📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀣𑁂𑀭𑀸𑀧𑀤𑀸𑀦𑀧𑀸𑀴𑀺

(𑀧𑀞𑀫𑁄 𑀪𑀸𑀕𑁄)

𑁧. 𑀩𑀼𑀤𑁆𑀥𑀯𑀕𑁆𑀕𑁄

𑁧. 𑀩𑀼𑀤𑁆𑀥𑀅𑀧𑀤𑀸𑀦𑀁

𑁧.

𑀢𑀣𑀸𑀕𑀢𑀁 ¶ ¶ ¶ 𑀚𑁂𑀢𑀯𑀦𑁂 𑀯𑀲𑀦𑁆𑀢𑀁, 𑀅𑀧𑀼𑀘𑁆𑀙𑀺 𑀯𑁂𑀤𑁂𑀳𑀫𑀼𑀦𑀻 𑀦𑀢𑀗𑁆𑀕𑁄;

‘‘𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀓𑀺𑀭 𑀦𑀸𑀫 𑀳𑁄𑀦𑁆𑀢𑀺, 𑀪𑀯𑀦𑁆𑀢𑀺 𑀢𑁂 𑀳𑁂𑀢𑀼𑀪𑀺 𑀓𑁂𑀳𑀺 𑀯𑀻𑀭’’.

𑁨.

𑀢𑀤𑀸𑀳 𑀲𑀩𑁆𑀩𑀜𑁆𑀜𑀼𑀯𑀭𑁄 𑀫𑀳𑁂𑀲𑀻, 𑀆𑀦𑀦𑁆𑀤𑀪𑀤𑁆𑀤𑀁 𑀫𑀥𑀼𑀭𑀲𑁆𑀲𑀭𑁂𑀦;

‘‘𑀬𑁂 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼 [𑀲𑀩𑁆𑀩𑀩𑀼𑀤𑁆𑀥𑁂𑀲𑀼 (𑀲𑁆𑀬𑀸.)] 𑀓𑀢𑀸𑀥𑀺𑀓𑀸𑀭𑀸, 𑀅𑀮𑀤𑁆𑀥𑀫𑁄𑀓𑁆𑀔𑀸 𑀚𑀺𑀦𑀲𑀸𑀲𑀦𑁂𑀲𑀼.

𑁩.

‘‘𑀢𑁂𑀦𑁂𑀯 𑀲𑀫𑁆𑀩𑁄𑀥𑀺𑀫𑀼𑀔𑁂𑀦 𑀥𑀻𑀭𑀸, 𑀅𑀚𑁆𑀛𑀸𑀲𑀬𑁂𑀦𑀸𑀧𑀺 𑀫𑀳𑀸𑀩𑀮𑁂𑀦;

𑀧𑀜𑁆𑀜𑀸𑀬 𑀢𑁂𑀚𑁂𑀦 𑀲𑀼𑀢𑀺𑀓𑁆𑀔𑀧𑀜𑁆𑀜𑀸, 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀅𑀦𑀼𑀧𑀸𑀧𑀼𑀡𑀦𑁆𑀢𑀺.

𑁪.

‘‘𑀅𑀳𑀫𑁆𑀧𑀺 ¶ ¶ 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼, 𑀩𑀼𑀤𑁆𑀥𑀢𑁆𑀢𑀫𑀪𑀺𑀧𑀢𑁆𑀣𑀬𑀺𑀁,

𑀫𑀦𑀲𑀸𑀬𑁂𑀯 𑀳𑀼𑀢𑁆𑀯𑀸𑀦, 𑀥𑀫𑁆𑀫𑀭𑀸𑀚𑀸 𑀅𑀲𑀗𑁆𑀔𑀺𑀬𑀸.

𑁫.

‘‘𑀅𑀣 ¶ ¶ 𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀺, 𑀲𑀼𑀡𑀸𑀣 𑀲𑀼𑀤𑁆𑀥𑀫𑀸𑀦𑀲𑀸;

𑀢𑀺𑀁𑀲𑀧𑀸𑀭𑀫𑀺𑀲𑀫𑁆𑀧𑀼𑀡𑁆𑀡𑀸, 𑀥𑀫𑁆𑀫𑀭𑀸𑀚𑀸 𑀅𑀲𑀗𑁆𑀔𑀺𑀬𑀸.

𑁬.

‘‘𑀲𑀫𑁆𑀩𑁄𑀥𑀺𑀁 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀤𑀲𑀗𑁆𑀕𑀼𑀮𑀻 𑀦𑀫𑀲𑁆𑀲𑀺𑀢𑁆𑀯𑀸, 𑀲𑀺𑀭𑀲𑀸 𑀅𑀪𑀺𑀯𑀸𑀤𑀬𑀺𑀁 [𑀅𑀪𑀺𑀯𑀸𑀤𑀬𑁂 (𑀲𑁆𑀬𑀸.)].

𑁭.

‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑁂𑀲𑀼, 𑀭𑀢𑀦𑀸 𑀯𑀺𑀚𑁆𑀚𑀦𑁆𑀢𑀺𑀲𑀗𑁆𑀔𑀺𑀬𑀸;

𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸 [𑀪𑀼𑀫𑁆𑀫𑀝𑁆𑀞𑀸 (𑀲𑀻. 𑀲𑁆𑀬𑀸.)], 𑀫𑀦𑀲𑀸 𑀲𑀩𑁆𑀩𑀫𑀸𑀳𑀭𑀺𑀁.

𑁮.

‘‘𑀢𑀢𑁆𑀣 𑀭𑀽𑀧𑀺𑀬𑀪𑀽𑀫𑀺𑀬𑀁, 𑀧𑀸𑀲𑀸𑀤𑀁 𑀫𑀸𑀧𑀬𑀺𑀁 𑀅𑀳𑀁;

𑀦𑁂𑀓𑀪𑀼𑀫𑁆𑀫𑀁 𑀭𑀢𑀦𑀫𑀬𑀁, 𑀉𑀩𑁆𑀩𑀺𑀤𑁆𑀥𑀁 𑀦𑀪𑀫𑀼𑀕𑁆𑀕𑀢𑀁.

𑁯.

‘‘𑀯𑀺𑀘𑀺𑀢𑁆𑀢𑀣𑀫𑁆𑀪𑀁 𑀲𑀼𑀓𑀢𑀁, 𑀲𑀼𑀯𑀺𑀪𑀢𑁆𑀢𑀁 𑀫𑀳𑀸𑀭𑀳𑀁;

𑀓𑀦𑀓𑀫𑀬𑀲𑀗𑁆𑀖𑀸𑀝𑀁, 𑀓𑁄𑀦𑁆𑀢𑀘𑁆𑀙𑀢𑁆𑀢𑁂𑀳𑀺 𑀫𑀡𑁆𑀟𑀺𑀢𑀁.

𑁧𑁦.

‘‘𑀧𑀞𑀫𑀸 𑀯𑁂𑀴𑀼𑀭𑀺𑀬𑀸 𑀪𑀽𑀫𑀺, 𑀯𑀺𑀫𑀮𑀩𑁆𑀪𑀲𑀫𑀸 𑀲𑀼𑀪𑀸;

𑀦𑀴𑀺𑀦𑀚𑀮𑀚𑀸𑀓𑀺𑀡𑁆𑀡𑀸, 𑀯𑀭𑀓𑀜𑁆𑀘𑀦𑀪𑀽𑀫𑀺𑀬𑀸.

𑁧𑁧.

‘‘𑀧𑀯𑀸𑀴𑀁𑀲𑀸 𑀧𑀯𑀸𑀴𑀯𑀡𑁆𑀡𑀸, 𑀓𑀸𑀘𑀺 𑀮𑁄𑀳𑀺𑀢𑀓𑀸 𑀲𑀼𑀪𑀸;

𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸, 𑀪𑀽𑀫𑀺 𑀑𑀪𑀸𑀲𑀢𑀻 𑀤𑀺𑀲𑀸.

𑁧𑁨.

‘‘𑀲𑀼𑀯𑀺𑀪𑀢𑁆𑀢𑀸 𑀖𑀭𑀫𑀼𑀔𑀸, 𑀦𑀺𑀬𑁆𑀬𑀽𑀳𑀸 𑀲𑀻𑀳𑀧𑀜𑁆𑀚𑀭𑀸;

𑀘𑀢𑀼𑀭𑁄 𑀯𑁂𑀤𑀺𑀓𑀸 𑀚𑀸𑀮𑀸, 𑀕𑀦𑁆𑀥𑀸𑀯𑁂𑀴𑀸 𑀫𑀦𑁄𑀭𑀫𑀸.

𑁧𑁩.

‘‘𑀦𑀻𑀮𑀸 𑀧𑀻𑀢𑀸 𑀮𑁄𑀳𑀺𑀢𑀓𑀸, 𑀑𑀤𑀸𑀢𑀸 𑀲𑀼𑀤𑁆𑀥𑀓𑀸𑀴𑀓𑀸;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀸, 𑀲𑀢𑁆𑀢𑀭𑀢𑀦𑀪𑀽𑀲𑀺𑀢𑀸.

𑁧𑁪.

‘‘𑀑𑀮𑁄𑀓𑀫𑀬𑀸 ¶ 𑀧𑀤𑀼𑀫𑀸, 𑀯𑀸𑀴𑀯𑀺𑀳𑀗𑁆𑀕𑀲𑁄𑀪𑀺𑀢𑀸;

𑀦𑀓𑁆𑀔𑀢𑁆𑀢𑀢𑀸𑀭𑀓𑀸𑀓𑀺𑀡𑁆𑀡𑀸, 𑀘𑀦𑁆𑀤𑀲𑀽𑀭𑁂𑀳𑀺 [𑀘𑀦𑁆𑀤𑀲𑀼𑀭𑀺𑀬𑁂𑀳𑀺 (𑀲𑀻. 𑀲𑁆𑀬𑀸.)] 𑀫𑀡𑁆𑀟𑀺𑀢𑀸.

𑁧𑁫.

‘‘𑀳𑁂𑀫𑀚𑀸𑀮𑁂𑀦 ¶ 𑀲𑀜𑁆𑀙𑀦𑁆𑀦𑀸, 𑀲𑁄𑀡𑁆𑀡𑀓𑀺𑀗𑁆𑀓𑀺𑀡𑀺𑀓𑀸𑀬𑀼𑀢𑀸;

𑀯𑀸𑀢𑀯𑁂𑀕𑁂𑀦 𑀓𑀽𑀚𑀦𑁆𑀢𑀺, 𑀲𑁄𑀡𑁆𑀡𑀫𑀸𑀮𑀸 𑀫𑀦𑁄𑀭𑀫𑀸.

𑁧𑁬.

‘‘𑀫𑀜𑁆𑀚𑁂𑀝𑁆𑀞𑀓𑀁 𑀮𑁄𑀳𑀺𑀢𑀓𑀁, 𑀧𑀻𑀢𑀓𑀁 𑀳𑀭𑀺𑀧𑀺𑀜𑁆𑀚𑀭𑀁;

𑀦𑀸𑀦𑀸𑀭𑀗𑁆𑀕𑁂𑀳𑀺 𑀲𑀫𑁆𑀧𑀻𑀢𑀁 [𑀲𑀁𑀘𑀺𑀢𑁆𑀢𑀁 (𑀲𑁆𑀬𑀸.)], 𑀉𑀲𑁆𑀲𑀺𑀢𑀤𑁆𑀥𑀚𑀫𑀸𑀮𑀺𑀦𑀻 [𑀫𑀸𑀮𑀺𑀦𑀺𑀁 (𑀲𑀻.)].

𑁧𑁭.

‘‘𑀦 𑀦𑀁 [𑀦𑀸𑀦𑀸 (𑀲𑀻. 𑀲𑁆𑀬𑀸.)] 𑀩𑀳𑀽𑀦𑁂𑀓𑀲𑀢𑀸, 𑀨𑀮𑀺𑀓𑀸 𑀭𑀚𑀢𑀸𑀫𑀬𑀸;

𑀫𑀡𑀺𑀫𑀬𑀸 𑀮𑁄𑀳𑀺𑀢𑀗𑁆𑀕𑀸, 𑀫𑀲𑀸𑀭𑀕𑀮𑁆𑀮𑀫𑀬𑀸 𑀢𑀣𑀸;

𑀦𑀸𑀦𑀸𑀲𑀬𑀦𑀯𑀺𑀘𑀺𑀢𑁆𑀢𑀸, 𑀲𑀡𑁆𑀳𑀓𑀸𑀲𑀺𑀓𑀲𑀦𑁆𑀣𑀢𑀸.

𑁧𑁮.

‘‘𑀓𑀫𑁆𑀧𑀮𑀸 ¶ ¶ 𑀤𑀼𑀓𑀽𑀮𑀸 𑀘𑀻𑀦𑀸, 𑀧𑀝𑁆𑀝𑀼𑀡𑁆𑀡𑀸 𑀧𑀡𑁆𑀟𑀼𑀧𑀸𑀯𑀼𑀭𑀸;

𑀯𑀺𑀯𑀺𑀥𑀢𑁆𑀣𑀭𑀡𑀁 𑀲𑀩𑁆𑀩𑀁, 𑀫𑀦𑀲𑀸 𑀧𑀜𑁆𑀜𑀧𑁂𑀲𑀳𑀁.

𑁧𑁯.

‘‘𑀢𑀸𑀲𑀼 𑀢𑀸𑀲𑁆𑀯𑁂𑀯 𑀪𑀽𑀫𑀻𑀲𑀼, 𑀭𑀢𑀦𑀓𑀽𑀝𑀮𑀗𑁆𑀓𑀢𑀁;

𑀫𑀡𑀺𑀯𑁂𑀭𑁄𑀘𑀦𑀸 𑀉𑀓𑁆𑀓𑀸, 𑀥𑀸𑀭𑀬𑀦𑁆𑀢𑀸 𑀲𑀼𑀢𑀺𑀝𑁆𑀞𑀭𑁂.

𑁨𑁦.

‘‘𑀲𑁄𑀪𑀦𑁆𑀢𑀺 𑀏𑀲𑀺𑀓𑀸 𑀣𑀫𑁆𑀪𑀸, 𑀲𑀼𑀪𑀸 𑀓𑀜𑁆𑀘𑀦𑀢𑁄𑀭𑀡𑀸;

𑀚𑀫𑁆𑀩𑁄𑀦𑀤𑀸 𑀲𑀸𑀭𑀫𑀬𑀸, 𑀅𑀣𑁄 𑀭𑀚𑀢𑀫𑀬𑀸𑀧𑀺 𑀘.

𑁨𑁧.

‘‘𑀦𑁂𑀓𑀸 𑀲𑀦𑁆𑀥𑀻 𑀲𑀼𑀯𑀺𑀪𑀢𑁆𑀢𑀸, 𑀓𑀯𑀸𑀝𑀕𑁆𑀕𑀴𑀘𑀺𑀢𑁆𑀢𑀺𑀢𑀸;

𑀉𑀪𑀢𑁄 𑀧𑀼𑀡𑁆𑀡𑀖𑀝𑀸𑀦𑁂𑀓𑀸, 𑀧𑀤𑀼𑀫𑀼𑀧𑁆𑀧𑀮𑀲𑀁𑀬𑀼𑀢𑀸.

𑁨𑁨.

‘‘𑀅𑀢𑀻𑀢𑁂 𑀲𑀩𑁆𑀩𑀩𑀼𑀤𑁆𑀥𑁂 𑀘, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀧𑀓𑀢𑀺𑀯𑀡𑁆𑀡𑀭𑀽𑀧𑁂𑀦, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀲𑀸𑀯𑀓𑁂.

𑁨𑁩.

‘‘𑀢𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸, 𑀲𑀩𑁆𑀩𑁂 𑀩𑀼𑀤𑁆𑀥𑀸 𑀲𑀲𑀸𑀯𑀓𑀸;

𑀲𑀩𑁆𑀩𑀲𑁄𑀡𑁆𑀡𑀫𑀬𑁂 𑀧𑀻𑀞𑁂, 𑀦𑀺𑀲𑀺𑀦𑁆𑀦𑀸 𑀅𑀭𑀺𑀬𑀫𑀡𑁆𑀟𑀮𑀸.

𑁨𑁪.

‘‘𑀬𑁂 𑀘 𑀏𑀢𑀭𑀳𑀺 𑀅𑀢𑁆𑀣𑀺, 𑀩𑀼𑀤𑁆𑀥𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑀸;

𑀅𑀢𑀻𑀢𑁂 ¶ 𑀯𑀢𑁆𑀢𑀫𑀸𑀦𑀸 𑀘, 𑀪𑀯𑀦𑀁 𑀲𑀩𑁆𑀩𑁂 𑀲𑀫𑀸𑀳𑀭𑀺𑀁.

𑁨𑁫.

‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦𑁂𑀓𑀲𑀢𑁂, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁂;

𑀅𑀢𑀻𑀢𑁂 𑀯𑀢𑁆𑀢𑀫𑀸𑀦𑁂 𑀘, 𑀪𑀯𑀦𑀁 𑀲𑀩𑁆𑀩𑁂 𑀲𑀫𑀸𑀳𑀭𑀺𑀁.

𑁨𑁬.

‘‘𑀓𑀧𑁆𑀧𑀭𑀼𑀓𑁆𑀔𑀸 𑀩𑀳𑀽 𑀅𑀢𑁆𑀣𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀲𑀩𑁆𑀩𑀁 𑀤𑀼𑀲𑁆𑀲𑀁 𑀲𑀫𑀸𑀳𑀦𑁆𑀢𑀸, 𑀅𑀘𑁆𑀙𑀸𑀤𑁂𑀫𑀺 𑀢𑀺𑀘𑀻𑀯𑀭𑀁.

𑁨𑁭.

‘‘𑀔𑀚𑁆𑀚𑀁 𑀪𑁄𑀚𑁆𑀚𑀁 𑀲𑀸𑀬𑀦𑀻𑀬𑀁, 𑀲𑀫𑁆𑀧𑀦𑁆𑀦𑀁 𑀧𑀸𑀦𑀪𑁄𑀚𑀦𑀁;

𑀫𑀡𑀺𑀫𑀬𑁂 𑀲𑀼𑀪𑁂 𑀧𑀢𑁆𑀢𑁂, 𑀲𑀁𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀳𑀁.

𑁨𑁮.

‘‘𑀤𑀺𑀩𑁆𑀩𑀯𑀢𑁆𑀣𑀲𑀫𑀸 𑀳𑀼𑀢𑁆𑀯𑀸, 𑀫𑀝𑁆𑀞𑀸 [𑀫𑀝𑁆𑀝𑀸 (𑀲𑀻.)] 𑀘𑀻𑀯𑀭𑀲𑀁𑀬𑀼𑀢𑀸;

𑀫𑀥𑀼𑀭𑀸 𑀲𑀓𑁆𑀔𑀭𑀸 𑀘𑁂𑀯, 𑀢𑁂𑀮𑀸 𑀘 𑀫𑀥𑀼𑀨𑀸𑀡𑀺𑀢𑀸.

𑁨𑁯.

‘‘𑀢𑀧𑁆𑀧𑀺𑀢𑀸 𑀧𑀭𑀫𑀦𑁆𑀦𑁂𑀦, 𑀲𑀩𑁆𑀩𑁂 𑀢𑁂 𑀅𑀭𑀺𑀬𑀫𑀡𑁆𑀟𑀮𑀸;

𑀭𑀢𑀦𑀕𑀩𑁆𑀪𑀁 ¶ 𑀧𑀯𑀺𑀲𑀺𑀢𑁆𑀯𑀸, 𑀓𑁂𑀲𑀭𑀻𑀯 𑀕𑀼𑀳𑀸𑀲𑀬𑀸.

𑁩𑁦.

‘‘𑀫𑀳𑀸𑀭𑀳𑀫𑁆𑀳𑀺 𑀲𑀬𑀦𑁂, 𑀲𑀻𑀳𑀲𑁂𑀬𑁆𑀬𑀫𑀓𑀧𑁆𑀧𑀬𑀼𑀁;

𑀲𑀫𑁆𑀧𑀚𑀸𑀦𑀸 𑀲𑀫𑀼𑀝𑁆𑀞𑀸𑀬, 𑀲𑀬𑀦𑁂 [𑀲𑁂𑀬𑁆𑀬𑁂 (𑀲𑁆𑀬𑀸.)] 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀼𑀁.

𑁩𑁧.

‘‘𑀕𑁄𑀘𑀭𑀁 ¶ 𑀲𑀩𑁆𑀩𑀩𑀼𑀤𑁆𑀥𑀸𑀦𑀁, 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑀸;

𑀅𑀜𑁆𑀜𑁂 𑀥𑀫𑁆𑀫𑀸𑀦𑀺 𑀤𑁂𑀲𑁂𑀦𑁆𑀢𑀺, 𑀅𑀜𑁆𑀜𑁂 𑀓𑀻𑀴𑀦𑁆𑀢𑀺 𑀇𑀤𑁆𑀥𑀺𑀬𑀸.

𑁩𑁨.

‘‘𑀅𑀜𑁆𑀜𑁂 ¶ 𑀅𑀪𑀺𑀜𑁆𑀜𑀸 𑀅𑀧𑁆𑀧𑁂𑀦𑁆𑀢𑀺, 𑀅𑀪𑀺𑀜𑁆𑀜𑀸 𑀯𑀲𑀺𑀪𑀸𑀯𑀺𑀢𑀸;

𑀯𑀺𑀓𑀼𑀩𑁆𑀩𑀦𑀸 𑀯𑀺𑀓𑀼𑀩𑁆𑀩𑀦𑁆𑀢𑀺, 𑀅𑀜𑁆𑀜𑁂𑀦𑁂𑀓𑀲𑀳𑀲𑁆𑀲𑀺𑀬𑁄.

𑁩𑁩.

‘‘𑀩𑀼𑀤𑁆𑀥𑀸𑀧𑀺 𑀩𑀼𑀤𑁆𑀥𑁂 𑀧𑀼𑀘𑁆𑀙𑀦𑁆𑀢𑀺, 𑀯𑀺𑀲𑀬𑀁 𑀲𑀩𑁆𑀩𑀜𑁆𑀜𑀼𑀫𑀸𑀮𑀬𑀁;

𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀞𑀸𑀦𑀁, 𑀧𑀜𑁆𑀜𑀸𑀬 𑀯𑀺𑀦𑀺𑀩𑀼𑀚𑁆𑀛𑀭𑁂.

𑁩𑁪.

‘‘𑀲𑀸𑀯𑀓𑀸 𑀩𑀼𑀤𑁆𑀥𑁂 𑀧𑀼𑀘𑁆𑀙𑀦𑁆𑀢𑀺, 𑀩𑀼𑀤𑁆𑀥𑀸 𑀧𑀼𑀘𑁆𑀙𑀦𑁆𑀢𑀺 𑀲𑀸𑀯𑀓𑁂;

𑀅𑀜𑁆𑀜𑀫𑀜𑁆𑀜𑀜𑁆𑀘 ¶ 𑀧𑀼𑀘𑁆𑀙𑀺𑀢𑁆𑀯𑀸 [𑀧𑀼𑀘𑁆𑀙𑀦𑁆𑀢𑀺 (𑀲𑀻. 𑀲𑁆𑀬𑀸.)], 𑀅𑀜𑁆𑀜𑁄𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺 𑀢𑁂.

𑁩𑁫.

‘‘𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘, 𑀲𑀸𑀯𑀓𑀸 𑀧𑀭𑀺𑀘𑀸𑀭𑀓𑀸;

𑀏𑀯𑀁 𑀲𑀓𑀸𑀬 𑀭𑀢𑀺𑀬𑀸, 𑀧𑀸𑀲𑀸𑀤𑁂𑀪𑀺𑀭𑀫𑀦𑁆𑀢𑀺 𑀢𑁂.

𑁩𑁬.

‘‘𑀙𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀼 𑀭𑀢𑀦𑀸, 𑀓𑀜𑁆𑀘𑀦𑀸𑀯𑁂𑀴𑀧𑀦𑁆𑀢𑀺𑀓𑀸;

𑀫𑀼𑀢𑁆𑀢𑀸𑀚𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑀸, 𑀲𑀩𑁆𑀩𑁂 𑀥𑀸𑀭𑁂𑀦𑁆𑀢𑀼 [𑀥𑀸𑀭𑁂𑀦𑁆𑀢𑀺 (𑀓.)] 𑀫𑀢𑁆𑀣𑀓𑁂.

𑁩𑁭.

‘‘𑀪𑀯𑀦𑁆𑀢𑀼 𑀘𑁂𑀴𑀯𑀺𑀢𑀸𑀦𑀸, 𑀲𑁄𑀡𑁆𑀡𑀢𑀸𑀭𑀓𑀘𑀺𑀢𑁆𑀢𑀺𑀢𑀸;

𑀯𑀺𑀘𑀺𑀢𑁆𑀢𑀫𑀮𑁆𑀬𑀯𑀺𑀢𑀢𑀸, 𑀲𑀩𑁆𑀩𑁂 𑀥𑀸𑀭𑁂𑀦𑁆𑀢𑀼 𑀫𑀢𑁆𑀣𑀓𑁂.

𑁩𑁮.

‘‘𑀯𑀺𑀢𑀢𑀸 𑀫𑀮𑁆𑀬𑀤𑀸𑀫𑁂𑀳𑀺, 𑀕𑀦𑁆𑀥𑀤𑀸𑀫𑁂𑀳𑀺 𑀲𑁄𑀪𑀺𑀢𑀸;

𑀤𑀼𑀲𑁆𑀲𑀤𑀸𑀫𑀧𑀭𑀺𑀓𑀺𑀡𑁆𑀡𑀸, 𑀭𑀢𑀦𑀤𑀸𑀫𑀪𑀽𑀲𑀺𑀢𑀸.

𑁩𑁯.

‘‘𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀸 𑀲𑀼𑀘𑀺𑀢𑁆𑀢𑀸, 𑀲𑀼𑀭𑀪𑀺𑀕𑀦𑁆𑀥𑀪𑀽𑀲𑀺𑀢𑀸;

𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀢𑀸 [𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀁 𑀓𑀢𑀸 (𑀅𑀝𑁆𑀞.)], 𑀳𑁂𑀫𑀘𑁆𑀙𑀤𑀦𑀙𑀸𑀤𑀺𑀢𑀸.

𑁪𑁦.

‘‘𑀘𑀢𑀼𑀤𑁆𑀤𑀺𑀲𑀸 𑀧𑁄𑀓𑁆𑀔𑀭𑀜𑁆𑀜𑁄, 𑀧𑀤𑀼𑀫𑀼𑀧𑁆𑀧𑀮𑀲𑀦𑁆𑀣𑀢𑀸;

𑀲𑁄𑀯𑀡𑁆𑀡𑀭𑀽𑀧𑀸 𑀔𑀸𑀬𑀦𑁆𑀢𑀼, 𑀧𑀤𑁆𑀫𑀁𑀭𑁂𑀡𑀼𑀭𑀚𑀼𑀕𑁆𑀕𑀢𑀸.

𑁪𑁧.

‘‘𑀧𑀼𑀧𑁆𑀨𑀦𑁆𑀢𑀼 𑀧𑀸𑀤𑀧𑀸 𑀲𑀩𑁆𑀩𑁂, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄;

𑀲𑀬𑀜𑁆𑀘 𑀧𑀼𑀧𑁆𑀨𑀸 𑀫𑀼𑀜𑁆𑀘𑀺𑀢𑁆𑀯𑀸, 𑀕𑀦𑁆𑀢𑁆𑀯𑀸 𑀪𑀯𑀦𑀫𑁄𑀓𑀺𑀭𑀼𑀁.

𑁪𑁨.

‘‘𑀲𑀺𑀔𑀺𑀦𑁄 𑀢𑀢𑁆𑀣 𑀦𑀘𑁆𑀘𑀦𑁆𑀢𑀼, 𑀤𑀺𑀩𑁆𑀩𑀳𑀁𑀲𑀸 𑀧𑀓𑀽𑀚𑀭𑁂;

𑀓𑀭𑀯𑀻𑀓𑀸 𑀘 𑀕𑀸𑀬𑀦𑁆𑀢𑀼, 𑀤𑀺𑀚𑀲𑀗𑁆𑀖𑀸 𑀲𑀫𑀦𑁆𑀢𑀢𑁄.

𑁪𑁩.

‘‘𑀪𑁂𑀭𑀺𑀬𑁄 𑀲𑀩𑁆𑀩𑀸 𑀯𑀚𑁆𑀚𑀦𑁆𑀢𑀼, 𑀯𑀻𑀡𑀸 𑀲𑀩𑁆𑀩𑀸 𑀭𑀲𑀦𑁆𑀢𑀼 [𑀭𑀯𑀦𑁆𑀢𑀼 (𑀲𑀻. 𑀲𑁆𑀬𑀸.)] 𑀢𑀸;

𑀲𑀩𑁆𑀩𑀸 𑀲𑀗𑁆𑀕𑀻𑀢𑀺 𑀯𑀢𑁆𑀢𑀦𑁆𑀢𑀼, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄.

𑁪𑁪.

‘‘𑀬𑀸𑀯𑀢𑀸 ¶ ¶ ¶ 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺, 𑀘𑀓𑁆𑀓𑀯𑀸𑀴𑁂 𑀢𑀢𑁄 𑀧𑀭𑁂;

𑀫𑀳𑀦𑁆𑀢𑀸 𑀚𑁄𑀢𑀺𑀲𑀫𑁆𑀧𑀦𑁆𑀦𑀸, 𑀅𑀘𑁆𑀙𑀺𑀦𑁆𑀦𑀸 𑀭𑀢𑀦𑀸𑀫𑀬𑀸.

𑁪𑁫.

‘‘𑀢𑀺𑀝𑁆𑀞𑀦𑁆𑀢𑀼 𑀲𑁄𑀡𑁆𑀡𑀧𑀮𑁆𑀮𑀗𑁆𑀓𑀸, 𑀤𑀻𑀧𑀭𑀼𑀓𑁆𑀔𑀸 𑀚𑀮𑀦𑁆𑀢𑀼 𑀢𑁂;

𑀪𑀯𑀦𑁆𑀢𑀼 𑀏𑀓𑀧𑀚𑁆𑀚𑁄𑀢𑀸, 𑀤𑀲𑀲𑀳𑀲𑁆𑀲𑀺𑀧𑀭𑀫𑁆𑀧𑀭𑀸.

𑁪𑁬.

‘‘𑀕𑀡𑀺𑀓𑀸 𑀮𑀸𑀲𑀺𑀓𑀸 𑀘𑁂𑀯, 𑀦𑀘𑁆𑀘𑀦𑁆𑀢𑀼 𑀅𑀘𑁆𑀙𑀭𑀸𑀕𑀡𑀸;

𑀦𑀸𑀦𑀸𑀭𑀗𑁆𑀕𑀸 𑀧𑀤𑀺𑀲𑁆𑀲𑀦𑁆𑀢𑀼, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄.

𑁪𑁭.

‘‘𑀤𑀼𑀫𑀕𑁆𑀕𑁂 ¶ 𑀧𑀩𑁆𑀩𑀢𑀕𑁆𑀕𑁂 𑀯𑀸, 𑀲𑀺𑀦𑁂𑀭𑀼𑀕𑀺𑀭𑀺𑀫𑀼𑀤𑁆𑀥𑀦𑀺;

𑀉𑀲𑁆𑀲𑀸𑀧𑁂𑀫𑀺 𑀥𑀚𑀁 𑀲𑀩𑁆𑀩𑀁, 𑀯𑀺𑀘𑀺𑀢𑁆𑀢𑀁 𑀧𑀜𑁆𑀘𑀯𑀡𑁆𑀡𑀺𑀓𑀁.

𑁪𑁮.

‘‘𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀲𑀩𑁆𑀩𑁂 𑀤𑁂𑀯𑀸 𑀉𑀧𑁂𑀦𑁆𑀢𑀼 𑀢𑁂;

𑀦𑀫𑀲𑁆𑀲𑀦𑁆𑀢𑀸 𑀧𑀜𑁆𑀚𑀮𑀺𑀓𑀸, 𑀧𑀸𑀲𑀸𑀤𑀁 𑀧𑀭𑀺𑀯𑀸𑀭𑀬𑀼𑀁.

𑁪𑁯.

‘‘𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀁 𑀓𑀫𑁆𑀫𑀁, 𑀓𑀢𑁆𑀢𑀩𑁆𑀩𑀁 𑀓𑀺𑀭𑀺𑀬𑀁 𑀫𑀫;

𑀓𑀸𑀬𑁂𑀦 𑀯𑀸𑀘𑀸 𑀫𑀦𑀲𑀸, 𑀢𑀺𑀤𑀲𑁂 𑀲𑀼𑀓𑀢𑀁 𑀓𑀢𑀁.

𑁫𑁦.

‘‘𑀬𑁂 𑀲𑀢𑁆𑀢𑀸 𑀲𑀜𑁆𑀜𑀺𑀦𑁄 𑀅𑀢𑁆𑀣𑀺, 𑀬𑁂 𑀘 𑀲𑀢𑁆𑀢𑀸 𑀅𑀲𑀜𑁆𑀜𑀺𑀦𑁄;

𑀓𑀢𑀁 𑀧𑀼𑀜𑁆𑀜𑀨𑀮𑀁 𑀫𑀬𑁆𑀳𑀁, 𑀲𑀩𑁆𑀩𑁂 𑀪𑀸𑀕𑀻 𑀪𑀯𑀦𑁆𑀢𑀼 𑀢𑁂.

𑁫𑁧.

‘‘𑀬𑁂𑀲𑀁 𑀓𑀢𑀁 𑀲𑀼𑀯𑀺𑀤𑀺𑀢𑀁, 𑀤𑀺𑀦𑁆𑀦𑀁 𑀧𑀼𑀜𑁆𑀜𑀨𑀮𑀁 𑀫𑀬𑀸;

𑀬𑁂 𑀘 𑀢𑀢𑁆𑀣 [𑀢𑀲𑁆𑀫𑀺𑀁 (𑀲𑀻. 𑀓.)] 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀢𑁆𑀯𑀸 𑀦𑀺𑀯𑁂𑀤𑀬𑀼𑀁.

𑁫𑁨.

‘‘𑀲𑀩𑁆𑀩𑀮𑁄𑀓𑀫𑁆𑀳𑀺 [𑀲𑀩𑁆𑀩𑁂 𑀮𑁄𑀓𑀫𑁆𑀳𑀺 (𑀲𑁆𑀬𑀸. 𑀓.)] 𑀬𑁂 𑀲𑀢𑁆𑀢𑀸, 𑀚𑀻𑀯𑀦𑁆𑀢𑀸𑀳𑀸𑀭𑀳𑁂𑀢𑀼𑀓𑀸;

𑀫𑀦𑀼𑀜𑁆𑀜𑀁 𑀪𑁄𑀚𑀦𑀁 𑀲𑀩𑁆𑀩𑀁 [𑀲𑀩𑁆𑀩𑁂 (𑀲𑁆𑀬𑀸.)], 𑀮𑀪𑀦𑁆𑀢𑀼 𑀫𑀫 𑀘𑁂𑀢𑀲𑀸.

𑁫𑁩.

‘‘𑀫𑀦𑀲𑀸 𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀫𑀦𑀲𑀸 𑀧𑀲𑀸𑀤𑀫𑀸𑀯𑀳𑀺𑀁;

𑀧𑀽𑀚𑀺𑀢𑀸 𑀲𑀩𑁆𑀩𑀲𑀫𑁆𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀸 𑀚𑀺𑀦𑀲𑀸𑀯𑀓𑀸.

𑁫𑁪.

‘‘𑀢𑁂𑀦 ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁫𑁫.

‘‘𑀤𑀼𑀯𑁂 𑀪𑀯𑁂 𑀧𑀚𑀸𑀦𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀫𑀦𑀲𑀸 𑀧𑀢𑁆𑀣𑀦𑀸𑀨𑀮𑀁.

𑁫𑁬.

‘‘𑀤𑁂𑀯𑀸𑀦𑀁 𑀅𑀥𑀺𑀓𑁄 𑀳𑁄𑀫𑀺, 𑀪𑀯𑀸𑀫𑀺 𑀫𑀦𑀼𑀚𑀸𑀥𑀺𑀧𑁄;

𑀭𑀽𑀧𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀸𑀬 𑀅𑀲𑀫𑁄 𑀪𑀯𑁂.

𑁫𑁭.

‘‘𑀪𑁄𑀚𑀦𑀁 𑀯𑀺𑀯𑀺𑀥𑀁 𑀲𑁂𑀝𑁆𑀞𑀁, 𑀭𑀢𑀦𑀜𑁆𑀘 𑀅𑀦𑀧𑁆𑀧𑀓𑀁;

𑀯𑀺𑀯𑀺𑀥𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀦𑀪𑀸 [𑀦𑀪𑀲𑀸 (𑀲𑁆𑀬𑀸.)] 𑀔𑀺𑀧𑁆𑀧𑀁 𑀉𑀧𑁂𑀦𑁆𑀢𑀺 𑀫𑀁.

𑁫𑁮.

‘‘𑀧𑀣𑀩𑁆𑀬𑀸 ¶ 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀤𑀺𑀩𑁆𑀩𑀸 𑀪𑀓𑁆𑀔𑀸 𑀉𑀧𑁂𑀦𑁆𑀢𑀺 𑀫𑀁.

𑁫𑁯.

‘‘𑀧𑀣𑀩𑁆𑀬𑀸 ¶ 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀭𑀢𑀦𑀸 𑀲𑀩𑁆𑀩𑁂 𑀉𑀧𑁂𑀦𑁆𑀢𑀺 𑀫𑀁.

𑁬𑁦.

‘‘𑀧𑀣𑀩𑁆𑀬𑀸 ¶ 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀕𑀦𑁆𑀥𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁧.

‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 [𑀬𑀢𑁆𑀣 (𑀲𑁆𑀬𑀸.), 𑀬𑀜𑁆𑀜𑀁 (𑀓.)] 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀬𑀸𑀦𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁨.

‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁩.

‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀅𑀮𑀗𑁆𑀓𑀸𑀭𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁪.

‘‘𑀧𑀣𑀩𑁆𑀬𑀸 ¶ 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑀸 𑀓𑀜𑁆𑀜𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁫.

‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀫𑀥𑀼𑀲𑀓𑁆𑀔𑀭𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁬.

‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀔𑀚𑁆𑀚𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁭.

‘‘𑀅𑀥𑀦𑁂 𑀅𑀤𑁆𑀥𑀺𑀓 [𑀅𑀤𑁆𑀥𑀺𑀓𑁂 (𑀲𑁆𑀬𑀸.)] 𑀚𑀦𑁂, 𑀬𑀸𑀘𑀓𑁂 𑀘 𑀧𑀣𑀸𑀯𑀺𑀦𑁄;

𑀤𑀤𑀸𑀫𑀺𑀳𑀁 [𑀤𑀤𑀸𑀫𑀺𑀳 (𑀲𑀻.) 𑀤𑀤𑀸𑀫𑀺 𑀢𑀁 (𑀲𑁆𑀬𑀸.)] 𑀤𑀸𑀦𑀯𑀭𑀁, 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸.

𑁬𑁮.

‘‘𑀦𑀸𑀤𑁂𑀦𑁆𑀢𑁄 𑀧𑀩𑁆𑀩𑀢𑀁 𑀲𑁂𑀮𑀁, 𑀕𑀚𑁆𑀚𑁂𑀦𑁆𑀢𑁄 𑀩𑀳𑀮𑀁 𑀕𑀺𑀭𑀺𑀁;

𑀲𑀤𑁂𑀯𑀓𑀁 𑀳𑀸𑀲𑀬𑀦𑁆𑀢𑁄, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀸𑀫𑀳𑀁.

𑁬𑁯.

‘‘𑀤𑀺𑀲𑀸 𑀤𑀲𑀯𑀺𑀥𑀸 𑀮𑁄𑀓𑁂, 𑀬𑀸𑀬𑀢𑁄 𑀦𑀢𑁆𑀣𑀺 𑀅𑀦𑁆𑀢𑀓𑀁;

𑀢𑀲𑁆𑀫𑀺𑀜𑁆𑀘 𑀤𑀺𑀲𑀸𑀪𑀸𑀕𑀫𑁆𑀳𑀺, 𑀩𑀼𑀤𑁆𑀥𑀔𑁂𑀢𑁆𑀢𑀸 𑀅𑀲𑀗𑁆𑀔𑀺𑀬𑀸.

𑁭𑁦.

‘‘𑀧𑀪𑀸 𑀧𑀓𑀺𑀢𑁆𑀢𑀺𑀢𑀸 𑀫𑀬𑁆𑀳𑀁, 𑀬𑀫𑀓𑀸 𑀭𑀁𑀲𑀺𑀯𑀸𑀳𑀦𑀸;

𑀏𑀢𑁆𑀣𑀦𑁆𑀢𑀭𑁂 𑀭𑀁𑀲𑀺𑀚𑀸𑀮𑀁, 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀪𑀯𑁂.

𑁭𑁧.

‘‘𑀏𑀢𑁆𑀢𑀓𑁂 ¶ 𑀮𑁄𑀓𑀥𑀸𑀢𑀼𑀫𑁆𑀳𑀺, 𑀲𑀩𑁆𑀩𑁂 𑀧𑀲𑁆𑀲𑀦𑁆𑀢𑀼 𑀫𑀁 𑀚𑀦𑀸;

𑀲𑀩𑁆𑀩𑁂 𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑀼, 𑀬𑀸𑀯 𑀩𑁆𑀭𑀳𑁆𑀫𑀦𑀺𑀯𑁂𑀲𑀦𑀁 [𑀲𑀩𑁆𑀩𑁂𑀯 𑀲𑀼𑀫𑀦𑀸 𑀳𑁄𑀦𑁆𑀢𑀼, 𑀲𑀩𑁆𑀩𑁂 𑀫𑀁 𑀅𑀦𑀼𑀯𑀢𑁆𑀢𑀭𑁂 (𑀲𑀻. 𑀲𑁆𑀬𑀸.)].

𑁭𑁨.

‘‘𑀯𑀺𑀲𑀺𑀝𑁆𑀞𑀫𑀥𑀼𑀦𑀸𑀤𑁂𑀦, 𑀅𑀫𑀢𑀪𑁂𑀭𑀺𑀫𑀸𑀳𑀦𑀺𑀁;

𑀏𑀢𑁆𑀣𑀦𑁆𑀢𑀭𑁂 𑀚𑀦𑀸 𑀲𑀩𑁆𑀩𑁂, 𑀲𑀼𑀡𑀦𑁆𑀢𑀼 𑀫𑀥𑀼𑀭𑀁 𑀕𑀺𑀭𑀁.

𑁭𑁩.

‘‘𑀥𑀫𑁆𑀫𑀫𑁂𑀖𑁂𑀦 𑀯𑀲𑁆𑀲𑀦𑁆𑀢𑁂, 𑀲𑀩𑁆𑀩𑁂 𑀳𑁄𑀦𑁆𑀢𑀼 𑀅𑀦𑀸𑀲𑀯𑀸;

𑀬𑁂𑀢𑁆𑀣 𑀧𑀘𑁆𑀙𑀺𑀫𑀓𑀸 𑀲𑀢𑁆𑀢𑀸, 𑀲𑁄𑀢𑀸𑀧𑀦𑁆𑀦𑀸 𑀪𑀯𑀦𑁆𑀢𑀼 𑀢𑁂.

𑁭𑁪.

‘‘𑀤𑀢𑁆𑀯𑀸 ¶ ¶ 𑀤𑀸𑀢𑀩𑁆𑀩𑀓𑀁 𑀤𑀸𑀦𑀁, 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀅𑀲𑁂𑀲𑀢𑁄;

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁭𑁫.

‘‘𑀧𑀡𑁆𑀟𑀺𑀢𑁂 ¶ 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸, 𑀓𑀢𑁆𑀯𑀸 𑀯𑀻𑀭𑀺𑀬𑀫𑀼𑀢𑁆𑀢𑀫𑀁;

𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁭𑁬.

‘‘𑀓𑀢𑁆𑀯𑀸 𑀤𑀴𑁆𑀳𑀫𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀧𑀸𑀭𑀫𑀺 𑀧𑀽𑀭𑀺𑀬;

𑀫𑁂𑀢𑁆𑀢𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁭𑁭.

‘‘𑀮𑀸𑀪𑀸𑀮𑀸𑀪𑁂 𑀲𑀼𑀔𑁂 𑀤𑀼𑀓𑁆𑀔𑁂, 𑀲𑀫𑁆𑀫𑀸𑀦𑁂 𑀘𑀸𑀯𑀫𑀸𑀦𑀦𑁂 [𑀲𑀫𑁆𑀫𑀸𑀦𑁂 𑀘 𑀯𑀺𑀫𑀸𑀦𑀦𑁂 (𑀓.) 𑀲𑀫𑁆𑀫𑀸𑀦𑀦𑁂 𑀯𑀺𑀫𑀸𑀦𑀦𑁂 (𑀲𑁆𑀬𑀸.)];

𑀲𑀩𑁆𑀩𑀢𑁆𑀣 𑀲𑀫𑀓𑁄 𑀳𑀼𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁭𑁮.

‘‘𑀓𑁄𑀲𑀚𑁆𑀚𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀯𑀻𑀭𑀺𑀬𑀁 𑀘𑀸𑀧𑀺 𑀔𑁂𑀫𑀢𑁄;

𑀆𑀭𑀤𑁆𑀥𑀯𑀻𑀭𑀺𑀬𑀸 𑀳𑁄𑀣, 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻.

𑁭𑁯.

‘‘𑀯𑀺𑀯𑀸𑀤𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀅𑀯𑀺𑀯𑀸𑀤𑀜𑁆𑀘 𑀔𑁂𑀫𑀢𑁄;

𑀲𑀫𑀕𑁆𑀕𑀸 𑀲𑀔𑀺𑀮𑀸 𑀳𑁄𑀣, 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻.

𑁮𑁦.

‘‘𑀧𑀫𑀸𑀤𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀅𑀧𑁆𑀧𑀫𑀸𑀤𑀜𑁆𑀘 𑀔𑁂𑀫𑀢𑁄;

𑀪𑀸𑀯𑁂𑀣𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻.

𑁮𑁧.

‘‘𑀲𑀫𑀸𑀕𑀢𑀸 𑀩𑀳𑀽 𑀩𑀼𑀤𑁆𑀥𑀸, 𑀅𑀭𑀳𑀦𑁆𑀢𑀸 [𑀅𑀭𑀳𑀦𑁆𑀢𑁄 (𑀲𑁆𑀬𑀸.)] 𑀘 𑀲𑀩𑁆𑀩𑀲𑁄;

𑀲𑀫𑁆𑀩𑀼𑀤𑁆𑀥𑁂 𑀅𑀭𑀳𑀦𑁆𑀢𑁂 𑀘, 𑀯𑀦𑁆𑀤𑀫𑀸𑀦𑀸 𑀦𑀫𑀲𑁆𑀲𑀣.

𑁮𑁨.

‘‘𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’’.

𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀘𑀭𑀺𑀬𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀩𑀼𑀤𑁆𑀥𑀸𑀧𑀤𑀸𑀦𑀺𑀬𑀁 [𑀩𑀼𑀤𑁆𑀥𑀘𑀭𑀺𑀬𑀁 (𑀲𑀻.) 𑀩𑀼𑀤𑁆𑀥𑀘𑀭𑀺𑀢𑀁 (𑀲𑁆𑀬𑀸.)] 𑀦𑀸𑀫 𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀼𑀤𑁆𑀥𑀸𑀧𑀤𑀸𑀦𑀁 𑀲𑀫𑀢𑁆𑀢𑀁.

𑁨. 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀧𑀤𑀸𑀦𑀁

𑀅𑀣 ¶ ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀁 𑀲𑀼𑀡𑀸𑀣 𑁋

𑁮𑁩.

‘‘𑀢𑀣𑀸𑀕𑀢𑀁 ¶ 𑀚𑁂𑀢𑀯𑀦𑁂 𑀯𑀲𑀦𑁆𑀢𑀁, 𑀅𑀧𑀼𑀘𑁆𑀙𑀺 𑀯𑁂𑀤𑁂𑀳𑀫𑀼𑀦𑀻 𑀦𑀢𑀗𑁆𑀕𑁄;

‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑀺𑀭 𑀦𑀸𑀫 𑀳𑁄𑀦𑁆𑀢𑀺, 𑀪𑀯𑀦𑁆𑀢𑀺 𑀢𑁂 𑀳𑁂𑀢𑀼𑀪𑀺 𑀓𑁂𑀳𑀺 𑀯𑀻𑀭’ [𑀥𑀻𑀭 (𑀲𑀻.) 𑀥𑀻𑀭𑀸 (𑀲𑁆𑀬𑀸.)].

𑁮𑁪.

‘‘𑀢𑀤𑀸𑀳 ¶ 𑀲𑀩𑁆𑀩𑀜𑁆𑀜𑀼𑀯𑀭𑁄 𑀫𑀳𑁂𑀲𑀻, 𑀆𑀦𑀦𑁆𑀤𑀪𑀤𑁆𑀤𑀁 𑀫𑀥𑀼𑀭𑀲𑁆𑀲𑀭𑁂𑀦;

‘𑀬𑁂 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼 [𑀲𑀩𑁆𑀩𑀩𑀼𑀤𑁆𑀥𑁂𑀲𑀼 (𑀲𑁆𑀬𑀸. 𑀓.)] 𑀓𑀢𑀸𑀥𑀺𑀓𑀸𑀭𑀸, 𑀅𑀮𑀤𑁆𑀥𑀫𑁄𑀓𑁆𑀔𑀸 𑀚𑀺𑀦𑀲𑀸𑀲𑀦𑁂𑀲𑀼.

𑁮𑁫.

‘‘‘𑀢𑁂𑀦𑁂𑀯 𑀲𑀁𑀯𑁂𑀕𑀫𑀼𑀔𑁂𑀦 𑀥𑀻𑀭𑀸, 𑀯𑀺𑀦𑀸𑀧𑀺 𑀩𑀼𑀤𑁆𑀥𑁂𑀳𑀺 𑀲𑀼𑀢𑀺𑀓𑁆𑀔𑀧𑀜𑁆𑀜𑀸;

𑀆𑀭𑀫𑁆𑀫𑀡𑁂𑀦𑀸𑀧𑀺 𑀧𑀭𑀺𑀢𑁆𑀢𑀓𑁂𑀦, 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀦𑀼𑀧𑀸𑀧𑀼𑀡𑀦𑁆𑀢𑀺.

𑁮𑁬.

‘‘‘𑀲𑀩𑁆𑀩𑀫𑁆𑀳𑀺 𑀮𑁄𑀓𑀫𑁆𑀳𑀺 𑀫𑀫𑀁 𑀞𑀧𑁂𑀢𑁆𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑁄𑀯 𑀦𑀢𑁆𑀣𑀺;

𑀢𑁂𑀲𑀁 𑀇𑀫𑀁 𑀯𑀡𑁆𑀡𑀧𑀤𑁂𑀲𑀫𑀢𑁆𑀢𑀁, 𑀯𑀓𑁆𑀔𑀸𑀫𑀳𑀁 𑀲𑀸𑀥𑀼 𑀫𑀳𑀸𑀫𑀼𑀦𑀻𑀦𑀁.

𑁮𑁭.

‘‘‘𑀲𑀬𑀫𑁂𑀯 ¶ 𑀩𑀼𑀤𑁆𑀥𑀸𑀦𑀁 𑀫𑀳𑀸𑀇𑀲𑀻𑀦𑀁, 𑀲𑀸𑀥𑀽𑀦𑀺 𑀯𑀸𑀓𑁆𑀬𑀸𑀦𑀺 𑀫𑀥𑀽𑀯 [𑀫𑀥𑀼𑀁𑀯 (𑀲𑀻.)] 𑀔𑀼𑀤𑁆𑀤𑀁;

𑀅𑀦𑀼𑀢𑁆𑀢𑀭𑀁 𑀪𑁂𑀲𑀚𑀁 𑀧𑀢𑁆𑀣𑀬𑀦𑁆𑀢𑀸, 𑀲𑀼𑀡𑀸𑀣 𑀲𑀩𑁆𑀩𑁂𑀲𑀼 𑀧𑀲𑀦𑁆𑀦𑀘𑀺𑀢𑁆𑀢𑀸.

𑁮𑁮.

‘‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀫𑀸𑀕𑀢𑀸𑀦𑀁, 𑀧𑀭𑀫𑁆𑀧𑀭𑀁 𑀩𑁆𑀬𑀸𑀓𑀭𑀡𑀸𑀦𑀺 𑀬𑀸𑀦𑀺;

𑀆𑀤𑀻𑀦𑀯𑁄 𑀬𑀜𑁆𑀘 𑀯𑀺𑀭𑀸𑀕𑀯𑀢𑁆𑀣𑀼𑀁, 𑀬𑀣𑀸 𑀘 𑀩𑁄𑀥𑀺𑀁 𑀅𑀦𑀼𑀧𑀸𑀧𑀼𑀡𑀺𑀁𑀲𑀼.

𑁮𑁯.

‘‘‘𑀲𑀭𑀸𑀕𑀯𑀢𑁆𑀣𑀽𑀲𑀼 ¶ ¶ 𑀯𑀺𑀭𑀸𑀕𑀲𑀜𑁆𑀜𑀻, 𑀭𑀢𑁆𑀢𑀫𑁆𑀳𑀺 𑀮𑁄𑀓𑀫𑁆𑀳𑀺 𑀯𑀺𑀭𑀢𑁆𑀢𑀘𑀺𑀢𑁆𑀢𑀸;

𑀳𑀺𑀢𑁆𑀯𑀸 𑀧𑀧𑀜𑁆𑀘𑁂 𑀚𑀺𑀢𑀨𑀦𑁆𑀤𑀺𑀢𑀸𑀦𑀺 [𑀯𑀺𑀤𑀺𑀬 𑀨𑀦𑁆𑀤𑀺𑀢𑀸𑀦𑀺 (𑀲𑀻.) 𑀚𑀺𑀢𑀩𑀦𑁆𑀥𑀺𑀢𑀸𑀦𑀺 (𑀓.)], 𑀢𑀣𑁂𑀯 𑀩𑁄𑀥𑀺𑀁 𑀅𑀦𑀼𑀧𑀸𑀧𑀼𑀡𑀺𑀁𑀲𑀼.

𑁯𑁦.

‘‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁧.

‘‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁨.

‘‘‘𑀲𑀁𑀲𑀕𑁆𑀕𑀚𑀸𑀢𑀲𑁆𑀲 ¶ 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁩.

‘‘‘𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁪.

‘‘‘𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑁂 𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁫.

‘‘‘𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁬.

‘‘‘𑀆𑀫𑀦𑁆𑀢𑀦𑀸 ¶ 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀘 [𑀯𑀸𑀲𑁂 (𑀲𑀻. 𑀲𑁆𑀬𑀸.) 𑀲𑀼𑀢𑁆𑀢𑀦𑀺𑀧𑀸𑀢𑁂𑀧𑀺 ‘‘𑀘‘‘𑀓𑀸𑀭𑁄 𑀦𑀢𑁆𑀣𑀺] 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁭.

‘‘‘𑀔𑀺𑀟𑁆𑀟𑀸 ¶ 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀧𑀼𑀢𑁆𑀢𑁂𑀲𑀼 𑀧𑁂𑀫𑀁 𑀯𑀺𑀧𑀼𑀮𑀜𑁆𑀘 𑀳𑁄𑀢𑀺;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 ¶ 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁮.

‘‘‘𑀘𑀸𑀢𑀼𑀤𑁆𑀤𑀺𑀲𑁄 ¶ 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺, 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁯𑁯.

‘‘‘𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁦.

‘‘‘𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄;

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁧.

‘‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

𑁧𑁦𑁨.

‘‘‘𑀦𑁄 ¶ 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑁧𑁦𑁩.

‘‘‘𑀅𑀤𑁆𑀥𑀸 ¶ 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀁, 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸;

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁪.

‘‘‘𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀧𑀪𑀲𑁆𑀲𑀭𑀸𑀦𑀺, 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀺;

𑀲𑀗𑁆𑀖𑀝𑁆𑀝𑀫𑀸𑀦𑀸𑀦𑀺 𑀤𑀼𑀯𑁂 𑀪𑀼𑀚𑀲𑁆𑀫𑀺𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁫.

‘‘‘𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳𑀸 𑀫𑀫𑀲𑁆𑀲, 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸;

𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁬.

‘‘‘𑀓𑀸𑀫𑀸 ¶ 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁭.

‘‘‘𑀈𑀢𑀻 ¶ 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀁;

𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁮.

‘‘‘𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀁, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 [𑀟𑀁𑀲𑀲𑀺𑀭𑀺𑀁𑀲𑀧𑁂 (𑀲𑀻. 𑀲𑁆𑀬𑀸.)] 𑀘;

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀩𑁆𑀪𑀯𑀺𑀢𑁆𑀯𑀸 [𑀅𑀪𑀺𑀲𑀁𑀪𑀯𑀺𑀢𑁆𑀯𑀸 (𑀲𑀼𑀢𑁆𑀢𑀦𑀺𑀧𑀸𑀢𑁂)], 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁦𑁯.

‘‘‘𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸, 𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄;

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀁 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁦.

‘‘‘𑀅𑀝𑁆𑀞𑀸𑀦𑀢𑀁 ¶ 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 [𑀨𑀼𑀲𑁆𑀲𑀬𑁂 (𑀲𑁆𑀬𑀸.)] 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁;

𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁧.

‘‘‘𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄;

𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁨.

‘‘‘𑀦𑀺𑀮𑁆𑀮𑁄𑀮𑀼𑀧𑁄 ¶ ¶ 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄, 𑀦𑀺𑀫𑁆𑀫𑀓𑁆𑀔 [𑀦𑀺𑀫𑁆𑀫𑀓𑁆𑀔𑁄 (𑀲𑁆𑀬𑀸.)] 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄;

𑀦𑀺𑀭𑀸𑀲𑀬𑁄 [𑀦𑀺𑀭𑀸𑀲𑀸𑀲𑁄 (𑀓.)] 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁩.

‘‘‘𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁;

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁪.

‘‘‘𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣, 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁;

𑀅𑀜𑁆𑀜𑀸𑀬 ¶ 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁫.

‘‘‘𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂, 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄;

𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁬.

‘‘‘𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁, 𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀺;

𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁭.

‘‘‘𑀲𑀗𑁆𑀕𑁄 ¶ ¶ 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀁, 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀪𑀺𑀬𑁆𑀬𑁄;

𑀕𑀴𑁄 [𑀕𑀸𑀳𑁄 (𑀲𑀻.) 𑀓𑀡𑁆𑀟𑁄 (𑀲𑁆𑀬𑀸.) 𑀕𑀸𑀴𑁆𑀳𑁄 (𑀓.)] 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁮.

‘‘‘𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺, 𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻;

𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁧𑁯.

‘‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽 𑀦 𑀘 𑀧𑀸𑀤𑀮𑁄𑀮𑁄, 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄;

𑀅𑀦𑀯𑀲𑁆𑀲𑀼𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁦.

‘‘‘𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑁄;

𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁧.

‘‘‘𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄, 𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻;

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁨.

‘‘‘𑀧𑀳𑀸𑀬 ¶ 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄, 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂;

𑀅𑀦𑀺𑀲𑁆𑀲𑀺𑀢𑁄 𑀙𑁂𑀚𑁆𑀚 𑀲𑀺𑀦𑁂𑀳𑀤𑁄𑀲𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁩.

‘‘‘𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 ¶ 𑀲𑀼𑀔𑀜𑁆𑀘 𑀤𑀼𑀓𑁆𑀔𑀁, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁;

𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁪.

‘‘‘𑀆𑀭𑀤𑁆𑀥𑀯𑀻𑀭𑀺𑀬𑁄 ¶ 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸, 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺;

𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁫.

‘‘‘𑀧𑀝𑀺𑀲𑀮𑁆𑀮𑀸𑀦𑀁 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀼, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁬.

‘‘‘𑀢𑀡𑁆𑀳𑀓𑁆𑀔𑀬𑀁 ¶ 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄, 𑀅𑀦𑁂𑀴𑀫𑀽𑀕𑁄 𑀲𑀼𑀢𑀯𑀸 𑀲𑀢𑀻𑀫𑀸;

𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁭.

‘‘‘𑀲𑀻𑀳𑁄𑀯 ¶ 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄;

𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀫𑁆𑀧𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁮.

‘‘‘𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻;

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁨𑁯.

‘‘‘𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂;

𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁩𑁦.

‘‘‘𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺;

𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁩𑁧.

‘‘‘𑀪𑀚𑀦𑁆𑀢𑀺 ¶ ¶ 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸, 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸;

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀅𑀲𑀼𑀘𑀻𑀫𑀦𑀼𑀲𑁆𑀲𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁩𑁨.

‘‘‘𑀯𑀺𑀲𑀼𑀤𑁆𑀥𑀲𑀻𑀮𑀸 ¶ 𑀲𑀼𑀯𑀺𑀲𑀼𑀤𑁆𑀥𑀧𑀜𑁆𑀜𑀸, 𑀲𑀫𑀸𑀳𑀺𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑀼𑀢𑁆𑀢𑀸;

𑀯𑀺𑀧𑀲𑁆𑀲𑀓𑀸 𑀥𑀫𑁆𑀫𑀯𑀺𑀲𑁂𑀲𑀤𑀲𑁆𑀲𑀻, 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀕𑀢𑁂 𑀯𑀺𑀚𑀜𑁆𑀜𑀸.

𑁧𑁩𑁩.

‘‘‘𑀲𑀼𑀜𑁆𑀜𑀧𑁆𑀧𑀡𑀺𑀥𑀺𑀜𑁆𑀘 𑀢𑀣𑀸𑀦𑀺𑀫𑀺𑀢𑁆𑀢𑀁 [𑀲𑀼𑀜𑁆𑀜𑀢𑀧𑁆𑀧𑀡𑀻𑀳𑀺𑀢𑀜𑁆𑀘𑀸𑀦𑀺𑀫𑀺𑀢𑁆𑀢𑀁 (𑀲𑀻.)], 𑀆𑀲𑁂𑀯𑀬𑀺𑀢𑁆𑀯𑀸 𑀚𑀺𑀦𑀲𑀸𑀲𑀦𑀫𑁆𑀳𑀺;

𑀬𑁂 𑀲𑀸𑀯𑀓𑀢𑁆𑀢𑀁 𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀪𑀯𑀦𑁆𑀢𑀺 𑀧𑀘𑁆𑀘𑁂𑀓𑀚𑀺𑀦𑀸 𑀲𑀬𑀫𑁆𑀪𑀽.

𑁧𑁩𑁪.

‘‘‘𑀫𑀳𑀦𑁆𑀢𑀥𑀫𑁆𑀫𑀸 𑀩𑀳𑀼𑀥𑀫𑁆𑀫𑀓𑀸𑀬𑀸, 𑀘𑀺𑀢𑁆𑀢𑀺𑀲𑁆𑀲𑀭𑀸 𑀲𑀩𑁆𑀩𑀤𑀼𑀓𑁆𑀔𑁄𑀖𑀢𑀺𑀡𑁆𑀡𑀸;

𑀉𑀤𑀕𑁆𑀕𑀘𑀺𑀢𑁆𑀢𑀸 𑀧𑀭𑀫𑀢𑁆𑀣𑀤𑀲𑁆𑀲𑀻, 𑀲𑀻𑀳𑁄𑀧𑀫𑀸 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀸.

𑁧𑁩𑁫.

‘‘‘𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀲𑀦𑁆𑀢𑀫𑀦𑀸 𑀲𑀫𑀸𑀥𑀻, 𑀧𑀘𑁆𑀘𑀦𑁆𑀢𑀲𑀢𑁆𑀢𑁂𑀲𑀼 𑀧𑀢𑀺𑀧𑁆𑀧𑀘𑀸𑀭𑀸 [𑀧𑀘𑁆𑀘𑀢𑁆𑀢𑀕𑀫𑁆𑀪𑀻𑀭𑀫𑀢𑀧𑁆𑀧𑀘𑀸𑀭𑀸 (𑀲𑀻.)];

𑀤𑀻𑀧𑀸 𑀧𑀭𑀢𑁆𑀣 𑀇𑀥 𑀯𑀺𑀚𑁆𑀚𑀮𑀦𑁆𑀢𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀢𑀢𑀁 𑀳𑀺𑀢𑀸𑀫𑁂.

𑁧𑁩𑁬.

‘‘‘𑀧𑀳𑀻𑀦𑀲𑀩𑁆𑀩𑀸𑀯𑀭𑀡𑀸 𑀚𑀦𑀺𑀦𑁆𑀤𑀸, 𑀮𑁄𑀓𑀧𑁆𑀧𑀤𑀻𑀧𑀸 𑀖𑀦𑀓𑀜𑁆𑀘𑀦𑀸𑀪𑀸;

𑀦𑀺𑀲𑁆𑀲𑀁𑀲𑀬𑀁 𑀮𑁄𑀓𑀲𑀼𑀤𑀓𑁆𑀔𑀺𑀡𑁂𑀬𑁆𑀬𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀢𑀢𑀧𑁆𑀧𑀺𑀢𑀸𑀫𑁂.

𑁧𑁩𑁭.

‘‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 ¶ 𑀲𑀼𑀪𑀸𑀲𑀺𑀢𑀸𑀦𑀺, 𑀘𑀭𑀦𑁆𑀢𑀺 𑀮𑁄𑀓𑀫𑁆𑀳𑀺 𑀲𑀤𑁂𑀯𑀓𑀫𑁆𑀳𑀺;

𑀲𑀼𑀢𑁆𑀯𑀸 𑀢𑀣𑀸 𑀬𑁂 𑀦 𑀓𑀭𑁄𑀦𑁆𑀢𑀺 𑀩𑀸𑀮𑀸, 𑀘𑀭𑀦𑁆𑀢𑀺 𑀤𑀼𑀓𑁆𑀔𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀢𑁂.

𑁧𑁩𑁮.

‘‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 ¶ 𑀲𑀼𑀪𑀸𑀲𑀺𑀢𑀸𑀦𑀺, 𑀫𑀥𑀼𑀁 𑀬𑀣𑀸 𑀔𑀼𑀤𑁆𑀤𑀫𑀯𑀲𑁆𑀲𑀯𑀦𑁆𑀢𑀁;

𑀲𑀼𑀢𑁆𑀯𑀸 𑀢𑀣𑀸 𑀬𑁂 𑀧𑀝𑀺𑀧𑀢𑁆𑀢𑀺𑀬𑀼𑀢𑁆𑀢𑀸, 𑀪𑀯𑀦𑁆𑀢𑀺 𑀢𑁂 𑀲𑀘𑁆𑀘𑀤𑀲𑀸 𑀲𑀧𑀜𑁆𑀜𑀸’.

𑁧𑁩𑁯.

‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 ¶ 𑀚𑀺𑀦𑁂𑀳𑀺 𑀪𑀸𑀲𑀺𑀢𑀸, 𑀓𑀣𑀸 [𑀕𑀸𑀣𑀸 (𑀲𑀻. 𑀲𑁆𑀬𑀸.)] 𑀉𑀴𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸;

𑀢𑀸 𑀲𑀓𑁆𑀬𑀲𑀻𑀳𑁂𑀦 𑀦𑀭𑀼𑀢𑁆𑀢𑀫𑁂𑀦, 𑀧𑀓𑀸𑀲𑀺𑀢𑀸 𑀥𑀫𑁆𑀫𑀯𑀺𑀚𑀸𑀦𑀦𑀢𑁆𑀣𑀁.

𑁧𑁪𑁦.

‘‘𑀮𑁄𑀓𑀸𑀦𑀼𑀓𑀫𑁆𑀧𑀸𑀬 ¶ 𑀇𑀫𑀸𑀦𑀺 𑀢𑁂𑀲𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦 𑀯𑀺𑀓𑀼𑀩𑁆𑀩𑀺𑀢𑀸𑀦𑀺;

𑀲𑀁𑀯𑁂𑀕𑀲𑀗𑁆𑀕𑀫𑀢𑀺𑀯𑀟𑁆𑀠𑀦𑀢𑁆𑀣𑀁, 𑀲𑀬𑀫𑁆𑀪𑀼𑀲𑀻𑀳𑁂𑀦 𑀧𑀓𑀸𑀲𑀺𑀢𑀸𑀦𑀻’’𑀢𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀤𑀸𑀦𑀁 𑀲𑀫𑀢𑁆𑀢𑀁.

𑁩-𑁧. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑀅𑀣 𑀣𑁂𑀭𑀸𑀧𑀤𑀸𑀦𑀁 𑀲𑀼𑀡𑀸𑀣 𑁋

𑁧𑁪𑁧.

‘‘𑀳𑀺𑀫𑀯𑀦𑁆𑀢𑀲𑁆𑀲 ¶ ¶ 𑀅𑀯𑀺𑀤𑀽𑀭𑁂, 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁧𑁪𑁨.

‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀼𑀲𑀼𑀤𑁆𑀥𑀧𑀼𑀴𑀺𑀦𑀸𑀓𑀺𑀡𑁆𑀡𑀸, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁧𑁪𑁩.

‘‘𑀅𑀲𑀓𑁆𑀔𑀭𑀸 𑀅𑀧𑀩𑁆𑀪𑀸𑀭𑀸, 𑀲𑀸𑀤𑀼 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸;

𑀲𑀦𑁆𑀤𑀢𑀻 𑀦𑀤𑀺𑀓𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁧𑁪𑁪.

‘‘𑀓𑀼𑀫𑁆𑀪𑀻𑀮𑀸 𑀫𑀓𑀭𑀸 𑀘𑁂𑀢𑁆𑀣, 𑀲𑀼𑀲𑀼𑀫𑀸𑀭𑀸 [𑀲𑀼𑀁𑀲𑀼𑀫𑀸𑀭𑀸 (𑀲𑀻. 𑀲𑁆𑀬𑀸. )] 𑀘 𑀓𑀘𑁆𑀙𑀧𑀸;

𑀘𑀭𑀦𑁆𑀢𑀺 𑀦𑀤𑀺𑀬𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁧𑁪𑁫.

‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 [𑀯𑀚𑀮𑀸 (𑀲𑀻. 𑀲𑁆𑀬𑀸.) 𑀚𑀮𑀚𑀸 (𑀧𑀻.)] 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀯𑀕𑁆𑀕𑀴𑀸 [𑀯𑀕𑁆𑀕𑀼𑀮𑀸 (𑀲𑀻.) 𑀯𑀕𑁆𑀕𑀼𑀴𑀸 (𑀲𑁆𑀬𑀸.) 𑀫𑀕𑁆𑀕𑀼𑀭𑀸 (𑀣𑁂𑀭𑀕𑀸𑀣𑀸)] 𑀧𑀧𑀢𑀸𑀬𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 [𑀧𑀧𑀢𑀸𑀬𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 (𑀓.)] 𑀫𑀫𑀲𑁆𑀲𑀫𑀁.

𑁧𑁪𑁬.

‘‘𑀉𑀪𑁄 ¶ 𑀓𑀽𑀮𑁂𑀲𑀼 𑀦𑀤𑀺𑀬𑀸, 𑀧𑀼𑀧𑁆𑀨𑀺𑀦𑁄 𑀨𑀮𑀺𑀦𑁄 𑀤𑀼𑀫𑀸;

𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 [𑀅𑀪𑀺𑀮𑀫𑁆𑀩𑀦𑁆𑀢𑀺 𑀲𑁄𑀪𑀬𑀦𑁆𑀢𑀸 (𑀓.)] 𑀫𑀫𑀲𑁆𑀲𑀫𑀁.

𑁧𑁪𑁭.

‘‘𑀅𑀫𑁆𑀩𑀸 𑀲𑀸𑀮𑀸 𑀘 𑀢𑀺𑀮𑀓𑀸, 𑀧𑀸𑀝𑀮𑀻 𑀲𑀺𑀦𑁆𑀤𑀼𑀯𑀸𑀭𑀓𑀸 [𑀲𑀺𑀦𑁆𑀤𑀼𑀯𑀸𑀭𑀺𑀓𑀸 (𑀩𑀳𑀽𑀲𑀼)];

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁪𑁮.

‘‘𑀘𑀫𑁆𑀧𑀓𑀸 𑀲𑀴𑀮𑀸 𑀦𑀻𑀧𑀸 [𑀦𑀺𑀫𑁆𑀩𑀸 (𑀓.)], 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁪𑁯.

‘‘𑀅𑀢𑀺𑀫𑀼𑀢𑁆𑀢𑀸 ¶ 𑀅𑀲𑁄𑀓𑀸 𑀘, 𑀪𑀕𑀺𑀦𑀻𑀫𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀅𑀗𑁆𑀓𑁄𑀮𑀸 𑀩𑀺𑀫𑁆𑀩𑀺𑀚𑀸𑀮𑀸 [𑀩𑀺𑀫𑁆𑀩𑀚𑀸𑀮𑀸 (𑀓.)] 𑀘, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁫𑁦.

‘‘𑀓𑁂𑀢𑀓𑀸 ¶ 𑀓𑀦𑁆𑀤𑀮𑀺 [𑀓𑀤𑀮𑀻 (𑀲𑁆𑀬𑀸.)] 𑀘𑁂𑀯, 𑀕𑁄𑀥𑀼𑀓𑀸 𑀢𑀺𑀡𑀲𑀽𑀮𑀺𑀓𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁧.

‘‘𑀓𑀡𑀺𑀓𑀸𑀭𑀸 ¶ 𑀓𑀡𑁆𑀡𑀺𑀓𑀸 𑀘, 𑀅𑀲𑀦𑀸 𑀅𑀚𑁆𑀚𑀼𑀦𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁨.

‘‘𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀓𑁄𑀯𑀺𑀴𑀸𑀭𑀸 𑀘 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁩.

‘‘𑀉𑀤𑁆𑀥𑀸𑀮𑀓𑀸 𑀘 𑀓𑀼𑀝𑀚𑀸, 𑀓𑀤𑀫𑁆𑀩𑀸 𑀯𑀓𑀼𑀮𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁪.

‘‘𑀆𑀴𑀓𑀸 𑀇𑀲𑀺𑀫𑀼𑀕𑁆𑀕𑀸 𑀘, 𑀓𑀤𑀮𑀺𑀫𑀸𑀢𑀼𑀮𑀼𑀗𑁆𑀕𑀺𑀬𑁄;

𑀕𑀦𑁆𑀥𑁄𑀤𑀓𑁂𑀦 𑀲𑀁𑀯𑀟𑁆𑀠𑀸, 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀺 𑀢𑁂.

𑁧𑁫𑁫.

‘‘𑀅𑀜𑁆𑀜𑁂 𑀧𑀼𑀧𑁆𑀨𑀦𑁆𑀢𑀺 𑀧𑀤𑀼𑀫𑀸, 𑀅𑀜𑁆𑀜𑁂 𑀚𑀸𑀬𑀦𑁆𑀢𑀺 𑀓𑁂𑀲𑀭𑀻;

𑀅𑀜𑁆𑀜𑁂 𑀑𑀧𑀼𑀧𑁆𑀨𑀸 𑀧𑀤𑀼𑀫𑀸, 𑀧𑀼𑀧𑁆𑀨𑀺𑀢𑀸 𑀢𑀴𑀸𑀓𑁂 𑀢𑀤𑀸.

𑁧𑁫𑁬.

‘‘𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀧𑀤𑀼𑀫𑀸, 𑀦𑀺𑀤𑁆𑀥𑀸𑀯𑀦𑁆𑀢𑀺 𑀫𑀼𑀮𑀸𑀴𑀺𑀬𑁄;

𑀲𑀺𑀁𑀖𑀸𑀝𑀺𑀧𑀢𑁆𑀢𑀫𑀸𑀓𑀺𑀡𑁆𑀡𑀸, 𑀲𑁄𑀪𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸.

𑁧𑁫𑁭.

‘‘𑀦𑀬𑀺𑀢𑀸 𑀅𑀫𑁆𑀩𑀕𑀦𑁆𑀥𑀻 𑀘, 𑀉𑀢𑁆𑀢𑀮𑀻 𑀩𑀦𑁆𑀥𑀼𑀚𑀻𑀯𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀢𑀴𑀸𑀓𑁂 𑀢𑀤𑀸.

𑁧𑁫𑁮.

‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀲𑀁𑀕𑀼𑀮𑀸 𑀫𑀕𑁆𑀕𑀼𑀭𑀸 [𑀫𑀗𑁆𑀕𑀼𑀭𑀸 (𑀲𑀻. 𑀓.)] 𑀘𑁂𑀯, 𑀯𑀲𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸.

𑁧𑁫𑁯.

‘‘𑀓𑀼𑀫𑁆𑀪𑀻𑀮𑀸 ¶ ¶ 𑀲𑀼𑀲𑀼𑀫𑀸𑀭𑀸 𑀘, 𑀢𑀦𑁆𑀢𑀺𑀕𑀸𑀳𑀸 𑀘 𑀭𑀓𑁆𑀔𑀲𑀸;

𑀑𑀕𑀼𑀳𑀸 [𑀑𑀕𑀸𑀳𑀸 (𑀲𑁆𑀬𑀸.)] 𑀅𑀚𑀕𑀭𑀸 𑀘, 𑀯𑀲𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸.

𑁧𑁬𑁦.

‘‘𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀓𑁄𑀓𑀺𑀮𑀸 𑀲𑀼𑀓𑀲𑀸𑀴𑀺𑀓𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁧.

‘‘𑀓𑀼𑀓𑁆𑀓𑀼𑀢𑁆𑀣𑀓𑀸 𑀓𑀼𑀴𑀻𑀭𑀓𑀸, 𑀯𑀦𑁂 𑀧𑁄𑀓𑁆𑀔𑀭𑀲𑀸𑀢𑀓𑀸;

𑀤𑀺𑀦𑁆𑀤𑀺𑀪𑀸 𑀲𑀼𑀯𑀧𑁄𑀢𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁨.

‘‘𑀳𑀁𑀲𑀸 ¶ 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀓𑁄𑀓𑀺𑀮𑀸 𑀢𑀫𑁆𑀩𑀘𑀽𑀴𑀓𑀸 [𑀢𑀫𑁆𑀩𑀘𑀽𑀴𑀺𑀓𑀸 (𑀲𑀻.)];

𑀧𑀫𑁆𑀧𑀓𑀸 𑀚𑀻𑀯𑀁𑀚𑀻𑀯𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁩.

‘‘𑀓𑁄𑀲𑀺𑀓𑀸 𑀧𑁄𑀝𑁆𑀞𑀲𑀻𑀲𑀸 𑀘, 𑀓𑀼𑀭𑀭𑀸 𑀲𑁂𑀦𑀓𑀸 𑀩𑀳𑀽;

𑀫𑀳𑀸𑀓𑀸𑀴𑀸 𑀘 𑀲𑀓𑀼𑀡𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁪.

‘‘𑀧𑀲𑀤𑀸 𑀘 𑀯𑀭𑀸𑀳𑀸 𑀘, 𑀘𑀫𑀭𑀸 𑀕𑀡𑁆𑀟𑀓𑀸 𑀩𑀳𑀽 [𑀯𑀓𑀸 𑀪𑁂𑀭𑀡𑁆𑀟𑀓𑀸 𑀩𑀳𑀽 (𑀲𑀻. 𑀲𑁆𑀬𑀸.)];

𑀭𑁄𑀳𑀺𑀘𑁆𑀘𑀸 𑀲𑀼𑀓𑀧𑁄𑀢𑀸 [𑀲𑀼𑀢𑁆𑀢𑀧𑁄𑀢𑀸 (𑀲𑁆𑀬𑀸.)] 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁫.

‘‘𑀲𑀻𑀳𑀩𑁆𑀬𑀕𑁆𑀖𑀸 ¶ 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀢𑀺𑀥𑀸 𑀧𑀪𑀺𑀦𑁆𑀦𑀫𑀸𑀢𑀗𑁆𑀕𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁬.

‘‘𑀓𑀺𑀦𑁆𑀦𑀭𑀸 𑀯𑀸𑀦𑀭𑀸 𑀘𑁂𑀯, 𑀅𑀣𑁄𑀧𑀺 𑀯𑀦𑀓𑀫𑁆𑀫𑀺𑀓𑀸;

𑀘𑁂𑀢𑀸 𑀘 𑀮𑀼𑀤𑁆𑀤𑀓𑀸 𑀘𑁂𑀯, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁭.

‘‘𑀢𑀺𑀦𑁆𑀤𑀼𑀓𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀫𑀥𑀼𑀓𑀸 𑀓𑀸𑀲𑀼𑀫𑀸𑀭𑀬𑁄 [𑀓𑀸𑀲𑀫𑀸𑀭𑀺𑀬𑁄 (𑀲𑁆𑀬𑀸.)];

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁧𑁬𑁮.

‘‘𑀓𑁄𑀲𑀫𑁆𑀩𑀸 [𑀓𑁄𑀲𑀼𑀫𑁆𑀪𑀸 (𑀲𑀻. 𑀲𑁆𑀬𑀸.)] 𑀲𑀴𑀮𑀸 𑀦𑀺𑀫𑁆𑀩𑀸 [𑀲𑀴𑀮𑀸 𑀦𑀻𑀧𑀸 (𑀲𑀻. 𑀲𑁆𑀬𑀸.) 𑀧𑀦𑀲𑀸 𑀅𑀫𑁆𑀩𑀸 (?)], 𑀲𑀸𑀤𑀼𑀨𑀮𑀲𑀫𑀸𑀬𑀼𑀢𑀸;

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁧𑁬𑁯.

‘‘𑀳𑀭𑀻𑀢𑀓𑀸 ¶ 𑀆𑀫𑀮𑀓𑀸, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀸;

𑀓𑁄𑀮𑀸 𑀪𑀮𑁆𑀮𑀸𑀢𑀓𑀸 𑀩𑀺𑀮𑁆𑀮𑀸, 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀺 𑀢𑁂.

𑁧𑁭𑁦.

‘‘𑀆𑀮𑀼𑀯𑀸 𑀘 𑀓𑀴𑀫𑁆𑀩𑀸 𑀘, 𑀩𑀺𑀴𑀸𑀮𑀻𑀢𑀓𑁆𑀓𑀴𑀸𑀦𑀺 𑀘;

𑀚𑀻𑀯𑀓𑀸 𑀲𑀼𑀢𑀓𑀸 𑀘𑁂𑀯, 𑀩𑀳𑀼𑀓𑀸 𑀫𑀫 𑀅𑀲𑁆𑀲𑀫𑁂.

𑁧𑁭𑁧.

‘‘𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺, 𑀢𑀴𑀸𑀓𑀸𑀲𑀼𑀁 𑀲𑀼𑀦𑀺𑀫𑁆𑀫𑀺𑀢𑀸;

𑀅𑀘𑁆𑀙𑁄𑀤𑀓𑀸 𑀲𑀻𑀢𑀚𑀮𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸.

𑁧𑁭𑁨.

‘‘𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸 ¶ , 𑀧𑀼𑀡𑁆𑀟𑀭𑀻𑀓𑀲𑀫𑀸𑀬𑀼𑀢𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀤𑀺𑀩𑁆𑀩𑀕𑀦𑁆𑀥𑁄 𑀧𑀯𑀸𑀬𑀢𑀺.

𑁧𑁭𑁩.

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁂, 𑀧𑀼𑀧𑁆𑀨𑀺𑀢𑁂 𑀨𑀮𑀺𑀢𑁂 𑀯𑀦𑁂;

𑀲𑀼𑀓𑀢𑁂 𑀅𑀲𑁆𑀲𑀫𑁂 𑀭𑀫𑁆𑀫𑁂, 𑀯𑀺𑀳𑀭𑀸𑀫𑀺 𑀅𑀳𑀁 𑀢𑀤𑀸.

𑁧𑁭𑁪.

‘‘𑀲𑀻𑀮𑀯𑀸 𑀯𑀢𑀲𑀫𑁆𑀧𑀦𑁆𑀦𑁄 [𑀯𑀢𑁆𑀢𑀲𑀫𑁆𑀧𑀦𑁆𑀦𑁄 (𑀲𑁆𑀬𑀸.)], 𑀛𑀸𑀬𑀻 𑀛𑀸𑀦𑀭𑀢𑁄 𑀲𑀤𑀸;

𑀧𑀜𑁆𑀘𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀲𑀼𑀭𑀼𑀘𑀺 𑀦𑀸𑀫 𑀢𑀸𑀧𑀲𑁄.

𑁧𑁭𑁫.

‘‘𑀘𑀢𑀼𑀯𑀻𑀲𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀼;

𑀲𑀩𑁆𑀩𑁂𑀯 𑀩𑁆𑀭𑀸𑀳𑁆𑀫𑀡𑀸 𑀏𑀢𑁂, 𑀚𑀸𑀢𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄.

𑁧𑁭𑁬.

‘‘𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀦𑀺𑀖𑀡𑁆𑀝𑀼𑀲𑀓𑁂𑀝𑀼𑀪𑁂;

𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑀸.

𑁧𑁭𑁭.

‘‘𑀉𑀧𑁆𑀧𑀸𑀢𑁂𑀲𑀼 ¶ 𑀦𑀺𑀫𑀺𑀢𑁆𑀢𑁂𑀲𑀼, 𑀮𑀓𑁆𑀔𑀡𑁂𑀲𑀼 𑀘 𑀓𑁄𑀯𑀺𑀤𑀸;

𑀧𑀣𑀩𑁆𑀬𑀸 𑀪𑀽𑀫𑀦𑁆𑀢𑀮𑀺𑀓𑁆𑀔𑁂, 𑀫𑀫 𑀲𑀺𑀲𑁆𑀲𑀸 𑀲𑀼𑀲𑀺𑀓𑁆𑀔𑀺𑀢𑀸.

𑁧𑁭𑁮.

‘‘𑀅𑀧𑁆𑀧𑀺𑀘𑁆𑀙𑀸 𑀦𑀺𑀧𑀓𑀸 𑀏𑀢𑁂, 𑀅𑀧𑁆𑀧𑀸𑀳𑀸𑀭𑀸 𑀅𑀮𑁄𑀮𑀼𑀧𑀸;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁭𑁯.

‘‘𑀛𑀸𑀬𑀻 ¶ ¶ 𑀛𑀸𑀦𑀭𑀢𑀸 𑀥𑀻𑀭𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀆𑀓𑀺𑀜𑁆𑀘𑀜𑁆𑀜𑀁 𑀧𑀢𑁆𑀣𑀬𑀦𑁆𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁮𑁦.

‘‘𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑀸;

𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀥𑀻𑀭𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁮𑁧.

‘‘𑀲𑀁𑀯𑀼𑀢𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼, 𑀅𑀦𑁂𑀚𑀸 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑀸;

𑀅𑀲𑀁𑀲𑀝𑁆𑀞𑀸 𑀘 𑀢𑁂 𑀥𑀻𑀭𑀸, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁨.

‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀚𑁆𑀚𑀸𑀬, 𑀞𑀸𑀦𑀘𑀗𑁆𑀓𑀫𑀦𑁂𑀦 𑀘;

𑀯𑀻𑀢𑀺𑀦𑀸𑀫𑁂𑀦𑁆𑀢𑀺 𑀢𑁂 𑀭𑀢𑁆𑀢𑀺𑀁, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁩.

‘‘𑀭𑀚𑀦𑀻𑀬𑁂 𑀦 𑀭𑀚𑁆𑀚𑀦𑁆𑀢𑀺, 𑀤𑀼𑀲𑁆𑀲𑀦𑀻𑀬𑁂 𑀦 𑀤𑀼𑀲𑁆𑀲𑀭𑁂;

𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀦𑁆𑀢𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁪.

‘‘𑀇𑀤𑁆𑀥𑀺𑀁 𑀯𑀻𑀫𑀁𑀲𑀫𑀸𑀦𑀸 𑀢𑁂, 𑀯𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀺𑀓𑀁;

𑀧𑀣𑀯𑀺𑀁 [𑀧𑀞𑀯𑀺𑀁 (𑀲𑀻. 𑀲𑁆𑀬𑀸.)] 𑀢𑁂 𑀧𑀓𑀫𑁆𑀧𑁂𑀦𑁆𑀢𑀺, 𑀲𑀸𑀭𑀫𑁆𑀪𑁂𑀦 𑀤𑀼𑀭𑀸𑀲𑀤𑀸.

𑁧𑁮𑁫.

‘‘𑀓𑀻𑀴𑀫𑀸𑀦𑀸 𑀘 𑀢𑁂 𑀲𑀺𑀲𑁆𑀲𑀸, 𑀓𑀻𑀴𑀦𑁆𑀢𑀺 𑀛𑀸𑀦𑀓𑀻𑀴𑀺𑀢𑀁;

𑀚𑀫𑁆𑀩𑀼𑀢𑁄 𑀨𑀮𑀫𑀸𑀦𑁂𑀦𑁆𑀢𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁬.

‘‘𑀅𑀜𑁆𑀜𑁂 ¶ 𑀕𑀘𑁆𑀙𑀦𑁆𑀢𑀺 𑀕𑁄𑀬𑀸𑀦𑀁, 𑀅𑀜𑁆𑀜𑁂 𑀧𑀼𑀩𑁆𑀩𑀯𑀺𑀤𑁂𑀳𑀓𑀁 [𑀧𑀼𑀩𑁆𑀩𑀯𑀺𑀤𑁂𑀳𑀦𑀁 (𑀲𑁆𑀬𑀸. 𑀓.)];

𑀅𑀜𑁆𑀜𑁂 𑀘 𑀉𑀢𑁆𑀢𑀭𑀓𑀼𑀭𑀼𑀁, 𑀏𑀲𑀦𑀸𑀬 𑀤𑀼𑀭𑀸𑀲𑀤𑀸.

𑁧𑁮𑁭.

‘‘𑀧𑀼𑀭𑀢𑁄 𑀧𑁂𑀲𑁂𑀦𑁆𑀢𑀺 𑀔𑀸𑀭𑀺𑀁, 𑀧𑀘𑁆𑀙𑀢𑁄 𑀘 𑀯𑀚𑀦𑁆𑀢𑀺 𑀢𑁂;

𑀘𑀢𑀼𑀯𑀻𑀲𑀲𑀳𑀲𑁆𑀲𑁂𑀳𑀺, 𑀙𑀸𑀤𑀺𑀢𑀁 𑀳𑁄𑀢𑀺 𑀅𑀫𑁆𑀩𑀭𑀁.

𑁧𑁮𑁮.

‘‘𑀅𑀕𑁆𑀕𑀺𑀧𑀸𑀓𑀻 𑀅𑀦𑀕𑁆𑀕𑀻 𑀘, 𑀤𑀦𑁆𑀢𑁄𑀤𑀼𑀓𑁆𑀔𑀮𑀺𑀓𑀸𑀧𑀺 𑀘;

𑀅𑀲𑁆𑀫𑁂𑀦 𑀓𑁄𑀝𑁆𑀝𑀺𑀢𑀸 𑀓𑁂𑀘𑀺, 𑀧𑀯𑀢𑁆𑀢𑀨𑀮𑀪𑁄𑀚𑀦𑀸.

𑁧𑁮𑁯.

‘‘𑀉𑀤𑀓𑁄𑀭𑁄𑀳𑀡𑀸 ¶ 𑀓𑁂𑀘𑀺, 𑀲𑀸𑀬𑀁 𑀧𑀸𑀢𑁄 𑀲𑀼𑀘𑀻𑀭𑀢𑀸;

𑀢𑁄𑀬𑀸𑀪𑀺𑀲𑁂𑀘𑀦𑀓𑀭𑀸, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁯𑁦.

‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀕𑀦𑁆𑀥𑀺𑀢𑀸 𑀲𑀻𑀮𑀕𑀦𑁆𑀥𑁂𑀦, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁯𑁧.

‘‘𑀧𑀸𑀢𑁄𑀯 ¶ 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, 𑀚𑀝𑀺𑀮𑀸 𑀉𑀕𑁆𑀕𑀢𑀸𑀧𑀦𑀸;

𑀮𑀸𑀪𑀸𑀮𑀸𑀪𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀕𑀘𑁆𑀙𑀦𑁆𑀢𑀺 𑀅𑀫𑁆𑀩𑀭𑁂 𑀢𑀤𑀸.

𑁧𑁯𑁨.

‘‘𑀏𑀢𑁂𑀲𑀁 𑀧𑀓𑁆𑀓𑀫𑀦𑁆𑀢𑀸𑀦𑀁, 𑀫𑀳𑀸𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀅𑀚𑀺𑀦𑀘𑀫𑁆𑀫𑀲𑀤𑁆𑀤𑁂𑀦, 𑀫𑀼𑀤𑀺𑀢𑀸 𑀳𑁄𑀦𑁆𑀢𑀺 𑀤𑁂𑀯𑀢𑀸.

𑁧𑁯𑁩.

‘‘𑀤𑀺𑀲𑁄𑀤𑀺𑀲𑀁 ¶ 𑀧𑀓𑁆𑀓𑀫𑀦𑁆𑀢𑀺, 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀇𑀲𑀻;

𑀲𑀓𑁂 𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑀸, 𑀢𑁂 𑀕𑀘𑁆𑀙𑀦𑁆𑀢𑀺 𑀬𑀤𑀺𑀘𑁆𑀙𑀓𑀁.

𑁧𑁯𑁪.

‘‘𑀧𑀣𑀯𑀻𑀓𑀫𑁆𑀧𑀓𑀸 𑀏𑀢𑁂, 𑀲𑀩𑁆𑀩𑁂𑀯 𑀦𑀪𑀘𑀸𑀭𑀺𑀦𑁄;

𑀉𑀕𑁆𑀕𑀢𑁂𑀚𑀸 𑀤𑀼𑀧𑁆𑀧𑀲𑀳𑀸, 𑀲𑀸𑀕𑀭𑁄𑀯 𑀅𑀔𑁄𑀪𑀺𑀬𑀸.

𑁧𑁯𑁫.

‘‘𑀞𑀸𑀦𑀘𑀗𑁆𑀓𑀫𑀺𑀦𑁄 𑀓𑁂𑀘𑀺, 𑀓𑁂𑀘𑀺 𑀦𑁂𑀲𑀚𑁆𑀚𑀺𑀓𑀸 𑀇𑀲𑀻;

𑀧𑀯𑀢𑁆𑀢𑀪𑁄𑀚𑀦𑀸 𑀓𑁂𑀘𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁯𑁬.

‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀏𑀢𑁂, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀲𑀩𑁆𑀩𑁂, 𑀦 𑀢𑁂 𑀯𑀫𑁆𑀪𑁂𑀦𑁆𑀢𑀺 𑀓𑀲𑁆𑀲𑀘𑀺.

𑁧𑁯𑁭.

‘‘𑀲𑀻𑀳𑀭𑀸𑀚𑀸𑀯𑀲𑀫𑁆𑀪𑀻𑀢𑀸, 𑀕𑀚𑀭𑀸𑀚𑀸𑀯 𑀣𑀸𑀫𑀯𑀸;

𑀤𑀼𑀭𑀸𑀲𑀤𑀸 𑀩𑁆𑀬𑀕𑁆𑀖𑀸𑀭𑀺𑀯, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀦𑁆𑀢𑀺𑀓𑁂.

𑁧𑁯𑁮.

‘‘𑀯𑀺𑀚𑁆𑀚𑀸𑀥𑀭𑀸 𑀤𑁂𑀯𑀢𑀸 𑀘, 𑀦𑀸𑀕𑀕𑀦𑁆𑀥𑀩𑁆𑀩𑀭𑀓𑁆𑀔𑀲𑀸;

𑀓𑀼𑀫𑁆𑀪𑀡𑁆𑀟𑀸 𑀤𑀸𑀦𑀯𑀸 𑀕𑀭𑀼𑀴𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁯𑁯.

‘‘𑀢𑁂 ¶ ¶ 𑀚𑀝𑀸𑀔𑀸𑀭𑀺𑀪𑀭𑀺𑀢𑀸, 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑀸;

𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀩𑁆𑀩𑁂, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁨𑁦𑁦.

‘‘𑀲𑀤𑀸𑀦𑀼𑀘𑁆𑀙𑀯𑀺𑀓𑀸 [𑀢𑀤𑀸𑀦𑀼𑀘𑁆𑀙𑀯𑀺𑀓𑀸 (𑀲𑁆𑀬𑀸. 𑀓.)] 𑀏𑀢𑁂, 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸;

𑀘𑀢𑀼𑀩𑁆𑀩𑀻𑀲𑀲𑀳𑀲𑁆𑀲𑀸𑀦𑀁, 𑀔𑀺𑀧𑀺𑀢𑀲𑀤𑁆𑀤𑁄 𑀦 𑀯𑀺𑀚𑁆𑀚𑀢𑀺.

𑁨𑁦𑁧.

‘‘𑀧𑀸𑀤𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑀸, 𑀅𑀧𑁆𑀧𑀲𑀤𑁆𑀤𑀸 𑀲𑀼𑀲𑀁𑀯𑀼𑀢𑀸;

𑀉𑀧𑀲𑀗𑁆𑀓𑀫𑁆𑀫 𑀲𑀩𑁆𑀩𑁂𑀯 [𑀲𑀩𑁆𑀩𑁂 𑀢𑁂 (𑀲𑁆𑀬𑀸.)], 𑀲𑀺𑀭𑀲𑀸 𑀯𑀦𑁆𑀤𑀭𑁂 𑀫𑀫𑀁.

𑁨𑁦𑁨.

‘‘𑀢𑁂𑀳𑀺 𑀲𑀺𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄, 𑀲𑀦𑁆𑀢𑁂𑀳𑀺 𑀘 𑀢𑀧𑀲𑁆𑀲𑀺𑀪𑀺;

𑀯𑀲𑀸𑀫𑀺 𑀅𑀲𑁆𑀲𑀫𑁂 𑀢𑀢𑁆𑀣, 𑀛𑀸𑀬𑀻 𑀛𑀸𑀦𑀭𑀢𑁄 𑀅𑀳𑀁.

𑁨𑁦𑁩.

‘‘𑀇𑀲𑀻𑀦𑀁 𑀲𑀻𑀮𑀕𑀦𑁆𑀥𑁂𑀦, 𑀧𑀼𑀧𑁆𑀨𑀕𑀦𑁆𑀥𑁂𑀦 𑀘𑀽𑀪𑀬𑀁;

𑀨𑀮𑀻𑀦𑀁 𑀨𑀮𑀕𑀦𑁆𑀥𑁂𑀦, 𑀕𑀦𑁆𑀥𑀺𑀢𑁄 𑀳𑁄𑀢𑀺 𑀅𑀲𑁆𑀲𑀫𑁄.

𑁨𑁦𑁪.

‘‘𑀭𑀢𑁆𑀢𑀺𑀦𑁆𑀤𑀺𑀯𑀁 𑀦 𑀚𑀸𑀦𑀸𑀫𑀺, 𑀅𑀭𑀢𑀺 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀓𑁂 𑀲𑀺𑀲𑁆𑀲𑁂 𑀑𑀯𑀤𑀦𑁆𑀢𑁄, 𑀪𑀺𑀬𑁆𑀬𑁄 𑀳𑀸𑀲𑀁 𑀮𑀪𑀸𑀫𑀳𑀁.

𑁨𑁦𑁫.

‘‘𑀧𑀼𑀧𑁆𑀨𑀸𑀦𑀁 𑀧𑀼𑀧𑁆𑀨𑀫𑀸𑀦𑀸𑀦𑀁, 𑀨𑀮𑀸𑀦𑀜𑁆𑀘 𑀯𑀺𑀧𑀘𑁆𑀘𑀢𑀁;

𑀤𑀺𑀩𑁆𑀩𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁨𑁦𑁬.

‘‘𑀲𑀫𑀸𑀥𑀺𑀫𑁆𑀳𑀸 ¶ 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀆𑀢𑀸𑀧𑀻 𑀦𑀺𑀧𑀓𑁄 𑀅𑀳𑀁;

𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀯𑀦𑀁 𑀅𑀚𑁆𑀛𑁄𑀕𑀳𑀺𑀁 𑀅𑀳𑀁.

𑁨𑁦𑁭.

‘‘𑀉𑀧𑁆𑀧𑀸𑀢𑁂 ¶ 𑀲𑀼𑀧𑀺𑀦𑁂 𑀘𑀸𑀧𑀺, 𑀮𑀓𑁆𑀔𑀡𑁂𑀲𑀼 𑀲𑀼𑀲𑀺𑀓𑁆𑀔𑀺𑀢𑁄;

𑀧𑀯𑀢𑁆𑀢𑀫𑀸𑀦𑀁 [𑀯𑀢𑁆𑀢𑀫𑀸𑀦𑀁 (𑀓.)] 𑀫𑀦𑁆𑀢𑀧𑀤𑀁, 𑀥𑀸𑀭𑀬𑀸𑀫𑀺 𑀅𑀳𑀁 𑀢𑀤𑀸.

𑁨𑁦𑁮.

‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺.

𑁨𑁦𑁯.

‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 ¶ 𑀳𑀺𑀫𑀯𑀦𑁆𑀢𑀁, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁨𑁧𑁦.

‘‘𑀢𑀫𑀤𑁆𑀤𑀲𑀸𑀳𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀧𑁆𑀧𑀪𑀸𑀲𑀁 𑀫𑀦𑁄𑀭𑀫𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁨𑁧𑁧.

‘‘𑀚𑀮𑀦𑁆𑀢𑀁 𑀤𑀻𑀧𑀭𑀼𑀓𑁆𑀔𑀁𑀯, 𑀯𑀺𑀚𑁆𑀚𑀼𑀢𑀁 𑀕𑀕𑀡𑁂 𑀬𑀣𑀸;

𑀲𑀼𑀨𑀼𑀮𑁆𑀮𑀁 𑀲𑀸𑀮𑀭𑀸𑀚𑀁𑀯, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁨𑁧𑁨.

‘‘𑀅𑀬𑀁 ¶ 𑀦𑀸𑀕𑁄 𑀫𑀳𑀸𑀯𑀻𑀭𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀫𑀼𑀦𑀺;

𑀇𑀫𑀁 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀭𑁂.

𑁨𑁧𑁩.

‘‘𑀤𑀺𑀲𑁆𑀯𑀸𑀦𑀸𑀳𑀁 𑀤𑁂𑀯𑀤𑁂𑀯𑀁, 𑀮𑀓𑁆𑀔𑀡𑀁 𑀉𑀧𑀥𑀸𑀭𑀬𑀺𑀁;

𑀩𑀼𑀤𑁆𑀥𑁄 𑀦𑀼 𑀔𑁄 𑀦 𑀯𑀸 𑀩𑀼𑀤𑁆𑀥𑁄, 𑀳𑀦𑁆𑀤 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀫𑀁.

𑁨𑁧𑁪.

‘‘𑀲𑀳𑀲𑁆𑀲𑀸𑀭𑀸𑀦𑀺 𑀘𑀓𑁆𑀓𑀸𑀦𑀺, 𑀤𑀺𑀲𑁆𑀲𑀦𑁆𑀢𑀺 𑀘𑀭𑀡𑀼𑀢𑁆𑀢𑀫𑁂;

𑀮𑀓𑁆𑀔𑀡𑀸𑀦𑀺𑀲𑁆𑀲 𑀤𑀺𑀲𑁆𑀯𑀸𑀦, 𑀦𑀺𑀝𑁆𑀞𑀁 𑀕𑀘𑁆𑀙𑀺𑀁 𑀢𑀣𑀸𑀕𑀢𑁂.

𑁨𑁧𑁫.

‘‘𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸𑀦, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦𑀳𑀁 𑀢𑀤𑀸;

𑀅𑀣 𑀧𑀼𑀧𑁆𑀨𑁂 𑀲𑀫𑀸𑀦𑁂𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀧𑀽𑀚𑀬𑀺𑀁.

𑁨𑁧𑁬.

‘‘𑀧𑀽𑀚𑀬𑀺𑀢𑁆𑀯𑀸𑀦 𑀢𑀁 𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀦𑀫𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁨𑁧𑁭.

‘‘𑀬𑁂𑀦 𑀜𑀸𑀡𑁂𑀦 𑀲𑀫𑁆𑀩𑀼𑀤𑁆𑀥𑁄, 𑀯𑀺𑀳𑀭𑀢𑀺 [𑀯𑀺𑀳𑀭𑀺𑀢𑁆𑀣 (𑀲𑀻.), 𑀯𑀺𑀳𑀭𑁂𑀢𑀺 (𑀓.)] 𑀅𑀦𑀸𑀲𑀯𑁄;

𑀢𑀁 𑀜𑀸𑀡𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁨𑁧𑁮.

‘‘‘𑀲𑀫𑀼𑀤𑁆𑀥𑀭𑀲𑀺𑀫𑀁 [𑀲𑀫𑀼𑀤𑁆𑀥𑀭𑀬𑀺𑀫𑀁 (𑀲𑁆𑀬𑀸.)] 𑀮𑁄𑀓𑀁, 𑀲𑀬𑀫𑁆𑀪𑀽 𑀅𑀫𑀺𑀢𑁄𑀤𑀬;

𑀢𑀯 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀓𑀗𑁆𑀔𑀸𑀲𑁄𑀢𑀁 𑀢𑀭𑀦𑁆𑀢𑀺 𑀢𑁂.

𑁨𑁧𑁯.

‘‘‘𑀢𑀼𑀯𑀁 ¶ 𑀲𑀢𑁆𑀣𑀸 𑀘 𑀓𑁂𑀢𑀼 𑀘, 𑀥𑀚𑁄 𑀬𑀽𑀧𑁄 𑀘 𑀧𑀸𑀡𑀺𑀦𑀁;

𑀧𑀭𑀸𑀬𑀡𑁄 [𑀧𑀭𑀸𑀬𑀦𑁄 (𑀲𑁆𑀬𑀸. 𑀓.)] 𑀧𑀢𑀺𑀝𑁆𑀞𑀸 𑀘, 𑀤𑀻𑀧𑁄 𑀘 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑁨𑁨𑁦.

‘‘‘𑀲𑀓𑁆𑀓𑀸 𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀧𑀫𑁂𑀢𑀼𑀁 𑀆𑀴𑁆𑀳𑀓𑁂𑀦 𑀯𑀸;

𑀦 𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂.

𑁨𑁨𑁧.

‘‘‘𑀥𑀸𑀭𑁂𑀢𑀼𑀁 ¶ 𑀧𑀣𑀯𑀺𑀁 𑀲𑀓𑁆𑀓𑀸, 𑀞𑀧𑁂𑀢𑁆𑀯𑀸 𑀢𑀼𑀮𑀫𑀡𑁆𑀟𑀮𑁂;

𑀦 𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀥𑀭𑁂𑀢𑀯𑁂.

𑁨𑁨𑁨.

‘‘‘𑀆𑀓𑀸𑀲𑁄 ¶ 𑀫𑀺𑀦𑀺𑀢𑀼𑀁 𑀲𑀓𑁆𑀓𑀸, 𑀭𑀚𑁆𑀚𑀼𑀬𑀸 𑀅𑀗𑁆𑀕𑀼𑀮𑁂𑀦 𑀯𑀸;

𑀦 𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂.

𑁨𑁨𑁩.

‘‘‘𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀧𑀣𑀯𑀻 𑀘𑀸𑀔𑀺𑀮𑀸 𑀚𑀝𑀁 [𑀧𑀣𑀯𑀺𑀁 𑀘𑀸𑀔𑀺𑀮𑀜𑁆𑀚𑀳𑁂 (𑀲𑁆𑀬𑀸.)];

𑀩𑀼𑀤𑁆𑀥𑀜𑀸𑀡𑀁 𑀉𑀧𑀸𑀤𑀸𑀬, 𑀉𑀧𑀫𑀸𑀢𑁄 𑀦 𑀬𑀼𑀚𑁆𑀚𑀭𑁂.

𑁨𑁨𑁪.

‘‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀘𑀺𑀢𑁆𑀢𑀁 𑀬𑁂𑀲𑀁 𑀧𑀯𑀢𑁆𑀢𑀢𑀺;

𑀅𑀦𑁆𑀢𑁄𑀚𑀸𑀮𑀻𑀓𑀢𑀸 [𑀅𑀦𑁆𑀢𑁄𑀚𑀸𑀮𑀕𑀢𑀸 (𑀧𑀻.)] 𑀏𑀢𑁂, 𑀢𑀯 𑀜𑀸𑀡𑀫𑁆𑀳𑀺 𑀘𑀓𑁆𑀔𑀼𑀫.

𑁨𑁨𑁫.

‘‘‘𑀬𑁂𑀦 ¶ 𑀜𑀸𑀡𑁂𑀦 𑀧𑀢𑁆𑀢𑁄𑀲𑀺, 𑀓𑁂𑀯𑀮𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀢𑁂𑀦 𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀼, 𑀫𑀤𑁆𑀤𑀲𑀻 𑀧𑀭𑀢𑀺𑀢𑁆𑀣𑀺𑀬𑁂’.

𑁨𑁨𑁬.

‘‘𑀇𑀫𑀸 𑀕𑀸𑀣𑀸 𑀣𑀯𑀺𑀢𑁆𑀯𑀸𑀦, 𑀲𑀼𑀭𑀼𑀘𑀺 𑀦𑀸𑀫 𑀢𑀸𑀧𑀲𑁄;

𑀅𑀚𑀺𑀦𑀁 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀧𑀣𑀯𑀺𑀬𑀁 𑀦𑀺𑀲𑀻𑀤𑀺 𑀲𑁄.

𑁨𑁨𑁭.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑀢𑁄 𑀢𑀸𑀯𑀤𑁂𑀯, 𑀕𑀺𑀭𑀺𑀭𑀸𑀚𑀸 𑀧𑀯𑀼𑀘𑁆𑀘𑀢𑀺.

𑁨𑁨𑁮.

‘‘𑀢𑀸𑀯 𑀅𑀘𑁆𑀘𑀼𑀕𑁆𑀕𑀢𑁄 𑀦𑁂𑀭𑀼, 𑀆𑀬𑀢𑁄 𑀯𑀺𑀢𑁆𑀣𑀢𑁄 𑀘 𑀲𑁄;

𑀘𑀼𑀡𑁆𑀡𑀺𑀢𑁄 𑀅𑀡𑀼𑀪𑁂𑀤𑁂𑀦, 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁄 [𑀲𑀳𑀲𑁆𑀲𑀺𑀬𑁄 (𑀲𑁆𑀬𑀸. 𑀓.)].

𑁨𑁨𑁯.

‘‘𑀮𑀓𑁆𑀔𑁂 ¶ 𑀞𑀧𑀺𑀬𑀫𑀸𑀦𑀫𑁆𑀳𑀺, 𑀧𑀭𑀺𑀓𑁆𑀔𑀬𑀫𑀕𑀘𑁆𑀙𑀣;

𑀦 𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂.

𑁨𑁩𑁦.

‘‘𑀲𑀼𑀔𑀼𑀫𑀘𑁆𑀙𑀺𑀓𑁂𑀦 𑀚𑀸𑀮𑁂𑀦, 𑀉𑀤𑀓𑀁 𑀬𑁄 𑀧𑀭𑀺𑀓𑁆𑀔𑀺𑀧𑁂;

𑀬𑁂 𑀓𑁂𑀘𑀺 𑀉𑀤𑀓𑁂 𑀧𑀸𑀡𑀸, 𑀅𑀦𑁆𑀢𑁄𑀚𑀸𑀮𑀻𑀓𑀢𑀸 𑀲𑀺𑀬𑀼𑀁.

𑁨𑁩𑁧.

‘‘𑀢𑀣𑁂𑀯 𑀳𑀺 𑀫𑀳𑀸𑀯𑀻𑀭, 𑀬𑁂 𑀓𑁂𑀘𑀺 𑀧𑀼𑀣𑀼𑀢𑀺𑀢𑁆𑀣𑀺𑀬𑀸;

𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑀸 [𑀧𑀓𑁆𑀔𑀦𑁆𑀢𑀸 (𑀲𑀻. 𑀲𑁆𑀬𑀸.)], 𑀧𑀭𑀸𑀫𑀸𑀲𑁂𑀦 𑀫𑁄𑀳𑀺𑀢𑀸.

𑁨𑁩𑁨.

‘‘𑀢𑀯 𑀲𑀼𑀤𑁆𑀥𑁂𑀦 𑀜𑀸𑀡𑁂𑀦, 𑀅𑀦𑀸𑀯𑀭𑀡𑀤𑀲𑁆𑀲𑀺𑀦𑀸;

𑀅𑀦𑁆𑀢𑁄𑀚𑀸𑀮𑀻𑀓𑀢𑀸 𑀏𑀢𑁂, 𑀜𑀸𑀡𑀁 𑀢𑁂 𑀦𑀸𑀢𑀺𑀯𑀢𑁆𑀢𑀭𑁂.

𑁨𑁩𑁩.

‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀅𑀦𑁄𑀫𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀫𑁆𑀳𑀸, 𑀤𑀺𑀲𑀁 𑀑𑀮𑁄𑀓𑀬𑀻 𑀚𑀺𑀦𑁄.

𑁨𑁩𑁪.

‘‘𑀅𑀦𑁄𑀫𑀤𑀲𑁆𑀲𑀺𑀫𑀼𑀦𑀺𑀦𑁄, 𑀦𑀺𑀲𑀪𑁄 𑀦𑀸𑀫 𑀲𑀸𑀯𑀓𑁄;

𑀧𑀭𑀺𑀯𑀼𑀢𑁄 𑀲𑀢𑀲𑀳𑀲𑁆𑀲𑁂𑀳𑀺, 𑀲𑀦𑁆𑀢𑀘𑀺𑀢𑁆𑀢𑁂𑀳𑀺 𑀢𑀸𑀤𑀺𑀪𑀺.

𑁨𑁩𑁫.

‘‘𑀔𑀻𑀡𑀸𑀲𑀯𑁂𑀳𑀺 ¶ 𑀲𑀼𑀤𑁆𑀥𑁂𑀳𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀛𑀸𑀬𑀺𑀪𑀺;

𑀘𑀺𑀢𑁆𑀢𑀫𑀜𑁆𑀜𑀸𑀬 𑀩𑀼𑀤𑁆𑀥𑀲𑁆𑀲, 𑀉𑀧𑁂𑀲𑀺 𑀮𑁄𑀓𑀦𑀸𑀬𑀓𑀁.

𑁨𑁩𑁬.

‘‘𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑀸 𑀢𑀢𑁆𑀣, 𑀧𑀤𑀓𑁆𑀔𑀺𑀡𑀫𑀓𑀁𑀲𑀼 𑀢𑁂;

𑀦𑀫𑀲𑁆𑀲𑀦𑁆𑀢𑀸 𑀧𑀜𑁆𑀚𑀮𑀺𑀓𑀸, 𑀑𑀢𑀭𑀼𑀁 [𑀑𑀭𑀼𑀳𑀼𑀁 (𑀲𑁆𑀬𑀸.)] 𑀩𑀼𑀤𑁆𑀥𑀲𑀦𑁆𑀢𑀺𑀓𑁂.

𑁨𑁩𑁭.

‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀺𑀤𑀺𑀢𑁆𑀯𑀸, 𑀲𑀺𑀢𑀁 𑀧𑀸𑀢𑀼𑀓𑀭𑀻 𑀚𑀺𑀦𑁄.

𑁨𑁩𑁮.

‘‘𑀯𑀭𑀼𑀡𑁄 ¶ 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄;

𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀅𑀧𑀼𑀘𑁆𑀙𑀺 𑀮𑁄𑀓𑀦𑀸𑀬𑀓𑀁.

𑁨𑁩𑁯.

‘‘‘𑀓𑁄 ¶ ¶ 𑀦𑀼 𑀔𑁄 𑀪𑀕𑀯𑀸 𑀳𑁂𑀢𑀼, 𑀲𑀺𑀢𑀓𑀫𑁆𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀦 𑀳𑀺 𑀩𑀼𑀤𑁆𑀥𑀸 𑀅𑀳𑁂𑀢𑀽𑀳𑀺, 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀺 𑀢𑁂’.

𑁨𑁪𑁦.

‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀣.

𑁨𑁪𑁧.

‘‘‘𑀬𑁄 𑀫𑀁 𑀧𑀼𑀧𑁆𑀨𑁂𑀦 𑀧𑀽𑀚𑁂𑀲𑀺, 𑀜𑀸𑀡𑀜𑁆𑀘𑀸𑀧𑀺 𑀅𑀦𑀼𑀢𑁆𑀣𑀯𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁨𑁪𑁨.

‘‘‘𑀩𑀼𑀤𑁆𑀥𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀲𑀩𑁆𑀩𑁂 𑀤𑁂𑀯𑀸 𑀲𑀫𑀸𑀕𑀢𑀸;

𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀢𑁂, 𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀗𑁆𑀓𑀫𑀼𑀁.

𑁨𑁪𑁩.

‘‘‘𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼, 𑀤𑁂𑀯𑀓𑀸𑀬𑀸 𑀫𑀳𑀺𑀤𑁆𑀥𑀺𑀓𑀸;

𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀢𑁂, 𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀗𑁆𑀓𑀫𑀼𑀁.

𑁨𑁪𑁪.

‘‘‘𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻, 𑀲𑁂𑀦𑀸 𑀘 𑀘𑀢𑀼𑀭𑀗𑁆𑀕𑀺𑀦𑀻;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁪𑁫.

‘‘‘𑀲𑀝𑁆𑀞𑀺𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀪𑁂𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀉𑀧𑀝𑁆𑀞𑀺𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁪𑁬.

‘‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸.

𑁨𑁪𑁭.

‘‘‘𑀅𑀴𑀸𑀭𑀧𑀫𑁆𑀳𑀸 𑀳𑀲𑀼𑀮𑀸, 𑀲𑀼𑀲𑀜𑁆𑀜𑀸 𑀢𑀦𑀼𑀫𑀚𑁆𑀛𑀺𑀫𑀸;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁪𑁮.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺.

𑁨𑁪𑁯.

‘‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 ¶ ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁 [𑀅𑀲𑀗𑁆𑀔𑀬𑀁 (𑀲𑁆𑀬𑀸. 𑀓.) 𑀏𑀯𑀫𑀼𑀧𑀭𑀺𑀧𑀺].

𑁨𑁫𑁦.

‘‘‘𑀧𑀘𑁆𑀙𑀺𑀫𑁂 𑀪𑀯𑀲𑀫𑁆𑀧𑀢𑁆𑀢𑁂 [𑀧𑀘𑁆𑀙𑀺𑀫𑀪𑀯𑁂 𑀲𑀫𑁆𑀧𑀢𑁆𑀢𑁂 (𑀲𑀻.)], 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀩𑁆𑀭𑀸𑀳𑁆𑀫𑀡𑀻 𑀲𑀸𑀭𑀺𑀬𑀸 𑀦𑀸𑀫, 𑀥𑀸𑀭𑀬𑀺𑀲𑁆𑀲𑀢𑀺 𑀓𑀼𑀘𑁆𑀙𑀺𑀦𑀸.

𑁨𑁫𑁧.

‘‘‘𑀫𑀸𑀢𑀼𑀬𑀸 ¶ 𑀦𑀸𑀫𑀕𑁄𑀢𑁆𑀢𑁂𑀦, 𑀧𑀜𑁆𑀜𑀸𑀬𑀺𑀲𑁆𑀲𑀢𑀺𑀬𑀁 𑀦𑀭𑁄;

𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀯𑀺𑀲𑁆𑀲𑀢𑀺.

𑁨𑁫𑁨.

‘‘‘𑀅𑀲𑀻𑀢𑀺𑀓𑁄𑀝𑀻 𑀙𑀟𑁆𑀟𑁂𑀢𑁆𑀯𑀸, 𑀧𑀩𑁆𑀩𑀚𑀺𑀲𑁆𑀲𑀢𑀺𑀓𑀺𑀜𑁆𑀘𑀦𑁄;

𑀕𑀯𑁂𑀲𑀦𑁆𑀢𑁄 𑀲𑀦𑁆𑀢𑀺𑀧𑀤𑀁, 𑀘𑀭𑀺𑀲𑁆𑀲𑀢𑀺 𑀫𑀳𑀺𑀁 𑀇𑀫𑀁.

𑁨𑁫𑁩.

‘‘‘𑀅𑀧𑁆𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁫𑁪.

‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀅𑀕𑁆𑀕𑀲𑀸𑀯𑀓𑁄.

𑁨𑁫𑁫.

‘‘‘𑀅𑀬𑀁 ¶ 𑀪𑀸𑀕𑀻𑀭𑀣𑀻 [𑀪𑀸𑀕𑀻𑀭𑀲𑀻 (𑀲𑁆𑀬𑀸. 𑀓.)] 𑀕𑀗𑁆𑀕𑀸, 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸;

𑀫𑀳𑀸𑀲𑀫𑀼𑀤𑁆𑀤𑀫𑀧𑁆𑀧𑁂𑀢𑀺, 𑀢𑀧𑁆𑀧𑀬𑀦𑁆𑀢𑀻 𑀫𑀳𑁄𑀤𑀥𑀺𑀁 [𑀫𑀳𑁄𑀤𑀥𑀻 (?) 𑀕𑀗𑁆𑀕𑀸𑀤𑀺𑀫𑀳𑀸𑀦𑀤𑀺𑀬𑁄𑀢𑀺 𑀅𑀢𑁆𑀣𑁄].

𑁨𑁫𑁬.

‘‘‘𑀢𑀣𑁂𑀯𑀸𑀬𑀁 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀓𑁂 𑀢𑀻𑀲𑀼 𑀯𑀺𑀲𑀸𑀭𑀤𑁄;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀢𑀧𑁆𑀧𑀬𑀺𑀲𑁆𑀲𑀢𑀺 𑀧𑀸𑀡𑀺𑀦𑁂 [𑀧𑀸𑀡𑀺𑀦𑁄 (𑀲𑀻. 𑀲𑁆𑀬𑀸.)].

𑁨𑁫𑁭.

‘‘‘𑀳𑀺𑀫𑀯𑀦𑁆𑀢𑀫𑀼𑀧𑀸𑀤𑀸𑀬, 𑀲𑀸𑀕𑀭𑀜𑁆𑀘 𑀫𑀳𑁄𑀤𑀥𑀺𑀁;

𑀏𑀢𑁆𑀣𑀦𑁆𑀢𑀭𑁂 𑀬𑀁 𑀧𑀼𑀮𑀺𑀦𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁨𑁫𑁮.

‘‘‘𑀢𑀫𑁆𑀧𑀺 𑀲𑀓𑁆𑀓𑀸 𑀅𑀲𑁂𑀲𑁂𑀦, 𑀲𑀗𑁆𑀔𑀸𑀢𑀼𑀁 𑀕𑀡𑀦𑀸 𑀬𑀣𑀸;

𑀦 𑀢𑁆𑀯𑁂𑀯 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀧𑀜𑁆𑀜𑀸𑀬𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

𑁨𑁫𑁯.

‘‘‘𑀮𑀓𑁆𑀔𑁂 ¶ 𑀞𑀧𑀺𑀬𑀫𑀸𑀦𑀫𑁆𑀳𑀺, 𑀔𑀻𑀬𑁂 𑀕𑀗𑁆𑀕𑀸𑀬 𑀯𑀸𑀮𑀼𑀓𑀸;

𑀦 𑀢𑁆𑀯𑁂𑀯 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀧𑀜𑁆𑀜𑀸𑀬𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

𑁨𑁬𑁦.

‘‘‘𑀫𑀳𑀸𑀲𑀫𑀼𑀤𑁆𑀤𑁂 𑀊𑀫𑀺𑀬𑁄, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸;

𑀢𑀣𑁂𑀯 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀧𑀜𑁆𑀜𑀸𑀬𑀦𑁆𑀢𑁄 𑀦 𑀳𑁂𑀲𑁆𑀲𑀢𑀺.

𑁨𑁬𑁧.

‘‘‘𑀆𑀭𑀸𑀥𑀬𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀳𑁂𑀲𑁆𑀲𑀢𑀺 𑀅𑀕𑁆𑀕𑀲𑀸𑀯𑀓𑁄.

𑁨𑁬𑁨.

‘‘‘𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁, 𑀲𑀓𑁆𑀬𑀧𑀼𑀢𑁆𑀢𑁂𑀦 𑀢𑀸𑀤𑀺𑀦𑀸;

𑀅𑀦𑀼𑀯𑀢𑁆𑀢𑁂𑀲𑁆𑀲𑀢𑀺 𑀲𑀫𑁆𑀫𑀸, 𑀯𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀯𑀼𑀝𑁆𑀞𑀺𑀬𑁄.

𑁨𑁬𑁩.

‘‘‘𑀲𑀩𑁆𑀩𑀫𑁂𑀢𑀁 ¶ 𑀅𑀪𑀺𑀜𑁆𑀜𑀸𑀬, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺’.

𑁨𑁬𑁪.

‘‘𑀅𑀳𑁄 ¶ 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄;

𑀬𑀲𑁆𑀲𑀸𑀳𑀁 𑀓𑀸𑀭𑀁 [𑀬𑀲𑁆𑀲𑀸𑀥𑀺𑀓𑀸𑀭𑀁 (𑀲𑁆𑀬𑀸.)] 𑀓𑀢𑁆𑀯𑀸𑀦, 𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀢𑁄.

𑁨𑁬𑁫.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀅𑀳𑀁.

𑁨𑁬𑁬.

‘‘𑀅𑀲𑀗𑁆𑀔𑀢𑀁 𑀕𑀯𑁂𑀲𑀦𑁆𑀢𑁄, 𑀦𑀺𑀩𑁆𑀩𑀸𑀦𑀁 𑀅𑀘𑀮𑀁 𑀧𑀤𑀁;

𑀯𑀺𑀘𑀺𑀦𑀁 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀏𑀲𑀸𑀳𑀁 𑀲𑀁𑀲𑀭𑀺𑀁 𑀪𑀯𑁂.

𑁨𑁬𑁭.

‘‘𑀬𑀣𑀸𑀧𑀺 𑀩𑁆𑀬𑀸𑀥𑀺𑀢𑁄 𑀧𑁄𑀲𑁄, 𑀧𑀭𑀺𑀬𑁂𑀲𑁂𑀬𑁆𑀬 𑀑𑀲𑀥𑀁;

𑀯𑀺𑀘𑀺𑀦𑁂𑀬𑁆𑀬 𑀯𑀦𑀁 [𑀥𑀦𑀁 (𑀲𑁆𑀬𑀸. 𑀓.)] 𑀲𑀩𑁆𑀩𑀁, 𑀩𑁆𑀬𑀸𑀥𑀺𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸.

𑁨𑁬𑁮.

‘‘𑀅𑀲𑀗𑁆𑀔𑀢𑀁 𑀕𑀯𑁂𑀲𑀦𑁆𑀢𑁄, 𑀦𑀺𑀩𑁆𑀩𑀸𑀦𑀁 𑀅𑀫𑀢𑀁 𑀧𑀤𑀁;

𑀅𑀩𑁆𑀩𑁄𑀓𑀺𑀡𑁆𑀡𑀁 [𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 (𑀅𑀝𑁆𑀞.)] 𑀧𑀜𑁆𑀘𑀲𑀢𑀁, 𑀧𑀩𑁆𑀩𑀚𑀺𑀁 𑀇𑀲𑀺𑀧𑀩𑁆𑀩𑀚𑀁.

𑁨𑁬𑁯.

‘‘𑀚𑀝𑀸𑀪𑀸𑀭𑁂𑀦 ¶ 𑀪𑀭𑀺𑀢𑁄, 𑀅𑀚𑀺𑀦𑀼𑀢𑁆𑀢𑀭𑀦𑀺𑀯𑀸𑀲𑀦𑁄;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀁 𑀅𑀕𑀘𑁆𑀙𑀺𑀳𑀁.

𑁨𑁭𑁦.

‘‘𑀦𑀢𑁆𑀣𑀺 ¶ 𑀩𑀸𑀳𑀺𑀭𑀓𑁂 𑀲𑀼𑀤𑁆𑀥𑀺, 𑀞𑀧𑁂𑀢𑁆𑀯𑀸 𑀚𑀺𑀦𑀲𑀸𑀲𑀦𑀁;

𑀬𑁂 𑀓𑁂𑀘𑀺 𑀩𑀼𑀤𑁆𑀥𑀺𑀫𑀸 𑀲𑀢𑁆𑀢𑀸, 𑀲𑀼𑀚𑁆𑀛𑀦𑁆𑀢𑀺 𑀚𑀺𑀦𑀲𑀸𑀲𑀦𑁂.

𑁨𑁭𑁧.

‘‘𑀅𑀢𑁆𑀢𑀓𑀸𑀭𑀫𑀬𑀁 [𑀅𑀢𑁆𑀣𑀓𑀸𑀭𑀫𑀬𑀁 (𑀓.)] 𑀏𑀢𑀁, 𑀦𑀬𑀺𑀤𑀁 𑀇𑀢𑀺𑀳𑀻𑀢𑀺𑀳𑀁;

𑀅𑀲𑀗𑁆𑀔𑀢𑀁 𑀕𑀯𑁂𑀲𑀦𑁆𑀢𑁄, 𑀓𑀼𑀢𑀺𑀢𑁆𑀣𑁂 [𑀓𑀼𑀢𑀺𑀢𑁆𑀣𑀁 (𑀲𑀻. 𑀲𑁆𑀬𑀸.)] 𑀲𑀜𑁆𑀘𑀭𑀺𑀁 𑀅𑀳𑀁.

𑁨𑁭𑁨.

‘‘𑀬𑀣𑀸 𑀲𑀸𑀭𑀢𑁆𑀣𑀺𑀓𑁄 𑀧𑁄𑀲𑁄, 𑀓𑀤𑀮𑀺𑀁 𑀙𑁂𑀢𑁆𑀯𑀸𑀦 𑀨𑀸𑀮𑀬𑁂;

𑀦 𑀢𑀢𑁆𑀣 𑀲𑀸𑀭𑀁 𑀯𑀺𑀦𑁆𑀤𑁂𑀬𑁆𑀬, 𑀲𑀸𑀭𑁂𑀦 𑀭𑀺𑀢𑁆𑀢𑀓𑁄 𑀳𑀺 𑀲𑁄.

𑁨𑁭𑁩.

‘‘𑀢𑀣𑁂𑀯 𑀢𑀺𑀢𑁆𑀣𑀺𑀬𑀸 𑀮𑁄𑀓𑁂, 𑀦𑀸𑀦𑀸𑀤𑀺𑀝𑁆𑀞𑀻 𑀩𑀳𑀼𑀚𑁆𑀚𑀦𑀸;

𑀅𑀲𑀗𑁆𑀔𑀢𑁂𑀦 𑀭𑀺𑀢𑁆𑀢𑀸𑀲𑁂, 𑀲𑀸𑀭𑁂𑀦 𑀓𑀤𑀮𑀻 𑀬𑀣𑀸.

𑁨𑁭𑁪.

‘‘𑀧𑀘𑁆𑀙𑀺𑀫𑁂 𑀪𑀯𑀲𑀫𑁆𑀧𑀢𑁆𑀢𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀅𑀳𑁄𑀲𑀳𑀁;

𑀫𑀳𑀸𑀪𑁄𑀕𑀁 𑀙𑀟𑁆𑀟𑁂𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑀧𑀞𑀫𑀪𑀸𑀡𑀯𑀸𑀭𑀁.

𑁨𑁭𑁫.

‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀩𑁆𑀭𑀸𑀳𑁆𑀫𑀡𑁄 𑀲𑀜𑁆𑀘𑀬𑁄 [𑀲𑀜𑁆𑀚𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀫, 𑀢𑀲𑁆𑀲 𑀫𑀽𑀮𑁂 𑀯𑀲𑀸𑀫𑀳𑀁.

𑁨𑁭𑁬.

‘‘𑀲𑀸𑀯𑀓𑁄 ¶ 𑀢𑁂 𑀫𑀳𑀸𑀯𑀻𑀭, 𑀅𑀲𑁆𑀲𑀚𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀤𑀼𑀭𑀸𑀲𑀤𑁄 𑀉𑀕𑁆𑀕𑀢𑁂𑀚𑁄, 𑀧𑀺𑀡𑁆𑀟𑀸𑀬 𑀘𑀭𑀢𑀻 𑀢𑀤𑀸.

𑁨𑁭𑁭.

‘‘𑀢𑀫𑀤𑁆𑀤𑀲𑀸𑀲𑀺𑀁 ¶ 𑀲𑀧𑁆𑀧𑀜𑁆𑀜𑀁, 𑀫𑀼𑀦𑀺𑀁 𑀫𑁄𑀦𑁂 𑀲𑀫𑀸𑀳𑀺𑀢𑀁;

𑀲𑀦𑁆𑀢𑀘𑀺𑀢𑁆𑀢𑀁 𑀫𑀳𑀸𑀦𑀸𑀕𑀁, 𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀬𑀣𑀸.

𑁨𑁭𑁮.

‘‘𑀤𑀺𑀲𑁆𑀯𑀸 ¶ 𑀫𑁂 𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀺, 𑀲𑀼𑀤𑀦𑁆𑀢𑀁 𑀲𑀼𑀤𑁆𑀥𑀫𑀸𑀦𑀲𑀁;

𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀅𑀭𑀳𑀸𑀬𑀁 𑀪𑀯𑀺𑀲𑁆𑀲𑀢𑀺.

𑁨𑁭𑁯.

‘‘𑀧𑀸𑀲𑀸𑀤𑀺𑀓𑁄 𑀇𑀭𑀺𑀬𑀢𑀺, 𑀅𑀪𑀺𑀭𑀽𑀧𑁄 𑀲𑀼𑀲𑀁𑀯𑀼𑀢𑁄;

𑀉𑀢𑁆𑀢𑀫𑁂 𑀤𑀫𑀣𑁂 𑀤𑀦𑁆𑀢𑁄, 𑀅𑀫𑀢𑀤𑀲𑁆𑀲𑀻 𑀪𑀯𑀺𑀲𑁆𑀲𑀢𑀺.

𑁨𑁮𑁦.

‘‘𑀬𑀁𑀦𑀽𑀦𑀸𑀳𑀁 𑀉𑀢𑁆𑀢𑀫𑀢𑁆𑀣𑀁, 𑀧𑀼𑀘𑁆𑀙𑁂𑀬𑁆𑀬𑀁 𑀢𑀼𑀝𑁆𑀞𑀫𑀸𑀦𑀲𑀁;

𑀲𑁄 𑀫𑁂 𑀧𑀼𑀝𑁆𑀞𑁄 𑀓𑀣𑁂𑀲𑁆𑀲𑀢𑀺, 𑀧𑀝𑀺𑀧𑀼𑀘𑁆𑀙𑀸𑀫𑀳𑀁 𑀢𑀤𑀸.

𑁨𑁮𑁧.

‘‘𑀧𑀺𑀡𑁆𑀟𑀧𑀸𑀢𑀁 [𑀧𑀺𑀡𑁆𑀟𑀘𑀸𑀭𑀁 (𑀲𑁆𑀬𑀸.)] 𑀘𑀭𑀦𑁆𑀢𑀲𑁆𑀲, 𑀧𑀘𑁆𑀙𑀢𑁄 𑀅𑀕𑀫𑀸𑀲𑀳𑀁;

𑀑𑀓𑀸𑀲𑀁 𑀧𑀝𑀺𑀫𑀸𑀦𑁂𑀦𑁆𑀢𑁄, 𑀧𑀼𑀘𑁆𑀙𑀺𑀢𑀼𑀁 𑀅𑀫𑀢𑀁 𑀧𑀤𑀁.

𑁨𑁮𑁨.

‘‘𑀯𑀻𑀣𑀺𑀦𑁆𑀢𑀭𑁂 𑀅𑀦𑀼𑀧𑁆𑀧𑀢𑁆𑀢𑀁, 𑀉𑀧𑀕𑀦𑁆𑀢𑁆𑀯𑀸𑀦 𑀧𑀼𑀘𑁆𑀙𑀳𑀁;

‘𑀓𑀣𑀁 𑀕𑁄𑀢𑁆𑀢𑁄𑀲𑀺 𑀢𑁆𑀯𑀁 𑀯𑀻𑀭, 𑀓𑀲𑁆𑀲 𑀲𑀺𑀲𑁆𑀲𑁄𑀲𑀺 𑀫𑀸𑀭𑀺𑀲’.

𑁨𑁮𑁩.

‘‘𑀲𑁄 𑀫𑁂 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀅𑀲𑀫𑁆𑀪𑀻𑀢𑁄𑀯 𑀓𑁂𑀲𑀭𑀻;

‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀲𑀺𑀲𑁆𑀲𑁄𑀫𑁆𑀳𑀺 𑀆𑀯𑀼𑀲𑁄’.

𑁨𑁮𑁪.

‘‘‘𑀓𑀻𑀤𑀺𑀲𑀁 ¶ 𑀢𑁂 𑀫𑀳𑀸𑀯𑀻𑀭, 𑀅𑀦𑀼𑀚𑀸𑀢 𑀫𑀳𑀸𑀬𑀲;

𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁 𑀥𑀫𑁆𑀫𑀁, 𑀲𑀸𑀥𑀼 𑀫𑁂 𑀓𑀣𑀬𑀲𑁆𑀲𑀼 𑀪𑁄’.

𑁨𑁮𑁫.

‘‘𑀲𑁄 𑀫𑁂 𑀧𑀼𑀝𑁆𑀞𑁄 𑀓𑀣𑀻 𑀲𑀩𑁆𑀩𑀁, 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀧𑀤𑀁;

𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀳𑀦𑁆𑀢𑀸𑀭𑀁, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁.

𑁨𑁮𑁬.

‘‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸, 𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄 𑀆𑀳;

𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄, 𑀏𑀯𑀁 𑀯𑀸𑀤𑀻 𑀫𑀳𑀸𑀲𑀫𑀡𑁄’.

