📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀣𑁂𑀭𑀸𑀧𑀤𑀸𑀦𑀧𑀸𑀴𑀺

(𑀤𑀼𑀢𑀺𑀬𑁄 𑀪𑀸𑀕𑁄)

𑁪𑁩. 𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑀯𑀕𑁆𑀕𑁄

𑁧. 𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀯𑀺𑀧𑀲𑁆𑀲𑀺𑀦𑁄 ¶ ¶ ¶ 𑀪𑀕𑀯𑀢𑁄, 𑀧𑀸𑀝𑀮𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀤𑀺𑀲𑁆𑀯𑀸𑀯 𑀢𑀁 𑀧𑀸𑀤𑀧𑀕𑁆𑀕𑀁, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁨.

‘‘𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸𑀦, 𑀩𑁄𑀥𑀺𑀁 𑀲𑀫𑁆𑀫𑀚𑁆𑀚𑀺 𑀢𑀸𑀯𑀤𑁂;

𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀢𑀁 𑀩𑁄𑀥𑀺𑀁, 𑀅𑀯𑀦𑁆𑀤𑀺𑀁 𑀧𑀸𑀝𑀮𑀺𑀁 𑀅𑀳𑀁.

𑁩.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀦𑀫𑀲𑁆𑀲𑀫𑀸𑀦𑁄 𑀢𑀁 𑀩𑁄𑀥𑀺𑀁, 𑀕𑀜𑁆𑀙𑀺𑀁 𑀧𑀝𑀺𑀓𑀼𑀝𑀺𑀁 𑀅𑀳𑀁.

𑁪.

‘‘𑀢𑀸𑀤𑀺𑀫𑀕𑁆𑀕𑁂𑀦 ¶ 𑀕𑀘𑁆𑀙𑀸𑀫𑀺, 𑀲𑀭𑀦𑁆𑀢𑁄 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀅𑀚𑀕𑀭𑁄 𑀫𑀁 𑀧𑀻𑀴𑁂𑀲𑀺, 𑀖𑁄𑀭𑀭𑀽𑀧𑁄 𑀫𑀳𑀩𑁆𑀩𑀮𑁄.

𑁫.

‘‘𑀆𑀲𑀦𑁆𑀦𑁂 ¶ 𑀫𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑁂𑀦 𑀢𑁄𑀲𑀬𑀻 𑀫𑀫𑀁;

𑀓𑀴𑁂𑀯𑀭𑀁 𑀫𑁂 𑀕𑀺𑀮𑀢𑀺, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁬.

‘‘𑀅𑀦𑀸𑀯𑀺𑀮𑀁 𑀫𑀫 𑀘𑀺𑀢𑁆𑀢𑀁, 𑀯𑀺𑀲𑀼𑀤𑁆𑀥𑀁 𑀧𑀡𑁆𑀟𑀭𑀁 𑀲𑀤𑀸;

𑀲𑁄𑀓𑀲𑀮𑁆𑀮𑀁 𑀦 𑀚𑀸𑀦𑀸𑀫𑀺, 𑀘𑀺𑀢𑁆𑀢𑀲𑀦𑁆𑀢𑀸𑀧𑀦𑀁 𑀫𑀫.

𑁭.

‘‘𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀘, 𑀅𑀧𑀫𑀸𑀭𑁄 𑀯𑀺𑀢𑀘𑁆𑀙𑀺𑀓𑀸;

𑀤𑀤𑁆𑀤𑀼 𑀓𑀡𑁆𑀟𑀼 𑀘 𑀫𑁂 𑀦𑀢𑁆𑀣𑀺, 𑀨𑀮𑀁 𑀲𑀫𑁆𑀫𑀚𑁆𑀚𑀦𑀸𑀬𑀺𑀤𑀁 [𑀲𑀫𑁆𑀫𑀚𑁆𑀚𑀦𑁂 𑀇𑀤𑀁 (𑀲𑀻.)].

𑁮.

‘‘𑀲𑁄𑀓𑁄 ¶ 𑀘 𑀧𑀭𑀺𑀤𑁂𑀯𑁄 𑀘, 𑀳𑀤𑀬𑁂 𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀪𑀦𑁆𑀢𑀁 𑀉𑀚𑀼𑀓𑀁 𑀘𑀺𑀢𑁆𑀢𑀁, 𑀨𑀮𑀁 𑀲𑀫𑁆𑀫𑀚𑁆𑀚𑀦𑀸𑀬𑀺𑀤𑀁.

𑁯.

‘‘𑀲𑀫𑀸𑀥𑀻𑀲𑀼 ¶ 𑀦 𑀫𑀚𑁆𑀚𑀸𑀫𑀺 [𑀲𑀫𑀸𑀥𑀻𑀲𑀼 𑀦 𑀲𑀚𑁆𑀚𑀸𑀫𑀺 (𑀲𑀻.), 𑀲𑀫𑀸𑀥𑀺𑀁 𑀧𑀼𑀦 𑀧𑀚𑁆𑀚𑀸𑀫𑀺 (𑀲𑁆𑀬𑀸)], 𑀯𑀺𑀲𑀤𑀁 𑀳𑁄𑀢𑀺 𑀫𑀸𑀦𑀲𑀁;

𑀬𑀁 𑀬𑀁 𑀲𑀫𑀸𑀥𑀺𑀫𑀺𑀘𑁆𑀙𑀸𑀫𑀺, 𑀲𑁄 𑀲𑁄 𑀲𑀫𑁆𑀧𑀚𑁆𑀚𑀢𑁂 𑀫𑀫𑀁.

𑁧𑁦.

‘‘𑀭𑀚𑀦𑀻𑀬𑁂 𑀦 𑀭𑀚𑁆𑀚𑀸𑀫𑀺, 𑀅𑀣𑁄 𑀤𑀼𑀲𑁆𑀲𑀦𑀺𑀬𑁂𑀲𑀼 [𑀤𑁄𑀲𑀦𑀺𑀬𑁂𑀲𑀼 (𑀲𑀻. 𑀲𑁆𑀬𑀸. 𑀓.)] 𑀘;

𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀸𑀫𑀺, 𑀨𑀮𑀁 𑀲𑀫𑁆𑀫𑀚𑁆𑀚𑀦𑀸𑀬𑀺𑀤𑀁.

𑁧𑁧.

‘‘𑀏𑀓𑀦𑀯𑀼𑀢𑀺𑀢𑁄 [𑀏𑀓𑀦𑀯𑀼𑀢𑁂 𑀇𑀢𑁄 (𑀲𑀻. 𑀲𑁆𑀬𑀸.)] 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀁 𑀲𑀫𑁆𑀫𑀚𑁆𑀚𑀦𑀸𑀬𑀺𑀤𑀁.

𑁧𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀏𑀓𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫.

‘‘𑀦𑀕𑀭𑁂 ¶ 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀢𑀺𑀡𑀳𑀸𑀭𑀓𑁄;

𑀢𑀺𑀡𑀳𑀸𑀭𑁂𑀦 𑀚𑀻𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂.

𑁧𑁬.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀢𑀫𑀦𑁆𑀥𑀓𑀸𑀭𑀁 𑀦𑀸𑀲𑁂𑀢𑁆𑀯𑀸, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁧𑁭.

‘‘𑀲𑀓𑁂 ¶ 𑀖𑀭𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀢𑀸𑀯𑀤𑁂;

‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀯𑀺𑀚𑁆𑀚𑀢𑀺.

𑁧𑁮.

‘‘‘𑀇𑀤𑀁 ¶ 𑀫𑁂 𑀲𑀸𑀝𑀓𑀁 𑀏𑀓𑀁, 𑀦𑀢𑁆𑀣𑀺 𑀫𑁂 𑀓𑁄𑀘𑀺 𑀤𑀸𑀬𑀓𑁄;

𑀤𑀼𑀓𑁆𑀔𑁄 𑀦𑀺𑀭𑀬𑀲𑀫𑁆𑀨𑀲𑁆𑀲𑁄, 𑀭𑁄𑀧𑀬𑀺𑀲𑁆𑀲𑀸𑀫𑀺 𑀤𑀓𑁆𑀔𑀺𑀡𑀁’.

𑁧𑁯.

‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀏𑀓𑀁 𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁨𑁦.

‘‘𑀏𑀓𑀁 ¶ 𑀤𑀼𑀲𑁆𑀲𑀁 𑀤𑀤𑀺𑀢𑁆𑀯𑀸𑀦, 𑀉𑀓𑁆𑀓𑀼𑀝𑁆𑀞𑀺𑀁 𑀲𑀫𑁆𑀧𑀯𑀢𑁆𑀢𑀬𑀺𑀁;

‘𑀬𑀤𑀺 𑀩𑀼𑀤𑁆𑀥𑁄 𑀢𑀼𑀯𑀁 𑀯𑀻𑀭, 𑀢𑀸𑀭𑁂𑀳𑀺 𑀫𑀁 𑀫𑀳𑀸𑀫𑀼𑀦𑀺’.

𑁨𑁧.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀤𑀸𑀦𑀁 𑀧𑀓𑀺𑀢𑁆𑀢𑁂𑀦𑁆𑀢𑁄, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

𑁨𑁨.

‘‘‘𑀇𑀫𑀺𑀦𑀸 𑀏𑀓𑀤𑀼𑀲𑁆𑀲𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀲𑀺.

𑁨𑁩.

‘‘‘𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀲𑀺;

𑀢𑁂𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 [𑀘𑀓𑁆𑀓𑀯𑀢𑁆𑀢𑀺 (𑀲𑁆𑀬𑀸.)] 𑀪𑀯𑀺𑀲𑁆𑀲𑀲𑀺.

𑁨𑁪.

‘‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁 [𑀅𑀲𑀗𑁆𑀓𑀬𑀁 (𑀲𑁆𑀬𑀸. 𑀓.) 𑀏𑀯𑀫𑀼𑀧𑀭𑀺𑀧𑀺];

𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀲𑀁𑀲𑀭𑀦𑁆𑀢𑁄 𑀢𑀼𑀯𑀁 𑀪𑀯𑁂.

𑁨𑁫.

‘‘‘𑀭𑀽𑀧𑀯𑀸 𑀕𑀼𑀡𑀲𑀫𑁆𑀧𑀦𑁆𑀦𑁄, 𑀅𑀦𑀯𑀓𑁆𑀓𑀦𑁆𑀢𑀤𑁂𑀳𑀯𑀸 [𑀅𑀦𑀼𑀯𑀢𑁆𑀢𑀦𑁆𑀢… (𑀲𑁆𑀬𑀸)];

𑀅𑀓𑁆𑀔𑁄𑀪𑀁 𑀅𑀫𑀺𑀢𑀁 𑀤𑀼𑀲𑁆𑀲𑀁, 𑀮𑀪𑀺𑀲𑁆𑀲𑀲𑀺 𑀬𑀤𑀺𑀘𑁆𑀙𑀓𑀁’.

𑁨𑁬.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄 [𑀥𑀻𑀭𑁄 (𑀲𑀻. 𑀲𑁆𑀬𑀸.)], 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁨𑁭.

‘‘𑀬𑀁 ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀏𑀓𑀤𑀼𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁨𑁮.

‘‘𑀧𑀤𑀼𑀤𑁆𑀥𑀸𑀭𑁂 ¶ 𑀧𑀤𑀼𑀤𑁆𑀥𑀸𑀭𑁂, 𑀤𑀼𑀲𑁆𑀲𑀁 𑀦𑀺𑀩𑁆𑀩𑀢𑁆𑀢𑀢𑁂 𑀫𑀫𑀁;

𑀳𑁂𑀝𑁆𑀞𑀸 𑀤𑀼𑀲𑁆𑀲𑀫𑁆𑀳𑀺 𑀢𑀺𑀝𑁆𑀞𑀸𑀫𑀺, 𑀉𑀧𑀭𑀺𑀘𑁆𑀙𑀤𑀦𑀁 𑀫𑀫.

𑁨𑁯.

‘‘𑀘𑀓𑁆𑀓𑀯𑀸𑀴𑀁 𑀉𑀧𑀸𑀤𑀸𑀬, 𑀲𑀓𑀸𑀦𑀦𑀁 𑀲𑀧𑀩𑁆𑀩𑀢𑀁;

𑀇𑀘𑁆𑀙𑀫𑀸𑀦𑁄 𑀘𑀳𑀁 𑀅𑀚𑁆𑀚, 𑀤𑀼𑀲𑁆𑀲𑁂𑀳𑀘𑁆𑀙𑀸𑀤𑀬𑁂𑀬𑁆𑀬 𑀢𑀁.

𑁩𑁦.

‘‘𑀢𑁂𑀦𑁂𑀯 𑀏𑀓𑀤𑀼𑀲𑁆𑀲𑁂𑀦, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑀸𑀪𑀯𑁂.

𑁩𑁧.

‘‘𑀯𑀺𑀧𑀸𑀓𑀁 ¶ 𑀯𑀺𑀏𑀓𑀤𑀼𑀲𑁆𑀲𑀲𑁆𑀲, 𑀦𑀸𑀚𑁆𑀛𑀕𑀁 𑀓𑀢𑁆𑀣𑀘𑀺𑀓𑁆𑀔𑀬𑀁;

𑀅𑀬𑀁 𑀫𑁂 𑀅𑀦𑁆𑀢𑀺𑀫𑀸 𑀚𑀸𑀢𑀺, 𑀯𑀺𑀧𑀘𑁆𑀘𑀢𑀺 𑀇𑀥𑀸𑀧𑀺 𑀫𑁂.

𑁩𑁨.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀼𑀲𑁆𑀲𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀤𑀼𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁩𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀤𑀼𑀲𑁆𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀏𑀓𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀏𑀓𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ ¶ , 𑀕𑁄𑀲𑀺𑀢𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁩𑁭.

‘‘𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀓𑀲𑁆𑀲𑀧𑁄 𑀇𑀢𑀺 𑀫𑀁 𑀯𑀺𑀤𑀽;

𑀲𑀼𑀤𑁆𑀥𑀺𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑁄, 𑀯𑀲𑀸𑀫𑀺 𑀕𑁄𑀲𑀺𑀢𑁂 𑀢𑀤𑀸.

𑁩𑁮.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀅𑀕𑀜𑁆𑀙𑀺 𑀅𑀦𑀺𑀮𑀜𑁆𑀚𑀲𑀸.

𑁩𑁯.

‘‘𑀯𑀦𑀕𑁆𑀕𑁂 𑀕𑀘𑁆𑀙𑀫𑀸𑀦𑀲𑁆𑀲, 𑀤𑀺𑀲𑁆𑀯𑀸 𑀭𑀁𑀲𑀺𑀁 𑀫𑀳𑁂𑀲𑀺𑀦𑁄;

𑀓𑀝𑁆𑀞𑀫𑀜𑁆𑀘𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀅𑀚𑀺𑀦𑀜𑁆𑀘 𑀅𑀧𑀢𑁆𑀣𑀭𑀺𑀁.

𑁪𑁦.

‘‘𑀆𑀲𑀦𑀁 ¶ 𑀧𑀜𑁆𑀜𑀸𑀧𑁂𑀢𑁆𑀯𑀸𑀦, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁪𑁧.

‘‘‘𑀲𑀮𑁆𑀮𑀓𑀢𑁆𑀢𑁄 𑀫𑀳𑀸𑀯𑀻𑀭, 𑀆𑀢𑀼𑀭𑀸𑀦𑀁 𑀢𑀺𑀓𑀺𑀘𑁆𑀙𑀓𑁄;

𑀫𑀫𑀁 𑀭𑁄𑀕𑀧𑀭𑁂𑀢𑀲𑁆𑀲 [𑀭𑀸𑀕… (𑀲𑁆𑀬𑀸.)], 𑀢𑀺𑀓𑀺𑀘𑁆𑀙𑀁 𑀤𑁂𑀳𑀺 𑀦𑀸𑀬𑀓.

𑁪𑁨.

‘‘‘𑀓𑀮𑁆𑀮𑀢𑁆𑀣𑀺𑀓𑀸 𑀬𑁂 𑀧𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀲𑁂𑀝𑁆𑀞 𑀢𑀼𑀯𑀁 𑀫𑀼𑀦𑁂;

𑀥𑀼𑀯𑀢𑁆𑀣𑀲𑀺𑀤𑁆𑀥𑀺𑀁 𑀧𑀧𑁆𑀧𑁄𑀦𑁆𑀢𑀺, 𑀏𑀢𑁂𑀲𑀁 𑀅𑀚𑀭𑁄 [𑀚𑀚𑁆𑀚𑀭𑁄 (𑀲𑀻. 𑀧𑀻. 𑀓.)] 𑀪𑀯𑁂.

𑁪𑁩.

‘‘‘𑀦 ¶ 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄 𑀅𑀢𑁆𑀣𑀺, 𑀧𑀯𑀢𑁆𑀢𑀨𑀮𑀪𑁄𑀚𑀺𑀳𑀁;

𑀇𑀤𑀁 𑀫𑁂 𑀆𑀲𑀦𑀁 𑀅𑀢𑁆𑀣𑀺 [𑀦 𑀫𑁂 𑀤𑁂𑀬𑁆𑀬𑀁 𑀢𑀯 𑀅𑀢𑁆𑀣𑀺 (𑀲𑀻. 𑀲𑁆𑀬𑀸.)], 𑀦𑀺𑀲𑀻𑀤 𑀓𑀝𑁆𑀞𑀫𑀜𑁆𑀘𑀓𑁂’.

𑁪𑁪.

‘‘𑀦𑀺𑀲𑀻𑀤𑀺 𑀢𑀢𑁆𑀣 𑀪𑀕𑀯𑀸, 𑀅𑀲𑀫𑁆𑀪𑀻𑀢𑁄𑀯 [𑀅𑀘𑁆𑀙𑀫𑁆𑀪𑀺𑀢𑁄𑀯 (𑀲𑁆𑀬𑀸. 𑀓.)] 𑀓𑁂𑀲𑀭𑀻;

𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁪𑁫.

‘‘‘𑀯𑀺𑀲𑀝𑁆𑀞𑁄 ¶ [𑀯𑀺𑀲𑁆𑀲𑀢𑁆𑀣𑁄 (𑀲𑀻. 𑀧𑀻), 𑀯𑀺𑀲𑁆𑀲𑀝𑁆𑀞𑁄 (𑀲𑁆𑀬𑀸. 𑀓.)] 𑀳𑁄𑀳𑀺 𑀫𑀸 𑀪𑀸𑀬𑀺, 𑀮𑀤𑁆𑀥𑁄 𑀚𑁄𑀢𑀺𑀭𑀲𑁄 𑀢𑀬𑀸;

𑀬𑀁 𑀢𑀼𑀬𑁆𑀳𑀁 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀭𑀺𑀧𑀽𑀭𑀺𑀲𑁆𑀲𑀢𑀺𑀦𑀸𑀕𑀢𑁂 [𑀧𑀭𑀺𑀧𑀽𑀭𑀺𑀲𑁆𑀲𑀢𑀸𑀲𑀦𑀁 (𑀲𑁆𑀬𑀸. 𑀓.)].

𑁪𑁬.

‘‘‘𑀦 𑀫𑁄𑀖𑀁 𑀢𑀁 𑀓𑀢𑀁 𑀢𑀼𑀬𑁆𑀳𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀲𑀓𑁆𑀓𑀸 𑀉𑀤𑁆𑀥𑀭𑀺𑀢𑀼𑀁 𑀅𑀢𑁆𑀢𑀸, 𑀬𑀲𑁆𑀲 𑀘𑀺𑀢𑁆𑀢𑀁 𑀧𑀡𑀻𑀳𑀺𑀢𑀁 [𑀲𑀼𑀦𑀻𑀳𑀺𑀢𑀁 (𑀲𑁆𑀬𑀸.)].

𑁪𑁭.

‘‘‘𑀇𑀫𑀺𑀦𑀸𑀲𑀦𑀤𑀸𑀦𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀲𑀺.

𑁪𑁮.

‘‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀲𑀺;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀲𑀺.

𑁪𑁯.

‘‘‘𑀧𑀤𑁂𑀲𑀭𑀚𑁆𑀚𑀁 ¶ 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑀼𑀢𑁆𑀯𑀸, 𑀲𑀁𑀲𑀸𑀭𑁂 𑀲𑀁𑀲𑀭𑀺𑀲𑁆𑀲𑀲𑀺’.

𑁫𑁦.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁫𑁧.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀲𑀭𑀣𑀁 𑀲𑀦𑁆𑀤𑀫𑀸𑀦𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁨.

‘‘𑀓𑀸𑀦𑀦𑀁 𑀧𑀯𑀺𑀲𑀺𑀢𑁆𑀯𑀸𑀧𑀺, 𑀬𑀤𑀸 𑀇𑀘𑁆𑀙𑀸𑀫𑀺 𑀆𑀲𑀦𑀁;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀮𑁆𑀮𑀗𑁆𑀓𑁄 𑀉𑀧𑀢𑀺𑀝𑁆𑀞𑀢𑀺.

𑁫𑁩.

‘‘𑀯𑀸𑀭𑀺𑀫𑀚𑁆𑀛𑀕𑀢𑁄 𑀲𑀦𑁆𑀢𑁄, 𑀬𑀤𑀸 𑀇𑀘𑁆𑀙𑀸𑀫𑀺 𑀆𑀲𑀦𑀁;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀮𑁆𑀮𑀗𑁆𑀓𑁄 𑀉𑀧𑀢𑀺𑀝𑁆𑀞𑀢𑀺.

𑁫𑁪.

‘‘𑀬𑀁 ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀧𑀮𑁆𑀮𑀗𑁆𑀓𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁫𑁫.

‘‘𑀤𑀼𑀯𑁂 ¶ ¶ 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀅𑀣 𑀩𑁆𑀭𑀸𑀳𑁆𑀫𑀡𑁂.

𑁫𑁬.

‘‘𑀏𑀓𑀸𑀲𑀦𑀁 𑀤𑀤𑀺𑀢𑁆𑀯𑀸𑀦, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀥𑀫𑁆𑀫𑀧𑀮𑁆𑀮𑀗𑁆𑀓𑀫𑀸𑀤𑀸𑀬 [𑀥𑀫𑁆𑀫𑀧𑀮𑁆𑀮𑀗𑁆𑀓𑀫𑀜𑁆𑀜𑀸𑀬 (𑀲𑁆𑀬𑀸. 𑀓.)], 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁭.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀢𑁆𑀢𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁧.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀓𑀼𑀓𑁆𑀓𑀼𑀝𑁄 [𑀓𑀤𑀫𑁆𑀩𑁄 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀫 𑀧𑀩𑁆𑀩𑀢𑁄;

𑀢𑀫𑁆𑀳𑀺 𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀲𑀢𑁆𑀢 𑀩𑀼𑀤𑁆𑀥𑀸 𑀯𑀲𑀺𑀁𑀲𑀼 𑀢𑁂.

𑁬𑁨.

‘‘𑀓𑀤𑀫𑁆𑀩𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀢𑁆𑀢 𑀫𑀸𑀮𑀸 𑀕𑀳𑁂𑀢𑁆𑀯𑀸𑀦, 𑀧𑀼𑀜𑁆𑀜𑀘𑀺𑀢𑁆𑀢𑁂𑀦 [𑀧𑀼𑀡𑁆𑀡𑀘𑀺𑀢𑁆𑀢𑁂𑀦 (𑀓.)] 𑀑𑀓𑀺𑀭𑀺𑀁.

𑁬𑁩.

‘‘𑀢𑁂𑀦 ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁬𑁪.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁫.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀢𑁆𑀢𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀢𑁆𑀢𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁮.

‘‘𑀯𑀦𑀓𑀫𑁆𑀫𑀺𑀓𑁄 𑀧𑀼𑀭𑁂 𑀆𑀲𑀺𑀁, 𑀧𑀺𑀢𑀼𑀫𑀸𑀢𑀼𑀫𑀢𑁂𑀦𑀳𑀁 [𑀧𑀺𑀢𑀼𑀧𑀺𑀢𑀸𑀫𑀳𑁂𑀦𑀳𑀁 (𑀲𑀻. 𑀲𑁆𑀬𑀸. 𑀧𑀻.)];

𑀧𑀲𑀼𑀫𑀸𑀭𑁂𑀦 𑀚𑀻𑀯𑀸𑀫𑀺, 𑀓𑀼𑀲𑀮𑀁 𑀫𑁂 𑀦 𑀯𑀺𑀚𑁆𑀚𑀢𑀺.

𑁬𑁯.

‘‘𑀫𑀫 𑀆𑀲𑀬𑀲𑀸𑀫𑀦𑁆𑀢𑀸, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀧𑀤𑀸𑀦𑀺 𑀢𑀻𑀡𑀺 𑀤𑀲𑁆𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

𑁭𑁦.

‘‘𑀅𑀓𑁆𑀓𑀦𑁆𑀢𑁂 𑀘 𑀧𑀤𑁂 𑀤𑀺𑀲𑁆𑀯𑀸, 𑀢𑀺𑀲𑁆𑀲𑀦𑀸𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀤𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁭𑁧.

‘‘𑀓𑁄𑀭𑀡𑁆𑀟𑀁 ¶ 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀧𑀸𑀤𑀧𑀁 𑀥𑀭𑀡𑀻𑀭𑀼𑀳𑀁;

𑀲𑀓𑁄𑀲𑀓𑀁 𑀕𑀳𑁂𑀢𑁆𑀯𑀸𑀦, 𑀧𑀤𑀲𑁂𑀝𑁆𑀞𑀫𑀧𑀽𑀚𑀬𑀺𑀁.

𑁭𑁨.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁭𑁩.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀓𑁄𑀭𑀡𑁆𑀟𑀯𑀡𑁆𑀡𑀓𑁄𑀬𑁂𑀯, 𑀲𑀼𑀧𑁆𑀧𑀪𑀸𑀲𑁄 𑀪𑀯𑀸𑀫𑀳𑀁.

𑁭𑁪.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀤𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁭𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀖𑀢𑀫𑀡𑁆𑀟𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁮.

‘‘𑀲𑀼𑀘𑀺𑀦𑁆𑀢𑀺𑀢𑀁 ¶ ¶ 𑀪𑀕𑀯𑀦𑁆𑀢𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀉𑀧𑀯𑀺𑀝𑁆𑀞𑀁 𑀫𑀳𑀸𑀭𑀜𑁆𑀜𑀁, 𑀯𑀸𑀢𑀸𑀩𑀸𑀥𑁂𑀦 𑀧𑀻𑀴𑀺𑀢𑀁.

𑁭𑁯.

‘‘𑀤𑀺𑀲𑁆𑀯𑀸 ¶ 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀖𑀢𑀫𑀡𑁆𑀟𑀫𑀼𑀧𑀸𑀦𑀬𑀺𑀁;

𑀓𑀢𑀢𑁆𑀢𑀸 ¶ 𑀆𑀘𑀺𑀢𑀢𑁆𑀢𑀸 𑀘, 𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀅𑀬𑀁.

𑁮𑁦.

‘‘𑀫𑀳𑀸𑀲𑀫𑀼𑀤𑁆𑀤𑀸 𑀘𑀢𑁆𑀢𑀸𑀭𑁄, 𑀖𑀢𑀁 𑀲𑀫𑁆𑀧𑀚𑁆𑀚𑀭𑁂 𑀫𑀫;

𑀅𑀬𑀜𑁆𑀘 𑀧𑀣𑀯𑀻 𑀖𑁄𑀭𑀸, 𑀅𑀧𑁆𑀧𑀫𑀸𑀡𑀸 𑀅𑀲𑀗𑁆𑀔𑀺𑀬𑀸.

𑁮𑁧.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀪𑀯𑀢𑁂 𑀫𑀥𑀼𑀲𑀓𑁆𑀓𑀭𑀸;

𑀘𑀸𑀢𑀼𑀤𑁆𑀤𑀻𑀧𑀸 [𑀘𑀢𑀼𑀤𑁆𑀤𑀺𑀲𑀸 (𑀲𑁆𑀬𑀸.)] 𑀇𑀫𑁂 𑀭𑀼𑀓𑁆𑀔𑀸, 𑀧𑀸𑀤𑀧𑀸 𑀥𑀭𑀡𑀻𑀭𑀼𑀳𑀸.

𑁮𑁨.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀓𑀧𑁆𑀧𑀭𑀼𑀓𑁆𑀔𑀸 𑀪𑀯𑀦𑁆𑀢𑀺 𑀢𑁂;

𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁮𑁩.

‘‘𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁮𑁪.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀖𑀢𑀫𑀡𑁆𑀟𑀲𑁆𑀲𑀺𑀤𑀁 𑀨𑀮𑀁.

𑁮𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀖𑀢𑀫𑀡𑁆𑀟𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀖𑀢𑀫𑀡𑁆𑀟𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀏𑀓𑀥𑀫𑁆𑀫𑀲𑁆𑀲𑀯𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁮.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀲𑀦𑁆𑀢𑀸𑀭𑁂𑀲𑀺 𑀩𑀳𑀼𑀁 𑀚𑀦𑀁.

𑁮𑁯.

‘‘𑀅𑀳𑀁 ¶ ¶ 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁯𑁦.

‘‘𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀉𑀧𑀭𑀺, 𑀕𑀦𑁆𑀢𑀼𑀁 𑀦 𑀯𑀺𑀲𑀳𑀸𑀫𑀳𑀁;

𑀧𑀓𑁆𑀔𑀻𑀯 𑀲𑁂𑀮𑀫𑀸𑀲𑀚𑁆𑀚, 𑀕𑀫𑀦𑀁 𑀦 𑀮𑀪𑀸𑀫𑀳𑀁.

𑁯𑁧.

‘‘𑀉𑀤𑀓𑁂 𑀯𑁄𑀓𑁆𑀓𑀫𑀺𑀢𑁆𑀯𑀸𑀦, 𑀏𑀯𑀁 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂;

𑀦 𑀫𑁂 𑀇𑀤𑀁 𑀪𑀽𑀢𑀧𑀼𑀩𑁆𑀩𑀁, 𑀇𑀭𑀺𑀬𑀸𑀧𑀣𑀯𑀺𑀓𑁄𑀧𑀦𑀁.

𑁯𑁨.

‘‘𑀳𑀦𑁆𑀤 𑀫𑁂𑀢𑀁 𑀕𑀯𑁂𑀲𑀺𑀲𑁆𑀲𑀁, 𑀅𑀧𑁆𑀧𑁂𑀯𑀢𑁆𑀣𑀁 𑀮𑀪𑁂𑀬𑁆𑀬𑀳𑀁;

𑀑𑀭𑁄𑀳𑀦𑁆𑀢𑁄 𑀅𑀦𑁆𑀢𑀮𑀺𑀓𑁆𑀔𑀸, 𑀲𑀤𑁆𑀤𑀫𑀲𑁆𑀲𑁄𑀲𑀺 𑀲𑀢𑁆𑀣𑀼𑀦𑁄.

𑁯𑁩.

‘‘𑀲𑀭𑁂𑀦 𑀭𑀚𑀦𑀻𑀬𑁂𑀦, 𑀲𑀯𑀦𑀻𑀬𑁂𑀦 𑀯𑀕𑁆𑀕𑀼𑀦𑀸;

𑀅𑀦𑀺𑀘𑁆𑀘𑀢𑀁 𑀓𑀣𑁂𑀦𑁆𑀢𑀲𑁆𑀲, 𑀢𑀜𑁆𑀜𑁂𑀯 𑀉𑀕𑁆𑀕𑀳𑀺𑀁 𑀢𑀤𑀸;

𑀅𑀦𑀺𑀘𑁆𑀘𑀲𑀜𑁆𑀜𑀫𑀼𑀕𑁆𑀕𑀬𑁆𑀳 ¶ , 𑀅𑀕𑀫𑀸𑀲𑀺𑀁 𑀫𑀫𑀲𑁆𑀲𑀫𑀁.

𑁯𑁪.

‘‘𑀬𑀸𑀯𑀢𑀸𑀬𑀼𑀁 𑀯𑀲𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁;

𑀘𑀭𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀭𑀺𑀁.

𑁯𑁫.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯𑁬.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘 ¶ , 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁯𑁭.

‘‘𑀏𑀓𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘 [𑀏𑀓𑀢𑀺𑀁𑀲𑀢𑀺… (𑀲𑁆𑀬𑀸.)], 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁯𑁮.

‘‘𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜𑀁, 𑀲𑀼𑀔𑀺𑀢𑁄𑀳𑀁 𑀪𑀯𑀸𑀪𑀯𑁂;

𑀅𑀦𑀼𑀲𑁆𑀲𑀭𑀸𑀫𑀺 𑀢𑀁 𑀲𑀜𑁆𑀜𑀁, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀦 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑀸𑀫𑀺, 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀼𑀢𑀁 𑀧𑀤𑀁.

𑁯𑁯.

‘‘𑀧𑀺𑀢𑀼𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄;

𑀓𑀣𑀁𑀲 [𑀓𑀣𑀬𑀁 (𑀲𑀻. 𑀧𑀻. 𑀓.)] 𑀧𑀭𑀺𑀤𑀻𑀧𑁂𑀦𑁆𑀢𑁄, 𑀅𑀦𑀺𑀘𑁆𑀘𑀢𑀫𑀼𑀤𑀸𑀳𑀭𑀺.

𑁧𑁦𑁦.

‘‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’.

𑁧𑁦𑁧.

‘‘𑀲𑀳 ¶ 𑀕𑀸𑀣𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀼𑀩𑁆𑀩𑀲𑀜𑁆𑀜𑀫𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁦𑁨.

‘‘𑀚𑀸𑀢𑀺𑀬𑀸 ¶ 𑀲𑀢𑁆𑀢𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁩.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀥𑀫𑁆𑀫𑀫𑀲𑀼𑀡𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀥𑀫𑁆𑀫𑀲𑁆𑀲𑀯𑀦𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀥𑀫𑁆𑀫𑀲𑁆𑀲𑀯𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁭.

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀓𑀲𑁆𑀲𑀓𑁄 𑀢𑀤𑀸;

𑀓𑀲𑀺𑀓𑀫𑁆𑀫𑁂𑀦 𑀚𑀻𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂.

𑁧𑁦𑁮.

‘‘𑀲𑀼𑀲𑀫𑁆𑀧𑀦𑁆𑀦𑀁 ¶ 𑀢𑀤𑀸 𑀔𑁂𑀢𑁆𑀢𑀁, 𑀥𑀜𑁆𑀜𑀁 𑀫𑁂 𑀨𑀮𑀺𑀦𑀁 [𑀨𑀮𑀺𑀢𑀁 (𑀲𑀻. 𑀧𑀻.)] 𑀅𑀳𑀼;

𑀧𑀸𑀓𑀓𑀸𑀮𑁂 𑀘 𑀲𑀫𑁆𑀧𑀢𑁆𑀢𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁧𑁦𑁯.

‘‘𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀚𑀸𑀦𑀦𑁆𑀢𑀲𑁆𑀲 𑀕𑀼𑀡𑀸𑀕𑀼𑀡𑀁;

𑀬𑁄𑀳𑀁 𑀲𑀗𑁆𑀖𑁂 𑀅𑀤𑀢𑁆𑀯𑀸𑀦, 𑀅𑀕𑁆𑀕𑀁 𑀪𑀼𑀜𑁆𑀚𑁂𑀬𑁆𑀬 𑀘𑁂 𑀢𑀤𑀸 [𑀫𑀢𑁆𑀢𑀦𑀸 (𑀲𑁆𑀬𑀸.)].

𑁧𑁧𑁦.

‘‘𑀅𑀬𑀁 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀢𑀢𑁄 𑀧𑀪𑀸𑀯𑀺𑀢𑁄 𑀲𑀗𑁆𑀖𑁄, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁄 𑀅𑀦𑀼𑀢𑁆𑀢𑀭𑁄.

𑁧𑁧𑁧.

‘‘𑀢𑀢𑁆𑀣 𑀤𑀲𑁆𑀲𑀸𑀫𑀳𑀁 𑀤𑀸𑀦𑀁, 𑀦𑀯𑀲𑀲𑁆𑀲𑀁 𑀧𑀼𑀭𑁂 𑀧𑀼𑀭𑁂;

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀳𑀝𑁆𑀞𑁄 𑀧𑀻𑀡𑀺𑀢𑀫𑀸𑀦𑀲𑁄 [𑀧𑀻𑀢𑀺𑀓… (𑀲𑁆𑀬𑀸.)].

𑁧𑁧𑁨.

‘‘𑀔𑁂𑀢𑁆𑀢𑀢𑁄 ¶ 𑀥𑀜𑁆𑀜𑀫𑀸𑀳𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀁;

𑀉𑀧𑀲𑀗𑁆𑀓𑀫𑁆𑀫 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁧𑁧𑁩.

‘‘‘𑀦𑀯𑀲𑀲𑁆𑀲𑀜𑁆𑀘 𑀲𑀫𑁆𑀧𑀦𑁆𑀦𑀁, 𑀆𑀬𑀸𑀕𑁄𑀲𑀺 [𑀇𑀥 𑀳𑁄𑀲𑀺 (𑀲𑁆𑀬𑀸.)] 𑀘 𑀢𑁆𑀯𑀁 𑀫𑀼𑀦𑁂;

𑀅𑀦𑀼𑀓𑀫𑁆𑀧𑀫𑀼𑀧𑀸𑀤𑀸𑀬 ¶ , 𑀅𑀥𑀺𑀯𑀸𑀲𑁂𑀳𑀺 𑀘𑀓𑁆𑀔𑀼𑀫’.

𑁧𑁧𑁪.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁧𑁫.

‘‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄;

𑀬𑀚𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁.

𑁧𑁧𑁬.

‘‘‘𑀓𑀭𑁄𑀢𑁄𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀢𑀲𑁆𑀫𑀺𑀁 𑀲𑀗𑁆𑀖𑁂𑀯 [𑀲𑀁𑀖𑁂 𑀘 (𑀲𑁆𑀬𑀸. 𑀧𑀻.)] 𑀤𑀸𑀢𑀩𑁆𑀩𑀁, 𑀢𑀯 𑀲𑀲𑁆𑀲𑀁 𑀢𑀣𑁂𑀢𑀭𑀁.

𑁧𑁧𑁭.

‘‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸𑀦, 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸𑀦 𑀲𑀁𑀖𑀭𑀁;

𑀧𑀝𑀺𑀬𑀢𑁆𑀢𑀁 𑀖𑀭𑁂 𑀲𑀦𑁆𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑁂𑀳𑀺 𑀢𑁆𑀯𑀁’.

𑁧𑁧𑁮.

‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸𑀦, 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸𑀦 𑀲𑀁𑀖𑀭𑀁;

𑀬𑀁 𑀖𑀭𑁂 𑀧𑀝𑀺𑀬𑀢𑁆𑀢𑀁 𑀫𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁.

𑁧𑁧𑁯.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁨𑁦.

‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀲𑁄𑀯𑀡𑁆𑀡𑀁 𑀲𑀧𑁆𑀧𑀪𑀲𑁆𑀲𑀭𑀁;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑀏𑀓𑀽𑀦𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁧𑁨𑁧.

‘‘𑀆𑀓𑀺𑀡𑁆𑀡𑀁 𑀪𑀯𑀦𑀁 𑀫𑀬𑁆𑀳𑀁, 𑀦𑀸𑀭𑀻𑀕𑀡𑀲𑀫𑀸𑀓𑀼𑀮𑀁;

𑀢𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀯𑀲𑀸𑀫𑀺 𑀢𑀺𑀤𑀲𑁂 𑀅𑀳𑀁.

𑁧𑁨𑁨.

‘‘𑀲𑀢𑀸𑀦𑀁 ¶ 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁨𑁩.

‘‘𑀪𑀯𑀸𑀪𑀯𑁂 ¶ ¶ 𑀲𑀁𑀲𑀭𑀦𑁆𑀢𑁄, 𑀮𑀪𑀸𑀫𑀺 𑀅𑀫𑀺𑀢𑀁 𑀥𑀦𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁪.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀲𑀺𑀯𑀺𑀓𑀁 𑀲𑀦𑁆𑀤𑀫𑀸𑀦𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁 [𑀲𑀩𑁆𑀩𑀫𑁂𑀢𑀫𑁆𑀧𑀺 (𑀓.)], 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁫.

‘‘𑀦𑀯𑀯𑀢𑁆𑀣𑀁 𑀦𑀯𑀨𑀮𑀁, 𑀦𑀯𑀕𑁆𑀕𑀭𑀲𑀪𑁄𑀚𑀦𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁬.

‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀺𑀬𑀸𑀦𑀺 ¶ , 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁭.

‘‘𑀤𑀸𑀲𑀻𑀕𑀡𑀁 𑀤𑀸𑀲𑀕𑀡𑀁, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁮.

‘‘𑀦 𑀫𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀺;

𑀅𑀣𑁄 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀳𑀤𑀬𑁂 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁨𑁯.

‘‘𑀇𑀤𑀁 𑀔𑀸𑀤 𑀇𑀤𑀁 𑀪𑀼𑀜𑁆𑀚, 𑀇𑀫𑀫𑁆𑀳𑀺 𑀲𑀬𑀦𑁂 𑀲𑀬;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁦.

‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀤𑀸𑀦𑀺, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑁄 𑀫𑁂, 𑀨𑀮𑀁 𑀢𑁄𑀲𑁂𑀲𑀺 𑀲𑀩𑁆𑀩𑀤𑀸.

𑁧𑁩𑁧.

‘‘𑀦𑀯𑀲𑀲𑁆𑀲𑀁 ¶ 𑀤𑀤𑀺𑀢𑁆𑀯𑀸𑀦, 𑀲𑀗𑁆𑀖𑁂 𑀕𑀡𑀯𑀭𑀼𑀢𑁆𑀢𑀫𑁂;

𑀅𑀝𑁆𑀞𑀸𑀦𑀺𑀲𑀁𑀲𑁂 𑀅𑀦𑀼𑀪𑁄𑀫𑀺, 𑀓𑀫𑁆𑀫𑀸𑀦𑀼𑀘𑁆𑀙𑀯𑀺𑀓𑁂 𑀫𑀫.

𑁧𑁩𑁨.

‘‘𑀯𑀡𑁆𑀡𑀯𑀸 𑀬𑀲𑀯𑀸 𑀳𑁄𑀫𑀺, 𑀫𑀳𑀸𑀪𑁄𑀕𑁄 𑀅𑀦𑀻𑀢𑀺𑀓𑁄;

𑀫𑀳𑀸𑀧𑀓𑁆𑀔𑁄 [𑀫𑀳𑀸𑀪𑀓𑁆𑀔𑁄 (𑀲𑁆𑀬𑀸. 𑀓.)] 𑀲𑀤𑀸 𑀳𑁄𑀫𑀺, 𑀅𑀪𑁂𑀚𑁆𑀚𑀧𑀭𑀺𑀲𑁄 𑀲𑀤𑀸.

𑁧𑁩𑁩.

‘‘𑀲𑀩𑁆𑀩𑁂 𑀫𑀁 𑀅𑀧𑀘𑀸𑀬𑀦𑁆𑀢𑀺, 𑀬𑁂 𑀓𑁂𑀘𑀺 𑀧𑀣𑀯𑀺𑀲𑁆𑀲𑀺𑀢𑀸;

𑀤𑁂𑀬𑁆𑀬𑀥𑀫𑁆𑀫𑀸 𑀘 𑀬𑁂 𑀓𑁂𑀘𑀺, 𑀧𑀼𑀭𑁂 𑀧𑀼𑀭𑁂 𑀮𑀪𑀸𑀫𑀳𑀁.

𑁧𑁩𑁪.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀸 𑀫𑀚𑁆𑀛𑁂, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸;

𑀲𑀩𑁆𑀩𑁂𑀧𑀺 𑀲𑀫𑀢𑀺𑀓𑁆𑀓𑀫𑁆𑀫, 𑀤𑁂𑀦𑁆𑀢𑀺 𑀫𑀫𑁂𑀯 𑀤𑀸𑀬𑀓𑀸.

𑁧𑁩𑁫.

‘‘𑀧𑀞𑀫𑀁 𑀦𑀯𑀲𑀲𑁆𑀲𑀜𑁆𑀳𑀺, 𑀤𑀢𑁆𑀯𑀸 𑀲𑀗𑁆𑀖𑁂 𑀕𑀡𑀼𑀢𑁆𑀢𑀫𑁂;

𑀇𑀫𑀸𑀦𑀺𑀲𑀁𑀲𑁂 𑀅𑀦𑀼𑀪𑁄𑀫𑀺, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁬.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦𑀯𑀲𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄;

𑁧𑁩𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁩𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀘𑀺𑀦𑁆𑀢𑀺𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀘𑀺𑀦𑁆𑀢𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑁄𑀯𑀡𑁆𑀡𑀓𑀺𑀗𑁆𑀓𑀡𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪𑁦.

‘‘𑀲𑀤𑁆𑀥𑀸𑀬 ¶ ¶ ¶ 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀯𑀸𑀓𑀘𑀻𑀭𑀥𑀭𑁄 𑀆𑀲𑀺𑀁, 𑀢𑀧𑁄𑀓𑀫𑁆𑀫𑀫𑀧𑀲𑁆𑀲𑀺𑀢𑁄.

𑁧𑁪𑁧.

‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀉𑀧𑁆𑀧𑀚𑁆𑀚𑀺 𑀢𑀫𑁆𑀳𑀺 𑀲𑀫𑀬𑁂, 𑀢𑀸𑀭𑀬𑀦𑁆𑀢𑁄 𑀫𑀳𑀸𑀚𑀦𑀁.

𑁧𑁪𑁨.

‘‘𑀩𑀮𑀜𑁆𑀘 𑀯𑀢 𑀫𑁂 𑀔𑀻𑀡𑀁, 𑀩𑁆𑀬𑀸𑀥𑀺𑀦𑀸 𑀧𑀭𑀫𑁂𑀦 𑀢𑀁;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀧𑀼𑀮𑀺𑀦𑁂 𑀣𑀽𑀧𑀫𑀼𑀢𑁆𑀢𑀫𑀁.

𑁧𑁪𑁩.

‘‘𑀓𑀭𑀺𑀢𑁆𑀯𑀸 𑀳𑀝𑁆𑀞𑀘𑀺𑀢𑁆𑀢𑁄𑀳𑀁, 𑀲𑀳𑀢𑁆𑀣𑁂𑀦 [𑀧𑀲𑀸𑀤𑁂𑀦 (𑀓.)] 𑀲𑀫𑁄𑀓𑀺𑀭𑀺𑀁;

𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀺, 𑀉𑀤𑀕𑁆𑀕𑀫𑀦𑀲𑁄 𑀅𑀳𑀁.

𑁧𑁪𑁪.

‘‘𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀣𑀽𑀧𑀁 𑀧𑀭𑀺𑀘𑀭𑀺𑀁 𑀅𑀳𑀁;

𑀢𑁂𑀦 𑀘𑁂𑀢𑁄𑀧𑀲𑀸𑀤𑁂𑀦, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀢𑀸𑀤𑀺𑀦𑁄.

𑁧𑁪𑁫.

‘‘𑀤𑁂𑀯𑀮𑁄𑀓𑀁 𑀕𑀢𑁄 𑀲𑀦𑁆𑀢𑁄, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁;

𑀲𑀼𑀯𑀡𑁆𑀡𑀯𑀡𑁆𑀡𑁄 𑀢𑀢𑁆𑀣𑀸𑀲𑀺𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪𑁬.

‘‘𑀅𑀲𑀻𑀢𑀺𑀓𑁄𑀝𑀺𑀬𑁄 𑀫𑀬𑁆𑀳𑀁, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀤𑀸 𑀫𑀬𑁆𑀳𑀁 𑀉𑀧𑀝𑁆𑀞𑀦𑁆𑀢𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪𑁭.

‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺 [𑀲𑀝𑁆𑀞𑀺𑀢𑀽𑀭𑀺𑀬… (𑀓.)], 𑀪𑁂𑀭𑀺𑀬𑁄 𑀧𑀡𑀯𑀸𑀦𑀺 𑀘;

𑀲𑀗𑁆𑀔𑀸 𑀘 𑀟𑀺𑀡𑁆𑀟𑀺𑀫𑀸 𑀢𑀢𑁆𑀣, 𑀯𑀕𑁆𑀕𑀽 𑀯𑀚𑁆𑀚𑀦𑁆𑀢𑀺 [𑀦𑀤𑀦𑁆𑀢𑀺 (𑀲𑀻.), 𑀯𑀤𑀦𑁆𑀢𑀺 (𑀧𑀻.)] 𑀤𑀼𑀦𑁆𑀤𑀼𑀪𑀻.

𑁧𑁪𑁮.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 ¶ , 𑀳𑀢𑁆𑀣𑀺𑀦𑁄 𑀲𑀫𑀮𑀗𑁆𑀓𑀢𑀸;

𑀢𑀺𑀥𑀸𑀧𑀪𑀺𑀦𑁆𑀦𑀫𑀸𑀢𑀗𑁆𑀕𑀸, 𑀓𑀼𑀜𑁆𑀚𑀭𑀸 𑀲𑀝𑁆𑀞𑀺𑀳𑀸𑀬𑀦𑀸.

𑁧𑁪𑁯.

‘‘𑀳𑁂𑀫𑀚𑀸𑀮𑀸𑀪𑀺𑀲𑀜𑁆𑀙𑀦𑁆𑀦𑀸 ¶ , 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺 𑀫𑁂;

𑀩𑀮𑀓𑀸𑀬𑁂 𑀕𑀚𑁂 𑀘𑁂𑀯, 𑀊𑀦𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁫𑁦.

‘‘𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀁, 𑀯𑀺𑀧𑀸𑀓𑀁 𑀅𑀦𑀼𑀪𑁄𑀫𑀳𑀁;

𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁫𑁧.

‘‘𑀏𑀓𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀏𑀓𑀲𑀢𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀁 𑀅𑀳𑀁.

𑁧𑁫𑁨.

‘‘𑀲𑁄 𑀤𑀸𑀦𑀺 𑀅𑀫𑀢𑀁 𑀧𑀢𑁆𑀢𑁄, 𑀅𑀲𑀗𑁆𑀔𑀢𑀁 𑀲𑀼𑀤𑀼𑀤𑁆𑀤𑀲𑀁 [𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀧𑀤𑀁 (𑀲𑁆𑀬𑀸.)];

𑀲𑀁𑀬𑁄𑀚𑀦𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁫𑁩.

‘‘𑀅𑀝𑁆𑀞𑀸𑀭𑀲𑁂 ¶ 𑀓𑀧𑁆𑀧𑀲𑀢𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁫𑁪.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁫𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁫𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀯𑀡𑁆𑀡𑀓𑀺𑀗𑁆𑀓𑀡𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀯𑀡𑁆𑀡𑀓𑀺𑀗𑁆𑀓𑀡𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀲𑁄𑀡𑁆𑀡𑀓𑁄𑀦𑁆𑀢𑀭𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫𑁭.

‘‘𑀫𑀦𑁄𑀪𑀸𑀯𑀦𑀺𑀬𑀁 ¶ 𑀩𑀼𑀤𑁆𑀥𑀁, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀇𑀭𑀺𑀬𑀫𑀸𑀦𑀁 𑀩𑁆𑀭𑀳𑁆𑀫𑀧𑀣𑁂, 𑀘𑀺𑀢𑁆𑀢𑀯𑀽𑀧𑀲𑀫𑁂 𑀭𑀢𑀁.

𑁧𑁫𑁮.

‘‘𑀦𑀺𑀢𑁆𑀢𑀺𑀡𑁆𑀡𑀑𑀖𑀁 𑀲𑀫𑁆𑀩𑀼𑀤𑁆𑀥𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀫𑀼𑀦𑀺𑀁;

𑀉𑀧𑀢𑀺𑀢𑁆𑀣𑀁 𑀲𑀫𑀸𑀧𑀦𑁆𑀦𑀁, 𑀇𑀦𑁆𑀤𑀺𑀯𑀭𑀤𑀮𑀧𑁆𑀧𑀪𑀁.

𑁧𑁫𑁯.

‘‘𑀅𑀮𑀸𑀩𑀼𑀦𑁄𑀤𑀓𑀁 𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀺𑀁;

𑀩𑀼𑀤𑁆𑀥𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸, 𑀅𑀮𑀸𑀩𑀼𑀓𑀫𑀤𑀸𑀲𑀳𑀁.

𑁧𑁬𑁦.

‘‘𑀆𑀡𑀸𑀧𑁂𑀲𑀺 ¶ 𑀘 𑀲𑀫𑁆𑀩𑀼𑀤𑁆𑀥𑁄, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄;

‘𑀇𑀫𑀺𑀦𑀸 𑀤𑀓𑀫𑀸𑀳𑀢𑁆𑀯𑀸, 𑀧𑀸𑀤𑀫𑀽𑀮𑁂 𑀞𑀧𑁂𑀳𑀺 𑀫𑁂’.

𑁧𑁬𑁧.

‘‘𑀲𑀸𑀥𑀽𑀢𑀺𑀳𑀁 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀲𑀢𑁆𑀣𑀼𑀕𑀸𑀭𑀯𑀢𑀸𑀬 𑀘;

𑀤𑀓𑀁 𑀅𑀮𑀸𑀩𑀼𑀦𑀸𑀳𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀺𑀁.

𑁧𑁬𑁨.

‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀧𑀬𑀁 𑀫𑀫;

‘𑀇𑀫𑀺𑀦𑀸𑀮𑀸𑀩𑀼𑀤𑀸𑀦𑁂𑀦, 𑀲𑀗𑁆𑀓𑀧𑁆𑀧𑁄 𑀢𑁂 𑀲𑀫𑀺𑀚𑁆𑀛𑀢𑀼’.

𑁧𑁬𑁩.

‘‘𑀧𑀦𑁆𑀦𑀭𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁧𑁬𑁪.

‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀘𑀗𑁆𑀓𑀫𑀦𑁆𑀢𑀲𑁆𑀲 𑀢𑀺𑀝𑁆𑀞𑀢𑁄;

𑀲𑁄𑀯𑀡𑁆𑀡𑀁 𑀓𑁄𑀦𑁆𑀢𑀭𑀁 𑀕𑀬𑁆𑀳, 𑀢𑀺𑀝𑁆𑀞𑀢𑁂 𑀧𑀼𑀭𑀢𑁄 𑀫𑀫.

𑁧𑁬𑁫.

