀮𑁆𑀮𑀗𑁆𑀓𑀁 𑀓𑀸𑀭𑁂𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀅𑀳𑁄𑀲𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀧𑀮𑁆𑀮𑀗𑁆𑀓𑀤𑀸𑀬𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀳𑁂𑀝𑁆𑀞𑀸 𑀯𑀺𑀬 𑀉𑀧𑀭𑀺𑀧𑀺 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀦𑀸𑀫𑁂𑀦 𑀣𑁂𑀭𑀸𑀦𑀁 𑀦𑀸𑀫𑀸𑀦𑀺 𑀏𑀯𑀫𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁭. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀧𑀮𑁆𑀮𑀗𑁆𑀓𑁄 𑀳𑀺 𑀫𑀬𑀸 𑀤𑀺𑀦𑁆𑀦𑁄𑀢𑀺 𑀧𑀮𑁆𑀮𑀗𑁆𑀓𑀁 𑀊𑀭𑀼𑀩𑀤𑁆𑀥𑀸𑀲𑀦𑀁 𑀓𑀢𑁆𑀯𑀸 𑀬𑀢𑁆𑀣 𑀉𑀧𑀯𑀻𑀲𑀦𑁆𑀢𑀺 𑀦𑀺𑀲𑀻𑀤𑀦𑁆𑀢𑀺, 𑀲𑁄 𑀧𑀮𑁆𑀮𑀗𑁆𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀧𑀮𑁆𑀮𑀗𑁆𑀓𑁄 𑀲𑀢𑁆𑀢𑀭𑀢𑀦𑀫𑀬𑁄 𑀫𑀬𑀸 𑀤𑀺𑀦𑁆𑀦𑁄 𑀧𑀽𑀚𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀉𑀢𑁆𑀢𑀭𑀲𑀧𑀘𑁆𑀙𑀤𑁄𑀢𑀺 𑀲𑀳 𑀉𑀢𑁆𑀢𑀭𑀘𑁆𑀙𑀤𑁂𑀦 𑀲𑀳 𑀧𑀘𑁆𑀙𑀤𑁂𑀦 𑀲𑀉𑀢𑁆𑀢𑀭𑀲𑀧𑀘𑁆𑀙𑀤𑁄, 𑀉𑀧𑀭𑀺𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀆𑀲𑀦𑀁 𑀉𑀢𑁆𑀢𑀫𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀮𑁆𑀮𑀗𑁆𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀧𑀦𑁆𑀦𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁬. 𑀩𑀦𑁆𑀥𑀼𑀚𑀻𑀯𑀓𑀯𑀕𑁆𑀕𑁄

𑁧. 𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀯𑀟𑁆𑀠𑀦𑀢𑁆𑀣𑀸𑀬 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀢𑀁 𑀞𑀢𑁆𑀯𑀸 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀲 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀭𑀽𑀧𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀚𑀸𑀢𑁄 𑀕𑁂𑀳𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧. 𑀲𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀦𑁆𑀢𑀺 𑀅𑀩𑁆𑀪𑀸, 𑀫𑀳𑀺𑀓𑀸, 𑀥𑀼𑀫𑁄, 𑀭𑀚𑁄, 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑀫𑀮𑁂𑀳𑀺 𑀯𑀺𑀫𑀼𑀢𑁆𑀢𑀁 𑀘𑀦𑁆𑀤𑀁 𑀇𑀯 𑀤𑀺𑀬𑀟𑁆𑀠𑀲𑀳𑀲𑁆𑀲𑀼𑀧𑀓𑁆𑀓𑀺𑀮𑁂𑀲𑀫𑀮𑀸𑀦𑀁 𑀧𑀳𑀻𑀦𑀢𑁆𑀢𑀸 𑀯𑀺𑀫𑀮𑀁 𑀦𑀺𑀓𑁆𑀓𑀺𑀮𑁂𑀲𑀢𑁆𑀢𑀸 𑀲𑀼𑀤𑁆𑀥𑀁 𑀧𑀲𑀦𑁆𑀦𑀁 𑀲𑀺𑀔𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀮𑁂𑀲𑀓𑀤𑁆𑀤𑀫𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀯𑀺𑀮𑀁. 𑀦𑀦𑁆𑀤𑀻𑀪𑀯𑀲𑀗𑁆𑀔𑀸𑀢𑀸𑀬 𑀩𑀮𑀯𑀲𑁆𑀦𑁂𑀳𑀸𑀬 𑀧𑀭𑀺𑀲𑀫𑀦𑁆𑀢𑀢𑁄 𑀔𑀻𑀡𑀢𑁆𑀢𑀸 𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀁. 𑀢𑀺𑀡𑁆𑀡𑀁 𑀮𑁄𑀓𑁂𑀢𑀺 𑀮𑁄𑀓𑀢𑁆𑀢𑀬𑀢𑁄 𑀢𑀺𑀡𑁆𑀡𑀁 𑀉𑀢𑁆𑀢𑀺𑀡𑁆𑀡𑀁 𑀅𑀢𑀺𑀓𑁆𑀓𑀦𑁆𑀢𑀁. 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀦𑀺𑀢𑁆𑀢𑀡𑁆𑀳𑀦𑁆𑀢𑀺 𑀅𑀢𑁆𑀣𑁄.

𑁨. 𑀦𑀺𑀩𑁆𑀩𑀸𑀧𑀬𑀦𑁆𑀢𑀁 𑀚𑀦𑀢𑀦𑁆𑀢𑀺 𑀥𑀫𑁆𑀫𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑁄 𑀚𑀦𑀢𑀁 𑀚𑀦𑀲𑀫𑀽𑀳𑀁 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀦𑀺𑀩𑁆𑀩𑀸𑀧𑀬𑀦𑁆𑀢𑀁 𑀯𑀽𑀧𑀲𑀫𑁂𑀦𑁆𑀢𑀁. 𑀲𑀬𑀁 𑀲𑀁𑀲𑀸𑀭𑀢𑁄 𑀢𑀺𑀡𑁆𑀡𑀁, 𑀲𑀩𑁆𑀩𑀲𑀢𑁆𑀢𑁂 𑀲𑀁𑀲𑀸𑀭𑀢𑁄 𑀢𑀸𑀭𑀬𑀦𑁆𑀢𑀁 𑀅𑀢𑀺𑀓𑁆𑀓𑀫𑁂𑀦𑁆𑀢𑀁 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀫𑀼𑀦𑀦𑀢𑁄 𑀚𑀸𑀦𑀦𑀢𑁄 𑀫𑀼𑀦𑀺𑀁 𑀲𑀺𑀔𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀦𑀲𑁆𑀫𑀺𑀁 𑀛𑀸𑀬𑀫𑀸𑀦𑀦𑁆𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀳𑀺 𑀛𑀸𑀬𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑀁 𑀘𑀺𑀢𑁆𑀢𑁂𑀦 𑀪𑀸𑀯𑁂𑀦𑁆𑀢𑀁 𑀯𑀦𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀏𑀓𑀕𑁆𑀕𑀁 𑀏𑀓𑀕𑁆𑀕𑀘𑀺𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁 𑀲𑀼𑀝𑁆𑀞𑀼 𑀆𑀭𑀫𑁆𑀫𑀡𑁂 𑀆𑀳𑀺𑀢𑀁 𑀞𑀧𑀺𑀢𑀘𑀺𑀢𑁆𑀢𑀁 𑀲𑀺𑀔𑀺𑀁 𑀫𑀼𑀦𑀺𑀁 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁩. 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀸𑀦𑀻𑀢𑀺 𑀩𑀦𑁆𑀥𑀽𑀦𑀁 𑀜𑀸𑀢𑀻𑀦𑀁 𑀚𑀻𑀯𑀓𑀁 𑀚𑀻𑀯𑀺𑀢𑀦𑀺𑀲𑁆𑀲𑀬𑀁 𑀳𑀤𑀬𑀫𑀁𑀲𑀮𑁄𑀳𑀺𑀢𑀁 𑀩𑀦𑁆𑀥𑀼𑀚𑀻𑀯𑀓𑀁 𑀳𑀤𑀬𑀫𑀁𑀲𑀮𑁄𑀳𑀺𑀢𑀲𑀫𑀸𑀦𑀯𑀡𑁆𑀡𑀁 𑀧𑀼𑀧𑁆𑀨𑀁 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀺𑀬𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑁂𑀦𑀘𑀺 𑀧𑀼𑀭𑁂 𑀓𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑁂𑀦 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀭𑁂𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀪𑀢𑀺𑀬𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀯𑀁 𑀤𑀼𑀓𑁆𑀔𑁂𑀦 𑀯𑀲𑀦𑁆𑀢𑁄 𑀧𑀭𑁂𑀲𑀁 𑀅𑀧𑀭𑀸𑀥𑀁 𑀓𑀢𑁆𑀯𑀸 𑀫𑀭𑀡𑀪𑀬𑁂𑀦 𑀧𑀮𑀸𑀬𑀺𑀢𑁆𑀯𑀸 𑀯𑀦𑀁 𑀧𑀸𑀯𑀺𑀲𑀺. 𑀢𑀢𑁆𑀣 𑀕𑀢𑀝𑁆𑀞𑀸𑀦𑁂 𑀧𑀸𑀝𑀮𑀺𑀩𑁄𑀥𑀺𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀢𑀫𑁆𑀩𑀯𑀡𑁆𑀡𑀁 𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀢𑀁 𑀲𑀩𑁆𑀩𑀁 𑀓𑀡𑁆𑀡𑀺𑀓𑁂 𑀑𑀘𑀺𑀦𑀺𑀢𑁆𑀯𑀸 𑀩𑁄𑀥𑀺𑀧𑀽𑀚𑀁 𑀅𑀓𑀸𑀲𑀺. 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑁂 𑀫𑀦𑀼𑀲𑁆𑀲𑀸 𑀧𑀤𑀸𑀦𑀼𑀧𑀤𑀺𑀓𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀲𑁄 𑀢𑁂 𑀤𑀺𑀲𑁆𑀯𑀸 𑀩𑁄𑀥𑀺𑀁 𑀆𑀯𑀚𑁆𑀚𑁂𑀦𑁆𑀢𑁄𑀯 𑀧𑀮𑀸𑀬𑀺𑀢𑁆𑀯𑀸 𑀪𑀬𑀸𑀦𑀓𑁂 𑀕𑀻𑀭𑀺𑀤𑀼𑀕𑁆𑀕𑀧𑀧𑀸𑀢𑁂 𑀧𑀢𑀺𑀢𑁆𑀯𑀸 𑀫𑀭𑀺.

𑁭. 𑀲𑁄 𑀩𑁄𑀥𑀺𑀧𑀽𑀚𑀸𑀬 𑀅𑀦𑀼𑀲𑁆𑀲𑀭𑀺𑀢𑀢𑁆𑀢𑀸 𑀢𑁂𑀦𑁂𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀢𑀸𑀯𑀢𑀺𑀁𑀲𑀸𑀤𑀻𑀲𑀼 𑀉𑀧𑀧𑀦𑁆𑀦𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑁂𑀲𑀁 𑀓𑀫𑁆𑀫𑀸𑀦𑀺 𑀧𑀭𑀓𑀫𑁆𑀫𑀸𑀦𑀺, 𑀧𑀭𑀓𑀫𑁆𑀫𑀸𑀦𑀁 𑀆𑀬𑀦𑁂 𑀓𑀭𑀡𑁂 𑀯𑀸𑀳𑀦𑁂 𑀥𑀸𑀭𑀡𑁂 𑀬𑀼𑀢𑁆𑀢𑁄 𑀬𑁄𑀚𑀺𑀢𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀯𑀻𑀣𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀉𑀤𑁂𑀦𑁆𑀢𑀁 𑀲𑀢𑀭𑀁𑀲𑀺𑀁 𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀻𑀣𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑁂𑀲𑀼 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀦𑀕𑀭𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀯𑀻𑀣𑀺𑀁 𑀲𑀚𑁆𑀚𑁂𑀢𑁆𑀯𑀸 𑀦𑀻𑀬𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀯𑀻𑀣𑀺𑀁 𑀲𑀫𑀁 𑀓𑀢𑁆𑀯𑀸 𑀥𑀚𑀁 𑀢𑀢𑁆𑀣 𑀉𑀲𑁆𑀲𑀸𑀧𑁂𑀲𑀺.

𑁧𑁫. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀩𑀳𑀼𑀫𑀸𑀦𑀳𑀤𑀬𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀺𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁂𑀦𑁆𑀢𑀁 𑀲𑀢𑀭𑀁𑀲𑀺𑀁 𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑁂𑀦𑁆𑀢𑀁 𑀉𑀕𑁆𑀕𑀘𑁆𑀙𑀦𑁆𑀢𑀁 𑀲𑀢𑀭𑀁𑀲𑀺𑀁 𑀲𑀢𑀧𑀪𑀁. 𑀲𑀢𑀭𑀁𑀲𑀻𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁, 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑀪𑀁 𑀲𑀽𑀭𑀺𑀬𑀁 𑀇𑀯𑀸𑀢𑀺 𑀅𑀢𑁆𑀣𑁄. 𑀧𑀻𑀢𑀭𑀁𑀲𑀺𑀁𑀯 𑀪𑀸𑀡𑀼𑀫𑀦𑁆𑀢𑀺 𑀧𑀻𑀢𑀭𑀁𑀲𑀺𑀁 𑀲𑀁𑀓𑀼𑀘𑀺𑀢𑀧𑀪𑀁 𑀪𑀸𑀡𑀼𑀫𑀁 𑀧𑀪𑀸𑀯𑀦𑁆𑀢𑀁 𑀘𑀦𑁆𑀤𑀫𑀡𑁆𑀟𑀮𑀁 𑀇𑀯 𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀻𑀣𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑁂𑀯𑀧𑀼𑀢𑁆𑀢𑁄 𑀅𑀳𑀁 𑀲𑀦𑁆𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀪𑀼𑀫𑁆𑀫𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀲𑀺𑀔𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀤𑀺𑀩𑁆𑀩𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺.

𑁨𑁧. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀏𑀓𑀢𑀺𑀁𑀲𑀓𑀧𑁆𑀧𑀩𑁆𑀪𑀦𑁆𑀢𑀭𑁂 𑀉𑀪𑀬𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀤𑁂𑀯𑀧𑀼𑀢𑁆𑀢𑁄 𑀅𑀳𑀁 𑀲𑀦𑁆𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀧𑀜𑁆𑀘𑀳𑀺 𑀤𑀺𑀩𑁆𑀩𑁂𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺 𑀤𑁂𑀯𑀸, 𑀤𑁂𑀯𑀸𑀦𑀁 𑀧𑀼𑀢𑁆𑀢𑁄, 𑀤𑁂𑀯𑁄 𑀏𑀯 𑀯𑀸 𑀧𑀼𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄, 𑀅𑀳𑀁 𑀤𑁂𑀯𑀧𑀼𑀢𑁆𑀢𑁄 𑀲𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑁄 𑀤𑀺𑀩𑁆𑀩𑀁 𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳 𑀧𑀓𑀸𑀭𑁂𑀦, 𑀕𑀳𑁂𑀢𑁆𑀯𑀸 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑁂𑀯𑀧𑀼𑀢𑁆𑀢𑁄 𑀅𑀳𑀁 𑀲𑀦𑁆𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀪𑀼𑀫𑁆𑀫𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀲𑀺𑀔𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀤𑀺𑀩𑁆𑀩𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺.

𑁨𑁫. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦𑀸𑀢𑀺𑀆𑀤𑀺𑀓𑀁 𑀲𑀩𑁆𑀩𑀁 𑀅𑀦𑀦𑁆𑀢𑀭𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑀫𑀻𑀧𑁂 𑀓𑀼𑀓𑁆𑀓𑀼𑀝𑁂 𑀦𑀸𑀫 𑀧𑀩𑁆𑀩𑀢𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀯𑀺𑀳𑀸𑀲𑀺. 𑀲𑁄 𑀢𑀢𑁆𑀣 𑀲𑀢𑁆𑀢 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀼𑀧𑁆𑀨𑀺𑀢𑀁 𑀓𑀤𑀫𑁆𑀩𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀽𑀚𑁂𑀲𑀺. 𑀢𑁂𑀧𑀺 ‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀫𑁄𑀤𑀦𑀁 𑀅𑀓𑀁𑀲𑀼.

𑁩𑁦. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀼𑀓𑁆𑀓𑀼𑀝𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀼𑀓𑁆𑀓𑀼𑀝𑀘𑀽𑀴𑀸𑀓𑀸𑀭𑁂𑀦 𑀧𑀩𑁆𑀩𑀢𑀓𑀽𑀝𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀓𑀼𑀓𑁆𑀓𑀼𑀝𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀧𑀓𑀸𑀭𑁂𑀦 𑀢𑀺𑀭𑁄 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀢𑀻𑀢𑀺 𑀧𑀩𑁆𑀩𑀢𑁄. 𑀢𑀫𑁆𑀳𑀺 𑀧𑀩𑁆𑀩𑀢𑀧𑀸𑀤𑀫𑁆𑀳𑀻𑀢𑀺 𑀢𑀲𑁆𑀫𑀺𑀁 𑀧𑀩𑁆𑀩𑀢𑀲𑀫𑀻𑀧𑁂. 𑀲𑀢𑁆𑀢 𑀩𑀼𑀤𑁆𑀥𑀸 𑀯𑀲𑀦𑁆𑀢𑀻𑀢𑀺 𑀲𑀢𑁆𑀢 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀲𑁆𑀫𑀺𑀁 𑀓𑀼𑀓𑁆𑀓𑀼𑀝𑀧𑀩𑁆𑀩𑀢𑀧𑀸𑀤𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁧. 𑀤𑀻𑀧𑀭𑀸𑀚𑀁𑀯 𑀉𑀕𑁆𑀕𑀢𑀦𑁆𑀢𑀺 𑀤𑀻𑀧𑀸𑀦𑀁 𑀭𑀸𑀚𑀸 𑀤𑀻𑀧𑀭𑀸𑀚𑀸, 𑀲𑀩𑁆𑀩𑁂𑀲𑀁 𑀤𑀻𑀧𑀸𑀦𑀁 𑀚𑀮𑀫𑀸𑀦𑀸𑀦𑀁 𑀢𑀸𑀭𑀓𑀸𑀦𑀁 𑀭𑀸𑀚𑀸 𑀘𑀦𑁆𑀤𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀩𑁆𑀩𑁂𑀲𑀼 𑀚𑀫𑁆𑀩𑀼𑀤𑀻𑀧𑀧𑀼𑀩𑁆𑀩𑀯𑀺𑀤𑁂𑀳𑀅𑀧𑀭𑀕𑁄𑀬𑀸𑀦𑀉𑀢𑁆𑀢𑀭𑀓𑀼𑀭𑀼𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑁂𑀲𑀼 𑀘 𑀭𑀸𑀚𑀸 𑀆𑀮𑁄𑀓𑀨𑀭𑀡𑀢𑁄 𑀘𑀦𑁆𑀤𑁄 𑀤𑀻𑀧𑀭𑀸𑀚𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦𑀪𑁂 𑀉𑀕𑁆𑀕𑀢𑀁 𑀘𑀦𑁆𑀤𑀁 𑀇𑀯 𑀧𑀼𑀧𑁆𑀨𑀺𑀢𑀁 𑀨𑀼𑀮𑁆𑀮𑀺𑀢𑀁 𑀓𑀤𑀫𑁆𑀩𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳 𑀧𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀲𑀢𑁆𑀢 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀫𑁄𑀓𑀺𑀭𑀺𑀁 𑀲𑀼𑀝𑁆𑀞𑀼 𑀑𑀓𑀺𑀭𑀺𑀁, 𑀆𑀤𑀭𑁂𑀦 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀢𑀺𑀡𑀲𑀽𑀮𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀡𑀲𑀽𑀮𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀓𑀼𑀲𑀮𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀢𑁆𑀣 𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀲𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑀫𑀻𑀧𑁂 𑀪𑀽𑀢𑀕𑀡𑁂 𑀦𑀸𑀫 𑀧𑀩𑁆𑀩𑀢𑁂 𑀯𑀲𑀦𑁆𑀢𑀁 𑀏𑀓𑀢𑀁 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑀁 𑀲𑀺𑀔𑀺𑀁 𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑀺𑀡𑀲𑀽𑀮𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀧𑀽𑀚𑁂𑀲𑀺. 𑀩𑀼𑀤𑁆𑀥𑁄𑀧𑀺 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑁩𑁫. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀪𑀽𑀢𑀕𑀡𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀪𑀽𑀢𑀕𑀡𑀸𑀦𑀁 𑀤𑁂𑀯𑀬𑀓𑁆𑀔𑀲𑀫𑀽𑀳𑀸𑀦𑀁 𑀆𑀯𑀸𑀲𑀪𑀽𑀢𑀢𑁆𑀢𑀸 𑀪𑀯𑀦𑀲𑀤𑀺𑀲𑀢𑁆𑀢𑀸 𑀅𑀯𑀺𑀭𑀽𑀴𑁆𑀳𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸 𑀘 𑀪𑀽𑀢𑀕𑀡𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀲𑁆𑀫𑀺𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀚𑀺𑀦𑁄 𑀚𑀺𑀢𑀫𑀸𑀭𑁄 𑀩𑀼𑀤𑁆𑀥𑁄 𑀯𑀲𑀢𑁂 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀳𑀺 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑁩𑁬. 𑀏𑀓𑀽𑀦𑀲𑀢𑀲𑀳𑀲𑁆𑀲𑀁, 𑀓𑀧𑁆𑀧𑀁 𑀦 𑀯𑀺𑀦𑀺𑀧𑀸𑀢𑀺𑀓𑁄𑀢𑀺 𑀢𑁂𑀦 𑀢𑀺𑀡𑀲𑀽𑀮𑀧𑀼𑀧𑁆𑀨𑀧𑀽𑀚𑀸𑀓𑀭𑀡𑀨𑀮𑁂𑀦 𑀦𑀺𑀭𑀦𑁆𑀢𑀭𑀁 𑀏𑀓𑀽𑀦𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀦𑀁 𑀅𑀯𑀺𑀦𑀺𑀧𑀸𑀢𑀓𑁄 𑀘𑀢𑀼𑀭𑀸𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑁄 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀪𑀯𑀫𑁂𑀯 𑀉𑀧𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀢𑀺𑀡𑀲𑀽𑀮𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀯𑀘𑁆𑀙𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀚𑀺𑀦𑀦𑀺𑀲𑀪𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀯𑁂𑀤𑀢𑁆𑀢𑀬𑀸𑀤𑀻𑀲𑀼 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀤𑀺𑀲𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀢𑀢𑁆𑀣 𑀅𑀕𑀫𑀸𑀲𑀺. 𑀲𑁄 𑀢𑀸𑀧𑀲𑁄 𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀮𑀓𑁆𑀔𑀡𑀲𑀢𑁆𑀣𑁂𑀲𑀼 𑀙𑁂𑀓𑀢𑁆𑀢𑀸 𑀪𑀕𑀯𑀢𑁄 𑀮𑀓𑁆𑀔𑀡𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑁄 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀆𑀓𑀸𑀲𑀢𑁄 𑀅𑀦𑁄𑀢𑀺𑀡𑁆𑀡𑀢𑁆𑀢𑀸 𑀧𑀽𑀚𑀸𑀲𑀓𑁆𑀓𑀸𑀭𑁂 𑀅𑀓𑀢𑁂𑀬𑁂𑀯 𑀆𑀓𑀸𑀲𑁂𑀦𑁂𑀯 𑀧𑀓𑁆𑀓𑀸𑀫𑀺. 𑀅𑀣 𑀲𑁄 𑀢𑀸𑀧𑀲𑁄 𑀲𑀲𑀺𑀲𑁆𑀲𑁄 𑀦𑀸𑀕𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀢𑁂𑀦 𑀧𑀼𑀧𑁆𑀨𑁂𑀦 𑀪𑀕𑀯𑀢𑁄 𑀕𑀢𑀤𑀺𑀲𑀸𑀪𑀸𑀕𑀫𑀕𑁆𑀕𑀁 𑀧𑀽𑀚𑁂𑀲𑀺.

𑁩𑁯. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀲𑀦𑀁 𑀲𑁄𑀪𑀬𑀫𑀸𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀓𑀼𑀲𑀮𑀓𑀫𑁆𑀫𑁂𑀦 𑀫𑀬𑀸 𑀅𑀬𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀅𑀢𑀻𑀢𑀓𑀫𑁆𑀫𑀁 𑀲𑀭𑀦𑁆𑀢𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀯𑀘𑁆𑀙𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀘𑁆𑀙𑀕𑁄𑀢𑁆𑀢𑁂 𑀚𑀸𑀢𑀢𑁆𑀢𑀸 𑀯𑀘𑁆𑀙𑁄, 𑀲𑀼𑀦𑁆𑀤𑀭𑁄 𑀘 𑀲𑁄 𑀯𑀘𑁆𑀙𑁄 𑀘𑁂𑀢𑀺 𑀲𑀼𑀯𑀘𑁆𑀙𑁄. 𑀦𑀸𑀫𑁂𑀦 𑀲𑀼𑀯𑀘𑁆𑀙𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽 𑀯𑁂𑀤𑀢𑁆𑀢𑀬𑀸𑀤𑀺𑀲𑀓𑀮𑀫𑀦𑁆𑀢𑀲𑀢𑁆𑀣𑁂 𑀓𑁄𑀝𑀺𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀦𑁂𑀲𑀸𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀸𑀯𑀦𑀁 𑀧𑀯𑀺𑀝𑁆𑀞𑁄 𑀢𑀢𑁆𑀣 𑀲𑀼𑀧𑀼𑀧𑁆𑀨𑀺𑀢𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑁆𑀢𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀧𑀻𑀢𑀺𑀯𑀲𑁂𑀦 𑀪𑀕𑀯𑀦𑁆𑀢𑀁 𑀲𑀭𑀺𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀲𑀳 𑀓𑀡𑁆𑀡𑀺𑀓𑀸𑀳𑀺 𑀑𑀘𑀺𑀦𑀺𑀢𑁆𑀯𑀸 𑀯𑀸𑀮𑀼𑀓𑀸𑀳𑀺 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀧𑀽𑀚𑁂𑀲𑀺.

𑁪𑁬. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑁂 𑀦𑀺𑀭𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄𑀬𑁂𑀯 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀼𑀩𑁆𑀩𑀯𑀸𑀲𑀦𑀸𑀩𑀮𑁂𑀦 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀓𑀼𑀫𑀼𑀤𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀼𑀫𑀼𑀤𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑀲𑁆𑀲 𑀆𑀲𑀦𑁆𑀦𑁂 𑀫𑀳𑀦𑁆𑀢𑁂 𑀚𑀸𑀢𑀲𑁆𑀲𑀭𑁂 𑀓𑀼𑀓𑀼𑀢𑁆𑀣𑁄 𑀦𑀸𑀫 𑀧𑀓𑁆𑀔𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀓𑁂𑀦𑀘𑀺 𑀅𑀓𑀼𑀲𑀮𑁂𑀦 𑀧𑀓𑁆𑀔𑀻 𑀲𑀫𑀸𑀦𑁄𑀧𑀺 𑀧𑀼𑀩𑁆𑀩𑁂 𑀓𑀢𑀲𑀫𑁆𑀪𑀸𑀭𑁂𑀦 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑁂𑀲𑀼 𑀙𑁂𑀓𑁄 𑀲𑀻𑀮𑀯𑀸 𑀧𑀸𑀡𑀕𑁄𑀘𑀭𑀢𑁄 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀫𑀻𑀧𑁂 𑀘𑀗𑁆𑀓𑀫𑀢𑀺. 𑀅𑀣 𑀲𑁄 𑀲𑀓𑀼𑀡𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀓𑀼𑀫𑀼𑀤𑀧𑀼𑀧𑁆𑀨𑀁 𑀟𑀁𑀲𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀢𑁆𑀣𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺.

𑁫𑁧. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑁄𑀢𑀺 𑀏𑀢𑁆𑀣 𑀲𑀢𑀧𑀢𑁆𑀢𑁂𑀳𑀺 𑀲𑀫𑁆𑀧𑀼𑀡𑁆𑀡𑁄 𑀲𑁂𑀢𑀧𑀤𑀼𑀫𑁄 𑀘 𑀢𑀻𑀡𑀺 𑀦𑀻𑀮𑀭𑀢𑁆𑀢𑀲𑁂𑀢𑀼𑀧𑁆𑀧𑀮𑀸𑀦𑀺 𑀘 𑀧𑀤𑀼𑀫𑀼𑀧𑁆𑀧𑀮𑀸𑀦𑀺 𑀢𑁂𑀳𑀺 𑀲𑀜𑁆𑀙𑀦𑁆𑀦𑁄 𑀕𑀳𑀦𑀻𑀪𑀽𑀢𑁄 𑀲𑀫𑁆𑀧𑀼𑀡𑁆𑀡𑁄 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑁆𑀣𑀝𑁄𑀢𑀺 𑀧𑀼𑀡𑁆𑀟𑀭𑀻𑀓𑁂𑀳𑀺 𑀭𑀢𑁆𑀢𑀧𑀤𑀼𑀫𑁂𑀳𑀺 𑀑𑀢𑁆𑀣𑀝𑁄 𑀲𑀫𑁆𑀧𑀼𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀓𑀼𑀫𑀼𑀤𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑁄𑀴𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁭. 𑀲𑀼𑀧𑀸𑀭𑀺𑀘𑀭𑀺𑀬𑀯𑀕𑁆𑀕𑁄

𑁧. 𑀲𑀼𑀧𑀸𑀭𑀺𑀘𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀧𑀸𑀭𑀺𑀘𑀭𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀫𑀼𑀦𑀺𑀧𑀼𑀗𑁆𑀕𑀯𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀳𑀺𑀫𑀯𑀢𑀺 𑀬𑀓𑁆𑀔𑀲𑀫𑀸𑀕𑀫𑀁 𑀕𑀢𑁄 𑀪𑀕𑀯𑀢𑁄 𑀤𑁂𑀯𑀬𑀓𑁆𑀔𑀕𑀦𑁆𑀥𑀩𑁆𑀩𑀦𑀸𑀕𑀸𑀦𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀉𑀪𑁄 𑀳𑀢𑁆𑀣𑁂 𑀆𑀪𑀼𑀚𑀺𑀢𑁆𑀯𑀸 𑀅𑀧𑁆𑀨𑁄𑀝𑁂𑀲𑀺 𑀦𑀫𑀲𑁆𑀲𑀺 𑀘. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀢𑀢𑁄 𑀘𑀼𑀢𑁄 𑀉𑀧𑀭𑀺 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀼𑀫𑁄𑀢𑀺 𑀬𑀲𑁆𑀲 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀼𑀫𑀁 𑀉𑀕𑁆𑀕𑀦𑁆𑀢𑁆𑀯𑀸 𑀧𑀸𑀤𑀢𑀮𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀲𑁄 𑀪𑀕𑀯𑀸 𑀧𑀤𑀼𑀫𑁄𑀢𑀺 𑀲𑀗𑁆𑀔𑀁 𑀕𑀢𑁄, 𑀇𑀥 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀪𑀕𑀯𑀸 𑀧𑀯𑀦𑀸 𑀯𑀲𑀦𑀯𑀺𑀳𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫 𑀯𑀦𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀓𑁆𑀔𑀸𑀦𑀁 𑀲𑀫𑀬𑁄𑀢𑀺 𑀤𑁂𑀯𑀸𑀦𑀁 𑀲𑀫𑀸𑀕𑀫𑁄 𑀆𑀲𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀸𑀧𑁂𑀓𑁆𑀔𑀺𑀁𑀲𑀼 𑀢𑀸𑀯𑀤𑁂𑀢𑀺 𑀢𑀲𑁆𑀫𑀺𑀁 𑀤𑁂𑀲𑀦𑀸𑀓𑀸𑀮𑁂 𑀅𑀥𑀺𑀅𑀧𑁂𑀓𑁆𑀔𑀺𑀁𑀲𑀼, 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑀲𑀻𑀮𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀼𑀧𑀸𑀭𑀺𑀘𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀓𑀡𑀯𑁂𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀡𑀯𑁂𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀼𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀧𑀸𑀮𑀓𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀅𑀣 𑀲𑁄 𑀅𑀦𑁆𑀢𑁂𑀧𑀼𑀭𑀧𑀸𑀮𑀓𑁄 𑀘𑀭𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸 𑀓𑀡𑀯𑁂𑀭𑀧𑀼𑀧𑁆𑀨𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑁄𑀬𑁂𑀯 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁭. 𑀲𑁄 𑀧𑀢𑁆𑀢𑀅𑀕𑁆𑀕𑀨𑀮𑁄 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀡𑀯𑁂𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀔𑀚𑁆𑀚𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀲𑁆𑀲𑀲𑁆𑀲 𑀔𑁄 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀔𑀚𑁆𑀚𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀼𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀫𑁆𑀩𑀚𑀫𑁆𑀩𑀼𑀆𑀤𑀺𑀫𑀦𑁂𑀓𑀁 𑀫𑀥𑀼𑀭𑀨𑀮𑀸𑀨𑀮𑀁 𑀦𑀸𑀴𑀺𑀓𑁂𑀭𑀁 𑀧𑀽𑀯𑀔𑀚𑁆𑀚𑀓𑀜𑁆𑀘 𑀅𑀤𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀧𑀲𑀸𑀤𑀯𑀟𑁆𑀠𑀦𑀢𑁆𑀣𑀸𑀬 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑁄𑀬𑁂𑀯 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑀤𑁆𑀥𑁄 𑀧𑀲𑀸𑀤𑀩𑀳𑀼𑀫𑀸𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀲𑀦𑀁 𑀲𑁄𑀪𑁂𑀦𑁆𑀢𑁄 𑀲𑀻𑀮𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁩. 𑀲𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀦𑁆𑀢𑁄 ‘‘𑀧𑀼𑀩𑁆𑀩𑁂 𑀫𑀬𑀸 𑀲𑀼𑀔𑁂𑀢𑁆𑀢𑁂 𑀓𑀼𑀲𑀮𑀁 𑀓𑀢𑀁 𑀲𑀼𑀦𑁆𑀤𑀭’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀔𑁄 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀲𑁆𑀲𑁄𑀧𑀺 𑀪𑀯𑀲𑀫𑁆𑀧𑀢𑁆𑀢𑀺𑀬𑁄 𑀤𑀤𑀫𑀸𑀦𑁄 𑀚𑀸𑀢𑁄𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀯𑀲𑁂𑀦 𑀢𑀺𑀲𑁆𑀲𑁄. 𑀅𑀣 𑀯𑀸 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀅𑀲𑁆𑀲𑀸𑀲𑁂𑀦𑁆𑀢𑁄 𑀑𑀯𑀤𑀦𑁆𑀢𑁄 𑀳𑁂𑀢𑀼𑀲𑀫𑁆𑀧𑀦𑁆𑀦𑀧𑀼𑀕𑁆𑀕𑀮𑁂 𑀲𑀕𑁆𑀕𑀫𑁄𑀓𑁆𑀔𑀤𑁆𑀯𑀬𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀩𑀼𑀤𑁆𑀥𑁄 𑀚𑀸𑀢𑁄𑀢𑀺 𑀢𑀺𑀲𑁆𑀲𑁄. 𑀲𑀫𑀸𑀧𑀢𑁆𑀢𑀺𑀕𑀼𑀡𑀸𑀤𑀻𑀳𑀺 𑀪𑀕𑁂𑀳𑀺 𑀬𑀼𑀢𑁆𑀢𑁄𑀢𑀺 𑀪𑀕𑀯𑀸, 𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀧𑀼𑀩𑁆𑀩𑁂 𑀅𑀳𑀁 𑀨𑀮𑀁 𑀅𑀤𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀴𑀺𑀓𑁂𑀭𑀜𑁆𑀘 𑀧𑀸𑀤𑀸𑀲𑀺𑀦𑁆𑀢𑀺 𑀦𑀸𑀴𑀺𑀓𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀨𑀮𑀁 𑀦𑀸𑀴𑀺𑀓𑁂𑀭𑀁, 𑀢𑀜𑁆𑀘 𑀨𑀮𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀔𑀚𑁆𑀚𑀓𑀁 𑀅𑀪𑀺𑀲𑀫𑁆𑀫𑀢𑀦𑁆𑀢𑀺 𑀔𑀸𑀤𑀺𑀢𑀩𑁆𑀩𑀁 𑀔𑀚𑁆𑀚𑀓𑀁 𑀅𑀪𑀺 𑀯𑀺𑀲𑁂𑀲𑁂𑀦 𑀫𑀥𑀼𑀲𑀓𑁆𑀓𑀭𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀁 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑀺𑀢𑀁 𑀲𑀼𑀦𑁆𑀤𑀭𑀁 𑀫𑀥𑀼𑀭𑀦𑁆𑀢𑀺 𑀲𑀫𑁆𑀫𑀢𑀁 𑀜𑀸𑀢𑀁 𑀅𑀪𑀺𑀲𑀫𑁆𑀫𑀢𑀁 𑀔𑀚𑁆𑀚𑀓𑀜𑁆𑀘 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀔𑀚𑁆𑀚𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀤𑁂𑀲𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀤𑁂𑀲𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄 𑀅𑀳𑁄𑀲𑀺. 𑀢𑀤𑀸 𑀅𑀢𑁆𑀣𑀤𑀲𑁆𑀲𑀻 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺. 𑀲𑁄 𑀉𑀧𑀸𑀲𑀓𑁄 𑀪𑀕𑀯𑀢𑁄 𑀕𑀢𑀤𑀺𑀲𑀸𑀪𑀸𑀕𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺.

𑁧𑁮. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀉𑀧𑀪𑁄𑀕𑀧𑀭𑀺𑀪𑁄𑀕𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀖𑀭𑀸𑀯𑀸𑀲𑁂 𑀅𑀦𑀮𑁆𑀮𑀻𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀦𑀺𑀮𑀜𑁆𑀚𑀲𑁂𑀢𑀺 ‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦’’𑀦𑁆𑀢𑀺 (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧) 𑀧𑀭𑀺𑀬𑀸𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀦𑀺𑀮𑀲𑁆𑀲 𑀯𑀸𑀢𑀲𑁆𑀲 𑀅𑀜𑁆𑀚𑀲𑀁 𑀕𑀫𑀦𑀫𑀕𑁆𑀕𑁄𑀢𑀺 𑀅𑀦𑀺𑀮𑀜𑁆𑀚𑀲𑀁, 𑀢𑀲𑁆𑀫𑀺𑀁 𑀅𑀦𑀺𑀮𑀜𑁆𑀚𑀲𑁂, 𑀆𑀓𑀸𑀲𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑁂𑀲𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀓𑀡𑀺𑀓𑀸𑀭𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑁂𑀲𑁆𑀲𑀪𑀽 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀡𑀺𑀓𑀸𑀭𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀲𑁆𑀲𑀪𑀽 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑁄 𑀫𑀳𑀸𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀲𑁄𑀧𑀺 𑀉𑀧𑀸𑀲𑀓𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀚𑀮𑀫𑀸𑀦𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀡𑀺𑀓𑀸𑀭𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀙𑀢𑁆𑀢𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀧𑀽𑀚𑁂𑀲𑀺, 𑀢𑀁 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀲𑀢𑁆𑀢𑀸𑀳𑀁 𑀅𑀫𑀺𑀮𑀸𑀢𑀁 𑀳𑀼𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀪𑀕𑀯𑀸𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀜𑁆𑀘 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀳𑀸𑀲𑀺, 𑀲𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺.

𑁨𑁩. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀖𑀭𑀸𑀯𑀸𑀲𑁂 𑀅𑀦𑀮𑁆𑀮𑀻𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀚𑀺𑀦𑀲𑀸𑀲𑀦𑀁 𑀲𑁄𑀪𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑁂𑀲𑁆𑀲𑀪𑀽 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑁆𑀲𑀪𑀽𑀢𑀺 𑀯𑁂𑀲𑁆𑀲𑁂 𑀯𑁂𑀲𑁆𑀲𑀚𑀦𑁂 𑀪𑀼𑀦𑀸𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑁂𑀲𑁆𑀲𑀪𑀽. 𑀅𑀣 𑀯𑀸 𑀯𑁂𑀲𑁆𑀲𑁂 𑀧𑀜𑁆𑀘𑀯𑀺𑀥𑀫𑀸𑀭𑁂 𑀅𑀪𑀺𑀪𑀼𑀦𑀸𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀯𑁂𑀲𑁆𑀲𑀪𑀽. 𑀲𑀸𑀫𑀁𑀬𑁂𑀯 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀸𑀫𑁂𑀦 𑀯𑁂𑀲𑁆𑀲𑀪𑀽 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀤𑀺𑀯𑀸𑀯𑀺𑀳𑀸𑀭𑀸𑀬 𑀫𑀼𑀦𑀻𑀢𑀺 𑀤𑀺𑀩𑁆𑀩𑀢𑀺 𑀧𑀓𑀸𑀲𑁂𑀢𑀺 𑀢𑀁 𑀢𑀁 𑀯𑀢𑁆𑀣𑀼𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀤𑀺𑀯𑀸. 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀢𑁆𑀣𑀗𑁆𑀕𑀫𑁄, 𑀢𑀸𑀯 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁄, 𑀯𑀺𑀳𑀭𑀡𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀯𑀢𑁆𑀢𑀦𑀁 𑀯𑀺𑀳𑀸𑀭𑁄, 𑀤𑀺𑀯𑀸𑀬 𑀯𑀺𑀳𑀸𑀭𑁄 𑀤𑀺𑀯𑀸𑀯𑀺𑀳𑀸𑀭𑁄, 𑀢𑀲𑁆𑀲 𑀤𑀺𑀯𑀸𑀯𑀺𑀳𑀸𑀭𑀸𑀬 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄 𑀩𑀼𑀤𑁆𑀥𑀫𑀼𑀦𑀺 𑀫𑀳𑀸𑀯𑀦𑀁 𑀑𑀕𑀸𑀳𑀺𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀡𑀺𑀓𑀸𑀭𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀨𑀼𑀲𑁆𑀲𑁄 𑀦𑀸𑀫𑀸𑀣 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀅𑀳𑁄𑀲𑀺. 𑀢𑀤𑀸 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀯𑀻𑀣𑀺𑀬𑀁 𑀘𑀭𑀫𑀸𑀦𑁄 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀲𑁄 𑀉𑀧𑀸𑀲𑀓𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀧𑀽𑀭𑀁 𑀲𑀧𑁆𑀧𑀺𑀢𑁂𑀮𑀁 𑀅𑀤𑀸𑀲𑀺, 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀦𑀺𑀩𑁆𑀩𑀢𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀫𑀥𑀼𑀭𑀸𑀳𑀸𑀭𑀲𑀫𑀗𑁆𑀕𑀻 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁨𑁮. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀨𑀼𑀲𑁆𑀲𑁄 𑀦𑀸𑀫𑀸𑀣 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀼𑀲𑁆𑀲𑁄𑀢𑀺 𑀨𑀼𑀲𑁆𑀲𑀦𑀓𑁆𑀔𑀢𑁆𑀢𑀬𑁄𑀕𑁂𑀦 𑀚𑀸𑀢𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀥𑁂𑀬𑁆𑀬𑁂𑀦 𑀨𑀼𑀲𑁆𑀲𑁄. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀁 𑀨𑀼𑀲𑀺 𑀧𑀲𑁆𑀲𑀺 𑀲𑀘𑁆𑀙𑀺 𑀅𑀓𑀸𑀲𑀻𑀢𑀺 𑀨𑀼𑀲𑁆𑀲𑁄. 𑀅𑀣 𑀯𑀸 𑀲𑀫𑀢𑀺𑀁𑀲𑀧𑀸𑀭𑀫𑀺𑀢𑀸𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀓𑀮𑁂 𑀘 𑀢𑁂𑀧𑀺𑀝𑀓𑁂 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀨𑀼𑀲𑀺 𑀧𑀲𑁆𑀲𑀺 𑀅𑀜𑁆𑀜𑀸𑀲𑀻𑀢𑀺 𑀨𑀼𑀲𑁆𑀲𑁄. 𑀪𑀕𑁆𑀕𑀯𑀸 𑀪𑀕𑁆𑀬𑀯𑀸 𑀬𑀼𑀢𑁆𑀢𑁄𑀢𑀺𑀆𑀤𑀺𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀲𑀫𑀗𑁆𑀕𑀺𑀢𑀸𑀬 𑀪𑀕𑀯𑀸. 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄𑀢𑀺 𑀆𑀳𑀼𑀢𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀧𑀽𑀚𑀸𑀲𑀓𑁆𑀓𑀸𑀭𑀸, 𑀢𑁂𑀲𑀁 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀭𑀳𑀢𑀻𑀢𑀺 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄. 𑀫𑀳𑀸𑀚𑀦𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀯𑀻𑀭𑁄 𑀨𑀼𑀲𑁆𑀲𑁄 𑀦𑀸𑀫 𑀪𑀕𑀯𑀸 𑀯𑀻𑀣𑀺𑀬𑀁 𑀅𑀣 𑀢𑀤𑀸 𑀕𑀘𑁆𑀙𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀬𑀽𑀣𑀺𑀓𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀬𑀽𑀣𑀺𑀓𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀧𑀼𑀭𑀺𑀫𑀫𑀼𑀦𑀺𑀦𑁆𑀤𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀘 𑀚𑀸𑀢𑀺𑀲𑀢𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀨𑀼𑀲𑁆𑀲𑀲𑁆𑀲𑁂𑀯 𑀪𑀕𑀯𑀢𑁄 𑀓𑀸𑀮𑁂 𑀲𑀼𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀦𑀼𑀲𑁄𑀢𑀁 𑀘𑀭𑀫𑀸𑀦𑁄 𑀨𑀼𑀲𑁆𑀲𑀁 𑀪𑀕𑀯𑀦𑁆𑀢𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀚𑀮𑀫𑀸𑀦𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀢𑁆𑀣 𑀚𑀸𑀢𑀁 𑀬𑀽𑀣𑀺𑀓𑀸𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀫𑀓𑀸𑀲𑀺.

𑁩𑁩. 𑀲𑁄 𑀢𑀢𑁆𑀣 𑀢𑁂𑀦 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀲𑀦𑀁 𑀲𑁄𑀪𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀬𑀽𑀣𑀺𑀓𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀯𑀭𑀸𑀬𑀁 𑀧𑀼𑀭𑁂 𑀭𑀫𑁆𑀫𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀓𑀸𑀮𑁂 𑀬𑀼𑀯𑀭𑀸𑀚𑀪𑀸𑀯𑀁 𑀧𑀢𑁆𑀯𑀸 𑀧𑀸𑀓𑀝𑁄 𑀏𑀓𑀁 𑀚𑀦𑀧𑀤𑀁 𑀮𑀪𑀺𑀢𑁆𑀯𑀸 𑀢𑀢𑁆𑀭𑀸𑀥𑀺𑀧𑀢𑀺𑀪𑀽𑀢𑁄 𑀲𑀓𑀮𑀚𑀦𑀧𑀤𑀯𑀸𑀲𑀺𑀦𑁄 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀣𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸 𑀢𑀁 𑀚𑀦𑀧𑀤𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀲𑁄 𑀬𑀼𑀯𑀭𑀸𑀚𑀸 𑀧𑀡𑁆𑀡𑀸𑀓𑀸𑀭𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀲𑀼𑀔𑀼𑀫𑀯𑀢𑁆𑀣𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀁 𑀯𑀢𑁆𑀣𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑀫𑁆𑀧𑀺 𑀯𑀢𑁆𑀣𑀁 𑀪𑀕𑀯𑀦𑁆𑀢𑀫𑁂𑀯 𑀅𑀦𑀼𑀩𑀦𑁆𑀥𑀺. 𑀅𑀣 𑀲𑁄 𑀬𑀼𑀯𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑀻𑀯 𑀧𑀲𑀦𑁆𑀦𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀪𑀕𑀯𑀢𑁄 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀝𑁆𑀞𑀸𑀦𑁂 𑀲𑀩𑁆𑀩𑁂 𑀚𑀦𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀁𑀲𑀼. 𑀪𑀕𑀯𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺. 𑀬𑀼𑀯𑀭𑀸𑀚𑀸 𑀢𑁂𑀦𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁮. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀯𑀭𑀸𑀬𑀁 𑀧𑀼𑀭𑁂 𑀭𑀫𑁆𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀯𑀭𑀦𑀸𑀫𑀓𑁂 𑀦𑀕𑀭𑁂 𑀭𑀫𑀡𑀻𑀬𑁂 𑀅𑀳𑀁 𑀭𑀸𑀚𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀯𑀢𑁆𑀣𑁂𑀦 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀲𑀫𑀸𑀤𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀫𑀸𑀤𑀧𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀓𑀢𑀓𑀼𑀲𑀮𑀲𑀫𑁆𑀪𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀯𑀲𑀫𑀸𑀦𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀩𑀳𑀽 𑀉𑀧𑀸𑀲𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀕𑀡𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 ‘‘𑀫𑀸𑀴𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀲𑀩𑁆𑀩𑁂 𑀲𑀫𑀸𑀤𑀧𑁂𑀢𑁆𑀯𑀸 𑀏𑀓𑀁 𑀫𑀸𑀴𑀓𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀧𑀡𑁆𑀟𑀭𑀧𑀼𑀮𑀺𑀦𑀁 𑀑𑀓𑀺𑀭𑀺𑀢𑁆𑀯𑀸 𑀪𑀕𑀯𑀢𑁄 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁪𑁪. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀦𑁆𑀥𑀦𑁆𑀢𑀺 𑀜𑀸𑀢𑀺𑀕𑁄𑀢𑁆𑀢𑀸𑀤𑀺𑀯𑀲𑁂𑀦 𑀏𑀓𑀲𑀫𑁆𑀩𑀦𑁆𑀥𑀸 𑀳𑁄𑀦𑁆𑀢𑀺 𑀲𑀓𑀮𑀦𑀕𑀭𑀯𑀸𑀲𑀺𑀦𑁄𑀢𑀺 𑀩𑀦𑁆𑀥𑀽, 𑀩𑀦𑁆𑀥𑀽 𑀏𑀢𑀲𑁆𑀫𑀺𑀁 𑀯𑀺𑀚𑁆𑀚𑀦𑁆𑀢𑀻𑀢𑀺 𑀩𑀦𑁆𑀥𑀼𑀫𑀢𑀻, 𑀢𑀲𑁆𑀲𑀸 𑀩𑀦𑁆𑀥𑀼𑀫𑀢𑀺𑀬𑀸 𑀦𑀸𑀫 𑀦𑀕𑀭𑁂 𑀫𑀳𑀸𑀧𑀽𑀕𑀕𑀡𑁄 𑀉𑀧𑀸𑀲𑀓𑀲𑀫𑀽𑀳𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀫𑀸𑀴𑀁 𑀓𑀲𑁆𑀲𑀸𑀫 𑀲𑀗𑁆𑀖𑀲𑁆𑀲𑀸𑀢𑀺 𑀏𑀢𑁆𑀣 𑀫𑀸𑀢𑀺 𑀕𑀡𑁆𑀳𑀸𑀢𑀺 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀚𑀦𑀸𑀦𑀁 𑀘𑀺𑀢𑁆𑀢𑀦𑁆𑀢𑀺 𑀫𑀸𑀴𑀁, 𑀅𑀣 𑀯𑀸 𑀲𑀫𑁆𑀧𑀢𑁆𑀢𑀬𑀢𑀺𑀕𑀡𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀺𑀯𑁂𑀓𑀓𑀭𑀡𑁂 𑀅𑀮𑀦𑁆𑀢𑀺 𑀫𑀸𑀴𑀁, 𑀫𑀸𑀴𑀫𑁂𑀯 𑀫𑀸𑀴𑀓𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀫𑀸𑀴𑀓𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀫𑀸𑀤𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀜𑁆𑀘𑀗𑁆𑀕𑀼𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀜𑁆𑀘𑀗𑁆𑀕𑀼𑀮𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁂 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀯𑀻𑀣𑀺𑀢𑁄 𑀯𑀺𑀳𑀸𑀭𑀁 𑀧𑀝𑀺𑀧𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀚𑀸𑀢𑀺𑀲𑀼𑀫𑀦𑀸𑀤𑀺𑀅𑀦𑁂𑀓𑀸𑀦𑀺 𑀲𑀼𑀕𑀦𑁆𑀥𑀧𑀼𑀧𑁆𑀨𑀸𑀦𑀺 𑀘𑀦𑁆𑀤𑀦𑀸𑀤𑀻𑀦𑀺 𑀘 𑀯𑀺𑀮𑁂𑀧𑀦𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄 𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀯𑀺𑀮𑁂𑀧𑀦𑁂𑀳𑀺 𑀪𑀕𑀯𑀢𑁄 𑀲𑀭𑀻𑀭𑁂 𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁫𑁦. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀦𑁆𑀢𑁄 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 ‘‘𑀇𑀫𑀁 𑀦𑀸𑀫 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀈𑀤𑀺𑀲𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀜𑁆𑀘𑀗𑁆𑀕𑀼𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀢𑁆𑀢𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁮. 𑀓𑀼𑀫𑀼𑀤𑀯𑀕𑁆𑀕𑁄

𑁧. 𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀲𑀫𑀻𑀧𑁂 𑀚𑀸𑀢𑀲𑁆𑀲𑀭𑀲𑁆𑀲 𑀆𑀲𑀦𑁆𑀦𑁂 𑀭𑀓𑁆𑀔𑀲𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀉𑀧𑀕𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀼𑀫𑀼𑀤𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀉𑀧𑀧𑀦𑁆𑀦𑁄 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀚𑁄 𑀭𑀓𑁆𑀔𑀲𑁄 𑀆𑀲𑀺𑀦𑁆𑀢𑀺 𑀢𑀲𑁆𑀫𑀺𑀁 𑀚𑀸𑀢𑀲𑁆𑀲𑀭𑀲𑀫𑀻𑀧𑁂 𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀭𑀓𑁆𑀔𑀲𑁄 𑀧𑀭𑀭𑀼𑀥𑀺𑀭𑀫𑀁𑀲𑀔𑀸𑀤𑀓𑁄 𑀦𑀺𑀤𑁆𑀤𑀬𑁄 𑀖𑁄𑀭𑀭𑀽𑀧𑁄 𑀪𑀬𑀸𑀦𑀓𑀲𑀪𑀸𑀯𑁄 𑀫𑀳𑀸𑀩𑀮𑁄 𑀫𑀳𑀸𑀣𑀸𑀫𑁄 𑀓𑀓𑁆𑀔𑀴𑁄 𑀬𑀓𑁆𑀔𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀓𑀼𑀫𑀼𑀤𑀁 𑀧𑀼𑀧𑁆𑀨𑀢𑁂 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀳𑀸𑀲𑀭𑁂 𑀲𑀽𑀭𑀺𑀬𑀭𑀁𑀲𑀺𑀬𑀸 𑀅𑀪𑀸𑀯𑁂 𑀲𑀢𑀺 𑀲𑀸𑀬𑀦𑁆𑀳𑁂 𑀫𑀓𑀼𑀴𑀺𑀢𑀁 𑀓𑀼𑀜𑁆𑀘𑀺𑀢𑀸𑀓𑀸𑀭𑁂𑀦 𑀦𑀺𑀧𑁆𑀧𑀪𑀁 𑀅𑀯𑀡𑁆𑀡𑀁 𑀳𑁄𑀢𑀻𑀢𑀺 ‘‘𑀓𑀼𑀫𑀼𑀤’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀧𑀼𑀧𑁆𑀨𑀁 𑀧𑀼𑀧𑁆𑀨𑀢𑁂 𑀯𑀺𑀓𑀲𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀫𑀢𑁆𑀢𑀸𑀦𑀺 𑀚𑀸𑀬𑀭𑁂𑀢𑀺 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀭𑀣𑀘𑀓𑁆𑀓𑀧𑀫𑀸𑀡𑀸𑀦𑀺 𑀳𑀼𑀢𑁆𑀯𑀸 𑀚𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀦𑀺𑀲𑁆𑀲𑁂𑀡𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑁂𑀡𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀟𑁆𑀠𑀓𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀪𑀕𑀯𑀢𑁄 𑀯𑀲𑀦𑀧𑀸𑀲𑀸𑀤𑀲𑁆𑀲𑀸𑀭𑁄𑀳𑀦𑀢𑁆𑀣𑀸𑀬 𑀲𑀸𑀭𑀓𑀝𑁆𑀞𑀫𑀬𑀁 𑀦𑀺𑀲𑁆𑀲𑁂𑀡𑀺𑀁 𑀓𑀢𑁆𑀯𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀧𑀲𑀸𑀤𑀲𑀁𑀯𑀟𑁆𑀠𑀦𑀢𑁆𑀣𑀸𑀬 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀉𑀧𑀭𑀺𑀧𑀸𑀲𑀸𑀤𑀁 𑀆𑀭𑀼𑀳𑀺. 𑀲𑁄 𑀅𑀢𑀻𑀯 𑀧𑀲𑀦𑁆𑀦𑁄 𑀢𑁂𑀦𑁂𑀯 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀚𑀸𑀬𑀫𑀸𑀦𑁄 𑀦𑀺𑀲𑁆𑀲𑁂𑀡𑀺𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀉𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀫𑀦𑀼𑀲𑁆𑀲𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁯. 𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄𑀡𑁆𑀟𑀜𑁆𑀜𑀲𑁆𑀲𑀸𑀢𑀺 𑀓𑀼𑀘𑁆𑀙𑀺𑀢𑁄 𑀳𑀼𑀢𑁆𑀯𑀸 𑀟𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑁄𑀡𑁆𑀟𑁄, 𑀮𑀸𑀫𑀓𑀲𑀢𑁆𑀢𑁄, 𑀓𑁄𑀡𑁆𑀟𑀢𑁄 𑀅𑀜𑁆𑀜𑁄𑀢𑀺 𑀓𑁄𑀡𑁆𑀟𑀜𑁆𑀜𑁄, 𑀅𑀮𑀸𑀫𑀓𑁄 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀩𑁆𑀭𑀸𑀳𑁆𑀫𑀡𑀕𑁄𑀢𑁆𑀢𑁂𑀲𑀼 𑀓𑁄𑀡𑁆𑀟𑀜𑁆𑀜𑀕𑁄𑀢𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀓𑁄𑀡𑁆𑀟𑀜𑁆𑀜𑁄’’𑀢𑀺 𑀕𑁄𑀢𑁆𑀢𑀯𑀲𑁂𑀦 𑀢𑀲𑁆𑀲 𑀦𑀸𑀫𑀁, 𑀢𑀲𑁆𑀲 𑀓𑁄𑀡𑁆𑀟𑀜𑁆𑀜𑀲𑁆𑀲. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.

𑀦𑀺𑀲𑁆𑀲𑁂𑀡𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀭𑀢𑁆𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀢𑁆𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀦𑁂𑀲𑀸𑀤𑀓𑀼𑀮𑁂 𑀉𑀧𑁆𑀧𑀦𑁆𑀦𑁄 𑀫𑀺𑀕𑀯𑀥𑀸𑀬 𑀅𑀭𑀜𑁆𑀜𑁂 𑀯𑀺𑀘𑀭𑀫𑀸𑀦𑁄 𑀢𑀲𑁆𑀲 𑀓𑀸𑀭𑀼𑀜𑁆𑀜𑁂𑀦 𑀅𑀭𑀜𑁆𑀜𑁂 𑀘𑀭𑀫𑀸𑀦𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀼𑀧𑁆𑀨𑀺𑀢𑀁 𑀭𑀢𑁆𑀢𑀺𑀓𑀁 𑀦𑀸𑀫 𑀧𑀼𑀧𑁆𑀨𑀁 𑀓𑀼𑀝𑀚𑀧𑀼𑀧𑁆𑀨𑀜𑁆𑀘 𑀲𑀳 𑀯𑀡𑁆𑀝𑁂𑀦 𑀑𑀘𑀺𑀦𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀧𑀽𑀚𑁂𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁩. 𑀲𑁄 𑀢𑁂𑀦𑁂𑀯 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 ‘‘𑀦𑁂𑀲𑀸𑀤𑀪𑀽𑀢𑁂𑀦 𑀫𑀬𑀸 𑀓𑀢𑀓𑀼𑀲𑀮𑀁 𑀲𑀼𑀦𑁆𑀤𑀭’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀺𑀕𑀸𑀦𑀁 𑀮𑀼𑀤𑁆𑀤𑁄 𑀲𑀸𑀳𑀲𑀺𑀓𑁄 𑀫𑀸𑀭𑀓𑁄𑀢𑀺 𑀫𑀺𑀕𑀮𑀼𑀤𑁆𑀤𑁄, 𑀫𑀺𑀕𑁂𑀲𑀼 𑀯𑀸 𑀮𑀼𑀤𑁆𑀤𑁄 𑀮𑁄𑀪𑀻𑀢𑀺 𑀫𑀺𑀕𑀮𑀼𑀤𑁆𑀤𑁄, 𑀦𑁂𑀲𑀸𑀤𑁄 𑀆𑀲𑀺𑀁 𑀧𑀼𑀭𑁂𑀢𑀺 𑀅𑀢𑁆𑀣𑁄.

𑁧𑁪. 𑀭𑀢𑁆𑀢𑀺𑀓𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸𑀢𑀺 𑀧𑀤𑀼𑀫𑀧𑀼𑀧𑁆𑀨𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀽𑀭𑀺𑀬𑀭𑀁𑀲𑀺𑀲𑀫𑁆𑀨𑀲𑁆𑀲𑁂𑀦 𑀤𑀺𑀯𑀸 𑀧𑀼𑀧𑁆𑀨𑀦𑁆𑀢𑀺 𑀭𑀢𑁆𑀢𑀺𑀬𑀁 𑀫𑀓𑀼𑀴𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀚𑀸𑀢𑀺𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀧𑀦 𑀭𑀢𑁆𑀢𑀺𑀬𑀁 𑀧𑀼𑀧𑁆𑀨𑀦𑁆𑀢𑀺 𑀦𑁄 𑀤𑀺𑀯𑀸. 𑀢𑀲𑁆𑀫𑀸 𑀭𑀢𑁆𑀢𑀺𑀬𑀁 𑀧𑀼𑀧𑁆𑀨𑀦𑀢𑁄 𑀭𑀢𑁆𑀢𑀺𑀧𑀼𑀧𑁆𑀨𑀦𑀸𑀫𑀓𑀸𑀦𑀺 𑀅𑀦𑁂𑀓𑀸𑀦𑀺 𑀲𑀼𑀕𑀦𑁆𑀥𑀧𑀼𑀧𑁆𑀨𑀸𑀦𑀺 𑀘 𑀓𑀼𑀝𑀚𑀧𑀼𑀧𑁆𑀨𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀢𑁆𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀉𑀤𑀧𑀸𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀤𑀧𑀸𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀫𑀼𑀦𑀺𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 ‘‘𑀧𑀸𑀦𑀻𑀬𑀤𑀸𑀦𑀁 𑀫𑀬𑀸 𑀤𑀸𑀢𑀩𑁆𑀩𑀁, 𑀢𑀜𑁆𑀘 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀓𑀽𑀧𑀁 𑀔𑀦𑀸𑀧𑁂𑀢𑁆𑀯𑀸 𑀉𑀤𑀓𑀲𑀫𑁆𑀧𑀢𑁆𑀢𑀓𑀸𑀮𑁂 𑀇𑀝𑁆𑀞𑀓𑀸𑀳𑀺 𑀘𑀺𑀦𑀸𑀧𑁂𑀢𑁆𑀯𑀸 𑀣𑀺𑀭𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀝𑁆𑀞𑀺𑀢𑁂𑀦 𑀉𑀤𑀓𑁂𑀦 𑀧𑀼𑀡𑁆𑀡𑀁 𑀢𑀁 𑀉𑀤𑀧𑀸𑀦𑀁 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀦𑀺𑀬𑁆𑀬𑀸𑀤𑁂𑀲𑀺. 𑀪𑀕𑀯𑀸 𑀧𑀸𑀦𑀻𑀬𑀤𑀸𑀦𑀸𑀦𑀺𑀲𑀁𑀲𑀤𑀻𑀧𑀓𑀁 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑁄𑀓𑁆𑀔𑀭𑀡𑀻𑀉𑀤𑀧𑀸𑀦𑀧𑀸𑀦𑀻𑀬𑀸𑀤𑀺𑀲𑀫𑁆𑀧𑀦𑁆𑀦𑁄 𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁧𑁮. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑀧𑀸𑀦𑁄 𑀓𑀢𑁄 𑀫𑀬𑀸𑀢𑀺 𑀉𑀤𑀓𑀁 𑀧𑀺𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀤𑀧𑀸𑀦𑁄, 𑀓𑀽𑀧𑀧𑁄𑀓𑁆𑀔𑀭𑀡𑀻𑀢𑀴𑀸𑀓𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀉𑀤𑀧𑀸𑀦𑁄 𑀓𑀽𑀧𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀢𑁆𑀣𑀸𑀬 𑀓𑀢𑁄 𑀔𑀦𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀉𑀤𑀧𑀸𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀓𑀢𑀧𑀼𑀜𑁆𑀜𑀽𑀧𑀘𑀬𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀢𑀲𑁆𑀫𑀺𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀔𑀘𑀺𑀢𑀁 𑀲𑀻𑀳𑀸𑀲𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀧𑀽𑀚𑁂𑀲𑀺, 𑀩𑀳𑀽𑀳𑀺 𑀫𑀸𑀮𑀸𑀕𑀦𑁆𑀥𑀥𑀽𑀧𑁂𑀳𑀺 𑀘 𑀧𑀽𑀚𑁂𑀲𑀺.

𑁨𑁧. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀜𑀸𑀢𑀺𑀯𑀕𑁆𑀕𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑀽𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀳𑀸𑀲𑀦𑀫𑀤𑀸𑀲𑀳𑀦𑁆𑀢𑀺 𑀲𑀻𑀳𑀭𑀽𑀧𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀭𑀢𑀦𑁂𑀳𑀺 𑀔𑀘𑀺𑀢𑀁 𑀆𑀲𑀦𑀁 𑀲𑀻𑀳𑀸𑀲𑀦𑀁, 𑀲𑀻𑀳𑀲𑁆𑀲 𑀯𑀸 𑀅𑀪𑀻𑀢𑀲𑁆𑀲 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀸𑀭𑀳𑀁, 𑀲𑀻𑀳𑀁 𑀯𑀸 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀆𑀲𑀦𑀦𑁆𑀢𑀺 𑀲𑀻𑀳𑀸𑀲𑀦𑀁, 𑀢𑀁 𑀅𑀳𑀁 𑀅𑀤𑀸𑀲𑀺𑀁, 𑀩𑁄𑀥𑀺𑀭𑀼𑀓𑁆𑀔𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀫𑀕𑁆𑀕𑀤𑀢𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀕𑁆𑀕𑀤𑀢𑁆𑀢𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀆𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀁 𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀤𑀼𑀤𑁆𑀥𑀸𑀭𑀘𑀗𑁆𑀓𑀫𑀦𑀝𑁆𑀞𑀸𑀦𑁂 𑀧𑀼𑀧𑁆𑀨𑀸𑀦𑀁 𑀯𑀺𑀓𑀺𑀭𑀡𑀁 𑀅𑀘𑁆𑀙𑀭𑀺𑀬𑀜𑁆𑀘 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺, 𑀢𑀸𑀦𑀺 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼.

𑁨𑁬. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀓𑀫𑁂𑀦 𑀬𑁄𑀩𑁆𑀩𑀜𑁆𑀜𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀘𑀗𑁆𑀓𑀫𑀦𑀲𑁆𑀲 𑀧𑀽𑀚𑀺𑀢𑀢𑁆𑀢𑀸 𑀫𑀕𑁆𑀕𑀤𑀢𑁆𑀢𑀺𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄. 𑀲𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀢𑁆𑀣𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀗𑁆𑀓𑀫𑀦𑁂𑀦 𑀲𑀭𑀻𑀭𑀲𑀮𑁆𑀮𑀳𑀼𑀓𑀸𑀤𑀺𑀲𑀼𑀔𑀁 𑀧𑀝𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀩𑁆𑀪𑁄𑀓𑀸𑀲𑀫𑁆𑀳𑀺 𑀘𑀗𑁆𑀓𑀫𑀻𑀢𑀺 𑀅𑀩𑁆𑀪𑁄𑀓𑀸𑀲𑁂 𑀅𑀗𑁆𑀕𑀡𑀝𑁆𑀞𑀸𑀦𑁂 𑀘𑀗𑁆𑀓𑀫𑀺, 𑀧𑀤𑀯𑀺𑀓𑁆𑀔𑁂𑀧𑀁 𑀧𑀤𑀲𑀜𑁆𑀘𑀸𑀭𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.

𑀉𑀤𑁆𑀥𑀢𑁂 𑀧𑀸𑀤𑁂 𑀧𑀼𑀧𑁆𑀨𑀸𑀦𑀻𑀢𑀺 𑀘𑀗𑁆𑀓𑀫𑀦𑁆𑀢𑁂𑀦 𑀧𑀸𑀤𑁂 𑀉𑀤𑁆𑀥𑀢𑁂 𑀧𑀤𑀼𑀫𑀼𑀧𑁆𑀧𑀮𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀧𑀣𑀯𑀺𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀘𑀗𑁆𑀓𑀫𑁂 𑀯𑀺𑀓𑀺𑀭𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀲𑁄𑀪𑀁 𑀫𑀼𑀤𑁆𑀥𑀦𑀺 𑀢𑀺𑀝𑁆𑀞𑀭𑁂𑀢𑀺 𑀩𑀼𑀤𑁆𑀥𑀲𑁆𑀲 𑀫𑀼𑀤𑁆𑀥𑀦𑀺 𑀲𑀻𑀲𑁂 𑀲𑁄𑀪𑀬𑀫𑀸𑀦𑀸 𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀫𑀕𑁆𑀕𑀤𑀢𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀫𑀼𑀦𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀚𑀺𑀦𑀲𑁂𑀝𑁆𑀞𑁂𑀲𑀼 𑀓𑀢𑀓𑀼𑀲𑀮𑀲𑀫𑁆𑀪𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀪𑀕𑀯𑀢𑁄 𑀲𑀮𑀮𑀫𑀳𑀸𑀩𑁄𑀥𑀺𑀫𑁆𑀳𑀺 𑀏𑀓𑀧𑀤𑀻𑀧𑀁 𑀧𑀽𑀚𑁂𑀲𑀺, 𑀣𑀸𑀯𑀭𑀁 𑀓𑀢𑁆𑀯𑀸 𑀦𑀺𑀘𑁆𑀘𑀫𑁂𑀓𑀧𑀤𑀻𑀧𑀧𑀽𑀚𑀦𑀢𑁆𑀣𑀸𑀬 𑀢𑁂𑀮𑀯𑀝𑁆𑀝𑀁 𑀧𑀝𑁆𑀞𑀧𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀚𑀮𑀫𑀸𑀦𑁄 𑀧𑀲𑀦𑁆𑀦𑀘𑀓𑁆𑀔𑀼𑀓𑁄 𑀉𑀪𑀬𑀲𑀼𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀤𑀻𑀧𑀧𑀽𑀚𑀸𑀬 𑀮𑀤𑁆𑀥𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀢𑀸 𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄.

𑁩𑁦. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀫𑀼𑀦𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀑𑀭𑁂𑀦 𑀳𑀺𑀫𑀯𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀢𑁆𑀣𑀸𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀑𑀭𑀪𑀸𑀕𑁂 𑀏𑀓𑀺𑀲𑁆𑀲𑀸 𑀦𑀤𑀺𑀬𑀸 𑀲𑀫𑀻𑀧𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀯𑀲𑀦𑁆𑀢𑁄 𑀯𑀺𑀯𑁂𑀓𑀓𑀸𑀫𑀢𑀸𑀬 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀘 𑀢𑀢𑁆𑀣 𑀉𑀧𑀕𑀢𑀁 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀫𑀡𑀺𑀧𑀮𑁆𑀮𑀗𑁆𑀓𑀁 𑀪𑀕𑀯𑀢𑁄 𑀧𑀽𑀚𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀧𑀲𑀸𑀤𑀯𑀟𑁆𑀠𑀦𑀢𑁆𑀣𑀸𑀬 𑀢𑀢𑁆𑀣 𑀦𑀺𑀲𑀻𑀤𑀺. 𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑁄 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀅𑀳𑁄𑀲𑀺.

𑁩𑁪. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑀸 𑀓𑀢𑀓𑀼𑀲𑀮𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀑𑀭𑁂𑀦 𑀳𑀺𑀫𑀯𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀭𑁂𑀦𑀸𑀢𑀺 𑀳𑀺𑀫𑀯𑀦𑁆𑀢𑀲𑁆𑀲 𑀅𑀧𑀭𑀁 𑀪𑀸𑀕𑀁 𑀯𑀺𑀳𑀸𑀬 𑀑𑀭𑁂𑀦, 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀑𑀭𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂𑀢𑀺 𑀅𑀢𑁆𑀣𑁄. 𑀦𑀤𑀺𑀓𑀸 𑀲𑀫𑁆𑀧𑀯𑀢𑁆𑀢𑀣𑀸𑀢𑀺 𑀅𑀧𑀸𑀓𑀝𑀦𑀸𑀫𑀥𑁂𑀬𑁆𑀬𑀸 𑀏𑀓𑀸 𑀦𑀤𑀻 𑀲𑀁𑀲𑀼𑀝𑁆𑀞𑀼 𑀧𑀯𑀢𑁆𑀢𑀸𑀦𑀻 𑀯𑀳𑀸𑀦𑀻 𑀲𑀦𑁆𑀤𑀫𑀸𑀦𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀘𑀸𑀦𑀼𑀧𑀔𑁂𑀢𑁆𑀢𑀫𑁆𑀳𑀻𑀢𑀺 𑀢𑀲𑁆𑀲𑀸 𑀦𑀤𑀺𑀬𑀸 𑀅𑀦𑀼𑀧𑀔𑁂𑀢𑁆𑀢𑀫𑁆𑀳𑀺 𑀢𑀻𑀭𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀲𑀬𑀫𑁆𑀪𑀽 𑀯𑀲𑀢𑁂 𑀢𑀤𑀸𑀢𑀺 𑀬𑀤𑀸 𑀅𑀳𑀁 𑀫𑀡𑀺𑀧𑀮𑁆𑀮𑀗𑁆𑀓𑀁 𑀧𑀽𑀚𑁂𑀲𑀺𑀁, 𑀢𑀤𑀸 𑀅𑀦𑀸𑀘𑀭𑀺𑀬𑀓𑁄 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀩𑀼𑀤𑁆𑀥𑀪𑀽𑀢𑁄 𑀪𑀕𑀯𑀸 𑀯𑀲𑀢𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑁩𑁫. 𑀫𑀡𑀺𑀁 𑀧𑀕𑁆𑀕𑀬𑁆𑀳 𑀧𑀮𑁆𑀮𑀗𑁆𑀓𑀦𑁆𑀢𑀺 𑀫𑀡𑀺𑀦𑁆𑀢𑀺 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺 𑀲𑁄𑀫𑀦𑀲𑁆𑀲𑀁 𑀓𑀭𑁄𑀢𑀻𑀢𑀺 𑀫𑀡𑀺, 𑀅𑀣 𑀯𑀸 𑀫𑀸𑀢𑀺 𑀧𑀫𑀸𑀡𑀁 𑀓𑀭𑁄𑀢𑀺 𑀆𑀪𑀭𑀡𑀦𑁆𑀢𑀺 𑀫𑀡𑀺, 𑀅𑀣 𑀯𑀸 𑀫𑀭𑀦𑁆𑀢𑀸𑀧𑀺 𑀭𑀸𑀚𑀬𑀼𑀯𑀭𑀸𑀚𑀸𑀤𑀬𑁄 𑀢𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺 𑀢𑀤𑀢𑁆𑀣𑀸𑀬 𑀲𑀗𑁆𑀕𑀸𑀫𑀁 𑀓𑀭𑁄𑀦𑁆𑀢𑀻𑀢𑀺 𑀫𑀡𑀺, 𑀢𑀁 𑀫𑀡𑀺𑀁 𑀫𑀡𑀺𑀫𑀬𑀁 𑀧𑀮𑁆𑀮𑀗𑁆𑀓𑀁 𑀫𑀦𑁄𑀭𑀫𑀁 𑀲𑀸𑀥𑀼 𑀘𑀺𑀢𑁆𑀢𑀁 𑀲𑀼𑀝𑁆𑀞𑀼 𑀯𑀺𑀘𑀺𑀢𑁆𑀢𑀁 𑀧𑀕𑁆𑀕𑀬𑁆𑀳 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀸𑀬𑀲𑁆𑀫𑀸 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀯𑁂𑀚𑁆𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄 𑀲𑀼𑀲𑀺𑀓𑁆𑀔𑀺𑀢𑁄 𑀯𑁂𑀚𑁆𑀚𑀓𑀫𑁆𑀫𑁂 𑀙𑁂𑀓𑁄 𑀩𑀳𑀽 𑀭𑁄𑀕𑀺𑀦𑁄 𑀢𑀺𑀓𑀺𑀘𑁆𑀙𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑀲𑁆𑀲 𑀅𑀲𑁄𑀓𑀦𑀸𑀫𑀢𑁆𑀣𑁂𑀭𑀲𑁆𑀲 𑀭𑁄𑀕𑀁 𑀢𑀺𑀓𑀺𑀘𑁆𑀙𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀧𑀭𑀸𑀧𑀭𑀁 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀅𑀭𑁄𑀕𑁄 𑀤𑀻𑀖𑀸𑀬𑀼𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑀲𑀭𑀻𑀭𑁄 𑀅𑀳𑁄𑀲𑀺.

𑁩𑁯. 𑀲𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀅𑀭𑁄𑀕𑁄 𑀲𑀼𑀔𑀺𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀲𑀗𑁆𑀖𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀯𑁂𑀲𑁆𑀲𑀪𑀼𑀫𑁆𑀳𑀺 𑀪𑀕𑀯𑀢𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀗𑁆𑀖𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀓𑀼𑀲𑀮𑀲𑀫𑁆𑀪𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑀲𑁆𑀲𑀸𑀭𑀸𑀫𑀺𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀯𑀺𑀳𑀸𑀭𑁂𑀲𑀼 𑀆𑀭𑀸𑀫𑀺𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀲𑀗𑁆𑀖𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑁂𑀦𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀲𑀼𑀔𑀧𑁆𑀧𑀢𑁆𑀢𑁄 𑀧𑀸𑀓𑀝𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀲𑀸𑀲𑀦𑀁 𑀲𑁄𑀪𑀬𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀙𑀴𑀪𑀺𑀜𑁆𑀜𑁄 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑀯𑀲𑁂𑀦 𑀲𑀗𑁆𑀖𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁪𑁫. 𑀲𑁄 𑀏𑀓𑀤𑀺𑀯𑀲𑀁 ‘‘𑀧𑀼𑀩𑁆𑀩𑁂 𑀫𑀬𑀸 𑀓𑀺𑀁 𑀦𑀸𑀫 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀬𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀯𑁂𑀲𑁆𑀲𑀪𑀼𑀫𑁆𑀳𑀺 𑀪𑀕𑀯𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑁄𑀲𑀸𑀭𑀸𑀫𑀺𑀓𑁄 𑀅𑀳𑀦𑁆𑀢𑀺 𑀅𑀳𑀁 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀆𑀭𑀸𑀫𑀺𑀓𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀗𑁆𑀖𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁯. 𑀓𑀼𑀝𑀚𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧-𑁧𑁦. 𑀓𑀼𑀝𑀚𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀇𑀢𑁄 𑀧𑀭𑀫𑁆𑀧𑀺 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁂 𑀆𑀕𑀢𑀸𑀦𑀁 𑀇𑀫𑁂𑀲𑀁 𑀓𑀼𑀝𑀚𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀸𑀤𑀻𑀦𑀁 𑀤𑀲𑀦𑁆𑀦𑀁 𑀣𑁂𑀭𑀸𑀦𑀁 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀢𑁂𑀲𑀜𑁆𑀳𑀺 𑀣𑁂𑀭𑀸𑀦𑀁 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀓𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀁 𑀯𑀲𑁂𑀦 𑀧𑀸𑀓𑀝𑀦𑀸𑀫𑀸𑀦𑀺 𑀘𑁂𑀯 𑀦𑀺𑀯𑀸𑀲𑀦𑀕𑀭𑀸𑀤𑀻𑀦𑀺 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀢𑀁 𑀲𑀩𑁆𑀩𑀁 𑀅𑀧𑀤𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁦. 𑀢𑀫𑀸𑀮𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧-𑁧𑁦. 𑀢𑀫𑀸𑀮𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀯𑀻𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀢𑁆𑀣𑁂𑀭𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀤𑀼𑀢𑀺𑀬𑀢𑁆𑀣𑁂𑀭𑀸𑀧𑀤𑀸𑀦𑁂 𑀬𑀁 𑀤𑀸𑀬𑀯𑀸𑀲𑀺𑀓𑁄 𑀇𑀲𑀻𑀢𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑁂 𑀯𑀲𑀦𑀪𑀸𑀯𑁂𑀦 𑀤𑀸𑀬𑀯𑀸𑀲𑀺𑀓𑁄 𑀇𑀲𑀻𑀢𑀺 𑀲𑀗𑁆𑀔𑀁 𑀕𑀢𑁄, 𑀅𑀢𑁆𑀢𑀦𑁄 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀯𑀦𑀁 𑀉𑀧𑀕𑀢𑀲𑁆𑀲 𑀲𑀺𑀤𑁆𑀥𑀢𑁆𑀣𑀲𑁆𑀲 𑀲𑀢𑁆𑀣𑀼𑀦𑁄 𑀯𑀲𑀦𑀫𑀡𑁆𑀟𑀧𑀘𑁆𑀙𑀸𑀤𑀦𑀢𑁆𑀣𑀸𑀬 𑀬𑀁 𑀢𑀺𑀡𑀁, 𑀢𑀁 𑀮𑀸𑀬𑀢𑀺 𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀤𑀩𑁆𑀩𑀙𑀤𑀦𑀁 𑀓𑀢𑁆𑀯𑀸 𑀅𑀦𑁂𑀓𑁂𑀳𑀺 𑀔𑀼𑀤𑁆𑀤𑀓𑀤𑀡𑁆𑀟𑀓𑁂𑀳𑀺 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀢𑀁 𑀢𑀺𑀡𑁂𑀦 𑀙𑀸𑀤𑁂𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀅𑀳𑀁 𑀅𑀤𑀸𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁮. 𑀲𑀢𑁆𑀢𑀸𑀳𑀁 𑀥𑀸𑀭𑀬𑀼𑀁 𑀢𑀢𑁆𑀣𑀸𑀢𑀺 𑀢𑀁 𑀫𑀡𑁆𑀟𑀧𑀁 𑀢𑀢𑁆𑀣 𑀞𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀢𑁆𑀣𑀼𑀦𑁄 𑀥𑀸𑀭𑀬𑀼𑀁 𑀥𑀸𑀭𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀢𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑁂 𑀔𑀡𑁆𑀟𑀨𑀼𑀮𑁆𑀮𑀺𑀬𑀢𑁆𑀣𑁂𑀭𑁄𑀢𑀺 𑀏𑀢𑁆𑀣 𑀔𑀡𑁆𑀟𑀦𑁆𑀢𑀺 𑀓𑀝𑁆𑀞𑀸𑀦𑀁 𑀚𑀺𑀡𑁆𑀡𑀢𑁆𑀢𑀸 𑀙𑀺𑀦𑁆𑀦𑀪𑀺𑀦𑁆𑀦𑀝𑁆𑀞𑀸𑀦𑀁, 𑀨𑀼𑀮𑁆𑀮𑀦𑁆𑀢𑀺 𑀓𑀝𑁆𑀞𑀸𑀦𑀁 𑀚𑀺𑀡𑁆𑀡𑀝𑁆𑀞𑀸𑀦𑁂 𑀓𑀡𑁆𑀡𑀓𑀺𑀢𑀫𑀳𑀺𑀘𑁆𑀙𑀢𑁆𑀢𑀓𑀸𑀤𑀺𑀧𑀼𑀧𑁆𑀨𑀦𑀁, 𑀔𑀡𑁆𑀟𑀜𑁆𑀘 𑀨𑀼𑀮𑁆𑀮𑀜𑁆𑀘 𑀔𑀡𑁆𑀟𑀨𑀼𑀮𑁆𑀮𑀸𑀦𑀺, 𑀔𑀡𑁆𑀟𑀨𑀼𑀮𑁆𑀮𑀸𑀦𑀁 𑀧𑀝𑀺𑀲𑀗𑁆𑀔𑀭𑀡𑀁 𑀧𑀼𑀦𑀧𑁆𑀧𑀼𑀦𑀁 𑀣𑀺𑀭𑀓𑀭𑀡𑀦𑁆𑀢𑀺 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀁. 𑀇𑀫𑀲𑁆𑀲 𑀧𑀦 𑀣𑁂𑀭𑀲𑁆𑀲 𑀲𑀫𑁆𑀪𑀸𑀭𑀧𑀽𑀭𑀡𑀓𑀸𑀮𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀘𑁂𑀢𑀺𑀬𑁂 𑀙𑀺𑀦𑁆𑀦𑀪𑀺𑀦𑁆𑀦𑀝𑁆𑀞𑀸𑀦𑁂 𑀲𑀼𑀥𑀸𑀧𑀺𑀡𑁆𑀟𑀁 𑀫𑀓𑁆𑀔𑁂𑀢𑁆𑀯𑀸 𑀣𑀺𑀭𑀓𑀭𑀡𑀁 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀁 𑀦𑀸𑀫. 𑀢𑀲𑁆𑀫𑀸 𑀲𑁄 𑀔𑀡𑁆𑀟𑀨𑀼𑀮𑁆𑀮𑀺𑀬𑁄 𑀣𑁂𑀭𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀢𑀺𑀬𑀁.

