📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀩𑀼𑀤𑁆𑀥𑀯𑀁𑀲-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀅𑀦𑀦𑁆𑀢𑀜𑀸𑀡𑀁 ¶ ¶ ¶ 𑀓𑀭𑀼𑀡𑀸𑀮𑀬𑀁 𑀮𑀬𑀁, 𑀫𑀮𑀲𑁆𑀲 𑀩𑀼𑀤𑁆𑀥𑀁 𑀲𑀼𑀲𑀫𑀸𑀳𑀺𑀢𑀁 𑀳𑀺𑀢𑀁;

𑀦𑀫𑀸𑀫𑀺 𑀥𑀫𑁆𑀫𑀁 𑀪𑀯𑀲𑀁𑀯𑀭𑀁 𑀯𑀭𑀁, 𑀕𑀼𑀡𑀸𑀓𑀭𑀜𑁆𑀘𑁂𑀯 𑀦𑀺𑀭𑀗𑁆𑀕𑀡𑀁 𑀕𑀡𑀁.

𑀧𑀜𑁆𑀜𑀸𑀬 𑀲𑁂𑀝𑁆𑀞𑁄 𑀚𑀺𑀦𑀲𑀸𑀯𑀓𑀸𑀦𑀁, 𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀥𑀫𑁆𑀫𑀭𑀸𑀚𑀁;

𑀅𑀧𑀼𑀘𑁆𑀙𑀺 𑀲𑀢𑁆𑀣𑀸𑀭𑀫𑀧𑀸𑀭𑀧𑀸𑀭𑀕𑀼𑀁, 𑀦𑀺𑀭𑀗𑁆𑀕𑀡𑀁 𑀜𑀸𑀢𑀺𑀕𑀡𑀲𑁆𑀲 𑀫𑀚𑁆𑀛𑁂.

𑀲𑀼𑀩𑀼𑀤𑁆𑀥𑀯𑀁𑀲𑁂𑀦𑀺𑀥 𑀩𑀼𑀤𑁆𑀥𑀯𑀁𑀲𑁄, 𑀯𑀺𑀲𑀼𑀤𑁆𑀥𑀯𑀁𑀲𑁂𑀦 𑀯𑀺𑀦𑀸𑀬𑀓𑁂𑀦;

𑀳𑀢𑀸𑀯𑀓𑀸𑀲𑁂𑀦 𑀧𑀓𑀸𑀲𑀺𑀢𑁄 𑀬𑁄, 𑀲𑀫𑀸𑀥𑀺𑀯𑀸𑀲𑁂𑀦 𑀢𑀣𑀸𑀕𑀢𑁂𑀦.

𑀬𑀸𑀯𑀚𑁆𑀚𑀓𑀸𑀮𑀸 ¶ 𑀅𑀯𑀺𑀦𑀸𑀲𑀬𑀦𑁆𑀢𑀸, 𑀧𑀸𑀴𑀺𑀓𑁆𑀓𑀫𑀜𑁆𑀘𑁂𑀯 𑀘 𑀧𑀸𑀴𑀺𑀬𑀢𑁆𑀣𑀁;

𑀓𑀣𑀸𑀦𑀼𑀲𑀦𑁆𑀥𑀺𑀁 𑀲𑀼𑀕𑀢𑀲𑁆𑀲 𑀧𑀼𑀢𑁆𑀢𑀸, 𑀬𑀣𑀸𑀲𑀼𑀢𑀁𑀬𑁂𑀯 𑀲𑀫𑀸𑀳𑀭𑀺𑀁𑀲𑀼.

𑀢𑀲𑁆𑀲𑁂𑀯 ¶ 𑀲𑀫𑁆𑀩𑀼𑀤𑁆𑀥𑀯𑀭𑀦𑁆𑀯𑀬𑀲𑁆𑀲, 𑀲𑀤𑀸 𑀚𑀦𑀸𑀦𑀁 𑀲𑀯𑀦𑀸𑀫𑀢𑀲𑁆𑀲;

𑀧𑀲𑀸𑀤𑀧𑀜𑁆𑀜𑀸𑀚𑀦𑀦𑀲𑁆𑀲 𑀬𑀲𑁆𑀫𑀸, 𑀲𑀁𑀯𑀡𑁆𑀡𑀦𑀸𑀦𑀼𑀓𑁆𑀓𑀫𑀢𑁄 𑀧𑀯𑀢𑁆𑀢𑀸.

𑀲𑀓𑁆𑀓𑀘𑁆𑀘𑀲𑀤𑁆𑀥𑀫𑁆𑀫𑀭𑀢𑁂𑀦 𑀩𑀼𑀤𑁆𑀥𑀲𑀻𑀳𑁂𑀦 𑀲𑀻𑀮𑀸𑀤𑀺𑀕𑀼𑀡𑁄𑀤𑀺𑀢𑁂𑀦;

𑀆𑀬𑀸𑀘𑀺𑀢𑁄𑀳𑀁 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁, 𑀢𑀲𑁆𑀫𑀸𑀲𑁆𑀲 𑀲𑀁𑀯𑀡𑁆𑀡𑀦𑀫𑀸𑀭𑀪𑀺𑀲𑁆𑀲𑀁.

𑀲𑀤𑀸 ¶ 𑀚𑀦𑀸𑀦𑀁 𑀓𑀮𑀺𑀦𑀸𑀲𑀦𑀲𑁆𑀲, 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀚𑀺𑀦𑀲𑀸𑀲𑀦𑀲𑁆𑀲;

𑀫𑀫𑀸𑀧𑀺 𑀧𑀼𑀜𑁆𑀜𑁄𑀤𑀬𑀯𑀼𑀤𑁆𑀥𑀺𑀬𑀢𑁆𑀣𑀁, 𑀧𑀲𑀸𑀤𑀦𑀢𑁆𑀣𑀜𑁆𑀘 𑀫𑀳𑀸𑀚𑀦𑀲𑁆𑀲.

𑀫𑀳𑀸𑀯𑀺𑀳𑀸𑀭𑀸𑀕𑀢𑀧𑀸𑀴𑀺𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸 𑀲𑀗𑁆𑀓𑀭𑀤𑁄𑀲𑀳𑀻𑀦𑀸;

𑀲𑀫𑀸𑀲𑀢𑁄𑀬𑀁 𑀧𑀦 𑀩𑀼𑀤𑁆𑀥𑀯𑀁𑀲𑀲𑀁𑀯𑀡𑁆𑀡𑀦𑀸 𑀳𑁂𑀲𑁆𑀲𑀢𑀺 𑀲𑀸𑀭𑀪𑀽𑀢𑀸.

𑀲𑁄𑀢𑀩𑁆𑀩𑀭𑀽𑀧𑀁 𑀧𑀦 𑀩𑀼𑀤𑁆𑀥𑀯𑀁𑀲𑀓𑀣𑀸𑀬 𑀅𑀜𑁆𑀜𑀁 𑀇𑀥 𑀦𑀢𑁆𑀣𑀺 𑀬𑀲𑁆𑀫𑀸;

𑀧𑀲𑀸𑀤𑀦𑀁 𑀩𑀼𑀤𑁆𑀥𑀕𑀼𑀡𑁂 𑀭𑀢𑀸𑀦𑀁, 𑀧𑀯𑀸𑀳𑀦𑀁 𑀧𑀸𑀧𑀫𑀳𑀸𑀫𑀮𑀲𑁆𑀲.

𑀢𑀲𑁆𑀫𑀸 𑀳𑀺 𑀲𑀓𑁆𑀓𑀘𑁆𑀘𑀲𑀫𑀸𑀥𑀺𑀬𑀼𑀢𑁆𑀢𑀸, 𑀯𑀺𑀳𑀸𑀬 𑀯𑀺𑀓𑁆𑀔𑁂𑀧𑀫𑀦𑀜𑁆𑀜𑀘𑀺𑀢𑁆𑀢𑀸;

𑀲𑀁𑀯𑀡𑁆𑀡𑀦𑀁 𑀯𑀡𑁆𑀡𑀬𑀢𑁄 𑀲𑀼𑀯𑀡𑁆𑀡𑀁, 𑀦𑀺𑀥𑀸𑀬 𑀓𑀡𑁆𑀡𑀁 𑀫𑀥𑀼𑀭𑀁 𑀲𑀼𑀡𑀸𑀣.

𑀲𑀩𑁆𑀩𑀫𑁆𑀧𑀺 𑀳𑀺𑀢𑁆𑀯𑀸 𑀧𑀦 𑀓𑀺𑀘𑁆𑀘𑀫𑀜𑁆𑀜𑀁, 𑀲𑀓𑁆𑀓𑀘𑁆𑀘 𑀫𑀘𑁆𑀘𑁂𑀦𑀺𑀥 𑀦𑀺𑀘𑁆𑀘𑀓𑀸𑀮𑀁;

𑀲𑁄𑀢𑀼𑀁 𑀓𑀣𑁂𑀢𑀼𑀫𑁆𑀧𑀺 𑀩𑀼𑀥𑁂𑀦 𑀬𑀼𑀢𑁆𑀢𑀸, 𑀓𑀣𑀸 𑀧𑀦𑀸𑀬𑀁 𑀅𑀢𑀺𑀤𑀼𑀮𑁆𑀮𑀪𑀸𑀢𑀺.

𑀢𑀢𑁆𑀣 ¶ ‘‘𑀩𑀼𑀤𑁆𑀥𑀯𑀁𑀲𑀲𑀁𑀯𑀡𑁆𑀡𑀦𑀸 𑀳𑁂𑀲𑁆𑀲𑀢𑀺 𑀲𑀸𑀭𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀯𑀁𑀲𑁄 𑀢𑀸𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑀢𑁆𑀭𑀺𑀤𑀁 𑀯𑀯𑀢𑁆𑀣𑀸𑀦𑀁 𑁋 𑀇𑀢𑁄 𑀳𑁂𑀝𑁆𑀞𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑁂𑀲𑀼 𑀘𑀢𑀽𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀓𑀧𑁆𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀯𑁂𑀡𑀺𑀯𑀺𑀢𑁆𑀣𑀸𑀭𑀓𑀣𑀸 ‘‘𑀩𑀼𑀤𑁆𑀥𑀯𑀁𑀲𑁄 𑀦𑀸𑀫𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑁆𑀯𑀸𑀬𑀁 𑀓𑀧𑁆𑀧𑀧𑀭𑀺𑀘𑁆𑀙𑁂𑀤𑁄 𑀦𑀸𑀫𑀧𑀭𑀺𑀘𑁆𑀙𑁂𑀤𑁄 𑀕𑁄𑀢𑁆𑀢𑀧𑀭𑀺𑀘𑁆𑀙𑁂𑀤𑁄 𑀚𑀸𑀢𑀺𑀧𑀭𑀺𑀘𑁆𑀙𑁂𑀤𑁄 𑀦𑀕𑀭𑀧𑀭𑀺𑀘𑁆𑀙𑁂𑀤𑁄 𑀧𑀺𑀢𑀼𑀧𑀭𑀺𑀘𑁆𑀙𑁂𑀤𑁄 ¶ 𑀫𑀸𑀢𑀼𑀧𑀭𑀺𑀘𑁆𑀙𑁂𑀤𑁄 𑀩𑁄𑀥𑀺𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀧𑀭𑀺𑀘𑁆𑀙𑁂𑀤𑁄 𑀅𑀪𑀺𑀲𑀫𑀬𑀧𑀭𑀺𑀘𑁆𑀙𑁂𑀤𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑁄 𑀅𑀕𑁆𑀕𑀲𑀸𑀯𑀓𑀧𑀭𑀺𑀘𑁆𑀙𑁂𑀤𑁄 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁄 𑀅𑀕𑁆𑀕𑀲𑀸𑀯𑀺𑀓𑀸𑀧𑀭𑀺𑀘𑁆𑀙𑁂𑀤𑁄 𑀧𑀭𑀺𑀯𑀸𑀭𑀪𑀺𑀓𑁆𑀔𑀼𑀧𑀭𑀺𑀘𑁆𑀙𑁂𑀤𑁄 𑀭𑀁𑀲𑀺𑀧𑀭𑀺𑀘𑁆𑀙𑁂𑀤𑁄 𑀲𑀭𑀻𑀭𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀩𑁄𑀥𑀺𑀲𑀢𑁆𑀢𑀸𑀥𑀺𑀓𑀸𑀭𑀧𑀭𑀺𑀘𑁆𑀙𑁂𑀤𑁄 𑀩𑁆𑀬𑀸𑀓𑀭𑀡𑀧𑀭𑀺𑀘𑁆𑀙𑁂𑀤𑁄 𑀩𑁄𑀥𑀺𑀲𑀢𑁆𑀢𑀧𑀥𑀸𑀦𑀧𑀭𑀺𑀘𑁆𑀙𑁂𑀤𑁄 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀇𑀫𑁂𑀳𑀺 𑀧𑀸𑀴𑀺𑀬𑀸 𑀆𑀕𑀢𑁂𑀳𑀺 𑀩𑀸𑀯𑀻𑀲𑀢𑀺𑀬𑀸 𑀧𑀭𑀺𑀘𑁆𑀙𑁂𑀤𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀯𑀢𑁆𑀣𑀺𑀢𑁄.

𑀧𑀸𑀴𑀺𑀅𑀦𑀸𑀭𑀼𑀴𑁆𑀳𑁄 𑀧𑀦 𑀲𑀫𑁆𑀩𑀳𑀼𑀮𑀯𑀸𑀭𑁄𑀧𑁂𑀢𑁆𑀣 𑀆𑀦𑁂𑀢𑀩𑁆𑀩𑁄. 𑀲𑁄 𑀅𑀕𑀸𑀭𑀯𑀸𑀲𑀧𑀭𑀺𑀘𑁆𑀙𑁂𑀤𑁄 𑀧𑀸𑀲𑀸𑀤𑀢𑁆𑀢𑀬𑀧𑀭𑀺𑀘𑁆𑀙𑁂𑀤𑁄 𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀘𑁆𑀙𑁂𑀤𑁄 𑀅𑀕𑁆𑀕𑀫𑀳𑁂𑀲𑀺𑀧𑀭𑀺𑀘𑁆𑀙𑁂𑀤𑁄 𑀧𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄 𑀬𑀸𑀦𑀧𑀭𑀺𑀘𑁆𑀙𑁂𑀤𑁄 𑀅𑀪𑀺𑀦𑀺𑀓𑁆𑀔𑀫𑀦𑀧𑀭𑀺𑀘𑁆𑀙𑁂𑀤𑁄 ¶ 𑀧𑀥𑀸𑀦𑀧𑀭𑀺𑀘𑁆𑀙𑁂𑀤𑁄 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁄 𑀯𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑁄𑀢𑀺 𑀤𑀲𑀥𑀸 𑀯𑀯𑀢𑁆𑀣𑀺𑀢𑁄 𑀳𑁄𑀢𑀺.

𑀢𑀁 𑀲𑀫𑁆𑀩𑀳𑀼𑀮𑀯𑀸𑀭𑀫𑁆𑀧𑀺, 𑀬𑀣𑀸𑀝𑁆𑀞𑀸𑀦𑁂 𑀫𑀬𑀁 𑀧𑀦;

𑀤𑀲𑁆𑀲𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫, 𑀢𑀢𑁆𑀣 𑀢𑀢𑁆𑀣 𑀲𑀫𑀸𑀲𑀢𑁄.

𑀲𑁄 𑀏𑀯𑀁 𑀯𑀯𑀢𑁆𑀣𑀺𑀢𑁄 𑀧𑀦 𑁋

𑀓𑁂𑀦𑀸𑀬𑀁 𑀤𑁂𑀲𑀺𑀢𑁄 𑀓𑀢𑁆𑀣, 𑀓𑀲𑁆𑀲𑀢𑁆𑀣𑀸𑀬 𑀘 𑀤𑁂𑀲𑀺𑀢𑁄;

𑀓𑀺𑀫𑀢𑁆𑀣𑀸𑀬 𑀓𑀤𑀸 𑀓𑀲𑁆𑀲, 𑀯𑀘𑀦𑀁 𑀓𑁂𑀦 𑀘𑀸𑀪𑀢𑁄.

𑀲𑀩𑁆𑀩𑀫𑁂𑀢𑀁 𑀯𑀺𑀥𑀺𑀁 𑀯𑀢𑁆𑀯𑀸, 𑀧𑀼𑀩𑁆𑀩𑀫𑁂𑀯 𑀲𑀫𑀸𑀲𑀢𑁄;

𑀧𑀘𑁆𑀙𑀸𑀳𑀁 𑀩𑀼𑀤𑁆𑀥𑀯𑀁𑀲𑀲𑁆𑀲, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀦𑁆𑀢𑀺.

𑀢𑀢𑁆𑀣 𑀓𑁂𑀦𑀸𑀬𑀁 𑀤𑁂𑀲𑀺𑀢𑁄𑀢𑀺 𑀅𑀬𑀁 𑀩𑀼𑀤𑁆𑀥𑀯𑀁𑀲𑁄 𑀓𑁂𑀦 𑀤𑁂𑀲𑀺𑀢𑁄? 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁂𑀦 𑀤𑀲𑀩𑀮𑁂𑀦 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑁂𑀦 𑀥𑀫𑁆𑀫𑀭𑀸𑀚𑁂𑀦 ¶ 𑀥𑀫𑁆𑀫𑀲𑁆𑀲𑀸𑀫𑀺𑀦𑀸 𑀢𑀣𑀸𑀕𑀢𑁂𑀦 𑀲𑀩𑁆𑀩𑀜𑁆𑀜𑀼𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄.

𑀓𑀢𑁆𑀣 𑀤𑁂𑀲𑀺𑀢𑁄𑀢𑀺? 𑀓𑀧𑀺𑀮𑀯𑀢𑁆𑀣𑀼𑀫𑀳𑀸𑀦𑀕𑀭𑁂 𑀦𑀺𑀕𑁆𑀭𑁄𑀥𑀸𑀭𑀸𑀫𑀫𑀳𑀸𑀯𑀺𑀳𑀸𑀭𑁂 𑀧𑀭𑀫𑀭𑀼𑀘𑀺𑀭𑀲𑀦𑁆𑀤𑀲𑁆𑀲𑀦𑁂 𑀤𑁂𑀯𑀫𑀦𑀼𑀲𑁆𑀲𑀦𑀬𑀦𑀦𑀺𑀧𑀸𑀢𑀪𑀽𑀢𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂𑀦 𑀤𑁂𑀲𑀺𑀢𑁄.

𑀓𑀲𑁆𑀲𑀢𑁆𑀣𑀸𑀬 ¶ 𑀘 𑀤𑁂𑀲𑀺𑀢𑁄𑀢𑀺? 𑀤𑁆𑀯𑀸𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑀸𑀦𑀁 𑀅𑀦𑁂𑀓𑀓𑁄𑀝𑀻𑀦𑀜𑁆𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀢𑁆𑀣𑀸𑀬 𑀤𑁂𑀲𑀺𑀢𑁄.

𑀓𑀺𑀫𑀢𑁆𑀣𑀸𑀬 𑀤𑁂𑀲𑀺𑀢𑁄𑀢𑀺? 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀤𑁂𑀲𑀺𑀢𑁄.

𑀓𑀤𑀸 𑀤𑁂𑀲𑀺𑀢𑁄𑀢𑀺 𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀨𑀸𑀲𑀼𑀓𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀯𑀲𑀺. 𑀓𑀣𑀁? 𑀧𑀞𑀫𑀁 𑀯𑀲𑁆𑀲𑀁 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀁 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩 𑀆𑀤𑀬𑁄; 𑀧𑀝𑀺. 𑀫. 𑁨.𑁩𑁦) 𑀧𑀯𑀢𑁆𑀢𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀯𑀲𑀺. 𑀤𑀼𑀢𑀺𑀬𑀁 𑀯𑀲𑁆𑀲𑀁 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀫𑀳𑀸𑀯𑀺𑀳𑀸𑀭𑁂. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺𑀧𑀺 𑀢𑀢𑁆𑀣𑁂𑀯. 𑀧𑀜𑁆𑀘𑀫𑀁 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀙𑀝𑁆𑀞𑀁 𑀫𑀓𑀼𑀮𑀧𑀩𑁆𑀩𑀢𑁂. 𑀲𑀢𑁆𑀢𑀫𑀁 𑀢𑀸𑀯𑀢𑀺𑀁𑀲𑀪𑀯𑀦𑁂. 𑀅𑀝𑁆𑀞𑀫𑀁 𑀪𑀕𑁆𑀕𑁂𑀲𑀼 𑀲𑀁𑀲𑀼𑀫𑀸𑀭𑀕𑀺𑀭𑀺𑀁 𑀉𑀧𑀦𑀺𑀲𑁆𑀲𑀸𑀬 𑀪𑁂𑀲𑀓𑀴𑀸𑀯𑀦𑁂. 𑀦𑀯𑀫𑀁 𑀓𑁄𑀲𑀫𑁆𑀩𑀺𑀬𑀁. 𑀤𑀲𑀫𑀁 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂. 𑀏𑀓𑀸𑀤𑀲𑀫𑀁 𑀦𑀸𑀴𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂. 𑀤𑁆𑀯𑀸𑀤𑀲𑀫𑀁 𑀯𑁂𑀭𑀜𑁆𑀚𑀸𑀬𑀁. 𑀢𑁂𑀭𑀲𑀫𑀁 𑀘𑀸𑀮𑀺𑀬𑀧𑀩𑁆𑀩𑀢𑁂. 𑀘𑀼𑀤𑁆𑀤𑀲𑀫𑀁 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂. 𑀧𑀜𑁆𑀘𑀤𑀲𑀫𑀁 𑀓𑀧𑀺𑀮𑀯𑀢𑁆𑀣𑀼𑀫𑀳𑀸𑀦𑀕𑀭𑁂. 𑀲𑁄𑀴𑀲𑀫𑀁 𑀆𑀴𑀯𑀓𑀁 𑀤𑀫𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀆𑀴𑀯𑀺𑀬𑀁. 𑀲𑀢𑁆𑀢𑀭𑀲𑀫𑀁 𑀭𑀸𑀚𑀕𑀳𑁂𑀬𑁂𑀯. 𑀅𑀝𑁆𑀞𑀸𑀭𑀲𑀫𑀁 𑀘𑀸𑀮𑀺𑀬𑀧𑀩𑁆𑀩𑀢𑁂𑀬𑁂𑀯. 𑀢𑀣𑀸 𑀏𑀓𑀽𑀦𑀯𑀻𑀲𑀢𑀺𑀫𑀁 𑀯𑀻𑀲𑀢𑀺𑀫𑀁 𑀧𑀦 𑀯𑀲𑁆𑀲𑀁 𑀭𑀸𑀚𑀕𑀳𑁂𑀬𑁂𑀯 𑀯𑀲𑀺. 𑀢𑁂𑀦 ¶ 𑀯𑀼𑀢𑁆𑀢𑀁 𑁋 ‘‘𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀨𑀸𑀲𑀼𑀓𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀯𑀲𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀸𑀯𑀢𑁆𑀣𑀺𑀁𑀬𑁂𑀯 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀘 𑀧𑀼𑀩𑁆𑀩𑀸𑀭𑀸𑀫𑁂 𑀘 𑀥𑀼𑀯𑀧𑀭𑀺𑀪𑁄𑀕𑀯𑀲𑁂𑀦 𑀯𑀲𑀺.

𑀬𑀤𑀸 𑀧𑀦 𑀲𑀢𑁆𑀣𑀸 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀞𑀫𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀬𑁄 𑀫𑀸𑀲𑁂 𑀯𑀲𑀦𑁆𑀢𑁄 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 𑀤𑀫𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀓𑀢𑀧𑀭𑀺𑀯𑀸𑀭𑁄 ¶ 𑀨𑀼𑀲𑁆𑀲𑀫𑀸𑀲𑀧𑀼𑀡𑁆𑀡𑀫𑀸𑀬𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀤𑁆𑀯𑁂 𑀫𑀸𑀲𑁂 𑀢𑀢𑁆𑀣𑁂𑀯 𑀯𑀲𑀺, 𑀢𑀤𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀧𑀦𑀲𑁆𑀲 𑀧𑀜𑁆𑀘 𑀫𑀸𑀲𑀸 𑀚𑀸𑀢𑀸. 𑀲𑀓𑀮𑁄 𑀳𑁂𑀫𑀦𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀆𑀕𑀢𑀤𑀺𑀯𑀲𑀢𑁄 𑀲𑀢𑁆𑀢𑀝𑁆𑀞𑀤𑀺𑀯𑀲𑀸 𑀯𑀻𑀢𑀺𑀯𑀢𑁆𑀢𑀸. 𑀲𑁄 𑀧𑀦 𑀨𑀕𑁆𑀕𑀼𑀦𑀻𑀧𑀼𑀡𑁆𑀡𑀫𑀸𑀲𑀺𑀬𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀓𑁆𑀓𑀦𑁆𑀢𑁄 𑀳𑁂𑀫𑀦𑁆𑀢𑁄, 𑀯𑀲𑀦𑁆𑀢𑀓𑀸𑀮𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀫𑀬𑁄 𑀢𑀣𑀸𑀕𑀢𑀲𑁆𑀲 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑀼’’𑀦𑁆𑀢𑀺. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀮𑀦𑀕𑀭𑀕𑀫𑀦𑀢𑁆𑀣𑀸𑀬 𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 𑀕𑀫𑀦𑀯𑀡𑁆𑀡𑀁 𑀯𑀡𑁆𑀡𑁂𑀲𑀺. 𑀅𑀣 𑀲𑀢𑁆𑀣𑀸 𑀘𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀜𑀸𑀢𑀺𑀲𑀗𑁆𑀕𑀳𑀁 𑀓𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀗𑁆𑀕𑀫𑀕𑀥𑀯𑀸𑀲𑀻𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀤𑀲𑀳𑀺 𑀲𑀳𑀲𑁆𑀲𑁂𑀳𑀺 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻𑀦𑀁 𑀤𑀲𑀳𑀺 𑀲𑀳𑀲𑁆𑀲𑁂𑀳𑀻𑀢𑀺 𑀲𑀩𑁆𑀩𑁂𑀳𑁂𑀯 𑀯𑀻𑀲𑀢𑀺𑀬𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑁄 𑀭𑀸𑀚𑀕𑀳𑀢𑁄 𑀲𑀝𑁆𑀞𑀺𑀬𑁄𑀚𑀦𑀁 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 ¶ 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀢𑀢𑁆𑀣 𑀜𑀸𑀢𑀻𑀦𑀁 𑀯𑀦𑁆𑀤𑀸𑀧𑀦𑀢𑁆𑀣𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀢𑀤𑀸𑀬𑀁 𑀩𑀼𑀤𑁆𑀥𑀯𑀁𑀲𑁄 𑀤𑁂𑀲𑀺𑀢𑁄.

𑀓𑀲𑁆𑀲 𑀯𑀘𑀦𑀦𑁆𑀢𑀺? 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀅𑀲𑀸𑀥𑀸𑀭𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀯𑀘𑀦𑀁.

𑀓𑁂𑀦𑀸𑀪𑀢𑁄𑀢𑀺? 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑁄. 𑀅𑀬𑀜𑁆𑀳𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀤𑁆𑀤𑀚𑀻 𑀢𑀺𑀲𑁆𑀲𑁄 𑀓𑁄𑀲𑀺𑀬𑀧𑀼𑀢𑁆𑀢𑁄 𑀲𑀺𑀕𑁆𑀕𑀯𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀲𑀼𑀤𑀢𑁆𑀢𑁄 𑀥𑀫𑁆𑀫𑀺𑀓𑁄 𑀤𑀸𑀲𑀓𑁄 𑀲𑁄𑀡𑀓𑁄 𑀭𑁂𑀯𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀮𑀸 𑀆𑀪𑀢𑁄, 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀢𑁂𑀲𑀁𑀬𑁂𑀯 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑁂𑀳𑀻𑀢𑀺 𑀏𑀯𑀁 𑀢𑀸𑀯 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯𑀚𑁆𑀚𑀓𑀸𑀮𑀸 𑀆𑀪𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 𑁋

‘‘𑀓𑁂𑀦𑀸𑀬𑀁 𑀤𑁂𑀲𑀺𑀢𑁄 𑀓𑀢𑁆𑀣, 𑀓𑀲𑁆𑀲𑀢𑁆𑀣𑀸𑀬 𑀘 𑀤𑁂𑀲𑀺𑀢𑁄;

𑀓𑀺𑀫𑀢𑁆𑀣𑀸𑀬 𑀓𑀤𑀸 𑀓𑀲𑁆𑀲, 𑀯𑀘𑀦𑀁 𑀓𑁂𑀦 𑀘𑀸𑀪𑀢𑁄’’𑀢𑀺. 𑁋

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

𑀦𑀺𑀤𑀸𑀦𑀓𑀣𑀸

𑀩𑀸𑀳𑀺𑀭𑀦𑀺𑀤𑀸𑀦𑀁

𑀏𑀯𑀁 ¶ ¶ 𑀆𑀪𑀢𑀲𑁆𑀲 𑀧𑀦𑀲𑁆𑀲 𑀇𑀤𑀸𑀦𑀺 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺, 𑀲𑀸 𑀧𑀦𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀬𑀲𑁆𑀫𑀸 𑀤𑀽𑀭𑁂𑀦𑀺𑀤𑀸𑀦𑀁 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀦𑁆𑀢𑀺, 𑀇𑀫𑀸𑀦𑀺 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸𑀯 𑀯𑀡𑁆𑀡𑀺𑀢𑀸 𑀲𑀼𑀯𑀡𑁆𑀡𑀺𑀢𑀸 𑀦𑀸𑀫 𑀳𑁄𑀢𑀺. 𑀬𑁂 𑀘 𑀦𑀁 𑀲𑀼𑀡𑀦𑁆𑀢𑀺, 𑀢𑁂𑀳𑀺 𑀲𑀫𑀼𑀤𑀸𑀕𑀫𑀢𑁄 ¶ 𑀧𑀝𑁆𑀞𑀸𑀬 𑀯𑀺𑀜𑁆𑀜𑀸𑀢𑀢𑁆𑀢𑀸 𑀲𑀼𑀯𑀺𑀜𑁆𑀜𑀸𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀦𑀺𑀤𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀢𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀸𑀯 𑀢𑁂𑀲𑀁 𑀦𑀺𑀤𑀸𑀦𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀤𑀻𑀧𑀦𑀸 𑁋 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀸 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀓𑀣𑀸 𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀘𑀯𑀺𑀢𑁆𑀯𑀸 𑀬𑀸𑀯 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀓𑀣𑀸 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫. ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀘, ‘‘𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂’’𑀢𑀺 𑀘, ‘‘𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’’𑀦𑁆𑀢𑀺 𑀘 𑀏𑀯𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀢𑁄 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀸 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀕𑀯𑀸 𑀬𑀢𑁆𑀣 𑀬𑀢𑁆𑀣 𑀯𑀺𑀳𑀸𑀲𑀺, 𑀢𑀁 𑀢𑀁 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀲𑀗𑁆𑀔𑁂𑀧𑁂𑀦𑁂𑀯 𑀢𑀺𑀡𑁆𑀡𑀁 𑀤𑀽𑀭𑀸𑀯𑀺𑀤𑀽𑀭𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀸𑀦𑀁 𑀯𑀲𑁂𑀦 𑀩𑀸𑀳𑀺𑀭𑀦𑀺𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸 𑀳𑁄𑀢𑀻𑀢𑀺.

𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁

𑁧. 𑀭𑀢𑀦𑀘𑀗𑁆𑀓𑀫𑀦𑀓𑀡𑁆𑀟𑀯𑀡𑁆𑀡𑀦𑀸

𑀇𑀤𑀸𑀦𑀺 𑀧𑀦 𑁋

𑁧.

‘‘𑀩𑁆𑀭𑀳𑁆𑀫𑀸 ¶ 𑀘 𑀮𑁄𑀓𑀸𑀥𑀺𑀧𑀢𑀻 𑀲𑀳𑀫𑁆𑀧𑀢𑀻, 𑀓𑀢𑀜𑁆𑀚𑀮𑀻 𑀅𑀦𑀥𑀺𑀯𑀭𑀁 𑀅𑀬𑀸𑀘𑀣;

𑀲𑀦𑁆𑀢𑀻𑀥 𑀲𑀢𑁆𑀢𑀸𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀤𑁂𑀲𑁂𑀳𑀺 𑀥𑀫𑁆𑀫𑀁 𑀅𑀦𑀼𑀓𑀫𑁆𑀧𑀺𑀫𑀁 𑀧𑀚’’𑀦𑁆𑀢𑀺. 𑁋

𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺.

𑀏𑀢𑁆𑀣 ¶ ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂’’𑀢𑀺𑀆𑀤𑀺𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀺𑀬 𑁋 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀩𑀼𑀤𑁆𑀥𑀯𑀁𑀲𑀁 𑀅𑀧𑀼𑀘𑁆𑀙𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀦𑀺𑀤𑀸𑀦𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 ‘‘𑀩𑁆𑀭𑀳𑁆𑀫𑀸 𑀘 𑀮𑁄𑀓𑀸𑀥𑀺𑀧𑀢𑀻 𑀲𑀳𑀫𑁆𑀧𑀢𑀻, 𑀓𑀢𑀜𑁆𑀚𑀮𑀻 𑀅𑀦𑀥𑀺𑀯𑀭𑀁 𑀅𑀬𑀸𑀘𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀪𑀕𑀯𑀢𑁄 𑀲𑀩𑁆𑀩𑀥𑀫𑁆𑀫𑀤𑁂𑀲𑀦𑀸𑀓𑀸𑀭𑀡𑀪𑀽𑀢𑀸𑀬 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀘𑀦𑀸𑀬 𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺.

‘‘𑀓𑀤𑀸𑀬𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁, 𑀅𑀚𑁆𑀛𑀺𑀝𑁆𑀞𑁄 𑀩𑁆𑀭𑀳𑁆𑀫𑀼𑀦𑀸 𑀚𑀺𑀦𑁄;

𑀓𑀤𑀸 𑀓𑀢𑁆𑀣 𑀘 𑀓𑁂𑀦𑀸𑀬𑀁, 𑀕𑀸𑀣𑀸 𑀳𑀺 𑀲𑀫𑀼𑀤𑀻𑀭𑀺𑀢𑀸’’𑀢𑀺.

𑀯𑀼𑀘𑁆𑀘𑀢𑁂 ¶ 𑁋 𑀩𑀼𑀤𑁆𑀥𑀪𑀽𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀲𑀢𑁆𑀣𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀩𑁆𑀭𑀳𑁆𑀫𑀼𑀦𑀸 𑀅𑀚𑁆𑀛𑀺𑀝𑁆𑀞𑁄 𑀆𑀬𑀸𑀘𑀺𑀢𑁄. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀓𑀢𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀯𑀺𑀯𑀝𑀧𑀸𑀓𑀝𑀩𑀻𑀪𑀘𑁆𑀙𑀲𑀬𑀦𑀸𑀲𑀦𑀘𑁂𑀝𑀺𑀓𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀤𑀺𑀲𑁆𑀯𑀸 𑀅𑀢𑀻𑀯 𑀲𑀁𑀯𑀺𑀕𑁆𑀕𑀳𑀤𑀬𑁄 𑀧𑀝𑁂𑀓𑀤𑁂𑀲𑀸𑀯𑀘𑁆𑀙𑀦𑁆𑀦𑀁 𑀙𑀦𑁆𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀅𑀭𑀺𑀦𑀭𑀯𑀭𑀫𑀦𑁆𑀣𑀓𑀁 𑀓𑀡𑁆𑀟𑀓𑀁 𑀦𑀸𑀫 𑀢𑀼𑀭𑀗𑁆𑀕𑀯𑀭𑀫𑀸𑀳𑀭𑀸’’𑀢𑀺 𑀓𑀡𑁆𑀟𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀙𑀦𑁆𑀦𑀲𑀳𑀸𑀬𑁄 𑀯𑀭𑀢𑀼𑀭𑀗𑁆𑀕𑀫𑀸𑀭𑀼𑀬𑁆𑀳 𑀦𑀕𑀭𑀤𑁆𑀯𑀸𑀭𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀦𑀕𑀭𑀤𑁆𑀯𑀸𑀭𑁂 𑀯𑀺𑀯𑀝𑁂 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀢𑁂𑀦 𑀭𑀢𑁆𑀢𑀸𑀯𑀲𑁂𑀲𑁂𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁄𑀫𑀲𑀢𑁆𑀢𑁄 𑀅𑀦𑁄𑀫𑀸𑀬 𑀦𑀸𑀫 𑀦𑀤𑀺𑀬𑀸 𑀢𑀻𑀭𑁂 𑀞𑀢𑁆𑀯𑀸 𑀙𑀦𑁆𑀦𑀫𑁂𑀯𑀫𑀸𑀳 ¶ 𑁋 ‘‘𑀙𑀦𑁆𑀦, 𑀢𑁆𑀯𑀁 𑀫𑀫 𑀇𑀫𑀸𑀦𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀆𑀪𑀭𑀡𑀸𑀦𑀺 𑀓𑀡𑁆𑀟𑀓𑀜𑁆𑀘 𑀯𑀭𑀢𑀼𑀭𑀗𑁆𑀕𑀫𑀸𑀤𑀸𑀬 𑀓𑀧𑀺𑀮𑀧𑀼𑀭𑀁 𑀕𑀘𑁆𑀙𑀸𑀳𑀻’’𑀢𑀺 𑀙𑀦𑁆𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀲𑀺𑀢𑁄𑀭𑀕𑀦𑀻𑀮𑀼𑀧𑁆𑀧𑀮𑀲𑀤𑀺𑀲𑁂𑀦𑀸𑀲𑀺𑀦𑀸 𑀲𑀓𑁂𑀲𑀫𑀓𑀼𑀝𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀯𑀤𑀢𑁆𑀢𑀺𑀬𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀲𑀬𑀫𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀺𑀮𑀩𑀮𑀲𑀫𑀼𑀤𑁆𑀥𑀼𑀢𑀢𑀭𑀗𑁆𑀕𑀪𑀗𑁆𑀕𑀁 𑀅𑀲𑀗𑁆𑀕𑀁 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀫𑀡𑀺𑀕𑀡𑀭𑀁𑀲𑀺𑀚𑀸𑀮𑀯𑀺𑀚𑁆𑀚𑁄𑀢𑀺𑀢𑀭𑀸𑀚𑀕𑀳𑀁 𑀭𑀸𑀚𑀕𑀳𑀁 𑀦𑀸𑀫 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑀁 𑀚𑀦𑀁 𑀧𑀭𑀺𑀳𑀸𑀲𑁂𑀦𑁆𑀢𑁄 𑀯𑀺𑀬 𑀘 𑀉𑀤𑁆𑀥𑀢𑀯𑁂𑀲𑀲𑁆𑀲 𑀚𑀦𑀲𑁆𑀲 𑀮𑀚𑁆𑀚𑀫𑀼𑀧𑁆𑀧𑀸𑀤𑀬𑀫𑀸𑀦𑁄 𑀯𑀺𑀬 𑀘 𑀯𑀬𑀓𑀦𑁆𑀢𑀻𑀳𑀺 𑀦𑀸𑀕𑀭𑀚𑀦𑀳𑀤𑀬𑀸𑀦𑀺 𑀅𑀢𑁆𑀢𑀦𑀺 𑀩𑀦𑁆𑀥𑀦𑁆𑀢𑁄 𑀯𑀺𑀬 𑀘 𑀤𑁆𑀯𑀢𑀺𑀁𑀲𑀯𑀭𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀭𑀸𑀚𑀺𑀢𑀸𑀬 𑀭𑀽𑀧𑀲𑀺𑀭𑀺𑀬𑀸 𑀲𑀩𑁆𑀩𑀚𑀦𑀦𑀬𑀦𑀸𑀦𑀺 𑀯𑀺𑀮𑀼𑀫𑁆𑀧𑀫𑀸𑀦𑁄 𑀯𑀺𑀬 𑀘 𑀭𑀽𑀧𑀻𑀧𑀸𑀤𑀲𑀜𑁆𑀘𑀭𑁄 𑀧𑀼𑀜𑁆𑀜𑀲𑀜𑁆𑀘𑀬𑁄 𑀯𑀺𑀬 𑀘 𑀧𑀩𑁆𑀩𑀢𑁄 𑀯𑀺𑀬 𑀘 𑀕𑀫𑀦𑁂𑀦 𑀦𑀺𑀲𑁆𑀲𑀗𑁆𑀕𑁄 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 ¶ 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀧𑀲𑁆𑀲𑁂 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁂 𑀲𑀼𑀘𑀺𑀪𑀽𑀫𑀺𑀪𑀸𑀕𑁂 𑀧𑀭𑀫𑀭𑀫𑀡𑀻𑀬𑁂 𑀧𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀫𑀺𑀲𑁆𑀲𑀓𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀡𑁆𑀟𑀯𑀕𑀺𑀭𑀸𑀦𑀼𑀲𑀸𑀭𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀫𑀕𑀥𑀫𑀳𑀸𑀭𑀸𑀚𑁂𑀦 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀸𑀫𑀕𑁄𑀢𑁆𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀧𑀫𑀼𑀤𑀺𑀢𑀳𑀤𑀬𑁂𑀦 ‘‘𑀫𑀫 𑀭𑀚𑁆𑀚𑀪𑀸𑀕𑀁 𑀕𑀡𑁆𑀳𑀸𑀳𑀻’’𑀢𑀺 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑁋 ‘‘𑀅𑀮𑀁, 𑀫𑀳𑀸𑀭𑀸𑀚, 𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄 𑀅𑀳𑀁 𑀭𑀚𑁆𑀚𑀁 𑀧𑀳𑀸𑀬 𑀮𑁄𑀓𑀳𑀺𑀢𑀢𑁆𑀣𑀸𑀬 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑁂𑀦 𑀘 ‘‘𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀫𑀫 𑀯𑀺𑀚𑀺𑀢𑀁 𑀑𑀲𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀼𑀢𑁆𑀢𑁄 ‘𑀲𑀸𑀥𑀽’𑀢𑀺 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀆𑀴𑀸𑀭𑀜𑁆𑀘 𑀉𑀤𑀓𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀭𑀁 𑀅𑀯𑀺𑀦𑁆𑀤𑀦𑁆𑀢𑁄 𑀢𑀢𑁄 𑀧𑀓𑁆𑀓𑀫𑀺𑀢𑁆𑀯𑀸 𑀉𑀭𑀼𑀯𑁂𑀮𑀸𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀅𑀫𑀢𑀁 𑀅𑀥𑀺𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀑𑀴𑀸𑀭𑀺𑀓𑀸𑀳𑀸𑀭𑀧𑀝𑀺𑀲𑁂𑀯𑀦𑁂𑀦 𑀲𑀭𑀻𑀭𑀁 𑀲𑀦𑁆𑀢𑀧𑁆𑀧𑁂𑀲𑀺.

𑀢𑀤𑀸 ¶ 𑀧𑀦 𑀉𑀭𑀼𑀯𑁂𑀮𑀸𑀬𑀁 𑀲𑁂𑀦𑀸𑀦𑀺𑀕𑀫𑁂 𑀲𑁂𑀦𑀸𑀦𑀺𑀕𑀫𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀥𑀻𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑀸𑀭𑀺𑀓𑀸 𑀯𑀬𑀧𑁆𑀧𑀢𑁆𑀢𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀧𑀢𑁆𑀣𑀦𑀫𑀓𑀸𑀲𑀺 𑁋 ‘‘𑀲𑀘𑀸𑀳𑀁 𑀲𑀫𑀚𑀸𑀢𑀺𑀓𑀁 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸 𑀲𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺. 𑀲𑀸 𑀯𑁂𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 ‘‘𑀅𑀚𑁆𑀚 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀢𑁄𑀯 𑀧𑀸𑀬𑀸𑀲𑀁 𑀅𑀦𑀸𑀬𑀸𑀲𑀁 𑀧𑀭𑀫𑀫𑀥𑀼𑀭𑀁 𑀲𑀫𑁆𑀧𑀝𑀺𑀧𑀸𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀤𑀳𑁂𑀯 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑀁 𑀆𑀕𑀫𑀬𑀫𑀸𑀦𑁄 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀧𑀼𑀡𑁆𑀡𑀸 𑀦𑀸𑀫 𑀤𑀸𑀲𑀻 𑀢𑀲𑁆𑀲𑀸 𑀥𑀸𑀢𑀻 𑀭𑀼𑀓𑁆𑀔𑀫𑀽𑀮𑀲𑁄𑀥𑀦𑀢𑁆𑀣𑀸𑀬 𑀕𑀢𑀸 𑀩𑁄𑀥𑀺𑀲𑀢𑁆𑀢𑀁 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁 𑀲𑀜𑁆𑀛𑀸𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀯𑀭𑀓𑀦𑀓𑀕𑀺𑀭𑀺𑀲𑀺𑀔𑀭𑀲𑀤𑀺𑀲𑀲𑀭𑀻𑀭𑀲𑁄𑀪𑀁 𑀢𑀺𑀫𑀺𑀭𑀦𑀺𑀓𑀭𑀦𑀺𑀥𑀸𑀦𑀓𑀭𑀁 𑀓𑀫𑀮𑀯𑀦𑀯𑀺𑀓𑀲𑀦𑀓𑀭𑀁 𑀖𑀦𑀯𑀺𑀯𑀭𑀫𑀼𑀧𑀕𑀢𑀁 𑀤𑀺𑀯𑀲𑀓𑀭𑀫𑀺𑀯 𑀢𑀭𑀼𑀯𑀭𑀫𑀼𑀧𑀕𑀢𑀁 𑀫𑀼𑀦𑀺𑀤𑀺𑀯𑀲𑀓𑀭𑀫𑀤𑁆𑀤𑀲. 𑀲𑀭𑀻𑀭𑀢𑁄 𑀘𑀲𑁆𑀲 𑀦𑀺𑀓𑁆𑀔𑀦𑁆𑀢𑀸𑀳𑀺 𑀧𑀪𑀸𑀳𑀺 𑀲𑀓𑀮𑀜𑁆𑀘 𑀢𑀁 𑀭𑀼𑀓𑁆𑀔𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 ¶ 𑀤𑁂𑀯𑀢𑀸 𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀲𑀳𑀢𑁆𑀣𑁂𑀦𑁂𑀯 𑀩𑀮𑀺𑀁 𑀧𑀝𑀺𑀕𑁆𑀕𑀳𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀸’’𑀢𑀺. 𑀲𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀼𑀚𑀸𑀢𑀸𑀬 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.

𑀢𑀢𑁄 ¶ 𑀲𑀼𑀚𑀸𑀢𑀸 𑀲𑀜𑁆𑀚𑀸𑀢𑀲𑀤𑁆𑀥𑀸 𑀳𑀼𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀭𑀫𑀫𑀥𑀼𑀭𑀲𑁆𑀲 𑀫𑀥𑀼𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀧𑀭𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀺𑀤𑀳𑀺𑀢𑁆𑀯𑀸 𑀲𑀻𑀲𑁂𑀦𑀸𑀤𑀸𑀬 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀸𑀪𑀺𑀫𑀼𑀔𑀻 𑀅𑀕𑀫𑀸𑀲𑀺. 𑀲𑀸 𑀕𑀘𑁆𑀙𑀦𑁆𑀢𑀻 𑀤𑀽𑀭𑀢𑁄𑀯 𑀢𑀁 𑀩𑁄𑀥𑀺𑀲𑀢𑁆𑀢𑀁 𑀭𑀼𑀓𑁆𑀔𑀤𑁂𑀯𑀢𑀫𑀺𑀯 𑀲𑀓𑀮𑀁 𑀢𑀁 𑀭𑀼𑀓𑁆𑀔𑀁 𑀲𑀭𑀻𑀭𑀧𑁆𑀧𑀪𑀸𑀬 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀢𑁆𑀯𑀸 𑀧𑀼𑀜𑁆𑀜𑀲𑀜𑁆𑀘𑀬𑀫𑀺𑀯 𑀭𑀽𑀧𑀯𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀼𑀚𑀸𑀢𑀸 ‘‘𑀭𑀼𑀓𑁆𑀔𑀤𑁂𑀯𑀢𑀸’’𑀢𑀺 𑀲𑀜𑁆𑀜𑀸𑀬 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑁄𑀦𑀢𑀸 𑀕𑀦𑁆𑀢𑁆𑀯𑀸 𑀲𑀻𑀲𑀢𑁄 𑀢𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀑𑀢𑀸𑀭𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀬𑀣𑀸 𑀫𑀫 𑀫𑀦𑁄𑀭𑀣𑁄 𑀦𑀺𑀧𑁆𑀨𑀦𑁆𑀦𑁄, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀦𑀺𑀧𑁆𑀨𑀚𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲 𑀦𑀸𑀫 𑀢𑀺𑀢𑁆𑀣𑀲𑁆𑀲 𑀢𑀻𑀭𑁂 𑀲𑀼𑀯𑀡𑁆𑀡𑀧𑀸𑀢𑀺𑀁 𑀞𑀧𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀽𑀦𑀧𑀜𑁆𑀜𑀸𑀲𑀧𑀺𑀡𑁆𑀟𑁂 𑀓𑀭𑁄𑀦𑁆𑀢𑁄 𑀢𑀁 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑁋 ‘‘𑀲𑀘𑀸𑀳𑀁 𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀅𑀬𑀁 𑀲𑀼𑀯𑀡𑁆𑀡𑀧𑀸𑀢𑀺 𑀧𑀝𑀺𑀲𑁄𑀢𑀁 𑀕𑀘𑁆𑀙𑀢𑀽’’𑀢𑀺 𑀔𑀺𑀧𑀺. 𑀲𑀸 𑀧𑀸𑀢𑀺 𑀧𑀝𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀓𑀸𑀴𑀲𑁆𑀲 𑀦𑀸𑀫 𑀦𑀸𑀕𑀭𑀸𑀚𑀲𑁆𑀲 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀣𑀸𑀮𑀓𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀳𑁂𑀝𑁆𑀞𑀸 𑀅𑀝𑁆𑀞𑀸𑀲𑀺.

𑀫𑀳𑀸𑀲𑀢𑁆𑀢𑁄 𑀢𑀢𑁆𑀣𑁂𑀯 𑀯𑀦𑀲𑀡𑁆𑀟𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀢𑁆𑀣𑀺𑀬𑁂𑀦 𑀦𑀸𑀫 𑀢𑀺𑀡𑀳𑀸𑀭𑀓𑁂𑀦 𑀫𑀳𑀸𑀧𑀼𑀭𑀺𑀲𑀲𑁆𑀲 𑀆𑀓𑀸𑀭𑀁 𑀜𑀢𑁆𑀯𑀸 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀫𑀸𑀭𑀼𑀬𑁆𑀳 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀅𑀝𑁆𑀞𑀸𑀲𑀺. 𑀲𑁄 𑀧𑀦 𑀧𑀤𑁂𑀲𑁄 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀅𑀓𑀫𑁆𑀧𑀺𑀢𑁆𑀣. 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀅𑀬𑀁 𑀧𑀤𑁂𑀲𑁄 𑀫𑀫 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑁄’’𑀢𑀺 ¶ 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀫𑀕𑀫𑀸𑀲𑀺. 𑀲𑁄𑀧𑀺 𑀢𑀣𑁂𑀯 𑀓𑀫𑁆𑀧𑀺𑀢𑁆𑀣. 𑀧𑀼𑀦 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑀫𑀕𑀫𑀸𑀲𑀺. 𑀲𑁄𑀧𑀺 𑀢𑀣𑁂𑀯 𑀓𑀫𑁆𑀧𑀺𑀢𑁆𑀣. 𑀧𑀼𑀦 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑀫𑀕𑀫𑀸𑀲𑀺. 𑀢𑀢𑁆𑀣 𑀧𑀮𑁆𑀮𑀗𑁆𑀓𑀧𑁆𑀧𑀫𑀸𑀡𑀝𑁆𑀞𑀸𑀦𑀁 𑀦𑀺𑀘𑁆𑀘𑀮𑀁 𑀅𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀇𑀤𑀁 𑀞𑀸𑀦𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀲𑀺. 𑀢𑀸𑀦𑀺 𑀢𑀽𑀮𑀺𑀓𑀕𑁆𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀩𑁄𑀥𑀺𑀁 𑀅𑀧𑀢𑁆𑀯𑀸𑀯 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀩𑁄𑀥𑀺𑀓𑁆𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺.

𑀢𑀗𑁆𑀔𑀡𑀜𑁆𑀜𑁂𑀯 ¶ 𑀲𑀩𑁆𑀩𑀮𑁄𑀓𑀸𑀪𑀺𑀳𑀸𑀭𑁄 𑀫𑀸𑀭𑁄 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀳𑀺𑀫𑀕𑀺𑀭𑀺𑀲𑀺𑀔𑀭𑀲𑀤𑀺𑀲𑀁 ¶ 𑀕𑀺𑀭𑀺𑀫𑁂𑀔𑀮𑀁 𑀦𑀸𑀫 𑀅𑀭𑀺𑀯𑀭𑀯𑀸𑀭𑀡𑀁 𑀯𑀭𑀯𑀸𑀭𑀡𑀁 𑀅𑀪𑀺𑀭𑀼𑀬𑁆𑀳 𑀦𑀯𑀬𑁄𑀚𑀦𑀺𑀓𑁂𑀦 𑀥𑀦𑀼𑀅𑀲𑀺𑀨𑀭𑀲𑀼𑀲𑀭𑀲𑀢𑁆𑀢𑀺𑀲𑀩𑀮𑁂𑀦𑀸𑀢𑀺𑀩𑀳𑀮𑁂𑀦 𑀫𑀸𑀭𑀩𑀮𑁂𑀦 𑀲𑀫𑁆𑀧𑀭𑀺𑀯𑀼𑀢𑁄 𑀲𑀫𑀦𑁆𑀢𑀸 𑀧𑀩𑁆𑀩𑀢𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀫𑀳𑀸𑀲𑀧𑀢𑁆𑀢𑀁 𑀯𑀺𑀬 𑀫𑀳𑀸𑀲𑀢𑁆𑀢𑀁 𑀲𑀫𑀼𑀧𑀸𑀕𑀫𑀺. 𑀫𑀳𑀸𑀧𑀼𑀭𑀺𑀲𑁄 𑀲𑀽𑀭𑀺𑀬𑁂 𑀥𑀭𑀦𑁆𑀢𑁂𑀬𑁂𑀯 𑀅𑀢𑀺𑀢𑀼𑀫𑀽𑀮𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀯𑀺𑀓𑀲𑀺𑀢𑀚𑀬𑀲𑀼𑀫𑀦𑀓𑀼𑀲𑀼𑀫𑀲𑀤𑀺𑀲𑀲𑁆𑀲 𑀘𑀻𑀯𑀭𑀲𑁆𑀲 𑀉𑀧𑀭𑀺 𑀧𑀢𑀫𑀸𑀦𑁂𑀳𑀺 𑀭𑀢𑁆𑀢𑀧𑀯𑀸𑀮𑀗𑁆𑀓𑀼𑀭𑀲𑀤𑀺𑀲𑀭𑀼𑀘𑀺𑀭𑀤𑀲𑁆𑀲𑀦𑁂𑀳𑀺 𑀩𑁄𑀥𑀺𑀭𑀼𑀓𑁆𑀔𑀗𑁆𑀓𑀼𑀭𑁂𑀳𑀺 𑀧𑀻𑀢𑀺𑀬𑀸 𑀯𑀺𑀬 𑀧𑀽𑀚𑀺𑀬𑀫𑀸𑀦𑁄 𑀏𑀯 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀮𑀪𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀯𑀝𑁆𑀝𑀯𑀺𑀯𑀝𑁆𑀝𑀁 𑀲𑀫𑁆𑀫𑀲𑀦𑁆𑀢𑁄 𑀅𑀭𑀼𑀡𑁄𑀤𑀬𑁂 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪) 𑁋

𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑁂𑀯𑀦𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀤𑁂𑀯𑀢𑀸𑀦𑀁 𑀓𑀗𑁆𑀔𑀁 𑀜𑀢𑁆𑀯𑀸 𑀢𑀸𑀲𑀁 𑀓𑀗𑁆𑀔𑀸𑀯𑀺𑀥𑀫𑀦𑀢𑁆𑀣𑀁 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑀁 𑀓𑀗𑁆𑀔𑀁 𑀯𑀺𑀥𑀫𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀢𑁄 𑀈𑀲𑀓𑀁 𑀧𑀸𑀘𑀻𑀦𑀦𑀺𑀲𑁆𑀲𑀺𑀢𑁂 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀢𑁆𑀯𑀸 𑁋 ‘‘𑀇𑀫𑀲𑁆𑀫𑀺𑀁 𑀯𑀢 𑀫𑁂 𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥’’𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀸𑀥𑀺𑀕𑀫𑀝𑁆𑀞𑀸𑀦𑀁 𑀧𑀮𑁆𑀮𑀗𑁆𑀓𑀜𑁆𑀘𑁂𑀯 𑀩𑁄𑀥𑀺𑀭𑀼𑀓𑁆𑀔𑀜𑁆𑀘 𑀅𑀦𑀺𑀫𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀅𑀦𑀺𑀫𑀺𑀲𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁.

𑀅𑀣 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀲𑁆𑀲 𑀘 𑀅𑀦𑁆𑀢𑀭𑁂 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀢𑁄 𑀆𑀬𑀢𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀭𑀢𑀦𑀘𑀗𑁆𑀓𑀫𑀘𑁂𑀢𑀺𑀬𑀁 ¶ 𑀦𑀸𑀫 𑀚𑀸𑀢𑀁. 𑀢𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀤𑁂𑀯𑀢𑀸 𑀭𑀢𑀦𑀖𑀭𑀁 𑀦𑀸𑀫 𑀫𑀸𑀧𑁂𑀲𑀼𑀁, 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀁 𑀞𑀸𑀦𑀁 𑀭𑀢𑀦𑀖𑀭𑀘𑁂𑀢𑀺𑀬𑀁 𑀦𑀸𑀫 ¶ 𑀚𑀸𑀢𑀁. 𑀏𑀯𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀘𑀢𑁆𑀢𑀸𑀭𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀢𑀢𑁆𑀣𑀸𑀧𑀺 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄𑀬𑁂𑀯 𑀯𑀺𑀫𑀼𑀢𑁆𑀢𑀺𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺.

𑀏𑀯𑀁 ¶ 𑀅𑀧𑀭𑀁 𑀲𑀢𑁆𑀢𑀸𑀳𑀁 𑀫𑀼𑀘𑀮𑀺𑀦𑁆𑀤𑁂 𑀦𑀺𑀲𑀻𑀤𑀺. 𑀢𑀲𑁆𑀲 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀪𑀕𑀯𑀢𑁄 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀦𑁆𑀢𑁄 𑀫𑀳𑀸𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀁 𑀧𑀦 𑀉𑀧𑁆𑀧𑀦𑁆𑀦𑁂 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀳𑀸𑀫𑁂𑀖𑁄 𑀲𑀢𑁆𑀣𑀭𑀺 𑀫𑀬𑁆𑀳𑀁 𑀪𑀯𑀦𑀁 𑀧𑀯𑀺𑀝𑁆𑀞𑀫𑀢𑁆𑀢𑁂 𑀉𑀧𑁆𑀧𑀦𑁆𑀦𑁄 𑀯𑀸𑀲𑀸𑀕𑀸𑀭𑀫𑀲𑁆𑀲 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀢𑁆𑀢𑀭𑀢𑀦𑀫𑀬𑀁 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀤𑀺𑀩𑁆𑀩𑀯𑀺𑀫𑀸𑀦𑀁 𑀦𑀺𑀫𑁆𑀫𑀺𑀦𑀺𑀢𑀼𑀁 𑀲𑀫𑀢𑁆𑀣𑁄𑀧𑀺 𑀏𑀯𑀁 𑀓𑀢𑁂 𑁋 ‘‘𑀦 𑀫𑀬𑁆𑀳𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀺, 𑀤𑀲𑀩𑀮𑀲𑁆𑀲 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑀺𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀸 𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄𑀯 𑀫𑀳𑀢𑀺 𑀑𑀓𑀸𑀲𑁂 𑀲𑀩𑁆𑀩𑀭𑀢𑀦𑀫𑀬𑁂 𑀧𑀘𑁆𑀘𑀕𑁆𑀖𑀧𑀮𑁆𑀮𑀗𑁆𑀓𑁂 𑀉𑀧𑀭𑀺 𑀯𑀺𑀦𑀺𑀕𑁆𑀕𑀮𑀦𑁆𑀢𑀯𑀺𑀯𑀺𑀥𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀫𑀯𑀺𑀢𑀸𑀦𑁂 𑀯𑀺𑀯𑀺𑀥𑀲𑀼𑀭𑀪𑀺𑀕𑀦𑁆𑀥𑀯𑀸𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀬𑀁 𑀯𑀺𑀳𑀭𑀦𑁆𑀢𑁄 𑀯𑀺𑀬 𑀯𑀺𑀳𑀸𑀲𑀺. 𑀏𑀯𑀁 𑀪𑀕𑀯𑀸 𑀢𑀁 𑀲𑀢𑁆𑀢𑀸𑀳𑀁 𑀢𑀢𑁆𑀣 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑁄 𑀅𑀧𑀭𑀁 𑀲𑀢𑁆𑀢𑀸𑀳𑀁 𑀭𑀸𑀚𑀸𑀬𑀢𑀦𑁂 𑀦𑀺𑀲𑀻𑀤𑀺. 𑀢𑀢𑁆𑀣𑀸𑀧𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀺𑀬𑁂𑀯. 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀅𑀳𑁂𑀲𑀼𑀁. 𑀏𑀢𑁆𑀣𑀦𑁆𑀢𑀭𑁂 𑀪𑀕𑀯𑀸 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀲𑀺.

𑀅𑀣𑀲𑁆𑀲 𑀲𑀢𑁆𑀢𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑁋 ‘‘𑀫𑀼𑀔𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀕𑀤𑀳𑀭𑀻𑀢𑀓𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀣𑀲𑁆𑀲 𑀲𑀓𑁆𑀓𑁄 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑀥𑁄𑀯𑀦𑀉𑀤𑀓𑀜𑁆𑀘 𑀅𑀤𑀸𑀲𑀺. 𑀢𑀢𑁄 𑀪𑀕𑀯𑀸 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁄𑀤𑀓𑁂𑀦 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑀽𑀳𑀺 𑀮𑁄𑀓𑀧𑀸𑀮𑁂𑀳𑀺 𑀉𑀧𑀦𑀻𑀢𑁂 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀯𑀸𑀡𑀺𑀚𑀸𑀦𑀁 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀢𑁆𑀢𑀦𑀸 𑀅𑀥𑀺𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑁄 𑁋 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄’’𑀢𑀺 (𑀫. 𑀦𑀺. 𑁨.𑁨𑁮𑁧; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭) 𑀧𑀭𑁂𑀲𑀁 𑀥𑀫𑁆𑀫𑀁 𑀅𑀤𑁂𑀲𑁂𑀢𑀼𑀓𑀸𑀫𑀢𑀸𑀓𑀸𑀭𑀧𑁆𑀧𑀢𑁆𑀢𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺.

𑀅𑀣 ¶ ¶ 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀤𑀲𑀩𑀮𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 ‘‘𑀦𑀲𑁆𑀲𑀢𑀺 𑀯𑀢, 𑀪𑁄, 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢, 𑀪𑁄, 𑀮𑁄𑀓𑁄’’𑀢𑀺 (𑀲𑀁. 𑀦𑀺. 𑁧.𑁧𑁭𑁨; 𑀫. 𑀦𑀺. 𑁧.𑁨𑁮𑁨; 𑀫𑀳𑀸𑀯. 𑁮) 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀼𑀢𑁄 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀳𑀺 𑀅𑀦𑀼𑀕𑀢𑁄 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀢𑁆𑀣𑀸𑀬 𑀧𑀣𑀯𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀚𑀮𑀚𑀸𑀫𑀮𑀸𑀯𑀺𑀓𑀮𑀓𑀫𑀮𑀫𑀓𑀼𑀮𑀲𑀤𑀺𑀲𑀁 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀫𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀓𑀢𑁆𑀯𑀸 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂 ¶ , 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁, 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺 (𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁮) 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂, 𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁, 𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄, 𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫, 𑀲𑀢𑁆𑀣𑀯𑀸𑀳 𑀅𑀦𑀡 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 𑀪𑀕𑀯𑀸 𑀥𑀫𑁆𑀫𑀁, 𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. (𑀫. 𑀦𑀺. 𑁧.𑁨𑁮𑁨; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁮) 𑁋

‘‘𑀦𑀦𑀼 𑀢𑀼𑀫𑁆𑀳𑁂𑀳𑀺 ‘𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬𑀁 𑀢𑀺𑀡𑁆𑀡𑁄 𑀢𑀸𑀭𑁂𑀬𑁆𑀬𑀁 𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬’’’𑀦𑁆𑀢𑀺 𑁋

‘‘𑀓𑀺𑀁 ¶ 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑀬𑀺𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺. (𑀩𑀼. 𑀯𑀁. 𑁨.𑁫𑁫) 𑁋

𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀧𑀢𑁆𑀢𑁄𑀢𑀺 𑀘, ‘‘𑀢𑀼𑀫𑁆𑀳𑁂𑀳𑀺 𑀥𑀫𑁆𑀫𑁂 𑀅𑀤𑁂𑀲𑀺𑀬𑀫𑀸𑀦𑁂 𑀓𑁄 𑀳𑀺 𑀦𑀸𑀫 𑀅𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀓𑀺𑀫𑀜𑁆𑀜𑀁 𑀮𑁄𑀓𑀲𑁆𑀲 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀦’’𑀦𑁆𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀬𑁂𑀳𑀺 𑀪𑀕𑀯𑀦𑁆𑀢𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀅𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀩𑀼𑀤𑁆𑀥𑀪𑀽𑀢𑀲𑁆𑀲 ¶ 𑀧𑀦 𑀪𑀕𑀯𑀢𑁄 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀲𑀢𑁆𑀣𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑁄’’𑀢𑀺.

𑀇𑀤𑀸𑀦𑀺 ‘‘𑀓𑀤𑀸 𑀓𑀢𑁆𑀣 𑀘 𑀓𑁂𑀦𑀸𑀬𑀁, 𑀕𑀸𑀣𑀸 𑀳𑀺 𑀲𑀫𑀼𑀤𑀻𑀭𑀺𑀢𑀸’’𑀢𑀺 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀓𑀤𑀸 𑀯𑀼𑀢𑁆𑀢𑀸𑀢𑀺? 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀸. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫𑁂𑀲𑀸 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑁂 (𑀘𑀽𑀴𑀯. 𑁪𑁩𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑀢𑁆𑀣 𑀓𑁂𑀦 𑀯𑀼𑀢𑁆𑀢𑀸𑀢𑀺? 𑀪𑀕𑀯𑀢𑀺 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑁂 𑀭𑀸𑀚𑀕𑀳𑀦𑀕𑀭𑁂 𑀯𑁂𑀪𑀸𑀭𑀧𑀩𑁆𑀩𑀢𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀯𑀺𑀚𑀺𑀢𑀲𑀩𑁆𑀩𑀲𑀢𑁆𑀢𑀼𑀦𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀫𑀕𑀥𑀫𑀳𑀸𑀭𑀸𑀚𑁂𑀦 𑀥𑀫𑁆𑀫𑀲𑀗𑁆𑀕𑀸𑀬𑀦𑀢𑁆𑀣𑀁 𑀓𑀸𑀭𑀺𑀢𑁂 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀲𑀗𑁆𑀓𑀸𑀲𑁂 ¶ 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑁂 𑀫𑀡𑁆𑀟𑀧𑁂 𑀥𑀫𑁆𑀫𑀸𑀲𑀦𑀕𑀢𑁂𑀦𑀸𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 ‘‘𑀩𑁆𑀭𑀳𑁆𑀫𑀸 𑀘 𑀮𑁄𑀓𑀸𑀥𑀺𑀧𑀢𑀻’’𑀢𑀺 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀕𑀸𑀣𑀸𑀲𑀫𑁆𑀩𑀦𑁆𑀥𑁄.

𑀏𑀢𑁆𑀢𑀸𑀯𑀢𑀸 𑁋

‘‘𑀓𑀤𑀸𑀬𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀁, 𑀅𑀚𑁆𑀛𑀺𑀝𑁆𑀞𑁄 𑀩𑁆𑀭𑀳𑁆𑀫𑀼𑀦𑀸 𑀚𑀺𑀦𑁄;

𑀓𑀤𑀸 𑀓𑀢𑁆𑀣 𑀘 𑀓𑁂𑀦𑀸𑀬𑀁, 𑀕𑀸𑀣𑀸 𑀳𑀺 𑀲𑀫𑀼𑀤𑀻𑀭𑀺𑀢𑀸’’𑀢𑀺. 𑁋

𑀅𑀬𑀫𑁆𑀧𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺. 𑀏𑀯𑀁 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀸𑀬 𑀧𑀦𑀲𑁆𑀲𑀸 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀢𑀢𑁆𑀣 𑀩𑁆𑀭𑀳𑁆𑀫𑀸𑀢𑀺 𑀩𑁆𑀭𑀽𑀳𑀺𑀢𑁄 𑀢𑁂𑀳𑀺 𑀢𑁂𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀻𑀢𑀺 𑀩𑁆𑀭𑀳𑁆𑀫𑀸. 𑀅𑀬𑀁 𑀧𑀦 𑀩𑁆𑀭𑀳𑁆𑀫-𑀲𑀤𑁆𑀤𑁄 𑀫𑀳𑀸𑀩𑁆𑀭𑀳𑁆𑀫𑀩𑁆𑀭𑀸𑀳𑁆𑀫𑀡𑀢𑀣𑀸𑀕𑀢𑀫𑀸𑀢𑀸𑀧𑀺𑀢𑀼𑀲𑁂𑀝𑁆𑀞𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀤𑁆𑀯𑀺𑀲𑀳𑀲𑁆𑀲𑁄 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁬𑁬) 𑀫𑀳𑀸𑀩𑁆𑀭𑀳𑁆𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑁄.

‘‘𑀢𑀫𑁄𑀦𑀼𑀤𑁄 ¶ 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼, 𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄;

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄, 𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂’’𑀢𑀺. (𑀲𑀼. 𑀦𑀺. 𑁧𑁧𑁩𑁯) 𑁋

𑀏𑀢𑁆𑀣 𑀩𑁆𑀭𑀸𑀳𑁆𑀫𑀡𑁄. ‘‘𑀩𑁆𑀭𑀳𑁆𑀫𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀏𑀢𑁆𑀣 𑀢𑀣𑀸𑀕𑀢𑁄. ‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺 (𑀅. 𑀦𑀺. 𑁩.𑁩𑁧; 𑁪.𑁬𑁩; 𑀇𑀢𑀺𑀯𑀼. 𑁧𑁦𑁬; 𑀚𑀸. 𑁨.𑁨𑁦.𑁧𑁮𑁧) 𑀏𑀢𑁆𑀣 𑀫𑀸𑀢𑀸𑀧𑀺𑀢𑀭𑁄. ‘‘𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺 (𑀫. 𑀦𑀺. 𑁧.𑁧𑁪𑁮; 𑀲𑀁. 𑀦𑀺. 𑁨.𑁨𑁧; 𑀅. 𑀦𑀺. 𑁪.𑁮; 𑁫.𑁧𑁧; 𑀧𑀝𑀺. 𑀫. 𑁨.𑁪𑁪) 𑀏𑀢𑁆𑀣 𑀲𑁂𑀝𑁆𑀞𑁄 𑀅𑀥𑀺𑀧𑁆𑀧𑁂𑀢𑁄. 𑀇𑀥 𑀧𑀦 𑀧𑀞𑀫𑀚𑁆𑀛𑀸𑀦𑀁 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀓𑀧𑁆𑀧𑀸𑀬𑀼𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀅𑀥𑀺𑀧𑁆𑀧𑁂𑀢𑁄 (𑀫. 𑀦𑀺. 𑀅𑀝𑁆𑀞. 𑁧.𑁩). 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀩𑁆𑀭𑀳𑁆𑀫𑀸 𑀘 𑀅𑀜𑁆𑀜𑁂 𑀘 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀩𑁆𑀭𑀳𑁆𑀫𑀸𑀦𑁄 𑀘𑀸𑀢𑀺 𑀅𑀢𑁆𑀣𑁄, 𑀧𑀤𑀧𑀽𑀭𑀡𑀫𑀢𑁆𑀢𑁄 𑀯𑀸. 𑀮𑁄𑀓𑀸𑀥𑀺𑀧𑀢𑀻𑀢𑀺 𑀏𑀢𑁆𑀣 𑀮𑁄𑀓𑁄𑀢𑀺 𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺 𑀢𑀬𑁄 ¶ 𑀮𑁄𑀓𑀸. 𑀢𑁂𑀲𑀼 𑀇𑀥 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀇𑀲𑁆𑀲𑀭𑁄 𑀅𑀥𑀺𑀧𑀢𑀻𑀢𑀺 𑀮𑁄𑀓𑀸𑀥𑀺𑀧𑀢𑀺, 𑀮𑁄𑀓𑁂𑀓𑀤𑁂𑀲𑀲𑁆𑀲𑀸𑀧𑀺 𑀅𑀥𑀺𑀧𑀢𑀺 𑀮𑁄𑀓𑀸𑀥𑀺𑀧𑀢𑀻𑀢𑀺 𑀯𑀼𑀘𑁆𑀘𑀢𑀺 𑀤𑁂𑀯𑀸𑀥𑀺𑀧𑀢𑀺 𑀦𑀭𑀸𑀥𑀺𑀧𑀢𑀺 𑀯𑀺𑀬.

𑀲𑀳𑀫𑁆𑀧𑀢𑀻𑀢𑀺 𑀲𑁄 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀳𑀓𑁄 𑀦𑀸𑀫 𑀣𑁂𑀭𑁄 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ¶ 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀓𑀧𑁆𑀧𑀸𑀬𑀼𑀓𑀫𑀳𑀸𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀭 𑀧𑀦 𑀦𑀁 ‘‘𑀲𑀳𑀫𑁆𑀧𑀢𑀺 𑀩𑁆𑀭𑀳𑁆𑀫𑀸’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. ‘‘𑀲𑀳𑀓𑀧𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀲𑁆𑀲𑀭𑀸𑀕𑀫𑀁 𑀓𑀢𑁆𑀯𑀸 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀲𑀳𑀫𑁆𑀧𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀢𑀜𑁆𑀚𑀮𑀻𑀢𑀺 𑀓𑀢𑀜𑁆𑀚𑀮𑀺𑀓𑁄, 𑀅𑀜𑁆𑀚𑀮𑀺𑀧𑀼𑀝𑀁 𑀲𑀺𑀭𑀲𑀺 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀥𑀺𑀯𑀭𑀦𑁆𑀢𑀺 𑀅𑀘𑁆𑀘𑀦𑁆𑀢𑀯𑀭𑁄 𑀅𑀥𑀺𑀯𑀭𑁄 𑀦𑀸𑀲𑁆𑀲 𑀅𑀢𑁆𑀣𑀻𑀢𑀺 𑀅𑀦𑀥𑀺𑀯𑀭𑁄, 𑀦 𑀢𑀢𑁄 𑀅𑀥𑀺𑀓𑁄 𑀯𑀭𑁄 𑀅𑀢𑁆𑀣𑀻𑀢𑀺 𑀯𑀸 𑀅𑀦𑀥𑀺𑀯𑀭𑁄, 𑀅𑀦𑀼𑀢𑁆𑀢𑀭𑁄𑀢𑀺 𑀅𑀢𑁆𑀣𑁄, 𑀢𑀁 𑀅𑀦𑀥𑀺𑀯𑀭𑀁. 𑀅𑀬𑀸𑀘𑀣𑀸𑀢𑀺 𑀅𑀬𑀸𑀘𑀺𑀢𑁆𑀣 𑀅𑀚𑁆𑀛𑁂𑀲𑀺.

𑀇𑀤𑀸𑀦𑀺 𑀬𑀲𑁆𑀲𑀢𑁆𑀣𑀸𑀬 𑀲𑁄 𑀪𑀕𑀯𑀦𑁆𑀢𑀁 𑀅𑀬𑀸𑀘𑀺, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑀻𑀥 𑀲𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑁆𑀢𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀩𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀅𑀬𑀁 𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄 ¶ . 𑀲𑁆𑀯𑀸𑀬𑀁 𑀓𑀢𑁆𑀣𑀘𑀺 𑀲𑀸𑀲𑀦𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄, 𑀇𑀥 𑀢𑀢𑀺𑀬𑁄 𑀲𑀫𑀡𑁄, 𑀇𑀥 𑀘𑀢𑀼𑀢𑁆𑀣𑁄 𑀲𑀫𑀡𑁄, 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀤𑀻. 𑀦𑀺. 𑁨.𑁨𑁧𑁪; 𑀅. 𑀦𑀺. 𑁪.𑁨𑁪𑁧). 𑀓𑀢𑁆𑀣𑀘𑀺 𑀑𑀓𑀸𑀲𑀁, 𑀬𑀣𑀸𑀳 𑁋

‘‘𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺. (𑀤𑀻. 𑀦𑀺. 𑁨.𑁩𑁬𑁯) 𑁋

𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀬𑀣𑀸𑀳 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄’’𑀢𑀺 (𑀫. 𑀦𑀺. 𑁧.𑁩𑁦). 𑀓𑀢𑁆𑀣𑀘𑀺 𑀮𑁄𑀓𑀁 𑀉𑀧𑀸𑀤𑀸𑀬, 𑀬𑀣𑀸𑀳 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬𑀸’’𑀢𑀺 (𑀅. 𑀦𑀺. 𑁧.𑁧𑁭𑁦). 𑀇𑀥𑀸𑀧𑀺 𑀮𑁄𑀓𑀫𑁂𑀯 𑀉𑀧𑀸𑀤𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀢𑀺 𑀭𑀽𑀧𑀸𑀤𑀻𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑁂𑀦 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑀺𑀢𑀸𑀢𑀺 𑀲𑀢𑁆𑀢𑀸, 𑀲𑀢𑁆𑀢𑀸𑀢𑀺 𑀧𑀸𑀡𑀺𑀦𑁄 𑀯𑀼𑀘𑁆𑀘𑀦𑁆𑀢𑀺. 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀧𑀦 𑀯𑀻𑀢𑀭𑀸𑀕𑁂𑀲𑀼𑀧𑀺 𑀅𑀬𑀁 𑀯𑁄𑀳𑀸𑀭𑁄 𑀯𑀢𑁆𑀢𑀢𑀺𑀬𑁂𑀯.

𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀭𑀚𑀁 𑀏𑀢𑁂𑀲𑀁 𑀏𑀯𑀁𑀲𑀪𑀸𑀯𑀸 𑀘 𑀢𑁂𑀢𑀺 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑀫𑁂𑀯 𑀯𑀸 𑀬𑁂𑀲𑀁 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸, 𑀢𑁂 𑀅𑀧𑁆𑀧𑀭𑀚𑀓𑁆𑀔𑀲𑀪𑀸𑀯𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀲𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀦𑀁. ‘‘𑀲𑀢𑁆𑀢𑀸𑀦’’𑀦𑁆𑀢𑀺 ¶ 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑁋 ‘‘𑀤𑁂𑀲𑁂𑀳𑀺 𑀥𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀤𑁂𑀲𑁂𑀳𑀻𑀢𑀺 𑀆𑀬𑀸𑀘𑀦𑀯𑀘𑀦𑀫𑁂𑀢𑀁, 𑀤𑁂𑀲𑁂𑀳𑀺 𑀓𑀣𑁂𑀳𑀺 𑀉𑀧𑀤𑀺𑀲𑀸𑀢𑀺 ¶ 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀥𑀫𑁆𑀫-𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀧𑀓𑀢𑀺𑀲𑀪𑀸𑀯𑀲𑀼𑀜𑁆𑀜𑀢𑀸𑀧𑀼𑀜𑁆𑀜𑀆𑀧𑀢𑁆𑀢𑀺𑀜𑁂𑀬𑁆𑀬𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑁋 ‘‘𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁…𑀧𑁂… 𑀯𑁂𑀤𑀮𑁆𑀮’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁩𑁯; 𑀅. 𑀦𑀺. 𑁪.𑁧𑁦𑁨) 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀸𑀥𑀺𑀫𑁆𑀳𑀺.

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺. 𑁋

𑀆𑀤𑀻𑀲𑀼 ¶ (𑀚𑀸. 𑁧.𑁨.𑁧𑁪𑁭) 𑀧𑀜𑁆𑀜𑀸𑀬. ‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁩𑁯) 𑀧𑀓𑀢𑀺𑀬𑀁. ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸) 𑀲𑀪𑀸𑀯𑁂. ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨𑁧) 𑀲𑀼𑀜𑁆𑀜𑀢𑀸𑀬𑀁. ‘‘𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁮𑁪; 𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫) 𑀧𑀼𑀜𑁆𑀜𑁂. ‘‘𑀤𑁆𑀯𑁂 𑀅𑀦𑀺𑀬𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀆𑀧𑀢𑁆𑀢𑀺𑀬𑀁. ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫) 𑀜𑁂𑀬𑁆𑀬𑁂. ‘‘𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁯𑁯; 𑀫𑀳𑀸𑀯. 𑁨𑁭, 𑁫𑁭) 𑀘𑀢𑀼𑀲𑀘𑁆𑀘𑀥𑀫𑁆𑀫𑁂. 𑀇𑀥𑀸𑀧𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀤𑀝𑁆𑀞𑀩𑁆𑀩𑁄 (𑀫. 𑀦𑀺. 𑀅𑀝𑁆𑀞. 𑁧.𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸; 𑀥. 𑀲. 𑀅𑀝𑁆𑀞. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟 𑁧). 𑀅𑀦𑀼𑀓𑀫𑁆𑀧𑀸𑀢𑀺 𑀅𑀦𑀼𑀓𑀫𑁆𑀧𑀁 𑀅𑀦𑀼𑀤𑁆𑀤𑀬𑀁 𑀓𑀭𑁄𑀳𑀺. 𑀇𑀫𑀦𑁆𑀢𑀺 𑀧𑀚𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳. 𑀧𑀚𑀦𑁆𑀢𑀺 𑀧𑀚𑀸𑀢𑀢𑁆𑀢𑀸 𑀧𑀚𑀸, 𑀢𑀁 𑀧𑀚𑀁, 𑀲𑀢𑁆𑀢𑀦𑀺𑀓𑀸𑀬𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀘𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 𑁋

‘‘𑀪𑀕𑀯𑀸𑀢𑀺 𑀮𑁄𑀓𑀸𑀥𑀺𑀧𑀢𑀻 𑀦𑀭𑀼𑀢𑁆𑀢𑀫𑁄,

𑀓𑀢𑀜𑁆𑀚𑀮𑀻 𑀩𑁆𑀭𑀳𑁆𑀫𑀕𑀡𑁂𑀳𑀺 𑀬𑀸𑀘𑀺𑀢𑁄’’𑀢𑀺. 𑁋

𑀧𑀞𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀲𑁄 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

𑀅𑀣 𑀪𑀕𑀯𑀢𑁄 𑀢𑀁 𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲 𑀆𑀬𑀸𑀘𑀦𑀯𑀘𑀦𑀁 𑀲𑀼𑀢𑁆𑀯𑀸 𑀅𑀧𑀭𑀺𑀫𑀺𑀢𑀲𑀫𑀬𑀲𑀫𑀼𑀤𑀺𑀢𑀓𑀭𑀼𑀡𑀸𑀩𑀮𑀲𑁆𑀲 𑀤𑀲𑀩𑀮𑀲𑁆𑀲 𑀧𑀭𑀳𑀺𑀢𑀓𑀭𑀡𑀦𑀺𑀧𑀼𑀡𑀫𑀢𑀺𑀘𑀸𑀭𑀲𑁆𑀲 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀓𑀸𑀲𑀓𑀭𑀡𑀫𑀢𑁆𑀢𑁂𑀦 𑀫𑀳𑀸𑀓𑀭𑀼𑀡𑀸 𑀉𑀤𑀧𑀸𑀤𑀺. 𑀢𑀁 𑀧𑀦 𑀪𑀕𑀯𑀢𑁄 𑀓𑀭𑀼𑀡𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑁋

𑁨.

‘‘𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑀲𑁆𑀲 ¶ ¶ 𑀢𑀸𑀤𑀺𑀦𑁄, 𑀚𑀼𑀢𑀺𑀦𑁆𑀥𑀭𑀲𑁆𑀲𑀦𑁆𑀢𑀺𑀫𑀤𑁂𑀳𑀥𑀸𑀭𑀺𑀦𑁄;

𑀢𑀣𑀸𑀕𑀢𑀲𑁆𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑀲𑁆𑀲, 𑀉𑀧𑁆𑀧𑀚𑁆𑀚𑀺 𑀓𑀸𑀭𑀼𑀜𑁆𑀜𑀢𑀸 𑀲𑀩𑁆𑀩𑀲𑀢𑁆𑀢𑁂’’𑀢𑀺. 𑁋

𑀅𑀬𑀁 𑀕𑀸𑀣𑀸 𑀞𑀧𑀺𑀢𑀸.

𑀢𑀢𑁆𑀣 𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑀲𑁆𑀲𑀸𑀢𑀺 𑀲𑀫𑁆𑀧𑀦𑁆𑀦𑀁 𑀦𑀸𑀫 𑀢𑀺𑀯𑀺𑀥𑀁 𑀧𑀭𑀺𑀧𑀼𑀡𑁆𑀡𑀲𑀫𑀗𑁆𑀕𑀺𑀫𑀥𑀼𑀭𑀯𑀲𑁂𑀦. 𑀢𑀢𑁆𑀣 𑁋

‘‘𑀲𑀫𑁆𑀧𑀦𑁆𑀦𑀁 ¶ 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑀁 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂’’𑀢𑀺. (𑀚𑀸. 𑁧.𑁧𑁪.𑁧) 𑁋

𑀇𑀤𑀁 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀁 𑀦𑀸𑀫. ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀇𑀤𑀁 𑀲𑀫𑀗𑁆𑀕𑀺𑀲𑀫𑁆𑀧𑀦𑁆𑀦𑀁 𑀦𑀸𑀫. ‘‘𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀁, 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀮𑀓𑀁, 𑀏𑀯𑀫𑀲𑁆𑀲𑀸𑀤’’𑀦𑁆𑀢𑀺 (𑀧𑀸𑀭𑀸. 𑁧𑁮) 𑀇𑀤𑀁 𑀫𑀥𑀼𑀭𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀇𑀥 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀫𑁆𑀧𑀺 𑀲𑀫𑀗𑁆𑀕𑀺𑀲𑀫𑁆𑀧𑀦𑁆𑀦𑀫𑁆𑀧𑀺 𑀬𑀼𑀚𑁆𑀚𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁬𑁪). 𑀯𑀺𑀚𑁆𑀚𑀸𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀦𑁆𑀤𑀺𑀢𑀩𑁆𑀩𑀝𑁆𑀞𑁂𑀦 𑀘 𑀯𑀺𑀚𑁆𑀚𑀸. 𑀢𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀯𑀺𑀚𑁆𑀚𑀸 𑀅𑀝𑁆𑀞𑀧𑀺 𑀯𑀺𑀚𑁆𑀚𑀸. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀪𑀬𑀪𑁂𑀭𑀯𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁫𑁦 𑀆𑀤𑀬𑁄) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀅𑀝𑁆𑀞 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁨𑁭𑁮 𑀆𑀤𑀬𑁄). 𑀢𑀢𑁆𑀭 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀘 𑀲𑀳 𑀙 𑀅𑀪𑀺𑀜𑁆𑀜𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀯𑀺𑀚𑁆𑀚𑀸 𑀯𑀼𑀢𑁆𑀢𑀸. 𑀘𑀭𑀡𑀦𑁆𑀢𑀺 𑀲𑀻𑀮𑀲𑀁𑀯𑀭𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀤𑁆𑀥𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀩𑀸𑀳𑀼𑀲𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀢𑀸 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀻𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀬𑁂𑀯 𑀳𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀬𑀲𑁆𑀫𑀸 𑀏𑀢𑁂𑀳𑀺 𑀘𑀭𑀢𑀺 𑀅𑀭𑀺𑀬𑀲𑀸𑀯𑀓𑁄 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀁, 𑀢𑀲𑁆𑀫𑀸 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀫. 𑀦𑀺. 𑁨.𑁨𑁪) 𑀲𑀩𑁆𑀩𑀁 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀚𑁆𑀚𑀸 𑀘 𑀘𑀭𑀡𑀜𑁆𑀘 𑀯𑀺𑀚𑁆𑀚𑀸𑀘𑀭𑀡𑀸𑀦𑀺, 𑀲𑀫𑁆𑀧𑀦𑁆𑀦𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀯𑀺𑀚𑁆𑀚𑀸𑀘𑀭𑀡𑀸𑀦𑀺 𑀬𑀲𑁆𑀲 𑀲𑁄𑀬𑀁 𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁄, 𑀯𑀺𑀚𑁆𑀚𑀸𑀘𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄, 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀸 𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁄. 𑀉𑀪𑀬𑀣𑀸𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑁂𑀯, 𑀢𑀲𑁆𑀲 𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑀲𑁆𑀲 (𑀧𑀸𑀭𑀸. 𑀅𑀝𑁆𑀞. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸).

𑀢𑀸𑀤𑀺𑀦𑁄𑀢𑀺 ‘‘𑀇𑀝𑁆𑀞𑁂𑀧𑀺 𑀢𑀸𑀤𑀻 𑀅𑀦𑀺𑀝𑁆𑀞𑁂𑀧𑀺 𑀢𑀸𑀤𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁩𑁮, 𑁧𑁯𑁨) 𑀆𑀕𑀢𑀢𑀸𑀤𑀺𑀮𑀓𑁆𑀔𑀡𑁂𑀦 𑀢𑀸𑀤𑀺𑀦𑁄, 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀲𑀼 𑀅𑀯𑀺𑀓𑀸𑀭𑀲𑁆𑀲 𑀢𑀸𑀤𑀺𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀚𑀼𑀢𑀺𑀦𑁆𑀥𑀭𑀲𑁆𑀲𑀸𑀢𑀺 ¶ ¶ 𑀚𑀼𑀢𑀺𑀫𑀢𑁄, 𑀬𑀼𑀕𑀦𑁆𑀥𑀭𑁂 𑀲𑀭𑀤𑀲𑀫𑀬𑁂 𑀲𑀫𑀼𑀤𑀺𑀢𑀤𑀺𑀯𑀲𑀓𑀭𑀸𑀢𑀺𑀭𑁂𑀓𑀢𑀭𑀲𑀲𑁆𑀲𑀺𑀭𑀺𑀓𑀲𑀭𑀻𑀭𑀚𑀼𑀢𑀺𑀯𑀺𑀲𑀭𑀥𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀥𑀭𑀲𑁆𑀲𑀸’’𑀢𑀺 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀢𑁆𑀢𑀸𑀭𑁄 ¶ 𑀮𑁄𑀓𑁂 𑀧𑀚𑁆𑀚𑁄𑀢𑀸, 𑀧𑀜𑁆𑀘𑀫𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀤𑀺𑀯𑀸 𑀢𑀧𑀢𑀺 𑀆𑀤𑀺𑀘𑁆𑀘𑁄, 𑀭𑀢𑁆𑀢𑀺𑀫𑀸𑀪𑀸𑀢𑀺 𑀘𑀦𑁆𑀤𑀺𑀫𑀸.

‘‘𑀅𑀣 𑀅𑀕𑁆𑀕𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀢𑀢𑁆𑀣 𑀢𑀢𑁆𑀣 𑀧𑀪𑀸𑀲𑀢𑀺;

𑀲𑀫𑁆𑀩𑀼𑀤𑁆𑀥𑁄 𑀢𑀧𑀢𑀁 𑀲𑁂𑀝𑁆𑀞𑁄, 𑀏𑀲𑀸 𑀆𑀪𑀸 𑀅𑀦𑀼𑀢𑁆𑀢𑀭𑀸’’𑀢𑀺. (𑀲𑀁. 𑀦𑀺. 𑁧.𑁨𑁬, 𑁮𑁫);

𑀢𑀲𑁆𑀫𑀸 𑀉𑀪𑀬𑀣𑀸𑀧𑀺 𑀲𑀭𑀻𑀭𑀧𑀜𑁆𑀜𑀸𑀚𑀼𑀢𑀺𑀯𑀺𑀲𑀭𑀥𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀺𑀦𑁄𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑀭𑀻𑀭𑀥𑀸𑀭𑀺𑀦𑁄, 𑀅𑀧𑀼𑀦𑀩𑁆𑀪𑀯𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀢𑀣𑀸𑀕𑀢𑀲𑁆𑀲𑀸𑀢𑀺 𑀏𑀢𑁆𑀣 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄, 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄𑀢𑀺.

𑀓𑀣𑀁 𑀪𑀕𑀯𑀸 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀯𑀻𑀭𑀺𑀬𑀔𑀦𑁆𑀢𑀺𑀲𑀘𑁆𑀘𑀅𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀇𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀥𑀦𑀭𑀚𑁆𑀚𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀬𑀣𑀸 𑀯𑀺𑀧𑀲𑁆𑀲𑀺𑀆𑀤𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀆𑀕𑀢𑀸, 𑀢𑀣𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀬𑀣𑀸𑀳 𑁋

‘‘𑀬𑀣𑁂𑀯 𑀮𑁄𑀓𑀫𑁆𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄, 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀫𑀼𑀦𑀬𑁄 𑀇𑀥𑀸𑀕𑀢𑀸;

𑀢𑀣𑀸 𑀅𑀬𑀁 𑀲𑀓𑁆𑀬𑀫𑀼𑀦𑀻𑀧𑀺 𑀆𑀕𑀢𑁄, 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀢𑁂𑀦 𑀘𑀓𑁆𑀔𑀼𑀫𑀸’’𑀢𑀺.

𑀓𑀣𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀫𑁆𑀧𑀢𑀺𑀚𑀸𑀢𑀸 𑀯𑀺𑀧𑀲𑁆𑀲𑀺𑀆𑀤𑀬𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀸 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑀸, 𑀢𑀣𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀬𑀣𑀸𑀳 𑁋

‘‘𑀫𑀼𑀳𑀼𑀢𑁆𑀢𑀚𑀸𑀢𑁄𑀯 ¶ ¶ ¶ 𑀕𑀯𑀫𑁆𑀧𑀢𑀻 𑀬𑀣𑀸, 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀨𑀼𑀲𑀻 𑀯𑀲𑀼𑀦𑁆𑀥𑀭𑀁;

𑀲𑁄 𑀯𑀺𑀓𑁆𑀓𑀫𑀻 𑀲𑀢𑁆𑀢𑀧𑀤𑀸𑀦𑀺 𑀕𑁄𑀢𑀫𑁄, 𑀲𑁂𑀢𑀜𑁆𑀘 𑀙𑀢𑁆𑀢𑀁 𑀅𑀦𑀼𑀥𑀸𑀭𑀬𑀼𑀁 𑀫𑀭𑀽.

‘‘𑀕𑀦𑁆𑀢𑁆𑀯𑀸𑀦 𑀲𑁄 𑀲𑀢𑁆𑀢𑀧𑀤𑀸𑀦𑀺 𑀕𑁄𑀢𑀫𑁄, 𑀤𑀺𑀲𑀸 𑀯𑀺𑀮𑁄𑀓𑁂𑀲𑀺 𑀲𑀫𑀸 𑀲𑀫𑀦𑁆𑀢𑀢𑁄;

𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀕𑀺𑀭𑀫𑀩𑁆𑀪𑀼𑀤𑀻𑀭𑀬𑀻, 𑀲𑀻𑀳𑁄 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄’’𑀢𑀺.

𑀓𑀣𑀁 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀲𑀩𑁆𑀩𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘 𑀢𑀣𑀁 𑀅𑀯𑀺𑀢𑀣𑀁 𑀜𑀸𑀡𑀕𑀢𑀺𑀬𑀸 𑀆𑀕𑀢𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀢𑁆𑀢𑁄 𑀅𑀦𑀼𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄.

‘‘𑀲𑀩𑁆𑀩𑁂𑀲𑀁 𑀧𑀦 𑀥𑀫𑁆𑀫𑀸𑀦𑀁, 𑀲𑀓𑀲𑀸𑀫𑀜𑁆𑀜𑀮𑀓𑁆𑀔𑀡𑀁;

𑀢𑀣𑀫𑁂𑀯𑀸𑀕𑀢𑁄 𑀬𑀲𑁆𑀫𑀸, 𑀢𑀲𑁆𑀫𑀸 𑀲𑀢𑁆𑀣𑀸 𑀢𑀣𑀸𑀕𑀢𑁄’’𑀢𑀺.

𑀓𑀣𑀁 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄? 𑀢𑀣𑀥𑀫𑁆𑀫𑀸 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦) 𑀯𑀺𑀢𑁆𑀣𑀸𑀭𑁄. 𑀢𑀸𑀦𑀺 𑀘 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀢𑀣𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀣𑁄 𑀳𑀺 𑀏𑀢𑁆𑀣 𑀕𑀢𑀲𑀤𑁆𑀤𑁄.

‘‘𑀢𑀣𑀦𑀸𑀫𑀸𑀦𑀺 𑀲𑀘𑁆𑀘𑀸𑀦𑀺, 𑀅𑀪𑀺𑀲𑀫𑁆𑀩𑀼𑀚𑁆𑀛𑀺 𑀦𑀸𑀬𑀓𑁄;

𑀢𑀲𑁆𑀫𑀸 𑀢𑀣𑀸𑀦𑀁 𑀲𑀘𑁆𑀘𑀸𑀦𑀁, 𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄’’.

𑀓𑀣𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄? 𑀪𑀕𑀯𑀸 𑀳𑀺 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁄𑀢𑀖𑀸𑀡𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀤𑁆𑀯𑀸𑀭𑁂𑀲𑀼 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀁 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀁 𑀢𑀣𑀸𑀕𑀢𑁄 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺, 𑀏𑀯𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄. 𑀅𑀣 𑀯𑀸 𑀬𑀁 𑀮𑁄𑀓𑁂 𑀢𑀣𑀁, 𑀢𑀁 𑀮𑁄𑀓𑀲𑁆𑀲 𑀢𑀣𑁂𑀯 𑀤𑀲𑁆𑀲𑁂𑀢𑀺. 𑀢𑀢𑁄𑀧𑀺 𑀪𑀕𑀯𑀸 𑀢𑀣𑀸𑀕𑀢𑁄. 𑀏𑀢𑁆𑀣 𑀢𑀣𑀤𑀲𑁆𑀲𑀺𑀅𑀢𑁆𑀣𑁂 ‘‘𑀢𑀣𑀸𑀕𑀢𑁄’’𑀢𑀺 𑀧𑀤𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀢𑀣𑀸𑀓𑀸𑀭𑁂𑀦 ¶ 𑀬𑁄 𑀥𑀫𑁆𑀫𑁂, 𑀚𑀸𑀦𑀸𑀢𑀺 𑀅𑀦𑀼𑀧𑀲𑁆𑀲𑀢𑀺;

𑀢𑀣𑀤𑀲𑁆𑀲𑀻𑀢𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀯𑀼𑀢𑁆𑀢𑁄 𑀢𑀣𑀸𑀕𑀢𑁄’’.

𑀓𑀣𑀁 ¶ ¶ 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄? 𑀬𑀜𑁆𑀘 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑁂 𑀲𑀼𑀢𑁆𑀢𑀸𑀤𑀺𑀦𑀯𑀗𑁆𑀕𑀲𑀗𑁆𑀕𑀳𑀺𑀢𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦, 𑀲𑀩𑁆𑀩𑀁 𑀢𑀁 𑀏𑀓𑀢𑀼𑀮𑀸𑀬 𑀢𑀼𑀮𑀺𑀢𑀁 𑀯𑀺𑀬 𑀢𑀣𑀫𑁂𑀯 𑀅𑀯𑀺𑀢𑀣𑀫𑁂𑀯 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺, 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀏𑀢𑁆𑀣 𑀧𑀦 𑀕𑀤𑀅𑀢𑁆𑀣𑁄 𑀳𑀺 𑀕𑀢𑀲𑀤𑁆𑀤𑁄. 𑀏𑀯𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄. 𑀆𑀕𑀤𑀦𑀁 𑀆𑀕𑀤𑁄, 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀆𑀕𑀤𑁄 𑀅𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄.

‘‘𑀢𑀣𑀸𑀯𑀸𑀤𑀻 𑀚𑀺𑀦𑁄 𑀬𑀲𑁆𑀫𑀸, 𑀢𑀣𑀥𑀫𑁆𑀫𑀧𑁆𑀧𑀓𑀸𑀲𑀓𑁄;

𑀢𑀣𑀸𑀫𑀸𑀕𑀤𑀦𑀜𑁆𑀘𑀲𑁆𑀲, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀢𑀣𑀸𑀕𑀢𑁄’’.

𑀓𑀣𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄? 𑀪𑀕𑀯𑀸 𑀳𑀺 𑀬𑀁 𑀬𑀁 𑀯𑀸𑀘𑀁 𑀅𑀪𑀸𑀲𑀺, 𑀢𑀁 𑀢𑀁 𑀏𑀯 𑀓𑀸𑀬𑁂𑀦 𑀓𑀭𑁄𑀢𑀺, 𑀯𑀸𑀘𑀸𑀬 𑀓𑀸𑀬𑁄 𑀅𑀦𑀼𑀮𑁄𑀫𑁂𑀢𑀺, 𑀓𑀸𑀬𑀲𑁆𑀲𑀧𑀺 𑀯𑀸𑀘𑀸. 𑀢𑁂𑀦𑁂𑀯𑀸𑀳 𑁋

‘‘𑀬𑀣𑀸 𑀯𑀸𑀤𑀻, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀢𑀣𑀸 𑀓𑀸𑀭𑀻, 𑀬𑀣𑀸 𑀓𑀸𑀭𑀻 𑀢𑀣𑀸 𑀯𑀸𑀤𑀻…𑀧𑁂… 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩; 𑀘𑀽𑀴𑀦𑀺. 𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁩).

𑀬𑀣𑀸 𑀘 𑀯𑀸𑀘𑀸 𑀕𑀢𑀸, 𑀓𑀸𑀬𑁄𑀧𑀺 𑀢𑀣𑀸 𑀕𑀢𑁄, 𑀬𑀣𑀸 𑀓𑀸𑀬𑁄 𑀕𑀢𑁄, 𑀯𑀸𑀘𑀸𑀧𑀺 𑀢𑀣𑀸 𑀕𑀢𑀸. 𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄.

‘‘𑀬𑀣𑀸 𑀯𑀸𑀘𑀸 𑀕𑀢𑀸 𑀢𑀲𑁆𑀲, 𑀢𑀣𑀸 𑀓𑀸𑀬𑁄 𑀕𑀢𑁄 𑀬𑀢𑁄;

𑀢𑀣𑀸𑀯𑀸𑀤𑀺𑀢𑀸𑀬 𑀲𑀫𑁆𑀩𑀼𑀤𑁆𑀥𑁄, 𑀲𑀢𑁆𑀣𑀸 𑀢𑀲𑁆𑀫𑀸 𑀢𑀣𑀸𑀕𑀢𑁄’’.

𑀓𑀣𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄? 𑀉𑀧𑀭𑀺 𑀪𑀯𑀕𑁆𑀕𑀁 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀲𑀻𑀮𑁂𑀦𑀧𑀺 𑀲𑀫𑀸𑀥𑀺𑀦𑀸𑀧𑀺 𑀧𑀜𑁆𑀜𑀸𑀬𑀧𑀺 𑀯𑀺𑀫𑀼𑀢𑁆𑀢𑀺𑀬𑀸𑀧𑀺 ¶ 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦𑀧𑀺, 𑀦 ¶ 𑀢𑀲𑁆𑀲 𑀢𑀼𑀮𑀸 𑀯𑀸 𑀧𑀫𑀸𑀡𑀁 𑀯𑀸 𑀅𑀢𑁆𑀣𑀺, 𑀅𑀣 𑀔𑁄 𑀅𑀢𑀼𑀮𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀼𑀢𑁆𑀢𑀭𑁄. 𑀢𑁂𑀦𑁂𑀯𑀸𑀳 𑁋

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼 𑀤𑀲𑁄 𑀯𑀲𑀯𑀢𑁆𑀢𑀻, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁧.𑁨𑁩; 𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁩).

𑀢𑀢𑁆𑀭𑁂𑀯𑀁 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀕𑀤𑁄 𑀯𑀺𑀬 𑀅𑀕𑀤𑁄. 𑀓𑁄 𑀧𑀦𑁂𑀲? 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘. 𑀢𑁂𑀦 𑀳𑁂𑀲 𑀫𑀳𑀸𑀦𑀼𑀪𑀸𑀯𑁄 𑀪𑀺𑀲𑀓𑁆𑀓𑁄 𑀤𑀺𑀩𑁆𑀩𑀸𑀕𑀤𑁂𑀦 𑀲𑀧𑁆𑀧𑁂 𑀯𑀺𑀬 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀺𑀦𑁄 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀅𑀪𑀺𑀪𑀯𑀢𑀺, 𑀇𑀢𑀺 𑀲𑀩𑁆𑀩𑀮𑁄𑀓𑀸𑀪𑀺𑀪𑀯𑀦𑀢𑁄 𑀅𑀯𑀺𑀧𑀭𑀻𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 ¶ 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘 𑀅𑀕𑀤𑁄 𑀅𑀲𑁆𑀲𑀸𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 ‘‘𑀢𑀣𑀸𑀕𑀢𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄.

‘‘𑀢𑀣𑁄 𑀅𑀯𑀺𑀧𑀭𑀻𑀢𑁄 𑀘, 𑀅𑀕𑀤𑁄 𑀬𑀲𑁆𑀲 𑀲𑀢𑁆𑀣𑀼𑀦𑁄;

𑀯𑀲𑀯𑀢𑁆𑀢𑀻𑀢𑀺 𑀲𑁄 𑀢𑁂𑀦, 𑀳𑁄𑀢𑀺 𑀲𑀢𑁆𑀣𑀸 𑀢𑀣𑀸𑀕𑀢𑁄’’.

𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀧𑀝𑀺𑀧𑀼𑀕𑁆𑀕𑀮𑀯𑀺𑀭𑀳𑀺𑀢𑀲𑁆𑀲, 𑀅𑀜𑁆𑀜𑁄 𑀓𑁄𑀘𑀺 ‘‘𑀅𑀳𑀁 𑀩𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀝𑀺𑀜𑁆𑀜𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑁄, 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀲𑁆𑀲. 𑀉𑀧𑁆𑀧𑀚𑁆𑀚𑀻𑀢𑀺 𑀉𑀧𑁆𑀧𑀦𑁆𑀦𑁄 𑀉𑀤𑀧𑀸𑀤𑀺. 𑀓𑀸𑀭𑀼𑀜𑁆𑀜𑀢𑀸𑀢𑀺 𑀓𑀭𑀼𑀡𑀸𑀬 𑀪𑀸𑀯𑁄 𑀓𑀸𑀭𑀼𑀜𑁆𑀜𑀢𑀸. 𑀲𑀩𑁆𑀩𑀲𑀢𑁆𑀢𑁂𑀢𑀺 𑀦𑀺𑀭𑀯𑀲𑁂𑀲𑀲𑀢𑁆𑀢𑀧𑀭𑀺𑀬𑀸𑀤𑀸𑀦𑀯𑀘𑀦𑀁, 𑀲𑀓𑀮𑁂 𑀲𑀢𑁆𑀢𑀦𑀺𑀓𑀸𑀬𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀅𑀬𑀫𑁆𑀧𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

𑀅𑀣 𑀪𑀕𑀯𑀸 𑀩𑁆𑀭𑀳𑁆𑀫𑀼𑀦𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀆𑀬𑀸𑀘𑀺𑀢𑁄 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀓𑀸𑀫𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸, 𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁, 𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺. (𑀫. 𑀦𑀺. 𑁧.𑁨𑁮𑁩; 𑀤𑀻. 𑀦𑀺. 𑁨.𑁭𑁧; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁯);

𑀅𑀣 ¶ 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 ‘‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀪𑀕𑀯𑀢𑀸 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺 𑀜𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀼𑀢𑁄 𑀧𑀓𑁆𑀓𑀸𑀫𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 ¶ 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁩; 𑀫𑀳𑀸𑀯. 𑁧𑁦) 𑀘𑀺𑀦𑁆𑀢𑁂𑀦𑁆𑀢𑁄 𑁋 ‘‘𑀆𑀴𑀸𑀭𑁄 𑀧𑀡𑁆𑀟𑀺𑀢𑁄 𑀲𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀁 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑀢𑁆𑀢𑀸𑀳𑀁 𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 𑀉𑀤𑀓𑀲𑁆𑀲 𑀘 𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦 𑁋 ‘‘𑀓𑀳𑀁 𑀦𑀼 𑀔𑁄 𑀏𑀢𑀭𑀳𑀺 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂’’𑀢𑀺 𑀜𑀢𑁆𑀯𑀸 𑀆𑀲𑀸𑀴𑁆𑀳𑀺𑀬𑀁 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀓𑀸𑀮𑀲𑁆𑀲𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀝𑁆𑀞𑀸𑀭𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀓𑀁 𑀦𑀸𑀫 𑀆𑀚𑀻𑀯𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀫𑀸𑀯𑀺𑀓𑀢𑁆𑀯𑀸 𑀢𑀁𑀤𑀺𑀯𑀲𑀫𑁂𑀯 𑀲𑀸𑀬𑀦𑁆𑀳𑀲𑀫𑀬𑁂 𑀇𑀲𑀺𑀧𑀢𑀦𑀫𑀕𑀫𑀸𑀲𑀺. 𑀢𑀢𑁆𑀣 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀕𑀢𑁄 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩 𑀆𑀤𑀬𑁄; 𑀧𑀝𑀺. 𑀫. 𑁨.𑁩𑁦) 𑀤𑁂𑀲𑁂𑀲𑀺.

𑀢𑁂𑀲𑀼 ¶ 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀯𑀧𑁆𑀧𑀢𑁆𑀣𑁂𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀧𑀜𑁆𑀘𑀫𑀺𑀬𑀁 𑀧𑀓𑁆𑀔𑀲𑁆𑀲 𑀧𑀜𑁆𑀘𑀧𑀺 𑀢𑁂 𑀣𑁂𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀁 (𑀲𑀁. 𑀦𑀺. 𑁩.𑁫𑁯; 𑀫𑀳𑀸𑀯. 𑁨𑁦 𑀆𑀤𑀬𑁄) 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀧𑀺 𑀣𑁂𑀭𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀅𑀣 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀕𑁂𑀳𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀏𑀳𑀺 𑀬𑀲𑀸’’𑀢𑀺 (𑀫𑀳𑀸𑀯. 𑁨𑁬) 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀭𑀢𑁆𑀢𑀺𑀪𑀸𑀕𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀳𑀢𑁆𑀢𑁂 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑀭𑁂𑀧𑀺 𑀢𑀲𑁆𑀲 𑀲𑀳𑀸𑀬𑀓𑁂 𑀘𑀢𑀼𑀧𑀡𑁆𑀡𑀸𑀲𑀚𑀦𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀯𑀁 𑀮𑁄𑀓𑁂 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑁂𑀲𑀼 𑀚𑀸𑀢𑁂𑀲𑀼 𑀲𑀢𑁆𑀣𑀸 𑀯𑀼𑀝𑁆𑀞𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋

‘‘𑀧𑀭𑀢𑁆𑀣𑀁 ¶ 𑀘𑀢𑁆𑀢𑀦𑁄 𑀅𑀢𑁆𑀣𑀁, 𑀓𑀭𑁄𑀦𑁆𑀢𑀸 𑀧𑀣𑀯𑀺𑀁 𑀇𑀫𑀁;

𑀩𑁆𑀬𑀸𑀳𑀭𑀦𑁆𑀢𑀸 𑀫𑀦𑀼𑀲𑁆𑀲𑀸𑀦𑀁, 𑀥𑀫𑁆𑀫𑀁 𑀘𑀭𑀣 𑀪𑀺𑀓𑁆𑀔𑀯𑁄.

‘‘𑀯𑀺𑀳𑀭𑀣 𑀯𑀺𑀯𑀺𑀢𑁆𑀢𑁂𑀲𑀼, 𑀧𑀩𑁆𑀩𑀢𑁂𑀲𑀼 𑀯𑀦𑁂𑀲𑀼 𑀘;

𑀧𑀓𑀸𑀲𑀬𑀦𑁆𑀢𑀸 𑀲𑀤𑁆𑀥𑀫𑁆𑀫𑀁, 𑀮𑁄𑀓𑀲𑁆𑀲 𑀲𑀢𑀢𑀁 𑀫𑀫.

‘‘𑀓𑀭𑁄𑀦𑁆𑀢𑀸 ¶ 𑀥𑀫𑁆𑀫𑀤𑀽𑀢𑁂𑀬𑁆𑀬𑀁, 𑀯𑀺𑀔𑁆𑀬𑀸𑀧𑀬𑀣 𑀪𑀺𑀓𑁆𑀔𑀯𑁄;

𑀲𑀦𑁆𑀢𑀺 𑀅𑀢𑁆𑀣𑀸𑀬 𑀲𑀢𑁆𑀢𑀸𑀦𑀁, 𑀲𑀼𑀩𑁆𑀩𑀢𑀸 𑀯𑀘𑀦𑀁 𑀫𑀫.

‘‘𑀲𑀩𑁆𑀩𑀁 𑀧𑀺𑀤𑀳𑀣 𑀤𑁆𑀯𑀸𑀭𑀁, 𑀅𑀧𑀸𑀬𑀸𑀦𑀫𑀦𑀸𑀲𑀯𑀸;

𑀲𑀕𑁆𑀕𑀫𑁄𑀓𑁆𑀔𑀲𑁆𑀲 𑀫𑀕𑁆𑀕𑀲𑁆𑀲, 𑀤𑁆𑀯𑀸𑀭𑀁 𑀯𑀺𑀯𑀭𑀣𑀸𑀲𑀫𑀸.

‘‘𑀤𑁂𑀲𑀦𑀸𑀧𑀝𑀺𑀧𑀢𑁆𑀢𑀻𑀳𑀺, 𑀓𑀭𑀼𑀡𑀸𑀤𑀺𑀕𑀼𑀡𑀸𑀮𑀬𑀸;

𑀩𑀼𑀤𑁆𑀥𑀺𑀁 𑀲𑀤𑁆𑀥𑀜𑁆𑀘 𑀮𑁄𑀓𑀲𑁆𑀲, 𑀅𑀪𑀺𑀯𑀟𑁆𑀠𑁂𑀣 𑀲𑀩𑁆𑀩𑀲𑁄.

‘‘𑀕𑀺𑀳𑀻𑀦𑀫𑀼𑀧𑀓𑀭𑁄𑀦𑁆𑀢𑀸𑀦𑀁, 𑀦𑀺𑀘𑁆𑀘𑀫𑀸𑀫𑀺𑀲𑀤𑀸𑀦𑀢𑁄;

𑀓𑀭𑁄𑀣 𑀥𑀫𑁆𑀫𑀤𑀸𑀦𑁂𑀦, 𑀢𑁂𑀲𑀁 𑀧𑀘𑁆𑀘𑀽𑀧𑀓𑀸𑀭𑀓𑀁.

‘‘𑀲𑀫𑀼𑀲𑁆𑀲𑀬𑀣 𑀲𑀤𑁆𑀥𑀫𑁆𑀫𑀁, 𑀤𑁂𑀲𑀬𑀦𑁆𑀢𑀸 𑀇𑀲𑀺𑀤𑁆𑀥𑀚𑀁;

𑀓𑀢𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑀸, 𑀧𑀭𑀢𑁆𑀣𑀁 𑀧𑀝𑀺𑀧𑀚𑁆𑀚𑀣𑀸’’𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑀸𑀲𑀼 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀁 𑀉𑀭𑀼𑀯𑁂𑀮𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑀓𑀼𑀫𑀸𑀭𑁂 𑀯𑀺𑀦𑁂𑀲𑀺. 𑀢𑁂𑀲𑀼 𑀬𑁄 𑀲𑀩𑁆𑀩𑀧𑀘𑁆𑀙𑀺𑀫𑀓𑁄, 𑀲𑁄 𑀲𑁄𑀢𑀸𑀧𑀦𑁆𑀦𑁄, 𑀲𑀩𑁆𑀩𑀲𑁂𑀝𑁆𑀞𑁄 𑀅𑀦𑀸𑀕𑀸𑀫𑀻, 𑀏𑀓𑁄𑀧𑀺 𑀅𑀭𑀳𑀸 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀦𑀸𑀳𑁄𑀲𑀺. 𑀢𑁂𑀧𑀺 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑀺𑀲𑀸𑀲𑀼 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 𑀲𑀳𑀲𑁆𑀲𑀚𑀝𑀺𑀮𑀧𑀭𑀺𑀯𑀸𑀭𑁂 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 𑀤𑀫𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸 ¶ 𑀕𑀬𑀸𑀲𑀻𑀲𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀬 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦 𑀅𑀭𑀳𑀦𑁆𑀢𑀲𑀳𑀲𑁆𑀲𑁂𑀦 𑀪𑀕𑀯𑀸 𑀧𑀭𑀺𑀯𑀼𑀢𑁄 ‘‘𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀭𑀜𑁆𑀜𑁄 𑀧𑀝𑀺𑀜𑁆𑀜𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀦𑀕𑀭𑀽𑀧𑀘𑀸𑀭𑁂 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀦𑀸𑀫 𑀅𑀕𑀫𑀸𑀲𑀺. 𑀢𑀢𑁄 𑀉𑀬𑁆𑀬𑀸𑀦𑀧𑀸𑀮𑀓𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑁋 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀦𑀳𑀼𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀧𑀭𑀺𑀯𑀼𑀢𑁄 𑀤𑀲𑀩𑀮𑀁 𑀖𑀦𑀯𑀺𑀯𑀭𑀕𑀢𑀫𑀺𑀯 𑀤𑀺𑀯𑀲𑀓𑀭𑀁 ¶ 𑀯𑀦𑀯𑀺𑀯𑀭𑀕𑀢𑀁 𑀫𑀼𑀦𑀺𑀯𑀭𑀤𑀺𑀯𑀲𑀓𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀓𑁆𑀓𑀸𑀮𑀗𑁆𑀓𑀢𑀢𑀮𑁂𑀲𑀼 𑀚𑀮𑀚𑀸𑀫𑀮𑀸𑀯𑀺𑀓𑀮𑀓𑀫𑀮𑀓𑁄𑀫𑀮𑁂𑀲𑀼 𑀤𑀲𑀩𑀮𑀲𑁆𑀲 𑀧𑀸𑀤𑁂𑀲𑀼 𑀫𑀓𑀼𑀝𑀫𑀡𑀺𑀚𑀼𑀢𑀺𑀯𑀺𑀲𑀭𑀯𑀺𑀚𑁆𑀚𑁄𑀢𑀺𑀦𑀸 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬.

𑀅𑀣 𑀔𑁄 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀫𑀳𑀸𑀲𑀫𑀡𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁂 ¶ 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀉𑀤𑀸𑀳𑀼 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀫𑀳𑀸𑀲𑀫𑀡𑁂’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀣𑁂𑀭𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀫𑁂𑀯 𑀤𑀺𑀲𑁆𑀯𑀸 𑀉𑀭𑀼𑀯𑁂𑀮𑀯𑀸𑀲𑀺, 𑀧𑀳𑀸𑀲𑀺 𑀅𑀕𑁆𑀕𑀺𑀁 𑀓𑀺𑀲𑀓𑁄𑀯𑀤𑀸𑀦𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀓𑀲𑁆𑀲𑀧 𑀏𑀢𑀫𑀢𑁆𑀣𑀁, 𑀓𑀣𑀁 𑀧𑀳𑀻𑀦𑀁 𑀢𑀯 𑀅𑀕𑁆𑀕𑀺𑀳𑀼𑀢𑁆𑀢’’𑀦𑁆𑀢𑀺. (𑀫𑀳𑀸𑀯. 𑁫𑁫);

𑀣𑁂𑀭𑁄 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑁋

‘‘𑀭𑀽𑀧𑁂 𑀘 𑀲𑀤𑁆𑀤𑁂 𑀘 𑀅𑀣𑁄 𑀭𑀲𑁂 𑀘, 𑀓𑀸𑀫𑀺𑀢𑁆𑀣𑀺𑀬𑁄 𑀘𑀸𑀪𑀺𑀯𑀤𑀦𑁆𑀢𑀺 𑀬𑀜𑁆𑀜𑀸;

𑀏𑀢𑀁 𑀫𑀮𑀦𑁆𑀢𑀻 𑀉𑀧𑀥𑀻𑀲𑀼 𑀜𑀢𑁆𑀯𑀸, 𑀢𑀲𑁆𑀫𑀸 𑀦 𑀬𑀺𑀝𑁆𑀞𑁂 𑀦 𑀳𑀼𑀢𑁂 𑀅𑀭𑀜𑁆𑀚𑀺’’𑀦𑁆𑀢𑀺. (𑀫𑀳𑀸𑀯. 𑁫𑁫) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀯𑀓𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀯𑀢𑁆𑀯𑀸 𑀏𑀓𑀢𑀸𑀮𑀤𑁆𑀯𑀺𑀢𑀸𑀮…𑀧𑁂… 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀯𑁂𑀳𑀸𑀲𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀔𑁄 𑀫𑀳𑀸𑀚𑀦𑁄 𑀢𑀲𑁆𑀲 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀅𑀳𑁄 𑀫𑀳𑀸𑀦𑀼𑀪𑀸𑀯𑀸 𑀩𑀼𑀤𑁆𑀥𑀸 𑀦𑀸𑀫, 𑀏𑀯𑀁 𑀣𑀸𑀫𑀕𑀢𑀤𑀺𑀝𑁆𑀞𑀺𑀓𑁄 𑀅𑀢𑁆𑀢𑀸𑀦𑀁 ‘𑀅𑀭𑀳𑀸 𑀅𑀳’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄𑀧𑀺 𑀤𑀺𑀝𑁆𑀞𑀺𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 𑀤𑀫𑀺𑀢𑁄’’𑀢𑀺 𑀤𑀲𑀩𑀮𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑁋 ‘‘𑀦𑀸𑀳𑀫𑀺𑀤𑀸𑀦𑀺𑀬𑁂𑀯 𑀇𑀫𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀤𑀫𑁂𑀫𑀺, 𑀅𑀢𑀻𑀢𑁂𑀧𑀺 𑀏𑀲 𑀫𑀬𑀸 𑀤𑀫𑀺𑀢𑁄𑀬𑁂𑀯𑀸’’𑀢𑀺 𑀆𑀳. 𑀅𑀣 𑀔𑁄 𑀲𑁄 𑀫𑀳𑀸𑀚𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀏𑀲 ¶ 𑀤𑀫𑀺𑀢𑁄 𑀤𑀺𑀝𑁆𑀞𑁄, 𑀓𑀣𑀁 𑀧𑀦𑁂𑀲 𑀅𑀢𑀻𑀢𑁂 𑀪𑀕𑀯𑀢𑀸 𑀤𑀫𑀺𑀢𑁄’’𑀢𑀺. 𑀢𑀢𑁄 𑀲𑀢𑁆𑀣𑀸 𑀢𑁂𑀦 𑀫𑀳𑀸𑀚𑀦𑁂𑀦 𑀬𑀸𑀘𑀺𑀢𑁄 ¶ 𑀪𑀯𑀦𑁆𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁧𑁫𑁩) 𑀓𑀣𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺. 𑀢𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀏𑀓𑀸𑀤𑀲𑀦𑀳𑀼𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀏𑀓𑀦𑀳𑀼𑀢𑀁 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀪𑀕𑀯𑀦𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀧𑀼𑀦𑀤𑀺𑀯𑀲𑁂 ¶ 𑀪𑀕𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀫𑀭𑀼𑀕𑀡𑀧𑀭𑀺𑀯𑀼𑀢𑁄 𑀯𑀺𑀬 𑀤𑀲𑀲𑀢𑀦𑀬𑀦𑁄 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀼𑀢𑁄 𑀯𑀺𑀬 𑀫𑀳𑀸𑀩𑁆𑀭𑀳𑁆𑀫𑀸 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀻𑀡𑀺 𑀭𑀢𑀦𑀸𑀦𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀯𑁂𑀮𑀸𑀬 𑀯𑀸 𑀅𑀯𑁂𑀮𑀸𑀬 𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀮𑀝𑁆𑀞𑀺𑀯𑀦𑀁 𑀦𑀸𑀫 𑀅𑀢𑀺𑀤𑀽𑀭𑁂, 𑀇𑀤𑀁 𑀧𑀦 𑀅𑀫𑁆𑀳𑀸𑀓𑀁 𑀯𑁂𑀴𑀼𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀧𑀯𑀺𑀯𑁂𑀓𑀓𑀸𑀫𑀸𑀦𑀁 𑀦𑀸𑀢𑀺𑀤𑀽𑀭𑀁 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀦𑀺𑀚𑁆𑀚𑀦𑀲𑀫𑁆𑀩𑀸𑀥𑀁 𑀧𑀯𑀺𑀯𑁂𑀓𑀲𑀼𑀔𑀁 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀲𑀻𑀢𑀮𑀲𑀺𑀮𑀸𑀢𑀮𑀲𑀫𑀮𑀗𑁆𑀓𑀢𑀁 𑀧𑀭𑀫𑀭𑀫𑀡𑀻𑀬𑀪𑀽𑀫𑀺𑀪𑀸𑀕𑀁 𑀲𑀼𑀭𑀪𑀺𑀓𑀼𑀲𑀼𑀫𑀢𑀭𑀼𑀯𑀭𑀦𑀺𑀭𑀦𑁆𑀢𑀭𑀁 𑀭𑀫𑀡𑀻𑀬𑀧𑀸𑀲𑀸𑀤𑀳𑀫𑁆𑀫𑀺𑀬𑀯𑀺𑀫𑀸𑀦𑀯𑀺𑀳𑀸𑀭𑀟𑁆𑀠𑀼𑀬𑁄𑀕𑀫𑀡𑁆𑀟𑀧𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁. 𑀇𑀤𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑀯𑀢𑀧𑀦𑀗𑁆𑀕𑀸𑀭𑀲𑀗𑁆𑀓𑀸𑀲𑁂𑀦 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀲𑀼𑀭𑀪𑀺𑀓𑀼𑀲𑀼𑀫𑀯𑀸𑀲𑀺𑀢𑀁 𑀫𑀡𑀺𑀯𑀡𑁆𑀡𑀉𑀤𑀓𑀁 𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑀸𑀭𑀸𑀫𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀤𑀲𑀩𑀮𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀲𑀺. 𑀢𑀲𑁆𑀫𑀺𑀁 𑀆𑀭𑀸𑀫𑀧𑀝𑀺𑀕𑁆𑀕𑀳𑀡𑁂 ‘‘𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀻’’𑀢𑀺 𑀧𑀻𑀢𑀺𑀯𑀲𑀁 𑀕𑀢𑀸 𑀦𑀘𑁆𑀘𑀦𑁆𑀢𑀻 𑀯𑀺𑀬 𑀅𑀬𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺. 𑀚𑀫𑁆𑀩𑀼𑀤𑀻𑀧𑁂 𑀧𑀦 𑀞𑀧𑁂𑀢𑁆𑀯𑀸 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑀁 𑀅𑀜𑁆𑀜𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸 𑀕𑀳𑀺𑀢𑀲𑁂𑀦𑀸𑀲𑀦𑀁 𑀦𑀸𑀫 𑀦𑀢𑁆𑀣𑀺. 𑀅𑀣 𑀲𑀢𑁆𑀣𑀸 𑀯𑁂𑀴𑀼𑀯𑀦𑀸𑀭𑀸𑀫𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀯𑀺𑀳𑀸𑀭𑀤𑀸𑀦𑀸𑀦𑀼𑀫𑁄𑀤𑀦𑀫𑀓𑀸𑀲𑀺 𑁋

‘‘𑀆𑀯𑀸𑀲𑀤𑀸𑀦𑀲𑁆𑀲 𑀧𑀦𑀸𑀦𑀺𑀲𑀁𑀲𑀁, 𑀓𑁄 𑀦𑀸𑀫 𑀯𑀢𑁆𑀢𑀼𑀁, 𑀧𑀼𑀭𑀺𑀲𑁄 𑀲𑀫𑀢𑁆𑀣𑁄;

𑀅𑀜𑁆𑀜𑀢𑁆𑀭 𑀩𑀼𑀤𑁆𑀥𑀸 𑀧𑀦 𑀮𑁄𑀓𑀦𑀸𑀣𑀸, 𑀬𑀼𑀢𑁆𑀢𑁄 𑀫𑀼𑀔𑀸𑀦𑀁 𑀦𑀳𑀼𑀢𑁂𑀦 𑀘𑀸𑀧𑀺.

‘‘𑀆𑀬𑀼𑀜𑁆𑀘 ¶ 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘, 𑀯𑀭𑀁 𑀧𑀲𑀢𑁆𑀣𑀁 𑀧𑀝𑀺𑀪𑀸𑀦𑀫𑁂𑀯;

𑀤𑀤𑀸𑀢𑀺 𑀦𑀸𑀫𑀸𑀢𑀺 𑀧𑀯𑀼𑀘𑁆𑀘𑀢𑁂 𑀲𑁄, 𑀬𑁄 𑀤𑁂𑀢𑀺 𑀲𑀗𑁆𑀖𑀲𑁆𑀲 𑀦𑀭𑁄 𑀯𑀺𑀳𑀸𑀭𑀁.

‘‘𑀤𑀸𑀢𑀸 𑀦𑀺𑀯𑀸𑀲𑀲𑁆𑀲 𑀦𑀺𑀯𑀸𑀭𑀡𑀲𑁆𑀲, 𑀲𑀻𑀢𑀸𑀤𑀺𑀦𑁄 𑀚𑀻𑀯𑀺𑀢𑀼𑀧𑀤𑁆𑀤𑀯𑀲𑁆𑀲;

𑀧𑀸𑀮𑁂𑀢𑀺 𑀆𑀬𑀼𑀁 𑀧𑀦 𑀢𑀲𑁆𑀲 𑀬𑀲𑁆𑀫𑀸, 𑀆𑀬𑀼𑀧𑁆𑀧𑀤𑁄 𑀳𑁄𑀢𑀺 𑀢𑀫𑀸𑀳𑀼 𑀲𑀦𑁆𑀢𑁄.

‘‘𑀅𑀘𑁆𑀘𑀼𑀡𑁆𑀳𑀲𑀻𑀢𑁂 ¶ 𑀯𑀲𑀢𑁄 𑀦𑀺𑀯𑀸𑀲𑁂, 𑀩𑀮𑀜𑁆𑀘 𑀯𑀡𑁆𑀡𑁄 𑀧𑀝𑀺𑀪𑀸 𑀦 𑀳𑁄𑀢𑀺;

𑀢𑀲𑁆𑀫𑀸 𑀳𑀺 𑀲𑁄 𑀤𑁂𑀢𑀺 𑀯𑀺𑀳𑀸𑀭𑀤𑀸𑀢𑀸, 𑀩𑀮𑀜𑁆𑀘 𑀯𑀡𑁆𑀡𑀁 𑀧𑀝𑀺𑀪𑀸𑀦𑀫𑁂𑀯.

‘‘𑀤𑀼𑀓𑁆𑀔𑀲𑁆𑀲 𑀲𑀻𑀢𑀼𑀡𑁆𑀳𑀲𑀭𑀻𑀲𑀧𑀸 𑀘, 𑀯𑀸𑀢𑀸𑀢𑀧𑀸𑀤𑀺𑀧𑁆𑀧𑀪𑀯𑀲𑁆𑀲 𑀮𑁄𑀓𑁂;

𑀦𑀺𑀯𑀸𑀭𑀡𑀸 𑀦𑁂𑀓𑀯𑀺𑀥𑀲𑁆𑀲 𑀦𑀺𑀘𑁆𑀘𑀁, 𑀲𑀼𑀔𑀧𑁆𑀧𑀤𑁄 𑀳𑁄𑀢𑀺 𑀯𑀺𑀳𑀸𑀭𑀤𑀸𑀢𑀸.

‘‘𑀲𑀻𑀢𑀼𑀡𑁆𑀳𑀯𑀸𑀢𑀸𑀢𑀧𑀟𑀁𑀲𑀯𑀼𑀝𑁆𑀞𑀺 ¶ , 𑀲𑀭𑀻𑀲𑀧𑀸𑀯𑀸𑀴𑀫𑀺𑀕𑀸𑀤𑀺𑀤𑀼𑀓𑁆𑀔𑀁;

𑀬𑀲𑁆𑀫𑀸 𑀦𑀺𑀯𑀸𑀭𑁂𑀢𑀺 𑀯𑀺𑀳𑀸𑀭𑀤𑀸𑀢𑀸, 𑀢𑀲𑁆𑀫𑀸 𑀲𑀼𑀔𑀁 𑀯𑀺𑀦𑁆𑀤𑀢𑀺 𑀲𑁄 𑀧𑀭𑀢𑁆𑀣.

‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀯𑀪𑁄𑀕𑀳𑁂𑀢𑀼𑀁, 𑀫𑀦𑁄𑀪𑀺𑀭𑀸𑀫𑀁 𑀫𑀼𑀤𑀺𑀢𑁄 𑀯𑀺𑀳𑀸𑀭𑀁;

𑀬𑁄 𑀤𑁂𑀢𑀺 𑀲𑀻𑀮𑀸𑀤𑀺𑀕𑀼𑀡𑁄𑀤𑀺𑀢𑀸𑀦𑀁, 𑀲𑀩𑁆𑀩𑀁 𑀤𑀤𑁄 𑀦𑀸𑀫 𑀧𑀯𑀼𑀘𑁆𑀘𑀢𑁂 𑀲𑁄.

‘‘𑀧𑀳𑀸𑀬 𑀫𑀘𑁆𑀙𑁂𑀭𑀫𑀮𑀁 𑀲𑀮𑁄𑀪𑀁, 𑀕𑀼𑀡𑀸𑀮𑀬𑀸𑀦𑀁 𑀦𑀺𑀮𑀬𑀁 𑀤𑀤𑀸𑀢𑀺;

𑀔𑀺𑀢𑁆𑀢𑁄𑀯 𑀲𑁄 𑀢𑀢𑁆𑀣 𑀧𑀭𑁂𑀳𑀺 𑀲𑀕𑁆𑀕𑁂, 𑀬𑀣𑀸𑀪𑀢𑀁 𑀚𑀸𑀬𑀢𑀺 𑀯𑀻𑀢𑀲𑁄𑀓𑁄.

‘‘𑀯𑀭𑁂 ¶ 𑀘𑀸𑀭𑀼𑀭𑀽𑀧𑁂 𑀯𑀺𑀳𑀸𑀭𑁂 𑀉𑀴𑀸𑀭𑁂, 𑀦𑀭𑁄 𑀓𑀸𑀭𑀬𑁂 𑀯𑀸𑀲𑀬𑁂 𑀢𑀢𑁆𑀣 𑀪𑀺𑀓𑁆𑀔𑀽;

𑀤𑀤𑁂𑀬𑁆𑀬𑀦𑁆𑀦𑀧𑀸𑀦𑀜𑁆𑀘 𑀯𑀢𑁆𑀣𑀜𑁆𑀘 𑀦𑁂𑀲𑀁, 𑀧𑀲𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀲𑀓𑁆𑀓𑀘𑁆𑀘 𑀦𑀺𑀘𑁆𑀘𑀁.

‘‘𑀢𑀲𑁆𑀫𑀸 𑀫𑀳𑀸𑀭𑀸𑀚 𑀪𑀯𑁂𑀲𑀼 𑀪𑁄𑀕𑁂, 𑀫𑀦𑁄𑀭𑀫𑁂 𑀧𑀘𑁆𑀘𑀦𑀼𑀪𑀼𑀬𑁆𑀬 𑀪𑀺𑀬𑁆𑀬𑁄;

𑀯𑀺𑀳𑀸𑀭𑀤𑀸𑀦𑀲𑁆𑀲 𑀨𑀮𑁂𑀦 𑀲𑀦𑁆𑀢𑀁, 𑀲𑀼𑀔𑀁 𑀅𑀲𑁄𑀓𑀁 𑀅𑀥𑀺𑀕𑀘𑁆𑀙 𑀧𑀘𑁆𑀙𑀸’’𑀢𑀺.

𑀇𑀘𑁆𑀘𑁂𑀯𑀁 𑀫𑀼𑀦𑀺𑀭𑀸𑀚𑀸 𑀦𑀭𑀭𑀸𑀚𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀯𑀺𑀳𑀸𑀭𑀤𑀸𑀦𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀭𑀫𑀤𑀲𑁆𑀲𑀦𑀻𑀬𑀸𑀬 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀲𑀼𑀯𑀡𑁆𑀡𑀭𑀲𑀲𑁂𑀓𑀧𑀺𑀜𑁆𑀙𑀭𑀸𑀦𑀺 𑀯𑀺𑀬 𑀦𑀕𑀭𑀯𑀦𑀯𑀺𑀫𑀸𑀦𑀸𑀤𑀻𑀦𑀺 𑀓𑀼𑀭𑀼𑀫𑀸𑀦𑁄 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀅𑀦𑀦𑁆𑀢𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑀫𑁂𑀯 𑀧𑀸𑀯𑀺𑀲𑀻𑀢𑀺.

‘‘𑀅𑀓𑀻𑀴𑀦𑁂 𑀯𑁂𑀴𑀼𑀯𑀦𑁂 𑀯𑀺𑀳𑀸𑀭𑁂, 𑀢𑀣𑀸𑀕𑀢𑁄 𑀢𑀢𑁆𑀣 𑀫𑀦𑁄𑀪𑀺𑀭𑀸𑀫𑁂;

𑀦𑀸𑀦𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺 𑀥𑀻𑀭𑁄, 𑀯𑁂𑀦𑁂𑀬𑁆𑀬𑀓𑀸𑀦𑀁 𑀲𑀫𑀼𑀤𑀺𑀓𑁆𑀔𑀫𑀸𑀦𑁄’’.