‘‘𑀩𑀼𑀤𑁆𑀥𑀲𑁆𑀲 ¶ 𑀤𑀢𑁆𑀯𑀸𑀦𑀮𑀸𑀩𑀼𑀁, 𑀮𑀪𑀸𑀫𑀺 𑀲𑁄𑀡𑁆𑀡𑀓𑁄𑀦𑁆𑀢𑀭𑀁;

𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀓𑀸𑀭𑀁, 𑀯𑀺𑀧𑀼𑀮𑀁 𑀳𑁄𑀢𑀺 𑀢𑀸𑀤𑀺𑀲𑀼.

𑁧𑁬𑁬.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁𑀮𑀸𑀩𑀼𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀮𑀸𑀩𑀼𑀲𑁆𑀲 𑀇𑀤𑀁 𑀨𑀮𑀁.

𑁧𑁬𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁬𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀡𑁆𑀡𑀓𑁄𑀦𑁆𑀢𑀭𑀺𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀡𑁆𑀡𑀓𑁄𑀦𑁆𑀢𑀭𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑀯𑀕𑁆𑀕𑁄 𑀢𑁂𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑁄 ¶ 𑀣𑁂𑀭𑁄, 𑀏𑀓𑀤𑀼𑀲𑁆𑀲𑀻 𑀏𑀓𑀸𑀲𑀦𑀻;

𑀓𑀤𑀫𑁆𑀩𑀓𑁄𑀭𑀡𑁆𑀟𑀓𑀤𑁄, 𑀖𑀢𑀲𑁆𑀲𑀯𑀦𑀺𑀓𑁄𑀧𑀺 𑀘.

𑀲𑀼𑀘𑀺𑀦𑁆𑀢𑀺𑀓𑁄 𑀓𑀺𑀗𑁆𑀓𑀡𑀺𑀓𑁄, 𑀲𑁄𑀡𑁆𑀡𑀓𑁄𑀦𑁆𑀢𑀭𑀺𑀓𑁄𑀧𑀺 𑀘;

𑀏𑀓𑀕𑀸𑀣𑀸𑀲𑀢𑀜𑁆𑀘𑁂𑀢𑁆𑀣, 𑀏𑀓𑀲𑀢𑁆𑀢𑀢𑀺𑀫𑁂𑀯 𑀘.

𑁪𑁪. 𑀏𑀓𑀯𑀺𑀳𑀸𑀭𑀺𑀯𑀕𑁆𑀕𑁄

𑁧. 𑀏𑀓𑀯𑀺𑀳𑀸𑀭𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀇𑀫𑀫𑁆𑀳𑀺 ¶ ¶ ¶ 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁨.

‘‘𑀦𑀺𑀧𑁆𑀧𑀧𑀜𑁆𑀘𑁄 𑀦𑀺𑀭𑀸𑀮𑀫𑁆𑀩𑁄, 𑀆𑀓𑀸𑀲𑀲𑀫𑀫𑀸𑀦𑀲𑁄;

𑀲𑀼𑀜𑁆𑀜𑀢𑀸𑀩𑀳𑀼𑀮𑁄 𑀢𑀸𑀤𑀻, 𑀅𑀦𑀺𑀫𑀺𑀢𑁆𑀢𑀭𑀢𑁄 𑀯𑀲𑀻.

𑁩.

‘‘𑀅𑀲𑀗𑁆𑀕𑀘𑀺𑀢𑁆𑀢𑁄 𑀦𑀺𑀓𑁆𑀮𑁂𑀲𑁄 [𑀦𑀺𑀮𑁆𑀮𑁂𑀧𑁄 (𑀲𑁆𑀬𑀸. 𑀓.)], 𑀅𑀲𑀁𑀲𑀝𑁆𑀞𑁄 𑀓𑀼𑀮𑁂 𑀕𑀡𑁂;

𑀫𑀳𑀸𑀓𑀸𑀭𑀼𑀡𑀺𑀓𑁄 𑀯𑀻𑀭𑁄, 𑀯𑀺𑀦𑀬𑁄𑀧𑀸𑀬𑀓𑁄𑀯𑀺𑀤𑁄.

𑁪.

‘‘𑀉𑀬𑁆𑀬𑀼𑀢𑁆𑀢𑁄 𑀧𑀭𑀓𑀺𑀘𑁆𑀘𑁂𑀲𑀼, 𑀯𑀺𑀦𑀬𑀦𑁆𑀢𑁄 𑀲𑀤𑁂𑀯𑀓𑁂;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀕𑀢𑀺𑀁 𑀧𑀗𑁆𑀓𑀯𑀺𑀲𑁄𑀲𑀦𑀁.

𑁫.

‘‘𑀅𑀫𑀢𑀁 𑀧𑀭𑀫𑀲𑁆𑀲𑀸𑀤𑀁, 𑀚𑀭𑀸𑀫𑀘𑁆𑀘𑀼𑀦𑀺𑀯𑀸𑀭𑀡𑀁;

𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀲𑁄, 𑀦𑀺𑀲𑀺𑀦𑁆𑀦𑁄 𑀮𑁄𑀓𑀢𑀸𑀭𑀓𑁄.

𑁬.

‘‘𑀓𑀭𑀯𑀻𑀓𑀭𑀼𑀢𑁄 [𑀓𑀭𑀯𑀻𑀓𑀭𑀼𑀤𑁄 (𑀲𑁆𑀬𑀸. 𑀧𑀻. 𑀓.)] 𑀦𑀸𑀣𑁄, 𑀩𑁆𑀭𑀳𑁆𑀫𑀖𑁄𑀲𑁄 𑀢𑀣𑀸𑀕𑀢𑁄;

𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀤𑀼𑀕𑁆𑀕𑀸, 𑀯𑀺𑀧𑁆𑀧𑀦𑀝𑁆𑀞𑁂 𑀅𑀦𑀸𑀬𑀓𑁂.

𑁭.

‘‘𑀤𑁂𑀲𑁂𑀦𑁆𑀢𑁄 𑀯𑀺𑀭𑀚𑀁 𑀥𑀫𑁆𑀫𑀁, 𑀤𑀺𑀝𑁆𑀞𑁄 𑀫𑁂 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁮.

‘‘𑀧𑀩𑁆𑀩𑀚𑀺𑀢𑁆𑀯𑀸 𑀢𑀤𑀸𑀧𑀸𑀳𑀁, 𑀘𑀺𑀦𑁆𑀢𑁂𑀦𑁆𑀢𑁄 𑀚𑀺𑀦𑀲𑀸𑀲𑀦𑀁;

𑀏𑀓𑀓𑁄𑀯 𑀯𑀦𑁂 𑀭𑀫𑁆𑀫𑁂, 𑀯𑀲𑀺𑀁 𑀲𑀁𑀲𑀕𑁆𑀕𑀧𑀻𑀴𑀺𑀢𑁄.

𑁯.

‘‘𑀲𑀓𑁆𑀓𑀸𑀬𑀯𑀽𑀧𑀓𑀸𑀲𑁄 ¶ 𑀫𑁂, 𑀳𑁂𑀢𑀼𑀪𑀽𑀢𑁄 𑀫𑀫𑀸𑀪𑀯𑀻 [𑀫𑀫𑀸𑀕𑀫𑀻 (𑀲𑁆𑀬𑀸. 𑀧𑀻.)];

𑀫𑀦𑀲𑁄 𑀯𑀽𑀧𑀓𑀸𑀲𑀲𑁆𑀲, 𑀲𑀁𑀲𑀕𑁆𑀕𑀪𑀬𑀤𑀲𑁆𑀲𑀺𑀦𑁄.

𑁧𑁦.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀯𑀺𑀳𑀸𑀭𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀯𑀺𑀳𑀸𑀭𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀏𑀓𑀲𑀗𑁆𑀔𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩.

‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀼;

𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫, 𑀧𑀽𑀚𑁂𑀦𑁆𑀢𑀺 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁪.

‘‘𑀦 𑀳𑀺 𑀢𑀁 𑀑𑀭𑀓𑀁 𑀫𑀜𑁆𑀜𑁂, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀪𑀯𑀺𑀲𑁆𑀲𑀢𑀺;

𑀬𑀲𑁆𑀲𑀸𑀬𑀁 𑀈𑀤𑀺𑀲𑀸 𑀩𑁄𑀥𑀺, 𑀧𑀽𑀚𑀦𑀻𑀬𑀸 [𑀈𑀤𑀺𑀲𑁄 𑀩𑁄𑀥𑀺, 𑀧𑀽𑀚𑀦𑀻𑀬𑁄 (𑀲𑁆𑀬𑀸.)] 𑀘 𑀲𑀢𑁆𑀣𑀼𑀦𑁄.

𑁧𑁫.

‘‘𑀢𑀢𑁄 𑀲𑀗𑁆𑀔𑀁 𑀕𑀳𑁂𑀢𑁆𑀯𑀸𑀦, 𑀩𑁄𑀥𑀺𑀭𑀼𑀓𑁆𑀔𑀫𑀼𑀧𑀝𑁆𑀞𑀳𑀺𑀁;

𑀥𑀫𑀦𑁆𑀢𑁄 𑀲𑀩𑁆𑀩𑀤𑀺𑀯𑀲𑀁, 𑀅𑀯𑀦𑁆𑀤𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁬.

‘‘𑀆𑀲𑀦𑁆𑀦𑀓𑁂 𑀓𑀢𑀁 𑀓𑀫𑁆𑀫𑀁, 𑀤𑁂𑀯𑀮𑁄𑀓𑀁 𑀅𑀧𑀸𑀧𑀬𑀻;

𑀓𑀴𑁂𑀯𑀭𑀁 𑀫𑁂 𑀧𑀢𑀺𑀢𑀁, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁧𑁭.

‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺 ¶ , 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸;

𑀲𑀤𑀸 𑀫𑀬𑁆𑀳𑀁 𑀉𑀧𑀝𑁆𑀞𑀦𑁆𑀢𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁮.

‘‘𑀏𑀓𑀲𑀢𑁆𑀢𑀢𑀺𑀫𑁂 𑀓𑀧𑁆𑀧𑁂, 𑀭𑀸𑀚𑀸 𑀆𑀲𑀺𑀁 𑀲𑀼𑀤𑀲𑁆𑀲𑀦𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 𑀇𑀲𑁆𑀲𑀭𑁄.

𑁧𑁯.

‘‘𑀢𑀢𑁄 𑀅𑀗𑁆𑀕𑀲𑀢𑀸 𑀢𑀼𑀭𑀺𑀬𑀸 [𑀢𑀽𑀭𑀸 (𑀲𑀻. 𑀓.)], 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁦.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀲𑁆𑀲𑀸𑀧𑀺, 𑀯𑀚𑁆𑀚𑀭𑁂 𑀪𑁂𑀭𑀺𑀬𑁄 𑀲𑀤𑀸.

𑁨𑁧.

‘‘𑀉𑀧𑀝𑁆𑀞𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀅𑀦𑀼𑀪𑀼𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀲𑀺𑀯𑀁 𑀲𑀼𑀔𑁂𑀫𑀁 𑀅𑀫𑀢𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁨𑁨.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁩.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁪.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀲𑀗𑁆𑀔𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀲𑀗𑁆𑀔𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀧𑀸𑀝𑀺𑀳𑀻𑀭𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ ¶ 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀦𑀕𑀭𑀁 𑀧𑀸𑀯𑀺𑀲𑀻 𑀢𑀤𑀸.

𑁨𑁭.

‘‘𑀦𑀕𑀭𑀁 𑀧𑀯𑀺𑀲𑀦𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀭𑀢𑀦𑀸𑀦𑀺 𑀧𑀚𑁆𑀚𑁄𑀢𑀺𑀁𑀲𑀼 [𑀧𑀦𑀸𑀤𑀺𑀁𑀲𑀼 (𑀧𑀻.)], 𑀦𑀺𑀕𑁆𑀖𑁄𑀲𑁄 𑀆𑀲𑀺 𑀢𑀸𑀯𑀤𑁂.

𑁨𑁮.

‘‘𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀪𑁂𑀭𑀻 𑀯𑀚𑁆𑀚𑀼𑀫𑀖𑀝𑁆𑀝𑀺𑀢𑀸;

𑀲𑀬𑀁 𑀯𑀻𑀡𑀸 𑀧𑀯𑀚𑁆𑀚𑀦𑁆𑀢𑀺, 𑀩𑀼𑀤𑁆𑀥𑀲𑁆𑀲 𑀧𑀯𑀺𑀲𑀢𑁄 𑀧𑀼𑀭𑀁.

𑁨𑁯.

‘‘𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀫𑀲𑁆𑀲𑀸𑀫𑀺 [𑀦 𑀧𑀲𑁆𑀲𑀸𑀫𑀺 (𑀲𑀻.)], 𑀧𑀤𑀼𑀫𑀼𑀢𑁆𑀢𑀭𑀫𑀳𑀸𑀫𑀼𑀦𑀺𑀁;

𑀧𑀸𑀝𑀺𑀳𑀻𑀭𑀜𑁆𑀘 𑀧𑀲𑁆𑀲𑀺𑀢𑁆𑀯𑀸, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁩𑁦.

‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀅𑀘𑁂𑀢𑀦𑀸𑀧𑀺 𑀢𑀼𑀭𑀺𑀬𑀸, 𑀲𑀬𑀫𑁂𑀯 𑀧𑀯𑀚𑁆𑀚𑀭𑁂.

𑁩𑁧.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀝𑀺𑀳𑀻𑀭𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀝𑀺𑀳𑀻𑀭𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀜𑀸𑀡𑀢𑁆𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫.

‘‘𑀓𑀡𑀺𑀓𑀸𑀭𑀁𑀯 ¶ ¶ 𑀚𑀮𑀺𑀢𑀁, 𑀤𑀻𑀧𑀭𑀼𑀓𑁆𑀔𑀁𑀯 𑀚𑁄𑀢𑀺𑀢𑀁;

𑀓𑀜𑁆𑀘𑀦𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀅𑀤𑁆𑀤𑀲𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁩𑁬.

‘‘𑀓𑀫𑀡𑁆𑀟𑀮𑀼𑀁 𑀞𑀧𑁂𑀢𑁆𑀯𑀸𑀦, 𑀯𑀸𑀓𑀘𑀻𑀭𑀜𑁆𑀘 𑀓𑀼𑀡𑁆𑀟𑀺𑀓𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀁 𑀅𑀳𑀁.

𑁩𑁭.

‘‘‘𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀁, 𑀫𑁄𑀳𑀚𑀸𑀮𑀲𑀫𑀸𑀓𑀼𑀮𑀁;

𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸𑀦, 𑀦𑀺𑀢𑁆𑀢𑀺𑀡𑁆𑀡𑁄𑀲𑀺 𑀫𑀳𑀸𑀫𑀼𑀦𑀺.

𑁩𑁮.

‘‘‘𑀲𑀫𑀼𑀤𑁆𑀥𑀭𑀲𑀺𑀫𑀁 𑀮𑁄𑀓𑀁, 𑀲𑀩𑁆𑀩𑀸𑀯𑀦𑁆𑀢𑀫𑀦𑀼𑀢𑁆𑀢𑀭𑀁;

𑀜𑀸𑀡𑁂 𑀢𑁂 𑀉𑀧𑀫𑀸 𑀦𑀢𑁆𑀣𑀺, 𑀬𑀸𑀯𑀢𑀸𑀚𑀕𑀢𑁄𑀕𑀢𑀺 [𑀬𑀸𑀯𑀢𑀸 𑀘 𑀕𑀢𑁄𑀕𑀢𑀺 (𑀧𑀻. 𑀓.)].

𑁩𑁯.

‘‘‘𑀢𑁂𑀦 𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀽, 𑀇𑀢𑀺 𑀩𑀼𑀤𑁆𑀥𑁄 𑀧𑀯𑀼𑀘𑁆𑀘𑀢𑀺;

𑀯𑀦𑁆𑀤𑀸𑀫𑀺 𑀢𑀁 𑀫𑀳𑀸𑀯𑀻𑀭𑀁, 𑀲𑀩𑁆𑀩𑀜𑁆𑀜𑀼𑀢𑀫𑀦𑀸𑀯𑀭𑀁’.

𑁪𑁦.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀢𑁆𑀣𑀯𑀸𑀬𑀺𑀤𑀁 𑀨𑀮𑀁;

𑁪𑁧.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄;

𑁪𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀜𑀸𑀡𑀢𑁆𑀣𑀯𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀜𑀸𑀡𑀢𑁆𑀣𑀯𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀉𑀘𑁆𑀙𑀼𑀔𑀡𑁆𑀟𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪.

‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀤𑁆𑀯𑀸𑀭𑀧𑀸𑀮𑁄 𑀅𑀳𑁄𑀲𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁪𑁫.

‘‘𑀉𑀘𑁆𑀙𑀼𑀔𑀡𑁆𑀟𑀺𑀓𑀫𑀸𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁪𑁬.

‘‘𑀏𑀓𑀦𑀯𑀼𑀢𑀺𑀢𑁄 ¶ ¶ 𑀓𑀧𑁆𑀧𑁂, 𑀬𑀁 𑀉𑀘𑁆𑀙𑀼𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀘𑁆𑀙𑀼𑀔𑀡𑁆𑀟𑀲𑁆𑀲𑀺𑀤𑀁 𑀨𑀮𑀁.

𑁪𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀘𑁆𑀙𑀼𑀔𑀡𑁆𑀟𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀘𑁆𑀙𑀼𑀔𑀡𑁆𑀟𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀓𑀴𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁦.

‘‘𑀭𑁄𑀫𑀲𑁄 ¶ 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀯𑀲𑀢𑁂 𑀧𑀩𑁆𑀩𑀢𑀦𑁆𑀢𑀭𑁂;

𑀓𑀴𑀫𑁆𑀩𑀁 𑀢𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁫𑁧.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀴𑀫𑁆𑀩𑀲𑁆𑀲 𑀇𑀤𑀁 𑀨𑀮𑀁.

𑁫𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀴𑀫𑁆𑀩𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀴𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀅𑀫𑁆𑀩𑀸𑀝𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁫.

‘‘𑀯𑀺𑀧𑀺𑀦𑁂 ¶ 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀅𑀫𑁆𑀩𑀸𑀝𑀓𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁.

𑁫𑁬.

‘‘𑀏𑀓𑀢𑀺𑀁𑀲𑁂 ¶ 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁭.

‘‘𑀓𑀺𑀮𑁂𑀲𑀸 ¶ ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀸𑀝𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀸𑀝𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀳𑀭𑀻𑀢𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁦.

‘‘𑀳𑀭𑀻𑀢𑀓𑀁 𑀆𑀫𑀮𑀓𑀁, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀁;

𑀓𑁄𑀮𑀁 𑀪𑀮𑁆𑀮𑀸𑀢𑀓𑀁 𑀩𑀺𑀮𑁆𑀮𑀁, 𑀲𑀬𑀫𑁂𑀯 𑀳𑀭𑀸𑀫𑀳𑀁.

𑁬𑁧.

‘‘𑀤𑀺𑀲𑁆𑀯𑀸𑀦 𑀧𑀩𑁆𑀪𑀸𑀭𑀕𑀢𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀫𑀼𑀦𑀺𑀁;

𑀆𑀩𑀸𑀥𑁂𑀦 𑀆𑀧𑀻𑀴𑁂𑀦𑁆𑀢𑀁, 𑀅𑀤𑀼𑀢𑀻𑀬𑀁 𑀫𑀳𑀸𑀫𑀼𑀦𑀺𑀁.

𑁬𑁨.

‘‘𑀳𑀭𑀻𑀢𑀓𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁;

𑀔𑀸𑀤𑀫𑀢𑁆𑀢𑀫𑁆𑀳𑀺 𑀪𑁂𑀲𑀚𑁆𑀚𑁂, 𑀩𑁆𑀬𑀸𑀥𑀺 𑀧𑀲𑁆𑀲𑀫𑁆𑀪𑀺 [𑀧𑀲𑁆𑀲𑀤𑁆𑀥𑀺 (𑀓.)] 𑀢𑀸𑀯𑀤𑁂.

𑁬𑁩.

‘‘𑀧𑀳𑀻𑀦𑀤𑀭𑀣𑁄 𑀩𑀼𑀤𑁆𑀥𑁄, 𑀅𑀦𑀼𑀫𑁄𑀤𑀫𑀓𑀸𑀲𑀺 𑀫𑁂;

‘𑀪𑁂𑀲𑀚𑁆𑀚𑀤𑀸𑀦𑁂𑀦𑀺𑀫𑀺𑀦𑀸, 𑀩𑁆𑀬𑀸𑀥𑀺𑀯𑀽𑀧𑀲𑀫𑁂𑀦 𑀘.

𑁬𑁪.

‘‘‘𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀚𑀸𑀢𑁄 𑀯𑀸 𑀅𑀜𑁆𑀜𑀚𑀸𑀢𑀺𑀬𑀸;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑁄𑀢𑀼, 𑀫𑀸 𑀘 𑀢𑁂 𑀩𑁆𑀬𑀸𑀥𑀺𑀫𑀸𑀕𑀫𑀸’.

𑁬𑁫.

‘‘𑀇𑀤𑀁 ¶ 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁬𑁬.

‘‘𑀬𑀢𑁄 𑀳𑀭𑀻𑀢𑀓𑀁 𑀤𑀺𑀦𑁆𑀦𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀇𑀫𑀁 𑀚𑀸𑀢𑀺𑀁 𑀉𑀧𑀸𑀤𑀸𑀬, 𑀩𑁆𑀬𑀸𑀥𑀺 𑀫𑁂 𑀦𑀼𑀧𑀧𑀚𑁆𑀚𑀣.

𑁬𑁭.

‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁮.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀪𑁂𑀲𑀚𑁆𑀚𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

𑁬𑁯.

‘‘𑀓𑀺𑀮𑁂𑀲𑀸 ¶ ¶ ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀳𑀭𑀻𑀢𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀳𑀭𑀻𑀢𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀅𑀫𑁆𑀩𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁨.

‘‘𑀳𑀢𑁆𑀣𑀺𑀭𑀸𑀚𑀸 𑀢𑀤𑀸 𑀆𑀲𑀺𑀁, 𑀈𑀲𑀸𑀤𑀦𑁆𑀢𑁄 𑀉𑀭𑀼𑀴𑁆𑀳𑀯𑀸;

𑀯𑀺𑀘𑀭𑀦𑁆𑀢𑁄 𑀩𑁆𑀭𑀳𑀸𑀭𑀜𑁆𑀜𑁂, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁭𑁩.

‘‘𑀅𑀫𑁆𑀩𑀧𑀺𑀡𑁆𑀟𑀁 ¶ 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁;

𑀧𑀝𑀺𑀕𑁆𑀕𑀡𑁆𑀳𑀺 𑀫𑀳𑀸𑀯𑀻𑀭𑁄, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄.

𑁭𑁪.

‘‘𑀫𑀫 𑀦𑀺𑀚𑁆𑀛𑀸𑀬𑀫𑀸𑀦𑀲𑁆𑀲, 𑀧𑀭𑀺𑀪𑀼𑀜𑁆𑀚𑀺 𑀢𑀤𑀸 𑀚𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁.

𑁭𑁫.

‘‘𑀢𑀢𑁄 𑀅𑀳𑀁 𑀘𑀯𑀺𑀢𑁆𑀯𑀸𑀦, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀅𑀦𑀼𑀪𑀼𑀢𑁆𑀯𑀸𑀦 𑀲𑀫𑁆𑀧𑀤𑀸.

𑁭𑁬.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀳𑀁, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁭.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀧𑀺𑀡𑁆𑀟𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀅𑀫𑁆𑀩𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁧.

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 ¶ ¶ ¶ , 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀲𑁆𑀲, 𑀥𑀸𑀭𑀢𑁄 𑀉𑀢𑁆𑀢𑀫𑀁 𑀬𑀲𑀁.

𑁮𑁨.

‘‘𑀅𑀕𑁆𑀕𑀨𑀮𑀁 𑀕𑀳𑁂𑀢𑁆𑀯𑀸𑀦, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀻𑀭𑀲𑁆𑀲, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁮𑁩.

‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤 [𑀤𑀺𑀧𑀤𑀺𑀦𑁆𑀤 (𑀲𑀻. 𑀲𑁆𑀬𑀸. 𑀧𑀻.)], 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁮𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀕𑁆𑀕𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀅𑀫𑁆𑀩𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀏𑀓𑀯𑀺𑀳𑀸𑀭𑀺𑀯𑀕𑁆𑀕𑁄 𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀣𑁂𑀭𑁄 ¶ 𑀏𑀓𑀯𑀺𑀳𑀸𑀭𑀻 𑀘, 𑀲𑀗𑁆𑀔𑀺𑀬𑁄 𑀧𑀸𑀝𑀺𑀳𑀻𑀭𑀓𑁄;

𑀣𑀯𑀺𑀓𑁄 𑀉𑀘𑁆𑀙𑀼𑀔𑀡𑁆𑀟𑀻 𑀘, 𑀓𑀴𑀫𑁆𑀩𑀅𑀫𑁆𑀩𑀸𑀝𑀓𑀤𑁄.

𑀳𑀭𑀻𑀢𑀓𑀫𑁆𑀩𑀧𑀺𑀡𑁆𑀟𑀻 𑀘, 𑀅𑀫𑁆𑀩𑀤𑁄 𑀤𑀲𑀫𑁄 𑀬𑀢𑀺;

𑀙𑀴𑀲𑀻𑀢𑀺 𑀘 𑀕𑀸𑀣𑀸𑀬𑁄, 𑀕𑀡𑀺𑀢𑀸𑀬𑁄 𑀯𑀺𑀪𑀸𑀯𑀺𑀪𑀺.

𑁪𑁫. 𑀯𑀺𑀪𑀻𑀢𑀓𑀯𑀕𑁆𑀕𑁄

𑁧. 𑀯𑀺𑀪𑀻𑀢𑀓𑀫𑀺𑀜𑁆𑀚𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀓𑀓𑀼𑀲𑀦𑁆𑀥𑁄 ¶ ¶ ¶ 𑀫𑀳𑀸𑀯𑀻𑀭𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀲𑁄, 𑀅𑀕𑀫𑀸𑀲𑀺 𑀯𑀦𑀦𑁆𑀢𑀭𑀁.

𑁨.

‘‘𑀩𑀻𑀚𑀫𑀺𑀜𑁆𑀚𑀁 𑀕𑀳𑁂𑀢𑁆𑀯𑀸𑀦, 𑀮𑀢𑀸𑀬 𑀆𑀯𑀼𑀡𑀺𑀁 𑀅𑀳𑀁;

𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀛𑀸𑀬𑀢𑁂 𑀧𑀩𑁆𑀩𑀢𑀦𑁆𑀢𑀭𑁂.

𑁩.

‘‘𑀤𑀺𑀲𑁆𑀯𑀸𑀦𑀳𑀁 𑀤𑁂𑀯𑀤𑁂𑀯𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀻𑀭𑀲𑁆𑀲, 𑀩𑀻𑀚𑀫𑀺𑀜𑁆𑀚𑀫𑀤𑀸𑀲𑀳𑀁.

𑁪.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀬𑀁 𑀫𑀺𑀜𑁆𑀚𑀫𑀤𑀤𑀺𑀁 [𑀨𑀮𑀫𑀤𑀤𑀺𑀁 (𑀲𑀻. 𑀧𑀻.), 𑀩𑀻𑀚𑀫𑀤𑀤𑀺𑀁 (𑀲𑁆𑀬𑀸.)] 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀻𑀚𑀫𑀺𑀜𑁆𑀚𑀲𑁆𑀲𑀺𑀤𑀁 𑀨𑀮𑀁.

𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀺𑀪𑀻𑀢𑀓𑀫𑀺𑀜𑁆𑀚𑀺𑀬𑁄 [𑀯𑀺𑀪𑁂𑀤𑀓… (𑀲𑁆𑀬𑀸. 𑀓.)] 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀺𑀪𑀻𑀢𑀓𑀫𑀺𑀜𑁆𑀚𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀓𑁄𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮.

‘‘𑀅𑀚𑀺𑀦𑁂𑀦 ¶ ¶ ¶ 𑀦𑀺𑀯𑀢𑁆𑀣𑁄𑀳𑀁, 𑀯𑀸𑀓𑀘𑀻𑀭𑀥𑀭𑁄 𑀢𑀤𑀸;

𑀔𑀸𑀭𑀺𑀬𑀸 𑀧𑀽𑀭𑀬𑀺𑀢𑁆𑀯𑀸𑀦, 𑀓𑁄𑀮𑀁𑀳𑀸𑀲𑀺𑀁 𑀫𑀫𑀲𑁆𑀲𑀫𑀁 [𑀔𑀸𑀭𑀺𑀪𑀸𑀭𑀁 𑀳𑀭𑀺𑀢𑁆𑀯𑀸𑀦, 𑀓𑁄𑀮𑀫𑀸𑀳𑀭𑀺𑀫𑀲𑁆𑀲𑀫𑀁 (𑀲𑀻. 𑀧𑀻.)].

𑁯.

‘‘𑀢𑀫𑁆𑀳𑀺 ¶ 𑀓𑀸𑀮𑁂 𑀲𑀺𑀔𑀻 𑀩𑀼𑀤𑁆𑀥𑁄, 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀳𑀼;

𑀫𑀫𑀲𑁆𑀲𑀫𑀁 𑀉𑀧𑀸𑀕𑀘𑁆𑀙𑀺, 𑀚𑀸𑀦𑀦𑁆𑀢𑁄 𑀲𑀩𑁆𑀩𑀓𑀸𑀮𑀺𑀓𑀁.

𑁧𑁦.

‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸𑀦 𑀘 𑀲𑀼𑀩𑁆𑀩𑀢𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀓𑁄𑀮𑀁 𑀩𑀼𑀤𑁆𑀥𑀲𑁆𑀲𑀤𑀸𑀲𑀳𑀁.

𑁧𑁧.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑁄𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁄𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑁄𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀩𑀺𑀮𑁆𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫.

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂 ¶ , 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀫;

𑀩𑀺𑀮𑁆𑀮𑀭𑀼𑀓𑁆𑀔𑁂𑀳𑀺 [𑀩𑁂𑀮𑀼𑀯𑀭𑀼𑀓𑁆𑀔𑁂𑀳𑀺 (𑀲𑁆𑀬𑀸.)] 𑀆𑀓𑀺𑀡𑁆𑀡𑁄, 𑀦𑀸𑀦𑀸𑀤𑀼𑀫𑀦𑀺𑀲𑁂𑀯𑀺𑀢𑁄.

𑁧𑁬.

‘‘𑀲𑀼𑀕𑀦𑁆𑀥𑀁 𑀩𑁂𑀮𑀼𑀯𑀁 𑀤𑀺𑀲𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀫𑀦𑀼𑀲𑁆𑀲𑀭𑀺𑀁;

𑀔𑀸𑀭𑀺𑀪𑀸𑀭𑀁 𑀧𑀽𑀭𑀬𑀺𑀢𑁆𑀯𑀸, 𑀢𑀼𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄.

𑁧𑁭.

‘‘𑀓𑀓𑀼𑀲𑀦𑁆𑀥𑀁 𑀉𑀧𑀸𑀕𑀫𑁆𑀫, 𑀩𑀺𑀮𑁆𑀮𑀧𑀓𑁆𑀓𑀫𑀤𑀸𑀲𑀳𑀁;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑁆𑀲 𑀯𑀻𑀭𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁮.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀲𑁆𑀫𑀺𑀁, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁯.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀺𑀮𑁆𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀺𑀮𑁆𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀪𑀮𑁆𑀮𑀸𑀢𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 ¶ ¶ 𑀲𑀫𑁆𑀩𑀼𑀤𑁆𑀥𑀁, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁;

𑀯𑀺𑀧𑀺𑀦𑀕𑁆𑀕𑁂𑀦 [𑀧𑀯𑀦𑀕𑁆𑀕𑁂𑀦 (𑀲𑀻. 𑀲𑁆𑀬𑀸. 𑀧𑀻.)] 𑀕𑀘𑁆𑀙𑀦𑁆𑀢𑀁, 𑀲𑀸𑀮𑀭𑀸𑀚𑀁𑀯 𑀨𑀼𑀮𑁆𑀮𑀺𑀢𑀁.

𑁨𑁩.

‘‘𑀢𑀺𑀡𑀢𑁆𑀣𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀬𑀸𑀘𑀳𑀁;

‘𑀅𑀦𑀼𑀓𑀫𑁆𑀧𑀢𑀼 𑀫𑀁 𑀩𑀼𑀤𑁆𑀥𑁄, 𑀪𑀺𑀓𑁆𑀔𑀁 𑀇𑀘𑁆𑀙𑀸𑀫𑀺 𑀤𑀸𑀢𑀯𑁂’.

𑁨𑁪.

‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀑𑀭𑀽𑀳𑀺 𑀫𑀫 𑀅𑀲𑁆𑀲𑀫𑁂.

𑁨𑁫.

‘‘𑀑𑀭𑁄𑀳𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀦𑀺𑀲𑀻𑀤𑀺 𑀧𑀡𑁆𑀡𑀲𑀦𑁆𑀣𑀭𑁂;

𑀪𑀮𑁆𑀮𑀸𑀢𑀓𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁨𑁬.

‘‘𑀫𑀫 𑀦𑀺𑀚𑁆𑀛𑀸𑀬𑀫𑀸𑀦𑀲𑁆𑀲, 𑀧𑀭𑀺𑀪𑀼𑀜𑁆𑀚𑀺 𑀢𑀤𑀸 𑀚𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀪𑀺𑀯𑀦𑁆𑀤𑀺𑀁 𑀢𑀤𑀸 𑀚𑀺𑀦𑀁.

𑁨𑁭.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀮𑁆𑀮𑀸𑀢𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀮𑁆𑀮𑀸𑀢𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀉𑀢𑁆𑀢𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧.

‘‘𑀦𑀺𑀕𑁆𑀭𑁄𑀥𑁂 ¶ ¶ 𑀳𑀭𑀺𑀢𑁄𑀪𑀸𑀲𑁂, 𑀲𑀁𑀯𑀺𑀭𑀼𑀴𑁆𑀳𑀫𑁆𑀳𑀺 𑀧𑀸𑀤𑀧𑁂;

𑀉𑀢𑁆𑀢𑀮𑀺𑀫𑀸𑀮𑀁 [𑀉𑀫𑁆𑀫𑀸 𑀫𑀸𑀮𑀁 𑀳𑀺 (𑀲𑁆𑀬𑀸.)] 𑀧𑀕𑁆𑀕𑀬𑁆𑀳, 𑀩𑁄𑀥𑀺𑀬𑀸 𑀅𑀪𑀺𑀭𑁄𑀧𑀬𑀺𑀁.

𑁩𑁨.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀬𑀁 𑀩𑁄𑀥𑀺𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑁄𑀥𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀢𑁆𑀢𑀮𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀢𑁆𑀢𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀅𑀫𑁆𑀩𑀸𑀝𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬.

‘‘𑀲𑀼𑀧𑀼𑀧𑁆𑀨𑀺𑀢𑀁 ¶ 𑀲𑀸𑀮𑀯𑀦𑀁, 𑀑𑀕𑀬𑁆𑀳 𑀯𑁂𑀲𑁆𑀲𑀪𑀽 𑀫𑀼𑀦𑀺;

𑀦𑀺𑀲𑀻𑀤𑀺 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀅𑀪𑀺𑀚𑀸𑀢𑁄𑀯 𑀓𑁂𑀲𑀭𑀻.

𑁩𑁭.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 ¶ 𑀲𑀼𑀫𑀦𑁄, 𑀅𑀫𑁆𑀩𑀸𑀝𑀓𑀫𑀧𑀽𑀚𑀬𑀺𑀁;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 [𑀫𑀳𑀸𑀯𑀻𑀭𑀁 (𑀲𑀻. 𑀲𑁆𑀬𑀸.)], 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁩𑁮.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁯.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀸𑀝𑀓𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀸𑀝𑀓𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀲𑀻𑀳𑀸𑀲𑀦𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁨.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ ¶ 𑀪𑀕𑀯𑀢𑁄, 𑀲𑀩𑁆𑀩𑀪𑀽𑀢𑀳𑀺𑀢𑁂𑀲𑀺𑀦𑁄;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀻𑀳𑀸𑀲𑀦𑀫𑀤𑀸𑀲𑀳𑀁.

𑁪𑁩.

‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀬𑀢𑁆𑀣 𑀬𑀢𑁆𑀣 𑀯𑀲𑀸𑀫𑀳𑀁;

𑀮𑀪𑀸𑀫𑀺 𑀯𑀺𑀧𑀼𑀮𑀁 𑀩𑁆𑀬𑀫𑁆𑀳𑀁, 𑀲𑀻𑀳𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁪.

‘‘𑀲𑁄𑀡𑁆𑀡𑀫𑀬𑀸 𑀭𑀽𑀧𑀺𑀫𑀬𑀸, 𑀮𑁄𑀳𑀺𑀢𑀗𑁆𑀕𑀫𑀬𑀸 [𑀮𑁄𑀳𑀺𑀢𑀗𑁆𑀓𑀫𑀬𑀸 (𑀲𑀻. 𑀲𑁆𑀬𑀸. 𑀧𑀻.)] 𑀩𑀳𑀽;

𑀫𑀡𑀺𑀫𑀬𑀸 𑀘 𑀧𑀮𑁆𑀮𑀗𑁆𑀓𑀸, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀫𑀫𑀁 𑀲𑀤𑀸.

𑁪𑁫.

‘‘𑀩𑁄𑀥𑀺𑀬𑀸 ¶ 𑀆𑀲𑀦𑀁 𑀓𑀢𑁆𑀯𑀸, 𑀚𑀮𑀚𑀼𑀢𑁆𑀢𑀫𑀦𑀸𑀫𑀺𑀦𑁄;

𑀉𑀘𑁆𑀘𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸.

𑁪𑁬.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀲𑀻𑀳𑀸𑀲𑀦𑀫𑀓𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀻𑀳𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀳𑀸𑀲𑀦𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀻𑀳𑀸𑀲𑀦𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀧𑀸𑀤𑀧𑀻𑀞𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁦.

‘‘𑀲𑀼𑀫𑁂𑀥𑁄 ¶ 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀢𑀸𑀭𑀬𑀺𑀢𑁆𑀯𑀸 𑀩𑀳𑀽 𑀲𑀢𑁆𑀢𑁂, 𑀦𑀺𑀩𑁆𑀩𑀼𑀢𑁄 𑀲𑁄 𑀫𑀳𑀸𑀬𑀲𑁄.

𑁫𑁧.

‘‘𑀲𑀻𑀳𑀸𑀲𑀦𑀲𑁆𑀲 𑀲𑀸𑀫𑀦𑁆𑀢𑀸, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀸𑀤𑀧𑀻𑀞𑀫𑀓𑀸𑀭𑀬𑀺𑀁.

𑁫𑁨.

‘‘𑀓𑀢𑁆𑀯𑀸𑀦 𑀓𑀼𑀲𑀮𑀁 𑀓𑀫𑁆𑀫𑀁, 𑀲𑀼𑀔𑀧𑀸𑀓𑀁 𑀲𑀼𑀔𑀼𑀤𑁆𑀭𑀬𑀁;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁫𑁩.

‘‘𑀢𑀢𑁆𑀣 ¶ ¶ ¶ 𑀫𑁂 𑀯𑀲𑀫𑀸𑀦𑀲𑁆𑀲, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀧𑀤𑀸𑀦𑀺 𑀉𑀤𑁆𑀥𑀭𑀦𑁆𑀢𑀲𑁆𑀲, 𑀲𑁄𑀡𑁆𑀡𑀧𑀻𑀞𑀸 𑀪𑀯𑀦𑁆𑀢𑀺 𑀫𑁂.

𑁫𑁪.

‘‘𑀮𑀸𑀪𑀸 𑀢𑁂𑀲𑀁 𑀲𑀼𑀮𑀤𑁆𑀥𑀁 𑀯𑁄, 𑀬𑁂 𑀮𑀪𑀦𑁆𑀢𑀺 𑀉𑀧𑀲𑁆𑀲𑀼𑀢𑀺𑀁;

𑀦𑀺𑀩𑁆𑀩𑀼𑀢𑁂 𑀓𑀸𑀭𑀁 𑀓𑀢𑁆𑀯𑀸𑀦, 𑀮𑀪𑀦𑁆𑀢𑀺 𑀯𑀺𑀧𑀼𑀮𑀁 𑀲𑀼𑀔𑀁.

𑁫𑁫.

‘‘𑀫𑀬𑀸𑀧𑀺 𑀲𑀼𑀓𑀢𑀁 𑀓𑀫𑁆𑀫𑀁, 𑀯𑀸𑀡𑀺𑀚𑁆𑀚𑀁 𑀲𑀼𑀧𑁆𑀧𑀬𑁄𑀚𑀺𑀢𑀁;

𑀧𑀸𑀤𑀧𑀻𑀞𑀁 𑀓𑀭𑀺𑀢𑁆𑀯𑀸𑀦, 𑀲𑁄𑀡𑁆𑀡𑀧𑀻𑀞𑀁 𑀮𑀪𑀸𑀫𑀳𑀁.

𑁫𑁬.

‘‘𑀬𑀁 𑀬𑀁 𑀤𑀺𑀲𑀁 𑀧𑀓𑁆𑀓𑀫𑀸𑀫𑀺, 𑀓𑁂𑀦𑀘𑀺 𑀓𑀺𑀘𑁆𑀘𑀬𑁂𑀦𑀳𑀁 [𑀧𑀘𑁆𑀘𑀬𑁂𑀦𑀳𑀁 (𑀲𑀻. 𑀧𑀻.)];

𑀲𑁄𑀡𑁆𑀡𑀧𑀻𑀞𑁂 𑀅𑀓𑁆𑀓𑀫𑀸𑀫𑀺 [𑀲𑁄𑀡𑁆𑀡𑀧𑀻𑀞𑁂𑀦 𑀓𑀫𑀸𑀫𑀺 (𑀓.)], 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁫𑁭.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀸𑀤𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁫𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀤𑀧𑀻𑀞𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀤𑀧𑀻𑀞𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁧.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ 𑀪𑀕𑀯𑀢𑁄, 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀯𑁂𑀤𑀺𑀓𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁬𑁨.

‘‘𑀅𑀢𑁄𑀴𑀸𑀭𑀸𑀦𑀺 [𑀅𑀣𑁄𑀴𑀸𑀭𑀸𑀦𑀺 (𑀲𑀻. 𑀧𑀻.), 𑀅𑀕𑁆𑀕𑁄𑀴𑀸𑀭𑀸𑀦𑀺 (𑀲𑁆𑀬𑀸.)] 𑀪𑀡𑁆𑀟𑀸𑀦𑀺, 𑀓𑀢𑀸𑀦𑀺 𑀅𑀓𑀢𑀸𑀦𑀺 𑀘;

𑀅𑀦𑁆𑀢𑀮𑀺𑀓𑁆𑀔𑀸 𑀧𑀯𑀲𑁆𑀲𑀦𑁆𑀢𑀺, 𑀯𑁂𑀤𑀺𑀓𑀸𑀬 𑀇𑀤𑀁 𑀨𑀮𑀁.

𑁬𑁩.

‘‘𑀉𑀪𑀢𑁄 𑀩𑁆𑀬𑀽𑀴𑁆𑀳𑀲𑀗𑁆𑀕𑀸𑀫𑁂, 𑀧𑀓𑁆𑀔𑀦𑁆𑀤𑀦𑁆𑀢𑁄 𑀪𑀬𑀸𑀦𑀓𑁂;

𑀪𑀬𑀪𑁂𑀭𑀯𑀁 𑀦 𑀧𑀲𑁆𑀲𑀸𑀫𑀺, 𑀯𑁂𑀤𑀺𑀓𑀸𑀬 𑀇𑀤𑀁 𑀨𑀮𑀁.

𑁬𑁪.

‘‘𑀫𑀫 ¶ ¶ 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀩𑁆𑀬𑀫𑁆𑀳𑀁 𑀦𑀺𑀩𑁆𑀩𑀢𑁆𑀢𑀢𑁂 𑀲𑀼𑀪𑀁;

𑀲𑀬𑀦𑀸𑀦𑀺 𑀫𑀳𑀕𑁆𑀖𑀸𑀦𑀺, 𑀯𑁂𑀤𑀺𑀓𑀸𑀬 𑀇𑀤𑀁 𑀨𑀮𑀁.

𑁬𑁫.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀯𑁂𑀤𑀺𑀓𑀫𑀓𑀸𑀭𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑁂𑀤𑀺𑀓𑀸𑀬 𑀇𑀤𑀁 𑀨𑀮𑀁.

𑁬𑁬.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑁂𑀤𑀺𑀓𑀸𑀭𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀩𑁄𑀥𑀺𑀖𑀭𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁯.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 ¶ 𑀪𑀕𑀯𑀢𑁄, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑁄𑀥𑀺𑀖𑀭𑀫𑀓𑀸𑀭𑀬𑀺𑀁.

𑁭𑁦.

‘‘𑀢𑀼𑀲𑀺𑀢𑀁 𑀉𑀧𑀧𑀦𑁆𑀦𑁄𑀫𑁆𑀳𑀺, 𑀯𑀲𑀸𑀫𑀺 𑀭𑀢𑀦𑁂 𑀖𑀭𑁂;

𑀦 𑀫𑁂 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸, 𑀯𑀸𑀢𑁄 𑀕𑀢𑁆𑀢𑁂 𑀦 𑀲𑀫𑁆𑀨𑀼𑀲𑁂.

𑁭𑁧.

‘‘𑀧𑀜𑁆𑀘𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀓𑀸𑀲𑀺𑀓𑀁 𑀦𑀸𑀫 𑀦𑀕𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 [𑀯𑀺𑀲𑀼𑀓𑀫𑁆𑀫𑁂𑀦 (𑀲𑁆𑀬𑀸. 𑀓.)] 𑀫𑀸𑀧𑀺𑀢𑀁.

𑁭𑁨.

‘‘𑀤𑀲𑀬𑁄𑀚𑀦𑀆𑀬𑀸𑀫𑀁, 𑀅𑀝𑁆𑀞𑀬𑁄𑀚𑀦𑀯𑀺𑀢𑁆𑀣𑀢𑀁;

𑀦 𑀢𑀫𑁆𑀳𑀺 𑀦𑀕𑀭𑁂 𑀅𑀢𑁆𑀣𑀺, 𑀓𑀝𑁆𑀞𑀁 𑀯𑀮𑁆𑀮𑀻 𑀘 𑀫𑀢𑁆𑀢𑀺𑀓𑀸.

𑁭𑁩.

‘‘𑀢𑀺𑀭𑀺𑀬𑀁 𑀬𑁄𑀚𑀦𑀁 𑀆𑀲𑀺, 𑀅𑀤𑁆𑀥𑀬𑁄𑀚𑀦𑀯𑀺𑀢𑁆𑀣𑀢𑀁;

𑀫𑀗𑁆𑀕𑀮𑁄 𑀦𑀸𑀫 𑀧𑀸𑀲𑀸𑀤𑁄, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑁄.

𑁭𑁪.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀣𑀫𑁆𑀪𑀸 𑀲𑁄𑀡𑁆𑀡𑀫𑀬𑀸 𑀅𑀳𑀼𑀁;

𑀫𑀡𑀺𑀫𑀬𑀸 𑀘 𑀦𑀺𑀬𑁆𑀬𑀽𑀳𑀸, 𑀙𑀤𑀦𑀁 𑀭𑀽𑀧𑀺𑀬𑀁 𑀅𑀳𑀼.

𑁭𑁫.

‘‘𑀲𑀩𑁆𑀩𑀲𑁄𑀡𑁆𑀡𑀫𑀬𑀁 ¶ 𑀖𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁;

𑀅𑀚𑁆𑀛𑀸𑀯𑀼𑀢𑁆𑀣𑀁 𑀫𑀬𑀸 𑀏𑀢𑀁, 𑀖𑀭𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁬.

‘‘𑀢𑁂 𑀲𑀩𑁆𑀩𑁂 𑀅𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑀫𑀸𑀦𑀼𑀲𑀓𑁂 𑀪𑀯𑁂;

𑀅𑀚𑁆𑀛𑀧𑀢𑁆𑀢𑁄𑀫𑁆𑀳𑀺 𑀦𑀺𑀩𑁆𑀩𑀸𑀦𑀁, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀁.

𑁭𑁭.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀩𑁄𑀥𑀺𑀖𑀭𑀫𑀓𑀸𑀭𑀬𑀺𑀁;

𑀤𑀼𑀕𑁆𑀕𑀢𑀺𑀁 ¶ 𑀦𑀸𑀪𑀺𑀚𑀸𑀦𑀸𑀫𑀺, 𑀖𑀭𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁮.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀖𑀭𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀖𑀭𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀯𑀺𑀪𑀻𑀢𑀓𑀯𑀕𑁆𑀕𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀺𑀪𑀻𑀢𑀓𑀻 𑀓𑁄𑀮𑀨𑀮𑀻, 𑀩𑀺𑀮𑁆𑀮𑀪𑀮𑁆𑀮𑀸𑀢𑀓𑀧𑁆𑀧𑀤𑁄;

𑀉𑀢𑁆𑀢𑀮𑀫𑁆𑀩𑀝𑀓𑀻 𑀘𑁂𑀯, 𑀆𑀲𑀦𑀻 𑀧𑀸𑀤𑀧𑀻𑀞𑀓𑁄.

𑀯𑁂𑀤𑀺𑀓𑁄 𑀩𑁄𑀥𑀺𑀖𑀭𑀺𑀓𑁄, 𑀕𑀸𑀣𑀸𑀬𑁄 𑀕𑀡𑀺𑀢𑀸𑀧𑀺 𑀘;

𑀏𑀓𑀽𑀦𑀸𑀲𑀻𑀢𑀺𑀓𑀸 𑀲𑀩𑁆𑀩𑀸, 𑀅𑀲𑁆𑀫𑀺𑀁 𑀯𑀕𑁆𑀕𑁂 𑀧𑀓𑀺𑀢𑁆𑀢𑀺𑀢𑀸.

𑁪𑁬. 𑀚𑀕𑀢𑀺𑀤𑀸𑀬𑀓𑀯𑀕𑁆𑀕𑁄

𑁧. 𑀚𑀕𑀢𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀥𑀫𑁆𑀫𑀤𑀲𑁆𑀲𑀺𑀲𑁆𑀲 ¶ ¶ ¶ 𑀫𑀼𑀦𑀺𑀦𑁄, 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀚𑀕𑀢𑀺𑀁 𑀓𑀸𑀭𑀬𑀺𑀁 𑀅𑀳𑀁.

𑁨.

‘‘𑀤𑀭𑀺𑀢𑁄 𑀧𑀩𑁆𑀩𑀢𑀢𑁄 𑀯𑀸, 𑀭𑀼𑀓𑁆𑀔𑀢𑁄 𑀧𑀢𑀺𑀢𑁄 𑀅𑀳𑀁;

𑀘𑀼𑀢𑁄 𑀧𑀢𑀺𑀝𑁆𑀞𑀁 𑀯𑀺𑀦𑁆𑀤𑀸𑀫𑀺, 𑀚𑀕𑀢𑀺𑀬𑀸 𑀇𑀤𑀁 𑀨𑀮𑀁.

𑁩.

‘‘𑀦 𑀫𑁂 𑀘𑁄𑀭𑀸 𑀯𑀺𑀳𑁂𑀲𑀦𑁆𑀢𑀺, 𑀦𑀸𑀢𑀺𑀫𑀜𑁆𑀜𑀦𑁆𑀢𑀺 𑀔𑀢𑁆𑀢𑀺𑀬𑀸 [𑀧𑀲𑀳𑀦𑁆𑀢𑀺, 𑀦𑀸𑀢𑀺𑀫𑀜𑁆𑀜𑀢𑀺 𑀔𑀢𑁆𑀢𑀺𑀬𑁄 (𑀲𑀻. 𑀧𑀻.)];

𑀲𑀩𑁆𑀩𑀸𑀫𑀺𑀢𑁆𑀢𑁂𑀢𑀺𑀓𑁆𑀓𑀫𑀸𑀫𑀺, 𑀚𑀕𑀢𑀺𑀬𑀸 𑀇𑀤𑀁 𑀨𑀮𑀁.

𑁪.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑁄𑀫𑀺, 𑀚𑀕𑀢𑀺𑀬𑀸 𑀇𑀤𑀁 𑀨𑀮𑀁.

𑁫.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀚𑀕𑀢𑀺𑀁 𑀓𑀸𑀭𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀚𑀕𑀢𑀺𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀚𑀕𑀢𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀚𑀕𑀢𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀫𑁄𑀭𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁯.

‘‘𑀫𑁄𑀭𑀳𑀢𑁆𑀣𑀁 ¶ ¶ 𑀕𑀳𑁂𑀢𑁆𑀯𑀸𑀦, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀫𑁄𑀭𑀳𑀢𑁆𑀣𑀫𑀤𑀸𑀲𑀳𑀁.

𑁧𑁦.

‘‘𑀇𑀫𑀺𑀦𑀸 ¶ 𑀫𑁄𑀭𑀳𑀢𑁆𑀣𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀦𑀺𑀩𑁆𑀩𑀸𑀬𑀺𑀁𑀲𑀼 𑀢𑀬𑁄 𑀅𑀕𑁆𑀕𑀻, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁.

𑁧𑁧.

‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀤𑀢𑁆𑀯𑀸𑀦𑀳𑀁 𑀫𑁄𑀭𑀳𑀢𑁆𑀣𑀁, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁.

𑁧𑁨.

‘‘𑀢𑀺𑀬𑀕𑁆𑀕𑀻 [𑀢𑀺𑀥𑀕𑁆𑀕𑀻 (𑀲𑁆𑀬𑀸. 𑀓.), 𑀢𑀺𑀯𑀕𑁆𑀕𑀻 (𑀧𑀻.)] 𑀦𑀺𑀩𑁆𑀩𑀼𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁩.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑁄𑀭𑀳𑀢𑁆𑀣𑀲𑁆𑀲𑀺𑀤𑀁 𑀨𑀮𑀁.

𑁧𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀫𑁄𑀭𑀳𑀢𑁆𑀣𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑁄𑀭𑀳𑀢𑁆𑀣𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀲𑀻𑀳𑀸𑀲𑀦𑀩𑀻𑀚𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭.