𑁨𑁮𑁭.

‘‘𑀲𑁄𑀳𑀁 𑀯𑀺𑀲𑁆𑀲𑀚𑁆𑀚𑀺𑀢𑁂 𑀧𑀜𑁆𑀳𑁂, 𑀧𑀞𑀫𑀁 𑀨𑀮𑀫𑀚𑁆𑀛𑀕𑀁;

𑀯𑀺𑀭𑀚𑁄 𑀯𑀺𑀫𑀮𑁄 𑀆𑀲𑀺𑀁, 𑀲𑀼𑀢𑁆𑀯𑀸𑀦 𑀚𑀺𑀦𑀲𑀸𑀲𑀦𑀁.

𑁨𑁮𑁮.

‘‘𑀲𑀼𑀢𑁆𑀯𑀸𑀦 ¶ 𑀫𑀼𑀦𑀺𑀦𑁄 𑀯𑀸𑀓𑁆𑀬𑀁, 𑀧𑀲𑁆𑀲𑀺𑀢𑁆𑀯𑀸 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀧𑀭𑀺𑀬𑁄𑀕𑀸𑀴𑁆𑀳𑀲𑀤𑁆𑀥𑀫𑁆𑀫𑁄, 𑀇𑀫𑀁 𑀕𑀸𑀣𑀫𑀪𑀸𑀲𑀳𑀁.

𑁨𑁮𑁯.

‘‘‘𑀏𑀲𑁂𑀯 ¶ 𑀥𑀫𑁆𑀫𑁄 𑀬𑀤𑀺 𑀢𑀸𑀯𑀤𑁂𑀯, 𑀧𑀘𑁆𑀘𑀩𑁆𑀬𑀣𑀧𑀤𑀫𑀲𑁄𑀓𑀁;

𑀅𑀤𑀺𑀝𑁆𑀞𑀁 𑀅𑀩𑁆𑀪𑀢𑀻𑀢𑀁, 𑀩𑀳𑀼𑀓𑁂𑀳𑀺 𑀓𑀧𑁆𑀧𑀦𑀳𑀼𑀢𑁂𑀳𑀺’.

𑁨𑁯𑁦.

‘‘𑀲𑁆𑀯𑀸𑀳𑀁 𑀥𑀫𑁆𑀫𑀁 𑀕𑀯𑁂𑀲𑀦𑁆𑀢𑁄, 𑀓𑀼𑀢𑀺𑀢𑁆𑀣𑁂 𑀲𑀜𑁆𑀘𑀭𑀺𑀁 𑀅𑀳𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀸𑀮𑁄 𑀫𑁂 𑀦𑀧𑁆𑀧𑀫𑀚𑁆𑀚𑀺𑀢𑀼𑀁.

𑁨𑁯𑁧.

‘‘𑀢𑁄𑀲𑀺𑀢𑁄𑀳𑀁 ¶ 𑀅𑀲𑁆𑀲𑀚𑀺𑀦𑀸, 𑀧𑀢𑁆𑀯𑀸𑀦 𑀅𑀘𑀮𑀁 𑀧𑀤𑀁;

𑀲𑀳𑀸𑀬𑀓𑀁 𑀕𑀯𑁂𑀲𑀦𑁆𑀢𑁄, 𑀅𑀲𑁆𑀲𑀫𑀁 𑀅𑀕𑀫𑀸𑀲𑀳𑀁.

𑁨𑁯𑁨.

‘‘𑀤𑀽𑀭𑀢𑁄𑀯 𑀫𑀫𑀁 𑀤𑀺𑀲𑁆𑀯𑀸, 𑀲𑀳𑀸𑀬𑁄 𑀫𑁂 𑀲𑀼𑀲𑀺𑀓𑁆𑀔𑀺𑀢𑁄;

𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 [𑀇𑀭𑀺𑀬𑀸𑀧𑀣𑀁 𑀫𑀫𑀁 𑀤𑀺𑀲𑁆𑀯𑀸 (𑀓.)], 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁨𑁯𑁩.

‘‘‘𑀧𑀲𑀦𑁆𑀦𑀫𑀼𑀔𑀦𑁂𑀢𑁆𑀢𑁄𑀲𑀺, 𑀫𑀼𑀦𑀺𑀪𑀸𑀯𑁄𑀯 𑀤𑀺𑀲𑁆𑀲𑀢𑀺;

𑀅𑀫𑀢𑀸𑀥𑀺𑀕𑀢𑁄 𑀓𑀘𑁆𑀘𑀺, 𑀦𑀺𑀩𑁆𑀩𑀸𑀦𑀫𑀘𑁆𑀘𑀼𑀢𑀁 𑀧𑀤𑀁.

𑁨𑁯𑁪.

‘‘‘𑀲𑀼𑀪𑀸𑀦𑀼𑀭𑀽𑀧𑁄 𑀆𑀬𑀸𑀲𑀺, 𑀆𑀦𑁂𑀜𑁆𑀚𑀓𑀸𑀭𑀺𑀢𑁄 𑀯𑀺𑀬;

𑀤𑀦𑁆𑀢𑁄𑀯 𑀤𑀦𑁆𑀢𑀤𑀫𑀣𑁄 [𑀤𑀦𑁆𑀢𑁄𑀯𑀼𑀢𑁆𑀢𑀫𑀤𑀫𑀣𑁄 (𑀲𑀻.) 𑀤𑀦𑁆𑀢𑁄𑀯 𑀤𑀦𑁆𑀢 𑀤𑀫𑀣𑁂 (𑀲𑁆𑀬𑀸.)], 𑀉𑀧𑀲𑀦𑁆𑀢𑁄𑀲𑀺 𑀩𑁆𑀭𑀸𑀳𑁆𑀫𑀡.

𑁨𑁯𑁫.

‘‘‘𑀅𑀫𑀢𑀁 𑀫𑀬𑀸𑀥𑀺𑀕𑀢𑀁, 𑀲𑁄𑀓𑀲𑀮𑁆𑀮𑀸𑀧𑀦𑀽𑀤𑀦𑀁;

𑀢𑁆𑀯𑀫𑁆𑀧𑀺 𑀢𑀁 𑀅𑀥𑀺𑀕𑀘𑁆𑀙𑁂𑀲𑀺 [𑀅𑀥𑀺𑀕𑀘𑁆𑀙𑀸𑀳𑀺 (𑀲𑀻.), 𑀅𑀥𑀺𑀕𑀘𑁆𑀙𑁂𑀳𑀺 (𑀲𑁆𑀬𑀸.), 𑀅𑀥𑀺𑀕𑀢𑁄𑀲𑀺 (?)], 𑀕𑀘𑁆𑀙𑀸𑀫 𑀩𑀼𑀤𑁆𑀥𑀲𑀦𑁆𑀢𑀺𑀓𑀁’.

𑁨𑁯𑁬.

‘‘𑀲𑀸𑀥𑀽𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀲𑀳𑀸𑀬𑁄 𑀫𑁂 𑀲𑀼𑀲𑀺𑀓𑁆𑀔𑀺𑀢𑁄;

𑀳𑀢𑁆𑀣𑁂𑀦 𑀳𑀢𑁆𑀣𑀁 𑀕𑀡𑁆𑀳𑀺𑀢𑁆𑀯𑀸, 𑀉𑀧𑀕𑀫𑁆𑀫 [𑀉𑀧𑀸𑀕𑀫𑀺 (𑀲𑀻.), 𑀉𑀧𑀸𑀕𑀫𑁆𑀫 (𑀲𑁆𑀬𑀸.)] 𑀢𑀯𑀦𑁆𑀢𑀺𑀓𑀁.

𑁨𑁯𑁭.

‘‘𑀉𑀪𑁄𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀲𑀓𑁆𑀬𑀧𑀼𑀢𑁆𑀢 𑀢𑀯𑀦𑁆𑀢𑀺𑀓𑁂;

𑀢𑀯 𑀲𑀸𑀲𑀦𑀫𑀸𑀕𑀫𑁆𑀫, 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

𑁨𑁯𑁮.

‘‘𑀓𑁄𑀮𑀺𑀢𑁄 ¶ 𑀇𑀤𑁆𑀥𑀺𑀬𑀸 𑀲𑁂𑀝𑁆𑀞𑁄, 𑀅𑀳𑀁 𑀧𑀜𑁆𑀜𑀸𑀬 𑀧𑀸𑀭𑀕𑁄;

𑀉𑀪𑁄𑀯 𑀏𑀓𑀢𑁄 𑀳𑀼𑀢𑁆𑀯𑀸, 𑀲𑀸𑀲𑀦𑀁 𑀲𑁄𑀪𑀬𑀸𑀫𑀲𑁂.

𑁨𑁯𑁯.

‘‘𑀅𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 ¶ , 𑀓𑀼𑀢𑀺𑀢𑁆𑀣𑁂 𑀲𑀜𑁆𑀘𑀭𑀺𑀁 𑀅𑀳𑀁;

𑀢𑀯 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀲𑀗𑁆𑀓𑀧𑁆𑀧𑁄 𑀧𑀽𑀭𑀺𑀢𑁄 𑀫𑀫.

𑁩𑁦𑁦.

‘‘𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬, 𑀧𑀼𑀧𑁆𑀨𑀦𑁆𑀢𑀺 𑀲𑀫𑀬𑁂 𑀤𑀼𑀫𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀢𑁄𑀲𑁂𑀦𑁆𑀢𑀺 𑀲𑀩𑁆𑀩𑀧𑀸𑀡𑀺𑀦𑀁.

𑁩𑁦𑁧.

‘‘𑀢𑀣𑁂𑀯𑀸𑀳𑀁 𑀫𑀳𑀸𑀯𑀻𑀭, 𑀲𑀓𑁆𑀬𑀧𑀼𑀢𑁆𑀢 𑀫𑀳𑀸𑀬𑀲;

𑀲𑀸𑀲𑀦𑁂 𑀢𑁂 𑀧𑀢𑀺𑀝𑁆𑀞𑀸𑀬, 𑀲𑀫𑀬𑁂𑀲𑀸𑀫𑀺 𑀧𑀼𑀧𑁆𑀨𑀺𑀢𑀼𑀁.

𑁩𑁦𑁨.

‘‘𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀁 ¶ 𑀏𑀲𑀦𑁆𑀢𑁄, 𑀪𑀯𑀲𑀁𑀲𑀸𑀭𑀫𑁄𑀘𑀦𑀁;

𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀮𑀸𑀪𑁂𑀦, 𑀢𑁄𑀲𑁂𑀫𑀺 𑀲𑀩𑁆𑀩𑀧𑀸𑀡𑀺𑀦𑀁.

𑁩𑁦𑁩.

‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺, 𑀞𑀧𑁂𑀢𑁆𑀯𑀸𑀦 𑀫𑀳𑀸𑀫𑀼𑀦𑀺𑀁;

𑀧𑀜𑁆𑀜𑀸𑀬 𑀲𑀤𑀺𑀲𑁄 𑀦𑀢𑁆𑀣𑀺, 𑀢𑀯 𑀧𑀼𑀢𑁆𑀢𑀲𑁆𑀲 𑀘𑀓𑁆𑀔𑀼𑀫.

𑁩𑁦𑁪.

‘‘𑀲𑀼𑀯𑀺𑀦𑀻𑀢𑀸 𑀘 𑀢𑁂 𑀲𑀺𑀲𑁆𑀲𑀸, 𑀧𑀭𑀺𑀲𑀸 𑀘 𑀲𑀼𑀲𑀺𑀓𑁆𑀔𑀺𑀢𑀸;

𑀉𑀢𑁆𑀢𑀫𑁂 𑀤𑀫𑀣𑁂 𑀤𑀦𑁆𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁦𑁫.

‘‘𑀛𑀸𑀬𑀻 ¶ 𑀛𑀸𑀦𑀭𑀢𑀸 𑀥𑀻𑀭𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀫𑀼𑀦𑀻 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁦𑁬.

‘‘𑀅𑀧𑁆𑀧𑀺𑀘𑁆𑀙𑀸 𑀦𑀺𑀧𑀓𑀸 𑀥𑀻𑀭𑀸, 𑀅𑀧𑁆𑀧𑀸𑀳𑀸𑀭𑀸 𑀅𑀮𑁄𑀮𑀼𑀧𑀸;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁦𑁭.

‘‘𑀆𑀭𑀜𑁆𑀜𑀺𑀓𑀸 𑀥𑀼𑀢𑀭𑀢𑀸, 𑀛𑀸𑀬𑀺𑀦𑁄 𑀮𑀽𑀔𑀘𑀻𑀯𑀭𑀸;

𑀯𑀺𑀯𑁂𑀓𑀸𑀪𑀺𑀭𑀢𑀸 𑀥𑀻𑀭𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁦𑁮.

‘‘𑀧𑀝𑀺𑀧𑀦𑁆𑀦𑀸 ¶ 𑀨𑀮𑀝𑁆𑀞𑀸 𑀘, 𑀲𑁂𑀔𑀸 𑀨𑀮𑀲𑀫𑀗𑁆𑀕𑀺𑀦𑁄;

𑀆𑀲𑀻𑀲𑀓𑀸 [𑀆𑀲𑀺𑀁𑀲𑀓𑀸 (𑀲𑀻. 𑀲𑁆𑀬𑀸.)] 𑀉𑀢𑁆𑀢𑀫𑀢𑁆𑀣𑀁, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁦𑁯.

‘‘𑀲𑁄𑀢𑀸𑀧𑀦𑁆𑀦𑀸 𑀘 𑀯𑀺𑀫𑀮𑀸, 𑀲𑀓𑀤𑀸𑀕𑀸𑀫𑀺𑀦𑁄 𑀘 𑀬𑁂;

𑀅𑀦𑀸𑀕𑀸𑀫𑀻 𑀘 𑀅𑀭𑀳𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁧𑁦.

‘‘𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸, 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀭𑀢𑀸;

𑀲𑀸𑀯𑀓𑀸 𑀢𑁂 𑀩𑀳𑀽 𑀲𑀩𑁆𑀩𑁂, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁧𑁧.

‘‘𑀇𑀤𑁆𑀥𑀺𑀧𑀸𑀤𑁂𑀲𑀼 𑀓𑀼𑀲𑀮𑀸, 𑀲𑀫𑀸𑀥𑀺𑀪𑀸𑀯𑀦𑀸𑀭𑀢𑀸;

𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀼𑀬𑀼𑀢𑁆𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁧𑁨.

‘‘𑀢𑁂𑀯𑀺𑀚𑁆𑀚𑀸 𑀙𑀴𑀪𑀺𑀜𑁆𑀜𑀸 𑀘, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑀸;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀁 𑀧𑀢𑁆𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁧𑁩.

‘‘𑀏𑀤𑀺𑀲𑀸 𑀢𑁂 𑀫𑀳𑀸𑀯𑀻𑀭, 𑀢𑀯 𑀲𑀺𑀲𑁆𑀲𑀸 𑀲𑀼𑀲𑀺𑀓𑁆𑀔𑀺𑀢𑀸;

𑀤𑀼𑀭𑀸𑀲𑀤𑀸 𑀉𑀕𑁆𑀕𑀢𑁂𑀚𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀢𑀁 𑀲𑀤𑀸.

𑁩𑁧𑁪.

‘‘𑀢𑁂𑀳𑀺 𑀲𑀺𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄, 𑀲𑀜𑁆𑀜𑀢𑁂𑀳𑀺 𑀢𑀧𑀲𑁆𑀲𑀺𑀪𑀺;

𑀫𑀺𑀕𑀭𑀸𑀚𑀸𑀯𑀲𑀫𑁆𑀪𑀻𑀢𑁄, 𑀉𑀴𑀼𑀭𑀸𑀚𑀸𑀯 𑀲𑁄𑀪𑀲𑀺.

𑁩𑁧𑁫.

‘‘𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬, 𑀭𑀼𑀳𑀦𑁆𑀢𑀺 𑀥𑀭𑀡𑀻𑀭𑀼𑀳𑀸;

𑀯𑁂𑀧𑀼𑀮𑁆𑀮𑀢𑀁 𑀧𑀸𑀧𑀼𑀡𑀦𑁆𑀢𑀺, 𑀨𑀮𑀜𑁆𑀘 𑀤𑀲𑁆𑀲𑀬𑀦𑁆𑀢𑀺 𑀢𑁂.

𑁩𑁧𑁬.

‘‘𑀧𑀣𑀯𑀻𑀲𑀤𑀺𑀲𑁄 ¶ ¶ 𑀢𑁆𑀯𑀁𑀲𑀺, 𑀲𑀓𑁆𑀬𑀧𑀼𑀢𑁆𑀢 𑀫𑀳𑀸𑀬𑀲;

𑀲𑀸𑀲𑀦𑁂 𑀢𑁂 𑀧𑀢𑀺𑀝𑁆𑀞𑀸𑀬, 𑀮𑀪𑀦𑁆𑀢𑀺 𑀅𑀫𑀢𑀁 𑀨𑀮𑀁.

𑁩𑁧𑁭.

‘‘𑀲𑀺𑀦𑁆𑀥𑀼 𑀲𑀭𑀲𑁆𑀲𑀢𑀻 𑀘𑁂𑀯, 𑀦𑀤𑀺𑀬𑁄 𑀘𑀦𑁆𑀤𑀪𑀸𑀕𑀺𑀓𑀸;

𑀕𑀗𑁆𑀕𑀸 𑀘 𑀬𑀫𑀼𑀦𑀸 𑀘𑁂𑀯, 𑀲𑀭𑀪𑀽 𑀘 𑀅𑀣𑁄 𑀫𑀳𑀻.

𑁩𑁧𑁮.

‘‘𑀏𑀢𑀸𑀲𑀁 ¶ 𑀲𑀦𑁆𑀤𑀫𑀸𑀦𑀸𑀦𑀁, 𑀲𑀸𑀕𑀭𑁄 𑀲𑀫𑁆𑀧𑀝𑀺𑀘𑁆𑀙𑀢𑀺;

𑀚𑀳𑀦𑁆𑀢𑀺 𑀧𑀼𑀭𑀺𑀫𑀁 𑀦𑀸𑀫𑀁, 𑀲𑀸𑀕𑀭𑁄𑀢𑁂𑀯 𑀜𑀸𑀬𑀢𑀺.

𑁩𑁧𑁯.

‘‘𑀢𑀣𑁂𑀯𑀺𑀫𑁂 ¶ 𑀘𑀢𑀼𑀩𑁆𑀩𑀡𑁆𑀡𑀸, 𑀧𑀩𑁆𑀩𑀚𑀺𑀢𑁆𑀯𑀸 𑀢𑀯𑀦𑁆𑀢𑀺𑀓𑁂;

𑀚𑀳𑀦𑁆𑀢𑀺 𑀧𑀼𑀭𑀺𑀫𑀁 𑀦𑀸𑀫𑀁, 𑀩𑀼𑀤𑁆𑀥𑀧𑀼𑀢𑁆𑀢𑀸𑀢𑀺 𑀜𑀸𑀬𑀭𑁂.

𑁩𑁨𑁦.

‘‘𑀬𑀣𑀸𑀧𑀺 𑀘𑀦𑁆𑀤𑁄 𑀯𑀺𑀫𑀮𑁄, 𑀕𑀘𑁆𑀙𑀁 𑀆𑀓𑀸𑀲𑀥𑀸𑀢𑀼𑀬𑀸;

𑀲𑀩𑁆𑀩𑁂 𑀢𑀸𑀭𑀕𑀡𑁂 𑀮𑁄𑀓𑁂, 𑀆𑀪𑀸𑀬 𑀅𑀢𑀺𑀭𑁄𑀘𑀢𑀺.

𑁩𑁨𑁧.

‘‘𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀧𑀭𑀺𑀯𑀼𑀢𑁄 𑀤𑁂𑀯𑀫𑀸𑀦𑀼𑀲𑁂;

𑀏𑀢𑁂 𑀲𑀩𑁆𑀩𑁂 𑀅𑀢𑀺𑀓𑁆𑀓𑀫𑁆𑀫, 𑀚𑀮𑀲𑀺 𑀲𑀩𑁆𑀩𑀤𑀸 𑀢𑀼𑀯𑀁.

𑁩𑁨𑁨.

‘‘𑀕𑀫𑁆𑀪𑀻𑀭𑁂 𑀉𑀝𑁆𑀞𑀺𑀢𑀸 𑀊𑀫𑀻, 𑀦 𑀯𑁂𑀮𑀫𑀢𑀺𑀯𑀢𑁆𑀢𑀭𑁂;

𑀲𑀩𑁆𑀩𑀸 𑀯𑁂𑀮𑀁𑀯 𑀨𑀼𑀲𑀦𑁆𑀢𑀺 [𑀲𑀩𑁆𑀩𑀸𑀯 𑀯𑁂𑀮𑀁 𑀨𑀼𑀲𑀦𑁆𑀢𑀺 (𑀲𑀻.), 𑀲𑀩𑁆𑀩𑀸 𑀯𑁂𑀮𑀁 𑀧𑀨𑀼𑀲𑁆𑀲𑀦𑁆𑀢𑀺 (𑀲𑁆𑀬𑀸.)], 𑀲𑀜𑁆𑀘𑀼𑀡𑁆𑀡𑀸 𑀯𑀺𑀓𑀺𑀭𑀦𑁆𑀢𑀺 𑀢𑀸.

𑁩𑁨𑁩.

‘‘𑀢𑀣𑁂𑀯 𑀢𑀺𑀢𑁆𑀣𑀺𑀬𑀸 𑀮𑁄𑀓𑁂, 𑀦𑀸𑀦𑀸𑀤𑀺𑀝𑁆𑀞𑀻 𑀩𑀳𑀼𑀚𑁆𑀚𑀦𑀸;

𑀥𑀫𑁆𑀫𑀁 𑀯𑀸𑀤𑀺𑀢𑀼𑀓𑀸𑀫𑀸 𑀢𑁂, 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀢𑀁 𑀫𑀼𑀦𑀺𑀁.

𑁩𑁨𑁪.

‘‘𑀲𑀘𑁂 𑀘 𑀢𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀝𑀺𑀯𑀸𑀤𑁂𑀳𑀺 𑀘𑀓𑁆𑀔𑀼𑀫;

𑀢𑀯𑀦𑁆𑀢𑀺𑀓𑀁 𑀉𑀧𑀸𑀕𑀦𑁆𑀢𑁆𑀯𑀸, 𑀲𑀜𑁆𑀘𑀼𑀡𑁆𑀡𑀸𑀯 𑀪𑀯𑀦𑁆𑀢𑀺 𑀢𑁂.

𑁩𑁨𑁫.

‘‘𑀬𑀣𑀸𑀧𑀺 𑀉𑀤𑀓𑁂 𑀚𑀸𑀢𑀸, 𑀓𑀼𑀫𑀼𑀤𑀸 𑀫𑀦𑁆𑀤𑀸𑀮𑀓𑀸 𑀩𑀳𑀽;

𑀉𑀧𑀮𑀺𑀫𑁆𑀧𑀦𑁆𑀢𑀺 [𑀉𑀧𑀮𑀺𑀧𑁆𑀧𑀦𑁆𑀢𑀺 (?)] 𑀢𑁄𑀬𑁂𑀦, 𑀓𑀤𑁆𑀤𑀫𑀓𑀮𑀮𑁂𑀦 𑀘.

𑁩𑁨𑁬.

‘‘𑀢𑀣𑁂𑀯 𑀩𑀳𑀼𑀓𑀸 𑀲𑀢𑁆𑀢𑀸, 𑀮𑁄𑀓𑁂 𑀚𑀸𑀢𑀸 𑀯𑀺𑀭𑀽𑀳𑀭𑁂;

𑀅𑀝𑁆𑀝𑀺𑀢𑀸 𑀭𑀸𑀕𑀤𑁄𑀲𑁂𑀦, 𑀓𑀤𑁆𑀤𑀫𑁂 𑀓𑀼𑀫𑀼𑀤𑀁 𑀬𑀣𑀸.

𑁩𑁨𑁭.

‘‘𑀬𑀣𑀸𑀧𑀺 𑀧𑀤𑀼𑀫𑀁 𑀚𑀮𑀚𑀁, 𑀚𑀮𑀫𑀚𑁆𑀛𑁂 𑀯𑀺𑀭𑀽𑀳𑀢𑀺;

𑀦 𑀲𑁄 𑀮𑀺𑀫𑁆𑀧𑀢𑀺 𑀢𑁄𑀬𑁂𑀦, 𑀧𑀭𑀺𑀲𑀼𑀤𑁆𑀥𑁄 𑀳𑀺 𑀓𑁂𑀲𑀭𑀻.

𑁩𑁨𑁮.

‘‘𑀢𑀣𑁂𑀯 ¶ 𑀢𑁆𑀯𑀁 𑀫𑀳𑀸𑀯𑀻𑀭, 𑀮𑁄𑀓𑁂 𑀚𑀸𑀢𑁄 𑀫𑀳𑀸𑀫𑀼𑀦𑀺;

𑀦𑁄𑀧𑀮𑀺𑀫𑁆𑀧𑀲𑀺 𑀮𑁄𑀓𑁂𑀦, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

𑁩𑁨𑁯.

‘‘𑀬𑀣𑀸𑀧𑀺 𑀭𑀫𑁆𑀫𑀓𑁂 𑀫𑀸𑀲𑁂, 𑀩𑀳𑀽 𑀧𑀼𑀧𑁆𑀨𑀦𑁆𑀢𑀺 𑀯𑀸𑀭𑀺𑀚𑀸;

𑀦𑀸𑀢𑀺𑀓𑁆𑀓𑀫𑀦𑁆𑀢𑀺 𑀢𑀁 𑀫𑀸𑀲𑀁, 𑀲𑀫𑀬𑁄 𑀧𑀼𑀧𑁆𑀨𑀦𑀸𑀬 𑀲𑁄.

𑁩𑁩𑁦.

‘‘𑀢𑀣𑁂𑀯 ¶ ¶ ¶ 𑀢𑁆𑀯𑀁 𑀫𑀳𑀸𑀯𑀻𑀭, 𑀧𑀼𑀧𑁆𑀨𑀺𑀢𑁄 𑀢𑁂 𑀯𑀺𑀫𑀼𑀢𑁆𑀢𑀺𑀬𑀸;

𑀲𑀸𑀲𑀦𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀧𑀤𑀼𑀫𑀁 𑀯𑀸𑀭𑀺𑀚𑀁 𑀬𑀣𑀸.

𑁩𑁩𑁧.

‘‘𑀲𑀼𑀧𑀼𑀧𑁆𑀨𑀺𑀢𑁄 𑀲𑀸𑀮𑀭𑀸𑀚𑀸, 𑀤𑀺𑀩𑁆𑀩𑀕𑀦𑁆𑀥𑀁 𑀧𑀯𑀸𑀬𑀢𑀺;

𑀅𑀜𑁆𑀜𑀲𑀸𑀮𑁂𑀳𑀺 𑀧𑀭𑀺𑀯𑀼𑀢𑁄, 𑀲𑀸𑀮𑀭𑀸𑀚𑀸𑀯 𑀲𑁄𑀪𑀢𑀺.

𑁩𑁩𑁨.

‘‘𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀤𑁆𑀥𑀜𑀸𑀡𑁂𑀦 𑀧𑀼𑀧𑁆𑀨𑀺𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄, 𑀲𑀸𑀮𑀭𑀸𑀚𑀸𑀯 𑀲𑁄𑀪𑀲𑀺.

𑁩𑁩𑁩.

‘‘𑀬𑀣𑀸𑀧𑀺 𑀲𑁂𑀮𑁄 𑀳𑀺𑀫𑀯𑀸, 𑀑𑀲𑀥𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀦𑀸𑀕𑀸𑀦𑀁 𑀅𑀲𑀼𑀭𑀸𑀦𑀜𑁆𑀘, 𑀤𑁂𑀯𑀢𑀸𑀦𑀜𑁆𑀘 𑀆𑀮𑀬𑁄.

𑁩𑁩𑁪.

‘‘𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀑𑀲𑀥𑁄 𑀯𑀺𑀬 𑀧𑀸𑀡𑀺𑀦𑀁;

𑀢𑁂𑀯𑀺𑀚𑁆𑀚𑀸 𑀙𑀴𑀪𑀺𑀜𑁆𑀜𑀸 𑀘, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑀸.

𑁩𑁩𑁫.

‘‘𑀅𑀦𑀼𑀲𑀺𑀝𑁆𑀞𑀸 𑀫𑀳𑀸𑀯𑀻𑀭, 𑀢𑀬𑀸 𑀓𑀸𑀭𑀼𑀡𑀺𑀓𑁂𑀦 𑀢𑁂;

𑀭𑀫𑀦𑁆𑀢𑀺 𑀥𑀫𑁆𑀫𑀭𑀢𑀺𑀬𑀸, 𑀯𑀲𑀦𑁆𑀢𑀺 𑀢𑀯 𑀲𑀸𑀲𑀦𑁂.

𑁩𑁩𑁬.

‘‘𑀫𑀺𑀕𑀭𑀸𑀚𑀸 𑀬𑀣𑀸 𑀲𑀻𑀳𑁄, 𑀅𑀪𑀺𑀦𑀺𑀓𑁆𑀔𑀫𑁆𑀫 𑀆𑀲𑀬𑀸;

𑀘𑀢𑀼𑀤𑁆𑀤𑀺𑀲𑀸𑀦𑀼𑀯𑀺𑀮𑁄𑀓𑁂𑀢𑁆𑀯𑀸 [𑀯𑀺𑀮𑁄𑀓𑁂𑀢𑁆𑀯𑀸 (𑀲𑀻. 𑀲𑁆𑀬𑀸.), 𑀦𑀼𑀮𑁄𑀓𑁂𑀢𑁆𑀯𑀸 (𑀓.)],

𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀦𑀸𑀤𑀢𑀺.

𑁩𑁩𑁭.

‘‘𑀲𑀩𑁆𑀩𑁂 𑀫𑀺𑀕𑀸 𑀉𑀢𑁆𑀢𑀲𑀦𑁆𑀢𑀺, 𑀫𑀺𑀕𑀭𑀸𑀚𑀲𑁆𑀲 𑀕𑀚𑁆𑀚𑀢𑁄;

𑀢𑀣𑀸 𑀳𑀺 𑀚𑀸𑀢𑀺𑀫𑀸 𑀏𑀲𑁄, 𑀧𑀲𑀽 𑀢𑀸𑀲𑁂𑀢𑀺 𑀲𑀩𑁆𑀩𑀤𑀸.

𑁩𑁩𑁮.

‘‘𑀕𑀚𑁆𑀚𑀢𑁄 ¶ 𑀢𑁂 𑀫𑀳𑀸𑀯𑀻𑀭, 𑀯𑀲𑀼𑀥𑀸 𑀲𑀫𑁆𑀧𑀓𑀫𑁆𑀧𑀢𑀺;

𑀩𑁄𑀥𑀦𑁂𑀬𑁆𑀬𑀸𑀯𑀩𑀼𑀚𑁆𑀛𑀦𑁆𑀢𑀺, 𑀢𑀲𑀦𑁆𑀢𑀺 𑀫𑀸𑀭𑀓𑀸𑀬𑀺𑀓𑀸.

𑁩𑁩𑁯.

‘‘𑀢𑀲𑀦𑁆𑀢𑀺 𑀢𑀺𑀢𑁆𑀣𑀺𑀬𑀸 𑀲𑀩𑁆𑀩𑁂, 𑀦𑀤𑀢𑁄 𑀢𑁂 𑀫𑀳𑀸𑀫𑀼𑀦𑀺;

𑀓𑀸𑀓𑀸 𑀲𑁂𑀦𑀸𑀯 𑀯𑀺𑀩𑁆𑀪𑀦𑁆𑀢𑀸, 𑀫𑀺𑀕𑀭𑀜𑁆𑀜𑀸 𑀬𑀣𑀸 𑀫𑀺𑀕𑀸.

𑁩𑁪𑁦.

‘‘𑀬𑁂 𑀓𑁂𑀘𑀺 𑀕𑀡𑀺𑀦𑁄 𑀮𑁄𑀓𑁂, 𑀲𑀢𑁆𑀣𑀸𑀭𑁄𑀢𑀺 𑀧𑀯𑀼𑀘𑁆𑀘𑀭𑁂;

𑀧𑀭𑀫𑁆𑀧𑀭𑀸𑀕𑀢𑀁 𑀥𑀫𑁆𑀫𑀁, 𑀤𑁂𑀲𑁂𑀦𑁆𑀢𑀺 𑀧𑀭𑀺𑀲𑀸𑀬 𑀢𑁂.

𑁩𑁪𑁧.

‘‘𑀦 𑀳𑁂𑀯𑀁 𑀢𑁆𑀯𑀁 𑀫𑀳𑀸𑀯𑀻𑀭, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀧𑀸𑀡𑀺𑀦𑀁;

𑀲𑀸𑀫𑀁 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀺𑀢𑁆𑀯𑀸, 𑀓𑁂𑀯𑀮𑀁 𑀩𑁄𑀥𑀺𑀧𑀓𑁆𑀔𑀺𑀬𑀁.

𑁩𑁪𑁨.

‘‘𑀆𑀲𑀬𑀸𑀦𑀼𑀲𑀬𑀁 𑀜𑀢𑁆𑀯𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀩𑀮𑀸𑀩𑀮𑀁;

𑀪𑀩𑁆𑀩𑀸𑀪𑀩𑁆𑀩𑁂 𑀯𑀺𑀤𑀺𑀢𑁆𑀯𑀸𑀦, 𑀫𑀳𑀸𑀫𑁂𑀖𑁄𑀯 𑀕𑀚𑁆𑀚𑀲𑀺.

𑁩𑁪𑁩.

‘‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸 ¶ , 𑀦𑀺𑀲𑀺𑀦𑁆𑀦𑀸 𑀧𑀭𑀺𑀲𑀸 𑀪𑀯𑁂;

𑀦𑀸𑀦𑀸𑀤𑀺𑀝𑁆𑀞𑀻 𑀯𑀺𑀘𑀺𑀦𑀦𑁆𑀢𑀸 [𑀯𑀺𑀘𑀺𑀦𑁆𑀢𑁂𑀦𑁆𑀢𑀺 (𑀲𑁆𑀬𑀸.), 𑀯𑀺𑀘𑀺𑀦𑀦𑁆𑀢𑀁 (𑀓.)], 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀬 𑀢𑀁.

𑁩𑁪𑁪.

‘‘𑀲𑀩𑁆𑀩𑁂𑀲𑀁 ¶ 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀑𑀧𑀫𑁆𑀫𑀓𑀼𑀲𑀮𑁄 𑀫𑀼𑀦𑀺;

𑀏𑀓𑀁 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄𑀯, 𑀯𑀺𑀫𑀢𑀺𑀁 𑀙𑀺𑀦𑁆𑀤𑀲𑀺 [𑀙𑀺𑀦𑁆𑀤𑀺 (𑀲𑁆𑀬𑀸. 𑀓.)] 𑀧𑀸𑀡𑀺𑀦𑀁.

𑁩𑁪𑁫.

‘‘𑀉𑀧𑀢𑀺𑀲𑁆𑀲𑀲𑀤𑀺𑀲𑁂𑀳𑁂𑀯, 𑀯𑀲𑀼𑀥𑀸 𑀧𑀽𑀭𑀺𑀢𑀸 𑀪𑀯𑁂;

𑀲𑀩𑁆𑀩𑁂𑀯 𑀢𑁂 𑀧𑀜𑁆𑀚𑀮𑀺𑀓𑀸, 𑀓𑀺𑀢𑁆𑀢𑀬𑀼𑀁 𑀮𑁄𑀓𑀦𑀸𑀬𑀓𑀁.

𑁩𑁪𑁬.

‘‘𑀓𑀧𑁆𑀧𑀁 𑀯𑀸 𑀢𑁂 𑀓𑀺𑀢𑁆𑀢𑀬𑀦𑁆𑀢𑀸, 𑀦𑀸𑀦𑀸𑀯𑀡𑁆𑀡𑁂𑀳𑀺 𑀓𑀺𑀢𑁆𑀢𑀬𑀼𑀁;

𑀧𑀭𑀺𑀫𑁂𑀢𑀼𑀁 𑀦 𑀲𑀓𑁆𑀓𑁂𑀬𑁆𑀬𑀼𑀁 [𑀦 𑀓𑀧𑁆𑀧𑁂𑀬𑁆𑀬𑀼𑀁 (𑀲𑁆𑀬𑀸.), 𑀦 𑀧𑀧𑁆𑀧𑁂𑀬𑁆𑀬𑀼𑀁 (𑀓.)], 𑀅𑀧𑁆𑀧𑀫𑁂𑀬𑁆𑀬𑁄 𑀢𑀣𑀸𑀕𑀢𑁄.

𑁩𑁪𑁭.

‘‘𑀬𑀣𑀸𑀲𑀓𑁂𑀦 ¶ 𑀣𑀸𑀫𑁂𑀦, 𑀓𑀺𑀢𑁆𑀢𑀺𑀢𑁄 𑀳𑀺 𑀫𑀬𑀸 𑀚𑀺𑀦𑁄;

𑀓𑀧𑁆𑀧𑀓𑁄𑀝𑀻𑀧𑀺 𑀓𑀺𑀢𑁆𑀢𑁂𑀦𑁆𑀢𑀸, 𑀏𑀯𑀫𑁂𑀯 𑀧𑀓𑀺𑀢𑁆𑀢𑀬𑀼𑀁.

𑁩𑁪𑁮.

‘‘𑀲𑀘𑁂 ¶ 𑀳𑀺 𑀓𑁄𑀘𑀺 𑀤𑁂𑀯𑁄 𑀯𑀸, 𑀫𑀦𑀼𑀲𑁆𑀲𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄;

𑀧𑀫𑁂𑀢𑀼𑀁 𑀧𑀭𑀺𑀓𑀧𑁆𑀧𑁂𑀬𑁆𑀬, 𑀯𑀺𑀖𑀸𑀢𑀁𑀯 𑀮𑀪𑁂𑀬𑁆𑀬 𑀲𑁄.

𑁩𑁪𑁯.

‘‘𑀲𑀸𑀲𑀦𑁂 𑀢𑁂 𑀧𑀢𑀺𑀝𑁆𑀞𑀸𑀬, 𑀲𑀓𑁆𑀬𑀧𑀼𑀢𑁆𑀢 𑀫𑀳𑀸𑀬𑀲;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁫𑁦.

‘‘𑀢𑀺𑀢𑁆𑀣𑀺𑀬𑁂 𑀲𑀫𑁆𑀧𑀫𑀤𑁆𑀤𑀸𑀫𑀺, 𑀯𑀢𑁆𑀢𑁂𑀫𑀺 𑀚𑀺𑀦𑀲𑀸𑀲𑀦𑀁;

𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁩𑁫𑁧.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀔𑀺𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀻 𑀫𑀫 [𑀛𑀸𑀧𑀬𑀺𑀁 𑀫𑀫 (𑀲𑁆𑀬𑀸.), 𑀛𑀸𑀧𑀬𑀺𑀁 𑀅𑀳𑀁 (𑀓.)].

𑁩𑁫𑁨.

‘‘𑀬𑁄 𑀓𑁄𑀘𑀺 𑀫𑀦𑀼𑀚𑁄 𑀪𑀸𑀭𑀁, 𑀥𑀸𑀭𑁂𑀬𑁆𑀬 𑀫𑀢𑁆𑀣𑀓𑁂 𑀲𑀤𑀸;

𑀪𑀸𑀭𑁂𑀦 𑀤𑀼𑀓𑁆𑀔𑀺𑀢𑁄 𑀅𑀲𑁆𑀲, 𑀪𑀸𑀭𑁂𑀳𑀺 𑀪𑀭𑀺𑀢𑁄 𑀢𑀣𑀸.

𑁩𑁫𑁩.

‘‘𑀟𑀬𑁆𑀳𑀫𑀸𑀦𑁄 𑀢𑀻𑀳𑀕𑁆𑀕𑀻𑀳𑀺, 𑀪𑀯𑁂𑀲𑀼 𑀲𑀁𑀲𑀭𑀺𑀁 𑀅𑀳𑀁;

𑀪𑀭𑀺𑀢𑁄 𑀪𑀯𑀪𑀸𑀭𑁂𑀦, 𑀕𑀺𑀭𑀺𑀁 𑀉𑀘𑁆𑀘𑀸𑀭𑀺𑀢𑁄 𑀬𑀣𑀸.

𑁩𑁫𑁪.

‘‘𑀑𑀭𑁄𑀧𑀺𑀢𑁄 𑀘 𑀫𑁂 𑀪𑀸𑀭𑁄, 𑀪𑀯𑀸 𑀉𑀕𑁆𑀖𑀸𑀝𑀺𑀢𑀸 𑀫𑀬𑀸;

𑀓𑀭𑀡𑀻𑀬𑀁 𑀓𑀢𑀁 𑀲𑀩𑁆𑀩𑀁, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁩𑁫𑁫.

‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺, 𑀞𑀧𑁂𑀢𑁆𑀯𑀸 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀅𑀳𑀁 𑀅𑀕𑁆𑀕𑁄𑀫𑁆𑀳𑀺 𑀧𑀜𑁆𑀜𑀸𑀬, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁩𑁫𑁬.

‘‘𑀲𑀫𑀸𑀥𑀺𑀫𑁆𑀳𑀺 ¶ 𑀲𑀼𑀓𑀼𑀲𑀮𑁄, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄;

𑀇𑀘𑁆𑀙𑀫𑀸𑀦𑁄 𑀘𑀳𑀁 𑀅𑀚𑁆𑀚, 𑀲𑀳𑀲𑁆𑀲𑀁 𑀅𑀪𑀺𑀦𑀺𑀫𑁆𑀫𑀺𑀦𑁂.

𑁩𑁫𑁭.

‘‘𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑁆𑀲 ¶ , 𑀯𑀲𑀻𑀪𑀽𑀢𑁄 𑀫𑀳𑀸𑀫𑀼𑀦𑀺;

𑀓𑀣𑁂𑀲𑀺 𑀲𑀸𑀲𑀦𑀁 𑀫𑀬𑁆𑀳𑀁, 𑀦𑀺𑀭𑁄𑀥𑁄 𑀲𑀬𑀦𑀁 𑀫𑀫.

𑁩𑁫𑁮.

‘‘𑀤𑀺𑀩𑁆𑀩𑀘𑀓𑁆𑀔𑀼 ¶ 𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑁄 𑀅𑀳𑀁;

𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀼𑀬𑀼𑀢𑁆𑀢𑁄, 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀭𑀢𑁄.

𑁩𑁫𑁯.

‘‘𑀲𑀸𑀯𑀓𑁂𑀦 𑀳𑀺 𑀧𑀢𑁆𑀢𑀩𑁆𑀩𑀁, 𑀲𑀩𑁆𑀩𑀫𑁂𑀯 𑀓𑀢𑀁 𑀫𑀬𑀸;

𑀮𑁄𑀓𑀦𑀸𑀣𑀁 𑀞𑀧𑁂𑀢𑁆𑀯𑀸𑀦, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁩𑁬𑁦.

‘‘𑀲𑀫𑀸𑀧𑀢𑁆𑀢𑀻𑀦𑀁 𑀓𑀼𑀲𑀮𑁄 [𑀲𑀫𑀸𑀧𑀢𑁆𑀢𑀺𑀦𑀬𑀓𑀼𑀲𑀮𑁄 (𑀲𑀻.)], 𑀛𑀸𑀦𑀯𑀺𑀫𑁄𑀓𑁆𑀔𑀸𑀦 𑀔𑀺𑀧𑁆𑀧𑀧𑀝𑀺𑀮𑀸𑀪𑀻;

𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀭𑀢𑁄, 𑀲𑀸𑀯𑀓𑀕𑀼𑀡𑀧𑀸𑀭𑀫𑀺𑀕𑀢𑁄𑀲𑁆𑀫𑀺.

𑁩𑁬𑁧.

‘‘𑀲𑀸𑀯𑀓𑀕𑀼𑀡𑁂𑀦𑀧𑀺 ¶ 𑀨𑀼𑀲𑁆𑀲𑁂𑀦 [𑀲𑀸𑀯𑀓𑀕𑀼𑀡𑀨𑀼𑀲𑁆𑀲𑁂𑀦 (𑀲𑁆𑀬𑀸.)], 𑀩𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀢𑁆𑀢𑀫𑀪𑀸𑀭𑀯𑀸 [𑀧𑀼𑀭𑀺𑀲𑀼𑀢𑁆𑀢𑀫𑀕𑀸𑀭𑀯𑀸 (𑀲𑁆𑀬𑀸.), 𑀧𑀼𑀭𑀺𑀲𑀼𑀢𑁆𑀢𑀫𑀪𑀸𑀭𑀯𑀸 (𑀓.)];

𑀬𑀁 𑀲𑀤𑁆𑀥𑀸𑀲𑀗𑁆𑀕𑀳𑀺𑀢𑀁 [𑀲𑀤𑁆𑀥𑀸𑀬 𑀲𑀗𑁆𑀕𑀳𑀺𑀢𑀁 (𑀲𑀻.), 𑀲𑀤𑁆𑀤𑀸𑀲𑀗𑁆𑀕𑀳𑀺𑀢𑀁 (𑀲𑁆𑀬𑀸.)] 𑀘𑀺𑀢𑁆𑀢𑀁, 𑀲𑀤𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼.

𑁩𑁬𑁨.

‘‘𑀉𑀤𑁆𑀥𑀢𑀯𑀺𑀲𑁄𑀯 𑀲𑀧𑁆𑀧𑁄, 𑀙𑀺𑀦𑁆𑀦𑀯𑀺𑀲𑀸𑀡𑁄𑀯 𑀉𑀲𑀪𑁄;

𑀦𑀺𑀓𑁆𑀔𑀺𑀢𑁆𑀢𑀫𑀸𑀦𑀤𑀧𑁆𑀧𑁄𑀯 [𑀤𑀩𑁆𑀩𑁄𑀯 (𑀓.)], 𑀉𑀧𑁂𑀫𑀺 𑀕𑀭𑀼𑀕𑀸𑀭𑀯𑁂𑀦 𑀕𑀡𑀁.

𑁩𑁬𑁩.

‘‘𑀬𑀤𑀺 𑀭𑀽𑀧𑀺𑀦𑀻 𑀪𑀯𑁂𑀬𑁆𑀬, 𑀧𑀜𑁆𑀜𑀸 𑀫𑁂 𑀯𑀲𑀼𑀫𑀢𑀻𑀧𑀺 [𑀯𑀲𑀼𑀫𑀢𑀻 (𑀲𑀻. 𑀓.) 𑀯𑀲𑀼𑀧𑀢𑀻𑀦𑀁 (𑀲𑁆𑀬𑀸.)] 𑀦 𑀲𑀫𑁂𑀬𑁆𑀬;

𑀅𑀦𑁄𑀫𑀤𑀲𑁆𑀲𑀺𑀲𑁆𑀲 [𑀅𑀦𑁄𑀫𑀤𑀲𑁆𑀲𑀺 (?)] 𑀪𑀕𑀯𑀢𑁄, 𑀨𑀮𑀫𑁂𑀢𑀁 𑀜𑀸𑀡𑀣𑀯𑀦𑀸𑀬.

𑁩𑁬𑁪.

‘‘𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁, 𑀲𑀓𑁆𑀬𑀧𑀼𑀢𑁆𑀢𑁂𑀦 𑀢𑀸𑀤𑀺𑀦𑀸;

𑀅𑀦𑀼𑀯𑀢𑁆𑀢𑁂𑀫𑀳𑀁 𑀲𑀫𑁆𑀫𑀸, 𑀜𑀸𑀡𑀣𑀯𑀦𑀸𑀬𑀺𑀤𑀁 𑀨𑀮𑀁.

𑁩𑁬𑁫.

‘‘𑀫𑀸 𑀫𑁂 𑀓𑀤𑀸𑀘𑀺 𑀧𑀸𑀧𑀺𑀘𑁆𑀙𑁄, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀅𑀧𑁆𑀧𑀲𑁆𑀲𑀼𑀢𑁄 𑀅𑀦𑀸𑀤𑀭𑁄 [𑀅𑀦𑀸𑀘𑀸𑀭𑁄 (𑀲𑀩𑁆𑀩𑀢𑁆𑀣) 𑀣𑁂𑀭𑀕𑀸. 𑁯𑁮𑁭 𑀧𑀲𑁆𑀲𑀺𑀢𑀩𑁆𑀩𑀸], 𑀲𑀫𑁂𑀢𑁄 𑀅𑀳𑀼 𑀓𑀢𑁆𑀣𑀘𑀺.

𑁩𑁬𑁬.

‘‘𑀩𑀳𑀼𑀲𑁆𑀲𑀼𑀢𑁄 𑀘 𑀫𑁂𑀥𑀸𑀯𑀻, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀘𑁂𑀢𑁄𑀲𑀫𑀣𑀸𑀦𑀼𑀬𑀼𑀢𑁆𑀢𑁄, 𑀅𑀧𑀺 𑀫𑀼𑀤𑁆𑀥𑀦𑀺 𑀢𑀺𑀝𑁆𑀞𑀢𑀼.

𑁩𑁬𑁭.

‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀅𑀧𑁆𑀧𑀺𑀘𑁆𑀙𑀸 𑀳𑁄𑀣 𑀲𑀦𑁆𑀢𑀼𑀝𑁆𑀞𑀸, 𑀛𑀸𑀬𑀻 𑀛𑀸𑀦𑀭𑀢𑀸 𑀲𑀤𑀸.

𑁩𑁬𑁮.

‘‘𑀬𑀫𑀳𑀁 ¶ ¶ ¶ 𑀧𑀞𑀫𑀁 𑀤𑀺𑀲𑁆𑀯𑀸, 𑀯𑀺𑀭𑀚𑁄 𑀯𑀺𑀫𑀮𑁄 𑀅𑀳𑀼𑀁;

𑀲𑁄 𑀫𑁂 𑀆𑀘𑀭𑀺𑀬𑁄 𑀥𑀻𑀭𑁄, 𑀅𑀲𑁆𑀲𑀚𑀺 𑀦𑀸𑀫 𑀲𑀸𑀯𑀓𑁄.

𑁩𑁬𑁯.

‘‘𑀢𑀲𑁆𑀲𑀸𑀳𑀁 𑀯𑀸𑀳𑀲𑀸 𑀅𑀚𑁆𑀚, 𑀥𑀫𑁆𑀫𑀲𑁂𑀦𑀸𑀧𑀢𑀻 𑀅𑀳𑀼𑀁;

𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀧𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁭𑁦.

‘‘𑀬𑁄 𑀫𑁂 𑀆𑀘𑀭𑀺𑀬𑁄 𑀆𑀲𑀺, 𑀅𑀲𑁆𑀲𑀚𑀺 𑀦𑀸𑀫 𑀲𑀸𑀯𑀓𑁄;

𑀬𑀲𑁆𑀲𑀁 𑀤𑀺𑀲𑀸𑀬𑀁 𑀯𑀲𑀢𑀺, 𑀉𑀲𑁆𑀲𑀻𑀲𑀫𑁆𑀳𑀺 𑀓𑀭𑁄𑀫𑀳𑀁.

𑁩𑁭𑁧.

‘‘𑀫𑀫 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑀫𑀁.

𑁩𑁭𑁨.

[𑀇𑀫𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀦 𑀲𑀦𑁆𑀢𑀺]

𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸.

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁭𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁 [𑀇𑀫𑀸 𑀤𑁆𑀯𑁂 𑀕𑀸𑀣𑀸𑀭𑁄 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀦 𑀲𑀦𑁆𑀢𑀺].

𑁩𑁭𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄 [𑀘𑀢𑀲𑁆𑀲𑁄 𑀘 (𑀲𑀻.)], 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁩-𑁨. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭𑁫.

‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀯𑀺𑀳𑀸𑀲𑀺 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

𑁩𑁭𑁬.

‘‘𑀯𑀭𑀼𑀡𑁄 𑀦𑀸𑀫 𑀦𑀸𑀫𑁂𑀦, 𑀦𑀸𑀕𑀭𑀸𑀚𑀸 𑀅𑀳𑀁 𑀢𑀤𑀸;

𑀓𑀸𑀫𑀭𑀽𑀧𑀻 𑀯𑀺𑀓𑀼𑀩𑁆𑀩𑀸𑀫𑀺, 𑀫𑀳𑁄𑀤𑀥𑀺𑀦𑀺𑀯𑀸𑀲𑀳𑀁.

𑁩𑁭𑁭.

‘‘𑀲𑀗𑁆𑀕𑀡𑀺𑀬𑀁 ¶ 𑀕𑀡𑀁 𑀳𑀺𑀢𑁆𑀯𑀸, 𑀢𑀽𑀭𑀺𑀬𑀁 𑀧𑀝𑁆𑀞𑀧𑁂𑀲𑀳𑀁;

𑀲𑀫𑁆𑀩𑀼𑀤𑁆𑀥𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀯𑀸𑀤𑁂𑀲𑀼𑀁 𑀅𑀘𑁆𑀙𑀭𑀸 𑀢𑀤𑀸.

𑁩𑁭𑁮.

‘‘𑀯𑀚𑁆𑀚𑀫𑀸𑀦𑁂𑀲𑀼 ¶ 𑀢𑀽𑀭𑁂𑀲𑀼, 𑀤𑁂𑀯𑀸 𑀢𑀽𑀭𑀸𑀦𑀺 [𑀢𑀼𑀭𑀺𑀬𑁂𑀲𑀼, 𑀤𑁂𑀯𑀸 𑀢𑀼𑀭𑀺𑀬𑀸𑀦𑀺 (𑀲𑀻. 𑀲𑁆𑀬𑀸.)] 𑀯𑀚𑁆𑀚𑀬𑀼𑀁;

𑀉𑀪𑀺𑀦𑁆𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀩𑀼𑀤𑁆𑀥𑁄𑀧𑀺 𑀲𑀫𑁆𑀧𑀩𑀼𑀚𑁆𑀛𑀣.

𑁩𑁭𑁯.

‘‘𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀓𑀁 𑀪𑀯𑀦𑀼𑀧𑀸𑀕𑀫𑀺𑀁;

𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀦, 𑀓𑀸𑀮𑀫𑀸𑀭𑁄𑀘𑀬𑀺𑀁 𑀅𑀳𑀁.

𑁩𑁮𑁦.

‘‘𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀧𑀭𑀺𑀯𑀼𑀢𑁄 𑀮𑁄𑀓𑀦𑀸𑀬𑀓𑁄;

𑀑𑀪𑀸𑀲𑁂𑀦𑁆𑀢𑁄 𑀤𑀺𑀲𑀸 𑀲𑀩𑁆𑀩𑀸, 𑀪𑀯𑀦𑀁 𑀫𑁂 𑀉𑀧𑀸𑀕𑀫𑀺.

𑁩𑁮𑁧.

‘‘𑀉𑀧𑀯𑀺𑀝𑁆𑀞𑀁 ¶ 𑀫𑀳𑀸𑀯𑀻𑀭𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀲𑀪𑀺𑀓𑁆𑀔𑀼𑀲𑀗𑁆𑀖𑀁 𑀢𑀧𑁆𑀧𑁂𑀲𑀺𑀁 [𑀲𑀦𑁆𑀢𑀧𑁆𑀧𑁂𑀲𑀺𑀁 (𑀲𑁆𑀬𑀸.), 𑀢𑀧𑁆𑀧𑁂𑀫𑀺 (𑀓.)], 𑀅𑀦𑁆𑀦𑀧𑀸𑀦𑁂𑀦𑀳𑀁 𑀢𑀤𑀸.

𑁩𑁮𑁨.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁮𑁩.

‘‘‘𑀬𑁄 𑀲𑁄 [𑀬𑀁 𑀲𑁄 (𑀓.)] 𑀲𑀗𑁆𑀖𑀁 𑀅𑀧𑀽𑀚𑁂𑀲𑀺, 𑀩𑀼𑀤𑁆𑀥𑀜𑁆𑀘 𑀮𑁄𑀓𑀦𑀸𑀬𑀓𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺.

𑁩𑁮𑁪.

‘‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁩𑁮𑁫.

‘‘‘𑀧𑀜𑁆𑀘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀪𑁄𑀕𑀸 𑀅𑀲𑀗𑁆𑀔𑀺𑀬𑀸 𑀢𑀲𑁆𑀲, 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂.

𑁩𑁮𑁬.

‘‘‘𑀅𑀧𑀭𑀺𑀫𑁂𑀬𑁆𑀬𑁂 ¶ 𑀇𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀻.)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁩𑁮𑁭.

‘‘‘𑀦𑀺𑀭𑀬𑀸 ¶ 𑀲𑁄 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑀁 𑀕𑀫𑀺𑀲𑁆𑀲𑀢𑀺;

𑀓𑁄𑀮𑀺𑀢𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁩𑁮𑁮.

‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀓𑀼𑀲𑀮𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀤𑀼𑀢𑀺𑀬𑁄 𑀳𑁂𑀲𑁆𑀲𑀢𑀺 𑀲𑀸𑀯𑀓𑁄.

𑁩𑁮𑁯.

‘‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁩𑁯𑁦.

‘‘𑀧𑀸𑀧𑀫𑀺𑀢𑁆𑀢𑁄𑀧𑀦𑀺𑀲𑁆𑀲𑀸𑀬, 𑀓𑀸𑀫𑀭𑀸𑀕𑀯𑀲𑀁 𑀕𑀢𑁄;

𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀖𑀸𑀢𑀬𑀺𑀁 𑀤𑀼𑀝𑁆𑀞𑀫𑀸𑀦𑀲𑁄.

𑁩𑁯𑁧.

‘‘𑀬𑀁 ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀦𑀺𑀭𑀬𑀁 𑀅𑀣 𑀫𑀸𑀦𑀼𑀲𑀁;

𑀧𑀸𑀧𑀓𑀫𑁆𑀫𑀲𑀫𑀗𑁆𑀕𑀺𑀢𑀸, 𑀪𑀺𑀦𑁆𑀦𑀲𑀻𑀲𑁄 𑀫𑀭𑀸𑀫𑀳𑀁.

𑁩𑁯𑁨.

‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀇𑀥𑀸𑀧𑀺 𑀏𑀤𑀺𑀲𑁄 𑀫𑀬𑁆𑀳𑀁, 𑀫𑀭𑀡𑀓𑀸𑀮𑁂 𑀪𑀯𑀺𑀲𑁆𑀲𑀢𑀺.

𑁩𑁯𑁩.

‘‘𑀧𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄, 𑀲𑀫𑀸𑀥𑀺𑀪𑀸𑀯𑀦𑀸𑀭𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁯𑁪.

‘‘𑀥𑀭𑀡𑀺𑀫𑁆𑀧𑀺 𑀲𑀼𑀕𑀫𑁆𑀪𑀻𑀭𑀁, 𑀩𑀳𑀮𑀁 𑀤𑀼𑀧𑁆𑀧𑀥𑀁𑀲𑀺𑀬𑀁;

𑀯𑀸𑀫𑀗𑁆𑀕𑀼𑀝𑁆𑀞𑁂𑀦 𑀔𑁄𑀪𑁂𑀬𑁆𑀬𑀁, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄.

𑁩𑁯𑁫.

‘‘𑀅𑀲𑁆𑀫𑀺𑀫𑀸𑀦𑀁 𑀦 𑀧𑀲𑁆𑀲𑀸𑀫𑀺, 𑀫𑀸𑀦𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀫𑀡𑁂𑀭𑁂 𑀉𑀧𑀸𑀤𑀸𑀬, 𑀕𑀭𑀼𑀘𑀺𑀢𑁆𑀢𑀁 𑀓𑀭𑁄𑀫𑀳𑀁.

𑁩𑁯𑁬.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀪𑀺𑀦𑀻𑀳𑀭𑀺𑀁;

𑀢𑀸𑀳𑀁 𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁩𑁯𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩-𑁩. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯𑁮.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀧𑀽𑀚𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁩𑁯𑁯.

‘‘𑀉𑀤𑀕𑁆𑀕𑀘𑀺𑀢𑁆𑀢𑀸 𑀚𑀦𑀢𑀸, 𑀆𑀫𑁄𑀤𑀺𑀢𑀧𑀫𑁄𑀤𑀺𑀢𑀸;

𑀢𑁂𑀲𑀼 𑀲𑀁𑀯𑁂𑀕𑀚𑀸𑀢𑁂𑀲𑀼, 𑀧𑀻𑀢𑀺 𑀫𑁂 𑀉𑀤𑀧𑀚𑁆𑀚𑀣.

𑁪𑁦𑁦.

‘‘𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

𑀧𑀭𑀺𑀦𑀺𑀩𑁆𑀩𑀼𑀢𑁄 𑀫𑀳𑀸𑀯𑀻𑀭𑁄, 𑀳𑀦𑁆𑀤 𑀧𑀽𑀚𑀁 𑀓𑀭𑁄𑀫𑀲𑁂.

𑁪𑁦𑁧.

‘‘𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑀺𑀁𑀲𑀼 𑀫𑁂;

𑀩𑀼𑀤𑁆𑀥𑀲𑁆𑀫𑀺𑀁 𑀮𑁄𑀓𑀦𑀸𑀣𑀫𑁆𑀳𑀺, 𑀓𑀸𑀳𑀸𑀫 𑀧𑀼𑀜𑁆𑀜𑀲𑀜𑁆𑀘𑀬𑀁.

𑁪𑁦𑁨.

‘‘𑀅𑀕𑁆𑀖𑀺𑀬𑀁 ¶ 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀢𑀳𑀢𑁆𑀣𑀲𑀫𑀼𑀕𑁆𑀕𑀢𑀁;

𑀤𑀺𑀬𑀟𑁆𑀠𑀳𑀢𑁆𑀣𑀧𑀢𑁆𑀣𑀝𑀁, 𑀯𑀺𑀫𑀸𑀦𑀁 𑀦𑀪𑀫𑀼𑀕𑁆𑀕𑀢𑀁.

𑁪𑁦𑁩.

‘‘𑀓𑀢𑁆𑀯𑀸𑀦 𑀳𑀫𑁆𑀫𑀺𑀬𑀁 𑀢𑀢𑁆𑀣, 𑀢𑀸𑀮𑀧𑀦𑁆𑀢𑀻𑀳𑀺 𑀘𑀺𑀢𑁆𑀢𑀺𑀢𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀘𑁂𑀢𑀺𑀬𑀁 𑀧𑀽𑀚𑀬𑀼𑀢𑁆𑀢𑀫𑀁.

𑁪𑁦𑁪.

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 ¶ 𑀚𑀮𑀺𑀢𑁄, 𑀓𑀺𑀁𑀲𑀼𑀓𑁄 𑀇𑀯 [𑀲𑀸𑀮𑀭𑀸𑀚𑀸𑀯 (𑀲𑀻.)] 𑀨𑀼𑀮𑁆𑀮𑀺𑀢𑁄;

𑀇𑀦𑁆𑀤𑀮𑀝𑁆𑀞𑀻𑀯 𑀆𑀓𑀸𑀲𑁂, 𑀑𑀪𑀸𑀲𑁂𑀢𑀺 𑀘𑀢𑀼𑀤𑁆𑀤𑀺𑀲𑀸.

𑁪𑁦𑁫.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀓𑀢𑁆𑀯𑀸𑀦 𑀓𑀼𑀲𑀮𑀁 𑀩𑀳𑀼𑀁;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀢𑀺𑀤𑀲𑀁 𑀉𑀧𑀧𑀚𑁆𑀚𑀳𑀁.

𑁪𑁦𑁬.

‘‘𑀲𑀳𑀲𑁆𑀲𑀬𑀼𑀢𑁆𑀢𑀁 ¶ 𑀳𑀬𑀯𑀸𑀳𑀺𑀁, 𑀤𑀺𑀩𑁆𑀩𑀬𑀸𑀦𑀫𑀥𑀺𑀝𑁆𑀞𑀺𑀢𑁄;

𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁.

𑁪𑁦𑁭.

‘‘𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀅𑀳𑀼𑀁;

𑀚𑀮𑀦𑁆𑀢𑀺 𑀲𑀓𑀢𑁂𑀚𑁂𑀦, 𑀤𑀺𑀲𑀸 𑀲𑀩𑁆𑀩𑀸 𑀧𑀪𑀸𑀲𑀬𑀁.

𑁪𑁦𑁮.

‘‘𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀦𑀺𑀬𑁆𑀬𑀽𑀳𑀸, 𑀮𑁄𑀳𑀺𑀢𑀗𑁆𑀕𑀫𑀬𑀸 𑀢𑀤𑀸;

𑀢𑁂𑀧𑀺 𑀚𑁄𑀢𑀦𑁆𑀢𑀺 𑀆𑀪𑀸𑀬, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

𑁪𑁦𑁯.

‘‘𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀓𑀽𑀝𑀸𑀕𑀸𑀭𑀸 𑀲𑀼𑀦𑀺𑀫𑁆𑀫𑀺𑀢𑀸;

𑀫𑀡𑀺𑀫𑀬𑀸𑀧𑀺 𑀚𑁄𑀢𑀦𑁆𑀢𑀺, 𑀤𑀺𑀲𑀸 𑀤𑀲 [𑀤𑀺𑀲𑁄𑀤𑀺𑀲𑀁 (𑀲𑁆𑀬𑀸.)] 𑀲𑀫𑀦𑁆𑀢𑀢𑁄.

𑁪𑁧𑁦.

‘‘𑀢𑁂𑀲𑀁 𑀉𑀚𑁆𑀚𑁄𑀢𑀫𑀸𑀦𑀸𑀦𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀅𑀳𑀼;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁧𑁧.

‘‘𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺 ¶ , 𑀉𑀩𑁆𑀩𑀺𑀤𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀧𑀣𑀯𑀺𑀁 𑀆𑀯𑀲𑀺𑀁 𑀅𑀳𑀁.

𑁪𑁧𑁨.

‘‘𑀢𑀣𑁂𑀯 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀅𑀳𑁄𑀲𑀳𑀁;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁧𑁩.

‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄;

𑀢𑀢𑁆𑀣𑀸𑀧𑀺 𑀪𑀯𑀦𑀁 𑀫𑀬𑁆𑀳𑀁, 𑀇𑀦𑁆𑀤𑀮𑀝𑁆𑀞𑀻𑀯 𑀉𑀕𑁆𑀕𑀢𑀁.

𑁪𑁧𑁪.

‘‘𑀆𑀬𑀸𑀫𑀢𑁄 ¶ ¶ 𑀘𑀢𑀼𑀩𑁆𑀩𑀻𑀲𑀁, 𑀯𑀺𑀢𑁆𑀣𑀸𑀭𑁂𑀦 𑀘 𑀤𑁆𑀯𑀸𑀤𑀲;

𑀭𑀫𑁆𑀫𑀡𑀁 [𑀭𑀫𑁆𑀫𑀓𑀁 (𑀲𑀻. 𑀲𑁆𑀬𑀸.)] 𑀦𑀸𑀫 𑀦𑀕𑀭𑀁, 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁.

𑁪𑁧𑁫.

‘‘𑀆𑀬𑀸𑀫𑀢𑁄 𑀧𑀜𑁆𑀘𑀲𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀢𑀤𑀟𑁆𑀠𑀓𑀁;

𑀆𑀓𑀺𑀡𑁆𑀡𑀁 𑀚𑀦𑀓𑀸𑀬𑁂𑀳𑀺, 𑀢𑀺𑀤𑀲𑀸𑀦𑀁 𑀧𑀼𑀭𑀁 𑀯𑀺𑀬.

𑁪𑁧𑁬.

‘‘𑀬𑀣𑀸 𑀲𑀽𑀘𑀺𑀖𑀭𑁂 𑀲𑀽𑀘𑀻, 𑀧𑀓𑁆𑀔𑀺𑀢𑁆𑀢𑀸 𑀧𑀡𑁆𑀡𑀯𑀻𑀲𑀢𑀺;

𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑁂𑀦𑁆𑀢𑀺, 𑀆𑀓𑀺𑀡𑁆𑀡𑀁 𑀳𑁄𑀢𑀺 𑀮𑀗𑁆𑀓𑀢𑀁 [𑀢𑀁 𑀢𑀤𑀸 (𑀲𑀻.), 𑀲𑀢𑀢𑀸 (𑀲𑁆𑀬𑀸.), 𑀲𑀗𑁆𑀓𑀭𑀁 (?)].

𑁪𑁧𑁭.

‘‘𑀏𑀯𑀫𑁆𑀧𑀺 𑀦𑀕𑀭𑀁 𑀫𑀬𑁆𑀳𑀁, 𑀳𑀢𑁆𑀣𑀺𑀲𑁆𑀲𑀭𑀣𑀲𑀁𑀓𑀼𑀮𑀁;

𑀫𑀦𑀼𑀲𑁆𑀲𑁂𑀳𑀺 𑀲𑀤𑀸𑀓𑀺𑀡𑁆𑀡𑀁, 𑀭𑀫𑁆𑀫𑀡𑀁 𑀦𑀕𑀭𑀼𑀢𑁆𑀢𑀫𑀁.