𑀅𑀣𑁂𑀯𑀁 ¶ 𑀪𑀕𑀯𑀢𑀺 𑀢𑀲𑁆𑀫𑀺𑀁 𑀯𑀺𑀳𑀭𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑁄 𑀫𑁂 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀜𑁆𑀜𑀢𑀭𑀁 𑀫𑀳𑀸𑀫𑀘𑁆𑀘𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺, 𑀪𑀡𑁂, 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀫𑀫 𑀯𑀘𑀦𑁂𑀦 ‘𑀧𑀺𑀢𑀸 𑀯𑁄 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀢𑀁 𑀤𑀝𑁆𑀞𑀼𑀓𑀸𑀫𑁄’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀁 𑀫𑁂 𑀕𑀡𑁆𑀳𑀺𑀢𑁆𑀯𑀸 𑀏𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀯𑁂𑀮𑀸𑀬 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀲𑁄 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦’’𑀦𑁆𑀢𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑀣𑀸𑀞𑀺𑀢𑁄𑀯 𑀲𑀤𑁆𑀥𑀺𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 ¶ 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀕𑀯𑀸 𑁋 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂 𑀲𑀩𑁆𑀩𑁂 𑀢𑀗𑁆𑀔𑀡𑀜𑁆𑀜𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀲𑀼𑀁. 𑀭𑀸𑀚𑀸 ‘‘𑀦𑁂𑀯 ¶ 𑀕𑀢𑁄 𑀆𑀕𑀘𑁆𑀙𑀢𑀺, 𑀦 𑀘 𑀲𑀸𑀲𑀦𑀁 𑀲𑀼𑀬𑁆𑀬𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀦𑀯𑀓𑁆𑀔𑀢𑁆𑀢𑀼𑀁 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀢𑁂𑀲𑀼 𑀦𑀯𑀲𑀼 𑀧𑀼𑀭𑀺𑀲𑀲𑀳𑀲𑁆𑀲𑁂𑀲𑀼 𑀏𑀓𑁄𑀧𑀺 𑀭𑀜𑁆𑀜𑁄 𑀦𑀸𑀭𑁄𑀘𑁂𑀲𑀺, 𑀦 𑀲𑀸𑀲𑀦𑀁 𑀯𑀸 𑀧𑀳𑀺𑀡𑀺. 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀧𑀩𑁆𑀩𑀚𑀺𑀁𑀲𑀼.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑁄 𑀦𑀼 𑀔𑁄 𑀫𑀫 𑀯𑀘𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀭𑀸𑀚𑀩𑀮𑀁 𑀑𑀮𑁄𑀓𑁂𑀦𑁆𑀢𑁄 𑀉𑀤𑀸𑀬𑀺𑀁 𑀅𑀤𑁆𑀤𑀲. 𑀲𑁄 𑀓𑀺𑀭 𑀭𑀜𑁆𑀜𑁄 𑀲𑀩𑁆𑀩𑀢𑁆𑀣𑀲𑀸𑀥𑀓𑁄 𑀅𑀫𑀘𑁆𑀘𑁄 𑀅𑀩𑁆𑀪𑀦𑁆𑀢𑀭𑀺𑀓𑁄 𑀅𑀢𑀺𑀯𑀺𑀲𑁆𑀲𑀸𑀲𑀺𑀓𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑁂𑀬𑁂𑀯 𑀚𑀸𑀢𑁄 𑀲𑀳𑀧𑀁𑀲𑀼𑀓𑀻𑀴𑀺𑀢𑁄 𑀲𑀳𑀸𑀬𑁄. 𑀅𑀣 𑀦𑀁 𑀭𑀸𑀚𑀸 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢 𑀉𑀤𑀸𑀬𑀺, 𑀅𑀳𑀁 𑀫𑀫 𑀧𑀼𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀦𑀯𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺𑀁, 𑀏𑀓𑀧𑀼𑀭𑀺𑀲𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀸𑀲𑀦𑀫𑀢𑁆𑀢𑀫𑁆𑀧𑀺 𑀆𑀭𑁄𑀘𑁂𑀢𑀸 𑀦𑀢𑁆𑀣𑀺, 𑀤𑀼𑀚𑁆𑀚𑀸𑀦𑁄 𑀔𑁄 𑀧𑀦 𑀫𑁂 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀅𑀳𑀁 𑀚𑀻𑀯𑀫𑀸𑀦𑁄𑀯 𑀧𑀼𑀢𑁆𑀢𑀁 𑀤𑀝𑁆𑀞𑀼𑀫𑀺𑀘𑁆𑀙𑀸𑀫𑀺. 𑀲𑀓𑁆𑀔𑀺𑀲𑁆𑀲𑀲𑀺 𑀫𑁂 𑀧𑀼𑀢𑁆𑀢𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺? 𑀲𑁄 ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯, 𑀲𑀘𑁂 𑀧𑀩𑁆𑀩𑀚𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑀸𑀢, 𑀢𑁆𑀯𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸 𑀅𑀧𑀩𑁆𑀩𑀚𑀺𑀢𑁆𑀯𑀸 𑀯𑀸 𑀫𑀬𑁆𑀳𑀁 𑀧𑀼𑀢𑁆𑀢𑀁 𑀤𑀲𑁆𑀲𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀆𑀤𑀸𑀬 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀤𑁆𑀥𑀺𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂 𑀧𑀢𑀺𑀝𑁆𑀞𑀸𑀬 𑀨𑀕𑁆𑀕𑀼𑀦𑀻𑀧𑀼𑀡𑁆𑀡𑀫𑀸𑀲𑀺𑀬𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀓𑁆𑀓𑀦𑁆𑀢𑁄 𑀳𑁂𑀫𑀦𑁆𑀢𑁄, 𑀯𑀲𑀦𑁆𑀢𑀲𑀫𑀬𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀼𑀧𑀼𑀧𑁆𑀨𑀺𑀢𑀸 𑀯𑀦𑀲𑀡𑁆𑀟𑀸, 𑀧𑀝𑀺𑀧𑀚𑁆𑀚𑀦𑀓𑁆𑀔𑀫𑁄 𑀫𑀕𑁆𑀕𑁄, 𑀓𑀸𑀮𑁄 𑀤𑀲𑀩𑀮𑀲𑁆𑀲 𑀜𑀸𑀢𑀺𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 𑀪𑀕𑀯𑀢𑁄 𑀓𑀼𑀮𑀦𑀕𑀭𑀁 𑀕𑀫𑀦𑀢𑁆𑀣𑀸𑀬 𑀕𑀫𑀦𑀯𑀡𑁆𑀡𑀁 𑀯𑀡𑁆𑀡𑁂𑀲𑀺 𑁋

‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬;

𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀤𑀼𑀫𑀸 ¶ 𑀯𑀺𑀘𑀺𑀢𑁆𑀢𑀸 𑀲𑀼𑀯𑀺𑀭𑀸𑀚𑀫𑀸𑀦𑀸, 𑀭𑀢𑁆𑀢𑀗𑁆𑀓𑀼𑀭𑁂𑀳𑁂𑀯 𑀘 𑀧𑀮𑁆𑀮𑀯𑁂𑀳𑀺;

𑀭𑀢𑀦𑀼𑀚𑁆𑀚𑀮𑀫𑀡𑁆𑀟𑀧𑀲𑀦𑁆𑀦𑀺𑀪𑀸𑀲𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀸 𑀓𑀼𑀲𑀼𑀫𑁂𑀳𑀺 𑀪𑀽𑀲𑀺𑀢𑀸, 𑀫𑀦𑀼𑀜𑁆𑀜𑀪𑀽𑀢𑀸 𑀲𑀼𑀘𑀺𑀲𑀸𑀥𑀼𑀕𑀦𑁆𑀥𑀸;

𑀭𑀼𑀓𑁆𑀔𑀸 𑀯𑀺𑀭𑁄𑀘𑀦𑁆𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀨𑀮𑁂𑀳𑀺𑀦𑁂𑀓𑁂𑀳𑀺 𑀲𑀫𑀺𑀤𑁆𑀥𑀺𑀪𑀽𑀢𑀸, 𑀯𑀺𑀘𑀺𑀢𑁆𑀢𑀭𑀼𑀓𑁆𑀔𑀸 𑀉𑀪𑀢𑁄𑀯𑀓𑀸𑀲𑁂;

𑀔𑀼𑀤𑁆𑀤𑀁 𑀧𑀺𑀧𑀸𑀲𑀫𑁆𑀧𑀺 𑀯𑀺𑀦𑁄𑀤𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀢𑀫𑀸𑀮𑀸 ¶ 𑀲𑀼𑀘𑀺𑀧𑀮𑁆𑀮𑀯𑁂𑀳𑀺, 𑀲𑀼𑀲𑀚𑁆𑀚𑀺𑀢𑀸 𑀫𑁄𑀭𑀓𑀮𑀸𑀧𑀲𑀦𑁆𑀦𑀺𑀪𑀸;

𑀭𑀼𑀓𑁆𑀔𑀸 𑀯𑀺𑀭𑁄𑀘𑀦𑁆𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀭𑁄𑀘𑀫𑀸𑀦𑀸 𑀨𑀮𑀧𑀮𑁆𑀮𑀯𑁂𑀳𑀺, 𑀲𑀼𑀲𑀚𑁆𑀚𑀺𑀢𑀸 𑀯𑀸𑀲𑀦𑀺𑀯𑀸𑀲𑀪𑀽𑀢𑀸;

𑀢𑁄𑀲𑁂𑀦𑁆𑀢𑀺 𑀅𑀤𑁆𑀥𑀸𑀦𑀓𑀺𑀮𑀦𑁆𑀢𑀲𑀢𑁆𑀢𑁂, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀨𑀼𑀮𑁆𑀮𑀺𑀢𑀕𑁆𑀕𑀸 𑀯𑀦𑀕𑀼𑀫𑁆𑀩𑀦𑀺𑀲𑁆𑀲𑀺𑀢𑀸, 𑀮𑀢𑀸 𑀅𑀦𑁂𑀓𑀸 𑀲𑀼𑀯𑀺𑀭𑀸𑀚𑀫𑀸𑀦𑀸;

𑀢𑁄𑀲𑁂𑀦𑁆𑀢𑀺 𑀲𑀢𑁆𑀢𑁂 𑀫𑀡𑀺𑀫𑀡𑁆𑀟𑀧𑀸𑀯, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀮𑀢𑀸 𑀅𑀦𑁂𑀓𑀸 𑀤𑀼𑀫𑀦𑀺𑀲𑁆𑀲𑀺𑀢𑀸𑀯, 𑀧𑀺𑀬𑁂𑀳𑀺 𑀲𑀤𑁆𑀥𑀺𑀁 𑀲𑀳𑀺𑀢𑀸 𑀯𑀥𑀽𑀯;

𑀧𑀮𑁄𑀪𑀬𑀦𑁆𑀢𑀻 𑀳𑀺 𑀲𑀼𑀕𑀦𑁆𑀥𑀕𑀦𑁆𑀥𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀢𑀦𑀻𑀮𑀸𑀤𑀺𑀫𑀦𑀼𑀜𑁆𑀜𑀯𑀡𑁆𑀡𑀸 ¶ , 𑀤𑀺𑀚𑀸 𑀲𑀫𑀦𑁆𑀢𑀸 𑀅𑀪𑀺𑀓𑀽𑀚𑀫𑀸𑀦𑀸;

𑀢𑁄𑀲𑁂𑀦𑁆𑀢𑀺 𑀫𑀜𑁆𑀚𑀼𑀲𑁆𑀲𑀭𑀢𑀸 𑀭𑀢𑀻𑀳𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀫𑀺𑀕𑀸 𑀘 𑀦𑀸𑀦𑀸 𑀲𑀼𑀯𑀺𑀭𑀸𑀚𑀫𑀸𑀦𑀸, 𑀉𑀢𑁆𑀢𑀼𑀗𑁆𑀕𑀓𑀡𑁆𑀡𑀸 𑀘 𑀫𑀦𑀼𑀜𑁆𑀜𑀦𑁂𑀢𑁆𑀢𑀸;

𑀤𑀺𑀲𑀸 𑀲𑀫𑀦𑁆𑀢𑀸 𑀫𑀪𑀺𑀥𑀸𑀯𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀫𑀦𑀼𑀜𑁆𑀜𑀪𑀽𑀢𑀸 𑀘 𑀫𑀳𑀻 𑀲𑀫𑀦𑁆𑀢𑀸, 𑀯𑀺𑀭𑀸𑀚𑀫𑀸𑀦𑀸 𑀳𑀭𑀺𑀢𑀸𑀯 𑀲𑀤𑁆𑀤𑀮𑀸;

𑀲𑀼𑀧𑀼𑀧𑁆𑀨𑀺𑀭𑀼𑀓𑁆𑀔𑀸 𑀫𑁄𑀴𑀺𑀦𑀺𑀯𑀮𑀗𑁆𑀓𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀲𑀚𑁆𑀚𑀺𑀢𑀸 𑀫𑀼𑀢𑁆𑀢𑀫𑀬𑀸𑀯 𑀯𑀸𑀮𑀼𑀓𑀸, 𑀲𑀼𑀲𑀡𑁆𑀞𑀺𑀢𑀸 𑀘𑀸𑀭𑀼𑀲𑀼𑀨𑀲𑁆𑀲𑀤𑀸𑀢𑀸;

𑀯𑀺𑀭𑁄𑀘𑀬𑀦𑁆𑀢𑁂𑀯 𑀤𑀺𑀲𑀸 𑀲𑀫𑀦𑁆𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀫𑀁 𑀲𑀼𑀨𑀲𑁆𑀲𑀁 𑀲𑀼𑀘𑀺𑀪𑀽𑀫𑀺𑀪𑀸𑀕𑀁, 𑀫𑀦𑀼𑀜𑁆𑀜𑀧𑀼𑀧𑁆𑀨𑁄𑀤𑀬𑀕𑀦𑁆𑀥𑀯𑀸𑀲𑀺𑀢𑀁;

𑀯𑀺𑀭𑀸𑀚𑀫𑀸𑀦𑀁 𑀲𑀼𑀘𑀺𑀫𑀜𑁆𑀘 𑀲𑁄𑀪𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀲𑀚𑁆𑀚𑀺𑀢𑀁 𑀦𑀦𑁆𑀤𑀦𑀓𑀸𑀦𑀦𑀁𑀯, 𑀯𑀺𑀘𑀺𑀢𑁆𑀢𑀦𑀸𑀦𑀸𑀤𑀼𑀫𑀲𑀡𑁆𑀟𑀫𑀡𑁆𑀟𑀺𑀢𑀁;

𑀲𑀼𑀕𑀦𑁆𑀥𑀪𑀽𑀢𑀁 𑀧𑀯𑀦𑀁 𑀲𑀼𑀭𑀫𑁆𑀫𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀭𑀸 𑀯𑀺𑀘𑀺𑀢𑁆𑀢𑀸 𑀯𑀺𑀯𑀺𑀥𑀸 𑀫𑀦𑁄𑀭𑀫𑀸, 𑀲𑀼𑀲𑀚𑁆𑀚𑀺𑀢𑀸 𑀧𑀗𑁆𑀓𑀚𑀧𑀼𑀡𑁆𑀟𑀭𑀻𑀓𑀸;

𑀧𑀲𑀦𑁆𑀦𑀲𑀻𑀢𑁄𑀤𑀓𑀘𑀸𑀭𑀼𑀧𑀼𑀡𑁆𑀡𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀨𑀼𑀮𑁆𑀮𑀦𑀸𑀦𑀸𑀯𑀺𑀥𑀧𑀗𑁆𑀓𑀚𑁂𑀳𑀺 ¶ ¶ , 𑀯𑀺𑀭𑀸𑀚𑀫𑀸𑀦𑀸 𑀲𑀼𑀘𑀺𑀕𑀦𑁆𑀥𑀕𑀦𑁆𑀥𑀸;

𑀧𑀫𑁄𑀤𑀬𑀦𑁆𑀢𑁂𑀯 𑀦𑀭𑀸𑀫𑀭𑀸𑀦𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀨𑀼𑀮𑁆𑀮𑀧𑀗𑁆𑀓𑁂𑀭𑀼𑀳𑀲𑀦𑁆𑀦𑀺𑀲𑀺𑀦𑁆𑀦𑀸, 𑀤𑀺𑀚𑀸 𑀲𑀫𑀦𑁆𑀢𑀸 𑀫𑀪𑀺𑀦𑀸𑀤𑀬𑀦𑁆𑀢𑀸;

𑀫𑁄𑀤𑀦𑁆𑀢𑀺 𑀪𑀭𑀺𑀬𑀸𑀳𑀺 𑀲𑀫𑀗𑁆𑀕𑀺𑀦𑁄 𑀢𑁂, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀨𑀼𑀮𑁆𑀮𑀧𑀼𑀧𑁆𑀨𑁂𑀳𑀺 𑀭𑀚𑀁 𑀕𑀳𑁂𑀢𑁆𑀯𑀸, 𑀅𑀮𑀻 𑀯𑀺𑀥𑀸𑀯𑀦𑁆𑀢𑀺 𑀯𑀺𑀓𑀽𑀚𑀫𑀸𑀦𑀸;

𑀫𑀥𑀼𑀫𑁆𑀳𑀺 𑀕𑀦𑁆𑀥𑁄 𑀯𑀺𑀤𑀺𑀲𑀁 𑀧𑀯𑀸𑀬𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀅𑀪𑀺𑀦𑁆𑀦𑀦𑀸𑀤𑀸 𑀫𑀤𑀯𑀸𑀭𑀡𑀸 𑀘, 𑀕𑀺𑀭𑀻𑀳𑀺 𑀥𑀸𑀯𑀦𑁆𑀢𑀺 𑀘 𑀯𑀸𑀭𑀺𑀥𑀸𑀭𑀸;

𑀲𑀯𑀦𑁆𑀢𑀺 𑀦𑀚𑁆𑀚𑁄 𑀲𑀼𑀯𑀺𑀭𑀸𑀚𑀺𑀢𑀸𑀯 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀕𑀺𑀭𑀻 𑀲𑀫𑀦𑁆𑀢𑀸𑀯 𑀧𑀤𑀺𑀲𑁆𑀲𑀫𑀸𑀦𑀸, 𑀫𑀬𑀽𑀭𑀕𑀻𑀯𑀸 𑀇𑀯 𑀦𑀻𑀮𑀯𑀡𑁆𑀡𑀸;

𑀤𑀺𑀲𑀸 𑀭𑀚𑀺𑀦𑁆𑀤𑀸𑀯 𑀯𑀺𑀭𑁄𑀘𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀫𑀬𑀽𑀭𑀲𑀗𑁆𑀖𑀸 𑀕𑀺𑀭𑀺𑀫𑀼𑀤𑁆𑀥𑀦𑀲𑁆𑀫𑀺𑀁, 𑀦𑀘𑁆𑀘𑀦𑁆𑀢𑀺 𑀦𑀸𑀭𑀻𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀓𑀽𑀚𑀦𑁆𑀢𑀺 𑀦𑀸𑀦𑀸𑀫𑀥𑀼𑀭𑀲𑁆𑀲𑀭𑁂𑀳𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀯𑀸𑀤𑀺𑀓𑀸 𑀦𑁂𑀓𑀤𑀺𑀚𑀸 𑀫𑀦𑀼𑀜𑁆𑀜𑀸, 𑀯𑀺𑀘𑀺𑀢𑁆𑀢𑀧𑀢𑁆𑀢𑁂𑀳𑀺 𑀯𑀺𑀭𑀸𑀚𑀫𑀸𑀦𑀸;

𑀕𑀺𑀭𑀺𑀫𑁆𑀳𑀺 𑀞𑀢𑁆𑀯𑀸 𑀅𑀪𑀺𑀦𑀸𑀤𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀨𑀼𑀮𑁆𑀮𑀧𑀼𑀧𑁆𑀨𑀸𑀓𑀭𑀫𑀸𑀪𑀺𑀓𑀺𑀡𑁆𑀡𑀸 ¶ , 𑀲𑀼𑀕𑀦𑁆𑀥𑀦𑀸𑀦𑀸𑀤𑀮𑀮𑀗𑁆𑀓𑀢𑀸 𑀘;

𑀕𑀺𑀭𑀻 𑀯𑀺𑀭𑁄𑀘𑀦𑁆𑀢𑀺 𑀤𑀺𑀲𑀸 𑀲𑀫𑀦𑁆𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀚𑀮𑀸𑀲𑀬𑀸 𑀦𑁂𑀓𑀲𑀼𑀕𑀦𑁆𑀥𑀕𑀦𑁆𑀥𑀸, 𑀲𑀼𑀭𑀺𑀦𑁆𑀤𑀉𑀬𑁆𑀬𑀸𑀦𑀚𑀮𑀸𑀲𑀬𑀸𑀯;

𑀲𑀯𑀦𑁆𑀢𑀺 𑀦𑀚𑁆𑀚𑁄 𑀲𑀼𑀯𑀺𑀭𑀸𑀚𑀫𑀸𑀦𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀢𑀢𑀺𑀢𑁆𑀣𑁂𑀳𑀺 𑀅𑀮𑀗𑁆𑀓𑀢𑀸 𑀘, 𑀫𑀦𑀼𑀜𑁆𑀜𑀦𑀸𑀦𑀸𑀫𑀺𑀕𑀧𑀓𑁆𑀔𑀺𑀧𑀸𑀲𑀸;

𑀦𑀚𑁆𑀚𑁄 𑀯𑀺𑀭𑁄𑀘𑀦𑁆𑀢𑀺 𑀲𑀼𑀲𑀦𑁆𑀤𑀫𑀸𑀦𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀚𑀮𑀸𑀲𑀬𑁂𑀲𑀼, 𑀲𑀼𑀧𑀼𑀧𑁆𑀨𑀺𑀢𑀸 𑀘𑀸𑀭𑀼𑀲𑀼𑀕𑀦𑁆𑀥𑀭𑀼𑀓𑁆𑀔𑀸;

𑀯𑀺𑀪𑀽𑀲𑀺𑀢𑀕𑁆𑀕𑀸 𑀲𑀼𑀭𑀲𑀼𑀦𑁆𑀤𑀭𑀻 𑀘, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀕𑀦𑁆𑀥𑀦𑀸𑀦𑀸𑀤𑀼𑀫𑀚𑀸𑀮𑀓𑀺𑀡𑁆𑀡𑀁 ¶ , 𑀯𑀦𑀁 𑀯𑀺𑀘𑀺𑀢𑁆𑀢𑀁 𑀲𑀼𑀭𑀦𑀦𑁆𑀤𑀦𑀁𑀯;

𑀫𑀦𑁄𑀪𑀺𑀭𑀸𑀫𑀁 𑀲𑀢𑀢𑀁 𑀕𑀢𑀻𑀦𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀫𑁆𑀧𑀦𑁆𑀦𑀦𑀸𑀦𑀸𑀲𑀼𑀘𑀺𑀅𑀦𑁆𑀦𑀧𑀸𑀦𑀸, 𑀲𑀩𑁆𑀬𑀜𑁆𑀚𑀦𑀸 𑀲𑀸𑀤𑀼𑀭𑀲𑁂𑀦 𑀬𑀼𑀢𑁆𑀢𑀸;

𑀧𑀣𑁂𑀲𑀼 𑀕𑀸𑀫𑁂 𑀲𑀼𑀮𑀪𑀸 𑀫𑀦𑀼𑀜𑁆𑀜𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀭𑀸𑀚𑀺𑀢𑀸 𑀆𑀲𑀺 𑀫𑀳𑀻 𑀲𑀫𑀦𑁆𑀢𑀸, 𑀯𑀺𑀘𑀺𑀢𑁆𑀢𑀯𑀡𑁆𑀡𑀸 𑀓𑀼𑀲𑀼𑀫𑀸𑀲𑀦𑀲𑁆𑀲;

𑀭𑀢𑁆𑀢𑀺𑀦𑁆𑀤𑀕𑁄𑀧𑁂𑀳𑀺 𑀅𑀮𑀗𑁆𑀓𑀢𑀸𑀯 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀤𑀺𑀕𑀼𑀡𑁂𑀳𑀺 ¶ 𑀬𑀼𑀢𑁆𑀢𑀸, 𑀲𑀫𑁆𑀩𑀼𑀤𑁆𑀥𑀭𑀸𑀚𑀁 𑀅𑀪𑀺𑀧𑀢𑁆𑀣𑀬𑀦𑁆𑀢𑀸;

𑀩𑀳𑀽𑀳𑀺 𑀢𑀢𑁆𑀣𑁂𑀯 𑀚𑀦𑀸 𑀲𑀫𑀦𑁆𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀭𑀆𑀭𑀸𑀫𑀲𑀼𑀧𑁄𑀓𑁆𑀔𑀭𑀜𑁆𑀜𑁄, 𑀯𑀺𑀘𑀺𑀢𑁆𑀭𑀦𑀸𑀦𑀸𑀧𑀤𑀼𑀫𑁂𑀳𑀺 𑀙𑀦𑁆𑀦𑀸;

𑀪𑀺𑀲𑁂𑀳𑀺 𑀔𑀻𑀭𑀁𑀯 𑀭𑀲𑀁 𑀧𑀯𑀸𑀬𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀭𑀦𑀻𑀮𑀘𑁆𑀙𑀤𑀦𑁂𑀦𑀮𑀗𑁆𑀓𑀢𑀸, 𑀫𑀦𑀼𑀜𑁆𑀜𑀭𑀼𑀓𑁆𑀔𑀸 𑀉𑀪𑀢𑁄𑀯𑀓𑀸𑀲𑁂;

𑀲𑀫𑀼𑀕𑁆𑀕𑀢𑀸 𑀲𑀢𑁆𑀢𑀲𑀫𑀽𑀳𑀪𑀽𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀭𑀦𑀻𑀮𑀩𑁆𑀪𑀫𑀺𑀯𑀸𑀬𑀢𑀁 𑀯𑀦𑀁, 𑀲𑀼𑀭𑀺𑀦𑁆𑀤𑀮𑁄𑀓𑁂 𑀇𑀯 𑀦𑀦𑁆𑀤𑀦𑀁 𑀯𑀦𑀁;

𑀲𑀩𑁆𑀩𑁄𑀢𑀼𑀓𑀁 𑀲𑀸𑀥𑀼𑀲𑀼𑀕𑀦𑁆𑀥𑀧𑀼𑀧𑁆𑀨𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀪𑀜𑁆𑀚𑀲𑀁 𑀬𑁄𑀚𑀦𑀬𑁄𑀚𑀦𑁂𑀲𑀼, 𑀲𑀼𑀪𑀺𑀓𑁆𑀔𑀕𑀸𑀫𑀸 𑀲𑀼𑀮𑀪𑀸 𑀫𑀦𑀼𑀜𑁆𑀜𑀸;

𑀚𑀦𑀸𑀪𑀺𑀓𑀺𑀡𑁆𑀡𑀸 𑀲𑀼𑀮𑀪𑀦𑁆𑀦𑀧𑀸𑀦𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀧𑀳𑀽𑀢𑀙𑀸𑀬𑀽𑀤𑀓𑀭𑀫𑁆𑀫𑀪𑀽𑀢𑀸, 𑀦𑀺𑀯𑀸𑀲𑀺𑀦𑀁 𑀲𑀩𑁆𑀩𑀲𑀼𑀔𑀧𑁆𑀧𑀤𑀸𑀢𑀸;

𑀯𑀺𑀲𑀸𑀮𑀲𑀸𑀮𑀸 𑀘 𑀲𑀪𑀸 𑀘 𑀩𑀳𑀽, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀢𑀦𑀸𑀦𑀸𑀤𑀼𑀫𑀲𑀡𑁆𑀟𑀫𑀡𑁆𑀟𑀺𑀢𑀸, 𑀫𑀦𑀼𑀜𑁆𑀜𑀉𑀬𑁆𑀬𑀸𑀦𑀲𑀼𑀧𑁄𑀓𑁆𑀔𑀭𑀜𑁆𑀜𑁄;

𑀲𑀼𑀫𑀸𑀧𑀺𑀢𑀸 𑀲𑀸𑀥𑀼𑀲𑀼𑀕𑀦𑁆𑀥𑀕𑀦𑁆𑀥𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀸𑀢𑁄 ¶ 𑀫𑀼𑀤𑀽𑀲𑀻𑀢𑀮𑀲𑀸𑀥𑀼𑀭𑀽𑀧𑁄, 𑀦𑀪𑀸 𑀘 𑀅𑀩𑁆𑀪𑀸 𑀯𑀺𑀕𑀢𑀸 𑀲𑀫𑀦𑁆𑀢𑀸;

𑀤𑀺𑀲𑀸 𑀘 𑀲𑀩𑁆𑀩𑀸𑀯 𑀯𑀺𑀭𑁄𑀘𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀧𑀣𑁂 ¶ 𑀭𑀚𑁄𑀦𑀼𑀕𑁆𑀕𑀫𑀦𑀢𑁆𑀣𑀫𑁂𑀯, 𑀭𑀢𑁆𑀢𑀺𑀁 𑀧𑀯𑀲𑁆𑀲𑀦𑁆𑀢𑀺 𑀘 𑀫𑀦𑁆𑀤𑀯𑀼𑀝𑁆𑀞𑀻;

𑀦𑀪𑁂 𑀘 𑀲𑀽𑀭𑁄 𑀫𑀼𑀤𑀼𑀓𑁄𑀯 𑀢𑀸𑀧𑁄, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀫𑀤𑀧𑁆𑀧𑀩𑀸𑀳𑀸 𑀫𑀤𑀳𑀢𑁆𑀣𑀺𑀲𑀗𑁆𑀖𑀸, 𑀓𑀭𑁂𑀡𑀼𑀲𑀗𑁆𑀖𑁂𑀳𑀺 𑀲𑀼𑀓𑀻𑀴𑀬𑀦𑁆𑀢𑀺;

𑀤𑀺𑀲𑀸 𑀯𑀺𑀥𑀸𑀯𑀦𑁆𑀢𑀺 𑀘 𑀕𑀚𑁆𑀚𑀬𑀦𑁆𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀦𑀁 𑀲𑀼𑀦𑀻𑀮𑀁 𑀅𑀪𑀺𑀤𑀲𑁆𑀲𑀦𑀻𑀬𑀁, 𑀦𑀻𑀮𑀩𑁆𑀪𑀓𑀽𑀝𑀁 𑀇𑀯 𑀭𑀫𑁆𑀫𑀪𑀽𑀢𑀁;

𑀯𑀺𑀮𑁄𑀓𑀺𑀢𑀸𑀦𑀁 𑀅𑀢𑀺𑀯𑀺𑀫𑁆𑀳𑀦𑀻𑀬𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀲𑀼𑀤𑁆𑀥𑀫𑀩𑁆𑀪𑀁 𑀕𑀕𑀦𑀁 𑀲𑀼𑀭𑀫𑁆𑀫𑀁, 𑀫𑀡𑀺𑀫𑀬𑁂𑀳𑀺 𑀲𑀫𑀮𑀗𑁆𑀓𑀢𑀸𑀯;

𑀤𑀺𑀲𑀸 𑀘 𑀲𑀩𑁆𑀩𑀸 𑀅𑀢𑀺𑀭𑁄𑀘𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀕𑀦𑁆𑀥𑀩𑁆𑀩𑀯𑀺𑀚𑁆𑀚𑀸𑀥𑀭𑀓𑀺𑀦𑁆𑀦𑀭𑀸 𑀘, 𑀲𑀼𑀕𑀻𑀢𑀺𑀬𑀦𑁆𑀢𑀸 𑀫𑀥𑀼𑀭𑀲𑁆𑀲𑀭𑁂𑀦;

𑀘𑀭𑀦𑁆𑀢𑀺 𑀢𑀲𑁆𑀫𑀺𑀁 𑀧𑀯𑀦𑁂 𑀲𑀼𑀭𑀫𑁆𑀫𑁂, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀓𑀺𑀮𑁂𑀲𑀲𑀗𑁆𑀖𑀲𑁆𑀲 𑀪𑀺𑀢𑀸𑀲𑀓𑁂𑀳𑀺, 𑀢𑀧𑀲𑁆𑀲𑀺𑀲𑀗𑁆𑀖𑁂𑀳𑀺 𑀦𑀺𑀲𑁂𑀯𑀺𑀢𑀁 𑀯𑀦𑀁;

𑀯𑀺𑀳𑀸𑀭𑀆𑀭𑀸𑀫𑀲𑀫𑀺𑀤𑁆𑀥𑀺𑀪𑀽𑀢𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀫𑀺𑀤𑁆𑀥𑀺𑀦𑀸𑀦𑀸𑀨𑀮𑀺𑀦𑁄 ¶ 𑀯𑀦𑀦𑁆𑀢𑀸, 𑀅𑀦𑀸𑀓𑀼𑀮𑀸 𑀦𑀺𑀘𑁆𑀘𑀫𑀦𑁄𑀪𑀺𑀭𑀫𑁆𑀫𑀸;

𑀲𑀫𑀸𑀥𑀺𑀧𑀻𑀢𑀺𑀁 𑀅𑀪𑀺𑀯𑀟𑁆𑀠𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀦𑀺𑀲𑁂𑀯𑀺𑀢𑀁 𑀦𑁂𑀓𑀤𑀺𑀚𑁂𑀳𑀺 𑀦𑀺𑀘𑁆𑀘𑀁, 𑀕𑀸𑀫𑁂𑀦 𑀕𑀸𑀫𑀁 𑀲𑀢𑀢𑀁 𑀯𑀲𑀦𑁆𑀢𑀸;

𑀧𑀼𑀭𑁂 𑀧𑀼𑀭𑁂 𑀕𑀸𑀫𑀯𑀭𑀸 𑀘 𑀲𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀢𑁆𑀣𑀦𑁆𑀦𑀧𑀸𑀦𑀁 𑀲𑀬𑀦𑀸𑀲𑀦𑀜𑁆𑀘, 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘 𑀯𑀺𑀮𑁂𑀧𑀦𑀜𑁆𑀘;

𑀢𑀳𑀺𑀁 𑀲𑀫𑀺𑀤𑁆𑀥𑀸 𑀚𑀦𑀢𑀸 𑀩𑀳𑀽 𑀘, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀲𑀩𑁆𑀩𑀬𑀲𑀕𑁆𑀕𑀧𑀢𑁆𑀢𑀸, 𑀚𑀦𑀸 𑀘 𑀢𑀲𑁆𑀫𑀺𑀁 𑀲𑀼𑀔𑀺𑀢𑀸 𑀲𑀫𑀺𑀤𑁆𑀥𑀸;

𑀧𑀳𑀽𑀢𑀪𑁄𑀕𑀸 𑀯𑀺𑀯𑀺𑀥𑀸 𑀯𑀲𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀦𑀪𑁂 𑀘 𑀅𑀩𑁆𑀪𑀸 𑀲𑀼𑀯𑀺𑀲𑀼𑀤𑁆𑀥𑀯𑀡𑁆𑀡𑀸, 𑀤𑀺𑀲𑀸 𑀘 𑀘𑀦𑁆𑀤𑁄 𑀲𑀼𑀯𑀺𑀭𑀸𑀚𑀺𑀢𑁄𑀯;

𑀭𑀢𑁆𑀢𑀺𑀜𑁆𑀘 𑀯𑀸𑀢𑁄 𑀫𑀼𑀤𑀼𑀲𑀻𑀢𑀮𑁄 𑀘, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀘𑀦𑁆𑀤𑀼𑀕𑁆𑀕𑀫𑁂 ¶ 𑀲𑀩𑁆𑀩𑀚𑀦𑀸 𑀧𑀳𑀝𑁆𑀞𑀸, 𑀲𑀓𑀗𑁆𑀕𑀡𑁂 𑀘𑀺𑀢𑁆𑀭𑀓𑀣𑀸 𑀯𑀤𑀦𑁆𑀢𑀸;

𑀧𑀺𑀬𑁂𑀳𑀺 𑀲𑀤𑁆𑀥𑀺𑀁 𑀅𑀪𑀺𑀫𑁄𑀤𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀘𑀦𑁆𑀤𑀲𑁆𑀲 𑀭𑀁𑀲𑀻𑀳𑀺 𑀦𑀪𑀁 𑀯𑀺𑀭𑁄𑀘𑀺, 𑀫𑀳𑀻 𑀘 𑀲𑀁𑀲𑀼𑀤𑁆𑀥𑀫𑀦𑀼𑀜𑁆𑀜𑀯𑀡𑁆𑀡𑀸;

𑀤𑀺𑀲𑀸 𑀘 𑀲𑀩𑁆𑀩𑀸 𑀧𑀭𑀺𑀲𑀼𑀤𑁆𑀥𑀭𑀽𑀧𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀤𑀽𑀭𑁂 ¶ 𑀘 𑀤𑀺𑀲𑁆𑀯𑀸 𑀯𑀭𑀘𑀦𑁆𑀤𑀭𑀁𑀲𑀺𑀁, 𑀧𑀼𑀧𑁆𑀨𑀺𑀁𑀲𑀼 𑀧𑀼𑀧𑁆𑀨𑀸𑀦𑀺 𑀫𑀳𑀻𑀢𑀮𑀲𑁆𑀫𑀺𑀁;

𑀲𑀫𑀦𑁆𑀢𑀢𑁄 𑀕𑀦𑁆𑀥𑀕𑀼𑀡𑀢𑁆𑀣𑀺𑀓𑀸𑀦𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀘𑀦𑁆𑀤𑀲𑁆𑀲 𑀭𑀁𑀲𑀻𑀳𑀺 𑀯𑀺𑀮𑀺𑀫𑁆𑀧𑀺𑀢𑀸𑀯, 𑀫𑀳𑀻 𑀲𑀫𑀦𑁆𑀢𑀸 𑀓𑀼𑀲𑀼𑀫𑁂𑀦𑀮𑀗𑁆𑀓𑀢𑀸;

𑀯𑀺𑀭𑁄𑀘𑀺 𑀲𑀩𑁆𑀩𑀗𑁆𑀕𑀲𑀼𑀫𑀸𑀮𑀺𑀦𑀻𑀯, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀓𑀼𑀘𑀦𑁆𑀢𑀺 𑀳𑀢𑁆𑀣𑀻𑀧𑀺 𑀫𑀤𑁂𑀦 𑀫𑀢𑁆𑀢𑀸, 𑀯𑀺𑀘𑀺𑀢𑁆𑀢𑀧𑀺𑀜𑁆𑀙𑀸 𑀘 𑀤𑀺𑀚𑀸 𑀲𑀫𑀦𑁆𑀢𑀸;

𑀓𑀭𑁄𑀦𑁆𑀢𑀺 𑀦𑀸𑀤𑀁 𑀧𑀯𑀦𑁂 𑀲𑀼𑀭𑀫𑁆𑀫𑁂, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀧𑀣𑀜𑁆𑀘 𑀲𑀩𑁆𑀩𑀁 𑀧𑀝𑀺𑀧𑀚𑁆𑀚𑀦𑀓𑁆𑀔𑀫𑀁, 𑀇𑀤𑁆𑀥𑀜𑁆𑀘 𑀭𑀝𑁆𑀞𑀁 𑀲𑀥𑀦𑀁 𑀲𑀪𑁄𑀕𑀁;

𑀲𑀩𑁆𑀩𑀢𑁆𑀣𑀼𑀢𑀁 𑀲𑀩𑁆𑀩𑀲𑀼𑀔𑀧𑁆𑀧𑀤𑀸𑀦𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀦𑀜𑁆𑀘 𑀲𑀩𑁆𑀩𑀁 𑀲𑀼𑀯𑀺𑀘𑀺𑀢𑁆𑀢𑀭𑀽𑀧𑀁, 𑀲𑀼𑀫𑀸𑀧𑀺𑀢𑀁 𑀦𑀦𑁆𑀤𑀦𑀓𑀸𑀦𑀦𑀁𑀯;

𑀬𑀢𑀻𑀦 𑀧𑀻𑀢𑀺𑀁 𑀲𑀢𑀢𑀁 𑀚𑀦𑁂𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀅𑀮𑀗𑁆𑀓𑀢𑀁 𑀤𑁂𑀯𑀧𑀼𑀭𑀁𑀯 𑀭𑀫𑁆𑀫𑀁, 𑀓𑀧𑀻𑀮𑀯𑀢𑁆𑀣𑀼𑀁 𑀇𑀢𑀺 𑀦𑀸𑀫𑀥𑁂𑀬𑁆𑀬𑀁;

𑀓𑀼𑀮𑀦𑀕𑀭𑀁 𑀇𑀥 𑀲𑀲𑁆𑀲𑀺𑀭𑀺𑀓𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀫𑀦𑀼𑀜𑁆𑀜𑀅𑀝𑁆𑀝𑀸𑀮𑀯𑀺𑀘𑀺𑀢𑁆𑀢𑀭𑀽𑀧𑀁, 𑀲𑀼𑀨𑀼𑀮𑁆𑀮𑀧𑀗𑁆𑀓𑁂𑀭𑀼𑀳𑀲𑀡𑁆𑀟𑀫𑀡𑁆𑀟𑀺𑀢𑀁;

𑀯𑀺𑀘𑀺𑀢𑁆𑀢𑀧𑀭𑀺𑀔𑀸𑀳𑀺 𑀧𑀼𑀭𑀁 𑀲𑀼𑀭𑀫𑁆𑀫𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀯𑀺𑀘𑀺𑀢𑁆𑀢𑀧𑀸𑀓𑀸𑀭𑀜𑁆𑀘 ¶ 𑀢𑁄𑀭𑀡𑀜𑁆𑀘, 𑀲𑀼𑀪𑀗𑁆𑀕𑀡𑀁 𑀤𑁂𑀯𑀦𑀺𑀯𑀸𑀲𑀪𑀽𑀢𑀁;

𑀫𑀦𑀼𑀜𑁆𑀜𑀯𑀻𑀣𑀺 𑀲𑀼𑀭𑀮𑁄𑀓𑀲𑀦𑁆𑀦𑀺𑀪𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀅𑀮𑀗𑁆𑀓𑀢𑀸 𑀲𑀸𑀓𑀺𑀬𑀭𑀸𑀚𑀧𑀼𑀢𑁆𑀢𑀸, 𑀯𑀺𑀭𑀸𑀚𑀫𑀸𑀦𑀸 𑀯𑀭𑀪𑀽𑀲𑀦𑁂𑀳𑀺;

𑀲𑀼𑀭𑀺𑀦𑁆𑀤𑀮𑁄𑀓𑁂 𑀇𑀯 𑀤𑁂𑀯𑀧𑀼𑀢𑁆𑀢𑀸, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀲𑀼𑀤𑁆𑀥𑁄𑀤𑀦𑁄 ¶ 𑀫𑀼𑀦𑀺𑀯𑀭𑀁 𑀅𑀪𑀺𑀤𑀲𑁆𑀲𑀦𑀸𑀬, 𑀅𑀫𑀘𑁆𑀘𑀧𑀼𑀢𑁆𑀢𑁂 𑀤𑀲𑀥𑀸 𑀅𑀧𑁂𑀲𑀬𑀺;

𑀩𑀮𑁂𑀦 𑀲𑀤𑁆𑀥𑀺𑀁 𑀫𑀳𑀢𑀸 𑀫𑀼𑀦𑀺𑀦𑁆𑀤, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀦𑁂𑀯𑀸𑀕𑀢𑀁 𑀧𑀲𑁆𑀲𑀢𑀺 𑀦𑁂𑀯 𑀯𑀸𑀘𑀁, 𑀲𑁄𑀓𑀸𑀪𑀺𑀪𑀽𑀢𑀁 𑀦𑀭𑀯𑀻𑀭𑀲𑁂𑀝𑁆𑀞𑀁;

𑀢𑁄𑀲𑁂𑀢𑀼𑀫𑀺𑀘𑁆𑀙𑀸𑀫𑀺 𑀦𑀭𑀸𑀥𑀺𑀧𑀢𑁆𑀢𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀢𑀁𑀤𑀲𑁆𑀲𑀦𑁂𑀦𑀩𑁆𑀪𑀼𑀢𑀧𑀻𑀢𑀺𑀭𑀸𑀲𑀺, 𑀉𑀤𑀺𑀓𑁆𑀔𑀫𑀸𑀦𑀁 𑀤𑁆𑀯𑀺𑀧𑀤𑀸𑀦𑀫𑀺𑀦𑁆𑀤𑀁;

𑀢𑁄𑀲𑁂𑀳𑀺 𑀢𑀁 𑀫𑀼𑀦𑀺𑀦𑁆𑀤 𑀕𑀼𑀡𑀲𑁂𑀝𑁆𑀞𑀁, 𑀲𑀫𑀬𑁄 𑀫𑀳𑀸𑀯𑀻𑀭 𑀅𑀗𑁆𑀕𑀻𑀭𑀲𑀸𑀦𑀁.

‘‘𑀆𑀲𑀸𑀬 𑀓𑀲𑁆𑀲𑀢𑁂 𑀔𑁂𑀢𑁆𑀢𑀁, 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀺;

𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀺, 𑀲𑀫𑀼𑀤𑁆𑀤𑀁 𑀥𑀦𑀳𑀸𑀭𑀓𑀸;

𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀺, 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀼.

‘‘𑀦𑀸𑀢𑀺𑀲𑀻𑀢𑀁 ¶ 𑀦𑀸𑀢𑀺𑀉𑀡𑁆𑀳𑀁, 𑀦𑀸𑀢𑀺𑀤𑀼𑀩𑁆𑀪𑀺𑀓𑁆𑀔𑀙𑀸𑀢𑀓𑀁;

𑀲𑀤𑁆𑀤𑀮𑀸 𑀳𑀭𑀺𑀢𑀸 𑀪𑀽𑀫𑀺, 𑀏𑀲 𑀓𑀸𑀮𑁄 𑀫𑀳𑀸𑀫𑀼𑀦𑀻’’𑀢𑀺.

𑀅𑀣 𑀦𑀁 𑀲𑀢𑁆𑀣𑀸 𑁋 ‘‘𑀓𑀺𑀁 𑀦𑀼 𑀔𑁄, 𑀉𑀤𑀸𑀬𑀺, 𑀕𑀫𑀦𑀯𑀡𑁆𑀡𑀁 𑀯𑀡𑁆𑀡𑁂𑀲𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀤𑀝𑁆𑀞𑀼𑀓𑀸𑀫𑁄, 𑀓𑀭𑁄𑀣 𑀜𑀸𑀢𑀓𑀸𑀦𑀁 𑀲𑀗𑁆𑀕𑀳’’𑀦𑁆𑀢𑀺 𑀆𑀳. ‘‘𑀲𑀸𑀥𑀼, 𑀉𑀤𑀸𑀬𑀺, 𑀓𑀭𑀺𑀲𑁆𑀲𑀸𑀫𑀺 𑀜𑀸𑀢𑀺𑀲𑀗𑁆𑀕𑀳𑀁, 𑀢𑁂𑀦 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀳𑀺 ¶ , 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀆𑀳. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀲𑀺.

𑀲𑀢𑁆𑀣𑀸 𑀅𑀗𑁆𑀕𑀫𑀕𑀥𑀯𑀸𑀲𑀻𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀤𑀲𑀳𑀺 𑀲𑀳𑀲𑁆𑀲𑁂𑀳𑀺, 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻𑀦𑀁 𑀤𑀲𑀳𑀺 𑀲𑀳𑀲𑁆𑀲𑁂𑀳𑀻𑀢𑀺 𑀲𑀩𑁆𑀩𑁂𑀳𑁂𑀯 𑀯𑀻𑀲𑀢𑀺𑀬𑀸 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀁 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑁄 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀲𑀸𑀓𑀺𑀬𑀸𑀧𑀺 𑀅𑀦𑀼𑀧𑁆𑀧𑀢𑁆𑀢𑁂𑀬𑁂𑀯 𑀪𑀕𑀯𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀪𑀕𑀯𑀢𑁄 𑀯𑀲𑀦𑀝𑁆𑀞𑀸𑀦𑀁 𑀯𑀻𑀫𑀁𑀲𑀫𑀸𑀦𑀸 ‘‘𑀦𑀺𑀕𑁆𑀭𑁄𑀥𑀲𑀓𑁆𑀓𑀲𑁆𑀲𑀸𑀭𑀸𑀫𑁄 𑀭𑀫𑀡𑀻𑀬𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀚𑀕𑁆𑀕𑀦𑀯𑀺𑀥𑀺𑀁 𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀳𑀢𑁆𑀣𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀲𑀫𑀮𑀗𑁆𑀓𑀢𑀕𑀢𑁆𑀢𑀸 𑀕𑀦𑁆𑀥𑀧𑀼𑀧𑁆𑀨𑀘𑀼𑀡𑁆𑀡𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑀪𑀕𑀯𑀦𑁆𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑀫𑁂𑀯 𑀅𑀕𑀫𑀁𑀲𑀼.

𑀢𑀢𑁆𑀭 𑀪𑀕𑀯𑀸 𑀯𑀻𑀲𑀢𑀺𑀬𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀸𑀓𑀺𑀬𑀸 ¶ 𑀧𑀦 𑀫𑀸𑀦𑀚𑀸𑀢𑀺𑀓𑀸 𑀫𑀸𑀦𑀢𑁆𑀣𑀤𑁆𑀥𑀸, ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀅𑀫𑁆𑀳𑁂𑀳𑀺 𑀤𑀳𑀭𑀢𑀭𑁄, 𑀅𑀫𑁆𑀳𑀸𑀓𑀁 𑀓𑀦𑀺𑀝𑁆𑀞𑁄 𑀪𑀸𑀢𑀸, 𑀧𑀼𑀢𑁆𑀢𑁄, 𑀪𑀸𑀕𑀺𑀦𑁂𑀬𑁆𑀬𑁄, 𑀦𑀢𑁆𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀳𑀭𑀤𑀳𑀭𑁂 𑀭𑀸𑀚𑀓𑀼𑀫𑀸𑀭𑁂 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂 𑀯𑀦𑁆𑀤𑀣, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀦𑀺𑀲𑀻𑀤𑀺𑀲𑁆𑀲𑀸𑀫𑀸’’𑀢𑀺. 𑀢𑁂𑀲𑁆𑀯𑁂𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀪𑀕𑀯𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀇𑀫𑁂 𑀜𑀸𑀢𑀓𑀸 𑀅𑀢𑁆𑀢𑀦𑁄 𑀫𑁄𑀖𑀚𑀺𑀡𑁆𑀡𑀪𑀸𑀯𑁂𑀦 𑀦 𑀫𑀁 𑀯𑀦𑁆𑀤𑀦𑁆𑀢𑀺, 𑀦 𑀧𑀦𑁂𑀢𑁂 𑀚𑀸𑀦𑀦𑁆𑀢𑀺 ‘𑀩𑀼𑀤𑁆𑀥𑁄 𑀦𑀸𑀫 𑀓𑀻𑀤𑀺𑀲𑁄, 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀓𑀻𑀤𑀺𑀲’𑀦𑁆𑀢𑀺 𑀯𑀸, ‘𑀩𑀼𑀤𑁆𑀥𑁄 𑀦𑀸𑀫 𑀏𑀤𑀺𑀲𑁄, 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀏𑀤𑀺𑀲’𑀦𑁆𑀢𑀺 𑀯𑀸, 𑀳𑀦𑁆𑀤𑀸𑀳𑀁 𑀅𑀢𑁆𑀢𑀦𑁄 𑀩𑀼𑀤𑁆𑀥𑀩𑀮𑀁 𑀇𑀤𑁆𑀥𑀺𑀩𑀮𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀓𑀭𑁂𑀬𑁆𑀬𑀁, 𑀆𑀓𑀸𑀲𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀺𑀢𑁆𑀣𑀢𑀁 𑀲𑀩𑁆𑀩𑀭𑀢𑀦𑀫𑀬𑀁 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀘𑀗𑁆𑀓𑀫𑀦𑁆𑀢𑁄 𑀫𑀳𑀸𑀚𑀦𑀲𑁆𑀲 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀪𑀕𑀯𑀢𑁄 𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑀢𑁆𑀣𑀁 𑁋

𑁩.

‘‘𑀦 𑀳𑁂𑀢𑁂 𑀚𑀸𑀦𑀦𑁆𑀢𑀺 𑀲𑀤𑁂𑀯𑀫𑀸𑀦𑀼𑀲𑀸, 𑀩𑀼𑀤𑁆𑀥𑁄 𑀅𑀬𑀁 𑀓𑀻𑀤𑀺𑀲𑀓𑁄 𑀦𑀭𑀼𑀢𑁆𑀢𑀫𑁄;

𑀇𑀤𑁆𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀜𑁆𑀘 𑀓𑀻𑀤𑀺𑀲𑀁, 𑀩𑀼𑀤𑁆𑀥𑀩𑀮𑀁 𑀮𑁄𑀓𑀳𑀺𑀢𑀲𑁆𑀲 𑀓𑀻𑀤𑀺𑀲𑀁.

𑁪.

‘‘𑀦 ¶ ¶ 𑀳𑁂𑀢𑁂 𑀚𑀸𑀦𑀦𑁆𑀢𑀺 𑀲𑀤𑁂𑀯𑀫𑀸𑀦𑀼𑀲𑀸, 𑀩𑀼𑀤𑁆𑀥𑁄 𑀅𑀬𑀁 𑀏𑀤𑀺𑀲𑀓𑁄 𑀦𑀭𑀼𑀢𑁆𑀢𑀫𑁄;

𑀇𑀤𑁆𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀜𑁆𑀘 𑀏𑀤𑀺𑀲𑀁, 𑀩𑀼𑀤𑁆𑀥𑀩𑀮𑀁 𑀮𑁄𑀓𑀳𑀺𑀢𑀲𑁆𑀲 𑀏𑀤𑀺𑀲𑀁.

𑁫.

‘‘𑀳𑀦𑁆𑀤𑀸𑀳𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑀩𑀮𑀫𑀦𑀼𑀢𑁆𑀢𑀭𑀁;

𑀘𑀗𑁆𑀓𑀫𑀁 𑀫𑀸𑀧𑀬𑀺𑀲𑁆𑀲𑀸𑀫𑀺, 𑀦𑀪𑁂 𑀭𑀢𑀦𑀫𑀡𑁆𑀟𑀺𑀢’’𑀦𑁆𑀢𑀺.

𑀢𑀢𑁆𑀣 𑀦 𑀳𑁂𑀢𑁂 𑀚𑀸𑀦𑀦𑁆𑀢𑀻𑀢𑀺 𑀦 𑀳𑀺 𑀏𑀢𑁂 𑀚𑀸𑀦𑀦𑁆𑀢𑀺. 𑀦-𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄. 𑀳𑀺-𑀓𑀸𑀭𑁄 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀧𑀦𑁂𑀢𑁂 𑀫𑀫 𑀜𑀸𑀢𑀺𑀆𑀤𑀬𑁄 𑀤𑁂𑀯𑀫𑀦𑀼𑀲𑁆𑀲𑀸 𑀫𑀬𑀸 𑀩𑀼𑀤𑁆𑀥𑀩𑀮𑁂 𑀘 𑀇𑀤𑁆𑀥𑀺𑀩𑀮𑁂 𑀘 𑀅𑀦𑀸𑀯𑀺𑀓𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀏𑀤𑀺𑀲𑁄 𑀩𑀼𑀤𑁆𑀥𑁄, 𑀏𑀤𑀺𑀲𑀁 𑀇𑀤𑁆𑀥𑀺𑀩𑀮’’𑀦𑁆𑀢𑀺, 𑀢𑀲𑁆𑀫𑀸 𑀅𑀳𑀁 𑀫𑀫 𑀩𑀼𑀤𑁆𑀥𑀩𑀮𑀜𑁆𑀘 𑀇𑀤𑁆𑀥𑀺𑀩𑀮𑀜𑁆𑀘 𑀤𑀲𑁆𑀲𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀫𑀸𑀦𑀼𑀲𑀸𑀢𑀺 𑀏𑀢𑁆𑀣 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀳 𑀤𑁂𑀯𑁂𑀳𑀻𑀢𑀺 𑀲𑀤𑁂𑀯𑀸. 𑀓𑁂 𑀢𑁂? 𑀫𑀸𑀦𑀼𑀲𑀸, 𑀲𑀤𑁂𑀯𑀸 𑀏𑀯 𑀫𑀸𑀦𑀼𑀲𑀸 𑀲𑀤𑁂𑀯𑀫𑀸𑀦𑀼𑀲𑀸. 𑀅𑀣 𑀯𑀸 𑀤𑁂𑀯𑁄𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑁄, 𑀲𑀼𑀤𑁆𑀥𑁄𑀤𑀦𑁄 𑀭𑀸𑀚𑀸 𑀅𑀥𑀺𑀧𑁆𑀧𑁂𑀢𑁄. 𑀲𑀳 𑀤𑁂𑀯𑁂𑀦 𑀭𑀜𑁆𑀜𑀸 𑀲𑀼𑀤𑁆𑀥𑁄𑀤𑀦𑁂𑀦𑀸𑀢𑀺 𑀲𑀤𑁂𑀯𑀸. 𑀫𑀸𑀦𑀼𑀲𑀸𑀢𑀺 𑀜𑀸𑀢𑀺𑀫𑀸𑀦𑀼𑀲𑀸, 𑀲𑀤𑁂𑀯𑀸 𑀲𑀲𑀼𑀤𑁆𑀥𑁄𑀤𑀦𑀸 𑀫𑀸𑀦𑀼𑀲𑀸 𑀲𑀤𑁂𑀯𑀫𑀸𑀦𑀼𑀲𑀸 𑀲𑀭𑀸𑀚𑀸𑀦𑁄 𑀯𑀸 𑀏𑀢𑁂 𑀫𑀫 𑀜𑀸𑀢𑀺𑀫𑀸𑀦𑀼𑀲𑀸 𑀫𑀫 𑀩𑀮𑀁 𑀦 𑀯𑀺𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀤𑁂𑀯𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀲𑀩𑁆𑀩𑁂𑀧𑀺 𑀤𑁂𑀯𑀸 𑀤𑁂𑀯𑀦𑀝𑁆𑀞𑁂𑀦 ‘‘𑀤𑁂𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑁂𑀯𑀦𑀁 𑀦𑀸𑀫 𑀥𑀸𑀢𑀼𑀅𑀢𑁆𑀣𑁄 𑀓𑀻𑀴𑀸𑀤𑀺. 𑀅𑀣 𑀯𑀸 𑀤𑁂𑀯𑀸 𑀘 𑀫𑀸𑀦𑀼𑀲𑀸 𑀘 𑀤𑁂𑀯𑀫𑀸𑀦𑀼𑀲𑀸, 𑀲𑀳 𑀤𑁂𑀯𑀫𑀸𑀦𑀼𑀲𑁂𑀳𑀺 𑀲𑀤𑁂𑀯𑀫𑀸𑀦𑀼𑀲𑀸. 𑀓𑁂 𑀢𑁂? 𑀮𑁄𑀓𑀸𑀢𑀺 𑀯𑀘𑀦𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀩𑀼𑀤𑁆𑀥𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀩𑀼𑀤𑁆𑀥𑁄 𑀅𑀦𑀼𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀅𑀪𑀺𑀜𑁆𑀜𑁂𑀬𑁆𑀬𑀁 ¶ 𑀅𑀪𑀺𑀜𑁆𑀜𑀸𑀢𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢𑀁;

𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁 𑀫𑁂, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁬𑁩);

𑀇𑀥 𑀧𑀦 𑀓𑀢𑁆𑀢𑀼𑀓𑀸𑀭𑀓𑁂 𑀩𑀼𑀤𑁆𑀥𑀲𑀤𑁆𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀅𑀥𑀺𑀕𑀢𑀯𑀺𑀲𑁂𑀲𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀢𑁆𑀢𑀸 𑀜𑀸𑀢𑀢𑁆𑀢𑀸 𑀩𑀼𑀤𑁆𑀥𑁄. 𑀇𑀥 𑀓𑀫𑁆𑀫𑀓𑀸𑀭𑀓𑁂 𑀩𑀼𑀤𑁆𑀥𑀲𑀤𑁆𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀩𑀼𑀤𑁆𑀥𑀫𑀲𑁆𑀲 𑀅𑀢𑁆𑀣𑀻𑀢𑀺 𑀯𑀸 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑀻𑀤𑀺𑀲𑀓𑁄𑀢𑀺 𑀓𑀻𑀤𑀺𑀲𑁄 𑀓𑀺𑀁𑀲𑀭𑀺𑀓𑁆𑀔𑀓𑁄 𑀓𑀺𑀁𑀲𑀤𑀺𑀲𑁄 𑀓𑀺𑀁𑀯𑀡𑁆𑀡𑁄 𑀓𑀺𑀁𑀲𑀡𑁆𑀞𑀸𑀦𑁄 𑀤𑀻𑀖𑁄 𑀯𑀸 𑀭𑀲𑁆𑀲𑁄 𑀯𑀸𑀢𑀺 𑀅𑀢𑁆𑀣𑁄.

𑀦𑀭𑀼𑀢𑁆𑀢𑀫𑁄𑀢𑀺 ¶ 𑀦𑀭𑀸𑀦𑀁 𑀦𑀭𑁂𑀲𑀼 𑀯𑀸 𑀉𑀢𑁆𑀢𑀫𑁄 𑀧𑀯𑀭𑁄 𑀲𑁂𑀝𑁆𑀞𑁄𑀢𑀺 𑀦𑀭𑀼𑀢𑁆𑀢𑀫𑁄. 𑀇𑀤𑁆𑀥𑀺𑀩𑀮𑀦𑁆𑀢𑀺 𑀏𑀢𑁆𑀣 𑀇𑀚𑁆𑀛𑀦𑀁 𑀇𑀤𑁆𑀥𑀺 𑀦𑀺𑀧𑁆𑀨𑀢𑁆𑀢𑀺𑀅𑀢𑁆𑀣𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀘 𑀇𑀤𑁆𑀥𑀺. 𑀅𑀣 𑀯𑀸 𑀇𑀚𑁆𑀛𑀦𑁆𑀢𑀺 𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 ¶ 𑀇𑀤𑁆𑀥𑀺. 𑀲𑀸 𑀧𑀦 𑀤𑀲𑀯𑀺𑀥𑀸 𑀳𑁄𑀢𑀺. 𑀬𑀣𑀸𑀳 𑁋

‘‘𑀇𑀤𑁆𑀥𑀺𑀬𑁄𑀢𑀺 𑀤𑀲 𑀇𑀤𑁆𑀥𑀺𑀬𑁄. 𑀓𑀢𑀫𑀸 𑀤𑀲? 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺, 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺, 𑀫𑀦𑁄𑀫𑀬𑀸 𑀇𑀤𑁆𑀥𑀺, 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀅𑀭𑀺𑀬𑀸 𑀇𑀤𑁆𑀥𑀺, 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺, 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻’’𑀢𑀺 (𑀧𑀝𑀺. 𑀫. 𑁩.𑁧𑁦).

𑀢𑀸𑀲𑀁 𑀇𑀤𑀁 𑀦𑀸𑀦𑀢𑁆𑀢𑀁 𑁋 𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀯𑀚𑁆𑀚𑁂𑀢𑀺, 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 ‘‘𑀩𑀳𑀼𑀓𑁄 𑀳𑁄𑀫𑀻’’𑀢𑀺 (𑀧𑀝𑀺. 𑀫. 𑁩.𑁧𑁦) 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀇𑀤𑁆𑀥𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺 𑀦𑀸𑀫. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀘𑁂 𑀲𑀢𑀁 𑀇𑀘𑁆𑀙𑀢𑀺 ‘‘𑀲𑀢𑀁 𑀳𑁄𑀫𑀺, 𑀲𑀢𑀁 𑀳𑁄𑀫𑀻’’𑀢𑀺 𑀓𑀸𑀫𑀸𑀯𑀘𑀭𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑁂𑀳𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀼𑀦 𑀆𑀯𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀺, 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀳𑁂𑀯 𑀲𑀢𑀁 𑀳𑁄𑀢𑀺. 𑀲𑀳𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀺 𑀲𑀢𑀸𑀭𑀫𑁆𑀫𑀡𑀸𑀦𑀺 𑀯𑀸 𑀲𑀳𑀲𑁆𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀭𑀫𑁆𑀫𑀡𑀸𑀦𑀺 𑀯𑀸, 𑀢𑀸𑀦𑀺 𑀘 𑀔𑁄 𑀯𑀡𑁆𑀡𑀯𑀲𑁂𑀦, 𑀦𑁄 𑀧𑀡𑁆𑀡𑀢𑁆𑀢𑀺𑀯𑀲𑁂𑀦. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺 𑀲𑀢𑀸𑀭𑀫𑁆𑀫𑀡𑀫𑁂𑀯, 𑀢𑀁 𑀧𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀯𑀺𑀬 𑀕𑁄𑀢𑁆𑀭𑀪𑀼𑀅𑀦𑀦𑁆𑀢𑀭𑀫𑁂𑀯 𑀉𑀧𑁆𑀧𑀚𑁆𑀚𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀛𑀸𑀦𑀺𑀓𑀁 ¶ . 𑀲𑁄 𑀧𑀦 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺 𑀦𑀸𑀕𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺. 𑀲𑀼𑀧𑀡𑁆𑀡𑀯𑀡𑁆𑀡𑀁 𑀯𑀸…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀯𑀸 𑀤𑀲𑁆𑀲𑁂𑀢𑀻𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀁 𑀆𑀕𑀢𑀸 𑀇𑀤𑁆𑀥𑀺 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦𑀸𑀫.

‘‘𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀧𑀝𑀺. 𑀫. 𑁩.𑁧𑁪) 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸 𑀇𑀤𑁆𑀥𑀺 𑀲𑀭𑀻𑀭𑀲𑁆𑀲𑁂𑀯 𑀅𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀫𑀦𑁄𑀫𑀬𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀺𑀤𑁆𑀥𑀺 𑀦𑀸𑀫.

𑀜𑀸𑀡𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀗𑁆𑀔𑀡𑁂 𑀯𑀸 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀅𑀭𑀳𑀢𑁆𑀢𑀜𑀸𑀡𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄 𑀯𑀺𑀲𑁂𑀲𑁄 ¶ 𑀜𑀸𑀡𑀯𑀺𑀧𑁆𑀨𑀸𑀭𑁄 𑀇𑀤𑁆𑀥𑀺 𑀦𑀸𑀫. 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀘 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀲𑁆𑀲 𑀘 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀢𑁂𑀲𑀁 𑀯𑀢𑁆𑀣𑀼 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁨𑁬).

𑀲𑀫𑀸𑀥𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀗𑁆𑀔𑀡𑁂 𑀯𑀸 𑀲𑀫𑀣𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄 𑀯𑀺𑀲𑁂𑀲𑁄 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 𑀦𑀸𑀫. 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 (𑀉𑀤𑀸. 𑁩𑁪), 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 (𑀫. 𑀦𑀺. 𑁧.𑁫𑁦𑁭), 𑀆𑀬𑀲𑁆𑀫𑀢𑁄 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 (𑀥. 𑀧. 𑀅𑀝𑁆𑀞. 𑁧.𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀯𑀢𑁆𑀣𑀼), 𑀉𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺 (𑀥. 𑀧. 𑀅𑀝𑁆𑀞. 𑁨.𑀉𑀢𑁆𑀢𑀭𑀸𑀉𑀧𑀸𑀲𑀺𑀓𑀸𑀯𑀢𑁆𑀣𑀼; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁨), 𑀲𑀸𑀫𑀸𑀯𑀢𑀺𑀬𑀸 𑀉𑀧𑀸𑀲𑀺𑀓𑀸𑀬 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀻𑀢𑀺 (𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀻𑀯𑀢𑁆𑀣𑀼; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁦-𑁨𑁬𑁧) 𑀢𑁂𑀲𑀁 𑀯𑀢𑁆𑀣𑀽𑀦𑁂𑀢𑁆𑀣 𑀓𑀣𑁂𑀢𑀩𑁆𑀩𑀸𑀦𑀺, 𑀕𑀦𑁆𑀣𑀯𑀺𑀢𑁆𑀣𑀸𑀭𑀤𑁄𑀲𑀧𑀭𑀺𑀳𑀸𑀭𑀢𑁆𑀣𑀁 𑀧𑀦 𑀫𑀬𑀸 𑀦 𑀯𑀺𑀢𑁆𑀣𑀸𑀭𑀺𑀢𑀸𑀦𑀺.

𑀓𑀢𑀫𑀸 𑀅𑀭𑀺𑀬𑀸 𑀇𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 𑀲𑀘𑁂 𑀆𑀓𑀗𑁆𑀔𑀢𑀺 ‘‘𑀧𑀝𑀺𑀓𑁆𑀓𑀽𑀮𑁂 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 ¶ 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘‘𑀅𑀧𑁆𑀧𑀝𑀺𑀓𑁆𑀓𑀽𑀮𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺…𑀧𑁂… 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 (𑀧𑀝𑀺. 𑀫. 𑁩.𑁧𑁭). 𑀅𑀬𑀜𑁆𑀳𑀺 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸𑀦𑀁 𑀅𑀭𑀺𑀬𑀸𑀦𑀁𑀬𑁂𑀯 𑀲𑀫𑁆𑀪𑀯𑀢𑁄 𑀅𑀭𑀺𑀬𑀸 𑀇𑀤𑁆𑀥𑀺 𑀦𑀸𑀫.

𑀓𑀢𑀫𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺? 𑀲𑀩𑁆𑀩𑁂𑀲𑀁 𑀧𑀓𑁆𑀔𑀻𑀦𑀁 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀏𑀓𑀘𑁆𑀘𑀸𑀦𑀜𑁆𑀘 ¶ 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺 𑀦𑀸𑀫. 𑀓𑀢𑀫𑀸 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺? 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀯𑁂𑀳𑀸𑀲𑀁 𑀕𑀘𑁆𑀙𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀚𑀝𑀺𑀮𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀲𑀻𑀢𑀺𑀳𑀢𑁆𑀣𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀦𑀺𑀩𑁆𑀩𑀢𑁆𑀢𑀺. 𑀅𑀬𑀁 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺 𑀦𑀸𑀫. 𑀖𑁄𑀲𑀓𑀲𑁆𑀲 𑀕𑀳𑀧𑀢𑀺𑀦𑁄 (𑀥. 𑀧. 𑀅𑀝𑁆𑀞. 𑁧.𑀓𑀼𑀫𑁆𑀪𑀖𑁄𑀲𑀓𑀲𑁂𑀝𑁆𑀞𑀺𑀯𑀢𑁆𑀣𑀼) 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀫𑀸𑀭𑀡𑀢𑁆𑀣𑀸𑀬 𑀉𑀧𑀓𑁆𑀓𑀫𑁂 𑀓𑀢𑁂𑀧𑀺 𑀅𑀭𑁄𑀕𑀪𑀸𑀯𑁄 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀲𑁆𑀲 (𑀥. 𑀧. 𑀅𑀝𑁆𑀞. 𑁨.𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀯𑀢𑁆𑀣𑀼) 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑁂 𑀧𑀤𑁂𑀲𑁂 𑀲𑀢𑁆𑀢𑀭𑀢𑀦𑀫𑀬𑀸𑀦𑀁 𑀫𑁂𑀡𑁆𑀟𑀓𑀸𑀦𑀁 𑀧𑀸𑀢𑀼𑀪𑀸𑀯𑁄 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺.

𑀓𑀢𑀫𑀸 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺? 𑀯𑀺𑀚𑁆𑀚𑀸𑀥𑀭𑀸 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺, 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 (𑀧𑀝𑀺. 𑀫. 𑁩.𑁧𑁮). 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺 𑀦𑀸𑀫. 𑀢𑀁 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 ¶ 𑀯𑀺𑀲𑁂𑀲𑁄 ‘𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻’𑀢𑀺 𑀅𑀬𑀁 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺 𑀦𑀸𑀫. 𑀇𑀫𑀺𑀲𑁆𑀲𑀸 𑀤𑀲𑀯𑀺𑀥𑀸𑀬 𑀇𑀤𑁆𑀥𑀺𑀬𑀸 𑀩𑀮𑀁 𑀇𑀤𑁆𑀥𑀺𑀩𑀮𑀁 𑀦𑀸𑀫, 𑀇𑀤𑀁 𑀫𑀬𑁆𑀳𑀁 𑀇𑀤𑁆𑀥𑀺𑀩𑀮𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄 (𑀯𑀺𑀲𑀼𑀤𑁆𑀥𑀺. 𑁨.𑁩𑁭𑁫 𑀆𑀤𑀬𑁄).

𑀧𑀜𑁆𑀜𑀸𑀩𑀮𑀦𑁆𑀢𑀺 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀯𑀺𑀲𑁂𑀲𑀤𑀸𑀬𑀓𑀁 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀩𑀮𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀫𑁆𑀧𑀺 𑀏𑀢𑁂 𑀦 𑀚𑀸𑀦𑀦𑁆𑀢𑀺. 𑀓𑁂𑀘𑀺 ‘‘𑀙𑀦𑁆𑀦𑀁 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁 𑀧𑀜𑁆𑀜𑀸𑀩𑀮’’𑀦𑁆𑀢𑀺 𑀯𑀤𑀦𑁆𑀢𑀺. 𑀩𑀼𑀤𑁆𑀥𑀩𑀮𑀦𑁆𑀢𑀺 𑀏𑀢𑁆𑀣 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀩𑀼𑀤𑁆𑀥𑀸𑀦𑀼𑀪𑀸𑀯𑁄, 𑀤𑀲𑀩𑀮𑀜𑀸𑀡𑀸𑀦𑀺 𑀯𑀸. 𑀢𑀢𑁆𑀣 𑀤𑀲𑀩𑀮𑀜𑀸𑀡𑀸𑀦𑀺 𑀦𑀸𑀫 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀦𑀜𑀸𑀡𑀁, 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁, 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀚𑀸𑀦𑀦𑀜𑀸𑀡𑀁, 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀜𑀸𑀡𑀁, 𑀆𑀲𑀬𑀸𑀦𑀼𑀲𑀬𑀜𑀸𑀡𑀁, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑁂𑀲𑀼 𑀬𑀣𑀸𑀪𑀽𑀢𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀘𑀼𑀢𑀽𑀧𑀧𑀸𑀢𑀜𑀸𑀡𑀁, 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀤𑀲. 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁 𑀩𑀼𑀤𑁆𑀥𑀩𑀮𑀦𑁆𑀢𑀺. 𑀏𑀤𑀺𑀲𑀦𑁆𑀢𑀺 𑀈𑀤𑀺𑀲𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀸 𑀧𑀦𑁂𑀢𑁂 𑀫𑀫 𑀜𑀸𑀢𑀓𑀸 𑀩𑀼𑀤𑁆𑀥𑀩𑀮𑀁 𑀯𑀸 𑀩𑀼𑀤𑁆𑀥𑀕𑀼𑀡𑁂 𑀯𑀸 𑀦 𑀚𑀸𑀦𑀦𑁆𑀢𑀺, 𑀓𑁂𑀯𑀮𑀁 𑀅𑀢𑁆𑀢𑀦𑁄 ¶ 𑀫𑁄𑀖𑀚𑀺𑀡𑁆𑀡𑀪𑀸𑀯𑀁 𑀦𑀺𑀲𑁆𑀲𑀸𑀬 𑀫𑀸𑀦𑀯𑀲𑁂𑀦 𑀲𑀩𑁆𑀩𑀮𑁄𑀓𑀚𑁂𑀝𑁆𑀞𑀲𑁂𑀝𑁆𑀞𑀁 𑀫𑀁 𑀦 𑀯𑀦𑁆𑀤𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀫𑀸𑀦𑀓𑁂𑀢𑀼 𑀅𑀢𑁆𑀣𑀺, 𑀢𑀁 𑀪𑀜𑁆𑀚𑀺𑀢𑁆𑀯𑀸 𑀯𑀦𑁆𑀤𑀦𑀢𑁆𑀣𑀁 𑀩𑀼𑀤𑁆𑀥𑀩𑀮𑀁 𑀤𑀲𑁆𑀲𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀬𑁆𑀬𑀁. ‘‘𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀩𑀼𑀤𑁆𑀥𑀩𑀮𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀁, 𑀩𑀼𑀤𑁆𑀥𑀜𑀸𑀡𑀯𑀺𑀲𑁂𑀲𑀁 𑀯𑀸. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀦𑀺𑀭𑀼𑀢𑁆𑀢𑀭𑀁. 𑀘𑀗𑁆𑀓𑀫𑀦𑁆𑀢𑀺 𑀘𑀗𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀫𑀸𑀧𑀬𑀺𑀲𑁆𑀲𑀸𑀫𑀻𑀢𑀺 𑀫𑀸𑀧𑁂𑀬𑁆𑀬𑀁. ‘‘𑀘𑀗𑁆𑀓𑀫𑀦𑀁 𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀦𑀪𑁂𑀢𑀺 𑀆𑀓𑀸𑀲𑁂. 𑀲𑀩𑁆𑀩𑀭𑀢𑀦𑀫𑀡𑁆𑀟𑀺𑀢𑀦𑁆𑀢𑀺 𑀲𑀩𑁆𑀩𑁂𑀳𑀺 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑁂𑀳𑀺 𑀫𑀼𑀢𑁆𑀢𑀸-𑀫𑀡𑀺-𑀯𑁂𑀴𑀼𑀭𑀺𑀬-𑀲𑀗𑁆𑀔-𑀲𑀺𑀮𑀸-𑀧𑀯𑀸𑀴-𑀭𑀚𑀢-𑀲𑀼𑀯𑀡𑁆𑀡-𑀫𑀲𑀸𑀭𑀕𑀮𑁆𑀮-𑀮𑁄𑀳𑀺𑀢𑀗𑁆𑀓𑁂𑀳𑀺 ¶ 𑀤𑀲𑀳𑀺 𑀤𑀲𑀳𑀺 𑀫𑀡𑁆𑀟𑀺𑀢𑁄 𑀅𑀮𑀗𑁆𑀓𑀢𑁄 𑀲𑀩𑁆𑀩𑀭𑀢𑀦𑀫𑀡𑁆𑀟𑀺𑀢𑁄, 𑀢𑀁 𑀲𑀩𑁆𑀩𑀭𑀢𑀦𑀫𑀡𑁆𑀟𑀺𑀢𑀁. ‘‘𑀦𑀪𑁂 𑀭𑀢𑀦𑀫𑀡𑁆𑀟𑀺𑀢’’𑀦𑁆𑀢𑀺 𑀧𑀞𑀦𑁆𑀢𑀺 𑀓𑁂𑀘𑀺.

𑀅𑀣𑁂𑀯𑀁 𑀪𑀕𑀯𑀢𑀸 𑀘𑀺𑀦𑁆𑀢𑀺𑀢𑀫𑀢𑁆𑀢𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀸𑀲𑀺𑀦𑁄 𑀪𑀼𑀫𑁆𑀫𑀸𑀤𑀬𑁄 𑀤𑁂𑀯𑀸 𑀧𑀫𑀼𑀤𑀺𑀢𑀳𑀤𑀬𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑁋

𑁬.

‘‘𑀪𑀼𑀫𑁆𑀫𑀸 ¶ 𑀫𑀳𑀸𑀭𑀸𑀚𑀺𑀓𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀫𑀸 𑀘 𑀤𑁂𑀯𑀸 𑀢𑀼𑀲𑀺𑀢𑀸 𑀘 𑀦𑀺𑀫𑁆𑀫𑀺𑀢𑀸;

𑀧𑀭𑀦𑀺𑀫𑁆𑀫𑀺𑀢𑀸 𑀬𑁂𑀧𑀺 𑀘 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀆𑀦𑀦𑁆𑀤𑀺𑀢𑀸 𑀯𑀺𑀧𑀼𑀮𑀫𑀓𑀁𑀲𑀼 𑀖𑁄𑀲’’𑀦𑁆𑀢𑀺. 𑁋

𑀆𑀤𑀺𑀕𑀸𑀣𑀸𑀬𑁄 𑀞𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀪𑀼𑀫𑁆𑀫𑀸𑀢𑀺 𑀪𑀼𑀫𑁆𑀫𑀝𑁆𑀞𑀸, 𑀧𑀸𑀲𑀸𑀡𑀧𑀩𑁆𑀩𑀢𑀯𑀦𑀭𑀼𑀓𑁆𑀔𑀸𑀤𑀻𑀲𑀼 𑀞𑀺𑀢𑀸. 𑀫𑀳𑀸𑀭𑀸𑀚𑀺𑀓𑀸𑀢𑀺 𑀫𑀳𑀸𑀭𑀸𑀚𑀧𑀓𑁆𑀔𑀺𑀓𑀸. 𑀪𑀼𑀫𑁆𑀫𑀝𑁆𑀞𑀸𑀦𑀁 𑀤𑁂𑀯𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸, 𑀢𑀢𑁄 𑀅𑀩𑁆𑀪𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀢𑁄 𑀉𑀡𑁆𑀳𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀢𑁄 𑀲𑀻𑀢𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀢𑁄 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀢𑁄 𑀯𑀸𑀢𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄, 𑀢𑀢𑁄 𑀢𑀸𑀯𑀢𑀺𑀁𑀲𑀸, 𑀢𑀢𑁄 𑀬𑀸𑀫𑀸, 𑀢𑀢𑁄 𑀢𑀼𑀲𑀺𑀢𑀸, 𑀢𑀢𑁄 𑀦𑀺𑀫𑁆𑀫𑀸𑀦𑀭𑀢𑀻, 𑀢𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻, 𑀢𑀢𑁄 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀢𑀢𑁄 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸, 𑀢𑀢𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄, 𑀢𑀢𑁄 𑀧𑀭𑀺𑀢𑁆𑀢𑀸𑀪𑀸, 𑀢𑀢𑁄 𑀅𑀧𑁆𑀧𑀫𑀸𑀡𑀸𑀪𑀸, 𑀢𑀢𑁄 𑀆𑀪𑀲𑁆𑀲𑀭𑀸, 𑀢𑀢𑁄 𑀧𑀭𑀺𑀢𑁆𑀢𑀲𑀼𑀪𑀸, 𑀢𑀢𑁄 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀢𑀢𑁄 𑀲𑀼𑀪𑀓𑀺𑀡𑁆𑀳𑀸, 𑀢𑀢𑁄 𑀯𑁂𑀳𑀧𑁆𑀨𑀮𑀸, 𑀢𑀢𑁄 𑀅𑀯𑀺𑀳𑀸, 𑀢𑀢𑁄 𑀅𑀢𑀧𑁆𑀧𑀸, 𑀢𑀢𑁄 𑀲𑀼𑀤𑀲𑁆𑀲𑀸, 𑀢𑀢𑁄 𑀲𑀼𑀤𑀲𑁆𑀲𑀻, 𑀢𑀢𑁄 𑀅𑀓𑀦𑀺𑀝𑁆𑀞𑀸 𑀤𑁂𑀯𑀢𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀅𑀓𑀁𑀲𑀼. 𑀅𑀲𑀜𑁆𑀜𑀺𑀦𑁄 𑀘 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑁂 𑀘 𑀞𑀧𑁂𑀢𑁆𑀯𑀸 𑀲𑁄𑀢𑀸𑀬𑀢𑀦𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀸𑀤𑀬𑁄 𑀧𑀻𑀢𑀺𑀯𑀲𑀁 𑀕𑀢𑀳𑀤𑀬𑀸 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀫𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀆𑀦𑀦𑁆𑀤𑀺𑀢𑀸𑀢𑀺 𑀧𑀫𑀼𑀤𑀺𑀢𑀳𑀤𑀬𑀸, 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀧𑀼𑀮𑀦𑁆𑀢𑀺 𑀧𑀼𑀣𑀼𑀮𑀁.

𑀅𑀣 𑀲𑀢𑁆𑀣𑀸 𑀘𑀺𑀦𑁆𑀢𑀺𑀢𑀲𑀫𑀦𑀦𑁆𑀢𑀭𑀫𑁂𑀯 𑀑𑀤𑀸𑀢𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑁋 ‘‘𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑁄 𑀳𑁄𑀢𑀽’’𑀢𑀺 ¶ 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀳𑁂𑀯 𑀆𑀮𑁄𑀓𑁄 𑀅𑀳𑁄𑀲𑀺 𑀧𑀣𑀯𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀑𑀪𑀸𑀲𑀺𑀢𑀸 𑀘 𑀧𑀣𑀯𑀻 𑀲𑀤𑁂𑀯𑀓𑀸, 𑀧𑀼𑀣𑀽 𑀘 𑀮𑁄𑀓𑀦𑁆𑀢𑀭𑀺𑀓𑀸 𑀅𑀲𑀁𑀯𑀼𑀢𑀸;

𑀢𑀫𑁄 𑀘 𑀢𑀺𑀩𑁆𑀩𑁄 𑀯𑀺𑀳𑀢𑁄 𑀢𑀤𑀸 𑀅𑀳𑀼, 𑀤𑀺𑀲𑁆𑀯𑀸𑀦 𑀅𑀘𑁆𑀙𑁂𑀭𑀓𑀁 𑀧𑀸𑀝𑀺𑀳𑀻𑀭’’𑀦𑁆𑀢𑀺.

𑀢𑀢𑁆𑀣 ¶ ¶ 𑀑𑀪𑀸𑀲𑀺𑀢𑀸𑀢𑀺 𑀧𑀓𑀸𑀲𑀺𑀢𑀸. 𑀧𑀣𑀯𑀻𑀢𑀺 𑀏𑀢𑁆𑀣𑀸𑀬𑀁 𑀧𑀣𑀯𑀻 𑀘𑀢𑀼𑀩𑁆𑀩𑀺𑀥𑀸 𑁋 𑀓𑀓𑁆𑀔𑀴𑀧𑀣𑀯𑀻, 𑀲𑀲𑀫𑁆𑀪𑀸𑀭𑀧𑀣𑀯𑀻, 𑀦𑀺𑀫𑀺𑀢𑁆𑀢𑀧𑀣𑀯𑀻, 𑀲𑀫𑁆𑀫𑀼𑀢𑀺𑀧𑀣𑀯𑀻𑀢𑀺. 𑀢𑀸𑀲𑀼 ‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼? 𑀬𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀓𑀓𑁆𑀔𑀴𑀁 𑀔𑀭𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁧𑁭𑁩) 𑀯𑀼𑀢𑁆𑀢𑀸 𑀅𑀬𑀁 𑀓𑀓𑁆𑀔𑀴𑀧𑀣𑀯𑀻 𑀦𑀸𑀫. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀧𑀣𑀯𑀺𑀁 𑀔𑀡𑁂𑀬𑁆𑀬 𑀯𑀸 𑀔𑀡𑀸𑀧𑁂𑀬𑁆𑀬 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁫) 𑀯𑀼𑀢𑁆𑀢𑀸 𑀲𑀲𑀫𑁆𑀪𑀸𑀭𑀧𑀣𑀯𑀻, 𑀬𑁂 𑀘 𑀓𑁂𑀲𑀸𑀤𑀬𑁄 𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑀸, 𑀅𑀬𑁄𑀮𑁄𑀳𑀸𑀤𑀬𑁄 𑀘 𑀩𑀸𑀳𑀺𑀭𑀸; 𑀲𑀸𑀧𑀺 𑀯𑀡𑁆𑀡𑀸𑀤𑀻𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀣𑀯𑀻𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀻 𑀦𑀸𑀫. ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁬𑁦) 𑀦𑀺𑀫𑀺𑀢𑁆𑀢𑀧𑀣𑀯𑀻 ‘‘𑀆𑀭𑀫𑁆𑀫𑀡𑀧𑀣𑀯𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀣𑀯𑀻𑀓𑀲𑀺𑀡𑀛𑀸𑀦𑀮𑀸𑀪𑀻 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀆𑀕𑀫𑀦𑀯𑀲𑁂𑀦 ‘‘𑀧𑀣𑀯𑀻𑀤𑁂𑀯𑁄’’𑀢𑀺 𑀦𑀸𑀫𑀁 𑀮𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀆𑀧𑁄 𑀘 𑀤𑁂𑀯𑀸 𑀧𑀣𑀯𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁪𑁦) 𑀅𑀬𑀁 𑀲𑀫𑁆𑀫𑀼𑀢𑀺𑀧𑀣𑀯𑀻, 𑀧𑀜𑁆𑀜𑀢𑁆𑀢𑀺𑀧𑀣𑀯𑀻 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀲𑀲𑀫𑁆𑀪𑀸𑀭𑀧𑀣𑀯𑀻 𑀅𑀥𑀺𑀧𑁆𑀧𑁂𑀢𑀸 (𑀫. 𑀦𑀺. 𑀅𑀝𑁆𑀞. 𑁧.𑁨 𑀧𑀣𑀯𑀻𑀯𑀸𑀭𑀯𑀡𑁆𑀡𑀦𑀸).

𑀲𑀤𑁂𑀯𑀓𑀸𑀢𑀺 𑀲𑀤𑁂𑀯𑀮𑁄𑀓𑀸. ‘‘𑀲𑀤𑁂𑀯𑀢𑀸’’𑀢𑀺𑀧𑀺 𑀧𑀸𑀞𑁄 𑀅𑀢𑁆𑀣𑀺 𑀘𑁂 𑀲𑀼𑀦𑁆𑀤𑀭𑀢𑀭𑀁, 𑀲𑀤𑁂𑀯𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀑𑀪𑀸𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀼𑀣𑀽𑀢𑀺 𑀩𑀳𑀽. 𑀮𑁄𑀓𑀦𑁆𑀢𑀭𑀺𑀓𑀸𑀢𑀺 𑀅𑀲𑀼𑀭𑀓𑀸𑀬𑀦𑀭𑀓𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀸 𑀧𑀦 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑀸 𑀏𑀓𑀸 𑀮𑁄𑀓𑀦𑁆𑀢𑀭𑀺𑀓𑀸 𑀳𑁄𑀢𑀺, 𑀢𑀺𑀡𑁆𑀡𑀁 𑀲𑀓𑀝𑀘𑀓𑁆𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀳𑀘𑁆𑀘 𑀞𑀺𑀢𑀸𑀦𑀁 𑀫𑀚𑁆𑀛𑁂 𑀑𑀓𑀸𑀲𑁄 𑀯𑀺𑀬 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄, 𑀧𑀭𑀺𑀫𑀸𑀡𑀢𑁄 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑁄 𑀳𑁄𑀢𑀺. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸 𑀅𑀧𑁆𑀧𑀢𑀺𑀝𑁆𑀞𑀸. 𑀢𑀫𑁄 𑀘𑀸𑀢𑀺 𑀅𑀦𑁆𑀥𑀓𑀸𑀭𑁄. 𑀢𑀺𑀩𑁆𑀩𑁄𑀢𑀺 𑀩𑀳𑀮𑁄 𑀖𑀦𑁄. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀮𑁄𑀓𑀸𑀪𑀸𑀯𑀢𑁄 𑀦𑀺𑀘𑁆𑀘𑀦𑁆𑀥𑀓𑀸𑀭𑁄𑀯 𑀳𑁄𑀢𑀺. 𑀯𑀺𑀳𑀢𑁄𑀢𑀺 𑀯𑀺𑀤𑁆𑀥𑀲𑁆𑀢𑁄. 𑀢𑀤𑀸𑀢𑀺 𑀬𑀤𑀸 𑀧𑀦 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁆𑀣𑀁 𑀆𑀮𑁄𑀓𑀁 𑀨𑀭𑀺, 𑀢𑀤𑀸 𑀲𑁄 𑀢𑀫𑁄 𑀢𑀺𑀩𑁆𑀩𑁄 𑀮𑁄𑀓𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑁄, 𑀯𑀺𑀳𑀢𑁄 𑀯𑀺𑀤𑁆𑀥𑀲𑁆𑀢𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀅𑀘𑁆𑀙𑁂𑀭𑀓𑀦𑁆𑀢𑀺 𑀅𑀘𑁆𑀙𑀭𑀸𑀧𑀳𑀭𑀡𑀬𑁄𑀕𑁆𑀕𑀁, 𑀯𑀺𑀫𑁆𑀳𑀬𑀯𑀲𑁂𑀦 𑀅𑀗𑁆𑀕𑀼𑀮𑀻𑀳𑀺 𑀧𑀳𑀭𑀡𑀬𑁄𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀝𑀺𑀳𑀻𑀭𑀦𑁆𑀢𑀺 𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀧𑀸𑀝𑀺𑀳𑀻𑀭𑀁. 𑀧𑀝𑀺𑀳𑀭𑀢𑀺 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀺𑀫𑀸𑀦𑁄𑀧𑀕𑀢𑀸𑀦𑀺 ¶ 𑀘𑀺𑀢𑁆𑀢𑀸𑀦𑀻𑀢𑀺 𑀯𑀸 𑀧𑀸𑀝𑀺𑀳𑀻𑀭𑀁, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀧𑀲𑀸𑀤𑀁 𑀧𑀝𑀺𑀆𑀳𑀭𑀢𑀻𑀢𑀺 𑀯𑀸 𑀧𑀸𑀝𑀺𑀳𑀻𑀭𑀁. ‘‘𑀧𑀸𑀝𑀺𑀳𑁂𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀏𑀢𑁆𑀣 𑀆𑀮𑁄𑀓𑀯𑀺𑀥𑀸𑀦𑀯𑀺𑀲𑁂𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀺𑀲𑁆𑀯𑀸𑀦 𑀅𑀘𑁆𑀙𑁂𑀭𑀓𑀁 ¶ 𑀧𑀸𑀝𑀺𑀳𑀻𑀭𑀦𑁆𑀢𑀺 𑀏𑀢𑁆𑀣 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀮𑁄𑀓𑀦𑁆𑀢𑀭𑀺𑀓𑀸𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀧𑀺 𑀘 𑀢𑀁 𑀪𑀕𑀯𑀢𑁄 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀭𑀫𑀧𑁆𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀅𑀕𑀫𑀁𑀲𑀽𑀢𑀺 𑀇𑀤𑀁 𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀇𑀢𑀭𑀣𑀸 𑀦 𑀧𑀼𑀩𑁆𑀩𑁂𑀦 𑀯𑀸 𑀧𑀭𑀁, 𑀦 𑀧𑀭𑁂𑀦 𑀯𑀸 𑀧𑀼𑀩𑁆𑀩𑀁 𑀬𑀼𑀚𑁆𑀚𑀢𑀺.

𑀇𑀤𑀸𑀦𑀺 ¶ 𑀦 𑀓𑁂𑀯𑀮𑀁 𑀫𑀦𑀼𑀲𑁆𑀲𑀮𑁄𑀓𑁂𑀲𑀼𑀬𑁂𑀯 𑀆𑀮𑁄𑀓𑁄 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀢𑀺𑀯𑀺𑀥𑁂𑀧𑀺 𑀲𑀗𑁆𑀔𑀸𑀭𑀲𑀢𑁆𑀢𑁄𑀓𑀸𑀲𑀲𑀗𑁆𑀔𑀸𑀢𑁂 𑀮𑁄𑀓𑁂 𑀆𑀮𑁄𑀓𑁄𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑁋

𑁮.

‘‘𑀲𑀤𑁂𑀯𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀭𑀓𑁆𑀔𑀲𑁂,

𑀆𑀪𑀸 𑀉𑀴𑀸𑀭𑀸 𑀯𑀺𑀧𑀼𑀮𑀸 𑀅𑀚𑀸𑀬𑀣;

𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀜𑁆𑀘𑁄𑀪𑀬𑀲𑁆𑀫𑀺𑀁,

𑀅𑀥𑁄 𑀘 𑀉𑀤𑁆𑀥𑀁 𑀢𑀺𑀭𑀺𑀬𑀜𑁆𑀘 𑀯𑀺𑀢𑁆𑀣𑀢’’𑀦𑁆𑀢𑀺. 𑁋 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸;

𑀢𑀢𑁆𑀣 𑀤𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺 𑀲𑀩𑁆𑀩𑁂𑀧𑀺 𑀤𑁂𑀯𑀸 𑀇𑀥 𑀲𑀗𑁆𑀕𑀳𑀺𑀢𑀸. 𑀤𑁂𑀯𑀸 𑀘 𑀕𑀦𑁆𑀥𑀩𑁆𑀩𑀸 𑀘 𑀫𑀦𑀼𑀲𑁆𑀲𑀸 𑀘 𑀭𑀓𑁆𑀔𑀲𑀸 𑀘 𑀤𑁂𑀯𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀭𑀓𑁆𑀔𑀲𑀸. 𑀲𑀳 𑀤𑁂𑀯𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀭𑀓𑁆𑀔𑀲𑁂𑀳𑀻𑀢𑀺 𑀲𑀤𑁂𑀯𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀭𑀓𑁆𑀔𑀲𑁄. 𑀓𑁄 𑀧𑀦 𑀲𑁄? 𑀮𑁄𑀓𑁄, 𑀢𑀲𑁆𑀫𑀺𑀁 𑀲𑀤𑁂𑀯𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀭𑀓𑁆𑀔𑀲𑁂 𑀮𑁄𑀓𑁂. 𑀆𑀪𑀸𑀢𑀺 𑀆𑀮𑁄𑀓𑁄. 𑀉𑀴𑀸𑀭𑀸𑀢𑀺 𑀏𑀢𑁆𑀣𑀸𑀬𑀁 𑀉𑀴𑀸𑀭-𑀲𑀤𑁆𑀤𑁄 𑀫𑀥𑀼𑀭𑀲𑁂𑀝𑁆𑀞𑀯𑀺𑀧𑀼𑀮𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀉𑀴𑀸𑀭𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀔𑀸𑀤𑀦𑁆𑀢𑀺 𑀪𑀼𑀜𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁬𑁬) 𑀫𑀥𑀼𑀭𑁂 𑀤𑀺𑀲𑁆𑀲𑀢𑀺. ‘‘𑀉𑀴𑀸𑀭𑀸𑀬 𑀔𑁄 𑀧𑀦 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀧𑀲𑀁𑀲𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮𑁮) 𑀲𑁂𑀝𑁆𑀞𑁂. ‘‘𑀅𑀢𑀺𑀓𑁆𑀓𑀫𑁆𑀫 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁨; 𑀫. 𑀦𑀺. 𑁩.𑁨𑁦𑁧) 𑀯𑀺𑀧𑀼𑀮𑁂. 𑀲𑁆𑀯𑀸𑀬𑀁 𑀇𑀥 𑀲𑁂𑀝𑁆𑀞𑁂 𑀤𑀝𑁆𑀞𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁪𑁨; 𑀯𑀺. 𑀯. 𑀅𑀝𑁆𑀞. 𑁧). 𑀯𑀺𑀧𑀼𑀮𑀸𑀢𑀺 𑀅𑀧𑁆𑀧𑀫𑀸𑀡𑀸. 𑀅𑀚𑀸𑀬𑀣𑀸𑀢𑀺 𑀉𑀧𑁆𑀧𑀚𑁆𑀚𑀺 𑀉𑀤𑀧𑀸𑀤𑀺 𑀧𑀯𑀢𑁆𑀢𑀺𑀢𑁆𑀣. 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀜𑁆𑀘𑀸𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀧𑀭𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀘𑀸𑀢𑀺 𑀅𑀢𑁆𑀣𑁄. 𑀉𑀪𑀬𑀲𑁆𑀫𑀺𑀦𑁆𑀢𑀺 𑀢𑀤𑀼𑀪𑀬𑀲𑁆𑀫𑀺𑀁, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀻𑀲𑀼 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀅𑀥𑁄 𑀘𑀸𑀢𑀺 𑀅𑀯𑀻𑀘𑀺𑀆𑀤𑀻𑀲𑀼 𑀦𑀺𑀭𑀬𑁂𑀲𑀼. 𑀉𑀤𑁆𑀥𑀦𑁆𑀢𑀺 𑀪𑀯𑀕𑁆𑀕𑀢𑁄𑀧𑀺 𑀉𑀤𑁆𑀥𑀁 𑀅𑀚𑀝𑀸𑀓𑀸𑀲𑁂𑀧𑀺. 𑀢𑀺𑀭𑀺𑀬𑀜𑁆𑀘𑀸𑀢𑀺 𑀢𑀺𑀭𑀺𑀬𑀢𑁄𑀧𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼. 𑀯𑀺𑀢𑁆𑀣𑀢𑀦𑁆𑀢𑀺 𑀯𑀺𑀲𑀝𑀁. 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀮𑁄𑀓𑀜𑁆𑀘 ¶ 𑀧𑀤𑁂𑀲𑀜𑁆𑀘 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀪𑀸 ¶ 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀭𑀺𑀬𑀜𑁆𑀘 𑀯𑀺𑀢𑁆𑀣𑀢𑀦𑁆𑀢𑀺 𑀢𑀺𑀭𑀺𑀬𑀢𑁄 𑀯𑀺𑀢𑁆𑀣𑀢𑀁 𑀫𑀳𑀦𑁆𑀢𑀁, 𑀅𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀆𑀪𑀸 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄.

𑀅𑀣 𑀪𑀕𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀆𑀮𑁄𑀓𑀨𑀭𑀡𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀆𑀓𑀸𑀲𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀜𑀸𑀢𑀻𑀦𑀁 𑀲𑀻𑀲𑁂𑀲𑀼 𑀧𑀸𑀤𑀧𑀁𑀲𑀼𑀁 𑀑𑀓𑀺𑀭𑀫𑀸𑀦𑁄 𑀯𑀺𑀬 𑀫𑀳𑀢𑀺𑀬𑀸 𑀤𑁂𑀯𑀫𑀦𑀼𑀲𑁆𑀲𑀧𑀭𑀺𑀲𑀸𑀬 𑀫𑀚𑁆𑀛𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀢𑀁 𑀧𑀦 𑀧𑀸𑀴𑀺𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 (𑀧𑀝𑀺. 𑀫. 𑁧.𑁧𑁧𑁬) 𑁋

‘‘𑀓𑀢𑀫𑀁 ¶ 𑀢𑀣𑀸𑀕𑀢𑀲𑁆𑀲 𑀬𑀫𑀓𑀧𑀸𑀝𑀺𑀳𑀻𑀭𑁂 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀬𑀫𑀓𑀧𑀸𑀝𑀺𑀳𑀻𑀭𑀁 𑀓𑀭𑁄𑀢𑀺 𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀺 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀧𑀘𑁆𑀙𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀅𑀓𑁆𑀔𑀺𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀅𑀓𑁆𑀔𑀺𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀅𑀁𑀲𑀓𑀽𑀝𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀳𑀢𑁆𑀣𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀳𑀢𑁆𑀣𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀧𑀲𑁆𑀲𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀧𑀲𑁆𑀲𑀢𑁄 ¶ 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀤𑀓𑁆𑀔𑀺𑀡𑀧𑀸𑀤𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀯𑀸𑀫𑀧𑀸𑀤𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀯𑀸𑀫𑀧𑀸𑀤𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀤𑀓𑁆𑀔𑀺𑀡𑀧𑀸𑀤𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺…𑀧𑁂… 𑀏𑀓𑁂𑀓𑀮𑁄𑀫𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀏𑀓𑁂𑀓𑀮𑁄𑀫𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺 𑁋 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀦𑀻𑀮𑀸𑀦𑀁 𑀧𑀻𑀢𑀓𑀸𑀦𑀁 𑀮𑁄𑀳𑀺𑀢𑀓𑀸𑀦𑀁 𑀑𑀤𑀸𑀢𑀸𑀦𑀁 𑀫𑀜𑁆𑀚𑀺𑀝𑁆𑀞𑀸𑀦𑀁 𑀧𑀪𑀲𑁆𑀲𑀭𑀸𑀦𑀁.

‘‘𑀪𑀕𑀯𑀸 𑀘𑀗𑁆𑀓𑀫𑀢𑀺, 𑀦𑀺𑀫𑁆𑀫𑀺𑀢𑁄 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀪𑀕𑀯𑀸 𑀢𑀺𑀝𑁆𑀞𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀪𑀕𑀯𑀸 𑀦𑀺𑀲𑀻𑀤𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀪𑀕𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸. 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺, 𑀪𑀕𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀦𑀺𑀫𑁆𑀫𑀺𑀢𑁄 𑀢𑀺𑀝𑁆𑀞𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀦𑀺𑀫𑁆𑀫𑀺𑀢𑁄 𑀦𑀺𑀲𑀻𑀤𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 ¶ 𑀢𑀺𑀝𑁆𑀞𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺. 𑀦𑀺𑀫𑁆𑀫𑀺𑀢𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀪𑀕𑀯𑀸 𑀘𑀗𑁆𑀓𑀫𑀢𑀺 𑀯𑀸 𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸, 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀬𑀫𑀓𑀧𑀸𑀝𑀺𑀳𑀻𑀭𑁂 𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁’’.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀢𑁂𑀚𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺. 𑀆𑀧𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻𑀢𑀺 𑀧𑀼𑀦 𑀉𑀤𑀓𑀥𑀸𑀭𑀸𑀬 𑀧𑀯𑀢𑁆𑀢𑀝𑁆𑀞𑀸𑀦𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑁆𑀲 𑀧𑀯𑀢𑁆𑀢𑀝𑁆𑀞𑀸𑀦𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀦𑁂𑀢𑁆𑀣 𑀉𑀤𑀓𑀥𑀸𑀭𑀸𑀬 𑀅𑀲𑀫𑁆𑀫𑀺𑀲𑁆𑀲𑁄𑀯 𑀅𑀳𑁄𑀲𑀺. 𑀢𑀣𑀸 𑀉𑀤𑀓𑀥𑀸𑀭𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀦. 𑀭𑀲𑁆𑀫𑀻𑀲𑀼 𑀧𑀦 𑀤𑀼𑀢𑀺𑀬𑀸 𑀤𑀼𑀢𑀺𑀬𑀸 𑀭𑀲𑁆𑀫𑀺 𑀧𑀼𑀭𑀺𑀫𑀸𑀬 𑀧𑀼𑀭𑀺𑀫𑀸𑀬 𑀬𑀫𑀓𑀸 𑀯𑀺𑀬 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀢𑀺. 𑀤𑁆𑀯𑀺𑀦𑁆𑀦𑀜𑁆𑀘 𑀘𑀺𑀢𑁆𑀢𑀸𑀦𑀁 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀺 𑀦𑀸𑀫 ¶ 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀁 𑀧𑀦 𑀪𑀯𑀗𑁆𑀕𑀧𑀭𑀺𑀯𑀸𑀲𑀲𑁆𑀲 𑀮𑀳𑀼𑀓𑀢𑀸𑀬 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀘𑀺𑀡𑁆𑀡𑀯𑀲𑀺𑀢𑀸𑀬 𑀏𑀢𑀸 𑀭𑀲𑁆𑀫𑀺𑀬𑁄 𑀏𑀓𑀓𑁆𑀔𑀡𑁂 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀲𑀸 𑀧𑀦 𑀭𑀲𑁆𑀫𑀺𑀬𑀸 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀦𑀺 𑀯𑀺𑀲𑀼𑀁𑀬𑁂𑀯. 𑀦𑀻𑀮𑀭𑀲𑁆𑀫𑀺𑀅𑀢𑁆𑀣𑀸𑀬 𑀳𑀺 𑀪𑀕𑀯𑀸 ¶ 𑀦𑀻𑀮𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀢𑀺. 𑀧𑀻𑀢𑀭𑀲𑁆𑀫𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀧𑀻𑀢𑀓𑀲𑀺𑀡𑀸𑀤𑀻𑀦𑀺 𑀲𑀫𑀸𑀧𑀚𑁆𑀚𑀢𑀺.

𑀏𑀯𑀁 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀻𑀭𑁂 𑀓𑀬𑀺𑀭𑀫𑀸𑀦𑁂 𑀲𑀓𑀮𑀲𑁆𑀲𑀸𑀧𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑁆𑀲 𑀅𑀮𑀗𑁆𑀓𑀸𑀭𑀓𑀭𑀡𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀲𑀢𑁆𑀢𑀼𑀢𑁆𑀢𑀫𑁄 𑀅𑀦𑀥𑀺𑀯𑀭𑁄 𑀯𑀺𑀦𑀸𑀬𑀓𑁄, 𑀲𑀢𑁆𑀣𑀸 𑀅𑀳𑀽 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄;

𑀫𑀳𑀸𑀦𑀼𑀪𑀸𑀯𑁄 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄, 𑀤𑀲𑁆𑀲𑁂𑀲𑀺 𑀅𑀘𑁆𑀙𑁂𑀭𑀓𑀁 𑀧𑀸𑀝𑀺𑀳𑀻𑀭’’𑀦𑁆𑀢𑀺.

𑀢𑀢𑁆𑀣 𑀲𑀢𑁆𑀢𑀼𑀢𑁆𑀢𑀫𑁄𑀢𑀺 𑀅𑀢𑁆𑀢𑀦𑁄 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀉𑀢𑁆𑀢𑀫𑁄 𑀧𑀯𑀭𑁄 𑀲𑁂𑀝𑁆𑀞𑁄𑀢𑀺 𑀲𑀢𑁆𑀢𑀼𑀢𑁆𑀢𑀫𑁄, 𑀲𑀢𑁆𑀢𑀸𑀦𑀁 𑀯𑀸 𑀉𑀢𑁆𑀢𑀫𑁄 𑀲𑀢𑁆𑀢𑀼𑀢𑁆𑀢𑀫𑁄. 𑀲𑀢𑁆𑀢𑀦𑁆𑀢𑀺 𑀳𑀺 𑀜𑀸𑀡𑀲𑁆𑀲 𑀦𑀸𑀫𑀁, 𑀢𑁂𑀦 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀙𑀅𑀲𑀸𑀥𑀸𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀲𑀢𑁆𑀢𑁂𑀦 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄𑀢𑀺 𑀲𑀢𑁆𑀢𑀼𑀢𑁆𑀢𑀫𑁄, 𑀲𑀫𑀸𑀦𑀸𑀥𑀺𑀓𑀭𑀡𑀯𑀲𑁂𑀦 𑀲𑀢𑁆𑀢𑁄 𑀉𑀢𑁆𑀢𑀫𑁄𑀢𑀺 𑀯𑀸 𑀲𑀢𑁆𑀢𑀼𑀢𑁆𑀢𑀫𑁄. 𑀬𑀤𑀺 𑀏𑀯𑀁 ‘‘𑀉𑀢𑁆𑀢𑀫𑀲𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀉𑀢𑁆𑀢𑀫-𑀲𑀤𑁆𑀤𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑀧𑀸𑀞𑀢𑁄. 𑀦 𑀧𑀦𑁂𑀲 𑀪𑁂𑀤𑁄 𑀅𑀦𑀺𑀬𑀫𑀢𑁄 𑀩𑀳𑀼𑀮𑀯𑀘𑀦𑀢𑁄 𑀘 𑀦𑀭𑀼𑀢𑁆𑀢𑀫𑀧𑀼𑀭𑀺𑀲𑀼𑀢𑁆𑀢𑀫𑀦𑀭𑀯𑀭𑀸𑀤𑀺-𑀲𑀤𑁆𑀤𑀸 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀲𑀢𑁆𑀢𑀁 𑀉𑀢𑁆𑀢𑀫𑀁 𑀬𑀲𑁆𑀲 𑀲𑁄 𑀲𑀢𑁆𑀢𑀼𑀢𑁆𑀢𑀫𑁄, 𑀇𑀥𑀸𑀧𑀺 𑀘 𑀉𑀢𑁆𑀢𑀫-𑀲𑀤𑁆𑀤𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄 𑀪𑀯𑀢𑀺. 𑀉𑀢𑁆𑀢𑀫𑀲𑀢𑁆𑀢𑁄𑀢𑀺 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑀧𑀸𑀞𑀢𑁄 ‘‘𑀘𑀺𑀢𑁆𑀢𑀕𑀽 𑀧𑀤𑁆𑀥𑀕𑀽’’𑀢𑀺 𑀏𑀢𑁆𑀣 𑀯𑀺𑀬𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀉𑀪𑀬𑀯𑀺𑀲𑁂𑀲𑀦𑀢𑁄 𑀯𑀸 𑀆𑀳𑀺𑀢𑀕𑁆𑀕𑀺𑀆𑀤𑀺𑀧𑀸𑀞𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀺𑀦𑀸𑀬𑀓𑁄𑀢𑀺 𑀩𑀳𑀽𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀺 𑀲𑀢𑁆𑀢𑁂 𑀯𑀺𑀦𑁂𑀢𑀺 𑀤𑀫𑁂𑀢𑀻𑀢𑀺 𑀯𑀺𑀦𑀸𑀬𑀓𑁄. 𑀲𑀢𑁆𑀣𑀸𑀢𑀺 ¶ 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀅𑀳𑀽𑀢𑀺 𑀅𑀳𑁄𑀲𑀺. 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄𑀢𑀺 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀓𑀸𑀫𑀕𑀼𑀡𑁂𑀳𑀺 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀻𑀢𑀺 𑀤𑁂𑀯𑀸. 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑁆𑀢𑀸 𑀫𑀦𑀼𑀲𑁆𑀲𑀸, 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀫𑀦𑀼𑀲𑁆𑀲𑀸, 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 ¶ 𑀧𑀽𑀚𑀺𑀢𑁄 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄. 𑀧𑀼𑀧𑁆𑀨𑀸𑀤𑀺𑀧𑀽𑀚𑀸𑀬 𑀘 𑀧𑀘𑁆𑀘𑀬𑀧𑀽𑀚𑀸𑀬 𑀘 𑀧𑀽𑀚𑀺𑀢𑁄, 𑀅𑀧𑀘𑀺𑀢𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀫𑁂𑀯 𑀕𑀳𑀡𑀁 𑀓𑀢𑀁, 𑀦𑀦𑀼 𑀪𑀕𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺𑀧𑀺 𑀆𑀭𑀯𑀸𑀴𑀓𑀸𑀴𑀸𑀧𑀮𑀸𑀮𑀥𑀦𑀧𑀸𑀮𑀧𑀸𑀮𑀺𑀮𑁂𑀬𑁆𑀬𑀓𑀦𑀸𑀕𑀸𑀤𑀻𑀳𑀺 𑀲𑀸𑀢𑀸𑀕𑀺𑀭𑀸𑀴𑀯𑀓𑀳𑁂𑀫𑀯𑀢𑀲𑀽𑀘𑀺𑀮𑁄𑀫𑀔𑀭𑀮𑁄𑀫𑀬𑀓𑁆𑀔𑀸𑀤𑀻𑀳𑀺 𑀯𑀺𑀦𑀺𑀧𑀸𑀢𑀕𑀢𑁂𑀳𑀺𑀧𑀺 𑀧𑀽𑀚𑀺𑀢𑁄𑀬𑁂𑀯𑀸𑀢𑀺? 𑀲𑀘𑁆𑀘𑀫𑁂𑀯𑁂𑀢𑀁, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀳𑀢𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄𑀢𑀺 𑀅𑀦𑀦𑁆𑀢𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸 𑀏𑀓𑁂𑀓𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀭𑁂𑀬𑁆𑀬𑀼𑀁 𑀏𑀢𑁆𑀢𑀓𑁂𑀳𑀺 𑀚𑀦𑁂𑀳𑀺 𑀓𑀢𑀓𑀫𑁆𑀫𑀁 𑀩𑁄𑀥𑀺𑀲𑀢𑁆𑀢𑁄 𑀲𑀬𑀫𑁂𑀯 𑀏𑀓𑀓𑁄 𑀲𑀢𑀕𑀼𑀡𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀸 ‘‘𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 𑀧𑀦 ‘‘𑀲𑀢𑁂𑀦 𑀲𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀏𑀓𑁂𑀓𑀮𑀓𑁆𑀔𑀡𑁄’’𑀢𑀺 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀸’’𑀢𑀺 𑀢𑀁 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀤𑀲𑁆𑀲𑁂𑀲𑀻𑀢𑀺 ¶ 𑀲𑀩𑁆𑀩𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀢𑀺𑀯𑀺𑀫𑁆𑀳𑀬𑀓𑀭𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺.

𑀅𑀣 𑀲𑀢𑁆𑀣𑀸 𑀆𑀓𑀸𑀲𑁂 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀓𑀽𑀮𑀁 𑀥𑀫𑁆𑀫𑀓𑀣𑀁 𑀘𑀗𑁆𑀓𑀫𑀦𑁆𑀢𑁄 𑀓𑀣𑁂𑀢𑀼𑀓𑀸𑀫𑁄 𑀆𑀓𑀸𑀲𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀺𑀢𑁆𑀣𑀢𑀁 𑀲𑀩𑁆𑀩𑀭𑀢𑀦𑀫𑀬𑀁 𑀭𑀢𑀦𑀘𑀗𑁆𑀓𑀫𑀁 𑀫𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀲𑁄 𑀬𑀸𑀘𑀺𑀢𑁄 𑀤𑁂𑀯𑀯𑀭𑁂𑀦 𑀘𑀓𑁆𑀔𑀼𑀫𑀸, 𑀅𑀢𑁆𑀣𑀁 𑀲𑀫𑁂𑀓𑁆𑀔𑀺𑀢𑁆𑀯𑀸 𑀢𑀤𑀸 𑀦𑀭𑀼𑀢𑁆𑀢𑀫𑁄;

𑀘𑀗𑁆𑀓𑀫𑀁 𑀫𑀸𑀧𑀬𑀺 𑀮𑁄𑀓𑀦𑀸𑀬𑀓𑁄, 𑀲𑀼𑀦𑀺𑀝𑁆𑀞𑀺𑀢𑀁 𑀲𑀩𑁆𑀩𑀭𑀢𑀦𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑁄𑀢𑀺 𑀲𑁄 𑀲𑀢𑁆𑀣𑀸. 𑀬𑀸𑀘𑀺𑀢𑁄𑀢𑀺 𑀧𑀞𑀫𑀫𑁂𑀯 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀥𑀫𑁆𑀫𑀤𑁂𑀲𑀦𑀸𑀬 𑀬𑀸𑀘𑀺𑀢𑁄𑀢𑀺 𑀅𑀢𑁆𑀣𑁄. 𑀤𑁂𑀯𑀯𑀭𑁂𑀦𑀸𑀢𑀺 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀼𑀦𑀸. 𑀘𑀓𑁆𑀔𑀼𑀫𑀸𑀢𑀺 𑀏𑀢𑁆𑀣 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀲𑀫𑀯𑀺𑀲𑀫𑀁 𑀯𑀺𑀪𑀸𑀯𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀘𑀓𑁆𑀔𑀼 𑀤𑀼𑀯𑀺𑀥𑀁 𑁋 𑀜𑀸𑀡𑀘𑀓𑁆𑀔𑀼, 𑀫𑀁𑀲𑀘𑀓𑁆𑀔𑀽𑀢𑀺. 𑀢𑀢𑁆𑀣 𑀜𑀸𑀡𑀘𑀓𑁆𑀔𑀼 𑀧𑀜𑁆𑀘𑀯𑀺𑀥𑀁 𑁋 𑀩𑀼𑀤𑁆𑀥𑀘𑀓𑁆𑀔𑀼, 𑀥𑀫𑁆𑀫𑀘𑀓𑁆𑀔𑀼, 𑀲𑀫𑀦𑁆𑀢𑀘𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀼, 𑀧𑀜𑁆𑀜𑀸𑀘𑀓𑁆𑀔𑀽𑀢𑀺. 𑀢𑁂𑀲𑀼 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫 𑀆𑀲𑀬𑀸𑀦𑀼𑀲𑀬𑀜𑀸𑀡𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘, 𑀬𑀁 ‘‘𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄’’𑀢𑀺 (𑀤𑀻. 𑀦𑀺. 𑁨.𑁬𑁯; 𑀫. 𑀦𑀺. 𑁧.𑁨𑁮𑁩; 𑁨.𑁩𑁩𑁯; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁯) 𑀆𑀕𑀢𑀁. 𑀥𑀫𑁆𑀫𑀘𑀓𑁆𑀔𑀼 𑀦𑀸𑀫 𑀳𑁂𑀝𑁆𑀞𑀺𑀫𑀸 ¶ 𑀢𑀬𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺, 𑀬𑀁 ‘‘𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 (𑀤𑀻. 𑀦𑀺. 𑁧.𑁩𑁫𑁫; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀧𑀝𑀺. 𑀫. 𑁨.𑁩𑁦) 𑀆𑀕𑀢𑀁. 𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ¶ , 𑀬𑀁 ‘‘𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁, 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺 (𑀤𑀻. 𑀦𑀺. 𑁨.𑁭𑁦; 𑀫. 𑀦𑀺. 𑁧.𑁨𑁮𑁨; 𑁨.𑁩𑁩𑁮; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁮) 𑀆𑀕𑀢𑀁. 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫 𑀆𑀮𑁄𑀓𑀯𑀟𑁆𑀠𑀦𑁂𑀦 𑀉𑀧𑁆𑀧𑀦𑁆𑀦𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁, 𑀬𑀁 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦𑀸’’𑀢𑀺 (𑀫. 𑀦𑀺. 𑁧.𑁧𑁪𑁮, 𑁨𑁮𑁪, 𑁩𑁮𑁫, 𑁪𑁩𑁨; 𑁨.𑁩𑁪𑁧; 𑁩.𑁮𑁨, 𑁨𑁬𑁧; 𑀫𑀳𑀸𑀯. 𑁧𑁦) 𑀆𑀕𑀢𑀁. 𑀧𑀜𑁆𑀜𑀸𑀘𑀓𑁆𑀔𑀼 𑀦𑀸𑀫 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁨; 𑀫𑀳𑀸𑀯. 𑁧𑁫; 𑀓𑀣𑀸. 𑁪𑁦𑁫; 𑀧𑀝𑀺. 𑀫. 𑁨.𑁩𑁦) 𑀏𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀺𑀜𑀸𑀡𑀁 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀆𑀕𑀢𑀁.

𑀫𑀁𑀲𑀘𑀓𑁆𑀔𑀼 𑀦𑀸𑀫 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘𑀸’’𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁨.𑁪𑁩; 𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀏𑀢𑁆𑀣 𑀧𑀲𑀸𑀤𑀫𑀁𑀲𑀘𑀓𑁆𑀔𑀼 𑀯𑀼𑀢𑁆𑀢𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁩). 𑀢𑀁 𑀧𑀦 𑀤𑀼𑀯𑀺𑀥𑀁 𑁋 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀧𑀲𑀸𑀤𑀘𑀓𑁆𑀔𑀽𑀢𑀺. 𑀢𑁂𑀲𑀼 𑀬𑁆𑀯𑀸𑀬𑀁 𑀅𑀓𑁆𑀔𑀺𑀓𑀽𑀧𑀓𑁂 𑀅𑀓𑁆𑀔𑀺𑀧𑀢𑁆𑀢𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀫𑀁𑀲𑀧𑀺𑀡𑁆𑀟𑁄 𑀬𑀢𑁆𑀣 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸 𑀲𑀫𑁆𑀪𑀯𑁄 𑀚𑀻𑀯𑀺𑀢𑀁 𑀪𑀸𑀯𑁄 𑀘𑀓𑁆𑀔𑀼𑀧𑀲𑀸𑀤𑁄 𑀓𑀸𑀬𑀧𑀲𑀸𑀤𑁄𑀢𑀺 ¶ 𑀲𑀗𑁆𑀔𑁂𑀧𑀢𑁄 𑀢𑁂𑀭𑀲 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀫𑁆𑀪𑀯𑀫𑀸𑀦𑀸𑀦𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀺 𑀙𑀢𑁆𑀢𑀺𑀁𑀲 𑀚𑀻𑀯𑀺𑀢𑀁 𑀪𑀸𑀯𑁄 𑀘𑀓𑁆𑀔𑀼𑀧𑀲𑀸𑀤𑁄 𑀓𑀸𑀬𑀧𑀲𑀸𑀤𑁄𑀢𑀺 𑀇𑀫𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀲𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺, 𑀇𑀤𑀁 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀦𑀸𑀫. 𑀬𑀁 𑀧𑀦 𑀲𑁂𑀢𑀫𑀡𑁆𑀟𑀮𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀓𑀡𑁆𑀳𑀫𑀡𑁆𑀟𑀮𑁂𑀦 𑀧𑀭𑀺𑀯𑀸𑀭𑀺𑀢𑁂 𑀤𑀺𑀝𑁆𑀞𑀫𑀡𑁆𑀟𑀮𑁂 𑀲𑀦𑁆𑀦𑀺𑀯𑀺𑀝𑁆𑀞𑀁 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀁 𑀧𑀲𑀸𑀤𑀫𑀢𑁆𑀢𑀁, 𑀇𑀤𑀁 𑀧𑀲𑀸𑀤𑀘𑀓𑁆𑀔𑀼 𑀦𑀸𑀫. 𑀲𑀩𑁆𑀩𑀸𑀦𑀺 𑀧𑀦𑁂𑀢𑀸𑀦𑀺 𑀏𑀓𑀯𑀺𑀥𑀸𑀦𑀺 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀢𑀢𑁄, 𑀤𑀼𑀯𑀺𑀥𑀸𑀦𑀺 𑀲𑀸𑀲𑀯𑀸𑀦𑀸𑀲𑀯𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄, 𑀢𑀺𑀯𑀺𑀥𑀸𑀦𑀺 𑀪𑀽𑀫𑀺𑀢𑁄 𑀉𑀧𑀸𑀤𑀺𑀡𑁆𑀡𑀢𑁆𑀢𑀺𑀓𑀢𑁄, 𑀘𑀢𑀼𑀩𑁆𑀩𑀺𑀥𑀸𑀦𑀺 𑀏𑀓𑀦𑁆𑀢𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀸𑀦𑀺𑀬𑀢𑀸𑀭𑀫𑁆𑀫𑀡𑀢𑁄, 𑀧𑀜𑁆𑀘𑀯𑀺𑀥𑀸𑀦𑀺 𑀭𑀽𑀧𑀦𑀺𑀩𑁆𑀩𑀸𑀦𑀸𑀭𑀽𑀧𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀯𑀲𑁂𑀦, 𑀙𑀩𑁆𑀩𑀺𑀥𑀸𑀦𑀺 𑀳𑁄𑀦𑁆𑀢𑀺 𑀩𑀼𑀤𑁆𑀥𑀘𑀓𑁆𑀔𑀸𑀤𑀺𑀯𑀲𑁂𑀦. 𑀇𑀘𑁆𑀘𑁂𑀯𑀫𑁂𑀢𑀸𑀦𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀘𑀓𑁆𑀔𑀽𑀦𑀺 𑀅𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀻𑀢𑀺 𑀪𑀕𑀯𑀸 𑀘𑀓𑁆𑀔𑀼𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀁 𑀲𑀫𑁂𑀓𑁆𑀔𑀺𑀢𑁆𑀯𑀸𑀢𑀺 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸, 𑀥𑀫𑁆𑀫𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀳𑀺𑀢𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀧𑀬𑀻𑀢𑀺 𑀫𑀸𑀧𑁂𑀲𑀺. 𑀮𑁄𑀓𑀦𑀸𑀬𑀓𑁄𑀢𑀺 𑀲𑀕𑁆𑀕𑀫𑁄𑀓𑁆𑀔𑀸𑀪𑀺𑀫𑀼𑀔𑀁 𑀮𑁄𑀓𑀁 𑀦𑀬𑀢𑀻𑀢𑀺 𑀮𑁄𑀓𑀦𑀸𑀬𑀓𑁄. 𑀲𑀼𑀦𑀺𑀝𑁆𑀞𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀦𑀺𑀝𑁆𑀞𑀺𑀢𑀁, 𑀧𑀭𑀺𑀬𑁄𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀭𑀢𑀦𑀦𑀺𑀫𑁆𑀫𑀺𑀢𑀦𑁆𑀢𑀺 𑀤𑀲𑀯𑀺𑀥𑀭𑀢𑀦𑀫𑀬𑀁.

𑀇𑀤𑀸𑀦𑀺 ¶ 𑀪𑀕𑀯𑀢𑁄 𑀢𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑁋

𑁧𑁧.

‘‘𑀇𑀤𑁆𑀥𑀻 𑀘 𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻, 𑀢𑀺𑀧𑀸𑀝𑀺𑀳𑀻𑀭𑁂 𑀪𑀕𑀯𑀸 𑀯𑀲𑀻 𑀅𑀳𑀼;

𑀘𑀗𑁆𑀓𑀫𑀁 𑀫𑀸𑀧𑀬𑀺 𑀮𑁄𑀓𑀦𑀸𑀬𑀓𑁄, 𑀲𑀼𑀦𑀺𑀝𑁆𑀞𑀺𑀢𑀁 𑀲𑀩𑁆𑀩𑀭𑀢𑀦𑀦𑀺𑀫𑁆𑀫𑀺𑀢’’𑀦𑁆𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 ¶ 𑀇𑀤𑁆𑀥𑀻𑀢𑀺 𑀇𑀤𑁆𑀥𑀺𑀯𑀺𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀫. 𑀢𑀁 𑀧𑀦 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀤𑀻. 𑀦𑀺. 𑁧.𑁨𑁩𑁯; 𑀫. 𑀦𑀺. 𑁧.𑁧𑁪𑁭; 𑀧𑀝𑀺. 𑀫. 𑁩.𑁧𑁦). 𑀆𑀤𑁂𑀲𑀦𑀸𑀢𑀺 𑀧𑀭𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀓𑀣𑀦𑀁 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀢𑀁 𑀲𑀸𑀯𑀓𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀜𑁆𑀘 𑀲𑀢𑀢𑀥𑀫𑁆𑀫𑀤𑁂𑀲𑀦𑀸. 𑀅𑀦𑀼𑀲𑀸𑀲𑀦𑀻𑀢𑀺 𑀅𑀦𑀼𑀲𑀸𑀲𑀦𑀺𑀧𑀸𑀝𑀺𑀳𑀸𑀭𑀺𑀬𑀁, 𑀢𑀲𑁆𑀲 𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀓𑀽𑀮𑀫𑁄𑀯𑀸𑀤𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺. 𑀢𑀢𑁆𑀣 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀦𑀼𑀲𑀸𑀲𑀦𑀺𑀧𑀸𑀝𑀺𑀳𑀸𑀭𑀺𑀬𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀘𑀺𑀡𑁆𑀡𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀦𑀼𑀲𑀸𑀲𑀦𑀺𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲, 𑀅𑀦𑀼𑀲𑀸𑀲𑀦𑀺𑀧𑀸𑀝𑀺𑀳𑀸𑀭𑀺𑀬𑀁 𑀧𑀦 𑀩𑀼𑀤𑁆𑀥𑀸𑀦𑀁 𑀲𑀢𑀢𑀥𑀫𑁆𑀫𑀤𑁂𑀲𑀦𑀸. 𑀢𑀺𑀧𑀸𑀝𑀺𑀳𑀻𑀭𑁂𑀢𑀺 ¶ 𑀏𑀢𑁂𑀲𑀼 𑀢𑀻𑀲𑀼 𑀧𑀸𑀝𑀺𑀳𑀸𑀭𑀺𑀬𑁂𑀲𑀽𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀇𑀤𑀁 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨; 𑀫. 𑀦𑀺. 𑀅𑀝𑁆𑀞. 𑁧.𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀧𑀸𑀭𑀸. 𑀅𑀝𑁆𑀞. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦);

𑀯𑀲𑀻𑀢𑀺 𑀏𑀢𑀲𑁆𑀫𑀺𑀁 𑀢𑀺𑀯𑀺𑀥𑁂𑀧𑀺 𑀧𑀸𑀝𑀺𑀳𑀸𑀭𑀺𑀬𑁂 𑀯𑀲𑀺𑀧𑁆𑀧𑀢𑁆𑀢𑁄, 𑀘𑀺𑀡𑁆𑀡𑀯𑀲𑀻𑀢𑀺 𑀅𑀢𑁆𑀣𑁄. 𑀯𑀲𑀺𑀬𑁄 𑀦𑀸𑀫 𑀧𑀜𑁆𑀘 𑀯𑀲𑀺𑀬𑁄 𑁋 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑀸. 𑀢𑀢𑁆𑀭 𑀬𑀁 𑀬𑀁 𑀛𑀸𑀦𑀁 𑀬𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀆𑀯𑀚𑁆𑀚𑀢𑀺 𑀆𑀯𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀲𑀻𑀖𑀁 𑀆𑀯𑀚𑁆𑀚𑁂𑀢𑀼𑀁 𑀲𑀫𑀢𑁆𑀣𑀢𑀸 𑀆𑀯𑀚𑁆𑀚𑀦𑀯𑀲𑀻 𑀦𑀸𑀫. 𑀢𑀣𑀸 𑀬𑀁 𑀬𑀁 𑀛𑀸𑀦𑀁 𑀬𑀣𑀺𑀘𑁆𑀙𑀓𑀁…𑀧𑁂… 𑀲𑀫𑀸𑀧𑀚𑁆𑀚𑀢𑀺 𑀲𑀫𑀸𑀧𑀚𑁆𑀚𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀲𑀻𑀖𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻 𑀦𑀸𑀫. 𑀤𑀻𑀖𑀁 𑀓𑀸𑀮𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻 𑀦𑀸𑀫. 𑀢𑀣𑁂𑀯 𑀮𑀳𑀼𑀁 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻 𑀦𑀸𑀫. 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 ¶ 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑁂𑀯 𑀳𑁄𑀦𑁆𑀢𑀺 𑀢𑀸𑀦𑀺 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀸𑀦𑁂𑀯 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀆𑀯𑀚𑁆𑀚𑀦𑀯𑀲𑀺𑀬𑀸 𑀏𑀯 𑀯𑀼𑀢𑁆𑀢𑀸𑀦𑀺. 𑀇𑀢𑀺 𑀇𑀫𑀸𑀲𑀼 𑀧𑀜𑁆𑀘𑀲𑀼 𑀯𑀲𑀻𑀲𑀼 𑀘𑀺𑀡𑁆𑀡𑀯𑀲𑀺𑀢𑀸 𑀯𑀲𑀻 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀺𑀧𑀸𑀝𑀺𑀳𑀻𑀭𑁂 𑀪𑀕𑀯𑀸 𑀯𑀲𑀻 𑀅𑀳𑀽’’𑀢𑀺.

𑀇𑀤𑀸𑀦𑀺 𑀢𑀲𑁆𑀲 𑀭𑀢𑀦𑀘𑀗𑁆𑀓𑀫𑀲𑁆𑀲 𑀦𑀺𑀫𑁆𑀫𑀺𑀢𑀯𑀺𑀥𑀸𑀦𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑁋

𑁧𑁨.

‘‘𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀬𑀸, 𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁂;

𑀣𑀫𑁆𑀪𑁂𑀯 𑀤𑀲𑁆𑀲𑁂𑀲𑀺 𑀧𑀝𑀺𑀧𑀸𑀝𑀺𑀬𑀸, 𑀘𑀗𑁆𑀓𑀫𑁂 𑀭𑀢𑀦𑀸𑀫𑀬𑁂’’𑀢𑀺. 𑁋 𑀆𑀤𑀺𑀕𑀸𑀣𑀸𑀬𑁄 𑀯𑀼𑀢𑁆𑀢𑀸;

𑀢𑀢𑁆𑀣 ¶ 𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼. 𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁂𑀢𑀺 𑀫𑀳𑀸𑀫𑁂𑀭𑀼𑀲𑀗𑁆𑀔𑀸𑀢𑁂 𑀲𑁂𑀝𑁆𑀞𑀧𑀩𑁆𑀩𑀢𑁂. 𑀣𑀫𑁆𑀪𑁂𑀯𑀸𑀢𑀺 𑀣𑀫𑁆𑀪𑁂 𑀯𑀺𑀬 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀬𑁂 𑀲𑀺𑀦𑁂𑀭𑀼𑀧𑀩𑁆𑀩𑀢𑀸, 𑀢𑁂 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀲𑀼𑀯𑀡𑁆𑀡𑀣𑀫𑁆𑀪𑁂 𑀯𑀺𑀬 𑀓𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀭𑀢𑀦𑀸𑀫𑀬𑁂𑀢𑀺 𑀭𑀢𑀦𑀫𑀬𑁂.

𑁧𑁩. 𑀤𑀲𑀲𑀳𑀲𑁆𑀲𑀻 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀭𑀢𑀦𑀘𑀗𑁆𑀓𑀫𑀁 𑀧𑀦 𑀪𑀕𑀯𑀸 𑀫𑀸𑀧𑁂𑀦𑁆𑀢𑁄 𑀢𑀲𑁆𑀲 𑀏𑀓𑀁 𑀓𑁄𑀝𑀺𑀁 𑀲𑀩𑁆𑀩𑀧𑀭𑀺𑀬𑀦𑁆𑀢𑀁 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀏𑀓𑀁 𑀓𑁄𑀝𑀺𑀁 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀁 𑀓𑀢𑁆𑀯𑀸 𑀫𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀤𑀲𑀲𑀳𑀲𑁆𑀲𑀻 𑀅𑀢𑀺𑀓𑁆𑀓𑀫𑁆𑀫, 𑀘𑀗𑁆𑀓𑀫𑀁 𑀫𑀸𑀧𑀬𑀻 𑀚𑀺𑀦𑁄;

𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀧𑀲𑁆𑀲𑁂, 𑀘𑀗𑁆𑀓𑀫𑁂 𑀭𑀢𑀦𑀸𑀫𑀬𑁂’’𑀢𑀺.

𑀢𑀢𑁆𑀣 𑀚𑀺𑀦𑁄𑀢𑀺 𑀓𑀺𑀮𑁂𑀲𑀸𑀭𑀺𑀚𑀬𑀦𑀢𑁄 𑀚𑀺𑀦𑁄. 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀧𑀲𑁆𑀲𑁂𑀢𑀺 𑀢𑀲𑁆𑀲 𑀧𑀦 𑀏𑀯𑀁 𑀦𑀺𑀫𑁆𑀫𑀺𑀢𑀲𑁆𑀲 𑀘𑀗𑁆𑀓𑀫𑀲𑁆𑀲 ¶ 𑀉𑀪𑀬𑀧𑀲𑁆𑀲𑁂𑀲𑀼 𑀲𑀼𑀯𑀡𑁆𑀡𑀫𑀬𑀸 𑀧𑀭𑀫𑀭𑀫𑀡𑀻𑀬𑀸 𑀫𑀭𑀺𑀬𑀸𑀤𑀪𑀽𑀫𑀺 𑀅𑀳𑁄𑀲𑀺, 𑀫𑀚𑁆𑀛𑁂 𑀫𑀡𑀺𑀫𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪. 𑀢𑀼𑀮𑀸𑀲𑀗𑁆𑀖𑀸𑀝𑀸𑀢𑀺 𑀢𑀼𑀮𑀸𑀬𑀼𑀕𑀴𑀸, 𑀢𑀸 𑀦𑀸𑀦𑀸𑀭𑀢𑀦𑀫𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀯𑀕𑁆𑀕𑀸𑀢𑀺 𑀅𑀦𑀼𑀭𑀽𑀧𑀸. 𑀲𑁄𑀯𑀡𑁆𑀡𑀨𑀮𑀓𑀢𑁆𑀣𑀢𑀸𑀢𑀺 𑀲𑁄𑀯𑀡𑁆𑀡𑀫𑀬𑁂𑀳𑀺 𑀨𑀮𑀓𑁂𑀳𑀺 𑀅𑀢𑁆𑀣𑀢𑀸, 𑀢𑀼𑀮𑀸𑀲𑀗𑁆𑀖𑀸𑀢𑀸𑀦𑀁 𑀉𑀧𑀭𑀺 𑀲𑀼𑀯𑀡𑁆𑀡𑀫𑀬𑁄 𑀧𑀤𑀭𑀘𑁆𑀙𑀤𑁄𑀢𑀺 𑀅𑀢𑁆𑀣𑁄. 𑀯𑁂𑀤𑀺𑀓𑀸 𑀲𑀩𑁆𑀩𑀲𑁄𑀯𑀡𑁆𑀡𑀸𑀢𑀺 𑀯𑁂𑀤𑀺𑀓𑀸 𑀧𑀦 𑀲𑀩𑁆𑀩𑀸𑀧𑀺 𑀲𑀼𑀯𑀡𑁆𑀡𑀫𑀬𑀸, 𑀬𑀸 𑀧𑀦𑁂𑀲𑀸 𑀘𑀗𑁆𑀓𑀫𑀦𑀧𑀭𑀺𑀓𑁆𑀔𑁂𑀧𑀯𑁂𑀤𑀺𑀓𑀸, 𑀲𑀸 𑀏𑀓𑀸𑀯 𑀅𑀜𑁆𑀜𑁂𑀳𑀺 𑀭𑀢𑀦𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀼𑀪𑀢𑁄 𑀧𑀲𑁆𑀲𑁂𑀲𑀼 𑀦𑀺𑀫𑁆𑀫𑀺𑀢𑀸𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀦𑀺𑀫𑁆𑀫𑀺𑀢𑀸. 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑁧𑁫. 𑀫𑀡𑀺𑀫𑀼𑀢𑁆𑀢𑀸𑀯𑀸𑀮𑀼𑀓𑀸𑀓𑀺𑀡𑁆𑀡𑀸𑀢𑀺 ¶ 𑀫𑀡𑀺𑀫𑀼𑀢𑁆𑀢𑀸𑀫𑀬𑀯𑀸𑀮𑀼𑀓𑀸𑀓𑀺𑀡𑁆𑀡𑀸. 𑀅𑀣 𑀯𑀸 𑀫𑀡𑀬𑁄 𑀘 𑀫𑀼𑀢𑁆𑀢𑀸 𑀘 𑀯𑀸𑀮𑀼𑀓𑀸 𑀘 𑀫𑀡𑀺𑀫𑀼𑀢𑁆𑀢𑀸𑀯𑀸𑀮𑀼𑀓𑀸. 𑀢𑀸𑀳𑀺 𑀫𑀡𑀺𑀫𑀼𑀢𑁆𑀢𑀸𑀯𑀸𑀮𑀼𑀓𑀸𑀳𑀺 𑀆𑀓𑀺𑀡𑁆𑀡𑀸 𑀲𑀦𑁆𑀣𑀢𑀸𑀢𑀺 𑀫𑀡𑀺𑀫𑀼𑀢𑁆𑀢𑀸𑀯𑀸𑀮𑀼𑀓𑀸𑀓𑀺𑀡𑁆𑀡𑀸. 𑀦𑀺𑀫𑁆𑀫𑀺𑀢𑁄𑀢𑀺 𑀇𑀫𑀺𑀦𑀸𑀓𑀸𑀭𑁂𑀦 𑀦𑀺𑀫𑁆𑀫𑀺𑀢𑁄 𑀓𑀢𑁄. 𑀭𑀢𑀦𑀸𑀫𑀬𑁄𑀢𑀺 𑀲𑀩𑁆𑀩𑀭𑀢𑀦𑀫𑀬𑁄, 𑀘𑀗𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸𑀧𑀺 𑀤𑀲 𑀤𑀺𑀲𑀸 𑀑𑀪𑀸𑀲𑁂𑀢𑀺 𑀧𑀓𑀸𑀲𑁂𑀢𑀺. 𑀲𑀢𑀭𑀁𑀲𑀻𑀯𑀸𑀢𑀺 𑀲𑀳𑀲𑁆𑀲𑀭𑀁𑀲𑀺𑀆𑀤𑀺𑀘𑁆𑀘𑁄 𑀯𑀺𑀬. 𑀉𑀕𑁆𑀕𑀢𑁄𑀢𑀺 𑀉𑀤𑀺𑀢𑁄. 𑀬𑀣𑀸 𑀧𑀦 𑀅𑀩𑁆𑀪𑀼𑀕𑁆𑀕𑀢𑁄 𑀲𑀳𑀲𑁆𑀲𑀭𑀁𑀲𑀺 𑀲𑀩𑁆𑀩𑀸𑀧𑀺 𑀤𑀲 𑀤𑀺𑀲𑀸 𑀑𑀪𑀸𑀲𑁂𑀢𑀺, 𑀏𑀯𑀫𑁂𑀯 𑀏𑀲𑁄𑀧𑀺 𑀲𑀩𑁆𑀩𑀭𑀢𑀦𑀫𑀬𑁄 𑀘𑀗𑁆𑀓𑀫𑁄 𑀑𑀪𑀸𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 ¶ 𑀧𑀦 𑀦𑀺𑀝𑁆𑀞𑀺𑀢𑁂 𑀘𑀗𑁆𑀓𑀫𑁂 𑀢𑀢𑁆𑀣 𑀪𑀕𑀯𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑁋

𑁧𑁬.

‘‘𑀢𑀲𑁆𑀫𑀺𑀁 𑀘𑀗𑁆𑀓𑀫𑀦𑁂 𑀥𑀻𑀭𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀯𑀺𑀭𑁄𑀘𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑁄, 𑀘𑀗𑁆𑀓𑀫𑁂 𑀘𑀗𑁆𑀓𑀫𑀻 𑀚𑀺𑀦𑁄.

𑁧𑁭.

‘‘𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀘𑀗𑁆𑀓𑀫𑀦𑁂 𑀑𑀓𑀺𑀭𑀦𑁆𑀢𑀺, 𑀲𑀩𑁆𑀩𑁂 𑀤𑁂𑀯𑀸 𑀲𑀫𑀸𑀕𑀢𑀸.

𑁧𑁮.

‘‘𑀧𑀲𑁆𑀲𑀦𑁆𑀢𑀺 𑀢𑀁 𑀤𑁂𑀯𑀲𑀗𑁆𑀖𑀸, 𑀤𑀲𑀲𑀳𑀲𑁆𑀲𑀻 𑀧𑀫𑁄𑀤𑀺𑀢𑀸;

𑀦𑀫𑀲𑁆𑀲𑀫𑀸𑀦𑀸 𑀦𑀺𑀧𑀢𑀦𑁆𑀢𑀺, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸’’𑀢𑀺. 𑁋 𑀕𑀸𑀣𑀸𑀬𑁄 𑀯𑀼𑀢𑁆𑀢𑀸;

𑀢𑀢𑁆𑀣 𑀥𑀻𑀭𑁄𑀢𑀺 𑀥𑀺𑀢𑀺𑀬𑀼𑀢𑁆𑀢𑁄. 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀮𑀸𑀤𑀻𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑀦𑁆𑀢𑀺 𑀤𑁂𑀯𑀮𑁄𑀓𑁂 𑀪𑀯𑀁 𑀚𑀸𑀢𑀁 𑀤𑀺𑀩𑁆𑀩𑀁. 𑀧𑀸𑀭𑀺𑀙𑀢𑁆𑀢𑀓𑀦𑁆𑀢𑀺 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑁄 𑀧𑀭𑀫𑀤𑀲𑁆𑀲𑀦𑀻𑀬𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑀭𑀼𑀓𑁆𑀔𑁄 𑀦𑀺𑀩𑁆𑀩𑀢𑁆𑀢𑀺. 𑀬𑀲𑁆𑀫𑀺𑀁 𑀧𑀼𑀧𑁆𑀨𑀺𑀢𑁂 𑀲𑀓𑀮𑀁 𑀤𑁂𑀯𑀦𑀕𑀭𑀁 𑀏𑀓𑀲𑀼𑀭𑀪𑀺𑀕𑀦𑁆𑀥𑀯𑀸𑀲𑀺𑀢𑀁 𑀳𑁄𑀢𑀺, 𑀢𑀲𑁆𑀲 𑀓𑀼𑀲𑀼𑀫𑀭𑁂𑀡𑀼𑀑𑀓𑀺𑀡𑁆𑀡𑀸𑀦𑀺 𑀦𑀯𑀓𑀦𑀓𑀯𑀺𑀫𑀸𑀦𑀸𑀦𑀺 𑀧𑀺𑀜𑁆𑀚𑀭𑀸𑀦𑀺 𑀳𑀼𑀢𑁆𑀯𑀸 𑀔𑀸𑀬𑀦𑁆𑀢𑀺. 𑀇𑀫𑀲𑁆𑀲 𑀧𑀦 𑀧𑀸𑀭𑀺𑀘𑁆𑀙𑀢𑁆𑀢𑀓𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀜𑁆𑀘 𑀧𑀸𑀭𑀺𑀘𑁆𑀙𑀢𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀗𑁆𑀓𑀫𑁂 𑀑𑀓𑀺𑀭𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀭𑀢𑀦𑀘𑀗𑁆𑀓𑀫𑁂 𑀅𑀯𑀓𑀺𑀭𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀼𑀧𑁆𑀨𑁂𑀦 𑀢𑀲𑁆𑀫𑀺𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑀁 𑀪𑀕𑀯𑀦𑁆𑀢𑀁 𑀧𑀽𑀚𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂 𑀤𑁂𑀯𑀸𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀤𑀬𑁄 𑀤𑁂𑀯𑀸. 𑀢𑁂𑀦𑀸𑀳 ‘‘𑀧𑀲𑁆𑀲𑀦𑁆𑀢𑀺 ¶ 𑀢𑀁 𑀤𑁂𑀯𑀲𑀗𑁆𑀖𑀸’’𑀢𑀺. 𑀢𑀁 𑀪𑀕𑀯𑀦𑁆𑀢𑀁 𑀭𑀢𑀦𑀘𑀗𑁆𑀓𑀫𑀦𑁂 𑀘𑀗𑁆𑀓𑀫𑀦𑁆𑀢𑀁 𑀲𑀓𑁂𑀲𑀼 𑀆𑀮𑀬𑁂𑀲𑀼𑀧𑀺 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀲𑀲𑀳𑀲𑁆𑀲𑀻𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀤𑀲𑀲𑀳𑀲𑁆𑀲𑀺𑀬𑀁 𑀤𑁂𑀯𑀲𑀗𑁆𑀖𑀸 𑀢𑀁 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀫𑁄𑀤𑀺𑀢𑀸𑀢𑀺 𑀧𑀫𑀼𑀤𑀺𑀢𑀸. 𑀦𑀺𑀧𑀢𑀦𑁆𑀢𑀻𑀢𑀺 ¶ 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀢𑀼𑀝𑁆𑀞𑀳𑀝𑁆𑀞𑀸𑀢𑀺 𑀧𑀻𑀢𑀺𑀯𑀲𑁂𑀦 𑀢𑀼𑀝𑁆𑀞𑀳𑀝𑁆𑀞𑀸. 𑀧𑀫𑁄𑀤𑀺𑀢𑀸𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁂𑀳𑀺 𑀢𑀸𑀯𑀢𑀺𑀁𑀲𑀸𑀤𑀺𑀤𑁂𑀯𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄, 𑀇𑀢𑀭𑀣𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀢𑁄 𑀦 𑀫𑀼𑀘𑁆𑀘𑀢𑀺. 𑀅𑀣 𑀯𑀸 𑀧𑀫𑁄𑀤𑀺𑀢𑀸 𑀢𑀁 𑀪𑀕𑀯𑀦𑁆𑀢𑀁 𑀧𑀲𑁆𑀲𑀦𑁆𑀢𑀺, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸 𑀢𑀳𑀺𑀁 𑀢𑀳𑀺𑀁 𑀲𑀦𑁆𑀦𑀺𑀧𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑁂 𑀧𑀲𑁆𑀲𑀺𑀁𑀲𑀼 𑀬𑁂 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑁋

𑁧𑁯.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀉𑀤𑀕𑁆𑀕𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀧𑀲𑁆𑀲𑀦𑁆𑀢𑀺 𑀮𑁄𑀓𑀦𑀸𑀬𑀓𑀁.

𑁨𑁦.

‘‘𑀲𑀤𑁂𑀯𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀭𑀓𑁆𑀔𑀲𑀸 ¶ , 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀅𑀣 𑀯𑀸𑀧𑀺 𑀓𑀺𑀦𑁆𑀦𑀭𑀸;

𑀧𑀲𑁆𑀲𑀦𑁆𑀢𑀺 𑀢𑀁 𑀮𑁄𑀓𑀳𑀺𑀢𑀸𑀦𑀼𑀓𑀫𑁆𑀧𑀓𑀁, 𑀦𑀪𑁂𑀯 𑀅𑀘𑁆𑀘𑀼𑀕𑁆𑀕𑀢𑀘𑀦𑁆𑀤𑀫𑀡𑁆𑀟𑀮𑀁.

𑁨𑁧.

‘‘𑀆𑀪𑀲𑁆𑀲𑀭𑀸 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸 𑀅𑀓𑀦𑀺𑀝𑁆𑀞𑀸 𑀘 𑀤𑁂𑀯𑀢𑀸;

𑀲𑀼𑀲𑀼𑀤𑁆𑀥𑀲𑀼𑀓𑁆𑀓𑀯𑀢𑁆𑀣𑀯𑀲𑀦𑀸, 𑀢𑀺𑀝𑁆𑀞𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

𑁨𑁨.

‘‘𑀫𑀼𑀜𑁆𑀘𑀦𑁆𑀢𑀺 𑀧𑀼𑀧𑁆𑀨𑀁 𑀧𑀦 𑀧𑀜𑁆𑀘𑀯𑀡𑁆𑀡𑀺𑀓𑀁, 𑀫𑀦𑁆𑀤𑀸𑀭𑀯𑀁 𑀘𑀦𑁆𑀤𑀦𑀘𑀼𑀡𑁆𑀡𑀫𑀺𑀲𑁆𑀲𑀺𑀢𑀁;

𑀪𑀫𑁂𑀦𑁆𑀢𑀺 𑀘𑁂𑀮𑀸𑀦𑀺 𑀘 𑀅𑀫𑁆𑀩𑀭𑁂 𑀢𑀤𑀸, 𑀅𑀳𑁄 𑀚𑀺𑀦𑁄 𑀮𑁄𑀓𑀳𑀺𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸𑀬𑁄 𑀯𑀼𑀢𑁆𑀢𑀸.

𑀢𑀢𑁆𑀣 𑀉𑀤𑀕𑁆𑀕𑀘𑀺𑀢𑁆𑀢𑀸𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀸. 𑀲𑀼𑀫𑀦𑀸𑀢𑀺 𑀉𑀤𑀕𑁆𑀕𑀘𑀺𑀢𑁆𑀢𑀢𑁆𑀢𑀸 𑀏𑀯 𑀲𑀼𑀫𑀦𑀸. 𑀮𑁄𑀓𑀳𑀺𑀢𑀸𑀦𑀼𑀓𑀫𑁆𑀧𑀓𑀦𑁆𑀢𑀺 𑀮𑁄𑀓𑀳𑀺𑀢𑀜𑁆𑀘 𑀮𑁄𑀓𑀸𑀦𑀼𑀓𑀫𑁆𑀧𑀓𑀜𑁆𑀘. 𑀮𑁄𑀓𑀳𑀺𑀢𑁂𑀦 𑀯𑀸 𑀅𑀦𑀼𑀓𑀫𑁆𑀧𑀓𑀁 𑀮𑁄𑀓𑀳𑀺𑀢𑀸𑀦𑀼𑀓𑀫𑁆𑀧𑀓𑀁. 𑀦𑀪𑁂𑀯 𑀅𑀘𑁆𑀘𑀼𑀕𑁆𑀕𑀢𑀘𑀦𑁆𑀤𑀫𑀡𑁆𑀟𑀮𑀦𑁆𑀢𑀺 𑀏𑀢𑁆𑀣 𑀆𑀓𑀸𑀲𑁂 𑀅𑀪𑀺𑀦𑀯𑁄𑀤𑀺𑀢𑀁 𑀧𑀭𑀺𑀧𑀼𑀡𑁆𑀡𑀁 𑀲𑀩𑁆𑀩𑁄𑀧𑀤𑁆𑀤𑀯𑀯𑀺𑀦𑀺𑀫𑀼𑀢𑁆𑀢𑀁 𑀲𑀭𑀤𑀲𑀫𑀬𑁂 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀦𑀬𑀦𑀸𑀦𑀦𑁆𑀤𑀓𑀭𑀁 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀆𑀪𑀲𑁆𑀲𑀭𑀸𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀸𑀪𑀅𑀧𑁆𑀧𑀫𑀸𑀡𑀸𑀪𑀆𑀪𑀲𑁆𑀲𑀭𑀸𑀧𑀭𑀺𑀢𑁆𑀢𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑁂𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀲𑀩𑁆𑀩𑁂𑀯 𑀕𑀳𑀺𑀢𑀸𑀢𑀺 ¶ 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀪𑀓𑀺𑀡𑁆𑀳𑀸𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀲𑀼𑀪𑀅𑀧𑁆𑀧𑀫𑀸𑀡𑀲𑀼𑀪𑀲𑀼𑀪𑀓𑀺𑀡𑁆𑀳𑀸𑀧𑀭𑀺𑀢𑁆𑀢𑀸𑀤𑀺𑀪𑁂𑀤𑁂𑀦 𑀢𑀢𑀺𑀬𑀚𑁆𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸 𑀲𑀩𑁆𑀩𑁂𑀯 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀳𑀧𑁆𑀨𑀮𑀸𑀢𑀺 𑀯𑀺𑀧𑀼𑀮𑀸 𑀨𑀮𑀸𑀢𑀺 𑀯𑁂𑀳𑀧𑁆𑀨𑀮𑀸. 𑀢𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀸 𑀅𑀲𑀜𑁆𑀜𑀲𑀢𑁆𑀢𑁂𑀳𑀺 𑀏𑀓𑀢𑀮𑀯𑀸𑀲𑀺𑀦𑁄. 𑀳𑁂𑀝𑁆𑀞𑀸 𑀧𑀦 𑀧𑀞𑀫𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀬𑁄 𑀤𑀲𑁆𑀲𑀺𑀢𑀸. 𑀢𑀲𑁆𑀫𑀸 𑀇𑀥 𑀦 𑀤𑀲𑁆𑀲𑀺𑀢𑀸. 𑀘𑀓𑁆𑀔𑀼𑀲𑁄𑀢𑀸𑀦𑀫𑀪𑀸𑀯𑀢𑁄 𑀅𑀲𑀜𑁆𑀜𑀲𑀢𑁆𑀢𑀸 𑀘 𑀅𑀭𑀽𑀧𑀺𑀦𑁄 𑀘 𑀇𑀥 𑀦 𑀉𑀤𑁆𑀤𑀺𑀝𑁆𑀞𑀸. 𑀅𑀓𑀦𑀺𑀝𑁆𑀞𑀸 𑀘 𑀤𑁂𑀯𑀢𑀸𑀢𑀺 𑀇𑀥𑀸𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀯𑀺𑀳𑀸𑀢𑀧𑁆𑀧𑀲𑀼𑀤𑀲𑁆𑀲𑀸𑀲𑀼𑀤𑀲𑁆𑀲𑀺𑀅𑀓𑀦𑀺𑀝𑁆𑀞𑀲𑀗𑁆𑀔𑀸𑀢𑀸 𑀧𑀜𑁆𑀘𑀧𑀺 𑀲𑀼𑀤𑁆𑀥𑀸𑀯𑀸𑀲𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀲𑀼𑀤𑁆𑀥𑀲𑀼𑀓𑁆𑀓𑀯𑀢𑁆𑀣𑀯𑀲𑀦𑀸𑀢𑀺 𑀲𑀼𑀝𑁆𑀞𑀼 𑀲𑀼𑀤𑁆𑀥𑀸𑀦𑀺 𑀲𑀼𑀲𑀼𑀤𑁆𑀥𑀸𑀦𑀺 𑀲𑀼𑀓𑁆𑀓𑀸𑀦𑀺 𑀑𑀤𑀸𑀢𑀸𑀦𑀺. 𑀲𑀼𑀲𑀼𑀤𑁆𑀥𑀸𑀦𑀺 𑀲𑀼𑀓𑁆𑀓𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸𑀦𑀺 𑀘𑁂𑀯 𑀧𑀸𑀭𑀼𑀢𑀸𑀦𑀺 𑀘 𑀬𑁂𑀳𑀺 ¶ 𑀢𑁂 𑀲𑀼𑀲𑀼𑀤𑁆𑀥𑀲𑀼𑀓𑁆𑀓𑀯𑀢𑁆𑀣𑀯𑀲𑀦𑀸, 𑀧𑀭𑀺𑀤𑀳𑀺𑀢𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀯𑀢𑁆𑀣𑀸𑀢𑀺 𑀅𑀢𑁆𑀣𑁄. ‘‘𑀲𑀼𑀲𑀼𑀤𑁆𑀥𑀲𑀼𑀓𑁆𑀓𑀯𑀲𑀦𑀸’’𑀢𑀺𑀧𑀺 𑀧𑀸𑀞𑁄. 𑀧𑀜𑁆𑀚𑀮𑀻𑀓𑀢𑀸𑀢𑀺 𑀓𑀢𑀧𑀜𑁆𑀚𑀮𑀺𑀓𑀸 𑀓𑀫𑀮𑀫𑀓𑀼𑀮𑀲𑀤𑀺𑀲𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺.

𑀫𑀼𑀜𑁆𑀘𑀦𑁆𑀢𑀻𑀢𑀺 ¶ 𑀑𑀓𑀺𑀭𑀦𑁆𑀢𑀺. 𑀧𑀼𑀧𑁆𑀨𑀁 𑀧𑀦𑀸𑀢𑀺 𑀓𑀼𑀲𑀼𑀫𑀁 𑀧𑀦. ‘‘𑀧𑀼𑀧𑁆𑀨𑀸𑀦𑀺 𑀯𑀸’’𑀢𑀺𑀧𑀺 𑀧𑀸𑀞𑁄, 𑀯𑀘𑀦𑀯𑀺𑀧𑀭𑀺𑀬𑀸𑀲𑁄 𑀤𑀝𑁆𑀞𑀩𑁆𑀩𑁄, 𑀅𑀢𑁆𑀣𑁄 𑀧𑀦𑀲𑁆𑀲 𑀲𑁄𑀬𑁂𑀯. 𑀧𑀜𑁆𑀘𑀯𑀡𑁆𑀡𑀺𑀓𑀦𑁆𑀢𑀺 𑀧𑀜𑁆𑀘𑀯𑀡𑁆𑀡𑀁 𑁋 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀓𑀯𑀡𑁆𑀡𑀯𑀲𑁂𑀦 𑀧𑀜𑁆𑀘𑀯𑀡𑁆𑀡𑀁. 𑀘𑀦𑁆𑀤𑀦𑀘𑀼𑀡𑁆𑀡𑀫𑀺𑀲𑁆𑀲𑀺𑀢𑀦𑁆𑀢𑀺 𑀘𑀦𑁆𑀤𑀦𑀘𑀼𑀡𑁆𑀡𑁂𑀦 𑀫𑀺𑀲𑁆𑀲𑀺𑀢𑀁. 𑀪𑀫𑁂𑀦𑁆𑀢𑀺 𑀘𑁂𑀮𑀸𑀦𑀻𑀢𑀺 𑀪𑀫𑀬𑀦𑁆𑀢𑀺 𑀯𑀢𑁆𑀣𑀸𑀦𑀺. 𑀅𑀳𑁄 𑀚𑀺𑀦𑁄 𑀮𑁄𑀓𑀳𑀺𑀢𑀸𑀦𑀼𑀓𑀫𑁆𑀧𑀓𑁄𑀢𑀺 ‘‘𑀅𑀳𑁄 𑀚𑀺𑀦𑁄 𑀮𑁄𑀓𑀳𑀺𑀢𑁄 𑀅𑀳𑁄 𑀘 𑀮𑁄𑀓𑀳𑀺𑀢𑀸𑀦𑀼𑀓𑀫𑁆𑀧𑀓𑁄 𑀅𑀳𑁄 𑀓𑀸𑀭𑀼𑀡𑀺𑀓𑁄’’𑀢𑀺 𑀏𑀯𑀫𑀸𑀤𑀻𑀦𑀺 𑀣𑀼𑀢𑀺𑀯𑀘𑀦𑀸𑀦𑀺 𑀉𑀕𑁆𑀕𑀺𑀭𑀦𑁆𑀢𑀸. 𑀫𑀼𑀜𑁆𑀘𑀦𑁆𑀢𑀺 𑀧𑀼𑀧𑁆𑀨𑀁 𑀪𑀫𑀬𑀦𑁆𑀢𑀺 𑀘𑁂𑀮𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀤𑀸𑀦𑀺 𑀢𑁂𑀳𑀺 𑀧𑀬𑀼𑀢𑁆𑀢𑀸𑀦𑀺 𑀣𑀼𑀢𑀺𑀯𑀘𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 𑀇𑀫𑀸 𑀕𑀸𑀣𑀸𑀬𑁄 𑀯𑀼𑀢𑁆𑀢𑀸 𑁋

𑁨𑁩.

‘‘𑀢𑀼𑀯𑀁 𑀲𑀢𑁆𑀣𑀸 𑀘 𑀓𑁂𑀢𑀽 𑀘, 𑀥𑀚𑁄 𑀬𑀽𑀧𑁄 𑀘 𑀧𑀸𑀡𑀺𑀦𑀁;

𑀧𑀭𑀸𑀬𑀦𑁄 𑀧𑀢𑀺𑀝𑁆𑀞𑀸 𑀘, 𑀤𑀻𑀧𑁄 𑀘 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑁨𑁪.

‘‘𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀬𑀸, 𑀤𑁂𑀯𑀢𑀸𑀬𑁄 𑀫𑀳𑀺𑀤𑁆𑀥𑀺𑀓𑀸;

𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀫𑀲𑁆𑀲𑀦𑁆𑀢𑀺, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸.

𑁨𑁫.

‘‘𑀤𑁂𑀯𑀢𑀸 𑀤𑁂𑀯𑀓𑀜𑁆𑀜𑀸 𑀘, 𑀧𑀲𑀦𑁆𑀦𑀸 𑀢𑀼𑀝𑁆𑀞𑀫𑀸𑀦𑀲𑀸;

𑀧𑀜𑁆𑀘𑀯𑀡𑁆𑀡𑀺𑀓𑀧𑀼𑀧𑁆𑀨𑁂𑀳𑀺, 𑀧𑀽𑀚𑀬𑀦𑁆𑀢𑀺 𑀦𑀭𑀸𑀲𑀪𑀁.

𑁨𑁬.

‘‘𑀧𑀲𑁆𑀲𑀦𑁆𑀢𑀺 𑀢𑀁 𑀤𑁂𑀯𑀲𑀗𑁆𑀖𑀸, 𑀧𑀲𑀦𑁆𑀦𑀸 𑀢𑀼𑀝𑁆𑀞𑀫𑀸𑀦𑀲𑀸;

𑀧𑀜𑁆𑀘𑀯𑀡𑁆𑀡𑀺𑀓𑀧𑀼𑀧𑁆𑀨𑁂𑀳𑀺, 𑀧𑀽𑀚𑀬𑀦𑁆𑀢𑀺 𑀦𑀭𑀸𑀲𑀪𑀁.

𑁨𑁭.

‘‘𑀅𑀳𑁄 ¶ 𑀅𑀘𑁆𑀙𑀭𑀺𑀬𑀁 𑀮𑁄𑀓𑁂, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀦 𑀫𑁂𑀤𑀺𑀲𑀁 𑀪𑀽𑀢𑀧𑀼𑀩𑁆𑀩𑀁, 𑀅𑀘𑁆𑀙𑁂𑀭𑀁 𑀮𑁄𑀫𑀳𑀁𑀲𑀦𑀁.

𑁨𑁮.

‘‘𑀲𑀓𑀲𑀓𑀫𑁆𑀳𑀺 𑀪𑀯𑀦𑁂, 𑀦𑀺𑀲𑀻𑀤𑀺𑀢𑁆𑀯𑀸𑀦 𑀤𑁂𑀯𑀢𑀸;

𑀳𑀲𑀦𑁆𑀢𑀺 𑀢𑀸 𑀫𑀳𑀸𑀳𑀲𑀺𑀢𑀁, 𑀤𑀺𑀲𑁆𑀯𑀸𑀦𑀘𑁆𑀙𑁂𑀭𑀓𑀁 𑀦𑀪𑁂.

𑁨𑁯.

‘‘𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸, 𑀢𑀺𑀡𑀧𑀦𑁆𑀣𑀦𑀺𑀯𑀸𑀲𑀺𑀦𑁄;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸.

𑁩𑁦.

‘‘𑀬𑁂𑀧𑀺 𑀤𑀻𑀖𑀸𑀬𑀼𑀓𑀸 𑀦𑀸𑀕𑀸, 𑀧𑀼𑀜𑁆𑀜𑀯𑀦𑁆𑀢𑁄 𑀫𑀳𑀺𑀤𑁆𑀥𑀺𑀓𑁄;

𑀧𑀫𑁄𑀤𑀺𑀢𑀸 𑀦𑀫𑀲𑁆𑀲𑀦𑁆𑀢𑀺, 𑀧𑀽𑀚𑀬𑀦𑁆𑀢𑀺 𑀦𑀭𑀼𑀢𑁆𑀢𑀫𑀁.

𑁩𑁧.

‘‘𑀲𑀗𑁆𑀕𑀻𑀢𑀺𑀬𑁄 ¶ 𑀧𑀯𑀢𑁆𑀢𑁂𑀦𑁆𑀢𑀺, 𑀅𑀫𑁆𑀩𑀭𑁂 𑀅𑀦𑀺𑀮𑀜𑁆𑀚𑀲𑁂;

𑀘𑀫𑁆𑀫𑀦𑀤𑁆𑀥𑀸𑀦𑀺 𑀯𑀸𑀤𑁂𑀦𑁆𑀢𑀺, 𑀤𑀺𑀲𑁆𑀯𑀸𑀦𑀘𑁆𑀙𑁂𑀭𑀓𑀁 𑀦𑀪𑁂.

𑁩𑁨.

‘‘𑀲𑀗𑁆𑀔𑀸 𑀘 𑀧𑀡𑀯𑀸 𑀘𑁂𑀯, 𑀅𑀣𑁄𑀧𑀺 𑀟𑀺𑀡𑁆𑀟𑀺𑀫𑀸 𑀩𑀳𑀽;

𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀯𑀚𑁆𑀚𑀦𑁆𑀢𑀺, 𑀤𑀺𑀲𑁆𑀯𑀸𑀦𑀘𑁆𑀙𑁂𑀭𑀓𑀁 𑀦𑀪𑁂.

𑁩𑁩.

‘‘𑀅𑀩𑁆𑀪𑀼𑀢𑁄 𑀯𑀢 𑀦𑁄 𑀅𑀚𑁆𑀚, 𑀉𑀧𑁆𑀧𑀚𑁆𑀚𑀺 𑀮𑁄𑀫𑀳𑀁𑀲𑀦𑁄;

𑀥𑀼𑀯𑀫𑀢𑁆𑀣𑀲𑀺𑀤𑁆𑀥𑀺𑀁 𑀮𑀪𑀸𑀫, 𑀔𑀡𑁄 𑀦𑁄 𑀧𑀝𑀺𑀧𑀸𑀤𑀺𑀢𑁄.

𑁩𑁪.

‘‘𑀩𑀼𑀤𑁆𑀥𑁄𑀢𑀺 𑀢𑁂𑀲𑀁 𑀲𑀼𑀢𑁆𑀯𑀸𑀦, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀓𑀣𑀬𑀦𑁆𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

𑁩𑁫.

‘‘𑀳𑀺𑀗𑁆𑀓𑀸𑀭𑀸 𑀲𑀸𑀥𑀼𑀓𑀸𑀭𑀸 𑀘, 𑀉𑀓𑁆𑀓𑀼𑀝𑁆𑀞𑀺 𑀲𑀫𑁆𑀧𑀳𑀁𑀲𑀦𑀁;

𑀧𑀚𑀸 𑀘 𑀯𑀺𑀯𑀺𑀥𑀸 𑀕𑀕𑀦𑁂, 𑀯𑀢𑁆𑀢𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

𑁩𑁬.

‘‘𑀕𑀸𑀬𑀦𑁆𑀢𑀺 𑀲𑁂𑀴𑁂𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺 𑀘, 𑀪𑀼𑀚𑀸𑀦𑀺 𑀧𑁄𑀣𑁂𑀦𑁆𑀢𑀺 𑀘 𑀦𑀘𑁆𑀘𑀬𑀦𑁆𑀢𑀺 𑀘;

𑀫𑀼𑀜𑁆𑀘𑀦𑁆𑀢𑀺 𑀧𑀼𑀧𑁆𑀨𑀁 𑀧𑀦 𑀧𑀜𑁆𑀘𑀯𑀡𑁆𑀡𑀺𑀓𑀁, 𑀫𑀦𑁆𑀤𑀸𑀭𑀯𑀁 𑀘𑀦𑁆𑀤𑀦𑀘𑀼𑀡𑁆𑀡𑀫𑀺𑀲𑁆𑀲𑀺𑀢𑀁.

𑁩𑁭.

‘‘𑀬𑀣𑀸 𑀢𑀼𑀬𑁆𑀳𑀁 𑀫𑀳𑀸𑀯𑀻𑀭, 𑀧𑀸𑀤𑁂𑀲𑀼 𑀘𑀓𑁆𑀓𑀮𑀓𑁆𑀔𑀡𑀁;

𑀥𑀚𑀯𑀚𑀺𑀭𑀧𑀝𑀸𑀓𑀸, 𑀯𑀟𑁆𑀠𑀫𑀸𑀦𑀗𑁆𑀓𑀼𑀲𑀸𑀘𑀺𑀢’’𑀦𑁆𑀢𑀺.

𑀢𑀢𑁆𑀣 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀢𑁆𑀣𑀁 𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀓𑁂𑀢𑀽𑀢𑀺 𑀓𑁂𑀢𑀼𑀦𑁄 𑀅𑀧𑀘𑀺𑀢𑀺𑀓𑀸𑀢𑀩𑁆𑀩𑀝𑁆𑀞𑁂𑀦 𑀓𑁂𑀢𑀼 𑀯𑀺𑀬𑀸𑀢𑀺 𑀓𑁂𑀢𑀼. 𑀥𑀚𑁄𑀢𑀺 𑀇𑀦𑁆𑀤𑀥𑀚𑁄 𑀲𑀫𑀼𑀲𑁆𑀲𑀬𑀝𑁆𑀞𑁂𑀦 𑀤𑀲𑁆𑀲𑀦𑀻𑀬𑀝𑁆𑀞𑁂𑀦 𑀘 𑀢𑀼𑀯𑀁 𑀥𑀚𑁄 𑀯𑀺𑀬𑀸𑀢𑀺 𑀥𑀚𑁄𑀢𑀺. 𑀅𑀣 ¶ 𑀯𑀸 𑀬𑀣𑀸 𑀳𑀺 𑀮𑁄𑀓𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀥𑀚𑀁 𑀤𑀺𑀲𑁆𑀯𑀸𑀯 𑁋 ‘‘𑀅𑀬𑀁 𑀥𑀚𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲𑀸’’𑀢𑀺 𑀥𑀚𑀯𑀸 𑀥𑀚𑀻𑀢𑀺 𑀧𑀜𑁆𑀜𑀸𑀬𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀧𑀜𑁆𑀜𑀸𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀯 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀧𑀜𑁆𑀜𑀸𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀥𑀚𑁄 𑀬𑀽𑀧𑁄 𑀘𑀸’’𑀢𑀺. 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀁 𑀤𑀸𑀦𑀸𑀤𑀺𑀆𑀲𑀯𑀓𑁆𑀔𑀬𑀜𑀸𑀡𑀧𑀭𑀺𑀬𑁄𑀲𑀸𑀦𑀸𑀦𑀁 𑀲𑀩𑁆𑀩𑀬𑀸𑀕𑀸𑀦𑀁 𑀬𑀚𑀦𑀢𑁆𑀣𑀸𑀬 𑀲𑀫𑀼𑀲𑁆𑀲𑀺𑀢𑁄 𑀬𑀽𑀧𑁄 𑀢𑀼𑀯𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀸𑀬𑀦𑁄𑀢𑀺 𑀧𑀝𑀺𑀲𑀭𑀡𑀁. 𑀧𑀢𑀺𑀝𑁆𑀞𑀸𑀢𑀺 𑀬𑀣𑀸 𑀫𑀳𑀸𑀧𑀣𑀯𑀻 𑀲𑀩𑁆𑀩𑀧𑀸𑀡𑀻𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀢𑀺𑀝𑁆𑀞𑀸 𑀦𑀺𑀲𑁆𑀲𑀬𑀪𑀽𑀢𑀸, 𑀏𑀯𑀁 𑀢𑀼𑀯𑀫𑁆𑀧𑀺 𑀧𑀢𑀺𑀝𑁆𑀞𑀸𑀪𑀽𑀢𑀸. 𑀤𑀻𑀧𑁄 𑀘𑀸𑀢𑀺 𑀧𑀤𑀻𑀧𑁄. 𑀬𑀣𑀸 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺 𑀯𑀢𑁆𑀢𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀆𑀭𑁄𑀧𑀺𑀢𑁄 𑀧𑀤𑀻𑀧𑁄 𑀭𑀽𑀧𑀲𑀦𑁆𑀤𑀲𑁆𑀲𑀦𑁄 𑀳𑁄𑀢𑀺. 𑀏𑀯𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂 𑀯𑀢𑁆𑀢𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀲𑀦𑁆𑀤𑀲𑁆𑀲𑀦𑁄 𑀧𑀤𑀻𑀧𑁄 𑀢𑀼𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀦𑀸𑀯𑀸𑀦𑀁 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀤𑀤𑀻𑀧𑁄 ¶ 𑀬𑀣𑀸 𑀧𑀢𑀺𑀝𑁆𑀞𑀸 ¶ 𑀳𑁄𑀢𑀺, 𑀏𑀯𑀁 𑀢𑀼𑀯𑀫𑁆𑀧𑀺 𑀲𑀁𑀲𑀸𑀭𑀲𑀸𑀕𑀭𑁂 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁂 𑀑𑀲𑀻𑀤𑀦𑁆𑀢𑀸𑀦𑀁 𑀧𑀸𑀡𑀻𑀦𑀁 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄𑀢𑀺 𑀅𑀢𑁆𑀣𑁄.