‘‘𑀢𑀺𑀲𑁆𑀲𑀲𑁆𑀲𑀸𑀳𑀁 𑀪𑀕𑀯𑀢𑁄, 𑀩𑁄𑀥𑀺𑀭𑀼𑀓𑁆𑀔𑀫𑀯𑀦𑁆𑀤𑀺𑀬𑀁;

𑀧𑀕𑁆𑀕𑀬𑁆𑀳 𑀩𑀻𑀚𑀦𑀺𑀁 𑀢𑀢𑁆𑀣, 𑀲𑀻𑀳𑀸𑀲𑀦𑀫𑀩𑀻𑀚𑀳𑀁 [𑀫𑀩𑀻𑀚𑀬𑀺𑀁 (𑀲𑀻.), 𑀫𑀯𑀺𑀚𑁆𑀚𑀳𑀁 (𑀲𑁆𑀬𑀸.)].

𑁧𑁮.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀲𑀻𑀳𑀸𑀲𑀦𑀫𑀩𑀻𑀚𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀻𑀚𑀦𑀸𑀬 𑀇𑀤𑀁 𑀨𑀮𑀁.

𑁧𑁯.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀳𑀸𑀲𑀦𑀩𑀻𑀚𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀻𑀳𑀸𑀲𑀦𑀩𑀻𑀚𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀢𑀺𑀡𑀼𑀓𑁆𑀓𑀥𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨.

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 ¶ ¶ , 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀢𑀬𑁄 𑀉𑀓𑁆𑀓𑁂 𑀅𑀥𑀸𑀭𑀬𑀺𑀁.

𑁨𑁩.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀲𑁄𑀳𑀁 𑀉𑀓𑁆𑀓𑀫𑀥𑀸𑀭𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀓𑁆𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀼𑀓𑁆𑀓𑀥𑀸𑀭𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀼𑀓𑁆𑀓𑀥𑀸𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀅𑀓𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭.

‘‘𑀓𑀓𑀼𑀲𑀦𑁆𑀥𑀲𑁆𑀲 𑀫𑀼𑀦𑀺𑀦𑁄, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄;

𑀤𑀺𑀯𑀸𑀯𑀺𑀳𑀸𑀭𑀁 𑀯𑀚𑀢𑁄, 𑀅𑀓𑁆𑀓𑀫𑀦𑀫𑀤𑀸𑀲𑀳𑀁.

𑁨𑁮.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀫𑁆𑀳𑀺, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀓𑁆𑀓𑀫𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁯.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀓𑁆𑀓𑀫𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀓𑁆𑀓𑀫𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀯𑀦𑀓𑁄𑀭𑀡𑁆𑀟𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁨.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀦𑀓𑁄𑀭𑀡𑁆𑀟𑀫𑀸𑀤𑀸𑀬, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁩𑁩.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀦𑀓𑁄𑀭𑀡𑁆𑀟𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀦𑀓𑁄𑀭𑀡𑁆𑀟𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁭. 𑀏𑀓𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭.

‘‘𑀅𑀗𑁆𑀕𑀸𑀭𑀚𑀸𑀢𑀸 ¶ ¶ 𑀧𑀣𑀯𑀻, 𑀓𑀼𑀓𑁆𑀓𑀼𑀴𑀸𑀦𑀼𑀕𑀢𑀸 𑀫𑀳𑀻;

𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸, 𑀅𑀩𑁆𑀪𑁄𑀓𑀸𑀲𑀫𑁆𑀳𑀺 𑀘𑀗𑁆𑀓𑀫𑀺.

𑁩𑁮.

‘‘𑀧𑀡𑁆𑀟𑀭𑀁 𑀙𑀢𑁆𑀢𑀫𑀸𑀤𑀸𑀬, 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀳𑀁;

𑀢𑀢𑁆𑀣 𑀤𑀺𑀲𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀯𑀺𑀢𑁆𑀢𑀺 𑀫𑁂 𑀉𑀧𑀧𑀚𑁆𑀚𑀣.

𑁩𑁯.

‘‘𑀫𑀭𑀻𑀘𑀺𑀬𑁄𑀢𑁆𑀣𑀝𑀸 ¶ [𑀫𑀭𑀺𑀘𑀺𑀫𑁄𑀨𑀼𑀦𑀸 (𑀲𑁆𑀬𑀸.), 𑀫𑀭𑀻𑀘𑀺𑀯𑁄𑀨𑀼𑀝𑀸 (𑀧𑀻.)] 𑀪𑀽𑀫𑀺, 𑀅𑀗𑁆𑀕𑀸𑀭𑀸𑀯 𑀫𑀳𑀻 𑀅𑀬𑀁;

𑀉𑀧𑀳𑀦𑁆𑀢𑀺 [𑀉𑀧𑀯𑀸𑀬𑀦𑁆𑀢𑀺 (𑀲𑀻. 𑀧𑀻.)] 𑀫𑀳𑀸𑀯𑀸𑀢𑀸, 𑀲𑀭𑀻𑀭𑀲𑁆𑀲𑀸𑀲𑀼𑀔𑁂𑀧𑀦𑀸 [𑀲𑀭𑀻𑀭𑀓𑀸𑀬𑀼𑀔𑁂𑀧𑀦𑀸 (𑀲𑁆𑀬𑀸.)].

𑁪𑁦.

‘‘𑀲𑀻𑀢𑀁 𑀉𑀡𑁆𑀳𑀁 𑀯𑀺𑀳𑀦𑀦𑁆𑀢𑀁 [𑀯𑀺𑀳𑀦𑀢𑀺 (𑀲𑁆𑀬𑀸. 𑀓.)], 𑀯𑀸𑀢𑀸𑀢𑀧𑀦𑀺𑀯𑀸𑀭𑀡𑀁;

𑀧𑀝𑀺𑀕𑁆𑀕𑀡𑁆𑀳 𑀇𑀫𑀁 𑀙𑀢𑁆𑀢𑀁, 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 [𑀧𑀲𑁆𑀲𑀬𑀺𑀲𑁆𑀲𑀸𑀫𑀺 (𑀓.)] 𑀦𑀺𑀩𑁆𑀩𑀼𑀢𑀺𑀁.

𑁪𑁧.

‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀬𑀲𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀝𑀺𑀕𑁆𑀕𑀡𑁆𑀳𑀺 𑀢𑀤𑀸 𑀚𑀺𑀦𑁄.

𑁪𑁨.

‘‘𑀢𑀺𑀁𑀲𑀓𑀧𑁆𑀧𑀸𑀦𑀺 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁪𑁩.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀲𑀼𑀓𑀢𑀫𑀢𑁆𑀢𑀦𑁄.

𑁪𑁪.

‘‘𑀅𑀬𑀁 ¶ 𑀫𑁂 𑀧𑀘𑁆𑀙𑀺𑀫𑀸 𑀚𑀸𑀢𑀺, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀫𑁂, 𑀲𑀩𑁆𑀩𑀓𑀸𑀮𑀁 𑀥𑀭𑀻𑀬𑀢𑀺.

𑁪𑁫.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀙𑀢𑁆𑀢𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀙𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁬.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀙𑀢𑁆𑀢𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀚𑀸𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁯.

‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀧𑀤𑀼𑀫𑀼𑀢𑁆𑀢𑀭𑁂 𑀫𑀳𑀸𑀬𑀲𑁂;

𑀧𑀼𑀧𑁆𑀨𑀯𑀝𑀁𑀲𑀓𑁂 𑀓𑀢𑁆𑀯𑀸 [𑀧𑀼𑀧𑁆𑀨𑀘𑀗𑁆𑀓𑁄𑀝𑀓𑁂 𑀕𑀳𑁂𑀢𑁆𑀯𑀸 (𑀲𑁆𑀬𑀸.)], 𑀲𑀭𑀻𑀭𑀫𑀪𑀺𑀭𑁄𑀧𑀬𑀺𑀁.

𑁫𑁦.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀺𑀫𑁆𑀫𑀸𑀦𑀁 𑀅𑀕𑀫𑀸𑀲𑀳𑀁;

𑀤𑁂𑀯𑀮𑁄𑀓𑀕𑀢𑁄 𑀲𑀦𑁆𑀢𑁄, 𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀸𑀫𑀳𑀁.

𑁫𑁧.

‘‘𑀅𑀫𑁆𑀩𑀭𑀸 ¶ ¶ 𑀧𑀼𑀧𑁆𑀨𑀯𑀲𑁆𑀲𑁄 𑀫𑁂, 𑀲𑀩𑁆𑀩𑀓𑀸𑀮𑀁 𑀧𑀯𑀲𑁆𑀲𑀢𑀺;

𑀲𑀁𑀲𑀭𑀸𑀫𑀺 𑀫𑀦𑀼𑀲𑁆𑀲𑁂 𑀘𑁂 [𑀯𑁂 (𑀲𑁆𑀬𑀸.)], 𑀭𑀸𑀚𑀸 𑀳𑁄𑀫𑀺 𑀫𑀳𑀸𑀬𑀲𑁄.

𑁫𑁨.

‘‘𑀢𑀳𑀺𑀁 𑀓𑀼𑀲𑀼𑀫𑀯𑀲𑁆𑀲𑁄 𑀫𑁂, 𑀅𑀪𑀺𑀯𑀲𑁆𑀲𑀢𑀺 𑀲𑀩𑁆𑀩𑀤𑀸;

𑀢𑀲𑁆𑀲𑁂𑀯 [𑀓𑀸𑀬𑁂𑀲𑀼 (𑀲𑁆𑀬𑀸.), 𑀓𑀸𑀬𑁂𑀯 (𑀧𑀻.)] 𑀧𑀼𑀧𑁆𑀨𑀧𑀽𑀚𑀸𑀬, 𑀯𑀸𑀳𑀲𑀸 𑀲𑀩𑁆𑀩𑀤𑀲𑁆𑀲𑀺𑀦𑁄.

𑁫𑁩.

‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀧𑀼𑀧𑁆𑀨𑀯𑀲𑁆𑀲𑁄 𑀫𑁂, 𑀅𑀪𑀺𑀯𑀲𑁆𑀲𑀢𑀺 𑀲𑀩𑁆𑀩𑀤𑀸.

𑁫𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑁂𑀳𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁬.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀚𑀸𑀢𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀚𑀸𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀧𑀝𑁆𑀝𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁮.

‘‘𑀦𑀻𑀳𑀭𑀦𑁆𑀢𑁂 𑀲𑀭𑀻𑀭𑀫𑁆𑀳𑀺, 𑀯𑀚𑁆𑀚𑀫𑀸𑀦𑀸𑀲𑀼 𑀪𑁂𑀭𑀺𑀲𑀼;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀝𑁆𑀝𑀺𑀧𑀼𑀧𑁆𑀨𑀫𑀧𑀽𑀚𑀬𑀺𑀁 [𑀲𑀢𑁆𑀢𑀺… (𑀲𑁆𑀬𑀸. 𑀧𑀻.)].

𑁫𑁯.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑁂𑀳𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁦.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀝𑁆𑀝𑀺𑀧𑀼𑀧𑁆𑀨𑀺𑀬𑁄 [𑀲𑀢𑁆𑀢𑀺𑀧𑀡𑁆𑀡𑀺𑀬𑁄 (𑀲𑁆𑀬𑀸. 𑀧𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀝𑁆𑀝𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀕𑀦𑁆𑀥𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁩.

‘‘𑀘𑀺𑀢𑀸𑀲𑀼 ¶ 𑀓𑀼𑀭𑀼𑀫𑀸𑀦𑀸𑀲𑀼 [𑀘𑀺𑀢𑁆𑀢𑁂𑀲𑀼 𑀓𑀬𑀺𑀭𑀫𑀸𑀦𑁂𑀲𑀼 (𑀲𑀻.)], 𑀦𑀸𑀦𑀸𑀕𑀦𑁆𑀥𑁂 𑀲𑀫𑀸𑀳𑀝𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀕𑀦𑁆𑀥𑀫𑀼𑀝𑁆𑀞𑀺𑀫𑀧𑀽𑀚𑀬𑀺𑀁.

𑁬𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀘𑀺𑀢𑀓𑀁 𑀬𑀫𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀺𑀢𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀦𑁆𑀥𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀦𑁆𑀥𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀚𑀕𑀢𑀺𑀤𑀸𑀬𑀓𑀯𑀕𑁆𑀕𑁄 𑀙𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀚𑀕𑀢𑀻 ¶ 𑀫𑁄𑀭𑀳𑀢𑁆𑀣𑀻 𑀘, 𑀆𑀲𑀦𑀻 𑀉𑀓𑁆𑀓𑀥𑀸𑀭𑀓𑁄;

𑀅𑀓𑁆𑀓𑀫𑀺 𑀯𑀦𑀓𑁄𑀭𑀡𑁆𑀟𑀺, 𑀙𑀢𑁆𑀢𑀤𑁄 𑀚𑀸𑀢𑀺𑀧𑀽𑀚𑀓𑁄.

𑀧𑀝𑁆𑀝𑀺𑀧𑀼𑀧𑁆𑀨𑀻 𑀘 𑀬𑁄 𑀣𑁂𑀭𑁄, 𑀤𑀲𑀫𑁄 𑀕𑀦𑁆𑀥𑀧𑀽𑀚𑀓𑁄;

𑀲𑀢𑁆𑀢𑀲𑀝𑁆𑀞𑀺 𑀘 𑀕𑀸𑀣𑀸𑀬𑁄, 𑀕𑀡𑀺𑀢𑀸𑀬𑁄 𑀯𑀺𑀪𑀸𑀯𑀺𑀪𑀺.

𑁪𑁭. 𑀲𑀸𑀮𑀓𑀼𑀲𑀼𑀫𑀺𑀬𑀯𑀕𑁆𑀕𑁄

𑁧. 𑀲𑀸𑀮𑀓𑀼𑀲𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀧𑀭𑀺𑀦𑀺𑀩𑁆𑀩𑀼𑀢𑁂 ¶ ¶ ¶ 𑀪𑀕𑀯𑀢𑀺, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁂;

𑀆𑀭𑁄𑀧𑀺𑀢𑀫𑁆𑀳𑀺 𑀘𑀺𑀢𑀓𑁂, 𑀲𑀸𑀮𑀧𑀼𑀧𑁆𑀨𑀫𑀧𑀽𑀚𑀬𑀺𑀁.

𑁨.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁 [𑀧𑀼𑀧𑁆𑀨𑀫𑀪𑀺𑀧𑀼𑀚𑀬𑀺𑀁 (𑀲𑁆𑀬𑀸.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀺𑀢𑀧𑀽𑀚𑀸𑀬𑀺𑀤𑀁 [𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 (𑀲𑁆𑀬𑀸.)] 𑀨𑀮𑀁.

𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀸𑀮𑀓𑀼𑀲𑀼𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀸𑀮𑀓𑀼𑀲𑀼𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬.

‘‘𑀛𑀸𑀬𑀫𑀸𑀦𑀲𑁆𑀲 𑀪𑀕𑀯𑀢𑁄, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄;

𑀅𑀝𑁆𑀞 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀺, 𑀘𑀺𑀢𑀓𑀁 𑀅𑀪𑀺𑀭𑁄𑀧𑀬𑀺𑀁.

𑁭.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 ¶ 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀺𑀢𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀺𑀢𑀓𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀘𑀺𑀢𑀓𑀦𑀺𑀩𑁆𑀩𑀸𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧.

‘‘𑀤𑀬𑁆𑀳𑀫𑀸𑀦𑁂 ¶ 𑀲𑀭𑀻𑀭𑀫𑁆𑀳𑀺, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀕𑀦𑁆𑀥𑁄𑀤𑀓𑀁 𑀕𑀳𑁂𑀢𑁆𑀯𑀸𑀦, 𑀘𑀺𑀢𑀁 𑀦𑀺𑀩𑁆𑀩𑀸𑀧𑀬𑀺𑀁 𑀅𑀳𑀁.

𑁧𑁨.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀘𑀺𑀢𑀁 𑀦𑀺𑀩𑁆𑀩𑀸𑀧𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀕𑀦𑁆𑀥𑁄𑀤𑀓𑀲𑁆𑀲𑀺𑀤𑀁 𑀨𑀮𑀁.

𑁧𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀺𑀢𑀓𑀦𑀺𑀩𑁆𑀩𑀸𑀧𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀺𑀢𑀓𑀦𑀺𑀩𑁆𑀩𑀸𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑁂𑀢𑀼𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬.

‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀘𑀗𑁆𑀓𑀫𑀦𑁆𑀢𑀲𑁆𑀲 𑀲𑀫𑁆𑀫𑀼𑀔𑀸;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑁂𑀢𑀼𑀁 𑀓𑀸𑀭𑀸𑀧𑀬𑀺𑀁 𑀅𑀳𑀁.

𑁧𑁭.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑁂𑀢𑀼𑀁 𑀓𑀸𑀭𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑁂𑀢𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁂𑀢𑀼𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁂𑀢𑀼𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀲𑀼𑀫𑀦𑀢𑀸𑀮𑀯𑀡𑁆𑀝𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 ¶ ¶ 𑀪𑀕𑀯𑀢𑁄, 𑀢𑀸𑀮𑀯𑀡𑁆𑀝𑀫𑀤𑀸𑀲𑀳𑀁;

𑀲𑀼𑀫𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀥𑀸𑀭𑀬𑀸𑀫𑀺 𑀫𑀳𑀸𑀬𑀲𑀁.

𑁨𑁨.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀢𑀸𑀮𑀯𑀡𑁆𑀝𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀸𑀮𑀯𑀡𑁆𑀝𑀲𑁆𑀲𑀺𑀤𑀁 𑀨𑀮𑀁.

𑁨𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀦𑀢𑀸𑀮𑀯𑀡𑁆𑀝𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀦𑀢𑀸𑀮𑀯𑀡𑁆𑀝𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀅𑀯𑀝𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬.

‘‘𑀲𑀢𑀭𑀁𑀲𑀻 ¶ 𑀦𑀸𑀫 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀕𑁄𑀘𑀭𑀸𑀬𑀸𑀪𑀺𑀦𑀺𑀓𑁆𑀔𑀫𑀺.

𑁨𑁭.

‘‘𑀨𑀮𑀳𑀢𑁆𑀣𑁄 𑀅𑀳𑀁 𑀤𑀺𑀲𑁆𑀯𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀤𑀸𑀲𑀺𑀁 𑀅𑀯𑀝𑀁 𑀨𑀮𑀁.

𑁨𑁮.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁯.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀯𑀝𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀯𑀝𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀮𑀩𑀼𑀚𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁨.

‘‘𑀦𑀕𑀭𑁂 ¶ 𑀩𑀦𑁆𑀥𑀼𑀫𑀢𑀺𑀬𑀸, 𑀆𑀭𑀸𑀫𑀺𑀓𑁄 𑀅𑀳𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂.

𑁩𑁩.

‘‘𑀮𑀩𑀼𑀚𑀁 𑀨𑀮𑀫𑀸𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀆𑀓𑀸𑀲𑁂𑀯 𑀞𑀺𑀢𑁄 𑀲𑀦𑁆𑀢𑁄, 𑀧𑀝𑀺𑀕𑁆𑀕𑀡𑁆𑀳𑀺 𑀫𑀳𑀸𑀬𑀲𑁄.

𑁩𑁪.

‘‘𑀯𑀺𑀢𑁆𑀢𑀺𑀲𑀜𑁆𑀚𑀦𑀦𑁄 𑀫𑀬𑁆𑀳𑀁, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀯𑀳𑁄;

𑀨𑀮𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁩𑁫.

‘‘𑀅𑀥𑀺𑀕𑀜𑁆𑀙𑀺𑀁 𑀢𑀤𑀸 𑀧𑀻𑀢𑀺𑀁, 𑀯𑀺𑀧𑀼𑀮𑀁 𑀲𑀼𑀔𑀫𑀼𑀢𑁆𑀢𑀫𑀁;

𑀉𑀧𑁆𑀧𑀚𑁆𑀚𑀢𑁂𑀯 [𑀉𑀧𑁆𑀧𑀚𑁆𑀚𑀢𑁂 𑀫𑁂 (𑀲𑁆𑀬𑀸.)] 𑀭𑀢𑀦𑀁, 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀳𑀺𑀁 𑀢𑀳𑀺𑀁.

𑁩𑁬.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀮𑀩𑀼𑀚𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀮𑀩𑀼𑀚𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀧𑀺𑀮𑀓𑁆𑀔𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁦.

‘‘𑀯𑀦𑀦𑁆𑀢𑀭𑁂 ¶ ¶ 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 [𑀯𑀦𑀦𑁆𑀢𑁂 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦 (𑀲𑀻. 𑀧𑀻.)], 𑀅𑀢𑁆𑀣𑀤𑀲𑁆𑀲𑀺𑀁 𑀫𑀳𑀸𑀬𑀲𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀺𑀮𑀓𑁆𑀔𑀲𑁆𑀲 [𑀧𑀺𑀮𑀓𑁆𑀔𑀼𑀲𑁆𑀲 (𑀧𑀻.)] 𑀨𑀮𑀁 𑀅𑀤𑀸.

𑁪𑁧.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀮𑀓𑁆𑀔𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀮𑀓𑁆𑀔𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀬𑀁𑀧𑀝𑀺𑀪𑀸𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁫.

‘‘𑀓𑀓𑀼𑀥𑀁 𑀯𑀺𑀮𑀲𑀦𑁆𑀢𑀁𑀯, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁪𑁬.

‘‘𑀢𑀫𑀦𑁆𑀥𑀓𑀸𑀭𑀁 𑀦𑀸𑀲𑁂𑀢𑁆𑀯𑀸, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀩𑀳𑀼𑀁 𑀚𑀦𑀁;

𑀜𑀸𑀡𑀸𑀮𑁄𑀓𑁂𑀦 𑀚𑁄𑀢𑀦𑁆𑀢𑀁, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁪𑁭.

‘‘𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀦𑀻𑀬𑀦𑁆𑀢𑀁 𑀮𑁄𑀓𑀦𑀸𑀬𑀓𑀁;

𑀉𑀤𑁆𑀥𑀭𑀦𑁆𑀢𑀁 𑀩𑀳𑀽 𑀲𑀢𑁆𑀢𑁂, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁪𑁮.

‘‘𑀆𑀳𑀦𑀦𑁆𑀢𑀁 [𑀆𑀳𑀦𑀺𑀢𑁆𑀯𑀸 (𑀲𑁆𑀬𑀸. 𑀓.)] 𑀥𑀫𑁆𑀫𑀪𑁂𑀭𑀺𑀁, 𑀫𑀤𑁆𑀤𑀦𑁆𑀢𑀁 𑀢𑀺𑀢𑁆𑀣𑀺𑀬𑁂 𑀕𑀡𑁂;

𑀲𑀻𑀳𑀦𑀸𑀤𑀁 𑀯𑀺𑀦𑀤𑀦𑁆𑀢𑀁, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁪𑁯.

‘‘𑀬𑀸𑀯𑀢𑀸 𑀩𑁆𑀭𑀳𑁆𑀫𑀮𑁄𑀓𑀢𑁄, 𑀆𑀕𑀦𑁆𑀢𑁆𑀯𑀸𑀦 𑀲𑀩𑁆𑀭𑀳𑁆𑀫𑀓𑀸;

𑀧𑀼𑀘𑁆𑀙𑀦𑁆𑀢𑀺 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁫𑁦.

‘‘𑀬𑀲𑁆𑀲𑀜𑁆𑀚𑀮𑀺𑀁 𑀓𑀭𑀺𑀢𑁆𑀯𑀸𑀦, 𑀆𑀬𑀸𑀘𑀦𑁆𑀢𑀺 𑀲𑀤𑁂𑀯𑀓𑀸;

𑀢𑁂𑀦 𑀧𑀼𑀜𑁆𑀜𑀁 𑀅𑀦𑀼𑀪𑁄𑀦𑁆𑀢𑀺, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁫𑁧.

‘‘𑀲𑀩𑁆𑀩𑁂 ¶ 𑀚𑀦𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀲𑀫𑁆𑀧𑀯𑀸𑀭𑁂𑀦𑁆𑀢𑀺 𑀘𑀓𑁆𑀔𑀼𑀫𑀁;

𑀦 𑀯𑀺𑀓𑀫𑁆𑀧𑀢𑀺 𑀅𑀚𑁆𑀛𑀺𑀝𑁆𑀞𑁄, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁫𑁨.

‘‘𑀦𑀕𑀭𑀁 ¶ 𑀧𑀯𑀺𑀲𑀢𑁄 𑀬𑀲𑁆𑀲, 𑀭𑀯𑀦𑁆𑀢𑀺 𑀪𑁂𑀭𑀺𑀬𑁄 𑀩𑀳𑀽;

𑀯𑀺𑀦𑀤𑀦𑁆𑀢𑀺 𑀕𑀚𑀸 𑀫𑀢𑁆𑀢𑀸, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁫𑁩.

‘‘𑀯𑀻𑀣𑀺𑀬𑀸 [𑀭𑀣𑀺𑀬𑀸 (𑀲𑀻.)] 𑀕𑀘𑁆𑀙𑀢𑁄 𑀬𑀲𑁆𑀲, 𑀲𑀩𑁆𑀩𑀸𑀪𑀸 𑀚𑁄𑀢𑀢𑁂 𑀲𑀤𑀸;

𑀅𑀩𑁆𑀪𑀼𑀦𑁆𑀦𑀢𑀸 𑀲𑀫𑀸 𑀳𑁄𑀦𑁆𑀢𑀺, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁫𑁪.

‘‘𑀩𑁆𑀬𑀸𑀳𑀭𑀦𑁆𑀢𑀲𑁆𑀲 ¶ 𑀩𑀼𑀤𑁆𑀥𑀲𑁆𑀲, 𑀘𑀓𑁆𑀓𑀯𑀸𑀴𑀫𑁆𑀧𑀺 𑀲𑀼𑀬𑁆𑀬𑀢𑀺;

𑀲𑀩𑁆𑀩𑁂 𑀲𑀢𑁆𑀢𑁂 𑀯𑀺𑀜𑁆𑀜𑀸𑀧𑁂𑀢𑀺, 𑀓𑁄 𑀤𑀺𑀲𑁆𑀯𑀸 𑀦 𑀧𑀲𑀻𑀤𑀢𑀺.

𑁫𑁫.

‘‘𑀲𑀢𑀲𑀳𑀲𑁆𑀲𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁫𑁬.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀬𑀁𑀧𑀝𑀺𑀪𑀸𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀬𑀁𑀧𑀝𑀺𑀪𑀸𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀦𑀺𑀫𑀺𑀢𑁆𑀢𑀩𑁆𑀬𑀸𑀓𑀭𑀡𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁯.

‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀺𑀫𑀯𑀁, 𑀫𑀦𑁆𑀢𑁂 𑀯𑀸𑀘𑁂 𑀫𑀳𑀁 𑀢𑀤𑀸;

𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀼𑀁.

𑁬𑁦.

‘‘𑀅𑀥𑀺𑀢𑀸 ¶ 𑀯𑁂𑀤𑀕𑀽 𑀲𑀩𑁆𑀩𑁂, 𑀙𑀴𑀗𑁆𑀕𑁂 𑀧𑀸𑀭𑀫𑀺𑀁 𑀕𑀢𑀸;

𑀲𑀓𑀯𑀺𑀚𑁆𑀚𑀸𑀳𑀼𑀧𑀢𑁆𑀣𑀤𑁆𑀥𑀸, 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑀺 𑀢𑁂.

𑁬𑁧.

‘‘𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀸 𑀓𑀸𑀬𑀸, 𑀤𑁂𑀯𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀉𑀧𑁆𑀧𑀚𑁆𑀚𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄.

𑁬𑁨.

‘‘𑀲𑀫𑁆𑀩𑀼𑀤𑁆𑀥𑁂 𑀉𑀧𑀧𑀚𑁆𑀚𑀦𑁆𑀢𑁂, 𑀤𑀲𑀲𑀳𑀲𑁆𑀲𑀺 𑀓𑀫𑁆𑀧𑀣;

𑀅𑀦𑁆𑀥𑀸 𑀘𑀓𑁆𑀔𑀼𑀁 𑀅𑀮𑀪𑀺𑀁𑀲𑀼, 𑀉𑀧𑁆𑀧𑀚𑁆𑀚𑀦𑁆𑀢𑀫𑁆𑀳𑀺 𑀦𑀸𑀬𑀓𑁂.

𑁬𑁩.

‘‘𑀲𑀩𑁆𑀩𑀸𑀓𑀸𑀭𑀁 ¶ 𑀧𑀓𑀫𑁆𑀧𑀺𑀢𑁆𑀣, 𑀓𑁂𑀯𑀮𑀸 𑀯𑀲𑀼𑀥𑀸 𑀅𑀬𑀁;

𑀦𑀺𑀕𑁆𑀖𑁄𑀲𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀉𑀩𑁆𑀩𑀺𑀚𑁆𑀚𑀺𑀁𑀲𑀼 [𑀯𑀺𑀫𑁆𑀳𑀬𑀺𑀁𑀲𑀼 (𑀲𑁆𑀬𑀸. 𑀓.)] 𑀫𑀳𑀸𑀚𑀦𑀸.

𑁬𑁪.

‘‘𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀫𑁆𑀫, 𑀆𑀕𑀘𑁆𑀙𑀼𑀁 𑀫𑀫 𑀲𑀦𑁆𑀢𑀺𑀓𑀁;

𑀯𑀲𑀼𑀥𑀸𑀬𑀁 𑀧𑀓𑀫𑁆𑀧𑀺𑀢𑁆𑀣, 𑀓𑀺𑀁 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺.

𑁬𑁫.

‘‘𑀅𑀯𑀘𑀸𑀲𑀺𑀁 [𑀯𑀺𑀤𑀲𑁆𑀲𑀸𑀫𑀺 (𑀲𑁆𑀬𑀸.)] 𑀢𑀤𑀸 𑀢𑁂𑀲𑀁, 𑀫𑀸 𑀪𑁂𑀣 [𑀫𑀸 𑀭𑁄𑀤 (𑀓.), 𑀫𑀸𑀪𑀸𑀬𑀺𑀢𑁆𑀣 (𑀲𑁆𑀬𑀸.)] 𑀦𑀢𑁆𑀣𑀺 𑀯𑁄 𑀪𑀬𑀁;

𑀯𑀺𑀲𑀝𑁆𑀞𑀸 𑀳𑁄𑀣 𑀲𑀩𑁆𑀩𑁂𑀧𑀺, 𑀉𑀧𑁆𑀧𑀸𑀤𑁄𑀬𑀁 𑀲𑀼𑀯𑀢𑁆𑀣𑀺𑀓𑁄 [𑀲𑀼𑀔𑀢𑁆𑀣𑀺𑀓𑁄 (𑀲𑁆𑀬𑀸.)].

𑁬𑁬.

‘‘𑀅𑀝𑁆𑀞𑀳𑁂𑀢𑀽𑀳𑀺 ¶ 𑀲𑀫𑁆𑀨𑀼𑀲𑁆𑀲 [𑀅𑀝𑁆𑀞𑀳𑁂𑀢𑀽𑀳𑀺 𑀲𑀫𑁆𑀨𑀲𑁆𑀲 (𑀲𑁆𑀬𑀸. 𑀧𑀻.), 𑀅𑀢𑁆𑀣𑀳𑁂𑀢𑀼 𑀦𑀺𑀲𑀁𑀲𑀬𑀁 (𑀓.)], 𑀯𑀲𑀼𑀥𑀸𑀬𑀁 𑀧𑀓𑀫𑁆𑀧𑀢𑀺;

𑀢𑀣𑀸 𑀦𑀺𑀫𑀺𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀫𑀳𑀸.

𑁬𑁭.

‘‘𑀅𑀲𑀁𑀲𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;

𑀲𑀜𑁆𑀜𑀸𑀧𑁂𑀢𑁆𑀯𑀸𑀦 𑀚𑀦𑀢𑀁, 𑀧𑀜𑁆𑀘𑀲𑀻𑀮𑁂 𑀓𑀣𑁂𑀲𑀳𑀁.

𑁬𑁮.

‘‘𑀲𑀼𑀢𑁆𑀯𑀸𑀦 ¶ 𑀧𑀜𑁆𑀘 𑀲𑀻𑀮𑀸𑀦𑀺, 𑀩𑀼𑀤𑁆𑀥𑀼𑀧𑁆𑀧𑀸𑀤𑀜𑁆𑀘 𑀤𑀼𑀮𑁆𑀮𑀪𑀁;

𑀉𑀩𑁆𑀩𑁂𑀕𑀚𑀸𑀢𑀸 𑀲𑀼𑀫𑀦𑀸, 𑀢𑀼𑀝𑁆𑀞𑀳𑀝𑁆𑀞𑀸 𑀅𑀳𑀁𑀲𑀼 𑀢𑁂.

𑁬𑁯.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀦𑀺𑀫𑀺𑀢𑁆𑀢𑀁 𑀯𑀺𑀬𑀸𑀓𑀭𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑁆𑀬𑀸𑀓𑀭𑀡𑀲𑁆𑀲𑀺𑀤𑀁 𑀨𑀮𑀁.

𑁭𑁦.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀺𑀫𑀺𑀢𑁆𑀢𑀩𑁆𑀬𑀸𑀓𑀭𑀡𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀺𑀫𑀺𑀢𑁆𑀢𑀩𑁆𑀬𑀸𑀓𑀭𑀡𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀲𑀸𑀮𑀓𑀼𑀲𑀼𑀫𑀺𑀬𑀯𑀕𑁆𑀕𑁄 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀸𑀮𑀓𑀼𑀲𑀼𑀫𑀺𑀬𑁄 𑀣𑁂𑀭𑁄, 𑀧𑀽𑀚𑀸 𑀦𑀺𑀩𑁆𑀩𑀸𑀧𑀓𑁄𑀧𑀺 𑀘;

𑀲𑁂𑀢𑀼𑀤𑁄 𑀢𑀸𑀮𑀯𑀡𑁆𑀝𑀻 𑀘, 𑀅𑀯𑀝𑀮𑀩𑀼𑀚𑀧𑁆𑀧𑀤𑁄.

𑀧𑀺𑀮𑀓𑁆𑀔𑀧𑀝𑀺𑀪𑀸𑀦𑀻 𑀘, 𑀯𑁂𑀬𑁆𑀬𑀸𑀓𑀭𑀡𑀺𑀬𑁄 𑀤𑀺𑀚𑁄;

𑀤𑁆𑀯𑁂𑀲𑀢𑁆𑀢𑀢𑀺 𑀘 𑀕𑀸𑀣𑀸𑀬𑁄, 𑀕𑀡𑀺𑀢𑀸𑀬𑁄 𑀯𑀺𑀪𑀸𑀯𑀺𑀪𑀺.

𑁪𑁮. 𑀦𑀴𑀫𑀸𑀮𑀺𑀯𑀕𑁆𑀕𑁄

𑁧. 𑀦𑀴𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 ¶ ¶ ¶ 𑀲𑀫𑁆𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀯𑀺𑀧𑀺𑀦𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁨.

‘‘𑀦𑀴𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀦𑀺𑀓𑁆𑀔𑀫𑀦𑁆𑀢𑁄 𑀘 𑀢𑀸𑀯𑀤𑁂;

𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

𑁩.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀦𑀴𑀫𑀸𑀮𑀫𑀧𑀽𑀚𑀬𑀺𑀁;

𑀤𑀓𑁆𑀔𑀺𑀡𑁂𑀬𑁆𑀬𑀁 𑀫𑀳𑀸𑀯𑀻𑀭𑀁, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑀁.

𑁪.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀫𑀸𑀮𑀫𑀪𑀺𑀭𑁄𑀧𑀬𑀺𑀁 [𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁 (𑀲𑀻. 𑀲𑁆𑀬𑀸. 𑀧𑀻.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀴𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀴𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ ¶ ¶ 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀕𑀘𑁆𑀙𑀢𑁂 𑀅𑀦𑀺𑀮𑀜𑁆𑀚𑀲𑁂.

𑁯.

‘‘𑀅𑀯𑀺𑀤𑀽𑀭𑁂 𑀳𑀺𑀫𑀯𑀦𑁆𑀢𑀲𑁆𑀲, 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑀼;

𑀢𑀢𑁆𑀣 𑀫𑁂 𑀪𑀯𑀦𑀁 𑀆𑀲𑀺, 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑀁.

𑁧𑁦.

‘‘𑀪𑀯𑀦𑀸 ¶ 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁧𑁧.

‘‘𑀯𑀺𑀘𑀺𑀦𑀁 𑀦𑀤𑁆𑀤𑀲𑀁 𑀧𑀼𑀧𑁆𑀨𑀁, 𑀧𑀽𑀚𑀬𑀺𑀲𑁆𑀲𑀦𑁆𑀢𑀺 𑀦𑀸𑀬𑀓𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁧𑁨.

‘‘𑀫𑀫 𑀲𑀻𑀲𑁂 𑀫𑀡𑀺𑀁 𑀕𑀬𑁆𑀳, 𑀧𑀽𑀚𑀬𑀺𑀁 𑀮𑁄𑀓𑀦𑀸𑀬𑀓𑀁;

𑀇𑀫𑀸𑀬 𑀫𑀡𑀺𑀧𑀽𑀚𑀸𑀬, 𑀯𑀺𑀧𑀸𑀓𑁄 𑀳𑁄𑀢𑀼 𑀪𑀤𑁆𑀤𑀓𑁄.

𑁧𑁩.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀣.

𑁧𑁪.

‘𑀲𑁄 𑀢𑁂 𑀇𑀚𑁆𑀛𑀢𑀼 𑀲𑀗𑁆𑀓𑀧𑁆𑀧𑁄, 𑀮𑀪𑀲𑁆𑀲𑀼 𑀯𑀺𑀧𑀼𑀮𑀁 𑀲𑀼𑀔𑀁;

𑀇𑀫𑀸𑀬 𑀫𑀡𑀺𑀧𑀽𑀚𑀸𑀬, 𑀅𑀦𑀼𑀪𑁄𑀳𑀺 𑀫𑀳𑀸𑀬𑀲𑀁’.

𑁧𑁫.

‘‘𑀇𑀤𑀁 𑀯𑀢𑁆𑀯𑀸𑀦 𑀪𑀕𑀯𑀸, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀅𑀕𑀫𑀸𑀲𑀺 𑀩𑀼𑀤𑁆𑀥𑀲𑁂𑀝𑁆𑀞𑁄, 𑀬𑀢𑁆𑀣 𑀘𑀺𑀢𑁆𑀢𑀁 𑀧𑀡𑀻𑀳𑀺𑀢𑀁.

𑁧𑁬.

‘‘𑀲𑀝𑁆𑀞𑀺𑀓𑀧𑁆𑀧𑀸𑀦𑀺 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁧𑁭.

‘‘𑀧𑀼𑀩𑁆𑀩𑀓𑀫𑁆𑀫𑀁 ¶ 𑀲𑀭𑀦𑁆𑀢𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀫𑀡𑀺 𑀦𑀺𑀩𑁆𑀩𑀢𑁆𑀢𑀢𑁂 𑀫𑀬𑁆𑀳𑀁, 𑀆𑀮𑁄𑀓𑀓𑀭𑀡𑁄 𑀫𑀫𑀁.

𑁧𑁮.

‘‘𑀙𑀴𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀫𑁂 𑀧𑀭𑀺𑀕𑁆𑀕𑀳𑀸;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸 [𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸 (𑀲𑀻. 𑀲𑁆𑀬𑀸. 𑀧𑀻.)].

𑁧𑁯.

‘‘𑀅𑀴𑀸𑀭𑀧𑀫𑁆𑀳𑀸 𑀳𑀲𑀼𑀮𑀸, 𑀲𑀼𑀲𑀜𑁆𑀜𑀸 𑀢𑀦𑀼𑀫𑀚𑁆𑀛𑀺𑀫𑀸;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀦𑀺𑀘𑁆𑀘𑀁, 𑀫𑀡𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦.

‘‘𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀮𑁄𑀳𑀺𑀢𑀗𑁆𑀕𑀫𑀬𑀸 𑀢𑀣𑀸;

𑀪𑀡𑁆𑀟𑀸 𑀫𑁂 𑀲𑀼𑀓𑀢𑀸 𑀳𑁄𑀦𑁆𑀢𑀺, 𑀬𑀤𑀺𑀘𑁆𑀙𑀲𑀺 [𑀬𑀤𑀺𑀘𑁆𑀙𑀸𑀬 (𑀲𑀻. 𑀧𑀻.)] 𑀧𑀺𑀴𑀦𑁆𑀥𑀦𑀸.

𑁨𑁧.

‘‘𑀓𑀽𑀝𑀸𑀕𑀸𑀭𑀸 ¶ 𑀕𑀳𑀸𑀭𑀫𑁆𑀫𑀸, 𑀲𑀬𑀦𑀜𑁆𑀘 𑀫𑀳𑀸𑀭𑀳𑀁;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀤𑀺𑀘𑁆𑀙𑀓𑀁.

𑁨𑁨.

‘‘𑀮𑀸𑀪𑀸 𑀢𑁂𑀲𑀁 𑀲𑀼𑀮𑀤𑁆𑀥𑀜𑁆𑀘, 𑀬𑁂 𑀮𑀪𑀦𑁆𑀢𑀺 𑀉𑀧𑀲𑁆𑀲𑀼𑀢𑀺𑀁;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑀦𑀼𑀲𑁆𑀲𑀸𑀦𑀁, 𑀑𑀲𑀥𑀁 𑀲𑀩𑁆𑀩𑀧𑀸𑀡𑀺𑀦𑀁.

𑁨𑁩.

‘‘𑀫𑀬𑁆𑀳𑀫𑁆𑀧𑀺 ¶ ¶ 𑀲𑀼𑀓𑀢𑀁 𑀓𑀫𑁆𑀫𑀁, 𑀬𑁄𑀳𑀁 𑀅𑀤𑀓𑁆𑀔𑀺 𑀦𑀸𑀬𑀓𑀁;

𑀯𑀺𑀦𑀺𑀧𑀸𑀢𑀸 𑀧𑀫𑀼𑀢𑁆𑀢𑁄𑀫𑁆𑀳𑀺, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁨𑁪.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀤𑀺𑀯𑀲𑀜𑁆𑀘𑁂𑀯 𑀭𑀢𑁆𑀢𑀺𑀜𑁆𑀘 [𑀲𑀫𑀦𑁆𑀢𑀸 𑀲𑀢𑁆𑀢𑀭𑀢𑀦𑀸 (𑀲𑀻. 𑀧𑀻. 𑀓.)], 𑀆𑀮𑁄𑀓𑁄 𑀳𑁄𑀢𑀺 𑀫𑁂 𑀲𑀤𑀸.

𑁨𑁫.

‘‘𑀢𑀸𑀬𑁂𑀯 𑀫𑀡𑀺𑀧𑀽𑀚𑀸𑀬, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀜𑀸𑀡𑀸𑀮𑁄𑀓𑁄 𑀫𑀬𑀸 𑀤𑀺𑀝𑁆𑀞𑁄, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁨𑁬.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀡𑀺𑀁 𑀅𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀡𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁭.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀡𑀺𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀉𑀓𑁆𑀓𑀸𑀲𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦.

‘‘𑀓𑁄𑀲𑀺𑀓𑁄 𑀦𑀸𑀫 𑀪𑀕𑀯𑀸, 𑀘𑀺𑀢𑁆𑀢𑀓𑀽𑀝𑁂 𑀯𑀲𑀻 𑀢𑀤𑀸;

𑀛𑀸𑀬𑀻 𑀛𑀸𑀦𑀭𑀢𑁄 𑀩𑀼𑀤𑁆𑀥𑁄, 𑀯𑀺𑀯𑁂𑀓𑀸𑀪𑀺𑀭𑀢𑁄 𑀫𑀼𑀦𑀺.

𑁩𑁧.

‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 [𑀅𑀚𑁆𑀛𑁄𑀕𑀳𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀳𑀺𑀫𑀯𑀦𑁆𑀢𑀁, 𑀦𑀸𑀭𑀻𑀕𑀡𑀧𑀼𑀭𑀓𑁆𑀔𑀢𑁄;

𑀅𑀤𑁆𑀤𑀲𑀁 𑀓𑁄𑀲𑀺𑀓𑀁 𑀩𑀼𑀤𑁆𑀥𑀁, 𑀧𑀼𑀡𑁆𑀡𑀫𑀸𑀬𑁂𑀯 𑀘𑀦𑁆𑀤𑀺𑀫𑀁.

𑁩𑁨.

‘‘𑀉𑀓𑁆𑀓𑀸𑀲𑀢𑁂 𑀕𑀳𑁂𑀢𑁆𑀯𑀸𑀦, 𑀧𑀭𑀺𑀯𑀸𑀭𑁂𑀲𑀳𑀁 𑀢𑀤𑀸;

𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀞𑀢𑁆𑀯𑀸 [𑀩𑀼𑀤𑁆𑀥𑁄 (𑀲𑁆𑀬𑀸. 𑀓.)], 𑀅𑀝𑁆𑀞𑀫𑁂𑀦 𑀅𑀕𑀘𑁆𑀙𑀳𑀁.

𑁩𑁩.

‘‘𑀯𑀼𑀝𑁆𑀞𑀺𑀢𑀁 ¶ 𑀓𑁄𑀲𑀺𑀓𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀺𑀢𑁆𑀯𑀸, 𑀏𑀓𑀁 𑀪𑀺𑀓𑁆𑀔𑀁 𑀅𑀤𑀸𑀲𑀳𑀁.

𑁩𑁪.

‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀉𑀧𑁆𑀧𑀚𑁆𑀚𑀺𑀁 𑀢𑀼𑀲𑀺𑀢𑁂 𑀓𑀸𑀬𑁂, 𑀏𑀓𑀪𑀺𑀓𑁆𑀔𑀸𑀬𑀺𑀤𑀁 𑀨𑀮𑀁.

𑁩𑁫.

‘‘𑀤𑀺𑀯𑀲𑀜𑁆𑀘𑁂𑀯 ¶ ¶ 𑀭𑀢𑁆𑀢𑀺𑀜𑁆𑀘, 𑀆𑀮𑁄𑀓𑁄 𑀳𑁄𑀢𑀺 𑀫𑁂 𑀲𑀤𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀑𑀪𑀸𑀲𑁂𑀦 𑀨𑀭𑀸𑀫𑀳𑀁.

𑁩𑁬.

‘‘𑀧𑀜𑁆𑀘𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 [𑀚𑀫𑁆𑀩𑀼𑀲𑀡𑁆𑀟𑀲𑁆𑀲 (𑀧𑀻.)] 𑀇𑀲𑁆𑀲𑀭𑁄.

𑁩𑁭.

‘‘𑀢𑀤𑀸 𑀫𑁂 𑀦𑀕𑀭𑀁 𑀆𑀲𑀺, 𑀇𑀤𑁆𑀥𑀁 𑀨𑀻𑀢𑀁 𑀲𑀼𑀦𑀺𑀫𑁆𑀫𑀺𑀢𑀁;

𑀢𑀺𑀁𑀲𑀬𑁄𑀚𑀦𑀫𑀸𑀬𑀸𑀫𑀁, 𑀯𑀺𑀢𑁆𑀣𑀸𑀭𑁂𑀦 𑀘 𑀯𑀻𑀲𑀢𑀺.

𑁩𑁮.

‘‘𑀲𑁄𑀪𑀡𑀁 𑀦𑀸𑀫 𑀦𑀕𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁;

𑀤𑀲𑀲𑀤𑁆𑀤𑀸𑀯𑀺𑀯𑀺𑀢𑁆𑀢𑀁 𑀢𑀁, 𑀲𑀫𑁆𑀫𑀢𑀸𑀴𑀲𑀫𑀸𑀳𑀺𑀢𑀁.

𑁩𑁯.

‘‘𑀦 ¶ 𑀢𑀫𑁆𑀳𑀺 𑀦𑀕𑀭𑁂 𑀅𑀢𑁆𑀣𑀺, 𑀯𑀮𑁆𑀮𑀺𑀓𑀝𑁆𑀞𑀜𑁆𑀘 𑀫𑀢𑁆𑀢𑀺𑀓𑀸;

𑀲𑀩𑁆𑀩𑀲𑁄𑀡𑁆𑀡𑀫𑀬𑀁𑀬𑁂𑀯, 𑀚𑁄𑀢𑀢𑁂 𑀦𑀺𑀘𑁆𑀘𑀓𑀸𑀮𑀺𑀓𑀁.

𑁪𑁦.

‘‘𑀘𑀢𑀼𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁, 𑀢𑀬𑁄 𑀆𑀲𑀼𑀁 𑀫𑀡𑀺𑀫𑀬𑀸;

𑀯𑁂𑀫𑀚𑁆𑀛𑁂 𑀢𑀸𑀮𑀧𑀦𑁆𑀢𑀻 𑀘, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀸.

𑁪𑁧.

‘‘𑀤𑀲𑀲𑀳𑀲𑁆𑀲𑀧𑁄𑀓𑁆𑀔𑀭𑀜𑁆𑀜𑁄, 𑀧𑀤𑀼𑀫𑀼𑀧𑁆𑀧𑀮𑀙𑀸𑀤𑀺𑀢𑀸;

𑀧𑀼𑀡𑁆𑀟𑀭𑀻𑀓𑁂𑀳𑀺 [𑀧𑀼𑀡𑁆𑀟𑀭𑀻𑀓𑀸𑀤𑀺 (𑀲𑁆𑀬𑀸.)] 𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀕𑀦𑁆𑀥𑀲𑀫𑀻𑀭𑀺𑀢𑀸.

𑁪𑁨.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀉𑀓𑁆𑀓𑀁 𑀥𑀸𑀭𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀓𑁆𑀓𑀥𑀸𑀭𑀲𑁆𑀲𑀺𑀤𑀁 𑀨𑀮𑀁.

𑁪𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀓𑁆𑀓𑀸𑀲𑀢𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀓𑁆𑀓𑀸𑀲𑀢𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀼𑀫𑀦𑀩𑀻𑀚𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁬.

‘‘𑀯𑀺𑀧𑀲𑁆𑀲𑀺𑀦𑁄 ¶ 𑀪𑀕𑀯𑀢𑁄, 𑀩𑁄𑀥𑀺𑀬𑀸 𑀧𑀸𑀤𑀧𑀼𑀢𑁆𑀢𑀫𑁂;

𑀲𑀼𑀫𑀦𑁄 𑀩𑀻𑀚𑀦𑀺𑀁 𑀕𑀬𑁆𑀳, 𑀅𑀩𑀻𑀚𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁪𑁭.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀅𑀩𑀻𑀚𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀻𑀚𑀦𑀸𑀬 𑀇𑀤𑀁 𑀨𑀮𑀁.

𑁪𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀦𑀩𑀻𑀚𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀦𑀩𑀻𑀚𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀓𑀼𑀫𑁆𑀫𑀸𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧.

‘‘𑀏𑀲𑀦𑀸𑀬 ¶ 𑀘𑀭𑀦𑁆𑀢𑀲𑁆𑀲, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀭𑀺𑀢𑁆𑀢𑀓𑀁 𑀧𑀢𑁆𑀢𑀁 𑀤𑀺𑀲𑁆𑀯𑀸𑀦, 𑀓𑀼𑀫𑁆𑀫𑀸𑀲𑀁 𑀧𑀽𑀭𑀬𑀺𑀁 𑀅𑀳𑀁.

𑁫𑁨.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀪𑀺𑀓𑁆𑀔𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀼𑀫𑁆𑀫𑀸𑀲𑀲𑁆𑀲 𑀇𑀤𑀁 𑀨𑀮𑀁.

𑁫𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀫𑁆𑀫𑀸𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀫𑁆𑀫𑀸𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀓𑀼𑀲𑀝𑁆𑀞𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁬.

‘‘𑀓𑀲𑁆𑀲𑀧𑀲𑁆𑀲 ¶ ¶ 𑀪𑀕𑀯𑀢𑁄, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀓𑀼𑀲𑀝𑁆𑀞𑀓𑀫𑀤𑀸𑀲𑀳𑀁.

𑁫𑁭.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀲𑁆𑀫𑀺𑀁, 𑀓𑀼𑀲𑀝𑁆𑀞𑀓𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀼𑀲𑀝𑁆𑀞𑀓𑀲𑁆𑀲𑀺𑀤𑀁 𑀨𑀮𑀁.

𑁫𑁮.

‘‘𑀓𑀺𑀮𑁂𑀲𑀸 ¶ ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀲𑀝𑁆𑀞𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀲𑀝𑁆𑀞𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀕𑀺𑀭𑀺𑀧𑀼𑀦𑁆𑀦𑀸𑀕𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁧.

‘‘𑀲𑁄𑀪𑀺𑀢𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀘𑀺𑀢𑁆𑀢𑀓𑀽𑀝𑁂 𑀯𑀲𑀻 𑀢𑀤𑀸;

𑀕𑀳𑁂𑀢𑁆𑀯𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀁, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

𑁬𑁨.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀺𑀭𑀺𑀧𑀼𑀦𑁆𑀦𑀸𑀕𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀯𑀮𑁆𑀮𑀺𑀓𑀸𑀭𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁬.

‘‘𑀲𑀼𑀫𑀦𑁄 ¶ 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀢𑀓𑁆𑀓𑀭𑀸𑀬𑀁 𑀯𑀲𑀻 𑀢𑀤𑀸;

𑀯𑀮𑁆𑀮𑀺𑀓𑀸𑀭𑀨𑀮𑀁 𑀕𑀬𑁆𑀳, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁.

𑁬𑁭.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀮𑁆𑀮𑀺𑀓𑀸𑀭𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀮𑁆𑀮𑀺𑀓𑀸𑀭𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀧𑀸𑀦𑀥𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁧.

‘‘𑀅𑀦𑁄𑀫𑀤𑀲𑁆𑀲𑀻 ¶ 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀧𑀣𑀫𑀸𑀭𑀼𑀳𑀺 [𑀧𑀻𑀢𑀺𑀫𑀸𑀭𑀼𑀬𑁆𑀳𑀺 (𑀲𑁆𑀬𑀸.)] 𑀘𑀓𑁆𑀔𑀼𑀫𑀸.

𑁭𑁨.

‘‘𑀧𑀸𑀦𑀥𑀺𑀁 ¶ 𑀲𑀼𑀓𑀢𑀁 𑀕𑀬𑁆𑀳, 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀳𑀁;

𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀧𑀢𑁆𑀢𑀺𑀓𑀁 𑀘𑀸𑀭𑀼𑀤𑀲𑁆𑀲𑀦𑀁.

𑁭𑁩.

‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀻𑀳𑀭𑀺𑀢𑁆𑀯𑀸𑀦 𑀧𑀸𑀦𑀥𑀺𑀁;

𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁭𑁪.