𑁪𑁧𑁮.

‘‘𑀢𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀧𑀼𑀦 𑀤𑁂𑀯𑀢𑁆𑀢𑀦𑀁 𑀕𑀢𑁄 [𑀧𑀼𑀦𑀧𑀺 𑀤𑁂𑀯𑀢𑀗𑁆𑀕𑀢𑁄 (𑀓.)].

𑀪𑀯𑁂 𑀧𑀘𑁆𑀙𑀺𑀫𑀓𑁂 𑀫𑀬𑁆𑀳𑀁, 𑀅𑀳𑁄𑀲𑀺 𑀓𑀼𑀮𑀲𑀫𑁆𑀧𑀤𑀸.

𑁪𑁧𑁯.

‘‘𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀽𑀢𑁄 ¶ , 𑀫𑀳𑀸𑀭𑀢𑀦𑀲𑀜𑁆𑀘𑀬𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄 𑀳𑀺𑀢𑁆𑀯𑀸, 𑀳𑀺𑀭𑀜𑁆𑀜𑀲𑁆𑀲𑀸𑀧𑀺 𑀧𑀩𑁆𑀩𑀚𑀺𑀁.

𑁪𑁨𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁩-𑁪. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁨𑁧.

‘‘𑀲𑀼𑀫𑁂𑀥𑀁 ¶ 𑀪𑀕𑀯𑀦𑁆𑀢𑀸𑀳𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀯𑀽𑀧𑀓𑀝𑁆𑀞𑀁 𑀯𑀺𑀳𑀭𑀦𑁆𑀢𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁪𑁨𑁨.

‘‘𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀫𑀬𑀸𑀘𑀳𑀁.

𑁪𑁨𑁩.

‘‘𑀅𑀦𑀼𑀓𑀫𑁆𑀧 ¶ 𑀫𑀳𑀸𑀯𑀻𑀭, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀤𑀻𑀧𑀁 𑀢𑁂 𑀧𑀤𑀲𑁆𑀲𑀸𑀫𑀺, 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀛𑀸𑀬𑀢𑁄.

𑁪𑁨𑁪.

‘‘𑀅𑀥𑀺𑀯𑀸𑀲𑁂𑀲𑀺 𑀲𑁄 𑀥𑀻𑀭𑁄, 𑀲𑀬𑀫𑁆𑀪𑀽 𑀯𑀤𑀢𑀁 𑀯𑀭𑁄;

𑀤𑀼𑀫𑁂𑀲𑀼 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸, 𑀬𑀦𑁆𑀢𑀁 𑀬𑁄𑀚𑀺𑀬𑀳𑀁 𑀢𑀤𑀸.

𑁪𑁨𑁫.

‘‘𑀲𑀳𑀲𑁆𑀲𑀯𑀝𑁆𑀝𑀺𑀁 ¶ 𑀧𑀸𑀤𑀸𑀲𑀺𑀁, 𑀩𑀼𑀤𑁆𑀥𑀲𑁆𑀲 𑀮𑁄𑀓𑀩𑀦𑁆𑀥𑀼𑀦𑁄;

𑀲𑀢𑁆𑀢𑀸𑀳𑀁 𑀧𑀚𑁆𑀚𑀮𑀺𑀢𑁆𑀯𑀸𑀦, 𑀤𑀻𑀧𑀸 𑀯𑀽𑀧𑀲𑀫𑀺𑀁𑀲𑀼 𑀫𑁂.

𑁪𑁨𑁬.

‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀯𑀺𑀫𑀸𑀦𑀫𑀼𑀧𑀧𑀚𑁆𑀚𑀳𑀁.

𑁪𑁨𑁭.

‘‘𑀉𑀧𑀧𑀦𑁆𑀦𑀲𑁆𑀲 𑀤𑁂𑀯𑀢𑁆𑀢𑀁, 𑀩𑁆𑀬𑀫𑁆𑀳𑀁 𑀆𑀲𑀺 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀢𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁨𑁮.

‘‘𑀲𑀫𑀦𑁆𑀢𑀸 ¶ 𑀬𑁄𑀚𑀦𑀲𑀢𑀁, 𑀯𑀺𑀭𑁄𑀘𑁂𑀲𑀺𑀫𑀳𑀁 𑀢𑀤𑀸;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁨𑁯.

‘‘𑀢𑀺𑀁𑀲𑀓𑀧𑁆𑀧𑀸𑀦𑀺 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀦 𑀫𑀁 𑀓𑁂𑀘𑀻𑀢𑀺𑀫𑀜𑁆𑀜𑀦𑁆𑀢𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁩𑁦.

‘‘𑀅𑀝𑁆𑀞𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀤𑀺𑀯𑀸 𑀭𑀢𑁆𑀢𑀺𑀜𑁆𑀘 𑀧𑀲𑁆𑀲𑀸𑀫𑀺, 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀢𑀤𑀸.

𑁪𑁩𑁧.

‘‘𑀲𑀳𑀲𑁆𑀲𑀮𑁄𑀓𑀁 𑀜𑀸𑀡𑁂𑀦, 𑀧𑀲𑁆𑀲𑀸𑀫𑀺 𑀲𑀢𑁆𑀣𑀼 𑀲𑀸𑀲𑀦𑁂;

𑀤𑀺𑀩𑁆𑀩𑀘𑀓𑁆𑀔𑀼𑀫𑀦𑀼𑀧𑁆𑀧𑀢𑁆𑀢𑁄, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁩𑁨.

‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀺𑀢𑁄;

𑀢𑀲𑁆𑀲 𑀤𑀻𑀧𑁄 𑀫𑀬𑀸 𑀤𑀺𑀦𑁆𑀦𑁄, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁪𑁩𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁩-𑁫. 𑀧𑀼𑀡𑁆𑀡𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩𑁪.

‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀧𑀼𑀭𑀓𑁆𑀔𑀢𑁄𑀫𑁆𑀳𑀺 𑀲𑀺𑀲𑁆𑀲𑁂𑀳𑀺, 𑀉𑀧𑀕𑀘𑁆𑀙𑀺𑀁 𑀦𑀭𑀼𑀢𑁆𑀢𑀫𑀁.

𑁪𑁩𑁫.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀲𑀺, 𑀲𑀗𑁆𑀔𑀺𑀢𑁆𑀢𑁂𑀦 𑀫𑀳𑀸𑀫𑀼𑀦𑀺.

𑁪𑁩𑁬.

‘‘𑀢𑀸𑀳𑀁 ¶ 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀧𑀓𑁆𑀓𑀫𑀺𑀁 [𑀧𑀓𑁆𑀓𑀸𑀫𑀺𑀁 (𑀲𑀻. 𑀲𑁆𑀬𑀸.)] 𑀤𑀓𑁆𑀔𑀺𑀡𑀸𑀫𑀼𑀔𑁄.

𑁪𑁩𑁭.

‘‘𑀲𑀗𑁆𑀔𑀺𑀢𑁆𑀢𑁂𑀦 ¶ 𑀲𑀼𑀡𑀺𑀢𑁆𑀯𑀸𑀦, 𑀯𑀺𑀢𑁆𑀣𑀸𑀭𑁂𑀦 𑀅𑀪𑀸𑀲𑀬𑀺𑀁 [𑀅𑀤𑁂𑀲𑀬𑀺𑀁 (𑀲𑀻. 𑀲𑁆𑀬𑀸.)];

𑀲𑀩𑁆𑀩𑁂 𑀲𑀺𑀲𑁆𑀲𑀸 𑀅𑀢𑁆𑀢𑀫𑀦𑀸, 𑀲𑀼𑀢𑁆𑀯𑀸𑀦 𑀫𑀫 𑀪𑀸𑀲𑀢𑁄;

𑀲𑀓𑀁 𑀤𑀺𑀝𑁆𑀞𑀺𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀼𑀁.

𑁪𑁩𑁮.

‘‘𑀲𑀗𑁆𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀫𑀺, 𑀯𑀺𑀢𑁆𑀣𑀸𑀭𑁂𑀦 𑀢𑀣𑁂𑀯𑀳𑀁 [𑀤𑁂𑀲𑁂𑀲𑀺𑀁 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀬𑀺𑀁 (𑀓.)];

𑀅𑀪𑀺𑀥𑀫𑁆𑀫𑀦𑀬𑀜𑁆𑀜𑀽𑀳𑀁 ¶ , 𑀓𑀣𑀸𑀯𑀢𑁆𑀣𑀼𑀯𑀺𑀲𑀼𑀤𑁆𑀥𑀺𑀬𑀸;

𑀲𑀩𑁆𑀩𑁂𑀲𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁩𑁯.

‘‘𑀇𑀢𑁄 𑀧𑀜𑁆𑀘𑀲𑀢𑁂 𑀓𑀧𑁆𑀧𑁂, 𑀘𑀢𑀼𑀭𑁄 𑀲𑀼𑀧𑁆𑀧𑀓𑀸𑀲𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸.

𑁪𑁪𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀡𑁆𑀡𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁩-𑁬. 𑀉𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪𑁧.

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀲𑀼𑀚𑀸𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀲𑀻𑀢𑀺𑀓𑁄𑀝𑀺𑀦𑀺𑀘𑀬𑁄, 𑀧𑀳𑀽𑀢𑀥𑀦𑀥𑀜𑁆𑀜𑀯𑀸.

𑁪𑁪𑁨.

‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄.

𑁪𑁪𑁩.

‘‘𑀧𑀭𑀺𑀩𑁆𑀩𑀸𑀚𑀸 ¶ 𑀏𑀓𑀲𑀺𑀔𑀸 [𑀏𑀓𑀪𑀺𑀓𑁆𑀔𑀸 (𑀓.)], 𑀕𑁄𑀢𑀫𑀸

𑀩𑀼𑀤𑁆𑀥𑀲𑀸𑀯𑀓𑀸 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺].

𑀘𑀭𑀓𑀸 𑀢𑀸𑀧𑀲𑀸 𑀘𑁂𑀯, 𑀘𑀭𑀦𑁆𑀢𑀺 𑀫𑀳𑀺𑀬𑀸 𑀢𑀤𑀸.

𑁪𑁪𑁪.

‘‘𑀢𑁂𑀧𑀺 𑀫𑀁 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀯𑀺𑀲𑁆𑀲𑀼𑀢𑁄 𑀇𑀢𑀺;

𑀩𑀳𑀼𑀚𑁆𑀚𑀦𑁄 𑀫𑀁 𑀧𑀽𑀚𑁂𑀢𑀺, 𑀦𑀸𑀳𑀁 𑀧𑀽𑀚𑁂𑀫𑀺 𑀓𑀺𑀜𑁆𑀘𑀦𑀁.

𑁪𑁪𑁫.

‘‘𑀧𑀽𑀚𑀸𑀭𑀳𑀁 ¶ 𑀦 𑀧𑀲𑁆𑀲𑀸𑀫𑀺, 𑀫𑀸𑀦𑀢𑁆𑀣𑀤𑁆𑀥𑁄 𑀅𑀳𑀁 𑀢𑀤𑀸;

𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀦𑀢𑁆𑀣𑀺, 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑁂 𑀚𑀺𑀦𑁄.

𑁪𑁪𑁬.

‘‘𑀅𑀘𑁆𑀘𑀬𑁂𑀦 ¶ 𑀅𑀳𑁄𑀭𑀢𑁆𑀢𑀁, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄 [𑀦𑀸𑀬𑀓𑁄 (𑀲𑀻. 𑀲𑁆𑀬𑀸.)];

𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁪𑁪𑁭.

‘‘𑀯𑀺𑀢𑁆𑀣𑀸𑀭𑀺𑀓𑁂 𑀩𑀸𑀳𑀼𑀚𑀜𑁆𑀜𑁂, 𑀧𑀼𑀣𑀼𑀪𑀽𑀢𑁂 𑀘 𑀲𑀸𑀲𑀦𑁂;

𑀉𑀧𑀸𑀕𑀫𑀺 𑀢𑀤𑀸 𑀩𑀼𑀤𑁆𑀥𑁄, 𑀦𑀕𑀭𑀁 𑀳𑀁𑀲𑀲𑀯𑁆𑀳𑀬𑀁.

𑁪𑁪𑁮.

‘‘𑀧𑀺𑀢𑀼 𑀅𑀢𑁆𑀣𑀸𑀬 ¶ 𑀲𑁄 𑀩𑀼𑀤𑁆𑀥𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀘𑀓𑁆𑀔𑀼𑀫𑀸;

𑀢𑁂𑀦 𑀓𑀸𑀮𑁂𑀦 𑀧𑀭𑀺𑀲𑀸, 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀢𑀤𑀸.

𑁪𑁪𑁯.

‘‘𑀲𑀫𑁆𑀫𑀢𑁄 𑀫𑀦𑀼𑀚𑀸𑀦𑀁 𑀲𑁄, 𑀲𑀼𑀦𑀦𑁆𑀤𑁄 𑀦𑀸𑀫 𑀢𑀸𑀧𑀲𑁄;

𑀬𑀸𑀯𑀢𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀧𑀼𑀧𑁆𑀨𑁂𑀳𑀘𑁆𑀙𑀸𑀤𑀬𑀻 𑀢𑀤𑀸.

𑁪𑁫𑁦.

‘‘𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁂, 𑀲𑁂𑀝𑁆𑀞𑁂 𑀘 [𑀳𑁂𑀝𑁆𑀞𑀸 𑀘 (𑀓.)] 𑀧𑀼𑀧𑁆𑀨𑀫𑀡𑁆𑀟𑀧𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪𑁫𑁧.

‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑀼𑀤𑁆𑀥𑁄, 𑀯𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀯𑀼𑀝𑁆𑀞𑀺𑀬𑁄;

𑀅𑀝𑁆𑀞𑀫𑁂 𑀤𑀺𑀯𑀲𑁂 𑀧𑀢𑁆𑀢𑁂, 𑀲𑀼𑀦𑀦𑁆𑀤𑀁 𑀓𑀺𑀢𑁆𑀢𑀬𑀻 𑀚𑀺𑀦𑁄.

𑁪𑁫𑁨.

‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀲𑀁𑀲𑀭𑀦𑁆𑀢𑁄 𑀅𑀬𑀁 𑀪𑀯𑁂;

𑀲𑀩𑁆𑀩𑁂𑀲𑀁 𑀧𑀯𑀭𑁄 𑀳𑀼𑀢𑁆𑀯𑀸, 𑀪𑀯𑁂𑀲𑀼 𑀲𑀁𑀲𑀭𑀺𑀲𑁆𑀲𑀢𑀺.

𑁪𑁫𑁩.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺 ¶ , 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁫𑁪.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀧𑀼𑀡𑁆𑀡𑁄𑀢𑀺, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁪𑁫𑁫.

‘‘𑀏𑀯𑀁 𑀓𑀺𑀢𑁆𑀢𑀬𑀺 𑀲𑀫𑁆𑀩𑀼𑀤𑁆𑀥𑁄, 𑀲𑀼𑀦𑀦𑁆𑀤𑀁 𑀢𑀸𑀧𑀲𑀁 𑀢𑀤𑀸;

𑀳𑀸𑀲𑀬𑀦𑁆𑀢𑁄 𑀚𑀦𑀁 𑀲𑀩𑁆𑀩𑀁, 𑀤𑀲𑁆𑀲𑀬𑀦𑁆𑀢𑁄 𑀲𑀓𑀁 𑀩𑀮𑀁.

𑁪𑁫𑁬.

‘‘𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀲𑀼𑀦𑀦𑁆𑀤𑀁 𑀢𑀸𑀧𑀲𑀁 𑀚𑀦𑀸;

𑀩𑀼𑀤𑁆𑀥𑁂 𑀓𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀲𑁄𑀥𑁂𑀲𑀺 𑀕𑀢𑀺𑀫𑀢𑁆𑀢𑀦𑁄.

𑁪𑁫𑁭.

‘‘𑀢𑀢𑁆𑀣 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄, 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑀁;

𑀅𑀳𑀫𑁆𑀧𑀺 𑀓𑀸𑀭𑀁 𑀓𑀲𑁆𑀲𑀸𑀫𑀺, 𑀬𑀣𑀸 𑀧𑀲𑁆𑀲𑀸𑀫𑀺 𑀕𑁄𑀢𑀫𑀁.

𑁪𑁫𑁮.

‘‘𑀏𑀯𑀸𑀳𑀁 ¶ 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀓𑀺𑀭𑀺𑀬𑀁 𑀘𑀺𑀦𑁆𑀢𑀬𑀺𑀁 𑀫𑀫;

𑀓𑁆𑀬𑀸𑀳𑀁 𑀓𑀫𑁆𑀫𑀁 𑀆𑀘𑀭𑀸𑀫𑀺, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂.

𑁪𑁫𑁯.

‘‘𑀅𑀬𑀜𑁆𑀘 𑀧𑀸𑀞𑀺𑀓𑁄 𑀪𑀺𑀓𑁆𑀔𑀼, 𑀲𑀩𑁆𑀩𑀧𑀸𑀞𑀺𑀲𑁆𑀲 𑀲𑀸𑀲𑀦𑁂;

𑀯𑀺𑀦𑀬𑁂 𑀅𑀕𑁆𑀕𑀦𑀺𑀓𑁆𑀔𑀺𑀢𑁆𑀢𑁄, 𑀢𑀁 𑀞𑀸𑀦𑀁 𑀧𑀢𑁆𑀣𑀬𑁂 𑀅𑀳𑀁.

𑁪𑁬𑁦.

‘‘𑀇𑀤𑀁 ¶ 𑀫𑁂 𑀅𑀫𑀺𑀢𑀁 𑀪𑁄𑀕𑀁, 𑀅𑀓𑁆𑀔𑁄𑀪𑀁 𑀲𑀸𑀕𑀭𑀽𑀧𑀫𑀁;

𑀢𑁂𑀦 𑀪𑁄𑀕𑁂𑀦 𑀩𑀼𑀤𑁆𑀥𑀲𑁆𑀲, 𑀆𑀭𑀸𑀫𑀁 𑀫𑀸𑀧𑀬𑁂 𑀅𑀳𑀁.

𑁪𑁬𑁧.

‘‘𑀲𑁄𑀪𑀦𑀁 𑀦𑀸𑀫 𑀆𑀭𑀸𑀫𑀁, 𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀢𑁄;

𑀓𑀺𑀡𑀺𑀢𑁆𑀯𑀸 [𑀓𑀻𑀢𑁆𑀯𑀸 (𑀲𑀻.), 𑀓𑀺𑀢𑁆𑀯𑀸 (𑀓.)] 𑀲𑀢𑀲𑀳𑀲𑁆𑀲𑁂𑀦, 𑀲𑀗𑁆𑀖𑀸𑀭𑀸𑀫𑀁 𑀅𑀫𑀸𑀧𑀬𑀺𑀁.

𑁪𑁬𑁨.

‘‘𑀓𑀽𑀝𑀸𑀕𑀸𑀭𑁂 ¶ 𑀘 𑀧𑀸𑀲𑀸𑀤𑁂, 𑀫𑀡𑁆𑀟𑀧𑁂 𑀳𑀫𑁆𑀫𑀺𑀬𑁂 𑀕𑀼𑀳𑀸;

𑀘𑀗𑁆𑀓𑀫𑁂 𑀲𑀼𑀓𑀢𑁂 𑀓𑀢𑁆𑀯𑀸, 𑀲𑀗𑁆𑀖𑀸𑀭𑀸𑀫𑀁 𑀅𑀫𑀸𑀧𑀬𑀺𑀁.

𑁪𑁬𑁩.

‘‘𑀚𑀦𑁆𑀢𑀸𑀖𑀭𑀁 ¶ 𑀅𑀕𑁆𑀕𑀺𑀲𑀸𑀮𑀁, 𑀅𑀣𑁄 𑀉𑀤𑀓𑀫𑀸𑀴𑀓𑀁;

𑀦𑁆𑀳𑀸𑀦𑀖𑀭𑀁 𑀫𑀸𑀧𑀬𑀺𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁.

𑁪𑁬𑁪.

‘‘𑀆𑀲𑀦𑁆𑀤𑀺𑀬𑁄 𑀧𑀻𑀞𑀓𑁂 𑀘, 𑀧𑀭𑀺𑀪𑁄𑀕𑁂 𑀘 𑀪𑀸𑀚𑀦𑁂;

𑀆𑀭𑀸𑀫𑀺𑀓𑀜𑁆𑀘 𑀪𑁂𑀲𑀚𑁆𑀚𑀁, 𑀲𑀩𑁆𑀩𑀫𑁂𑀢𑀁 𑀅𑀤𑀸𑀲𑀳𑀁.

𑁪𑁬𑁫.

‘‘𑀆𑀭𑀓𑁆𑀔𑀁 𑀧𑀝𑁆𑀞𑀧𑁂𑀢𑁆𑀯𑀸𑀦, 𑀧𑀸𑀓𑀸𑀭𑀁 𑀓𑀸𑀭𑀬𑀺𑀁 𑀤𑀴𑁆𑀳𑀁;

𑀫𑀸 𑀦𑀁 𑀓𑁄𑀘𑀺 𑀯𑀺𑀳𑁂𑀞𑁂𑀲𑀺, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁪𑁬𑁬.

‘‘𑀲𑀢𑀲𑀳𑀲𑁆𑀲𑁂𑀦𑀸𑀯𑀸𑀲𑀁 [𑀆𑀯𑀸𑀲𑀁 𑀲𑀢𑀲𑀳𑀲𑁆𑀲𑁂𑀦 (𑀲𑀻.), 𑀆𑀯𑀸𑀲𑁂 𑀲𑀢𑀲𑀳𑀲𑁆𑀲𑁂 (𑀲𑁆𑀬𑀸.)], 𑀲𑀗𑁆𑀖𑀸𑀭𑀸𑀫𑁂 𑀅𑀫𑀸𑀧𑀬𑀺𑀁;

𑀯𑁂𑀧𑀼𑀮𑁆𑀮𑀁 𑀢𑀁 𑀫𑀸𑀧𑀬𑀺𑀢𑁆𑀯𑀸 [𑀯𑁂𑀧𑀼𑀮𑁆𑀮𑀢𑀁 𑀧𑀸𑀧𑀬𑀺𑀢𑁆𑀯𑀸 (𑀲𑀻.)], 𑀲𑀫𑁆𑀩𑀼𑀤𑁆𑀥𑀁 𑀉𑀧𑀦𑀸𑀫𑀬𑀺𑀁.

𑁪𑁬𑁭.

‘‘𑀦𑀺𑀝𑁆𑀞𑀸𑀧𑀺𑀢𑁄 𑀫𑀬𑀸𑀭𑀸𑀫𑁄, 𑀲𑀫𑁆𑀧𑀝𑀺𑀘𑁆𑀙 𑀢𑀼𑀯𑀁 𑀫𑀼𑀦𑀺;

𑀦𑀺𑀬𑁆𑀬𑀸𑀤𑁂𑀲𑁆𑀲𑀸𑀫𑀺 𑀢𑀁 𑀯𑀻𑀭 [𑀢𑁂 𑀯𑀻𑀭 (𑀲𑀻.), 𑀢𑀁 𑀥𑀻𑀭 (𑀲𑁆𑀬𑀸.)], 𑀅𑀥𑀺𑀯𑀸𑀲𑁂𑀳𑀺 𑀘𑀓𑁆𑀔𑀼𑀫.

𑁪𑁬𑁮.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀅𑀥𑀺𑀯𑀸𑀲𑁂𑀲𑀺 𑀦𑀸𑀬𑀓𑁄.

𑁪𑁬𑁯.

‘‘𑀅𑀥𑀺𑀯𑀸𑀲𑀦𑀫𑀜𑁆𑀜𑀸𑀬, 𑀲𑀩𑁆𑀩𑀜𑁆𑀜𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀪𑁄𑀚𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸, 𑀓𑀸𑀮𑀫𑀸𑀭𑁄𑀘𑀬𑀺𑀁 𑀅𑀳𑀁.

𑁪𑁭𑁦.

‘‘𑀆𑀭𑁄𑀘𑀺𑀢𑀫𑁆𑀳𑀺 𑀓𑀸𑀮𑀫𑁆𑀳𑀺, 𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑁄;

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀆𑀭𑀸𑀫𑀁 𑀫𑁂 𑀉𑀧𑀸𑀕𑀫𑀺.

𑁪𑁭𑁧.

‘‘𑀦𑀺𑀲𑀺𑀦𑁆𑀦𑀁 ¶ 𑀓𑀸𑀮𑀫𑀜𑁆𑀜𑀸𑀬, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀺𑀁;

𑀪𑀼𑀢𑁆𑀢𑀸𑀯𑀺𑀁 𑀓𑀸𑀮𑀫𑀜𑁆𑀜𑀸𑀬, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁪𑁭𑁨.

‘‘𑀓𑀻𑀢𑁄 𑀲𑀢𑀲𑀳𑀲𑁆𑀲𑁂𑀦, 𑀢𑀢𑁆𑀢𑀓𑁂𑀦𑁂𑀯 𑀓𑀸𑀭𑀺𑀢𑁄;

𑀲𑁄𑀪𑀦𑁄 𑀦𑀸𑀫 𑀆𑀭𑀸𑀫𑁄, 𑀲𑀫𑁆𑀧𑀝𑀺𑀘𑁆𑀙 𑀢𑀼𑀯𑀁 𑀫𑀼𑀦𑀺.

𑁪𑁭𑁩.

‘‘𑀇𑀫𑀺𑀦𑀸𑀭𑀸𑀫𑀤𑀸𑀦𑁂𑀦 ¶ , 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑁄𑀳𑀁, 𑀮𑀪𑀸𑀫𑀺 𑀫𑀫 𑀧𑀢𑁆𑀣𑀺𑀢𑀁.

𑁪𑁭𑁪.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ¶ 𑀲𑀫𑁆𑀩𑀼𑀤𑁆𑀥𑁄, 𑀲𑀗𑁆𑀖𑀸𑀭𑀸𑀫𑀁 𑀲𑀼𑀫𑀸𑀧𑀺𑀢𑀁;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁪𑁭𑁫.

‘‘𑀬𑁄 𑀲𑁄 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺, 𑀲𑀗𑁆𑀖𑀸𑀭𑀸𑀫𑀁 𑀲𑀼𑀫𑀸𑀧𑀺𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁪𑁭𑁬.

‘‘𑀳𑀢𑁆𑀣𑀻 ¶ 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻, 𑀲𑁂𑀦𑀸 𑀘 𑀘𑀢𑀼𑀭𑀗𑁆𑀕𑀺𑀦𑀻;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀲𑀗𑁆𑀖𑀸𑀭𑀸𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁭𑁭.

‘‘𑀲𑀝𑁆𑀞𑀺 𑀢𑀽𑀭𑀲𑀳𑀲𑁆𑀲𑀸𑀦𑀺 [𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺 (𑀲𑀻. 𑀲𑁆𑀬𑀸.)], 𑀪𑁂𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀲𑀗𑁆𑀖𑀸𑀭𑀸𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁭𑁮.

‘‘𑀙𑀴𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸.

𑁪𑁭𑁯.

‘‘𑀅𑀴𑀸𑀭𑀧𑀫𑁆𑀳𑀸 𑀳𑀲𑀼𑀮𑀸, 𑀲𑀼𑀲𑀜𑁆𑀜𑀸 𑀢𑀦𑀼𑀫𑀚𑁆𑀛𑀺𑀫𑀸;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀲𑀗𑁆𑀖𑀸𑀭𑀸𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁮𑁦.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁪𑁮𑁧.

‘‘𑀤𑁂𑀯𑀭𑀸𑀚𑁂𑀦 𑀧𑀢𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀧𑀝𑀺𑀮𑀪𑀺𑀲𑁆𑀲𑀢𑀺;

𑀅𑀦𑀽𑀦𑀪𑁄𑀕𑁄 𑀳𑀼𑀢𑁆𑀯𑀸𑀦, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁪𑁮𑁨.

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁪𑁮𑁩.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺 ¶ , 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁮𑁪.

‘‘𑀢𑀲𑁆𑀲 ¶ 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀉𑀧𑀸𑀮𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁪𑁮𑁫.

‘‘𑀯𑀺𑀦𑀬𑁂 𑀧𑀸𑀭𑀫𑀺𑀁 𑀧𑀢𑁆𑀯𑀸, 𑀞𑀸𑀦𑀸𑀞𑀸𑀦𑁂 𑀘 𑀓𑁄𑀯𑀺𑀤𑁄;

𑀚𑀺𑀦𑀲𑀸𑀲𑀦𑀁 𑀥𑀸𑀭𑁂𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀢𑀺𑀦𑀸𑀲𑀯𑁄.

𑁪𑁮𑁬.

‘‘𑀲𑀩𑁆𑀩𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺.

𑁪𑁮𑁭.

‘‘𑀅𑀧𑀭𑀺𑀫𑁂𑀬𑁆𑀬𑀼𑀧𑀸𑀤𑀸𑀬, 𑀧𑀢𑁆𑀣𑁂𑀫𑀺 𑀢𑀯 𑀲𑀸𑀲𑀦𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

𑁪𑁮𑁮.

‘‘𑀬𑀣𑀸 ¶ 𑀲𑀽𑀮𑀸𑀯𑀼𑀢𑁄 𑀧𑁄𑀲𑁄, 𑀭𑀸𑀚𑀤𑀡𑁆𑀟𑁂𑀦 𑀢𑀚𑁆𑀚𑀺𑀢𑁄;

𑀲𑀽𑀮𑁂 𑀲𑀸𑀢𑀁 𑀅𑀯𑀺𑀦𑁆𑀤𑀦𑁆𑀢𑁄, 𑀧𑀭𑀺𑀫𑀼𑀢𑁆𑀢𑀺𑀁𑀯 𑀇𑀘𑁆𑀙𑀢𑀺.

𑁪𑁮𑁯.

‘‘𑀢𑀣𑁂𑀯𑀸𑀳𑀁 ¶ 𑀫𑀳𑀸𑀯𑀻𑀭, 𑀪𑀯𑀤𑀡𑁆𑀟𑁂𑀦 𑀢𑀚𑁆𑀚𑀺𑀢𑁄;

𑀓𑀫𑁆𑀫𑀲𑀽𑀮𑀸𑀯𑀼𑀢𑁄 𑀲𑀦𑁆𑀢𑁄, 𑀧𑀺𑀧𑀸𑀲𑀸𑀯𑁂𑀤𑀦𑀝𑁆𑀝𑀺𑀢𑁄.

𑁪𑁯𑁦.

‘‘𑀪𑀯𑁂 𑀲𑀸𑀢𑀁 𑀦 𑀯𑀺𑀦𑁆𑀤𑀸𑀫𑀺, 𑀟𑀬𑁆𑀳𑀦𑁆𑀢𑁄 𑀢𑀻𑀳𑀺 𑀅𑀕𑁆𑀕𑀺𑀪𑀺;

𑀧𑀭𑀺𑀫𑀼𑀢𑁆𑀢𑀺𑀁 𑀕𑀯𑁂𑀲𑀸𑀫𑀺, 𑀬𑀣𑀸𑀧𑀺 𑀭𑀸𑀚𑀤𑀡𑁆𑀟𑀺𑀢𑁄.

𑁪𑁯𑁧.

‘‘𑀬𑀣𑀸 ¶ 𑀯𑀺𑀲𑀸𑀤𑁄 𑀧𑀼𑀭𑀺𑀲𑁄, 𑀯𑀺𑀲𑁂𑀦 𑀧𑀭𑀺𑀧𑀻𑀴𑀺𑀢𑁄;

𑀅𑀕𑀤𑀁 𑀲𑁄 𑀕𑀯𑁂𑀲𑁂𑀬𑁆𑀬, 𑀯𑀺𑀲𑀖𑀸𑀢𑀸𑀬𑀼𑀧𑀸𑀮𑀦𑀁 [𑀯𑀺𑀲𑀖𑀸𑀢𑀸𑀬𑀼𑀧𑀸𑀬𑀦𑀁 (𑀲𑁆𑀬𑀸. 𑀓.)].

𑁪𑁯𑁨.

‘‘𑀕𑀯𑁂𑀲𑀫𑀸𑀦𑁄 𑀧𑀲𑁆𑀲𑁂𑀬𑁆𑀬, 𑀅𑀕𑀤𑀁 𑀯𑀺𑀲𑀖𑀸𑀢𑀓𑀁;

𑀢𑀁 𑀧𑀺𑀯𑀺𑀢𑁆𑀯𑀸 𑀲𑀼𑀔𑀻 𑀅𑀲𑁆𑀲, 𑀯𑀺𑀲𑀫𑁆𑀳𑀸 𑀧𑀭𑀺𑀫𑀼𑀢𑁆𑀢𑀺𑀬𑀸.

𑁪𑁯𑁩.

‘‘𑀢𑀣𑁂𑀯𑀸𑀳𑀁 𑀫𑀳𑀸𑀯𑀻𑀭, 𑀬𑀣𑀸 𑀯𑀺𑀲𑀳𑀢𑁄 𑀦𑀭𑁄;

𑀲𑀫𑁆𑀧𑀻𑀴𑀺𑀢𑁄 𑀅𑀯𑀺𑀚𑁆𑀚𑀸𑀬, 𑀲𑀤𑁆𑀥𑀫𑁆𑀫𑀸𑀕𑀤𑀫𑁂𑀲𑀳𑀁.

𑁪𑁯𑁪.

‘‘𑀥𑀫𑁆𑀫𑀸𑀕𑀤𑀁 𑀕𑀯𑁂𑀲𑀦𑁆𑀢𑁄, 𑀅𑀤𑁆𑀤𑀓𑁆𑀔𑀺𑀁 𑀲𑀓𑁆𑀬𑀲𑀸𑀲𑀦𑀁;

𑀅𑀕𑁆𑀕𑀁 𑀲𑀩𑁆𑀩𑁄𑀲𑀥𑀸𑀦𑀁 𑀢𑀁, 𑀲𑀩𑁆𑀩𑀲𑀮𑁆𑀮𑀯𑀺𑀦𑁄𑀤𑀦𑀁.

𑁪𑁯𑁫.

‘‘𑀥𑀫𑁆𑀫𑁄𑀲𑀥𑀁 𑀧𑀺𑀯𑀺𑀢𑁆𑀯𑀸𑀦, 𑀯𑀺𑀲𑀁 𑀲𑀩𑁆𑀩𑀁 𑀲𑀫𑀽𑀳𑀦𑀺𑀁;

𑀅𑀚𑀭𑀸𑀫𑀭𑀁 𑀲𑀻𑀢𑀺𑀪𑀸𑀯𑀁, 𑀦𑀺𑀩𑁆𑀩𑀸𑀦𑀁 𑀨𑀲𑁆𑀲𑀬𑀺𑀁 𑀅𑀳𑀁.

𑁪𑁯𑁬.

‘‘𑀬𑀣𑀸 𑀪𑀽𑀢𑀝𑁆𑀝𑀺𑀢𑁄 𑀧𑁄𑀲𑁄, 𑀪𑀽𑀢𑀕𑁆𑀕𑀸𑀳𑁂𑀦 𑀧𑀻𑀴𑀺𑀢𑁄;

𑀪𑀽𑀢𑀯𑁂𑀚𑁆𑀚𑀁 𑀕𑀯𑁂𑀲𑁂𑀬𑁆𑀬, 𑀪𑀽𑀢𑀲𑁆𑀫𑀸 𑀧𑀭𑀺𑀫𑀼𑀢𑁆𑀢𑀺𑀬𑀸.

𑁪𑁯𑁭.

‘‘𑀕𑀯𑁂𑀲𑀫𑀸𑀦𑁄 ¶ 𑀧𑀲𑁆𑀲𑁂𑀬𑁆𑀬, 𑀪𑀽𑀢𑀯𑀺𑀚𑁆𑀚𑀸𑀲𑀼 𑀓𑁄𑀯𑀺𑀤𑀁;

𑀢𑀲𑁆𑀲 𑀲𑁄 𑀯𑀺𑀳𑀦𑁂 𑀪𑀽𑀢𑀁, 𑀲𑀫𑀽𑀮𑀜𑁆𑀘 𑀯𑀺𑀦𑀸𑀲𑀬𑁂.

𑁪𑁯𑁮.

‘‘𑀢𑀣𑁂𑀯𑀸𑀳𑀁 ¶ 𑀫𑀳𑀸𑀯𑀻𑀭, 𑀢𑀫𑀕𑁆𑀕𑀸𑀳𑁂𑀦 𑀧𑀻𑀴𑀺𑀢𑁄;

𑀜𑀸𑀡𑀸𑀮𑁄𑀓𑀁 𑀕𑀯𑁂𑀲𑀸𑀫𑀺, 𑀢𑀫𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸.

𑁪𑁯𑁯.

‘‘𑀅𑀣𑀤𑁆𑀤𑀲𑀁 𑀲𑀓𑁆𑀬𑀫𑀼𑀦𑀺𑀁, 𑀓𑀺𑀮𑁂𑀲𑀢𑀫𑀲𑁄𑀥𑀦𑀁;

𑀲𑁄 𑀫𑁂 𑀢𑀫𑀁 𑀯𑀺𑀦𑁄𑀤𑁂𑀲𑀺, 𑀪𑀽𑀢𑀯𑁂𑀚𑁆𑀚𑁄𑀯 𑀪𑀽𑀢𑀓𑀁.

𑁫𑁦𑁦.

‘‘𑀲𑀁𑀲𑀸𑀭𑀲𑁄𑀢𑀁 𑀲𑀜𑁆𑀙𑀺𑀦𑁆𑀤𑀺𑀁, 𑀢𑀡𑁆𑀳𑀸𑀲𑁄𑀢𑀁 𑀦𑀺𑀯𑀸𑀭𑀬𑀺𑀁;

𑀪𑀯𑀁 𑀉𑀕𑁆𑀖𑀸𑀝𑀬𑀺𑀁 𑀲𑀩𑁆𑀩𑀁, 𑀪𑀽𑀢𑀯𑁂𑀚𑁆𑀚𑁄𑀯 𑀫𑀽𑀮𑀢𑁄.

𑁫𑁦𑁧.

‘‘𑀕𑀭𑀼𑀴𑁄 𑀬𑀣𑀸 𑀑𑀧𑀢𑀢𑀺, 𑀧𑀦𑁆𑀦𑀕𑀁 𑀪𑀓𑁆𑀔𑀫𑀢𑁆𑀢𑀦𑁄;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀯𑀺𑀓𑁆𑀔𑁄𑀪𑁂𑀢𑀺 𑀫𑀳𑀸𑀲𑀭𑀁.

𑁫𑁦𑁨.

‘‘𑀧𑀦𑁆𑀦𑀕𑀁 ¶ 𑀲𑁄 𑀕𑀳𑁂𑀢𑁆𑀯𑀸𑀦, 𑀅𑀥𑁄𑀲𑀻𑀲𑀁 𑀯𑀺𑀳𑁂𑀞𑀬𑀁;

𑀆𑀤𑀸𑀬 𑀲𑁄 𑀧𑀓𑁆𑀓𑀫𑀢𑀺, 𑀬𑁂𑀦𑀓𑀸𑀫𑀁 𑀯𑀺𑀳𑀗𑁆𑀕𑀫𑁄.

𑁫𑁦𑁩.

‘‘𑀢𑀣𑁂𑀯𑀸𑀳𑀁 𑀫𑀳𑀸𑀯𑀻𑀭, 𑀬𑀣𑀸𑀧𑀺 𑀕𑀭𑀼𑀴𑁄 𑀩𑀮𑀻;

𑀅𑀲𑀗𑁆𑀔𑀢𑀁 𑀕𑀯𑁂𑀲𑀦𑁆𑀢𑁄, 𑀤𑁄𑀲𑁂 𑀯𑀺𑀓𑁆𑀔𑀸𑀮𑀬𑀺𑀁 𑀅𑀳𑀁.

𑁫𑁦𑁪.

‘‘𑀤𑀺𑀝𑁆𑀞𑁄 𑀅𑀳𑀁 𑀥𑀫𑁆𑀫𑀯𑀭𑀁, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀁;

𑀆𑀤𑀸𑀬 𑀯𑀺𑀳𑀭𑀸𑀫𑁂𑀢𑀁, 𑀕𑀭𑀼𑀴𑁄 𑀧𑀦𑁆𑀦𑀕𑀁 𑀬𑀣𑀸.

𑁫𑁦𑁫.

‘‘𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸, 𑀚𑀸𑀢𑀸 𑀘𑀺𑀢𑁆𑀢𑀮𑀢𑀸𑀯𑀦𑁂;

𑀢𑀲𑁆𑀲𑀸 𑀯𑀲𑁆𑀲𑀲𑀳𑀲𑁆𑀲𑁂𑀦, 𑀏𑀓𑀁 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

𑁫𑁦𑁬.

‘‘𑀢𑀁 ¶ 𑀤𑁂𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑀸𑀯𑀤𑀽𑀭𑀨𑀮𑁂 𑀲𑀢𑀺;

𑀤𑁂𑀯𑀸𑀦𑀁 𑀲𑀸 𑀧𑀺𑀬𑀸 𑀏𑀯𑀁, 𑀆𑀲𑀸𑀯𑀢𑀻 𑀮𑀢𑀼𑀢𑁆𑀢𑀫𑀸.

𑁫𑁦𑁭.

‘‘𑀲𑀢𑀲𑀳𑀲𑁆𑀲𑀼𑀧𑀸𑀤𑀸𑀬, 𑀢𑀸𑀳𑀁 𑀧𑀭𑀺𑀘𑀭𑁂 𑀫𑀼𑀦𑀺;

𑀲𑀸𑀬𑀁 𑀧𑀸𑀢𑀁 𑀦𑀫𑀲𑁆𑀲𑀸𑀫𑀺, 𑀤𑁂𑀯𑀸 𑀆𑀲𑀸𑀯𑀢𑀺𑀁 𑀬𑀣𑀸.

𑁫𑁦𑁮.

‘‘𑀅𑀯𑀜𑁆𑀛𑀸 𑀧𑀸𑀭𑀺𑀘𑀭𑀺𑀬𑀸, 𑀅𑀫𑁄𑀖𑀸 𑀘 𑀦𑀫𑀲𑁆𑀲𑀦𑀸;

𑀤𑀽𑀭𑀸𑀕𑀢𑀫𑁆𑀧𑀺 𑀫𑀁 𑀲𑀦𑁆𑀢𑀁, 𑀔𑀡𑁄𑀬𑀁 𑀦 𑀯𑀺𑀭𑀸𑀥𑀬𑀺.

𑁫𑁦𑁯.

‘‘𑀧𑀝𑀺𑀲𑀦𑁆𑀥𑀺𑀁 𑀦 𑀧𑀲𑁆𑀲𑀸𑀫𑀺, 𑀯𑀺𑀘𑀺𑀦𑀦𑁆𑀢𑁄 𑀪𑀯𑁂 𑀅𑀳𑀁;

𑀦𑀺𑀭𑀽𑀧𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄 [𑀯𑀺𑀧𑁆𑀧𑀬𑀼𑀢𑁆𑀢𑁄 (𑀓.)], 𑀉𑀧𑀲𑀦𑁆𑀢𑁄 𑀘𑀭𑀸𑀫𑀳𑀁.

𑁫𑁧𑁦.

‘‘𑀬𑀣𑀸𑀧𑀺 ¶ 𑀧𑀤𑀼𑀫𑀁 𑀦𑀸𑀫, 𑀲𑀽𑀭𑀺𑀬𑀭𑀁𑀲𑁂𑀦 𑀧𑀼𑀧𑁆𑀨𑀢𑀺;

𑀢𑀣𑁂𑀯𑀸𑀳𑀁 𑀫𑀳𑀸𑀯𑀻𑀭, 𑀩𑀼𑀤𑁆𑀥𑀭𑀁𑀲𑁂𑀦 𑀧𑀼𑀧𑁆𑀨𑀺𑀢𑁄.

𑁫𑁧𑁧.

‘‘𑀬𑀣𑀸 𑀩𑀮𑀸𑀓𑀬𑁄𑀦𑀺𑀫𑁆𑀳𑀺, 𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄 [𑀧𑀼𑀫𑀸 (𑀲𑀻. 𑀲𑁆𑀬𑀸.)] 𑀲𑀤𑀸;

𑀫𑁂𑀖𑁂𑀲𑀼 𑀕𑀚𑁆𑀚𑀫𑀸𑀦𑁂𑀲𑀼, 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀢𑀸 𑀲𑀤𑀸.

𑁫𑁧𑁨.

‘‘𑀘𑀺𑀭𑀫𑁆𑀧𑀺 𑀕𑀩𑁆𑀪𑀁 𑀥𑀸𑀭𑁂𑀦𑁆𑀢𑀺, 𑀬𑀸𑀯 𑀫𑁂𑀖𑁄 𑀦 𑀕𑀚𑁆𑀚𑀢𑀺;

𑀪𑀸𑀭𑀢𑁄 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀬𑀤𑀸 𑀫𑁂𑀖𑁄 𑀧𑀯𑀲𑁆𑀲𑀢𑀺.

𑁫𑁧𑁩.

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 ¶ , 𑀥𑀫𑁆𑀫𑀫𑁂𑀖𑁂𑀦 𑀕𑀚𑁆𑀚𑀢𑁄;

𑀲𑀤𑁆𑀤𑁂𑀦 𑀥𑀫𑁆𑀫𑀫𑁂𑀖𑀲𑁆𑀲, 𑀥𑀫𑁆𑀫𑀕𑀩𑁆𑀪𑀁 𑀅𑀕𑀡𑁆𑀳𑀳𑀁.

𑁫𑁧𑁪.

𑀲𑀢𑀲𑀳𑀲𑁆𑀲𑀼𑀧𑀸𑀤𑀸𑀬, 𑀧𑀼𑀜𑁆𑀜𑀕𑀩𑁆𑀪𑀁 𑀥𑀭𑁂𑀫𑀳𑀁;

𑀦𑀧𑁆𑀧𑀫𑀼𑀘𑁆𑀘𑀸𑀫𑀺 𑀪𑀸𑀭𑀢𑁄, 𑀥𑀫𑁆𑀫𑀫𑁂𑀖𑁄 𑀦 𑀕𑀚𑁆𑀚𑀢𑀺.

𑁫𑁧𑁫.

‘‘𑀬𑀤𑀸 𑀢𑀼𑀯𑀁 𑀲𑀓𑁆𑀬𑀫𑀼𑀦𑀺, 𑀭𑀫𑁆𑀫𑁂 𑀓𑀧𑀺𑀮𑀯𑀢𑁆𑀣𑀯𑁂;

𑀕𑀚𑁆𑀚𑀲𑀺 𑀥𑀫𑁆𑀫𑀫𑁂𑀖𑁂𑀦, 𑀪𑀸𑀭𑀢𑁄 𑀧𑀭𑀺𑀫𑀼𑀘𑁆𑀘𑀳𑀁.

𑁫𑁧𑁬.

‘‘𑀲𑀼𑀜𑁆𑀜𑀢𑀁 ¶ 𑀅𑀦𑀺𑀫𑀺𑀢𑁆𑀢𑀜𑁆𑀘, 𑀢𑀣𑀸𑀧𑁆𑀧𑀡𑀺𑀳𑀺𑀢𑀫𑁆𑀧𑀺 𑀘;

𑀘𑀢𑀼𑀭𑁄 𑀘 𑀨𑀮𑁂 𑀲𑀩𑁆𑀩𑁂, 𑀥𑀫𑁆𑀫𑁂𑀯𑀁 𑀯𑀺𑀚𑀦𑀬𑀺𑀁 [𑀯𑀺𑀚𑀝𑀬𑀺𑀁 (𑀓.) 𑀩𑀮𑀸𑀓𑀸𑀦𑀁 𑀯𑀺𑀚𑀸𑀬𑀦𑀽𑀧𑀫𑀸𑀬 𑀲𑀁𑀲𑀦𑁆𑀤𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄] 𑀅𑀳𑀁.

𑀤𑀼𑀢𑀺𑀬𑀪𑀸𑀡𑀯𑀸𑀭𑀁.

𑁫𑁧𑁭.

‘‘𑀅𑀧𑀭𑀺𑀫𑁂𑀬𑁆𑀬𑀼𑀧𑀸𑀤𑀸𑀬, 𑀧𑀢𑁆𑀣𑁂𑀫𑀺 𑀢𑀯 𑀲𑀸𑀲𑀦𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀁.

𑁫𑁧𑁮.

‘‘𑀯𑀺𑀦𑀬𑁂 ¶ 𑀧𑀸𑀭𑀫𑀺𑀁 𑀧𑀢𑁆𑀢𑁄, 𑀬𑀣𑀸𑀧𑀺 𑀧𑀸𑀞𑀺𑀓𑁄 𑀇𑀲𑀺;

𑀦 𑀫𑁂 𑀲𑀫𑀲𑀫𑁄 𑀅𑀢𑁆𑀣𑀺, 𑀥𑀸𑀭𑁂𑀫𑀺 𑀲𑀸𑀲𑀦𑀁 𑀅𑀳𑀁.

𑁫𑁧𑁯.

‘‘𑀯𑀺𑀦𑀬𑁂 𑀔𑀦𑁆𑀥𑀓𑁂 𑀘𑀸𑀧𑀺, 𑀢𑀺𑀓𑀘𑁆𑀙𑁂𑀤𑁂 𑀘 𑀧𑀜𑁆𑀘𑀓𑁂 [𑀧𑀜𑁆𑀘𑀫𑁂 (𑀲𑀻.)];

𑀏𑀢𑁆𑀣 𑀫𑁂 𑀯𑀺𑀫𑀢𑀺 𑀦𑀢𑁆𑀣𑀺, 𑀅𑀓𑁆𑀔𑀭𑁂 𑀩𑁆𑀬𑀜𑁆𑀚𑀦𑁂𑀧𑀺 𑀯𑀸.

𑁫𑁨𑁦.

‘‘𑀦𑀺𑀕𑁆𑀕𑀳𑁂 𑀧𑀝𑀺𑀓𑀫𑁆𑀫𑁂 𑀘, 𑀞𑀸𑀦𑀸𑀞𑀸𑀦𑁂 𑀘 𑀓𑁄𑀯𑀺𑀤𑁄;

𑀑𑀲𑀸𑀭𑀡𑁂 𑀯𑀼𑀝𑁆𑀞𑀸𑀧𑀦𑁂, 𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀢𑁄.

𑁫𑁨𑁧.

‘‘𑀯𑀺𑀦𑀬𑁂 𑀔𑀦𑁆𑀥𑀓𑁂 𑀯𑀸𑀧𑀺, 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀁 𑀅𑀳𑀁;

𑀉𑀪𑀢𑁄 𑀯𑀺𑀦𑀺𑀯𑁂𑀞𑁂𑀢𑁆𑀯𑀸, 𑀭𑀲𑀢𑁄 𑀑𑀲𑀭𑁂𑀬𑁆𑀬𑀳𑀁.

𑁫𑁨𑁨.

‘‘𑀦𑀺𑀭𑀼𑀢𑁆𑀢𑀺𑀬𑀸 ¶ ¶ 𑀲𑀼𑀓𑀼𑀲𑀮𑁄, 𑀅𑀢𑁆𑀣𑀸𑀦𑀢𑁆𑀣𑁂 𑀘 𑀓𑁄𑀯𑀺𑀤𑁄;

𑀅𑀦𑀜𑁆𑀜𑀸𑀢𑀁 𑀫𑀬𑀸 𑀦𑀢𑁆𑀣𑀺, 𑀏𑀓𑀕𑁆𑀕𑁄 𑀲𑀢𑁆𑀣𑀼 𑀲𑀸𑀲𑀦𑁂.

𑁫𑁨𑁩.

‘‘𑀭𑀽𑀧𑀤𑀓𑁆𑀔𑁄 [𑀭𑀽𑀧𑀭𑀓𑁆𑀔𑁄 (?) 𑀫𑀺𑀮𑀺𑀦𑁆𑀤𑀧𑀜𑁆𑀳𑁄 𑀥𑀫𑁆𑀫𑀦𑀕𑀭𑀸𑀥𑀺𑀓𑀸𑀭𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀳𑀁 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂;

𑀓𑀗𑁆𑀔𑀁 𑀲𑀩𑁆𑀩𑀁 𑀯𑀺𑀦𑁄𑀤𑁂𑀫𑀺, 𑀙𑀺𑀦𑁆𑀤𑀸𑀫𑀺 𑀲𑀩𑁆𑀩𑀲𑀁𑀲𑀬𑀁.

𑁫𑁨𑁪.

‘‘𑀧𑀤𑀁 𑀅𑀦𑀼𑀧𑀤𑀜𑁆𑀘𑀸𑀧𑀺, 𑀅𑀓𑁆𑀔𑀭𑀜𑁆𑀘𑀸𑀧𑀺 𑀩𑁆𑀬𑀜𑁆𑀚𑀦𑀁;

𑀦𑀺𑀤𑀸𑀦𑁂 𑀧𑀭𑀺𑀬𑁄𑀲𑀸𑀦𑁂, 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄 𑀅𑀳𑀁.

𑁫𑁨𑁫.

‘‘𑀬𑀣𑀸𑀧𑀺 𑀭𑀸𑀚𑀸 𑀩𑀮𑀯𑀸, 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀦𑁆𑀢𑀧𑁂;

𑀯𑀺𑀚𑀺𑀦𑀺𑀢𑁆𑀯𑀸𑀦 𑀲𑀗𑁆𑀕𑀸𑀫𑀁, 𑀦𑀕𑀭𑀁 𑀢𑀢𑁆𑀣 𑀫𑀸𑀧𑀬𑁂.

𑁫𑁨𑁬.

‘‘𑀧𑀸𑀓𑀸𑀭𑀁 𑀧𑀭𑀺𑀔𑀜𑁆𑀘𑀸𑀧𑀺, 𑀏𑀲𑀺𑀓𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀁;

𑀅𑀝𑁆𑀝𑀸𑀮𑀓𑁂 𑀘 𑀯𑀺𑀯𑀺𑀥𑁂, 𑀓𑀸𑀭𑀬𑁂 𑀦𑀕𑀭𑁂 𑀩𑀳𑀽.

𑁫𑁨𑁭.

‘‘𑀲𑀺𑀗𑁆𑀖𑀸𑀝𑀓𑀁 𑀘𑀘𑁆𑀘𑀭𑀜𑁆𑀘, 𑀲𑀼𑀯𑀺𑀪𑀢𑁆𑀢𑀦𑁆𑀢𑀭𑀸𑀧𑀡𑀁;

𑀓𑀸𑀭𑀬𑁂𑀬𑁆𑀬 𑀲𑀪𑀁 𑀢𑀢𑁆𑀣, 𑀅𑀢𑁆𑀣𑀸𑀦𑀢𑁆𑀣𑀯𑀺𑀦𑀺𑀘𑁆𑀙𑀬𑀁.

𑁫𑁨𑁮.

‘‘𑀦𑀺𑀕𑁆𑀖𑀸𑀢𑀢𑁆𑀣𑀁 𑀅𑀫𑀺𑀢𑁆𑀢𑀸𑀦𑀁, 𑀙𑀺𑀤𑁆𑀤𑀸𑀙𑀺𑀤𑁆𑀤𑀜𑁆𑀘 𑀚𑀸𑀦𑀺𑀢𑀼𑀁;

𑀩𑀮𑀓𑀸𑀬𑀲𑁆𑀲 𑀭𑀓𑁆𑀔𑀸𑀬, 𑀲𑁂𑀦𑀸𑀧𑀘𑁆𑀘𑀁 𑀞𑀧𑁂𑀢𑀺 [𑀣𑀧𑁂𑀲𑀺 (𑀓.)] 𑀲𑁄.

𑁫𑁨𑁯.

‘‘𑀆𑀭𑀓𑁆𑀔𑀢𑁆𑀣𑀸𑀬 ¶ 𑀪𑀡𑁆𑀟𑀲𑁆𑀲, 𑀦𑀺𑀥𑀸𑀦𑀓𑀼𑀲𑀮𑀁 𑀦𑀭𑀁;

𑀫𑀸 𑀫𑁂 𑀪𑀡𑁆𑀟𑀁 𑀯𑀺𑀦𑀲𑁆𑀲𑀻𑀢𑀺, 𑀪𑀡𑁆𑀟𑀭𑀓𑁆𑀔𑀁 𑀞𑀧𑁂𑀢𑀺 𑀲𑁄.

𑁫𑁩𑁦.

‘‘𑀫𑀫𑀢𑁆𑀢𑁄 [𑀫𑀸𑀫𑀓𑁄 (𑀲𑀻.), 𑀲𑀫𑀕𑁆𑀕𑁄 (𑀲𑁆𑀬𑀸.)]

𑀳𑁄𑀢𑀺 𑀬𑁄 𑀭𑀜𑁆𑀜𑁄, 𑀯𑀼𑀤𑁆𑀥𑀺𑀁 𑀬𑀲𑁆𑀲 𑀘 𑀇𑀘𑁆𑀙𑀢𑀺.

𑀢𑀲𑁆𑀲𑀸𑀥𑀺𑀓𑀭𑀡𑀁 𑀤𑁂𑀢𑀺, 𑀫𑀺𑀢𑁆𑀢𑀲𑁆𑀲 𑀧𑀝𑀺𑀧𑀚𑁆𑀚𑀺𑀢𑀼𑀁.

𑁫𑁩𑁧.

‘‘𑀉𑀧𑁆𑀧𑀸𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼, 𑀮𑀓𑁆𑀔𑀡𑁂𑀲𑀼 𑀘 𑀓𑁄𑀯𑀺𑀤𑀁;

𑀅𑀚𑁆𑀛𑀸𑀬𑀓𑀁 𑀫𑀦𑁆𑀢𑀥𑀭𑀁, 𑀧𑁄𑀭𑁄𑀳𑀺𑀘𑁆𑀘𑁂 𑀞𑀧𑁂𑀢𑀺 𑀲𑁄.

𑁫𑁩𑁨.

‘‘𑀏𑀢𑁂𑀳𑀗𑁆𑀕𑁂𑀳𑀺 ¶ ¶ 𑀲𑀫𑁆𑀧𑀦𑁆𑀦𑁄, 𑀔𑀢𑁆𑀢𑀺𑀬𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀲𑀤𑀸 𑀭𑀓𑁆𑀔𑀦𑁆𑀢𑀺 𑀭𑀸𑀚𑀸𑀦𑀁, 𑀘𑀓𑁆𑀓𑀯𑀸𑀓𑁄𑀯 𑀤𑀼𑀓𑁆𑀔𑀺𑀢𑀁.

𑁫𑁩𑁩.

‘‘𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀳𑀢𑀸𑀫𑀺𑀢𑁆𑀢𑁄𑀯 𑀔𑀢𑁆𑀢𑀺𑀬𑁄;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀥𑀫𑁆𑀫𑀭𑀸𑀚𑀸𑀢𑀺 𑀯𑀼𑀘𑁆𑀘𑀢𑀺.

𑁫𑁩𑁪.

‘‘𑀢𑀺𑀢𑁆𑀣𑀺𑀬𑁂 𑀦𑀺𑀳𑀦𑀺𑀢𑁆𑀯𑀸𑀦 [𑀦𑀻𑀳𑀭𑀺𑀢𑁆𑀯𑀸𑀦 (𑀲𑁆𑀬𑀸. 𑀓.)], 𑀫𑀸𑀭𑀜𑁆𑀘𑀸𑀧𑀺 𑀲𑀲𑁂𑀦𑀓𑀁;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸, 𑀥𑀫𑁆𑀫𑀦𑀕𑀭𑀁 𑀅𑀫𑀸𑀧𑀬𑀺.

𑁫𑁩𑁫.

‘‘𑀲𑀻𑀮𑀁 ¶ 𑀧𑀸𑀓𑀸𑀭𑀓𑀁 𑀢𑀢𑁆𑀣, 𑀜𑀸𑀡𑀁 𑀢𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑀁;

𑀲𑀤𑁆𑀥𑀸 𑀢𑁂 𑀏𑀲𑀺𑀓𑀸 𑀯𑀻𑀭, 𑀤𑁆𑀯𑀸𑀭𑀧𑀸𑀮𑁄 𑀘 𑀲𑀁𑀯𑀭𑁄.

𑁫𑁩𑁬.

‘‘𑀲𑀢𑀺𑀧𑀝𑁆𑀞𑀸𑀦𑀫𑀝𑁆𑀝𑀸𑀮𑀁, 𑀧𑀜𑁆𑀜𑀸 𑀢𑁂 𑀘𑀘𑁆𑀘𑀭𑀁 𑀫𑀼𑀦𑁂;

𑀇𑀤𑁆𑀥𑀺𑀧𑀸𑀤𑀜𑁆𑀘 𑀲𑀺𑀗𑁆𑀖𑀸𑀝𑀁, 𑀥𑀫𑁆𑀫𑀯𑀻𑀣𑀺 𑀲𑀼𑀫𑀸𑀧𑀺𑀢𑀸.

𑁫𑁩𑁭.

‘‘𑀲𑀼𑀢𑁆𑀢𑀦𑁆𑀢𑀁 𑀅𑀪𑀺𑀥𑀫𑁆𑀫𑀜𑁆𑀘, 𑀯𑀺𑀦𑀬𑀜𑁆𑀘𑀸𑀧𑀺 𑀓𑁂𑀯𑀮𑀁;

𑀦𑀯𑀗𑁆𑀕𑀁 𑀩𑀼𑀤𑁆𑀥𑀯𑀘𑀦𑀁, 𑀏𑀲𑀸 𑀥𑀫𑁆𑀫𑀲𑀪𑀸 𑀢𑀯.

𑁫𑁩𑁮.

‘‘𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀜𑁆𑀘, 𑀯𑀺𑀳𑀸𑀭𑀜𑁆𑀘𑀧𑁆𑀧𑀡𑀻𑀳𑀺𑀢𑀁;

𑀆𑀦𑁂𑀜𑁆𑀚𑀜𑁆𑀘 𑀦𑀺𑀭𑁄𑀥𑁄 𑀘, 𑀏𑀲𑀸 𑀥𑀫𑁆𑀫𑀓𑀼𑀝𑀻 𑀢𑀯.

𑁫𑁩𑁯.

‘‘𑀧𑀜𑁆𑀜𑀸𑀬 𑀅𑀕𑁆𑀕𑁄 𑀦𑀺𑀓𑁆𑀔𑀺𑀢𑁆𑀢𑁄 [𑀅𑀕𑁆𑀕𑀦𑀺𑀓𑁆𑀔𑀺𑀢𑁆𑀢𑁄 (𑀲𑀻.)], 𑀧𑀝𑀺𑀪𑀸𑀦𑁂 𑀘 𑀓𑁄𑀯𑀺𑀤𑁄;

𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀥𑀫𑁆𑀫𑀲𑁂𑀦𑀸𑀧𑀢𑀻 𑀢𑀯.

𑁫𑁪𑁦.

‘‘𑀘𑀼𑀢𑀽𑀧𑀧𑀸𑀢𑀓𑀼𑀲𑀮𑁄, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄;

𑀓𑁄𑀮𑀺𑀢𑁄 𑀦𑀸𑀫 𑀦𑀸𑀫𑁂𑀦, 𑀧𑁄𑀭𑁄𑀳𑀺𑀘𑁆𑀘𑁄 𑀢𑀯𑀁 𑀫𑀼𑀦𑁂.

𑁫𑁪𑁧.

‘‘𑀧𑁄𑀭𑀸𑀡𑀓𑀯𑀁𑀲𑀥𑀭𑁄, 𑀉𑀕𑁆𑀕𑀢𑁂𑀚𑁄 𑀤𑀼𑀭𑀸𑀲𑀤𑁄;

𑀥𑀼𑀢𑀯𑀸𑀤𑀻𑀕𑀼𑀡𑁂𑀦𑀕𑁆𑀕𑁄, 𑀅𑀓𑁆𑀔𑀤𑀲𑁆𑀲𑁄 𑀢𑀯𑀁 𑀫𑀼𑀦𑁂.

𑁫𑁪𑁨.

‘‘𑀩𑀳𑀼𑀲𑁆𑀲𑀼𑀢𑁄 ¶ 𑀥𑀫𑁆𑀫𑀥𑀭𑁄, 𑀲𑀩𑁆𑀩𑀧𑀸𑀞𑀻 𑀘 𑀲𑀸𑀲𑀦𑁂;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀥𑀫𑁆𑀫𑀸𑀭𑀓𑁆𑀔𑁄 [𑀥𑀫𑁆𑀫𑀭𑀓𑁆𑀔𑁄 (𑀲𑁆𑀬𑀸.)] 𑀢𑀯𑀁 𑀫𑀼𑀦𑁂.

𑁫𑁪𑁩.

‘‘𑀏𑀢𑁂 ¶ 𑀲𑀩𑁆𑀩𑁂 𑀅𑀢𑀺𑀓𑁆𑀓𑀫𑁆𑀫, 𑀧𑀫𑁂𑀲𑀺 𑀪𑀕𑀯𑀸 𑀫𑀫𑀁;

𑀯𑀺𑀦𑀺𑀘𑁆𑀙𑀬𑀁 𑀫𑁂 𑀧𑀸𑀤𑀸𑀲𑀺, 𑀯𑀺𑀦𑀬𑁂 𑀯𑀺𑀜𑁆𑀜𑀼𑀤𑁂𑀲𑀺𑀢𑀁.

𑁫𑁪𑁪.

‘‘𑀬𑁄 𑀓𑁄𑀘𑀺 𑀯𑀺𑀦𑀬𑁂 𑀧𑀜𑁆𑀳𑀁, 𑀧𑀼𑀘𑁆𑀙𑀢𑀺 𑀩𑀼𑀤𑁆𑀥𑀲𑀸𑀯𑀓𑁄;

𑀢𑀢𑁆𑀣 𑀫𑁂 𑀘𑀺𑀦𑁆𑀢𑀦𑀸 𑀦𑀢𑁆𑀣𑀺, 𑀢𑀜𑁆𑀜𑁂𑀯𑀢𑁆𑀣𑀁 𑀓𑀣𑁂𑀫𑀳𑀁.

𑁫𑁪𑁫.

‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺, 𑀞𑀧𑁂𑀢𑁆𑀯𑀸 𑀢𑀁 𑀫𑀳𑀸𑀫𑀼𑀦𑀺;

𑀯𑀺𑀦𑀬𑁂 𑀫𑀸𑀤𑀺𑀲𑁄 𑀦𑀢𑁆𑀣𑀺, 𑀓𑀼𑀢𑁄 𑀪𑀺𑀬𑁆𑀬𑁄 𑀪𑀯𑀺𑀲𑁆𑀲𑀢𑀺.

𑁫𑁪𑁬.

‘‘𑀪𑀺𑀓𑁆𑀔𑀼𑀲𑀗𑁆𑀖𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀕𑀚𑁆𑀚𑀢𑀺 𑀕𑁄𑀢𑀫𑁄;

𑀉𑀧𑀸𑀮𑀺𑀲𑁆𑀲 𑀲𑀫𑁄 𑀦𑀢𑁆𑀣𑀺, 𑀯𑀺𑀦𑀬𑁂 𑀔𑀦𑁆𑀥𑀓𑁂𑀲𑀼 𑀘.

𑁫𑁪𑁭.

‘‘𑀬𑀸𑀯𑀢𑀸 𑀩𑀼𑀤𑁆𑀥𑀪𑀡𑀺𑀢𑀁, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀯𑀺𑀦𑀬𑁄𑀕𑀥𑀁 𑀢𑀁 [𑀯𑀺𑀦𑀬𑁄𑀕𑀥𑀺𑀢𑀁 (𑀲𑀻. 𑀅𑀝𑁆𑀞.), 𑀯𑀺𑀦𑀬𑁂 𑀓𑀣𑀺𑀢𑀁 (𑀲𑁆𑀬𑀸.)] 𑀲𑀩𑁆𑀩𑀁,

𑀯𑀺𑀦𑀬𑀫𑀽𑀮𑀧𑀲𑁆𑀲𑀺𑀦𑁄 [𑀯𑀺𑀦𑀬𑀁 𑀫𑀽𑀮𑀦𑁆𑀢𑀺 𑀧𑀲𑁆𑀲𑀢𑁄 (𑀲𑀻.)].

𑁫𑁪𑁮.

‘‘𑀫𑀫 ¶ 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁫𑁪𑁯.

‘‘𑀲𑀢𑀲𑀳𑀲𑁆𑀲𑀼𑀧𑀸𑀤𑀸𑀬, 𑀇𑀫𑀁 𑀞𑀸𑀦𑀁 𑀅𑀧𑀢𑁆𑀣𑀬𑀺𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀯𑀺𑀦𑀬𑁂 𑀧𑀸𑀭𑀫𑀺𑀁 𑀕𑀢𑁄.