𑀤𑁆𑀯𑀺𑀧𑀤𑀼𑀢𑁆𑀢𑀫𑁄𑀢𑀺 𑀤𑁆𑀯𑀺𑀧𑀤𑀸𑀦𑀁 𑀉𑀢𑁆𑀢𑀫𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄, 𑀏𑀢𑁆𑀣 𑀧𑀦 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀢𑁄 𑀙𑀝𑁆𑀞𑀻𑀲𑀫𑀸𑀲𑀲𑁆𑀲 𑀧𑀝𑀺𑀲𑁂𑀥𑁄 𑀦𑀢𑁆𑀣𑀺, 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀬 𑀙𑀝𑁆𑀞𑀺𑀬𑀸 𑀲𑀫𑀸𑀲𑁄 𑀧𑀝𑀺𑀲𑀺𑀤𑁆𑀥𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀧𑀤𑀸𑀦𑀁 𑀤𑁆𑀯𑀺𑀧𑀤𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁 𑀩𑀳𑀼𑀧𑁆𑀧𑀤𑀸𑀦𑀁 𑀭𑀽𑀧𑀻𑀦𑀁 𑀅𑀭𑀽𑀧𑀻𑀦𑀁 𑀲𑀜𑁆𑀜𑀻𑀦𑀁 𑀅𑀲𑀜𑁆𑀜𑀻𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀦𑀁 𑀉𑀢𑁆𑀢𑀫𑁄𑀯. 𑀓𑀲𑁆𑀫𑀸 𑀧𑀦𑀺𑀥 ‘‘𑀤𑁆𑀯𑀺𑀧𑀤𑀼𑀢𑁆𑀢𑀫𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀘𑁂? 𑀲𑁂𑀝𑁆𑀞𑀢𑀭𑀯𑀲𑁂𑀦. 𑀇𑀫𑀲𑁆𑀫𑀺𑀜𑁆𑀳𑀺 𑀮𑁄𑀓𑁂 𑀲𑁂𑀝𑁆𑀞𑁄 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀧𑀤𑀘𑀢𑀼𑀧𑁆𑀧𑀤𑀩𑀳𑀼𑀧𑁆𑀧𑀤𑁂𑀲𑀼𑀧𑀺 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀤𑁆𑀯𑀺𑀧𑀤𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀭𑀤𑁆𑀯𑀺𑀧𑀤𑁂𑀲𑀽𑀢𑀺? 𑀫𑀦𑀼𑀲𑁆𑀲𑁂𑀲𑀼 𑀘𑁂𑀯 𑀤𑁂𑀯𑁂𑀲𑀼 𑀘. 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀯𑀲𑁂 𑀓𑀢𑁆𑀢𑀼𑀁 𑀲𑀫𑀢𑁆𑀣𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀯𑀲𑀯𑀢𑁆𑀢𑀻 𑀫𑀳𑀸𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀢𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀲𑀫𑁆𑀧𑀚𑁆𑀚𑀢𑀺. 𑀇𑀢𑀺 𑀢𑀢𑁄𑀧𑀺 𑀲𑁂𑀝𑁆𑀞𑀢𑀭𑀯𑀲𑁂𑀦 ‘‘𑀤𑁆𑀯𑀺𑀧𑀤𑀼𑀢𑁆𑀢𑀫𑁄’’𑀢𑀺 𑀯𑀼𑀢𑁆𑀢𑁄.

𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀲𑀗𑁆𑀔𑀸𑀢𑀸𑀬 𑀮𑁄𑀓𑀥𑀸𑀢𑀼𑀬𑀸. 𑀫𑀳𑀺𑀤𑁆𑀥𑀺𑀓𑀸𑀢𑀺 𑀫𑀳𑀢𑀺𑀬𑀸 𑀇𑀤𑁆𑀥𑀺𑀬𑀸 𑀬𑀼𑀢𑁆𑀢𑀸, 𑀫𑀳𑀸𑀦𑀼𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸. 𑀧𑀲𑀦𑁆𑀦𑀸𑀢𑀺 𑀲𑀜𑁆𑀚𑀸𑀢𑀲𑀤𑁆𑀥𑀸. 𑀦𑀭𑀸𑀲𑀪𑀦𑁆𑀢𑀺 𑀦𑀭𑀧𑀼𑀗𑁆𑀕𑀯𑀁. 𑀅𑀳𑁄 𑀅𑀘𑁆𑀙𑀭𑀺𑀬𑀦𑁆𑀢𑀺 𑀏𑀢𑁆𑀣 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀁 𑀯𑀺𑀬 𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀘𑁆𑀙𑀭𑀺𑀬𑀁, 𑀅𑀘𑁆𑀙𑀭𑀸𑀬𑁄𑀕𑁆𑀕𑀦𑁆𑀢𑀺 𑀯𑀸 𑀅𑀘𑁆𑀙𑀭𑀺𑀬𑀁, ‘‘𑀅𑀳𑁄, 𑀇𑀤𑀁 𑀯𑀺𑀫𑁆𑀳𑀬’’𑀦𑁆𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀼𑀢𑀦𑁆𑀢𑀺 ¶ 𑀅𑀪𑀽𑀢𑀧𑀼𑀩𑁆𑀩𑀁 𑀅𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁. 𑀉𑀪𑀬𑀫𑁆𑀧𑁂𑀢𑀁 𑀯𑀺𑀫𑁆𑀳𑀬𑀸𑀯𑀳𑀲𑁆𑀲𑀸𑀥𑀺𑀯𑀘𑀦𑀁. 𑀮𑁄𑀫𑀳𑀁𑀲𑀦𑀦𑁆𑀢𑀺 𑀮𑁄𑀫𑀸𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑀓𑀭𑀡𑀁. 𑀦 𑀫𑁂𑀤𑀺𑀲𑀁 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀦 𑀫𑀬𑀸 𑀈𑀤𑀺𑀲𑀁 𑀪𑀽𑀢𑀧𑀼𑀩𑁆𑀩𑀁, 𑀅𑀩𑁆𑀪𑀼𑀢𑀁 𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀦𑁆𑀢𑀺 𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀘𑁆𑀙𑁂𑀭𑀦𑁆𑀢𑀺 𑀅𑀘𑁆𑀙𑀭𑀺𑀬𑀁.

𑀲𑀓𑀲𑀓𑀫𑁆𑀳𑀺 𑀪𑀯𑀦𑁂𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀯𑀦𑁂. 𑀦𑀺𑀲𑀻𑀤𑀺𑀢𑁆𑀯𑀸𑀦𑀸𑀢𑀺 𑀉𑀧𑀯𑀺𑀲𑁆𑀲. 𑀤𑁂𑀯𑀢𑀸𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀤𑁂𑀯𑀸𑀦𑀫𑁆𑀧𑀺 𑀤𑁂𑀯𑀥𑀻𑀢𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀲𑀦𑁆𑀢𑀺𑀢𑀸𑀢𑀺 𑀢𑀸 𑀤𑁂𑀯𑀢𑀸 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀺, 𑀧𑀻𑀢𑀺𑀯𑀲𑀁 𑀕𑀢𑀳𑀤𑀬𑀢𑀸𑀬 𑀫𑀺𑀳𑀺𑀢𑀫𑀢𑁆𑀢𑀁 𑀅𑀓𑀢𑁆𑀯𑀸 𑀅𑀝𑁆𑀝𑀳𑀸𑀲𑀁 𑀳𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀪𑁂𑀢𑀺 𑀆𑀓𑀸𑀲𑁂.

𑀆𑀓𑀸𑀲𑀝𑁆𑀞𑀸𑀢𑀺 𑀆𑀓𑀸𑀲𑁂 𑀯𑀺𑀫𑀸𑀦𑀸𑀤𑀻𑀲𑀼 𑀞𑀺𑀢𑀸, 𑀏𑀲𑁂𑀯 𑀦𑀬𑁄 𑀪𑀽𑀫𑀝𑁆𑀞𑁂𑀲𑀼𑀧𑀺. 𑀢𑀺𑀡𑀧𑀦𑁆𑀣𑀦𑀺𑀯𑀸𑀲𑀺𑀦𑁄𑀢𑀺 ¶ 𑀢𑀺𑀡𑀕𑁆𑀕𑁂𑀲𑀼 𑀘𑁂𑀯 𑀧𑀦𑁆𑀣𑁂𑀲𑀼 𑀘 𑀦𑀺𑀯𑀸𑀲𑀺𑀦𑁄. 𑀧𑀼𑀜𑁆𑀜𑀯𑀦𑁆𑀢𑁄𑀢𑀺 𑀫𑀳𑀸𑀧𑀼𑀜𑁆𑀜𑀸. 𑀫𑀳𑀺𑀤𑁆𑀥𑀺𑀓𑀸𑀢𑀺 𑀫𑀳𑀸𑀦𑀼𑀪𑀸𑀯𑀸. 𑀲𑀗𑁆𑀕𑀻𑀢𑀺𑀬𑁄 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀤𑁂𑀯𑀦𑀸𑀝𑀓𑀲𑀗𑁆𑀕𑀻𑀢𑀺𑀬𑁄 𑀧𑀯𑀢𑁆𑀢𑁂𑀦𑁆𑀢𑀺, 𑀢𑀣𑀸𑀕𑀢𑀁 𑀧𑀽𑀚𑀦𑀢𑁆𑀣𑀸𑀬 𑀧𑀬𑀼𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀫𑁆𑀩𑀭𑁂𑀢𑀺 𑀆𑀓𑀸𑀲𑁂. 𑀅𑀦𑀺𑀮𑀜𑁆𑀚𑀲𑁂𑀢𑀺 𑀅𑀦𑀺𑀮𑀧𑀣𑁂, 𑀅𑀫𑁆𑀩𑀭𑀲𑁆𑀲 𑀅𑀦𑁂𑀓𑀢𑁆𑀣𑀢𑁆𑀢𑀸 ¶ ‘‘𑀅𑀦𑀺𑀮𑀜𑁆𑀚𑀲𑁂’’𑀢𑀺 𑀯𑀼𑀢𑁆𑀢𑀁, 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀫𑁆𑀫𑀦𑀤𑁆𑀥𑀸𑀦𑀻𑀢𑀺 𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄𑀢𑀺 𑀅𑀢𑁆𑀣𑁄. 𑀯𑀸𑀤𑁂𑀦𑁆𑀢𑀻𑀢𑀺 𑀯𑀸𑀤𑀬𑀦𑁆𑀢𑀺 𑀤𑁂𑀯𑀢𑀸.

𑀲𑀗𑁆𑀔𑀸𑀢𑀺 𑀥𑀫𑀦𑀲𑀗𑁆𑀔𑀸. 𑀧𑀡𑀯𑀸𑀢𑀺 𑀢𑀦𑀼𑀫𑀚𑁆𑀛𑀢𑀼𑀭𑀺𑀬𑀯𑀺𑀲𑁂𑀲𑀸. 𑀟𑀺𑀡𑁆𑀟𑀺𑀫𑀸𑀢𑀺 𑀢𑀺𑀡𑀯𑀸𑀔𑀼𑀤𑁆𑀤𑀓𑀪𑁂𑀭𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀯𑀚𑁆𑀚𑀦𑁆𑀢𑀻𑀢𑀺 𑀯𑀸𑀤𑀬𑀦𑁆𑀢𑀺. 𑀅𑀩𑁆𑀪𑀼𑀢𑁄 𑀯𑀢 𑀦𑁄𑀢𑀺 𑀅𑀘𑁆𑀙𑀭𑀺𑀬𑁄 𑀯𑀢 𑀦𑀼. 𑀉𑀧𑁆𑀧𑀚𑁆𑀚𑀻𑀢𑀺 𑀉𑀧𑁆𑀧𑀦𑁆𑀦𑁄. 𑀮𑁄𑀫𑀳𑀁𑀲𑀦𑁄𑀢𑀺 𑀮𑁄𑀫𑀳𑀁𑀲𑀦𑀓𑀭𑁄. 𑀥𑀼𑀯𑀦𑁆𑀢𑀺 𑀬𑀲𑁆𑀫𑀸 𑀧𑀦 𑀅𑀩𑁆𑀪𑀼𑀢𑁄 𑀅𑀬𑀁 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀥𑀼𑀯𑀁 𑀅𑀯𑀲𑁆𑀲𑀁 𑀅𑀢𑁆𑀣𑀲𑀺𑀤𑁆𑀥𑀺𑀁 𑀮𑀪𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑀪𑀸𑀫𑀸𑀢𑀺 𑀮𑀪𑀺𑀲𑁆𑀲𑀸𑀫. 𑀔𑀡𑁄𑀢𑀺 𑀅𑀝𑁆𑀞𑀓𑁆𑀔𑀡𑀯𑀺𑀭𑀳𑀺𑀢𑁄 𑀦𑀯𑀫𑁄 𑀔𑀡𑁄𑀢𑀺 𑀅𑀢𑁆𑀣𑁄. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀧𑀝𑀺𑀧𑀸𑀤𑀺𑀢𑁄𑀢𑀺 𑀧𑀝𑀺𑀮𑀤𑁆𑀥𑁄.

𑀩𑀼𑀤𑁆𑀥𑁄𑀢𑀺 𑀢𑁂𑀲𑀁 𑀲𑀼𑀢𑁆𑀯𑀸𑀦𑀸𑀢𑀺 𑀩𑀼𑀤𑁆𑀥𑁄𑀢𑀺 𑀇𑀤𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀤𑁂𑀯𑀸𑀦𑀁 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀤𑀧𑀸𑀤𑀻𑀢𑀺 𑀅𑀢𑁆𑀣𑁄. 𑀢𑀸𑀯𑀤𑁂𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀳𑀺𑀗𑁆𑀓𑀸𑀭𑀸𑀢𑀺 𑀳𑀺𑀗𑁆𑀓𑀸𑀭𑀲𑀤𑁆𑀤𑀸, 𑀳𑀺𑀁𑀳𑀺𑀦𑁆𑀢𑀺 𑀬𑀓𑁆𑀔𑀸𑀤𑀬𑁄 𑀧𑀳𑀝𑁆𑀞𑀓𑀸𑀮𑁂 𑀓𑀭𑁄𑀦𑁆𑀢𑀺. 𑀲𑀸𑀥𑀼𑀓𑀸𑀭𑀸𑀢𑀺 𑀲𑀸𑀥𑀼𑀓𑀸𑀭𑀲𑀤𑁆𑀤𑀸 𑀘 𑀧𑀯𑀢𑁆𑀢𑀦𑁆𑀢𑀺. 𑀉𑀓𑁆𑀓𑀼𑀝𑁆𑀞𑀻𑀢𑀺 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑁄 𑀘 𑀉𑀦𑁆𑀦𑀸𑀤𑀲𑀤𑁆𑀤𑁄 𑀘𑀸𑀢𑀺 𑀅𑀢𑁆𑀣𑁄. 𑀧𑀚𑀸𑀢𑀺 𑀤𑁂𑀯𑀸𑀤𑀬𑁄 𑀅𑀥𑀺𑀧𑁆𑀧𑁂𑀢𑀸. 𑀓𑁂𑀘𑀺 ‘‘𑀧𑀝𑀸𑀓𑀸 𑀯𑀺𑀯𑀺𑀥𑀸 𑀕𑀕𑀦𑁂 𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺. 𑀕𑀸𑀬𑀦𑁆𑀢𑀻𑀢𑀺 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀻𑀢𑀁 𑀕𑀸𑀬𑀦𑁆𑀢𑀺.

𑀲𑁂𑀴𑁂𑀦𑁆𑀢𑀻𑀢𑀺 ¶ 𑀫𑀼𑀔𑁂𑀦 𑀲𑁂𑀴𑀺𑀢𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀯𑀸𑀤𑀬𑀦𑁆𑀢𑀻𑀢𑀺 ¶ 𑀫𑀳𑀢𑀻 𑀯𑀺𑀧𑀜𑁆𑀘𑀺𑀓𑀸𑀫𑀓𑀭𑀫𑀼𑀔𑀸𑀤𑀬𑁄 𑀯𑀻𑀡𑀸 𑀘 𑀢𑀼𑀭𑀺𑀬𑀸𑀦𑀺 𑀘 𑀢𑀣𑀸𑀕𑀢𑀲𑁆𑀲 𑀧𑀽𑀚𑀦𑀢𑁆𑀣𑀸𑀬 𑀯𑀸𑀤𑁂𑀦𑁆𑀢𑀺 𑀧𑀬𑁄𑀚𑁂𑀦𑁆𑀢𑀺. 𑀪𑀼𑀚𑀸𑀦𑀺 𑀧𑁄𑀣𑁂𑀦𑁆𑀢𑀻𑀢𑀺 𑀪𑀼𑀚𑁂 𑀅𑀧𑁆𑀨𑁄𑀝𑁂𑀦𑁆𑀢𑀺. 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀦𑀘𑁆𑀘𑀦𑁆𑀢𑀺 𑀘𑀸𑀢𑀺 𑀅𑀜𑁆𑀜𑁂 𑀘 𑀦𑀘𑁆𑀘𑀸𑀧𑁂𑀦𑁆𑀢𑀺 𑀲𑀬𑀜𑁆𑀘 𑀦𑀘𑁆𑀘𑀦𑁆𑀢𑀺.

𑀬𑀣𑀸 𑀢𑀼𑀬𑁆𑀳𑀁 𑀫𑀳𑀸𑀯𑀻𑀭, 𑀧𑀸𑀤𑁂𑀲𑀼 𑀘𑀓𑁆𑀓𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀬𑁂𑀦 𑀧𑀓𑀸𑀭𑁂𑀦 𑀬𑀣𑀸. 𑀫𑀳𑀸𑀯𑀻𑀭𑀺𑀬𑁂𑀦 𑀬𑁄𑀕𑀢𑁄 𑀫𑀳𑀸𑀯𑀻𑀭𑁄. 𑀧𑀸𑀤𑁂𑀲𑀼 𑀘𑀓𑁆𑀓𑀮𑀓𑁆𑀔𑀡𑀦𑁆𑀢𑀺 𑀢𑀯 𑀉𑀪𑁄𑀲𑀼 𑀧𑀸𑀤𑀢𑀮𑁂𑀲𑀼 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀘𑀓𑁆𑀓𑀮𑀓𑁆𑀔𑀡𑀁 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀓-𑀲𑀤𑁆𑀤𑁄 𑀧𑀦𑀸𑀬𑀁 𑀲𑀫𑁆𑀧𑀢𑁆𑀢𑀺𑀭𑀣𑀗𑁆𑀕𑀇𑀭𑀺𑀬𑀸𑀧𑀣𑀤𑀸𑀦𑀭𑀢𑀦𑀥𑀫𑁆𑀫𑀔𑀼𑀭𑀘𑀓𑁆𑀓𑀮𑀓𑁆𑀔𑀡𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁧) 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁯) 𑀇𑀭𑀺𑀬𑀸𑀧𑀣𑁂. ‘‘𑀤𑀤𑀁 𑀪𑀼𑀜𑁆𑀚 𑀘 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀽𑀢’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁪𑁩; 𑁩.𑁮𑁫; 𑀫. 𑀦𑀺. 𑁩.𑁨𑁫𑁬) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨; 𑀩𑀼. 𑀯𑀁. 𑁨𑁮.𑁧𑁭) 𑀏𑀢𑁆𑀣 𑀧𑀦 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 ¶ 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀏𑀢𑁆𑀣 𑀔𑀼𑀭𑀘𑀓𑁆𑀓𑁂, 𑀧𑀳𑀭𑀡𑀘𑀓𑁆𑀓𑁂𑀢𑀺 𑀅𑀢𑁆𑀣𑁄. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁫; 𑁩.𑁨𑁦𑁦, 𑁨𑁦𑁪; 𑀫. 𑀦𑀺. 𑁨.𑁩𑁮𑁬) 𑀏𑀢𑁆𑀣 𑀮𑀓𑁆𑀔𑀡𑁂. 𑀇𑀥𑀸𑀧𑀺 𑀮𑀓𑁆𑀔𑀡𑀘𑀓𑁆𑀓𑁂 𑀤𑀝𑁆𑀞𑀩𑁆𑀩𑁄 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁮𑁭; 𑁨.𑁪.𑁮; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪). 𑀥𑀚𑀯𑀚𑀺𑀭𑀧𑀝𑀸𑀓𑀸, 𑀯𑀟𑁆𑀠𑀫𑀸𑀦𑀗𑁆𑀓𑀼𑀲𑀸𑀘𑀺𑀢𑀦𑁆𑀢𑀺 𑀥𑀚𑁂𑀦 𑀘 𑀯𑀚𑀺𑀭𑁂𑀦 𑀘 𑀧𑀝𑀸𑀓𑀸𑀬 𑀘 𑀯𑀟𑁆𑀠𑀫𑀸𑀦𑁂𑀦 𑀘 𑀅𑀗𑁆𑀓𑀼𑀲𑁂𑀦 𑀘 𑀆𑀘𑀺𑀢𑀁 𑀅𑀮𑀗𑁆𑀓𑀢𑀁 𑀧𑀭𑀺𑀯𑀸𑀭𑀺𑀢𑀁 𑀧𑀸𑀤𑁂𑀲𑀼 𑀘𑀓𑁆𑀓𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀮𑀓𑁆𑀔𑀡𑁂 𑀧𑀦 𑀕𑀳𑀺𑀢𑁂 𑀲𑁂𑀲𑀮𑀓𑁆𑀔𑀡𑀸𑀦𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀣𑀸 𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀩𑁆𑀬𑀸𑀫𑀧𑁆𑀧𑀪𑀸 𑀘. 𑀢𑀲𑁆𑀫𑀸 𑀢𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀳𑀺 𑀲𑀫𑀮𑀗𑁆𑀓𑀢𑁄 𑀪𑀕𑀯𑀢𑁄 𑀓𑀸𑀬𑁄 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀯𑀺𑀓𑀲𑀺𑀢𑀧𑀤𑀼𑀫𑀁 𑀯𑀺𑀬 𑀓𑀫𑀮𑀯𑀦𑀁 𑀯𑀺𑀯𑀺𑀥𑀭𑀢𑀦𑀯𑀺𑀘𑀺𑀢𑁆𑀢𑀁 𑀯𑀺𑀬 𑀦𑀯𑀓𑀦𑀓𑀢𑁄𑀭𑀡𑀁 𑀢𑀸𑀭𑀸𑀫𑀭𑀻𑀘𑀺𑀯𑀺𑀭𑀸𑀚𑀺𑀢𑀫𑀺𑀯 𑀕𑀕𑀦𑀢𑀮𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀫𑀸𑀦𑁄 𑀅𑀢𑀺𑀯𑀺𑀬 𑀲𑁄𑀪𑀢𑀺.

𑀇𑀤𑀸𑀦𑀺 ¶ 𑀪𑀕𑀯𑀢𑁄 𑀭𑀽𑀧𑀓𑀸𑀬𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑁋

𑁩𑁮.

‘‘𑀭𑀽𑀧𑁂 𑀲𑀻𑀮𑁂 𑀲𑀫𑀸𑀥𑀺𑀫𑁆𑀳𑀺, 𑀧𑀜𑁆𑀜𑀸𑀬 𑀘 𑀅𑀲𑀸𑀤𑀺𑀲𑁄;

𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑀫𑀲𑀫𑁄, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂’’𑀢𑀺. 𑁋 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸;

𑀢𑀢𑁆𑀣 𑀭𑀽𑀧𑁂𑀢𑀺 𑀅𑀬𑀁 𑀭𑀽𑀧-𑀲𑀤𑁆𑀤𑁄 𑀔𑀦𑁆𑀥𑀪𑀯𑀦𑀺𑀫𑀺𑀢𑁆𑀢𑀧𑀘𑁆𑀘𑀬𑀲𑀭𑀻𑀭𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀲𑀼 ¶ 𑀤𑀺𑀲𑁆𑀲𑀢𑀺. 𑀬𑀣𑀸𑀳 𑁋 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀫. 𑀦𑀺. 𑁧.𑁩𑁬𑁧; 𑁩.𑁮𑁬, 𑁮𑁯; 𑀯𑀺𑀪. 𑁨; 𑀫𑀳𑀸𑀯. 𑁨𑁨) 𑀏𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁂 𑀤𑀺𑀲𑁆𑀲𑀢𑀺. ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁧𑁬𑁦-𑁧𑁬𑁧; 𑀯𑀺𑀪. 𑁬𑁨𑁪) 𑀏𑀢𑁆𑀣 𑀭𑀽𑀧𑀪𑀯𑁂. ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁩𑁮; 𑀫. 𑀦𑀺. 𑁨.𑁨𑁪𑁯; 𑀅. 𑀦𑀺. 𑁧.𑁪𑁩𑁫-𑁪𑁪𑁨; 𑀥. 𑀲. 𑁨𑁦𑁪-𑁨𑁦𑁫) 𑀏𑀢𑁆𑀣 𑀓𑀲𑀺𑀡𑀦𑀺𑀫𑀺𑀢𑁆𑀢𑁂. ‘‘𑀲𑀭𑀽𑀧𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑁄 𑀅𑀭𑀽𑀧𑀸’’𑀢𑀺 (𑀅. 𑀦𑀺. 𑁨.𑁮𑁩) 𑀏𑀢𑁆𑀣 𑀧𑀘𑁆𑀘𑀬𑁂. ‘‘𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁬) 𑀏𑀢𑁆𑀣 𑀲𑀭𑀻𑀭𑁂. ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫-𑁪𑁨𑁬; 𑀲𑀁. 𑀦𑀺. 𑁪.𑁬𑁦; 𑀓𑀣𑀸. 𑁪𑁬𑁫) 𑀏𑀢𑁆𑀣 𑀯𑀡𑁆𑀡𑁂. ‘‘𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄’’𑀢𑀺 (𑀅. 𑀦𑀺. 𑁪.𑁬𑁫) 𑀏𑀢𑁆𑀣 𑀲𑀡𑁆𑀞𑀸𑀦𑁂. 𑀇𑀥𑀸𑀧𑀺 𑀲𑀡𑁆𑀞𑀸𑀦𑁂 𑀤𑀝𑁆𑀞𑀩𑁆𑀩𑁄 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧 𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸). 𑀲𑀻𑀮𑁂𑀢𑀺 𑀘𑀢𑀼𑀩𑁆𑀩𑀺𑀥𑁂 𑀲𑀻𑀮𑁂. 𑀲𑀫𑀸𑀥𑀺𑀫𑁆𑀳𑀻𑀢𑀺 𑀢𑀺𑀯𑀺𑀥𑁂𑀧𑀺 𑀲𑀫𑀸𑀥𑀺𑀫𑁆𑀳𑀺. 𑀧𑀜𑁆𑀜𑀸𑀬𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬. 𑀅𑀲𑀸𑀤𑀺𑀲𑁄𑀢𑀺 𑀅𑀲𑀤𑀺𑀲𑁄 𑀅𑀦𑀼𑀧𑀫𑁄. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 ¶ . 𑀅𑀲𑀫𑀲𑀫𑁄𑀢𑀺 𑀅𑀲𑀫𑀸 𑀅𑀢𑀻𑀢𑀸 𑀩𑀼𑀤𑁆𑀥𑀸 𑀢𑁂𑀳𑀺 𑀅𑀲𑀫𑁂𑀳𑀺 𑀩𑀼𑀤𑁆𑀥𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀫𑁄𑀢𑀺 𑀅𑀲𑀫𑀲𑀫𑁄. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀢𑁄 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸.

𑀇𑀤𑀸𑀦𑀺 𑀪𑀕𑀯𑀢𑁄 𑀓𑀸𑀬𑀩𑀮𑀸𑀤𑀺𑀁 𑀤𑀲𑁆𑀲𑁂𑀢𑀼𑀁 𑁋

𑁩𑁯.

‘‘𑀤𑀲𑀦𑀸𑀕𑀩𑀮𑀁 𑀓𑀸𑀬𑁂, 𑀢𑀼𑀬𑁆𑀳𑀁 𑀧𑀸𑀓𑀢𑀺𑀓𑀁 𑀩𑀮𑀁;

𑀇𑀤𑁆𑀥𑀺𑀩𑀮𑁂𑀦 𑀅𑀲𑀫𑁄, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂’’𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 𑀤𑀲𑀦𑀸𑀕𑀩𑀮𑀦𑁆𑀢𑀺 𑀤𑀲𑀙𑀤𑁆𑀤𑀦𑁆𑀢𑀦𑀸𑀕𑀩𑀮𑀁. 𑀤𑀼𑀯𑀺𑀥𑀜𑁆𑀳𑀺 𑀢𑀣𑀸𑀕𑀢𑀲𑁆𑀲 𑀩𑀮𑀁 𑁋 𑀓𑀸𑀬𑀩𑀮𑀁, 𑀜𑀸𑀡𑀩𑀮𑀜𑁆𑀘𑀸𑀢𑀺. 𑀢𑀢𑁆𑀣 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁?

‘‘𑀓𑀸𑀴𑀸𑀯𑀓𑀜𑁆𑀘 ¶ 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.(𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁨𑁨; 𑀅. 𑀦𑀺. 𑀅𑀝𑁆𑀞. 𑁩.𑁧𑁦.𑁨𑁧; 𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁯𑁮; 𑀯𑀺𑀪. 𑀅𑀝𑁆𑀞. 𑁭𑁬𑁦; 𑀉𑀤𑀸. 𑀅𑀝𑁆𑀞. 𑁭𑁫; 𑀘𑀽𑀴𑀦𑀺. 𑀅𑀝𑁆𑀞. 𑁮𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪) 𑁋

𑀇𑀫𑀸𑀦𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀸𑀴𑀸𑀯𑀓𑁄𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀲𑁆𑀲 𑀳𑀢𑁆𑀣𑀺𑀦𑁄 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲𑀸𑀢𑀺 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀙𑀤𑁆𑀤𑀦𑁆𑀢𑀩𑀮𑀁 𑀦𑁂𑀢𑀩𑁆𑀩𑀦𑁆𑀢𑀺. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲 𑀩𑀮𑀁, 𑀦𑀸𑀭𑀸𑀬𑀦𑀩𑀮𑀁 𑀯𑀚𑀺𑀭𑀩𑀮𑀦𑁆𑀢𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 ¶ 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀧𑀓𑀢𑀺𑀓𑀸𑀬𑀩𑀮𑀁, 𑀜𑀸𑀡𑀩𑀮𑀁 𑀧𑀦 𑀅𑀧𑁆𑀧𑀫𑁂𑀬𑁆𑀬𑀁 𑀤𑀲𑀩𑀮𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀻𑀢𑀺 𑀏𑀯𑀫𑀸𑀤𑀺𑀓𑀁 𑀜𑀸𑀡𑀩𑀮𑀁. 𑀇𑀥 𑀧𑀦 𑀓𑀸𑀬𑀩𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀓𑀸𑀬𑁂, 𑀢𑀼𑀬𑁆𑀳𑀁 𑀧𑀸𑀓𑀢𑀺𑀓𑀁 𑀩𑀮𑀦𑁆𑀢𑀺 𑀢𑀜𑁆𑀘 𑀧𑀦 𑀢𑀯 𑀓𑀸𑀬𑁂 𑀧𑀸𑀓𑀢𑀺𑀓𑀩𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 ‘‘𑀤𑀲𑀦𑀸𑀕𑀩𑀮’’𑀦𑁆𑀢𑀺 𑀤𑀲𑀙𑀤𑁆𑀤𑀦𑁆𑀢𑀦𑀸𑀕𑀩𑀮𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀜𑀸𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑁆𑀥𑀺𑀩𑀮𑁂𑀦 𑀅𑀲𑀫𑁄, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂’’𑀢𑀺 𑀆𑀳. 𑀢𑀢𑁆𑀣 𑀇𑀤𑁆𑀥𑀺𑀩𑀮𑁂𑀦 𑀅𑀲𑀫𑁄𑀢𑀺 𑀯𑀺𑀓𑀼𑀩𑁆𑀩𑀦𑀸𑀥𑀺𑀝𑁆𑀞𑀸𑀦𑀸𑀤𑀺𑀦𑀸 𑀇𑀤𑁆𑀥𑀺𑀩𑀮𑁂𑀦 ¶ 𑀅𑀲𑀫𑁄 𑀅𑀲𑀤𑀺𑀲𑁄 𑀅𑀦𑀼𑀧𑀫𑁄. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀢𑀺 𑀤𑁂𑀲𑀦𑀸𑀜𑀸𑀡𑁂𑀧𑀺 𑀅𑀲𑀫𑁄𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 ‘‘𑀬𑁄 𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀣𑀸, 𑀲𑁄 𑀲𑀩𑁆𑀩𑀮𑁄𑀓𑁂𑀓𑀦𑀸𑀬𑀓𑁄, 𑀢𑀁 𑀲𑀢𑁆𑀣𑀸𑀭𑀁 𑀦𑀫𑀲𑁆𑀲𑀣𑀸’’𑀢𑀺 𑀢𑀣𑀸𑀕𑀢𑀲𑁆𑀲 𑀧𑀡𑀸𑀫𑀦𑁂 𑀦𑀺𑀬𑁄𑀕𑀤𑀲𑁆𑀲𑀦𑀢𑁆𑀣𑀁 𑁋

𑁪𑁦.

‘‘𑀏𑀯𑀁 𑀲𑀩𑁆𑀩𑀕𑀼𑀡𑀽𑀧𑁂𑀢𑀁, 𑀲𑀩𑁆𑀩𑀗𑁆𑀕𑀲𑀫𑀼𑀧𑀸𑀕𑀢𑀁;

𑀫𑀳𑀸𑀫𑀼𑀦𑀺𑀁 𑀓𑀸𑀭𑀼𑀡𑀺𑀓𑀁, 𑀮𑁄𑀓𑀦𑀸𑀣𑀁 𑀦𑀫𑀲𑁆𑀲𑀣𑀸’’𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑀺𑀤𑀲𑁆𑀲𑀦𑁂 𑀦𑀺𑀧𑀸𑀢𑁄. 𑀲𑀩𑁆𑀩𑀕𑀼𑀡𑀽𑀧𑁂𑀢𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑁄𑀢𑀺 𑀅𑀬𑀁 𑀦𑀺𑀭𑀯𑀲𑁂𑀲𑀯𑀸𑀘𑀻. 𑀕𑀼𑀡𑁄𑀢𑀺 𑀅𑀬𑀁 𑀕𑀼𑀡-𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 ¶ 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁫𑁪𑁬; 𑀫𑀳𑀸𑀯. 𑁩𑁪𑁮) 𑀏𑀢𑁆𑀣 𑀧𑀝𑀮𑀢𑁆𑀣𑁂 𑀤𑀺𑀲𑁆𑀲𑀢𑀺. ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁪) 𑀏𑀢𑁆𑀣 𑀭𑀸𑀲𑀢𑁆𑀣𑁂. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀏𑀢𑁆𑀣 𑀆𑀦𑀺𑀲𑀁𑀲𑀢𑁆𑀣𑁂. ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁’’ (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦, 𑁩𑁦𑁨; 𑁨.𑁧𑁧𑁪; 𑁩.𑁧𑁫𑁪, 𑁩𑁪𑁯; 𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭) ‘‘𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽’’𑀢𑀺 (𑀥. 𑀧. 𑁫𑁩) 𑀏𑀢𑁆𑀣 𑀩𑀦𑁆𑀥𑀦𑀢𑁆𑀣𑁂. ‘‘𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁, 𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺’’𑀦𑁆𑀢𑀺 (𑀩𑀼. 𑀯𑀁. 𑁨.𑁨𑁯) 𑀏𑀢𑁆𑀣 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂. 𑀇𑀥𑀸𑀧𑀺 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁫𑁪𑁬; 𑀫. 𑀦𑀺. 𑀅𑀝𑁆𑀞. 𑁧.𑁧𑁬𑁬; 𑀘𑀽𑀴𑀦𑀺. 𑀅𑀝𑁆𑀞. 𑁧𑁩𑁬). 𑀢𑀲𑁆𑀫𑀸 𑀲𑀩𑁆𑀩𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀕𑀼𑀡𑁂𑀳𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀉𑀧𑁂𑀢𑀁 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀗𑁆𑀕𑀲𑀫𑀼𑀧𑀸𑀕𑀢𑀦𑁆𑀢𑀺 𑀲𑀩𑁆𑀩𑁂𑀳𑀺 𑀩𑀼𑀤𑁆𑀥𑀕𑀼𑀡𑁂𑀳𑀺 𑀕𑀼𑀡𑀗𑁆𑀕𑁂𑀳𑀺 𑀯𑀸 𑀲𑀫𑀼𑀧𑀸𑀕𑀢𑀁 𑀲𑀫𑀦𑁆𑀦𑀸𑀕𑀢𑀁. 𑀫𑀳𑀸𑀫𑀼𑀦𑀺𑀦𑁆𑀢𑀺 𑀅𑀜𑁆𑀜𑁂𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀫𑀼𑀦𑀻𑀳𑀺 𑀅𑀥𑀺𑀓𑀪𑀸𑀯𑀢𑁄 𑀫𑀳𑀦𑁆𑀢𑁄 𑀫𑀼𑀦𑀻𑀢𑀺 𑀯𑀼𑀘𑁆𑀘𑀢𑀺 𑀫𑀳𑀸𑀫𑀼𑀦𑀺. 𑀓𑀸𑀭𑀼𑀡𑀺𑀓𑀦𑁆𑀢𑀺 ¶ 𑀓𑀭𑀼𑀡𑀸𑀕𑀼𑀡𑀬𑁄𑀕𑀢𑁄 𑀓𑀸𑀭𑀼𑀡𑀺𑀓𑀁. 𑀮𑁄𑀓𑀦𑀸𑀣𑀦𑁆𑀢𑀺 𑀲𑀩𑁆𑀩𑀮𑁄𑀓𑁂𑀓𑀦𑀸𑀣𑀁, 𑀲𑀩𑁆𑀩𑀮𑁄𑀓𑁂𑀳𑀺 ‘‘𑀅𑀬𑀁 𑀦𑁄 𑀤𑀼𑀓𑁆𑀔𑁄𑀧𑀢𑀸𑀧𑀲𑁆𑀲 𑀆𑀳𑀦𑁆𑀢𑀸 𑀲𑀫𑁂𑀢𑀸’’𑀢𑀺 𑀏𑀯𑀫𑀸𑀲𑀻𑀲𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀤𑀲𑀩𑀮𑀲𑁆𑀲 𑀲𑀩𑁆𑀩𑀦𑀺𑀧𑀘𑁆𑀘𑀸𑀓𑀸𑀭𑀲𑁆𑀲 𑀅𑀭𑀳𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑁋

𑁪𑁧.

‘‘𑀅𑀪𑀺𑀯𑀸𑀤𑀦𑀁 𑀣𑁄𑀫𑀦𑀜𑁆𑀘, 𑀯𑀦𑁆𑀤𑀦𑀜𑁆𑀘 𑀧𑀲𑀁𑀲𑀦𑀁;

𑀦𑀫𑀲𑁆𑀲𑀦𑀜𑁆𑀘 𑀧𑀽𑀚𑀜𑁆𑀘, 𑀲𑀩𑁆𑀩𑀁 𑀅𑀭𑀳𑀲𑀻 𑀢𑀼𑀯𑀁.

𑁪𑁨.

‘‘𑀬𑁂 ¶ 𑀓𑁂𑀘𑀺 𑀮𑁄𑀓𑁂 𑀯𑀦𑁆𑀤𑀦𑁂𑀬𑁆𑀬𑀸, 𑀯𑀦𑁆𑀤𑀦𑀁 𑀅𑀭𑀳𑀦𑁆𑀢𑀺 𑀬𑁂;

𑀲𑀩𑁆𑀩𑀲𑁂𑀝𑁆𑀞𑁄 𑀫𑀳𑀸𑀯𑀻𑀭, 𑀲𑀤𑀺𑀲𑁄 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 𑀅𑀪𑀺𑀯𑀸𑀤𑀦𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀢𑁆𑀢𑀦𑁄 𑀅𑀪𑀺𑀯𑀸𑀤𑀦𑀓𑀸𑀭𑀸𑀧𑀦𑀁. 𑀣𑁄𑀫𑀦𑀦𑁆𑀢𑀺 𑀧𑀭𑀫𑁆𑀫𑀼𑀔𑀢𑁄 𑀣𑀼𑀢𑀺. 𑀯𑀦𑁆𑀤𑀦𑀦𑁆𑀢𑀺 𑀧𑀡𑀸𑀫𑀦𑀁. 𑀧𑀲𑀁𑀲𑀦𑀦𑁆𑀢𑀺 𑀲𑀫𑁆𑀫𑀼𑀔𑀢𑁄 𑀧𑀲𑀁𑀲𑀦𑀁. 𑀦𑀫𑀲𑁆𑀲𑀦𑀦𑁆𑀢𑀺 𑀅𑀜𑁆𑀚𑀮𑀺𑀓𑀭𑀡𑀁, 𑀫𑀦𑀲𑀸 𑀦𑀫𑀲𑁆𑀲𑀦𑀁 𑀯𑀸. 𑀧𑀽𑀚𑀦𑀦𑁆𑀢𑀺 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀳𑀺 𑀧𑀽𑀚𑀦𑀜𑁆𑀘. 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀓𑁆𑀓𑀸𑀭𑀯𑀺𑀲𑁂𑀲𑀁 𑀢𑀼𑀯𑀁 𑀅𑀭𑀳𑀲𑀺 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑁂 𑀓𑁂𑀘𑀺 𑀮𑁄𑀓𑁂 𑀯𑀦𑁆𑀤𑀦𑁂𑀬𑁆𑀬𑀸𑀢𑀺 𑀬𑁂 𑀓𑁂𑀘𑀺 𑀮𑁄𑀓𑁂 𑀯𑀦𑁆𑀤𑀺𑀢𑀩𑁆𑀩𑀸 𑀯𑀦𑁆𑀤𑀦𑀻𑀬𑀸 𑀯𑀦𑁆𑀤𑀦𑀁 𑀅𑀭𑀳𑀦𑁆𑀢𑀺. 𑀬𑁂𑀢𑀺 𑀬𑁂 𑀧𑀦 𑀮𑁄𑀓𑁂 ¶ 𑀯𑀦𑁆𑀤𑀦𑀁 𑀅𑀭𑀳𑀦𑁆𑀢𑀺. 𑀇𑀤𑀁 𑀧𑀦 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀲𑁂𑀝𑁆𑀞𑁄𑀢𑀺 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄, 𑀢𑁆𑀯𑀁 𑀫𑀳𑀸𑀯𑀻𑀭 𑀲𑀤𑀺𑀲𑁄 𑀢𑁂 𑀮𑁄𑀓𑁂 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀪𑀕𑀯𑀢𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀭𑀢𑀦𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀭 𑀘𑀗𑁆𑀓𑀫𑀫𑀸𑀦𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀜𑁆𑀘𑀳𑀺 𑀧𑀭𑀺𑀯𑀸𑀭𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀓𑀧𑀺𑀮𑀧𑀼𑀭𑁂 𑀆𑀓𑀸𑀲𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁩.

‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑁄;

𑀕𑀺𑀚𑁆𑀛𑀓𑀽𑀝𑁂 𑀞𑀺𑀢𑁄𑀬𑁂𑀯, 𑀧𑀲𑁆𑀲𑀢𑀺 𑀮𑁄𑀓𑀦𑀸𑀬𑀓’’𑀦𑁆𑀢𑀺. 𑁋 𑀆𑀤𑀺;

𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀭𑀽𑀧𑀲𑀸𑀭𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑁄. 𑀫𑀳𑀸𑀧𑀜𑁆𑀜𑁄𑀢𑀺 𑀫𑀳𑀢𑀺𑀬𑀸 𑀲𑁄𑀴𑀲𑀯𑀺𑀥𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀫𑀳𑀸𑀧𑀜𑁆𑀜𑁄. 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑁄𑀢𑀺 𑀏𑀢𑁆𑀣 𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀢𑀺 𑀆𑀭𑀫𑁆𑀫𑀡𑁂 𑀞𑀧𑁂𑀢𑀻𑀢𑀺 𑀲𑀫𑀸𑀥𑀺. 𑀲𑁄 𑀢𑀺𑀯𑀺𑀥𑁄 𑀳𑁄𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀻𑀢𑀺. 𑀛𑀸𑀦𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀢𑀢𑀺𑀬𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺 ¶ 𑀇𑀫𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀫𑁂𑀢𑁆𑀢𑀸𑀛𑀸𑀦𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀛𑀸𑀦𑀫𑁆𑀧𑀺 𑀤𑀼𑀯𑀺𑀥𑀁 𑀳𑁄𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 ‘‘𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀁 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀯𑀸 𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀸𑀥𑀻𑀲𑀼 𑀘 𑀛𑀸𑀦𑁂𑀲𑀼 𑀘 𑀓𑁄𑀯𑀺𑀤𑁄𑀢𑀺 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑁄, 𑀲𑀫𑀸𑀥𑀺𑀚𑁆𑀛𑀸𑀦𑀓𑀼𑀲𑀮𑁄𑀢𑀺 𑀅𑀢𑁆𑀣𑁄. 𑀕𑀺𑀚𑁆𑀛𑀓𑀽𑀝𑁂𑀢𑀺 𑀏𑀯𑀁𑀦𑀸𑀫𑀓𑁂 𑀧𑀩𑁆𑀩𑀢𑁂 𑀞𑀺𑀢𑁄𑀬𑁂𑀯 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀺.

𑁪𑁪. 𑀲𑀼𑀨𑀼𑀮𑁆𑀮𑀁 ¶ 𑀲𑀸𑀮𑀭𑀸𑀚𑀁 𑀯𑀸𑀢𑀺 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑀁 𑀲𑀫𑀼𑀕𑁆𑀕𑀢𑀯𑀺𑀧𑀼𑀮𑀓𑁄𑀫𑀮𑀨𑀮𑀧𑀮𑁆𑀮𑀯𑀗𑁆𑀓𑀼𑀭𑀲𑀫𑀮𑀗𑁆𑀓𑀢𑀲𑀸𑀔𑀁 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀁 𑀲𑀸𑀮𑀭𑀸𑀚𑀁 𑀯𑀺𑀬 𑀲𑀻𑀮𑀫𑀽𑀮𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀜𑁆𑀜𑀸𑀲𑀸𑀔𑀁 𑀅𑀪𑀺𑀜𑁆𑀜𑀸𑀧𑀼𑀧𑁆𑀨𑀁 𑀯𑀺𑀫𑀼𑀢𑁆𑀢𑀺𑀨𑀮𑀁 𑀤𑀲𑀩𑀮𑀲𑀸𑀮𑀭𑀸𑀚𑀁 𑀑𑀮𑁄𑀓𑁂𑀲𑀻𑀢𑀺 𑀏𑀯𑀁 𑀑𑀮𑁄𑀓𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀘𑀦𑁆𑀤𑀁𑀯 𑀕𑀕𑀦𑁂 𑀬𑀣𑀸𑀢𑀺 𑀅𑀩𑁆𑀪𑀸𑀳𑀺𑀫𑀥𑀽𑀫𑀭𑀚𑁄𑀭𑀸𑀳𑀼𑀧𑀲𑀕𑁆𑀕𑀯𑀺𑀦𑀺𑀫𑀼𑀢𑁆𑀢𑀁 𑀢𑀸𑀭𑀕𑀡𑀧𑀭𑀺𑀯𑀼𑀢𑀁 𑀲𑀭𑀤𑀲𑀫𑀬𑁂 𑀧𑀭𑀺𑀧𑀼𑀡𑁆𑀡𑀁 𑀯𑀺𑀬 ¶ 𑀭𑀚𑀦𑀺𑀓𑀭𑀁 𑀲𑀩𑁆𑀩𑀓𑀺𑀮𑁂𑀲𑀢𑀺𑀫𑀺𑀭𑀯𑀺𑀥𑀫𑀦𑀓𑀭𑀁 𑀯𑁂𑀦𑁂𑀬𑁆𑀬𑀚𑀦𑀓𑀼𑀫𑀼𑀤𑀯𑀦𑀯𑀺𑀓𑀲𑀦𑀓𑀭𑀁 𑀫𑀼𑀦𑀺𑀯𑀭𑀭𑀚𑀦𑀺𑀓𑀭𑀁 𑀑𑀮𑁄𑀓𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀫𑀚𑁆𑀛𑀦𑁆𑀳𑀺𑀓𑁂𑀯 𑀲𑀽𑀭𑀺𑀬𑀦𑁆𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀲𑀺𑀭𑀺𑀬𑀸 𑀧𑀝𑀼𑀢𑀭𑀓𑀺𑀭𑀡𑀫𑀸𑀮𑀺𑀦𑀁 𑀅𑀁𑀲𑀼𑀫𑀸𑀮𑀺𑀦𑀫𑀺𑀯 𑀯𑀺𑀭𑁄𑀘𑀫𑀸𑀦𑀁. 𑀦𑀭𑀸𑀲𑀪𑀦𑁆𑀢𑀺 𑀦𑀭𑀯𑀲𑀪𑀁.

𑁪𑁫. 𑀚𑀮𑀦𑁆𑀢𑀦𑁆𑀢𑀺 𑀤𑀤𑁆𑀤𑀴𑁆𑀳𑀫𑀸𑀦𑀁, 𑀲𑀭𑀤𑀲𑀫𑀬𑀁 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀘𑀸𑀭𑀼𑀯𑀤𑀦𑀲𑁄𑀪𑀁 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀮𑀗𑁆𑀓𑀢𑀯𑀭𑀲𑀭𑀻𑀭𑀁 𑀧𑀭𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀻𑀧𑀭𑀼𑀓𑁆𑀔𑀁 𑀯𑀸𑀢𑀺 𑀆𑀭𑁄𑀧𑀺𑀢𑀤𑀻𑀧𑀁 𑀤𑀻𑀧𑀭𑀼𑀓𑁆𑀔𑀫𑀺𑀯. 𑀢𑀭𑀼𑀡𑀲𑀽𑀭𑀺𑀬𑀁𑀯 𑀉𑀕𑁆𑀕𑀢𑀦𑁆𑀢𑀺 𑀅𑀪𑀺𑀦𑀯𑁄𑀤𑀺𑀢𑀸𑀤𑀺𑀘𑁆𑀘𑀫𑀺𑀯, 𑀲𑁄𑀫𑁆𑀫𑀪𑀸𑀯𑁂𑀦 𑀚𑀮𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀽𑀭𑀺𑀬𑀲𑁆𑀲 𑀢𑀭𑀼𑀡𑀪𑀸𑀯𑁄 𑀧𑀦 𑀉𑀤𑀬𑀁 𑀧𑀝𑀺𑀘𑁆𑀘 𑀯𑀼𑀘𑁆𑀘𑀢𑀺. 𑀦 𑀳𑀺 𑀘𑀦𑁆𑀤𑀲𑁆𑀲 𑀯𑀺𑀬 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀅𑀢𑁆𑀣𑀺. 𑀩𑁆𑀬𑀸𑀫𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀦𑁆𑀢𑀺 𑀩𑁆𑀬𑀸𑀫𑀧𑁆𑀧𑀪𑀸𑀬 𑀅𑀦𑀼𑀭𑀜𑁆𑀚𑀺𑀢𑀁. 𑀥𑀻𑀭𑀁 𑀧𑀲𑁆𑀲𑀢𑀺 𑀮𑁄𑀓𑀦𑀸𑀬𑀓𑀦𑁆𑀢𑀺 𑀲𑀩𑁆𑀩𑀮𑁄𑀓𑁂𑀓𑀥𑀻𑀭𑀁 𑀧𑀲𑁆𑀲𑀢𑀺 𑀦𑀸𑀬𑀓𑀦𑁆𑀢𑀺 𑀅𑀢𑁆𑀣𑁄.

𑀅𑀣𑀸𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑀺𑀲𑀻𑀢𑀮𑀲𑀮𑀺𑀮𑀥𑀭𑀦𑀺𑀓𑀭𑀧𑀭𑀺𑀘𑀼𑀫𑁆𑀩𑀺𑀢𑀓𑀽𑀝𑁂 𑀦𑀸𑀦𑀸𑀯𑀺𑀥𑀲𑀼𑀭𑀪𑀺𑀢𑀭𑀼𑀓𑀼𑀲𑀼𑀫𑀯𑀸𑀲𑀺𑀢𑀓𑀽𑀝𑁂 𑀧𑀭𑀫𑀭𑀼𑀘𑀺𑀭𑀘𑀺𑀢𑁆𑀢𑀓𑀽𑀝𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀞𑀢𑁆𑀯𑀸𑀯 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀆𑀕𑀢𑁂𑀳𑀺 𑀤𑁂𑀯𑀩𑁆𑀭𑀳𑁆𑀫𑀕𑀡𑁂𑀳𑀺 𑀧𑀭𑀺𑀯𑀼𑀢𑀁 𑀪𑀕𑀯𑀦𑁆𑀢𑀁 𑀅𑀦𑀼𑀢𑁆𑀢𑀭𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀅𑀦𑁄𑀧𑀫𑀸𑀬 ¶ 𑀩𑀼𑀤𑁆𑀥𑀮𑀻𑀴𑀸𑀬 𑀲𑀩𑁆𑀩𑀭𑀢𑀦𑀫𑀬𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑀁 𑀤𑀺𑀲𑁆𑀯𑀸 𑁋 ‘‘𑀳𑀦𑁆𑀤𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀧𑀭𑀺𑀤𑀻𑀧𑀦𑀁 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀯𑀲𑀫𑀸𑀦𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁬.

‘‘𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁, 𑀓𑀢𑀓𑀺𑀘𑁆𑀘𑀸𑀦 𑀢𑀸𑀤𑀺𑀦𑀁;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀔𑀡𑁂𑀦 𑀲𑀦𑁆𑀦𑀺𑀧𑀸𑀢𑀬𑀻’’𑀢𑀺.

𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀦𑁆𑀢𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀓𑀢𑀓𑀺𑀘𑁆𑀘𑀸𑀦𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀯𑀲𑁂𑀦 𑀧𑀭𑀺𑀦𑀺𑀝𑁆𑀞𑀺𑀢𑀲𑁄𑀴𑀲𑀓𑀺𑀘𑁆𑀘𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀔𑀻𑀡𑀸𑀲𑀯𑀸𑀦𑀦𑁆𑀢𑀺 𑀧𑀭𑀺𑀓𑁆𑀔𑀻𑀡𑀘𑀢𑀼𑀭𑀸𑀲𑀯𑀸𑀦𑀁. 𑀯𑀺𑀫𑀮𑀸𑀦𑀦𑁆𑀢𑀺 𑀯𑀺𑀕𑀢𑀫𑀮𑀸𑀦𑀁 ¶ , 𑀔𑀻𑀡𑀸𑀲𑀯𑀢𑁆𑀢𑀸 𑀯𑀸 𑀯𑀺𑀫𑀮𑀸𑀦𑀁 𑀧𑀭𑀫𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀔𑀡𑁂𑀦𑀸𑀢𑀺 𑀔𑀡𑁂𑀬𑁂𑀯. 𑀲𑀦𑁆𑀦𑀺𑀧𑀸𑀢𑀬𑀻𑀢𑀺 𑀲𑀦𑁆𑀦𑀺𑀧𑀸𑀢𑁂𑀲𑀺.

𑀇𑀤𑀸𑀦𑀺 ¶ 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀧𑀸𑀢𑁂 𑀕𑀫𑀦𑁂 𑀘 𑀓𑀸𑀭𑀡𑀁 𑀤𑀲𑁆𑀲𑀦𑀢𑁆𑀣𑀁 𑁋

𑁪𑁭.

‘‘𑀮𑁄𑀓𑀧𑁆𑀧𑀲𑀸𑀤𑀦𑀁 𑀦𑀸𑀫, 𑀧𑀸𑀝𑀺𑀳𑀻𑀭𑀁 𑀦𑀺𑀤𑀲𑁆𑀲𑀬𑀺;

𑀅𑀫𑁆𑀳𑁂𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦, 𑀯𑀦𑁆𑀤𑀺𑀲𑁆𑀲𑀸𑀫 𑀫𑀬𑀁 𑀚𑀺𑀦𑀁.

𑁪𑁮.

‘‘𑀏𑀣 𑀲𑀩𑁆𑀩𑁂 𑀕𑀫𑀺𑀲𑁆𑀲𑀸𑀫, 𑀢𑀼𑀘𑁆𑀙𑀺𑀲𑁆𑀲𑀸𑀫 𑀫𑀬𑀁 𑀚𑀺𑀦𑀁;

𑀓𑀗𑁆𑀔𑀁 𑀯𑀺𑀦𑁄𑀤𑀬𑀺𑀲𑁆𑀲𑀸𑀫, 𑀧𑀲𑁆𑀲𑀺𑀢𑁆𑀯𑀸 𑀮𑁄𑀓𑀦𑀸𑀬𑀓’’𑀦𑁆𑀢𑀺. 𑁋 𑀇𑀫𑀸 𑀕𑀸𑀣𑀸𑀬𑁄 𑀯𑀼𑀢𑁆𑀢𑀸;

𑀢𑀢𑁆𑀣 𑀮𑁄𑀓𑀧𑁆𑀧𑀲𑀸𑀤𑀦𑀁 𑀦𑀸𑀫𑀸𑀢𑀺 𑀮𑁄𑀓𑀲𑁆𑀲 𑀧𑀲𑀸𑀤𑀓𑀭𑀡𑀢𑁄 𑀮𑁄𑀓𑀧𑁆𑀧𑀲𑀸𑀤𑀦𑀁 𑀧𑀸𑀝𑀺𑀳𑀻𑀭𑀁 𑀯𑀼𑀘𑁆𑀘𑀢𑀺. ‘‘𑀉𑀮𑁆𑀮𑁄𑀓𑀧𑁆𑀧𑀲𑀸𑀤𑀦𑀁 𑀦𑀸𑀫𑀸𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀉𑀤𑁆𑀥𑀁 𑀅𑀓𑀦𑀺𑀝𑁆𑀞𑀪𑀯𑀦𑀢𑁄 𑀳𑁂𑀝𑁆𑀞𑀸 𑀬𑀸𑀯 𑀅𑀯𑀻𑀘𑀺 𑀏𑀢𑁆𑀣𑀦𑁆𑀢𑀭𑁂 𑀏𑀓𑀸𑀮𑁄𑀓𑀁 𑀓𑀢𑁆𑀯𑀸 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀤𑀲𑁆𑀲𑀦𑀓𑀭𑀡𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀤𑀲𑁆𑀲𑀬𑀻𑀢𑀺 𑀤𑀲𑁆𑀲𑁂𑀲𑀺. 𑀅𑀫𑁆𑀳𑁂𑀧𑀻𑀢𑀺 𑀫𑀬𑀫𑁆𑀧𑀺. 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦𑀸𑀢𑀺 𑀅𑀢𑁆𑀣𑁄. 𑀯𑀦𑁆𑀤𑀺𑀲𑁆𑀲𑀸𑀫𑀸𑀢𑀺 𑀫𑀬𑀁 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀲𑁆𑀲𑀸𑀫. 𑀏𑀢𑁆𑀣 𑀧𑀦 𑀅𑀫𑁆𑀳𑁂𑀧𑀺, 𑀫𑀬𑀦𑁆𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀧𑀼𑀭𑀺𑀫𑀲𑁆𑀲 𑀕𑀫𑀦𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄, 𑀧𑀘𑁆𑀙𑀺𑀫𑀲𑁆𑀲 𑀯𑀦𑁆𑀤𑀦𑀓𑀺𑀭𑀺𑀬𑀸𑀬. 𑀇𑀢𑀭𑀣𑀸 𑀳𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀢𑁄 𑀦 𑀫𑀼𑀘𑁆𑀘𑀢𑀺.

𑀏𑀣𑀸𑀢𑀺 𑀆𑀕𑀘𑁆𑀙𑀣. 𑀓𑀗𑁆𑀔𑀁 ¶ 𑀯𑀺𑀦𑁄𑀤𑀬𑀺𑀲𑁆𑀲𑀸𑀫𑀸𑀢𑀺 𑀏𑀢𑁆𑀣𑀸𑀳 𑁋 𑀔𑀻𑀡𑀸𑀲𑀯𑀸𑀦𑀁 𑀧𑀦 𑀓𑀗𑁆𑀔𑀸 𑀦𑀸𑀫 𑀓𑀸𑀘𑀺𑀧𑀺 𑀦𑀢𑁆𑀣𑀺, 𑀓𑀲𑁆𑀫𑀸 𑀣𑁂𑀭𑁄 𑀏𑀯𑀫𑀸𑀳𑀸𑀢𑀺? 𑀲𑀘𑁆𑀘𑀫𑁂𑀯𑁂𑀢𑀁, 𑀧𑀞𑀫𑀫𑀕𑁆𑀕𑁂𑀦𑁂𑀯 𑀲𑀫𑀼𑀘𑁆𑀙𑁂𑀤𑀁 𑀕𑀢𑀸. 𑀬𑀣𑀸𑀳 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀺? 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀧𑀸𑀬𑀕𑀫𑀦𑀻𑀬𑁄 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’’𑀢𑀺 (𑀥. 𑀲. 𑁧𑁪𑁦𑁫 𑀣𑁄𑀓𑀁 𑀯𑀺𑀲𑀤𑀺𑀲𑀁).

𑀦 𑀧𑀦𑁂𑀲𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀗𑁆𑀔𑀸𑀢𑀸 𑀓𑀗𑁆𑀔𑀸𑀢𑀺, 𑀓𑀺𑀦𑁆𑀢𑀼 𑀧𑀜𑁆𑀜𑀢𑁆𑀢𑀺𑀅𑀚𑀸𑀦𑀦𑀁 𑀦𑀸𑀫. 𑀣𑁂𑀭𑁄 𑀧𑀦 𑀪𑀕𑀯𑀦𑁆𑀢𑀁 𑀩𑀼𑀤𑁆𑀥𑀯𑀁𑀲𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀲𑁄 𑀧𑀦 𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑁄, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁, 𑀢𑀲𑁆𑀫𑀸 𑀣𑁂𑀭𑁄 𑀅𑀯𑀺𑀲𑀬𑀢𑁆𑀢𑀸 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀦𑁄𑀤𑀬𑀺𑀲𑁆𑀲𑀸𑀫𑀸𑀢𑀺 𑀯𑀺𑀦𑁄𑀤𑁂𑀲𑁆𑀲𑀸𑀫.

𑀅𑀣 ¶ ¶ 𑀔𑁄 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀼𑀯𑀫𑁆𑀫𑀺𑀢𑀸 𑀯𑀺𑀬 𑀫𑀳𑀸𑀦𑀸𑀕𑀸 𑀧𑀪𑀺𑀦𑁆𑀦𑀓𑀺𑀮𑁂𑀲𑀸 𑀙𑀺𑀦𑁆𑀦𑀩𑀦𑁆𑀥𑀦𑀸 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀧𑀯𑀺𑀯𑀺𑀢𑁆𑀢𑀸 𑀅𑀲𑀁𑀲𑀝𑁆𑀞𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸 𑀢𑀭𑀫𑀸𑀦𑀸 𑀲𑀦𑁆𑀦𑀺𑀧𑀢𑁆𑀢𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁯.

‘‘𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀦𑀺𑀧𑀓𑀸 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸;

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬, 𑀢𑀭𑀫𑀸𑀦𑀸 𑀉𑀧𑀸𑀕𑀫𑀼’’𑀦𑁆𑀢𑀺.

𑀢𑀢𑁆𑀣 𑀲𑀸𑀥𑀽𑀢𑀺 𑀅𑀬𑀁 𑀲𑀸𑀥𑀼-𑀲𑀤𑁆𑀤𑁄 𑀆𑀬𑀸𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀳𑀁𑀲𑀦𑀲𑀼𑀦𑁆𑀤𑀭𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁯𑁫; 𑁫.𑁩𑁮𑁨; 𑀅. 𑀦𑀺. 𑁪.𑁨𑁫𑁭) 𑀆𑀬𑀸𑀘𑀦𑁂 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯) 𑀲𑀫𑁆𑀧𑀳𑀁𑀲𑀦𑁂.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀺 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁨.𑁧𑁮.𑁧𑁦𑁧) 𑀲𑀼𑀦𑁆𑀤𑀭𑁂. 𑀇𑀥 𑀲𑀫𑁆𑀧𑀝𑀺𑀘𑁆𑀙𑀦𑁂. 𑀢𑀲𑁆𑀫𑀸 𑀲𑀸𑀥𑀼 𑀲𑀼𑀝𑁆𑀞𑀽𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁮𑁯; 𑀫. 𑀦𑀺. 𑀅𑀝𑁆𑀞. 𑁧.𑁧 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧𑁧𑁫 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸). 𑀦𑀺𑀧𑀓𑀸𑀢𑀺 𑀧𑀡𑁆𑀟𑀺𑀢𑀸 𑀧𑀜𑁆𑀜𑀯𑀦𑁆𑀢𑀸. 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀢𑀭𑀫𑀸𑀦𑀸𑀢𑀺 𑀢𑀼𑀭𑀺𑀢𑀸. 𑀉𑀧𑀸𑀕𑀫𑀼𑀦𑁆𑀢𑀺 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀁𑀲𑀼.

𑁫𑁦-𑁧. 𑀇𑀤𑀸𑀦𑀺 ¶ 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 ‘‘𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀻’’𑀢𑀺𑀆𑀤𑀺𑀕𑀸𑀣𑀸𑀬𑁄 𑀯𑀼𑀢𑁆𑀢𑀸 𑀢𑀢𑁆𑀣 𑀤𑀦𑁆𑀢𑁂𑀳𑀻𑀢𑀺 𑀓𑀸𑀬𑁂𑀦 𑀘 𑀘𑀺𑀢𑁆𑀢𑁂𑀦 𑀘 𑀤𑀦𑁆𑀢𑁂𑀳𑀺. 𑀉𑀢𑁆𑀢𑀫𑁂 𑀤𑀫𑁂𑀢𑀺 𑀅𑀭𑀳𑀢𑁆𑀢𑁂, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀫𑀳𑀸𑀕𑀡𑀻𑀢𑀺 𑀲𑀻𑀮𑀸𑀤𑀻𑀳𑀺 𑀘 𑀲𑀗𑁆𑀔𑁆𑀬𑀸𑀯𑀲𑁂𑀦 𑀘 𑀫𑀳𑀦𑁆𑀢𑁄 𑀕𑀡𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀸𑀕𑀡𑀻, 𑀦𑀸𑀦𑀸𑀧𑀤𑀯𑀲𑁂𑀦 𑀯𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀫𑀳𑀦𑁆𑀢𑁄 𑀕𑀡𑁄𑀢𑀺 𑀫𑀳𑀸𑀕𑀡𑁄, 𑀫𑀳𑀸𑀕𑀡𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀸𑀕𑀡𑀻. 𑀮𑀴𑀦𑁆𑀢𑁄 𑀤𑁂𑀯𑁄𑀯 𑀕𑀕𑀦𑁂𑀢𑀺 𑀇𑀤𑁆𑀥𑀺𑀯𑀺𑀮𑀸𑀲𑁂𑀦 𑀯𑀺𑀮𑀸𑀲𑁂𑀦𑁆𑀢𑁄 𑀤𑁂𑀯𑁄 𑀯𑀺𑀬 𑀕𑀕𑀦𑀢𑀮𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄.

𑁫𑁨. 𑀇𑀤𑀸𑀦𑀺 ¶ ‘‘𑀢𑁂 𑀇𑀢𑁆𑀣𑀫𑁆𑀪𑀽𑀢𑀸 𑀉𑀧𑀲𑀗𑁆𑀓𑀫𑀺𑀁𑀲𑀽’’𑀢𑀺 𑀉𑀧𑀲𑀗𑁆𑀓𑀫𑀯𑀺𑀥𑀸𑀦𑀤𑀲𑁆𑀲𑀦𑀢𑁆𑀣𑀁 ‘‘𑀉𑀓𑁆𑀓𑀸𑀲𑀺𑀢𑀜𑁆𑀘 𑀔𑀺𑀧𑀺𑀢’’𑀦𑁆𑀢𑀺𑀆𑀤𑀺 ¶ 𑀆𑀭𑀤𑁆𑀥𑀁. 𑀢𑀢𑁆𑀣 𑀉𑀓𑁆𑀓𑀸𑀲𑀺𑀢𑀜𑁆𑀘𑀸𑀢𑀺 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀜𑁆𑀘. 𑀔𑀺𑀧𑀺𑀢𑀦𑁆𑀢𑀺 𑀔𑀺𑀧𑀺𑀢𑀲𑀤𑁆𑀤𑀜𑁆𑀘. 𑀅𑀚𑁆𑀛𑀼𑀧𑁂𑀓𑁆𑀔𑀺𑀬𑀸𑀢𑀺 𑀉𑀧𑁂𑀓𑁆𑀔𑀺𑀢𑁆𑀯𑀸, 𑀢𑀁 𑀉𑀪𑀬𑀁 𑀅𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀩𑁆𑀩𑀢𑀸𑀢𑀺 𑀲𑀼𑀯𑀺𑀫𑀮𑀥𑀼𑀢𑀕𑀼𑀡𑀸. 𑀲𑀧𑁆𑀧𑀢𑀺𑀲𑁆𑀲𑀸𑀢𑀺 𑀲𑀳𑀧𑀢𑀺𑀲𑁆𑀲𑀬𑀸, 𑀦𑀻𑀘𑀯𑀼𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄.

𑁫𑁩. 𑀲𑀬𑀫𑁆𑀪𑀼𑀦𑁆𑀢𑀺 𑀲𑀬𑀫𑁂𑀯 𑀅𑀜𑁆𑀜𑀸𑀧𑀤𑁂𑀲𑀁 𑀯𑀺𑀦𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀥𑀺𑀕𑀢𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀼𑀕𑁆𑀕𑀢𑀦𑁆𑀢𑀺 𑀅𑀪𑀺𑀦𑀯𑁄𑀤𑀺𑀢𑀁. 𑀘𑀦𑁆𑀤𑀁 𑀯𑀸𑀢𑀺 𑀘𑀦𑁆𑀤𑀁 𑀯𑀺𑀬, 𑀦𑀪𑁂 𑀚𑀮𑀦𑁆𑀢𑀁 𑀪𑀕𑀯𑀦𑁆𑀢𑀁 𑀕𑀕𑀦𑁂 𑀘𑀦𑁆𑀤𑀁 𑀯𑀺𑀬 𑀧𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀧𑀤𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀇𑀥𑀸𑀧𑀺 𑀬𑀣𑀸-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑁄𑀯.

𑁫𑁪. 𑀯𑀺𑀚𑁆𑀚𑀼𑀁 𑀯𑀸𑀢𑀺 𑀯𑀺𑀚𑁆𑀚𑀼𑀖𑀦𑀁 𑀯𑀺𑀬. 𑀬𑀤𑀺 𑀘𑀺𑀭𑀝𑁆𑀞𑀺𑀢𑀺𑀓𑀸 𑀅𑀘𑀺𑀭𑀧𑁆𑀧𑀪𑀸 𑀅𑀲𑁆𑀲 𑀢𑀸𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀕𑀕𑀦𑁂 𑀬𑀣𑀸𑀢𑀺 𑀆𑀓𑀸𑀲𑁂 𑀬𑀣𑀸, 𑀇𑀥𑀸𑀧𑀺 𑀬𑀣𑀸-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑁄𑀯. 𑀇𑀢𑁄 𑀧𑀭𑀫𑁆𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀣𑀸-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁫𑁫. 𑀭𑀳𑀤𑀫𑀺𑀯 𑀯𑀺𑀧𑁆𑀧𑀲𑀦𑁆𑀦𑀦𑁆𑀢𑀺 𑀅𑀢𑀺𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑀁 𑀫𑀳𑀸𑀭𑀳𑀤𑀁 𑀯𑀺𑀬 𑀅𑀦𑀸𑀯𑀺𑀮𑀁 𑀯𑀺𑀧𑁆𑀧𑀲𑀦𑁆𑀦𑀁 𑀲𑀮𑀺𑀮𑀁. 𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀬𑀣𑀸𑀢𑀺 𑀲𑀼𑀯𑀺𑀓𑀲𑀺𑀢𑀧𑀤𑀼𑀫𑀯𑀦𑀁 𑀭𑀳𑀤𑀫𑀺𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀲𑀼𑀨𑀼𑀮𑁆𑀮𑀁 𑀓𑀫𑀮𑀁 𑀬𑀣𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀓𑀫𑀦𑀻𑀬𑀪𑀸𑀯𑁂𑀦 𑀲𑀼𑀨𑀼𑀮𑁆𑀮𑀁 𑀓𑀫𑀮𑀯𑀦𑀫𑀺𑀯𑀸𑀢𑀺 𑀅𑀢𑁆𑀣𑁄.

𑁫𑁬. 𑀅𑀣 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑁂𑀦𑀸𑀧𑀢𑀺𑀧𑁆𑀧𑀫𑀼𑀔𑀸 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀤𑀲𑀩𑀮𑀲𑁆𑀲 𑀘𑀓𑁆𑀓𑀸𑀮𑀗𑁆𑀓𑀢𑀢𑀮𑁂𑀲𑀼 𑀧𑀸𑀤𑁂𑀲𑀼 𑀦𑀺𑀧𑀢𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀧𑀢𑀦𑁆𑀢𑀻𑀢𑀺 𑀦𑀺𑀧𑀢𑀺𑀁𑀲𑀼, 𑀯𑀦𑁆𑀤𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀮𑀓𑁆𑀔𑀡𑁂𑀢𑀺 ¶ 𑀘𑀓𑁆𑀓𑀁 𑀮𑀓𑁆𑀔𑀡𑀁 𑀬𑀲𑁆𑀫𑀺𑀁 𑀧𑀸𑀤𑁂 𑀲𑁄 𑀧𑀸𑀤𑁄 𑀘𑀓𑁆𑀓𑀮𑀓𑁆𑀔𑀡𑁄, 𑀢𑀲𑁆𑀫𑀺𑀁 𑀘𑀓𑁆𑀓𑀮𑀓𑁆𑀔𑀡𑁂. 𑀚𑀸𑀢𑀺𑀯𑀲𑁂𑀦 ‘‘𑀧𑀸𑀤𑁂’’𑀢𑀺 𑀯𑀼𑀢𑁆𑀢𑀁, 𑀲𑀢𑁆𑀣𑀼𑀦𑁄 𑀘𑀓𑁆𑀓𑀸𑀮𑀗𑁆𑀓𑀢𑀢𑀮𑁂𑀲𑀼 𑀧𑀸𑀤𑁂𑀲𑀼 𑀦𑀺𑀧𑀢𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁫𑁭. 𑀇𑀤𑀸𑀦𑀺 𑀢𑁂𑀲𑀁 𑀓𑁂𑀲𑀜𑁆𑀘𑀺 𑀣𑁂𑀭𑀸𑀦𑀁 𑀦𑀸𑀫𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀓𑁄𑀭𑀡𑁆𑀟𑀲𑀫𑀲𑀸𑀤𑀺𑀲𑁄’’𑀢𑀺𑀆𑀤𑀺 𑀕𑀸𑀣𑀸𑀬𑁄 𑀯𑀼𑀢𑁆𑀢𑀸. 𑀢𑀢𑁆𑀣 𑀓𑁄𑀭𑀡𑁆𑀟𑀲𑀫𑀲𑀸𑀤𑀺𑀲𑁄𑀢𑀺 𑀓𑁄𑀭𑀡𑁆𑀟𑀓𑀼𑀲𑀼𑀫𑀲𑀤𑀺𑀲𑀯𑀡𑁆𑀡𑁄, 𑀬𑀤𑀺 𑀏𑀯𑀁 ‘‘𑀓𑁄𑀭𑀡𑁆𑀟𑀲𑀫𑁄’’𑀢𑀺 𑀯𑀸, ‘‘𑀓𑁄𑀭𑀡𑁆𑀟𑀲𑀤𑀺𑀲𑁄’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁, 𑀓𑀺𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 ¶ ‘‘𑀲𑀫𑀲𑀸𑀤𑀺𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄, 𑀢𑀸𑀤𑀺𑀲𑁄 𑀓𑁄𑀭𑀡𑁆𑀟𑀲𑀫𑀢𑁆𑀢𑀸 𑀓𑁄𑀭𑀡𑁆𑀟𑀲𑀤𑀺𑀲𑀪𑀸𑀯𑁂𑀦𑁂𑀯 𑀓𑁄𑀭𑀡𑁆𑀟𑀲𑀫𑀲𑀸𑀤𑀺𑀲𑁄. 𑀦 𑀧𑀦𑀸𑀥𑀺𑀓𑀯𑀘𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀸𑀥𑀺𑀚𑁆𑀛𑀸𑀦𑀓𑀼𑀲𑀮𑁄𑀢𑀺 𑀏𑀢𑁆𑀣 𑀅𑀬𑀁 𑀓𑀼𑀲𑀮-𑀲𑀤𑁆𑀤𑁄 𑀢𑀸𑀯 𑀅𑀭𑁄𑀕𑁆𑀬𑀸𑀦𑀯𑀚𑁆𑀚𑀙𑁂𑀓𑀲𑀼𑀔𑀯𑀺𑀧𑀸𑀓𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯) 𑀆𑀭𑁄𑀕𑁆𑀬𑁂 𑀤𑀺𑀲𑁆𑀲𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀸𑀬𑀲𑀫𑀸𑀘𑀸𑀭𑁄 𑀓𑀼𑀲𑀮𑁄 ¶ ? 𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺 (𑀫. 𑀦𑀺. 𑁨.𑁩𑁬𑁧) 𑀏𑀯𑀫𑀸𑀤𑀻𑀲𑀼 𑀅𑀦𑀯𑀚𑁆𑀚𑁂. ‘‘𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁮𑁭) 𑀙𑁂𑀓𑁂. ‘‘𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁪𑁩𑁧 𑀆𑀤𑀬𑁄) 𑀲𑀼𑀔𑀯𑀺𑀧𑀸𑀓𑁂. 𑀇𑀥 𑀧𑀦 𑀙𑁂𑀓𑁂 𑀤𑀝𑁆𑀞𑀩𑁆𑀩𑁄. 𑀯𑀦𑁆𑀤𑀢𑁂𑀢𑀺 𑀯𑀦𑁆𑀤𑀺𑀢𑁆𑀣.

𑁫𑁮. 𑀕𑀚𑁆𑀚𑀺𑀢𑀸𑀢𑀺 𑀕𑀚𑁆𑀚𑀦𑁆𑀢𑀻𑀢𑀺 𑀕𑀚𑁆𑀚𑀺𑀢𑀸. 𑀓𑀸𑀮𑀫𑁂𑀖𑁄 𑀯𑀸𑀢𑀺 𑀦𑀻𑀮𑀲𑀮𑀺𑀮𑀥𑀭𑁄 𑀯𑀺𑀬 𑀕𑀚𑁆𑀚𑀺𑀢𑀸 𑀇𑀤𑁆𑀥𑀺𑀯𑀺𑀲𑀬𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀻𑀮𑀼𑀧𑁆𑀧𑀮𑀲𑀫𑀲𑀸𑀤𑀺𑀲𑁄𑀢𑀺 𑀦𑀻𑀮𑀓𑀼𑀯𑀮𑀬𑀲𑀤𑀺𑀲𑀯𑀡𑁆𑀡𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀏𑀯𑀁 𑀕𑁄𑀢𑁆𑀢𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀓𑁄𑀮𑀺𑀢𑁄.

𑁫𑁯. 𑀫𑀳𑀸𑀓𑀲𑁆𑀲𑀧𑁄𑀧𑀺 𑀘𑀸𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀦𑀤𑀻𑀓𑀲𑁆𑀲𑀧𑀕𑀬𑀸𑀓𑀲𑁆𑀲𑀧𑀓𑀼𑀫𑀸𑀭𑀓𑀲𑁆𑀲𑀧𑁂 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑁂 𑀣𑁂𑀭𑁂 𑀉𑀧𑀸𑀤𑀸𑀬 𑀅𑀬𑀁 𑀫𑀳𑀸, 𑀢𑀲𑁆𑀫𑀸 ‘‘𑀫𑀳𑀸𑀓𑀲𑁆𑀲𑀧𑁄’’𑀢𑀺 𑀯𑀼𑀢𑁆𑀢𑁄. 𑀧𑀺 𑀘𑀸𑀢𑀺 𑀲𑀫𑁆𑀪𑀸𑀯𑀦𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀉𑀢𑁆𑀢𑀢𑁆𑀢𑀓𑀦𑀓𑀲𑀦𑁆𑀦𑀺𑀪𑁄𑀢𑀺 𑀲𑀦𑁆𑀢𑀢𑁆𑀢𑀲𑀼𑀯𑀡𑁆𑀡𑀲𑀤𑀺𑀲𑀙𑀯𑀺𑀯𑀡𑁆𑀡𑁄. 𑀥𑀼𑀢𑀕𑀼𑀡𑁂𑀢𑀺 𑀏𑀢𑁆𑀣 𑀓𑀺𑀮𑁂𑀲𑀥𑀼𑀦𑀦𑀢𑁄 𑀥𑀫𑁆𑀫𑁄 𑀥𑀼𑀢𑁄 𑀦𑀸𑀫, 𑀥𑀼𑀢𑀕𑀼𑀡𑁄 𑀦𑀸𑀫 𑀥𑀼𑀢𑀥𑀫𑁆𑀫𑁄. 𑀓𑀢𑀫𑁄 𑀧𑀦 𑀥𑀼𑀢𑀥𑀫𑁆𑀫𑁄 𑀦𑀸𑀫? 𑀅𑀧𑁆𑀧𑀺𑀘𑁆𑀙𑀢𑀸, 𑀲𑀦𑁆𑀢𑀼𑀝𑁆𑀞𑀺𑀢𑀸, 𑀲𑀮𑁆𑀮𑁂𑀔𑀢𑀸, 𑀧𑀯𑀺𑀯𑁂𑀓𑀢𑀸, 𑀇𑀤𑀫𑀝𑁆𑀞𑀺𑀓𑀢𑀸𑀢𑀺 𑀇𑀫𑁂 𑀥𑀼𑀢𑀗𑁆𑀕𑀘𑁂𑀢𑀦𑀸𑀬 𑀧𑀭𑀺𑀯𑀸𑀭𑀪𑀽𑀢𑀸 𑀧𑀜𑁆𑀘 𑀥𑀫𑁆𑀫𑀸 ‘‘𑀅𑀧𑁆𑀧𑀺𑀘𑁆𑀙𑀁𑀬𑁂𑀯 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀥𑀼𑀢𑀥𑀫𑁆𑀫𑀸 𑀦𑀸𑀫. 𑀅𑀣 𑀯𑀸 𑀓𑀺𑀮𑁂𑀲𑁂 𑀥𑀼𑀦𑀦𑀢𑁄 𑀜𑀸𑀡𑀁 𑀥𑀼𑀢𑀁 𑀦𑀸𑀫, 𑀢𑀲𑁆𑀫𑀺𑀁 𑀥𑀼𑀢𑀕𑀼𑀡𑁂. 𑀅𑀕𑁆𑀕𑀦𑀺𑀓𑁆𑀔𑀺𑀢𑁆𑀢𑁄𑀢𑀺 ¶ 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀓𑁄𑀝𑀺𑀪𑀽𑀢𑁄𑀢𑀺 𑀞𑀧𑀺𑀢𑁄. ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁧) 𑀞𑀸𑀦𑀦𑁆𑀢𑀭𑁂 𑀞𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀅𑀕𑁆𑀕-𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 𑁋 ‘‘𑀅𑀚𑁆𑀚𑀢𑀕𑁆𑀕𑁂, 𑀲𑀫𑁆𑀫 𑀤𑁄𑀯𑀸𑀭𑀺𑀓 ¶ , 𑀆𑀯𑀭𑀸𑀫𑀺 𑀤𑀸𑀭𑀁 𑀦𑀺𑀕𑀡𑁆𑀞𑀸𑀦𑀁 𑀦𑀺𑀕𑀡𑁆𑀞𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁦) 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. ‘‘𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬’’ (𑀓𑀣𑀸. 𑁪𑁪𑁧), ‘‘𑀉𑀘𑁆𑀙𑀕𑁆𑀕𑀁 𑀯𑁂𑀴𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. ‘‘𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑀥𑀼𑀭𑀕𑁆𑀕𑀁 𑀯𑀸’’ (𑀲𑀁. 𑀦𑀺. 𑁫.𑁩𑁭𑁪) ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀓𑁄𑀝𑁆𑀞𑀸𑀲𑁂. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪) 𑀲𑁂𑀝𑁆𑀞𑁂. 𑀲𑁆𑀯𑀸𑀬𑀫𑀺𑀥 𑀲𑁂𑀝𑁆𑀞𑁂 𑀤𑀝𑁆𑀞𑀩𑁆𑀩𑁄. 𑀓𑁄𑀝𑀺𑀬𑀫𑁆𑀧𑀺 𑀯𑀢𑁆𑀢𑀢𑀺. 𑀣𑁂𑀭𑁄 𑀅𑀢𑁆𑀢𑀦𑁄 𑀞𑀸𑀦𑁂 𑀲𑁂𑀝𑁆𑀞𑁄 𑀘𑁂𑀯 𑀓𑁄𑀝𑀺𑀪𑀽𑀢𑁄 𑀘. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀕𑁆𑀕𑀦𑀺𑀓𑁆𑀔𑀺𑀢𑁆𑀢𑁄’’𑀢𑀺, 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀓𑁄𑀝𑀺𑀪𑀽𑀢𑁄𑀢𑀺 𑀅𑀢𑁆𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦 𑀲𑀭𑀡𑀕𑀫𑀦𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑁧𑁫). 𑀣𑁄𑀫𑀺𑀢𑁄𑀢𑀺 𑀧𑀲𑀁𑀲𑀺𑀢𑁄 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀳𑀺. 𑀲𑀢𑁆𑀣𑀼 𑀯𑀡𑁆𑀡𑀺𑀢𑁄𑀢𑀺 𑀲𑀢𑁆𑀣𑀸𑀭𑀸 𑀯𑀡𑁆𑀡𑀺𑀢𑁄 𑀣𑀼𑀢𑁄, ‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀽𑀧𑀫𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑀅𑀧𑀓𑀲𑁆𑀲𑁂𑀯 ¶ 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑁄 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑁄’’𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀦𑀬𑁂𑀳𑀺 (𑀲𑀁. 𑀦𑀺. 𑁨.𑁧𑁪𑁬) 𑀯𑀡𑁆𑀡𑀺𑀢𑁄 𑀧𑀲𑀢𑁆𑀣𑁄, 𑀲𑁄𑀧𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀢𑀻𑀢𑀺 𑀅𑀢𑁆𑀣𑁄.

𑁬𑁦. 𑀤𑀺𑀩𑁆𑀩𑀘𑀓𑁆𑀔𑀽𑀦𑀦𑁆𑀢𑀺 𑀤𑀺𑀩𑁆𑀩𑀁 𑀘𑀓𑁆𑀔𑀼 𑀬𑁂𑀲𑀁 𑀅𑀢𑁆𑀣𑀺 𑀢𑁂 𑀤𑀺𑀩𑁆𑀩𑀘𑀓𑁆𑀔𑀽, 𑀢𑁂𑀲𑀁 𑀤𑀺𑀩𑁆𑀩𑀘𑀓𑁆𑀔𑀽𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀬𑀤𑀺𑀤𑀁 𑀅𑀦𑀼𑀭𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁨). 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀪𑀕𑀯𑀢𑁄 𑀘𑀽𑀴𑀧𑀺𑀢𑀼𑀦𑁄 𑀅𑀫𑀺𑀢𑁄𑀤𑀦𑀲𑁆𑀲 𑀦𑀸𑀫 𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀦𑀸𑀫𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀫𑀳𑀸𑀧𑀼𑀜𑁆𑀜𑁄 𑀧𑀭𑀫𑀲𑀼𑀔𑀼𑀫𑀸𑀮𑁄, 𑀲𑁄 𑀅𑀢𑁆𑀢𑀲𑀢𑁆𑀢𑀫𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀦𑀼𑀓𑁆𑀓𑀫𑁄 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁩𑁦 𑀆𑀤𑀬𑁄) 𑀆𑀕𑀢𑁄𑀯. 𑀅𑀯𑀺𑀤𑀽𑀭𑁂 𑀯𑀸𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂𑀬𑁂𑀯.

𑁬𑁧. 𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀺𑀬𑀸𑀢𑀺 𑀆𑀧𑀢𑁆𑀢𑀺𑀬𑀜𑁆𑀘 𑀅𑀦𑀸𑀧𑀢𑁆𑀢𑀺𑀬𑀜𑁆𑀘 𑀓𑁄𑀯𑀺𑀤𑁄. 𑀲𑀢𑁂𑀓𑀺𑀘𑁆𑀙𑀸𑀬𑀸𑀢𑀺 𑀲𑀧𑁆𑀧𑀝𑀺𑀓𑀫𑁆𑀫𑀸𑀬𑀧𑀺 𑀅𑀧𑁆𑀧𑀝𑀺𑀓𑀫𑁆𑀫𑀸𑀬𑀧𑀺 𑀘𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀧𑁆𑀧𑀝𑀺𑀓𑀫𑁆𑀫𑀸 𑀲𑀸 𑀙𑀩𑁆𑀩𑀺𑀥𑀸 𑀳𑁄𑀢𑀺, 𑀅𑀧𑁆𑀧𑀝𑀺𑀓𑀫𑁆𑀫𑀸 𑀲𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. ‘‘𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀺𑀬𑀸, 𑀲𑀢𑁂𑀓𑀺𑀘𑁆𑀙𑀸𑀬 𑀓𑁄𑀯𑀺𑀤𑁄’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯 𑀅𑀢𑁆𑀣𑁄. 𑀯𑀺𑀦𑀬𑁂𑀢𑀺 ¶ 𑀯𑀺𑀦𑀬𑀧𑀺𑀝𑀓𑁂. 𑀅𑀕𑁆𑀕𑀦𑀺𑀓𑁆𑀔𑀺𑀢𑁆𑀢𑁄𑀢𑀺 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂 ¶ , 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁, 𑀉𑀧𑀸𑀮𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮) 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀸𑀮𑀻𑀢𑀺 𑀉𑀧𑀸𑀮𑀺𑀢𑁆𑀣𑁂𑀭𑁄. 𑀲𑀢𑁆𑀣𑀼 𑀯𑀡𑁆𑀡𑀺𑀢𑁄𑀢𑀺 𑀲𑀢𑁆𑀣𑀸𑀭𑀸 𑀯𑀡𑁆𑀡𑀺𑀢𑁄 𑀧𑀲𑀢𑁆𑀣𑁄. 𑀣𑁂𑀭𑁄 𑀓𑀺𑀭 𑀢𑀣𑀸𑀕𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀯𑀺𑀦𑀬𑀧𑀺𑀝𑀓𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀪𑀸𑀭𑀼𑀓𑀘𑁆𑀙𑀓𑀯𑀢𑁆𑀣𑀼𑀁 (𑀧𑀸𑀭𑀸. 𑁭𑁮), 𑀅𑀚𑁆𑀚𑀼𑀓𑀯𑀢𑁆𑀣𑀼𑀁 (𑀧𑀸𑀭𑀸. 𑁧𑁫𑁮), 𑀓𑀼𑀫𑀸𑀭𑀓𑀲𑁆𑀲𑀧𑀯𑀢𑁆𑀣𑀼𑀦𑁆𑀢𑀺 (𑀫. 𑀦𑀺. 𑁧.𑁨𑁪𑁯) 𑀇𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀲𑀺. 𑀢𑀲𑁆𑀫𑀸 𑀣𑁂𑀭𑁄 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑁄𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀲𑀢𑁆𑀣𑀸𑀭𑀸 𑀯𑀡𑁆𑀡𑀺𑀢𑁄𑀢𑀺 𑀯𑀼𑀢𑁆𑀢𑁄.

𑁬𑁨. 𑀲𑀼𑀔𑀼𑀫𑀦𑀺𑀧𑀼𑀡𑀢𑁆𑀣𑀧𑀝𑀺𑀯𑀺𑀤𑁆𑀥𑁄𑀢𑀺 𑀧𑀝𑀺𑀯𑀺𑀤𑁆𑀥𑀲𑀼𑀔𑀼𑀫𑀦𑀺𑀧𑀼𑀡𑀢𑁆𑀣𑁄, 𑀧𑀝𑀺𑀯𑀺𑀤𑁆𑀥𑀤𑀼𑀤𑁆𑀤𑀲𑀦𑀺𑀧𑀼𑀡𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀓𑀣𑀺𑀓𑀸𑀦𑀁 𑀧𑀯𑀭𑁄𑀢𑀺 𑀥𑀫𑁆𑀫𑀓𑀣𑀺𑀓𑀸𑀦𑀁 𑀲𑁂𑀝𑁆𑀞𑁄. ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁬) 𑀏𑀢𑀤𑀕𑁆𑀕𑀧𑀸𑀴𑀺𑀬𑀁 𑀆𑀭𑁄𑀧𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀣𑀺𑀓𑀸𑀦𑀁 𑀧𑀯𑀭𑁄’’𑀢𑀺. 𑀕𑀡𑀻𑀢𑀺 𑀲𑀲𑀗𑁆𑀖𑁄. 𑀣𑁂𑀭𑀲𑁆𑀲 𑀓𑀺𑀭 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀧𑀜𑁆𑀘𑀲𑀢𑀸 𑀅𑀳𑁂𑀲𑀼𑀁. 𑀲𑀩𑁆𑀩𑁂𑀧𑀺 𑀢𑁂 𑀤𑀲𑀩𑀮𑀲𑁆𑀲 𑀚𑀸𑀢𑀪𑀽𑀫𑀺𑀓𑀸 𑀚𑀸𑀢𑀭𑀝𑁆𑀞𑀯𑀸𑀲𑀺𑀦𑁄 𑀲𑀩𑁆𑀩𑁂𑀯 𑀔𑀻𑀡𑀸𑀲𑀯𑀸 𑀲𑀩𑁆𑀩𑁂𑀯 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀡𑀻’’𑀢𑀺. 𑀇𑀲𑀻𑀢𑀺 𑀏𑀲𑀢𑀺 𑀕𑀯𑁂𑀲𑀢𑀺 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀇𑀲𑀺. 𑀫𑀦𑁆𑀢𑀸𑀡𑀺𑀬𑀸 𑀧𑀼𑀢𑁆𑀢𑁄𑀢𑀺 𑀫𑀦𑁆𑀢𑀸𑀡𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀧𑀼𑀡𑁆𑀡𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀯𑀺𑀲𑁆𑀲𑀼𑀢𑁄𑀢𑀺 𑀅𑀢𑁆𑀢𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀺𑀲𑁆𑀲𑀼𑀢𑁄.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 ¶ 𑀧𑀦 𑀲𑀢𑁆𑀣𑀭𑀺 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀅𑀦𑀼𑀧𑀼𑀩𑁆𑀩𑁂𑀦 𑀆𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀧𑀼𑀡𑁆𑀡𑀁 𑀦𑀸𑀫 𑀫𑀸𑀡𑀯𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀯𑀸𑀲𑀢𑁆𑀣𑀸𑀬 𑀲𑀬𑀁 𑀙𑀤𑁆𑀤𑀦𑁆𑀢𑀤𑀳𑀁 𑀕𑀢𑁄. 𑀧𑀼𑀡𑁆𑀡𑁄 𑀧𑀦 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑁋 ‘‘𑀫𑀬𑁆𑀳𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸𑀯 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀓𑀧𑀺𑀮𑀧𑀼𑀭𑁂𑀬𑁂𑀯 𑀑𑀳𑀻𑀦𑁄, 𑀲𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀏𑀢𑁆𑀣 𑀧𑀦 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘 𑀉𑀧𑀸𑀮𑀺𑀢𑁆𑀣𑁂𑀭𑁄 𑀘 𑀇𑀫𑁂 𑀤𑁆𑀯𑁂 𑀣𑁂𑀭𑀸 𑀪𑀕𑀯𑀢𑁄 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀜𑀸𑀢𑀺𑀲𑀫𑀸𑀕𑀫𑀤𑀺𑀯𑀲𑁂 𑀧𑀩𑁆𑀩𑀚𑀺𑀢𑀸 𑀯𑀺𑀬 𑀤𑀲𑁆𑀲𑀺𑀢𑀸, 𑀢𑀁 𑀧𑀦 𑀔𑀦𑁆𑀥𑀓𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀦 𑀲𑀫𑁂𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀣 ¶ 𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁 ¶ 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀘𑀺𑀢𑁆𑀢𑀸𑀘𑀸𑀭𑀫𑀜𑁆𑀜𑀸𑀬 𑀅𑀢𑁆𑀢𑀦𑁄 𑀕𑀼𑀡𑁂 𑀓𑀣𑁂𑀢𑀼𑀫𑀸𑀭𑀪𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁩.

‘‘𑀏𑀢𑁂𑀲𑀁 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀑𑀧𑀫𑁆𑀫𑀓𑀼𑀲𑀮𑁄 𑀫𑀼𑀦𑀺;

𑀓𑀗𑁆𑀔𑀘𑁆𑀙𑁂𑀤𑁄 𑀫𑀳𑀸𑀯𑀻𑀭𑁄, 𑀓𑀣𑁂𑀲𑀺 𑀅𑀢𑁆𑀢𑀦𑁄 𑀕𑀼𑀡’’𑀦𑁆𑀢𑀺.

𑀢𑀢𑁆𑀣 𑀑𑀧𑀫𑁆𑀫𑀓𑀼𑀲𑀮𑁄𑀢𑀺 𑀉𑀧𑀫𑀸𑀬 𑀓𑀼𑀲𑀮𑁄. 𑀓𑀗𑁆𑀔𑀘𑁆𑀙𑁂𑀤𑁄𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀁𑀲𑀬𑀘𑁆𑀙𑁂𑀤𑀓𑁄.

𑀇𑀤𑀸𑀦𑀺 𑀢𑁂 𑀅𑀢𑁆𑀢𑀦𑁄 𑀕𑀼𑀡𑁂 𑀓𑀣𑁂𑀲𑀺, 𑀢𑁂 𑀤𑀲𑁆𑀲𑁂𑀢𑀼𑀁 𑁋

𑁬𑁪.

‘‘𑀘𑀢𑁆𑀢𑀸𑀭𑁄 𑀢𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸, 𑀓𑁄𑀝𑀺 𑀬𑁂𑀲𑀁 𑀦 𑀦𑀸𑀬𑀢𑀺;

𑀲𑀢𑁆𑀢𑀓𑀸𑀬𑁄 𑀘 𑀆𑀓𑀸𑀲𑁄, 𑀘𑀓𑁆𑀓𑀯𑀸𑀴𑀸 𑀘𑀦𑀦𑁆𑀢𑀓𑀸;

𑀩𑀼𑀤𑁆𑀥𑀜𑀸𑀡𑀁 𑀅𑀧𑁆𑀧𑀫𑁂𑀬𑁆𑀬𑀁, 𑀦 𑀲𑀓𑁆𑀓𑀸 𑀏𑀢𑁂 𑀯𑀺𑀚𑀸𑀦𑀺𑀢𑀼’’𑀦𑁆𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀏𑀢𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑁂 𑀦𑀺𑀤𑀲𑁆𑀲𑁂𑀢𑀺. 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺 𑀲𑀗𑁆𑀔𑁆𑀬𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸, 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑁄𑀝𑀻𑀢𑀺𑀆𑀤𑀺 𑀯𑀸 𑀅𑀦𑁆𑀢𑁄 𑀯𑀸 𑀫𑀭𑀺𑀬𑀸𑀤𑀸. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁. 𑀦 𑀦𑀸𑀬𑀢𑀻𑀢𑀺 𑀦 𑀧𑀜𑁆𑀜𑀸𑀬𑀢𑀺. 𑀇𑀤𑀸𑀦𑀺 𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀓𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀓𑀸𑀬𑁄𑀢𑀺 𑀲𑀢𑁆𑀢𑀲𑀫𑀽𑀳𑁄, 𑀲𑀢𑁆𑀢𑀓𑀸𑀬𑁄 𑀅𑀦𑀦𑁆𑀢𑁄 𑀅𑀧𑀭𑀺𑀫𑀸𑀡𑁄 𑀅𑀧𑁆𑀧𑀫𑁂𑀬𑁆𑀬𑁄. 𑀢𑀣𑀸 𑀆𑀓𑀸𑀲𑁄 𑀆𑀓𑀸𑀲𑀲𑁆𑀲𑀸𑀧𑀺 𑀅𑀦𑁆𑀢𑁄 𑀦𑀢𑁆𑀣𑀺. 𑀢𑀣𑀸 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸𑀦𑀺 𑀏𑀯. 𑀩𑀼𑀤𑁆𑀥𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀧𑁆𑀧𑀫𑁂𑀬𑁆𑀬𑀁. 𑀦 𑀲𑀓𑁆𑀓𑀸 𑀏𑀢𑁂 𑀯𑀺𑀚𑀸𑀦𑀺𑀢𑀼𑀦𑁆𑀢𑀺 𑀬𑀲𑁆𑀫𑀸 𑀧𑀦𑁂𑀢𑁂 𑀅𑀦𑀦𑁆𑀢𑀸, 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀯𑀺𑀚𑀸𑀦𑀺𑀢𑀼𑀁.

𑁬𑁫. 𑀇𑀤𑀸𑀦𑀺 ¶ 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑁂 𑀲𑀜𑁆𑀚𑀸𑀢𑀘𑁆𑀙𑀭𑀺𑀬𑀩𑁆𑀪𑀼𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀦𑀁 𑀓𑀺𑀦𑁆𑀦𑀸𑀫𑁂𑀢𑀁 𑀅𑀘𑁆𑀙𑀭𑀺𑀬𑀁, 𑀇𑀢𑁄𑀧𑀺 𑀯𑀺𑀲𑀺𑀝𑁆𑀞𑀢𑀭𑀁 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀁 𑀅𑀢𑁆𑀣𑀺, 𑀫𑀫 𑀢𑀁 𑀲𑀼𑀡𑀸𑀣𑀸𑀢𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑁋

‘‘𑀓𑀺𑀫𑁂𑀢𑀁 𑀅𑀘𑁆𑀙𑀭𑀺𑀬𑀁 𑀮𑁄𑀓𑁂, 𑀬𑀁 𑀫𑁂 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁;

𑀅𑀜𑁆𑀜𑁂 𑀩𑀳𑀽 𑀅𑀘𑁆𑀙𑀭𑀺𑀬𑀸, 𑀅𑀩𑁆𑀪𑀼𑀢𑀸 𑀮𑁄𑀫𑀳𑀁𑀲𑀦𑀸’’𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 ¶ 𑀓𑀺𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁.𑀏𑀢𑀦𑁆𑀢𑀺 𑀇𑀤𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀲𑀦𑁆𑀥𑀸𑀬𑀸𑀳. 𑀬𑀦𑁆𑀢𑀺 𑀅𑀬𑀁 𑀬𑀁-𑀲𑀤𑁆𑀤𑁄 ‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁦𑁫𑁮; 𑀫𑀳𑀸𑀦𑀺. 𑁧𑁧𑁦; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸 𑁭𑁭) 𑀉𑀧𑀬𑁄𑀕𑀯𑀘𑀦𑁂 𑀤𑀺𑀲𑁆𑀲𑀢𑀺 ¶ . ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄; 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 (𑀅. 𑀦𑀺. 𑁧.𑁨𑁭𑁭; 𑀯𑀺𑀪. 𑁮𑁦𑁯; 𑀫𑀺. 𑀧. 𑁫.𑁧.𑁧) 𑀏𑀢𑁆𑀣 𑀓𑀸𑀭𑀡𑀯𑀘𑀦𑁂. ‘‘𑀬𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀓𑀧𑁆𑀧𑁂 𑀉𑀤𑀧𑀸𑀤𑀻’’𑀢𑀺 (𑀤𑀻. 𑀦𑀺. 𑁨.𑁪) 𑀏𑀢𑁆𑀣 𑀪𑀼𑀫𑁆𑀫𑁂. ‘‘𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀆𑀭𑁄𑀘𑁂𑀫𑀺 𑀢𑀁 𑀪𑀕𑀯𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁯𑁩) 𑀧𑀘𑁆𑀘𑀢𑁆𑀢𑀯𑀘𑀦𑁂. 𑀇𑀥𑀸𑀧𑀺 𑀧𑀘𑁆𑀘𑀢𑁆𑀢𑀯𑀘𑀦𑁂 𑀤𑀝𑁆𑀞𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁨.𑁪). 𑀅𑀜𑁆𑀜𑁂 𑀩𑀳𑀽 𑀫𑀫 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀯𑀺𑀲𑁂𑀲𑀸 𑀲𑀦𑁆𑀢𑀻𑀢𑀺 𑀤𑀻𑀧𑁂𑀢𑀺.

𑀇𑀤𑀸𑀦𑀺 𑀢𑁂 𑀅𑀘𑁆𑀙𑀭𑀺𑀬𑁂 𑀤𑀲𑁆𑀲𑁂𑀦𑁆𑀢𑁄 𑁋

𑁬𑁬.

‘‘𑀬𑀤𑀸𑀳𑀁 𑀢𑀼𑀲𑀺𑀢𑁂 𑀓𑀸𑀬𑁂, 𑀲𑀦𑁆𑀢𑀼𑀲𑀺𑀢𑁄 𑀦𑀸𑀫𑀳𑀁 𑀢𑀤𑀸;

𑀤𑀲𑀲𑀳𑀲𑁆𑀲𑀻 𑀲𑀫𑀸𑀕𑀫𑁆𑀫, 𑀬𑀸𑀘𑀦𑁆𑀢𑀺 𑀧𑀜𑁆𑀚𑀮𑀻 𑀫𑀫’’𑀦𑁆𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀢𑀼𑀲𑀺𑀢𑁂 𑀓𑀸𑀬𑁂𑀢𑀺 𑀢𑀼𑀲𑀺𑀢𑀲𑀗𑁆𑀔𑀸𑀢𑁂 𑀤𑁂𑀯𑀦𑀺𑀓𑀸𑀬𑁂. 𑀬𑀤𑀸 𑀧𑀦𑀸𑀳𑀁 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀜𑀸𑀢𑀢𑁆𑀣𑀘𑀭𑀺𑀬𑀮𑁄𑀓𑀢𑁆𑀣𑀘𑀭𑀺𑀬𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸𑀦𑀁 𑀓𑁄𑀝𑀺𑀁 𑀧𑀢𑁆𑀯𑀸 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀢𑁄 𑀘𑀯𑀺𑀢𑁆𑀯𑀸 𑀤𑀼𑀢𑀺𑀬𑁂 𑀘𑀺𑀢𑁆𑀢𑀯𑀸𑀭𑁂 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀢𑀤𑀸𑀧𑀺 𑀲𑀦𑁆𑀢𑀼𑀲𑀺𑀢𑁄 𑀦𑀸𑀫 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺𑀁. 𑀤𑀲𑀲𑀳𑀲𑁆𑀲𑀻 𑀲𑀫𑀸𑀕𑀫𑁆𑀫𑀸𑀢𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀸𑀘𑀦𑁆𑀢𑀺 𑀧𑀜𑁆𑀚𑀮𑀻 𑀫𑀫𑀦𑁆𑀢𑀺 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀫𑀸𑀭𑀺𑀲, 𑀢𑀬𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀦 𑀫𑀸𑀭 𑀦 𑀩𑁆𑀭𑀳𑁆𑀫 𑀦 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁂𑀦 𑀧𑀽𑀭𑀺𑀢𑀸, 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀫𑀸𑀦𑁂𑀦 𑀧𑀽𑀭𑀺𑀢𑀸, 𑀲𑁄 𑀢𑀯 𑀓𑀸𑀮𑁄, 𑀫𑀸𑀭𑀺𑀲, 𑀩𑀼𑀤𑁆𑀥𑀢𑁆𑀢𑀸𑀬 𑀲𑀫𑀬𑁄 ¶ , 𑀫𑀸𑀭𑀺𑀲, 𑀩𑀼𑀤𑁆𑀥𑀢𑁆𑀢𑀸𑀬𑀸’’𑀢𑀺 (𑀚𑀸. 𑀅𑀝𑁆𑀞. 𑁧.𑀦𑀺𑀤𑀸𑀦𑀓𑀣𑀸, 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀬𑀸𑀘𑀦𑁆𑀢𑀺 𑀫𑀫𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁭.

‘‘𑀓𑀸𑀮𑁄 𑀔𑁄 𑀢𑁂 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺.

𑀢𑀢𑁆𑀣 ¶ 𑀓𑀸𑀮𑁄 𑀢𑁂𑀢𑀺 𑀓𑀸𑀮𑁄 𑀢𑀯, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀉𑀧𑁆𑀧𑀚𑁆𑀚𑀸𑀢𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳, ‘‘𑀑𑀓𑁆𑀓𑀫𑀸’’𑀢𑀺𑀧𑀺 𑀧𑀸𑀞𑁄. 𑀲𑀤𑁂𑀯𑀓𑀦𑁆𑀢𑀺 𑀲𑀤𑁂𑀯𑀓𑀁 𑀮𑁄𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀭𑀬𑀦𑁆𑀢𑁄𑀢𑀺 𑀏𑀢𑁆𑀣 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀧𑀸𑀭𑀫𑀺𑀬𑁄 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀢𑁄 𑀘𑀯𑀺𑀢𑁆𑀯𑀸 ¶ 𑀢𑀼𑀲𑀺𑀢𑀧𑀼𑀭𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀧𑀡𑁆𑀡𑀸𑀲𑀯𑀲𑁆𑀲𑀓𑁄𑀝𑀺𑀬𑁄 𑀢𑀢𑁆𑀣 𑀢𑀺𑀝𑁆𑀞𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀤𑁂𑀯𑀢𑀸𑀳𑀺 𑀬𑀸𑀘𑀺𑀢𑁄 𑀧𑀜𑁆𑀘𑀯𑀺𑀥𑀁 𑀫𑀳𑀸𑀯𑀺𑀮𑁄𑀓𑀺𑀢𑀁 𑀯𑀺𑀮𑁄𑀓𑁂𑀢𑁆𑀯𑀸 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺 𑀤𑀲𑀫𑀸𑀲𑁂 𑀕𑀩𑁆𑀪𑀯𑀸𑀲𑀁 𑀯𑀲𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀢𑀺𑀝𑁆𑀞𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫. 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀚𑀸𑀢𑀤𑀺𑀯𑀲𑁂 𑀙𑀦𑁆𑀦𑀲𑀳𑀸𑀬𑁄 𑀓𑀡𑁆𑀟𑀓𑀁 𑀆𑀭𑀼𑀬𑁆𑀳 𑀦𑀺𑀓𑁆𑀔𑀫𑀦𑁆𑀢𑁄𑀧𑀺 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁄𑀫𑀸𑀬 𑀦𑀸𑀫 𑀦𑀤𑀺𑀬𑀸 𑀢𑀻𑀭𑁂 𑀧𑀩𑁆𑀩𑀚𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀓𑀭𑁄𑀦𑁆𑀢𑁄𑀧𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀤𑁆𑀯𑀸𑀤𑀲𑀗𑁆𑀕𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂𑀧𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂𑀧𑀺, 𑀲𑀓𑀤𑀸𑀕𑀸𑀫𑀺𑀨𑀮𑀓𑁆𑀔𑀡𑁂𑀧𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂𑀧𑀺, 𑀅𑀦𑀸𑀕𑀸𑀫𑀺𑀨𑀮𑀓𑁆𑀔𑀡𑁂𑀧𑀺, 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂𑀧𑀺, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂𑀧𑀺 𑀢𑀸𑀭𑀬𑀢𑀺 𑀦𑀸𑀫, 𑀬𑀤𑀸 𑀅𑀝𑁆𑀞𑀸𑀭𑀲𑀤𑁂𑀯𑀢𑀸𑀓𑁄𑀝𑀺𑀲𑀳𑀲𑁆𑀲𑁂𑀳𑀺 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀅𑀫𑀢𑀧𑀸𑀦𑀁 𑀅𑀤𑀸𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑀸𑀭𑀬𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀤𑁂𑀯𑀢𑀸𑀳𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀚𑀦𑁂𑀢𑁆𑀢𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀜𑁆𑀘𑀯𑀺𑀥𑀁 𑀫𑀳𑀸𑀯𑀺𑀮𑁄𑀓𑀦𑀁 𑀦𑀸𑀫 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ‘‘𑀓𑀸𑀮𑁄 𑀦𑀼 𑀔𑁄, 𑀦 𑀓𑀸𑀮𑁄’’𑀢𑀺 𑀧𑀞𑀫𑀁 𑀓𑀸𑀮𑀁 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀻𑀦𑀁 𑀅𑀧𑀸𑀓𑀝𑀢𑁆𑀢𑀸, 𑀩𑀼𑀤𑁆𑀥𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀢𑀺𑀮𑀓𑁆𑀔𑀡𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑁂𑀲𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀓𑀣𑁂𑀦𑁆𑀢𑀸𑀦𑀁 ‘‘𑀓𑀺𑀦𑁆𑀦𑀸𑀫𑁂𑀢𑁂 𑀓𑀣𑁂𑀦𑁆𑀢𑀻’’𑀢𑀺 𑀦 𑀲𑀤𑁆𑀤𑀳𑀦𑁆𑀢𑀺, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 ¶ 𑀲𑀸𑀲𑀦𑀁 𑀳𑁄𑀢𑀺 ¶ . 𑀢𑀲𑁆𑀫𑀸 𑀲𑁄 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀢𑁄 𑀊𑀦𑁄 𑀆𑀬𑀼𑀓𑀸𑀮𑁄𑀧𑀺 𑀓𑀸𑀮𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀺, 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸𑀦𑀜𑁆𑀘 𑀤𑀺𑀦𑁆𑀦𑁄 𑀑𑀯𑀸𑀤𑁄 𑀑𑀯𑀸𑀤𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀲𑁄𑀧𑀺 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀯𑀲𑁆𑀲𑀲𑀢𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫. 𑀇𑀤𑀸𑀦𑀺 𑀯𑀲𑁆𑀲𑀲𑀢𑀸𑀬𑀼𑀓𑀸 𑀫𑀦𑀼𑀲𑁆𑀲𑀸𑀢𑀺 𑀅𑀣 𑀩𑁄𑀥𑀺𑀲𑀢𑁆𑀢𑁄 ‘‘𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀓𑀸𑀮𑁄’’𑀢𑀺 𑀅𑀤𑁆𑀤𑀲.

𑀢𑀢𑁄 𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀻𑀧𑀁 𑀧𑀲𑁆𑀲𑀺. 𑀢𑀢𑁄 𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀫𑀳𑀸 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄, 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑁂𑀲𑀁 𑀯𑀺𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀁 𑀧𑀲𑁆𑀲𑀺. 𑀢𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀦𑁆𑀢𑁄 ‘‘𑀩𑀼𑀤𑁆𑀥𑀸 𑀦𑀸𑀫 𑀮𑁄𑀓𑀲𑀫𑁆𑀫𑀢𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀇𑀤𑀸𑀦𑀺 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀫𑁂 𑀭𑀸𑀚𑀸 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀅𑀤𑁆𑀤𑀲. 𑀢𑀢𑁄 𑀫𑀸𑀢𑀭𑀁 𑀯𑀺𑀮𑁄𑀓𑁂𑀦𑁆𑀢𑁄 ‘‘𑀩𑀼𑀤𑁆𑀥𑀫𑀸𑀢𑀸 𑀦𑀸𑀫 𑀮𑁄𑀮𑀸 𑀲𑀼𑀭𑀸𑀥𑀼𑀢𑁆𑀢𑀸 𑀦 𑀳𑁄𑀢𑀺, 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸𑀢𑀺 𑀅𑀬𑀜𑁆𑀘 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀏𑀤𑀺𑀲𑀸, 𑀅𑀬𑀁 𑀫𑁂 𑀫𑀸𑀢𑀸 𑀪𑀯𑀺𑀲𑁆𑀲𑀢𑀻𑀢𑀺 𑀓𑀺𑀢𑁆𑀢𑀓𑀁 𑀅𑀲𑁆𑀲𑀸 𑀆𑀬𑀽’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢𑀤𑀺𑀯𑀲𑀸𑀦𑀺 𑀧𑀲𑁆𑀲𑀺. 𑀇𑀢𑀺 𑀇𑀫𑀁 𑀧𑀜𑁆𑀘𑀯𑀺𑀥𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 𑁋 ‘‘𑀓𑀸𑀮𑁄 𑀫𑁂, 𑀫𑀸𑀭𑀺𑀲, 𑀩𑀼𑀤𑁆𑀥𑀪𑀸𑀯𑀸𑀬𑀸’’𑀢𑀺 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀓𑁆𑀬𑀭𑀸𑀚𑀓𑀼𑀮𑁂 ¶ 𑀫𑀸𑀬𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺 (𑀚𑀸. 𑀅𑀝𑁆𑀞. 𑁧.𑀦𑀺𑀤𑀸𑀦𑀓𑀣𑀸, 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀦𑀺𑀤𑀸𑀦𑀓𑀣𑀸, 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸). 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁮.

‘‘𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀬𑀤𑀸 𑀑𑀓𑁆𑀓𑀫𑀺 𑀓𑀼𑀘𑁆𑀙𑀺𑀬𑀁;

𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼, 𑀓𑀫𑁆𑀧𑀺𑀢𑁆𑀣 𑀥𑀭𑀡𑀻 𑀢𑀤𑀸’’𑀢𑀺. 𑁋 𑀆𑀤𑀺;

𑀢𑀢𑁆𑀣 𑀑𑀓𑁆𑀓𑀫𑀻𑀢𑀺 𑀑𑀓𑁆𑀓𑀫𑀺𑀁 𑀧𑀸𑀯𑀺𑀲𑀺𑀁. 𑀓𑀼𑀘𑁆𑀙𑀺𑀬𑀦𑁆𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺. 𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼, 𑀓𑀫𑁆𑀧𑀺𑀢𑁆𑀣𑀸𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁄 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑀤𑀺𑀲 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀢𑀤𑀸 𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼 𑀲𑀓𑀮𑀸𑀧𑀺 ¶ 𑀓𑀫𑁆𑀧𑀺 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀥𑀭𑀡𑀻𑀢𑀺 𑀥𑀸𑀭𑁂𑀢𑀺 𑀲𑀩𑁆𑀩𑁂 𑀣𑀸𑀯𑀭𑀚𑀗𑁆𑀕𑀫𑁂𑀢𑀺 𑀥𑀭𑀡𑀻, 𑀧𑀣𑀯𑀻.

𑁬𑁯. 𑀲𑀫𑁆𑀧𑀚𑀸𑀦𑁄𑀯 𑀦𑀺𑀓𑁆𑀔𑀫𑀺𑀦𑁆𑀢𑀺 𑀏𑀢𑁆𑀣 𑀬𑀤𑀸 𑀧𑀦𑀸𑀳𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀥𑀫𑁆𑀫𑀸𑀲𑀦𑀢𑁄 𑀑𑀢𑀭𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬 𑀦𑀺𑀲𑁆𑀲𑁂𑀡𑀺𑀢𑁄 𑀑𑀢𑀭𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀘 𑀤𑁆𑀯𑁂 𑀳𑀢𑁆𑀣𑁂 𑀘 𑀧𑀸𑀤𑁂 ¶ 𑀘 𑀧𑀲𑀸𑀭𑁂𑀢𑁆𑀯𑀸 𑀞𑀺𑀢𑀓𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄𑀯 𑀦𑀺𑀓𑁆𑀔𑀫𑀺𑀁. 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀦𑁆𑀢𑀺, 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀓𑀫𑁆𑀧𑀺𑀢𑁆𑀣𑀸𑀢𑀺 𑀓𑀫𑁆𑀧𑀺𑀢𑁆𑀣, 𑀑𑀓𑁆𑀓𑀫𑀦𑁂𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂𑀧𑀺 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑁭𑁦. 𑀅𑀣 𑀪𑀕𑀯𑀸 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀅𑀤𑀺𑀲𑁆𑀯𑀸 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀅𑀘𑁆𑀙𑀭𑀺𑀬𑀤𑀲𑁆𑀲𑀦𑀢𑁆𑀣𑀁 ‘‘𑀑𑀓𑁆𑀓𑀦𑁆𑀢𑀺 𑀫𑁂 𑀲𑀫𑁄 𑀦𑀢𑁆𑀣𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀑𑀓𑁆𑀓𑀦𑁆𑀢𑀻𑀢𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀁, 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀢𑀺 𑀅𑀢𑁆𑀣𑁄. 𑀫𑁂𑀢𑀺 𑀫𑀬𑀸. 𑀲𑀫𑁄𑀢𑀺 𑀲𑀤𑀺𑀲𑁄 𑀦𑀢𑁆𑀣𑀺. 𑀚𑀸𑀢𑀺𑀢𑁄𑀢𑀺 𑀏𑀢𑁆𑀣 𑀚𑀸𑀬𑀢𑀺 𑀏𑀢𑀸𑀬 𑀫𑀸𑀢𑀼𑀬𑀸𑀢𑀺 𑀫𑀸𑀢𑀸 ‘‘𑀚𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀚𑀸𑀢𑀺𑀢𑁄 𑀫𑀸𑀢𑀼𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀓𑁆𑀔𑀫𑁂𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀪𑀺𑀦𑀺𑀓𑁆𑀔𑀫𑀦𑁂 𑀧𑀲𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀏𑀢𑁆𑀣 𑀧𑀲𑀢𑁆𑀣𑀸 𑀲𑀼𑀦𑁆𑀤𑀭𑀸 𑀩𑁄𑀥𑀺 𑀲𑀫𑁆𑀩𑁄𑀥𑀺. 𑀅𑀬𑀁 𑀧𑀦 𑀩𑁄𑀥𑀺-𑀲𑀤𑁆𑀤𑁄 𑀭𑀼𑀓𑁆𑀔𑀫𑀕𑁆𑀕𑀦𑀺𑀩𑁆𑀩𑀸𑀦𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀲𑀼 𑀤𑀺𑀲𑁆𑀲𑀢𑀺 𑁋 ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀘, ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧) 𑀘 𑀆𑀕𑀢𑀝𑁆𑀞𑀸𑀦𑁂 𑀳𑀺 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁄𑀥𑀺 ¶ 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀇𑀥 𑀧𑀦 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁩; 𑀧𑀸𑀭𑀸. 𑀅𑀝𑁆𑀞. 𑁧.𑁧𑁧; 𑀉𑀤𑀸. 𑀅𑀝𑁆𑀞. 𑁨𑁦; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀅𑀧𑀭𑁂 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀲𑁆𑀲𑀁 𑀲𑀫𑁆𑀩𑁄𑀥𑀺𑀬𑀁 𑀅𑀳𑀁 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀲𑀫𑁆𑀩𑁄𑀥𑀺𑀁 𑀧𑀝𑀺𑀘𑁆𑀘 𑀅𑀢𑁆𑀢𑀸𑀦𑀁 𑀧𑀲𑀁𑀲𑀢𑀻𑀢𑀺? 𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸. 𑀪𑀕𑀯𑀢𑁄 𑀳𑀺 𑀲𑀫𑁆𑀩𑁄𑀥𑀺 𑀲𑀩𑁆𑀩𑀕𑀼𑀡𑀤𑀸𑀬𑀺𑀓𑀸 𑀲𑀩𑁆𑀩𑁂𑀧𑀺 𑀦𑀺𑀭𑀯𑀲𑁂𑀲𑁂 𑀩𑀼𑀤𑁆𑀥𑀕𑀼𑀡𑁂 ¶ 𑀤𑀤𑀸𑀢𑀺, 𑀦 𑀧𑀦 𑀅𑀜𑁆𑀜𑁂𑀲𑀁. 𑀅𑀜𑁆𑀜𑁂𑀲𑀁 𑀧𑀦 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀫𑁂𑀯 𑀤𑁂𑀢𑀺, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑀲𑁆𑀲𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑀲𑁆𑀲𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑀲𑁆𑀲𑀘𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁂𑀯 𑀤𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸 ‘‘𑀲𑀫𑁆𑀩𑁄𑀥𑀺𑀬𑀁 𑀅𑀳𑀁 𑀲𑁂𑀝𑁆𑀞𑁄’’𑀢𑀺 𑀅𑀢𑁆𑀢𑀸𑀦𑀁 𑀧𑀲𑀁𑀲𑀢𑀺. 𑀅𑀧𑀺 𑀘 𑀪𑀽𑀫𑀺𑀁 𑀘𑀸𑀮𑁂𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺, 𑀢𑀲𑁆𑀫𑀸 ‘‘𑀲𑀫𑁆𑀩𑁄𑀥𑀺𑀬𑀁 𑀅𑀳𑀁 𑀲𑁂𑀝𑁆𑀞𑁄’’𑀢𑀺 𑀯𑀤𑀢𑀺. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀢𑀺 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀧𑀝𑀺𑀯𑁂𑀥𑀜𑀸𑀡𑀜𑁆𑀘 𑀤𑁂𑀲𑀦𑀸𑀜𑀸𑀡𑀜𑁆𑀘𑀸𑀢𑀺. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁, 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁 𑀓𑀼𑀲𑀮𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁 𑀅𑀩𑁆𑀬𑀸𑀓𑀢𑀁 ¶ , 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁. 𑀇𑀥 𑀧𑀦 𑀤𑁂𑀲𑀦𑀸𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁 (𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪).

𑁭𑁧. 𑀇𑀤𑀸𑀦𑀺 𑀪𑀕𑀯𑀢𑁄 𑀕𑀩𑁆𑀪𑁄𑀓𑁆𑀓𑀫𑀦𑁂𑀯 𑀧𑀣𑀯𑀺𑀓𑀫𑁆𑀧𑀦𑀸𑀤𑀺𑀓𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀮𑁄𑀓𑁂’’𑀢𑀺 𑀤𑁂𑀯𑀢𑀸𑀳𑀺 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀕𑀼𑀡𑀫𑀳𑀦𑁆𑀢𑀢𑀸𑀢𑀺 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀕𑀼𑀡𑀫𑀳𑀦𑁆𑀢𑀪𑀸𑀯𑁄, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀅𑀢𑁆𑀣𑁄 𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼, 𑀙𑀧𑁆𑀧𑀓𑀸𑀭𑀁 𑀧𑀓𑀫𑁆𑀧𑀣𑀸𑀢𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀫𑀳𑀸𑀧𑀣𑀯𑀻 𑀙𑀧𑁆𑀧𑀓𑀸𑀭𑀁 𑀧𑀓𑀫𑁆𑀧𑀺𑀢𑁆𑀣 𑀘𑀮𑀺𑀢𑁆𑀣. 𑀓𑀣𑀁? 𑀧𑀼𑀭𑀢𑁆𑀣𑀺𑀫𑀢𑁄 𑀉𑀦𑁆𑀦𑀫𑀢𑀺 𑀧𑀘𑁆𑀙𑀺𑀫𑀢𑁄 𑀑𑀦𑀫𑀢𑀺, 𑀧𑀘𑁆𑀙𑀺𑀫𑀢𑁄 𑀉𑀦𑁆𑀦𑀫𑀢𑀺 𑀧𑀼𑀭𑀢𑁆𑀣𑀺𑀫𑀢𑁄 𑀑𑀦𑀫𑀢𑀺, 𑀉𑀢𑁆𑀢𑀭𑀢𑁄 𑀉𑀦𑁆𑀦𑀫𑀢𑀺 𑀤𑀓𑁆𑀔𑀺𑀡𑀢𑁄 𑀑𑀦𑀫𑀢𑀺, 𑀤𑀓𑁆𑀔𑀺𑀡𑀢𑁄 𑀉𑀦𑁆𑀦𑀫𑀢𑀺 𑀉𑀢𑁆𑀢𑀭𑀢𑁄 𑀑𑀦𑀫𑀢𑀺, 𑀫𑀚𑁆𑀛𑀺𑀫𑀢𑁄 𑀉𑀦𑁆𑀦𑀫𑀢𑀺 𑀧𑀭𑀺𑀬𑀦𑁆𑀢𑀢𑁄 𑀑𑀦𑀫𑀢𑀺, 𑀧𑀭𑀺𑀬𑀦𑁆𑀢𑀢𑁄 𑀉𑀦𑁆𑀦𑀫𑀢𑀺 𑀫𑀚𑁆𑀛𑀺𑀫𑀢𑁄 𑀑𑀦𑀫𑀢𑀻𑀢𑀺 𑀏𑀯𑀁 𑀙𑀧𑁆𑀧𑀓𑀸𑀭𑀁 𑀅𑀦𑀺𑀮𑀩𑀮𑀘𑀮𑀺𑀢𑀚𑀮𑀢𑀭𑀗𑁆𑀕𑀪𑀗𑁆𑀕𑀲𑀗𑁆𑀖𑀝𑁆𑀝𑀺𑀢𑀸 𑀯𑀺𑀬 𑀦𑀸𑀯𑀸 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀧𑀣𑀯𑀺𑀲𑀦𑁆𑀥𑀸𑀭𑀓𑀚𑀮𑀧𑀭𑀺𑀬𑀦𑁆𑀢𑀸 𑀅𑀘𑁂𑀢𑀦𑀸𑀧𑀺 𑀲𑀫𑀸𑀦𑀸 𑀲𑀘𑁂𑀢𑀦𑀸 𑀯𑀺𑀬 𑀅𑀬𑀁 𑀫𑀳𑀸𑀧𑀣𑀯𑀻 𑀧𑀻𑀢𑀺𑀬𑀸 𑀦𑀘𑁆𑀘𑀦𑁆𑀢𑀻 𑀯𑀺𑀬 𑀅𑀓𑀫𑁆𑀧𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀑𑀪𑀸𑀲𑁄 ¶ 𑀘 𑀫𑀳𑀸 𑀆𑀲𑀻𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁 𑀉𑀴𑀸𑀭𑁄 𑀑𑀪𑀸𑀲𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀙𑁂𑀭𑀁 𑀮𑁄𑀫𑀳𑀁𑀲𑀦𑀦𑁆𑀢𑀺 𑀅𑀘𑁆𑀙𑁂𑀭𑀜𑁆𑀘 𑀮𑁄𑀫𑀳𑀁𑀲𑀦𑀜𑁆𑀘 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁭𑁨. 𑀇𑀤𑀸𑀦𑀺 𑀧𑀣𑀯𑀺𑀓𑀫𑁆𑀧𑀦𑀸𑀮𑁄𑀓𑀧𑀸𑀢𑀼𑀪𑀸𑀯𑀸𑀤𑀻𑀲𑀼 𑀅𑀘𑁆𑀙𑀭𑀺𑀬𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀪𑀕𑀯𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂’’𑀢𑀺𑀆𑀤𑀺𑀕𑀸𑀣𑀸𑀬𑁄 𑀯𑀼𑀢𑁆𑀢𑀸. 𑀢𑀢𑁆𑀣 𑀮𑁄𑀓𑀚𑁂𑀝𑁆𑀞𑁄𑀢𑀺 𑀮𑁄𑀓𑀲𑁂𑀝𑁆𑀞𑁄. 𑀲𑀤𑁂𑀯𑀓𑀦𑁆𑀢𑀺 ¶ 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀤𑀲𑁆𑀲𑀬𑀦𑁆𑀢𑁄𑀢𑀺 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀦𑁆𑀢𑁄.

𑁭𑁩. 𑀘𑀗𑁆𑀓𑀫𑀦𑁆𑀢𑁄𑀯𑀸𑀢𑀺 𑀤𑀲𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂 𑀢𑀲𑁆𑀫𑀺𑀁 𑀭𑀢𑀦𑀫𑀬𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁄𑀯 𑀓𑀣𑁂𑀲𑀺. 𑀮𑁄𑀓𑀦𑀸𑀬𑀓𑁄𑀢𑀺 𑀅𑀣 𑀲𑀢𑁆𑀣𑀸 𑀫𑀦𑁄𑀲𑀺𑀮𑀸𑀢𑀮𑁂 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀲𑀻𑀳𑁄 𑀯𑀺𑀬 𑀕𑀚𑁆𑀚𑀦𑁆𑀢𑁄 𑀧𑀸𑀯𑀼𑀲𑁆𑀲𑀓𑀫𑁂𑀖𑁄 𑀯𑀺𑀬 𑀘 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀘 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 (𑀤𑀻. 𑀦𑀺. 𑁨.𑁨𑁮𑁫, 𑁩𑁦𑁧) 𑀲𑀯𑀦𑀻𑀬𑁂𑀦 𑀓𑀫𑀦𑀻𑀬𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄.

𑀅𑀦𑁆𑀢𑀭𑀸 𑀦 𑀦𑀺𑀯𑀢𑁆𑀢𑁂𑀢𑀺, 𑀘𑀢𑀼𑀳𑀢𑁆𑀣𑁂 𑀘𑀗𑁆𑀓𑀫𑁂 𑀬𑀣𑀸𑀢𑀺 𑀏𑀢𑁆𑀣 𑀲𑀢𑁆𑀣𑀸𑀭𑀸 𑀧𑀦 𑀦𑀺𑀫𑁆𑀫𑀺𑀢𑀲𑁆𑀲 𑀢𑀲𑁆𑀲 𑀘𑀗𑁆𑀓𑀫𑀲𑁆𑀲 𑀏𑀓𑀸 𑀓𑁄𑀝𑀺 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀏𑀓𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀏𑀯𑀁 𑀞𑀺𑀢𑁂 𑀢𑀲𑁆𑀫𑀺𑀁 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁄 𑀲𑀢𑁆𑀣𑀸 𑀉𑀪𑁄 𑀓𑁄𑀝𑀺𑀬𑁄 𑀧𑀢𑁆𑀯𑀸𑀯 𑀦𑀺𑀯𑀢𑁆𑀢𑀢𑀺, 𑀅𑀦𑁆𑀢𑀭𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀧𑀢𑁆𑀯𑀸 𑀦 𑀦𑀺𑀯𑀢𑁆𑀢𑀢𑀺. 𑀬𑀣𑀸 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁄 𑀉𑀪𑁄 𑀓𑁄𑀝𑀺𑀬𑁄 𑀲𑀻𑀖𑀫𑁂𑀯 𑀧𑀢𑁆𑀯𑀸 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀅𑀦𑁆𑀢𑀭𑀸 𑀦 𑀦𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀪𑀕𑀯𑀸 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑀸𑀬𑀸𑀫𑀁 𑀘𑀗𑁆𑀓𑀫𑀁 𑀭𑀲𑁆𑀲𑀫𑀓𑀸𑀲𑀺 ¶ , 𑀢𑀸𑀯𑀫𑀳𑀦𑁆𑀢𑀁 𑀯𑀸 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀻𑀢𑀺? 𑀦 𑀧𑀦𑁂𑀯𑀫𑀓𑀸𑀲𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀅𑀓𑀦𑀺𑀝𑁆𑀞𑀪𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀯𑀻𑀘𑀺, 𑀢𑀸𑀯 𑀏𑀓𑀗𑁆𑀕𑀡𑀸 𑀅𑀳𑁄𑀲𑀺. 𑀢𑀺𑀭𑀺𑀬𑀢𑁄 𑀘 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀤𑁂𑀯𑀸 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀤𑁂𑀯𑁂 𑀧𑀲𑁆𑀲𑀦𑁆𑀢𑀺. 𑀬𑀣𑀸 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀘𑀗𑁆𑀓𑀫𑀫𑀸𑀦𑀁 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀪𑀕𑀯𑀦𑁆𑀢𑀁 𑀘𑀗𑁆𑀓𑀫𑀫𑀸𑀦𑀁 𑀧𑀲𑁆𑀲𑀺𑀁𑀲𑀽𑀢𑀺. 𑀪𑀕𑀯𑀸 𑀧𑀦 𑀘𑀗𑁆𑀓𑀫𑀦𑁆𑀢𑁄𑀯 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑁆𑀢𑀭𑀸𑀲𑀫𑀸𑀧𑀢𑁆𑀢𑀺𑀜𑁆𑀘 𑀲𑀫𑀸𑀧𑀚𑁆𑀚𑀢𑀺.

𑀅𑀣 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀧𑀭𑀺𑀫𑀺𑀢𑀲𑀫𑀬𑀲𑀫𑀼𑀧𑀘𑀺𑀢𑀓𑀼𑀲𑀮𑀩𑀮𑀚𑀦𑀺𑀢𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄𑀧𑀲𑁄𑀪𑀺𑀢𑀁 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀯𑀺𑀭𑀸𑀚𑀺𑀢𑀁 𑀯𑀭𑀲𑀭𑀻𑀭𑀁 𑀲𑀭𑀤𑀲𑀫𑀬𑁂 𑀧𑀭𑀺𑀧𑀼𑀡𑁆𑀡𑀁 𑀯𑀺𑀬 𑀭𑀚𑀦𑀺𑀓𑀭𑀁 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀘 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀁 𑀅𑀝𑁆𑀞𑀸𑀭𑀲𑀭𑀢𑀦𑀼𑀩𑁆𑀩𑁂𑀥𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀲𑀲𑁆𑀲𑀺𑀭𑀺𑀓𑀁 𑀯𑀭𑀓𑀦𑀓𑀕𑀺𑀭𑀺𑀫𑀺𑀯 𑀚𑀗𑁆𑀕𑀫𑀁 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀅𑀦𑁄𑀧𑀫𑁂𑀦 𑀩𑀼𑀤𑁆𑀥𑀲𑀺𑀭𑀺𑀯𑀺𑀮𑀸𑀲𑁂𑀦 𑀘𑀗𑁆𑀓𑀫𑀦𑁆𑀢𑀁 𑀤𑀲𑀲𑀳𑀲𑁆𑀲𑀺𑀤𑁂𑀯𑀕𑀡𑀧𑀭𑀺𑀯𑀼𑀢𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸𑀦 𑀅𑀬𑀁 ¶ 𑀧𑀦 𑀲𑀓𑀮𑀸𑀧𑀺 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀳𑀢𑀺𑀬𑀸 𑀧𑀦𑁂𑀢𑁆𑀣 𑀥𑀫𑁆𑀫𑀤𑁂𑀲𑀦𑀸𑀬 𑀪𑀯𑀺𑀢𑀩𑁆𑀩𑀁, 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸 𑀧𑀦 𑀩𑀳𑀽𑀧𑀓𑀸𑀭𑀸 𑀪𑀕𑀯𑀢𑀺 𑀧𑀲𑀸𑀤𑀸𑀯𑀳𑀸, 𑀬𑀁𑀦𑀽𑀦𑀸𑀳𑀁 𑀤𑀲𑀩𑀮𑀲𑁆𑀲 𑀅𑀪𑀺𑀦𑀻𑀳𑀸𑀭𑀢𑁄 ¶ 𑀧𑀝𑁆𑀞𑀸𑀬 𑀩𑀼𑀤𑁆𑀥𑀯𑀁𑀲𑀁 𑀧𑀭𑀺𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀲𑀦𑀔𑀲𑀫𑀼𑀚𑁆𑀚𑀮𑀁 𑀚𑀮𑀚𑀸𑀫𑀮𑀸𑀯𑀺𑀓𑀮-𑀓𑀫𑀮-𑀫𑀓𑀼𑀮𑀲𑀤𑀺𑀲𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 ‘‘𑀓𑀻𑀤𑀺𑀲𑁄 𑀢𑁂 𑀫𑀳𑀸𑀯𑀻𑀭𑀸’’𑀢𑀺𑀆𑀤𑀺𑀓𑀁 𑀧𑀭𑀺𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁪.

‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑁄;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀧𑀼𑀘𑁆𑀙𑀢𑀺 𑀮𑁄𑀓𑀦𑀸𑀬𑀓𑀁.

𑁭𑁫.

‘‘𑀓𑀻𑀤𑀺𑀲𑁄 𑀢𑁂 𑀫𑀳𑀸𑀯𑀻𑀭, 𑀅𑀪𑀺𑀦𑀻𑀳𑀸𑀭𑁄 𑀦𑀭𑀼𑀢𑁆𑀢𑀫;

𑀓𑀫𑁆𑀳𑀺 𑀓𑀸𑀮𑁂 𑀢𑀬𑀸 𑀥𑀻𑀭, 𑀧𑀢𑁆𑀣𑀺𑀢𑀸 𑀩𑁄𑀥𑀺𑀫𑀼𑀢𑁆𑀢𑀫𑀸’’𑀢𑀺. 𑁋

𑀆𑀤𑀺. 𑀓𑀸 𑀦𑀸𑀫𑀸𑀬𑀁 𑀅𑀦𑀼𑀲𑀦𑁆𑀥𑀻𑀢𑀺? 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀦𑀸𑀫. 𑀢𑀺𑀲𑁆𑀲𑁄 𑀳𑀺 𑀅𑀦𑀼𑀲𑀦𑁆𑀥𑀺𑀬𑁄 𑁋 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀻𑀢𑀺. 𑀢𑀢𑁆𑀣 ‘‘𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀑𑀭𑀺𑀫𑀁 𑀢𑀻𑀭𑀁 𑀓𑀺𑀁 𑀧𑀸𑀭𑀺𑀫𑀁 𑀢𑀻𑀭’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁧) 𑀏𑀯𑀁 𑀧𑀼𑀘𑁆𑀙𑀦𑁆𑀢𑀸𑀦𑀁 𑀪𑀕𑀯𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀅𑀣 𑀔𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘𑀇𑀢𑀺 𑀓𑀺𑀭, 𑀪𑁄, 𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀅𑀦𑀢𑁆𑀢𑀓𑀢𑀸𑀦𑀺 ¶ 𑀓𑀫𑁆𑀫𑀸𑀦𑀺 𑀓𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺, 𑀬𑀁 𑀇𑀥𑁂𑀓𑀘𑁆𑀘𑁄 𑀫𑁄𑀖𑀧𑀼𑀭𑀺𑀲𑁄 𑀅𑀯𑀺𑀤𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁂𑀦 𑀘𑁂𑀢𑀲𑀸 𑀲𑀢𑁆𑀣𑀼𑀲𑀸𑀲𑀦𑀁 𑀅𑀢𑀺𑀥𑀸𑀯𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬 ‘𑀇𑀢𑀺 𑀓𑀺𑀭, 𑀪𑁄, 𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀅𑀦𑀢𑁆𑀢𑀓𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻’𑀢𑀺…𑀧𑁂… 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 (𑀫. 𑀦𑀺. 𑁩.𑁯𑁦) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑀸 𑀯𑀼𑀢𑁆𑀢𑀯𑀲𑁂𑀦 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀬𑁂𑀦 ¶ 𑀧𑀦 𑀥𑀫𑁆𑀫𑁂𑀦 𑀆𑀤𑀺𑀫𑁆𑀳𑀺 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑀸 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀸 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀉𑀧𑀭𑀺𑀤𑁂𑀲𑀦𑀸 𑀆𑀕𑀘𑁆𑀙𑀢𑀺, 𑀢𑁂𑀲𑀁 𑀯𑀲𑁂𑀦 𑀬𑀣𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀻’’𑀢𑀺.

𑀢𑀢𑁆𑀣 𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑁄𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀧𑀼𑀘𑁆𑀙𑀢𑀻𑀢𑀺 𑀅𑀧𑀼𑀘𑁆𑀙𑀺. 𑀢𑀢𑁆𑀣 𑀧𑀼𑀘𑁆𑀙𑀸 𑀦𑀸𑀫 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸, 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣𑀸𑀬𑀁 𑀣𑁂𑀭𑀲𑁆𑀲 𑀓𑀢𑀫𑀸 𑀧𑀼𑀘𑁆𑀙𑀸𑀢𑀺 𑀘𑁂? 𑀬𑀲𑁆𑀫𑀸 𑀧𑀦𑀸𑀬𑀁 𑀩𑀼𑀤𑁆𑀥𑀯𑀁𑀲𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀅𑀲𑀗𑁆𑀔𑁆𑀬𑁂𑀬𑁆𑀬𑁄𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 ¶ 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀅𑀲𑀗𑁆𑀔𑁆𑀬𑁂𑀬𑁆𑀬𑁄𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀜𑁆𑀘 𑀓𑀧𑁆𑀧𑀲𑀢𑀲𑀳𑀲𑁆𑀲𑁄𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀁 𑀲𑁂𑀲𑀫𑀳𑀸𑀲𑀸𑀯𑀓𑀸𑀦𑀁 𑀯𑀸 𑀅𑀯𑀺𑀲𑀬𑁄, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑁄, 𑀢𑀲𑁆𑀫𑀸 𑀣𑁂𑀭𑀲𑁆𑀲 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀻𑀤𑀺𑀲𑁄𑀢𑀺 𑀧𑀼𑀘𑁆𑀙𑀦𑀸𑀓𑀸𑀭𑁄, 𑀓𑀺𑀁𑀧𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀢𑀯. 𑀅𑀪𑀺𑀦𑀻𑀳𑀸𑀭𑁄𑀢𑀺 𑀅𑀪𑀺𑀦𑀻𑀳𑀸𑀭𑁄 𑀦𑀸𑀫 𑀩𑀼𑀤𑁆𑀥𑀪𑀸𑀯𑀢𑁆𑀣𑀁 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀩𑀼𑀤𑁆𑀥𑀩𑁆𑀬𑀸𑀓𑀭𑀡𑀁 𑀅𑀮𑀤𑁆𑀥𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀫𑀥𑀺𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀓𑀻𑀤𑀺𑀲𑁄 𑀢𑁂 𑀫𑀳𑀸𑀯𑀻𑀭, 𑀅𑀪𑀺𑀦𑀻𑀳𑀸𑀭𑁄 𑀦𑀭𑀼𑀢𑁆𑀢𑀫𑀸’’𑀢𑀺.

𑀓𑀫𑁆𑀳𑀺 𑀓𑀸𑀮𑁂𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀧𑀢𑁆𑀣𑀺𑀢𑀸𑀢𑀺 𑀇𑀘𑁆𑀙𑀺𑀢𑀸 𑀅𑀪𑀺𑀓𑀗𑁆𑀔𑀺𑀢𑀸, ‘‘𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬𑀁 𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑀼𑀤𑁆𑀥𑀪𑀸𑀯𑀸𑀬 𑀧𑀡𑀺𑀥𑀸𑀦𑀁 𑀓𑀤𑀸 𑀓𑀢𑀦𑁆𑀢𑀺 𑀅𑀧𑀼𑀘𑁆𑀙𑀺. 𑀩𑁄𑀥𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀢𑁆𑀢𑀫𑀸𑀢𑀺 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀻𑀳𑀺 𑀲𑁂𑀝𑁆𑀞𑀢𑁆𑀢𑀸 𑀉𑀢𑁆𑀢𑀫𑀸𑀢𑀺 𑀯𑀼𑀢𑁆𑀢𑀸. 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀇𑀤𑀸𑀦𑀺 ¶ 𑀩𑀼𑀤𑁆𑀥𑀪𑀸𑀯𑀓𑀸𑀭𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑀦𑁆𑀢𑁄 𑁋

𑁭𑁬.

‘‘𑀤𑀸𑀦𑀁 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸𑀯𑀻𑀭𑀺𑀬𑀜𑁆𑀘 𑀓𑀻𑀤𑀺𑀲𑀁;

𑀔𑀦𑁆𑀢𑀺𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸 𑀘 𑀓𑀻𑀤𑀺𑀲𑀸.

𑁭𑁭.

‘‘𑀤𑀲 𑀧𑀸𑀭𑀫𑀻 𑀢𑀬𑀸 𑀥𑀻𑀭, 𑀓𑀻𑀤𑀺𑀲𑀻 𑀮𑁄𑀓𑀦𑀸𑀬𑀓;

𑀓𑀣𑀁 𑀉𑀧𑀧𑀸𑀭𑀫𑀻 𑀧𑀼𑀡𑁆𑀡𑀸, 𑀧𑀭𑀫𑀢𑁆𑀣𑀧𑀸𑀭𑀫𑀻 𑀓𑀣’’𑀦𑁆𑀢𑀺. 𑁋 𑀆𑀳;

𑀢𑀢𑁆𑀣 ¶ 𑀤𑀸𑀦𑀧𑀸𑀭𑀫𑀺𑀬𑀁 𑀢𑀸𑀯 𑀩𑀸𑀳𑀺𑀭𑀪𑀡𑁆𑀟𑀧𑀭𑀺𑀘𑁆𑀘𑀸𑀕𑁄 𑀧𑀸𑀭𑀫𑀻 𑀦𑀸𑀫, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀉𑀧𑀧𑀸𑀭𑀫𑀻 𑀦𑀸𑀫, 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫𑀸𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀸𑀭𑀫𑀻𑀲𑀼𑀧𑀺. 𑀏𑀯𑀁 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀦𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑁂 𑁋

‘‘𑀪𑀺𑀓𑁆𑀔𑀸𑀬 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀲𑀓𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀁;

𑀤𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀤𑀸𑀦𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁧.𑁧𑁪𑁩 𑀢𑀲𑁆𑀲𑀼𑀤𑁆𑀤𑀸𑀦𑀁) 𑁋

𑀏𑀯𑀁 𑀧𑀭𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀤𑀸𑀦𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀲𑀻𑀮𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦𑁂𑀯 𑀧𑀦𑀲𑁆𑀲 𑀲𑀗𑁆𑀔𑀧𑀸𑀮𑀚𑀸𑀢𑀓𑁂 𑁋

‘‘𑀲𑀽𑀮𑁂𑀳𑀺 ¶ 𑀯𑀺𑀦𑀺𑀯𑀺𑀚𑁆𑀛𑀦𑁆𑀢𑁂, 𑀓𑁄𑀝𑁆𑀝𑀬𑀦𑁆𑀢𑁂𑀧𑀺 𑀲𑀢𑁆𑀢𑀺𑀪𑀺;

𑀪𑁄𑀚𑀧𑀼𑀢𑁆𑀢𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀲𑀻𑀮𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁨.𑁯𑁧) 𑁋

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀲𑀻𑀮𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑁂 𑁋

‘‘𑀫𑀳𑀸𑀭𑀚𑁆𑀚𑀁 ¶ 𑀳𑀢𑁆𑀣𑀕𑀢𑀁, 𑀔𑁂𑀴𑀧𑀺𑀡𑁆𑀟𑀁𑀯 𑀙𑀟𑁆𑀟𑀬𑀺𑀁;

𑀘𑀚𑀢𑁄 𑀦 𑀳𑁄𑀢𑀺 𑀮𑀕𑁆𑀕𑀦𑀁, 𑀏𑀲𑀸 𑀫𑁂 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀦𑀺𑀲𑁆𑀲𑀗𑁆𑀕𑀢𑀸𑀬 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀫𑀳𑁄𑀲𑀥𑀧𑀡𑁆𑀟𑀺𑀢𑀓𑀸𑀮𑀸𑀤𑀻𑀲𑀼 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀢𑁆𑀢𑀼𑀪𑀢𑁆𑀢𑀓𑀧𑀡𑁆𑀟𑀺𑀢𑀓𑀸𑀮𑁂 𑁋

‘‘𑀧𑀜𑁆𑀜𑀸𑀬 𑀯𑀺𑀘𑀺𑀦𑀦𑁆𑀢𑁄𑀳𑀁, 𑀩𑁆𑀭𑀸𑀳𑁆𑀫𑀡𑀁 𑀫𑁄𑀘𑀬𑀺𑀁 𑀤𑀼𑀔𑀸;

𑀧𑀜𑁆𑀜𑀸𑀬 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀧𑀜𑁆𑀜𑀸𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀅𑀦𑁆𑀢𑁄𑀪𑀲𑁆𑀢𑀕𑀢𑀁 ¶ 𑀲𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀧𑀜𑁆𑀜𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀯𑀻𑀭𑀺𑀬𑀧𑀸𑀭𑀫𑀺𑀢𑀸𑀬 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀫𑀳𑀸𑀚𑀦𑀓𑀚𑀸𑀢𑀓𑁂 𑁋

‘‘𑀅𑀢𑀻𑀭𑀤𑀲𑁆𑀲𑀻 𑀚𑀮𑀫𑀚𑁆𑀛𑁂, 𑀳𑀢𑀸 𑀲𑀩𑁆𑀩𑁂𑀯 𑀫𑀸𑀦𑀼𑀲𑀸;

𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀦𑀢𑁆𑀣𑀺, 𑀏𑀲𑀸 𑀫𑁂 𑀯𑀻𑀭𑀺𑀬𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀲𑁆𑀲 𑀯𑀻𑀭𑀺𑀬𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓𑁂 𑁋

‘‘𑀅𑀘𑁂𑀢𑀦𑀁𑀯 𑀓𑁄𑀝𑁆𑀝𑁂𑀦𑁆𑀢𑁂, 𑀢𑀺𑀡𑁆𑀳𑁂𑀦 𑀨𑀭𑀲𑀼𑀦𑀸 𑀫𑀫𑀁;

𑀓𑀸𑀲𑀺𑀭𑀸𑀚𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀔𑀦𑁆𑀢𑀺𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 ¶ 𑀅𑀘𑁂𑀢𑀦𑀪𑀸𑀯𑁂𑀦 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀔𑀦𑁆𑀢𑀺𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀫𑀳𑀸𑀲𑀼𑀢𑀲𑁄𑀫𑀚𑀸𑀢𑀓𑁂 𑁋

‘‘𑀲𑀘𑁆𑀘𑀯𑀸𑀘𑀁𑀦𑀼𑀭𑀓𑁆𑀔𑀦𑁆𑀢𑁄, 𑀘𑀚𑀺𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁;

𑀫𑁄𑀘𑁂𑀲𑀺𑀁 𑀏𑀓𑀲𑀢𑀁 𑀔𑀢𑁆𑀢𑀺𑀬𑁂, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀚𑀻𑀯𑀺𑀢𑀁 𑀘𑀚𑀺𑀢𑁆𑀯𑀸 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑀲𑁆𑀲 𑀲𑀘𑁆𑀘𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀫𑀽𑀕𑀧𑀓𑁆𑀔𑀚𑀸𑀢𑀓𑁂 𑁋

‘‘𑀫𑀸𑀢𑀸 ¶ 𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀅𑀢𑁆𑀢𑀸 𑀫𑁂 𑀦 𑀘 𑀤𑁂𑀲𑁆𑀲𑀺𑀬𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀯𑀢𑀁 𑀅𑀥𑀺𑀝𑁆𑀞𑀳𑀺’’𑀦𑁆𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸 𑁩.𑁬𑁫) 𑁋

𑀏𑀯𑀁 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀣𑀸 𑀲𑀼𑀯𑀡𑁆𑀡𑀲𑀸𑀫𑀚𑀸𑀢𑀓𑁂 𑁋

‘‘𑀦 𑀫𑀁 𑀓𑁄𑀘𑀺 𑀉𑀢𑁆𑀢𑀲𑀢𑀺, 𑀦𑀧𑀺 𑀪𑀸𑀬𑀸𑀫𑀺 𑀓𑀲𑁆𑀲𑀘𑀺;

𑀫𑁂𑀢𑁆𑀢𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀭𑀫𑀸𑀫𑀺 𑀧𑀯𑀦𑁂 𑀢𑀤𑀸’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸. 𑁩.𑁧𑁧𑁩) 𑁋

𑀏𑀯𑀁 ¶ 𑀚𑀻𑀯𑀺𑀢𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀫𑁂𑀢𑁆𑀢𑀸𑀬𑀦𑁆𑀢𑀲𑁆𑀲 𑀫𑁂𑀢𑁆𑀢𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀢𑀢𑁄 ¶ 𑀮𑁄𑀫𑀳𑀁𑀲𑀚𑀸𑀢𑀓𑁂 𑁋

‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀙𑀯𑀝𑁆𑀞𑀺𑀓𑀁 𑀉𑀧𑀦𑀺𑀥𑀸𑀬𑀳𑀁;

𑀕𑀸𑀫𑀡𑁆𑀟𑀮𑀸 𑀉𑀧𑀕𑀦𑁆𑀢𑁆𑀯𑀸, 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺𑀦𑀧𑁆𑀧𑀓’’𑀦𑁆𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸. 𑁩.𑁧𑁧𑁯) 𑁋

𑀏𑀯𑀁 𑀕𑀸𑀫𑀤𑀸𑀭𑀓𑁂𑀲𑀼 𑀦𑀺𑀝𑁆𑀞𑀼𑀪𑀦𑀸𑀤𑀻𑀳𑀺 𑀘𑁂𑀯 𑀫𑀸𑀮𑀸𑀕𑀦𑁆𑀥𑀽𑀧𑀳𑀸𑀭𑀸𑀤𑀻𑀳𑀺 𑀘 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀲𑀼𑀧𑀺 𑀉𑀧𑁂𑀓𑁆𑀔𑀁 𑀅𑀦𑀢𑀺𑀯𑀢𑁆𑀢𑀦𑁆𑀢𑀲𑁆𑀲 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀘𑀭𑀺𑀬𑀸𑀧𑀺𑀝𑀓𑀢𑁄 𑀕𑀳𑁂𑀢𑀩𑁆𑀩𑁄.