‘‘‘𑀅𑀪𑀺𑀭𑀽𑀳 𑀫𑀳𑀸𑀯𑀻𑀭, 𑀲𑀼𑀕𑀢𑀺𑀦𑁆𑀤 𑀯𑀺𑀦𑀸𑀬𑀓;

𑀇𑀢𑁄 𑀨𑀮𑀁 𑀮𑀪𑀺𑀲𑁆𑀲𑀸𑀫𑀺, 𑀲𑁄 𑀫𑁂 𑀅𑀢𑁆𑀣𑁄 𑀲𑀫𑀺𑀚𑁆𑀛𑀢𑀼’.

𑁭𑁫.

‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀧𑀸𑀦𑀥𑀺𑀁 𑀅𑀪𑀺𑀭𑀽𑀳𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁭𑁬.

‘‘‘𑀬𑁄 𑀧𑀸𑀦𑀥𑀺𑀁 𑀫𑁂 𑀅𑀤𑀸𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄’.

𑁭𑁭.

‘‘𑀩𑀼𑀤𑁆𑀥𑀲𑁆𑀲 ¶ 𑀕𑀺𑀭𑀫𑀜𑁆𑀜𑀸𑀬, 𑀲𑀩𑁆𑀩𑁂 𑀤𑁂𑀯𑀸 𑀲𑀫𑀸𑀕𑀢𑀸;

𑀉𑀤𑀕𑁆𑀕𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻.

𑁭𑁮.

‘‘𑀧𑀸𑀦𑀥𑀻𑀦𑀁 𑀧𑀤𑀸𑀦𑁂𑀦, 𑀲𑀼𑀔𑀺𑀢𑁄𑀬𑀁 𑀪𑀯𑀺𑀲𑁆𑀲𑀢𑀺;

𑀧𑀜𑁆𑀘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁭𑁯.

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁮𑁦.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀩𑁆𑀩𑀢𑁆𑀣)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁮𑁧.

‘‘𑀢𑀲𑁆𑀲 ¶ 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁮𑁨.

‘‘𑀤𑁂𑀯𑀮𑁄𑀓𑁂 ¶ 𑀫𑀦𑀼𑀲𑁆𑀲𑁂 𑀯𑀸, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀧𑀼𑀜𑁆𑀜𑀯𑀸;

𑀤𑁂𑀯𑀬𑀸𑀦𑀧𑀝𑀺𑀪𑀸𑀕𑀁, 𑀬𑀸𑀦𑀁 𑀧𑀝𑀺𑀮𑀪𑀺𑀲𑁆𑀲𑀢𑀺.

𑁮𑁩.

‘‘𑀧𑀸𑀲𑀸𑀤𑀸 𑀲𑀺𑀯𑀺𑀓𑀸 𑀯𑀬𑁆𑀳𑀁, 𑀳𑀢𑁆𑀣𑀺𑀦𑁄 𑀲𑀫𑀮𑀗𑁆𑀓𑀢𑀸;

𑀭𑀣𑀸 𑀯𑀸𑀚𑀜𑁆𑀜𑀲𑀁𑀬𑀼𑀢𑁆𑀢𑀸, 𑀲𑀤𑀸 𑀧𑀸𑀢𑀼𑀪𑀯𑀦𑁆𑀢𑀺 𑀫𑁂.

𑁮𑁪.

‘‘𑀅𑀕𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑁄𑀧𑀺, 𑀭𑀣𑁂𑀦 𑀦𑀺𑀓𑁆𑀔𑀫𑀺𑀁 𑀅𑀳𑀁;

𑀓𑁂𑀲𑁂𑀲𑀼 𑀙𑀺𑀚𑁆𑀚𑀫𑀸𑀦𑁂𑀲𑀼, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁮𑁫.

‘‘𑀮𑀸𑀪𑀸 𑀫𑀬𑁆𑀳𑀁 𑀲𑀼𑀮𑀤𑁆𑀥𑀁 𑀫𑁂, 𑀯𑀸𑀡𑀺𑀚𑁆𑀚𑀁 𑀲𑀼𑀧𑁆𑀧𑀬𑁄𑀚𑀺𑀢𑀁;

𑀤𑀢𑁆𑀯𑀸𑀦 𑀧𑀸𑀦𑀥𑀺𑀁 𑀏𑀓𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁮𑁬.

‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀸𑀦𑀥𑀺𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀸𑀦𑀥𑀺𑀲𑁆𑀲 𑀇𑀤𑀁 𑀨𑀮𑀁.

𑁮𑁭.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀦𑀥𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀦𑀥𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀼𑀮𑀺𑀦𑀘𑀗𑁆𑀓𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁦.

‘‘𑀫𑀺𑀕𑀮𑀼𑀤𑁆𑀤𑁄 ¶ ¶ 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀯𑀸𑀢𑀫𑀺𑀕𑀁 𑀕𑀯𑁂𑀲𑀦𑁆𑀢𑁄, 𑀘𑀗𑁆𑀓𑀫𑀁 𑀅𑀤𑁆𑀤𑀲𑀁 𑀅𑀳𑀁.

𑁯𑁧.

‘‘𑀉𑀘𑁆𑀙𑀗𑁆𑀕𑁂𑀦 𑀧𑀼𑀮𑀺𑀦𑀁 [𑀧𑀼𑀴𑀺𑀦𑀁 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀕𑀬𑁆𑀳, 𑀘𑀗𑁆𑀓𑀫𑁂 𑀑𑀓𑀺𑀭𑀺𑀁 𑀅𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀼𑀕𑀢𑀲𑁆𑀲 𑀲𑀺𑀭𑀻𑀫𑀢𑁄.

𑁯𑁨.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀧𑀼𑀮𑀺𑀦𑀁 𑀑𑀓𑀺𑀭𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀮𑀺𑀦𑀲𑁆𑀲 𑀇𑀤𑀁 𑀨𑀮𑀁.

𑁯𑁩.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀘𑀗𑁆𑀓𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀘𑀗𑁆𑀓𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀦𑀴𑀫𑀸𑀮𑀺𑀯𑀕𑁆𑀕𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦𑀴𑀫𑀸𑀮𑀻 𑀫𑀡𑀺𑀤𑀤𑁄, 𑀉𑀓𑁆𑀓𑀸𑀲𑀢𑀺𑀓𑀩𑀻𑀚𑀦𑀻;

𑀓𑀼𑀫𑁆𑀫𑀸𑀲𑁄 𑀘 𑀓𑀼𑀲𑀝𑁆𑀞𑁄 𑀘, 𑀕𑀺𑀭𑀺𑀧𑀼𑀦𑁆𑀦𑀸𑀕𑀺𑀬𑁄𑀧𑀺 𑀘.

𑀯𑀮𑁆𑀮𑀺𑀓𑀸𑀭𑁄 ¶ 𑀧𑀸𑀦𑀥𑀺𑀤𑁄, 𑀅𑀣𑁄 𑀧𑀼𑀮𑀺𑀦𑀘𑀗𑁆𑀓𑀫𑁄;

𑀕𑀸𑀣𑀸𑀬𑁄 𑀧𑀜𑁆𑀘𑀦𑀯𑀼𑀢𑀺, 𑀕𑀡𑀺𑀢𑀸𑀬𑁄 𑀯𑀺𑀪𑀸𑀯𑀺𑀪𑀺.

𑁪𑁯. 𑀧𑀁𑀲𑀼𑀓𑀽𑀮𑀯𑀕𑁆𑀕𑁄

𑁧. 𑀧𑀁𑀲𑀼𑀓𑀽𑀮𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀢𑀺𑀲𑁆𑀲𑁄 ¶ ¶ 𑀦𑀸𑀫𑀸𑀲𑀺 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀧𑀁𑀲𑀼𑀓𑀽𑀮𑀁 𑀞𑀧𑁂𑀢𑁆𑀯𑀸𑀦, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀚𑀺𑀦𑁄.

𑁨.

‘‘𑀯𑀺𑀦𑀢𑀁 [𑀲𑀚𑁆𑀚𑀺𑀢𑀁 (𑀲𑁆𑀬𑀸.), 𑀢𑀺𑀬𑀦𑁆𑀢𑀁 (𑀧𑀻.)] 𑀥𑀦𑀼𑀫𑀸𑀤𑀸𑀬, 𑀪𑀓𑁆𑀔𑀢𑁆𑀣𑀸𑀬 𑀘𑀭𑀺𑀁 𑀅𑀳𑀁;

𑀫𑀡𑁆𑀟𑀮𑀕𑁆𑀕𑀁 𑀕𑀳𑁂𑀢𑁆𑀯𑀸𑀦, 𑀓𑀸𑀦𑀦𑀁 𑀧𑀸𑀯𑀺𑀲𑀺𑀁 𑀅𑀳𑀁.

𑁩.

‘‘𑀢𑀢𑁆𑀣𑀤𑁆𑀤𑀲𑀁 ¶ 𑀧𑀁𑀲𑀼𑀓𑀽𑀮𑀁, 𑀤𑀼𑀫𑀕𑁆𑀕𑁂 𑀮𑀕𑁆𑀕𑀺𑀢𑀁 𑀢𑀤𑀸;

𑀘𑀸𑀧𑀁 𑀢𑀢𑁆𑀣𑁂𑀯 𑀦𑀺𑀓𑁆𑀔𑀺𑀧𑁆𑀧, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁.

𑁪.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀺𑀧𑀼𑀮𑀸𑀬 𑀘 𑀧𑀻𑀢𑀺𑀬𑀸;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀧𑀁𑀲𑀼𑀓𑀽𑀮𑀁 𑀅𑀯𑀦𑁆𑀤𑀳𑀁.

𑁫.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀧𑀁𑀲𑀼𑀓𑀽𑀮𑀫𑀯𑀦𑁆𑀤𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀦𑁆𑀤𑀦𑀸𑀬 𑀇𑀤𑀁 𑀨𑀮𑀁.

𑁬.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀁𑀲𑀼𑀓𑀽𑀮𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯.

‘‘𑀅𑀚𑁆𑀛𑀸𑀬𑀓𑁄 ¶ 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀦𑀺𑀖𑀡𑁆𑀟𑀼𑀲𑀓𑁂𑀝𑀼𑀪𑁂.

𑁧𑁦.

‘‘𑀦𑀤𑀻𑀲𑁄𑀢𑀧𑀝𑀺𑀪𑀸𑀕𑀸 ¶ , 𑀲𑀺𑀲𑁆𑀲𑀸 𑀆𑀬𑀦𑁆𑀢𑀺 𑀫𑁂 𑀢𑀤𑀸;

𑀢𑁂𑀲𑀸𑀳𑀁 𑀫𑀦𑁆𑀢𑁂 [𑀫𑀦𑁆𑀢𑀁 (𑀲𑁆𑀬𑀸. 𑀓.)] 𑀯𑀸𑀘𑁂𑀫𑀺, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

𑁧𑁧.

‘‘𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

𑀢𑀫𑀦𑁆𑀥𑀓𑀸𑀭𑀁 𑀦𑀸𑀲𑁂𑀢𑁆𑀯𑀸, 𑀜𑀸𑀡𑀸𑀮𑁄𑀓𑀁 𑀧𑀯𑀢𑁆𑀢𑀬𑀺.

𑁧𑁨.

‘‘𑀫𑀫 𑀅𑀜𑁆𑀜𑀢𑀭𑁄 𑀲𑀺𑀲𑁆𑀲𑁄, 𑀲𑀺𑀲𑁆𑀲𑀸𑀦𑀁 𑀲𑁄 𑀓𑀣𑁂𑀲𑀺 𑀫𑁂;

𑀲𑀼𑀢𑁆𑀯𑀸𑀦 𑀢𑁂 𑀏𑀢𑀫𑀢𑁆𑀣𑀁, 𑀆𑀭𑁄𑀘𑁂𑀲𑀼𑀁 𑀫𑀫𑀁 𑀢𑀤𑀸.

𑁧𑁩.

‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲𑀸𑀦𑀼𑀯𑀢𑁆𑀢𑀢𑀺 𑀚𑀦𑁄, 𑀮𑀸𑀪𑁄 𑀅𑀫𑁆𑀳𑀁 𑀦 𑀯𑀺𑀚𑁆𑀚𑀢𑀺 [𑀦 𑀳𑁂𑀲𑁆𑀲𑀢𑀺 (𑀲𑀻. 𑀧𑀻.)].

𑁧𑁪.

‘‘𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀸 𑀩𑀼𑀤𑁆𑀥𑀸, 𑀘𑀓𑁆𑀔𑀼𑀫𑀦𑁆𑀢𑁄 𑀫𑀳𑀸𑀬𑀲𑀸;

𑀬𑀁𑀦𑀽𑀦𑀸𑀳𑀁 𑀩𑀼𑀤𑁆𑀥𑀲𑁂𑀝𑁆𑀞𑀁, 𑀧𑀲𑁆𑀲𑁂𑀬𑁆𑀬𑀁 𑀮𑁄𑀓𑀦𑀸𑀬𑀓𑀁.

𑁧𑁫.

‘‘𑀅𑀚𑀺𑀦𑀁 ¶ 𑀫𑁂 𑀕𑀳𑁂𑀢𑁆𑀯𑀸𑀦, 𑀯𑀸𑀓𑀘𑀻𑀭𑀁 𑀓𑀫𑀡𑁆𑀟𑀮𑀼𑀁;

𑀅𑀲𑁆𑀲𑀫𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀲𑀺𑀲𑁆𑀲𑁂 𑀆𑀫𑀦𑁆𑀢𑀬𑀺𑀁 𑀅𑀳𑀁.

𑁧𑁬.

‘‘𑀑𑀤𑀼𑀫𑁆𑀩𑀭𑀺𑀓𑀧𑀼𑀧𑁆𑀨𑀁𑀯, 𑀘𑀦𑁆𑀤𑀫𑁆𑀳𑀺 𑀲𑀲𑀓𑀁 𑀬𑀣𑀸;

𑀯𑀸𑀬𑀲𑀸𑀦𑀁 𑀬𑀣𑀸 𑀔𑀻𑀭𑀁, 𑀤𑀼𑀮𑁆𑀮𑀪𑁄 𑀮𑁄𑀓𑀦𑀸𑀬𑀓𑁄 [𑀤𑀼𑀮𑁆𑀮𑀪𑀸 𑀮𑁄𑀓𑀦𑀸𑀬𑀓𑀸 (𑀲𑀻.), 𑀤𑀼𑀮𑁆𑀮𑀪𑀁 𑀮𑁄𑀓𑀦𑀸𑀬𑀓𑀁 (𑀲𑁆𑀬𑀸. 𑀧𑀻. 𑀓.)].

𑁧𑁭.

‘‘𑀩𑀼𑀤𑁆𑀥𑁄 𑀮𑁄𑀓𑀫𑁆𑀳𑀺 𑀉𑀧𑁆𑀧𑀦𑁆𑀦𑁄, 𑀫𑀦𑀼𑀲𑁆𑀲𑀢𑁆𑀢𑀫𑁆𑀧𑀺 𑀤𑀼𑀮𑁆𑀮𑀪𑀁;

𑀉𑀪𑁄𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼, 𑀲𑀯𑀦𑀜𑁆𑀘 𑀲𑀼𑀤𑀼𑀮𑁆𑀮𑀪𑀁.

𑁧𑁮.

‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀘𑀓𑁆𑀔𑀼𑀁 𑀮𑀘𑁆𑀙𑀸𑀫 𑀦𑁄 𑀪𑀯𑀁;

𑀏𑀣 𑀲𑀩𑁆𑀩𑁂 𑀕𑀫𑀺𑀲𑁆𑀲𑀸𑀫, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀦𑁆𑀢𑀺𑀓𑀁.

𑁧𑁯.

‘‘𑀓𑀫𑀡𑁆𑀟𑀮𑀼𑀥𑀭𑀸 ¶ 𑀲𑀩𑁆𑀩𑁂, 𑀔𑀭𑀸𑀚𑀺𑀦𑀦𑀺𑀯𑀸𑀲𑀺𑀦𑁄;

𑀢𑁂 𑀚𑀝𑀸 𑀪𑀸𑀭𑀪𑀭𑀺𑀢𑀸, 𑀦𑀺𑀓𑁆𑀔𑀫𑀼𑀁 𑀯𑀺𑀧𑀺𑀦𑀸 𑀢𑀤𑀸.

𑁨𑁦.

‘‘𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑀸, 𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀺𑀦𑁄;

𑀆𑀲𑀢𑁆𑀢𑀺𑀤𑁄𑀲𑀭𑀳𑀺𑀢𑀸, 𑀅𑀲𑀫𑁆𑀪𑀻𑀢𑀸𑀯 𑀓𑁂𑀲𑀭𑀻.

𑁨𑁧.

‘‘𑀅𑀧𑁆𑀧𑀓𑀺𑀘𑁆𑀘𑀸 𑀅𑀮𑁄𑀮𑀼𑀧𑁆𑀧𑀸, 𑀦𑀺𑀧𑀓𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑁄;

𑀉𑀜𑁆𑀙𑀸𑀬 𑀘𑀭𑀫𑀸𑀦𑀸 𑀢𑁂, 𑀩𑀼𑀤𑁆𑀥𑀲𑁂𑀝𑁆𑀞𑀫𑀼𑀧𑀸𑀕𑀫𑀼𑀁.

𑁨𑁨.

‘‘𑀤𑀺𑀬𑀟𑁆𑀠𑀬𑁄𑀚𑀦𑁂 ¶ 𑀲𑁂𑀲𑁂, 𑀩𑁆𑀬𑀸𑀥𑀺 𑀫𑁂 𑀉𑀧𑀧𑀚𑁆𑀚𑀣;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁨𑁩.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁨𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁫.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀼𑀤𑁆𑀥𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀼𑀤𑁆𑀥𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭.

‘‘𑀑𑀕𑀬𑁆𑀳 𑀬𑀁 [𑀑𑀕𑀬𑁆𑀳𑀸𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑁄𑀓𑁆𑀔𑀭𑀡𑀺𑀁, 𑀦𑀸𑀦𑀸𑀓𑀼𑀜𑁆𑀚𑀭𑀲𑁂𑀯𑀺𑀢𑀁;

𑀉𑀤𑁆𑀥𑀭𑀸𑀫𑀺 𑀪𑀺𑀲𑀁 𑀢𑀢𑁆𑀣, 𑀖𑀸𑀲𑀳𑁂𑀢𑀼 [𑀅𑀲𑀦𑀳𑁂𑀢𑀼 (𑀲𑁆𑀬𑀸.)] 𑀅𑀳𑀁 𑀢𑀤𑀸.

𑁨𑁮.

‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀧𑀤𑀼𑀫𑀼𑀢𑁆𑀢𑀭𑀲𑀯𑁆𑀳𑀬𑁄;

𑀭𑀢𑁆𑀢𑀫𑁆𑀩𑀭𑀥𑀭𑁄 [𑀭𑀢𑁆𑀢𑀓𑀫𑁆𑀩𑀮𑀥𑀭𑁄 (𑀲𑁆𑀬𑀸.)] 𑀩𑀼𑀤𑁆𑀥𑁄, 𑀕𑀘𑁆𑀙𑀢𑀺 𑀅𑀦𑀺𑀮𑀜𑁆𑀚𑀲𑁂.

𑁨𑁯.

‘‘𑀥𑀼𑀦𑀦𑁆𑀢𑁄 𑀧𑀁𑀲𑀼𑀓𑀽𑀮𑀸𑀦𑀺, 𑀲𑀤𑁆𑀤𑀫𑀲𑁆𑀲𑁄𑀲𑀳𑀁 𑀢𑀤𑀸;

𑀉𑀤𑁆𑀥𑀁 𑀦𑀺𑀚𑁆𑀛𑀸𑀬𑀫𑀸𑀦𑁄𑀳𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁩𑁦.

‘‘𑀢𑀢𑁆𑀣𑁂𑀯 𑀞𑀺𑀢𑀓𑁄 𑀲𑀦𑁆𑀢𑁄, 𑀆𑀬𑀸𑀘𑀺𑀁 𑀮𑁄𑀓𑀦𑀸𑀬𑀓𑀁;

𑀫𑀥𑀼𑀁 𑀪𑀺𑀲𑁂𑀳𑀺 𑀲𑀯𑀢𑀺, 𑀔𑀻𑀭𑀁 𑀲𑀧𑁆𑀧𑀺𑀁 𑀫𑀼𑀴𑀸𑀮𑀺𑀪𑀺.

𑁩𑁧.

‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀩𑀼𑀤𑁆𑀥𑁄, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸;

𑀢𑀢𑁄 𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀑𑀭𑀼𑀳𑀺𑀢𑁆𑀯𑀸 𑀫𑀳𑀸𑀬𑀲𑁄.

𑁩𑁨.

‘‘𑀧𑀝𑀺𑀕𑁆𑀕𑀡𑁆𑀳𑀺 𑀫𑀫𑀁 𑀪𑀺𑀓𑁆𑀔𑀁, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸;

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

𑁩𑁩.

‘‘‘𑀲𑀼𑀔𑀻 ¶ 𑀳𑁄𑀢𑀼 [𑀳𑁄𑀳𑀺 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀫𑀳𑀸𑀧𑀼𑀜𑁆𑀜, 𑀕𑀢𑀺 𑀢𑀼𑀬𑁆𑀳𑀁 𑀲𑀫𑀺𑀚𑁆𑀛𑀢𑀼;

𑀇𑀫𑀺𑀦𑀸 𑀪𑀺𑀲𑀤𑀸𑀦𑁂𑀦, 𑀮𑀪𑀲𑁆𑀲𑀼 𑀯𑀺𑀧𑀼𑀮𑀁 𑀲𑀼𑀔𑀁’.

𑁩𑁪.

‘‘𑀇𑀤𑀁 ¶ ¶ 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀪𑀺𑀓𑁆𑀔𑀫𑀸𑀤𑀸𑀬 𑀲𑀫𑁆𑀩𑀼𑀤𑁆𑀥𑁄, 𑀅𑀫𑁆𑀩𑀭𑁂𑀦𑀸𑀕𑀫𑀸 𑀚𑀺𑀦𑁄.

𑁩𑁫.

‘‘𑀢𑀢𑁄 ¶ 𑀪𑀺𑀲𑀁 𑀕𑀳𑁂𑀢𑁆𑀯𑀸𑀦, 𑀆𑀕𑀘𑁆𑀙𑀺𑀁 𑀫𑀫 𑀅𑀲𑁆𑀲𑀫𑀁;

𑀪𑀺𑀲𑀁 𑀭𑀼𑀓𑁆𑀔𑁂 𑀮𑀕𑁂𑀢𑁆𑀯𑀸𑀦 [𑀮𑀕𑁆𑀕𑀺𑀢𑁆𑀯𑀸𑀦 (𑀲𑁆𑀬𑀸. 𑀓.)], 𑀫𑀫 𑀤𑀸𑀦𑀫𑀦𑀼𑀲𑁆𑀲𑀭𑀺𑀁.

𑁩𑁬.

‘‘𑀫𑀳𑀸𑀯𑀸𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀲𑀜𑁆𑀘𑀸𑀮𑁂𑀲𑀺 𑀯𑀦𑀁 𑀢𑀤𑀸;

𑀆𑀓𑀸𑀲𑁄 𑀅𑀪𑀺𑀦𑀸𑀤𑀺𑀢𑁆𑀣, 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸.

𑁩𑁭.

‘‘𑀢𑀢𑁄 𑀫𑁂 𑀅𑀲𑀦𑀺𑀧𑀸𑀢𑁄, 𑀫𑀢𑁆𑀣𑀓𑁂 𑀦𑀺𑀧𑀢𑀻 𑀢𑀤𑀸;

𑀲𑁄𑀳𑀁 𑀦𑀺𑀲𑀺𑀦𑁆𑀦𑀓𑁄 𑀲𑀦𑁆𑀢𑁄, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀼𑀁.

𑁩𑁮.

‘‘𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁;

𑀓𑀴𑁂𑀯𑀭𑀁 𑀫𑁂 𑀧𑀢𑀺𑀢𑀁, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁.

𑁩𑁯.

‘‘𑀙𑀴𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀸𑀬𑀧𑀸𑀢𑀁 [𑀲𑀸𑀬𑀁 𑀧𑀸𑀢𑀁 (𑀲𑁆𑀬𑀸. 𑀓.)] 𑀉𑀧𑀝𑁆𑀞𑀦𑁆𑀢𑀺, 𑀪𑀺𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁦.

‘‘𑀫𑀦𑀼𑀲𑁆𑀲𑀬𑁄𑀦𑀺𑀫𑀸𑀕𑀦𑁆𑀢𑁆𑀯𑀸, 𑀲𑀼𑀔𑀺𑀢𑁄 𑀳𑁄𑀫𑀳𑀁 𑀲𑀤𑀸;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀪𑀺𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁧.

‘‘𑀅𑀦𑀼𑀓𑀫𑁆𑀧𑀺𑀢𑀓𑁄 𑀢𑁂𑀦, 𑀤𑁂𑀯𑀤𑁂𑀯𑁂𑀦 𑀢𑀸𑀤𑀺𑀦𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁪𑁨.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀪𑀺𑀲𑀁 [𑀪𑀺𑀓𑁆𑀔𑀁 (𑀲𑀩𑁆𑀩𑀢𑁆𑀣)] 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁩.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀺𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀺𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀜𑀸𑀡𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁬.

‘‘𑀤𑀓𑁆𑀔𑀺𑀡𑁂 ¶ 𑀳𑀺𑀫𑀯𑀦𑁆𑀢𑀲𑁆𑀲, 𑀲𑀼𑀓𑀢𑁄 𑀅𑀲𑁆𑀲𑀫𑁄 𑀫𑀫;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑁄, 𑀯𑀲𑀸𑀫𑀺 𑀯𑀺𑀧𑀺𑀦𑁂 𑀢𑀤𑀸.

𑁪𑁭.

‘‘𑀮𑀸𑀪𑀸𑀮𑀸𑀪𑁂𑀦 ¶ 𑀲𑀦𑁆𑀢𑀼𑀝𑁆𑀞𑁄, 𑀫𑀽𑀮𑁂𑀦 𑀘 𑀨𑀮𑁂𑀦 𑀘;

𑀅𑀦𑁆𑀯𑁂𑀲𑀦𑁆𑀢𑁄 𑀆𑀘𑀭𑀺𑀬𑀁, 𑀯𑀲𑀸𑀫𑀺 𑀏𑀓𑀓𑁄 𑀅𑀳𑀁.

𑁪𑁮.

‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀢𑀺, 𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀚𑀦𑀁.

𑁪𑁯.

‘‘𑀦𑀸𑀳𑀁 𑀲𑀼𑀡𑁄𑀫𑀺 𑀲𑀫𑁆𑀩𑀼𑀤𑁆𑀥𑀁, 𑀦𑀧𑀺 𑀫𑁂 𑀓𑁄𑀘𑀺 𑀲𑀁𑀲𑀢𑀺 [𑀪𑀸𑀲𑀢𑀺 (𑀲𑀻.), 𑀲𑀸𑀲𑀢𑀺 (𑀲𑁆𑀬𑀸. 𑀧𑀻.)];

𑀅𑀝𑁆𑀞𑀯𑀲𑁆𑀲𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀅𑀲𑁆𑀲𑁄𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁫𑁦.

‘‘𑀅𑀕𑁆𑀕𑀺𑀤𑀸𑀭𑀼𑀁 ¶ 𑀦𑀻𑀳𑀭𑀺𑀢𑁆𑀯𑀸, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀅𑀲𑁆𑀲𑀫𑀁;

𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀦𑀺𑀓𑁆𑀔𑀫𑀺𑀁 𑀯𑀺𑀧𑀺𑀦𑀸 𑀅𑀳𑀁.

𑁫𑁧.

‘‘𑀏𑀓𑀭𑀢𑁆𑀢𑀺𑀁 ¶ 𑀯𑀲𑀦𑁆𑀢𑁄𑀳𑀁, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;

𑀅𑀦𑀼𑀧𑀼𑀩𑁆𑀩𑁂𑀦 𑀘𑀦𑁆𑀤𑀯𑀢𑀺𑀁, 𑀢𑀤𑀸𑀳𑀁 𑀉𑀧𑀲𑀗𑁆𑀓𑀫𑀺𑀁.

𑁫𑁨.

‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄;

𑀉𑀤𑁆𑀥𑀭𑀦𑁆𑀢𑁄 𑀩𑀳𑀽 𑀲𑀢𑁆𑀢𑁂, 𑀤𑁂𑀲𑁂𑀢𑀺 𑀅𑀫𑀢𑀁 𑀧𑀤𑀁.

𑁫𑁩.

‘‘𑀚𑀦𑀓𑀸𑀬𑀫𑀢𑀺𑀓𑁆𑀓𑀫𑁆𑀫, 𑀯𑀦𑁆𑀤𑀺𑀢𑁆𑀯𑀸 𑀚𑀺𑀦𑀲𑀸𑀕𑀭𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁫𑁪.

‘‘‘𑀢𑀼𑀯𑀁 𑀲𑀢𑁆𑀣𑀸 𑀘 𑀓𑁂𑀢𑀼 𑀘, 𑀥𑀚𑁄 𑀬𑀽𑀧𑁄 𑀘 𑀧𑀸𑀡𑀺𑀦𑀁;

𑀧𑀭𑀸𑀬𑀦𑁄 [𑀧𑀭𑀸𑀬𑀡𑁄 (𑀲𑀻. 𑀧𑀻.)] 𑀧𑀢𑀺𑀝𑁆𑀞𑀸 𑀘, 𑀤𑀻𑀧𑁄 𑀘 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑀏𑀓𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁫𑁫.

‘‘‘𑀦𑁂𑀧𑀼𑀜𑁆𑀜𑁄 𑀤𑀲𑁆𑀲𑀦𑁂 𑀯𑀻𑀭𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀢𑀼𑀯𑀁;

𑀦𑀢𑁆𑀣𑀜𑁆𑀜𑁄 𑀢𑀸𑀭𑀓𑁄 𑀮𑁄𑀓𑁂, 𑀢𑀯𑀼𑀢𑁆𑀢𑀭𑀺𑀢𑀭𑁄 𑀫𑀼𑀦𑁂.

𑁫𑁬.

‘‘‘𑀲𑀓𑁆𑀓𑀸 𑀣𑁂𑀯𑁂 [𑀳𑀯𑁂 (𑀲𑀻. 𑀧𑀻.) 𑀪𑀯𑁂 (𑀲𑁆𑀬𑀸. 𑀓.)] 𑀓𑀼𑀲𑀕𑁆𑀕𑁂𑀦, 𑀧𑀫𑁂𑀢𑀼𑀁 𑀲𑀸𑀕𑀭𑀼𑀢𑁆𑀢𑀫𑁂 [𑀲𑀸𑀕𑀭𑀼𑀢𑁆𑀢𑀫𑁄 (𑀲𑀻. 𑀲𑁆𑀬𑀸. 𑀧𑀻.)];

𑀦𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀜𑀸𑀡𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂.

𑁫𑁭.

‘‘‘𑀢𑀼𑀮𑀤𑀡𑁆𑀟𑁂 ¶ [𑀢𑀼𑀮𑀫𑀡𑁆𑀟𑀮𑁂 (𑀲𑀻. 𑀧𑀻.)] 𑀞𑀧𑁂𑀢𑁆𑀯𑀸𑀦, 𑀫𑀳𑀺𑀁 [𑀫𑀳𑀻 (𑀲𑁆𑀬𑀸. 𑀧𑀻.)] 𑀲𑀓𑁆𑀓𑀸 𑀥𑀭𑁂𑀢𑀯𑁂;

𑀦𑀢𑁆𑀯𑁂𑀯 𑀢𑀯 𑀧𑀜𑁆𑀜𑀸𑀬, 𑀧𑀫𑀸𑀡𑀫𑀢𑁆𑀣𑀺 𑀘𑀓𑁆𑀔𑀼𑀫.

𑁫𑁮.

‘‘‘𑀆𑀓𑀸𑀲𑁄 𑀫𑀺𑀦𑀺𑀢𑀼𑀁 𑀲𑀓𑁆𑀓𑀸, 𑀭𑀚𑁆𑀚𑀼𑀬𑀸 𑀅𑀗𑁆𑀕𑀼𑀮𑁂𑀦 𑀯𑀸;

𑀦𑀢𑁆𑀯𑁂𑀯 𑀢𑀯 𑀲𑀩𑁆𑀩𑀜𑁆𑀜𑀼, 𑀲𑀻𑀮𑀁 𑀲𑀓𑁆𑀓𑀸 𑀧𑀫𑁂𑀢𑀯𑁂.

𑁫𑁯.

‘‘‘𑀫𑀳𑀸𑀲𑀫𑀼𑀤𑁆𑀤𑁂 ¶ 𑀉𑀤𑀓𑀁, 𑀆𑀓𑀸𑀲𑁄 𑀘 𑀯𑀲𑀼𑀦𑁆𑀥𑀭𑀸;

𑀧𑀭𑀺𑀫𑁂𑀬𑁆𑀬𑀸𑀦𑀺 𑀏𑀢𑀸𑀦𑀺, 𑀅𑀧𑁆𑀧𑀫𑁂𑀬𑁆𑀬𑁄𑀲𑀺 𑀘𑀓𑁆𑀔𑀼𑀫’.

𑁬𑁦.

‘‘𑀙𑀳𑀺 ¶ 𑀕𑀸𑀣𑀸𑀳𑀺 𑀲𑀩𑁆𑀩𑀜𑁆𑀜𑀼𑀁, 𑀓𑀺𑀢𑁆𑀢𑀬𑀺𑀢𑁆𑀯𑀸 𑀫𑀳𑀸𑀬𑀲𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀳𑀁 𑀢𑀤𑀸.

𑁬𑁧.

‘‘𑀬𑀁 𑀯𑀤𑀦𑁆𑀢𑀺 𑀲𑀼𑀫𑁂𑀥𑁄𑀢𑀺, 𑀪𑀽𑀭𑀺𑀧𑀜𑁆𑀜𑀁 𑀲𑀼𑀫𑁂𑀥𑀲𑀁;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁨.

‘‘‘𑀬𑁄 𑀫𑁂 𑀜𑀸𑀡𑀁 𑀧𑀓𑀺𑀢𑁆𑀢𑁂𑀲𑀺, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁬𑁩.

‘‘‘𑀲𑀢𑁆𑀢𑀲𑀢𑁆𑀢𑀢𑀺 𑀓𑀧𑁆𑀧𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁬𑁪.

‘‘‘𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁬𑁫.

‘‘‘𑀤𑁂𑀯𑀪𑀽𑀢𑁄 ¶ 𑀫𑀦𑀼𑀲𑁆𑀲𑁄 𑀯𑀸, 𑀧𑀼𑀜𑁆𑀜𑀓𑀫𑁆𑀫𑀲𑀫𑀸𑀳𑀺𑀢𑁄;

𑀅𑀦𑀽𑀦𑀫𑀦𑀲𑀗𑁆𑀓𑀧𑁆𑀧𑁄, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀯𑀺𑀲𑁆𑀲𑀢𑀺’.

𑁬𑁬.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁭.

‘‘𑀅𑀕𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀢𑀺 𑀓𑀺𑀜𑁆𑀘𑀦𑁄;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀁 𑀨𑀼𑀲𑀺𑀲𑁆𑀲𑀢𑀺.

𑁬𑁮.

‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀲𑀸𑀲𑀦𑀁;

𑀏𑀢𑁆𑀣𑀦𑁆𑀢𑀭𑁂 𑀦 𑀚𑀸𑀦𑀸𑀫𑀺, 𑀘𑁂𑀢𑀦𑀁 𑀅𑀫𑀦𑁄𑀭𑀫𑀁.

𑁬𑁯.

‘‘𑀲𑀁𑀲𑀭𑀺𑀢𑁆𑀯𑀸 𑀪𑀯𑁂 𑀲𑀩𑁆𑀩𑁂, 𑀲𑀫𑁆𑀧𑀢𑁆𑀢𑀸𑀦𑀼𑀪𑀯𑀺𑀁 𑀅𑀳𑀁;

𑀪𑁄𑀕𑁂 ¶ 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀨𑀮𑀁 𑀜𑀸𑀡𑀲𑁆𑀲 𑀣𑁄𑀫𑀦𑁂.

𑁭𑁦.

‘‘𑀢𑀺𑀬𑀕𑁆𑀕𑀻 𑀦𑀺𑀩𑁆𑀩𑀼𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁭𑁧.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺 ¶ , 𑀬𑀁 𑀜𑀸𑀡𑀫𑀣𑀯𑀺𑀁 𑀅𑀳𑀁 [𑀫𑀪𑀺𑀣𑁄𑀫𑀬𑀺𑀁 (𑀲𑀻. 𑀧𑀻.), 𑀫𑀪𑀺𑀣𑁄𑀫𑀳𑀁 (𑀲𑁆𑀬𑀸.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀁 𑀜𑀸𑀡𑀲𑁆𑀲 𑀣𑁄𑀫𑀦𑁂.

𑁭𑁨.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀜𑀸𑀡𑀣𑀯𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀜𑀸𑀡𑀣𑀯𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀘𑀦𑁆𑀤𑀦𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁫.

‘‘𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀧𑀺𑀬𑀭𑀽𑀧𑁂 𑀫𑀦𑁄𑀭𑀫𑁂;

𑀅𑀲𑀻𑀢𑀺𑀓𑁄𑀝𑀺𑀬𑁄 𑀳𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁭𑁬.

‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦, 𑀧𑀸𑀧𑀓𑀫𑁆𑀫𑀁 𑀯𑀺𑀯𑀚𑁆𑀚𑀬𑀺𑀁;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀦𑀤𑀻𑀓𑀽𑀮𑁂 𑀯𑀲𑀸𑀫𑀳𑀁.

𑁭𑁭.

‘‘𑀏𑀓𑀓𑀁 ¶ 𑀫𑀁 𑀯𑀺𑀳𑀭𑀦𑁆𑀢𑀁, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀉𑀧𑀸𑀕𑀫𑀺;

𑀦𑀸𑀳𑀁 𑀚𑀸𑀦𑀸𑀫𑀺 𑀩𑀼𑀤𑁆𑀥𑁄𑀢𑀺, 𑀅𑀓𑀸𑀲𑀺𑀁 𑀧𑀝𑀺𑀲𑀦𑁆𑀣𑀭𑀁 [𑀧𑀝𑀺𑀲𑀦𑁆𑀥𑀸𑀭𑀁 (𑀓.)].

𑁭𑁮.

‘‘𑀓𑀭𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁, 𑀦𑀸𑀫𑀕𑁄𑀢𑁆𑀢𑀫𑀧𑀼𑀘𑁆𑀙𑀳𑀁;

‘𑀤𑁂𑀯𑀢𑀸𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄.

𑁭𑁯.

‘‘‘𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀇𑀥𑀸𑀕𑀢𑁄;

𑀯𑀺𑀭𑁄𑀘𑁂𑀲𑀺 𑀤𑀺𑀲𑀸 𑀲𑀩𑁆𑀩𑀸, 𑀉𑀤𑀬𑀁 𑀲𑀽𑀭𑀺𑀬𑁄 𑀬𑀣𑀸.

𑁮𑁦.

‘‘‘𑀲𑀳𑀲𑁆𑀲𑀸𑀭𑀸𑀦𑀺 ¶ 𑀘𑀓𑁆𑀓𑀸𑀦𑀺, 𑀧𑀸𑀤𑁂 𑀤𑀺𑀲𑁆𑀲𑀦𑁆𑀢𑀺 𑀫𑀸𑀭𑀺𑀲;

𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁;

𑀦𑀸𑀫𑀕𑁄𑀢𑁆𑀢𑀁 𑀧𑀯𑁂𑀤𑁂𑀳𑀺, 𑀲𑀁𑀲𑀬𑀁 𑀅𑀧𑀦𑁂𑀳𑀺 𑀫𑁂’.

𑁮𑁧.

‘‘‘𑀦𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀫𑁆𑀳𑀺 [𑀦𑀸𑀧𑀺 (𑀲𑀻.)] 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀩𑁆𑀭𑀳𑁆𑀫𑀪𑀸𑀯𑁄 𑀘 𑀫𑁂 𑀦𑀢𑁆𑀣𑀺, 𑀏𑀢𑁂𑀲𑀁 𑀉𑀢𑁆𑀢𑀫𑁄 𑀅𑀳𑀁.

𑁮𑁨.

‘‘‘𑀅𑀢𑀻𑀢𑁄 𑀯𑀺𑀲𑀬𑀁 𑀢𑁂𑀲𑀁, 𑀤𑀸𑀮𑀬𑀺𑀁 𑀓𑀸𑀫𑀩𑀦𑁆𑀥𑀦𑀁;

𑀲𑀩𑁆𑀩𑁂 𑀓𑀺𑀮𑁂𑀲𑁂 𑀛𑀸𑀧𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁’.

𑁮𑁩.

‘‘𑀢𑀲𑁆𑀲 ¶ ¶ 𑀯𑀸𑀘𑀁 𑀲𑀼𑀡𑀺𑀢𑁆𑀯𑀸𑀳𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀬𑀤𑀺 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀜𑁆𑀜𑀽, 𑀦𑀺𑀲𑀻𑀤 𑀢𑁆𑀯𑀁 𑀫𑀳𑀸𑀫𑀼𑀦𑁂.

𑁮𑁪.

‘𑀢𑀫𑀳𑀁 𑀧𑀽𑀚𑀬𑀺𑀲𑁆𑀲𑀸𑀫𑀺, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀢𑀼𑀯𑀁’;

‘‘𑀧𑀢𑁆𑀣𑀭𑀺𑀢𑁆𑀯𑀸 𑀚𑀺𑀦𑀘𑀫𑁆𑀫𑀁, 𑀅𑀤𑀸𑀲𑀺 𑀲𑀢𑁆𑀣𑀼𑀦𑁄 𑀅𑀳𑀁.

𑁮𑁫.

‘‘𑀦𑀺𑀲𑀻𑀤𑀺 𑀢𑀢𑁆𑀣 𑀪𑀕𑀯𑀸, 𑀲𑀻𑀳𑁄𑀯 𑀕𑀺𑀭𑀺𑀕𑀩𑁆𑀪𑀭𑁂;

𑀔𑀺𑀧𑁆𑀧𑀁 𑀧𑀩𑁆𑀩𑀢𑀫𑀸𑀭𑀼𑀬𑁆𑀳, 𑀅𑀫𑁆𑀩𑀲𑁆𑀲 𑀨𑀮𑀫𑀕𑁆𑀕𑀳𑀺𑀁.

𑁮𑁬.

‘‘𑀲𑀸𑀮𑀓𑀮𑁆𑀬𑀸𑀡𑀺𑀓𑀁 𑀧𑀼𑀧𑁆𑀨𑀁, 𑀘𑀦𑁆𑀤𑀦𑀜𑁆𑀘 𑀫𑀳𑀸𑀭𑀳𑀁;

𑀔𑀺𑀧𑁆𑀧𑀁 ¶ 𑀧𑀕𑁆𑀕𑀬𑁆𑀳 𑀢𑀁 𑀲𑀩𑁆𑀩𑀁, 𑀉𑀧𑁂𑀢𑁆𑀯𑀸 𑀮𑁄𑀓𑀦𑀸𑀬𑀓𑀁.

𑁮𑁭.

‘‘𑀨𑀮𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀲𑀸𑀮𑀧𑀼𑀧𑁆𑀨𑀫𑀧𑀽𑀚𑀬𑀺𑀁;

𑀘𑀦𑁆𑀤𑀦𑀁 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸, 𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁮𑁮.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀺𑀧𑀼𑀮𑀸𑀬 𑀘 𑀧𑀻𑀢𑀺𑀬𑀸;

𑀅𑀚𑀺𑀦𑀫𑁆𑀳𑀺 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄.

𑁮𑁯.

‘‘𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀲𑀺, 𑀳𑀸𑀲𑀬𑀦𑁆𑀢𑁄 𑀫𑀫𑀁 𑀢𑀤𑀸;

‘𑀇𑀫𑀺𑀦𑀸 𑀨𑀮𑀤𑀸𑀦𑁂𑀦, 𑀕𑀦𑁆𑀥𑀫𑀸𑀮𑁂𑀳𑀺 𑀘𑀽𑀪𑀬𑀁.

𑁯𑁦.

‘‘‘𑀧𑀜𑁆𑀘𑀯𑀻𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀅𑀦𑀽𑀦𑀫𑀦𑀲𑀗𑁆𑀓𑀧𑁆𑀧𑁄, 𑀯𑀲𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁯𑁧.

‘‘‘𑀙𑀩𑁆𑀩𑀻𑀲𑀢𑀺𑀓𑀧𑁆𑀧𑀲𑀢𑁂, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀘𑀸𑀢𑀼𑀭𑀦𑁆𑀢𑁄 𑀫𑀳𑀺𑀤𑁆𑀥𑀺𑀓𑁄.

𑁯𑁨.

‘‘‘𑀯𑁂𑀪𑀸𑀭𑀁 𑀦𑀸𑀫 𑀦𑀕𑀭𑀁, 𑀯𑀺𑀲𑁆𑀲𑀓𑀫𑁆𑀫𑁂𑀦 𑀫𑀸𑀧𑀺𑀢𑀁;

𑀳𑁂𑀲𑁆𑀲𑀢𑀺 𑀲𑀩𑁆𑀩𑀲𑁄𑀯𑀡𑁆𑀡𑀁, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑀁.

𑁯𑁩.

‘‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀲𑀁𑀲𑀭𑀺𑀲𑁆𑀲𑀢𑀺 𑀲𑁄 𑀪𑀯𑁂 [𑀬𑁄𑀦𑀺𑀲𑁄 (𑀲𑁆𑀬𑀸. 𑀧𑀻.)];

𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑀼𑀢𑁆𑀯𑀸, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂.

𑁯𑁪.

‘‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺;

𑀅𑀕𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀅𑀦𑀕𑀸𑀭𑀻 𑀪𑀯𑀺𑀲𑁆𑀲𑀢𑀺;

𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁯𑁫.

‘‘𑀇𑀤𑀁 ¶ 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄;

𑀫𑀫 𑀦𑀺𑀚𑁆𑀛𑀸𑀬𑀫𑀸𑀦𑀲𑁆𑀲, 𑀧𑀓𑁆𑀓𑀸𑀫𑀺 𑀅𑀦𑀺𑀮𑀜𑁆𑀚𑀲𑁂.

𑁯𑁬.

‘‘𑀢𑁂𑀦 ¶ ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯𑁭.

‘‘𑀢𑀼𑀲𑀺𑀢𑀢𑁄 ¶ 𑀘𑀯𑀺𑀢𑁆𑀯𑀸𑀦, 𑀦𑀺𑀩𑁆𑀩𑀢𑁆𑀢𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀬𑀫𑁆𑀳𑀺 𑀕𑀩𑁆𑀪𑁂 𑀯𑀲𑀸𑀫𑀳𑀁.

𑁯𑁮.

‘‘𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁂 𑀫𑀬𑀺, 𑀅𑀦𑁆𑀦𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀫𑀸𑀢𑀼𑀬𑀸 𑀫𑀫 𑀙𑀦𑁆𑀤𑁂𑀦, 𑀦𑀺𑀩𑁆𑀩𑀢𑁆𑀢𑀢𑀺 𑀬𑀤𑀺𑀘𑁆𑀙𑀓𑀁.

𑁯𑁯.

‘‘𑀚𑀸𑀢𑀺𑀬𑀸 𑀧𑀜𑁆𑀘𑀯𑀲𑁆𑀲𑁂𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀑𑀭𑁄𑀧𑀺𑀢𑀫𑁆𑀳𑀺 𑀓𑁂𑀲𑀫𑁆𑀳𑀺, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁦𑁦.

‘‘𑀧𑀼𑀩𑁆𑀩𑀓𑀫𑁆𑀫𑀁 𑀕𑀯𑁂𑀲𑀦𑁆𑀢𑁄, 𑀑𑀭𑁂𑀦 𑀦𑀸𑀤𑁆𑀤𑀲𑀁 𑀅𑀳𑀁;

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀫𑀫 𑀓𑀫𑁆𑀫𑀫𑀦𑀼𑀲𑁆𑀲𑀭𑀺𑀁.

𑁧𑁦𑁧.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀢𑀯 𑀲𑀸𑀲𑀦𑀫𑀸𑀕𑀫𑁆𑀫, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁧𑁦𑁨.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁦𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀦𑁆𑀤𑀦𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀦𑁆𑀤𑀦𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀥𑀸𑀢𑀼𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁬.

‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀲𑀺𑀤𑁆𑀥𑀢𑁆𑀣𑁂 𑀮𑁄𑀓𑀦𑀸𑀬𑀓𑁂;

𑀫𑀫 𑀜𑀸𑀢𑀻 𑀲𑀫𑀸𑀦𑁂𑀢𑁆𑀯𑀸, 𑀥𑀸𑀢𑀼𑀧𑀽𑀚𑀁 𑀅𑀓𑀸𑀲𑀳𑀁.

𑁧𑁦𑁭.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀥𑀸𑀢𑀼𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀸𑀢𑀼𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁦𑁮.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁧𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀸𑀢𑀼𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀸𑀢𑀼𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧𑁧.

‘‘𑀧𑀩𑁆𑀩𑀢𑁂 ¶ ¶ 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀤𑁂𑀯𑀮𑁄 𑀦𑀸𑀫 𑀢𑀸𑀧𑀲𑁄;

𑀢𑀢𑁆𑀣 𑀫𑁂 𑀘𑀗𑁆𑀓𑀫𑁄 𑀆𑀲𑀺, 𑀅𑀫𑀦𑀼𑀲𑁆𑀲𑁂𑀳𑀺 𑀫𑀸𑀧𑀺𑀢𑁄.

𑁧𑁧𑁨.

‘‘𑀚𑀝𑀸𑀪𑀸𑀭𑁂𑀦 ¶ [𑀚𑀝𑀸𑀪𑀸𑀭𑀲𑁆𑀲 (𑀲𑁆𑀬𑀸. 𑀓.)] 𑀪𑀭𑀺𑀢𑁄, 𑀓𑀫𑀡𑁆𑀟𑀮𑀼𑀥𑀭𑁄 𑀲𑀤𑀸;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑁄, 𑀯𑀺𑀧𑀺𑀦𑀸 𑀦𑀺𑀓𑁆𑀔𑀫𑀺𑀁 𑀢𑀤𑀸.

𑁧𑁧𑁩.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀼𑀁;

𑀲𑀓𑀓𑀫𑁆𑀫𑀸𑀪𑀺𑀧𑀲𑀼𑀢𑀸, 𑀯𑀲𑀦𑁆𑀢𑀺 𑀯𑀺𑀧𑀺𑀦𑁂 𑀢𑀤𑀸.

𑁧𑁧𑁪.

‘‘𑀅𑀲𑁆𑀲𑀫𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀅𑀓𑀁 𑀧𑀼𑀮𑀺𑀦𑀘𑁂𑀢𑀺𑀬𑀁;

𑀦𑀸𑀦𑀸𑀧𑀼𑀧𑁆𑀨𑀁 𑀲𑀫𑀸𑀦𑁂𑀢𑁆𑀯𑀸, 𑀢𑀁 𑀘𑁂𑀢𑀺𑀬𑀫𑀧𑀽𑀚𑀬𑀺𑀁.

𑁧𑁧𑁫.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀲𑁆𑀲𑀫𑀁 𑀧𑀯𑀺𑀲𑀸𑀫𑀳𑀁;

𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀁𑀲𑀼 𑀫𑀁 [𑀏𑀢𑀫𑀢𑁆𑀣𑀫𑀧𑀼𑀘𑁆𑀙𑀼 𑀫𑀁 (𑀲𑀻.), 𑀏𑀢𑀫𑀢𑁆𑀢𑀁 𑀅𑀧𑀼𑀘𑁆𑀙𑀺𑀁𑀲𑀼 (𑀲𑁆𑀬𑀸. 𑀓.)].

𑁧𑁧𑁬.

‘‘‘𑀧𑀼𑀮𑀺𑀦𑁂𑀦 𑀓𑀢𑁄 𑀣𑀽𑀧𑁄 [𑀓𑀢𑁄 𑀣𑀽𑀧𑁂 (𑀲𑀻.)], 𑀬𑀁 𑀢𑁆𑀯𑀁 𑀤𑁂𑀯 [𑀤𑁂𑀯𑀁 (𑀲𑀻. 𑀧𑀻.)] 𑀫𑀲𑁆𑀲𑀢𑀺;

𑀫𑀬𑀫𑁆𑀧𑀺 𑀜𑀸𑀢𑀼𑀫𑀺𑀘𑁆𑀙𑀸𑀫, 𑀧𑀼𑀝𑁆𑀞𑁄 𑀆𑀘𑀺𑀓𑁆𑀔 𑀦𑁄 𑀢𑀼𑀯𑀁’.

𑁧𑁧𑁭.

‘‘‘𑀦𑀺𑀤𑁆𑀤𑀺𑀝𑁆𑀞𑀸 𑀦𑀼 [𑀦𑀺𑀤𑁆𑀤𑀺𑀝𑁆𑀞𑀸 𑀦𑁄 (𑀲𑀻. 𑀧𑀻.), 𑀤𑀺𑀝𑁆𑀞𑀸𑀦𑁄 𑀯𑁄 (𑀲𑁆𑀬𑀸.)] 𑀫𑀦𑁆𑀢𑀧𑀤𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀫𑀳𑀸𑀬𑀲𑀸;

𑀢𑁂 𑀔𑁄 𑀅𑀳𑀁 𑀦𑀫𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑁂 𑀫𑀳𑀸𑀬𑀲𑁂’.

𑁧𑁧𑁮.

‘‘‘𑀓𑀻𑀤𑀺𑀲𑀸 𑀢𑁂 𑀫𑀳𑀸𑀯𑀻𑀭𑀸, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑀸;

𑀓𑀣𑀁𑀯𑀡𑁆𑀡𑀸 𑀓𑀣𑀁𑀲𑀻𑀮𑀸, 𑀓𑀻𑀤𑀺𑀲𑀸 𑀢𑁂 𑀫𑀳𑀸𑀬𑀲𑀸’.

𑁧𑁧𑁯.