𑁧𑁭. 𑀘𑀢𑀼𑀢𑁆𑀣𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑁂 𑀭𑀜𑁆𑀜𑁄 𑀩𑀤𑁆𑀥𑀘𑀭𑁄 𑀅𑀳𑀦𑁆𑀢𑀺 𑀭𑀜𑁆𑀜𑁄 𑀧𑀭𑀺𑀘𑀸𑀭𑀓𑁄 𑀓𑀫𑁆𑀫𑀓𑀸𑀭𑀓𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁯. 𑀚𑀮𑀚𑀼𑀢𑁆𑀢𑀫𑀦𑀸𑀫𑀺𑀦𑁄𑀢𑀺 𑀚𑀮𑁂 𑀉𑀤𑀓𑁂 𑀚𑀸𑀢𑀁 𑀚𑀮𑀚𑀁, 𑀓𑀺𑀁 𑀢𑀁 𑀧𑀤𑀼𑀫𑀁, 𑀧𑀤𑀼𑀫𑁂𑀦 𑀲𑀫𑀸𑀦𑀦𑀸𑀫𑀢𑁆𑀢𑀸 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑀧𑀤𑀼𑀫𑀦𑀸𑀫𑀲𑁆𑀲 𑀪𑀕𑀯𑀢𑁄𑀢𑀺 𑀯𑀸 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀁.

𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁮. 𑀙𑀝𑁆𑀞𑁂 𑀦𑀕𑀭𑁂 𑀤𑁆𑀯𑀸𑀭𑀯𑀢𑀺𑀬𑀸𑀢𑀺 𑀫𑀳𑀸𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑀨𑀮𑀓𑀸𑀳𑀺 𑀯𑀢𑀺𑀧𑀸𑀓𑀸𑀭𑀝𑁆𑀝𑀸𑀮𑀕𑁄𑀧𑀼𑀭𑀓𑀤𑁆𑀤𑀫𑁄𑀤𑀓𑀧𑀭𑀺𑀔𑀸𑀳𑀺 𑀘 𑀲𑀫𑁆𑀧𑀦𑁆𑀦𑀁 𑀦𑀕𑀭𑀦𑁆𑀢𑀺 𑀤𑁆𑀯𑀸𑀭𑀯𑀢𑀻𑀦𑀕𑀭𑀁, 𑀤𑁆𑀯𑀸𑀭𑀁 𑀯𑀢𑀺𑀜𑁆𑀘 𑀧𑀥𑀸𑀦𑀁 𑀓𑀢𑁆𑀯𑀸 𑀦𑀕𑀭𑀲𑁆𑀲 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 ‘‘𑀤𑁆𑀯𑀸𑀭𑀯𑀢𑀻 𑀦𑀕𑀭’’𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑀦𑀕𑀭𑁂 𑀤𑁆𑀯𑀸𑀭𑀯𑀢𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀫𑀸𑀮𑀸𑀯𑀘𑁆𑀙𑁄 𑀧𑀼𑀧𑁆𑀨𑀸𑀭𑀸𑀫𑁄 𑀫𑀫 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁩𑁧. 𑀢𑁂 𑀓𑀺𑀲𑀮𑀬𑀸𑀢𑀺 𑀢𑁂 𑀅𑀲𑁄𑀓𑀧𑀮𑁆𑀮𑀯𑀸. 𑀙𑀝𑁆𑀞𑀁.

𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀤𑀲𑀫𑁂𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀻𑀢𑀺.

𑀯𑀻𑀲𑀢𑀺𑀫𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁧-𑁨𑁩. 𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀸𑀤𑀺𑀯𑀕𑁆𑀕𑁄

𑁧-𑁩𑁦. 𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀇𑀢𑁄 𑀧𑀭𑀁 𑀲𑀩𑁆𑀩𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀏𑀓𑀯𑀻𑀲𑀢𑀺𑀫𑁂 𑀩𑀸𑀯𑀻𑀲𑀢𑀺𑀫𑁂 𑀢𑁂𑀯𑀻𑀲𑀢𑀺𑀫𑁂 𑀘 𑀯𑀕𑁆𑀕𑁂 𑀲𑀩𑁆𑀩𑁂𑀲𑀁 𑀣𑁂𑀭𑀸𑀦𑀁 𑀲𑀬𑀁𑀓𑀢𑁂𑀦 𑀧𑀼𑀜𑁆𑀜𑁂𑀦 𑀮𑀤𑁆𑀥𑀦𑀸𑀫𑀸𑀦𑀺, 𑀓𑀢𑀧𑀼𑀜𑁆𑀜𑀸𑀦𑀜𑁆𑀘 𑀦𑀸𑀦𑀢𑁆𑀢𑀁 𑀢𑁂𑀲𑀁 𑀩𑁆𑀬𑀸𑀓𑀭𑀡𑀤𑀸𑀬𑀓𑀸𑀦𑀁 𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀦𑀺 𑀯𑀲𑀺𑀢𑀦𑀕𑀭𑀸𑀦𑀺 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀩𑁆𑀩𑀸𑀦𑀺𑀧𑀺 𑀉𑀢𑁆𑀢𑀸𑀦𑀸𑀦𑁂𑀯. 𑀅𑀧𑀤𑀸𑀦𑀕𑀸𑀣𑀸𑀦𑀫𑀢𑁆𑀣𑁄 𑀘 𑀦𑀬𑀸𑀦𑀼𑀬𑁄𑀕𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀬𑁂𑀯𑀸𑀢𑀺.

𑁨𑁪. 𑀉𑀤𑀓𑀸𑀲𑀦𑀯𑀕𑁆𑀕𑁄

𑁧-𑁧𑁦.𑀉𑀤𑀓𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀘𑀢𑀼𑀯𑀻𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀤𑀼𑀢𑀺𑀬𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁯. 𑀢𑀢𑀺𑀬𑀸𑀧𑀤𑀸𑀦𑁂 𑀅𑀭𑀼𑀡𑀯𑀢𑀺𑀬𑀸 𑀦𑀕𑀭𑁂𑀢𑀺 𑀆 𑀲𑀫𑀦𑁆𑀢𑀢𑁄 𑀆𑀮𑁄𑀓𑀁 𑀓𑀭𑁄𑀦𑁆𑀢𑁄 𑀉𑀡𑀢𑀺 𑀉𑀕𑁆𑀕𑀘𑁆𑀙𑀢𑀻𑀢𑀺 𑀅𑀭𑀼𑀡𑁄, 𑀲𑁄 𑀢𑀲𑁆𑀫𑀺𑀁 𑀯𑀺𑀚𑁆𑀚𑀢𑀻𑀢𑀺 𑀅𑀭𑀼𑀡𑀯𑀢𑀻, 𑀢𑀲𑁆𑀫𑀺𑀁 𑀦𑀕𑀭𑁂 𑀆𑀮𑁄𑀓𑀁 𑀓𑀭𑁄𑀦𑁆𑀢𑁄 𑀲𑀽𑀭𑀺𑀬𑁄 𑀉𑀕𑁆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀦𑀕𑀭𑁂𑀲𑀼𑀧𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀯𑀺𑀲𑁂𑀲𑀯𑀘𑀦𑀁 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀁 𑀫𑀳𑀺𑀬𑀁 𑀲𑀬𑀦𑁂𑀧𑀺 𑀲𑀢𑀺 𑀫𑀳𑀺𑀬𑀁 𑀲𑀬𑀢𑀻𑀢𑀺 𑀫𑀳𑀺𑀁𑀲𑁄𑀢𑀺 𑀯𑀘𑀦𑀁 𑀯𑀺𑀬 𑀭𑀽𑀴𑁆𑀳𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀧𑀸𑀓𑀸𑀭𑀧𑀸𑀲𑀸𑀤𑀳𑀫𑁆𑀫𑀺𑀬𑀸𑀤𑀻𑀲𑀼 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀲𑀢𑁆𑀢𑀭𑀢𑀦𑀧𑀪𑀸𑀳𑀺 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀧𑀪𑀸𑀯𑀢𑀻 𑀅𑀭𑀼𑀡𑀯𑀢𑀻 𑀦𑀸𑀫, 𑀢𑀲𑁆𑀫𑀺𑀁 𑀅𑀭𑀼𑀡𑀯𑀢𑀺𑀬𑀸 𑀦𑀕𑀭𑁂, 𑀧𑀽𑀧𑀺𑀓𑁄 𑀧𑀽𑀧𑀯𑀺𑀓𑁆𑀓𑀬𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁪. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀢𑀺𑀯𑀭𑀸𑀬𑀁 𑀧𑀼𑀭𑁂 𑀭𑀫𑁆𑀫𑁂𑀢𑀺 𑀢𑀻𑀳𑀺 𑀧𑀸𑀓𑀸𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀧𑀭𑀺𑀓𑁆𑀔𑀺𑀢𑁆𑀢𑀸𑀢𑀺 𑀢𑀺𑀯𑀭𑀸, 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀉𑀧𑀪𑁄𑀕𑀯𑀢𑁆𑀣𑀸𑀪𑀭𑀡𑀸𑀤𑀺𑀦𑀘𑁆𑀘𑀕𑀻𑀢𑀸𑀤𑀻𑀳𑀺 𑀭𑀫𑀡𑀻𑀬𑀦𑁆𑀢𑀺 𑀭𑀫𑁆𑀫𑀁, 𑀢𑀲𑁆𑀫𑀺𑀁 𑀢𑀺𑀯𑀭𑀸𑀬𑀁 𑀧𑀼𑀭𑁂 𑀦𑀕𑀭𑁂 𑀭𑀫𑁆𑀫𑁂 𑀦𑀴𑀓𑀸𑀭𑁄 𑀅𑀳𑀁 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀜𑁆𑀘𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁩. 𑀙𑀝𑁆𑀞𑀸𑀧𑀤𑀸𑀦𑁂 𑀯𑀡𑁆𑀡𑀓𑀸𑀭𑁄 𑀅𑀳𑀁 𑀢𑀤𑀸𑀢𑀺 𑀦𑀻𑀮𑀧𑀻𑀢𑀭𑀢𑁆𑀢𑀸𑀤𑀺𑀯𑀡𑁆𑀡𑀯𑀲𑁂𑀦 𑀯𑀢𑁆𑀣𑀸𑀦𑀺 𑀓𑀭𑁄𑀢𑀺 𑀭𑀜𑁆𑀚𑁂𑀢𑀻𑀢𑀺 𑀯𑀡𑁆𑀡𑀓𑀸𑀭𑁄. 𑀯𑀢𑁆𑀣𑀭𑀚𑀓𑁄 𑀳𑀼𑀢𑁆𑀯𑀸 𑀘𑁂𑀢𑀺𑀬𑁂 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑀦𑀲𑀫𑀬𑁂 𑀦𑀸𑀦𑀸𑀯𑀡𑁆𑀡𑁂𑀳𑀺 𑀤𑀼𑀲𑁆𑀲𑀸𑀦𑀺 𑀭𑀜𑁆𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁭. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀧𑀺𑀬𑀸𑀮𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸𑀢𑀺 𑀲𑀼𑀧𑀼𑀧𑁆𑀨𑀺𑀢𑀁 𑀧𑀺𑀬𑀸𑀮𑀭𑀼𑀓𑁆𑀔𑀁 𑀤𑀺𑀲𑁆𑀯𑀸. 𑀕𑀢𑀫𑀕𑁆𑀕𑁂 𑀔𑀺𑀧𑀺𑀁 𑀅𑀳𑀦𑁆𑀢𑀺 𑀅𑀳𑀁 𑀫𑀺𑀕𑀮𑀼𑀤𑁆𑀤𑁄 𑀦𑁂𑀲𑀸𑀤𑁄 𑀳𑀼𑀢𑁆𑀯𑀸 𑀧𑀺𑀬𑀸𑀮𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀕𑀢𑀫𑀕𑁆𑀕𑁂 𑀔𑀺𑀧𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁦. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀲𑀓𑁂 𑀲𑀺𑀧𑁆𑀧𑁂 𑀅𑀧𑀢𑁆𑀣𑀤𑁆𑀥𑁄𑀢𑀺 𑀅𑀢𑁆𑀢𑀦𑁄 𑀢𑀓𑁆𑀓𑀩𑁆𑀬𑀸𑀓𑀭𑀡𑀸𑀤𑀺𑀲𑀺𑀧𑁆𑀧𑀲𑁆𑀫𑀺𑀁 𑀅𑀧𑀢𑁆𑀣𑀤𑁆𑀥𑁄 𑀧𑀢𑀺𑀝𑁆𑀞𑀺𑀢𑁄 𑀙𑁂𑀓𑁄 𑀅𑀳𑀁 𑀓𑀸𑀦𑀦𑀁 𑀅𑀕𑀫𑀁 𑀕𑀢𑁄 𑀲𑀫𑁆𑀩𑀼𑀤𑁆𑀥𑀁 𑀬𑀦𑁆𑀢𑀁 𑀤𑀺𑀲𑁆𑀯𑀸𑀦𑀸𑀢𑀺 𑀯𑀦𑀦𑁆𑀢𑀭𑁂 𑀕𑀘𑁆𑀙𑀦𑁆𑀢𑀁 𑀯𑀺𑀧𑀲𑁆𑀲𑀺𑀁 𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸. 𑀅𑀫𑁆𑀩𑀬𑀸𑀕𑀁 𑀅𑀤𑀸𑀲𑀳𑀦𑁆𑀢𑀺 𑀅𑀳𑀁 𑀅𑀫𑁆𑀩𑀤𑀸𑀦𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁩. 𑀦𑀯𑀫𑀸𑀧𑀤𑀸𑀦𑁂 𑀚𑀕𑀢𑀻 𑀓𑀸𑀭𑀺𑀢𑀸 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼𑀦𑀺𑀥𑀸𑀧𑀺𑀢𑀘𑁂𑀢𑀺𑀬𑁂 𑀚𑀕𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀆𑀮𑀺𑀦𑁆𑀤𑀧𑀼𑀧𑁆𑀨𑀸𑀥𑀸𑀦𑀲𑀗𑁆𑀔𑀸𑀢𑀸 𑀚𑀕𑀢𑀺 𑀫𑀬𑀸 𑀓𑀸𑀭𑀺𑀢𑀸 𑀓𑀸𑀭𑀸𑀧𑀺𑀢𑀸𑀢𑀺 𑀅𑀢𑁆𑀣𑁄.

𑀤𑀲𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀢𑀼𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁫. 𑀢𑀼𑀯𑀭𑀤𑀸𑀬𑀓𑀯𑀕𑁆𑀕𑁄

𑁧-𑁧𑁦. 𑀢𑀼𑀯𑀭𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁧. 𑀧𑀜𑁆𑀘𑀯𑀻𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀪𑀭𑀺𑀢𑁆𑀯𑀸 𑀢𑀼𑀯𑀭𑀫𑀸𑀤𑀸𑀬𑀸𑀢𑀺 𑀢𑀼𑀯𑀭𑀅𑀝𑁆𑀞𑀺𑀁 𑀫𑀼𑀕𑁆𑀕𑀓𑀮𑀬𑀲𑀤𑀺𑀲𑀁 𑀢𑀼𑀯𑀭𑀝𑁆𑀞𑀺𑀁 𑀪𑀚𑁆𑀚𑀺𑀢𑁆𑀯𑀸 𑀧𑀼𑀧𑁆𑀨𑁂𑀢𑁆𑀯𑀸 𑀪𑀸𑀚𑀦𑁂𑀦 𑀆𑀤𑀸𑀬 𑀲𑀗𑁆𑀖𑀲𑁆𑀲 𑀯𑀦𑀫𑀚𑁆𑀛𑁄𑀕𑀸𑀳𑀓𑀲𑁆𑀲 𑀅𑀤𑀤𑀺𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁪-𑁫. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀥𑀦𑀼𑀁 𑀅𑀤𑁆𑀯𑁂𑀚𑁆𑀛𑀁 𑀓𑀢𑁆𑀯𑀸𑀦𑀸𑀢𑀺 𑀫𑀺𑀕𑀸𑀤𑀻𑀦𑀁 𑀫𑀸𑀭𑀡𑀢𑁆𑀣𑀸𑀬 𑀥𑀦𑀼𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀘𑀭𑀫𑀸𑀦𑁄 𑀓𑁂𑀲𑀭𑀁 𑀑𑀕𑀢𑀁 𑀤𑀺𑀲𑁆𑀯𑀸𑀢𑀺 𑀲𑀼𑀧𑀼𑀧𑁆𑀨𑀺𑀢𑀁 𑀔𑀼𑀤𑁆𑀤𑀓𑀲𑀭𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀦𑁆𑀢𑀺 𑀅𑀳𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀯𑀦𑀁 𑀲𑀫𑁆𑀧𑀢𑁆𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁯-𑁧𑁦. 𑀢𑀢𑀺𑀬𑀸𑀧𑀤𑀸𑀦𑁂 𑀚𑀮𑀓𑀼𑀓𑁆𑀓𑀼𑀝𑁄𑀢𑀺 𑀚𑀸𑀢𑀲𑁆𑀲𑀭𑁂 𑀘𑀭𑀫𑀸𑀦𑀓𑀼𑀓𑁆𑀓𑀼𑀝𑁄. 𑀢𑀼𑀡𑁆𑀟𑁂𑀦 𑀓𑁂𑀲𑀭𑀺𑀁 𑀕𑀬𑁆𑀳𑀸𑀢𑀺 𑀧𑀤𑀼𑀫𑀧𑀼𑀧𑁆𑀨𑀁 𑀫𑀼𑀔𑀢𑀼𑀡𑁆𑀟𑁂𑀦 𑀟𑀁𑀲𑀺𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀅𑀪𑀺𑀭𑁄𑀧𑁂𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁪. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀯𑀺𑀭𑀯𑀧𑀼𑀧𑁆𑀨𑀫𑀸𑀤𑀸𑀬𑀸𑀢𑀺 𑀯𑀺𑀯𑀺𑀥𑀁 𑀭𑀯𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀯𑀺𑀭𑀯𑀁, 𑀲𑀤𑁆𑀤𑀓𑀭𑀡𑀯𑁂𑀮𑀸𑀬𑀁 𑀯𑀺𑀓𑀲𑀦𑀢𑁄 ‘‘𑀯𑀺𑀭𑀯’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀧𑀼𑀧𑁆𑀨𑀲𑀫𑀽𑀳𑀁 𑀆𑀤𑀸𑀬 𑀕𑀳𑁂𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁭. 𑀧𑀜𑁆𑀘𑀫𑀸𑀧𑀤𑀸𑀦𑁂 𑀓𑀼𑀝𑀺𑀕𑁄𑀧𑀓𑁄𑀢𑀺 𑀲𑁂𑀦𑀸𑀲𑀦𑀧𑀸𑀮𑀓𑁄. 𑀓𑀸𑀮𑁂𑀦 𑀓𑀸𑀮𑀁 𑀥𑀽𑀧𑁂𑀲𑀺𑀦𑁆𑀢𑀺 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀓𑀸𑀮𑀸𑀦𑀼𑀓𑀸𑀮𑁂 𑀥𑀽𑀧𑁂𑀲𑀺𑀁, 𑀥𑀽𑀧𑁂𑀦 𑀲𑀼𑀕𑀦𑁆𑀥𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀓𑀸𑀮𑀸𑀦𑀼𑀲𑀸𑀭𑀺𑀥𑀽𑀧𑁂𑀦 𑀥𑀽𑀧𑁂𑀲𑀺𑀁 𑀯𑀸𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀙𑀝𑁆𑀞𑀲𑀢𑁆𑀢𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁨𑁭. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀲𑀢𑁆𑀢 𑀲𑀢𑁆𑀢𑀮𑀺𑀧𑀼𑀧𑁆𑀨𑀸𑀦𑀻𑀢𑀺 𑀲𑀢𑁆𑀢𑀮𑀺𑀲𑀗𑁆𑀔𑀸𑀢𑀸𑀦𑀺, 𑀲𑀢𑁆𑀢 𑀧𑀼𑀧𑁆𑀨𑀸𑀦𑀺 𑀲𑀻𑀲𑁂𑀦𑀸𑀤𑀸𑀬 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀅𑀪𑀺𑀭𑁄𑀧𑁂𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁧. 𑀦𑀯𑀫𑀸𑀧𑀤𑀸𑀦𑁂 𑀩𑀺𑀫𑁆𑀩𑀺𑀚𑀸𑀮𑀓𑀧𑀼𑀧𑁆𑀨𑀸𑀦𑀻𑀢𑀺 𑀭𑀢𑁆𑀢𑀗𑁆𑀓𑀼𑀭𑀯𑀓𑀧𑀼𑀧𑁆𑀨𑀸𑀦𑀺 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁫. 𑀤𑀲𑀫𑀸𑀧𑀤𑀸𑀦𑁂 𑀉𑀤𑁆𑀤𑀸𑀮𑀓𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀚𑀸𑀢𑀲𑁆𑀲𑀭𑁂 𑀯𑀺𑀳𑀗𑁆𑀕𑀲𑁄𑀩𑁆𑀪𑁂 𑀚𑀸𑀢𑀁 𑀉𑀤𑁆𑀤𑀸𑀮𑀓𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀜𑁆𑀘𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁬. 𑀣𑁄𑀫𑀓𑀯𑀕𑁆𑀕𑁄

𑁧-𑁧𑁦. 𑀣𑁄𑀫𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀙𑀩𑁆𑀩𑀻𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀫𑁂𑀯.

𑁫-𑁬. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀯𑀺𑀚𑀳𑀺𑀢𑁆𑀯𑀸 𑀤𑁂𑀯𑀯𑀡𑁆𑀡𑀦𑁆𑀢𑀺 𑀤𑁂𑀯𑀢𑀸 𑀲𑀭𑀻𑀭𑀁 𑀯𑀺𑀚𑀳𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸, 𑀫𑀦𑀼𑀲𑁆𑀲𑀲𑀭𑀻𑀭𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀓𑀸𑀭𑀁 𑀓𑀢𑁆𑀢𑀼𑀓𑀸𑀫𑁄𑀢𑀺 𑀅𑀥𑀺𑀓𑀓𑀺𑀭𑀺𑀬𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀓𑀢𑁆𑀢𑀼𑀓𑀸𑀫𑁄 𑀤𑁂𑀯𑀭𑁄 𑀦𑀸𑀫 𑀅𑀳𑀁 𑀤𑁂𑀯𑀭𑀸𑀚𑀸 𑀪𑀭𑀺𑀬𑀸𑀬 𑀲𑀳 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀸𑀲𑀦𑁂 𑀲𑀸𑀤𑀭𑀢𑀸𑀬 𑀇𑀥 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀆𑀕𑀫𑀺𑀁 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀪𑀺𑀓𑁆𑀔𑀸 𑀫𑀬𑀸 𑀤𑀺𑀦𑁆𑀦𑀸𑀢𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀬𑁄 𑀦𑀸𑀫𑁂𑀦 𑀤𑁂𑀯𑀮𑁄 𑀦𑀸𑀫 𑀲𑀸𑀯𑀓𑁄 𑀅𑀳𑁄𑀲𑀺, 𑀢𑀲𑁆𑀲 𑀲𑀸𑀯𑀓𑀲𑁆𑀲 𑀫𑀬𑀸 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸 𑀧𑀺𑀡𑁆𑀟𑀧𑀸𑀢𑁄 𑀤𑀺𑀦𑁆𑀦𑁄𑀢𑀺 𑀅𑀢𑁆𑀣𑁄.

𑁯-𑁧𑁦. 𑀢𑀢𑀺𑀬𑀸𑀧𑀤𑀸𑀦𑁂 𑀆𑀦𑀦𑁆𑀤𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺 𑀆𑀦𑀦𑁆𑀤𑀁 𑀢𑀼𑀝𑁆𑀞𑀺𑀁 𑀚𑀦𑀦𑀢𑁄 𑀆𑀦𑀦𑁆𑀤𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀅𑀫𑀦𑀼𑀲𑁆𑀲𑀫𑁆𑀳𑀺 𑀓𑀸𑀦𑀦𑁂𑀢𑀺 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑁂 𑀓𑀸𑀦𑀦𑁂 𑀫𑀳𑀸𑀅𑀭𑀜𑁆𑀜𑁂 𑀧𑀭𑀺𑀦𑀺𑀩𑁆𑀩𑀸𑀬𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑁆𑀢𑀭𑀥𑀸𑀬𑀺, 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀁 𑀢𑀢𑁆𑀣 𑀛𑀸𑀧𑁂𑀲𑀺𑀦𑁆𑀢𑀺 𑀅𑀳𑀁 𑀤𑁂𑀯𑀮𑁄𑀓𑀸 𑀇𑀥𑀸𑀕𑀦𑁆𑀢𑁆𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀁 𑀢𑀢𑁆𑀣 𑀅𑀭𑀜𑁆𑀜𑁂 𑀛𑀸𑀧𑁂𑀲𑀺𑀁 𑀤𑀳𑀦𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁨𑁦. 𑀙𑀝𑁆𑀞𑀸𑀧𑀤𑀸𑀦𑁂 𑀅𑀳𑁄𑀲𑀺𑀁 𑀘𑀦𑁆𑀤𑀦𑁄 𑀦𑀸𑀫𑀸𑀢𑀺 𑀦𑀸𑀫𑁂𑀦 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀘𑀦𑁆𑀤𑀦𑁄 𑀦𑀸𑀫. 𑀲𑀫𑁆𑀩𑀼𑀤𑁆𑀥𑀲𑁆𑀲𑀢𑁆𑀭𑀚𑁄𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀪𑀽𑀢𑀢𑁄 𑀧𑀼𑀩𑁆𑀩𑁂 𑀢𑀲𑁆𑀲 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄 𑀅𑀳𑀁. 𑀏𑀓𑁄𑀧𑀸𑀳𑀦𑁄 𑀫𑀬𑀸 𑀤𑀺𑀦𑁆𑀦𑁄𑀢𑀺 𑀏𑀓𑀁 𑀉𑀧𑀸𑀳𑀦𑀬𑀼𑀕𑀁 𑀫𑀬𑀸 𑀤𑀺𑀦𑁆𑀦𑀁. 𑀩𑁄𑀥𑀺𑀁 𑀲𑀫𑁆𑀧𑀚𑁆𑀚 𑀫𑁂 𑀢𑀼𑀯𑀦𑁆𑀢𑀺 𑀢𑁂𑀦 𑀉𑀧𑀸𑀳𑀦𑀬𑀼𑀕𑁂𑀦 𑀫𑁂 𑀫𑀬𑁆𑀳𑀁 𑀲𑀸𑀯𑀓𑀩𑁄𑀥𑀺𑀁 𑀢𑀼𑀯𑀁 𑀲𑀫𑁆𑀧𑀚𑁆𑀚 𑀦𑀺𑀧𑁆𑀨𑀸𑀤𑁂𑀳𑀻𑀢𑀺 𑀅𑀢𑁆𑀣𑁄.

𑁨𑁩-𑁨𑁪. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀫𑀜𑁆𑀚𑀭𑀺𑀓𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀫𑀜𑁆𑀚𑁂𑀝𑁆𑀞𑀺𑀧𑀼𑀧𑁆𑀨𑀁 𑀳𑀭𑀺𑀢𑀘𑀗𑁆𑀓𑁄𑀝𑀓𑀁 𑀕𑀳𑁂𑀢𑁆𑀯𑀸 𑀭𑀣𑀺𑀬𑀁 𑀯𑀻𑀣𑀺𑀬𑀸 𑀧𑀝𑀺𑀧𑀚𑁆𑀚𑀺𑀁 𑀅𑀳𑀁 𑀢𑀣𑀸 𑀧𑀝𑀺𑀧𑀦𑁆𑀦𑁄𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑀁 𑀲𑀫𑀡𑀸𑀦𑀕𑁆𑀕𑀁 𑀲𑀫𑀡𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀦𑁆𑀢𑀺 𑀤𑀺𑀲𑁆𑀯𑀸 𑀘 𑀧𑀦 𑀢𑀁 𑀧𑀼𑀧𑁆𑀨𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁮-𑁨𑁯. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀅𑀮𑁄𑀡𑀧𑀡𑁆𑀡𑀪𑀓𑁆𑀔𑁄𑀫𑁆𑀳𑀻𑀢𑀺 𑀔𑀻𑀭𑀧𑀡𑁆𑀡𑀸𑀤𑀻𑀦𑀺 𑀉𑀜𑁆𑀙𑀸𑀘𑀭𑀺𑀬𑀸𑀬 𑀆𑀳𑀭𑀺𑀢𑁆𑀯𑀸 𑀮𑁄𑀡𑀯𑀺𑀭𑀳𑀺𑀢𑀸𑀦𑀺 𑀧𑀡𑁆𑀡𑀸𑀦𑀺 𑀧𑀘𑀺𑀢𑁆𑀯𑀸 𑀪𑀓𑁆𑀔𑀸𑀫𑀺, 𑀅𑀮𑁄𑀡𑀧𑀡𑁆𑀡𑀪𑀓𑁆𑀔𑁄 𑀅𑀫𑁆𑀳𑀺 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀬𑀫𑁂𑀲𑀼 𑀘 𑀲𑀁𑀯𑀼𑀢𑁄𑀢𑀺 𑀦𑀺𑀬𑀫𑀲𑀜𑁆𑀜𑀺𑀢𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀲𑀼 𑀦𑀺𑀘𑁆𑀘𑀧𑀜𑁆𑀘𑀲𑀻𑀮𑁂𑀲𑀼 𑀲𑀁𑀯𑀼𑀢𑁄 𑀧𑀺𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀢𑀭𑀸𑀲𑁂 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀧𑀼𑀭𑁂𑀪𑀢𑁆𑀢𑀓𑀸𑀮𑁂 𑀅𑀦𑀼𑀧𑁆𑀧𑀢𑁆𑀢𑁂. 𑀲𑀺𑀤𑁆𑀥𑀢𑁆𑀣𑁄 𑀉𑀧𑀕𑀘𑁆𑀙𑀺 𑀫𑀦𑁆𑀢𑀺 𑀫𑀫 𑀲𑀫𑀻𑀧𑀁 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸 𑀉𑀧𑀕𑀜𑁆𑀙𑀺 𑀲𑀫𑁆𑀧𑀸𑀧𑀼𑀡𑀺. 𑀢𑀸𑀳𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀦𑁆𑀢𑀺 𑀅𑀳𑀁 𑀢𑀁 𑀅𑀮𑁄𑀡𑀧𑀡𑁆𑀡𑀁 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀦𑀯𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀫𑁂𑀯.

𑁩𑁭-𑁩𑁮. 𑀤𑀲𑀫𑀸𑀧𑀤𑀸𑀦𑁂 𑀲𑀺𑀔𑀺𑀦𑀁 𑀲𑀺𑀔𑀺𑀦𑀁 𑀬𑀣𑀸𑀢𑀺 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀑𑀪𑀸𑀲𑀬𑀦𑁆𑀢𑀁 𑀚𑀮𑀦𑁆𑀢𑀁 𑀲𑀺𑀔𑀻𑀦𑀁 𑀲𑀺𑀔𑀻𑀪𑀕𑀯𑀦𑁆𑀢𑀁 𑀲𑀺𑀔𑀻𑀦𑀁 𑀬𑀣𑀸 𑀚𑀮𑀫𑀸𑀦𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬. 𑀅𑀕𑁆𑀕𑀚𑀁 𑀧𑀼𑀧𑁆𑀨𑀫𑀸𑀤𑀸𑀬𑀸𑀢𑀺 𑀅𑀕𑁆𑀕𑀚𑀦𑀸𑀫𑀓𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀪𑀺𑀭𑁄𑀧𑀬𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀙𑀩𑁆𑀩𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁭. 𑀧𑀤𑀼𑀫𑀼𑀓𑁆𑀔𑀺𑀧𑀯𑀕𑁆𑀕𑁄

𑁧-𑁧𑁦. 𑀆𑀓𑀸𑀲𑀼𑀓𑁆𑀔𑀺𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀲𑀢𑁆𑀢𑀯𑀻𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀚𑀮𑀚𑀕𑁆𑀕𑁂 𑀤𑀼𑀯𑁂 𑀕𑀬𑁆𑀳𑀸𑀢𑀺 𑀚𑀮𑁂 𑀉𑀤𑀓𑁂 𑀚𑀸𑀢𑁂 𑀅𑀕𑁆𑀕𑁂 𑀉𑀧𑁆𑀧𑀮𑀸𑀤𑀬𑁄 𑀤𑁆𑀯𑁂 𑀧𑀼𑀧𑁆𑀨𑁂 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀼𑀧𑁆𑀨𑀁 𑀧𑀸𑀤𑁂𑀲𑀼 𑀦𑀺𑀓𑁆𑀔𑀺𑀧𑀺𑀁 𑀧𑀽𑀚𑁂𑀲𑀺𑀁, 𑀏𑀓𑀁 𑀧𑀼𑀧𑁆𑀨𑀁 𑀆𑀓𑀸𑀲𑁂 𑀔𑀺𑀧𑀺𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀸𑀧𑀤𑀸𑀦𑀁 𑀧𑀸𑀓𑀝𑀫𑁂𑀯.

𑁧𑁦. 𑀢𑀢𑀺𑀬𑀸𑀧𑀤𑀸𑀦𑁂 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂𑀢𑀺 𑀉𑀢𑁆𑀢𑀫𑁂 𑀩𑁄𑀥𑀺𑀧𑀸𑀤𑀧𑁂. 𑀅𑀟𑁆𑀠𑀘𑀦𑁆𑀤𑀁 𑀫𑀬𑀸 𑀤𑀺𑀦𑁆𑀦𑀦𑁆𑀢𑀺 𑀢𑀲𑁆𑀫𑀺𑀁 𑀩𑁄𑀥𑀺𑀫𑀽𑀮𑁂 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀬𑀸 𑀅𑀦𑁂𑀓𑀧𑀼𑀧𑁆𑀨𑀸𑀦𑀺 𑀧𑀽𑀚𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀥𑀭𑀡𑀻𑀭𑀼𑀳𑀧𑀸𑀤𑀧𑁂𑀢𑀺 𑀭𑀼𑀓𑁆𑀔𑀧𑀩𑁆𑀩𑀢𑀭𑀢𑀦𑀸𑀤𑀬𑁄 𑀥𑀸𑀭𑁂𑀢𑀻𑀢𑀺 𑀥𑀭𑀡𑀻, 𑀧𑀣𑀯𑀻, 𑀥𑀭𑀡𑀺𑀬𑀸 𑀭𑀼𑀳𑀢𑀺 𑀧𑀢𑀺𑀝𑁆𑀞𑀳𑀢𑀻𑀢𑀺 𑀥𑀭𑀡𑀻𑀭𑀼𑀳𑁄, 𑀧𑀸𑀤𑀲𑀗𑁆𑀔𑀸𑀢𑁂𑀦 𑀫𑀽𑀮𑁂𑀦 𑀉𑀤𑀓𑀁 𑀧𑀺𑀯𑀢𑀺 𑀔𑀦𑁆𑀥𑀯𑀺𑀝𑀧𑀸𑀤𑀻𑀲𑀼 𑀧𑀢𑁆𑀣𑀭𑀺𑀬𑀢𑀻𑀢𑀺 𑀧𑀸𑀤𑀧𑁄, 𑀥𑀭𑀡𑀻𑀭𑀼𑀳𑁄 𑀘 𑀲𑁄 𑀧𑀸𑀤𑀧𑁄 𑀘𑁂𑀢𑀺 𑀥𑀭𑀡𑀻𑀭𑀼𑀳𑀧𑀸𑀤𑀧𑁄, 𑀢𑀲𑁆𑀫𑀺𑀁 𑀥𑀭𑀡𑀻𑀭𑀼𑀳𑀧𑀸𑀤𑀧𑁂 𑀧𑀼𑀧𑁆𑀨𑀁 𑀫𑀬𑀸 𑀧𑀽𑀚𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁮-𑁧𑁯. 𑀧𑀜𑁆𑀘𑀫𑀸𑀧𑀤𑀸𑀦𑁂 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺 𑀳𑀺𑀫𑀯𑀦𑁆𑀢𑀲𑁆𑀲 𑀆𑀲𑀦𑁆𑀦𑁂. 𑀭𑁄𑀫𑀲𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀭𑀼𑀓𑁆𑀔𑀮𑀢𑀸𑀕𑀼𑀫𑁆𑀩𑀸𑀪𑀸𑀯𑀸 𑀓𑁂𑀯𑀮𑀁 𑀤𑀩𑁆𑀩𑀢𑀺𑀡𑀸𑀤𑀺𑀲𑀜𑁆𑀙𑀦𑁆𑀦𑀢𑁆𑀢𑀸 𑀭𑁄𑀫𑀲𑁄 𑀦𑀸𑀫 𑀧𑀩𑁆𑀩𑀢𑁄 𑀅𑀳𑁄𑀲𑀺. 𑀢𑀫𑁆𑀳𑀺 𑀧𑀩𑁆𑀩𑀢𑀧𑀸𑀤𑀫𑁆𑀳𑀻𑀢𑀺 𑀢𑀲𑁆𑀫𑀺𑀁 𑀧𑀩𑁆𑀩𑀢𑀧𑀭𑀺𑀬𑀦𑁆𑀢𑁂. 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀲𑀫𑀺𑀢𑀧𑀸𑀧𑁄 𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑁄 𑀲𑀫𑀡𑁄 𑀯𑀟𑁆𑀠𑀺𑀢𑀇𑀦𑁆𑀤𑁆𑀭𑀺𑀬𑁄, 𑀭𑀓𑁆𑀔𑀺𑀢𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀇𑀦𑁆𑀤𑁆𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀟𑁆𑀠𑀺𑀢𑀇𑀦𑁆𑀤𑁆𑀭𑀺𑀬𑁄 𑀯𑀟𑁆𑀠𑀺𑀢𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀇𑀦𑁆𑀤𑁆𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀲𑀫𑀡𑀲𑁆𑀲 𑀅𑀳𑀁 𑀩𑀺𑀴𑀸𑀮𑀺𑀆𑀮𑀼𑀯𑁂 𑀕𑀳𑁂𑀢𑁆𑀯𑀸 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀲𑀢𑁆𑀢𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁮. 𑀲𑀼𑀯𑀡𑁆𑀡𑀩𑀺𑀩𑁆𑀩𑁄𑀳𑀦𑀯𑀕𑁆𑀕𑁄

𑁧-𑁧𑁦. 𑀲𑀼𑀯𑀡𑁆𑀡𑀩𑀺𑀩𑁆𑀩𑁄𑀳𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀅𑀝𑁆𑀞𑀯𑀻𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀫𑁂𑀯.

𑁫. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀫𑀦𑁄𑀫𑀬𑁂𑀦 𑀓𑀸𑀬𑁂𑀦𑀸𑀢𑀺 𑀬𑀣𑀸 𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀓𑀸𑀬𑁂𑀦𑀸𑀢𑀺 𑀅𑀢𑁆𑀣𑁄.

𑁧𑁦. 𑀢𑀢𑀺𑀬𑀸𑀧𑀤𑀸𑀦𑁂 𑀫𑀳𑀸𑀲𑀫𑀼𑀤𑁆𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀫𑀳𑀸𑀲𑀸𑀕𑀭𑀸𑀲𑀦𑁆𑀦𑁂 𑀞𑀺𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑀭𑁂 𑀧𑀩𑁆𑀩𑀢𑀮𑁂𑀡𑁂𑀢𑀺 𑀅𑀢𑁆𑀣𑁄. 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸 𑀯𑀺𑀯𑁂𑀓𑀓𑀸𑀫𑀢𑀸𑀬 𑀯𑀲𑀢𑀺 𑀧𑀝𑀺𑀯𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦𑀓𑀸𑀲𑀳𑀦𑁆𑀢𑀺 𑀅𑀳𑀁 𑀢𑀲𑁆𑀲 𑀪𑀕𑀯𑀢𑁄 𑀧𑀝𑀺𑀉𑀕𑁆𑀕𑀦𑁆𑀢𑁆𑀯𑀸 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀦𑀸𑀤𑀺𑀧𑀼𑀜𑁆𑀜𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀗𑁆𑀓𑁄𑀝𑀓𑀫𑀤𑀸𑀲𑀳𑀦𑁆𑀢𑀺 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀅𑀳𑀁 𑀧𑀼𑀧𑁆𑀨𑀪𑀭𑀺𑀢𑀁 𑀘𑀗𑁆𑀓𑁄𑀝𑀓𑀁 𑀓𑀤𑀫𑁆𑀩𑀁 𑀅𑀤𑀸𑀲𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁪. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀅𑀓𑀓𑁆𑀓𑀲𑀘𑀺𑀢𑁆𑀢𑀲𑁆𑀲𑀸𑀣𑀸𑀢𑀺 𑀅𑀨𑀭𑀼𑀲𑀘𑀺𑀢𑁆𑀢𑀲𑁆𑀲, 𑀅𑀣-𑀲𑀤𑁆𑀤𑁄 𑀧𑀤𑀧𑀽𑀭𑀡𑁂.

𑁧𑁯. 𑀧𑀜𑁆𑀘𑀫𑀸𑀧𑀤𑀸𑀦𑁂 𑀉𑀤𑀼𑀫𑁆𑀩𑀭𑁂 𑀯𑀲𑀦𑁆𑀢𑀲𑁆𑀲𑀸𑀢𑀺 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀫𑀽𑀮𑁂 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀯𑀲𑀦𑁆𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄. 𑀦𑀺𑀬𑀢𑁂 𑀧𑀡𑁆𑀡𑀲𑀦𑁆𑀣𑀭𑁂𑀢𑀺 𑀦𑀺𑀬𑀸𑀫𑀺𑀢𑁂 𑀧𑀝𑀺𑀩𑀤𑁆𑀥𑁂 𑀧𑀡𑁆𑀡𑀲𑀦𑁆𑀣𑀭𑁂 𑀲𑀸𑀔𑀸𑀪𑀗𑁆𑀕𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲. 𑀯𑀼𑀢𑁆𑀣𑁄𑀓𑀸𑀲𑁄 𑀫𑀬𑀸 𑀤𑀺𑀦𑁆𑀦𑁄𑀢𑀺 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀫𑀡𑁆𑀟𑀧𑀤𑁆𑀯𑀸𑀭𑀸𑀤𑀻𑀳𑀺 𑀧𑀺𑀳𑀺𑀢𑁄𑀓𑀸𑀲𑁄 𑀫𑀬𑀸 𑀤𑀺𑀦𑁆𑀦𑁄 𑀲𑀫𑁆𑀧𑀸𑀤𑀺𑀢𑁄𑀢𑀺 𑀅𑀢𑁆𑀣𑁄.

𑁨𑁪. 𑀙𑀝𑁆𑀞𑀸𑀧𑀤𑀸𑀦𑁂 𑀧𑁄𑀢𑁆𑀣𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀦𑁆𑀢𑀺 𑀧𑁄𑀢𑁆𑀣𑀯𑀝𑁆𑀝𑀺𑀁 𑀧𑁄𑀢𑁆𑀣𑀙𑀮𑁆𑀮𑀺𑀁 𑀢𑀸𑀴𑁂𑀢𑁆𑀯𑀸 𑀓𑀢𑀁 𑀲𑀸𑀝𑀓𑀁 𑀯𑀺𑀲𑀫𑀁 𑀕𑁄𑀨𑀸𑀲𑀼𑀓𑁂𑀦 𑀖𑀁𑀲𑀺𑀢𑁆𑀯𑀸 𑀦𑀺𑀫𑁆𑀫𑀺𑀢𑀁 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀦𑁆𑀢𑀺𑀢𑁆𑀯𑀸 𑀢𑁂𑀦 𑀲𑀼𑀢𑁆𑀢𑁂𑀦 𑀦𑀺𑀲𑀻𑀤𑀦𑀢𑁆𑀣𑀸𑀬 𑀯𑀸 𑀪𑀽𑀫𑀢𑁆𑀣𑀭𑀡𑀢𑁆𑀣𑀸𑀬 𑀯𑀸 𑀲𑀸𑀝𑀓𑀁 𑀯𑀸𑀬𑀸𑀧𑁂𑀢𑁆𑀯𑀸 𑀢𑀁 𑀲𑀸𑀝𑀓𑀁 𑀫𑀬𑀸 𑀭𑀢𑀦𑀢𑁆𑀢𑀬𑀲𑁆𑀲 𑀤𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑁨𑁭. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂𑀢𑀺 𑀘𑀦𑁆𑀤𑀪𑀸𑀕𑀸𑀬 𑀦𑀸𑀫 𑀦𑀤𑀺𑀬𑀸 𑀢𑀻𑀭𑀢𑁄, 𑀦𑀺𑀲𑁆𑀲𑀓𑁆𑀓𑁂 𑀪𑀼𑀫𑁆𑀫𑀯𑀘𑀦𑀁. 𑀅𑀦𑀼𑀲𑁄𑀢𑀦𑁆𑀢𑀺 𑀲𑁄𑀢𑀲𑁆𑀲 𑀅𑀦𑀼 𑀳𑁂𑀝𑁆𑀞𑀸𑀕𑀗𑁆𑀕𑀁 𑀯𑀚𑀸𑀫𑀺 𑀕𑀘𑁆𑀙𑀸𑀫𑀺 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀢 𑀫𑀸𑀮𑀼𑀯𑀧𑀼𑀧𑁆𑀨𑀸𑀦𑀺, 𑀘𑀺𑀢𑀫𑀸𑀭𑁄𑀧𑀬𑀺𑀁 𑀅𑀳𑀦𑁆𑀢𑀺 𑀅𑀳𑀁 𑀫𑀸𑀮𑀼𑀯𑀧𑀼𑀧𑁆𑀨𑀸𑀦𑀺 𑀲𑀢𑁆𑀢 𑀧𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀘𑀺𑀢𑀓𑁂 𑀯𑀸𑀮𑀼𑀓𑀭𑀸𑀲𑀺𑀫𑁆𑀳𑀺 𑀯𑀸𑀮𑀼𑀓𑀸𑀳𑀺 𑀣𑀽𑀧𑀁 𑀓𑀢𑁆𑀯𑀸 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁧-𑁩𑁨. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀫𑀳𑀸𑀲𑀺𑀦𑁆𑀥𑀼 𑀲𑀼𑀤𑀲𑁆𑀲𑀦𑀸𑀢𑀺 𑀲𑀼𑀦𑁆𑀤𑀭𑀤𑀲𑁆𑀲𑀦𑀲𑀼𑀦𑁆𑀤𑀭𑁄𑀤𑀓𑀥𑀯𑀮𑀧𑀼𑀮𑀺𑀦𑁄𑀧𑀲𑁄𑀪𑀺𑀢𑀢𑁆𑀢𑀸 𑀲𑀼𑀝𑁆𑀞𑀼 𑀫𑀦𑁄𑀳𑀭𑀸 𑀫𑀳𑀸𑀲𑀺𑀦𑁆𑀥𑀼 𑀦𑀸𑀫 𑀯𑀸𑀭𑀺𑀦𑀤𑀻 𑀅𑀳𑁄𑀲𑀺. 𑀢𑀢𑁆𑀣 𑀢𑀺𑀲𑁆𑀲𑀁 𑀲𑀺𑀦𑁆𑀥𑀼𑀯𑀸𑀭𑀺𑀦𑀤𑀺𑀬𑀁 𑀲𑀧𑁆𑀧𑀪𑀸𑀲𑀁 𑀧𑀪𑀸𑀬 𑀲𑀳𑀺𑀢𑀁 𑀲𑀼𑀤𑀲𑁆𑀲𑀦𑀁 𑀲𑀼𑀦𑁆𑀤𑀭𑀭𑀽𑀧𑀁 𑀧𑀭𑀫𑁄𑀧𑀲𑀫𑁂 𑀬𑀼𑀢𑁆𑀢𑀁 𑀉𑀢𑁆𑀢𑀫𑁂 𑀉𑀧𑀲𑀫𑁂 𑀬𑀼𑀢𑁆𑀢𑀁 𑀲𑀫𑀗𑁆𑀕𑀻𑀪𑀽𑀢𑀁 𑀯𑀻𑀢𑀭𑀸𑀕𑀁 𑀅𑀳𑀁 𑀅𑀤𑁆𑀤𑀲𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀲𑁆𑀯𑀸𑀳𑀁 𑀯𑀺𑀫𑁆𑀳𑀺𑀢𑀸𑀲𑀬𑁄𑀢𑀺 ‘‘𑀏𑀯𑀭𑀽𑀧𑀁 𑀪𑀬𑀸𑀦𑀓𑀁 𑀳𑀺𑀫𑀯𑀦𑁆𑀢𑀁 𑀓𑀣𑀁 𑀲𑀫𑁆𑀧𑀢𑁆𑀢𑁄’’𑀢𑀺 𑀯𑀺𑀫𑁆𑀳𑀺𑀢𑀅𑀚𑁆𑀛𑀸𑀲𑀬𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀮𑀼𑀯𑀁 𑀢𑀲𑁆𑀲 𑀧𑀸𑀤𑀸𑀲𑀺𑀦𑁆𑀢𑀺 𑀢𑀲𑁆𑀲 𑀅𑀭𑀳𑀢𑁄 𑀅𑀳𑀁 𑀧𑀲𑀦𑁆𑀦𑀫𑀸𑀦𑀲𑁄 𑀆𑀮𑀼𑀯𑀓𑀦𑁆𑀤𑀁 𑀧𑀸𑀤𑀸𑀲𑀺𑀁 𑀆𑀤𑀭𑁂𑀦 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯𑀸𑀢𑀺.

𑀅𑀝𑁆𑀞𑀯𑀻𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁯. 𑀧𑀡𑁆𑀡𑀤𑀸𑀬𑀓𑀯𑀕𑁆𑀕𑁄

𑁧-𑁧𑁦. 𑀧𑀡𑁆𑀡𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀏𑀓𑀽𑀦𑀢𑀺𑀁𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀧𑀡𑁆𑀡𑀪𑁄𑀚𑀦𑀪𑁄𑀚𑀦𑁄𑀢𑀺 𑀔𑀻𑀭𑀧𑀡𑁆𑀡𑀸𑀤𑀺𑀪𑁄𑀚𑀦𑀲𑁆𑀲 𑀪𑀼𑀜𑁆𑀚𑀦𑀢𑁆𑀣𑀸𑀬 𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀅𑀫𑁆𑀳𑀺 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄. 𑀉𑀧𑀯𑀺𑀝𑁆𑀞𑀜𑁆𑀘 𑀫𑀁 𑀲𑀦𑁆𑀢𑀦𑁆𑀢𑀺 𑀧𑀡𑁆𑀡𑀲𑀸𑀮𑀸𑀬𑀁 𑀉𑀧𑀯𑀺𑀝𑁆𑀞𑀁 𑀲𑀦𑁆𑀢𑀁 𑀯𑀺𑀚𑁆𑀚𑀫𑀸𑀦𑀁 𑀫𑀁. 𑀉𑀧𑀸𑀕𑀘𑁆𑀙𑀺 𑀫𑀳𑀸𑀇𑀲𑀻𑀢𑀺 𑀫𑀳𑀦𑁆𑀢𑁂 𑀲𑀻𑀮𑀸𑀤𑀺𑀔𑀦𑁆𑀥𑁂 𑀏𑀲𑀦𑀢𑁄 𑀫𑀳𑀸𑀇𑀲𑀺. 𑀮𑁄𑀓𑀧𑀚𑁆𑀚𑁄𑀢𑁄 𑀮𑁄𑀓𑀧𑀤𑀻𑀧𑁄 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸 𑀉𑀧𑀕𑀘𑁆𑀙𑀺, 𑀫𑀫 𑀲𑀫𑀻𑀧𑀁 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. 𑀦𑀺𑀲𑀺𑀦𑁆𑀦𑀲𑁆𑀲 𑀧𑀡𑁆𑀡𑀲𑀦𑁆𑀣𑀭𑁂𑀢𑀺 𑀉𑀧𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀦𑁆𑀣𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀔𑀸𑀤𑀦𑀢𑁆𑀣𑀸𑀬 𑀲𑁂𑀤𑀺𑀢𑀁 𑀧𑀡𑁆𑀡𑀁 𑀫𑀬𑀸 𑀤𑀺𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫-𑁭. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀲𑀺𑀦𑁂𑀭𑀼𑀲𑀫𑀲𑀦𑁆𑀢𑁄𑀲𑁄 𑀥𑀭𑀡𑀻𑀲𑀫𑀲𑀸𑀤𑀺𑀲𑁄 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀫𑁆𑀳𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀲𑀼𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀸𑀬 𑀫𑀫𑀼𑀧𑀝𑁆𑀞𑀺𑀢𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 ‘‘𑀅𑀚𑁆𑀚 𑀫𑀫 𑀬𑁄 𑀓𑁄𑀘𑀺 𑀓𑀺𑀜𑁆𑀘𑀺 𑀤𑀸𑀦𑀁 𑀤𑀤𑀸𑀢𑀺, 𑀢𑀲𑁆𑀲 𑀫𑀳𑀧𑁆𑀨𑀮’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀫𑀫 𑀲𑀦𑁆𑀢𑀺𑀓𑀁 𑀲𑀫𑀻𑀧𑀁 𑀉𑀧𑀝𑁆𑀞𑀺𑀢𑁄 𑀲𑀫𑀻𑀧𑀫𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀳𑀭𑀻𑀢𑀓𑀁…𑀧𑁂… 𑀨𑀸𑀭𑀼𑀲𑀓𑀨𑀮𑀸𑀦𑀺 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀁 𑀢𑀁 𑀨𑀮𑀁 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀺𑀦𑁄 𑀢𑀲𑁆𑀲 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀲𑁆𑀲 𑀫𑀬𑀸 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀤𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁧-𑁧𑁨. 𑀢𑀢𑀺𑀬𑀸𑀧𑀤𑀸𑀦𑁂 𑀲𑀻𑀳𑀁 𑀬𑀣𑀸 𑀯𑀦𑀘𑀭𑀦𑁆𑀢𑀺 𑀯𑀦𑁂 𑀘𑀭𑀫𑀸𑀦𑀁 𑀲𑀻𑀳𑀭𑀸𑀚𑀁 𑀇𑀯 𑀘𑀭𑀫𑀸𑀦𑀁 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑀪𑀸𑀚𑀸𑀦𑀺𑀬𑀁 𑀬𑀣𑀸𑀢𑀺 𑀯𑀲𑀪𑁄, 𑀦𑀺𑀲𑀪𑁄, 𑀯𑀺𑀲𑀪𑁄, 𑀆𑀲𑀪𑁄𑀢𑀺 𑀘𑀢𑁆𑀢𑀸𑀭𑁄 𑀕𑀯𑀚𑁂𑀝𑁆𑀞𑀓𑀸. 𑀢𑁂𑀲𑀼 𑀕𑀯𑀲𑀢𑀲𑁆𑀲 𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀕𑀯𑀲𑀳𑀲𑁆𑀲𑀲𑁆𑀲 𑀚𑁂𑀝𑁆𑀞𑀓𑁄 𑀦𑀺𑀲𑀪𑁄, 𑀕𑀯𑀲𑀢𑀲𑀳𑀲𑁆𑀲𑀲𑁆𑀲 𑀚𑁂𑀝𑁆𑀞𑀓𑁄 𑀯𑀺𑀲𑀪𑁄, 𑀕𑀯𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁆𑀲 𑀚𑁂𑀝𑁆𑀞𑀓𑁄 𑀆𑀲𑀪𑁄. 𑀇𑀥 𑀧𑀦 𑀆𑀲𑀪𑁄 ‘‘𑀦𑀺𑀲𑀪𑁄’’𑀢𑀺 𑀯𑀼𑀢𑁆𑀢𑁄, 𑀆𑀚𑀸𑀦𑀻𑀬𑀁 𑀅𑀪𑀻𑀢𑀁 𑀦𑀺𑀘𑁆𑀘𑀮𑀁 𑀉𑀲𑀪𑀭𑀸𑀚𑀁 𑀇𑀯𑀸𑀢𑀺 𑀅𑀢𑁆𑀣𑁄. 𑀓𑀓𑀼𑀥𑀁 𑀯𑀺𑀮𑀲𑀦𑁆𑀢𑀁𑀯𑀸𑀢𑀺 𑀧𑀼𑀧𑁆𑀨𑀧𑀮𑁆𑀮𑀯𑁂𑀳𑀺 𑀲𑁄𑀪𑀫𑀸𑀦𑀁 𑀓𑀓𑀼𑀥𑀭𑀼𑀓𑁆𑀔𑀁 𑀇𑀯 𑀦𑀭𑀸𑀲𑀪𑀁 𑀦𑀭𑀸𑀦𑀁 𑀆𑀲𑀪𑀁 𑀉𑀢𑁆𑀢𑀫𑀁 𑀆𑀕𑀘𑁆𑀙𑀦𑁆𑀢𑀁 𑀲𑀺𑀤𑁆𑀥𑀢𑁆𑀣𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑀤𑁆𑀥𑀸𑀬 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀸𑀧𑀤𑀸𑀦𑀸𑀤𑀻𑀦𑀺 𑀤𑀲𑀫𑀸𑀯𑀲𑀸𑀦𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯𑀸𑀢𑀺.

𑀏𑀓𑀽𑀦𑀢𑀺𑀁𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁦. 𑀘𑀺𑀢𑀓𑀧𑀽𑀚𑀓𑀯𑀕𑁆𑀕𑁄

𑁧-𑁧𑁦. 𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀢𑀺𑀁𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀳𑀦𑁆𑀢𑀺 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑀼𑀓𑀸𑀫𑁄 𑀅𑀳𑀁. 𑀦𑀸𑀦𑀸𑀧𑀼𑀧𑁆𑀨𑀁 𑀲𑀫𑀸𑀦𑀬𑀺𑀦𑁆𑀢𑀺 𑀦𑀸𑀦𑀸 𑀅𑀦𑁂𑀓𑀯𑀺𑀥𑀁 𑀘𑀫𑁆𑀧𑀓𑀲𑀮𑀮𑀸𑀤𑀺𑀧𑀼𑀧𑁆𑀨𑀁 𑀲𑀁 𑀲𑀼𑀝𑁆𑀞𑀼 𑀆𑀦𑀬𑀺𑀁, 𑀭𑀸𑀲𑀺𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄𑀢𑀺 𑀲𑀓𑀮𑀮𑁄𑀓𑀢𑁆𑀢𑀬𑀩𑀦𑁆𑀥𑀼𑀲𑁆𑀲 𑀜𑀸𑀢𑀓𑀲𑁆𑀲 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑀺𑀢𑀓𑀁 𑀆𑀴𑀸𑀳𑀦𑀘𑀺𑀢𑀓𑀁 𑀤𑀸𑀭𑀼𑀭𑀸𑀲𑀺𑀁 𑀚𑀮𑀦𑁆𑀢𑀁 𑀆𑀤𑀺𑀢𑁆𑀢𑀁 𑀤𑀺𑀲𑁆𑀯𑀸 𑀢𑀜𑁆𑀘 𑀫𑀬𑀸 𑀭𑀸𑀲𑀻𑀓𑀢𑀁 𑀧𑀼𑀧𑁆𑀨𑀁 𑀑𑀓𑀺𑀭𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬-𑁭. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑁄𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀦𑀺𑀯𑀸𑀲𑀺𑀦𑁄 𑀅𑀘𑁆𑀙𑀸𑀤𑀦𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸 𑀧𑀜𑁆𑀘 𑀦𑀺𑀩𑁆𑀩𑀢𑁆𑀢𑀸𑀢𑀺 𑀇𑀤𑁆𑀥𑀺𑀯𑀺𑀥𑀸𑀤𑀬𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀧𑀜𑁆𑀘 𑀜𑀸𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀸 𑀉𑀧𑁆𑀧𑀸𑀤𑀺𑀢𑀸 𑀦𑀺𑀧𑁆𑀨𑀸𑀤𑀺𑀢𑀸. 𑀘𑀦𑁆𑀤𑀲𑁆𑀲 𑀧𑀭𑀺𑀫𑀚𑁆𑀚𑀓𑁄𑀢𑀺 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀲𑀫𑀦𑁆𑀢𑀢𑁄 𑀫𑀚𑁆𑀚𑀓𑁄, 𑀨𑀼𑀝𑁆𑀞𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀺𑀁 𑀮𑁄𑀓𑀧𑀚𑁆𑀚𑁄𑀢𑀦𑁆𑀢𑀺 𑀲𑀓𑀮𑀮𑁄𑀓𑀢𑁆𑀢𑀬𑁂 𑀧𑀤𑀻𑀧𑀲𑀤𑀺𑀲𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀫𑀫 𑀲𑀦𑁆𑀢𑀺𑀓𑀁 𑀅𑀪𑀺𑀕𑀢𑀁 𑀯𑀺𑀲𑁂𑀲𑁂𑀦 𑀲𑀫𑁆𑀧𑀢𑁆𑀢𑀁 𑀆𑀕𑀢𑀁. 𑀤𑀺𑀲𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀸𑀦𑀻𑀢𑀺 𑀤𑁂𑀯𑀮𑁄𑀓𑀢𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄 𑀫𑀢𑁆𑀣𑀓𑁂 𑀙𑀢𑁆𑀢𑀸𑀓𑀸𑀭𑁂𑀦 𑀅𑀳𑀁 𑀥𑀸𑀭𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁧-𑁧𑁩. 𑀢𑀢𑀺𑀬𑀸𑀧𑀤𑀸𑀦𑁂 𑀧𑀼𑀢𑁆𑀢𑁄 𑀫𑀫 𑀧𑀩𑁆𑀩𑀚𑀺𑀢𑁄𑀢𑀺 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄. 𑀓𑀸𑀲𑀸𑀬𑀯𑀲𑀦𑁄 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑀓𑀸𑀮𑁂 𑀓𑀸𑀲𑀸𑀬𑀦𑀺𑀯𑀢𑁆𑀣𑁄, 𑀦 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀘 𑀩𑀼𑀤𑁆𑀥𑀢𑁆𑀢𑀁 𑀲𑀫𑁆𑀧𑀢𑁆𑀢𑁄𑀢𑀺 𑀲𑁄 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀘𑀢𑀽𑀲𑀼 𑀩𑀼𑀤𑁆𑀥𑁂𑀲𑀼 𑀲𑀸𑀯𑀓𑀩𑀼𑀤𑁆𑀥𑀪𑀸𑀯𑀁 𑀲𑀁 𑀲𑀼𑀝𑁆𑀞𑀼 𑀧𑀢𑁆𑀢𑁄, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀼𑀢𑁄 𑀮𑁄𑀓𑀧𑀽𑀚𑀺𑀢𑁄𑀢𑀺 𑀲𑀓𑀮𑀮𑁄𑀓𑁂𑀳𑀺 𑀓𑀢𑀲𑀓𑁆𑀓𑀸𑀭𑁄 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀦𑀦𑁆𑀢𑁄 𑀲𑀓𑀁 𑀧𑀼𑀢𑁆𑀢𑀦𑁆𑀢𑀺 𑀅𑀳𑀁 𑀢𑀲𑁆𑀲 𑀕𑀢𑀤𑁂𑀲𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑀁 𑀧𑀼𑀢𑁆𑀢𑀁 𑀯𑀺𑀘𑀺𑀦𑀦𑁆𑀢𑁄 𑀧𑀘𑁆𑀙𑀢𑁄 𑀅𑀕𑀫𑀁, 𑀅𑀦𑀼𑀕𑀢𑁄 𑀅𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀼𑀢𑀲𑁆𑀲 𑀫𑀳𑀦𑁆𑀢𑀲𑁆𑀲𑀸𑀢𑀺 𑀫𑀳𑀦𑁆𑀢𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀬𑀼𑀢𑁆𑀢𑀢𑁆𑀢𑀸 𑀫𑀳𑀦𑁆𑀢𑀲𑁆𑀲 𑀢𑀲𑁆𑀲 𑀫𑀫 𑀧𑀼𑀢𑁆𑀢𑀲𑁆𑀲 𑀅𑀭𑀳𑀢𑁄 𑀆𑀤𑀳𑀦𑀝𑁆𑀞𑀸𑀦𑁂 𑀘𑀺𑀢𑀓𑀁 𑀘𑀺𑀢𑀓𑀝𑁆𑀞𑀸𑀦𑀁 𑀅𑀳𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀕𑁆𑀕𑀬𑁆𑀳 𑀅𑀜𑁆𑀚𑀮𑀺𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀤𑀳𑀦𑀝𑁆𑀞𑀸𑀦𑁂 𑀅𑀜𑁆𑀚𑀮𑀺𑀁 𑀤𑀲𑀗𑁆𑀕𑀼𑀮𑀺𑀲𑀫𑁄𑀥𑀸𑀦𑀁 𑀧𑀕𑁆𑀕𑀳𑁂𑀢𑁆𑀯𑀸 𑀲𑀺𑀭𑀲𑀺 𑀓𑀢𑁆𑀯𑀸 𑀅𑀳𑀁 𑀘𑀺𑀢𑀓𑀁 𑀤𑀳𑀦𑀤𑀸𑀭𑀼𑀭𑀸𑀲𑀺𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑀸𑀫𑀁 𑀓𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀧𑀕𑁆𑀕𑀬𑁆𑀳𑀸𑀢𑀺 𑀦 𑀓𑁂𑀯𑀮𑀫𑁂𑀯 𑀯𑀦𑁆𑀤𑀺𑀢𑁆𑀯𑀸 𑀥𑀯𑀮𑀘𑁆𑀙𑀢𑁆𑀢𑀜𑁆𑀘 𑀧𑀕𑁆𑀕𑀬𑁆𑀳 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀳𑀁 𑀆𑀭𑁄𑀧𑁂𑀲𑀺𑀁 𑀧𑀢𑀺𑀝𑁆𑀞𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁭-𑁧𑁮. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀅𑀦𑀼𑀕𑁆𑀕𑀢𑀫𑁆𑀳𑀺 𑀆𑀤𑀺𑀘𑁆𑀘𑁂𑀢𑀺 𑀲𑀽𑀭𑀺𑀬𑁂 𑀅𑀦𑀼𑀕𑁆𑀕𑀢𑁂 𑀅𑀦𑀼𑀝𑁆𑀞𑀺𑀢𑁂 𑀧𑀘𑁆𑀘𑀽𑀲𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀧𑀲𑀸𑀤𑁄 𑀯𑀺𑀧𑀼𑀮𑁄 𑀅𑀳𑀽𑀢𑀺 𑀭𑁄𑀕𑀧𑀻𑀴𑀺𑀢𑀲𑁆𑀲 𑀫𑀬𑁆𑀳𑀁 𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀯𑀺𑀧𑀼𑀮𑁄 𑀅𑀢𑀺𑀭𑁂𑀓𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀭𑀡𑁂𑀦 𑀅𑀳𑀼 𑀅𑀳𑁄𑀲𑀺. 𑀫𑀳𑁂𑀲𑀺𑀦𑁄 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀮𑁄𑀓𑀫𑁆𑀳𑀺 𑀧𑀸𑀢𑀼𑀪𑀸𑀯𑁄 𑀧𑀸𑀓𑀝𑀪𑀸𑀯𑁄 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀖𑁄𑀲𑀫𑀲𑁆𑀲𑁄𑀲𑀳𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀸𑀢𑀼𑀪𑀸𑀯𑁂 𑀲𑀢𑀺 ‘‘𑀅𑀳𑀁 𑀕𑀺𑀮𑀸𑀦𑁄 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀖𑁄𑀲𑀁 𑀅𑀲𑁆𑀲𑁄𑀲𑀺𑀁. 𑀦 𑀘 𑀧𑀲𑁆𑀲𑀸𑀫𑀺 𑀢𑀁 𑀚𑀺𑀦𑀦𑁆𑀢𑀺 𑀢𑀁 𑀚𑀺𑀢𑀧𑀜𑁆𑀘𑀫𑀸𑀭𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀦 𑀧𑀲𑁆𑀲𑀸𑀫𑀺, 𑀩𑀸𑀴𑁆𑀳𑀕𑀺𑀮𑀸𑀦𑀢𑁆𑀢𑀸 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀅𑀢𑁆𑀣𑁄. 𑀫𑀭𑀡𑀜𑁆𑀘 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀆𑀲𑀦𑁆𑀦𑀫𑀭𑀡𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀲𑀜𑁆𑀜𑀫𑀦𑀼𑀲𑁆𑀲𑀭𑀺𑀦𑁆𑀢𑀺 𑀩𑀼𑀤𑁆𑀥𑁄𑀢𑀺𑀦𑀸𑀫𑀁 𑀅𑀦𑀼𑀲𑁆𑀲𑀭𑀺𑀁, 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀫𑀦𑀲𑀺 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁧-𑁨𑁩. 𑀧𑀜𑁆𑀘𑀫𑀸𑀧𑀤𑀸𑀦𑁂 𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫𑀸𑀢𑀺 𑀆𑀭𑀸𑀫𑀤𑁆𑀯𑀸𑀭𑀢𑁄 𑀲𑀗𑁆𑀖𑀲𑁆𑀲 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀫𑀕𑁆𑀕𑁂𑀳𑀺 𑀅𑀢𑁆𑀣𑁄. 𑀕𑁄𑀲𑀻𑀲𑀁 𑀲𑀦𑁆𑀣𑀢𑀁 𑀫𑀬𑀸𑀢𑀺 𑀢𑀲𑁆𑀫𑀺𑀁 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀫𑀕𑁆𑀕𑁂 ‘‘𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀸𑀤𑀸 𑀫𑀸 𑀓𑀤𑁆𑀤𑀫𑀁 𑀅𑀓𑁆𑀓𑀫𑀦𑁆𑀢𑀽’’𑀢𑀺 𑀅𑀓𑁆𑀓𑀫𑀦𑀢𑁆𑀣𑀸𑀬 𑀕𑁄𑀲𑀻𑀲𑀝𑁆𑀞𑀺𑀁 𑀫𑀬𑀸 𑀲𑀦𑁆𑀣𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀦𑁆𑀢𑀺 𑀅𑀢𑁆𑀢𑀦𑁄 𑀕𑁄𑀲𑀻𑀲𑀅𑀢𑁆𑀣𑀭𑀡𑀓𑀫𑁆𑀫𑀲𑁆𑀲 𑀩𑀮𑁂𑀦 𑀆𑀚𑀸𑀦𑀻𑀬𑀸 𑀯𑀸𑀢𑀚𑀯𑀸 𑀲𑀺𑀦𑁆𑀥𑀯𑀸 𑀲𑀻𑀖𑀯𑀸𑀳𑀦𑀸𑀤𑀻𑀦𑀺 𑀯𑀺𑀧𑀸𑀓𑀨𑀮𑀸𑀦𑀺 𑀅𑀦𑀼𑀪𑁄𑀫𑀻𑀢𑀺 𑀅𑀢𑁆𑀣𑁄. 𑀅𑀳𑁄 𑀓𑀸𑀭𑀁 𑀧𑀭𑀫𑀓𑀸𑀭𑀦𑁆𑀢𑀺 𑀲𑀼𑀔𑁂𑀢𑁆𑀢𑁂 𑀲𑀗𑁆𑀖𑁂 𑀫𑀬𑀸 𑀲𑀼𑀝𑁆𑀞𑀼 𑀓𑀢𑀁 𑀓𑀸𑀭𑀁 𑀅𑀧𑁆𑀧𑀓𑀫𑁆𑀧𑀺 𑀓𑀺𑀘𑁆𑀘𑀁 𑀫𑀳𑀧𑁆𑀨𑀮𑀤𑀸𑀦𑀢𑁄 𑀧𑀭𑀫𑀓𑀸𑀭𑀁 𑀉𑀢𑁆𑀢𑀫𑀓𑀺𑀘𑁆𑀘𑀁 𑀅𑀳𑁄 𑀯𑀺𑀫𑁆𑀳𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀢𑀺𑀡𑀤𑁄𑀲𑀸𑀤𑀺𑀯𑀺𑀭𑀳𑀺𑀢𑁂𑀲𑀼 𑀔𑁂𑀢𑁆𑀢𑁂𑀲𑀼 𑀯𑀧𑁆𑀧𑀺𑀢𑀁 𑀲𑀸𑀮𑀺𑀩𑀻𑀚𑀁 𑀫𑀳𑀧𑁆𑀨𑀮𑀁 𑀤𑁂𑀢𑀺, 𑀏𑀯𑀫𑁂𑀯 𑀭𑀸𑀕𑀤𑁄𑀲𑀸𑀤𑀺𑀤𑁄𑀲𑀭𑀳𑀺𑀢𑁂 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁂 𑀲𑀗𑁆𑀖𑀔𑁂𑀢𑁆𑀢𑁂 𑀕𑁄𑀲𑀻𑀲𑀅𑀢𑁆𑀣𑀭𑀡𑀓𑀫𑁆𑀫𑀁 𑀫𑀬𑀸 𑀓𑀢𑀁, 𑀇𑀤𑀁 𑀫𑀳𑀧𑁆𑀨𑀮𑀁 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀅𑀜𑁆𑀜𑀁 𑀓𑀮𑀫𑀕𑁆𑀖𑀢𑀻𑀢𑀺 𑀅𑀜𑁆𑀜𑀁 𑀩𑀸𑀳𑀺𑀭𑀲𑀸𑀲𑀦𑁂 𑀓𑀢𑀁 𑀓𑀫𑁆𑀫𑀁 𑀲𑀗𑁆𑀖𑁂 𑀓𑀢𑀲𑁆𑀲 𑀓𑀸𑀭𑀲𑁆𑀲 𑀧𑀽𑀚𑀸𑀲𑀓𑁆𑀓𑀸𑀭𑀲𑁆𑀲 𑀓𑀮𑀁 𑀲𑁄𑀴𑀲𑀺𑀁 𑀓𑀮𑀁 𑀓𑁄𑀝𑁆𑀞𑀸𑀲𑀁 𑀦 𑀅𑀕𑁆𑀖𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯𑀸𑀢𑀺.

𑀢𑀺𑀁𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁧. 𑀧𑀤𑀼𑀫𑀓𑁂𑀲𑀭𑀯𑀕𑁆𑀕𑁄

𑁧-𑁧𑁦. 𑀧𑀤𑀼𑀫𑀓𑁂𑀲𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀏𑀓𑀢𑀺𑀁𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀇𑀲𑀺𑀲𑀗𑁆𑀖𑁂 𑀅𑀳𑀁 𑀧𑀼𑀩𑁆𑀩𑁂𑀢𑀺 𑀅𑀳𑀁 𑀧𑀼𑀩𑁆𑀩𑁂 𑀩𑁄𑀥𑀺𑀲𑀫𑁆𑀪𑀸𑀭𑀧𑀽𑀭𑀡𑀓𑀸𑀮𑁂 𑀇𑀲𑀺𑀲𑀗𑁆𑀖𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀇𑀲𑀺𑀲𑀫𑀽𑀳𑁂 𑀢𑁂𑀲𑀁 𑀲𑀫𑀻𑀧𑁂 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂 𑀫𑀸𑀢𑀗𑁆𑀕𑀳𑀢𑁆𑀣𑀺𑀓𑀼𑀮𑁂 𑀯𑀸𑀭𑀡𑁄 𑀘𑀡𑁆𑀟𑀳𑀢𑁆𑀣𑀻 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀦𑀼𑀲𑁆𑀲𑀸𑀤𑀬𑁄 𑀯𑀸𑀭𑁂𑀢𑀻𑀢𑀺 𑀯𑀸𑀭𑀡𑁄, 𑀅𑀣 𑀯𑀸 𑀯𑀸𑀘𑀸𑀬 𑀭𑀯𑀢𑀺 𑀓𑁄𑀜𑁆𑀘𑀦𑀸𑀤𑀁 𑀦𑀤𑀢𑀻𑀢𑀺 𑀯𑀸𑀭𑀡𑁄. 𑀫𑀳𑁂𑀲𑀻𑀦𑀁 𑀧𑀲𑀸𑀤𑁂𑀦𑀸𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑁂𑀲𑀻𑀦𑀁 𑀧𑀲𑀸𑀤𑁂𑀦. 𑀧𑀘𑁆𑀘𑁂𑀓𑀚𑀺𑀦𑀲𑁂𑀝𑁆𑀞𑁂𑀲𑀼, 𑀥𑀼𑀢𑀭𑀸𑀕𑁂𑀲𑀼 𑀢𑀸𑀤𑀺𑀲𑀽𑀢𑀺 𑀮𑁄𑀓𑀥𑀫𑁆𑀫𑁂𑀳𑀺 𑀦𑀺𑀘𑁆𑀘𑀮𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀧𑀤𑁆𑀫𑀓𑁂𑀲𑀭𑀁 𑀧𑀤𑀼𑀫𑀭𑁂𑀡𑀼𑀁 𑀑𑀓𑀺𑀭𑀺𑀁 𑀅𑀯𑀲𑀺𑀜𑁆𑀘𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀤𑀼𑀢𑀺𑀬𑀢𑀢𑀺𑀬𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑀺.

𑁧𑁩-𑁧𑁬. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀽𑀢𑀺 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀘𑀢𑀼𑀫𑀕𑁆𑀕𑀜𑀸𑀡𑀸𑀥𑀸𑀭𑀪𑀸𑀯𑀢𑁄 ‘‘𑀩𑁄𑀥𑀻’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀽𑀚𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀭𑀼𑀓𑁆𑀔𑀝𑁆𑀞𑀲𑁆𑀲𑁂𑀯 𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀲𑁆𑀲 𑀩𑁄𑀥𑀺𑀧𑀽𑀚𑀸𑀲𑀫𑀬𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄 𑀭𑀼𑀓𑁆𑀔𑀝𑁆𑀞𑁄 𑀇𑀯 𑀭𑀼𑀓𑁆𑀔𑁂 𑀞𑀺𑀢𑁄 𑀯𑀺𑀬 𑀧𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀩𑁄𑀥𑀺𑀧𑀽𑀚𑀸𑀓𑀭𑀡𑀓𑀸𑀮𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄. 𑀯𑀸𑀘𑀸𑀲𑀪𑀺𑀫𑀼𑀤𑀻𑀭𑀬𑀦𑁆𑀢𑀺 𑀫𑀼𑀤𑀼𑀲𑀺𑀮𑀺𑀝𑁆𑀞𑀫𑀥𑀼𑀭𑀉𑀢𑁆𑀢𑀫𑀖𑁄𑀲𑀁 𑀉𑀤𑀻𑀭𑀬𑀁 𑀓𑀣𑀬𑀦𑁆𑀢𑁄 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀲𑀺, 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀁𑀔𑀺𑀢𑁆𑀢𑁂𑀦 𑀘 𑀤𑁂𑀲𑁂𑀦𑁆𑀢𑁄𑀢𑀺 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀤𑁂𑀲𑁂𑀦𑁆𑀢𑁄 𑀲𑀁𑀔𑀺𑀢𑁆𑀢𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘 𑀤𑁂𑀲𑀬𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀘𑁆𑀙𑀤𑁄𑀢𑀺 𑀭𑀸𑀕𑁄 𑀙𑀤𑀦𑀁, 𑀤𑁄𑀲𑁄 𑀙𑀤𑀦𑀁, 𑀫𑁄𑀳𑁄 𑀙𑀤𑀦𑀁, 𑀲𑀩𑁆𑀩𑀓𑀺𑀮𑁂𑀲𑀸 𑀙𑀤𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀙𑀤𑀦𑀸 𑀯𑀺𑀯𑀝𑀸 𑀉𑀕𑁆𑀖𑀸𑀝𑀺𑀢𑀸 𑀯𑀺𑀤𑁆𑀥𑀁𑀲𑀺𑀢𑀸 𑀅𑀦𑁂𑀦𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀲𑀫𑁆𑀩𑀼𑀤𑁆𑀥𑁄. 𑀢𑀁 𑀫𑀳𑀸𑀚𑀦𑀁 𑀤𑁂𑀲𑀦𑀸𑀯𑀲𑁂𑀦 𑀦𑀺𑀩𑁆𑀩𑀸𑀧𑁂𑀲𑀺 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦𑀸𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀤𑁂𑀲𑁂𑀦𑁆𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸.

𑁨𑁦. 𑀧𑀜𑁆𑀘𑀫𑀸𑀧𑀤𑀸𑀦𑁂 𑀨𑀮𑀳𑀢𑁆𑀣𑁄 𑀅𑀧𑁂𑀓𑁆𑀔𑀯𑀸𑀢𑀺 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀫𑀥𑀼𑀭𑀸𑀦𑀺 𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀅𑀧𑁂𑀓𑁆𑀔𑀯𑀸 𑀅𑀢𑀼𑀭𑀺𑀢𑁄 𑀲𑀡𑀺𑀓𑀁 𑀅𑀲𑁆𑀲𑀫𑀁 𑀕𑀜𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

𑀙𑀝𑁆𑀞𑀲𑀢𑁆𑀢𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁪𑁦. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀦𑀺𑀝𑁆𑀞𑀺𑀢𑁂 𑀦𑀯𑀓𑀫𑁆𑀫𑁂 𑀘𑀸𑀢𑀺 𑀲𑀻𑀫𑀸𑀬 𑀦𑀯𑀓𑀫𑁆𑀫𑁂 𑀦𑀺𑀝𑁆𑀞𑀁 𑀕𑀢𑁂 𑀲𑀢𑀺. 𑀅𑀦𑀼𑀮𑁂𑀧𑀫𑀤𑀸𑀲𑀳𑀦𑁆𑀢𑀺 𑀅𑀦𑀼𑀧𑀘𑁆𑀙𑀸 𑀲𑀼𑀥𑀸𑀮𑁂𑀧𑀁 𑀅𑀤𑀸𑀲𑀺𑀁, 𑀲𑀼𑀥𑀸𑀬 𑀮𑁂𑀧𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑀺𑀬𑁂𑀯𑀸𑀢𑀺.

𑀏𑀓𑀢𑀺𑀁𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁨. 𑀆𑀭𑀓𑁆𑀔𑀤𑀸𑀬𑀓𑀯𑀕𑁆𑀕𑁄

𑁧-𑁧𑁦. 𑀆𑀭𑀓𑁆𑀔𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀩𑀸𑀢𑁆𑀢𑀺𑀁𑀲𑀢𑀺𑀫𑀯𑀕𑁆𑀕𑁂 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀧𑀤𑀸𑀦𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯.

𑁧𑁬. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀚𑀮𑀚𑀕𑁆𑀕𑁂𑀳𑀺 𑀑𑀓𑀺𑀭𑀺𑀦𑁆𑀢𑀺 𑀚𑀮𑀚𑁂𑀳𑀺 𑀉𑀢𑁆𑀢𑀫𑁂𑀳𑀺 𑀉𑀧𑁆𑀧𑀮𑀧𑀤𑀼𑀫𑀸𑀤𑀻𑀳𑀺 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀁 𑀧𑀽𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀫𑁂𑀯.