𑀇𑀤𑀸𑀦𑀺 𑀣𑁂𑀭𑁂𑀦 𑀧𑀼𑀝𑁆𑀞𑀲𑁆𑀲 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑁋

𑁭𑁮.

‘‘𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀓𑀭𑀯𑀻𑀓𑀫𑀥𑀼𑀭𑀕𑀺𑀭𑁄;

𑀦𑀺𑀩𑁆𑀩𑀸𑀧𑀬𑀦𑁆𑀢𑁄 𑀳𑀤𑀬𑀁, 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓𑀁.

𑁭𑁯.

‘‘𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀚𑀺𑀦𑀸𑀦𑀁 𑀤𑁂𑀲𑀺𑀢𑀁, 𑀦𑀺𑀓𑀻𑀮𑀺𑀢𑀁 𑀩𑀼𑀤𑁆𑀥𑀧𑀭𑀫𑁆𑀧𑀭𑀸𑀕𑀢𑀁;

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀕𑀢𑀸𑀬 𑀩𑀼𑀤𑁆𑀥𑀺𑀬𑀸, 𑀧𑀓𑀸𑀲𑀬𑀻 𑀮𑁄𑀓𑀳𑀺𑀢𑀁 𑀲𑀤𑁂𑀯𑀓𑁂’’𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀻𑀢𑀺 𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀧𑀼𑀝𑁆𑀞𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀩𑁆𑀬𑀸𑀓𑀸𑀲𑀺, 𑀅𑀢𑁆𑀢𑀦𑁄 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀅𑀪𑀺𑀲𑀫𑁆𑀩𑁄𑀥𑀺𑀧𑀭𑀺𑀬𑁄𑀲𑀸𑀦𑀁 𑀲𑀩𑁆𑀩𑀁 𑀩𑀼𑀤𑁆𑀥𑀯𑀁𑀲𑀁 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀓𑀭𑀯𑀻𑀓𑀫𑀥𑀼𑀭𑀕𑀺𑀭𑁄𑀢𑀺 𑀓𑀭𑀯𑀻𑀓𑀲𑀓𑀼𑀡𑀲𑁆𑀲 𑀯𑀺𑀬 𑀫𑀥𑀼𑀭𑀸 𑀕𑀺𑀭𑀸 𑀬𑀲𑁆𑀲 𑀲𑁄 𑀓𑀭𑀯𑀻𑀓𑀫𑀥𑀼𑀭𑀕𑀺𑀭𑁄, 𑀓𑀭𑀯𑀻𑀓𑀫𑀥𑀼𑀭𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀺𑀤𑀁 𑀓𑀭𑀯𑀻𑀓𑀸𑀦𑀁 𑀫𑀥𑀼𑀭𑀲𑁆𑀲𑀭𑀢𑀸 𑁋 𑀓𑀭𑀯𑀻𑀓𑀲𑀓𑀼𑀡𑀸 𑀓𑀺𑀭 𑀫𑀥𑀼𑀭𑀭𑀲𑀁 ¶ 𑀅𑀫𑁆𑀩𑀧𑀓𑁆𑀓𑀁 𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀳𑀭𑀺𑀢𑁆𑀯𑀸 𑀧𑀕𑁆𑀖𑀭𑀺𑀢𑀁 𑀨𑀮𑀭𑀲𑀁 𑀧𑀺𑀯𑀺𑀢𑁆𑀯𑀸 𑀧𑀓𑁆𑀔𑁂𑀦 𑀢𑀸𑀴𑀁 𑀤𑀢𑁆𑀯𑀸 𑀯𑀺𑀓𑀽𑀚𑀫𑀸𑀦𑁂 𑀘𑀢𑀼𑀧𑁆𑀧𑀤𑀸 𑀫𑀤𑀫𑀢𑁆𑀢𑀸 𑀯𑀺𑀬 𑀮𑀴𑀺𑀢𑀼𑀁 𑀆𑀭𑀪𑀦𑁆𑀢𑀺, 𑀕𑁄𑀘𑀭𑀧𑀲𑀼𑀢𑀸𑀧𑀺 𑀘𑀢𑀼𑀧𑁆𑀧𑀤𑀕𑀡𑀸 𑀫𑀼𑀔𑀕𑀢𑀸𑀦𑀺𑀧𑀺 𑀢𑀺𑀡𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀢𑀁 𑀦𑀸𑀤𑀁 𑀲𑀼𑀡𑀦𑁆𑀢𑀺, 𑀯𑀸𑀴𑀫𑀺𑀕𑀸 𑀔𑀼𑀤𑁆𑀤𑀓𑀫𑀺𑀕𑁂 𑀅𑀦𑀼𑀩𑀦𑁆𑀥𑀫𑀸𑀦𑀸 𑀉𑀓𑁆𑀔𑀺𑀢𑁆𑀢𑀁 𑀧𑀸𑀤𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀘𑀺𑀢𑁆𑀢𑀓𑀢𑀸 𑀯𑀺𑀬 𑀢𑀺𑀝𑁆𑀞𑀦𑁆𑀢𑀺, 𑀅𑀦𑀼𑀩𑀦𑁆𑀥𑀫𑀺𑀕𑀸𑀧𑀺 𑀫𑀭𑀡𑀪𑀬𑀁 𑀳𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀦𑁆𑀢𑀸 𑀧𑀓𑁆𑀔𑀺𑀦𑁄𑀧𑀺 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀉𑀤𑀓𑁂 𑀫𑀘𑁆𑀙𑀸𑀧𑀺 𑀓𑀡𑁆𑀡𑀧𑀝𑀮𑀁 𑀅𑀘𑀸𑀮𑁂𑀦𑁆𑀢𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀫𑀸𑀦𑀸 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀫𑀥𑀼𑀭𑀲𑁆𑀲𑀭𑀸 𑀓𑀭𑀯𑀻𑀓𑀸 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮; 𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁬). 𑀦𑀺𑀩𑁆𑀩𑀸𑀧𑀬𑀦𑁆𑀢𑁄 𑀳𑀤𑀬𑀦𑁆𑀢𑀺 𑀓𑀺𑀮𑁂𑀲𑀕𑁆𑀕𑀺𑀲𑀦𑁆𑀢𑀢𑁆𑀢𑀲𑀩𑁆𑀩𑀚𑀦𑀫𑀸𑀦𑀲𑀁 ¶ 𑀥𑀫𑁆𑀫𑀓𑀣𑀸𑀫𑀢𑀥𑀸𑀭𑀸𑀬 𑀲𑀻𑀢𑀺𑀪𑀸𑀯𑀁 𑀚𑀦𑀬𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀳𑀸𑀲𑀬𑀦𑁆𑀢𑁄𑀢𑀺 𑀢𑁄𑀲𑀬𑀦𑁆𑀢𑁄. 𑀲𑀤𑁂𑀯𑀓𑀦𑁆𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁.

𑀅𑀢𑀻𑀢𑀩𑀼𑀤𑁆𑀥𑀸𑀦𑀦𑁆𑀢𑀺 𑀅𑀢𑀻𑀢𑀸𑀦𑀁 𑀩𑀼𑀤𑁆𑀥𑀸𑀦𑀁. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀅𑀪𑀺𑀦𑀻𑀳𑀸𑀭𑀲𑁆𑀲 𑀧𑀼𑀭𑀢𑁄 𑀧𑀦 𑀢𑀡𑁆𑀳𑀗𑁆𑀓𑀭𑁄 𑀫𑁂𑀥𑀗𑁆𑀓𑀭𑁄 𑀲𑀭𑀡𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀅𑀧𑀭𑀪𑀸𑀕𑁂 𑀓𑁄𑀡𑁆𑀟𑀜𑁆𑀜𑀸𑀤𑀬𑁄 𑀢𑁂𑀯𑀻𑀲𑀢𑀺 𑀩𑀼𑀤𑁆𑀥𑀸𑀢𑀺 𑀲𑀩𑁆𑀩𑁂 𑀤𑀻𑀧𑀗𑁆𑀓𑀭𑀸𑀤𑀬𑁄 𑀘𑀢𑀼𑀯𑀻𑀲𑀢𑀺 𑀩𑀼𑀤𑁆𑀥𑀸 𑀇𑀥 ‘‘𑀅𑀢𑀻𑀢𑀩𑀼𑀤𑁆𑀥𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀢𑁂𑀲𑀁 𑀅𑀢𑀻𑀢𑀩𑀼𑀤𑁆𑀥𑀸𑀦𑀁. 𑀚𑀺𑀦𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀤𑁂𑀲𑀺𑀢𑀦𑁆𑀢𑀺 𑀓𑀣𑀺𑀢𑀁. 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁. 𑀦𑀺𑀓𑀻𑀮𑀺𑀢𑀦𑁆𑀢𑀺 𑀢𑁂𑀲𑀁 𑀘𑀭𑀺𑀢𑀁 𑀓𑀧𑁆𑀧𑀚𑀸𑀢𑀺𑀕𑁄𑀢𑁆𑀢𑀸𑀬𑀼𑀩𑁄𑀥𑀺𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀉𑀧𑀝𑁆𑀞𑀸𑀓𑀫𑀸𑀢𑀸𑀧𑀺𑀢𑀼𑀧𑀼𑀢𑁆𑀢𑀪𑀭𑀺𑀬𑀸𑀧𑀭𑀺𑀘𑁆𑀙𑁂𑀤𑀸𑀤𑀺𑀓𑀁 𑀦𑀺𑀓𑀻𑀮𑀺𑀢𑀁 𑀦𑀸𑀫. 𑀩𑀼𑀤𑁆𑀥𑀧𑀭𑀫𑁆𑀧𑀭𑀸𑀕𑀢𑀦𑁆𑀢𑀺 𑀤𑀻𑀧𑀗𑁆𑀓𑀭𑀤𑀲𑀩𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀲𑁆𑀲𑀧𑀧𑀭𑀫𑁆𑀧𑀭𑀢𑁄 𑀆𑀕𑀢𑀁 𑀤𑁂𑀲𑀺𑀢𑀁 𑀦𑀺𑀓𑀻𑀮𑀺𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀕𑀢𑀸𑀬 𑀩𑀼𑀤𑁆𑀥𑀺𑀬𑀸𑀢𑀺 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺 (𑀫. 𑀦𑀺. 𑁧.𑁧𑁪𑁮, 𑁩𑁮𑁪, 𑁪𑁨𑁧; 𑁨.𑁨𑁩𑁩; 𑁩.𑁮𑁨; 𑀧𑀸𑀭𑀸. 𑁧𑁨) 𑀏𑀯𑀁 𑀯𑀺𑀪𑀢𑁆𑀢𑀁 𑀧𑀼𑀩𑁆𑀩𑁂 𑀦𑀺𑀯𑀼𑀝𑁆𑀞𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀲𑀗𑁆𑀔𑀸𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀕𑀢𑀸 𑀉𑀧𑀕𑀢𑀸 𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀕𑀢𑀸𑀬 𑀩𑀼𑀤𑁆𑀥𑀺𑀬𑀸, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀓𑀸𑀲𑀬𑀻𑀢𑀺 𑀩𑁆𑀬𑀸𑀓𑀸𑀲𑀺. 𑀮𑁄𑀓𑀳𑀺𑀢𑀦𑁆𑀢𑀺 𑀲𑀩𑁆𑀩𑀮𑁄𑀓𑀳𑀺𑀢𑀁 𑀩𑀼𑀤𑁆𑀥𑀯𑀁𑀲𑀁. 𑀲𑀤𑁂𑀯𑀓𑁂𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂𑀢𑀺 𑀅𑀢𑁆𑀣𑁄.

𑁮𑁦. 𑀅𑀣 𑀪𑀕𑀯𑀸 𑀓𑀭𑀼𑀡𑀸𑀲𑀻𑀢𑀮𑁂𑀦 𑀳𑀤𑀬𑁂𑀦 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀯𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀧𑀻𑀢𑀺𑀧𑀸𑀫𑁄𑀚𑁆𑀚𑀚𑀦𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀻𑀢𑀺𑀧𑀸𑀫𑁄𑀚𑁆𑀚𑀚𑀦𑀦𑀦𑁆𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀓𑀭𑀁 𑀧𑀻𑀢𑀺𑀬𑀸 𑀧𑀼𑀩𑁆𑀩𑀪𑀸𑀕𑀁 𑀧𑀸𑀫𑁄𑀚𑁆𑀚𑀁, 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀚𑀦𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀓𑀲𑀮𑁆𑀮𑀯𑀺𑀦𑁄𑀤𑀦𑀦𑁆𑀢𑀺 𑀲𑁄𑀓𑀲𑀗𑁆𑀔𑀸𑀢𑀸𑀦𑀁 𑀲𑀮𑁆𑀮𑀸𑀦𑀁 𑀯𑀺𑀦𑁄𑀤𑀦𑀁 𑀯𑀺𑀤𑁆𑀥𑀁𑀲𑀦𑀁. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀦𑁆𑀢𑀺 ¶ 𑀲𑀩𑁆𑀩𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀮𑀪𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁄, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀁 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀻𑀓𑀢𑁆𑀯𑀸𑀢𑀺 ¶ 𑀘𑀺𑀢𑁆𑀢𑁂 𑀓𑀢𑁆𑀯𑀸, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀣𑀸𑀢𑀺 𑀦𑀺𑀲𑀸𑀫𑁂𑀣 𑀦𑀺𑀩𑁄𑀥𑀣. 𑀫𑁂𑀢𑀺 𑀫𑀫.

𑁮𑁧. 𑀫𑀤𑀦𑀺𑀫𑁆𑀫𑀤𑀦𑀦𑁆𑀢𑀺 𑀚𑀸𑀢𑀺𑀫𑀤𑀸𑀤𑀻𑀦𑀁 𑀲𑀩𑁆𑀩𑀫𑀤𑀸𑀦𑀁 𑀦𑀺𑀫𑁆𑀫𑀤𑀦𑀓𑀭𑀁. 𑀲𑁄𑀓𑀦𑀼𑀤𑀦𑁆𑀢𑀺 𑀲𑁄𑀓𑁄 𑀦𑀸𑀫 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀧𑁄. 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀢𑁄 𑀤𑁄𑀫𑀦𑀲𑁆𑀲𑀫𑁂𑀯 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁄, 𑀘𑁂𑀢𑀲𑁄 𑀧𑀭𑀺𑀦𑀺𑀚𑁆𑀛𑀸𑀬𑀦𑀭𑀲𑁄, 𑀅𑀦𑀼𑀲𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀁 𑀲𑁄𑀓𑀁 𑀦𑀼𑀤𑀢𑀻𑀢𑀺 𑀲𑁄𑀓𑀦𑀼𑀤𑁄, 𑀢𑀁 𑀲𑁄𑀓𑀦𑀼𑀤𑀁. 𑀲𑀁𑀲𑀸𑀭𑀧𑀭𑀺𑀫𑁄𑀘𑀦𑀦𑁆𑀢𑀺 𑀲𑀁𑀲𑀸𑀭𑀩𑀦𑁆𑀥𑀦𑀢𑁄 𑀧𑀭𑀺𑀫𑁄𑀘𑀦𑀓𑀭𑀁. ‘‘𑀲𑀁𑀲𑀸𑀭𑀲𑀫𑀢𑀺𑀓𑁆𑀓𑀫’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀲𑀁𑀲𑀸𑀭𑀲𑀫𑀢𑀺𑀓𑁆𑀓𑀫𑀓𑀭𑀦𑁆𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀦𑁆𑀢𑀺 ¶ 𑀏𑀢𑁆𑀣 𑀤𑀼𑀓𑁆𑀔-𑀲𑀤𑁆𑀤𑁄 𑀤𑀼𑀓𑁆𑀔𑀯𑁂𑀤𑀦𑀸-𑀤𑀼𑀓𑁆𑀔𑀯𑀢𑁆𑀣𑀼-𑀤𑀼𑀓𑁆𑀔𑀸𑀭𑀫𑁆𑀫𑀡-𑀤𑀼𑀓𑁆𑀔𑀧𑀘𑁆𑀘𑀬-𑀤𑀼𑀓𑁆𑀔𑀝𑁆𑀞𑀸𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁩𑁨; 𑀫. 𑀦𑀺. 𑁧.𑁩𑁮𑁩, 𑁪𑁩𑁦; 𑀧𑀸𑀭𑀸. 𑁧𑁧) 𑀤𑀼𑀓𑁆𑀔𑀯𑁂𑀤𑀦𑀸𑀬𑀁 𑀤𑀺𑀲𑁆𑀲𑀢𑀺. ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸 𑀚𑀭𑀸𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁮𑁭; 𑀲𑀁. 𑀦𑀺. 𑁫.𑁧𑁦𑁮𑁧) 𑀤𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁. ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁦) 𑀤𑀼𑀓𑁆𑀔𑀸𑀭𑀫𑁆𑀫𑀡𑁂. ‘‘𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁧𑁭) 𑀤𑀼𑀓𑁆𑀔𑀧𑀘𑁆𑀘𑀬𑁂. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀸 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀁 𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁦) 𑀤𑀼𑀓𑁆𑀔𑀝𑁆𑀞𑀸𑀦𑁂. 𑀇𑀥 𑀧𑀦𑀸𑀬𑀁 𑀤𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁 𑀤𑀼𑀓𑁆𑀔𑀧𑀘𑁆𑀘𑀬𑁂𑀧𑀺 𑀘 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀚𑀸𑀢𑀺𑀆𑀤𑀺𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀓𑀭𑀦𑁆𑀢𑀺 𑀅𑀢𑁆𑀣𑁄 (𑀥. 𑀲. 𑀅𑀝𑁆𑀞. 𑁨 𑀆𑀤𑀬𑁄). 𑀫𑀕𑁆𑀕𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄𑀢𑀺 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸 𑀯𑀼𑀘𑁆𑀘𑀢𑀺, 𑀢𑀁 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑀪𑀽𑀢𑀁 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀁. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀓𑁆𑀓𑀘𑁆𑀘𑀁 𑀘𑀺𑀢𑁆𑀢𑀻𑀓𑀢𑁆𑀯𑀸, 𑀑𑀳𑀺𑀢𑀲𑁄𑀢𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀚𑁆𑀚𑀣𑀸𑀢𑀺 𑀅𑀥𑀺𑀢𑀺𑀝𑁆𑀞𑀣, 𑀲𑀼𑀡𑀸𑀣𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑀚𑀦𑀦𑀁 𑀲𑁄𑀓𑀲𑀮𑁆𑀮𑀯𑀺𑀦𑁄𑀤𑀦𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼𑀪𑀽𑀢𑀁 𑀇𑀫𑀁 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀕𑀼𑀡𑀯𑀺𑀲𑁂𑀲𑀸𑀯𑀳𑀁 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀁 𑀩𑀼𑀤𑁆𑀥𑀪𑀸𑀯𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀣𑀸𑀢𑀺 ¶ 𑀲𑀩𑁆𑀩𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑀢𑁆𑀢𑀁 𑀧𑀡𑀺𑀥𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀸 𑀩𑀼𑀤𑁆𑀥𑀯𑀁𑀲-𑀅𑀝𑁆𑀞𑀓𑀣𑀸𑀬

𑀭𑀢𑀦𑀘𑀗𑁆𑀓𑀫𑀦𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀩𑁆𑀩𑀸𑀓𑀸𑀭𑁂𑀦 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀲𑁆𑀲𑀢𑁆𑀣𑀯𑀡𑁆𑀡𑀦𑀸.

𑁨. 𑀲𑀼𑀫𑁂𑀥𑀧𑀢𑁆𑀣𑀦𑀸𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ¶ 𑁋

𑁧-𑁨.

‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀅𑀫𑀭𑀁 𑀦𑀸𑀫 𑀦𑀕𑀭𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫’’𑀦𑁆𑀢𑀺. 𑁋

𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀲𑀸 𑀧𑀦𑁂𑀲𑀸 𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀬𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀺𑀘𑀸𑀭𑀡𑀸 𑀢𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄 𑀧𑀼𑀘𑁆𑀙𑀸𑀯𑀲𑀺𑀓𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺. 𑀢𑀢𑁆𑀣 𑀬𑀸𑀦𑀺 𑀲𑀼𑀢𑁆𑀢𑀸𑀦𑀺 𑀪𑀕𑀯𑀸 𑀧𑀭𑁂𑀳𑀺 𑀅𑀦𑀚𑁆𑀛𑀺𑀝𑁆𑀞𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀓𑀣𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁬𑁪 𑀆𑀤𑀬𑁄) 𑀯𑀢𑁆𑀣𑀲𑀼𑀢𑁆𑀢𑀦𑁆𑀢𑀺 (𑀫. 𑀦𑀺. 𑁧.𑁭𑁦 𑀆𑀤𑀬𑁄) 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀅𑀢𑁆𑀢𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄.

𑀬𑀸𑀦𑀺 𑀯𑀸 𑀧𑀦 ‘‘𑀧𑀭𑀺𑀧𑀓𑁆𑀓𑀸 𑀔𑁄 𑀭𑀸𑀳𑀼𑀮𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀬𑀁𑀦𑀽𑀦𑀸𑀳𑀁 𑀭𑀸𑀳𑀼𑀮𑀁 𑀉𑀢𑁆𑀢𑀭𑀺𑀁 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁨𑁧) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀔𑀦𑁆𑀢𑀺𑀁 𑀫𑀦𑀁 𑀩𑀼𑀚𑁆𑀛𑀦𑀓𑀪𑀸𑀯𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀧𑀭𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩 𑀆𑀤𑀬𑁄; 𑀧𑀝𑀺. 𑀫. 𑁨.𑁩𑁦) 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄.

𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀢𑁂 𑀤𑁂𑀯𑀫𑀦𑀼𑀲𑁆𑀲𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀼𑀝𑁆𑀞𑁂𑀦 𑀧𑀦 𑀪𑀕𑀯𑀢𑀸 𑀬𑀸𑀦𑀺 𑀓𑀣𑀺𑀢𑀸𑀦𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢 (𑀲𑀁. 𑀦𑀺. 𑁧.𑁧 𑀆𑀤𑀬𑁄) 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀸𑀤𑀻𑀦𑀺 (𑀲𑀁. 𑀦𑀺. 𑁫.𑁧𑁮𑁨 𑀆𑀤𑀬𑁄) 𑀢𑁂𑀲𑀁 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄.

𑀬𑀸𑀦𑀺 𑀯𑀸 𑀧𑀦 𑀉𑀧𑁆𑀧𑀦𑁆𑀦𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀤𑁂𑀲𑀺𑀢𑀸𑀦𑀺 𑀥𑀫𑁆𑀫𑀤𑀸𑀬𑀸𑀤- (𑀫. 𑀦𑀺. 𑁧.𑁨𑁯 𑀆𑀤𑀬𑁄) 𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀤𑀻𑀦𑀺 (𑀲𑀁. 𑀦𑀺. 𑁨.𑁬𑁩), 𑀢𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀏𑀯𑀫𑁂𑀢𑁂𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁂𑀲𑀼 𑀇𑀫𑀲𑁆𑀲 𑀩𑀼𑀤𑁆𑀥𑀯𑀁𑀲𑀲𑁆𑀲 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀧𑀼𑀘𑁆𑀙𑀸𑀯𑀲𑁂𑀦 𑀳𑀺 𑀪𑀕𑀯𑀢𑀸 𑀅𑀬𑀁 ¶ 𑀦𑀺𑀓𑁆𑀔𑀺𑀢𑁆𑀢𑁄. 𑀓𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦? 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀲𑁆𑀫𑀺𑀁 𑀦𑀺𑀤𑀸𑀦𑀲𑁆𑀫𑀺𑀁 𑀏𑀯 𑁋

‘‘𑀲𑀸𑀭𑀺𑀧𑀼𑀢𑁆𑀢𑁄 ¶ ¶ 𑀫𑀳𑀸𑀧𑀜𑁆𑀜𑁄, 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑁄;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀧𑀼𑀘𑁆𑀙𑀢𑀺 𑀮𑁄𑀓𑀦𑀸𑀬𑀓𑀁;

𑀓𑀻𑀤𑀺𑀲𑁄 𑀢𑁂 𑀫𑀳𑀸𑀯𑀻𑀭, 𑀅𑀪𑀺𑀦𑀻𑀳𑀸𑀭𑁄 𑀦𑀭𑀼𑀢𑁆𑀢𑀫𑀸’’𑀢𑀺. (𑀩𑀼. 𑀯𑀁. 𑁧.𑁭𑁪-𑁭𑁫) 𑁋

𑀆𑀤𑀺. 𑀢𑁂𑀦𑁂𑀲𑀸 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸 𑀧𑀼𑀘𑁆𑀙𑀸𑀯𑀲𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂𑀢𑀺 𑀏𑀢𑁆𑀣 𑀓𑀧𑁆𑀧-𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀙𑁂𑀤𑀦𑀯𑀺𑀓𑀧𑁆𑀧𑀦𑀮𑁂𑀲𑀲𑀫𑀦𑁆𑀢𑀪𑀸𑀯𑀆𑀬𑀼𑀓𑀧𑁆𑀧𑀫𑀳𑀸𑀓𑀧𑁆𑀧𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀑𑀓𑀧𑁆𑀧𑀦𑀻𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲. 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀪𑀺𑀲𑀤𑁆𑀤𑀳𑀦𑁂 𑀤𑀺𑀲𑁆𑀲𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁦) 𑀯𑁄𑀳𑀸𑀭𑁂. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁂. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 (𑀲𑀼. 𑀦𑀺. 𑁧𑁦𑁯𑁮; 𑀘𑀽𑀴𑀦𑀺. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑁧𑁧𑁭; 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁧) 𑀘, ‘‘𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀇𑀢𑀺 𑀢𑀲𑁆𑀲 𑀦𑀸𑀫𑀁, 𑀢𑀬𑀸 𑀓𑀢𑀁 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲𑀸’’𑀢𑀺 𑀘 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁩𑁪𑁬) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁨.𑁨𑁨.𑁧𑁩𑁬𑁮) 𑀙𑁂𑀤𑀦𑁂. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁪𑁪𑁬) 𑀯𑀺𑀓𑀧𑁆𑀧𑁂. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁮𑁦) 𑀮𑁂𑀲𑁂. ‘‘𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀲𑀫𑀦𑁆𑀢𑀪𑀸𑀯𑁂. ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧’’𑀦𑁆𑀢𑀺 (𑀤𑀻. 𑀦𑀺. 𑁨.𑁧𑁭𑁮; 𑀉𑀤𑀸. 𑁫𑁧) 𑀏𑀢𑁆𑀣 𑀆𑀬𑀼𑀓𑀧𑁆𑀧𑁂. ‘‘𑀓𑀻𑀯 𑀤𑀻𑀖𑁄 𑀦𑀼 𑀔𑁄, 𑀪𑀦𑁆𑀢𑁂, 𑀓𑀧𑁆𑀧𑁄’’𑀢𑀺 (𑀲𑀁. 𑀦𑀺. 𑁨.𑁧𑁨𑁮-𑁧𑁨𑁯) 𑀏𑀢𑁆𑀣 𑀫𑀳𑀸𑀓𑀧𑁆𑀧𑁂. 𑀆𑀤𑀺𑀲𑀤𑁆𑀤𑁂𑀦 ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀓𑀺𑀭, 𑀪𑁄, 𑀫𑀬𑀁 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳𑀸’’𑀢𑀺 (𑀫. 𑀦𑀺. 𑁧.𑁨𑁬𑁦) 𑀏𑀢𑁆𑀣 𑀧𑀝𑀺𑀪𑀸𑀕𑁂. ‘‘𑀓𑀧𑁆𑀧𑁄 𑀦𑀝𑁆𑀞𑁄 𑀳𑁄𑀢𑀺. 𑀓𑀧𑁆𑀧𑀓𑀢𑁄𑀓𑀸𑀲𑁄 𑀚𑀺𑀡𑁆𑀡𑁄 𑀳𑁄𑀢𑀻’’𑀢𑀺 (𑀧𑀸𑀘𑀺. 𑁩𑁭𑁧) 𑀏𑀢𑁆𑀣 𑀯𑀺𑀦𑀬𑀓𑀧𑁆𑀧𑁂. 𑀇𑀥 𑀧𑀦 𑀫𑀳𑀸𑀓𑀧𑁆𑀧𑁂 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂𑀢𑀺 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀢𑁆𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁯; 𑁩.𑁨𑁭𑁫; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧; 𑀅. 𑀦𑀺. 𑀅𑀝𑁆𑀞. 𑁨.𑁩.𑁧𑁨𑁮; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀗𑁆𑀕𑀮𑀲𑀼𑀢𑁆𑀢, 𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸; 𑀲𑀼. 𑀦𑀺. 𑀅𑀝𑁆𑀞. 𑁨.𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸.𑁧; 𑀘𑀽𑀴𑀦𑀺. 𑀅𑀝𑁆𑀞. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸). ¶ 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂𑀢𑀺 ‘‘𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂’’𑀢𑀺 𑀯𑀘𑀦𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂𑀢𑀺 𑀅𑀢𑁆𑀣𑁄. 𑀅𑀫𑀭𑀁 𑀦𑀸𑀫 𑀦𑀕𑀭𑀦𑁆𑀢𑀺 ‘‘𑀅𑀫𑀭’’𑀦𑁆𑀢𑀺 𑀘 ‘‘𑀅𑀫𑀭𑀯𑀢𑀻’’𑀢𑀺 ¶ 𑀘 𑀮𑀤𑁆𑀥𑀦𑀸𑀫𑀁 𑀦𑀕𑀭𑀁 𑀅𑀳𑁄𑀲𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀅𑀜𑁆𑀜𑁂𑀦𑀸𑀧𑀺 𑀧𑀓𑀸𑀭𑁂𑀦 𑀯𑀡𑁆𑀡𑀬𑀦𑁆𑀢𑀺, 𑀓𑀺𑀁 𑀢𑁂𑀳𑀺, 𑀦𑀸𑀫𑀫𑀢𑁆𑀢𑀁 𑀧𑀦𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲. 𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀯𑀺𑀘𑀺𑀢𑁆𑀭-𑀘𑀘𑁆𑀘𑀭𑀤𑁆𑀯𑀸𑀭-𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀺𑀓-𑀧𑀸𑀓𑀸𑀭-𑀧𑀭𑀺𑀓𑁆𑀔𑁂𑀧𑀧𑀸𑀲𑀸𑀤- 𑀳𑀫𑁆𑀫𑀺𑀬-𑀪𑀯𑀦-𑀲𑀫𑀮𑀗𑁆𑀓𑀢𑀢𑁆𑀢𑀸 𑀤𑀲𑁆𑀲𑀦𑀻𑀬𑀁. 𑀫𑀦𑁄𑀭𑀫𑀦𑁆𑀢𑀺 𑀲𑀫𑀲𑀼𑀘𑀺𑀧𑀭𑀫𑀭𑀫𑀡𑀻𑀬𑀪𑀽𑀫𑀺𑀪𑀸𑀕𑀢𑁆𑀢𑀸 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀢𑁆𑀢𑀸 ¶ 𑀲𑀼𑀮𑀪𑀸𑀳𑀸𑀭𑀢𑁆𑀢𑀸 𑀲𑀩𑁆𑀩𑁄𑀧𑀓𑀭𑀡𑀬𑀼𑀢𑁆𑀢𑀢𑁆𑀢𑀸 𑀘 𑀲𑀫𑀺𑀤𑁆𑀥𑀢𑁆𑀢𑀸 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀦𑀁 𑀫𑀦𑁄 𑀭𑀫𑀬𑀢𑀻𑀢𑀺 𑀫𑀦𑁄𑀭𑀫𑀁.

𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀦𑁆𑀢𑀺 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀲𑁆𑀲𑀲𑀤𑁆𑀤𑁂𑀦 𑀭𑀣𑀲𑀤𑁆𑀤𑁂𑀦 𑀪𑁂𑀭𑀺𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁂𑀦 𑀫𑀼𑀤𑀺𑀗𑁆𑀕𑀲𑀤𑁆𑀤𑁂𑀦 𑀯𑀻𑀡𑀸𑀲𑀤𑁆𑀤𑁂𑀦 𑀕𑀻𑀢𑀲𑀤𑁆𑀤𑁂𑀦 𑀲𑀫𑁆𑀫𑀢𑀸𑀴𑀲𑀤𑁆𑀤𑁂𑀦 ‘‘𑀪𑀼𑀜𑁆𑀚𑀣 𑀧𑀺𑀯𑀣 𑀔𑀸𑀤𑀣𑀸’’𑀢𑀺 𑀤𑀲𑀫𑁂𑀦 𑀲𑀤𑁆𑀤𑁂𑀦𑀸𑀢𑀺; 𑀇𑀫𑁂𑀳𑀺 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁 𑀅𑀳𑁄𑀲𑀺, 𑀲𑀩𑁆𑀩𑀓𑀸𑀮𑀁 𑀅𑀦𑀼𑀧𑀫𑀼𑀲𑁆𑀲𑀯𑀲𑀫𑀚𑁆𑀚𑀦𑀸𑀝𑀓𑀸 𑀓𑀻𑀴𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢𑀦𑁆𑀢𑀺 𑀅𑀦𑁆𑀦𑁂𑀦 𑀘𑀢𑀼𑀩𑁆𑀩𑀺𑀥𑁂𑀦𑀸𑀳𑀸𑀭𑁂𑀦 𑀘 𑀧𑀸𑀦𑁂𑀦 𑀘 𑀲𑀼𑀝𑁆𑀞𑀼 𑀆𑀬𑀼𑀢𑀁 𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢𑀁, 𑀇𑀫𑀺𑀦𑀸 𑀲𑀼𑀪𑀺𑀓𑁆𑀔𑀢𑀸 𑀤𑀲𑁆𑀲𑀺𑀢𑀸, 𑀩𑀳𑀼𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑁂 𑀤𑀲 𑀲𑀤𑁆𑀤𑁂 𑀯𑀢𑁆𑀣𑀼𑀢𑁄 𑀤𑀲𑁆𑀲𑀦𑀢𑁆𑀣𑀁 𑁋

‘‘𑀳𑀢𑁆𑀣𑀺𑀲𑀤𑁆𑀤𑀁 𑀅𑀲𑁆𑀲𑀲𑀤𑁆𑀤𑀁, 𑀪𑁂𑀭𑀺𑀲𑀗𑁆𑀔𑀭𑀣𑀸𑀦𑀺 𑀘;

𑀔𑀸𑀤𑀣 𑀧𑀺𑀯𑀣 𑀘𑁂𑀯, 𑀅𑀦𑁆𑀦𑀧𑀸𑀦𑁂𑀦 𑀖𑁄𑀲𑀺𑀢’’𑀦𑁆𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 𑀳𑀢𑁆𑀣𑀺𑀲𑀤𑁆𑀤𑀦𑁆𑀢𑀺 𑀳𑀢𑁆𑀣𑀻𑀦𑀁 𑀓𑁄𑀜𑁆𑀘𑀦𑀸𑀤𑀲𑀤𑁆𑀤𑁂𑀦, 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀪𑁂𑀭𑀺𑀲𑀗𑁆𑀔𑀭𑀣𑀸𑀦𑀺 𑀘𑀸𑀢𑀺 𑀪𑁂𑀭𑀺𑀲𑀤𑁆𑀤𑁂𑀦 𑀘 𑀲𑀗𑁆𑀔𑀲𑀤𑁆𑀤𑁂𑀦 𑀘 𑀭𑀣𑀲𑀤𑁆𑀤𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀲𑁂𑀦 𑀯𑀼𑀢𑁆𑀢𑀁, ‘𑀔𑀸𑀤𑀣 𑀧𑀺𑀯𑀣𑀸’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀅𑀦𑁆𑀦𑀧𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑁂𑀦 𑀖𑁄𑀲𑀺𑀢𑀁 𑀅𑀪𑀺𑀦𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀳 𑁋 𑀢𑁂𑀲𑀁 𑀧𑀦 𑀲𑀤𑁆𑀤𑀸𑀦𑀁 𑀏𑀓𑀤𑁂𑀲𑁄𑀯 𑀤𑀲𑁆𑀲𑀺𑀢𑁄, 𑀦 𑀲𑀓𑀮𑁄𑀢𑀺? 𑀦 𑀏𑀓𑀤𑁂𑀲𑁄 𑀲𑀓𑀮𑁄 𑀤𑀲𑀯𑀺𑀥𑁄 𑀤𑀲𑁆𑀲𑀺𑀢𑁄𑀯. 𑀓𑀣𑀁? 𑀪𑁂𑀭𑀺𑀲𑀤𑁆𑀤𑁂𑀦 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀲𑀗𑁆𑀕𑀳𑀺𑀢𑁄, 𑀲𑀗𑁆𑀔𑀲𑀤𑁆𑀤𑁂𑀦 𑀯𑀻𑀡𑀸𑀕𑀻𑀢𑀲𑀫𑁆𑀫𑀢𑀸𑀴𑀲𑀤𑁆𑀤𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀲𑁂𑀯 𑀤𑀲𑁆𑀲𑀺𑀢𑀸.

𑀏𑀯𑀁 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀦𑀕𑀭𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑁂𑀢𑁆𑀯𑀸 𑀧𑀼𑀦 𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 𑁋

𑁩.

‘‘𑀦𑀕𑀭𑀁 ¶ 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀲𑀩𑁆𑀩𑀓𑀫𑁆𑀫𑀫𑀼𑀧𑀸𑀕𑀢𑀁, 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀁, 𑀦𑀸𑀦𑀸𑀚𑀦𑀲𑀫𑀸𑀓𑀼𑀮𑀁;

𑀲𑀫𑀺𑀤𑁆𑀥𑀁 𑀤𑁂𑀯𑀦𑀕𑀭𑀁𑀯, 𑀆𑀯𑀸𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦’’𑀦𑁆𑀢𑀺. 𑁋 𑀯𑀼𑀢𑁆𑀢𑀁;

𑀢𑀢𑁆𑀣 ¶ 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀸𑀓𑀸𑀭𑀕𑁄𑀧𑀼𑀭𑀝𑁆𑀝𑀸𑀮𑀓𑀸𑀤𑀺𑀲𑀩𑁆𑀩𑀦𑀕𑀭𑀸𑀯𑀬𑀯𑀲𑀫𑁆𑀧𑀦𑁆𑀦𑀁, 𑀧𑀭𑀺𑀧𑀼𑀡𑁆𑀡𑀲𑀩𑁆𑀩𑀯𑀺𑀢𑁆𑀢𑀽𑀧𑀓𑀭𑀡𑀥𑀦𑀥𑀜𑁆𑀜𑀢𑀺𑀡𑀓𑀝𑁆𑀞𑁄𑀤𑀓𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀲𑀩𑁆𑀩𑀓𑀫𑁆𑀫𑀫𑀼𑀧𑀸𑀕𑀢𑀦𑁆𑀢𑀺 𑀲𑀩𑁆𑀩𑀓𑀫𑁆𑀫𑀦𑁆𑀢𑁂𑀦 𑀉𑀧𑀕𑀢𑀁, 𑀲𑀫𑀼𑀧𑀕𑀢𑀲𑀩𑁆𑀩𑀓𑀫𑁆𑀫𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀦𑁆𑀢𑀺 ¶ 𑀧𑀭𑀺𑀧𑀼𑀡𑁆𑀡𑀫𑀼𑀢𑁆𑀢𑀸𑀤𑀺𑀲𑀢𑁆𑀢𑀭𑀢𑀦𑀁, 𑀘𑀓𑁆𑀓𑀯𑀢𑁆𑀢𑀺𑀦𑀺𑀯𑀸𑀲𑀪𑀽𑀫𑀺𑀢𑁄 𑀯𑀸 𑀳𑀢𑁆𑀣𑀺𑀭𑀢𑀦𑀸𑀤𑀻𑀳𑀺 𑀲𑀢𑁆𑀢𑀭𑀢𑀦𑁂𑀳𑀺 𑀲𑀫𑁆𑀧𑀦𑁆𑀦𑀁. 𑀦𑀸𑀦𑀸𑀚𑀦𑀲𑀫𑀸𑀓𑀼𑀮𑀦𑁆𑀢𑀺 𑀦𑀸𑀦𑀸𑀯𑀺𑀥𑀤𑁂𑀲𑀪𑀸𑀲𑁂𑀳𑀺 𑀚𑀦𑁂𑀳𑀺 𑀲𑀫𑀸𑀓𑀼𑀮𑀁. 𑀲𑀫𑀺𑀤𑁆𑀥𑀦𑁆𑀢𑀺 𑀫𑀦𑀼𑀲𑁆𑀲𑁄𑀧𑀪𑁄𑀕𑀲𑀩𑁆𑀩𑁄𑀧𑀓𑀭𑀡𑁂𑀳𑀺 𑀲𑀫𑀺𑀤𑁆𑀥𑀁 𑀨𑀻𑀢𑀁. 𑀤𑁂𑀯𑀦𑀕𑀭𑀁 𑀯𑀸𑀢𑀺 𑀤𑁂𑀯𑀦𑀕𑀭𑀁 𑀯𑀺𑀬 𑀆𑀮𑀓𑀫𑀦𑁆𑀤𑀸 𑀯𑀺𑀬 𑀅𑀫𑀭𑀯𑀢𑀻 𑀲𑀫𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀯𑀸𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦𑀦𑁆𑀢𑀺 𑀆𑀯𑀲𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀓𑀫𑁆𑀫𑀺𑀦𑁄 𑀚𑀦𑀸𑀢𑀺 𑀆𑀯𑀸𑀲𑁄. ‘‘𑀆𑀯𑀸𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀯𑀸𑀲’’𑀦𑁆𑀢𑀺 𑀮𑀺𑀗𑁆𑀕𑀪𑁂𑀤𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀜𑀸𑀬𑀢𑀺 𑀢𑁂𑀦𑀸𑀢𑀺 𑀧𑀼𑀜𑁆𑀜𑀁, 𑀓𑀼𑀮𑀭𑀽𑀧𑀫𑀳𑀸𑀪𑁄𑀕𑀺𑀲𑁆𑀲𑀭𑀺𑀬𑀯𑀲𑁂𑀦 𑀧𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀦𑀸𑀢𑀻𑀢𑀺 𑀯𑀸 𑀧𑀼𑀜𑁆𑀜𑀁. 𑀲𑀩𑁆𑀩𑀓𑀼𑀲𑀮𑀫𑀮𑀭𑀚𑀸𑀧𑀯𑀸𑀳𑀓𑀢𑁆𑀢𑀸 𑀧𑀼𑀜𑁆𑀜𑀁 𑀓𑀫𑁆𑀫𑀁 𑀬𑁂𑀲𑀁 𑀅𑀢𑁆𑀣𑀺 𑀢𑁂 𑀧𑀼𑀜𑁆𑀜𑀓𑀫𑁆𑀫𑀺𑀦𑁄, 𑀢𑁂𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦𑀁 𑀆𑀯𑀸𑀲𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀅𑀳𑁄𑀲𑀺 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀅𑀦𑀯𑀬𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼. 𑀢𑀲𑁆𑀲 𑀧𑀦 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀅𑀣𑀲𑁆𑀲 𑀭𑀸𑀲𑀺𑀯𑀟𑁆𑀠𑀓𑁄 𑀅𑀫𑀘𑁆𑀘𑁄 𑀆𑀬𑀧𑁄𑀢𑁆𑀣𑀓𑀁 𑀆𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀯𑀺𑀯𑀺𑀥𑀭𑀢𑀦𑀪𑀭𑀺𑀢𑁂 𑀕𑀩𑁆𑀪𑁂 𑀯𑀺𑀯𑀭𑀺𑀢𑁆𑀯𑀸 𑁋 ‘‘𑀏𑀢𑁆𑀣𑀓𑀁 𑀢𑁂, 𑀓𑀼𑀫𑀸𑀭, 𑀫𑀸𑀢𑀼 𑀲𑀦𑁆𑀢𑀓𑀁, 𑀏𑀢𑁆𑀣𑀓𑀁 𑀧𑀺𑀢𑀼 𑀲𑀦𑁆𑀢𑀓𑀁, 𑀏𑀢𑁆𑀣𑀓𑀁 𑀅𑀬𑁆𑀬𑀓𑀧𑀬𑁆𑀬𑀓𑀸𑀦’’𑀦𑁆𑀢𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀥𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑁋 ‘‘𑀏𑀢𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀦𑀺𑀬𑁆𑀬𑀸𑀢𑁂𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀦𑀕𑀭𑁂 ¶ 𑀅𑀫𑀭𑀯𑀢𑀺𑀬𑀸, 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀦𑁂𑀓𑀓𑁄𑀝𑀺𑀲𑀦𑁆𑀦𑀺𑀘𑀬𑁄, 𑀧𑀳𑀽𑀢𑀥𑀦𑀥𑀜𑁆𑀜𑀯𑀸.

𑁫.

‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄’’𑀢𑀺.

𑀢𑀢𑁆𑀣 𑀦𑀕𑀭𑁂 𑀅𑀫𑀭𑀯𑀢𑀺𑀬𑀸𑀢𑀺 𑀅𑀫𑀭𑀯𑀢𑀻𑀲𑀗𑁆𑀔𑀸𑀢𑁂 𑀦𑀕𑀭𑁂. 𑀲𑀼𑀫𑁂𑀥𑁄 𑀦𑀸𑀫𑀸𑀢𑀺 𑀏𑀢𑁆𑀣 ‘‘𑀫𑁂𑀥𑀸’’𑀢𑀺 𑀧𑀜𑁆𑀜𑀸 ¶ 𑀯𑀼𑀘𑁆𑀘𑀢𑀺. 𑀲𑀸 𑀢𑀲𑁆𑀲 𑀲𑀼𑀦𑁆𑀤𑀭𑀸 𑀧𑀲𑀢𑁆𑀣𑀸𑀢𑀺 𑀲𑀼𑀫𑁂𑀥𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑁆𑀭𑀳𑁆𑀫𑀁 𑀅𑀡𑀢𑀺 𑀲𑀺𑀓𑁆𑀔𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄 ¶ . 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 ‘‘𑀩𑁆𑀭𑀳𑁆𑀫𑀼𑀦𑁄 𑀅𑀧𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀤𑀦𑁆𑀢𑀺. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀅𑀦𑁂𑀓𑀓𑁄𑀝𑀺𑀲𑀦𑁆𑀦𑀺𑀘𑀬𑁄𑀢𑀺 𑀓𑁄𑀝𑀻𑀦𑀁 𑀲𑀦𑁆𑀦𑀺𑀘𑀬𑁄 𑀓𑁄𑀝𑀺𑀲𑀦𑁆𑀦𑀺𑀘𑀬𑁄, 𑀅𑀦𑁂𑀓𑁄 𑀓𑁄𑀝𑀺𑀲𑀦𑁆𑀦𑀺𑀘𑀬𑁄 𑀬𑀲𑁆𑀲 𑀲𑁄𑀬𑀁 𑀅𑀦𑁂𑀓𑀓𑁄𑀝𑀺𑀲𑀦𑁆𑀦𑀺𑀘𑀬𑁄, 𑀅𑀦𑁂𑀓𑀓𑁄𑀝𑀺 𑀥𑀦𑀲𑀦𑁆𑀦𑀺𑀘𑀬𑁄𑀢𑀺 𑀅𑀢𑁆𑀣𑁄. 𑀧𑀳𑀽𑀢𑀥𑀦𑀥𑀜𑁆𑀜𑀯𑀸𑀢𑀺 𑀩𑀳𑀼𑀮𑀥𑀦𑀥𑀜𑁆𑀜𑀯𑀸. 𑀧𑀼𑀭𑀺𑀫𑀁 𑀪𑀽𑀫𑀺𑀕𑀢𑀕𑀩𑁆𑀪𑀕𑀢𑀥𑀦𑀥𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀤𑀁 𑀦𑀺𑀘𑁆𑀘𑀧𑀭𑀺𑀪𑁄𑀕𑀽𑀧𑀕𑀢𑀥𑀦𑀥𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀚𑁆𑀛𑀸𑀬𑀓𑁄𑀢𑀺 𑀦 𑀛𑀸𑀬𑀢𑀻𑀢𑀺 𑀅𑀚𑁆𑀛𑀸𑀬𑀓𑁄, 𑀛𑀸𑀦𑀪𑀸𑀯𑀦𑀸𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀻𑀢𑀺. 𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀅𑀚𑁆𑀛𑀸𑀬𑀓𑀸 𑀅𑀚𑁆𑀛𑀸𑀬𑀓𑀸’ 𑀢𑁆𑀯𑁂𑀯 𑀢𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁩𑁨) 𑀏𑀯𑀁 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀛𑀸𑀦𑀯𑀺𑀭𑀳𑀺𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀭𑀳𑀯𑀘𑀦𑀁 𑀉𑀧𑁆𑀧𑀦𑁆𑀦𑀁. 𑀇𑀤𑀸𑀦𑀺 𑀫𑀦𑁆𑀢𑀁 𑀛𑀸𑀬𑀢𑀻𑀢𑀺 𑀅𑀚𑁆𑀛𑀸𑀬𑀓𑁄, 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀧𑀲𑀁𑀲𑀯𑀘𑀦𑀁 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺. 𑀫𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀫𑀦𑁆𑀢𑀥𑀭𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁. 𑀅𑀬𑀁 𑀧𑀦 𑀯𑁂𑀤-𑀲𑀤𑁆𑀤𑁄 𑀜𑀸𑀡𑀲𑁄𑀫𑀦𑀲𑁆𑀲𑀕𑀦𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 𑁋 ‘‘𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁦𑁬𑁫) 𑀜𑀸𑀡𑁂 𑀤𑀺𑀲𑁆𑀲𑀢𑀺. ‘‘𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫𑁭) 𑀲𑁄𑀫𑀦𑀲𑁆𑀲𑁂. ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁬) 𑀕𑀦𑁆𑀣𑁂. 𑀇𑀥𑀸𑀧𑀺 𑀕𑀦𑁆𑀣𑁂 (𑀫. 𑀦𑀺. 𑀅𑀝𑁆𑀞. 𑁧.𑁭𑁫). 𑀧𑀸𑀭𑀕𑀽𑀢𑀺 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀑𑀝𑁆𑀞𑀧𑀳𑀢𑀓𑀭𑀡𑀫𑀢𑁆𑀢𑁂𑀦 𑀧𑀸𑀭𑀁 𑀕𑀢𑁄𑀢𑀺 𑀧𑀸𑀭𑀕𑀽. 𑀮𑀓𑁆𑀔𑀡𑁂𑀢𑀺 𑀇𑀢𑁆𑀣𑀺𑀮𑀓𑁆𑀔𑀡𑀧𑀼𑀭𑀺𑀲𑀮𑀓𑁆𑀔𑀡𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀤𑀺𑀓𑁂 𑀮𑀓𑁆𑀔𑀡𑁂. 𑀇𑀢𑀺𑀳𑀸𑀲𑁂𑀢𑀺 𑀇𑀢𑀺𑀳 𑀆𑀲, 𑀇𑀢𑀺𑀳 𑀆𑀲𑀸𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁂 ¶ 𑀧𑀼𑀭𑀸𑀡𑀲𑀗𑁆𑀔𑀸𑀢𑁂 𑀕𑀦𑁆𑀣𑀯𑀺𑀲𑁂𑀲𑁂. 𑀲𑀥𑀫𑁆𑀫𑁂𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀓𑁂 𑀥𑀫𑁆𑀫𑁂, 𑀲𑀓𑁂 𑀆𑀘𑀭𑀺𑀬𑀓𑁂 𑀯𑀸. 𑀧𑀸𑀭𑀫𑀺𑀁 𑀕𑀢𑁄𑀢𑀺 𑀧𑀸𑀭𑀁 𑀕𑀢𑁄, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀅𑀣𑁂𑀓𑀤𑀺𑀯𑀲𑀁 𑀲𑁄 𑀤𑀲𑀕𑀼𑀡𑀕𑀡𑀸𑀭𑀸𑀥𑀺𑀢𑀧𑀡𑁆𑀟𑀺𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀢𑀮𑁂 𑀭𑀳𑁄𑀕𑀢𑁄 𑀳𑀼𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀦𑀩𑁆𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀦𑀸𑀫 𑀤𑀼𑀓𑁆𑀔𑀁, 𑀢𑀣𑀸 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀪𑁂𑀤𑀦𑀁, 𑀅𑀳𑀜𑁆𑀘 𑀚𑀸𑀢𑀺𑀥𑀫𑁆𑀫𑁄, 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀫𑀭𑀡𑀥𑀫𑁆𑀫𑁄, 𑀏𑀯𑀁𑀪𑀽𑀢𑁂𑀦 𑀫𑀬𑀸 𑀅𑀚𑀸𑀢𑀺𑀁 𑀅𑀚𑀭𑀁 𑀅𑀩𑁆𑀬𑀸𑀥𑀺𑀁 𑀅𑀫𑀭𑀡𑀁 𑀲𑀼𑀔𑀁 𑀲𑀺𑀯𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀺𑀢𑀼𑀁 ¶ 𑀯𑀝𑁆𑀝𑀢𑀺, 𑀅𑀯𑀲𑁆𑀲𑀁 𑀪𑀯𑀘𑀸𑀭𑀓𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀸 𑀏𑀓𑁂𑀦 𑀫𑀕𑁆𑀕𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀭𑀳𑁄𑀕𑀢𑁄 ¶ 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀤𑀼𑀓𑁆𑀔𑁄 𑀧𑀼𑀦𑀩𑁆𑀪𑀯𑁄 𑀦𑀸𑀫, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁.

𑁭.

‘‘𑀚𑀸𑀢𑀺𑀥𑀫𑁆𑀫𑁄 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺𑀥𑀫𑁆𑀫𑁄 𑀲𑀳𑀁 𑀢𑀤𑀸;

𑀅𑀚𑀭𑀁 𑀅𑀫𑀭𑀁 𑀔𑁂𑀫𑀁, 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

𑁮.

‘‘𑀬𑀁𑀦𑀽𑀦𑀺𑀫𑀁 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄.

𑁯.

‘‘𑀅𑀢𑁆𑀣𑀺 𑀳𑁂𑀳𑀺𑀢𑀺 𑀲𑁄 𑀫𑀕𑁆𑀕𑁄, 𑀦 𑀲𑁄 𑀲𑀓𑁆𑀓𑀸 𑀦 𑀳𑁂𑀢𑀼𑀬𑁂;

𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺 𑀢𑀁 𑀫𑀕𑁆𑀕𑀁, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸’’𑀢𑀺.

𑀏𑀢𑁆𑀣 𑀧𑀦 𑀕𑀸𑀣𑀸𑀲𑀫𑁆𑀩𑀦𑁆𑀥𑀜𑁆𑀘 𑀅𑀦𑀼𑀢𑁆𑀢𑀸𑀦𑀧𑀤𑀸𑀦𑀫𑀢𑁆𑀣𑀜𑁆𑀘 𑀯𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫. 𑀢𑀢𑁆𑀣 𑀭𑀳𑁄𑀕𑀢𑁄𑀢𑀺 𑀭𑀳𑀲𑀺 𑀕𑀢𑁄, 𑀭𑀳𑀲𑀺 𑀞𑀸𑀦𑁂 𑀦𑀺𑀲𑀺𑀦𑁆𑀦𑁄. 𑀏𑀯𑀁 𑀘𑀺𑀦𑁆𑀢𑁂𑀲𑀳𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑁂𑀲𑀺𑀁 𑀅𑀳𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀘𑀺𑀦𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑀓𑀸𑀮𑁂. ‘‘𑀏𑀯𑀁 𑀘𑀺𑀦𑁆𑀢𑁂𑀲𑀳’’𑀦𑁆𑀢𑀺 𑀪𑀕𑀯𑀸 𑀇𑀫𑀺𑀦𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑀁 𑀏𑀓𑀢𑁆𑀢𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀢𑀤𑀸 𑀲𑁄 𑀲𑀼𑀫𑁂𑀥𑁄 𑀅𑀳𑀫𑁂𑀯𑀸𑀢𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸’’𑀢𑀺 𑀪𑀕𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑀯𑀲𑁂𑀦𑀸𑀳. 𑀚𑀸𑀢𑀺𑀥𑀫𑁆𑀫𑁄𑀢𑀺 𑀚𑀸𑀢𑀺𑀲𑀪𑀸𑀯𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀁.

𑀬𑀁𑀦𑀽𑀦𑀸𑀢𑀺 ¶ 𑀧𑀭𑀺𑀯𑀺𑀢𑀓𑁆𑀓𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀤𑀺 𑀧𑀦𑀸𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀽𑀢𑀺𑀓𑀸𑀬𑀦𑁆𑀢𑀺 𑀧𑀽𑀢𑀺𑀪𑀽𑀢𑀁 𑀓𑀸𑀬𑀁. 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀦𑁆𑀢𑀺 𑀫𑀼𑀢𑁆𑀢-𑀓𑀭𑀻𑀲-𑀧𑀼𑀩𑁆𑀩𑀮𑁄𑀳𑀺𑀢-𑀧𑀺𑀢𑁆𑀢-𑀲𑁂𑀫𑁆𑀳-𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀅𑀦𑁂𑀓𑀓𑀼𑀡𑀧𑀧𑀽𑀭𑀺𑀢𑀁. 𑀅𑀦𑀧𑁂𑀓𑁆𑀔𑁄𑀢𑀺 𑀅𑀦𑀸𑀮𑀬𑁄. 𑀅𑀢𑁆𑀣𑀻𑀢𑀺 𑀅𑀯𑀲𑁆𑀲𑀁 𑀉𑀧𑀮𑀩𑁆𑀪𑀢𑀺. 𑀳𑁂𑀳𑀺𑀢𑀻𑀢𑀺 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀯𑀺𑀢𑀓𑁆𑀓𑀦𑀯𑀘𑀦𑀫𑀺𑀤𑀁. 𑀦 𑀲𑁄 𑀲𑀓𑁆𑀓𑀸 𑀦 𑀳𑁂𑀢𑀼𑀬𑁂𑀢𑀺 𑀢𑁂𑀦 𑀫𑀕𑁆𑀕𑁂𑀦 𑀦 𑀲𑀓𑁆𑀓𑀸 𑀦 𑀪𑀯𑀺𑀢𑀼𑀁. 𑀲𑁄 𑀧𑀦 𑀫𑀕𑁆𑀕𑁄 𑀳𑁂𑀢𑀼𑀬𑁂𑀢𑀺 𑀳𑁂𑀢𑀼𑀪𑀸𑀯𑀸𑀬 𑀦 𑀦 𑀳𑁄𑀢𑀺, 𑀳𑁂𑀢𑀼𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸𑀢𑀺 𑀪𑀯𑀩𑀦𑁆𑀥𑀦𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑀸 𑀧𑀭𑀺𑀯𑀺𑀢𑀓𑁆𑀓𑀺𑀢𑀫𑀢𑁆𑀣𑀁 𑀲𑀫𑁆𑀧𑀸𑀤𑀬𑀺𑀢𑀼𑀁 ‘‘𑀬𑀣𑀸𑀧𑀻’’𑀢𑀺 𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀮𑁄𑀓𑁂 𑀤𑀼𑀓𑁆𑀔𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀼𑀔𑀁 𑀦𑀸𑀫 𑀅𑀢𑁆𑀣𑀺, 𑀏𑀯𑀁 𑀪𑀯𑁂 𑀲𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀯𑀺𑀪𑀯𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁 ¶ , 𑀬𑀣𑀸 𑀘 𑀉𑀡𑁆𑀳𑁂 𑀲𑀢𑀺 𑀢𑀲𑁆𑀲 𑀯𑀽𑀧𑀲𑀫𑀪𑀽𑀢𑀁 𑀲𑀻𑀢𑀮𑀫𑁆𑀧𑀺 𑀅𑀢𑁆𑀣𑀺, 𑀏𑀯𑀁 𑀭𑀸𑀕𑀸𑀤𑀺𑀅𑀕𑁆𑀕𑀻𑀦𑀁 𑀯𑀽𑀧𑀲𑀫𑁂𑀦 𑀦𑀺𑀩𑁆𑀩𑀸𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀘 𑀧𑀸𑀧𑀲𑁆𑀲 𑀮𑀸𑀫𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁄 𑀓𑀮𑁆𑀬𑀸𑀡𑁄 𑀅𑀦𑀯𑀚𑁆𑀚𑀥𑀫𑁆𑀫𑁄𑀧𑀺 ¶ 𑀅𑀢𑁆𑀣𑀺𑀬𑁂𑀯, 𑀏𑀯𑀫𑁂𑀯 𑀧𑀸𑀧𑀺𑀓𑀸𑀬 𑀚𑀸𑀢𑀺𑀬𑀸 𑀲𑀢𑀺 𑀲𑀩𑁆𑀩𑀚𑀸𑀢𑀺𑀔𑁂𑀧𑀦𑀢𑁄 𑀅𑀚𑀸𑀢𑀺𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀫𑁂𑀯𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀬𑀣𑀸𑀧𑀺 𑀤𑀼𑀓𑁆𑀔𑁂 𑀯𑀺𑀚𑁆𑀚𑀦𑁆𑀢𑁂, 𑀲𑀼𑀔𑀁 𑀦𑀸𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀁 𑀪𑀯𑁂 𑀯𑀺𑀚𑁆𑀚𑀫𑀸𑀦𑁂, 𑀯𑀺𑀪𑀯𑁄𑀧𑀺𑀘𑁆𑀙𑀺𑀢𑀩𑁆𑀩𑀓𑁄.

𑁧𑁧.

‘‘𑀬𑀣𑀸𑀧𑀺 𑀉𑀡𑁆𑀳𑁂 𑀯𑀺𑀚𑁆𑀚𑀦𑁆𑀢𑁂, 𑀅𑀧𑀭𑀁 𑀯𑀺𑀚𑁆𑀚𑀢𑀺 𑀲𑀻𑀢𑀮𑀁;

𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂, 𑀦𑀺𑀩𑁆𑀩𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀓𑀁.

𑁧𑁨.

‘‘𑀬𑀣𑀸𑀧𑀺 𑀧𑀸𑀧𑁂 𑀯𑀺𑀚𑁆𑀚𑀦𑁆𑀢𑁂, 𑀓𑀮𑁆𑀬𑀸𑀡𑀫𑀧𑀺 𑀯𑀺𑀚𑁆𑀚𑀢𑀺;

𑀏𑀯𑀫𑁂𑀯 𑀚𑀸𑀢𑀺 𑀯𑀺𑀚𑁆𑀚𑀦𑁆𑀢𑁂, 𑀅𑀚𑀸𑀢𑀺𑀧𑀺𑀘𑁆𑀙𑀺𑀢𑀩𑁆𑀩𑀓’’𑀦𑁆𑀢𑀺.

𑀢𑀢𑁆𑀣 𑀬𑀣𑀸𑀧𑀻𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁, 𑀲𑀼𑀝𑁆𑀞𑀼 𑀤𑀼𑀓𑁆𑀔𑀁 𑀔𑀡𑀢𑀻𑀢𑀺 𑀲𑀼𑀔𑀁. 𑀪𑀯𑁂𑀢𑀺 𑀚𑀦𑀦𑁂. 𑀯𑀺𑀪𑀯𑁄𑀢𑀺 𑀅𑀚𑀦𑀦𑀁, 𑀚𑀦𑀦𑁂 𑀯𑀺𑀚𑁆𑀚𑀫𑀸𑀦𑁂 𑀅𑀚𑀦𑀦𑀥𑀫𑁆𑀫𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑁄. 𑀢𑀺𑀯𑀺𑀥𑀕𑁆𑀕𑀺 𑀯𑀺𑀚𑁆𑀚𑀦𑁆𑀢𑁂𑀢𑀺 𑀢𑀺𑀯𑀺𑀥𑁂 𑀭𑀸𑀕𑀸𑀤𑀺𑀓𑁂 𑀅𑀕𑁆𑀕𑀺𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀲𑁆𑀲 𑀢𑀺𑀯𑀺𑀥𑀲𑁆𑀲 𑀭𑀸𑀕𑀸𑀤𑀺𑀅𑀕𑁆𑀕𑀺𑀲𑁆𑀲 𑀦𑀺𑀩𑁆𑀩𑀸𑀧𑀦𑀁 𑀉𑀧𑀲𑀫𑀦𑀁 𑀦𑀺𑀩𑁆𑀩𑀸𑀦𑀜𑁆𑀘 𑀇𑀘𑁆𑀙𑀺𑀢𑀩𑁆𑀩𑀁. 𑀧𑀸𑀧𑁂𑀢𑀺 𑀅𑀓𑀼𑀲𑀮𑁂 𑀮𑀸𑀫𑀓𑁂. 𑀓𑀮𑁆𑀬𑀸𑀡𑀫𑀧𑀻𑀢𑀺 𑀓𑀼𑀲𑀮𑀫𑀧𑀺. 𑀏𑀯𑀫𑁂𑀯𑀸𑀢𑀺 𑀏𑀯𑀫𑁂𑀯𑀁. 𑀚𑀸𑀢𑀺 𑀯𑀺𑀚𑁆𑀚𑀦𑁆𑀢𑁂𑀢𑀺 ¶ 𑀚𑀸𑀢𑀺𑀬𑀸 𑀯𑀺𑀚𑁆𑀚𑀫𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀪𑁂𑀤𑀜𑁆𑀘 𑀯𑀺𑀪𑀢𑁆𑀢𑀺𑀮𑁄𑀧𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀚𑀸𑀢𑀺𑀧𑀻𑀢𑀺 𑀚𑀸𑀢𑀺𑀔𑁂𑀧𑀦𑀁 𑀅𑀚𑀸𑀢𑀺𑀦𑀺𑀩𑁆𑀩𑀸𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁.

𑀅𑀣𑀸𑀳𑀁 𑀧𑀭𑀫𑁆𑀧𑀺 𑀘𑀺𑀦𑁆𑀢𑁂𑀲𑀺𑀁 𑁋 ‘‘𑀬𑀣𑀸 𑀦𑀸𑀫 𑀕𑀽𑀣𑀭𑀸𑀲𑀺𑀫𑁆𑀳𑀺 𑀦𑀺𑀫𑀼𑀕𑁆𑀕𑁂𑀦 𑀧𑀼𑀭𑀺𑀲𑁂𑀦 𑀤𑀽𑀭𑀢𑁄𑀯 𑀓𑀫𑀮𑀓𑀼𑀯𑀮𑀬𑀧𑀼𑀡𑁆𑀟𑀭𑀻𑀓𑀲𑀡𑁆𑀟𑀫𑀡𑁆𑀟𑀺𑀢𑀁 𑀯𑀺𑀫𑀮𑀲𑀮𑀺𑀮𑀁 𑀢𑀴𑀸𑀓𑀁 𑀤𑀺𑀲𑁆𑀯𑀸 𑁋 ‘𑀓𑀢𑀭𑁂𑀦 𑀦𑀼 𑀔𑁄 𑀫𑀕𑁆𑀕𑁂𑀦 𑀢𑀢𑁆𑀣 𑀕𑀦𑁆𑀢𑀩𑁆𑀩’𑀦𑁆𑀢𑀺 𑀢𑀴𑀸𑀓𑀁 𑀕𑀯𑁂𑀲𑀺𑀢𑀼𑀁 𑀬𑀼𑀢𑁆𑀢𑀁. 𑀬𑀁 𑀢𑀲𑁆𑀲 𑀅𑀕𑀯𑁂𑀲𑀦𑀁, 𑀦 𑀲𑁄 𑀢𑀲𑁆𑀲 𑀢𑀴𑀸𑀓𑀲𑁆𑀲 𑀤𑁄𑀲𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀏𑀯𑀫𑁂𑀯 𑀓𑀺𑀮𑁂𑀲𑀫𑀮𑀥𑁄𑀯𑀦𑁂 𑀅𑀫𑀢𑀫𑀳𑀸𑀢𑀴𑀸𑀓𑁂 𑀯𑀺𑀚𑁆𑀚𑀫𑀸𑀦𑁂 𑀬𑀁 𑀢𑀲𑁆𑀲 𑀅𑀕𑀯𑁂𑀲𑀦𑀁, 𑀦 𑀲𑁄 𑀅𑀫𑀢𑀲𑀗𑁆𑀔𑀸𑀢𑀲𑁆𑀲 𑀦𑀺𑀩𑁆𑀩𑀸𑀦𑀫𑀳𑀸𑀢𑀴𑀸𑀓𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀬𑀣𑀸 𑀧𑀦 𑀘𑁄𑀭𑁂𑀳𑀺 𑀲𑀁𑀧𑀭𑀺𑀯𑀸𑀭𑀺𑀢𑁄 𑀧𑀼𑀭𑀺𑀲𑁄 𑀧𑀮𑀸𑀬𑀦𑀫𑀕𑁆𑀕𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀘𑁂 𑀲𑁄 𑀦 𑀧𑀮𑀸𑀬𑀢𑀺, 𑀦 𑀲𑁄 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀤𑁄𑀲𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀏𑀯𑀫𑁂𑀯 𑀓𑀺𑀮𑁂𑀲𑀘𑁄𑀭𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀳𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀕𑀸𑀫𑀺𑀫𑁆𑀳𑀺 𑀲𑀺𑀯𑁂 𑀫𑀳𑀸𑀫𑀕𑁆𑀕𑁂 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀕𑀯𑁂𑀲𑀦𑀁 ¶ 𑀦𑀸𑀫 𑀦 𑀫𑀕𑁆𑀕𑀲𑁆𑀲 𑀤𑁄𑀲𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀬𑀣𑀸 𑀩𑁆𑀬𑀸𑀥𑀺𑀧𑀻𑀴𑀺𑀢𑁄 𑀧𑀼𑀭𑀺𑀲𑁄 𑀯𑀺𑀚𑁆𑀚𑀫𑀸𑀦𑁂 𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀓𑁂 𑀯𑁂𑀚𑁆𑀚𑁂 𑀲𑀘𑁂 𑀢𑀁 𑀯𑁂𑀚𑁆𑀚𑀁 𑀕𑀯𑁂𑀲𑀺𑀢𑁆𑀯𑀸 𑀢𑀁 𑀩𑁆𑀬𑀸𑀥𑀺𑀁 𑀦 𑀢𑀺𑀓𑀺𑀘𑁆𑀙𑀸𑀧𑁂𑀢𑀺, 𑀦 ¶ 𑀲𑁄 𑀯𑁂𑀚𑁆𑀚𑀲𑁆𑀲 𑀤𑁄𑀲𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑁂𑀯 𑀤𑁄𑀲𑁄. 𑀏𑀯𑀫𑁂𑀯 𑀧𑀦 𑀬𑁄 𑀓𑀺𑀮𑁂𑀲𑀩𑁆𑀬𑀸𑀥𑀺𑀧𑀭𑀺𑀧𑀻𑀴𑀺𑀢𑁄 𑀓𑀺𑀮𑁂𑀲𑀯𑀽𑀧𑀲𑀫𑀫𑀕𑁆𑀕𑀓𑁄𑀯𑀺𑀤𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀆𑀘𑀭𑀺𑀬𑀁 𑀦 𑀕𑀯𑁂𑀲𑀢𑀺, 𑀢𑀲𑁆𑀲𑁂𑀯 𑀤𑁄𑀲𑁄, 𑀦 𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀺𑀦𑀸𑀬𑀓𑀲𑁆𑀲 𑀆𑀘𑀭𑀺𑀬𑀲𑁆𑀲 𑀤𑁄𑀲𑁄’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩.

‘‘𑀬𑀣𑀸 𑀕𑀽𑀣𑀕𑀢𑁄 𑀧𑀼𑀭𑀺𑀲𑁄, 𑀢𑀴𑀸𑀓𑀁 𑀤𑀺𑀲𑁆𑀯𑀸𑀦 𑀧𑀽𑀭𑀺𑀢𑀁;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀢𑀴𑀸𑀓𑀲𑁆𑀲 𑀲𑁄.

𑁧𑁪.

‘‘𑀏𑀯𑀁 𑀓𑀺𑀮𑁂𑀲𑀫𑀮𑀥𑁄𑀯𑀁, 𑀯𑀺𑀚𑁆𑀚𑀦𑁆𑀢𑁂 𑀅𑀫𑀢𑀦𑁆𑀢𑀴𑁂;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀅𑀫𑀢𑀦𑁆𑀢𑀴𑁂.

𑁧𑁫.

‘‘𑀬𑀣𑀸 𑀅𑀭𑀻𑀳𑀺 𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀦𑁆𑀢𑁂 𑀕𑀫𑀦𑀫𑁆𑀧𑀣𑁂;

𑀦 𑀧𑀮𑀸𑀬𑀢𑀺 𑀲𑁄 𑀧𑀼𑀭𑀺𑀲𑁄, 𑀦 𑀤𑁄𑀲𑁄 𑀅𑀜𑁆𑀚𑀲𑀲𑁆𑀲 𑀲𑁄.

𑁧𑁬.

‘‘𑀏𑀯𑀁 𑀓𑀺𑀮𑁂𑀲𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀫𑀸𑀦𑁂 𑀲𑀺𑀯𑁂 𑀧𑀣𑁂;

𑀦 𑀕𑀯𑁂𑀲𑀢𑀺 𑀢𑀁 𑀫𑀕𑁆𑀕𑀁, 𑀦 𑀤𑁄𑀲𑁄 𑀲𑀺𑀯𑀫𑀜𑁆𑀚𑀲𑁂.

𑁧𑁭.

‘‘𑀬𑀣𑀸𑀧𑀺 ¶ 𑀩𑁆𑀬𑀸𑀥𑀺𑀢𑁄 𑀧𑀼𑀭𑀺𑀲𑁄, 𑀯𑀺𑀚𑁆𑀚𑀫𑀸𑀦𑁂 𑀢𑀺𑀓𑀺𑀘𑁆𑀙𑀓𑁂;

𑀦 𑀢𑀺𑀓𑀺𑀘𑁆𑀙𑀸𑀧𑁂𑀢𑀺 𑀢𑀁 𑀩𑁆𑀬𑀸𑀥𑀺𑀁, 𑀦 𑀤𑁄𑀲𑁄 𑀲𑁄 𑀢𑀺𑀓𑀺𑀘𑁆𑀙𑀓𑁂.

𑁧𑁮.

‘‘𑀏𑀯𑀁 𑀓𑀺𑀮𑁂𑀲𑀩𑁆𑀬𑀸𑀥𑀻𑀳𑀺, 𑀤𑀼𑀓𑁆𑀔𑀺𑀢𑁄 𑀧𑀢𑀺𑀧𑀻𑀴𑀺𑀢𑁄;

𑀦 𑀕𑀯𑁂𑀲𑀢𑀺 𑀢𑀁 𑀆𑀘𑀭𑀺𑀬𑀁, 𑀦 𑀤𑁄𑀲𑁄 𑀲𑁄 𑀯𑀺𑀦𑀸𑀬𑀓𑁂’’𑀢𑀺.

𑀢𑀢𑁆𑀣 𑀕𑀽𑀣𑀕𑀢𑁄𑀢𑀺 𑀕𑀽𑀣𑀓𑀽𑀧𑀕𑀢𑁄, 𑀕𑀽𑀣𑁂𑀦 𑀕𑀢𑁄 𑀫𑀓𑁆𑀔𑀺𑀢𑁄 𑀯𑀸. 𑀓𑀺𑀮𑁂𑀲𑀫𑀮𑀥𑁄𑀯𑀦𑁆𑀢𑀺 𑀓𑀺𑀮𑁂𑀲𑀫𑀮𑀲𑁄𑀥𑀦𑁂, 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀅𑀫𑀢𑀦𑁆𑀢𑀴𑁂𑀢𑀺 𑀅𑀫𑀢𑀲𑀗𑁆𑀔𑀸𑀢𑀲𑁆𑀲 𑀢𑀴𑀸𑀓𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀅𑀦𑀼𑀲𑁆𑀲𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀭𑀻𑀳𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑁂𑀳𑀺. 𑀧𑀭𑀺𑀭𑀼𑀤𑁆𑀥𑁄𑀢𑀺 𑀲𑀫𑀦𑁆𑀢𑀢𑁄 𑀦𑀺𑀭𑀼𑀤𑁆𑀥𑁄. 𑀕𑀫𑀦𑀫𑁆𑀧𑀣𑁂𑀢𑀺 𑀕𑀫𑀦𑀧𑀣𑁂. 𑀙𑀦𑁆𑀤𑀸𑀯𑀺𑀦𑀸𑀲𑀢𑁆𑀣𑀁 𑀅𑀦𑀼𑀲𑁆𑀲𑀭𑀸𑀕𑀫𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦 𑀧𑀮𑀸𑀬𑀢𑀻𑀢𑀺 𑀬𑀤𑀺 𑀦 𑀧𑀮𑀸𑀬𑁂𑀬𑁆𑀬. 𑀲𑁄 𑀧𑀼𑀭𑀺𑀲𑁄𑀢𑀺 𑀲𑁄 𑀘𑁄𑀭𑁂𑀳𑀺 𑀧𑀭𑀺𑀭𑀼𑀤𑁆𑀥𑁄 𑀧𑀼𑀭𑀺𑀲𑁄. 𑀅𑀜𑁆𑀚𑀲𑀲𑁆𑀲𑀸𑀢𑀺 ¶ 𑀫𑀕𑁆𑀕𑀲𑁆𑀲. 𑀫𑀕𑁆𑀕𑀲𑁆𑀲 𑀳𑀺 𑁋

‘‘𑀫𑀕𑁆𑀕𑁄 ¶ 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’𑀢𑀺. (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧) 𑁋

𑀩𑀳𑀽𑀦𑀺 𑀦𑀸𑀫𑀸𑀦𑀺. 𑀲𑁆𑀯𑀸𑀬𑀫𑀺𑀥 𑀅𑀜𑁆𑀚𑀲𑀦𑀸𑀫𑁂𑀦 𑀯𑀼𑀢𑁆𑀢𑁄. 𑀲𑀺𑀯𑁂𑀢𑀺 𑀲𑀩𑁆𑀩𑀼𑀧𑀤𑁆𑀤𑀯𑀸𑀪𑀸𑀯𑀢𑁄 𑀲𑀺𑀯𑁂. 𑀲𑀺𑀯𑀫𑀜𑁆𑀚𑀲𑁂𑀢𑀺 𑀲𑀺𑀯𑀲𑁆𑀲 𑀅𑀜𑁆𑀚𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀺𑀓𑀺𑀘𑁆𑀙𑀓𑁂𑀢𑀺 𑀯𑁂𑀚𑁆𑀚𑁂. 𑀦 𑀢𑀺𑀓𑀺𑀘𑁆𑀙𑀸𑀧𑁂𑀢𑀻𑀢𑀺 𑀦 𑀢𑀺𑀓𑀺𑀘𑁆𑀙𑀸𑀧𑁂𑀬𑁆𑀬. 𑀦 𑀤𑁄𑀲𑁄 𑀲𑁄 𑀢𑀺𑀓𑀺𑀘𑁆𑀙𑀓𑁂𑀢𑀺 𑀢𑀺𑀓𑀺𑀘𑁆𑀙𑀓𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺, 𑀩𑁆𑀬𑀸𑀥𑀺𑀢𑀲𑁆𑀲𑁂𑀯 𑀤𑁄𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀺𑀢𑁄𑀢𑀺 𑀲𑀜𑁆𑀚𑀸𑀢𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑁄. 𑀆𑀘𑀭𑀺𑀬𑀦𑁆𑀢𑀺 𑀫𑁄𑀓𑁆𑀔𑀫𑀕𑁆𑀕𑀸𑀘𑀭𑀺𑀬𑀁. 𑀯𑀺𑀦𑀸𑀬𑀓𑁂𑀢𑀺 𑀆𑀘𑀭𑀺𑀬𑀲𑁆𑀲.

𑀏𑀯𑀁 𑀧𑀦𑀸𑀳𑀁 𑀘𑀺𑀦𑁆𑀢𑁂𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀏𑀯𑀁 𑀘𑀺𑀦𑁆𑀢𑁂𑀲𑀺𑀁 𑁋 ‘‘𑀬𑀣𑀸𑀧𑀺 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀓𑀡𑁆𑀞𑁂 𑀆𑀲𑀢𑁆𑀢𑀁 𑀓𑀼𑀡𑀧𑀁 𑀙𑀟𑁆𑀟𑁂𑀢𑁆𑀯𑀸 𑀲𑀼𑀔𑀻 𑀕𑀘𑁆𑀙𑁂𑀬𑁆𑀬, 𑀏𑀯𑀁 𑀫𑀬𑀸𑀧𑀺 𑀇𑀫𑀁 𑀧𑀽𑀢𑀺𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑁂𑀦 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀬𑀣𑀸 𑀘 𑀦𑀭𑀦𑀸𑀭𑀺𑀬𑁄 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀢𑁆𑀯𑀸 𑀦 𑀢𑀁 𑀉𑀘𑁆𑀙𑀗𑁆𑀕𑁂𑀦 𑀯𑀸 𑀆𑀤𑀸𑀬 𑀤𑀲𑀦𑁆𑀢𑁂 𑀯𑀸 𑀯𑁂𑀞𑁂𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑀺, 𑀅𑀣 𑀔𑁄 𑀚𑀺𑀕𑀼𑀘𑁆𑀙𑀫𑀸𑀦𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑀸 𑀅𑀦𑀧𑁂𑀓𑁆𑀔𑀸 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀫𑀬𑀸𑀧𑀺 𑀇𑀫𑀁 𑀧𑀽𑀢𑀺𑀓𑀸𑀬𑀁 𑀅𑀦𑀧𑁂𑀓𑁆𑀔𑁂𑀦 𑀙𑀟𑁆𑀟𑁂𑀢𑁆𑀯𑀸 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀘 𑀦𑀸𑀯𑀺𑀓𑀸 𑀦𑀸𑀫 𑀚𑀚𑁆𑀚𑀭𑀁 𑀦𑀸𑀯𑀁 𑀉𑀤𑀓𑀕𑀸𑀳𑀺𑀦𑀺𑀁 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑀸𑀯 𑀕𑀘𑁆𑀙𑀦𑁆𑀢𑀺, 𑀏𑀯𑀫𑀳𑀫𑁆𑀧𑀺 𑀇𑀫𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀦𑁆𑀢𑀁 𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀁 𑀧𑀯𑀺𑀲𑀺𑀲𑁆𑀲𑀸𑀫𑀺 ¶ . 𑀬𑀣𑀸 𑀘 𑀓𑁄𑀘𑀺 𑀧𑀼𑀭𑀺𑀲𑁄 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀻𑀦𑀺 𑀦𑀸𑀦𑀸𑀯𑀺𑀥𑀸𑀦𑀺 𑀭𑀢𑀦𑀸𑀦𑀺 𑀆𑀤𑀸𑀬 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀭𑀢𑀦𑀯𑀺𑀦𑀸𑀲𑀪𑀬𑁂𑀦 𑀢𑁂 𑀘𑁄𑀭𑁂 𑀙𑀟𑁆𑀟𑁂𑀢𑁆𑀯𑀸 𑀔𑁂𑀫𑀁 𑀫𑀕𑁆𑀕𑀁 𑀕𑀡𑁆𑀳𑀸𑀢𑀺, 𑀏𑀯𑀫𑀬𑀫𑁆𑀧𑀺 𑀧𑀽𑀢𑀺𑀓𑀸𑀬𑁄 𑀭𑀢𑀦𑀯𑀺𑀮𑁄𑀧𑀓𑀘𑁄𑀭𑀲𑀤𑀺𑀲𑁄. 𑀲𑀘𑀸𑀳𑀁 𑀏𑀢𑁆𑀣 𑀢𑀡𑁆𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀭𑀺𑀬𑀫𑀕𑁆𑀕𑀓𑀼𑀲𑀮𑀥𑀫𑁆𑀫𑀭𑀢𑀦𑀸𑀦𑀺 𑀫𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀬𑀸 𑀇𑀫𑀁 𑀫𑀳𑀸𑀘𑁄𑀭𑀲𑀤𑀺𑀲𑀁 𑀓𑀭𑀚𑀓𑀸𑀬𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁯.

‘‘𑀬𑀣𑀸𑀧𑀺 𑀓𑀼𑀡𑀧𑀁 𑀧𑀼𑀭𑀺𑀲𑁄, 𑀓𑀡𑁆𑀞𑁂 𑀩𑀤𑁆𑀥𑀁 𑀚𑀺𑀕𑀼𑀘𑁆𑀙𑀺𑀬;

𑀫𑁄𑀘𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬, 𑀲𑀼𑀔𑀻 𑀲𑁂𑀭𑀻 𑀲𑀬𑀁𑀯𑀲𑀻.

𑁨𑁦.

‘‘𑀢𑀣𑁂𑀯𑀺𑀫𑀁 𑀧𑀽𑀢𑀺𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀲𑀜𑁆𑀘𑀬𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑁂𑀬𑁆𑀬𑀁, 𑀅𑀦𑀧𑁂𑀓𑁆𑀔𑁄 𑀅𑀦𑀢𑁆𑀣𑀺𑀓𑁄.

𑁨𑁧.

‘‘𑀬𑀣𑀸 ¶ ¶ 𑀉𑀘𑁆𑀘𑀸𑀭𑀝𑁆𑀞𑀸𑀦𑀫𑁆𑀳𑀺, 𑀓𑀭𑀻𑀲𑀁 𑀦𑀭𑀦𑀸𑀭𑀺𑀬𑁄;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀅𑀦𑀢𑁆𑀣𑀺𑀓𑀸.

𑁨𑁨.

‘‘𑀏𑀯𑀫𑁂𑀯𑀸𑀳𑀁 𑀇𑀫𑀁 𑀓𑀸𑀬𑀁, 𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀺𑀲𑁆𑀲𑀁, 𑀯𑀘𑁆𑀘𑀁 𑀓𑀢𑁆𑀯𑀸 𑀬𑀣𑀸 𑀓𑀼𑀝𑀺𑀁.

𑁨𑁩.

‘‘𑀬𑀣𑀸𑀧𑀺 𑀚𑀚𑁆𑀚𑀭𑀁 𑀦𑀸𑀯𑀁, 𑀧𑀮𑀼𑀕𑁆𑀕𑀁 𑀉𑀤𑀕𑀸𑀳𑀺𑀦𑀺𑀁;

𑀲𑀸𑀫𑀻 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀦𑀧𑁂𑀓𑁆𑀔𑀸 𑀅𑀦𑀢𑁆𑀣𑀺𑀓𑀸.

𑁨𑁪.

‘‘𑀏𑀯𑀫𑁂𑀯𑀸𑀳𑀁 𑀇𑀫𑀁 𑀓𑀸𑀬𑀁, 𑀦𑀯𑀘𑁆𑀙𑀺𑀤𑁆𑀤𑀁 𑀥𑀼𑀯𑀲𑁆𑀲𑀯𑀁;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀺𑀲𑁆𑀲𑀁, 𑀚𑀺𑀡𑁆𑀡𑀦𑀸𑀯𑀁𑀯 𑀲𑀸𑀫𑀺𑀓𑀸.

𑁨𑁫.

‘‘𑀬𑀣𑀸𑀧𑀺 𑀧𑀼𑀭𑀺𑀲𑁄 𑀘𑁄𑀭𑁂𑀳𑀺, 𑀕𑀘𑁆𑀙𑀦𑁆𑀢𑁄 𑀪𑀡𑁆𑀟𑀫𑀸𑀤𑀺𑀬;

𑀪𑀡𑁆𑀟𑀘𑁆𑀙𑁂𑀤𑀪𑀬𑀁 𑀤𑀺𑀲𑁆𑀯𑀸, 𑀙𑀟𑁆𑀟𑀬𑀺𑀢𑁆𑀯𑀸𑀦 𑀕𑀘𑁆𑀙𑀢𑀺.

𑁨𑁬.

‘‘𑀏𑀯𑀫𑁂𑀯 𑀇𑀫𑀁 𑀓𑀸𑀬𑁄, 𑀫𑀳𑀸𑀘𑁄𑀭𑀲𑀫𑁄 𑀯𑀺𑀬;

𑀧𑀳𑀸𑀬𑀺𑀫𑀁 𑀕𑀫𑀺𑀲𑁆𑀲𑀸𑀫𑀺, 𑀓𑀼𑀲𑀮𑀘𑁆𑀙𑁂𑀤𑀦𑀸𑀪𑀬𑀸’’𑀢𑀺.

𑀢𑀢𑁆𑀣 𑀬𑀣𑀸𑀧𑀺 𑀓𑀼𑀡𑀧𑀁 𑀧𑀼𑀭𑀺𑀲𑁄𑀢𑀺 𑀬𑀣𑀸𑀧𑀺 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀻𑀬𑀺𑀢𑁆𑀯𑀸 𑀳𑀭𑀸𑀬𑀺𑀢𑁆𑀯𑀸 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀢𑀁 𑀓𑀼𑀡𑀧𑀁 𑀫𑁄𑀘𑁂𑀢𑁆𑀯𑀸 ¶ 𑀕𑀘𑁆𑀙𑁂𑀬𑁆𑀬. 𑀲𑀼𑀔𑀻𑀢𑀺 𑀲𑀼𑀔𑀺𑀢𑁄. 𑀲𑁂𑀭𑀻𑀢𑀺 𑀬𑀣𑀺𑀘𑁆𑀙𑀓𑀯𑀺𑀳𑀸𑀭𑀻. 𑀦𑀸𑀦𑀸𑀓𑀼𑀡𑀧𑀲𑀜𑁆𑀘𑀬𑀦𑁆𑀢𑀺 𑀅𑀦𑁂𑀓𑀯𑀺𑀥𑀓𑀼𑀡𑀧𑀭𑀸𑀲𑀺𑀪𑀽𑀢𑀁 ‘‘𑀦𑀸𑀦𑀸𑀓𑀼𑀡𑀧𑀧𑀽𑀭𑀺𑀢’’𑀦𑁆𑀢𑀺𑀧𑀺 𑀧𑀸𑀞𑁄.

𑀉𑀘𑁆𑀘𑀸𑀭𑀝𑁆𑀞𑀸𑀦𑀫𑁆𑀳𑀻𑀢𑀺 𑀉𑀘𑁆𑀘𑀸𑀭𑁂𑀦𑁆𑀢𑀺 𑀯𑀘𑁆𑀘𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀘𑁆𑀘𑀸𑀭𑁄, 𑀉𑀘𑁆𑀘𑀸𑀭𑁄 𑀘 𑀲𑁄 𑀞𑀸𑀦𑀁 𑀘𑁂𑀢𑀺 𑀉𑀘𑁆𑀘𑀸𑀭𑀝𑁆𑀞𑀸𑀦𑀁. 𑀅𑀣 𑀯𑀸 𑀉𑀲𑁆𑀲𑀸𑀲𑀺𑀬𑁆𑀬𑀢𑀻𑀢𑀺 𑀉𑀲𑁆𑀲𑀸𑀲𑁄, 𑀯𑀘𑁆𑀘𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀲𑁆𑀲 𑀞𑀸𑀦𑀁 𑀉𑀲𑁆𑀲𑀸𑀲𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁 𑀉𑀲𑁆𑀲𑀸𑀲𑀝𑁆𑀞𑀸𑀦𑀫𑁆𑀳𑀺, 𑀉𑀓𑁆𑀓𑀸𑀭𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀯𑀘𑁆𑀘𑀁 𑀓𑀢𑁆𑀯𑀸 𑀬𑀣𑀸 𑀓𑀼𑀝𑀺𑀦𑁆𑀢𑀺 𑀯𑀘𑁆𑀘𑀁 𑀓𑀢𑁆𑀯𑀸 𑀓𑀼𑀝𑀺𑀁 𑀦𑀭𑀦𑀸𑀭𑀺𑀬𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑀚𑀚𑁆𑀚𑀭𑀦𑁆𑀢𑀺 𑀚𑀺𑀡𑁆𑀡𑀁. 𑀧𑀮𑀼𑀕𑁆𑀕𑀦𑁆𑀢𑀺 𑀧𑀮𑀼𑀚𑁆𑀚𑀦𑁆𑀢𑀺𑀁, 𑀯𑀺𑀓𑀺𑀭𑀦𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀤𑀕𑀸𑀳𑀺𑀦𑀺𑀦𑁆𑀢𑀺 𑀉𑀤𑀓𑀕𑀸𑀳𑀺𑀦𑀺𑀁 ¶ . 𑀲𑀸𑀫𑀻𑀢𑀺 𑀦𑀸𑀯𑀸𑀲𑀸𑀫𑀺𑀓𑀸. 𑀦𑀯𑀘𑁆𑀙𑀺𑀤𑁆𑀤𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀸𑀤𑀻𑀳𑀺 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀙𑀺𑀤𑁆𑀤𑀸𑀯𑀘𑁆𑀙𑀺𑀤𑁆𑀤𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀦𑀯𑀘𑁆𑀙𑀺𑀤𑁆𑀤𑀁. 𑀥𑀼𑀯𑀲𑁆𑀲𑀯𑀦𑁆𑀢𑀺 𑀥𑀼𑀯𑀦𑀺𑀲𑁆𑀲𑀦𑁆𑀤𑀁, 𑀦𑀺𑀘𑁆𑀘𑀁 𑀧𑀕𑁆𑀖𑀭𑀡𑀸𑀲𑀼𑀘𑀺𑀦𑁆𑀢𑀺 𑀅𑀢𑁆𑀣𑁄.

𑀪𑀡𑁆𑀟𑀫𑀸𑀤𑀺𑀬𑀸𑀢𑀺 𑀬𑀁𑀓𑀺𑀜𑁆𑀘𑀺 𑀭𑀢𑀦𑀸𑀤𑀺𑀓𑀁 𑀪𑀡𑁆𑀟𑀁 𑀆𑀤𑀺𑀬. 𑀪𑀡𑁆𑀟𑀘𑁆𑀙𑁂𑀤𑀪𑀬𑀁 ¶ 𑀤𑀺𑀲𑁆𑀯𑀸𑀢𑀺 𑀪𑀡𑁆𑀟𑀲𑁆𑀲 𑀅𑀘𑁆𑀙𑀺𑀦𑁆𑀤𑀦𑁂𑀦 𑀪𑀬𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯𑀸𑀢𑀺 𑀲𑁄 𑀪𑀡𑁆𑀟𑀫𑀸𑀤𑀸𑀬 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬. 𑀅𑀬𑀁 𑀓𑀸𑀬𑁄𑀢𑀺 𑀅𑀬𑀁 𑀧𑀦 𑀓𑀼𑀘𑁆𑀙𑀺𑀢𑀸𑀦𑀁 𑀧𑀭𑀫𑀚𑁂𑀕𑀼𑀘𑁆𑀙𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑀢𑁆𑀢𑀺𑀝𑁆𑀞𑀸𑀦𑀁. 𑀆𑀬𑀦𑁆𑀢𑀺 𑀢𑀢𑁄𑀢𑀺 𑀆𑀬𑁄, 𑀓𑀼𑀘𑁆𑀙𑀺𑀢𑀸 𑀓𑁂𑀲𑀸𑀤𑀬𑁄. 𑀇𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀫𑀳𑀸𑀘𑁄𑀭𑀲𑀫𑁄 𑀯𑀺𑀬𑀸𑀢𑀺 𑀘𑀓𑁆𑀔𑀼𑀆𑀤𑀻𑀳𑀺 𑀭𑀽𑀧𑀸𑀤𑀻𑀲𑀼 𑀧𑀺𑀬𑀭𑀽𑀧𑁂𑀲𑀼 𑀲𑀸𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀘𑁄𑀭𑁄 𑀳𑀼𑀢𑁆𑀯𑀸 𑀲𑀩𑁆𑀩𑀓𑀼𑀲𑀮𑀁 𑀯𑀺𑀮𑀼𑀫𑁆𑀧𑀢𑀻𑀢𑀺 𑀫𑀳𑀸𑀘𑁄𑀭𑀲𑀫𑁄. 𑀢𑀲𑁆𑀫𑀸 𑀬𑀣𑀸 𑀲𑁄 𑀭𑀢𑀦𑀪𑀡𑁆𑀟𑀫𑀸𑀤𑀸𑀬 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀢𑁂 𑀘𑁄𑀭𑁂 𑀧𑀳𑀸𑀬 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀸𑀳𑀫𑁆𑀧𑀺 𑀇𑀫𑀁 𑀫𑀳𑀸𑀘𑁄𑀭𑀲𑀫𑀁 𑀓𑀸𑀬𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀲𑁄𑀢𑁆𑀣𑀺𑀪𑀸𑀯𑀓𑀭𑀁 𑀫𑀕𑁆𑀕𑀁 𑀕𑀯𑁂𑀲𑀺𑀢𑀼𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀲𑀮𑀘𑁆𑀙𑁂𑀤𑀦𑀸𑀪𑀬𑀸𑀢𑀺 𑀓𑀼𑀲𑀮𑀥𑀫𑁆𑀫𑀯𑀺𑀮𑁄𑀧𑀦𑀪𑀬𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀣𑁂𑀯𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀦𑀸𑀦𑀸𑀯𑀺𑀥𑀸𑀳𑀺 𑀉𑀧𑀫𑀸𑀳𑀺 𑀦𑁂𑀓𑁆𑀔𑀫𑁆𑀫𑀓𑀸𑀭𑀡𑀁 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀫𑀳𑀸𑀥𑀦𑀭𑀸𑀲𑀺𑀁 𑀲𑀁𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀬𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸 𑀏𑀓𑀓𑀳𑀸𑀧𑀡𑀫𑁆𑀧𑀺 𑀕𑀳𑁂𑀢𑁆𑀯𑀸 𑀦 𑀕𑀢𑀸, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ¶ 𑁋 ‘‘𑀅𑀳𑀁, 𑀫𑀳𑀸𑀭𑀸𑀚, 𑀚𑀸𑀢𑀺𑀚𑀭𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀳𑀤𑀬𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀬𑁆𑀳𑀁 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀥𑀦𑀁 𑀅𑀢𑁆𑀣𑀺, 𑀢𑀁 𑀤𑁂𑀯𑁄 𑀧𑀝𑀺𑀧𑀚𑁆𑀚𑀢𑀽’’𑀢𑀺. 𑀭𑀸𑀚𑀸 𑀆𑀳 𑁋 ‘‘𑀦 𑀫𑀬𑁆𑀳𑀁 𑀢𑁂 𑀥𑀦𑁂𑀦 𑀅𑀢𑁆𑀣𑁄, 𑀢𑁆𑀯𑀁𑀬𑁂𑀯 𑀬𑀣𑀺𑀘𑁆𑀙𑀓𑀁 𑀓𑀭𑁄𑀳𑀻’’𑀢𑀺.

𑀲𑁄 𑀘 ‘‘𑀲𑀸𑀥𑀼 𑀤𑁂𑀯𑀸’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘 𑀧𑀳𑀸𑀬 𑀅𑀫𑀭𑀯𑀭𑀦𑀕𑀭𑀲𑀤𑀺𑀲𑀢𑁄 𑀅𑀫𑀭𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀓𑁄𑀯 𑀦𑀸𑀦𑀸𑀫𑀺𑀕𑀕𑀡𑀯𑀦𑁆𑀢𑁂 𑀳𑀺𑀫𑀯𑀦𑁆𑀢𑁂 𑀥𑀫𑁆𑀫𑀺𑀓𑀁 𑀦𑀸𑀫 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀁 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁 𑀅𑀪𑀺𑀜𑁆𑀜𑀸𑀩𑀮𑀁 𑀲𑀫𑀸𑀳𑀭𑀺𑀢𑀼𑀁 𑀦𑀯𑀤𑁄𑀲𑀲𑀫𑀦𑁆𑀦𑀸𑀕𑀢𑀁 𑀲𑀸𑀝𑀓𑀁 𑀧𑀚𑀳𑀺𑀢𑁆𑀯𑀸 𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢𑀁 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀏𑀯𑀁 𑀧𑀦 𑀲𑁄 𑀧𑀩𑁆𑀩𑀚𑀺𑀢𑁄 𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁 𑀧𑀡𑁆𑀡𑀲𑀸𑀮𑀁 𑀧𑀳𑀸𑀬 𑀤𑀲𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀦𑁆𑀢𑁆𑀯𑀸 𑀲𑀩𑁆𑀩𑀥𑀜𑁆𑀜𑀯𑀺𑀓𑀢𑀺𑀁 𑀧𑀳𑀸𑀬 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀳𑀼𑀢𑁆𑀯𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑀦𑀯𑀲𑁂𑀦 𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀧𑀜𑁆𑀘𑀦𑁆𑀦𑀜𑁆𑀘 𑀅𑀪𑀺𑀜𑁆𑀜𑀸𑀦𑀁 𑀮𑀸𑀪𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁭.

‘‘𑀏𑀯𑀸𑀳𑀁 ¶ 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀦𑁂𑀓𑀓𑁄𑀝𑀺𑀲𑀢𑀁 𑀥𑀦𑀁;

𑀦𑀸𑀣𑀸𑀦𑀸𑀣𑀸𑀦𑀁 𑀤𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺𑀁.

𑁨𑁮.

‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀥𑀫𑁆𑀫𑀺𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁨𑁯.

‘‘𑀘𑀗𑁆𑀓𑀫𑀁 ¶ 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀁.

𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀁, 𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺𑀁.

𑁩𑁦.

‘‘𑀲𑀸𑀝𑀓𑀁 𑀧𑀚𑀳𑀺𑀁 𑀢𑀢𑁆𑀣, 𑀦𑀯𑀤𑁄𑀲𑀫𑀼𑀧𑀸𑀕𑀢𑀁;

𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀁, 𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢𑀁.

𑁩𑁧.

‘‘𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓𑀁;

𑀉𑀧𑀸𑀕𑀫𑀺𑀁 𑀭𑀼𑀓𑁆𑀔𑀫𑀽𑀮𑀁, 𑀕𑀼𑀡𑁂 𑀤𑀲𑀳𑀼𑀧𑀸𑀕𑀢𑀁.

𑁩𑁨.

‘‘𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀁, 𑀧𑀚𑀳𑀺𑀁 𑀦𑀺𑀭𑀯𑀲𑁂𑀲𑀢𑁄;

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀯𑀢𑁆𑀢𑀨𑀮𑀫𑀸𑀤𑀺𑀬𑀺𑀁.

𑁩𑁩.

‘‘𑀢𑀢𑁆𑀣𑀧𑁆𑀧𑀥𑀸𑀦𑀁 ¶ 𑀧𑀤𑀳𑀺𑀁, 𑀦𑀺𑀲𑁆𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀩𑁆𑀪𑀦𑁆𑀢𑀭𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀅𑀪𑀺𑀜𑁆𑀜𑀸𑀩𑀮𑀧𑀸𑀧𑀼𑀡𑀺’’𑀦𑁆𑀢𑀺.

𑀢𑀢𑁆𑀣 𑀏𑀯𑀸𑀳𑀦𑁆𑀢𑀺 𑀏𑀯𑀁 𑀅𑀳𑀁, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀸𑀣𑀸𑀦𑀸𑀣𑀸𑀦𑀦𑁆𑀢𑀺 𑀲𑀦𑀸𑀣𑀸𑀦𑀫𑀦𑀸𑀣𑀸𑀦𑀜𑁆𑀘 𑀅𑀟𑁆𑀠𑀸𑀦𑀜𑁆𑀘𑁂𑀯 𑀤𑀮𑀺𑀤𑁆𑀤𑀸𑀦𑀜𑁆𑀘 ‘‘𑀅𑀢𑁆𑀣𑀺𑀓𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀲𑀳 𑀓𑁄𑀝𑁆𑀞𑀸𑀕𑀸𑀭𑁂𑀳𑀺 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂𑀢𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀭𑀸𑀚𑀲𑁆𑀲 𑀅𑀯𑀺𑀤𑀽𑀭𑁂 𑀲𑀫𑀻𑀧𑁂. 𑀥𑀫𑁆𑀫𑀺𑀓𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀏𑀯𑀁𑀦𑀸𑀫𑀓𑁄 𑀧𑀩𑁆𑀩𑀢𑁄. 𑀓𑀲𑁆𑀫𑀸 𑀧𑀦𑀸𑀬𑀁 𑀥𑀫𑁆𑀫𑀺𑀓𑁄𑀢𑀺? 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀩𑁄𑀥𑀺𑀲𑀢𑁆𑀢𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀁 𑀧𑀩𑁆𑀩𑀢𑀁 𑀉𑀧𑀦𑀺𑀲𑁆𑀲𑀸𑀬 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀁𑀲𑀼. 𑀢𑀲𑁆𑀫𑀸 𑀲𑀫𑀡𑀥𑀫𑁆𑀫𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀢𑁆𑀢𑀸 ‘‘𑀥𑀫𑁆𑀫𑀺𑀓𑁄’’𑀢𑁆𑀯𑁂𑀯 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀦𑁆𑀢𑀺𑀆𑀤𑀺𑀦𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁂𑀦 𑀅𑀲𑁆𑀲𑀫𑀧𑀡𑁆𑀡𑀲𑀸𑀮𑀸 𑀘𑀗𑁆𑀓𑀫𑀸 𑀲𑀳𑀢𑁆𑀣𑀸 𑀫𑀸𑀧𑀺𑀢𑀸 𑀯𑀺𑀬 𑀯𑀼𑀢𑁆𑀢𑀸, 𑀦 𑀘 𑀧𑀦 𑀲𑀳𑀢𑁆𑀣𑀸 𑀫𑀸𑀧𑀺𑀢𑀸, 𑀓𑀺𑀦𑁆𑀢𑀼 𑀲𑀓𑁆𑀓𑁂𑀦 𑀤𑁂𑀯𑁂𑀦 𑀧𑁂𑀲𑀺𑀢𑁂 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀤𑁂𑀯𑀧𑀼𑀢𑁆𑀢𑁂𑀦 𑀦𑀺𑀫𑁆𑀫𑀺𑀢𑀸. 𑀪𑀕𑀯𑀸 ¶ 𑀧𑀦 𑀢𑀤𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀢𑀁 𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 𑁋 ‘‘𑀲𑀸𑀭𑀺𑀧𑀼𑀢𑁆𑀢, 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑁋

‘𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸;

𑀘𑀗𑁆𑀓𑀫𑀁 𑀢𑀢𑁆𑀣 𑀫𑀸𑀧𑁂𑀲𑀺𑀁, 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢’’’𑀦𑁆𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 𑀧𑀡𑁆𑀡𑀲𑀸𑀮𑀸𑀢𑀺 𑀧𑀡𑁆𑀡𑀙𑀤𑀦𑀲𑀸𑀮𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀲𑁆𑀲𑀫𑀧𑀤𑁂. 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀧𑀜𑁆𑀘𑀳𑀺 𑀘𑀗𑁆𑀓𑀫𑀤𑁄𑀲𑁂𑀳𑀺 𑀯𑀺𑀯𑀚𑁆𑀚𑀺𑀢𑀁. 𑀓𑀢𑀫𑁂 𑀧𑀜𑁆𑀘 𑀘𑀗𑁆𑀓𑀫𑀤𑁄𑀲𑀸 𑀦𑀸𑀫? 𑀣𑀤𑁆𑀥𑀯𑀺𑀲𑀫𑀢𑀸, 𑀅𑀦𑁆𑀢𑁄𑀭𑀼𑀓𑁆𑀔𑀢𑀸, 𑀕𑀳𑀦𑀘𑁆𑀙𑀦𑁆𑀦𑀢𑀸, 𑀅𑀢𑀺𑀲𑀫𑁆𑀩𑀸𑀥𑀢𑀸, 𑀅𑀢𑀺𑀯𑀺𑀲𑀸𑀮𑀢𑀸𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 ¶ 𑀤𑁄𑀲𑁂𑀳𑀺 𑀯𑀺𑀯𑀚𑁆𑀚𑀺𑀢𑀁. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀤𑀻𑀖𑀢𑁄 𑀲𑀝𑁆𑀞𑀺𑀭𑀢𑀦𑁄 𑀯𑀺𑀢𑁆𑀣𑀸𑀭𑀢𑁄 𑀤𑀺𑀬𑀟𑁆𑀠𑀭𑀢𑀦𑁄 𑀘𑀗𑁆𑀓𑀫𑁄 𑀯𑀼𑀢𑁆𑀢𑁄. 𑀅𑀣 𑀯𑀸 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑀤𑁄𑀲𑁂𑀳𑀺 𑀯𑀺𑀯𑀚𑁆𑀚𑀺𑀢𑀁 𑀧𑀭𑀺𑀳𑀻𑀦𑀁 𑀅𑀪𑀺𑀜𑁆𑀜𑀸𑀩𑀮𑀫𑀸𑀳𑀭𑀺𑀦𑁆𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸, 𑀲𑀼𑀫𑁂𑀥𑀓𑀣𑀸). 𑀅𑀝𑁆𑀞𑀕𑀼𑀡𑀲𑀫𑀼𑀧𑁂𑀢𑀦𑁆𑀢𑀺 ‘‘𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀕𑀼𑀡𑁂𑀳𑀺 (𑀤𑀻. 𑀦𑀺. 𑁧.𑁨𑁪𑁪-𑁨𑁪𑁫; 𑀫. 𑀦𑀺. 𑁧.𑁩𑁮𑁪-𑁩𑁮𑁬, 𑁪𑁩𑁧-𑁪𑁩𑁩; 𑀧𑀸𑀭𑀸. 𑁧𑁨-𑁧𑁪) 𑀲𑀫𑀦𑁆𑀦𑀸𑀕𑀢𑀁 𑀅𑀪𑀺𑀜𑁆𑀜𑀸𑀩𑀮𑀁 𑀆𑀳𑀭𑀺𑀁 𑀆𑀦𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀓𑁂𑀘𑀺 ¶ 𑀧𑀦 ‘‘𑀅𑀝𑁆𑀞𑀳𑀺 𑀲𑀫𑀡𑀲𑀼𑀔𑁂𑀳𑀺 𑀉𑀧𑁂𑀢𑀁, 𑀅𑀝𑁆𑀞𑀺𑀫𑀸𑀦𑀺 𑀲𑀫𑀡𑀲𑀼𑀔𑀸𑀦𑀺 𑀦𑀸𑀫 𑀥𑀦𑀥𑀜𑁆𑀜𑀧𑀭𑀺𑀕𑁆𑀕𑀳𑀸𑀪𑀸𑀯𑁄, 𑀅𑀦𑀯𑀚𑁆𑀚𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀪𑀸𑀯𑁄, 𑀦𑀺𑀩𑁆𑀩𑀼𑀢𑀧𑀺𑀡𑁆𑀟𑀪𑀼𑀜𑁆𑀚𑀦𑀪𑀸𑀯𑁄, 𑀭𑀝𑁆𑀞𑀁 𑀧𑀻𑀴𑁂𑀢𑁆𑀯𑀸 𑀥𑀦𑀥𑀜𑁆𑀜𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀭𑀸𑀚𑀧𑀼𑀭𑀺𑀲𑁂𑀲𑀼 𑀭𑀝𑁆𑀞𑀧𑀻𑀴𑀦𑀓𑀺𑀮𑁂𑀲𑀸𑀪𑀸𑀯𑁄, 𑀉𑀧𑀓𑀭𑀡𑁂𑀲𑀼 𑀦𑀺𑀘𑁆𑀙𑀦𑁆𑀤𑀭𑀸𑀕𑀪𑀸𑀯𑁄, 𑀘𑁄𑀭𑀯𑀺𑀮𑁄𑀧𑀦𑁂 𑀦𑀺𑀩𑁆𑀪𑀬𑀪𑀸𑀯𑁄, 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀅𑀲𑀁𑀲𑀝𑁆𑀞𑀪𑀸𑀯𑁄, 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀪𑀸𑀯𑁄𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀲𑀫𑀡𑀲𑀼𑀔𑁂𑀳𑀺 (𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦, 𑀲𑀼𑀫𑁂𑀥𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀅𑀲𑁆𑀲𑀫𑀁 𑀫𑀸𑀧𑁂𑀲𑀺’’𑀦𑁆𑀢𑀺 𑀅𑀲𑁆𑀲𑀫𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺.

𑀲𑀸𑀝𑀓𑀦𑁆𑀢𑀺 𑀯𑀢𑁆𑀣𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂. 𑀦𑀯𑀤𑁄𑀲𑀫𑀼𑀧𑀸𑀕𑀢𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀢𑁆𑀣 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀦𑀺𑀯𑀢𑁆𑀣𑀧𑀸𑀭𑀼𑀢𑀁 𑀫𑀳𑀕𑁆𑀖𑀲𑀸𑀝𑀓𑀁 𑀧𑀚𑀳𑀺𑀁 𑀧𑀭𑀺𑀘𑁆𑀘𑀚𑀺𑀁. 𑀲𑀸𑀝𑀓𑀁 𑀧𑀚𑀳𑀦𑁆𑀢𑁄 𑀘 𑀢𑀢𑁆𑀣 𑀦𑀯 𑀤𑁄𑀲𑁂 𑀤𑀺𑀲𑁆𑀯𑀸 𑀧𑀚𑀳𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸𑀦𑀜𑁆𑀳𑀺 𑀲𑀸𑀝𑀓𑀲𑁆𑀫𑀺𑀁 𑀦𑀯 𑀤𑁄𑀲𑀸 𑀧𑀓𑀸𑀲𑀺𑀢𑀸. 𑀓𑀢𑀫𑁂 𑀦𑀯? 𑀲𑀸𑀝𑀓𑀲𑁆𑀲 𑀫𑀳𑀕𑁆𑀖𑀪𑀸𑀯𑁄, 𑀧𑀭𑀧𑀝𑀺𑀩𑀤𑁆𑀥𑀪𑀸𑀯𑁄, 𑀧𑀭𑀺𑀪𑁄𑀕𑁂𑀦 𑀮𑀳𑀼𑀓𑀁 𑀓𑀺𑀮𑀺𑀲𑁆𑀲𑀦𑀪𑀸𑀯𑁄, 𑀓𑀺𑀮𑀺𑀝𑁆𑀞𑁄 𑀘 𑀥𑁄𑀯𑀺𑀢𑀩𑁆𑀩𑁄 𑀧𑀼𑀦 𑀭𑀚𑀺𑀢𑀩𑁆𑀩𑁄 𑀘 𑀳𑁄𑀢𑀺 𑀧𑀭𑀺𑀪𑁄𑀕𑁂𑀦 𑀚𑀻𑀭𑀡𑀪𑀸𑀯𑁄, 𑀚𑀺𑀡𑁆𑀡𑀲𑁆𑀲 𑀧𑀼𑀦 𑀢𑀼𑀦𑁆𑀦𑀓𑀭𑀡𑀁 ¶ 𑀯𑀸 𑀅𑀕𑁆𑀕𑀴𑀤𑀸𑀦𑀁 𑀯𑀸 𑀓𑀸𑀢𑀩𑁆𑀩𑀁 𑀳𑁄𑀢𑀺 𑀧𑀼𑀦 𑀧𑀭𑀺𑀬𑁂𑀲𑀦𑀸𑀬 𑀤𑀼𑀭𑀪𑀺𑀲𑀫𑁆𑀪𑀯𑀪𑀸𑀯𑁄, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀅𑀦𑀦𑀼𑀘𑁆𑀙𑀯𑀺𑀓𑀪𑀸𑀯𑁄, 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁄, 𑀬𑀣𑀸 𑀦𑀁 𑀦 𑀧𑀘𑁆𑀘𑀢𑁆𑀣𑀺𑀓𑀸 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀕𑁄𑀧𑁂𑀢𑀩𑁆𑀩𑁄 𑀳𑁄𑀢𑀺 𑀧𑀭𑀺𑀤𑀳𑀢𑁄 𑀯𑀺𑀪𑀽𑀲𑀦𑀝𑁆𑀞𑀸𑀦𑀪𑀸𑀯𑁄, 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑀲𑁆𑀲 𑀫𑀳𑀺𑀘𑁆𑀙𑀪𑀸𑀯𑁄𑀢𑀺 𑀏𑀢𑁂𑀳𑀺 𑀦𑀯𑀳𑀺 𑀤𑁄𑀲𑁂𑀳𑀺 (𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦, 𑀲𑀼𑀫𑁂𑀥𑀓𑀣𑀸) 𑀉𑀧𑀕𑀢𑀁 𑀲𑀸𑀝𑀓𑀁 𑀧𑀳𑀸𑀬 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀲𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀯𑀸𑀓𑀘𑀻𑀭𑀦𑁆𑀢𑀺 𑀫𑀼𑀜𑁆𑀚𑀢𑀺𑀡𑀁 𑀳𑀻𑀭𑀸𑀳𑀻𑀭𑀁 𑀓𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀁 𑀯𑀸𑀓𑀫𑀬𑀘𑀻𑀭𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁆𑀣𑀸𑀬 𑀆𑀤𑀺𑀬𑀺𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢𑀦𑁆𑀢𑀺 𑀤𑁆𑀯𑀸𑀤𑀲𑀳𑀺 𑀆𑀦𑀺𑀲𑀁𑀲𑁂𑀳𑀺 𑀉𑀧𑁂𑀢𑀁. 𑀏𑀢𑁆𑀣 𑀕𑀼𑀡-𑀲𑀤𑁆𑀤𑁄 𑀆𑀦𑀺𑀲𑀁𑀲𑀝𑁆𑀞𑁄 ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁭𑁯) 𑀯𑀺𑀬. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀯𑀸𑀓𑀘𑀻𑀭𑀲𑁆𑀫𑀺𑀁 𑀤𑁆𑀯𑀸𑀤𑀲𑀸𑀦𑀺𑀲𑀁𑀲𑀸 ¶ 𑀅𑀧𑁆𑀧𑀕𑁆𑀖𑀢𑀸, 𑀅𑀧𑀭𑀸𑀬𑀢𑁆𑀢𑀢𑀸, 𑀲𑀳𑀢𑁆𑀣𑀸 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸, 𑀧𑀭𑀺𑀪𑁄𑀕𑁂𑀦 𑀚𑀺𑀡𑁆𑀡𑁂𑀧𑀺 𑀲𑀺𑀩𑁆𑀩𑀺𑀢𑀩𑁆𑀩𑀸𑀪𑀸𑀯𑁄, 𑀘𑁄𑀭𑀪𑀬𑀸𑀪𑀸𑀯𑁄 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀲𑀼𑀔𑁂𑀦 𑀓𑀭𑀡𑀪𑀸𑀯𑁄, 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀲𑀸𑀭𑀼𑀧𑁆𑀧𑀪𑀸𑀯𑁄, 𑀲𑁂𑀯𑀫𑀸𑀦𑀲𑁆𑀲 𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀪𑀸𑀯𑁄, 𑀘𑀻𑀯𑀭𑀧𑁆𑀧𑀘𑁆𑀘𑀬𑁂 𑀅𑀧𑁆𑀧𑀺𑀘𑁆𑀙𑀪𑀸𑀯𑁄 ¶ , 𑀧𑀭𑀺𑀪𑁄𑀕𑀲𑀼𑀔𑀪𑀸𑀯𑁄, 𑀯𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀲𑀼𑀮𑀪𑀪𑀸𑀯𑁄, 𑀯𑀸𑀓𑀘𑀻𑀭𑁂 𑀦𑀝𑁆𑀞𑁂𑀧𑀺 𑀅𑀦𑀧𑁂𑀓𑁆𑀔𑀪𑀸𑀯𑁄𑀢𑀺 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀕𑀼𑀡𑁂𑀳𑀺 𑀲𑀫𑁆𑀧𑀦𑁆𑀦𑀁 (𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦, 𑀲𑀼𑀫𑁂𑀥𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸).

𑀅𑀣 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀢𑀢𑁆𑀣 𑀧𑀡𑁆𑀡𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀧𑀘𑁆𑀘𑀼𑀝𑁆𑀞𑀸𑀬 𑀅𑀢𑁆𑀢𑀦𑁄 𑀦𑀺𑀓𑁆𑀔𑀫𑀦𑀓𑀸𑀭𑀡𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀦 𑀦𑀯𑀓𑀦𑀓𑀓𑀝𑀓𑀦𑀽𑀧𑀼𑀭𑀸𑀤𑀺𑀲𑀗𑁆𑀖𑀝𑁆𑀝𑀦𑀲𑀤𑁆𑀤𑀲𑀫𑁆𑀫𑀺𑀲𑁆𑀲𑀺𑀢-𑀫𑀥𑀼𑀭𑀳𑀲𑀺𑀢𑀓𑀣𑀺𑀢𑀕𑁂𑀳𑀚𑀦𑀭𑀫𑀡𑀻𑀬𑀁 𑀉𑀴𑀸𑀭𑀯𑀺𑀪𑀯𑀲𑁄𑀪𑀺𑀢𑀁 𑀲𑀼𑀭𑀯𑀭𑀪𑀯𑀦𑀸𑀓𑀸𑀭𑀫𑀕𑀸𑀭𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀳𑀸𑀬 𑀯𑀺𑀯𑁂𑀓𑀸𑀭𑀸𑀫𑀢𑀸𑀬 𑀲𑀩𑁆𑀩𑀚𑀦𑀧𑀸𑀧𑀧𑀯𑀸𑀳𑀦𑀁 𑀢𑀧𑁄𑀯𑀦𑀁 𑀧𑀯𑀺𑀝𑁆𑀞𑁄𑀲𑁆𑀫𑀺, 𑀇𑀥 𑀧𑀦 𑀫𑁂 𑀧𑀡𑁆𑀡𑀲𑀸𑀮𑀸𑀬 𑀯𑀸𑀲𑁄 𑀤𑀼𑀢𑀺𑀬𑁄 𑀖𑀭𑀸𑀯𑀸𑀲𑁄 𑀯𑀺𑀬 𑀳𑁄𑀢𑀺, 𑀳𑀦𑁆𑀤𑀸𑀳𑀁 𑀭𑀼𑀓𑁆𑀔𑀫𑀽𑀮𑁂 𑀯𑀲𑁂𑀬𑁆𑀬’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩𑁧.

‘‘𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀁, 𑀧𑀚𑀳𑀺𑀁 𑀧𑀡𑁆𑀡𑀲𑀸𑀮𑀓’’𑀦𑁆𑀢𑀺.

𑀢𑀢𑁆𑀣 𑀅𑀝𑁆𑀞𑀤𑁄𑀲𑀲𑀫𑀸𑀓𑀺𑀡𑁆𑀡𑀦𑁆𑀢𑀺 𑀅𑀝𑁆𑀞𑀳𑀺 𑀤𑁄𑀲𑁂𑀳𑀺 𑀲𑀫𑀸𑀓𑀺𑀡𑁆𑀡𑀁 𑀲𑀁𑀬𑀼𑀢𑁆𑀢𑀁. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀫𑀳𑀸𑀲𑀫𑁆𑀪𑀸𑀭𑁂𑀳𑀺 𑀦𑀺𑀧𑁆𑀨𑀸𑀤𑀦𑀻𑀬𑀢𑀸, 𑀢𑀺𑀡𑀧𑀡𑁆𑀡𑀫𑀢𑁆𑀢𑀺𑀓𑀸𑀤𑀻𑀳𑀺 𑀦𑀺𑀘𑁆𑀘𑀁 𑀧𑀝𑀺𑀚𑀕𑁆𑀕𑀦𑀻𑀬𑀢𑀸, 𑀲𑁂𑀦𑀸𑀲𑀦𑀁 𑀦𑀸𑀫 𑀫𑀳𑀮𑁆𑀮𑀓𑀲𑁆𑀲 𑀧𑀸𑀧𑀼𑀡𑀸𑀢𑀻𑀢𑀺 𑀅𑀯𑁂𑀮𑀸𑀬 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦 𑀳𑁄𑀢𑀻𑀢𑀺 𑀯𑀼𑀝𑁆𑀞𑀸𑀧𑀦𑀻𑀬𑀪𑀸𑀯𑁄, 𑀲𑀻𑀢𑀼𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑁂𑀦 𑀓𑀸𑀬𑀲𑁆𑀲 𑀲𑀼𑀔𑀼𑀫𑀸𑀮𑀓𑀭𑀡𑀪𑀸𑀯𑁄, 𑀖𑀭𑀁 𑀧𑀯𑀺𑀝𑁆𑀞𑁂𑀦 𑀬𑀁 𑀓𑀺𑀜𑁆𑀘𑀺 𑀧𑀸𑀧𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀕𑀭𑀳𑀧𑀝𑀺𑀘𑁆𑀙𑀸𑀤𑀦𑀓𑀭𑀡𑀪𑀸𑀯𑁄, ‘‘𑀫𑀬𑁆𑀳𑀫𑀺𑀤’’𑀦𑁆𑀢𑀺 𑀲𑀧𑀭𑀺𑀕𑁆𑀕𑀳𑀪𑀸𑀯𑁄, 𑀕𑁂𑀳𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀲𑀤𑀼𑀢𑀺𑀬𑀓𑀯𑀸𑀲𑁄, 𑀊𑀓𑀸𑀫𑀗𑁆𑀕𑀼𑀮𑀖𑀭𑀕𑁄𑀴𑀺𑀓𑀸𑀤𑀻𑀦𑀁 𑀲𑀸𑀥𑀸𑀭𑀡𑀢𑀸𑀬 𑀩𑀳𑀼𑀲𑀸𑀥𑀸𑀭𑀡𑀪𑀸𑀯𑁄𑀢𑀺 ¶ 𑀇𑀢𑀺 𑀇𑀫𑁂 𑀅𑀝𑁆𑀞 𑀆𑀤𑀻𑀦𑀯𑁂 (𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦, 𑀲𑀼𑀫𑁂𑀥𑀓𑀣𑀸) 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀚𑀳𑀺𑀁.

𑀕𑀼𑀡𑁂 𑀤𑀲𑀳𑀼𑀧𑀸𑀕𑀢𑀦𑁆𑀢𑀺 𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀳𑀺 𑀕𑀼𑀡𑁂𑀳𑀺 𑀉𑀧𑁂𑀢𑀁, 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀓𑀢𑀫𑁂𑀳𑀺 𑀤𑀲𑀳𑀺? 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀸, 𑀉𑀧𑀕𑀫𑀦𑀫𑀢𑁆𑀢𑀫𑁂𑀯𑁂𑀢𑁆𑀣 𑀳𑁄𑀢𑀻𑀢𑀺 𑀲𑀼𑀮𑀪𑀸𑀦𑀯𑀚𑁆𑀚𑀢𑀸, 𑀅𑀪𑀺𑀡𑁆𑀳𑀁 𑀢𑀭𑀼𑀧𑀡𑁆𑀡𑀯𑀺𑀓𑀸𑀭𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑀲𑀜𑁆𑀜𑀸𑀲𑀫𑀼𑀝𑁆𑀞𑀸𑀧𑀦𑀢𑀸, 𑀲𑁂𑀦𑀸𑀲𑀦𑀫𑀘𑁆𑀙𑁂𑀭𑀸𑀪𑀸𑀯𑁄, 𑀢𑀢𑁆𑀣 𑀳𑀺 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀮𑀚𑁆𑀚𑀢𑀻𑀢𑀺 𑀧𑀸𑀧𑀓𑀭𑀡𑀸𑀭𑀳𑀸𑀪𑀸𑀯𑁄, 𑀧𑀭𑀺𑀕𑁆𑀕𑀳𑀓𑀭𑀡𑀸𑀪𑀸𑀯𑁄, 𑀤𑁂𑀯𑀢𑀸𑀳𑀺 𑀲𑀳 𑀯𑀸𑀲𑁄, 𑀙𑀦𑁆𑀦𑀧𑀝𑀺𑀓𑁆𑀔𑁂𑀧𑁄, 𑀧𑀭𑀺𑀪𑁄𑀕𑀲𑀼𑀔𑀢𑀸, 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀲𑀼𑀮𑀪𑀢𑀸𑀬 𑀅𑀦𑀧𑁂𑀓𑁆𑀔𑀪𑀸𑀯𑁄𑀢𑀺 𑀇𑀢𑀺 𑀇𑀫𑁂 𑀤𑀲 𑀕𑀼𑀡𑁂 (𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦, 𑀲𑀼𑀫𑁂𑀥𑀓𑀣𑀸) 𑀤𑀺𑀲𑁆𑀯𑀸 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀢𑁄𑀲𑁆𑀫𑀻𑀢𑀺 𑀯𑀤𑀢𑀺. 𑀆𑀳 𑀘 𑁋

‘‘𑀯𑀡𑁆𑀡𑀺𑀢𑁄 ¶ 𑀩𑀼𑀤𑁆𑀥𑀲𑁂𑀝𑁆𑀞𑁂𑀦, 𑀦𑀺𑀲𑁆𑀲𑀬𑁄𑀢𑀺 𑀘 𑀪𑀸𑀲𑀺𑀢𑁄;

𑀦𑀺𑀯𑀸𑀲𑁄 𑀧𑀯𑀺𑀯𑀺𑀢𑁆𑀢𑀲𑁆𑀲, 𑀭𑀼𑀓𑁆𑀔𑀫𑀽𑀮𑀲𑀫𑁄 𑀓𑀼𑀢𑁄.

‘‘𑀆𑀯𑀸𑀲𑀫𑀘𑁆𑀙𑁂𑀭𑀳𑀭𑁂, 𑀤𑁂𑀯𑀢𑀸𑀧𑀭𑀺𑀧𑀸𑀮𑀺𑀢𑁂;

𑀧𑀯𑀺𑀯𑀺𑀢𑁆𑀢𑁂 𑀯𑀲𑀦𑁆𑀢𑁄 𑀳𑀺, 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀲𑀼𑀩𑁆𑀩𑀢𑁄.

‘‘𑀅𑀪𑀺𑀭𑀢𑁆𑀢𑀸𑀦𑀺 ¶ 𑀦𑀻𑀮𑀸𑀦𑀺, 𑀧𑀡𑁆𑀟𑀽𑀦𑀺 𑀧𑀢𑀺𑀢𑀸𑀦𑀺 𑀘;

𑀧𑀲𑁆𑀲𑀦𑁆𑀢𑁄 𑀢𑀭𑀼𑀧𑀡𑁆𑀡𑀸𑀦𑀺, 𑀦𑀺𑀘𑁆𑀘𑀲𑀜𑁆𑀜𑀁 𑀧𑀦𑀽𑀤𑀢𑀺.

‘‘𑀢𑀲𑁆𑀫𑀸 𑀳𑀺 𑀩𑀼𑀤𑁆𑀥𑀤𑀸𑀬𑀚𑁆𑀚𑀁, 𑀪𑀸𑀯𑀦𑀸𑀪𑀺𑀭𑀢𑀸𑀮𑀬𑀁;

𑀯𑀺𑀯𑀺𑀢𑁆𑀢𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀭𑀼𑀓𑁆𑀔𑀫𑀽𑀮𑀁 𑀯𑀺𑀘𑀓𑁆𑀔𑀡𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁩𑁨);

𑀅𑀣 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀧𑀡𑁆𑀡𑀲𑀸𑀮𑀸𑀬 𑀤𑀺𑀝𑁆𑀞𑀤𑁄𑀲𑁄 𑀳𑀼𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑁂 𑀮𑀤𑁆𑀥𑀸𑀦𑀺𑀲𑀁𑀲𑁄 𑀯𑀺𑀳𑀭𑀦𑁆𑀢𑁄 𑀉𑀢𑁆𑀢𑀭𑀺𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀆𑀳𑀸𑀭𑀢𑁆𑀣𑀸𑀬 𑀫𑁂 𑀕𑀸𑀫𑀕𑀫𑀦𑀁 𑀆𑀳𑀸𑀭𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀁, 𑀦𑀸𑀳𑀁 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀳𑀸𑀭𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀆𑀳𑀸𑀭𑀧𑀭𑀺𑀬𑁂𑀲𑀦𑀫𑀽𑀮𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀧𑀯𑀢𑁆𑀢𑀨𑀮𑁂𑀦 𑀬𑀸𑀧𑁂𑀬𑁆𑀬’’𑀦𑁆𑀢𑀺. 𑀇𑀫𑀁 𑀧𑀦 𑀅𑀢𑁆𑀣𑀯𑀺𑀲𑁂𑀲𑀁 𑀤𑀻𑀧𑁂𑀦𑁆𑀢𑁄 𑁋

𑁩𑁨-𑁩𑁩. ‘‘𑀯𑀸𑀧𑀺𑀢𑀁 𑀭𑁄𑀧𑀺𑀢𑀁 𑀥𑀜𑁆𑀜𑀁, 𑀧𑀚𑀳𑀺𑀁 𑀦𑀺𑀭𑀯𑀲𑁂𑀲𑀢𑁄.

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀯𑀢𑁆𑀢𑀨𑀮𑀫𑀸𑀤𑀺𑀬𑀺’’𑀦𑁆𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 ¶ 𑀯𑀸𑀧𑀺𑀢𑀦𑁆𑀢𑀺 𑀯𑀧𑀺𑀢𑁆𑀯𑀸 𑀦𑀺𑀧𑁆𑀨𑀦𑁆𑀦𑀁. 𑀭𑁄𑀧𑀺𑀢𑀦𑁆𑀢𑀺 𑀭𑁄𑀧𑀺𑀢𑁆𑀯𑀸 𑀦𑀺𑀧𑁆𑀨𑀦𑁆𑀦𑀁, 𑀯𑀧𑀦𑀭𑁄𑀧𑀦𑀯𑀲𑁂𑀦 𑀤𑀼𑀯𑀺𑀥𑀸𑀯 𑀲𑀲𑁆𑀲𑀦𑀺𑀧𑁆𑀨𑀢𑁆𑀢𑀺, 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀢𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀧𑀳𑀸𑀬 𑀧𑀯𑀢𑁆𑀢𑀨𑀮𑁂𑀦 𑀬𑀸𑀧𑁂𑀲𑀺𑀁. 𑀧𑀯𑀢𑁆𑀢𑀨𑀮𑀦𑁆𑀢𑀺 𑀲𑀬𑀫𑁂𑀯 𑀧𑀢𑀺𑀢𑀨𑀮𑀁. 𑀆𑀤𑀺𑀬𑀺𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀁.

‘‘𑀧𑀯𑀢𑁆𑀢𑀨𑀮𑀲𑀦𑁆𑀢𑀼𑀝𑁆𑀞𑁄, 𑀅𑀧𑀭𑀸𑀬𑀢𑁆𑀢𑀚𑀻𑀯𑀺𑀓𑁄;

𑀧𑀳𑀻𑀦𑀸𑀳𑀸𑀭𑀮𑁄𑀮𑀼𑀧𑁆𑀧𑁄, 𑀳𑁄𑀢𑀺 𑀘𑀸𑀢𑀼𑀤𑁆𑀤𑀺𑀲𑁄 𑀫𑀼𑀦𑀺.

‘‘𑀚𑀳𑀸𑀢𑀺 𑀭𑀲𑀢𑀡𑁆𑀳𑀜𑁆𑀘, 𑀆𑀚𑀻𑀯𑁄 𑀢𑀲𑁆𑀲 𑀲𑀼𑀚𑁆𑀛𑀢𑀺;

𑀢𑀲𑁆𑀫𑀸 𑀳𑀺 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀧𑀯𑀢𑁆𑀢𑀨𑀮𑀪𑁄𑀚𑀦’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑁋

𑀏𑀯𑀁 𑀧𑀯𑀢𑁆𑀢𑀫𑀸𑀦𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀧𑀸𑀧𑀼𑀡𑀺. 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁂𑀦 ‘‘𑀢𑀢𑁆𑀣𑀧𑁆𑀧𑀥𑀸𑀦𑀁 ¶ 𑀧𑀤𑀳𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂. 𑀧𑀥𑀸𑀦𑀦𑁆𑀢𑀺 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀜𑁆𑀳𑀺 𑀧𑀤𑀳𑀺𑀢𑀩𑁆𑀩𑀢𑁄 𑀧𑀥𑀸𑀦𑀪𑀸𑀯𑀓𑀭𑀡𑀢𑁄 𑀯𑀸 ‘‘𑀧𑀥𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀤𑀳𑀺𑀦𑁆𑀢𑀺 𑀯𑀻𑀭𑀺𑀬𑀫𑀸𑀭𑀪𑀺𑀁. 𑀦𑀺𑀲𑁆𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂𑀢𑀺 𑀦𑀺𑀲𑀚𑁆𑀚𑀸𑀬 𑀘 𑀞𑀸𑀦𑁂𑀦 𑀘 𑀘𑀗𑁆𑀓𑀫𑁂𑀦 𑀘.

𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀧𑀦 𑀲𑁂𑀬𑁆𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂𑀳𑁂𑀯 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀪𑀺𑀜𑁆𑀜𑀸𑀩𑀮𑀁 𑀧𑀸𑀧𑀼𑀡𑀺. 𑀏𑀯𑀁 𑀧𑀦 𑀅𑀪𑀺𑀜𑁆𑀜𑀸𑀩𑀮𑀁 𑀧𑀢𑁆𑀯𑀸 𑀲𑀼𑀫𑁂𑀥𑀢𑀸𑀧𑀲𑁂 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁂 𑀢𑀤𑀸 𑀲𑀩𑁆𑀩𑀚𑀦𑀲𑀗𑁆𑀕𑀳𑀓𑀭𑁄 𑀫𑀸𑀭𑀩𑀮𑀪𑀬𑀁𑀓𑀭𑁄 𑀜𑀸𑀡𑀤𑀻𑀧𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺.

𑀲𑀗𑁆𑀔𑁂𑀧𑁂𑀦𑁂𑀯 𑀢𑀲𑁆𑀲𑀸𑀬𑀫𑀸𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀁 𑀓𑀺𑀭 𑀤𑀻𑀧𑀗𑁆𑀓𑀭𑁄 𑀦𑀸𑀫 𑀫𑀳𑀸𑀲𑀢𑁆𑀢𑁄 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀞𑀺𑀢𑁄 𑀧𑀣𑀯𑀺𑀓𑀫𑁆𑀧𑀦𑀸𑀤𑀻𑀦𑀺 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 ¶ 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋

‘‘𑀓𑀸𑀮𑁄 𑀔𑁄 𑀢𑁂 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁭) 𑁋

𑀯𑀼𑀢𑁆𑀢𑁂 ¶ 𑀢𑀢𑁄 𑀲𑁄 𑀤𑁂𑀯𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀘 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀭𑀫𑁆𑀫𑀯𑀢𑀻𑀦𑀕𑀭𑁂 𑀅𑀢𑁆𑀢𑀦𑁄 𑀬𑀲𑀯𑀺𑀪𑀽𑀢𑀺𑀬𑀸 𑀯𑀺𑀚𑀺𑀢𑀯𑀸𑀲𑀼𑀤𑁂𑀯𑀲𑁆𑀲 𑀦𑀭𑀤𑁂𑀯𑀲𑁆𑀲 𑀲𑀼𑀤𑁂𑀯𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀲𑀼𑀫𑁂𑀥𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀸 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀧𑀭𑀺𑀳𑀭𑀺𑀬𑀫𑀸𑀦𑁄 𑀫𑀳𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀫𑀡𑀺𑀓𑀽𑀝𑀕𑀢𑁄 𑀯𑀺𑀬 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄 𑀤𑀲 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀲𑀮𑀺𑀮𑀥𑀭𑀯𑀺𑀯𑀭𑀕𑀢𑁄 𑀲𑀭𑀤𑀓𑀸𑀮𑀘𑀦𑁆𑀤𑁄 𑀯𑀺𑀬 𑀢𑀲𑁆𑀲𑀸 𑀉𑀤𑀭𑀢𑁄 𑀦𑀺𑀓𑁆𑀔𑀫𑀺.

𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺

𑀢𑀲𑁆𑀲 𑀧𑀦 𑀤𑀻𑀧𑀗𑁆𑀓𑀭𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀧𑀺 𑀯𑀺𑀚𑀸𑀢𑀓𑁆𑀔𑀡𑁂𑀧𑀺 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀲𑀩𑁆𑀩𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀲𑀫𑁆𑀩𑀼𑀚𑁆𑀛𑀦𑁆𑀢𑁂𑀲𑀼 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀦𑁆𑀢𑁂𑀲𑀽𑀢𑀺 𑀇𑀫𑁂𑀲𑀼 ¶ 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀤𑁆𑀯𑀢𑁆𑀢𑀺𑀁𑀲 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀯𑀢𑁆𑀢𑀦𑁆𑀢𑁂𑀯. 𑀢𑀲𑁆𑀫𑀸 𑀫𑀬𑀸 𑀧𑀸𑀓𑀝𑀢𑁆𑀢𑀸 𑀤𑀻𑀧𑀗𑁆𑀓𑀭𑀓𑀼𑀫𑀸𑀭𑀲𑁆𑀲 𑀚𑀸𑀢𑀺𑀬𑀁 𑀤𑀲𑁆𑀲𑀺𑀢𑀸𑀦𑀺 𑁋

‘‘𑀤𑀻𑀧𑀗𑁆𑀓𑀭𑁂 𑀘𑀸𑀭𑀼𑀓𑀭𑁂 𑀓𑀼𑀫𑀸𑀭𑁂, 𑀲𑀺𑀯𑀁𑀓𑀭𑁂 𑀲𑀦𑁆𑀢𑀺𑀓𑀭𑁂𑀯 𑀚𑀸𑀢𑁂;

𑀧𑀓𑀫𑁆𑀧𑀺 𑀲𑀗𑁆𑀓𑀫𑁆𑀧𑀺 𑀢𑀤𑀸 𑀲𑀫𑀦𑁆𑀢𑀸, 𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀤𑀲𑀮𑁄𑀓𑀥𑀸𑀢𑀼.

‘‘𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼, 𑀤𑀲𑀲𑀳𑀲𑁆𑀲𑁂𑀯 𑀤𑁂𑀯𑀢𑀸;

𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑁆𑀫𑀺𑀁, 𑀢𑀤𑀸 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑀸.

‘‘𑀩𑁄𑀥𑀺𑀲𑀢𑁆𑀢𑀁 𑀫𑀳𑀸𑀲𑀢𑁆𑀢𑀁, 𑀚𑀸𑀢𑀫𑀢𑁆𑀢𑀦𑁆𑀢𑀼 𑀤𑁂𑀯𑀢𑀸;

𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀧𑀘𑁆𑀙𑀸 𑀢𑀁 𑀫𑀦𑀼𑀚𑀸 𑀧𑀦.

‘‘𑀅𑀯𑀸𑀤𑀺𑀢𑀸 𑀓𑁂𑀦𑀘𑀺 𑀘𑀫𑁆𑀫𑀦𑀤𑁆𑀥𑀸, 𑀲𑀼𑀧𑁄𑀓𑁆𑀔𑀭𑀸 𑀤𑀼𑀦𑁆𑀤𑀼𑀪𑀺𑀬𑁄 𑀘 𑀯𑀻𑀡𑀸;

𑀅𑀖𑀝𑁆𑀝𑀺𑀢𑀸𑀦𑀸𑀪𑀭𑀡𑀸𑀦𑀺 𑀢𑀲𑁆𑀫𑀺𑀁, 𑀔𑀡𑁂 𑀲𑀫𑀦𑁆𑀢𑀸 𑀫𑀥𑀼𑀭𑀁 𑀭𑀯𑀺𑀁𑀲𑀼.

‘‘𑀙𑀺𑀚𑁆𑀚𑀺𑀁𑀲𑀼 𑀲𑀩𑁆𑀩𑀢𑁆𑀣 𑀘 𑀩𑀦𑁆𑀥𑀦𑀸𑀦𑀺, 𑀲𑀬𑀁 𑀯𑀺𑀕𑀘𑁆𑀙𑀺𑀁𑀲𑀼 𑀘 𑀲𑀩𑁆𑀩𑀭𑁄𑀕𑀸;

𑀭𑀽𑀧𑀸𑀦𑀺 𑀧𑀲𑁆𑀲𑀺𑀁𑀲𑀼 𑀘 𑀚𑀸𑀢𑀺𑀅𑀦𑁆𑀥𑀸, 𑀲𑀤𑁆𑀤𑀁 𑀲𑀫𑀦𑁆𑀢𑀸 𑀩𑀥𑀺𑀭𑀸 𑀲𑀼𑀡𑀺𑀁𑀲𑀼.

‘‘𑀅𑀦𑀼𑀲𑁆𑀲𑀢𑀺𑀁 𑀚𑀸𑀢𑀺𑀚𑀴𑀸 𑀫𑀦𑀼𑀲𑁆𑀲𑀸, 𑀮𑀪𑀺𑀁𑀲𑀼 𑀬𑀸𑀦𑀁 𑀧𑀤𑀲𑀸𑀯 𑀧𑀗𑁆𑀕𑀼𑀮𑀸;

𑀯𑀺𑀤𑁂𑀲𑀬𑀸𑀢𑀸 𑀲𑀬𑀫𑁂𑀯 𑀦𑀸𑀯𑀸, 𑀲𑀧𑀝𑁆𑀝𑀦𑀁 𑀲𑀻𑀖𑀫𑀼𑀧𑀸𑀕𑀫𑀺𑀁𑀲𑀼.

‘‘𑀆𑀓𑀸𑀲𑀝𑁆𑀞𑀁 ¶ ¶ 𑀪𑀽𑀫𑀺𑀕𑀢𑀜𑁆𑀘 𑀲𑀩𑁆𑀩𑀁, 𑀲𑀬𑀁 𑀲𑀫𑀦𑁆𑀢𑀸 𑀭𑀢𑀦𑀁 𑀯𑀺𑀭𑁄𑀘𑀺;

𑀦𑀺𑀩𑁆𑀩𑀸𑀬𑀺 𑀖𑁄𑀭𑁂 𑀦𑀺𑀭𑀬𑁂 𑀳𑀼𑀢𑀸𑀲𑁄, 𑀦𑀤𑀻𑀲𑀼 𑀢𑁄𑀬𑀫𑁆𑀧𑀺 𑀘 𑀦𑀧𑁆𑀧𑀯𑀢𑁆𑀢𑀺.

‘‘𑀮𑁄𑀓𑀦𑁆𑀢𑀭𑁂 ¶ 𑀤𑀼𑀓𑁆𑀔𑀦𑀺𑀭𑀦𑁆𑀢𑀭𑁂𑀧𑀺, 𑀧𑀪𑀸 𑀉𑀴𑀸𑀭𑀸 𑀯𑀺𑀧𑀼𑀮𑀸 𑀅𑀳𑁄𑀲𑀺;

𑀢𑀣𑀸 𑀢𑀤𑀸 𑀲𑀦𑁆𑀢𑀢𑀭𑀗𑁆𑀕𑀫𑀸𑀮𑁄, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀥𑀼𑀭𑁄𑀤𑀓𑁄𑀬𑀁.

‘‘𑀦 𑀯𑀸𑀬𑀺 𑀯𑀸𑀢𑁄 𑀨𑀭𑀼𑀲𑁄 𑀔𑀭𑁄 𑀯𑀸, 𑀲𑀫𑁆𑀨𑀼𑀮𑁆𑀮𑀧𑀼𑀧𑁆𑀨𑀸 𑀢𑀭𑀯𑁄 𑀅𑀳𑁂𑀲𑀼𑀁;

𑀯𑀺𑀭𑁄𑀘𑀺 𑀘𑀦𑁆𑀤𑁄 𑀅𑀥𑀺𑀓𑀁 𑀲𑀢𑀸𑀭𑁄, 𑀦 𑀘𑀸𑀧𑀺 𑀉𑀡𑁆𑀳𑁄 𑀲𑀽𑀭𑀺𑀬𑁄 𑀅𑀳𑁄𑀲𑀺.

‘‘𑀔𑀕𑀸 𑀦𑀪𑀫𑁆𑀳𑀸𑀧𑀺 𑀘 𑀭𑀼𑀓𑁆𑀔𑀢𑁄 𑀘, 𑀳𑀝𑁆𑀞𑀸𑀯 𑀳𑁂𑀝𑁆𑀞𑀸 𑀧𑀣𑀯𑀺𑀁 𑀪𑀚𑀺𑀁𑀲𑀼;

𑀫𑀳𑀸𑀘𑀢𑀼𑀤𑁆𑀤𑀻𑀧𑀕𑀢𑁄 𑀘 𑀫𑁂𑀖𑁄, 𑀧𑀯𑀲𑁆𑀲𑀺 𑀢𑁄𑀬𑀁 𑀫𑀥𑀼𑀭𑀁 𑀲𑀫𑀦𑁆𑀢𑀸.

‘‘𑀞𑀢𑁆𑀯𑀸𑀯 𑀤𑀺𑀩𑁆𑀩𑁂 𑀪𑀯𑀦𑁂 𑀲𑀓𑀲𑁆𑀫𑀺𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀦 𑀤𑁂𑀯𑀢𑀸𑀬𑁄;

𑀦𑀘𑁆𑀘𑀺𑀁𑀲𑀼 𑀕𑀸𑀬𑀺𑀁𑀲𑀼 𑀘 𑀯𑀸𑀤𑀬𑀺𑀁𑀲𑀼, 𑀲𑁂𑀴𑀺𑀁𑀲𑀼 𑀢𑀸 𑀓𑁂𑀴𑀺𑀫𑀓𑀁𑀲𑀼 𑀘𑁂𑀯.

‘‘𑀲𑀬𑀁 𑀓𑀺𑀭 𑀤𑁆𑀯𑀸𑀭𑀫𑀳𑀸𑀓𑀯𑀸𑀝𑀸, 𑀔𑀡𑁂𑀯 𑀢𑀲𑁆𑀫𑀺𑀁 𑀯𑀺𑀯𑀝𑀸 𑀅𑀳𑁂𑀲𑀼𑀁;

𑀫𑀳𑀸𑀚𑀦𑁂 𑀦𑁂𑀯 𑀔𑀼𑀤𑀸 𑀧𑀺𑀧𑀸𑀲𑀸, 𑀧𑀻𑀴𑁂𑀲𑀺 𑀮𑁄𑀓𑀁 𑀓𑀺𑀭 𑀓𑀜𑁆𑀘𑀺 𑀓𑀜𑁆𑀘𑀺.

‘‘𑀬𑁂 𑀦𑀺𑀘𑁆𑀘𑀯𑁂𑀭𑀸 𑀧𑀦 𑀧𑀸𑀡𑀺𑀲𑀗𑁆𑀖𑀸, 𑀢𑁂 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀭𑀫𑀁 𑀮𑀪𑀺𑀁𑀲𑀼;

𑀓𑀸𑀓𑀸 𑀉𑀮𑀽𑀓𑁂𑀳𑀺 𑀘𑀭𑀺𑀁𑀲𑀼 𑀲𑀤𑁆𑀥𑀺𑀁, 𑀓𑁄𑀡𑀸 𑀯𑀭𑀸𑀳𑁂𑀳𑀺 𑀅𑀓𑀁𑀲𑀼 𑀓𑁂𑀴𑀺𑀁.

‘‘𑀖𑁄𑀭𑀸𑀧𑀺 𑀲𑀧𑁆𑀧𑀸𑀦𑀫𑀼𑀔𑀸𑀧𑀺 𑀲𑀧𑁆𑀧𑀸, 𑀓𑀻𑀴𑀺𑀁𑀲𑀼 𑀓𑀸𑀫𑀁 𑀦𑀓𑀼𑀮𑁂𑀳𑀺 𑀲𑀤𑁆𑀥𑀺𑀁;

𑀕𑀡𑁆𑀳𑀺𑀁𑀲𑀼 𑀫𑀚𑁆𑀚𑀸𑀭𑀲𑀺𑀭𑁂𑀲𑀼 𑀬𑀽𑀓𑀸, 𑀯𑀺𑀲𑁆𑀲𑀢𑁆𑀣𑀘𑀺𑀢𑁆𑀢𑀸 𑀖𑀭𑀫𑀽𑀲𑀺𑀓𑀸𑀧𑀺.

‘‘𑀩𑀼𑀤𑁆𑀥𑀦𑁆𑀢𑀭𑁂𑀦𑀸𑀧𑀺 ¶ 𑀅𑀮𑀤𑁆𑀥𑀢𑁄𑀬𑁂, 𑀧𑀺𑀲𑀸𑀘𑀮𑁄𑀓𑁂 𑀯𑀺𑀕𑀢𑀸 𑀧𑀺𑀧𑀸𑀲𑀸;

𑀔𑀼𑀚𑁆𑀚𑀸 𑀅𑀳𑁂𑀲𑀼𑀁 𑀲𑀫𑀘𑀸𑀭𑀼𑀓𑀸𑀬𑀸, 𑀫𑀽𑀕𑀸 𑀘 𑀯𑀸𑀘𑀁 𑀫𑀥𑀼𑀭𑀁 𑀮𑀧𑀺𑀁𑀲𑀼.

‘‘𑀧𑀲𑀦𑁆𑀦𑀘𑀺𑀢𑁆𑀢𑀸 ¶ 𑀧𑀦 𑀧𑀸𑀡𑀺𑀲𑀗𑁆𑀖𑀸, 𑀢𑀤𑀜𑁆𑀜𑀫𑀜𑁆𑀜𑀁 𑀧𑀺𑀬𑀫𑀸𑀮𑀧𑀺𑀁𑀲𑀼;

𑀅𑀲𑁆𑀲𑀸 𑀘 𑀳𑁂𑀲𑀺𑀁𑀲𑀼 𑀧𑀳𑀝𑁆𑀞𑀘𑀺𑀢𑁆𑀢𑀸, 𑀕𑀚𑁆𑀚𑀺𑀁𑀲𑀼 𑀫𑀢𑁆𑀢𑀸 𑀯𑀭𑀯𑀸𑀭𑀡𑀸𑀧𑀺.

‘‘𑀲𑀼𑀭𑀪𑀺𑀘𑀦𑁆𑀤𑀦𑀘𑀼𑀡𑁆𑀡𑀲𑀫𑀸𑀓𑀼𑀮𑀸 ¶ , 𑀓𑀼𑀲𑀼𑀫𑀓𑀼𑀗𑁆𑀓𑀼𑀫𑀥𑀽𑀧𑀲𑀼𑀕𑀦𑁆𑀥𑀺𑀦𑀻;

𑀯𑀺𑀯𑀺𑀥𑀘𑀸𑀭𑀼𑀫𑀳𑀤𑁆𑀥𑀚𑀫𑀸𑀮𑀺𑀦𑀻, 𑀤𑀲𑀲𑀳𑀲𑁆𑀲𑀺 𑀅𑀳𑁄𑀲𑀺 𑀲𑀫𑀦𑁆𑀢𑀢𑁄’’𑀢𑀺.