‘‘‘𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀸 ¶ 𑀩𑀼𑀤𑁆𑀥𑀸, 𑀘𑀢𑁆𑀢𑀸𑀮𑀻𑀲𑀤𑀺𑀚𑀸𑀧𑀺 𑀘;

𑀦𑁂𑀢𑁆𑀢𑀸 𑀕𑁄𑀧𑀔𑀼𑀫𑀸 𑀢𑁂𑀲𑀁, 𑀚𑀺𑀜𑁆𑀚𑀼𑀓𑀸 𑀨𑀮𑀲𑀦𑁆𑀦𑀺𑀪𑀸.

𑁧𑁨𑁦.

‘‘‘𑀕𑀘𑁆𑀙𑀫𑀸𑀦𑀸 𑀘 𑀢𑁂 𑀩𑀼𑀤𑁆𑀥𑀸, 𑀬𑀼𑀕𑀫𑀢𑁆𑀢𑀜𑁆𑀘 𑀧𑁂𑀓𑁆𑀔𑀭𑁂;

𑀦 𑀢𑁂𑀲𑀁 𑀚𑀸𑀡𑀼 𑀦𑀤𑀢𑀺, 𑀲𑀦𑁆𑀥𑀺𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺.

𑁧𑁨𑁧.

‘‘‘𑀕𑀘𑁆𑀙𑀫𑀸𑀦𑀸 𑀘 𑀲𑀼𑀕𑀢𑀸, 𑀉𑀤𑁆𑀥𑀭𑀦𑁆𑀢𑀸𑀯 𑀕𑀘𑁆𑀙𑀭𑁂;

𑀧𑀞𑀫𑀁 𑀤𑀓𑁆𑀔𑀺𑀡𑀁 𑀧𑀸𑀤𑀁, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸.

𑁧𑁨𑁨.

‘‘‘𑀅𑀲𑀫𑁆𑀪𑀻𑀢𑀸 ¶ 𑀘 𑀢𑁂 𑀩𑀼𑀤𑁆𑀥𑀸, 𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻;

𑀦𑁂𑀯𑀼𑀓𑁆𑀓𑀁𑀲𑁂𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀦𑁄 𑀘 𑀯𑀫𑁆𑀪𑁂𑀦𑁆𑀢𑀺 𑀧𑀸𑀡𑀺𑀦𑀁.

𑁧𑁨𑁩.

‘‘‘𑀫𑀸𑀦𑀸𑀯𑀫𑀸𑀦𑀢𑁄 𑀫𑀼𑀢𑁆𑀢𑀸, 𑀲𑀫𑀸 𑀲𑀩𑁆𑀩𑁂𑀲𑀼 𑀧𑀸𑀡𑀺𑀲𑀼;

𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸.

𑁧𑁨𑁪.

‘‘‘𑀉𑀧𑁆𑀧𑀚𑁆𑀚𑀦𑁆𑀢𑀸 ¶ 𑀘 𑀲𑀫𑁆𑀩𑀼𑀤𑁆𑀥𑀸, 𑀆𑀮𑁄𑀓𑀁 𑀤𑀲𑁆𑀲𑀬𑀦𑁆𑀢𑀺 𑀢𑁂;

𑀙𑀧𑁆𑀧𑀓𑀸𑀭𑀁 𑀧𑀓𑀫𑁆𑀧𑁂𑀦𑁆𑀢𑀺, 𑀓𑁂𑀯𑀮𑀁 𑀯𑀲𑀼𑀥𑀁 𑀇𑀫𑀁.

𑁧𑁨𑁫.

‘‘‘𑀧𑀲𑁆𑀲𑀦𑁆𑀢𑀺 ¶ 𑀦𑀺𑀭𑀬𑀜𑁆𑀘𑁂𑀢𑁂, 𑀦𑀺𑀩𑁆𑀩𑀸𑀢𑀺 𑀦𑀺𑀭𑀬𑁄 𑀢𑀤𑀸;

𑀧𑀯𑀲𑁆𑀲𑀢𑀺 𑀫𑀳𑀸𑀫𑁂𑀖𑁄, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸.

𑁧𑁨𑁬.

‘‘‘𑀈𑀤𑀺𑀲𑀸 𑀢𑁂 𑀫𑀳𑀸𑀦𑀸𑀕𑀸, 𑀅𑀢𑀼𑀮𑀸 𑀘 [𑀢𑁂 (𑀲𑁆𑀬𑀸. 𑀓.)] 𑀫𑀳𑀸𑀬𑀲𑀸;

𑀯𑀡𑁆𑀡𑀢𑁄 𑀅𑀦𑀢𑀺𑀓𑁆𑀓𑀦𑁆𑀢𑀸, 𑀅𑀧𑁆𑀧𑀫𑁂𑀬𑁆𑀬𑀸 𑀢𑀣𑀸𑀕𑀢𑀸’.

𑁧𑁨𑁭.

‘‘‘𑀅𑀦𑀼𑀫𑁄𑀤𑀺𑀁𑀲𑀼 𑀫𑁂 𑀯𑀸𑀓𑁆𑀬𑀁, 𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀕𑀸𑀭𑀯𑀸;

𑀢𑀣𑀸 𑀘 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁’.

𑁧𑁨𑁮.

‘‘𑀧𑀝𑀺𑀧𑀽𑀚𑁂𑀦𑁆𑀢𑀺 𑀧𑀼𑀮𑀺𑀦𑀁, 𑀲𑀓𑀓𑀫𑁆𑀫𑀸𑀪𑀺𑀮𑀸𑀲𑀺𑀦𑁄;

𑀲𑀤𑁆𑀤𑀳𑀦𑁆𑀢𑀸 𑀫𑀫 𑀯𑀸𑀓𑁆𑀬𑀁, 𑀩𑀼𑀤𑁆𑀥𑀲𑀓𑁆𑀓𑀢𑀫𑀸𑀦𑀲𑀸 [𑀩𑀼𑀤𑁆𑀥𑀢𑁆𑀢𑀕𑀢𑀫𑀸𑀦𑀲𑀸 (𑀲𑀻. 𑀲𑁆𑀬𑀸. 𑀧𑀻.)].

𑁧𑁨𑁯.

‘‘𑀢𑀤𑀸 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀸, 𑀤𑁂𑀯𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀉𑀧𑁆𑀧𑀚𑁆𑀚𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺, 𑀤𑀲𑀲𑀳𑀲𑁆𑀲𑀺 𑀓𑀫𑁆𑀧𑀣.

𑁧𑁩𑁦.

‘‘𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺, 𑀘𑀗𑁆𑀓𑀫𑀫𑁆𑀳𑀺 𑀞𑀺𑀢𑁄 𑀅𑀳𑀁;

𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀆𑀕𑀘𑁆𑀙𑀼𑀁 𑀫𑀫 𑀲𑀦𑁆𑀢𑀺𑀓𑁂.

𑁧𑁩𑁧.

‘‘𑀉𑀲𑀪𑁄𑀯 𑀫𑀳𑀻 𑀦𑀤𑀢𑀺, 𑀫𑀺𑀕𑀭𑀸𑀚𑀸𑀯 𑀓𑀽𑀚𑀢𑀺;

𑀲𑀼𑀲𑀼𑀫𑀸𑀭𑁄𑀯 [𑀲𑀼𑀁𑀲𑀼𑀫𑀸𑀭𑁄𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑀴𑀢𑀺, 𑀓𑀺𑀁 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺.

𑁧𑁩𑁨.

‘‘𑀬𑀁 ¶ ¶ 𑀧𑀓𑀺𑀢𑁆𑀢𑁂𑀫𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀓𑀢𑀸𑀣𑀽𑀧𑀲𑀦𑁆𑀢𑀺𑀓𑁂;

𑀲𑁄 𑀤𑀸𑀦𑀺 𑀪𑀕𑀯𑀸 𑀲𑀢𑁆𑀣𑀸, 𑀫𑀸𑀢𑀼𑀓𑀼𑀘𑁆𑀙𑀺𑀫𑀼𑀧𑀸𑀕𑀫𑀺.

𑁧𑁩𑁩.

‘‘𑀢𑁂𑀲𑀁 𑀥𑀫𑁆𑀫𑀓𑀣𑀁 𑀯𑀢𑁆𑀯𑀸, 𑀓𑀺𑀢𑁆𑀢𑀬𑀺𑀢𑁆𑀯𑀸 𑀫𑀳𑀸𑀫𑀼𑀦𑀺𑀁;

𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀓𑁂 𑀲𑀺𑀲𑁆𑀲𑁂, 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀺𑀁 𑀅𑀳𑀁.

𑁧𑁩𑁪.

‘‘𑀩𑀮𑀜𑁆𑀘 𑀯𑀢 𑀫𑁂 𑀔𑀻𑀡𑀁, 𑀩𑁆𑀬𑀸𑀥𑀺𑀦𑀸 [𑀩𑁆𑀬𑀸𑀥𑀺𑀢𑁄 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀧𑀭𑀫𑁂𑀦 𑀢𑀁;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 [𑀓𑀸𑀮𑀓𑀢𑁄 (𑀲𑀻. 𑀧𑀻.)] 𑀅𑀳𑀁.

𑁧𑁩𑁫.

‘‘𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀘𑀺𑀢𑀓𑀁 𑀢𑀤𑀸;

𑀓𑀴𑁂𑀯𑀭𑀜𑁆𑀘 𑀫𑁂 𑀕𑀬𑁆𑀳, 𑀘𑀺𑀢𑀓𑀁 𑀅𑀪𑀺𑀭𑁄𑀧𑀬𑀼𑀁.

𑁧𑁩𑁬.

‘‘𑀘𑀺𑀢𑀓𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀲𑀻𑀲𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀓𑀲𑀮𑁆𑀮𑀧𑀭𑁂𑀢𑀸 𑀢𑁂, 𑀯𑀺𑀓𑁆𑀓𑀦𑁆𑀤𑀺𑀁𑀲𑀼 𑀲𑀫𑀸𑀕𑀢𑀸.

𑁧𑁩𑁭.

‘‘𑀢𑁂𑀲𑀁 𑀮𑀸𑀮𑀧𑁆𑀧𑀫𑀸𑀦𑀸𑀦𑀁, 𑀅𑀕𑀫𑀁 𑀘𑀺𑀢𑀓𑀁 𑀢𑀤𑀸;

‘𑀅𑀳𑀁 𑀆𑀘𑀭𑀺𑀬𑁄 𑀢𑀼𑀫𑁆𑀳𑀁, 𑀫𑀸 𑀲𑁄𑀘𑀺𑀢𑁆𑀣 𑀲𑀼𑀫𑁂𑀥𑀲𑀸.

𑁧𑁩𑁮.

‘‘‘𑀲𑀤𑀢𑁆𑀣𑁂 ¶ 𑀯𑀸𑀬𑀫𑁂𑀬𑁆𑀬𑀸𑀣, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀫𑀸 𑀯𑁄 𑀧𑀫𑀢𑁆𑀢𑀸 𑀅𑀳𑀼𑀢𑁆𑀣 [𑀅𑀳𑀼𑀯𑀢𑁆𑀣 (𑀲𑀻.)], 𑀔𑀡𑁄 𑀯𑁄 𑀧𑀝𑀺𑀧𑀸𑀤𑀺𑀢𑁄’.

𑁧𑁩𑁯.

‘‘𑀲𑀓𑁂 𑀲𑀺𑀲𑁆𑀲𑁂𑀦𑀼𑀲𑀸𑀲𑀺𑀢𑁆𑀯𑀸, 𑀤𑁂𑀯𑀮𑁄𑀓𑀁 𑀧𑀼𑀦𑀸𑀕𑀫𑀺𑀁;

𑀅𑀝𑁆𑀞𑀸𑀭𑀲 𑀘 𑀓𑀧𑁆𑀧𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁧𑁪𑁦.

‘‘𑀲𑀢𑀸𑀦𑀁 ¶ 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁪𑁧.

‘‘𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀯𑁄𑀓𑀺𑀡𑁆𑀡𑁄 [𑀯𑁄𑀓𑀺𑀡𑁆𑀡𑀁 (𑀲𑀻. 𑀲𑁆𑀬𑀸. 𑀓.)] 𑀲𑀁𑀲𑀭𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑁆𑀧𑀸𑀤𑀲𑁆𑀲 𑀇𑀤𑀁 𑀨𑀮𑀁 [𑀧𑀼𑀮𑀺𑀦𑀧𑀽𑀚𑀸𑀬𑀺𑀤𑀁 𑀨𑀮𑀁 (𑀲𑀻.)].

𑁧𑁪𑁨.

‘‘𑀬𑀣𑀸 ¶ 𑀓𑁄𑀫𑀼𑀤𑀺𑀓𑁂 𑀫𑀸𑀲𑁂, 𑀩𑀳𑀽 𑀧𑀼𑀧𑁆𑀨𑀦𑁆𑀢𑀺 𑀧𑀸𑀤𑀧𑀸;

𑀢𑀣𑁂𑀯𑀸𑀳𑀫𑁆𑀧𑀺 𑀲𑀫𑀬𑁂, 𑀧𑀼𑀧𑁆𑀨𑀺𑀢𑁄𑀫𑁆𑀳𑀺 𑀫𑀳𑁂𑀲𑀺𑀦𑀸.

𑁧𑁪𑁩.

‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁧𑁪𑁫.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀢𑀭𑀡𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪𑁮.

‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀯𑀺𑀦𑀢𑀸 𑀦𑀤𑀺𑀬𑀸 𑀢𑀻𑀭𑀁 [𑀢𑀻𑀭𑁂 (𑀲𑁆𑀬𑀸. 𑀧𑀻. 𑀓.)], 𑀉𑀧𑀸𑀕𑀘𑁆𑀙𑀺 𑀢𑀣𑀸𑀕𑀢𑁄.

𑁧𑁪𑁯.

‘‘𑀉𑀤𑀓𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀓𑀘𑁆𑀙𑀧𑁄 𑀯𑀸𑀭𑀺𑀕𑁄𑀘𑀭𑁄;

𑀩𑀼𑀤𑁆𑀥𑀁 𑀢𑀸𑀭𑁂𑀢𑀼𑀓𑀸𑀫𑁄𑀳𑀁, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁧𑁫𑁦.

‘‘‘𑀅𑀪𑀺𑀭𑀽𑀳𑀢𑀼 ¶ ¶ 𑀫𑀁 𑀩𑀼𑀤𑁆𑀥𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀅𑀳𑀁 𑀢𑀁 𑀢𑀸𑀭𑀬𑀺𑀲𑁆𑀲𑀸𑀫𑀺, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀢𑀼𑀯𑀁’.

𑁧𑁫𑁧.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀅𑀪𑀺𑀭𑀽𑀳𑀺𑀢𑁆𑀯𑀸 𑀫𑁂 𑀧𑀺𑀝𑁆𑀞𑀺𑀁, 𑀅𑀝𑁆𑀞𑀸𑀲𑀺 𑀮𑁄𑀓𑀦𑀸𑀬𑀓𑁄.

𑁧𑁫𑁨.

‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀲𑀼𑀔𑀁 𑀫𑁂 𑀢𑀸𑀤𑀺𑀲𑀁 𑀦𑀢𑁆𑀣𑀺, 𑀨𑀼𑀝𑁆𑀞𑁂 𑀧𑀸𑀤𑀢𑀮𑁂 𑀬𑀣𑀸.

𑁧𑁫𑁩.

‘‘𑀉𑀢𑁆𑀢𑀭𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀦𑀤𑀻𑀢𑀻𑀭𑀫𑁆𑀳𑀺 𑀞𑀢𑁆𑀯𑀸𑀦, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁫𑁪.

‘‘‘𑀬𑀸𑀯𑀢𑀸 ¶ 𑀯𑀢𑁆𑀢𑀢𑁂 𑀘𑀺𑀢𑁆𑀢𑀁, 𑀕𑀗𑁆𑀕𑀸𑀲𑁄𑀢𑀁 𑀢𑀭𑀸𑀫𑀳𑀁;

𑀅𑀬𑀜𑁆𑀘 𑀓𑀘𑁆𑀙𑀧𑁄 𑀭𑀸𑀚𑀸, 𑀢𑀸𑀭𑁂𑀲𑀺 𑀫𑀫 𑀧𑀜𑁆𑀜𑀯𑀸.

𑁧𑁫𑁫.

‘‘‘𑀇𑀫𑀺𑀦𑀸 𑀩𑀼𑀤𑁆𑀥𑀢𑀭𑀡𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑀯𑀢𑀸𑀬 𑀘;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺.

𑁧𑁫𑁬.

‘‘‘𑀤𑁂𑀯𑀮𑁄𑀓𑀸 𑀇𑀥𑀸𑀕𑀦𑁆𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀗𑁆𑀔𑀸𑀲𑁄𑀢𑀁 𑀢𑀭𑀺𑀲𑁆𑀲𑀢𑀺.

𑁧𑁫𑁭.

‘‘‘𑀬𑀣𑀸𑀧𑀺 ¶ 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸𑀥𑀸𑀭𑁂 𑀧𑀯𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁 [𑀓𑀲𑁆𑀲𑀓𑁂 (𑀲𑁆𑀬𑀸.)].

𑁧𑁫𑁮.

‘‘‘𑀢𑀣𑁂𑀯𑀺𑀤𑀁 𑀩𑀼𑀤𑁆𑀥𑀔𑁂𑀢𑁆𑀢𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀲𑀫𑁆𑀫𑀸𑀥𑀸𑀭𑁂 𑀧𑀯𑀘𑁆𑀙𑀦𑁆𑀢𑁂, 𑀨𑀮𑀁 𑀫𑀁 𑀢𑁄𑀲𑀬𑀺𑀲𑁆𑀲𑀢𑀺’.

𑁧𑁫𑁯.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀫𑁆𑀳𑀺, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁬𑁦.

‘‘𑀅𑀝𑁆𑀞𑀸𑀭𑀲𑁂 ¶ 𑀓𑀧𑁆𑀧𑀲𑀢𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀭𑀡𑀸𑀬 𑀇𑀤𑀁 𑀨𑀮𑀁.

𑁧𑁬𑁧.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁬𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀭𑀡𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀭𑀡𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀥𑀫𑁆𑀫𑀭𑀼𑀘𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁪.

‘‘𑀬𑀤𑀸 ¶ 𑀤𑀻𑀧𑀗𑁆𑀓𑀭𑁄 𑀩𑀼𑀤𑁆𑀥𑁄, 𑀲𑀼𑀫𑁂𑀥𑀁 𑀩𑁆𑀬𑀸𑀓𑀭𑀻 𑀚𑀺𑀦𑁄;

‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬𑁫.

‘‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁧𑁬𑁬.

‘‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁;

𑀅𑀲𑁆𑀲𑀢𑁆𑀣𑀫𑀽𑀮𑁂 𑀲𑀫𑁆𑀩𑀼𑀤𑁆𑀥𑁄, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁧𑁬𑁭.

‘‘‘𑀉𑀧𑀢𑀺𑀲𑁆𑀲𑁄 𑀓𑁄𑀮𑀺𑀢𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦 [𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄 (𑀲𑁆𑀬𑀸.)], 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

𑁧𑁬𑁮.

‘‘‘𑀔𑁂𑀫𑀸 ¶ 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀘𑀺𑀢𑁆𑀢𑁄 𑀆𑀴𑀯𑀓𑁄 𑀘𑁂𑀯, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀸𑀲𑀓𑀸.

𑁧𑁬𑁯.

‘‘‘𑀔𑀼𑀚𑁆𑀚𑀼𑀢𑁆𑀢𑀭𑀸 ¶ 𑀦𑀦𑁆𑀤𑀫𑀸𑀢𑀸, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀸𑀲𑀺𑀓𑀸;

𑀩𑁄𑀥𑀺 𑀇𑀫𑀲𑁆𑀲 𑀯𑀻𑀭𑀲𑁆𑀲, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺’.

𑁧𑁭𑁦.

‘‘𑀇𑀤𑀁 ¶ 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀦𑀫𑀲𑁆𑀲𑀦𑁆𑀢𑀺 𑀓𑀢𑀜𑁆𑀚𑀮𑀻.

𑁧𑁭𑁧.

‘‘𑀢𑀤𑀸𑀳𑀁 𑀫𑀸𑀡𑀯𑁄 𑀆𑀲𑀺𑀁, 𑀫𑁂𑀖𑁄 𑀦𑀸𑀫 𑀲𑀼𑀲𑀺𑀓𑁆𑀔𑀺𑀢𑁄;

𑀲𑀼𑀢𑁆𑀯𑀸 𑀩𑁆𑀬𑀸𑀓𑀭𑀡𑀁 𑀲𑁂𑀝𑁆𑀞𑀁, 𑀲𑀼𑀫𑁂𑀥𑀲𑁆𑀲 𑀫𑀳𑀸𑀫𑀼𑀦𑁂.

𑁧𑁭𑁨.

‘‘𑀲𑀁𑀯𑀺𑀲𑀝𑁆𑀞𑁄 𑀪𑀯𑀺𑀢𑁆𑀯𑀸𑀦, 𑀲𑀼𑀫𑁂𑀥𑁂 𑀓𑀭𑀼𑀡𑀸𑀲𑀬𑁂 [𑀓𑀭𑀼𑀡𑀸𑀮𑀬𑁂 (𑀲𑁆𑀬𑀸.)];

𑀧𑀩𑁆𑀩𑀚𑀦𑁆𑀢𑀜𑁆𑀘 𑀢𑀁 𑀯𑀻𑀭𑀁, 𑀲𑀳𑀸𑀯 𑀅𑀦𑀼𑀧𑀩𑁆𑀩𑀚𑀺𑀁.

𑁧𑁭𑁩.

‘‘𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀼;

𑀲𑀼𑀤𑁆𑀥𑀸𑀚𑀻𑀯𑁄 𑀲𑀢𑁄 𑀯𑀻𑀭𑁄, 𑀚𑀺𑀦𑀲𑀸𑀲𑀦𑀓𑀸𑀭𑀓𑁄.

𑁧𑁭𑁪.

‘‘𑀏𑀯𑀁 𑀯𑀺𑀳𑀭𑀫𑀸𑀦𑁄𑀳𑀁, 𑀧𑀸𑀧𑀫𑀺𑀢𑁆𑀢𑁂𑀦 𑀓𑁂𑀦𑀘𑀺;

𑀦𑀺𑀬𑁄𑀚𑀺𑀢𑁄 𑀅𑀦𑀸𑀘𑀸𑀭𑁂, 𑀲𑀼𑀫𑀕𑁆𑀕𑀸 𑀧𑀭𑀺𑀥𑀁𑀲𑀺𑀢𑁄.

𑁧𑁭𑁫.

‘‘𑀯𑀺𑀢𑀓𑁆𑀓𑀯𑀲𑀺𑀓𑁄 𑀳𑀼𑀢𑁆𑀯𑀸, 𑀲𑀸𑀲𑀦𑀢𑁄 𑀅𑀧𑀓𑁆𑀓𑀫𑀺𑀁;

𑀧𑀘𑁆𑀙𑀸 𑀢𑁂𑀦 𑀓𑀼𑀫𑀺𑀢𑁆𑀢𑁂𑀦, 𑀧𑀬𑀼𑀢𑁆𑀢𑁄 𑀫𑀸𑀢𑀼𑀖𑀸𑀢𑀦𑀁.

𑁧𑁭𑁬.

‘‘𑀅𑀓𑀭𑀺𑀁 𑀆𑀦𑀦𑁆𑀢𑀭𑀺𑀬𑀁 [𑀅𑀓𑀭𑀺𑀁 𑀦𑀦𑁆𑀢𑀭𑀺𑀬𑀜𑁆𑀘 (𑀲𑁆𑀬𑀸. 𑀓.)], 𑀖𑀸𑀢𑀬𑀺𑀁 𑀤𑀼𑀝𑁆𑀞𑀫𑀸𑀦𑀲𑁄;

𑀢𑀢𑁄 𑀘𑀼𑀢𑁄 𑀫𑀳𑀸𑀯𑀻𑀘𑀺𑀁, 𑀉𑀧𑀧𑀦𑁆𑀦𑁄 𑀲𑀼𑀤𑀸𑀭𑀼𑀡𑀁.

𑁧𑁭𑁭.

‘‘𑀯𑀺𑀦𑀺𑀧𑀸𑀢𑀕𑀢𑁄 ¶ 𑀲𑀦𑁆𑀢𑁄, 𑀲𑀁𑀲𑀭𑀺𑀁 𑀤𑀼𑀓𑁆𑀔𑀺𑀢𑁄 𑀘𑀺𑀭𑀁;

𑀦 𑀧𑀼𑀦𑁄 𑀅𑀤𑁆𑀤𑀲𑀁 𑀯𑀻𑀭𑀁, 𑀲𑀼𑀫𑁂𑀥𑀁 𑀦𑀭𑀧𑀼𑀗𑁆𑀕𑀯𑀁.

𑁧𑁭𑁮.

‘‘𑀅𑀲𑁆𑀫𑀺𑀁 ¶ 𑀓𑀧𑁆𑀧𑁂 𑀲𑀫𑀼𑀤𑁆𑀤𑀫𑁆𑀳𑀺, 𑀫𑀘𑁆𑀙𑁄 𑀆𑀲𑀺𑀁 𑀢𑀺𑀫𑀺𑀗𑁆𑀕𑀮𑁄;

𑀤𑀺𑀲𑁆𑀯𑀸𑀳𑀁 𑀲𑀸𑀕𑀭𑁂 𑀦𑀸𑀯𑀁, 𑀕𑁄𑀘𑀭𑀢𑁆𑀣𑀫𑀼𑀧𑀸𑀕𑀫𑀺𑀁.

𑁧𑁭𑁯.

‘‘𑀤𑀺𑀲𑁆𑀯𑀸 𑀫𑀁 𑀯𑀸𑀡𑀺𑀚𑀸 𑀪𑀻𑀢𑀸, 𑀩𑀼𑀤𑁆𑀥𑀲𑁂𑀝𑁆𑀞𑀫𑀦𑀼𑀲𑁆𑀲𑀭𑀼𑀁;

𑀕𑁄𑀢𑀫𑁄𑀢𑀺 𑀫𑀳𑀸𑀖𑁄𑀲𑀁, 𑀲𑀼𑀢𑁆𑀯𑀸 𑀢𑁂𑀳𑀺 𑀉𑀤𑀻𑀭𑀺𑀢𑀁.

𑁧𑁮𑁦.

‘‘𑀧𑀼𑀩𑁆𑀩𑀲𑀜𑁆𑀜𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁄 𑀓𑀸𑀮𑀗𑁆𑀓𑀢𑁄 𑀅𑀳𑀁;

𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑁂 𑀇𑀤𑁆𑀥𑁂, 𑀚𑀸𑀢𑁄 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀁.

𑁧𑁮𑁧.

‘‘𑀆𑀲𑀺𑀁 𑀥𑀫𑁆𑀫𑀭𑀼𑀘𑀺 𑀦𑀸𑀫, 𑀲𑀩𑁆𑀩𑀧𑀸𑀧𑀚𑀺𑀕𑀼𑀘𑁆𑀙𑀓𑁄;

𑀤𑀺𑀲𑁆𑀯𑀸𑀳𑀁 𑀮𑁄𑀓𑀧𑀚𑁆𑀚𑁄𑀢𑀁, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄.

𑁧𑁮𑁨.

‘‘𑀫𑀳𑀸𑀚𑁂𑀢𑀯𑀦𑀁 ¶ 𑀕𑀦𑁆𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀉𑀧𑁂𑀫𑀺 𑀩𑀼𑀤𑁆𑀥𑀁 𑀢𑀺𑀓𑁆𑀔𑀢𑁆𑀢𑀼𑀁, 𑀭𑀢𑁆𑀢𑀺𑀬𑀸 𑀤𑀺𑀯𑀲𑀲𑁆𑀲 𑀘.

𑁧𑁮𑁩.

‘‘𑀢𑀤𑀸 𑀤𑀺𑀲𑁆𑀯𑀸 𑀫𑀼𑀦𑀺 𑀆𑀳, 𑀘𑀺𑀭𑀁 𑀥𑀫𑁆𑀫𑀭𑀼𑀘𑀻𑀢𑀺 𑀫𑀁;

𑀢𑀢𑁄𑀳𑀁 𑀅𑀯𑀘𑀁 𑀩𑀼𑀤𑁆𑀥𑀁, 𑀧𑀼𑀩𑁆𑀩𑀓𑀫𑁆𑀫𑀧𑀪𑀸𑀯𑀺𑀢𑀁.

𑁧𑁮𑁪.

‘‘𑀲𑀼𑀘𑀺𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁, 𑀧𑀢𑀺𑀧𑀼𑀩𑁆𑀩𑁂𑀦 𑀯𑀺𑀲𑀼𑀤𑁆𑀥𑀧𑀘𑁆𑀘𑀬𑀁;

𑀅𑀳𑀫𑀚𑁆𑀚𑀲𑀼𑀧𑁂𑀓𑁆𑀔𑀦𑀁 ¶ 𑀯𑀢, 𑀢𑀯 𑀧𑀲𑁆𑀲𑀸𑀫𑀺 𑀦𑀺𑀭𑀼𑀧𑀫𑀁 𑀯𑀺𑀕𑁆𑀕𑀳𑀁 [𑀦𑀺𑀭𑀽𑀧𑀫𑀕𑁆𑀕𑀳𑀁 (𑀲𑀻.)].

𑁧𑁮𑁫.

‘‘𑀲𑀼𑀘𑀺𑀭𑀁 𑀯𑀺𑀳𑀢𑀢𑁆𑀢𑀫𑁄 𑀫𑀬𑀸, 𑀲𑀼𑀘𑀺𑀭𑀓𑁆𑀔𑁂𑀦 𑀦𑀤𑀻 𑀯𑀺𑀲𑁄𑀲𑀺𑀢𑀸;

𑀲𑀼𑀘𑀺𑀭𑀁 𑀅𑀫𑀮𑀁 𑀯𑀺𑀲𑁄𑀥𑀺𑀢𑀁, 𑀦𑀬𑀦𑀁 𑀜𑀸𑀡𑀫𑀬𑀁 𑀫𑀳𑀸𑀫𑀼𑀦𑁂.

𑁧𑁮𑁬.

‘‘𑀘𑀺𑀭𑀓𑀸𑀮𑀲𑀫𑀗𑁆𑀕𑀺𑀢𑁄 ¶ [𑀘𑀺𑀭𑀓𑀸𑀮𑀁 𑀲𑀫𑀸𑀕𑀢𑁄 (𑀧𑀻.)] 𑀢𑀬𑀸, 𑀅𑀯𑀺𑀦𑀝𑁆𑀞𑁄 𑀧𑀼𑀦𑀭𑀦𑁆𑀢𑀭𑀁 𑀘𑀺𑀭𑀁;

𑀧𑀼𑀦𑀭𑀚𑁆𑀚𑀲𑀫𑀸𑀕𑀢𑁄 𑀢𑀬𑀸, 𑀦 𑀳𑀺 𑀦𑀲𑁆𑀲𑀦𑁆𑀢𑀺 𑀓𑀢𑀸𑀦𑀺 𑀕𑁄𑀢𑀫.

𑁧𑁮𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁮𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁮𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀭𑀼𑀘𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀫𑁆𑀫𑀭𑀼𑀘𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀲𑀸𑀮𑀫𑀡𑁆𑀟𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁯𑁦.

‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 ¶ 𑀲𑀸𑀮𑀯𑀦𑀁, 𑀲𑀼𑀓𑀢𑁄 𑀅𑀲𑁆𑀲𑀫𑁄 𑀫𑀫;

𑀲𑀸𑀮𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀯𑀲𑀸𑀫𑀺 𑀯𑀺𑀧𑀺𑀦𑁂 𑀢𑀤𑀸.

𑁧𑁯𑁧.

‘‘𑀧𑀺𑀬𑀤𑀲𑁆𑀲𑀻 𑀘 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀲𑀸𑀮𑀯𑀦𑀫𑀼𑀧𑀸𑀕𑀫𑀺.

𑁧𑁯𑁨.

‘‘𑀅𑀲𑁆𑀲𑀫𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀯𑀦𑀁 𑀅𑀕𑀫𑀸𑀲𑀳𑀁;

𑀫𑀽𑀮𑀨𑀮𑀁 𑀕𑀯𑁂𑀲𑀦𑁆𑀢𑁄, 𑀆𑀳𑀺𑀡𑁆𑀟𑀸𑀫𑀺 𑀯𑀦𑁂 𑀢𑀤𑀸.

𑁧𑁯𑁩.

‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 ¶ 𑀲𑀫𑁆𑀩𑀼𑀤𑁆𑀥𑀁, 𑀧𑀺𑀬𑀤𑀲𑁆𑀲𑀺𑀁 𑀫𑀳𑀸𑀬𑀲𑀁;

𑀲𑀼𑀦𑀺𑀲𑀺𑀦𑁆𑀦𑀁 𑀲𑀫𑀸𑀧𑀦𑁆𑀦𑀁, 𑀯𑀺𑀭𑁄𑀘𑀦𑁆𑀢𑀁 𑀫𑀳𑀸𑀯𑀦𑁂.

𑁧𑁯𑁪.

‘‘𑀘𑀢𑀼𑀤𑀡𑁆𑀟𑁂 ¶ 𑀞𑀧𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁆𑀲 𑀉𑀧𑀭𑀻 𑀅𑀳𑀁;

𑀫𑀡𑁆𑀟𑀧𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀸𑀮𑀧𑀼𑀧𑁆𑀨𑁂𑀳𑀺 𑀙𑀸𑀤𑀬𑀺𑀁.

𑁧𑁯𑁫.

‘‘𑀲𑀢𑁆𑀢𑀸𑀳𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀫𑀡𑁆𑀟𑀧𑀁 𑀲𑀸𑀮𑀙𑀸𑀤𑀺𑀢𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀫𑀯𑀦𑁆𑀤𑀳𑀁.

𑁧𑁯𑁬.

‘‘𑀪𑀕𑀯𑀸 ¶ 𑀢𑀫𑁆𑀳𑀺 𑀲𑀫𑀬𑁂, 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀢𑁄;

𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁧𑁯𑁭.

‘‘𑀲𑀸𑀯𑀓𑁄 𑀯𑀭𑀼𑀡𑁄 𑀦𑀸𑀫, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀉𑀧𑀕𑀘𑁆𑀙𑀺 𑀯𑀺𑀦𑀸𑀬𑀓𑀁.

𑁧𑁯𑁮.

‘‘𑀧𑀺𑀬𑀤𑀲𑁆𑀲𑀻 𑀘 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀺𑀢𑀁 𑀧𑀸𑀢𑀼𑀓𑀭𑀻 𑀚𑀺𑀦𑁄.

𑁧𑁯𑁯.

‘‘𑀅𑀦𑀼𑀭𑀼𑀤𑁆𑀥𑁄 𑀉𑀧𑀝𑁆𑀞𑀸𑀓𑁄, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄;

𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀅𑀧𑀼𑀘𑁆𑀙𑀺𑀢𑁆𑀣 𑀫𑀳𑀸𑀫𑀼𑀦𑀺𑀁.

𑁨𑁦𑁦.

‘‘‘𑀓𑁄 𑀦𑀼 𑀔𑁄 𑀪𑀕𑀯𑀸 𑀳𑁂𑀢𑀼, 𑀲𑀺𑀢𑀓𑀫𑁆𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀓𑀸𑀭𑀡𑁂 𑀯𑀺𑀚𑁆𑀚𑀫𑀸𑀦𑀫𑁆𑀳𑀺, 𑀲𑀢𑁆𑀣𑀸 𑀧𑀸𑀢𑀼𑀓𑀭𑁂 𑀲𑀺𑀢𑀁’.

𑁨𑁦𑁧.

‘‘‘𑀲𑀢𑁆𑀢𑀸𑀳𑀁 𑀲𑀸𑀮𑀘𑁆𑀙𑀤𑀦𑀁 [𑀧𑀼𑀧𑁆𑀨𑀙𑀤𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀬𑁄 𑀫𑁂 𑀥𑀸𑀭𑁂𑀲𑀺 𑀫𑀸𑀡𑀯𑁄;

𑀢𑀲𑁆𑀲 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀲𑀺𑀢𑀁 𑀧𑀸𑀢𑀼𑀓𑀭𑀺𑀁 𑀅𑀳𑀁.

𑁨𑁦𑁨.

‘‘‘𑀅𑀦𑁄𑀓𑀸𑀲𑀁 𑀦 𑀧𑀲𑁆𑀲𑀸𑀫𑀺, 𑀬𑀢𑁆𑀣 [𑀬𑀁 𑀢𑀁 (𑀲𑁆𑀬𑀸. 𑀧𑀻. 𑀓.)] 𑀧𑀼𑀜𑁆𑀜𑀁 𑀯𑀺𑀧𑀘𑁆𑀘𑀢𑀺;

𑀤𑁂𑀯𑀮𑁄𑀓𑁂 ¶ 𑀫𑀦𑀼𑀲𑁆𑀲𑁂 𑀯𑀸, 𑀑𑀓𑀸𑀲𑁄𑀯 𑀦 𑀲𑀫𑁆𑀫𑀢𑀺.

𑁨𑁦𑁩.

‘‘‘𑀤𑁂𑀯𑀮𑁄𑀓𑁂 ¶ 𑀯𑀲𑀦𑁆𑀢𑀲𑁆𑀲, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀬𑀸𑀯𑀢𑀸 𑀧𑀭𑀺𑀲𑀸 𑀢𑀲𑁆𑀲, 𑀲𑀸𑀮𑀘𑁆𑀙𑀦𑁆𑀦𑀸 𑀪𑀯𑀺𑀲𑁆𑀲𑀢𑀺.

𑁨𑁦𑁪.

‘‘‘𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀦𑀘𑁆𑀘𑁂𑀳𑀺, 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘;

𑀭𑀫𑀺𑀲𑁆𑀲𑀢𑀺 𑀲𑀤𑀸 𑀲𑀦𑁆𑀢𑁄, 𑀧𑀼𑀜𑁆𑀜𑀓𑀫𑁆𑀫𑀲𑀫𑀸𑀳𑀺𑀢𑁄.

𑁨𑁦𑁫.

‘‘‘𑀬𑀸𑀯𑀢𑀸 𑀧𑀭𑀺𑀲𑀸 𑀢𑀲𑁆𑀲, 𑀕𑀦𑁆𑀥𑀕𑀦𑁆𑀥𑀻 𑀪𑀯𑀺𑀲𑁆𑀲𑀢𑀺;

𑀲𑀸𑀮𑀲𑁆𑀲 𑀧𑀼𑀧𑁆𑀨𑀯𑀲𑁆𑀲𑁄 𑀘, 𑀧𑀯𑀲𑁆𑀲𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁨𑁦𑁬.

‘‘‘𑀢𑀢𑁄 𑀘𑀼𑀢𑁄𑀬𑀁 𑀫𑀦𑀼𑀚𑁄, 𑀫𑀸𑀦𑀼𑀲𑀁 𑀆𑀕𑀫𑀺𑀲𑁆𑀲𑀢𑀺;

𑀇𑀥𑀸𑀧𑀺 𑀲𑀸𑀮𑀘𑁆𑀙𑀤𑀦𑀁, 𑀲𑀩𑁆𑀩𑀓𑀸𑀮𑀁 𑀥𑀭𑀺𑀲𑁆𑀲𑀢𑀺 [𑀥𑀭𑀺𑀬𑀢𑀺 (𑀲𑀻. 𑀧𑀻.)].

𑁨𑁦𑁭.

‘‘‘𑀇𑀥 ¶ 𑀦𑀘𑁆𑀘𑀜𑁆𑀘 𑀕𑀻𑀢𑀜𑁆𑀘, 𑀲𑀫𑁆𑀫𑀢𑀸𑀴𑀲𑀫𑀸𑀳𑀺𑀢𑀁;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺 𑀫𑀁 𑀦𑀺𑀘𑁆𑀘𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦𑁮.

‘‘‘𑀉𑀕𑁆𑀕𑀘𑁆𑀙𑀦𑁆𑀢𑁂 𑀘 𑀲𑀽𑀭𑀺𑀬𑁂, 𑀲𑀸𑀮𑀯𑀲𑁆𑀲𑀁 𑀧𑀯𑀲𑁆𑀲𑀢𑀺;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑀁, 𑀯𑀲𑁆𑀲𑀢𑁂 𑀲𑀩𑁆𑀩𑀓𑀸𑀮𑀺𑀓𑀁.

𑁨𑁦𑁯.

‘‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁧𑁦.

‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁨𑁧𑁧.

‘‘‘𑀥𑀫𑁆𑀫𑀁 𑀅𑀪𑀺𑀲𑀫𑁂𑀦𑁆𑀢𑀲𑁆𑀲, 𑀲𑀸𑀮𑀘𑁆𑀙𑀦𑁆𑀦𑀁 𑀪𑀯𑀺𑀲𑁆𑀲𑀢𑀺;

𑀘𑀺𑀢𑀓𑁂 𑀛𑀸𑀬𑀫𑀸𑀦𑀲𑁆𑀲, 𑀙𑀤𑀦𑀁 𑀢𑀢𑁆𑀣 𑀳𑁂𑀲𑁆𑀲𑀢𑀺’.

𑁨𑁧𑁨.

‘‘𑀯𑀺𑀧𑀸𑀓𑀁 𑀓𑀺𑀢𑁆𑀢𑀬𑀺𑀢𑁆𑀯𑀸𑀦, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀧𑁆𑀧𑁂𑀦𑁆𑀢𑁄 𑀥𑀫𑁆𑀫𑀯𑀼𑀝𑁆𑀞𑀺𑀬𑀸.

𑁨𑁧𑁩.

‘‘𑀢𑀺𑀁𑀲𑀓𑀧𑁆𑀧𑀸𑀦𑀺 ¶ ¶ 𑀤𑁂𑀯𑁂𑀲𑀼, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀝𑁆𑀞𑀺 𑀘 𑀲𑀢𑁆𑀢𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁨𑁧𑁪.

‘‘𑀤𑁂𑀯𑀮𑁄𑀓𑀸 𑀇𑀥𑀸𑀕𑀦𑁆𑀢𑁆𑀯𑀸, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁;

𑀇𑀥𑀸𑀧𑀺 𑀲𑀸𑀮𑀘𑁆𑀙𑀤𑀦𑀁, 𑀫𑀡𑁆𑀟𑀧𑀲𑁆𑀲 𑀇𑀤𑀁 𑀨𑀮𑀁.

𑁨𑁧𑁫.

‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀇𑀥𑀸𑀧𑀺 𑀲𑀸𑀮𑀘𑁆𑀙𑀤𑀦𑀁, 𑀳𑁂𑀲𑁆𑀲𑀢𑀺 𑀲𑀩𑁆𑀩𑀓𑀸𑀮𑀺𑀓𑀁.

𑁨𑁧𑁬.

‘‘𑀫𑀳𑀸𑀫𑀼𑀦𑀺𑀁 𑀢𑁄𑀲𑀬𑀺𑀢𑁆𑀯𑀸, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁨𑁧𑁭.

‘‘𑀅𑀝𑁆𑀞𑀸𑀭𑀲𑁂 ¶ 𑀓𑀧𑁆𑀧𑀲𑀢𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁧𑁮.

𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁧𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁨𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀸𑀮𑀫𑀡𑁆𑀟𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀸𑀮𑀫𑀡𑁆𑀟𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀧𑀁𑀲𑀼𑀓𑀽𑀮𑀯𑀕𑁆𑀕𑁄 𑀏𑀓𑀽𑀦𑀧𑀜𑁆𑀜𑀸𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀁𑀲𑀼𑀓𑀽𑀮𑀁 ¶ 𑀩𑀼𑀤𑁆𑀥𑀲𑀜𑁆𑀜𑀻, 𑀪𑀺𑀲𑀤𑁄 𑀜𑀸𑀡𑀓𑀺𑀢𑁆𑀢𑀓𑁄;

𑀘𑀦𑁆𑀤𑀦𑀻 𑀥𑀸𑀢𑀼𑀧𑀽𑀚𑀻 𑀘, 𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑁄𑀧𑀺 𑀘.

𑀢𑀭𑀡𑁄 𑀥𑀫𑁆𑀫𑀭𑀼𑀘𑀺𑀓𑁄, 𑀲𑀸𑀮𑀫𑀡𑁆𑀟𑀧𑀺𑀬𑁄 𑀢𑀣𑀸;

𑀲𑀢𑀸𑀦𑀺 𑀤𑁆𑀯𑁂 𑀳𑁄𑀦𑁆𑀢𑀺 𑀕𑀸𑀣𑀸, 𑀊𑀦𑀯𑀻𑀲𑀢𑀺𑀫𑁂𑀯 𑀘.

𑁫𑁦. 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀯𑀕𑁆𑀕𑁄

𑁧. 𑀢𑀺𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀓𑀡𑀺𑀓𑀸𑀭𑀁𑀯 ¶ ¶ ¶ 𑀚𑁄𑀢𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀯𑀺𑀧𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁨.

‘‘𑀢𑀻𑀡𑀺 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀺, 𑀧𑀕𑁆𑀕𑀬𑁆𑀳 𑀅𑀪𑀺𑀭𑁄𑀧𑀬𑀺𑀁;

𑀲𑀫𑁆𑀩𑀼𑀤𑁆𑀥𑀫𑀪𑀺𑀧𑀽𑀚𑁂𑀢𑁆𑀯𑀸, 𑀕𑀘𑁆𑀙𑀸𑀫𑀺 𑀤𑀓𑁆𑀔𑀺𑀡𑀸𑀫𑀼𑀔𑁄.

𑁩.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁪.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀁𑀲𑀼𑀓𑀽𑀮𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ ¶ , 𑀉𑀤𑀗𑁆𑀕𑀡𑁄 𑀦𑀸𑀫 𑀧𑀩𑁆𑀩𑀢𑁄;

𑀢𑀢𑁆𑀣𑀤𑁆𑀤𑀲𑀁 𑀧𑀁𑀲𑀼𑀓𑀽𑀮𑀁, 𑀤𑀼𑀫𑀕𑁆𑀕𑀫𑁆𑀳𑀺 𑀯𑀺𑀮𑀫𑁆𑀩𑀺𑀢𑀁.

𑁯.

‘‘𑀢𑀻𑀡𑀺 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀺, 𑀑𑀘𑀺𑀦𑀺𑀢𑁆𑀯𑀸𑀦𑀳𑀁 𑀢𑀤𑀸;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀁𑀲𑀼𑀓𑀽𑀮𑀫𑀧𑀽𑀚𑀬𑀺𑀁.

𑁧𑁦.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁧.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀽𑀚𑀺𑀢𑁆𑀯𑀸 𑀅𑀭𑀳𑀤𑁆𑀥𑀚𑀁.

𑁧𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁩.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀁𑀲𑀼𑀓𑀽𑀮𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀁𑀲𑀼𑀓𑀽𑀮𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫.

‘‘𑀯𑀦𑀓𑀫𑁆𑀫𑀺𑀓𑁄 ¶ 𑀧𑀼𑀭𑁂 𑀆𑀲𑀺𑀁, 𑀧𑀺𑀢𑀼𑀫𑀸𑀢𑀼𑀫𑀢𑁂𑀦𑀳𑀁 [𑀧𑀺𑀢𑀼𑀧𑁂𑀢𑀸𑀫𑀳𑁂𑀦𑀳𑀁 (𑀲𑀻. 𑀲𑁆𑀬𑀸. 𑀧𑀻.)];

𑀧𑀲𑀼𑀫𑀸𑀭𑁂𑀦 𑀚𑀻𑀯𑀸𑀫𑀺, 𑀓𑀼𑀲𑀮𑀁 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁬.

‘‘𑀫𑀫 𑀆𑀲𑀬𑀲𑀸𑀫𑀦𑁆𑀢𑀸, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀧𑀤𑀸𑀦𑀺 𑀢𑀻𑀡𑀺 𑀤𑀲𑁆𑀲𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀘𑀓𑁆𑀔𑀼𑀫𑀸.

𑁧𑁭.

‘‘𑀅𑀓𑁆𑀓𑀦𑁆𑀢𑁂 𑀘 𑀧𑀤𑁂 𑀤𑀺𑀲𑁆𑀯𑀸, 𑀢𑀺𑀲𑁆𑀲𑀦𑀸𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀤𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁧𑁮.

‘‘𑀓𑁄𑀭𑀡𑁆𑀟𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀧𑀸𑀤𑀧𑀁 𑀥𑀭𑀡𑀻𑀭𑀼𑀳𑀁;

𑀲𑀓𑁄𑀲𑀓𑀁 𑀕𑀳𑁂𑀢𑁆𑀯𑀸𑀦, 𑀧𑀤𑀲𑁂𑀝𑁆𑀞𑀫𑀧𑀽𑀚𑀬𑀺𑀁 [𑀧𑀤𑀲𑁂𑀝𑁆𑀞𑁂 𑀅𑀧𑀽𑀚𑀬𑀺𑀁 (𑀲𑀻. 𑀧𑀻.)].

𑁧𑁯.

‘‘𑀢𑁂𑀦 ¶ ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁨𑁦.

‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀓𑁄𑀭𑀡𑁆𑀟𑀓𑀙𑀯𑀺 𑀳𑁄𑀫𑀺, 𑀲𑀼𑀧𑁆𑀧𑀪𑀸𑀲𑁄 [𑀲𑀧𑀪𑀸𑀲𑁄 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀪𑀯𑀸𑀫𑀳𑀁.

𑁨𑁧.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀤𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁩.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀓𑀺𑀁𑀲𑀼𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫.

‘‘𑀓𑀺𑀁𑀲𑀼𑀓𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀆𑀓𑀸𑀲𑁂 𑀅𑀪𑀺𑀧𑀽𑀚𑀬𑀺𑀁.

𑁨𑁬.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁨𑁭.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀺𑀁𑀲𑀼𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀺𑀁𑀲𑀼𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀉𑀧𑀟𑁆𑀠𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧.

‘‘𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀢𑁄 ¶ ¶ , 𑀲𑀼𑀚𑀸𑀢𑁄 𑀦𑀸𑀫 𑀲𑀸𑀯𑀓𑁄;

𑀧𑀁𑀲𑀼𑀓𑀽𑀮𑀁 𑀕𑀯𑁂𑀲𑀦𑁆𑀢𑁄, 𑀲𑀗𑁆𑀓𑀸𑀭𑁂 𑀘𑀭𑀢𑁂 [𑀘𑀭𑀢𑀻 (𑀲𑀻. 𑀓.)] 𑀢𑀤𑀸.

𑁩𑁨.

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀧𑀭𑁂𑀲𑀁 𑀪𑀢𑀓𑁄 𑀅𑀳𑀁;

𑀉𑀧𑀟𑁆𑀠𑀤𑀼𑀲𑁆𑀲𑀁 𑀤𑀢𑁆𑀯𑀸𑀦, 𑀲𑀺𑀭𑀲𑀸 𑀅𑀪𑀺𑀯𑀸𑀤𑀬𑀺𑀁.

𑁩𑁩.

‘‘𑀢𑁂𑀦 ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁩𑁪.

‘‘𑀢𑁂𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 ¶ 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁩𑁫.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀉𑀧𑀟𑁆𑀠𑀤𑀼𑀲𑁆𑀲𑀤𑀸𑀦𑁂𑀦, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑁄.

𑁩𑁬.

‘‘𑀇𑀘𑁆𑀙𑀫𑀸𑀦𑁄 𑀘𑀳𑀁 𑀅𑀚𑁆𑀚, 𑀲𑀓𑀸𑀦𑀦𑀁 𑀲𑀧𑀩𑁆𑀩𑀢𑀁;

𑀔𑁄𑀫𑀤𑀼𑀲𑁆𑀲𑁂𑀳𑀺 𑀙𑀸𑀤𑁂𑀬𑁆𑀬𑀁, 𑀅𑀟𑁆𑀠𑀤𑀼𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁩𑁭.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀟𑁆𑀠𑀤𑀼𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁩𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀟𑁆𑀠𑀤𑀼𑀲𑁆𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀧𑀟𑁆𑀠𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀖𑀢𑀫𑀡𑁆𑀟𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁧.

‘‘𑀲𑀼𑀘𑀺𑀦𑁆𑀢𑀺𑀢𑀁 𑀪𑀕𑀯𑀦𑁆𑀢𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀉𑀧𑀯𑀺𑀝𑁆𑀞𑀁 𑀫𑀳𑀸𑀭𑀜𑁆𑀜𑀁, 𑀯𑀸𑀢𑀸𑀩𑀸𑀥𑁂𑀦 𑀧𑀻𑀴𑀺𑀢𑀁.

𑁪𑁨.

‘‘𑀤𑀺𑀲𑁆𑀯𑀸 ¶ 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀖𑀢𑀫𑀡𑁆𑀟𑀫𑀼𑀧𑀸𑀦𑀬𑀺𑀁;

𑀓𑀢𑀢𑁆𑀢𑀸 𑀆𑀘𑀺𑀢𑀢𑁆𑀢𑀸 [𑀉𑀧𑀘𑀺𑀢𑀢𑁆𑀢𑀸 (𑀲𑁆𑀬𑀸. 𑀓.)] 𑀘, 𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀅𑀬𑀁.

𑁪𑁩.

‘‘𑀫𑀳𑀸𑀲𑀫𑀼𑀤𑁆𑀤𑀸 𑀘𑀢𑁆𑀢𑀸𑀭𑁄, 𑀖𑀢𑀁 𑀲𑀫𑁆𑀧𑀚𑁆𑀚𑀭𑁂 𑀫𑀫;

𑀅𑀬𑀜𑁆𑀘 𑀧𑀣𑀯𑀻 𑀖𑁄𑀭𑀸, 𑀅𑀧𑁆𑀧𑀫𑀸𑀡𑀸 𑀅𑀲𑀗𑁆𑀔𑀺𑀬𑀸.

𑁪𑁪.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀪𑀯𑀢𑁂 𑀫𑀥𑀼𑀲𑀓𑁆𑀓𑀭𑀸 [𑀫𑀥𑀼𑀲𑀓𑁆𑀔𑀭𑀸 (𑀲𑁆𑀬𑀸. 𑀓.)];

𑀘𑀸𑀢𑀼𑀤𑁆𑀤𑀻𑀧𑀸 𑀇𑀫𑁂 𑀭𑀼𑀓𑁆𑀔𑀸, 𑀧𑀸𑀤𑀧𑀸 𑀥𑀭𑀡𑀻𑀭𑀼𑀳𑀸.