𑁨𑁬-𑁨𑁭. 𑀙𑀝𑁆𑀞𑀸𑀧𑀤𑀸𑀦𑁂 𑀘𑁂𑀢𑀺𑀬𑀁 𑀉𑀢𑁆𑀢𑀫𑀁 𑀦𑀸𑀫, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄𑀢𑀺 𑀲𑀓𑀮𑀮𑁄𑀓𑀢𑁆𑀢𑀬𑀲𑁆𑀲 𑀩𑀦𑁆𑀥𑀼𑀦𑁄 𑀜𑀸𑀢𑀓𑀲𑁆𑀲 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀉𑀢𑁆𑀢𑀫𑀁 𑀘𑁂𑀢𑀺𑀬𑀁. 𑀇𑀭𑀻𑀡𑁂 𑀚𑀦𑀲𑀜𑁆𑀘𑀭𑀯𑀺𑀭𑀳𑀺𑀢𑁂 𑀯𑀦𑁂 𑀫𑀦𑀼𑀲𑁆𑀲𑀸𑀦𑀁 𑀓𑁄𑀮𑀸𑀳𑀮𑀯𑀺𑀭𑀳𑀺𑀢𑁂 𑀫𑀳𑀸𑀅𑀭𑀜𑁆𑀜𑁂 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀥𑀸𑀳𑀺𑀡𑁆𑀟𑀸𑀫𑀳𑀁 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀯𑀦𑁂 𑀫𑀕𑁆𑀕𑀫𑀽𑀴𑁆𑀳𑀪𑀸𑀯𑁂𑀦 𑀅𑀦𑁆𑀥𑁄, 𑀦 𑀘𑀓𑁆𑀔𑀼𑀦𑀸 𑀅𑀦𑁆𑀥𑁄, 𑀅𑀳𑀁 𑀆𑀳𑀺𑀡𑁆𑀟𑀸𑀫𑀺 𑀫𑀕𑁆𑀕𑀁 𑀧𑀭𑀺𑀬𑁂𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀯𑀦𑀸 𑀦𑀺𑀓𑁆𑀔𑀫𑀦𑁆𑀢𑁂𑀦𑀸𑀢𑀺 𑀫𑀳𑀸𑀯𑀦𑀢𑁄 𑀦𑀺𑀓𑁆𑀔𑀫𑀦𑁆𑀢𑁂𑀦 𑀫𑀬𑀸 𑀲𑀻𑀳𑀸𑀲𑀦𑀁 𑀉𑀢𑁆𑀢𑀫𑀸𑀲𑀦𑀁, 𑀲𑀻𑀳𑀲𑁆𑀲 𑀯𑀸 𑀪𑀕𑀯𑀢𑁄 𑀆𑀲𑀦𑀁 𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀁𑀲𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀦𑁆𑀢𑀺 𑀲𑀓𑀮𑀮𑁄𑀓𑀢𑁆𑀢𑀬𑀦𑀬𑀁 𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀦𑁆𑀢𑀁 𑀣𑁄𑀫𑀺𑀢𑀁 𑀣𑀼𑀢𑀺𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁪. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀻𑀭𑁄𑀢𑀺 𑀲𑀼𑀦𑁆𑀤𑀭𑀤𑀲𑁆𑀲𑀦𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀲𑀭𑀻𑀭𑀢𑁆𑀢𑀸 𑀫𑀦𑁄𑀳𑀭𑀤𑀲𑁆𑀲𑀦𑁄 𑀫𑀳𑀸𑀯𑀻𑀭𑀺𑀬𑁄 𑀲𑀺𑀤𑁆𑀥𑀢𑁆𑀣𑁄 𑀪𑀕𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑀢𑀺𑀖𑀭𑀫𑀼𑀢𑁆𑀢𑀫𑁂𑀢𑀺 𑀉𑀢𑁆𑀢𑀫𑁂 𑀯𑀺𑀳𑀸𑀭𑁂 𑀯𑀲𑀢𑀻𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯𑀸𑀢𑀺.

𑀩𑀸𑀢𑁆𑀢𑀺𑀁𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁩. 𑀉𑀫𑀸𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧-𑁧𑁦. 𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀢𑁂𑀢𑁆𑀢𑀺𑀁𑀲𑀢𑀺𑀫𑁂 𑀯𑀕𑁆𑀕𑁂 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑀺𑀬𑁂𑀯.

𑁫𑁫. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀲𑀫𑀬𑀁 𑀅𑀕𑀫𑀸𑀲𑀳𑀦𑁆𑀢𑀺 𑀲𑀫𑀽𑀳𑀁 𑀲𑀫𑀸𑀕𑀫𑀝𑁆𑀞𑀸𑀦𑀁 𑀅𑀳𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁨. 𑀅𑀩𑁆𑀩𑀼𑀤𑀦𑀺𑀭𑀩𑁆𑀩𑀼𑀤𑀸𑀦𑀻𑀢𑀺 ‘‘𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀅𑀩𑁆𑀩𑀼𑀤𑀁, 𑀅𑀩𑁆𑀩𑀼𑀤𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀦𑀺𑀭𑀩𑁆𑀩𑀼𑀤’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀬𑀼𑀦𑀸 𑀅𑀩𑁆𑀩𑀼𑀤𑀦𑀺𑀭𑀩𑁆𑀩𑀼𑀤𑀸𑀦𑀺 𑀕𑀢𑀫𑀳𑀸𑀆𑀬𑀼𑀯𑀦𑁆𑀢𑀸 𑀫𑀦𑀼𑀚𑀸𑀥𑀺𑀧𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀔𑀢𑁆𑀢𑀺𑀬𑀸 𑀅𑀝𑁆𑀞 𑀅𑀝𑁆𑀞 𑀳𑀼𑀢𑁆𑀯𑀸 𑀓𑀧𑁆𑀧𑀸𑀦𑀁 𑀧𑀜𑁆𑀘𑀯𑀻𑀲𑀲𑀳𑀲𑁆𑀲𑀫𑁆𑀳𑀺 𑀆𑀲𑀺𑀁𑀲𑀼 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀧𑀸𑀓𑀝𑀸𑀦𑁂𑀯𑀸𑀢𑀺.

𑀢𑁂𑀢𑁆𑀢𑀺𑀁𑀲𑀢𑀺𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩𑁪-𑁩𑁮. 𑀕𑀦𑁆𑀥𑁄𑀤𑀓𑀸𑀤𑀺𑀯𑀕𑁆𑀕𑁄

𑁧-𑁫𑁦. 𑀕𑀦𑁆𑀥𑀥𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀘𑀢𑀼𑀢𑀺𑀁𑀲𑀢𑀺𑀫𑀯𑀕𑁆𑀕𑀧𑀜𑁆𑀘𑀢𑀺𑀁𑀲𑀢𑀺𑀫𑀯𑀕𑁆𑀕𑀙𑀢𑁆𑀢𑀺𑀁𑀲𑀢𑀺𑀫𑀯𑀕𑁆𑀕𑀲𑀢𑁆𑀢𑀢𑀺𑀁𑀲𑀢𑀺𑀫𑀯𑀕𑁆𑀕𑀅𑀝𑁆𑀞𑀢𑀺𑀁𑀲𑀢𑀺𑀫𑀯𑀕𑁆𑀕𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑁂𑀧𑀺 𑀧𑀞𑀫𑀸𑀧𑀤𑀸𑀦𑀸𑀤𑀻𑀦𑀺 𑀅𑀝𑁆𑀞𑀫𑀸𑀧𑀤𑀸𑀦𑀦𑁆𑀢𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯𑀸𑀢𑀺.

𑁩𑁯. 𑀅𑀯𑀝𑀨𑀮𑀯𑀕𑁆𑀕𑁄

𑁯. 𑀲𑁄𑀡𑀓𑁄𑀝𑀺𑀯𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀯𑀫𑀸𑀧𑀤𑀸𑀦𑁂 𑀧𑀦 𑀯𑀺𑀧𑀲𑁆𑀲𑀺𑀦𑁄 𑀧𑀸𑀯𑀘𑀦𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀓𑁄𑀝𑀺𑀯𑀻𑀲𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀯𑀺𑀪𑀯𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀪𑀕𑀯𑀢𑁄 𑀘𑀗𑁆𑀓𑀫𑀦𑀝𑁆𑀞𑀸𑀦𑁂 𑀲𑀼𑀥𑀸𑀬 𑀧𑀭𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀏𑀓𑀜𑁆𑀘 𑀮𑁂𑀡𑀁 𑀓𑀸𑀭𑁂𑀢𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀯𑀢𑁆𑀣𑁂𑀳𑀺 𑀮𑁂𑀡𑀪𑀽𑀫𑀺𑀬𑀸 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀜𑁆𑀘 𑀓𑀢𑁆𑀯𑀸 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀲𑁆𑀲𑀧𑀤𑀲𑀩𑀮𑁂 𑀅𑀦𑀼𑀧𑁆𑀧𑀦𑁆𑀦𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀓𑀭𑀺𑀢𑁆𑀯𑀸 𑀯𑀲𑀦𑁆𑀢𑀁 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀢𑁂𑀫𑀸𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀼𑀝𑁆𑀞𑀯𑀲𑁆𑀲𑁄 𑀧𑀭𑀺𑀧𑀼𑀡𑁆𑀡𑀧𑀭𑀺𑀓𑁆𑀔𑀸𑀭𑁄 𑀕𑀦𑁆𑀥𑀫𑀸𑀤𑀦𑀫𑁂𑀯 𑀅𑀕𑀫𑀸𑀲𑀺. 𑀲𑁄𑀧𑀺 𑀓𑀼𑀮𑀧𑀼𑀢𑁆𑀢𑁄 𑀬𑀸𑀯𑀚𑀻𑀯𑀁 𑀢𑀢𑁆𑀣 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀘𑀫𑁆𑀧𑀸𑀦𑀕𑀭𑁂 𑀅𑀕𑁆𑀕𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺𑀲𑁆𑀲 𑀫𑀳𑀸𑀪𑁄𑀕𑀓𑁆𑀔𑀦𑁆𑀥𑁄 𑀅𑀪𑀺𑀯𑀟𑁆𑀠𑀺. 𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀲𑀓𑀮𑀦𑀕𑀭𑁂 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀅𑀳𑁄𑀲𑀺, 𑀢𑀲𑁆𑀲 𑀧𑀼𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀘𑁆𑀘𑀸𑀕𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀼𑀔𑀼𑀫𑀸𑀮𑀢𑀭𑁄 𑀘 𑀅𑀢𑁆𑀢𑀪𑀸𑀯𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀲𑁄𑀡𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀅𑀪𑀺𑀯𑀟𑁆𑀠𑀺. 𑀢𑀲𑁆𑀲 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀯𑀡𑁆𑀡𑀸𑀦𑀺 𑀅𑀳𑁂𑀲𑀼𑀁, 𑀢𑁂𑀲𑀁 𑀲𑀢𑀯𑀸𑀭𑀁 𑀯𑀺𑀳𑀢𑀓𑀧𑁆𑀧𑀸𑀲𑀁 𑀯𑀺𑀬 𑀫𑀼𑀤𑀼𑀲𑀫𑁆𑀨𑀲𑁆𑀲𑁄 𑀅𑀳𑁄𑀲𑀺. 𑀧𑀸𑀤𑀢𑀮𑁂𑀲𑀼 𑀫𑀡𑀺𑀓𑀼𑀡𑁆𑀟𑀮𑀸𑀯𑀝𑁆𑀝𑀯𑀡𑁆𑀡𑀮𑁄𑀫𑀸𑀦𑀺 𑀚𑀸𑀬𑀺𑀁𑀲𑀼. 𑀯𑀬𑀧𑁆𑀧𑀢𑁆𑀢𑀲𑁆𑀲 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑀸𑀧𑁂𑀢𑁆𑀯𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀼𑀁. 𑀲𑁄 𑀢𑀢𑁆𑀣 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀧𑀝𑀺𑀯𑀲𑀢𑀺.

𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑀸 𑀧𑀓𑁆𑀓𑁄𑀲𑀸𑀧𑀺𑀢𑁄 𑀢𑁂𑀳𑀺 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀆𑀕𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀚𑀦𑀲𑀁𑀲𑀕𑁆𑀕𑀧𑀭𑀺𑀳𑀭𑀡𑀢𑁆𑀣𑀁 𑀲𑀻𑀢𑀯𑀦𑁂 𑀯𑀺𑀳𑀸𑀲𑀺. 𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄 ‘‘𑀫𑀫 𑀲𑀭𑀻𑀭𑀁 𑀲𑀼𑀔𑀼𑀫𑀸𑀮𑀁, 𑀦 𑀘 𑀲𑀓𑁆𑀓𑀸 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁, 𑀓𑀸𑀬𑀁 𑀓𑀺𑀮𑀫𑁂𑀢𑁆𑀯𑀸𑀧𑀺 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀬 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀸𑀤𑀢𑀮𑁂𑀲𑀼 𑀨𑁄𑀝𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀯𑁂𑀤𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀤𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀏𑀯𑀁 𑀅𑀳𑀁 𑀯𑀸𑀬𑀫𑀦𑁆𑀢𑁄𑀧𑀺 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑁂 𑀧𑀩𑁆𑀩𑀚𑁆𑀚𑀸𑀬, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀸𑀫𑀺, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀻𑀡𑁄𑀧𑀫𑁄𑀯𑀸𑀤𑁂𑀦 (𑀫𑀳𑀸𑀯. 𑁨𑁪𑁩) 𑀑𑀯𑀤𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀕𑀢𑁄. 𑀲𑁄𑀡𑁄𑀧𑀺 𑀔𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑁪𑁯. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀺𑀦𑁄 𑀧𑀸𑀯𑀘𑀦𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀲𑁆𑀲𑀻𑀢𑀺 𑀯𑀺𑀲𑁂𑀲𑁂𑀦, 𑀯𑀺𑀯𑀺𑀥𑀁 𑀯𑀸 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻. 𑀧𑀸𑀯𑀘𑀦𑁂𑀢𑀺 𑀧𑀓𑀸𑀭𑁂𑀦 𑀯𑀼𑀘𑁆𑀘𑀢𑀻𑀢𑀺 𑀧𑀸𑀯𑀘𑀦𑀁, 𑀧𑀺𑀝𑀓𑀢𑁆𑀢𑀬𑀁. 𑀢𑀲𑁆𑀲 𑀯𑀺𑀧𑀲𑁆𑀲𑀺𑀦𑁄 𑀢𑀲𑁆𑀫𑀺𑀁 𑀧𑀸𑀯𑀘𑀦𑁂𑀢𑀺 𑀅𑀢𑁆𑀣𑁄. 𑀮𑁂𑀡𑀦𑁆𑀢𑀺 𑀮𑀺𑀦𑀦𑁆𑀢𑁂 𑀦𑀺𑀮𑀻𑀬𑀦𑁆𑀢𑁂 𑀏𑀢𑁆𑀣𑀸𑀢𑀺 𑀮𑁂𑀡𑀁 𑀯𑀺𑀳𑀸𑀭𑀁. 𑀩𑀦𑁆𑀥𑀼𑀫𑀸𑀭𑀸𑀚𑀥𑀸𑀦𑀺𑀬𑀸𑀢𑀺 𑀩𑀦𑁆𑀥𑀦𑁆𑀢𑀺 𑀓𑀼𑀮𑀧𑀭𑀫𑁆𑀧𑀭𑀸𑀬 𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀚𑁆𑀛𑀦𑁆𑀢𑀻𑀢𑀺 𑀩𑀦𑁆𑀥𑀽, 𑀜𑀸𑀢𑀓𑀸. 𑀢𑁂 𑀏𑀢𑁆𑀣 𑀧𑀝𑀺𑀯𑀲𑀦𑁆𑀢𑀻𑀢𑀺 𑀩𑀦𑁆𑀥𑀼𑀫𑀸, 𑀩𑀦𑁆𑀥𑀼 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀸 𑀩𑀦𑁆𑀥𑀼𑀫𑀸. 𑀭𑀸𑀚𑀽𑀦𑀁 𑀯𑀲𑀦𑀝𑁆𑀞𑀸𑀦𑀦𑁆𑀢𑀺 𑀭𑀸𑀚𑀥𑀸𑀦𑀻, 𑀩𑀦𑁆𑀥𑀼𑀫𑀸 𑀘 𑀲𑀸 𑀭𑀸𑀚𑀥𑀸𑀦𑀻 𑀘𑁂𑀢𑀺 𑀩𑀦𑁆𑀥𑀼𑀫𑀸𑀭𑀸𑀚𑀥𑀸𑀦𑀻, 𑀢𑀲𑁆𑀲𑀸 𑀩𑀦𑁆𑀥𑀼𑀫𑀸𑀭𑀸𑀚𑀥𑀸𑀦𑀺𑀬𑀸, 𑀮𑁂𑀡𑀁 𑀫𑀬𑀸 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑁄𑀡𑀓𑁄𑀝𑀺𑀯𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀧𑀼𑀩𑁆𑀩𑀓𑀫𑁆𑀫𑀧𑀺𑀮𑁄𑀢𑀺𑀓𑀩𑀼𑀤𑁆𑀥𑀅𑀧𑀤𑀸𑀦𑀯𑀡𑁆𑀡𑀦𑀸

𑁬𑁪. 𑀤𑀲𑀫𑀸𑀧𑀤𑀸𑀦𑁂 𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑁂𑀢𑀺 𑀧𑀩𑁆𑀩𑀢𑀓𑀽𑀝𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀦𑁆𑀢𑀸𑀧𑁂𑀳𑀺 𑀑𑀢𑀢𑁆𑀢𑀁 𑀉𑀡𑁆𑀳𑀁 𑀉𑀤𑀓𑀁 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀅𑀦𑁄𑀢𑀢𑁆𑀢𑁄. 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀪𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀏𑀢𑀲𑁆𑀫𑀸 𑀫𑀳𑀸𑀦𑀤𑀺𑀬𑁄𑀢𑀺 𑀲𑀭𑁄. 𑀲𑀻𑀳𑀫𑀼𑀔𑀸𑀤𑀻𑀳𑀺 𑀦𑀺𑀓𑁆𑀔𑀦𑁆𑀢𑀸 𑀫𑀳𑀸𑀦𑀤𑀺𑀬𑁄 𑀢𑀺𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀦𑀺𑀓𑁆𑀔𑀦𑁆𑀢𑀤𑀺𑀲𑀸𑀪𑀸𑀕𑁂𑀦 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁄𑀢𑀢𑁆𑀢𑁄 𑀘 𑀲𑁄 𑀲𑀭𑁄 𑀘𑀸𑀢𑀺 𑀅𑀦𑁄𑀢𑀢𑁆𑀢𑀲𑀭𑁄. 𑀢𑀲𑁆𑀲 𑀆𑀲𑀦𑁆𑀦𑀁 𑀲𑀫𑀻𑀧𑀝𑁆𑀞𑀸𑀦𑀦𑁆𑀢𑀺 𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑀁, 𑀢𑀲𑁆𑀫𑀺𑀁 𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑁂, 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀭𑀫𑀡𑀻𑀬𑁂𑀢𑀺 𑀤𑁂𑀯𑀤𑀸𑀦𑀯𑀕𑀦𑁆𑀥𑀩𑁆𑀩𑀓𑀺𑀦𑁆𑀦𑀭𑁄𑀭𑀕𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀭𑀫𑀺𑀢𑀩𑁆𑀩𑀁 𑀅𑀮𑁆𑀮𑀻𑀬𑀺𑀢𑀩𑁆𑀩𑀦𑁆𑀢𑀺 𑀭𑀫𑀡𑀻𑀬𑀁, 𑀢𑀲𑁆𑀫𑀺𑀁 𑀭𑀫𑀡𑀻𑀬𑁂. 𑀲𑀺𑀮𑀸𑀢𑀮𑁂𑀢𑀺 𑀏𑀓𑀕𑁆𑀖𑀦𑀧𑀩𑁆𑀩𑀢𑀲𑀺𑀮𑀸𑀢𑀮𑁂𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂𑀢𑀺 𑀧𑀤𑀼𑀫𑀭𑀸𑀕𑀯𑁂𑀴𑀼𑀭𑀺𑀬𑀸𑀤𑀺𑀦𑀸𑀦𑀸𑀅𑀦𑁂𑀓𑁂𑀳𑀺 𑀭𑀢𑀦𑁂𑀳𑀺 𑀧𑀚𑁆𑀚𑁄𑀢𑁂 𑀧𑀓𑀸𑀭𑁂𑀦 𑀚𑁄𑀢𑀫𑀸𑀦𑁂. 𑀦𑀸𑀦𑀸𑀕𑀦𑁆𑀥𑀯𑀦𑀦𑁆𑀢𑀭𑁂𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀘𑀦𑁆𑀤𑀦𑀸𑀕𑀭𑀼𑀓𑀧𑁆𑀧𑀽𑀭𑀢𑀫𑀸𑀮𑀢𑀺𑀮𑀓𑀸𑀲𑁄𑀓𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀲𑀼𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀕𑀳𑀦𑀻𑀪𑀽𑀢𑀯𑀦𑀦𑁆𑀢𑀭𑁂 𑀲𑀺𑀮𑀸𑀢𑀮𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁫. 𑀕𑀼𑀡𑀫𑀳𑀦𑁆𑀢𑀢𑀸𑀬 𑀲𑀗𑁆𑀔𑁆𑀬𑀸𑀫𑀳𑀦𑁆𑀢𑀢𑀸𑀬 𑀘 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀧𑀭𑁂𑀢𑁄 𑀧𑀭𑀺𑀯𑀼𑀢𑁄 𑀮𑁄𑀓𑀦𑀸𑀬𑀓𑁄 𑀮𑁄𑀓𑀢𑁆𑀢𑀬𑀲𑀸𑀫𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀢𑁆𑀣 𑀲𑀺𑀮𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀸𑀦𑀺 𑀓𑀫𑁆𑀫𑀸𑀦𑀺 𑀩𑁆𑀬𑀸𑀓𑀭𑀻 𑀯𑀺𑀲𑁂𑀲𑁂𑀦 𑀧𑀸𑀓𑀝𑀫𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀩𑀼𑀤𑁆𑀥𑀸𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧.𑁧 𑀆𑀤𑀬𑁄) 𑀯𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀩𑀼𑀤𑁆𑀥𑀸𑀧𑀤𑀸𑀦𑁂 𑀅𑀦𑁆𑀢𑁄𑀕𑀥𑀫𑁆𑀧𑀺 𑀇𑀥𑀸𑀧𑀤𑀸𑀦𑁂 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀲𑀁𑀲𑀽𑀘𑀓𑀢𑁆𑀢𑀸 𑀯𑀕𑁆𑀕𑀲𑀗𑁆𑀕𑀳𑀯𑀲𑁂𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸 𑀲𑀗𑁆𑀕𑀸𑀬𑀺𑀁𑀲𑀽𑀢𑀺.

𑀧𑀼𑀩𑁆𑀩𑀓𑀫𑁆𑀫𑀧𑀺𑀮𑁄𑀢𑀺𑀓𑀩𑀼𑀤𑁆𑀥𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁦. 𑀧𑀺𑀮𑀺𑀦𑁆𑀤𑀯𑀘𑁆𑀙𑀯𑀕𑁆𑀕𑁄

𑁧. 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑁂 𑀅𑀧𑀤𑀸𑀦𑁂 𑀦𑀕𑀭𑁂 𑀳𑀁𑀲𑀯𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀤𑁄𑀯𑀸𑀭𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀳𑁄𑀲𑀺. 𑀲𑁄 𑀓𑁄𑀝𑀺𑀲𑀦𑁆𑀦𑀺𑀘𑀺𑀢𑀥𑀦𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 𑀭𑀳𑁄 𑀦𑀺𑀲𑀺𑀦𑁆𑀦𑁄 ‘‘𑀇𑀫𑀁 𑀲𑀩𑁆𑀩𑀥𑀦𑀁 𑀫𑀬𑀸 𑀲𑀫𑁆𑀫𑀸 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀙𑀢𑁆𑀢𑀲𑀢𑀲𑀳𑀲𑁆𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀧𑀭𑀺𑀪𑁄𑀕𑀧𑀭𑀺𑀓𑁆𑀔𑀸𑀭𑀸𑀦𑀺𑀧𑀺 𑀲𑀢𑀲𑀳𑀲𑁆𑀲𑀯𑀲𑁂𑀦 𑀓𑀸𑀭𑁂𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀏𑀯𑀁 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀤𑀺𑀯𑀲𑁂 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀙 𑀓𑀸𑀫𑀸𑀯𑀘𑀭𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀘 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀕𑁄𑀢𑁆𑀢𑀯𑀲𑁂𑀦 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺.

𑁧. 𑀲𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀉𑀤𑀸𑀦𑀯𑀲𑁂𑀦 𑀢𑀁 𑀧𑀓𑀸𑀲𑁂𑀦𑁆𑀢𑁄 𑀦𑀕𑀭𑁂 𑀳𑀁𑀲𑀯𑀢𑀺𑀬𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀆𑀲𑀺𑀁 𑀤𑁄𑀯𑀸𑀭𑀺𑀓𑁄 𑀅𑀳𑀦𑁆𑀢𑀺 𑀅𑀳𑀁 𑀳𑀁𑀲𑀯𑀢𑀻𑀦𑀕𑀭𑁂 𑀭𑀜𑁆𑀜𑁄 𑀕𑁂𑀳𑀤𑁆𑀯𑀸𑀭𑁂 𑀤𑁆𑀯𑀸𑀭𑀧𑀸𑀮𑀓𑁄 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀓𑁆𑀔𑁄𑀪𑀁 𑀅𑀫𑀺𑀢𑀁 𑀪𑁄𑀕𑀦𑁆𑀢𑀺 𑀭𑀜𑁆𑀜𑁄 𑀯𑀮𑁆𑀮𑀪𑀢𑁆𑀢𑀸 𑀅𑀜𑁆𑀜𑁂𑀳𑀺 𑀔𑁄𑀪𑁂𑀢𑀼𑀁 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀫𑀺𑀢𑀁 𑀅𑀧𑀭𑀺𑀫𑀸𑀡𑀪𑁄𑀕𑀁 𑀥𑀦𑀁 𑀫𑀫 𑀖𑀭𑁂 𑀲𑀦𑁆𑀦𑀺𑀘𑀺𑀢𑀁 𑀭𑀸𑀲𑀻𑀓𑀢𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁩. 𑀩𑀳𑀽 𑀫𑁂𑀥𑀺𑀕𑀢𑀸 𑀪𑁄𑀕𑀸𑀢𑀺 𑀅𑀦𑁂𑀓𑀸 𑀪𑁄𑀕𑀸 𑀫𑁂 𑀫𑀬𑀸 𑀅𑀥𑀺𑀕𑀢𑀸 𑀧𑀢𑁆𑀢𑀸 𑀧𑀝𑀺𑀮𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀯𑀸𑀲𑀺𑀆𑀤𑀻𑀦𑀁 𑀧𑀭𑀺𑀓𑁆𑀔𑀸𑀭𑀸𑀦𑀁 𑀦𑀸𑀫𑀸𑀦𑀺 𑀦𑀬𑀸𑀦𑀼𑀬𑁄𑀕𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. 𑀧𑀭𑀺𑀓𑁆𑀔𑀸𑀭𑀤𑀸𑀦𑀸𑀦𑀺𑀲𑀁𑀲𑀸𑀦𑀺 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯𑀸𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯𑀸𑀢𑀺.

𑁬. 𑀩𑀸𑀓𑀼𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀙𑀝𑁆𑀞𑀸𑀧𑀤𑀸𑀦𑁂 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀩𑀸𑀓𑀼𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀁 𑀓𑀺𑀭 𑀣𑁂𑀭𑁄 𑀅𑀢𑀻𑀢𑁂 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀫𑀢𑁆𑀣𑀓𑁂 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀁 𑀕𑀯𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀲𑀢𑁆𑀣𑀼 𑀯𑀸𑀢𑀸𑀩𑀸𑀥𑁂 𑀉𑀧𑁆𑀧𑀦𑁆𑀦𑁂 𑀅𑀭𑀜𑁆𑀜𑀢𑁄 𑀪𑁂𑀲𑀚𑁆𑀚𑀸𑀦𑀺 𑀆𑀦𑁂𑀢𑁆𑀯𑀸 𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑀁 𑀧𑀼𑀜𑁆𑀜𑀁 𑀆𑀭𑁄𑀕𑁆𑀬𑀢𑁆𑀣𑀸𑀬 𑀧𑀭𑀺𑀡𑀸𑀫𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀧𑁆𑀧𑀸𑀩𑀸𑀥𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀢𑀁 𑀞𑀸𑀦𑀦𑁆𑀢𑀭𑀁 𑀆𑀓𑀗𑁆𑀔𑀦𑁆𑀢𑁄 𑀧𑀡𑀺𑀥𑀸𑀦𑀁 𑀓𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀮𑀸𑀪𑀻 𑀳𑀼𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀯𑀲𑀦𑁆𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀢𑀺𑀡𑀧𑀼𑀧𑁆𑀨𑀓𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀁 𑀚𑀺𑀡𑁆𑀡𑀁 𑀯𑀺𑀦𑀲𑁆𑀲𑀫𑀸𑀦𑀁 𑀫𑀳𑀸𑀯𑀺𑀳𑀸𑀭𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀁 𑀲𑀩𑁆𑀩𑀁 𑀆𑀯𑀲𑀣𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀁 𑀪𑁂𑀲𑀚𑁆𑀚𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀓𑁄𑀲𑀫𑁆𑀩𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺.

𑀲𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀸𑀢𑀻𑀳𑀺 𑀅𑀭𑁄𑀕𑀪𑀸𑀯𑀸𑀬 𑀬𑀫𑀼𑀦𑀸𑀬𑀁 𑀦𑁆𑀳𑀸𑀧𑀺𑀬𑀫𑀸𑀦𑁄 𑀢𑀸𑀲𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀫𑀘𑁆𑀙𑁂𑀦 𑀕𑀺𑀮𑀺𑀢𑁄 𑀅𑀳𑁄𑀲𑀺. 𑀓𑁂𑀯𑀝𑁆𑀝𑀸 𑀢𑀁 𑀫𑀘𑁆𑀙𑀁 𑀚𑀸𑀮𑀸𑀬 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀯𑀺𑀓𑁆𑀓𑀺𑀡𑀺𑀁𑀲𑀼. 𑀲𑀸 𑀢𑀁 𑀕𑀳𑁂𑀢𑁆𑀯𑀸 𑀨𑀸𑀮𑀬𑀫𑀸𑀦𑀸 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀨𑀮𑁂𑀦 𑀅𑀭𑁄𑀕𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀧𑀼𑀢𑁆𑀢𑁄 𑀫𑁂 𑀮𑀤𑁆𑀥𑁄’’𑀢𑀺 𑀕𑀳𑁂𑀢𑁆𑀯𑀸 𑀧𑁄𑀲𑁂𑀲𑀺. 𑀲𑁄 𑀚𑀦𑀓𑁂𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄, 𑀤𑁂𑀣 𑀦𑁄 𑀧𑀼𑀢𑁆𑀢’’𑀦𑁆𑀢𑀺 𑀅𑀦𑀼𑀬𑁄𑀕𑁂 𑀓𑀢𑁂 𑀭𑀜𑁆𑀜𑀸 ‘‘𑀉𑀪𑀬𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑁄 𑀳𑁄𑀢𑀽’’𑀢𑀺 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀤𑀸𑀬𑀸𑀤𑀪𑀸𑀯𑁂𑀦 𑀯𑀺𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀩𑀸𑀓𑀼𑀮𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀤𑁆𑀯𑀻𑀲𑀼 𑀲𑁂𑀝𑁆𑀞𑀺𑀓𑀼𑀮𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀙𑀫𑀸𑀲𑀁 𑀙𑀫𑀸𑀲𑀁 𑀯𑀲𑀢𑀺. 𑀢𑁂 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀦𑀸𑀯𑀸𑀲𑀗𑁆𑀖𑀸𑀝𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀭𑀽𑀧𑀭𑀺 𑀭𑀢𑀦𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑁂 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀓𑀼𑀫𑀸𑀭𑀁 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀪𑀬𑀦𑀕𑀭𑀫𑀚𑁆𑀛𑀝𑁆𑀞𑀸𑀦𑀁 𑀕𑀗𑁆𑀕𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀅𑀧𑀭𑀲𑁂𑀝𑁆𑀞𑀺𑀫𑀦𑀼𑀲𑁆𑀲𑀸𑀧𑀺 𑀏𑀯𑀫𑁂𑀯 𑀲𑀚𑁆𑀚𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀢𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀲𑁄 𑀏𑀯𑀁 𑀯𑀟𑁆𑀠𑀫𑀸𑀦𑁄 𑀆𑀲𑀻𑀢𑀺𑀓𑁄 𑀳𑀼𑀢𑁆𑀯𑀸 𑀉𑀪𑀬𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀢𑀺 𑀧𑀸𑀓𑀝𑁄. 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀸𑀬𑀫𑀦𑁆𑀢𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁩𑁮𑁬. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀅𑀧𑀤𑀸𑀦𑀧𑀸𑀴𑀺𑀅𑀢𑁆𑀣𑁄𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑁄 𑀲𑀝𑁆𑀞𑀺𑀯𑀲𑁆𑀲𑀲𑀢𑀸𑀬𑀼𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀩𑀸𑀓𑀼𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀢𑁆𑀢𑀫𑀸𑀧𑀤𑀸𑀦𑁂 𑀪𑀭𑀺𑀬𑀸 𑀫𑁂 𑀓𑀸𑀮𑀗𑁆𑀓𑀢𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀘 𑀧𑀼𑀢𑁆𑀢𑁂 𑀘 𑀓𑀸𑀮𑀗𑁆𑀓𑀢𑁂 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀸𑀲𑀺. 𑀢𑀤𑀸 𑀲𑀼𑀫𑁂𑀥𑁄 𑀪𑀕𑀯𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑁄𑀓𑀲𑀮𑁆𑀮𑀁 𑀅𑀩𑁆𑀩𑀽𑀴𑁆𑀳𑁂𑀲𑀺. 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀼𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀅𑀪𑀺𑀢𑁆𑀣𑀯𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀢𑁆𑀣 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀕𑀺𑀭𑀺𑀫𑀸𑀦𑀦𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀭𑀸𑀚𑀕𑀳𑀸𑀕𑀫𑀦𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀢𑀺𑀧𑀬𑀁 𑀤𑀺𑀯𑀲𑀁 𑀕𑀸𑀫𑀓𑀸𑀯𑀸𑀲𑁂 𑀯𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀸 𑀢𑀲𑁆𑀲 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣, 𑀅𑀳𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀸𑀫𑀻’’𑀢𑀺 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀕𑀢𑁄𑀧𑀺 𑀩𑀳𑀼𑀓𑀺𑀘𑁆𑀘𑀢𑁆𑀢𑀸 𑀢𑀁 𑀦 𑀲𑀭𑀺. ‘‘𑀣𑁂𑀭𑁄 𑀅𑀩𑁆𑀪𑁄𑀓𑀸𑀲𑁂𑀬𑁂𑀯 𑀯𑀲𑀢𑀻’’𑀢𑀺. 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀢𑁂𑀫𑀦𑀪𑀬𑁂𑀦 𑀯𑀲𑁆𑀲𑀥𑀸𑀭𑀁 𑀯𑀸𑀭𑁂𑀲𑀼𑀁. 𑀭𑀸𑀚𑀸 𑀅𑀯𑀲𑁆𑀲𑀦𑀓𑀸𑀭𑀡𑀁 𑀉𑀧𑀥𑀸𑀭𑁂𑀢𑁆𑀯𑀸 𑀜𑀢𑁆𑀯𑀸 𑀣𑁂𑀭𑀲𑁆𑀲 𑀓𑀼𑀝𑀺𑀓𑀁 𑀓𑀸𑀭𑀸𑀧𑁂𑀲𑀺. 𑀣𑁂𑀭𑁄 𑀓𑀼𑀝𑀺𑀓𑀸𑀬𑀁 𑀯𑀲𑀦𑁆𑀢𑁄 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀮𑀸𑀪𑁂𑀦 𑀘𑀺𑀢𑁆𑀢𑀲𑀫𑀸𑀥𑀸𑀦𑀁 𑀮𑀪𑀺𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁪𑁧𑁯. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀪𑀭𑀺𑀬𑀸 𑀫𑁂 𑀓𑀸𑀮𑀗𑁆𑀓𑀢𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀪𑀕𑀯𑀢𑁄 𑀦𑀺𑀯𑁂𑀤𑀦𑀜𑁆𑀘 𑀪𑀕𑀯𑀢𑀸 𑀓𑀢𑀸𑀦𑀼𑀲𑀸𑀲𑀦𑀜𑁆𑀘 𑀫𑀕𑁆𑀕𑀁 𑀨𑀮𑀸𑀥𑀺𑀕𑀫𑀸𑀧𑀤𑀸𑀦𑀜𑁆𑀘 𑀧𑀸𑀞𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁧. 𑀫𑁂𑀢𑁆𑀢𑁂𑀬𑁆𑀬𑀯𑀕𑁆𑀕𑁄

𑁧. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑁧. 𑀏𑀓𑀘𑀢𑁆𑀢𑀸𑀮𑀻𑀲𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀧𑀩𑁆𑀪𑀸𑀭𑀓𑀽𑀝𑀁 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺𑀓𑀁 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀅𑀚𑀺𑀦𑀘𑀫𑁆𑀫𑀁 𑀦𑀺𑀲𑀻𑀤𑀦𑀢𑁆𑀣𑀸𑀬 𑀤𑀺𑀦𑁆𑀦𑀫𑁂𑀯 𑀦𑀸𑀦𑀁. 𑀲𑁂𑀲𑀁 𑀅𑀧𑀤𑀸𑀦𑀧𑀸𑀴𑀺𑀬𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑁨. 𑀧𑀼𑀡𑁆𑀡𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑁨𑁯. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀧𑀩𑁆𑀪𑀸𑀭𑀓𑀽𑀝𑀁 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀳𑀺𑀫𑀯𑀦𑁆𑀢𑁂 𑀬𑀓𑁆𑀔𑀲𑁂𑀦𑀸𑀧𑀢𑀺 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀆𑀴𑀳𑀦𑀓𑀭𑀡𑀫𑁂𑀯 𑀦𑀸𑀦𑀢𑁆𑀢𑀁. 𑀲𑁂𑀲𑀁 𑀧𑀸𑀞𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁪𑁫. 𑀢𑀢𑀺𑀬𑀸𑀧𑀤𑀸𑀦𑁂 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑁂𑀢𑁆𑀢𑀕𑀼𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀳𑀺𑀫𑀯𑀦𑁆𑀢𑀲𑀫𑀻𑀧𑁂 𑀅𑀲𑁄𑀓𑀧𑀩𑁆𑀩𑀢𑁂 𑀲𑁄 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀦𑁆𑀢𑁄 𑀲𑀼𑀫𑁂𑀥𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀧𑁆𑀧𑀺𑀧𑀽𑀭𑀡𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀧𑀼𑀜𑁆𑀜𑀨𑀮𑀸𑀦𑀺 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯. 𑀅𑀧𑀤𑀸𑀦𑀕𑀸𑀣𑀸𑀦𑀁 𑀅𑀢𑁆𑀣𑁄 𑀘 𑀧𑀸𑀓𑀝𑁄𑀬𑁂𑀯.

𑁭𑁨. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀦𑀸𑀫𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀥𑁄𑀢𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀭𑀸𑀧𑀺 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀪𑀸𑀕𑀻𑀭𑀣𑀻𑀕𑀗𑁆𑀕𑀸𑀬 𑀢𑀭𑀫𑀸𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑁂𑀢𑀼𑀁 𑀓𑀸𑀭𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀺𑀢𑀪𑀸𑀯𑁄𑀬𑁂𑀯 𑀯𑀺𑀲𑁂𑀲𑁄. 𑀧𑀼𑀜𑁆𑀜𑀨𑀮𑀧𑀭𑀺𑀤𑀻𑀧𑀦𑀕𑀸𑀣𑀸𑀦𑀁 𑀅𑀢𑁆𑀣𑁄 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯.

𑁧𑁦𑁦. 𑀧𑀜𑁆𑀘𑀫𑀸𑀧𑀤𑀸𑀦𑁂 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑀲𑀺𑀯𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀲𑀸𑀮𑀧𑀼𑀧𑁆𑀨𑀧𑀽𑀚𑀁 𑀅𑀓𑀸𑀲𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

𑁧𑁬𑁧. 𑀙𑀝𑁆𑀞𑀸𑀧𑀤𑀸𑀦𑁂 𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀭𑀯𑀺𑀓𑀲𑀓𑀼𑀡𑁄 𑀳𑀼𑀢𑁆𑀯𑀸 𑀫𑀥𑀼𑀭𑀓𑀽𑀚𑀺𑀢𑀁 𑀓𑀭𑁄𑀦𑁆𑀢𑁄 𑀲𑀢𑁆𑀣𑀸𑀭𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀫𑀬𑀽𑀭𑁄 𑀳𑀼𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀲𑀦𑀕𑀼𑀳𑀸𑀤𑁆𑀯𑀸𑀭𑁂 𑀧𑀲𑀦𑁆𑀦𑀫𑀸𑀦𑀲𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀫𑀥𑀼𑀭𑁂𑀦 𑀯𑀲𑁆𑀲𑀺𑀢𑀁 𑀯𑀲𑁆𑀲𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀦𑀦𑁆𑀤𑀓𑁄𑀢𑀺 𑀮𑀤𑁆𑀥𑀦𑀸𑀫𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑁂𑀳𑀺 𑀙𑀤𑀦𑀫𑁂𑀯 𑀯𑀺𑀲𑁂𑀲𑁄.

𑁧𑁮𑁩. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀧𑀩𑁆𑀪𑀸𑀭𑀓𑀽𑀝𑀁 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀳𑁂𑀫𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣𑀸𑀧𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀧𑀺𑀬𑀤𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸 𑀭𑀢𑀦𑀫𑀬𑀁 𑀧𑀻𑀞𑀁 𑀅𑀢𑁆𑀣𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀓𑀼𑀫𑁆𑀪𑀫𑀢𑁆𑀢𑀁 𑀚𑀫𑁆𑀩𑀼𑀨𑀮𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀢𑁆𑀣𑀸𑀬 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺. 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄.

𑁨𑁨𑁪. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀭𑀸𑀚𑀸𑀲𑀺 𑀯𑀺𑀚𑀬𑁄 𑀦𑀸𑀫𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀢𑁄𑀤𑁂𑀬𑁆𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀭𑀸𑀚𑀸𑀲𑀺 𑀯𑀺𑀚𑀬𑁄 𑀦𑀸𑀫𑀸𑀢𑀺 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀗𑁆𑀕𑀸𑀫𑁂𑀲𑀼 𑀚𑀺𑀦𑀢𑁄, 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀭𑀜𑁆𑀚𑀦𑀢𑁄 𑀅𑀮𑁆𑀮𑀻𑀬𑀦𑀢𑁄 𑀯𑀺𑀚𑀬𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀓𑁂𑀢𑀼𑀫𑀢𑀻𑀧𑀼𑀭𑀼𑀢𑁆𑀢𑀫𑁂𑀢𑀺 𑀓𑁂𑀢𑀼 𑀯𑀼𑀘𑁆𑀘𑀦𑁆𑀢𑀺 𑀥𑀚𑀧𑀝𑀸𑀓𑀸. 𑀅𑀣 𑀯𑀸 𑀦𑀕𑀭𑀲𑁄𑀪𑀦𑀢𑁆𑀣𑀸𑀬 𑀦𑀕𑀭𑀫𑀚𑁆𑀛𑁂 𑀉𑀲𑁆𑀲𑀸𑀧𑀺𑀢𑀭𑀢𑀦𑀢𑁄𑀭𑀡𑀸𑀦𑀺, 𑀢𑁂 𑀓𑁂𑀢𑀽 𑀦𑀺𑀘𑁆𑀘𑀁 𑀉𑀲𑁆𑀲𑀸𑀧𑀺𑀢𑀸 𑀲𑁄𑀪𑀬𑀫𑀸𑀦𑀸 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀓𑁂𑀢𑀼𑀫𑀢𑀻. 𑀧𑀽𑀭𑁂𑀢𑀺 𑀥𑀦𑀥𑀜𑁆𑀜𑁂𑀳𑀺 𑀲𑀩𑁆𑀩𑀚𑀦𑀸𑀦𑀁 𑀫𑀦𑀦𑁆𑀢𑀺 𑀧𑀼𑀭𑀁. 𑀓𑁂𑀢𑀼𑀫𑀢𑀻 𑀘 𑀲𑀸 𑀧𑀼𑀭𑀜𑁆𑀘 𑀲𑁂𑀝𑁆𑀞𑀝𑁆𑀞𑁂𑀦 𑀉𑀢𑁆𑀢𑀫𑀜𑁆𑀘𑁂𑀢𑀺 𑀓𑁂𑀢𑀼𑀫𑀢𑀻𑀧𑀼𑀭𑀼𑀢𑁆𑀢𑀫𑀁, 𑀢𑀲𑁆𑀫𑀺𑀁 𑀓𑁂𑀢𑀼𑀫𑀢𑀻𑀧𑀼𑀭𑀼𑀢𑁆𑀢𑀫𑁂. 𑀲𑀽𑀭𑁄 𑀯𑀺𑀓𑁆𑀓𑀫𑀲𑀫𑁆𑀧𑀦𑁆𑀦𑁄𑀢𑀺 𑀅𑀪𑀻𑀢𑁄 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄 𑀯𑀺𑀚𑀬𑁄 𑀦𑀸𑀫 𑀭𑀸𑀚𑀸 𑀅𑀚𑁆𑀛𑀸𑀯𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀁 𑀪𑀽𑀢𑀁 𑀧𑀼𑀭𑀜𑁆𑀘 𑀲𑀩𑁆𑀩𑀯𑀢𑁆𑀣𑀼𑀯𑀸𑀳𑀦𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀲𑀦𑁆𑀢𑁄 𑀲𑀼𑀫𑁂𑀥𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀦𑁆𑀤𑀦𑁂𑀦 𑀧𑀽𑀚𑀸𑀓𑀭𑀡𑀫𑁂𑀯 𑀯𑀺𑀲𑁂𑀲𑁄.

𑁨𑁭𑁬. 𑀦𑀯𑀫𑀸𑀧𑀤𑀸𑀦𑁂 𑀦𑀕𑀭𑁂 𑀳𑀁𑀲𑀯𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀚𑀢𑀼𑀓𑀡𑁆𑀡𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀲𑀸𑀤𑁂 𑀯𑀲𑀦𑀪𑀸𑀯𑁄 𑀘 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀯𑀲𑀦𑀪𑀸𑀯𑁄 𑀘 𑀲𑀩𑁆𑀩𑀤𑁂𑀲𑀯𑀸𑀲𑀻𑀦𑀁 𑀲𑀩𑁆𑀩𑀲𑀺𑀧𑁆𑀧𑀯𑀺𑀜𑁆𑀜𑀽𑀦𑀜𑁆𑀘 𑀆𑀕𑀦𑁆𑀢𑁆𑀯𑀸 𑀲𑁂𑀯𑀦𑀪𑀸𑀯𑁄 𑀘 𑀯𑀺𑀲𑁂𑀲𑁄.

𑁩𑁩𑁦. 𑀤𑀲𑀫𑀸𑀧𑀤𑀸𑀦𑁂 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀤𑁂𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀳𑀺𑀫𑀯𑀦𑁆𑀢𑀲𑀫𑀻𑀧𑁂 𑀧𑀤𑀼𑀫𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀲𑀦𑁆𑀢𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀤𑀼𑀫𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀽𑀚𑀺𑀢𑀪𑀸𑀯𑁄𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀏𑀓𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁨. 𑀪𑀤𑁆𑀤𑀸𑀮𑀺𑀯𑀕𑁆𑀕𑁄

𑁧-𑁧𑁦. 𑀪𑀤𑁆𑀤𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀩𑀸𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑀜𑁆𑀘 𑀤𑀼𑀢𑀺𑀬𑀸𑀧𑀤𑀸𑀦𑀜𑁆𑀘 𑀢𑀢𑀺𑀬𑀸𑀧𑀤𑀸𑀦𑀜𑁆𑀘 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁦𑁬. 𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀥𑀼𑀫𑀁𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀢𑁆𑀣 𑀲𑀽𑀓𑀭𑀺𑀓𑁄𑀢𑀺 𑀲𑀽𑀓𑀭𑀫𑀁𑀲𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄. 𑀉𑀓𑁆𑀓𑁄𑀝𑀓𑀁 𑀭𑀦𑁆𑀥𑀬𑀺𑀢𑁆𑀯𑀸𑀢𑀺 𑀧𑀺𑀳𑀓𑀧𑀧𑁆𑀨𑀸𑀲𑀫𑀁𑀲𑀁 𑀧𑀘𑀺𑀢𑁆𑀯𑀸 𑀫𑀥𑀼𑀫𑀁𑀲𑀫𑁆𑀳𑀺 𑀑𑀓𑀺𑀭𑀺𑀁 𑀧𑀓𑁆𑀔𑀺𑀧𑀺𑀁. 𑀢𑁂𑀦 𑀫𑀁𑀲𑁂𑀦 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀢𑁆𑀯𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀦𑁆𑀢𑀺 𑀅𑀢𑁆𑀣𑁄.

𑀦𑀸𑀕𑀧𑀮𑁆𑀮𑀯𑀢𑁆𑀣𑁂𑀭𑀲𑁆𑀲 𑀧𑀜𑁆𑀘𑀫𑀸𑀧𑀤𑀸𑀦𑀫𑁆𑀧𑀺 𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀲𑁆𑀲 𑀙𑀝𑁆𑀞𑀸𑀧𑀤𑀸𑀦𑀫𑁆𑀧𑀺 𑀉𑀘𑁆𑀙𑀗𑁆𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲 𑀲𑀢𑁆𑀢𑀫𑀸𑀧𑀤𑀸𑀦𑀫𑁆𑀧𑀺 𑀬𑀸𑀕𑀼𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀅𑀝𑁆𑀞𑀫𑀸𑀧𑀤𑀸𑀦𑀫𑁆𑀧𑀺 𑀧𑀢𑁆𑀣𑁄𑀤𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀦𑀯𑀫𑀸𑀧𑀤𑀸𑀦𑀫𑁆𑀧𑀺 𑀫𑀜𑁆𑀘𑀤𑀸𑀬𑀓𑀢𑁆𑀣𑁂𑀭𑀲𑁆𑀲 𑀤𑀲𑀫𑀸𑀧𑀤𑀸𑀦𑀫𑁆𑀧𑀺 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀩𑀸𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪𑁩-𑁪𑁮. 𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑀸𑀤𑀺𑀯𑀕𑁆𑀕𑁄

𑁧-𑁬𑁦. 𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀢𑁂𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑁂 𑀲𑀩𑁆𑀩𑀣𑁂𑀭𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯. 𑀓𑁂𑀯𑀮𑀁 𑀣𑁂𑀭𑀸𑀦𑀁 𑀦𑀸𑀫𑀦𑀸𑀦𑀢𑁆𑀢𑀁 𑀧𑀼𑀜𑁆𑀜𑀦𑀸𑀦𑀢𑁆𑀢𑀜𑁆𑀘 𑀯𑀺𑀲𑁂𑀲𑁄.

𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑁂 𑀯𑀕𑁆𑀕𑁂𑀧𑀺 𑀲𑀩𑁆𑀩𑀸𑀦𑀺 𑀅𑀧𑀤𑀸𑀦𑀸𑀦𑀺 𑀧𑀸𑀓𑀝𑀸𑀦𑁂𑀯. 𑀓𑁂𑀯𑀮𑀁 𑀧𑀼𑀜𑁆𑀜𑀦𑀸𑀦𑀢𑁆𑀢𑀁 𑀨𑀮𑀦𑀸𑀦𑀢𑁆𑀢𑀜𑁆𑀘 𑀯𑀺𑀲𑁂𑀲𑁄.

𑁧. 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀓𑀓𑀼𑀲𑀦𑁆𑀥𑁄 𑀫𑀳𑀸𑀯𑀻𑀭𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀺𑀪𑀻𑀝𑀓𑀫𑀺𑀜𑁆𑀚𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁.

𑁨. 𑀢𑀢𑁆𑀣 𑀩𑀻𑀚𑀫𑀺𑀜𑁆𑀚𑀫𑀤𑀸𑀲𑀳𑀦𑁆𑀢𑀺 𑀯𑀺𑀪𑀻𑀝𑀓𑀨𑀮𑀸𑀦𑀺 𑀨𑀸𑀮𑁂𑀢𑁆𑀯𑀸 𑀩𑀻𑀚𑀸𑀦𑀺 𑀫𑀺𑀜𑁆𑀚𑀸𑀦𑀺 𑀕𑀳𑁂𑀢𑁆𑀯𑀸 𑀫𑀥𑀼𑀲𑀓𑁆𑀓𑀭𑀸𑀳𑀺 𑀬𑁄𑀚𑁂𑀢𑁆𑀯𑀸 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀸𑀧𑀤𑀸𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯, 𑀣𑁂𑀭𑀸𑀦𑀁 𑀦𑀸𑀫𑀦𑀸𑀦𑀢𑁆𑀢𑀸𑀤𑀻𑀦𑀺𑀧𑀺 𑀧𑀸𑀞𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧. 𑀙𑀘𑀢𑁆𑀢𑀸𑀮𑀻𑀲𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀚𑀕𑀢𑀺𑀁 𑀓𑀸𑀭𑀬𑀺𑀁 𑀅𑀳𑀦𑁆𑀢𑀺 𑀉𑀢𑁆𑀢𑀫𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀲𑀫𑀦𑁆𑀢𑀢𑁄 𑀆𑀴𑀺𑀦𑁆𑀤𑀁 𑀅𑀳𑀁 𑀓𑀸𑀭𑀬𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀺 𑀤𑀼𑀢𑀺𑀬𑀸𑀧𑀤𑀸𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑀺𑀧𑀺 𑀉𑀢𑁆𑀢𑀸𑀦𑀸𑀦𑁂𑀯.

𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑀸𑀤𑀻𑀦𑀺 𑀧𑀸𑀴𑀺𑀅𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯.

𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑁂 𑀯𑀕𑁆𑀕𑁂 𑀧𑀞𑀫𑀤𑀼𑀢𑀺𑀬𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁩𑁦. 𑀢𑀢𑀺𑀬𑀸𑀧𑀤𑀸𑀦𑁂 𑀓𑁄𑀲𑀺𑀬𑁄 𑀦𑀸𑀫 𑀪𑀕𑀯𑀸𑀢𑀺 𑀓𑁄𑀲𑀺𑀬𑀕𑁄𑀢𑁆𑀢𑁂 𑀚𑀸𑀢𑀢𑁆𑀢𑀸 𑀓𑁄𑀲𑀺𑀬𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀓𑀽𑀝𑁂𑀢𑀺 𑀘𑀺𑀢𑁆𑀢𑀓𑀽𑀝𑀓𑁂𑀮𑀸𑀲𑀓𑀽𑀝𑀲𑀸𑀦𑀼𑀓𑀽𑀝𑀸𑀤𑀻𑀲𑀼 𑀅𑀦𑁄𑀢𑀢𑁆𑀢𑀤𑀳𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀧𑀩𑁆𑀩𑀢𑀓𑀽𑀝𑁂𑀲𑀼 𑀦𑀸𑀦𑀸𑀭𑀢𑀦𑀑𑀲𑀥𑀸𑀤𑀻𑀳𑀺 𑀯𑀺𑀘𑀺𑀢𑁆𑀢𑁂 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀲𑀻𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁫𑁬. 𑀙𑀝𑁆𑀞𑀸𑀧𑀤𑀸𑀦𑁂 𑀓𑀼𑀲𑀝𑁆𑀞𑀓𑀫𑀤𑀸𑀲𑀳𑀦𑁆𑀢𑀺 𑀧𑀓𑁆𑀔𑀺𑀓𑀪𑀢𑁆𑀢𑀉𑀧𑁄𑀲𑀣𑀺𑀓𑀪𑀢𑁆𑀢𑀥𑀼𑀭𑀪𑀢𑁆𑀢𑀲𑀮𑀸𑀓𑀪𑀢𑁆𑀢𑀸𑀤𑀻𑀲𑀼 𑀓𑀼𑀲𑀧𑀡𑁆𑀡𑀯𑀲𑁂𑀦 𑀤𑀸𑀢𑀩𑁆𑀩𑀁 𑀅𑀝𑁆𑀞𑀲𑀮𑀸𑀓𑀪𑀢𑁆𑀢𑀁 𑀅𑀳𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁧. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀲𑁄𑀪𑀺𑀢𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀩𑁆𑀬𑀸𑀫𑀧𑁆𑀧𑀪𑀸𑀤𑀻𑀳𑀺 𑀲𑁄𑀪𑀫𑀸𑀦𑀲𑀭𑀻𑀭𑀢𑁆𑀢𑀸 𑀲𑁄𑀪𑀺𑀢𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄.

𑁬𑁬. 𑀅𑀝𑁆𑀞𑀫𑀸𑀧𑀤𑀸𑀦𑁂 𑀢𑀓𑁆𑀓𑀭𑀸𑀬𑀁 𑀯𑀲𑀻 𑀢𑀤𑀸𑀢𑀺 𑀢𑀁 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀓𑀭𑁄𑀦𑁆𑀢𑀸 𑀚𑀦𑀸 𑀧𑀝𑀺𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀓𑁆𑀓𑀭𑀸, 𑀭𑀸𑀚𑀥𑀸𑀦𑀻. 𑀢𑀺𑀲𑁆𑀲𑀁 𑀢𑀓𑁆𑀓𑀭𑀸𑀬𑀁, 𑀢𑀤𑀸 𑀯𑀲𑀻𑀢𑀺 𑀅𑀢𑁆𑀣𑁄.

𑁭𑁨. 𑀦𑀯𑀫𑀸𑀧𑀤𑀸𑀦𑁂 𑀧𑀸𑀦𑀥𑀺𑀁 𑀲𑀼𑀓𑀢𑀁 𑀕𑀬𑁆𑀳𑀸𑀢𑀺 𑀉𑀧𑀸𑀳𑀦𑀬𑀼𑀕𑀁 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀦𑀺𑀧𑁆𑀨𑀸𑀤𑀺𑀢𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀲𑀫𑀸𑀧𑀤𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁯. 𑀧𑀁𑀲𑀼𑀓𑀽𑀮𑀯𑀕𑁆𑀕𑁄

𑁧-𑁧𑁦. 𑀧𑀁𑀲𑀼𑀓𑀽𑀮𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀏𑀓𑀽𑀦𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁪. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀸 𑀩𑀼𑀤𑁆𑀥𑀸𑀢𑀺 𑀅𑀥𑀺𑀘𑁆𑀘𑁂𑀦 𑀅𑀓𑀸𑀭𑀡𑁂𑀦 𑀉𑀧𑁆𑀧𑀢𑁆𑀢𑀺𑀓𑀸 𑀲𑀬𑀫𑁆𑀪𑀽𑀢𑀸, 𑀅𑀜𑁆𑀜𑁂𑀳𑀺 𑀤𑁂𑀯𑀩𑁆𑀭𑀳𑁆𑀫𑀫𑀸𑀭𑀸𑀤𑀻𑀳𑀺 𑀉𑀧𑀤𑁂𑀲𑀤𑀸𑀬𑀓𑁂𑀳𑀺 𑀭𑀳𑀺𑀢𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀉𑀧𑁆𑀧𑀦𑁆𑀦𑀸 𑀚𑀸𑀢𑀸 𑀧𑀸𑀢𑀼𑀪𑀽𑀢𑀸𑀢𑀺 𑀅𑀢𑁆𑀣𑁄.

𑁧𑁬. 𑀑𑀤𑀼𑀫𑁆𑀩𑀭𑀺𑀓𑀧𑀼𑀧𑁆𑀨𑀁 𑀯𑀸𑀢𑀺 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀧𑀼𑀧𑁆𑀨𑀁 𑀤𑀼𑀮𑁆𑀮𑀪𑀁 𑀤𑀼𑀮𑁆𑀮𑀪𑀼𑀧𑁆𑀧𑀢𑁆𑀢𑀺𑀓𑀁 𑀇𑀯. 𑀘𑀦𑁆𑀤𑀫𑁆𑀳𑀺 𑀲𑀲𑀓𑀁 𑀬𑀣𑀸𑀢𑀺 𑀘𑀦𑁆𑀤𑀫𑀡𑁆𑀟𑀮𑁂 𑀲𑀲𑀮𑁂𑀔𑀸𑀬 𑀭𑀽𑀧𑀁 𑀤𑀼𑀮𑁆𑀮𑀪𑀁 𑀬𑀣𑀸. 𑀯𑀸𑀬𑀲𑀸𑀦𑀁 𑀬𑀣𑀸 𑀔𑀻𑀭𑀦𑁆𑀢𑀺 𑀓𑀸𑀓𑀸𑀦𑀁 𑀦𑀺𑀘𑁆𑀘𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀔𑀼𑀤𑁆𑀤𑀸𑀧𑀻𑀴𑀺𑀢𑀪𑀸𑀯𑁂𑀦 𑀔𑀻𑀭𑀁 𑀤𑀼𑀮𑁆𑀮𑀪𑀁 𑀬𑀣𑀸, 𑀏𑀯𑀁 𑀤𑀼𑀮𑁆𑀮𑀪𑀁 𑀮𑁄𑀓𑀦𑀸𑀬𑀓𑀁 𑀘𑀢𑀼𑀭𑀸𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀸 𑀅𑀝𑁆𑀞𑀸𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀸 𑀲𑁄𑀴𑀲𑀸𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀢𑁄 𑀤𑀼𑀮𑁆𑀮𑀪𑁄 𑀮𑁄𑀓𑀦𑀸𑀬𑀓𑁄𑀢𑀺 𑀅𑀢𑁆𑀣𑁄.

𑁩𑁦. 𑀢𑀢𑀺𑀬𑀸𑀧𑀤𑀸𑀦𑁂 𑀫𑀥𑀼𑀁 𑀪𑀺𑀲𑁂𑀳𑀺 𑀲𑀯𑀢𑀻𑀢𑀺 𑀧𑁄𑀓𑁆𑀔𑀭𑀫𑀥𑀼𑀧𑀤𑀼𑀫𑀓𑁂𑀲𑀭𑁂𑀳𑀺 𑀲𑀯𑀢𑀺 𑀧𑀕𑁆𑀖𑀭𑀢𑀺. 𑀔𑀻𑀭𑀁 𑀲𑀧𑁆𑀧𑀺𑀁 𑀫𑀼𑀴𑀸𑀮𑀺𑀪𑀻𑀢𑀺 𑀔𑀻𑀭𑀜𑁆𑀘 𑀲𑀧𑁆𑀧𑀺𑀭𑀲𑀜𑁆𑀘 𑀧𑀤𑀼𑀫𑀫𑀼𑀴𑀸𑀮𑁂𑀳𑀺 𑀲𑀯𑀢𑀺 𑀧𑀕𑁆𑀖𑀭𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀫𑀫 𑀲𑀦𑁆𑀢𑀓𑀁 𑀩𑀼𑀤𑁆𑀥𑁄 𑀧𑀝𑀺𑀕𑁆𑀕𑀡𑁆𑀳𑀢𑀽𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀸𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁧𑁧𑁯. 𑀲𑀢𑁆𑀢𑀫𑀸𑀧𑀤𑀸𑀦𑁂 𑀘𑀢𑁆𑀢𑀸𑀮𑀻𑀲𑀤𑀺𑀚𑀸𑀧𑀺 𑀘𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑀸𑀢𑀺 𑀤𑀺𑀚𑀸. 𑀓𑀼𑀫𑀸𑀭𑀯𑀬𑁂 𑀉𑀝𑁆𑀞𑀺𑀢𑀤𑀦𑁆𑀢𑀸𑀦𑀁 𑀧𑀢𑀺𑀢𑀢𑁆𑀢𑀸 𑀧𑀼𑀦 𑀉𑀝𑁆𑀞𑀺𑀢𑀤𑀦𑁆𑀢𑀸 𑀤𑀺𑀚𑀸, 𑀢𑁂 𑀘 𑀤𑀦𑁆𑀢𑀸. 𑀩𑁆𑀬𑀸𑀓𑀭𑀡𑀜𑁆𑀘 𑀳𑁂𑀝𑁆𑀞𑀸 𑀦𑀺𑀤𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀅𑀝𑁆𑀞𑀫𑀸𑀧𑀤𑀸𑀦𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁧𑁭𑁧. 𑀦𑀯𑀫𑀸𑀧𑀤𑀸𑀦𑁂 𑀢𑀤𑀸𑀳𑀁 𑀫𑀸𑀡𑀯𑁄 𑀆𑀲𑀺𑀦𑁆𑀢𑀺 𑀬𑀤𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀤𑀻𑀧𑀗𑁆𑀓𑀭𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀩𑁆𑀬𑀸𑀓𑀭𑀡𑀁 𑀮𑀪𑀺, 𑀢𑀤𑀸 𑀅𑀳𑀁 𑀫𑁂𑀖𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀳𑀼𑀢𑁆𑀯𑀸 𑀲𑀼𑀫𑁂𑀥𑀢𑀸𑀧𑀲𑁂𑀦 𑀲𑀳 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀢𑁄 𑀓𑁂𑀦𑀘𑀺 𑀧𑀸𑀧𑀲𑀳𑀸𑀬𑁂𑀦 𑀲𑀁𑀲𑀝𑁆𑀞𑁄 𑀲𑀁𑀲𑀕𑁆𑀕𑀤𑁄𑀲𑁂𑀦 𑀧𑀸𑀧𑀯𑀺𑀢𑀓𑁆𑀓𑀸𑀤𑀺𑀯𑀲𑀁 𑀕𑀢𑁄 𑀫𑀸𑀢𑀼𑀖𑀸𑀢𑀓𑀫𑁆𑀫𑀯𑀲𑁂𑀦 𑀦𑀭𑀓𑁂 𑀅𑀕𑁆𑀕𑀺𑀚𑀸𑀮𑀸𑀤𑀺𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀫𑀼𑀤𑁆𑀤𑁂 𑀢𑀺𑀫𑀺𑀗𑁆𑀕𑀮𑀫𑀳𑀸𑀫𑀘𑁆𑀙𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀕𑀘𑁆𑀙𑀦𑁆𑀢𑀁 𑀫𑀳𑀸𑀦𑀸𑀯𑀁 𑀕𑀺𑀮𑀺𑀢𑀼𑀓𑀸𑀫𑁄 𑀕𑀢𑁄. 𑀤𑀺𑀲𑁆𑀯𑀸 𑀫𑀁 𑀯𑀸𑀡𑀺𑀚𑀸 𑀪𑀻𑀢𑀸 ‘‘𑀅𑀳𑁄 𑀕𑁄𑀢𑀫𑁄 𑀪𑀕𑀯𑀸’’𑀢𑀺 𑀲𑀤𑁆𑀤𑀫𑀓𑀁𑀲𑀼. 𑀅𑀣 𑀫𑀳𑀸𑀫𑀘𑁆𑀙𑁄 𑀧𑀼𑀩𑁆𑀩𑀯𑀸𑀲𑀦𑀸𑀯𑀲𑁂𑀦 𑀩𑀼𑀤𑁆𑀥𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀭𑀫𑀸𑀦𑁄 𑀯𑀦𑁆𑀤𑀢𑀺. 𑀢𑀤𑀸 𑀪𑀕𑀯𑀸 ‘‘𑀘𑀺𑀭𑀁 𑀥𑀫𑁆𑀫𑀭𑀼𑀘𑀻’’𑀢𑀺 𑀫𑀁 𑀆𑀳.

𑁧𑁮𑁪. 𑀅𑀣 𑀲𑁄 𑀣𑁂𑀭𑁄 ‘‘𑀲𑀼𑀘𑀺𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡’’𑀦𑁆𑀢𑀺𑀆𑀤𑀻𑀳𑀺 𑀕𑀸𑀣𑀸𑀳𑀺 𑀣𑁄𑀫𑁂𑀲𑀺. 𑀪𑀦𑁆𑀢𑁂, 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀥𑀭 𑀕𑁄𑀢𑀫. 𑀧𑀢𑀺𑀧𑀼𑀩𑁆𑀩𑁂𑀦 𑀯𑀺𑀲𑀼𑀤𑁆𑀥𑀧𑀘𑁆𑀘𑀬𑀦𑁆𑀢𑀺 𑀧𑀼𑀩𑁆𑀩𑁂 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀧𑀭𑀺𑀧𑀼𑀡𑁆𑀡𑀧𑀸𑀭𑀫𑀻𑀧𑀘𑁆𑀘𑀬𑀲𑀫𑁆𑀪𑀸𑀭𑁄 𑀲𑀼𑀝𑁆𑀞𑀼 𑀘𑀺𑀭𑀁 𑀓𑀸𑀮𑀁 𑀫𑀬𑀸 𑀦 𑀤𑀺𑀝𑁆𑀞𑁄 𑀅𑀲𑀻𑀢𑀺 𑀅𑀢𑁆𑀣𑁄. 𑀅𑀳𑀫𑀚𑁆𑀚𑀲𑀼𑀧𑁂𑀓𑁆𑀔𑀦𑀦𑁆𑀢𑀺 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂 𑀅𑀳𑀁 𑀲𑀼𑀧𑁂𑀓𑁆𑀔𑀦𑀁 𑀲𑀼𑀦𑁆𑀤𑀭𑀤𑀲𑁆𑀲𑀦𑀁, 𑀲𑀼𑀦𑁆𑀤𑀭𑀤𑀺𑀝𑁆𑀞𑀁 𑀯𑀸 𑀦𑀺𑀭𑀼𑀧𑀫𑀁 𑀯𑀺𑀕𑁆𑀕𑀳𑀁 𑀉𑀧𑀫𑀸𑀭𑀳𑀺𑀢𑀲𑀭𑀻𑀭𑀁 𑀕𑁄𑀢𑀫𑀁 𑀯𑀢 𑀏𑀓𑀦𑁆𑀢𑁂𑀦 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁮𑁫-𑁧𑁮𑁬. 𑀲𑀼𑀘𑀺𑀭𑀁 𑀯𑀺𑀳𑀢𑀢𑀫𑁄 𑀫𑀬𑀸𑀢𑀺 𑀯𑀺𑀲𑁂𑀲𑁂𑀦 𑀳𑀢𑀢𑀫𑁄 𑀯𑀺𑀤𑁆𑀥𑀁𑀲𑀺𑀢𑀫𑁄𑀳𑁄 𑀢𑁆𑀯𑀁 𑀫𑀬𑀸𑀧𑀺 𑀲𑀼𑀝𑁆𑀞𑀼 𑀘𑀺𑀭𑀁 𑀣𑁄𑀫𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀘𑀺𑀭𑀓𑁆𑀔𑁂𑀦 𑀦𑀤𑀻 𑀯𑀺𑀲𑁄𑀲𑀺𑀢𑀸𑀢𑀺 𑀏𑀲𑀸 𑀢𑀡𑁆𑀳𑀸𑀦𑀤𑀻 𑀲𑀼𑀦𑁆𑀤𑀭𑀭𑀓𑁆𑀔𑁂𑀦 𑀕𑁄𑀧𑀦𑁂𑀦 𑀯𑀺𑀲𑁂𑀲𑁂𑀦 𑀲𑁄𑀲𑀺𑀢𑀸, 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀢𑀸 𑀢𑀬𑀸𑀢𑀺 𑀅𑀢𑁆𑀣𑁄. 𑀲𑀼𑀘𑀺𑀭𑀁 𑀅𑀫𑀮𑀁 𑀯𑀺𑀲𑁄𑀥𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀘𑀺𑀭𑀁 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀫𑀮𑀁 𑀦𑀺𑀩𑁆𑀩𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀥𑀺𑀢𑀁, 𑀲𑀼𑀝𑁆𑀞𑀼 𑀓𑀢𑀁 𑀅𑀥𑀺𑀕𑀢𑀁 𑀢𑀬𑀸𑀢𑀺 𑀅𑀢𑁆𑀣𑁄. 𑀦𑀬𑀦𑀁 𑀜𑀸𑀡𑀫𑀬𑀁 𑀫𑀳𑀸𑀫𑀼𑀦𑁂. 𑀘𑀺𑀭𑀓𑀸𑀮𑀲𑀫𑀗𑁆𑀕𑀺𑀢𑁄𑀢𑀺 𑀫𑀳𑀸𑀫𑀼𑀦𑁂 𑀫𑀳𑀸𑀲𑀫𑀡 𑀜𑀸𑀡𑀫𑀬𑀁 𑀦𑀬𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀁 𑀘𑀺𑀭𑀓𑀸𑀮𑀁 𑀲𑀫𑀥𑀺𑀕𑀢𑁄 𑀲𑀫𑁆𑀧𑀢𑁆𑀢𑁄 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀦𑀝𑁆𑀞𑁄 𑀧𑀼𑀦𑀭𑀦𑁆𑀢𑀭𑀦𑁆𑀢𑀺 𑀅𑀳𑀁 𑀧𑀼𑀦 𑀅𑀦𑁆𑀢𑀭𑀁 𑀅𑀦𑁆𑀢𑀭𑀸𑀪𑀯𑁂 𑀫𑀚𑁆𑀛𑁂 𑀧𑀭𑀺𑀦𑀝𑁆𑀞𑁄 𑀧𑀭𑀺𑀳𑀻𑀦𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀦𑀭𑀚𑁆𑀚𑀲𑀫𑀸𑀕𑀢𑁄 𑀢𑀬𑀸𑀢𑀺 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀢𑀬𑀸 𑀲𑀤𑁆𑀥𑀺𑀁 𑀧𑀼𑀦𑀧𑀺 𑀲𑀫𑀸𑀕𑀢𑁄 𑀏𑀓𑀻𑀪𑀽𑀢𑁄 𑀲𑀳 𑀯𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀦𑀲𑁆𑀲𑀦𑁆𑀢𑀺 𑀓𑀢𑀸𑀦𑀺 𑀕𑁄𑀢𑀫𑀸𑀢𑀺 𑀕𑁄𑀢𑀫 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥, 𑀢𑀬𑀸 𑀲𑀤𑁆𑀥𑀺𑀁 𑀓𑀢𑀸𑀦𑀺 𑀲𑀫𑀸𑀕𑀫𑀸𑀤𑀻𑀦𑀺 𑀦 𑀳𑀺 𑀦𑀲𑁆𑀲𑀦𑁆𑀢𑀺 𑀬𑀸𑀯 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸 𑀦 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀥𑀫𑁆𑀫𑀭𑀼𑀘𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀲𑀫𑀸𑀧𑀤𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀏𑀓𑀽𑀦𑀧𑀜𑁆𑀜𑀸𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁦-𑁫𑁩. 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀤𑀺𑀯𑀕𑁆𑀕𑁄

𑁧-𑁪𑁦. 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀘 𑀏𑀓𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀘 𑀤𑁆𑀯𑁂𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀘 𑀢𑁂𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀘 𑀲𑀩𑁆𑀩𑀸𑀦𑀺 𑀅𑀧𑀤𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯𑀸𑀢𑀺.

𑁫𑁪. 𑀓𑀘𑁆𑀘𑀸𑀬𑀦𑀯𑀕𑁆𑀕𑁄

𑁧. 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀢𑀼𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀬𑀫𑀸𑀦𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀧𑀡𑀺𑀥𑀸𑀦𑀁 𑀓𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀚𑁆𑀚𑀸𑀥𑀭𑁄 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀡𑀺𑀓𑀸𑀭𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀅𑀓𑀸𑀲𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑁂𑀦 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀬 𑀧𑀽𑀚𑀁 𑀓𑀢𑁆𑀯𑀸 ‘‘𑀇𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀁 𑀫𑁂 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀢𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀉𑀚𑁆𑀚𑁂𑀦𑀺𑀬𑀁 𑀭𑀜𑁆𑀜𑁄 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀧𑀼𑀭𑁄𑀳𑀺𑀢𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀫𑀸𑀢𑀸 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀅𑀢𑁆𑀢𑀦𑁄 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀓𑀜𑁆𑀘𑀦𑀫𑀸𑀡𑀯𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀪𑀺. 𑀲𑁄 𑀕𑁄𑀢𑁆𑀢𑀯𑀲𑁂𑀦 𑀓𑀘𑁆𑀘𑀸𑀬𑀦𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣 𑀭𑀸𑀚𑀸 𑀘𑀡𑁆𑀟𑀧𑀚𑁆𑀚𑁄𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀲𑀼𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀇𑀥𑀸𑀦𑁂𑀣𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 𑀅𑀢𑁆𑀢𑀝𑁆𑀞𑀫𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀕𑀢𑁄 𑀢𑀲𑁆𑀲 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀢𑁆𑀢𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑁧. 𑀲𑁄 𑀏𑀯𑀁 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀣 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂 𑀢𑀸𑀯𑀤𑁂𑀯 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀓𑁂𑀲𑀫𑀲𑁆𑀲𑀼𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀏𑀯𑀁 𑀣𑁂𑀭𑁄 𑀲𑀤𑀢𑁆𑀣𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀯𑀦𑁆𑀤𑀺𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀇𑀘𑁆𑀙𑀢𑀻’’𑀢𑀺 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑁆𑀯𑀁𑀬𑁂𑀯, 𑀓𑀘𑁆𑀘𑀸𑀦, 𑀢𑀢𑁆𑀣 𑀕𑀘𑁆𑀙, 𑀢𑀬𑀺 𑀕𑀢𑁂 𑀭𑀸𑀚𑀸 𑀧𑀲𑀻𑀤𑀺𑀲𑁆𑀲𑀢𑀻’’𑀢𑀺 𑀆𑀳. 𑀣𑁂𑀭𑁄 𑀲𑀢𑁆𑀣𑀼 𑀆𑀡𑀸𑀬 𑀅𑀢𑁆𑀢𑀝𑁆𑀞𑀫𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑀸𑀤𑁂𑀢𑁆𑀯𑀸 𑀅𑀯𑀦𑁆𑀢𑀻𑀲𑀼 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀆𑀕𑀢𑁄. 𑀅𑀢𑁆𑀢𑀦𑁄 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑀁 𑀫𑀳𑀸𑀦𑀺𑀭𑀼𑀢𑁆𑀢𑀺𑀧𑁆𑀧𑀓𑀭𑀡𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀦𑁆𑀢𑀺 𑀧𑀓𑀭𑀡𑀢𑁆𑀢𑀬𑀁 𑀲𑀗𑁆𑀖𑀫𑀚𑁆𑀛𑁂 𑀩𑁆𑀬𑀸𑀓𑀸𑀲𑀺. 𑀅𑀣 𑀲𑀦𑁆𑀢𑀼𑀝𑁆𑀞𑁂𑀦 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁭) 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄 𑀅𑀕𑁆𑀕𑀨𑀮𑀲𑀼𑀔𑁂𑀦 𑀯𑀺𑀳𑀸𑀲𑀻𑀢𑀺.

𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀯𑀓𑁆𑀓𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑀼𑀢𑀺𑀬𑀸𑀧𑀤𑀸𑀦𑁂 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀣𑁂𑀭𑁄 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺.

𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀓𑁆𑀓𑀮𑀻𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀢𑁆𑀣 𑀓𑀮𑀻𑀢𑀺 𑀅𑀧𑀭𑀸𑀥𑀢𑀺𑀮𑀓𑀸𑀴𑀓𑀸𑀤𑀺𑀤𑁄𑀲𑀲𑁆𑀲 𑀅𑀥𑀺𑀯𑀘𑀦𑀁. 𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀧𑀺𑀡𑁆𑀟𑀲𑀤𑀺𑀲𑀢𑀸𑀬 𑀅𑀧𑀕𑀢𑁄 𑀩𑁆𑀬𑀧𑀕𑀢𑁄 𑀓𑀮𑀺 𑀤𑁄𑀲𑁄 𑀅𑀲𑁆𑀲𑀸𑀢𑀺 𑀯-𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀯𑀓𑁆𑀓𑀮𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄, 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀢𑀺𑀢𑁆𑀢𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀭𑀢𑀺. ‘‘𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀦𑀺𑀘𑁆𑀘𑀓𑀸𑀮𑀁 𑀲𑀢𑁆𑀣𑀼 𑀤𑀲𑁆𑀲𑀦𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀪𑁄𑀚𑀦𑀓𑀸𑀮𑀁 𑀲𑀭𑀻𑀭𑀓𑀺𑀘𑁆𑀘𑀓𑀸𑀮𑀜𑁆𑀘 𑀲𑁂𑀲𑀓𑀸𑀮𑁂 𑀬𑀢𑁆𑀣 𑀞𑀺𑀢𑁂𑀦 𑀲𑀓𑁆𑀓𑀸 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁, 𑀢𑀢𑁆𑀣 𑀞𑀺𑀢𑁄 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀧𑀳𑀸𑀬 𑀪𑀕𑀯𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑁄𑀬𑁂𑀯 𑀯𑀺𑀳𑀭𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑁄 𑀩𑀳𑀼𑀓𑀸𑀮𑀁 𑀢𑀲𑁆𑀫𑀺𑀁 𑀭𑀽𑀧𑀤𑀲𑁆𑀲𑀦𑁂𑀦𑁂𑀯 𑀯𑀺𑀘𑀭𑀦𑁆𑀢𑁂 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑁋 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦? 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀺; 𑀬𑁄 𑀫𑀁 𑀧𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺. 𑀥𑀫𑁆𑀫𑀜𑁆𑀳𑀺, 𑀯𑀓𑁆𑀓𑀮𑀺, 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭) 𑀆𑀳. 𑀲𑀢𑁆𑀣𑀭𑀺 𑀏𑀯𑀁 𑀯𑀤𑀦𑁆𑀢𑁂𑀧𑀺 𑀣𑁂𑀭𑁄 𑀲𑀢𑁆𑀣𑀼 𑀤𑀲𑁆𑀲𑀦𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁄 𑀲𑀢𑁆𑀣𑀸, ‘‘𑀦𑀸𑀬𑀁 𑀪𑀺𑀓𑁆𑀔𑀼 𑀲𑀁𑀯𑁂𑀕𑀁 𑀅𑀮𑀪𑀺𑀢𑁆𑀯𑀸 𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑁋 ‘‘𑀅𑀧𑁂𑀳𑀺, 𑀯𑀓𑁆𑀓𑀮𑀻’’𑀢𑀺 𑀣𑁂𑀭𑀁 𑀧𑀡𑀸𑀫𑁂𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀧𑀡𑀸𑀫𑀺𑀢𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑁋 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦, 𑀬𑁄𑀳𑀁 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀦 𑀮𑀪𑀸𑀫𑀻’’𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀧𑀸𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀺? 𑀲𑀢𑁆𑀣𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀫𑀫 𑀲𑀦𑁆𑀢𑀺𑀓𑀸 𑀅𑀲𑁆𑀲𑀸𑀲𑀁 𑀅𑀮𑀪𑀦𑁆𑀢𑁄 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀦𑀸𑀲𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑁋

‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁩𑁮𑁧) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀏𑀳𑀺, 𑀯𑀓𑁆𑀓𑀮𑀻’’𑀢𑀺 (𑀥. 𑀧. 𑀅𑀝𑁆𑀞. 𑁨.𑁩𑁮𑁧) 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀣𑁂𑀭𑁄 ‘‘𑀤𑀲𑀩𑀮𑁄 𑀫𑁂 𑀤𑀺𑀝𑁆𑀞𑁄, ‘𑀏𑀳𑀻’𑀢𑀺 𑀅𑀯𑁆𑀳𑀸𑀬𑀦𑀫𑁆𑀧𑀺 𑀮𑀤𑁆𑀥’’𑀦𑁆𑀢𑀺 𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀼𑀢𑁄 𑀕𑀘𑁆𑀙𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀕𑀫𑀦𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸𑀯 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀞𑀫𑁂𑀦 𑀧𑀸𑀤𑁂𑀦 𑀧𑀩𑁆𑀩𑀢𑁂 𑀞𑀺𑀢𑁄𑀬𑁂𑀯 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀕𑀸𑀣𑀸𑀬𑁄 𑀆𑀯𑀚𑁆𑀚𑁂𑀦𑁆𑀢𑁄 𑀆𑀓𑀸𑀲𑁂𑀬𑁂𑀯 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁮) 𑀥𑀫𑁆𑀫𑀧𑀤𑀯𑀡𑁆𑀡𑀦𑀸𑀬𑀜𑁆𑀘 (𑀥. 𑀧. 𑀅𑀝𑁆𑀞. 𑁨.𑁩𑁮𑁧 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼) 𑀆𑀕𑀢𑀁.

𑀇𑀥 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀻’’𑀢𑀺𑀆𑀤𑀺𑀦𑀸 𑀲𑀢𑁆𑀣𑀸𑀭𑀸 𑀑𑀯𑀤𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀢𑀲𑁆𑀲 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑀢𑁄 𑀏𑀯 𑀯𑀺𑀧𑀲𑁆𑀲𑀦𑀸 𑀯𑀻𑀣𑀺𑀁 𑀦 𑀑𑀢𑀭𑀢𑀺? 𑀪𑀕𑀯𑀸 𑀢𑀁 𑀜𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀧𑀼𑀦 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀬𑁂𑀯. 𑀅𑀣𑀲𑁆𑀲 𑀆𑀳𑀸𑀭𑀯𑁂𑀓𑀮𑁆𑀮𑁂𑀦 𑀯𑀸𑀢𑀸𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀢𑀁 𑀯𑀸𑀢𑀸𑀩𑀸𑀥𑁂𑀦 𑀧𑀻𑀴𑀺𑀬𑀫𑀸𑀦𑀁 𑀜𑀢𑁆𑀯𑀸 𑀪𑀕𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄 𑀢𑁆𑀯𑀁, 𑀯𑀺𑀳𑀭𑀁 𑀓𑀸𑀦𑀦𑁂 𑀯𑀦𑁂;

𑀧𑀯𑀺𑀤𑁆𑀥𑀕𑁄𑀘𑀭𑁂 𑀮𑀽𑀔𑁂, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻’’𑀢𑀺. (𑀣𑁂𑀭𑀕𑀸. 𑁩𑁫𑁦) 𑁋

𑀆𑀳. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑁋

‘‘𑀧𑀻𑀢𑀺𑀲𑀼𑀔𑁂𑀦 𑀯𑀺𑀧𑀼𑀮𑁂𑀦, 𑀨𑀭𑀫𑀸𑀦𑁄 𑀲𑀫𑀼𑀲𑁆𑀲𑀬𑀁;

𑀮𑀽𑀔𑀫𑁆𑀧𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

‘‘𑀪𑀸𑀯𑁂𑀦𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀩𑁄𑀚𑁆𑀛𑀗𑁆𑀕𑀸𑀦𑀺 𑀘 𑀪𑀸𑀯𑁂𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂;

𑀲𑀫𑀕𑁆𑀕𑁂 𑀲𑀳𑀺𑀢𑁂 𑀤𑀺𑀲𑁆𑀯𑀸, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

‘‘𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀫𑁆𑀩𑀼𑀤𑁆𑀥𑀁, 𑀅𑀕𑁆𑀕𑀁 𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀅𑀢𑀦𑁆𑀤𑀺𑀢𑁄 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂’’𑀢𑀺. (𑀣𑁂𑀭𑀕𑀸. 𑁩𑁫𑁧-𑁩𑁫𑁪) 𑁋

𑀘𑀢𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀸𑀲𑀁 𑀅𑀢𑁆𑀣𑁄 𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸𑀬𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁩𑁫𑁧-𑁩𑁫𑁪) 𑀯𑀼𑀢𑁆𑀢𑁄𑀬𑁂𑀯. 𑀏𑀯𑀁 𑀣𑁂𑀭𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁨𑁮. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁄𑀢𑀺 𑀓𑀓𑀼𑀲𑀦𑁆𑀥𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑀪𑀤𑁆𑀤𑀓𑀧𑁆𑀧𑀢𑁄 𑀳𑁂𑀝𑁆𑀞𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂𑀢𑀺 𑀅𑀢𑁆𑀣𑁄.