𑀢𑀢𑁆𑀭 𑀳𑀺𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑁂𑀯𑀢𑀸𑀦𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀸𑀢𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀞𑀫𑀁 𑀤𑁂𑀯𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀘𑀫𑁆𑀫𑀦𑀤𑁆𑀥𑀤𑀼𑀦𑁆𑀤𑀼𑀪𑀻𑀦𑀁 𑀲𑀬𑀫𑁂𑀯 𑀯𑀚𑁆𑀚𑀦𑀁 𑀫𑀳𑀦𑁆𑀢𑀺𑀬𑀸 𑀥𑀫𑁆𑀫𑀪𑁂𑀭𑀺𑀬𑀸 𑀅𑀦𑀼𑀲𑀸𑀯𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀯𑀻𑀡𑀸𑀪𑀭𑀡𑀸𑀦𑀁 𑀲𑀬𑀫𑁂𑀯 𑀯𑀚𑁆𑀚𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀩𑀦𑁆𑀥𑀦𑀸𑀦𑀁 𑀲𑀬𑀫𑁂𑀯 𑀙𑁂𑀤𑁄 𑀅𑀲𑁆𑀫𑀺𑀫𑀸𑀦𑀲𑀫𑀼𑀘𑁆𑀙𑁂𑀤𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀫𑀳𑀸𑀚𑀦𑀲𑁆𑀲 𑀲𑀩𑁆𑀩𑀭𑁄𑀕𑀯𑀺𑀕𑀫𑁄 𑀘𑀢𑀼𑀲𑀘𑁆𑀘𑀨𑀮𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀚𑀘𑁆𑀘𑀦𑁆𑀥𑀸𑀦𑀁 𑀭𑀽𑀧𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀩𑀥𑀺𑀭𑀸𑀦𑀁 𑀲𑀤𑁆𑀤𑀲𑁆𑀲𑀯𑀦𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀚𑀸𑀢𑀺𑀚𑀴𑀸𑀦𑀁 𑀅𑀦𑀼𑀲𑁆𑀲𑀢𑀼𑀧𑁆𑀧𑀸𑀤𑁄 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀗𑁆𑀕𑀼𑀮𑀸𑀦𑀁 𑀧𑀤𑀲𑀸 𑀕𑀫𑀦𑀁 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀯𑀺𑀤𑁂𑀲𑀕𑀢𑀸𑀦𑀁 𑀦𑀸𑀯𑀸𑀦𑀁 𑀲𑀧𑀝𑁆𑀝𑀦𑀸𑀕𑀫𑀦𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑀲𑁆𑀲, 𑀭𑀢𑀦𑀸𑀦𑀁 𑀲𑀬𑀫𑁂𑀯 𑀯𑀺𑀭𑁄𑀘𑀦𑀁 𑀥𑀫𑁆𑀫𑁄𑀪𑀸𑀲𑀧𑀝𑀺𑀮𑀸𑀪𑀲𑁆𑀲, 𑀦𑀺𑀭𑀬𑁂 𑀅𑀕𑁆𑀕𑀺𑀦𑀺𑀩𑁆𑀩𑀸𑀬𑀦𑀁 𑀏𑀓𑀸𑀤𑀲𑀕𑁆𑀕𑀺𑀦𑀺𑀩𑁆𑀩𑀸𑀬𑀦𑀲𑁆𑀲, 𑀦𑀤𑀻𑀲𑀼 𑀢𑁄𑀬𑀲𑁆𑀲 𑀦𑀧𑁆𑀧𑀯𑀢𑁆𑀢𑀦𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑀝𑀺𑀮𑀸𑀪𑀲𑁆𑀲, 𑀮𑁄𑀓𑀦𑁆𑀢𑀭𑁂 𑀆𑀮𑁄𑀓𑁄 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀜𑀸𑀡𑀮𑁄𑀓𑀤𑀲𑁆𑀲𑀦𑀲𑁆𑀲, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 ¶ 𑀫𑀥𑀼𑀭𑁄𑀤𑀓𑀢𑀸 𑀦𑀺𑀩𑁆𑀩𑀸𑀦𑀭𑀲𑁂𑀦 𑀏𑀓𑀭𑀲𑀪𑀸𑀯𑀲𑁆𑀲, 𑀯𑀸𑀢𑀲𑁆𑀲 𑀅𑀯𑀸𑀬𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑁂𑀤𑀦𑀲𑁆𑀲, 𑀢𑀭𑀽𑀦𑀁 𑀧𑀼𑀧𑁆𑀨𑀺𑀢𑀪𑀸𑀯𑁄 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑁂𑀳𑀺 𑀧𑀼𑀧𑁆𑀨𑀺𑀢𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀘𑀦𑁆𑀤𑀲𑁆𑀲 𑀅𑀢𑀺𑀯𑀺𑀭𑁄𑀘𑀦𑀁 𑀩𑀳𑀼𑀚𑀦𑀓𑀦𑁆𑀢𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀽𑀭𑀺𑀬𑀲𑁆𑀲 𑀦𑀸𑀢𑀺𑀉𑀡𑁆𑀳𑀯𑀺𑀫𑀮𑀪𑀸𑀯𑁄 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸, 𑀔𑀕𑀸𑀦𑀁 𑀦𑀕𑀸𑀤𑀻𑀳𑀺 𑀧𑀣𑀯𑀺𑀕𑀫𑀦𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀸𑀡𑁂𑀳𑀺 𑀲𑀭𑀡𑀕𑀫𑀦𑀲𑁆𑀲, 𑀫𑀳𑀢𑁄 𑀘𑀢𑀼𑀤𑁆𑀤𑀻𑀧𑀕𑀢𑀫𑁂𑀖𑀲𑁆𑀲 𑀧𑀯𑀲𑁆𑀲𑀦𑀁 𑀫𑀳𑀢𑁄 𑀥𑀫𑁆𑀫𑀯𑀲𑁆𑀲𑀲𑁆𑀲, 𑀤𑁂𑀯𑀢𑀸𑀦𑀁 𑀲𑀓𑀲𑀓𑀪𑀯𑀦𑁂𑀲𑁆𑀯𑁂𑀯 𑀞𑀢𑁆𑀯𑀸 𑀦𑀘𑁆𑀘𑀸𑀤𑀻𑀳𑀺 𑀓𑀻𑀴𑀦𑀁 𑀩𑀼𑀤𑁆𑀥𑀪𑀸𑀯𑀁 𑀧𑀢𑁆𑀯𑀸 𑀉𑀤𑀸𑀦𑀼𑀤𑀸𑀦𑀲𑁆𑀲, 𑀤𑁆𑀯𑀸𑀭𑀓𑀯𑀸𑀝𑀸𑀦𑀁 𑀲𑀬𑀫𑁂𑀯 𑀯𑀺𑀯𑀭𑀡𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀲𑁆𑀲, 𑀔𑀼𑀤𑀸𑀧𑀻𑀴𑀦𑀲𑁆𑀲 𑀅𑀪𑀸𑀯𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀲𑀼𑀔𑀺𑀢𑀪𑀸𑀯𑀲𑁆𑀲, 𑀯𑁂𑀭𑀻𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀧𑀝𑀺𑀮𑀸𑀪𑁄 𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 ¶ 𑀏𑀓𑀥𑀚𑀫𑀸𑀮𑀺𑀢𑀸 𑀅𑀭𑀺𑀬𑀥𑀚𑀫𑀸𑀮𑀺𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑁂𑀲𑀯𑀺𑀲𑁂𑀲𑀸 𑀧𑀦 𑀲𑁂𑀲𑀩𑀼𑀤𑁆𑀥𑀕𑀼𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 ¶ 𑀤𑀻𑀧𑀗𑁆𑀓𑀭𑀓𑀼𑀫𑀸𑀭𑁄 𑀫𑀳𑀢𑀺𑀬𑀸 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀪𑀤𑁆𑀤𑀁 𑀬𑁄𑀩𑁆𑀩𑀦𑀁 𑀧𑀢𑁆𑀯𑀸 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀤𑁂𑀯𑀮𑁄𑀓𑀲𑀺𑀭𑀺𑀁 𑀯𑀺𑀬 𑀭𑀚𑁆𑀚𑀲𑀺𑀭𑀺𑀫𑀦𑀼𑀪𑀯𑀦𑁆𑀢𑁄 𑀉𑀬𑁆𑀬𑀸𑀦𑀓𑀻𑀴𑀸𑀬 𑀕𑀫𑀦𑀲𑀫𑀬𑁂 𑀅𑀦𑀼𑀓𑁆𑀓𑀫𑁂𑀦 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀲𑀗𑁆𑀔𑀸𑀢𑁂 𑀢𑀬𑁄 𑀤𑁂𑀯𑀤𑀽𑀢𑁂 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀼𑀤𑀲𑁆𑀲𑀦𑀦𑀕𑀭𑀲𑀤𑀺𑀲𑀯𑀺𑀪𑀯𑀲𑁄𑀪𑀁 𑀭𑀫𑁆𑀫𑀯𑀢𑀻 𑀦𑀸𑀫 𑀦𑀕𑀭𑀁 𑀧𑀸𑀯𑀺𑀲𑀺. 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦 𑀘𑀢𑀼𑀢𑁆𑀣𑀯𑀸𑀭𑁂 𑀳𑀢𑁆𑀣𑀸𑀘𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀢𑀸𑀢, 𑀉𑀬𑁆𑀬𑀸𑀦𑀤𑀲𑁆𑀲𑀦𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀳𑀢𑁆𑀣𑀺𑀬𑀸𑀦𑀸𑀦𑀺 𑀓𑀧𑁆𑀧𑀸𑀧𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀧𑀝𑀺𑀲𑀼𑀡𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀓𑀧𑁆𑀧𑀸𑀧𑁂𑀲𑀺. 𑀅𑀣 𑀯𑀺𑀲𑁆𑀲𑀓𑀫𑁆𑀫𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀦𑀸𑀦𑀸𑀯𑀺𑀭𑀸𑀕𑀯𑀲𑀦𑀦𑀺𑀯𑀸𑀲𑀦𑀁 𑀆𑀫𑀼𑀓𑁆𑀓𑀫𑀼𑀢𑁆𑀢𑀸𑀳𑀸𑀭𑀓𑁂𑀬𑀽𑀭𑀁 𑀭𑀼𑀘𑀺𑀭𑀦𑀯𑀓𑀦𑀓𑀓𑀝𑀓𑀫𑀓𑀼𑀝𑀓𑀼𑀡𑁆𑀟𑀮𑀥𑀭𑀁 𑀧𑀭𑀫𑀲𑀼𑀭𑀪𑀺𑀓𑀼𑀲𑀼𑀫𑀫𑀸𑀮𑀲𑀫𑀮𑀗𑁆𑀓𑀢𑀲𑀺𑀭𑁄𑀭𑀼𑀳𑀁 𑀲𑀫𑀮𑀗𑁆𑀓𑀭𑀺 𑀓𑀺𑀭. 𑀅𑀣 𑀤𑀻𑀧𑀗𑁆𑀓𑀭𑀓𑀼𑀫𑀸𑀭𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀘𑀢𑀼𑀭𑀸𑀲𑀻𑀢𑀺𑀬𑀸 𑀳𑀢𑁆𑀣𑀺𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀭𑀢𑀺𑀚𑀦𑀦𑀁 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳 𑀢𑀁 𑀉𑀬𑁆𑀬𑀸𑀦𑀫𑀦𑀼𑀲𑀜𑁆𑀘𑀭𑀺𑀢𑁆𑀯𑀸 𑀧𑀭𑀫𑀭𑀼𑀘𑀺𑀭𑀤𑀲𑁆𑀲𑀦𑁂 𑀲𑀓𑀳𑀤𑀬𑀲𑀻𑀢𑀮𑁂 𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺 ¶ . 𑀢𑀗𑁆𑀔𑀡𑀜𑁆𑀜𑁂𑀯 𑀲𑀼𑀤𑁆𑀥𑀸𑀯𑀸𑀲𑀔𑀻𑀡𑀸𑀲𑀯𑁄 𑀫𑀳𑀸𑀩𑁆𑀭𑀳𑁆𑀫𑀸 𑀅𑀝𑁆𑀞 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀆𑀤𑀸𑀬 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀓𑁆𑀔𑀼𑀧𑀣𑁂 𑀧𑀸𑀢𑀼𑀭𑀳𑁄𑀲𑀺.

𑀫𑀳𑀸𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 𑁋 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀲𑀫𑀡𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀲𑀼𑀢𑁆𑀯𑀸 𑀅𑀮𑀗𑁆𑀓𑀸𑀭𑀪𑀡𑁆𑀟𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀧𑀲𑀸𑀥𑀦𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀫𑀗𑁆𑀕𑀮𑀔𑀕𑁆𑀕𑀫𑀸𑀤𑀸𑀬 𑀲𑀤𑁆𑀥𑀺𑀁 𑀫𑀓𑀼𑀝𑁂𑀦 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑀮𑀺𑀓𑁆𑀔𑁂 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂𑀦 𑀢𑀁 𑀓𑁂𑀲𑀫𑀓𑀼𑀝𑀁 𑀆𑀤𑀸𑀬 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁 𑀫𑀓𑀼𑀝𑀘𑁂𑀢𑀺𑀬𑀁 𑀦𑀸𑀫 𑀅𑀓𑀸𑀲𑀺. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑀺𑀬𑀁 𑀅𑀭𑀳𑀢𑁆𑀢𑀥𑀚𑀁 𑀓𑀸𑀲𑀸𑀯𑀁 𑀧𑀭𑀺𑀤𑀳𑀺𑀢𑁆𑀯𑀸 𑀲𑀸𑀝𑀓𑀬𑀼𑀕𑀁 𑀆𑀓𑀸𑀲𑁂 𑀔𑀺𑀧𑀺. 𑀢𑀁 𑀩𑁆𑀭𑀳𑁆𑀫𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀲𑀩𑁆𑀩𑀭𑀢𑀦𑀫𑀬𑀁 𑀘𑁂𑀢𑀺𑀬𑀫𑀓𑀸𑀲𑀺. 𑀤𑀻𑀧𑀗𑁆𑀓𑀭𑀓𑀼𑀫𑀸𑀭𑀁 𑀧𑀦 𑀧𑀩𑁆𑀩𑀚𑀦𑁆𑀢𑀁 𑀏𑀓𑀸 𑀧𑀼𑀭𑀺𑀲𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀢𑀸𑀬 𑀧𑀦 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑀲 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀅𑀘𑀭𑀺. 𑀅𑀣 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀅𑀜𑁆𑀜𑀢𑀭𑀁 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀢𑀲𑁆𑀫𑀺𑀁 𑀓𑀺𑀭 𑀦𑀕𑀭𑁂 𑀢𑀁𑀤𑀺𑀯𑀲𑀁 𑀤𑁂𑀯𑀢𑀸𑀦𑀁 𑀩𑀮𑀺𑀓𑀭𑀡𑀢𑁆𑀣𑀸𑀬 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀘𑀺𑀁𑀲𑀼. 𑀢𑀲𑁆𑀲 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀲𑀧𑀭𑀺𑀲𑀲𑁆𑀲 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀫𑀦𑀼𑀲𑁆𑀲𑀸 𑀅𑀤𑀁𑀲𑀼. 𑀢𑀁 𑀓𑀺𑀭 𑀲𑀩𑁆𑀩𑁂𑀲𑀁 𑀓𑁄𑀝𑀺𑀲𑀗𑁆𑀔𑁆𑀬𑀸𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀬𑀢𑁆𑀢𑀁 𑀅𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀧𑀢𑁆𑀢𑁂 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 ¶ 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀸𑀬 𑀕𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀼𑀦𑀦𑁆𑀤𑁂𑀦 𑀦𑀸𑀫𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 ¶ 𑀧𑀺𑀧𑁆𑀨𑀮𑀺𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀦𑀯𑀼𑀢𑀺𑀳𑀢𑁆𑀣𑀁 𑀩𑁄𑀥𑀺𑀓𑁆𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺.

𑀢𑀢𑁄 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀬𑀸𑀯 𑀕𑁄𑀢𑁆𑀭𑀪𑀼𑀜𑀸𑀡𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀼𑀡𑁄𑀤𑀬𑁂 𑀅𑀭𑀺𑀬𑀫𑀕𑁆𑀕𑁂𑀦 𑀲𑀓𑀮𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀜𑁆𑀜𑀸𑀬 𑀲𑀼𑀦𑀦𑁆𑀤𑀸𑀭𑀸𑀫𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀓𑁄𑀝𑀺𑀲𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀢𑁆𑀯𑀸 𑀘𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑁄 𑀯𑀺𑀬 𑀥𑀫𑁆𑀫𑀯𑀲𑁆𑀲𑀁 ¶ 𑀯𑀲𑁆𑀲𑁂𑀦𑁆𑀢𑁄 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀭𑁄𑀦𑁆𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀯𑀺𑀘𑀭𑀺.

𑀢𑀤𑀸 𑀓𑀺𑀭 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀦𑁂𑀯 𑀧𑀣𑀯𑀺𑀓𑀫𑁆𑀧𑀦𑀫𑀤𑁆𑀤𑀲 𑀦 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩𑁪.

‘‘𑀏𑀯𑀁 𑀫𑁂 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀲𑁆𑀲, 𑀯𑀲𑀻𑀪𑀽𑀢𑀲𑁆𑀲 𑀲𑀸𑀲𑀦𑁂;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁩𑁫.

‘‘𑀉𑀧𑁆𑀧𑀚𑁆𑀚𑀦𑁆𑀢𑁂 𑀘 𑀚𑀸𑀬𑀦𑁆𑀢𑁂, 𑀩𑀼𑀚𑁆𑀛𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑁂;

𑀘𑀢𑀼𑀭𑁄 𑀦𑀺𑀫𑀺𑀢𑁆𑀢𑁂 𑀦𑀸𑀤𑁆𑀤𑀲𑀁, 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑁄’’𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀺. 𑀫𑁂𑀢𑀺 𑀫𑀫. 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀧𑀜𑁆𑀘𑀸𑀪𑀺𑀜𑁆𑀜𑀸𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀲𑁆𑀲. 𑀯𑀲𑀻𑀪𑀽𑀢𑀲𑁆𑀲𑀸𑀢𑀺 𑀪𑀽𑀢𑀯𑀲𑀺𑀲𑁆𑀲, 𑀘𑀺𑀡𑁆𑀡𑀯𑀲𑀻𑀪𑀸𑀯𑀫𑀼𑀧𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀸𑀲𑀦𑁂𑀢𑀺 𑀯𑀺𑀯𑁂𑀓𑀫𑀸𑀦𑀲𑀸𑀦𑀁 𑀲𑀸𑀲𑀦𑁂, 𑀅𑀦𑀸𑀤𑀭𑀮𑀓𑁆𑀔𑀡𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀚𑀺𑀦𑁄𑀢𑀺 𑀓𑀺𑀮𑁂𑀲𑀸𑀭𑀺𑀚𑀬𑀦𑁂𑀦 𑀚𑀺𑀦𑁄.

𑀉𑀧𑁆𑀧𑀚𑁆𑀚𑀦𑁆𑀢𑁂𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂. 𑀚𑀸𑀬𑀦𑁆𑀢𑁂𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂. 𑀩𑀼𑀚𑁆𑀛𑀦𑁆𑀢𑁂𑀢𑀺 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑁆𑀢𑁂. 𑀥𑀫𑁆𑀫𑀤𑁂𑀲𑀦𑁂𑀢𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂. 𑀘𑀢𑀼𑀭𑁄 ¶ 𑀦𑀺𑀫𑀺𑀢𑁆𑀢𑁂𑀢𑀺 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀤𑀻𑀧𑀗𑁆𑀓𑀭𑀲𑁆𑀲 𑀤𑀲𑀩𑀮𑀲𑁆𑀲 𑀧𑀝𑀺𑀲𑀦𑁆𑀥𑀺-𑀚𑀸𑀢𑀺-𑀩𑁄𑀥𑀺-𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀳 𑁋 𑀢𑀸𑀦𑀺 𑀧𑀦 𑀩𑀳𑀽𑀦𑀺 𑀦𑀺𑀫𑀺𑀢𑁆𑀢𑀸𑀦𑀺, 𑀓𑀲𑁆𑀫𑀸 ¶ ‘‘𑀘𑀢𑀼𑀭𑁄 𑀦𑀺𑀫𑀺𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁, 𑀅𑀬𑀼𑀢𑁆𑀢𑀁 𑀦𑀦𑀽𑀢𑀺? 𑀦𑀸𑀬𑀼𑀢𑁆𑀢𑀁, 𑀬𑀤𑀺𑀧𑀺 𑀏𑀢𑀸𑀦𑀺 𑀩𑀳𑀽𑀦𑀺 𑀦𑀺𑀫𑀺𑀢𑁆𑀢𑀸𑀦𑀺, 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀘𑀢𑀼𑀭𑁄 𑀦𑀺𑀫𑀺𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀦𑀸𑀤𑁆𑀤𑀲𑀦𑁆𑀢𑀺 𑀦𑀸𑀤𑁆𑀤𑀲𑀺𑀁. 𑀇𑀤𑀸𑀦𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀅𑀤𑀲𑁆𑀲𑀦𑁂 𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑁄’’𑀢𑀺 𑀆𑀳. 𑀛𑀸𑀦𑀭𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀲𑀼𑀔𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀛𑀸𑀦𑀭𑀢𑀺𑀬𑀸 𑀲𑀫𑀧𑁆𑀧𑀺𑀢𑀢𑁆𑀢𑀸 𑀲𑀫𑀗𑁆𑀕𑀻𑀪𑀽𑀢𑀢𑁆𑀢𑀸 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀦𑀸𑀤𑁆𑀤𑀲𑀦𑁆𑀢𑀺 𑀅𑀢𑁆𑀣𑁄.

𑀅𑀣 𑀢𑀲𑁆𑀫𑀺𑀁 𑀓𑀸𑀮𑁂 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀘𑀢𑀽𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀧𑀭𑀫𑀭𑀫𑁆𑀫𑀁 𑀭𑀫𑁆𑀫𑀁 𑀦𑀸𑀫 𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 ‘‘𑀤𑀻𑀧𑀗𑁆𑀓𑀭𑁄 𑀓𑀺𑀭 𑀤𑀲𑀩𑀮𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 ¶ 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀭𑀫𑁆𑀫𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀧𑁆𑀧𑀺𑀆𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀕𑀳𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀧𑀼𑀧𑁆𑀨𑀥𑀽𑀧𑀕𑀦𑁆𑀥𑀳𑀢𑁆𑀣𑀸 𑀬𑁂𑀦 𑀩𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑀺𑀫𑀥𑀼𑀭𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀤𑀲𑀩𑀮𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀢𑁂 𑀧𑀼𑀦𑀤𑀺𑀯𑀲𑁂 𑀅𑀲𑀤𑀺𑀲𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀯𑀺𑀫𑀮𑀓𑁄𑀫𑀮𑁂𑀳𑀺 𑀦𑀻𑀮𑀼𑀧𑁆𑀧𑀮𑁂𑀳𑀺 𑀙𑀸𑀤𑁂𑀢𑁆𑀯𑀸 𑀘𑀢𑀼𑀚𑁆𑀚𑀸𑀢𑀺𑀕𑀦𑁆𑀥𑁂𑀦 𑀧𑀭𑀺𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀲𑀼𑀭𑀪𑀺𑀓𑀼𑀲𑀼𑀫𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀫𑀡𑁆𑀟𑀧𑀲𑁆𑀲 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀲𑀻𑀢𑀮𑀫𑀥𑀼𑀭𑀯𑀸𑀭𑀺𑀧𑀼𑀡𑁆𑀡𑀸 𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀓𑀤𑀮𑀺𑀧𑀡𑁆𑀡𑁂𑀳𑀺 𑀧𑀺𑀤𑀳𑀺𑀢𑁆𑀯𑀸 𑀫𑀡𑁆𑀟𑀧𑁄𑀧𑀭𑀺 𑀚𑀬𑀲𑀼𑀫𑀦𑀓𑀼𑀲𑀼𑀫𑀲𑀤𑀺𑀲𑀁 𑀧𑀭𑀫𑀭𑀼𑀘𑀺𑀭𑀤𑀲𑁆𑀲𑀦𑀁 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀡𑀺𑀭𑀚𑀢𑀢𑀸𑀭𑀓𑀸𑀳𑀺 𑀭𑀘𑀬𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀥𑀤𑀸𑀫𑀧𑀼𑀧𑁆𑀨𑀤𑀸𑀫𑀧𑀢𑁆𑀢𑀤𑀸𑀫𑀭𑀢𑀦𑀤𑀸𑀫𑀸𑀦𑀺 𑀑𑀮𑀫𑁆𑀩𑁂𑀢𑁆𑀯𑀸 𑀥𑀽𑀧𑁂𑀳𑀺 𑀤𑀼𑀤𑁆𑀤𑀺𑀦𑀁 𑀓𑀢𑁆𑀯𑀸 𑀲𑀓𑀮𑀜𑁆𑀘 𑀢𑀁 𑀭𑀫𑁆𑀫𑀁 𑀭𑀫𑁆𑀫𑀦𑀕𑀭𑀁 𑀲𑀫𑁆𑀫𑀝𑁆𑀞𑀁 𑀲𑀨𑀮𑀓𑀤𑀮𑀺𑀬𑁄 𑀘 𑀧𑀼𑀧𑁆𑀨𑀲𑀫𑀮𑀗𑁆𑀓𑀢𑁂 𑀧𑀼𑀡𑁆𑀡𑀖𑀝𑁂 𑀘 𑀞𑀧𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀸 𑀥𑀚𑀧𑀝𑀸𑀓𑀸𑀬𑁄 𑀘 𑀲𑀫𑀼𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀸𑀯𑀻𑀣𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀸𑀡𑀺𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀦𑁆𑀢𑀸 𑀉𑀤𑀓𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀓𑁆𑀔𑀮𑁆𑀮𑀓𑀫𑁆𑀧𑀺 𑀧𑀣𑀯𑀺𑀁 𑀅𑀲𑀫𑀁 𑀲𑀫𑀁 𑀓𑀢𑁆𑀯𑀸 𑀫𑀼𑀢𑁆𑀢𑀸𑀲𑀤𑀺𑀲𑀸𑀳𑀺 𑀯𑀸𑀮𑀼𑀓𑀸𑀳𑀺 𑀆𑀓𑀺𑀭𑀦𑁆𑀢𑀺, 𑀮𑀸𑀚𑀧𑀜𑁆𑀘𑀫𑁂𑀳𑀺 𑀘 𑀧𑀼𑀧𑁆𑀨𑁂𑀳𑀺 𑀆𑀓𑀺𑀭𑀦𑁆𑀢𑀺, 𑀲𑀨𑀮𑀓𑀤𑀮𑀺𑀓𑀫𑀼𑀓𑁂 𑀘 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺.

𑀅𑀣 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀼𑀫𑁂𑀥𑀢𑀸𑀧𑀲𑁄 𑀅𑀢𑁆𑀢𑀦𑁄 𑀅𑀲𑁆𑀲𑀫𑀧𑀤𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀭𑀫𑁆𑀫𑀦𑀕𑀭𑀯𑀸𑀲𑀻𑀦𑀁 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀭𑀺𑀪𑀸𑀕𑁂𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀢𑁂 𑀳𑀝𑁆𑀞𑀧𑀳𑀝𑁆𑀞𑁂 𑀫𑀕𑁆𑀕𑀁 𑀲𑁄𑀥𑁂𑀦𑁆𑀢𑁂 𑀘 𑀅𑀮𑀗𑁆𑀓𑀭𑁄𑀦𑁆𑀢𑁂 𑀘 𑀤𑀺𑀲𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 ¶ 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀏𑀓𑀫𑀦𑁆𑀢𑁂 ¶ 𑀞𑀢𑁆𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀪𑁄! 𑀓𑀲𑁆𑀲𑀢𑁆𑀣𑀸𑀬 𑀢𑀼𑀫𑁆𑀳𑁂 𑀇𑀫𑀁 𑀫𑀕𑁆𑀕𑀁 𑀲𑁄𑀥𑁂𑀣𑀸’’𑀢𑀺? 𑀢𑁂𑀦 𑀯𑀼𑀢𑁆𑀢𑀁 𑁋

𑁩𑁬.

‘‘𑀧𑀘𑁆𑀘𑀦𑁆𑀢𑀤𑁂𑀲𑀯𑀺𑀲𑀬𑁂, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀢𑀲𑁆𑀲 𑀆𑀕𑀫𑀦𑀁 𑀫𑀕𑁆𑀕𑀁, 𑀲𑁄𑀥𑁂𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

𑁩𑁭.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀲𑁆𑀲𑀫𑀸;

𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁩𑁮.

‘‘𑀯𑁂𑀤𑀚𑀸𑀢𑀁 ¶ 𑀚𑀦𑀁 𑀤𑀺𑀲𑁆𑀯𑀸, 𑀢𑀼𑀝𑁆𑀞𑀳𑀝𑁆𑀞𑀁 𑀧𑀫𑁄𑀤𑀺𑀢𑀁;

𑀑𑀭𑁄𑀳𑀺𑀢𑁆𑀯𑀸𑀦 𑀕𑀕𑀦𑀸, 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑀢𑀸𑀯𑀤𑁂.

𑁩𑁯.

‘‘𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑀼𑀤𑀺𑀢𑁄, 𑀯𑁂𑀤𑀚𑀸𑀢𑁄 𑀫𑀳𑀸𑀚𑀦𑁄;

𑀓𑀲𑁆𑀲 𑀲𑁄𑀥𑀻𑀬𑀢𑀺 𑀫𑀕𑁆𑀕𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦’’𑀦𑁆𑀢𑀺.

𑀢𑀢𑁆𑀣 𑀧𑀘𑁆𑀘𑀦𑁆𑀢𑀤𑁂𑀲𑀯𑀺𑀲𑀬𑁂𑀢𑀺 𑀫𑀚𑁆𑀛𑀺𑀫𑀤𑁂𑀲𑀲𑁆𑀲𑁂𑀯 𑀏𑀓𑀧𑀲𑁆𑀲𑁂 𑀧𑀘𑁆𑀘𑀦𑁆𑀢𑀤𑁂𑀲𑀲𑀜𑁆𑀜𑀺𑀢𑁂 𑀚𑀦𑀧𑀤𑁂. 𑀢𑀲𑁆𑀲 𑀆𑀕𑀫𑀦𑀁 𑀫𑀕𑁆𑀕𑀦𑁆𑀢𑀺 𑀢𑁂𑀦 𑀆𑀕𑀦𑁆𑀢𑀩𑁆𑀩𑀁 𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀅𑀳𑀁 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀅𑀳𑀁 𑀢𑀲𑁆𑀫𑀺𑀁 𑀲𑀫𑀬𑁂, 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀓𑀲𑁆𑀲𑀫𑀸𑀢𑀺 𑀅𑀢𑁆𑀢𑀦𑁄 𑀅𑀲𑁆𑀲𑀫𑀧𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀥𑀼𑀦𑀦𑁆𑀢𑁄𑀢𑀺 𑀑𑀥𑀼𑀦𑀦𑁆𑀢𑁄. ‘‘𑀢𑁂𑀦 𑀲𑀫𑀬𑁂𑀦’’ 𑀘, ‘‘𑀢𑀤𑀸’’ 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀏𑀓𑀢𑁆𑀣𑀢𑁆𑀢𑀸 𑀧𑀼𑀭𑀺𑀫𑀲𑁆𑀲 𑀦𑀺𑀓𑁆𑀔𑀫𑀦𑀓𑀺𑀭𑀺𑀬𑀸𑀬 𑀧𑀘𑁆𑀙𑀺𑀫𑀲𑁆𑀲 𑀘 𑀕𑀫𑀦𑀓𑀺𑀭𑀺𑀬𑀸𑀬 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀇𑀢𑀭𑀣𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸 𑀦 𑀫𑀼𑀘𑁆𑀘𑀢𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂.

𑀯𑁂𑀤𑀚𑀸𑀢𑀦𑁆𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀁. 𑀢𑀼𑀝𑁆𑀞𑀳𑀝𑁆𑀞𑀁 𑀧𑀫𑁄𑀤𑀺𑀢𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀢𑁆𑀣𑀤𑀻𑀧𑀦𑀸𑀦𑀺. 𑀅𑀣 𑀯𑀸 𑀲𑀼𑀔𑁂𑀦 𑀢𑀼𑀝𑁆𑀞𑀁, 𑀧𑀻𑀢𑀺𑀬𑀸 𑀳𑀝𑁆𑀞𑀁, 𑀧𑀸𑀫𑁄𑀚𑁆𑀚𑁂𑀦 𑀧𑀫𑀼𑀤𑀺𑀢𑀁. 𑀑𑀭𑁄𑀳𑀺𑀢𑁆𑀯𑀸𑀦𑀸𑀢𑀺 𑀑𑀢𑀭𑀺𑀢𑁆𑀯𑀸. 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀻𑀢𑀺 𑀫𑀸𑀦𑀼𑀲𑁂 𑀧𑀼𑀘𑁆𑀙𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀸𑀯𑀤𑁂𑀢𑀺 𑀢𑀤𑀸, 𑀢𑀗𑁆𑀔𑀡𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑀼𑀤𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀫𑀳𑀸𑀚𑀦𑁄 𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑁄𑀤𑀺𑀢𑀳𑀤𑀬𑁄 𑀳𑀼𑀢𑁆𑀯𑀸 𑀫𑀕𑁆𑀕𑀁 𑀲𑁄𑀥𑁂𑀢𑀺, 𑀓𑀺𑀁 𑀓𑀸𑀭𑀡𑀸 𑀲𑁄𑀥𑁂𑀢𑀺, 𑀓𑀲𑁆𑀲𑀢𑁆𑀣𑀸𑀬 𑀯𑀸 𑀲𑁄𑀥𑁂𑀢𑀻𑀢𑀺? 𑀏𑀯𑀁 ‘‘𑀲𑁄𑀥𑁂𑀢𑀺’’ 𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀇𑀢𑀭𑀣𑀸 𑀦 𑀬𑀼𑀚𑁆𑀚𑀢𑀺. 𑀲𑁄𑀥𑀻𑀬𑀢𑀻𑀢𑀺 𑀲𑀼𑀤𑁆𑀥𑀪𑀸𑀯𑁄 𑀓𑀭𑀻𑀬𑀢𑀺. 𑀫𑀕𑁆𑀕𑁄 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀦𑁆𑀢𑀺 𑀫𑀕𑁆𑀕𑀲𑁆𑀲𑁂𑀯𑁂𑀢𑀸𑀦𑀺 𑀯𑁂𑀯𑀘𑀦𑀸𑀦𑀺.

𑀏𑀯𑀁 ¶ 𑀢𑁂𑀦 𑀲𑀼𑀫𑁂𑀥𑀢𑀸𑀧𑀲𑁂𑀦 𑀧𑀼𑀝𑁆𑀞𑀸 𑀢𑁂 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂 ¶ 𑀲𑀼𑀫𑁂𑀥, 𑀓𑀺𑀁 𑀦 𑀚𑀸𑀦𑀸𑀣 𑀤𑀻𑀧𑀗𑁆𑀓𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺, 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀢𑀲𑁆𑀲𑁂𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀕𑀫𑀦𑀫𑀕𑁆𑀕𑀁 𑀲𑁄𑀥𑁂𑀫𑀸’’𑀢𑀺. 𑀢𑀢𑁄 𑀢𑀁 𑀲𑀼𑀢𑁆𑀯𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑁄𑀢𑀺 𑀔𑁄 𑀧𑀦𑁂𑀲 𑀖𑁄𑀲𑁄𑀧𑀺 𑀤𑀼𑀮𑁆𑀮𑀪𑁄, 𑀧𑀕𑁂𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀢𑁂𑀦 𑀳𑀺 𑀫𑀬𑀸𑀧𑀺 𑀇𑀫𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀲𑁄𑀥𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑁂 𑀫𑀦𑀼𑀲𑁆𑀲𑁂 ¶ 𑀆𑀳 𑁋 ‘‘𑀲𑀘𑁂, 𑀪𑁄, 𑀢𑀼𑀫𑁆𑀳𑁂 𑀇𑀫𑀁 𑀫𑀕𑁆𑀕𑀁 𑀩𑀼𑀤𑁆𑀥𑀲𑁆𑀲 𑀲𑁄𑀥𑁂𑀣, 𑀫𑀬𑁆𑀳𑀫𑁆𑀧𑀺 𑀏𑀓𑀁 𑀑𑀓𑀸𑀲𑀁 𑀤𑁂𑀣, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀩𑀼𑀤𑁆𑀥𑀲𑁆𑀲 𑀫𑀕𑁆𑀕𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑁋 ‘‘𑀅𑀬𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀚𑀸𑀦𑀫𑀸𑀦𑀸 𑀤𑀼𑀩𑁆𑀩𑀺𑀲𑁄𑀥𑀦𑀁 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀅𑀢𑀺𑀯𑀺𑀬 𑀯𑀺𑀲𑀫𑀁 𑀏𑀓𑀁 𑀑𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋 ‘‘𑀇𑀫𑀁 𑀑𑀓𑀸𑀲𑀁 𑀢𑀼𑀫𑁆𑀳𑁂 𑀲𑁄𑀥𑁂𑀣 𑀅𑀮𑀗𑁆𑀓𑀭𑁄𑀣 𑀘𑀸’’𑀢𑀺 𑀅𑀤𑀁𑀲𑀼. 𑀢𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀦 𑀇𑀫𑀁 𑀑𑀓𑀸𑀲𑀁 𑀇𑀤𑁆𑀥𑀺𑀬𑀸 𑀧𑀭𑀫𑀤𑀲𑁆𑀲𑀦𑀻𑀬𑀁 𑀓𑀸𑀢𑀼𑀁 𑀧𑀳𑁄𑀫𑀺, 𑀏𑀯𑀁 𑀓𑀢𑁂 𑀧𑀦 𑀫𑀁 𑀦 𑀧𑀭𑀺𑀢𑁄𑀲𑁂𑀲𑁆𑀲𑀢𑀺. 𑀅𑀚𑁆𑀚 𑀧𑀦 𑀫𑀬𑀸 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀁𑀲𑀼𑀁 𑀆𑀳𑀭𑀺𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀧𑀽𑀭𑁂𑀢𑀺.

𑀢𑀲𑁆𑀲 𑀧𑀦 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀅𑀲𑁄𑀥𑀺𑀢𑁂 𑀯𑀺𑀧𑁆𑀧𑀓𑀢𑁂𑀬𑁂𑀯 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀓𑀸𑀮𑀫𑀸𑀭𑁄𑀘𑁂𑀲𑀼𑀁 𑁋 ‘‘𑀦𑀺𑀝𑁆𑀞𑀺𑀢𑀁, 𑀪𑀦𑁆𑀢𑁂, 𑀪𑀢𑁆𑀢’’𑀦𑁆𑀢𑀺. 𑀏𑀯𑀁 𑀢𑁂𑀳𑀺 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀤𑀲𑀩𑀮𑁄 𑀚𑀬𑀲𑀼𑀫𑀦𑀓𑀼𑀲𑀼𑀫𑀲𑀤𑀺𑀲𑀯𑀡𑁆𑀡𑀁 𑀤𑀼𑀧𑀝𑁆𑀝𑀘𑀻𑀯𑀭𑀁 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑁂𑀦 𑀚𑀬𑀲𑀼𑀫𑀦𑀓𑀼𑀲𑀼𑀫𑀓𑀮𑀸𑀧𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀯𑀺𑀚𑁆𑀚𑀼𑀮𑀢𑀸𑀲𑀲𑁆𑀲𑀺𑀭𑀺𑀓𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀓𑀦𑀓𑀕𑀺𑀭𑀺𑀲𑀺𑀔𑀭𑀫𑀢𑁆𑀣𑀓𑁂 𑀮𑀸𑀔𑀸𑀭𑀲𑀁 𑀧𑀭𑀺𑀲𑀺𑀜𑁆𑀘𑀦𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀧𑀯𑀸𑀴𑀚𑀸𑀮𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀘 𑀲𑀼𑀯𑀡𑁆𑀡𑀕𑁆𑀖𑀺𑀓𑀁 𑀭𑀢𑁆𑀢𑀓𑀫𑁆𑀩𑀮𑁂𑀦 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀘 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑀁 𑀭𑀢𑁆𑀢𑀯𑀮𑀸𑀳𑀓𑁂𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀯𑀺𑀬 𑀘 𑀮𑀸𑀔𑀸𑀭𑀲𑁂𑀦 𑀢𑀺𑀦𑁆𑀢𑀓𑀺𑀁𑀲𑀼𑀓𑀓𑀼𑀲𑀼𑀫𑀲𑀤𑀺𑀲𑀯𑀡𑁆𑀡𑀁 𑀭𑀢𑁆𑀢𑀯𑀭𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀢𑁄 𑀓𑀜𑁆𑀘𑀦𑀕𑀼𑀳𑀢𑁄 𑀲𑀻𑀳𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀅𑀣 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀢𑁂 𑀧𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸 𑀅𑀳𑁂𑀲𑀼𑀁 𑁋

‘‘𑀅𑀧𑁆𑀧𑀺𑀘𑁆𑀙𑀸 𑀧𑀦 𑀲𑀦𑁆𑀢𑀼𑀝𑁆𑀞𑀸, 𑀯𑀢𑁆𑀢𑀸𑀭𑁄 𑀯𑀘𑀦𑀓𑁆𑀔𑀫𑀸;

𑀧𑀯𑀺𑀯𑀺𑀢𑁆𑀢𑀸 𑀅𑀲𑀁𑀲𑀝𑁆𑀞𑀸, 𑀯𑀺𑀦𑀻𑀢𑀸 𑀧𑀸𑀧𑀕𑀭𑀳𑀺𑀦𑁄.

‘‘𑀲𑀩𑁆𑀩𑁂𑀧𑀺 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑀸;

𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀸, 𑀢𑀺𑀧𑀜𑁆𑀘𑀘𑀭𑀡𑀸𑀬𑀼𑀢𑀸.

‘‘𑀔𑀻𑀡𑀸𑀲𑀯𑀸 ¶ 𑀯𑀲𑀺𑀧𑁆𑀧𑀢𑁆𑀢𑀸, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀤𑀫𑀧𑁆𑀧𑀢𑁆𑀢𑀸, 𑀲𑀼𑀤𑁆𑀥𑀸 𑀔𑀻𑀡𑀧𑀼𑀦𑀩𑁆𑀪𑀯𑀸’’𑀢𑀺.

𑀇𑀢𑀺 ¶ ¶ 𑀪𑀕𑀯𑀸 𑀲𑀬𑀁 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀳𑀺 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑁂𑀳𑀺 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑁂𑀳𑀺 𑀧𑀭𑀺𑀯𑀼𑀢𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀅𑀣 𑀲𑀢𑁆𑀣𑀸 𑀫𑀳𑀸𑀦𑀼𑀪𑀸𑀯𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀙𑀴𑀪𑀺𑀜𑁆𑀜𑀸𑀦𑀁 𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀫𑀭𑀼𑀕𑀡𑀧𑀭𑀺𑀯𑀼𑀢𑁄 𑀤𑀲𑀲𑀢𑀦𑀬𑀦𑁄 𑀯𑀺𑀬 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀼𑀢𑁄 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀬 𑀘 𑀅𑀧𑀭𑀺𑀫𑀺𑀢𑀲𑀫𑀬𑀲𑀫𑀼𑀧𑀘𑀺𑀢𑀓𑀼𑀲𑀮𑀩𑀮𑀚𑀦𑀺𑀢𑀸𑀬 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑁄 𑀯𑀺𑀬 𑀘 𑀕𑀕𑀦𑀢𑀮𑀁 𑀢𑀁 𑀫𑀕𑁆𑀕𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀧𑀝𑀺𑀧𑀚𑁆𑀚𑀺.

‘‘𑀲𑀼𑀯𑀡𑁆𑀡𑀯𑀡𑁆𑀡𑀸𑀬 𑀧𑀪𑀸𑀬 𑀥𑀻𑀭𑁄, 𑀲𑀼𑀯𑀡𑁆𑀡𑀯𑀡𑁆𑀡𑁂 𑀓𑀺𑀭 𑀫𑀕𑁆𑀕𑀭𑀼𑀓𑁆𑀔𑁂;

𑀲𑀼𑀯𑀡𑁆𑀡𑀯𑀡𑁆𑀡𑁂 𑀓𑀼𑀲𑀼𑀫𑁂 𑀓𑀭𑁄𑀦𑁆𑀢𑁄, 𑀲𑀼𑀯𑀡𑁆𑀡𑀯𑀡𑁆𑀡𑁄 𑀧𑀝𑀺𑀧𑀚𑁆𑀚𑀺 𑀫𑀕𑁆𑀕𑀁’’.

𑀲𑀼𑀫𑁂𑀥𑀢𑀸𑀧𑀲𑁄𑀧𑀺 𑀢𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 𑀫𑀕𑁆𑀕𑁂𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑀼𑀭𑀜𑁆𑀚𑀺𑀢𑀁 𑀩𑁆𑀬𑀸𑀫𑀧𑁆𑀧𑀪𑀸𑀬 𑀧𑀭𑀺𑀓𑁆𑀔𑁂𑀧𑀁 𑀲𑀲𑁆𑀲𑀺𑀭𑀺𑀓𑀁 𑀇𑀦𑁆𑀤𑀦𑀻𑀮𑀫𑀡𑀺𑀲𑀤𑀺𑀲𑀁 𑀆𑀓𑀸𑀲𑁂 𑀦𑀸𑀦𑀧𑁆𑀧𑀓𑀸𑀭𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀁 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀚𑁆𑀚 𑀫𑀬𑀸 𑀤𑀲𑀩𑀮𑀲𑁆𑀲 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺, ‘‘𑀫𑀸 𑀪𑀕𑀯𑀸 𑀓𑀮𑀮𑁂 𑀅𑀓𑁆𑀓𑀫𑀺, 𑀫𑀡𑀺𑀫𑀬𑀨𑀮𑀓𑀲𑁂𑀢𑀼𑀁 𑀅𑀓𑁆𑀓𑀫𑀦𑁆𑀢𑁄 𑀯𑀺𑀬 𑀲𑀤𑁆𑀥𑀺𑀁 𑀘𑀢𑀽𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀫𑀫 𑀧𑀺𑀝𑁆𑀞𑀺𑀁 𑀅𑀓𑁆𑀓𑀫𑀦𑁆𑀢𑁄 𑀕𑀘𑁆𑀙𑀢𑀼, 𑀢𑀁 𑀫𑁂 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀓𑁂𑀲𑁂 𑀫𑁄𑀘𑁂𑀢𑁆𑀯𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀸𑀦𑀺 𑀓𑀸𑀴𑀯𑀡𑁆𑀡𑁂 𑀓𑀮𑀮𑁂 𑀧𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁦.

‘‘𑀢𑁂 𑀫𑁂 𑀧𑀼𑀝𑁆𑀞𑀸 𑀯𑀺𑀬𑀸𑀓𑀁𑀲𑀼, 𑀩𑀼𑀤𑁆𑀥𑁄 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲 𑀲𑁄𑀥𑀻𑀬𑀢𑀺 𑀫𑀕𑁆𑀕𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁.

𑁪𑁧.

‘‘𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀦, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂;

𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀓𑀣𑀬𑀦𑁆𑀢𑁄, 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺𑀁.

𑁪𑁨.

‘‘𑀢𑀢𑁆𑀣 ¶ ¶ 𑀞𑀢𑁆𑀯𑀸 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀢𑀼𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀇𑀥 𑀩𑀻𑀚𑀸𑀦𑀺 𑀭𑁄𑀧𑀺𑀲𑁆𑀲𑀁, 𑀔𑀡𑁄 𑀯𑁂 𑀫𑀸 𑀉𑀧𑀘𑁆𑀘𑀕𑀸.

𑁪𑁩.

‘‘𑀬𑀤𑀺 𑀩𑀼𑀤𑁆𑀥𑀲𑁆𑀲 𑀲𑁄𑀥𑁂𑀣, 𑀏𑀓𑁄𑀓𑀸𑀲𑀁 𑀤𑀤𑀸𑀣 𑀫𑁂;

𑀅𑀳𑀫𑁆𑀧𑀺 𑀲𑁄𑀥𑀬𑀺𑀲𑁆𑀲𑀸𑀫𑀺, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁.

𑁪𑁪.

‘‘𑀅𑀤𑀁𑀲𑀼 ¶ 𑀢𑁂 𑀫𑀫𑁄𑀓𑀸𑀲𑀁, 𑀲𑁄𑀥𑁂𑀢𑀼𑀁 𑀅𑀜𑁆𑀚𑀲𑀁 𑀢𑀤𑀸;

𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, 𑀫𑀕𑁆𑀕𑀁 𑀲𑁄𑀥𑁂𑀫𑀳𑀁 𑀢𑀤𑀸.

𑁪𑁫.

‘‘𑀅𑀦𑀺𑀝𑁆𑀞𑀺𑀢𑁂 𑀫𑀫𑁄𑀓𑀸𑀲𑁂, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀢𑀸𑀤𑀺𑀳𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀧𑀝𑀺𑀧𑀚𑁆𑀚𑀺 𑀅𑀜𑁆𑀚𑀲𑀁 𑀚𑀺𑀦𑁄.

𑁪𑁬.

‘‘𑀧𑀘𑁆𑀘𑀼𑀕𑁆𑀕𑀫𑀦𑀸 𑀯𑀢𑁆𑀢𑀦𑁆𑀢𑀺, 𑀯𑀚𑁆𑀚𑀦𑁆𑀢𑀺 𑀪𑁂𑀭𑀺𑀬𑁄 𑀩𑀳𑀽;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀼𑀁.

𑁪𑁭.

‘‘𑀤𑁂𑀯𑀸 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀘 𑀤𑁂𑀯𑀢𑀸;

𑀉𑀪𑁄𑀧𑀺 𑀢𑁂 𑀧𑀜𑁆𑀚𑀮𑀺𑀓𑀸, 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀁.

𑁪𑁮.

‘‘𑀤𑁂𑀯𑀸 𑀤𑀺𑀩𑁆𑀩𑁂𑀳𑀺 𑀢𑀼𑀭𑀺𑀬𑁂𑀳𑀺, 𑀫𑀦𑀼𑀲𑁆𑀲𑀸 𑀫𑀸𑀦𑀼𑀲𑁂𑀳𑀺 𑀘;

𑀉𑀪𑁄𑀧𑀺 𑀢𑁂 𑀯𑀚𑁆𑀚𑀬𑀦𑁆𑀢𑀸, 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀁.

𑁪𑁯.

‘‘𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀤𑀺𑀲𑁄𑀤𑀺𑀲𑀁 𑀑𑀓𑀺𑀭𑀦𑁆𑀢𑀺, 𑀆𑀓𑀸𑀲𑀦𑀪𑀕𑀢𑀸 𑀫𑀭𑀽.

𑁫𑁦.

‘‘𑀤𑀺𑀩𑁆𑀩𑀁 𑀘𑀦𑁆𑀤𑀦𑀘𑀼𑀡𑁆𑀡𑀜𑁆𑀘, 𑀯𑀭𑀕𑀦𑁆𑀥𑀜𑁆𑀘 𑀓𑁂𑀯𑀮𑀁;

𑀤𑀺𑀲𑁄𑀤𑀺𑀲𑀁 𑀑𑀓𑀺𑀭𑀦𑁆𑀢𑀺, 𑀆𑀓𑀸𑀲𑀦𑀪𑀕𑀢𑀸 𑀫𑀭𑀽.

𑁫𑁧.

‘‘𑀘𑀫𑁆𑀧𑀓𑀁 𑀲𑀭𑀮𑀁 𑀦𑀻𑀧𑀁, 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀮𑀁;

𑀤𑀺𑀲𑁄𑀤𑀺𑀲𑀁 𑀉𑀓𑁆𑀔𑀺𑀧𑀦𑁆𑀢𑀺, 𑀪𑀽𑀫𑀺𑀢𑀮𑀕𑀢𑀸 𑀦𑀭𑀸.

𑁫𑁨.

‘‘𑀓𑁂𑀲𑁂 ¶ 𑀫𑀼𑀜𑁆𑀘𑀺𑀢𑁆𑀯𑀸𑀳𑀁 𑀢𑀢𑁆𑀣, 𑀯𑀸𑀓𑀘𑀻𑀭𑀜𑁆𑀘 𑀘𑀫𑁆𑀫𑀓𑀁;

𑀓𑀮𑀮𑁂 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀅𑀯𑀓𑀼𑀚𑁆𑀚𑁄 𑀦𑀺𑀧𑀚𑁆𑀚𑀳𑀁.

𑁫𑁩.

‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀫𑀁 𑀩𑀼𑀤𑁆𑀥𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀕𑀘𑁆𑀙𑀢𑀼;

𑀫𑀸 𑀦𑀁 𑀓𑀮𑀮𑁂 𑀅𑀓𑁆𑀓𑀫𑀺𑀢𑁆𑀣, 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀯𑀺𑀬𑀸𑀓𑀁𑀲𑀽𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. ‘‘𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀢𑀲𑁆𑀲 𑀲𑁄𑀥𑀻𑀬𑀢𑀺 𑀧𑀣𑁄’’𑀢𑀺𑀧𑀺 𑀧𑀸𑀞𑁄. 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺𑀦𑁆𑀢𑀺 𑀲𑁄𑀫𑀦𑀲𑁆𑀲𑀫𑀦𑀼𑀪𑀯𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀞𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀆𑀓𑀸𑀲𑀢𑁄 𑀑𑀢𑀭𑀺, 𑀢𑀢𑁆𑀣𑁂𑀯 𑀞𑀢𑁆𑀯𑀸. 𑀲𑀁𑀯𑀺𑀕𑁆𑀕𑀫𑀸𑀦𑀲𑁄𑀢𑀺 𑀧𑀻𑀢𑀺𑀯𑀺𑀫𑁆𑀳𑀺𑀢𑀫𑀸𑀦𑀲𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀤𑀻𑀧𑀗𑁆𑀓𑀭𑁂 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂. 𑀩𑀻𑀚𑀸𑀦𑀻𑀢𑀺 𑀓𑀼𑀲𑀮𑀩𑀻𑀚𑀸𑀦𑀺. 𑀭𑁄𑀧𑀺𑀲𑁆𑀲𑀦𑁆𑀢𑀺 𑀭𑁄𑀧𑀺𑀲𑁆𑀲𑀸𑀫𑀺. 𑀔𑀡𑁄𑀢𑀺 𑀅𑀝𑁆𑀞𑀓𑁆𑀔𑀡𑀯𑀺𑀭𑀳𑀺𑀢𑁄 𑀦𑀯𑀫𑁄 𑀔𑀡𑀲𑀦𑁆𑀦𑀺𑀧𑀸𑀢𑁄. 𑀅𑀢𑀺𑀤𑀼𑀮𑁆𑀮𑀪𑁄 𑀲𑁄 𑀫𑀬𑀸 𑀧𑀝𑀺𑀮𑀤𑁆𑀥𑁄. 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀫𑀸 𑀉𑀧𑀘𑁆𑀘𑀕𑀸𑀢𑀺 𑀲𑁄 𑀫𑀸 𑀅𑀘𑁆𑀘𑀕𑀫𑀸, 𑀫𑀸 𑀅𑀢𑀺𑀓𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀤𑀤𑀸𑀣𑀸𑀢𑀺 ¶ 𑀤𑁂𑀣. 𑀢𑁂𑀢𑀺 𑀬𑁂 𑀫𑁂 𑀧𑀼𑀝𑁆𑀞𑀸 𑀫𑀦𑀼𑀲𑁆𑀲𑀸, 𑀢𑁂𑀢𑀺 𑀅𑀢𑁆𑀣𑁄. 𑀲𑁄𑀥𑁂𑀫𑀳𑀁 𑀢𑀤𑀸𑀢𑀺 𑀲𑁄𑀥𑁂𑀫𑀺 𑀅𑀳𑀁 𑀢𑀤𑀸. 𑀅𑀦𑀺𑀝𑁆𑀞𑀺𑀢𑁂𑀢𑀺 𑀅𑀧𑀭𑀺𑀬𑁄𑀲𑀺𑀢𑁂 𑀯𑀺𑀧𑁆𑀧𑀓𑀢𑁂. 𑀔𑀻𑀡𑀸𑀲𑀯𑁂𑀳𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 (𑀘𑀽𑀴𑀦𑀺. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁯) 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀬𑁂𑀲𑀁 𑀔𑀻𑀡𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀢𑁂 𑀔𑀻𑀡𑀸𑀲𑀯𑀸, 𑀢𑁂𑀳𑀺 𑀔𑀻𑀡𑀸𑀲𑀯𑁂𑀳𑀺. 𑀔𑀻𑀡𑀸𑀲𑀯𑀢𑁆𑀢𑀸𑀬𑁂𑀯 𑀯𑀺𑀫𑀮𑁂𑀳𑀺.

𑀤𑁂𑀯𑀸 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀤𑀲𑁆𑀲𑀦𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀧𑀓𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀦 𑀬𑀣𑀸 𑀫𑀦𑀼𑀲𑁆𑀲𑀸 𑀇𑀥 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀯𑀢𑀸𑀢𑀺 𑀤𑁂𑀯𑁂. 𑀉𑀪𑁄𑀧𑀻𑀢𑀺 𑀉𑀪𑁄 𑀤𑁂𑀯𑀫𑀦𑀼𑀲𑁆𑀲𑀸. 𑀧𑀜𑁆𑀚𑀮𑀺𑀓𑀸𑀢𑀺 𑀓𑀢𑀧𑀜𑁆𑀚𑀮𑀺𑀓𑀸, 𑀉𑀪𑁄𑀧𑀺 𑀳𑀢𑁆𑀣𑁂 𑀲𑀺𑀭𑀲𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀘𑁆𑀙𑀢𑁄 𑀬𑀦𑁆𑀢𑀺, 𑀅𑀦𑀼𑀬𑁄𑀕𑁂 𑀲𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀳𑁄𑀢𑀻𑀢𑀺 𑀮𑀓𑁆𑀔𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀬𑀦𑁆𑀢𑀺 𑀢𑀣𑀸𑀕𑀢’’𑀦𑁆𑀢𑀺. 𑀯𑀚𑁆𑀚𑀬𑀦𑁆𑀢𑀸𑀢𑀺 𑀯𑀸𑀤𑁂𑀦𑁆𑀢𑀸.

𑀫𑀦𑁆𑀤𑀸𑀭𑀯𑀦𑁆𑀢𑀺 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁. 𑀤𑀺𑀲𑁄𑀤𑀺𑀲𑀦𑁆𑀢𑀺 𑀤𑀺𑀲𑀢𑁄 𑀤𑀺𑀲𑀢𑁄. 𑀑𑀓𑀺𑀭𑀦𑁆𑀢𑀻𑀢𑀺 𑀅𑀯𑀓𑀺𑀭𑀦𑁆𑀢𑀺. 𑀆𑀓𑀸𑀲𑀦𑀪𑀕𑀢𑀸𑀢𑀺 𑀆𑀓𑀸𑀲𑀲𑀗𑁆𑀔𑀸𑀢𑁂 𑀦𑀪𑀲𑀺 𑀕𑀢𑀸. 𑀅𑀣 𑀯𑀸 𑀆𑀓𑀸𑀲𑀁 𑀕𑀢𑀸 𑀲𑀕𑁆𑀕𑀕𑀢𑀸𑀯. ‘‘𑀦𑀪𑁄’’𑀢𑀺 𑀳𑀺 𑀲𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀫𑀭𑀽𑀢𑀺 𑀅𑀫𑀭𑀸. 𑀲𑀭𑀮𑀦𑁆𑀢𑀺 𑀲𑀭𑀮𑀢𑀭𑀼𑀓𑀼𑀲𑀼𑀫𑀁. 𑀦𑀻𑀧𑀦𑁆𑀢𑀺 𑀓𑀤𑀫𑁆𑀩𑀧𑀼𑀧𑁆𑀨𑀁. 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀦𑁆𑀢𑀺 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀧𑀼𑀧𑁆𑀨𑀸𑀦𑀺 𑀘. 𑀪𑀽𑀫𑀺𑀢𑀮𑀕𑀢𑀸𑀢𑀺 𑀪𑀽𑀫𑀺𑀕𑀢𑀸.

𑀓𑁂𑀲𑁂 ¶ 𑀫𑀼𑀜𑁆𑀘𑀺𑀢𑁆𑀯𑀸𑀳𑀦𑁆𑀢𑀺 𑀅𑀳𑀁 𑀓𑁂𑀲𑁂 𑀩𑀤𑁆𑀥𑀸 𑀓𑀮𑀸𑀧𑀓𑀼𑀝𑀺𑀮𑀚𑀝𑀸 𑀫𑀼𑀜𑁆𑀘𑀺𑀢𑁆𑀯𑀸, 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀫𑀬𑁆𑀳𑀁 𑀤𑀺𑀦𑁆𑀦𑁂 𑀑𑀓𑀸𑀲𑁂. 𑀘𑀫𑁆𑀫𑀓𑀦𑁆𑀢𑀺 𑀘𑀫𑁆𑀫𑀓𑁆𑀔𑀡𑁆𑀟𑀁. 𑀓𑀮𑀮𑁂𑀢𑀺 𑀘𑀺𑀓𑁆𑀔𑀮𑁆𑀮𑀓𑀤𑁆𑀤𑀫𑁂. 𑀅𑀯𑀓𑀼𑀚𑁆𑀚𑁄𑀢𑀺 𑀅𑀥𑁄𑀫𑀼𑀔𑁄 𑀳𑀼𑀢𑁆𑀯𑀸. 𑀦𑀺𑀧𑀚𑁆𑀚𑀳𑀦𑁆𑀢𑀺 𑀦𑀺𑀧𑀚𑁆𑀚𑀺𑀁 ¶ 𑀅𑀳𑀁. 𑀫𑀸 𑀦𑀦𑁆𑀢𑀺 𑀏𑀢𑁆𑀣 𑀫𑀸𑀢𑀺 𑀧𑀝𑀺𑀲𑁂𑀥𑀢𑁆𑀣𑁂 𑀦𑀺𑀧𑀸𑀢𑁄. 𑀦𑀦𑁆𑀢𑀺 𑀧𑀤𑀧𑀽𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀩𑀼𑀤𑁆𑀥𑁄 𑀓𑀮𑀮𑁂 𑀫𑀸 𑀅𑀓𑁆𑀓𑀫𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀢𑀁 𑀓𑀮𑀮𑁂 𑀅𑀦𑀓𑁆𑀓𑀫𑀦𑀁 𑀤𑀻𑀖𑀭𑀢𑁆𑀢𑀁 𑀫𑀫 𑀳𑀺𑀢𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀻𑀢𑀺. ‘‘𑀲𑀼𑀔𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺𑀧𑀺 𑀧𑀸𑀞𑁄.

𑀢𑀢𑁄 ¶ 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀘𑁆𑀙𑁂𑀬𑁆𑀬𑀁 𑀲𑀩𑁆𑀩𑀓𑀺𑀮𑁂𑀲𑁂 𑀛𑀸𑀧𑁂𑀢𑁆𑀯𑀸 𑀲𑀗𑁆𑀖𑀦𑀯𑀓𑁄 𑀳𑀼𑀢𑁆𑀯𑀸 𑀭𑀫𑁆𑀫𑀦𑀕𑀭𑀁 𑀧𑀯𑀺𑀲𑁂𑀬𑁆𑀬𑀁, 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀦 𑀫𑁂 𑀓𑀺𑀮𑁂𑀲𑁂 𑀛𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀯𑀺𑀬 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀥𑀫𑁆𑀫𑀦𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀁𑀲𑀸𑀭𑀲𑀸𑀕𑀭𑀸 𑀉𑀢𑁆𑀢𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀁, 𑀇𑀤𑀁 𑀫𑁂 𑀧𑀢𑀺𑀭𑀽𑀧’’𑀦𑁆𑀢𑀺. 𑀢𑀢𑁄 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫𑁪.

‘‘𑀧𑀣𑀯𑀺𑀬𑀁 𑀦𑀺𑀧𑀦𑁆𑀦𑀲𑁆𑀲, 𑀏𑀯𑀁 𑀫𑁂 𑀆𑀲𑀺 𑀘𑁂𑀢𑀲𑁄;

𑀇𑀘𑁆𑀙𑀫𑀸𑀦𑁄 𑀅𑀳𑀁 𑀅𑀚𑁆𑀚, 𑀓𑀺𑀮𑁂𑀲𑁂 𑀛𑀸𑀧𑀬𑁂 𑀫𑀫.

𑁫𑁫.

‘‘𑀓𑀺𑀁 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀩𑀼𑀤𑁆𑀥𑁄 𑀳𑁂𑀲𑁆𑀲𑀁 𑀲𑀤𑁂𑀯𑀓𑁂.

𑁫𑁬.

‘‘𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀧𑀼𑀭𑀺𑀲𑁂𑀦 𑀣𑀸𑀫𑀤𑀲𑁆𑀲𑀺𑀦𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓𑀁.

𑁫𑁭.

‘‘𑀇𑀫𑀺𑀦𑀸 𑀫𑁂 𑀅𑀥𑀺𑀓𑀸𑀭𑁂𑀦, 𑀓𑀢𑁂𑀦 𑀧𑀼𑀭𑀺𑀲𑀼𑀢𑁆𑀢𑀫𑁂;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑁂𑀫𑀺 𑀚𑀦𑀢𑀁 𑀩𑀳𑀼𑀁.

𑁫𑁮.

‘‘𑀲𑀁𑀲𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀼𑀬𑁆𑀳, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺.

𑀢𑀢𑁆𑀣 𑀧𑀣𑀯𑀺𑀬𑀁 𑀦𑀺𑀧𑀦𑁆𑀦𑀲𑁆𑀲𑀸𑀢𑀺 𑀧𑀼𑀣𑀯𑀺𑀬𑀸 𑀦𑀺𑀧𑀦𑁆𑀦𑀲𑁆𑀲. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀘𑁂𑀢𑀲𑁄𑀢𑀺 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 ¶ 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. ‘‘𑀏𑀯𑀁 𑀫𑁂 𑀆𑀲𑀺 𑀘𑁂𑀢𑀦𑀸’’𑀢𑀺𑀧𑀺 𑀧𑀸𑀞𑁄. 𑀇𑀘𑁆𑀙𑀫𑀸𑀦𑁄𑀢𑀺 𑀆𑀓𑀗𑁆𑀔𑀫𑀸𑀦𑁄. 𑀓𑀺𑀮𑁂𑀲𑁂𑀢𑀺 𑀓𑀺𑀮𑀺𑀲𑁆𑀲𑀦𑁆𑀢𑀺 𑀉𑀧𑀢𑀸𑀧𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀸, 𑀭𑀸𑀕𑀸𑀤𑀬𑁄 𑀤𑀲. 𑀛𑀸𑀧𑀬𑁂𑀢𑀺 𑀛𑀸𑀧𑁂𑀬𑁆𑀬𑀁, 𑀫𑀫 𑀓𑀺𑀮𑁂𑀲𑁂 𑀛𑀸𑀧𑀬𑁂 𑀅𑀳𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀅𑀜𑁆𑀜𑀸𑀢𑀯𑁂𑀲𑁂𑀦𑀸𑀢𑀺 𑀅𑀧𑀸𑀓𑀝𑀯𑁂𑀲𑁂𑀦, 𑀅𑀯𑀺𑀜𑁆𑀜𑀸𑀢𑁂𑀦 𑀧𑀝𑀺𑀘𑁆𑀙𑀦𑁆𑀦𑁂𑀦. 𑀇𑀥 𑀧𑀦 𑀪𑀺𑀓𑁆𑀔𑀽 𑀯𑀺𑀬 𑀆𑀲𑀯𑀓𑁆𑀔𑀬𑀁 𑀓𑀢𑁆𑀯𑀸 𑀓𑀺𑀁, 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂 ¶ 𑀧𑀽𑀭𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀚𑀸𑀢𑀺𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀲𑀼 𑀫𑀳𑀸𑀧𑀣𑀯𑀺𑀓𑀫𑁆𑀧𑀦𑀁 𑀓𑀢𑁆𑀯𑀸 𑀩𑀼𑀤𑁆𑀥𑁄 𑀩𑁄𑀥𑁂𑀢𑀸, 𑀢𑀺𑀡𑁆𑀡𑁄 𑀢𑀸𑀭𑁂𑀢𑀸, 𑀫𑀼𑀢𑁆𑀢𑁄 𑀫𑁄𑀘𑁂𑀢𑀸 𑀪𑀯𑁂𑀬𑁆𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀤𑁂𑀯𑀓𑁂𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂.

𑀣𑀸𑀫𑀤𑀲𑁆𑀲𑀺𑀦𑀸𑀢𑀺 𑀅𑀢𑁆𑀢𑀦𑁄 𑀣𑀸𑀫𑀩𑀮𑀁 𑀧𑀲𑁆𑀲𑀫𑀸𑀦𑁂𑀦. 𑀲𑀦𑁆𑀢𑀸𑀭𑁂𑀲𑁆𑀲𑀦𑁆𑀢𑀺 𑀲𑀦𑁆𑀢𑀸𑀭𑁂𑀲𑁆𑀲𑀸𑀫𑀺. 𑀲𑀤𑁂𑀯𑀓𑀦𑁆𑀢𑀺 ¶ 𑀲𑀤𑁂𑀯𑀓𑀁 𑀲𑀢𑁆𑀢𑀦𑀺𑀓𑀸𑀬𑀁, 𑀲𑀤𑁂𑀯𑀓𑀁 𑀮𑁄𑀓𑀁 𑀯𑀸. 𑀅𑀥𑀺𑀓𑀸𑀭𑁂𑀦𑀸𑀢𑀺 𑀅𑀥𑀺𑀯𑀺𑀲𑀺𑀝𑁆𑀞𑁂𑀦 𑀓𑀸𑀭𑁂𑀦, 𑀩𑀼𑀤𑁆𑀥𑀲𑁆𑀲 𑀫𑀫 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑀮𑀮𑀧𑀺𑀝𑁆𑀞𑁂 𑀲𑀬𑀦𑁂𑀦𑀸𑀥𑀺𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀲𑀁𑀲𑀸𑀭𑀲𑁄𑀢𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀦𑀯𑀲𑀢𑁆𑀢𑀸𑀯𑀸𑀲𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀭𑀡𑀁 𑀲𑀁𑀲𑀸𑀭𑁄. 𑀬𑀣𑀸𑀳 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦𑀜𑁆𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀧𑀤𑀦𑀺𑀤𑁆𑀤𑁂𑀲; 𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁩; 𑀉𑀤𑀸. 𑀅𑀝𑁆𑀞. 𑁩𑁯; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪, 𑁫𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁬𑁭, 𑁯𑁯; 𑀘𑀽𑀴𑀦𑀺. 𑀅𑀝𑁆𑀞. 𑁬; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁭);

𑀲𑀁𑀲𑀸𑀭𑁄 𑀘 𑀲𑁄 𑀲𑁄𑀢𑀁 𑀘𑁂𑀢𑀺 𑀲𑀁𑀲𑀸𑀭𑀲𑁄𑀢𑀁, 𑀢𑀁 𑀲𑀁𑀲𑀸𑀭𑀲𑁄𑀢𑀁. 𑀅𑀣 𑀯𑀸 𑀲𑀁𑀲𑀸𑀭𑀲𑁆𑀲 𑀲𑁄𑀢𑀁 𑀲𑀁𑀲𑀸𑀭𑀲𑁄𑀢𑀁, 𑀲𑀁𑀲𑀸𑀭𑀓𑀸𑀭𑀡𑀁 𑀢𑀡𑁆𑀳𑀸𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀬𑁄 𑀪𑀯𑁂𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂. 𑀢𑀺𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀓𑀺𑀮𑁂𑀲𑀸 𑀢𑀬𑁄 𑀪𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀥𑀫𑁆𑀫𑀦𑀸𑀯𑀦𑁆𑀢𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁. 𑀲𑁄 𑀳𑀺 𑀘𑀢𑀼𑀭𑁄𑀖𑀼𑀢𑁆𑀢𑀭𑀡𑀝𑁆𑀞𑁂𑀦 ‘‘𑀥𑀫𑁆𑀫𑀦𑀸𑀯𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀸𑀭𑀼𑀬𑁆𑀳𑀸𑀢𑀺 𑀆𑀭𑀼𑀬𑁆𑀳. 𑀲𑀦𑁆𑀢𑀸𑀭𑁂𑀲𑁆𑀲𑀦𑁆𑀢𑀺 𑀲𑀦𑁆𑀢𑀸𑀭𑁂𑀲𑁆𑀲𑀸𑀫𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑁋

𑁫𑁯.

‘‘𑀫𑀦𑀼𑀲𑁆𑀲𑀢𑁆𑀢𑀁 ¶ 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀺’’.

𑀢𑀢𑁆𑀣 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂𑀬𑁂𑀯 𑀞𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀦𑀸𑀕𑀚𑀸𑀢𑀺𑀆𑀤𑀻𑀲𑀼 𑀞𑀺𑀢𑀸𑀦𑀁. 𑀓𑀲𑁆𑀫𑀸𑀢𑀺 𑀘𑁂? 𑀅𑀳𑁂𑀢𑀼𑀓𑀪𑀸𑀯𑀢𑁄.

𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀧𑀼𑀭𑀺𑀲𑀮𑀺𑀗𑁆𑀕𑁂 𑀞𑀺𑀢𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑁆𑀣𑀺𑀬𑀸 𑀯𑀸 𑀧𑀡𑁆𑀟𑀓𑀦𑀧𑀼𑀁𑀲𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀯𑀸 𑀲𑀫𑀺𑀚𑁆𑀛𑀢𑀺 ¶ . 𑀓𑀲𑁆𑀫𑀸𑀢𑀺 𑀘𑁂? 𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫. 𑀦𑀺. 𑁩.𑁧𑁩𑁦; 𑀅. 𑀦𑀺. 𑁧.𑁨𑁭𑁯; 𑀯𑀺𑀪. 𑁮𑁦𑁯) 𑀯𑀺𑀢𑁆𑀣𑀸𑀭𑁄. 𑀢𑀲𑁆𑀫𑀸 𑀇𑀢𑁆𑀣𑀺𑀮𑀺𑀗𑁆𑀕𑁂 𑀞𑀺𑀢𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲𑀸𑀧𑀺 𑀧𑀢𑁆𑀣𑀦𑀸 𑀦 𑀲𑀫𑀺𑀚𑁆𑀛𑀢𑀺.

𑀳𑁂𑀢𑀽𑀢𑀺 𑀧𑀼𑀭𑀺𑀲𑀲𑁆𑀲𑀸𑀧𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦𑁄 𑀇𑀢𑀭𑀲𑁆𑀲.

𑀲𑀢𑁆𑀣𑀸𑀭𑀤𑀲𑁆𑀲𑀦𑀦𑁆𑀢𑀺 𑀲𑀘𑁂 𑀚𑀻𑀯𑀫𑀸𑀦𑀓𑀩𑀼𑀤𑁆𑀥𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀢𑁆𑀣𑁂𑀢𑀺 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀝𑀺𑀫𑀸𑀬 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀦𑁆𑀢𑀺𑀓𑁂 𑀧𑀢𑁆𑀣𑀦𑀸 𑀦 𑀲𑀫𑀺𑀚𑁆𑀛𑀢𑀺. 𑀓𑀲𑁆𑀫𑀸? 𑀪𑀩𑁆𑀩𑀸𑀪𑀩𑁆𑀩𑀓𑁂 𑀜𑀢𑁆𑀯𑀸 𑀓𑀫𑁆𑀫𑀯𑀺𑀧𑀸𑀓𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀢𑀲𑁆𑀫𑀸 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺.

𑀧𑀩𑁆𑀩𑀚𑁆𑀚𑀸𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀢𑁆𑀣𑁂𑀦𑁆𑀢𑀲𑁆𑀲𑀸𑀧𑀺 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀻𑀲𑀼 𑀢𑀸𑀧𑀲𑁂𑀲𑀼 𑀯𑀸 𑀪𑀺𑀓𑁆𑀔𑀽𑀲𑀼 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦𑁄 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑀲𑁆𑀲. 𑀓𑀲𑁆𑀫𑀸? 𑀧𑀩𑁆𑀩𑀚𑀺𑀢𑀸𑀬𑁂𑀯 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀦 𑀕𑀳𑀝𑁆𑀞𑀸. 𑀢𑀲𑁆𑀫𑀸 𑀆𑀤𑀺𑀫𑁆𑀳𑀺 𑀧𑀡𑀺𑀥𑀸𑀦𑀓𑀸𑀮𑁂𑀧𑀺 𑀧𑀩𑁆𑀩𑀚𑀺𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁.

𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀜𑁆𑀘𑀸𑀪𑀺𑀜𑁆𑀜𑀲𑁆𑀲𑁂𑀯 𑀲𑀫𑀺𑀚𑁆𑀛𑀢𑀺, 𑀦 𑀧𑀦 𑀇𑀫𑀸𑀬 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀭𑀳𑀺𑀢𑀲𑁆𑀲. 𑀓𑀲𑁆𑀫𑀸? 𑀦𑀺𑀕𑁆𑀕𑀼𑀡𑀲𑁆𑀲 𑀢𑀤𑀪𑀸𑀯𑀢𑁄.

𑀅𑀥𑀺𑀓𑀸𑀭𑁄𑀢𑀺 ¶ 𑀕𑀼𑀡𑀲𑀫𑁆𑀧𑀦𑁆𑀦𑁂𑀦𑀸𑀧𑀺 𑀬𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 𑀇𑀫𑀺𑀦𑀸 𑀅𑀥𑀺𑀓𑀸𑀭𑁂𑀦 𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲.

𑀙𑀦𑁆𑀤𑀢𑀸𑀢𑀺 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀬𑀲𑁆𑀲 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀅𑀢𑁆𑀣𑀸𑀬 𑀫𑀳𑀦𑁆𑀢𑁄 𑀙𑀦𑁆𑀤𑁄 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀧𑀭𑀺𑀬𑁂𑀝𑁆𑀞𑀺 𑀘, 𑀢𑀲𑁆𑀲𑁂𑀯 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲. 𑀢𑀢𑁆𑀭𑀺𑀤𑀁 𑀙𑀦𑁆𑀤𑀫𑀳𑀦𑁆𑀢𑀢𑀸𑀬 𑀑𑀧𑀫𑁆𑀫𑀁 𑁋 𑀲𑀘𑁂 𑀳𑀺 𑀏𑀯𑀫𑀲𑁆𑀲, ‘‘𑀬𑁄 𑀧𑀦 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀏𑀓𑁄𑀤𑀓𑀻𑀪𑀽𑀢𑀁 𑀅𑀢𑁆𑀢𑀦𑁄 𑀩𑀸𑀳𑀼𑀩𑀮𑁂𑀦 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀬𑁄 𑀧𑀦𑀺𑀫𑀁 𑀅𑀢𑁆𑀢𑀦𑁄 𑀤𑀼𑀓𑁆𑀓𑀭𑀁 𑀦 𑀫𑀜𑁆𑀜𑀢𑀺 ‘𑀅𑀳𑀁 𑀇𑀫𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’’𑀢𑀺 𑀏𑀯𑀁 𑀫𑀳𑀢𑀸 𑀙𑀦𑁆𑀤𑁂𑀦 𑀉𑀲𑁆𑀲𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀢𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲 (𑀲𑀼. 𑀦𑀺. 𑀅𑀝𑁆𑀞. 𑁧.𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦, 𑀲𑀼𑀫𑁂𑀥𑀓𑀣𑀸; 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸).

𑀲𑀼𑀫𑁂𑀥𑀧𑀡𑁆𑀟𑀺𑀢𑁄 ¶ 𑀧𑀦 𑀇𑀫𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸𑀯 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀤𑀻𑀧𑀗𑁆𑀓𑀭𑁄𑀧𑀺 𑀪𑀕𑀯𑀸 𑀆𑀕𑀦𑁆𑀢𑁆𑀯𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑀲𑁆𑀲 𑀲𑀻𑀲𑀪𑀸𑀕𑁂 𑀞𑀢𑁆𑀯𑀸 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀁 𑀲𑀼𑀫𑁂𑀥𑀢𑀸𑀧𑀲𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀢𑀸𑀧𑀲𑁄 𑀩𑀼𑀤𑁆𑀥𑀢𑁆𑀢𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀇𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑀲𑁆𑀲 𑀧𑀢𑁆𑀣𑀦𑀸, 𑀉𑀤𑀸𑀳𑀼 𑀦𑁄’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀞𑀺𑀢𑀓𑁄𑀯 𑀧𑀭𑀺𑀲𑀫𑀚𑁆𑀛𑁂 𑀩𑁆𑀬𑀸𑀓𑀸𑀲𑀺 𑁋 ‘‘𑀧𑀲𑁆𑀲𑀣 𑀦𑁄, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂, 𑀇𑀫𑀁 𑀉𑀕𑁆𑀕𑀢𑀧𑀁 𑀢𑀸𑀧𑀲𑀁 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. 𑀅𑀬𑀁 𑀩𑀼𑀤𑁆𑀥𑀢𑁆𑀢𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀇𑀫𑀲𑁆𑀲 𑀢𑀸𑀧𑀲𑀲𑁆𑀲 𑀧𑀢𑁆𑀣𑀦𑀸, 𑀅𑀬𑀜𑁆𑀳𑀺 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀧𑀦𑀲𑁆𑀲 𑀅𑀢𑁆𑀢𑀪𑀸𑀯𑁂 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁 𑀦𑀺𑀯𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀉𑀧𑀢𑀺𑀲𑁆𑀲𑁄 𑀘 𑀓𑁄𑀮𑀺𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀆𑀦𑀦𑁆𑀤𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀔𑁂𑀫𑀸 𑀘 𑀉𑀧𑁆𑀧𑀮𑀯𑀡𑁆𑀡𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 ¶ . 𑀅𑀬𑀁 𑀧𑀭𑀺𑀧𑀓𑁆𑀓𑀜𑀸𑀡𑁄 𑀳𑀼𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀫𑀽𑀮𑁂 𑀲𑀼𑀚𑀸𑀢𑀸𑀬 𑀦𑀸𑀫 𑀓𑀼𑀫𑀸𑀭𑀺𑀬𑀸 𑀤𑀺𑀦𑁆𑀦𑀁 𑀧𑀸𑀬𑀸𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁦.

‘‘𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀉𑀲𑁆𑀲𑀻𑀲𑀓𑁂 𑀫𑀁 𑀞𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁬𑁧.

‘‘𑀧𑀲𑁆𑀲𑀣 ¶ 𑀇𑀫𑀁 𑀢𑀸𑀧𑀲𑀁, 𑀚𑀝𑀺𑀮𑀁 𑀉𑀕𑁆𑀕𑀢𑀸𑀧𑀦𑀁;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁨.

‘‘𑀅𑀳𑀽 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁.

𑁬𑁩.

‘‘𑀅𑀚𑀧𑀸𑀮𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀢𑀢𑁆𑀣 𑀧𑀸𑀬𑀸𑀲𑀁 𑀧𑀕𑁆𑀕𑀬𑁆𑀳, 𑀦𑁂𑀭𑀜𑁆𑀚𑀭𑀫𑀼𑀧𑁂𑀳𑀺𑀢𑀺.

𑁬𑁪.

‘‘𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀫𑁆𑀳𑀺, 𑀧𑀸𑀬𑀸𑀲𑀁 𑀅𑀤 𑀲𑁄 𑀚𑀺𑀦𑁄;

𑀧𑀝𑀺𑀬𑀢𑁆𑀢𑀯𑀭𑀫𑀕𑁆𑀕𑁂𑀦, 𑀩𑁄𑀥𑀺𑀫𑀽𑀮𑀫𑀼𑀧𑁂𑀳𑀺𑀢𑀺.

𑁬𑁫.

‘‘𑀢𑀢𑁄 ¶ 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀩𑁄𑀥𑀺𑀫𑀡𑁆𑀟𑀁 𑀅𑀦𑀼𑀢𑁆𑀢𑀭𑁄;

𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁬𑁬.

‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁬𑁭.

‘‘𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

𑁬𑁮.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸.

𑁬𑁯.

‘‘𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀘𑀺𑀢𑁆𑀢𑁄 𑀘 𑀳𑀢𑁆𑀣𑀸𑀴𑀯𑀓𑁄, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀓𑀸;

𑀉𑀢𑁆𑀢𑀭𑀸 𑀦𑀦𑁆𑀤𑀫𑀸𑀢𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀺𑀓𑀸’’𑀢𑀺.

𑀢𑀢𑁆𑀣 𑀮𑁄𑀓𑀯𑀺𑀤𑀽𑀢𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀧𑀦 𑀮𑁄𑀓𑀯𑀺𑀤𑀽. 𑀪𑀕𑀯𑀸 𑀳𑀺 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 ¶ 𑀦𑀺𑀭𑁄𑀥𑀢𑁄 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 𑀲𑀩𑁆𑀩𑀣𑀸𑀧𑀺 𑀮𑁄𑀓𑀁 ¶ 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀢𑀲𑁆𑀫𑀸 𑀮𑁄𑀓𑀯𑀺𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀢𑀲𑁆𑀫𑀸 𑀳𑀯𑁂 𑀮𑁄𑀓𑀯𑀺𑀤𑀽 𑀲𑀼𑀫𑁂𑀥𑁄, 𑀮𑁄𑀓𑀦𑁆𑀢𑀕𑀽 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀫𑀺𑀢𑀸𑀯𑀺 𑀜𑀢𑁆𑀯𑀸, 𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁬);

𑀅𑀧𑀺 𑀘 𑀢𑀬𑁄 𑀮𑁄𑀓𑀸 𑁋 𑀲𑀗𑁆𑀔𑀸𑀭𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄, 𑀑𑀓𑀸𑀲𑀮𑁄𑀓𑁄𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀭𑀮𑁄𑀓𑁄 𑀦𑀸𑀫 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀧𑀣𑀯𑀺𑀆𑀤𑀬𑁄 𑀥𑀫𑁆𑀫𑀸. 𑀲𑀢𑁆𑀢𑀮𑁄𑀓𑁄 𑀦𑀸𑀫 𑀲𑀜𑁆𑀜𑀺𑀦𑁄 𑀅𑀲𑀜𑁆𑀜𑀺𑀦𑁄 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀦𑁄 𑀘 𑀲𑀢𑁆𑀢𑀸. 𑀑𑀓𑀸𑀲𑀮𑁄𑀓𑁄 𑀦𑀸𑀫 𑀲𑀢𑁆𑀢𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀇𑀫𑁂 𑀧𑀦 𑀢𑀬𑁄𑀧𑀺 𑀮𑁄𑀓𑀸 𑀪𑀕𑀯𑀢𑀸 𑀬𑀣𑀸𑀲𑀪𑀸𑀯𑀢𑁄 𑀯𑀺𑀤𑀺𑀢𑀸, 𑀢𑀲𑁆𑀫𑀸 𑀮𑁄𑀓𑀯𑀺𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄𑀢𑀺 𑀤𑀸𑀦𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀭𑀳𑀢𑁆𑀢𑀸 𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄. 𑀉𑀲𑁆𑀲𑀻𑀲𑀓𑁂 𑀫𑀁 𑀞𑀢𑁆𑀯𑀸𑀦𑀸𑀢𑀺 𑀫𑀫 ¶ 𑀲𑀻𑀲𑀲𑀫𑀻𑀧𑁂 𑀞𑀢𑁆𑀯𑀸. 𑀇𑀤𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀯𑀘𑀦𑀁 𑀅𑀩𑁆𑀭𑀯𑀻𑀢𑀺 𑀅𑀢𑁆𑀣𑁄. 𑀚𑀝𑀺𑀮𑀦𑁆𑀢𑀺 𑀚𑀝𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀚𑀝𑀺𑀮𑁄, 𑀢𑀁 𑀚𑀝𑀺𑀮𑀁. 𑀉𑀕𑁆𑀕𑀢𑀸𑀧𑀦𑀦𑁆𑀢𑀺 𑀉𑀕𑁆𑀕𑀢𑀸𑀧𑀲𑀁. 𑀅𑀳𑀽𑀢𑀺 𑀅𑀳𑀦𑀺, 𑀅𑀣𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀓𑀧𑀺𑀮𑀯𑁆𑀳𑀬𑀸𑀢𑀺 𑀓𑀧𑀺𑀮𑀅𑀯𑁆𑀳𑀬𑀸 𑀅𑀪𑀺𑀥𑀸𑀦𑀸. 𑀭𑀫𑁆𑀫𑀸𑀢𑀺 𑀭𑀫𑀡𑀻𑀬𑀢𑁄. 𑀧𑀥𑀸𑀦𑀦𑁆𑀢𑀺 𑀯𑀻𑀭𑀺𑀬𑀁. 𑀏𑀳𑀺𑀢𑀻𑀢𑀺 𑀏𑀲𑁆𑀲𑀢𑀺 𑀕𑀫𑀺𑀲𑁆𑀲𑀢𑀺. 𑀲𑁂𑀲𑀕𑀸𑀣𑀸𑀲𑀼 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑁋 ‘‘𑀫𑀬𑁆𑀳𑀁 𑀓𑀺𑀭 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑁋 ‘‘𑀲𑀼𑀫𑁂𑀥𑀢𑀸𑀧𑀲𑁄 𑀓𑀺𑀭 𑀩𑀼𑀤𑁆𑀥𑀩𑀻𑀚𑀗𑁆𑀓𑀼𑀭𑁄’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀅𑀳𑁄𑀲𑀺. 𑀏𑀯𑀜𑁆𑀘𑀲𑁆𑀲 𑀅𑀳𑁄𑀲𑀺 𑁋 ‘‘𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀦𑀤𑀺𑀁 𑀢𑀭𑀦𑁆𑀢𑁄 𑀉𑀚𑀼𑀓𑁂𑀦 𑀢𑀺𑀢𑁆𑀣𑁂𑀦 𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑁂𑀝𑁆𑀞𑀸𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀢𑀺, 𑀏𑀯𑀫𑁂𑀯 𑀫𑀬𑀁 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀫𑀕𑁆𑀕𑀨𑀮𑀁 𑀅𑀮𑀪𑀫𑀸𑀦𑀸 𑀅𑀦𑀸𑀕𑀢𑁂 𑀬𑀤𑀸 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀢𑀤𑀸 𑀢𑀯 𑀲𑀫𑁆𑀫𑀼𑀔𑀸 𑀫𑀕𑁆𑀕𑀨𑀮𑀁 𑀲𑀘𑁆𑀙𑀺𑀓𑀸𑀢𑀼𑀁 𑀲𑀫𑀢𑁆𑀣𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀦𑀁 𑀅𑀓𑀁𑀲𑀼. 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀩𑁄𑀥𑀺𑀲𑀢𑁆𑀢𑀁 𑀫𑀳𑀸𑀲𑀢𑁆𑀢𑀁 𑀧𑀲𑀁𑀲𑀺𑀢𑁆𑀯𑀸 𑀅𑀝𑁆𑀞𑀳𑀺 𑀧𑀼𑀧𑁆𑀨𑀫𑀼𑀝𑁆𑀞𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂𑀧𑀺 𑀘𑀢𑀼𑀲𑀢𑀲𑀳𑀲𑁆𑀲𑀸 𑀔𑀻𑀡𑀸𑀲𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀧𑁆𑀨𑁂𑀳𑀺 𑀘 𑀕𑀦𑁆𑀥𑁂𑀳𑀺 𑀘 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀤𑁂𑀯𑀫𑀦𑀼𑀲𑁆𑀲𑀸 𑀧𑀦 𑀢𑀣𑁂𑀯 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀣 𑀲𑀩𑁆𑀩𑀮𑁄𑀓𑀫𑀢𑀺𑀤𑀻𑀧𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄 𑀪𑀕𑀯𑀸 𑀘𑀢𑀽𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀭𑀫𑁆𑀫𑀦𑀕𑀭𑀯𑀸𑀲𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀤𑁂𑀯𑀢𑀸𑀳𑀺 𑀅𑀪𑀺𑀯𑀦𑁆𑀤𑀺𑀬𑀫𑀸𑀦𑁄 𑀲𑀜𑁆𑀛𑀸𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀯𑀭𑀓𑀦𑀓𑀕𑀺𑀭𑀺𑀲𑀺𑀔𑀭𑁄 𑀯𑀺𑀬 𑀚𑀗𑁆𑀕𑀫𑀫𑀸𑀦𑁄 𑀅𑀦𑁂𑀓𑁂𑀲𑀼 𑀧𑀸𑀝𑀺𑀳𑀸𑀭𑀺𑀬𑁂𑀲𑀼 ¶ 𑀯𑀢𑁆𑀢𑀫𑀸𑀦𑁂𑀲𑀼 𑀢𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 ¶ 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀦𑀸𑀦𑀸𑀲𑀼𑀭𑀪𑀺𑀓𑀼𑀲𑀼𑀫𑀕𑀦𑁆𑀥𑀯𑀸𑀲𑀺𑀢𑀁 𑀘𑀼𑀡𑁆𑀡𑀲𑀫𑁆𑀫𑁄𑀤𑀕𑀦𑁆𑀥𑀁 𑀲𑀫𑀼𑀲𑁆𑀲𑀺𑀢𑀥𑀚𑀧𑀝𑀸𑀓𑀁 𑀕𑀦𑁆𑀥𑀸𑀦𑀼𑀩𑀤𑁆𑀥𑀳𑀤𑀬𑁂𑀳𑀺 𑀪𑀫𑀭𑀕𑀡𑁂𑀳𑀺 𑀕𑀼𑀫𑁆𑀩𑀕𑀼𑀫𑁆𑀩𑀸𑀬𑀫𑀸𑀦𑀁 𑀥𑀽𑀧𑀦𑁆𑀥𑀓𑀸𑀭𑀁 𑀅𑀫𑀭𑀧𑀼𑀭𑀲𑀤𑀺𑀲𑀲𑁄𑀪𑀁 𑀅𑀪𑀺𑀭𑀫𑁆𑀫𑀁 𑀭𑀫𑁆𑀫𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀫𑀳𑀸𑀭𑀳𑁂 𑀩𑀼𑀤𑁆𑀥𑀸𑀲𑀦𑁂 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀲𑀭𑀤𑀲𑀫𑀬𑀭𑀼𑀘𑀺𑀭𑀓𑀭𑀭𑀚𑀦𑀺𑀓𑀭𑁄 𑀢𑀺𑀫𑀺𑀭𑀦𑀺𑀓𑀭𑀦𑀺𑀥𑀦𑀓𑀭𑁄 𑀓𑀫𑀮𑀯𑀦𑀯𑀺𑀓𑀲𑀦𑀓𑀭𑁄 𑀤𑀺𑀯𑀲𑀓𑀭𑁄 𑀯𑀺𑀬 𑀤𑀲𑀩𑀮𑀤𑀺𑀯𑀲𑀓𑀭𑁄 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 𑀧𑀦 𑀉𑀧𑀸𑀲𑀓𑀸 𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀦𑀸𑀦𑀸𑀯𑀺𑀥𑀔𑀚𑁆𑀚𑀸𑀤𑀻𑀳𑀺 𑀲𑀫𑀮𑀗𑁆𑀓𑀢𑀁 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀅𑀲𑀤𑀺𑀲𑀁 𑀲𑀼𑀔𑀦𑀺𑀤𑀸𑀦𑀁 𑀤𑀸𑀦𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀁𑀲𑀼.

𑀅𑀣 ¶ 𑀔𑁄 𑀩𑁄𑀥𑀺𑀲𑀢𑁆𑀢𑁄 𑀤𑀲𑀩𑀮𑀲𑁆𑀲 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀓𑀭𑀢𑀮𑀕𑀢𑀫𑀺𑀯 𑀫𑀜𑁆𑀜𑀫𑀸𑀦𑁄 𑀧𑀫𑀼𑀤𑀺𑀢𑀳𑀤𑀬𑁄 𑀲𑀩𑁆𑀩𑁂𑀲𑀼 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀲𑀬𑀦𑀸 𑀯𑀼𑀝𑁆𑀞𑀸𑀬 𑁋 ‘‘𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀧𑁆𑀨𑀭𑀸𑀲𑀺𑀫𑀢𑁆𑀣𑀓𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀯𑀁 𑀦𑀺𑀲𑀺𑀦𑁆𑀦𑁂 𑀫𑀳𑀸𑀲𑀢𑁆𑀢𑁂 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑁋 ‘‘𑀅𑀬𑁆𑀬 𑀲𑀼𑀫𑁂𑀥𑀢𑀸𑀧𑀲, 𑀧𑁄𑀭𑀸𑀡𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑁋 ‘𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀺𑀲𑁆𑀲𑀸𑀫𑀻’𑀢𑀺 𑀦𑀺𑀲𑀺𑀦𑁆𑀦𑀓𑀸𑀮𑁂 𑀬𑀸𑀦𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀦𑀸𑀫 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀅𑀚𑁆𑀚 𑀧𑀸𑀢𑀼𑀪𑀽𑀢𑀸𑀦𑀺 𑀦𑀺𑀲𑁆𑀲𑀁𑀲𑀬𑁂𑀦 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀫𑀬𑀫𑁂𑀢𑀁 𑀚𑀸𑀦𑀸𑀫 𑁋 ‘𑀬𑀲𑁆𑀲𑁂𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀲𑁄 𑀏𑀓𑀦𑁆𑀢𑁂𑀦𑁂𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺’ 𑀢𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀕𑁆𑀕𑀡𑁆𑀳𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑀸𑀳𑀺 𑀣𑀼𑀢𑀻𑀳𑀺 𑀅𑀪𑀺𑀢𑁆𑀣𑀯𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁦.

‘‘𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀁.

𑁭𑁧.

‘‘𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀘;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑀸.

𑁭𑁨.

‘‘𑀬𑀤𑀺𑀫𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀭𑀚𑁆𑀛𑀺𑀲𑁆𑀲𑀸𑀫 𑀲𑀸𑀲𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁭𑁩.

‘‘𑀬𑀣𑀸 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸, 𑀧𑀝𑀺𑀢𑀺𑀢𑁆𑀣𑀁 𑀯𑀺𑀭𑀚𑁆𑀛𑀺𑀬;

𑀳𑁂𑀝𑁆𑀞𑀸𑀢𑀺𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀢𑁆𑀢𑀭𑀦𑁆𑀢𑀺 𑀫𑀳𑀸𑀦𑀤𑀺𑀁.

𑁭𑁪.

‘‘𑀏𑀯𑀫𑁂𑀯 𑀫𑀬𑀁 𑀲𑀩𑁆𑀩𑁂, 𑀬𑀤𑀺 𑀫𑀼𑀜𑁆𑀘𑀸𑀫𑀺𑀫𑀁 𑀚𑀺𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁭𑁫.

‘‘𑀤𑀻𑀧𑀗𑁆𑀓𑀭𑁄 ¶ ¶ 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀤𑀓𑁆𑀔𑀺𑀡𑀁 𑀧𑀸𑀤𑀫𑀼𑀤𑁆𑀥𑀭𑀺.

𑁭𑁬.

‘‘𑀬𑁂 𑀢𑀢𑁆𑀣𑀸𑀲𑀼𑀁 𑀚𑀺𑀦𑀧𑀼𑀢𑁆𑀢𑀸, 𑀧𑀤𑀓𑁆𑀔𑀺𑀡𑀫𑀓𑀁𑀲𑀼 𑀫𑀁;

𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀘, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼𑀁.

𑁭𑁭.

‘‘𑀤𑀲𑁆𑀲𑀦𑀁 𑀫𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀲𑀬𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀦, 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀁 𑀢𑀤𑀸.

𑁭𑁮.

‘‘𑀲𑀼𑀔𑁂𑀦 ¶ 𑀲𑀼𑀔𑀺𑀢𑁄 𑀳𑁄𑀫𑀺, 𑀧𑀸𑀫𑁄𑀚𑁆𑀚𑁂𑀦 𑀧𑀫𑁄𑀤𑀺𑀢𑁄;

𑀧𑀻𑀢𑀺𑀬𑀸 𑀘 𑀅𑀪𑀺𑀲𑁆𑀲𑀦𑁆𑀦𑁄, 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀁 𑀢𑀤𑀸.

𑁭𑁯.

‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀯𑀲𑀻𑀪𑀽𑀢𑁄 𑀅𑀳𑀁 𑀛𑀸𑀦𑁂, 𑀅𑀪𑀺𑀜𑁆𑀜𑀸𑀲𑀼 𑀧𑀸𑀭𑀫𑀺𑀁 𑀕𑀢𑁄.

𑁮𑁦.

‘‘𑀲𑀳𑀲𑁆𑀲𑀺𑀬𑀫𑁆𑀳𑀺 𑀮𑁄𑀓𑀫𑁆𑀳𑀺, 𑀇𑀲𑀬𑁄 𑀦𑀢𑁆𑀣𑀺 𑀫𑁂 𑀲𑀫𑀸;

𑀅𑀲𑀫𑁄 𑀇𑀤𑁆𑀥𑀺𑀥𑀫𑁆𑀫𑁂𑀲𑀼, 𑀅𑀮𑀪𑀺𑀁 𑀈𑀤𑀺𑀲𑀁 𑀲𑀼𑀔𑀁.

𑁮𑁧.

‘‘𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂 𑀫𑀬𑁆𑀳𑀁, 𑀤𑀲𑀲𑀳𑀲𑁆𑀲𑀸𑀥𑀺𑀯𑀸𑀲𑀺𑀦𑁄;

𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑁂𑀲𑀼𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁨.

‘‘𑀬𑀸 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂;

𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂.

𑁮𑁩.

‘‘𑀲𑀻𑀢𑀁 𑀩𑁆𑀬𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀉𑀧𑀲𑀫𑁆𑀫𑀢𑀺;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁪.

‘‘𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼, 𑀦𑀺𑀲𑁆𑀲𑀤𑁆𑀤𑀸 𑀳𑁄𑀦𑁆𑀢𑀺 𑀦𑀺𑀭𑀸𑀓𑀼𑀮𑀸;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁫.

‘‘𑀫𑀳𑀸𑀯𑀸𑀢𑀸 ¶ 𑀦 𑀯𑀸𑀬𑀦𑁆𑀢𑀺, 𑀦 𑀲𑀦𑁆𑀤𑀦𑁆𑀢𑀺 𑀲𑀯𑀦𑁆𑀢𑀺𑀬𑁄;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁬.

‘‘𑀣𑀮𑀚𑀸 𑀤𑀓𑀚𑀸 𑀧𑀼𑀧𑁆𑀨𑀸, 𑀲𑀩𑁆𑀩𑁂 𑀧𑀼𑀧𑁆𑀨𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁭.

‘‘𑀮𑀢𑀸 𑀯𑀸 𑀬𑀤𑀺 𑀯𑀸 𑀭𑀼𑀓𑁆𑀔𑀸, 𑀨𑀮𑀪𑀸𑀭𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀨𑀮𑀺𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁮.

‘‘𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸, 𑀭𑀢𑀦𑀸 𑀚𑁄𑀢𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀭𑀢𑀦𑀸 𑀚𑁄𑀢𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁮𑁯.

‘‘𑀫𑀸𑀦𑀼𑀲𑁆𑀲𑀓𑀸 𑀘 𑀤𑀺𑀩𑁆𑀩𑀸 𑀘, 𑀢𑀼𑀭𑀺𑀬𑀸 𑀯𑀚𑁆𑀚𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚𑀼𑀪𑁄 𑀅𑀪𑀺𑀭𑀯𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁦.

‘‘𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀸 ¶ 𑀕𑀕𑀦𑀸, 𑀅𑀪𑀺𑀯𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀺 𑀅𑀚𑁆𑀚 𑀧𑀯𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁧.

‘‘𑀫𑀳𑀸𑀲𑀫𑀼𑀤𑁆𑀤𑁄 ¶ 𑀆𑀪𑀼𑀚𑀢𑀺, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀢𑀺;

𑀢𑁂𑀧𑀚𑁆𑀚𑀼𑀪𑁄 𑀅𑀪𑀺𑀭𑀯𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁨.

‘‘𑀦𑀺𑀭𑀬𑁂𑀧𑀺 𑀤𑀲𑀲𑀳𑀲𑁆𑀲𑁂, 𑀅𑀕𑁆𑀕𑀻 𑀦𑀺𑀩𑁆𑀩𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀦𑀺𑀩𑁆𑀩𑀼𑀢𑀸 𑀅𑀕𑁆𑀕𑀻, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁩.

‘‘𑀯𑀺𑀫𑀮𑁄 𑀳𑁄𑀢𑀺 𑀲𑀽𑀭𑀺𑀬𑁄, 𑀲𑀩𑁆𑀩𑀸 𑀤𑀺𑀲𑁆𑀲𑀦𑁆𑀢𑀺 𑀢𑀸𑀭𑀓𑀸;

𑀢𑁂𑀧𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁪.

‘‘𑀅𑀦𑁄𑀯𑀝𑁆𑀞𑁂𑀦 𑀉𑀤𑀓𑀁, 𑀫𑀳𑀺𑀬𑀸 𑀉𑀩𑁆𑀪𑀺𑀚𑁆𑀚𑀺 𑀢𑀸𑀯𑀤𑁂;

𑀢𑀫𑁆𑀧𑀚𑁆𑀚𑀼𑀩𑁆𑀪𑀺𑀚𑁆𑀚𑀢𑁂 𑀫𑀳𑀺𑀬𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁫.

‘‘𑀢𑀸𑀭𑀸𑀕𑀡𑀸 ¶ 𑀯𑀺𑀭𑁄𑀘𑀦𑁆𑀢𑀺, 𑀦𑀓𑁆𑀔𑀢𑁆𑀢𑀸 𑀕𑀕𑀦𑀫𑀡𑁆𑀟𑀮𑁂;

𑀯𑀺𑀲𑀸𑀔𑀸 𑀘𑀦𑁆𑀤𑀺𑀫𑀸𑀬𑀼𑀢𑁆𑀢𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁬.

‘‘𑀩𑀺𑀮𑀸𑀲𑀬𑀸 𑀤𑀭𑀻𑀲𑀬𑀸, 𑀦𑀺𑀓𑁆𑀔𑀫𑀦𑁆𑀢𑀺 𑀲𑀓𑀸𑀲𑀬𑀸;

𑀢𑁂𑀧𑀚𑁆𑀚 𑀆𑀲𑀬𑀸 𑀙𑀼𑀤𑁆𑀥𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁭.

‘‘𑀦 𑀳𑁄𑀦𑁆𑀢𑀺 𑀅𑀭𑀢𑀻 𑀲𑀢𑁆𑀢𑀸𑀦𑀁, 𑀲𑀦𑁆𑀢𑀼𑀝𑁆𑀞𑀸 𑀳𑁄𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀲𑀦𑁆𑀢𑀼𑀝𑁆𑀞𑀸, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁮.

‘‘𑀭𑁄𑀕𑀸 𑀢𑀤𑀼𑀧𑀲𑀫𑁆𑀫𑀦𑁆𑀢𑀺, 𑀚𑀺𑀖𑀘𑁆𑀙𑀸 𑀘 𑀯𑀺𑀦𑀲𑁆𑀲𑀲𑀺;

𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁯𑁯.

‘‘𑀭𑁄𑀕𑀸 𑀢𑀤𑀸 𑀢𑀦𑀼 𑀳𑁄𑀢𑀺, 𑀤𑁄𑀲𑁄 𑀫𑁄𑀳𑁄 𑀯𑀺𑀦𑀲𑁆𑀲𑀲𑀺;

𑀢𑁂𑀧𑀚𑁆𑀚 𑀯𑀺𑀕𑀢𑀸 𑀲𑀩𑁆𑀩𑁂, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁦.

‘‘𑀪𑀬𑀁 𑀢𑀤𑀸 𑀦 𑀪𑀯𑀢𑀺, 𑀅𑀚𑁆𑀚𑀧𑁂𑀢𑀁 𑀧𑀤𑀺𑀲𑁆𑀲𑀢𑀺;

𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁧.

‘‘𑀭𑀚𑁄𑀦𑀼𑀤𑁆𑀥𑀁𑀲𑀢𑀻 𑀉𑀤𑁆𑀥𑀁, 𑀅𑀚𑁆𑀚𑀧𑁂𑀢𑀁 𑀧𑀤𑀺𑀲𑁆𑀲𑀢𑀺;

𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁨.

‘‘𑀅𑀦𑀺𑀝𑁆𑀞𑀕𑀦𑁆𑀥𑁄 𑀧𑀓𑁆𑀓𑀫𑀢𑀺, 𑀤𑀺𑀩𑁆𑀩𑀕𑀦𑁆𑀥𑁄 𑀧𑀯𑀸𑀬𑀢𑀺;

𑀲𑁄𑀧𑀚𑁆𑀚 𑀯𑀸𑀬𑀢𑀻 𑀕𑀦𑁆𑀥𑁄, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁩.

‘‘𑀲𑀩𑁆𑀩𑁂 ¶ 𑀤𑁂𑀯𑀸 𑀧𑀤𑀺𑀲𑁆𑀲𑀦𑁆𑀢𑀺, 𑀞𑀧𑀬𑀺𑀢𑁆𑀯𑀸 𑀅𑀭𑀽𑀧𑀺𑀦𑁄;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁪.

‘‘𑀬𑀸𑀯𑀢𑀸 𑀦𑀺𑀭𑀬𑀸 𑀦𑀸𑀫, 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂;

𑀢𑁂𑀧𑀚𑁆𑀚 𑀲𑀩𑁆𑀩𑁂 𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁫.

‘‘𑀓𑀼𑀝𑁆𑀝𑀸 ¶ ¶ 𑀓𑀯𑀸𑀝𑀸 𑀲𑁂𑀮𑀸 𑀘, 𑀦 𑀳𑁄𑀦𑁆𑀢𑀸𑀯𑀭𑀡𑀸 𑀢𑀤𑀸;

𑀆𑀓𑀸𑀲𑀪𑀽𑀢𑀸 𑀢𑁂𑀧𑀚𑁆𑀚, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁬.

‘‘𑀘𑀼𑀢𑀻 𑀘 𑀉𑀧𑀧𑀢𑁆𑀢𑀻 𑀘, 𑀔𑀡𑁂 𑀢𑀲𑁆𑀫𑀺𑀁 𑀦 𑀯𑀺𑀚𑁆𑀚𑀢𑀺;

𑀢𑀸𑀦𑀺𑀧𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀺, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺.

𑁧𑁦𑁭.

‘‘𑀤𑀴𑁆𑀳𑀁 𑀧𑀕𑁆𑀕𑀡𑁆𑀳 𑀯𑀻𑀭𑀺𑀬𑀁, 𑀫𑀸 𑀦𑀺𑀯𑀢𑁆𑀢 𑀅𑀪𑀺𑀓𑁆𑀓𑀫;

𑀫𑀬𑀫𑁆𑀧𑁂𑀢𑀁 𑀯𑀺𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀦𑁆𑀢𑀺 𑀇𑀤𑀁 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑁆𑀬𑀸𑀓𑀭𑀡𑀯𑀘𑀦𑀁 𑀲𑀼𑀢𑁆𑀯𑀸. 𑀅𑀲𑀫𑀲𑁆𑀲𑀸𑀢𑀺 𑀲𑀫𑀲𑁆𑀲 𑀲𑀤𑀺𑀲𑀲𑁆𑀲 𑀅𑀪𑀸𑀯𑀢𑁄 𑀅𑀲𑀫𑀲𑁆𑀲. 𑀬𑀣𑀸𑀳 𑁋

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫𑀺. 𑀧. 𑁪.𑁫.𑁧𑁧);

𑀫𑀳𑁂𑀲𑀺𑀦𑁄𑀢𑀺 𑀫𑀳𑀦𑁆𑀢𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀏𑀲𑀺 𑀕𑀯𑁂𑀲𑀻𑀢𑀺 𑀫𑀳𑁂𑀲𑀻, 𑀢𑀲𑁆𑀲 𑀫𑀳𑁂𑀲𑀺𑀦𑁄. 𑀦𑀭𑀫𑀭𑀽𑀢𑀺 𑀦𑀭𑀸 𑀘 𑀅𑀫𑀭𑀸 𑀘, 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀧𑀦𑀸𑀬𑀁 𑀲𑀩𑁆𑀩𑁂𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀦𑀸𑀕𑀲𑀼𑀧𑀡𑁆𑀡𑀬𑀓𑁆𑀔𑀸𑀤𑀬𑁄𑀧𑀺 𑀆𑀫𑁄𑀤𑀺𑀢𑀸𑀯. 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀦𑁆𑀢𑀺 𑀅𑀬𑀁 𑀓𑀺𑀭 𑀩𑀼𑀤𑁆𑀥𑀗𑁆𑀓𑀼𑀭𑁄 𑀉𑀧𑁆𑀧𑀦𑁆𑀦𑁄𑀢𑀺 𑀆𑀫𑁄𑀤𑀺𑀢𑀸𑀢𑀺 𑀅𑀢𑁆𑀣𑁄.

𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸𑀢𑀺 𑀉𑀦𑁆𑀦𑀸𑀤𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑀺. 𑀅𑀧𑁆𑀨𑁄𑀝𑁂𑀦𑁆𑀢𑀻𑀢𑀺 𑀳𑀢𑁆𑀣𑁂𑀳𑀺 𑀩𑀸𑀳𑀸 𑀅𑀪𑀺𑀳𑀦𑀦𑁆𑀢𑀺. 𑀤𑀲𑀲𑀳𑀲𑁆𑀲𑀻𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑁄. 𑀲𑀤𑁂𑀯𑀓𑀸𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑀸 𑀤𑀲𑀲𑀳𑀲𑁆𑀲𑀻 𑀦𑀫𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺𑀫𑀲𑁆𑀲𑀸𑀢𑀺 𑀬𑀤𑀺 𑀇𑀫𑀲𑁆𑀲, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀺𑀭𑀚𑁆𑀛𑀺𑀲𑁆𑀲𑀸𑀫𑀸𑀢𑀺 𑀬𑀤𑀺 𑀦 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀸𑀫. 𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂𑀢𑀺 𑀅𑀦𑀸𑀕𑀢𑁂 𑀓𑀸𑀮𑁂. 𑀳𑁂𑀲𑁆𑀲𑀸𑀫𑀸𑀢𑀺 𑀪𑀯𑀺𑀲𑁆𑀲𑀸𑀫. 𑀲𑀫𑁆𑀫𑀼𑀔𑀸𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀇𑀫𑀦𑁆𑀢𑀺 𑀇𑀫𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑀦𑀤𑀺𑀁 ¶ 𑀢𑀭𑀦𑁆𑀢𑀸𑀢𑀺 𑀦𑀤𑀻𑀢𑀭𑀡𑀓𑀸, ‘‘𑀦𑀤𑀺𑀢𑀭𑀦𑁆𑀢𑀸’’𑀢𑀺𑀧𑀺 𑀧𑀸𑀞𑁄. 𑀧𑀝𑀺𑀢𑀺𑀢𑁆𑀣𑀦𑁆𑀢𑀺 𑀧𑀝𑀺𑀫𑀼𑀔𑀢𑀺𑀢𑁆𑀣𑀁. 𑀯𑀺𑀭𑀚𑁆𑀛𑀺𑀬𑀸𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸. 𑀬𑀤𑀺 𑀫𑀼𑀜𑁆𑀘𑀸𑀫𑀸𑀢𑀺 𑀬𑀤𑀺 𑀇𑀫𑀁 𑀪𑀕𑀯𑀦𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀓𑀢𑀓𑀺𑀘𑁆𑀘𑀸 𑀕𑀫𑀺𑀲𑁆𑀲𑀸𑀫𑀸𑀢𑀺 ¶ 𑀅𑀢𑁆𑀣𑁄. 𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀫𑀫 𑀪𑀸𑀯𑀺𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑀺𑀢𑁆𑀯𑀸. 𑀤𑀓𑁆𑀔𑀺𑀡𑀁 ¶ 𑀧𑀸𑀤𑀫𑀼𑀤𑁆𑀥𑀭𑀻𑀢𑀺 𑀤𑀓𑁆𑀔𑀺𑀡𑀁 𑀧𑀸𑀤𑀁 𑀉𑀓𑁆𑀔𑀺𑀧𑀺, ‘‘𑀓𑀢𑀧𑀤𑀓𑁆𑀔𑀺𑀡𑁄’’𑀢𑀺𑀧𑀺 𑀧𑀸𑀞𑁄.

𑀚𑀺𑀦𑀧𑀼𑀢𑁆𑀢𑀸𑀢𑀺 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑀸. 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀘, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼𑀦𑁆𑀢𑀺 𑀤𑁂𑀯𑀸𑀤𑀬𑁄 𑀲𑀩𑁆𑀩𑁂𑀧𑀺 𑀇𑀫𑁂 𑀫𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀜𑁆𑀘𑀗𑁆𑀕𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀢𑁆𑀯𑀸 𑀫𑀥𑀼𑀭𑀢𑁆𑀣𑀩𑁆𑀬𑀜𑁆𑀚𑀦𑀸𑀳𑀺 𑀦𑀸𑀦𑀧𑁆𑀧𑀓𑀸𑀭𑀸𑀳𑀺 𑀣𑀼𑀢𑀻𑀳𑀺 𑀯𑀡𑁆𑀡𑁂𑀦𑁆𑀢𑀸 𑀧𑀓𑁆𑀓𑀫𑀺𑀁𑀲𑀼. ‘‘𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼’’𑀦𑁆𑀢𑀺𑀧𑀺 𑀧𑀸𑀞𑁄.

𑀤𑀲𑁆𑀲𑀦𑀁 𑀫𑁂 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀫𑀫 𑀤𑀲𑁆𑀲𑀦𑀯𑀺𑀲𑀬𑀁 𑀪𑀕𑀯𑀢𑀺 𑀅𑀢𑀺𑀓𑁆𑀓𑀦𑁆𑀢𑁂. ‘‘𑀚𑀳𑀺𑀢𑁂 𑀤𑀲𑁆𑀲𑀦𑀽𑀧𑀘𑀸𑀭𑁂’’𑀢𑀺𑀧𑀺 𑀧𑀸𑀞𑁄. 𑀲𑀲𑀗𑁆𑀖𑁂𑀢𑀺 𑀲𑀤𑁆𑀥𑀺𑀁 𑀲𑀗𑁆𑀖𑁂𑀦 𑀲𑀲𑀗𑁆𑀖𑁄, 𑀢𑀲𑁆𑀫𑀺𑀁 𑀲𑀲𑀗𑁆𑀖𑁂. 𑀲𑀬𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀦𑀸𑀢𑀺 𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀓𑀮𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸. 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀦𑁆𑀢𑀺 𑀓𑀢𑀧𑀮𑁆𑀮𑀗𑁆𑀓𑁄 𑀳𑀼𑀢𑁆𑀯𑀸 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀺 𑀦𑀺𑀲𑀻𑀤𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀲𑀦𑀸 𑀯𑀼𑀝𑁆𑀞𑀳𑀺𑀁 𑀢𑀤𑀸’’𑀢𑀺𑀧𑀺 𑀧𑀸𑀞𑁄, 𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀯.

𑀧𑀻𑀢𑀺𑀬𑀸 𑀘 𑀅𑀪𑀺𑀲𑁆𑀲𑀦𑁆𑀦𑁄𑀢𑀺 𑀧𑀻𑀢𑀺𑀧𑀭𑀺𑀧𑁆𑀨𑀼𑀝𑁄. 𑀯𑀲𑀻𑀪𑀽𑀢𑁄𑀢𑀺 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄. 𑀛𑀸𑀦𑁂𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀛𑀸𑀦𑁂𑀲𑀼. 𑀲𑀳𑀲𑁆𑀲𑀺𑀬𑀫𑁆𑀳𑀻𑀢𑀺 𑀤𑀲𑀲𑀳𑀲𑁆𑀲𑀺𑀬𑀁. 𑀮𑁄𑀓𑀫𑁆𑀳𑀻𑀢𑀺 𑀮𑁄𑀓𑀥𑀸𑀢𑀼𑀬𑀸. 𑀫𑁂 𑀲𑀫𑀸𑀢𑀺 𑀫𑀬𑀸 𑀲𑀤𑀺𑀲𑀸. 𑀅𑀯𑀺𑀲𑁂𑀲𑁂𑀦 ‘‘𑀫𑁂 𑀲𑀫𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀦𑀺𑀬𑀫𑁂𑀦𑁆𑀢𑁄 ‘‘𑀅𑀲𑀫𑁄 𑀇𑀤𑁆𑀥𑀺𑀥𑀫𑁆𑀫𑁂𑀲𑀽’’𑀢𑀺 𑀆𑀳. 𑀢𑀢𑁆𑀣 𑀇𑀤𑁆𑀥𑀺𑀥𑀫𑁆𑀫𑁂𑀲𑀽𑀢𑀺 𑀧𑀜𑁆𑀘𑀲𑀼 𑀇𑀤𑁆𑀥𑀺𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀮𑀪𑀺𑀦𑁆𑀢𑀺 𑀧𑀝𑀺𑀮𑀪𑀺𑀁. 𑀈𑀤𑀺𑀲𑀁 𑀲𑀼𑀔𑀦𑁆𑀢𑀺 𑀈𑀤𑀺𑀲𑀁 𑀲𑁄𑀫𑀦𑀲𑁆𑀲𑀁.

𑀅𑀣 𑀲𑀼𑀫𑁂𑀥𑀢𑀸𑀧𑀲𑁄 𑀤𑀲𑀩𑀮𑀲𑁆𑀲 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀓𑀭𑀢𑀮𑀕𑀢𑀓𑀸𑀮𑀫𑀺𑀯 𑀫𑀜𑁆𑀜𑀫𑀸𑀦𑁄 𑀧𑀫𑀼𑀤𑀺𑀢𑀳𑀤𑀬𑁄 𑀤𑀲𑀲𑀼 𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑁂𑀲𑀼 𑀲𑀼𑀤𑁆𑀥𑀸𑀯𑀸𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀅𑀢𑀻𑀢𑀩𑀼𑀤𑁆𑀥𑀤𑀲𑁆𑀲𑀸𑀯𑀺𑀦𑁄 𑀦𑀺𑀬𑀢𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑁂𑀦 𑀢𑀣𑀸𑀕𑀢𑀯𑀘𑀦𑀲𑁆𑀲 𑀅𑀯𑀺𑀢𑀣𑀢𑀁 𑀧𑀓𑀸𑀲𑁂𑀦𑁆𑀢𑁄 𑀫𑀁 𑀧𑀭𑀺𑀢𑁄𑀲𑀬𑀦𑁆𑀢𑀸 𑀇𑀫𑀸 𑀕𑀸𑀣𑀸𑀬𑁄 𑀆𑀳𑀁𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂 𑀫𑀬𑁆𑀳’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂 𑀫𑀬𑁆𑀳𑀦𑁆𑀢𑀺 𑀫𑀫 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀤𑀲𑀲𑀳𑀲𑁆𑀲𑀸𑀥𑀺𑀯𑀸𑀲𑀺𑀦𑁄𑀢𑀺 𑀤𑀲𑀲𑀳𑀲𑁆𑀲𑀺𑀯𑀸𑀲𑀺𑀦𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀬𑀸 𑀧𑀼𑀩𑁆𑀩𑁂𑀢𑀺 𑀬𑀸𑀦𑀺 𑀧𑀼𑀩𑁆𑀩𑁂, 𑀯𑀺𑀪𑀢𑁆𑀢𑀺𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀮𑁆𑀮𑀗𑁆𑀓𑀯𑀭𑀫𑀸𑀪𑀼𑀚𑁂𑀢𑀺 𑀯𑀭𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂. 𑀦𑀺𑀫𑀺𑀢𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑀺𑀫𑀺𑀢𑁆𑀢𑀸𑀦𑀺 ¶ 𑀧𑀤𑀺𑀲𑁆𑀲𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀢𑀻𑀢𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀅𑀢𑀻𑀢𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂𑀢𑀺 𑀧𑀼𑀩𑁆𑀩𑁂𑀧𑀺 𑀦𑀺𑀬𑀢𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂 ¶ 𑀬𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂. 𑀢𑀲𑁆𑀫𑀸 𑀢𑁆𑀯𑀁 𑀥𑀼𑀯𑀫𑁂𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀦 𑀧𑀦 𑀢𑀸𑀦𑀺𑀬𑁂𑀯 𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀢𑀁𑀲𑀤𑀺𑀲𑀢𑁆𑀢𑀸 ‘‘𑀢𑀸𑀦𑀺 𑀅𑀚𑁆𑀚 𑀧𑀤𑀺𑀲𑁆𑀲𑀭𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀻𑀢𑀦𑁆𑀢𑀺 𑀲𑀻𑀢𑀢𑁆𑀢𑀁. 𑀩𑁆𑀬𑀧𑀕𑀢𑀦𑁆𑀢𑀺 𑀕𑀢𑀁 𑀯𑀺𑀕𑀢𑀁. 𑀢𑀸𑀦𑀻𑀢𑀺 𑀲𑀻𑀢𑀯𑀺𑀕𑀫𑀦𑀉𑀡𑁆𑀳𑀼𑀧𑀲𑀫𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀤𑁆𑀤𑀸𑀢𑀺 𑀅𑀲𑀤𑁆𑀤𑀸 𑀅𑀦𑀺𑀕𑁆𑀖𑁄𑀲𑀸. 𑀦𑀺𑀭𑀸𑀓𑀼𑀮𑀸𑀢𑀺 𑀅𑀦𑀸𑀓𑀼𑀮𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦 𑀲𑀦𑁆𑀤𑀦𑁆𑀢𑀻𑀢𑀺 𑀦 𑀯𑀳𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀲𑀯𑀦𑁆𑀢𑀺𑀬𑁄𑀢𑀺 𑀦𑀤𑀺𑀬𑁄. 𑀢𑀸𑀦𑀻𑀢𑀺 𑀅𑀯𑀸𑀬𑀦𑀅𑀲𑀦𑁆𑀤𑀦𑀸𑀦𑀺. 𑀣𑀮𑀚𑀸𑀢𑀺 𑀧𑀣𑀯𑀺𑀢𑀮𑀧𑀩𑁆𑀩𑀢𑀭𑀼𑀓𑁆𑀔𑁂𑀲𑀼 𑀚𑀸𑀢𑀸𑀦𑀺. 𑀤𑀓𑀚𑀸𑀢𑀺 𑀑𑀤𑀓𑀸𑀦𑀺 𑀧𑀼𑀧𑁆𑀨𑀸𑀦𑀺. 𑀧𑀼𑀧𑁆𑀨𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀼𑀧𑁆𑀨𑀺𑀁𑀲𑀼, 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀧𑀚𑁆𑀚 𑀧𑀼𑀧𑁆𑀨𑀺𑀢𑀸𑀦𑀻𑀢𑀺 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀅𑀚𑁆𑀚 𑀧𑀼𑀧𑁆𑀨𑀺𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀨𑀮𑀪𑀸𑀭𑀸𑀢𑀺 𑀨𑀮𑀥𑀭𑀸. 𑀢𑁂𑀧𑀚𑁆𑀚𑀸𑀢𑀺 𑀢𑁂𑀧𑀺 𑀅𑀚𑁆𑀚, 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 ‘‘𑀢𑁂𑀧𑀻’’𑀢𑀺 𑀯𑀼𑀢𑁆𑀢𑀁, ‘‘𑀮𑀢𑀸 𑀯𑀸 𑀭𑀼𑀓𑁆𑀔𑀸 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀨𑀮𑀺𑀢𑀸𑀢𑀺 𑀲𑀜𑁆𑀚𑀸𑀢𑀨𑀮𑀸. 𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸 𑀘𑀸𑀢𑀺 𑀆𑀓𑀸𑀲𑀕𑀢𑀸 𑀘 𑀪𑀽𑀫𑀺𑀕𑀢𑀸 𑀘 𑀭𑀢𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀤𑀻𑀦𑀺 𑀭𑀢𑀦𑀸𑀦𑀺. 𑀚𑁄𑀢𑀦𑁆𑀢𑀻𑀢𑀺 𑀑𑀪𑀸𑀲𑀦𑁆𑀢𑀺. 𑀫𑀸𑀦𑀼𑀲𑁆𑀲𑀓𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀓𑀸 𑀫𑀸𑀦𑀼𑀲𑁆𑀲𑀓𑀸. 𑀤𑀺𑀩𑁆𑀩𑀸𑀢𑀺 𑀤𑁂𑀯𑀸𑀦𑀁 𑀲𑀦𑁆𑀢𑀓𑀸 𑀤𑀺𑀩𑁆𑀩𑀸. 𑀢𑀼𑀭𑀺𑀬𑀸𑀢𑀺 𑀆𑀢𑀢𑀁 𑀯𑀺𑀢𑀢𑀁 𑀆𑀢𑀢𑀯𑀺𑀢𑀢𑀁 𑀲𑀼𑀲𑀺𑀭𑀁 𑀖𑀦𑀦𑁆𑀢𑀺 𑀧𑀜𑁆𑀘 𑀢𑀼𑀭𑀺𑀬𑀸𑀦𑀺. 𑀢𑀢𑁆𑀣 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀺𑀆𑀤𑀻𑀲𑀼 𑀏𑀓𑀢𑀮𑀢𑀼𑀭𑀺𑀬𑀁. 𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑀮𑀁. 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀲𑀩𑁆𑀩𑀢𑁄 𑀧𑀭𑀺𑀬𑁄𑀦𑀤𑁆𑀥𑀁 𑀫𑀳𑀢𑀺𑀯𑀮𑁆𑀮𑀓𑀺𑀆𑀤𑀺𑀓𑀁. 𑀲𑀼𑀲𑀺𑀭𑀁 𑀦𑀸𑀫 𑀯𑀁𑀲𑀸𑀤𑀺𑀓𑀁. 𑀖𑀦𑀁 𑀦𑀸𑀫 𑀲𑀫𑁆𑀫𑀢𑀸𑀴𑀸𑀤𑀺𑀓𑀁. 𑀯𑀚𑁆𑀚𑀦𑁆𑀢𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀚𑁆𑀚𑀺𑀁𑀲𑀼, 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀲 𑀦𑀬𑁄 𑀉𑀧𑀭𑀺 𑀈𑀤𑀺𑀲𑁂𑀲𑀼 𑀯𑀘𑀦𑁂𑀲𑀼𑀧𑀺. 𑀅𑀪𑀺𑀭𑀯𑀦𑁆𑀢𑀻𑀢𑀺 𑀢𑀢𑁆𑀭 𑀢𑀢𑁆𑀭 𑀓𑀼𑀲𑀮𑁂𑀳𑀺 𑀲𑀼𑀫𑀼𑀜𑁆𑀘𑀺𑀢𑀸 𑀲𑀼𑀧𑁆𑀧𑀢𑀸𑀴𑀺𑀢𑀸 𑀲𑀼𑀯𑀸𑀤𑀺𑀢𑀸 𑀯𑀺𑀬 𑀅𑀪𑀺𑀭𑀯𑀦𑁆𑀢𑀺, 𑀅𑀪𑀺𑀦𑀤𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀸𑀢𑀺 ¶ 𑀯𑀺𑀘𑀺𑀢𑁆𑀭𑀸𑀦𑀺 𑀦𑀸𑀦𑀸𑀕𑀦𑁆𑀥𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺. 𑀅𑀪𑀺𑀯𑀲𑁆𑀲𑀦𑁆𑀢𑀻𑀢𑀺 𑀅𑀪𑀺𑀯𑀲𑁆𑀲𑀺𑀁𑀲𑀼, 𑀦𑀺𑀧𑀢𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀧𑀻𑀢𑀺 𑀢𑀸𑀦𑀺𑀧𑀺 𑀯𑀺𑀘𑀺𑀢𑁆𑀭𑀧𑀼𑀧𑁆𑀨𑀸𑀦𑀺 𑀅𑀪𑀺𑀯𑀲𑁆𑀲𑀦𑁆𑀢𑀸𑀦𑀺 𑀧𑀤𑀺𑀲𑁆𑀲𑀦𑁆𑀢𑀺, 𑀤𑁂𑀯𑀩𑁆𑀭𑀳𑁆𑀫𑀕𑀡𑁂𑀳𑀺 𑀑𑀓𑀺𑀭𑀺𑀬𑀫𑀸𑀦𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀪𑀼𑀚𑀢𑀻𑀢𑀺 𑀑𑀲𑀓𑁆𑀓𑀢𑀺. 𑀢𑁂𑀧𑀚𑁆𑀚𑀼𑀪𑁄𑀢𑀺 ¶ 𑀢𑁂𑀧𑀺 𑀅𑀚𑁆𑀚 𑀉𑀪𑁄 𑀫𑀳𑀸𑀲𑀫𑀼𑀤𑁆𑀤𑀤𑀲𑀲𑀳𑀲𑁆𑀲𑀺𑀬𑁄. 𑀅𑀪𑀺𑀭𑀯𑀦𑁆𑀢𑀻𑀢𑀺 𑀅𑀪𑀺𑀦𑀤𑀦𑁆𑀢𑀺. 𑀦𑀺𑀭𑀬𑁂𑀢𑀺 𑀦𑀺𑀭𑀬𑁂𑀲𑀼. 𑀤𑀲𑀲𑀳𑀲𑁆𑀲𑀸𑀢𑀺 𑀅𑀦𑁂𑀓𑀤𑀲𑀲𑀳𑀲𑁆𑀲𑀸. 𑀦𑀺𑀩𑁆𑀩𑀦𑁆𑀢𑀻𑀢𑀺 𑀲𑀫𑁆𑀫𑀦𑁆𑀢𑀺, 𑀲𑀦𑁆𑀢𑀺𑀁 𑀉𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀭𑀓𑀸𑀢𑀺 𑀦𑀓𑁆𑀔𑀢𑁆𑀢𑀸𑀦𑀺 ¶ . 𑀢𑁂𑀧𑀺 𑀅𑀚𑁆𑀚 𑀧𑀤𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀧𑀺 𑀲𑀽𑀭𑀺𑀬𑀲𑁆𑀲 𑀯𑀺𑀫𑀮𑀪𑀸𑀯𑀸 𑀢𑀸𑀭𑀓𑀸 𑀅𑀚𑁆𑀚 𑀤𑀺𑀯𑀸 𑀤𑀺𑀲𑁆𑀲𑀦𑁆𑀢𑀺.

𑀅𑀦𑁄𑀯𑀝𑁆𑀞𑁂𑀦𑀸𑀢𑀺 𑀅𑀦𑁄𑀯𑀝𑁆𑀞𑁂, 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀅𑀣 𑀯𑀸 𑀅𑀦𑁄𑀯𑀝𑁆𑀞𑁂𑀢𑀺 𑀅𑀦𑀪𑀺𑀯𑀝𑁆𑀞𑁂𑀧𑀺. 𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 ‘‘𑀲𑀼𑀢𑁆𑀯𑀸 𑀦 𑀤𑀽𑀢𑀯𑀘𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀫𑁆𑀧𑀚𑁆𑀚𑀼𑀩𑁆𑀪𑀺𑀚𑁆𑀚𑀢𑁂𑀢𑀺 𑀢𑀫𑁆𑀧𑀺 𑀉𑀤𑀓𑀁 𑀅𑀚𑁆𑀚 𑀉𑀩𑁆𑀪𑀺𑀚𑁆𑀚𑀢𑀺, 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀳𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀺𑀬𑀸𑀢𑀺 𑀧𑀣𑀯𑀺𑀬𑀸, 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀢𑀸𑀭𑀸𑀕𑀡𑀸𑀢𑀺 𑀕𑀳𑀦𑀓𑁆𑀔𑀢𑁆𑀢𑀸𑀤𑀬𑁄 𑀲𑀩𑁆𑀩𑁂 𑀢𑀸𑀭𑀕𑀡𑀸. 𑀦𑀓𑁆𑀔𑀢𑁆𑀢𑀸𑀢𑀺 𑀦𑀓𑁆𑀔𑀢𑁆𑀢𑀢𑀸𑀭𑀓𑀸 𑀘. 𑀕𑀕𑀦𑀫𑀡𑁆𑀟𑀮𑁂𑀢𑀺 𑀲𑀓𑀮𑀕𑀕𑀦𑀫𑀡𑁆𑀟𑀮𑀁 𑀯𑀺𑀭𑁄𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀩𑀺𑀮𑀸𑀲𑀬𑀸𑀢𑀺 𑀩𑀺𑀮𑀸𑀲𑀬𑀸 𑀅𑀳𑀺𑀦𑀓𑀼𑀮𑀓𑀼𑀫𑁆𑀪𑀻𑀮𑀕𑁄𑀥𑀸𑀤𑀬𑁄. 𑀤𑀭𑀻𑀲𑀬𑀸𑀢𑀺 𑀛𑀭𑀸𑀲𑀬𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦𑀺𑀓𑁆𑀔𑀫𑀦𑁆𑀢𑀻𑀢𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀓𑀸𑀲𑀬𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀲𑀬𑀢𑁄. ‘‘𑀢𑀤𑀸𑀲𑀬𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂, 𑀆𑀲𑀬𑀢𑁄, 𑀩𑀺𑀮𑀢𑁄𑀢𑀺 𑀅𑀢𑁆𑀣𑁄. 𑀙𑀼𑀤𑁆𑀥𑀸𑀢𑀺 𑀲𑀼𑀙𑀼𑀤𑁆𑀥𑀸 𑀲𑀼𑀯𑀼𑀤𑁆𑀥𑀸𑀭𑀺𑀢𑀸, 𑀦𑀺𑀓𑁆𑀔𑀦𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀭𑀢𑀻𑀢𑀺 𑀉𑀓𑁆𑀓𑀡𑁆𑀞𑀸. 𑀲𑀦𑁆𑀢𑀼𑀝𑁆𑀞𑀸𑀢𑀺 𑀧𑀭𑀫𑁂𑀦 𑀲𑀦𑁆𑀢𑀼𑀝𑁆𑀞𑁂𑀦 𑀲𑀦𑁆𑀢𑀼𑀝𑁆𑀞𑀸. 𑀯𑀺𑀦𑀲𑁆𑀲𑀢𑀻𑀢𑀺 𑀯𑀺𑀕𑀘𑁆𑀙𑀢𑀺. 𑀭𑀸𑀕𑁄𑀢𑀺 𑀓𑀸𑀫𑀭𑀸𑀕𑁄. 𑀢𑀤𑀸 𑀢𑀦𑀼 𑀳𑁄𑀢𑀻𑀢𑀺 𑀑𑀭𑀫𑀢𑁆𑀢𑀓𑁄 𑀳𑁄𑀢𑀺, 𑀇𑀫𑀺𑀦𑀸 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀯𑀺𑀳𑀢𑀸𑀢𑀺 𑀯𑀺𑀦𑀝𑁆𑀞𑀸. 𑀢𑀤𑀸𑀢𑀺 𑀧𑀼𑀩𑁆𑀩𑁂, 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂𑀢𑀺 𑀅𑀢𑁆𑀣𑁄. 𑀦 𑀪𑀯𑀢𑀻𑀢𑀺 𑀦 𑀳𑁄𑀢𑀺. 𑀅𑀚𑁆𑀚𑀧𑁂𑀢𑀦𑁆𑀢𑀺 𑀅𑀚𑁆𑀚 𑀢𑀯 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂𑀧𑀺 𑀏𑀢𑀁 𑀪𑀬𑀁 𑀦 𑀳𑁄𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀲𑀩𑁆𑀩𑁂𑀯 𑀫𑀬𑀁 𑀚𑀸𑀦𑀸𑀫, 𑀬𑀁 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀤𑁆𑀥𑀁𑀲𑀢𑀻𑀢𑀺 𑀦 𑀉𑀕𑁆𑀕𑀘𑁆𑀙𑀢𑀺. 𑀅𑀦𑀺𑀝𑁆𑀞𑀕𑀦𑁆𑀥𑁄𑀢𑀺 𑀤𑀼𑀕𑁆𑀕𑀦𑁆𑀥𑁄. 𑀧𑀓𑁆𑀓𑀫𑀢𑀻𑀢𑀺 𑀧𑀓𑁆𑀓𑀫𑀺 𑀯𑀺𑀕𑀘𑁆𑀙𑀺. 𑀧𑀯𑀸𑀬𑀢𑀻𑀢𑀺 𑀧𑀯𑀸𑀬𑀺. 𑀲𑁄𑀧𑀚𑁆𑀚𑀸𑀢𑀺 𑀲𑁄𑀧𑀺 𑀤𑀺𑀩𑁆𑀩𑀕𑀦𑁆𑀥𑁄 𑀅𑀚𑁆𑀚. 𑀧𑀤𑀺𑀲𑁆𑀲𑀦𑁆𑀢𑀻𑀢𑀺 ¶ 𑀧𑀤𑀺𑀲𑁆𑀲𑀺𑀁𑀲𑀼. 𑀢𑁂𑀧𑀚𑁆𑀚𑀸𑀢𑀺 𑀢𑁂𑀧𑀺 𑀲𑀩𑁆𑀩𑁂 𑀤𑁂𑀯𑀸 𑀅𑀚𑁆𑀚. 𑀬𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑁂 ¶ 𑀦𑀺𑀧𑀸𑀢𑁄, 𑀬𑀢𑁆𑀢𑀓𑀸𑀢𑀺 𑀅𑀢𑁆𑀣𑁄. 𑀓𑀼𑀝𑁆𑀝𑀸𑀢𑀺 𑀧𑀸𑀓𑀸𑀭𑀸. 𑀦 𑀳𑁄𑀦𑁆𑀢𑀸𑀯𑀭𑀡𑀸𑀢𑀺 𑀆𑀯𑀭𑀡𑀓𑀭𑀸 𑀦 𑀅𑀳𑁂𑀲𑀼𑀁. 𑀢𑀤𑀸𑀢𑀺 𑀧𑀼𑀩𑁆𑀩𑁂. 𑀆𑀓𑀸𑀲𑀪𑀽𑀢𑀸𑀢𑀺 𑀢𑁂 𑀓𑀼𑀝𑁆𑀝𑀓𑀯𑀸𑀝𑀧𑀩𑁆𑀩𑀢𑀸 𑀆𑀯𑀭𑀡𑀁 𑀢𑀺𑀭𑁄𑀓𑀭𑀡𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸, 𑀅𑀚𑀝𑀸𑀓𑀸𑀲𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀼𑀢𑀻𑀢𑀺 𑀫𑀭𑀡𑀁. 𑀉𑀧𑀧𑀢𑁆𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁. 𑀔𑀡𑁂𑀢𑀺 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑀓𑁆𑀔𑀡𑁂. 𑀦 𑀯𑀺𑀚𑁆𑀚𑀢𑀻𑀢𑀺 𑀦𑀸𑀳𑁄𑀲𑀺. 𑀢𑀸𑀦𑀺𑀧𑀚𑁆𑀚𑀸𑀢𑀺 𑀢𑀸𑀦𑀺𑀧𑀺 𑀅𑀚𑁆𑀚 𑀘𑀯𑀦𑀪𑀯𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀫𑀸 𑀦𑀺𑀯𑀢𑁆𑀢𑀻𑀢𑀺 𑀫𑀸 𑀧𑀝𑀺𑀓𑁆𑀓𑀫𑀺. 𑀅𑀪𑀺𑀓𑁆𑀓𑀫𑀸𑀢𑀺 𑀧𑀭𑀓𑁆𑀓𑀫. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀤𑀻𑀧𑀗𑁆𑀓𑀭𑀲𑁆𑀲 𑀤𑀲𑀩𑀮𑀲𑁆𑀲 𑀘 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀜𑁆𑀘 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀫𑁄𑀖𑀯𑀘𑀦𑀸, 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀅𑀜𑁆𑀜𑀣𑀢𑁆𑀢𑀁. 𑀬𑀣𑀸 𑀳𑀺 𑀆𑀓𑀸𑀲𑁂 𑀔𑀺𑀢𑁆𑀢𑀲𑁆𑀲 𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀁 𑀥𑀼𑀯𑀁, 𑀚𑀸𑀢𑀲𑁆𑀲 𑀫𑀭𑀡𑀁, 𑀅𑀭𑀼𑀡𑁂 ¶ 𑀉𑀕𑁆𑀕𑀢𑁂 𑀲𑀽𑀭𑀺𑀬𑀲𑁆𑀲 𑀅𑀩𑁆𑀪𑀼𑀕𑁆𑀕𑀫𑀦𑀁, 𑀆𑀲𑀬𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀲𑀻𑀳𑀲𑁆𑀲 𑀲𑀻𑀳𑀦𑀸𑀤𑀦𑀤𑀦𑀁, 𑀕𑀭𑀼𑀕𑀩𑁆𑀪𑀸𑀬 𑀇𑀢𑁆𑀣𑀺𑀬𑀸 𑀪𑀸𑀭𑀫𑁄𑀭𑁄𑀧𑀦𑀁 𑀥𑀼𑀯𑀁 𑀅𑀯𑀲𑁆𑀲𑀫𑁆𑀪𑀸𑀯𑀻, 𑀏𑀯𑀫𑁂𑀯 𑀩𑀼𑀤𑁆𑀥𑀸𑀦𑀁 𑀯𑀘𑀦𑀁 𑀦𑀸𑀫 𑀥𑀼𑀯𑀁 𑀅𑀫𑁄𑀖𑀁, 𑀅𑀤𑁆𑀥𑀸 𑀅𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦𑁮.

‘‘𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻𑀦𑀘𑀽𑀪𑀬𑀁;

𑀢𑀼𑀝𑁆𑀞𑀳𑀝𑁆𑀞𑁄 𑀧𑀫𑀼𑀤𑀺𑀢𑁄, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁧𑁦𑁯.

‘‘𑀅𑀤𑁆𑀯𑁂𑀚𑁆𑀛𑀯𑀘𑀦𑀸 𑀩𑀼𑀤𑁆𑀥𑀸, 𑀅𑀫𑁄𑀖𑀯𑀘𑀦𑀸 𑀚𑀺𑀦𑀸;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

𑁧𑁧𑁦.

‘‘𑀬𑀣𑀸 𑀔𑀺𑀢𑁆𑀢𑀁 𑀦𑀪𑁂 𑀮𑁂𑀟𑁆𑀟𑀼, 𑀥𑀼𑀯𑀁 𑀧𑀢𑀢𑀺 𑀪𑀽𑀫𑀺𑀬𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

𑁧𑁧𑁧.

‘‘𑀬𑀣𑀸𑀧𑀺 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀫𑀭𑀡𑀁 𑀥𑀼𑀯𑀲𑀲𑁆𑀲𑀢𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

𑁧𑁧𑁨.

‘‘𑀬𑀣𑀸 ¶ 𑀭𑀢𑁆𑀢𑀺𑀓𑁆𑀔𑀬𑁂 𑀧𑀢𑁆𑀢𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

𑁧𑁧𑁩.

‘‘𑀬𑀣𑀸 ¶ 𑀦𑀺𑀓𑁆𑀔𑀦𑁆𑀢𑀲𑀬𑀦𑀲𑁆𑀲, 𑀲𑀻𑀳𑀲𑁆𑀲 𑀦𑀤𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀁.

𑁧𑁧𑁪.

‘‘𑀬𑀣𑀸 𑀆𑀧𑀦𑁆𑀦𑀲𑀢𑁆𑀢𑀸𑀦𑀁, 𑀪𑀸𑀭𑀫𑁄𑀭𑁄𑀧𑀦𑀁 𑀥𑀼𑀯𑀁;

𑀢𑀣𑁂𑀯 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀯𑀘𑀦𑀁 𑀥𑀼𑀯𑀲𑀲𑁆𑀲𑀢𑀁;

𑀯𑀺𑀢𑀣𑀁 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳’’𑀦𑁆𑀢𑀺.

𑀢𑀢𑁆𑀣 ¶ 𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻 𑀦 𑀘𑀽𑀪𑀬𑀦𑁆𑀢𑀺 𑀤𑀻𑀧𑀗𑁆𑀓𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀜𑁆𑀘 𑀯𑀘𑀦𑀁 𑀲𑀼𑀢𑁆𑀯𑀸. 𑀉𑀪𑀬𑀦𑁆𑀢𑀺 𑀉𑀪𑀬𑁂𑀲𑀁, 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀉𑀪𑀬𑀯𑀘𑀦𑀁 𑀯𑀸. 𑀏𑀯𑀁 𑀘𑀺𑀦𑁆𑀢𑁂𑀲𑀳𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑁂𑀲𑀺𑀁 𑀅𑀳𑀁.

𑀅𑀤𑁆𑀯𑁂𑀚𑁆𑀛𑀯𑀘𑀦𑀸𑀢𑀺 𑀤𑁆𑀯𑁂𑀥𑀸 𑀅𑀧𑁆𑀧𑀯𑀢𑁆𑀢𑀯𑀘𑀦𑀸, 𑀏𑀓𑀁𑀲𑀯𑀘𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀘𑁆𑀙𑀺𑀤𑁆𑀤𑀯𑀘𑀦𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀦𑀺𑀤𑁆𑀤𑁄𑀲𑀯𑀘𑀦𑀸𑀢𑀺 𑀅𑀢𑁆𑀣𑁄. 𑀅𑀫𑁄𑀖𑀯𑀘𑀦𑀸𑀢𑀺 𑀅𑀯𑀺𑀢𑀣𑀯𑀘𑀦𑀸. 𑀯𑀺𑀢𑀣𑀦𑁆𑀢𑀺 𑀯𑀺𑀢𑀣𑀯𑀘𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳𑀦𑁆𑀢𑀺 𑀅𑀳𑀁 𑀏𑀓𑀁𑀲𑁂𑀦𑁂𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀦𑀺𑀬𑀢𑀯𑀲𑁂𑀦 𑀅𑀯𑀲𑁆𑀲𑀫𑁆𑀪𑀸𑀯𑀺𑀯𑀲𑁂𑀦 𑀘 𑀯𑀢𑁆𑀢𑀫𑀸𑀦𑀯𑀘𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀽𑀭𑀺𑀬𑀼𑀕𑁆𑀕𑀫𑀦𑀦𑁆𑀢𑀺 𑀲𑀽𑀭𑀺𑀬𑀲𑁆𑀲 𑀉𑀤𑀬𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀥𑀼𑀯𑀲𑀲𑁆𑀲𑀢𑀦𑁆𑀢𑀺 𑀏𑀓𑀁𑀲𑀪𑀸𑀯𑀻 𑀘𑁂𑀯 𑀲𑀲𑁆𑀲𑀢𑀜𑁆𑀘. 𑀦𑀺𑀓𑁆𑀔𑀦𑁆𑀢𑀲𑀬𑀦𑀲𑁆𑀲𑀸𑀢𑀺 𑀲𑀬𑀦𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲. 𑀆𑀧𑀦𑁆𑀦𑀲𑀢𑁆𑀢𑀸𑀦𑀦𑁆𑀢𑀺 𑀕𑀭𑀼𑀕𑀩𑁆𑀪𑀸𑀦𑀁, 𑀕𑀩𑁆𑀪𑀺𑀦𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀭𑀫𑁄𑀭𑁄𑀧𑀦𑀦𑁆𑀢𑀺 𑀪𑀸𑀭𑀑𑀭𑁄𑀧𑀦𑀁, 𑀕𑀩𑁆𑀪𑀲𑁆𑀲 𑀑𑀭𑁄𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

‘‘𑀲𑁆𑀯𑀸𑀳𑀁 𑀅𑀤𑁆𑀥𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀉𑀧𑀥𑀸𑀭𑁂𑀢𑀼𑀁 𑁋 ‘‘𑀓𑀳𑀁 𑀦𑀼 𑀔𑁄 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸’’𑀢𑀺, 𑀉𑀤𑁆𑀥𑀁 𑀅𑀥𑁄 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀽𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀓𑀮𑀁 𑀥𑀫𑁆𑀫𑀥𑀸𑀢𑀼𑀁 𑀯𑀺𑀘𑀺𑀦𑀦𑁆𑀢𑁄 𑀧𑀼𑀩𑁆𑀩𑁂 𑀧𑁄𑀭𑀸𑀡𑀓𑁂𑀳𑀺 𑀩𑁄𑀥𑀺𑀲𑀢𑁆𑀢𑁂𑀳𑀺 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀯𑀁 𑀅𑀢𑁆𑀢𑀸𑀦𑀁 𑀑𑀯𑀤𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀦𑀺𑀓𑀼𑀚𑁆𑀚𑀺𑀢𑁄 𑀉𑀤𑀓𑀓𑀼𑀫𑁆𑀪𑁄 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀉𑀤𑀓𑀁 𑀯𑀫𑀢𑀺𑀬𑁂𑀯 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀯𑀫𑁂𑀯 𑀥𑀦𑀁 𑀯𑀸 𑀬𑀲𑀁 𑀯𑀸 𑀧𑀼𑀢𑁆𑀢𑀤𑀸𑀭𑀁 ¶ 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀸𑀘𑀓𑀸𑀦𑀁 𑀲𑀩𑁆𑀩𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀤𑀤𑀫𑀸𑀦𑁄 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁫.

‘‘𑀳𑀦𑁆𑀤 ¶ 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀬𑀸𑀯𑀢𑀸 𑀥𑀫𑁆𑀫𑀥𑀸𑀢𑀼𑀬𑀸.

𑁧𑁧𑁬.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀅𑀦𑀼𑀘𑀺𑀡𑁆𑀡𑀁 𑀫𑀳𑀸𑀧𑀣𑀁.

𑁧𑁧𑁭.

‘‘𑀇𑀫𑀁 ¶ 𑀢𑁆𑀯𑀁 𑀧𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀤𑀸𑀦𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑁧𑁧𑁮.

‘‘𑀬𑀣𑀸𑀧𑀺 𑀓𑀼𑀫𑁆𑀪𑁄 𑀲𑀫𑁆𑀧𑀼𑀡𑁆𑀡𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀥𑁄 𑀓𑀢𑁄;

𑀯𑀫𑀢𑁂𑀯𑀼𑀤𑀓𑀁 𑀦𑀺𑀲𑁆𑀲𑁂𑀲𑀁, 𑀦 𑀢𑀢𑁆𑀣 𑀧𑀭𑀺𑀭𑀓𑁆𑀔𑀢𑀺.

𑁧𑁧𑁯.

‘‘𑀢𑀣𑁂𑀯 𑀬𑀸𑀘𑀓𑁂 𑀤𑀺𑀲𑁆𑀯𑀸, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀤𑀤𑀸𑀳𑀺 𑀤𑀸𑀦𑀁 𑀦𑀺𑀲𑁆𑀲𑁂𑀲𑀁, 𑀓𑀼𑀫𑁆𑀪𑁄 𑀯𑀺𑀬 𑀅𑀥𑁄 𑀓𑀢𑁄’’𑀢𑀺.

𑀢𑀢𑁆𑀣 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂𑀢𑀺 𑀩𑀼𑀤𑁆𑀥𑀢𑁆𑀢𑀓𑀭𑁂 𑀥𑀫𑁆𑀫𑁂. 𑀩𑀼𑀤𑁆𑀥𑀢𑁆𑀢𑀓𑀭𑀸 𑀦𑀸𑀫 𑀥𑀫𑁆𑀫𑀸 𑀤𑀸𑀦𑀧𑀸𑀭𑀫𑀺𑀢𑀸𑀤𑀬𑁄 𑀤𑀲 𑀥𑀫𑁆𑀫𑀸. 𑀯𑀺𑀘𑀺𑀦𑀸𑀫𑀻𑀢𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀘𑀺𑀢𑁄𑀢𑀺 𑀇𑀢𑁄 𑀇𑀢𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀺𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑁂. 𑀅𑀥𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑁂. 𑀤𑀲 𑀤𑀺𑀲𑀸𑀢𑀺 𑀤𑀲𑀲𑀼 𑀤𑀺𑀲𑀸𑀲𑀼; 𑀓𑀢𑁆𑀣 𑀦𑀼 𑀔𑁄 𑀢𑁂 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀸𑀯𑀢𑀸 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀏𑀢𑁆𑀣 𑀬𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀲𑀪𑀸𑀯𑀥𑀫𑁆𑀫𑀲𑁆𑀲, 𑀧𑀯𑀢𑁆𑀢𑀦𑀻𑀢𑀺 𑀯𑀘𑀦𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀸𑀯𑀢𑀺𑀓𑀸 𑀲𑀪𑀸𑀯𑀥𑀫𑁆𑀫𑀸𑀦𑀁 𑀓𑀸𑀫𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺, 𑀢𑀸𑀯𑀢𑀺𑀓𑀁 𑀯𑀺𑀘𑀺𑀦𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀺𑀘𑀺𑀦𑀦𑁆𑀢𑁄𑀢𑀺 𑀯𑀻𑀫𑀁𑀲𑀦𑁆𑀢𑁄 𑀉𑀧𑀧𑀭𑀺𑀓𑁆𑀔𑀦𑁆𑀢𑁄. 𑀧𑀼𑀩𑁆𑀩𑀓𑁂𑀳𑀻𑀢𑀺 𑀧𑁄𑀭𑀸𑀡𑁂𑀳𑀺 𑀩𑁄𑀥𑀺𑀲𑀢𑁆𑀢𑁂𑀳𑀺. 𑀅𑀦𑀼𑀘𑀺𑀡𑁆𑀡𑀦𑁆𑀢𑀺 𑀅𑀚𑁆𑀛𑀸𑀘𑀺𑀡𑁆𑀡𑀁 𑀆𑀲𑁂𑀯𑀺𑀢𑀁. 𑀲𑀫𑀸𑀤𑀺𑀬𑀸𑀢𑀺 𑀲𑀫𑀸𑀤𑀺𑀬𑀦𑀁 𑀓𑀭𑁄𑀳𑀺, 𑀅𑀚𑁆𑀚 𑀧𑀝𑁆𑀞𑀸𑀬 𑀅𑀬𑀁 𑀧𑀞𑀫𑀁 𑀤𑀸𑀦𑀧𑀸𑀭𑀫𑀻 𑀧𑀽𑀭𑁂𑀢𑀩𑁆𑀩𑀸 𑀫𑀬𑀸𑀢𑀺 𑀏𑀯𑀁 𑀲𑀫𑀸𑀤𑀺𑀬𑀸𑀢𑀺 𑀅𑀢𑁆𑀣𑁄. 𑀤𑀸𑀦𑀧𑀸𑀭𑀫𑀺𑀢𑀁 𑀕𑀘𑁆𑀙𑀸𑀢𑀺 𑀤𑀸𑀦𑀧𑀸𑀭𑀫𑀺𑀁 𑀕𑀘𑁆𑀙, 𑀧𑀽𑀭𑀬𑀸𑀢𑀺 𑀅𑀢𑁆𑀣𑁄. 𑀬𑀤𑀺 ¶ 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀻𑀢𑀺 𑀩𑁄𑀥𑀺𑀫𑀽𑀮𑀫𑀼𑀧𑀕𑀦𑁆𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑀼𑀁 𑀇𑀘𑁆𑀙𑀲𑀺 𑀘𑁂. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀉𑀤𑀓𑀲𑁆𑀲 𑀯𑀸 𑀔𑀻𑀭𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀧𑀼𑀡𑁆𑀡𑁄. 𑀲𑀫𑁆𑀧𑀼𑀡𑁆𑀡𑀲𑀤𑁆𑀤𑀬𑁄𑀕𑁂 𑀲𑀢𑀺 𑀲𑀸𑀫𑀺𑀯𑀘𑀦𑀁 𑀇𑀘𑁆𑀙𑀦𑁆𑀢𑀺 ¶ 𑀲𑀤𑁆𑀤𑀯𑀺𑀤𑀽. 𑀓𑀭𑀡𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁, 𑀬𑁂𑀦 𑀓𑁂𑀦𑀘𑀻𑀢𑀺 𑀅𑀢𑁆𑀣𑁄. 𑀅𑀥𑁄 𑀓𑀢𑁄𑀢𑀺 𑀳𑁂𑀝𑁆𑀞𑀸𑀫𑀼𑀔𑀻𑀓𑀢𑁄. 𑀦 𑀢𑀢𑁆𑀣 𑀧𑀭𑀺𑀭𑀓𑁆𑀔𑀢𑀻𑀢𑀺 𑀢𑀲𑁆𑀫𑀺𑀁 𑀯𑀫𑀦𑁂 𑀦 𑀧𑀭𑀺𑀭𑀓𑁆𑀔𑀢𑀺, 𑀦𑀺𑀲𑁆𑀲𑁂𑀲𑀁 𑀉𑀤𑀓𑀁 𑀯𑀫𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂𑀢𑀺 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑁂. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀓𑀼𑀫𑁆𑀪𑁄 𑀯𑀺𑀬 𑀅𑀥𑁄 𑀓𑀢𑁄𑀢𑀺 𑀳𑁂𑀝𑁆𑀞𑀸𑀫𑀼𑀔𑀻𑀓𑀢𑁄 𑀯𑀺𑀬 𑀓𑀼𑀫𑁆𑀪𑁄. 𑀬𑀸𑀘𑀓𑁂 𑀉𑀧𑀕𑀢𑁂 𑀤𑀺𑀲𑁆𑀯𑀸 𑁋 ‘‘𑀢𑁆𑀯𑀁, 𑀲𑀼𑀫𑁂𑀥, 𑀅𑀢𑁆𑀢𑀦𑁄 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀤𑀸𑀦𑀧𑀸𑀭𑀫𑀺𑀁, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁂𑀦 𑀉𑀧𑀧𑀸𑀭𑀫𑀺𑀁, 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀦 𑀧𑀭𑀫𑀢𑁆𑀣𑀧𑀸𑀭𑀫𑀺𑀜𑁆𑀘 𑀧𑀽𑀭𑁂𑀳𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺.