𑁪𑁫.

‘‘𑀫𑀫 ¶ 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀓𑀧𑁆𑀧𑀭𑀼𑀓𑁆𑀔𑀸 𑀪𑀯𑀦𑁆𑀢𑀺 𑀢𑁂;

𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁪𑁬.

‘‘𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁪𑁭.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 [𑀙𑀦𑀯𑀼𑀢𑁂 𑀇𑀢𑁄 (𑀲𑀻.)] 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀖𑀢𑀫𑀡𑁆𑀟𑀲𑁆𑀲𑀺𑀤𑀁 𑀨𑀮𑀁.

𑁪𑁮.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀖𑀢𑀫𑀡𑁆𑀟𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀖𑀢𑀫𑀡𑁆𑀟𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀉𑀤𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧.

‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 ¶ , 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀦𑀼𑀢𑁆𑀢𑀭𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀸𑀦𑀻𑀖𑀝𑀫𑀧𑀽𑀭𑀬𑀺𑀁.

𑁫𑁨.

‘‘𑀧𑀩𑁆𑀩𑀢𑀕𑁆𑀕𑁂 𑀤𑀼𑀫𑀕𑁆𑀕𑁂 𑀯𑀸, 𑀆𑀓𑀸𑀲𑁂 𑀯𑀸𑀣 𑀪𑀽𑀫𑀺𑀬𑀁;

𑀬𑀤𑀸 𑀧𑀸𑀦𑀻𑀬𑀫𑀺𑀘𑁆𑀙𑀸𑀫𑀺, 𑀔𑀺𑀧𑁆𑀧𑀁 𑀦𑀺𑀩𑁆𑀩𑀢𑁆𑀢𑀢𑁂 𑀫𑀫.

𑁫𑁩.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁪.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀧𑀼𑀮𑀺𑀦𑀣𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁭.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ , 𑀬𑀫𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁫𑁮.

‘‘𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀘𑀢𑀼𑀤𑁆𑀤𑀲𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀧𑀭𑀺𑀘𑀭𑀦𑁆𑀢𑀺 𑀫𑀁.

𑁫𑁯.

‘‘𑀧𑀝𑀺𑀲𑀮𑁆𑀮𑀻𑀦𑀓𑁄 𑀲𑀦𑁆𑀢𑁄, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀲𑀩𑁆𑀩𑁄 𑀚𑀦𑁄 𑀫𑀁 𑀧𑀽𑀚𑁂𑀢𑀺, 𑀦𑀸𑀳𑀁 𑀧𑀽𑀚𑁂𑀫𑀺 𑀓𑀺𑀜𑁆𑀘𑀦𑀁.

𑁬𑁦.

‘‘‘𑀦 𑀫𑁂 𑀑𑀯𑀸𑀤𑀓𑁄 𑀅𑀢𑁆𑀣𑀺, 𑀯𑀢𑁆𑀢𑀸 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;

𑀅𑀦𑀸𑀘𑀭𑀺𑀬𑀼𑀧𑀚𑁆𑀛𑀸𑀬𑁄, 𑀯𑀦𑁂 𑀯𑀸𑀲𑀁 𑀉𑀧𑁂𑀫𑀳𑀁.

𑁬𑁧.

‘‘‘𑀉𑀧𑀸𑀲𑀫𑀸𑀦𑁄 𑀬𑀫𑀳𑀁, 𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀳𑁂;

𑀲𑁄 𑀫𑁂 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀯𑀦𑀯𑀸𑀲𑁄 𑀦𑀺𑀭𑀢𑁆𑀣𑀓𑁄.

𑁬𑁨.

‘‘‘𑀆𑀬𑀸𑀕𑀁 𑀫𑁂 𑀕𑀯𑁂𑀲𑀺𑀲𑁆𑀲𑀁, 𑀕𑀭𑀼𑀁 𑀪𑀸𑀯𑀦𑀺𑀬𑀁 𑀢𑀣𑀸;

𑀲𑀸𑀯𑀲𑁆𑀲𑀬𑁄 𑀯𑀲𑀺𑀲𑁆𑀲𑀸𑀫𑀺, 𑀦 𑀓𑁄𑀘𑀺 𑀕𑀭𑀳𑀺𑀲𑁆𑀲𑀢𑀺’.

𑁬𑁩.

‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀁𑀲𑀼𑀤𑁆𑀥𑀧𑀼𑀮𑀺𑀦𑀸𑀓𑀺𑀡𑁆𑀡𑀸, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁬𑁪.

‘‘𑀦𑀤𑀺𑀁 ¶ 𑀅𑀫𑀭𑀺𑀓𑀁 𑀦𑀸𑀫, 𑀉𑀧𑀕𑀦𑁆𑀢𑁆𑀯𑀸𑀦𑀳𑀁 𑀢𑀤𑀸;

𑀲𑀁𑀯𑀟𑁆𑀠𑀬𑀺𑀢𑁆𑀯𑀸 𑀧𑀼𑀮𑀺𑀦𑀁, 𑀅𑀓𑀁 𑀧𑀼𑀮𑀺𑀦𑀘𑁂𑀢𑀺𑀬𑀁.

𑁬𑁫.

‘‘𑀬𑁂 ¶ 𑀢𑁂 𑀅𑀳𑁂𑀲𑀼𑀁 𑀲𑀫𑁆𑀩𑀼𑀤𑁆𑀥𑀸, 𑀪𑀯𑀦𑁆𑀢𑀓𑀭𑀡𑀸 𑀫𑀼𑀦𑀻;

𑀢𑁂𑀲𑀁 𑀏𑀢𑀸𑀤𑀺𑀲𑁄 𑀣𑀽𑀧𑁄, 𑀢𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀫𑀳𑀁.

𑁬𑁬.

‘‘𑀓𑀭𑀺𑀢𑁆𑀯𑀸 ¶ 𑀧𑀼𑀮𑀺𑀦𑀁 [𑀧𑀼𑀴𑀺𑀦𑁂 (𑀲𑀻. 𑀲𑁆𑀬𑀸. 𑀧𑀻.)] 𑀣𑀽𑀧𑀁, 𑀲𑁄𑀯𑀡𑁆𑀡𑀁 𑀫𑀸𑀧𑀬𑀺𑀁 𑀅𑀳𑀁;

𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀺, 𑀲𑀳𑀲𑁆𑀲𑁂 𑀢𑀻𑀡𑀺 𑀧𑀽𑀚𑀬𑀺𑀁.

𑁬𑁭.

‘‘𑀲𑀸𑀬𑀧𑀸𑀢𑀁 𑀦𑀫𑀲𑁆𑀲𑀸𑀫𑀺, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀯𑀦𑁆𑀤𑀺𑀁 𑀧𑀼𑀮𑀺𑀦𑀘𑁂𑀢𑀺𑀬𑀁.

𑁬𑁮.

‘‘𑀬𑀤𑀸 𑀓𑀺𑀮𑁂𑀲𑀸 𑀚𑀸𑀬𑀦𑁆𑀢𑀺, 𑀯𑀺𑀢𑀓𑁆𑀓𑀸 𑀕𑁂𑀳𑀦𑀺𑀲𑁆𑀲𑀺𑀢𑀸;

𑀲𑀭𑀸𑀫𑀺 𑀲𑀼𑀓𑀢𑀁 𑀣𑀽𑀧𑀁, 𑀧𑀘𑁆𑀘𑀯𑁂𑀓𑁆𑀔𑀸𑀫𑀺 𑀢𑀸𑀯𑀤𑁂.

𑁬𑁯.

‘‘𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀁, 𑀲𑀢𑁆𑀣𑀯𑀸𑀳𑀁 𑀯𑀺𑀦𑀸𑀬𑀓𑀁;

𑀓𑀺𑀮𑁂𑀲𑁂 𑀲𑀁𑀯𑀲𑁂𑀬𑁆𑀬𑀸𑀲𑀺, 𑀦 𑀬𑀼𑀢𑁆𑀢𑀁 𑀢𑀯 𑀫𑀸𑀭𑀺𑀲.

𑁭𑁦.

‘‘𑀲𑀳 ¶ 𑀆𑀯𑀚𑁆𑀚𑀺𑀢𑁂 𑀣𑀽𑀧𑁂, 𑀕𑀸𑀭𑀯𑀁 𑀳𑁄𑀢𑀺 𑀫𑁂 𑀢𑀤𑀸;

𑀓𑀼𑀯𑀺𑀢𑀓𑁆𑀓𑁂 𑀯𑀺𑀦𑁄𑀤𑁂𑀲𑀺𑀁, 𑀦𑀸𑀕𑁄 𑀢𑀼𑀢𑁆𑀢𑀝𑁆𑀝𑀺𑀢𑁄 𑀬𑀣𑀸.

𑁭𑁧.

‘‘𑀏𑀯𑀁 𑀯𑀺𑀳𑀭𑀫𑀸𑀦𑀁 𑀫𑀁, 𑀫𑀘𑁆𑀘𑀼𑀭𑀸𑀚𑀸𑀪𑀺𑀫𑀤𑁆𑀤𑀣;

𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀲𑀦𑁆𑀢𑁄, 𑀩𑁆𑀭𑀳𑁆𑀫𑀮𑁄𑀓𑀫𑀕𑀘𑁆𑀙𑀳𑀁.

𑁭𑁨.

‘‘𑀬𑀸𑀯𑀢𑀸𑀬𑀼𑀁 𑀯𑀲𑀺𑀢𑁆𑀯𑀸𑀦, 𑀢𑀺𑀤𑀺𑀯𑁂 [𑀢𑀺𑀤𑀲𑁂 (𑀲𑀻. 𑀧𑀻.)] 𑀉𑀧𑀧𑀚𑁆𑀚𑀳𑀁;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁭𑁩.

‘‘𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁭𑁪.

‘‘𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀁 ¶ [𑀢𑁂𑀲𑀁 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀁 (𑀲𑀻.)], 𑀯𑀺𑀧𑀸𑀓𑀁 𑀅𑀦𑀼𑀪𑁄𑀫𑀳𑀁;

𑀥𑀸𑀢𑀻𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 [𑀫𑁂 (𑀓.)] 𑀪𑀯𑁂.

𑁭𑁫.

‘‘𑀣𑀽𑀧𑀲𑁆𑀲 𑀧𑀭𑀺𑀘𑀺𑀡𑁆𑀡𑀢𑁆𑀢𑀸, 𑀭𑀚𑁄𑀚𑀮𑁆𑀮𑀁 𑀦 𑀮𑀺𑀫𑁆𑀧𑀢𑀺;

𑀕𑀢𑁆𑀢𑁂 𑀲𑁂𑀤𑀸 𑀦 𑀫𑀼𑀘𑁆𑀘𑀦𑁆𑀢𑀺, 𑀲𑀼𑀧𑁆𑀧𑀪𑀸𑀲𑁄 𑀪𑀯𑀸𑀫𑀳𑀁.

𑁭𑁬.

‘‘𑀅𑀳𑁄 𑀫𑁂 𑀲𑀼𑀓𑀢𑁄 𑀣𑀽𑀧𑁄, 𑀲𑀼𑀤𑀺𑀝𑁆𑀞𑀸𑀫𑀭𑀺𑀓𑀸 𑀦𑀤𑀻;

𑀣𑀽𑀧𑀁 𑀓𑀢𑁆𑀯𑀸𑀦 𑀧𑀼𑀮𑀺𑀦𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁭𑁭.

‘‘𑀓𑀼𑀲𑀮𑀁 𑀓𑀢𑁆𑀢𑀼𑀓𑀸𑀫𑁂𑀦, 𑀚𑀦𑁆𑀢𑀼𑀦𑀸 𑀲𑀸𑀭𑀕𑀸𑀳𑀺𑀦𑀸;

𑀦𑀢𑁆𑀣𑀺 𑀔𑁂𑀢𑁆𑀢𑀁 𑀅𑀔𑁂𑀢𑁆𑀢𑀁 𑀯𑀸, 𑀧𑀝𑀺𑀧𑀢𑁆𑀢𑀻𑀯 𑀲𑀸𑀥𑀓𑀸 [𑀲𑀸𑀭𑀺𑀓𑀸 (𑀧𑀻.), 𑀲𑀸𑀭𑀓𑀸 (𑀲𑁆𑀬𑀸.), 𑀲𑀸𑀭𑀢𑀸 (𑀓.)].

𑁭𑁮.

‘‘𑀬𑀣𑀸𑀧𑀺 𑀩𑀮𑀯𑀸 𑀧𑁄𑀲𑁄, 𑀅𑀡𑁆𑀡𑀯𑀁 𑀢𑀭𑀺𑀢𑀼𑀲𑁆𑀲𑀳𑁂;

𑀧𑀭𑀺𑀢𑁆𑀢𑀁 𑀓𑀝𑁆𑀞𑀫𑀸𑀤𑀸𑀬, 𑀧𑀓𑁆𑀔𑀦𑁆𑀤𑁂𑀬𑁆𑀬 𑀫𑀳𑀸𑀲𑀭𑀁.

𑁭𑁯.

‘‘𑀇𑀫𑀸𑀳𑀁 𑀓𑀝𑁆𑀞𑀁 𑀦𑀺𑀲𑁆𑀲𑀸𑀬, 𑀢𑀭𑀺𑀲𑁆𑀲𑀸𑀫𑀺 𑀫𑀳𑁄𑀤𑀥𑀺𑀁;

𑀉𑀲𑁆𑀲𑀸𑀳𑁂𑀦 𑀯𑀻𑀭𑀺𑀬𑁂𑀦, 𑀢𑀭𑁂𑀬𑁆𑀬 𑀉𑀤𑀥𑀺𑀁 𑀦𑀭𑁄.

𑁮𑁦.

‘‘𑀢𑀣𑁂𑀯 ¶ ¶ 𑀫𑁂 𑀓𑀢𑀁 𑀓𑀫𑁆𑀫𑀁, 𑀧𑀭𑀺𑀢𑁆𑀢𑀁 𑀣𑁄𑀓𑀓𑀜𑁆𑀘 𑀬𑀁;

𑀢𑀁 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀸𑀬, 𑀲𑀁𑀲𑀸𑀭𑀁 𑀲𑀫𑀢𑀺𑀓𑁆𑀓𑀫𑀺𑀁.

𑁮𑁧.

‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁮𑁨.

‘‘𑀲𑀤𑁆𑀥𑀸 𑀫𑀸𑀢𑀸 𑀧𑀺𑀢𑀸 𑀫𑀬𑁆𑀳𑀁, 𑀩𑀼𑀤𑁆𑀥𑀲𑁆𑀲 𑀲𑀭𑀡𑀁 𑀕𑀢𑀸;

𑀉𑀪𑁄 𑀤𑀺𑀝𑁆𑀞𑀧𑀤𑀸 𑀏𑀢𑁂, 𑀅𑀦𑀼𑀯𑀢𑁆𑀢𑀦𑁆𑀢𑀺 𑀲𑀸𑀲𑀦𑀁.

𑁮𑁩.

‘‘𑀩𑁄𑀥𑀺𑀧𑀧𑀝𑀺𑀓𑀁 ¶ 𑀕𑀬𑁆𑀳, 𑀲𑁄𑀡𑁆𑀡𑀣𑀽𑀧𑀫𑀓𑀸𑀭𑀬𑀼𑀁;

𑀲𑀸𑀬𑀧𑀸𑀢𑀁 [𑀲𑀸𑀬𑀁 𑀧𑀸𑀢𑀁 (𑀲𑁆𑀬𑀸. 𑀓.)] 𑀦𑀫𑀲𑁆𑀲𑀦𑁆𑀢𑀺, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀸.

𑁮𑁪.

‘‘𑀉𑀧𑁄𑀲𑀣𑀫𑁆𑀳𑀺 ¶ 𑀤𑀺𑀯𑀲𑁂, 𑀲𑁄𑀡𑁆𑀡𑀣𑀽𑀧𑀁 𑀯𑀺𑀦𑀻𑀳𑀭𑀼𑀁;

𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀓𑀺𑀢𑁆𑀢𑁂𑀦𑁆𑀢𑀸, 𑀢𑀺𑀬𑀸𑀫𑀁 𑀯𑀻𑀢𑀺𑀦𑀸𑀫𑀬𑀼𑀁.

𑁮𑁫.

‘‘𑀲𑀳 𑀤𑀺𑀲𑁆𑀯𑀸𑀦𑀳𑀁 [𑀧𑀲𑀸𑀤𑁂𑀢𑁆𑀯𑀸𑀦𑀳𑀁 (𑀓.)] 𑀣𑀽𑀧𑀁, 𑀲𑀭𑀺𑀁 𑀧𑀼𑀮𑀺𑀦𑀘𑁂𑀢𑀺𑀬𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑀤𑁆𑀯𑀸𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁮𑁬.

‘‘𑀕𑀯𑁂𑀲𑀫𑀸𑀦𑁄 𑀢𑀁 𑀯𑀻𑀭𑀁, 𑀥𑀫𑁆𑀫𑀲𑁂𑀦𑀸𑀧𑀢𑀺𑀤𑁆𑀤𑀲𑀁;

𑀅𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁮𑁭.

‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁮𑁮.

‘‘𑀤𑀸𑀭𑀓𑁂𑀦𑁂𑀯 𑀲𑀦𑁆𑀢𑁂𑀦, 𑀓𑀺𑀭𑀺𑀬𑀁 𑀦𑀺𑀝𑁆𑀞𑀺𑀢𑀁 𑀫𑀬𑀸;

𑀓𑀢𑀁 𑀫𑁂 𑀓𑀭𑀡𑀻𑀬𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁮𑁯.

‘‘𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢𑁄, 𑀲𑀩𑁆𑀩𑀲𑀗𑁆𑀕𑀸𑀢𑀺𑀕𑁄 [𑀲𑀩𑁆𑀩𑀲𑀗𑁆𑀓𑀸𑀢𑀺𑀢𑁄 (𑀓.)] 𑀇𑀲𑀺;

𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀲𑁄𑀡𑁆𑀡𑀣𑀽𑀧𑀲𑁆𑀲𑀺𑀤𑀁 𑀨𑀮𑀁.

𑁯𑁦.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀣𑀽𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀣𑀽𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀦𑀴𑀓𑀼𑀝𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁩.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ ¶ , 𑀳𑀸𑀭𑀺𑀢𑁄 𑀦𑀸𑀫 𑀧𑀩𑁆𑀩𑀢𑁄;

𑀲𑀬𑀫𑁆𑀪𑀽 𑀦𑀸𑀭𑀤𑁄 𑀦𑀸𑀫, 𑀭𑀼𑀓𑁆𑀔𑀫𑀽𑀮𑁂 𑀯𑀲𑀻 𑀢𑀤𑀸.

𑁯𑁪.

‘‘𑀦𑀴𑀸𑀕𑀸𑀭𑀁 ¶ 𑀓𑀭𑀺𑀢𑁆𑀯𑀸𑀦, 𑀢𑀺𑀡𑁂𑀦 𑀙𑀸𑀤𑀬𑀺𑀁 𑀅𑀳𑀁;

𑀘𑀗𑁆𑀓𑀫𑀁 𑀲𑁄𑀥𑀬𑀺𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁.

𑁯𑁫.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯𑁬.

‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀦𑀴𑀓𑀼𑀝𑀺𑀓𑀦𑀺𑀫𑁆𑀫𑀺𑀢𑀁;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁯𑁭.

‘‘𑀘𑀢𑀼𑀤𑁆𑀤𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀏𑀓𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁯𑁮.

‘‘𑀘𑀢𑀼𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁯𑁯.

‘‘𑀥𑀫𑁆𑀫𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑀫𑀁;

𑀬𑀤𑀺𑀘𑁆𑀙𑀓𑀸𑀳𑀁 𑀯𑀺𑀳𑀭𑁂, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁧𑁦𑁦.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦𑀴𑀓𑀼𑀝𑀺𑀬𑀺𑀤𑀁 𑀨𑀮𑀁.

𑁧𑁦𑁧.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀴𑀓𑀼𑀝𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀴𑀓𑀼𑀝𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁪.

‘‘𑀫𑀺𑀕𑀮𑀼𑀤𑁆𑀤𑁄 ¶ 𑀧𑀼𑀭𑁂 𑀆𑀲𑀺𑀁, 𑀯𑀺𑀧𑀺𑀦𑁂 𑀯𑀺𑀘𑀭𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁧𑁦𑁫.

‘‘𑀧𑀺𑀬𑀸𑀮𑀨𑀮𑀫𑀸𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑁆𑀲 𑀯𑀻𑀭𑀲𑁆𑀲, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁦𑁬.

‘‘𑀏𑀓𑀢𑀺𑀁𑀲𑁂 ¶ 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁭.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁦𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀬𑀸𑀮𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀯𑀕𑁆𑀕𑁄 𑀧𑀜𑁆𑀜𑀸𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀺𑀗𑁆𑀓𑀡𑀻 𑀧𑀁𑀲𑀼𑀓𑀽𑀮𑀜𑁆𑀘, 𑀓𑁄𑀭𑀡𑁆𑀟𑀫𑀣 𑀓𑀺𑀁𑀲𑀼𑀓𑀁;

𑀉𑀧𑀟𑁆𑀠𑀤𑀼𑀲𑁆𑀲𑀻 𑀖𑀢𑀤𑁄, 𑀉𑀤𑀓𑀁 𑀣𑀽𑀧𑀓𑀸𑀭𑀓𑁄.

𑀦𑀴𑀓𑀸𑀭𑀻 𑀘 𑀦𑀯𑀫𑁄, 𑀧𑀺𑀬𑀸𑀮𑀨𑀮𑀤𑀸𑀬𑀓𑁄;

𑀲𑀢𑀫𑁂𑀓𑀜𑁆𑀘 𑀕𑀸𑀣𑀸𑀦𑀁, 𑀦𑀯𑀓𑀜𑁆𑀘 𑀢𑀤𑀼𑀢𑁆𑀢𑀭𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀫𑁂𑀢𑁆𑀢𑁂𑀬𑁆𑀬𑀯𑀕𑁆𑀕𑁄 𑀪𑀤𑁆𑀤𑀸𑀮𑀺, 𑀲𑀓𑀺𑀁𑀲𑀫𑁆𑀫𑀚𑁆𑀚𑀓𑁄𑀧𑀺 𑀘;

𑀏𑀓𑀯𑀺𑀳𑀸𑀭𑀻 𑀯𑀺𑀪𑀻𑀢𑀓𑀻, 𑀚𑀕𑀢𑀻 𑀲𑀸𑀮𑀧𑀼𑀧𑁆𑀨𑀺𑀬𑁄.

𑀦𑀴𑀸𑀕𑀸𑀭𑀁 𑀧𑀁𑀲𑀼𑀓𑀽𑀮𑀁, 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑁄 𑀢𑀣𑀸;

𑀅𑀲𑀻𑀢𑀺 𑀤𑁆𑀯𑁂 𑀘 𑀕𑀸𑀣𑀸𑀬𑁄, 𑀘𑀢𑀼𑀤𑁆𑀤𑀲𑀲𑀢𑀸𑀦𑀺 𑀘.

𑀫𑁂𑀢𑁆𑀢𑁂𑀬𑁆𑀬𑀯𑀕𑁆𑀕𑀤𑀲𑀓𑀁.

𑀧𑀜𑁆𑀘𑀫𑀲𑀢𑀓𑀁 𑀲𑀫𑀢𑁆𑀢𑀁.

𑁫𑁧. 𑀓𑀡𑀺𑀓𑀸𑀭𑀯𑀕𑁆𑀕𑁄

𑁧. 𑀢𑀺𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀲𑀼𑀫𑁂𑀥𑁄 ¶ ¶ ¶ 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺𑀁.

𑁨.

‘‘𑀅𑀚𑁆𑀛𑁄𑀕𑀬𑁆𑀳 𑀳𑀺𑀫𑀯𑀦𑁆𑀢𑀁, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀺𑀢𑁆𑀯𑀸𑀦, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁩.

‘‘𑀯𑀺𑀚𑁆𑀚𑀸𑀥𑀭𑁄 𑀢𑀤𑀸 𑀆𑀲𑀺𑀁, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀅𑀳𑀁;

𑀢𑀺𑀲𑀽𑀮𑀁 𑀲𑀼𑀓𑀢𑀁 𑀕𑀬𑁆𑀳, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁪.

‘‘𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀅𑀕𑁆𑀕𑀺, 𑀧𑀼𑀡𑁆𑀡𑀫𑀸𑀬𑁂𑀯 𑀘𑀦𑁆𑀤𑀺𑀫𑀸;

𑀯𑀦𑁂 𑀑𑀪𑀸𑀲𑀢𑁂 𑀩𑀼𑀤𑁆𑀥𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁫.

‘‘𑀯𑀦𑀕𑁆𑀕𑀸 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀩𑀼𑀤𑁆𑀥𑀭𑀁𑀲𑀻𑀪𑀺𑀥𑀸𑀯𑀭𑁂;

𑀦𑀴𑀕𑁆𑀕𑀺𑀯𑀡𑁆𑀡𑀲𑀗𑁆𑀓𑀸𑀲𑀸, 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁬.

‘‘𑀯𑀺𑀘𑀺𑀦𑀁 𑀅𑀤𑁆𑀤𑀲𑀁 𑀧𑀼𑀧𑁆𑀨𑀁, 𑀓𑀡𑀺𑀓𑀸𑀭𑀁 𑀤𑁂𑀯𑀕𑀦𑁆𑀥𑀺𑀓𑀁;

𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀆𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀫𑀧𑀽𑀚𑀬𑀺𑀁.

𑁭.

‘‘𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀫𑁂 𑀢𑀤𑀸;

𑀉𑀤𑁆𑀥𑀁𑀯𑀡𑁆𑀝𑀸 𑀅𑀥𑁄𑀧𑀢𑁆𑀢𑀸, 𑀙𑀸𑀬𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁮.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯.

‘‘𑀢𑀢𑁆𑀣 ¶ 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀓𑀡𑀺𑀓𑀸𑀭𑀻𑀢𑀺 𑀜𑀸𑀬𑀢𑀺;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁧𑁦.

‘‘𑀲𑀳𑀲𑁆𑀲𑀓𑀡𑁆𑀟𑀁 𑀲𑀢𑀪𑁂𑀡𑁆𑀟𑀼 [𑀲𑀢𑀕𑁂𑀡𑁆𑀟𑀼 (𑀲𑁆𑀬𑀸.)], 𑀥𑀚𑀸𑀮𑀼𑀳𑀭𑀺𑀢𑀸𑀫𑀬𑀁;

𑀲𑀢𑀲𑀳𑀲𑁆𑀲𑀦𑀺𑀬𑁆𑀬𑀽𑀳𑀸, 𑀩𑁆𑀬𑀫𑁆𑀳𑁂 𑀧𑀸𑀢𑀼𑀪𑀯𑀺𑀁𑀲𑀼 𑀫𑁂.

𑁧𑁧.

‘‘𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀮𑁄𑀳𑀺𑀢𑀗𑁆𑀕𑀫𑀬𑀸𑀧𑀺 𑀘;

𑀨𑀮𑀺𑀓𑀸𑀧𑀺 𑀘 𑀧𑀮𑁆𑀮𑀗𑁆𑀓𑀸, 𑀬𑁂𑀦𑀺𑀘𑁆𑀙𑀓𑀸 𑀬𑀤𑀺𑀘𑁆𑀙𑀓𑀸 [𑀬𑁂𑀦𑀺𑀘𑁆𑀙𑀬𑀸 𑀬𑀤𑀺𑀘𑁆𑀙𑀓𑀁 (𑀲𑁆𑀬𑀸.), 𑀬𑀤𑀺𑀘𑁆𑀙𑀓𑀸𑀬𑀤𑀺𑀘𑁆𑀙𑀓𑀸 (𑀓.)].

𑁧𑁨.

‘‘𑀫𑀳𑀸𑀭𑀳𑀜𑁆𑀘 ¶ ¶ 𑀲𑀬𑀦𑀁, 𑀢𑀽𑀮𑀺𑀓𑀸𑀯𑀺𑀓𑀢𑀻𑀬𑀼𑀢𑀁;

𑀉𑀤𑁆𑀥𑀮𑁄𑀫𑀺𑀓𑀏𑀓𑀦𑁆𑀢𑀁, 𑀩𑀺𑀫𑁆𑀩𑁄𑀳𑀦𑀲𑀫𑀸𑀬𑀼𑀢𑀁 [𑀩𑀺𑀩𑁆𑀩𑁄𑀳𑀦𑀲𑀫𑀸𑀬𑀼𑀢𑀁… (𑀲𑁆𑀬𑀸. 𑀓.)].

𑁧𑁩.

‘‘𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀘𑀭𑀦𑁆𑀢𑁄 𑀤𑁂𑀯𑀘𑀸𑀭𑀺𑀓𑀁;

𑀬𑀤𑀸 𑀇𑀘𑁆𑀙𑀸𑀫𑀺 𑀕𑀫𑀦𑀁, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

𑁧𑁪.

‘‘𑀧𑀼𑀧𑁆𑀨𑀲𑁆𑀲 𑀳𑁂𑀝𑁆𑀞𑀸 𑀢𑀺𑀝𑁆𑀞𑀸𑀫𑀺, 𑀉𑀧𑀭𑀺𑀘𑁆𑀙𑀤𑀦𑀁 𑀫𑀫;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀓𑀡𑀺𑀓𑀸𑀭𑁂𑀳𑀺 𑀙𑀸𑀤𑀺𑀢𑀁.

𑁧𑁫.

‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺, 𑀲𑀸𑀬𑀧𑀸𑀢𑀫𑀼𑀧𑀝𑁆𑀞𑀳𑀼𑀁;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀦𑀺𑀘𑁆𑀘𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸.

𑁧𑁬.

‘‘𑀢𑀢𑁆𑀣 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺, 𑀢𑀸𑀴𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘;

𑀭𑀫𑀸𑀫𑀺 𑀔𑀺𑀟𑁆𑀟𑀸𑀭𑀢𑀺𑀬𑀸, 𑀫𑁄𑀤𑀸𑀫𑀺 𑀓𑀸𑀫𑀓𑀸𑀫𑀺𑀳𑀁.

𑁧𑁭.

‘‘𑀢𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀫𑁄𑀤𑀸𑀫𑀺 𑀢𑀺𑀤𑀲𑁂 𑀢𑀤𑀸;

𑀦𑀸𑀭𑀻𑀕𑀡𑁂𑀳𑀺 𑀲𑀳𑀺𑀢𑁄, 𑀫𑁄𑀤𑀸𑀫𑀺 𑀩𑁆𑀬𑀫𑁆𑀳𑀫𑀼𑀢𑁆𑀢𑀫𑁂.

𑁧𑁮.

‘‘𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 ¶ 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁯.

‘‘𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑁄, 𑀫𑀳𑀸𑀪𑁄𑀕𑀁 𑀮𑀪𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦.

‘‘𑀤𑀼𑀯𑁂 ¶ 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁧.

‘‘𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁂;

𑀦𑀻𑀘𑁂 𑀓𑀼𑀮𑁂 𑀦 𑀚𑀸𑀬𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁨.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀲𑀺𑀯𑀺𑀓𑀁 𑀲𑀦𑁆𑀤𑀫𑀸𑀦𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁩.

‘‘𑀤𑀸𑀲𑀻𑀕𑀡𑀁 𑀤𑀸𑀲𑀕𑀡𑀁, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁪.

‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀺𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁫.

‘‘𑀦𑀯𑀯𑀢𑁆𑀣𑀁 ¶ ¶ 𑀦𑀯𑀨𑀮𑀁, 𑀦𑀯𑀕𑁆𑀕𑀭𑀲𑀪𑁄𑀚𑀦𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁬.

‘‘𑀇𑀫𑀁 𑀔𑀸𑀤 𑀇𑀫𑀁 𑀪𑀼𑀜𑁆𑀚, 𑀇𑀫𑀫𑁆𑀳𑀺 𑀲𑀬𑀦𑁂 𑀲𑀬;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁭.

‘‘𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑁄𑀫𑀺, 𑀬𑀲𑁄 𑀅𑀩𑁆𑀪𑀼𑀕𑁆𑀕𑀢𑁄 𑀫𑀫;

𑀫𑀳𑀸𑀧𑀓𑁆𑀔𑁄 𑀲𑀤𑀸 𑀳𑁄𑀫𑀺, 𑀅𑀪𑁂𑀚𑁆𑀚𑀧𑀭𑀺𑀲𑁄 𑀲𑀤𑀸;

𑀜𑀸𑀢𑀻𑀦𑀁 𑀉𑀢𑁆𑀢𑀫𑁄 𑀳𑁄𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁮.

‘‘𑀲𑀻𑀢𑀁 ¶ 𑀉𑀡𑁆𑀳𑀁 𑀦 𑀚𑀸𑀦𑀸𑀫𑀺, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀺;

𑀅𑀣𑁄 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀳𑀤𑀬𑁂 𑀫𑁂 𑀦 𑀯𑀺𑀚𑁆𑀚𑀢𑀺.

𑁨𑁯.

‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑀸𑀪𑀯𑁂;

𑀯𑁂𑀯𑀡𑁆𑀡𑀺𑀬𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁦.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁩𑁧.

‘‘𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁩𑁨.

‘‘𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸;

𑀢𑀭𑀼𑀡𑁄 𑀧𑀽𑀚𑀦𑀻𑀬𑁄𑀳𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁩.

‘‘𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑁄 𑀅𑀳𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀅𑀦𑀼𑀧𑁆𑀧𑀢𑁆𑀢𑁄, 𑀇𑀤𑁆𑀥𑀺𑀧𑀸𑀤𑁂𑀲𑀼 𑀓𑁄𑀯𑀺𑀤𑁄;

𑀥𑀫𑁆𑀫𑁂𑀲𑀼 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁫.

‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺 ¶ , 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁬.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀏𑀓𑀧𑀢𑁆𑀢𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯.

‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀓𑀼𑀫𑁆𑀪𑀓𑀸𑀭𑁄 𑀅𑀳𑁄𑀲𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

𑁪𑁦.

‘‘𑀲𑀼𑀓𑀢𑀁 𑀫𑀢𑁆𑀢𑀺𑀓𑀸𑀧𑀢𑁆𑀢𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀧𑀢𑁆𑀢𑀁 𑀤𑀢𑁆𑀯𑀸 𑀪𑀕𑀯𑀢𑁄, 𑀉𑀚𑀼𑀪𑀽𑀢𑀲𑁆𑀲 𑀢𑀸𑀤𑀺𑀦𑁄.

𑁪𑁧.

‘‘𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑁄𑀳𑀁, 𑀲𑁄𑀡𑁆𑀡𑀣𑀸𑀮𑁂 𑀮𑀪𑀸𑀫𑀳𑀁;

𑀭𑀽𑀧𑀺𑀫𑀬𑁂 𑀘 𑀲𑁄𑀯𑀡𑁆𑀡𑁂, 𑀢𑀝𑁆𑀝𑀺𑀓𑁂 𑀘 𑀫𑀡𑀻𑀫𑀬𑁂.

𑁪𑁨.

‘‘𑀧𑀸𑀢𑀺𑀬𑁄 𑀧𑀭𑀺𑀪𑀼𑀜𑁆𑀚𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁;

𑀬𑀲𑀸𑀦𑀜𑁆𑀘 𑀥𑀦𑀸𑀦𑀜𑁆𑀘 [𑀬𑀲𑀲𑀸𑀯 𑀚𑀦𑀸𑀦𑀜𑁆𑀘 (𑀲𑁆𑀬𑀸.)], 𑀅𑀕𑁆𑀕𑀪𑀽𑀢𑁄 [𑀧𑀢𑁆𑀢𑀪𑀽𑀢𑁄 (𑀲𑀻. 𑀧𑀻.)] 𑀘 𑀳𑁄𑀫𑀳𑀁.

𑁪𑁩.

‘‘𑀬𑀣𑀸𑀧𑀺 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸𑀥𑀸𑀭𑀁 𑀧𑀯𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

𑁪𑁪.

‘‘𑀢𑀣𑁂𑀯𑀺𑀤𑀁 𑀧𑀢𑁆𑀢𑀤𑀸𑀦𑀁, 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺 𑀭𑁄𑀧𑀺𑀢𑀁;

𑀧𑀻𑀢𑀺𑀥𑀸𑀭𑁂 𑀧𑀯𑀲𑁆𑀲𑀦𑁆𑀢𑁂, 𑀨𑀮𑀁 𑀫𑀁 𑀢𑁄𑀲𑀬𑀺𑀲𑁆𑀲𑀢𑀺.

𑁪𑁫.

‘‘𑀬𑀸𑀯𑀢𑀸 𑀔𑁂𑀢𑁆𑀢𑀸 𑀯𑀺𑀚𑁆𑀚𑀦𑁆𑀢𑀺, 𑀲𑀗𑁆𑀖𑀸𑀧𑀺 𑀘 𑀕𑀡𑀸𑀧𑀺 𑀘;

𑀩𑀼𑀤𑁆𑀥𑀔𑁂𑀢𑁆𑀢𑀲𑀫𑁄 𑀦𑀢𑁆𑀣𑀺, 𑀲𑀼𑀔𑀤𑁄 𑀲𑀩𑁆𑀩𑀧𑀸𑀡𑀺𑀦𑀁.

𑁪𑁬.

‘‘𑀦𑀫𑁄 ¶ 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀏𑀓𑀧𑀢𑁆𑀢𑀁 𑀤𑀤𑀺𑀢𑁆𑀯𑀸𑀦, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁪𑁭.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀢𑁆𑀢𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁮.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁯.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀧𑀢𑁆𑀢𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀧𑀢𑁆𑀢𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀓𑀸𑀲𑀼𑀫𑀸𑀭𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧.

‘‘𑀓𑀡𑀺𑀓𑀸𑀭𑀁𑀯 ¶ 𑀚𑁄𑀢𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁫𑁨.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀓𑀸𑀲𑀼𑀫𑀸𑀭𑀺𑀓𑀫𑀸𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁫𑁩.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁪.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀸𑀲𑀼𑀫𑀸𑀭𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀸𑀲𑀼𑀫𑀸𑀭𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀅𑀯𑀝𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁭.

‘‘𑀲𑀳𑀲𑁆𑀲𑀭𑀁𑀲𑀻 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀸 𑀉𑀝𑁆𑀞𑀳𑀺𑀢𑁆𑀯𑀸𑀦, 𑀕𑁄𑀘𑀭𑀸𑀬𑀸𑀪𑀺𑀦𑀺𑀓𑁆𑀔𑀫𑀺.

𑁫𑁮.

‘‘𑀨𑀮𑀳𑀢𑁆𑀣𑁄 ¶ 𑀅𑀳𑀁 𑀤𑀺𑀲𑁆𑀯𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀯𑀝𑀁 𑀅𑀤𑀤𑀺𑀁 𑀨𑀮𑀁.

𑁫𑁯.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁦.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀯𑀝𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀯𑀝𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀧𑀸𑀤𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁩.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀧𑀸𑀤𑀨𑀮𑀁 [𑀯𑀸𑀭𑀨𑀮𑀁 (𑀲𑀻.), 𑀘𑀸𑀭𑀨𑀮𑀁 (𑀲𑁆𑀬𑀸.), 𑀧𑀸𑀭𑀨𑀮𑀁 (𑀧𑀻.)] 𑀅𑀤𑀸𑀲𑀳𑀁.

𑁬𑁪.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁫.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀤𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀤𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀫𑀸𑀢𑀼𑀮𑀼𑀗𑁆𑀕𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁮.

‘‘𑀓𑀡𑀺𑀓𑀸𑀭𑀁𑀯 ¶ ¶ 𑀚𑀮𑀺𑀢𑀁, 𑀧𑀼𑀡𑁆𑀡𑀫𑀸𑀬𑁂𑀯 𑀘𑀦𑁆𑀤𑀺𑀫𑀁;

𑀚𑀮𑀦𑁆𑀢𑀁 𑀤𑀻𑀧𑀭𑀼𑀓𑁆𑀔𑀁𑀯, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁬𑁯.

‘‘𑀫𑀸𑀢𑀼𑀮𑀼𑀗𑁆𑀕𑀨𑀮𑀁 ¶ 𑀕𑀬𑁆𑀳, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀻𑀭𑀲𑁆𑀲 [𑀥𑀻𑀭𑀲𑁆𑀲 (𑀲𑀻.)], 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁭𑁦.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁧.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀸𑀢𑀼𑀮𑀼𑀗𑁆𑀕𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀸𑀢𑀼𑀮𑀼𑀗𑁆𑀕𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀅𑀚𑁂𑀮𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁪.

‘‘𑀅𑀚𑁆𑀚𑀼𑀦𑁄 [𑀅𑀚𑀺𑀦𑁄 (𑀲𑁆𑀬𑀸.)] 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢𑁂 𑀯𑀲𑀻 𑀢𑀤𑀸;

𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀲𑀫𑀸𑀥𑀺𑀓𑀼𑀲𑀮𑁄 𑀫𑀼𑀦𑀺.

𑁭𑁫.

‘‘𑀓𑀼𑀫𑁆𑀪𑀫𑀢𑁆𑀢𑀁 ¶ 𑀕𑀳𑁂𑀢𑁆𑀯𑀸𑀦, 𑀅𑀚𑁂𑀮𑀺𑀁 [𑀅𑀜𑁆𑀚𑀮𑀺𑀁 (𑀲𑁆𑀬𑀸.), 𑀅𑀚𑁂𑀮𑀁 (𑀧𑀻.)] 𑀚𑀻𑀯𑀚𑀻𑀯𑀓𑀁;

𑀙𑀢𑁆𑀢𑀧𑀡𑁆𑀡𑀁 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁭𑁬.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀚𑁂𑀮𑀺𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀚𑁂𑀮𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀅𑀫𑁄𑀤𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁦.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 ¶ ¶ ¶ 𑀲𑀫𑁆𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀅𑀫𑁄𑀤𑀫𑀤𑀤𑀺𑀁 𑀨𑀮𑀁.

𑁮𑁧.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁨.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁩.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁪.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁄𑀤𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁄𑀤𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀢𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁫.

‘‘𑀲𑀢𑀭𑀁𑀲𑀻 𑀦𑀸𑀫 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀦, 𑀕𑁄𑀘𑀭𑀸𑀬𑀸𑀪𑀺𑀦𑀺𑀓𑁆𑀔𑀫𑀺.

𑁮𑁬.

‘‘𑀨𑀮𑀳𑀢𑁆𑀣𑁄 𑀅𑀳𑀁 𑀤𑀺𑀲𑁆𑀯𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀢𑀸𑀮𑀨𑀮𑀁 𑀅𑀤𑀸𑀲𑀳𑀁.

𑁮𑁭.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀸𑀮𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀦𑀸𑀴𑀺𑀓𑁂𑀭𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁧.

‘‘𑀦𑀕𑀭𑁂 ¶ ¶ 𑀩𑀦𑁆𑀥𑀼𑀫𑀢𑀺𑀬𑀸, 𑀆𑀭𑀸𑀫𑀺𑀓𑁄 𑀅𑀳𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂.

𑁯𑁨.

‘‘𑀦𑀸𑀴𑀺𑀓𑁂𑀭𑀨𑀮𑀁 𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀆𑀓𑀸𑀲𑁂 𑀞𑀺𑀢𑀓𑁄 𑀲𑀦𑁆𑀢𑁄, 𑀧𑀝𑀺𑀕𑁆𑀕𑀡𑁆𑀳𑀺 𑀫𑀳𑀸𑀬𑀲𑁄.

𑁯𑁩.

‘‘𑀯𑀺𑀢𑁆𑀢𑀺𑀲𑀜𑁆𑀚𑀦𑀦𑁄 ¶ 𑀫𑀬𑁆𑀳𑀁, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀯𑀳𑁄;

𑀨𑀮𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁯𑁪.

‘‘𑀅𑀥𑀺𑀕𑀘𑁆𑀙𑀺𑀁 𑀢𑀤𑀸 𑀧𑀻𑀢𑀺𑀁, 𑀯𑀺𑀧𑀼𑀮𑀜𑁆𑀘 𑀲𑀼𑀔𑀼𑀢𑁆𑀢𑀫𑀁;

𑀉𑀧𑁆𑀧𑀚𑁆𑀚𑀢𑁂𑀯 𑀭𑀢𑀦𑀁, 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀳𑀺𑀁 𑀢𑀳𑀺𑀁.

𑁯𑁫.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯𑁬.

‘‘𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑁄 𑀅𑀳𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯𑁭.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁮.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… ¶ 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁯.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀸𑀴𑀺𑀓𑁂𑀭𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀸𑀴𑀺𑀓𑁂𑀭𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀡𑀺𑀓𑀸𑀭𑀯𑀕𑁆𑀕𑁄 𑀏𑀓𑀧𑀜𑁆𑀜𑀸𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀡𑀺𑀓𑀸𑀭𑁂𑀓𑀧𑀢𑁆𑀢𑀸 𑀘, 𑀓𑀸𑀲𑀼𑀫𑀸𑀭𑀻 𑀢𑀣𑀸𑀯𑀝𑀸;

𑀧𑀸𑀤𑀜𑁆𑀘 𑀫𑀸𑀢𑀼𑀮𑀼𑀗𑁆𑀕𑀜𑁆𑀘, 𑀅𑀚𑁂𑀮𑀻𑀫𑁄𑀤𑀫𑁂𑀯 𑀘.

𑀢𑀸𑀮𑀁 𑀢𑀣𑀸 𑀦𑀸𑀴𑀺𑀓𑁂𑀭𑀁, 𑀕𑀸𑀣𑀸𑀬𑁄 𑀕𑀡𑀺𑀢𑀸 𑀯𑀺𑀳;

𑀏𑀓𑀁 𑀕𑀸𑀣𑀸𑀲𑀢𑀁 𑀳𑁄𑀢𑀺, 𑀊𑀦𑀸𑀥𑀺𑀓𑀯𑀺𑀯𑀚𑁆𑀚𑀺𑀢𑀁.

𑁫𑁨. 𑀨𑀮𑀤𑀸𑀬𑀓𑀯𑀕𑁆𑀕𑁄

𑁧. 𑀓𑀼𑀭𑀜𑁆𑀘𑀺𑀬𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀫𑀺𑀕𑀮𑀼𑀤𑁆𑀤𑁄 ¶ ¶ ¶ 𑀧𑀼𑀭𑁂 𑀆𑀲𑀺𑀁, 𑀯𑀺𑀧𑀺𑀦𑁂 𑀯𑀺𑀘𑀭𑀁 𑀅𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁨.

‘‘𑀓𑀼𑀭𑀜𑁆𑀘𑀺𑀬𑀨𑀮𑀁 𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑁆𑀲 𑀢𑀸𑀤𑀺𑀦𑁄, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁩.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀭𑀜𑁆𑀘𑀺𑀬𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀭𑀜𑁆𑀘𑀺𑀬𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀓𑀧𑀺𑀢𑁆𑀣𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 ¶ 𑀲𑀫𑁆𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀓𑀧𑀺𑀢𑁆𑀣𑀁 [𑀓𑀧𑀺𑀝𑁆𑀞𑀁 (𑀲𑁆𑀬𑀸.)] 𑀅𑀤𑀤𑀺𑀁 𑀨𑀮𑀁.

𑁮.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀧𑀺𑀢𑁆𑀣𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀧𑀺𑀢𑁆𑀣𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀓𑁄𑀲𑀫𑁆𑀩𑀨𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨.

‘‘𑀓𑀓𑀼𑀥𑀁 𑀯𑀺𑀮𑀲𑀦𑁆𑀢𑀁𑀯, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀓𑁄𑀲𑀫𑁆𑀩𑀁 [𑀓𑁄𑀲𑀼𑀫𑁆𑀩𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀤𑀤𑀺𑀁 𑀢𑀤𑀸.

𑁧𑁩.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁪.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁄𑀲𑀫𑁆𑀩𑀨𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑁄𑀲𑀫𑁆𑀩𑀨𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀓𑁂𑀢𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭.

‘‘𑀯𑀺𑀦𑀢𑀸𑀦𑀤𑀺𑀬𑀸 𑀢𑀻𑀭𑁂, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁧𑁮.

‘‘𑀫𑀥𑀼𑀕𑀦𑁆𑀥𑀲𑁆𑀲 ¶ 𑀧𑀼𑀧𑁆𑀨𑁂𑀦, 𑀓𑁂𑀢𑀓𑀲𑁆𑀲 𑀅𑀳𑀁 𑀢𑀤𑀸;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀫𑀧𑀽𑀚𑀬𑀺𑀁.

𑁧𑁯.

‘‘𑀏𑀓𑀦𑀯𑀼𑀢𑀺𑀢𑁄 ¶ ¶ 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… ¶ 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁂𑀢𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑁂𑀢𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁩.

‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀦𑀸𑀕𑀧𑀼𑀧𑁆𑀨𑀁 𑀅𑀧𑀽𑀚𑀬𑀺𑀁.

𑁨𑁪.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀸𑀕𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀅𑀚𑁆𑀚𑀼𑀦𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁮.

‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂 ¶ ¶ , 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑁄 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

𑁨𑁯.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀕𑀳𑁂𑀢𑁆𑀯𑀸 𑀅𑀚𑁆𑀚𑀼𑀦𑀁 𑀧𑀼𑀧𑁆𑀨𑀁, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

𑁩𑁦.

‘‘𑀢𑁂𑀦 ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁩𑁧.

‘‘𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀤𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀫𑀳𑀸𑀭𑀚𑁆𑀚𑀫𑀓𑀸𑀭𑀬𑀺𑀁.

𑁩𑁨.

‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀼𑀔𑁂𑀢𑁆𑀢𑁂 𑀯𑀧𑁆𑀧𑀺𑀢𑀁 𑀩𑀻𑀚𑀁, 𑀲𑀬𑀫𑁆𑀪𑀼𑀫𑁆𑀳𑀺 𑀅𑀳𑁄 𑀫𑀫 [𑀅𑀳𑁄𑀲𑀺 𑀫𑁂 (𑀲𑁆𑀬𑀸.)].

𑁩𑁩.

‘‘𑀓𑀼𑀲𑀮𑀁 𑀯𑀺𑀚𑁆𑀚𑀢𑁂 𑀫𑀬𑁆𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀧𑀽𑀚𑀸𑀭𑀳𑁄 𑀅𑀳𑀁 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁩𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀚𑁆𑀚𑀼𑀦𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀚𑁆𑀚𑀼𑀦𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀓𑀼𑀝𑀚𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀯𑀲𑀮𑁄 [𑀘𑀸𑀯𑀮𑁄 (𑀲𑀻. 𑀧𑀻.), 𑀅𑀘𑁆𑀘𑀬𑁄 (𑀲𑁆𑀬𑀸.)] 𑀦𑀸𑀫 𑀧𑀩𑁆𑀩𑀢𑁄;

𑀩𑀼𑀤𑁆𑀥𑁄 𑀲𑀼𑀤𑀲𑁆𑀲𑀦𑁄 𑀦𑀸𑀫, 𑀯𑀲𑀢𑁂 𑀧𑀩𑁆𑀩𑀢𑀦𑁆𑀢𑀭𑁂.

𑁩𑁮.

‘‘𑀧𑀼𑀧𑁆𑀨𑀁 𑀳𑁂𑀫𑀯𑀦𑁆𑀢𑀁 𑀕𑀬𑁆𑀳, 𑀯𑁂𑀳𑀸𑀲𑀁 𑀅𑀕𑀫𑀸𑀲𑀳𑀁;

𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

𑁩𑁯.

‘‘𑀧𑀼𑀧𑁆𑀨𑀁 ¶ 𑀓𑀼𑀝𑀚𑀫𑀸𑀤𑀸𑀬, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁 [𑀓𑀢𑁆𑀯𑀸𑀦𑀳𑀁 𑀢𑀤𑀸 (𑀲𑁆𑀬𑀸. 𑀧𑀻. 𑀓.)];

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁪𑁦.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁧.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀝𑀚𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀝𑀚𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀖𑁄𑀲𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪.

‘‘𑀫𑀺𑀕𑀮𑀼𑀤𑁆𑀤𑁄 ¶ 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀯𑀺𑀧𑀺𑀦𑁂 𑀅𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁪𑁫.

‘‘𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁;

𑀅𑀲𑁆𑀲𑁄𑀲𑀺𑀁 𑀫𑀥𑀼𑀭𑀁 𑀥𑀫𑁆𑀫𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁪𑁬.

‘‘𑀖𑁄𑀲𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀅𑀲𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑁂;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀉𑀢𑁆𑀢𑀭𑀺𑀁 [𑀅𑀢𑀭𑀺𑀁 (𑀲𑀻. 𑀧𑀻.)] 𑀤𑀼𑀢𑁆𑀢𑀭𑀁 𑀪𑀯𑀁.

𑁪𑁭.

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀖𑁄𑀲𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁪𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀖𑁄𑀲𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀖𑁄𑀲𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀩𑁆𑀩𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧.

‘‘𑀯𑀭𑀼𑀡𑁄 ¶ ¶ ¶ 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀙𑀟𑁆𑀟𑁂𑀢𑁆𑀯𑀸 𑀤𑀲𑀧𑀼𑀢𑁆𑀢𑀸𑀦𑀺, 𑀯𑀦𑀫𑀚𑁆𑀛𑁄𑀕𑀳𑀺𑀁 𑀢𑀤𑀸.

𑁫𑁨.

‘‘𑀅𑀲𑁆𑀲𑀫𑀁 ¶ 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀼𑀯𑀺𑀪𑀢𑁆𑀢𑀁 𑀫𑀦𑁄𑀭𑀫𑀁;

𑀧𑀡𑁆𑀡𑀲𑀸𑀮𑀁 𑀓𑀭𑀺𑀢𑁆𑀯𑀸𑀦, 𑀯𑀲𑀸𑀫𑀺 𑀯𑀺𑀧𑀺𑀦𑁂 𑀅𑀳𑀁.

𑁫𑁩.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀫𑀫 𑀅𑀲𑁆𑀲𑀫𑀁.

𑁫𑁪.

‘‘𑀬𑀸𑀯𑀢𑀸 𑀯𑀦𑀲𑀡𑁆𑀟𑀫𑁆𑀳𑀺, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀅𑀳𑀼;

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀧𑀚𑁆𑀚𑀮𑀻 𑀯𑀺𑀧𑀺𑀦𑀁 𑀢𑀤𑀸.

𑁫𑁫.