𑁫𑁫𑁦.

‘‘𑀲𑀓𑁆𑀬𑀸𑀦𑀁 𑀦𑀦𑁆𑀤𑀺𑀚𑀦𑀦𑁄, 𑀓𑀧𑁆𑀧𑀓𑁄 𑀆𑀲𑀳𑀁 𑀧𑀼𑀭𑁂;

𑀯𑀺𑀚𑀳𑀺𑀢𑁆𑀯𑀸𑀦 𑀢𑀁 𑀚𑀸𑀢𑀺𑀁, 𑀧𑀼𑀢𑁆𑀢𑁄 𑀚𑀸𑀢𑁄 𑀫𑀳𑁂𑀲𑀺𑀦𑁄.

𑁫𑁫𑁧.

‘‘𑀇𑀢𑁄 𑀤𑀼𑀢𑀺𑀬𑀓𑁂 𑀓𑀧𑁆𑀧𑁂, 𑀅𑀜𑁆𑀚𑀲𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀪𑀽𑀫𑀺𑀧𑀸𑀮𑁄 𑀫𑀳𑀤𑁆𑀥𑀦𑁄.

𑁫𑁫𑁨.

‘‘𑀢𑀲𑁆𑀲 ¶ 𑀭𑀜𑁆𑀜𑁄 𑀅𑀳𑀁 𑀧𑀼𑀢𑁆𑀢𑁄, 𑀘𑀦𑁆𑀤𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀚𑀸𑀢𑀺𑀫𑀤𑁂𑀦𑀼𑀧𑀢𑁆𑀣𑀤𑁆𑀥𑁄, 𑀬𑀲𑀪𑁄𑀕𑀫𑀤𑁂𑀦 𑀘.

𑁫𑁫𑁩.

‘‘𑀦𑀸𑀕𑀲𑀢𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀢𑀺𑀥𑀸𑀧𑀪𑀺𑀦𑁆𑀦𑀸 𑀫𑀸𑀢𑀗𑁆𑀕𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁫𑁫𑁪.

‘‘𑀲𑀩𑀮𑁂𑀳𑀺 𑀧𑀭𑁂𑀢𑁄𑀳𑀁, 𑀉𑀬𑁆𑀬𑀸𑀦𑀁 𑀕𑀦𑁆𑀢𑀼𑀓𑀸𑀫𑀓𑁄;

𑀆𑀭𑀼𑀬𑁆𑀳 𑀲𑀺𑀭𑀺𑀓𑀁 𑀦𑀸𑀕𑀁, 𑀦𑀕𑀭𑀸 𑀦𑀺𑀓𑁆𑀔𑀫𑀺𑀁 𑀢𑀤𑀸.

𑁫𑁫𑁫.

‘‘𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄;

𑀤𑁂𑀯𑀮𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀆𑀕𑀘𑁆𑀙𑀺 𑀧𑀼𑀭𑀢𑁄 𑀫𑀫.

𑁫𑁫𑁬.

‘‘𑀧𑁂𑀲𑁂𑀢𑁆𑀯𑀸 𑀲𑀺𑀭𑀺𑀓𑀁 𑀦𑀸𑀕𑀁, 𑀩𑀼𑀤𑁆𑀥𑀁 𑀆𑀲𑀸𑀤𑀬𑀺𑀁 𑀢𑀤𑀸;

𑀢𑀢𑁄 𑀲𑀜𑁆𑀚𑀸𑀢𑀓𑁄𑀧𑁄 𑀲𑁄 [𑀚𑀸𑀢𑀓𑁄𑀧𑁄𑀯 (𑀲𑁆𑀬𑀸.)], 𑀦𑀸𑀕𑁄 𑀦𑀼𑀤𑁆𑀥𑀭𑀢𑁂 𑀧𑀤𑀁.

𑁫𑁫𑁭.

‘‘𑀦𑀸𑀕𑀁 ¶ 𑀭𑀼𑀡𑁆𑀡𑀫𑀦𑀁 [𑀭𑀼𑀝𑁆𑀞𑀫𑀦𑀁 (𑀧𑀻. 𑀅𑀝𑁆𑀞.), 𑀤𑀼𑀝𑁆𑀞𑀫𑀦𑀁 (𑀲𑀻. 𑀅𑀝𑁆𑀞.), 𑀭𑀼𑀤𑁆𑀥𑀧𑀤𑀁 (?)] 𑀤𑀺𑀲𑁆𑀯𑀸, 𑀩𑀼𑀤𑁆𑀥𑁂 𑀓𑁄𑀥𑀁 𑀅𑀓𑀸𑀲𑀳𑀁;

𑀯𑀺𑀳𑁂𑀲𑀬𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁, 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀳𑀁.

𑁫𑁫𑁮.

‘‘𑀲𑀸𑀢𑀁 𑀢𑀢𑁆𑀣 𑀦 𑀯𑀺𑀦𑁆𑀤𑀸𑀫𑀺, 𑀲𑀺𑀭𑁄 𑀧𑀚𑁆𑀚𑀮𑀺𑀢𑁄 𑀬𑀣𑀸;

𑀧𑀭𑀺𑀴𑀸𑀳𑁂𑀦 𑀟𑀬𑁆𑀳𑀸𑀫𑀺, 𑀫𑀘𑁆𑀙𑁄𑀯 𑀩𑀴𑀺𑀲𑀸𑀤𑀓𑁄.

𑁫𑁫𑁯.

‘‘𑀲𑀲𑀸𑀕𑀭𑀦𑁆𑀢𑀸 ¶ 𑀧𑀣𑀯𑀻, 𑀆𑀤𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺 𑀫𑁂;

𑀧𑀺𑀢𑀼 𑀲𑀦𑁆𑀢𑀺𑀓𑀼𑀧𑀸𑀕𑀫𑁆𑀫, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁫𑁬𑁦.

‘‘𑀆𑀲𑀻𑀯𑀺𑀲𑀁𑀯 𑀓𑀼𑀧𑀺𑀢𑀁, 𑀅𑀕𑁆𑀕𑀺𑀓𑁆𑀔𑀦𑁆𑀥𑀁𑀯 𑀆𑀕𑀢𑀁;

𑀫𑀢𑁆𑀢𑀁𑀯 𑀓𑀼𑀜𑁆𑀚𑀭𑀁 𑀤𑀦𑁆𑀢𑀺𑀁, 𑀬𑀁 𑀲𑀬𑀫𑁆𑀪𑀼𑀫𑀲𑀸𑀤𑀬𑀺𑀁.

𑁫𑁬𑁧.

‘‘𑀆𑀲𑀸𑀤𑀺𑀢𑁄 ¶ 𑀫𑀬𑀸 𑀩𑀼𑀤𑁆𑀥𑁄, 𑀖𑁄𑀭𑁄 𑀉𑀕𑁆𑀕𑀢𑀧𑁄 𑀚𑀺𑀦𑁄;

𑀧𑀼𑀭𑀸 𑀲𑀩𑁆𑀩𑁂 𑀯𑀺𑀦𑀲𑁆𑀲𑀸𑀫, 𑀔𑀫𑀸𑀧𑁂𑀲𑁆𑀲𑀸𑀫 𑀢𑀁 𑀫𑀼𑀦𑀺𑀁.

𑁫𑁬𑁨.

‘‘𑀦𑁄 ¶ 𑀘𑁂 𑀢𑀁 𑀦𑀺𑀚𑁆𑀛𑀸𑀧𑁂𑀲𑁆𑀲𑀸𑀫, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀑𑀭𑁂𑀦 𑀲𑀢𑁆𑀢𑀤𑀺𑀯𑀲𑀸, 𑀭𑀝𑁆𑀞𑀁 𑀫𑁂 𑀯𑀺𑀥𑀫𑀺𑀲𑁆𑀲𑀢𑀺.

𑁫𑁬𑁩.

‘‘𑀲𑀼𑀫𑁂𑀔𑀮𑁄 𑀓𑁄𑀲𑀺𑀬𑁄 𑀘, 𑀲𑀺𑀕𑁆𑀕𑀯𑁄 𑀘𑀸𑀧𑀺 𑀲𑀢𑁆𑀢𑀓𑁄 [𑀲𑀢𑁆𑀢𑀼𑀓𑁄 (𑀲𑀻.)];

𑀆𑀲𑀸𑀤𑀬𑀺𑀢𑁆𑀯𑀸 𑀇𑀲𑀬𑁄, 𑀤𑀼𑀕𑁆𑀕𑀢𑀸 𑀢𑁂 𑀲𑀭𑀝𑁆𑀞𑀓𑀸.

𑁫𑁬𑁪.

‘‘𑀬𑀤𑀸 𑀓𑀼𑀧𑁆𑀧𑀦𑁆𑀢𑀺 𑀇𑀲𑀬𑁄, 𑀲𑀜𑁆𑀜𑀢𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄;

𑀲𑀤𑁂𑀯𑀓𑀁 𑀯𑀺𑀦𑀸𑀲𑁂𑀦𑁆𑀢𑀺, 𑀲𑀲𑀸𑀕𑀭𑀁 𑀲𑀧𑀩𑁆𑀩𑀢𑀁.

𑁫𑁬𑁫.

‘‘𑀢𑀺𑀬𑁄𑀚𑀦𑀲𑀳𑀲𑁆𑀲𑀫𑁆𑀳𑀺, 𑀧𑀼𑀭𑀺𑀲𑁂 𑀲𑀦𑁆𑀦𑀺𑀧𑀸𑀢𑀬𑀺𑀁;

𑀅𑀘𑁆𑀘𑀬𑀁 𑀤𑁂𑀲𑀦𑀢𑁆𑀣𑀸𑀬, 𑀲𑀬𑀫𑁆𑀪𑀼𑀁 𑀉𑀧𑀲𑀗𑁆𑀓𑀫𑀺𑀁.

𑁫𑁬𑁬.

‘‘𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀲𑀺𑀭𑀸, 𑀲𑀩𑁆𑀩𑁂𑀯 𑀧𑀜𑁆𑀚𑀮𑀻𑀓𑀢𑀸;

𑀩𑀼𑀤𑁆𑀥𑀲𑁆𑀲 𑀧𑀸𑀤𑁂 𑀦𑀺𑀧𑀢𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀼𑀁 [𑀫𑀩𑁆𑀭𑀯𑀺𑀁 (𑀓.)].

𑁫𑁬𑁭.

‘‘𑀔𑀫𑀲𑁆𑀲𑀼 𑀢𑁆𑀯𑀁 𑀫𑀳𑀸𑀯𑀻𑀭, 𑀅𑀪𑀺𑀬𑀸𑀘𑀢𑀺 𑀢𑀁 𑀚𑀦𑁄;

𑀧𑀭𑀺𑀴𑀸𑀳𑀁 𑀯𑀺𑀦𑁄𑀤𑁂𑀳𑀺, 𑀫𑀸 𑀦𑁄 𑀭𑀝𑁆𑀞𑀁 𑀯𑀺𑀦𑀸𑀲𑀬.

𑁫𑁬𑁮.

‘‘𑀲𑀤𑁂𑀯𑀫𑀸𑀦𑀼𑀲𑀸 𑀲𑀩𑁆𑀩𑁂, 𑀲𑀤𑀸𑀦𑀯𑀸 𑀲𑀭𑀓𑁆𑀔𑀲𑀸;

𑀅𑀬𑁄𑀫𑀬𑁂𑀦 𑀓𑀼𑀝𑁂𑀦, 𑀲𑀺𑀭𑀁 𑀪𑀺𑀦𑁆𑀤𑁂𑀬𑁆𑀬𑀼 𑀫𑁂 𑀲𑀤𑀸.

𑁫𑁬𑁯.

‘‘𑀤𑀓𑁂 [𑀉𑀤𑀓𑁂 (𑀲𑀻. 𑀲𑁆𑀬𑀸.)] 𑀅𑀕𑁆𑀕𑀺 𑀦 𑀲𑀡𑁆𑀞𑀸𑀢𑀺, 𑀩𑀻𑀚𑀁 𑀲𑁂𑀮𑁂 𑀦 𑀭𑀽𑀳𑀢𑀺;

𑀅𑀕𑀤𑁂 𑀓𑀺𑀫𑀺 𑀦 𑀲𑀡𑁆𑀞𑀸𑀢𑀺, 𑀓𑁄𑀧𑁄 𑀩𑀼𑀤𑁆𑀥𑁂 𑀦 𑀚𑀸𑀬𑀢𑀺.

𑁫𑁭𑁦.

‘‘𑀬𑀣𑀸 𑀘 𑀪𑀽𑀫𑀺 𑀅𑀘𑀮𑀸, 𑀅𑀧𑁆𑀧𑀫𑁂𑀬𑁆𑀬𑁄 𑀘 𑀲𑀸𑀕𑀭𑁄;

𑀅𑀦𑀦𑁆𑀢𑀓𑁄 𑀘 𑀆𑀓𑀸𑀲𑁄, 𑀏𑀯𑀁 𑀩𑀼𑀤𑁆𑀥𑀸 𑀅𑀔𑁄𑀪𑀺𑀬𑀸.

𑁫𑁭𑁧.

‘‘𑀲𑀤𑀸 ¶ 𑀔𑀦𑁆𑀢𑀸 𑀫𑀳𑀸𑀯𑀻𑀭𑀸, 𑀔𑀫𑀺𑀢𑀸 𑀘 𑀢𑀧𑀲𑁆𑀲𑀺𑀦𑁄;

𑀔𑀦𑁆𑀢𑀸𑀦𑀁 𑀔𑀫𑀺𑀢𑀸𑀦𑀜𑁆𑀘, 𑀕𑀫𑀦𑀁 𑀢𑀁 [𑀯𑁄 (𑀲𑁆𑀬𑀸.)] 𑀦 𑀯𑀺𑀚𑁆𑀚𑀢𑀺.

𑁫𑁭𑁨.

‘‘𑀇𑀤𑀁 ¶ 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀧𑀭𑀺𑀴𑀸𑀳𑀁 𑀯𑀺𑀦𑁄𑀤𑀬𑀁;

𑀫𑀳𑀸𑀚𑀦𑀲𑁆𑀲 𑀧𑀼𑀭𑀢𑁄, 𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀺 𑀢𑀤𑀸.

𑁫𑁭𑁩.

‘‘𑀢𑁂𑀦 ¶ 𑀓𑀫𑁆𑀫𑁂𑀦𑀳𑀁 𑀯𑀻𑀭, 𑀳𑀻𑀦𑀢𑁆𑀢𑀁 𑀅𑀚𑁆𑀛𑀼𑀧𑀸𑀕𑀢𑁄;

𑀲𑀫𑀢𑀺𑀓𑁆𑀓𑀫𑁆𑀫 𑀢𑀁 𑀚𑀸𑀢𑀺𑀁, 𑀧𑀸𑀯𑀺𑀲𑀺𑀁 𑀅𑀪𑀬𑀁 𑀧𑀼𑀭𑀁.

𑁫𑁭𑁪.

‘‘𑀢𑀤𑀸𑀧𑀺 ¶ 𑀫𑀁 𑀫𑀳𑀸𑀯𑀻𑀭, 𑀟𑀬𑁆𑀳𑀫𑀸𑀦𑀁 𑀲𑀼𑀲𑀡𑁆𑀞𑀺𑀢𑀁;

𑀧𑀭𑀺𑀴𑀸𑀳𑀁 𑀯𑀺𑀦𑁄𑀤𑁂𑀲𑀺, 𑀲𑀬𑀫𑁆𑀪𑀼𑀜𑁆𑀘 𑀔𑀫𑀸𑀧𑀬𑀺𑀁.

𑁫𑁭𑁫.

‘‘𑀅𑀚𑁆𑀚𑀸𑀧𑀺 𑀫𑀁 𑀫𑀳𑀸𑀯𑀻𑀭, 𑀟𑀬𑁆𑀳𑀫𑀸𑀦𑀁 𑀢𑀺𑀳𑀕𑁆𑀕𑀺𑀪𑀺;

𑀦𑀺𑀩𑁆𑀩𑀸𑀧𑁂𑀲𑀺 𑀢𑀬𑁄 𑀅𑀕𑁆𑀕𑀻, 𑀲𑀻𑀢𑀺𑀪𑀸𑀯𑀜𑁆𑀘 𑀧𑀸𑀧𑀬𑀺𑀁 [𑀧𑀸𑀧𑀬𑀻 (𑀲𑀻.)].

𑁫𑁭𑁬.

𑀬𑁂𑀲𑀁 𑀲𑁄𑀢𑀸𑀯𑀥𑀸𑀦𑀢𑁆𑀣𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄;

𑀅𑀢𑁆𑀣𑀁 𑀢𑀼𑀫𑁆𑀳𑀁 𑀧𑀯𑀓𑁆𑀔𑀸𑀫𑀺, 𑀬𑀣𑀸 𑀤𑀺𑀝𑁆𑀞𑀁 𑀧𑀤𑀁 𑀫𑀫.

𑁫𑁭𑁭.

‘‘𑀲𑀬𑀫𑁆𑀪𑀼𑀁 𑀢𑀁 𑀯𑀺𑀫𑀸𑀦𑁂𑀢𑁆𑀯𑀸, 𑀲𑀦𑁆𑀢𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁;

𑀢𑁂𑀦 𑀓𑀫𑁆𑀫𑁂𑀦𑀳𑀁 𑀅𑀚𑁆𑀚, 𑀚𑀸𑀢𑁄𑀫𑁆𑀳𑀺 𑀦𑀻𑀘𑀬𑁄𑀦𑀺𑀬𑀁.

𑁫𑁭𑁮.

‘‘𑀫𑀸 𑀯𑁄 𑀔𑀡𑀁 𑀯𑀺𑀭𑀸𑀥𑁂𑀣, 𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀭𑁂;

𑀲𑀤𑀢𑁆𑀣𑁂 𑀯𑀸𑀬𑀫𑁂𑀬𑁆𑀬𑀸𑀣, 𑀔𑀡𑁄 𑀯𑁄 𑀧𑀝𑀺𑀧𑀸𑀤𑀺𑀢𑁄.

𑁫𑁭𑁯.

‘‘𑀏𑀓𑀘𑁆𑀘𑀸𑀦𑀜𑁆𑀘 𑀯𑀫𑀦𑀁, 𑀏𑀓𑀘𑁆𑀘𑀸𑀦𑀁 𑀯𑀺𑀭𑁂𑀘𑀦𑀁;

𑀯𑀺𑀲𑀁 𑀳𑀮𑀸𑀳𑀮𑀁 𑀏𑀓𑁂, 𑀏𑀓𑀘𑁆𑀘𑀸𑀦𑀜𑁆𑀘 𑀑𑀲𑀥𑀁.

𑁫𑁮𑁦.

‘‘𑀯𑀫𑀦𑀁 𑀧𑀝𑀺𑀧𑀦𑁆𑀦𑀸𑀦𑀁, 𑀨𑀮𑀝𑁆𑀞𑀸𑀦𑀁 𑀯𑀺𑀭𑁂𑀘𑀦𑀁;

𑀑𑀲𑀥𑀁 𑀨𑀮𑀮𑀸𑀪𑀻𑀦𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀕𑀯𑁂𑀲𑀺𑀦𑀁.

𑁫𑁮𑁧.

‘‘𑀲𑀸𑀲𑀦𑁂𑀦 𑀯𑀺𑀭𑀼𑀤𑁆𑀥𑀸𑀦𑀁, 𑀯𑀺𑀲𑀁 𑀳𑀮𑀸𑀳𑀮𑀁 𑀬𑀣𑀸;

𑀆𑀲𑀻𑀯𑀺𑀲𑁄 𑀤𑀺𑀝𑁆𑀞𑀯𑀺𑀲𑁄 [𑀤𑀝𑁆𑀞𑀯𑀺𑀲𑁄 (𑀲𑁆𑀬𑀸. 𑀅𑀝𑁆𑀞.)], 𑀏𑀯𑀁 𑀛𑀸𑀧𑁂𑀢𑀺 𑀢𑀁 𑀦𑀭𑀁.

𑁫𑁮𑁨.

‘‘𑀲𑀓𑀺𑀁 ¶ 𑀧𑀻𑀢𑀁 𑀳𑀮𑀸𑀳𑀮𑀁, 𑀉𑀧𑀭𑀼𑀦𑁆𑀥𑀢𑀺 𑀚𑀻𑀯𑀺𑀢𑀁;

𑀲𑀸𑀲𑀦𑁂𑀦 𑀯𑀺𑀭𑀼𑀚𑁆𑀛𑀺𑀢𑁆𑀯𑀸, 𑀓𑀧𑁆𑀧𑀓𑁄𑀝𑀺𑀫𑁆𑀳𑀺 𑀟𑀬𑁆𑀳𑀢𑀺.

𑁫𑁮𑁩.

‘‘𑀔𑀦𑁆𑀢𑀺𑀬𑀸 𑀅𑀯𑀺𑀳𑀺𑀁𑀲𑀸𑀬, 𑀫𑁂𑀢𑁆𑀢𑀘𑀺𑀢𑁆𑀢𑀯𑀢𑀸𑀬 𑀘;

𑀲𑀤𑁂𑀯𑀓𑀁 𑀲𑁄 𑀢𑀸𑀭𑀢𑀺, 𑀢𑀲𑁆𑀫𑀸 𑀢𑁂 𑀅𑀯𑀺𑀭𑀸𑀥𑀺𑀬𑀸 [𑀅𑀯𑀺𑀭𑁄𑀥𑀺𑀬𑁄 (𑀲𑀻.), 𑀢𑁂 𑀅𑀯𑀺𑀭𑁄𑀥𑀺𑀬𑀸 (𑀲𑁆𑀬𑀸.)].

𑁫𑁮𑁪.

‘‘𑀮𑀸𑀪𑀸𑀮𑀸𑀪𑁂 𑀦 𑀲𑀚𑁆𑀚𑀦𑁆𑀢𑀺, 𑀲𑀫𑁆𑀫𑀸𑀦𑀦𑀯𑀺𑀫𑀸𑀦𑀦𑁂;

𑀧𑀣𑀯𑀻𑀲𑀤𑀺𑀲𑀸 𑀩𑀼𑀤𑁆𑀥𑀸, 𑀢𑀲𑁆𑀫𑀸 𑀢𑁂 𑀦 𑀯𑀺𑀭𑀸𑀥𑀺𑀬𑀸 [𑀢𑁂 𑀦 𑀯𑀺𑀭𑁄𑀥𑀺𑀬𑀸 (𑀲𑀻. 𑀲𑁆𑀬𑀸.)].

𑁫𑁮𑁫.

‘‘𑀤𑁂𑀯𑀤𑀢𑁆𑀢𑁂 ¶ 𑀘 𑀯𑀥𑀓𑁂, 𑀘𑁄𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑀓𑁂;

𑀭𑀸𑀳𑀼𑀮𑁂 𑀥𑀦𑀧𑀸𑀮𑁂 𑀘, 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀫𑀼𑀦𑀺.

𑁫𑁮𑁬.

‘‘𑀏𑀢𑁂𑀲𑀁 ¶ 𑀧𑀝𑀺𑀖𑁄 𑀦𑀢𑁆𑀣𑀺, 𑀭𑀸𑀕𑁄𑀫𑁂𑀲𑀁 𑀦 𑀯𑀺𑀚𑁆𑀚𑀢𑀺;

𑀲𑀩𑁆𑀩𑁂𑀲𑀁 𑀲𑀫𑀓𑁄 𑀩𑀼𑀤𑁆𑀥𑁄, 𑀯𑀥𑀓𑀲𑁆𑀲𑁄𑀭𑀲𑀲𑁆𑀲 𑀘.

𑁫𑁮𑁭.

‘‘𑀧𑀦𑁆𑀣𑁂 ¶ 𑀤𑀺𑀲𑁆𑀯𑀸𑀦 𑀓𑀸𑀲𑀸𑀯𑀁, 𑀙𑀟𑁆𑀟𑀺𑀢𑀁 𑀫𑀻𑀴𑁆𑀳𑀫𑀓𑁆𑀔𑀺𑀢𑀁;

𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀯𑀦𑁆𑀤𑀺𑀢𑀩𑁆𑀩𑀁 𑀇𑀲𑀺𑀤𑁆𑀥𑀚𑀁.

𑁫𑁮𑁮.

‘‘𑀅𑀩𑁆𑀪𑀢𑀻𑀢𑀸 𑀘 𑀬𑁂 𑀩𑀼𑀤𑁆𑀥𑀸, 𑀯𑀢𑁆𑀢𑀫𑀸𑀦𑀸 𑀅𑀦𑀸𑀕𑀢𑀸;

𑀥𑀚𑁂𑀦𑀸𑀦𑁂𑀦 𑀲𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁂 𑀦𑀫𑀲𑁆𑀲𑀺𑀬𑀸.

𑁫𑁮𑁯.

‘‘𑀲𑀢𑁆𑀣𑀼𑀓𑀧𑁆𑀧𑀁 𑀲𑀼𑀯𑀺𑀦𑀬𑀁, 𑀥𑀸𑀭𑁂𑀫𑀺 𑀳𑀤𑀬𑁂𑀦𑀳𑀁;

𑀦𑀫𑀲𑁆𑀲𑀫𑀸𑀦𑁄 𑀯𑀺𑀦𑀬𑀁, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀲𑀩𑁆𑀩𑀤𑀸.

𑁫𑁯𑁦.

‘‘𑀯𑀺𑀦𑀬𑁄 𑀆𑀲𑀬𑁄 𑀫𑀬𑁆𑀳𑀁, 𑀯𑀺𑀦𑀬𑁄 𑀞𑀸𑀦𑀘𑀗𑁆𑀓𑀫𑀁;

𑀓𑀧𑁆𑀧𑁂𑀫𑀺 𑀯𑀺𑀦𑀬𑁂 𑀯𑀸𑀲𑀁, 𑀯𑀺𑀦𑀬𑁄 𑀫𑀫 𑀕𑁄𑀘𑀭𑁄.

𑁫𑁯𑁧.

‘‘𑀯𑀺𑀦𑀬𑁂 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀲𑀫𑀣𑁂 𑀘𑀸𑀧𑀺 𑀓𑁄𑀯𑀺𑀤𑁄;

𑀉𑀧𑀸𑀮𑀺 𑀢𑀁 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄.

𑁫𑁯𑁨.

‘‘𑀲𑁄 ¶ 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

𑁫𑁯𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁫𑁯𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁯𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁩-𑁭. 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁯𑁬.

‘‘𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀯𑀺𑀦𑀸𑀬𑀓𑀁;

𑀩𑀼𑀤𑁆𑀥𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀁, 𑀧𑀞𑀫𑀁 𑀅𑀤𑁆𑀤𑀲𑀁 𑀅𑀳𑀁.

𑁫𑁯𑁭.

‘‘𑀬𑀸𑀯𑀢𑀸 ¶ 𑀩𑁄𑀥𑀺𑀬𑀸 𑀫𑀽𑀮𑁂, 𑀬𑀓𑁆𑀔𑀸 𑀲𑀩𑁆𑀩𑁂 𑀲𑀫𑀸𑀕𑀢𑀸;

𑀲𑀫𑁆𑀩𑀼𑀤𑁆𑀥𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀯𑀦𑁆𑀤𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

𑁫𑁯𑁮.

‘‘𑀲𑀩𑁆𑀩𑁂 ¶ ¶ 𑀤𑁂𑀯𑀸 𑀢𑀼𑀝𑁆𑀞𑀫𑀦𑀸, 𑀆𑀓𑀸𑀲𑁂 𑀲𑀜𑁆𑀘𑀭𑀦𑁆𑀢𑀺 𑀢𑁂;

𑀩𑀼𑀤𑁆𑀥𑁄 𑀅𑀬𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀦𑁆𑀥𑀓𑀸𑀭𑀢𑀫𑁄𑀦𑀼𑀤𑁄.

𑁫𑁯𑁯.

‘‘𑀢𑁂𑀲𑀁 ¶ 𑀳𑀸𑀲𑀧𑀭𑁂𑀢𑀸𑀦𑀁, 𑀫𑀳𑀸𑀦𑀸𑀤𑁄 𑀅𑀯𑀢𑁆𑀢𑀣;

𑀓𑀺𑀮𑁂𑀲𑁂 𑀛𑀸𑀧𑀬𑀺𑀲𑁆𑀲𑀸𑀫, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁬𑁦𑁦.

‘‘𑀤𑁂𑀯𑀸𑀦𑀁 𑀕𑀺𑀭𑀫𑀜𑁆𑀜𑀸𑀬, 𑀯𑀸𑀘𑀸𑀲𑀪𑀺𑀫𑀼𑀤𑀻𑀭𑀺𑀳𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀤𑀺𑀪𑀺𑀓𑁆𑀔𑀫𑀤𑀸𑀲𑀳𑀁.

𑁬𑁦𑁧.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀤𑁂𑀯𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁦𑁨.

‘‘‘𑀲𑀢𑁆𑀢𑀸𑀳𑀁 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀩𑁄𑀥𑀺𑀁 𑀅𑀚𑁆𑀛𑀕𑀫𑀁 𑀅𑀳𑀁;

𑀇𑀤𑀁 𑀫𑁂 𑀧𑀞𑀫𑀁 𑀪𑀢𑁆𑀢𑀁, 𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲 𑀬𑀸𑀧𑀦𑀁.

𑁬𑁦𑁩.

‘‘‘𑀢𑀼𑀲𑀺𑀢𑀸 𑀳𑀺 𑀇𑀥𑀸𑀕𑀦𑁆𑀢𑁆𑀯𑀸, 𑀬𑁄 𑀫𑁂 𑀪𑀺𑀓𑁆𑀔𑀁 𑀉𑀧𑀸𑀦𑀬𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁬𑁦𑁪.

‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺 [𑀢𑀺𑀁𑀲𑀫𑀢𑁆𑀢𑁂 𑀓𑀧𑁆𑀧𑀲𑀕𑀲𑁆𑀲𑁂 (𑀲𑁆𑀬𑀸. 𑀓.)], 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀢𑁆𑀯𑀸, 𑀢𑀺𑀤𑀺𑀯𑀁 𑀆𑀯𑀲𑀺𑀲𑁆𑀲𑀢𑀺.

𑁬𑁦𑁫.

‘‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀥𑀸 𑀘𑀓𑁆𑀓𑀯𑀢𑁆𑀢𑀻, 𑀢𑀢𑁆𑀣 𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁬𑁦𑁬.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁦𑁭.

‘‘‘𑀢𑀺𑀤𑀲𑀸 𑀲𑁄 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀅𑀕𑀸𑀭𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀙𑀩𑁆𑀩𑀲𑁆𑀲𑀸𑀦𑀺 𑀯𑀲𑀺𑀲𑁆𑀲𑀢𑀺.

𑁬𑁦𑁮.

‘‘‘𑀢𑀢𑁄 𑀲𑀢𑁆𑀢𑀫𑀓𑁂 𑀯𑀲𑁆𑀲𑁂, 𑀩𑀼𑀤𑁆𑀥𑁄 𑀲𑀘𑁆𑀘𑀁 𑀓𑀣𑁂𑀲𑁆𑀲𑀢𑀺;

𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀦𑀸𑀫𑁂𑀦, 𑀧𑀞𑀫𑀁 𑀲𑀘𑁆𑀙𑀺𑀓𑀸𑀳𑀺𑀢𑀺’.

𑁬𑁦𑁯.

‘‘𑀦𑀺𑀓𑁆𑀔𑀦𑁆𑀢𑁂𑀦𑀸𑀦𑀼𑀧𑀩𑁆𑀩𑀚𑀺𑀁 ¶ , 𑀧𑀥𑀸𑀦𑀁 𑀲𑀼𑀓𑀢𑀁 𑀫𑀬𑀸;

𑀓𑀺𑀮𑁂𑀲𑁂 𑀛𑀸𑀧𑀦𑀢𑁆𑀣𑀸𑀬, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁬𑁧𑁦.

‘‘𑀅𑀪𑀺𑀕𑀦𑁆𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽, 𑀩𑀼𑀤𑁆𑀥𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀇𑀲𑀺𑀦𑀸𑀫𑁂 𑀫𑀺𑀕𑀸𑀭𑀜𑁆𑀜𑁂 [𑀇𑀫𑀺𑀦𑀸 𑀫𑁂 𑀫𑀳𑀸𑀭𑀜𑁆𑀜𑀁 (𑀲𑁆𑀬𑀸.), 𑀇𑀫𑀺𑀦𑀸 𑀫𑁂 𑀫𑀺𑀕𑀸𑀭𑀜𑁆𑀜𑀁 (𑀓.)], 𑀅𑀫𑀢𑀪𑁂𑀭𑀺𑀫𑀸𑀳𑀦𑀺.

𑁬𑁧𑁧.

‘‘𑀲𑁄 ¶ ¶ 𑀤𑀸𑀦𑀺 𑀧𑀢𑁆𑀢𑁄 𑀅𑀫𑀢𑀁, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁧𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 [𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑁄 (𑀲𑀻.), 𑀅𑀜𑁆𑀜𑀸 𑀓𑁄𑀡𑁆𑀟𑀜𑁆𑀜𑁄 (𑀲𑁆𑀬𑀸.)] 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁩-𑁮. 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁧𑁩.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀧𑀼𑀭𑀢𑁄 𑀳𑀺𑀫𑀯𑀦𑁆𑀢𑀲𑁆𑀲, 𑀘𑀺𑀢𑁆𑀢𑀓𑀽𑀝𑁂 𑀯𑀲𑀻 𑀢𑀤𑀸.

𑁬𑁧𑁪.

‘‘𑀅𑀪𑀻𑀢𑀭𑀽𑀧𑁄 𑀢𑀢𑁆𑀣𑀸𑀲𑀺𑀁, 𑀫𑀺𑀕𑀭𑀸𑀚𑀸 𑀘𑀢𑀼𑀓𑁆𑀓𑀫𑁄;

𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀺𑀢𑁆𑀯𑀸𑀦, 𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀩𑀳𑀼𑀚𑁆𑀚𑀦𑀸.

𑁬𑁧𑁫.

‘‘𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀯𑀼𑀝𑁆𑀞𑀺𑀢𑀲𑁆𑀲 𑀲𑀫𑀸𑀥𑀺𑀫𑁆𑀳𑀸, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁬𑁧𑁬.

‘‘𑀘𑀸𑀢𑀼𑀤𑁆𑀤𑀺𑀲𑀁 ¶ 𑀦𑀫𑀲𑁆𑀲𑀺𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀭𑀼𑀢𑁆𑀢𑀫𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀻𑀳𑀦𑀸𑀤𑀁 𑀦𑀤𑀺𑀁 𑀅𑀳𑀁 [𑀢𑀤𑀸 (𑀲𑁆𑀬𑀸.)].

𑁬𑁧𑁭.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀲𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁧𑁮.

‘‘‘𑀩𑀼𑀤𑁆𑀥𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀲𑀩𑁆𑀩𑁂 𑀤𑁂𑀯𑀸 𑀲𑀫𑀸𑀕𑀢𑀸;

𑀆𑀕𑀢𑁄 𑀯𑀤𑀢𑀁 𑀲𑁂𑀝𑁆𑀞𑁄, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫 𑀢𑀁 𑀫𑀬𑀁.

𑁬𑁧𑁯.

‘‘‘𑀢𑁂𑀲𑀁 𑀳𑀸𑀲𑀧𑀭𑁂𑀢𑀸𑀦𑀁, 𑀧𑀼𑀭𑀢𑁄 𑀮𑁄𑀓𑀦𑀸𑀬𑀓𑁄;

𑀫𑀫 𑀲𑀤𑁆𑀤𑀁 [𑀓𑀫𑁆𑀫𑀁 (?)] 𑀧𑀓𑀺𑀢𑁆𑀢𑁂𑀲𑀺, 𑀤𑀻𑀖𑀤𑀲𑁆𑀲𑀻 𑀫𑀳𑀸𑀫𑀼𑀦𑀺’.

𑁬𑁨𑁦.

‘‘𑀬𑁂𑀦𑀺𑀤𑀁 𑀧𑀤𑀼𑀫𑀁 𑀤𑀺𑀦𑁆𑀦𑀁, 𑀲𑀻𑀳𑀦𑀸𑀤𑁄 𑀘 𑀦𑀸𑀤𑀺𑀢𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁬𑁨𑁧.

‘‘‘𑀇𑀢𑁄 ¶ 𑀅𑀝𑁆𑀞𑀫𑀓𑁂 𑀓𑀧𑁆𑀧𑁂, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄.

𑁬𑁨𑁨.

‘‘‘𑀓𑀸𑀭𑀬𑀺𑀲𑁆𑀲𑀢𑀺 𑀇𑀲𑁆𑀲𑀭𑀺𑀬𑀁 [𑀇𑀲𑁆𑀲𑀭𑀁 (𑀲𑁆𑀬𑀸. 𑀓.)], 𑀫𑀳𑀺𑀬𑀸 𑀘𑀢𑀼𑀲𑀝𑁆𑀞𑀺𑀬𑀸;

𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬𑁨𑁩.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺 ¶ ¶ , 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁨𑁪.

‘𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺;

𑀩𑁆𑀭𑀳𑁆𑀫𑀜𑁆𑀜𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀢𑀺 𑀢𑀸𑀯𑀤𑁂’.

𑁬𑁨𑁫.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁬𑁨𑁬.

‘‘𑀯𑀺𑀚𑀦𑁂 ¶ 𑀧𑀦𑁆𑀢𑀲𑁂𑀬𑁆𑀬𑀫𑁆𑀳𑀺, 𑀯𑀸𑀴𑀫𑀺𑀕𑀲𑀫𑀸𑀓𑀼𑀮𑁂;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁬𑁨𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁩-𑁯. 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁨𑁮.

‘‘𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀦𑀸𑀫, 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸;

𑀓𑀼𑀢𑀺𑀢𑁆𑀣𑁂 𑀦𑀸𑀯𑀺𑀓𑁄 𑀆𑀲𑀺𑀁, 𑀑𑀭𑀺𑀫𑁂 𑀘 𑀢𑀭𑀺𑀁 [𑀑𑀭𑀺𑀫𑀁 𑀘 𑀢𑀭𑁂 (𑀲𑁆𑀬𑀸.)] 𑀅𑀳𑀁.

𑁬𑁨𑁯.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀬𑀓𑁄, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀯𑀲𑀻 𑀲𑀢𑀲𑀳𑀲𑁆𑀲𑁂𑀳𑀺, 𑀕𑀗𑁆𑀕𑀸𑀢𑀻𑀭𑀫𑀼𑀧𑀸𑀕𑀢𑁄 [𑀧𑀼𑀩𑁆𑀩𑁂 𑀫𑀬𑁆𑀳𑀁 𑀲𑀼𑀢𑀁 𑀆𑀲𑀺,§‘‘𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑁄; 𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀕𑀗𑁆𑀕𑀸𑀲𑁄𑀢𑀁 𑀢𑀭𑀺𑀲𑁆𑀲𑀢𑀺‘‘; (𑀲𑀻.)].

𑁬𑁩𑁦.

‘‘𑀩𑀳𑀽 𑀦𑀸𑀯𑀸 𑀲𑀫𑀸𑀦𑁂𑀢𑁆𑀯𑀸, 𑀯𑀟𑁆𑀠𑀓𑀻𑀳𑀺 [𑀘𑀫𑁆𑀫𑀓𑁂𑀳𑀺 (𑀓.)] 𑀲𑀼𑀲𑀗𑁆𑀔𑀢𑀁;

𑀦𑀸𑀯𑀸𑀬 [𑀦𑀸𑀯𑀸𑀦𑀁 (𑀓.)] 𑀙𑀤𑀦𑀁 𑀓𑀢𑁆𑀯𑀸, 𑀧𑀝𑀺𑀫𑀸𑀦𑀺𑀁 𑀦𑀭𑀸𑀲𑀪𑀁.

𑁬𑁩𑁧.

‘‘𑀆𑀕𑀦𑁆𑀢𑁆𑀯𑀸𑀦 ¶ 𑀘 𑀲𑀫𑁆𑀩𑀼𑀤𑁆𑀥𑁄, 𑀆𑀭𑀽𑀳𑀺 𑀢𑀜𑁆𑀘 𑀦𑀸𑀯𑀓𑀁;

𑀯𑀸𑀭𑀺𑀫𑀚𑁆𑀛𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁩𑁨.

‘‘‘𑀬𑁄 𑀲𑁄 𑀢𑀸𑀭𑁂𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀗𑁆𑀖𑀜𑁆𑀘𑀸𑀧𑀺 𑀅𑀦𑀸𑀲𑀯𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺.

𑁬𑁩𑁩.

‘‘‘𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑁂 𑀩𑁆𑀬𑀫𑁆𑀳𑀁, 𑀲𑀼𑀓𑀢𑀁 𑀦𑀸𑀯𑀲𑀡𑁆𑀞𑀺𑀢𑀁;

𑀆𑀓𑀸𑀲𑁂 𑀧𑀼𑀧𑁆𑀨𑀙𑀤𑀦𑀁, 𑀥𑀸𑀭𑀬𑀺𑀲𑁆𑀲𑀢𑀺 𑀲𑀩𑁆𑀩𑀤𑀸.

𑁬𑁩𑁪.

‘‘‘𑀅𑀝𑁆𑀞𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺 ¶ , 𑀢𑀸𑀭𑀓𑁄 [𑀢𑀸𑀭𑀡𑁄 (𑀲𑁆𑀬𑀸.)] 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁬𑁩𑁫.

‘‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺 ¶ ¶ , 𑀘𑀫𑁆𑀫𑀓𑁄 [𑀘𑀫𑁆𑀧𑀓𑁄 (𑀲𑀻.), 𑀘𑀫𑁆𑀩𑀓𑁄 (𑀲𑁆𑀬𑀸.)] 𑀦𑀸𑀫 𑀔𑀢𑁆𑀢𑀺𑀬𑁄;

𑀉𑀕𑁆𑀕𑀘𑁆𑀙𑀦𑁆𑀢𑁄𑀯 𑀲𑀽𑀭𑀺𑀬𑁄, 𑀚𑁄𑀢𑀺𑀲𑁆𑀲𑀢𑀺 𑀫𑀳𑀩𑁆𑀩𑀮𑁄.

𑁬𑁩𑁬.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁩𑁭.

‘‘‘𑀢𑀺𑀤𑀲𑀸 𑀲𑁄 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀭𑁂𑀯𑀢𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁬𑁩𑁮.

‘‘‘𑀅𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀢𑀺.

𑁬𑁩𑁯.

‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀬𑀼𑀢𑁆𑀢𑀬𑁄𑀕𑁄 𑀯𑀺𑀧𑀲𑁆𑀲𑀓𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁬𑁪𑁦.

‘‘𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑀻. 𑀲𑁆𑀬𑀸.)] 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁬𑁪𑁧.

‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀻 𑀫𑀫.

𑁬𑁪𑁨.

‘‘𑀢𑀢𑁄 𑀫𑀁 𑀯𑀦𑀦𑀺𑀭𑀢𑀁, 𑀤𑀺𑀲𑁆𑀯𑀸 𑀮𑁄𑀓𑀦𑁆𑀢𑀕𑀽 𑀫𑀼𑀦𑀺;

𑀯𑀦𑀯𑀸𑀲𑀺𑀪𑀺𑀓𑁆𑀔𑀽𑀦𑀕𑁆𑀕𑀁, 𑀧𑀜𑁆𑀜𑀧𑁂𑀲𑀺 𑀫𑀳𑀸𑀫𑀢𑀺.

𑁬𑁪𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀔𑀤𑀺𑀭𑀯𑀦𑀺𑀬𑁄 𑀭𑁂𑀯𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁩-𑁧𑁦. 𑀆𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁪𑁪.

‘‘𑀆𑀭𑀸𑀫𑀤𑁆𑀯𑀸𑀭𑀸 ¶ 𑀦𑀺𑀓𑁆𑀔𑀫𑁆𑀫, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀯𑀲𑁆𑀲𑁂𑀦𑁆𑀢𑁄 𑀅𑀫𑀢𑀁 𑀯𑀼𑀝𑁆𑀞𑀺𑀁, 𑀦𑀺𑀩𑁆𑀩𑀸𑀧𑁂𑀲𑀺 𑀫𑀳𑀸𑀚𑀦𑀁.

𑁬𑁪𑁫.

‘‘𑀲𑀢𑀲𑀳𑀲𑁆𑀲𑀁 𑀢𑁂 𑀥𑀻𑀭𑀸, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻 [𑀅𑀦𑀼𑀧𑀸𑀬𑀺𑀦𑀻 (𑀲𑁆𑀬𑀸. 𑀓.)].

𑁬𑁪𑁬.

‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀆𑀲𑀺𑀁, 𑀲𑁂𑀢𑀘𑁆𑀙𑀢𑁆𑀢𑀁 𑀯𑀭𑀼𑀢𑁆𑀢𑀫𑀁;

𑀲𑀼𑀘𑀸𑀭𑀼𑀭𑀽𑀧𑀁 𑀤𑀺𑀲𑁆𑀯𑀸𑀦, 𑀯𑀺𑀢𑁆𑀢𑀺 𑀫𑁂 𑀉𑀤𑀧𑀚𑁆𑀚𑀣.

𑁬𑁪𑁭.

‘‘𑀑𑀭𑀼𑀬𑁆𑀳 ¶ 𑀳𑀢𑁆𑀣𑀺𑀔𑀦𑁆𑀥𑀫𑁆𑀳𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀭𑀢𑀦𑀸𑀫𑀬𑀙𑀢𑁆𑀢𑀁 𑀫𑁂, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀥𑀸𑀭𑀬𑀺𑀁.

𑁬𑁪𑁮.

‘‘𑀫𑀫 ¶ 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀇𑀲𑀺;

𑀢𑀁 𑀓𑀣𑀁 𑀞𑀧𑀬𑀺𑀢𑁆𑀯𑀸𑀦, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁪𑁯.

‘‘‘𑀬𑁄 𑀲𑁄 𑀙𑀢𑁆𑀢𑀫𑀥𑀸𑀭𑁂𑀲𑀺, 𑀲𑁄𑀡𑁆𑀡𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁬𑁫𑁦.

‘‘‘𑀇𑀢𑁄 𑀕𑀦𑁆𑀢𑁆𑀯𑀸 𑀅𑀬𑀁 𑀧𑁄𑀲𑁄, 𑀢𑀼𑀲𑀺𑀢𑀁 𑀆𑀯𑀲𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁬𑁫𑁧.

‘‘‘𑀘𑀢𑀼𑀢𑁆𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀩𑀮𑀸𑀥𑀺𑀧𑁄 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁬𑁫𑁨.

‘‘‘𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀲𑁆𑀲𑀢𑀺.

𑁬𑁫𑁩.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺 ¶ , 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁫𑁪.

‘‘‘𑀲𑀓𑁆𑀬𑀸𑀦𑀁 ¶ 𑀓𑀼𑀮𑀓𑁂𑀢𑀼𑀲𑁆𑀲, 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀦𑁄.

𑁬𑁫𑁫.

‘‘‘𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀧𑀺, 𑀩𑀸𑀳𑀼𑀲𑀘𑁆𑀘𑁂 𑀲𑀼𑀓𑁄𑀯𑀺𑀤𑁄;

𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀢𑁆𑀣𑀤𑁆𑀥𑁄, 𑀲𑀩𑁆𑀩𑀧𑀸𑀞𑀻 𑀪𑀯𑀺𑀲𑁆𑀲𑀢𑀺.

𑁬𑁫𑁬.

‘‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁬𑁫𑁭.

‘‘‘𑀲𑀦𑁆𑀢𑀺 𑀆𑀭𑀜𑁆𑀜𑀓𑀸 𑀦𑀸𑀕𑀸, 𑀓𑀼𑀜𑁆𑀚𑀭𑀸 𑀲𑀝𑁆𑀞𑀺𑀳𑀸𑀬𑀦𑀸;

𑀢𑀺𑀥𑀸𑀧𑀪𑀺𑀦𑁆𑀦𑀸 𑀫𑀸𑀢𑀗𑁆𑀕𑀸, 𑀈𑀲𑀸𑀤𑀦𑁆𑀢𑀸 𑀉𑀭𑀽𑀴𑁆𑀳𑀯𑀸.

𑁬𑁫𑁮.

‘‘‘𑀅𑀦𑁂𑀓𑀲𑀢𑀲𑀳𑀲𑁆𑀲𑀸, 𑀧𑀡𑁆𑀟𑀺𑀢𑀸𑀧𑀺 𑀫𑀳𑀺𑀤𑁆𑀥𑀺𑀓𑀸;

𑀲𑀩𑁆𑀩𑁂 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲, 𑀦 𑀳𑁄𑀦𑁆𑀢𑀼 𑀧𑀡𑀺𑀥𑀺𑀫𑁆𑀳𑀺 𑀢𑁂’ [𑀦 𑀳𑁄𑀦𑁆𑀢𑀺 𑀧𑀭𑀺𑀯𑀺𑀫𑁆𑀪𑀺𑀢𑀸 (𑀲𑁆𑀬𑀸.), 𑀦 𑀳𑁄𑀦𑁆𑀢𑀺 𑀧𑀡𑀺𑀥𑀺𑀫𑁆𑀳𑀺 𑀢𑁂 (𑀓.)].

𑁬𑁫𑁯.

‘‘𑀆𑀤𑀺𑀬𑀸𑀫𑁂 𑀦𑀫𑀲𑁆𑀲𑀸𑀫𑀺, 𑀫𑀚𑁆𑀛𑀺𑀫𑁂 𑀅𑀣 𑀧𑀘𑁆𑀙𑀺𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀝𑁆𑀞𑀳𑀺𑀁.

𑁬𑁬𑁦.

‘‘𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀧𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄;

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀲𑁂𑀔𑀪𑀽𑀫𑀻𑀲𑀼 𑀓𑁄𑀯𑀺𑀤𑁄.

𑁬𑁬𑁧.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀪𑀺𑀦𑀻𑀳𑀭𑀺𑀁;

𑀢𑀸𑀳𑀁 𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄, 𑀞𑀺𑀢𑀸 𑀲𑀤𑁆𑀥𑀫𑁆𑀫𑀫𑀸𑀘𑀮𑀸 [𑀞𑀺𑀢𑁄 𑀲𑀤𑁆𑀥𑀫𑁆𑀫𑀫𑀸𑀘𑀮𑁄 (𑀲𑀻.), 𑀞𑀺𑀢𑀸 𑀲𑀤𑁆𑀥𑀸 𑀫𑀳𑀧𑁆𑀨𑀮𑀸 (𑀲𑁆𑀬𑀸.)].

𑁬𑁬𑁨.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁬𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑀼𑀤𑁆𑀥𑁄 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀓𑁄𑀮𑀺𑀢𑁄;

𑀓𑀲𑁆𑀲𑀧𑁄 𑀅𑀦𑀼𑀭𑀼𑀤𑁆𑀥𑁄 𑀘, 𑀧𑀼𑀡𑁆𑀡𑀢𑁆𑀣𑁂𑀭𑁄 𑀉𑀧𑀸𑀮𑀺 𑀘.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀧𑀺𑀡𑁆𑀟𑁄𑀮𑁄, 𑀭𑁂𑀯𑀢𑀸𑀦𑀦𑁆𑀤𑀧𑀡𑁆𑀟𑀺𑀢𑁄;

𑀙𑀲𑀢𑀸𑀦𑀺 𑀘 𑀧𑀜𑁆𑀜𑀸𑀲, 𑀕𑀸𑀣𑀸𑀬𑁄 𑀲𑀩𑁆𑀩𑀧𑀺𑀡𑁆𑀟𑀺𑀢𑀸.

𑀅𑀧𑀤𑀸𑀦𑁂 𑀩𑀼𑀤𑁆𑀥𑀯𑀕𑁆𑀕𑁄 𑀧𑀞𑀫𑁄.

𑁨. 𑀲𑀻𑀳𑀸𑀲𑀦𑀺𑀬𑀯𑀕𑁆𑀕𑁄

𑁧. 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀦𑀺𑀩𑁆𑀩𑀼𑀢𑁂 ¶ ¶ ¶ 𑀮𑁄𑀓𑀦𑀸𑀣𑀫𑁆𑀳𑀺, 𑀲𑀺𑀤𑁆𑀥𑀢𑁆𑀣𑁂 𑀤𑁆𑀯𑀺𑀧𑀤𑀼𑀢𑁆𑀢𑀫𑁂 [𑀤𑀺𑀧𑀤𑀼𑀢𑁆𑀢𑀫𑁂 (𑀲𑀻. 𑀲𑁆𑀬𑀸.)];

𑀯𑀺𑀢𑁆𑀣𑀸𑀭𑀺𑀓𑁂 𑀧𑀸𑀯𑀘𑀦𑁂, 𑀩𑀸𑀳𑀼𑀚𑀜𑁆𑀜𑀫𑁆𑀳𑀺 𑀲𑀸𑀲𑀦𑁂.

𑁨.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀻𑀳𑀸𑀲𑀦𑀫𑀓𑀸𑀲𑀳𑀁;

𑀲𑀻𑀳𑀸𑀲𑀦𑀁 𑀓𑀭𑀺𑀢𑁆𑀯𑀸𑀦, 𑀧𑀸𑀤𑀧𑀻𑀞𑀫𑀓𑀸𑀲𑀳𑀁.

𑁩.

‘‘𑀲𑀻𑀳𑀸𑀲𑀦𑁂 𑀘 𑀯𑀲𑁆𑀲𑀦𑁆𑀢𑁂, 𑀖𑀭𑀁 𑀢𑀢𑁆𑀣 𑀅𑀓𑀸𑀲𑀳𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁.

𑁪.

‘‘𑀆𑀬𑀸𑀫𑁂𑀦 ¶ 𑀘𑀢𑀼𑀩𑁆𑀩𑀻𑀲, 𑀬𑁄𑀚𑀦𑀁 𑀆𑀲𑀺 [𑀬𑁄𑀚𑀦𑀸𑀲𑀺𑀁𑀲𑀼 (𑀲𑁆𑀬𑀸. 𑀓.)] 𑀢𑀸𑀯𑀤𑁂;

𑀯𑀺𑀫𑀸𑀦𑀁 𑀲𑀼𑀓𑀢𑀁 𑀫𑀬𑁆𑀳𑀁, 𑀯𑀺𑀢𑁆𑀣𑀸𑀭𑁂𑀦 𑀘𑀢𑀼𑀤𑁆𑀤𑀲.

𑁫.

‘‘𑀲𑀢𑀁 [𑀲𑀢𑁆𑀢 (𑀲𑁆𑀬𑀸.)] 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸;

𑀲𑁄𑀡𑁆𑀡𑀫𑀬𑀜𑁆𑀘 𑀧𑀮𑁆𑀮𑀗𑁆𑀓𑀁, 𑀩𑁆𑀬𑀫𑁆𑀳𑁂 𑀆𑀲𑀺 𑀲𑀼𑀦𑀺𑀫𑁆𑀫𑀺𑀢𑀁.

𑁬.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀤𑀺𑀩𑁆𑀩𑀬𑀸𑀦𑀁 𑀉𑀧𑀝𑁆𑀞𑀺𑀢𑀁;

𑀧𑀸𑀲𑀸𑀤𑀸 𑀲𑀺𑀯𑀺𑀓𑀸 𑀘𑁂𑀯, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀤𑀺𑀘𑁆𑀙𑀓𑀁.

𑁭.

‘‘𑀫𑀡𑀺𑀫𑀬𑀸 𑀘 𑀧𑀮𑁆𑀮𑀗𑁆𑀓𑀸, 𑀅𑀜𑁆𑀜𑁂 𑀲𑀸𑀭𑀫𑀬𑀸 𑀩𑀳𑀽;

𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀫𑀫𑀁 𑀲𑀩𑁆𑀩𑁂, 𑀲𑀻𑀳𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁮.

‘‘𑀲𑁄𑀡𑁆𑀡𑀫𑀬𑀸 𑀭𑀽𑀧𑀺𑀫𑀬𑀸, 𑀨𑀮𑀺𑀓𑀸𑀯𑁂𑀴𑀼𑀭𑀺𑀬𑀸𑀫𑀬𑀸;

𑀧𑀸𑀤𑀼𑀓𑀸 𑀅𑀪𑀺𑀭𑀽𑀳𑀸𑀫𑀺, 𑀧𑀸𑀤𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁯.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 [𑀘𑀢𑀼𑀦𑀯𑀼𑀢𑁂 𑀇𑀢𑁄 (𑀲𑀻. 𑀲𑁆𑀬𑀸.)] 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁦.

‘‘𑀢𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀇𑀦𑁆𑀤𑀦𑀸𑀫𑀸 𑀢𑀬𑁄 𑀚𑀦𑀸;

𑀤𑁆𑀯𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀢𑀬𑁄 𑀲𑀼𑀫𑀦𑀦𑀸𑀫𑀓𑀸.

𑁧𑁧.

‘‘𑀲𑀫𑀲𑀢𑁆𑀢𑀢𑀺𑀢𑁄 𑀓𑀧𑁆𑀧𑁂, 𑀢𑀬𑁄 𑀯𑀭𑀼𑀡𑀦𑀸𑀫𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸.

𑁧𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀳𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀏𑀓𑀢𑁆𑀣𑀫𑁆𑀪𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 ¶ ¶ 𑀪𑀕𑀯𑀢𑁄, 𑀫𑀳𑀸𑀧𑀽𑀕𑀕𑀡𑁄 𑀅𑀳𑀼;

𑀲𑀭𑀡𑀁 𑀕𑀢𑀸 𑀘 𑀢𑁂 𑀩𑀼𑀤𑁆𑀥𑀁, 𑀲𑀤𑁆𑀤𑀳𑀦𑁆𑀢𑀺 𑀢𑀣𑀸𑀕𑀢𑀁.

𑁧𑁪.

‘‘𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀢𑁆𑀯𑀸, 𑀫𑀸𑀴𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄;

𑀏𑀓𑀢𑁆𑀣𑀫𑁆𑀪𑀁 𑀅𑀮𑀪𑀦𑁆𑀢𑀸, 𑀯𑀺𑀘𑀺𑀦𑀦𑁆𑀢𑀺 𑀩𑁆𑀭𑀳𑀸𑀯𑀦𑁂.

𑁧𑁫.

‘‘𑀢𑁂𑀳𑀁 𑀅𑀭𑀜𑁆𑀜𑁂 𑀤𑀺𑀲𑁆𑀯𑀸𑀦, 𑀉𑀧𑀕𑀫𑁆𑀫 𑀕𑀡𑀁 𑀢𑀤𑀸;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀧𑀭𑀺𑀧𑀼𑀘𑁆𑀙𑀺𑀁 𑀕𑀡𑀁 𑀅𑀳𑀁.

𑁧𑁬.

‘‘𑀢𑁂 𑀫𑁂 𑀧𑀼𑀝𑁆𑀞𑀸 𑀯𑀺𑀬𑀸𑀓𑀁𑀲𑀼, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀫𑀸𑀴𑀁 𑀫𑀬𑀁 𑀓𑀢𑁆𑀢𑀼𑀓𑀸𑀫𑀸, 𑀏𑀓𑀢𑁆𑀣𑀫𑁆𑀪𑁄 𑀦 𑀮𑀩𑁆𑀪𑀢𑀺.

𑁧𑁭.

‘‘𑀏𑀓𑀢𑁆𑀣𑀫𑁆𑀪𑀁 𑀫𑀫𑀁 𑀤𑁂𑀣, 𑀅𑀳𑀁 𑀤𑀲𑁆𑀲𑀸𑀫𑀺 𑀲𑀢𑁆𑀣𑀼𑀦𑁄;

𑀆𑀳𑀭𑀺𑀲𑁆𑀲𑀸𑀫𑀳𑀁 𑀣𑀫𑁆𑀪𑀁, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀪𑀯𑀦𑁆𑀢𑀼 𑀢𑁂 [𑀪𑀯𑀦𑁆𑀢𑀼 𑀯𑁄 (𑀲𑀻.), 𑀪𑀯𑀸𑀣 𑀯𑁄 (?)].

𑁧𑁮.

‘‘𑀢𑁂 𑀫𑁂 𑀣𑀫𑁆𑀪𑀁 𑀧𑀯𑁂𑀘𑁆𑀙𑀺𑀁𑀲𑀼, 𑀧𑀲𑀦𑁆𑀦𑀸 𑀢𑀼𑀝𑁆𑀞𑀫𑀸𑀦𑀲𑀸;

𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸, 𑀅𑀕𑀫𑀁𑀲𑀼 𑀲𑀓𑀁 𑀖𑀭𑀁.

𑁧𑁯.

‘‘𑀅𑀘𑀺𑀭𑀁 𑀕𑀢𑁂 𑀧𑀽𑀕𑀕𑀡𑁂, 𑀣𑀫𑁆𑀪𑀁 𑀅𑀳𑀸𑀲𑀳𑀁 𑀢𑀤𑀸;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀞𑀫𑀁 𑀉𑀲𑁆𑀲𑀧𑁂𑀲𑀳𑀁.

𑁨𑁦.

‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀳𑀁;

𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 [𑀲𑀢𑀪𑀽𑀫𑀁 (𑀲𑀻. 𑀓.)] 𑀲𑀫𑀼𑀕𑁆𑀕𑀢𑀁.

𑁨𑁧.

‘‘𑀯𑀚𑁆𑀚𑀫𑀸𑀦𑀸𑀲𑀼 𑀪𑁂𑀭𑀻𑀲𑀼, 𑀧𑀭𑀺𑀘𑀸𑀭𑁂𑀫𑀳𑀁 𑀲𑀤𑀸;

𑀧𑀜𑁆𑀘𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀭𑀸𑀚𑀸 𑀆𑀲𑀺𑀁 𑀬𑀲𑁄𑀥𑀭𑁄.

𑁨𑁨.

‘‘𑀢𑀢𑁆𑀣𑀸𑀧𑀺 ¶ ¶ 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀏𑀓𑀢𑁆𑀣𑀫𑁆𑀪𑀁 𑀫𑀦𑁄𑀭𑀫𑀁.

𑁨𑁩.

‘‘𑀏𑀓𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀉𑀤𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀢𑁆𑀭𑀸𑀧𑀺 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁.

𑁨𑁪.

‘‘𑀬𑀁 ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀦𑀼𑀪𑁄𑀫𑀺 𑀲𑀼𑀔𑀁 𑀲𑀩𑁆𑀩𑀁 [𑀲𑀩𑁆𑀩𑀫𑁂𑀢𑀁 (𑀲𑁆𑀬𑀸.)], 𑀏𑀓𑀢𑁆𑀣𑀫𑁆𑀪𑀲𑁆𑀲𑀺𑀤𑀁 𑀨𑀮𑀁.

𑁨𑁫.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀣𑀫𑁆𑀪𑀫𑀤𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀢𑁆𑀣𑀫𑁆𑀪𑀲𑁆𑀲𑀺𑀤𑀁 𑀨𑀮𑀁.

𑁨𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀢𑁆𑀣𑀫𑁆𑀪𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀢𑁆𑀣𑀫𑁆𑀪𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀢𑁆𑀣𑀁 𑀔𑁄𑀫𑀁 𑀫𑀬𑀸 𑀤𑀺𑀦𑁆𑀦𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁮.

‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀮𑀚𑀼𑀢𑁆𑀢𑀭𑀦𑀸𑀫𑀓𑁄;

‘𑀇𑀫𑀺𑀦𑀸 𑀯𑀢𑁆𑀣𑀤𑀸𑀦𑁂𑀦, 𑀳𑁂𑀫𑀯𑀡𑁆𑀡𑁄 𑀪𑀯𑀺𑀲𑁆𑀲𑀲𑀺.

𑁨𑁯.

‘‘‘𑀤𑁆𑀯𑁂 ¶ 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀓𑀼𑀲𑀮𑀫𑀽𑀮𑁂𑀳𑀺 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀓𑀦𑀺𑀝𑁆𑀞𑁄 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺.

𑁩𑁦.

‘‘‘𑀭𑀸𑀕𑀭𑀢𑁆𑀢𑁄 𑀲𑀼𑀔𑀲𑀻𑀮𑁄, 𑀓𑀸𑀫𑁂𑀲𑀼 𑀕𑁂𑀥𑀫𑀸𑀬𑀼𑀢𑁄;

𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄 𑀲𑀦𑁆𑀢𑁄, 𑀢𑀤𑀸 [𑀢𑀢𑁄 (𑀲𑁆𑀬𑀸.)] 𑀢𑁆𑀯𑀁 𑀧𑀩𑁆𑀩𑀚𑀺𑀲𑁆𑀲𑀲𑀺.

𑁩𑁧.

‘‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀢𑁆𑀯𑀁 𑀢𑀢𑁆𑀣, 𑀓𑀼𑀲𑀮𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺𑀦𑀸𑀲𑀯𑁄’.

𑁩𑁨.

‘‘𑀲𑀢𑁆𑀢 ¶ [𑀲𑀢 (𑀲𑁆𑀬𑀸.)] 𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀘𑀢𑀼𑀭𑁄 𑀘𑁂𑀴𑀦𑀸𑀫𑀓𑀸;

𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀉𑀧𑀘𑁂𑀮𑀸 𑀘𑀢𑀼𑀚𑁆𑀚𑀦𑀸.

𑁩𑁩.

‘‘𑀧𑀜𑁆𑀘 𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀘𑁂𑀴𑀸𑀯 𑀘𑀢𑀼𑀭𑁄 𑀚𑀦𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸.

𑁩𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ ¶ 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀲𑁄, 𑀳𑀺𑀫𑀯𑀦𑁆𑀢𑁂 𑀯𑀲𑀻 𑀢𑀤𑀸.

𑁩𑁬.

‘‘𑀅𑀳𑀫𑁆𑀧𑀺 ¶ 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀢𑀤𑀸;

𑀅𑀘𑀺𑀭𑀸𑀕𑀢𑀁 𑀫𑀳𑀸𑀯𑀻𑀭𑀁, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁩𑁭.

‘‘𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀁, 𑀅𑀦𑁆𑀢𑀭𑀸𑀬𑀫𑀓𑀸𑀲𑀳𑀁.

𑁩𑁮.

‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀅𑀤𑀸𑀲𑀳𑀁;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺.

𑁩𑁯.

‘‘𑀲𑀩𑁆𑀩𑁂 𑀤𑁂𑀯𑀸 𑀅𑀢𑁆𑀢𑀫𑀦𑀸, 𑀳𑀺𑀫𑀯𑀦𑁆𑀢𑀁 𑀉𑀧𑁂𑀦𑁆𑀢𑀺 𑀢𑁂;

𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀼𑀁, 𑀅𑀦𑀼𑀫𑁄𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑁪𑁦.

‘‘𑀇𑀤𑀁 𑀯𑀢𑁆𑀯𑀸𑀦 𑀢𑁂 𑀤𑁂𑀯𑀸, 𑀉𑀧𑀕𑀘𑁆𑀙𑀼𑀁 𑀦𑀭𑀼𑀢𑁆𑀢𑀫𑀁;

𑀆𑀓𑀸𑀲𑁂 𑀥𑀸𑀭𑀬𑀦𑁆𑀢𑀲𑁆𑀲 [𑀥𑀸𑀭𑀬𑀦𑁆𑀢𑀁 𑀫𑁂 (𑀓), 𑀥𑀸𑀭𑀬𑀢𑁄 𑀫𑁂 (?)], 𑀧𑀤𑀼𑀫𑀘𑁆𑀙𑀢𑁆𑀢𑀫𑀼𑀢𑁆𑀢𑀫𑀁.

𑁪𑁧.

‘‘𑀲𑀢𑀧𑀢𑁆𑀢𑀙𑀢𑁆𑀢𑀁 𑀧𑀕𑁆𑀕𑀬𑁆𑀳, 𑀅𑀤𑀸𑀲𑀺 𑀢𑀸𑀧𑀲𑁄 𑀫𑀫;

‘𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁪𑁨.

‘‘‘𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀸𑀦𑀺, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀘𑀢𑀼𑀢𑁆𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁪𑁩.

‘‘‘𑀬𑀁 ¶ 𑀬𑀁 𑀬𑁄𑀦𑀺𑀁 𑀲𑀁𑀲𑀭𑀢𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀩𑁆𑀪𑁄𑀓𑀸𑀲𑁂 𑀧𑀢𑀺𑀝𑁆𑀞𑀦𑁆𑀢𑀁, 𑀧𑀤𑀼𑀫𑀁 𑀥𑀸𑀭𑀬𑀺𑀲𑁆𑀲𑀢𑀺’.

𑁪𑁪.

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀻. 𑀓.)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁫.

‘‘‘𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂, 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑀺𑀲𑁆𑀲𑀢𑀺;

𑀫𑀦𑁄𑀫𑀬𑀫𑁆𑀳𑀺 𑀓𑀸𑀬𑀫𑁆𑀳𑀺, 𑀉𑀢𑁆𑀢𑀫𑁄 𑀲𑁄 𑀪𑀯𑀺𑀲𑁆𑀲𑀢𑀺.

𑁪𑁬.