𑀅𑀣𑀲𑁆𑀲 ¶ ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑁂𑀳𑀺 𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀲𑀻𑀮𑀧𑀸𑀭𑀫𑀺𑀁 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸 𑀘𑀫𑀭𑀻 𑀫𑀺𑀕𑁄 𑀦𑀸𑀫 𑀚𑀻𑀯𑀺𑀢𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀮𑀫𑁂𑀯 𑀭𑀓𑁆𑀔𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀇𑀢𑁄 𑀧𑀝𑁆𑀞𑀸𑀬 𑀚𑀻𑀯𑀺𑀢𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀻𑀮𑀫𑁂𑀯 𑀭𑀓𑁆𑀔𑀦𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨𑁦.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁨𑁧.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁨𑁨.

‘‘𑀇𑀫𑀁 𑀢𑁆𑀯𑀁 𑀤𑀼𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀲𑀻𑀮𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑁧𑁨𑁩.

‘‘𑀬𑀣𑀸𑀧𑀺 𑀘𑀫𑀭𑀻 𑀯𑀸𑀮𑀁, 𑀓𑀺𑀲𑁆𑀫𑀺𑀜𑁆𑀘𑀺 𑀧𑀝𑀺𑀮𑀕𑁆𑀕𑀺𑀢𑀁;

𑀉𑀧𑁂𑀢𑀺 𑀫𑀭𑀡𑀁 𑀢𑀢𑁆𑀣, 𑀦 𑀯𑀺𑀓𑁄𑀧𑁂𑀢𑀺 𑀯𑀸𑀮𑀥𑀺𑀁.

𑁧𑁨𑁪.

‘‘𑀢𑀣𑁂𑀯 𑀢𑁆𑀯𑀁 𑀘𑀢𑀽𑀲𑀼 𑀪𑀽𑀫𑀻𑀲𑀼, 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑀬;

𑀧𑀭𑀺𑀭𑀓𑁆𑀔 𑀲𑀩𑁆𑀩𑀤𑀸 𑀲𑀻𑀮𑀁, 𑀘𑀫𑀭𑀻 𑀯𑀺𑀬 𑀯𑀸𑀮𑀥𑀺’’𑀦𑁆𑀢𑀺.

𑀢𑀢𑁆𑀣 𑀦 𑀳𑁂𑀢𑁂𑀢𑀺 𑀦 𑀳𑀺 𑀏𑀢𑁂𑀬𑁂𑀯. 𑀩𑁄𑀥𑀺𑀧𑀸𑀘𑀦𑀸𑀢𑀺 𑀫𑀕𑁆𑀕𑀧𑀭𑀺𑀧𑀸𑀘𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀭𑀺𑀧𑀸𑀘𑀦𑀸 𑀯𑀸. 𑀤𑀼𑀢𑀺𑀬𑀁 ¶ 𑀲𑀻𑀮𑀧𑀸𑀭𑀫𑀺𑀦𑁆𑀢𑀺 𑀲𑀻𑀮𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸, 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀓𑀼𑀲𑀮𑀥𑀫𑁆𑀫𑁂𑀳𑀺 𑀦 𑀧𑀭𑀺𑀳𑀸𑀬𑀢𑀺, 𑀲𑀩𑁆𑀩𑁂𑀧𑀺 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑁂 𑀧𑀝𑀺𑀮𑀪𑀢𑀺. 𑀢𑀲𑁆𑀫𑀸 𑀲𑀻𑀮𑀧𑀸𑀭𑀫𑀻 𑀧𑀽𑀭𑁂𑀢𑀩𑁆𑀩𑀸𑀢𑀺 𑀤𑀼𑀢𑀺𑀬𑀁 𑀲𑀻𑀮𑀧𑀸𑀭𑀫𑀺𑀁 𑀅𑀤𑁆𑀤𑀓𑁆𑀔𑀺𑀦𑁆𑀢𑀺 𑀅𑀢𑁆𑀣𑁄.

𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀦𑁆𑀢𑀺 𑀪𑀸𑀯𑀺𑀢𑀜𑁆𑀘𑁂𑀯 𑀩𑀳𑀼𑀮𑀻𑀓𑀢𑀜𑁆𑀘. 𑀘𑀫𑀭𑀻𑀢𑀺 𑀘𑀫𑀭𑀻 𑀫𑀺𑀕𑁄. 𑀓𑀺𑀲𑁆𑀫𑀺𑀜𑁆𑀘𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀭𑀼𑀓𑁆𑀔𑀮𑀢𑀸𑀓𑀡𑁆𑀝𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀧𑀝𑀺𑀮𑀕𑁆𑀕𑀺𑀢𑀦𑁆𑀢𑀺 𑀧𑀝𑀺𑀯𑀺𑀮𑀕𑁆𑀕𑀺𑀢𑀁. 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀯𑀺𑀮𑀕𑁆𑀕𑀺𑀢𑀁, 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀫𑀭𑀡𑀁 𑀉𑀧𑀕𑀘𑁆𑀙𑀢𑀺. 𑀦 𑀯𑀺𑀓𑁄𑀧𑁂𑀢𑀻𑀢𑀺 𑀦 𑀙𑀺𑀦𑁆𑀤𑀢𑀺. 𑀯𑀸𑀮𑀥𑀺𑀦𑁆𑀢𑀺 𑀯𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦 𑀕𑀘𑁆𑀙𑀢𑀺, 𑀢𑀢𑁆𑀣𑁂𑀯 𑀫𑀭𑀡𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀘𑀢𑀽𑀲𑀼 ¶ 𑀪𑀽𑀫𑀻𑀲𑀼 𑀲𑀻𑀮𑀸𑀦𑀻𑀢𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀲𑀻𑀮𑀸𑀦𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀯𑀲𑁂𑀦 𑀧𑀦 𑀤𑁆𑀯𑀻𑀲𑀼𑀬𑁂𑀯 𑀪𑀽𑀫𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑀁 𑀢𑀫𑁆𑀧𑀺 𑀘𑀢𑀼𑀲𑀻𑀮𑀫𑁂𑀯𑀸𑀢𑀺. 𑀧𑀭𑀺𑀧𑀽𑀭𑀬𑀸𑀢𑀺 𑀔𑀡𑁆𑀟𑀙𑀺𑀤𑁆𑀤𑀲𑀩𑀮𑀸𑀤𑀺𑀅𑀪𑀸𑀯𑁂𑀦 𑀧𑀭𑀺𑀧𑀽𑀭𑀬. 𑀲𑀩𑁆𑀩𑀤𑀸𑀢𑀺 𑀲𑀩𑁆𑀩𑀓𑀸𑀮𑀁. 𑀘𑀫𑀭𑀻 𑀯𑀺𑀬𑀸𑀢𑀺 𑀘𑀫𑀭𑀻 𑀫𑀺𑀕𑁄 𑀯𑀺𑀬. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑁂𑀳𑀺 𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸𑀧𑀺 𑀲𑀼𑀘𑀺𑀭𑀁 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀫𑀸𑀦𑁄 𑀧𑀼𑀭𑀺𑀲𑁄 𑀦 𑀢𑀢𑁆𑀣 𑀲𑀺𑀦𑁂𑀳𑀁 𑀓𑀭𑁄𑀢𑀺, 𑀅𑀣 𑀔𑁄 𑀉𑀓𑁆𑀓𑀡𑁆𑀞𑀺𑀢𑁄 𑀅𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑀪𑀯𑁂 𑀩𑀦𑁆𑀥𑀦𑀸𑀕𑀸𑀭𑀲𑀤𑀺𑀲𑁂 𑀓𑀢𑁆𑀯𑀸 𑀧𑀲𑁆𑀲, 𑀲𑀩𑁆𑀩𑀪𑀯𑁂𑀳𑀺 𑀉𑀓𑁆𑀓𑀡𑁆𑀞𑀺𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄𑀯 𑀳𑁄𑀢𑀺, 𑀏𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨𑁫.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁨𑁬.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁨𑁭.

‘‘𑀇𑀫𑀁 𑀢𑁆𑀯𑀁 𑀢𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑁧𑁨𑁮.

‘‘𑀬𑀣𑀸 𑀅𑀦𑁆𑀤𑀼𑀖𑀭𑁂 𑀧𑀼𑀭𑀺𑀲𑁄, 𑀘𑀺𑀭𑀯𑀼𑀝𑁆𑀞𑁄 𑀤𑀼𑀔𑀝𑁆𑀝𑀺𑀢𑁄;

𑀦 𑀢𑀢𑁆𑀣 𑀭𑀸𑀕𑀁 𑀚𑀦𑁂𑀢𑀺, 𑀫𑀼𑀢𑁆𑀢𑀺𑀁𑀬𑁂𑀯 𑀕𑀯𑁂𑀲𑀢𑀺.

𑁧𑁨𑁯.

‘‘𑀢𑀣𑁂𑀯 ¶ ¶ 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀲𑁆𑀲 𑀅𑀦𑁆𑀤𑀼𑀖𑀭𑁂 𑀯𑀺𑀬;

𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸’’𑀢𑀺.

𑀢𑀢𑁆𑀣 𑀅𑀦𑁆𑀤𑀼𑀖𑀭𑁂𑀢𑀺 𑀩𑀦𑁆𑀥𑀦𑀸𑀕𑀸𑀭𑁂. 𑀘𑀺𑀭𑀯𑀼𑀝𑁆𑀞𑁄𑀢𑀺 𑀘𑀺𑀭𑀓𑀸𑀮𑀁 𑀯𑀼𑀝𑁆𑀞𑁄. 𑀤𑀼𑀔𑀝𑁆𑀝𑀺𑀢𑁄𑀢𑀺 𑀤𑀼𑀓𑁆𑀔𑀧𑀻𑀴𑀺𑀢𑁄. 𑀦 ¶ 𑀢𑀢𑁆𑀣 𑀭𑀸𑀕𑀁 𑀚𑀦𑁂𑀢𑀻𑀢𑀺 𑀢𑀢𑁆𑀣 𑀅𑀦𑁆𑀤𑀼𑀖𑀭𑁂 𑀭𑀸𑀕𑀁 𑀲𑀺𑀦𑁂𑀳𑀁 𑀦 𑀚𑀦𑁂𑀢𑀺 𑀦 𑀉𑀧𑁆𑀧𑀸𑀤𑁂𑀢𑀺. ‘‘𑀇𑀫𑀁 𑀅𑀦𑁆𑀤𑀼𑀖𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀸𑀳𑀁 𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀢𑀢𑁆𑀣 𑀭𑀸𑀕𑀁 𑀦 𑀚𑀦𑁂𑀢𑀺, 𑀓𑀺𑀦𑁆𑀢𑀼 𑀫𑀼𑀢𑁆𑀢𑀺𑀁𑀬𑁂𑀯 𑀫𑁄𑀓𑁆𑀔𑀫𑁂𑀯 𑀕𑀯𑁂𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄𑀢𑀺 𑀦𑀺𑀓𑁆𑀔𑀫𑀦𑀸𑀪𑀺𑀫𑀼𑀔𑁄 𑀳𑁄𑀢𑀺. 𑀪𑀯𑀢𑁄𑀢𑀺 𑀲𑀩𑁆𑀩𑀪𑀯𑁂𑀳𑀺. 𑀧𑀭𑀺𑀫𑀼𑀢𑁆𑀢𑀺𑀬𑀸𑀢𑀺 𑀧𑀭𑀺𑀫𑁄𑀘𑀦𑀢𑁆𑀣𑀸𑀬. 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺𑀧𑀺 𑀧𑀸𑀞𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀧𑀜𑁆𑀜𑀸𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺. 𑀳𑀻𑀦𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑁂𑀲𑀼 𑀓𑀜𑁆𑀘𑀺 𑀅𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺. 𑀬𑀣𑀸𑀧𑀺 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀳𑀻𑀦𑀸𑀤𑀺𑀪𑁂𑀤𑁂𑀲𑀼 𑀓𑀼𑀮𑁂𑀲𑀼 𑀓𑀺𑀜𑁆𑀘𑀺 𑀓𑀼𑀮𑀁 𑀅𑀯𑀺𑀯𑀚𑁆𑀚𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀔𑀺𑀧𑁆𑀧𑀁 𑀬𑀸𑀧𑀦𑀫𑀢𑁆𑀢𑀁 𑀮𑀪𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑁂 𑀧𑀡𑁆𑀟𑀺𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩𑁦.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁩𑁧.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀘𑀢𑀼𑀢𑁆𑀣𑀁 𑀧𑀜𑁆𑀜𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁩𑁨.

‘‘𑀇𑀫𑀁 𑀢𑁆𑀯𑀁 𑀘𑀢𑀼𑀢𑁆𑀣𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑁧𑁩𑁩.

‘‘𑀬𑀣𑀸 𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀦𑁆𑀢𑁄, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀓𑀼𑀮𑀸𑀦𑀺 𑀦 𑀯𑀺𑀯𑀚𑁆𑀚𑁂𑀦𑁆𑀢𑁄, 𑀏𑀯𑀁 𑀮𑀪𑀢𑀺 𑀬𑀸𑀧𑀦𑀁.

𑁧𑁩𑁪.

‘‘𑀢𑀣𑁂𑀯 ¶ 𑀢𑁆𑀯𑀁 𑀲𑀩𑁆𑀩𑀓𑀸𑀮𑀁, 𑀧𑀭𑀺𑀧𑀼𑀘𑁆𑀙𑀁 𑀩𑀼𑀥𑀁 𑀚𑀦𑀁;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 ¶ 𑀪𑀺𑀓𑁆𑀔𑀦𑁆𑀢𑁄𑀢𑀺 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄. 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂𑀢𑀺 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸𑀦𑀺 𑀓𑀼𑀮𑀸𑀦𑀻𑀢𑀺 ¶ 𑀅𑀢𑁆𑀣𑁄. 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀲𑁄 𑀓𑀢𑁄. 𑀦 𑀯𑀺𑀯𑀚𑁆𑀚𑁂𑀦𑁆𑀢𑁄𑀢𑀺 𑀦 𑀧𑀭𑀺𑀳𑀭𑀦𑁆𑀢𑁄, 𑀖𑀭𑀧𑀝𑀺𑀧𑀸𑀝𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀭𑀦𑁆𑀢𑁄 𑀯𑀺𑀯𑀚𑁆𑀚𑁂𑀢𑀺 𑀦𑀸𑀫, 𑀏𑀯𑀫𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀸𑀧𑀦𑀦𑁆𑀢𑀺 𑀬𑀸𑀧𑀦𑀫𑀢𑁆𑀢𑀁 𑀧𑀸𑀡𑀥𑀸𑀭𑀡𑀁 𑀆𑀳𑀸𑀭𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮𑀁, 𑀓𑀺𑀁 𑀅𑀓𑀼𑀲𑀮𑀁; 𑀓𑀺𑀁 𑀲𑀸𑀯𑀚𑁆𑀚𑀁, 𑀓𑀺𑀁 𑀅𑀦𑀯𑀚𑁆𑀚’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁮𑁪, 𑁨𑁧𑁬) 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀜𑁆𑀜𑀸𑀢𑁂 𑀧𑀡𑁆𑀟𑀺𑀢𑁂 𑀚𑀦𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀥𑀁 𑀚𑀦𑀦𑁆𑀢𑀺 𑀧𑀡𑁆𑀟𑀺𑀢𑀁 𑀚𑀦𑀁. ‘‘𑀩𑀼𑀥𑁂 𑀚𑀦𑁂’’𑀢𑀺𑀧𑀺 𑀧𑀸𑀞𑁄. 𑀧𑀜𑁆𑀜𑀸𑀬 𑀧𑀸𑀭𑀫𑀺𑀦𑁆𑀢𑀺 𑀧𑀜𑁆𑀜𑀸𑀬 𑀧𑀸𑀭𑀁. ‘‘𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀯𑀻𑀭𑀺𑀬𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺. 𑀬𑀣𑀸𑀧𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑁄 𑀳𑁄𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀲𑀩𑁆𑀩𑀪𑀯𑁂𑀲𑀼 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑁄 𑀅𑀦𑁄𑀮𑀻𑀦𑀯𑀻𑀭𑀺𑀬𑁄 𑀲𑀫𑀸𑀦𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩𑁫.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁩𑁬.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀜𑁆𑀘𑀫𑀁 𑀯𑀻𑀭𑀺𑀬𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁩𑁭.

‘‘𑀇𑀫𑀁 𑀢𑁆𑀯𑀁 𑀧𑀜𑁆𑀘𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀯𑀻𑀭𑀺𑀬𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑁧𑁩𑁮.

‘‘𑀬𑀣𑀸𑀧𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀮𑀻𑀦𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀺𑀢𑀫𑀦𑁄 𑀲𑀤𑀸.

𑁧𑁩𑁯.

‘‘𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀕𑁆𑀕𑀡𑁆𑀳 𑀯𑀻𑀭𑀺𑀬𑀁 𑀤𑀴𑁆𑀳𑀁;

𑀯𑀻𑀭𑀺𑀬𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 ¶ 𑀅𑀮𑀻𑀦𑀯𑀻𑀭𑀺𑀬𑁄𑀢𑀺 𑀅𑀦𑁄𑀮𑀻𑀦𑀯𑀻𑀭𑀺𑀬𑁄. 𑀲𑀩𑁆𑀩𑀪𑀯𑁂𑀢𑀺 ¶ 𑀚𑀸𑀢𑀚𑀸𑀢𑀪𑀯𑁂, 𑀲𑀩𑁆𑀩𑁂𑀲𑀼 𑀪𑀯𑁂𑀲𑀽𑀢𑀺 𑀅𑀢𑁆𑀣𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻𑀢𑀺𑀧𑀺 𑀧𑀸𑀞𑁄. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀣𑀲𑁆𑀲 ¶ ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀙𑀝𑁆𑀞𑀫𑀁 𑀔𑀦𑁆𑀢𑀺𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀔𑀦𑁆𑀢𑀺𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀬𑁆𑀬𑀸𑀲𑀺, 𑀲𑀫𑁆𑀫𑀸𑀦𑀦𑁂𑀧𑀺 𑀅𑀯𑀫𑀸𑀦𑀦𑁂𑀧𑀺 𑀔𑀫𑁄𑀯 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸 𑀳𑀺 𑀧𑀣𑀯𑀺𑀬𑀁 𑀦𑀸𑀫 𑀲𑀼𑀘𑀺𑀫𑁆𑀧𑀺 𑀧𑀓𑁆𑀔𑀺𑀧𑀦𑁆𑀢𑀺 𑀅𑀲𑀼𑀘𑀺𑀫𑁆𑀧𑀺, 𑀦 𑀘 𑀢𑁂𑀦 𑀧𑀣𑀯𑀻 𑀲𑀺𑀦𑁂𑀳𑀁 𑀯𑀸 𑀧𑀝𑀺𑀖𑀁 𑀯𑀸 𑀓𑀭𑁄𑀢𑀺, 𑀔𑀫𑀢𑀺 𑀲𑀳𑀢𑀺 𑀅𑀥𑀺𑀯𑀸𑀲𑁂𑀢𑀺𑀬𑁂𑀯, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑁂𑀲𑀁 𑀲𑀫𑁆𑀫𑀸𑀦𑀦𑀸𑀯𑀫𑀸𑀦𑀦𑁂𑀲𑀼 𑀔𑀫𑁄 𑀲𑀫𑀸𑀦𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀙𑀝𑁆𑀞𑀫𑀁 𑀔𑀦𑁆𑀢𑀺𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪𑁦.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁪𑁧.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀙𑀝𑁆𑀞𑀫𑀁 𑀔𑀦𑁆𑀢𑀺𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁪𑁨.

‘‘𑀇𑀫𑀁 𑀢𑁆𑀯𑀁 𑀙𑀝𑁆𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀅𑀤𑁆𑀯𑁂𑀚𑁆𑀛𑀫𑀸𑀦𑀲𑁄, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑁧𑁪𑁩.

‘‘𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫, 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀘;

𑀲𑀩𑁆𑀩𑀁 𑀲𑀳𑀢𑀺 𑀦𑀺𑀓𑁆𑀔𑁂𑀧𑀁, 𑀦 𑀓𑀭𑁄𑀢𑀺 𑀧𑀝𑀺𑀖𑀁 𑀢𑀬𑀸.

𑁧𑁪𑁪.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑁂𑀲𑀁, 𑀲𑀫𑁆𑀫𑀸𑀦𑀸𑀯𑀫𑀸𑀦𑀓𑁆𑀔𑀫𑁄;

𑀔𑀦𑁆𑀢𑀺𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀔𑀦𑁆𑀢𑀺𑀧𑀸𑀭𑀫𑀺𑀬𑀁. 𑀅𑀤𑁆𑀯𑁂𑀚𑁆𑀛𑀫𑀸𑀦𑀲𑁄𑀢𑀺 𑀏𑀓𑀁𑀲𑀫𑀸𑀦𑀲𑁄. 𑀲𑀼𑀘𑀺𑀫𑁆𑀧𑀻𑀢𑀺 𑀘𑀦𑁆𑀤𑀦𑀓𑀼𑀗𑁆𑀓𑀼𑀫𑀕𑀦𑁆𑀥𑀫𑀸𑀮𑀸𑀤𑀺𑀲𑀼𑀘𑀺𑀫𑁆𑀧𑀺. 𑀅𑀲𑀼𑀘𑀺𑀫𑁆𑀧𑀻𑀢𑀺 𑀅𑀳𑀺𑀓𑀼𑀓𑁆𑀓𑀼𑀭𑀫𑀦𑀼𑀲𑁆𑀲𑀓𑀼𑀡𑀧𑀕𑀽𑀣𑀫𑀼𑀢𑁆𑀢𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀅𑀲𑀼𑀘𑀺𑀫𑁆𑀧𑀺. 𑀲𑀳𑀢𑀻𑀢𑀺 𑀔𑀫𑀢𑀺, 𑀅𑀥𑀺𑀯𑀸𑀲𑁂𑀢𑀺. 𑀦𑀺𑀓𑁆𑀔𑁂𑀧𑀦𑁆𑀢𑀺 𑀦𑀺𑀓𑁆𑀔𑀺𑀢𑁆𑀢𑀁. 𑀧𑀝𑀺𑀖𑀦𑁆𑀢𑀺 𑀓𑁄𑀥𑀁. 𑀢𑀬𑀸𑀢𑀺 𑀢𑀸𑀬 𑀯𑀼𑀢𑁆𑀢𑀺𑀬𑀸, 𑀢𑀸𑀬 𑀦𑀺𑀓𑁆𑀔𑀺𑀢𑁆𑀢𑀢𑀸𑀬 𑀯𑀸. ‘‘𑀧𑀝𑀺𑀖𑀁 𑀤𑀬’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀢𑁂𑀦 𑀦𑀺𑀓𑁆𑀔𑁂𑀧𑁂𑀦 𑀧𑀝𑀺𑀖𑀸𑀦𑀼𑀭𑁄𑀥𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀦𑀸𑀯𑀫𑀸𑀦𑀓𑁆𑀔𑀫𑁄𑀢𑀺 𑀲𑀩𑁆𑀩𑁂𑀲𑀁 ¶ 𑀲𑀫𑁆𑀫𑀸𑀦𑀦𑀸𑀯𑀫𑀸𑀦𑀦𑀲𑀳𑁄 𑀢𑁆𑀯𑀫𑁆𑀧𑀺 ¶ 𑀪𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑀪𑀯𑁂, 𑀲𑀫𑁆𑀫𑀸𑀦𑀦𑀯𑀺𑀫𑀸𑀦𑀓𑁆𑀔𑀫𑁄’’𑀢𑀺𑀧𑀺 𑀧𑀞𑀦𑁆𑀢𑀺. ‘‘𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀸 𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀧𑀽𑀭𑀡𑀯𑀲𑁂𑀦 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀇𑀢𑁄 𑀧𑀭𑀁 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀁 𑀢𑀫𑁂𑀯 𑀯𑀢𑁆𑀯𑀸 𑀧𑀸𑀞𑀦𑁆𑀢𑀭𑀁 𑀤𑀲𑁆𑀲𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸𑀢𑀺.

𑀅𑀣𑀲𑁆𑀲 ¶ ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀲𑀘𑁆𑀘𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀅𑀲𑀦𑀺𑀬𑀸 𑀫𑀢𑁆𑀣𑀓𑁂 𑀧𑀢𑀫𑀸𑀦𑀸𑀬𑀧𑀺 𑀥𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀙𑀦𑁆𑀤𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀦𑀸𑀫 𑀫𑀸 𑀪𑀸𑀲𑀺. 𑀬𑀣𑀸𑀧𑀺 𑀑𑀲𑀥𑀻𑀢𑀸𑀭𑀓𑀸 𑀦𑀸𑀫 𑀲𑀩𑁆𑀩𑀉𑀢𑀽𑀲𑀼 𑀅𑀢𑁆𑀢𑀦𑁄 𑀕𑀫𑀦𑀯𑀻𑀣𑀺𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀸𑀬 𑀯𑀻𑀣𑀺𑀬𑀸 𑀦 𑀕𑀘𑁆𑀙𑀢𑀺, 𑀲𑀓𑀯𑀻𑀣𑀺𑀬𑀸𑀯 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀘𑁆𑀘𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀁 𑀦𑀸𑀫 𑀅𑀯𑀤𑀦𑁆𑀢𑁄𑀬𑁂𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪𑁫.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁪𑁬.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀲𑀢𑁆𑀢𑀫𑀁 𑀲𑀘𑁆𑀘𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁪𑁭.

‘‘𑀇𑀫𑀁 𑀢𑁆𑀯𑀁 𑀲𑀢𑁆𑀢𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀅𑀤𑁆𑀯𑁂𑀚𑁆𑀛𑀯𑀘𑀦𑁄, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑁧𑁪𑁮.

‘‘𑀬𑀣𑀸𑀧𑀺 𑀑𑀲𑀥𑀻 𑀦𑀸𑀫, 𑀢𑀼𑀮𑀸𑀪𑀽𑀢𑀸 𑀲𑀤𑁂𑀯𑀓𑁂;

𑀲𑀫𑀬𑁂 𑀉𑀢𑀼𑀯𑀲𑁆𑀲𑁂 𑀯𑀸, 𑀦 𑀯𑁄𑀓𑁆𑀓𑀫𑀢𑀺 𑀯𑀻𑀣𑀺𑀢𑁄.

𑁧𑁪𑁯.

‘‘𑀢𑀣𑁂𑀯 𑀢𑁆𑀯𑀫𑁆𑀧𑀺 𑀲𑀘𑁆𑀘𑁂𑀲𑀼, 𑀫𑀸 𑀯𑁄𑀓𑁆𑀓𑀫 𑀳𑀺 𑀯𑀻𑀣𑀺𑀢𑁄;

𑀲𑀘𑁆𑀘𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀲𑀘𑁆𑀘𑀧𑀸𑀭𑀫𑀺𑀬𑀁. 𑀅𑀤𑁆𑀯𑁂𑀚𑁆𑀛𑀯𑀘𑀦𑁄𑀢𑀺 𑀅𑀯𑀺𑀢𑀣𑀯𑀘𑀦𑁄. 𑀑𑀲𑀥𑀻 𑀦𑀸𑀫𑀸𑀢𑀺 𑀑𑀲𑀥𑀻𑀢𑀸𑀭𑀓𑀸, 𑀑𑀲𑀥𑀕𑀳𑀡𑁂 𑀑𑀲𑀥𑀻𑀢𑀸𑀭𑀓𑀁 𑀉𑀤𑀺𑀢𑀁 𑀤𑀺𑀲𑁆𑀯𑀸 𑀑𑀲𑀥𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 ‘‘𑀑𑀲𑀥𑀻𑀢𑀸𑀭𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀼𑀮𑀸𑀪𑀽𑀢𑀸𑀢𑀺 𑀧𑀫𑀸𑀡𑀪𑀽𑀢𑀸. 𑀲𑀤𑁂𑀯𑀓𑁂𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲. 𑀲𑀫𑀬𑁂𑀢𑀺 ¶ 𑀯𑀲𑁆𑀲𑀲𑀫𑀬𑁂. 𑀉𑀢𑀼𑀯𑀲𑁆𑀲𑁂𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼. ‘‘𑀲𑀫𑀬𑁂 𑀉𑀢𑀼𑀯𑀝𑁆𑀝𑁂’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 𑀲𑀫𑀬𑁂𑀢𑀺 𑀕𑀺𑀫𑁆𑀳𑁂. 𑀉𑀢𑀼𑀯𑀝𑁆𑀝𑁂𑀢𑀺 𑀳𑁂𑀫𑀦𑁆𑀢𑁂 𑀘 𑀯𑀲𑁆𑀲𑀸𑀦𑁂 𑀘𑀸𑀢𑀺 𑀅𑀢𑁆𑀣𑁄. 𑀦 ¶ 𑀯𑁄𑀓𑁆𑀓𑀫𑀢𑀺 𑀯𑀻𑀣𑀺𑀢𑁄𑀢𑀺 𑀢𑀁 𑀢𑀁 𑀉𑀢𑀼𑀫𑁆𑀳𑀺 𑀅𑀢𑁆𑀢𑀦𑁄 𑀕𑀫𑀦𑀯𑀻𑀣𑀺𑀢𑁄 𑀦 𑀯𑁄𑀓𑁆𑀓𑀫𑀢𑀺 𑀦 𑀯𑀺𑀕𑀘𑁆𑀙𑀢𑀺, 𑀙 𑀫𑀸𑀲𑁂 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀙 𑀫𑀸𑀲𑁂 𑀧𑀼𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀻𑀢𑀺. 𑀅𑀣 𑀯𑀸 𑀑𑀲𑀥𑀻 𑀦𑀸𑀫𑀸𑀢𑀺 𑀲𑀺𑀗𑁆𑀕𑀺𑀯𑁂𑀭𑀧𑀺𑀧𑁆𑀨𑀮𑀺𑀫𑀭𑀺𑀘𑀸𑀤𑀺𑀓𑀁 𑀑𑀲𑀥𑀁. 𑀦 𑀯𑁄𑀓𑁆𑀓𑀫𑀢𑀻𑀢𑀺 𑀬𑀁 𑀬𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀑𑀲𑀥𑀁, 𑀢𑀁 𑀢𑀁 𑀨𑀮𑀤𑀸𑀦𑀁 𑀑𑀓𑁆𑀓𑀫𑁆𑀫 𑀅𑀢𑁆𑀢𑀦𑁄 ¶ 𑀨𑀮𑀁 𑀅𑀤𑀢𑁆𑀯𑀸 𑀦 𑀦𑀺𑀯𑀢𑁆𑀢𑀢𑀺. 𑀯𑀻𑀣𑀺𑀢𑁄𑀢𑀺 𑀕𑀫𑀦𑀯𑀻𑀣𑀺𑀢𑁄, 𑀧𑀺𑀢𑁆𑀢𑀳𑀭𑁄 𑀧𑀺𑀢𑁆𑀢𑀁 𑀳𑀭𑀢𑁂𑀯, 𑀯𑀸𑀢𑀳𑀭𑁄 𑀯𑀸𑀢𑀁 𑀳𑀭𑀢𑁂𑀯, 𑀲𑁂𑀫𑁆𑀳𑀳𑀭𑁄 𑀲𑁂𑀫𑁆𑀳𑀁 𑀳𑀭𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀫𑁆𑀧𑀺 𑀧𑀽𑀭𑁂𑀬𑁆𑀬𑀸𑀲𑀺, 𑀬𑀁 𑀅𑀥𑀺𑀝𑁆𑀞𑀸𑀲𑀺, 𑀢𑀲𑁆𑀫𑀺𑀁 𑀅𑀥𑀺𑀝𑁆𑀞𑀸𑀦𑁂 𑀦𑀺𑀘𑁆𑀘𑀮𑁄 𑀪𑀯𑁂𑀬𑁆𑀬𑀸𑀲𑀺, 𑀬𑀣𑀸 𑀧𑀩𑁆𑀩𑀢𑁄 𑀦𑀸𑀫 𑀲𑀩𑁆𑀩𑀤𑀺𑀲𑀸𑀲𑀼 𑀯𑀸𑀢𑁂 𑀧𑀳𑀭𑀦𑁆𑀢𑁂𑀧𑀺 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺, 𑀅𑀢𑁆𑀢𑀦𑁄 𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀅𑀢𑁆𑀢𑀦𑁄 𑀅𑀥𑀺𑀝𑁆𑀞𑀸𑀦𑁂 𑀦𑀺𑀘𑁆𑀘𑀮𑁄 𑀳𑁄𑀦𑁆𑀢𑁄𑀯 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫𑁦.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁫𑁧.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀅𑀝𑁆𑀞𑀫𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁫𑁨.

‘‘𑀇𑀫𑀁 𑀢𑁆𑀯𑀁 𑀅𑀝𑁆𑀞𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀢𑁆𑀣 𑀢𑁆𑀯𑀁 𑀅𑀘𑀮𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑁧𑁫𑁩.

‘‘𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄;

𑀦 𑀓𑀫𑁆𑀧𑀢𑀺 𑀪𑀼𑀲𑀯𑀸𑀢𑁂𑀳𑀺, 𑀲𑀓𑀝𑁆𑀞𑀸𑀦𑁂𑀯 𑀢𑀺𑀝𑁆𑀞𑀢𑀺.

𑁧𑁫𑁪.

‘‘𑀢𑀢𑁆𑀣𑁂𑀯 𑀢𑁆𑀯𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑁂, 𑀲𑀩𑁆𑀩𑀤𑀸 𑀅𑀘𑀮𑁄 𑀪𑀯;

𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 ¶ 𑀲𑁂𑀮𑁄𑀢𑀺 𑀲𑀺𑀮𑀸𑀫𑀬𑁄. 𑀅𑀘𑀮𑁄𑀢𑀺 𑀦𑀺𑀘𑁆𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀘𑀮𑀢𑁆𑀢𑀸𑀯 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑁄. ‘‘𑀬𑀣𑀸𑀧𑀺 𑀧𑀩𑁆𑀩𑀢𑁄 𑀅𑀘𑀮𑁄, 𑀦𑀺𑀔𑀸𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄’’𑀢𑀺𑀧𑀺 𑀧𑀸𑀞𑁄. 𑀪𑀼𑀲𑀯𑀸𑀢𑁂𑀳𑀻𑀢𑀺 𑀩𑀮𑀯𑀯𑀸𑀢𑁂𑀳𑀺. 𑀲𑀓𑀝𑁆𑀞𑀸𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀞𑀸𑀦𑁂𑀬𑁂𑀯, 𑀬𑀣𑀸𑀞𑀺𑀢𑀝𑁆𑀞𑀸𑀦𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 ¶ 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀧𑀽𑀭𑁂𑀬𑁆𑀬𑀸𑀲𑀺, 𑀳𑀺𑀢𑁂𑀲𑀼𑀧𑀺 𑀅𑀳𑀺𑀢𑁂𑀲𑀼𑀧𑀺 𑀏𑀓𑀘𑀺𑀢𑁆𑀢𑁄𑀯 ¶ 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸𑀧𑀺 𑀉𑀤𑀓𑀁 𑀦𑀸𑀫 𑀧𑀸𑀧𑀚𑀦𑀲𑁆𑀲𑀧𑀺 𑀓𑀮𑁆𑀬𑀸𑀡𑀚𑀦𑀲𑁆𑀲𑀧𑀺 𑀲𑀻𑀢𑀪𑀸𑀯𑀁 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀨𑀭𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀏𑀓𑀘𑀺𑀢𑁆𑀢𑁄𑀯 𑀳𑀼𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫𑁫.

‘‘𑀦 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁫𑁬.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀦𑀯𑀫𑀁 𑀫𑁂𑀢𑁆𑀢𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁫𑁭.

‘‘𑀇𑀫𑀁 𑀢𑁆𑀯𑀁 𑀦𑀯𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀫𑁂𑀢𑁆𑀢𑀸𑀬 𑀅𑀲𑀫𑁄 𑀳𑁄𑀢𑀺, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

𑁧𑁫𑁮.

‘‘𑀬𑀣𑀸𑀧𑀺 𑀉𑀤𑀓𑀁 𑀦𑀸𑀫, 𑀓𑀮𑁆𑀬𑀸𑀡𑁂 𑀧𑀸𑀧𑀓𑁂 𑀚𑀦𑁂;

𑀲𑀫𑀁 𑀨𑀭𑀢𑀺 𑀲𑀻𑀢𑁂𑀦, 𑀧𑀯𑀸𑀳𑁂𑀢𑀺 𑀭𑀚𑁄𑀫𑀮𑀁.

𑁧𑁫𑁯.

‘‘𑀢𑀣𑁂𑀯 𑀢𑁆𑀯𑀁 𑀳𑀺𑀢𑀸𑀳𑀺𑀢𑁂, 𑀲𑀫𑀁 𑀫𑁂𑀢𑁆𑀢𑀸𑀬 𑀪𑀸𑀯𑀬;

𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀅𑀲𑀫𑁄 𑀳𑁄𑀳𑀻𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀅𑀲𑀤𑀺𑀲𑁄 𑀳𑁄𑀳𑀺. 𑀢𑀢𑁆𑀣 ‘‘𑀢𑁆𑀯𑀁 𑀲𑀫𑀲𑀫𑁄 𑀳𑁄𑀳𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀯. 𑀲𑀫𑀦𑁆𑀢𑀺 𑀢𑀼𑀮𑁆𑀬𑀁. 𑀨𑀭𑀢𑀻𑀢𑀺 𑀨𑀼𑀲𑀢𑀺. 𑀧𑀯𑀸𑀳𑁂𑀢𑀻𑀢𑀺 𑀯𑀺𑀲𑁄𑀥𑁂𑀢𑀺. 𑀭𑀚𑁄𑀢𑀺 𑀆𑀕𑀦𑁆𑀢𑀼𑀓𑀭𑀚𑀁. 𑀫𑀮𑀦𑁆𑀢𑀺 𑀲𑀭𑀻𑀭𑁂 𑀉𑀝𑁆𑀞𑀺𑀢𑀁 𑀲𑁂𑀤𑀫𑀮𑀸𑀤𑀺𑀁. ‘‘𑀭𑀚𑀫𑀮’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀳𑀺𑀢𑀸𑀳𑀺𑀢𑁂𑀢𑀺 ¶ 𑀳𑀺𑀢𑁂 𑀘 𑀅𑀳𑀺𑀢𑁂 𑀘, 𑀫𑀺𑀢𑁆𑀢𑁂 𑀘 𑀅𑀫𑀺𑀢𑁆𑀢𑁂 𑀘𑀸𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸𑀬 𑀪𑀸𑀯𑀬𑀸𑀢𑀺 𑀫𑁂𑀢𑁆𑀢𑀁 𑀪𑀸𑀯𑀬 𑀯𑀟𑁆𑀠𑁂𑀳𑀺. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀣𑀲𑁆𑀲 ‘‘𑀦 𑀏𑀢𑁆𑀢𑀓𑁂𑀳𑁂𑀯 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀉𑀧𑀥𑀸𑀭𑀬𑀢𑁄 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀫𑁂𑀥𑀧𑀡𑁆𑀟𑀺𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀬𑁆𑀬𑀸𑀲𑀺, 𑀲𑀼𑀔𑁂𑀧𑀺 𑀤𑀼𑀓𑁆𑀔𑁂𑀧𑀺 𑀫𑀚𑁆𑀛𑀢𑁆𑀢𑁄𑀯 𑀪𑀯𑁂𑀬𑁆𑀬𑀸𑀲𑀺. 𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀘 𑀧𑀓𑁆𑀔𑀺𑀧𑀫𑀸𑀦𑁂 𑀫𑀚𑁆𑀛𑀢𑁆𑀢𑀸𑀯 𑀳𑁄𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑁂𑀲𑀼 𑀫𑀚𑁆𑀛𑀢𑁆𑀢𑁄𑀯 𑀳𑁄𑀦𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 ¶ 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬𑁦.

‘‘𑀦 ¶ 𑀳𑁂𑀢𑁂 𑀏𑀢𑁆𑀢𑀓𑀸𑀬𑁂𑀯, 𑀩𑀼𑀤𑁆𑀥𑀥𑀫𑁆𑀫𑀸 𑀪𑀯𑀺𑀲𑁆𑀲𑀭𑁂;

𑀅𑀜𑁆𑀜𑁂𑀧𑀺 𑀯𑀺𑀘𑀺𑀦𑀺𑀲𑁆𑀲𑀸𑀫𑀺, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸.

𑁧𑁬𑁧.

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀤𑀲𑀫𑀁 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀆𑀲𑁂𑀯𑀺𑀢𑀦𑀺𑀲𑁂𑀯𑀺𑀢𑀁.

𑁧𑁬𑁨.

‘‘𑀇𑀫𑀁 𑀢𑁆𑀯𑀁 𑀤𑀲𑀫𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀢𑀼𑀮𑀸𑀪𑀽𑀢𑁄 𑀤𑀴𑁆𑀳𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑁧𑁬𑁩.

‘‘𑀬𑀣𑀸𑀧𑀺 𑀧𑀣𑀯𑀻 𑀦𑀸𑀫, 𑀦𑀺𑀓𑁆𑀔𑀺𑀢𑁆𑀢𑀁 𑀅𑀲𑀼𑀘𑀺𑀁 𑀲𑀼𑀘𑀺𑀁;

𑀉𑀧𑁂𑀓𑁆𑀔𑀢𑀺 𑀉𑀪𑁄𑀧𑁂𑀢𑁂, 𑀓𑁄𑀧𑀸𑀦𑀼𑀦𑀬𑀯𑀚𑁆𑀚𑀺𑀢𑀸.

𑁧𑁬𑁪.

‘‘𑀢𑀣𑁂𑀯 𑀢𑁆𑀯𑀁 𑀲𑀼𑀔𑀤𑀼𑀓𑁆𑀔𑁂, 𑀢𑀼𑀮𑀸𑀪𑀽𑀢𑁄 𑀲𑀤𑀸 𑀪𑀯;

𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀢𑀼𑀮𑀸𑀪𑀽𑀢𑁄𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁂 𑀞𑀺𑀢𑁄 𑀬𑀣𑀸 𑀢𑀼𑀮𑀸𑀬 𑀤𑀡𑁆𑀟𑁄 𑀲𑀫𑀁 𑀢𑀼𑀮𑀺𑀢𑁄 𑀲𑀫𑀁 𑀢𑀺𑀝𑁆𑀞𑀢𑀺, 𑀦 𑀦𑀫𑀢𑀺 𑀦 𑀉𑀦𑁆𑀦𑀫𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀲𑀼𑀔𑀤𑀼𑀓𑁆𑀔𑁂𑀲𑀼 𑀢𑀼𑀮𑀸𑀲𑀤𑀺𑀲𑁄 𑀳𑀼𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀺. 𑀓𑁄𑀧𑀸𑀦𑀼𑀦𑀬𑀯𑀚𑁆𑀚𑀺𑀢𑀸𑀢𑀺 𑀧𑀝𑀺𑀖𑀸𑀦𑀼𑀭𑁄𑀥𑀯𑀚𑁆𑀚𑀺𑀢𑀸. ‘‘𑀤𑀬𑀸𑀓𑁄𑀧𑀯𑀺𑀯𑀚𑁆𑀚𑀺𑀢𑀸’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀲𑁂𑀲𑀁 𑀔𑀦𑁆𑀢𑀺𑀧𑀸𑀭𑀫𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀇𑀫𑁂 𑀤𑀲 𑀧𑀸𑀭𑀫𑀺𑀥𑀫𑁆𑀫𑁂 𑀯𑀺𑀘𑀺𑀦𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 ¶ 𑀮𑁄𑀓𑁂 𑀩𑁄𑀥𑀺𑀲𑀢𑁆𑀢𑁂𑀳𑀺 𑀧𑀭𑀺𑀧𑀽𑀭𑁂𑀢𑀩𑁆𑀩𑀸 𑀩𑁄𑀥𑀺𑀧𑀸𑀘𑀦𑀸 𑀩𑀼𑀤𑁆𑀥𑀢𑁆𑀢𑀓𑀭𑀸 𑀥𑀫𑁆𑀫𑀸 𑀏𑀢𑁆𑀢𑀓𑀸𑀬𑁂𑀯, 𑀦 𑀇𑀢𑁄 𑀪𑀺𑀬𑁆𑀬𑁄, 𑀇𑀫𑀸 𑀧𑀦 𑀧𑀸𑀭𑀫𑀺𑀬𑁄 𑀉𑀤𑁆𑀥𑀁 𑀆𑀓𑀸𑀲𑁂𑀧𑀺 𑀦𑀢𑁆𑀣𑀺, 𑀦 𑀳𑁂𑀝𑁆𑀞𑀸 𑀧𑀣𑀯𑀺𑀬𑀫𑁆𑀧𑀺, 𑀦 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼𑀧𑀺 𑀅𑀢𑁆𑀣𑀺, 𑀫𑀬𑁆𑀳𑀁𑀬𑁂𑀯 𑀧𑀦 𑀳𑀤𑀬𑀫𑀁𑀲𑀦𑁆𑀢𑀭𑁂𑀬𑁂𑀯 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀏𑀯𑀁 𑀢𑀸𑀲𑀁 𑀅𑀢𑁆𑀢𑀦𑁄 𑀳𑀤𑀬𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀦𑁆𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀲𑀫𑁆𑀫𑀲𑀺, 𑀧𑀭𑀺𑀬𑀦𑁆𑀢𑁂 𑀕𑀳𑁂𑀢𑁆𑀯𑀸 𑀆𑀤𑀺𑀫𑁆𑀳𑀺 𑀧𑀸𑀧𑁂𑀲𑀺, 𑀆𑀤𑀺𑀫𑁆𑀳𑀺 𑀕𑀳𑁂𑀢𑁆𑀯𑀸 𑀧𑀭𑀺𑀬𑀦𑁆𑀢𑁂 𑀞𑀧𑁂𑀲𑀺, 𑀫𑀚𑁆𑀛𑁂 𑀕𑀳𑁂𑀢𑁆𑀯𑀸 𑀉𑀪𑀢𑁄 𑀑𑀲𑀸𑀧𑁂𑀲𑀺, 𑀉𑀪𑀢𑁄 𑀓𑁄𑀝𑀻𑀲𑀼 𑀕𑀳𑁂𑀢𑁆𑀯𑀸 𑀫𑀚𑁆𑀛𑁂 𑀑𑀲𑀸𑀧𑁂𑀲𑀺. 𑀩𑀸𑀳𑀺𑀭𑀪𑀡𑁆𑀟𑀧𑀭𑀺𑀘𑁆𑀘𑀸𑀕𑁄 𑀧𑀸𑀭𑀫𑀺𑀬𑁄 𑀦𑀸𑀫, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀉𑀧𑀧𑀸𑀭𑀫𑀺𑀬𑁄 𑀦𑀸𑀫, 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀦𑀸𑀫𑀸𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀬𑀫𑀓𑀢𑁂𑀮𑀁 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁄 𑀯𑀺𑀬 𑀲𑀫𑁆𑀫𑀲𑀺. 𑀢𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀲𑀫𑁆𑀫𑀲𑀦𑁆𑀢𑀲𑁆𑀲 𑀥𑀫𑁆𑀫𑀢𑁂𑀚𑁂𑀦 ¶ 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀯𑀺𑀧𑀼𑀮𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀳𑀢𑁆𑀣𑀺𑀦𑀸 𑀅𑀓𑁆𑀓𑀦𑁆𑀢𑀦𑀴𑀓𑀮𑀸𑀧𑁄 𑀯𑀺𑀬 𑀉𑀧𑁆𑀧𑀻𑀴𑀺𑀬𑀫𑀸𑀦𑀁 𑀉𑀘𑁆𑀙𑀼𑀬𑀦𑁆𑀢𑀁 𑀯𑀺𑀬 𑀘 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀫𑀸𑀦𑀸 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺. 𑀓𑀼𑀮𑀸𑀮𑀘𑀓𑁆𑀓𑀁 ¶ 𑀯𑀺𑀬 𑀢𑁂𑀮𑀬𑀦𑁆𑀢𑀘𑀓𑁆𑀓𑀁 𑀯𑀺𑀬 𑀘 𑀧𑀭𑀺𑀩𑁆𑀪𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬𑁫.

‘‘𑀏𑀢𑁆𑀢𑀓𑀸𑀬𑁂𑀯 𑀢𑁂 𑀮𑁄𑀓𑁂, 𑀬𑁂 𑀥𑀫𑁆𑀫𑀸 𑀩𑁄𑀥𑀺𑀧𑀸𑀘𑀦𑀸;

𑀢𑀢𑀼𑀤𑁆𑀥𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭, 𑀤𑀴𑁆𑀳𑀁 𑀢𑀢𑁆𑀣 𑀧𑀢𑀺𑀝𑁆𑀞𑀳.

𑁧𑁬𑁬.

‘‘𑀇𑀫𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄, 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑁂;

𑀥𑀫𑁆𑀫𑀢𑁂𑀚𑁂𑀦 𑀯𑀲𑀼𑀥𑀸, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀣.

𑁧𑁬𑁭.

‘‘𑀘𑀮𑀢𑀻 𑀭𑀯𑀢𑀻 𑀧𑀣𑀯𑀻, 𑀉𑀘𑁆𑀙𑀼𑀬𑀦𑁆𑀢𑀁𑀯 𑀧𑀻𑀴𑀺𑀢𑀁;

𑀢𑁂𑀮𑀬𑀦𑁆𑀢𑁂 𑀬𑀣𑀸 𑀘𑀓𑁆𑀓𑀁, 𑀏𑀯𑀁 𑀓𑀫𑁆𑀧𑀢𑀺 𑀫𑁂𑀤𑀦𑀻’’𑀢𑀺.

𑀢𑀢𑁆𑀣 𑀏𑀢𑁆𑀢𑀓𑀸𑀬𑁂𑀯𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀤𑀲𑀦𑁆𑀦𑀁 𑀧𑀸𑀭𑀫𑀺𑀢𑀸𑀦𑀁 𑀅𑀦𑀽𑀦𑀸𑀥𑀺𑀓𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑀼𑀤𑁆𑀥𑀦𑁆𑀢𑀺 𑀢𑀢𑁄 𑀤𑀲𑀧𑀸𑀭𑀫𑀻𑀳𑀺 𑀉𑀤𑁆𑀥𑀁 𑀦𑀢𑁆𑀣𑀺. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀁, 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀕𑀳𑁂𑀢𑀩𑁆𑀩𑀁. 𑀢𑀢𑁄 𑀤𑀲𑀧𑀸𑀭𑀫𑀺𑀢𑁄 𑀅𑀜𑁆𑀜𑁄 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑀲𑀲𑀼 𑀧𑀸𑀭𑀫𑀻𑀲𑀼. 𑀧𑀢𑀺𑀝𑁆𑀞𑀳𑀸𑀢𑀺 𑀧𑀢𑀺𑀝𑁆𑀞, 𑀧𑀭𑀺𑀧𑀽𑀭𑁂𑀦𑁆𑀢𑁄 𑀢𑀺𑀝𑁆𑀞𑀸𑀢𑀺 𑀅𑀢𑁆𑀣𑁄.

𑀇𑀫𑁂 𑀥𑀫𑁆𑀫𑁂𑀢𑀺 𑀧𑀸𑀭𑀫𑀺𑀥𑀫𑁆𑀫𑁂. 𑀲𑀫𑁆𑀫𑀲𑀢𑁄𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑀲𑁆𑀲, 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑁂𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀭𑀲𑀮𑀓𑁆𑀔𑀡𑁂𑀦 𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀢𑁂𑀚𑁂𑀦𑀸𑀢𑀺 𑀧𑀸𑀭𑀫𑀺𑀧𑀯𑀺𑀘𑀬𑀜𑀸𑀡𑀢𑁂𑀚𑁂𑀦. 𑀯𑀲𑀼𑀥𑀸𑀢𑀺 𑀯𑀲𑀽𑀢𑀺 𑀭𑀢𑀦𑀁 𑀯𑀼𑀘𑁆𑀘𑀢𑀺, 𑀢𑀁 𑀥𑀸𑀭𑁂𑀢𑀺 𑀥𑀻𑀬𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀯𑀲𑀼𑀥𑀸 ¶ . 𑀓𑀸 𑀲𑀸? 𑀫𑁂𑀤𑀦𑀻. 𑀧𑀓𑀫𑁆𑀧𑀣𑀸𑀢𑀺 𑀧𑀓𑀫𑁆𑀧𑀺𑀢𑁆𑀣. 𑀲𑀼𑀫𑁂𑀥𑀧𑀡𑁆𑀟𑀺𑀢𑁂 𑀧𑀦 𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀦𑁆𑀢𑁂 𑀢𑀲𑁆𑀲 𑀜𑀸𑀡𑀢𑁂𑀚𑁂𑀦 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀘𑀮𑀢𑀻𑀢𑀺 𑀙𑀧𑁆𑀧𑀓𑀸𑀭𑀸 𑀓𑀫𑁆𑀧𑀺. 𑀭𑀯𑀢𑀻𑀢𑀺 𑀦𑀤𑀢𑀺 𑀯𑀺𑀓𑀽𑀚𑀢𑀺. 𑀉𑀘𑁆𑀙𑀼𑀬𑀦𑁆𑀢𑀁𑀯 𑀧𑀻𑀴𑀺𑀢𑀦𑁆𑀢𑀺 𑀦𑀺𑀧𑁆𑀧𑀻𑀴𑀺𑀢𑀁 𑀉𑀘𑁆𑀙𑀼𑀬𑀦𑁆𑀢𑀁 𑀯𑀺𑀬. ‘‘𑀕𑀼𑀴𑀬𑀦𑁆𑀢𑀁𑀯 𑀧𑀻𑀴𑀺𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀢𑁂𑀮𑀬𑀦𑁆𑀢𑁂𑀢𑀺 𑀢𑁂𑀮𑀧𑀻𑀴𑀦𑀬𑀦𑁆𑀢𑁂. 𑀬𑀣𑀸 𑀘𑀓𑁆𑀓𑀦𑁆𑀢𑀺 𑀘𑀓𑁆𑀓𑀺𑀓𑀸𑀦𑀁 𑀫𑀳𑀸𑀘𑀓𑁆𑀓𑀬𑀦𑁆𑀢𑀁 𑀯𑀺𑀬. 𑀏𑀯𑀦𑁆𑀢𑀺 𑀬𑀣𑀸 𑀢𑁂𑀮𑀧𑀻𑀴𑀦𑀘𑀓𑁆𑀓𑀬𑀦𑁆𑀢𑀁 𑀧𑀭𑀺𑀩𑁆𑀪𑀫𑀢𑀺 𑀓𑀫𑁆𑀧𑀢𑀺, 𑀏𑀯𑀁 𑀅𑀬𑀁 𑀫𑁂𑀤𑀦𑀻 𑀓𑀫𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀏𑀯𑀁 ¶ 𑀫𑀳𑀸𑀧𑀣𑀯𑀺𑀬𑀸 𑀓𑀫𑁆𑀧𑀫𑀸𑀦𑀸𑀬 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 ¶ 𑀧𑀭𑀺𑀯𑀺𑀲𑀬𑀫𑀸𑀦𑀸 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀬𑀼𑀕𑀦𑁆𑀥𑀭𑀯𑀸𑀢𑀩𑁆𑀪𑀸𑀳𑀢𑀸 𑀫𑀳𑀸𑀲𑀸𑀮𑀸 𑀯𑀺𑀬 𑀫𑀼𑀘𑁆𑀙𑀺𑀢𑀸 𑀧𑀧𑀢𑀺𑀁𑀲𑀼. 𑀖𑀝𑀸𑀤𑀻𑀦𑀺 𑀓𑀼𑀮𑀸𑀮𑀪𑀡𑁆𑀟𑀸𑀦𑀺 𑀧𑀯𑀝𑁆𑀝𑁂𑀦𑁆𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀦𑁆𑀢𑀸𑀦𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀦𑀺 𑀅𑀳𑁂𑀲𑀼𑀁. 𑀫𑀳𑀸𑀚𑀦𑁄 𑀪𑀻𑀢𑀢𑀲𑀺𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀸 ‘𑀦𑀸𑀕𑀸𑀯𑀝𑁆𑀝𑁄 𑀅𑀬𑀁, 𑀪𑀽𑀢𑀬𑀓𑁆𑀔𑀤𑁂𑀯𑀢𑀸𑀲𑀼 𑀅𑀜𑁆𑀜𑀢𑀭𑀸𑀯𑀝𑁆𑀝𑁄 𑀯𑀸’𑀢𑀺 𑀦 𑀳𑀺 𑀫𑀬𑀁 𑀏𑀢𑀁 𑀚𑀸𑀦𑀸𑀫. 𑀅𑀧𑀺 𑀘 𑀔𑁄 𑀲𑀩𑁆𑀩𑁄𑀧𑀺 𑀅𑀬𑀁 𑀫𑀳𑀸𑀚𑀦𑁄 𑀪𑀬𑁂𑀦 𑀉𑀧𑀤𑁆𑀤𑀼𑀢𑁄, 𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀸𑀧𑀓𑀁 𑀪𑀯𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀓𑀮𑁆𑀬𑀸𑀡𑀁, 𑀓𑀣𑁂𑀣 𑀦𑁄 𑀏𑀢𑀁 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼.

𑀅𑀣 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑁋 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣, 𑀫𑀸 𑀔𑁄 𑀘𑀺𑀦𑁆𑀢𑀬𑀺𑀢𑁆𑀣, 𑀦𑀢𑁆𑀣𑀺 𑀯𑁄 𑀇𑀢𑁄𑀦𑀺𑀤𑀸𑀦𑀁 𑀪𑀬𑀁, 𑀬𑁄 𑀲𑁄 𑀫𑀬𑀸 𑀅𑀚𑁆𑀚 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 ‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀩𑁆𑀬𑀸𑀓𑀢𑁄, 𑀲𑁄 𑀇𑀤𑀸𑀦𑀺 𑀧𑀸𑀭𑀫𑀺𑀬𑁄 𑀲𑀫𑁆𑀫𑀲𑀢𑀺, 𑀢𑀲𑁆𑀲 𑀲𑀫𑁆𑀫𑀲𑀦𑁆𑀢𑀲𑁆𑀲 𑀥𑀫𑁆𑀫𑀢𑁂𑀚𑁂𑀦 𑀲𑀓𑀮𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀧𑁆𑀧𑀳𑀸𑀭𑁂𑀦 𑀓𑀫𑁆𑀧𑀢𑀺 𑀘𑁂𑀯 𑀯𑀺𑀭𑀯𑀢𑀺 𑀘𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬𑁮.

‘‘𑀬𑀸𑀯𑀢𑀸 𑀧𑀭𑀺𑀲𑀸 𑀆𑀲𑀺, 𑀩𑀼𑀤𑁆𑀥𑀲𑁆𑀲 𑀧𑀭𑀺𑀯𑁂𑀲𑀦𑁂;

𑀧𑀯𑁂𑀥𑀫𑀸𑀦𑀸 𑀲𑀸 𑀢𑀢𑁆𑀣, 𑀫𑀼𑀘𑁆𑀙𑀺𑀢𑀸 𑀲𑁂𑀢𑀺 𑀪𑀽𑀫𑀺𑀬𑀁.

𑁧𑁬𑁯.

‘‘𑀖𑀝𑀸𑀦𑁂𑀓𑀲𑀳𑀲𑁆𑀲𑀸𑀦𑀺, 𑀓𑀼𑀫𑁆𑀪𑀻𑀦𑀜𑁆𑀘 𑀲𑀢𑀸 𑀩𑀳𑀽;

𑀲𑀜𑁆𑀘𑀼𑀡𑁆𑀡𑀫𑀣𑀺𑀢𑀸 𑀢𑀢𑁆𑀣, 𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑀺𑀢𑀸.

𑁧𑁭𑁦.

‘‘𑀉𑀩𑁆𑀩𑀺𑀕𑁆𑀕𑀸 𑀢𑀲𑀺𑀢𑀸 𑀪𑀻𑀢𑀸, 𑀪𑀦𑁆𑀢𑀸 𑀩𑁆𑀬𑀣𑀺𑀢𑀫𑀸𑀦𑀲𑀸;

𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫, 𑀤𑀻𑀧𑀗𑁆𑀓𑀭𑀫𑀼𑀧𑀸𑀕𑀫𑀼𑀁.

𑁧𑁭𑁧.

‘‘𑀓𑀺𑀁 ¶ 𑀪𑀯𑀺𑀲𑁆𑀲𑀢𑀺 𑀮𑁄𑀓𑀲𑁆𑀲, 𑀓𑀮𑁆𑀬𑀸𑀡𑀫𑀣 𑀧𑀸𑀧𑀓𑀁;

𑀲𑀩𑁆𑀩𑁄 𑀉𑀧𑀤𑁆𑀤𑀼𑀢𑁄 𑀮𑁄𑀓𑁄, 𑀢𑀁 𑀯𑀺𑀦𑁄𑀤𑁂𑀳𑀺 𑀘𑀓𑁆𑀔𑀼𑀫.

𑁧𑁭𑁨.

‘‘𑀢𑁂𑀲𑀁 𑀢𑀤𑀸 𑀲𑀜𑁆𑀜𑀸𑀧𑁂𑀲𑀺, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀯𑀺𑀲𑁆𑀲𑀢𑁆𑀣𑀸 𑀳𑁄𑀣 𑀫𑀸 𑀪𑀸𑀣, 𑀇𑀫𑀲𑁆𑀫𑀺𑀁 𑀧𑀣𑀯𑀺𑀓𑀫𑁆𑀧𑀦𑁂.

𑁧𑁭𑁩.

‘‘𑀬𑀫𑀳𑀁 𑀅𑀚𑁆𑀚 𑀩𑁆𑀬𑀸𑀓𑀸𑀲𑀺𑀁, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺;

𑀏𑀲𑁄 𑀲𑀫𑁆𑀫𑀲𑀢𑀻 𑀥𑀫𑁆𑀫𑀁, 𑀧𑀼𑀩𑁆𑀩𑀓𑀁 𑀚𑀺𑀦𑀲𑁂𑀯𑀺𑀢𑀁.

𑁧𑁭𑁪.

‘‘𑀢𑀲𑁆𑀲 ¶ 𑀲𑀫𑁆𑀫𑀲𑀢𑁄 𑀥𑀫𑁆𑀫𑀁, 𑀩𑀼𑀤𑁆𑀥𑀪𑀽𑀫𑀺𑀁 𑀅𑀲𑁂𑀲𑀢𑁄;

𑀢𑁂𑀦𑀸𑀬𑀁 𑀓𑀫𑁆𑀧𑀺𑀢𑀸 𑀧𑀣𑀯𑀻, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑁂’’𑀢𑀺.

𑀢𑀢𑁆𑀣 𑀬𑀸𑀯𑀢𑀸𑀢𑀺 𑀬𑀸𑀯𑀢𑀺𑀓𑀸. 𑀆𑀲𑀻𑀢𑀺 ¶ 𑀅𑀳𑁄𑀲𑀺. ‘‘𑀬𑀸 𑀢𑀤𑀸 𑀧𑀭𑀺𑀲𑀸 𑀆𑀲𑀻’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀬𑀸 𑀢𑀢𑁆𑀣 𑀧𑀭𑀺𑀲𑀸 𑀞𑀺𑀢𑀸 𑀆𑀲𑀻𑀢𑀺 𑀅𑀢𑁆𑀣𑁄. 𑀧𑀯𑁂𑀥𑀫𑀸𑀦𑀸𑀢𑀺 𑀓𑀫𑁆𑀧𑀫𑀸𑀦𑀸. 𑀲𑀸𑀢𑀺 𑀲𑀸 𑀧𑀭𑀺𑀲𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑁂. 𑀲𑁂𑀢𑀻𑀢𑀺 𑀲𑀬𑀺𑀢𑁆𑀣.

𑀖𑀝𑀸𑀢𑀺 𑀖𑀝𑀸𑀦𑀁, 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀖𑀝𑀸𑀦𑀁 𑀦𑁂𑀓𑀲𑀳𑀲𑁆𑀲𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀜𑁆𑀘𑀼𑀡𑁆𑀡𑀫𑀣𑀺𑀢𑀸𑀢𑀺 𑀘𑀼𑀡𑁆𑀡𑀸 𑀘𑁂𑀯 𑀫𑀣𑀺𑀢𑀸 𑀘, 𑀫𑀣𑀺𑀢𑀲𑀜𑁆𑀘𑀼𑀡𑁆𑀡𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑀺𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀧𑀳𑀝𑀸. 𑀉𑀩𑁆𑀩𑀺𑀕𑁆𑀕𑀸𑀢𑀺 𑀉𑀢𑁆𑀭𑀸𑀲𑀳𑀤𑀬𑀸. 𑀢𑀲𑀺𑀢𑀸𑀢𑀺 𑀲𑀜𑁆𑀚𑀸𑀢𑀢𑀸𑀲𑀸. 𑀪𑀻𑀢𑀸𑀢𑀺 𑀪𑀬𑀪𑀻𑀢𑀸. 𑀪𑀦𑁆𑀢𑀸𑀢𑀺 𑀨𑀦𑁆𑀤𑀦𑀫𑀸𑀦𑀲𑀸, 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀦𑀺 𑀧𑀦𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀲𑀫𑀸𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀉𑀧𑀤𑁆𑀤𑀼𑀢𑁄𑀢𑀺 𑀉𑀧𑀳𑀢𑁄. 𑀢𑀁 𑀯𑀺𑀦𑁄𑀤𑁂𑀳𑀻𑀢𑀺 𑀢𑀁 𑀉𑀧𑀤𑁆𑀤𑀼𑀢𑀪𑀬𑀁 𑀯𑀺𑀦𑁄𑀤𑁂𑀳𑀺, 𑀯𑀺𑀦𑀸𑀲𑀬𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫. 𑀢𑁂𑀲𑀁 𑀢𑀤𑀸𑀢𑀺 𑀢𑁂 𑀚𑀦𑁂 𑀢𑀤𑀸, 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀲𑀜𑁆𑀜𑀸𑀧𑁂𑀲𑀻𑀢𑀺 𑀜𑀸𑀧𑁂𑀲𑀺 𑀩𑁄𑀥𑁂𑀲𑀺. 𑀯𑀺𑀲𑀢𑁆𑀣𑀸𑀢𑀺 𑀯𑀺𑀲𑁆𑀲𑀢𑁆𑀣𑀘𑀺𑀢𑁆𑀢𑀸. 𑀫𑀸 𑀪𑀸𑀣𑀸𑀢𑀺 𑀫𑀸 𑀪𑀸𑀬𑀣. 𑀬𑀫𑀳𑀦𑁆𑀢𑀺 𑀬𑀁 𑀅𑀳𑀁 𑀲𑀼𑀫𑁂𑀥𑀧𑀡𑁆𑀟𑀺𑀢𑀁. 𑀥𑀫𑁆𑀫𑀦𑁆𑀢𑀺 𑀧𑀸𑀭𑀫𑀺𑀥𑀫𑁆𑀫𑀁. 𑀧𑀼𑀩𑁆𑀩𑀓𑀦𑁆𑀢𑀺 𑀧𑁄𑀭𑀸𑀡𑀁. 𑀚𑀺𑀦𑀲𑁂𑀯𑀺𑀢𑀦𑁆𑀢𑀺 𑀚𑀺𑀦𑁂𑀳𑀺 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀲𑁂𑀯𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀪𑀽𑀫𑀺𑀦𑁆𑀢𑀺 𑀧𑀸𑀭𑀫𑀺𑀥𑀫𑁆𑀫𑀁. 𑀢𑁂𑀦𑀸𑀢𑀺 𑀢𑁂𑀦 𑀲𑀫𑁆𑀫𑀲𑀦𑀓𑀸𑀭𑀡𑁂𑀦. 𑀓𑀫𑁆𑀧𑀺𑀢𑀸𑀢𑀺 𑀘𑀮𑀺𑀢𑀸. 𑀲𑀤𑁂𑀯𑀓𑁂𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂.

𑀢𑀢𑁄 𑀫𑀳𑀸𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀦𑀺 𑀆𑀤𑀸𑀬 𑀭𑀫𑁆𑀫𑀦𑀕𑀭𑀢𑁄 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀫𑁆𑀫𑀦𑀕𑀭𑀫𑁂𑀯 𑀧𑀸𑀯𑀺𑀲𑀺. 𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑁄 𑀤𑀲 𑀧𑀸𑀭𑀫𑀺𑀬𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀸𑀲𑀦𑀸 𑀯𑀼𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁭𑁫.

‘‘𑀩𑀼𑀤𑁆𑀥𑀲𑁆𑀲 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀫𑀦𑁄 𑀦𑀺𑀩𑁆𑀩𑀸𑀬𑀺 𑀢𑀸𑀯𑀤𑁂;

𑀲𑀩𑁆𑀩𑁂 𑀫𑀁 𑀉𑀧𑀲𑀗𑁆𑀓𑀫𑁆𑀫, 𑀧𑀼𑀦𑀸𑀧𑀺 𑀫𑀁 𑀅𑀪𑀺𑀯𑀦𑁆𑀤𑀺𑀲𑀼𑀁.

𑁧𑁭𑁬.

‘‘𑀲𑀫𑀸𑀤𑀺𑀬𑀺𑀢𑁆𑀯𑀸 ¶ 𑀩𑀼𑀤𑁆𑀥𑀕𑀼𑀡𑀁, 𑀤𑀴𑁆𑀳𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀤𑀻𑀧𑀗𑁆𑀓𑀭𑀁 𑀦𑀫𑀲𑁆𑀲𑀺𑀢𑁆𑀯𑀸, 𑀆𑀲𑀦𑀸 𑀯𑀼𑀝𑁆𑀞𑀳𑀺𑀁 𑀢𑀤𑀸’’𑀢𑀺.

𑀢𑀢𑁆𑀣 𑀫𑀦𑁄 𑀦𑀺𑀩𑁆𑀩𑀸𑀬𑀻𑀢𑀺 𑀫𑀳𑀸𑀚𑀦𑀲𑁆𑀲 𑀧𑀣𑀯𑀺𑀓𑀫𑁆𑀧𑀦𑁂 𑀉𑀩𑁆𑀩𑀺𑀕𑁆𑀕𑀳𑀤𑀬𑀲𑁆𑀲 𑀢𑀢𑁆𑀣 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀫𑀦𑁄 𑀦𑀺𑀩𑁆𑀩𑀸𑀬𑀺, 𑀲𑀦𑁆𑀢𑀺𑀁 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. ‘‘𑀚𑀦𑁄 𑀦𑀺𑀩𑁆𑀩𑀸𑀬𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀉𑀢𑁆𑀢𑀸𑀦𑁄𑀬𑁂𑀯. 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸, 𑀲𑀫𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀕𑀼𑀡𑀦𑁆𑀢𑀺 𑀧𑀸𑀭𑀫𑀺𑀬𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑀁 𑀤𑀬𑀺𑀢𑀲𑀩𑁆𑀩𑀲𑀢𑁆𑀢𑀁 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀁 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑁋 ‘‘𑀅𑀬𑁆𑀬 𑀲𑀼𑀫𑁂𑀥𑀢𑀸𑀧𑀲, 𑀢𑀬𑀸 𑀅𑀚𑁆𑀚 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀫𑀳𑀢𑀺 𑀧𑀢𑁆𑀣𑀦𑀸 𑀧𑀢𑁆𑀣𑀺𑀢𑀸, 𑀲𑀸 𑀢𑁂 𑀅𑀦𑀦𑁆𑀢𑀭𑀸𑀬𑁂𑀦 𑀲𑀫𑀺𑀚𑁆𑀛𑀢𑀼, 𑀫𑀸 𑀢𑁂 𑀢𑀢𑁆𑀣 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀅𑀳𑁄𑀲𑀺. 𑀲𑀭𑀻𑀭𑁂 𑀢𑁂 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀭𑁄𑀕𑁄 𑀫𑀸 𑀉𑀧𑁆𑀧𑀚𑁆𑀚𑀢𑀼, 𑀔𑀺𑀧𑁆𑀧𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀝𑀺𑀯𑀺𑀚𑁆𑀛. 𑀬𑀣𑀸 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀸 𑀭𑀼𑀓𑁆𑀔𑀸 𑀲𑀫𑀬𑁂 𑀧𑀼𑀧𑁆𑀨𑀦𑁆𑀢𑀺 𑀘𑁂𑀯 𑀨𑀮𑀦𑁆𑀢𑀺 𑀘, 𑀢𑀣𑁂𑀯 𑀢𑁆𑀯𑀫𑁆𑀧𑀺 𑀢𑀁 𑀲𑀫𑀬𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀔𑀺𑀧𑁆𑀧𑀁 𑀲𑀫𑁆𑀩𑁄𑀥𑀺𑀁 𑀨𑀼𑀲𑀲𑁆𑀲𑀽’’𑀢𑀺𑀆𑀤𑀻𑀦𑀺 𑀣𑀼𑀢𑀺𑀫𑀗𑁆𑀕𑀮𑀸𑀦𑀺 𑀧𑀬𑀺𑀭𑀼𑀤𑀸𑀳𑀁𑀲𑀼, 𑀏𑀯𑀁 𑀧𑀬𑀺𑀭𑀼𑀤𑀸𑀳𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑁂𑀯𑀢𑀸𑀳𑀺 𑀅𑀪𑀺𑀢𑁆𑀣𑀼𑀢𑁄 𑁋 ‘‘𑀅𑀳𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀬 𑀆𑀓𑀸𑀲𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀇𑀲𑀺𑀕𑀡𑀯𑀦𑁆𑀢𑀁 𑀳𑀺𑀫𑀯𑀦𑁆𑀢𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁭𑁭.

‘‘𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀁 𑀧𑀼𑀧𑁆𑀨𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄;

𑀲𑀫𑁄𑀓𑀺𑀭𑀦𑁆𑀢𑀺 𑀧𑀼𑀧𑁆𑀨𑁂𑀳𑀺, 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀆𑀲𑀦𑀸.

𑁧𑁭𑁮.

‘‘𑀯𑁂𑀤𑀬𑀦𑁆𑀢𑀺 ¶ 𑀘 𑀢𑁂 𑀲𑁄𑀢𑁆𑀣𑀺𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄;

𑀫𑀳𑀦𑁆𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀢𑀁 𑀮𑀪𑀲𑁆𑀲𑀼 𑀬𑀣𑀺𑀘𑁆𑀙𑀺𑀢𑀁.

𑁧𑁭𑁯.

‘‘𑀲𑀩𑁆𑀩𑀻𑀢𑀺𑀬𑁄 𑀯𑀺𑀯𑀚𑁆𑀚𑀦𑁆𑀢𑀼, 𑀲𑁄𑀓𑁄 𑀭𑁄𑀕𑁄 𑀯𑀺𑀦𑀲𑁆𑀲𑀢𑀼;

𑀫𑀸 𑀢𑁂 𑀪𑀯𑀦𑁆𑀢𑁆𑀯𑀦𑁆𑀢𑀭𑀸𑀬𑀸, 𑀨𑀼𑀲 𑀔𑀺𑀧𑁆𑀧𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁮𑁦.

‘‘𑀬𑀣𑀸𑀧𑀺 𑀲𑀫𑀬𑁂 𑀧𑀢𑁆𑀢𑁂, 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀺𑀦𑁄 𑀤𑀼𑀫𑀸;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀤𑁆𑀥𑀜𑀸𑀡𑁂𑀳𑀺 𑀧𑀼𑀧𑁆𑀨𑀲𑀼.

𑁧𑁮𑁧.

‘‘𑀬𑀣𑀸 ¶ ¶ 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀧𑀽𑀭𑀬𑀼𑀁 𑀤𑀲𑀧𑀸𑀭𑀫𑀻;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀧𑀽𑀭𑀬 𑀤𑀲𑀧𑀸𑀭𑀫𑀻.

𑁧𑁮𑁨.

‘‘𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀩𑁄𑀥𑀺𑀫𑀡𑁆𑀟𑀫𑁆𑀳𑀺 𑀩𑀼𑀚𑁆𑀛𑀭𑁂;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀩𑀼𑀚𑁆𑀛𑀲𑁆𑀲𑀼 𑀚𑀺𑀦𑀩𑁄𑀥𑀺𑀬𑀁.

𑁧𑁮𑁩.

‘‘𑀬𑀣𑀸 𑀬𑁂 𑀓𑁂𑀘𑀺 𑀲𑀫𑁆𑀩𑀼𑀤𑁆𑀥𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀼𑀁;

𑀢𑀣𑁂𑀯 𑀢𑁆𑀯𑀁 𑀫𑀳𑀸𑀯𑀻𑀭, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬.

𑁧𑁮𑁪.

‘‘𑀧𑀼𑀡𑁆𑀡𑀫𑀸𑀬𑁂 𑀬𑀣𑀸 𑀘𑀦𑁆𑀤𑁄, 𑀧𑀭𑀺𑀲𑀼𑀤𑁆𑀥𑁄 𑀯𑀺𑀭𑁄𑀘𑀢𑀺;

𑀢𑀣𑁂𑀯 𑀢𑁆𑀯𑀁 𑀧𑀼𑀡𑁆𑀡𑀫𑀦𑁄, 𑀯𑀺𑀭𑁄𑀘 𑀤𑀲𑀲𑀳𑀲𑁆𑀲𑀺𑀬𑀁.

𑁧𑁮𑁫.

‘‘𑀭𑀸𑀳𑀼𑀫𑀼𑀢𑁆𑀢𑁄 𑀬𑀣𑀸 𑀲𑀽𑀭𑀺𑀬𑁄, 𑀢𑀸𑀧𑁂𑀦 𑀅𑀢𑀺𑀭𑁄𑀘𑀢𑀺;

𑀢𑀣𑁂𑀯 𑀮𑁄𑀓𑀸 𑀫𑀼𑀘𑁆𑀘𑀺𑀢𑁆𑀯𑀸, 𑀯𑀺𑀭𑁄𑀘 𑀲𑀺𑀭𑀺𑀬𑀸 𑀢𑀼𑀯𑀁.

𑁧𑁮𑁬.

‘‘𑀬𑀣𑀸 𑀬𑀸 𑀓𑀸𑀘𑀺 𑀦𑀤𑀺𑀬𑁄, 𑀑𑀲𑀭𑀦𑁆𑀢𑀺 𑀫𑀳𑁄𑀤𑀥𑀺𑀁;

𑀏𑀯𑀁 𑀲𑀤𑁂𑀯𑀓𑀸 𑀮𑁄𑀓𑀸, 𑀑𑀲𑀭𑀦𑁆𑀢𑀼 𑀢𑀯𑀦𑁆𑀢𑀺𑀓𑁂.

𑁧𑁮𑁭.

‘‘𑀢𑁂𑀳𑀺 𑀣𑀼𑀢𑀧𑁆𑀧𑀲𑀢𑁆𑀣𑁄 𑀲𑁄, 𑀤𑀲 𑀥𑀫𑁆𑀫𑁂 𑀲𑀫𑀸𑀤𑀺𑀬;

𑀢𑁂 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀧𑀯𑀦𑀁 𑀧𑀸𑀯𑀺𑀲𑀻 𑀢𑀤𑀸’’𑀢𑀺.

𑀢𑀢𑁆𑀣 ¶ 𑀤𑀺𑀩𑁆𑀩𑀦𑁆𑀢𑀺 𑀫𑀦𑁆𑀤𑀸𑀭𑀯𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀦𑁆𑀢𑀸𑀦𑀓𑀼𑀲𑁂𑀲𑀬𑀸𑀤𑀺𑀓𑀁 𑀤𑀺𑀩𑁆𑀩𑀓𑀼𑀲𑀼𑀫𑀁 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀘 𑀫𑀸𑀦𑀼𑀲𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑁄𑀓𑀺𑀭𑀦𑁆𑀢𑀻𑀢𑀺 𑀫𑀫𑁄𑀧𑀭𑀺 𑀲𑀫𑁄𑀓𑀺𑀭𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀯𑀼𑀝𑁆𑀞𑀳𑀦𑁆𑀢𑀲𑁆𑀲𑀸𑀢𑀺 𑀯𑀼𑀝𑁆𑀞𑀳𑀢𑁄. 𑀯𑁂𑀤𑀬𑀦𑁆𑀢𑀻𑀢𑀺 𑀦𑀺𑀯𑁂𑀤𑀬𑀺𑀁𑀲𑀼 𑀲𑀜𑁆𑀜𑀸𑀧𑁂𑀲𑀼𑀁. 𑀲𑁄𑀢𑁆𑀣𑀺𑀦𑁆𑀢𑀺 𑀲𑁄𑀢𑁆𑀣𑀺𑀪𑀸𑀯𑀁. 𑀇𑀤𑀸𑀦𑀺 𑀯𑁂𑀤𑀬𑀺𑀢𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀫𑀳𑀦𑁆𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑀸 𑀧𑀦, 𑀲𑀼𑀫𑁂𑀥𑀧𑀡𑁆𑀟𑀺𑀢, 𑀫𑀳𑀦𑁆𑀢𑀁 𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀢𑀁 𑀬𑀣𑀸𑀧𑀢𑁆𑀣𑀺𑀢𑀁 𑀮𑀪𑀲𑁆𑀲𑀽𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀻𑀢𑀺𑀬𑁄𑀢𑀺 𑀏𑀦𑁆𑀢𑀻𑀢𑀺 𑀈𑀢𑀺𑀬𑁄, 𑀲𑀩𑁆𑀩𑀸 𑀈𑀢𑀺𑀬𑁄 𑀲𑀩𑁆𑀩𑀻𑀢𑀺𑀬𑁄, 𑀉𑀧𑀤𑁆𑀤𑀯𑀸. 𑀯𑀺𑀯𑀚𑁆𑀚𑀦𑁆𑀢𑀽𑀢𑀺 𑀫𑀸 𑀳𑁄𑀦𑁆𑀢𑀼. 𑀲𑁄𑀓𑁄 𑀭𑁄𑀕𑁄 𑀯𑀺𑀦𑀲𑁆𑀲𑀢𑀽𑀢𑀺 𑀲𑁄𑀘𑀦𑀲𑀗𑁆𑀔𑀸𑀢𑁄 𑀲𑁄𑀓𑁄 𑀭𑀼𑀚𑀦𑀲𑀗𑁆𑀔𑀸𑀢𑁄 𑀭𑁄𑀕𑁄 𑀘 𑀯𑀺𑀦𑀲𑁆𑀲𑀢𑀼. 𑀢𑁂𑀢𑀺 𑀢𑀯. 𑀫𑀸 𑀪𑀯𑀦𑁆𑀢𑁆𑀯𑀦𑁆𑀢𑀭𑀸𑀬𑀸𑀢𑀺 𑀫𑀸 𑀪𑀯𑀦𑁆𑀢𑀼 𑀅𑀦𑁆𑀢𑀭𑀸𑀬𑀸. 𑀨𑀼𑀲𑀸𑀢𑀺 𑀅𑀥𑀺𑀕𑀘𑁆𑀙 𑀧𑀸𑀧𑀼𑀡𑀸𑀳𑀺. 𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀯𑀝𑁆𑀝𑀢𑀺. 𑀉𑀢𑁆𑀢𑀫𑀦𑁆𑀢𑀺 𑀲𑁂𑀝𑁆𑀞𑀁 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀤𑀸𑀬𑀓𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 ‘‘𑀉𑀢𑁆𑀢𑀫’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀫𑀬𑁂𑀢𑀺 ¶ 𑀢𑀲𑁆𑀲 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀦𑀲𑀫𑀬𑁂 𑀲𑀫𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀺𑀦𑁄𑀢𑀺 ¶ 𑀧𑀼𑀧𑁆𑀨𑀦𑀓𑀸. 𑀩𑀼𑀤𑁆𑀥𑀜𑀸𑀡𑁂𑀳𑀻𑀢𑀺 𑀅𑀝𑁆𑀞𑀸𑀭𑀲𑀳𑀺 𑀩𑀼𑀤𑁆𑀥𑀜𑀸𑀡𑁂𑀳𑀺. 𑀧𑀼𑀧𑁆𑀨𑀲𑀽𑀢𑀺 𑀧𑀼𑀧𑁆𑀨𑀲𑁆𑀲𑀼. 𑀧𑀽𑀭𑀬𑀼𑀦𑁆𑀢𑀺 𑀧𑀽𑀭𑀬𑀺𑀁𑀲𑀼. 𑀧𑀽𑀭𑀬𑀸𑀢𑀺 𑀧𑀭𑀺𑀧𑀽𑀭𑀬. 𑀩𑀼𑀚𑁆𑀛𑀭𑁂𑀢𑀺 𑀩𑀼𑀚𑁆𑀛𑀺𑀁𑀲𑀼. 𑀚𑀺𑀦𑀩𑁄𑀥𑀺𑀬𑀦𑁆𑀢𑀺 𑀚𑀺𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀩𑁄𑀥𑀺𑀬𑀸, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀧𑀼𑀡𑁆𑀡𑀫𑀸𑀬𑁂𑀢𑀺 𑀧𑀼𑀡𑁆𑀡𑀫𑀸𑀲𑀺𑀬𑀁. 𑀧𑀼𑀡𑁆𑀡𑀫𑀦𑁄𑀢𑀺 𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑁄.

𑀭𑀸𑀳𑀼𑀫𑀼𑀢𑁆𑀢𑁄𑀢𑀺 𑀭𑀸𑀳𑀼𑀦𑀸 𑀲𑁄𑀩𑁆𑀪𑀸𑀦𑀼𑀦𑀸 𑀫𑀼𑀢𑁆𑀢𑁄. 𑀢𑀸𑀧𑁂𑀦𑀸𑀢𑀺 𑀧𑀢𑀸𑀧𑁂𑀦, 𑀆𑀮𑁄𑀓𑁂𑀦. 𑀮𑁄𑀓𑀸 𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀮𑀺𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀭𑁄𑀘𑀸𑀢𑀺 𑀯𑀺𑀭𑀸𑀚. 𑀲𑀺𑀭𑀺𑀬𑀸𑀢𑀺 𑀩𑀼𑀤𑁆𑀥𑀲𑀺𑀭𑀺𑀬𑀸. 𑀑𑀲𑀭𑀦𑁆𑀢𑀻𑀢𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀑𑀲𑀭𑀦𑁆𑀢𑀽𑀢𑀺 𑀉𑀧𑀕𑀘𑁆𑀙𑀦𑁆𑀢𑀼. 𑀢𑀯𑀦𑁆𑀢𑀺𑀓𑁂𑀢𑀺 𑀢𑀯 𑀲𑀦𑁆𑀢𑀺𑀓𑀁. 𑀢𑁂𑀳𑀻𑀢𑀺 𑀤𑁂𑀯𑁂𑀳𑀺. 𑀣𑀼𑀢𑀧𑁆𑀧𑀲𑀢𑁆𑀣𑁄𑀢𑀺 𑀣𑀼𑀢𑁄 𑀘𑁂𑀯 𑀧𑀲𑀢𑁆𑀣𑁄 𑀘, 𑀣𑀼𑀢𑁂𑀳𑀺 𑀯𑀸 𑀤𑀻𑀧𑀗𑁆𑀓𑀭𑀸𑀤𑀻𑀳𑀺 𑀧𑀲𑀢𑁆𑀣𑁄𑀢𑀺 𑀣𑀼𑀢𑀧𑁆𑀧𑀲𑀢𑁆𑀣𑁄. 𑀤𑀲 𑀥𑀫𑁆𑀫𑁂𑀢𑀺 𑀤𑀲 𑀧𑀸𑀭𑀫𑀺𑀥𑀫𑁆𑀫𑁂. 𑀧𑀯𑀦𑀦𑁆𑀢𑀺 𑀫𑀳𑀸𑀯𑀦𑀁, 𑀥𑀫𑁆𑀫𑀺𑀓𑀧𑀩𑁆𑀩𑀢𑁂 𑀫𑀳𑀸𑀯𑀦𑀁 𑀧𑀸𑀯𑀺𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸 𑀲𑀼𑀉𑀢𑁆𑀢𑀸𑀦𑀸 𑀏𑀯𑀸𑀢𑀺.

𑀇𑀢𑀺 𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀸 𑀩𑀼𑀤𑁆𑀥𑀯𑀁𑀲-𑀅𑀝𑁆𑀞𑀓𑀣𑀸𑀬

𑀲𑀼𑀫𑁂𑀥𑀧𑀢𑁆𑀣𑀦𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄𑀧𑀺 ¶ 𑀢𑁂 𑀉𑀧𑀸𑀲𑀓𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀤𑀸𑀦𑀸𑀦𑀼𑀫𑁄𑀤𑀦𑀁 𑀲𑁄𑀢𑀼𑀓𑀸𑀫𑀸 𑀉𑀧𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀢𑁂𑀲𑀁 𑀧𑀭𑀫𑀫𑀥𑀼𑀭𑀁 𑀳𑀤𑀬𑀗𑁆𑀕𑀫𑀁 𑀤𑀸𑀦𑀸𑀦𑀼𑀫𑁄𑀤𑀦𑀫𑀓𑀸𑀲𑀺 𑁋

‘‘𑀤𑀸𑀦𑀁 𑀦𑀸𑀫 𑀲𑀼𑀔𑀸𑀤𑀻𑀦𑀁, 𑀦𑀺𑀤𑀸𑀦𑀁 𑀧𑀭𑀫𑀁 𑀫𑀢𑀁;

𑀦𑀺𑀩𑁆𑀩𑀸𑀦𑀁 𑀧𑀦 𑀲𑁄𑀧𑀸𑀦𑀁, 𑀧𑀢𑀺𑀝𑁆𑀞𑀸𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀤𑀸𑀦𑀁 𑀢𑀸𑀡𑀁 𑀫𑀦𑀼𑀲𑁆𑀲𑀸𑀦𑀁, 𑀤𑀸𑀦𑀁 𑀩𑀦𑁆𑀥𑀼 𑀧𑀭𑀸𑀬𑀦𑀁;

𑀤𑀸𑀦𑀁 𑀤𑀼𑀓𑁆𑀔𑀸𑀥𑀺𑀧𑀦𑁆𑀦𑀸𑀦𑀁, 𑀲𑀢𑁆𑀢𑀸𑀦𑀁 𑀧𑀭𑀫𑀸 𑀕𑀢𑀺.

‘‘𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦 ¶ , 𑀤𑀸𑀦𑀁 𑀦𑀸𑀯𑀸𑀢𑀺 𑀤𑀻𑀧𑀺𑀢𑀁;

𑀪𑀬𑀭𑀓𑁆𑀔𑀡𑀢𑁄 𑀤𑀸𑀦𑀁, 𑀦𑀕𑀭𑀦𑁆𑀢𑀺 𑀘 𑀯𑀡𑁆𑀡𑀺𑀢𑀁.

‘‘𑀤𑀸𑀦𑀁 ¶ 𑀤𑀼𑀭𑀸𑀲𑀤𑀝𑁆𑀞𑁂𑀦, 𑀯𑀼𑀢𑁆𑀢𑀫𑀸𑀲𑀺𑀯𑀺𑀲𑁄𑀢𑀺 𑀘;

𑀤𑀸𑀦𑀁 𑀮𑁄𑀪𑀫𑀮𑀸𑀤𑀻𑀳𑀺, 𑀧𑀤𑀼𑀫𑀁 𑀅𑀦𑀼𑀧𑀮𑀺𑀢𑁆𑀢𑀢𑁄.

‘‘𑀦𑀢𑁆𑀣𑀺 𑀤𑀸𑀦𑀲𑀫𑁄 𑀮𑁄𑀓𑁂, 𑀧𑀼𑀭𑀺𑀲𑀲𑁆𑀲 𑀅𑀯𑀲𑁆𑀲𑀬𑁄;

𑀧𑀝𑀺𑀧𑀚𑁆𑀚𑀣 𑀢𑀲𑁆𑀫𑀸 𑀢𑀁, 𑀓𑀺𑀭𑀺𑀬𑀸𑀚𑁆𑀛𑀸𑀲𑀬𑁂𑀦 𑀘.

‘‘𑀲𑀕𑁆𑀕𑀮𑁄𑀓𑀦𑀺𑀤𑀸𑀦𑀸𑀦𑀺, 𑀤𑀸𑀦𑀸𑀦𑀺 𑀫𑀢𑀺𑀫𑀸 𑀇𑀥;

𑀓𑁄 𑀳𑀺 𑀦𑀸𑀫 𑀦𑀭𑁄 𑀮𑁄𑀓𑁂, 𑀦 𑀤𑀤𑁂𑀬𑁆𑀬 𑀳𑀺𑀢𑁂 𑀭𑀢𑁄.

‘‘𑀲𑀼𑀢𑁆𑀯𑀸 𑀤𑁂𑀯𑁂𑀲𑀼 𑀲𑀫𑁆𑀧𑀢𑁆𑀢𑀺𑀁, 𑀓𑁄 𑀦𑀭𑁄 𑀤𑀸𑀦𑀲𑀫𑁆𑀪𑀯𑀁;

𑀦 𑀤𑀚𑁆𑀚𑀸 𑀲𑀼𑀔𑀧𑁆𑀧𑀤𑀁 𑀤𑀸𑀦𑀁, 𑀤𑀸𑀦𑀁 𑀘𑀺𑀢𑁆𑀢𑀧𑁆𑀧𑀫𑁄𑀤𑀦𑀁.

‘‘𑀤𑀸𑀦𑁂𑀦 ¶ 𑀧𑀝𑀺𑀧𑀦𑁆𑀦𑁂𑀦, 𑀅𑀘𑁆𑀙𑀭𑀸𑀧𑀭𑀺𑀯𑀸𑀭𑀺𑀢𑁄;

𑀭𑀫𑀢𑁂 𑀲𑀼𑀘𑀺𑀭𑀁 𑀓𑀸𑀮𑀁, 𑀦𑀦𑁆𑀤𑀦𑁂 𑀲𑀼𑀭𑀦𑀦𑁆𑀤𑀦𑁂.

‘‘𑀧𑀻𑀢𑀺𑀫𑀼𑀴𑀸𑀭𑀁 𑀯𑀺𑀦𑁆𑀤𑀢𑀺 𑀤𑀸𑀢𑀸, 𑀕𑀸𑀭𑀯𑀫𑀲𑁆𑀫𑀺𑀁 𑀕𑀘𑁆𑀙𑀢𑀺 𑀮𑁄𑀓𑁂;

𑀓𑀺𑀢𑁆𑀢𑀺𑀫𑀦𑀦𑁆𑀢𑀁 𑀬𑀸𑀢𑀺 𑀘 𑀤𑀸𑀢𑀸, 𑀯𑀺𑀲𑁆𑀲𑀲𑀦𑀻𑀬𑁄 𑀳𑁄𑀢𑀺 𑀘 𑀤𑀸𑀢𑀸.

‘‘𑀤𑀢𑁆𑀯𑀸 𑀤𑀸𑀦𑀁 𑀬𑀸𑀢𑀺 𑀦𑀭𑁄 𑀲𑁄, 𑀪𑁄𑀕𑀲𑀫𑀺𑀤𑁆𑀥𑀺𑀁 𑀤𑀻𑀖𑀜𑁆𑀘𑀸𑀬𑀼;

𑀲𑀼𑀲𑁆𑀲𑀭𑀢𑀫𑁆𑀧𑀺 𑀘 𑀯𑀺𑀦𑁆𑀤𑀢𑀺 𑀭𑀽𑀧𑀁, 𑀲𑀕𑁆𑀕𑁂 𑀲𑀤𑁆𑀥𑀺𑀁 𑀓𑀻𑀴𑀢𑀺 𑀤𑁂𑀯𑁂𑀳𑀺;

𑀯𑀺𑀫𑀸𑀦𑁂𑀲𑀼 𑀞𑀢𑁆𑀯𑀸 𑀦𑀸𑀦𑀸, 𑀫𑀢𑁆𑀢𑀫𑀬𑀽𑀭𑀸𑀪𑀺𑀭𑀼𑀢𑁂𑀲𑀼.

‘‘𑀘𑁄𑀭𑀸𑀭𑀺𑀭𑀸𑀚𑁄𑀤𑀓𑀧𑀸𑀯𑀓𑀸𑀦𑀁, 𑀥𑀦𑀁 𑀅𑀲𑀸𑀥𑀸𑀭𑀡𑀫𑁂𑀯 𑀤𑀸𑀦𑀁;

𑀤𑀤𑀸𑀢𑀺 𑀢𑀁 𑀲𑀸𑀯𑀓𑀜𑀸𑀡𑀪𑀽𑀫𑀺𑀁, 𑀧𑀘𑁆𑀘𑁂𑀓𑀪𑀽𑀫𑀺𑀁 𑀧𑀦 𑀩𑀼𑀤𑁆𑀥𑀪𑀽𑀫𑀺’’𑀦𑁆𑀢𑀺. 𑁋

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀤𑀸𑀦𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀤𑀸𑀦𑀸𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀻𑀮𑀓𑀣𑀁 𑀓𑀣𑁂𑀲𑀺. 𑀲𑀻𑀮𑀁 𑀦𑀸𑀫𑁂𑀢𑀁 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁.

‘‘𑀲𑀻𑀮𑀁 𑀲𑀼𑀔𑀸𑀦𑀁 𑀧𑀭𑀫𑀁 𑀦𑀺𑀤𑀸𑀦𑀁, 𑀲𑀻𑀮𑁂𑀦 𑀲𑀻𑀮𑀻 𑀢𑀺𑀤𑀺𑀯𑀁 𑀧𑀬𑀸𑀢𑀺;

𑀲𑀻𑀮𑀜𑁆𑀳𑀺 𑀲𑀁𑀲𑀸𑀭𑀫𑀼𑀧𑀸𑀕𑀢𑀲𑁆𑀲, 𑀢𑀸𑀡𑀜𑁆𑀘 𑀮𑁂𑀡𑀜𑁆𑀘 𑀧𑀭𑀸𑀬𑀦𑀜𑁆𑀘.

‘‘𑀅𑀯𑀲𑁆𑀲𑀬𑁄 ¶ 𑀲𑀻𑀮𑀲𑀫𑁄 𑀚𑀦𑀸𑀦𑀁, 𑀓𑀼𑀢𑁄 𑀧𑀦𑀜𑁆𑀜𑁄 𑀇𑀥 𑀯𑀸 𑀧𑀭𑀢𑁆𑀣;

𑀲𑀻𑀮𑀁 𑀕𑀼𑀡𑀸𑀦𑀁 𑀧𑀭𑀫𑀸 𑀧𑀢𑀺𑀝𑁆𑀞𑀸, 𑀬𑀣𑀸 𑀥𑀭𑀸 𑀣𑀸𑀯𑀭𑀚𑀗𑁆𑀕𑀫𑀸𑀦𑀁.

‘‘𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀅𑀭𑀺𑀬𑀯𑀼𑀢𑁆𑀢𑀺𑀲𑀫𑀸𑀘𑀸𑀭𑁄, 𑀬𑁂𑀦 𑀯𑀼𑀘𑁆𑀘𑀢𑀺 𑀲𑀻𑀮𑀯𑀸’’. (𑀚𑀸. 𑁧.𑁩.𑁧𑁧𑁮);

𑀲𑀻𑀮𑀸𑀮𑀗𑁆𑀓𑀸𑀭𑀲𑀫𑁄 ¶ 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺, 𑀲𑀻𑀮𑀕𑀦𑁆𑀥𑀲𑀫𑁄 𑀕𑀦𑁆𑀥𑁄 𑀦𑀢𑁆𑀣𑀺, 𑀲𑀻𑀮𑀲𑀫𑀁 𑀓𑀺𑀮𑁂𑀲𑀫𑀮𑀯𑀺𑀲𑁄𑀥𑀦𑀁 𑀦𑀢𑁆𑀣𑀺, 𑀲𑀻𑀮𑀲𑀫𑀁 𑀧𑀭𑀺𑀴𑀸𑀳𑀽𑀧𑀲𑀫𑀁 𑀦𑀢𑁆𑀣𑀺, 𑀲𑀻𑀮𑀲𑀫𑀁 𑀓𑀺𑀢𑁆𑀢𑀺𑀚𑀦𑀦𑀁 𑀦𑀢𑁆𑀣𑀺, 𑀲𑀻𑀮𑀲𑀫𑀁 𑀲𑀕𑁆𑀕𑀸𑀭𑁄𑀳𑀡𑀲𑁄𑀧𑀸𑀦𑀁 𑀦𑀢𑁆𑀣𑀺, 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀦𑁂 𑀘 𑀲𑀻𑀮𑀲𑀫𑀁 𑀤𑁆𑀯𑀸𑀭𑀁 𑀦𑀢𑁆𑀣𑀺. 𑀬𑀣𑀸𑀳 𑁋

‘‘𑀲𑁄𑀪𑀦𑁆𑀢𑁂𑀯𑀁 ¶ 𑀦 𑀭𑀸𑀚𑀸𑀦𑁄, 𑀫𑀼𑀢𑁆𑀢𑀸𑀫𑀡𑀺𑀯𑀺𑀪𑀽𑀲𑀺𑀢𑀸;

𑀬𑀣𑀸 𑀲𑁄𑀪𑀦𑁆𑀢𑀺 𑀬𑀢𑀺𑀦𑁄, 𑀲𑀻𑀮𑀪𑀽𑀲𑀦𑀪𑀽𑀲𑀺𑀢𑀸.

‘‘𑀲𑀻𑀮𑀕𑀦𑁆𑀥𑀲𑀫𑁄 𑀕𑀦𑁆𑀥𑁄, 𑀓𑀼𑀢𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀬𑁄 𑀲𑀫𑀁 𑀅𑀦𑀼𑀯𑀸𑀢𑁂 𑀘, 𑀧𑀝𑀺𑀯𑀸𑀢𑁂 𑀘 𑀯𑀸𑀬𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁯);

‘‘𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺, 𑀦 𑀘𑀦𑁆𑀤𑀦𑀁 𑀢𑀕𑁆𑀕𑀭𑀫𑀮𑁆𑀮𑀺𑀓𑀸 𑀯𑀸;

𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺, 𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀺.

‘‘𑀘𑀦𑁆𑀤𑀦𑀁 𑀢𑀕𑀭𑀁 𑀯𑀸𑀧𑀺, 𑀉𑀧𑁆𑀧𑀮𑀁 𑀅𑀣 𑀯𑀲𑁆𑀲𑀺𑀓𑀻;

𑀏𑀢𑁂𑀲𑀁 𑀕𑀦𑁆𑀥𑀚𑀸𑀢𑀸𑀦𑀁, 𑀲𑀻𑀮𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄. (𑀥. 𑀧. 𑁫𑁪-𑁫𑁫; 𑀫𑀺. 𑀧. 𑁫.𑁪.𑁧);

‘‘𑀦 𑀕𑀗𑁆𑀕𑀸 𑀬𑀫𑀼𑀦𑀸 𑀘𑀸𑀧𑀺, 𑀲𑀭𑀪𑀽 𑀯𑀸 𑀲𑀭𑀲𑁆𑀯𑀢𑀻;

𑀦𑀺𑀦𑁆𑀦𑀕𑀸 𑀯𑀸𑀘𑀺𑀭𑀯𑀢𑀻, 𑀫𑀳𑀻 𑀯𑀸𑀧𑀺 𑀫𑀳𑀸𑀦𑀤𑀻.

‘‘𑀲𑀓𑁆𑀓𑀼𑀡𑀦𑁆𑀢𑀺 𑀯𑀺𑀲𑁄𑀥𑁂𑀢𑀼𑀁, 𑀢𑀁 𑀫𑀮𑀁 𑀇𑀥 𑀧𑀸𑀡𑀺𑀦𑀁;

𑀯𑀺𑀲𑁄𑀥𑀬𑀢𑀺 𑀲𑀢𑁆𑀢𑀸𑀦𑀁, 𑀬𑀁 𑀯𑁂 𑀲𑀻𑀮𑀚𑀮𑀁 𑀫𑀮𑀁.

‘‘𑀦 𑀢𑀁 𑀲𑀚𑀮𑀤𑀸 𑀯𑀸𑀢𑀸, 𑀦 𑀘𑀸𑀧𑀺 𑀳𑀭𑀺𑀘𑀦𑁆𑀤𑀦𑀁;

𑀦𑁂𑀯 𑀳𑀸𑀭𑀸 𑀦 𑀫𑀡𑀬𑁄, 𑀦 𑀘𑀦𑁆𑀤𑀓𑀺𑀭𑀡𑀗𑁆𑀓𑀼𑀭𑀸.

‘‘𑀲𑀫𑀬𑀦𑁆𑀢𑀻𑀥 ¶ 𑀲𑀢𑁆𑀢𑀸𑀦𑀁, 𑀧𑀭𑀺𑀴𑀸𑀳𑀁 𑀲𑀼𑀭𑀓𑁆𑀔𑀺𑀢𑀁;

𑀬𑀁 𑀲𑀫𑁂𑀢𑀺 𑀇𑀤𑀁 𑀅𑀭𑀺𑀬𑀁, 𑀲𑀻𑀮𑀁 𑀅𑀘𑁆𑀘𑀦𑁆𑀢𑀲𑀻𑀢𑀮𑀁.

‘‘𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑀁, 𑀯𑀺𑀤𑁆𑀥𑀁𑀲𑀬𑀢𑀺 𑀲𑀩𑁆𑀩𑀤𑀸;

𑀚𑀦𑁂𑀢𑀺 𑀓𑀺𑀢𑁆𑀢𑀺𑀳𑀸𑀲𑀜𑁆𑀘, 𑀲𑀻𑀮𑀁 𑀲𑀻𑀮𑀯𑀢𑁄 𑀲𑀤𑀸.

‘‘𑀲𑀕𑁆𑀕𑀸𑀭𑁄𑀳𑀡𑀲𑁄𑀧𑀸𑀦𑀁, 𑀅𑀜𑁆𑀜𑀁 𑀲𑀻𑀮𑀲𑀫𑀁 𑀓𑀼𑀢𑁄;

𑀤𑁆𑀯𑀸𑀭𑀁 𑀯𑀸 𑀧𑀦 𑀦𑀺𑀩𑁆𑀩𑀸𑀦, 𑀦𑀕𑀭𑀲𑁆𑀲 𑀧𑀯𑁂𑀲𑀦𑁂.

‘‘𑀕𑀼𑀡𑀸𑀦𑀁 ¶ 𑀫𑀽𑀮𑀪𑀽𑀢𑀲𑁆𑀲, 𑀤𑁄𑀲𑀸𑀦𑀁 𑀩𑀮𑀖𑀸𑀢𑀺𑀦𑁄;

𑀇𑀢𑀺 𑀲𑀻𑀮𑀲𑁆𑀲 𑀚𑀸𑀦𑀸𑀣, 𑀆𑀦𑀺𑀲𑀁𑀲𑀫𑀦𑀼𑀢𑁆𑀢𑀭’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁯);

𑀏𑀯𑀁 𑀪𑀕𑀯𑀸 𑀲𑀻𑀮𑀸𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑁋 ‘‘𑀇𑀤𑀁 𑀧𑀦 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀕𑁆𑀕𑁄 𑀮𑀪𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀁 𑀓𑀣𑁂𑀲𑀺. 𑀅𑀬𑀁 𑀲𑀕𑁆𑀕𑁄 𑀦𑀸𑀫 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀏𑀓𑀦𑁆𑀢𑀲𑀼𑀔𑁄 𑀦𑀺𑀘𑁆𑀘𑀫𑁂𑀢𑁆𑀣 𑀓𑀻𑀴𑀸 𑀦𑀺𑀘𑁆𑀘𑀁 𑀲𑀫𑁆𑀧𑀢𑁆𑀢𑀺𑀬𑁄 𑀮𑀪𑀦𑁆𑀢𑀺. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀦𑁆𑀢𑀺. 𑀢𑀸𑀯𑀢𑀺𑀁𑀲𑀸 𑀢𑀺𑀲𑁆𑀲𑁄 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀫𑀸𑀤𑀺𑀲𑀕𑁆𑀕𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁 𑀓𑀣𑁂𑀲𑀺. 𑀏𑀯𑀁 𑀲𑀕𑁆𑀕𑀓𑀣𑀸𑀬 ¶ 𑀧𑀮𑁄𑀪𑁂𑀢𑁆𑀯𑀸 𑀧𑀼𑀦 𑁋 ‘‘𑀅𑀬𑀫𑁆𑀧𑀺 𑀲𑀕𑁆𑀕𑁄 𑀅𑀦𑀺𑀘𑁆𑀘𑁄 𑀅𑀥𑀼𑀯𑁄 𑀦 𑀢𑀢𑁆𑀣 𑀙𑀦𑁆𑀤𑀭𑀸𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀏𑀯𑀁 𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀏𑀓𑀘𑁆𑀘𑁂 𑀲𑀭𑀡𑁂𑀲𑀼 𑀘 𑀏𑀓𑀘𑁆𑀘𑁂 𑀧𑀜𑁆𑀘𑀲𑀻𑀮𑁂𑀲𑀼 𑀘 𑀏𑀓𑀘𑁆𑀘𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀘 𑀏𑀓𑀘𑁆𑀘𑁂 𑀲𑀓𑀤𑀸𑀕𑀸𑀫𑀺𑀨𑀮𑁂 𑀏𑀓𑀘𑁆𑀘𑁂 𑀅𑀦𑀸𑀕𑀸𑀫𑀺𑀨𑀮𑁂 𑀏𑀓𑀘𑁆𑀘𑁂 𑀘𑀢𑀽𑀲𑀼𑀧𑀺 𑀨𑀮𑁂𑀲𑀼 𑀏𑀓𑀘𑁆𑀘𑁂 𑀢𑀻𑀲𑀼 𑀯𑀺𑀚𑁆𑀚𑀸𑀲𑀼 𑀏𑀓𑀘𑁆𑀘𑁂 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀏𑀓𑀘𑁆𑀘𑁂 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀭𑀫𑁆𑀫𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑀫𑁂𑀯 𑀧𑀸𑀯𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀢𑀤𑀸 𑀢𑁂 𑀪𑁄𑀚𑀬𑀺𑀢𑁆𑀯𑀸𑀦, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀉𑀧𑀕𑀘𑁆𑀙𑀼𑀁 𑀲𑀭𑀡𑀁 𑀢𑀲𑁆𑀲, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨.

‘‘𑀲𑀭𑀡𑀸𑀕𑀫𑀦𑁂 𑀓𑀜𑁆𑀘𑀺, 𑀦𑀺𑀯𑁂𑀲𑁂𑀢𑀺 𑀢𑀣𑀸𑀕𑀢𑁄;

𑀓𑀜𑁆𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀲𑀻𑀮𑁂 𑀤𑀲𑀯𑀺𑀥𑁂 𑀧𑀭𑀁.

𑁩.

‘‘𑀓𑀲𑁆𑀲𑀘𑀺 ¶ 𑀤𑁂𑀢𑀺 𑀲𑀸𑀫𑀜𑁆𑀜𑀁, 𑀘𑀢𑀼𑀭𑁄 𑀨𑀮𑀫𑀼𑀢𑁆𑀢𑀫𑁂;

𑀓𑀲𑁆𑀲𑀘𑀺 𑀅𑀲𑀫𑁂 𑀥𑀫𑁆𑀫𑁂, 𑀤𑁂𑀢𑀺 𑀲𑁄 𑀧𑀝𑀺𑀲𑀫𑁆𑀪𑀺𑀤𑀸.

𑁪.

‘‘𑀓𑀲𑁆𑀲𑀘𑀺 𑀯𑀭𑀲𑀫𑀸𑀧𑀢𑁆𑀢𑀺𑀬𑁄, 𑀅𑀝𑁆𑀞 𑀤𑁂𑀢𑀺 𑀦𑀭𑀸𑀲𑀪𑁄;

𑀢𑀺𑀲𑁆𑀲𑁄 𑀓𑀲𑁆𑀲𑀘𑀺 𑀯𑀺𑀚𑁆𑀚𑀸𑀬𑁄, 𑀙𑀴𑀪𑀺𑀜𑁆𑀜𑀸 𑀧𑀯𑁂𑀘𑁆𑀙𑀢𑀺.

𑁫.

‘‘𑀢𑁂𑀦 𑀬𑁄𑀕𑁂𑀦 𑀚𑀦𑀓𑀸𑀬𑀁, 𑀑𑀯𑀤𑀢𑀺 𑀫𑀳𑀸𑀫𑀼𑀦𑀺;

𑀢𑁂𑀦 𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑁬.

‘‘𑀫𑀳𑀸𑀳𑀦𑀼𑀲𑀪𑀓𑁆𑀔𑀦𑁆𑀥𑁄 ¶ , 𑀤𑀻𑀧𑀗𑁆𑀓𑀭𑀲𑀦𑀸𑀫𑀓𑁄;

𑀩𑀳𑀽 𑀚𑀦𑁂 𑀢𑀸𑀭𑀬𑀢𑀺, 𑀧𑀭𑀺𑀫𑁄𑀘𑁂𑀢𑀺 𑀤𑀼𑀕𑁆𑀕𑀢𑀺𑀁.

𑁭.

‘‘𑀩𑁄𑀥𑀦𑁂𑀬𑁆𑀬𑀁 𑀚𑀦𑀁 𑀤𑀺𑀲𑁆𑀯𑀸, 𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂;

𑀔𑀡𑁂𑀦 𑀉𑀧𑀕𑀦𑁆𑀢𑁆𑀯𑀸𑀦, 𑀩𑁄𑀥𑁂𑀢𑀺 𑀢𑀁 𑀫𑀳𑀸𑀫𑀼𑀦𑀻’’𑀢𑀺.

𑀢𑀢𑁆𑀣 𑀢𑁂𑀢𑀺 𑀭𑀫𑁆𑀫𑀦𑀕𑀭𑀯𑀸𑀲𑀺𑀦𑁄 𑀉𑀧𑀸𑀲𑀓𑀸. 𑀲𑀭𑀡𑀦𑁆𑀢𑀺 𑀏𑀢𑁆𑀣 𑀲𑀭𑀡𑀁 𑀲𑀭𑀡𑀕𑀫𑀦𑀁 𑀲𑀭𑀡𑀲𑁆𑀲 𑀕𑀦𑁆𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀭𑀢𑀺 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀲𑀭𑀡𑀁, 𑀓𑀺𑀁 𑀢𑀁? 𑀭𑀢𑀦𑀢𑁆𑀢𑀬𑀁. 𑀢𑀁 𑀧𑀦 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀁 𑀧𑀭𑀺𑀓𑁆𑀓𑀺𑀮𑁂𑀲𑀁 𑀳𑀦𑀢𑀺 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

‘‘𑀬𑁂 ¶ 𑀓𑁂𑀘𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

‘‘𑀬𑁂 𑀓𑁂𑀘𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀲𑀭𑀡𑀕𑀫𑀦𑀁 ¶ 𑀦𑀸𑀫 𑀭𑀢𑀦𑀢𑁆𑀢𑀬𑀧𑀭𑀸𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑀭𑀡𑀲𑁆𑀲 𑀕𑀦𑁆𑀢𑀸 𑀦𑀸𑀫 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀏𑀯𑀁 𑀢𑀸𑀯 𑀲𑀭𑀡𑀁 𑀲𑀭𑀡𑀕𑀫𑀦𑀁 𑀲𑀭𑀡𑀲𑁆𑀲 𑀕𑀦𑁆𑀢𑀸 𑀘𑀸𑀢𑀺 𑀇𑀤𑀁 𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀲𑁆𑀲𑀸𑀢𑀺 𑀢𑀁 𑀤𑀻𑀧𑀗𑁆𑀓𑀭𑀁, 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. ‘‘𑀉𑀧𑀕𑀘𑁆𑀙𑀼𑀁 𑀲𑀭𑀡𑀁 𑀢𑀢𑁆𑀣𑀸’’𑀢𑀺𑀧𑀺 𑀧𑀸𑀞𑁄. 𑀲𑀢𑁆𑀣𑀼𑀦𑁄𑀢𑀺 𑀲𑀢𑁆𑀣𑀸𑀭𑀁. 𑀲𑀭𑀡𑀸𑀕𑀫𑀦𑁂 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀲𑀭𑀡𑀕𑀫𑀦𑁂 𑀦𑀺𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀢𑀻𑀢𑀓𑀸𑀮𑀯𑀲𑁂𑀦 𑀧𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀓𑀲𑁆𑀲𑀘𑀺 𑀲𑀭𑀡𑀸𑀕𑀫𑀦𑁂’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀧𑀺 𑀲𑁄𑀬𑁂𑀯𑀢𑁆𑀣𑁄. 𑀓𑀜𑁆𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀽𑀢𑀺 ¶ 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀧𑀜𑁆𑀘𑀲𑀼 𑀯𑀺𑀭𑀢𑀺𑀲𑀻𑀮𑁂𑀲𑀼 𑀦𑀺𑀯𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀓𑀲𑁆𑀲𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀽’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀲𑀻𑀮𑁂 𑀤𑀲𑀯𑀺𑀥𑁂 𑀧𑀭𑀦𑁆𑀢𑀺 𑀅𑀧𑀭𑀁 𑀧𑀼𑀕𑁆𑀕𑀮𑀁 𑀤𑀲𑀯𑀺𑀥𑁂 𑀲𑀻𑀮𑁂 𑀦𑀺𑀯𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀓𑀲𑁆𑀲𑀘𑀺 𑀓𑀼𑀲𑀮𑁂 𑀤𑀲𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀤𑀲 𑀓𑀼𑀲𑀮𑀥𑀫𑁆𑀫𑁂 𑀲𑀫𑀸𑀤𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀲𑀘𑀺 𑀤𑁂𑀢𑀺 𑀲𑀸𑀫𑀜𑁆𑀜𑀦𑁆𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀢𑁄 𑀲𑀸𑀫𑀜𑁆𑀜𑀦𑁆𑀢𑀺 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀸𑀫𑀜𑁆𑀜𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀜𑁆𑀜’’𑀦𑁆𑀢𑀺 (𑀲𑀁. 𑀦𑀺. 𑁫.𑁩𑁬).

𑀘𑀢𑀼𑀭𑁄 𑀨𑀮𑀫𑀼𑀢𑁆𑀢𑀫𑁂𑀢𑀺 𑀘𑀢𑁆𑀢𑀸𑀭𑀺 𑀉𑀢𑁆𑀢𑀫𑀸𑀦𑀺 𑀨𑀮𑀸𑀦𑀻𑀢𑀺 𑀅𑀢𑁆𑀣𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀲𑁂𑀦 𑀯𑀼𑀢𑁆𑀢𑀁. 𑀬𑀣𑁄𑀧𑀦𑀺𑀲𑁆𑀲𑀬𑀁 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀓𑀲𑁆𑀲𑀘𑀺 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀲𑀘𑀺 𑀅𑀲𑀫𑁂 𑀥𑀫𑁆𑀫𑁂𑀢𑀺 𑀓𑀲𑁆𑀲𑀘𑀺 𑀅𑀲𑀤𑀺𑀲𑁂 𑀘𑀢𑁆𑀢𑀸𑀭𑁄 𑀧𑀝𑀺𑀲𑀫𑁆𑀪𑀺𑀤𑀸𑀥𑀫𑁆𑀫𑁂 𑀅𑀤𑀸𑀲𑀺.

𑀓𑀲𑁆𑀲𑀘𑀺 𑀯𑀭𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀓𑀲𑁆𑀲𑀘𑀺 𑀧𑀦 𑀦𑀻𑀯𑀭𑀡𑀯𑀺𑀕𑀫𑁂𑀦 𑀧𑀥𑀸𑀦𑀪𑀽𑀢𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀅𑀤𑀸𑀲𑀺. 𑀢𑀺𑀲𑁆𑀲𑁄 𑀓𑀲𑁆𑀲𑀘𑀺 𑀯𑀺𑀚𑁆𑀚𑀸𑀬𑁄𑀢𑀺 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀁 𑀯𑀲𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀬𑁄. 𑀙𑀴𑀪𑀺𑀜𑁆𑀜𑀸 𑀧𑀯𑁂𑀘𑁆𑀙𑀢𑀻𑀢𑀺 𑀙 𑀅𑀪𑀺𑀜𑁆𑀜𑀸𑀬𑁄 𑀓𑀲𑁆𑀲𑀘𑀺 𑀅𑀤𑀸𑀲𑀺.

𑀢𑁂𑀦 𑀬𑁄𑀕𑁂𑀦𑀸𑀢𑀺 𑀢𑁂𑀦 𑀦𑀬𑁂𑀦 𑀢𑁂𑀦𑀸𑀦𑀼𑀓𑁆𑀓𑀫𑁂𑀦 𑀘. 𑀚𑀦𑀓𑀸𑀬𑀦𑁆𑀢𑀺 𑀚𑀦𑀲𑀫𑀽𑀳𑀁. 𑀑𑀯𑀤𑀢𑀻𑀢𑀺 𑀑𑀯𑀤𑀺. 𑀓𑀸𑀮𑀯𑀺𑀧𑀭𑀺𑀬𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁄 𑀉𑀧𑀭𑀺𑀧𑀺 𑀈𑀤𑀺𑀲𑁂𑀲𑀼 𑀯𑀘𑀦𑁂𑀲𑀼 𑀅𑀢𑀻𑀢𑀓𑀸𑀮𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ¶ . 𑀢𑁂𑀦 𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀻𑀢𑀺 𑀢𑁂𑀦 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀺𑀬𑀸 𑀯𑀺𑀢𑁆𑀣𑀸𑀭𑀺𑀓𑀁 𑀯𑀺𑀢𑁆𑀣𑀢𑀁 𑀯𑀺𑀲𑀸𑀮𑀻𑀪𑀽𑀢𑀁 𑀲𑀸𑀲𑀦𑀁 𑀅𑀳𑁄𑀲𑀺.

𑀫𑀳𑀸𑀳𑀦𑀽𑀢𑀺 ¶ 𑀫𑀳𑀸𑀧𑀼𑀭𑀺𑀲𑀸𑀦𑀁 𑀓𑀺𑀭 𑀤𑁆𑀯𑁂𑀧𑀺 𑀳𑀦𑀽𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀤𑁆𑀯𑀸𑀤𑀲𑀺𑀬𑀸 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀓𑀸𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀫𑀳𑀦𑁆𑀢𑀸𑀦𑀺 𑀳𑀦𑀽𑀦𑀺 𑀬𑀲𑁆𑀲 𑀲𑁄 𑀫𑀳𑀸𑀳𑀦𑀼, 𑀲𑀻𑀳𑀳𑀦𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀲𑀪𑀓𑁆𑀔𑀦𑁆𑀥𑁄𑀢𑀺 𑀉𑀲𑀪𑀲𑁆𑀲𑁂𑀯 𑀔𑀦𑁆𑀥𑁄 𑀬𑀲𑁆𑀲 𑀪𑀯𑀢𑀺, 𑀲𑁄 𑀉𑀲𑀪𑀓𑁆𑀔𑀦𑁆𑀥𑁄. 𑀲𑀼𑀯𑀝𑁆𑀝𑀺𑀢𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑀭𑀼𑀘𑀺𑀭𑀓𑁆𑀔𑀦𑁆𑀥𑁄 𑀲𑀫𑀯𑀝𑁆𑀝𑀘𑀸𑀭𑀼𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀤𑀻𑀧𑀗𑁆𑀓𑀭𑀲𑀦𑀸𑀫𑀓𑁄𑀢𑀺 𑀤𑀻𑀧𑀗𑁆𑀓𑀭𑀲𑀦𑀸𑀫𑁄 ¶ . 𑀩𑀳𑀽 𑀚𑀦𑁂 𑀢𑀸𑀭𑀬𑀢𑀻𑀢𑀺 𑀩𑀳𑀽 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂 𑀚𑀦𑁂 𑀢𑀸𑀭𑁂𑀲𑀺. 𑀧𑀭𑀺𑀫𑁄𑀘𑁂𑀢𑀻𑀢𑀺 𑀧𑀭𑀺𑀫𑁄𑀘𑁂𑀲𑀺. 𑀤𑀼𑀕𑁆𑀕𑀢𑀺𑀦𑁆𑀢𑀺 𑀤𑀼𑀕𑁆𑀕𑀢𑀺𑀢𑁄. 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑀇𑀤𑀸𑀦𑀺 𑀢𑀸𑀭𑀡𑀧𑀭𑀺𑀫𑁄𑀘𑀦𑀓𑀭𑀡𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀩𑁄𑀥𑀦𑁂𑀬𑁆𑀬𑀁 𑀚𑀦’’𑀦𑁆𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀩𑁄𑀥𑀦𑁂𑀬𑁆𑀬𑀁 𑀚𑀦𑀦𑁆𑀢𑀺 𑀩𑁄𑀥𑀦𑁂𑀬𑁆𑀬𑀁 𑀧𑀚𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀤𑀺𑀲𑁆𑀯𑀸𑀢𑀺 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸. 𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂𑀢𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂 𑀞𑀺𑀢𑀁. 𑀇𑀤𑀁 𑀧𑀦 𑀤𑀲𑀲𑀳𑀲𑁆𑀲𑀺𑀬𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀻𑀧𑀗𑁆𑀓𑀭𑁄 𑀓𑀺𑀭 𑀲𑀢𑁆𑀣𑀸 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀩𑁄𑀥𑀺𑀫𑀽𑀮𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀚𑁆𑀛𑁂𑀲𑀦𑀁 𑀧𑀝𑀺𑀜𑁆𑀜𑀸𑀬 𑀲𑀼𑀦𑀦𑁆𑀤𑀸𑀭𑀸𑀫𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀓𑁄𑀝𑀺𑀲𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀅𑀬𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀅𑀣 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑀲𑁆𑀲 𑀉𑀲𑀪𑀓𑁆𑀔𑀦𑁆𑀥𑀲𑁆𑀲 𑀦𑀸𑀫 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀢𑀁 𑀅𑀢𑁆𑀭𑀚𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀭𑀸𑀳𑀼𑀮𑁄𑀯𑀸𑀤𑀲𑀤𑀺𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀦𑀯𑀼𑀢𑀺𑀓𑁄𑀝𑀺𑀬𑁄 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀦 𑀪𑀕𑀯𑀸 𑀅𑀫𑀭𑀯𑀢𑀻𑀦𑀕𑀭𑀤𑁆𑀯𑀸𑀭𑁂 𑀫𑀳𑀸𑀲𑀺𑀭𑀻𑀲𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀸𑀫𑁄𑀓𑁆𑀔𑀁 𑀓𑀢𑁆𑀯𑀸 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀤𑀺𑀯𑀲𑀓𑀭𑀸𑀢𑀺𑀭𑁂𑀓𑀚𑀼𑀢𑀺𑀯𑀺𑀲𑀭𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀭𑀫𑀲𑀻𑀢𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀤𑁂𑀯𑀕𑀡𑀧𑀻𑀢𑀺𑀲𑀜𑁆𑀚𑀦𑀦𑀺𑀁 𑀅𑀢𑁆𑀢𑀦𑁄 ¶ 𑀚𑀦𑀦𑀺𑀁 𑀲𑀼𑀫𑁂𑀥𑀸𑀤𑁂𑀯𑀺𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀲𑀩𑁆𑀩𑀮𑁄𑀓𑀯𑀺𑀤𑀺𑀢𑀯𑀺𑀲𑀼𑀤𑁆𑀥𑀺𑀤𑁂𑀯𑁄 𑀤𑁂𑀯𑀤𑁂𑀯𑁄 𑀤𑀻𑀧𑀗𑁆𑀓𑀭𑁄 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑀳𑀺𑀢𑀓𑀭𑀁 𑀧𑀭𑀫𑀸𑀢𑀺𑀭𑁂𑀓𑀕𑀫𑁆𑀪𑀻𑀭𑀲𑀼𑀔𑀼𑀫𑀁 𑀩𑀼𑀤𑁆𑀥𑀺𑀯𑀺𑀲𑀤𑀓𑀭𑀁 𑀲𑀢𑁆𑀢𑀧𑁆𑀧𑀓𑀭𑀡𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀢𑁆𑀯𑀸 𑀦𑀯𑀼𑀢𑀺𑀤𑁂𑀯𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀧𑀞𑀫𑀸𑀪𑀺𑀲𑀫𑀬𑁂 𑀩𑀼𑀤𑁆𑀥𑁄, 𑀓𑁄𑀝𑀺𑀲𑀢𑀫𑀩𑁄𑀥𑀬𑀺;

𑀤𑀼𑀢𑀺𑀬𑀸𑀪𑀺𑀲𑀫𑀬𑁂 𑀦𑀸𑀣𑁄, 𑀦𑀯𑀼𑀢𑀺𑀓𑁄𑀝𑀺𑀫𑀩𑁄𑀥𑀬𑀺.

𑁯.

‘‘𑀬𑀤𑀸 𑀘 𑀤𑁂𑀯𑀪𑀯𑀦𑀫𑁆𑀳𑀺, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀤𑀻𑀧𑀗𑁆𑀓𑀭𑀲𑁆𑀲 ¶ ¶ 𑀧𑀦 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀢𑀢𑁆𑀣 𑀲𑀼𑀦𑀦𑁆𑀤𑀸𑀭𑀸𑀫𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀤𑀲𑀩𑀮𑁄 𑀘𑀢𑀽𑀳𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀦𑀕𑀭𑀧𑀝𑀺𑀧𑀸𑀝𑀺𑀬𑀸 𑀫𑀳𑀸𑀚𑀦𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑀸𑀚𑀦𑀓𑀢𑀲𑀓𑁆𑀓𑀸𑀭𑀁 𑀲𑀩𑁆𑀩𑀮𑁄𑀓𑀯𑀺𑀲𑁆𑀲𑀼𑀢𑀁 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀁 𑀅𑀢𑀺𑀪𑀬𑀸𑀦𑀓𑀁 𑀑𑀮𑀫𑁆𑀩𑀸𑀫𑁆𑀩𑀼𑀥𑀭𑀧𑀭𑀺𑀘𑀼𑀫𑁆𑀩𑀺𑀢𑀓𑀽𑀝𑀁 𑀯𑀺𑀯𑀺𑀥𑀲𑀼𑀭𑀪𑀺𑀢𑀭𑀼𑀓𑀼𑀲𑀼𑀫𑀯𑀸𑀲𑀺𑀢𑀓𑀽𑀝𑀁 𑀦𑀸𑀦𑀸𑀫𑀺𑀕𑀕𑀡𑀯𑀺𑀘𑀭𑀺𑀢𑀓𑀽𑀝𑀁 𑀦𑀸𑀭𑀤𑀓𑀽𑀝𑀁 𑀦𑀸𑀫 𑀧𑀭𑀫𑀭𑀫𑀡𑀻𑀬𑀁 𑀧𑀩𑁆𑀩𑀢𑀁 𑀲𑀫𑁆𑀧𑀸𑀧𑀼𑀡𑀺. 𑀲𑁄 𑀓𑀺𑀭 𑀧𑀩𑁆𑀩𑀢𑁄 𑀦𑀸𑀭𑀤𑁂𑀦 𑀦𑀸𑀫 𑀬𑀓𑁆𑀔𑁂𑀦 𑀧𑀭𑀺𑀕𑁆𑀕𑀳𑀺𑀢𑁄 𑀅𑀳𑁄𑀲𑀺. 𑀢𑀢𑁆𑀣 𑀧𑀦 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀅𑀦𑀼𑀲𑀁𑀯𑀘𑁆𑀙𑀭𑀁 𑀫𑀳𑀸𑀚𑀦𑁄 𑀫𑀦𑀼𑀲𑁆𑀲𑀩𑀮𑀺𑀁 𑀉𑀧𑀲𑀁𑀳𑀭𑀢𑀺.

𑀅𑀣 𑀤𑀻𑀧𑀗𑁆𑀓𑀭𑁄 𑀓𑀺𑀭 𑀪𑀕𑀯𑀸 𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀘𑀸𑀢𑀼𑀤𑁆𑀤𑀺𑀲𑀁 𑀧𑁂𑀲𑁂𑀢𑁆𑀯𑀸 𑀅𑀤𑀼𑀢𑀺𑀬𑁄 𑀅𑀲𑀳𑀸𑀬𑁄 𑀫𑀳𑀸𑀓𑀭𑀼𑀡𑀸𑀩𑀮𑀯𑀲𑀗𑁆𑀕𑀢𑀳𑀤𑀬𑁄 𑀢𑀜𑁆𑀘 𑀬𑀓𑁆𑀔𑀁 𑀯𑀺𑀦𑁂𑀢𑀼𑀁 𑀢𑀁 𑀦𑀸𑀭𑀤𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺. 𑀅𑀣 𑀲𑁄 𑀫𑀦𑀼𑀲𑁆𑀲𑀪𑀓𑁆𑀔𑁄 𑀲𑀓𑀳𑀺𑀢𑀦𑀺𑀭𑀧𑁂𑀓𑁆𑀔𑁄 𑀧𑀭𑀯𑀥𑀤𑀓𑁆𑀔𑁄 𑀬𑀓𑁆𑀔𑁄 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀓𑁄𑀥𑀧𑀭𑁂𑀢𑀫𑀸𑀦𑀲𑁄 𑀤𑀲𑀩𑀮𑀁 𑀪𑀺𑀁𑀲𑀸𑀧𑁂𑀢𑁆𑀯𑀸 𑀧𑀮𑀸𑀧𑁂𑀢𑀼𑀓𑀸𑀫𑁄 𑀢𑀁 𑀧𑀩𑁆𑀩𑀢𑀁 𑀘𑀸𑀮𑁂𑀲𑀺. 𑀲𑁄 𑀓𑀺𑀭 𑀧𑀩𑁆𑀩𑀢𑁄 𑀢𑁂𑀦 ¶ 𑀘𑀸𑀮𑀺𑀬𑀫𑀸𑀦𑁄 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 𑀧𑀢𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺.

𑀢𑀢𑁄 𑀲𑁄 𑀪𑀻𑀢𑁄 𑁋 ‘‘𑀳𑀦𑁆𑀤 𑀦𑀁 𑀅𑀕𑁆𑀕𑀺𑀦𑀸 𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀁 𑀅𑀢𑀺𑀪𑀻𑀫𑀤𑀲𑁆𑀲𑀦𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀝𑀺𑀯𑀸𑀢𑁂 𑀔𑀺𑀢𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄𑀯 𑀤𑀼𑀓𑁆𑀔𑀁 𑀚𑀦𑁂𑀲𑀺, 𑀦 𑀧𑀦 𑀪𑀕𑀯𑀢𑁄 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀤𑀟𑁆𑀠𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺. 𑀬𑀓𑁆𑀔𑁄 𑀧𑀦 ‘‘𑀲𑀫𑀡𑁄 𑀤𑀟𑁆𑀠𑁄, 𑀦 𑀤𑀟𑁆𑀠𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀤𑀲𑀩𑀮𑀁 𑀲𑀭𑀤𑀲𑀫𑀬𑀯𑀺𑀫𑀮𑀓𑀭𑀦𑀺𑀓𑀭𑀁 𑀲𑀩𑁆𑀩𑀚𑀦𑀭𑀢𑀺𑀓𑀭𑀁 𑀭𑀚𑀦𑀺𑀓𑀭𑀫𑀺𑀯 𑀲𑀻𑀢𑀮𑀚𑀮𑀢𑀮𑀕𑀢𑀓𑀫𑀮𑀓𑀡𑁆𑀡𑀺𑀓𑀸𑀬 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀅𑀬𑀁 𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀁 𑀬𑀁 𑀇𑀫𑀲𑁆𑀲𑀸𑀳𑀁 𑀅𑀦𑀢𑁆𑀣𑀁 𑀓𑀭𑁄𑀫𑀺, 𑀲𑁄 𑀲𑁄 𑀫𑀫𑀽𑀧𑀭𑀺𑀬𑁂𑀯 𑀧𑀢𑀢𑀺, 𑀇𑀫𑀁 𑀧𑀦 𑀲𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀫𑁂 𑀧𑀝𑀺𑀲𑀭𑀡𑀁 𑀧𑀭𑀸𑀬𑀦𑀁 𑀦𑀢𑁆𑀣𑀺, 𑀧𑀣𑀯𑀺𑀬𑀁 𑀉𑀧𑀓𑁆𑀔𑀮𑀺𑀢𑀸 𑀧𑀣𑀯𑀺𑀁𑀬𑁂𑀯 𑀦𑀺𑀲𑁆𑀲𑀸𑀬 𑀉𑀝𑁆𑀞𑀳𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀁𑀬𑁂𑀯 𑀲𑀫𑀡𑀁 𑀲𑀭𑀡𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀅𑀣𑁂𑀯𑀁 ¶ 𑀧𑀦 𑀲𑁄 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀢𑁄 𑀘𑀓𑁆𑀓𑀸𑀮𑀗𑁆𑀓𑀢𑀢𑀮𑁂𑀲𑀼 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸’’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀭𑀡𑀫𑀕𑀫𑀸𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑀲𑀳𑀺 𑀬𑀓𑁆𑀔𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀲𑁆𑀫𑀺𑀁 𑀓𑀺𑀭 𑀤𑀺𑀯𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 ¶ 𑀢𑀲𑁆𑀲 𑀩𑀮𑀺𑀓𑀫𑁆𑀫𑀢𑁆𑀣𑀁 𑀏𑀓𑁂𑀓𑀕𑀸𑀫𑀢𑁄 𑀏𑀓𑁂𑀓𑀁 𑀧𑀼𑀭𑀺𑀲𑀁 𑀆𑀳𑀭𑀺𑀁𑀲𑀼. 𑀅𑀜𑁆𑀜𑀜𑁆𑀘 𑀩𑀳𑀼𑀢𑀺𑀮𑀢𑀡𑁆𑀟𑀼𑀮𑀓𑀼𑀮𑀢𑁆𑀣𑀫𑀼𑀕𑁆𑀕𑀫𑀸𑀲𑀸𑀤𑀺𑀁 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀜𑁆𑀘 𑀆𑀳𑀭𑀺𑀁𑀲𑀼. 𑀅𑀣 𑀲𑁄 𑀬𑀓𑁆𑀔𑁄 𑀢𑀁 𑀤𑀺𑀯𑀲𑀁 𑀆𑀪𑀢𑀢𑀡𑁆𑀟𑀼𑀮𑀸𑀤𑀺𑀓𑀁 𑀲𑀩𑁆𑀩𑀁 𑀢𑁂𑀲𑀁𑀬𑁂𑀯 𑀤𑀢𑁆𑀯𑀸 𑀢𑁂 𑀩𑀮𑀺𑀓𑀫𑁆𑀫𑀢𑁆𑀣𑀸𑀬 𑀆𑀦𑀻𑀢𑀫𑀦𑀼𑀲𑁆𑀲𑁂 𑀤𑀲𑀩𑀮𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺.

𑀅𑀣 𑀲𑀢𑁆𑀣𑀸 𑀢𑁂 𑀫𑀦𑀼𑀲𑁆𑀲𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀦𑁆𑀢𑁄𑀲𑀢𑁆𑀢𑀸𑀳𑁂𑀬𑁂𑀯 𑀲𑀩𑁆𑀩𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀸𑀖𑀧𑀼𑀡𑁆𑀡𑀫𑀸𑀬 𑀓𑁄𑀝𑀺𑀲𑀢𑀪𑀺𑀓𑁆𑀔𑀼𑀫𑀚𑁆𑀛𑀕𑀢𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑀦𑁆𑀦𑀺𑀧𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀫𑀼𑀤𑁆𑀤𑀺𑀲𑀺. 𑀘𑀢𑀼𑀭𑀗𑁆𑀕𑀸𑀦𑀺 𑀦𑀸𑀫 𑀲𑀩𑁆𑀩𑁂𑀯 𑀏𑀳𑀺𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀙𑀴𑀪𑀺𑀜𑁆𑀜𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀅𑀦𑀸𑀫𑀦𑁆𑀢𑀺𑀢𑀸𑀯 𑀆𑀕𑀢𑀸, 𑀧𑀦𑁆𑀦𑀭𑀲𑀽𑀧𑁄𑀲𑀣𑀤𑀺𑀯𑀲𑁄 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀦𑀸𑀫. 𑀅𑀬𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧.

‘‘𑀧𑀼𑀦 ¶ 𑀦𑀸𑀭𑀤𑀓𑀽𑀝𑀫𑁆𑀳𑀺, 𑀧𑀯𑀺𑀯𑁂𑀓𑀕𑀢𑁂 𑀚𑀺𑀦𑁂;

𑀔𑀻𑀡𑀸𑀲𑀯𑀸 𑀯𑀻𑀢𑀫𑀮𑀸, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄’’𑀢𑀺.

𑀢𑀢𑁆𑀣 𑀧𑀯𑀺𑀯𑁂𑀓𑀕𑀢𑁂𑀢𑀺 𑀕𑀡𑀁 𑀧𑀳𑀸𑀬 𑀕𑀢𑁂. 𑀲𑀫𑀺𑀁𑀲𑀽𑀢𑀺 𑀲𑀦𑁆𑀦𑀺𑀧𑀢𑀺𑀁𑀲𑀼.

𑀬𑀤𑀸 𑀧𑀦 𑀤𑀻𑀧𑀗𑁆𑀓𑀭𑁄 𑀮𑁄𑀓𑀦𑀸𑀬𑀓𑁄 𑀲𑀼𑀤𑀲𑁆𑀲𑀦𑀦𑀸𑀫𑀓𑁂 𑀧𑀩𑁆𑀩𑀢𑁂 𑀯𑀲𑁆𑀲𑀸𑀯𑀸𑀲𑀫𑀼𑀧𑀕𑀜𑁆𑀙𑀺, 𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀅𑀦𑀼𑀲𑀁𑀯𑀘𑁆𑀙𑀭𑀁 𑀕𑀺𑀭𑀕𑁆𑀕𑀲𑀫𑀚𑁆𑀚𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀚𑁆𑀚𑁂 𑀲𑀦𑁆𑀦𑀺𑀧𑀢𑀺𑀢𑀸 𑀫𑀦𑀼𑀲𑁆𑀲𑀸 𑀤𑀲𑀩𑀮𑀁 𑀤𑀺𑀲𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀢𑁆𑀭 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀫𑀳𑀸𑀧𑀯𑀸𑀭𑀡𑀤𑀺𑀯𑀲𑁂 𑀲𑀢𑁆𑀣𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀸𑀦𑀼𑀓𑀽𑀮𑀁 𑀯𑀺𑀧𑀲𑁆𑀲𑀦𑀸𑀓𑀣𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀦𑀼𑀧𑀼𑀩𑁆𑀩𑁂𑀦 𑀫𑀕𑁆𑀕𑀸𑀦𑀼𑀧𑀼𑀩𑁆𑀩𑁂𑀦 𑀘 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀲𑀺. 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨.

‘‘𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀲𑀼𑀤𑀲𑁆𑀲𑀦𑀲𑀺𑀮𑀼𑀘𑁆𑀘𑀬𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑁂𑀳𑀺, 𑀧𑀯𑀸𑀭𑁂𑀲𑀺 𑀫𑀳𑀸𑀫𑀼𑀦𑀺.

‘‘𑀅𑀳𑀁 ¶ 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀘𑀭𑀡𑁄, 𑀧𑀜𑁆𑀘𑀸𑀪𑀺𑀜𑁆𑀜𑀸𑀲𑀼 𑀧𑀸𑀭𑀕𑀽’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸);

𑀅𑀬𑀁 𑀕𑀸𑀣𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬 𑀦𑀺𑀤𑀸𑀦𑀯𑀡𑁆𑀡𑀦𑀸𑀬 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑁂 𑀮𑀺𑀔𑀺𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑀯𑀁𑀲𑁂 𑀦𑀢𑁆𑀣𑀺. 𑀦𑀢𑁆𑀣𑀺𑀪𑀸𑀯𑁄𑀬𑁂𑀯 𑀧𑀦𑀲𑁆𑀲𑀸 𑀬𑀼𑀢𑁆𑀢𑀢𑀭𑁄. 𑀓𑀲𑁆𑀫𑀸𑀢𑀺 𑀘𑁂? 𑀳𑁂𑀝𑁆𑀞𑀸 𑀲𑀼𑀫𑁂𑀥𑀓𑀣𑀸𑀲𑀼 𑀓𑀣𑀺𑀢𑀢𑁆𑀢𑀸𑀢𑀺.

𑀤𑀻𑀧𑀗𑁆𑀓𑀭𑁂 𑀓𑀺𑀭 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀤𑀲𑀲𑀳𑀲𑁆𑀲𑀸𑀦𑀜𑁆𑀘 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀜𑁆𑀘 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺𑀬𑁂𑀯. 𑀏𑀓𑀲𑁆𑀲 𑀧𑀦 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀦𑁆𑀢𑀺 𑀘 𑀆𑀤𑀺𑀯𑀲𑁂𑀦 𑀅𑀪𑀺𑀲𑀫𑀬𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩.

‘‘𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀁 ¶ , 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼;

𑀏𑀓𑀤𑁆𑀯𑀺𑀦𑁆𑀦𑀁 𑀅𑀪𑀺𑀲𑀫𑀬𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸’’𑀢𑀺.

𑀢𑀢𑁆𑀣 𑀤𑀲𑀯𑀻𑀲𑀲𑀳𑀲𑁆𑀲𑀸𑀦𑀦𑁆𑀢𑀺 𑀤𑀲𑀲𑀳𑀲𑁆𑀲𑀸𑀦𑀁 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀜𑁆𑀘. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑁆𑀧𑀝𑀺𑀯𑁂𑀥𑁄. 𑀏𑀓𑀤𑁆𑀯𑀺𑀦𑁆𑀦𑀦𑁆𑀢𑀺 𑀏𑀓𑀲𑁆𑀲 𑀘𑁂𑀯 𑀤𑁆𑀯𑀺𑀦𑁆𑀦𑀜𑁆𑀘 ¶ , 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁…𑀧𑁂… 𑀤𑀲𑀦𑁆𑀦𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀪𑀺𑀲𑀫𑀬𑀢𑁆𑀢𑀸 𑀘 𑀯𑀺𑀢𑁆𑀣𑀸𑀭𑀺𑀓𑀁 𑀫𑀳𑀦𑁆𑀢𑀧𑁆𑀧𑀢𑁆𑀢𑀁 𑀩𑀳𑀽𑀳𑀺 𑀧𑀡𑁆𑀟𑀺𑀢𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀚𑀜𑁆𑀜𑀁 𑀚𑀸𑀦𑀺𑀢𑀩𑁆𑀩𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀳𑀺 𑀇𑀤𑁆𑀥𑀜𑁆𑀘 𑀲𑀫𑀸𑀥𑀺𑀆𑀤𑀻𑀳𑀺 𑀨𑀻𑀢𑀜𑁆𑀘 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪.

‘‘𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁, 𑀇𑀤𑁆𑀥𑀁 𑀨𑀻𑀢𑀁 𑀅𑀳𑀽 𑀢𑀤𑀸;

𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑀁 𑀲𑀼𑀯𑀺𑀲𑁄𑀥𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀼𑀯𑀺𑀲𑁄𑀥𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀪𑀕𑀯𑀢𑀸 𑀲𑁄𑀥𑀺𑀢𑀁 𑀯𑀺𑀲𑀼𑀤𑁆𑀥𑀁 𑀓𑀢𑀁. 𑀤𑀻𑀧𑀗𑁆𑀓𑀭𑀁 𑀓𑀺𑀭 𑀲𑀢𑁆𑀣𑀸𑀭𑀁 𑀲𑀩𑁆𑀩𑀓𑀸𑀮𑀁 𑀙𑀴𑀪𑀺𑀜𑁆𑀜𑀸𑀦𑀁 𑀫𑀳𑀺𑀤𑁆𑀥𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀬𑁂 𑀲𑁂𑀓𑁆𑀔𑀸 𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀺, 𑀢𑁂 𑀕𑀭𑀳𑀺𑀢𑀸 𑀪𑀯𑀦𑁆𑀢𑀺, 𑀲𑀩𑁆𑀩𑁂 𑀔𑀻𑀡𑀸𑀲𑀯𑀸 𑀳𑀼𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀲𑀼𑀧𑀼𑀧𑁆𑀨𑀺𑀢𑀁 𑀲𑀼𑀲𑀫𑀺𑀤𑁆𑀥𑀁 𑀔𑀻𑀡𑀸𑀲𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑀺𑀯𑀺𑀬 𑀲𑁄𑀪𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫.

‘‘𑀘𑀢𑁆𑀢𑀸𑀭𑀺 ¶ 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀤𑀻𑀧𑀗𑁆𑀓𑀭𑀁 𑀮𑁄𑀓𑀯𑀺𑀤𑀼𑀁, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸.

𑁧𑁬.

‘‘𑀬𑁂 𑀓𑁂𑀘𑀺 𑀢𑁂𑀦 𑀲𑀫𑀬𑁂𑀦, 𑀚𑀳𑀦𑁆𑀢𑀺 𑀫𑀸𑀦𑀼𑀲𑀁 𑀪𑀯𑀁;

𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀲𑁂𑀔𑀸, 𑀕𑀭𑀳𑀺𑀢𑀸 𑀪𑀯𑀦𑁆𑀢𑀺 𑀢𑁂.

𑁧𑁭.

‘‘𑀲𑀼𑀧𑀼𑀧𑁆𑀨𑀺𑀢𑀁 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀉𑀧𑀲𑁄𑀪𑀢𑀺 𑀲𑀩𑁆𑀩𑀤𑀸’’𑀢𑀺.

𑀢𑀢𑁆𑀣 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀕𑀡𑀦𑀸𑀬 𑀤𑀲𑁆𑀲𑀺𑀢𑀸 𑀏𑀯𑀁 𑀤𑀲𑁆𑀲𑀺𑀢𑀕𑀡𑀦𑀸 𑀇𑀫𑁂 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸𑀢𑀺 𑀙𑀴𑀪𑀺𑀜𑁆𑀜𑀸𑀦𑀁 𑀫𑀳𑀺𑀤𑁆𑀥𑀺𑀓𑀸𑀦𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀩𑁆𑀩𑀤𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀤𑀲𑀩𑀮𑀁 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀪𑀕𑀯𑀦𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀓𑀢𑁆𑀣𑀘𑀺 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂. 𑀅𑀬𑀁 𑀧𑀦 𑀲𑀫𑀬-𑀲𑀤𑁆𑀤𑁄 𑀲𑀫𑀯𑀸𑀬𑀸𑀤𑀻𑀲𑀼 𑀦𑀯𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀬𑀣𑀸𑀳 𑁋

‘‘𑀲𑀫𑀯𑀸𑀬𑁂 ¶ ¶ 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧; 𑀫. 𑀦𑀺. 𑀅𑀝𑁆𑀞. 𑁧.𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧; 𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬; 𑀔𑀼. 𑀧𑀸. 𑀅𑀝𑁆𑀞. 𑀫𑀁𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸, 𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁮𑁪);

𑀇𑀥 𑀲𑁄 𑀓𑀸𑀮𑁂 𑀤𑀝𑁆𑀞𑀩𑁆𑀩𑁄; 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀫𑀸𑀦𑀼𑀲𑀁 𑀪𑀯𑀦𑁆𑀢𑀺 𑀫𑀦𑀼𑀲𑁆𑀲𑀪𑀸𑀯𑀁. 𑀅𑀧𑁆𑀧𑀢𑁆𑀢𑀫𑀸𑀦𑀲𑀸𑀢𑀺 𑀅𑀧𑁆𑀧𑀢𑁆𑀢𑀁 𑀅𑀦𑀥𑀺𑀕𑀢𑀁 𑀫𑀸𑀦𑀲𑀁 𑀬𑁂𑀳𑀺 𑀢𑁂 𑀅𑀧𑁆𑀧𑀢𑁆𑀢𑀫𑀸𑀦𑀲𑀸. 𑀫𑀸𑀦𑀲𑀦𑁆𑀢𑀺 𑀭𑀸𑀕𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀘 𑀅𑀭𑀳𑀢𑁆𑀢𑀲𑁆𑀲 𑀘 𑀅𑀥𑀺𑀯𑀘𑀦𑀁. ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩) 𑀳𑀺 𑀏𑀢𑁆𑀣 𑀧𑀦 𑀭𑀸𑀕𑁄 ‘‘𑀫𑀸𑀦𑀲𑁄’’𑀢𑀺 𑀯𑀼𑀢𑁆𑀢𑁄. ‘‘𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭’’𑀦𑁆𑀢𑀺 (𑀥. 𑀲. 𑁬; 𑀯𑀺𑀪. 𑁧𑁮𑁪; 𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁧𑁪) 𑀏𑀢𑁆𑀣 𑀘𑀺𑀢𑁆𑀢𑀁. ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀔𑁄, 𑀓𑀸𑀮𑀁 𑀓𑀬𑀺𑀭𑀸 𑀚𑀦𑁂𑀲𑀼𑀢𑀸’’𑀢𑀺 ¶ (𑀲𑀁. 𑀦𑀺. 𑁧.𑁧𑁫𑁯) 𑀏𑀢𑁆𑀣 𑀅𑀭𑀳𑀢𑁆𑀢𑀁. 𑀇𑀥𑀸𑀧𑀺 𑀅𑀭𑀳𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 (𑀥. 𑀲. 𑀅𑀝𑁆𑀞. 𑁫 𑀓𑀸𑀫𑀸𑀯𑀘𑀭𑀓𑀼𑀲𑀮𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁧). 𑀢𑀲𑁆𑀫𑀸 𑀅𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑀨𑀮𑀸𑀢𑀺 𑀅𑀢𑁆𑀣𑁄. 𑀲𑁂𑀔𑀸𑀢𑀺 𑀓𑁂𑀦𑀝𑁆𑀞𑁂𑀦 𑀲𑁂𑀔𑀸? 𑀲𑁂𑀔𑀥𑀫𑁆𑀫𑀧𑀝𑀺𑀮𑀸𑀪𑀝𑁆𑀞𑁂𑀦 𑀲𑁂𑀔𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑁂𑀔𑁄 𑀳𑁄𑀢𑀻𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀔𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺…𑀧𑁂… 𑀲𑁂𑀔𑁂𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀔𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁩). 𑀅𑀧𑀺 𑀘 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀔𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀺𑀓𑁆𑀔𑀢𑀺, 𑀲𑀺𑀓𑁆𑀔𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀲𑁂𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀺 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀲𑁂𑀔𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁩.𑁮𑁬).

𑀲𑀼𑀧𑀼𑀧𑁆𑀨𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀯𑀺𑀓𑀲𑀺𑀢𑀁. 𑀧𑀸𑀯𑀘𑀦𑀦𑁆𑀢𑀺 𑀧𑀲𑀢𑁆𑀣𑀁 𑀯𑀘𑀦𑀁, 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁 𑀯𑀸 𑀯𑀘𑀦𑀁 𑀧𑀯𑀘𑀦𑀁, 𑀧𑀯𑀘𑀦𑀫𑁂𑀯 𑀧𑀸𑀯𑀘𑀦𑀁, 𑀲𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀲𑁄𑀪𑀢𑀻𑀢𑀺 𑀅𑀪𑀺𑀭𑀸𑀚𑀢𑀺 𑀅𑀢𑀺𑀯𑀺𑀭𑁄𑀘𑀢𑀺. 𑀲𑀩𑁆𑀩𑀤𑀸𑀢𑀺 𑀲𑀩𑁆𑀩𑀓𑀸𑀮𑀁. ‘‘𑀉𑀧𑀲𑁄𑀪𑀢𑀺 𑀲𑀤𑁂𑀯𑀓𑁂’’𑀢𑀺𑀧𑀺 𑀧𑀸𑀞𑁄.