𑁨𑁯. 𑀧𑀤𑀼𑀫𑀸𑀓𑀸𑀭𑀯𑀤𑀦𑁄𑀢𑀺 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀲𑀲𑁆𑀲𑀺𑀭𑀻𑀓𑀫𑀼𑀔𑁄. 𑀧𑀤𑀼𑀫𑀧𑀢𑁆𑀢𑀓𑁆𑀔𑁄𑀢𑀺 𑀲𑁂𑀢𑀧𑀤𑀼𑀫𑀧𑀼𑀧𑁆𑀨𑀧𑀡𑁆𑀡𑀲𑀤𑀺𑀲𑀅𑀓𑁆𑀔𑀻𑀢𑀺 𑀅𑀢𑁆𑀣𑁄.

𑁩𑁦. 𑀧𑀤𑀼𑀫𑀼𑀢𑁆𑀢𑀭𑀕𑀦𑁆𑀥𑁄𑀯𑀸𑀢𑀺 𑀧𑀤𑀼𑀫𑀕𑀦𑁆𑀥𑀫𑀼𑀔𑁄𑀢𑀺 𑀅𑀢𑁆𑀣𑁄.

𑁩𑁧. 𑀅𑀦𑁆𑀥𑀸𑀦𑀁 𑀦𑀬𑀦𑀽𑀧𑀫𑁄𑀢𑀺 𑀘𑀓𑁆𑀔𑀼𑀯𑀺𑀭𑀳𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀦𑀬𑀦𑀲𑀤𑀺𑀲𑁄, 𑀥𑀫𑁆𑀫𑀤𑁂𑀲𑀦𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀜𑁆𑀜𑀸𑀘𑀓𑁆𑀔𑀸𑀤𑀺𑀘𑀓𑁆𑀔𑀼𑀤𑀸𑀬𑀓𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀯𑁂𑀲𑁄𑀢𑀺 𑀲𑀦𑁆𑀢𑀲𑀪𑀸𑀯𑁄 𑀲𑀦𑁆𑀢𑀇𑀭𑀺𑀬𑀸𑀧𑀣𑁄. 𑀕𑀼𑀡𑀦𑀺𑀥𑀻𑀢𑀺 𑀕𑀼𑀡𑀸𑀦𑀁 𑀦𑀺𑀥𑀺, 𑀲𑀩𑁆𑀩𑀕𑀼𑀡𑀕𑀡𑀸𑀦𑀁 𑀦𑀺𑀥𑀸𑀦𑀝𑁆𑀞𑀸𑀦𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀫𑀢𑀺𑀆𑀓𑀭𑁄𑀢𑀺 𑀲𑀸𑀥𑀽𑀦𑀁 𑀘𑀺𑀢𑁆𑀢𑀓𑀫𑁆𑀧𑀦𑀲𑀗𑁆𑀔𑀸𑀢𑀸𑀬 𑀓𑀭𑀼𑀡𑀸𑀬 𑀘 𑀅𑀢𑁆𑀣𑀸𑀦𑀢𑁆𑀣𑀫𑀺𑀦𑀦𑀧𑀭𑀺𑀘𑁆𑀙𑀺𑀦𑁆𑀦𑀫𑀢𑀺𑀬𑀸 𑀘 𑀆𑀓𑀭𑁄 𑀆𑀥𑀸𑀭𑀪𑀽𑀢𑁄.

𑁩𑁨. 𑀩𑁆𑀭𑀳𑁆𑀫𑀸𑀲𑀼𑀭𑀲𑀼𑀭𑀘𑁆𑀘𑀺𑀢𑁄𑀢𑀺 𑀩𑁆𑀭𑀳𑁆𑀫𑁂𑀳𑀺 𑀘 𑀅𑀲𑀼𑀭𑁂𑀳𑀺 𑀘 𑀤𑁂𑀯𑁂𑀳𑀺 𑀘 𑀅𑀘𑁆𑀘𑀺𑀢𑁄 𑀧𑀽𑀚𑀺𑀢𑁄𑀢𑀺 𑀅𑀢𑁆𑀣𑁄.

𑁩𑁩. 𑀫𑀥𑀼𑀭𑁂𑀦 𑀭𑀼𑀢𑁂𑀦 𑀘𑀸𑀢𑀺 𑀓𑀭𑀯𑀻𑀓𑀭𑀼𑀢𑀫𑀥𑀼𑀭𑁂𑀦 𑀲𑀤𑁆𑀤𑁂𑀦 𑀲𑀓𑀮𑀁 𑀚𑀦𑀁 𑀭𑀜𑁆𑀚𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀣𑀯𑀻 𑀲𑀸𑀯𑀓𑀁 𑀲𑀓𑀦𑁆𑀢𑀺 𑀅𑀢𑁆𑀢𑀦𑁄 𑀲𑀸𑀯𑀓𑀁 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀸𑀬 𑀲𑀦𑁆𑀣𑀯𑀻, 𑀣𑀼𑀢𑀺𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.

𑁩𑁪. 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀤𑀳𑀦𑀲𑀤𑁆𑀥𑀸𑀬 𑀲𑀸𑀲𑀦𑁂 𑀅𑀥𑀺𑀫𑀼𑀢𑁆𑀢𑁄 𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀫𑀫 𑀤𑀲𑁆𑀲𑀦𑀮𑀸𑀮𑀲𑁄𑀢𑀺 𑀫𑀬𑁆𑀳𑀁 𑀤𑀲𑁆𑀲𑀦𑁂 𑀩𑁆𑀬𑀸𑀯𑀝𑁄 𑀢𑀧𑁆𑀧𑀭𑁄.

𑁩𑁫. 𑀢𑀁 𑀞𑀸𑀦𑀫𑀪𑀺𑀭𑁄𑀘𑀬𑀺𑀦𑁆𑀢𑀺 𑀢𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀁 𑀅𑀪𑀺𑀭𑁄𑀘𑀬𑀺𑀁, 𑀇𑀘𑁆𑀙𑀺𑀁 𑀧𑀢𑁆𑀣𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁪𑁦. 𑀧𑀻𑀢𑀫𑀝𑁆𑀞𑀦𑀺𑀯𑀸𑀲𑀦𑀦𑁆𑀢𑀺 𑀲𑀺𑀮𑀺𑀝𑁆𑀞𑀲𑀼𑀯𑀡𑁆𑀡𑀯𑀡𑁆𑀡𑀯𑀢𑁆𑀣𑁂 𑀦𑀺𑀯𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀳𑁂𑀫𑀬𑀜𑁆𑀜𑁄𑀧𑀘𑀺𑀢𑀗𑁆𑀕𑀦𑁆𑀢𑀺 𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑀮𑀕𑁆𑀕𑀺𑀢𑀕𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁪𑁭-𑁪𑁮. 𑀦𑁄𑀦𑀻𑀢𑀲𑀼𑀔𑀼𑀫𑀸𑀮𑀁 𑀫𑀦𑁆𑀢𑀺 𑀦𑀯𑀦𑀻𑀢𑀫𑀺𑀯 𑀫𑀼𑀤𑀼𑀢𑀮𑀼𑀡𑀳𑀢𑁆𑀣𑀧𑀸𑀤𑀁. 𑀚𑀸𑀢𑀧𑀮𑁆𑀮𑀯𑀓𑁄𑀫𑀮𑀦𑁆𑀢𑀺 𑀅𑀲𑁄𑀓𑀧𑀮𑁆𑀮𑀯𑀧𑀢𑁆𑀢𑀓𑁄𑀫𑀮𑀫𑀺𑀯 𑀫𑀼𑀤𑀼𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀲𑀸𑀘𑀻𑀪𑀬𑀢𑀚𑁆𑀚𑀺𑀢𑀸𑀢𑀺 𑀢𑀤𑀸 𑀏𑀯𑀁𑀪𑀽𑀢𑀁 𑀓𑀼𑀫𑀸𑀭𑀁 𑀫𑀁 𑀅𑀜𑁆𑀜𑀸 𑀧𑀺𑀲𑀸𑀘𑀻 𑀏𑀓𑀸 𑀭𑀓𑁆𑀔𑀲𑀻 𑀪𑀬𑁂𑀦 𑀢𑀚𑁆𑀚𑁂𑀲𑀺 𑀪𑀺𑀁𑀲𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀤𑀸 𑀫𑀳𑁂𑀲𑀺𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀫𑀁 𑀲𑀸𑀬𑁂𑀲𑀼𑀁 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀤𑀻𑀦𑀫𑀸𑀦𑀲𑀸 𑀪𑀻𑀢𑀘𑀺𑀢𑁆𑀢𑀸 𑀫𑀫 𑀫𑀸𑀢𑀸𑀧𑀺𑀢𑀭𑁄 𑀇𑀫𑀁 𑀤𑀸𑀭𑀓𑀁 𑀢𑁂 𑀤𑀤𑀸𑀫, 𑀇𑀫𑀲𑁆𑀲 𑀲𑀭𑀡𑀁 𑀧𑀢𑀺𑀝𑁆𑀞𑀸 𑀳𑁄𑀢𑀼 𑀦𑀸𑀣 𑀦𑀸𑀬𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯. 𑀢𑀤𑀸 𑀧𑀝𑀺𑀕𑁆𑀕𑀳𑀺 𑀲𑁄 𑀫𑀦𑁆𑀢𑀺 𑀲𑁄 𑀪𑀕𑀯𑀸 𑀢𑀤𑀸 𑀢𑀲𑁆𑀫𑀺𑀁 𑀫𑀫 𑀫𑀸𑀢𑀼𑀬𑀸 𑀤𑀺𑀦𑁆𑀦𑀓𑀸𑀮𑁂 𑀚𑀸𑀮𑀺𑀦𑀸 𑀚𑀸𑀮𑀬𑀼𑀢𑁆𑀢𑁂𑀦 𑀲𑀗𑁆𑀔𑀸𑀮𑀓𑁂𑀦 𑀘𑀓𑁆𑀓𑀮𑀓𑁆𑀔𑀡𑀸𑀤𑀻𑀳𑀺 𑀮𑀓𑁆𑀔𑀺𑀢𑁂𑀦 𑀫𑀼𑀤𑀼𑀓𑁄𑀫𑀮𑀧𑀸𑀡𑀺𑀦𑀸 𑀫𑀼𑀤𑀼𑀓𑁂𑀦 𑀯𑀺𑀲𑀼𑀤𑁆𑀥𑁂𑀦 𑀳𑀢𑁆𑀣𑀢𑀮𑁂𑀦 𑀫𑀁 𑀅𑀕𑁆𑀕𑀳𑁂𑀲𑀻𑀢𑀺 𑀅𑀢𑁆𑀣𑁄.

𑁫𑁨. 𑀲𑀩𑁆𑀩𑀧𑀸𑀭𑀫𑀺𑀲𑀫𑁆𑀪𑀽𑀢𑀦𑁆𑀢𑀺 𑀲𑀩𑁆𑀩𑁂𑀳𑀺 𑀤𑀸𑀦𑀧𑀸𑀭𑀫𑀺𑀢𑀸𑀤𑀻𑀳𑀺 𑀲𑀫𑁆𑀪𑀽𑀢𑀁 𑀚𑀸𑀢𑀁. 𑀦𑀻𑀮𑀓𑁆𑀔𑀺𑀦𑀬𑀦𑀁 𑀯𑀭𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀚𑀁 𑀉𑀢𑁆𑀢𑀫𑀦𑀻𑀮𑀅𑀓𑁆𑀔𑀺𑀯𑀦𑁆𑀢𑀁. 𑀲𑀩𑁆𑀩𑀲𑀼𑀪𑀸𑀓𑀺𑀡𑁆𑀡𑀁 𑀲𑀩𑁆𑀩𑁂𑀦 𑀲𑀼𑀪𑁂𑀦 𑀯𑀡𑁆𑀡𑁂𑀦 𑀲𑀡𑁆𑀞𑀸𑀦𑁂𑀦 𑀆𑀓𑀺𑀡𑁆𑀡𑀁 𑀕𑀳𑀦𑀻𑀪𑀽𑀢𑀁 𑀭𑀽𑀧𑀁 𑀪𑀕𑀯𑀢𑁄 𑀳𑀢𑁆𑀣𑀧𑀸𑀤𑀲𑀻𑀲𑀸𑀤𑀺𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄, 𑀢𑀺𑀢𑁆𑀢𑀺𑀁 𑀅𑀧𑀢𑁆𑀢𑁄 𑀯𑀺𑀳𑀭𑀸𑀫𑀺 𑀅𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁧. 𑀢𑀤𑀸 𑀫𑀁 𑀘𑀭𑀡𑀦𑁆𑀢𑀕𑁄𑀢𑀺 𑀢𑀲𑁆𑀫𑀺𑀁 𑀫𑀬𑁆𑀳𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀲𑀻𑀮𑀸𑀤𑀺𑀧𑀦𑁆𑀦𑀭𑀲𑀦𑁆𑀦𑀁 𑀘𑀭𑀡𑀥𑀫𑁆𑀫𑀸𑀦𑀁 𑀅𑀦𑁆𑀢𑀕𑁄, 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑁄 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀅𑀢𑁆𑀣𑁄. ‘‘𑀫𑀭𑀡𑀦𑁆𑀢𑀕𑁄’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 𑀫𑀭𑀡𑀲𑁆𑀲 𑀅𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀁 𑀧𑀜𑁆𑀜𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀬𑀤𑀺𑀤𑀁, 𑀯𑀓𑁆𑀓𑀮𑀻’’𑀢𑀺 (𑀅. 𑀦𑀺. 𑁧.𑁧𑁯𑁮, 𑁨𑁦𑁮) 𑀫𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀓𑁆𑀓𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀧𑁆𑀧𑀺𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀑𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺.

𑀲𑁄 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀧𑁂𑀲𑀓𑀸𑀭𑀕𑀸𑀫𑁂 𑀚𑁂𑀝𑁆𑀞𑀧𑁂𑀲𑀓𑀸𑀭𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀢𑀤𑀸 𑀲𑀳𑀲𑁆𑀲𑀫𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀺𑀫𑀯𑀦𑁆𑀢𑁂 𑀅𑀝𑁆𑀞 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀚𑀦𑀧𑀤𑁂 𑀯𑀲𑀦𑁆𑀢𑀺. 𑀢𑁂 𑀏𑀓𑀯𑀸𑀭𑀁 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 ‘‘𑀲𑁂𑀦𑀸𑀲𑀦𑀁 𑀓𑀭𑀡𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀣𑀸’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀳𑀺𑀡𑀺𑀁𑀲𑀼. 𑀢𑀤𑀸 𑀧𑀦 𑀭𑀜𑁆𑀜𑁄 𑀯𑀧𑁆𑀧𑀫𑀗𑁆𑀕𑀮𑀁 𑀅𑀳𑁄𑀲𑀺. 𑀲𑁄 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑀺𑀭 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀚𑁆𑀚, 𑀪𑀦𑁆𑀢𑁂, 𑀑𑀓𑀸𑀲𑁄 𑀦𑀢𑁆𑀣𑀺 𑀲𑁆𑀯𑁂 𑀅𑀫𑁆𑀳𑀸𑀓𑀁 𑀯𑀧𑁆𑀧𑀫𑀗𑁆𑀕𑀮𑀁, 𑀢𑀢𑀺𑀬𑀤𑀺𑀯𑀲𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀦𑀺𑀫𑀦𑁆𑀢𑁂𑀢𑁆𑀯𑀸𑀯 𑀧𑀸𑀯𑀺𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀅𑀜𑁆𑀜𑀁 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀓𑁆𑀓𑀫𑀺𑀁𑀲𑀼.

𑀢𑀲𑁆𑀫𑀺𑀁 𑀲𑀫𑀬𑁂 𑀚𑁂𑀝𑁆𑀞𑀧𑁂𑀲𑀓𑀸𑀭𑀲𑁆𑀲 𑀪𑀭𑀺𑀬𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑀻 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀓𑀺𑀁, 𑀪𑀦𑁆𑀢𑁂, 𑀅𑀯𑁂𑀮𑀸𑀬 𑀅𑀬𑁆𑀬𑀸 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀇𑀢𑁆𑀣𑀻 ‘‘𑀲𑁆𑀯𑁂, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. ‘‘𑀩𑀳𑀼𑀓𑀸 𑀫𑀬𑀁, 𑀪𑀕𑀺𑀦𑀻’’𑀢𑀺. ‘‘𑀓𑀺𑀢𑁆𑀢𑀓𑀸, 𑀪𑀦𑁆𑀢𑁂’’𑀢𑀺? ‘‘𑀲𑀳𑀲𑁆𑀲𑀫𑀢𑁆𑀢𑀸, 𑀪𑀕𑀺𑀦𑀻’’𑀢𑀺. ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀦𑁄 𑀕𑀸𑀫𑁂 𑀲𑀳𑀲𑁆𑀲𑀫𑀢𑁆𑀢𑀸 𑀯𑀲𑀺𑀫𑁆𑀳𑀸, 𑀏𑀓𑁂𑀓𑁄 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀢𑀺, 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣, 𑀅𑀳𑀫𑁂𑀯 𑀯𑁄 𑀯𑀲𑀦𑀝𑁆𑀞𑀸𑀦𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀥𑀺𑀯𑀸𑀲𑁂𑀲𑀼𑀁.

𑀲𑀸 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀉𑀕𑁆𑀖𑁄𑀲𑁂𑀲𑀺 𑁋 ‘‘𑀅𑀫𑁆𑀫𑀢𑀸𑀢𑀸, 𑀅𑀳𑀁 𑀲𑀳𑀲𑁆𑀲𑀫𑀢𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀦𑀺𑀫𑀦𑁆𑀢𑁂𑀲𑀺𑀁, 𑀅𑀬𑁆𑀬𑀸𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀲𑀁𑀯𑀺𑀤𑀳𑀣, 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀣𑀸’’𑀢𑀺 𑀕𑀸𑀫𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀆𑀤𑀸𑀬 𑀢𑀸𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀯𑀦𑁆𑀤𑀺𑀢𑁆𑀯𑀸 𑀢𑁂𑀫𑀸𑀲𑀁 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀕𑀸𑀫𑁂 𑀉𑀕𑁆𑀖𑁄𑀲𑁂𑀲𑀺 𑁋 ‘‘𑀅𑀫𑁆𑀫𑀢𑀸𑀢𑀸, 𑀏𑀓𑁂𑀓𑀓𑀼𑀮𑀢𑁄 𑀏𑀓𑁂𑀓𑀧𑀼𑀭𑀺𑀲𑁄 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀆𑀳𑀭𑀺𑀢𑁆𑀯𑀸 𑀅𑀬𑁆𑀬𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀓𑀭𑁄𑀢𑀽’’𑀢𑀺. 𑀕𑀸𑀫𑀯𑀸𑀲𑀺𑀦𑁄 𑀢𑀲𑁆𑀲𑀸𑀬𑁂𑀯 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀓𑁂𑀓𑁄 𑀏𑀓𑁂𑀓𑀁 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀭𑀢𑁆𑀢𑀺𑀤𑀺𑀯𑀸𑀝𑁆𑀞𑀸𑀦𑁂𑀳𑀺 𑀧𑀡𑁆𑀡𑀲𑀸𑀮𑀲𑀳𑀲𑁆𑀲𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬𑀁 𑀉𑀧𑀕𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 ‘‘𑀅𑀳𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀲𑀸 𑀯𑀲𑁆𑀲𑀁𑀯𑀼𑀝𑁆𑀞𑀓𑀸𑀮𑁂 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀻𑀯𑀭𑀲𑀸𑀝𑀓𑁂 𑀲𑀚𑁆𑀚𑁂𑀣𑀸’’𑀢𑀺 𑀲𑀫𑀸𑀤𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀲 𑀲𑀳𑀲𑁆𑀲 𑀲𑀳𑀲𑁆𑀲𑀫𑀽𑀮𑀁 𑀘𑀻𑀯𑀭𑀁 𑀤𑀸𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀼𑀝𑁆𑀞𑀯𑀲𑁆𑀲𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀕𑀸𑀫𑀯𑀸𑀲𑀺𑀦𑁄𑀧𑀺 𑀇𑀤𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀕𑀡𑀤𑁂𑀯𑀢𑀸 𑀦𑀸𑀫 𑀅𑀳𑁂𑀲𑀼𑀁.

𑀢𑁂 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀧𑀼𑀩𑁆𑀩𑁂 𑀚𑁂𑀝𑁆𑀞𑀓𑀧𑁂𑀲𑀓𑀸𑀭𑁄 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀏𑀓𑀲𑁆𑀲 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀥𑀻𑀢𑀸 𑀅𑀳𑁄𑀲𑀺. 𑀲𑁂𑀲𑀸𑀦𑀁 𑀪𑀭𑀺𑀬𑀸𑀬𑁄 𑀲𑁂𑀲𑀓𑀼𑀝𑀼𑀫𑁆𑀩𑀺𑀓𑀸𑀦𑀁 𑀥𑀻𑀢𑀭𑁄 𑀅𑀳𑁂𑀲𑀼𑀁, 𑀢𑀸 𑀲𑀩𑁆𑀩𑀸𑀧𑀺 𑀯𑀬𑀧𑁆𑀧𑀢𑁆𑀢𑀸 𑀧𑀭𑀓𑀼𑀮𑀁 𑀕𑀘𑁆𑀙𑀦𑁆𑀢𑀺𑀬𑁄 𑀢𑁂𑀲𑀁 𑀢𑁂𑀲𑀁𑀬𑁂𑀯 𑀕𑁂𑀳𑀸𑀦𑀺 𑀅𑀕𑀫𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀯𑀺𑀳𑀸𑀭𑁂 𑀥𑀫𑁆𑀫𑀲𑁆𑀲𑀯𑀦𑁂 𑀲𑀗𑁆𑀖𑀼𑀝𑁆𑀞𑁂 ‘‘𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑁂 𑀲𑀩𑁆𑀩𑁂𑀧𑀺 𑀓𑀼𑀝𑀼𑀫𑁆𑀩𑀺𑀓𑀸 ‘‘𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀪𑀭𑀺𑀬𑀸𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑁂𑀲𑀁 𑀯𑀺𑀳𑀸𑀭𑀫𑀚𑁆𑀛𑀁 𑀧𑀯𑀺𑀝𑁆𑀞𑀓𑁆𑀔𑀡𑁂 𑀯𑀲𑁆𑀲𑀁 𑀯𑀲𑁆𑀲𑀺. 𑀬𑁂𑀲𑀁 𑀓𑀼𑀮𑀽𑀧𑀓𑀸 𑀯𑀸 𑀜𑀸𑀢𑀺𑀲𑀸𑀫𑀡𑁂𑀭𑀸𑀤𑀬𑁄 𑀯𑀸 𑀅𑀢𑁆𑀣𑀺, 𑀢𑁂 𑀢𑁂𑀲𑀁 𑀧𑀭𑀺𑀯𑁂𑀡𑀸𑀤𑀻𑀦𑀺 𑀧𑀯𑀺𑀲𑀺𑀁𑀲𑀼. 𑀢𑁂 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀦𑀢𑁆𑀣𑀺𑀢𑀸𑀬 𑀓𑀢𑁆𑀣𑀘𑀺 𑀧𑀯𑀺𑀲𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 𑀅𑀝𑁆𑀞𑀁𑀲𑀼. 𑀅𑀣 𑀦𑁂 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑁄 𑀆𑀳 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀫𑁆𑀳𑀸𑀓𑀁 𑀯𑀺𑀧𑁆𑀧𑀓𑀸𑀭𑀁, 𑀓𑀼𑀮𑀧𑀼𑀢𑁆𑀢𑁂𑀳𑀺 𑀦𑀸𑀫 𑀏𑀢𑁆𑀢𑀓𑁂𑀦 𑀮𑀚𑁆𑀚𑀺𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺. ‘‘𑀅𑀬𑁆𑀬, 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀫𑀬𑀁 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑁂𑀦 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑀸, 𑀲𑀩𑁆𑀩𑁂 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀸𑀥𑀼, 𑀅𑀬𑁆𑀬𑀸’’𑀢𑀺 𑀚𑁂𑀝𑁆𑀞𑀓𑁄 𑀲𑀳𑀲𑁆𑀲𑀁 𑀅𑀤𑀸𑀲𑀺. 𑀲𑁂𑀲𑀸 𑀧𑀜𑁆𑀘 𑀧𑀜𑁆𑀘 𑀲𑀢𑀸𑀦𑀺. 𑀇𑀢𑁆𑀣𑀺𑀬𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀲𑀢𑀸𑀦𑀺. 𑀢𑁂 𑀢𑀁 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀲𑀳𑀲𑁆𑀲𑀓𑀽𑀝𑀸𑀕𑀸𑀭𑀧𑀭𑀺𑀯𑀸𑀭𑀁 𑀲𑀢𑁆𑀣𑀼 𑀯𑀲𑀦𑀢𑁆𑀣𑀸𑀬 𑀫𑀳𑀸𑀧𑀭𑀺𑀯𑁂𑀡𑀁 𑀦𑀸𑀫 𑀓𑀸𑀭𑀸𑀧𑁂𑀲𑀼𑀁. 𑀦𑀯𑀓𑀫𑁆𑀫𑀲𑁆𑀲 𑀫𑀳𑀦𑁆𑀢𑀢𑀸𑀬 𑀥𑀦𑁂 𑀅𑀧𑁆𑀧𑀳𑁄𑀦𑁆𑀢𑁂 𑀧𑀼𑀩𑁆𑀩𑁂 𑀤𑀺𑀦𑁆𑀦𑀥𑀦𑀢𑁄 𑀧𑀼𑀦 𑀉𑀧𑀟𑁆𑀠𑀽𑀧𑀟𑁆𑀠𑀁 𑀅𑀤𑀁𑀲𑀼. 𑀦𑀺𑀝𑁆𑀞𑀺𑀢𑁂 𑀧𑀭𑀺𑀯𑁂𑀡𑁂 𑀯𑀺𑀳𑀸𑀭𑀫𑀳𑀁 𑀓𑀭𑁄𑀦𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀘𑀻𑀯𑀭𑀸𑀦𑀺 𑀲𑀚𑁆𑀚𑀬𑀺𑀁𑀲𑀼.

𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀦 𑀪𑀭𑀺𑀬𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀞𑀺𑀢𑀸 𑀅𑀳𑀁 𑀢𑁂𑀳𑀺 𑀲𑀫𑀓𑀁 𑀅𑀓𑀢𑁆𑀯𑀸 𑀅𑀢𑀺𑀭𑁂𑀓𑀢𑀭𑀁 𑀓𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁄𑀚𑀧𑀼𑀧𑁆𑀨𑀯𑀡𑁆𑀡𑁂𑀦 𑀲𑀳𑀲𑁆𑀲𑀫𑀽𑀮𑁂𑀦 𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀅𑀦𑁄𑀚𑀧𑀼𑀧𑁆𑀨𑀘𑀗𑁆𑀓𑁄𑀝𑀓𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑁄𑀚𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀢𑀁 𑀲𑀸𑀝𑀓𑀁 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀦𑁄𑀚𑀧𑀼𑀧𑁆𑀨𑀯𑀡𑁆𑀡𑀁𑀬𑁂𑀯 𑀫𑁂 𑀲𑀭𑀻𑀭𑀁 𑀳𑁄𑀢𑀼, 𑀅𑀦𑁄𑀚𑀸𑀢𑁆𑀯𑁂𑀯 𑀘 𑀦𑀸𑀫𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀚𑁂𑀝𑁆𑀞𑀓𑁄 𑀓𑀼𑀓𑁆𑀓𑀼𑀝𑀯𑀢𑀻𑀦𑀕𑀭𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸 𑀦𑀸𑀫 𑀅𑀳𑁄𑀲𑀺. 𑀲𑁂𑀲𑀸 𑀅𑀫𑀘𑁆𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀚𑁂𑀝𑁆𑀞𑀓𑀲𑁆𑀲 𑀪𑀭𑀺𑀬𑀸 𑀫𑀤𑁆𑀤𑀭𑀝𑁆𑀞𑁂 𑀲𑀸𑀓𑀮𑀦𑀕𑀭𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺 𑀅𑀦𑁄𑀚𑀧𑀼𑀧𑁆𑀨𑀯𑀡𑁆𑀡𑀫𑁂𑀯𑀲𑁆𑀲𑀸 𑀲𑀭𑀻𑀭𑀁 𑀅𑀳𑁄𑀲𑀺, 𑀢𑁂𑀦 𑀅𑀦𑁄𑀚𑀸𑀢𑁆𑀯𑁂𑀯𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼, 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀫𑀳𑀸𑀓𑀧𑁆𑀧𑀺𑀦𑀭𑀜𑁆𑀜𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀦𑁄𑀚𑀸𑀤𑁂𑀯𑀻𑀢𑀺 𑀧𑀸𑀓𑀝𑀸 𑀅𑀳𑁄𑀲𑀺.

𑀲𑁂𑀲𑀺𑀢𑁆𑀣𑀺𑀬𑁄𑀧𑀺 𑀅𑀫𑀘𑁆𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀢𑁂𑀲𑀁𑀬𑁂𑀯 𑀅𑀫𑀘𑁆𑀘𑀧𑀼𑀢𑁆𑀢𑀸𑀦𑀁 𑀕𑁂𑀳𑀸𑀦𑀺 𑀅𑀕𑀫𑀁𑀲𑀼. 𑀢𑁂 𑀲𑀩𑁆𑀩𑁂𑀧𑀺 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼. 𑀬𑀤𑀸 𑀳𑀺 𑀭𑀸𑀚𑀸 𑀅𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀤𑀸𑀧𑀺 𑀢𑁂 𑀢𑀣𑁂𑀯 𑀯𑀺𑀘𑀭𑀦𑁆𑀢𑀺. 𑀢𑀲𑁆𑀫𑀺𑀁 𑀅𑀲𑁆𑀲𑁂𑀦 𑀯𑀸 𑀭𑀣𑁂𑀦 𑀯𑀸 𑀯𑀺𑀘𑀭𑀦𑁆𑀢𑁂 𑀢𑁂𑀧𑀺 𑀢𑀣𑁂𑀯 𑀯𑀺𑀘𑀭𑀦𑁆𑀢𑀺. 𑀏𑀯𑀁 𑀢𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀢𑀸𑀦𑀁 𑀧𑀼𑀜𑁆𑀜𑀸𑀦𑀁 𑀩𑀮𑁂𑀦 𑀏𑀓𑀢𑁄𑀯 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼. 𑀭𑀜𑁆𑀜𑁄 𑀧𑀦 𑀯𑀸𑀮𑁄, 𑀯𑀸𑀮𑀯𑀸𑀳𑀦𑁄, 𑀧𑀼𑀧𑁆𑀨𑁄, 𑀧𑀼𑀧𑁆𑀨𑀯𑀸𑀳𑀦𑁄, 𑀲𑀼𑀧𑀢𑁆𑀢𑁄𑀢𑀺 𑀧𑀜𑁆𑀘𑁂𑀯 𑀅𑀲𑁆𑀲𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀭𑀸𑀚𑀸 𑀲𑀼𑀧𑀢𑁆𑀢𑀁 𑀅𑀲𑁆𑀲𑀁 𑀲𑀬𑀁 𑀆𑀭𑁄𑀳𑀢𑀺, 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀅𑀲𑁆𑀲𑁂 𑀅𑀲𑁆𑀲𑀸𑀭𑁄𑀳𑀸𑀦𑀁 𑀲𑀸𑀲𑀦𑀸𑀳𑀭𑀡𑀢𑁆𑀣𑀸𑀬 𑀅𑀤𑀸𑀲𑀺. 𑀭𑀸𑀚𑀸 𑀢𑁂 𑀧𑀸𑀢𑁄𑀯 𑀪𑁄𑀚𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀡𑁂, 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀬𑁄𑀚𑀦𑀸𑀦𑀺 𑀆𑀳𑀺𑀡𑁆𑀟𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀫𑀬𑁆𑀳𑀁 𑀲𑀼𑀔𑀲𑀸𑀲𑀦𑀁 𑀆𑀭𑁄𑀘𑁂𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀆𑀳𑀺𑀡𑁆𑀟𑀺𑀢𑁆𑀯𑀸 𑀓𑀺𑀜𑁆𑀘𑀺 𑀲𑀸𑀲𑀦𑀁 𑀅𑀮𑀪𑀺𑀢𑁆𑀯𑀸𑀯 𑀧𑀘𑁆𑀘𑀸𑀕𑀫𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀲𑀼𑀧𑀢𑁆𑀢𑀁 𑀆𑀭𑀼𑀳𑀺𑀢𑁆𑀯𑀸 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀓𑀺𑀮𑀦𑁆𑀢𑀭𑀽𑀧𑁂 𑀧𑀜𑁆𑀘𑀲𑀢𑀫𑀢𑁆𑀢𑁂 𑀯𑀸𑀡𑀺𑀚𑀓𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀤𑁆𑀥𑀸𑀦𑀓𑀺𑀮𑀦𑁆𑀢𑀸, 𑀅𑀤𑁆𑀥𑁄 𑀇𑀫𑁂𑀲𑀁 𑀲𑀦𑁆𑀢𑀺𑀓𑀸 𑀏𑀓𑀁 𑀪𑀤𑁆𑀤𑀓𑀁 𑀲𑀸𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀇𑀢𑁄 𑀯𑀻𑀲𑀢𑀺𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀢𑀢𑁄 𑀆𑀕𑀢𑀫𑁆𑀳𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀯𑁄 𑀤𑁂𑀲𑁂 𑀓𑀺𑀜𑁆𑀘𑀺 𑀲𑀸𑀲𑀦𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺. ‘‘𑀤𑁂𑀯, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀢𑀸𑀯𑀤𑁂𑀯 𑀩𑀮𑀯𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀦, ‘‘𑀢𑀸𑀢𑀸, 𑀓𑀺𑀁 𑀯𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑁄, 𑀤𑁂𑀯, 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀢𑀣𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀓𑀺𑀁 𑀯𑀤𑁂𑀣, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂, ‘‘𑀢𑀸𑀢𑀸, 𑀲𑀼𑀔𑀲𑀸𑀲𑀦𑀲𑀯𑀦𑀸𑀬 𑀲𑀢𑀲𑀳𑀲𑁆𑀲𑀁 𑀯𑁄 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 ‘‘𑀅𑀧𑀭𑀫𑁆𑀧𑀺 𑀓𑀺𑀜𑁆𑀘𑀺 𑀲𑀸𑀲𑀦𑀁 𑀅𑀢𑁆𑀣𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀬𑁄 𑀯𑀸𑀭𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑁋 ‘‘𑀇𑀥𑀸𑀧𑀺 𑀯𑁄 𑀲𑀢𑀲𑀳𑀲𑁆𑀲𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 ‘‘𑀅𑀧𑀭𑀫𑁆𑀧𑀺 𑀓𑀺𑀜𑁆𑀘𑀺 𑀲𑀸𑀲𑀦𑀁 𑀅𑀢𑁆𑀣𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀣𑁂𑀯 𑀢𑀬𑁄 𑀯𑀸𑀭𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑁋 ‘‘𑀇𑀥𑀸𑀧𑀺 𑀯𑁄 𑀲𑀢𑀲𑀳𑀲𑁆𑀲𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀅𑀫𑀘𑁆𑀘𑀲𑀳𑀲𑁆𑀲𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀢𑀸𑀢𑀸, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀅𑀳𑀁, 𑀢𑀸𑀢𑀸, ‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄 𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀲𑀼𑀢𑁆𑀯𑀸 𑀦 𑀧𑀼𑀦 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀬𑀫𑁆𑀧𑀺, 𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀅𑀓𑁆𑀔𑀭𑀸𑀦𑀺 𑀮𑀺𑀔𑀸𑀧𑁂𑀢𑁆𑀯𑀸 𑀯𑀸𑀡𑀺𑀚𑀓𑀸𑀦𑀁 𑀤𑀢𑁆𑀯𑀸 ‘‘𑀇𑀫𑀁 𑀅𑀦𑁄𑀚𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀤𑁂𑀣, 𑀲𑀸 𑀢𑀼𑀫𑁆𑀳𑀸𑀓𑀁 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑀢𑀺, 𑀏𑀯𑀜𑁆𑀘 𑀧𑀦 𑀦𑀁 𑀯𑀤𑁂𑀬𑁆𑀬𑀸𑀣 ‘𑀭𑀜𑁆𑀜𑀸 𑀓𑀺𑀭 𑀢𑁂 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀝𑁆𑀞𑀁, 𑀬𑀣𑀸𑀲𑀼𑀔𑀁 𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀪𑀼𑀜𑁆𑀚𑀸𑀳𑀻’𑀢𑀺, 𑀲𑀘𑁂 𑀧𑀦 ‘𑀯𑁄 𑀭𑀸𑀚𑀸 𑀓𑀳’𑀦𑁆𑀢𑀺 𑀧𑀼𑀘𑁆𑀙𑀢𑀺, ‘𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀕𑀢𑁄𑀢𑀺 𑀆𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀦𑀁 𑀢𑀣𑁂𑀯 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 𑀯𑀸𑀡𑀺𑀚𑀓𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀲𑁆𑀲𑀁 𑀅𑀪𑀺𑀭𑀼𑀬𑁆𑀳 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀢𑀁𑀔𑀡𑀜𑁆𑀜𑁂𑀯 𑀦𑀺𑀓𑁆𑀔𑀫𑀺.

𑀲𑀢𑁆𑀣𑀸𑀧𑀺 𑀢𑀁𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸𑀦𑀁 𑀲𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀳𑀸𑀓𑀧𑁆𑀧𑀺𑀦𑁄 𑀯𑀸𑀡𑀺𑀚𑀓𑀸𑀦𑀁 𑀲𑀦𑁆𑀢𑀺𑀓𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀢𑀻𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀽𑀚𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀫𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀲𑁆𑀯𑁂 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀲𑁄 𑀲𑀧𑀭𑀺𑀯𑀸𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀘𑀓𑁆𑀓𑀯𑀢𑁆𑀢𑀻 𑀯𑀺𑀬 𑀔𑀼𑀤𑁆𑀤𑀓𑀕𑀸𑀫𑀪𑁄𑀚𑀓𑀁 𑀭𑀸𑀚𑀸𑀦𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀻𑀲𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸𑀧𑀺 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀦𑀤𑀺𑀁 𑀧𑀢𑁆𑀯𑀸 ‘‘𑀓𑀸 𑀦𑀸𑀫𑀸𑀬’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀅𑀧𑀭𑀘𑁆𑀙𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑀺𑀫𑀲𑁆𑀲𑀸 𑀧𑀭𑀺𑀫𑀸𑀡𑀁, 𑀢𑀸𑀢𑀸’’𑀢𑀺? ‘‘𑀕𑀫𑁆𑀪𑀻𑀭𑀢𑁄 𑀕𑀸𑀯𑀼𑀢𑀁, 𑀧𑀼𑀣𑀼𑀮𑀢𑁄 𑀤𑁆𑀯𑁂 𑀕𑀸𑀯𑀼𑀢𑀸𑀦𑀺, 𑀤𑁂𑀯𑀸’’𑀢𑀺. ‘‘𑀅𑀢𑁆𑀣𑀺 𑀧𑀦𑁂𑀢𑁆𑀣 𑀦𑀸𑀯𑀸 𑀯𑀸 𑀉𑀴𑀼𑀫𑁆𑀧𑁄 𑀯𑀸’’𑀢𑀺? ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀦𑀸𑀯𑀸𑀤𑀻𑀦𑀺 𑀑𑀮𑁄𑀓𑁂𑀦𑁆𑀢𑁂 𑀅𑀫𑁆𑀳𑁂 𑀚𑀸𑀢𑀺 𑀚𑀭𑀁 𑀉𑀧𑀦𑁂𑀢𑀺, 𑀚𑀭𑀸 𑀫𑀭𑀡𑀁. 𑀅𑀳𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑁄, 𑀢𑁂𑀲𑀁 𑀫𑁂 𑀆𑀦𑀼𑀪𑀸𑀯𑁂𑀦 ‘𑀇𑀤𑀁 𑀉𑀤𑀓𑀁 𑀉𑀤𑀓𑀁 𑀯𑀺𑀬 𑀫𑀸 𑀳𑁄𑀢𑀽’𑀢𑀺 𑀭𑀢𑀦𑀢𑁆𑀢𑀬𑀲𑁆𑀲 𑀕𑀼𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’’𑀢𑀺 𑀩𑀼𑀤𑁆𑀥𑀕𑀼𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀧𑀭𑀺𑀯𑀸𑀭𑁄 𑀅𑀲𑁆𑀲𑀲𑀳𑀲𑁆𑀲𑁂𑀦 𑀉𑀤𑀓𑀧𑀺𑀝𑁆𑀞𑁂 𑀧𑀓𑁆𑀔𑀦𑁆𑀤𑀺. 𑀲𑀺𑀦𑁆𑀥𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀯𑀺𑀬 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀔𑀼𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂𑀯 𑀢𑁂𑀫𑀺𑀁𑀲𑀼.

𑀲𑁄 𑀢𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀅𑀧𑀭𑀫𑁆𑀧𑀺 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀸 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀦𑀻𑀮𑀯𑀸𑀳𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑀺𑀫𑀲𑁆𑀲𑀸 𑀧𑀭𑀺𑀫𑀸𑀡’’𑀦𑁆𑀢𑀺? ‘‘𑀕𑀫𑁆𑀪𑀻𑀭𑀢𑁄𑀧𑀺 𑀧𑀼𑀣𑀼𑀮𑀢𑁄𑀧𑀺 𑀅𑀟𑁆𑀠𑀬𑁄𑀚𑀦𑀁, 𑀤𑁂𑀯𑀸’’𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀁 𑀧𑀦 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀧𑀓𑁆𑀔𑀦𑁆𑀤𑀺. 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀧𑀭𑀫𑁆𑀧𑀺 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀸 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀘𑀦𑁆𑀤𑀪𑀸𑀕𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑀺𑀫𑀲𑁆𑀲𑀸 𑀧𑀭𑀺𑀫𑀸𑀡’’𑀦𑁆𑀢𑀺? ‘‘𑀕𑀫𑁆𑀪𑀻𑀭𑀢𑁄𑀧𑀺 𑀧𑀼𑀣𑀼𑀮𑀢𑁄𑀧𑀺 𑀬𑁄𑀚𑀦𑀁, 𑀤𑁂𑀯𑀸’’𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀁 𑀧𑀦 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀧𑀓𑁆𑀔𑀦𑁆𑀤𑀺. 𑀢𑀫𑁆𑀧𑀺 𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀼 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀸 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀯𑀺𑀝𑀧𑀧𑀮𑀸𑀲𑀸𑀦𑀺 𑀑𑀪𑀸𑀲𑀬𑀫𑀸𑀦𑀸 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀑𑀪𑀸𑀲𑁄 𑀦𑁂𑀯 𑀘𑀦𑁆𑀤𑀲𑁆𑀲, 𑀦 𑀲𑀽𑀭𑀺𑀬𑀲𑁆𑀲, 𑀦 𑀤𑁂𑀯𑀫𑀸𑀭𑀩𑁆𑀭𑀸𑀳𑁆𑀫𑀡𑀲𑀼𑀧𑀡𑁆𑀡𑀦𑀸𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀲, 𑀅𑀤𑁆𑀥𑀸 𑀅𑀳𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀆𑀕𑀘𑁆𑀙𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀸𑀯𑀤𑁂𑀯 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀢𑀭𑀺𑀢𑁆𑀯𑀸 𑀑𑀦𑀢𑀲𑀭𑀻𑀭𑁄 𑀭𑀲𑁆𑀫𑀺𑀬𑀸𑀦𑀼𑀲𑀸𑀭𑁂𑀦 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀭𑀲𑁂 𑀦𑀺𑀫𑀼𑀚𑁆𑀚𑀦𑁆𑀢𑁄 𑀯𑀺𑀬 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑁄 𑀧𑀸𑀯𑀺𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦. 𑀲𑀢𑁆𑀣𑀸 𑀢𑁂𑀲𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀧𑀭𑀺𑀯𑀸𑀭𑁄 𑀭𑀸𑀚𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀅𑀣 𑀲𑀩𑁆𑀩𑁂 𑀉𑀝𑁆𑀞𑀳𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 ‘‘𑀆𑀕𑀫𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀁 𑀘𑀻𑀯𑀭𑀲𑀳𑀲𑁆𑀲𑀁 𑀅𑀤𑀁𑀲𑀼, 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀯𑀻𑀲𑀢𑀺𑀘𑀻𑀯𑀭𑀲𑀳𑀲𑁆𑀲𑀸𑀦𑀺𑀧𑀺 𑀅𑀤𑀁𑀲𑀼, 𑀅𑀦𑀘𑁆𑀙𑀭𑀺𑀬𑀁 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀸𑀕𑀫𑀦’’𑀦𑁆𑀢𑀺 𑀜𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀣, 𑀪𑀺𑀓𑁆𑀔𑀯𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀢𑁂 𑀢𑀸𑀯𑀤𑁂𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀢𑁂 𑀧𑀦 𑀯𑀸𑀡𑀺𑀚𑀓𑀸 𑀭𑀸𑀚𑀕𑁂𑀳𑀁 𑀕𑀦𑁆𑀢𑁆𑀯𑀸 𑀤𑁂𑀯𑀺𑀬𑀸 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦𑀁 𑀆𑀭𑁄𑀘𑁂𑀢𑁆𑀯𑀸 𑀤𑁂𑀯𑀺𑀬𑀸 ‘‘𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀦𑁂 𑀤𑁂𑀯𑀻 𑀧𑀼𑀘𑁆𑀙𑀺 𑁋 ‘‘𑀢𑀸𑀢𑀸, 𑀓𑀺𑀁𑀓𑀸𑀭𑀡𑀸 𑀆𑀕𑀢𑀢𑁆𑀣𑀸’’𑀢𑀺? ‘‘𑀫𑀬𑀁 𑀭𑀜𑁆𑀜𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑀸, 𑀢𑀻𑀡𑀺 𑀓𑀺𑀭 𑀦𑁄 𑀲𑀢𑀲𑀳𑀲𑁆𑀲𑀸𑀦𑀺 𑀤𑁂𑀣𑀸’’𑀢𑀺. ‘‘𑀩𑀳𑀼𑀁, 𑀪𑀡𑁂, 𑀪𑀡𑀣, 𑀓𑀺𑀁 𑀢𑀼𑀫𑁆𑀳𑁂𑀳𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀓𑀢𑀁, 𑀓𑀺𑀲𑁆𑀫𑀺𑀁 𑀯𑁄 𑀭𑀸𑀚𑀸 𑀧𑀲𑀦𑁆𑀦𑁄 𑀏𑀢𑁆𑀢𑀓𑀁 𑀥𑀦𑀁 𑀤𑀸𑀧𑁂𑀢𑀻’’𑀢𑀺? ‘‘𑀤𑁂𑀯𑀺, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀢𑀁, 𑀏𑀓𑀁 𑀧𑀦 𑀲𑀸𑀲𑀦𑀁 𑀆𑀭𑁄𑀘𑀬𑀺𑀫𑁆𑀳𑀸’’𑀢𑀺. ‘‘𑀲𑀓𑁆𑀓𑀸 𑀧𑀦, 𑀢𑀸𑀢𑀸, 𑀫𑀬𑁆𑀳𑀫𑁆𑀧𑀺 𑀢𑀁 𑀆𑀭𑁄𑀘𑁂𑀢𑀼’’𑀦𑁆𑀢𑀺. ‘‘𑀲𑀓𑁆𑀓𑀸, 𑀤𑁂𑀯𑀻’’𑀢𑀺 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 ‘‘𑀤𑁂𑀯𑀺, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺. 𑀲𑀸𑀧𑀺 𑀢𑀁 𑀲𑀼𑀢𑁆𑀯𑀸 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀓𑀺𑀜𑁆𑀘𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀧𑀤𑁂 𑀭𑀜𑁆𑀜𑀸 𑀤𑀺𑀦𑁆𑀦’’𑀦𑁆𑀢𑀺? ‘‘𑀲𑀢𑀲𑀳𑀲𑁆𑀲𑀁, 𑀤𑁂𑀯𑀻’’𑀢𑀺. ‘‘𑀢𑀸𑀢𑀸, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀭𑀜𑁆𑀜𑀸 𑀓𑀢𑀁 𑀏𑀯𑀭𑀽𑀧𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀢𑀲𑀳𑀲𑁆𑀲𑀤𑀤𑀫𑀸𑀦𑁂𑀦, 𑀅𑀳𑀁 𑀯𑁄 𑀫𑀫 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁂 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀤𑀫𑁆𑀫𑀺. 𑀅𑀧𑀭𑀁 𑀓𑀺𑀜𑁆𑀘𑀺 𑀢𑀼𑀫𑁆𑀳𑁂𑀳𑀺 𑀆𑀭𑁄𑀘𑀺𑀢’’𑀦𑁆𑀢𑀺? 𑀢𑁂 𑀇𑀤𑀜𑁆𑀘 𑀇𑀤𑀜𑁆𑀘𑀸𑀢𑀺 𑀇𑀢𑀭𑀸𑀦𑀺𑀧𑀺 𑀤𑁆𑀯𑁂 𑀲𑀸𑀲𑀦𑀸𑀦𑀺 𑀆𑀭𑁄𑀘𑁂𑀲𑀼𑀁. 𑀤𑁂𑀯𑀻 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀬𑁄 𑀢𑀬𑁄 𑀯𑀸𑀭𑁂 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑀼𑀢𑁆𑀣𑀘𑀢𑀼𑀢𑁆𑀣𑀯𑀸𑀭𑁂 𑀢𑀻𑀡𑀺 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀏𑀯𑀁 𑀢𑁂 𑀲𑀩𑁆𑀩𑀸𑀦𑀺 𑀤𑁆𑀯𑀸𑀤𑀲𑀲𑀢𑀲𑀳𑀲𑁆𑀲𑀸𑀦𑀺 𑀮𑀪𑀺𑀁𑀲𑀼.

𑀅𑀣 𑀦𑁂 𑀤𑁂𑀯𑀻 𑀧𑀼𑀘𑁆𑀙𑀺 𑁋 ‘‘𑀭𑀸𑀚𑀸 𑀓𑀳𑀁, 𑀢𑀸𑀢𑀸’’𑀢𑀺? ‘‘𑀤𑁂𑀯𑀺, 𑀭𑀸𑀚𑀸 ‘𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀕𑀢𑁄’’𑀢𑀺. ‘‘𑀫𑀬𑁆𑀳𑀁 𑀢𑁂𑀦 𑀓𑀺𑀁 𑀲𑀸𑀲𑀦𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀲𑀩𑁆𑀩𑀁 𑀓𑀺𑀭 𑀇𑀲𑁆𑀲𑀭𑀺𑀬𑀁 𑀢𑀼𑀫𑁆𑀳𑀸𑀓𑀁 𑀯𑀺𑀲𑁆𑀲𑀝𑁆𑀞𑀁, ‘𑀢𑀼𑀫𑁆𑀳𑁂 𑀓𑀺𑀭 𑀬𑀣𑀸𑀲𑀼𑀔𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀣𑀸’’’𑀢𑀺. ‘‘𑀅𑀫𑀘𑁆𑀘𑀸 𑀧𑀦 𑀓𑀼𑀳𑀺𑀁, 𑀢𑀸𑀢𑀸’’𑀢𑀺? ‘‘𑀢𑁂𑀧𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀸’𑀢𑀺 𑀕𑀢𑀸, 𑀤𑁂𑀯𑀻’’𑀢𑀺. 𑀲𑀸 𑀢𑁂𑀲𑀁 𑀪𑀭𑀺𑀬𑀸𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀫𑁆𑀫𑀸, 𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀸’𑀢𑀺 𑀕𑀢𑀸, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀓𑀺𑀁 𑀧𑀦 𑀢𑁂𑀳𑀺 𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀧𑀳𑀺𑀢𑀁, 𑀤𑁂𑀯𑀻’’𑀢𑀺? ‘‘𑀢𑁂𑀳𑀺 𑀓𑀺𑀭 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺 𑀢𑀼𑀫𑁆𑀳𑀸𑀓𑀁 𑀯𑀺𑀲𑁆𑀲𑀝𑁆𑀞𑀸 ‘𑀢𑀼𑀫𑁆𑀳𑁂 𑀓𑀺𑀭 𑀲𑀫𑁆𑀧𑀢𑁆𑀢𑀺𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀣𑀸’’’𑀢𑀺. ‘‘𑀢𑀼𑀫𑁆𑀳𑁂 𑀧𑀦, 𑀤𑁂𑀯𑀺, 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀲𑁄 𑀢𑀸𑀯 𑀭𑀸𑀚𑀸 𑀫𑀕𑁆𑀕𑁂 𑀞𑀺𑀢𑁄 𑀢𑀻𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀧𑀽𑀚𑁂𑀢𑁆𑀯𑀸 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀦𑁆𑀢𑁄, 𑀫𑀬𑀸𑀧𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀸𑀦𑀺 𑀦𑀯𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀽𑀚𑀺𑀢𑀸𑀦𑀺, 𑀦 𑀔𑁄 𑀧𑀦𑁂𑀲𑀸 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀭𑀜𑁆𑀜𑁄𑀬𑁂𑀯 𑀤𑀼𑀓𑁆𑀔𑀸, 𑀫𑀬𑁆𑀳𑀫𑁆𑀧𑀺 𑀤𑀼𑀓𑁆𑀔𑀸 𑀏𑀯. 𑀓𑁄 𑀭𑀜𑁆𑀜𑀸 𑀙𑀟𑁆𑀟𑀺𑀢𑀔𑁂𑀴𑀧𑀺𑀡𑁆𑀟𑀁 𑀚𑀡𑁆𑀡𑀼𑀓𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀫𑀼𑀔𑁂𑀦 𑀕𑀡𑁆𑀳𑀺𑀲𑁆𑀲𑀢𑀺, 𑀦 𑀫𑀬𑁆𑀳𑀁 𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑁄, 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀤𑁂𑀯𑀺, 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀘𑁂 𑀲𑀓𑁆𑀓𑁄𑀣, 𑀲𑀸𑀥𑀽’’𑀢𑀺. ‘‘𑀲𑀓𑁆𑀓𑁄𑀫, 𑀤𑁂𑀯𑀻’’𑀢𑀺. 𑀢𑁂𑀦 𑀳𑀺 ‘‘𑀏𑀣𑀸’’𑀢𑀺 𑀭𑀣𑀲𑀳𑀲𑁆𑀲𑀁 𑀬𑁄𑀚𑀸𑀧𑁂𑀢𑁆𑀯𑀸 𑀭𑀣𑀁 𑀆𑀭𑀼𑀬𑁆𑀳 𑀢𑀸𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀞𑀫𑀁 𑀦𑀤𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀭𑀜𑁆𑀜𑀸 𑀧𑀞𑀫𑀁 𑀧𑀼𑀘𑁆𑀙𑀺𑀢𑀸, 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀭𑀜𑁆𑀜𑀸 𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀲𑀺𑀦𑁆𑀥𑀯𑀸𑀦𑀁 𑀧𑀤𑀯𑀮𑀜𑁆𑀚𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 ‘‘𑀢𑀻𑀡𑀺 𑀭𑀢𑀦𑀸𑀦𑀺 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑁄𑀲𑁆𑀫𑀻’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑀺𑀢𑁆𑀯𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑀸, 𑀢𑁂𑀲𑀁 𑀫𑁂 𑀆𑀦𑀼𑀪𑀸𑀯𑁂𑀦 ‘‘𑀇𑀤𑀁 𑀉𑀤𑀓𑀁 𑀉𑀤𑀓𑀁 𑀯𑀺𑀬 𑀫𑀸 𑀳𑁄𑀢𑀽’’𑀢𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀻 𑀭𑀣𑀲𑀳𑀲𑁆𑀲𑀁 𑀧𑁂𑀲𑁂𑀲𑀺. 𑀉𑀤𑀓𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑀤𑀺𑀲𑀁 𑀅𑀳𑁄𑀲𑀺, 𑀘𑀓𑁆𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂𑀯 𑀢𑁂𑀫𑀺𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑀭𑀸 𑀤𑁆𑀯𑁂𑀧𑀺 𑀦𑀤𑀺𑀬𑁄 𑀉𑀢𑁆𑀢𑀭𑀺𑀁𑀲𑀼.

𑀲𑀢𑁆𑀣𑀸 𑀢𑀸𑀲𑀁 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀬𑀣𑀸 𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁂 𑀲𑀸𑀫𑀺𑀓𑁂 𑀪𑀺𑀓𑁆𑀔𑀽 𑀦 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺. 𑀤𑁂𑀯𑀻𑀧𑀺 𑀆𑀕𑀘𑁆𑀙𑀦𑁆𑀢𑀻 𑀲𑀢𑁆𑀣𑀼 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀸 𑀭𑀲𑁆𑀫𑀺𑀬𑁄 𑀤𑀺𑀲𑁆𑀯𑀸 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀫𑀳𑀸𑀓𑀧𑁆𑀧𑀺𑀦𑁄 𑀭𑀸𑀚𑀸 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄, 𑀓𑀳𑀁 𑀦𑀼 𑀔𑁄 𑀲𑁄, 𑀅𑀫𑁆𑀳𑀸𑀓𑀁 𑀢𑀁 𑀤𑀲𑁆𑀲𑁂𑀣𑀸’’𑀢𑀺. ‘‘𑀦𑀺𑀲𑀻𑀤𑀣 𑀢𑀸𑀯, 𑀇𑀥𑁂𑀯 𑀦𑀁 𑀧𑀲𑁆𑀲𑀺𑀲𑁆𑀲𑀣𑀸’’𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀳𑀝𑁆𑀞𑀢𑀼𑀝𑁆𑀞𑀸 ‘‘𑀇𑀥𑁂𑀯 𑀓𑀺𑀭 𑀦𑀺𑀲𑀺𑀦𑁆𑀦𑀸 𑀲𑀸𑀫𑀺𑀓𑁂 𑀦𑁄 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀅𑀦𑁄𑀚𑀸𑀤𑁂𑀯𑀻 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑀸𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀫𑀳𑀸𑀓𑀧𑁆𑀧𑀺𑀦𑁄 𑀣𑁂𑀭𑁄 𑀢𑀸𑀲𑀁 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀢𑀸𑀲𑀁 𑀢𑁂 𑀪𑀺𑀓𑁆𑀔𑀽 𑀤𑀲𑁆𑀲𑁂𑀲𑀺. 𑀢𑀸𑀲𑀜𑁆𑀳𑀺 𑀆𑀕𑀢𑀓𑁆𑀔𑀡𑁂𑀬𑁂𑀯 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀓𑀸𑀲𑀸𑀯𑀥𑀭𑁂 𑀫𑀼𑀡𑁆𑀟𑀲𑀻𑀲𑁂 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀪𑀯𑁂𑀬𑁆𑀬, 𑀫𑀕𑁆𑀕𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑀸 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀅𑀘𑀮𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀸𑀲𑀁 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀤𑀲𑁆𑀲𑁂𑀲𑀺. 𑀢𑀸𑀧𑀺 𑀢𑁂 𑀤𑀺𑀲𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀧𑁆𑀧𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼.

𑀏𑀯𑀁 𑀯𑀼𑀢𑁆𑀢𑁂 𑀲𑀢𑁆𑀣𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀣𑁂𑀭𑀺𑀬𑀸 𑀆𑀕𑀫𑀦𑀁 𑀘𑀺𑀦𑁆𑀢𑁂𑀲𑀺. 𑀲𑀸 𑀲𑀢𑁆𑀣𑀼 𑀘𑀺𑀦𑁆𑀢𑀺𑀢𑀓𑁆𑀔𑀡𑁂𑀬𑁂𑀯 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀸 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀸 𑀲𑀩𑁆𑀩𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀆𑀤𑀸𑀬 𑀆𑀓𑀸𑀲𑁂𑀦 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀫𑀳𑀸𑀓𑀧𑁆𑀧𑀺𑀦𑁄 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀢𑁆𑀢𑀦𑁄 𑀭𑀚𑁆𑀚𑀲𑀼𑀔𑀁 𑀆𑀭𑀩𑁆𑀪 𑀉𑀤𑀸𑀦𑁂𑀢𑀺 𑀫𑀜𑁆𑀜𑁂’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀓𑀧𑁆𑀧𑀺𑀦, 𑀓𑀸𑀫𑀲𑀼𑀔𑀁 𑀆𑀭𑀩𑁆𑀪 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺? ‘‘𑀪𑀕𑀯𑀸 𑀫𑁂, 𑀪𑀦𑁆𑀢𑁂, 𑀢𑀁 𑀆𑀭𑀩𑁆𑀪 𑀉𑀤𑀸𑀦𑀪𑀸𑀯𑀁 𑀯𑀸 𑀅𑀜𑁆𑀜𑀁 𑀆𑀭𑀩𑁆𑀪 𑀉𑀤𑀸𑀦𑀪𑀸𑀯𑀁 𑀯𑀸 𑀚𑀸𑀦𑀸𑀢𑀻’’𑀢𑀺. 𑀅𑀣 𑀲𑀢𑁆𑀣𑀸 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀓𑀸𑀫𑀲𑀼𑀔𑀁 𑀭𑀚𑁆𑀚𑀲𑀼𑀔𑀁 𑀆𑀭𑀩𑁆𑀪 𑀉𑀤𑀸𑀦𑀁 𑀉𑀤𑀸𑀦𑁂𑀢𑀺, 𑀧𑀼𑀢𑁆𑀢𑀲𑁆𑀲 𑀧𑀦 𑀫𑁂 𑀥𑀫𑁆𑀫𑀁 𑀘𑀭𑀢𑁄 𑀥𑀫𑁆𑀫𑀧𑀻𑀢𑀺 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀏𑀯𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀥𑀫𑁆𑀫𑀧𑀻𑀢𑀺 𑀲𑀼𑀔𑀁 𑀲𑁂𑀢𑀺, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑁂, 𑀲𑀤𑀸 𑀭𑀫𑀢𑀺 𑀧𑀡𑁆𑀟𑀺𑀢𑁄’’𑀢𑀺. (𑀥. 𑀧. 𑁭𑁯);

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀺𑀦𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺? ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀑𑀯𑀸𑀤𑀫𑀢𑁆𑀢𑀫𑁆𑀧𑀺 𑀦 𑀤𑁂𑀢𑀻’’𑀢𑀺. 𑀲𑀢𑁆𑀣𑀸 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀓𑀧𑁆𑀧𑀺𑀦, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀑𑀯𑀸𑀤𑀫𑀢𑁆𑀢𑀫𑁆𑀧𑀺 𑀦 𑀤𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀫𑀸 𑀏𑀯𑀁 𑀅𑀓𑀸𑀲𑀺, 𑀅𑀚𑁆𑀚 𑀧𑀝𑁆𑀞𑀸𑀬 𑀉𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀪𑀕𑀯𑀢𑁄 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑁄𑀯𑀸𑀤𑁂𑀦𑁂𑀯 𑀲𑀫𑀡𑀲𑀳𑀲𑁆𑀲𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀦𑀁 𑀲𑀢𑁆𑀣𑀸 𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀧𑁆𑀧𑀺𑀦𑁄’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁩𑁧) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑁬𑁬. 𑀏𑀯𑀁 𑀣𑁂𑀭𑁄 𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀉𑀤𑀺𑀢𑁄 𑀅𑀚𑀝𑀸𑀓𑀸𑀲𑁂𑀢𑀺 𑀲𑀓𑀮𑀸𑀓𑀸𑀲𑁂 𑀉𑀤𑀺𑀢𑁄 𑀉𑀝𑁆𑀞𑀺𑀢𑁄 𑀧𑀸𑀓𑀝𑀪𑀽𑀢𑁄. 𑀲𑀭𑀤𑀫𑁆𑀩𑀭𑁂 𑀲𑀭𑀤𑀓𑀸𑀮𑁂 𑀆𑀓𑀸𑀲𑁂 𑀭𑀯𑀻𑀯 𑀲𑀽𑀭𑀺𑀬𑁄 𑀇𑀯𑀸𑀢𑀺 𑀅𑀢𑁆𑀣𑁄.

𑁭𑁦. 𑀅𑀓𑁆𑀔𑀤𑀲𑁆𑀲𑁄 𑀢𑀤𑀸 𑀆𑀲𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀭𑀤𑀲𑁆𑀲𑀻 𑀳𑀺𑀢𑀤𑀲𑁆𑀲𑀻 𑀆𑀘𑀭𑀺𑀬𑁄 𑀧𑀸𑀓𑀝𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁭𑁧. 𑀲𑀸𑀯𑀓𑀲𑁆𑀲 𑀓𑀢𑀸𑀯𑀺𑀦𑁄𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀫𑁂 𑀫𑀦𑀁 𑀫𑀫 𑀘𑀺𑀢𑁆𑀢𑀁, 𑀢𑀧𑁆𑀧𑀬𑀦𑁆𑀢𑀲𑁆𑀲 𑀢𑁄𑀲𑀬𑀦𑁆𑀢𑀲𑁆𑀲 𑀲𑀸𑀯𑀓𑀲𑁆𑀲 𑀑𑀯𑀸𑀤𑀓𑀲𑁆𑀲 𑀕𑀼𑀡𑀁 𑀧𑀓𑀸𑀲𑀬𑀢𑁄 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀲𑁆𑀲 𑀓𑀢𑀸𑀯𑀺𑀦𑁄 𑀲𑀸𑀢𑀘𑁆𑀘𑀓𑀺𑀘𑁆𑀘𑀬𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁩. 𑀳𑀁𑀲𑀲𑀫𑀪𑀸𑀕𑁄𑀢𑀺 𑀳𑀁𑀲𑀲𑀤𑀺𑀲𑀕𑀸𑀫𑀺. 𑀳𑀁𑀲𑀤𑀼𑀦𑁆𑀤𑀼𑀪𑀺𑀦𑀺𑀲𑁆𑀲𑀦𑁄𑀢𑀺 𑀳𑀁𑀲𑀭𑀯𑁄 𑀤𑀼𑀦𑁆𑀤𑀼𑀪𑀺𑀪𑁂𑀭𑀺𑀲𑀤𑁆𑀤𑀲𑀤𑀺𑀲𑀯𑀘𑀦𑁄 ‘‘𑀏𑀢𑀁 𑀫𑀳𑀸𑀫𑀢𑁆𑀢𑀁 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁄’’𑀢𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁪. 𑀲𑀫𑀼𑀕𑁆𑀕𑀢𑀢𑀦𑀽𑀭𑀼𑀳𑀦𑁆𑀢𑀺 𑀲𑀼𑀝𑁆𑀞𑀼 𑀉𑀕𑁆𑀕𑀢𑀮𑁄𑀫𑀁 𑀉𑀤𑁆𑀥𑀕𑁆𑀕𑀮𑁄𑀫𑀁, 𑀉𑀤𑀕𑁆𑀬𑀫𑀦𑀁 𑀯𑀸. 𑀚𑀻𑀫𑀽𑀢𑀯𑀡𑁆𑀡𑀦𑁆𑀢𑀺 𑀫𑀼𑀢𑁆𑀢𑀨𑀮𑀲𑀫𑀸𑀦𑀯𑀡𑁆𑀡𑀁 𑀲𑀼𑀦𑁆𑀤𑀭𑀲𑀭𑀻𑀭𑀧𑀪𑀦𑁆𑀢𑀺 𑀅𑀢𑁆𑀣𑁄. 𑀧𑀻𑀡𑀁𑀲𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀁𑀲𑀁. 𑀧𑀲𑀦𑁆𑀦𑀦𑀬𑀦𑀸𑀦𑀦𑀦𑁆𑀢𑀺 𑀧𑀲𑀦𑁆𑀦𑀅𑀓𑁆𑀔𑀺𑀧𑀲𑀦𑁆𑀦𑀫𑀼𑀔𑀦𑁆𑀢𑀺 𑀅𑀢𑁆𑀣𑁄.

𑁭𑁫. 𑀓𑀢𑀸𑀯𑀺𑀦𑁄𑀢𑀺 𑀓𑀢𑀸𑀥𑀺𑀓𑀸𑀭𑀲𑁆𑀲 𑀏𑀢𑀤𑀕𑁆𑀕𑁂 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀞𑀸𑀦𑀁 𑀲𑁄 𑀏𑀲𑁄 𑀫𑀼𑀤𑀺𑀢𑀸𑀬 𑀧𑀳𑀝𑁆𑀞𑀘𑀺𑀢𑁆𑀢𑀢𑀸𑀬 𑀧𑀢𑁆𑀣𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁧. 𑀲𑀢𑀲𑁄 𑀅𑀦𑀼𑀲𑀸𑀲𑀺𑀬𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀯𑀘𑀦𑁂𑀦 𑀓𑀸𑀭𑀡𑀯𑀲𑁂𑀦 𑀅𑀦𑀼𑀲𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀩𑀸𑀭𑀸𑀡𑀲𑀺𑀬𑀫𑀸𑀲𑀦𑁆𑀦𑁂𑀢𑀺 𑀩𑀸𑀭𑀸𑀡𑀲𑀺𑀬𑀸 𑀲𑀫𑀻𑀧𑁂 𑀧𑁂𑀲𑀓𑀸𑀭𑀕𑀸𑀫𑁂. 𑀚𑀸𑀢𑁄 𑀓𑁂𑀦𑀺𑀬𑀚𑀸𑀢𑀺𑀬𑀦𑁆𑀢𑀺 𑀢𑀦𑁆𑀢𑀯𑀸𑀬𑀚𑀸𑀢𑀺𑀬𑀸 𑀧𑁂𑀲𑀓𑀸𑀭𑀓𑀼𑀮𑁂 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀚𑀸𑀢𑁄 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀲𑀺. 𑀪𑀕𑀯𑀸𑀧𑀺𑀲𑁆𑀲 𑀲𑀫𑀺𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑀼𑀲𑀺𑀢𑀸𑀤𑀻𑀲𑀼 𑀤𑁂𑀯𑁂𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁂𑀦 𑀢𑀲𑁆𑀲 𑀲𑀸𑀯𑀓𑀁 𑀪𑀺𑀓𑁆𑀔𑀼𑀁 𑀅𑀭𑀳𑀸𑀢𑀺 𑀚𑀸𑀦𑀦𑁆𑀢𑁄𑀧𑀺 𑀅𑀩𑁆𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀺. 𑀢𑀲𑁆𑀲𑁂𑀯 𑀲𑀸𑀯𑀓𑀸𑀦𑀁 𑀔𑀻𑀭𑀲𑀮𑀸𑀓𑀪𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀑𑀲𑀸𑀦𑀓𑀸𑀮𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀓𑀮𑀮𑁄𑀓𑁂 𑀓𑁄𑀮𑀸𑀳𑀮𑁂 𑀚𑀸𑀢𑁂 𑀲𑀢𑁆𑀢 𑀪𑀺𑀓𑁆𑀔𑀯𑁄 𑀧𑀩𑁆𑀩𑀚𑀺𑀢𑁄 𑀧𑀘𑁆𑀘𑀦𑁆𑀢𑀚𑀦𑀧𑀤𑁂 𑀯𑀦𑀫𑀚𑁆𑀛𑁂 𑀏𑀓𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀚𑀻𑀯𑀺𑀢𑀸𑀲𑀸 𑀑𑀭𑁄𑀳𑀦𑁆𑀢𑀼 𑀦𑀺𑀭𑀸𑀮𑀬𑀸 𑀦𑀺𑀲𑀻𑀤𑀦𑁆𑀢𑀽’’𑀢𑀺 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀲𑀼𑀁. 𑀢𑁂𑀲𑀁 𑀑𑀯𑀸𑀤𑀤𑀸𑀬𑀓𑁄 𑀚𑁂𑀝𑁆𑀞𑀓𑀢𑁆𑀣𑁂𑀭𑁄 𑀲𑀢𑁆𑀣𑀸𑀳𑀩𑁆𑀪𑀦𑁆𑀢𑀭𑁂 𑀅𑀭𑀳𑀸 𑀅𑀳𑁄𑀲𑀺. 𑀢𑀤𑀦𑀦𑁆𑀢𑀭𑀢𑁆𑀣𑁂𑀭𑁄 𑀅𑀦𑀸𑀕𑀸𑀫𑀻, 𑀇𑀢𑀭𑁂 𑀧𑀜𑁆𑀘 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑀢𑁆𑀣 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀼𑀓𑁆𑀓𑀼𑀲𑀸𑀢𑀺 (𑀫. 𑀦𑀺. 𑁩.𑁩𑁪𑁨), 𑀲𑀪𑀺𑀬𑁄 (𑀲𑀼. 𑀦𑀺. 𑀲𑀪𑀺𑀬𑀲𑀼𑀢𑁆𑀢), 𑀩𑀸𑀳𑀺𑀬𑁄 (𑀉𑀤𑀸. 𑁧𑁦), 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 (𑀫. 𑀦𑀺. 𑁧.𑁨𑁪𑁯) 𑀇𑀫𑁂 𑀘𑀢𑁆𑀢𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀅𑀬𑀁 𑀧𑀦 𑀫𑀮𑁆𑀮𑀭𑀝𑁆𑀞𑁂 𑀅𑀦𑀼𑀧𑀺𑀬𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀦𑀺𑀓𑁆𑀔𑀦𑁆𑀢𑁂𑀬𑁂𑀯 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺, 𑀅𑀣𑁂𑀓𑁄 𑀢𑀲𑁆𑀲𑀸 𑀲𑀭𑀻𑀭𑀁 𑀛𑀸𑀧𑀦𑀢𑁆𑀣𑀸𑀬 𑀘𑀺𑀢𑀓𑀲𑁆𑀫𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀼𑀫𑀸𑀭𑀁 𑀤𑀩𑁆𑀩𑀦𑁆𑀢𑀭𑁂 𑀧𑀢𑀺𑀢𑀁 𑀕𑀳𑁂𑀢𑁆𑀯𑀸 𑀚𑀕𑁆𑀕𑀸𑀧𑁂𑀲𑀺. 𑀤𑀩𑁆𑀩𑁂 𑀧𑀢𑀺𑀢𑀢𑁆𑀢𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀲𑀫𑁆𑀪𑀸𑀭𑀯𑀲𑁂𑀦 𑀧𑀩𑁆𑀩𑀚𑀺, 𑀲𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀅𑀣 𑀦𑀁 𑀲𑀢𑁆𑀣𑀸 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀪𑀸𑀯𑁂𑀦 𑀘 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑀦𑁂 𑀪𑀢𑁆𑀢𑀼𑀤𑁆𑀤𑁂𑀲𑀦𑁂 𑀘 𑀦𑀺𑀬𑁄𑀚𑁂𑀲𑀺. 𑀲𑀩𑁆𑀩𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀁 𑀲𑀫𑀦𑁆𑀦𑁂𑀲𑀺. 𑀢𑀁 𑀯𑀺𑀦𑀬𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁮𑁯-𑁧𑁯𑁦) 𑀆𑀕𑀢𑀫𑁂𑀯. 𑀅𑀧𑀭𑀪𑀸𑀕𑁂 𑀣𑁂𑀭𑁄 𑀏𑀓𑀲𑁆𑀲 𑀯𑀭𑀲𑀮𑀸𑀓𑀤𑀸𑀬𑀓𑀲𑁆𑀲 𑀲𑀮𑀸𑀓𑀪𑀢𑁆𑀢𑀁 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑀺𑀲𑀺. 𑀢𑁂 𑀳𑀝𑁆𑀞𑀢𑀼𑀝𑁆𑀞𑀸 ‘‘𑀲𑁆𑀯𑁂 𑀫𑀬𑁆𑀳𑀁 𑀫𑀼𑀕𑁆𑀕𑀖𑀢𑀫𑀥𑀼𑀫𑀺𑀲𑁆𑀲𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀅𑀳𑁂𑀲𑀼𑀁. 𑀲𑁄 𑀧𑀦 𑀉𑀧𑀸𑀲𑀓𑁄 𑀢𑁂𑀲𑀁 𑀯𑀸𑀭𑀧𑁆𑀧𑀢𑁆𑀢𑀪𑀸𑀯𑀁 𑀲𑀼𑀢𑁆𑀯𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀬𑁂, 𑀚𑁂, 𑀪𑀺𑀓𑁆𑀔𑀽 𑀲𑁆𑀯𑁂 𑀇𑀥 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑁂 𑀓𑀡𑀸𑀚𑀓𑁂𑀦 𑀩𑀺𑀮𑀗𑁆𑀕𑀤𑀼𑀢𑀺𑀬𑁂𑀦 𑀧𑀭𑀺𑀯𑀺𑀲𑀸𑀳𑀻’’𑀢𑀺. 𑀲𑀸𑀧𑀺 𑀢𑀣𑁂𑀯 𑀢𑁂 𑀪𑀺𑀓𑁆𑀔𑀽 𑀆𑀕𑀢𑁂 𑀓𑁄𑀝𑁆𑀞𑀓𑀧𑀫𑀼𑀔𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀲𑀺. 𑀢𑁂 𑀪𑀺𑀓𑁆𑀔𑀽 𑀅𑀦𑀢𑁆𑀢𑀫𑀦𑀸 𑀓𑁄𑀧𑁂𑀦 𑀢𑀝𑀢𑀝𑀸𑀬𑀦𑁆𑀢𑀸 𑀣𑁂𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀫𑀥𑀼𑀭𑀪𑀢𑁆𑀢𑀤𑀸𑀬𑀓𑀁 𑀅𑀫𑁆𑀳𑀸𑀓𑀁 𑀅𑀫𑀥𑀼𑀭𑀪𑀢𑁆𑀢𑀁 𑀤𑀸𑀧𑁂𑀢𑀼𑀁 𑀏𑀲𑁄𑀯 𑀦𑀺𑀬𑁄𑀚𑁂𑀲𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀢𑁂 𑀫𑁂𑀢𑁆𑀢𑀺𑀬𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻 ‘‘𑀓𑀺𑀁, 𑀪𑀦𑁆𑀢𑁂, 𑀤𑀼𑀫𑁆𑀫𑀦𑀸’’𑀢𑀺 𑀧𑀼𑀘𑁆𑀙𑀺. 𑀢𑁂, ‘‘𑀪𑀕𑀺𑀦𑀺, 𑀓𑀺𑀁 𑀅𑀫𑁆𑀳𑁂 𑀤𑀩𑁆𑀩𑁂𑀦 𑀫𑀮𑁆𑀮𑀧𑀼𑀢𑁆𑀢𑁂𑀦 𑀯𑀺𑀳𑁂𑀞𑀺𑀬𑀫𑀸𑀦𑁂 𑀅𑀚𑁆𑀛𑀼𑀧𑁂𑀓𑁆𑀔𑀲𑀻’’𑀢𑀺 𑀆𑀳𑀁𑀲𑀼. ‘‘𑀓𑀺𑀁, 𑀪𑀦𑁆𑀢𑁂, 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺? ‘‘𑀢𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀳𑀻’’𑀢𑀺. 𑀲𑀸 𑀢𑀢𑁆𑀣 𑀢𑀢𑁆𑀣 𑀣𑁂𑀭𑀲𑁆𑀲 𑀅𑀪𑀽𑀢𑀸𑀭𑁄𑀧𑀦𑀁 𑀅𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀅𑀣 𑀪𑀕𑀯𑀸 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀤𑀩𑁆𑀩, 𑀫𑁂𑀢𑁆𑀢𑀺𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀧𑁆𑀧𑀓𑀸𑀭𑀫𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀬𑀣𑀸 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀚𑀸𑀦𑀸𑀢𑀻’’𑀢𑀺. ‘‘𑀦 𑀔𑁄, 𑀤𑀩𑁆𑀩, 𑀤𑀩𑁆𑀩𑀸 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀺, 𑀓𑀸𑀭𑀓𑀪𑀸𑀯𑀁 𑀯𑀸 𑀅𑀓𑀸𑀭𑀓𑀪𑀸𑀯𑀁 𑀯𑀸 𑀯𑀤𑁂𑀳𑀻’’𑀢𑀺. ‘‘𑀅𑀓𑀸𑀭𑀓𑁄 𑀅𑀳𑀁, 𑀪𑀦𑁆𑀢𑁂’’𑀢𑀺. 𑀪𑀕𑀯𑀸 𑁋 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀆𑀳. 𑀉𑀧𑀸𑀮𑀺𑀢𑁆𑀣𑁂𑀭𑀧𑁆𑀧𑀫𑀼𑀔𑀸 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀢𑁂𑀳𑀺 ‘‘𑀅𑀫𑁆𑀳𑁂𑀳𑀺 𑀦𑀺𑀬𑁄𑀚𑀺𑀢𑀸 𑀲𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀯𑀼𑀢𑁆𑀢𑁂 𑀪𑀕𑀯𑀢𑁄 𑀏𑀓𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀫𑀽𑀮𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀜𑁆𑀜𑀧𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀤𑀩𑁆𑀩𑀢𑁆𑀣𑁂𑀭𑁄 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑁄 𑀯𑁂𑀴𑀼𑀯𑀦𑀯𑀺𑀳𑀸𑀭𑀲𑁆𑀲 𑀲𑀸𑀫𑀦𑁆𑀢𑀸 𑀅𑀝𑁆𑀞𑀸𑀭𑀲𑀫𑀳𑀸𑀯𑀺𑀳𑀸𑀭𑁂 𑀲𑀪𑀸𑀕𑁂 𑀪𑀺𑀓𑁆𑀔𑀽 𑀧𑁂𑀲𑁂𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑁂 𑀅𑀗𑁆𑀕𑀼𑀮𑀺𑀬𑀸 𑀧𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑁂𑀦𑁂𑀯𑀸𑀮𑁄𑀓𑁂𑀦 𑀅𑀦𑀺𑀤𑁆𑀥𑀺𑀫𑀦𑁆𑀢𑁂 𑀪𑀺𑀓𑁆𑀔𑀽 𑀧𑁂𑀲𑁂𑀲𑀺. 𑀏𑀯𑀁 𑀣𑁂𑀭𑀲𑁆𑀲 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀦𑀪𑀢𑁆𑀢𑀼𑀤𑁆𑀤𑁂𑀲𑀦𑀓𑀺𑀘𑁆𑀘𑁂 𑀧𑀸𑀓𑀝𑁂 𑀚𑀸𑀢𑁂 𑀲𑀢𑁆𑀣𑀸 𑀅𑀭𑀺𑀬𑀕𑀡𑀫𑀚𑁆𑀛𑁂 𑀤𑀩𑁆𑀩𑀢𑁆𑀣𑁂𑀭𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀦𑀁 𑀬𑀤𑀺𑀤𑀁 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁪) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑁧𑁦𑁮. 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀇𑀢𑁄 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁨𑁫. 𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀤𑀽𑀲𑀺𑀢𑀘𑀺𑀢𑁆𑀢𑁄 𑀅𑀲𑀸𑀥𑀼𑀲𑀗𑁆𑀕𑀫𑁂𑀦 𑀅𑀧𑀲𑀦𑁆𑀦𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀯𑀤𑀺𑀁 𑀲𑀸𑀯𑀓𑀁 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀔𑀻𑀡𑀸𑀲𑀯𑀁 𑀲𑀸𑀯𑀓𑀁 𑀉𑀧𑀯𑀤𑀺𑀁, 𑀉𑀧𑀭𑀺 𑀅𑀪𑀽𑀢𑀁 𑀯𑀘𑀦𑀁 𑀆𑀭𑁄𑀧𑁂𑀲𑀺𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁨. 𑀤𑀼𑀦𑁆𑀤𑀼𑀪𑀺𑀬𑁄𑀢𑀺 𑀤𑀼𑀦𑁆𑀤𑀼𑀁 𑀇𑀢𑀺 𑀲𑀤𑁆𑀤𑀸𑀬𑀦𑀢𑁄 𑀤𑀼𑀦𑁆𑀤𑀼𑀪𑀺𑀲𑀗𑁆𑀔𑀸𑀢𑀸 𑀪𑁂𑀭𑀺𑀬𑁄. 𑀦𑀸𑀤𑀬𑀺𑀁𑀲𑀽𑀢𑀺 𑀲𑀤𑁆𑀤𑀁 𑀓𑀭𑀺𑀁𑀲𑀼. 𑀲𑀫𑀦𑁆𑀢𑀢𑁄 𑀅𑀲𑀦𑀺𑀬𑁄𑀢𑀺 𑀲𑀩𑁆𑀩𑀤𑀺𑀲𑀸𑀪𑀸𑀕𑀢𑁄 𑀅𑀲𑀦𑁂 𑀯𑀺𑀦𑀸𑀲𑀦𑁂 𑀦𑀺𑀬𑀼𑀢𑁆𑀢𑁄𑀢𑀺 𑀅𑀲𑀦𑀺𑀬𑁄, 𑀤𑁂𑀯𑀤𑀡𑁆𑀟𑀸 𑀪𑀬𑀸𑀯𑀳𑀸 𑀨𑀮𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁩𑁩. 𑀉𑀓𑁆𑀓𑀸 𑀧𑀢𑀺𑀁𑀲𑀼 𑀦𑀪𑀲𑀸𑀢𑀺 𑀆𑀓𑀸𑀲𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀘 𑀧𑀢𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀥𑀽𑀫𑀓𑁂𑀢𑀼 𑀘 𑀤𑀺𑀲𑁆𑀲𑀢𑀻𑀢𑀺 𑀥𑀽𑀫𑀭𑀸𑀚𑀺𑀲𑀳𑀺𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀘 𑀤𑀺𑀲𑁆𑀲𑀢𑀺 𑀧𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀜𑁆𑀘𑀫𑀸𑀧𑀤𑀸𑀦𑁂 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀧𑀡𑀺𑀥𑀸𑀦𑀁 𑀓𑀢𑁆𑀯𑀸 𑀢𑀤𑀦𑀼𑀭𑀽𑀧𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀤𑀺𑀩𑁆𑀩𑀲𑀼𑀔𑀁 𑀫𑀸𑀦𑀼𑀲𑀲𑀼𑀔𑀜𑁆𑀘 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀏𑀓𑀺𑀲𑁆𑀲𑀸 𑀲𑁂𑀝𑁆𑀞𑀺𑀥𑀻𑀢𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀲𑀸 𑀓𑀺𑀭 𑀓𑀼𑀫𑀸𑀭𑀺𑀓𑀸𑀓𑀸𑀮𑁂𑀬𑁂𑀯 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸 𑀧𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀢𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀸 𑀲𑀸𑀫𑀺𑀓𑀁 𑀆𑀭𑀸𑀥𑁂𑀦𑁆𑀢𑀻, 𑀅𑀬𑁆𑀬𑀧𑀼𑀢𑁆𑀢 𑁋

‘‘𑀲𑀘𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀅𑀦𑁆𑀢𑁄 𑀩𑀸𑀳𑀺𑀭𑀓𑁄 𑀲𑀺𑀬𑀸;

𑀤𑀡𑁆𑀟𑀁 𑀦𑀽𑀦 𑀕𑀳𑁂𑀢𑁆𑀯𑀸𑀦, 𑀓𑀸𑀓𑁂 𑀲𑁄𑀡𑁂 𑀦𑀺𑀯𑀸𑀭𑀬𑁂’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁨) 𑁋

𑀆𑀤𑀺𑀦𑀸 𑀲𑀭𑀻𑀭𑀲𑁆𑀲 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑀻 𑀢𑀁 𑀆𑀭𑀸𑀥𑁂𑀲𑀺.