‘‘𑀤𑀺𑀲𑁆𑀯𑀸𑀦 𑀢𑀁 𑀧𑀸𑀝𑀺𑀳𑀻𑀭𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀧𑀢𑁆𑀢𑀧𑀼𑀝𑀁 𑀕𑀳𑁂𑀢𑁆𑀯𑀸𑀦, 𑀨𑀮𑁂𑀦 𑀧𑀽𑀚𑀬𑀺𑀁 𑀅𑀳𑀁.

𑁫𑁬.

‘‘𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀳𑀔𑀸𑀭𑀺𑀫𑀤𑀸𑀲𑀳𑀁;

𑀅𑀦𑀼𑀓𑀫𑁆𑀧𑀸𑀬 𑀫𑁂 𑀩𑀼𑀤𑁆𑀥𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁫𑁭.

‘𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀧𑀘𑁆𑀙𑀢𑁄 𑀏𑀳𑀺 𑀫𑁂 𑀢𑀼𑀯𑀁;

𑀧𑀭𑀺𑀪𑀼𑀢𑁆𑀢𑁂 𑀘 𑀲𑀗𑁆𑀖𑀫𑁆𑀳𑀺, 𑀧𑀼𑀜𑁆𑀜𑀁 𑀢𑀯 𑀪𑀯𑀺𑀲𑁆𑀲𑀢𑀺’.

𑁫𑁮.

‘‘𑀧𑀼𑀝𑀓𑀦𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁.

𑁫𑁯.

‘‘𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀦𑀘𑁆𑀘𑁂𑀳𑀺, 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑀁, 𑀅𑀦𑀼𑀪𑁄𑀫𑀺 𑀲𑀤𑀸 𑀲𑀼𑀔𑀁.

𑁬𑁦.

‘‘𑀬𑀁 ¶ 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁧.

‘‘𑀬𑀸𑀯𑀢𑀸 𑀘𑀢𑀼𑀭𑁄 𑀤𑀻𑀧𑀸, 𑀲𑀲𑀫𑀼𑀤𑁆𑀤𑀸 𑀲𑀧𑀩𑁆𑀩𑀢𑀸;

𑀨𑀮𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀇𑀲𑁆𑀲𑀭𑀁 𑀓𑀸𑀭𑀬𑀸𑀫𑀳𑀁.

𑁬𑁨.

‘‘𑀬𑀸𑀯𑀢𑀸 𑀫𑁂 𑀧𑀓𑁆𑀔𑀺𑀕𑀡𑀸, 𑀆𑀓𑀸𑀲𑁂 𑀉𑀧𑁆𑀧𑀢𑀦𑁆𑀢𑀺 𑀘𑁂;

𑀢𑁂𑀧𑀺 𑀫𑀁 𑀯𑀲𑀫𑀦𑁆𑀯𑁂𑀦𑁆𑀢𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁩.

‘‘𑀬𑀸𑀯𑀢𑀸 𑀯𑀦𑀲𑀡𑁆𑀟𑀫𑁆𑀳𑀺, 𑀬𑀓𑁆𑀔𑀸 𑀪𑀽𑀢𑀸 𑀘 𑀭𑀓𑁆𑀔𑀲𑀸;

𑀓𑀼𑀫𑁆𑀪𑀡𑁆𑀟𑀸 𑀕𑀭𑀼𑀴𑀸 𑀘𑀸𑀧𑀺, 𑀧𑀸𑀭𑀺𑀘𑀭𑀺𑀬𑀁 𑀉𑀧𑁂𑀦𑁆𑀢𑀺 𑀫𑁂.

𑁬𑁪.

‘‘𑀓𑀼𑀫𑁆𑀪𑀸 ¶ ¶ 𑀲𑁄𑀡𑀸 𑀫𑀥𑀼𑀓𑀸𑀭𑀸, 𑀟𑀁𑀲𑀸 𑀘 𑀫𑀓𑀲𑀸 𑀉𑀪𑁄;

𑀢𑁂𑀧𑀺 𑀫𑀁 𑀯𑀲𑀫𑀦𑁆𑀯𑁂𑀦𑁆𑀢𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁫.

‘‘𑀲𑀼𑀧𑀡𑁆𑀡𑀸 ¶ 𑀦𑀸𑀫 𑀲𑀓𑀼𑀡𑀸, 𑀧𑀓𑁆𑀔𑀺𑀚𑀸𑀢𑀸 𑀫𑀳𑀩𑁆𑀩𑀮𑀸;

𑀢𑁂𑀧𑀺 𑀫𑀁 𑀲𑀭𑀡𑀁 𑀬𑀦𑁆𑀢𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁬.

‘‘𑀬𑁂𑀧𑀺 𑀤𑀻𑀖𑀸𑀬𑀼𑀓𑀸 𑀦𑀸𑀕𑀸, 𑀇𑀤𑁆𑀥𑀺𑀫𑀦𑁆𑀢𑁄 𑀫𑀳𑀸𑀬𑀲𑀸;

𑀢𑁂𑀧𑀺 𑀫𑀁 𑀯𑀲𑀫𑀦𑁆𑀯𑁂𑀦𑁆𑀢𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁭.

‘‘𑀲𑀻𑀳𑀸 𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀢𑁂𑀧𑀺 𑀫𑀁 𑀯𑀲𑀫𑀦𑁆𑀯𑁂𑀦𑁆𑀢𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁮.

‘‘𑀑𑀲𑀥𑀻𑀢𑀺𑀡𑀯𑀸𑀲𑀻 𑀘, 𑀬𑁂 𑀘 𑀆𑀓𑀸𑀲𑀯𑀸𑀲𑀺𑀦𑁄;

𑀲𑀩𑁆𑀩𑁂 𑀫𑀁 𑀲𑀭𑀡𑀁 𑀬𑀦𑁆𑀢𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁯.

‘‘𑀲𑀼𑀤𑀼𑀤𑁆𑀤𑀲𑀁 𑀲𑀼𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀲𑀼𑀧𑁆𑀧𑀓𑀸𑀲𑀺𑀢𑀁;

𑀨𑀲𑁆𑀲𑀬𑀺𑀢𑁆𑀯𑀸 [𑀨𑀼𑀲𑀬𑀺𑀢𑁆𑀯𑀸 (𑀓.)] 𑀯𑀺𑀳𑀭𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁦.

‘‘𑀯𑀺𑀫𑁄𑀓𑁆𑀔𑁂 ¶ 𑀅𑀝𑁆𑀞 𑀨𑀼𑀲𑀺𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄;

𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀳𑀁, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁧.

‘‘𑀬𑁂 𑀨𑀮𑀝𑁆𑀞𑀸 𑀩𑀼𑀤𑁆𑀥𑀧𑀼𑀢𑁆𑀢𑀸, 𑀔𑀻𑀡𑀤𑁄𑀲𑀸 𑀫𑀳𑀸𑀬𑀲𑀸;

𑀅𑀳𑀫𑀜𑁆𑀜𑀢𑀭𑁄 𑀢𑁂𑀲𑀁, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁨.

‘‘𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁩.

‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀩𑀼𑀤𑁆𑀥𑀧𑀼𑀢𑁆𑀢𑀸 𑀫𑀳𑀸𑀬𑀲𑀸;

𑀤𑀺𑀩𑁆𑀩𑀲𑁄𑀢𑀲𑀫𑀸𑀧𑀦𑁆𑀦𑀸, 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀅𑀳𑀁.

𑁭𑁪.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀩𑁆𑀩𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀩𑁆𑀩𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀤𑀼𑀫𑀥𑀸𑀭𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁮.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ ¶ ¶ , 𑀭𑁄𑀫𑀲𑁄 𑀦𑀸𑀫 𑀧𑀩𑁆𑀩𑀢𑁄;

𑀩𑀼𑀤𑁆𑀥𑁄𑀧𑀺 𑀲𑀫𑁆𑀪𑀯𑁄 𑀦𑀸𑀫, 𑀅𑀩𑁆𑀪𑁄𑀓𑀸𑀲𑁂 𑀯𑀲𑀻 𑀢𑀤𑀸.

𑁭𑁯.

‘‘𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀧𑀤𑀼𑀫𑀁 𑀥𑀸𑀭𑀬𑀺𑀁 𑀅𑀳𑀁;

𑀏𑀓𑀸𑀳𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀪𑀯𑀦𑀁 𑀧𑀼𑀦𑀭𑀸𑀕𑀫𑀺𑀁.

𑁮𑁦.

‘‘𑀏𑀓𑀢𑀺𑀁𑀲𑁂 ¶ 𑀇𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮𑁧.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁮𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀤𑀼𑀫𑀥𑀸𑀭𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀤𑀼𑀫𑀥𑀸𑀭𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀨𑀮𑀤𑀸𑀬𑀓𑀯𑀕𑁆𑀕𑁄 𑀤𑁆𑀯𑁂𑀧𑀜𑁆𑀜𑀸𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀭𑀜𑁆𑀘𑀺𑀬𑀁 𑀓𑀧𑀺𑀢𑁆𑀣𑀜𑁆𑀘, 𑀓𑁄𑀲𑀫𑁆𑀩𑀫𑀣 𑀓𑁂𑀢𑀓𑀁;

𑀦𑀸𑀕𑀧𑀼𑀧𑁆𑀨𑀚𑁆𑀚𑀼𑀦𑀜𑁆𑀘𑁂𑀯, 𑀓𑀼𑀝𑀚𑀻 𑀖𑁄𑀲𑀲𑀜𑁆𑀜𑀓𑁄.

𑀣𑁂𑀭𑁄 ¶ 𑀘 𑀲𑀩𑁆𑀩𑀨𑀮𑀤𑁄, 𑀢𑀣𑀸 𑀧𑀤𑀼𑀫𑀥𑀸𑀭𑀺𑀓𑁄;

𑀅𑀲𑀻𑀢𑀺 𑀘𑁂𑀢𑁆𑀣 𑀕𑀸𑀣𑀸𑀬𑁄, 𑀢𑀺𑀲𑁆𑀲𑁄 𑀕𑀸𑀣𑀸 𑀢𑀤𑀼𑀢𑁆𑀢𑀭𑀺.

𑁫𑁩. 𑀢𑀺𑀡𑀤𑀸𑀬𑀓𑀯𑀕𑁆𑀕𑁄

𑁧. 𑀢𑀺𑀡𑀫𑀼𑀝𑁆𑀞𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂 ¶ ¶ , 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀢𑀢𑁆𑀣𑁂𑀯 𑀢𑀺𑀲𑁆𑀲𑁄 [𑀢𑀢𑁆𑀣𑁄𑀧𑀢𑀺𑀲𑁆𑀲𑁄 (𑀲𑀻. 𑀧𑀻. 𑀓.)] 𑀲𑀫𑁆𑀩𑀼𑀤𑁆𑀥𑁄, 𑀅𑀩𑁆𑀪𑁄𑀓𑀸𑀲𑀫𑁆𑀳𑀺 𑀘𑀗𑁆𑀓𑀫𑀺.

𑁨.

‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀤𑀺𑀲𑁆𑀯𑀸𑀦 𑀢𑀁 𑀤𑁂𑀯𑀤𑁂𑀯𑀁, 𑀢𑀺𑀡𑀫𑀼𑀝𑁆𑀞𑀺𑀫𑀤𑀸𑀲𑀳𑀁.

𑁩.

‘‘𑀦𑀺𑀲𑀻𑀤𑀦𑀢𑁆𑀣𑀁 𑀩𑀼𑀤𑁆𑀥𑀲𑁆𑀲, 𑀤𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 [𑀧𑀓𑁆𑀓𑀫𑀺𑀁 (𑀓.)] 𑀉𑀢𑁆𑀢𑀭𑀸𑀫𑀼𑀔𑁄.

𑁪.

‘‘𑀅𑀘𑀺𑀭𑀁 𑀕𑀢𑀫𑀢𑁆𑀢𑀲𑁆𑀲 [𑀕𑀢𑀫𑀢𑁆𑀢𑀁 𑀫𑀁 (𑀲𑀻. 𑀲𑁆𑀬𑀸.)], 𑀫𑀺𑀕𑀭𑀸𑀚𑀸 𑀅𑀧𑁄𑀣𑀬𑀺 [𑀅𑀳𑁂𑀞𑀬𑀺 (𑀲𑀻. 𑀲𑁆𑀬𑀸. 𑀧𑀻.)];

𑀲𑀻𑀳𑁂𑀦 𑀧𑁄𑀣𑀺𑀢𑁄 [𑀧𑀸𑀢𑀺𑀢𑁄 (𑀲𑀻. 𑀧𑀻.), 𑀖𑀸𑀝𑀺𑀢𑁄 (𑀲𑁆𑀬𑀸.)] 𑀲𑀦𑁆𑀢𑁄, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁫.

‘‘𑀆𑀲𑀦𑁆𑀦𑁂 𑀫𑁂 𑀓𑀢𑀁 𑀓𑀫𑁆𑀫𑀁, 𑀩𑀼𑀤𑁆𑀥𑀲𑁂𑀝𑁆𑀞𑁂 𑀅𑀦𑀸𑀲𑀯𑁂;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀤𑁂𑀯𑀮𑁄𑀓𑀫𑀕𑀘𑁆𑀙𑀳𑀁.

𑁬.

‘‘𑀬𑀽𑀧𑁄 𑀢𑀢𑁆𑀣 𑀲𑀼𑀪𑁄 𑀆𑀲𑀺, 𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀫𑁆𑀫𑀺𑀢𑁄;

𑀲𑀳𑀲𑁆𑀲𑀓𑀡𑁆𑀟𑁄 𑀲𑀢𑀪𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑁄.

𑁭.

‘‘𑀧𑀪𑀸 ¶ 𑀦𑀺𑀤𑁆𑀥𑀸𑀯𑀢𑁂 𑀢𑀲𑁆𑀲, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄;

𑀆𑀓𑀺𑀡𑁆𑀡𑁄 𑀤𑁂𑀯𑀓𑀜𑁆𑀜𑀸𑀳𑀺, 𑀆𑀫𑁄𑀤𑀺𑀁 𑀓𑀸𑀫𑀓𑀸𑀫𑀺𑀳𑀁.

𑁮.

‘‘𑀤𑁂𑀯𑀮𑁄𑀓𑀸 ¶ 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀆𑀕𑀦𑁆𑀢𑁆𑀯𑀸𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁯.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀦𑀺𑀲𑀻𑀤𑀦𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀺𑀡𑀫𑀼𑀝𑁆𑀞𑁂 𑀇𑀤𑀁 𑀨𑀮𑀁.

𑁧𑁦.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁧.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ ¶ 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀫𑀼𑀝𑁆𑀞𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀫𑀼𑀝𑁆𑀞𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀫𑀜𑁆𑀘𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩.

‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀏𑀓𑀫𑀜𑁆𑀘𑀁 [𑀏𑀓𑀁 𑀯𑁂𑀘𑁆𑀘𑀁 (𑀲𑁆𑀬𑀸.), 𑀏𑀓𑀧𑀘𑁆𑀙𑀁 (𑀧𑀻.)] 𑀫𑀬𑀸 𑀤𑀺𑀦𑁆𑀦𑀁, 𑀧𑀲𑀦𑁆𑀦𑁂𑀦 𑀲𑀧𑀸𑀡𑀺𑀦𑀸.

𑁧𑁪.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀤𑀺𑀩𑁆𑀩𑀬𑀸𑀦𑀁 𑀲𑀫𑀚𑁆𑀛𑀕𑀁;

𑀢𑁂𑀦 𑀫𑀜𑁆𑀘𑀓𑀤𑀸𑀦𑁂𑀦, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁧𑁫.

‘‘𑀏𑀓𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀫𑀜𑁆𑀘𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀜𑁆𑀘𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁭.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁮.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀜𑁆𑀘𑀤𑀸𑀬𑀓𑁄 [𑀯𑁂𑀘𑁆𑀘𑀓𑀤𑀸𑀬𑀓𑁄 (𑀲𑁆𑀬𑀸.), 𑀲𑀤𑁆𑀤𑀲𑀜𑁆𑀜𑀺𑀓𑀯𑀕𑁆𑀕𑁂𑀧𑀺 𑀇𑀤𑀁§𑀅𑀧𑀤𑀸𑀦𑀁 𑀤𑀺𑀲𑁆𑀲𑀢𑀺] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀜𑁆𑀘𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁯.

‘‘𑀆𑀭𑀼𑀳𑀺𑀫𑁆𑀳 𑀢𑀤𑀸 𑀦𑀸𑀯𑀁, 𑀪𑀺𑀓𑁆𑀔𑀼 𑀘𑀸𑀚𑀻𑀯𑀺𑀓𑁄 𑀘𑀳𑀁;

𑀦𑀸𑀯𑀸𑀬 𑀪𑀺𑀚𑁆𑀚𑀫𑀸𑀦𑀸𑀬, 𑀪𑀺𑀓𑁆𑀔𑀼 𑀫𑁂 𑀲𑀭𑀡𑀁 𑀅𑀤𑀸.

𑁨𑁦.

‘‘𑀏𑀓𑀢𑀺𑀁𑀲𑁂 ¶ 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑁄 𑀫𑁂 𑀲𑀭𑀡𑀁 𑀅𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀭𑀡𑀕𑀫𑀦𑁂 𑀨𑀮𑀁.

𑁨𑁧.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁨.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀭𑀡𑀕𑀫𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀅𑀩𑁆𑀪𑀜𑁆𑀚𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁪.

‘‘𑀦𑀕𑀭𑁂 ¶ 𑀩𑀦𑁆𑀥𑀼𑀫𑀢𑀺𑀬𑀸, 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀫𑀳𑀁;

𑀘𑀫𑁆𑀫𑀯𑀸𑀲𑀻 𑀢𑀤𑀸 𑀆𑀲𑀺𑀁, 𑀓𑀫𑀡𑁆𑀟𑀮𑀼𑀥𑀭𑁄 𑀅𑀳𑀁.

𑁨𑁫.

‘‘𑀅𑀤𑁆𑀤𑀲𑀁 𑀯𑀺𑀫𑀮𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀧𑀥𑀸𑀦𑀁 𑀧𑀳𑀺𑀢𑀢𑁆𑀢𑀁 𑀢𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀯𑀲𑀺𑀁 [𑀇𑀲𑀺𑀁 (𑀲𑁆𑀬𑀸.)].

𑁨𑁬.

‘‘𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀜𑁆𑀘, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁;

𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀲𑀼𑀫𑀦𑁄, 𑀅𑀩𑁆𑀪𑀜𑁆𑀚𑀦𑀫𑀤𑀸𑀲𑀳𑀁.

𑁨𑁭.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀩𑁆𑀪𑀜𑁆𑀚𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁮.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀩𑁆𑀪𑀜𑁆𑀚𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀩𑁆𑀪𑀜𑁆𑀚𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀲𑀼𑀧𑀝𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧.

‘‘𑀤𑀺𑀯𑀸𑀯𑀺𑀳𑀸𑀭𑀸 ¶ ¶ 𑀦𑀺𑀓𑁆𑀔𑀦𑁆𑀢𑁄, 𑀯𑀺𑀧𑀲𑁆𑀲𑀻 𑀮𑁄𑀓𑀦𑀸𑀬𑀓𑁄;

𑀮𑀳𑀼𑀁 𑀲𑀼𑀧𑀝𑀓𑀁 [𑀲𑀼𑀧𑀝𑀺𑀓𑀁 (𑀲𑁆𑀬𑀸.), 𑀧𑀽𑀧𑀧𑀯𑀁 (𑀧𑀻.)] 𑀤𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁩𑁨.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀲𑀼𑀧𑀝𑀓𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀼𑀧𑀝𑀲𑁆𑀲 𑀇𑀤𑀁 𑀨𑀮𑀁.

𑁩𑁩.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀧𑀝𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀧𑀝𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀤𑀡𑁆𑀟𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬.

‘‘𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀯𑁂𑀴𑀼𑀁 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀆𑀮𑀫𑁆𑀩𑀡𑀁 𑀓𑀭𑀺𑀢𑁆𑀯𑀸𑀦, 𑀲𑀗𑁆𑀖𑀲𑁆𑀲 𑀅𑀤𑀤𑀺𑀁 𑀩𑀳𑀼𑀁 [𑀅𑀳𑀁 (𑀲𑀻. 𑀲𑁆𑀬𑀸. 𑀧𑀻.)].

𑁩𑁭.

‘‘𑀢𑁂𑀦 ¶ 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀲𑀼𑀩𑁆𑀩𑀢𑁂 𑀅𑀪𑀺𑀯𑀸𑀤𑀺𑀬;

𑀆𑀮𑀫𑁆𑀩𑀤𑀡𑁆𑀟𑀁 𑀤𑀢𑁆𑀯𑀸𑀦, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁩𑁮.

‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 ¶ 𑀓𑀧𑁆𑀧𑁂, 𑀬𑀁 𑀤𑀡𑁆𑀟𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀡𑁆𑀟𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁯.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁦.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁧.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 ¶ 𑀲𑀼𑀤𑀁 𑀆𑀬𑀲𑁆𑀫𑀸 𑀤𑀡𑁆𑀟𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑀡𑁆𑀟𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑀢𑁂𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁭. 𑀕𑀺𑀭𑀺𑀦𑁂𑀮𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁨.

‘‘𑀫𑀺𑀕𑀮𑀼𑀤𑁆𑀤𑁄 ¶ 𑀧𑀼𑀭𑁂 𑀆𑀲𑀺𑀁, 𑀯𑀺𑀧𑀺𑀦𑁂 𑀯𑀺𑀘𑀭𑀁 𑀅𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁪𑁩.

‘‘𑀢𑀲𑁆𑀫𑀺𑀁 𑀫𑀳𑀸𑀓𑀸𑀭𑀼𑀡𑀺𑀓𑁂, 𑀲𑀩𑁆𑀩𑀲𑀢𑁆𑀢𑀳𑀺𑀢𑁂 𑀭𑀢𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀦𑁂𑀮𑀧𑀼𑀧𑁆𑀨𑀫𑀧𑀽𑀚𑀬𑀺𑀁.

𑁪𑁪.

‘‘𑀏𑀓𑀢𑀺𑀁𑀲𑁂 ¶ 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁬.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀺𑀭𑀺𑀦𑁂𑀮𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀺𑀭𑀺𑀦𑁂𑀮𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮.

‘‘𑀅𑀳𑀁 𑀧𑀼𑀭𑁂 𑀩𑁄𑀥𑀺𑀧𑀢𑁆𑀢𑀁, 𑀉𑀚𑁆𑀛𑀺𑀢𑀁 𑀘𑁂𑀢𑀺𑀬𑀗𑁆𑀕𑀡𑁂;

𑀢𑀁 𑀕𑀳𑁂𑀢𑁆𑀯𑀸𑀦 𑀙𑀟𑁆𑀟𑁂𑀲𑀺𑀁, 𑀅𑀮𑀪𑀺𑀁 𑀯𑀻𑀲𑀢𑀻𑀕𑀼𑀡𑁂.

𑁪𑁯.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀢𑁂𑀚𑁂𑀦, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀘𑀸𑀧𑀺 𑀫𑀸𑀦𑀼𑀲𑁂.

𑁫𑁦.

‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀆𑀕𑀦𑁆𑀢𑁆𑀯𑀸 𑀫𑀸𑀦𑀼𑀲𑀁 𑀪𑀯𑀁;

𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁂.

𑁫𑁧.

‘‘𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑁄, 𑀆𑀭𑁄𑀳𑀧𑀭𑀺𑀡𑀸𑀳𑀯𑀸;

𑀅𑀪𑀺𑀭𑀽𑀧𑁄 𑀲𑀼𑀘𑀺 𑀳𑁄𑀫𑀺, 𑀲𑀫𑁆𑀧𑀼𑀡𑁆𑀡𑀗𑁆𑀕𑁄 𑀅𑀦𑀽𑀦𑀓𑁄.

𑁫𑁨.

‘‘𑀤𑁂𑀯𑀮𑁄𑀓𑁂 ¶ ¶ 𑀫𑀦𑀼𑀲𑁆𑀲𑁂 𑀯𑀸, 𑀚𑀸𑀢𑁄 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺;

𑀪𑀯𑁂 𑀲𑀼𑀯𑀡𑁆𑀡𑀯𑀡𑁆𑀡𑁄 𑀘, 𑀉𑀢𑁆𑀢𑀢𑁆𑀢𑀓𑀦𑀓𑀽𑀧𑀫𑁄.

𑁫𑁩.

‘‘𑀫𑀼𑀤𑀼𑀓𑀸 ¶ ¶ 𑀫𑀤𑁆𑀤𑀯𑀸 𑀲𑁆𑀦𑀺𑀤𑁆𑀥𑀸 [𑀫𑀼𑀤𑀼 𑀫𑀤𑁆𑀤𑀯𑀸 𑀲𑀺𑀦𑀺𑀤𑁆𑀥𑀸 (𑀲𑁆𑀬𑀸.)], 𑀲𑀼𑀔𑀼𑀫𑀸 𑀲𑀼𑀓𑀼𑀫𑀸𑀭𑀺𑀓𑀸;

𑀙𑀯𑀺 𑀫𑁂 𑀲𑀩𑁆𑀩𑀤𑀸 𑀳𑁄𑀢𑀺, 𑀩𑁄𑀥𑀺𑀧𑀢𑁆𑀢𑁂 𑀲𑀼𑀙𑀟𑁆𑀟𑀺𑀢𑁂 [𑀲𑀼𑀙𑀟𑁆𑀟𑀺𑀦𑁂 (𑀲𑀻.)].

𑁫𑁪.

‘‘𑀬𑀢𑁄 𑀓𑀼𑀢𑁄𑀘𑀺 𑀕𑀢𑀻𑀲𑀼, 𑀲𑀭𑀻𑀭𑁂 𑀲𑀫𑀼𑀤𑀸𑀕𑀢𑁂;

𑀦 𑀮𑀺𑀫𑁆𑀧𑀢𑀺 𑀭𑀚𑁄𑀚𑀮𑁆𑀮𑀁, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁫.

‘‘𑀉𑀡𑁆𑀳𑁂 𑀯𑀸𑀢𑀸𑀢𑀧𑁂 𑀢𑀲𑁆𑀲, 𑀅𑀕𑁆𑀕𑀺𑀢𑀸𑀧𑁂𑀦 𑀯𑀸 𑀧𑀦;

𑀕𑀢𑁆𑀢𑁂 𑀲𑁂𑀤𑀸 𑀦 𑀫𑀼𑀘𑁆𑀘𑀦𑁆𑀢𑀺, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁬.

‘‘𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀘, 𑀢𑀺𑀮𑀓𑀸 𑀧𑀺𑀴𑀓𑀸 𑀢𑀣𑀸;

𑀦 𑀳𑁄𑀦𑁆𑀢𑀺 𑀓𑀸𑀬𑁂 𑀤𑀤𑁆𑀤𑀼 𑀘, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁭.

‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀭𑁄𑀕𑀸 𑀦 𑀳𑁄𑀦𑁆𑀢𑀺 𑀓𑀸𑀬𑀲𑁆𑀫𑀺𑀁, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁮.

‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀦 𑀳𑁄𑀢𑀺 𑀘𑀺𑀢𑁆𑀢𑀚𑀸 𑀧𑀻𑀴𑀸, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁯.

‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀅𑀫𑀺𑀢𑁆𑀢𑀸 𑀦 𑀪𑀯𑀦𑁆𑀢𑀲𑁆𑀲, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁬𑁦.

‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀅𑀦𑀽𑀦𑀪𑁄𑀕𑁄 𑀪𑀯𑀢𑀺, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁬𑁧.

‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀅𑀕𑁆𑀕𑀺𑀭𑀸𑀚𑀽𑀳𑀺 𑀘𑁄𑀭𑁂𑀳𑀺, 𑀦 𑀳𑁄𑀢𑀺 𑀉𑀤𑀓𑁂 𑀪𑀬𑀁.

𑁬𑁨.

‘‘𑀅𑀧𑀭𑀫𑁆𑀧𑀺 ¶ 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀤𑀸𑀲𑀺𑀤𑀸𑀲𑀸 𑀅𑀦𑀼𑀘𑀭𑀸, 𑀳𑁄𑀦𑁆𑀢𑀺 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸.

𑁬𑁩.

‘‘𑀬𑀫𑁆𑀳𑀺 𑀆𑀬𑀼𑀧𑁆𑀧𑀫𑀸𑀡𑀫𑁆𑀳𑀺, 𑀚𑀸𑀬𑀢𑁂 𑀫𑀸𑀦𑀼𑀲𑁂 𑀪𑀯𑁂;

𑀢𑀢𑁄 𑀦 𑀳𑀸𑀬𑀢𑁂 𑀆𑀬𑀼, 𑀢𑀺𑀝𑁆𑀞𑀢𑁂 𑀬𑀸𑀯𑀢𑀸𑀬𑀼𑀓𑀁.

𑁬𑁪.

‘‘𑀅𑀩𑁆𑀪𑀦𑁆𑀢𑀭𑀸 𑀘 𑀩𑀸𑀳𑀺𑀭𑀸 [𑀩𑀳𑀺𑀘𑀭𑀸 (𑀲𑀻. 𑀧𑀻. 𑀓.)], 𑀦𑁂𑀕𑀫𑀸 𑀘 𑀲𑀭𑀝𑁆𑀞𑀓𑀸;

𑀦𑀼𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀲𑀩𑁆𑀩𑁂𑀧𑀺, 𑀯𑀼𑀤𑁆𑀥𑀺𑀓𑀸𑀫𑀸 𑀲𑀼𑀔𑀺𑀘𑁆𑀙𑀓𑀸.

𑁬𑁫.

‘‘𑀪𑁄𑀕𑀯𑀸 𑀬𑀲𑀯𑀸 𑀳𑁄𑀫𑀺, 𑀲𑀺𑀭𑀺𑀫𑀸 𑀜𑀸𑀢𑀺𑀧𑀓𑁆𑀔𑀯𑀸;

𑀅𑀧𑁂𑀢𑀪𑀬𑀲𑀦𑁆𑀢𑀸𑀲𑁄, 𑀪𑀯𑁂𑀳𑀁 𑀲𑀩𑁆𑀩𑀢𑁄 𑀪𑀯𑁂.

𑁬𑁬.

‘‘𑀤𑁂𑀯𑀸 ¶ ¶ 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸, 𑀕𑀦𑁆𑀥𑀩𑁆𑀩𑀸 𑀬𑀓𑁆𑀔𑀭𑀓𑁆𑀔𑀲𑀸;

𑀲𑀩𑁆𑀩𑁂 𑀢𑁂 𑀧𑀭𑀺𑀭𑀓𑁆𑀔𑀦𑁆𑀢𑀺, 𑀪𑀯𑁂 𑀲𑀁𑀲𑀭𑀢𑁄 𑀲𑀤𑀸.

𑁬𑁭.

‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀘, 𑀅𑀦𑀼𑀪𑁄𑀢𑁆𑀯𑀸 𑀉𑀪𑁄 𑀬𑀲𑁂;

𑀅𑀯𑀲𑀸𑀦𑁂 𑀘 𑀦𑀺𑀩𑁆𑀩𑀸𑀦𑀁, 𑀲𑀺𑀯𑀁 𑀧𑀢𑁆𑀢𑁄 𑀅𑀦𑀼𑀢𑁆𑀢𑀭𑀁.

𑁬𑁮.

‘‘𑀲𑀫𑁆𑀩𑀼𑀤𑁆𑀥𑀫𑀼𑀤𑁆𑀤𑀺𑀲𑀺𑀢𑁆𑀯𑀸𑀦, 𑀩𑁄𑀥𑀺𑀁 𑀯𑀸 𑀢𑀲𑁆𑀲 𑀲𑀢𑁆𑀣𑀼𑀦𑁄;

𑀬𑁄 𑀧𑀼𑀜𑁆𑀜𑀁 𑀧𑀲𑀯𑁂 𑀧𑁄𑀲𑁄, 𑀢𑀲𑁆𑀲 𑀓𑀺𑀁 𑀦𑀸𑀫 𑀤𑀼𑀮𑁆𑀮𑀪𑀁.

𑁬𑁯.

‘‘𑀫𑀕𑁆𑀕𑁂 ¶ 𑀨𑀮𑁂 𑀆𑀕𑀫𑁂 𑀘, 𑀛𑀸𑀦𑀸𑀪𑀺𑀜𑁆𑀜𑀸𑀕𑀼𑀡𑁂𑀲𑀼 𑀘;

𑀅𑀜𑁆𑀜𑁂𑀲𑀁 𑀅𑀥𑀺𑀓𑁄 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀸𑀬𑀸𑀫𑀺 𑀅𑀦𑀸𑀲𑀯𑁄.

𑁭𑁦.

‘‘𑀧𑀼𑀭𑁂𑀳𑀁 𑀩𑁄𑀥𑀺𑀬𑀸 𑀧𑀢𑁆𑀢𑀁, 𑀙𑀟𑁆𑀟𑁂𑀢𑁆𑀯𑀸 𑀳𑀝𑁆𑀞𑀫𑀸𑀦𑀲𑁄;

𑀇𑀫𑁂𑀳𑀺 𑀯𑀻𑀲𑀢𑀗𑁆𑀕𑁂𑀳𑀺, 𑀲𑀫𑀗𑁆𑀕𑀻 𑀳𑁄𑀫𑀺 𑀲𑀩𑁆𑀩𑀤𑀸.

𑁭𑁧.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁨.

‘‘𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁩.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀆𑀫𑀡𑁆𑀟𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁪.

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀫𑁆𑀳𑀸, 𑀘𑀗𑁆𑀓𑀫𑀻 𑀮𑁄𑀓𑀦𑀸𑀬𑀓𑁄.

𑁭𑁫.

‘‘𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀆𑀳𑀭𑀦𑁆𑀢𑁄 𑀨𑀮𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀘𑀗𑁆𑀓𑀫𑀦𑁆𑀢𑀁 𑀫𑀳𑀸𑀫𑀼𑀦𑀺𑀁.

𑁭𑁬.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀆𑀫𑀡𑁆𑀟𑀫𑀤𑀤𑀺𑀁 𑀨𑀮𑀁.

𑁭𑁭.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀆𑀫𑀡𑁆𑀟𑀲𑁆𑀲 𑀇𑀤𑀁 𑀨𑀮𑀁.

𑁭𑁮.

‘‘𑀓𑀺𑀮𑁂𑀲𑀸 ¶ ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁯.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁦.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀫𑀡𑁆𑀟𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸

𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀫𑀡𑁆𑀟𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀲𑀼𑀕𑀦𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁧.

‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀩𑁆𑀩𑀢𑁆𑀣)], 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁮𑁨.

‘‘𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀯𑀼𑀢𑁄, 𑀭𑀁𑀲𑀺𑀚𑀸𑀮𑀲𑀫𑁄𑀢𑁆𑀣𑀝𑁄 [𑀭𑀁𑀲𑀺𑀚𑀸𑀮𑀲𑀫𑁄𑀲𑀝𑁄 (𑀲𑀻. 𑀧𑀻.)].

𑁮𑁩.

‘‘𑀅𑀲𑁆𑀲𑀸𑀲𑁂𑀢𑀸 𑀬𑀣𑀸 𑀘𑀦𑁆𑀤𑁄, 𑀲𑀽𑀭𑀺𑀬𑁄𑀯 𑀧𑀪𑀗𑁆𑀓𑀭𑁄;

𑀦𑀺𑀩𑁆𑀩𑀸𑀧𑁂𑀢𑀸 𑀬𑀣𑀸 𑀫𑁂𑀖𑁄, 𑀲𑀸𑀕𑀭𑁄𑀯 𑀕𑀼𑀡𑀸𑀓𑀭𑁄.

𑁮𑁪.

‘‘𑀥𑀭𑀡𑀻𑀭𑀺𑀯 ¶ 𑀲𑀻𑀮𑁂𑀦, 𑀳𑀺𑀫𑀯𑀸𑀯 𑀲𑀫𑀸𑀥𑀺𑀦𑀸;

𑀆𑀓𑀸𑀲𑁄 𑀯𑀺𑀬 𑀧𑀜𑁆𑀜𑀸𑀬, 𑀅𑀲𑀗𑁆𑀕𑁄 𑀅𑀦𑀺𑀮𑁄 𑀬𑀣𑀸.

𑁮𑁫.

‘‘𑀲 𑀓𑀤𑀸𑀘𑀺 𑀫𑀳𑀸𑀯𑀻𑀭𑁄, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄;

𑀲𑀘𑁆𑀘𑀸𑀦𑀺 𑀲𑀫𑁆𑀧𑀓𑀸𑀲𑁂𑀢𑀺, 𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀚𑀦𑀁.

𑁮𑁬.

‘‘𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀆𑀲𑀳𑀁 𑀥𑀦𑀥𑀜𑁆𑀜𑀲𑁆𑀲 [𑀅𑀦𑀦𑁆𑀢𑀥𑀦𑀥𑀜𑁆𑀜𑀲𑁆𑀲 (𑀓.)], 𑀧𑀳𑀽𑀢𑀲𑁆𑀲 𑀩𑀳𑀽 𑀢𑀤𑀸.

𑁮𑁭.

‘‘𑀚𑀗𑁆𑀖𑀸𑀯𑀺𑀳𑀸𑀭𑀁 𑀯𑀺𑀘𑀭𑀁, 𑀫𑀺𑀕𑀤𑀸𑀬𑀫𑀼𑀧𑁂𑀘𑁆𑀘𑀳𑀁 [𑀫𑀼𑀧𑁂𑀲𑀳𑀁 (𑀓.)];

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁.

𑁮𑁮.

‘‘𑀯𑀺𑀲𑀝𑁆𑀞𑀓𑀦𑁆𑀢𑀯𑀘𑀦𑀁 ¶ , 𑀓𑀭𑀯𑀻𑀓𑀲𑀫𑀲𑁆𑀲𑀭𑀁;

𑀳𑀁𑀲𑀭𑀼𑀢𑁂𑀳𑀺 [𑀳𑀁𑀲𑀤𑀼𑀦𑁆𑀤𑀼𑀪𑀺 (𑀲𑁆𑀬𑀸. 𑀧𑀻.)] 𑀦𑀺𑀕𑁆𑀖𑁄𑀲𑀁, 𑀯𑀺𑀜𑁆𑀜𑀸𑀧𑁂𑀦𑁆𑀢𑀁 𑀫𑀳𑀸𑀚𑀦𑀁.

𑁮𑁯.

‘‘𑀤𑀺𑀲𑁆𑀯𑀸 ¶ 𑀤𑁂𑀯𑀸𑀢𑀺𑀤𑁂𑀯𑀁 𑀢𑀁, 𑀲𑀼𑀢𑁆𑀯𑀸𑀯 𑀫𑀥𑀼𑀭𑀁 𑀕𑀺𑀭𑀁;

𑀧𑀳𑀸𑀬𑀦𑀧𑁆𑀧𑀓𑁂 𑀪𑁄𑀕𑁂, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁯𑁦.

‘‘𑀏𑀯𑀁 ¶ 𑀧𑀩𑁆𑀩𑀚𑀺𑀢𑁄 𑀘𑀸𑀳𑀁, 𑀦 𑀘𑀺𑀭𑁂𑀦 𑀩𑀳𑀼𑀲𑁆𑀲𑀼𑀢𑁄;

𑀅𑀳𑁄𑀲𑀺𑀁 𑀥𑀫𑁆𑀫𑀓𑀣𑀺𑀓𑁄, 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀡𑀯𑀸.

𑁯𑁧.

‘‘𑀫𑀳𑀸𑀧𑀭𑀺𑀲𑀫𑀚𑁆𑀛𑁂𑀳𑀁, 𑀳𑀝𑁆𑀞𑀘𑀺𑀢𑁆𑀢𑁄 𑀧𑀼𑀦𑀧𑁆𑀧𑀼𑀦𑀁;

𑀯𑀡𑁆𑀡𑀬𑀺𑀁 𑀳𑁂𑀫𑀯𑀡𑁆𑀡𑀲𑁆𑀲, 𑀯𑀡𑁆𑀡𑀁 𑀯𑀡𑁆𑀡𑀯𑀺𑀲𑀸𑀭𑀤𑁄.

𑁯𑁨.

‘‘𑀏𑀲 𑀔𑀻𑀡𑀸𑀲𑀯𑁄 𑀩𑀼𑀤𑁆𑀥𑁄, 𑀅𑀦𑀻𑀖𑁄 𑀙𑀺𑀦𑁆𑀦𑀲𑀁𑀲𑀬𑁄;

𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄𑀧𑀥𑀺𑀲𑀗𑁆𑀔𑀬𑁂.

𑁯𑁩.

‘‘𑀏𑀲 𑀲𑁄 𑀪𑀕𑀯𑀸 𑀩𑀼𑀤𑁆𑀥𑁄, 𑀏𑀲 𑀲𑀻𑀳𑁄 𑀅𑀦𑀼𑀢𑁆𑀢𑀭𑁄;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑁆𑀭𑀳𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀓𑁄.

𑁯𑁪.

‘‘𑀤𑀦𑁆𑀢𑁄 𑀤𑀫𑁂𑀢𑀸 𑀲𑀦𑁆𑀢𑁄 𑀘, 𑀲𑀫𑁂𑀢𑀸 𑀦𑀺𑀩𑁆𑀩𑀼𑀢𑁄 𑀇𑀲𑀺;

𑀦𑀺𑀩𑁆𑀩𑀸𑀧𑁂𑀢𑀸 𑀘 𑀅𑀲𑁆𑀲𑀢𑁆𑀣𑁄, 𑀅𑀲𑁆𑀲𑀸𑀲𑁂𑀢𑀸 𑀫𑀳𑀸𑀚𑀦𑀁.

𑁯𑁫.

‘‘𑀯𑀻𑀭𑁄 𑀲𑀽𑀭𑁄 𑀘 𑀯𑀺𑀓𑁆𑀓𑀦𑁆𑀢𑁄 [𑀥𑀻𑀭𑁄 𑀘 (𑀲𑀻. 𑀧𑀻.)], 𑀧𑀜𑁆𑀜𑁄 𑀓𑀸𑀭𑀼𑀡𑀺𑀓𑁄 𑀯𑀲𑀻;

𑀯𑀺𑀚𑀺𑀢𑀸𑀯𑀻 𑀘 𑀲 𑀚𑀺𑀦𑁄, 𑀅𑀧𑁆𑀧𑀕𑀩𑁆𑀩𑁄 𑀅𑀦𑀸𑀮𑀬𑁄.

𑁯𑁬.

‘‘𑀅𑀦𑁂𑀜𑁆𑀚𑁄 𑀅𑀘𑀮𑁄 𑀥𑀻𑀫𑀸, 𑀅𑀫𑁄𑀳𑁄 𑀅𑀲𑀫𑁄 𑀫𑀼𑀦𑀺;

𑀥𑁄𑀭𑀬𑁆𑀳𑁄 𑀉𑀲𑀪𑁄 𑀦𑀸𑀕𑁄, 𑀲𑀻𑀳𑁄 𑀲𑀓𑁆𑀓𑁄 𑀕𑀭𑀽𑀲𑀼𑀧𑀺.

𑁯𑁭.

‘‘𑀯𑀺𑀭𑀸𑀕𑁄 𑀯𑀺𑀫𑀮𑁄 𑀩𑁆𑀭𑀳𑁆𑀫𑀸, 𑀯𑀸𑀤𑀻 𑀲𑀽𑀭𑁄 𑀭𑀡𑀜𑁆𑀚𑀳𑁄;

𑀅𑀔𑀺𑀮𑁄 𑀘 𑀯𑀺𑀲𑀮𑁆𑀮𑁄 𑀘, 𑀅𑀲𑀫𑁄 𑀲𑀁𑀬𑀢𑁄 [𑀯𑀼𑀲𑀪𑁄 (𑀲𑁆𑀬𑀸.), 𑀧𑀬𑀢𑁄 (𑀧𑀻.)] 𑀲𑀼𑀘𑀺.

𑁯𑁮.

‘‘𑀩𑁆𑀭𑀸𑀳𑁆𑀫𑀡𑁄 ¶ ¶ 𑀲𑀫𑀡𑁄 𑀦𑀸𑀣𑁄, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑀓𑁄;

𑀬𑁄𑀥𑁄 𑀩𑀼𑀤𑁆𑀥𑁄 𑀲𑀼𑀢𑀸𑀲𑀼𑀢𑁄 [𑀲𑀼𑀢𑁄 𑀲𑀼𑀢𑁄 (𑀲𑀻. 𑀧𑀻.)], 𑀅𑀘𑀮𑁄 𑀫𑀼𑀤𑀺𑀢𑁄 𑀲𑀺𑀢𑁄 [𑀤𑀺𑀢𑁄 (𑀲𑀻.)].

𑁯𑁯.

‘‘𑀥𑀸𑀢𑀸 𑀥𑀢𑀸 𑀘 𑀲𑀦𑁆𑀢𑀺 𑀘, 𑀓𑀢𑁆𑀢𑀸 𑀦𑁂𑀢𑀸 𑀧𑀓𑀸𑀲𑀺𑀢𑀸;

𑀲𑀫𑁆𑀧𑀳𑀁𑀲𑀺𑀢𑀸 𑀪𑁂𑀢𑁆𑀢𑀸 𑀘, 𑀙𑁂𑀢𑁆𑀢𑀸 𑀲𑁄𑀢𑀸 𑀧𑀲𑀁𑀲𑀺𑀢𑀸.

𑁧𑁦𑁦.

‘‘𑀅𑀔𑀺𑀮𑁄 𑀘 𑀯𑀺𑀲𑀮𑁆𑀮𑁄 𑀘, 𑀅𑀦𑀻𑀖𑁄 𑀅𑀓𑀣𑀁𑀓𑀣𑀻;

𑀅𑀦𑁂𑀚𑁄 𑀯𑀺𑀭𑀚𑁄 𑀓𑀢𑁆𑀢𑀸, 𑀕𑀦𑁆𑀥𑀸 𑀯𑀢𑁆𑀢𑀸 𑀧𑀲𑀁𑀲𑀺𑀢𑀸.

𑁧𑁦𑁧.

‘‘𑀢𑀸𑀭𑁂𑀢𑀸 𑀅𑀢𑁆𑀣𑀓𑀸𑀭𑁂𑀢𑀸, 𑀓𑀸𑀭𑁂𑀢𑀸 𑀲𑀫𑁆𑀧𑀤𑀸𑀭𑀺𑀢𑀸;

𑀧𑀸𑀧𑁂𑀢𑀸 𑀲𑀳𑀺𑀢𑀸 𑀓𑀦𑁆𑀢𑀸, 𑀳𑀦𑁆𑀢𑀸 𑀆𑀢𑀸𑀧𑀻 𑀢𑀸𑀧𑀲𑁄 [𑀳𑀦𑁆𑀢𑀸, 𑀢𑀸𑀧𑀺𑀢𑀸 𑀘 𑀯𑀺𑀲𑁄𑀲𑀺𑀢𑀸 (𑀲𑁆𑀬𑀸.)].

𑁧𑁦𑁨.

‘‘𑀲𑀫𑀘𑀺𑀢𑁆𑀢𑁄 ¶ [𑀲𑀘𑁆𑀘𑀝𑁆𑀞𑀺𑀢𑁄 (𑀲𑁆𑀬𑀸.)] 𑀲𑀫𑀲𑀫𑁄, 𑀅𑀲𑀳𑀸𑀬𑁄 𑀤𑀬𑀸𑀮𑀬𑁄 [𑀤𑀬𑀸𑀲𑀬𑁄 (𑀲𑀻.)];

𑀅𑀘𑁆𑀙𑁂𑀭𑀲𑀢𑁆𑀢𑁄 [𑀅𑀘𑁆𑀙𑁂𑀭𑀫𑀦𑁆𑀢𑁄 (𑀲𑁆𑀬𑀸.)] 𑀅𑀓𑀼𑀳𑁄, 𑀓𑀢𑀸𑀯𑀻 𑀇𑀲𑀺𑀲𑀢𑁆𑀢𑀫𑁄.

𑁧𑁦𑁩.

‘‘𑀦𑀺𑀢𑁆𑀢𑀺𑀡𑁆𑀡𑀓𑀗𑁆𑀔𑁄 𑀦𑀺𑀫𑁆𑀫𑀸𑀦𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀽𑀧𑀫𑁄;

𑀲𑀩𑁆𑀩𑀯𑀸𑀓𑁆𑀬𑀧𑀣𑀸𑀢𑀻𑀢𑁄, 𑀲𑀘𑁆𑀘 𑀦𑁂𑀬𑁆𑀬𑀦𑁆𑀢𑀕𑀽 [𑀲𑀩𑁆𑀩𑀦𑁂𑀬𑁆𑀬𑀦𑁆𑀢𑀺𑀓𑁄 (𑀲𑁆𑀬𑀸.)] 𑀚𑀺𑀦𑁄.

𑁧𑁦𑁪.

‘‘𑀲𑀢𑁆𑀢𑀲𑀸𑀭𑀯𑀭𑁂 ¶ [𑀲𑀢𑀭𑀁𑀲𑀻𑀯𑀭𑁂 (𑀲𑁆𑀬𑀸.)] 𑀢𑀲𑁆𑀫𑀺𑀁, 𑀧𑀲𑀸𑀤𑁄 𑀅𑀫𑀢𑀸𑀯𑀳𑁄;

𑀢𑀲𑁆𑀫𑀸 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀲𑀤𑁆𑀥𑀸 𑀫𑀳𑀢𑁆𑀣𑀺𑀓𑀸 [𑀫𑀳𑀺𑀤𑁆𑀥𑀺𑀓𑀸 (𑀲𑀻. 𑀓.)].

𑁧𑁦𑁫.

‘‘𑀕𑀼𑀡𑁂𑀳𑀺 𑀏𑀯𑀫𑀸𑀤𑀻𑀳𑀺, 𑀢𑀺𑀮𑁄𑀓𑀲𑀭𑀡𑀼𑀢𑁆𑀢𑀫𑀁;

𑀯𑀡𑁆𑀡𑁂𑀦𑁆𑀢𑁄 𑀧𑀭𑀺𑀲𑀸𑀫𑀚𑁆𑀛𑁂, 𑀅𑀓𑀁 [𑀓𑀣𑀺𑀁 (𑀲𑁆𑀬𑀸.)] 𑀥𑀫𑁆𑀫𑀓𑀣𑀁 𑀅𑀳𑀁.

𑁧𑁦𑁬.

‘‘𑀢𑀢𑁄 𑀘𑀼𑀢𑀸𑀳𑀁 𑀢𑀼𑀲𑀺𑀢𑁂, 𑀅𑀦𑀼𑀪𑁄𑀢𑁆𑀯𑀸 𑀫𑀳𑀸𑀲𑀼𑀔𑀁;

𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼, 𑀚𑀸𑀢𑁄 𑀳𑁄𑀫𑀺 𑀲𑀼𑀕𑀦𑁆𑀥𑀺𑀓𑁄.

𑁧𑁦𑁭.

‘‘𑀦𑀺𑀲𑁆𑀲𑀸𑀲𑁄 𑀫𑀼𑀔𑀕𑀦𑁆𑀥𑁄 𑀘, 𑀤𑁂𑀳𑀕𑀦𑁆𑀥𑁄 𑀢𑀣𑁂𑀯 𑀫𑁂;

𑀲𑁂𑀤𑀕𑀦𑁆𑀥𑁄 𑀘 𑀲𑀢𑀢𑀁, 𑀲𑀩𑁆𑀩𑀕𑀦𑁆𑀥𑁄𑀯 𑀳𑁄𑀢𑀺 𑀫𑁂 [𑀲𑀩𑁆𑀩𑀕𑀦𑁆𑀥𑁄𑀢𑀺𑀲𑁂𑀢𑀺 𑀫𑁂 (𑀲𑀻. 𑀧𑀻.)].

𑁧𑁦𑁮.

‘‘𑀫𑀼𑀔𑀕𑀦𑁆𑀥𑁄 ¶ 𑀲𑀤𑀸 𑀫𑀬𑁆𑀳𑀁, 𑀧𑀤𑀼𑀫𑀼𑀧𑁆𑀧𑀮𑀘𑀫𑁆𑀧𑀓𑁄;

𑀧𑀭𑀺𑀲𑀦𑁆𑀢𑁄 [𑀆𑀤𑀺𑀲𑀦𑁆𑀢𑁄 (𑀲𑀻.), 𑀅𑀢𑀺𑀓𑀦𑁆𑀢𑁄 (𑀲𑁆𑀬𑀸.), 𑀅𑀢𑀺𑀲𑀦𑁆𑀢𑁄 (𑀧𑀻.)] 𑀲𑀤𑀸 𑀯𑀸𑀢𑀺, 𑀲𑀭𑀻𑀭𑁄 𑀘 𑀢𑀣𑁂𑀯 𑀫𑁂.

𑁧𑁦𑁯.

‘‘𑀕𑀼𑀡𑀢𑁆𑀣𑀯𑀲𑁆𑀲 𑀲𑀩𑁆𑀩𑀦𑁆𑀢𑀁, 𑀨𑀮𑀁 𑀢𑀼 [𑀨𑀮𑀦𑁆𑀢𑀁 (𑀲𑁆𑀬𑀸.)] 𑀧𑀭𑀫𑀩𑁆𑀪𑀼𑀢𑀁;

𑀏𑀓𑀕𑁆𑀕𑀫𑀦𑀲𑀸 𑀲𑀩𑁆𑀩𑁂, 𑀯𑀡𑁆𑀡𑀬𑀺𑀲𑁆𑀲𑀁 [𑀪𑀸𑀲𑀺𑀢𑀲𑁆𑀲 (𑀲𑁆𑀬𑀸.)] 𑀲𑀼𑀡𑀸𑀣 𑀫𑁂.

𑁧𑁧𑁦.