‘‘‘𑀤𑁆𑀯𑁂 ¶ 𑀪𑀸𑀢𑀭𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀉𑀪𑁄𑀧𑀺 𑀧𑀦𑁆𑀣𑀓𑀯𑁆𑀳𑀬𑀸;

𑀅𑀦𑀼𑀪𑁄𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁, 𑀚𑁄𑀢𑀬𑀺𑀲𑁆𑀲𑀦𑁆𑀢𑀺 𑀲𑀸𑀲𑀦𑀁’.

𑁪𑁭.

‘‘𑀲𑁄𑀳𑀁 ¶ 𑀅𑀝𑁆𑀞𑀸𑀭𑀲𑀯𑀲𑁆𑀲𑁄 [𑀲𑁄 𑀅𑀝𑁆𑀞𑀸𑀭𑀲𑀯𑀲𑁆𑀲𑁄𑀳𑀁 (𑀲𑁆𑀬𑀸.)], 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀯𑀺𑀲𑁂𑀲𑀸𑀳𑀁 𑀦 𑀯𑀺𑀦𑁆𑀤𑀸𑀫𑀺, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁪𑁮.

‘‘𑀤𑀦𑁆𑀥𑀸 𑀫𑀬𑁆𑀳𑀁 𑀕𑀢𑀻 𑀆𑀲𑀺, 𑀧𑀭𑀺𑀪𑀽𑀢𑁄 𑀧𑀼𑀭𑁂 𑀅𑀳𑀼𑀁 [𑀅𑀳𑀁 (𑀲𑁆𑀬𑀸.)];

𑀪𑀸𑀢𑀸 𑀘 𑀫𑀁 𑀧𑀡𑀸𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀲𑀓𑀁 𑀖𑀭𑀁.

𑁪𑁯.

‘‘𑀲𑁄𑀳𑀁 𑀧𑀡𑀸𑀫𑀺𑀢𑁄 𑀲𑀦𑁆𑀢𑁄, 𑀲𑀗𑁆𑀖𑀸𑀭𑀸𑀫𑀲𑁆𑀲 𑀓𑁄𑀝𑁆𑀞𑀓𑁂;

𑀤𑀼𑀫𑁆𑀫𑀦𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺𑀁, 𑀲𑀸𑀫𑀜𑁆𑀜𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸.

𑁫𑁦.

‘‘𑀪𑀕𑀯𑀸 ¶ 𑀢𑀢𑁆𑀣 [𑀅𑀣𑁂𑀢𑁆𑀣 𑀲𑀢𑁆𑀣𑀸 (𑀲𑀻. 𑀲𑁆𑀬𑀸.)] 𑀆𑀕𑀘𑁆𑀙𑀺, 𑀲𑀻𑀲𑀁 𑀫𑀬𑁆𑀳𑀁 𑀧𑀭𑀸𑀫𑀲𑀺;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀲𑀗𑁆𑀖𑀸𑀭𑀸𑀫𑀁 𑀧𑀯𑁂𑀲𑀬𑀺.

𑁫𑁧.

‘‘𑀅𑀦𑀼𑀓𑀫𑁆𑀧𑀸𑀬 𑀫𑁂 𑀲𑀢𑁆𑀣𑀸, 𑀅𑀤𑀸𑀲𑀺 𑀧𑀸𑀤𑀧𑀼𑀜𑁆𑀙𑀦𑀺𑀁;

𑀏𑀯𑀁 𑀲𑀼𑀤𑁆𑀥𑀁 𑀅𑀥𑀺𑀝𑁆𑀞𑁂𑀳𑀺, 𑀏𑀓𑀫𑀦𑁆𑀢𑀫𑀥𑀺𑀝𑁆𑀞𑀳𑀁.

𑁫𑁨.

‘‘𑀳𑀢𑁆𑀣𑁂𑀳𑀺 𑀢𑀫𑀳𑀁 𑀕𑀬𑁆𑀳, 𑀲𑀭𑀺𑀁 𑀓𑁄𑀓𑀦𑀤𑀁 𑀅𑀳𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀁.

𑁫𑁩.

‘‘𑀫𑀦𑁄𑀫𑀬𑁂𑀲𑀼 𑀓𑀸𑀬𑁂𑀲𑀼, 𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 [𑀘𑀼𑀮𑁆𑀮𑀧𑀦𑁆𑀣𑀓𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁫.

‘‘𑀦𑀺𑀩𑁆𑀩𑀼𑀢𑁂 ¶ ¶ 𑀮𑁄𑀓𑀦𑀸𑀣𑀫𑁆𑀳𑀺, 𑀲𑀼𑀫𑁂𑀥𑁂 𑀅𑀕𑁆𑀕𑀧𑀼𑀕𑁆𑀕𑀮𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀣𑀽𑀧𑀧𑀽𑀚𑀁 𑀅𑀓𑀸𑀲𑀳𑀁.

𑁫𑁬.

‘‘𑀬𑁂 𑀘 𑀔𑀻𑀡𑀸𑀲𑀯𑀸 𑀢𑀢𑁆𑀣, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀢𑁂𑀳𑀁 𑀢𑀢𑁆𑀣 𑀲𑀫𑀸𑀦𑁂𑀢𑁆𑀯𑀸, 𑀲𑀗𑁆𑀖𑀪𑀢𑁆𑀢𑀁 𑀅𑀓𑀸𑀲𑀳𑀁.

𑁫𑁭.

‘‘𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄, 𑀉𑀧𑀝𑁆𑀞𑀸𑀓𑁄 𑀢𑀤𑀸 𑀅𑀳𑀼;

𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦, 𑀅𑀦𑀼𑀫𑁄𑀤𑀺𑀢𑁆𑀣 𑀲𑁄 𑀢𑀤𑀸.

𑁫𑁮.

‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀳𑀁;

𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀅𑀘𑁆𑀙𑀭𑀸𑀬𑁄 𑀭𑀫𑀺𑀁𑀲𑀼 𑀫𑁂.

𑁫𑁯.

‘‘𑀫𑀫𑁂𑀯 ¶ 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀲𑀩𑁆𑀩𑀓𑀸𑀫𑁂𑀳𑀺 𑀢𑀸 𑀲𑀤𑀸;

𑀅𑀜𑁆𑀜𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁬𑁦.

‘‘𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀯𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀯𑀺𑀲𑀼𑀤𑁆𑀥𑀪𑁄𑀚𑀦𑁄 [𑀲𑀼𑀲𑀼𑀤𑁆𑀥𑀪𑁄𑀚𑀦𑁄 (𑀲𑀻.)] 𑀆𑀲𑀺𑀁, 𑀘𑀓𑁆𑀓𑀯𑀢𑁆𑀢𑀻 𑀅𑀳𑀁 𑀢𑀤𑀸.

𑁬𑁧.

‘‘𑀦 𑀢𑁂 𑀩𑀻𑀚𑀁 𑀧𑀯𑀧𑀦𑁆𑀢𑀺, 𑀦𑀧𑀺 𑀦𑀻𑀬𑀦𑁆𑀢𑀺 𑀦𑀗𑁆𑀕𑀮𑀸;

𑀅𑀓𑀝𑁆𑀞𑀧𑀸𑀓𑀺𑀫𑀁 𑀲𑀸𑀮𑀺𑀁, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀫𑀸𑀦𑀼𑀲𑀸.

𑁬𑁨.

‘‘𑀢𑀢𑁆𑀣 ¶ 𑀭𑀚𑁆𑀚𑀁 𑀓𑀭𑀺𑀢𑁆𑀯𑀸𑀦, 𑀤𑁂𑀯𑀢𑁆𑀢𑀁 𑀧𑀼𑀦 𑀕𑀘𑁆𑀙𑀳𑀁;

𑀢𑀤𑀸𑀧𑀺 𑀏𑀤𑀺𑀲𑀸 𑀫𑀬𑁆𑀳𑀁, 𑀦𑀺𑀩𑁆𑀩𑀢𑁆𑀢𑀸 𑀪𑁄𑀕𑀲𑀫𑁆𑀧𑀤𑀸.

𑁬𑁩.

‘‘𑀦 𑀫𑀁 𑀫𑀺𑀢𑁆𑀢𑀸 𑀅𑀫𑀺𑀢𑁆𑀢𑀸 𑀯𑀸, 𑀳𑀺𑀁𑀲𑀦𑁆𑀢𑀺 𑀲𑀩𑁆𑀩𑀧𑀸𑀡𑀺𑀦𑁄;

𑀲𑀩𑁆𑀩𑁂𑀲𑀫𑁆𑀧𑀺 𑀧𑀺𑀬𑁄 𑀳𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁬𑁪.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺 ¶ , 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀕𑀦𑁆𑀥𑀸𑀮𑁂𑀧𑀲𑁆𑀲𑀺𑀤𑀁 𑀨𑀮𑀁.

𑁬𑁫.

‘‘𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀫𑀳𑀸𑀦𑀼𑀪𑀸𑀯𑁄 𑀭𑀸𑀚𑀸𑀳𑀁 [𑀭𑀸𑀚𑀻𑀲𑀺 (𑀲𑁆𑀬𑀸. 𑀓.)], 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬𑁬.

‘‘𑀲𑁄𑀳𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀞𑀧𑁂𑀢𑁆𑀯𑀸 𑀚𑀦𑀢𑀁 𑀩𑀳𑀼𑀁;

𑀧𑀸𑀧𑁂𑀢𑁆𑀯𑀸 𑀲𑀼𑀕𑀢𑀺𑀁𑀬𑁂𑀯, 𑀤𑁂𑀯𑀢𑀸𑀦𑀁 𑀧𑀺𑀬𑁄 𑀅𑀳𑀼𑀁.

𑁬𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 [𑀧𑀺𑀮𑀺𑀦𑁆𑀤𑀺𑀯𑀘𑁆𑀙𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀭𑀸𑀳𑀼𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁮.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀢𑁆𑀢𑀪𑀽𑀫𑀫𑁆𑀳𑀺 𑀧𑀸𑀲𑀸𑀤𑁂, 𑀆𑀤𑀸𑀲𑀁 𑀲𑀦𑁆𑀣𑀭𑀺𑀁 𑀅𑀳𑀁.

𑁬𑁯.

‘‘𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀧𑀭𑀺𑀓𑀺𑀡𑁆𑀡𑁄 𑀫𑀳𑀸𑀫𑀼𑀦𑀺;

𑀉𑀧𑀸𑀕𑀫𑀺 𑀕𑀦𑁆𑀥𑀓𑀼𑀝𑀺𑀁, 𑀤𑁆𑀯𑀺𑀧𑀤𑀺𑀦𑁆𑀤𑁄 [𑀤𑀺𑀧𑀤𑀺𑀦𑁆𑀤𑁄 (𑀲𑀻. 𑀲𑁆𑀬𑀸.)] 𑀦𑀭𑀸𑀲𑀪𑁄.

𑁭𑁦.

‘‘𑀯𑀺𑀭𑁄𑀘𑁂𑀦𑁆𑀢𑁄 [𑀯𑀺𑀭𑁄𑀘𑀬𑀁 (𑀲𑁆𑀬𑀸.)] 𑀕𑀦𑁆𑀥𑀓𑀼𑀝𑀺𑀁, 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁭𑁧.

‘‘‘𑀬𑁂𑀦𑀸𑀬𑀁 ¶ ¶ 𑀚𑁄𑀢𑀺𑀢𑀸 𑀲𑁂𑀬𑁆𑀬𑀸, 𑀆𑀤𑀸𑀲𑁄𑀯 𑀲𑀼𑀲𑀦𑁆𑀣𑀢𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁭𑁨.

‘‘‘𑀲𑁄𑀡𑁆𑀡𑀫𑀬𑀸 𑀭𑀽𑀧𑀺𑀫𑀬𑀸, 𑀅𑀣𑁄 𑀯𑁂𑀴𑀼𑀭𑀺𑀬𑀸𑀫𑀬𑀸;

𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺 𑀧𑀸𑀲𑀸𑀤𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁭𑁩.

‘‘‘𑀘𑀢𑀼𑀲𑀝𑁆𑀞𑀺𑀓𑁆𑀔𑀢𑁆𑀢𑀼𑀁 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀪𑀯𑀺𑀲𑁆𑀲𑀢𑀺 𑀅𑀦𑀦𑁆𑀢𑀭𑀸.

𑁭𑁪.

‘‘‘𑀏𑀓𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀯𑀺𑀫𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁭𑁫.

‘‘‘𑀦𑀕𑀭𑀁 𑀭𑁂𑀡𑀼𑀯𑀢𑀻 𑀦𑀸𑀫, 𑀇𑀝𑁆𑀞𑀓𑀸𑀳𑀺 𑀲𑀼𑀫𑀸𑀧𑀺𑀢𑀁;

𑀆𑀬𑀸𑀫𑀢𑁄 𑀢𑀻𑀡𑀺 𑀲𑀢𑀁, 𑀘𑀢𑀼𑀭𑀲𑁆𑀲𑀲𑀫𑀸𑀬𑀼𑀢𑀁.

𑁭𑁬.

‘‘‘𑀲𑀼𑀤𑀲𑁆𑀲𑀦𑁄 𑀦𑀸𑀫 𑀧𑀸𑀲𑀸𑀤𑁄, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑁄 [𑀯𑀺𑀲𑀼𑀓𑀫𑁆𑀫𑁂𑀦§𑀫𑀸𑀧𑀺𑀢𑁄 (𑀓.), 𑀯𑀺𑀲𑁆𑀲𑀓𑀫𑁆𑀫𑁂𑀦 𑀦𑀺𑀫𑁆𑀫𑀺𑀢𑁄 (𑀲𑀻.)];

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑁄, 𑀲𑀢𑁆𑀢𑀭𑀢𑀦𑀪𑀽𑀲𑀺𑀢𑁄.

𑁭𑁭.

‘‘‘𑀤𑀲𑀲𑀤𑁆𑀤𑀸𑀯𑀺𑀯𑀺𑀢𑁆𑀢𑀁 ¶ 𑀢𑀁 [𑀅𑀯𑀺𑀯𑀺𑀢𑁆𑀢𑀁 (𑀲𑀻.)], 𑀯𑀺𑀚𑁆𑀚𑀸𑀥𑀭𑀲𑀫𑀸𑀓𑀼𑀮𑀁;

𑀲𑀼𑀤𑀲𑁆𑀲𑀦𑀁𑀯 𑀦𑀕𑀭𑀁, 𑀤𑁂𑀯𑀢𑀸𑀦𑀁 𑀪𑀯𑀺𑀲𑁆𑀲𑀢𑀺.

𑁭𑁮.

‘‘‘𑀧𑀪𑀸 𑀦𑀺𑀕𑁆𑀕𑀘𑁆𑀙𑀢𑁂 𑀢𑀲𑁆𑀲, 𑀉𑀕𑁆𑀕𑀘𑁆𑀙𑀦𑁆𑀢𑁂𑀯 𑀲𑀽𑀭𑀺𑀬𑁂;

𑀯𑀺𑀭𑁄𑀘𑁂𑀲𑁆𑀲𑀢𑀺 𑀢𑀁 𑀦𑀺𑀘𑁆𑀘𑀁, 𑀲𑀫𑀦𑁆𑀢𑀸 𑀅𑀝𑁆𑀞𑀬𑁄𑀚𑀦𑀁.

𑁭𑁯.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁮𑁦.

‘‘‘𑀢𑀼𑀲𑀺𑀢𑀸 𑀲𑁄 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀅𑀢𑁆𑀭𑀚𑁄 𑀲𑁄 𑀪𑀯𑀺𑀲𑁆𑀲𑀢𑀺.

𑁮𑁧.

‘‘‘𑀲𑀘𑁂 ¶ 𑀯𑀲𑁂𑀬𑁆𑀬 [𑀲𑀘𑀸’𑀯𑀲𑁂𑀬𑁆𑀬 (?)] 𑀅𑀕𑀸𑀭𑀁, 𑀘𑀓𑁆𑀓𑀯𑀢𑁆𑀢𑀻 𑀪𑀯𑁂𑀬𑁆𑀬 𑀲𑁄;

𑀅𑀝𑁆𑀞𑀸𑀦𑀫𑁂𑀢𑀁 𑀬𑀁 𑀢𑀸𑀤𑀻, 𑀅𑀕𑀸𑀭𑁂 𑀭𑀢𑀺𑀫𑀚𑁆𑀛𑀕𑀸.

𑁮𑁨.

‘‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀸𑀭𑀫𑁆𑀳𑀸, 𑀧𑀩𑁆𑀩𑀚𑀺𑀲𑁆𑀲𑀢𑀺 𑀲𑀼𑀩𑁆𑀩𑀢𑁄;

𑀭𑀸𑀳𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀅𑀭𑀳𑀸 𑀲𑁄 𑀪𑀯𑀺𑀲𑁆𑀲𑀢𑀺’.

𑁮𑁩.

‘‘𑀓𑀺𑀓𑀻𑀯 𑀅𑀡𑁆𑀟𑀁 𑀭𑀓𑁆𑀔𑁂𑀬𑁆𑀬, 𑀘𑀸𑀫𑀭𑀻 𑀯𑀺𑀬 𑀯𑀸𑀮𑀥𑀺𑀁;

𑀦𑀺𑀧𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀫𑀫𑀁 𑀭𑀓𑁆𑀔𑀺 𑀫𑀳𑀸𑀫𑀼𑀦𑀺 [𑀏𑀯𑀁 𑀭𑀓𑁆𑀔𑀺𑀁 𑀫𑀳𑀸𑀫𑀼𑀦𑀺 (𑀲𑀻. 𑀓.), 𑀫𑀫𑀁 𑀤𑀓𑁆𑀔𑀺 𑀫𑀳𑀸𑀫𑀼𑀦𑀺 (𑀲𑁆𑀬𑀸.)].

𑁮𑁪.

‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁬.

‘‘𑀧𑀤𑀼𑀫𑀼𑀢𑁆𑀢𑀭𑀁 ¶ 𑀪𑀕𑀯𑀦𑁆𑀢𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀧𑀩𑁆𑀪𑀸𑀭𑀫𑁆𑀳𑀺 𑀦𑀺𑀲𑀻𑀤𑀦𑁆𑀢𑀁, 𑀉𑀧𑀕𑀘𑁆𑀙𑀺𑀁 𑀦𑀭𑀼𑀢𑁆𑀢𑀫𑀁.

𑁮𑁭.

‘‘𑀓𑀡𑀺𑀓𑀸𑀭𑀧𑀼𑀧𑁆𑀨𑀁 ¶ [𑀓𑀡𑀺𑀓𑀸𑀭𑀁 𑀧𑀼𑀧𑁆𑀨𑀺𑀢𑀁 (𑀲𑀻. 𑀲𑁆𑀬𑀸.)] 𑀤𑀺𑀲𑁆𑀯𑀸, 𑀯𑀡𑁆𑀝𑁂 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀙𑀢𑁆𑀢𑀫𑁆𑀳𑀺, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁮𑁮.

‘‘𑀧𑀺𑀡𑁆𑀟𑀧𑀸𑀢𑀜𑁆𑀘 ¶ 𑀧𑀸𑀤𑀸𑀲𑀺𑀁, 𑀧𑀭𑀫𑀦𑁆𑀦𑀁 𑀲𑀼𑀪𑁄𑀚𑀦𑀁;

𑀩𑀼𑀤𑁆𑀥𑁂𑀦 𑀦𑀯𑀫𑁂 𑀢𑀢𑁆𑀣, 𑀲𑀫𑀡𑁂 𑀅𑀝𑁆𑀞 𑀪𑁄𑀚𑀬𑀺𑀁.

𑁮𑁯.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀇𑀫𑀺𑀦𑀸 𑀙𑀢𑁆𑀢𑀤𑀸𑀦𑁂𑀦, 𑀧𑀭𑀫𑀦𑁆𑀦𑀧𑀯𑁂𑀘𑁆𑀙𑀦𑀸.

𑁯𑁦.

‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀲𑁆𑀲𑀲𑀺;

𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁯𑁧.

‘‘𑀏𑀓𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁯𑁨.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺 [𑀬𑀁 𑀯𑀤𑀦𑁆𑀢𑀺 𑀲𑀼𑀫𑁂𑀥𑁄𑀢𑀺, 𑀪𑀽𑀭𑀺𑀧𑀜𑁆𑀜𑀁 𑀲𑀼𑀫𑁂𑀥𑀲𑀁; 𑀓𑀧𑁆𑀧𑁂𑀢𑁄 𑀲𑀢𑀲𑀳𑀲𑁆𑀲𑁂, 𑀏𑀲 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺; (𑀓.)].

𑁯𑁩.

‘‘𑀲𑀸𑀲𑀦𑁂 𑀤𑀺𑀩𑁆𑀩𑀫𑀸𑀦𑀫𑁆𑀳𑀺, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄.

𑁯𑁪.

‘‘𑀉𑀧𑀲𑁂𑀦𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄;

[𑀇𑀤𑀁 𑀧𑀸𑀤𑀤𑁆𑀯𑀬𑀁 𑀣𑁂𑀭𑀕𑀸𑀣𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀤𑀺𑀲𑁆𑀲𑀢𑀺] 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺

[𑀇𑀤𑀁 𑀧𑀸𑀤𑀤𑁆𑀯𑀬𑀁 𑀣𑁂𑀭𑀕𑀸𑀣𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀤𑀺𑀲𑁆𑀲𑀢𑀺].

𑁯𑁫.

‘‘𑀘𑀭𑀺𑀫𑀁 𑀯𑀢𑁆𑀢𑀢𑁂 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁 [𑀲𑀯𑀸𑀳𑀺𑀦𑀺𑀁 (?)].

𑁯𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀲𑁂𑀦𑁄 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑀢𑀢𑀺𑀬𑀪𑀸𑀡𑀯𑀸𑀭𑀁.

𑁮. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁭.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ ¶ ¶ 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀭𑀦𑀸𑀕𑁄 𑀫𑀬𑀸 𑀤𑀺𑀦𑁆𑀦𑁄, 𑀈𑀲𑀸𑀤𑀦𑁆𑀢𑁄 𑀉𑀭𑀽𑀴𑁆𑀳𑀯𑀸.

𑁯𑁮.

‘‘𑀲𑁂𑀢𑀘𑁆𑀙𑀢𑁆𑀢𑁄 𑀧𑀲𑁄𑀪𑀺𑀢𑁄, 𑀲𑀓𑀧𑁆𑀧𑀦𑁄 𑀲𑀳𑀢𑁆𑀣𑀺𑀧𑁄;

𑀅𑀕𑁆𑀖𑀸𑀧𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀲𑀗𑁆𑀖𑀸𑀭𑀸𑀫𑀁 𑀅𑀓𑀸𑀭𑀬𑀺𑀁.

𑁯𑁯.

‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀺𑀁 𑀅𑀳𑀁;

𑀫𑀳𑁄𑀖𑀤𑀸𑀦𑀁 [𑀫𑀳𑀸𑀪𑀢𑁆𑀢𑀁 (𑀲𑀻.), 𑀫𑀳𑁄𑀖𑀜𑁆𑀘 (𑀓.), 𑀫𑀳𑀸𑀤𑀸𑀦𑀁 (?)] 𑀓𑀭𑀺𑀢𑁆𑀯𑀸𑀦, 𑀦𑀺𑀬𑁆𑀬𑀸𑀤𑁂𑀲𑀺𑀁 𑀫𑀳𑁂𑀲𑀺𑀦𑁄.

𑁧𑁦𑁦.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀲𑀩𑁆𑀩𑁂 𑀚𑀦𑁂 𑀳𑀸𑀲𑀬𑀦𑁆𑀢𑁄, 𑀤𑁂𑀲𑁂𑀲𑀺 𑀅𑀫𑀢𑀁 𑀧𑀤𑀁.

𑁧𑁦𑁧.

‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀮𑀚𑀼𑀢𑁆𑀢𑀭𑀦𑀸𑀫𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁦𑁨.

‘‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀻 𑀅𑀬𑀁;

𑀓𑀣𑀬𑀺𑀲𑁆𑀲𑀸𑀫𑀺 𑀯𑀺𑀧𑀸𑀓𑀁, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁧𑁦𑁩.

‘‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀓𑀽𑀝𑀸𑀕𑀸𑀭𑀸 𑀪𑀯𑀺𑀲𑁆𑀲𑀭𑁂;

𑀩𑁆𑀬𑀫𑁆𑀳𑀼𑀢𑁆𑀢𑀫𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀘 𑀢𑁂.

𑁧𑁦𑁪.

‘‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁧𑁦𑁫.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁦𑁬.

‘‘‘𑀤𑁂𑀯𑀮𑁄𑀓𑀸 ¶ 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀅𑀟𑁆𑀠𑁂 𑀓𑀼𑀮𑁂 𑀫𑀳𑀸𑀪𑁄𑀕𑁂, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁧𑁦𑁭.

‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀭𑀝𑁆𑀞𑀧𑀸𑀮𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁧𑁦𑁮.

‘‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 ¶ 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁧𑁦𑁯.

‘‘𑀉𑀝𑁆𑀞𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀚𑀳𑀺𑀢𑀸 𑀪𑁄𑀕𑀲𑀫𑁆𑀧𑀤𑀸;

𑀔𑁂𑀴𑀧𑀺𑀡𑁆𑀟𑁂𑀯 𑀪𑁄𑀕𑀫𑁆𑀳𑀺, 𑀧𑁂𑀫𑀁 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺.

𑁧𑁧𑁦.

‘‘𑀯𑀻𑀭𑀺𑀬𑀁 ¶ ¶ 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁧𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑁄𑀧𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧𑁨.

‘‘𑀧𑀩𑁆𑀪𑀸𑀭𑀁 𑀲𑁄𑀥𑀬𑀦𑁆𑀢𑀲𑁆𑀲 [𑀲𑁂𑀯𑀬𑀦𑁆𑀢𑀲𑁆𑀲 (𑀲𑀻. 𑀓.)], 𑀯𑀺𑀧𑀺𑀦𑁂 𑀧𑀩𑁆𑀩𑀢𑀼𑀢𑁆𑀢𑀫𑁂;

𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀕𑀯𑀸, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁧𑁧𑁩.

‘‘𑀩𑀼𑀤𑁆𑀥𑀁 ¶ 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸𑀦 [𑀧𑀜𑁆𑀜𑀧𑁂𑀢𑁆𑀯𑀸𑀦 (𑀲𑁆𑀬𑀸. 𑀅𑀝𑁆𑀞)], 𑀧𑀼𑀧𑁆𑀨𑀸𑀲𑀦𑀫𑀤𑀸𑀲𑀳𑀁.

𑁧𑁧𑁪.

‘‘𑀧𑀼𑀧𑁆𑀨𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀫𑀫𑀜𑁆𑀘 𑀕𑀢𑀺𑀫𑀜𑁆𑀜𑀸𑀬, 𑀅𑀦𑀺𑀘𑁆𑀘𑀢𑀫𑀼𑀤𑀸𑀳𑀭𑀺.

𑁧𑁧𑁫.

‘‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’.

𑁧𑁧𑁬.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀺 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁧𑁧𑁭.

‘‘𑀲𑀓𑀁 𑀤𑀺𑀝𑁆𑀞𑀺𑀁 𑀚𑀳𑀺𑀢𑁆𑀯𑀸𑀦, 𑀪𑀸𑀯𑀬𑀸𑀦𑀺𑀘𑁆𑀘𑀲𑀜𑁆𑀜𑀳𑀁;

𑀏𑀓𑀸𑀳𑀁 𑀪𑀸𑀯𑀬𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀁 𑀓𑀢𑁄 𑀅𑀳𑀁.

𑁧𑁧𑁮.

‘‘𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀧𑀸𑀓𑀬𑁄𑀦𑀼𑀧𑀸𑀕𑀫𑀺𑀁.

𑁧𑁧𑁯.

‘‘𑀅𑀕𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁨𑁦.

‘‘𑀆𑀭𑀤𑁆𑀥𑀯𑀻𑀭𑀺𑀬𑁄 ¶ ¶ 𑀧𑀳𑀺𑀢𑀢𑁆𑀢𑁄, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀢𑁄𑀲𑁂𑀢𑁆𑀯𑀸𑀦 𑀫𑀳𑀸𑀦𑀸𑀕𑀁, 𑀅𑀮𑀢𑁆𑀣𑀁 𑀉𑀧𑀲𑀫𑁆𑀧𑀤𑀁.

𑁧𑁨𑁧.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁨.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀁 𑀪𑀸𑀯𑀬𑀺𑀁 𑀢𑀤𑀸;

𑀢𑀁 𑀲𑀜𑁆𑀜𑀁 𑀪𑀸𑀯𑀬𑀦𑁆𑀢𑀲𑁆𑀲, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄.

𑁧𑁨𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀧𑀸𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀧𑀸𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨𑁪.

‘‘𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀳𑀁, 𑀧𑀝𑀺𑀬𑀸𑀤𑁂𑀢𑁆𑀯𑀸𑀦 𑀪𑁄𑀚𑀦𑀁;

𑀩𑁆𑀭𑀸𑀳𑁆𑀫𑀡𑁂 𑀧𑀝𑀺𑀫𑀸𑀦𑁂𑀦𑁆𑀢𑁄, 𑀯𑀺𑀲𑀸𑀮𑁂 𑀫𑀸𑀴𑀓𑁂 𑀞𑀺𑀢𑁄.

𑁧𑁨𑁫.

‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀧𑀺𑀬𑀤𑀲𑁆𑀲𑀺𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀮𑁄𑀓𑀯𑀺𑀦𑁂𑀢𑀸𑀭𑀁, 𑀲𑀬𑀫𑁆𑀪𑀼𑀁 𑀅𑀕𑁆𑀕𑀧𑀼𑀕𑁆𑀕𑀮𑀁.

𑁧𑁨𑁬.

‘‘𑀪𑀕𑀯𑀦𑁆𑀢𑀁 𑀚𑀼𑀢𑀺𑀫𑀦𑁆𑀢𑀁, 𑀲𑀸𑀯𑀓𑁂𑀳𑀺 𑀧𑀼𑀭𑀓𑁆𑀔𑀢𑀁;

𑀆𑀤𑀺𑀘𑁆𑀘𑀫𑀺𑀯 𑀭𑁄𑀘𑀦𑁆𑀢𑀁, 𑀭𑀣𑀺𑀬𑀁 𑀧𑀝𑀺𑀧𑀦𑁆𑀦𑀓𑀁.

𑁧𑁨𑁭.

‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀫𑀦𑀲𑀸𑀯 𑀦𑀺𑀫𑀦𑁆𑀢𑁂𑀲𑀺𑀁, ‘𑀆𑀕𑀘𑁆𑀙𑀢𑀼 𑀫𑀳𑀸𑀫𑀼𑀦𑀺’.

𑁧𑁨𑁮.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀫𑀫 𑀤𑁆𑀯𑀸𑀭𑀁 𑀉𑀧𑀸𑀕𑀫𑀺.

𑁧𑁨𑁯.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺𑀢𑁆𑀯𑀸, 𑀲𑀻𑀳𑀸𑀲𑀦𑁂 𑀦𑀺𑀲𑀻𑀤𑀢𑀁 [𑀦𑀺𑀲𑀻𑀤 𑀢𑁆𑀯𑀁 (𑀲𑀻.)].

𑁧𑁩𑁦.

‘‘𑀤𑀦𑁆𑀢𑁄 ¶ ¶ 𑀤𑀦𑁆𑀢𑀧𑀭𑀺𑀯𑀸𑀭𑁄, 𑀢𑀺𑀡𑁆𑀡𑁄 𑀢𑀸𑀭𑀬𑀢𑀁 𑀯𑀭𑁄;

𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺𑀢𑁆𑀯𑀸, 𑀦𑀺𑀲𑀻𑀤𑀺 𑀧𑀯𑀭𑀸𑀲𑀦𑁂.

𑁧𑁩𑁧.

‘‘𑀬𑀁 𑀫𑁂 𑀅𑀢𑁆𑀣𑀺 𑀲𑀓𑁂 𑀕𑁂𑀳𑁂, 𑀆𑀫𑀺𑀲𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁;

𑀢𑀸𑀳𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁩𑁨.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 ¶ 𑀲𑀼𑀫𑀦𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀫𑀲𑁆𑀲𑀸𑀫𑀺, 𑀅𑀳𑁄 𑀩𑀼𑀤𑁆𑀥𑀲𑁆𑀲𑀼𑀴𑀸𑀭𑀢𑀸.

𑁧𑁩𑁩.

‘‘𑀅𑀝𑁆𑀞𑀦𑁆𑀦𑀁 ¶ 𑀧𑀬𑀺𑀭𑀽𑀧𑀸𑀲𑀢𑀁, 𑀪𑀼𑀜𑁆𑀚𑀁 𑀔𑀻𑀡𑀸𑀲𑀯𑀸 𑀩𑀳𑀽;

𑀢𑀼𑀬𑁆𑀳𑁂𑀯𑁂𑀲𑁄 𑀆𑀦𑀼𑀪𑀸𑀯𑁄, 𑀲𑀭𑀡𑀁 𑀢𑀁 𑀉𑀧𑁂𑀫𑀳𑀁.

𑁧𑁩𑁪.

‘‘𑀧𑀺𑀬𑀤𑀲𑁆𑀲𑀻 𑀘 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁩𑁫.

‘‘‘𑀬𑁄 𑀲𑁄 𑀲𑀗𑁆𑀖𑀁 𑀅𑀪𑁄𑀚𑁂𑀲𑀺, 𑀉𑀚𑀼𑀪𑀽𑀢𑀁 𑀲𑀫𑀸𑀳𑀺𑀢𑀁;

𑀢𑀣𑀸𑀕𑀢𑀜𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁩𑁬.

‘‘‘𑀲𑀢𑁆𑀢𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀲𑁄, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺.

𑁧𑁩𑁭.

‘‘‘𑀤𑀲 𑀅𑀝𑁆𑀞 𑀘𑀓𑁆𑀔𑀢𑁆𑀢𑀼𑀁 [𑀤𑀲𑀜𑁆𑀘𑀝𑁆𑀞𑀓𑁆𑀔𑀢𑁆𑀣𑀼𑀁 (𑀲𑀻.), 𑀤𑀲 𑀘𑀝𑁆𑀞𑀓𑁆𑀔𑀢𑁆𑀢𑀼𑀁 (𑀲𑁆𑀬𑀸.)] 𑀲𑁄, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀧𑀜𑁆𑀘𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺’.

𑁧𑁩𑁮.

‘‘𑀅𑀭𑀜𑁆𑀜𑀯𑀦𑀫𑁄𑀕𑁆𑀕𑀬𑁆𑀳, 𑀓𑀸𑀦𑀦𑀁 𑀩𑁆𑀬𑀕𑁆𑀖𑀲𑁂𑀯𑀺𑀢𑀁;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑀸.

𑁧𑁩𑁯.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁪𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀗𑁆𑀕𑀮𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀻𑀳𑀸𑀲𑀦𑀻 ¶ 𑀏𑀓𑀣𑀫𑁆𑀪𑀻, 𑀦𑀦𑁆𑀤𑁄 𑀘 𑀘𑀽𑀴𑀧𑀦𑁆𑀣𑀓𑁄;

𑀧𑀺𑀮𑀺𑀦𑁆𑀤𑀭𑀸𑀳𑀼𑀮𑁄 𑀘𑁂𑀯, 𑀯𑀗𑁆𑀕𑀦𑁆𑀢𑁄 𑀭𑀝𑁆𑀞𑀧𑀸𑀮𑀓𑁄.

𑀲𑁄𑀧𑀸𑀓𑁄 𑀫𑀗𑁆𑀕𑀮𑁄 𑀘𑁂𑀯, 𑀤𑀲𑁂𑀯 𑀤𑀼𑀢𑀺𑀬𑁂 𑀯𑀕𑁆𑀕𑁂;

𑀲𑀢𑀜𑁆𑀘 𑀅𑀝𑁆𑀞𑀢𑀺𑀁𑀲 𑀘, 𑀕𑀸𑀣𑀸 𑀘𑁂𑀢𑁆𑀣 𑀧𑀓𑀸𑀲𑀺𑀢𑀸.

𑀲𑀻𑀳𑀸𑀲𑀦𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀲𑀼𑀪𑀽𑀢𑀺𑀯𑀕𑁆𑀕𑁄

𑁧. 𑀲𑀼𑀪𑀽𑀢𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ ¶ ¶ , 𑀦𑀺𑀲𑀪𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁨.

‘‘𑀓𑁄𑀲𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀏𑀓𑀸𑀓𑀺𑀬𑁄 [𑀏𑀓𑀸𑀓𑀺𑀓𑁄 (𑀓.)] 𑀅𑀤𑀼𑀢𑀺𑀬𑁄, 𑀯𑀲𑀸𑀫𑀺 𑀦𑀺𑀲𑀪𑁂 𑀢𑀤𑀸.

𑁩.

‘‘𑀨𑀮𑀁 𑀫𑀽𑀮𑀜𑁆𑀘 𑀧𑀡𑁆𑀡𑀜𑁆𑀘, 𑀦 𑀪𑀼𑀜𑁆𑀚𑀸𑀫𑀺 𑀅𑀳𑀁 𑀢𑀤𑀸;

𑀧𑀯𑀢𑁆𑀢𑀁𑀯 𑀲𑀼𑀧𑀸𑀢𑀸𑀳𑀁 [𑀧𑀯𑀢𑁆𑀢𑀧𑀡𑁆𑀟𑀼𑀧𑀢𑁆𑀢𑀸𑀦𑀺 (𑀲𑀻.)], 𑀉𑀧𑀚𑀻𑀯𑀸𑀫𑀺 𑀢𑀸𑀯𑀤𑁂.

𑁪.

‘‘𑀦𑀸𑀳𑀁 ¶ 𑀓𑁄𑀧𑁂𑀫𑀺 𑀆𑀚𑀻𑀯𑀁, 𑀘𑀚𑀫𑀸𑀦𑁄𑀧𑀺 𑀚𑀻𑀯𑀺𑀢𑀁;

𑀆𑀭𑀸𑀥𑁂𑀫𑀺 𑀲𑀓𑀁 𑀘𑀺𑀢𑁆𑀢𑀁, 𑀯𑀺𑀯𑀚𑁆𑀚𑁂𑀫𑀺 𑀅𑀦𑁂𑀲𑀦𑀁.

𑁫.

‘‘𑀭𑀸𑀕𑀽𑀧𑀲𑀁𑀳𑀺𑀢𑀁 𑀘𑀺𑀢𑁆𑀢𑀁, 𑀬𑀤𑀸 𑀉𑀧𑁆𑀧𑀚𑁆𑀚𑀢𑁂 𑀫𑀫;

𑀲𑀬𑀁𑀯 𑀧𑀘𑁆𑀘𑀯𑁂𑀓𑁆𑀔𑀸𑀫𑀺, 𑀏𑀓𑀕𑁆𑀕𑁄 𑀢𑀁 𑀤𑀫𑁂𑀫𑀳𑀁.

𑁬.

‘‘‘𑀭𑀚𑁆𑀚𑀲𑁂 𑀭𑀚𑁆𑀚𑀦𑀻𑀬𑁂 𑀘, 𑀤𑀼𑀲𑁆𑀲𑀦𑀻𑀬𑁂 𑀘 𑀤𑀼𑀲𑁆𑀲𑀲𑁂;

𑀫𑀼𑀬𑁆𑀳𑀲𑁂 𑀫𑁄𑀳𑀦𑀻𑀬𑁂 𑀘, 𑀦𑀺𑀓𑁆𑀔𑀫𑀲𑁆𑀲𑀼 𑀯𑀦𑀸 𑀢𑀼𑀯𑀁.

𑁭.

‘‘‘𑀯𑀺𑀲𑀼𑀤𑁆𑀥𑀸𑀦𑀁 𑀅𑀬𑀁 𑀯𑀸𑀲𑁄, 𑀦𑀺𑀫𑁆𑀫𑀮𑀸𑀦𑀁 𑀢𑀧𑀲𑁆𑀲𑀺𑀦𑀁;

𑀫𑀸 𑀔𑁄 𑀯𑀺𑀲𑀼𑀤𑁆𑀥𑀁 𑀤𑀽𑀲𑁂𑀲𑀺, 𑀦𑀺𑀓𑁆𑀔𑀫𑀲𑁆𑀲𑀼 𑀯𑀦𑀸 𑀢𑀼𑀯𑀁.

𑁮.

‘‘‘𑀅𑀕𑀸𑀭𑀺𑀓𑁄 𑀪𑀯𑀺𑀢𑁆𑀯𑀸𑀦, 𑀬𑀤𑀸 𑀧𑀼𑀢𑁆𑀢𑀁 [𑀲𑀤𑀸𑀬𑀼𑀢𑁆𑀢𑀁 (𑀲𑀻.), 𑀬𑀤𑀸𑀬𑀼𑀢𑁆𑀢𑀁 (𑀲𑁆𑀬𑀸.)], 𑀮𑀪𑀺𑀲𑁆𑀲𑀲𑀺;

𑀉𑀪𑁄𑀧𑀺 𑀫𑀸 𑀯𑀺𑀭𑀸𑀥𑁂𑀲𑀺, 𑀦𑀺𑀓𑁆𑀔𑀫𑀲𑁆𑀲𑀼 𑀯𑀦𑀸 𑀢𑀼𑀯𑀁.

𑁯.

‘‘‘𑀙𑀯𑀸𑀮𑀸𑀢𑀁 𑀬𑀣𑀸 𑀓𑀝𑁆𑀞𑀁, 𑀦 𑀓𑁆𑀯𑀘𑀺 𑀓𑀺𑀘𑁆𑀘𑀓𑀸𑀭𑀓𑀁;

𑀦𑁂𑀯 𑀕𑀸𑀫𑁂 𑀅𑀭𑀜𑁆𑀜𑁂 𑀯𑀸, 𑀦 𑀳𑀺 𑀢𑀁 𑀓𑀝𑁆𑀞𑀲𑀫𑁆𑀫𑀢𑀁.

𑁧𑁦.

‘‘‘𑀙𑀯𑀸𑀮𑀸𑀢𑀽𑀧𑀫𑁄 𑀢𑁆𑀯𑀁𑀲𑀺, 𑀦 𑀕𑀺𑀳𑀻 𑀦𑀸𑀧𑀺 𑀲𑀜𑁆𑀜𑀢𑁄;

𑀉𑀪𑀢𑁄 𑀫𑀼𑀢𑁆𑀢𑀓𑁄 𑀅𑀚𑁆𑀚, 𑀦𑀺𑀓𑁆𑀔𑀫𑀲𑁆𑀲𑀼 𑀯𑀦𑀸 𑀢𑀼𑀯𑀁.

𑁧𑁧.

‘‘‘𑀲𑀺𑀬𑀸 𑀦𑀼 𑀔𑁄 𑀢𑀯 𑀏𑀢𑀁, 𑀓𑁄 𑀧𑀚𑀸𑀦𑀸𑀢𑀺 𑀢𑁂 𑀇𑀤𑀁;

𑀲𑀤𑁆𑀥𑀸𑀥𑀼𑀭𑀁 𑀯𑀳𑀺𑀲𑀺 [𑀲𑀤𑁆𑀥𑀸𑀥𑀼𑀭𑀁 𑀚𑀳𑀲𑀺 (𑀲𑀻.), 𑀲𑀻𑀖𑀁 𑀥𑀼𑀭𑀁 𑀯𑀳𑀺𑀲𑀺 (𑀲𑁆𑀬𑀸.)] 𑀫𑁂, 𑀓𑁄𑀲𑀚𑁆𑀚𑀩𑀳𑀼𑀮𑀸𑀬 𑀘.

𑁧𑁨.

‘‘‘𑀚𑀺𑀕𑀼𑀘𑁆𑀙𑀺𑀲𑁆𑀲𑀦𑁆𑀢𑀺 ¶ ¶ 𑀢𑀁 𑀯𑀺𑀜𑁆𑀜𑀽, 𑀅𑀲𑀼𑀘𑀺𑀁 𑀦𑀸𑀕𑀭𑀺𑀓𑁄 𑀬𑀣𑀸;

𑀆𑀓𑀟𑁆𑀠𑀺𑀢𑁆𑀯𑀸𑀦 𑀇𑀲𑀬𑁄, 𑀘𑁄𑀤𑀬𑀺𑀲𑁆𑀲𑀦𑁆𑀢𑀺 𑀢𑀁 𑀲𑀤𑀸.

𑁧𑁩.

‘‘‘𑀢𑀁 𑀯𑀺𑀜𑁆𑀜𑀽 𑀧𑀯𑀤𑀺𑀲𑁆𑀲𑀦𑁆𑀢𑀺, 𑀲𑀫𑀢𑀺𑀓𑁆𑀓𑀦𑁆𑀢𑀲𑀸𑀲𑀦𑀁;

𑀲𑀁𑀯𑀸𑀲𑀁 𑀅𑀮𑀪𑀦𑁆𑀢𑁄 𑀳𑀺, 𑀓𑀣𑀁 𑀚𑀻𑀯𑀺𑀳𑀺𑀲𑀺 [𑀚𑀻𑀯𑀺𑀲𑁆𑀲𑀲𑀺 (𑀲𑀻.)] 𑀢𑀼𑀯𑀁.

𑁧𑁪.

‘‘‘𑀢𑀺𑀥𑀸𑀧𑀪𑀺𑀦𑁆𑀦𑀁 ¶ ¶ 𑀫𑀸𑀢𑀗𑁆𑀕𑀁, 𑀓𑀼𑀜𑁆𑀚𑀭𑀁 𑀲𑀝𑁆𑀞𑀺𑀳𑀸𑀬𑀦𑀁;

𑀩𑀮𑀻 𑀦𑀸𑀕𑁄 𑀉𑀧𑀕𑀦𑁆𑀢𑁆𑀯𑀸, 𑀬𑀽𑀣𑀸 𑀦𑀻𑀳𑀭𑀢𑁂 𑀕𑀚𑀁.

𑁧𑁫.

‘‘‘𑀬𑀽𑀣𑀸 𑀯𑀺𑀦𑀺𑀲𑁆𑀲𑀝𑁄 𑀲𑀦𑁆𑀢𑁄, 𑀲𑀼𑀔𑀁 𑀲𑀸𑀢𑀁 𑀦 𑀯𑀺𑀦𑁆𑀤𑀢𑀺;

𑀤𑀼𑀓𑁆𑀔𑀺𑀢𑁄 𑀯𑀺𑀫𑀦𑁄 𑀳𑁄𑀢𑀺, 𑀧𑀚𑁆𑀛𑀸𑀬𑀦𑁆𑀢𑁄 𑀧𑀯𑁂𑀥𑀢𑀺.

𑁧𑁬.

‘‘‘𑀢𑀣𑁂𑀯 𑀚𑀝𑀺𑀮𑀸 𑀢𑀫𑁆𑀧𑀺, 𑀦𑀻𑀳𑀭𑀺𑀲𑁆𑀲𑀦𑁆𑀢𑀺 𑀤𑀼𑀫𑁆𑀫𑀢𑀺𑀁;

𑀢𑁂𑀳𑀺 𑀢𑁆𑀯𑀁 𑀦𑀺𑀲𑁆𑀲𑀝𑁄 𑀲𑀦𑁆𑀢𑁄, 𑀲𑀼𑀔𑀁 𑀲𑀸𑀢𑀁 𑀦 𑀮𑀘𑁆𑀙𑀲𑀺.

𑁧𑁭.

‘‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄;

𑀟𑀬𑁆𑀳𑀲𑀺 𑀧𑀭𑀺𑀴𑀸𑀳𑁂𑀦, 𑀕𑀚𑁄 𑀬𑀽𑀣𑀸𑀯 𑀦𑀺𑀲𑁆𑀲𑀝𑁄.

𑁧𑁮.

‘‘‘𑀚𑀸𑀢𑀭𑀽𑀧𑀁 𑀬𑀣𑀸 𑀓𑀽𑀝𑀁, 𑀦𑁂𑀯 𑀛𑀸𑀬𑀢𑀺 [𑀬𑀸𑀬𑀢𑀺 (𑀲𑁆𑀬𑀸.)] 𑀓𑀢𑁆𑀣𑀘𑀺;

𑀢𑀣𑀸 𑀲𑀻𑀮𑀯𑀺𑀳𑀻𑀦𑁄 𑀢𑁆𑀯𑀁, 𑀦 𑀛𑀸𑀬𑀺𑀲𑁆𑀲𑀲𑀺 [𑀬𑀸𑀭𑀺𑀲𑁆𑀲𑀢𑀺 (𑀲𑁆𑀬𑀸.)] 𑀓𑀢𑁆𑀣𑀘𑀺.

𑁧𑁯.

‘‘‘𑀅𑀕𑀸𑀭𑀁 𑀯𑀲𑀫𑀸𑀦𑁄𑀧𑀺, 𑀓𑀣𑀁 𑀚𑀻𑀯𑀺𑀳𑀺𑀲𑀺 𑀢𑀼𑀯𑀁;

𑀫𑀢𑁆𑀢𑀺𑀓𑀁 𑀧𑁂𑀢𑁆𑀢𑀺𑀓𑀜𑁆𑀘𑀸𑀧𑀺, 𑀦𑀢𑁆𑀣𑀺 𑀢𑁂 𑀦𑀺𑀳𑀺𑀢𑀁 𑀥𑀦𑀁.

𑁨𑁦.

‘‘‘𑀲𑀬𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀕𑀢𑁆𑀢𑁂 𑀲𑁂𑀤𑀁 𑀧𑀫𑁄𑀘𑀬𑀁;

𑀏𑀯𑀁 𑀚𑀻𑀯𑀺𑀳𑀺𑀲𑀺 𑀕𑁂𑀳𑁂, 𑀲𑀸𑀥𑀼 𑀢𑁂 𑀢𑀁 𑀦 𑀭𑀼𑀘𑁆𑀘𑀢𑀺.

𑁨𑁧.

‘‘‘𑀏𑀯𑀸𑀳𑀁 𑀢𑀢𑁆𑀣 𑀯𑀸𑀭𑁂𑀫𑀺, 𑀲𑀁𑀓𑀺𑀮𑁂𑀲𑀕𑀢𑀁 𑀫𑀦𑀁;

𑀦𑀸𑀦𑀸𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑀺𑀁’.

𑁨𑁨.

‘‘𑀏𑀯𑀁 𑀫𑁂 𑀯𑀺𑀳𑀭𑀦𑁆𑀢𑀲𑁆𑀲, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑁄;

𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀧𑀺𑀦𑁂 𑀫𑁂 𑀅𑀢𑀺𑀓𑁆𑀓𑀫𑀼𑀁.

𑁨𑁩.

‘‘𑀅𑀧𑁆𑀧𑀫𑀸𑀤𑀭𑀢𑀁 𑀤𑀺𑀲𑁆𑀯𑀸, 𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀓𑀁;

𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁨𑁪.

‘‘𑀢𑀺𑀫𑁆𑀩𑀭𑀽𑀲𑀓𑀯𑀡𑁆𑀡𑀸𑀪𑁄 ¶ , 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀽𑀧𑀫𑁄;

𑀭𑀽𑀧𑁂𑀦𑀸𑀲𑀤𑀺𑀲𑁄 𑀩𑀼𑀤𑁆𑀥𑁄, 𑀆𑀓𑀸𑀲𑁂 𑀘𑀗𑁆𑀓𑀫𑀻 𑀢𑀤𑀸.

𑁨𑁫.

‘‘𑀲𑀼𑀨𑀼𑀮𑁆𑀮𑁄 ¶ 𑀲𑀸𑀮𑀭𑀸𑀚𑀸𑀯, 𑀯𑀺𑀚𑁆𑀚𑀽𑀯𑀩𑁆𑀪𑀖𑀦𑀦𑁆𑀢𑀭𑁂;

𑀜𑀸𑀡𑁂𑀦𑀸𑀲𑀤𑀺𑀲𑁄 𑀩𑀼𑀤𑁆𑀥𑁄, 𑀆𑀓𑀸𑀲𑁂 𑀘𑀗𑁆𑀓𑀫𑀻 𑀢𑀤𑀸.

𑁨𑁬.

‘‘𑀲𑀻𑀳𑀭𑀸𑀚𑀸 ¶ 𑀯𑀲𑀫𑁆𑀪𑀻𑀢𑁄 [𑀙𑀫𑁆𑀪𑀺𑀢𑁄 (𑀓.)],

𑀕𑀚𑀭𑀸𑀚𑀸𑀯 𑀤𑀧𑁆𑀧𑀺𑀢𑁄 [𑀤𑀫𑁆𑀫𑀺𑀢𑁄 (𑀓.)].

𑀮𑀸𑀲𑀺𑀢𑁄 [𑀅𑀪𑀻𑀢𑁄 (𑀲𑁆𑀬𑀸.)] 𑀩𑁆𑀬𑀕𑁆𑀖𑀭𑀸𑀚𑀸𑀯, 𑀆𑀓𑀸𑀲𑁂 𑀘𑀗𑁆𑀓𑀫𑀻 𑀢𑀤𑀸.

𑁨𑁭.

‘‘𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑀸𑀪𑁄, 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑁄;

𑀫𑀡𑀺 𑀬𑀣𑀸 𑀚𑁄𑀢𑀺𑀭𑀲𑁄, 𑀆𑀓𑀸𑀲𑁂 𑀘𑀗𑁆𑀓𑀫𑀻 𑀢𑀤𑀸.

𑁨𑁮.

‘‘𑀯𑀺𑀲𑀼𑀤𑁆𑀥𑀓𑁂𑀮𑀸𑀲𑀦𑀺𑀪𑁄 ¶ , 𑀧𑀼𑀡𑁆𑀡𑀫𑀸𑀬𑁂𑀯 𑀘𑀦𑁆𑀤𑀺𑀫𑀸;

𑀫𑀚𑁆𑀛𑀦𑁆𑀳𑀺𑀓𑁂𑀯 [𑀫𑀚𑁆𑀛𑀦𑁆𑀢𑀺𑀓𑁂𑀯 (𑀲𑀩𑁆𑀩𑀢𑁆𑀣)] 𑀲𑀽𑀭𑀺𑀬𑁄, 𑀆𑀓𑀸𑀲𑁂 𑀘𑀗𑁆𑀓𑀫𑀻 𑀢𑀤𑀸.

𑁨𑁯.

‘‘𑀤𑀺𑀲𑁆𑀯𑀸 𑀦𑀪𑁂 𑀘𑀗𑁆𑀓𑀫𑀦𑁆𑀢𑀁, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀤𑁂𑀯𑁄 𑀦𑀼 𑀔𑁄 𑀅𑀬𑀁 𑀲𑀢𑁆𑀢𑁄, 𑀉𑀤𑀸𑀳𑀼 𑀫𑀦𑀼𑀚𑁄 𑀅𑀬𑀁.

𑁩𑁦.

‘‘‘𑀦 𑀫𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀫𑀳𑀺𑀬𑀸 𑀏𑀤𑀺𑀲𑁄 𑀦𑀭𑁄;

𑀅𑀧𑀺 𑀫𑀦𑁆𑀢𑀧𑀤𑀁 𑀅𑀢𑁆𑀣𑀺, 𑀅𑀬𑀁 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺’.

𑁩𑁧.

‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀦𑀸𑀦𑀸𑀧𑀼𑀧𑁆𑀨𑀜𑁆𑀘 𑀕𑀦𑁆𑀥𑀜𑁆𑀘, 𑀲𑀦𑁆𑀦𑀺𑀧𑀸𑀢𑁂𑀲𑀳𑀁 [𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀳𑀁 (𑀲𑀻.)] 𑀢𑀤𑀸.

𑁩𑁨.

‘‘𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸, 𑀲𑀸𑀥𑀼𑀘𑀺𑀢𑁆𑀢𑀁 𑀫𑀦𑁄𑀭𑀫𑀁;

𑀦𑀭𑀲𑀸𑀭𑀣𑀺𑀦𑀁 𑀅𑀕𑁆𑀕𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁩𑁩.

‘‘‘𑀇𑀤𑀁 𑀫𑁂 𑀆𑀲𑀦𑀁 𑀯𑀻𑀭, 𑀧𑀜𑁆𑀜𑀢𑁆𑀢𑀁 𑀢𑀯𑀦𑀼𑀘𑁆𑀙𑀯𑀁;

𑀳𑀸𑀲𑀬𑀦𑁆𑀢𑁄 𑀫𑀫𑀁 𑀘𑀺𑀢𑁆𑀢𑀁, 𑀦𑀺𑀲𑀻𑀤 𑀓𑀼𑀲𑀼𑀫𑀸𑀲𑀦𑁂’.

𑁩𑁪.

‘‘𑀦𑀺𑀲𑀻𑀤𑀺 ¶ 𑀢𑀢𑁆𑀣 𑀪𑀕𑀯𑀸, 𑀅𑀲𑀫𑁆𑀪𑀻𑀢𑁄𑀯 [𑀅𑀙𑀫𑁆𑀪𑀺𑀢𑁄𑀯 (𑀓.)] 𑀓𑁂𑀲𑀭𑀻;

𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑀼𑀤𑁆𑀥𑁄, 𑀧𑀯𑀭𑁂 𑀓𑀼𑀲𑀼𑀫𑀸𑀲𑀦𑁂.

𑁩𑁫.

‘‘𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺𑀁, 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀳𑀁;

𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀫𑁆𑀳𑀸, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀦𑁆𑀢𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁩𑁬.

‘‘‘𑀪𑀸𑀯𑁂𑀳𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁, 𑀪𑀸𑀯𑀦𑀸𑀦𑀫𑀦𑀼𑀢𑁆𑀢𑀭𑀁;

𑀇𑀫𑀁 𑀲𑀢𑀺𑀁 𑀪𑀸𑀯𑀬𑀺𑀢𑁆𑀯𑀸, 𑀧𑀽𑀭𑀬𑀺𑀲𑁆𑀲𑀲𑀺 𑀫𑀸𑀦𑀲𑀁.

𑁩𑁭.

‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀲𑀺;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀲𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀲𑀺.

𑁩𑁮.

‘‘‘𑀧𑀤𑁂𑀲𑀭𑀚𑁆𑀚𑀁 ¶ 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀅𑀦𑀼𑀪𑁄𑀲𑁆𑀲𑀲𑀺 𑀢𑀁 𑀲𑀩𑁆𑀩𑀁, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀨𑀮𑀁.

𑁩𑁯.

‘‘‘𑀪𑀯𑀸𑀪𑀯𑁂 ¶ 𑀲𑀁𑀲𑀭𑀦𑁆𑀢𑁄, 𑀫𑀳𑀸𑀪𑁄𑀕𑀁 𑀮𑀪𑀺𑀲𑁆𑀲𑀲𑀺;

𑀪𑁄𑀕𑁂 𑀢𑁂 𑀊𑀦𑀢𑀸 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀨𑀮𑀁.

𑁪𑁦.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁧.

‘‘‘𑀅𑀲𑀻𑀢𑀺𑀓𑁄𑀝𑀺𑀁 𑀙𑀟𑁆𑀟𑁂𑀢𑁆𑀯𑀸, 𑀤𑀸𑀲𑁂 𑀓𑀫𑁆𑀫𑀓𑀭𑁂 𑀩𑀳𑀽;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀲𑀺.

𑁪𑁨.

‘‘‘𑀆𑀭𑀸𑀥𑀬𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀲𑀼𑀪𑀽𑀢𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁪𑁩.

‘‘‘𑀪𑀺𑀓𑁆𑀔𑀼𑀲𑀗𑁆𑀖𑁂 ¶ ¶ 𑀦𑀺𑀲𑀻𑀤𑀺𑀢𑁆𑀯𑀸, 𑀤𑀓𑁆𑀔𑀺𑀡𑁂𑀬𑁆𑀬𑀕𑀼𑀡𑀫𑁆𑀳𑀺 𑀢𑀁;

𑀢𑀣𑀸𑀭𑀡𑀯𑀺𑀳𑀸𑀭𑁂 𑀘, 𑀤𑁆𑀯𑀻𑀲𑀼 𑀅𑀕𑁆𑀕𑁂 𑀞𑀧𑁂𑀲𑁆𑀲𑀢𑀺’.

𑁪𑁪.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁪𑁫.

‘‘𑀲𑀸𑀲𑀺𑀢𑁄 𑀮𑁄𑀓𑀦𑀸𑀣𑁂𑀦, 𑀦𑀫𑀲𑁆𑀲𑀺𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀤𑀸 𑀪𑀸𑀯𑁂𑀫𑀺 𑀫𑀼𑀤𑀺𑀢𑁄, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀫𑀼𑀢𑁆𑀢𑀫𑀁.

𑁪𑁬.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀁 𑀅𑀕𑀘𑁆𑀙𑀳𑀁.

𑁪𑁭.

‘‘𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁪𑁮.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀅𑀦𑀼𑀪𑁄𑀫𑀺 𑀲𑀼𑀲𑀫𑁆𑀧𑀢𑁆𑀢𑀺𑀁, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀨𑀮𑀁.

𑁪𑁯.

‘‘𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑁄, 𑀫𑀳𑀸𑀪𑁄𑀕𑀁 𑀮𑀪𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀨𑀮𑀁.

𑁫𑁦.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀨𑀮𑀁.

𑁫𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀪𑀽𑀢𑀺 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀪𑀽𑀢𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀉𑀧𑀯𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁨.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ ¶ 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄.

𑁫𑁩.

‘‘𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫, 𑀧𑀽𑀚𑀬𑀺𑀢𑁆𑀯𑀸 𑀢𑀣𑀸𑀕𑀢𑀁;

𑀘𑀺𑀢𑀁 𑀓𑀢𑁆𑀯𑀸𑀦 𑀲𑀼𑀓𑀢𑀁, 𑀲𑀭𑀻𑀭𑀁 𑀅𑀪𑀺𑀭𑁄𑀧𑀬𑀼𑀁.

𑁫𑁪.

‘‘𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸𑀦, 𑀥𑀸𑀢𑀼𑀁 𑀢𑀢𑁆𑀣 𑀲𑀫𑀸𑀦𑀬𑀼𑀁;

𑀲𑀤𑁂𑀯𑀫𑀸𑀦𑀼𑀲𑀸 𑀲𑀩𑁆𑀩𑁂, 𑀩𑀼𑀤𑁆𑀥𑀣𑀽𑀧𑀁 𑀅𑀓𑀁𑀲𑀼 𑀢𑁂.

𑁫𑁫.

‘‘𑀧𑀞𑀫𑀸 ¶ 𑀓𑀜𑁆𑀘𑀦𑀫𑀬𑀸, 𑀤𑀼𑀢𑀺𑀬𑀸𑀲𑀺 𑀫𑀡𑀻𑀫𑀬𑀸;

𑀢𑀢𑀺𑀬𑀸 𑀭𑀽𑀧𑀺𑀬𑀫𑀬𑀸, 𑀘𑀢𑀼𑀢𑁆𑀣𑀻 𑀨𑀮𑀺𑀓𑀸𑀫𑀬𑀸.

𑁫𑁬.

‘‘𑀢𑀣𑀸 [𑀢𑀢𑁆𑀣 (𑀲𑁆𑀬𑀸. 𑀓.)] 𑀧𑀜𑁆𑀘𑀫𑀺𑀬𑀸 𑀪𑀽𑀫𑀺 [𑀦𑁂𑀫𑀺 (𑀲𑀻.)], 𑀮𑁄𑀳𑀺𑀢𑀗𑁆𑀕𑀫𑀬𑀸 𑀅𑀳𑀼;

𑀙𑀝𑁆𑀞𑀸 𑀫𑀲𑀸𑀭𑀕𑀮𑁆𑀮𑀲𑁆𑀲, 𑀲𑀩𑁆𑀩𑀭𑀢𑀦𑀫𑀬𑀽𑀧𑀭𑀺.

𑁫𑁭.

‘‘𑀚𑀗𑁆𑀖𑀸 𑀫𑀡𑀺𑀫𑀬𑀸 𑀆𑀲𑀺, 𑀯𑁂𑀤𑀺𑀓𑀸 𑀭𑀢𑀦𑀫𑀬𑀸;

𑀲𑀩𑁆𑀩𑀲𑁄𑀡𑁆𑀡𑀫𑀬𑁄 𑀣𑀽𑀧𑁄, 𑀉𑀤𑁆𑀥𑀁 𑀬𑁄𑀚𑀦𑀫𑀼𑀕𑁆𑀕𑀢𑁄.

𑁫𑁮.

‘‘𑀤𑁂𑀯𑀸 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀓𑀢𑁄 𑀫𑀦𑁆𑀢𑀬𑀼𑀁 𑀢𑀤𑀸;

𑀫𑀬𑀫𑁆𑀧𑀺 𑀣𑀽𑀧𑀁 𑀓𑀲𑁆𑀲𑀸𑀫, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄.

𑁫𑁯.

‘‘𑀥𑀸𑀢𑀼 𑀆𑀯𑁂𑀡𑀺𑀓𑀸 𑀦𑀢𑁆𑀣𑀺, 𑀲𑀭𑀻𑀭𑀁 𑀏𑀓𑀧𑀺𑀡𑁆𑀟𑀺𑀢𑀁;

𑀇𑀫𑀫𑁆𑀳𑀺 𑀩𑀼𑀤𑁆𑀥𑀣𑀽𑀧𑀫𑁆𑀳𑀺, 𑀓𑀲𑁆𑀲𑀸𑀫 𑀓𑀜𑁆𑀘𑀼𑀓𑀁 𑀫𑀬𑀁.

𑁬𑁦.

‘‘𑀤𑁂𑀯𑀸 𑀲𑀢𑁆𑀢𑀳𑀺 𑀭𑀢𑁆𑀦𑁂𑀳𑀺 [𑀲𑀢𑁆𑀢𑀭𑀢𑀦𑁂𑀳𑀺 (𑀲𑀻.)], 𑀅𑀜𑁆𑀜𑀁 𑀯𑀟𑁆𑀠𑁂𑀲𑀼 𑀬𑁄𑀚𑀦𑀁;

𑀣𑀽𑀧𑁄 𑀤𑁆𑀯𑀺𑀬𑁄𑀚𑀦𑀼𑀩𑁆𑀩𑁂𑀥𑁄, 𑀢𑀺𑀫𑀺𑀭𑀁 𑀩𑁆𑀬𑀧𑀳𑀦𑁆𑀢𑀺 𑀲𑁄.

𑁬𑁧.

‘‘𑀦𑀸𑀕𑀸 ¶ 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀓𑀢𑁄 𑀫𑀦𑁆𑀢𑀬𑀼𑀁 𑀢𑀤𑀸;

𑀫𑀦𑀼𑀲𑁆𑀲𑀸 𑀘𑁂𑀯 𑀤𑁂𑀯𑀸 𑀘, 𑀩𑀼𑀤𑁆𑀥𑀣𑀽𑀧𑀁 𑀅𑀓𑀁𑀲𑀼 𑀢𑁂.

𑁬𑁨.

‘‘𑀫𑀸 ¶ 𑀦𑁄 𑀧𑀫𑀢𑁆𑀢𑀸 𑀅𑀲𑁆𑀲𑀼𑀫𑁆𑀳 [𑀅𑀲𑁆𑀲𑀼𑀫𑁆𑀳𑀸 (𑀲𑀻. 𑀲𑁆𑀬𑀸.), 𑀆𑀲𑀺𑀫𑁆𑀳𑀸 (?)], 𑀅𑀧𑁆𑀧𑀫𑀢𑁆𑀢𑀸 𑀲𑀤𑁂𑀯𑀓𑀸;

𑀫𑀬𑀫𑁆𑀧𑀺 𑀣𑀽𑀧𑀁 𑀓𑀲𑁆𑀲𑀸𑀫, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄.

𑁬𑁩.

‘‘𑀇𑀦𑁆𑀤𑀦𑀻𑀮𑀁 𑀫𑀳𑀸𑀦𑀻𑀮𑀁, 𑀅𑀣𑁄 𑀚𑁄𑀢𑀺𑀭𑀲𑀁 𑀫𑀡𑀺𑀁;

𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀩𑀼𑀤𑁆𑀥𑀣𑀽𑀧𑀁 𑀅𑀙𑀸𑀤𑀬𑀼𑀁.

𑁬𑁪.

‘‘𑀲𑀩𑁆𑀩𑀁 𑀫𑀡𑀺𑀫𑀬𑀁 𑀆𑀲𑀺, 𑀢𑀸𑀯𑀢𑀸 𑀩𑀼𑀤𑁆𑀥𑀘𑁂𑀢𑀺𑀬𑀁;

𑀢𑀺𑀬𑁄𑀚𑀦𑀲𑀫𑀼𑀩𑁆𑀩𑀺𑀤𑁆𑀥𑀁 [𑀢𑀻𑀡𑀺 𑀬𑁄𑀚𑀦𑀫𑀼𑀩𑁆𑀩𑀺𑀤𑁆𑀥𑀁 (𑀲𑀻. 𑀓.)], 𑀆𑀮𑁄𑀓𑀓𑀭𑀡𑀁 𑀢𑀤𑀸.

𑁬𑁫.