𑀲𑀸 𑀲𑀸𑀫𑀺𑀓𑁂𑀦 𑀅𑀦𑀼𑀜𑁆𑀜𑀸𑀢𑀸 𑀕𑀩𑁆𑀪𑀺𑀦𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀻 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀬𑀸𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺. 𑀢𑀲𑁆𑀲𑀸 𑀕𑀩𑁆𑀪𑀺𑀦𑀺𑀪𑀸𑀯𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀯𑀤𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀅𑀲𑁆𑀲𑀫𑀡𑀻’’𑀢𑀺 𑀆𑀳. 𑀲𑀸 ‘‘𑀦𑀸𑀳𑀁 𑀤𑁂𑀯𑀤𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸’’𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻𑀦𑀺 𑀓𑀼𑀮𑀸𑀦𑀺 𑀯𑀺𑀲𑀸𑀔𑀜𑁆𑀘 𑀉𑀧𑀸𑀲𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀢𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 ‘‘𑀧𑀼𑀭𑁂 𑀮𑀤𑁆𑀥𑁄 𑀕𑀩𑁆𑀪𑁄, 𑀅𑀭𑁄𑀕𑀸 𑀧𑀩𑁆𑀩𑀚𑁆𑀚𑀸’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀉𑀧𑀸𑀮𑀺𑀦𑀸 𑀅𑀥𑀺𑀓𑀭𑀡’’𑀦𑁆𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺.

𑀲𑀸 𑀪𑀺𑀓𑁆𑀔𑀼𑀦𑀻 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 ‘‘𑀤𑀸𑀭𑀓𑀧𑀭𑀺𑀳𑀭𑀡𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀮𑀺𑀩𑁄𑀥𑁄’’𑀢𑀺 𑀥𑀸𑀢𑀻𑀦𑀁 𑀤𑀸𑀧𑁂𑀢𑁆𑀯𑀸 𑀧𑁄𑀲𑀸𑀧𑁂𑀲𑀺, 𑀓𑀲𑁆𑀲𑀧𑁄𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀓𑀼𑀫𑀸𑀭𑀓𑀸𑀮𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀦 𑀪𑀕𑀯𑀢𑀸 ‘‘𑀓𑀲𑁆𑀲𑀧𑀁 𑀧𑀓𑁆𑀓𑁄𑀲𑀣, 𑀇𑀤𑀁 𑀨𑀮𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀓𑀲𑁆𑀲𑀧𑀲𑁆𑀲 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀢𑀭𑀓𑀲𑁆𑀲𑀧𑀲𑁆𑀲𑀸’’𑀢𑀺 ‘‘𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲𑀸’’𑀢𑀺 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸 𑀭𑀜𑁆𑀜𑀸 𑀧𑁄𑀲𑀸𑀯𑀦𑀻𑀬𑀧𑀼𑀢𑁆𑀢𑀢𑁆𑀢𑀸 𑀘 𑀯𑀼𑀤𑁆𑀥𑀓𑀸𑀮𑁂𑀧𑀺 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣.

𑀲𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺, 𑀩𑀼𑀤𑁆𑀥𑀯𑀘𑀦𑀜𑁆𑀘 𑀉𑀕𑁆𑀕𑀡𑁆𑀳𑀸𑀢𑀺. 𑀅𑀣 𑀢𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀫𑀳𑀸𑀩𑁆𑀭𑀳𑁆𑀫𑀸 ‘‘𑀯𑀺𑀧𑀲𑁆𑀲𑀦𑀸𑀬 𑀫𑀼𑀔𑀁 𑀤𑀲𑁆𑀲𑁂𑀢𑁆𑀯𑀸 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀤𑀲𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀦𑁆𑀥𑀯𑀦𑁂 𑀯𑀲𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 ‘‘𑀇𑀫𑁂 𑀧𑀜𑁆𑀳𑁂 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀘𑀺𑀓𑁆𑀔𑀺. 𑀢𑀢𑁄 𑀲𑁄 𑀢𑁂 𑀧𑀜𑁆𑀳𑁂 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀪𑀕𑀯𑀸𑀧𑀺𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀣𑁂𑀭𑁄 𑀪𑀕𑀯𑀢𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀢𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀕𑀩𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁫𑁦. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀜𑁆𑀘, 𑀢𑀁 𑀲𑀩𑁆𑀩𑀁 𑀦 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀦𑀼𑀢𑁆𑀢𑀸𑀦𑀧𑀤𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁧𑁬𑁯. 𑀆𑀧𑀦𑁆𑀦𑀲𑀢𑁆𑀢𑀸 𑀫𑁂 𑀫𑀸𑀢𑀸𑀢𑀺 𑀫𑀬𑁆𑀳𑀁 𑀫𑀸𑀢𑀸 𑀕𑀭𑀼𑀕𑀩𑁆𑀪𑀸 𑀕𑀩𑁆𑀪𑀺𑀦𑀻 𑀧𑀲𑀼𑀢𑀸𑀲𑀦𑁆𑀦𑀕𑀩𑁆𑀪𑀸𑀢𑀺 𑀅𑀢𑁆𑀣𑁄.

𑁧𑁭𑁩. 𑀯𑀫𑁆𑀫𑀺𑀓𑀲𑀤𑀺𑀲𑀁 𑀓𑀸𑀬𑀦𑁆𑀢𑀺 𑀲𑀭𑀻𑀭𑀁 𑀦𑀸𑀫 𑀯𑀫𑁆𑀫𑀺𑀓𑀲𑀤𑀺𑀲𑀁 𑀬𑀣𑀸 𑀯𑀫𑁆𑀫𑀺𑀓𑁄 𑀇𑀢𑁄 𑀘𑀺𑀢𑁄 𑀘 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑁄 𑀖𑀭𑀕𑁄𑀴𑀺𑀓𑀉𑀧𑀘𑀺𑀓𑀸𑀤𑀻𑀦𑀁 𑀆𑀲𑀬𑁄, 𑀏𑀯𑀫𑁂𑀯 𑀅𑀬𑀁 𑀓𑀸𑀬𑁄 𑀦𑀯𑀙𑀺𑀤𑁆𑀤𑁄 𑀥𑀼𑀯𑀲𑁆𑀲𑀯𑁄𑀢𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀧𑀓𑀸𑀲𑀺𑀢𑀁 𑀢𑀁 𑀲𑀼𑀢𑁆𑀯𑀸 𑀫𑁂 𑀘𑀺𑀢𑁆𑀢𑀁 𑀆𑀲𑀯𑁂 𑀅𑀕𑁆𑀕𑀳𑁂𑀢𑁆𑀯𑀸 𑀅𑀲𑁂𑀲𑁂𑀢𑁆𑀯𑀸 𑀓𑀺𑀮𑁂𑀲𑀢𑁄 𑀯𑀺𑀫𑀼𑀘𑁆𑀘𑀺, 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀧𑀭𑀪𑀸𑀕𑁂 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀯𑀺𑀘𑀺𑀢𑁆𑀢𑀥𑀫𑁆𑀫𑀓𑀣𑀺𑀓𑀪𑀸𑀯𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁭) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀻𑀢𑀺.

𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀩𑀸𑀳𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀙𑀝𑁆𑀞𑀸𑀧𑀤𑀸𑀦𑁂 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀸𑀳𑀺𑀬𑀲𑁆𑀲 𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀯𑁂𑀤𑀗𑁆𑀕𑁂𑀲𑀼 𑀅𑀦𑀯𑀬𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀧𑀲𑀦𑁆𑀦𑀫𑀸𑀦𑀲𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀁 𑀧𑀢𑁆𑀢𑀼𑀓𑀸𑀫𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀦𑁆𑀦𑁄 ‘‘𑀪𑀕𑀯𑀸, 𑀪𑀦𑁆𑀢𑁂, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀬𑀁 𑀪𑀺𑀓𑁆𑀔𑀼𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀲𑁄 𑀯𑀺𑀬 𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀑𑀮𑁄𑀓𑁂𑀢𑁆𑀯𑀸 𑀲𑀫𑀺𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑁂𑀲𑀼 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀩𑁆𑀩𑀚𑀺𑀢𑁄 𑀬𑀤𑀸 𑀲𑀸𑀲𑀦𑁂 𑀑𑀲𑀓𑁆𑀓𑀫𑀸𑀦𑁂 𑀲𑀢𑁆𑀢 𑀪𑀺𑀓𑁆𑀔𑀽 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀅𑀚𑁆𑀛𑀸𑀘𑀸𑀭𑀁 𑀤𑀺𑀲𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀬𑀸𑀯 𑀲𑀸𑀲𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀦 𑀳𑁄𑀢𑀺, 𑀢𑀸𑀯 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀅𑀭𑀜𑁆𑀜𑁂 𑀏𑀓𑀁 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 ‘‘𑀚𑀻𑀯𑀺𑀢𑀲𑀸𑀮𑀬𑀸 𑀦𑀺𑀯𑀢𑁆𑀢𑀦𑁆𑀢𑀼, 𑀦𑀺𑀭𑀸𑀮𑀬𑀸 𑀇𑀫𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀦𑁆𑀢𑀽’’𑀢𑀺 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑁂 𑀢𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀅𑀦𑁄𑀢𑀢𑁆𑀢𑀤𑀳𑁂 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀆𑀯𑀼𑀲𑁄, 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀣𑀸’’𑀢𑀺. 𑀢𑁂 𑀆𑀳𑀁𑀲𑀼 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀏𑀯𑀁 𑀓𑀢𑀺𑀓𑀸 𑀓𑀢𑀸 ‘𑀬𑁄 𑀧𑀞𑀫𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑁂𑀦𑀸𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀯𑀲𑁂𑀲𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺 𑀲𑀘𑁂 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫, 𑀲𑀬𑀁 𑀆𑀳𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦 𑀇𑀘𑁆𑀙𑀺𑀁𑀲𑀼.

𑀤𑀼𑀢𑀺𑀬𑀤𑀺𑀯𑀲𑁂 𑀤𑀼𑀢𑀺𑀬𑀢𑁆𑀣𑁂𑀭𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀢𑀣𑁂𑀯 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀇𑀢𑀭𑁂 𑀦𑀺𑀫𑀦𑁆𑀢𑁂𑀲𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀓𑀢𑀺𑀓𑀸 𑀓𑀢𑀸, ‘𑀫𑀳𑀸𑀣𑁂𑀭𑁂𑀦 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀣𑁂𑀭𑁂𑀦 𑀆𑀪𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑁂 𑀯𑀺𑀬 𑀫𑀬𑀫𑁆𑀧𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑁂𑀦 𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦 𑀇𑀘𑁆𑀙𑀺𑀁𑀲𑀼. 𑀢𑁂𑀲𑀼 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀢𑁆𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀤𑀼𑀢𑀺𑀬𑁄 𑀅𑀦𑀸𑀕𑀸𑀫𑀻 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀇𑀢𑀭𑁂 𑀧𑀜𑁆𑀘 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀲𑁆𑀲𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀧𑀼𑀓𑁆𑀓𑀼𑀲𑀸𑀢𑀺 𑀭𑀸𑀚𑀸 𑀅𑀳𑁄𑀲𑀺, 𑀏𑀓𑁄 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀏𑀓𑁄 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄, 𑀏𑀓𑁄 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄, 𑀏𑀓𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺. 𑀢𑁂𑀲𑀼 𑀅𑀬𑀁 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀸𑀡𑀺𑀚𑀓𑀫𑁆𑀫𑁂 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄, 𑀲𑁄 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑁂𑀳𑀺 𑀯𑀸𑀡𑀺𑀚𑁂𑀳𑀺 𑀲𑀤𑁆𑀥𑀺𑀁 𑀦𑀸𑀯𑀫𑀸𑀭𑀼𑀬𑁆𑀳 𑀯𑀺𑀤𑁂𑀲𑀁 𑀕𑀘𑁆𑀙𑀦𑁆𑀢𑁄 𑀓𑀢𑀺𑀧𑀸𑀳𑀁 𑀕𑀦𑁆𑀢𑁆𑀯𑀸 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀲𑁂𑀲𑁂𑀲𑀼 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑁂𑀲𑀼 𑀚𑀸𑀢𑁂𑀲𑀼 𑀏𑀓𑁄𑀬𑁂𑀯 𑀅𑀯𑀲𑀺𑀝𑁆𑀞𑁄 𑀏𑀓𑀁 𑀨𑀮𑀓𑀁 𑀕𑀳𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀢𑀻𑀭𑀁 𑀑𑀓𑁆𑀓𑀫𑀺. 𑀢𑀲𑁆𑀲 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀦𑀢𑁆𑀣𑀺, 𑀲𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 𑀲𑀼𑀓𑁆𑀔𑀓𑀝𑁆𑀞𑀤𑀡𑁆𑀟𑀓𑁂 𑀯𑀸𑀓𑁂𑀳𑀺 𑀧𑀮𑀺𑀯𑁂𑀞𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀤𑁂𑀯𑀓𑀼𑀮𑀢𑁄 𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑀢𑁆𑀯𑀸 ‘‘𑀅𑀬𑀁 𑀏𑀓𑁄 𑀅𑀭𑀳𑀸’’𑀢𑀺 𑀲𑀫𑁆𑀪𑀸𑀯𑁂𑀲𑀼𑀁. 𑀲𑁄 𑀯𑀢𑁆𑀣𑁂𑀲𑀼 𑀉𑀧𑀦𑀻𑀢𑁂𑀲𑀼 ‘‘𑀲𑀘𑀸𑀳𑀁 𑀦𑀺𑀯𑀸𑀲𑁂𑀫𑀺, 𑀧𑀸𑀭𑀼𑀧𑀸𑀫𑀺 𑀯𑀸, 𑀮𑀸𑀪𑀲𑀓𑁆𑀓𑀸𑀭𑁄 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’’𑀢𑀺 𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀭𑀼𑀘𑀻𑀭𑀸𑀦𑁂𑀯 𑀧𑀭𑀺𑀳𑀭𑀺.

𑀅𑀣𑀲𑁆𑀲 ‘‘𑀅𑀭𑀳𑀸, 𑀅𑀭𑀳𑀸’’𑀢𑀺 𑀩𑀳𑀽𑀳𑀺 𑀲𑀫𑁆𑀪𑀸𑀯𑀺𑀬𑀫𑀸𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀬𑁂 𑀓𑁂𑀘𑀺 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄’’𑀢𑀺 𑀲𑁄 𑀢𑁂𑀦 𑀦𑀺𑀬𑀸𑀫𑁂𑀦 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺.

𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀲𑀢𑁆𑀢𑀲𑀼 𑀚𑀦𑁂𑀲𑀼 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀆𑀕𑀢𑀝𑁆𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀧𑀩𑁆𑀩𑀢𑀫𑀸𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀓𑀭𑀡𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀲𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀏𑀓𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀇𑀢𑀭𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑁂 𑀓𑀸𑀮𑀸𑀦𑀼𑀓𑀸𑀮𑀁 𑀆𑀯𑀚𑁆𑀚𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀓𑀳𑀁 𑀦𑀼 𑀔𑁄 𑀢𑁂’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀸𑀭𑀼𑀘𑀻𑀭𑀺𑀬𑀁 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁 𑀦𑀺𑀲𑁆𑀲𑀸𑀬 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀝𑁆𑀞𑁄 𑀯𑀢𑀸𑀬𑀁 𑀩𑀸𑀮𑁄, 𑀧𑀼𑀩𑁆𑀩𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑀺𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀅𑀭𑀳𑀢𑀸𑀧𑀺 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀸𑀦𑀺 𑀉𑀤𑀭𑀳𑁂𑀢𑀼 𑀅𑀦𑀸𑀭𑀳𑀸𑀯 𑀲𑀫𑀸𑀦𑁄 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀤𑀲𑀩𑀮𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀕𑀘𑁆𑀙𑀸𑀫𑀺 𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀔𑀡𑁂𑀦𑁂𑀯 𑀩𑁆𑀭𑀳𑁆𑀫𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀤𑀸𑀭𑀼𑀘𑀻𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑁄𑀭𑀸𑀡𑀓𑀲𑀳𑀸𑀬𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀫𑁆𑀳𑀸𑀓𑀁 𑀲𑀩𑁆𑀩𑀚𑁂𑀝𑁆𑀞𑀓𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀼𑀫𑁆𑀳𑁂 𑀧𑀦 𑀧𑀜𑁆𑀘𑀚𑀦𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀲𑁆𑀯𑀸𑀳𑀁 𑀤𑀸𑀦𑀺 𑀢𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀤𑀫𑀺𑀢𑀼𑀁 𑀆𑀕𑀢𑁄’’𑀢𑀺 𑀯𑀢𑁆𑀯𑀸 𑀇𑀤𑀁 𑀓𑀸𑀭𑀡𑀁 𑀆𑀳 𑁋 ‘‘𑀦𑁂𑀯 𑀔𑁄 𑀢𑁆𑀯𑀁, 𑀩𑀸𑀳𑀺𑀬, 𑀅𑀭𑀳𑀸 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄, 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀼 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀸𑀯𑀢𑁆𑀣𑀺𑀬𑀁 𑀯𑀲𑀦𑀪𑀸𑀯𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺.

𑀩𑀸𑀳𑀺𑀬𑁄 𑀧𑀦 𑀆𑀓𑀸𑀲𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀫𑀬𑀸 𑀓𑀢𑀁, 𑀅𑀦𑀭𑀳𑀁 𑀅𑀭𑀳𑀸 𑀅𑀳𑀦𑁆𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀅𑀬𑀜𑁆𑀘 𑀫𑀁 ‘𑀦 𑀢𑁆𑀯𑀁 𑀅𑀭𑀳𑀸, 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸𑀲𑀻’𑀢𑀺 𑀯𑀤𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀮𑁄𑀓𑁂 𑀅𑀜𑁆𑀜𑁄 𑀅𑀭𑀳𑀸’’𑀢𑀺. 𑀅𑀣 𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀣 𑀓𑁂 𑀘𑀭𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸’’𑀢𑀺. 𑀅𑀣𑀲𑁆𑀲 𑀤𑁂𑀯𑀢𑀸 𑀆𑀘𑀺𑀓𑁆𑀔𑀺 𑁋 ‘‘𑀅𑀢𑁆𑀣𑀺, 𑀩𑀸𑀳𑀺𑀬, 𑀉𑀢𑁆𑀢𑀭𑁂𑀲𑀼 𑀚𑀦𑀧𑀤𑁂𑀲𑀼 𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀲𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀲𑁄 𑀳𑀺, 𑀩𑀸𑀳𑀺𑀬, 𑀪𑀕𑀯𑀸 𑀅𑀭𑀳𑀸 𑀘𑁂𑀯 𑀅𑀭𑀳𑀢𑁆𑀢𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺. 𑀩𑀸𑀳𑀺𑀬𑁄 𑀭𑀢𑁆𑀢𑀺𑀪𑀸𑀕𑁂 𑀤𑁂𑀯𑀢𑀸𑀬 𑀓𑀣𑀁 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀢𑀁𑀔𑀡𑀁𑀬𑁂𑀯 𑀲𑀼𑀧𑁆𑀧𑀸𑀭𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺, 𑀕𑀘𑁆𑀙𑀦𑁆𑀢𑁄 𑀘 𑀧𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀘 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀓𑀼𑀳𑀺𑀁 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺? 𑀪𑀺𑀓𑁆𑀔𑀽 ‘‘𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀁 𑀧𑀦 𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀲𑀼𑀧𑁆𑀧𑀸𑀭𑀓𑀸 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀤𑀸 𑀦𑀺𑀓𑁆𑀔𑀦𑁆𑀢𑁄𑀲𑀻’’𑀢𑀺? ‘‘𑀳𑀺𑀬𑁆𑀬𑁄 𑀲𑀸𑀬𑀦𑁆𑀳𑀲𑀫𑀬𑁂 𑀦𑀺𑀓𑁆𑀔𑀦𑁆𑀢𑁄𑀫𑁆𑀳𑀻’’𑀢𑀺. ‘‘𑀤𑀽𑀭𑀢𑁄𑀧𑀺 𑀆𑀕𑀢𑁄, 𑀦𑀺𑀲𑀻𑀤 𑀢𑀸𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀸𑀳𑀺, 𑀆𑀕𑀢𑀓𑀸𑀮𑁂 𑀲𑀢𑁆𑀣𑀸𑀭𑀁 𑀤𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. ‘‘𑀅𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀼 𑀯𑀸 𑀅𑀢𑁆𑀢𑀦𑁄 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀓𑀢𑁆𑀣𑀘𑀺 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀭𑀢𑁆𑀢𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑁄, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸𑀯 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 𑀏𑀯𑀁 𑀯𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀕𑁄𑀢𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀺𑀝𑁆𑀞𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑀲𑀭𑀻𑀭𑁄 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂 𑀪𑀕𑀯𑀸, 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀩𑀸𑀳𑀺𑀬, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸 𑀧𑀺𑀡𑁆𑀟𑀸𑀬𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺.

𑀢𑀁 𑀲𑀼𑀢𑁆𑀯𑀸 𑀩𑀸𑀳𑀺𑀬𑁄, ‘‘𑀪𑀦𑁆𑀢𑁂, 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦 𑀅𑀮𑀤𑁆𑀥𑀧𑀼𑀩𑁆𑀩𑁄, 𑀢𑀼𑀫𑁆𑀳𑀸𑀓𑀁 𑀯𑀸 𑀫𑀬𑁆𑀳𑀁 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺 𑀧𑀼𑀦 𑀬𑀸𑀘𑀺. 𑀲𑀢𑁆𑀣𑀸 𑀤𑀼𑀢𑀺𑀬𑀫𑁆𑀧𑀺 𑀢𑀣𑁂𑀯 𑀧𑀝𑀺𑀓𑁆𑀔𑀺𑀧𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀚𑁆𑀛𑁄𑀢𑁆𑀣𑀝𑀁 𑀳𑁄𑀢𑀺, 𑀩𑀮𑀯𑀧𑀻𑀢𑀺𑀯𑁂𑀕𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀧𑀺 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀢𑀸𑀯 𑀢𑀺𑀝𑁆𑀞𑀢𑀼, 𑀏𑀓𑀭𑀢𑁆𑀢𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑀲𑁆𑀲𑀧𑀺 𑀘𑀲𑁆𑀲 𑀤𑀭𑀣𑁄 𑀩𑀮𑀯𑀸 𑀲𑁄𑀧𑀺 𑀢𑀸𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀽’’𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀁 𑀬𑀸𑀘𑀺𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀉𑀤𑀸. 𑁧𑁦) 𑀦𑀬𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄𑀬𑁂𑀯 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁭𑁮. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑁆𑀔𑀡𑁂𑀬𑁂𑀯 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑀺𑀲𑁆𑀲𑀸𑀫.

𑁧𑁮𑁧. 𑀳𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀲𑁄𑀫𑀦𑀲𑁆𑀲𑀚𑀸𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀓𑁄𑀫𑀸𑀭𑀯𑀡𑁆𑀡𑀁 𑀅𑀢𑀺𑀓𑁄𑀫𑀮𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁨. 𑀳𑁂𑀫𑀬𑀜𑁆𑀜𑁄𑀧𑀘𑀺𑀢𑀗𑁆𑀕𑀦𑁆𑀢𑀺 𑀲𑀼𑀯𑀡𑁆𑀡𑀲𑀼𑀢𑁆𑀢𑀬𑀜𑁆𑀜𑁄𑀧𑀘𑀺𑀢𑀲𑀼𑀢𑁆𑀢𑀅𑀯𑀬𑀯𑀁 𑀲𑀭𑀻𑀭𑀁 𑀤𑁂𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀮𑀫𑁆𑀩𑀩𑀺𑀫𑁆𑀩𑀢𑀫𑁆𑀩𑁄𑀝𑁆𑀞𑀦𑁆𑀢𑀺 𑀑𑀮𑀫𑁆𑀩𑀺𑀢𑀩𑀺𑀫𑁆𑀩𑀨𑀮𑀲𑀤𑀺𑀲𑀁 𑀭𑀢𑁆𑀢𑀯𑀡𑁆𑀡𑀁 𑀑𑀝𑁆𑀞𑀤𑁆𑀯𑀬𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀢𑀢𑀺𑀡𑁆𑀳𑀲𑀫𑀁 𑀤𑀺𑀚𑀦𑁆𑀢𑀺 𑀲𑀼𑀦𑀺𑀲𑀺𑀢𑀢𑀺𑀔𑀺𑀡𑀅𑀬𑀮𑁄𑀳𑀖𑀁𑀲𑀦𑁂𑀦 𑀖𑀁𑀲𑀺𑀢𑁆𑀯𑀸 𑀲𑀫𑀁 𑀓𑀢𑀁 𑀯𑀺𑀬 𑀲𑀫𑀤𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁩. 𑀧𑀻𑀢𑀺𑀲𑀫𑁆𑀨𑀼𑀮𑁆𑀮𑀺𑀢𑀸𑀦𑀦𑀦𑁆𑀢𑀺 𑀧𑀻𑀢𑀺𑀬𑀸 𑀲𑀼𑀝𑁆𑀞𑀼 𑀨𑀼𑀮𑁆𑀮𑀺𑀢𑀁 𑀯𑀺𑀓𑀲𑀺𑀢𑀁 𑀆𑀦𑀦𑀁 𑀫𑀼𑀔𑀁 𑀆𑀤𑀸𑀲𑀢𑀮𑀲𑀤𑀺𑀲𑀫𑀼𑀔𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁪. 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀔𑀺𑀧𑁆𑀧𑀁 𑀤𑁂𑀲𑀦𑀸𑀬 𑀲𑀫𑀼𑀕𑁆𑀖𑀸𑀝𑀺𑀢𑀓𑁆𑀔𑀡𑁂𑀬𑁂𑀯 𑀅𑀪𑀺𑀯𑀺𑀲𑁂𑀲𑁂𑀦 𑀜𑀸𑀢𑀼𑀁 𑀲𑀫𑀢𑁆𑀣𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀅𑀢𑁆𑀣𑁄.

𑁧𑁮𑁬. 𑀲𑀕𑁆𑀕𑀁 𑀅𑀕𑀁 𑀲𑀪𑀯𑀦𑀁 𑀬𑀣𑀸𑀢𑀺 𑀅𑀢𑁆𑀢𑀦𑁄 𑀕𑁂𑀳𑀁 𑀯𑀺𑀬 𑀲𑀕𑁆𑀕𑀁 𑀮𑁄𑀓𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁯𑁬. 𑀦 𑀢𑁆𑀯𑀁 𑀉𑀧𑀸𑀬𑀫𑀕𑁆𑀕𑀜𑁆𑀜𑀽𑀢𑀺 𑀢𑁆𑀯𑀁 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀽𑀧𑀸𑀬𑀪𑀽𑀢𑀫𑀕𑁆𑀕𑀜𑁆𑀜𑀽 𑀦 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁨𑁦𑁦. 𑀲𑀢𑁆𑀣𑀼𑀦𑁄 𑀲𑀤𑀸 𑀚𑀺𑀦𑀦𑁆𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀚𑀺𑀦𑀁 𑀚𑀺𑀦𑀦𑁆𑀢𑁄 𑀧𑀭𑀸𑀚𑀺𑀢𑀓𑁄𑀧𑁄 𑀲𑀢𑁆𑀣𑀼𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀫𑀮𑀸𑀦𑀦𑀁 𑀆𑀤𑀸𑀲𑀢𑀮𑀲𑀤𑀺𑀲𑀫𑀼𑀔𑀁 𑀧𑀲𑁆𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀺𑀢𑀼𑀁 𑀦𑀺𑀓𑁆𑀔𑀫𑀸𑀫𑀻𑀢𑀺 𑀬𑁄𑀚𑀦𑀸. 𑀤𑀺𑀚𑁂 𑀅𑀧𑀼𑀘𑁆𑀙𑀺𑀁 𑀓𑀼𑀳𑀺𑀁 𑀮𑁄𑀓𑀦𑀦𑁆𑀤𑀦𑁄𑀢𑀺 𑀓𑀼𑀳𑀺𑀁 𑀞𑀸𑀦𑁂 𑀮𑁄𑀓𑀧𑀲𑀸𑀤𑀓𑀭𑁄 𑀲𑀢𑁆𑀣𑀸𑀢𑀺 𑀤𑀺𑀚𑁂 𑀩𑁆𑀭𑀸𑀳𑁆𑀫𑀡𑁂 𑀅𑀳𑀁 𑀪𑀺𑀓𑁆𑀔𑀽 𑀅𑀧𑀼𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁦𑁧. 𑀲𑀲𑁄𑀯 𑀔𑀺𑀧𑁆𑀧𑀁 𑀫𑀼𑀦𑀺𑀤𑀲𑁆𑀲𑀦𑀼𑀲𑁆𑀲𑀼𑀓𑁄𑀢𑀺 𑀫𑀼𑀦𑀺𑀤𑀲𑁆𑀲𑀦𑁂 𑀢𑀣𑀸𑀕𑀢𑀤𑀲𑁆𑀲𑀦𑁂 𑀉𑀲𑁆𑀲𑀼𑀓𑁄 𑀉𑀲𑁆𑀲𑀸𑀳𑀚𑀸𑀢𑁄 𑀲𑀲𑁄 𑀇𑀯 𑀔𑀺𑀧𑁆𑀧𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑁨𑁦𑁨. 𑀢𑀼𑀯𑀝𑀁 𑀕𑀦𑁆𑀢𑁆𑀯𑀸𑀢𑀺 𑀲𑀻𑀖𑀁 𑀕𑀦𑁆𑀢𑁆𑀯𑀸. 𑀧𑀺𑀡𑁆𑀟𑀢𑁆𑀣𑀁 𑀅𑀧𑀺𑀳𑀸𑀕𑀺𑀥𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀘𑁆𑀘 𑀅𑀧𑀺𑀳𑀁 𑀅𑀧𑀕𑀢𑀧𑀺𑀳𑀁 𑀅𑀕𑀺𑀥𑀁 𑀦𑀺𑀢𑁆𑀢𑀡𑁆𑀳𑀁.

𑁨𑁦𑁩. 𑀅𑀮𑁄𑀮𑀓𑁆𑀔𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀅𑀦𑁄𑀮𑁄𑀓𑀬𑀫𑀸𑀦𑀁 𑀉𑀢𑁆𑀢𑀫𑁂 𑀲𑀸𑀯𑀢𑁆𑀣𑀺𑀦𑀕𑀭𑁂 𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀅𑀤𑀓𑁆𑀔𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀭𑀻𑀦𑀺𑀮𑀬𑀲𑀗𑁆𑀓𑀸𑀲𑀦𑁆𑀢𑀺 𑀲𑀺𑀭𑀺𑀬𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀲𑁄𑀪𑀸𑀬 𑀦𑀺𑀮𑀬𑀁 𑀲𑀗𑁆𑀓𑀸𑀲𑀁 𑀚𑀮𑀫𑀸𑀦𑀢𑁄𑀭𑀡𑀲𑀤𑀺𑀲𑀁. 𑀭𑀯𑀺𑀤𑀺𑀢𑁆𑀢𑀺𑀳𑀭𑀸𑀦𑀦𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀫𑀼𑀔𑀫𑀡𑁆𑀟𑀮𑀁.

𑁨𑁦𑁪. 𑀓𑀼𑀧𑀣𑁂 𑀯𑀺𑀧𑁆𑀧𑀦𑀝𑁆𑀞𑀲𑁆𑀲𑀸𑀢𑀺 𑀓𑀼𑀘𑁆𑀙𑀺𑀢𑀧𑀣𑁂 𑀲𑁄𑀧𑀤𑁆𑀤𑀯𑀫𑀕𑁆𑀕𑁂 𑀫𑀽𑀴𑁆𑀳𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀭𑀡𑀁 𑀳𑁄𑀳𑀺 𑀧𑀢𑀺𑀝𑁆𑀞𑀸 𑀳𑁄𑀳𑀺. 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑁨𑁧𑁮. 𑀦 𑀢𑀢𑁆𑀣 𑀲𑀼𑀓𑁆𑀓𑀸 𑀚𑁄𑀢𑀦𑁆𑀢𑀻𑀢𑀺 𑀲𑀼𑀓𑁆𑀓𑀧𑀪𑀸𑀲𑀫𑁆𑀧𑀦𑁆𑀦𑀸 𑀚𑁄𑀢𑀫𑀸𑀦𑀑𑀲𑀥𑀺𑀢𑀸𑀭𑀓𑀸𑀤𑀬𑁄 𑀦 𑀚𑁄𑀢𑀦𑁆𑀢𑀺 𑀦𑀧𑁆𑀧𑀪𑀸𑀲𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑁄 𑀏𑀯𑀁 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀢𑁆𑀯𑀸 𑀢𑀸𑀯𑀤𑁂𑀯 𑀘 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. ‘‘𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀘 𑀧𑀼𑀝𑁆𑀞𑁄 ‘‘𑀦 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀓𑀺𑀭 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀢𑁆𑀢𑀦𑀸 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀬𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀧𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀲𑀗𑁆𑀕𑀳𑀁 𑀦𑀸𑀓𑀸𑀲𑀺, ‘‘𑀦 𑀢𑁂𑀦𑀲𑁆𑀲 𑀇𑀤𑁆𑀥𑀺𑀫𑀬𑀁 𑀧𑀢𑁆𑀢𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀦𑀸𑀤𑀸𑀲𑀺. 𑀢𑀫𑁆𑀧𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀫𑀸𑀦𑀫𑁂𑀯 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑁄 𑀘𑁄𑀴𑀓𑁆𑀔𑀡𑁆𑀟𑀸𑀦𑀺 𑀲𑀁𑀓𑀟𑁆𑀠𑁂𑀦𑁆𑀢𑀁 𑀧𑀼𑀩𑁆𑀩𑀯𑁂𑀭𑀺𑀓𑁄 𑀅𑀫𑀦𑀼𑀲𑁆𑀲𑁄 𑀏𑀓𑀺𑀲𑁆𑀲𑀸 𑀢𑀭𑀼𑀡𑀯𑀘𑁆𑀙𑀸𑀬 𑀕𑀸𑀯𑀺𑀬𑀸 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀸𑀫𑀊𑀭𑀼𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀦𑁆𑀢𑁄 𑀩𑀸𑀳𑀺𑀬𑀲𑁆𑀲 𑀲𑀭𑀻𑀭𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀏𑀢𑀁 𑀩𑀸𑀳𑀺𑀬𑀁 𑀤𑀸𑀭𑀼𑀘𑀻𑀭𑀺𑀬𑀦𑁆𑀢𑀺 𑀏𑀓𑀲𑁆𑀫𑀺𑀁 𑀕𑁂𑀳𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀜𑁆𑀘𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀇𑀫𑀁 𑀲𑀭𑀻𑀭𑀁 𑀦𑀕𑀭𑀤𑁆𑀯𑀸𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀣𑀽𑀧𑀁 𑀓𑀭𑁄𑀣𑀸’’𑀢𑀺 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺.

𑀢𑁂 𑀪𑀺𑀓𑁆𑀔𑀽 𑀥𑀸𑀢𑀼𑀁 𑀫𑀳𑀸𑀧𑀣𑁂 𑀣𑀽𑀧𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀲𑀗𑁆𑀖𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀢𑀣𑀸𑀕𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀭𑀻𑀭𑀛𑀸𑀧𑀦𑀓𑀺𑀘𑁆𑀘𑀁 𑀓𑀸𑀭𑁂𑀲𑀺, 𑀥𑀸𑀢𑀼𑀬𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺, 𑀓𑀢𑀭𑀫𑀕𑁆𑀕𑁄 𑀦𑀼 𑀔𑁄 𑀢𑁂𑀦 𑀲𑀫𑀥𑀺𑀕𑀢𑁄, 𑀲𑀸𑀫𑀡𑁂𑀭𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀼 𑀦𑀼 𑀔𑁄’’𑀢𑀺. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 ‘‘𑀧𑀢𑀺𑀝𑁆𑀞𑀺𑀢𑁄, 𑀪𑀺𑀓𑁆𑀔𑀯𑁂, 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀅𑀭𑀳𑀢𑁆𑀢𑁄’’𑀢𑀺 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀢𑀺. 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀬𑀤𑀺𑀤𑀁 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁬) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀅𑀣 𑀦𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, ‘𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’𑀢𑀺 𑀯𑀤𑁂𑀣, 𑀓𑀤𑀸 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺? ‘‘𑀫𑀫 𑀥𑀫𑁆𑀫𑀁 𑀲𑀼𑀢𑀓𑀸𑀮𑁂, 𑀪𑀺𑀓𑁆𑀔𑀯𑁂’’𑀢𑀺. ‘‘𑀓𑀤𑀸 𑀧𑀦𑀲𑁆𑀲, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀥𑀫𑁆𑀫𑁄 𑀓𑀣𑀺𑀢𑁄’’𑀢𑀺? ‘‘𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁂𑀦 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁂𑀦𑀸’’𑀢𑀺. ‘‘𑀅𑀧𑁆𑀧𑀫𑀢𑁆𑀢𑀓𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸 𑀓𑀣𑀺𑀢𑀥𑀫𑁆𑀫𑁄; 𑀓𑀣𑀁 𑀲𑁄 𑀢𑀸𑀯𑀢𑁆𑀢𑀓𑁂𑀦 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺? 𑀅𑀣 𑀦𑁂 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀫𑀫 𑀥𑀫𑁆𑀫𑀁 ‘𑀅𑀧𑁆𑀧𑀁’ 𑀯𑀸 ‘𑀩𑀳𑀼𑀁 𑀯𑀸’𑀢𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣. 𑀅𑀦𑁂𑀓𑀸𑀦𑀺𑀧𑀺 𑀳𑀺 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸𑀦𑀺 𑀕𑀸𑀣𑀸𑀲𑀳𑀲𑁆𑀲𑀸𑀦𑀺 𑀦 𑀲𑁂𑀬𑁆𑀬𑁄, 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀧𑀦 𑀏𑀓𑀫𑁆𑀧𑀺 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺. (𑀥. 𑀧. 𑁧𑁦𑁧) 𑁋

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀩𑀸𑀳𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀢𑁆𑀢𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑀯𑀸𑀲𑀺𑀦𑁄 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁂 𑀬𑁂𑀦 𑀩𑀼𑀤𑁆𑀥𑁄 𑀬𑁂𑀦 𑀥𑀫𑁆𑀫𑁄 𑀬𑁂𑀦 𑀲𑀗𑁆𑀖𑁄, 𑀢𑀦𑁆𑀦𑀺𑀦𑁆𑀦𑁂 𑀢𑀧𑁆𑀧𑁄𑀡𑁂 𑀢𑀧𑁆𑀧𑀩𑁆𑀪𑀸𑀭𑁂 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑁄, 𑀬𑀁𑀦𑀽𑀦𑀸𑀳𑀫𑁆𑀧𑀺 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀬𑀁 𑀯𑀺𑀬 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑁆𑀯𑁂 𑀫𑀬𑁆𑀳𑀁 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀓𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀩𑀼𑀤𑁆𑀥𑀲𑁆𑀲 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀲𑀢𑁆𑀣𑀸𑀭𑀁 𑀯𑀺𑀯𑀺𑀥𑀬𑀸𑀕𑀼𑀔𑀚𑁆𑀚𑀓𑀧𑀭𑀺𑀯𑀸𑀭𑀁 𑀲𑀲𑀽𑀧𑀩𑁆𑀬𑀜𑁆𑀚𑀦𑀁 𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀪𑁄𑀚𑀸𑀧𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀦𑁆𑀢𑀁 𑀔𑁄 𑀅𑀳𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀫𑀺, 𑀦 𑀧𑀦 𑀬𑀼𑀢𑁆𑀢𑀁 𑀫𑀬𑀸 𑀏𑀓𑀤𑀺𑀯𑀲𑀫𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑀼𑀁, 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀉𑀢𑁆𑀢𑀫𑀁 𑀢𑀺𑀘𑀻𑀯𑀭𑀧𑁆𑀧𑀳𑁄𑀦𑀓𑀁 𑀲𑀼𑀔𑀼𑀫𑀯𑀢𑁆𑀣𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀘 𑀢𑀺𑀘𑀻𑀯𑀭𑀁 𑀤𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑁄 𑀲𑁄 𑀪𑀺𑀓𑁆𑀔𑀼 𑀢𑀼𑀫𑁆𑀳𑁂𑀳𑀺 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑀫𑀢𑁆𑀣𑀓𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀅𑀳𑀫𑁆𑀧𑀺 𑀲𑁄 𑀪𑀺𑀓𑁆𑀔𑀼 𑀯𑀺𑀬 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀲𑀫𑀺𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀸𑀲𑀦𑁂 𑀢𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀧𑀭𑀺𑀩𑁆𑀪𑀫𑀺.

𑀏𑀯𑀁 𑀲𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁂 𑀲𑀫𑁆𑀪𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀓𑁄𑀝𑁆𑀞𑀺𑀓𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀓𑀲𑁆𑀫𑀸 𑀫𑀸𑀢𑀼𑀬𑀸 𑀯𑀸 𑀅𑀬𑁆𑀬𑀓𑀧𑀬𑁆𑀬𑀓𑀸𑀤𑀻𑀦𑀁 𑀯𑀸 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀯𑀁 𑀦𑀸𑀫𑀁 𑀓𑀭𑀺𑀁𑀲𑀽𑀢𑀺 𑀘𑁂? 𑀅𑀢𑁆𑀢𑀦𑁄 𑀧𑀜𑁆𑀜𑀯𑀦𑁆𑀢𑀢𑀸𑀬 𑀯𑁂𑀤𑀗𑁆𑀕𑁂𑀲𑀼 𑀲𑀢𑀓𑁆𑀓𑀧𑀭𑀢𑀓𑁆𑀓𑁂𑀲𑀼 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑁂𑀲𑀼 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑁂𑀲𑀼 𑀲𑀓𑀮𑀩𑁆𑀬𑀸𑀓𑀭𑀡𑁂𑀲𑀼 𑀘 𑀙𑁂𑀓𑀪𑀸𑀯𑁂𑀦 𑀘 𑀤𑀺𑀝𑁆𑀞𑀤𑀺𑀝𑁆𑀞𑁂 𑀚𑀦𑁂 𑀫𑀼𑀔𑀲𑀢𑁆𑀢𑀻𑀳𑀺 𑀓𑁄𑀝𑁆𑀞𑁂𑀦𑁆𑀢𑁄 𑀧𑀓𑁆𑀓𑁄𑀝𑁆𑀞𑁂𑀦𑁆𑀢𑁄 𑀯𑀺𑀢𑀼𑀤𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀅𑀦𑁆𑀯𑀢𑁆𑀣𑀦𑀸𑀫𑀁 𑀓𑀭𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀅𑀪𑀻𑀢𑁄 𑀫𑀳𑀸𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄𑀧𑀺 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀲𑀼𑀬𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀏𑀯𑀫𑀬𑀁 𑀣𑁂𑀭𑁄 𑀢𑀢𑁆𑀣 𑀓𑀢𑀸𑀥𑀺𑀓𑀸𑀭𑀢𑀸𑀬 𑀢𑀢𑁆𑀣 𑀘𑀺𑀡𑁆𑀡𑀯𑀲𑀻𑀪𑀸𑀯𑁂𑀦 𑀘 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑁄 𑀚𑀸𑀢𑁄. 𑀅𑀣 𑀦𑀁 𑀲𑀢𑁆𑀣𑀸 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑁄𑀝𑁆𑀞𑀺𑀓𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁮).

𑁨𑁨𑁧. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀢𑁆𑀣𑀁 𑀲𑀼𑀤𑀫𑀸𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄𑀢𑀺 𑀏𑀢𑁆𑀣 𑀲𑀼𑀤𑀦𑁆𑀢𑀺 𑀦𑀺𑀤𑀲𑁆𑀲𑀦𑁂 𑀦𑀺𑀧𑀸𑀢𑁄. 𑀆𑀬𑀲𑁆𑀫𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁, 𑀬𑀣𑀸 𑀢𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺.

𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀝𑁆𑀞𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀘𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀯𑁂𑀫𑀸𑀢𑀺𑀓𑀓𑀦𑀺𑀝𑁆𑀞𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀅𑀜𑁆𑀜𑁂𑀧𑀺𑀲𑁆𑀲 𑀤𑁆𑀯𑁂 𑀓𑀦𑀺𑀝𑁆𑀞𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀢𑁂 𑀢𑀬𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀭𑀫𑀸𑀬 𑀧𑀽𑀚𑀸𑀬 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀢𑀬𑁄 𑀪𑀸𑀢𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀕𑁄𑀢𑁆𑀢𑀯𑀲𑁂𑀦 𑀢𑀬𑁄𑀧𑀺 𑀓𑀲𑁆𑀲𑀧𑀸𑀢𑀺 𑀏𑀯𑀁 𑀦𑀸𑀫𑀓𑀸 𑀅𑀳𑁂𑀲𑀼𑀁. 𑀢𑁂 𑀢𑀬𑁄 𑀯𑀬𑀧𑁆𑀧𑀢𑁆𑀢𑀸 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀢𑁂𑀲𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀧𑀜𑁆𑀘𑀫𑀸𑀡𑀯𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑀸, 𑀫𑀚𑁆𑀛𑀺𑀫𑀲𑁆𑀲 𑀢𑀻𑀡𑀺, 𑀓𑀦𑀺𑀝𑁆𑀞𑀲𑁆𑀲 𑀤𑁆𑀯𑁂, 𑀢𑁂 𑀅𑀢𑁆𑀢𑀦𑁄 𑀕𑀦𑁆𑀣𑁂𑀲𑀼 𑀲𑀸𑀭𑀁 𑀑𑀮𑁄𑀓𑁂𑀦𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯 𑀅𑀢𑁆𑀣𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀁 𑀭𑁄𑀘𑁂𑀲𑀼𑀁. 𑀢𑁂𑀲𑀼 𑀚𑁂𑀝𑁆𑀞𑀪𑀸𑀢𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄, 𑀫𑀚𑁆𑀛𑀺𑀫𑁄 𑀕𑀗𑁆𑀕𑀸𑀦𑀤𑀻𑀯𑀗𑁆𑀓𑁂 𑀧𑀩𑁆𑀩𑀚𑀺𑀢𑁄 𑀦𑀤𑀻𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄, 𑀓𑀦𑀺𑀝𑁆𑀞𑁄 𑀕𑀬𑀸𑀲𑀻𑀲𑁂 𑀧𑀩𑁆𑀩𑀚𑀺𑀢𑁄 𑀕𑀬𑀸𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄. 𑀏𑀯𑀁 𑀢𑁂𑀲𑀼 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀩𑀳𑀽𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀅𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀲𑀓𑀼𑀮𑀧𑀼𑀢𑁆𑀢𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀜𑁆𑀜𑀸𑀲𑀚𑀦𑁂 𑀲𑀳𑀸𑀬𑀓𑁂 𑀯𑀺𑀦𑁂𑀢𑁆𑀯𑀸 𑀲𑀝𑁆𑀞𑀺 𑀅𑀭𑀳𑀦𑁆𑀢𑁂 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓’’𑀦𑁆𑀢𑀺 (𑀫𑀳𑀸𑀯. 𑁩𑁨) 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀺𑀁𑀲𑀪𑀤𑁆𑀤𑀯𑀕𑁆𑀕𑀺𑀬𑁂 𑀯𑀺𑀦𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀦𑀢𑁆𑀣𑀸𑀬 𑀅𑀕𑁆𑀬𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀕𑀢𑀦𑀸𑀕𑀤𑀫𑀦𑀸𑀤𑀻𑀳𑀺 𑀅𑀟𑁆𑀠𑀼𑀟𑁆𑀠𑀲𑀳𑀲𑁆𑀲𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀲𑀧𑀭𑀺𑀯𑀸𑀭𑀁 𑀯𑀺𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀜𑁆𑀘 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀜𑁆𑀘 𑀲𑀩𑁆𑀩𑀁 𑀦𑀤𑀻𑀓𑀲𑁆𑀲𑀧𑀲𑁆𑀲 𑀅𑀧𑀤𑀸𑀦𑀝𑁆𑀞𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀇𑀢𑀭𑁂𑀧𑀺 𑀤𑁆𑀯𑁂 𑀪𑀸𑀢𑀭𑁄 𑀲𑀧𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀲𑀩𑁆𑀩𑁂𑀯 𑀢𑁂 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀏𑀳𑀺𑀪𑀺𑀓𑁆𑀔𑀼𑀓𑀸 𑀅𑀳𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀲𑀫𑀡𑀲𑀳𑀲𑁆𑀲𑀁 𑀆𑀤𑀸𑀬 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 (𑀫𑀳𑀸𑀯. 𑁫𑁪) 𑀢𑁂 𑀲𑀩𑁆𑀩𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑁨𑁫𑁧. 𑀲𑁄 𑀏𑀯𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀅𑀦𑀼𑀢𑁆𑀢𑀸𑀦𑀧𑀤𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁨𑁬𑁮. 𑀲𑁄 𑀘 𑀲𑀩𑁆𑀩𑀁 𑀢𑀫𑀁 𑀳𑀦𑁆𑀢𑁆𑀯𑀸𑀢𑀺 𑀲𑁄 𑀨𑀼𑀲𑁆𑀲𑁄 𑀪𑀕𑀯𑀸 𑀭𑀸𑀕𑀤𑁄𑀲𑀫𑁄𑀳𑀸𑀤𑀺𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸. 𑀯𑀺𑀚𑀝𑁂𑀢𑁆𑀯𑀸 𑀫𑀳𑀸𑀚𑀝𑀦𑁆𑀢𑀺 𑀢𑀡𑁆𑀳𑀸𑀫𑀸𑀦𑀸𑀤𑀻𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑁂𑀳𑀺 𑀓𑀺𑀮𑁂𑀲𑀕𑀡𑁂𑀳𑀺 𑀫𑀳𑀸𑀩𑁆𑀬𑀸𑀓𑀼𑀮𑀁 𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 𑀧𑀤𑀸𑀮𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀓𑀁 𑀤𑁂𑀯𑀮𑁄𑀓𑀲𑀳𑀺𑀢𑀁 𑀲𑀓𑀮𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑀁𑀢𑀧𑁆𑀧𑀬𑀦𑁆𑀢𑁄 𑀲𑀦𑁆𑀢𑀧𑁆𑀧𑀬𑀦𑁆𑀢𑁄 𑀧𑀻𑀡𑁂𑀦𑁆𑀢𑁄 𑀅𑀫𑀢𑀁 𑀯𑀼𑀝𑁆𑀞𑀺𑀁 𑀫𑀳𑀸𑀦𑀺𑀩𑁆𑀩𑀸𑀦𑀯𑀼𑀝𑁆𑀞𑀺𑀥𑀸𑀭𑀁 𑀯𑀲𑁆𑀲𑀢𑁂 𑀧𑀕𑁆𑀖𑀭𑀸𑀧𑁂𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁯. 𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀦𑁆𑀢𑀺 ‘‘𑀩𑀸𑀭𑀲 𑀫𑀦𑀼𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀩𑀸𑀭𑀲 𑀤𑁆𑀯𑀸𑀤𑀲𑀭𑀸𑀲𑀻 𑀳𑀼𑀢𑁆𑀯𑀸 𑀧𑀼𑀭𑀸, 𑀳𑀺𑀫𑀯𑀦𑁆𑀢𑀢𑁄 𑀇𑀲𑀬𑁄 𑀘 𑀧𑀘𑁆𑀘𑁂𑀓𑀫𑀼𑀦𑀺𑀲𑀗𑁆𑀔𑀸𑀢𑀸 𑀇𑀲𑀬𑁄 𑀘 𑀕𑀦𑁆𑀥𑀫𑀸𑀤𑀦𑀢𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀏𑀢𑁆𑀣 𑀕𑀘𑁆𑀙𑀦𑁆𑀢𑀺 𑀑𑀢𑀭𑀦𑁆𑀢𑀺 𑀧𑀯𑀺𑀲𑀦𑁆𑀢𑀻𑀢𑀺 𑀩𑀸𑀭𑀸𑀡𑀲𑀻, 𑀅𑀣 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀗𑁆𑀔𑀸𑀢𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀢𑁆𑀣𑀸𑀬 𑀑𑀢𑀭𑀝𑁆𑀞𑀸𑀦𑀁 𑀦𑀕𑀭𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀩𑀸𑀭𑀸𑀡𑀲𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀺𑀲𑁆𑀲𑀁 𑀩𑀸𑀭𑀸𑀡𑀲𑀺𑀬𑀁.

𑁨𑁭𑁩. 𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑀁 𑀧𑀘𑁆𑀘𑀦𑁆𑀢𑀦𑁆𑀢𑀺 𑀙𑀟𑁆𑀟𑀺𑀢𑀲𑀢𑁆𑀣𑀁 𑀧𑀸𑀢𑀺𑀢𑀆𑀯𑀼𑀥𑀁 𑀧𑀘𑁆𑀘𑀦𑁆𑀢𑀚𑀦𑀧𑀤𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀼𑀦𑀭𑀼𑀧𑀘𑁆𑀘𑀢𑀦𑁆𑀢𑀺 𑀧𑀼𑀦𑀭𑀧𑀺 𑀢𑀁 𑀦𑀕𑀭𑀁 𑀉𑀧𑁂𑀘𑁆𑀘 𑀉𑀧𑀕𑀫𑁆𑀫 𑀲𑀫𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀭𑀸𑀥𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑁨𑁯𑁬. 𑀦𑀯𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀸𑀥𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀢𑀁 𑀲𑀩𑁆𑀩𑀁 𑀧𑀸𑀞𑀸𑀦𑀼𑀲𑀸𑀭𑁂𑀦 𑀦𑀬𑀸𑀦𑀼𑀘𑀺𑀦𑁆𑀢𑀦𑁂𑀦 𑀯𑀺𑀜𑁆𑀜𑀽𑀳𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀓𑁂𑀯𑀮𑀁 𑀧𑀼𑀜𑁆𑀜𑀦𑀸𑀦𑀢𑁆𑀢𑀫𑁂𑀯𑀸𑀢𑀺.

𑀭𑀸𑀥𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀲𑀫𑀁 𑀫𑁄𑀖𑀭𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀘𑀢𑀼𑀧𑀜𑁆𑀜𑀸𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁫. 𑀪𑀤𑁆𑀤𑀺𑀬𑀯𑀕𑁆𑀕𑁄

𑁧. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀜𑁆𑀘𑀧𑀜𑁆𑀜𑀸𑀲𑀫𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀫𑀜𑁆𑀚𑀼𑀲𑁆𑀲𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀧𑁆𑀧𑀺𑀲𑀓𑁆𑀔𑀭𑀸𑀤𑀺𑀫𑀥𑀼𑀭𑀭𑀲𑀲𑀫𑁆𑀫𑀺𑀲𑁆𑀲𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 ‘‘𑀅𑀳𑀫𑁆𑀧𑀺, 𑀪𑀦𑁆𑀢𑁂, 𑀅𑀦𑀸𑀕𑀢𑁂 𑀅𑀬𑀁 𑀪𑀺𑀓𑁆𑀔𑀼 𑀯𑀺𑀬 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀫𑀜𑁆𑀚𑀼𑀲𑁆𑀲𑀭𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀨𑀼𑀲𑁆𑀲𑀪𑀕𑀯𑀢𑁄 𑀓𑀸𑀮𑁂 𑀘𑀺𑀢𑁆𑀭𑀓𑁄𑀓𑀺𑀮𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀭𑀸𑀚𑀼𑀬𑁆𑀬𑀸𑀦𑀢𑁄 𑀫𑀥𑀼𑀭𑀁 𑀅𑀫𑁆𑀩𑀨𑀮𑀁 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀤𑀲𑁆𑀲𑀸𑀫𑀺 𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀓𑁄𑀓𑀺𑀮𑁄 𑀤𑀲𑀩𑀮𑀲𑁆𑀲 𑀧𑀢𑁆𑀢𑁂 𑀅𑀫𑁆𑀩𑀧𑀓𑁆𑀓𑀁 𑀞𑀧𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀢𑁆𑀣𑀁 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀅𑀣 𑀲𑁄 𑀓𑁄𑀓𑀺𑀮𑁄 𑀧𑀲𑀦𑁆𑀦𑀫𑀸𑀦𑀲𑁄 𑀢𑁂𑀦𑁂𑀯 𑀧𑀻𑀢𑀺𑀲𑀼𑀔𑁂𑀦 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀢𑁂𑀦𑁂𑀯 𑀧𑀼𑀜𑁆𑀜𑀓𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀪𑀯𑁂 𑀫𑀜𑁆𑀚𑀼𑀲𑁆𑀲𑀭𑁄 𑀅𑀳𑁄𑀲𑀺. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀯𑀟𑁆𑀠𑀓𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀚𑁂𑀝𑁆𑀞𑀓𑀯𑀟𑁆𑀠𑀓𑀻 𑀳𑀼𑀢𑁆𑀯𑀸 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀢𑀲𑁆𑀲 𑀲𑀭𑀻𑀭𑀥𑀸𑀢𑀼𑀬𑁄 𑀦𑀺𑀤𑀳𑀺𑀢𑀼𑀁 𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑁂 𑀣𑀽𑀧𑁂 𑀆𑀭𑀤𑁆𑀥𑁂 𑀲𑁄 𑀆𑀳 𑁋 ‘‘𑀬𑁄𑀚𑀦𑀸𑀯𑀝𑁆𑀝𑀁 𑀬𑁄𑀚𑀦𑀼𑀩𑁆𑀩𑁂𑀥𑀁 𑀓𑀭𑁄𑀫𑀸’’𑀢𑀺. 𑀢𑁂 𑀲𑀩𑁆𑀩𑁂 𑀢𑀲𑁆𑀲 𑀯𑀘𑀦𑁂 𑀅𑀝𑁆𑀞𑀁𑀲𑀼. 𑀇𑀢𑀺 𑀅𑀧𑁆𑀧𑀫𑀸𑀡𑀲𑁆𑀲 𑀩𑀼𑀤𑁆𑀥𑀲𑁆𑀲 𑀑𑀭𑀧𑁆𑀧𑀫𑀸𑀡𑀁 𑀘𑁂𑀢𑀺𑀬𑀁 𑀓𑀸𑀭𑁂𑀲𑀺, 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀜𑁆𑀜𑁂𑀳𑀺 𑀳𑀻𑀦𑀧𑁆𑀧𑀫𑀸𑀡𑁄 𑀅𑀳𑁄𑀲𑀺. 𑀲𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑀺𑀭𑀲𑁆𑀲𑀢𑀸𑀬 𑀘 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀲𑀼𑀦𑁆𑀤𑀭𑀲𑀭𑀻𑀭𑀢𑀸𑀬 𑀘 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀳𑀼𑀢𑁆𑀯𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀧𑀭𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺.

𑀅𑀣𑁂𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀏𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀭𑀣𑁂𑀦 𑀕𑀘𑁆𑀙𑀦𑁆𑀢𑀻 𑀏𑀓𑀸 𑀕𑀡𑀺𑀓𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀺. 𑀣𑁂𑀭𑁄 𑀢𑀲𑁆𑀲𑀸 𑀤𑀦𑁆𑀢𑀝𑁆𑀞𑀺𑀓𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺, 𑀲𑁄 𑀅𑀪𑀺𑀡𑁆𑀳𑀁 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀑𑀯𑀤𑀺𑀬𑀫𑀸𑀦𑁄 𑀅𑀦𑀼𑀲𑀸𑀲𑀺𑀬𑀫𑀸𑀦𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀘 𑀲𑀸𑀫𑀡𑁂𑀭𑀸 𑀘 𑀢𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀺, 𑀲𑀻𑀲𑁂 𑀩𑀸𑀳𑀸𑀬 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀓𑀻𑀴𑀦𑁆𑀢𑀸 𑀯𑀺𑀳𑁂𑀞𑁂𑀲𑀼𑀁. 𑀅𑀣 𑀪𑀕𑀯𑀸 𑀲𑀼𑀢𑁆𑀯𑀸 𑁋 ‘‘𑀫𑀸, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀁 𑀯𑀺𑀳𑁂𑀞𑁂𑀣𑀸’’𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀢𑀁 ‘‘𑀅𑀭𑀳𑀸’’𑀢𑀺 𑀚𑀸𑀦𑀺𑀢𑁆𑀯𑀸 𑀦 𑀯𑀺𑀳𑁂𑀞𑁂𑀲𑀼𑀁.

𑁧𑁨. 𑀲𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀫𑀜𑁆𑀚𑀼𑀦𑀸𑀪𑀺𑀦𑀺𑀓𑀽𑀚𑀳𑀦𑁆𑀢𑀺 𑀫𑀥𑀼𑀭𑁂𑀦 𑀧𑁂𑀫𑀦𑀺𑀬𑁂𑀦 𑀲𑀭𑁂𑀦 𑀅𑀪𑀺𑀦𑀺𑀓𑀽𑀚𑀺𑀁 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑁩𑁪. 𑀤𑀼𑀢𑀺𑀬𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀁 𑀲𑀩𑁆𑀩𑀁 𑀧𑀸𑀞𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀲𑀻𑀯𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀢𑀺𑀬𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀸𑀬 𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀮𑀸𑀪𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀸𑀧𑀺 𑀅𑀦𑀸𑀕𑀢𑁂 𑀏𑀯𑀭𑀽𑀧𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀅𑀥𑀺𑀓𑀸𑀭𑀓𑀫𑁆𑀫𑁂𑀦 𑀦 𑀅𑀜𑁆𑀜𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀫𑀺, 𑀅𑀦𑀸𑀕𑀢𑁂 𑀧𑀦 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑁄 𑀏𑀢𑀤𑀕𑁆𑀕𑁂 𑀞𑀧𑀺𑀢𑀪𑀺𑀓𑁆𑀔𑀼 𑀯𑀺𑀬 𑀮𑀸𑀪𑀻𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀢𑁂 𑀧𑀢𑁆𑀣𑀦𑀸 𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑀯𑀸𑀲𑀺𑀦𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀤𑀸𑀦𑀁 𑀅𑀤𑀁𑀲𑀼.

𑀏𑀓𑀤𑀺𑀯𑀲𑀁 𑀲𑀩𑁆𑀩𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀸 ‘‘𑀓𑀺𑀁 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀤𑀸𑀦𑀕𑁆𑀕𑁂 𑀦𑀢𑁆𑀣𑀻’’𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁭; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁫𑁯 𑀲𑀻𑀯𑀮𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀑𑀮𑁄𑀓𑁂𑀦𑁆𑀢𑀸 𑀫𑀥𑀼𑀜𑁆𑀘 𑀕𑀼𑀴𑀤𑀥𑀺𑀜𑁆𑀘 𑀦𑀸𑀤𑁆𑀤𑀲𑀁𑀲𑀼. 𑀢𑁂 ‘‘𑀬𑀢𑁄 𑀓𑀼𑀢𑁄𑀘𑀺 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀚𑀦𑀧𑀤𑀢𑁄 𑀦𑀕𑀭𑀧𑀯𑀺𑀲𑀦𑀫𑀕𑁆𑀕𑁂𑀲𑀼 𑀧𑀼𑀭𑀺𑀲𑁂 𑀞𑀧𑁂𑀲𑀼𑀁. 𑀢𑀤𑀸 𑀏𑀲 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀕𑀸𑀫𑀢𑁄 𑀕𑀼𑀴𑀤𑀥𑀺𑀯𑀸𑀭𑀓𑀁 𑀕𑀳𑁂𑀢𑁆𑀯𑀸 ‘‘𑀓𑀺𑀜𑁆𑀘𑀺𑀤𑁂𑀯 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀁 𑀕𑀘𑁆𑀙𑀦𑁆𑀢𑁄 ‘‘𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀥𑁄𑀢𑀳𑀢𑁆𑀣𑀧𑀸𑀤𑁄 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀨𑀸𑀲𑀼𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀗𑁆𑀕𑀮𑀲𑀻𑀲𑀧𑁆𑀧𑀫𑀸𑀡𑀁 𑀦𑀺𑀫𑁆𑀫𑀓𑁆𑀔𑀺𑀓𑀤𑀡𑁆𑀟𑀓𑀫𑀥𑀼𑀁 𑀤𑀺𑀲𑁆𑀯𑀸 ‘‘𑀧𑀼𑀜𑁆𑀜𑁂𑀦 𑀫𑁂 𑀇𑀤𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀦𑀸𑀕𑀭𑁂𑀳𑀺 𑀞𑀧𑀺𑀢𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸, ‘‘𑀫𑀸𑀭𑀺𑀲, 𑀓𑀲𑁆𑀲 𑀇𑀫𑀁 𑀳𑀭𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀓𑀲𑁆𑀲𑀘𑀺, 𑀲𑀸𑀫𑀺, 𑀯𑀺𑀓𑁆𑀓𑀸𑀬𑀺𑀓𑀁 𑀫𑁂 𑀇𑀤’’𑀦𑁆𑀢𑀺. ‘‘𑀢𑁂𑀦 𑀳𑀺 𑀇𑀫𑀁 𑀓𑀳𑀸𑀧𑀡𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀫𑀥𑀼𑀜𑁆𑀘 𑀕𑀼𑀴𑀤𑀥𑀺𑀜𑁆𑀘 𑀤𑁂𑀳𑀻’’𑀢𑀺.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀫𑁂 𑀦 𑀩𑀳𑀼𑀁 𑀅𑀕𑁆𑀖𑀢𑀺, 𑀅𑀬𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀩𑀳𑀼𑀁 𑀤𑁂𑀢𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀦𑀸𑀳𑀁 𑀏𑀓𑀓𑀳𑀸𑀧𑀡𑁂𑀦 𑀤𑁂𑀫𑀻’’𑀢𑀺. ‘‘𑀬𑀤𑀺 𑀏𑀯𑀁 𑀤𑁆𑀯𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺. ‘‘𑀤𑁆𑀯𑀻𑀳𑀺𑀧𑀺 𑀦 𑀤𑁂𑀫𑀻’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀯𑀟𑁆𑀠𑁂𑀢𑁆𑀯𑀸 𑀬𑀸𑀯 𑀲𑀳𑀲𑁆𑀲𑀁 𑀧𑀸𑀧𑀼𑀡𑀺, 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀅𑀜𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀳𑁄𑀢𑀼 𑀢𑀸𑀯 𑀇𑀫𑀺𑀦𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀦 𑀇𑀤𑀁 𑀩𑀳𑀼𑀅𑀕𑁆𑀖𑀦𑀓𑀁, 𑀢𑁆𑀯𑀁 𑀧𑀦 𑀩𑀳𑀼𑀁 𑀤𑁂𑀲𑀺, 𑀓𑁂𑀦 𑀓𑀫𑁆𑀫𑁂𑀦 𑀇𑀤𑀁 𑀕𑀡𑁆𑀳𑀲𑀻’’𑀢𑀺. ‘‘𑀇𑀥, 𑀪𑁄, 𑀦𑀕𑀭𑀯𑀸𑀲𑀺𑀦𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀸 𑀇𑀤𑀁 𑀤𑁆𑀯𑀬𑀁 𑀤𑀸𑀦𑀕𑁆𑀕𑁂 𑀅𑀧𑀲𑁆𑀲𑀦𑁆𑀢𑀸 𑀫𑀁 𑀧𑀭𑀺𑀬𑁂𑀲𑀸𑀧𑁂𑀦𑁆𑀢𑀺. 𑀲𑀘𑁂 𑀇𑀤𑀁 𑀤𑁆𑀯𑀬𑀁 𑀦 𑀮𑀪𑀺𑀲𑁆𑀲𑀦𑁆𑀢𑀺, 𑀦𑀸𑀕𑀭𑀸𑀦𑀁 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀕𑀡𑁆𑀳𑀸𑀫𑀻’’𑀢𑀺. ‘‘𑀓𑀺𑀁 𑀧𑀦𑁂𑀢𑀁 𑀦𑀸𑀕𑀭𑀸𑀦𑀁 𑀏𑀯 𑀯𑀝𑁆𑀝𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀢𑀼𑀁 𑀅𑀯𑀸𑀭𑀺𑀢𑀫𑁂𑀢’’𑀦𑁆𑀢𑀺. ‘‘𑀅𑀢𑁆𑀣𑀺 𑀧𑀦 𑀓𑁄𑀘𑀺 𑀦𑀸𑀕𑀭𑀸𑀦𑀁 𑀤𑀸𑀦𑁂 𑀏𑀓𑀤𑀺𑀯𑀲𑀁 𑀲𑀳𑀲𑁆𑀲𑀁 𑀤𑀸𑀢𑀸’’𑀢𑀺? ‘‘𑀦𑀢𑁆𑀣𑀺, 𑀲𑀫𑁆𑀫𑀸’’𑀢𑀺. ‘‘𑀇𑀫𑁂𑀲𑀁 𑀫𑁂 𑀤𑁆𑀯𑀺𑀦𑁆𑀦𑀁 𑀲𑀳𑀲𑁆𑀲𑀕𑁆𑀖𑀦𑀓𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙, 𑀦𑀸𑀕𑀭𑀸𑀦𑀁 𑀆𑀭𑁄𑀘𑁂𑀳𑀺 𑁋 ‘𑀏𑀓𑁄 𑀧𑀼𑀭𑀺𑀲𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀽𑀮𑁂𑀦 𑀦 𑀤𑁂𑀢𑀺, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑀳𑀢𑁆𑀣𑁂𑀦𑁂𑀯 𑀤𑀸𑀢𑀼𑀓𑀸𑀫𑁄, 𑀢𑀼𑀫𑁆𑀳𑁂 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀓𑀸𑀭𑀡𑀸 𑀦𑀺𑀩𑁆𑀩𑀺𑀢𑀓𑁆𑀓𑀸 𑀳𑁄𑀣𑀸’’𑀢𑀺. ‘‘𑀢𑁆𑀯𑀁 𑀇𑀫𑀲𑁆𑀫𑀺𑀁 𑀤𑀸𑀦𑁂 𑀚𑁂𑀝𑁆𑀞𑀓𑀪𑀸𑀕𑀲𑁆𑀲 𑀓𑀸𑀬𑀲𑀓𑁆𑀔𑀻 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀕𑀢𑁄. 𑀲𑁄 𑀧𑀦 𑀓𑀼𑀮𑀧𑀼𑀢𑁆𑀢𑁄 𑀕𑀸𑀫𑀢𑁄 𑀧𑀭𑀺𑀩𑁆𑀩𑀬𑀢𑁆𑀣𑀁 𑀕𑀳𑀺𑀢𑀓𑀳𑀸𑀧𑀡𑁂𑀦 𑀧𑀜𑁆𑀘𑀓𑀝𑀼𑀓𑀁 𑀕𑀳𑁂𑀢𑁆𑀯𑀸 𑀘𑀼𑀡𑁆𑀡𑀁 𑀓𑀢𑁆𑀯𑀸 𑀤𑀥𑀺𑀢𑁄 𑀓𑀜𑁆𑀘𑀺𑀬𑀁 𑀯𑀸𑀳𑁂𑀢𑁆𑀯𑀸 𑀢𑀢𑁆𑀣 𑀫𑀥𑀼𑀧𑀝𑀮𑀁 𑀧𑀻𑀴𑁂𑀢𑁆𑀯𑀸 𑀧𑀜𑁆𑀘𑀓𑀝𑀼𑀓𑀘𑀼𑀡𑁆𑀡𑁂𑀦 𑀬𑁄𑀚𑁂𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀆𑀤𑀸𑀬 𑀤𑀲𑀩𑀮𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺. 𑀫𑀳𑀸𑀚𑀦𑁂𑀳𑀺 𑀆𑀳𑀭𑀺𑀬𑀫𑀸𑀦𑀲𑁆𑀲 𑀲𑀓𑁆𑀓𑀸𑀭𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀢𑀦𑁄 𑀧𑀢𑁆𑀢𑀯𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀑𑀓𑀸𑀲𑀁 𑀜𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀬𑀁 𑀫𑁂 𑀤𑀼𑀕𑁆𑀕𑀢𑀲𑀓𑁆𑀓𑀸𑀭𑁄, 𑀇𑀫𑀁 𑀫𑁂 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀧𑀝𑀺𑀕𑁆𑀕𑀡𑁆𑀳𑀣𑀸’’𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀸𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀘𑀢𑀼𑀫𑀳𑀸𑀭𑀸𑀚𑁂𑀳𑀺 𑀤𑀢𑁆𑀢𑀺𑀬𑁂𑀦 𑀲𑁂𑀮𑀫𑀬𑀧𑀢𑁆𑀢𑁂𑀦 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀣𑀸 𑀅𑀝𑁆𑀞𑀲𑀝𑁆𑀞𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀤𑀺𑀬𑁆𑀬𑀫𑀸𑀦𑀁 𑀦 𑀔𑀻𑀬𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺.

𑀲𑁄 𑀓𑀼𑀮𑀧𑀼𑀢𑁆𑀢𑁄 𑀦𑀺𑀝𑁆𑀞𑀺𑀢𑀪𑀢𑁆𑀢𑀓𑀺𑀘𑁆𑀘𑀁 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀆𑀳 𑁋 ‘‘𑀤𑀺𑀝𑁆𑀞𑁄 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀅𑀚𑁆𑀚 𑀩𑀦𑁆𑀥𑀼𑀫𑀢𑀻𑀦𑀕𑀭𑀯𑀸𑀲𑀻𑀳𑀺 𑀢𑀼𑀫𑁆𑀳𑀸𑀓𑀁 𑀲𑀓𑁆𑀓𑀸𑀭𑁄 𑀆𑀳𑀭𑀺𑀬𑀫𑀸𑀦𑁄, 𑀅𑀳𑀫𑁆𑀧𑀺 𑀇𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀲𑀢𑁆𑀣𑀸 ‘‘𑀏𑀯𑀁 𑀳𑁄𑀢𑀼 𑀓𑀼𑀮𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀘 𑀦𑀕𑀭𑀯𑀸𑀲𑀻𑀦𑀜𑁆𑀘 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀼𑀧𑁆𑀧𑀯𑀸𑀲𑀸𑀬 𑀭𑀸𑀚𑀥𑀻𑀢𑀼𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀸𑀬𑀁 𑀧𑀸𑀢𑀜𑁆𑀘 𑀧𑀜𑁆𑀘𑀧𑀡𑁆𑀡𑀸𑀓𑀸𑀭𑀲𑀢𑀸𑀦𑀺 𑀲𑀼𑀧𑁆𑀧𑀯𑀸𑀲𑀸𑀬 𑀉𑀧𑀦𑀻𑀬𑀦𑁆𑀢𑀺. 𑀅𑀣𑀲𑁆𑀲 𑀲𑀸 𑀧𑀼𑀜𑁆𑀜𑀯𑀻𑀫𑀁𑀲𑀦𑀢𑁆𑀣𑀁 𑀳𑀢𑁆𑀣𑁂𑀦 𑀩𑀻𑀚𑀧𑀘𑁆𑀙𑀺𑀁 𑀨𑀼𑀲𑀸𑀧𑁂𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀏𑀓𑁂𑀓𑀩𑀻𑀚𑀢𑁄 𑀲𑀮𑀸𑀓𑀲𑀢𑀁 𑀲𑀮𑀸𑀓𑀲𑀳𑀲𑁆𑀲𑀫𑁆𑀧𑀺 𑀦𑀺𑀕𑁆𑀕𑀘𑁆𑀙𑀢𑀺, 𑀏𑀓𑁂𑀓𑀓𑀭𑀻𑀲𑀔𑁂𑀢𑁆𑀢𑀢𑁄 𑀧𑀡𑁆𑀡𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀲𑀓𑀝𑀧𑀫𑀸𑀡𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑁄𑀝𑁆𑀞𑀧𑀽𑀭𑀡𑀓𑀸𑀮𑁂𑀧𑀺𑀲𑁆𑀲𑀸 𑀓𑁄𑀝𑁆𑀞𑀤𑁆𑀯𑀸𑀭𑀁 𑀳𑀢𑁆𑀣𑁂𑀦 𑀨𑀼𑀲𑀦𑁆𑀢𑀺𑀬𑀸 𑀭𑀸𑀚𑀥𑀻𑀢𑀸𑀬 𑀧𑀼𑀜𑁆𑀜𑁂𑀦 𑀕𑀡𑁆𑀳𑀦𑁆𑀢𑀸𑀦𑀁 𑀕𑀳𑀺𑀢𑀕𑀳𑀺𑀢𑀁 𑀧𑀼𑀦 𑀧𑀽𑀭𑀢𑀺. 𑀧𑀭𑀺𑀧𑀼𑀡𑁆𑀡𑀪𑀢𑁆𑀢𑀓𑀼𑀫𑁆𑀪𑀺𑀢𑁄𑀧𑀺 ‘‘𑀭𑀸𑀚𑀥𑀻𑀢𑀸𑀬 𑀧𑀼𑀜𑁆𑀜’’𑀦𑁆𑀢𑀺 𑀯𑀢𑁆𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀤𑁂𑀦𑁆𑀢𑀸 𑀦𑀁 𑀬𑀸𑀯 𑀦 𑀉𑀓𑁆𑀓𑀟𑁆𑀠𑀦𑁆𑀢𑀺, 𑀦 𑀢𑀸𑀯 𑀪𑀢𑁆𑀢𑀁 𑀔𑀻𑀬𑀢𑀺. 𑀤𑀸𑀭𑀓𑁂 𑀓𑀼𑀘𑁆𑀙𑀺𑀕𑀢𑁂𑀬𑁂𑀯 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀁𑀲𑀼.

𑀕𑀩𑁆𑀪𑁂 𑀧𑀦 𑀧𑀭𑀺𑀧𑀓𑁆𑀓𑁂 𑀲𑀢𑁆𑀢𑀸𑀳𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀺. 𑀲𑀸 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀧𑀼𑀭𑁂 𑀫𑀭𑀡𑀸 𑀚𑀻𑀯𑀫𑀸𑀦𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙, 𑀲𑀸𑀫𑀺, 𑀇𑀫𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀳𑀺, 𑀬𑀜𑁆𑀘 𑀲𑀢𑁆𑀣𑀸 𑀯𑀤𑀢𑀺, 𑀢𑀁 𑀲𑀸𑀥𑀼𑀓𑀁 𑀉𑀧𑀮𑀓𑁆𑀔𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑀸𑀲𑀦𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 𑁋 ‘‘𑀲𑀢𑁆𑀣𑀼 𑀪𑀦𑁆𑀢𑁂, 𑀓𑁄𑀴𑀺𑀬𑀥𑀻𑀢𑀸 𑀧𑀸𑀤𑁂 𑀯𑀦𑁆𑀤𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑁋 ‘‘𑀲𑀼𑀔𑀺𑀦𑀻 𑀳𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀴𑀺𑀬𑀥𑀻𑀢𑀸 𑀅𑀭𑁄𑀕𑀸, 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀽’’𑀢𑀺 𑀆𑀳. 𑀲𑁄 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀬𑁂𑀯 𑀲𑀼𑀧𑁆𑀧𑀯𑀸𑀲𑀸𑀬 𑀓𑀼𑀘𑁆𑀙𑀺𑀢𑁄 𑀥𑀫𑁆𑀫𑀓𑀭𑀡𑀢𑁄 𑀉𑀤𑀓𑀁 𑀯𑀺𑀬 𑀕𑀩𑁆𑀪𑁄 𑀦𑀺𑀓𑁆𑀔𑀫𑀺, 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀚𑀦𑁄 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀺𑀢𑀼𑀁 𑀆𑀭𑀤𑁆𑀥𑁄 𑀳𑀝𑁆𑀞𑀢𑀼𑀝𑁆𑀞𑁄𑀯 𑀢𑀲𑁆𑀲𑀸 𑀲𑀸𑀫𑀺𑀓𑀲𑁆𑀲 𑀢𑀼𑀝𑁆𑀞𑀺𑀲𑀸𑀲𑀦𑀁 𑀆𑀭𑁄𑀘𑁂𑀢𑀼𑀁 𑀅𑀕𑀫𑀸𑀲𑀺. 𑀲𑁄 𑀢𑁂𑀲𑀁 𑀇𑀗𑁆𑀕𑀺𑀢𑀁 𑀤𑀺𑀲𑁆𑀯𑀸 𑁋 ‘‘𑀤𑀲𑀩𑀮𑁂𑀦 𑀓𑀣𑀺𑀢𑀓𑀣𑀸 𑀦𑀺𑀧𑁆𑀨𑀦𑁆𑀦𑀸 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀓𑀣𑀁 𑀭𑀸𑀚𑀥𑀻𑀢𑀸𑀬 𑀓𑀣𑁂𑀲𑀺. 𑀭𑀸𑀚𑀥𑀻𑀢𑀸 𑀢𑀬𑀸 𑀦𑀺𑀫𑀦𑁆𑀢𑀺𑀢𑀁 𑀚𑀻𑀯𑀪𑀢𑁆𑀢𑀫𑁂𑀯 𑀫𑀗𑁆𑀕𑀮𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀕𑀘𑁆𑀙 𑀲𑀢𑁆𑀢𑀸𑀳𑀁 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀲𑁄 𑀤𑀸𑀭𑀓𑁄 𑀜𑀸𑀢𑀻𑀦𑀁 𑀲𑀦𑁆𑀢𑀢𑁆𑀢𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀲𑀻𑀢𑀮𑀪𑀸𑀯𑀁 𑀓𑀼𑀭𑀼𑀫𑀸𑀦𑁄 𑀚𑀸𑀢𑁄𑀢𑀺, 𑀲𑀻𑀯𑀮𑀺𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑁂 𑀯𑀲𑀺𑀢𑀢𑁆𑀢𑀸 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑀫𑁆𑀫𑀓𑁆𑀔𑀫𑁄 𑀅𑀳𑁄𑀲𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑀫𑀓𑀸𑀲𑀺. 𑀲𑀢𑁆𑀣𑀸𑀧𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁄𑀫𑀁 𑀧𑀮𑀺𑀧𑀣𑀁 𑀤𑀼𑀕𑁆𑀕𑀁, 𑀲𑀁𑀲𑀸𑀭𑀁 𑀫𑁄𑀳𑀫𑀘𑁆𑀘𑀕𑀸;

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀛𑀸𑀬𑀻, 𑀅𑀦𑁂𑀚𑁄 𑀅𑀓𑀣𑀁𑀓𑀣𑀻;

𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑁄, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁧𑁪; 𑀲𑀼. 𑀦𑀺. 𑁬𑁪𑁩);

𑀅𑀣 𑀦𑀁 𑀣𑁂𑀭𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀧𑀦 𑀢𑀬𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀮𑀪𑀦𑁆𑀢𑁄 𑀧𑀩𑁆𑀩𑀚𑁂𑀬𑁆𑀬𑀁, 𑀪𑀦𑁆𑀢𑁂’’𑀢𑀺. 𑀲𑀼𑀧𑁆𑀧𑀯𑀸𑀲𑀸 𑀢𑀁 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀓𑀣𑁂𑀢𑀻’’𑀢𑀺 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀺𑀁 𑀓𑀣𑁂𑀢𑀺, 𑀪𑀦𑁆𑀢𑁂’’𑀢𑀺? 𑀅𑀢𑁆𑀢𑀦𑀸 𑀅𑀦𑀼𑀪𑀼𑀢𑁆𑀢𑀕𑀩𑁆𑀪𑀯𑀸𑀲𑀤𑀼𑀓𑁆𑀔𑀁 𑀓𑀣𑁂𑀢𑁆𑀯𑀸 𑁋 ‘‘𑀢𑀼𑀫𑁆𑀳𑁂𑀳𑀺 𑀅𑀦𑀼𑀜𑁆𑀜𑀸𑀢𑁄 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀻𑀢𑀺. ‘‘𑀲𑀸𑀥𑀼 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺. 𑀣𑁂𑀭𑁄 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁄, ‘‘𑀲𑀻𑀯𑀮𑀺, 𑀢𑀼𑀬𑁆𑀳𑀁 𑀅𑀜𑁆𑀜𑁂𑀦 𑀑𑀯𑀸𑀤𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀢𑀬𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀅𑀦𑀼𑀪𑀼𑀢𑁆𑀢𑀤𑀼𑀓𑁆𑀔𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀸𑀳𑀻’’𑀢𑀺. ‘‘𑀪𑀦𑁆𑀢𑁂, 𑀧𑀩𑁆𑀩𑀚𑁆𑀚𑀸𑀬𑁂𑀯 𑀢𑀼𑀫𑁆𑀳𑀸𑀓𑀁 𑀪𑀸𑀭𑁄, 𑀬𑀁 𑀧𑀦 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀫𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀦 𑀧𑀞𑀫𑀓𑁂𑀲𑀯𑀝𑁆𑀝𑀺𑀬𑀸 𑀑𑀭𑁄𑀧𑀺𑀢𑀓𑁆𑀔𑀡𑁂𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀤𑀼𑀢𑀺𑀬𑀸𑀬 𑀑𑀭𑁄𑀧𑀺𑀢𑀓𑁆𑀔𑀡𑁂 𑀲𑀓𑀤𑀸𑀕𑀸𑀫𑀺𑀨𑀮𑁂, 𑀢𑀢𑀺𑀬𑀸𑀬 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀩𑁆𑀩𑁂𑀲𑀁𑀬𑁂𑀯 𑀓𑁂𑀲𑀸𑀦𑀁 𑀑𑀭𑁄𑀧𑀦𑀜𑁆𑀘 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀅𑀧𑀼𑀭𑁂 𑀅𑀧𑀘𑁆𑀙𑀸 𑀅𑀳𑁄𑀲𑀺.