𑀢𑀲𑁆𑀲 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀭𑀫𑁆𑀫𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀲𑀼𑀫𑁂𑀥𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀲𑀼𑀫𑀗𑁆𑀕𑀮𑁄 𑀘 𑀢𑀺𑀲𑁆𑀲𑁄 𑀘𑀸𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀸𑀕𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀦𑀦𑁆𑀤𑀸 𑀘 𑀲𑀼𑀦𑀦𑁆𑀤𑀸 𑀘𑀸𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄 𑀧𑀺𑀧𑁆𑀨𑀮𑀺𑀭𑀼𑀓𑁆𑀔𑁄 𑀅𑀳𑁄𑀲𑀺, 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄, 𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺 𑀆𑀬𑀽𑀢𑀺. 𑀓𑀺𑀁 𑀧𑀦𑀺𑀫𑁂𑀲𑀁 𑀚𑀸𑀢𑀦𑀕𑀭𑀸𑀤𑀻𑀦𑀁 𑀤𑀲𑁆𑀲𑀦𑁂 𑀧𑀬𑁄𑀚𑀦𑀦𑁆𑀢𑀺 𑀘𑁂? 𑀯𑀼𑀘𑁆𑀘𑀢𑁂 𑁋 𑀬𑀲𑁆𑀲 𑀬𑀤𑀺 𑀦𑁂𑀯 𑀚𑀸𑀢𑀦𑀕𑀭𑀁 𑀦 𑀧𑀺𑀢𑀸 𑀦 𑀫𑀸𑀢𑀸 𑀧𑀜𑁆𑀜𑀸𑀬𑁂𑀬𑁆𑀬, 𑀇𑀫𑀲𑁆𑀲 𑀧𑀦 𑀦𑁂𑀯 𑀚𑀸𑀢𑀦𑀕𑀭𑀁 ¶ 𑀦 𑀧𑀺𑀢𑀸 𑀦 𑀫𑀸𑀢𑀸 𑀧𑀜𑁆𑀜𑀸𑀬𑀢𑀺, 𑀤𑁂𑀯𑁄 𑀯𑀸 𑀲𑀓𑁆𑀓𑁄 𑀯𑀸 𑀬𑀓𑁆𑀔𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀏𑀲 𑀫𑀜𑁆𑀜𑁂, 𑀤𑁂𑀯𑀸𑀦𑀫𑁆𑀧𑀺 𑀈𑀤𑀺𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀅𑀦𑀘𑁆𑀙𑀭𑀺𑀬𑀦𑁆𑀢𑀺 ¶ 𑀫𑀜𑁆𑀜𑀫𑀸𑀦𑀸 𑀦 𑀲𑁄𑀢𑀩𑁆𑀩𑀁 𑀦 𑀲𑀤𑁆𑀤𑀳𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀪𑀯𑁂𑀬𑁆𑀬, 𑀅𑀲𑀢𑀺 𑀅𑀪𑀺𑀲𑀫𑀬𑁂 𑀦𑀺𑀭𑀢𑁆𑀣𑀓𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀪𑀯𑁂𑀬𑁆𑀬, 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁. 𑀢𑀲𑁆𑀫𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀚𑀸𑀢𑀦𑀕𑀭𑀸𑀤𑀺𑀓𑁄 𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮.

‘‘𑀦𑀕𑀭𑀁 𑀭𑀫𑁆𑀫𑀯𑀢𑀻 𑀦𑀸𑀫, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀫𑁂𑀥𑀸 𑀦𑀸𑀫 𑀚𑀦𑀺𑀓𑀸, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁪.

‘‘𑀲𑀼𑀫𑀗𑁆𑀕𑀮𑁄 𑀘 𑀢𑀺𑀲𑁆𑀲𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀸𑀕𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁫.

‘‘𑀦𑀦𑁆𑀤𑀸 ¶ 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀧𑀺𑀧𑁆𑀨𑀮𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁭.

‘‘𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑀺 𑀤𑀻𑀧𑀭𑀼𑀓𑁆𑀔𑁄𑀯, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁨𑁮.

‘‘𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁯.

‘‘𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁩𑁦.

‘‘𑀲𑀸 𑀘 𑀇𑀤𑁆𑀥𑀺 𑀲𑁄 𑀘 𑀬𑀲𑁄, 𑀢𑀸𑀦𑀺 𑀘 𑀧𑀸𑀤𑁂𑀲𑀼 𑀘𑀓𑁆𑀓𑀭𑀢𑀦𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄𑀢𑀺 𑀲𑀼𑀤𑁂𑀯𑁄 𑀦𑀸𑀫𑀲𑁆𑀲 𑀔𑀢𑁆𑀢𑀺𑀬𑁄 𑀧𑀺𑀢𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀚𑀦𑀺𑀓𑀸𑀢𑀺 𑀚𑀦𑁂𑀢𑁆𑀢𑀺. 𑀧𑀺𑀧𑁆𑀨𑀮𑀻𑀢𑀺 𑀧𑀺𑀮𑀓𑁆𑀔𑀓𑀧𑀻𑀢𑀦𑀭𑀼𑀓𑁆𑀔𑁄 𑀩𑁄𑀥𑀺. 𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄𑀢𑀺 𑀅𑀲𑀻𑀢𑀺𑀳𑀢𑁆𑀣𑀁 𑀉𑀘𑁆𑀘𑀕𑁆𑀕𑀢𑁄. 𑀤𑀻𑀧𑀭𑀼𑀓𑁆𑀔𑁄 𑀯𑀸𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀤𑀻𑀧𑀫𑀸𑀮𑀸𑀓𑀼𑀮𑁄 𑀤𑀻𑀧𑀭𑀼𑀓𑁆𑀔𑁄 𑀯𑀺𑀬 𑀆𑀭𑁄𑀳𑀧𑀭𑀺𑀡𑀸𑀳𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀲𑀫𑁆𑀧𑀦𑁆𑀦𑁄 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀮𑀗𑁆𑀓𑀢𑀲𑀭𑀻𑀭𑁄 𑀯𑀺𑀧𑁆𑀨𑀼𑀭𑀺𑀢𑀭𑀁𑀲𑀺𑀚𑀸𑀮𑀸𑀯𑀺𑀲𑀭𑀢𑀸𑀭𑀸𑀕𑀡𑀲𑀫𑀼𑀚𑁆𑀚𑀮𑀫𑀺𑀯 𑀕𑀕𑀦𑀢𑀮𑀁 𑀪𑀕𑀯𑀸 ¶ 𑀥𑀭𑀫𑀸𑀦𑀓𑀸𑀮𑁂 𑀲𑁄𑀪𑀢𑀻𑀢𑀺 𑀲𑁄𑀪𑀺𑀢𑁆𑀣. 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄𑀢𑀺 𑀧𑀼𑀧𑁆𑀨𑀺𑀢𑁄 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀲𑀸𑀮𑀭𑀸𑀚𑀭𑀼𑀓𑁆𑀔𑁄 𑀯𑀺𑀬 𑀘 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀧𑀸𑀭𑀺𑀘𑁆𑀙𑀢𑁆𑀢𑁄 𑀯𑀺𑀬 𑀘 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀪𑀕𑀯𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺.

𑀲𑀢𑀲𑀳𑀲𑁆𑀲𑀯𑀲𑁆𑀲𑀸𑀦𑀻𑀢𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀢𑀲𑁆𑀲 𑀆𑀬𑀽𑀢𑀺 𑀅𑀢𑁆𑀣𑁄. 𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄𑀢𑀺 𑀢𑀸𑀯𑀢𑀓𑀁 𑀓𑀸𑀮𑀁 𑀢𑀺𑀝𑁆𑀞𑀫𑀸𑀦𑁄. 𑀚𑀦𑀢𑀦𑁆𑀢𑀺 ¶ 𑀚𑀦𑀲𑀫𑀽𑀳𑀁. 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀦𑁆𑀢𑀺 𑀢𑀸𑀭𑀬𑀺𑀢𑁆𑀯𑀸 𑀫𑀳𑀸𑀚𑀦𑀁. ‘‘𑀲𑀦𑁆𑀢𑀸𑀭𑁂𑀢𑁆𑀯𑀸 𑀲𑀤𑁂𑀯𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀲𑀤𑁂𑀯𑀓𑀁 𑀮𑁄𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀘 𑀇𑀤𑁆𑀥𑀻𑀢𑀺 𑀲𑀸 𑀘 𑀲𑀫𑁆𑀧𑀢𑁆𑀢𑀺 𑀆𑀦𑀼𑀪𑀸𑀯𑁄. 𑀲𑁄 𑀘 𑀬𑀲𑁄𑀢𑀺 𑀲𑁄 𑀘 𑀧𑀭𑀺𑀯𑀸𑀭𑁄. 𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀦𑁆𑀢𑀺 𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑁆𑀧𑀢𑁆𑀢𑀺𑀚𑀸𑀢𑀁 𑀅𑀦𑁆𑀢𑀭𑀳𑀺𑀢𑀁 𑀅𑀧𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸𑀢𑀺 𑀲𑀩𑁆𑀩𑁂 𑀧𑀦 𑀲𑀗𑁆𑀔𑀢𑀥𑀫𑁆𑀫𑀸 𑀦𑀦𑀼 𑀭𑀺𑀢𑁆𑀢𑀸 𑀢𑀼𑀘𑁆𑀙𑀸, 𑀦𑀺𑀘𑁆𑀘𑀲𑀸𑀭𑀸𑀤𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 ¶ 𑀧𑀦 𑀦𑀕𑀭𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀧𑀸𑀴𑀺𑀬𑀫𑀸𑀕𑀢𑁄𑀯. 𑀲𑀫𑁆𑀩𑀳𑀼𑀮𑀯𑀸𑀭𑁄 𑀧𑀦 𑀦𑀸𑀕𑀢𑁄, 𑀲𑁄 𑀆𑀦𑁂𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄, 𑀪𑀭𑀺𑀬𑀸𑀧𑀭𑀺𑀘𑁆𑀙𑁂𑀤𑁄, 𑀧𑀸𑀲𑀸𑀤𑀧𑀭𑀺𑀘𑁆𑀙𑁂𑀤𑁄, 𑀅𑀕𑀸𑀭𑀯𑀸𑀲𑀧𑀭𑀺𑀘𑁆𑀙𑁂𑀤𑁄, 𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀘𑁆𑀙𑁂𑀤𑁄, 𑀅𑀪𑀺𑀦𑀺𑀓𑁆𑀔𑀫𑀦𑀧𑀭𑀺𑀘𑁆𑀙𑁂𑀤𑁄, 𑀧𑀥𑀸𑀦𑀧𑀭𑀺𑀘𑁆𑀙𑁂𑀤𑁄, 𑀯𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑁄, 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁄𑀢𑀺. 𑀏𑀢𑁂𑀲𑀫𑁆𑀧𑀺 𑀤𑀻𑀧𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀢𑀲𑁆𑀲 𑀧𑀦 𑀤𑀻𑀧𑀗𑁆𑀓𑀭𑀲𑁆𑀲 𑀪𑀭𑀺𑀬𑀸𑀦𑀁 𑀢𑀺𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺. 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀧𑀤𑀼𑀫𑀸 𑀦𑀸𑀫, 𑀢𑀲𑁆𑀲 𑀧𑀦 𑀧𑀼𑀢𑁆𑀢𑁄 𑀉𑀲𑀪𑀓𑁆𑀔𑀦𑁆𑀥𑁄 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀪𑀭𑀺𑀬𑀸 𑀧𑀤𑀼𑀫𑀸 𑀦𑀸𑀫, 𑀯𑀺𑀩𑀼𑀤𑁆𑀥𑀧𑀤𑀼𑀫𑀸𑀦𑀦𑀸;

𑀅𑀢𑁆𑀭𑀚𑁄 𑀉𑀲𑀪𑀓𑁆𑀔𑀦𑁆𑀥𑁄, 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄.

‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸𑀔𑁆𑀬𑀸, 𑀧𑀸𑀲𑀸𑀤𑀸𑀧𑀺 𑀢𑀬𑁄 𑀫𑀢𑀸;

𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀯𑀲𑀻 𑀓𑀺𑀭.

‘‘𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀦𑁆𑀢𑁄, 𑀦𑀦𑁆𑀤𑀸𑀭𑀸𑀫𑁂 𑀚𑀺𑀦𑁄 𑀯𑀲𑀻;

𑀦𑀦𑁆𑀤𑁄 𑀦𑀸𑀫𑀲𑁆𑀲𑀼𑀧𑀝𑁆𑀞𑀸𑀓𑁄, 𑀮𑁄𑀓𑀸𑀦𑀦𑁆𑀤𑀓𑀭𑁄 𑀓𑀺𑀭𑀸’’𑀢𑀺.

𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀦 𑀧𑀜𑁆𑀘 𑀯𑁂𑀫𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀆𑀬𑀼𑀯𑁂𑀫𑀢𑁆𑀢𑀁 𑀧𑀫𑀸𑀡𑀯𑁂𑀫𑀢𑁆𑀢𑀁 𑀓𑀼𑀮𑀯𑁂𑀫𑀢𑁆𑀢𑀁 𑀧𑀥𑀸𑀦𑀯𑁂𑀫𑀢𑁆𑀢𑀁 𑀭𑀲𑁆𑀫𑀺𑀯𑁂𑀫𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀆𑀬𑀼𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀤𑀻𑀖𑀸𑀬𑀼𑀓𑀸 ¶ 𑀳𑁄𑀦𑁆𑀢𑀺 𑀓𑁂𑀘𑀺 𑀅𑀧𑁆𑀧𑀸𑀬𑀼𑀓𑀸. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑀲𑁆𑀲 𑀧𑀦 𑀪𑀕𑀯𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀯𑀲𑁆𑀲𑀲𑀢𑀁.

𑀧𑀫𑀸𑀡𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀤𑀻𑀖𑀸 𑀳𑁄𑀦𑁆𑀢𑀺 𑀓𑁂𑀘𑀺 𑀭𑀲𑁆𑀲𑀸. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑁄 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁄 𑀅𑀳𑁄𑀲𑀺, 𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑀧𑁆𑀧𑀫𑀸𑀡𑁄.

𑀓𑀼𑀮𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀓𑁂𑀘𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑀸𑀤𑀬𑁄 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑀸𑀤𑀬𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂.

𑀧𑀥𑀸𑀦𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀲𑀜𑁆𑀘𑀺 𑀧𑀥𑀸𑀦𑀁 𑀇𑀢𑁆𑀢𑀭𑀫𑁂𑀯 𑀳𑁄𑀢𑀺 𑀬𑀣𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 ¶ , 𑀓𑁂𑀲𑀜𑁆𑀘𑀺 𑀅𑀤𑁆𑀥𑀦𑀺𑀬𑀁 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀯𑀺𑀬.

𑀭𑀲𑁆𑀫𑀺𑀯𑁂𑀫𑀢𑁆𑀢𑀁 ¶ 𑀦𑀸𑀫 𑀫𑀗𑁆𑀕𑀮𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀲𑁆𑀫𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀩𑁆𑀬𑀸𑀫𑀫𑀢𑁆𑀢𑀁. 𑀢𑀢𑁆𑀭 𑀭𑀲𑁆𑀫𑀺𑀯𑁂𑀫𑀢𑁆𑀢𑀁 𑀅𑀚𑁆𑀛𑀸𑀲𑀬𑀧𑀝𑀺𑀩𑀤𑁆𑀥𑀁 𑀳𑁄𑀢𑀺. 𑀬𑁄 𑀬𑀢𑁆𑀢𑀓𑀁 𑀇𑀘𑁆𑀙𑀲𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀲𑀭𑀻𑀭𑀧𑁆𑀧𑀪𑀸 𑀨𑀭𑀢𑀺. 𑀫𑀗𑁆𑀕𑀮𑀲𑁆𑀲 𑀧𑀦 ‘‘𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀢𑀽’’𑀢𑀺 𑀅𑀚𑁆𑀛𑀸𑀲𑀬𑁄 𑀅𑀳𑁄𑀲𑀺. 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀲𑀼 𑀧𑀦 𑀓𑀲𑁆𑀲𑀘𑀺 𑀯𑁂𑀫𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁨 𑀆𑀤𑀬𑁄).

𑀢𑀣𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀘𑀢𑁆𑀢𑀸𑀭𑀺 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀩𑁄𑀥𑀺𑀧𑀮𑁆𑀮𑀗𑁆𑀓𑁄 𑀅𑀯𑀺𑀚𑀳𑀺𑀢𑁄 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀳𑁄𑀢𑀺. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀝𑁆𑀞𑀸𑀦𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀤𑁂𑀯𑁄𑀭𑁄𑀳𑀡𑀓𑀸𑀮𑁂 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀧𑀞𑀫𑀧𑀸𑀤𑀓𑁆𑀓𑀫𑁄 𑀅𑀯𑀺𑀚𑀳𑀺𑀢𑁄𑀯 𑀳𑁄𑀢𑀺. 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀸 𑀘𑀢𑁆𑀢𑀸𑀭𑀺 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀸𑀦𑀺 𑀅𑀯𑀺𑀚𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀯𑀺𑀳𑀸𑀭𑁄𑀧𑀺 𑀅𑀯𑀺𑀚𑀳𑀺𑀢𑁄𑀯. 𑀲𑁄 𑀧𑀦 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀳𑁄𑀢𑀺.

𑀅𑀧𑀭𑀁 𑀧𑀦 𑀅𑀫𑁆𑀳𑀸𑀓𑀁𑀬𑁂𑀯 𑀪𑀕𑀯𑀢𑁄 𑀲𑀳𑀚𑀸𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀦𑀓𑁆𑀔𑀢𑁆𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀯𑀺𑀲𑁂𑀲𑀁. 𑀅𑀫𑁆𑀳𑀸𑀓𑀁 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀦 𑀓𑀺𑀭 𑀲𑀤𑁆𑀥𑀺𑀁 𑀭𑀸𑀳𑀼𑀮𑀫𑀸𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀙𑀦𑁆𑀦𑁄 𑀓𑀡𑁆𑀟𑀓𑁄 𑀅𑀲𑁆𑀲𑀭𑀸𑀚𑀸 𑀦𑀺𑀥𑀺𑀓𑀼𑀫𑁆𑀪𑀸 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑀸𑀦𑀺 𑀲𑀢 𑀲𑀳𑀚𑀸𑀢𑀸𑀦𑀺. 𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺 ¶ , 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀯𑀺𑀲𑀸𑀔𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄 𑀘 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀘, 𑀫𑀸𑀖𑀦𑀓𑁆𑀔𑀢𑁆𑀢𑁂𑀦 𑀢𑀲𑁆𑀲 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀘𑁂𑀯 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑀚𑁆𑀚𑀦𑀜𑁆𑀘 𑀅𑀳𑁄𑀲𑀺, 𑀅𑀲𑁆𑀲𑀬𑀼𑀚𑀦𑀓𑁆𑀔𑀢𑁆𑀢𑁂𑀦 𑀤𑁂𑀯𑁄𑀭𑁄𑀳𑀡𑀦𑁆𑀢𑀺 𑀏𑀢𑁆𑀢𑀓𑀁 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀁. 𑀅𑀬𑀁 𑀲𑀫𑁆𑀩𑀳𑀼𑀮𑀯𑀸𑀭𑀧𑀭𑀺𑀘𑁆𑀙𑁂𑀤𑁄. 𑀲𑁂𑀲𑀕𑀸𑀣𑀸 𑀲𑀉𑀢𑁆𑀢𑀸𑀦𑀸 𑀏𑀯𑀸𑀢𑀺.

𑀇𑀢𑀺 𑀪𑀕𑀯𑀸 𑀤𑀻𑀧𑀗𑁆𑀓𑀭𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀬𑀲𑁆𑀫𑀺𑀁 𑀓𑀺𑀭 𑀓𑀧𑁆𑀧𑁂 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀉𑀤𑀧𑀸𑀤𑀺, 𑀢𑀲𑁆𑀫𑀺𑀁 𑀅𑀜𑁆𑀜𑁂𑀧𑀺 𑀢𑀡𑁆𑀳𑀗𑁆𑀓𑀭𑁄, 𑀫𑁂𑀥𑀗𑁆𑀓𑀭𑁄, 𑀲𑀭𑀡𑀗𑁆𑀓𑀭𑁄𑀢𑀺 𑀢𑀬𑁄 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑁆𑀬𑀸𑀓𑀭𑀡𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂 𑀇𑀥 𑀦 𑀤𑀲𑁆𑀲𑀺𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀫𑁆𑀳𑀸 𑀓𑀧𑁆𑀧𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀲𑀩𑁆𑀩𑀩𑀼𑀤𑁆𑀥𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀢𑀡𑁆𑀳𑀗𑁆𑀓𑀭𑁄 𑀫𑁂𑀥𑀗𑁆𑀓𑀭𑁄, 𑀅𑀣𑁄𑀧𑀺 𑀲𑀭𑀡𑀗𑁆𑀓𑀭𑁄;

𑀤𑀻𑀧𑀗𑁆𑀓𑀭𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀓𑁄𑀡𑁆𑀟𑀜𑁆𑀜𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

‘‘𑀫𑀗𑁆𑀕𑀮𑁄 ¶ 𑀘 𑀲𑀼𑀫𑀦𑁄 𑀘, 𑀭𑁂𑀯𑀢𑁄 𑀲𑁄𑀪𑀺𑀢𑁄 𑀫𑀼𑀦𑀺;

𑀅𑀦𑁄𑀫𑀤𑀲𑁆𑀲𑀻 𑀧𑀤𑀼𑀫𑁄, 𑀦𑀸𑀭𑀤𑁄 𑀧𑀤𑀼𑀫𑀼𑀢𑁆𑀢𑀭𑁄.

‘‘𑀲𑀼𑀫𑁂𑀥𑁄 𑀘 𑀲𑀼𑀚𑀸𑀢𑁄 𑀘, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀅𑀢𑁆𑀣𑀤𑀲𑁆𑀲𑀻 𑀥𑀫𑁆𑀫𑀤𑀲𑁆𑀲𑀻, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄.

‘‘𑀢𑀺𑀲𑁆𑀲𑁄 𑀨𑀼𑀲𑁆𑀲𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀯𑀺𑀧𑀲𑁆𑀲𑀻 𑀲𑀺𑀔𑀺 𑀯𑁂𑀲𑁆𑀲𑀪𑀽;

𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄 𑀘𑀸𑀧𑀺 𑀦𑀸𑀬𑀓𑁄.

‘‘𑀏𑀢𑁂 ¶ 𑀅𑀳𑁂𑀲𑀼𑀁 𑀲𑀫𑁆𑀩𑀼𑀤𑁆𑀥𑀸, 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸;

𑀲𑀢𑀭𑀁𑀲𑀻𑀯 𑀉𑀧𑁆𑀧𑀦𑁆𑀦𑀸, 𑀫𑀳𑀸𑀢𑀫𑀯𑀺𑀦𑁄𑀤𑀦𑀸;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯, 𑀦𑀺𑀩𑁆𑀩𑀼𑀢𑀸 𑀢𑁂 𑀲𑀲𑀸𑀯𑀓𑀸’’𑀢𑀺. (𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸);

𑀏𑀢𑁆𑀢𑀸𑀯𑀢𑀸 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀓𑀢𑀸𑀬

𑀫𑀥𑀼𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀸 𑀩𑀼𑀤𑁆𑀥𑀯𑀁𑀲-𑀅𑀝𑁆𑀞𑀓𑀣𑀸𑀬

𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀧𑀞𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁪. 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀤𑀻𑀧𑀗𑁆𑀓𑀭𑁂 ¶ ¶ 𑀓𑀺𑀭 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀲𑀸𑀲𑀦𑀁 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀧𑀯𑀢𑁆𑀢𑀺𑀢𑁆𑀣. 𑀅𑀣 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀲𑀸𑀲𑀦𑀫𑁆𑀧𑀺𑀲𑁆𑀲 𑀅𑀦𑁆𑀢𑀭𑀥𑀸𑀬𑀺. 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀲𑁄 𑀧𑀦 𑀪𑀕𑀯𑀸 𑀲𑁄𑀴𑀲𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀸𑀦𑀜𑁆𑀘 𑀲𑀢𑀲𑀳𑀲𑁆𑀲𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀜𑀸𑀡𑀁 𑀧𑀭𑀺𑀧𑀸𑀘𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀭𑀫𑁆𑀫𑀯𑀢𑀻𑀦𑀕𑀭𑁂 𑀲𑀼𑀦𑀦𑁆𑀤𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀲𑀼𑀚𑀸𑀢𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀲𑀧𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑁄 𑀤𑁂𑀯𑀢𑀸𑀳𑀺 𑀓𑀢𑀸𑀭𑀓𑁆𑀔𑀲𑀁𑀯𑀺𑀥𑀸𑀦𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀭𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀘 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭).

𑀢𑀢𑁄 𑀓𑀼𑀫𑀸𑀭𑀲𑁆𑀲 𑀦𑀸𑀫𑀓𑀭𑀡𑀤𑀺𑀯𑀲𑁂 𑀦𑀸𑀫𑀁 𑀓𑀭𑁄𑀦𑁆𑀢𑀸 ‘‘𑀓𑁄𑀡𑁆𑀟𑀜𑁆𑀜𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀳𑀺 𑀪𑀕𑀯𑀸 𑀓𑁄𑀡𑁆𑀟𑀜𑁆𑀜𑀕𑁄𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀓𑀺𑀭 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁 𑁋 𑀭𑀸𑀫, 𑀲𑀼𑀭𑀸𑀫, 𑀲𑀼𑀪𑀦𑀸𑀫𑀓𑀸 𑀧𑀭𑀫𑀭𑀫𑀡𑀻𑀬𑀸. 𑀢𑁂𑀲𑀼 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀦𑀸𑀝𑀓𑀺𑀢𑁆𑀣𑀻𑀦𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀓𑀼𑀲𑀮𑀸𑀦𑀁 𑀲𑀩𑁆𑀩𑀓𑀸𑀮𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀲 𑀭𑀼𑀘𑀺𑀤𑁂𑀯𑀻 𑀦𑀸𑀫 ¶ 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀯𑀺𑀚𑀺𑀢𑀲𑁂𑀦𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺.

𑀲𑁄 𑀧𑀦 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸 𑀆𑀚𑀜𑁆𑀜𑀭𑀣𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀤𑀲 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺. 𑀓𑁄𑀡𑁆𑀟𑀜𑁆𑀜𑀓𑀼𑀫𑀸𑀭𑀁 𑀧𑀦 𑀧𑀩𑁆𑀩𑀚𑀦𑁆𑀢𑀁 𑀤𑀲 𑀚𑀦𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀤𑀲 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀦𑀦𑁆𑀤𑀕𑀸𑀫𑁂 𑀲𑀫𑀲𑀳𑀺𑀢𑀖𑀦𑀧𑀬𑁄𑀥𑀭𑀸𑀬 𑀬𑀲𑁄𑀥𑀭𑀸𑀬 𑀦𑀸𑀫 𑀲𑁂𑀝𑁆𑀞𑀺𑀥𑀻𑀢𑀸𑀬 𑀤𑀺𑀦𑁆𑀦𑀁 𑀧𑀭𑀫𑀫𑀥𑀼𑀭𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀨𑀮𑀧𑀮𑁆𑀮𑀯𑀗𑁆𑀓𑀼𑀭𑀲𑀫𑀮𑀗𑁆𑀓𑀢𑁂 ¶ 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ¶ 𑀲𑀸𑀬𑀦𑁆𑀳𑀲𑀫𑀬𑁂 𑀕𑀡𑀁 𑀧𑀳𑀸𑀬 𑀲𑀼𑀦𑀦𑁆𑀤𑀓𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀲𑀸𑀮𑀓𑀮𑁆𑀬𑀸𑀡𑀺𑀭𑀼𑀓𑁆𑀔𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀤𑀺𑀲𑀸𑀪𑀸𑀕𑀁 𑀑𑀮𑁄𑀓𑁂𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀯𑀺𑀲𑁄𑀥𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀬𑀸𑀯 𑀕𑁄𑀢𑁆𑀭𑀪𑀼𑀜𑀸𑀡𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀨𑀮𑀜𑀸𑀡𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀓𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄 𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑁄𑀯 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸. (𑀥. 𑀧. 𑁧𑁫𑁩-𑁧𑁫𑁪);

‘‘𑀅𑀬𑁄𑀖𑀦𑀳𑀢𑀲𑁆𑀲𑁂𑀯, 𑀚𑀮𑀢𑁄 𑀚𑀸𑀢𑀯𑁂𑀤𑀲𑁄;

𑀅𑀦𑀼𑀧𑀼𑀩𑁆𑀩𑀽𑀧𑀲𑀦𑁆𑀢𑀲𑁆𑀲, 𑀬𑀣𑀸 𑀦 𑀜𑀸𑀬𑀢𑁂 𑀕𑀢𑀺.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀓𑀸𑀫𑀩𑀦𑁆𑀥𑁄𑀖𑀢𑀸𑀭𑀺𑀦𑀁;

𑀧𑀜𑁆𑀜𑀸𑀧𑁂𑀢𑀼𑀁 𑀕𑀢𑀻 𑀦𑀢𑁆𑀣𑀺, 𑀧𑀢𑁆𑀢𑀸𑀦𑀁 𑀅𑀘𑀮𑀁 𑀲𑀼𑀔’’𑀦𑁆𑀢𑀺. (𑀉𑀤𑀸. 𑁮𑁦) 𑁋

𑀏𑀯𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀽𑀮𑁂𑀬𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀁 𑀧𑀝𑀺𑀘𑁆𑀘 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀫𑀳𑀸𑀯. 𑁧𑁦) 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀸 𑀤𑀲 𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀤𑁆𑀤𑀲. ‘‘𑀇𑀫𑁂 𑀧𑀦 𑀓𑀼𑀮𑀧𑀼𑀢𑁆𑀢𑀸 𑀲𑀫𑀼𑀧𑀘𑀺𑀢𑀓𑀼𑀲𑀮𑀫𑀽𑀮𑀸 𑀫𑀁 𑀧𑀩𑁆𑀩𑀚𑀦𑁆𑀢𑀁 ¶ 𑀅𑀦𑀼𑀧𑀩𑁆𑀩𑀚𑀺𑀢𑀸 𑀫𑀬𑀸 𑀲𑀤𑁆𑀥𑀺𑀁 𑀧𑀥𑀸𑀦𑀁 𑀘𑀭𑀺𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀳𑀦𑁆𑀤𑀸𑀳𑀁 𑀇𑀫𑁂𑀲𑀁 𑀲𑀩𑁆𑀩𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 ¶ 𑀏𑀯𑀁 𑀉𑀧𑀥𑀸𑀭𑁂𑀢𑁆𑀯𑀸 𑁋 ‘‘𑀇𑀤𑀸𑀦𑀺 𑀧𑀦 𑀢𑁂 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀇𑀢𑁄 𑀅𑀝𑁆𑀞𑀸𑀭𑀲𑀬𑁄𑀚𑀦𑀺𑀓𑁂 ¶ 𑀅𑀭𑀼𑀦𑁆𑀥𑀯𑀢𑀻𑀦𑀕𑀭𑁂 𑀤𑁂𑀯𑀯𑀦𑁂 𑀯𑀺𑀳𑀭𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑁋 ‘‘𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀩𑁄𑀥𑀺𑀫𑀽𑀮𑁂 𑀅𑀦𑁆𑀢𑀭𑀳𑀺𑀢𑁄 𑀤𑁂𑀯𑀯𑀦𑁂 𑀧𑀸𑀢𑀼𑀭𑀳𑁄𑀲𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀢𑀸 𑀤𑀲 𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀭𑀼𑀦𑁆𑀥𑀯𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀤𑁂𑀯𑀯𑀦𑁂 𑀯𑀺𑀳𑀭𑀦𑁆𑀢𑀺. 𑀢𑁂 𑀧𑀦 𑀪𑀺𑀓𑁆𑀔𑀽 𑀤𑀲𑀩𑀮𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸, 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸, 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀲𑀢𑁆𑀣𑀼 𑀕𑀸𑀭𑀯𑀁 𑀓𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, 𑀧𑀭𑀺𑀯𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁆𑀭 𑀓𑁄𑀡𑁆𑀟𑀜𑁆𑀜𑁄 𑀤𑀲𑀩𑀮𑁄 𑀫𑀼𑀦𑀺𑀕𑀡𑀧𑀭𑀺𑀯𑀼𑀢𑁄 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀺𑀤𑀲𑀕𑀡𑀧𑀭𑀺𑀯𑀼𑀢𑁄 𑀤𑀲𑀲𑀢𑀦𑀬𑀦𑁄 𑀯𑀺𑀬 𑀯𑀺𑀫𑀮𑀕𑀕𑀦𑀢𑀮𑀕𑀢𑁄 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑁄 𑀯𑀺𑀬 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀅𑀣 𑀲𑀢𑁆𑀣𑀸 𑀢𑁂𑀲𑀁 𑀲𑀩𑁆𑀩𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀅𑀦𑀼𑀢𑁆𑀢𑀭𑀁 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀢𑁆𑀯𑀸 𑀤𑀲𑀪𑀺𑀓𑁆𑀔𑀼𑀓𑁄𑀝𑀺𑀧𑁆𑀧𑀫𑀼𑀔𑀸 𑀲𑀢𑀲𑀳𑀲𑁆𑀲𑀤𑁂𑀯𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀤𑀻𑀧𑀗𑁆𑀓𑀭𑀲𑁆𑀲 𑀅𑀧𑀭𑁂𑀦, 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀦𑀸𑀬𑀓𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄.

𑁨.

‘‘𑀥𑀭𑀡𑀽𑀧𑀫𑁄 𑀔𑀫𑀦𑁂𑀦, 𑀲𑀻𑀮𑁂𑀦 𑀲𑀸𑀕𑀭𑀽𑀧𑀫𑁄;

𑀲𑀫𑀸𑀥𑀺𑀦𑀸 𑀫𑁂𑀭𑀽𑀧𑀫𑁄, 𑀜𑀸𑀡𑁂𑀦 𑀕𑀕𑀦𑀽𑀧𑀫𑁄.

𑁩.

‘‘𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕-𑀫𑀕𑁆𑀕𑀲𑀘𑁆𑀘𑀧𑁆𑀧𑀓𑀸𑀲𑀦𑀁;

𑀧𑀓𑀸𑀲𑁂𑀲𑀺 𑀲𑀤𑀸 𑀩𑀼𑀤𑁆𑀥𑁄 𑀳𑀺𑀢𑀸𑀬 𑀲𑀩𑁆𑀩𑀧𑀸𑀡𑀺𑀦𑀁.

𑁪.

‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀓𑁄𑀡𑁆𑀟𑀜𑁆𑀜𑁂 𑀮𑁄𑀓𑀦𑀸𑀬𑀓𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀤𑀻𑀧𑀗𑁆𑀓𑀭𑀲𑁆𑀲 𑀅𑀧𑀭𑁂𑀦𑀸𑀢𑀺 𑀤𑀻𑀧𑀗𑁆𑀓𑀭𑀲𑁆𑀲 𑀲𑀢𑁆𑀣𑀼𑀦𑁄 𑀅𑀧𑀭𑀪𑀸𑀕𑁂𑀢𑀺 𑀅𑀢𑁆𑀣𑁄. 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫𑀸𑀢𑀺 𑀅𑀢𑁆𑀢𑀦𑁄 𑀕𑁄𑀢𑁆𑀢𑀯𑀲𑁂𑀦 𑀲𑀫𑀥𑀺𑀕𑀢𑀦𑀸𑀫𑀥𑁂𑀬𑁆𑀬𑁄. 𑀦𑀸𑀬𑀓𑁄𑀢𑀺 𑀯𑀺𑀦𑀸𑀬𑀓𑁄. 𑀅𑀦𑀦𑁆𑀢𑀢𑁂𑀚𑁄𑀢𑀺 𑀅𑀢𑁆𑀢𑀦𑁄 𑀲𑀻𑀮𑀕𑀼𑀡𑀜𑀸𑀡𑀧𑀼𑀜𑁆𑀜𑀢𑁂𑀚𑁂𑀦 𑀅𑀦𑀦𑁆𑀢𑀢𑁂𑀚𑁄. 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺 𑀉𑀧𑀭𑀺 𑀪𑀯𑀕𑁆𑀕𑀁 𑀢𑀺𑀭𑀺𑀬𑀢𑁄 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄 𑀏𑀢𑁆𑀣𑀦𑁆𑀢𑀭𑁂 𑀏𑀓𑀧𑀼𑀕𑁆𑀕𑀮𑁄𑀧𑀺 ¶ 𑀢𑀲𑁆𑀲 ¶ 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ¶ ‘‘𑀅𑀦𑀦𑁆𑀢𑀢𑁂𑀚𑁄’’𑀢𑀺. 𑀅𑀫𑀺𑀢𑀬𑀲𑁄𑀢𑀺 𑀅𑀦𑀦𑁆𑀢𑀧𑀭𑀺𑀯𑀸𑀭𑁄. 𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑀁 𑀏𑀢𑁆𑀣𑀦𑁆𑀢𑀭𑁂 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑀲𑁆𑀫𑀸 ‘‘𑀅𑀫𑀺𑀢𑀬𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀫𑀺𑀢𑀕𑀼𑀡𑀓𑀺𑀢𑁆𑀢𑀺𑀧𑀺 ‘‘𑀅𑀫𑀺𑀢𑀬𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀕𑀼𑀡𑀕𑀡𑀧𑀭𑀺𑀫𑀸𑀡𑀯𑀲𑁂𑀦 𑀦𑀧𑁆𑀧𑀫𑁂𑀬𑁆𑀬𑁄𑀢𑀺 𑀅𑀧𑁆𑀧𑀫𑁂𑀬𑁆𑀬𑁄. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁, 𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂, 𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸);

𑀢𑀲𑁆𑀫𑀸 𑀅𑀧𑁆𑀧𑀫𑁂𑀬𑁆𑀬𑀕𑀼𑀡𑀕𑀡𑀢𑁆𑀢𑀸 ‘‘𑀅𑀧𑁆𑀧𑀫𑁂𑀬𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀭𑀸𑀲𑀤𑁄𑀢𑀺 𑀤𑀼𑀭𑀼𑀧𑀲𑀗𑁆𑀓𑀫𑀦𑀻𑀬𑁄, 𑀆𑀲𑀚𑁆𑀚 𑀖𑀝𑁆𑀝𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄 𑀤𑀼𑀭𑀸𑀲𑀤𑁄, 𑀤𑀼𑀭𑀪𑀺𑀪𑀯𑀦𑀻𑀬𑁄𑀢𑀺 𑀅𑀢𑁆𑀣𑁄.

𑀥𑀭𑀡𑀽𑀧𑀫𑁄𑀢𑀺 𑀥𑀭𑀡𑀻𑀲𑀫𑁄. 𑀔𑀫𑀦𑁂𑀦𑀸𑀢𑀺 𑀔𑀦𑁆𑀢𑀺𑀬𑀸, 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀫𑀳𑀸𑀧𑀣𑀯𑀻 𑀯𑀺𑀬 𑀧𑀓𑀢𑀺𑀯𑀸𑀢𑁂𑀦 𑀮𑀸𑀪𑀸𑀮𑀸𑀪𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀳𑀺 𑀅𑀓𑀫𑁆𑀧𑀦𑀪𑀸𑀯𑀢𑁄 ‘‘𑀥𑀭𑀡𑀽𑀧𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀮𑁂𑀦 𑀲𑀸𑀕𑀭𑀽𑀧𑀫𑁄𑀢𑀺 𑀲𑀻𑀮𑀲𑀁𑀯𑀭𑁂𑀦 𑀯𑁂𑀮𑀸𑀦𑀸𑀢𑀺𑀓𑁆𑀓𑀫𑀦𑀪𑀸𑀯𑁂𑀦 𑀲𑀸𑀕𑀭𑀲𑀫𑁄. ‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁮.𑁧𑁯; 𑀘𑀽𑀴𑀯. 𑁩𑁮𑁪; 𑀫𑀺. 𑀧. 𑁬.𑁨.𑁧𑁦) 𑀳𑀺 𑀯𑀼𑀢𑁆𑀢𑀁.

𑀲𑀫𑀸𑀥𑀺𑀦𑀸 𑀫𑁂𑀭𑀽𑀧𑀫𑁄𑀢𑀺 𑀲𑀫𑀸𑀥𑀺𑀧𑀝𑀺𑀧𑀓𑁆𑀔𑀪𑀽𑀢𑀥𑀫𑁆𑀫𑀚𑀦𑀺𑀢𑀓𑀫𑁆𑀧𑀸𑀪𑀸𑀯𑀢𑁄 𑀫𑁂𑀭𑀼𑀦𑀸 𑀕𑀺𑀭𑀺𑀯𑀭𑁂𑀦 𑀲𑀫𑁄, 𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀫𑁂𑀭𑀼𑀕𑀺𑀭𑀺𑀯𑀭𑁄 𑀯𑀺𑀬 𑀣𑀺𑀭𑀢𑀭𑀲𑀭𑀻𑀭𑁄𑀢𑀺 𑀯𑀸. 𑀜𑀸𑀡𑁂𑀦 𑀕𑀕𑀦𑀽𑀧𑀫𑁄𑀢𑀺 𑀏𑀢𑁆𑀣 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀅𑀦𑀦𑁆𑀢𑀪𑀸𑀯𑁂𑀦 𑀅𑀦𑀦𑁆𑀢𑀸𑀓𑀸𑀲𑁂𑀦 𑀉𑀧𑀫𑀸 𑀓𑀢𑀸. 𑀘𑀢𑁆𑀢𑀸𑀭𑀺 𑀅𑀦𑀦𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸. 𑀬𑀣𑀸𑀳 𑁋

‘‘𑀲𑀢𑁆𑀢𑀓𑀸𑀬𑁄 𑀘 𑀆𑀓𑀸𑀲𑁄, 𑀘𑀓𑁆𑀓𑀯𑀸𑀴𑀸 𑀘𑀦𑀦𑁆𑀢𑀓𑀸;

𑀩𑀼𑀤𑁆𑀥𑀜𑀸𑀡𑀁 𑀅𑀧𑁆𑀧𑀫𑁂𑀬𑁆𑀬𑀁, 𑀦 𑀲𑀓𑁆𑀓𑀸 𑀏𑀢𑁂 𑀯𑀺𑀚𑀸𑀦𑀺𑀢𑀼’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁪);

𑀢𑀲𑁆𑀫𑀸 𑀅𑀦𑀦𑁆𑀢𑀲𑁆𑀲 𑀜𑀸𑀡𑀲𑁆𑀲 𑀅𑀦𑀦𑁆𑀢𑁂𑀦 𑀆𑀓𑀸𑀲𑁂𑀦 𑀉𑀧𑀫𑀸 𑀓𑀢𑀸𑀢𑀺.

𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀲𑀘𑁆𑀘𑀧𑁆𑀧𑀓𑀸𑀲𑀦𑀦𑁆𑀢𑀺 ¶ 𑀏𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀲𑀘𑁆𑀘𑀸𑀦𑀁 𑀕𑀳𑀡𑁂𑀦 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀺𑀤𑁆𑀥𑀺𑀧𑀸𑀤𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀘𑀢𑀼𑀲𑀗𑁆𑀔𑁂𑀧𑀸𑀦𑀁 𑀯𑀲𑁂𑀦 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 ¶ 𑀧𑀓𑀸𑀲𑀦𑀥𑀫𑁆𑀫𑀁 𑀧𑀓𑀸𑀲𑁂𑀲𑀺, 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀳𑀺𑀢𑀸𑀬𑀸𑀢𑀺 𑀳𑀺𑀢𑀢𑁆𑀣𑀁. 𑀥𑀫𑁆𑀫𑀘𑀓𑁆𑀓𑀁 ¶ 𑀧𑀯𑀢𑁆𑀢𑁂𑀦𑁆𑀢𑁂𑀢𑀺 𑀤𑁂𑀲𑀦𑀸𑀜𑀸𑀡𑁂 𑀧𑀯𑀢𑁆𑀢𑀺𑀬𑀫𑀸𑀦𑁂.

𑀢𑀢𑁄 𑀅𑀧𑀭𑀪𑀸𑀕𑁂 𑀫𑀳𑀸𑀫𑀗𑁆𑀕𑀮𑀲𑀫𑀸𑀕𑀫𑁂 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸𑀬𑁄 𑀲𑀼𑀔𑀼𑀫𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀜𑁆𑀜𑁂𑀯 𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑀺𑀭 𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀓𑁄𑀡𑁆𑀟𑀜𑁆𑀜𑀤𑀲𑀩𑀮𑀁 𑀫𑀗𑁆𑀕𑀮𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀫𑀗𑁆𑀕𑀮𑀸𑀦𑀺 𑀓𑀣𑁂𑀲𑀺. 𑀢𑀢𑁆𑀣 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀢𑀢𑁄 𑀧𑀭𑀫𑁆𑀧𑀺 𑀤𑁂𑀲𑁂𑀦𑁆𑀢𑁂, 𑀦𑀭𑀫𑀭𑀽𑀦𑀁 𑀲𑀫𑀸𑀕𑀫𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀢𑁄 𑀧𑀭𑀫𑁆𑀧𑀻𑀢𑀺 𑀢𑀢𑁄 𑀅𑀧𑀭𑀪𑀸𑀕𑁂𑀧𑀺. 𑀤𑁂𑀲𑁂𑀦𑁆𑀢𑁂𑀢𑀺 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂. 𑀦𑀭𑀫𑀭𑀽𑀦𑀦𑁆𑀢𑀺 𑀦𑀭𑀸𑀦𑀜𑁆𑀘𑁂𑀯 𑀅𑀫𑀭𑀸𑀦𑀜𑁆𑀘, 𑀬𑀤𑀸 𑀧𑀦 𑀪𑀕𑀯𑀸 𑀕𑀕𑀦𑀢𑀮𑁂 𑀢𑀺𑀢𑁆𑀣𑀺𑀬𑀫𑀸𑀦𑀫𑀤𑁆𑀤𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀢𑀤𑀸 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀻𑀲𑀼 𑀨𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀢𑀺𑀢𑁆𑀣𑀺𑀬𑁂 𑀅𑀪𑀺𑀫𑀤𑁆𑀤𑀦𑁆𑀢𑁄, 𑀬𑀤𑀸 𑀥𑀫𑁆𑀫𑀫𑀤𑁂𑀲𑀬𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀤𑀸-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀽𑀢𑀺.

𑀓𑁄𑀡𑁆𑀟𑀜𑁆𑀜𑁄 𑀓𑀺𑀭 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀞𑀫𑀯𑀲𑁆𑀲𑀁 𑀘𑀦𑁆𑀤𑀯𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀘𑀦𑁆𑀤𑀸𑀭𑀸𑀫𑁂 𑀯𑀺𑀳𑀸𑀲𑀺. 𑀢𑀢𑁆𑀣 𑀲𑀼𑀘𑀺𑀦𑁆𑀥𑀭𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀪𑀤𑁆𑀤𑀫𑀸𑀡𑀯𑁄 𑀦𑀸𑀫 𑀬𑀲𑁄𑀥𑀭𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀲𑀼𑀪𑀤𑁆𑀤𑀫𑀸𑀡𑀯𑁄 𑀘 𑀓𑁄𑀡𑁆𑀟𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀤𑀲𑀳𑀺 𑀫𑀸𑀡𑀯𑀓𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀅𑀣 ¶ 𑀓𑁄𑀡𑁆𑀟𑀜𑁆𑀜𑁄 𑀲𑀢𑁆𑀣𑀸 𑀚𑁂𑀝𑁆𑀞𑀫𑀸𑀲𑀧𑀼𑀡𑁆𑀡𑀫𑀸𑀬 𑀲𑀼𑀪𑀤𑁆𑀤𑀢𑁆𑀣𑁂𑀭𑀧𑁆𑀧𑀫𑀼𑀔𑁂𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀫𑀼𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀓𑁄𑀡𑁆𑀟𑀜𑁆𑀜𑀲𑀢𑁆𑀣𑀼𑀦𑁄 𑀧𑀼𑀢𑁆𑀢𑁂 𑀯𑀺𑀚𑀺𑀢𑀲𑁂𑀦𑁂 ¶ 𑀦𑀸𑀫 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀢𑀁𑀧𑀫𑀼𑀔𑀲𑁆𑀲 𑀓𑁄𑀝𑀺𑀲𑀳𑀲𑁆𑀲𑀲𑁆𑀲 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀤𑀲𑀩𑀮𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀉𑀤𑁂𑀦𑀭𑀸𑀚𑀸𑀦𑀁 𑀦𑀸𑀫 𑀦𑀯𑀼𑀢𑀺𑀓𑁄𑀝𑀺𑀚𑀦𑀧𑀭𑀺𑀯𑀸𑀭𑀁 𑀧𑀩𑁆𑀩𑀸𑀚𑁂𑀲𑀺 𑀲𑀤𑁆𑀥𑀺𑀁 𑀢𑀸𑀬 𑀧𑀭𑀺𑀲𑀸𑀬. 𑀢𑀲𑁆𑀫𑀺𑀁 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀢𑀁𑀧𑀫𑀼𑀔𑁂𑀳𑀺 𑀦𑀯𑀼𑀢𑀺𑀬𑀸 𑀅𑀭𑀳𑀦𑁆𑀢𑀓𑁄𑀝𑀻𑀳𑀺 𑀪𑀕𑀯𑀸 𑀧𑀭𑀺𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮.

‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀤𑀼𑀢𑀺𑀬𑁄 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀺𑀦’’𑀦𑁆𑀢𑀺.

𑀢𑀤𑀸 ¶ 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸 𑀘𑀦𑁆𑀤𑀯𑀢𑀻𑀦𑀕𑀭𑁂 𑀧𑀝𑀺𑀯𑀲𑀢𑀺. 𑀲𑁄 𑀓𑀺𑀭 𑀅𑀦𑁂𑀓𑀦𑀭𑀯𑀭𑀧𑀭𑀺𑀯𑀼𑀢𑁄 𑀲𑀮𑀺𑀮𑀦𑀺𑀥𑀺𑀦𑀺𑀯𑀲𑀦𑀁 𑀲𑀫𑁂𑀭𑀼𑀬𑀼𑀕𑀦𑁆𑀥𑀭𑀁 𑀅𑀧𑀭𑀺𑀫𑀺𑀢𑀯𑀲𑀼𑀥𑀭𑀁 𑀯𑀲𑀼𑀦𑁆𑀥𑀭𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀧𑀭𑀺𑀧𑀸𑀮𑁂𑀢𑀺. 𑀅𑀣 𑀓𑁄𑀡𑁆𑀟𑀜𑁆𑀜𑁄 𑀩𑀼𑀤𑁆𑀥𑁄𑀧𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀦𑁆𑀤𑀯𑀢𑀻𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺.

𑀲𑁄 𑀯𑀺𑀚𑀺𑀢𑀸𑀯𑀻 𑀓𑀺𑀭 𑀭𑀸𑀚𑀸 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀺𑀭 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀯𑀲𑀦𑀝𑁆𑀞𑀸𑀦𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀢𑁆𑀢𑀯𑀺𑀥𑀺𑀁 𑀲𑀼𑀝𑁆𑀞𑀼 𑀧𑀝𑀺𑀬𑀸𑀤𑁂𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀪𑀕𑀯𑀦𑁆𑀢𑀁 𑀪𑁄𑀚𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑁋 ‘‘𑀪𑀦𑁆𑀢𑁂, 𑀢𑁂𑀫𑀸𑀲𑀁 𑀫𑀳𑀸𑀚𑀦𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀇𑀥𑁂𑀯 𑀯𑀲𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀢𑀬𑁄 𑀫𑀸𑀲𑁂 𑀦𑀺𑀭𑀦𑁆𑀢𑀭𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀲𑀤𑀺𑀲𑀫𑀳𑀸𑀤𑀸𑀦𑀁 𑀅𑀤𑀸𑀲𑀺.

𑀅𑀣 𑀲𑀢𑁆𑀣𑀸 𑀩𑁄𑀥𑀺𑀲𑀢𑁆𑀢𑀁 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀫𑀲𑁆𑀲 𑀤𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ¶ 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀅𑀳𑀁 ¶ 𑀢𑁂𑀦 𑀲𑀫𑀬𑁂𑀦, 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀫𑀼𑀤𑁆𑀤𑀁 𑀅𑀦𑁆𑀢𑀫𑀦𑁆𑀢𑁂𑀦, 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑀬𑀸𑀫𑀳𑀁.

𑁧𑁦.

‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀯𑀺𑀫𑀮𑀸𑀦𑀁 𑀫𑀳𑁂𑀲𑀺𑀦𑀁;

𑀲𑀳 𑀮𑁄𑀓𑀕𑁆𑀕𑀦𑀸𑀣𑁂𑀦, 𑀧𑀭𑀫𑀦𑁆𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁧.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀓𑁄𑀡𑁆𑀟𑀜𑁆𑀜𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁨.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁;

𑀅𑀲𑁆𑀲𑀢𑁆𑀣𑀫𑀽𑀮𑁂 𑀲𑀫𑁆𑀩𑀼𑀤𑁆𑀥𑁄, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁧𑁩.

‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁧𑁪.

‘‘𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺 𑀢𑀁 𑀚𑀺𑀦𑀁.

𑁧𑁫.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁬.

‘‘𑀘𑀺𑀢𑁆𑀢𑁄 𑀘 𑀳𑀢𑁆𑀣𑀸𑀴𑀯𑀓𑁄, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀓𑀸;

𑀦𑀦𑁆𑀤𑀫𑀸𑀢𑀸 𑀘 𑀉𑀢𑁆𑀢𑀭𑀸, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀝𑁆𑀞𑀺𑀓𑀸;

𑀆𑀬𑀼 𑀯𑀲𑁆𑀲𑀲𑀢𑀁 𑀢𑀲𑁆𑀲, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁭.

‘‘𑀇𑀤𑀁 ¶ 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀩𑀼𑀤𑁆𑀥𑀩𑀻𑀚𑀁 𑀓𑀺𑀭 𑀅𑀬𑀁.

𑁧𑁮.

‘‘𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀘;

𑀓𑀢𑀜𑁆𑀚𑀮𑀻 𑀦𑀫𑀲𑁆𑀲𑀦𑁆𑀢𑀺, 𑀤𑀲𑀲𑀳𑀲𑁆𑀲𑀺𑀤𑁂𑀯𑀢𑀸.

𑁧𑁯.

‘‘𑀬𑀤𑀺𑀫𑀲𑁆𑀲 ¶ ¶ 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀭𑀚𑁆𑀛𑀺𑀲𑁆𑀲𑀸𑀫 𑀲𑀸𑀲𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁨𑁦.

‘‘𑀬𑀣𑀸 𑀫𑀦𑀼𑀲𑁆𑀲𑀸 𑀦𑀤𑀺𑀁 𑀢𑀭𑀦𑁆𑀢𑀸, 𑀧𑀝𑀺𑀢𑀺𑀢𑁆𑀣𑀁 𑀯𑀺𑀭𑀚𑁆𑀛𑀺𑀬;

𑀳𑁂𑀝𑁆𑀞𑀸𑀢𑀺𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀢𑁆𑀢𑀭𑀦𑁆𑀢𑀺 𑀫𑀳𑀸𑀦𑀤𑀺𑀁.

𑁨𑁧.

‘‘𑀏𑀯𑀫𑁂𑀯 𑀫𑀬𑀁 𑀲𑀩𑁆𑀩𑁂, 𑀬𑀤𑀺 𑀫𑀼𑀜𑁆𑀘𑀸𑀫𑀺𑀫𑀁 𑀚𑀺𑀦𑀁;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁨𑁨.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀫𑁂𑀯 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑁄, 𑀫𑀳𑀸𑀭𑀚𑁆𑀚𑀁 𑀚𑀺𑀦𑁂 𑀅𑀤𑀁;

𑀫𑀳𑀸𑀭𑀚𑁆𑀚𑀁 𑀤𑀤𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁨𑁩.

‘‘𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀁 𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁨𑁪.

‘‘𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺.

𑀢𑀢𑁆𑀣 𑀅𑀳𑀁 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀅𑀳𑀁 𑀢𑀲𑁆𑀫𑀺𑀁 𑀲𑀫𑀬𑁂. 𑀯𑀺𑀚𑀺𑀢𑀸𑀯𑀻 𑀦𑀸𑀫𑀸𑀢𑀺 𑀏𑀯𑀁𑀦𑀸𑀫𑀓𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀅𑀳𑁄𑀲𑀺𑀁. 𑀲𑀫𑀼𑀤𑁆𑀤𑀁 𑀅𑀦𑁆𑀢𑀫𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀲𑀻𑀫𑀁 𑀫𑀭𑀺𑀬𑀸𑀤𑀁 𑀓𑀢𑁆𑀯𑀸 𑀞𑀺𑀢𑀁 𑀲𑀫𑀼𑀤𑁆𑀤𑀁 𑀅𑀦𑁆𑀢𑀁 𑀓𑀢𑁆𑀯𑀸 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀓𑀝𑀁 𑀳𑁄𑀢𑀺.

𑀭𑀸𑀚𑀸 𑀓𑀺𑀭 𑀘𑀓𑁆𑀓𑀯𑀢𑁆𑀢𑀻 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀯𑀸𑀫𑀧𑀲𑁆𑀲𑁂𑀦 𑀲𑀺𑀦𑁂𑀭𑀼𑀁 𑀓𑀢𑁆𑀯𑀸 𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀧𑀼𑀩𑁆𑀩𑀯𑀺𑀤𑁂𑀳𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑁋 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦𑀸𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀸𑀲𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁪𑁪; 𑁩.𑁮𑁫; 𑀫. 𑀦𑀺. 𑁩.𑁨𑁫𑁭) 𑀑𑀯𑀸𑀤𑀁 𑀤𑁂𑀢𑀺. 𑀏𑀯𑀁 𑀑𑀯𑀸𑀤𑁂 𑀤𑀺𑀦𑁆𑀦𑁂 𑀢𑀁 𑀘𑀓𑁆𑀓𑀭𑀢𑀦𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀢𑀺. 𑀬𑀣𑀸 𑀬𑀣𑀸 𑀘 𑀢𑀁 𑀅𑀚𑁆𑀛𑁄𑀕𑀸𑀳𑀢𑀺, 𑀢𑀣𑀸 𑀢𑀣𑀸 𑀲𑀁𑀔𑀺𑀢𑁆𑀢𑀊𑀫𑀺𑀯𑀺𑀧𑁆𑀨𑀸𑀭𑀁 𑀳𑀼𑀢𑁆𑀯𑀸 𑀑𑀕𑀘𑁆𑀙𑀫𑀸𑀦𑀁 𑀫𑀳𑀸𑀲𑀫𑀼𑀤𑁆𑀤𑀲𑀮𑀺𑀮𑀁 𑀬𑁄𑀚𑀦𑀫𑀢𑁆𑀢𑀁 𑀑𑀕𑁆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀫𑀼𑀤𑁆𑀤𑀁 𑀉𑀪𑁄𑀲𑀼 ¶ 𑀧𑀲𑁆𑀲𑁂𑀲𑀼 𑀯𑁂𑀴𑀼𑀭𑀺𑀬𑀫𑀡𑀺𑀪𑀺𑀢𑁆𑀢𑀺 ¶ 𑀯𑀺𑀬 𑀧𑀭𑀫𑀤𑀲𑁆𑀲𑀦𑀻𑀬𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀧𑀼𑀭𑀢𑁆𑀣𑀺𑀫𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀕𑀦𑁆𑀢𑁆𑀯𑀸 𑀢𑀁 𑀘𑀓𑁆𑀓𑀭𑀢𑀦𑀁 𑀧𑀝𑀺𑀦𑀺𑀯𑀢𑁆𑀢𑀢𑀺. 𑀧𑀝𑀺𑀦𑀺𑀯𑀢𑁆𑀢𑀫𑀸𑀦𑁂 𑀘 𑀢𑀲𑁆𑀫𑀺𑀁 𑀲𑀸 ¶ 𑀧𑀭𑀺𑀲𑀸 𑀅𑀕𑁆𑀕𑀢𑁄 𑀳𑁄𑀢𑀺, 𑀫𑀚𑁆𑀛𑁂 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀅𑀦𑁆𑀢𑁂 𑀘𑀓𑁆𑀓𑀭𑀢𑀦𑀁 𑀳𑁄𑀢𑀺. 𑀢𑀫𑁆𑀧𑀺 𑀚𑀮𑀁 𑀚𑀮𑀦𑁆𑀢𑁂𑀦 𑀯𑀺𑀬𑁄𑀕𑀁 𑀅𑀲𑀳𑀫𑀸𑀦𑀫𑀺𑀯 𑀦𑁂𑀫𑀺𑀫𑀡𑁆𑀟𑀮𑀧𑀭𑀺𑀬𑀦𑁆𑀢𑀁 𑀅𑀪𑀺𑀳𑀦𑀦𑁆𑀢𑀫𑁂𑀯 𑀢𑀻𑀭𑀫𑀼𑀧𑀕𑀘𑁆𑀙𑀢𑀺.

𑀏𑀯𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀼𑀩𑁆𑀩𑀯𑀺𑀤𑁂𑀳𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀚𑀫𑁆𑀩𑀼𑀤𑀻𑀧𑀁 𑀯𑀺𑀚𑁂𑀢𑀼𑀓𑀸𑀫𑁄 𑀘𑀓𑁆𑀓𑀭𑀢𑀦𑀤𑁂𑀲𑀺𑀢𑁂𑀦 𑀫𑀕𑁆𑀕𑁂𑀦 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀢𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀚𑀫𑁆𑀩𑀼𑀤𑀻𑀧𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀢𑁄 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀅𑀧𑀭𑀕𑁄𑀬𑀸𑀦𑀁 𑀯𑀺𑀚𑁂𑀢𑀼𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑀢𑁄𑀧𑀺 𑀉𑀢𑁆𑀢𑀭𑀺𑀢𑁆𑀯𑀸 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀉𑀢𑁆𑀢𑀭𑀓𑀼𑀭𑀼𑀁 𑀯𑀺𑀚𑁂𑀢𑀼𑀁 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀢𑀁 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀣𑁂𑀯 𑀅𑀪𑀺𑀯𑀺𑀚𑀺𑀬 𑀉𑀢𑁆𑀢𑀭𑀲𑀫𑀼𑀤𑁆𑀤𑀢𑁄𑀧𑀺 𑀧𑀘𑁆𑀘𑀼𑀢𑁆𑀢𑀭𑀢𑀺. 𑀏𑀢𑁆𑀢𑀸𑀯𑀢𑀸 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀸𑀕𑀭𑀧𑀭𑀺𑀬𑀦𑁆𑀢𑀸𑀬 𑀧𑀣𑀯𑀺𑀬𑀸 𑀇𑀲𑁆𑀲𑀭𑀺𑀬𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑀼𑀤𑁆𑀤𑀁 𑀅𑀦𑁆𑀢𑀫𑀦𑁆𑀢𑁂𑀦, 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑀬𑀸𑀫𑀳’’𑀦𑁆𑀢𑀺.

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀦𑁆𑀢𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀺𑀫𑀮𑀸𑀦𑀦𑁆𑀢𑀺 𑀔𑀻𑀡𑀸𑀲𑀯𑀸𑀦𑀁. 𑀲𑀳 𑀮𑁄𑀓𑀕𑁆𑀕𑀦𑀸𑀣𑁂𑀦𑀸𑀢𑀺 𑀲𑀤𑁆𑀥𑀺𑀁 𑀤𑀲𑀩𑀮𑁂𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀫𑀦𑁆𑀦𑁂𑀦𑀸𑀢𑀺 𑀧𑀡𑀻𑀢𑁂𑀦 𑀅𑀦𑁆𑀦𑁂𑀦. 𑀢𑀧𑁆𑀧𑀬𑀺𑀦𑁆𑀢𑀺 𑀢𑀧𑁆𑀧𑁂𑀲𑀺𑀁. 𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂𑀢𑀺 𑀅𑀢𑁆𑀣𑁄.

𑀧𑀥𑀸𑀦𑀦𑁆𑀢𑀺 𑀯𑀻𑀭𑀺𑀬𑀁. 𑀢𑀫𑁂𑀯 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑁄𑀢𑀺 𑀢𑀫𑁂𑀯 𑀩𑀼𑀤𑁆𑀥𑀓𑀸𑀭𑀓𑀫𑀢𑁆𑀣𑀁 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀦𑁆𑀢𑁄 𑀲𑀸𑀥𑁂𑀦𑁆𑀢𑁄 𑀦𑀺𑀧𑁆𑀨𑀸𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀭𑀚𑁆𑀚𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁. 𑀚𑀺𑀦𑁂𑀢𑀺 𑀪𑀕𑀯𑀢𑀺, 𑀲𑀫𑁆𑀧𑀤𑀸𑀦𑀢𑁆𑀣𑁂 𑀯𑀸 𑀪𑀼𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. 𑀅𑀤𑀦𑁆𑀢𑀺 𑀅𑀤𑀸𑀲𑀺𑀁. 𑀏𑀯𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. ‘‘𑀫𑀳𑀸𑀭𑀚𑁆𑀚𑀁 𑀚𑀺𑀦𑁂 𑀤𑀤𑀺’’𑀦𑁆𑀢𑀺 𑀧𑀞𑀦𑁆𑀢𑀺 𑀓𑁂𑀘𑀺. 𑀤𑀤𑀺𑀢𑁆𑀯𑀸𑀦𑀸𑀢𑀺 𑀘𑀚𑀺𑀢𑁆𑀯𑀸. 𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁. 𑀯𑀺𑀦𑀬𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀁. 𑀦𑀯𑀗𑁆𑀕𑀦𑁆𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀦𑀯𑀗𑁆𑀕𑀁. 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀦𑁆𑀢𑀺 𑀆𑀕𑀫𑀸𑀥𑀺𑀕𑀫𑁂𑀳𑀺 𑀮𑁄𑀓𑀺𑀬𑁂𑀳𑀺 𑀲𑀫𑀮𑀗𑁆𑀓𑀭𑀺𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀢𑀺𑀲𑀫𑁆𑀧𑀦𑁆𑀦𑁄. 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳𑀦𑁆𑀢𑀺 ¶ 𑀩𑁆𑀭𑀳𑁆𑀫𑀮𑁄𑀓𑀁 𑀅𑀕𑀜𑁆𑀙𑀺𑀁 𑀅𑀳𑀁.

𑀇𑀫𑀲𑁆𑀲 𑀧𑀦 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀲𑁆𑀲 𑀭𑀫𑁆𑀫𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀦𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀚𑀸𑀢𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀪𑀤𑁆𑀤𑁄 𑀘 𑀲𑀼𑀪𑀤𑁆𑀤𑁄 𑀘 𑀤𑁆𑀯𑁂 ¶ 𑀅𑀕𑁆𑀕𑀲𑀸𑀯𑀓𑀸, 𑀅𑀦𑀼𑀭𑀼𑀤𑁆𑀥𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀢𑀺𑀲𑁆𑀲𑀸 𑀘 𑀉𑀧𑀢𑀺𑀲𑁆𑀲𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀓𑀮𑁆𑀬𑀸𑀡𑀺𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 ¶ , 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀢𑀲𑁆𑀲 𑀭𑀼𑀘𑀺𑀤𑁂𑀯𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺, 𑀯𑀺𑀚𑀺𑀢𑀲𑁂𑀦𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀘𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄 𑀭𑀸𑀚𑀸. 𑀘𑀦𑁆𑀤𑀸𑀭𑀸𑀫𑁂 𑀓𑀺𑀭 𑀯𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁫.

‘‘𑀦𑀕𑀭𑀁 𑀭𑀫𑁆𑀫𑀯𑀢𑀻 𑀦𑀸𑀫, 𑀲𑀼𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀚𑀸𑀢𑀸 𑀦𑀸𑀫 𑀚𑀦𑀺𑀓𑀸, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁦.

‘‘𑀪𑀤𑁆𑀤𑁄 𑀘𑁂𑀯 𑀲𑀼𑀪𑀤𑁆𑀤𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀦𑀼𑀭𑀼𑀤𑁆𑀥𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁧.

‘‘𑀢𑀺𑀲𑁆𑀲𑀸 𑀘 𑀉𑀧𑀢𑀺𑀲𑁆𑀲𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀲𑀸𑀮𑀓𑀮𑁆𑀬𑀸𑀡𑀺𑀓𑁄 𑀩𑁄𑀥𑀺, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁩.

‘‘𑀲𑁄 𑀅𑀝𑁆𑀞𑀸𑀲𑀻𑀢𑀺 𑀳𑀢𑁆𑀣𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑁂 𑀉𑀴𑀼𑀭𑀸𑀚𑀸𑀯, 𑀲𑀽𑀭𑀺𑀬𑁄 𑀫𑀚𑁆𑀛𑀦𑁆𑀳𑀺𑀓𑁂 𑀬𑀣𑀸.

𑁩𑁪.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁫.

‘‘𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀯𑀺𑀘𑀺𑀢𑁆𑀢𑀸 𑀆𑀲𑀺 𑀫𑁂𑀤𑀦𑀻;

𑀬𑀣𑀸 𑀳𑀺 𑀕𑀕𑀦𑀫𑀼𑀴𑀽𑀪𑀺, 𑀏𑀯𑀁 𑀲𑁄 𑀉𑀧𑀲𑁄𑀪𑀣.

𑁩𑁬.

‘‘𑀢𑁂𑀧𑀺 𑀦𑀸𑀕𑀸 𑀅𑀧𑁆𑀧𑀫𑁂𑀬𑁆𑀬𑀸, 𑀅𑀲𑀗𑁆𑀔𑁄𑀪𑀸 𑀤𑀼𑀭𑀸𑀲𑀤𑀸;

𑀯𑀺𑀚𑁆𑀚𑀼𑀧𑀸𑀢𑀁𑀯 𑀤𑀲𑁆𑀲𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸 𑀢𑁂 𑀫𑀳𑀸𑀬𑀲𑀸.

𑁩𑁭.

‘‘𑀲𑀸 𑀘 𑀅𑀢𑀼𑀮𑀺𑀬𑀸 𑀚𑀺𑀦𑀲𑁆𑀲 𑀇𑀤𑁆𑀥𑀺, 𑀜𑀸𑀡𑀧𑀭𑀺𑀪𑀸𑀯𑀺𑀢𑁄 𑀘 𑀲𑀫𑀸𑀥𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀲𑀸𑀮𑀓𑀮𑁆𑀬𑀸𑀡𑀺𑀓𑁄𑀢𑀺 𑀲𑀸𑀮𑀓𑀮𑁆𑀬𑀸𑀡𑀺𑀭𑀼𑀓𑁆𑀔𑁄, 𑀲𑁄 𑀩𑀼𑀤𑁆𑀥𑀓𑀸𑀮𑁂 𑀘𑁂𑀯 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀺𑀩𑁆𑀩𑀢𑁆𑀢𑀢𑀺, 𑀦𑀸𑀜𑁆𑀜𑀤𑀸. 𑀲𑁄 𑀏𑀓𑀸𑀳𑁂𑀦𑁂𑀯 𑀉𑀝𑁆𑀞𑀸𑀢𑀺 𑀓𑀺𑀭. 𑀔𑀻𑀡𑀸𑀲𑀯𑁂𑀳𑀺 𑀯𑀺𑀫𑀮𑁂𑀳𑀺, 𑀯𑀺𑀘𑀺𑀢𑁆𑀢𑀸 𑀆𑀲𑀺 𑀫𑁂𑀤𑀦𑀻𑀢𑀺 𑀅𑀬𑀁 𑀫𑁂𑀤𑀦𑀻 𑀔𑀻𑀡𑀸𑀲𑀯𑁂𑀳𑀺 𑀏𑀓𑀓𑀸𑀲𑀸𑀯𑀧𑀚𑁆𑀚𑁄𑀢𑀸 𑀯𑀺𑀘𑀺𑀢𑁆𑀢𑀸 𑀧𑀭𑀫𑀤𑀲𑁆𑀲𑀦𑀻𑀬𑀸 𑀅𑀳𑁄𑀲𑀺. 𑀬𑀣𑀸 ¶ 𑀳𑀻𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀴𑀽𑀪𑀻𑀢𑀺 ¶ 𑀦𑀓𑁆𑀔𑀢𑁆𑀢𑁂𑀳𑀺, 𑀢𑀸𑀭𑀸𑀕𑀡𑁂𑀳𑀺 ¶ 𑀕𑀕𑀦𑀢𑀮𑀁 𑀯𑀺𑀬 𑀔𑀻𑀡𑀸𑀲𑀯𑁂𑀳𑀺 𑀯𑀺𑀘𑀺𑀢𑁆𑀢𑀸 𑀅𑀬𑀁 𑀫𑁂𑀤𑀦𑀻 𑀲𑁄𑀪𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀅𑀲𑀗𑁆𑀔𑁄𑀪𑀸𑀢𑀺 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑁆𑀔𑁄𑀪𑀸 𑀅𑀯𑀺𑀓𑀸𑀭𑀸. 𑀯𑀺𑀚𑁆𑀚𑀼𑀧𑀸𑀢𑀁𑀯 𑀤𑀲𑁆𑀲𑁂𑀢𑁆𑀯𑀸𑀢𑀺 𑀯𑀺𑀚𑁆𑀚𑀼𑀧𑀸𑀢𑀁 𑀯𑀺𑀬 𑀤𑀲𑁆𑀲𑀬𑀺𑀢𑁆𑀯𑀸, ‘‘𑀯𑀺𑀚𑁆𑀚𑀼𑀧𑁆𑀧𑀸𑀢𑀁𑀯𑀸’’𑀢𑀺𑀧𑀺 𑀧𑀸𑀞𑁄. 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀲𑁆𑀲 𑀓𑀺𑀭 𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀬𑀫𑀸𑀦𑀸 𑀪𑀺𑀓𑁆𑀔𑀽 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀫𑀸𑀓𑀸𑀲𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀲𑀺𑀢𑀚𑀮𑀥𑀭𑀯𑀺𑀯𑀭𑀕𑀢𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀧𑀸𑀤𑀸𑀦𑀸 𑀤𑀳𑀦𑀸 𑀯𑀺𑀬 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀚𑁆𑀚𑀼𑀧𑀸𑀢𑀁𑀯 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀅𑀢𑀼𑀮𑀺𑀬𑀸𑀢𑀺 𑀅𑀢𑀼𑀮𑁆𑀬𑀸 𑀅𑀲𑀤𑀺𑀲𑀸. 𑀜𑀸𑀡𑀧𑀭𑀺𑀪𑀸𑀯𑀺𑀢𑁄𑀢𑀺 𑀜𑀸𑀡𑁂𑀦 𑀯𑀟𑁆𑀠𑀺𑀢𑁄. 𑀲𑁂𑀲𑀕𑀸𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀸 𑀏𑀯𑀸𑀢𑀺.

‘‘𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀘𑀦𑁆𑀤𑀸𑀭𑀸𑀫𑁂 𑀫𑀦𑁄𑀭𑀫𑁂;

𑀦𑀺𑀩𑁆𑀩𑀸𑀬𑀺 𑀘𑁂𑀢𑀺𑀬𑁄 𑀢𑀲𑁆𑀲, 𑀲𑀢𑁆𑀢𑀬𑁄𑀚𑀦𑀺𑀓𑁄 𑀓𑀢𑁄.

‘‘𑀦 𑀳𑁂𑀯 𑀥𑀸𑀢𑀼𑀬𑁄 𑀢𑀲𑁆𑀲, 𑀲𑀢𑁆𑀣𑀼𑀦𑁄, 𑀯𑀺𑀓𑀺𑀭𑀺𑀁𑀲𑀼 𑀢𑀸;

𑀞𑀺𑀢𑀸 𑀏𑀓𑀖𑀦𑀸 𑀳𑀼𑀢𑁆𑀯𑀸, 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬’’.

𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸 𑀲𑀢𑁆𑀢𑀬𑁄𑀚𑀦𑀺𑀓𑀁 𑀲𑀢𑁆𑀢𑀭𑀢𑀦𑀫𑀬𑀁 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀬 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀢𑁂𑀮𑀲𑀧𑁆𑀧𑀻𑀳𑀺 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀲𑀼𑀦𑁆𑀢𑀺.

𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄 𑀩𑀼𑀤𑁆𑀥𑀯𑀁𑀲𑁄.

𑁫. 𑀫𑀗𑁆𑀕𑀮𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀓𑁄𑀡𑁆𑀟𑀜𑁆𑀜𑁂 ¶ 𑀓𑀺𑀭 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀲𑀸𑀲𑀦𑀁 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀧𑀯𑀢𑁆𑀢𑀺𑀢𑁆𑀣. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀲𑀸𑀲𑀦𑀫𑀲𑁆𑀲 𑀅𑀦𑁆𑀢𑀭𑀥𑀸𑀬𑀺. 𑀓𑁄𑀡𑁆𑀟𑀜𑁆𑀜𑀲𑁆𑀲 𑀧𑀦 𑀅𑀧𑀭𑀪𑀸𑀕𑁂 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀫𑀗𑁆𑀕𑀮𑁄, 𑀲𑀼𑀫𑀦𑁄, 𑀭𑁂𑀯𑀢𑁄, 𑀲𑁄𑀪𑀺𑀢𑁄𑀢𑀺. 𑀢𑀢𑁆𑀣 𑀫𑀗𑁆𑀕𑀮𑁄 𑀧𑀦 𑀮𑁄𑀓𑀦𑀸𑀬𑀓𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀜𑁆𑀘𑀲𑀼 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 ¶ 𑀉𑀤𑀧𑀸𑀤𑀺, 𑀢𑀤𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸𑀬𑁄 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀬𑀸𑀘𑀦𑁆𑀢𑀺 𑁋

‘‘𑀓𑀸𑀮𑁄 ¶ 𑀔𑁄 𑀢𑁂 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁭);

𑀏𑀯𑀁 𑀤𑁂𑀯𑁂𑀳𑀺 𑀆𑀬𑀸𑀘𑀺𑀢𑁄 𑀓𑀢𑀧𑀜𑁆𑀘𑀯𑀺𑀮𑁄𑀓𑀦𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀩𑁆𑀩𑀦𑀕𑀭𑀼𑀢𑁆𑀢𑀫𑁂 𑀉𑀢𑁆𑀢𑀭𑀦𑀕𑀭𑁂 𑀅𑀦𑀼𑀢𑁆𑀢𑀭𑀲𑁆𑀲 𑀉𑀢𑁆𑀢𑀭𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀉𑀢𑁆𑀢𑀭𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀤𑀸 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑀼𑀁. 𑀢𑀸𑀦𑀺 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀲𑁆𑀲𑀸 𑀉𑀢𑁆𑀢𑀭𑀸𑀬 𑀓𑀺𑀭 𑀫𑀳𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀩𑁆𑀩𑀮𑁄𑀓𑀫𑀗𑁆𑀕𑀮𑀲𑁆𑀲 𑀫𑀗𑁆𑀕𑀮𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀲𑀭𑀻𑀭𑀧𑁆𑀧𑀪𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀨𑀭𑀺𑀢𑁆𑀯𑀸 𑀘𑀦𑁆𑀤𑀸𑀮𑁄𑀓𑀲𑀽𑀭𑀺𑀬𑀸𑀮𑁄𑀓𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀘 𑀅𑀜𑁆𑀜𑁂𑀦𑀸𑀮𑁄𑀓𑁂𑀦 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀲𑀫𑀼𑀤𑀬𑁂𑀦𑁂𑀯 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀅𑀝𑁆𑀞𑀲𑀝𑁆𑀞𑀺𑀬𑀸 𑀥𑀸𑀢𑀻𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑀸 𑀯𑀺𑀘𑀭𑀢𑀺.

𑀲𑀸 𑀓𑀺𑀭 𑀤𑁂𑀯𑀢𑀸𑀳𑀺 𑀓𑀢𑀸𑀭𑀓𑁆𑀔𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀧𑀭𑀫𑀲𑀼𑀭𑀪𑀺𑀓𑀼𑀲𑀼𑀫𑀨𑀮𑀥𑀭𑀲𑀸𑀔𑀸𑀯𑀺𑀝𑀧𑁂 𑀓𑀫𑀮𑀓𑀼𑀯𑀮𑀬𑀲𑀫𑀮𑀗𑁆𑀓𑀢𑁂 𑀭𑀼𑀭𑀼-𑀲𑀻𑀳-𑀩𑁆𑀬𑀕𑁆𑀖-𑀕𑀚-𑀕𑀯𑀬-𑀫𑀳𑀺𑀁𑀲𑀧𑀲𑀤𑀯𑀺𑀯𑀺𑀥𑀫𑀺𑀕𑀕𑀡𑀯𑀺𑀘𑀭𑀺𑀢𑁂 𑀧𑀭𑀫𑀭𑀫𑀡𑀻𑀬𑁂 𑀉𑀢𑁆𑀢𑀭𑀫𑀥𑀼𑀭𑀼𑀬𑁆𑀬𑀸𑀦𑁂 𑀦𑀸𑀫 𑀫𑀗𑁆𑀕𑀮𑀼𑀬𑁆𑀬𑀸𑀦𑁂 𑀫𑀗𑁆𑀕𑀮𑀫𑀳𑀸𑀧𑀼𑀭𑀺𑀲𑀁 𑀯𑀺𑀚𑀸𑀬𑀺 ¶ . 𑀲𑁄 𑀚𑀸𑀢𑀫𑀢𑁆𑀢𑁄𑀯 𑀫𑀳𑀸𑀲𑀢𑁆𑀢𑁄 𑀲𑀩𑁆𑀩𑀸 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽𑀲𑀼 𑀤𑁂𑀯𑀢𑀸 𑀤𑀺𑀲𑁆𑀲𑀫𑀸𑀦𑀲𑀭𑀻𑀭𑀸 𑀤𑀺𑀩𑁆𑀩𑀫𑀸𑀮𑀸𑀤𑀻𑀳𑀺 𑀲𑀫𑀮𑀗𑁆𑀓𑀢𑀕𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀞𑀢𑁆𑀯𑀸 𑀚𑀬𑀫𑀗𑁆𑀕𑀮𑀣𑀼𑀢𑀺𑀯𑀘𑀦𑀸𑀦𑀺 𑀲𑀫𑁆𑀧𑀯𑀢𑁆𑀢𑁂𑀲𑀼𑀁. 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲 𑀮𑀓𑁆𑀔𑀡𑀧𑀸𑀞𑀓𑀸 𑀲𑀩𑁆𑀩𑀫𑀗𑁆𑀕𑀮𑀲𑀫𑁆𑀧𑀢𑁆𑀢𑀺𑀬𑀸 𑀚𑀸𑀢𑁄𑀢𑀺 ‘‘𑀫𑀗𑁆𑀕𑀮𑀓𑀼𑀫𑀸𑀭𑁄’’ 𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼.

𑀢𑀲𑁆𑀲 𑀓𑀺𑀭 𑀬𑀲𑀯𑀸 𑀭𑀼𑀘𑀺𑀫𑀸 𑀲𑀺𑀭𑀺𑀫𑀸𑀢𑀺 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀬𑀲𑀯𑀢𑀻𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑀺𑀁𑀲𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀫𑀳𑀸𑀲𑀢𑁆𑀢𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀲𑀤𑀺𑀲𑀁 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀬𑀲𑀯𑀢𑀺𑀬𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀻𑀮𑀯𑀁 𑀦𑀸𑀫 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀅𑀮𑀗𑁆𑀓𑀢𑀁 𑀧𑀡𑁆𑀟𑀭𑀁 𑀦𑀸𑀫 𑀲𑀼𑀦𑁆𑀤𑀭𑀢𑀼𑀭𑀗𑁆𑀕𑀯𑀭𑀫𑀸𑀭𑀼𑀬𑁆𑀳 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀧𑀩𑁆𑀩𑀚𑀺. 𑀢𑀁 𑀧𑀦 𑀧𑀩𑁆𑀩𑀚𑀦𑁆𑀢𑀁 𑀢𑀺𑀲𑁆𑀲𑁄 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀧𑀼𑀭𑀺𑀲𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀫𑀘𑀭𑀺.

𑀢𑀢𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀉𑀢𑁆𑀢𑀭𑀕𑀸𑀫𑁂 𑀉𑀢𑁆𑀢𑀭𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀬 𑀉𑀢𑁆𑀢𑀭𑀸𑀬 𑀦𑀸𑀫 𑀤𑀺𑀦𑁆𑀦𑀁 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀭𑀪𑀺𑀓𑀼𑀲𑀼𑀫𑀸𑀮𑀗𑁆𑀓𑀢𑁂 𑀦𑀻𑀮𑁄𑀪𑀸𑀲𑁂 𑀫𑀦𑁄𑀭𑀫𑁂 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀸𑀫 𑀆𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀅𑀲𑀺𑀢𑀜𑁆𑀚𑀦𑀕𑀺𑀭𑀺𑀲𑀗𑁆𑀓𑀸𑀲𑀁 𑀅𑀓𑁆𑀓𑀦𑁆𑀢𑀯𑀭𑀓𑀦𑀓𑀚𑀸𑀮𑀓𑀽𑀝𑀁𑀯 𑀲𑀻𑀢𑀘𑁆𑀙𑀸𑀬𑀁 𑀯𑀺𑀯𑀺𑀥𑀫𑀺𑀕𑀕𑀡𑀲𑀫𑁆𑀧𑀸𑀢𑀯𑀺𑀭𑀳𑀺𑀢𑀁 𑀫𑀦𑁆𑀤𑀫𑀸𑀮𑀼𑀢𑁂𑀭𑀺𑀢𑀸𑀬 𑀖𑀦𑀲𑀸𑀔𑀸𑀬 𑀲𑀫𑀮𑀗𑁆𑀓𑀢𑀁 𑀦𑀘𑁆𑀘𑀦𑁆𑀢𑀫𑀺𑀯 𑀧𑀻𑀢𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀦𑀸𑀕𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀢𑁆𑀢𑀯𑀭𑀦𑀸𑀕𑀕𑀸𑀫𑀻 𑀦𑀸𑀕𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀧𑀲𑁆𑀲𑁂 𑀞𑀢𑁆𑀯𑀸 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀩𑀮𑀁 𑀫𑀸𑀭𑀩𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀧𑀘𑁆𑀘𑀬𑀸𑀓𑀸𑀭𑀲𑀫𑁆𑀫𑀲𑀦𑀁 ¶ 𑀓𑀢𑁆𑀯𑀸 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪) 𑁋

𑀉𑀤𑀸𑀦𑀁 ¶ 𑀉𑀤𑀸𑀦𑁂𑀲𑀺.

𑀫𑀗𑁆𑀕𑀮𑀲𑁆𑀲 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀜𑁆𑀜𑁂𑀳𑀺 𑀩𑀼𑀤𑁆𑀥𑁂𑀳𑀺 𑀅𑀥𑀺𑀓𑀢𑀭𑀸 𑀲𑀭𑀻𑀭𑀧𑁆𑀧𑀪𑀸 𑀅𑀳𑁄𑀲𑀺. 𑀬𑀣𑀸 𑀧𑀦 𑀅𑀜𑁆𑀜𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀸 𑀯𑀸 𑀩𑁆𑀬𑀸𑀫𑀧𑁆𑀧𑀫𑀸𑀡𑀸 𑀯𑀸 𑀲𑀭𑀻𑀭𑀧𑁆𑀧𑀪𑀸 𑀅𑀳𑁄𑀲𑀺, 𑀦 𑀏𑀯𑀁 𑀢𑀲𑁆𑀲. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀓𑀸𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀭𑀼𑀕𑀺𑀭𑀺𑀖𑀭𑀧𑀸𑀓𑀸𑀭𑀖𑀝𑀓𑀯𑀸𑀝𑀸𑀤𑀬𑁄 𑀲𑀼𑀯𑀡𑁆𑀡𑀧𑀝𑁆𑀝𑀧𑀭𑀺𑀬𑁄𑀦𑀤𑁆𑀥𑀸 𑀯𑀺𑀬 𑀅𑀳𑁂𑀲𑀼𑀁. 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀆𑀬𑀼 𑀢𑀲𑁆𑀲 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀘𑀦𑁆𑀤𑀲𑀽𑀭𑀺𑀬𑀢𑀸𑀭𑀓𑀸𑀤𑀻𑀦𑀁 𑀧𑀪𑀸 𑀦𑀢𑁆𑀣𑀺. 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑁂𑀦 𑀯𑀺𑀬 𑀲𑀢𑁆𑀢𑀸 𑀦𑀺𑀘𑁆𑀘𑀁 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀲𑀩𑁆𑀩𑀓𑀫𑁆𑀫𑀸𑀦𑀺 ¶ 𑀓𑀭𑁄𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀲𑀸𑀬𑀁 𑀧𑀼𑀧𑁆𑀨𑀦𑀓𑀓𑀼𑀲𑀼𑀫𑀸𑀦𑀁 𑀧𑀸𑀢𑁄 𑀘 𑀭𑀯𑀦𑀓𑀲𑀓𑀼𑀡𑀸𑀤𑀻𑀦𑀜𑁆𑀘 𑀯𑀲𑁂𑀦 𑀮𑁄𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁 𑀲𑀮𑁆𑀮𑀓𑁆𑀔𑁂𑀲𑀺.

𑀓𑀺𑀁 𑀧𑀦 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀢𑁂𑀧𑀺 𑀳𑀺 𑀆𑀓𑀗𑁆𑀔𑀫𑀸𑀦𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀢𑀢𑁄 𑀯𑀸 𑀪𑀺𑀬𑁆𑀬𑁄 𑀆𑀪𑀸𑀬 𑀨𑀭𑁂𑀬𑁆𑀬𑀼𑀁. 𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀅𑀜𑁆𑀜𑁂𑀲𑀁 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀫𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀲𑀧𑀼𑀢𑁆𑀢𑀤𑀸𑀭𑁄 𑀯𑀗𑁆𑀓𑀧𑀩𑁆𑀩𑀢𑀲𑀤𑀺𑀲𑁂 𑀧𑀩𑁆𑀩𑀢𑁂 𑀯𑀲𑀺. 𑀅𑀣𑁂𑀓𑁄 𑀲𑀩𑁆𑀩𑀚𑀦𑀯𑀺𑀳𑁂𑀞𑀓𑁄 𑀔𑀭𑀤𑀸𑀞𑀺𑀓𑁄 𑀦𑀸𑀫 𑀫𑀦𑀼𑀲𑁆𑀲𑀪𑀓𑁆𑀔𑁄 𑀫𑀳𑁂𑀲𑀓𑁆𑀔𑁄 𑀬𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑁆𑀯𑁂 𑀤𑀸𑀭𑀓𑁂 𑀬𑀸𑀘𑀺. 𑀫𑀳𑀸𑀲𑀢𑁆𑀢𑁄 ‘‘𑀤𑀤𑀸𑀫𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀓𑁂’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀓𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀦𑁆𑀢𑁄 𑀤𑁆𑀯𑁂 𑀤𑀸𑀭𑀓𑁂 𑀅𑀤𑀸𑀲𑀺. 𑀅𑀣 𑀔𑁄 𑀬𑀓𑁆𑀔𑁄 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀧𑀼𑀭𑀺𑀲𑀲𑁆𑀲 𑀢𑀁 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀁 𑀧𑀳𑀸𑀬 𑀅𑀦𑀮𑀚𑀸𑀮𑀧𑀺𑀗𑁆𑀕𑀮𑀯𑀺𑀭𑀽𑀧𑀦𑀬𑀦𑁄 𑀯𑀺𑀲𑀫𑀯𑀺𑀭𑀽𑀧𑀓𑀼𑀝𑀺𑀮𑀪𑀻𑀫𑀤𑀸𑀞𑁄 𑀘𑀺𑀧𑀺𑀝𑀓𑀯𑀺𑀭𑀽𑀧𑀦𑀸𑀲𑁄 𑀓𑀧𑀺𑀮𑀨𑀭𑀼𑀲𑀤𑀻𑀖𑀓𑁂𑀲𑁄 𑀦𑀯𑀤𑀟𑁆𑀠𑀢𑀸𑀮𑀓𑁆𑀔𑀦𑁆𑀥𑀲𑀤𑀺𑀲𑀓𑀸𑀬𑁄 𑀳𑀼𑀢𑁆𑀯𑀸 𑀢𑁂 𑀤𑀸𑀭𑀓𑁂 𑀫𑀼𑀴𑀸𑀮𑀓𑀮𑀸𑀧𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀔𑀸𑀤𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀫𑀼𑀔𑁂 𑀯𑀺𑀯𑀝𑀫𑀢𑁆𑀢𑁂 𑀅𑀕𑁆𑀕𑀺𑀚𑀸𑀮𑀁 𑀯𑀺𑀬 𑀮𑁄𑀳𑀺𑀢𑀥𑀸𑀭𑀁 𑀉𑀕𑁆𑀕𑀺𑀭𑀦𑁆𑀢𑀁 𑀢𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸𑀧𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀺. ‘‘𑀲𑀼𑀤𑀺𑀦𑁆𑀦𑀁 𑀯𑀢 𑀫𑁂 𑀤𑀸𑀦’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀧𑀦𑀲𑁆𑀲 𑀲𑀭𑀻𑀭𑁂 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀲𑁄 ‘‘𑀇𑀫𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀢𑀲𑁆𑀲 𑀢𑀁 𑀧𑀢𑁆𑀣𑀦𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀨𑀭𑀺𑀁𑀲𑀼.

𑀅𑀧𑀭𑀫𑁆𑀧𑀺 𑀧𑀼𑀩𑁆𑀩𑀘𑀭𑀺𑀬𑀁 𑀢𑀲𑁆𑀲 𑀅𑀢𑁆𑀣𑀺. 𑀅𑀬𑀁 𑀓𑀺𑀭 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀇𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀫 ¶ 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀡𑁆𑀟𑀤𑀻𑀧𑀺𑀓𑀸𑀯𑁂𑀞𑀦𑀦𑀺𑀬𑀸𑀫𑁂𑀦 𑀲𑀓𑀮𑀲𑀭𑀻𑀭𑀁 ¶ 𑀯𑁂𑀞𑀸𑀧𑁂𑀢𑁆𑀯𑀸 𑀭𑀢𑀦𑀫𑀢𑁆𑀢𑀫𑀓𑀼𑀴𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀼𑀕𑀦𑁆𑀥𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀲𑁆𑀲𑀯𑀝𑁆𑀝𑀺𑀬𑁄 𑀚𑀸𑀮𑁂𑀢𑁆𑀯𑀸 𑀢𑀁 𑀲𑀻𑀲𑁂𑀦𑀸𑀤𑀸𑀬 𑀲𑀓𑀮𑀲𑀭𑀻𑀭𑀁 𑀚𑀸𑀮𑀸𑀧𑁂𑀢𑁆𑀯𑀸 𑀚𑀺𑀦𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀲𑀓𑀮𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀏𑀯𑀁 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀸𑀬𑀫𑀦𑁆𑀢𑀲𑁆𑀲 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀲𑀼𑀫𑀁 𑀦 𑀕𑀡𑁆𑀳𑀺. 𑀧𑀤𑀼𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑀓𑀸𑀮𑁄 ¶ 𑀯𑀺𑀬 𑀅𑀳𑁄𑀲𑀺. 𑀥𑀫𑁆𑀫𑁄 𑀳𑀺 𑀦𑀸𑀫𑁂𑀲 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀭𑀓𑁆𑀔𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫);

𑀇𑀫𑀲𑁆𑀲𑀸𑀧𑀺 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀲𑁆𑀲 𑀲𑀭𑀻𑀭𑁄𑀪𑀸𑀲𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀧𑀭𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀦𑀸𑀬𑀓𑁄;

𑀢𑀫𑀁 𑀮𑁄𑀓𑁂 𑀦𑀺𑀳𑀦𑁆𑀢𑁆𑀯𑀸𑀦, 𑀥𑀫𑁆𑀫𑁄𑀓𑁆𑀓𑀫𑀪𑀺𑀥𑀸𑀭𑀬𑀺.

𑁨.

‘‘𑀅𑀢𑀼𑀮𑀸𑀲𑀺 𑀧𑀪𑀸 𑀢𑀲𑁆𑀲, 𑀚𑀺𑀦𑁂𑀳𑀜𑁆𑀜𑁂𑀳𑀺 𑀉𑀢𑁆𑀢𑀭𑀺𑀁;

𑀘𑀦𑁆𑀤𑀲𑀽𑀭𑀺𑀬𑀧𑁆𑀧𑀪𑀁 𑀳𑀦𑁆𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻’’𑀢𑀺.

𑀢𑀢𑁆𑀣 𑀢𑀫𑀦𑁆𑀢𑀺 𑀮𑁄𑀓𑀦𑁆𑀥𑀓𑀸𑀭𑀜𑁆𑀘 𑀳𑀤𑀬𑀢𑀫𑀜𑁆𑀘. 𑀦𑀺𑀳𑀦𑁆𑀢𑁆𑀯𑀸𑀦𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀥𑀫𑁆𑀫𑁄𑀓𑁆𑀓𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀧𑀦 𑀉𑀓𑁆𑀓𑀸-𑀲𑀤𑁆𑀤𑁄 𑀲𑀼𑀯𑀡𑁆𑀡𑀓𑀸𑀭𑀫𑀽𑀲𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸𑀳𑀺 ‘‘𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁬𑁦) 𑀆𑀕𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸 ‘‘𑀉𑀓𑁆𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀸𑀦𑀁 𑀅𑀗𑁆𑀕𑀸𑀭𑀓𑀧𑀮𑁆𑀮𑀁. ‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀻’’𑀢𑀺 (𑀚𑀸. 𑁨.𑁨𑁨.𑁬𑁪𑁯) 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀼𑀤𑁆𑀥𑀦𑀁. ‘‘𑀏𑀯𑀁𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁪, 𑁨𑁦𑁮) 𑀆𑀕𑀢𑀝𑁆𑀞𑀸𑀦𑁂 𑀯𑀸𑀬𑀼𑀯𑁂𑀕𑁄 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀽’’𑀢𑀺 (𑀤𑀻. 𑀦𑀺. 𑁧.𑁧𑁫𑁯) 𑀆𑀕𑀢𑀝𑁆𑀞𑀸𑀦𑁂 𑀤𑀻𑀧𑀺𑀓𑀸 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀥𑀸𑀧𑀺 𑀤𑀻𑀧𑀺𑀓𑀸 𑀉𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑁂𑀢𑀸 (𑀫. 𑀦𑀺. 𑀅𑀝𑁆𑀞. 𑁧.𑁭𑁬 𑀆𑀤𑀬𑁄). 𑀢𑀲𑁆𑀫𑀸 𑀇𑀥 𑀥𑀫𑁆𑀫𑀫𑀬𑀁 𑀉𑀓𑁆𑀓𑀁 𑀅𑀪𑀺𑀥𑀸𑀭𑀬𑀺, 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀸𑀪𑀺𑀪𑀽𑀢𑀲𑁆𑀲 𑀮𑁄𑀓𑀲𑁆𑀲 𑀥𑀫𑁆𑀫𑀫𑀬𑀁 𑀉𑀓𑁆𑀓𑀁 𑀥𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑀅𑀢𑀼𑀮𑀸𑀲𑀻𑀢𑀺 ¶ ¶ 𑀅𑀢𑀼𑀮𑁆𑀬𑀸 𑀆𑀲𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀅𑀜𑁆𑀜𑁂𑀳𑀺 𑀩𑀼𑀤𑁆𑀥𑁂𑀳𑀺 𑀅𑀲𑀤𑀺𑀲𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀚𑀺𑀦𑁂𑀳𑀜𑁆𑀜𑁂𑀳𑀻𑀢𑀺 𑀚𑀺𑀦𑁂𑀳𑀺 𑀅𑀜𑁆𑀜𑁂𑀳𑀺 ¶ . 𑀘𑀦𑁆𑀤𑀲𑀽𑀭𑀺𑀬𑀧𑁆𑀧𑀪𑀁 𑀳𑀦𑁆𑀢𑁆𑀯𑀸𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀧𑀪𑀁 𑀅𑀪𑀺𑀳𑀦𑁆𑀢𑁆𑀯𑀸. 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀮𑁄𑀓𑀁 𑀯𑀺𑀦𑀸 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄.

𑀫𑀗𑁆𑀕𑀮𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀥𑀺𑀕𑀢𑀩𑁄𑀥𑀺𑀜𑀸𑀡𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀫𑀳𑀸𑀯. 𑁧𑁦) 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀺𑀲𑁆𑀲𑁄 𑀓𑁄𑀝𑀺𑀬𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀫𑀁 𑀧𑀩𑁆𑀩𑀚𑀦𑁆𑀢𑀁 𑀅𑀦𑀼𑀧𑀩𑁆𑀩𑀚𑀺𑀢𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀘, 𑀢𑁂 𑀫𑀬𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀯𑀺𑀯𑁂𑀓𑀢𑁆𑀣𑀺𑀓𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀸 𑀲𑀺𑀭𑀺𑀯𑀟𑁆𑀠𑀦𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀲𑀺𑀭𑀺𑀯𑀦𑀕𑀳𑀦𑀁 𑀕𑀦𑁆𑀢𑁆𑀯𑀸 𑀯𑀺𑀳𑀭𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀢𑁂𑀲𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀳𑀁𑀲𑀭𑀸𑀚𑀸 𑀯𑀺𑀬 𑀕𑀕𑀦𑀢𑀮𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀲𑀺𑀭𑀺𑀯𑀦𑀕𑀳𑀦𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀢𑁂 𑀘 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀲𑀩𑁆𑀩𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀢𑀢𑁄 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀧𑀓𑀸𑀲𑁂𑀲𑀺, 𑀘𑀢𑀼𑀭𑁄 𑀲𑀘𑁆𑀘𑀯𑀭𑀼𑀢𑁆𑀢𑀫𑁂;

𑀢𑁂 𑀢𑁂 𑀲𑀘𑁆𑀘𑀭𑀲𑀁 𑀧𑀻𑀢𑁆𑀯𑀸, 𑀯𑀺𑀦𑁄𑀤𑁂𑀦𑁆𑀢𑀺 𑀫𑀳𑀸𑀢𑀫𑀁.

𑁪.

‘‘𑀧𑀢𑁆𑀯𑀸𑀦 𑀩𑁄𑀥𑀺𑀫𑀢𑀼𑀮𑀁, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀘𑀢𑀼𑀭𑁄𑀢𑀺 𑀘𑀢𑁆𑀢𑀸𑀭𑀺. 𑀲𑀘𑁆𑀘𑀯𑀭𑀼𑀢𑁆𑀢𑀫𑁂𑀢𑀺 𑀲𑀘𑁆𑀘𑀸𑀦𑀺 𑀘 𑀯𑀭𑀸𑀦𑀺 𑀘 𑀲𑀘𑁆𑀘𑀯𑀭𑀸𑀦𑀺, 𑀲𑀘𑁆𑀘𑀸𑀦𑀺 𑀉𑀢𑁆𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀘𑀢𑁆𑀢𑀸𑀭𑁄 𑀲𑀘𑁆𑀘𑀯𑀭𑀼𑀢𑁆𑀢𑀫𑁂’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀲𑀘𑁆𑀘𑀯𑀭𑀸𑀦𑀺 𑀉𑀢𑁆𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂 𑀢𑁂𑀢𑀺 𑀢𑁂 𑀢𑁂 𑀤𑁂𑀯𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀯𑀺𑀦𑀻𑀢𑀸. 𑀲𑀘𑁆𑀘𑀭𑀲𑀦𑁆𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀫𑀢𑀭𑀲𑀁 𑀧𑀺𑀯𑀺𑀢𑁆𑀯𑀸. 𑀯𑀺𑀦𑁄𑀤𑁂𑀦𑁆𑀢𑀺 𑀫𑀳𑀸𑀢𑀫𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀁 𑀫𑁄𑀳𑀢𑀫𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀢𑁆𑀯𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀩𑁄𑀥𑀺𑀦𑁆𑀢𑀺 𑀏𑀢𑁆𑀣 𑀧𑀦𑀸𑀬𑀁 𑀩𑁄𑀥𑀺-𑀲𑀤𑁆𑀤𑁄 𑁋

‘‘𑀫𑀕𑁆𑀕𑁂 ¶ ¶ 𑀨𑀮𑁂 𑀘 𑀦𑀺𑀩𑁆𑀩𑀸𑀦𑁂, 𑀭𑀼𑀓𑁆𑀔𑁂 𑀧𑀜𑁆𑀜𑀢𑁆𑀢𑀺𑀬𑀁 𑀢𑀣𑀸;

𑀲𑀩𑁆𑀩𑀜𑁆𑀜𑀼𑀢𑁂 𑀘 𑀜𑀸𑀡𑀲𑁆𑀫𑀺𑀁, 𑀩𑁄𑀥𑀺𑀲𑀤𑁆𑀤𑁄 𑀧𑀦𑀸𑀕𑀢𑁄’’.

𑀢𑀣𑀸 ¶ 𑀳𑀺 𑀧𑀦𑁂𑀲 𑁋 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀫𑀕𑁆𑀕𑁂 𑀆𑀕𑀢𑁄. ‘‘𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁧.𑁩𑁩; 𑁩.𑁩𑁨𑁩; 𑀫𑀳𑀸𑀯. 𑁧𑁩; 𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁨.𑁩𑁦) 𑀏𑀢𑁆𑀣 𑀨𑀮𑁂. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂. ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧) 𑀏𑀢𑁆𑀣 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑁂. ‘‘𑀩𑁄𑀥𑀺 𑀔𑁄 𑀭𑀸𑀚𑀓𑀼𑀫𑀸𑀭𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺 𑀏𑀢𑁆𑀣 (𑀫. 𑀦𑀺. 𑁨.𑁩𑁨𑁪; 𑀘𑀽𑀴𑀯. 𑁨𑁬𑁮) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂. 𑀇𑀥𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀤𑀝𑁆𑀞𑀩𑁆𑀩𑁄. 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀧𑀺 𑀯𑀝𑁆𑀝𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁩; 𑀉𑀤𑀸. 𑀅𑀝𑁆𑀞. 𑁧; 𑀧𑀸𑀭𑀸. 𑀅𑀝𑁆𑀞. 𑁧.𑁧𑁧; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀅𑀢𑀼𑀮𑀦𑁆𑀢𑀺 𑀢𑀼𑀮𑀭𑀳𑀺𑀢𑀁 𑀧𑀫𑀸𑀡𑀸𑀢𑀻𑀢𑀁, 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀬𑀤𑀸 𑀧𑀦 𑀘𑀺𑀢𑁆𑀢𑀁 𑀦𑀸𑀫 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀘𑀫𑁆𑀧𑀓𑀭𑀼𑀓𑁆𑀔𑀫𑀽𑀮𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀯𑀺𑀬 𑀢𑀺𑀢𑁆𑀣𑀺𑀬𑀸𑀦𑀁 𑀫𑀸𑀦𑀫𑀤𑁆𑀤𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀲𑀼𑀭𑀸𑀲𑀼𑀭𑀬𑀼𑀯𑀢𑀺𑀭𑀢𑀺𑀲𑀫𑁆𑀪𑀯𑀦𑁂 𑀭𑀼𑀘𑀺𑀭𑀦𑀯𑀓𑀦𑀓𑀭𑀚𑀢𑀫𑀬𑀯𑀭𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀭𑀼𑀓𑁆𑀔𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀓𑀣𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄. 𑀬𑀤𑀸 𑀧𑀦 𑀲𑀼𑀦𑀦𑁆𑀤𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀲𑀼𑀭𑀪𑀺𑀦𑀕𑀭𑁂 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁄 𑀳𑀼𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀧𑀝𑀺𑀮𑀪𑀺. 𑀢𑀁 𑀓𑀺𑀭 𑀫𑀗𑁆𑀕𑀮𑀤𑀲𑀩𑀮𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑁂 𑀘𑀓𑁆𑀓𑀭𑀢𑀦𑀁 𑀞𑀸𑀦𑀸 𑀑𑀲𑀓𑁆𑀓𑀺𑀢𑀁 𑀤𑀺𑀲𑁆𑀯𑀸 𑀲𑀼𑀦𑀦𑁆𑀤𑁄 𑀭𑀸𑀚𑀸 𑀯𑀺𑀕𑀢𑀸𑀦𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁂 𑀧𑀭𑀺𑀧𑀼𑀘𑁆𑀙𑀺 𑁋 ‘‘𑀇𑀫𑀁 𑀘𑀓𑁆𑀓𑀭𑀢𑀦𑀁 𑀫𑀫 𑀓𑀼𑀲𑀮𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀓𑀲𑁆𑀫𑀸 𑀞𑀸𑀦𑀸 𑀑𑀲𑀓𑁆𑀓𑀺𑀢’’𑀦𑁆𑀢𑀺? 𑀢𑀢𑁄 𑀢𑁂 𑀢𑀲𑁆𑀲 𑀭𑀜𑁆𑀜𑁄 𑀑𑀲𑀓𑁆𑀓𑀦𑀓𑀸𑀭𑀡𑀁 𑀩𑁆𑀬𑀸𑀓𑀭𑀺𑀁𑀲𑀼. ‘‘𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀯𑀸 𑀩𑀼𑀤𑁆𑀥𑀧𑀸𑀢𑀼𑀪𑀸𑀯𑁂𑀦 𑀯𑀸 𑀘𑀓𑁆𑀓𑀭𑀢𑀦𑀁 𑀞𑀸𑀦𑀸 𑀑𑀲𑀓𑁆𑀓𑀢𑀻𑀢𑀺 𑀯𑀢𑁆𑀯𑀸 𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀆𑀬𑀼𑀓𑁆𑀔𑀬𑁄 𑀦𑀢𑁆𑀣𑀺, 𑀅𑀢𑀺𑀤𑀻𑀖𑀸𑀬𑀼𑀓𑁄 𑀢𑁆𑀯𑀁, 𑀫𑀗𑁆𑀕𑀮𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑁂𑀦 𑀢𑁂 𑀘𑀓𑁆𑀓𑀭𑀢𑀦𑀁 𑀑𑀲𑀓𑁆𑀓𑀺𑀢’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀲𑀧𑀭𑀺𑀚𑀦𑁄 ¶ 𑀢𑀁 𑀘𑀓𑁆𑀓𑀭𑀢𑀦𑀁 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀆𑀬𑀸𑀘𑀺 𑁋 ‘‘𑀬𑀸𑀯𑀸𑀳𑀁 𑀢𑀯𑀸𑀦𑀼𑀪𑀸𑀯𑁂𑀦 𑀫𑀗𑁆𑀕𑀮𑀤𑀲𑀩𑀮𑀁 𑀲𑀓𑁆𑀓𑀭𑀺𑀲𑁆𑀲𑀸𑀫𑀺, 𑀢𑀸𑀯 𑀢𑁆𑀯𑀁 𑀫𑀸 𑀅𑀦𑁆𑀢𑀭𑀥𑀸𑀬𑀲𑁆𑀲𑀽’’𑀢𑀺. 𑀅𑀣 𑀦𑀁 𑀘𑀓𑁆𑀓𑀭𑀢𑀦𑀁 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀢𑀢𑁄 ¶ 𑀲𑀫𑀼𑀧𑀸𑀕𑀢𑀸𑀦𑀦𑁆𑀤𑁄 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀙𑀢𑁆𑀢𑀺𑀁𑀲𑀬𑁄𑀚𑀦𑀧𑀭𑀺𑀫𑀡𑁆𑀟𑀮𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀲𑀩𑁆𑀩𑀮𑁄𑀓𑀫𑀗𑁆𑀕𑀮𑀁 𑀫𑀗𑁆𑀕𑀮𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀲𑀸𑀯𑀓𑀲𑀗𑁆𑀖𑀁 𑀲𑀢𑁆𑀣𑀸𑀭𑀁 𑀫𑀳𑀸𑀤𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀅𑀭𑀳𑀦𑁆𑀢𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀓𑀸𑀲𑀺𑀓𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀲𑀓𑀮𑀮𑁄𑀓𑀯𑀺𑀫𑁆𑀳𑀬𑀓𑀭𑀁 𑀪𑀕𑀯𑀢𑁄 𑀧𑀽𑀚𑀁 𑀓𑀢𑁆𑀯𑀸 𑀫𑀗𑁆𑀕𑀮𑀁 𑀲𑀩𑁆𑀩𑀮𑁄𑀓𑀦𑀸𑀣𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 ¶ 𑀯𑀺𑀫𑀮𑀓𑀫𑀮𑀫𑀓𑀼𑀴𑀲𑀫𑀫𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀧𑀼𑀢𑁆𑀢𑁄𑀧𑀺 𑀢𑀲𑁆𑀲 𑀅𑀦𑀼𑀭𑀸𑀚𑀓𑀼𑀫𑀸𑀭𑁄 𑀦𑀸𑀫 𑀢𑀣𑁂𑀯 𑀦𑀺𑀲𑀻𑀤𑀺.

𑀢𑀤𑀸 𑀲𑀼𑀦𑀦𑁆𑀤𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀧𑁆𑀧𑀫𑀼𑀔𑀸𑀦𑀁 𑀢𑁂𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀻 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀲𑀢𑁆𑀣𑀸 𑀢𑁂𑀲𑀁 𑀧𑀼𑀩𑁆𑀩𑀘𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀘𑀓𑁆𑀓𑀚𑀸𑀮𑀲𑀫𑀮𑀗𑁆𑀓𑀢𑀁 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑁋 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀆𑀳. 𑀲𑀩𑁆𑀩𑁂 𑀢𑀗𑁆𑀔𑀡𑀁𑀬𑁂𑀯 𑀤𑀼𑀯𑀗𑁆𑀕𑀼𑀮𑀓𑁂𑀲𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀲𑀼𑀭𑀺𑀦𑁆𑀤𑀤𑁂𑀯𑀪𑀯𑀦𑁂, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬.

‘‘𑀬𑀤𑀸 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀻, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺;

𑀢𑀤𑀸 𑀆𑀳𑀦𑀺 𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑀪𑁂𑀭𑀺𑀁 𑀯𑀭𑀼𑀢𑁆𑀢𑀫𑀁.

𑁭.

‘‘𑀲𑀼𑀦𑀦𑁆𑀤𑀲𑁆𑀲𑀸𑀦𑀼𑀘𑀭𑀸 𑀚𑀦𑀢𑀸, 𑀢𑀤𑀸𑀲𑀼𑀁 𑀦𑀯𑀼𑀢𑀺𑀓𑁄𑀝𑀺𑀬𑁄;

𑀲𑀩𑁆𑀩𑁂𑀧𑀺 𑀢𑁂 𑀦𑀺𑀭𑀯𑀲𑁂𑀲𑀸, 𑀅𑀳𑁂𑀲𑀼𑀁 𑀏𑀳𑀺𑀪𑀺𑀓𑁆𑀔𑀼𑀓𑀸’’𑀢𑀺.

𑀢𑀢𑁆𑀣 𑀲𑀼𑀭𑀺𑀦𑁆𑀤𑀤𑁂𑀯𑀪𑀯𑀦𑁂𑀢𑀺 𑀧𑀼𑀦 𑀤𑁂𑀯𑀺𑀦𑁆𑀤𑀪𑀯𑀦𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀅𑀪𑀺𑀥𑀫𑁆𑀫𑀁. 𑀆𑀳𑀦𑀻𑀢𑀺 𑀅𑀪𑀺𑀳𑀦𑀺. 𑀯𑀭𑀼𑀢𑁆𑀢𑀫𑀦𑁆𑀢𑀺 𑀯𑀭𑁄 𑀪𑀕𑀯𑀸 𑀉𑀢𑁆𑀢𑀫𑀁 𑀥𑀫𑁆𑀫𑀪𑁂𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀘𑀭𑀸𑀢𑀺 𑀦𑀺𑀩𑀤𑁆𑀥𑀘𑀭𑀸 𑀲𑁂𑀯𑀓𑀸. 𑀆𑀲𑀼𑀦𑁆𑀢𑀺 𑀅𑀳𑁂𑀲𑀼𑀁. ‘‘𑀢𑀤𑀸𑀲𑀺 𑀦𑀯𑀼𑀢𑀺𑀓𑁄𑀝𑀺𑀬𑁄’’𑀢𑀺𑀧𑀺 ¶ 𑀧𑀸𑀞𑁄. 𑀢𑀲𑁆𑀲 𑀚𑀦𑀢𑀸 𑀆𑀲𑀺, 𑀲𑀸 𑀚𑀦𑀢𑀸 𑀓𑀺𑀢𑁆𑀢𑀓𑀸𑀢𑀺 𑀘𑁂, 𑀦𑀯𑀼𑀢𑀺𑀓𑁄𑀝𑀺𑀬𑁄𑀢𑀺 𑀅𑀢𑁆𑀣𑁄.

𑀅𑀣 𑀫𑀗𑁆𑀕𑀮𑁂 𑀓𑀺𑀭 𑀮𑁄𑀓𑀦𑀸𑀣𑁂 𑀫𑁂𑀔𑀮𑁂 𑀧𑀼𑀭𑁂 𑀯𑀺𑀳𑀭𑀦𑁆𑀢𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑁂 𑀲𑀼𑀤𑁂𑀯𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀫𑀸𑀡𑀯𑀓𑀸 𑀫𑀸𑀡𑀯𑀓𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀁𑀲𑀼 ¶ . 𑀫𑀸𑀖𑀧𑀼𑀡𑁆𑀡𑀫𑀸𑀬 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀲𑀧𑀭𑀺𑀯𑀸𑀭𑁂𑀲𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀲𑀼 𑀲𑀢𑁆𑀣𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀕𑀡𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀉𑀢𑁆𑀢𑀭𑀸𑀭𑀸𑀫𑁂 𑀦𑀸𑀫 𑀅𑀦𑀼𑀢𑁆𑀢𑀭𑁂 𑀜𑀸𑀢𑀺𑀲𑀫𑀸𑀕𑀫𑁂 𑀧𑀩𑁆𑀩𑀚𑀺𑀢𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀫𑀸𑀕𑀫𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀲𑀼𑀦𑀦𑁆𑀤𑀘𑀓𑁆𑀓𑀯𑀢𑁆𑀢𑀺𑀪𑀺𑀓𑁆𑀔𑀼𑀕𑀡𑀲𑀫𑀸𑀕𑀫𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀲𑀦𑁆𑀦𑀺𑀧𑀸𑀢𑀸 ¶ 𑀢𑀬𑁄 𑀆𑀲𑀼𑀁, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁯.

‘‘𑀤𑀼𑀢𑀺𑀬𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀺𑀦𑀁;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀼𑀭𑀼𑀘𑀺𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀲𑀼𑀭𑀼𑀘𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄 𑀅𑀳𑁄𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀻𑀤𑀺𑀢𑁆𑀯𑀸 𑀲𑀭𑀡𑀁 𑀕𑀦𑁆𑀢𑁆𑀯𑀸 𑁋 ‘‘𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀲𑀲𑀸𑀯𑀓𑀲𑀗𑁆𑀖𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀲𑀺. 𑀲𑁄 𑀪𑀕𑀯𑀢𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑁂 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁄 𑁋 ‘‘𑀓𑀺𑀢𑁆𑀢𑀓𑀸 𑀧𑀦 𑀯𑁄, 𑀪𑀦𑁆𑀢𑁂, 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽’’𑀢𑀺 𑀆𑀳. 𑀢𑀤𑀸 𑀧𑀞𑀫𑀲𑀦𑁆𑀦𑀺𑀧𑀸𑀢𑁄𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑁄𑀝𑀺𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀬𑀤𑀺 𑀏𑀯𑀁, 𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺𑀧𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺.

𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀪𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 ¶ 𑀧𑀦 𑀓𑀣𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀓𑀺𑀭 𑀲𑀸 𑀘𑀺𑀦𑁆𑀢𑀦𑀸 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁂 𑀫𑁂𑀭𑀼𑀫𑀢𑁆𑀣𑀓𑁂 𑀞𑀺𑀢𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀤𑀲𑀲𑀢𑀦𑀬𑀦𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀲𑁆𑀲 𑀉𑀡𑁆𑀳𑀸𑀓𑀸𑀭𑀁 𑀚𑀦𑁂𑀲𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀲𑀦𑀲𑁆𑀲 𑀉𑀡𑁆𑀳𑀪𑀸𑀯𑀁 𑀤𑀺𑀲𑁆𑀯𑀸 𑁋 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀲𑀫𑀼𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀫𑀦𑀼𑀲𑁆𑀲𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀫𑀳𑀸𑀲𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑀻𑀤𑀦𑀢𑁆𑀣𑀸𑀬 𑀘𑀺𑀦𑁆𑀢𑁂𑀲𑀺, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 ¶ 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀟𑁆𑀠𑀓𑀻𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀳𑀢𑁆𑀣𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀲𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀲𑁆𑀲𑀘𑀺 𑀪𑀢𑀺𑀬𑀸 𑀓𑀢𑁆𑀢𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀆𑀳.

𑀫𑀳𑀸𑀲𑀢𑁆𑀢𑁄 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀫𑀫 𑀅𑀚𑀸𑀦𑀦𑀲𑀺𑀧𑁆𑀧𑀁 𑀦𑀸𑀫 𑀦𑀢𑁆𑀣𑀺, 𑀬𑁄 𑀬𑁄 𑀬𑀁 𑀬𑀁 𑀇𑀘𑁆𑀙𑀢𑀺 𑀫𑀡𑁆𑀟𑀧𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀦𑀺𑀯𑁂𑀲𑀦𑀸𑀤𑀺𑀓𑀁, 𑀢𑀲𑁆𑀲 𑀢𑀲𑁆𑀲 𑀢𑀁 𑀢𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄𑀫𑁆𑀳𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑁆𑀳𑀁 𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺. ‘‘𑀓𑀺𑀁, 𑀅𑀬𑁆𑀬𑀸’’𑀢𑀺? ‘‘𑀲𑁆𑀯𑀸𑀢𑀦𑀸𑀬 𑀫𑀬𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀸, 𑀢𑁂𑀲𑀁 𑀦𑀺𑀲𑀻𑀤𑀦𑀫𑀡𑁆𑀟𑀧𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀅𑀳𑀁 𑀦𑀸𑀫 𑀓𑀭𑁂𑀬𑁆𑀬𑀁, 𑀲𑀘𑁂 𑀫𑁂 𑀪𑀢𑀺𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀬𑀤𑀺 𑀏𑀯𑀁, 𑀲𑀸𑀥𑀼, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀏𑀓𑀁 𑀧𑀤𑁂𑀲𑀁 𑀑𑀮𑁄𑀓𑁂𑀲𑀺. 𑀲𑁄 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀬 𑀲𑀫𑀢𑀮𑁄 𑀧𑀭𑀫𑀭𑀫𑀡𑀻𑀬𑁄 𑀅𑀳𑁄𑀲𑀺. 𑀧𑀼𑀦 𑀲𑁄 ‘‘𑀏𑀢𑁆𑀢𑀓𑁂 𑀞𑀸𑀦𑁂 𑀲𑀢𑁆𑀢𑀭𑀢𑀦𑀫𑀬𑁄 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑁄 𑀫𑀡𑁆𑀟𑀧𑁄 𑀉𑀝𑁆𑀞𑀳𑀢𑀽’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀢𑀢𑁄 𑀢𑀸𑀯𑀤𑁂𑀯 𑀫𑀡𑁆𑀟𑀧𑀲𑀤𑀺𑀲𑁄 𑀧𑀣𑀯𑀺𑀢𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀡𑁆𑀟𑀧𑁄 𑀉𑀝𑁆𑀞𑀳𑀺. 𑀢𑀲𑁆𑀲 𑀲𑁄𑀯𑀡𑁆𑀡𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀭𑀚𑀢𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁, 𑀭𑀚𑀢𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑁄𑀯𑀡𑁆𑀡𑀫𑀬𑀸 𑀖𑀝𑀓𑀸, 𑀫𑀡𑀺𑀢𑁆𑀣𑀫𑁆𑀪𑁂𑀲𑀼 𑀧𑀯𑀸𑀴𑀫𑀬𑀸 𑀖𑀝𑀓𑀸, 𑀧𑀯𑀸𑀴𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀫𑀡𑀺𑀫𑀬𑀸 𑀖𑀝𑀓𑀸, 𑀲𑀢𑁆𑀢𑀭𑀢𑀦𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑀢𑁆𑀢𑀭𑀢𑀦𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁.

𑀢𑀢𑁄 𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸𑀧𑀺 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸 𑀑𑀮𑀫𑁆𑀩𑀢𑀽’’𑀢𑀺 𑀑𑀮𑁄𑀓𑁂𑀲𑀺, 𑀲𑀳 𑀑𑀮𑁄𑀓𑀦𑁂𑀦 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸 𑀑𑀮𑀫𑁆𑀩𑀺, 𑀬𑀲𑁆𑀲 𑀫𑀦𑁆𑀤𑀯𑀸𑀢𑁂𑀭𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀲𑁆𑀲𑁂𑀯 𑀢𑀼𑀭𑀺𑀬𑀲𑁆𑀲 𑀧𑀭𑀫𑀫𑀦𑁄𑀭𑀫𑁄 𑀫𑀥𑀼𑀭𑁄 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺, 𑀤𑀺𑀩𑁆𑀩𑀲𑀗𑁆𑀕𑀻𑀢𑀺𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. ‘‘𑀅𑀦𑁆𑀢𑀭𑀦𑁆𑀢𑀭𑀸 𑀤𑀺𑀩𑁆𑀩𑀕𑀦𑁆𑀥𑀤𑀸𑀫𑀧𑀼𑀧𑁆𑀨𑀤𑀸𑀫𑀧𑀢𑁆𑀢𑀤𑀸𑀫𑀲𑀢𑁆𑀢𑀭𑀢𑀦𑀤𑀸𑀫𑀸𑀦𑀺 𑀑𑀮𑀫𑁆𑀩𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀲𑀳 𑀘𑀺𑀦𑁆𑀢𑀸𑀬 𑀤𑀸𑀫𑀸𑀦𑀺 𑀑𑀮𑀫𑁆𑀩𑀺𑀁𑀲𑀼. ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀘 ¶ 𑀓𑀧𑁆𑀧𑀺𑀬𑀫𑀳𑀕𑁆𑀖𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀆𑀥𑀸𑀭𑀓𑀸𑀦𑀺 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀸𑀯𑀤𑁂𑀯 𑀉𑀝𑁆𑀞𑀳𑀺𑀁𑀲𑀼. ‘‘𑀓𑁄𑀡𑁂 𑀓𑁄𑀡𑁂 𑀏𑀓𑁂𑀓𑀸 𑀉𑀤𑀓𑀘𑀸𑀝𑀺 𑀉𑀝𑁆𑀞𑀳𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀗𑁆𑀔𑀡𑀁𑀬𑁂𑀯 𑀉𑀤𑀓𑀘𑀸𑀝𑀺𑀬𑁄 𑀧𑀭𑀫𑀲𑀻𑀢𑀮𑁂𑀦 𑀫𑀥𑀼𑀭𑁂𑀦 𑀲𑀼𑀯𑀺𑀲𑀼𑀤𑁆𑀥𑀲𑀼𑀕𑀦𑁆𑀥𑀓𑀧𑁆𑀧𑀺𑀬𑀯𑀸𑀭𑀺𑀦𑀸 𑀧𑀼𑀡𑁆𑀡𑀸 𑀓𑀤𑀮𑀺𑀧𑀡𑁆𑀡𑀧𑀺𑀳𑀺𑀢𑀫𑀼𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀤𑀲𑀲𑀢𑀦𑀬𑀦𑁄 𑀏𑀢𑁆𑀢𑀓𑀁 𑀫𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀏𑀳𑀺, 𑀅𑀬𑁆𑀬, 𑀢𑀯 𑀫𑀡𑁆𑀟𑀧𑀁 𑀤𑀺𑀲𑁆𑀯𑀸 𑀫𑀬𑁆𑀳𑀁 𑀪𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀫𑀡𑁆𑀟𑀧𑀁 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺.

𑀅𑀣𑀲𑁆𑀲 𑀫𑀡𑁆𑀟𑀧𑀁 𑀑𑀮𑁄𑀓𑀬𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀦𑀸𑀬𑀁 𑀫𑀡𑁆𑀟𑀧𑁄 𑀫𑀦𑀼𑀲𑁆𑀲𑀪𑀽𑀢𑁂𑀦 𑀓𑀢𑁄, 𑀫𑀬𑁆𑀳𑀁 𑀅𑀚𑁆𑀛𑀸𑀲𑀬𑀁 𑀫𑀬𑁆𑀳𑀁 𑀕𑀼𑀡𑀁 𑀆𑀕𑀫𑁆𑀫 𑀅𑀤𑁆𑀥𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀪𑀯𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺, 𑀢𑀢𑁄 𑀲𑀓𑁆𑀓𑁂𑀦 ¶ 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀅𑀬𑀁 𑀫𑀡𑁆𑀟𑀧𑁄 𑀦𑀺𑀫𑁆𑀫𑀺𑀢𑁄’’𑀢𑀺. ‘‘𑀦 𑀔𑁄 𑀧𑀦 𑀫𑁂 𑀬𑀼𑀢𑁆𑀢𑀁 𑀏𑀯𑀭𑀽𑀧𑁂 𑀫𑀡𑁆𑀟𑀧𑁂 𑀏𑀓𑀤𑀺𑀯𑀲𑀁𑀬𑁂𑀯 𑀤𑀸𑀦𑀁 𑀤𑀸𑀢𑀼𑀁, 𑀲𑀢𑁆𑀢𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀩𑀸𑀳𑀺𑀭𑀓𑀤𑀸𑀦𑀁 𑀦𑀸𑀫 𑀢𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑀤𑀬𑀁 𑀢𑀼𑀝𑁆𑀞𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀮𑀗𑁆𑀓𑀢𑀲𑀻𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀺𑀢𑀸𑀦𑀺 𑀯𑀸 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀯𑀸 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀸𑀕𑀁 𑀦𑀺𑀲𑁆𑀲𑀸𑀬 𑀢𑀼𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀲𑀺𑀯𑀺𑀚𑀸𑀢𑀓𑁂 (𑀚𑀸. 𑁧.𑁧𑁫.𑁫𑁨 𑀆𑀤𑀬𑁄) 𑀤𑁂𑀯𑀲𑀺𑀓𑀁 𑀧𑀜𑁆𑀘𑀓𑀳𑀸𑀧𑀡𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂𑀢𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀢𑀁 𑀤𑀸𑀦𑀁 𑀘𑀸𑀕𑀢𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀬𑀤𑀸 𑀧𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀓𑁆𑀔𑀻𑀦𑀺 𑀬𑀸𑀘𑀺, 𑀢𑀤𑀸 𑀲𑁄 𑀢𑀸𑀦𑀺 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀅𑀤𑀸𑀲𑀺, 𑀤𑀤𑀫𑀸𑀦𑀲𑁆𑀲𑁂𑀯 𑀳𑀸𑀲𑁄 𑀉𑀧𑁆𑀧𑀚𑁆𑀚𑀺, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀦𑀸𑀳𑁄𑀲𑀺. 𑀏𑀯𑀁 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑀸𑀳𑀺𑀭𑀤𑀸𑀦𑀁 𑀦𑀺𑀲𑁆𑀲𑀸𑀬 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄𑀧𑀺 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀫𑀬𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀡𑁆𑀟𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁 𑀦𑀸𑀫 𑀤𑀸𑀦𑀁 𑀅𑀤𑀸𑀲𑀺.

𑀏𑀢𑁆𑀣 𑀕𑀯𑀧𑀸𑀦𑀦𑁆𑀢𑀺 ¶ 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀓𑁄𑀮𑀫𑁆𑀩𑁂 𑀔𑀻𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀦𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀖𑀦𑀧𑀸𑀓𑀧𑀓𑁆𑀓𑁂 𑀔𑀻𑀭𑁂 𑀣𑁄𑀓𑀣𑁄𑀓𑁂 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀥𑀼𑀲𑀓𑁆𑀔𑀭𑀘𑀼𑀡𑁆𑀡𑀲𑀧𑁆𑀧𑀻𑀳𑀺 𑀅𑀪𑀺𑀲𑀗𑁆𑀔𑀢𑀪𑁄𑀚𑀦𑀁 𑀯𑀼𑀘𑁆𑀘𑀢𑀺. 𑀇𑀤𑀫𑁂𑀯 𑀘𑀢𑀼𑀫𑀥𑀼𑀭𑀪𑁄𑀚𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀫𑀦𑀼𑀲𑁆𑀲𑀸𑀬𑁂𑀯 𑀧𑀦 𑀧𑀭𑀺𑀯𑀺𑀲𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀤𑁂𑀯𑀸𑀧𑀺 ¶ 𑀏𑀓𑀦𑁆𑀢𑀭𑀺𑀓𑀸 𑀳𑀼𑀢𑁆𑀯𑀸 𑀧𑀭𑀺𑀯𑀺𑀲𑀺𑀁𑀲𑀼. 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑀫𑁆𑀧𑀺 𑀢𑀁 𑀞𑀸𑀦𑀁 𑀢𑁂 𑀪𑀺𑀓𑁆𑀔𑀽 𑀕𑀡𑁆𑀳𑀺𑀢𑀼𑀁 𑀦𑀧𑁆𑀧𑀳𑁄𑀲𑀺𑀬𑁂𑀯, 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀪𑀸𑀯𑁂𑀦 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀬𑁄𑀲𑀸𑀦𑀤𑀺𑀯𑀲𑁂 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂 𑀥𑁄𑀯𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀧𑁆𑀧𑀺𑀦𑀯𑀦𑀻𑀢𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀁 𑀧𑀽𑀭𑁂𑀢𑁆𑀯𑀸 𑀢𑀺𑀘𑀻𑀯𑀭𑁂𑀳𑀺 𑀲𑀤𑁆𑀥𑀺𑀁 𑀅𑀤𑀸𑀲𑀺. 𑀢𑀢𑁆𑀣 𑀲𑀗𑁆𑀖𑀦𑀯𑀓𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀘𑀻𑀯𑀭𑀲𑀸𑀝𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀅𑀳𑁂𑀲𑀼𑀁.

𑀅𑀣 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋 ‘‘𑀅𑀬𑀁 𑀫𑀳𑀸𑀧𑀼𑀭𑀺𑀲𑁄 𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀓𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀢𑀢𑁄 𑀫𑀳𑀸𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀢𑁆𑀯𑀁 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀧𑀫𑀼𑀤𑀺𑀢𑀳𑀤𑀬𑁄 𑁋 ‘‘𑀅𑀳𑀁 𑀓𑀺𑀭 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀅𑀳𑀁 ¶ 𑀢𑁂𑀦 𑀲𑀫𑀬𑁂𑀦, 𑀲𑀼𑀭𑀼𑀘𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁧.

‘‘𑀢𑀫𑀳𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀭𑀡𑀁 𑀕𑀦𑁆𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁, 𑀕𑀦𑁆𑀥𑀫𑀸𑀮𑁂𑀦 𑀧𑀽𑀚𑀬𑀺𑀁;

𑀧𑀽𑀚𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑁂𑀦, 𑀕𑀯𑀧𑀸𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁨.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀫𑀗𑁆𑀕𑀮𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫’’𑀦𑁆𑀢𑀺. 𑁋

𑀅𑀝𑁆𑀞 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑁧𑁪.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫.

‘‘𑀢𑀤𑀸 ¶ ¶ 𑀧𑀻𑀢𑀺𑀫𑀦𑀼𑀩𑁆𑀭𑀽𑀳𑀦𑁆𑀢𑁄, 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸;

𑀩𑀼𑀤𑁆𑀥𑁂 𑀤𑀢𑁆𑀯𑀸𑀦 𑀫𑀁 𑀕𑁂𑀳𑀁, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁬.

‘‘𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀁 𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁭.

‘‘𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺.

𑀢𑀢𑁆𑀣 𑀕𑀦𑁆𑀥𑀫𑀸𑀮𑁂𑀦𑀸𑀢𑀺 𑀕𑀦𑁆𑀥𑁂𑀳𑀺 𑀘𑁂𑀯 𑀫𑀸𑀮𑁂𑀳𑀺 𑀘. 𑀕𑀯𑀧𑀸𑀦𑁂𑀦𑀸𑀢𑀺 𑀇𑀤𑀁 𑀯𑀼𑀢𑁆𑀢𑀫𑁂𑀯. ‘‘𑀖𑀢𑀧𑀸𑀦𑁂𑀦𑀸’’𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀢𑀧𑁆𑀧𑀬𑀺𑀦𑁆𑀢𑀺 𑀢𑀧𑁆𑀧𑁂𑀲𑀺𑀁. 𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀦𑁆𑀢𑀺 𑀪𑀺𑀬𑁆𑀬𑁄𑀧𑀺 𑀯𑀢𑀫𑀥𑀺𑀝𑁆𑀞𑀸𑀲𑀺𑀁. 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸𑀢𑀺 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀡𑀢𑁆𑀣𑀸𑀬. 𑀧𑀻𑀢𑀺𑀦𑁆𑀢𑀺 𑀳𑀤𑀬𑀢𑀼𑀝𑁆𑀞𑀺𑀁. 𑀅𑀦𑀼𑀩𑁆𑀭𑀽𑀳𑀦𑁆𑀢𑁄𑀢𑀺 𑀯𑀟𑁆𑀠𑁂𑀦𑁆𑀢𑁄. 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸𑀢𑀺 𑀩𑀼𑀤𑁆𑀥𑀢𑁆𑀢𑀧𑁆𑀧𑀢𑁆𑀢𑀺𑀬𑀸. 𑀩𑀼𑀤𑁆𑀥𑁂 𑀤𑀢𑁆𑀯𑀸𑀦𑀸𑀢𑀺 𑀩𑀼𑀤𑁆𑀥𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 ¶ . 𑀫𑀁 𑀕𑁂𑀳𑀦𑁆𑀢𑀺 𑀫𑀫 𑀕𑁂𑀳𑀁, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀩𑀼𑀤𑁆𑀥𑀲𑀸𑀲𑀦𑁂. 𑀩𑁆𑀭𑀳𑁆𑀫𑀦𑁆𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀪𑀸𑀯𑁂𑀢𑁆𑀯𑀸.

𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀉𑀢𑁆𑀢𑀭𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸𑀧𑀺𑀲𑁆𑀲 𑀉𑀢𑁆𑀢𑀭𑁄 𑀦𑀸𑀫 𑀭𑀸𑀚𑀸 𑀔𑀢𑁆𑀢𑀺𑀬𑁄, 𑀫𑀸𑀢𑀸𑀧𑀺 𑀉𑀢𑁆𑀢𑀭𑀸 𑀦𑀸𑀫, 𑀲𑀼𑀤𑁂𑀯𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀧𑀸𑀮𑀺𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀻𑀯𑀮𑀸 𑀘 𑀅𑀲𑁄𑀓𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀁 𑀆𑀬𑀼𑀧𑀭𑀺𑀫𑀸𑀡𑀁, 𑀪𑀭𑀺𑀬𑀸 𑀧𑀦𑀲𑁆𑀲 𑀬𑀲𑀯𑀢𑀻 𑀦𑀸𑀫, 𑀲𑀻𑀯𑀮𑁄 𑀦𑀸𑀫 𑀧𑀼𑀢𑁆𑀢𑁄, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀉𑀢𑁆𑀢𑀭𑀸𑀭𑀸𑀫𑁂 𑀯𑀲𑀺. 𑀉𑀢𑁆𑀢𑀭𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀢𑀲𑁆𑀫𑀺𑀁 𑀧𑀦 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀦𑁆𑀥𑀓𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀲𑀩𑁆𑀩𑀘𑀓𑁆𑀓𑀯𑀸𑀴𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀫𑀳𑀦𑁆𑀢𑀁 𑀆𑀭𑁄𑀤𑀦𑀧𑀭𑀺𑀤𑁂𑀯𑀦𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮.

‘‘𑀉𑀢𑁆𑀢𑀭𑀁 𑀦𑀸𑀫 𑀦𑀕𑀭𑀁, 𑀉𑀢𑁆𑀢𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀉𑀢𑁆𑀢𑀭𑀸 𑀦𑀸𑀫 𑀚𑀦𑀺𑀓𑀸, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁩.

‘‘𑀲𑀼𑀤𑁂𑀯𑁄 𑀥𑀫𑁆𑀫𑀲𑁂𑀦𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀧𑀸𑀮𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪.

‘‘𑀲𑀻𑀯𑀮𑀸 ¶ 𑀘 𑀅𑀲𑁄𑀓𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀦𑀸𑀕𑀭𑀼𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁬.

‘‘𑀅𑀝𑁆𑀞𑀸𑀲𑀻𑀢𑀺 ¶ 𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀢𑀢𑁄 𑀦𑀺𑀤𑁆𑀥𑀸𑀯𑀢𑀻 𑀭𑀁𑀲𑀻, 𑀅𑀦𑁂𑀓𑀲𑀢𑀲𑀳𑀲𑁆𑀲𑀺𑀬𑁄.

𑁨𑁭.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁮.

‘‘𑀬𑀣𑀸𑀧𑀺 𑀲𑀸𑀕𑀭𑁂 𑀊𑀫𑀻, 𑀦 𑀲𑀓𑁆𑀓𑀸 𑀢𑀸 𑀕𑀡𑁂𑀢𑀼𑀬𑁂;

𑀢𑀣𑁂𑀯 𑀲𑀸𑀯𑀓𑀸 𑀢𑀲𑁆𑀲, 𑀦 𑀲𑀓𑁆𑀓𑀸 𑀢𑁂 𑀕𑀡𑁂𑀢𑀼𑀬𑁂.

𑁨𑁯.

‘‘𑀬𑀸𑀯 ¶ 𑀅𑀝𑁆𑀞𑀸𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀫𑀗𑁆𑀕𑀮𑁄 𑀮𑁄𑀓𑀦𑀸𑀬𑀓𑁄;

𑀦 𑀢𑀲𑁆𑀲 𑀲𑀸𑀲𑀦𑁂 𑀅𑀢𑁆𑀣𑀺, 𑀲𑀓𑀺𑀮𑁂𑀲𑀫𑀭𑀡𑀁 𑀢𑀤𑀸.

𑁩𑁦.

‘‘𑀥𑀫𑁆𑀫𑁄𑀓𑁆𑀓𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀥𑀼𑀫𑀓𑁂𑀢𑀽𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀫𑀳𑀸𑀬𑀲𑁄.

𑁩𑁧.

‘‘𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀢𑁆𑀢𑀁, 𑀤𑀲𑁆𑀲𑀬𑀺𑀢𑁆𑀯𑀸 𑀲𑀤𑁂𑀯𑀓𑁂;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄 𑀬𑀣𑀸’’𑀢𑀺.

𑀢𑀢𑁆𑀣 𑀢𑀢𑁄𑀢𑀺 𑀢𑀲𑁆𑀲 𑀫𑀗𑁆𑀕𑀮𑀲𑁆𑀲 𑀲𑀭𑀻𑀭𑀢𑁄. 𑀦𑀺𑀤𑁆𑀥𑀸𑀯𑀢𑀻𑀢𑀺 𑀦𑀺𑀤𑁆𑀥𑀸𑀯𑀦𑁆𑀢𑀺, 𑀯𑀘𑀦𑀯𑀺𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀭𑀁𑀲𑀻𑀢𑀺 𑀭𑀲𑁆𑀫𑀺𑀬𑁄. 𑀅𑀦𑁂𑀓𑀲𑀢𑀲𑀳𑀲𑁆𑀲𑀺𑀬𑁄𑀢𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑀸. 𑀊𑀫𑀻𑀢𑀺 𑀯𑀻𑀘𑀺𑀬𑁄 𑀢𑀭𑀗𑁆𑀕𑀸. 𑀕𑀡𑁂𑀢𑀼𑀬𑁂𑀢𑀺 𑀕𑀡𑁂𑀢𑀼𑀁 𑀲𑀗𑁆𑀔𑀸𑀢𑀼𑀁. 𑀏𑀢𑁆𑀢𑀓𑀸 𑀲𑀸𑀕𑀭𑁂 𑀊𑀫𑀺𑀬𑁄𑀢𑀺 𑀬𑀣𑀸 𑀦 𑀲𑀓𑁆𑀓𑀸 𑀕𑀡𑁂𑀢𑀼𑀁, 𑀏𑀯𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸𑀧𑀺 𑀦 𑀲𑀓𑁆𑀓𑀸 𑀕𑀡𑁂𑀢𑀼𑀁, 𑀅𑀣 𑀔𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀸𑀢𑀺 𑀬𑀸𑀯𑀢𑀓𑀁 𑀓𑀸𑀮𑀁. 𑀲𑀓𑀺𑀮𑁂𑀲𑀫𑀭𑀡𑀁 𑀢𑀤𑀸𑀢𑀺 𑀲𑀳 𑀓𑀺𑀮𑁂𑀲𑁂𑀳𑀺 𑀲𑀓𑀺𑀮𑁂𑀲𑁄, 𑀲𑀓𑀺𑀮𑁂𑀲𑀲𑁆𑀲 𑀫𑀭𑀡𑀁 𑀲𑀓𑀺𑀮𑁂𑀲𑀫𑀭𑀡𑀁, 𑀢𑀁 𑀦𑀢𑁆𑀣𑀺. 𑀢𑀤𑀸 𑀓𑀺𑀭 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀸𑀯𑀓𑀸 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀯𑀸 𑀳𑀼𑀢𑁆𑀯𑀸 𑀦 𑀓𑀸𑀮𑀫𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀲𑀫𑁆𑀫𑁄𑀳𑀫𑀸𑀭𑀡𑀁 𑀢𑀤𑀸’’𑀢𑀺 𑀧𑀞𑀦𑁆𑀢𑀺.

𑀥𑀫𑁆𑀫𑁄𑀓𑁆𑀓𑀦𑁆𑀢𑀺 𑀥𑀫𑁆𑀫𑀤𑀻𑀧𑀓𑀁. 𑀥𑀽𑀫𑀓𑁂𑀢𑀽𑀢𑀺 𑀅𑀕𑁆𑀕𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀧𑀤𑀻𑀧𑁄 𑀤𑀝𑁆𑀞𑀩𑁆𑀩𑁄 𑀢𑀲𑁆𑀫𑀸 𑀧𑀤𑀻𑀧𑁄 𑀯𑀺𑀬 𑀚𑀮𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀬𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄 ¶ . 𑀓𑁂𑀘𑀺 ‘‘𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺 𑀧𑀞𑀦𑁆𑀢𑀺. 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀲𑀪𑀸𑀯𑀢𑁆𑀢𑀦𑁆𑀢𑀺 ¶ 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀁. 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄 𑀬𑀣𑀸𑀢𑀺 𑀬𑀣𑀸 𑀲𑀳𑀲𑁆𑀲𑀓𑀺𑀭𑀡𑁄 𑀤𑀺𑀯𑀲𑀓𑀭𑁄 𑀲𑀩𑁆𑀩𑀁 𑀢𑀫𑀕𑀡𑀁 𑀯𑀺𑀥𑀫𑀺𑀢𑁆𑀯𑀸 𑀲𑀩𑁆𑀩𑀜𑁆𑀘 𑀮𑁄𑀓𑀁 𑀑𑀪𑀸𑀲𑁂𑀢𑁆𑀯𑀸 𑀅𑀢𑁆𑀣𑀫𑀼𑀧𑀕𑀘𑁆𑀙𑀢𑀺, 𑀏𑀯𑀁 𑀫𑀗𑁆𑀕𑀮𑀤𑀺𑀯𑀲𑀓𑀭𑁄𑀧𑀺 𑀯𑁂𑀦𑁂𑀬𑁆𑀬𑀓𑀫𑀮𑀯𑀦𑀯𑀺𑀓𑀲𑀦𑀓𑀭𑁄 𑀲𑀩𑁆𑀩𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀮𑁄𑀓𑀢𑀫𑀁 𑀯𑀺𑀥𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀚𑀮𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀸 𑀏𑀯𑀸𑀢𑀺.

𑀫𑀗𑁆𑀕𑀮𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀢𑀢𑀺𑀬𑁄 𑀩𑀼𑀤𑁆𑀥𑀯𑀁𑀲𑁄.

𑁬. 𑀲𑀼𑀫𑀦𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀏𑀯𑀁 ¶ 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀏𑀓𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀅𑀧𑀭𑀪𑀸𑀕𑁂 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑁂𑀲𑀼 𑀚𑀸𑀢𑁂𑀲𑀼 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀲𑀼𑀫𑀦𑁄 𑀦𑀸𑀫 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀫𑁂𑀔𑀮𑀦𑀕𑀭𑁂 𑀲𑀼𑀤𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀲𑀺𑀭𑀺𑀫𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑁂𑀯.

𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀺𑀭𑀺𑀯𑀟𑁆𑀠𑀦𑀲𑁄𑀫𑀯𑀟𑁆𑀠𑀦𑀇𑀤𑁆𑀥𑀺𑀯𑀟𑁆𑀠𑀦𑀦𑀸𑀫𑀥𑁂𑀬𑁆𑀬𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑁂𑀲𑀝𑁆𑀞𑀺𑀬𑀸 𑀦𑀸𑀝𑀓𑀺𑀢𑁆𑀣𑀺𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀲𑀼𑀭𑀬𑀼𑀯𑀢𑀻𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀲𑀤𑀺𑀲𑀁 𑀯𑀺𑀲𑀬𑀲𑀼𑀔𑀫𑀦𑀼𑀪𑀯𑀫𑀸𑀦𑁄 𑀯𑀝𑀁𑀲𑀺𑀓𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀅𑀦𑀼𑀧𑀫𑀁 𑀦𑀸𑀫 𑀦𑀺𑀭𑀼𑀧𑀫𑀁 𑀧𑀼𑀢𑁆𑀢𑀁 𑀚𑀦𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀧𑀦 𑀧𑀩𑁆𑀩𑀚𑀦𑁆𑀢𑀁 𑀢𑀺𑀁𑀲𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼.

𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀤𑀲𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀅𑀦𑁄𑀫𑀦𑀺𑀕𑀫𑁂 𑀅𑀦𑁄𑀫𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀬 𑀅𑀦𑀼𑀧𑀫𑀸𑀬 𑀦𑀸𑀫 𑀤𑀺𑀦𑁆𑀦𑀁 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀁 ¶ 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀦𑀼𑀧𑀫𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀦𑀸𑀕𑀩𑁄𑀥𑀺𑀁 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀳𑀺 𑀢𑀺𑀡𑀫𑀼𑀝𑁆𑀞𑀻𑀳𑀺 𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀢𑁄 𑀫𑀸𑀭𑀩𑀮𑀁 ¶ 𑀯𑀺𑀥𑀫𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 (𑀥. 𑀧. 𑁧𑁫𑁩-𑁧𑁫𑁪) 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀫𑀗𑁆𑀕𑀮𑀲𑁆𑀲 𑀅𑀧𑀭𑁂𑀦, 𑀲𑀼𑀫𑀦𑁄 𑀦𑀸𑀫 𑀦𑀸𑀬𑀓𑁄;

𑀲𑀩𑁆𑀩𑀥𑀫𑁆𑀫𑁂𑀳𑀺 𑀅𑀲𑀫𑁄, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑁄’’𑀢𑀺.

𑀢𑀢𑁆𑀣 ¶ 𑀫𑀗𑁆𑀕𑀮𑀲𑁆𑀲 𑀅𑀧𑀭𑁂𑀦𑀸𑀢𑀺 𑀫𑀗𑁆𑀕𑀮𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂. 𑀲𑀩𑁆𑀩𑀥𑀫𑁆𑀫𑁂𑀳𑀺 𑀅𑀲𑀫𑁄𑀢𑀺 𑀲𑀩𑁆𑀩𑁂𑀳𑀺𑀧𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀥𑀫𑁆𑀫𑁂𑀳𑀺 𑀅𑀲𑀫𑁄 𑀅𑀲𑀤𑀺𑀲𑁄.

𑀲𑀼𑀫𑀦𑁄 𑀓𑀺𑀭 𑀪𑀕𑀯𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁭𑁨; 𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀫𑀳𑀸𑀯. 𑁧𑁦) 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀢𑀺𑀁𑀲𑀓𑁄𑀝𑀺𑀬𑁄 𑀘 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀯𑁂𑀫𑀸𑀢𑀺𑀓𑀁 𑀲𑀭𑀡𑀓𑀼𑀫𑀸𑀭𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀪𑀸𑀯𑀺𑀢𑀢𑁆𑀢𑀫𑀸𑀡𑀯𑀓𑀜𑁆𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀤𑀺𑀲𑁆𑀯𑀸 𑁋 ‘‘𑀏𑀢𑁂𑀲𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀳𑀁𑀲𑀭𑀸𑀚𑀸 𑀯𑀺𑀬 𑀕𑀕𑀦𑀧𑀣𑁂𑀦 𑀫𑁂𑀔𑀮𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀲𑀭𑀡𑀓𑀼𑀫𑀸𑀭𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀪𑀸𑀯𑀺𑀢𑀢𑁆𑀢𑀓𑀼𑀫𑀸𑀭𑀜𑁆𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀧𑀭𑀺𑀯𑀸𑀭𑀪𑀽𑀢𑀸 𑀲𑀢𑁆𑀢𑀢𑀺𑀁𑀲𑀓𑁄𑀝𑀺𑀬𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸 𑀢𑀺𑀁𑀲𑀓𑁄𑀝𑀺𑀬𑁄 𑀘 𑀅𑀜𑁆𑀜𑁂 𑀘 𑀩𑀳𑀽 𑀤𑁂𑀯𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀘𑀸𑀢𑀺 𑀏𑀯𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀦 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨.

‘‘𑀢𑀤𑀸 𑀅𑀫𑀢𑀪𑁂𑀭𑀺𑀁 𑀲𑁄, 𑀆𑀳𑀦𑀻 𑀫𑁂𑀔𑀮𑁂 𑀧𑀼𑀭𑁂;

𑀥𑀫𑁆𑀫𑀲𑀗𑁆𑀔𑀲𑀫𑀸𑀬𑀼𑀢𑁆𑀢𑀁, 𑀦𑀯𑀗𑁆𑀕𑀁 𑀚𑀺𑀦𑀲𑀸𑀲𑀦’’𑀦𑁆𑀢𑀺.

𑀢𑀢𑁆𑀣 𑀅𑀫𑀢𑀪𑁂𑀭𑀺𑀦𑁆𑀢𑀺 𑀅𑀫𑀢𑀸𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀪𑁂𑀭𑀺𑀁. 𑀆𑀳𑀦𑀻𑀢𑀺 𑀯𑀸𑀤𑀬𑀺, 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀸𑀬𑀁 𑀅𑀫𑀢𑀪𑁂𑀭𑀻 𑀦𑀸𑀫 𑀅𑀫𑀢𑀧𑀭𑀺𑀬𑁄𑀲𑀸𑀦𑀁 𑀦𑀯𑀗𑁆𑀕𑀁 𑀩𑀼𑀤𑁆𑀥𑀯𑀘𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀥𑀫𑁆𑀫𑀲𑀗𑁆𑀔𑀲𑀫𑀸𑀬𑀼𑀢𑁆𑀢𑀁, 𑀦𑀯𑀗𑁆𑀕𑀁 𑀚𑀺𑀦𑀲𑀸𑀲𑀦’’𑀦𑁆𑀢𑀺. 𑀢𑀢𑁆𑀣 𑀥𑀫𑁆𑀫𑀲𑀗𑁆𑀔𑀲𑀫𑀸𑀬𑀼𑀢𑁆𑀢𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀓𑀣𑀸𑀲𑀗𑁆𑀔𑀯𑀭𑀲𑀫𑀸𑀬𑀼𑀢𑁆𑀢𑀁.

𑀲𑀼𑀫𑀦𑁄 ¶ 𑀧𑀦 𑀮𑁄𑀓𑀦𑀸𑀬𑀓𑁄 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀫𑀳𑀸𑀚𑀦𑀲𑁆𑀲 𑀪𑀯𑀩𑀦𑁆𑀥𑀦𑀫𑁄𑀓𑁆𑀔𑀢𑁆𑀣𑀸𑀬 𑀓𑀼𑀲𑀮𑀭𑀢𑀦𑀲𑁆𑀲 𑀓𑀺𑀮𑁂𑀲𑀘𑁄𑀭𑁂𑀳𑀺 𑀯𑀺𑀮𑀼𑀧𑁆𑀧𑀫𑀸𑀦𑀲𑁆𑀲 𑀧𑀭𑀺𑀢𑁆𑀢𑀸𑀦𑀢𑁆𑀣𑀁 𑀲𑀻𑀮𑀯𑀺𑀧𑀼𑀮𑀧𑀸𑀓𑀸𑀭𑀁 𑀲𑀫𑀸𑀥𑀺𑀧𑀭𑀺𑀔𑀸𑀧𑀭𑀺𑀯𑀸𑀭𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀤𑁆𑀯𑀸𑀭𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀤𑀴𑁆𑀳𑀓𑀯𑀸𑀝𑀁 𑀲𑀫𑀸𑀧𑀢𑁆𑀢𑀺𑀫𑀡𑁆𑀟𑀧𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀚𑀦𑀲𑀫𑀸𑀓𑀼𑀮𑀁 𑀅𑀫𑀢𑀯𑀭𑀦𑀕𑀭𑀁 𑀫𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩.

‘‘𑀦𑀺𑀚𑁆𑀚𑀺𑀦𑀺𑀢𑁆𑀯𑀸 ¶ 𑀓𑀺𑀮𑁂𑀲𑁂 𑀲𑁄, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀫𑀸𑀧𑁂𑀲𑀺 𑀦𑀕𑀭𑀁 𑀲𑀢𑁆𑀣𑀸, 𑀲𑀤𑁆𑀥𑀫𑁆𑀫𑀧𑀼𑀭𑀯𑀭𑀼𑀢𑁆𑀢𑀫’’𑀦𑁆𑀢𑀺.