‘‘𑀕𑀭𑀼𑀴𑀸 ¶ 𑀘 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀓𑀢𑁄 𑀫𑀦𑁆𑀢𑀬𑀼𑀁 𑀢𑀤𑀸;

𑀫𑀦𑀼𑀲𑁆𑀲𑀸 𑀤𑁂𑀯𑀸 𑀦𑀸𑀕𑀸 𑀘, 𑀩𑀼𑀤𑁆𑀥𑀣𑀽𑀧𑀁 𑀅𑀓𑀁𑀲𑀼 𑀢𑁂.

𑁬𑁬.

‘‘‘𑀫𑀸 𑀦𑁄 𑀧𑀫𑀢𑁆𑀢𑀸 𑀅𑀲𑁆𑀲𑀼𑀫𑁆𑀳, 𑀅𑀧𑁆𑀧𑀫𑀢𑁆𑀢𑀸 𑀲𑀤𑁂𑀯𑀓𑀸;

𑀫𑀬𑀫𑁆𑀧𑀺 𑀣𑀽𑀧𑀁 𑀓𑀲𑁆𑀲𑀸𑀫, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄’.

𑁬𑁭.

‘‘𑀲𑀩𑁆𑀩𑀁 𑀫𑀡𑀺𑀫𑀬𑀁 𑀣𑀽𑀧𑀁, 𑀅𑀓𑀭𑀼𑀁 𑀢𑁂 𑀘 𑀓𑀜𑁆𑀘𑀼𑀓𑀁 [𑀲𑀩𑁆𑀩𑀫𑀡𑀺𑀫𑀬𑀁 𑀣𑀽𑀧𑁂, 𑀅𑀓𑀭𑀼𑀢𑁆𑀢𑀭𑀓𑀜𑁆𑀘𑀼𑀓𑀁 (𑀲𑀻.)];

𑀬𑁄𑀚𑀦𑀁 𑀢𑁂𑀧𑀺 𑀯𑀟𑁆𑀠𑁂𑀲𑀼𑀁, 𑀆𑀬𑀢𑀁 𑀩𑀼𑀤𑁆𑀥𑀘𑁂𑀢𑀺𑀬𑀁.

𑁬𑁮.

‘‘𑀘𑀢𑀼𑀬𑁄𑀚𑀦𑀫𑀼𑀩𑁆𑀩𑀺𑀤𑁆𑀥𑁄, 𑀩𑀼𑀤𑁆𑀥𑀣𑀽𑀧𑁄 𑀯𑀺𑀭𑁄𑀘𑀢𑀺;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄.

𑁬𑁯.

‘‘𑀓𑀼𑀫𑁆𑀪𑀡𑁆𑀟𑀸 𑀘 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀓𑀢𑁄 𑀫𑀦𑁆𑀢𑀬𑀼𑀁 𑀢𑀤𑀸;

𑀫𑀦𑀼𑀲𑁆𑀲𑀸 𑀘𑁂𑀯 𑀤𑁂𑀯𑀸 𑀘, 𑀦𑀸𑀕𑀸 𑀘 𑀕𑀭𑀼𑀴𑀸 𑀢𑀣𑀸.

𑀧𑀘𑁆𑀘𑁂𑀓𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀅𑀓𑀁𑀲𑀼 𑀣𑀽𑀧𑀫𑀼𑀢𑁆𑀢𑀫𑀁.

𑁭𑁦.

‘‘‘𑀫𑀸 𑀦𑁄 𑀧𑀫𑀢𑁆𑀢𑀸 𑀅𑀲𑁆𑀲𑀼𑀫𑁆𑀳, 𑀅𑀧𑁆𑀧𑀫𑀢𑁆𑀢𑀸 𑀲𑀤𑁂𑀯𑀓𑀸;

𑀫𑀬𑀫𑁆𑀧𑀺 𑀣𑀽𑀧𑀁 𑀓𑀲𑁆𑀲𑀸𑀫, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄;

𑀭𑀢𑀦𑁂𑀳𑀺 𑀙𑀸𑀤𑁂𑀲𑁆𑀲𑀸𑀫, 𑀆𑀬𑀢𑀁 𑀩𑀼𑀤𑁆𑀥𑀘𑁂𑀢𑀺𑀬𑀁’.

𑁭𑁧.

‘‘𑀬𑁄𑀚𑀦𑀁 𑀢𑁂𑀧𑀺 𑀯𑀟𑁆𑀠𑁂𑀲𑀼𑀁, 𑀆𑀬𑀢𑀁 𑀩𑀼𑀤𑁆𑀥𑀘𑁂𑀢𑀺𑀬𑀁;

𑀧𑀜𑁆𑀘𑀬𑁄𑀚𑀦𑀫𑀼𑀩𑁆𑀩𑀺𑀤𑁆𑀥𑁄, 𑀣𑀽𑀧𑁄 𑀑𑀪𑀸𑀲𑀢𑁂 𑀢𑀤𑀸.

𑁭𑁨.

‘‘𑀬𑀓𑁆𑀔𑀸 ¶ 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀓𑀢𑁄 𑀫𑀦𑁆𑀢𑀬𑀼𑀁 𑀢𑀤𑀸;

𑀫𑀦𑀼𑀲𑁆𑀲𑀸 𑀤𑁂𑀯𑀸 𑀦𑀸𑀕𑀸 𑀘, 𑀕𑀭𑀼𑀴𑀸 𑀓𑀼𑀫𑁆𑀪𑀅𑀡𑁆𑀟𑀓𑀸.

𑁭𑁩.

‘‘𑀧𑀘𑁆𑀘𑁂𑀓𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀅𑀓𑀁𑀲𑀼 𑀣𑀽𑀧𑀫𑀼𑀢𑁆𑀢𑀫𑀁;

‘𑀫𑀸 𑀦𑁄 𑀧𑀫𑀢𑁆𑀢𑀸 𑀅𑀲𑁆𑀲𑀼𑀫𑁆𑀳, 𑀅𑀧𑁆𑀧𑀫𑀢𑁆𑀢𑀸 𑀲𑀤𑁂𑀯𑀓𑀸.

𑁭𑁪.

‘‘‘𑀫𑀬𑀫𑁆𑀧𑀺 ¶ ¶ 𑀣𑀽𑀧𑀁 𑀓𑀲𑁆𑀲𑀸𑀫, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄;

𑀨𑀮𑀺𑀓𑀸𑀳𑀺 𑀙𑀸𑀤𑁂𑀲𑁆𑀲𑀸𑀫, 𑀆𑀬𑀢𑀁 𑀩𑀼𑀤𑁆𑀥𑀘𑁂𑀢𑀺𑀬𑀁’.

𑁭𑁫.

‘‘𑀬𑁄𑀚𑀦𑀁 𑀢𑁂𑀧𑀺 𑀯𑀟𑁆𑀠𑁂𑀲𑀼𑀁, 𑀆𑀬𑀢𑀁 𑀩𑀼𑀤𑁆𑀥𑀘𑁂𑀢𑀺𑀬𑀁;

𑀙 𑀬𑁄𑀚𑀦𑀸𑀦𑀺 𑀉𑀩𑁆𑀩𑀺𑀤𑁆𑀥𑁄, 𑀣𑀽𑀧𑁄 𑀑𑀪𑀸𑀲𑀢𑁂 𑀢𑀤𑀸.

𑁭𑁬.

‘‘𑀕𑀦𑁆𑀥𑀩𑁆𑀩𑀸 𑀘 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀓𑀢𑁄 𑀫𑀦𑁆𑀢𑀬𑀼𑀁 𑀢𑀤𑀸;

‘𑀫𑀦𑀼𑀚𑀸 𑀤𑁂𑀯𑀢𑀸 𑀦𑀸𑀕𑀸, 𑀕𑀭𑀼𑀴𑀸 𑀓𑀼𑀫𑁆𑀪𑀬𑀓𑁆𑀔𑀓𑀸.

𑁭𑁭.

‘‘‘𑀲𑀩𑁆𑀩𑁂𑀓𑀁𑀲𑀼 𑀩𑀼𑀤𑁆𑀥𑀣𑀽𑀧𑀁, 𑀫𑀬𑀫𑁂𑀢𑁆𑀣 𑀅𑀓𑀸𑀭𑀓𑀸;

𑀫𑀬𑀫𑁆𑀧𑀺 𑀣𑀽𑀧𑀁 𑀓𑀲𑁆𑀲𑀸𑀫, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄’.

𑁭𑁮.

‘‘𑀯𑁂𑀤𑀺𑀬𑁄 ¶ 𑀲𑀢𑁆𑀢 𑀓𑀢𑁆𑀯𑀸𑀦, 𑀙𑀢𑁆𑀢𑀫𑀸𑀭𑁄𑀧𑀬𑀺𑀁𑀲𑀼 𑀢𑁂;

𑀲𑀩𑁆𑀩𑀲𑁄𑀡𑁆𑀡𑀫𑀬𑀁 𑀣𑀽𑀧𑀁, 𑀕𑀦𑁆𑀥𑀩𑁆𑀩𑀸 𑀓𑀸𑀭𑀬𑀼𑀁 𑀢𑀤𑀸.

𑁭𑁯.

‘‘𑀲𑀢𑁆𑀢𑀬𑁄𑀚𑀦𑀫𑀼𑀩𑁆𑀩𑀺𑀤𑁆𑀥𑁄, 𑀣𑀽𑀧𑁄 𑀑𑀪𑀸𑀲𑀢𑁂 𑀢𑀤𑀸;

𑀭𑀢𑁆𑀢𑀺𑀦𑁆𑀤𑀺𑀯𑀸 𑀦 𑀜𑀸𑀬𑀦𑁆𑀢𑀺, 𑀆𑀮𑁄𑀓𑁄 𑀳𑁄𑀢𑀺 [𑀆𑀮𑁄𑀓𑀸 𑀳𑁄𑀦𑁆𑀢𑀺 (𑀲𑁆𑀬𑀸. 𑀓.)] 𑀲𑀩𑁆𑀩𑀤𑀸.

𑁮𑁦.

‘‘𑀅𑀪𑀺𑀪𑁄𑀦𑁆𑀢𑀺 ¶ 𑀦 𑀢𑀲𑁆𑀲𑀸𑀪𑀸, 𑀘𑀦𑁆𑀤𑀲𑀽𑀭𑀸 𑀲𑀢𑀸𑀭𑀓𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑁂, 𑀧𑀤𑀻𑀧𑁄𑀧𑀺 𑀦 𑀧𑀚𑁆𑀚𑀮𑀺.

𑁮𑁧.

‘‘𑀢𑁂𑀦 𑀓𑀸𑀮𑁂𑀦 𑀬𑁂 𑀓𑁂𑀘𑀺, 𑀣𑀽𑀧𑀁 𑀧𑀽𑀚𑁂𑀦𑁆𑀢𑀺 𑀫𑀸𑀦𑀼𑀲𑀸;

𑀦 𑀢𑁂 𑀣𑀽𑀧𑀫𑀸𑀭𑀼𑀳𑀦𑁆𑀢𑀺, 𑀅𑀫𑁆𑀩𑀭𑁂 𑀉𑀓𑁆𑀔𑀺𑀧𑀦𑁆𑀢𑀺 𑀢𑁂.

𑁮𑁨.

‘‘𑀤𑁂𑀯𑁂𑀳𑀺 𑀞𑀧𑀺𑀢𑁄 𑀬𑀓𑁆𑀔𑁄, 𑀅𑀪𑀺𑀲𑀫𑁆𑀫𑀢𑀦𑀸𑀫𑀓𑁄;

𑀥𑀚𑀁 𑀯𑀸 𑀧𑀼𑀧𑁆𑀨𑀤𑀸𑀫𑀁 𑀯𑀸, 𑀅𑀪𑀺𑀭𑁄𑀧𑁂𑀢𑀺 𑀉𑀢𑁆𑀢𑀭𑀺.

𑁮𑁩.

‘‘𑀦 𑀢𑁂 𑀧𑀲𑁆𑀲𑀦𑁆𑀢𑀺 𑀢𑀁 𑀬𑀓𑁆𑀔𑀁, 𑀤𑀸𑀫𑀁 𑀧𑀲𑁆𑀲𑀦𑁆𑀢𑀺 𑀕𑀘𑁆𑀙𑀢𑁄;

𑀏𑀯𑀁 𑀧𑀲𑁆𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸, 𑀲𑀩𑁆𑀩𑁂 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁.

𑁮𑁪.

‘‘𑀯𑀺𑀭𑀼𑀤𑁆𑀥𑀸 [𑀯𑀺𑀲𑀤𑁆𑀥𑀸 (𑀲𑀻.)] 𑀬𑁂 𑀧𑀸𑀯𑀘𑀦𑁂, 𑀧𑀲𑀦𑁆𑀦𑀸 𑀬𑁂 𑀘 𑀲𑀸𑀲𑀦𑁂;

𑀧𑀸𑀝𑀺𑀳𑁂𑀭𑀁 𑀤𑀝𑁆𑀞𑀼𑀓𑀸𑀫𑀸, 𑀣𑀽𑀧𑀁 𑀧𑀽𑀚𑁂𑀦𑁆𑀢𑀺 𑀫𑀸𑀦𑀼𑀲𑀸.

𑁮𑁫.

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀪𑀢𑀓𑁄 [𑀯𑀭𑀓𑁄 (𑀲𑁆𑀬𑀸. 𑀓.)] 𑀢𑀤𑀸;

𑀆𑀫𑁄𑀤𑀺𑀢𑀁 𑀚𑀦𑀁 𑀤𑀺𑀲𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁮𑁬.

‘‘‘𑀉𑀴𑀸𑀭𑁄 𑀪𑀕𑀯𑀸 𑀳𑁂𑀲𑁄, 𑀬𑀲𑁆𑀲 𑀥𑀸𑀢𑀼𑀥𑀭𑁂𑀤𑀺𑀲𑀁;

𑀇𑀫𑀸 𑀘 𑀚𑀦𑀢𑀸 𑀢𑀼𑀝𑁆𑀞𑀸, 𑀓𑀸𑀭𑀁 𑀓𑀼𑀩𑁆𑀩𑀁 𑀦 𑀢𑀧𑁆𑀧𑀭𑁂 [𑀓𑀼𑀩𑁆𑀩𑀦𑁆𑀢𑀦𑀧𑁆𑀧𑀓𑀁 (𑀲𑀻.)].

𑁮𑁭.

‘‘‘𑀅𑀳𑀫𑁆𑀧𑀺 ¶ 𑀓𑀸𑀭𑀁 𑀓𑀲𑁆𑀲𑀸𑀫𑀺, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄;

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑁂’.

𑁮𑁮.

‘‘𑀲𑀼𑀥𑁄𑀢𑀁 ¶ 𑀭𑀚𑀓𑁂𑀦𑀸𑀳𑀁, 𑀉𑀢𑁆𑀢𑀭𑁂𑀬𑁆𑀬𑀧𑀝𑀁 𑀫𑀫;

𑀯𑁂𑀴𑀕𑁆𑀕𑁂 𑀆𑀮𑀕𑁂𑀢𑁆𑀯𑀸𑀦, 𑀥𑀚𑀁 𑀉𑀓𑁆𑀔𑀺𑀧𑀺𑀫𑀫𑁆𑀩𑀭𑁂.

𑁮𑁯.

‘‘𑀅𑀪𑀺𑀲𑀫𑁆𑀫𑀢𑀓𑁄 𑀕𑀬𑁆𑀳, 𑀅𑀫𑁆𑀩𑀭𑁂𑀳𑀸𑀲𑀺 𑀫𑁂 𑀥𑀚𑀁;

𑀯𑀸𑀢𑁂𑀭𑀺𑀢𑀁 𑀥𑀚𑀁 𑀤𑀺𑀲𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑁂𑀲𑀳𑀁.

𑁯𑁦.

‘‘𑀢𑀢𑁆𑀣 ¶ 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀫𑀡𑀁 𑀉𑀧𑀲𑀗𑁆𑀓𑀫𑀺𑀁;

𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀯𑀺𑀧𑀸𑀓𑀁 𑀧𑀼𑀘𑁆𑀙𑀳𑀁 𑀥𑀚𑁂.

𑁯𑁧.

‘‘𑀲𑁄 𑀫𑁂 𑀓𑀣𑁂𑀲𑀺 𑀆𑀦𑀦𑁆𑀤, 𑀧𑀻𑀢𑀺𑀲𑀜𑁆𑀚𑀦𑀦𑀁 𑀫𑀫;

‘𑀢𑀲𑁆𑀲 𑀥𑀚𑀲𑁆𑀲 𑀯𑀺𑀧𑀸𑀓𑀁, 𑀅𑀦𑀼𑀪𑁄𑀲𑁆𑀲𑀲𑀺 𑀲𑀩𑁆𑀩𑀤𑀸.

𑁯𑁨.

‘‘‘𑀳𑀢𑁆𑀣𑀻 ¶ 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻, 𑀲𑁂𑀦𑀸 𑀘 𑀘𑀢𑀼𑀭𑀗𑁆𑀕𑀺𑀦𑀻;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺 𑀢𑀁 𑀦𑀺𑀘𑁆𑀘𑀁, 𑀥𑀚𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯𑁩.

‘‘‘𑀲𑀝𑁆𑀞𑀺𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀪𑁂𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺 𑀢𑀁 𑀦𑀺𑀘𑁆𑀘𑀁, 𑀥𑀚𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯𑁪.

‘‘‘𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸.

𑁯𑁫.

‘‘‘𑀅𑀴𑀸𑀭𑀧𑀫𑁆𑀳𑀸 𑀳𑀲𑀼𑀮𑀸, 𑀲𑀼𑀲𑀜𑁆𑀜𑀸 𑀢𑀦𑀼𑀫𑀚𑁆𑀛𑀺𑀫𑀸;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺 𑀢𑀁 𑀦𑀺𑀘𑁆𑀘𑀁, 𑀥𑀚𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯𑁬.

‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀲𑀺;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀲𑀺.

𑁯𑁭.

‘‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀲𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁯𑁮.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁯𑁯.

‘‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀲𑀺.

𑁧𑁦𑁦.

‘‘‘𑀅𑀲𑀻𑀢𑀺𑀓𑁄𑀝𑀺𑀁 ¶ 𑀙𑀟𑁆𑀟𑁂𑀢𑁆𑀯𑀸, 𑀤𑀸𑀲𑁂 𑀓𑀫𑁆𑀫𑀓𑀭𑁂 𑀩𑀳𑀽;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀲𑀺.

𑁧𑁦𑁧.

‘‘‘𑀆𑀭𑀸𑀥𑀬𑀺𑀢𑁆𑀯𑀸 ¶ 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀉𑀧𑀯𑀸𑀦𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀲𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁧𑁦𑁨.

‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯 𑀓𑀺𑀮𑁂𑀲𑁂 𑀛𑀸𑀧𑀬𑀻 𑀫𑀫.

𑁧𑁦𑁩.

‘‘𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀦𑁆𑀢𑀲𑁆𑀲, 𑀘𑀢𑀼𑀤𑀻𑀧𑀺𑀲𑁆𑀲𑀭𑀲𑁆𑀲 𑀫𑁂;

𑀢𑀺𑀬𑁄𑀚𑀦𑀸𑀦𑀺 𑀲𑀫𑀦𑁆𑀢𑀸, 𑀉𑀲𑁆𑀲𑀻𑀲𑀦𑁆𑀢𑀺 𑀥𑀚𑀸 𑀲𑀤𑀸.

𑁧𑁦𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀚𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀯𑀸𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀧𑀯𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁬.

‘‘𑀦𑀕𑀭𑁂 𑀘𑀦𑁆𑀤𑀯𑀢𑀺𑀬𑀸 [𑀩𑀦𑁆𑀥𑀼𑀫𑀢𑀺𑀬𑀸 (𑀅𑀝𑁆𑀞.)], 𑀫𑀸𑀢𑀼𑀉𑀧𑀝𑁆𑀞𑀸𑀓𑁄 [𑀫𑀸𑀢𑀼𑀧𑀝𑁆𑀞𑀸𑀬𑀓𑁄 (𑀲𑀻.), 𑀫𑀸𑀢𑀼𑀧𑀝𑁆𑀞𑀸𑀦𑀓𑁄 (𑀲𑁆𑀬𑀸.)] 𑀅𑀳𑀼𑀁;

𑀅𑀦𑁆𑀥𑀸 𑀫𑀸𑀢𑀸 𑀧𑀺𑀢𑀸 𑀫𑀬𑁆𑀳𑀁, 𑀢𑁂 𑀧𑁄𑀲𑁂𑀫𑀺 𑀅𑀳𑀁 𑀢𑀤𑀸.

𑁧𑁦𑁭.

‘‘𑀭𑀳𑁄𑀕𑀢𑁄 ¶ 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀧𑁄𑀲𑁂𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄, 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀸𑀫𑀳𑀁.

𑁧𑁦𑁮.

‘‘𑀫𑀳𑀦𑁆𑀥𑀓𑀸𑀭𑀧𑀺𑀳𑀺𑀢𑀸 [𑀢𑀫𑀦𑁆𑀥𑀓𑀸𑀭𑀧𑀺𑀳𑀺𑀢𑀸 (𑀲𑁆𑀬𑀸.)], 𑀢𑀺𑀯𑀺𑀥𑀕𑁆𑀕𑀻𑀳𑀺 𑀟𑀬𑁆𑀳𑀭𑁂;

𑀏𑀢𑀸𑀤𑀺𑀲𑁂 𑀪𑀯𑁂 [𑀪𑀬𑁂 (𑀲𑀻.)] 𑀚𑀸𑀢𑁂, 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀦𑀸𑀬𑀓𑁄.

𑁧𑁦𑁯.

‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀤𑀺𑀧𑁆𑀧𑀢𑀺 [𑀤𑀺𑀩𑁆𑀩𑀢𑀺 (𑀓.)] [𑀚𑀺𑀦𑀲𑀸𑀲𑀦𑀁 (𑀲𑀻.)] 𑀤𑀸𑀦𑀺 𑀲𑀸𑀲𑀦𑀁;

𑀲𑀓𑁆𑀓𑀸 𑀉𑀤𑁆𑀥𑀭𑀺𑀢𑀼𑀁 𑀅𑀢𑁆𑀢𑀸, 𑀧𑀼𑀜𑁆𑀜𑀓𑀸𑀫𑁂𑀦 𑀚𑀦𑁆𑀢𑀼𑀦𑀸.

𑁧𑁧𑁦.

‘‘𑀉𑀕𑁆𑀕𑀬𑁆𑀳 𑀢𑀻𑀡𑀺 𑀲𑀭𑀡𑁂, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀕𑁄𑀧𑀬𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀧𑀝𑀺𑀫𑁄𑀓𑁆𑀔𑀸𑀫𑀺 𑀤𑀼𑀕𑁆𑀕𑀢𑀺𑀁.

𑁧𑁧𑁧.

‘‘𑀦𑀺𑀲𑀪𑁄 ¶ 𑀦𑀸𑀫 𑀲𑀫𑀡𑁄, 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄;

𑀢𑀫𑀳𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀲𑀭𑀡𑀕𑀫𑀦𑀁 𑀕𑀳𑀺𑀁.

𑁧𑁧𑁨.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀲𑀭𑀡𑀕𑀫𑀦𑀁, 𑀧𑀭𑀺𑀧𑀼𑀡𑁆𑀡𑀁 𑀅𑀕𑁄𑀧𑀬𑀺𑀁.

𑁧𑁧𑁩.

‘‘𑀘𑀭𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀭𑀡𑀁 𑀢𑀁 𑀅𑀦𑀼𑀲𑁆𑀲𑀭𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀁 𑀅𑀕𑀘𑁆𑀙𑀳𑀁.

𑁧𑁧𑁪.

‘‘𑀤𑁂𑀯𑀮𑁄𑀓𑀕𑀢𑁄 𑀲𑀦𑁆𑀢𑁄, 𑀧𑀼𑀜𑁆𑀜𑀓𑀫𑁆𑀫𑀲𑀫𑀸𑀳𑀺𑀢𑁄;

𑀬𑀁 𑀤𑁂𑀲𑀁 [𑀬𑀁 𑀬𑀁 𑀤𑁂𑀲𑀁 (𑀲𑁆𑀬𑀸.)] 𑀉𑀧𑀧𑀚𑁆𑀚𑀸𑀫𑀺 [𑀉𑀧𑀕𑀘𑁆𑀙𑀸𑀫𑀺 (𑀲𑀻.)], 𑀅𑀝𑁆𑀞 𑀳𑁂𑀢𑀽 𑀮𑀪𑀸𑀫𑀳𑀁.

𑁧𑁧𑁫.

‘‘𑀤𑀺𑀲𑀸𑀲𑀼 ¶ 𑀧𑀽𑀚𑀺𑀢𑁄 𑀳𑁄𑀫𑀺, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀯𑀸𑀫𑀳𑀁;

𑀲𑀩𑁆𑀩𑁂 𑀤𑁂𑀯𑀸𑀦𑀼𑀯𑀢𑁆𑀢𑀦𑁆𑀢𑀺, 𑀅𑀫𑀺𑀢𑀪𑁄𑀕𑀁 𑀮𑀪𑀸𑀫𑀳𑀁.

𑁧𑁧𑁬.

‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀩𑁆𑀩𑀢𑁆𑀣, 𑀧𑀝𑀺𑀓𑀦𑁆𑀢𑁄 𑀪𑀯𑀸𑀫𑀳𑀁;

𑀫𑀺𑀢𑁆𑀢𑀸𑀦𑀁 𑀅𑀘𑀮𑁄 𑀳𑁄𑀫𑀺, 𑀬𑀲𑁄 𑀅𑀩𑁆𑀪𑀼𑀕𑁆𑀕𑀢𑁄 𑀫𑀫𑀁.

𑁧𑁧𑁭.

‘‘𑀅𑀲𑀻𑀢𑀺𑀓𑁆𑀔𑀢𑁆𑀢𑀼 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁧𑁮.

‘‘𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘 ¶ , 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁧𑁯.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀧𑀼𑀜𑁆𑀜𑀓𑀫𑁆𑀫𑀲𑀫𑀸𑀳𑀺𑀢𑁄;

𑀧𑀼𑀭𑁂 𑀲𑀸𑀯𑀢𑁆𑀣𑀺𑀬𑀁 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁧𑁨𑁦.

‘‘𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀤𑀸𑀭𑀓𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀳𑀲𑀔𑀺𑀟𑁆𑀟𑀲𑀫𑀗𑁆𑀕𑀻𑀳𑀁 [𑀲𑀸𑀳𑀁 𑀔𑀺𑀟𑁆𑀟𑀲𑀫𑀗𑁆𑀕𑀻 (𑀲𑁆𑀬𑀸.)], 𑀲𑀗𑁆𑀖𑀸𑀭𑀸𑀫𑀁 𑀉𑀧𑀸𑀕𑀫𑀺𑀁.

𑁧𑁨𑁧.

‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 [𑀢𑀢𑁆𑀣𑀤𑁆𑀤𑀲𑀸𑀳𑀁 (𑀓.)] 𑀲𑀫𑀡𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀭𑀡𑀜𑁆𑀘 𑀅𑀤𑀸𑀲𑀺 𑀫𑁂.

𑁧𑁨𑁨.

‘‘𑀲𑁄𑀳𑀁 𑀲𑀼𑀢𑁆𑀯𑀸𑀦 𑀲𑀭𑀡𑀁, 𑀲𑀭𑀡𑀁 𑀫𑁂 𑀅𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁨𑁩.

‘‘𑀚𑀸𑀢𑀺𑀬𑀸 𑀲𑀢𑁆𑀢𑀫𑁂 𑀯𑀲𑁆𑀲𑁂, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀺 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁧𑁨𑁪.

‘‘𑀅𑀧𑀭𑀺𑀫𑁂𑀬𑁆𑀬𑁂 ¶ 𑀇𑀢𑁄 𑀓𑀧𑁆𑀧𑁂, 𑀲𑀭𑀡𑀸𑀦𑀺 𑀅𑀕𑀘𑁆𑀙𑀳𑀁;

𑀢𑀢𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥.

𑁧𑁨𑁫.

‘‘𑀲𑀼𑀕𑁄𑀧𑀺𑀢𑀁 𑀫𑁂 𑀲𑀭𑀡𑀁, 𑀫𑀸𑀦𑀲𑀁 𑀲𑀼𑀧𑁆𑀧𑀡𑀻𑀳𑀺𑀢𑀁;

𑀅𑀦𑀼𑀪𑁄𑀢𑁆𑀯𑀸 𑀬𑀲𑀁 𑀲𑀩𑁆𑀩𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁧𑁨𑁬.

‘‘𑀬𑁂𑀲𑀁 𑀲𑁄𑀢𑀸𑀯𑀥𑀸𑀦𑀢𑁆𑀣𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄;

𑀅𑀳𑀁 [𑀅𑀢𑁆𑀣𑀁 (𑀲𑁆𑀬𑀸.)] 𑀯𑁄 𑀓𑀣𑀬𑀺𑀲𑁆𑀲𑀸𑀫𑀺, 𑀲𑀸𑀫𑀁 𑀤𑀺𑀝𑁆𑀞𑀁 𑀧𑀤𑀁 𑀫𑀫.

𑁧𑁨𑁭.

‘‘‘𑀩𑀼𑀤𑁆𑀥𑁄 ¶ 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀯𑀢𑁆𑀢𑀢𑁂 𑀚𑀺𑀦𑀲𑀸𑀲𑀦𑀁;

𑀅𑀫𑀢𑀸 𑀯𑀸𑀤𑀺𑀢𑀸 𑀪𑁂𑀭𑀻, 𑀲𑁄𑀓𑀲𑀮𑁆𑀮𑀯𑀺𑀦𑁄𑀤𑀦𑀸.

𑁧𑁨𑁮.

‘‘‘𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀅𑀥𑀺𑀓𑀸𑀭𑀁 𑀓𑀭𑁂𑀬𑁆𑀬𑀸𑀣, 𑀧𑀲𑁆𑀲𑀬𑀺𑀲𑁆𑀲𑀣 𑀦𑀺𑀩𑁆𑀩𑀼𑀢𑀺𑀁.

𑁧𑁨𑁯.

‘‘‘𑀧𑀕𑁆𑀕𑀬𑁆𑀳 𑀢𑀻𑀡𑀺 𑀲𑀭𑀡𑁂, 𑀧𑀜𑁆𑀘𑀲𑀻𑀮𑀸𑀦𑀺 𑀕𑁄𑀧𑀺𑀬;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣.

𑁧𑁩𑁦.

‘‘‘𑀲𑀫𑁆𑀫𑀸 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸𑀦 [𑀫𑀫𑁄𑀧𑀫𑀁 𑀓𑀭𑀺𑀢𑁆𑀯𑀸𑀦 (𑀲𑀻. 𑀲𑁆𑀬𑀸.)], 𑀲𑀻𑀮𑀸𑀦𑀺 ¶ 𑀧𑀭𑀺𑀕𑁄𑀧𑀺𑀬;

𑀅𑀘𑀺𑀭𑀁 𑀅𑀭𑀳𑀢𑁆𑀢𑀁 𑀯𑁄, 𑀲𑀩𑁆𑀩𑁂𑀧𑀺 𑀧𑀸𑀧𑀼𑀡𑀺𑀲𑁆𑀲𑀣.

𑁧𑁩𑁧.

‘‘‘𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑁄;

𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀲𑀭𑀡𑁄 [𑀘𑀭𑀡𑁂 (𑀲𑀻. 𑀲𑁆𑀬𑀸.)] 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄’.

𑁧𑁩𑁨.

‘‘𑀅𑀧𑀭𑀺𑀫𑁂𑀬𑁆𑀬𑁂 ¶ 𑀇𑀢𑁄 𑀓𑀧𑁆𑀧𑁂, 𑀲𑀭𑀡𑀁 𑀩𑀼𑀤𑁆𑀥𑀲𑁆𑀲 𑀕𑀘𑁆𑀙𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀭𑀡𑀁 𑀕𑀫𑀦𑁂 𑀨𑀮𑀁.

𑁧𑁩𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀲𑀭𑀡𑀕𑀫𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩𑁪.

‘‘𑀦𑀕𑀭𑁂 𑀘𑀦𑁆𑀤𑀯𑀢𑀺𑀬𑀸, 𑀪𑀢𑀓𑁄 𑀆𑀲𑀳𑀁 𑀢𑀤𑀸;

𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀸𑀫𑀳𑀁.

𑁧𑁩𑁫.

‘‘𑀫𑀳𑀦𑁆𑀥𑀓𑀸𑀭𑀧𑀺𑀳𑀺𑀢𑀸 ¶ ¶ , 𑀢𑀺𑀯𑀺𑀥𑀕𑁆𑀕𑀻𑀳𑀺 𑀟𑀬𑁆𑀳𑀭𑁂;

𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦, 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑁂 𑀅𑀳𑀁.

𑁧𑁩𑁬.

‘‘𑀤𑁂𑀬𑁆𑀬𑀥𑀫𑁆𑀫𑁄 𑀘 𑀫𑁂 𑀦𑀢𑁆𑀣𑀺, 𑀯𑀭𑀸𑀓𑁄 𑀪𑀢𑀓𑁄 𑀅𑀳𑀁;

𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀲𑀻𑀮𑀁, 𑀭𑀓𑁆𑀔𑁂𑀬𑁆𑀬𑀁 𑀧𑀭𑀺𑀧𑀽𑀭𑀬𑀁.

𑁧𑁩𑁭.

‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀦𑀺𑀲𑀪𑁄 𑀦𑀸𑀫 𑀲𑀸𑀯𑀓𑁄;

𑀢𑀫𑀳𑀁 𑀉𑀧𑀲𑀗𑁆𑀓𑀫𑁆𑀫, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀕𑁆𑀕𑀳𑀺𑀁.

𑁧𑁩𑁮.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀧𑀜𑁆𑀘𑀲𑀻𑀮𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀕𑁄𑀧𑀬𑀺𑀁.

𑁧𑁩𑁯.

‘‘𑀫𑀘𑁆𑀘𑀼𑀓𑀸𑀮𑁂 𑀘 𑀲𑀫𑁆𑀧𑀢𑁆𑀢𑁂, 𑀤𑁂𑀯𑀸 𑀅𑀲𑁆𑀲𑀸𑀲𑀬𑀦𑁆𑀢𑀺 𑀫𑀁;

‘𑀭𑀣𑁄 𑀲𑀳𑀲𑁆𑀲𑀬𑀼𑀢𑁆𑀢𑁄 𑀢𑁂, 𑀫𑀸𑀭𑀺𑀲𑀸𑀬𑀁 [𑀫𑀸𑀭𑀺𑀲𑀲𑁆𑀲 (𑀓.)] 𑀉𑀧𑀝𑁆𑀞𑀺𑀢𑁄’.

𑁧𑁪𑁦.

‘‘𑀯𑀢𑁆𑀢𑀦𑁆𑀢𑁂 𑀘𑀭𑀺𑀫𑁂 𑀘𑀺𑀢𑁆𑀢𑁂, 𑀫𑀫 𑀲𑀻𑀮𑀁 𑀅𑀦𑀼𑀲𑁆𑀲𑀭𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀁 𑀅𑀕𑀘𑁆𑀙𑀳𑀁.

𑁧𑁪𑁧.

‘‘𑀢𑀺𑀁𑀲𑀓𑁆𑀔𑀢𑁆𑀢𑀼𑀜𑁆𑀘 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀤𑀺𑀩𑁆𑀩𑀲𑀼𑀔𑀁 [𑀤𑀺𑀩𑁆𑀩𑀁 𑀲𑀼𑀔𑀁 (𑀲𑀻.)] 𑀅𑀦𑀼𑀪𑀯𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁪𑁨.

‘‘𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁪𑁩.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀧𑀼𑀭𑁂 𑀯𑁂𑀲𑀸𑀮𑀺𑀬𑀁 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁧𑁪𑁪.

‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑁂 ¶ 𑀓𑀸𑀮𑁂, 𑀤𑀺𑀧𑁆𑀧𑀦𑁆𑀢𑁂 [𑀤𑀺𑀩𑁆𑀩𑀦𑁆𑀢𑀺 (𑀓.)] 𑀚𑀺𑀦𑀲𑀸𑀲𑀦𑁂;

𑀫𑀸𑀢𑀸 𑀘 𑀫𑁂 𑀧𑀺𑀢𑀸 𑀘𑁂𑀯, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀕𑁆𑀕𑀳𑀼𑀁.

𑁧𑁪𑁫.

‘‘𑀲𑀳 ¶ 𑀲𑀼𑀢𑁆𑀯𑀸𑀦𑀳𑀁 𑀲𑀻𑀮𑀁, 𑀫𑀫 𑀲𑀻𑀮𑀁 𑀅𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁪𑁬.

‘‘𑀚𑀸𑀢𑀺𑀬𑀸 𑀧𑀜𑁆𑀘𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀺 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁧𑁪𑁭.

‘‘𑀧𑀭𑀺𑀧𑀼𑀡𑁆𑀡𑀸𑀦𑀺 𑀕𑁄𑀧𑁂𑀢𑁆𑀯𑀸, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀸𑀦𑀳𑀁;

𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀳𑀁.

𑁧𑁪𑁮.

‘‘𑀲𑁆𑀯𑀸𑀳𑀁 ¶ 𑀬𑀲𑀫𑀦𑀼𑀪𑀯𑀺𑀁, 𑀢𑁂𑀲𑀁 𑀲𑀻𑀮𑀸𑀦 𑀯𑀸𑀳𑀲𑀸;

𑀓𑀧𑁆𑀧𑀓𑁄𑀝𑀺𑀫𑁆𑀧𑀺 𑀓𑀺𑀢𑁆𑀢𑁂𑀦𑁆𑀢𑁄, 𑀓𑀺𑀢𑁆𑀢𑀬𑁂 𑀏𑀓𑀤𑁂𑀲𑀓𑀁.

𑁧𑁪𑁯.

‘‘𑀧𑀜𑁆𑀘𑀲𑀻𑀮𑀸𑀦𑀺 𑀕𑁄𑀧𑁂𑀢𑁆𑀯𑀸, 𑀢𑀬𑁄 𑀳𑁂𑀢𑀽 𑀮𑀪𑀸𑀫𑀳𑀁;

𑀤𑀻𑀖𑀸𑀬𑀼𑀓𑁄 𑀫𑀳𑀸𑀪𑁄𑀕𑁄, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀯𑀸𑀫𑀳𑀁.

𑁧𑁫𑁦.

‘‘𑀲𑀁𑀓𑀺𑀢𑁆𑀢𑁂𑀦𑁆𑀢𑁄 𑀘 [𑀧𑀓𑀺𑀢𑁆𑀢𑁂𑀦𑁆𑀢𑁄𑀯 (𑀲𑀻.), 𑀧𑀓𑀺𑀢𑁆𑀢𑁂𑀦𑁆𑀢𑁂 𑀘 (𑀲𑁆𑀬𑀸.)] 𑀲𑀩𑁆𑀩𑁂𑀲𑀁, 𑀅𑀪𑀺𑀫𑀢𑁆𑀢𑀜𑁆𑀘 𑀧𑁄𑀭𑀺𑀲𑀁;

𑀪𑀯𑀸𑀪𑀯𑁂 𑀲𑀁𑀲𑀭𑀺𑀢𑁆𑀯𑀸, 𑀏𑀢𑁂 𑀞𑀸𑀦𑁂 𑀮𑀪𑀸𑀫𑀳𑀁.

𑁧𑁫𑁧.

‘‘𑀅𑀧𑀭𑀺𑀫𑁂𑀬𑁆𑀬𑀲𑀻𑀮𑁂𑀲𑀼, 𑀯𑀢𑁆𑀢𑀦𑁆𑀢𑀸 𑀚𑀺𑀦𑀲𑀸𑀯𑀓𑀸;

𑀪𑀯𑁂𑀲𑀼 𑀬𑀤𑀺 𑀭𑀚𑁆𑀚𑁂𑀬𑁆𑀬𑀼𑀁, 𑀯𑀺𑀧𑀸𑀓𑁄 𑀓𑀻𑀤𑀺𑀲𑁄 𑀪𑀯𑁂.

𑁧𑁫𑁨.

‘‘𑀲𑀼𑀘𑀺𑀡𑁆𑀡𑀁 𑀫𑁂 𑀧𑀜𑁆𑀘𑀲𑀻𑀮𑀁, 𑀪𑀢𑀓𑁂𑀦 𑀢𑀧𑀲𑁆𑀲𑀺𑀦𑀸 [𑀯𑀺𑀧𑀲𑁆𑀲𑀺𑀦𑀸 (𑀲𑀻.)];

𑀢𑁂𑀦 𑀲𑀻𑀮𑁂𑀦𑀳𑀁 𑀅𑀚𑁆𑀚, 𑀫𑁄𑀘𑀬𑀺𑀁 𑀲𑀩𑁆𑀩𑀩𑀦𑁆𑀥𑀦𑀸.

𑁧𑁫𑁩.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀧𑀜𑁆𑀘𑀲𑀻𑀮𑀸𑀦𑀺 𑀕𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀜𑁆𑀘𑀲𑀻𑀮𑀸𑀦𑀺𑀤𑀁 𑀨𑀮𑀁.

𑁧𑁫𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫𑁫.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 ¶ 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂;

𑀓𑀜𑁆𑀘𑀦𑀕𑁆𑀖𑀺𑀬𑀲𑀁𑀓𑀸𑀲𑀁, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁.

𑁧𑁫𑁬.

‘‘𑀲𑀺𑀤𑁆𑀥𑀢𑁆𑀣𑀁 ¶ 𑀮𑁄𑀓𑀧𑀚𑁆𑀚𑁄𑀢𑀁, 𑀅𑀧𑁆𑀧𑀫𑁂𑀬𑁆𑀬𑀁 𑀅𑀦𑁄𑀧𑀫𑀁;

𑀅𑀮𑀢𑁆𑀣𑀁 𑀧𑀭𑀫𑀁 𑀧𑀻𑀢𑀺𑀁, 𑀤𑀺𑀲𑁆𑀯𑀸 𑀤𑀦𑁆𑀢𑀁 𑀚𑀼𑀢𑀺𑀦𑁆𑀥𑀭𑀁.

𑁧𑁫𑁭.

‘‘𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀦𑀸𑀫𑁂𑀢𑁆𑀯𑀸, 𑀪𑁄𑀚𑀬𑀺𑀁 𑀢𑀁 𑀫𑀳𑀸𑀫𑀼𑀦𑀺𑀁;

𑀫𑀳𑀸𑀓𑀸𑀭𑀼𑀡𑀺𑀓𑁄 𑀮𑁄𑀓𑁂 [𑀦𑀸𑀣𑁄 (𑀲𑀻.)], 𑀅𑀦𑀼𑀫𑁄𑀤𑀺 𑀫𑀫𑀁 𑀢𑀤𑀸.

𑁧𑁫𑁮.

‘‘𑀢𑀲𑁆𑀫𑀺𑀁 ¶ 𑀫𑀳𑀸𑀓𑀸𑀭𑀼𑀡𑀺𑀓𑁂, 𑀧𑀭𑀫𑀲𑁆𑀲𑀸𑀲𑀓𑀸𑀭𑀓𑁂;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁧𑁫𑁯.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀓𑁆𑀔𑀸𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀦𑁆𑀦𑀲𑀁𑀲𑀸𑀯𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀥𑀽𑀧𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁧.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 ¶ 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀓𑀼𑀝𑀺𑀥𑀽𑀧𑀁 𑀫𑀬𑀸 𑀤𑀺𑀦𑁆𑀦𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁬𑁨.

𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑁂𑀲𑀫𑁆𑀧𑀺 𑀧𑀺𑀬𑁄 𑀳𑁄𑀫𑀺, 𑀥𑀽𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁩.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀥𑀽𑀧𑀫𑀤𑀤𑀺𑀁 𑀢𑀤𑀸 [𑀬𑀁 𑀥𑀽𑀧𑀦𑀫𑀤𑀸𑀲𑀳𑀁 (𑀓.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀽𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀽𑀧𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀽𑀧𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁫.

‘‘𑀯𑀺𑀧𑀲𑁆𑀲𑀺𑀲𑁆𑀲 ¶ ¶ 𑀪𑀕𑀯𑀢𑁄, 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀧𑀼𑀭𑀸𑀡𑀧𑀼𑀮𑀺𑀦𑀁 𑀳𑀺𑀢𑁆𑀯𑀸 [𑀙𑀟𑁆𑀟𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)], 𑀲𑀼𑀤𑁆𑀥𑀧𑀼𑀮𑀺𑀦𑀫𑀸𑀓𑀺𑀭𑀺𑀁.

𑁧𑁬𑁬.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀧𑀼𑀮𑀺𑀦𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀮𑀺𑀦𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁭.

‘‘𑀢𑀺𑀁𑀲𑀢𑀺𑀫𑁂 ¶ [𑀢𑀺𑀧𑀜𑁆𑀜𑀸𑀲𑁂 (𑀲𑀻. 𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀭𑀸𑀚𑀸 𑀆𑀲𑀺𑀁 𑀚𑀦𑀸𑀥𑀺𑀪𑀽;

𑀫𑀳𑀸𑀧𑀼𑀮𑀺𑀦𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁬𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀉𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁯.

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀲𑀼𑀲𑀼𑀫𑀸𑀭𑁄 𑀅𑀳𑀁 𑀢𑀤𑀸;

𑀲𑀕𑁄𑀘𑀭𑀧𑁆𑀧𑀲𑀼𑀢𑁄𑀳𑀁 [𑀲𑀪𑁄𑀚𑀦𑀧𑀲𑀼𑀢𑀸𑀳𑀁 (𑀲𑁆𑀬𑀸. 𑀓.)], 𑀦𑀤𑀻𑀢𑀺𑀢𑁆𑀣𑀁 𑀅𑀕𑀘𑁆𑀙𑀳𑀁.

𑁧𑁭𑁦.

‘‘𑀲𑀺𑀤𑁆𑀥𑀢𑁆𑀣𑁄 𑀢𑀫𑁆𑀳𑀺 𑀲𑀫𑀬𑁂, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀦𑀤𑀺𑀁 𑀢𑀭𑀺𑀢𑀼𑀓𑀸𑀫𑁄 𑀲𑁄, 𑀦𑀤𑀻𑀢𑀺𑀢𑁆𑀣𑀁 𑀉𑀧𑀸𑀕𑀫𑀺.

𑁧𑁭𑁧.

‘‘𑀉𑀧𑀸𑀕𑀢𑁂 𑀘 [𑀉𑀧𑀸𑀕𑀢𑀫𑁆𑀳𑀺 (𑀲𑁆𑀬𑀸. 𑀓.)] 𑀲𑀫𑁆𑀩𑀼𑀤𑁆𑀥𑁂, 𑀅𑀳𑀫𑁆𑀧𑀺 𑀢𑀢𑁆𑀣𑀼𑀧𑀸𑀕𑀫𑀺𑀁;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀇𑀫𑀁 𑀯𑀸𑀘𑀁 𑀉𑀤𑀻𑀭𑀬𑀺𑀁.

𑁧𑁭𑁨.

‘‘‘𑀅𑀪𑀺𑀭𑀽𑀳 𑀫𑀳𑀸𑀯𑀻𑀭, 𑀢𑀸𑀭𑁂𑀲𑁆𑀲𑀸𑀫𑀺 𑀅𑀳𑀁 𑀢𑀼𑀯𑀁;

𑀧𑁂𑀢𑁆𑀢𑀺𑀓𑀁 𑀯𑀺𑀲𑀬𑀁 𑀫𑀬𑁆𑀳𑀁, 𑀅𑀦𑀼𑀓𑀫𑁆𑀧 𑀫𑀳𑀸𑀫𑀼𑀦𑀺’.

𑁧𑁭𑁩.

‘‘𑀫𑀫 𑀉𑀕𑁆𑀕𑀚𑁆𑀚𑀦𑀁 𑀲𑀼𑀢𑁆𑀯𑀸, 𑀅𑀪𑀺𑀭𑀽𑀳𑀺 𑀫𑀳𑀸𑀫𑀼𑀦𑀺;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀢𑀸𑀭𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁧𑁭𑁪.

‘‘𑀦𑀤𑀺𑀬𑀸 ¶ 𑀧𑀸𑀭𑀺𑀫𑁂 𑀢𑀻𑀭𑁂, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀅𑀲𑁆𑀲𑀸𑀲𑁂𑀲𑀺 𑀫𑀫𑀁 𑀢𑀢𑁆𑀣, 𑀅𑀫𑀢𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑁧𑁭𑁫.

‘‘𑀢𑀫𑁆𑀳𑀸 ¶ 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀆𑀕𑀘𑁆𑀙𑀳𑀁;

𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁭𑁬.

‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀜𑁆𑀘 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀲𑀳𑀁;

𑀢𑀻𑀡𑀺𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀫𑀳𑀺𑀬𑀸 𑀇𑀲𑁆𑀲𑀭𑁄 𑀅𑀳𑀼𑀁.

𑁧𑁭𑁭.

‘‘𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀳𑀁 ¶ , 𑀦𑀺𑀧𑀓𑁄 𑀘 𑀲𑀼𑀲𑀁𑀯𑀼𑀢𑁄;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁭𑁮.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀢𑀸𑀭𑁂𑀲𑀺𑀁 𑀬𑀁 𑀦𑀭𑀸𑀲𑀪𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀭𑀡𑀸𑀬 𑀇𑀤𑀁 𑀨𑀮𑀁.

𑁧𑁭𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀢𑁆𑀢𑀺𑀬𑁄 [𑀉𑀢𑁆𑀢𑀺𑀭𑀺𑀬𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀏𑀓𑀜𑁆𑀚𑀮𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮𑁦.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂;

𑀯𑀺𑀧𑀲𑁆𑀲𑀺𑀁 𑀲𑀢𑁆𑀣𑀯𑀸𑀳𑀕𑁆𑀕𑀁, 𑀦𑀭𑀯𑀭𑀁 𑀯𑀺𑀦𑀸𑀬𑀓𑀁.

𑁧𑁮𑁧.

‘‘𑀅𑀤𑀦𑁆𑀢𑀤𑀫𑀦𑀁 ¶ 𑀢𑀸𑀤𑀺𑀁, 𑀫𑀳𑀸𑀯𑀸𑀤𑀺𑀁 𑀫𑀳𑀸𑀫𑀢𑀺𑀁;

𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀲𑀼𑀫𑀦𑁄, 𑀏𑀓𑀜𑁆𑀚𑀮𑀺𑀫𑀓𑀸𑀲𑀳𑀁.

𑁧𑁮𑁨.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀫𑀜𑁆𑀚𑀮𑀺𑀁 𑀓𑀭𑀺𑀁 [𑀬𑀁 𑀅𑀜𑁆𑀚𑀮𑀺𑀫𑀓𑀭𑀺𑀁 (𑀲𑁆𑀬𑀸.), 𑀅𑀜𑁆𑀚𑀮𑀺𑀫𑀓𑀭𑀺𑀁 (𑀓.)] 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀜𑁆𑀚𑀮𑀺𑀲𑁆𑀲 𑀇𑀤𑀁 𑀨𑀮𑀁.

𑁧𑁮𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀜𑁆𑀚𑀮𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀜𑁆𑀚𑀮𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀔𑁄𑀫𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮𑁪.

‘‘𑀦𑀕𑀭𑁂 ¶ ¶ 𑀩𑀦𑁆𑀥𑀼𑀫𑀢𑀺𑀬𑀸, 𑀅𑀳𑁄𑀲𑀺𑀁 𑀯𑀸𑀡𑀺𑀚𑁄 𑀢𑀤𑀸;

𑀢𑁂𑀦𑁂𑀯 𑀤𑀸𑀭𑀁 𑀧𑁄𑀲𑁂𑀫𑀺, 𑀭𑁄𑀧𑁂𑀫𑀺 𑀩𑀻𑀚𑀲𑀫𑁆𑀧𑀤𑀁.

𑁧𑁮𑁫.

‘‘𑀭𑀣𑀺𑀬𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀏𑀓𑀁 𑀔𑁄𑀫𑀁 𑀫𑀬𑀸 𑀤𑀺𑀦𑁆𑀦𑀁, 𑀓𑀼𑀲𑀮𑀢𑁆𑀣𑀸𑀬 𑀲𑀢𑁆𑀣𑀼𑀦𑁄.

𑁧𑁮𑁬.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀔𑁄𑀫𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀔𑁄𑀫𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁮𑁭.

‘‘𑀲𑀢𑁆𑀢𑀭𑀲𑁂 [𑀲𑀢𑁆𑀢𑀯𑀻𑀲𑁂 (𑀲𑀻. 𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀲𑀺𑀦𑁆𑀥𑀯𑀲𑀦𑁆𑀥𑀦𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄.

𑁧𑁮𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀔𑁄𑀫𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀔𑁄𑀫𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀲𑀽𑀢𑀺 𑀉𑀧𑀯𑀸𑀦𑁄 𑀘, 𑀲𑀭𑀡𑁄 𑀲𑀻𑀮𑀕𑀸𑀳𑀓𑁄;

𑀅𑀦𑁆𑀦𑀲𑀁𑀲𑀸𑀯𑀓𑁄 𑀔𑁄𑀫𑀤𑀸𑀬𑀻 𑀘, 𑀤𑀲𑁂𑀯 𑀢𑀢𑀺𑀬𑁂 𑀕𑀡𑁂;

𑀅𑀜𑁆𑀚𑀮𑀻 𑀔𑁄𑀫𑀤𑀸𑀬𑀻 𑀘, 𑀤𑀲𑁂𑀯 𑀢𑀢𑀺𑀬𑁂 𑀕𑀡𑁂;

𑀧𑀜𑁆𑀘𑀸𑀮𑀻𑀲𑀻𑀢𑀺𑀲𑀢𑀁 𑀯𑀼𑀢𑁆𑀢𑀸, 𑀕𑀸𑀣𑀸𑀬𑁄 𑀲𑀩𑁆𑀩𑀧𑀺𑀡𑁆𑀟𑀺𑀢𑀸.

𑀲𑀼𑀪𑀽𑀢𑀺𑀯𑀕𑁆𑀕𑁄 𑀢𑀢𑀺𑀬𑁄.

𑀘𑀢𑀼𑀢𑁆𑀣𑀪𑀸𑀡𑀯𑀸𑀭𑀁.

𑁪. 𑀓𑀼𑀡𑁆𑀟𑀥𑀸𑀦𑀯𑀕𑁆𑀕𑁄

𑁧. 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀲𑀢𑁆𑀢𑀸𑀳𑀁 ¶ ¶ 𑀧𑀝𑀺𑀲𑀮𑁆𑀮𑀻𑀦𑀁, 𑀲𑀬𑀫𑁆𑀪𑀼𑀁 𑀅𑀕𑁆𑀕𑀧𑀼𑀕𑁆𑀕𑀮𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀝𑁆𑀞𑀳𑀺𑀁.

𑁨.

‘‘𑀯𑀼𑀝𑁆𑀞𑀺𑀢𑀁 𑀓𑀸𑀮𑀫𑀜𑁆𑀜𑀸𑀬, 𑀧𑀤𑀼𑀫𑀼𑀢𑁆𑀢𑀭𑀁 𑀫𑀳𑀸𑀫𑀼𑀦𑀺𑀁;

𑀫𑀳𑀦𑁆𑀢𑀺𑀁 𑀓𑀤𑀮𑀻𑀓𑀡𑁆𑀡𑀺𑀁, 𑀕𑀳𑁂𑀢𑁆𑀯𑀸 𑀉𑀧𑀕𑀘𑁆𑀙𑀳𑀁.

𑁩.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ¶ [𑀧𑀝𑀺𑀕𑁆𑀕𑀳𑁂𑀲𑀺 (𑀲𑁆𑀬𑀸. 𑀓.)] 𑀪𑀕𑀯𑀸, 𑀲𑀩𑁆𑀩𑀜𑁆𑀜𑀽 [𑀢𑀁 𑀨𑀮𑀁 (𑀲𑀻.)] 𑀮𑁄𑀓𑀦𑀸𑀬𑀓𑁄;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀧𑀭𑀺𑀪𑀼𑀜𑁆𑀚𑀺 𑀫𑀳𑀸𑀫𑀼𑀦𑀺.

𑁪.

‘‘𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀲𑀢𑁆𑀣𑀯𑀸𑀳𑁄 𑀅𑀦𑀼𑀢𑁆𑀢𑀭𑁄;

𑀲𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁫.

‘‘‘𑀬𑁂 ¶ 𑀘 𑀲𑀦𑁆𑀢𑀺 𑀲𑀫𑀺𑀢𑀸𑀭𑁄 [𑀬𑁂 𑀯𑀲𑀦𑁆𑀢𑀺 𑀲𑀫𑁂𑀢𑀸𑀭𑁄 (𑀲𑀻.)], 𑀬𑀓𑁆𑀔𑀸 𑀇𑀫𑀫𑁆𑀳𑀺 𑀧𑀩𑁆𑀩𑀢𑁂;

𑀅𑀭𑀜𑁆𑀜𑁂 𑀪𑀽𑀢𑀪𑀩𑁆𑀬𑀸𑀦𑀺 [𑀪𑀽𑀢𑀕𑀡𑀸 𑀲𑀩𑁆𑀩𑁂 (𑀲𑁆𑀬𑀸.)], 𑀲𑀼𑀡𑀦𑁆𑀢𑀼 𑀯𑀘𑀦𑀁 𑀫𑀫’.

𑁬.

‘‘𑀬𑁄 𑀲𑁄 𑀩𑀼𑀤𑁆𑀥𑀁 𑀉𑀧𑀝𑁆𑀞𑀸𑀲𑀺, 𑀫𑀺𑀕𑀭𑀸𑀚𑀁𑀯 𑀓𑁂𑀲𑀭𑀺𑀁 [𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻 (𑀲𑀻.)];

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁭.

‘‘‘𑀏𑀓𑀸𑀤𑀲𑀜𑁆𑀘𑀓𑁆𑀔𑀢𑁆𑀢𑀼𑀁, 𑀲𑁄 [𑀲𑁄𑀬𑀫𑁂𑀓𑀸𑀤𑀲𑀓𑁆𑀔𑀢𑁆𑀢𑀼𑀁 (𑀲𑀻.)] 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺;

𑀘𑀢𑀼𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁮.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁯.

‘‘‘𑀅𑀓𑁆𑀓𑁄𑀲𑀺𑀢𑁆𑀯𑀸𑀦 𑀲𑀫𑀡𑁂, 𑀲𑀻𑀮𑀯𑀦𑁆𑀢𑁂 𑀅𑀦𑀸𑀲𑀯𑁂;

𑀧𑀸𑀧𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀸𑀫𑀥𑁂𑀬𑁆𑀬𑀁 𑀮𑀪𑀺𑀲𑁆𑀲𑀢𑀺 [𑀪𑀯𑀺𑀲𑁆𑀲𑀢𑀺 (𑀓.)].

𑁧𑁦.

‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀼𑀡𑁆𑀟𑀥𑀸𑀦𑁄𑀢𑀺 𑀦𑀸𑀫𑁂𑀦, 𑀲𑀸𑀯𑀓𑁄 𑀲𑁄 𑀪𑀯𑀺𑀲𑁆𑀲𑀢𑀺’.

𑁧𑁧.

‘‘𑀧𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄, 𑀛𑀸𑀬𑀻 𑀛𑀸𑀦𑀭𑀢𑁄 𑀅𑀳𑀁;

𑀢𑁄𑀲𑀬𑀺𑀢𑁆𑀯𑀸𑀦 𑀲𑀢𑁆𑀣𑀸𑀭𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁨.

‘‘𑀲𑀸𑀯𑀓𑁂𑀳𑀺 ¶ ¶ [𑀲𑀸𑀯𑀓𑀕𑁆𑀕𑁂𑀳𑀺 (𑀲𑀻.)] 𑀧𑀭𑀺𑀯𑀼𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀮𑀸𑀓𑀁 𑀕𑀸𑀳𑀬𑀻 𑀚𑀺𑀦𑁄.

𑁧𑁩.

‘‘𑀏𑀓𑀁𑀲𑀁 ¶ 𑀘𑀻𑀯𑀭𑀁 𑀓𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀯𑀤𑀢𑀁 𑀯𑀭𑀲𑁆𑀲 𑀧𑀼𑀭𑀢𑁄, 𑀧𑀞𑀫𑀁 𑀅𑀕𑁆𑀕𑀳𑁂𑀲𑀳𑀁.

𑁧𑁪.

‘‘𑀢𑁂𑀦 𑀓𑀫𑁆𑀫𑁂𑀦 𑀪𑀕𑀯𑀸, 𑀤𑀲𑀲𑀳𑀲𑁆𑀲𑀻𑀓𑀫𑁆𑀧𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑀫𑀁.

𑁧𑁫.

‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀡𑁆𑀟𑀥𑀸𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀲𑀸𑀕𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭.

‘‘𑀲𑁄𑀪𑀺𑀢𑁄 ¶ 𑀦𑀸𑀫 𑀦𑀸𑀫𑁂𑀦, 𑀅𑀳𑁄𑀲𑀺𑀁 𑀩𑁆𑀭𑀸𑀳𑁆𑀫𑀡𑁄 𑀢𑀤𑀸;

𑀧𑀼𑀭𑀓𑁆𑀔𑀢𑁄 𑀲𑀲𑀺𑀲𑁆𑀲𑁂𑀳𑀺, 𑀆𑀭𑀸𑀫𑀁 𑀅𑀕𑀫𑀸𑀲𑀳𑀁.

𑁧𑁮.

‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀅𑀝𑁆𑀞𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁯.

‘‘𑀢𑀫𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀤𑀦𑁆𑀢𑀁 𑀤𑀦𑁆𑀢𑀧𑀼𑀭𑀓𑁆𑀔𑀢𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁨𑁦.

‘‘𑀬𑁂 𑀓𑁂𑀘𑀺 𑀧𑀸𑀤𑀧𑀸 𑀲𑀩𑁆𑀩𑁂, 𑀫𑀳𑀺𑀬𑀸 𑀢𑁂 𑀯𑀺𑀭𑀽𑀳𑀭𑁂;

𑀩𑀼𑀤𑁆𑀥𑀺𑀫𑀦𑁆𑀢𑁄 ¶ 𑀢𑀣𑀸 𑀲𑀢𑁆𑀢𑀸, 𑀭𑀼𑀳𑀦𑁆𑀢𑀺 𑀚𑀺𑀦𑀲𑀸𑀲𑀦𑁂.

𑁨𑁧.

‘‘𑀲𑀢𑁆𑀣𑀯𑀸𑀳𑁄𑀲𑀺 𑀲𑀧𑁆𑀧𑀜𑁆𑀜𑁄, 𑀫𑀳𑁂𑀲𑀺 𑀩𑀳𑀼𑀓𑁂 𑀚𑀦𑁂;

𑀯𑀺𑀧𑀣𑀸 𑀉𑀤𑁆𑀥𑀭𑀺𑀢𑁆𑀯𑀸𑀦, 𑀧𑀣𑀁 𑀆𑀘𑀺𑀓𑁆𑀔𑀲𑁂 𑀢𑀼𑀯𑀁.

𑁨𑁨.

‘‘𑀤𑀦𑁆𑀢𑁄 ¶ 𑀤𑀦𑁆𑀢𑀧𑀭𑀺𑀓𑀺𑀡𑁆𑀡𑁄 [𑀧𑀼𑀭𑀓𑁆𑀔𑀢𑁄 (𑀲𑁆𑀬𑀸.)], 𑀛𑀸𑀬𑀻 𑀛𑀸𑀦𑀭𑀢𑁂𑀳𑀺 𑀘;

𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁂𑀳𑀺, 𑀉𑀧𑀲𑀦𑁆𑀢𑁂𑀳𑀺 𑀢𑀸𑀤𑀺𑀪𑀺.

𑁨𑁩.

‘‘𑀅𑀮𑀗𑁆𑀓𑀢𑁄 𑀧𑀭𑀺𑀲𑀸𑀳𑀺, 𑀧𑀼𑀜𑁆𑀜𑀜𑀸𑀡𑁂𑀳𑀺 𑀲𑁄𑀪𑀢𑀺;

𑀧𑀪𑀸 𑀦𑀺𑀤𑁆𑀥𑀸𑀯𑀢𑁂 𑀢𑀼𑀬𑁆𑀳𑀁, 𑀲𑀽𑀭𑀺𑀬𑁄𑀤𑀬𑀦𑁂 𑀬𑀣𑀸.

𑁨𑁪.

‘‘𑀧𑀲𑀦𑁆𑀦𑀘𑀺𑀢𑁆𑀢𑀁 ¶ 𑀤𑀺𑀲𑁆𑀯𑀸𑀦, 𑀫𑀳𑁂𑀲𑀻 𑀧𑀤𑀼𑀫𑀼𑀢𑁆𑀢𑀭𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁨𑁫.

‘‘‘𑀬𑁄 𑀲𑁄 𑀳𑀸𑀲𑀁 𑀚𑀦𑁂𑀢𑁆𑀯𑀸𑀦, 𑀫𑀫𑀁 𑀓𑀺𑀢𑁆𑀢𑁂𑀲𑀺 𑀩𑁆𑀭𑀸𑀳𑁆𑀫𑀡𑁄;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺.

𑁨𑁬.

‘‘‘𑀢𑀼𑀲𑀺𑀢𑀸 𑀳𑀺 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀢𑀺.

𑁨𑁭.

‘‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀅𑀭𑀳𑀢𑁆𑀢𑀁 [𑀢𑀼𑀝𑁆𑀞𑀳𑀝𑁆𑀞𑀁 (𑀲𑁆𑀬𑀸. 𑀓.)] 𑀮𑀪𑀺𑀲𑁆𑀲𑀢𑀺;

𑀲𑀸𑀕𑀢𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁨𑁮.

‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦, 𑀧𑀸𑀧𑀓𑀫𑁆𑀫𑀁 𑀯𑀺𑀯𑀚𑁆𑀚𑀬𑀺𑀁;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀆𑀚𑀻𑀯𑀁 𑀧𑀭𑀺𑀲𑁄𑀥𑀬𑀺𑀁.

𑁨𑁯.

‘‘𑀏𑀯𑀁 ¶ 𑀯𑀺𑀳𑀭𑀫𑀸𑀦𑁄𑀳𑀁, 𑀢𑁂𑀚𑁄𑀥𑀸𑀢𑀽𑀲𑀼 𑀓𑁄𑀯𑀺𑀤𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀸𑀕𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧.

‘‘𑀧𑀤𑀼𑀫𑀼𑀢𑁆𑀢𑀭𑀦𑀸𑀣𑀲𑁆𑀲, 𑀧𑀤𑀼𑀫𑀁 𑀦𑀸𑀫 𑀘𑁂𑀢𑀺𑀬𑀁;

𑀲𑀺𑀮𑀸𑀲𑀦𑀁 [𑀲𑀻𑀳𑀸𑀲𑀦𑀁 (𑀓.)] 𑀓𑀸𑀭𑀬𑀺𑀢𑁆𑀯𑀸, 𑀲𑀼𑀯𑀡𑁆𑀡𑁂𑀦𑀸𑀪𑀺𑀮𑁂𑀧𑀬𑀺𑀁.

𑁩𑁨.

‘‘𑀭𑀢𑀦𑀸𑀫𑀬𑀙𑀢𑁆𑀢𑀜𑁆𑀘, 𑀧𑀕𑁆𑀕𑀬𑁆𑀳 𑀯𑀸𑀴𑀩𑀻𑀚𑀦𑀺𑀁 [𑀯𑀸𑀴𑀩𑀻𑀚𑀦𑀻 (𑀲𑀻. 𑀲𑁆𑀬𑀸.)];

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀮𑁄𑀓𑀩𑀦𑁆𑀥𑀼𑀲𑁆𑀲 𑀢𑀸𑀤𑀺𑀦𑁄.

𑁩𑁩.

‘‘𑀬𑀸𑀯𑀢𑀸 ¶ 𑀤𑁂𑀯𑀢𑀸 𑀪𑀼𑀫𑁆𑀫𑀸 [𑀪𑀽𑀫𑀸 (𑀓.)], 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸;

𑀭𑀢𑀦𑀸𑀫𑀬𑀙𑀢𑁆𑀢𑀸𑀦𑀁, 𑀯𑀺𑀧𑀸𑀓𑀁 𑀓𑀣𑀬𑀺𑀲𑁆𑀲𑀢𑀺.

𑁩𑁪.

‘‘𑀢𑀜𑁆𑀘 𑀲𑀩𑁆𑀩𑀁 𑀲𑀼𑀡𑀺𑀲𑁆𑀲𑀸𑀫, 𑀓𑀣𑀬𑀦𑁆𑀢𑀲𑁆𑀲 𑀲𑀢𑁆𑀣𑀼𑀦𑁄;

𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑁂𑀬𑁆𑀬𑀸𑀫, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁩𑁫.

‘‘𑀳𑁂𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑁄 [𑀧𑀭𑀺𑀩𑁆𑀩𑀽𑀴𑁆𑀳𑁄 (𑀲𑀻.)], 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁬.