𑀅𑀣 𑀪𑀺𑀓𑁆𑀔𑀼𑀲𑀗𑁆𑀖𑁂 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀳𑁄 𑀏𑀯𑀁 𑀧𑀼𑀜𑁆𑀜𑀯𑀸𑀧𑀺 𑀣𑁂𑀭𑁄 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀫𑀸𑀢𑀼𑀕𑀩𑁆𑀪𑁂 𑀯𑀲𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀽𑀴𑁆𑀳𑀕𑀩𑁆𑀪𑁂 𑀯𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑀺𑀦𑀸 𑀓𑀼𑀮𑀧𑀼𑀢𑁆𑀢𑁂𑀦 𑀇𑀫𑀸𑀬 𑀚𑀸𑀢𑀺𑀬𑀸 𑀓𑀢𑀓𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀼𑀭𑁂𑀢𑀭𑀫𑁂𑀯 𑀏𑀲 𑀓𑀼𑀮𑀧𑀼𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀤𑀸 𑀏𑀓𑁄 𑀧𑀘𑁆𑀘𑀦𑁆𑀢𑀭𑀸𑀚𑀸 ‘‘𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀦𑀕𑀭𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀺𑀳𑀸𑀲𑀺. 𑀅𑀣 𑀭𑀸𑀚𑀸 𑀫𑀸𑀢𑀼𑀬𑀸 𑀲𑀤𑁆𑀥𑀺𑀁 𑀲𑀫𑀸𑀦𑀘𑁆𑀙𑀦𑁆𑀤𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀔𑀦𑁆𑀥𑀸𑀯𑀸𑀭𑀦𑀕𑀭𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀤𑁆𑀯𑀸𑀭𑀁 𑀧𑀺𑀥𑀸𑀧𑁂𑀲𑀺, 𑀦𑀺𑀓𑁆𑀔𑀫𑀦𑁆𑀢𑀸𑀦𑀁 𑀧𑀯𑀺𑀲𑀦𑁆𑀢𑀸𑀦𑀜𑁆𑀘 𑀤𑁆𑀯𑀸𑀭𑀫𑀽𑀴𑁆𑀳𑀁 𑀅𑀳𑁄𑀲𑀺. 𑀅𑀣 𑀫𑀺𑀕𑀤𑀸𑀬𑀯𑀺𑀳𑀸𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀉𑀕𑁆𑀖𑁄𑀲𑁂𑀲𑀼𑀁. 𑀭𑀸𑀚𑀸 𑀲𑀼𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀲𑀻𑀢𑀺. 𑀧𑀘𑁆𑀘𑀦𑁆𑀢𑀭𑀸𑀚𑀸𑀧𑀺 𑀧𑀮𑀸𑀬𑀺. 𑀲𑁄 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀦𑀭𑀓𑀸𑀤𑀻𑀲𑀼 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀧𑀺 𑀫𑀸𑀢𑀼𑀬𑀸 𑀲𑀤𑁆𑀥𑀺𑀁 𑀇𑀫𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀫𑀦𑀼𑀪𑀯𑀺. 𑀢𑀲𑁆𑀲 𑀧𑀦 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀬𑀤𑀺𑀘𑁆𑀙𑀓𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀏𑀢𑁆𑀣 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁.

𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀧𑀼𑀜𑁆𑀜𑀩𑀮𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀺, 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺 𑀤𑁂𑀣𑀸’’𑀢𑀺. ‘‘𑀕𑀡𑁆𑀳, 𑀲𑀻𑀯𑀮𑀻’’𑀢𑀺. 𑀲𑁄 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑁄 𑀅𑀝𑀯𑀺𑀫𑀕𑁆𑀕𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀧𑀞𑀫𑀁 𑀤𑀺𑀝𑁆𑀞𑀦𑀺𑀕𑁆𑀭𑁄𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀸𑀦𑀁 𑀅𑀤𑀸𑀲𑀺. 𑀇𑀢𑀺 𑀲𑁄 𑁋

‘‘𑀦𑀺𑀕𑁆𑀭𑁄𑀥𑀁 𑀧𑀞𑀫𑀁 𑀧𑀲𑁆𑀲𑀺, 𑀤𑀼𑀢𑀺𑀬𑀁 𑀧𑀡𑁆𑀟𑀯𑀧𑀩𑁆𑀩𑀢𑀁;

𑀢𑀢𑀺𑀬𑀁 𑀅𑀘𑀺𑀭𑀯𑀢𑀺𑀬𑀁, 𑀘𑀢𑀼𑀢𑁆𑀣𑀁 𑀯𑀭𑀲𑀸𑀕𑀭𑀁.

‘‘𑀧𑀜𑁆𑀘𑀫𑀁 𑀳𑀺𑀫𑀯𑀦𑁆𑀢𑀁 𑀲𑁄, 𑀙𑀝𑁆𑀞𑀁 𑀙𑀤𑁆𑀤𑀦𑁆𑀢𑀼𑀧𑀸𑀕𑀫𑀺;

𑀲𑀢𑁆𑀢𑀫𑀁 𑀕𑀦𑁆𑀥𑀫𑀸𑀤𑀦𑀁, 𑀅𑀝𑁆𑀞𑀫𑀁 𑀅𑀣 𑀭𑁂𑀯𑀢’’𑀦𑁆𑀢𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁭; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁫𑁯 𑀲𑀻𑀯𑀮𑀺𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑁋

𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀢𑁆𑀢 𑀲𑀢𑁆𑀢 𑀤𑀺𑀯𑀲𑀸𑀦𑁂𑀯 𑀤𑀸𑀦𑀁 𑀅𑀤𑀁𑀲𑀼. 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀧𑀦 𑀦𑀸𑀕𑀤𑀢𑁆𑀢𑀤𑁂𑀯𑀭𑀸𑀚𑀸 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀏𑀓𑀤𑀺𑀯𑀲𑀁 𑀔𑀻𑀭𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀺, 𑀏𑀓𑀤𑀺𑀯𑀲𑀁 𑀲𑀧𑁆𑀧𑀺𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀆𑀳 𑁋 ‘‘𑀆𑀯𑀼𑀲𑁄, 𑀇𑀫𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑁂𑀯 𑀥𑁂𑀦𑀼𑀬𑁄 𑀤𑀼𑀬𑁆𑀳𑀫𑀸𑀦𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀤𑀥𑀺𑀦𑀺𑀫𑁆𑀫𑀣𑀦𑀁, 𑀓𑀼𑀢𑁄 𑀢𑁂, 𑀤𑁂𑀯𑀭𑀸𑀚, 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀪𑀦𑁆𑀢𑁂, 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀔𑀻𑀭𑀲𑀮𑀸𑀓𑀪𑀢𑁆𑀢𑀤𑀸𑀦𑀲𑁆𑀲𑁂𑀢𑀁 𑀨𑀮’’𑀦𑁆𑀢𑀺 𑀤𑁂𑀯𑀭𑀸𑀚𑀸 𑀆𑀳.

𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺. 𑀓𑀣𑀁? 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀓𑀺𑀭 𑀓𑀦𑀺𑀝𑁆𑀞𑀪𑀸𑀢𑀸 𑀭𑁂𑀯𑀢𑁄 𑀧𑀩𑁆𑀩𑀚𑀺𑀢𑁄, 𑀲𑁄 𑀅𑀪𑀺𑀭𑀫𑁂𑀬𑁆𑀬 𑀯𑀸 𑀦 𑀯𑀸, 𑀕𑀦𑁆𑀢𑁆𑀯𑀸 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀪𑀕𑀯𑀸 𑀭𑁂𑀯𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑁂 𑀯𑀸𑀭𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀬𑀸𑀘𑀺𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑁋 𑀲𑀸𑀭𑀺𑀧𑀼𑀢𑁆𑀢, 𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀳𑀻𑀢𑀺. 𑀣𑁂𑀭𑁄 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑁋 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄, 𑀕𑀦𑁆𑀢𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀲𑀩𑁆𑀩𑁂𑀲𑀁𑀬𑁂𑀯 𑀆𑀭𑁄𑀘𑁂𑀲𑀺. 𑀤𑀲𑀩𑀮𑀲𑁆𑀲 𑀘𑀸𑀭𑀺𑀓𑀢𑁆𑀣𑀸𑀬 𑀕𑀫𑀦𑀓𑀸𑀮𑁂 𑀑𑀳𑀺𑀬𑁆𑀬𑀫𑀸𑀦𑀓𑀪𑀺𑀓𑁆𑀔𑀽 𑀦𑀸𑀫 𑀅𑀧𑁆𑀧𑀓𑀸 𑀳𑁄𑀦𑁆𑀢𑀺, ‘‘𑀲𑀢𑁆𑀣𑀼 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀫𑀥𑀼𑀭𑀥𑀫𑁆𑀫𑀓𑀣𑀁 𑀯𑀸 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀬𑁂𑀪𑀼𑀬𑁆𑀬𑁂𑀦 𑀕𑀦𑁆𑀢𑀼𑀓𑀸𑀫𑀸 𑀩𑀳𑀼𑀢𑀭𑀸𑀯 𑀳𑁄𑀦𑁆𑀢𑀺. 𑀇𑀢𑀺 𑀲𑀢𑁆𑀣𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 ‘‘𑀭𑁂𑀯𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀦𑁆𑀢𑁄.

𑀅𑀣𑁂𑀓𑀲𑁆𑀫𑀺𑀁 𑀧𑀤𑁂𑀲𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑁂𑀥𑀸𑀧𑀣𑁄, 𑀓𑀢𑀭𑀫𑀕𑁆𑀕𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀕𑀘𑁆𑀙𑀢𑀽’’𑀢𑀺? ‘‘𑀓𑀢𑀭𑀫𑀕𑁆𑀕𑁄, 𑀆𑀦𑀦𑁆𑀤, 𑀉𑀚𑀼𑀓𑁄’’𑀢𑀺? ‘‘𑀪𑀦𑁆𑀢𑁂, 𑀉𑀚𑀼𑀫𑀕𑁆𑀕𑁄 𑀢𑀺𑀁𑀲𑀬𑁄𑀚𑀦𑀺𑀓𑁄 𑀅𑀫𑀦𑀼𑀲𑁆𑀲𑀧𑀣𑁄. 𑀧𑀭𑀺𑀳𑀸𑀭𑀫𑀕𑁆𑀕𑁄 𑀧𑀦 𑀲𑀝𑁆𑀞𑀺𑀬𑁄𑀚𑀦𑀺𑀓𑁄 𑀔𑁂𑀫𑁄 𑀲𑀼𑀪𑀺𑀓𑁆𑀔𑁄’’𑀢𑀺. ‘‘𑀆𑀦𑀦𑁆𑀤, 𑀲𑀻𑀯𑀮𑀺, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀆𑀕𑀢𑁄’’𑀢𑀺. ‘‘𑀢𑁂𑀦 𑀳𑀺 𑀲𑀗𑁆𑀖𑁄 𑀉𑀚𑀼𑀫𑀕𑁆𑀕𑀫𑁂𑀯 𑀕𑀘𑁆𑀙𑀢𑀼, 𑀲𑀻𑀯𑀮𑀺𑀲𑁆𑀲 𑀧𑀼𑀜𑁆𑀜𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀸’’𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀧𑀼𑀜𑁆𑀜𑀯𑀻𑀫𑀁𑀲𑀦𑀢𑁆𑀣𑀁 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀅𑀪𑀺𑀭𑀼𑀳𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁩).

𑀫𑀕𑁆𑀕𑀁 𑀅𑀪𑀺𑀭𑀼𑀳𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀗𑁆𑀖𑁄 𑀬𑁄𑀚𑀦𑁂 𑀬𑁄𑀚𑀦𑁂 𑀞𑀸𑀦𑁂 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀲𑀦𑀢𑁆𑀣𑀸𑀬 𑀯𑀺𑀳𑀸𑀭𑁂 𑀧𑀝𑀺𑀬𑀸𑀤𑁂𑀲𑀺. 𑀤𑁂𑀯𑀧𑀼𑀢𑁆𑀢𑀸 𑀭𑀜𑁆𑀜𑀸 𑀧𑁂𑀲𑀺𑀢𑀓𑀫𑁆𑀫𑀓𑀸𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑁋 ‘‘𑀓𑀳𑀁, 𑀅𑀬𑁆𑀬𑁄 𑀲𑀻𑀯𑀮𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀣𑁂𑀭𑁄 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑀼𑀜𑁆𑀚𑀺. 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀲𑀢𑁆𑀣𑀸 𑀲𑀓𑁆𑀓𑀸𑀭𑀁 𑀅𑀦𑀼𑀪𑀯𑀦𑁆𑀢𑁄 𑀤𑁂𑀯𑀲𑀺𑀓𑀁 𑀬𑁄𑀚𑀦𑀧𑀭𑀫𑀁 𑀕𑀦𑁆𑀢𑁆𑀯𑀸 𑀢𑀺𑀁𑀲𑀬𑁄𑀚𑀦𑀺𑀓𑀁 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑁆𑀫 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀢𑁄, 𑀣𑁂𑀭𑁄 𑀲𑀢𑁆𑀣𑀼 𑀆𑀕𑀫𑀦𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀳𑁄𑀦𑀓𑀯𑀺𑀳𑀸𑀭𑁂 𑀤𑀲𑀩𑀮𑀲𑁆𑀲 𑀕𑀦𑁆𑀥𑀓𑀼𑀝𑀺𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀘 𑀇𑀤𑁆𑀥𑀺𑀬𑀸 𑀫𑀸𑀧𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀕𑀢𑁄. 𑀲𑀢𑁆𑀣𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 𑀫𑀕𑁆𑀕𑁂𑀦 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀅𑀣 𑀢𑀣𑀸𑀕𑀢𑁂 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀽 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀸𑀦𑀺 𑀧𑀯𑀺𑀲𑀺𑀁𑀲𑀼. 𑀤𑁂𑀯𑀢𑀸 ‘‘𑀅𑀓𑀸𑀮𑁄 𑀆𑀳𑀸𑀭𑀲𑁆𑀲𑀸’’𑀢𑀺 𑀅𑀝𑁆𑀞𑀯𑀺𑀥𑀁 𑀧𑀸𑀦𑀓𑀁 𑀆𑀳𑀭𑀺𑀁𑀲𑀼. 𑀲𑀢𑁆𑀣𑀸 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀸𑀦𑀓𑀁 𑀧𑀺𑀯𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀦𑀼𑀪𑀯𑀦𑁆𑀢𑀲𑁆𑀲𑁂𑀯 𑀅𑀤𑁆𑀥𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄.

𑀅𑀣𑁂𑀓𑀘𑁆𑀘𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀽 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀁 𑀉𑀧𑁆𑀧𑀸𑀤𑀬𑀺𑀁𑀲𑀼 𑁋 ‘‘𑀤𑀲𑀩𑀮𑁄 ‘𑀫𑀬𑁆𑀳𑀁 𑀅𑀕𑁆𑀕𑀲𑀸𑀯𑀓𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸’𑀢𑀺 𑀯𑀢𑁆𑀯𑀸 𑀏𑀯𑀭𑀽𑀧𑀁 𑀦𑀯𑀓𑀫𑁆𑀫𑀺𑀓𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑀼𑀁 𑀆𑀕𑀢𑁄, 𑀇𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀚𑁂𑀢𑀯𑀦𑀯𑀺𑀳𑀸𑀭𑁄 𑀯𑀸 𑀯𑁂𑀴𑀼𑀯𑀦𑀯𑀺𑀳𑀸𑀭𑀸𑀤𑀬𑁄 𑀯𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺? 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀏𑀯𑀭𑀽𑀧𑀲𑁆𑀲 𑀦𑀯𑀓𑀫𑁆𑀫𑀲𑁆𑀲 𑀓𑀸𑀭𑀓𑁄, 𑀓𑀺𑀁 𑀦𑀸𑀫 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺? 𑀅𑀣 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀺 𑀇𑀥 𑀘𑀺𑀭𑀁 𑀯𑀲𑀦𑁆𑀢𑁂 𑀇𑀤𑀁 𑀞𑀸𑀦𑀁 𑀆𑀓𑀺𑀡𑁆𑀡𑀁 𑀪𑀯𑀺𑀲𑁆𑀲𑀢𑀺, 𑀆𑀭𑀜𑁆𑀜𑀓𑀸 𑀦𑀸𑀫 𑀪𑀺𑀓𑁆𑀔𑀽 𑀧𑀯𑀺𑀯𑁂𑀓𑀢𑁆𑀣𑀺𑀓𑀸 𑀳𑁄𑀦𑁆𑀢𑀺, 𑀭𑁂𑀯𑀢𑀲𑁆𑀲 𑀨𑀸𑀲𑀼𑀯𑀺𑀳𑀸𑀭𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀣𑁂𑀭𑀲𑁆𑀲 𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁄. 𑀣𑁂𑀭𑁄𑀧𑀺 𑀏𑀓𑀓𑁄𑀯 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀺𑀦𑁆𑀦𑁄 𑀲𑀢𑁆𑀣𑀸𑀭𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺.

𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 𑁋 ‘‘𑀭𑁂𑀯𑀢, 𑀇𑀤𑀁 𑀯𑀸𑀴𑀫𑀺𑀕𑀝𑁆𑀞𑀸𑀦𑀁, 𑀘𑀡𑁆𑀟𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀢𑁂𑀲𑀁 𑀫𑁂, 𑀪𑀦𑁆𑀢𑁂, 𑀲𑀤𑁆𑀤𑀁 𑀲𑀼𑀡𑀢𑁄 𑀅𑀭𑀜𑁆𑀜𑀧𑀻𑀢𑀺 𑀦𑀸𑀫 𑀉𑀧𑁆𑀧𑀦𑁆𑀦𑀸’’𑀢𑀺. 𑀲𑀢𑁆𑀣𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀧𑀜𑁆𑀘𑀳𑀺 𑀕𑀸𑀣𑀸𑀲𑀢𑁂𑀳𑀺 𑀅𑀭𑀜𑁆𑀜𑀸𑀦𑀺𑀲𑀁𑀲𑀁 𑀦𑀸𑀫 𑀓𑀣𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀭𑁂𑀯𑀢𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀣𑁂𑀭𑀲𑁆𑀲 𑀅𑀯𑀡𑁆𑀡𑁄 𑀓𑀣𑀺𑀢𑁄, 𑀢𑁂𑀲𑀁 𑀓𑀢𑁆𑀢𑀭𑀬𑀝𑁆𑀞𑀺𑀉𑀧𑀸𑀳𑀦𑀢𑁂𑀮𑀦𑀸𑀴𑀺𑀙𑀢𑁆𑀢𑀸𑀦𑀁 𑀧𑀫𑀼𑀲𑁆𑀲𑀦𑀪𑀸𑀯𑀫𑀓𑀸𑀲𑀺. 𑀢𑁂 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀦𑀺𑀯𑀢𑁆𑀢𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀕𑀘𑁆𑀙𑀦𑁆𑀢𑀸𑀧𑀺 𑀢𑀁 𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀞𑀫𑀜𑁆𑀳𑀺 𑀢𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸, 𑀢𑀁𑀤𑀺𑀯𑀲𑀁 𑀧𑀦 𑀯𑀺𑀲𑀫𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀦𑁆𑀢𑀸 𑀚𑀡𑁆𑀡𑀼𑀓𑁂𑀳𑀺 𑀕𑀘𑁆𑀙𑀦𑁆𑀢𑀺. 𑀢𑁂 𑀕𑀼𑀫𑁆𑀩𑁂 𑀘 𑀕𑀘𑁆𑀙𑁂 𑀘 𑀓𑀡𑁆𑀟𑀓𑁂 𑀘 𑀫𑀤𑁆𑀤𑀦𑁆𑀢𑀸 𑀅𑀢𑁆𑀢𑀦𑀸 𑀯𑀲𑀺𑀢𑀲𑀪𑀸𑀕𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀤𑀺𑀭𑀔𑀸𑀡𑀼𑀓𑁂 𑀮𑀕𑁆𑀕𑀺𑀢𑀁 𑀅𑀢𑁆𑀢𑀦𑁄 𑀙𑀢𑁆𑀢𑀁 𑀲𑀜𑁆𑀚𑀸𑀦𑀦𑁆𑀢𑀺, 𑀉𑀧𑀸𑀳𑀦𑀁 𑀓𑀢𑁆𑀢𑀭𑀬𑀝𑁆𑀞𑀺𑀁 𑀢𑁂𑀮𑀦𑀸𑀴𑀺𑀜𑁆𑀘 𑀲𑀜𑁆𑀚𑀸𑀦𑀦𑁆𑀢𑀺. 𑀢𑁂 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀇𑀤𑁆𑀥𑀺𑀫𑀸 𑀅𑀬𑀁 𑀪𑀺𑀓𑁆𑀔𑀽’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀫𑀸𑀤𑀸𑀬 ‘‘𑀤𑀲𑀩𑀮𑀲𑁆𑀲 𑀧𑀝𑀺𑀬𑀢𑁆𑀢𑀲𑀓𑁆𑀓𑀸𑀭𑁄 𑀦𑀸𑀫 𑀏𑀯𑀭𑀽𑀧𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀸 𑀅𑀕𑀫𑀁𑀲𑀼.

𑀧𑀼𑀭𑀢𑁄 𑀆𑀕𑀢𑁂 𑀪𑀺𑀓𑁆𑀔𑀽, 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸, 𑀅𑀢𑁆𑀢𑀦𑁄 𑀕𑁂𑀳𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀼𑀘𑁆𑀙𑀺 𑁋 ‘‘𑀫𑀦𑀸𑀧𑀁 𑀦𑀼 𑀔𑁄, 𑀪𑀦𑁆𑀢𑁂, 𑀭𑁂𑀯𑀢𑀲𑁆𑀲 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺? ‘‘𑀫𑀦𑀸𑀧𑀁, 𑀉𑀧𑀸𑀲𑀺𑀓𑁂, 𑀦𑀦𑁆𑀤𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀧𑀝𑀺𑀪𑀸𑀕𑀁 𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺. 𑀅𑀣 𑀢𑁂𑀲𑀁 𑀧𑀘𑁆𑀙𑀢𑁄 𑀆𑀕𑀢𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀫𑀦𑀸𑀧𑀁, 𑀅𑀬𑁆𑀬𑀸, 𑀭𑁂𑀯𑀢𑀲𑁆𑀲 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺? ‘‘𑀫𑀸 𑀧𑀼𑀘𑁆𑀙, 𑀉𑀧𑀸𑀲𑀺𑀓𑁂, 𑀓𑀣𑁂𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑀸𑀦𑀁, 𑀏𑀢𑀁 𑀉𑀚𑁆𑀚𑀗𑁆𑀕𑀮𑀲𑀓𑁆𑀔𑀭𑀧𑀸𑀲𑀸𑀡𑀯𑀺𑀲𑀫𑀔𑀤𑀺𑀭𑀯𑀦𑀁 𑀏𑀯, 𑀢𑀢𑁆𑀣 𑀲𑁄 𑀪𑀺𑀓𑁆𑀔𑀼 𑀯𑀲𑀢𑀻’’𑀢𑀺.

𑀯𑀺𑀲𑀸𑀔𑀸 𑀧𑀼𑀭𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀓𑁂𑀲𑀁 𑀦𑀼 𑀔𑁄 𑀓𑀣𑀸 𑀲𑀘𑁆𑀘𑀸’’𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀤𑀲𑀩𑀮𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀏𑀓𑀘𑁆𑀘𑁂 𑀅𑀬𑁆𑀬𑀸 𑀯𑀡𑁆𑀡𑁂𑀦𑁆𑀢𑀺, 𑀏𑀓𑀘𑁆𑀘𑁂 𑀦𑀺𑀦𑁆𑀤𑀦𑁆𑀢𑀺, 𑀓𑀺𑀫𑁂𑀢𑀁, 𑀪𑀦𑁆𑀢𑁂’’𑀢𑀺? ‘‘𑀯𑀺𑀲𑀸𑀔𑁂, 𑀭𑀫𑀡𑀺𑀬𑀁 𑀯𑀸 𑀳𑁄𑀢𑀼 𑀫𑀸 𑀯𑀸, 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀭𑀺𑀬𑀸𑀦𑀁 𑀘𑀺𑀢𑁆𑀢𑀁 𑀭𑀫𑀢𑀺, 𑀢𑀤𑁂𑀯 𑀞𑀸𑀦𑀁 𑀭𑀫𑀡𑀺𑀬𑀁 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺. (𑀥. 𑀧. 𑁯𑁮; 𑀣𑁂𑀭𑀕𑀸. 𑁯𑁯𑁧; 𑀲𑀁. 𑀦𑀺. 𑁧.𑁨𑁬𑁧);

𑀅𑀧𑀭𑀪𑀸𑀕𑁂 𑀪𑀕𑀯𑀸 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑀸𑀪𑀻𑀦𑀁 𑀬𑀤𑀺𑀤𑀁, 𑀲𑀻𑀯𑀮𑀻’’𑀢𑀺 (𑀅. 𑀦𑀺. 𑁧.𑁧𑁯𑁮, 𑁨𑁦𑁭) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑁫𑁪. 𑀅𑀣𑀸𑀬𑀲𑁆𑀫𑀸 𑀲𑀻𑀯𑀮𑀺𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀅𑀦𑀼𑀢𑁆𑀢𑀸𑀦𑀢𑁆𑀣𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑀺𑀲𑁆𑀲𑀸𑀫.

𑁫𑁫. 𑀲𑀻𑀮𑀁 𑀢𑀲𑁆𑀲 𑀅𑀲𑀗𑁆𑀔𑁂𑀬𑁆𑀬𑀦𑁆𑀢𑀺 𑀢𑀲𑁆𑀲 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀲𑀻𑀮𑀁 𑀅𑀲𑀗𑁆𑀔𑁂𑀬𑁆𑀬𑀁.

‘‘𑀦𑀯 𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀅𑀲𑀻𑀢𑀺𑀲𑀢𑀓𑁄𑀝𑀺𑀬𑁄;

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲𑀸 𑀘 𑀧𑀼𑀦𑀸𑀧𑀭𑁂.

‘‘𑀏𑀢𑁂 𑀲𑀁𑀯𑀭𑀯𑀺𑀦𑀬𑀸, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸;

𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀲𑀺𑀓𑁆𑀔𑀸𑀯𑀺𑀦𑀬𑀲𑀁𑀯𑀭𑁂’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁦; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩𑁭) 𑁋

𑀏𑀯𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀦𑀁 𑀲𑀸𑀯𑀓𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀪𑀕𑀯𑀢𑁄 𑀧𑀦 𑀲𑀻𑀮𑀁 𑀅𑀲𑀗𑁆𑀔𑁂𑀬𑁆𑀬𑀫𑁂𑀯 𑀲𑀁𑀔𑀸𑀢𑀼𑀁 𑀕𑀡𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀯𑀚𑀺𑀭𑀽𑀧𑀫𑁄 𑀬𑀣𑀸 𑀯𑀚𑀺𑀭𑀁 𑀇𑀦𑁆𑀤𑀦𑀻𑀮𑀫𑀡𑀺𑀯𑁂𑀴𑀼𑀭𑀺𑀬𑀫𑀡𑀺𑀨𑀮𑀺𑀓𑀫𑀲𑀸𑀭𑀕𑀮𑁆𑀮𑀸𑀤𑀻𑀦𑀺 𑀭𑀢𑀦𑀸𑀦𑀺 𑀯𑀺𑀚𑁆𑀛𑀢𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀫𑀸𑀥𑀺 𑀧𑀝𑀺𑀧𑀓𑁆𑀔𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀯𑀺𑀚𑁆𑀛𑀢𑀺 𑀪𑀺𑀦𑁆𑀤𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀗𑁆𑀔𑁂𑀬𑁆𑀬𑀁 𑀜𑀸𑀡𑀯𑀭𑀁 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑁂 𑀘 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀁 𑀲𑀬𑀫𑁆𑀪𑀽𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀜𑀸𑀡𑀲𑀫𑀽𑀳𑀁 𑀅𑀲𑀗𑁆𑀔𑁂𑀬𑁆𑀬𑀁, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀪𑁂𑀤𑁂𑀦 𑀲𑀁𑀔𑀸𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀫𑀼𑀢𑁆𑀢𑀺 𑀘 𑀅𑀦𑁄𑀧𑀫𑀸𑀢𑀺 𑀲𑀁𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀺𑀓𑀸 𑀘𑀢𑀲𑁆𑀲𑁄 𑀯𑀺𑀫𑀼𑀢𑁆𑀢𑀺𑀬𑁄 𑀅𑀦𑀼𑀧𑀫𑀸 𑀉𑀧𑀫𑀸𑀭𑀳𑀺𑀢𑀸 ‘‘𑀇𑀫𑀸 𑀯𑀺𑀬 𑀪𑀽𑀢𑀸’’𑀢𑀺 𑀉𑀧𑀫𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀻𑀯𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀯𑀗𑁆𑀕𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀥𑀫𑁆𑀫𑀁 𑀲𑁄𑀢𑀼𑀁 𑀕𑀘𑁆𑀙𑀦𑁆𑀢𑁂𑀳𑀺 𑀦𑀕𑀭𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀪𑀺𑀓𑁆𑀔𑀼𑀁 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑁋 ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀸 𑀩𑁆𑀬𑀸𑀓𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀉𑀪𑀬𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀸𑀢𑀼 𑀧𑀭𑀺𑀩𑁆𑀩𑀸𑀚𑀺𑀓𑀸𑀪𑀸𑀯𑁂𑀦 𑀅𑀧𑀭𑀪𑀸𑀕𑁂 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀧𑀸𑀓𑀝𑁄 𑀯𑀗𑁆𑀕𑀻𑀲𑁄𑀢𑀺 𑀘 𑀮𑀤𑁆𑀥𑀦𑀸𑀫𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁄 𑀆𑀘𑀭𑀺𑀬𑀁 𑀆𑀭𑀸𑀥𑁂𑀢𑁆𑀯𑀸 𑀙𑀯𑀲𑀻𑀲𑀚𑀸𑀦𑀦𑀫𑀦𑁆𑀢𑀁 𑀦𑀸𑀫 𑀲𑀺𑀓𑁆𑀔𑀺𑀢𑁆𑀯𑀸 𑀙𑀯𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 𑁋 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀚𑀸𑀦𑀸𑀢𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀚𑀺𑀯𑀺𑀓𑀸𑀬 𑀫𑀕𑁆𑀕𑁄’’𑀢𑀺 𑀯𑀗𑁆𑀕𑀻𑀲𑀁 𑀕𑀳𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀯𑀺𑀘𑀭𑀺𑀁𑀲𑀼. 𑀯𑀗𑁆𑀕𑀻𑀲𑁄 𑀢𑀺𑀯𑀲𑁆𑀲𑀫𑀢𑁆𑀣𑀓𑁂 𑀫𑀢𑀸𑀦𑀫𑁆𑀧𑀺 𑀲𑀻𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 𑁋 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀸𑀘𑁆𑀙𑁂𑀤𑀦𑀢𑁆𑀣𑀁 𑀢𑁂 𑀢𑁂 𑀚𑀦𑁂 𑀆𑀯𑀸𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀢𑀺𑀁 𑀓𑀣𑀸𑀧𑁂𑀢𑀺. 𑀢𑁂𑀦 𑀢𑀲𑁆𑀫𑀺𑀁 𑀫𑀳𑀸𑀚𑀦𑁄 𑀅𑀪𑀺𑀧𑁆𑀧𑀲𑀻𑀤𑀢𑀺. 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀳𑀢𑁆𑀣𑀢𑁄 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀮𑀪𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀯𑀗𑁆𑀕𑀻𑀲𑀁 𑀆𑀤𑀸𑀬 𑀬𑀣𑀸𑀭𑀼𑀘𑀺 𑀯𑀺𑀘𑀭𑀺𑀁𑀲𑀼. 𑀯𑀗𑁆𑀕𑀻𑀲𑁄 𑀲𑀢𑁆𑀣𑀼 𑀕𑀼𑀡𑁂 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀸𑀬𑀸𑀬 𑀢𑀁 𑀆𑀯𑀝𑁆𑀝𑁂𑀲𑁆𑀲𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼.

𑀯𑀗𑁆𑀕𑀻𑀲𑁄 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀁 𑀧𑀼𑀘𑁆𑀙𑀺 𑁋 ‘‘𑀯𑀗𑁆𑀕𑀻𑀲, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀢𑀻’’𑀢𑀺? ‘‘𑀆𑀫, 𑀪𑁄 𑀕𑁄𑀢𑀫, 𑀙𑀯𑀲𑀻𑀲𑀫𑀦𑁆𑀢𑀁 𑀦𑀸𑀫𑁂𑀓𑀁 𑀚𑀸𑀦𑀸𑀫𑀺, 𑀢𑁂𑀦 𑀢𑀺𑀯𑀲𑁆𑀲𑀫𑀢𑁆𑀣𑀓𑁂 𑀫𑀢𑀸𑀦𑀫𑁆𑀧𑀺 𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀫𑀻’’𑀢𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀏𑀓𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁, 𑀏𑀓𑀁 𑀫𑀦𑀼𑀲𑁆𑀲𑁂𑀲𑀼, 𑀏𑀓𑀁 𑀤𑁂𑀯𑁂𑀲𑀼, 𑀏𑀓𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀻𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑁄 𑀧𑀞𑀫𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸, ‘‘𑀪𑁄 𑀕𑁄𑀢𑀫, 𑀅𑀬𑀁 𑀲𑀢𑁆𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀳. 𑀲𑀸𑀥𑀼 𑀯𑀗𑁆𑀕𑀻𑀲, 𑀲𑀼𑀝𑁆𑀞𑀼 𑀢𑀬𑀸 𑀤𑀺𑀝𑁆𑀞𑀁, ‘‘𑀅𑀬𑀁 𑀲𑀢𑁆𑀢𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺. ‘‘𑀅𑀬𑀁 𑀓𑀼𑀳𑀺’’𑀦𑁆𑀢𑀺? ‘‘𑀤𑁂𑀯𑀮𑁄𑀓𑁂’’𑀢𑀺. 𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀦 𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀦𑁆𑀢𑁄 𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀧𑀲𑁆𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀲𑀓𑁆𑀓𑁄𑀲𑀺, 𑀯𑀗𑁆𑀕𑀻𑀲𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀲𑁆𑀲𑀣, 𑀪𑁄 𑀕𑁄𑀢𑀫, 𑀉𑀧𑀧𑀭𑀺𑀓𑁆𑀔𑀸𑀫𑀺 𑀢𑀸𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀩𑀸𑀳𑀺𑀭𑀓𑀫𑀦𑁆𑀢𑁂𑀦 𑀔𑀻𑀡𑀸𑀲𑀯𑀲𑁆𑀲 𑀲𑀻𑀲𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀣𑀲𑁆𑀲 𑀫𑀢𑁆𑀣𑀓𑀢𑁄 𑀲𑁂𑀤𑁄 𑀫𑀼𑀘𑁆𑀘𑀺. 𑀲𑁄 𑀮𑀚𑁆𑀚𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺’’. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀮𑀫𑀲𑀺, 𑀯𑀗𑁆𑀕𑀻𑀲𑀸’’𑀢𑀺 𑀆𑀳. ‘‘𑀆𑀫, 𑀪𑁄 𑀕𑁄𑀢𑀫, 𑀇𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀲𑀘𑁂 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀓𑀣𑁂𑀣𑀸’’𑀢𑀺. ‘‘𑀯𑀗𑁆𑀕𑀻𑀲, 𑀅𑀳𑀁 𑀏𑀢𑀫𑁆𑀧𑀺 𑀚𑀸𑀦𑀸𑀫𑀺, 𑀇𑀢𑁄 𑀉𑀢𑁆𑀢𑀭𑀺𑀧𑀺 𑀚𑀸𑀦𑀸𑀫𑀻’’𑀢𑀺 𑀯𑀢𑁆𑀯𑀸 𑁋

‘‘𑀘𑀼𑀢𑀺𑀁 𑀬𑁄 𑀯𑁂𑀤𑀺 𑀲𑀢𑁆𑀢𑀸𑀦𑀁, 𑀉𑀧𑀧𑀢𑁆𑀢𑀺𑀜𑁆𑀘 𑀲𑀩𑁆𑀩𑀲𑁄;

𑀅𑀲𑀢𑁆𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸;

𑀔𑀻𑀡𑀸𑀲𑀯𑀁 𑀅𑀭𑀳𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁧𑁯-𑁪𑁨𑁦; 𑀲𑀼. 𑀦𑀺. 𑁬𑁪𑁮-𑁬𑁪𑁯) 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀲𑁄 𑀢𑁂𑀦 𑀳𑀺, 𑀪𑁄 𑀕𑁄𑀢𑀫, 𑀢𑀁 𑀯𑀺𑀚𑁆𑀚𑀁 𑀫𑁂 𑀤𑁂𑀣𑀸𑀢𑀺 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀅𑀫𑁆𑀳𑁂𑀳𑀺 𑀲𑀫𑀸𑀦𑀮𑀺𑀗𑁆𑀕𑀲𑁆𑀲 𑀤𑁂𑀫𑀸’’𑀢𑀺 𑀆𑀳. 𑀯𑀗𑁆𑀕𑀻𑀲𑁄 ‘‘𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀬𑀸 𑀇𑀫𑀁 𑀫𑀦𑁆𑀢𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂 𑀉𑀧𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀢𑀼𑀫𑁆𑀳𑁂 𑀫𑀬𑀺 𑀧𑀩𑁆𑀩𑀚𑀦𑁆𑀢𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀢𑁂𑀦 𑀪𑀤𑁆𑀤𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑁄 𑀫𑀦𑁆𑀢𑀢𑁆𑀣𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀤𑀸 𑀘 𑀣𑁂𑀭𑁄 𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀞𑀺𑀢𑁄 𑀳𑁄𑀢𑀺, 𑀢𑀁 𑀪𑀕𑀯𑀸 𑀆𑀡𑀸𑀧𑁂𑀲𑀺 𑁋 ‘‘𑀦𑀺𑀕𑁆𑀭𑁄𑀥𑀓𑀧𑁆𑀧, 𑀇𑀫𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀣𑁂𑀭𑁄 𑀲𑀢𑁆𑀣𑀼 𑀆𑀡𑀸𑀬 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 ‘‘𑀫𑀦𑁆𑀢𑀧𑀭𑀺𑀯𑀸𑀭𑀁 𑀢𑀸𑀯 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀆𑀘𑀺𑀓𑁆𑀔𑀺. 𑀲𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀲𑀚𑁆𑀛𑀸𑀬𑀦𑁆𑀢𑁄𑀯 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀓𑀺𑀁, 𑀪𑁄 𑀯𑀗𑁆𑀕𑀻𑀲, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀳𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫 𑀲𑀺𑀓𑁆𑀔𑀺𑀢𑀁’’. ‘‘𑀢𑁂𑀦 𑀳𑀺 𑀏𑀳𑀺 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀲𑀺𑀧𑁆𑀧𑀲𑀺𑀓𑁆𑀔𑀦𑁂𑀦, 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀦 𑀫𑀬𑁆𑀳𑀁 𑀢𑀼𑀫𑁆𑀳𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀢𑁆𑀯𑀫𑁆𑀧𑀺 𑀤𑀸𑀦𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀲𑀁 𑀆𑀧𑀦𑁆𑀦𑁄, 𑀫𑀸𑀬𑀸𑀬 𑀆𑀯𑀝𑁆𑀝𑀺𑀢𑁄, 𑀓𑀺𑀁 𑀫𑀬𑀁 𑀢𑀯 𑀲𑀦𑁆𑀢𑀺𑀓𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀓𑁆𑀓𑀫𑀺𑀁𑀲𑀼. 𑀯𑀗𑁆𑀕𑀻𑀲𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺.

𑁯𑁬. 𑀏𑀯𑀁 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀅𑀦𑀼𑀢𑁆𑀢𑀸𑀦𑀢𑁆𑀣𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁯𑁯. 𑀧𑀪𑀸𑀳𑀺 𑀅𑀦𑀼𑀭𑀜𑁆𑀚𑀦𑁆𑀢𑁄𑀢𑀺 𑀲𑁄 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀦𑀻𑀮𑀧𑀻𑀢𑀸𑀤𑀺𑀙𑀩𑁆𑀩𑀡𑁆𑀡𑀧𑀪𑀸𑀳𑀺 𑀭𑀁𑀲𑀻𑀳𑀺 𑀅𑀦𑀼𑀭𑀜𑁆𑀚𑀦𑁆𑀢𑁄 𑀚𑀮𑀦𑁆𑀢𑁄 𑀲𑁄𑀪𑀬𑀫𑀸𑀦𑁄 𑀯𑀺𑀚𑁆𑀚𑁄𑀢𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀯𑁂𑀦𑁂𑀬𑁆𑀬𑀧𑀤𑀼𑀫𑀸𑀦𑀺 𑀲𑁄𑀢𑀺 𑀧𑀤𑀼𑀫𑀼𑀢𑁆𑀢𑀭𑀲𑀽𑀭𑀺𑀬𑁄 𑀅𑀢𑁆𑀢𑀦𑁄 𑀯𑀘𑀦𑀲𑀗𑁆𑀔𑀸𑀢𑁂𑀦 𑀲𑀽𑀭𑀺𑀬𑀭𑀁𑀲𑀺𑀬𑀸 𑀯𑁂𑀦𑁂𑀬𑁆𑀬𑀚𑀦𑀲𑀗𑁆𑀔𑀸𑀢𑀧𑀤𑀼𑀫𑀸𑀦𑀺 𑀯𑀺𑀲𑁂𑀲𑁂𑀦 𑀩𑁄𑀥𑁂𑀦𑁆𑀢𑁄 𑀧𑀩𑁄𑀥𑁂𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀸𑀥𑀺𑀕𑀫𑁂𑀦 𑀨𑀼𑀮𑁆𑀮𑀺𑀢𑀸𑀦𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁦. 𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑁆𑀧𑀦𑁆𑀦𑁄𑀢𑀺 𑁋

‘‘𑀅𑀦𑁆𑀢𑀭𑀸𑀬𑁂 𑀘 𑀦𑀺𑀬𑁆𑀬𑀸𑀦𑁂, 𑀩𑀼𑀤𑁆𑀥𑀢𑁆𑀢𑁂 𑀆𑀲𑀯𑀓𑁆𑀔𑀬𑁂;

𑀏𑀢𑁂𑀲𑀼 𑀘𑀢𑀼𑀝𑁆𑀞𑀸𑀦𑁂𑀲𑀼, 𑀩𑀼𑀤𑁆𑀥𑁄 𑀲𑀼𑀝𑁆𑀞𑀼 𑀯𑀺𑀲𑀸𑀭𑀤𑁄’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑁧𑁦𑁫. 𑀯𑀸𑀕𑀻𑀲𑁄 𑀯𑀸𑀤𑀺𑀲𑀽𑀤𑀦𑁄𑀢𑀺 𑀯𑀸𑀤𑀻𑀦𑀁 𑀧𑀡𑁆𑀟𑀺𑀢𑀚𑀦𑀸𑀦𑀁 𑀈𑀲𑁄 𑀧𑀥𑀸𑀦𑁄 ‘‘𑀯𑀸𑀤𑀻𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀤-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀓𑀢𑁆𑀣𑀧𑀭𑀢𑁆𑀣𑀯𑀸𑀤𑀁 𑀲𑀽𑀤𑀢𑀺 𑀧𑀕𑁆𑀖𑀭𑀸𑀧𑁂𑀢𑀺 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀯𑀸𑀤𑀺𑀲𑀽𑀤𑀦𑁄.

𑁧𑁧𑁦. 𑀫𑀸𑀭𑀫𑀲𑀦𑀸𑀢𑀺 𑀔𑀦𑁆𑀥𑀫𑀸𑀭𑀸𑀤𑀬𑁄 𑀧𑀜𑁆𑀘𑀫𑀸𑀭𑁂 𑀫𑀲𑀢𑀺 𑀧𑀭𑀸𑀫𑀲𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀫𑀸𑀭𑀫𑀲𑀦𑁄. 𑀤𑀺𑀝𑁆𑀞𑀺𑀲𑀽𑀤𑀦𑀸𑀢𑀺 𑀯𑁄𑀳𑀸𑀭𑀧𑀭𑀫𑀢𑁆𑀣𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀺𑀤𑀲𑁆𑀲𑀦𑀁 𑀲𑀽𑀤𑀢𑀺 𑀧𑀕𑁆𑀖𑀭𑀁 𑀤𑀻𑀧𑁂𑀢𑀻𑀢𑀺 𑀤𑀺𑀝𑁆𑀞𑀺𑀲𑀽𑀤𑀦𑁄.

𑁧𑁧𑁧. 𑀯𑀺𑀲𑁆𑀲𑀸𑀫𑀪𑀽𑀫𑀺 𑀲𑀦𑁆𑀢𑀸𑀦𑀦𑁆𑀢𑀺 𑀲𑀓𑀮𑀲𑀁𑀲𑀸𑀭𑀲𑀸𑀕𑀭𑁂 𑀲𑀦𑁆𑀢𑀸𑀦𑀁 𑀓𑀺𑀮𑀫𑀦𑁆𑀢𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀅𑀥𑀺𑀕𑀫𑀸𑀧𑀦𑁂𑀦 𑀯𑀺𑀲𑁆𑀲𑀫𑀪𑀽𑀫𑀺 𑀯𑀺𑀲𑁆𑀲𑀫𑀝𑁆𑀞𑀸𑀦𑀁 𑀯𑀽𑀧𑀲𑀫𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁨. 𑀢𑀢𑁄𑀳𑀁 𑀯𑀺𑀳𑀢𑀸𑀭𑀫𑁆𑀪𑁄𑀢𑀺 𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀤𑀲𑁆𑀲𑀦𑁂𑀦 𑀅𑀳𑀁 𑀯𑀺𑀳𑀢𑀸𑀭𑀫𑁆𑀪𑁄 𑀯𑀺𑀦𑀝𑁆𑀞𑀲𑀸𑀭𑀫𑁆𑀪𑁄, 𑀯𑀺𑀦𑀝𑁆𑀞𑀫𑀸𑀦𑁄 𑀦𑀺𑀫𑁆𑀫𑀤𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀲𑀁 𑀲𑀼𑀝𑁆𑀞𑀼 𑀬𑀸𑀘𑀺𑀁 𑀲𑀁𑀬𑀸𑀘𑀺𑀁 𑀆𑀭𑁄𑀘𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀗𑁆𑀕𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀦𑀦𑁆𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀜𑁆𑀘𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄𑀢𑀺𑀆𑀤𑀺 𑀲𑀩𑁆𑀩𑀁 𑀧𑀸𑀞𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀦𑀦𑁆𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀙𑀝𑁆𑀞𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀚𑁆𑀚𑀁 𑀅𑀪𑀺𑀦𑀻𑀳𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀢𑁆𑀣𑀸𑀧𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀅𑀫𑀘𑁆𑀘𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀩𑁄𑀥𑀺𑀲𑀢𑁆𑀢𑁂𑀦 𑀲𑀳 𑀏𑀓𑀤𑀺𑀯𑀲𑁂𑀬𑁂𑀯 𑀚𑀸𑀢𑁄, 𑀢𑀁𑀤𑀺𑀯𑀲𑀁𑀬𑁂𑀯 𑀦𑀁 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀩𑁄𑀥𑀺𑀭𑀼𑀓𑁆𑀔𑁄, 𑀭𑀸𑀳𑀼𑀮𑀫𑀸𑀢𑀸, 𑀘𑀢𑁆𑀢𑀸𑀭𑁄 𑀦𑀺𑀥𑀻, 𑀆𑀭𑁄𑀳𑀦𑀺𑀬𑀳𑀢𑁆𑀣𑀻, 𑀓𑀡𑁆𑀟𑀓𑁄, 𑀙𑀦𑁆𑀦𑁄, 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑁂 𑀲𑀢𑁆𑀢 𑀏𑀓𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀲𑀳𑀚𑀸𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀲𑀓𑀮𑀦𑀕𑀭𑀲𑁆𑀲 𑀉𑀤𑀕𑁆𑀕𑀘𑀺𑀢𑁆𑀢𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀉𑀤𑀸𑀬𑀻𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀣𑁄𑀓𑀁 𑀓𑀸𑀴𑀥𑀸𑀢𑀼𑀓𑀢𑁆𑀢𑀸 𑀧𑀦 𑀓𑀸𑀴𑀼𑀤𑀸𑀬𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀼𑀤𑁆𑀥𑀺𑀁 𑀅𑀕𑀫𑀸𑀲𑀺.

𑀅𑀧𑀭𑀪𑀸𑀕𑁂 𑀮𑁄𑀓𑀦𑀸𑀣𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀏𑀓𑀁 𑀅𑀫𑀘𑁆𑀘𑀁 ‘‘𑀧𑀼𑀢𑁆𑀢𑀁 𑀫𑁂 𑀇𑀥𑀸𑀦𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑁂 𑀲𑀢𑁆𑀣𑀸 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀩𑁆𑀩𑁂 𑀢𑀁𑀔𑀡𑀁𑀬𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀢𑁄 𑀧𑀝𑁆𑀞𑀸𑀬 𑀅𑀭𑀺𑀬𑀸 𑀦𑀸𑀫 𑀫𑀚𑁆𑀛𑀢𑁆𑀢𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀭𑀜𑁆𑀜𑀸 𑀧𑁂𑀲𑀺𑀢𑀲𑀸𑀲𑀦𑀁 𑀤𑀲𑀩𑀮𑀲𑁆𑀲 𑀦𑀸𑀭𑁄𑀘𑁂𑀲𑀺. 𑀭𑀸𑀚𑀸 𑀦𑁂𑀯 𑀕𑀢𑁄 𑀆𑀕𑀘𑁆𑀙𑀢𑀺, 𑀦 𑀲𑀸𑀲𑀦𑀁 𑀲𑀼𑀬𑁆𑀬𑀢𑀻𑀢𑀺 𑀅𑀧𑀭𑀫𑁆𑀧𑀺 𑀅𑀫𑀘𑁆𑀘𑀁 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀫𑁆𑀧𑀺 𑀢𑀣𑀸 𑀧𑀝𑀺𑀧𑀦𑁆𑀦𑁂 𑀅𑀧𑀭𑀫𑁆𑀧𑀻𑀢𑀺 𑀏𑀢𑁂𑀦 𑀦𑀬𑁂𑀦 𑀦𑀯𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂 𑀦𑀯 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀲𑀩𑁆𑀩𑁂 𑀕𑀦𑁆𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀸 𑀅𑀳𑁂𑀲𑀼𑀁.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁆𑀢𑀓𑀸 𑀚𑀦𑀸 𑀫𑀬𑀺 𑀲𑀺𑀦𑁂𑀳𑀸𑀪𑀸𑀯𑁂𑀦 𑀤𑀲𑀩𑀮𑀲𑁆𑀲 𑀇𑀥𑀸𑀕𑀫𑀦𑀢𑁆𑀣𑀸𑀬 𑀦 𑀓𑀺𑀜𑁆𑀘𑀺 𑀓𑀣𑀬𑀺𑀁𑀲𑀼, 𑀅𑀬𑀁 𑀔𑁄 𑀧𑀦 𑀉𑀤𑀸𑀬𑀻 𑀤𑀲𑀩𑀮𑁂𑀦 𑀲𑀫𑀯𑀬𑁄 𑀲𑀳𑀧𑀁𑀲𑀼𑀓𑀻𑀴𑀺𑀓𑁄, 𑀫𑀬𑀺 𑀘 𑀲𑀺𑀦𑁂𑀳𑀯𑀸, 𑀇𑀫𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀇𑀥𑀸𑀦𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀲𑀺. 𑀲𑁄 𑀧𑀦 𑀕𑀘𑁆𑀙𑀦𑁆𑀢𑁄 ‘‘𑀲𑀘𑀸𑀳𑀁, 𑀤𑁂𑀯, 𑀧𑀩𑁆𑀩𑀚𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀇𑀥𑀸𑀦𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑀸 ‘‘𑀧𑀩𑁆𑀩𑀚𑀺𑀢𑁄𑀧𑀺 𑀫𑀫 𑀧𑀼𑀢𑁆𑀢𑀁 𑀤𑀲𑁆𑀲𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂 𑀧𑀢𑀺𑀝𑁆𑀞𑀸𑀲𑀺. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑁋 ‘‘𑀦 𑀢𑀸𑀯𑀸𑀬𑀁 𑀤𑀲𑀩𑀮𑀲𑁆𑀲 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀓𑀸𑀮𑁄, 𑀯𑀲𑁆𑀲𑀦𑁆𑀢𑁂 𑀧𑀦 𑀉𑀧𑀕𑀢𑁂 𑀧𑀩𑁆𑀩𑀢𑁂𑀲𑀼 𑀯𑀦𑀲𑀡𑁆𑀟𑁂𑀲𑀼 𑀳𑀭𑀺𑀢𑀢𑀺𑀡𑀲𑀜𑁆𑀙𑀦𑁆𑀦𑀸𑀬 𑀪𑀽𑀫𑀺𑀬𑀸 𑀕𑀫𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀫𑀦𑀓𑀸𑀮𑀁 𑀆𑀕𑀫𑁂𑀦𑁆𑀢𑁄 𑀯𑀲𑁆𑀲𑀦𑁆𑀢𑁂 𑀲𑀫𑁆𑀧𑀢𑁆𑀢𑁂 𑀲𑀢𑁆𑀣𑀼 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀕𑀫𑀦𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀣𑁂𑀭𑀕𑀸𑀣𑀸𑀬 (𑀣𑁂𑀭𑀕𑀸. 𑁫𑁨𑁭-𑁫𑁩𑁦) 𑁋

‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬;

𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀪𑀸𑀕𑀻 𑀭𑀲𑀸𑀦𑀁.

‘‘𑀤𑀼𑀫𑀸𑀦𑀺 𑀨𑀼𑀮𑁆𑀮𑀸𑀦𑀺 𑀫𑀦𑁄𑀭𑀫𑀸𑀦𑀺, 𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸 𑀧𑀯𑀦𑁆𑀢𑀺;

𑀧𑀢𑁆𑀢𑀁 𑀧𑀳𑀸𑀬 𑀨𑀮𑀫𑀸𑀲𑀲𑀸𑀦𑀸, 𑀓𑀸𑀮𑁄 𑀇𑀢𑁄 𑀧𑀓𑁆𑀓𑀫𑀦𑀸𑀬 𑀯𑀻𑀭.

‘‘𑀦𑁂𑀯𑀸𑀢𑀺𑀲𑀻𑀢𑀁 𑀦 𑀧𑀦𑀸𑀢𑀺𑀉𑀡𑁆𑀳𑀁, 𑀲𑀼𑀔𑀸 𑀉𑀢𑀼 𑀅𑀤𑁆𑀥𑀦𑀺𑀬𑀸 𑀪𑀤𑀦𑁆𑀢𑁂;

𑀧𑀲𑁆𑀲𑀦𑁆𑀢𑀼 𑀢𑀁 𑀲𑀸𑀓𑀺𑀬𑀸 𑀓𑁄𑀴𑀺𑀬𑀸 𑀘, 𑀧𑀘𑁆𑀙𑀸𑀫𑀼𑀔𑀁 𑀭𑁄𑀳𑀺𑀦𑀺𑀬𑀁 𑀢𑀭𑀦𑁆𑀢𑀁.

‘‘𑀆𑀲𑀸𑀬 𑀓𑀲𑀢𑁂 𑀔𑁂𑀢𑁆𑀢𑀁, 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀺;

𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀺, 𑀲𑀫𑀼𑀤𑁆𑀤𑀁 𑀥𑀦𑀳𑀸𑀭𑀓𑀸;

𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀺, 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀼.

‘‘𑀦𑀸𑀢𑀺𑀲𑀻𑀢𑀁 𑀦𑀸𑀢𑀺𑀉𑀡𑁆𑀳𑀁, 𑀦𑀸𑀢𑀺𑀤𑀼𑀩𑁆𑀪𑀺𑀓𑁆𑀔𑀙𑀸𑀢𑀓𑀁;

𑀲𑀤𑁆𑀤𑀮𑀸 𑀳𑀭𑀺𑀢𑀸 𑀪𑀽𑀫𑀺, 𑀏𑀲 𑀓𑀸𑀮𑁄 𑀫𑀳𑀸𑀫𑀼𑀦𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁨𑁫);

‘‘𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀧𑀼𑀦𑀧𑁆𑀧𑀼𑀦𑀁 𑀥𑀜𑁆𑀜𑀫𑀼𑀧𑁂𑀢𑀺 𑀭𑀝𑁆𑀞𑀁.

‘‘𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑀓𑀸 𑀘𑀭𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀦𑁆𑀢𑀺;

𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀁.

‘‘𑀯𑀻𑀭𑁄 𑀳𑀯𑁂 𑀲𑀢𑁆𑀢𑀬𑀼𑀕𑀁 𑀧𑀼𑀦𑁂𑀢𑀺; 𑀬𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄;

𑀫𑀜𑁆𑀜𑀸𑀫𑀳𑀁 𑀲𑀓𑁆𑀓𑀢𑀺 𑀤𑁂𑀯𑀤𑁂𑀯𑁄, 𑀢𑀬𑀸 𑀳𑀺 𑀚𑀸𑀢𑁄 𑀫𑀼𑀦𑀺 𑀲𑀘𑁆𑀘𑀦𑀸𑀫𑁄.

‘‘𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀧𑀺𑀢𑀸 𑀫𑀳𑁂𑀲𑀺𑀦𑁄, 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸 𑀧𑀦 𑀫𑀸𑀬𑀦𑀸𑀫𑀸;

𑀬𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀬 𑀓𑀼𑀘𑁆𑀙𑀺𑀦𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀢𑀺𑀤𑀺𑀯𑀫𑁆𑀳𑀺 𑀫𑁄𑀤𑀢𑀺.

‘‘𑀲𑀸 𑀕𑁄𑀢𑀫𑀻 𑀓𑀸𑀮𑀓𑀢𑀸 𑀇𑀢𑁄 𑀘𑀼𑀢𑀸, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀲𑀸 𑀫𑁄𑀤𑀢𑀺 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺, 𑀧𑀭𑀺𑀯𑀸𑀭𑀺𑀢𑀸 𑀤𑁂𑀯𑀕𑀡𑁂𑀳𑀺 𑀢𑁂𑀳𑀺.

‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀺 𑀲𑀓𑁆𑀓, 𑀥𑀫𑁆𑀫𑁂𑀦 𑀫𑁂 𑀕𑁄𑀢𑀫 𑀅𑀬𑁆𑀬𑀓𑁄𑀲𑀻’’𑀢𑀺. (𑀣𑁂𑀭𑀕𑀸. 𑁫𑁩𑁧-𑁫𑁩𑁬);

‘‘𑀅𑀫𑁆𑀩𑀸 𑀧𑀦𑀲𑀸 𑀓𑀧𑀺𑀝𑁆𑀞𑀸 𑀘, 𑀧𑀼𑀧𑁆𑀨𑀧𑀮𑁆𑀮𑀯𑀮𑀗𑁆𑀓𑀢𑀸;

𑀥𑀼𑀯𑀧𑁆𑀨𑀮𑀸𑀦𑀺 𑀲𑀯𑀦𑁆𑀢𑀺, 𑀔𑀼𑀤𑁆𑀤𑀸𑀫𑀥𑀼𑀓𑀓𑀽𑀧𑀫𑀸;

𑀲𑁂𑀯𑀫𑀸𑀦𑁄 𑀉𑀪𑁄 𑀧𑀲𑁆𑀲𑁂, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲𑁆𑀲.

‘‘𑀚𑀫𑁆𑀩𑀽 𑀲𑀼𑀫𑀥𑀼𑀭𑀸 𑀦𑀻𑀧𑀸, 𑀫𑀥𑀼𑀕𑀡𑁆𑀟𑀺𑀤𑀺𑀯𑀧𑁆𑀨𑀮𑀸;

𑀢𑀸 𑀉𑀪𑁄𑀲𑀼 𑀧𑀚𑁆𑀚𑁄𑀢𑀦𑁆𑀢𑀺, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀢𑀺𑀡𑁆𑀟𑀼𑀓𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀲𑁄𑀡𑁆𑀡𑀯𑀡𑁆𑀡𑀸 𑀫𑀦𑁄𑀭𑀫𑀸;

𑀔𑀼𑀤𑁆𑀤𑀓𑀧𑁆𑀧𑀨𑀮𑀸 𑀦𑀺𑀘𑁆𑀘𑀁, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀓𑀤𑀮𑀻 𑀧𑀜𑁆𑀘𑀫𑁄𑀘𑁆𑀘𑀺 𑀘, 𑀲𑀼𑀧𑀓𑁆𑀓𑀨𑀮𑀪𑀽𑀲𑀺𑀢𑀸;

𑀉𑀪𑁄𑀧𑀲𑁆𑀲𑁂𑀲𑀼 𑀮𑀫𑁆𑀩𑀦𑁆𑀢𑀺, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀫𑀥𑀼𑀧𑁆𑀨𑀮𑀥𑀭𑀸 𑀦𑀺𑀘𑁆𑀘𑀁, 𑀫𑁄𑀭𑀭𑀼𑀓𑁆𑀔𑀸 𑀫𑀦𑁄𑀭𑀫𑀸;

𑀔𑀼𑀤𑁆𑀤𑀓𑀧𑁆𑀧𑀨𑀮𑀸 𑀦𑀺𑀘𑁆𑀘𑀁, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀳𑀺𑀦𑁆𑀢𑀸𑀮𑀢𑀸𑀮𑀧𑀦𑁆𑀢𑀻 𑀘, 𑀭𑀚𑀢𑀓𑁆𑀔𑀦𑁆𑀥𑁄𑀯 𑀚𑁄𑀢𑀭𑁂;

𑀲𑀼𑀧𑀓𑁆𑀓𑀨𑀮𑀲𑀜𑁆𑀙𑀦𑁆𑀦𑀸, 𑀔𑀼𑀤𑁆𑀤𑀓𑀧𑁆𑀧𑀸 𑀫𑀥𑀼𑀲𑁆𑀲𑀯𑀸;

𑀨𑀮𑀸𑀦𑀺 𑀢𑀸𑀦𑀺 𑀔𑀸𑀤𑀦𑁆𑀢𑁂, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀉𑀤𑀼𑀫𑁆𑀩𑀭𑀸𑀭𑀼𑀡𑀸𑀯𑀡𑁆𑀡𑀸, 𑀲𑀤𑀸𑀲𑀼𑀫𑀥𑀼𑀭𑀧𑁆𑀨𑀮𑀸;

𑀉𑀪𑁄𑀧𑀲𑁆𑀲𑁂𑀲𑀼 𑀮𑀫𑁆𑀩𑀦𑁆𑀢𑀺, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀇𑀢𑁆𑀣𑀫𑁆𑀪𑀽𑀢𑀸 𑀅𑀦𑁂𑀓𑀸 𑀢𑁂, 𑀦𑀸𑀦𑀸𑀨𑀮𑀥𑀭𑀸 𑀤𑀼𑀫𑀸;

𑀉𑀪𑁄𑀧𑀲𑁆𑀲𑁂𑀲𑀼 𑀮𑀫𑁆𑀩𑀦𑁆𑀢𑀺, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀘𑀫𑁆𑀧𑀓𑀸 𑀲𑀮𑀴𑀸 𑀦𑀸𑀕𑀸, 𑀲𑀼𑀕𑀦𑁆𑀥𑀸 𑀫𑀸𑀮𑀼𑀢𑁂𑀭𑀺𑀢𑀸;

𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀸 𑀚𑁄𑀢𑀦𑁆𑀢𑀺, 𑀲𑀼𑀕𑀦𑁆𑀥𑁂𑀦𑀸𑀪𑀺𑀧𑀽𑀚𑀬𑀼𑀁;

𑀲𑀸𑀤𑀭𑀸 𑀯𑀺𑀦𑀢𑀸𑀦𑁂𑀯, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀧𑀼𑀧𑁆𑀨𑀺𑀢𑀸 𑀥𑀭𑀡𑀻𑀭𑀼𑀳𑀸;

𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀸 𑀚𑁄𑀢𑀦𑁆𑀢𑀺, 𑀲𑀼𑀕𑀦𑁆𑀥𑁂𑀦𑀸𑀪𑀺𑀧𑀽𑀚𑀬𑀼𑀁;

𑀲𑀸𑀤𑀭𑀸 𑀯𑀺𑀦𑀢𑀼𑀕𑁆𑀕𑀕𑁆𑀕𑀸, 𑀕𑀦𑁆𑀢𑀼𑀓𑀸𑀮𑁄 𑀫𑀳𑀸𑀬𑀲.

‘‘𑀅𑀲𑁄𑀓𑀸 𑀓𑁄𑀯𑀺𑀴𑀸𑀭𑀸 𑀘, 𑀲𑁄𑀫𑀦𑀲𑁆𑀲𑀓𑀭𑀸 𑀯𑀭𑀸;

𑀲𑀼𑀕𑀦𑁆𑀥𑀸 𑀓𑀡𑁆𑀡𑀺𑀓𑀸 𑀩𑀦𑁆𑀥𑀸, 𑀭𑀢𑁆𑀢𑀯𑀡𑁆𑀡𑁂𑀳𑀺 𑀪𑀽𑀲𑀺𑀢𑀸;

𑀲𑀸𑀤𑀭𑀸 𑀯𑀺𑀦𑀢𑀼𑀕𑁆𑀕𑀕𑁆𑀕𑀸, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀓𑀡𑁆𑀡𑀺𑀓𑀸𑀭𑀸 𑀨𑀼𑀮𑁆𑀮𑀺𑀢𑀸 𑀦𑀺𑀘𑁆𑀘𑀁, 𑀲𑁄𑀯𑀡𑁆𑀡𑀭𑀁𑀲𑀺𑀚𑁄𑀢𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀤𑀺𑀲𑀸 𑀲𑀩𑁆𑀩𑀸𑀦𑀺 𑀲𑁄𑀪𑀬𑀁;

𑀲𑀸𑀤𑀭𑀸 𑀯𑀺𑀦𑀢𑀸𑀦𑁂𑀯, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀲𑀼𑀧𑀢𑁆𑀢𑀸 𑀕𑀦𑁆𑀥𑀲𑀫𑁆𑀧𑀦𑁆𑀦𑀸, 𑀓𑁂𑀢𑀓𑀻 𑀥𑀦𑀼𑀓𑁂𑀢𑀓𑀻;

𑀲𑀼𑀕𑀦𑁆𑀥𑀸 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀤𑀺𑀲𑀸 𑀲𑀩𑁆𑀩𑀸𑀪𑀺𑀕𑀦𑁆𑀥𑀺𑀦𑁄;

𑀲𑀸𑀤𑀭𑀸 𑀧𑀽𑀚𑀬𑀦𑁆𑀢𑀸𑀯, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀫𑀮𑁆𑀮𑀺𑀓𑀸 𑀚𑀸𑀢𑀺𑀲𑀼𑀫𑀦𑀸, 𑀲𑀼𑀕𑀦𑁆𑀥𑀸 𑀔𑀼𑀤𑁆𑀤𑀫𑀮𑁆𑀮𑀺𑀓𑀸;

𑀤𑀺𑀲𑀸 𑀲𑀩𑁆𑀩𑀸 𑀧𑀯𑀸𑀬𑀦𑁆𑀢𑀺, 𑀉𑀪𑁄 𑀫𑀕𑁆𑀕𑁂 𑀧𑀲𑁄𑀪𑀬𑀁;

𑀲𑀸𑀤𑀭𑀸 𑀢𑁂 𑀧𑀮𑀫𑁆𑀩𑀦𑁆𑀢𑀺, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀲𑀺𑀦𑁆𑀥𑀼𑀯𑀸𑀭𑀸 𑀲𑀻𑀢𑀕𑀦𑁆𑀥𑀸, 𑀲𑀼𑀕𑀦𑁆𑀥𑀸 𑀫𑀸𑀮𑀼𑀢𑁂𑀭𑀺𑀢𑀸;

𑀤𑀺𑀲𑀸 𑀲𑀩𑁆𑀩𑀸𑀪𑀺𑀧𑀽𑀚𑁂𑀦𑁆𑀢𑀸, 𑀉𑀪𑁄 𑀫𑀕𑁆𑀕𑁂 𑀧𑀲𑁄𑀪𑀬𑀁;

𑀲𑀸𑀤𑀭𑀸 𑀯𑀺𑀦𑀢𑀼𑀕𑁆𑀕𑀕𑁆𑀕𑀸, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀲𑀻𑀳𑀸 𑀓𑁂𑀲𑀭𑀲𑀻𑀳𑀸 𑀘, 𑀘𑀢𑀼𑀧𑁆𑀧𑀤𑀦𑀺𑀲𑁂𑀯𑀺𑀢𑀸;

𑀅𑀘𑁆𑀙𑀫𑁆𑀪𑀻𑀢𑀸 𑀲𑀼𑀭𑀸𑀧𑀸𑀦𑁂, 𑀫𑀺𑀕𑀭𑀸𑀚𑀸 𑀧𑀢𑀸𑀧𑀺𑀦𑁄.

‘‘𑀲𑀻𑀳𑀦𑀸𑀤𑁂𑀦 𑀧𑀽𑀚𑁂𑀦𑁆𑀢𑀺, 𑀲𑀸𑀤𑀭𑀸 𑀢𑁂 𑀫𑀺𑀕𑀸𑀪𑀺𑀪𑀽;

𑀫𑀕𑁆𑀕𑀫𑁆𑀳𑀺 𑀉𑀪𑀢𑁄 𑀯𑀽𑀴𑁆𑀳𑀸, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀩𑁆𑀬𑀕𑁆𑀖𑀸 𑀲𑀺𑀦𑁆𑀥𑀯𑀸 𑀦𑀓𑀼𑀮𑀸, 𑀲𑀸𑀥𑀼𑀭𑀽𑀧𑀸 𑀪𑀬𑀸𑀦𑀓𑀸;

𑀆𑀓𑀸𑀲𑁂 𑀲𑀫𑁆𑀧𑀢𑀦𑁆𑀢𑀸𑀯, 𑀦𑀺𑀩𑁆𑀪𑀻𑀢𑀸 𑀬𑁂𑀦 𑀓𑁂𑀦𑀘𑀺;

𑀢𑁂𑀳𑀺 𑀢𑁂 𑀲𑀸𑀤𑀭𑀸 𑀦𑀢𑀸, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀢𑀺𑀥𑀸 𑀧𑀪𑀺𑀦𑁆𑀦𑀸 𑀙𑀤𑁆𑀤𑀦𑁆𑀢𑀸, 𑀲𑀼𑀭𑀽𑀧𑀸 𑀲𑀼𑀲𑁆𑀲𑀭𑀸 𑀲𑀼𑀪𑀸;

𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑀺𑀢𑀗𑁆𑀕𑀸 𑀢𑁂, 𑀉𑀪𑁄 𑀫𑀕𑁆𑀕𑁂𑀲𑀼 𑀓𑀽𑀚𑀺𑀦𑁄;

𑀲𑀸𑀤𑀭𑀸 𑀳𑀸𑀲𑀫𑀸𑀦𑀸𑀯, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀫𑀺𑀕𑀸 𑀯𑀭𑀸𑀳𑀸 𑀧𑀲𑀤𑀸, 𑀘𑀺𑀢𑁆𑀭𑀸𑀲𑀸𑀯𑀬𑀯𑀸 𑀲𑀼𑀪𑀸;

𑀆𑀭𑁄𑀳𑀧𑀭𑀺𑀡𑀸𑀳𑁂𑀦, 𑀲𑀼𑀭𑀽𑀧𑀸 𑀅𑀗𑁆𑀕𑀲𑀁𑀬𑀼𑀢𑀸;

𑀉𑀪𑁄 𑀫𑀕𑁆𑀕𑁂 𑀕𑀸𑀬𑀫𑀸𑀦𑀸𑀯, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀕𑁄𑀓𑀡𑁆𑀡𑀸 𑀲𑀭𑀪𑀸 𑀭𑀼𑀭𑀽, 𑀆𑀭𑁄𑀳𑀧𑀭𑀺𑀡𑀸𑀳𑀺𑀦𑁄;

𑀲𑀼𑀭𑀽𑀧𑀸 𑀅𑀗𑁆𑀕𑀲𑀫𑁆𑀧𑀦𑁆𑀦𑀸, 𑀲𑁂𑀯𑀫𑀸𑀦𑀸𑀯 𑀅𑀘𑁆𑀙𑀭𑀼𑀁;

𑀲𑁂𑀯𑀫𑀸𑀦𑀸 𑀢𑁂𑀳𑀺 𑀢𑀤𑀸, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀘, 𑀢𑀼𑀤𑀭𑀸 𑀯𑀭𑀼𑀡𑀸 𑀲𑀤𑀸;

𑀢𑁂 𑀤𑀸𑀦𑀺 𑀲𑀺𑀓𑁆𑀔𑀺𑀢𑀸 𑀲𑀩𑁆𑀩𑁂, 𑀫𑁂𑀢𑁆𑀢𑀸𑀬 𑀢𑀯 𑀢𑀸𑀤𑀺𑀦𑁄;

𑀢𑁂 𑀧𑀘𑁆𑀘𑀲𑁂𑀯𑀓𑀸 𑀅𑀤𑁆𑀥𑀸, 𑀲𑀫𑀬𑁄 𑀢𑁂 𑀫𑀳𑀸𑀬𑀲.

‘‘𑀲𑀲𑀸 𑀲𑀺𑀗𑁆𑀕𑀸𑀮𑀸 𑀦𑀓𑀼𑀮𑀸, 𑀓𑀮𑀦𑁆𑀤𑀓𑀸𑀴𑀓𑀸 𑀩𑀳𑀽;

𑀓𑀲𑁆𑀢𑀼𑀭𑀸 𑀲𑀽𑀭𑀸 𑀕𑀦𑁆𑀥𑀸 𑀢𑁂, 𑀓𑁂𑀯𑀮𑀸 𑀕𑀸𑀬𑀫𑀸𑀦𑀸𑀯.

𑀲𑀫𑀬𑁄 𑀢𑁂 𑀫𑀳𑀸𑀬𑀲;

‘‘𑀫𑀬𑀽𑀭𑀸 𑀦𑀻𑀮𑀕𑀻𑀯𑀸 𑀢𑁂, 𑀲𑀼𑀲𑀺𑀔𑀸 𑀲𑀼𑀪𑀧𑀓𑁆𑀔𑀺𑀓𑀸;

𑀲𑀼𑀧𑀺𑀜𑁆𑀙𑀸 𑀢𑁂 𑀲𑀼𑀦𑀸𑀤𑀸 𑀘, 𑀯𑁂𑀴𑀼𑀭𑀺𑀬𑀫𑀡𑀺𑀲𑀦𑁆𑀦𑀺𑀪𑀸;

𑀦𑀸𑀤𑀁 𑀓𑀭𑁄𑀦𑁆𑀢𑀸 𑀧𑀽𑀚𑁂𑀦𑁆𑀢𑀺, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀲𑀼𑀯𑀡𑁆𑀡𑀘𑀺𑀢𑁆𑀭𑀳𑀁𑀲𑀸 𑀘, 𑀚𑀯𑀳𑀁𑀲𑀸 𑀯𑀺𑀳𑀸𑀘𑀭𑀸;

𑀢𑁂 𑀲𑀩𑁆𑀩𑁂 𑀆𑀲𑀬𑀸 𑀙𑀼𑀤𑁆𑀥𑀸, 𑀚𑀺𑀦𑀤𑀲𑁆𑀲𑀦𑀩𑁆𑀬𑀸𑀯𑀝𑀸;

𑀫𑀥𑀼𑀭𑀲𑁆𑀲𑀭𑁂𑀦 𑀓𑀽𑀚𑀦𑁆𑀢𑀺, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀳𑀁𑀲𑀸 𑀓𑁄𑀜𑁆𑀘𑀸 𑀲𑀼𑀦𑀤𑀸 𑀢𑁂, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀩𑀓𑀸 𑀩𑀮𑀸𑀓𑀸 𑀭𑀼𑀘𑀺𑀭𑀸, 𑀚𑀮𑀓𑀸𑀓𑀸 𑀲𑀭𑀓𑀼𑀓𑁆𑀓𑀼𑀝𑀸;

𑀲𑀸𑀤𑀭𑀸𑀪𑀺𑀦𑀸𑀤𑀺𑀦𑁄 𑀏𑀢𑁂, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀘𑀺𑀢𑁆𑀭𑀸 𑀲𑀼𑀭𑀽𑀧𑀸 𑀲𑀼𑀲𑁆𑀲𑀭𑀸, 𑀲𑀸𑀴𑀺𑀓𑀸 𑀲𑀼𑀯𑀢𑀡𑁆𑀟𑀺𑀓𑀸;

𑀭𑀼𑀓𑁆𑀔𑀕𑁆𑀕𑀸 𑀲𑀫𑁆𑀧𑀢𑀦𑁆𑀢𑀸 𑀢𑁂, 𑀉𑀪𑁄 𑀫𑀕𑁆𑀕𑁂𑀲𑀼 𑀓𑀽𑀚𑀺𑀦𑁄;

𑀢𑁂𑀲𑀼 𑀢𑁂𑀲𑀼 𑀦𑀺𑀓𑀽𑀚𑀦𑁆𑀢𑀺, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀓𑁄𑀓𑀺𑀮𑀸 𑀲𑀓𑀮𑀸 𑀘𑀺𑀢𑁆𑀭𑀸, 𑀲𑀤𑀸 𑀫𑀜𑁆𑀚𑀼𑀲𑁆𑀲𑀭𑀸 𑀯𑀭𑀸;

𑀯𑀺𑀫𑁆𑀳𑀸𑀧𑀺𑀢𑀸 𑀢𑁂 𑀚𑀦𑀢𑀁, 𑀲𑀤𑁆𑀥𑀺𑀫𑀺𑀢𑁆𑀢𑀸𑀤𑀺𑀓𑁂 𑀲𑀼𑀭𑀸;

𑀲𑀭𑁂𑀳𑀺 𑀧𑀽𑀚𑀬𑀦𑁆𑀢𑀸𑀯, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀪𑀺𑀗𑁆𑀓𑀸 𑀓𑀼𑀭𑀭𑀸 𑀲𑀸𑀭𑀸, 𑀧𑀽𑀭𑀺𑀢𑀸 𑀓𑀸𑀦𑀦𑁂 𑀲𑀤𑀸;

𑀦𑀺𑀦𑁆𑀦𑀸𑀤𑀬𑀦𑁆𑀢𑀸 𑀧𑀯𑀦𑀁, 𑀅𑀜𑁆𑀜𑀫𑀜𑁆𑀜𑀲𑀫𑀗𑁆𑀕𑀺𑀦𑁄;

𑀕𑀸𑀬𑀫𑀸𑀦𑀸 𑀲𑀭𑁂𑀦𑁂𑀯, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀢𑀺𑀢𑁆𑀢𑀺𑀭𑀸 𑀲𑀼𑀲𑀭𑀸 𑀲𑀸𑀭𑀸, 𑀲𑀼𑀲𑀭𑀸 𑀯𑀦𑀓𑀼𑀓𑁆𑀓𑀼𑀝𑀸;

𑀫𑀜𑁆𑀚𑀼𑀲𑁆𑀲𑀭𑀸 𑀭𑀸𑀫𑀡𑁂𑀬𑁆𑀬𑀸, 𑀓𑀸𑀮𑁄 𑀢𑁂 𑀧𑀺𑀢𑀼𑀤𑀲𑁆𑀲𑀦𑁂.

‘‘𑀲𑁂𑀢𑀯𑀸𑀮𑀼𑀓𑀲𑀜𑁆𑀙𑀦𑁆𑀦𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀫𑀥𑀼𑀭𑁄𑀤𑀓𑀲𑀫𑁆𑀧𑀼𑀡𑁆𑀡𑀸, 𑀲𑀭𑀸 𑀚𑁄𑀢𑀦𑁆𑀢𑀺 𑀢𑁂 𑀲𑀤𑀸;

𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂.

‘‘𑀓𑀼𑀫𑁆𑀪𑀻𑀭𑀸𑀫𑀓𑀭𑀸𑀓𑀺𑀡𑁆𑀡𑀸, 𑀯𑀮𑀬𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀫𑀘𑁆𑀙𑀓𑀘𑁆𑀙𑀧𑀩𑁆𑀬𑀸𑀯𑀺𑀤𑁆𑀥𑀸, 𑀲𑀭𑀸 𑀲𑀻𑀢𑁄𑀤𑀓𑀸 𑀲𑀼𑀪𑀸;

𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂.

‘‘𑀦𑀻𑀮𑀼𑀧𑁆𑀧𑀮𑀲𑀫𑀸𑀓𑀺𑀡𑁆𑀡𑀸, 𑀢𑀣𑀸 𑀭𑀢𑁆𑀢𑀼𑀧𑁆𑀧𑀮𑁂𑀳𑀺 𑀘;

𑀓𑀼𑀫𑀼𑀤𑀼𑀧𑁆𑀧𑀮𑀲𑀁𑀓𑀺𑀡𑁆𑀡𑀸, 𑀲𑀭𑀸 𑀲𑁄𑀪𑀦𑁆𑀢𑀺𑀦𑁂𑀓𑀥𑀸;

𑀢𑀢𑁆𑀣 𑀲𑀻𑀢𑀮𑀓𑀸 𑀢𑁄𑀬𑀸, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂.