‘‘𑀕𑀼𑀡𑀁 ¶ 𑀩𑀼𑀤𑁆𑀥𑀲𑁆𑀲 𑀯𑀢𑁆𑀯𑀸𑀦, 𑀳𑀺𑀢𑀸𑀬 𑀘 𑀦 𑀲𑀤𑀺𑀲𑀁 [𑀳𑀺𑀢𑀸𑀬 𑀚𑀦𑀲𑀦𑁆𑀥𑀺𑀲𑀼 (𑀲𑀻. 𑀧𑀻.), 𑀳𑀺𑀢𑀸𑀬 𑀦𑀁 𑀲𑀼𑀔𑀸𑀯𑀳𑀁 (𑀲𑁆𑀬𑀸.)];

𑀲𑀼𑀔𑀺𑀢𑁄 [𑀲𑀼𑀘𑀺𑀢𑁆𑀢𑁄 (𑀲𑁆𑀬𑀸.)] 𑀳𑁄𑀫𑀺 𑀲𑀩𑁆𑀩𑀢𑁆𑀣, 𑀲𑀗𑁆𑀖𑁄 𑀯𑀻𑀭𑀲𑀫𑀸𑀬𑀼𑀢𑁄 [𑀲𑀭𑀤𑁆𑀥𑀦𑀺𑀲𑀫𑀸𑀬𑀼𑀢𑁄 (𑀲𑀻.)].

𑁧𑁧𑁧.

‘‘𑀬𑀲𑀲𑁆𑀲𑀻 𑀲𑀼𑀔𑀺𑀢𑁄 𑀓𑀦𑁆𑀢𑁄, 𑀚𑀼𑀢𑀺𑀫𑀸 𑀧𑀺𑀬𑀤𑀲𑁆𑀲𑀦𑁄;

𑀯𑀢𑁆𑀢𑀸 𑀅𑀧𑀭𑀺𑀪𑀽𑀢𑁄 𑀘, 𑀦𑀺𑀤𑁆𑀤𑁄𑀲𑁄 𑀧𑀜𑁆𑀜𑀯𑀸 𑀢𑀣𑀸.

𑁧𑁧𑁨.

‘‘𑀔𑀻𑀡𑁂 𑀆𑀬𑀼𑀲𑀺 [𑀧𑀸𑀲𑀼𑀲𑀺 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑀁, 𑀲𑀼𑀮𑀪𑀁 𑀩𑀼𑀤𑁆𑀥𑀪𑀢𑁆𑀢𑀺𑀦𑁄;

𑀢𑁂𑀲𑀁 𑀳𑁂𑀢𑀼𑀁 𑀧𑀯𑀓𑁆𑀔𑀸𑀫𑀺, 𑀢𑀁 𑀲𑀼𑀡𑀸𑀣 𑀬𑀣𑀸𑀢𑀣𑀁.

𑁧𑁧𑁩.

‘‘𑀲𑀦𑁆𑀢𑀁 ¶ 𑀬𑀲𑀁 𑀪𑀕𑀯𑀢𑁄, 𑀯𑀺𑀥𑀺𑀦𑀸 𑀅𑀪𑀺𑀯𑀸𑀤𑀬𑀁;

𑀢𑀢𑁆𑀣 𑀢𑀢𑁆𑀣𑀽𑀧𑀧𑀦𑁆𑀦𑁄𑀧𑀺 [𑀬𑀢𑁆𑀣 𑀢𑀢𑁆𑀣𑀽𑀧𑀧𑀦𑁆𑀦𑁄𑀧𑀺 (𑀲𑀻. 𑀧𑀻.)], 𑀬𑀲𑀲𑁆𑀲𑀻 𑀢𑁂𑀦 𑀳𑁄𑀫𑀳𑀁.

𑁧𑁧𑁪.

‘‘𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀦𑁆𑀢𑀫𑀲𑀗𑁆𑀔𑀢𑀁;

𑀯𑀡𑁆𑀡𑀬𑀁 𑀲𑀼𑀔𑀤𑁄 𑀆𑀲𑀺𑀁, 𑀲𑀢𑁆𑀢𑀸𑀦𑀁 𑀲𑀼𑀔𑀺𑀢𑁄 𑀢𑀢𑁄.

𑁧𑁧𑁫.

‘‘𑀕𑀼𑀡𑀁 𑀯𑀤𑀦𑁆𑀢𑁄 𑀩𑀼𑀤𑁆𑀥𑀲𑁆𑀲, 𑀩𑀼𑀤𑁆𑀥𑀧𑀻𑀢𑀺𑀲𑀫𑀸𑀬𑀼𑀢𑁄;

𑀲𑀓𑀦𑁆𑀢𑀺𑀁 𑀧𑀭𑀓𑀦𑁆𑀢𑀺𑀜𑁆𑀘, 𑀚𑀦𑀬𑀺𑀁 𑀢𑁂𑀦 𑀓𑀦𑁆𑀢𑀺𑀫𑀸.

𑁧𑁧𑁬.

‘‘𑀚𑀺𑀦𑁄 𑀢𑁂 𑀢𑀺𑀢𑁆𑀣𑀺𑀓𑀸𑀓𑀺𑀡𑁆𑀡𑁂 [𑀚𑀦𑁄𑀖𑁂 𑀢𑀺𑀢𑁆𑀣𑀓𑀸𑀓𑀺𑀡𑁆𑀡𑁂 (𑀲𑀻. 𑀧𑀻.), 𑀚𑀺𑀦𑁄 𑀬𑁄 𑀢𑀺𑀢𑁆𑀣𑀺𑀓𑀸𑀢𑀺𑀡𑁆𑀡𑁄 (𑀲𑁆𑀬𑀸.)], 𑀅𑀪𑀺𑀪𑀼𑀬𑁆𑀬 𑀓𑀼𑀢𑀺𑀢𑁆𑀣𑀺𑀬𑁂;

𑀕𑀼𑀡𑀁 𑀯𑀤𑀦𑁆𑀢𑁄 𑀚𑁄𑀢𑁂𑀲𑀺𑀁 [𑀣𑁄𑀫𑁂𑀲𑀺𑀁 (𑀲𑁆𑀬𑀸.)], 𑀦𑀸𑀬𑀓𑀁 𑀚𑀼𑀢𑀺𑀫𑀸 𑀢𑀢𑁄.

𑁧𑁧𑁭.

‘‘𑀧𑀺𑀬𑀓𑀸𑀭𑀻 𑀚𑀦𑀲𑁆𑀲𑀸𑀧𑀺, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀕𑀼𑀡𑀁 𑀯𑀤𑀁;

𑀲𑀭𑀤𑁄𑀯 𑀲𑀲𑀗𑁆𑀓𑁄𑀳𑀁, 𑀢𑁂𑀦𑀸𑀲𑀺𑀁 𑀧𑀺𑀬𑀤𑀲𑁆𑀲𑀦𑁄.

𑁧𑁧𑁮.

‘‘𑀬𑀣𑀸𑀲𑀢𑁆𑀢𑀺𑀯𑀲𑁂𑀦𑀸𑀳𑀁 ¶ ¶ , 𑀲𑀩𑁆𑀩𑀯𑀸𑀘𑀸𑀳𑀺 𑀲𑀦𑁆𑀣𑀯𑀺𑀁;

𑀲𑀼𑀕𑀢𑀁 𑀢𑁂𑀦 𑀯𑀸𑀕𑀺𑀲𑁄, 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀯𑀸.

𑁧𑁧𑁯.

‘‘𑀬𑁂 𑀩𑀸𑀮𑀸 𑀯𑀺𑀫𑀢𑀺𑀁 𑀧𑀢𑁆𑀢𑀸, 𑀧𑀭𑀺𑀪𑁄𑀦𑁆𑀢𑀺 𑀫𑀳𑀸𑀫𑀼𑀦𑀺𑀁;

𑀦𑀺𑀕𑁆𑀕𑀳𑀺𑀁 𑀢𑁂 𑀲𑀤𑁆𑀥𑀫𑁆𑀫𑁂𑀦, 𑀧𑀭𑀺𑀪𑀽𑀢𑁄 𑀦 𑀢𑁂𑀦𑀳𑀁 [𑀧𑀭𑀺𑀪𑀽𑀢𑁂𑀦 𑀢𑁂𑀦𑀳𑀁 (𑀲𑁆𑀬𑀸.)].

𑁧𑁨𑁦.

‘‘𑀩𑀼𑀤𑁆𑀥𑀯𑀡𑁆𑀡𑁂𑀦 𑀲𑀢𑁆𑀢𑀸𑀦𑀁, 𑀓𑀺𑀮𑁂𑀲𑁂 𑀅𑀧𑀦𑁂𑀲𑀳𑀁;

𑀦𑀺𑀓𑁆𑀓𑀺𑀮𑁂𑀲𑀫𑀦𑁄 𑀳𑁄𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

𑁧𑁨𑁧.

‘‘𑀲𑁄𑀢𑀽𑀦𑀁 ¶ 𑀯𑀼𑀤𑁆𑀥𑀺𑀫𑀚𑀦𑀺𑀁 [𑀩𑀼𑀤𑁆𑀥𑀺𑀫𑀚𑀦𑀺𑀁 (𑀲𑀻. 𑀧𑀻.)], 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀤𑁂𑀲𑀓𑁄;

𑀢𑁂𑀦𑀸𑀳𑀫𑀸𑀲𑀺𑀁 [𑀢𑁂𑀦𑀸𑀧𑀺 𑀘𑀸𑀲𑀺𑀁 (𑀲𑁆𑀬𑀸.)] 𑀲𑀧𑁆𑀧𑀜𑁆𑀜𑁄, 𑀦𑀺𑀧𑀼𑀡𑀢𑁆𑀣𑀯𑀺𑀧𑀲𑁆𑀲𑀓𑁄.

𑁧𑁨𑁨.

‘‘𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀢𑀺𑀡𑁆𑀡𑀲𑀁𑀲𑀸𑀭𑀲𑀸𑀕𑀭𑁄;

𑀲𑀺𑀔𑀻𑀯 𑀅𑀦𑀼𑀧𑀸𑀤𑀸𑀦𑁄, 𑀧𑀸𑀧𑀼𑀡𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

𑁧𑁨𑁩.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀲𑁆𑀫𑀺𑀁, 𑀬𑀫𑀳𑀁 𑀲𑀦𑁆𑀣𑀯𑀺𑀁 𑀚𑀺𑀦𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀯𑀡𑁆𑀡𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁪.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁨𑁫.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨𑁬.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀕𑀦𑁆𑀥𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀕𑀦𑁆𑀥𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀺𑀡𑀤𑀸𑀬𑀓𑀯𑀕𑁆𑀕𑁄 𑀢𑁂𑀧𑀜𑁆𑀜𑀸𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀢𑀺𑀡𑀤𑁄 ¶ 𑀫𑀜𑁆𑀘𑀤𑁄 𑀘𑁂𑀯, 𑀲𑀭𑀡𑀩𑁆𑀪𑀜𑁆𑀚𑀦𑀧𑁆𑀧𑀤𑁄;

𑀲𑀼𑀧𑀝𑁄 𑀤𑀡𑁆𑀟𑀤𑀸𑀬𑀻 𑀘, 𑀦𑁂𑀮𑀧𑀽𑀚𑀻 𑀢𑀣𑁂𑀯 𑀘.

𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑁄 𑀫𑀡𑁆𑀟𑁄, 𑀲𑀼𑀕𑀦𑁆𑀥𑁄 𑀤𑀲𑀫𑁄𑀢𑀺 𑀘;

𑀕𑀸𑀣𑀸𑀲𑀢𑀁 𑀲𑀢𑁂𑀯𑀻𑀲𑀁, 𑀕𑀡𑀺𑀢𑀜𑁆𑀘𑁂𑀢𑁆𑀣 𑀲𑀩𑁆𑀩𑀲𑁄.

𑁫𑁪. 𑀓𑀘𑁆𑀘𑀸𑀬𑀦𑀯𑀕𑁆𑀕𑁄

𑁧. 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁧.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ ¶ ¶ 𑀦𑀸𑀫 𑀚𑀺𑀦𑁄, 𑀅𑀦𑁂𑀚𑁄 𑀅𑀚𑀺𑀢𑀁 𑀚𑀬𑁄;

𑀲𑀢𑀲𑀳𑀲𑁆𑀲𑁂 𑀓𑀧𑁆𑀧𑀸𑀦𑀁, 𑀇𑀢𑁄 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁨.

‘‘𑀯𑀻𑀭𑁄 𑀓𑀫𑀮𑀧𑀢𑁆𑀢𑀓𑁆𑀔𑁄, 𑀲𑀲𑀗𑁆𑀓𑀯𑀺𑀫𑀮𑀸𑀦𑀦𑁄;

𑀓𑀦𑀓𑀸𑀘𑀮𑀲𑀗𑁆𑀓𑀸𑀲𑁄 [𑀓𑀜𑁆𑀘𑀦𑀢𑀘𑀲𑀗𑁆𑀓𑀸𑀲𑁄 (𑀲𑁆𑀬𑀸.)], 𑀭𑀯𑀺𑀤𑀺𑀢𑁆𑀢𑀺𑀲𑀫𑀧𑁆𑀧𑀪𑁄.

𑁩.

‘‘𑀲𑀢𑁆𑀢𑀦𑁂𑀢𑁆𑀢𑀫𑀦𑁄𑀳𑀸𑀭𑀻, 𑀯𑀭𑀮𑀓𑁆𑀔𑀡𑀪𑀽𑀲𑀺𑀢𑁄;

𑀲𑀩𑁆𑀩𑀯𑀸𑀓𑁆𑀬𑀧𑀣𑀸𑀢𑀻𑀢𑁄, 𑀫𑀦𑀼𑀚𑀸𑀫𑀭𑀲𑀓𑁆𑀓𑀢𑁄.

𑁪.

‘‘𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀬𑀁 𑀲𑀢𑁆𑀢𑁂, 𑀯𑀸𑀕𑀻𑀲𑁄 𑀫𑀥𑀼𑀭𑀲𑁆𑀲𑀭𑁄;

𑀓𑀭𑀼𑀡𑀸𑀦𑀺𑀩𑀦𑁆𑀥𑀲𑀦𑁆𑀢𑀸𑀦𑁄, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

𑁫.

‘‘𑀤𑁂𑀲𑁂𑀢𑀺 ¶ 𑀫𑀥𑀼𑀭𑀁 𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀽𑀧𑀲𑀁𑀳𑀺𑀢𑀁;

𑀦𑀺𑀫𑀼𑀕𑁆𑀕𑁂 𑀫𑁄𑀳𑀧𑀗𑁆𑀓𑀫𑁆𑀳𑀺, 𑀲𑀫𑀼𑀤𑁆𑀥𑀭𑀢𑀺 𑀧𑀸𑀡𑀺𑀦𑁂.

𑁬.

‘‘𑀢𑀤𑀸 𑀏𑀓𑀘𑀭𑁄 𑀳𑀼𑀢𑁆𑀯𑀸, 𑀢𑀸𑀧𑀲𑁄 𑀳𑀺𑀫𑀯𑀸𑀮𑀬𑁄;

𑀦𑀪𑀲𑀸 𑀫𑀸𑀦𑀼𑀲𑀁 𑀮𑁄𑀓𑀁, 𑀕𑀘𑁆𑀙𑀦𑁆𑀢𑁄 𑀚𑀺𑀦𑀫𑀤𑁆𑀤𑀲𑀁.

𑁭.

‘‘𑀉𑀧𑁂𑀘𑁆𑀘 𑀲𑀦𑁆𑀢𑀺𑀓𑀁 𑀢𑀲𑁆𑀲, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀯𑀡𑁆𑀡𑀬𑀦𑁆𑀢𑀲𑁆𑀲 𑀯𑀻𑀭𑀲𑁆𑀲, 𑀲𑀸𑀯𑀓𑀲𑁆𑀲 𑀫𑀳𑀸𑀕𑀼𑀡𑀁.

𑁮.

‘‘𑀲𑀗𑁆𑀔𑀺𑀢𑁆𑀢𑁂𑀦 𑀫𑀬𑀸 𑀯𑀼𑀢𑁆𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑀬𑀁;

𑀧𑀭𑀺𑀲𑀁 𑀫𑀜𑁆𑀘 𑀢𑁄𑀲𑁂𑀢𑀺, 𑀬𑀣𑀸 𑀓𑀘𑁆𑀘𑀸𑀬𑀦𑁄 𑀅𑀬𑀁.

𑁯.

‘‘‘𑀦𑀸𑀳𑀁 ¶ 𑀏𑀯𑀫𑀺𑀥𑁂𑀓𑀘𑁆𑀘𑀁 [𑀏𑀯𑀁𑀯𑀺𑀥𑀁 𑀓𑀜𑁆𑀘𑀺 (𑀲𑀻. 𑀧𑀻.)], 𑀅𑀜𑁆𑀜𑀁 𑀧𑀲𑁆𑀲𑀸𑀫𑀺 𑀲𑀸𑀯𑀓𑀁;

𑀢𑀲𑁆𑀫𑀸𑀢𑀤𑀕𑁆𑀕𑁂 [𑀢𑀲𑁆𑀫𑁂𑀢𑀤𑀕𑁆𑀕𑁂 (𑀲𑀻.)] 𑀏𑀲𑀕𑁆𑀕𑁄, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄’.

𑁧𑁦.

‘‘𑀢𑀤𑀸𑀳𑀁 𑀯𑀺𑀫𑁆𑀳𑀺𑀢𑁄 𑀳𑀼𑀢𑁆𑀯𑀸, 𑀲𑀼𑀢𑁆𑀯𑀸 𑀯𑀸𑀓𑁆𑀬𑀁 𑀫𑀦𑁄𑀭𑀫𑀁;

𑀳𑀺𑀫𑀯𑀦𑁆𑀢𑀁 𑀕𑀫𑀺𑀢𑁆𑀯𑀸𑀦, 𑀆𑀳𑀺𑀢𑁆𑀯𑀸 [𑀆𑀳𑀢𑁆𑀯𑀸 (𑀲𑀻. 𑀧𑀻.)] 𑀧𑀼𑀧𑁆𑀨𑀲𑀜𑁆𑀘𑀬𑀁.

𑁧𑁧.

‘‘𑀧𑀽𑀚𑁂𑀢𑁆𑀯𑀸 𑀮𑁄𑀓𑀲𑀭𑀡𑀁, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀢𑀤𑀸 𑀫𑀫𑀸𑀲𑀬𑀁 𑀜𑀢𑁆𑀯𑀸, 𑀩𑁆𑀬𑀸𑀓𑀸𑀲𑀺 𑀲 𑀭𑀡𑀜𑁆𑀚𑀳𑁄.

𑁧𑁨.

‘‘‘𑀧𑀲𑁆𑀲𑀣𑁂𑀢𑀁 ¶ 𑀇𑀲𑀺𑀯𑀭𑀁, 𑀦𑀺𑀤𑁆𑀥𑀦𑁆𑀢𑀓𑀦𑀓𑀢𑁆𑀢𑀘𑀁;

𑀉𑀤𑁆𑀥𑀕𑁆𑀕𑀮𑁄𑀫𑀁 𑀧𑀻𑀡𑀁𑀲𑀁, 𑀅𑀘𑀮𑀁 𑀧𑀜𑁆𑀚𑀮𑀺𑀁 𑀞𑀺𑀢𑀁.

𑁧𑁩.

‘‘‘𑀳𑀸𑀲𑀁 ¶ 𑀲𑀼𑀧𑀼𑀡𑁆𑀡𑀦𑀬𑀦𑀁, 𑀩𑀼𑀤𑁆𑀥𑀯𑀡𑁆𑀡𑀕𑀢𑀸𑀲𑀬𑀁;

𑀥𑀫𑁆𑀫𑀚𑀁 𑀉𑀕𑁆𑀕𑀳𑀤𑀬𑀁 [𑀥𑀫𑁆𑀫𑀁𑀯 𑀯𑀺𑀕𑁆𑀕𑀳𑀯𑀭𑀁 (𑀲𑀻.), 𑀥𑀫𑁆𑀫𑀧𑀝𑀺𑀕𑁆𑀕𑀳𑀯𑀭𑀁 (𑀧𑀻.)], 𑀅𑀫𑀢𑀸𑀲𑀺𑀢𑁆𑀢𑀲𑀦𑁆𑀦𑀺𑀪𑀁’.

𑁧𑁪.

‘‘𑀓𑀘𑁆𑀘𑀸𑀦𑀲𑁆𑀲 𑀕𑀼𑀡𑀁 𑀲𑀼𑀢𑁆𑀯𑀸, 𑀢𑀁 𑀞𑀸𑀦𑀁 𑀧𑀢𑁆𑀣𑀬𑀁 𑀞𑀺𑀢𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀕𑁄𑀢𑀫𑀲𑁆𑀲 𑀫𑀳𑀸𑀫𑀼𑀦𑁂.

𑁧𑁫.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀘𑁆𑀘𑀸𑀦𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁧𑁬.

‘‘𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀜𑀸𑀡𑀻, 𑀅𑀥𑀺𑀧𑁆𑀧𑀸𑀬𑀯𑀺𑀤𑀽 𑀫𑀼𑀦𑁂;

𑀧𑀸𑀧𑀼𑀡𑀺𑀲𑁆𑀲𑀢𑀺 𑀢𑀁 𑀞𑀸𑀦𑀁, 𑀬𑀣𑀸𑀬𑀁 𑀩𑁆𑀬𑀸𑀓𑀢𑁄 𑀫𑀬𑀸.

𑁧𑁭.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁮.

‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁯.

‘‘𑀤𑀼𑀯𑁂 ¶ 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀅𑀣 𑀩𑁆𑀭𑀸𑀳𑁆𑀫𑀡𑁂;

𑀦𑀻𑀘𑁂 𑀓𑀼𑀮𑁂 𑀦 𑀚𑀸𑀬𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦.

‘‘𑀧𑀘𑁆𑀙𑀺𑀫𑁂 ¶ 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀉𑀚𑁆𑀚𑁂𑀦𑀺𑀬𑀁 𑀧𑀼𑀭𑁂 [𑀚𑀸𑀢𑁄, 𑀉𑀚𑁆𑀚𑁂𑀦𑀺𑀬𑀁 𑀧𑀼𑀭𑁂 𑀭𑀫𑁂 (𑀲𑁆𑀬𑀸.)];

𑀧𑀚𑁆𑀚𑁄𑀢𑀲𑁆𑀲 𑀘 𑀘𑀡𑁆𑀟𑀲𑁆𑀲, 𑀧𑀼𑀭𑁄𑀳𑀺𑀢𑀤𑀺𑀚𑀸𑀥𑀺𑀦𑁄 [𑀧𑀼𑀭𑁄𑀳𑀺𑀢𑀤𑀺𑀚𑀸𑀢𑀺𑀦𑁄 (𑀲𑀻. 𑀧𑀻.)].

𑁨𑁧.

‘‘𑀧𑀼𑀢𑁆𑀢𑁄 𑀢𑀺𑀭𑀺𑀝𑀺𑀯𑀘𑁆𑀙𑀲𑁆𑀲 [𑀢𑀺𑀭𑀺𑀝𑀯𑀘𑁆𑀙𑀲𑁆𑀲 (𑀲𑀻.), 𑀢𑀺𑀧𑀺𑀢𑀺𑀯𑀘𑁆𑀙𑀲𑁆𑀲 (𑀲𑁆𑀬𑀸.)], 𑀦𑀺𑀧𑀼𑀡𑁄 𑀯𑁂𑀤𑀧𑀸𑀭𑀕𑀽;

𑀫𑀸𑀢𑀸 𑀘 𑀘𑀦𑁆𑀤𑀺𑀫𑀸 𑀦𑀸𑀫, 𑀓𑀘𑁆𑀘𑀸𑀦𑁄𑀳𑀁 𑀯𑀭𑀢𑁆𑀢𑀘𑁄.

𑁨𑁨.

‘‘𑀯𑀻𑀫𑀁𑀲𑀦𑀢𑁆𑀣𑀁 𑀩𑀼𑀤𑁆𑀥𑀲𑁆𑀲, 𑀪𑀽𑀫𑀺𑀧𑀸𑀮𑁂𑀦 𑀧𑁂𑀲𑀺𑀢𑁄;

𑀤𑀺𑀲𑁆𑀯𑀸 𑀫𑁄𑀓𑁆𑀔𑀧𑀼𑀭𑀤𑁆𑀯𑀸𑀭𑀁, 𑀦𑀸𑀬𑀓𑀁 𑀕𑀼𑀡𑀲𑀜𑁆𑀘𑀬𑀁.

𑁨𑁩.

‘‘𑀲𑀼𑀢𑁆𑀯𑀸 𑀘 𑀯𑀺𑀫𑀮𑀁 𑀯𑀸𑀓𑁆𑀬𑀁, 𑀕𑀢𑀺𑀧𑀗𑁆𑀓𑀯𑀺𑀲𑁄𑀲𑀦𑀁;

𑀧𑀸𑀧𑀼𑀡𑀺𑀁 𑀅𑀫𑀢𑀁 𑀲𑀦𑁆𑀢𑀁, 𑀲𑁂𑀲𑁂𑀳𑀺 𑀲𑀳 𑀲𑀢𑁆𑀢𑀳𑀺.

𑁨𑁪.

‘‘𑀅𑀥𑀺𑀧𑁆𑀧𑀸𑀬𑀯𑀺𑀤𑀽 𑀚𑀸𑀢𑁄, 𑀲𑀼𑀕𑀢𑀲𑁆𑀲 𑀫𑀳𑀸𑀫𑀢𑁂;

𑀞𑀧𑀺𑀢𑁄 𑀏𑀢𑀤𑀕𑁆𑀕𑁂 𑀘, 𑀲𑀼𑀲𑀫𑀺𑀤𑁆𑀥𑀫𑀦𑁄𑀭𑀣𑁄.

𑁨𑁫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁬.

‘‘𑀲𑁆𑀯𑀸𑀕𑀢𑀁 ¶ ¶ 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂; 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁭.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀯𑀓𑁆𑀓𑀮𑀺𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁮.

‘‘𑀇𑀢𑁄 ¶ 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄;

𑀅𑀦𑁄𑀫𑀦𑀸𑀫𑁄 𑀅𑀫𑀺𑀢𑁄, 𑀦𑀸𑀫𑁂𑀦 𑀧𑀤𑀼𑀫𑀼𑀢𑁆𑀢𑀭𑁄.

𑁨𑁯.

‘‘𑀧𑀤𑀼𑀫𑀸𑀓𑀸𑀭𑀯𑀤𑀦𑁄, 𑀧𑀤𑀼𑀫𑀸𑀫𑀮𑀲𑀼𑀘𑁆𑀙𑀯𑀻;

𑀮𑁄𑀓𑁂𑀦𑀸𑀦𑀼𑀧𑀮𑀺𑀢𑁆𑀢𑁄𑀯 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

𑁩𑁦.

‘‘𑀯𑀻𑀭𑁄 𑀧𑀤𑀼𑀫𑀧𑀢𑁆𑀢𑀓𑁆𑀔𑁄, 𑀓𑀦𑁆𑀢𑁄 𑀘 𑀧𑀤𑀼𑀫𑀁 𑀬𑀣𑀸;

𑀧𑀤𑀼𑀫𑀼𑀢𑁆𑀢𑀭𑀕𑀦𑁆𑀥𑁄𑀯, 𑀢𑀲𑁆𑀫𑀸 𑀲𑁄 𑀧𑀤𑀼𑀫𑀼𑀢𑁆𑀢𑀭𑁄.

𑁩𑁧.

‘‘𑀮𑁄𑀓𑀚𑁂𑀝𑁆𑀞𑁄 𑀘 𑀦𑀺𑀫𑁆𑀫𑀸𑀦𑁄, 𑀅𑀦𑁆𑀥𑀸𑀦𑀁 𑀦𑀬𑀦𑀽𑀧𑀫𑁄;

𑀲𑀦𑁆𑀢𑀯𑁂𑀲𑁄 𑀕𑀼𑀡𑀦𑀺𑀥𑀺, 𑀓𑀭𑀼𑀡𑀸𑀫𑀢𑀺𑀲𑀸𑀕𑀭𑁄.

𑁩𑁨.

‘‘𑀲 𑀓𑀤𑀸𑀘𑀺 𑀫𑀳𑀸𑀯𑀻𑀭𑁄, 𑀩𑁆𑀭𑀳𑁆𑀫𑀸𑀲𑀼𑀭𑀲𑀼𑀭𑀘𑁆𑀘𑀺𑀢𑁄;

𑀲𑀤𑁂𑀯𑀫𑀦𑀼𑀚𑀸𑀓𑀺𑀡𑁆𑀡𑁂, 𑀚𑀦𑀫𑀚𑁆𑀛𑁂 𑀚𑀺𑀦𑀼𑀢𑁆𑀢𑀫𑁄 [𑀚𑀦𑀼𑀢𑁆𑀢𑀫𑁄 (𑀲𑁆𑀬𑀸. 𑀧𑀻.), 𑀅𑀦𑀼𑀢𑁆𑀢𑀫𑁄 (𑀓.) 𑀯𑀗𑁆𑀕𑀻𑀲𑀢𑁆𑀣𑁂𑀭𑀸𑀧𑀤𑀸𑀦𑁂𑀧𑀺].

𑁩𑁩.

‘‘𑀯𑀤𑀦𑁂𑀦 𑀲𑀼𑀕𑀦𑁆𑀥𑁂𑀦, 𑀫𑀥𑀼𑀭𑁂𑀦 𑀭𑀼𑀢𑁂𑀦 𑀘;

𑀭𑀜𑁆𑀚𑀬𑀁 𑀧𑀭𑀺𑀲𑀁 𑀲𑀩𑁆𑀩𑀁, 𑀲𑀦𑁆𑀣𑀯𑀻 𑀲𑀸𑀯𑀓𑀁 𑀲𑀓𑀁.

𑁩𑁪.

‘‘𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 ¶ 𑀲𑀼𑀫𑀢𑀺, 𑀫𑀫 𑀤𑀲𑁆𑀲𑀦𑀮𑀸𑀮𑀲𑁄 [𑀤𑀲𑁆𑀲𑀦𑀲𑀸𑀮𑀬𑁄 (𑀲𑁆𑀬𑀸.)];

𑀦𑀢𑁆𑀣𑀺 𑀏𑀢𑀸𑀤𑀺𑀲𑁄 𑀅𑀜𑁆𑀜𑁄, 𑀬𑀣𑀸𑀬𑀁 𑀪𑀺𑀓𑁆𑀔𑀼 𑀯𑀓𑁆𑀓𑀮𑀺.

𑁩𑁫.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀢𑁆𑀭𑀚𑁄;

𑀳𑀼𑀢𑁆𑀯𑀸 𑀲𑀼𑀢𑁆𑀯𑀸 𑀘 𑀢𑀁 𑀯𑀸𑀓𑁆𑀬𑀁, 𑀢𑀁 𑀞𑀸𑀦𑀫𑀪𑀺𑀭𑁄𑀘𑀬𑀺𑀁.

𑁩𑁬.

‘‘𑀲𑀲𑀸𑀯𑀓𑀁 ¶ 𑀢𑀁 𑀯𑀺𑀫𑀮𑀁, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀢𑁆𑀢𑀸𑀳𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀤𑀼𑀲𑁆𑀲𑁂𑀳𑀘𑁆𑀙𑀸𑀤𑀬𑀺𑀁 𑀢𑀤𑀸.

𑁩𑁭.

‘‘𑀦𑀺𑀧𑀘𑁆𑀘 ¶ ¶ 𑀲𑀺𑀭𑀲𑀸 𑀢𑀲𑁆𑀲, 𑀅𑀦𑀦𑁆𑀢𑀕𑀼𑀡𑀲𑀸𑀕𑀭𑁂;

𑀦𑀺𑀫𑀼𑀕𑁆𑀕𑁄 𑀧𑀻𑀢𑀺𑀲𑀫𑁆𑀧𑀼𑀡𑁆𑀡𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁩𑁮.

‘‘‘𑀬𑁄 𑀲𑁄 𑀢𑀬𑀸 𑀲𑀦𑁆𑀣𑀯𑀺𑀢𑁄, 𑀇𑀢𑁄 𑀲𑀢𑁆𑀢𑀫𑀓𑁂 𑀫𑀼𑀦𑀺 [𑀇𑀥 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀇𑀲𑀺 (𑀲𑁆𑀬𑀸.), 𑀇𑀢𑁄 𑀲𑀢𑁆𑀢𑀫𑀓𑁂𑀳𑀦𑀺 (𑀲𑀻. 𑀧𑀻.)];

𑀪𑀺𑀓𑁆𑀔𑀼 𑀲𑀤𑁆𑀥𑀸𑀯𑀢𑀁 𑀅𑀕𑁆𑀕𑁄, 𑀢𑀸𑀤𑀺𑀲𑁄 𑀳𑁄𑀫𑀳𑀁 𑀫𑀼𑀦𑁂’.

𑁩𑁯.

‘‘𑀏𑀯𑀁 𑀯𑀼𑀢𑁆𑀢𑁂 𑀫𑀳𑀸𑀯𑀻𑀭𑁄, 𑀅𑀦𑀸𑀯𑀭𑀡𑀤𑀲𑁆𑀲𑀦𑁄;

𑀇𑀫𑀁 𑀯𑀸𑀓𑁆𑀬𑀁 𑀉𑀤𑀻𑀭𑁂𑀲𑀺, 𑀧𑀭𑀺𑀲𑀸𑀬 𑀫𑀳𑀸𑀫𑀼𑀦𑀺.

𑁪𑁦.

‘‘‘𑀧𑀲𑁆𑀲𑀣𑁂𑀢𑀁 𑀫𑀸𑀡𑀯𑀓𑀁, 𑀧𑀻𑀢𑀫𑀝𑁆𑀞𑀦𑀺𑀯𑀸𑀲𑀦𑀁;

𑀳𑁂𑀫𑀬𑀜𑁆𑀜𑁄𑀧𑀘𑀺𑀢𑀗𑁆𑀕𑀁 [𑀳𑁂𑀫𑀬𑀜𑁆𑀜𑁄𑀧𑀯𑀻𑀢𑀗𑁆𑀕𑀁 (𑀲𑀻.)], 𑀚𑀦𑀦𑁂𑀢𑁆𑀢𑀫𑀦𑁄𑀳𑀭𑀁.

𑁪𑁧.

‘‘‘𑀏𑀲𑁄 𑀅𑀦𑀸𑀕𑀢𑀤𑁆𑀥𑀸𑀦𑁂, 𑀕𑁄𑀢𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀅𑀕𑁆𑀕𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁, 𑀲𑀸𑀯𑀓𑁄𑀬𑀁 𑀪𑀯𑀺𑀲𑁆𑀲𑀢𑀺.

𑁪𑁨.

‘‘‘𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀲𑀩𑁆𑀩𑀲𑀦𑁆𑀢𑀸𑀧𑀯𑀚𑁆𑀚𑀺𑀢𑁄;

𑀲𑀩𑁆𑀩𑀪𑁄𑀕𑀧𑀭𑀺𑀩𑁆𑀬𑀽𑀴𑁆𑀳𑁄, 𑀲𑀼𑀔𑀺𑀢𑁄 𑀲𑀁𑀲𑀭𑀺𑀲𑁆𑀲𑀢𑀺.

𑁪𑁩.

‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁪.

‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀯𑀓𑁆𑀓𑀮𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁪𑁫.

‘‘𑀢𑁂𑀦 𑀓𑀫𑁆𑀫𑀯𑀺𑀲𑁂𑀲𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁪𑁬.

‘‘𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑀼𑀢𑁆𑀯𑀸, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀚𑀸𑀢𑁄, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀁.

𑁪𑁭.

‘‘𑀦𑁄𑀦𑀻𑀢𑀲𑀼𑀔𑀼𑀫𑀸𑀮𑀁 ¶ 𑀫𑀁, 𑀚𑀸𑀢𑀧𑀮𑁆𑀮𑀯𑀓𑁄𑀫𑀮𑀁;

𑀫𑀦𑁆𑀤𑀁 𑀉𑀢𑁆𑀢𑀸𑀦𑀲𑀬𑀦𑀁, 𑀧𑀺𑀲𑀸𑀘𑀪𑀬𑀢𑀚𑁆𑀚𑀺𑀢𑀸.

𑁪𑁮.

‘‘𑀧𑀸𑀤𑀫𑀽𑀮𑁂 𑀫𑀳𑁂𑀲𑀺𑀲𑁆𑀲, 𑀲𑀸𑀬𑁂𑀲𑀼𑀁 𑀤𑀻𑀦𑀫𑀸𑀦𑀲𑀸;

𑀇𑀫𑀁 𑀤𑀤𑀸𑀫 𑀢𑁂 𑀦𑀸𑀣, 𑀲𑀭𑀡𑀁 𑀳𑁄𑀳𑀺 𑀦𑀸𑀬𑀓.

𑁪𑁯.

‘‘𑀢𑀤𑀸 ¶ ¶ 𑀧𑀝𑀺𑀕𑁆𑀕𑀳𑀺 𑀲𑁄 𑀫𑀁, 𑀪𑀻𑀢𑀸𑀦𑀁 𑀲𑀭𑀡𑁄 𑀫𑀼𑀦𑀺;

𑀚𑀸𑀮𑀺𑀦𑀸 𑀘𑀓𑁆𑀓𑀗𑁆𑀓𑀺𑀢𑁂𑀦 [𑀲𑀗𑁆𑀓𑀮𑀗𑁆𑀓𑁂𑀦 (𑀲𑀻.)], 𑀫𑀼𑀤𑀼𑀓𑁄𑀫𑀮𑀧𑀸𑀡𑀺𑀦𑀸.

𑁫𑁦.

‘‘𑀢𑀤𑀸 𑀧𑀪𑀼𑀢𑀺 𑀢𑁂𑀦𑀸𑀳𑀁, 𑀅𑀭𑀓𑁆𑀔𑁂𑀬𑁆𑀬𑁂𑀦 𑀭𑀓𑁆𑀔𑀺𑀢𑁄;

𑀲𑀩𑁆𑀩𑀯𑁂𑀭𑀯𑀺𑀦𑀺𑀫𑀼𑀢𑁆𑀢𑁄 [𑀲𑀩𑁆𑀩𑀩𑁆𑀬𑀸𑀥𑀺𑀯𑀺𑀦𑀺𑀫𑀼𑀢𑁆𑀢𑁄 (𑀲𑁆𑀬𑀸.), 𑀲𑀩𑁆𑀩𑀽𑀧𑀥𑀺𑀯𑀺𑀦𑀺𑀫𑀼𑀢𑁆𑀢𑁄 (𑀧𑀻.)], 𑀲𑀼𑀔𑁂𑀦 𑀧𑀭𑀺𑀯𑀼𑀤𑁆𑀥𑀺𑀢𑁄.

𑁫𑁧.

‘‘𑀲𑀼𑀕𑀢𑁂𑀦 ¶ 𑀯𑀺𑀦𑀸 𑀪𑀽𑀢𑁄, 𑀉𑀓𑁆𑀓𑀡𑁆𑀞𑀸𑀫𑀺 𑀫𑀼𑀳𑀼𑀢𑁆𑀢𑀓𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁫𑁨.

‘‘𑀲𑀩𑁆𑀩𑀧𑀸𑀭𑀫𑀺𑀲𑀫𑁆𑀪𑀽𑀢𑀁, 𑀦𑀻𑀮𑀓𑁆𑀔𑀺𑀦𑀬𑀦𑀁 [𑀮𑀗𑁆𑀓𑀺𑀦𑀻𑀮𑀬𑀦𑀁 (𑀲𑀻.)] 𑀯𑀭𑀁;

𑀭𑀽𑀧𑀁 𑀲𑀩𑁆𑀩𑀲𑀼𑀪𑀸𑀓𑀺𑀡𑁆𑀡𑀁, 𑀅𑀢𑀺𑀢𑁆𑀢𑁄 𑀯𑀺𑀳𑀭𑀸𑀫𑀳𑀁 [𑀯𑀺𑀳𑀬𑀸𑀫𑀳𑀁 (𑀲𑀻. 𑀧𑀻.)].

𑁫𑁩.

‘‘𑀩𑀼𑀤𑁆𑀥𑀭𑀽𑀧𑀭𑀢𑀺𑀁 [𑀩𑀼𑀤𑁆𑀥𑁄 𑀭𑀽𑀧𑀭𑀢𑀺𑀁 (𑀲𑀻.)] 𑀜𑀢𑁆𑀯𑀸, 𑀢𑀤𑀸 𑀑𑀯𑀤𑀺 𑀫𑀁 𑀚𑀺𑀦𑁄;

‘𑀅𑀮𑀁 𑀯𑀓𑁆𑀓𑀮𑀺 𑀓𑀺𑀁 𑀭𑀽𑀧𑁂, 𑀭𑀫𑀲𑁂 𑀩𑀸𑀮𑀦𑀦𑁆𑀤𑀺𑀢𑁂.

𑁫𑁪.

‘‘‘𑀬𑁄 𑀳𑀺 𑀧𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑀁, 𑀲𑁄 𑀫𑀁 𑀧𑀲𑁆𑀲𑀢𑀺 𑀧𑀡𑁆𑀟𑀺𑀢𑁄;

𑀅𑀧𑀲𑁆𑀲𑀫𑀸𑀦𑁄 𑀲𑀤𑁆𑀥𑀫𑁆𑀫𑀁, 𑀫𑀁 𑀧𑀲𑁆𑀲𑀫𑁆𑀧𑀺 𑀦 𑀧𑀲𑁆𑀲𑀢𑀺.

𑁫𑁫.

‘‘‘𑀅𑀦𑀦𑁆𑀢𑀸𑀤𑀻𑀦𑀯𑁄 𑀓𑀸𑀬𑁄, 𑀯𑀺𑀲𑀭𑀼𑀓𑁆𑀔𑀲𑀫𑀽𑀧𑀫𑁄;

𑀆𑀯𑀸𑀲𑁄 𑀲𑀩𑁆𑀩𑀭𑁄𑀕𑀸𑀦𑀁, 𑀧𑀼𑀜𑁆𑀚𑁄 𑀤𑀼𑀓𑁆𑀔𑀲𑁆𑀲 𑀓𑁂𑀯𑀮𑁄.

𑁫𑁬.

‘‘‘𑀦𑀺𑀩𑁆𑀩𑀺𑀦𑁆𑀤𑀺𑀬 𑀢𑀢𑁄 𑀭𑀽𑀧𑁂, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀦𑀁, 𑀲𑀼𑀔𑁂𑀦𑀦𑁆𑀢𑀁 𑀕𑀫𑀺𑀲𑁆𑀲𑀢𑀺’.

𑁫𑁭.

‘‘𑀏𑀯𑀁 ¶ 𑀢𑁂𑀦𑀸𑀦𑀼𑀲𑀺𑀝𑁆𑀞𑁄𑀳𑀁, 𑀦𑀸𑀬𑀓𑁂𑀦 𑀳𑀺𑀢𑁂𑀲𑀺𑀦𑀸;

𑀕𑀺𑀚𑁆𑀛𑀓𑀽𑀝𑀁 𑀲𑀫𑀸𑀭𑀼𑀬𑁆𑀳, 𑀛𑀸𑀬𑀸𑀫𑀺 𑀕𑀺𑀭𑀺𑀓𑀦𑁆𑀤𑀭𑁂.

𑁫𑁮.

‘‘𑀞𑀺𑀢𑁄 𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀅𑀲𑁆𑀲𑀸𑀲𑀬𑀺 [𑀫𑀫𑀸𑀳𑀲𑁄 (𑀲𑀻.)] 𑀫𑀳𑀸𑀫𑀼𑀦𑀺;

𑀯𑀓𑁆𑀓𑀮𑀻𑀢𑀺 𑀚𑀺𑀦𑁄 𑀯𑀸𑀘𑀁, 𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀅𑀳𑀁.

𑁫𑁯.

‘‘𑀧𑀓𑁆𑀔𑀦𑁆𑀤𑀺𑀁 𑀲𑁂𑀮𑀧𑀩𑁆𑀪𑀸𑀭𑁂, 𑀅𑀦𑁂𑀓𑀲𑀢𑀧𑁄𑀭𑀺𑀲𑁂;

𑀢𑀤𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦, 𑀲𑀼𑀔𑁂𑀦𑁂𑀯 𑀫𑀳𑀺𑀁 𑀕𑀢𑁄.

𑁬𑁦.

‘‘𑀧𑀼𑀦𑁄𑀧𑀺 [𑀧𑀼𑀦𑀸𑀧𑀺 (𑀲𑁆𑀬𑀸.), 𑀫𑀼𑀦𑀺 𑀫𑀁 (𑀓.)] 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀢𑀫𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁬𑁧.

‘‘𑀲𑀼𑀫𑀳𑀸𑀧𑀭𑀺𑀲𑀫𑀚𑁆𑀛𑁂 ¶ , 𑀢𑀤𑀸 𑀫𑀁 𑀘𑀭𑀡𑀦𑁆𑀢𑀕𑁄;

𑀅𑀕𑁆𑀕𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁, 𑀧𑀜𑁆𑀜𑀧𑁂𑀲𑀺 𑀫𑀳𑀸𑀫𑀢𑀺.

𑁬𑁨.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁩.

‘‘𑀓𑀺𑀮𑁂𑀲𑀸 ¶ 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁪.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁫.

‘‘𑀧𑀝𑀺𑀲𑀫𑁆𑀪𑀺𑀤𑀸 ¶ 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀓𑁆𑀓𑀮𑀺𑀢𑁆𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁬.

‘‘𑀧𑀤𑀼𑀫𑀼𑀢𑁆𑀢𑀭𑁄 ¶ 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀉𑀤𑀺𑀢𑁄 𑀅𑀚𑀝𑀸𑀓𑀸𑀲𑁂 [𑀚𑀕𑀤𑀸𑀓𑀸𑀲𑁂 (𑀲𑀻.), 𑀚𑀮𑀤𑀸𑀓𑀸𑀲𑁂 (𑀧𑀻.)], 𑀭𑀯𑀻𑀯 𑀲𑀭𑀤𑀫𑁆𑀩𑀭𑁂.

𑁬𑁭.

‘‘𑀯𑀘𑀦𑀸𑀪𑀸𑀬 𑀩𑁄𑀥𑁂𑀢𑀺, 𑀯𑁂𑀦𑁂𑀬𑁆𑀬𑀧𑀤𑀼𑀫𑀸𑀦𑀺 𑀲𑁄;

𑀓𑀺𑀮𑁂𑀲𑀧𑀗𑁆𑀓𑀁 𑀲𑁄𑀲𑁂𑀢𑀺, 𑀫𑀢𑀺𑀭𑀁𑀲𑀻𑀳𑀺 𑀦𑀸𑀬𑀓𑁄.

𑁬𑁮.

‘‘𑀢𑀺𑀢𑁆𑀣𑀺𑀬𑀸𑀦𑀁 𑀬𑀲𑁂 [𑀬𑀲𑁄 (𑀲𑀻. 𑀧𑀻.)] 𑀳𑀦𑁆𑀢𑀺, 𑀔𑀚𑁆𑀚𑁄𑀢𑀸𑀪𑀸 𑀬𑀣𑀸 𑀭𑀯𑀺;

𑀲𑀘𑁆𑀘𑀢𑁆𑀣𑀸𑀪𑀁 𑀧𑀓𑀸𑀲𑁂𑀢𑀺, 𑀭𑀢𑀦𑀁𑀯 𑀤𑀺𑀯𑀸𑀓𑀭𑁄.

𑁬𑁯.

‘‘𑀕𑀼𑀡𑀸𑀦𑀁 𑀆𑀬𑀢𑀺𑀪𑀽𑀢𑁄, 𑀭𑀢𑀦𑀸𑀦𑀁𑀯 𑀲𑀸𑀕𑀭𑁄;

𑀧𑀚𑁆𑀚𑀼𑀦𑁆𑀦𑁄𑀭𑀺𑀯 𑀪𑀽𑀢𑀸𑀦𑀺, 𑀥𑀫𑁆𑀫𑀫𑁂𑀖𑁂𑀦 𑀯𑀲𑁆𑀲𑀢𑀺.

𑁭𑁦.

‘‘𑀅𑀓𑁆𑀔𑀤𑀲𑁆𑀲𑁄 𑀢𑀤𑀸 𑀆𑀲𑀺𑀁, 𑀦𑀕𑀭𑁂 𑀳𑀁𑀲𑀲𑀯𑁆𑀳𑀬𑁂;

𑀉𑀧𑁂𑀘𑁆𑀘 𑀥𑀫𑁆𑀫𑀫𑀲𑁆𑀲𑁄𑀲𑀺𑀁, 𑀚𑀮𑀚𑀼𑀢𑁆𑀢𑀫𑀦𑀸𑀫𑀺𑀦𑁄.

𑁭𑁧.

‘‘𑀑𑀯𑀸𑀤𑀓𑀲𑁆𑀲 𑀪𑀺𑀓𑁆𑀔𑀽𑀦𑀁, 𑀲𑀸𑀯𑀓𑀲𑁆𑀲 𑀓𑀢𑀸𑀯𑀺𑀦𑁄;

𑀕𑀼𑀡𑀁 𑀧𑀓𑀸𑀲𑀬𑀦𑁆𑀢𑀲𑁆𑀲, 𑀢𑀧𑁆𑀧𑀬𑀦𑁆𑀢𑀲𑁆𑀲 [𑀢𑁄𑀲𑀬𑀦𑁆𑀢𑀲𑁆𑀲 (𑀲𑀻.), 𑀳𑀸𑀲𑀬𑀦𑁆𑀢𑀲𑁆𑀲 (𑀲𑁆𑀬𑀸.), 𑀯𑀸𑀲𑀬𑀦𑁆𑀢𑀲𑁆𑀲 (𑀧𑀻.)] 𑀫𑁂 𑀫𑀦𑀁.

𑁭𑁨.

‘‘𑀲𑀼𑀢𑁆𑀯𑀸 𑀧𑀢𑀻𑀢𑁄 𑀲𑀼𑀫𑀦𑁄, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀲𑀲𑀺𑀲𑁆𑀲𑀁 𑀪𑁄𑀚𑀬𑀺𑀢𑁆𑀯𑀸𑀦, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

𑁭𑁩.

‘‘𑀢𑀤𑀸 ¶ 𑀳𑀁𑀲𑀲𑀫𑀪𑀸𑀕𑁄, 𑀳𑀁𑀲𑀤𑀼𑀦𑁆𑀤𑀼𑀪𑀺𑀦𑀺𑀲𑁆𑀲𑀦𑁄 [𑀳𑀁𑀲𑀤𑀼𑀦𑁆𑀤𑀼𑀪𑀺𑀲𑀼𑀲𑁆𑀲𑀭𑁄 (𑀲𑀻.)];

𑀧𑀲𑁆𑀲𑀣𑁂𑀢𑀁 𑀫𑀳𑀸𑀫𑀢𑁆𑀢𑀁, 𑀯𑀺𑀦𑀺𑀘𑁆𑀙𑀬𑀯𑀺𑀲𑀸𑀭𑀤𑀁.

𑁭𑁪.

‘‘𑀧𑀢𑀺𑀢𑀁 𑀧𑀸𑀤𑀫𑀽𑀮𑁂 𑀫𑁂, 𑀲𑀫𑀼𑀕𑁆𑀕𑀢𑀢𑀦𑀽𑀭𑀼𑀳𑀁;

𑀚𑀻𑀫𑀽𑀢𑀯𑀡𑁆𑀡𑀁 𑀧𑀻𑀡𑀁𑀲𑀁, 𑀧𑀲𑀦𑁆𑀦𑀦𑀬𑀦𑀸𑀦𑀦𑀁.

𑁭𑁫.

‘‘𑀧𑀭𑀺𑀯𑀸𑀭𑁂𑀦 ¶ 𑀫𑀳𑀢𑀸, 𑀭𑀸𑀚𑀬𑀼𑀢𑁆𑀢𑀁 𑀫𑀳𑀸𑀬𑀲𑀁;

𑀏𑀲𑁄 𑀓𑀢𑀸𑀯𑀺𑀦𑁄 𑀞𑀸𑀦𑀁, 𑀧𑀢𑁆𑀣𑁂𑀢𑀺 𑀫𑀼𑀤𑀺𑀢𑀸𑀲𑀬𑁄.

𑁭𑁬.

‘‘‘𑀇𑀫𑀺𑀦𑀸 ¶ ¶ 𑀧𑀡𑀺𑀧𑀸𑀢𑁂𑀦, 𑀘𑀸𑀕𑁂𑀦 𑀧𑀡𑀺𑀥𑀻𑀳𑀺 𑀘 [𑀧𑀺𑀡𑁆𑀟𑀧𑀸𑀢𑁂𑀦, 𑀘𑁂𑀢𑀦𑀸 𑀧𑀡𑀺𑀥𑀻𑀳𑀺 𑀘 (𑀲𑀻.)];

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀦𑀼𑀧𑀧𑀚𑁆𑀚𑀢𑀺 𑀤𑀼𑀕𑁆𑀕𑀢𑀺𑀁.

𑁭𑁭.

‘‘‘𑀤𑁂𑀯𑁂𑀲𑀼 𑀤𑁂𑀯𑀲𑁄𑀪𑀕𑁆𑀕𑀁, 𑀫𑀦𑀼𑀲𑁆𑀲𑁂𑀲𑀼 𑀫𑀳𑀦𑁆𑀢𑀢𑀁;

𑀅𑀦𑀼𑀪𑁄𑀢𑁆𑀯𑀸𑀦 𑀲𑁂𑀲𑁂𑀦 [𑀅𑀪𑀼𑀢𑁆𑀯𑀸𑀯 𑀲𑁂𑀲𑁂𑀦 (𑀲𑀻.), 𑀅𑀦𑀼𑀪𑁄𑀢𑁆𑀯𑀸𑀯 𑀲𑁂𑀲𑁂𑀦 (𑀲𑁆𑀬𑀸.)], 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺.

𑁭𑁮.

‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁭𑁯.

‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀧𑁆𑀧𑀺𑀦𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁮𑁦.

‘‘𑀢𑀢𑁄𑀳𑀁 𑀲𑀼𑀓𑀢𑀁 𑀓𑀸𑀭𑀁, 𑀓𑀢𑁆𑀯𑀸𑀦 𑀚𑀺𑀦𑀲𑀸𑀲𑀦𑁂;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁.

𑁮𑁧.

‘‘𑀤𑁂𑀯𑀫𑀸𑀦𑀼𑀲𑀭𑀚𑁆𑀚𑀸𑀦𑀺, 𑀲𑀢𑀲𑁄 𑀅𑀦𑀼𑀲𑀸𑀲𑀺𑀬;