‘‘‘𑀬𑁂𑀦𑀺𑀤𑀁 ¶ 𑀆𑀲𑀦𑀁 𑀤𑀺𑀦𑁆𑀦𑀁, 𑀲𑁄𑀯𑀡𑁆𑀡𑀁 𑀭𑀢𑀦𑀸𑀫𑀬𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁭.

‘‘‘𑀢𑀺𑀁𑀲𑀓𑀧𑁆𑀧𑀸𑀦𑀺 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀆𑀪𑀸𑀬𑀸𑀪𑀺𑀪𑀯𑀺𑀲𑁆𑀲𑀢𑀺.

𑁩𑁮.

‘‘‘𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀦𑁆𑀢𑁆𑀯𑀸, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀪𑀲𑁆𑀲𑀭𑁄𑀢𑀺 𑀦𑀸𑀫𑁂𑀦, 𑀉𑀕𑁆𑀕𑀢𑁂𑀚𑁄 𑀪𑀯𑀺𑀲𑁆𑀲𑀢𑀺.

𑁩𑁯.

‘‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄;

𑀲𑀫𑀦𑁆𑀢𑀸 𑀅𑀝𑁆𑀞𑀭𑀢𑀦𑀁, 𑀉𑀚𑁆𑀚𑁄𑀢𑀺𑀲𑁆𑀲𑀢𑀺 𑀔𑀢𑁆𑀢𑀺𑀬𑁄.

𑁪𑁦.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁧.

‘‘‘𑀢𑀼𑀲𑀺𑀢𑀸 ¶ 𑀳𑀺 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀓𑀘𑁆𑀘𑀸𑀦𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁪𑁨.

‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀅𑀭𑀳𑀸 𑀳𑁂𑀲𑁆𑀲𑀢𑀺𑀦𑀸𑀲𑀯𑁄;

𑀕𑁄𑀢𑀫𑁄 𑀮𑁄𑀓𑀧𑀚𑁆𑀚𑁄𑀢𑁄, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺.

𑁪𑁩.

‘‘‘𑀲𑀁𑀔𑀺𑀢𑁆𑀢𑀧𑀼𑀘𑁆𑀙𑀺𑀢𑀁 [𑀲𑀁𑀔𑀺𑀢𑁆𑀢𑀁 𑀧𑀼𑀘𑁆𑀙𑀺𑀢𑀁 (𑀲𑁆𑀬𑀸. 𑀓.)] 𑀧𑀜𑁆𑀳𑀁, 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑁆𑀲𑀢𑀺;

𑀓𑀣𑀬𑀦𑁆𑀢𑁄 𑀘 𑀢𑀁 𑀧𑀜𑁆𑀳𑀁, 𑀅𑀚𑁆𑀛𑀸𑀲𑀬𑀁 [𑀅𑀚𑁆𑀛𑀸𑀲𑀁 (𑀲𑀻.), 𑀅𑀩𑁆𑀪𑀸𑀲𑀁 (𑀓.)] 𑀧𑀽𑀭𑀬𑀺𑀲𑁆𑀲𑀢𑀺’.

𑁪𑁪.

‘‘𑀅𑀟𑁆𑀠𑁂 𑀓𑀼𑀮𑁂 𑀅𑀪𑀺𑀚𑀸𑀢𑁄, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀑𑀳𑀸𑀬 𑀥𑀦𑀥𑀜𑁆𑀜𑀸𑀦𑀺, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁪𑁫.

‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀧𑀼𑀘𑁆𑀙𑀦𑁆𑀢𑁂, 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀫𑀳𑀁;

𑀅𑀚𑁆𑀛𑀸𑀲𑀬𑀁 𑀢𑁂𑀲𑀁 𑀧𑀽𑀭𑁂𑀫𑀺, 𑀢𑁄𑀲𑁂𑀫𑀺 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁪𑁬.

‘‘𑀢𑁄𑀲𑀺𑀢𑁄 ¶ 𑀫𑁂 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁪𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮.

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 ¶ , 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀘𑀭𑀢𑁄 𑀘𑀸𑀭𑀺𑀓𑀁 𑀢𑀤𑀸.

𑁪𑁯.

‘‘𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳, 𑀉𑀧𑁆𑀧𑀮𑀁 𑀫𑀮𑁆𑀮𑀺𑀓𑀜𑁆𑀘𑀳𑀁;

𑀧𑀭𑀫𑀦𑁆𑀦𑀁 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁫𑁦.

‘‘𑀧𑀭𑀺𑀪𑀼𑀜𑁆𑀚𑀺 𑀫𑀳𑀸𑀯𑀻𑀭𑁄, 𑀧𑀭𑀫𑀦𑁆𑀦𑀁 𑀲𑀼𑀪𑁄𑀚𑀦𑀁;

𑀢𑀜𑁆𑀘 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀚𑀦𑀲𑁆𑀲 𑀲𑀫𑁆𑀧𑀤𑀲𑁆𑀲𑀬𑀺.

𑁫𑁧.

‘‘𑀇𑀝𑁆𑀞𑀁 𑀓𑀦𑁆𑀢𑀁 [𑀓𑀦𑁆𑀢𑀬𑀺𑀤𑀁 (𑀲𑁆𑀬𑀸.)], 𑀧𑀺𑀬𑀁 𑀮𑁄𑀓𑁂, 𑀚𑀮𑀚𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀲𑀼𑀤𑀼𑀓𑁆𑀓𑀭𑀁 𑀓𑀢𑀁 𑀢𑁂𑀦, 𑀬𑁄 𑀫𑁂 𑀧𑀼𑀧𑁆𑀨𑀁 𑀅𑀤𑀸𑀲𑀺𑀤𑀁.

𑁫𑁨.

‘‘𑀬𑁄 ¶ 𑀧𑀼𑀧𑁆𑀨𑀫𑀪𑀺𑀭𑁄𑀧𑁂𑀲𑀺, 𑀧𑀭𑀫𑀦𑁆𑀦𑀜𑁆𑀘𑀤𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁫𑁩.

‘‘‘𑀤𑀲 𑀅𑀝𑁆𑀞 𑀘𑀓𑁆𑀔𑀢𑁆𑀢𑀼𑀁 [𑀤𑀲 𑀘𑀝𑁆𑀞𑀓𑁆𑀔𑀢𑁆𑀢𑀼𑀁 (𑀲𑀻.), 𑀤𑀲𑀫𑀝𑁆𑀞𑀓𑁆𑀔𑀢𑁆𑀢𑀼𑀁 (𑀲𑁆𑀬𑀸.)] 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀉𑀧𑁆𑀧𑀮𑀁 𑀧𑀤𑀼𑀫𑀜𑁆𑀘𑀸𑀧𑀺, 𑀫𑀮𑁆𑀮𑀺𑀓𑀜𑁆𑀘 𑀢𑀤𑀼𑀢𑁆𑀢𑀭𑀺.

𑁫𑁪.

‘‘‘𑀅𑀲𑁆𑀲 ¶ 𑀧𑀼𑀜𑁆𑀜𑀯𑀺𑀧𑀸𑀓𑁂𑀦, 𑀤𑀺𑀩𑁆𑀩𑀕𑀦𑁆𑀥𑀲𑀫𑀸𑀬𑀼𑀢𑀁;

𑀆𑀓𑀸𑀲𑁂 𑀙𑀤𑀦𑀁 𑀓𑀢𑁆𑀯𑀸, 𑀥𑀸𑀭𑀬𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁫𑁫.

‘‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀧𑀜𑁆𑀘𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁫𑁬.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀻. 𑀲𑁆𑀬𑀸. 𑀓.)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁫𑁭.

‘‘‘𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 ¶ 𑀲𑁄, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀓𑁆𑀬𑀸𑀦𑀁 𑀦𑀦𑁆𑀤𑀺𑀚𑀦𑀦𑁄, 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁫𑁮.

‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁫𑁯.

‘‘‘𑀧𑀝𑀺𑀲𑀫𑁆𑀪𑀺𑀤𑀫𑀦𑀼𑀧𑁆𑀧𑀢𑁆𑀢𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀕𑁄𑀢𑀫𑁄 𑀮𑁄𑀓𑀩𑀦𑁆𑀥𑀼 𑀢𑀁 [𑀲𑁄 (𑀲𑀻.)], 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺.

𑁬𑁦.

‘‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀉𑀤𑀸𑀬𑀻 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁬𑁧.

‘‘𑀭𑀸𑀕𑁄 ¶ 𑀤𑁄𑀲𑁄 𑀘 𑀫𑁄𑀳𑁄 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀥𑀁𑀲𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁨.

‘‘𑀢𑁄𑀲𑀬𑀺𑀜𑁆𑀘𑀸𑀧𑀺 𑀲𑀫𑁆𑀩𑀼𑀤𑁆𑀥𑀁, 𑀆𑀢𑀸𑀧𑀻 𑀦𑀺𑀧𑀓𑁄 𑀅𑀳𑀁;

𑀧𑀲𑀸𑀤𑀺𑀢𑁄 [𑀧𑀫𑁄𑀤𑀺𑀢𑁄 (𑀲𑀻.)] 𑀘 𑀲𑀫𑁆𑀩𑀼𑀤𑁆𑀥𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁬𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀸𑀴𑀼𑀤𑀸𑀬𑀻 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀓𑀸𑀴𑀼𑀤𑀸𑀬𑀻𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀫𑁄𑀖𑀭𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁪.

‘‘𑀅𑀢𑁆𑀣𑀤𑀲𑁆𑀲𑀻 ¶ 𑀢𑀼 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑁄, 𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀣.

𑁬𑁫.

‘‘𑀲𑀺𑀲𑁆𑀲𑁂𑀳𑀺 𑀲𑀫𑁆𑀧𑀭𑀺𑀯𑀼𑀢𑁄, 𑀖𑀭𑀫𑁆𑀳𑀸 𑀅𑀪𑀺𑀦𑀺𑀓𑁆𑀔𑀫𑀺𑀁;

𑀦𑀺𑀓𑁆𑀔𑀫𑀺𑀢𑁆𑀯𑀸𑀦𑀳𑀁 𑀢𑀢𑁆𑀣, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁬𑁬.

‘‘𑀅𑀪𑀺𑀯𑀸𑀤𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁬𑁭.

‘‘𑀬𑀸𑀯𑀢𑀸 𑀭𑀽𑀧𑀺𑀦𑁄 𑀲𑀢𑁆𑀢𑀸, 𑀅𑀭𑀽𑀧𑀻 𑀯𑀸 𑀅𑀲𑀜𑁆𑀜𑀺𑀦𑁄;

𑀲𑀩𑁆𑀩𑁂 𑀢𑁂 𑀢𑀯 𑀜𑀸𑀡𑀫𑁆𑀳𑀺, 𑀅𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑁄𑀕𑀥𑀸.

𑁬𑁮.

‘‘𑀲𑀼𑀔𑀼𑀫𑀘𑁆𑀙𑀺𑀓𑀚𑀸𑀮𑁂𑀦 ¶ , 𑀉𑀤𑀓𑀁 𑀬𑁄 𑀧𑀭𑀺𑀓𑁆𑀔𑀺𑀧𑁂;

𑀬𑁂 𑀓𑁂𑀘𑀺 𑀉𑀤𑀓𑁂 𑀧𑀸𑀡𑀸, 𑀅𑀦𑁆𑀢𑁄𑀚𑀸𑀮𑁂 𑀪𑀯𑀦𑁆𑀢𑀺 𑀢𑁂.

𑁬𑁯.

‘‘𑀬𑁂𑀲𑀜𑁆𑀘 𑀘𑁂𑀢𑀦𑀸 𑀅𑀢𑁆𑀣𑀺, 𑀭𑀽𑀧𑀺𑀦𑁄 𑀘 𑀅𑀭𑀽𑀧𑀺𑀦𑁄;

𑀲𑀩𑁆𑀩𑁂 𑀢𑁂 𑀢𑀯 𑀜𑀸𑀡𑀫𑁆𑀳𑀺, 𑀅𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑁄𑀕𑀥𑀸.

𑁭𑁦.

‘‘𑀲𑀫𑀼𑀤𑁆𑀥𑀭𑀲𑀺𑀫𑀁 𑀮𑁄𑀓𑀁, 𑀅𑀦𑁆𑀥𑀓𑀸𑀭𑀲𑀫𑀸𑀓𑀼𑀮𑀁;

𑀢𑀯 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀓𑀗𑁆𑀔𑀸𑀲𑁄𑀢𑀁 𑀢𑀭𑀦𑁆𑀢𑀺 𑀢𑁂.

𑁭𑁧.

‘‘𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑁂 𑀮𑁄𑀓𑁂, 𑀅𑀦𑁆𑀥𑀓𑀸𑀭𑁂𑀦 𑀑𑀢𑁆𑀣𑀝𑁂;

𑀢𑀯 ¶ 𑀜𑀸𑀡𑀫𑁆𑀳𑀺 𑀚𑁄𑀢𑀦𑁆𑀢𑁂, 𑀅𑀦𑁆𑀥𑀓𑀸𑀭𑀸 𑀧𑀥𑀁𑀲𑀺𑀢𑀸.

𑁭𑁨.

‘‘𑀢𑀼𑀯𑀁 𑀘𑀓𑁆𑀔𑀽𑀲𑀺 𑀲𑀩𑁆𑀩𑁂𑀲𑀁, 𑀫𑀳𑀸𑀢𑀫𑀧𑀦𑀽𑀤𑀦𑁄;

𑀢𑀯 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀦𑀺𑀩𑁆𑀩𑀸𑀬𑀢𑀺 𑀩𑀳𑀼𑀚𑁆𑀚𑀦𑁄.

𑁭𑁩.

‘‘𑀧𑀼𑀝𑀓𑀁 ¶ 𑀧𑀽𑀭𑀬𑀺𑀢𑁆𑀯𑀸𑀦 [𑀧𑀻𑀞𑀭𑀁 (𑀲𑀻.), 𑀧𑀼𑀢𑀭𑀁 (𑀲𑁆𑀬𑀸.)], 𑀫𑀥𑀼𑀔𑀼𑀤𑁆𑀤𑀫𑀦𑁂𑀴𑀓𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀉𑀧𑀦𑁂𑀲𑀺𑀁 𑀫𑀳𑁂𑀲𑀺𑀦𑁄.

𑁭𑁪.

‘‘𑀧𑀝𑀺𑀕𑁆𑀕𑀡𑁆𑀳𑀺 𑀫𑀳𑀸𑀯𑀻𑀭𑁄, 𑀲𑀳𑀢𑁆𑀣𑁂𑀦 𑀫𑀳𑀸 𑀇𑀲𑀻;

𑀪𑀼𑀜𑁆𑀚𑀺𑀢𑁆𑀯𑀸 𑀢𑀜𑁆𑀘 𑀲𑀩𑁆𑀩𑀜𑁆𑀜𑀽, 𑀯𑁂𑀳𑀸𑀲𑀁 𑀦𑀪𑀫𑀼𑀕𑁆𑀕𑀫𑀺.

𑁭𑁫.

‘‘𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀅𑀢𑁆𑀣𑀤𑀲𑁆𑀲𑀻 𑀦𑀭𑀸𑀲𑀪𑁄;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁭𑁬.

‘‘‘𑀬𑁂𑀦𑀺𑀤𑀁 𑀣𑀯𑀺𑀢𑀁 𑀜𑀸𑀡𑀁, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀘 𑀣𑁄𑀫𑀺𑀢𑁄;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑀼𑀕𑁆𑀕𑀢𑀺𑀁 𑀲𑁄 𑀦 𑀕𑀘𑁆𑀙𑀢𑀺.

𑁭𑁭.

‘‘‘𑀘𑀢𑀼𑀤𑁆𑀤𑀲𑀜𑁆𑀘𑀓𑁆𑀔𑀢𑁆𑀢𑀼𑀁 [𑀘𑀢𑀼𑀲𑀝𑁆𑀞𑀺𑀜𑁆𑀘 (𑀲𑁆𑀬𑀸.)] 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁭𑁮.

‘‘‘𑀧𑀜𑁆𑀘𑁂𑀯 ¶ 𑀲𑀢𑀓𑁆𑀔𑀢𑁆𑀢𑀼𑀜𑁆𑀘 [𑀅𑀣 𑀧𑀜𑁆𑀘𑀲𑀢𑀓𑁆𑀔𑀢𑁆𑀢𑀼𑀁 (𑀲𑀻.)], 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀅𑀲𑀗𑁆𑀔𑁂𑀬𑁆𑀬𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀲𑁆𑀲𑀢𑀺.

𑁭𑁯.

‘‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂 𑀧𑀩𑁆𑀩𑀚𑀺𑀲𑁆𑀲𑀢𑀺.

𑁮𑁦.

‘‘‘𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀅𑀢𑁆𑀣𑀁, 𑀜𑀸𑀡𑁂𑀦 𑀯𑀺𑀘𑀺𑀦𑀺𑀲𑁆𑀲𑀢𑀺;

𑀫𑁄𑀖𑀭𑀸𑀚𑀸𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁮𑁧.

‘‘‘𑀢𑀻𑀳𑀺 ¶ 𑀯𑀺𑀚𑁆𑀚𑀸𑀳𑀺 𑀲𑀫𑁆𑀧𑀦𑁆𑀦𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀕𑁄𑀢𑀫𑁄 ¶ 𑀲𑀢𑁆𑀣𑀯𑀸𑀳𑀕𑁆𑀕𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺’.

𑁮𑁨.

‘‘𑀳𑀺𑀢𑁆𑀯𑀸 𑀫𑀸𑀦𑀼𑀲𑀓𑀁 𑀬𑁄𑀕𑀁, 𑀙𑁂𑀢𑁆𑀯𑀸𑀦 𑀪𑀯𑀩𑀦𑁆𑀥𑀦𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀫𑁄𑀖𑀭𑀸𑀚𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀫𑁄𑀖𑀭𑀸𑀚𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁪.

‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀅𑀢𑁆𑀣𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂;

𑀉𑀧𑀝𑁆𑀞𑀳𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁮𑁫.

‘‘𑀦𑀺𑀫𑀦𑁆𑀢𑁂𑀢𑁆𑀯𑀸 ¶ 𑀪𑀺𑀓𑁆𑀔𑀼𑀲𑀗𑁆𑀖𑀁 [𑀲𑀁𑀖𑀭𑀢𑀦𑀁 (𑀲𑀻. 𑀲𑁆𑀬𑀸.)], 𑀉𑀚𑀼𑀪𑀽𑀢𑀁 𑀲𑀫𑀸𑀳𑀺𑀢𑀁;

𑀉𑀘𑁆𑀙𑀼𑀦𑀸 𑀫𑀡𑁆𑀟𑀧𑀁 𑀓𑀢𑁆𑀯𑀸, 𑀪𑁄𑀚𑁂𑀲𑀺𑀁 𑀲𑀗𑁆𑀖𑀫𑀼𑀢𑁆𑀢𑀫𑀁.

𑁮𑁬.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑁂 𑀲𑀢𑁆𑀢𑁂 𑀅𑀪𑀺𑀪𑁄𑀫𑀺 [𑀅𑀢𑀺𑀪𑁄𑀫𑀺 (𑀲𑀻. 𑀓.)], 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁮𑁭.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀘𑁆𑀙𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀥𑀺𑀫𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀮𑀲𑀼𑀡𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁯.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ , 𑀢𑀸𑀧𑀲𑁄 𑀆𑀲𑀳𑀁 𑀢𑀤𑀸;

𑀮𑀲𑀼𑀡𑀁 𑀉𑀧𑀚𑀻𑀯𑀸𑀫𑀺, 𑀮𑀲𑀼𑀡𑀁 𑀫𑀬𑁆𑀳𑀪𑁄𑀚𑀦𑀁.

𑁯𑁦.

‘‘𑀔𑀸𑀭𑀺𑀬𑁄 ¶ 𑀧𑀽𑀭𑀬𑀺𑀢𑁆𑀯𑀸𑀦, 𑀲𑀗𑁆𑀖𑀸𑀭𑀸𑀫𑀫𑀕𑀘𑁆𑀙𑀳𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀲𑀗𑁆𑀖𑀲𑁆𑀲 𑀮𑀲𑀼𑀡𑀁 𑀅𑀤𑀁.

𑁯𑁧.

‘‘𑀯𑀺𑀧𑀲𑁆𑀲𑀺𑀲𑁆𑀲 𑀦𑀭𑀕𑁆𑀕𑀲𑁆𑀲, 𑀲𑀸𑀲𑀦𑁂 𑀦𑀺𑀭𑀢𑀲𑁆𑀲𑀳𑀁;

𑀲𑀗𑁆𑀖𑀲𑁆𑀲 𑀮𑀲𑀼𑀡𑀁 𑀤𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁯𑁨.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀮𑀲𑀼𑀡𑀁 𑀬𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀮𑀲𑀼𑀡𑀲𑁆𑀲 𑀇𑀤𑀁 𑀨𑀮𑀁.

𑁯𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀮𑀲𑀼𑀡𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀮𑀲𑀼𑀡𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀆𑀬𑀸𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁪.

‘‘𑀦𑀺𑀩𑁆𑀩𑀼𑀢𑁂 ¶ 𑀮𑁄𑀓𑀦𑀸𑀣𑀫𑁆𑀳𑀺, 𑀲𑀺𑀔𑀺𑀫𑁆𑀳𑀺 𑀯𑀤𑀢𑀁 𑀯𑀭𑁂;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀅𑀯𑀦𑁆𑀤𑀺𑀁 𑀣𑀽𑀧𑀫𑀼𑀢𑁆𑀢𑀫𑀁.

𑁯𑁫.

‘‘𑀯𑀟𑁆𑀠𑀓𑀻𑀳𑀺 ¶ 𑀓𑀣𑀸𑀧𑁂𑀢𑁆𑀯𑀸, 𑀫𑀽𑀮𑀁 𑀤𑀢𑁆𑀯𑀸𑀦𑀳𑀁 𑀢𑀤𑀸;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀬𑀸𑀕𑀁 𑀓𑀸𑀭𑀧𑁂𑀲𑀳𑀁.

𑁯𑁬.

‘‘𑀅𑀝𑁆𑀞 𑀓𑀧𑁆𑀧𑀸𑀦𑀺 𑀤𑁂𑀯𑁂𑀲𑀼, 𑀅𑀩𑁆𑀩𑁄𑀓𑀺𑀡𑁆𑀡𑀁 [𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 (𑀲𑀻.)] 𑀯𑀲𑀺𑀁 𑀅𑀳𑀁;

𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀯𑁄𑀓𑀺𑀡𑁆𑀡𑀁 𑀲𑀁𑀲𑀭𑀺𑀁 𑀅𑀳𑀁.

𑁯𑁭.

‘‘𑀓𑀸𑀬𑁂 𑀯𑀺𑀲𑀁 𑀦 𑀓𑀫𑀢𑀺, 𑀲𑀢𑁆𑀣𑀸𑀦𑀺 𑀦 𑀘 𑀳𑀦𑁆𑀢𑀺 𑀫𑁂;

𑀉𑀤𑀓𑁂𑀳𑀁 𑀦 𑀫𑀺𑀬𑁆𑀬𑀸𑀫𑀺, 𑀆𑀬𑀸𑀕𑀲𑁆𑀲 𑀇𑀤𑀁 𑀨𑀮𑀁.

𑁯𑁮.

‘‘𑀬𑀤𑀺𑀘𑁆𑀙𑀸𑀫𑀺 𑀅𑀳𑀁 𑀯𑀲𑁆𑀲𑀁, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀢𑀺;

𑀤𑁂𑀯𑀸𑀧𑀺 𑀫𑁂 𑀯𑀲𑀁 𑀏𑀦𑁆𑀢𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁯𑁯.

‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀢𑀺𑀲𑀓𑁆𑀔𑀢𑁆𑀢𑀼𑀁 𑀅𑀳𑁄𑀲𑀳𑀁;

𑀦 𑀫𑀁 𑀓𑁂𑀘𑀸𑀯𑀚𑀸𑀦𑀦𑁆𑀢𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁦.

‘‘𑀏𑀓𑀢𑁆𑀢𑀺𑀁𑀲𑁂 ¶ 𑀇𑀢𑁄 𑀓𑀧𑁆𑀧𑁂, 𑀆𑀬𑀸𑀕𑀁 𑀬𑀫𑀓𑀸𑀭𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀆𑀬𑀸𑀕𑀲𑁆𑀲 𑀇𑀤𑀁 𑀨𑀮𑀁.

𑁧𑁦𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀬𑀸𑀕𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀬𑀸𑀕𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀥𑀫𑁆𑀫𑀘𑀓𑁆𑀓𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁨.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 ¶ 𑀪𑀕𑀯𑀢𑁄, 𑀲𑀻𑀳𑀸𑀲𑀦𑀲𑁆𑀲 𑀲𑀫𑁆𑀫𑀼𑀔𑀸;

𑀥𑀫𑁆𑀫𑀘𑀓𑁆𑀓𑀁 𑀫𑁂 𑀞𑀧𑀺𑀢𑀁, 𑀲𑀼𑀓𑀢𑀁 𑀯𑀺𑀜𑁆𑀜𑀼𑀯𑀡𑁆𑀡𑀺𑀢𑀁.

𑁧𑁦𑁩.

‘‘𑀘𑀸𑀭𑀼𑀯𑀡𑁆𑀡𑁄𑀯 𑀲𑁄𑀪𑀸𑀫𑀺, 𑀲𑀬𑁄𑀕𑁆𑀕𑀩𑀮𑀯𑀸𑀳𑀦𑁄;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀦𑀺𑀘𑁆𑀘𑀁, 𑀅𑀦𑀼𑀬𑀦𑁆𑀢𑀸 𑀩𑀳𑀼𑀚𑁆𑀚𑀦𑀸.

𑁧𑁦𑁪.

‘‘𑀲𑀝𑁆𑀞𑀺𑀢𑀽𑀭𑀺𑀬𑀲𑀳𑀲𑁆𑀲𑁂𑀳𑀺, 𑀧𑀭𑀺𑀘𑀸𑀭𑁂𑀫𑀳𑀁 𑀲𑀤𑀸;

𑀧𑀭𑀺𑀯𑀸𑀭𑁂𑀦 𑀲𑁄𑀪𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁫.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀘𑀓𑁆𑀓𑀁 𑀞𑀧𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀫𑁆𑀫𑀘𑀓𑁆𑀓𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁬.

‘‘𑀇𑀢𑁄 𑀏𑀓𑀸𑀤𑀲𑁂 𑀓𑀧𑁆𑀧𑁂, 𑀅𑀝𑁆𑀞𑀸𑀲𑀺𑀁𑀲𑀼 𑀚𑀦𑀸𑀥𑀺𑀧𑀸;

𑀲𑀳𑀲𑁆𑀲𑀭𑀸𑀚𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁦𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀘𑀓𑁆𑀓𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀫𑁆𑀫𑀘𑀓𑁆𑀓𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀓𑀧𑁆𑀧𑀭𑀼𑀓𑁆𑀔𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁮.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀣𑀽𑀧𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸;

𑀯𑀺𑀘𑀺𑀢𑁆𑀢𑀤𑀼𑀲𑁆𑀲𑁂 𑀮𑀕𑁂𑀢𑁆𑀯𑀸 [𑀮𑀕𑁆𑀕𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)], 𑀓𑀧𑁆𑀧𑀭𑀼𑀓𑁆𑀔𑀁 𑀞𑀧𑁂𑀲𑀳𑀁.

𑁧𑁦𑁯.

‘‘𑀬𑀁 ¶ ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑁄𑀪𑀬𑀦𑁆𑀢𑁄 𑀫𑀫 𑀤𑁆𑀯𑀸𑀭𑀁, 𑀓𑀧𑁆𑀧𑀭𑀼𑀓𑁆𑀔𑁄 𑀧𑀢𑀺𑀝𑁆𑀞𑀢𑀺.

𑁧𑁧𑁦.

‘‘𑀅𑀳𑀜𑁆𑀘 ¶ 𑀧𑀭𑀺𑀲𑀸 𑀘𑁂𑀯, 𑀬𑁂 𑀓𑁂𑀘𑀺 𑀫𑀫 𑀯𑀲𑁆𑀲𑀺𑀢𑀸 [𑀦𑀺𑀲𑁆𑀲𑀺𑀢𑀸 (𑀲𑀻.)];

𑀢𑀫𑁆𑀳𑀸 𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸𑀦, 𑀦𑀺𑀯𑀸𑀲𑁂𑀫 𑀫𑀬𑀁 𑀲𑀤𑀸 [𑀢𑀤𑀸 (𑀲𑁆𑀬𑀸.)].

𑁧𑁧𑁧.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀭𑀼𑀓𑁆𑀔𑀁 𑀞𑀧𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀧𑁆𑀧𑀭𑀼𑀓𑁆𑀔𑀲𑁆𑀲𑀺𑀤𑀁 𑀨𑀮𑀁.

𑁧𑁧𑁨.

‘‘𑀇𑀢𑁄 𑀘 𑀲𑀢𑁆𑀢𑀫𑁂 𑀓𑀧𑁆𑀧𑁂, 𑀲𑀼𑀘𑁂𑀴𑀸 𑀅𑀝𑁆𑀞 𑀔𑀢𑁆𑀢𑀺𑀬𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁧𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀧𑁆𑀧𑀭𑀼𑀓𑁆𑀔𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀧𑁆𑀧𑀭𑀼𑀓𑁆𑀔𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀼𑀡𑁆𑀟𑀥𑀸𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀡𑁆𑀟𑀲𑀸𑀕𑀢𑀓𑀘𑁆𑀘𑀸𑀦𑀸, 𑀉𑀤𑀸𑀬𑀻 𑀫𑁄𑀖𑀭𑀸𑀚𑀓𑁄;

𑀅𑀥𑀺𑀫𑀼𑀢𑁆𑀢𑁄 𑀮𑀲𑀼𑀡𑀤𑁄, 𑀆𑀬𑀸𑀕𑀻 𑀥𑀫𑁆𑀫𑀘𑀓𑁆𑀓𑀺𑀓𑁄;

𑀓𑀧𑁆𑀧𑀭𑀼𑀓𑁆𑀔𑀻 𑀘 𑀤𑀲𑀫𑁄, 𑀕𑀸𑀣𑀸 𑀤𑁆𑀯𑀬𑀤𑀲𑀲𑀢𑀁 [𑀕𑀸𑀣𑀸𑀬𑁄 𑀤𑁆𑀯𑀸𑀤𑀲𑀲𑀢𑀁 (𑀲𑀻.)].

𑁫. 𑀉𑀧𑀸𑀮𑀺𑀯𑀕𑁆𑀕𑁄

𑁧. 𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺 ¶ ¶ , 𑀧𑀭𑀺𑀯𑀼𑀢𑁄 [𑀧𑀭𑁂𑀢𑁄 (𑀓. 𑀅𑀝𑁆𑀞)] 𑀮𑁄𑀓𑀦𑀸𑀬𑀓𑁄;

𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄 𑀲𑁄, 𑀕𑀘𑁆𑀙𑀢𑁂 𑀧𑀝𑀺𑀲𑀮𑁆𑀮𑀺𑀢𑀼𑀁.

𑁨.

‘‘𑀅𑀚𑀺𑀦𑁂𑀦 𑀦𑀺𑀯𑀢𑁆𑀣𑁄𑀳𑀁, 𑀢𑀺𑀤𑀡𑁆𑀟𑀧𑀭𑀺𑀥𑀸𑀭𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁩.

‘‘𑀏𑀓𑀁𑀲𑀁 ¶ 𑀅𑀚𑀺𑀦𑀁 𑀓𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁪.

‘‘𑀬𑀣𑀸𑀡𑁆𑀟𑀚𑀸 𑀘 𑀲𑀁𑀲𑁂𑀤𑀸, 𑀑𑀧𑀧𑀸𑀢𑀻 𑀚𑀮𑀸𑀩𑀼𑀚𑀸;

𑀓𑀸𑀓𑀸𑀤𑀺𑀧𑀓𑁆𑀔𑀺𑀦𑁄 𑀲𑀩𑁆𑀩𑁂, 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀤𑀸.

𑁫.

‘‘𑀬𑁂 𑀓𑁂𑀘𑀺 𑀧𑀸𑀡𑀪𑀽𑀢𑀢𑁆𑀣𑀺, 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄;

𑀲𑀩𑁆𑀩𑁂 𑀢𑁂 𑀢𑀯 𑀜𑀸𑀡𑀫𑁆𑀳𑀺, 𑀅𑀦𑁆𑀢𑁄 𑀳𑁄𑀦𑁆𑀢𑀺 𑀲𑀫𑁄𑀕𑀥𑀸.

𑁬.

‘‘𑀕𑀦𑁆𑀥𑀸 𑀘 𑀧𑀩𑁆𑀩𑀢𑁂𑀬𑁆𑀬𑀸 𑀬𑁂, 𑀳𑀺𑀫𑀯𑀦𑁆𑀢𑀦𑀕𑀼𑀢𑁆𑀢𑀫𑁂;

𑀲𑀩𑁆𑀩𑁂 𑀢𑁂 𑀢𑀯 𑀲𑀻𑀮𑀫𑁆𑀳𑀺, 𑀓𑀮𑀸𑀬𑀧𑀺 𑀦 𑀬𑀼𑀚𑁆𑀚𑀭𑁂.

𑁭.

‘‘𑀫𑁄𑀳𑀦𑁆𑀥𑀓𑀸𑀭𑀧𑀓𑁆𑀔𑀦𑁆𑀤𑁄, 𑀅𑀬𑀁 𑀮𑁄𑀓𑁄 𑀲𑀤𑁂𑀯𑀓𑁄;

𑀢𑀯 𑀜𑀸𑀡𑀫𑁆𑀳𑀺 𑀚𑁄𑀢𑀦𑁆𑀢𑁂, 𑀅𑀦𑁆𑀥𑀓𑀸𑀭𑀸 𑀯𑀺𑀥𑀁𑀲𑀺𑀢𑀸.

𑁮.

‘‘𑀬𑀣𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂, 𑀳𑁄𑀦𑁆𑀢𑀺 𑀲𑀢𑁆𑀢𑀸 𑀢𑀫𑁄𑀕𑀢𑀸;

𑀏𑀯𑀁 𑀩𑀼𑀤𑁆𑀥𑁂 𑀅𑀦𑀼𑀧𑁆𑀧𑀦𑁆𑀦𑁂, 𑀳𑁄𑀢𑀺 𑀮𑁄𑀓𑁄 𑀢𑀫𑁄𑀕𑀢𑁄.

𑁯.

‘‘𑀬𑀣𑁄𑀤𑀬𑀦𑁆𑀢𑁄 𑀆𑀤𑀺𑀘𑁆𑀘𑁄, 𑀯𑀺𑀦𑁄𑀤𑁂𑀢𑀺 𑀢𑀫𑀁 𑀲𑀤𑀸;

𑀢𑀣𑁂𑀯 𑀢𑁆𑀯𑀁 𑀩𑀼𑀤𑁆𑀥𑀲𑁂𑀝𑁆𑀞, 𑀯𑀺𑀤𑁆𑀥𑀁𑀲𑁂𑀲𑀺 𑀢𑀫𑀁 𑀲𑀤𑀸.

𑁧𑁦.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀲𑀺 ¶ , 𑀩𑀼𑀤𑁆𑀥𑁄 𑀮𑁄𑀓𑁂 𑀲𑀤𑁂𑀯𑀓𑁂;

𑀢𑀯 𑀓𑀫𑁆𑀫𑀸𑀪𑀺𑀭𑀤𑁆𑀥𑁂𑀦, 𑀢𑁄𑀲𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁧𑁧.

‘‘𑀢𑀁 𑀲𑀩𑁆𑀩𑀁 𑀅𑀦𑀼𑀫𑁄𑀤𑀺𑀢𑁆𑀯𑀸, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁧𑁨.

‘‘𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸𑀦 ¶ 𑀲𑀫𑁆𑀩𑀼𑀤𑁆𑀥𑁄, 𑀫𑀳𑁂𑀲𑀺 𑀧𑀤𑀼𑀫𑀼𑀢𑁆𑀢𑀭𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁩.

‘‘𑀬𑁂𑀦𑀺𑀤𑀁 ¶ 𑀣𑀯𑀺𑀢𑀁 𑀜𑀸𑀡𑀁, 𑀑𑀧𑀫𑁆𑀫𑁂𑀳𑀺 𑀲𑀫𑀸𑀬𑀼𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁪.

‘‘‘𑀅𑀝𑁆𑀞𑀸𑀭𑀲𑀜𑁆𑀘 𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀢𑀺𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁧𑁫.

‘‘‘𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁬.

‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁭.

‘‘‘𑀢𑀼𑀲𑀺𑀢𑀸 𑀳𑀺 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀳𑀻𑀦𑁄𑀯 𑀚𑀸𑀢𑀺𑀬𑀸 𑀲𑀦𑁆𑀢𑁄, 𑀉𑀧𑀸𑀮𑀺 𑀦𑀸𑀫 𑀳𑁂𑀲𑁆𑀲𑀢𑀺.

𑁧𑁮.

‘‘‘𑀲𑁄 ¶ 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀯𑀺𑀭𑀸𑀚𑁂𑀢𑁆𑀯𑀸𑀦 𑀧𑀸𑀧𑀓𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁧𑁯.

‘‘‘𑀢𑀼𑀝𑁆𑀞𑁄 𑀘 𑀕𑁄𑀢𑀫𑁄 𑀩𑀼𑀤𑁆𑀥𑁄, 𑀲𑀓𑁆𑀬𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀯𑀺𑀦𑀬𑀸𑀥𑀺𑀕𑀢𑀁 𑀢𑀲𑁆𑀲, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺’.

𑁨𑁦.

‘‘𑀲𑀤𑁆𑀥𑀸𑀬𑀸𑀳𑀁 ¶ 𑀧𑀩𑁆𑀩𑀚𑀺𑀢𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁧.

‘‘𑀪𑀕𑀯𑀸 𑀘𑀸𑀦𑀼𑀓𑀫𑁆𑀧𑀻 𑀫𑀁, 𑀯𑀺𑀦𑀬𑁂𑀳𑀁 𑀯𑀺𑀲𑀸𑀭𑀤𑁄;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀘, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁨.

‘‘𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀫𑁆𑀳𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀼;

𑀥𑀸𑀭𑁂𑀫𑀺 𑀯𑀺𑀦𑀬𑀁 𑀲𑀩𑁆𑀩𑀁, 𑀓𑁂𑀯𑀮𑀁 𑀭𑀢𑀦𑀸𑀓𑀭𑀁 [𑀭𑀢𑀦𑀕𑁆𑀖𑀭𑀁 (𑀓.)].

𑁨𑁩.

‘‘𑀫𑀫𑀜𑁆𑀘 𑀕𑀼𑀡𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁨𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀸𑀮𑀺𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀸𑀕𑀺𑀦𑁂𑀬𑁆𑀬𑀼𑀧𑀸𑀮𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫.

‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 ¶ ¶ 𑀫𑀼𑀦𑀺𑀦𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀼𑀥𑀸𑀬 𑀮𑁂𑀧𑀦𑀁 𑀓𑀢𑁆𑀯𑀸, 𑀘𑀗𑁆𑀓𑀫𑀁 𑀓𑀸𑀭𑀬𑀺𑀁 𑀅𑀳𑀁.

𑁨𑁬.

‘‘𑀦𑀸𑀦𑀸𑀯𑀡𑁂𑀳𑀺 𑀧𑀼𑀧𑁆𑀨𑁂𑀳𑀺, 𑀘𑀗𑁆𑀓𑀫𑀁 𑀲𑀦𑁆𑀣𑀭𑀺𑀁 𑀅𑀳𑀁;

𑀆𑀓𑀸𑀲𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸, 𑀪𑁄𑀚𑀬𑀺𑀁 𑀩𑀼𑀤𑁆𑀥𑀫𑀼𑀢𑁆𑀢𑀫𑀁.

𑁨𑁭.

‘‘𑀅𑀜𑁆𑀚𑀮𑀺𑀁 ¶ 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀲𑀼𑀩𑁆𑀩𑀢𑀁 [𑀧𑀼𑀧𑁆𑀨𑀓𑀁 (𑀓.)];

𑀤𑀻𑀖𑀲𑀸𑀮𑀁 𑀪𑀕𑀯𑀢𑁄, 𑀦𑀺𑀬𑁆𑀬𑀸𑀤𑁂𑀲𑀺𑀫𑀳𑀁 𑀢𑀤𑀸.

𑁨𑁮.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

𑁨𑁯.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑀤𑁂𑀯𑀓𑁂;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁦.

‘‘‘𑀬𑁄 𑀲𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀤𑀻𑀖𑀲𑀸𑀮𑀁 𑀅𑀤𑀸𑀲𑀺 [𑀅𑀓𑀸𑀲𑀺 (𑀲𑀻.)] 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁧.

‘‘‘𑀇𑀫𑀲𑁆𑀲 ¶ 𑀫𑀘𑁆𑀘𑀼𑀓𑀸𑀮𑀫𑁆𑀳𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀲𑀳𑀲𑁆𑀲𑀬𑀼𑀢𑁆𑀢𑀲𑁆𑀲𑀭𑀣𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁩𑁨.

‘‘‘𑀢𑁂𑀦 𑀬𑀸𑀦𑁂𑀦𑀬𑀁 𑀧𑁄𑀲𑁄, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺;

𑀅𑀦𑀼𑀫𑁄𑀤𑀺𑀲𑁆𑀲𑀭𑁂 𑀤𑁂𑀯𑀸, 𑀲𑀫𑁆𑀧𑀢𑁆𑀢𑁂 𑀓𑀼𑀲𑀮𑀩𑁆𑀪𑀯𑁂 [𑀓𑀼𑀲𑀮𑁂 𑀪𑀯𑁂 (𑀲𑀻. 𑀲𑁆𑀬𑀸.)].

𑁩𑁩.

‘‘‘𑀫𑀳𑀸𑀭𑀳𑀁 𑀩𑁆𑀬𑀫𑁆𑀳𑀁 𑀲𑁂𑀝𑁆𑀞𑀁, 𑀭𑀢𑀦𑀫𑀢𑁆𑀢𑀺𑀓𑀮𑁂𑀧𑀦𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀩𑁆𑀬𑀫𑁆𑀳𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺.

𑁩𑁪.

‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀧𑀜𑁆𑀘𑀯𑀻𑀲𑀢𑀺 𑀓𑀧𑁆𑀧𑀸𑀦𑀺, 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺.

𑁩𑁫.

‘‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀬𑀲𑁄𑀥𑀭𑀲𑀦𑀸𑀫𑀸 [𑀬𑀲𑁂𑀥𑀭𑀸 𑀲𑀫𑀸𑀦𑀸 (𑀲𑀻.)] 𑀢𑁂, 𑀲𑀩𑁆𑀩𑁂𑀧𑀺 𑀏𑀓𑀦𑀸𑀫𑀓𑀸.

𑁩𑁬.

‘‘‘𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸 [𑀘𑀺𑀦𑀺𑀢𑁆𑀯𑀸 (𑀲𑁆𑀬𑀸.)] 𑀧𑀼𑀜𑁆𑀜𑀲𑀜𑁆𑀘𑀬𑀁;

𑀅𑀝𑁆𑀞𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁩𑁭.

‘‘‘𑀢𑀢𑁆𑀭𑀸𑀧𑀺 ¶ ¶ 𑀩𑁆𑀬𑀫𑁆𑀳𑀁 𑀧𑀯𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁;

𑀤𑀲𑀲𑀤𑁆𑀤𑀸𑀯𑀺𑀯𑀺𑀢𑁆𑀢𑀁 𑀢𑀁, 𑀧𑀼𑀭𑀫𑀚𑁆𑀛𑀸𑀯𑀲𑀺𑀲𑁆𑀲𑀢𑀺.

𑁩𑁮.

‘‘‘𑀅𑀧𑀭𑀺𑀫𑁂𑀬𑁆𑀬𑁂 ¶ 𑀇𑀢𑁄 𑀓𑀧𑁆𑀧𑁂, 𑀪𑀽𑀫𑀺𑀧𑀸𑀮𑁄 𑀫𑀳𑀺𑀤𑁆𑀥𑀺𑀓𑁄;

𑀑𑀓𑁆𑀓𑀸𑀓𑁄 𑀦𑀸𑀫 𑀦𑀸𑀫𑁂𑀦, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺.

𑁩𑁯.

‘‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀲𑀩𑁆𑀩𑀸𑀲𑀁 𑀧𑀯𑀭𑀸 𑀘 𑀲𑀸 [𑀧𑀯𑀭𑀸𑀯 𑀬𑀸 (𑀲𑁆𑀬𑀸.), 𑀧𑀯𑀭𑀸 𑀧𑀺𑀬𑀸 (?)];

𑀅𑀪𑀺𑀚𑀸𑀢𑀸 𑀔𑀢𑁆𑀢𑀺𑀬𑀸𑀦𑀻, 𑀦𑀯 𑀧𑀼𑀢𑁆𑀢𑁂 𑀚𑀦𑁂𑀲𑁆𑀲𑀢𑀺.

𑁪𑁦.

‘‘‘𑀦𑀯 𑀧𑀼𑀢𑁆𑀢𑁂 𑀚𑀦𑁂𑀢𑁆𑀯𑀸𑀦, 𑀔𑀢𑁆𑀢𑀺𑀬𑀸𑀦𑀻 𑀫𑀭𑀺𑀲𑁆𑀲𑀢𑀺;

𑀢𑀭𑀼𑀡𑀻 𑀘 𑀧𑀺𑀬𑀸 𑀓𑀜𑁆𑀜𑀸, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀢𑀺.

𑁪𑁧.

‘‘‘𑀑𑀓𑁆𑀓𑀸𑀓𑀁 𑀢𑁄𑀲𑀬𑀺𑀢𑁆𑀯𑀸𑀦, 𑀯𑀭𑀁 𑀓𑀜𑁆𑀜𑀸 𑀮𑀪𑀺𑀲𑁆𑀲𑀢𑀺;

𑀯𑀭𑀁 𑀮𑀤𑁆𑀥𑀸𑀦 𑀲𑀸 𑀓𑀜𑁆𑀜𑀸, 𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑀬𑀺𑀲𑁆𑀲𑀢𑀺.

𑁪𑁨.

‘‘‘𑀧𑀩𑁆𑀩𑀸𑀚𑀺𑀢𑀸 𑀘 𑀢𑁂 𑀲𑀩𑁆𑀩𑁂, 𑀕𑀫𑀺𑀲𑁆𑀲𑀦𑁆𑀢𑀺 𑀦𑀕𑀼𑀢𑁆𑀢𑀫𑀁;

𑀚𑀸𑀢𑀺𑀪𑁂𑀤𑀪𑀬𑀸 𑀲𑀩𑁆𑀩𑁂, 𑀪𑀕𑀺𑀦𑀻𑀳𑀺 𑀯𑀲𑀺𑀲𑁆𑀲𑀭𑁂 [𑀲𑀁𑀯𑀲𑀺𑀲𑁆𑀲𑀭𑁂 (𑀲𑀻.)].

𑁪𑁩.

‘‘‘𑀏𑀓𑀸 𑀘 𑀓𑀜𑁆𑀜𑀸 𑀩𑁆𑀬𑀸𑀥𑀻𑀳𑀺, 𑀪𑀯𑀺𑀲𑁆𑀲𑀢𑀺 𑀧𑀭𑀺𑀓𑁆𑀔𑀢𑀸 [𑀧𑀼𑀭𑀓𑁆𑀔𑀢𑀸 (𑀲𑁆𑀬𑀸. 𑀓.)];

𑀫𑀸 𑀦𑁄 𑀚𑀸𑀢𑀺 𑀧𑀪𑀺𑀚𑁆𑀚𑀻𑀢𑀺, 𑀦𑀺𑀔𑀡𑀺𑀲𑁆𑀲𑀦𑁆𑀢𑀺 𑀔𑀢𑁆𑀢𑀺𑀬𑀸.

𑁪𑁪.

‘‘‘𑀔𑀢𑁆𑀢𑀺𑀬𑁄 𑀦𑀻𑀳𑀭𑀺𑀢𑁆𑀯𑀸𑀦, 𑀢𑀸𑀬 𑀲𑀤𑁆𑀥𑀺𑀁 𑀯𑀲𑀺𑀲𑁆𑀲𑀢𑀺;

𑀪𑀯𑀺𑀲𑁆𑀲𑀢𑀺 𑀢𑀤𑀸 𑀪𑁂𑀤𑁄, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄.

𑁪𑁫.

‘‘‘𑀢𑁂𑀲𑀁 ¶ 𑀧𑀚𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑁄𑀴𑀺𑀬𑀸 𑀦𑀸𑀫 𑀚𑀸𑀢𑀺𑀬𑀸;

𑀢𑀢𑁆𑀣 𑀫𑀸𑀦𑀼𑀲𑀓𑀁 𑀪𑁄𑀕𑀁, 𑀅𑀦𑀼𑀪𑁄𑀲𑁆𑀲𑀢𑀺𑀦𑀧𑁆𑀧𑀓𑀁.

𑁪𑁬.

‘‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺;

𑀢𑀢𑁆𑀭𑀸𑀧𑀺 𑀧𑀯𑀭𑀁 𑀩𑁆𑀬𑀫𑁆𑀳𑀁, 𑀮𑀪𑀺𑀲𑁆𑀲𑀢𑀺 𑀫𑀦𑁄𑀭𑀫𑀁.

𑁪𑁭.

‘‘‘𑀤𑁂𑀯𑀮𑁄𑀓𑀸 ¶ 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀆𑀕𑀦𑁆𑀢𑁆𑀯𑀸𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀲𑁄𑀡𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺.

𑁪𑁮.

‘‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀧𑀤𑀳𑀁 𑀲𑀢𑁆𑀣𑀼 𑀲𑀸𑀲𑀦𑁂;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁪𑁯.

‘‘‘𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀯𑀺𑀲𑁂𑀲𑀜𑁆𑀜𑀽 𑀫𑀳𑀸𑀯𑀻𑀭𑁄, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀢𑀺’.

𑁫𑁦.

‘‘𑀯𑀼𑀝𑁆𑀞𑀫𑁆𑀳𑀺 ¶ 𑀤𑁂𑀯𑁂 𑀘𑀢𑀼𑀭𑀗𑁆𑀕𑀼𑀮𑀫𑁆𑀳𑀺, 𑀢𑀺𑀡𑁂 𑀅𑀦𑀺𑀮𑁂𑀭𑀺𑀢𑀅𑀗𑁆𑀕𑀡𑀫𑁆𑀳𑀺;

𑀞𑀢𑁆𑀯𑀸𑀦 𑀬𑁄𑀕𑀲𑁆𑀲 𑀧𑀬𑀼𑀢𑁆𑀢𑀢𑀸𑀤𑀺𑀦𑁄, 𑀢𑀢𑁄𑀢𑁆𑀢𑀭𑀺𑀁 𑀧𑀸𑀭𑀫𑀢𑀸 𑀦 𑀯𑀺𑀚𑁆𑀚𑀢𑀺.

𑁫𑁧.

‘‘𑀉𑀢𑁆𑀢𑀫𑁂 𑀤𑀫𑀣𑁂 𑀤𑀦𑁆𑀢𑁄, 𑀘𑀺𑀢𑁆𑀢𑀁 𑀫𑁂 𑀲𑀼𑀧𑀡𑀻𑀳𑀺𑀢𑀁;

𑀪𑀸𑀭𑁄 𑀫𑁂 𑀑𑀳𑀺𑀢𑁄 𑀲𑀩𑁆𑀩𑁄, 𑀦𑀺𑀩𑁆𑀩𑀼𑀢𑁄𑀫𑁆𑀳𑀺 𑀅𑀦𑀸𑀲𑀯𑁄.

𑁫𑁨.

‘‘𑀅𑀗𑁆𑀕𑀻𑀭𑀲𑁄 ¶ 𑀫𑀳𑀸𑀦𑀸𑀕𑁄, 𑀅𑀪𑀺𑀚𑀸𑀢𑁄𑀯 𑀓𑁂𑀲𑀭𑀻;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁫𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 [𑀓𑁄𑀴𑀺𑀬𑀯𑁂𑀲𑁆𑀲𑁄 (𑀲𑀻. 𑀲𑁆𑀬𑀸.), 𑀓𑁄𑀝𑀺𑀓𑀡𑁆𑀡𑁄 (𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀓𑀸𑀴𑀺𑀕𑁄𑀥𑀸𑀧𑀼𑀢𑁆𑀢𑀪𑀤𑁆𑀤𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁪.

‘‘𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀩𑀼𑀤𑁆𑀥𑀁 ¶ , 𑀫𑁂𑀢𑁆𑀢𑀘𑀺𑀢𑁆𑀢𑀁 𑀫𑀳𑀸𑀫𑀼𑀦𑀺𑀁;

𑀉𑀧𑁂𑀢𑀺 𑀚𑀦𑀢𑀸 𑀲𑀩𑁆𑀩𑀸, 𑀲𑀩𑁆𑀩𑀮𑁄𑀓𑀕𑁆𑀕𑀦𑀸𑀬𑀓𑀁.

𑁫𑁫.

‘‘𑀲𑀢𑁆𑀢𑀼𑀓𑀜𑁆𑀘 𑀩𑀤𑁆𑀥𑀓𑀜𑁆𑀘 [𑀯𑀢𑁆𑀣𑀁 𑀲𑁂𑀦𑀸𑀲𑀦𑀜𑁆𑀘𑁂𑀯 (𑀲𑀻.), 𑀲𑀢𑁆𑀢𑀼𑀓𑀜𑁆𑀘 𑀧𑀤𑀓𑀜𑁆𑀘 (𑀲𑀻. 𑀅𑀝𑁆𑀞.), 𑀲𑀢𑁆𑀢𑀼𑀓𑀜𑁆𑀘 𑀧𑀯𑀸𑀓𑀜𑁆𑀘 (𑀲𑁆𑀬𑀸.)], 𑀆𑀫𑀺𑀲𑀁 𑀧𑀸𑀦𑀪𑁄𑀚𑀦𑀁;

𑀤𑀤𑀦𑁆𑀢𑀺 𑀲𑀢𑁆𑀣𑀼𑀦𑁄 𑀲𑀩𑁆𑀩𑁂, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂.

𑁫𑁬.

‘‘𑀅𑀳𑀫𑁆𑀧𑀺 ¶ 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀤𑁂𑀯𑀤𑁂𑀯𑀲𑁆𑀲 𑀢𑀸𑀤𑀺𑀦𑁄;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀲𑀗𑁆𑀖𑀫𑁆𑀧𑀺 𑀘 𑀅𑀦𑀼𑀢𑁆𑀢𑀭𑀁.

𑁫𑁭.

‘‘𑀉𑀬𑁆𑀬𑁄𑀚𑀺𑀢𑀸 𑀫𑀬𑀸 𑀘𑁂𑀢𑁂, 𑀦𑀺𑀫𑀦𑁆𑀢𑁂𑀲𑀼𑀁 𑀢𑀣𑀸𑀕𑀢𑀁;

𑀓𑁂𑀯𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑁫𑁮.

‘‘𑀲𑀢𑀲𑀳𑀲𑁆𑀲𑀧𑀮𑁆𑀮𑀗𑁆𑀓𑀁, 𑀲𑁄𑀯𑀡𑁆𑀡𑀁 𑀕𑁄𑀦𑀓𑀢𑁆𑀣𑀢𑀁;

𑀢𑀽𑀮𑀺𑀓𑀸𑀧𑀝𑀮𑀺𑀓𑀸𑀬, 𑀔𑁄𑀫𑀓𑀧𑁆𑀧𑀸𑀲𑀺𑀓𑁂𑀳𑀺 𑀘;

𑀫𑀳𑀸𑀭𑀳𑀁 𑀧𑀜𑁆𑀜𑀸𑀧𑀬𑀺𑀁, 𑀆𑀲𑀦𑀁 𑀩𑀼𑀤𑁆𑀥𑀬𑀼𑀢𑁆𑀢𑀓𑀁.

𑁫𑁯.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀮𑁄𑀓𑀯𑀺𑀤𑀽, 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑁄, 𑀫𑀫 𑀤𑁆𑀯𑀸𑀭𑀫𑀼𑀧𑀸𑀕𑀫𑀺.

𑁬𑁦.

‘‘𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀦𑀸𑀣𑀁 𑀬𑀲𑀲𑁆𑀲𑀺𑀦𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀪𑀺𑀦𑀸𑀫𑀬𑀺𑀁 𑀲𑀗𑁆𑀖𑀭𑀁 [𑀲𑀓𑀁 𑀖𑀭𑀁 (𑀲𑀻.)].

𑁬𑁧.

‘‘𑀪𑀺𑀓𑁆𑀔𑀽𑀦𑀁 𑀲𑀢𑀲𑀳𑀲𑁆𑀲𑀁, 𑀩𑀼𑀤𑁆𑀥𑀜𑁆𑀘 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀭𑀫𑀦𑁆𑀦𑁂𑀦 𑀢𑀧𑁆𑀧𑀬𑀺𑀁.

𑁬𑁨.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁩.

‘‘‘𑀬𑁂𑀦𑀺𑀤𑀁 𑀆𑀲𑀦𑀁 𑀤𑀺𑀦𑁆𑀦𑀁, 𑀲𑁄𑀯𑀡𑁆𑀡𑀁 𑀕𑁄𑀦𑀓𑀢𑁆𑀣𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁬𑁪.

‘‘‘𑀘𑀢𑀼𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀁 ¶ 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁬𑁫.

‘‘‘𑀧𑀤𑁂𑀲𑀭𑀚𑁆𑀚𑀁 𑀲𑀳𑀲𑁆𑀲𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺;

𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁬𑁬.

‘‘‘𑀲𑀩𑁆𑀩𑀸𑀲𑀼 𑀪𑀯𑀬𑁄𑀦𑀻𑀲𑀼, 𑀉𑀘𑁆𑀘𑀸𑀓𑀼𑀮𑀻 [𑀉𑀘𑁆𑀘𑀸𑀓𑀼𑀮𑁂 (𑀓.)] 𑀪𑀯𑀺𑀲𑁆𑀲𑀢𑀺;

𑀲𑁄 𑀘 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀪𑀤𑁆𑀤𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁬𑁭.

‘‘‘𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀫𑁆𑀳𑀺, 𑀧𑀦𑁆𑀢𑀲𑁂𑀦𑀦𑀺𑀯𑀸𑀲𑀳𑀁;

𑀨𑀮𑀜𑁆𑀘𑀸𑀥𑀺𑀕𑀢𑀁 𑀲𑀩𑁆𑀩𑀁, 𑀘𑀢𑁆𑀢𑀓𑁆𑀮𑁂𑀲𑁄𑀫𑁆𑀳𑀺 𑀅𑀚𑁆𑀚𑀳𑀁.

𑁬𑁮.

‘‘‘𑀫𑀫 𑀲𑀩𑁆𑀩𑀁 [𑀓𑀫𑁆𑀫𑀁 (?)] 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁’.

𑁬𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀺𑀕𑁄𑀥𑀸𑀬 𑀧𑀼𑀢𑁆𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀤𑁆𑀤𑀺𑀬𑀲𑁆𑀲 𑀓𑀸𑀴𑀺𑀕𑁄𑀥𑀸𑀬 𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀦𑁆𑀦𑀺𑀝𑁆𑀞𑀸𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁦.

‘‘𑀅𑀭𑀜𑁆𑀜𑁂 ¶ ¶ 𑀓𑀼𑀝𑀺𑀓𑀁 𑀓𑀢𑁆𑀯𑀸, 𑀯𑀲𑀸𑀫𑀺 𑀧𑀩𑁆𑀩𑀢𑀦𑁆𑀢𑀭𑁂;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀬𑀲𑁂𑀦 𑀅𑀬𑀲𑁂𑀦 𑀘.

𑁭𑁧.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺 [𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 (𑀲𑁆𑀬𑀸.)], 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁭𑁨.

‘‘𑀉𑀧𑀸𑀕𑀢𑀁 𑀫𑀳𑀸𑀦𑀸𑀕𑀁 [𑀫𑀳𑀸𑀯𑀻𑀭𑀁 (𑀲𑀻.)], 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑀁;

𑀢𑀺𑀡𑀲𑀦𑁆𑀣𑀭𑀁 [𑀢𑀺𑀡𑀢𑁆𑀣𑀭𑀁 (𑀓.)] 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁭𑁩.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀆𑀫𑀡𑁆𑀟𑀁 𑀧𑀸𑀦𑀻𑀬𑀜𑁆𑀘𑀳𑀁;

𑀅𑀤𑀸𑀲𑀺𑀁 𑀉𑀚𑀼𑀪𑀽𑀢𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁭𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂 [𑀲𑀢𑀲𑀳𑀲𑁆𑀲𑁂 𑀇𑀢𑁄 𑀓𑀧𑁆𑀧𑁂 (𑀲𑀻.)], 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀆𑀫𑀡𑁆𑀟𑀲𑁆𑀲 𑀇𑀤𑀁 𑀨𑀮𑀁.

𑁭𑁫.

‘‘𑀏𑀓𑀢𑀸𑀮𑀻𑀲𑀓𑀧𑁆𑀧𑀫𑁆𑀳𑀺, 𑀏𑀓𑁄 𑀆𑀲𑀺𑀁 𑀅𑀭𑀺𑀦𑁆𑀤𑀫𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁭𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑁄 [𑀲𑀦𑁆𑀦𑀺𑀥𑀸𑀧𑀓𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀦𑁆𑀦𑀺𑀝𑁆𑀞𑀸𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁭.

‘‘𑀲𑀼𑀫𑁂𑀥𑁄 ¶ 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀕𑀘𑁆𑀙𑀢𑁂 𑀅𑀦𑁆𑀢𑀭𑀸𑀧𑀡𑁂;

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 [𑀔𑀺𑀢𑁆𑀢𑀘𑀓𑁆𑀔𑀼 (𑀓. 𑀲𑀻. 𑀓.)] 𑀫𑀺𑀢𑀪𑀸𑀡𑀻, 𑀲𑀢𑀺𑀫𑀸 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄.

𑁭𑁮.

‘‘𑀧𑀜𑁆𑀘 𑀉𑀧𑁆𑀧𑀮𑀳𑀢𑁆𑀣𑀸𑀦𑀺, 𑀆𑀯𑁂𑀴𑀢𑁆𑀣𑀁 𑀅𑀳𑀁𑀲𑀼 𑀫𑁂;

𑀢𑁂𑀦 𑀩𑀼𑀤𑁆𑀥𑀁 𑀅𑀧𑀽𑀚𑁂𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁭𑁯.

‘‘𑀆𑀭𑁄𑀧𑀺𑀢𑀸 ¶ 𑀘 𑀢𑁂 𑀧𑀼𑀧𑁆𑀨𑀸, 𑀙𑀤𑀦𑀁 𑀅𑀲𑁆𑀲𑀼 𑀲𑀢𑁆𑀣𑀼𑀦𑁄;

𑀲𑀫𑀸𑀥𑀺𑀁𑀲𑀼 [𑀲𑀁𑀲𑀸𑀯𑀺𑀁𑀲𑀼 (𑀲𑀻.)] 𑀫𑀳𑀸𑀦𑀸𑀕𑀁, 𑀲𑀺𑀲𑁆𑀲𑀸 𑀆𑀘𑀭𑀺𑀬𑀁 𑀬𑀣𑀸.

𑁮𑁦.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺 ¶ , 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮𑁧.

‘‘𑀇𑀢𑁄 𑀯𑀻𑀲𑀓𑀧𑁆𑀧𑀲𑀢𑁂, 𑀅𑀳𑁂𑀲𑀼𑀁 𑀧𑀜𑁆𑀘 𑀔𑀢𑁆𑀢𑀺𑀬𑀸;

𑀳𑀢𑁆𑀣𑀺𑀬𑀸 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁮𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀳𑀢𑁆𑀣𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀧𑀤𑀼𑀫𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁩.

‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀯𑀺𑀧𑀲𑁆𑀲𑀺𑀫𑁆𑀳𑀕𑁆𑀕𑀧𑀼𑀕𑁆𑀕𑀮𑁂;

𑀲𑀼𑀨𑀼𑀮𑁆𑀮𑀧𑀤𑀼𑀫𑀁 𑀕𑀬𑁆𑀳, 𑀘𑀺𑀢𑀫𑀸𑀭𑁄𑀧𑀬𑀺𑀁 𑀅𑀳𑀁.

𑁮𑁪.

‘‘𑀆𑀭𑁄𑀧𑀺𑀢𑁂 ¶ 𑀘 𑀘𑀺𑀢𑀓𑁂, 𑀯𑁂𑀳𑀸𑀲𑀁 𑀦𑀪𑀫𑀼𑀕𑁆𑀕𑀫𑀺;

𑀆𑀓𑀸𑀲𑁂 𑀙𑀤𑀦𑀁 [𑀆𑀓𑀸𑀲𑀘𑁆𑀙𑀤𑀦𑀁 (𑀲𑀻.)] 𑀓𑀢𑁆𑀯𑀸, 𑀘𑀺𑀢𑀓𑀫𑁆𑀳𑀺 𑀅𑀥𑀸𑀭𑀬𑀺.

𑁮𑁫.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮𑁬.

‘‘𑀲𑀢𑁆𑀢𑀢𑀸𑀮𑀻𑀲𑀺𑀢𑁄 ¶ 𑀓𑀧𑁆𑀧𑁂, 𑀧𑀤𑀼𑀫𑀺𑀲𑁆𑀲𑀭𑀦𑀸𑀫𑀓𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁮𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀤𑀼𑀫𑀘𑁆𑀙𑀤𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀧𑀤𑀼𑀫𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁮.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀲𑀬𑀦𑀕𑁆𑀕𑀁 𑀫𑀬𑀸 𑀤𑀺𑀦𑁆𑀦𑀁, 𑀤𑀼𑀲𑁆𑀲𑀪𑀡𑁆𑀟𑁂𑀳𑀺 [𑀤𑀼𑀲𑁆𑀲𑀪𑀡𑁆𑀟𑁂𑀦 (𑀲𑁆𑀬𑀸.)] 𑀅𑀢𑁆𑀣𑀢𑀁.

𑁮𑁯.

‘‘𑀧𑀝𑀺𑀕𑁆𑀕𑀳𑁂𑀲𑀺 ¶ 𑀪𑀕𑀯𑀸, 𑀓𑀧𑁆𑀧𑀺𑀬𑀁 𑀲𑀬𑀦𑀸𑀲𑀦𑀁;

𑀉𑀝𑁆𑀞𑀸𑀬 𑀲𑀬𑀦𑀸 [𑀆𑀲𑀦𑀸 (𑀲𑀻.)] 𑀢𑀫𑁆𑀳𑀸, 𑀯𑁂𑀳𑀸𑀲𑀁 𑀉𑀕𑁆𑀕𑀫𑀻 𑀚𑀺𑀦𑁄.

𑁯𑁦.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀲𑀬𑀦𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀬𑀦𑀲𑁆𑀲 𑀇𑀤𑀁 𑀨𑀮𑀁.

𑁯𑁧.

‘‘𑀏𑀓𑀧𑀜𑁆𑀜𑀸𑀲𑀺𑀢𑁄 ¶ 𑀓𑀧𑁆𑀧𑁂, 𑀯𑀭𑀓𑁄 [𑀯𑀭𑀼𑀡𑁄 (𑀲𑀻. 𑀲𑁆𑀬𑀸.)] 𑀤𑁂𑀯𑀲𑀯𑁆𑀳𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁯𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀬𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀬𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀘𑀗𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁩.

‘‘𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑁆𑀯𑀸𑀦, 𑀘𑀗𑁆𑀓𑀫𑀁 𑀓𑀸𑀭𑀬𑀺𑀁 𑀅𑀳𑀁.

𑁯𑁪.

‘‘𑀉𑀘𑁆𑀘𑀢𑁄 𑀧𑀜𑁆𑀘𑀭𑀢𑀦𑀁, 𑀘𑀗𑁆𑀓𑀫𑀁 𑀲𑀸𑀥𑀼𑀫𑀸𑀧𑀺𑀢𑀁;

𑀆𑀬𑀸𑀫𑀢𑁄 𑀳𑀢𑁆𑀣𑀲𑀢𑀁, 𑀪𑀸𑀯𑀦𑀻𑀬𑁆𑀬𑀁 𑀫𑀦𑁄𑀭𑀫𑀁.

𑁯𑁫.

‘‘𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀅𑀢𑁆𑀣𑀤𑀲𑁆𑀲𑀻 𑀦𑀭𑀼𑀢𑁆𑀢𑀫𑁄;

𑀳𑀢𑁆𑀣𑁂𑀦 𑀧𑀼𑀮𑀺𑀦𑀁 𑀕𑀬𑁆𑀳, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁯𑁬.

‘‘‘𑀇𑀫𑀺𑀦𑀸 ¶ 𑀧𑀼𑀮𑀺𑀦𑀤𑀸𑀦𑁂𑀦, 𑀘𑀗𑁆𑀓𑀫𑀁 𑀲𑀼𑀓𑀢𑁂𑀦 𑀘;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀁, 𑀧𑀼𑀮𑀺𑀦𑀁 𑀅𑀦𑀼𑀪𑁄𑀲𑁆𑀲𑀢𑀺.

𑁯𑁭.