‘‘𑀧𑀼𑀡𑁆𑀟𑀭𑀻𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑁂𑀳𑀺 𑀲𑀫𑁄𑀳𑀢𑀸;

𑀉𑀪𑁄 𑀫𑀕𑁆𑀕𑁂𑀲𑀼 𑀲𑁄𑀪𑀦𑁆𑀢𑀺, 𑀧𑁄𑀓𑁆𑀔𑀭𑀜𑁆𑀜𑁄 𑀢𑀳𑀺𑀁 𑀢𑀳𑀺𑀁;

𑀢𑀢𑁆𑀣𑁄𑀤𑀓𑀸𑀦𑀺 𑀦𑁆𑀳𑀸𑀬𑀦𑁆𑀢𑀺, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂.

‘‘𑀲𑁂𑀢𑀧𑀼𑀮𑀺𑀦𑀲𑀁𑀓𑀺𑀡𑁆𑀡𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀻𑀢𑁄𑀤𑀓𑀫𑀳𑁄𑀖𑁂𑀳𑀺, 𑀲𑀫𑁆𑀧𑀼𑀡𑁆𑀡𑀸 𑀢𑀸 𑀦𑀤𑀻 𑀲𑀼𑀪𑀸;

𑀉𑀪𑁄 𑀫𑀕𑁆𑀕𑁂𑀳𑀺 𑀲𑀦𑁆𑀤𑀦𑁆𑀢𑀺, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂.

‘‘𑀫𑀕𑁆𑀕𑀲𑁆𑀲 𑀉𑀪𑀢𑁄𑀧𑀲𑁆𑀲𑁂, 𑀕𑀸𑀫𑀦𑀺𑀕𑀫𑀲𑀫𑀸𑀓𑀼𑀮𑀸;

𑀲𑀤𑁆𑀥𑀸 𑀧𑀲𑀦𑁆𑀦𑀸 𑀚𑀦𑀢𑀸, 𑀭𑀢𑀦𑀢𑁆𑀢𑀬𑀫𑀸𑀫𑀓𑀸;

𑀢𑁂𑀲𑀁 𑀲𑀫𑁆𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂.

‘‘𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼, 𑀤𑁂𑀯𑀸 𑀫𑀸𑀦𑀼𑀲𑁆𑀲𑀓𑀸 𑀉𑀪𑁄;

𑀕𑀦𑁆𑀥𑀫𑀸𑀮𑀸𑀪𑀺𑀧𑀽𑀚𑁂𑀦𑁆𑀢𑀺, 𑀲𑀫𑀬𑁄 𑀢𑁂 𑀜𑀸𑀢𑀺𑀤𑀲𑁆𑀲𑀦𑁂’’𑀢𑀺.

𑀏𑀯𑀁 𑀣𑁂𑀭𑁄 𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 𑀲𑀢𑁆𑀣𑀼 𑀕𑀫𑀦𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀺. 𑀅𑀣 𑀔𑁄 𑀪𑀕𑀯𑀸 ‘‘𑀓𑀸𑀴𑀼𑀤𑀸𑀬𑀻 𑀫𑀫 𑀕𑀫𑀦𑀁 𑀧𑀢𑁆𑀣𑁂𑀢𑀺, 𑀧𑀽𑀭𑁂𑀲𑁆𑀲𑀸𑀫𑀺𑀲𑁆𑀲 𑀲𑀗𑁆𑀓𑀧𑁆𑀧’’𑀦𑁆𑀢𑀺 𑀢𑀢𑁆𑀣 𑀕𑀫𑀦𑁂 𑀩𑀳𑀽𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀤𑀺𑀲𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀢𑁄 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀨𑀮𑀸𑀨𑀮𑁂 𑀅𑀦𑀼𑀪𑀯𑀦𑁆𑀢𑁄 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀤𑀺𑀲𑀫𑀽𑀳𑀸𑀦𑀁 𑀲𑁂𑀯𑀦𑀧𑀽𑀚𑀸𑀬 𑀧𑀽𑀚𑀺𑀬𑀫𑀸𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀼𑀕𑀦𑁆𑀥𑀧𑀼𑀧𑁆𑀨𑀕𑀦𑁆𑀥𑁂𑀳𑀺 𑀕𑀦𑁆𑀥𑀺𑀬𑀫𑀸𑀦𑁄 𑀕𑀸𑀫𑀦𑀺𑀕𑀫𑀯𑀸𑀲𑀻𑀦𑀁 𑀲𑀗𑁆𑀕𑀳𑀁 𑀓𑀼𑀭𑀼𑀫𑀸𑀦𑁄 𑀓𑀧𑀺𑀮𑀯𑀢𑁆𑀣𑀼𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀣𑁂𑀭𑁄 𑀇𑀤𑁆𑀥𑀺𑀬𑀸 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀆𑀓𑀸𑀲𑁂 𑀞𑀺𑀢𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑁂𑀲𑀁 𑀤𑀺𑀲𑁆𑀯𑀸, 𑀭𑀜𑁆𑀜𑀸 𑁋 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀲𑀘𑁂 𑀅𑀫𑀘𑁆𑀘𑀧𑀼𑀢𑁆𑀢𑀁 𑀢𑀬𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑁂𑀲𑀺𑀢𑀁 𑀦 𑀚𑀸𑀦𑀸𑀲𑀺, 𑀏𑀯𑀁 𑀚𑀸𑀦𑀸𑀳𑀻’’𑀢𑀺 𑀯𑀤𑀦𑁆𑀢𑁄 𑁋

‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀺 𑀲𑀓𑁆𑀓, 𑀥𑀫𑁆𑀫𑁂𑀦 𑀫𑁂 𑀕𑁄𑀢𑀫 𑀅𑀬𑁆𑀬𑀓𑁄𑀲𑀻’’𑀢𑀺. (𑀣𑁂𑀭𑀕𑀸. 𑁫𑁩𑁬) 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀳𑀺 𑀥𑀫𑁆𑀫𑀤𑁂𑀲𑀦𑀸𑀳𑀺 𑀚𑀸𑀢𑀢𑀸𑀬 𑀑𑀭𑀲𑀧𑀼𑀢𑁆𑀢𑁄 𑀅𑀫𑁆𑀳𑀺. 𑀅𑀲𑀬𑁆𑀳𑀲𑀸𑀳𑀺𑀦𑁄𑀢𑀺 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀞𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀁 𑀅𑀜𑁆𑀜𑁂𑀳𑀺 𑀲𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀬𑁆𑀳𑀲𑁆𑀲 𑀲𑀓𑀮𑀩𑁄𑀥𑀺𑀲𑀫𑁆𑀪𑀸𑀭𑀲𑁆𑀲, 𑀫𑀳𑀸𑀓𑀭𑀼𑀡𑀸𑀓𑀭𑀲𑁆𑀲 𑀘 𑀲𑀳𑀦𑀢𑁄 𑀢𑀢𑁄 𑀧𑀭𑀫𑁆𑀧𑀺 𑀅𑀜𑁆𑀜𑁂𑀳𑀺 𑀲𑀳𑀺𑀢𑀼𑀁 𑀅𑀪𑀺𑀪𑀯𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀬𑁆𑀳𑀸𑀦𑀁 𑀧𑀜𑁆𑀘𑀦𑁆𑀦𑀁 𑀫𑀸𑀭𑀸𑀦𑀁 𑀲𑀳𑀦𑀢𑁄 𑀅𑀪𑀺𑀪𑀯𑀦𑀢𑁄 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀯𑀺𑀪𑀸𑀕𑀸𑀯𑀩𑁄𑀥𑁂𑀦 𑀬𑀣𑀸𑀭𑀳𑀁 𑀯𑁂𑀦𑁂𑀬𑁆𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀅𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑁂𑀳𑀺 𑀅𑀲𑀬𑁆𑀳𑀲𑁆𑀲 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲 𑀲𑀳𑀦𑀢𑁄 𑀢𑀢𑁆𑀣 𑀯𑀸 𑀲𑀸𑀥𑀼𑀓𑀸𑀭𑀻𑀪𑀸𑀯𑀢𑁄 𑀅𑀲𑀬𑁆𑀳𑀲𑀸𑀳𑀺𑀦𑁄. 𑀅𑀗𑁆𑀕𑀻𑀭𑀲𑀲𑁆𑀲𑀸𑀢𑀺 𑀅𑀗𑁆𑀕𑀻𑀓𑀢𑀲𑀻𑀮𑀸𑀤𑀺𑀲𑀫𑁆𑀧𑀢𑁆𑀢𑀺𑀓𑀲𑁆𑀲. ‘‘𑀅𑀗𑁆𑀕𑀫𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀡𑀓𑀑𑀪𑀸𑀲𑀲𑁆𑀲𑀸’’𑀢𑀺 𑀅𑀧𑀭𑁂. 𑀓𑁂𑀘𑀺 𑀧𑀦 ‘‘𑀅𑀗𑁆𑀕𑀻𑀭𑀲𑁄 𑀲𑀺𑀤𑁆𑀥𑀢𑁆𑀣𑁄𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀦𑀸𑀫𑀸𑀦𑀺 𑀧𑀺𑀢𑀭𑀸𑀬𑁂𑀯 𑀕𑀳𑀺𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑁆𑀧𑀝𑀺𑀫𑀲𑁆𑀲𑀸𑀢𑀺 𑀅𑀦𑀼𑀧𑀫𑀲𑁆𑀲 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀮𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀢𑀸𑀤𑀺𑀦𑁄. 𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀻𑀢𑀺 𑀅𑀭𑀺𑀬𑀚𑀸𑀢𑀺𑀯𑀲𑁂𑀦 𑀫𑀬𑁆𑀳𑀁 𑀧𑀺𑀢𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀢𑁆𑀯𑀁 𑀧𑀺𑀢𑀸 𑀅𑀲𑀺. 𑀲𑀓𑁆𑀓𑀸𑀢𑀺 𑀯𑀁𑀲𑁂𑀦 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀲𑀪𑀸𑀯𑁂𑀦 𑀅𑀭𑀺𑀬𑀚𑀸𑀢𑀺𑀮𑁄𑀓𑀺𑀬𑀚𑀸𑀢𑀻𑀳𑀺 𑀤𑁆𑀯𑀺𑀦𑁆𑀦𑀁 𑀚𑀸𑀢𑀻𑀦𑀁 𑀲𑀪𑀸𑀯𑀲𑀫𑁄𑀥𑀸𑀦𑁂𑀦. 𑀕𑁄𑀢𑀫𑀸𑀢𑀺 𑀕𑁄𑀢𑁆𑀢𑁂𑀦 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀅𑀬𑁆𑀬𑀓𑁄𑀲𑀻𑀢𑀺 𑀧𑀺𑀢𑀸𑀫𑀳𑁄 𑀅𑀳𑁄𑀲𑀺. 𑀏𑀢𑁆𑀣 𑀘 ‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄 𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀏𑀯𑀁 𑀧𑀦 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁂𑀦 𑀭𑀜𑁆𑀜𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀲𑁆𑀲 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀧𑀢𑁆𑀢𑁂 𑀤𑀺𑀦𑁆𑀦𑁂 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. ‘‘𑀓𑀲𑁆𑀫𑀸 𑀕𑀦𑁆𑀢𑀼𑀓𑀸𑀫𑀢𑁆𑀣, 𑀪𑀼𑀜𑁆𑀚𑀣𑀸’’𑀢𑀺 𑀯𑀼𑀢𑁆𑀢𑁂, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺. 𑀓𑀳𑀁 𑀧𑀦 𑀲𑀢𑁆𑀣𑀸𑀢𑀺? 𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀢𑀺. 𑀢𑀼𑀫𑁆𑀳𑁂 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀣, 𑀅𑀜𑁆𑀜𑀁 𑀪𑀕𑀯𑀢𑁄 𑀳𑀭𑀣. 𑀬𑀸𑀯 𑀘 𑀫𑀫 𑀧𑀼𑀢𑁆𑀢𑁄 𑀇𑀫𑀁 𑀦𑀕𑀭𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀯𑀲𑁆𑀲 𑀇𑀢𑁄𑀬𑁂𑀯 𑀧𑀺𑀡𑁆𑀟𑀧𑀸𑀢𑀁 𑀳𑀭𑀣𑀸𑀢𑀺. 𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀘 𑀧𑀭𑀺𑀲𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀢𑁆𑀣𑀼 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀭𑀸𑀚𑀦𑀺𑀯𑁂𑀲𑀦𑀁 𑀭𑀢𑀦𑀢𑁆𑀢𑀬𑀕𑀼𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑀁 𑀓𑀭𑁄𑀦𑁆𑀢𑁄 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀲𑀢𑁆𑀣𑀼 𑀆𑀳𑀭𑀺𑀢𑀩𑁆𑀩𑀪𑀢𑁆𑀢𑀧𑀼𑀡𑁆𑀡𑀁 𑀧𑀢𑁆𑀢𑀁 𑀆𑀓𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀉𑀧𑀦𑁂𑀢𑁆𑀯𑀸 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑀢𑁆𑀣𑀸𑀧𑀺 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀏𑀯𑀁 𑀲𑀝𑁆𑀞𑀺𑀬𑁄𑀚𑀦𑀁 𑀫𑀕𑁆𑀕𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀪𑀕𑀯𑀢𑁄 𑀭𑀸𑀚𑀕𑁂𑀳𑀢𑁄 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀸 𑀓𑀫𑁂𑀦 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀁 𑀧𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀭𑀸𑀚𑀯𑀻𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸, ‘‘𑀫𑀸 𑀏𑀯𑀁 𑀓𑀢𑁆𑀢𑀩𑁆𑀩𑀁 𑀫𑀜𑁆𑀜𑀺, 𑀦𑀬𑀺𑀤𑀁 𑀭𑀸𑀚𑀯𑀁𑀲𑀧𑁆𑀧𑀯𑁂𑀡𑀻’’𑀢𑀺. ‘‘𑀅𑀬𑀁 𑀢𑀼𑀫𑁆𑀳𑀸𑀓𑀁, 𑀫𑀳𑀸𑀭𑀸𑀚, 𑀯𑀁𑀲𑁄, 𑀈𑀤𑀺𑀲𑁄 𑀅𑀫𑁆𑀳𑀸𑀓𑀁 𑀧𑀦 𑀩𑀼𑀤𑁆𑀥𑀯𑀁𑀲𑁄’’𑀢𑀺 𑀯𑀢𑁆𑀯𑀸 𑁋

‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀥𑀫𑁆𑀫𑀁 𑀲𑀼𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

‘‘𑀥𑀫𑁆𑀫𑀁 𑀘𑀭𑁂 𑀲𑀼𑀘𑀭𑀺𑀢𑀁, 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘𑀸’’𑀢𑀺. (𑀥. 𑀧. 𑁧𑁬𑁮-𑁧𑁬𑁯) 𑁋

𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀭𑀸𑀚𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀓𑀫𑀦𑁆𑀤𑀺𑀭𑁂 𑀪𑁄𑀚𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑁄𑀚𑀦𑀸𑀯𑀲𑀸𑀦𑁂 𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀲𑀼𑀢𑁆𑀯𑀸 𑀲𑀧𑀭𑀺𑀲𑁄 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀧𑀭𑀪𑀸𑀕𑁂 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑁄𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀢𑀢𑁄 𑀪𑀕𑀯𑀸 𑀭𑀸𑀳𑀼𑀮𑀫𑀸𑀢𑀼𑀬𑀸 𑀩𑀺𑀫𑁆𑀩𑀸𑀤𑁂𑀯𑀺𑀬𑀸 𑀧𑀸𑀲𑀸𑀤𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀤𑁂𑀲𑀦𑀸𑀬 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀧𑀲𑀸𑀤𑀁 𑀚𑀦𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀅𑀣 𑀩𑀺𑀫𑁆𑀩𑀸𑀤𑁂𑀯𑀻 𑀧𑀼𑀢𑁆𑀢𑀁 𑀭𑀸𑀳𑀼𑀮𑀓𑀼𑀫𑀸𑀭𑀁 𑀆𑀳 𑁋 ‘‘𑀕𑀘𑁆𑀙, 𑀢𑀯 𑀧𑀺𑀢𑀼 𑀲𑀦𑁆𑀢𑀓𑀁 𑀥𑀦𑀁 𑀬𑀸𑀘𑀸𑀳𑀻’’𑀢𑀺. 𑀓𑀼𑀫𑀸𑀭𑁄 ‘‘𑀤𑀸𑀬𑀚𑁆𑀚𑀁, 𑀫𑁂 𑀲𑀫𑀡, 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸, ‘‘𑀲𑀼𑀔𑀸, 𑀢𑁂 𑀲𑀫𑀡, 𑀙𑀸𑀬𑀸’’𑀢𑀺 𑀯𑀤𑀦𑁆𑀢𑁄 𑀕𑀘𑁆𑀙𑀢𑀺. 𑀢𑀁 𑀪𑀕𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑀁 𑀦𑁂𑀢𑁆𑀯𑀸 ‘‘𑀮𑁄𑀓𑀼𑀢𑀭𑀤𑀸𑀬𑀚𑁆𑀚𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀅𑀣 𑀪𑀕𑀯𑀸 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀬𑀤𑀺𑀤𑀁 𑀓𑀸𑀴𑀼𑀤𑀸𑀬𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁫) 𑀣𑁂𑀭𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑁧𑁬𑁫. 𑀣𑁂𑀭𑁄 𑀧𑀢𑁆𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑁧𑁬𑁬. 𑀕𑀼𑀡𑀸𑀕𑀼𑀡𑀯𑀺𑀤𑀽𑀢𑀺 𑀕𑀼𑀡𑀜𑁆𑀘 𑀅𑀕𑀼𑀡𑀜𑁆𑀘 𑀕𑀼𑀡𑀸𑀕𑀼𑀡𑀁, 𑀯𑀡𑁆𑀡𑀸𑀯𑀡𑁆𑀡𑀁, 𑀓𑀼𑀲𑀮𑀸𑀓𑀼𑀲𑀮𑀁 𑀯𑀸 𑀢𑀁 𑀚𑀸𑀦𑀸𑀢𑀻𑀢𑀺 𑀕𑀼𑀡𑀸𑀕𑀼𑀡𑀯𑀺𑀤𑀽. 𑀓𑀢𑀜𑁆𑀜𑀽𑀢𑀺 𑀅𑀜𑁆𑀜𑁂𑀳𑀺 𑀓𑀢𑀕𑀼𑀡𑀁 𑀚𑀸𑀦𑀸𑀢𑀻𑀢𑀺 𑀓𑀢𑀜𑁆𑀜𑀽, 𑀏𑀓𑀤𑀺𑀯𑀲𑀫𑁆𑀧𑀺 𑀪𑀢𑁆𑀢𑀤𑀸𑀦𑀸𑀤𑀺𑀦𑀸 𑀓𑀢𑀽𑀧𑀓𑀸𑀭𑀲𑁆𑀲 𑀭𑀚𑁆𑀚𑀫𑁆𑀧𑀺 𑀤𑀸𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀓𑀢𑀜𑁆𑀜𑀽. 𑀓𑀢𑀯𑁂𑀤𑀻𑀢𑀺 𑀓𑀢𑀁 𑀯𑀺𑀦𑁆𑀤𑀢𑀺 𑀅𑀦𑀼𑀪𑀯𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀓𑀢𑀯𑁂𑀤𑀻. 𑀢𑀺𑀢𑁆𑀣𑁂 𑀬𑁄𑀚𑁂𑀢𑀺 𑀧𑀸𑀡𑀺𑀦𑁂𑀢𑀺 𑀲𑀩𑁆𑀩𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀧𑀯𑁂𑀲𑀦𑀼𑀧𑀸𑀬𑁂 𑀓𑀼𑀲𑀮𑀧𑀣𑁂 𑀫𑀕𑁆𑀕𑁂 𑀥𑀫𑁆𑀫𑀤𑁂𑀲𑀦𑀸𑀬 𑀬𑁄𑀚𑁂𑀢𑀺 𑀲𑀫𑁆𑀧𑀬𑁄𑀚𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀕𑀫𑀦𑀯𑀡𑁆𑀡𑀦𑀕𑀸𑀣𑀸𑀦𑀫𑀢𑁆𑀣𑁄 𑀣𑁂𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯𑀸𑀢𑀺.

𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀅𑀪𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀢𑁆𑀢𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀪𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀚𑀺𑀦𑀯𑀭𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀧𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀯𑁂𑀤𑀗𑁆𑀕𑀧𑀸𑀭𑀕𑁄 𑀲𑀓𑀧𑀭𑀲𑀫𑀬𑀓𑀼𑀲𑀮𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀳𑀺 𑀣𑁄𑀫𑁂𑀲𑀺. 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯𑀁 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀅𑀪𑀬𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀦𑀺𑀕𑀡𑁆𑀞𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀺𑀓𑁄 𑀳𑀼𑀢𑁆𑀯𑀸 𑀘𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀦𑀺𑀕𑀡𑁆𑀞𑁂𑀦 𑀦𑀸𑀝𑀧𑀼𑀢𑁆𑀢𑁂𑀦 𑀲𑀢𑁆𑀣𑀼 𑀯𑀸𑀤𑀸𑀭𑁄𑀧𑀦𑀢𑁆𑀣𑀸𑀬 𑀧𑁂𑀲𑀺𑀢𑁄 𑀦𑀺𑀧𑀼𑀡𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀧𑀼𑀡𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀭𑀽𑀧𑀁 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁯𑁫. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀪𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀮𑁄𑀫𑀲𑀓𑀗𑁆𑀕𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀝𑁆𑀞𑀫𑀸𑀧𑀤𑀸𑀦𑁂 𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀮𑁄𑀫𑀲𑀓𑀗𑁆𑀕𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀳𑁄𑀲𑀺. 𑀅𑀧𑀭𑁄 𑀘𑀦𑁆𑀤𑀦𑁄 𑀦𑀸𑀫 𑀢𑀲𑁆𑀲 𑀲𑀳𑀸𑀬𑁄 𑀘𑀸𑀲𑀺. 𑀢𑁂 𑀤𑁆𑀯𑁂𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀁𑀲𑀼. 𑀢𑁂𑀲𑀼 𑀅𑀬𑀁 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀓𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑁄 𑀘𑀦𑁆𑀤𑀦𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀲𑁄 𑀲𑀓𑁆𑀬𑀓𑀼𑀮𑀧𑁆𑀧𑀲𑀸𑀤𑀓𑁂𑀦 𑀓𑀸𑀴𑀼𑀤𑀸𑀬𑀺𑀦𑀸 𑀆𑀭𑀸𑀥𑀺𑀢𑁂𑀦 𑀪𑀕𑀯𑀢𑀸 𑀲𑀓𑁆𑀬𑀭𑀸𑀚𑀽𑀦𑀁 𑀫𑀸𑀦𑀫𑀤𑁆𑀤𑀦𑀸𑀬 𑀓𑀢𑀁 𑀯𑁂𑀲𑁆𑀲𑀦𑁆𑀢𑀭𑀥𑀫𑁆𑀫𑀤𑁂𑀲𑀦𑀸𑀬𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀧𑁄𑀓𑁆𑀔𑀭𑀯𑀲𑁆𑀲𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀯𑀼𑀢𑁆𑀢𑀁 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀭𑀜𑁆𑀜𑀯𑀸𑀲𑀁 𑀯𑀲𑀦𑁆𑀢𑁄 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀦𑀼𑀲𑀸𑀲𑀦𑀁 (𑀫. 𑀦𑀺. 𑁩.𑁨𑁮𑁬 𑀆𑀤𑀬𑁄) 𑀲𑀭𑀺𑀢𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁨𑁨𑁫. 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀧𑁆𑀧𑁄 𑀢𑀸𑀯 𑀘𑀢𑀼𑀩𑁆𑀩𑀺𑀥𑁄 𑁋 𑀲𑀸𑀭𑀓𑀧𑁆𑀧𑁄, 𑀯𑀭𑀓𑀧𑁆𑀧𑁄, 𑀫𑀡𑁆𑀟𑀓𑀧𑁆𑀧𑁄, 𑀪𑀤𑁆𑀤𑀓𑀧𑁆𑀧𑁄𑀢𑀺. 𑀢𑁂𑀲𑀼 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀲𑀸𑀭𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀯𑀭𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀫𑀡𑁆𑀟𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀧𑀜𑁆𑀘 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀪𑀤𑁆𑀤𑀓𑀧𑁆𑀧𑁄 𑀦𑀸𑀫. 𑀅𑀜𑁆𑀜𑀢𑁆𑀣 𑀧𑀦 𑁋

‘‘𑀲𑀸𑀭𑀓𑀧𑁆𑀧𑁄 𑀫𑀡𑁆𑀟𑀓𑀧𑁆𑀧𑁄, 𑀲𑀸𑀭𑀫𑀡𑁆𑀟𑀓𑀧𑁆𑀧𑁄 𑀢𑀣𑀸;

𑀯𑀭𑀓𑀧𑁆𑀧𑁄 𑀪𑀤𑁆𑀤𑀓𑀧𑁆𑀧𑁄, 𑀓𑀧𑁆𑀧𑀸 𑀧𑀜𑁆𑀘𑀯𑀺𑀥𑀸 𑀲𑀺𑀬𑀼𑀁.

‘‘𑀏𑀓𑁄 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄, 𑀧𑀜𑁆𑀘 𑀩𑀼𑀤𑁆𑀥𑀸 𑀬𑀣𑀸𑀓𑁆𑀓𑀫𑀁;

𑀏𑀢𑁂𑀲𑀼 𑀧𑀜𑁆𑀘𑀓𑀧𑁆𑀧𑁂𑀲𑀼, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀦𑀸𑀬𑀓𑀸’’𑀢𑀺. 𑁋

𑀏𑀯𑀁 𑀧𑀜𑁆𑀘 𑀓𑀧𑁆𑀧𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀅𑀬𑀁 𑀓𑀧𑁆𑀧𑁄 ‘‘𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄 𑀕𑁄𑀢𑀫𑁄 𑀫𑁂𑀢𑁆𑀢𑁂𑀬𑁆𑀬𑁄’’𑀢𑀺 𑀧𑀜𑁆𑀘𑀩𑀼𑀤𑁆𑀥𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀪𑀤𑁆𑀤𑀓𑀧𑁆𑀧𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑀫𑁆𑀳𑀺 𑀓𑀲𑁆𑀲𑀧𑁄 𑀦𑀸𑀬𑀓𑁄 𑀉𑀧𑁆𑀧𑀚𑁆𑀚𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀮𑁄𑀫𑀲𑀓𑀗𑁆𑀕𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀯𑀦𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀯𑀫𑀸𑀧𑀤𑀸𑀦𑁂 𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀦𑀯𑀘𑁆𑀙𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁄 𑀘𑀼𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀪𑀺𑀓𑁆𑀔𑀽𑀦𑀁 𑀲𑀫𑀻𑀧𑁂 𑀓𑀧𑁄𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄. 𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀓𑀸𑀮𑁂𑀬𑁂𑀯 𑀫𑀸𑀢𑀼 𑀤𑁄𑀳𑀴𑁄 𑀉𑀤𑀧𑀸𑀤𑀺 𑀯𑀦𑁂 𑀯𑀲𑀺𑀢𑀼𑀁 𑀯𑀦𑁂 𑀯𑀺𑀚𑀸𑀬𑀺𑀢𑀼𑀁. 𑀢𑀢𑁄 𑀇𑀘𑁆𑀙𑀸𑀦𑀼𑀭𑀽𑀧𑀯𑀲𑁂𑀦 𑀯𑀦𑁂 𑀯𑀲𑀦𑁆𑀢𑀺𑀬𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀕𑀩𑁆𑀪𑀢𑁄 𑀦𑀺𑀓𑁆𑀔𑀦𑁆𑀢𑀜𑁆𑀘 𑀦𑀁 𑀓𑀸𑀲𑀸𑀯𑀔𑀡𑁆𑀟𑁂𑀦 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁄, 𑀭𑀸𑀚𑀸 𑀢𑀁 𑀓𑀼𑀫𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀳𑁂𑀯 𑀧𑁄𑀲𑁂𑀲𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙𑀩𑁆𑀩𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸 𑀩𑀼𑀤𑁆𑀥𑁂 𑀚𑀸𑀢𑁂 𑀲𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑁂 𑀧𑀲𑀦𑁆𑀦𑁄 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀭𑀳𑀸 𑀅𑀳𑁄𑀲𑀺.

𑁨𑁫𑁧. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄𑀢𑀺 𑀏𑀢𑁆𑀣 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑀦𑁆𑀥𑀼 𑀜𑀸𑀢𑀓𑁄𑀢𑀺 𑀩𑁆𑀭𑀸𑀳𑁆𑀫𑀡𑀩𑀦𑁆𑀥𑀽𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀩𑁆𑀭𑀳𑁆𑀫𑀩𑀦𑁆𑀥𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑀬𑀲𑀢𑁆𑀢𑀸 𑀫𑀳𑀸𑀬𑀲𑁄. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀦𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀘𑀽𑀴𑀲𑀼𑀕𑀦𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑀲𑀫𑀸𑀧𑀤𑀸𑀦𑁂 𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀼𑀕𑀦𑁆𑀥𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀩𑁆𑀩𑀤𑀸 𑀦𑀫𑀲𑁆𑀲𑀫𑀸𑀦𑁄 𑀫𑀳𑀸𑀤𑀸𑀦𑀁 𑀤𑀤𑀫𑀸𑀦𑁄 𑀫𑀸𑀲𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀬𑀸 𑀘𑀢𑀼𑀚𑁆𑀚𑀸𑀢𑀺𑀕𑀦𑁆𑀥𑁂𑀦 𑀯𑀺𑀮𑀺𑀫𑁆𑀧𑁂𑀲𑀺. ‘‘𑀫𑀫 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀢𑁄 𑀲𑀼𑀕𑀦𑁆𑀥𑀕𑀦𑁆𑀥𑁄 𑀦𑀺𑀩𑁆𑀩𑀢𑁆𑀢𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀢𑀁 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀓𑀸𑀫𑀸𑀯𑀘𑀭𑀮𑁄𑀓𑀁 𑀲𑀭𑀻𑀭𑀕𑀦𑁆𑀥𑁂𑀦 𑀲𑀼𑀕𑀦𑁆𑀥𑀁 𑀓𑀼𑀭𑀼𑀫𑀸𑀦𑁄 𑀲𑀼𑀕𑀦𑁆𑀥𑀤𑁂𑀯𑀧𑀼𑀢𑁆𑀢𑁄𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁄 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀲𑁆𑀲𑁂𑀯 𑀫𑀸𑀢𑀼𑀬𑀸 𑀲𑀭𑀻𑀭𑀕𑀦𑁆𑀥𑁂𑀦 𑀲𑀓𑀮𑀕𑁂𑀳𑀁 𑀲𑀓𑀮𑀦𑀕𑀭𑀜𑁆𑀘 𑀲𑀼𑀕𑀦𑁆𑀥𑁂𑀦 𑀏𑀓𑀕𑀦𑁆𑀥𑀁 𑀅𑀳𑁄𑀲𑀺, 𑀚𑀸𑀢𑀓𑁆𑀔𑀡𑁂 𑀲𑀓𑀮𑀁 𑀲𑀸𑀯𑀢𑁆𑀣𑀺𑀦𑀕𑀭𑀁 𑀲𑀼𑀕𑀦𑁆𑀥𑀓𑀭𑀡𑁆𑀟𑀓𑁄 𑀯𑀺𑀬 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀲𑀼𑀕𑀦𑁆𑀥𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀼𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀢𑀤𑀸 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀧𑀢𑁆𑀯𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀉𑀧𑁆𑀧𑀦𑁆𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀏𑀢𑁆𑀣𑀦𑁆𑀢𑀭𑁂 𑀦𑀺𑀧𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 𑀲𑀼𑀕𑀦𑁆𑀥𑀫𑁂𑀯 𑀯𑀸𑀬𑀺. 𑀤𑁂𑀯𑀸𑀧𑀺 𑀤𑀺𑀩𑁆𑀩𑀘𑀼𑀡𑁆𑀡𑀤𑀺𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑀸𑀦𑀺 𑀑𑀓𑀺𑀭𑀦𑁆𑀢𑀺.

𑁨𑁭𑁨. 𑀲𑁄𑀧𑀺 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯, 𑀓𑁂𑀯𑀮𑀁 𑀧𑀼𑀜𑁆𑀜𑀦𑀸𑀦𑀢𑁆𑀢𑀁 𑀦𑀸𑀫𑀦𑀸𑀦𑀢𑁆𑀢𑀜𑁆𑀘 𑀯𑀺𑀲𑁂𑀲𑁄.

𑀘𑀽𑀴𑀲𑀼𑀕𑀦𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀧𑀜𑁆𑀘𑀧𑀜𑁆𑀜𑀸𑀲𑀫𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫𑁬. 𑀬𑀲𑀯𑀕𑁆𑀕𑁄

𑁧. 𑀬𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀙𑀧𑁆𑀧𑀜𑁆𑀜𑀸𑀲𑀫𑁂 𑀯𑀕𑁆𑀕𑁂 𑀧𑀞𑀫𑀸𑀧𑀤𑀸𑀦𑁂 𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑁆𑀕𑀬𑁆𑀳𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀬𑀲𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀢𑁆𑀢𑀦𑁄 𑀪𑀯𑀦𑀁 𑀦𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀪𑀕𑀯𑀦𑁆𑀢𑀁 𑀫𑀳𑀕𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀺, 𑀏𑀓𑁂𑀓𑀜𑁆𑀘 𑀪𑀺𑀓𑁆𑀔𑀼𑀁 𑀫𑀳𑀕𑁆𑀖𑁂𑀦𑁂𑀯 𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑁂𑀦 𑀲𑀩𑁆𑀩𑁂𑀦 𑀘 𑀲𑀫𑀡𑀧𑀭𑀺𑀓𑁆𑀔𑀸𑀭𑁂𑀦. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑀮𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀽𑀚𑁂𑀲𑀺. 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀏𑀯𑀁 𑀲𑁄 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀲𑀼𑀚𑀸𑀢𑀸𑀬 𑀪𑀕𑀯𑀢𑁄 𑀔𑀻𑀭𑀧𑀸𑀬𑀸𑀲𑀁 𑀤𑀺𑀦𑁆𑀦𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀬𑀲𑁄 𑀦𑀸𑀫 𑀦𑀸𑀫𑁂𑀦 𑀧𑀭𑀫𑀲𑀼𑀔𑀼𑀫𑀸𑀮𑁄. 𑀢𑀲𑁆𑀲 𑀢𑀬𑁄 𑀧𑀸𑀲𑀸𑀤𑀸 𑀳𑁄𑀦𑁆𑀢𑀺 𑁋 𑀏𑀓𑁄 𑀳𑁂𑀫𑀦𑁆𑀢𑀺𑀓𑁄, 𑀏𑀓𑁄 𑀕𑀺𑀫𑁆𑀳𑀺𑀓𑁄, 𑀏𑀓𑁄 𑀯𑀲𑁆𑀲𑀺𑀓𑁄𑀢𑀺. 𑀲𑁄 𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 𑀯𑀲𑀢𑀺, 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀦 𑀑𑀢𑀭𑀢𑀺. 𑀳𑁂𑀫𑀦𑁆𑀢𑀺𑀓𑁂 𑀧𑀸𑀲𑀸𑀤𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀼𑀨𑀼𑀲𑀺𑀢𑀯𑀸𑀢𑀧𑀸𑀦𑀓𑀯𑀸𑀝𑁂 𑀢𑀢𑁆𑀣𑁂𑀯 𑀧𑀝𑀺𑀯𑀲𑀢𑀺. 𑀕𑀺𑀫𑁆𑀳𑀺𑀓𑁂 𑀧𑀸𑀲𑀸𑀤𑁂 𑀩𑀳𑀼𑀓𑀯𑀸𑀝𑀯𑀸𑀢𑀧𑀸𑀦𑀚𑀸𑀮𑀸𑀳𑀺 𑀲𑀫𑁆𑀧𑀦𑁆𑀦𑁂 𑀢𑀢𑁆𑀣𑁂𑀯 𑀯𑀲𑀢𑀺. 𑀳𑀢𑁆𑀣𑀧𑀸𑀤𑀸𑀦𑀁 𑀲𑀼𑀔𑀼𑀫𑀸𑀮𑀢𑀸𑀬 𑀪𑀽𑀫𑀺𑀬𑀁 𑀦𑀺𑀲𑀚𑁆𑀚𑀸𑀤𑀺𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀺𑀫𑁆𑀩𑀮𑀺𑀢𑀼𑀮𑀸𑀤𑀺𑀧𑀼𑀡𑁆𑀡𑀲𑀪𑀸𑀯𑁂 𑀅𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀉𑀧𑀥𑀸𑀦𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀏𑀯𑀁 𑀤𑁂𑀯𑀮𑁄𑀓𑁂 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀲𑁆𑀲 𑀲𑀫𑀗𑁆𑀕𑀻𑀪𑀽𑀢𑀲𑁆𑀲 𑀧𑀭𑀺𑀘𑀸𑀭𑀬𑀫𑀸𑀦𑀲𑁆𑀲 𑀧𑀝𑀺𑀓𑀘𑁆𑀘𑁂𑀯 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺, 𑀧𑀭𑀺𑀚𑀦𑀲𑁆𑀲𑀸𑀧𑀺 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺, 𑀲𑀩𑁆𑀩𑀭𑀢𑁆𑀢𑀺𑀬𑁄 𑀘 𑀢𑁂𑀮𑀧𑀤𑀻𑀧𑁄 𑀛𑀸𑀬𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀧𑀝𑀺𑀓𑀘𑁆𑀘𑁂𑀯 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀤𑁆𑀤𑀲 𑀲𑀓𑀁 𑀧𑀭𑀺𑀚𑀦𑀁 𑀲𑀼𑀧𑀦𑁆𑀢𑀁 𑀅𑀜𑁆𑀜𑀺𑀲𑁆𑀲𑀸 𑀓𑀘𑁆𑀙𑁂 𑀯𑀻𑀡𑀁, 𑀅𑀜𑁆𑀜𑀺𑀲𑁆𑀲𑀸 𑀓𑀡𑁆𑀞𑁂 𑀫𑀼𑀤𑀺𑀗𑁆𑀕𑀁, 𑀅𑀜𑁆𑀜𑀺𑀲𑁆𑀲𑀸 𑀓𑀘𑁆𑀙𑁂 𑀆𑀴𑀫𑁆𑀩𑀭𑀁, 𑀅𑀜𑁆𑀜𑀁 𑀯𑀺𑀓𑁂𑀲𑀺𑀓𑀁, 𑀯𑀺𑀓𑁆𑀔𑁂𑀴𑀺𑀓𑀁, 𑀅𑀜𑁆𑀜𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄 𑀳𑀢𑁆𑀣𑀧𑀢𑁆𑀢𑀁 𑀲𑀼𑀲𑀸𑀦𑀁 𑀫𑀜𑁆𑀜𑁂, 𑀤𑀺𑀲𑁆𑀯𑀸𑀦𑀲𑁆𑀲 𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑁄𑀲𑀺, 𑀦𑀺𑀩𑁆𑀩𑀺𑀤𑀸𑀬 𑀘𑀺𑀢𑁆𑀢𑀁 𑀲𑀡𑁆𑀞𑀸𑀲𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀉𑀧𑀤𑁆𑀤𑀼𑀢𑀁 𑀯𑀢 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢 𑀪𑁄’’𑀢𑀺.

𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀬𑁄 𑀆𑀭𑁄𑀳𑀺𑀢𑁆𑀯𑀸 𑀬𑁂𑀦 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀅𑀫𑀦𑀼𑀲𑁆𑀲𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼 𑁋 ‘‘𑀫𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑀫𑀓𑀸𑀲𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀦𑀕𑀭𑀤𑁆𑀯𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀅𑀫𑀦𑀼𑀲𑁆𑀲𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼 𑁋 ‘‘𑀫𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑀫𑀓𑀸𑀲𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀇𑀲𑀺𑀧𑀢𑀦𑀁 𑀫𑀺𑀕𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀢𑀺, 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀉𑀧𑀤𑁆𑀤𑀼𑀢𑀁 𑀯𑀢 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢 𑀪𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀔𑁄, 𑀬𑀲, 𑀅𑀦𑀼𑀧𑀤𑁆𑀤𑀼𑀢𑀁, 𑀇𑀤𑀁 𑀅𑀦𑀼𑀧𑀲𑁆𑀲𑀝𑁆𑀞𑀁, 𑀏𑀳𑀺, 𑀬𑀲, 𑀦𑀺𑀲𑀻𑀤, 𑀥𑀫𑁆𑀫𑀁 𑀢𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄, ‘‘𑀇𑀤𑀁 𑀓𑀺𑀭 𑀅𑀦𑀼𑀧𑀤𑁆𑀤𑀼𑀢𑀁, 𑀇𑀤𑀁 𑀅𑀦𑀼𑀧𑀲𑁆𑀲𑀝𑁆𑀞’’𑀦𑁆𑀢𑀺 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀳𑀺 𑀑𑀭𑁄𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁, 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑀅𑀣 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀫𑀸𑀢𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀬𑁂𑀦 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀬𑀲𑁄 𑀦 𑀤𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄, 𑀲𑁂𑀝𑁆𑀞𑀺 𑀕𑀳𑀧𑀢𑀺, 𑀘𑀢𑀼𑀤𑁆𑀤𑀺𑀲𑀸 𑀅𑀲𑁆𑀲𑀤𑀽𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀸𑀫𑀁𑀬𑁂𑀯 𑀬𑁂𑀦 𑀇𑀲𑀺𑀧𑀢𑀦𑀁 𑀫𑀺𑀕𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄, 𑀲𑁂𑀝𑁆𑀞𑀺 𑀕𑀳𑀧𑀢𑀺, 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀦𑀁 𑀦𑀺𑀓𑁆𑀔𑁂𑀧𑀁, 𑀤𑀺𑀲𑁆𑀯𑀸𑀦 𑀢𑀁𑀬𑁂𑀯 𑀅𑀦𑀼𑀕𑀫𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁂𑀬𑁆𑀬𑀁, 𑀬𑀣𑀸 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀇𑀥 𑀦𑀺𑀲𑀺𑀦𑁆𑀦𑁄 𑀇𑀥 𑀦𑀺𑀲𑀺𑀦𑁆𑀦𑀁 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀦 𑀧𑀲𑁆𑀲𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁂𑀲𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀲𑁆𑀲𑁂𑀬𑁆𑀬𑀸’’𑀢𑀺. 𑀢𑁂𑀦 𑀳𑀺 𑀕𑀳𑀧𑀢𑀺 𑀦𑀺𑀲𑀻𑀤, 𑀅𑀧𑁆𑀧𑁂𑀯 𑀦𑀸𑀫 𑀇𑀥 𑀦𑀺𑀲𑀺𑀦𑁆𑀦𑁄 𑀇𑀥 𑀦𑀺𑀲𑀺𑀦𑁆𑀦𑀁 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀲𑀻𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 ‘‘𑀇𑀥𑁂𑀯 𑀓𑀺𑀭𑀸𑀳𑀁 𑀦𑀺𑀲𑀺𑀦𑁆𑀦𑁄 𑀇𑀥 𑀦𑀺𑀲𑀺𑀦𑁆𑀦𑀁 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺…𑀧𑁂… 𑀅𑀧𑀭𑀧𑁆𑀧𑀘𑁆𑀘𑀬𑁄 𑀅𑀢𑁆𑀣𑀼 𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂, 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘, 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀲𑁄𑀯 𑀮𑁄𑀓𑁂 𑀧𑀞𑀫𑀁 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀢𑁂𑀯𑀸𑀘𑀺𑀓𑁄.

𑀅𑀣 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀺𑀢𑀼𑀦𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀬𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀲𑀲𑁆𑀲 𑀔𑁄 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀺𑀢𑀼𑀦𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀪𑀩𑁆𑀩𑁄 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄, 𑀬𑀁𑀦𑀽𑀦𑀸𑀳𑀁 𑀢𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀢𑀸 𑀢𑁂 𑀢𑀸𑀢, 𑀬𑀲, 𑀧𑀭𑀺𑀤𑁂𑀯𑀲𑁄𑀓𑀲𑀫𑀸𑀧𑀦𑁆𑀦𑀸, 𑀤𑁂𑀳𑀺 𑀫𑀸𑀢𑀼𑀬𑀸 𑀚𑀻𑀯𑀺𑀢’’𑀦𑁆𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀉𑀮𑁆𑀮𑁄𑀓𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀬𑀲𑁆𑀲 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑁂𑀓𑁆𑀔𑁂𑀦 𑀤𑀲𑁆𑀲𑀦𑁂𑀦 𑀥𑀫𑁆𑀫𑁄 𑀤𑀺𑀝𑁆𑀞𑁄 𑀯𑀺𑀤𑀺𑀢𑁄 𑀲𑁂𑀬𑁆𑀬𑀣𑀸𑀧𑀺 𑀢𑀬𑀸, 𑀢𑀲𑁆𑀲 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀪𑀩𑁆𑀩𑁄 𑀦𑀼 𑀔𑁄 𑀲𑁄, 𑀕𑀳𑀧𑀢𑀺, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑀲𑀲𑁆𑀲 𑀔𑁄, 𑀕𑀳𑀧𑀢𑀺, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑁂𑀓𑁆𑀔𑁂𑀦 𑀤𑀲𑁆𑀲𑀦𑁂𑀦 𑀥𑀫𑁆𑀫𑁄 𑀤𑀺𑀝𑁆𑀞𑁄 𑀯𑀺𑀤𑀺𑀢𑁄 𑀲𑁂𑀬𑁆𑀬𑀣𑀸𑀧𑀺 𑀢𑀬𑀸, 𑀢𑀲𑁆𑀲 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀪𑀩𑁆𑀩𑁄 𑀔𑁄, 𑀕𑀳𑀧𑀢𑀺, 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄’’𑀢𑀺. ‘‘𑀮𑀸𑀪𑀸, 𑀪𑀦𑁆𑀢𑁂, 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲, 𑀲𑀼𑀮𑀤𑁆𑀥𑀁, 𑀪𑀦𑁆𑀢𑁂, 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲, 𑀬𑀣𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀬𑀲𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀧𑀘𑁆𑀙𑀸𑀲𑀫𑀡𑁂𑀦𑀸’’𑀢𑀺. ‘‘𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦’’. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺, 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀲𑁂𑀝𑁆𑀞𑀺𑀫𑁆𑀳𑀺 𑀕𑀳𑀧𑀢𑀺𑀫𑁆𑀳𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺, 𑀲𑀸𑀯 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁧. 𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑁆𑀕𑀬𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀼𑀤𑁆𑀤𑀦𑁆𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀸𑀬 𑀲𑀁 𑀲𑀼𑀝𑁆𑀞𑀼 𑀤𑀲𑁆𑀲𑁂𑀢𑀩𑁆𑀩𑀢𑁄 𑀲𑀫𑀼𑀤𑁆𑀤𑁄, 𑀅𑀣 𑀯𑀸 𑀲𑀁 𑀲𑀼𑀝𑁆𑀞𑀼 𑀉𑀤𑀺𑀬𑀢𑀺 𑀔𑁄𑀪𑀺𑀬𑀢𑀺 𑀧𑀲𑁄𑀥𑀺𑀬𑀢𑀺 𑀖𑁄𑀲𑀦𑀁 𑀓𑀭𑁄𑀦𑁆𑀢𑁄 𑀆𑀮𑀼𑀴𑀺𑀬𑀢𑀻𑀢𑀺 𑀲𑀫𑀼𑀤𑁆𑀤𑁄, 𑀫𑀳𑀦𑁆𑀢𑁄 𑀘 𑀲𑁄 𑀲𑀫𑀼𑀤𑁆𑀤𑁄 𑀘𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑁄, 𑀢𑀁 𑀫𑀳𑀸𑀲𑀫𑀼𑀤𑁆𑀤𑀁. 𑀑𑀕𑁆𑀕𑀬𑁆𑀳𑀸𑀢𑀺 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸, 𑀲𑀸𑀫𑁆𑀬𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀯𑀦𑀁 𑀫𑁂 𑀲𑀼𑀫𑀸𑀧𑀺𑀢𑀦𑁆𑀢𑀺 𑀏𑀢𑁆𑀣 𑀪𑀯𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀦𑀺𑀯𑀲𑀦𑁆𑀢𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀯𑀦𑀁, 𑀫𑀬𑁆𑀳𑀁 𑀢𑀁 𑀪𑀯𑀦𑀁 𑀢𑀁 𑀯𑀺𑀫𑀸𑀦𑀁 𑀢𑀁 𑀧𑀸𑀲𑀸𑀤𑀁 𑀧𑀜𑁆𑀘𑀧𑀸𑀓𑀸𑀭𑀓𑀽𑀝𑀸𑀕𑀸𑀭𑁂𑀳𑀺 𑀲𑀁 𑀲𑀼𑀝𑁆𑀞𑀼 𑀫𑀸𑀧𑀺𑀢𑀁 𑀦𑀕𑀭𑀁, 𑀅𑀢𑁆𑀢𑀦𑁄 𑀩𑀮𑁂𑀦 𑀲𑀼𑀝𑁆𑀞𑀼 𑀦𑀺𑀫𑁆𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀦𑀺𑀫𑁆𑀫𑀺𑀢𑀸 𑀧𑁄𑀓𑁆𑀔𑀭𑀡𑀻𑀢𑀺 𑀲𑀼𑀫𑀳𑀦𑁆𑀢𑀸 𑀳𑀼𑀢𑁆𑀯𑀸 𑀪𑀽𑀢𑀸 𑀇𑀢𑀸 𑀕𑀢𑀸 𑀧𑀯𑀢𑁆𑀢𑀸 𑀔𑀡𑀺𑀢𑀸 𑀓𑀢𑀸𑀢𑀺 𑀧𑁄𑀓𑁆𑀔𑀭𑀡𑀻, 𑀫𑀘𑁆𑀙𑀓𑀘𑁆𑀙𑀧𑀧𑀼𑀧𑁆𑀨𑀧𑀼𑀮𑀺𑀦𑀢𑀺𑀢𑁆𑀣𑀫𑀥𑀼𑀭𑁄𑀤𑀓𑀸𑀤𑀻𑀳𑀺 𑀲𑀼𑀝𑁆𑀞𑀼 𑀦𑀺𑀩𑁆𑀩𑀢𑁆𑀢𑀸 𑀦𑀺𑀫𑁆𑀫𑀺𑀢𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀯𑀸𑀓𑀽𑀧𑀓𑀽𑀚𑀺𑀢𑀸𑀢𑀺 𑀘𑀓𑁆𑀓𑀯𑀸𑀓𑀓𑀼𑀓𑁆𑀓𑀼𑀝𑀳𑀁𑀲𑀸𑀤𑀻𑀳𑀺 𑀓𑀽𑀚𑀺𑀢𑀸 𑀖𑁄𑀲𑀺𑀢𑀸 𑀦𑀸𑀤𑀺𑀢𑀸 𑀲𑀸 𑀧𑁄𑀓𑁆𑀔𑀭𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄 𑀧𑀭𑀁 𑀦𑀤𑀻𑀯𑀦𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀧𑀸𑀤𑀧𑀧𑀓𑁆𑀔𑀻𑀦𑀁 𑀯𑀡𑁆𑀡𑀜𑁆𑀘 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀤𑀲𑁆𑀲𑀦𑀜𑁆𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀤𑀸𑀦𑀓𑁆𑀓𑀫𑀜𑁆𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑀦𑁆𑀢𑀺 𑀏𑀢𑁆𑀣 𑀮𑁄𑀓𑁂 𑀆𑀳𑀼𑀢𑀺 𑀮𑁄𑀓𑀸𑀳𑀼𑀢𑀺, 𑀓𑀸𑀫𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀮𑁄𑀓𑀲𑁆𑀲 𑀆𑀳𑀼𑀢𑀺𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑀁, 𑀲𑀼𑀫𑁂𑀥𑀁 𑀪𑀕𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀩𑁆𑀬𑀸𑀓𑀭𑀡𑀤𑀸𑀦𑀜𑁆𑀘 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀨𑀮𑀜𑁆𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀬𑀲𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑀼𑀢𑀺𑀬𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀢𑁆𑀢𑀦𑀸 𑀭𑁄𑀧𑀺𑀢𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀧𑀞𑀫𑀼𑀧𑁆𑀧𑀦𑁆𑀦𑀁 𑀫𑀦𑁄𑀲𑀺𑀮𑀸𑀯𑀡𑁆𑀡𑀁 𑀏𑀓𑀁 𑀅𑀫𑁆𑀩𑀨𑀮𑀁 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀅𑀦𑀺𑀘𑁆𑀙𑀦𑁆𑀢𑁄 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀳𑀺 𑀢𑀸𑀧𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀦𑀤𑀻𑀢𑀻𑀭𑁂 𑀯𑀲𑀦𑀢𑁄 𑀓𑀲𑁆𑀲𑀧𑀕𑁄𑀢𑁆𑀢𑀢𑀸𑀬 𑀘 𑀦𑀤𑀻𑀓𑀲𑁆𑀲𑀧𑁄𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀢𑀲𑁆𑀲 𑀪𑀕𑀯𑀸 𑀲𑀧𑀭𑀺𑀲𑀲𑁆𑀲 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀲𑁄 𑀪𑀕𑀯𑀢𑁄 𑀕𑀬𑀸𑀲𑀻𑀲𑁂 𑀆𑀤𑀺𑀢𑁆𑀢𑀧𑀭𑀺𑀬𑀸𑀬 𑀤𑁂𑀲𑀦𑀸𑀬 (𑀫𑀳𑀸𑀯. 𑁫𑁪; 𑀲𑀁. 𑀦𑀺. 𑁪.𑁨𑁮) 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀢𑁆𑀣𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀭𑀼𑀯𑁂𑀮𑀸𑀬𑀁 𑀢𑀬𑁄 𑀪𑀸𑀢𑀺𑀓𑀚𑀝𑀺𑀮𑁂 𑀤𑀫𑁂𑀢𑀼𑀁 𑀬𑁂𑀦 𑀉𑀭𑀼𑀯𑁂𑀮𑀸 𑀢𑀤𑀯𑀲𑀭𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀸𑀬𑀁 𑀢𑀬𑁄 𑀚𑀝𑀺𑀮𑀸 𑀧𑀝𑀺𑀯𑀲𑀦𑁆𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀦𑀤𑀻𑀓𑀲𑁆𑀲𑀧𑁄 𑀕𑀬𑀸𑀓𑀲𑁆𑀲𑀧𑁄𑀢𑀺, 𑀢𑁂𑀲𑀼 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀧𑀜𑁆𑀘𑀦𑁆𑀦𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀳𑁄𑀢𑀺 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄, 𑀦𑀤𑀻𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀺𑀡𑁆𑀡𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀳𑁄𑀢𑀺 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄, 𑀕𑀬𑀸𑀓𑀲𑁆𑀲𑀧𑁄 𑀚𑀝𑀺𑀮𑁄 𑀤𑁆𑀯𑀺𑀦𑁆𑀦𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀳𑁄𑀢𑀺 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁂, 𑀓𑀲𑁆𑀲𑀧, 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀅𑀕𑁆𑀬𑀸𑀕𑀸𑀭𑁂’’𑀢𑀺. 𑀦 𑀔𑁄 𑀫𑁂, 𑀫𑀳𑀸𑀲𑀫𑀡, 𑀕𑀭𑀼, 𑀘𑀡𑁆𑀟𑁂𑀢𑁆𑀣 𑀦𑀸𑀕𑀭𑀸𑀚𑀸 𑀇𑀤𑁆𑀥𑀺𑀫𑀸 𑀆𑀲𑀺𑀯𑀺𑀲𑁄 𑀖𑁄𑀭𑀯𑀺𑀲𑁄, 𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘…𑀧𑁂… 𑀢𑀢𑀺𑀬𑀫𑁆𑀧𑀺…𑀧𑁂… 𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻𑀢𑀺. 𑀅𑀧𑁆𑀧𑁂𑀯 𑀫𑀁 𑀦 𑀯𑀺𑀳𑁂𑀞𑁂𑀬𑁆𑀬, 𑀇𑀗𑁆𑀖 𑀢𑁆𑀯𑀁, 𑀓𑀲𑁆𑀲𑀧, 𑀅𑀦𑀼𑀚𑀸𑀦𑀸𑀳𑀺 𑀅𑀕𑁆𑀬𑀸𑀕𑀸𑀭𑀦𑁆𑀢𑀺. 𑀯𑀺𑀳𑀭, 𑀫𑀳𑀸𑀲𑀫𑀡, 𑀬𑀣𑀸𑀲𑀼𑀔𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀕𑁆𑀬𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑀅𑀤𑁆𑀤𑀲𑀸 𑀔𑁄 𑀲𑁄 𑀦𑀸𑀕𑁄 𑀪𑀕𑀯𑀦𑁆𑀢𑀁 𑀧𑀯𑀺𑀝𑁆𑀞𑀁, 𑀤𑀺𑀲𑁆𑀯𑀸 𑀤𑀼𑀫𑁆𑀫𑀦𑁄 𑀧𑀥𑀽𑀧𑀸𑀬𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀲𑁆𑀲 𑀦𑀸𑀕𑀲𑁆𑀲 𑀅𑀦𑀼𑀧𑀳𑀘𑁆𑀘 𑀙𑀯𑀺𑀜𑁆𑀘 𑀘𑀫𑁆𑀫𑀜𑁆𑀘 𑀫𑀁𑀲𑀜𑁆𑀘 𑀦𑁆𑀳𑀸𑀭𑀼𑀜𑁆𑀘 𑀅𑀝𑁆𑀞𑀺𑀜𑁆𑀘 𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀥𑀽𑀧𑀸𑀬𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀧𑀚𑁆𑀚𑀮𑀺. 𑀪𑀕𑀯𑀸𑀧𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀚𑁆𑀚𑀮𑀺. 𑀉𑀪𑀺𑀦𑁆𑀦𑀁 𑀲𑀚𑁄𑀢𑀺𑀪𑀽𑀢𑀸𑀦𑀁 𑀅𑀕𑁆𑀬𑀸𑀕𑀸𑀭𑀁 𑀆𑀤𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀅𑀕𑁆𑀬𑀸𑀕𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀪𑀺𑀭𑀽𑀧𑁄 𑀯𑀢, 𑀪𑁄, 𑀫𑀳𑀸𑀲𑀫𑀡𑁄 𑀦𑀸𑀕𑁂𑀦 𑀯𑀺𑀳𑁂𑀞𑀺𑀬𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀦𑀸𑀕𑀲𑁆𑀲 𑀅𑀦𑀼𑀧𑀳𑀘𑁆𑀘 𑀙𑀯𑀺𑀜𑁆𑀘 𑀘𑀫𑁆𑀫𑀜𑁆𑀘 𑀫𑀁𑀲𑀜𑁆𑀘 𑀦𑁆𑀳𑀸𑀭𑀼𑀜𑁆𑀘 𑀅𑀝𑁆𑀞𑀺𑀜𑁆𑀘 𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀤𑀲𑁆𑀲𑁂𑀲𑀺 𑁋 ‘‘𑀅𑀬𑀁 𑀢𑁂, 𑀓𑀲𑁆𑀲𑀧, 𑀦𑀸𑀕𑁄 𑀧𑀭𑀺𑀬𑀸𑀤𑀺𑀦𑁆𑀦𑁄 𑀅𑀲𑁆𑀲 𑀢𑁂𑀚𑀲𑀸 𑀢𑁂𑀚𑁄’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑀡𑁆𑀟𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀇𑀤𑁆𑀥𑀺𑀫𑀢𑁄 𑀆𑀲𑀺𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

‘‘𑀦𑁂𑀭𑀜𑁆𑀚𑀭𑀸𑀬𑀁 𑀪𑀕𑀯𑀸, 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀅𑀯𑁄𑀘;

𑀲𑀘𑁂 𑀢𑁂 𑀓𑀲𑁆𑀲𑀧 𑀅𑀕𑀭𑀼, 𑀯𑀺𑀳𑀭𑁂𑀫𑀼 𑀅𑀚𑁆𑀚𑀡𑁆𑀳𑁄 𑀅𑀕𑁆𑀕𑀺𑀲𑀸𑀮𑀫𑁆𑀳𑀻’’𑀢𑀺.

‘‘𑀦 𑀔𑁄 𑀫𑁂 𑀫𑀳𑀸𑀲𑀫𑀡 𑀕𑀭𑀼, 𑀨𑀸𑀲𑀼𑀓𑀸𑀫𑁄𑀯 𑀢𑀁 𑀦𑀺𑀯𑀸𑀭𑁂𑀫𑀺;

𑀘𑀡𑁆𑀟𑁂𑀢𑁆𑀣 𑀦𑀸𑀕𑀭𑀸𑀚𑀸, 𑀇𑀤𑁆𑀥𑀺𑀫𑀸 𑀆𑀲𑀺𑀯𑀺𑀲𑁄 𑀖𑁄𑀭𑀯𑀺𑀲𑁄;

𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻’’𑀢𑀺.

‘‘𑀅𑀧𑁆𑀧𑁂𑀯 𑀫𑀁 𑀦 𑀯𑀺𑀳𑁂𑀞𑁂𑀬𑁆𑀬, 𑀇𑀗𑁆𑀖 𑀢𑁆𑀯𑀁 𑀓𑀲𑁆𑀲𑀧 𑀅𑀦𑀼𑀚𑀸𑀦𑀸𑀳𑀺 𑀅𑀕𑁆𑀬𑀸𑀕𑀸𑀭𑀦𑁆𑀢𑀺;

𑀤𑀺𑀦𑁆𑀦𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸, 𑀅𑀪𑀻𑀢𑁄 𑀧𑀸𑀯𑀺𑀲𑀺 𑀪𑀬𑀫𑀢𑀻𑀢𑁄.

‘‘𑀤𑀺𑀲𑁆𑀯𑀸 𑀇𑀲𑀺𑀁 𑀧𑀯𑀺𑀝𑁆𑀞𑀁, 𑀅𑀳𑀺𑀦𑀸𑀕𑁄 𑀤𑀼𑀫𑁆𑀫𑀦𑁄 𑀧𑀥𑀽𑀧𑀸𑀬𑀺;

𑀲𑀼𑀫𑀦𑀫𑀦𑀲𑁄 𑀅𑀥𑀺𑀫𑀦𑁄, 𑀫𑀦𑀼𑀲𑁆𑀲𑀦𑀸𑀕𑁄𑀧𑀺 𑀢𑀢𑁆𑀣 𑀧𑀥𑀽𑀧𑀸𑀬𑀺.

‘‘𑀫𑀓𑁆𑀔𑀜𑁆𑀘 𑀅𑀲𑀳𑀫𑀸𑀦𑁄, 𑀅𑀳𑀺𑀦𑀸𑀕𑁄 𑀧𑀸𑀯𑀓𑁄𑀯 𑀧𑀚𑁆𑀚𑀮𑀺;

𑀢𑁂𑀚𑁄𑀥𑀸𑀢𑀼𑀲𑀼𑀓𑀼𑀲𑀮𑁄, 𑀫𑀦𑀼𑀲𑁆𑀲𑀦𑀸𑀕𑁄𑀧𑀺 𑀢𑀢𑁆𑀣 𑀧𑀚𑁆𑀚𑀮𑀺.

‘‘𑀉𑀪𑀺𑀦𑁆𑀦𑀁 𑀲𑀚𑁄𑀢𑀺𑀪𑀽𑀢𑀸𑀦𑀁,

𑀅𑀕𑁆𑀬𑀸𑀕𑀸𑀭𑀁 𑀆𑀤𑀺𑀢𑁆𑀢𑀁 𑀳𑁄𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁;

𑀉𑀤𑀺𑀘𑁆𑀙𑀭𑁂 𑀚𑀝𑀺𑀮𑀸, 𑀅𑀪𑀺𑀭𑀽𑀧𑁄 𑀯𑀢 𑀪𑁄 𑀫𑀳𑀸𑀲𑀫𑀡𑁄;

𑀦𑀸𑀕𑁂𑀦 𑀯𑀺𑀳𑁂𑀞𑀺𑀬𑀢𑀻𑀢𑀺 𑀪𑀡𑀦𑁆𑀢𑀺.

‘‘𑀅𑀣 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦, 𑀳𑀢𑀸 𑀦𑀸𑀕𑀲𑁆𑀲 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀺;

𑀇𑀤𑁆𑀥𑀺𑀫𑀢𑁄 𑀧𑀦 𑀞𑀺𑀢𑀸, 𑀅𑀦𑁂𑀓𑀯𑀡𑁆𑀡𑀸 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀺.

‘‘𑀦𑀻𑀮𑀸 𑀅𑀣 𑀮𑁄𑀳𑀺𑀢𑀺𑀓𑀸, 𑀫𑀜𑁆𑀚𑀺𑀝𑁆𑀞𑀸 𑀧𑀻𑀢𑀓𑀸 𑀨𑀮𑀺𑀓𑀯𑀡𑁆𑀡𑀸𑀬𑁄;

𑀅𑀗𑁆𑀕𑀻𑀭𑀲𑀲𑁆𑀲 𑀓𑀸𑀬𑁂, 𑀅𑀦𑁂𑀓𑀯𑀡𑁆𑀡𑀸 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀺.

‘‘𑀧𑀢𑁆𑀢𑀫𑁆𑀳𑀺 𑀑𑀤𑀳𑀺𑀢𑁆𑀯𑀸, 𑀅𑀳𑀺𑀦𑀸𑀕𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀺;

𑀅𑀬𑀁 𑀢𑁂 𑀓𑀲𑁆𑀲𑀧 𑀦𑀸𑀕𑁄, 𑀧𑀭𑀺𑀬𑀸𑀤𑀺𑀦𑁆𑀦𑁄 𑀅𑀲𑁆𑀲 𑀢𑁂𑀚𑀲𑀸 𑀢𑁂𑀚𑁄’’𑀢𑀺.

𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀢𑁄 𑀇𑀫𑀺𑀦𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀪𑀺𑀧𑁆𑀧𑀲𑀦𑁆𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑁂𑀯, 𑀫𑀳𑀸𑀲𑀫𑀡, 𑀯𑀺𑀳𑀭, 𑀅𑀳𑀁 𑀢𑁂 𑀥𑀼𑀯𑀪𑀢𑁆𑀢𑁂𑀦𑀸’’𑀢𑀺.

𑀧𑀞𑀫𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺. 𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀅𑀝𑁆𑀞𑀁𑀲𑀼 𑀲𑁂𑀬𑁆𑀬𑀣𑀸𑀧𑀺 𑀫𑀳𑀦𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁, 𑀢𑁂 𑀦𑀼 𑀔𑁄 𑀢𑁂, 𑀫𑀳𑀸𑀲𑀫𑀡, 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀢𑁆𑀯𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀅𑀝𑁆𑀞𑀁𑀲𑀼 𑀲𑁂𑀬𑁆𑀬𑀣𑀸𑀧𑀺 𑀫𑀳𑀦𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸’’𑀢𑀺. 𑀏𑀢𑁂 𑀔𑁄, 𑀓𑀲𑁆𑀲𑀧, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 𑀥𑀫𑁆𑀫𑀲𑁆𑀲𑀯𑀦𑀸𑀬𑀸𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀤𑀼𑀢𑀺𑀬𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁, 𑀓𑁄 𑀦𑀼 𑀔𑁄 𑀲𑁄, 𑀫𑀳𑀸𑀲𑀫𑀡, 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀢𑁆𑀯𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺. 𑀏𑀲𑁄 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀥𑀫𑁆𑀫𑀲𑁆𑀲𑀯𑀦𑀸𑀬𑀸𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑁆𑀓𑁄𑀧𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀢𑀢𑀺𑀬𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁, 𑀓𑁄 𑀦𑀼 𑀔𑁄 𑀲𑁄, 𑀫𑀳𑀸𑀲𑀫𑀡, 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀢𑁆𑀯𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺. 𑀏𑀲𑁄 𑀔𑁄, 𑀓𑀲𑁆𑀲𑀧, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀥𑀫𑁆𑀫𑀲𑁆𑀲𑀯𑀦𑀸𑀬𑀸𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀸𑀧𑀺 𑀲𑀳𑀫𑁆𑀧𑀢𑀺 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀘𑀢𑀼𑀢𑁆𑀣𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑁂 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀲𑀘𑁂 𑀫𑀳𑀸𑀲𑀫𑀡𑁄 𑀫𑀳𑀸𑀚𑀦𑀓𑀸𑀬𑁂 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀫𑀳𑀸𑀲𑀫𑀡𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀫𑀫 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀅𑀳𑁄 𑀦𑀽𑀦 𑀫𑀳𑀸𑀲𑀫𑀡𑁄 𑀲𑁆𑀯𑀸𑀢𑀦𑀸𑀬 𑀦𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀉𑀢𑁆𑀢𑀭𑀓𑀼𑀭𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀤𑀺𑀯𑀸𑀯𑀺𑀳𑀸𑀭𑀁 𑀅𑀓𑀸𑀲𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁, 𑀓𑀺𑀁 𑀦𑀼 𑀔𑁄, 𑀫𑀳𑀸𑀲𑀫𑀡, 𑀳𑀺𑀬𑁆𑀬𑁄 𑀦𑀸𑀕𑀫𑀸𑀲𑀺, 𑀅𑀧𑀺𑀘 𑀫𑀬𑀁 𑀢𑀁 𑀲𑀭𑀸𑀫, ‘𑀓𑀺𑀁 𑀦𑀼 𑀔𑁄 𑀫𑀳𑀸𑀲𑀫𑀡𑁄 𑀦𑀸𑀕𑀘𑁆𑀙𑀢𑀻’𑀢𑀺, 𑀔𑀸𑀤𑀦𑀻𑀬𑀲𑁆𑀲 𑀘 𑀪𑁄𑀚𑀦𑀻𑀬𑀲𑁆𑀲 𑀘 𑀢𑁂 𑀧𑀝𑀺𑀯𑀻𑀲𑁄 𑀞𑀧𑀺𑀢𑁄’’𑀢𑀺. 𑀦𑀦𑀼 𑀢𑁂, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑁂 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀲𑀘𑁂 𑀫𑀳𑀸𑀲𑀫𑀡𑁄 𑀫𑀳𑀸𑀚𑀦𑀓𑀸𑀬𑁂 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀫𑀳𑀸𑀲𑀫𑀡𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀫𑀫 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀅𑀳𑁄 𑀦𑀽𑀦 𑀫𑀳𑀸𑀲𑀫𑀡𑁄 𑀲𑁆𑀯𑀸𑀢𑀦𑀸𑀬 𑀦𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺, 𑀲𑁄 𑀔𑁄 𑀅𑀳𑀁, 𑀓𑀲𑁆𑀲𑀧, 𑀢𑀯 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀉𑀢𑁆𑀢𑀭𑀓𑀼𑀭𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀤𑀺𑀯𑀸𑀯𑀺𑀳𑀸𑀭𑀁 𑀅𑀓𑀸𑀲𑀺𑀦𑁆𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀧𑀜𑁆𑀘𑀫𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀁𑀲𑀼𑀓𑀽𑀮𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀥𑁄𑀯𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀧𑀸𑀡𑀺𑀦𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀧𑀁𑀲𑀼𑀓𑀽𑀮𑀁 𑀥𑁄𑀯𑀢𑀽’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑀢𑀽’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀢𑁆𑀢𑀭𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀓𑀓𑀼𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀸𑀔𑀁 𑀑𑀦𑀸𑀫𑁂𑀲𑀺 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀆𑀮𑀫𑁆𑀩𑀺𑀢𑁆𑀯𑀸 𑀉𑀢𑁆𑀢𑀭𑀢𑀽’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀽’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁, 𑀓𑀺𑀁 𑀦𑀼 𑀔𑁄, 𑀫𑀳𑀸𑀲𑀫𑀡, 𑀦𑀸𑀬𑀁 𑀧𑀼𑀩𑁆𑀩𑁂 𑀇𑀥 𑀧𑁄𑀓𑁆𑀔𑀭𑀡𑀻 𑀲𑀸𑀬𑀁 𑀇𑀥 𑀧𑁄𑀓𑁆𑀔𑀭𑀡𑀻, 𑀦𑀬𑀺𑀫𑀸 𑀲𑀺𑀮𑀸 𑀧𑀼𑀩𑁆𑀩𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀸, 𑀓𑁂𑀦𑀺𑀫𑀸 𑀲𑀺𑀮𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀸, 𑀦𑀬𑀺𑀫𑀲𑁆𑀲 𑀓𑀓𑀼𑀥𑀲𑁆𑀲 𑀧𑀼𑀩𑁆𑀩𑁂 𑀲𑀸𑀔𑀸 𑀑𑀦𑀢𑀸, 𑀲𑀸𑀬𑀁 𑀲𑀸𑀔𑀸 𑀑𑀦𑀢𑀸’’𑀢𑀺? 𑀇𑀥 𑀫𑁂, 𑀓𑀲𑁆𑀲𑀧, 𑀧𑀁𑀲𑀼𑀓𑀽𑀮𑀁 𑀉𑀧𑁆𑀧𑀦𑁆𑀦𑀁 𑀅𑀳𑁄𑀲𑀺, 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀥𑁄𑀯𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀧𑀸𑀡𑀺𑀦𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀧𑀁𑀲𑀼𑀓𑀽𑀮𑀁 𑀥𑁄𑀯𑀢𑀽’’𑀢𑀺. 𑀲𑀸𑀬𑀁, 𑀓𑀲𑁆𑀲𑀧, 𑀅𑀫𑀦𑀼𑀲𑁆𑀲𑁂𑀦 𑀧𑀸𑀡𑀺𑀦𑀸 𑀔𑀡𑀺𑀢𑀸 𑀧𑁄𑀓𑁆𑀔𑀭𑀡𑀻. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑀢𑀽’’𑀢𑀺? 𑀲𑀸𑀬𑀁, 𑀓𑀲𑁆𑀲𑀧, 𑀅𑀫𑀦𑀼𑀲𑁆𑀲𑁂𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀸 𑀲𑀺𑀮𑀸. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀢𑁆𑀢𑀭𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀓𑀓𑀼𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀸𑀔𑀁 𑀑𑀦𑀸𑀫𑁂𑀲𑀺 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀆𑀮𑀫𑁆𑀩𑀺𑀢𑁆𑀯𑀸 𑀉𑀢𑁆𑀢𑀭𑀢𑀽’’𑀢𑀺? 𑀲𑁆𑀯𑀸𑀬𑀁 𑀆𑀳𑀭𑀳𑀢𑁆𑀣𑁄 𑀓𑀓𑀼𑀥𑁄. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 ‘‘𑀇𑀥, 𑀪𑀦𑁆𑀢𑁂 𑀪𑀕𑀯𑀸, 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀽’’𑀢𑀺? 𑀲𑀸𑀬𑀁, 𑀓𑀲𑁆𑀲𑀧, 𑀅𑀫𑀦𑀼𑀲𑁆𑀲𑁂𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀸 𑀲𑀺𑀮𑀸𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑁆𑀓𑁄𑀧𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. ‘‘𑀕𑀘𑁆𑀙 𑀢𑁆𑀯𑀁, 𑀓𑀲𑁆𑀲𑀧, 𑀆𑀬𑀸𑀫𑀳’’𑀦𑁆𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 𑀚𑀫𑁆𑀩𑀼𑀤𑀻𑀧𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀸 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂𑀦 𑀢𑁆𑀯𑀁, 𑀫𑀳𑀸𑀲𑀫𑀡, 𑀫𑀕𑁆𑀕𑁂𑀦 𑀆𑀕𑀢𑁄, 𑀅𑀳𑀁 𑀢𑀬𑀸 𑀧𑀞𑀫𑀢𑀭𑀁 𑀧𑀓𑁆𑀓𑀦𑁆𑀢𑁄, 𑀲𑁄 𑀢𑁆𑀯𑀁 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄’’𑀢𑀺? ‘‘𑀇𑀥𑀸𑀳𑀁, 𑀓𑀲𑁆𑀲𑀧, 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 𑀚𑀫𑁆𑀩𑀼𑀤𑀻𑀧𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄. 𑀇𑀤𑀁 𑀔𑁄, 𑀓𑀲𑁆𑀲𑀧, 𑀚𑀫𑁆𑀩𑀼𑀨𑀮𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀭𑀲𑀲𑀫𑁆𑀧𑀦𑁆𑀦𑀁, 𑀲𑀘𑁂 𑀆𑀓𑀗𑁆𑀔𑀲𑀺 𑀧𑀭𑀺𑀪𑀼𑀜𑁆𑀚𑀸’’𑀢𑀺. ‘‘𑀅𑀮𑀁, 𑀫𑀳𑀸𑀲𑀫𑀡, 𑀢𑁆𑀯𑀁𑀬𑁂𑀯 𑀢𑀁 𑀅𑀭𑀳𑀲𑀺, 𑀢𑁆𑀯𑀁𑀬𑁂𑀯 𑀢𑀁 𑀧𑀭𑀺𑀪𑀼𑀜𑁆𑀚𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀫𑀁 𑀧𑀞𑀫𑀢𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 𑀚𑀫𑁆𑀩𑀼𑀤𑀻𑀧𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. ‘‘𑀕𑀘𑁆𑀙 𑀢𑁆𑀯𑀁, 𑀓𑀲𑁆𑀲𑀧, 𑀆𑀬𑀸𑀫𑀳’’𑀦𑁆𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 𑀚𑀫𑁆𑀩𑀼𑀤𑀻𑀧𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀅𑀫𑁆𑀩𑁄…𑀧𑁂… 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀆𑀫𑀮𑀓𑀻…𑀧𑁂… 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀳𑀭𑀻𑀢𑀓𑀻…𑀧𑁂… 𑀢𑀸𑀯𑀢𑀺𑀁𑀲𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀸 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂𑀦 𑀢𑁆𑀯𑀁, 𑀫𑀳𑀸𑀲𑀫𑀡, 𑀫𑀕𑁆𑀕𑁂𑀦 𑀆𑀕𑀢𑁄, 𑀅𑀳𑀁 𑀢𑀬𑀸 𑀧𑀞𑀫𑀢𑀭𑀁 𑀧𑀓𑁆𑀓𑀦𑁆𑀢𑁄, 𑀲𑁄 𑀢𑁆𑀯𑀁 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄’’𑀢𑀺? ‘‘𑀇𑀥𑀸𑀳𑀁, 𑀓𑀲𑁆𑀲𑀧, 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄. 𑀇𑀤𑀁 𑀔𑁄, 𑀓𑀲𑁆𑀲𑀧, 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁, 𑀲𑀘𑁂 𑀆𑀓𑀗𑁆𑀔𑀲𑀺 𑀕𑀡𑁆𑀳𑀸’’𑀢𑀺. ‘‘𑀅𑀮𑀁, 𑀫𑀳𑀸𑀲𑀫𑀡, 𑀢𑁆𑀯𑀁𑀬𑁂𑀯 𑀢𑀁 𑀅𑀭𑀳𑀲𑀺, 𑀢𑁆𑀯𑀁𑀬𑁂𑀯 𑀢𑀁 𑀕𑀡𑁆𑀳𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀫𑀁 𑀧𑀞𑀫𑀢𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑀼𑀓𑀸𑀫𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀓𑀝𑁆𑀞𑀸𑀦𑀺 𑀨𑀸𑀮𑁂𑀢𑀼𑀁. 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄 𑀬𑀣𑀸 𑀫𑀬𑀁 𑀦 𑀲𑀓𑁆𑀓𑁄𑀫 𑀓𑀝𑁆𑀞𑀸𑀦𑀺 𑀨𑀸𑀮𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀨𑀸𑀮𑀺𑀬𑀦𑁆𑀢𑀼, 𑀓𑀲𑁆𑀲𑀧, 𑀓𑀝𑁆𑀞𑀸𑀦𑀻’’𑀢𑀺. ‘‘𑀨𑀸𑀮𑀺𑀬𑀦𑁆𑀢𑀼, 𑀫𑀳𑀸𑀲𑀫𑀡𑀸’’𑀢𑀺. 𑀲𑀓𑀺𑀤𑁂𑀯 𑀧𑀜𑁆𑀘 𑀓𑀝𑁆𑀞𑀲𑀢𑀸𑀦𑀺 𑀨𑀸𑀮𑀺𑀬𑀺𑀁𑀲𑀼. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀓𑀝𑁆𑀞𑀸𑀦𑀺𑀧𑀺 𑀨𑀸𑀮𑀺𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑀼𑀓𑀸𑀫𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀕𑁆𑀕𑀺𑀁 𑀉𑀚𑁆𑀚𑀮𑁂𑀢𑀼𑀁. 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄 𑀬𑀣𑀸 𑀫𑀬𑀁 𑀦 𑀲𑀓𑁆𑀓𑁄𑀫 𑀅𑀕𑁆𑀕𑀺𑀁 𑀉𑀚𑁆𑀚𑀮𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀚𑁆𑀚𑀮𑀺𑀬𑀦𑁆𑀢𑀼, 𑀓𑀲𑁆𑀲𑀧, 𑀅𑀕𑁆𑀕𑀻’’𑀢𑀺. ‘‘𑀉𑀚𑁆𑀚𑀮𑀺𑀬𑀦𑁆𑀢𑀼, 𑀫𑀳𑀸𑀲𑀫𑀡𑀸’’𑀢𑀺. 𑀲𑀓𑀺𑀤𑁂𑀯 𑀧𑀜𑁆𑀘 𑀅𑀕𑁆𑀕𑀺𑀲𑀢𑀸𑀦𑀺 𑀉𑀚𑁆𑀚𑀮𑀺𑀬𑀺𑀁𑀲𑀼. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀅𑀕𑁆𑀕𑀻𑀧𑀺 𑀉𑀚𑁆𑀚𑀮𑀺𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀕𑁆𑀕𑀺𑀁 𑀯𑀺𑀚𑁆𑀛𑀸𑀧𑁂𑀢𑀼𑀁. 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄 𑀬𑀣𑀸 𑀫𑀬𑀁 𑀦 𑀲𑀓𑁆𑀓𑁄𑀫 𑀅𑀕𑁆𑀕𑀺𑀁 𑀯𑀺𑀚𑁆𑀛𑀸𑀧𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀚𑁆𑀛𑀸𑀬𑀦𑁆𑀢𑀼, 𑀓𑀲𑁆𑀲𑀧, 𑀅𑀕𑁆𑀕𑀻’’𑀢𑀺. ‘‘𑀯𑀺𑀚𑁆𑀛𑀸𑀬𑀦𑁆𑀢𑀼, 𑀫𑀳𑀸𑀲𑀫𑀡𑀸’’𑀢𑀺. 𑀲𑀓𑀺𑀤𑁂𑀯 𑀧𑀜𑁆𑀘 𑀅𑀕𑁆𑀕𑀺𑀲𑀢𑀸𑀦𑀺 𑀯𑀺𑀚𑁆𑀛𑀸𑀬𑀺𑀁𑀲𑀼. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀅𑀕𑁆𑀕𑀻𑀧𑀺 𑀯𑀺𑀚𑁆𑀛𑀸𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀉𑀫𑁆𑀫𑀼𑀚𑁆𑀚𑀦𑁆𑀢𑀺𑀧𑀺 𑀦𑀺𑀫𑀼𑀚𑁆𑀚𑀦𑁆𑀢𑀺𑀧𑀺 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀫𑀦𑁆𑀤𑀸𑀫𑀼𑀔𑀺𑀲𑀢𑀸𑀦𑀺 𑀅𑀪𑀺𑀦𑀺𑀫𑁆𑀫𑀺𑀦𑀺 𑀬𑀢𑁆𑀣 𑀢𑁂 𑀚𑀝𑀺𑀮𑀸 𑀉𑀢𑁆𑀢𑀭𑀺𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀲𑀼𑀁. 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄 𑀬𑀣𑀬𑀺𑀫𑀸 𑀫𑀦𑁆𑀤𑀸𑀫𑀼𑀔𑀺𑀬𑁄 𑀦𑀺𑀫𑁆𑀫𑀺𑀢𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀢𑀸𑀯 𑀩𑀳𑀽 𑀫𑀦𑁆𑀤𑀸𑀫𑀼𑀔𑀺𑀬𑁄𑀧𑀺 𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀧𑀸𑀯𑀲𑁆𑀲𑀺, 𑀫𑀳𑀸 𑀉𑀤𑀓𑀯𑀸𑀳𑀓𑁄 𑀲𑀜𑁆𑀚𑀸𑀬𑀺, 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺 𑀲𑁄 𑀧𑀤𑁂𑀲𑁄 𑀉𑀤𑀓𑁂𑀦 𑀦 𑀑𑀢𑁆𑀣𑀝𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀲𑀫𑀦𑁆𑀢𑀸 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀫𑀚𑁆𑀛𑁂 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀫𑀦𑁆𑀢𑀸 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀫𑀚𑁆𑀛𑁂 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 ‘‘𑀫𑀸𑀳𑁂𑀯 𑀔𑁄 𑀫𑀳𑀸𑀲𑀫𑀡𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄 𑀅𑀳𑁄𑀲𑀻’’𑀢𑀺 𑀦𑀸𑀯𑀸𑀬 𑀲𑀫𑁆𑀩𑀳𑀼𑀮𑁂𑀳𑀺 𑀚𑀝𑀺𑀮𑁂𑀳𑀺 𑀲𑀤𑁆𑀥𑀺𑀁 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀲𑀫𑀦𑁆𑀢𑀸 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀫𑀚𑁆𑀛𑁂 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀦𑀼 𑀢𑁆𑀯𑀁, 𑀫𑀳𑀸𑀲𑀫𑀡𑀸’’𑀢𑀺. ‘‘𑀅𑀬𑀫𑀳𑀫𑀲𑁆𑀫𑀺, 𑀓𑀲𑁆𑀲𑀧𑀸’’𑀢𑀺 𑀪𑀕𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀦𑀸𑀯𑀸𑀬 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀉𑀤𑀓𑀫𑁆𑀧𑀺 𑀦 𑀧𑀯𑀸𑀳𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀘𑀺𑀭𑀫𑁆𑀧𑀺 𑀔𑁄 𑀇𑀫𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀏𑀯𑀁 𑀪𑀯𑀺𑀲𑁆𑀲𑀢𑀺 ‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀚𑀝𑀺𑀮𑀁 𑀲𑀁𑀯𑁂𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀦𑁂𑀯 𑀘 𑀔𑁄 𑀢𑁆𑀯𑀁, 𑀓𑀲𑁆𑀲𑀧, 𑀅𑀭𑀳𑀸, 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀸𑀧𑀦𑁆𑀦𑁄, 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲𑀲𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀢𑁆𑀯𑀁 𑀔𑁄𑀲𑀺, 𑀓𑀲𑁆𑀲𑀧, 𑀧𑀜𑁆𑀘𑀦𑁆𑀦𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄, 𑀢𑁂𑀧𑀺 𑀢𑀸𑀯 𑀅𑀧𑀮𑁄𑀓𑁂𑀳𑀺, 𑀬𑀣𑀸 𑀢𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀢𑁂 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀬𑁂𑀦 𑀢𑁂 𑀚𑀝𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀚𑀝𑀺𑀮𑁂 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑁄, 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁, 𑀬𑀣𑀸 𑀪𑀯𑀦𑁆𑀢𑁄 𑀫𑀜𑁆𑀜𑀦𑁆𑀢𑀺 𑀢𑀣𑀸 𑀓𑀭𑁄𑀦𑁆𑀢𑀽’’𑀢𑀺. ‘‘𑀘𑀺𑀭𑀧𑀝𑀺𑀓𑀸 𑀫𑀬𑀁, 𑀪𑁄, 𑀫𑀳𑀸𑀲𑀫𑀡𑁂 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀲𑀘𑁂 𑀪𑀯𑀁 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀢𑀺, 𑀲𑀩𑁆𑀩𑁂𑀯 𑀫𑀬𑀁 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀅𑀤𑁆𑀤𑀲𑀸 𑀔𑁄 𑀦𑀤𑀻𑀓𑀲𑁆𑀲𑀧𑁄 𑀚𑀝𑀺𑀮𑁄 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀯𑀼𑀬𑁆𑀳𑀫𑀸𑀦𑁂, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀳𑁂𑀯 𑀫𑁂 𑀪𑀸𑀢𑀼𑀦𑁄 𑀉𑀧𑀲𑀕𑁆𑀕𑁄 𑀅𑀳𑁄𑀲𑀻’’𑀢𑀺, 𑀚𑀝𑀺𑀮𑁂 𑀧𑀸𑀳𑁂𑀲𑀺 𑁋 ‘‘𑀕𑀘𑁆𑀙𑀣 𑀫𑁂 𑀪𑀸𑀢𑀭𑀁 𑀚𑀸𑀦𑀸𑀣𑀸’’𑀢𑀺, 𑀲𑀸𑀫𑀜𑁆𑀘 𑀢𑀻𑀳𑀺 𑀚𑀝𑀺𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀦𑀼 𑀔𑁄, 𑀓𑀲𑁆𑀲𑀧, 𑀲𑁂𑀬𑁆𑀬𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀇𑀤𑀁 𑀲𑁂𑀬𑁆𑀬𑁄’’𑀢𑀺. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀅𑀤𑁆𑀤𑀲𑀸 𑀔𑁄 𑀕𑀬𑀸𑀓𑀲𑁆𑀲𑀧𑁄 𑀚𑀝𑀺𑀮𑁄 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀯𑀼𑀬𑁆𑀳𑀫𑀸𑀦𑁂, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀳𑁂𑀯 𑀫𑁂 𑀪𑀸𑀢𑀽𑀦𑀁 𑀉𑀧𑀲𑀕𑁆𑀕𑁄 𑀅𑀳𑁄𑀲𑀻’’𑀢𑀺, 𑀚𑀝𑀺𑀮𑁂 𑀧𑀸𑀳𑁂𑀲𑀺 𑁋 ‘‘𑀕𑀘𑁆𑀙𑀣 𑀫𑁂 𑀪𑀸𑀢𑀭𑁄 𑀚𑀸𑀦𑀸𑀣𑀸’’𑀢𑀺, 𑀲𑀸𑀫𑀜𑁆𑀘 𑀤𑁆𑀯𑀻𑀳𑀺 𑀚𑀝𑀺𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀦𑀼 𑀔𑁄, 𑀓𑀲𑁆𑀲𑀧, 𑀲𑁂𑀬𑁆𑀬𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀇𑀤𑀁 𑀲𑁂𑀬𑁆𑀬𑁄’’𑀢𑀺. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺, 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

‘‘𑀪𑀕𑀯𑀢𑁄 𑀅𑀥𑀺𑀝𑁆𑀞𑀸𑀦𑁂𑀦 𑀧𑀜𑁆𑀘 𑀓𑀝𑁆𑀞𑀲𑀢𑀸𑀦𑀺 𑀦 𑀨𑀸𑀮𑀺𑀬𑀺𑀁𑀲𑀼, 𑀨𑀸𑀮𑀺𑀬𑀺𑀁𑀲𑀼, 𑀅𑀕𑁆𑀕𑀻 𑀦 𑀉𑀚𑁆𑀚𑀮𑀺𑀬𑀺𑀁𑀲𑀼, 𑀉𑀚𑁆𑀚𑀮𑀺𑀬𑀺𑀁𑀲𑀼, 𑀦 𑀯𑀺𑀚𑁆𑀛𑀸𑀬𑀺𑀁𑀲𑀼, 𑀯𑀺𑀚𑁆𑀛𑀸𑀬𑀺𑀁𑀲𑀼, 𑀧𑀜𑁆𑀘 𑀫𑀦𑁆𑀤𑀸𑀫𑀼𑀔𑀺𑀲𑀢𑀸𑀦𑀺 𑀅𑀪𑀺𑀦𑀺𑀫𑁆𑀫𑀺𑀦𑀺, 𑀏𑀢𑁂𑀦 𑀦𑀬𑁂𑀦 𑀅𑀟𑁆𑀠𑀼𑀟𑁆𑀠𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺.

‘‘𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀕𑀬𑀸𑀲𑀻𑀲𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀳𑀲𑁆𑀲𑁂𑀦 𑀲𑀩𑁆𑀩𑁂𑀳𑁂𑀯 𑀧𑀼𑀭𑀸𑀡𑀚𑀝𑀺𑀮𑁂𑀳𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀕𑀬𑀸𑀲𑀻𑀲𑁂 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀼 𑀆𑀫𑀦𑁆𑀢𑁂𑀲𑀺 (𑀲𑀁. 𑀦𑀺. 𑁪.𑁨𑁮) 𑁋 ‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁, 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀆𑀤𑀺𑀢𑁆𑀢𑀁, 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁, 𑀭𑀽𑀧𑀸 𑀆𑀤𑀺𑀢𑁆𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁, 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺? 𑀲𑁄𑀢𑀁 𑀆𑀤𑀺𑀢𑁆𑀢𑀁, 𑀲𑀤𑁆𑀤𑀸 𑀆𑀤𑀺𑀢𑁆𑀢𑀸…𑀧𑁂… 𑀖𑀸𑀦𑀁 𑀆𑀤𑀺𑀢𑁆𑀢𑀁, 𑀕𑀦𑁆𑀥𑀸 𑀆𑀤𑀺𑀢𑁆𑀢𑀸…𑀧𑁂… 𑀚𑀺𑀯𑁆𑀳𑀸 𑀆𑀤𑀺𑀢𑁆𑀢𑀸, 𑀭𑀲𑀸 𑀆𑀤𑀺𑀢𑁆𑀢𑀸…𑀧𑁂… 𑀓𑀸𑀬𑁄 𑀆𑀤𑀺𑀢𑁆𑀢𑁄, 𑀨𑁄𑀝𑁆𑀞𑀩𑁆𑀩𑀸 𑀆𑀤𑀺𑀢𑁆𑀢𑀸…𑀧𑁂… 𑀫𑀦𑁄 𑀆𑀤𑀺𑀢𑁆𑀢𑁄, 𑀥𑀫𑁆𑀫𑀸 𑀆𑀤𑀺𑀢𑁆𑀢𑀸, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁, 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢’’’𑀦𑁆𑀢𑀺 𑀯𑀤𑀸𑀫𑀺.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀘𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀭𑀽𑀧𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀬𑀫𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀲𑁄𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀤𑁆𑀤𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀖𑀸𑀦𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀕𑀦𑁆𑀥𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀚𑀺𑀯𑁆𑀳𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀭𑀲𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀓𑀸𑀬𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀨𑁄𑀝𑁆𑀞𑀩𑁆𑀩𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀫𑀦𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀥𑀫𑁆𑀫𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀫𑀦𑁄𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀬𑀫𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀢𑀲𑁆𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼.

𑁨𑁯. 𑀏𑀯𑀁 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀲𑀫𑁆𑀧𑀢𑁆𑀢𑁄 𑀦𑀤𑀻𑀓𑀲𑁆𑀲𑀧𑁄 𑀣𑁂𑀭𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀨𑀮𑀦𑁆𑀢𑀺 𑀉𑀢𑁆𑀢𑀫𑀨𑀮𑀁, 𑀅𑀢𑁆𑀢𑀦𑀸 𑀭𑁄𑀧𑀺𑀢𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀆𑀤𑀺𑀫𑁆𑀳𑀺 𑀕𑀳𑀺𑀢𑀨𑀮𑀁 𑀯𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀢𑀢𑀺𑀬𑀸𑀧𑀤𑀸𑀦𑁂 𑀅𑀚𑀺𑀦𑀘𑀫𑁆𑀫𑀯𑀢𑁆𑀣𑁄𑀳𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀏𑀓𑀢𑀺𑀁𑀲𑀓𑀧𑁆𑀧𑁂 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀯𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀢𑀲𑁆𑀲 𑀅𑀲𑁆𑀲𑀫𑀲𑀫𑀻𑀧𑁂𑀦𑀸𑀕𑀘𑁆𑀙𑀺, 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀯𑁂𑀮𑀁 𑀑𑀮𑁄𑀓𑁂𑀦𑁆𑀢𑁄 𑀫𑀦𑁄𑀳𑀭𑀸𑀦𑀺 𑀓𑁄𑀮𑀨𑀮𑀸𑀦𑀺 𑀲𑀢𑁆𑀣𑀼 𑀉𑀧𑀦𑁂𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑀻𑀳𑀺 𑀢𑀸𑀧𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀬𑀸𑀬 𑀯𑀺𑀳𑀭𑀢𑀺. 𑀕𑀬𑀸𑀬 𑀯𑀲𑀦𑀢𑁄 𑀳𑀺𑀲𑁆𑀲 𑀓𑀲𑁆𑀲𑀧𑀕𑁄𑀢𑁆𑀢𑀢𑀸𑀬 𑀘 𑀕𑀬𑀸𑀓𑀲𑁆𑀲𑀧𑁄𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀲𑁄 𑀪𑀕𑀯𑀢𑁄 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀁 𑀤𑀢𑁆𑀯𑀸 𑀦𑀤𑀻𑀓𑀲𑁆𑀲𑀧𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀆𑀤𑀺𑀢𑁆𑀢𑀧𑀭𑀺𑀬𑀸𑀬 𑀤𑁂𑀲𑀦𑀸𑀬 𑀑𑀯𑀤𑀺𑀬𑀫𑀸𑀦𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑁩𑁫. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀅𑀚𑀺𑀦𑀘𑀫𑁆𑀫𑀯𑀢𑁆𑀣𑁄𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑀺𑀦𑀘𑀫𑁆𑀫𑀯𑀢𑁆𑀣𑁄𑀢𑀺 𑀢𑀸𑀧𑀲𑀧𑀩𑁆𑀩𑀚𑀺𑀢𑀢𑁆𑀢𑀸 𑀅𑀚𑀺𑀦𑀘𑀫𑁆𑀫𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑁄𑀢𑀺 𑀅𑀢𑁆𑀣𑁄. 𑀔𑀸𑀭𑀺𑀪𑀸𑀭𑀥𑀭𑁄𑀢𑀺 𑀢𑀸𑀧𑀲𑀓𑀸𑀮𑁂 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀧𑀭𑀺𑀧𑀼𑀡𑁆𑀡𑀓𑀸𑀚𑀥𑀭𑁄𑀢𑀺 𑀅𑀢𑁆𑀣𑁄. 𑀔𑀸𑀭𑀺𑀓𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑁂 𑀧𑀽𑀭𑁂𑀢𑁆𑀯𑀸. 𑀓𑁄𑀮𑀁 𑀅𑀳𑀸𑀲𑀺 𑀅𑀲𑁆𑀲𑀫𑀦𑁆𑀢𑀺 𑀓𑁄𑀮𑀨𑀮𑀁 𑀅𑀲𑁆𑀲𑀫𑁂 𑀧𑀽𑀭𑁂𑀢𑁆𑀯𑀸 𑀅𑀲𑁆𑀲𑀫𑁂 𑀦𑀺𑀲𑀺𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀕𑁄𑀧𑀬𑀺𑀦𑁆𑀢𑀺 𑀧𑀸𑀞𑁂 𑀓𑁄𑀮𑀨𑀮𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑁆𑀲𑀫𑀁 𑀕𑁄𑀧𑁂𑀲𑀺𑀁 𑀭𑀓𑁆𑀔𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀓𑀺𑀫𑀺𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑀸𑀧𑀤𑀸𑀦𑁂 𑀦𑀺𑀩𑁆𑀩𑀼𑀢𑁂 𑀓𑀓𑀼𑀲𑀦𑁆𑀥𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀓𑀺𑀫𑀺𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺 𑀢𑀲𑁆𑀲 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑁆𑀲 𑀲𑀮𑀮𑀫𑀸𑀮𑀸𑀳𑀺 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀸𑀯𑀢𑀺𑀁𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀓𑁆𑀬𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀺𑀫𑀺𑀮𑁄𑀢𑀺 𑀢𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀢𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀅𑀦𑀼𑀧𑀺𑀬𑀸𑀬𑀁 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸 𑀧𑀞𑀫𑀬𑁄𑀩𑁆𑀩𑀦𑁂 𑀞𑀺𑀢𑀁 𑀭𑀫𑀡𑀻𑀬𑀁 𑀇𑀢𑁆𑀣𑀺𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀼𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀦𑀼𑀓𑁆𑀓𑀫𑁂𑀦 𑀬𑀣𑀸 𑀚𑀭𑀸𑀭𑁄𑀕𑀯𑀺𑀧𑀢𑁆𑀢𑀻𑀳𑀺 𑀅𑀪𑀺𑀪𑀽𑀢𑀸 𑀤𑀺𑀲𑁆𑀲𑀢𑀺, 𑀢𑀣𑀸 𑀅𑀓𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀓𑀺𑀫𑀺𑀮𑀓𑀼𑀫𑀸𑀭𑁄 𑀅𑀢𑀺𑀯𑀺𑀬 𑀲𑀁𑀯𑁂𑀕𑀚𑀸𑀢𑁄 𑀅𑀢𑁆𑀢𑀦𑁄 𑀲𑀁𑀯𑁂𑀕𑀁 𑀧𑀓𑀸𑀲𑁂𑀦𑁆𑀢𑁄 𑀪𑀕𑀯𑀢𑁄 𑀧𑀸𑀓𑀝𑀁 𑀓𑀢𑁆𑀯𑀸 𑀮𑀤𑁆𑀥𑀸𑀦𑀼𑀲𑀸𑀲𑀦𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁪𑁨. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀓𑀓𑀼𑀲𑀦𑁆𑀥𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀩𑁆𑀭𑀸𑀳𑁆𑀫𑀡𑀫𑁆𑀳𑀺 𑀯𑀼𑀲𑀻𑀫𑀢𑀻𑀢𑀺 𑀧𑀜𑁆𑀘𑀳𑀺 𑀯𑀲𑀺𑀢𑀸𑀳𑀺 𑀯𑀲𑀺𑀧𑁆𑀧𑀢𑁆𑀢𑀫𑁆𑀳𑀺 𑀪𑀕𑀯𑀢𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀩𑁆𑀩𑀕𑀼𑀡𑀕𑀡𑁂𑀳𑀺 𑀫𑀡𑁆𑀟𑀺𑀢𑀢𑁆𑀢𑀸 𑀅𑀪𑀺𑀯𑀽𑀴𑁆𑀳𑀻𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀫𑁆𑀳𑀺 𑀓𑀓𑀼𑀲𑀦𑁆𑀥𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀺𑀫𑀺𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁫. 𑀯𑀚𑁆𑀚𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀳𑀲𑁆𑀲𑀭𑀁𑀲𑀻 𑀪𑀕𑀯𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀯𑀚𑁆𑀚𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑁂 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀪𑀺𑀓𑁆𑀔𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀓𑀤𑀮𑀺𑀨𑀮𑀸𑀦𑀺 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀭𑀸𑀚𑀓𑀼𑀫𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀯𑀚𑁆𑀚𑀺𑀭𑀸𑀚𑀧𑀼𑀢𑁆𑀢𑀢𑁆𑀢𑀸 𑀯𑀚𑁆𑀚𑀺𑀧𑀼𑀢𑁆𑀢𑁄𑀢𑁆𑀯𑁂𑀯𑀲𑁆𑀲 𑀲𑀫𑀜𑁆𑀜𑀸. 𑀲𑁄 𑀤𑀳𑀭𑁄 𑀳𑀼𑀢𑁆𑀯𑀸 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀦𑀓𑀸𑀮𑁂𑀧𑀺 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑁄𑀯 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀙𑀴𑀪𑀺𑀜𑁆𑀜𑁄 𑀧𑀦 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀁 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀫𑀳𑀸𑀣𑁂𑀭𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀭𑀦𑁆𑀢𑁂𑀲𑀼 𑀏𑀓𑀤𑀺𑀯𑀲𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑁂𑀔𑀁𑀬𑁂𑀯 𑀲𑀫𑀸𑀦𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑁋

‘‘𑀭𑀼𑀓𑁆𑀔𑀫𑀽𑀮𑀕𑀳𑀦𑀁 𑀧𑀲𑀓𑁆𑀓𑀺𑀬, 𑀦𑀺𑀩𑁆𑀩𑀸𑀦𑀁 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬;

𑀛𑀸𑀬 𑀕𑁄𑀢𑀫 𑀫𑀸 𑀘 𑀧𑀫𑀸𑀤𑁄, 𑀓𑀺𑀁 𑀢𑁂 𑀩𑀺𑀴𑀺𑀩𑀺𑀴𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺. (𑀣𑁂𑀭𑀕𑀸. 𑁧𑁧𑁯) 𑁋 𑀕𑀸𑀣𑀁 𑀅𑀪𑀸𑀲𑀺;

𑀢𑀢𑁆𑀣 𑀭𑀼𑀓𑁆𑀔𑀫𑀽𑀮𑀕𑀳𑀦𑀦𑁆𑀢𑀺 𑀭𑀼𑀓𑁆𑀔𑀫𑀽𑀮𑀪𑀽𑀢𑀁 𑀕𑀳𑀦𑀁, 𑀕𑀳𑀦𑀜𑁆𑀳𑀺 𑀅𑀢𑁆𑀣𑀺, 𑀦 𑀭𑀼𑀓𑁆𑀔𑀫𑀽𑀮𑀁, 𑀭𑀼𑀓𑁆𑀔𑀫𑀽𑀮𑀜𑁆𑀘 𑀅𑀢𑁆𑀣𑀺, 𑀦 𑀕𑀳𑀦𑀁, 𑀢𑁂𑀲𑀼 𑀭𑀼𑀓𑁆𑀔𑀫𑀽𑀮𑀕𑁆𑀕𑀳𑀡𑁂𑀦 𑀞𑀸𑀦𑀲𑁆𑀲 𑀙𑀸𑀬𑀸𑀬 𑀲𑀫𑁆𑀧𑀦𑁆𑀦𑀢𑀸𑀬 𑀯𑀸𑀢𑀸𑀢𑀧𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀤𑀻𑀧𑁂𑀢𑀺, 𑀕𑀳𑀦𑀕𑁆𑀕𑀳𑀡𑁂𑀦 𑀦𑀺𑀯𑀸𑀢𑀪𑀸𑀯𑁂𑀦 𑀯𑀸𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀚𑀦𑀲𑀫𑁆𑀩𑀸𑀥𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺, 𑀢𑀤𑀼𑀪𑀬𑁂𑀦 𑀘 𑀪𑀸𑀯𑀦𑀸𑀬𑁄𑀕𑁆𑀬𑀢𑀁. 𑀧𑀲𑀓𑁆𑀓𑀺𑀬𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀦𑀺𑀩𑁆𑀩𑀸𑀦𑀁 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬𑀸𑀢𑀺 ‘‘𑀏𑀯𑀁 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀦𑀺𑀩𑁆𑀩𑀼𑀢𑀺𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑁂 𑀓𑀢𑁆𑀯𑀸. 𑀛𑀸𑀬𑀸𑀢𑀺 𑀢𑀺𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀳𑀺𑀢𑀁 𑀫𑀕𑁆𑀕𑀪𑀸𑀯𑀦𑀁 𑀪𑀸𑀯𑁂𑀳𑀺. 𑀕𑁄𑀢𑀫𑀸𑀢𑀺 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀕𑁄𑀢𑁆𑀢𑁂𑀦𑀸𑀮𑀧𑀢𑀺. 𑀫𑀸 𑀘 𑀧𑀫𑀸𑀤𑁄𑀢𑀺 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀫𑀸 𑀧𑀫𑀸𑀤𑀁 𑀆𑀧𑀚𑁆𑀚𑀺. 𑀇𑀤𑀸𑀦𑀺 𑀬𑀸𑀤𑀺𑀲𑁄 𑀣𑁂𑀭𑀲𑁆𑀲 𑀧𑀫𑀸𑀤𑁄, 𑀢𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀢𑁂 𑀩𑀺𑀴𑀺𑀩𑀺𑀴𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁆𑀣 𑀩𑀺𑀴𑀺𑀩𑀺𑀴𑀺𑀓𑀸𑀢𑀺 𑀩𑀺𑀴𑀺𑀩𑀺𑀴𑀺𑀓𑀺𑀭𑀺𑀬𑀸, 𑀩𑀺𑀴𑀺𑀩𑀺𑀴𑀺𑀢𑀺𑀲𑀤𑁆𑀤𑀧𑀯𑀢𑁆𑀢𑀺 𑀬𑀣𑀸 𑀦𑀺𑀭𑀢𑁆𑀣𑀓𑀸, 𑀏𑀯𑀁 𑀩𑀺𑀴𑀺𑀩𑀺𑀴𑀺𑀓𑀸𑀲𑀤𑀺𑀲𑀸 𑀚𑀦𑀧𑀜𑁆𑀜𑀢𑁆𑀢𑀺. 𑀓𑀺𑀁 𑀢𑁂 𑀓𑀭𑀺𑀲𑁆𑀲𑀢𑀻𑀢𑀺 𑀓𑀻𑀤𑀺𑀲𑀁 𑀅𑀢𑁆𑀣𑀁 𑀢𑀼𑀬𑁆𑀳𑀁 𑀲𑀸𑀥𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀚𑀦𑀧𑀜𑁆𑀜𑀢𑁆𑀢𑀺𑀁 𑀧𑀳𑀸𑀬 𑀲𑀤𑀢𑁆𑀣𑀧𑀲𑀼𑀢𑁄 𑀳𑁄𑀳𑀻𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺.

𑀢𑀁 𑀲𑀼𑀢𑁆𑀯𑀸 𑀅𑀜𑁆𑀜𑁂𑀳𑀺 𑀯𑀼𑀢𑁆𑀢𑁂𑀦 𑀯𑀺𑀲𑁆𑀲𑀕𑀦𑁆𑀥𑀯𑀸𑀬𑀦𑀯𑀘𑀦𑁂𑀦 𑀲𑀁𑀯𑁂𑀕𑀚𑀸𑀢𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀘𑀗𑁆𑀓𑀫𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑁄𑀯 ‘‘𑀓𑀺𑀜𑁆𑀘𑀺 𑀲𑀬𑀸𑀫𑀻’’𑀢𑀺 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀫𑀲𑀫𑁆𑀧𑀢𑁆𑀢𑀁 𑀧𑀸𑀤𑀁 𑀪𑀽𑀫𑀺𑀢𑁄 𑀉𑀕𑁆𑀕𑀢𑀁 𑀲𑀭𑀻𑀭𑀲𑁆𑀲 𑀆𑀓𑀸𑀲𑀕𑀢𑀓𑁆𑀔𑀡𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁪𑁯. 𑀯𑀚𑁆𑀚𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀧𑀭𑀪𑀸𑀕𑁂 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀳𑀲𑁆𑀲𑀭𑀁𑀲𑀻 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀳𑀲𑁆𑀲𑀭𑀁𑀲𑀻𑀢𑀺 𑀏𑀢𑁆𑀣 ‘‘𑀅𑀦𑁂𑀓𑀲𑀢𑀲𑀳𑀲𑁆𑀲𑀭𑀁𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀲𑀳𑀲𑁆𑀲𑀭𑀁𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀚𑁆𑀚𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁬. 𑀉𑀢𑁆𑀢𑀭𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀙𑀝𑁆𑀞𑀸𑀧𑀤𑀸𑀦𑁂 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀢𑁆𑀢𑀭𑀲𑀸𑀫𑀡𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀚𑁆𑀚𑀸𑀥𑀭𑁄 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀯𑀺𑀘𑀭𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀢𑁆𑀣𑀸 𑀢𑀲𑁆𑀲𑁂𑀯 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀁 𑀯𑀦𑀦𑁆𑀢𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀲𑁄 𑀅𑀦𑁆𑀢𑀮𑀺𑀓𑁆𑀔𑁂𑀦 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀲𑀼𑀯𑀺𑀲𑀼𑀤𑁆𑀥𑁂𑀳𑀺 𑀯𑀺𑀧𑀼𑀮𑁂𑀳𑀺 𑀓𑀡𑀺𑀓𑀸𑀭𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺, 𑀧𑀼𑀧𑁆𑀨𑀸𑀦𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀢𑁆𑀣𑀼 𑀉𑀧𑀭𑀺 𑀙𑀢𑁆𑀢𑀸𑀓𑀸𑀭𑁂𑀦 𑀅𑀝𑁆𑀞𑀁𑀲𑀼, 𑀲𑁄 𑀢𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀢𑀢𑁆𑀣 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀢𑁆𑀢𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀯𑀺𑀚𑁆𑀚𑀸𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀚𑀸𑀢𑀺𑀬𑀸 𑀭𑀽𑀧𑁂𑀦 𑀯𑀺𑀚𑁆𑀚𑀸𑀬 𑀯𑀬𑁂𑀦 𑀲𑀻𑀮𑀸𑀘𑀸𑀭𑁂𑀦 𑀘 𑀮𑁄𑀓𑀲𑁆𑀲 𑀲𑀫𑁆𑀪𑀸𑀯𑀦𑀻𑀬𑁄 𑀚𑀸𑀢𑁄.

𑀢𑀲𑁆𑀲 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀯𑀲𑁆𑀲𑀓𑀸𑀭𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀯𑁂𑀤𑁂𑀲𑀺. 𑀲𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀣𑁂𑀭𑀁 𑀉𑀧𑀝𑁆𑀞𑀳𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀣𑁂𑀭𑀲𑁆𑀲 𑀅𑀜𑁆𑀜𑀢𑀭𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀉𑀢𑁆𑀢𑀭𑁄 𑀲𑀸𑀫𑀡𑁂𑀭𑁄 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀴𑀸𑀓𑀲𑁆𑀲 𑀲𑀫𑀻𑀧𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀉𑀤𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀥𑁄𑀯𑀢𑀺. 𑀅𑀣 𑀅𑀜𑁆𑀜𑀢𑀭𑁄 𑀉𑀫𑀗𑁆𑀕𑀘𑁄𑀭𑁄 𑀓𑀢𑀓𑀫𑁆𑀫𑁄 𑀆𑀭𑀓𑁆𑀔𑀧𑀼𑀭𑀺𑀲𑁂𑀳𑀺 𑀅𑀦𑀼𑀩𑀤𑁆𑀥𑁄 𑀅𑀕𑁆𑀕𑀫𑀕𑁆𑀕𑁂𑀦 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑁄 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀭𑀢𑀦𑀪𑀡𑁆𑀟𑀺𑀢𑀁 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀺. 𑀲𑀸𑀫𑀡𑁂𑀭𑁄𑀧𑀺 𑀧𑀢𑁆𑀢𑀲𑀫𑀻𑀧𑀁 𑀉𑀧𑀕𑀢𑁄. 𑀘𑁄𑀭𑀁 𑀅𑀦𑀼𑀩𑀦𑁆𑀥𑀦𑁆𑀢𑀸 𑀭𑀸𑀚𑀧𑀼𑀭𑀺𑀲𑀸 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀘𑁄𑀭𑁄, 𑀇𑀫𑀺𑀦𑀸 𑀘𑁄𑀭𑀺𑀬𑀁 𑀓𑀢’’𑀦𑁆𑀢𑀺 𑀲𑀸𑀫𑀡𑁂𑀭𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀯𑀲𑁆𑀲𑀓𑀸𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀯𑀲𑁆𑀲𑀓𑀸𑀭𑁄 𑀘 𑀢𑀤𑀸 𑀭𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀢𑀺, 𑀲𑁄 ‘‘𑀧𑀼𑀩𑁆𑀩𑁂 𑀫𑀫 𑀯𑀘𑀦𑀁 𑀦𑀸𑀤𑀺𑀬𑀺, 𑀲𑀼𑀤𑁆𑀥𑀧𑀸𑀲𑀡𑁆𑀟𑀺𑀬𑁂𑀲𑀼 𑀧𑀩𑁆𑀩𑀚𑀻’’𑀢𑀺 (𑀣𑁂𑀭𑀕𑀸. 𑀅𑀝𑁆𑀞. 𑁧.𑀉𑀢𑁆𑀢𑀭𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸 𑀖𑀸𑀢𑀼𑀓𑀸𑀫𑀢𑁆𑀢𑀸𑀯 𑀚𑀻𑀯𑀦𑁆𑀢𑀫𑁂𑀯 𑀢𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀲𑀺.

𑀅𑀣𑀲𑁆𑀲 𑀪𑀕𑀯𑀸 𑀜𑀸𑀡𑀧𑀭𑀺𑀧𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀺𑀧𑁆𑀨𑀼𑀭𑀦𑁆𑀢𑀳𑀢𑁆𑀣𑀦𑀔𑀫𑀡𑀺𑀫𑀬𑀽𑀔𑀲𑀫𑁆𑀪𑀺𑀦𑁆𑀦𑀲𑀺𑀢𑀸𑀪𑀢𑀸𑀬 𑀧𑀕𑁆𑀖𑀭𑀦𑁆𑀢𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀲𑀼𑀯𑀡𑁆𑀡𑀭𑀲𑀥𑀸𑀭𑀁 𑀯𑀺𑀬 𑀚𑀸𑀮𑀸𑀕𑀼𑀡𑁆𑀞𑀺𑀢𑀫𑀼𑀤𑀼𑀢𑀮𑀼𑀦𑀤𑀻𑀖𑀗𑁆𑀕𑀼𑀮𑀺𑀳𑀢𑁆𑀣𑀁 𑀉𑀢𑁆𑀢𑀭𑀲𑁆𑀲 𑀲𑀻𑀲𑁂 𑀞𑀧𑁂𑀢𑁆𑀯𑀸 ‘‘𑀉𑀢𑁆𑀢𑀭, 𑀇𑀤𑀁 𑀢𑁂 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀨𑀮𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣 𑀢𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑁂𑀦 𑀅𑀥𑀺𑀯𑀸𑀲𑀦𑀸 𑀓𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀉𑀢𑁆𑀢𑀭𑁄 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑁂𑀦 𑀲𑀢𑁆𑀣𑀼 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀲𑁄𑀫𑀦𑀲𑁆𑀲𑀢𑀸𑀬 𑀉𑀴𑀸𑀭𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀧𑀝𑀺𑀮𑀪𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑀺𑀢𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀢𑁆𑀣𑀼 𑀘 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀢𑀸𑀯𑀤𑁂𑀯 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀙𑀴𑀪𑀺𑀜𑁆𑀜𑁄 𑀧𑀦 𑀳𑀼𑀢𑁆𑀯𑀸 𑀲𑀽𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀭𑀸𑀦𑀼𑀤𑁆𑀤𑀬𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀚𑀦𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀅𑀳𑁄𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀯𑀡𑁄 𑀲𑀁𑀭𑀽𑀴𑁆𑀳𑀺, 𑀲𑁄 𑀪𑀺𑀓𑁆𑀔𑀽𑀳𑀺, ‘‘𑀆𑀯𑀼𑀲𑁄, 𑀢𑀸𑀤𑀺𑀲𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀓𑀣𑀁 𑀢𑁆𑀯𑀁 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀔𑀻’’𑀢𑀺 𑀧𑀼𑀝𑁆𑀞𑁄, ‘‘𑀧𑀕𑁂𑀯 𑀫𑁂, 𑀆𑀯𑀼𑀲𑁄, 𑀲𑀁𑀲𑀸𑀭𑁂 𑀆𑀤𑀻𑀦𑀯𑁄, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀲𑀪𑀸𑀯𑁄 𑀲𑀼𑀤𑀺𑀝𑁆𑀞𑁄, 𑀏𑀯𑀸𑀳𑀁 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄𑀧𑀺 𑀅𑀲𑀓𑁆𑀔𑀺𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼’’𑀦𑁆𑀢𑀺 𑀆𑀳. ‘‘𑀧𑀼𑀩𑁆𑀩𑀚𑀸𑀢𑀺𑀬𑀸 𑀤𑀳𑀭𑀓𑀸𑀮𑁂 𑀫𑀓𑁆𑀔𑀺𑀓𑀁 𑀕𑀳𑁂𑀢𑁆𑀯𑀸 𑀦𑀺𑀫𑁆𑀩𑀲𑀽𑀮𑀓𑀁 𑀕𑀳𑁂𑀢𑁆𑀯𑀸 𑀲𑀽𑀮𑀸𑀭𑁄𑀧𑀦𑀓𑀻𑀴𑀁 𑀧𑀝𑀺𑀘𑁆𑀘 𑀏𑀯𑀁 𑀅𑀦𑁂𑀓𑀚𑀸𑀢𑀺𑀲𑀢𑁂𑀲𑀼 𑀲𑀽𑀮𑀸𑀭𑁄𑀧𑀦𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀸𑀬 𑀧𑀭𑀺𑀬𑁄𑀲𑀸𑀦𑀚𑀸𑀢𑀺𑀬𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀫𑀦𑀼𑀪𑀽𑀢’’𑀦𑁆𑀢𑀺 𑀆𑀳.

𑁫𑁫. 𑀅𑀣 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑀺𑀲𑁆𑀲𑀸𑀫.

𑁫𑁭. 𑀯𑀺𑀚𑁆𑀚𑀸𑀥𑀭𑁄 𑀢𑀤𑀸 𑀆𑀲𑀺𑀦𑁆𑀢𑀺 𑀩𑀸𑀳𑀺𑀭𑀓𑀫𑀦𑁆𑀢𑀸𑀤𑀺𑀯𑀺𑀚𑁆𑀚𑀸𑀲𑀺𑀤𑁆𑀥𑀺𑀬𑀸 𑀆𑀓𑀸𑀲𑀕𑀸𑀫𑀺𑀲𑀫𑀢𑁆𑀣𑁄 𑀳𑀼𑀢𑁆𑀯𑀸 𑀘𑀭𑀡𑀯𑀲𑁂𑀦 𑀢𑀁 𑀯𑀺𑀚𑁆𑀚𑀁 𑀭𑀓𑁆𑀔𑀺𑀢𑁆𑀯𑀸 𑀅𑀯𑀺𑀦𑀸𑀲𑁂𑀢𑁆𑀯𑀸 𑀧𑀭𑀺𑀳𑀭𑀡𑀯𑀲𑁂𑀦 𑀯𑀺𑀚𑁆𑀚𑀸𑀥𑀭𑀬𑁄𑀦𑀺 𑀆𑀲𑀺𑀁 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀅𑀳𑀦𑁆𑀢𑀺 𑀅𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀓𑁄𑀝𑀺𑀁 𑀮𑀺𑀔𑀢𑁂 𑀲𑀁𑀓𑀭𑀺𑀲𑁆𑀲𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀁. 𑀅𑀣 𑀯𑀸 𑀅𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀮𑀺𑀔𑁆𑀬𑀢𑁂 𑀑𑀮𑁄𑀓𑀺𑀬𑀢𑁂 𑀏𑀢𑁂𑀦𑀸𑀢𑀺 𑀅𑀦𑁆𑀢𑀮𑀺𑀓𑁆𑀔𑀁, 𑀢𑀲𑁆𑀫𑀺𑀁 𑀅𑀦𑁆𑀢𑀮𑀺𑀓𑁆𑀔𑁂, 𑀆𑀓𑀸𑀲𑁂 𑀘𑀭𑀡𑀲𑀻𑀮𑁄 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀲𑀽𑀮𑀁 𑀲𑀼𑀓𑀢𑀁 𑀕𑀬𑁆𑀳𑀸𑀢𑀺 𑀢𑀺𑀔𑀺𑀡𑀁 𑀲𑀽𑀮𑀁, 𑀅𑀕𑁆𑀕𑀁 𑀆𑀯𑀼𑀥𑀁. 𑀢𑀺𑀲𑀽𑀮𑀁 𑀲𑀼𑀦𑁆𑀤𑀭𑀁 𑀓𑀢𑀁, 𑀓𑁄𑀝𑁆𑀝𑀦𑀖𑀁𑀲𑀦𑀫𑀤𑁆𑀤𑀦𑀧𑀳𑀭𑀡𑀯𑀲𑁂𑀦 𑀲𑀼𑀝𑁆𑀞𑀼 𑀓𑀢𑀁 𑀲𑀽𑀮𑀸𑀯𑀼𑀥𑀁 𑀕𑀬𑁆𑀳 𑀕𑀳𑁂𑀢𑁆𑀯𑀸 𑀅𑀫𑁆𑀩𑀭𑀢𑁄 𑀕𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸𑀯 𑀦𑀬𑀸𑀦𑀼𑀬𑁄𑀕𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀉𑀢𑁆𑀢𑀭𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁭. 𑀅𑀧𑀭𑀉𑀢𑁆𑀢𑀭𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀢𑁆𑀢𑀫𑀸𑀧𑀤𑀸𑀦𑁂 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀅𑀧𑀭𑀲𑁆𑀲 𑀉𑀢𑁆𑀢𑀭𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀇𑀢𑁄 𑀘𑀢𑀼𑀦𑁆𑀦𑀯𑀼𑀢𑀺𑀓𑀧𑁆𑀧𑁂 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀸𑀲𑀦𑁂 𑀮𑀤𑁆𑀥𑀧𑁆𑀧𑀲𑀸𑀤𑁄 𑀳𑀼𑀢𑁆𑀯𑀸 𑀉𑀧𑀸𑀲𑀓𑀢𑁆𑀢𑀁 𑀦𑀺𑀯𑁂𑀤𑁂𑀲𑀺. 𑀲𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀩𑀳𑀼𑀧𑀽𑀚𑀸𑀲𑀓𑁆𑀓𑀸𑀭𑀁 𑀲𑀁𑀳𑀭𑀺𑀢𑁆𑀯𑀸 𑀥𑀸𑀢𑀼𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀓𑁂𑀢𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀢𑁆𑀢𑀭𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀸𑀯𑀢𑁆𑀣𑀺𑀁 𑀕𑀢𑁄 𑀓𑀡𑁆𑀟𑀫𑁆𑀩𑀫𑀽𑀮𑁂 𑀓𑀢𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀧𑀼𑀦 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀤𑁂𑀲𑀦𑀸𑀬 𑀅𑀪𑀺𑀯𑀟𑁆𑀠𑀫𑀸𑀦𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀢𑀣𑁂𑀯 𑀘𑀭𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀙𑀴𑀪𑀺𑀜𑁆𑀜𑁄 𑀧𑀦 𑀳𑀼𑀢𑁆𑀯𑀸 𑀲𑀢𑁆𑀣𑀭𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀢𑁆𑀣𑀁 𑀭𑀸𑀚𑀕𑀳𑀢𑁄 𑀲𑀸𑀯𑀢𑁆𑀣𑀺𑀁 𑀉𑀧𑀕𑀢𑁄 𑀪𑀺𑀓𑁆𑀔𑀽𑀳𑀺 𑁋 ‘‘𑀓𑀺𑀁, 𑀆𑀯𑀼𑀲𑁄, 𑀧𑀩𑁆𑀩𑀚𑁆𑀚𑀸𑀓𑀺𑀘𑁆𑀘𑀁 𑀢𑀬𑀸 𑀫𑀢𑁆𑀣𑀓𑀁 𑀧𑀸𑀧𑀺𑀢’’𑀦𑁆𑀢𑀺 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑁯𑁩. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀧𑀭𑀉𑀢𑁆𑀢𑀭𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁮. 𑀪𑀤𑁆𑀤𑀚𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀅𑀝𑁆𑀞𑀫𑀸𑀧𑀤𑀸𑀦𑁂 𑀑𑀕𑀬𑁆𑀳𑀸𑀳𑀁 𑀧𑁄𑀓𑁆𑀔𑀭𑀡𑀺𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀪𑀤𑁆𑀤𑀚𑀺𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀚𑁆𑀚𑀸𑀲𑀺𑀧𑁆𑀧𑁂𑀲𑀼 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀤𑀺𑀲𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺. 𑀑𑀢𑀺𑀡𑁆𑀡𑀲𑁆𑀲 𑀧𑀦 𑀪𑀕𑀯𑀢𑁄 𑀫𑀥𑀼𑀜𑁆𑀘 𑀪𑀺𑀲𑀫𑀼𑀴𑀸𑀮𑀜𑁆𑀘 𑀲𑀧𑁆𑀧𑀺𑀔𑀻𑀭𑀜𑁆𑀘 𑀉𑀧𑀦𑀸𑀫𑁂𑀲𑀺, 𑀢𑀲𑁆𑀲 𑀢𑀁 𑀪𑀕𑀯𑀸 𑀅𑀦𑀼𑀓𑀫𑁆𑀫𑀁 𑀉𑀧𑀸𑀤𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀢𑀼𑀲𑀺𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀧𑀭𑀸𑀧𑀭𑀁 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀫𑀳𑀤𑁆𑀥𑀦𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀪𑁄𑀚𑁂𑀢𑁆𑀯𑀸 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀺.

𑀏𑀯𑀁 𑀩𑀳𑀼𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂𑀲𑀼 𑀉𑀧𑁆𑀧𑀦𑁆𑀦𑁄 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑁆𑀯𑀸 𑀞𑀺𑀢𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀧𑀽𑀚𑁂𑀲𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀢𑀸𑀦𑀺 𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀤𑁆𑀤𑀺𑀬𑀦𑀕𑀭𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀪𑀤𑁆𑀤𑀺𑀬𑀲𑁂𑀝𑁆𑀞𑀺𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀪𑀤𑁆𑀤𑀚𑀻𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀢𑀲𑁆𑀲 𑀓𑀺𑀭 𑀇𑀲𑁆𑀲𑀭𑀺𑀬𑀪𑁄𑀕𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺 𑀘𑀭𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀬 𑀅𑀳𑁄𑀲𑀺.

𑀢𑀤𑀸 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑀺𑀢𑁆𑀯𑀸 𑀪𑀤𑁆𑀤𑀚𑀺𑀓𑀼𑀫𑀸𑀭𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀸𑀬 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀪𑀤𑁆𑀤𑀺𑀬𑀦𑀕𑀭𑀁 𑀕𑀦𑁆𑀢𑁆𑀯𑀸 𑀚𑀸𑀢𑀺𑀬𑀸𑀯𑀦𑁂 𑀯𑀲𑀺 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄. 𑀲𑁄𑀧𑀺 𑀉𑀧𑀭𑀺𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀢𑀼𑀁 𑀕𑀘𑁆𑀙𑀦𑁆𑀢𑀁 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸, ‘‘𑀓𑀢𑁆𑀣𑀸𑀬𑀁 𑀫𑀳𑀸𑀚𑀦𑁄 𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄𑀯 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑁂 𑀧𑀦 𑀢𑁂𑀦 𑀅𑀥𑀺𑀕𑀢𑁂 𑀲𑀢𑁆𑀣𑀸 𑀪𑀤𑁆𑀤𑀺𑀬𑀲𑁂𑀝𑁆𑀞𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀯 𑀧𑀼𑀢𑁆𑀢𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺, 𑀢𑁂𑀦𑀲𑁆𑀲 𑀇𑀤𑀸𑀦𑁂𑀯 𑀧𑀩𑁆𑀩𑀚𑀺𑀢𑀼𑀁 𑀬𑀼𑀢𑁆𑀢𑀁, 𑀦𑁄 𑀘𑁂 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑁂𑀝𑁆𑀞𑀺 ‘‘𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺 𑀆𑀳. 𑀢𑀁 𑀲𑀢𑁆𑀣𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀯𑀲𑀺𑀢𑁆𑀯𑀸 𑀓𑁄𑀝𑀺𑀕𑀸𑀫𑀁 𑀧𑀸𑀧𑀼𑀡𑀺, 𑀲𑁄 𑀘 𑀕𑀸𑀫𑁄 𑀕𑀗𑁆𑀕𑀸𑀢𑀻𑀭𑁂 𑀅𑀳𑁄𑀲𑀺. 𑀓𑁄𑀝𑀺𑀕𑀸𑀫𑀯𑀸𑀲𑀺𑀦𑁄 𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀁. 𑀪𑀤𑁆𑀤𑀚𑀺𑀢𑁆𑀣𑁂𑀭𑁄 𑀲𑀢𑁆𑀣𑀸𑀭𑀸 𑀅𑀦𑀼𑀫𑁄𑀤𑀦𑀸𑀬 𑀆𑀭𑀤𑁆𑀥𑀫𑀢𑁆𑀢𑀸𑀬 𑀩𑀳𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀕𑀗𑁆𑀕𑀸𑀢𑀻𑀭𑁂 𑀫𑀕𑁆𑀕𑀲𑀫𑀻𑀧𑁂 𑀲𑀢𑁆𑀣𑀼 𑀆𑀕𑀢𑀓𑀸𑀮𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀫𑀳𑀸𑀣𑁂𑀭𑁂𑀲𑀼 𑀆𑀕𑀘𑁆𑀙𑀦𑁆𑀢𑁂𑀲𑀼𑀧𑀺 𑀅𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀢𑁆𑀣𑀼 𑀆𑀕𑀢𑀓𑀸𑀮𑁂𑀬𑁂𑀯 𑀯𑀼𑀝𑁆𑀞𑀸𑀲𑀺. 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 𑁋 ‘‘𑀅𑀬𑀁 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁄, 𑀫𑀳𑀸𑀣𑁂𑀭𑁂𑀲𑀼 𑀆𑀕𑀘𑁆𑀙𑀦𑁆𑀢𑁂𑀲𑀼 𑀫𑀸𑀦𑀣𑀤𑁆𑀥𑁄 𑀳𑀼𑀢𑁆𑀯𑀸 𑀦 𑀯𑀼𑀝𑁆𑀞𑀸𑀲𑀻’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼.

𑀓𑁄𑀝𑀺𑀕𑀸𑀫𑀯𑀸𑀲𑀺𑀦𑁄 𑀲𑀢𑁆𑀣𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀩𑀳𑀽 𑀦𑀸𑀯𑀸𑀲𑀗𑁆𑀖𑀸𑀝𑁂 𑀩𑀦𑁆𑀥𑀺𑀁𑀲𑀼. 𑀲𑀢𑁆𑀣𑀸 ‘‘𑀪𑀤𑁆𑀤𑀚𑀺𑀲𑁆𑀲𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀫𑀻’’𑀢𑀺 𑀦𑀸𑀯𑀸𑀬 𑀞𑀢𑁆𑀯𑀸 ‘‘𑀓𑀳𑀁 𑀪𑀤𑁆𑀤𑀚𑀻’’𑀢𑀺 𑀧𑀼𑀘𑁆𑀙𑀺. 𑀪𑀤𑁆𑀤𑀚𑀺𑀢𑁆𑀣𑁂𑀭𑁄 𑁋 ‘‘𑀲𑁄𑀳𑀁, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 ‘‘𑀏𑀳𑀺, 𑀪𑀤𑁆𑀤𑀚𑀺, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀦𑀸𑀯𑀁 𑀅𑀪𑀺𑀭𑀼𑀳𑀸’’𑀢𑀺. 𑀲𑁄 𑀉𑀧𑁆𑀧𑀢𑀺𑀢𑁆𑀯𑀸 𑀲𑀢𑁆𑀣𑀼 𑀞𑀺𑀢𑀦𑀸𑀯𑀸𑀬𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀕𑀗𑁆𑀕𑀸𑀬 𑀫𑀚𑁆𑀛𑁂 𑀕𑀢𑀓𑀸𑀮𑁂, ‘‘𑀪𑀤𑁆𑀤𑀚𑀺, 𑀢𑀬𑀸 𑀫𑀳𑀸𑀧𑀦𑀸𑀤𑀓𑀸𑀮𑁂 𑀅𑀚𑁆𑀛𑀸𑀯𑀼𑀝𑁆𑀞𑀭𑀢𑀦𑀧𑀸𑀲𑀸𑀤𑁄 𑀓𑀳’’𑀦𑁆𑀢𑀺 𑀆𑀳. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀫𑀼𑀕𑁆𑀕𑁄, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀪𑀤𑁆𑀤𑀚𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀓𑀗𑁆𑀔𑀁 𑀙𑀺𑀦𑁆𑀤𑀸’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑁆𑀥𑀺𑀩𑀮𑁂𑀦 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀣𑀽𑀧𑀺𑀓𑀁 𑀧𑀸𑀤𑀗𑁆𑀕𑀼𑀮𑀦𑁆𑀢𑀭𑁂𑀦 𑀲𑀦𑁆𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀁 𑀧𑀸𑀲𑀸𑀤𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺, 𑀉𑀧𑁆𑀧𑀢𑀦𑁆𑀢𑁄 𑀘 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺 𑀉𑀓𑁆𑀔𑀺𑀧𑀺. 𑀅𑀣𑀲𑁆𑀲 𑀧𑀼𑀭𑀺𑀫𑀪𑀯𑁂 𑀜𑀸𑀢𑀓𑀸 𑀧𑀸𑀲𑀸𑀤𑀕𑀢𑁂𑀦 𑀮𑁄𑀪𑁂𑀦 𑀫𑀘𑁆𑀙𑀓𑀘𑁆𑀙𑀧𑀫𑀡𑁆𑀟𑀽𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀉𑀝𑁆𑀞𑀳𑀦𑁆𑀢𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀢𑁂 𑀲𑀫𑁆𑀧𑀢𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀜𑀸𑀢𑀓𑀸 𑀢𑁂, 𑀪𑀤𑁆𑀤𑀚𑀺, 𑀓𑀺𑀮𑀫𑀦𑁆𑀢𑀻’’𑀢𑀺 𑀆𑀳. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑁂𑀦 𑀧𑀸𑀲𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀸𑀲𑀸𑀤𑁄 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀽𑀳𑀺 𑁋 ‘‘𑀓𑀤𑀸, 𑀪𑀦𑁆𑀢𑁂, 𑀪𑀤𑁆𑀤𑀚𑀺𑀢𑁆𑀣𑁂𑀭𑁂𑀦 𑀅𑀬𑀁 𑀧𑀸𑀲𑀸𑀤𑁄 𑀅𑀚𑁆𑀛𑀸𑀯𑀼𑀝𑁆𑀞𑁄’’𑀢𑀺 𑀧𑀼𑀝𑁆𑀞𑁄 𑀫𑀳𑀸𑀧𑀦𑀸𑀤𑀚𑀸𑀢𑀓𑀁 (𑀚𑀸. 𑁧.𑁩.𑁪𑁦 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀩𑀳𑀼𑀚𑀦𑀁 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺.

𑁯𑁮. 𑀣𑁂𑀭𑁄 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀧𑀼𑀩𑁆𑀩𑀲𑀫𑁆𑀪𑀸𑀭𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀢𑀼𑀁 𑀑𑀕𑀬𑁆𑀳𑀸𑀳𑀁 𑀧𑁄𑀓𑁆𑀔𑀭𑀡𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀕𑀬𑁆𑀳𑀸𑀳𑀁 𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀧𑀼𑀣𑀼𑀦𑀸𑀦𑀸𑀅𑀦𑁂𑀓𑀫𑀳𑁄𑀖𑁂𑀳𑀺 𑀔𑀡𑀺𑀢𑀢𑁆𑀢𑀸 ‘‘𑀧𑁄𑀓𑁆𑀔𑀭𑀡𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀚𑀮𑀸𑀲𑀬𑀁 𑀑𑀕𑀬𑁆𑀳 𑀑𑀕𑀳𑁂𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀖𑀸𑀲𑀳𑁂𑀢𑀼𑀔𑀸𑀤𑀦𑀢𑁆𑀣𑀸𑀬 𑀢𑀢𑁆𑀣 𑀧𑁄𑀓𑁆𑀔𑀭𑀡𑀺𑀬𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀲𑀁 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀫𑀽𑀮𑀁 𑀉𑀤𑁆𑀥𑀭𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀧𑀤𑀢𑁆𑀣𑀢𑁆𑀢𑀸 𑀘 𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀪𑀤𑁆𑀤𑀚𑀺𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁯. 𑀲𑀺𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀦𑀯𑀫𑀸𑀧𑀤𑀸𑀦𑁂 𑀏𑀲𑀦𑀸𑀬 𑀘𑀭𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀲𑀺𑀯𑀓𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀢𑁆𑀢𑀁 𑀆𑀤𑀸𑀬 𑀓𑀼𑀫𑁆𑀫𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀺𑀯𑀓𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀯𑀺𑀚𑁆𑀚𑀸𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀢𑀸𑀬 𑀓𑀸𑀫𑁂 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁧𑁭. 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀏𑀲𑀦𑀸𑀬 𑀘𑀭𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑀺𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁦. 𑀉𑀧𑀯𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀤𑀲𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀉𑀧𑀯𑀸𑀦𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀁 𑀓𑀺𑀭 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀓𑁂𑀦𑀘𑀺 𑀓𑀫𑁆𑀫𑀘𑁆𑀙𑀺𑀤𑁆𑀤𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀤𑀮𑁆𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀤𑁂𑀯𑀦𑀸𑀕𑀕𑀭𑀼𑀴𑀬𑀓𑁆𑀔𑀓𑀼𑀫𑁆𑀪𑀡𑁆𑀟𑀕𑀦𑁆𑀥𑀩𑁆𑀩𑁂𑀳𑀺 𑀲𑀢𑁆𑀢𑀭𑀢𑀦𑀫𑀬𑁂 𑀲𑀢𑁆𑀢𑀬𑁄𑀚𑀦𑀺𑀓𑁂 𑀣𑀽𑀧𑁂 𑀓𑀢𑁂 𑀢𑀢𑁆𑀣 𑀲𑀼𑀥𑁄𑀢𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀸𑀲𑀗𑁆𑀕𑀁 𑀯𑁂𑀴𑀕𑁆𑀕𑁂 𑀆𑀩𑀦𑁆𑀥𑀺𑀢𑁆𑀯𑀸 𑀥𑀚𑀁 𑀓𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀅𑀪𑀺𑀲𑀫𑁆𑀫𑀢𑀓𑁄 𑀦𑀸𑀫 𑀬𑀓𑁆𑀔𑀲𑁂𑀦𑀸𑀧𑀢𑀺 𑀤𑁂𑀯𑁂𑀳𑀺 𑀘𑁂𑀢𑀺𑀬𑀧𑀽𑀚𑀸𑀭𑀓𑁆𑀔𑀡𑀢𑁆𑀣𑀁 𑀞𑀧𑀺𑀢𑁄 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀆𑀓𑀸𑀲𑁂 𑀥𑀸𑀭𑁂𑀦𑁆𑀢𑁄 𑀘𑁂𑀢𑀺𑀬𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀫𑀸𑀦𑀲𑁄 𑀅𑀳𑁄𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑀯𑀸𑀦𑁄𑀢𑀺 𑀮𑀤𑁆𑀥𑀦𑀸𑀫𑁄 𑀯𑀬𑀧𑁆𑀧𑀢𑁆𑀢𑁄 𑀚𑁂𑀢𑀯𑀦𑀧𑀝𑀺𑀕𑁆𑀕𑀳𑀡𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀅𑀣𑀸𑀬𑀲𑁆𑀫𑀸 𑀉𑀧𑀯𑀸𑀦𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀯𑀸𑀢𑀸𑀩𑀸𑀥𑁄 𑀉𑀧𑁆𑀧𑀚𑁆𑀚𑀺. 𑀣𑁂𑀭𑀲𑁆𑀲 𑀕𑀺𑀳𑀺𑀲𑀳𑀸𑀬𑁄 𑀤𑁂𑀯𑀳𑀺𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀢𑀺. 𑀲𑁄 𑀣𑁂𑀭𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀲𑀺. 𑀅𑀣𑀸𑀬𑀲𑁆𑀫𑀸 𑀉𑀧𑀯𑀸𑀦𑁄 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀉𑀧𑀕𑀜𑁆𑀙𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀓𑁂𑀦𑀘𑀺 𑀫𑀜𑁆𑀜𑁂 𑀧𑀬𑁄𑀚𑀦𑁂𑀦 𑀣𑁂𑀭𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂, 𑀓𑁂𑀦𑀢𑁆𑀣𑁄’’𑀢𑀺 𑀆𑀳. 𑀣𑁂𑀭𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀬𑁄𑀚𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀯𑀸𑀢𑁂𑀳𑀸𑀩𑀸𑀥𑀺𑀓𑁄 𑀫𑀼𑀦𑀺;

𑀲𑀘𑁂 𑀉𑀡𑁆𑀳𑁄𑀤𑀓𑀁 𑀅𑀢𑁆𑀣𑀺, 𑀫𑀼𑀦𑀺𑀦𑁄 𑀤𑁂𑀳𑀺 𑀩𑁆𑀭𑀸𑀳𑁆𑀫𑀡.

‘‘𑀧𑀽𑀚𑀺𑀢𑁄 𑀧𑀽𑀚𑀦𑁂𑀬𑁆𑀬𑀸𑀦𑀁, 𑀲𑀓𑁆𑀓𑀭𑁂𑀬𑁆𑀬𑀸𑀦 𑀲𑀓𑁆𑀓𑀢𑁄;

𑀅𑀧𑀘𑀺𑀢𑁄𑀧𑀘𑁂𑀬𑁆𑀬𑀸𑀦𑀁, 𑀢𑀲𑁆𑀲 𑀇𑀘𑁆𑀙𑀸𑀫𑀺 𑀳𑀸𑀢𑀯𑁂’’𑀢𑀺. (𑀣𑁂𑀭𑀕𑀸. 𑁧𑁮𑁫-𑁧𑁮𑁬) 𑁋

𑀕𑀸𑀣𑀸𑀤𑁆𑀯𑀬𑀁 𑀅𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀽𑀚𑀦𑁂𑀬𑁆𑀬𑀸𑀦𑀁 𑀧𑀽𑀚𑁂𑀢𑀩𑁆𑀩𑁂𑀳𑀺 𑀲𑀓𑁆𑀓𑀸𑀤𑀻𑀳𑀺 𑀤𑁂𑀯𑁂𑀳𑀺 𑀫𑀳𑀸𑀩𑁆𑀭𑀳𑁆𑀫𑀸𑀤𑀻𑀳𑀺 𑀘 𑀩𑁆𑀭𑀳𑁆𑀫𑁂𑀳𑀺 𑀧𑀽𑀚𑀺𑀢𑁄, 𑀲𑀓𑁆𑀓𑀭𑁂𑀬𑁆𑀬𑀸𑀦𑀁 𑀲𑀓𑁆𑀓𑀸𑀢𑀩𑁆𑀩𑁂𑀳𑀺 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀸𑀤𑀻𑀳𑀺 𑀲𑀓𑁆𑀓𑀢𑁄, 𑀅𑀧𑀘𑁂𑀬𑁆𑀬𑀸𑀦𑀁 𑀅𑀧𑀘𑀸𑀬𑀺𑀢𑀩𑁆𑀩𑁂𑀳𑀺 𑀫𑀳𑁂𑀲𑀻𑀳𑀺 𑀔𑀻𑀡𑀸𑀲𑀯𑁂𑀳𑀺 𑀅𑀧𑀘𑀺𑀢𑁄, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸𑀤𑀺𑀦𑀸 𑀅𑀭𑀳𑀁, 𑀲𑁄𑀪𑀦𑀕𑀫𑀦𑀸𑀤𑀺𑀦𑀸 𑀲𑀼𑀕𑀢𑁄 𑀲𑀩𑁆𑀩𑀜𑁆𑀜𑀽 𑀫𑀼𑀦𑀺 𑀫𑀬𑁆𑀳𑀁 𑀲𑀢𑁆𑀣𑀸 𑀤𑁂𑀯𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸, 𑀲𑁄 𑀤𑀸𑀦𑀺 𑀯𑀸𑀢𑁂𑀳𑀺 𑀯𑀸𑀢𑀳𑁂𑀢𑀼 𑀯𑀸𑀢𑀓𑁆𑀔𑁄𑀪𑀦𑀺𑀫𑀺𑀢𑁆𑀢𑀁 𑀆𑀩𑀸𑀥𑀺𑀓𑁄 𑀚𑀸𑀢𑁄. 𑀲𑀘𑁂, 𑀩𑁆𑀭𑀸𑀳𑁆𑀫𑀡, 𑀉𑀡𑁆𑀳𑁄𑀤𑀓𑀁 𑀅𑀢𑁆𑀣𑀺, 𑀢𑀲𑁆𑀲 𑀯𑀸𑀢𑀸𑀩𑀸𑀥𑀯𑀽𑀧𑀲𑀫𑀦𑀢𑁆𑀣𑀁 𑀢𑀁 𑀳𑀸𑀢𑀯𑁂 𑀉𑀧𑀦𑁂𑀢𑀼𑀁 𑀇𑀘𑁆𑀙𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀉𑀡𑁆𑀳𑁄𑀤𑀓𑀁 𑀢𑀤𑀦𑀼𑀭𑀽𑀧𑀁 𑀯𑀸𑀢𑀳𑀭𑀜𑁆𑀘 𑀪𑁂𑀲𑀚𑁆𑀚𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺. 𑀢𑁂𑀦 𑀘 𑀲𑀢𑁆𑀣𑀼 𑀭𑁄𑀕𑁄 𑀯𑀽𑀧𑀲𑀫𑀺. 𑀢𑀲𑁆𑀲 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑁧𑁨𑁨. 𑀅𑀣𑀸𑀬𑀲𑁆𑀫𑀸 𑀉𑀧𑀯𑀸𑀦𑁄 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀼𑀫𑀼𑀢𑁆𑀢𑀭𑁄𑀢𑀺𑀆𑀤𑀻𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁧𑁨𑁩. 𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫𑀸𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀭𑀸𑀲𑀺𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀺𑀢𑀓𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀼𑀩𑁆𑀩𑁂𑀥𑀁 𑀘𑀦𑁆𑀤𑀦𑀭𑀸𑀲𑀺𑀘𑀺𑀢𑀓𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀢𑀢𑁆𑀣 𑀅𑀪𑀺𑀭𑁄𑀧𑀬𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁨𑁪. 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸𑀦𑀸𑀢𑀺 𑀆𑀤𑀳𑀦𑀸𑀢𑀺 𑀅𑀕𑁆𑀕𑀺𑀦𑀸 𑀤𑀳𑀦𑀓𑀺𑀘𑁆𑀘𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁧𑁨𑁭-𑁨𑁮. 𑀚𑀗𑁆𑀖𑀸 𑀫𑀡𑀺𑀫𑀬𑀸 𑀆𑀲𑀻𑀢𑀺 𑀫𑀦𑀼𑀲𑁆𑀲𑁂𑀳𑀺 𑀓𑀢𑀣𑀽𑀧𑁂 𑀚𑀗𑁆𑀖𑀸 𑀧𑀼𑀧𑁆𑀨𑀯𑀸𑀳𑀢𑁆𑀣𑀁 𑀘𑀭𑀺𑀢𑀝𑁆𑀞𑀸𑀦𑀁 𑀫𑀡𑀺𑀫𑀬𑀸 𑀇𑀦𑁆𑀤𑀦𑀻𑀮𑀫𑀡𑀺𑀦𑀸 𑀓𑀢𑀸𑀢𑀺 𑀅𑀢𑁆𑀣𑁄. 𑀫𑀬𑀫𑁆𑀧𑀻𑀢𑀺 𑀲𑀩𑁆𑀩𑁂 𑀤𑁂𑀯𑀸 𑀣𑀽𑀧𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑁧𑁨𑁯. 𑀥𑀸𑀢𑀼 𑀆𑀯𑁂𑀡𑀺𑀓𑀸 𑀦𑀢𑁆𑀣𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀘𑁂𑀢𑀺𑀬𑀁 𑀓𑀸𑀢𑀼𑀁 𑀆𑀯𑁂𑀡𑀺𑀓𑀸 𑀯𑀺𑀲𑀼𑀁 𑀥𑀸𑀢𑀼 𑀦𑀢𑁆𑀣𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀭𑀻𑀭𑀁 𑀏𑀓𑀧𑀺𑀡𑁆𑀟𑀺𑀢𑀦𑁆𑀢𑀺 𑀆𑀳. 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀲𑀓𑀮𑀲𑀭𑀻𑀭𑀥𑀸𑀢𑀼 𑀏𑀓𑀖𑀦𑀲𑀺𑀮𑀸𑀫𑀬𑀧𑀝𑀺𑀫𑀸 𑀯𑀺𑀬 𑀏𑀓𑀫𑁂𑀯 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀇𑀫𑀫𑁆𑀳𑀺 𑀩𑀼𑀤𑁆𑀥𑀣𑀽𑀧𑀫𑁆𑀳𑀻𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀳𑀺 𑀓𑀢𑀫𑁆𑀳𑀺 𑀇𑀫𑀫𑁆𑀳𑀺 𑀲𑀼𑀯𑀡𑁆𑀡𑀣𑀽𑀧𑀫𑁆𑀳𑀺 𑀫𑀬𑀁 𑀲𑀩𑁆𑀩𑁂 𑀲𑀫𑀸𑀕𑀦𑁆𑀢𑁆𑀯𑀸 𑀓𑀜𑁆𑀘𑀼𑀓𑀣𑀽𑀧𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑁧𑁩𑁩. 𑀇𑀦𑁆𑀤𑀦𑀻𑀮𑀁 𑀫𑀳𑀸𑀦𑀻𑀮𑀦𑁆𑀢𑀺 𑀇𑀦𑁆𑀤𑀻𑀯𑀭𑀧𑀼𑀧𑁆𑀨𑀯𑀡𑁆𑀡𑀸𑀪𑀁 𑀫𑀡𑀺 𑀇𑀦𑁆𑀤𑀦𑀻𑀮𑀫𑀡𑀺. 𑀢𑀢𑁄 𑀅𑀥𑀺𑀓𑀯𑀡𑁆𑀡𑀢𑀸 𑀫𑀳𑀸𑀫𑀡𑀺 𑀇𑀦𑁆𑀤𑀦𑀻𑀮𑀫𑀡𑀬𑁄 𑀘 𑀫𑀳𑀸𑀦𑀻𑀮𑀫𑀡𑀬𑁄 𑀘 𑀚𑁄𑀢𑀺𑀭𑀲𑀫𑀡𑀺𑀚𑀸𑀢𑀺𑀭𑀗𑁆𑀕𑀫𑀡𑀬𑁄 𑀘 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀭𑀸𑀲𑀻 𑀓𑀢𑁆𑀯𑀸 𑀲𑀼𑀯𑀡𑁆𑀡𑀣𑀽𑀧𑁂 𑀓𑀜𑁆𑀘𑀼𑀓𑀣𑀽𑀧𑀁 𑀓𑀢𑁆𑀯𑀸 𑀅𑀙𑀸𑀤𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁪𑁪. 𑀧𑀘𑁆𑀘𑁂𑀓𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀸𑀢𑀺 𑀩𑀼𑀤𑁆𑀥𑀼𑀢𑁆𑀢𑀫𑀲𑁆𑀲 𑀧𑀢𑀺 𑀏𑀓𑀁 𑀯𑀺𑀲𑀼𑀁 𑀉𑀧𑀭𑀺𑀙𑀤𑀦𑁂𑀦 𑀣𑀽𑀧𑀁 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄.

𑁧𑁪𑁭. 𑀓𑀼𑀫𑁆𑀪𑀡𑁆𑀟𑀸 𑀕𑀼𑀬𑁆𑀳𑀓𑀸 𑀢𑀣𑀸𑀢𑀺 𑀓𑀼𑀫𑁆𑀪𑀫𑀢𑁆𑀢𑀸𑀦𑀺 𑀅𑀡𑁆𑀟𑀸𑀦𑀺 𑀬𑁂𑀲𑀁 𑀤𑁂𑀯𑀸𑀦𑀁 𑀢𑁂 𑀓𑀼𑀫𑁆𑀪𑀡𑁆𑀟𑀸, 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀕𑀼𑀳𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑀦𑀢𑁄 𑀕𑀭𑀼𑀴𑀸 𑀕𑀼𑀬𑁆𑀳𑀓𑀸 𑀦𑀸𑀫 𑀚𑀸𑀢𑀸, 𑀢𑁂 𑀓𑀼𑀫𑁆𑀪𑀡𑁆𑀟𑀸 𑀕𑀼𑀬𑁆𑀳𑀓𑀸𑀧𑀺 𑀣𑀽𑀧𑀁 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄.

𑁧𑁫𑁧. 𑀅𑀢𑀺𑀪𑁄𑀦𑁆𑀢𑀺 𑀦 𑀢𑀲𑁆𑀲𑀸𑀪𑀸𑀢𑀺 𑀢𑀲𑁆𑀲 𑀘𑁂𑀢𑀺𑀬𑀲𑁆𑀲 𑀧𑀪𑀁 𑀘𑀦𑁆𑀤𑀲𑀽𑀭𑀺𑀬𑀢𑀸𑀭𑀓𑀸𑀦𑀁 𑀧𑀪𑀸 𑀦 𑀅𑀢𑀺𑀪𑁄𑀦𑁆𑀢𑀺, 𑀦 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁮. 𑀅𑀳𑀫𑁆𑀧𑀺 𑀓𑀸𑀭𑀁 𑀓𑀲𑁆𑀲𑀸𑀫𑀻𑀢𑀺 𑀢𑀸𑀤𑀺𑀦𑁄 𑀮𑁄𑀓𑀦𑀸𑀣𑀲𑁆𑀲 𑀣𑀽𑀧𑀲𑁆𑀫𑀺𑀁 𑀅𑀳𑀫𑁆𑀧𑀺 𑀓𑀸𑀭𑀁 𑀧𑀼𑀜𑁆𑀜𑀓𑀺𑀭𑀺𑀬𑀁 𑀓𑀼𑀲𑀮𑀓𑀫𑁆𑀫𑀁 𑀥𑀚𑀧𑀝𑀸𑀓𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀉𑀧𑀯𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁧𑁧. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑀸𑀧𑀤𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀺𑀢𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀓𑀫𑁆𑀫𑀺𑀓𑁂𑀦 𑀤𑀲𑁆𑀲𑀺𑀢𑀁 𑀅𑀧𑀭𑀺𑀫𑀸𑀡𑀁 𑀓𑀼𑀮𑀯𑀁𑀲𑀸𑀦𑀼𑀕𑀢𑀁 𑀥𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀏𑀢𑁆𑀢𑀓𑀁 𑀥𑀦𑀭𑀸𑀲𑀺𑀁 𑀫𑀬𑁆𑀳𑀁 𑀅𑀬𑁆𑀬𑀓𑀧𑀬𑁆𑀬𑀓𑀸𑀤𑀬𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀲𑁄 𑀅𑀪𑀺𑀜𑁆𑀜𑀸𑀮𑀸𑀪𑀺𑀁 𑀏𑀓𑀁 𑀢𑀸𑀧𑀲𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑁂𑀦 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑁂 𑀉𑀬𑁆𑀬𑁄𑀚𑀺𑀢𑁄 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀢𑁆𑀣 𑀤𑁂𑀯𑀮𑁄𑀓𑁂 𑀤𑁂𑀯𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀓𑀼𑀮𑀲𑁆𑀲 𑀏𑀓𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑀁 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑀗𑁆𑀔𑀸𑀢𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀲𑀺. 𑀅𑀣 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀓𑀤𑀺𑀯𑀲𑀁 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀢𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀢𑁆𑀣𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀢𑀤𑀢𑁆𑀣𑀸𑀬 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀇𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀪𑀸𑀢𑀺𑀓𑁂𑀲𑀼 𑀢𑀻𑀲𑀼 𑀭𑀸𑀚𑀧𑀼𑀢𑁆𑀢𑁂𑀲𑀼 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀢𑁂𑀲𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀳𑀸𑀬𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀢𑀁 𑀢𑀁 𑀩𑀳𑀼𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀼𑀭𑀝𑁆𑀞𑁂 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑀺𑀕𑀫𑁂 𑀭𑀝𑁆𑀞𑀧𑀸𑀮𑀲𑁂𑀝𑁆𑀞𑀺𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀭𑀝𑁆𑀞𑀧𑀸𑀮𑁄𑀢𑀺 𑀯𑀁𑀲𑀸𑀦𑀼𑀕𑀢𑀫𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀬𑁄𑀩𑁆𑀩𑀦𑀁 𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀢𑁆𑀯𑀸 𑀫𑀳𑀦𑁆𑀢𑁂 𑀘 𑀬𑀲𑁂 𑀧𑀢𑀺𑀝𑁆𑀞𑀸𑀧𑀺𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀅𑀣 𑀪𑀕𑀯𑀸 𑀓𑀼𑀭𑀼𑀭𑀝𑁆𑀞𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀁 𑀅𑀦𑀼𑀧𑀸𑀧𑀼𑀡𑀺. 𑀢𑀁 𑀲𑀼𑀢𑁆𑀯𑀸 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀲𑀢𑁆𑀢𑀯𑀸𑀭𑁂 𑀪𑀢𑁆𑀢𑀘𑁆𑀙𑁂𑀤𑁂 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀲𑀢𑁆𑀣𑀼 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁭𑁯-𑁧𑁮𑁦. 𑀅𑀣𑀸𑀬𑀲𑁆𑀫𑀸 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀲𑀼𑀦𑀸𑀕𑁄 𑀲𑁄 𑀫𑀬𑀸 𑀤𑀺𑀦𑁆𑀦𑁄𑀢𑀺 𑀢𑀤𑀸 𑀫𑀳𑀸𑀥𑀦𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑀦𑀲𑀫𑀬𑁂 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀲𑀼𑀦𑁆𑀤𑀭𑁄 𑀦𑀸𑀕𑁄 𑀳𑀢𑁆𑀣𑀺𑀭𑀸𑀚𑀸 𑀫𑀬𑀸 𑀤𑀺𑀦𑁆𑀦𑁄 𑀅𑀳𑁄𑀲𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀈𑀲𑀸𑀤𑀦𑁆𑀢𑁄𑀢𑀺𑀆𑀤𑀺𑀫𑀸𑀳. 𑀈𑀲𑀸𑀤𑀦𑁆𑀢𑁄 𑀭𑀣𑀈𑀲𑀧𑁆𑀧𑀫𑀸𑀡𑀤𑀦𑁆𑀢𑁄, 𑀲𑁄 𑀫𑀬𑀸 𑀤𑀺𑀦𑁆𑀦𑁄 𑀳𑀢𑁆𑀣𑀺𑀦𑀸𑀕𑁄. 𑀉𑀭𑀽𑀴𑁆𑀳𑀯𑀸𑀢𑀺 𑀭𑀸𑀚𑀸𑀯𑀳𑀦𑀬𑁄𑀕𑁆𑀕𑀲𑀫𑀢𑁆𑀣𑁄, 𑀭𑀸𑀚𑀸𑀭𑀳𑁄 𑀯𑀸. 𑀲𑁂𑀢𑀘𑁆𑀙𑀢𑁆𑀢𑁄𑀢𑀺 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀉𑀧𑀝𑁆𑀞𑀳𑀦𑀲𑁂𑀢𑀘𑁆𑀙𑀢𑁆𑀢𑀲𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀲𑁄𑀪𑀺𑀢𑁄𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀯𑀸 𑀭𑀽𑀧𑀲𑁄𑀪𑀸𑀳𑀺 𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀓𑀧𑁆𑀧𑀦𑁄 𑀲𑀳𑀢𑁆𑀣𑀺𑀧𑁄𑀢𑀺 𑀳𑀢𑁆𑀣𑀺𑀅𑀮𑀗𑁆𑀓𑀸𑀭𑀲𑀳𑀺𑀢𑁄 𑀳𑀢𑁆𑀣𑀺𑀕𑁄𑀧𑀓𑀲𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀫𑁆𑀪𑀽𑀢𑁄 𑀳𑀢𑁆𑀣𑀺𑀦𑀸𑀕𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀫𑀬𑀸 𑀤𑀺𑀦𑁆𑀦𑁄𑀢𑀺 𑀅𑀢𑁆𑀣𑁄.

𑁧𑁮𑁧. 𑀫𑀬𑀸 𑀪𑀢𑁆𑀢𑀁 𑀓𑀸𑀭𑁂𑀢𑁆𑀯𑀸𑀦𑀸𑀢𑀺 𑀫𑀬𑀸 𑀓𑀸𑀭𑀸𑀧𑀺𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑀸𑀦𑀁 𑀓𑁄𑀝𑀺𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 𑀫𑀳𑁂𑀲𑀺𑀦𑁄 𑀦𑀺𑀬𑁆𑀬𑀸𑀤𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁩. 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄𑀢𑀺 𑀚𑀮𑀢𑁄 𑀚𑀸𑀢𑁄 𑀚𑀮𑀚𑁄, 𑀓𑀺𑀁 𑀢𑀁? 𑀧𑀤𑀼𑀫𑀁, 𑀧𑀤𑀼𑀫𑁂𑀦 𑀲𑀫𑀸𑀦𑀦𑀸𑀫𑀢𑁆𑀢𑀸 𑀉𑀢𑁆𑀢𑀫𑀢𑁆𑀢𑀸 𑀘 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀪𑀕𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀙𑀧𑁆𑀧𑀜𑁆𑀜𑀸𑀲𑀫𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀇𑀢𑀺 𑀯𑀺𑀲𑀼𑀤𑁆𑀥𑀚𑀦𑀯𑀺𑀮𑀸𑀲𑀺𑀦𑀺𑀬𑀸 𑀅𑀧𑀤𑀸𑀦-𑀅𑀝𑁆𑀞𑀓𑀣𑀸𑀬

𑀏𑀢𑁆𑀢𑀸𑀯𑀢𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀢𑁆𑀣𑁂𑀭𑀸𑀧𑀤𑀸𑀦-𑀅𑀝𑁆𑀞𑀓𑀣𑀸 𑀲𑀫𑀢𑁆𑀢𑀸.

𑀦𑀺𑀕𑀫𑀦𑀓𑀣𑀸

𑀲𑀻𑀳𑀴𑀤𑀻𑀧𑀓𑁂 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀯𑀦𑁆𑀢𑀸𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀻𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀸𑀤𑀬𑁄 𑀙𑁂𑀤𑀦𑀦𑀺𑀕𑁆𑀕𑀳𑀯𑀺𑀯𑁂𑀘𑀦𑀸𑀤𑁆𑀬𑀢𑁆𑀣𑀁 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀅𑀢𑀺𑀯𑀺𑀬 𑀆𑀭𑀸𑀥𑀦𑁂𑀦 𑀮𑀤𑁆𑀥𑀓𑁄𑀲𑀮𑁆𑀮𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀁 𑀕𑀯𑁂𑀲𑀦𑁆𑀢𑁂𑀦 𑀲𑀢𑀺𑀥𑀺𑀢𑀺𑀕𑀢𑀺𑀯𑀻𑀭𑀺𑀬𑀧𑀭𑀓𑁆𑀓𑀫𑀦𑁆𑀢𑁂𑀦 𑀫𑀳𑀸𑀲𑀫𑀦𑁆𑀢𑀕𑀼𑀡𑀲𑁄𑀪𑀦𑁂𑀦 𑀢𑀺𑀧𑀺𑀝𑀓𑀥𑀭𑁂𑀦 𑀧𑀡𑁆𑀟𑀺𑀢𑁂𑀦 𑀆𑀪𑀢𑀁 𑀇𑀫𑀁 𑀅𑀧𑀤𑀸𑀦-𑀅𑀝𑁆𑀞𑀓𑀣𑀁 𑀲𑀩𑁆𑀩𑁄 𑀲𑀤𑁂𑀯𑀮𑁄𑀓𑁄 𑀚𑀸𑀦𑀸𑀢𑀽𑀢𑀺.

𑀅𑀦𑁂𑀦 𑀮𑁄𑀪𑀸𑀤𑀺𑀫𑀮𑀸 𑀧𑀚𑀸𑀦𑀁, 𑀘𑀓𑁆𑀔𑀸𑀤𑀺𑀭𑁄𑀕𑀸 𑀯𑀺𑀯𑀺𑀥𑀸 𑀘 𑀤𑀼𑀓𑁆𑀔𑀸;

𑀓𑀮𑀳𑀸𑀤𑀺𑀪𑀬𑀸 𑀤𑀼𑀓𑁆𑀔𑀺𑀢𑀸 𑀚𑀸𑀢𑀸, 𑀘𑁄𑀭𑀸𑀤𑀬𑁄𑀦𑀢𑁆𑀣𑀓𑀭𑀸 𑀘 𑀮𑁄𑀓𑁂.

𑀦𑀲𑁆𑀲𑀦𑁆𑀢𑀼 𑀫𑁂 𑀧𑀜𑁆𑀘 𑀯𑁂𑀭𑀸 𑀘 𑀧𑀸𑀧𑀸, 𑀦𑀲𑁆𑀲𑀦𑁆𑀢𑀼 𑀕𑀺𑀫𑁆𑀳𑁂 𑀬𑀣𑀸 𑀯𑀼𑀝𑁆𑀞𑀺𑀯𑀸𑀢𑀸;

𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀭𑁂𑀦 𑀧𑀢𑁆𑀯𑀸, 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀝𑀺𑀧𑀸𑀤𑀬𑀸𑀫𑀺.

𑀲𑀩𑁆𑀩𑀤𑀺𑀝𑁆𑀞𑀺𑀜𑁆𑀘 𑀫𑀤𑁆𑀤𑀦𑁆𑀢𑁄, 𑀭𑀸𑀕𑀤𑁄𑀲𑀸𑀤𑀺𑀧𑀸𑀧𑀓𑁂;

𑀲𑀁𑀲𑀸𑀭𑀯𑀝𑁆𑀝𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀉𑀧𑁂𑀫𑀺 𑀲𑀕𑁆𑀕𑀫𑁄𑀓𑁆𑀔𑀓𑁂.

𑀆𑀡𑀸𑀔𑁂𑀢𑁆𑀢𑀫𑁆𑀳𑀺 𑀲𑀩𑁆𑀩𑀢𑁆𑀣, 𑀅𑀯𑀻𑀘𑀺𑀫𑁆𑀳𑀺 𑀪𑀯𑀕𑁆𑀕𑀢𑁄;

𑀲𑀩𑁆𑀩𑁂 𑀥𑀫𑁆𑀫𑀸𑀦𑀼𑀬𑀸𑀬𑀦𑁆𑀢𑀼, 𑀢𑀬𑁄 𑀮𑁄𑀓𑀸 𑀉𑀢𑀼𑀧𑀺 𑀘𑀸𑀢𑀺.

𑀅𑀧𑀤𑀸𑀦-𑀅𑀝𑁆𑀞𑀓𑀣𑀸 𑀲𑀫𑀢𑁆𑀢𑀸.