𑀢𑀢𑁆𑀣 𑀦𑀺𑀚𑁆𑀚𑀺𑀦𑀺𑀢𑁆𑀯𑀸𑀢𑀺 𑀯𑀺𑀚𑀺𑀦𑀺𑀢𑁆𑀯𑀸 𑀅𑀪𑀺𑀪𑀼𑀬𑁆𑀬, 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑁂 𑀯𑀺𑀤𑁆𑀥𑀁𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 ¶ . 𑀲𑁄𑀢𑀺 𑀲𑁄 𑀲𑀼𑀫𑀦𑁄 𑀪𑀕𑀯𑀸. ‘‘𑀯𑀺𑀚𑀺𑀦𑀺𑀢𑁆𑀯𑀸 𑀓𑀺𑀮𑁂𑀲𑁂 𑀳𑀻’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀳𑀺-𑀓𑀸𑀭𑁄 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀧𑀢𑁆𑀯𑀸𑀢𑀺 𑀅𑀥𑀺𑀕𑀦𑁆𑀢𑁆𑀯𑀸. ‘‘𑀧𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀦𑀕𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑀕𑀭𑀁. 𑀲𑀤𑁆𑀥𑀫𑁆𑀫𑀧𑀼𑀭𑀯𑀭𑀼𑀢𑁆𑀢𑀫𑀦𑁆𑀢𑀺 𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀁 𑀧𑀼𑀭𑀯𑀭𑁂𑀲𑀼 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀧𑀥𑀸𑀦𑀪𑀽𑀢𑀁. 𑀅𑀣 𑀯𑀸 𑀲𑀤𑁆𑀥𑀫𑁆𑀫𑀫𑀬𑁂𑀲𑀼 𑀧𑀼𑀭𑁂𑀲𑀼 𑀧𑀯𑀭𑁂𑀲𑀼 𑀉𑀢𑁆𑀢𑀫𑀁 𑀲𑀤𑁆𑀥𑀫𑁆𑀫𑀧𑀼𑀭𑀯𑀭𑀼𑀢𑁆𑀢𑀫𑀁. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀦𑀕𑀭’’𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀲𑀪𑀸𑀯𑀸𑀦𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀧𑀢𑀺𑀝𑁆𑀞𑀸𑀦𑀁 𑀕𑁄𑀘𑀭𑀦𑀺𑀯𑀸𑀲𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀁 ‘‘𑀦𑀕𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀧𑀦 𑀲𑀤𑁆𑀥𑀫𑁆𑀫𑀯𑀭𑀦𑀕𑀭𑁂 𑀲𑁄 𑀲𑀢𑁆𑀣𑀸 𑀅𑀯𑀺𑀘𑁆𑀙𑀺𑀦𑁆𑀦𑀁 𑀅𑀓𑀼𑀝𑀺𑀮𑀁 𑀉𑀚𑀼𑀁 𑀧𑀼𑀣𑀼𑀮𑀜𑁆𑀘 𑀯𑀺𑀢𑁆𑀣𑀢𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀫𑀬𑀁 𑀫𑀳𑀸𑀯𑀻𑀣𑀺𑀁 𑀫𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀦𑀺𑀭𑀦𑁆𑀢𑀭𑀁 𑀅𑀓𑀼𑀝𑀺𑀮𑀁, 𑀉𑀚𑀼𑀁 𑀯𑀺𑀧𑀼𑀮𑀯𑀺𑀢𑁆𑀣𑀢𑀁;

𑀫𑀸𑀧𑁂𑀲𑀺 𑀲𑁄 𑀫𑀳𑀸𑀯𑀻𑀣𑀺𑀁, 𑀲𑀢𑀺𑀧𑀝𑁆𑀞𑀸𑀦𑀯𑀭𑀼𑀢𑁆𑀢𑀫’’𑀦𑁆𑀢𑀺.

𑀢𑀢𑁆𑀣 𑀦𑀺𑀭𑀦𑁆𑀢𑀭𑀦𑁆𑀢𑀺 𑀓𑀼𑀲𑀮𑀚𑀯𑀦𑀲𑀜𑁆𑀘𑀭𑀡𑀸𑀦𑀦𑁆𑀢𑀭𑀪𑀸𑀯𑀢𑁄 𑀦𑀺𑀭𑀦𑁆𑀢𑀭𑀁. 𑀅𑀓𑀼𑀝𑀺𑀮𑀦𑁆𑀢𑀺 𑀓𑀼𑀝𑀺𑀮𑀪𑀸𑀯𑀓𑀭𑀤𑁄𑀲𑀯𑀺𑀭𑀳𑀺𑀢𑀢𑁄 𑀅𑀓𑀼𑀝𑀺𑀮𑀁. 𑀉𑀚𑀼𑀦𑁆𑀢𑀺 𑀅𑀓𑀼𑀝𑀺𑀮𑀢𑁆𑀢𑀸𑀯 𑀉𑀚𑀼𑀁. 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀅𑀢𑁆𑀣𑀤𑀻𑀧𑀓𑀫𑀺𑀤𑀁 𑀯𑀘𑀦𑀁. 𑀯𑀺𑀧𑀼𑀮𑀯𑀺𑀢𑁆𑀣𑀢𑀦𑁆𑀢𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀼𑀣𑀼𑀮𑀯𑀺𑀢𑁆𑀣𑀢𑀁, 𑀧𑀼𑀣𑀼𑀮𑀯𑀺𑀢𑁆𑀣𑀢𑀪𑀸𑀯𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀫𑀳𑀸𑀯𑀻𑀣𑀺𑀦𑁆𑀢𑀺 𑀫𑀳𑀸𑀫𑀕𑁆𑀕𑀁. 𑀲𑀢𑀺𑀧𑀝𑁆𑀞𑀸𑀦𑀯𑀭𑀼𑀢𑁆𑀢𑀫𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀜𑁆𑀘 𑀢𑀁 𑀯𑀭𑁂𑀲𑀼 𑀉𑀢𑁆𑀢𑀫𑀜𑁆𑀘𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀯𑀭𑀼𑀢𑁆𑀢𑀫𑀁. 𑀅𑀣 𑀯𑀸 𑀯𑀭𑀁 𑀲𑀢𑀺𑀧𑀝𑁆𑀞𑀸𑀦𑀫𑀬𑀁 𑀉𑀢𑁆𑀢𑀫𑀯𑀻𑀣𑀺𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑁆𑀲 𑀢𑀲𑁆𑀲𑀁 𑀲𑀢𑀺𑀧𑀝𑁆𑀞𑀸𑀦𑀯𑀻𑀣𑀺𑀬𑀁 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀙 𑀅𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀇𑀫𑀸𑀦𑀺 ¶ 𑀫𑀳𑀕𑁆𑀖𑀭𑀢𑀦𑀸𑀦𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀥𑀫𑁆𑀫𑀸𑀧𑀡𑁂 𑀧𑀲𑀸𑀭𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀨𑀮𑁂 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑁂, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸;

𑀙𑀴𑀪𑀺𑀜𑁆𑀜𑀸𑀝𑁆𑀞𑀲𑀫𑀸𑀧𑀢𑁆𑀢𑀻, 𑀧𑀲𑀸𑀭𑁂𑀲𑀺 𑀢𑀢𑁆𑀣 𑀯𑀻𑀣𑀺𑀬’’𑀦𑁆𑀢𑀺.

𑀇𑀤𑀸𑀦𑀺 ¶ 𑀪𑀕𑀯𑀸 𑀇𑀫𑀸𑀦𑀺 𑀭𑀢𑀦𑀪𑀡𑁆𑀟𑀸𑀦𑀺 𑀬𑁂 𑀧𑀦 𑀅𑀧𑁆𑀧𑀫𑀢𑁆𑀢𑀸 𑀲𑀢𑀺𑀫𑀦𑁆𑀢𑁄 𑀧𑀡𑁆𑀟𑀺𑀢𑀸 𑀳𑀺𑀭𑀺𑀑𑀢𑁆𑀢𑀧𑁆𑀧𑀯𑀻𑀭𑀺𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀢𑁂 𑀆𑀤𑀻𑀬𑀦𑁆𑀢𑀻𑀢𑀺 𑀢𑁂𑀲𑀁 𑀭𑀢𑀦𑀸𑀦𑀁 𑀳𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁬.

‘‘𑀬𑁂 𑀅𑀧𑁆𑀧𑀫𑀢𑁆𑀢𑀸 𑀅𑀔𑀺𑀮𑀸, 𑀳𑀺𑀭𑀺𑀯𑀻𑀭𑀺𑀬𑁂𑀳𑀼𑀧𑀸𑀕𑀢𑀸;

𑀢𑁂 𑀢𑁂 𑀇𑀫𑁂 𑀕𑀼𑀡𑀯𑀭𑁂, 𑀆𑀤𑀺𑀬𑀦𑁆𑀢𑀺 𑀬𑀣𑀸𑀲𑀼𑀔’’𑀦𑁆𑀢𑀺. 𑁋 𑀆𑀳;

𑀢𑀢𑁆𑀣 ¶ 𑀬𑁂𑀢𑀺 𑀅𑀦𑀺𑀬𑀫𑀼𑀤𑁆𑀤𑁂𑀲𑁄. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑁂𑀦 𑀅𑀧𑁆𑀧𑀫𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀔𑀺𑀮𑀸𑀢𑀺 𑀧𑀜𑁆𑀘𑀘𑁂𑀢𑁄𑀔𑀺𑀮𑀭𑀳𑀺𑀢𑀸. 𑀳𑀺𑀭𑀺𑀯𑀻𑀭𑀺𑀬𑁂𑀳𑀼𑀧𑀸𑀕𑀢𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻, 𑀮𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬𑀁, 𑀢𑀁 𑀉𑀲𑁆𑀲𑀸𑀳𑀮𑀓𑁆𑀔𑀡𑀁. 𑀢𑁂𑀳𑀺 𑀳𑀺𑀭𑀺𑀯𑀻𑀭𑀺𑀬𑁂𑀳𑀺 𑀉𑀧𑀸𑀕𑀢𑀸 𑀲𑀫𑀦𑁆𑀦𑀸𑀕𑀢𑀸 𑀪𑀩𑁆𑀩𑀧𑀼𑀕𑁆𑀕𑀮𑀸. 𑀢𑁂𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀅𑀦𑀺𑀬𑀫𑀼𑀤𑁆𑀤𑁂𑀲𑀲𑁆𑀲 𑀦𑀺𑀬𑀫𑀼𑀤𑁆𑀤𑁂𑀲𑁄. 𑀧𑀼𑀦 𑀢𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀕𑀼𑀡𑀭𑀢𑀦𑀯𑀺𑀲𑁂𑀲𑁂 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀆𑀤𑀺𑀬𑀦𑁆𑀢𑀺 𑀧𑀝𑀺𑀮𑀪𑀦𑁆𑀢𑀺 𑀅𑀥𑀺𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀁 𑀧𑀦 𑀲𑀼𑀫𑀦𑁄 𑀪𑀕𑀯𑀸 𑀓𑀢𑀯𑀺𑀤𑀺𑀢𑀫𑀦𑁄 𑀥𑀫𑁆𑀫𑀪𑁂𑀭𑀺𑀁 𑀆𑀳𑀦𑀺𑀢𑁆𑀯𑀸 𑀥𑀫𑁆𑀫𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀇𑀫𑀺𑀦𑀸 𑀦𑀬𑁂𑀦 𑀧𑀞𑀫𑀫𑁂𑀯 𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑁄 𑀩𑁄𑀥𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀏𑀯𑀫𑁂𑀢𑁂𑀦 𑀬𑁄𑀕𑁂𑀦, 𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀚𑀦𑀁;

𑀩𑁄𑀥𑁂𑀲𑀺 𑀧𑀞𑀫𑀁 𑀲𑀢𑁆𑀣𑀸, 𑀓𑁄𑀝𑀺𑀲𑀢𑀲𑀳𑀲𑁆𑀲𑀺𑀬𑁄’’𑀢𑀺.

𑀢𑀢𑁆𑀣 𑀉𑀤𑁆𑀥𑀭𑀦𑁆𑀢𑁄𑀢𑀺 𑀲𑀁𑀲𑀸𑀭𑀲𑀸𑀕𑀭𑀢𑁄 𑀅𑀭𑀺𑀬𑀫𑀕𑁆𑀕𑀦𑀸𑀯𑀸𑀬 𑀲𑀫𑀼𑀤𑁆𑀥𑀭𑀦𑁆𑀢𑁄. 𑀓𑁄𑀝𑀺𑀲𑀢𑀲𑀳𑀲𑁆𑀲𑀺𑀬𑁄𑀢𑀺 𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀺𑀬𑀸𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀁.

𑀬𑀤𑀸 𑀧𑀦 𑀲𑀼𑀫𑀦𑁄 𑀮𑁄𑀓𑀦𑀸𑀬𑀓𑁄 𑀲𑀼𑀦𑀦𑁆𑀤𑀯𑀢𑀻𑀦𑀕𑀭𑁂 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀢𑀺𑀢𑁆𑀣𑀺𑀬𑀫𑀤𑀫𑀸𑀦𑀫𑀤𑁆𑀤𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀲𑀢𑁆𑀢𑀸𑀦𑀁 𑀓𑁄𑀝𑀺𑀲𑀳𑀲𑁆𑀲𑀁 𑀥𑀫𑁆𑀫𑀸𑀫𑀢𑀁 ¶ 𑀧𑀸𑀬𑁂𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀑𑀯𑀤𑀻 𑀢𑀺𑀢𑁆𑀣𑀺𑀬𑁂 𑀕𑀡𑁂;

𑀓𑁄𑀝𑀺𑀲𑀳𑀲𑁆𑀲𑀸 𑀪𑀺𑀲𑀫𑀺𑀁𑀲𑀼, 𑀤𑀼𑀢𑀺𑀬𑁂 𑀥𑀫𑁆𑀫𑀤𑁂𑀲𑀦𑁂’’𑀢𑀺.

𑀢𑀢𑁆𑀣 𑀢𑀺𑀢𑁆𑀣𑀺𑀬𑁂 𑀕𑀡𑁂𑀢𑀺 𑀢𑀺𑀢𑁆𑀣𑀺𑀬𑀪𑀽𑀢𑁂 𑀕𑀡𑁂, 𑀢𑀺𑀢𑁆𑀣𑀺𑀬𑀸𑀦𑀁 𑀕𑀡𑁂 𑀯𑀸 ‘‘𑀢𑀺𑀢𑁆𑀣𑀺𑀬𑁂 𑀅𑀪𑀺𑀫𑀤𑁆𑀤𑀦𑁆𑀢𑁄, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀻’’𑀢𑀺 𑀧𑀞𑀦𑁆𑀢𑀺 𑀓𑁂𑀘𑀺.

𑀬𑀤𑀸 𑀧𑀦 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑀼𑀲𑁆𑀲𑀸 𑀘 𑀦𑀺𑀭𑁄𑀥𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀓𑀣𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀣𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀓𑀣𑀁 ¶ 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀻’’𑀢𑀺? 𑀏𑀯𑀁 𑀲𑀫𑀸𑀧𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀳 𑀫𑀦𑀼𑀲𑁆𑀲𑁂𑀳𑀺 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀸 𑀘 𑀦𑀯𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀩𑁆𑀭𑀳𑁆𑀫𑀸𑀦𑁄 𑀘 𑀤𑁆𑀯𑁂𑀴𑁆𑀳𑀓𑀚𑀸𑀢𑀸 𑀤𑁆𑀯𑀺𑀥𑀸 𑀅𑀳𑁂𑀲𑀼𑀁. 𑀢𑀢𑁄 𑀦𑀭𑀲𑀼𑀦𑁆𑀤𑀭𑁂𑀦 𑀅𑀭𑀺𑀦𑁆𑀤𑀫𑁂𑀦 𑀦𑀸𑀫 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀸𑀬𑀦𑁆𑀳𑀲𑀫𑀬𑁂 𑀲𑀼𑀫𑀦𑀤𑀲𑀩𑀮𑀁 ¶ 𑀲𑀩𑁆𑀩𑀮𑁄𑀓𑀦𑀸𑀣𑀁 𑀉𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀭𑀺𑀦𑁆𑀤𑀫𑁄 𑀭𑀸𑀚𑀸 𑀪𑀕𑀯𑀦𑁆𑀢𑀁 𑀦𑀺𑀭𑁄𑀥𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀢𑁄 𑀪𑀕𑀯𑀢𑀸 𑀦𑀺𑀭𑁄𑀥𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀦𑀯𑀼𑀢𑀺𑀧𑀸𑀡𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀬𑀤𑀸 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀲𑀫𑀕𑁆𑀕𑀸 𑀏𑀓𑀫𑀸𑀦𑀲𑀸;

𑀦𑀺𑀭𑁄𑀥𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀁𑀲𑀬𑀁 𑀘𑀸𑀧𑀺 𑀫𑀸𑀦𑀲𑀁.

𑁧𑁦.

‘‘𑀢𑀤𑀸𑀧𑀺 𑀥𑀫𑁆𑀫𑀤𑁂𑀲𑀦𑁂, 𑀦𑀺𑀭𑁄𑀥𑀧𑀭𑀺𑀤𑀻𑀧𑀦𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀲𑁆𑀲 𑀧𑀦 𑀲𑀼𑀫𑀦𑀲𑁆𑀲 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀢𑀢𑁆𑀣 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀫𑁂𑀔𑀮𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀧𑀞𑀫𑀧𑀯𑀸𑀭𑀡𑀸𑀬 𑀅𑀭𑀳𑀦𑁆𑀢𑀸𑀦𑀁 𑀓𑁄𑀝𑀺𑀲𑀳𑀲𑁆𑀲𑁂𑀦 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀪𑀕𑀯𑀸 𑀧𑀯𑀸𑀭𑁂𑀲𑀺, 𑀅𑀬𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑀗𑁆𑀓𑀲𑁆𑀲𑀦𑀕𑀭𑀲𑁆𑀲𑀸𑀯𑀺𑀤𑀽𑀭𑁂 𑀅𑀭𑀺𑀦𑁆𑀤𑀫𑀭𑀸𑀚𑀓𑀼𑀲𑀮𑀩𑀮𑀦𑀺𑀩𑁆𑀩𑀢𑁆𑀢𑁂 𑀬𑁄𑀚𑀦𑀧𑁆𑀧𑀫𑀸𑀡𑁂 𑀓𑀦𑀓𑀧𑀩𑁆𑀩𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀤𑀲𑀫𑀬𑀭𑀼𑀘𑀺𑀭𑀓𑀭𑀦𑀺𑀓𑀭𑁄 𑀤𑀺𑀯𑀲𑀓𑀭𑁄 𑀯𑀺𑀬 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂 𑀫𑀼𑀦𑀺𑀯𑀭𑀤𑀺𑀯𑀲𑀓𑀭𑁄 𑀅𑀭𑀺𑀦𑁆𑀤𑀫𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ¶ 𑀆𑀕𑀢𑀸𑀦𑀁 𑀧𑀼𑀭𑀺𑀲𑀸𑀦𑀁 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀤𑀫𑁂𑀢𑁆𑀯𑀸 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑀦𑁆𑀦𑀺𑀧𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀼𑀕𑀢𑀤𑀲𑁆𑀲𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺, 𑀢𑀤𑀸 𑀲𑀼𑀫𑀦𑁄 𑀪𑀕𑀯𑀸 𑀅𑀲𑀻𑀢𑀺𑀬𑀸 𑀅𑀭𑀳𑀦𑁆𑀢𑀓𑁄𑀝𑀺𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑀼𑀫𑀦𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁧𑁨.

‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑁆𑀲 𑀪𑀕𑀯𑀢𑁄, 𑀅𑀪𑀺𑀖𑀼𑀝𑁆𑀞𑁂 𑀧𑀯𑀸𑀭𑀡𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺, 𑀧𑀯𑀸𑀭𑁂𑀲𑀺 𑀢𑀣𑀸𑀕𑀢𑁄.

𑁧𑁩.

‘‘𑀢𑀢𑁄 𑀧𑀭𑀁 𑀲𑀦𑁆𑀦𑀺𑀧𑀸𑀢𑁂, 𑀯𑀺𑀫𑀮𑁂 𑀓𑀜𑁆𑀘𑀦𑀧𑀩𑁆𑀩𑀢𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁪.

‘‘𑀬𑀤𑀸 ¶ 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑀼𑀤𑁆𑀥𑀤𑀲𑁆𑀲𑀦𑀼𑀧𑀸𑀕𑀫𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀢𑁆𑀣 ¶ 𑀅𑀪𑀺𑀖𑀼𑀝𑁆𑀞𑁂 𑀧𑀯𑀸𑀭𑀡𑁂𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀤𑀝𑁆𑀞𑀩𑁆𑀩𑁄, 𑀅𑀪𑀺𑀖𑀼𑀝𑁆𑀞𑀸𑀬 𑀧𑀯𑀸𑀭𑀡𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀧𑀭𑀦𑁆𑀢𑀺 𑀢𑀢𑁄 𑀅𑀧𑀭𑀪𑀸𑀕𑁂. 𑀓𑀜𑁆𑀘𑀦𑀧𑀩𑁆𑀩𑀢𑁂𑀢𑀺 𑀓𑀦𑀓𑀫𑀬𑁂 𑀧𑀩𑁆𑀩𑀢𑁂. 𑀩𑀼𑀤𑁆𑀥𑀤𑀲𑁆𑀲𑀦𑀼𑀧𑀸𑀕𑀫𑀻𑀢𑀺 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀫𑀼𑀧𑀸𑀕𑀫𑀺. 𑀢𑀤𑀸 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀅𑀢𑀼𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄. 𑀲𑁄 ‘‘𑀮𑁄𑀓𑁂 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀜𑀸𑀢𑀺𑀕𑀡𑀧𑀭𑀺𑀯𑀼𑀢𑁄 𑀲𑀓𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀲𑀼𑀫𑀦𑀲𑁆𑀲 𑀪𑀕𑀯𑀢𑁄 𑀤𑀺𑀩𑁆𑀩𑁂𑀳𑀺 𑀢𑀼𑀭𑀺𑀬𑁂𑀳𑀺 𑀉𑀧𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑀸𑀦𑀺 𑀤𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀸𑀕𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀅𑀢𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀉𑀲𑁆𑀲𑀦𑁆𑀦𑀓𑀼𑀲𑀮𑀲𑀜𑁆𑀘𑀬𑁄.

𑁧𑁬.

‘‘𑀢𑀤𑀸𑀳𑀁 𑀦𑀸𑀕𑀪𑀯𑀦𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀜𑀸𑀢𑀺𑀪𑀺;

𑀦𑀸𑀕𑀸𑀦𑀁 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺, 𑀲𑀲𑀗𑁆𑀖𑀁 𑀚𑀺𑀦𑀫𑀼𑀧𑀝𑁆𑀞𑀳𑀺𑀁.

𑁧𑁭.

‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 ¶ , 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀺𑀁;

𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑀁 𑀤𑀢𑁆𑀯𑀸, 𑀲𑀭𑀡𑀁 𑀢𑀫𑀼𑀧𑀸𑀕𑀫𑀺𑀁.

𑁧𑁮.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀼𑀫𑀦𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁯.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑀬𑀣𑀸 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀯𑀁𑀲𑁂, 𑀏𑀯𑀁 𑀅𑀝𑁆𑀞 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀢𑀺.

𑁨𑁦.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀲𑁆𑀲 ¶ 𑀧𑀦 𑀲𑀼𑀫𑀦𑀲𑁆𑀲 𑀪𑀕𑀯𑀢𑁄 𑀫𑁂𑀔𑀮𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀺𑀭𑀺𑀫𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀲𑀭𑀡𑁄 𑀘 𑀪𑀸𑀯𑀺𑀢𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀉𑀤𑁂𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑁄𑀡𑀸 𑀘 𑀉𑀧𑀲𑁄𑀡𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀦𑀯𑀼𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁, 𑀦𑀯𑀼𑀢𑀺𑀬𑁂𑀯 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀯𑀝𑀁𑀲𑀺𑀓𑀸 𑀦𑀸𑀫𑀲𑁆𑀲 𑀫𑀳𑁂𑀲𑀻 𑀤𑁂𑀯𑀻, 𑀅𑀦𑀽𑀧𑀫𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀉𑀧𑀝𑁆𑀞𑀸𑀓𑁄 𑀅𑀗𑁆𑀕𑀭𑀸𑀚𑀸. 𑀅𑀗𑁆𑀕𑀸𑀭𑀸𑀫𑁂 𑀯𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁧.

‘‘𑀦𑀕𑀭𑀁 ¶ 𑀫𑁂𑀔𑀮𑀁 𑀦𑀸𑀫, 𑀲𑀼𑀤𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀺𑀭𑀺𑀫𑀸 𑀦𑀸𑀫 𑀚𑀦𑀺𑀓𑀸, 𑀲𑀼𑀫𑀦𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨.

‘‘𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀘𑀦𑁆𑀤𑁄 𑀲𑀼𑀘𑀦𑁆𑀤𑁄 𑀯𑀝𑀁𑀲𑁄 𑀘, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁩.

‘‘𑀢𑁂𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀝𑀁𑀲𑀺𑀓𑀸 𑀦𑀸𑀫 𑀦𑀸𑀭𑀻, 𑀅𑀦𑀽𑀧𑀫𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁪.

‘‘𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁫.

‘‘𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀲𑀼𑀫𑀦𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑁂𑀔𑀮𑁂 𑀧𑀼𑀭𑀫𑀼𑀢𑁆𑀢𑀫𑁂.

𑁨𑁬.

‘‘𑀲𑀭𑀡𑁄 𑀪𑀸𑀯𑀺𑀢𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀉𑀤𑁂𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀫𑀦𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁭.

‘‘𑀲𑁄𑀡𑀸 ¶ 𑀘 𑀉𑀧𑀲𑁄𑀡𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀲𑁄𑀧𑀺 𑀩𑀼𑀤𑁆𑀥𑁄 𑀅𑀫𑀺𑀢𑀬𑀲𑁄, 𑀦𑀸𑀕𑀫𑀽𑀮𑁂 𑀅𑀩𑀼𑀚𑁆𑀛𑀣.

𑁨𑁮.

‘‘𑀯𑀭𑀼𑀡𑁄 𑀘𑁂𑀯 𑀲𑀭𑀡𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀘𑀸𑀮𑀸 𑀘 𑀉𑀧𑀘𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁯.

‘‘𑀉𑀘𑁆𑀘𑀢𑁆𑀢𑀦𑁂𑀦 ¶ 𑀲𑁄 𑀩𑀼𑀤𑁆𑀥𑁄, 𑀦𑀯𑀼𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁩𑁦.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁧.

‘‘𑀢𑀸𑀭𑀡𑀻𑀬𑁂 𑀢𑀸𑀭𑀬𑀺𑀢𑁆𑀯𑀸, 𑀩𑁄𑀥𑀦𑀻𑀬𑁂 𑀘 𑀩𑁄𑀥𑀬𑀺;

𑀧𑀭𑀺𑀦𑀺𑀩𑁆𑀩𑀸𑀬𑀺 𑀲𑀫𑁆𑀩𑀼𑀤𑁆𑀥𑁄, 𑀉𑀴𑀼𑀭𑀸𑀚𑀸𑀯 𑀅𑀢𑁆𑀣𑀫𑀺.

𑁩𑁨.

‘‘𑀢𑁂 𑀘 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽, 𑀲𑁄 𑀘 𑀩𑀼𑀤𑁆𑀥𑁄 𑀅𑀲𑀸𑀤𑀺𑀲𑁄;

𑀅𑀢𑀼𑀮𑀧𑁆𑀧𑀪𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸 𑀢𑁂 𑀫𑀳𑀸𑀬𑀲𑀸.

𑁩𑁩.

‘‘𑀢𑀜𑁆𑀘 𑀜𑀸𑀡𑀁 𑀅𑀢𑀼𑀮𑀺𑀬𑀁, 𑀢𑀸𑀦𑀺 𑀘 𑀅𑀢𑀼𑀮𑀸𑀦𑀺 𑀭𑀢𑀦𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁪.

‘‘𑀲𑀼𑀫𑀦𑁄 𑀬𑀲𑀥𑀭𑁄 𑀩𑀼𑀤𑁆𑀥𑁄, 𑀅𑀗𑁆𑀕𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯 𑀢𑀲𑁆𑀲 𑀚𑀺𑀦𑀣𑀽𑀧𑁄, 𑀘𑀢𑀼𑀬𑁄𑀚𑀦𑀫𑀼𑀕𑁆𑀕𑀢𑁄’’𑀢𑀺.

𑀢𑀢𑁆𑀣 ¶ 𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄𑀢𑀺 𑀯𑀺𑀯𑀺𑀥𑀭𑀢𑀦𑀯𑀺𑀘𑀺𑀢𑁆𑀢𑀓𑀜𑁆𑀘𑀦𑀫𑀬𑀕𑁆𑀖𑀺𑀓𑀲𑀤𑀺𑀲𑀭𑀽𑀧𑀲𑁄𑀪𑁄. 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀢𑀲𑁆𑀲 𑀧𑀪𑀸𑀬 𑀤𑀲𑀲𑀳𑀲𑁆𑀲𑀻𑀧𑀺 𑀮𑁄𑀓𑀥𑀸𑀢𑀼 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀭𑀡𑀻𑀬𑁂𑀢𑀺 𑀢𑀸𑀭𑀬𑀺𑀢𑀩𑁆𑀩𑁂, 𑀢𑀸𑀭𑀬𑀺𑀢𑀼𑀁 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂𑀢𑀺 𑀅𑀢𑁆𑀣𑁄. 𑀉𑀴𑀼𑀭𑀸𑀚𑀸𑀯𑀸𑀢𑀺 𑀘𑀦𑁆𑀤𑁄 𑀯𑀺𑀬. 𑀅𑀢𑁆𑀣𑀫𑀻𑀢𑀺 𑀅𑀢𑁆𑀣𑀗𑁆𑀕𑀢𑁄. 𑀓𑁂𑀘𑀺 ‘‘𑀅𑀢𑁆𑀣𑀁 𑀕𑀢𑁄’’𑀢𑀺 𑀧𑀞𑀦𑁆𑀢𑀺. 𑀅𑀲𑀸𑀤𑀺𑀲𑁄𑀢𑀺 𑀅𑀲𑀤𑀺𑀲𑁄. 𑀫𑀳𑀸𑀬𑀲𑀸𑀢𑀺 𑀫𑀳𑀸𑀓𑀺𑀢𑁆𑀢𑀺𑀲𑀤𑁆𑀤𑀸 𑀫𑀳𑀸𑀧𑀭𑀺𑀯𑀸𑀭𑀸 𑀘. 𑀢𑀜𑁆𑀘 𑀜𑀸𑀡𑀦𑁆𑀢𑀺 𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘. 𑀅𑀢𑀼𑀮𑀺𑀬𑀦𑁆𑀢𑀺 𑀅𑀢𑀼𑀮𑁆𑀬𑀁 𑀅𑀲𑀤𑀺𑀲𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀼𑀫𑀦𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘𑀢𑀼𑀢𑁆𑀣𑁄 𑀩𑀼𑀤𑁆𑀥𑀯𑀁𑀲𑁄.

𑁭. 𑀭𑁂𑀯𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀲𑀼𑀫𑀦𑀲𑁆𑀲 ¶ ¶ 𑀧𑀦 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀲𑀸𑀲𑀦𑁂 𑀘𑀲𑁆𑀲 𑀅𑀦𑁆𑀢𑀭𑀳𑀺𑀢𑁂 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀫𑀦𑀼𑀲𑁆𑀲𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀧𑀭𑀺𑀳𑀸𑀬𑀫𑀸𑀦𑀸 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀢𑀤𑀸 𑀭𑁂𑀯𑀢𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺. 𑀲𑁄𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑁂𑀓𑀭𑀢𑀦𑀲𑀫𑀼𑀚𑁆𑀚𑀮𑀺𑀢𑀪𑀯𑀦𑁂 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀩𑁆𑀩𑀥𑀦𑀥𑀜𑁆𑀜𑀯𑀢𑀺𑀲𑀼𑀥𑀜𑁆𑀜𑀯𑀢𑀻𑀦𑀕𑀭𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀲𑀫𑀮𑀗𑁆𑀓𑀢𑀅𑀫𑀺𑀢𑀭𑀼𑀘𑀺𑀭𑀧𑀭𑀺𑀯𑀸𑀭𑀧𑀭𑀺𑀯𑀼𑀢𑀲𑁆𑀲 𑀲𑀺𑀭𑀺𑀯𑀺𑀪𑀯𑀲𑀫𑀼𑀤𑀬𑁂𑀦𑀸𑀓𑀼𑀮𑀲𑁆𑀲 𑀲𑀩𑁆𑀩𑀲𑀫𑀺𑀤𑁆𑀥𑀺𑀯𑀺𑀧𑀼𑀮𑀲𑁆𑀲 𑀯𑀺𑀧𑀼𑀮𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀲𑀩𑁆𑀩𑀚𑀦𑀦𑀬𑀦𑀸𑀮𑀺𑀧𑀸𑀮𑀺𑀲𑀫𑀸𑀓𑀼𑀮𑀸𑀬 𑀲𑀫𑁆𑀨𑀼𑀮𑁆𑀮𑀦𑀬𑀦𑀓𑀼𑀯𑀮𑀬𑀲𑀲𑁆𑀲𑀺𑀭𑀺𑀓𑀲𑀺𑀦𑀺𑀤𑁆𑀥𑀯𑀤𑀦𑀓𑀫𑀮𑀸𑀓𑀭𑀲𑁄𑀪𑀸𑀲𑀫𑀼𑀚𑁆𑀚𑀮𑀸𑀬 𑀲𑀼𑀭𑀼𑀘𑀺𑀭𑀫𑀦𑁄𑀳𑀭𑀕𑀼𑀡𑀕𑀡𑀯𑀺𑀧𑀼𑀮𑀸𑀬 𑀯𑀺𑀧𑀼𑀮𑀸𑀬 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀢𑁄 𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀸 𑀯𑀺𑀬 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺.

𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀚𑀸𑀢𑀺𑀬𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑁂𑀯 𑀅𑀳𑁂𑀲𑀼𑀁. 𑀲𑀼𑀤𑀲𑁆𑀲𑀦𑀭𑀢𑀦𑀕𑁆𑀖𑀺𑀆𑀯𑁂𑀴𑀦𑀸𑀫𑀓𑀸 𑀢𑀬𑁄 𑀘𑀲𑁆𑀲 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀼𑀤𑀲𑁆𑀲𑀦𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀢𑁆𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀳𑀺 𑀧𑀭𑀺𑀯𑀼𑀢𑁄 𑀲𑁄 𑀲𑀼𑀭𑀬𑀼𑀯𑀢𑀻𑀳𑀺 𑀧𑀭𑀺𑀯𑀼𑀢𑁄 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀙𑀩𑁆𑀩𑀲𑁆𑀲𑀲𑀳𑀲𑁆𑀲𑀸𑀦𑀺 𑀯𑀺𑀲𑀬𑀲𑀼𑀔𑀫𑀦𑀼𑀪𑀯𑀫𑀸𑀦𑁄 𑀅𑀕𑀸𑀭𑀁 ¶ 𑀅𑀚𑁆𑀛𑀸𑀯𑀲𑀺. 𑀲𑁄 𑀲𑀼𑀤𑀲𑁆𑀲𑀦𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀯𑀭𑀼𑀡𑁂 𑀦𑀸𑀫 𑀢𑀦𑀬𑁂 𑀚𑀸𑀢𑁂 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀢𑀦𑀼𑀯𑀭𑀯𑀲𑀦𑀦𑀺𑀯𑀲𑀦𑁄 𑀆𑀫𑀼𑀓𑁆𑀓𑀫𑀼𑀢𑁆𑀢𑀸𑀳𑀸𑀭𑀫𑀡𑀺𑀓𑀼𑀡𑁆𑀟𑀮𑁄 𑀯𑀭𑀓𑁂𑀬𑀽𑀭𑀫𑀓𑀼𑀝𑀓𑀝𑀓𑀥𑀭𑁄 𑀧𑀭𑀫𑀲𑀼𑀭𑀪𑀺𑀕𑀦𑁆𑀥𑀓𑀼𑀲𑀼𑀫𑀲𑀫𑀮𑀗𑁆𑀓𑀢𑁄 𑀧𑀭𑀫𑀭𑀼𑀘𑀺𑀭𑀓𑀭𑀦𑀺𑀓𑀭𑁄 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑁄 𑀯𑀺𑀬 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀯𑀺𑀬 𑀘𑀦𑁆𑀤𑁄 𑀢𑀺𑀤𑀲𑀕𑀡𑀧𑀭𑀺𑀯𑀼𑀢𑁄 𑀯𑀺𑀬 𑀤𑀲𑀲𑀢𑀦𑀬𑀦𑁄 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀼𑀢𑁄 𑀯𑀺𑀬 𑀘 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀆𑀚𑀜𑁆𑀜𑀭𑀣𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀚𑀮𑀚𑀸𑀫𑀮𑀸𑀯𑀺𑀓𑀮𑀦𑀻𑀮𑀓𑀼𑀯𑀮𑀬𑀤𑀮𑀲𑀤𑀺𑀲𑁂𑀦𑀸𑀢𑀺𑀦𑀺𑀲𑀺𑀢𑁂𑀦𑀸𑀢𑀺𑀢𑀺𑀔𑀺𑀡𑁂𑀦𑀸𑀲𑀺𑀦𑀸 𑀲𑀓𑁂𑀲𑀫𑀓𑀼𑀝𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀺. 𑀢𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂𑀦 ¶ 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀲𑀢𑁆𑀢𑀭𑀢𑀦𑀫𑀬𑀁 𑀘𑁂𑀢𑀺𑀬𑀁 𑀅𑀓𑀸𑀲𑀺.

𑀫𑀳𑀸𑀧𑀼𑀭𑀺𑀲𑁄 ¶ 𑀧𑀦 𑀤𑁂𑀯𑀤𑀢𑁆𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀧𑀭𑀺𑀤𑀳𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀏𑀓𑀸 𑀘 𑀦𑀁 𑀧𑀼𑀭𑀺𑀲𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀢𑁆𑀢𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀅𑀜𑁆𑀜𑀢𑀭𑀸𑀬 𑀲𑀸𑀥𑀼𑀤𑁂𑀯𑀺𑀬𑀸 𑀦𑀸𑀫 𑀲𑁂𑀝𑁆𑀞𑀺𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀅𑀜𑁆𑀜𑀢𑀭𑁂𑀦𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀫𑀢𑁆𑀢𑀯𑀭𑀦𑀸𑀕𑀕𑀸𑀫𑀻 𑀦𑀸𑀕𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑁂𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 (𑀥. 𑀧. 𑁧𑁫𑁩-𑁧𑁫𑁪) 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀲𑀼𑀫𑀦𑀲𑁆𑀲 𑀅𑀧𑀭𑁂𑀦, 𑀭𑁂𑀯𑀢𑁄 𑀦𑀸𑀫 𑀦𑀸𑀬𑀓𑁄;

𑀅𑀦𑀼𑀧𑀫𑁄 𑀅𑀲𑀤𑀺𑀲𑁄, 𑀅𑀢𑀼𑀮𑁄 𑀉𑀢𑁆𑀢𑀫𑁄 𑀚𑀺𑀦𑁄’’𑀢𑀺.

𑀭𑁂𑀯𑀢𑁄 𑀓𑀺𑀭 𑀲𑀢𑁆𑀣𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁭𑁨; 𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀫𑀳𑀸𑀯. 𑁧𑁦) 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀜𑁆𑀜𑁂 𑀘 𑀩𑀳𑀽 𑀤𑁂𑀯𑀫𑀦𑀼𑀲𑁆𑀲𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀯𑀭𑀼𑀡𑀸𑀭𑀸𑀫𑁂 𑀑𑀢𑀭𑀺𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀢𑀺𑀧𑀭𑀺𑀯𑀝𑁆𑀝𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀅𑀜𑁆𑀜𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀻𑀲𑀼 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨.

‘‘𑀲𑁄𑀧𑀺 𑀥𑀫𑁆𑀫𑀁 𑀧𑀓𑀸𑀲𑁂𑀲𑀺, 𑀩𑁆𑀭𑀳𑁆𑀫𑀼𑀦𑀸 𑀅𑀪𑀺𑀬𑀸𑀘𑀺𑀢𑁄;

𑀔𑀦𑁆𑀥𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀅𑀧𑁆𑀧𑀯𑀢𑁆𑀢𑀁 𑀪𑀯𑀸𑀪𑀯𑁂’’𑀢𑀺.

𑀢𑀢𑁆𑀣 ¶ 𑀔𑀦𑁆𑀥𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑀓𑀭𑀡𑀁. 𑀲𑀪𑀸𑀯𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀳𑁄 𑀔𑀦𑁆𑀥𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀦𑀸𑀫. 𑀅𑀣 𑀯𑀸 𑀨𑁂𑀡𑀧𑀺𑀡𑁆𑀟𑀽𑀧𑀫𑀁 𑀭𑀽𑀧𑀁 𑀧𑀭𑀺𑀫𑀤𑁆𑀤𑀦𑀸𑀲𑀳𑀦𑀢𑁄 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀸𑀤𑀺𑀪𑀸𑀯𑀢𑁄 𑀘 𑀉𑀤𑀓𑀧𑀼𑀩𑁆𑀩𑀼𑀴𑀓𑀁 𑀯𑀺𑀬 ¶ 𑀯𑁂𑀤𑀦𑀸 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀪𑀸𑀯𑀢𑁄, 𑀫𑀭𑀻𑀘𑀺𑀓𑀸 𑀯𑀺𑀬 𑀲𑀜𑁆𑀜𑀸 𑀯𑀺𑀧𑁆𑀧𑀮𑀫𑁆𑀪𑀦𑀢𑁄, 𑀓𑀤𑀮𑀺𑀓𑁆𑀔𑀦𑁆𑀥𑁄 𑀯𑀺𑀬 𑀲𑀗𑁆𑀔𑀸𑀭𑀸 𑀅𑀲𑀸𑀭𑀓𑀢𑁄, 𑀫𑀸𑀬𑀸 𑀯𑀺𑀬 𑀯𑀺𑀜𑁆𑀜𑀸𑀡𑀁 𑀯𑀜𑁆𑀘𑀦𑀓𑀢𑁄’’𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀦𑀬𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦𑀧𑀺 𑀔𑀦𑁆𑀥𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁 (𑀯𑀺𑀪. 𑀅𑀝𑁆𑀞. 𑁨𑁬 𑀓𑀫𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸). 𑀅𑀧𑁆𑀧𑀯𑀢𑁆𑀢𑀁 𑀪𑀯𑀸𑀪𑀯𑁂𑀢𑀺 𑀏𑀢𑁆𑀣 𑀪𑀯𑁄𑀢𑀺 𑀯𑀟𑁆𑀠𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 ¶ , 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀪𑀯𑁄𑀢𑀺 𑀔𑀼𑀤𑁆𑀤𑀓𑀪𑀯𑁄, 𑀅𑀪𑀯𑁄𑀢𑀺 𑀫𑀳𑀸𑀪𑀯𑁄. 𑀪𑀯𑁄𑀢𑀺 𑀓𑀸𑀫𑀪𑀯𑁄, 𑀅𑀪𑀯𑁄𑀢𑀺 𑀭𑀽𑀧𑀸𑀭𑀽𑀧𑀪𑀯𑁄𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀪𑀯𑀸𑀪𑀯𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 (𑀫. 𑀦𑀺. 𑀅𑀝𑁆𑀞. 𑁨.𑁨𑁨𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁦𑁮𑁦; 𑀉𑀤𑀸. 𑀅𑀝𑁆𑀞. 𑁨𑁦). 𑀢𑁂𑀲𑀁 𑀪𑀯𑀸𑀪𑀯𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀥𑀫𑁆𑀫𑀁 𑀧𑀓𑀸𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀯𑀢𑀺 𑀅𑀦𑁂𑀦𑀸𑀢𑀺 𑀪𑀯𑁄, 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀸𑀤𑀺𑀓𑀁. 𑀉𑀧𑀧𑀢𑁆𑀢𑀺𑀪𑀯𑁄 𑀅𑀪𑀯𑁄 𑀦𑀸𑀫. 𑀉𑀪𑀬𑀢𑁆𑀣 𑀦𑀺𑀓𑀦𑁆𑀢𑀺𑀬𑀸 𑀧𑀳𑀸𑀦𑀓𑀭𑀁 𑀅𑀧𑁆𑀧𑀯𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀦 𑀭𑁂𑀯𑀢𑀩𑀼𑀤𑁆𑀥𑀲𑁆𑀲 𑀢𑀬𑁄𑀯 𑀅𑀪𑀺𑀲𑀫𑀬𑀸 𑀅𑀳𑁂𑀲𑀼𑀁. 𑀧𑀞𑀫𑁄 𑀧𑀦𑀲𑁆𑀲 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋

𑁩.

‘‘𑀢𑀲𑁆𑀲𑀸𑀪𑀺𑀲𑀫𑀬𑀸 𑀢𑀻𑀡𑀺, 𑀅𑀳𑁂𑀲𑀼𑀁 𑀥𑀫𑁆𑀫𑀤𑁂𑀲𑀦𑁂;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀻𑀡𑀻𑀢𑀺 𑀢𑀬𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄, 𑀅𑀬𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀦𑀕𑀭𑀼𑀢𑁆𑀢𑀭𑁂 𑀉𑀢𑁆𑀢𑀭𑁂 𑀦𑀕𑀭𑁂 𑀲𑀩𑁆𑀩𑀸𑀭𑀺𑀦𑁆𑀤𑀫𑁄 𑀅𑀭𑀺𑀦𑁆𑀤𑀫𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀓𑀺𑀭 𑀪𑀕𑀯𑀦𑁆𑀢𑀁 𑀅𑀢𑁆𑀢𑀦𑁄 𑀦𑀕𑀭𑀫𑀦𑀼𑀧𑁆𑀧𑀢𑁆𑀢𑀁 𑀲𑀼𑀢𑁆𑀯𑀸 𑀢𑀻𑀳𑀺 𑀚𑀦𑀓𑁄𑀝𑀻𑀳𑀺 𑀧𑀭𑀺𑀯𑀼𑀢𑁄 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀺𑀕𑀸𑀯𑀼𑀢𑀯𑀺𑀢𑁆𑀣𑀢𑀁 𑀤𑀻𑀧𑀧𑀽𑀚𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀪𑀕𑀯𑀸 𑀢𑀲𑁆𑀲 𑀫𑀦𑁄𑀦𑀼𑀓𑀽𑀮𑀁 𑀯𑀺𑀘𑀺𑀢𑁆𑀢𑀦𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑁄𑀝𑀺𑀲𑀳𑀲𑁆𑀲𑀲𑁆𑀲 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀬𑀤𑀸 𑀅𑀭𑀺𑀦𑁆𑀤𑀫𑀁 𑀭𑀸𑀚𑀁, 𑀯𑀺𑀦𑁂𑀲𑀺 𑀭𑁂𑀯𑀢𑁄 𑀫𑀼𑀦𑀺;

𑀢𑀤𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄.

𑀅𑀣𑀸𑀧𑀭𑁂𑀦 ¶ ¶ 𑀲𑀫𑀬𑁂𑀦 𑀭𑁂𑀯𑀢𑁄 𑀲𑀢𑁆𑀣𑀸 𑀉𑀢𑁆𑀢𑀭𑀦𑀺𑀕𑀫𑀁 𑀦𑀸𑀫 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀤𑀸 𑀓𑀺𑀭 𑀉𑀢𑁆𑀢𑀭𑀦𑀺𑀕𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀪𑁂𑀲𑀚𑁆𑀚𑀧𑀸𑀦𑀓𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀺𑀓𑁆𑀔𑀽 𑀧𑀭𑀺𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺? 𑀢𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀪𑀕𑀯𑀸, 𑀆𑀯𑀼𑀲𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣𑀸𑀢𑀻𑀢𑁂 𑀢𑀲𑁆𑀫𑀺𑀁 𑀲𑀢𑁆𑀢𑀸𑀳𑁂 𑀪𑀕𑀯𑀦𑁆𑀢𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀁 ¶ 𑀲𑀭𑀤𑀲𑀫𑀬𑁂 𑀲𑀽𑀭𑀺𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀅𑀦𑀽𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀕𑀼𑀡𑀸𑀦𑀺𑀲𑀁𑀲𑀁 𑀧𑀼𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀘 𑀢𑁂𑀲𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀕𑀼𑀡𑀸𑀦𑀺𑀲𑀁𑀲𑀁 𑀓𑀣𑁂𑀲𑀺. 𑀢𑀤𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑁄𑀝𑀺𑀲𑀢𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀲𑀢𑁆𑀢𑀸𑀳𑀁 𑀧𑀝𑀺𑀲𑀮𑁆𑀮𑀸𑀦𑀸, 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑀭𑀸𑀲𑀪𑁄;

𑀓𑁄𑀝𑀺𑀲𑀢𑀁 𑀦𑀭𑀫𑀭𑀽𑀦𑀁, 𑀯𑀺𑀦𑁂𑀲𑀺 𑀉𑀢𑁆𑀢𑀫𑁂 𑀨𑀮𑁂’’𑀢𑀺.

𑀲𑀼𑀥𑀜𑁆𑀜𑀯𑀢𑀻𑀦𑀕𑀭𑁂 𑀧𑀞𑀫𑀫𑀳𑀸𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸𑀦𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀫𑁂𑀔𑀮𑀦𑀕𑀭𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀢𑀸𑀦𑀁 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀭𑁂𑀯𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀓𑁄 𑀯𑀭𑀼𑀡𑁄 𑀦𑀸𑀫 𑀅𑀕𑁆𑀕𑀲𑀸𑀯𑀓𑁄 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀕𑁆𑀕𑁄 𑀆𑀩𑀸𑀥𑀺𑀓𑁄 𑀅𑀳𑁄𑀲𑀺. 𑀢𑀢𑁆𑀣 𑀕𑀺𑀮𑀸𑀦𑀧𑀼𑀘𑁆𑀙𑀦𑀢𑁆𑀣𑀸𑀬 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀮𑀓𑁆𑀔𑀡𑀢𑁆𑀢𑀬𑀧𑀭𑀺𑀤𑀻𑀧𑀓𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀧𑀼𑀭𑀺𑀲𑀸𑀦𑀁 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀓𑁂 𑀲𑀦𑁆𑀦𑀺𑀧𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀼𑀯𑀺𑀫𑀼𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭.

‘‘𑀅𑀢𑀺𑀓𑁆𑀓𑀦𑁆𑀢𑀸 𑀕𑀡𑀦𑀧𑀣𑀁, 𑀧𑀞𑀫𑀁 𑀬𑁂 𑀲𑀫𑀸𑀕𑀢𑀸;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮.

‘‘𑀬𑁄𑀧𑀺 𑀧𑀜𑁆𑀜𑀸𑀬 𑀅𑀲𑀫𑁄, 𑀢𑀲𑁆𑀲 𑀘𑀓𑁆𑀓𑀸𑀦𑀼𑀯𑀢𑁆𑀢𑀓𑁄;

𑀲𑁄 𑀢𑀤𑀸 𑀩𑁆𑀬𑀸𑀥𑀺𑀢𑁄 𑀆𑀲𑀺, 𑀧𑀢𑁆𑀢𑁄 𑀚𑀻𑀯𑀺𑀢𑀲𑀁𑀲𑀬𑀁.

𑁯.

‘‘𑀢𑀲𑁆𑀲 ¶ 𑀕𑀺𑀮𑀸𑀦𑀧𑀼𑀘𑁆𑀙𑀸𑀬, 𑀬𑁂 𑀢𑀤𑀸 𑀉𑀧𑀕𑀢𑀸 𑀫𑀼𑀦𑀻;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸 𑀅𑀭𑀳𑀦𑁆𑀢𑁄, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀢𑁆𑀣 𑀘𑀓𑁆𑀓𑀸𑀦𑀼𑀯𑀢𑁆𑀢𑀓𑁄𑀢𑀺 𑀥𑀫𑁆𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀓𑁄. 𑀧𑀢𑁆𑀢𑁄 𑀚𑀻𑀯𑀺𑀢𑀲𑀁𑀲𑀬𑀦𑁆𑀢𑀺 𑀏𑀢𑁆𑀣 𑀚𑀻𑀯𑀺𑀢𑁂 𑀲𑀁𑀲𑀬𑀁 𑀚𑀻𑀯𑀺𑀢𑀲𑀁𑀲𑀬𑀁, 𑀚𑀻𑀯𑀺𑀢𑀓𑁆𑀔𑀬𑀁 ¶ 𑀧𑀸𑀧𑀼𑀡𑀸𑀢𑀺 𑀯𑀸, 𑀦 𑀯𑀸 𑀧𑀸𑀧𑀼𑀡𑀸𑀢𑀻𑀢𑀺 𑀏𑀯𑀁 𑀚𑀻𑀯𑀺𑀢𑀲𑀁𑀲𑀬𑀁 𑀧𑀢𑁆𑀢𑁄, 𑀩𑁆𑀬𑀸𑀥𑀺𑀢𑀲𑁆𑀲 ¶ 𑀩𑀮𑀯𑀪𑀸𑀯𑁂𑀦 𑀫𑀭𑀢𑀺, 𑀦 𑀫𑀭𑀢𑀻𑀢𑀺 𑀚𑀻𑀯𑀺𑀢𑁂 𑀲𑀁𑀲𑀬𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑁂 𑀢𑀤𑀸 𑀉𑀧𑀕𑀢𑀸 𑀫𑀼𑀦𑀻𑀢𑀺 𑀇𑀢𑀺 𑀤𑀻𑀖𑀪𑀸𑀯𑁂 𑀲𑀢𑀺 𑀪𑀺𑀓𑁆𑀔𑀽𑀦𑀁 𑀉𑀧𑀭𑀺 𑀳𑁄𑀢𑀺, 𑀭𑀲𑁆𑀲𑁂 𑀅𑀦𑀼𑀲𑁆𑀲𑀭𑁂𑀦 𑀲𑀤𑁆𑀥𑀺𑀁 𑀯𑀭𑀼𑀡𑀲𑁆𑀲 𑀉𑀧𑀭𑀺 𑀳𑁄𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀭𑀫𑁆𑀫𑀯𑀢𑀻𑀦𑀕𑀭𑁂 𑀅𑀢𑀺𑀤𑁂𑀯𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀧𑀸𑀭𑀁 𑀕𑀢𑁄 𑀭𑁂𑀯𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀺𑀮𑁄𑀓𑀲𑀳𑀲𑁆𑀲𑁂𑀦 𑀤𑀲𑀩𑀮𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑀳𑀲𑁆𑀲𑀕𑁆𑀖𑀦𑀺𑀓𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀲𑁄𑀧𑀺 𑀦𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺 𑁋 ‘‘𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀅𑀢𑀺𑀤𑁂𑀯𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀉𑀧𑀕𑀦𑁆𑀢𑁆𑀯𑀸 𑀭𑁂𑀯𑀢𑀁 𑀩𑀼𑀤𑁆𑀥𑀁, 𑀲𑀭𑀡𑀁 𑀢𑀲𑁆𑀲 𑀕𑀜𑁆𑀙𑀳𑀁.

𑁧𑁧.

‘‘𑀢𑀲𑁆𑀲 𑀲𑀻𑀮𑀁 𑀲𑀫𑀸𑀥𑀺𑀜𑁆𑀘, 𑀧𑀜𑁆𑀜𑀸𑀕𑀼𑀡𑀫𑀦𑀼𑀢𑁆𑀢𑀫𑀁;

𑀣𑁄𑀫𑀬𑀺𑀢𑁆𑀯𑀸 𑀬𑀣𑀸𑀣𑀸𑀫𑀁, 𑀉𑀢𑁆𑀢𑀭𑀻𑀬𑀫𑀤𑀸𑀲𑀳𑀁.

𑁧𑁨.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀭𑁂𑀯𑀢𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩.

‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫’’’𑀦𑁆𑀢𑀺. 𑁋

𑀅𑀝𑁆𑀞 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑁧𑁪.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫.

‘‘𑀢𑀤𑀸𑀧𑀺 𑀢𑀁 𑀩𑀼𑀤𑁆𑀥𑀥𑀫𑁆𑀫𑀁, 𑀲𑀭𑀺𑀢𑁆𑀯𑀸 𑀅𑀦𑀼𑀩𑁆𑀭𑀽𑀳𑀬𑀺𑀁;

𑀆𑀳𑀭𑀺𑀲𑁆𑀲𑀸𑀫𑀺 𑀢𑀁 𑀥𑀫𑁆𑀫𑀁, 𑀬𑀁 𑀫𑀬𑁆𑀳𑀁 𑀅𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀲𑀭𑀡𑀁 𑀢𑀲𑁆𑀲 𑀕𑀜𑁆𑀙𑀳𑀦𑁆𑀢𑀺 𑀢𑀁 𑀲𑀭𑀡𑀁 𑀅𑀕𑀜𑁆𑀙𑀺𑀁 𑀅𑀳𑀁, 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀧𑀜𑁆𑀜𑀸𑀕𑀼𑀡𑀦𑁆𑀢𑀺 ¶ 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀁. 𑀅𑀦𑀼𑀢𑁆𑀢𑀫𑀦𑁆𑀢𑀺 𑀲𑁂𑀝𑁆𑀞𑀁. ‘‘𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀕𑀼𑀡𑀫𑀼𑀢𑁆𑀢𑀫’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄 𑀉𑀢𑁆𑀢𑀸𑀦𑁄𑀯. 𑀣𑁄𑀫𑀬𑀺𑀢𑁆𑀯𑀸𑀢𑀺 𑀣𑁄𑀫𑁂𑀢𑁆𑀯𑀸 𑀯𑀡𑁆𑀡𑀬𑀺𑀢𑁆𑀯𑀸. 𑀬𑀣𑀸𑀣𑀸𑀫𑀦𑁆𑀢𑀺 𑀬𑀣𑀸𑀩𑀮𑀁. 𑀉𑀢𑁆𑀢𑀭𑀻𑀬𑀦𑁆𑀢𑀺 ¶ 𑀉𑀢𑁆𑀢𑀭𑀸𑀲𑀗𑁆𑀕𑀁. 𑀅𑀤𑀸𑀲𑀳𑀦𑁆𑀢𑀺 𑀅𑀤𑀸𑀲𑀺𑀁 𑀅𑀳𑀁. 𑀩𑀼𑀤𑁆𑀥𑀥𑀫𑁆𑀫𑀦𑁆𑀢𑀺 𑀩𑀼𑀤𑁆𑀥𑀪𑀸𑀯𑀓𑀭𑀁 𑀥𑀫𑁆𑀫𑀁, 𑀧𑀸𑀭𑀫𑀻𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀭𑀺𑀢𑁆𑀯𑀸𑀢𑀺 𑀅𑀦𑀼𑀲𑁆𑀲𑀭𑀺𑀢𑁆𑀯𑀸. 𑀅𑀦𑀼𑀩𑁆𑀭𑀽𑀳𑀬𑀺𑀦𑁆𑀢𑀺 𑀅𑀪𑀺𑀯𑀟𑁆𑀠𑁂𑀲𑀺𑀁. 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀆𑀦𑀬𑀺𑀲𑁆𑀲𑀸𑀫𑀺. 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀩𑀼𑀤𑁆𑀥𑀢𑁆𑀢𑀁. 𑀬𑀁 𑀫𑀬𑁆𑀳𑀁 𑀅𑀪𑀺𑀧𑀢𑁆𑀣𑀺𑀢𑀦𑁆𑀢𑀺 𑀬𑀁 𑀫𑀬𑀸 𑀅𑀪𑀺𑀧𑀢𑁆𑀣𑀺𑀢𑀁 𑀩𑀼𑀤𑁆𑀥𑀢𑁆𑀢𑀁, 𑀢𑀁 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀭𑁂𑀯𑀢𑀲𑁆𑀲 𑀪𑀕𑀯𑀢𑁄 𑀦𑀕𑀭𑀁 𑀲𑀼𑀥𑀜𑁆𑀜𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀯𑀺𑀧𑀼𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀯𑀺𑀧𑀼𑀮𑀸 𑀦𑀸𑀫, 𑀯𑀭𑀼𑀡𑁄 𑀘 𑀩𑁆𑀭𑀳𑁆𑀫𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀫𑁆𑀪𑀯𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀪𑀤𑁆𑀤𑀸 𑀘 𑀲𑀼𑀪𑀤𑁆𑀤𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀼𑀤𑀲𑁆𑀲𑀦𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀯𑀭𑀼𑀡𑁄 𑀦𑀸𑀫 𑀧𑀼𑀢𑁆𑀢𑁄, 𑀆𑀚𑀜𑁆𑀜𑀭𑀣𑁂𑀦 𑀦𑀺𑀓𑁆𑀔𑀫𑀺.

‘‘𑀢𑀲𑁆𑀲 𑀤𑁂𑀳𑀸𑀪𑀺𑀦𑀺𑀓𑁆𑀔𑀦𑁆𑀢𑀁, 𑀧𑀪𑀸𑀚𑀸𑀮𑀫𑀦𑀼𑀢𑁆𑀢𑀭𑀁;

𑀤𑀺𑀯𑀸 𑀘𑁂𑀯 𑀢𑀤𑀸 𑀭𑀢𑁆𑀢𑀺𑀁, 𑀦𑀺𑀘𑁆𑀘𑀁 𑀨𑀭𑀢𑀺 𑀬𑁄𑀚𑀦𑀁.

‘‘𑀥𑀸𑀢𑀼𑀬𑁄 𑀫𑀫 𑀲𑀩𑁆𑀩𑀸𑀧𑀺, 𑀯𑀺𑀓𑀺𑀭𑀦𑁆𑀢𑀽𑀢𑀺 𑀲𑁄 𑀚𑀺𑀦𑁄;

𑀅𑀥𑀺𑀝𑁆𑀞𑀸𑀲𑀺 𑀫𑀳𑀸𑀯𑀻𑀭𑁄, 𑀲𑀩𑁆𑀩𑀲𑀢𑁆𑀢𑀸𑀦𑀼𑀓𑀫𑁆𑀧𑀓𑁄.

‘‘𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑁂, 𑀫𑀳𑀢𑁄 𑀦𑀕𑀭𑀲𑁆𑀲 𑀲𑁄;

𑀧𑀽𑀚𑀺𑀢𑁄 𑀦𑀭𑀫𑀭𑀽𑀳𑀺, 𑀧𑀭𑀺𑀦𑀺𑀩𑁆𑀩𑀸𑀬𑀺 𑀭𑁂𑀯𑀢𑁄’’𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬.

‘‘𑀦𑀕𑀭𑀁 𑀲𑀼𑀥𑀜𑁆𑀜𑀯𑀢𑀻 𑀦𑀸𑀫, 𑀯𑀺𑀧𑀼𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀯𑀺𑀧𑀼𑀮𑀸 𑀦𑀸𑀫 𑀚𑀦𑀺𑀓𑀸, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁧.

‘‘𑀯𑀭𑀼𑀡𑁄 𑀩𑁆𑀭𑀳𑁆𑀫𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀫𑁆𑀪𑀯𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨.

‘‘𑀪𑀤𑁆𑀤𑀸 ¶ 𑀘𑁂𑀯 𑀲𑀼𑀪𑀤𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀦𑀸𑀕𑀫𑀽𑀮𑁂 𑀅𑀩𑀼𑀚𑁆𑀛𑀣.

𑁨𑁩.

‘‘𑀧𑀤𑀼𑀫𑁄 ¶ 𑀓𑀼𑀜𑁆𑀚𑀭𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀲𑀺𑀭𑀺𑀫𑀸 𑀘𑁂𑀯 𑀬𑀲𑀯𑀢𑀻, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁪.

‘‘𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀅𑀲𑀻𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀇𑀦𑁆𑀤𑀓𑁂𑀢𑀼𑀯 𑀉𑀕𑁆𑀕𑀢𑁄.

𑁨𑁫.

‘‘𑀢𑀲𑁆𑀲 𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑀸, 𑀧𑀪𑀸𑀫𑀸𑀮𑀸 𑀅𑀦𑀼𑀢𑁆𑀢𑀭𑀸;

𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀲𑀫𑀦𑁆𑀢𑀸 𑀨𑀭𑀢𑀺 𑀬𑁄𑀚𑀦𑀁.

𑁨𑁬.

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 ¶ , 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀤𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭.

‘‘𑀤𑀲𑁆𑀲𑀬𑀺𑀢𑁆𑀯𑀸 𑀩𑀼𑀤𑁆𑀥𑀩𑀮𑀁 𑀅𑀫𑀢𑀁 𑀮𑁄𑀓𑁂 𑀧𑀓𑀸𑀲𑀬𑀁;

𑀦𑀺𑀩𑁆𑀩𑀸𑀬𑀺 𑀅𑀦𑀼𑀧𑀸𑀤𑀸𑀦𑁄, 𑀬𑀣𑀕𑁆𑀕𑀼𑀧𑀸𑀤𑀸𑀦𑀲𑀗𑁆𑀔𑀬𑀸.

𑁨𑁮.

‘‘𑀲𑁄 𑀘 𑀓𑀸𑀬𑁄 𑀭𑀢𑀦𑀦𑀺𑀪𑁄, 𑀲𑁄 𑀘 𑀥𑀫𑁆𑀫𑁄 𑀅𑀲𑀸𑀤𑀺𑀲𑁄;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀑𑀪𑀸𑀲𑁂𑀢𑀻𑀢𑀺 𑀧𑀓𑀸𑀲𑀬𑀢𑀺. 𑀉𑀕𑁆𑀕𑀢𑁄𑀢𑀺 𑀉𑀲𑁆𑀲𑀺𑀢𑁄. 𑀧𑀪𑀸𑀫𑀸𑀮𑀸𑀢𑀺 𑀧𑀪𑀸𑀯𑁂𑀮𑀸. 𑀬𑀣𑀕𑁆𑀕𑀻𑀢𑀺 𑀅𑀕𑁆𑀕𑀺 𑀯𑀺𑀬. 𑀉𑀧𑀸𑀤𑀸𑀦𑀲𑀗𑁆𑀔𑀬𑀸𑀢𑀺 𑀇𑀦𑁆𑀥𑀦𑀓𑁆𑀔𑀬𑀸. 𑀲𑁄 𑀘 𑀓𑀸𑀬𑁄 𑀭𑀢𑀦𑀦𑀺𑀪𑁄𑀢𑀺 𑀲𑁄 𑀘 𑀢𑀲𑁆𑀲 𑀪𑀕𑀯𑀢𑁄 𑀓𑀸𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄. ‘‘𑀢𑀜𑁆𑀘 𑀓𑀸𑀬𑀁 𑀭𑀢𑀦𑀦𑀺𑀪’’𑀦𑁆𑀢𑀺𑀧𑀺 𑀧𑀸𑀞𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀲𑁄𑀬𑁂𑀯 𑀧𑀦𑀲𑁆𑀲𑀢𑁆𑀣𑁄. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀭𑁂𑀯𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁮. 𑀲𑁄𑀪𑀺𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀢𑀲𑁆𑀲 ¶ ¶ 𑀧𑀦 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀲𑀸𑀲𑀦𑁂𑀧𑀺 𑀅𑀦𑁆𑀢𑀭𑀳𑀺𑀢𑁂 𑀲𑁄𑀪𑀺𑀢𑁄 𑀦𑀸𑀫 𑀩𑁄𑀥𑀺𑀲𑀢𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑁂𑀳𑀺 𑀆𑀬𑀸𑀘𑀺𑀢𑁄 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀲𑀼𑀥𑀫𑁆𑀫𑀦𑀕𑀭𑁂 𑀲𑀼𑀥𑀫𑁆𑀫𑀭𑀸𑀚𑀲𑁆𑀲 𑀓𑀼𑀮𑁂 𑀲𑀼𑀥𑀫𑁆𑀫𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀼𑀥𑀫𑁆𑀫𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀧𑀭𑀺𑀲𑀼𑀤𑁆𑀥𑀯𑀺𑀭𑀸𑀚𑀺𑀢𑀖𑀦𑀫𑁂𑀖𑀧𑀝𑀮𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀚𑀸𑀢𑀺𑀬𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺.

𑀲𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀢𑁆𑀯𑀸 𑀲𑀢𑁆𑀢𑀢𑁆𑀢𑀺𑀁𑀲𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀸𑀬 𑀅𑀕𑁆𑀕𑀫𑀳𑁂𑀲𑀺𑀬𑀸 𑀫𑀔𑀺𑀮𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀻𑀳𑀓𑀼𑀫𑀸𑀭𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀧𑀸𑀲𑀸𑀤𑁂𑀬𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀁 𑀪𑀸𑀯𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀢𑀢𑁆𑀣𑁂𑀯 𑀧𑀥𑀸𑀦𑀘𑀭𑀺𑀬𑀫𑀘𑀭𑀺. 𑀢𑀢𑁄 𑀫𑀔𑀺𑀮𑀫𑀳𑀸𑀤𑁂𑀯𑀺𑀬𑀸 𑀤𑀺𑀦𑁆𑀦𑀁 𑀧𑀭𑀫𑀫𑀥𑀼𑀭𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀪𑀺𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀘𑀺𑀢𑁆𑀢𑀫𑀼𑀧𑁆𑀧𑀸𑀤𑁂𑀲𑀺 𑁋 ‘‘𑀅𑀬𑀁 𑀧𑀸𑀲𑀸𑀤𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 ¶ 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀫𑀚𑁆𑀛𑁂𑀓𑀢𑁆𑀯𑀸 𑀧𑀣𑀯𑀺𑀬𑀁 𑀑𑀢𑀭𑀢𑀼, 𑀇𑀫𑀸 𑀘 𑀇𑀢𑁆𑀣𑀺𑀬𑁄 𑀫𑀬𑀺 𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑁂 𑀅𑀯𑀼𑀢𑁆𑀢𑀸 𑀲𑀬𑀫𑁂𑀯 𑀧𑀸𑀲𑀸𑀤𑀢𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺. 𑀲𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀸𑀲𑀸𑀤𑁄 𑀘 𑀲𑀼𑀥𑀫𑁆𑀫𑀭𑀸𑀚𑀪𑀯𑀦𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀲𑀺𑀢𑀜𑁆𑀚𑀦𑀲𑀗𑁆𑀓𑀸𑀲𑀫𑀸𑀓𑀸𑀲𑀫𑀩𑁆𑀪𑀼𑀕𑁆𑀕𑀜𑁆𑀙𑀺. 𑀲𑁄 𑀲𑀫𑁄𑀲𑀭𑀺𑀢𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀫𑀲𑀫𑀮𑀗𑁆𑀓𑀢𑀧𑀸𑀲𑀸𑀤𑀢𑀮𑁄 𑀲𑀓𑀮𑀫𑁆𑀧𑀺 𑀕𑀕𑀦𑀢𑀮𑀁 𑀲𑀫𑀮𑀗𑁆𑀓𑀼𑀭𑀼𑀫𑀸𑀦𑁄 𑀯𑀺𑀬 𑀓𑀦𑀓𑀭𑀲𑀥𑀸𑀭𑀸𑀲𑀤𑀺𑀲𑀭𑀼𑀘𑀺𑀭𑀓𑀭𑀦𑀺𑀓𑀭𑁄 𑀤𑀺𑀯𑀲𑀓𑀭𑁄 𑀯𑀺𑀬 𑀘 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑁄 𑀯𑀺𑀬 𑀘 𑀯𑀺𑀭𑁄𑀘𑀫𑀸𑀦𑁄 𑀯𑀺𑀮𑀫𑁆𑀩𑀫𑀸𑀦𑀯𑀺𑀯𑀺𑀥𑀯𑀺𑀘𑀺𑀢𑁆𑀢𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑁄 𑀬𑀲𑁆𑀲 𑀓𑀺𑀭 𑀯𑀸𑀢𑁂𑀭𑀺𑀢𑀲𑁆𑀲 𑀲𑀼𑀓𑀼𑀲𑀮𑀚𑀦𑀯𑀸𑀤𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀼𑀭𑀺𑀬𑀲𑁆𑀲 𑀯𑀺𑀬 𑀲𑀤𑁆𑀤𑁄 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀓𑀫𑀦𑀻𑀬𑁄 𑀘 𑀅𑀳𑁄𑀲𑀺.

𑀤𑀽𑀭𑀢𑁄 𑀧𑀝𑁆𑀞𑀸𑀬 𑀲𑀼𑀬𑁆𑀬𑀫𑀸𑀦𑁂𑀦 𑀫𑀥𑀼𑀭𑁂𑀦 𑀲𑀭𑁂𑀦 𑀲𑀢𑁆𑀢𑀸𑀦𑀁 𑀲𑁄𑀢𑀸𑀦𑀺 𑀑𑀤𑀳𑀫𑀸𑀦𑁄 𑀖𑀭𑀘𑀘𑁆𑀘𑀭𑀘𑀢𑀼𑀓𑁆𑀓𑀯𑀻𑀣𑀺𑀆𑀤𑀻𑀲𑀼 𑀞𑀢𑁆𑀯𑀸 𑀧𑀯𑀢𑁆𑀢𑀺𑀢𑀓𑀣𑀸𑀲𑀮𑁆𑀮𑀸𑀧𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀦𑀸𑀢𑀺𑀦𑀻𑀘𑁂𑀦 𑀦𑀸𑀢𑀺𑀉𑀘𑁆𑀘𑁂𑀦 𑀢𑀭𑀼𑀯𑀭𑀯𑀦𑀫𑀢𑁆𑀣𑀓𑀸𑀯𑀺𑀤𑀽𑀭𑁂𑀦𑀸𑀓𑀸𑀲𑁂𑀦 𑀧𑀮𑁄𑀪𑀬𑀫𑀸𑀦𑁄 ¶ 𑀯𑀺𑀬 𑀢𑀭𑀼𑀯𑀭𑀲𑀸𑀔𑀸𑀦𑀸𑀦𑀸𑀭𑀢𑀦𑀚𑀼𑀢𑀺𑀯𑀺𑀲𑀭𑀲𑀫𑀼𑀚𑁆𑀚𑀮𑁂𑀦 𑀯𑀡𑁆𑀡𑁂𑀦 ¶ 𑀚𑀦𑀦𑀬𑀦𑀸𑀦𑀺 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬 𑀘 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀲𑀫𑀼𑀕𑁆𑀖𑁄𑀲𑀬𑀦𑁆𑀢𑁄 𑀯𑀺𑀬 𑀘 𑀕𑀕𑀦𑀢𑀮𑀁 𑀧𑀝𑀺𑀧𑀚𑁆𑀚𑀺. 𑀢𑀢𑁆𑀣 𑀦𑀸𑀝𑀓𑀺𑀢𑁆𑀣𑀺𑀬𑁄𑀧𑀺 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀯𑀭𑀢𑀼𑀭𑀺𑀬𑀲𑁆𑀲 𑀫𑀥𑀼𑀭𑁂𑀦 𑀲𑀭𑁂𑀦 𑀉𑀧𑀕𑀸𑀬𑀺𑀁𑀲𑀼 𑀘𑁂𑀯 𑀯𑀺𑀮𑀧𑀺𑀁𑀲𑀼 𑀘. 𑀘𑀢𑀼𑀭𑀗𑁆𑀕𑀺𑀦𑀻 𑀓𑀺𑀭𑀲𑁆𑀲 𑀲𑁂𑀦𑀸𑀧𑀺 𑀅𑀮𑀗𑁆𑀓𑀸𑀭-𑀓𑀸𑀬𑀸𑀪𑀭𑀡-𑀚𑀼𑀢𑀺-𑀲𑀫𑀼𑀤𑀬-𑀲𑀫𑀼𑀚𑁆𑀚𑁄𑀢𑀦𑀸𑀦𑀸𑀯𑀺𑀭𑀸𑀕-𑀲𑀼𑀭𑀪𑀺𑀓𑀼𑀲𑀼𑀫𑀯𑀲𑀦𑀸𑀪𑀭𑀡𑀲𑁄𑀪𑀺𑀢𑀸 𑀅𑀫𑀭𑀯𑀭𑀲𑁂𑀦𑀸 𑀯𑀺𑀬 𑀧𑀭𑀫𑀭𑀼𑀘𑀺𑀭𑀤𑀲𑁆𑀲𑀦𑀸 𑀥𑀭𑀡𑀻 𑀯𑀺𑀬 𑀕𑀕𑀦𑀢𑀮𑁂𑀦 𑀧𑀸𑀲𑀸𑀤𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀢𑀢𑁄 𑀧𑀸𑀲𑀸𑀤𑁄 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀉𑀚𑀼𑀯𑀺𑀧𑀼𑀮𑀯𑀝𑁆𑀝𑀓𑁆𑀔𑀦𑁆𑀥𑀁 𑀓𑀼𑀲𑀼𑀫𑀧𑀮𑁆𑀮𑀯𑀫𑀓𑀼𑀮𑀲𑀫𑀮𑀗𑁆𑀓𑀢𑀁 𑀦𑀸𑀕𑀭𑀼𑀓𑁆𑀔𑀁 𑀫𑀚𑁆𑀛𑁂𑀓𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺. 𑀦𑀸𑀝𑀓𑀺𑀢𑁆𑀣𑀺𑀬𑁄 𑀘 𑀓𑁂𑀦𑀘𑀺 𑀅𑀯𑀼𑀢𑁆𑀢𑀸𑀯 𑀢𑀢𑁄 𑀧𑀸𑀲𑀸𑀤𑀢𑁄 𑀑𑀢𑀭𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀦𑁂𑀓𑀕𑀼𑀡𑀲𑁄𑀪𑀺𑀢𑁄 𑀓𑀺𑀭 𑀲𑁄𑀪𑀺𑀢𑁄𑀧𑀺 𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀚𑀦𑀓𑀢𑀧𑀭𑀺𑀯𑀸𑀭𑁄𑀬𑁂𑀯 𑀭𑀢𑁆𑀢𑀺𑀬𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀬𑁄 𑀉𑀧𑁆𑀧𑀸𑀤𑁂𑀲𑀺. 𑀫𑀸𑀭𑀩𑀮𑀁 𑀧𑀦𑀲𑁆𑀲 𑀥𑀫𑁆𑀫𑀢𑀸𑀩𑀮𑁂𑀦𑁂𑀯 𑀬𑀣𑀸𑀕𑀢𑀫𑀕𑀫𑀸𑀲𑀺. 𑀧𑀸𑀲𑀸𑀤𑁄 𑀧𑀦 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀲𑁄𑀪𑀺𑀢𑁄 𑀧𑀦 𑀪𑀕𑀯𑀢𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀚𑁆𑀛𑁂𑀲𑀦𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑁂𑀫𑀸𑀢𑀺𑀓𑁂 𑀓𑀦𑀺𑀝𑁆𑀞𑀪𑀸𑀢𑀺𑀓𑁂 𑀅𑀲𑀫𑀓𑀼𑀫𑀸𑀭𑀜𑁆𑀘 𑀲𑀼𑀦𑁂𑀢𑁆𑀢𑀓𑀼𑀫𑀸𑀭𑀜𑁆𑀘 𑀤𑀺𑀲𑁆𑀯𑀸 𑁋 ‘‘𑀇𑀫𑁂 𑀤𑁆𑀯𑁂 𑀓𑀼𑀫𑀸𑀭𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸, 𑀳𑀦𑁆𑀤𑀸𑀳𑀁 𑀇𑀫𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀲𑀼𑀥𑀫𑁆𑀫𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀤𑁆𑀯𑁂𑀧𑀺 𑀓𑀼𑀫𑀸𑀭𑁂 𑀉𑀬𑁆𑀬𑀸𑀦𑀧𑀸𑀮𑁂𑀦 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀳𑀺 𑀲𑀧𑀭𑀺𑀯𑀸𑀭𑁂𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀚𑀦𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀭𑁂𑀯𑀢𑀲𑁆𑀲 𑀅𑀧𑀭𑁂𑀦, 𑀲𑁄𑀪𑀺𑀢𑁄 𑀦𑀸𑀫 𑀦𑀸𑀬𑀓𑁄;

𑀲𑀫𑀸𑀳𑀺𑀢𑁄 𑀲𑀦𑁆𑀢𑀘𑀺𑀢𑁆𑀢𑁄, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨.

‘‘𑀲𑁄 ¶ 𑀚𑀺𑀦𑁄 𑀲𑀓𑀕𑁂𑀳𑀫𑁆𑀳𑀺, 𑀫𑀸𑀦𑀲𑀁 𑀯𑀺𑀦𑀺𑀯𑀢𑁆𑀢𑀬𑀺;

𑀧𑀢𑁆𑀯𑀸𑀦 𑀓𑁂𑀯𑀮𑀁 𑀩𑁄𑀥𑀺𑀁, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁩.

‘‘𑀬𑀸𑀯 𑀳𑁂𑀝𑁆𑀞𑀸 𑀅𑀯𑀻𑀘𑀺𑀢𑁄, 𑀪𑀯𑀕𑁆𑀕𑀸 𑀘𑀸𑀧𑀺 𑀉𑀤𑁆𑀥𑀢𑁄;

𑀏𑀢𑁆𑀣𑀦𑁆𑀢𑀭𑁂 𑀏𑀓𑀧𑀭𑀺𑀲𑀸, 𑀅𑀳𑁄𑀲𑀺 𑀥𑀫𑁆𑀫𑀤𑁂𑀲𑀦𑁂.

𑁪.

‘‘𑀢𑀸𑀬 ¶ 𑀧𑀭𑀺𑀲𑀸𑀬 𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 ¶ 𑀲𑀓𑀕𑁂𑀳𑀫𑁆𑀳𑀻𑀢𑀺 𑀅𑀢𑁆𑀢𑀦𑁄 𑀪𑀯𑀦𑁂𑀬𑁂𑀯, 𑀅𑀦𑁆𑀢𑁄𑀧𑀸𑀲𑀸𑀤𑀢𑀮𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀫𑀸𑀦𑀲𑀁 𑀯𑀺𑀦𑀺𑀯𑀢𑁆𑀢𑀬𑀻𑀢𑀺 𑀘𑀺𑀢𑁆𑀢𑀁 𑀧𑀭𑀺𑀯𑀢𑁆𑀢𑁂𑀲𑀺, 𑀲𑀓𑀕𑁂𑀳𑁂 𑀞𑀢𑁆𑀯𑀸 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂𑀬𑁂𑀯 𑀧𑀼𑀣𑀼𑀚𑁆𑀚𑀦𑀪𑀸𑀯𑀢𑁄 𑀘𑀺𑀢𑁆𑀢𑀁 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀸𑀢𑀺 𑀳𑁂𑀝𑁆𑀞𑀢𑁄. 𑀪𑀯𑀕𑁆𑀕𑀸𑀢𑀺 𑀅𑀓𑀦𑀺𑀝𑁆𑀞𑀪𑀯𑀦𑀢𑁄. 𑀢𑀸𑀬 𑀧𑀭𑀺𑀲𑀸𑀬𑀸𑀢𑀺 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀫𑀚𑁆𑀛𑁂. 𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀕𑀡𑀦𑀧𑀣𑀫𑀢𑀻𑀢𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀸𑀪𑀺𑀲𑀫𑀬𑁄𑀢𑀺 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄. 𑀅𑀳𑀽𑀢𑀺 𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑀸 𑀧𑀭𑀺𑀲𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. ‘‘𑀧𑀞𑀫𑁂 𑀅𑀪𑀺𑀲𑀫𑀺𑀁𑀲𑀼𑀬𑁂𑀯𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀧𑀞𑀫𑀥𑀫𑁆𑀫𑀤𑁂𑀲𑀦𑁂 𑀅𑀪𑀺𑀲𑀫𑀺𑀁𑀲𑀼 𑀬𑁂 𑀚𑀦𑀸, 𑀢𑁂 𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑀼𑀤𑀲𑁆𑀲𑀦𑀦𑀕𑀭𑀤𑁆𑀯𑀸𑀭𑁂 𑀘𑀺𑀢𑁆𑀢𑀧𑀸𑀝𑀮𑀺𑀬𑀸 𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀦𑀯𑀓𑀦𑀓𑀫𑀡𑀺𑀫𑀬𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀢𑀢𑁄 𑀧𑀭𑀫𑁆𑀧𑀺 𑀤𑁂𑀲𑁂𑀦𑁆𑀢𑁂, 𑀫𑀭𑀽𑀦𑀜𑁆𑀘 𑀲𑀫𑀸𑀕𑀫𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑀼𑀤𑀲𑁆𑀲𑀦𑀦𑀕𑀭𑁂 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀬𑁄𑀚𑀦𑀧𑁆𑀧𑀫𑀸𑀡𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀲𑁄𑀓𑀲𑁆𑀲𑀓𑀡𑁆𑀡𑀘𑀫𑁆𑀧𑀓𑀦𑀸𑀕𑀧𑀼𑀦𑁆𑀦𑀸𑀕𑀯𑀓𑀼𑀮𑀲𑀼𑀭𑀪𑀺𑀘𑀽𑀢𑀧𑀦𑀲𑀸𑀲𑀦𑀲𑀸𑀮𑀓𑀼𑀦𑁆𑀤- 𑀲𑀳𑀓𑀸𑀭𑀓𑀭𑀯𑀻𑀭𑀸𑀤𑀺𑀢𑀭𑀼𑀯𑀭𑀦𑀺𑀭𑀦𑁆𑀢𑀭𑀁 𑀆𑀭𑀸𑀫𑀁 𑀭𑁄𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺. 𑀤𑀸𑀦𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀬𑀸𑀕𑀁 𑀯𑀡𑁆𑀡𑁂𑀢𑁆𑀯𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀧𑀼𑀦𑀸𑀧𑀭𑀁 𑀭𑀸𑀚𑀧𑀼𑀢𑁆𑀢𑁄, 𑀚𑀬𑀲𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀆𑀭𑀸𑀫𑀁 𑀭𑁄𑀧𑀬𑀺𑀢𑁆𑀯𑀸𑀦, 𑀩𑀼𑀤𑁆𑀥𑁂 𑀦𑀺𑀬𑁆𑀬𑀸𑀢𑀬𑀻 𑀢𑀤𑀸.

𑁭.

‘‘𑀢𑀲𑁆𑀲 ¶ ¶ 𑀬𑀸𑀕𑀁 𑀧𑀓𑀺𑀢𑁆𑀢𑁂𑀦𑁆𑀢𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀘𑀓𑁆𑀔𑀼𑀫𑀸;

𑀢𑀤𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀧𑀼𑀦 𑀉𑀕𑁆𑀕𑀢𑁄 𑀦𑀸𑀫 𑀭𑀸𑀚𑀸 𑀲𑀼𑀦𑀦𑁆𑀤𑀦𑀕𑀭𑁂 𑀲𑀼𑀦𑀦𑁆𑀤𑀁 𑀦𑀸𑀫 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀢𑀲𑁆𑀫𑀺𑀁 𑀤𑀸𑀦𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀓𑁄𑀝𑀺𑀲𑀢𑀁 𑀅𑀭𑀳𑀦𑁆𑀢𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 ¶ , 𑀢𑁂𑀲𑀁 𑀫𑀚𑁆𑀛𑁂 𑀲𑁄𑀪𑀺𑀢𑁄 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀫𑁂𑀔𑀮𑀸𑀦𑀕𑀭𑁂 𑀥𑀫𑁆𑀫𑀕𑀡𑁄 𑀥𑀫𑁆𑀫𑀕𑀡𑀸𑀭𑀸𑀫𑀁 𑀦𑀸𑀫 𑀧𑀯𑀭𑀸𑀭𑀸𑀫𑀁 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀢𑁆𑀯𑀸 𑀲𑀳 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂𑀳𑀺 𑀤𑀸𑀦𑀁 𑀅𑀤𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑀺𑀢𑀸𑀦𑀁 𑀦𑀯𑀼𑀢𑀺𑀬𑀸 𑀅𑀭𑀳𑀦𑁆𑀢𑀓𑁄𑀝𑀻𑀦𑀁 𑀲𑀦𑁆𑀦𑀺𑀧𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀪𑀕𑀯𑀸 𑀤𑀲𑀲𑀢𑀦𑀬𑀦𑀧𑀼𑀭𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀬 𑀲𑀼𑀭𑀯𑀭𑀧𑀭𑀺𑀯𑀼𑀢𑁄 𑀑𑀢𑀭𑀺, 𑀢𑀤𑀸 𑀅𑀲𑀻𑀢𑀺𑀬𑀸 𑀅𑀭𑀳𑀦𑁆𑀢𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀓𑁂 𑀲𑀦𑁆𑀦𑀺𑀧𑀸𑀢𑁂 𑀧𑀯𑀸𑀭𑁂𑀲𑀺. 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑁄𑀪𑀺𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁯.

‘‘𑀉𑀕𑁆𑀕𑀢𑁄 𑀦𑀸𑀫 𑀲𑁄 𑀭𑀸𑀚𑀸, 𑀤𑀸𑀦𑀁 𑀤𑁂𑀢𑀺 𑀦𑀭𑀼𑀢𑁆𑀢𑀫𑁂;

𑀢𑀫𑁆𑀳𑀺 𑀤𑀸𑀦𑁂 𑀲𑀫𑀸𑀕𑀜𑁆𑀙𑀼𑀁, 𑀅𑀭𑀳𑀦𑁆𑀢𑀸 𑀲𑀢𑀓𑁄𑀝𑀺𑀬𑁄.

𑁧𑁦.

‘‘𑀧𑀼𑀦𑀸𑀧𑀭𑀁 𑀧𑀼𑀭𑀕𑀡𑁄, 𑀤𑁂𑀢𑀺 𑀤𑀸𑀦𑀁 𑀦𑀭𑀼𑀢𑁆𑀢𑀫𑁂;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁧.

‘‘𑀤𑁂𑀯𑀮𑁄𑀓𑁂 𑀯𑀲𑀺𑀢𑁆𑀯𑀸𑀦, 𑀬𑀤𑀸 𑀑𑀭𑁄𑀳𑀢𑀻 𑀚𑀺𑀦𑁄;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀤𑀸 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀭𑀫𑁆𑀫𑀯𑀢𑀻𑀦𑀕𑀭𑁂 𑀉𑀪𑀢𑁄 𑀲𑀼𑀚𑀸𑀢𑁄 ‘𑀲𑀼𑀚𑀸𑀢𑁄’ 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀲𑁄𑀪𑀺𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑁂𑀫𑀸𑀲𑀁 𑀫𑀳𑀸𑀤𑀸𑀦𑀫𑀤𑀸𑀲𑀺. 𑀲𑁄𑀧𑀺 𑀦𑀁 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨.

‘‘𑀅𑀳𑀁 ¶ 𑀢𑁂𑀦 𑀲𑀫𑀬𑁂𑀦, 𑀲𑀼𑀚𑀸𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀢𑀤𑀸 𑀲𑀲𑀸𑀯𑀓𑀁 𑀩𑀼𑀤𑁆𑀥𑀁, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁩.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑁄𑀪𑀺𑀢𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪.

‘‘𑀧𑀥𑀸𑀦𑀁 ¶ ¶ 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁫.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀢𑀫𑁂𑀯𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀺𑀬𑀸, 𑀉𑀕𑁆𑀕𑀁 𑀥𑀺𑀢𑀺𑀫𑀓𑀸𑀲𑀳’’𑀦𑁆𑀢𑀺.

𑀢𑀢𑁆𑀣 𑀢𑀫𑁂𑀯𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀢𑀲𑁆𑀲 𑀩𑀼𑀤𑁆𑀥𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑀁, 𑀢𑀲𑁆𑀲 𑀧𑀦 𑀲𑁄𑀪𑀺𑀢𑀩𑀼𑀤𑁆𑀥𑀲𑁆𑀲 𑁋 ‘‘𑀅𑀦𑀸𑀕𑀢𑁂 𑀅𑀬𑀁 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀯𑀺𑀢𑀣𑀯𑀘𑀦𑀸 𑀳𑀺 𑀩𑀼𑀤𑁆𑀥𑀸’’𑀢𑀺 𑀩𑀼𑀤𑁆𑀥𑀢𑁆𑀢𑀧𑁆𑀧𑀢𑁆𑀢𑀺𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀉𑀕𑁆𑀕𑀦𑁆𑀢𑀺 𑀢𑀺𑀩𑁆𑀩𑀁 𑀖𑁄𑀭𑀁. 𑀥𑀺𑀢𑀺𑀦𑁆𑀢𑀺 𑀯𑀻𑀭𑀺𑀬𑀁. 𑀅𑀓𑀸𑀲𑀳𑀦𑁆𑀢𑀺 𑀅𑀓𑀸𑀲𑀺𑀁 𑀅𑀳𑀁.

𑀢𑀲𑁆𑀲 𑀧𑀦 𑀲𑁄𑀪𑀺𑀢𑀲𑁆𑀲 𑀪𑀕𑀯𑀢𑁄 𑀲𑀼𑀥𑀫𑁆𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀥𑀫𑁆𑀫𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀥𑀫𑁆𑀫𑀸 𑀦𑀸𑀫 𑀤𑁂𑀯𑀻, 𑀅𑀲𑀫𑁄 𑀘 𑀲𑀼𑀦𑁂𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀦𑁄𑀫𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀦𑀓𑀼𑀮𑀸 𑀘 𑀲𑀼𑀚𑀸𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁, 𑀫𑀔𑀺𑀮𑀸 𑀦𑀸𑀫𑀲𑁆𑀲 𑀫𑀳𑀸𑀤𑁂𑀯𑀻, 𑀲𑀻𑀳𑀓𑀼𑀫𑀸𑀭𑁄 𑀦𑀸𑀫 𑀅𑀢𑁆𑀭𑀚𑁄, 𑀦𑀸𑀝𑀓𑀺𑀢𑁆𑀣𑀻𑀦𑀁 𑀲𑀢𑁆𑀢𑀢𑁆𑀢𑀺𑀁𑀲𑀲𑀳𑀲𑁆𑀲𑀸𑀦𑀺 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀧𑀸𑀲𑀸𑀤𑁂𑀦 𑀅𑀪𑀺𑀦𑀺𑀓𑁆𑀔𑀫𑀺. 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀉𑀧𑀝𑁆𑀞𑀸𑀓𑁄. 𑀲𑁂𑀢𑀸𑀭𑀸𑀫𑁂 𑀓𑀺𑀭 𑀯𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬.

‘‘𑀲𑀼𑀥𑀫𑁆𑀫𑀁 𑀦𑀸𑀫 𑀦𑀕𑀭𑀁, 𑀲𑀼𑀥𑀫𑁆𑀫𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀥𑀫𑁆𑀫𑀸 𑀦𑀸𑀫 𑀚𑀦𑀺𑀓𑀸, 𑀲𑁄𑀪𑀺𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁧.

‘‘𑀅𑀲𑀫𑁄 𑀘 𑀲𑀼𑀦𑁂𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀦𑁄𑀫𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑁄𑀪𑀺𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨.

‘‘𑀦𑀓𑀼𑀮𑀸 𑀘 𑀲𑀼𑀚𑀸𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑀼𑀚𑁆𑀛𑀫𑀸𑀦𑁄 𑀘 𑀲𑁄 𑀩𑀼𑀤𑁆𑀥𑁄, 𑀦𑀸𑀕𑀫𑀽𑀮𑁂 𑀅𑀩𑀼𑀚𑁆𑀛𑀣.

𑁨𑁪.

‘‘𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁 ¶ , 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄.

𑁨𑁫.

‘‘𑀢𑀣𑀸 ¶ 𑀲𑀼𑀨𑀼𑀮𑁆𑀮𑀁 𑀧𑀯𑀦𑀁, 𑀦𑀸𑀦𑀸𑀕𑀦𑁆𑀥𑁂𑀳𑀺 𑀥𑀽𑀧𑀺𑀢𑀁;

𑀢𑀣𑁂𑀯 𑀢𑀲𑁆𑀲 𑀧𑀸𑀯𑀘𑀦𑀁, 𑀲𑀻𑀮𑀕𑀦𑁆𑀥𑁂𑀳𑀺 𑀥𑀽𑀧𑀺𑀢𑀁.

𑁨𑁬.

‘‘𑀬𑀣𑀸𑀧𑀺 𑀲𑀸𑀕𑀭𑁄 𑀦𑀸𑀫, 𑀤𑀲𑁆𑀲𑀦𑁂𑀦 𑀅𑀢𑀧𑁆𑀧𑀺𑀬𑁄;

𑀢𑀣𑁂𑀯 𑀢𑀲𑁆𑀲 𑀧𑀸𑀯𑀘𑀦𑀁, 𑀲𑀯𑀦𑁂𑀦 𑀅𑀢𑀧𑁆𑀧𑀺𑀬𑀁.

𑁨𑁭.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 ¶ , 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁮.

‘‘𑀑𑀯𑀸𑀤𑀁 𑀅𑀦𑀼𑀲𑀺𑀝𑁆𑀞𑀺𑀜𑁆𑀘, 𑀤𑀢𑁆𑀯𑀸𑀦 𑀲𑁂𑀲𑀓𑁂 𑀚𑀦𑁂;

𑀳𑀼𑀢𑀸𑀲𑀦𑁄𑀯 𑀢𑀸𑀧𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁯.

‘‘𑀲𑁄 𑀘 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀢𑁂𑀧𑀺 𑀲𑀸𑀯𑀓𑀸 𑀩𑀮𑀧𑁆𑀧𑀢𑁆𑀢𑀸;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀲𑀢𑀭𑀁𑀲𑀻𑀯𑀸𑀢𑀺𑀆𑀤𑀺𑀘𑁆𑀘𑁄 𑀯𑀺𑀬, 𑀲𑀩𑁆𑀩𑀸 𑀤𑀺𑀲𑀸 𑀑𑀪𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀥𑀽𑀧𑀺𑀢𑀦𑁆𑀢𑀺 𑀯𑀸𑀲𑀺𑀢𑀁 𑀕𑀦𑁆𑀥𑀺𑀢𑀁. 𑀅𑀢𑀧𑁆𑀧𑀺𑀬𑁄𑀢𑀺 𑀅𑀢𑀺𑀢𑁆𑀢𑀺𑀓𑀭𑁄, 𑀅𑀢𑀺𑀢𑁆𑀢𑀺𑀚𑀦𑀦𑁄 𑀯𑀸. 𑀢𑀸𑀯𑀤𑁂𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂, 𑀢𑀸𑀯𑀢𑀓𑀁 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀭𑁂𑀲𑀻𑀢𑀺 𑀢𑀸𑀭𑀬𑀻. 𑀑𑀯𑀸𑀤𑀦𑁆𑀢𑀺 𑀲𑀓𑀺𑀁 𑀯𑀸𑀤𑁄 𑀑𑀯𑀸𑀤𑁄 𑀦𑀸𑀫. 𑀅𑀦𑀼𑀲𑀺𑀝𑁆𑀞𑀺𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀁 𑀅𑀦𑀼𑀲𑀺𑀝𑁆𑀞𑀺 𑀦𑀸𑀫. 𑀲𑁂𑀲𑀓𑁂 𑀚𑀦𑁂𑀢𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀅𑀧𑁆𑀧𑀢𑁆𑀢𑀲𑁆𑀲 𑀲𑁂𑀲𑀚𑀦𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀳𑀼𑀢𑀸𑀲𑀦𑁄𑀯 𑀢𑀸𑀧𑁂𑀢𑁆𑀯𑀸𑀢𑀺 𑀅𑀕𑁆𑀕𑀺 𑀯𑀺𑀬 𑀢𑀧𑁆𑀧𑁂𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀉𑀧𑀸𑀤𑀸𑀦𑀓𑁆𑀔𑀬𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑁄𑀪𑀺𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀙𑀝𑁆𑀞𑁄 𑀩𑀼𑀤𑁆𑀥𑀯𑀁𑀲𑁄.

𑁯. 𑀅𑀦𑁄𑀫𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀲𑁄𑀪𑀺𑀢𑀩𑀼𑀤𑁆𑀥𑁂 ¶ ¶ 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀅𑀧𑀭𑀪𑀸𑀕𑁂 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀭𑀳𑀺𑀢𑀁 𑀅𑀳𑁄𑀲𑀺. 𑀅𑀢𑀻𑀢𑁂 𑀧𑀦 𑀢𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀅𑀦𑁄𑀫𑀤𑀲𑁆𑀲𑀻, 𑀧𑀤𑀼𑀫𑁄, 𑀦𑀸𑀭𑀤𑁄𑀢𑀺. 𑀢𑀢𑁆𑀣 𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑁂𑀳𑀺 𑀅𑀪𑀺𑀬𑀸𑀘𑀺𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀘𑀦𑁆𑀤𑀯𑀢𑀺𑀬𑀁 𑀦𑀸𑀫 𑀭𑀸𑀚𑀥𑀸𑀦𑀺𑀬𑀁 𑀬𑀲𑀯𑀸 𑀦𑀸𑀫𑀲𑁆𑀲 𑀭𑀜𑁆𑀜𑁄 𑀓𑀼𑀮𑁂 𑀲𑀫𑀼𑀲𑁆𑀲𑀺𑀢𑀘𑀸𑀭𑀼𑀧𑀬𑁄𑀥𑀭𑀸𑀬 𑀬𑀲𑁄𑀥𑀭𑀸𑀬 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀅𑀦𑁄𑀫𑀤𑀲𑁆𑀲𑀺𑀓𑀼𑀫𑀸𑀭𑁂 𑀓𑀺𑀭 𑀬𑀲𑁄𑀥𑀭𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀕𑀢𑁂 𑀢𑀲𑁆𑀲 𑀧𑀼𑀜𑁆𑀜𑀧𑁆𑀧𑀪𑀸𑀯𑁂𑀦 𑀧𑀪𑀸 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 ¶ 𑀞𑀸𑀦𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀘𑀦𑁆𑀤𑀲𑀽𑀭𑀺𑀬𑀧𑁆𑀧𑀪𑀸𑀳𑀺 𑀅𑀦𑀪𑀺𑀪𑀯𑀦𑀻𑀬𑀸𑀯 𑀅𑀳𑁄𑀲𑀺. 𑀲𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑁄𑀥𑀺𑀲𑀢𑁆𑀢𑀁 𑀲𑀼𑀘𑀦𑁆𑀤𑀦𑀼𑀬𑁆𑀬𑀸𑀦𑁂 𑀯𑀺𑀚𑀸𑀬𑀺. 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑀸, 𑀬𑀲𑁆𑀫𑀸 𑀚𑀸𑀢𑀺𑀬𑀁 𑀆𑀓𑀸𑀲𑀢𑁄 𑀲𑀢𑁆𑀢 𑀭𑀢𑀦𑀸𑀦𑀺 𑀧𑀢𑀺𑀁𑀲𑀼, 𑀢𑀲𑁆𑀫𑀸 𑀅𑀦𑁄𑀫𑀸𑀦𑀁 𑀭𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀢𑁆𑀢𑀸 ‘‘𑀅𑀦𑁄𑀫𑀤𑀲𑁆𑀲𑀻’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀤𑀺𑀩𑁆𑀩𑁂𑀳𑀺 𑀓𑀸𑀫𑀕𑀼𑀡𑁂𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀲𑀺𑀭𑀺 𑀉𑀧𑀲𑀺𑀭𑀺 𑀲𑀺𑀭𑀺𑀯𑀟𑁆𑀠𑁄𑀢𑀺 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀺𑀭𑀺𑀫𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀲𑀺𑀭𑀺𑀫𑀸𑀬 𑀤𑁂𑀯𑀺𑀬𑀸 𑀉𑀧𑀯𑀸𑀡𑁂 𑀦𑀸𑀫 𑀧𑀼𑀢𑁆𑀢𑁂 𑀚𑀸𑀢𑁂 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀺𑀯𑀺𑀓𑀸𑀬𑀸𑀦𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀢𑀺𑀲𑁆𑀲𑁄 𑀚𑀦𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼.

𑀢𑁂𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀧𑀼𑀭𑀺𑀲𑁄 𑀤𑀲 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺. 𑀢𑀢𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀅𑀦𑀼𑀧𑀫𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀅𑀦𑀼𑀧𑀫𑀲𑁂𑀝𑁆𑀞𑀺𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀦𑁄𑀫𑀦𑀸𑀫𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀅𑀚𑁆𑀚𑀼𑀦𑀭𑀼𑀓𑁆𑀔𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀢𑁆𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 ¶ 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀲𑁄𑀪𑀺𑀢𑀲𑁆𑀲 ¶ 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀅𑀦𑁄𑀫𑀤𑀲𑁆𑀲𑀻 𑀅𑀫𑀺𑀢𑀬𑀲𑁄, 𑀢𑁂𑀚𑀲𑁆𑀲𑀻 𑀤𑀼𑀭𑀢𑀺𑀓𑁆𑀓𑀫𑁄.

𑁨.

‘‘𑀲𑁄 𑀙𑁂𑀢𑁆𑀯𑀸 𑀩𑀦𑁆𑀥𑀦𑀁 𑀲𑀩𑁆𑀩𑀁, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀅𑀦𑀺𑀯𑀢𑁆𑀢𑀺𑀕𑀫𑀦𑀁 𑀫𑀕𑁆𑀕𑀁, 𑀤𑁂𑀲𑁂𑀲𑀺 𑀤𑁂𑀯𑀫𑀸𑀦𑀼𑀲𑁂.

𑁩.

‘‘𑀲𑀸𑀕𑀭𑁄𑀯 𑀅𑀲𑀗𑁆𑀔𑁄𑀪𑁄, 𑀧𑀩𑁆𑀩𑀢𑁄𑀯 𑀤𑀼𑀭𑀸𑀲𑀤𑁄;

𑀆𑀓𑀸𑀲𑁄𑀯 𑀅𑀦𑀦𑁆𑀢𑁄 𑀲𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁪.

‘‘𑀤𑀲𑁆𑀲𑀦𑁂𑀦𑀧𑀺 𑀢𑀁 𑀩𑀼𑀤𑁆𑀥𑀁, 𑀢𑁄𑀲𑀺𑀢𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦𑁄;

𑀩𑁆𑀬𑀸𑀳𑀭𑀦𑁆𑀢𑀁 𑀕𑀺𑀭𑀁 𑀲𑀼𑀢𑁆𑀯𑀸, 𑀅𑀫𑀢𑀁 𑀧𑀸𑀧𑀼𑀡𑀦𑁆𑀢𑀺 𑀢𑁂’’𑀢𑀺.

𑀢𑀢𑁆𑀣 𑀅𑀦𑁄𑀫𑀤𑀲𑁆𑀲𑀻𑀢𑀺 𑀅𑀦𑀼𑀧𑀫𑀤𑀲𑁆𑀲𑀦𑁄, 𑀅𑀫𑀺𑀢𑀤𑀲𑁆𑀲𑀦𑁄 𑀯𑀸. 𑀅𑀫𑀺𑀢𑀬𑀲𑁄𑀢𑀺 𑀅𑀫𑀺𑀢𑀧𑀭𑀺𑀯𑀸𑀭𑁄, 𑀅𑀫𑀺𑀢𑀓𑀺𑀢𑁆𑀢𑀺 𑀯𑀸. 𑀢𑁂𑀚𑀲𑁆𑀲𑀻𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀼𑀭𑀢𑀺𑀓𑁆𑀓𑀫𑁄𑀢𑀺 𑀤𑀼𑀧𑁆𑀧𑀥𑀁𑀲𑀺𑀬𑁄, 𑀅𑀜𑁆𑀜𑁂𑀦 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀲𑁄 ¶ 𑀙𑁂𑀢𑁆𑀯𑀸 𑀩𑀦𑁆𑀥𑀦𑀁 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀤𑀲𑀯𑀺𑀥𑀁 𑀲𑀁𑀬𑁄𑀚𑀦𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂𑀢𑀺 𑀢𑀺𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑁂𑀦 𑀯𑀺𑀤𑁆𑀥𑀁𑀲𑁂𑀢𑁆𑀯𑀸, 𑀅𑀪𑀸𑀯𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀯𑀢𑁆𑀢𑀺𑀕𑀫𑀦𑀁 𑀫𑀕𑁆𑀕𑀦𑁆𑀢𑀺 𑀦𑀺𑀯𑀢𑁆𑀢𑀺𑀬𑀸 𑀧𑀯𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀅𑀦𑀺𑀯𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀦𑀺𑀯𑀢𑁆𑀢𑀺𑀁 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀅𑀦𑀺𑀯𑀢𑁆𑀢𑀺𑀕𑀫𑀦𑁄. 𑀢𑀁 𑀅𑀦𑀺𑀯𑀢𑁆𑀢𑀺𑀕𑀫𑀦𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. ‘‘𑀤𑀲𑁆𑀲𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀤𑁂𑀯𑀫𑀸𑀦𑀼𑀲𑁂𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀲𑀗𑁆𑀔𑁄𑀪𑁄𑀢𑀺 𑀔𑁄𑀪𑁂𑀢𑀼𑀁 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀓𑁆𑀔𑁄𑀪𑀺𑀬𑁄. 𑀬𑀣𑀸 𑀳𑀺 𑀲𑀫𑀼𑀤𑁆𑀤𑁄 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀪𑀽𑀢𑀸𑀯𑀸𑀲𑁄 𑀅𑀓𑁆𑀔𑁄𑀪𑀺𑀬𑁄, 𑀏𑀯𑀁 𑀅𑀓𑁆𑀔𑁄𑀪𑀺𑀬𑁄𑀢𑀺 𑀅𑀢𑁆𑀣𑁄. 𑀆𑀓𑀸𑀲𑁄𑀯 𑀅𑀦𑀦𑁆𑀢𑁄𑀢𑀺 𑀬𑀣𑀸 𑀧𑀦 𑀆𑀓𑀸𑀲𑀲𑁆𑀲 𑀅𑀦𑁆𑀢𑁄 𑀦𑀢𑁆𑀣𑀺, 𑀅𑀣 𑀔𑁄 𑀅𑀦𑀦𑁆𑀢𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀧𑀸𑀭𑁄, 𑀏𑀯𑀁 𑀪𑀕𑀯𑀸𑀧𑀺 𑀩𑀼𑀤𑁆𑀥𑀕𑀼𑀡𑁂𑀳𑀺 𑀅𑀦𑀦𑁆𑀢𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀧𑀸𑀭𑁄. 𑀲𑁄𑀢𑀺 𑀲𑁄 𑀪𑀕𑀯𑀸. 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄𑀢𑀺 𑀲𑀩𑁆𑀩𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀮𑀗𑁆𑀓𑀢𑀲𑀭𑀻𑀭𑀢𑁆𑀢𑀸 𑀲𑀼𑀨𑀼𑀮𑁆𑀮𑀺𑀢𑀲𑀸𑀮𑀭𑀸𑀚𑀸 𑀯𑀺𑀬 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑁂𑀦𑀧𑀺 𑀢𑀁 𑀩𑀼𑀤𑁆𑀥𑀦𑁆𑀢𑀺 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀤𑀲𑁆𑀲𑀦𑁂𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀈𑀤𑀺𑀲𑁂𑀲𑀼𑀧𑀺 ¶ 𑀲𑀸𑀫𑀺𑀯𑀘𑀦𑀁 𑀧𑀬𑀼𑀚𑁆𑀚𑀦𑁆𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽. 𑀢𑁄𑀲𑀺𑀢𑀸𑀢𑀺 𑀧𑀭𑀺𑀢𑁄𑀲𑀺𑀢𑀸 𑀧𑀻𑀡𑀺𑀢𑀸. 𑀩𑁆𑀬𑀸𑀳𑀭𑀦𑁆𑀢𑀦𑁆𑀢𑀺 𑀩𑁆𑀬𑀸𑀳𑀭𑀦𑁆𑀢𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 ¶ 𑀉𑀧𑀬𑁄𑀕𑀯𑀘𑀦𑀁. 𑀅𑀫𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀢𑁂𑀢𑀺 𑀬𑁂 𑀢𑀲𑁆𑀲 𑀕𑀺𑀭𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀺, 𑀢𑁂 𑀅𑀫𑀢𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀪𑀕𑀯𑀸 𑀧𑀦 𑀩𑁄𑀥𑀺𑀫𑀽𑀮𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑁂 𑀢𑀺𑀓𑁄𑀝𑀺𑀲𑀗𑁆𑀔𑁂 𑀚𑀦𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀤𑀺𑀲𑁆𑀯𑀸 𑁋 ‘‘𑀓𑀢𑁆𑀣 𑀦𑀼 𑀔𑁄 𑀢𑁂 𑀏𑀢𑀭𑀳𑀺 𑀯𑀺𑀳𑀭𑀦𑁆𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀲𑀼𑀪𑀯𑀢𑀻𑀦𑀕𑀭𑁂 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑁂 𑀯𑀺𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑁂 𑀑𑀢𑀭𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀢𑁆𑀣 𑀓𑁄𑀝𑀺𑀲𑀢𑀸𑀦𑀁 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀥𑀫𑁆𑀫𑀸𑀪𑀺𑀲𑀫𑀬𑁄 𑀢𑀲𑁆𑀲, 𑀇𑀤𑁆𑀥𑁄 𑀨𑀻𑀢𑁄 𑀢𑀤𑀸 𑀅𑀳𑀼;

𑀓𑁄𑀝𑀺𑀲𑀢𑀸𑀦𑀺 𑀅𑀪𑀺𑀲𑀫𑀺𑀁𑀲𑀼, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂’’𑀢𑀺.

𑀢𑀢𑁆𑀣 𑀨𑀻𑀢𑁄𑀢𑀺 𑀨𑀸𑀢𑀺𑀧𑁆𑀧𑀢𑁆𑀢𑁄 𑀩𑀸𑀳𑀼𑀚𑀜𑁆𑀜𑀯𑀲𑁂𑀦. 𑀓𑁄𑀝𑀺𑀲𑀢𑀸𑀦𑀻𑀢𑀺 𑀓𑁄𑀝𑀻𑀦𑀁 𑀲𑀢𑀸𑀦𑀺 𑀓𑁄𑀝𑀺𑀲𑀢𑀸𑀦𑀺. ‘‘𑀓𑁄𑀝𑀺𑀲𑀢𑀬𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀲𑀢𑀓𑁄𑀝𑀺𑀬𑁄𑀢𑀺 𑀅𑀢𑁆𑀣𑁄.

𑀅𑀣𑀸𑀧𑀭𑁂𑀦 ¶ 𑀲𑀫𑀬𑁂𑀦 𑀑𑀲𑀥𑀻𑀦𑀕𑀭𑀤𑁆𑀯𑀸𑀭𑁂 𑀅𑀲𑀦𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀅𑀲𑀼𑀭𑁂𑀳𑀺 𑀤𑀼𑀭𑀪𑀺𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑁄 𑀢𑁂𑀫𑀸𑀲𑀁 𑀅𑀪𑀺𑀥𑀫𑁆𑀫𑀯𑀲𑁆𑀲𑀁 𑀯𑀲𑁆𑀲𑀸𑀧𑀬𑀺. 𑀢𑀤𑀸 𑀅𑀲𑀻𑀢𑀺𑀤𑁂𑀯𑀢𑀸𑀓𑁄𑀝𑀺𑀬𑁄 𑀅𑀪𑀺𑀲𑀫𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀢𑀢𑁄 𑀧𑀭𑀁 𑀅𑀪𑀺𑀲𑀫𑀬𑁂, 𑀯𑀲𑁆𑀲𑀦𑁆𑀢𑁂 𑀥𑀫𑁆𑀫𑀯𑀼𑀝𑁆𑀞𑀺𑀬𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄𑀪𑀺𑀲𑀫𑀺𑀁𑀲𑀼, 𑀤𑀼𑀢𑀺𑀬𑁂 𑀥𑀫𑁆𑀫𑀤𑁂𑀲𑀦𑁂’’𑀢𑀺.

𑀢𑀢𑁆𑀣 𑀯𑀲𑁆𑀲𑀦𑁆𑀢𑁂𑀢𑀺 𑀩𑀼𑀤𑁆𑀥𑀫𑀳𑀸𑀫𑁂𑀖𑁂 𑀯𑀲𑁆𑀲𑀦𑁆𑀢𑁂. 𑀥𑀫𑁆𑀫𑀯𑀼𑀝𑁆𑀞𑀺𑀬𑁄𑀢𑀺 𑀥𑀫𑁆𑀫𑀓𑀣𑀸𑀯𑀲𑁆𑀲𑀯𑀼𑀝𑁆𑀞𑀺𑀬𑁄.

𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀫𑀗𑁆𑀕𑀮𑀧𑀜𑁆𑀳𑀸𑀦𑀺𑀤𑁆𑀤𑁂𑀲𑁂 𑀅𑀝𑁆𑀞𑀲𑀢𑁆𑀢𑀢𑀺 𑀓𑁄𑀝𑀺𑀬𑁄 𑀅𑀪𑀺𑀲𑀫𑀺𑀁𑀲𑀼. 𑀲𑁄 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀢𑀢𑁄 ¶ ¶ 𑀧𑀭𑀫𑁆𑀧𑀺 𑀯𑀲𑁆𑀲𑀦𑁆𑀢𑁂, 𑀢𑀧𑁆𑀧𑀬𑀦𑁆𑀢𑁂 𑀘 𑀧𑀸𑀡𑀺𑀦𑀁;

𑀅𑀝𑁆𑀞𑀲𑀢𑁆𑀢𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀯𑀲𑁆𑀲𑀦𑁆𑀢𑁂𑀢𑀺 𑀥𑀫𑁆𑀫𑀓𑀣𑀸𑀲𑀮𑀺𑀮𑀥𑀸𑀭𑀁 𑀯𑀲𑁆𑀲𑀦𑁆𑀢𑁂. 𑀢𑀧𑁆𑀧𑀬𑀦𑁆𑀢𑁂𑀢𑀺 𑀥𑀫𑁆𑀫𑀸𑀫𑀢𑀯𑀲𑁆𑀲𑁂𑀦 𑀢𑀧𑁆𑀧𑀬𑀦𑁆𑀢𑁂, 𑀢𑀧𑁆𑀧𑀦𑀁 𑀓𑀭𑁄𑀦𑁆𑀢𑁂 𑀪𑀕𑀯𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁄𑀫𑀤𑀲𑁆𑀲𑀺𑀲𑁆𑀲𑀧𑀺 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀢𑀢𑁆𑀣 𑀲𑁄𑀭𑁂𑀬𑁆𑀬𑀦𑀕𑀭𑁂 𑀇𑀲𑀺𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀧𑀲𑀻𑀤𑀺𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀭𑀳𑀦𑁆𑀢𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀭𑀸𑀥𑀯𑀢𑀻𑀦𑀕𑀭𑁂 𑀲𑀼𑀦𑁆𑀤𑀭𑀺𑀦𑁆𑀥𑀭𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀅𑀭𑀳𑀦𑁆𑀢𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀲𑁄𑀭𑁂𑀬𑁆𑀬𑀦𑀕𑀭𑁂𑀬𑁂𑀯 𑀲𑁄𑀭𑁂𑀬𑁆𑀬𑀭𑀜𑁆𑀜𑀸 𑀲𑀳 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀙𑀦𑁆𑀦𑀁 𑀅𑀭𑀳𑀦𑁆𑀢𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀲𑀸𑀧𑀺 𑀘 𑀫𑀳𑁂𑀲𑀺𑀦𑁄;

𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀁, 𑀧𑀼𑀧𑁆𑀨𑀺𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀬𑀸.

𑁯.

‘‘𑀅𑀝𑁆𑀞𑀲𑀢𑀲𑀳𑀲𑁆𑀲𑀸𑀦𑀁, 𑀲𑀦𑁆𑀦𑀺𑀧𑀸𑀢𑁄 𑀢𑀤𑀸 𑀅𑀳𑀼;

𑀧𑀳𑀻𑀦𑀫𑀤𑀫𑁄𑀳𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁧𑁦.

‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀗𑁆𑀕𑀡𑀸𑀦𑀁 𑀯𑀺𑀭𑀚𑀸𑀦𑀁, 𑀉𑀧𑀲𑀦𑁆𑀢𑀸𑀦 𑀢𑀸𑀤𑀺𑀦𑀁.

𑁧𑁧.

‘‘𑀙𑀦𑁆𑀦𑀁 𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀁, 𑀦𑀺𑀩𑁆𑀩𑀼𑀢𑀸𑀦𑀁 𑀢𑀧𑀲𑁆𑀲𑀺𑀦’’𑀦𑁆𑀢𑀺.

𑀢𑀢𑁆𑀣 ¶ 𑀢𑀲𑁆𑀲𑀸𑀧𑀺 𑀘 𑀫𑀳𑁂𑀲𑀺𑀦𑁄𑀢𑀺 𑀢𑀲𑁆𑀲 𑀫𑀳𑁂𑀲𑀺𑀦𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲𑀸𑀧𑀺. ‘‘𑀢𑀲𑁆𑀲𑀸𑀧𑀺 𑀤𑁆𑀯𑀺𑀧𑀤𑀼𑀢𑁆𑀢𑀫𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀧𑀺 𑀤𑁆𑀯𑀺𑀧𑀤𑀼𑀢𑁆𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀕𑀳𑁂𑀢𑀩𑁆𑀩𑀁. 𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀦𑀁 𑀩𑀮𑀧𑁆𑀧𑀢𑁆𑀢𑀸𑀦𑀁, 𑀘𑀺𑀡𑁆𑀡𑀯𑀲𑀺𑀢𑀸𑀬 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑁂𑀦 𑀅𑀪𑀺𑀜𑁆𑀜𑀸𑀲𑀼 ¶ 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀺𑀢𑀸𑀦𑀦𑁆𑀢𑀺 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀪𑀸𑀯𑁂𑀦 𑀅𑀢𑀺𑀯𑀺𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸𑀦𑀁. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸.

𑀅𑀦𑀗𑁆𑀕𑀡𑀸𑀦𑀦𑁆𑀢𑀺 ¶ 𑀏𑀢𑁆𑀣 𑀅𑀬𑀁 𑀅𑀗𑁆𑀕𑀡-𑀲𑀤𑁆𑀤𑁄 𑀓𑀢𑁆𑀣𑀘𑀺 𑀓𑀺𑀮𑁂𑀲𑁂𑀲𑀼 𑀤𑀺𑀲𑁆𑀲𑀢𑀺. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀢𑀻𑀡𑀺 𑀅𑀗𑁆𑀕𑀡𑀸𑀦𑀺? 𑀭𑀸𑀕𑁄 𑀅𑀗𑁆𑀕𑀡𑀁 𑀤𑁄𑀲𑁄 𑀅𑀗𑁆𑀕𑀡𑀁 𑀫𑁄𑀳𑁄 𑀅𑀗𑁆𑀕𑀡’’𑀦𑁆𑀢𑀺 (𑀯𑀺𑀪. 𑁯𑁨𑁪). ‘‘𑀧𑀸𑀧𑀓𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀅𑀓𑀼𑀲𑀮𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 𑀅𑀗𑁆𑀕𑀡’’𑀦𑁆𑀢𑀺 (𑀫. 𑀦𑀺. 𑁧.𑁬𑁦). 𑀓𑀢𑁆𑀣𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀫𑀮𑁂? 𑀬𑀣𑀸𑀳 𑁋 ‘‘𑀢𑀲𑁆𑀲𑁂𑀯 𑀭𑀚𑀲𑁆𑀲 𑀯𑀸 𑀅𑀗𑁆𑀕𑀡𑀲𑁆𑀲 𑀯𑀸 𑀧𑀳𑀸𑀦𑀸𑀬 𑀯𑀸𑀬𑀫𑀢𑀻’’𑀢𑀺 (𑀫. 𑀦𑀺. 𑁧.𑁧𑁮𑁪). 𑀓𑀢𑁆𑀣𑀘𑀺 𑀢𑀣𑀸𑀭𑀽𑀧𑁂 𑀪𑀽𑀫𑀺𑀪𑀸𑀕𑁂 ‘‘𑀘𑁂𑀢𑀺𑀬𑀗𑁆𑀕𑀡𑀁 𑀩𑁄𑀥𑀺𑀬𑀗𑁆𑀕𑀡𑀁 𑀭𑀸𑀚𑀗𑁆𑀕𑀡’’𑀦𑁆𑀢𑀺. 𑀇𑀥 𑀧𑀦 𑀓𑀺𑀮𑁂𑀲𑁂𑀲𑀼 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀦𑀺𑀓𑁆𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄 (𑀫. 𑀦𑀺. 𑀅𑀝𑁆𑀞. 𑁧.𑁫𑁭). 𑀯𑀺𑀭𑀚𑀸𑀦𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀧𑀲𑁆𑀲𑀺𑀦𑀦𑁆𑀢𑀺 𑀓𑀺𑀮𑁂𑀲𑀓𑁆𑀔𑀬𑀓𑀭𑁄 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑁄 𑀢𑀧𑁄 𑀬𑁂𑀲𑀁 𑀅𑀢𑁆𑀣𑀺 𑀢𑁂 𑀢𑀧𑀲𑁆𑀲𑀺𑀦𑁄, 𑀢𑁂𑀲𑀁 𑀢𑀧𑀲𑁆𑀲𑀻𑀦𑀁, 𑀔𑀻𑀡𑀸𑀲𑀯𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀏𑀓𑁄 𑀫𑀳𑁂𑀲𑀓𑁆𑀔𑁄 𑀬𑀓𑁆𑀔𑀲𑁂𑀦𑀸𑀧𑀢𑀺 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀬𑀓𑁆𑀔𑀸𑀦𑀁 𑀅𑀥𑀺𑀧𑀢𑀺. 𑀲𑁄 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀭𑀫𑀭𑀼𑀘𑀺𑀭𑀤𑀲𑁆𑀲𑀦𑀁 𑀲𑀢𑁆𑀢𑀭𑀢𑀦𑀫𑀬𑀁 𑀅𑀪𑀺𑀭𑀼𑀘𑀺𑀭𑀭𑀚𑀦𑀺𑀓𑀭𑀫𑀡𑁆𑀟𑀮𑀲𑀤𑀺𑀲𑀁 𑀫𑀡𑁆𑀟𑀧𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀅𑀣 𑀦𑀁 𑀪𑀕𑀯𑀸 𑀪𑀢𑁆𑀢𑀸𑀦𑀼𑀫𑁄𑀤𑀦𑀲𑀫𑀬𑁂 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑁂 𑀏𑀓𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀅𑀢𑀺𑀓𑁆𑀓𑀦𑁆𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀬𑀓𑁆𑀔𑁄 𑀆𑀲𑀺𑀁 𑀫𑀳𑀺𑀤𑁆𑀥𑀺𑀓𑁄;

𑀦𑁂𑀓𑀸𑀦𑀁 𑀬𑀓𑁆𑀔𑀓𑁄𑀝𑀻𑀦𑀁, 𑀯𑀲𑀯𑀢𑁆𑀢𑀺𑀫𑁆𑀳𑀺 𑀇𑀲𑁆𑀲𑀭𑁄.

𑁧𑁩.

‘‘𑀢𑀤𑀸𑀧𑀺 𑀢𑀁 𑀩𑀼𑀤𑁆𑀥𑀯𑀭𑀁, 𑀉𑀧𑀕𑀦𑁆𑀢𑁆𑀯𑀸 𑀫𑀳𑁂𑀲𑀺𑀦𑀁;

𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑁂𑀲𑀺𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑁧𑁪.

‘‘𑀲𑁄𑀧𑀺 𑀫𑀁 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀯𑀺𑀲𑀼𑀤𑁆𑀥𑀦𑀬𑀦𑁄 𑀫𑀼𑀦𑀺;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁫.

‘‘𑀧𑀥𑀸𑀦𑀁 ¶ 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁬.

‘‘𑀢𑀲𑁆𑀲𑀸𑀧𑀺 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 ¶ 𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀦𑁆𑀢𑀺 𑀧𑀸𑀭𑀫𑀺𑀧𑀽𑀭𑀡𑀢𑁆𑀣𑀸𑀬 𑀪𑀺𑀬𑁆𑀬𑁄𑀧𑀺 𑀤𑀴𑁆𑀳𑀢𑀭𑀁 𑀧𑀭𑀓𑁆𑀓𑀫𑀫𑀓𑀸𑀲𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀘𑀦𑁆𑀤𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀬𑀲𑀯𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀬𑀲𑁄𑀥𑀭𑀸 𑀦𑀸𑀫 𑀫𑀸𑀢𑀸, 𑀦𑀺𑀲𑀪𑁄 𑀘 𑀅𑀦𑁄𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀦𑁆𑀤𑀭𑀻 𑀘 𑀲𑀼𑀫𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀅𑀚𑁆𑀚𑀼𑀦𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼, 𑀲𑀺𑀭𑀺𑀫𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀉𑀧𑀯𑀸𑀡𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀲𑁄 𑀲𑀺𑀯𑀺𑀓𑀸𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀲𑀺𑀯𑀺𑀓𑀸𑀬𑀸𑀦𑁂𑀦 𑀕𑀫𑀦𑀁 𑀧𑀦 𑀲𑁄𑀪𑀺𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸𑀬 𑀧𑀸𑀲𑀸𑀤𑀕𑀫𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀓𑁄 𑀦𑀸𑀫 𑀭𑀸𑀚𑀸 𑀉𑀧𑀝𑁆𑀞𑀸𑀓𑁄. 𑀥𑀫𑁆𑀫𑀸𑀭𑀸𑀫𑁂 𑀓𑀺𑀭 𑀪𑀕𑀯𑀸 𑀯𑀺𑀳𑀸𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁭.

‘‘𑀦𑀕𑀭𑀁 𑀘𑀦𑁆𑀤𑀯𑀢𑀻 𑀦𑀸𑀫, 𑀬𑀲𑀯𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀬𑀲𑁄𑀥𑀭𑀸 𑀦𑀸𑀫, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁨.

‘‘𑀦𑀺𑀲𑀪𑁄 𑀘 𑀅𑀦𑁄𑀫𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁩.

‘‘𑀲𑀼𑀦𑁆𑀤𑀭𑀻 𑀘 𑀲𑀼𑀫𑀦𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀚𑁆𑀚𑀼𑀦𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁫.

‘‘𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀧𑀪𑀸 𑀦𑀺𑀤𑁆𑀥𑀸𑀯𑀢𑀻 𑀢𑀲𑁆𑀲, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄.

𑁨𑁬.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭.

‘‘𑀲𑀼𑀧𑀼𑀧𑁆𑀨𑀺𑀢𑀁 ¶ 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀯𑀻𑀢𑀭𑀸𑀕𑁂𑀳𑀺 𑀯𑀺𑀫𑀮𑁂𑀳𑀺, 𑀲𑁄𑀪𑀺𑀢𑁆𑀣 𑀚𑀺𑀦𑀲𑀸𑀲𑀦𑀁.

𑁨𑁮.

‘‘𑀲𑁄 𑀘 𑀲𑀢𑁆𑀣𑀸 𑀅𑀫𑀺𑀢𑀬𑀲𑁄, 𑀬𑀼𑀕𑀸𑀦𑀺 𑀢𑀸𑀦𑀺 𑀅𑀢𑀼𑀮𑀺𑀬𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 ¶ 𑀧𑀪𑀸 𑀦𑀺𑀤𑁆𑀥𑀸𑀯𑀢𑀻𑀢𑀺 𑀢𑀲𑁆𑀲 𑀲𑀭𑀻𑀭𑀢𑁄 𑀧𑀪𑀸 𑀦𑀺𑀓𑁆𑀔𑀫𑀢𑀺. 𑀲𑀭𑀻𑀭𑀧𑁆𑀧𑀪𑀸 𑀧𑀦𑀲𑁆𑀲 𑀦𑀺𑀘𑁆𑀘𑀓𑀸𑀮𑀁 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑀼𑀕𑀸𑀦𑀺 𑀢𑀸𑀦𑀻𑀢𑀺 𑀅𑀕𑁆𑀕𑀲𑀸𑀯𑀓𑀬𑀼𑀕𑀸𑀤𑀻𑀦𑀺 𑀬𑀼𑀕𑀴𑀸𑀦𑀺. 𑀲𑀩𑁆𑀩𑀁 ¶ 𑀢𑀫𑀦𑁆𑀢𑀭𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀩𑁆𑀩𑀫𑁆𑀧𑀺 𑀅𑀦𑀺𑀘𑁆𑀘𑀫𑀼𑀔𑀁 𑀧𑀯𑀺𑀝𑁆𑀞𑀁 𑀯𑀺𑀦𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. ‘‘𑀦𑀦𑀼 𑀭𑀺𑀢𑁆𑀢𑀓𑀫𑁂𑀯 𑀲𑀗𑁆𑀔𑀸𑀭𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀦𑀦𑀼 𑀭𑀺𑀢𑁆𑀢𑀓𑀸 𑀢𑀼𑀘𑁆𑀙𑀓𑀸𑀬𑁂𑀯 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀅𑀢𑁆𑀣𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀫𑀲𑁆𑀲 𑀧𑀦 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀕𑁆𑀕𑀲𑀸𑀯𑀓𑀪𑀸𑀯𑀢𑁆𑀣𑀸𑀬 𑀧𑀡𑀺𑀥𑀸𑀦𑀫𑀓𑀁𑀲𑀼. 𑀇𑀫𑁂𑀲𑀁 𑀧𑀦 𑀣𑁂𑀭𑀸𑀦𑀁 𑀯𑀢𑁆𑀣𑀼 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀫𑀬𑀸 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀉𑀤𑁆𑀥𑀝𑀦𑁆𑀢𑀺.

𑀅𑀦𑁄𑀫𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀲𑀢𑁆𑀢𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁦. 𑀧𑀤𑀼𑀫𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀅𑀦𑁄𑀫𑀤𑀲𑁆𑀲𑀺𑀲𑁆𑀲 ¶ 𑀧𑀦 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑀸 𑀫𑀦𑀼𑀲𑁆𑀲𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀼𑀦 𑀧𑀭𑀺𑀳𑀸𑀬𑀫𑀸𑀦𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀢𑀣𑀸 𑀧𑀤𑀼𑀫𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀲𑁄𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀘𑀫𑁆𑀧𑀓𑀦𑀕𑀭𑁂 𑀅𑀲𑀫𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀭𑀽𑀧𑀸𑀤𑀻𑀳𑀺 𑀅𑀲𑀫𑀸𑀬 𑀅𑀲𑀫𑀸𑀬 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀘𑀫𑁆𑀧𑀓𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀚𑀸𑀢𑁂 𑀧𑀦 𑀓𑀼𑀫𑀸𑀭𑁂 𑀆𑀓𑀸𑀲𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑁂 𑀧𑀤𑀼𑀫𑀯𑀲𑁆𑀲𑀁 𑀦𑀺𑀧𑀢𑀺. 𑀢𑁂𑀦𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀦𑀸𑀫𑀁 𑀕𑀡𑁆𑀳𑀦𑁆𑀢𑀸 𑀦𑁂𑀫𑀺𑀢𑁆𑀢𑀓𑀸 𑀘 𑀜𑀸𑀢𑀓𑀸 𑀘 ‘‘𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄’’𑀢𑁆𑀯𑁂𑀯 𑀦𑀸𑀫𑀫𑀓𑀁𑀲𑀼. 𑀲𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀦𑀦𑁆𑀤𑀼𑀢𑁆𑀢𑀭-𑀯𑀲𑀼𑀢𑁆𑀢𑀭-𑀬𑀲𑀼𑀢𑁆𑀢𑀭𑀸𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀉𑀢𑁆𑀢𑀭𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀢𑁆𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀅𑀣 ¶ 𑀫𑀳𑀸𑀲𑀢𑁆𑀢𑁄 𑀉𑀢𑁆𑀢𑀭𑀸𑀬 𑀦𑀸𑀫 𑀫𑀳𑀸𑀤𑁂𑀯𑀺𑀬𑀸 𑀭𑀫𑁆𑀫𑀓𑀼𑀫𑀸𑀭𑁂 𑀦𑀸𑀫 𑀉𑀧𑁆𑀧𑀦𑁆𑀦𑁂 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀆𑀚𑀜𑁆𑀜𑀭𑀣𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺. 𑀢𑀁 𑀧𑀩𑁆𑀩𑀚𑀦𑁆𑀢𑀁 𑀏𑀓𑀸 𑀧𑀼𑀭𑀺𑀲𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀥𑀜𑁆𑀜𑀯𑀢𑀻𑀦𑀕𑀭𑁂 𑀲𑀼𑀥𑀜𑁆𑀜𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸𑀬 𑀥𑀜𑁆𑀜𑀯𑀢𑀺𑀬𑀸 𑀦𑀸𑀫 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀸𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀺𑀢𑁆𑀣𑀓𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀫𑀳𑀸𑀲𑁄𑀡𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀢𑁆𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀫𑀸𑀭𑀩𑀮𑀁 ¶ 𑀯𑀺𑀥𑀫𑀺𑀢𑁆𑀯𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 (𑀥. 𑀧. 𑁧𑁫𑁩-𑁧𑁫𑁪) 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀆𑀬𑀸𑀘𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀪𑀽𑀢𑁂 𑀧𑀼𑀕𑁆𑀕𑀮𑁂 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑁂 𑀓𑁄𑀝𑀺𑀲𑀗𑁆𑀔𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑀗𑁆𑀔𑀡𑁂𑀬𑁂𑀯 𑀅𑀦𑀺𑀮𑀧𑀣𑁂𑀦 𑀕𑀦𑁆𑀢𑁆𑀯𑀸 𑀥𑀜𑁆𑀜𑀯𑀢𑀻𑀦𑀕𑀭𑀲𑀫𑀻𑀧𑁂 𑀥𑀦𑀜𑁆𑀚𑀬𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀢𑁂𑀲𑀁 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀸𑀦𑀁 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 ¶ 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨.

‘‘𑀢𑀲𑁆𑀲𑀸𑀧𑀺 𑀅𑀲𑀫𑀁 𑀲𑀻𑀮𑀁, 𑀲𑀫𑀸𑀥𑀺𑀧𑀺 𑀅𑀦𑀦𑁆𑀢𑀓𑁄;

𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀜𑀸𑀡𑀯𑀭𑀁, 𑀯𑀺𑀫𑀼𑀢𑁆𑀢𑀺𑀧𑀺 𑀅𑀦𑀽𑀧𑀫𑀸.

𑁩.

‘‘𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂;

𑀅𑀪𑀺𑀲𑀫𑀬𑀸 𑀢𑀬𑁄 𑀆𑀲𑀼𑀁, 𑀫𑀳𑀸𑀢𑀫𑀧𑀯𑀸𑀳𑀦𑀸’’𑀢𑀺.

𑀢𑀢𑁆𑀣 𑀅𑀲𑀫𑀁 𑀲𑀻𑀮𑀦𑁆𑀢𑀺 𑀅𑀜𑁆𑀜𑁂𑀲𑀁 𑀲𑀻𑀮𑁂𑀦 𑀅𑀲𑀤𑀺𑀲𑀁, 𑀉𑀢𑁆𑀢𑀫𑀁 𑀲𑁂𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀧𑀺 𑀅𑀦𑀦𑁆𑀢𑀓𑁄𑀢𑀺 𑀲𑀫𑀸𑀥𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑁄, 𑀢𑀲𑁆𑀲 𑀅𑀦𑀦𑁆𑀢𑀪𑀸𑀯𑁄 𑀮𑁄𑀓𑀯𑀺𑀯𑀭𑀡𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑁄. 𑀜𑀸𑀡𑀯𑀭𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀯𑀸. 𑀯𑀺𑀫𑀼𑀢𑁆𑀢𑀺𑀧𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀧𑀺 𑀪𑀕𑀯𑀢𑁄. 𑀅𑀦𑀽𑀧𑀫𑀸𑀢𑀺 𑀉𑀧𑀫𑀸𑀯𑀺𑀭𑀳𑀺𑀢𑀸. 𑀅𑀢𑀼𑀮𑀢𑁂𑀚𑀲𑁆𑀲𑀸𑀢𑀺 𑀅𑀢𑀼𑀮𑀜𑀸𑀡𑀢𑁂𑀚𑀲𑁆𑀲. ‘‘𑀅𑀢𑀼𑀮𑀜𑀸𑀡𑀢𑁂𑀚𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 ‘‘𑀢𑀬𑁄 𑀅𑀪𑀺𑀲𑀫𑀬𑀸’’𑀢𑀺 𑀇𑀫𑀺𑀦𑀸 ¶ 𑀉𑀢𑁆𑀢𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀫𑀳𑀸𑀢𑀫𑀧𑀯𑀸𑀳𑀦𑀸𑀢𑀺 𑀫𑀳𑀸𑀫𑁄𑀳𑀯𑀺𑀦𑀸𑀲𑀓𑀸, 𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀸𑀢𑀺 𑀅𑀢𑁆𑀣𑁄.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀧𑀤𑀼𑀫𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀭𑀁 𑀲𑀸𑀮𑀓𑀼𑀫𑀸𑀭𑀜𑁆𑀘 𑀉𑀧𑀲𑀸𑀮𑀓𑀼𑀫𑀸𑀭𑀜𑁆𑀘 𑀜𑀸𑀢𑀺𑀲𑀫𑀸𑀕𑀫𑁂 𑀲𑀧𑀭𑀺𑀯𑀸𑀭𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀯𑀼𑀢𑀺 𑀓𑁄𑀝𑀺𑀬𑁄 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀬𑀤𑀸 𑀧𑀦 𑀭𑀫𑁆𑀫𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀧𑀞𑀫𑀸𑀪𑀺𑀲𑀫𑀬𑁂 𑀩𑀼𑀤𑁆𑀥𑁄, 𑀓𑁄𑀝𑀺𑀲𑀢𑀫𑀩𑁄𑀥𑀬𑀺;

𑀤𑀼𑀢𑀺𑀬𑀸𑀪𑀺𑀲𑀫𑀬𑁂 𑀥𑀻𑀭𑁄, 𑀦𑀯𑀼𑀢𑀺𑀓𑁄𑀝𑀺𑀫𑀩𑁄𑀥𑀬𑀺.

𑁫.

‘‘𑀬𑀤𑀸 𑀘 𑀧𑀤𑀼𑀫𑁄 𑀩𑀼𑀤𑁆𑀥𑁄, 𑀑𑀯𑀤𑀻 𑀲𑀓𑀫𑀢𑁆𑀭𑀚𑀁;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 ¶ 𑀧𑀦 𑀲𑀼𑀪𑀸𑀯𑀺𑀢𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀤𑀼𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀩𑀼𑀤𑁆𑀥𑀧𑀤𑀼𑀫𑀯𑀤𑀦𑀲𑁆𑀲 𑀲𑀦𑁆𑀢𑀺𑀓𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀦 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

𑀅𑀣𑀸𑀧𑀭𑁂𑀦 ¶ 𑀲𑀫𑀬𑁂𑀦 𑀫𑀳𑀸𑀧𑀤𑀼𑀫𑁄 𑀫𑀼𑀦𑀺𑀯𑀲𑀪𑁄 𑀉𑀲𑀪𑀲𑀫𑀕𑀢𑀻 𑀉𑀲𑀪𑀯𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀁 𑀉𑀧𑀕𑀜𑁆𑀙𑀺. 𑀦𑀕𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀓𑀸𑀫𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀢𑁆𑀣 𑀘 𑀩𑀳𑀯𑁄 𑀫𑀦𑀼𑀲𑁆𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀩𑁆𑀩𑀚𑀺𑀁𑀲𑀼. 𑀢𑀢𑁄 𑀤𑀲𑀩𑀮𑁄 𑀢𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀘 𑀢𑀻𑀳𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺. 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀬𑁂 𑀧𑀦 𑀢𑀢𑁆𑀣 𑀦 𑀧𑀩𑁆𑀩𑀚𑀺𑀁𑀲𑀼, 𑀢𑁂 𑀓𑀣𑀺𑀦𑀸𑀦𑀺𑀲𑀁𑀲𑀁 𑀲𑀼𑀢𑁆𑀯𑀸 𑀧𑀸𑀝𑀺𑀧𑀤𑁂 𑀧𑀜𑁆𑀘𑀲𑀼 𑀫𑀸𑀲𑁂𑀲𑀼 𑀧𑀜𑁆𑀘𑀸𑀦𑀺𑀲𑀁𑀲𑀤𑀸𑀬𑀓𑀁 𑀓𑀣𑀺𑀦𑀘𑀻𑀯𑀭𑀫𑀤𑀁𑀲𑀼. 𑀢𑀢𑁄 𑀢𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀅𑀕𑁆𑀕𑀲𑀸𑀯𑀓𑀁 𑀯𑀺𑀲𑀸𑀮𑀫𑀢𑀺𑀁 𑀲𑀸𑀮𑀢𑁆𑀣𑁂𑀭𑀁 𑀓𑀣𑀺𑀦𑀢𑁆𑀣𑀸𑀭𑀢𑁆𑀣𑀁 𑀬𑀸𑀘𑀺𑀢𑁆𑀯𑀸 𑀓𑀣𑀺𑀦𑀘𑀻𑀯𑀭𑀁 𑀢𑀲𑁆𑀲𑀸𑀤𑀁𑀲𑀼. 𑀣𑁂𑀭𑀲𑁆𑀲 𑀓𑀣𑀺𑀦𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂 𑀪𑀺𑀓𑁆𑀔𑀽 𑀲𑀺𑀩𑁆𑀩𑀦𑁂 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀧𑀤𑀼𑀫𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀽𑀘𑀺𑀘𑁆𑀙𑀺𑀤𑁆𑀤𑁂 𑀲𑀼𑀢𑁆𑀢𑀸𑀦𑀺 𑀆𑀯𑀼𑀦𑀺𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀝𑁆𑀞𑀺𑀢𑁂 𑀧𑀦 𑀘𑀻𑀯𑀭𑁂 𑀪𑀕𑀯𑀸 𑀢𑀻𑀳𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑀅𑀣𑀸𑀧𑀭𑁂𑀦 ¶ 𑀲𑀫𑀬𑁂𑀦 𑀲𑀻𑀳𑀯𑀺𑀓𑁆𑀓𑀦𑁆𑀢𑀕𑀸𑀫𑀻 𑀧𑀼𑀭𑀺𑀲𑀲𑀻𑀳𑁄 𑀯𑀺𑀬 𑀩𑀼𑀤𑁆𑀥𑀲𑀻𑀳𑁄 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀲𑀤𑀺𑀲𑁂 𑀧𑀭𑀫𑀲𑀼𑀭𑀪𑀺𑀓𑀼𑀲𑀼𑀫𑀨𑀮𑀪𑀸𑀭𑀯𑀺𑀦𑀫𑀺𑀢𑀲𑀸𑀔𑀸𑀯𑀺𑀝𑀧𑁂 𑀯𑀺𑀫𑀮𑀓𑀫𑀮𑀓𑀼𑀯𑀮𑀬𑀲𑀫𑀮𑀗𑁆𑀓𑀢𑁂 𑀲𑀺𑀲𑀺𑀭𑀫𑀥𑀼𑀭𑀯𑀸𑀭𑀺𑀯𑀸𑀳𑁂𑀦 𑀧𑀭𑀺𑀧𑀽𑀭𑀺𑀢𑁂 𑀭𑀼𑀭𑀼-𑀘𑀫𑀭-𑀲𑀻𑀳-𑀩𑁆𑀬𑀕𑁆𑀖-𑀅𑀚-𑀳𑀬-𑀕𑀯𑀬-𑀫𑀳𑀺𑀁𑀲𑀸𑀤𑀺 𑀯𑀺𑀯𑀺𑀥𑀫𑀺𑀕𑀕𑀡𑀯𑀺𑀘𑀭𑀺𑀢𑁂 𑀲𑀼𑀭𑀪𑀺𑀓𑀼𑀲𑀼𑀫𑀕𑀦𑁆𑀥𑀸𑀯𑀩𑀤𑁆𑀥𑀳𑀤𑀬𑀸𑀳𑀺 𑀪𑀫𑀭𑀫𑀥𑀼𑀓𑀭𑀬𑀼𑀯𑀢𑀻𑀳𑀺 𑀅𑀦𑀼𑀪𑀽𑀢𑀧𑁆𑀧𑀘𑀸𑀭𑀸𑀳𑀺 𑀲𑀫𑀦𑁆𑀢𑀢𑁄 𑀕𑀼𑀫𑁆𑀩𑀕𑀼𑀫𑁆𑀩𑀸𑀬𑀫𑀸𑀦𑁂 𑀨𑀮𑀭𑀲𑀧𑀫𑀼𑀤𑀺𑀢𑀳𑀤𑀬𑀸𑀳𑀺 𑀓𑀸𑀓𑀮𑀺𑀲𑀤𑀺𑀲𑀫𑀥𑀼𑀭𑀯𑀺𑀭𑀼𑀢𑀸𑀳𑀺 𑀓𑁄𑀓𑀺𑀮𑀯𑀥𑀽𑀳𑀺 𑀉𑀧𑀕𑀻𑀬𑀫𑀸𑀦𑁂 𑀧𑀭𑀫𑀭𑀫𑀡𑀻𑀬𑁂 𑀯𑀺𑀯𑀺𑀢𑁆𑀢𑁂 𑀯𑀺𑀚𑀦𑁂 𑀬𑁄𑀕𑀸𑀦𑀼𑀓𑀽𑀮𑁂 𑀧𑀯𑀦𑁂 𑀯𑀲𑁆𑀲𑀸𑀯𑀸𑀲𑀫𑀼𑀧𑀕𑀜𑁆𑀙𑀺. 𑀢𑀲𑁆𑀫𑀺𑀁 𑀯𑀺𑀳𑀭𑀦𑁆𑀢𑀁 𑀲𑀧𑀭𑀺𑀯𑀸𑀭𑀓𑀁 𑀤𑀲𑀩𑀮𑀁 𑀢𑀣𑀸𑀕𑀢𑀁 𑀥𑀫𑁆𑀫𑀭𑀸𑀚𑀁 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀁𑀲𑀼. 𑀢𑀤𑀸 𑀤𑁆𑀯𑀻𑀳𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀯𑀸𑀭𑁂𑀲𑀺. 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀧𑀤𑀼𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁭.

‘‘𑀓𑀣𑀺𑀦𑀢𑁆𑀣𑀸𑀭𑀲𑀫𑀬𑁂, 𑀉𑀧𑁆𑀧𑀦𑁆𑀦𑁂 𑀓𑀣𑀺𑀦𑀘𑀻𑀯𑀭𑁂;

𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑀸𑀬, 𑀪𑀺𑀓𑁆𑀔𑀽 𑀲𑀺𑀩𑁆𑀩𑀺𑀁𑀲𑀼 𑀘𑀻𑀯𑀭𑀁.

𑁮.

‘‘𑀢𑀤𑀸 𑀢𑁂 𑀯𑀺𑀫𑀮𑀸 𑀪𑀺𑀓𑁆𑀔𑀽, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀫𑀺𑀁𑀲𑀼 𑀅𑀧𑀭𑀸𑀚𑀺𑀢𑀸.

𑁯.

‘‘𑀧𑀼𑀦𑀸𑀧𑀭𑀁 ¶ ¶ 𑀲𑁄 𑀦𑀭𑀸𑀲𑀪𑁄, 𑀧𑀯𑀦𑁂 𑀯𑀸𑀲𑀁 𑀉𑀧𑀸𑀕𑀫𑀺;

𑀢𑀤𑀸 𑀲𑀫𑀸𑀕𑀫𑁄 𑀆𑀲𑀺, 𑀤𑁆𑀯𑀺𑀦𑁆𑀦𑀁 𑀲𑀢𑀲𑀳𑀲𑁆𑀲𑀺𑀦’’𑀦𑁆𑀢𑀺.

𑀢𑀢𑁆𑀣 𑀓𑀣𑀺𑀦𑀢𑁆𑀣𑀸𑀭𑀲𑀫𑀬𑁂𑀢𑀺 𑀓𑀣𑀺𑀦𑀘𑀻𑀯𑀭𑀢𑁆𑀣𑀭𑀡𑀲𑀫𑀬𑁂. 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑀸𑀬𑀸𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀮𑀢𑁆𑀣𑁂𑀭𑀢𑁆𑀣𑀁. 𑀅𑀧𑀭𑀸𑀚𑀺𑀢𑀸𑀢𑀺 𑀦 𑀧𑀭𑀸𑀚𑀺𑀢𑀸, 𑀯𑀺𑀪𑀢𑁆𑀢𑀺𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀲𑁄𑀢𑀺 𑀲𑁄 𑀫𑀳𑀸𑀧𑀤𑀼𑀫𑁄. 𑀧𑀯𑀦𑁂𑀢𑀺 𑀫𑀳𑀸𑀯𑀦𑁂. 𑀯𑀸𑀲𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀁. 𑀉𑀧𑀸𑀕𑀫𑀻𑀢𑀺 𑀉𑀧𑀸𑀕𑀢𑁄. 𑀤𑁆𑀯𑀺𑀦𑁆𑀦𑀁 𑀲𑀢𑀲𑀳𑀲𑁆𑀲𑀺𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀢𑀲𑀳𑀲𑁆𑀲𑀸𑀦𑀁. ‘‘𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄’’𑀢𑀺𑀧𑀺 𑀧𑀸𑀞𑁄 𑀬𑀤𑀺 𑀅𑀢𑁆𑀣𑀺 𑀲𑀼𑀦𑁆𑀤𑀭𑁄 𑀪𑀯𑁂𑀬𑁆𑀬.

𑀢𑀤𑀸 𑀢𑀣𑀸𑀕𑀢𑁂 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀲𑀦𑁆𑀢𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ¶ 𑀳𑀼𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀧𑀻𑀢𑀺𑀲𑀼𑀔𑁂𑀦𑁂𑀯 𑀕𑁄𑀘𑀭𑀸𑀬 𑀅𑀧𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀦𑀭𑀲𑀻𑀳𑁄 𑀲𑀻𑀳𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀳𑁄𑀢𑀽𑀢𑀺 𑀲𑀗𑁆𑀖𑁄 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀦𑁂𑀓𑀓𑁄𑀝𑀺𑀪𑀺𑀓𑁆𑀔𑀽 𑀢𑀸𑀯𑀤𑁂𑀯 𑀆𑀕𑀜𑁆𑀙𑀺𑀁𑀲𑀼. 𑀲𑀻𑀳𑁄 𑀲𑀗𑁆𑀖𑁂𑀧𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀻𑀳𑁄 𑀆𑀲𑀺𑀁 𑀫𑀺𑀕𑀸𑀥𑀺𑀪𑀽;

𑀧𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑀁, 𑀧𑀯𑀦𑁂 𑀅𑀤𑁆𑀤𑀲𑀁 𑀚𑀺𑀦𑀁.

𑁧𑁧.

‘‘𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀧𑀸𑀤𑁂, 𑀓𑀢𑁆𑀯𑀸𑀦 𑀢𑀁 𑀧𑀤𑀓𑁆𑀔𑀺𑀡𑀁;

𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀦𑀸𑀤𑀺𑀢𑁆𑀯𑀸, 𑀲𑀢𑁆𑀢𑀸𑀳𑀁 𑀚𑀺𑀦𑀫𑀼𑀧𑀝𑁆𑀞𑀳𑀁.

𑁧𑁨.

‘‘𑀲𑀢𑁆𑀢𑀸𑀳𑀁 𑀯𑀭𑀲𑀫𑀸𑀧𑀢𑁆𑀢𑀺𑀬𑀸, 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀫𑀦𑀲𑀸 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀓𑁄𑀝𑀺𑀪𑀺𑀓𑁆𑀔𑀽 𑀲𑀫𑀸𑀦𑀬𑀺.

𑁧𑁩.

‘‘𑀢𑀤𑀸𑀧𑀺 𑀲𑁄 𑀫𑀳𑀸𑀯𑀻𑀭𑁄, 𑀢𑁂𑀲𑀁 𑀫𑀚𑁆𑀛𑁂 𑀯𑀺𑀬𑀸𑀓𑀭𑀺;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪.

‘‘𑀧𑀥𑀸𑀦𑀁 ¶ 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁫.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 ¶ 𑀧𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀤𑀓𑁆𑀔𑀺𑀡𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸. 𑀅𑀪𑀺𑀦𑀸𑀤𑀺𑀢𑁆𑀯𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸. 𑀉𑀧𑀝𑁆𑀞𑀳𑀦𑁆𑀢𑀺 𑀉𑀧𑀝𑁆𑀞𑀳𑀺𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀭𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸. 𑀫𑀦𑀲𑀸 𑀘𑀺𑀦𑁆𑀢𑀬𑀺𑀢𑁆𑀯𑀸𑀦𑀸𑀢𑀺 ‘‘𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀇𑀥 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀫𑀦𑀲𑀸𑀯 𑀘𑀺𑀦𑁆𑀢𑁂𑀢𑁆𑀯𑀸. 𑀲𑀫𑀸𑀦𑀬𑀻𑀢𑀺 𑀲𑀫𑀸𑀳𑀭𑀺.

𑀢𑀲𑁆𑀲 𑀧𑀦 𑀧𑀤𑀼𑀫𑀲𑁆𑀲 𑀪𑀕𑀯𑀢𑁄 𑀘𑀫𑁆𑀧𑀓𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀅𑀲𑀫𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺, 𑀫𑀸𑀢𑀸𑀧𑀺 𑀢𑀲𑁆𑀲 𑀅𑀲𑀫𑀸 𑀦𑀸𑀫, 𑀲𑀸𑀮𑁄 ¶ 𑀘 𑀉𑀧𑀲𑀸𑀮𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑀸𑀥𑀸 𑀘 𑀲𑀼𑀭𑀸𑀥𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑁄𑀡𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀭𑀽𑀧𑀸𑀤𑀻𑀳𑀺 𑀕𑀼𑀡𑁂𑀳𑀺 𑀅𑀦𑀼𑀢𑁆𑀢𑀭𑀸 𑀉𑀢𑁆𑀢𑀭𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀭𑀫𑁆𑀫𑀓𑀼𑀫𑀸𑀭𑁄 𑀦𑀸𑀫𑀲𑁆𑀲 𑀅𑀢𑀺𑀭𑀫𑁆𑀫𑁄 𑀢𑀦𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬.

‘‘𑀘𑀫𑁆𑀧𑀓𑀁 𑀦𑀸𑀫 𑀦𑀕𑀭𑀁, 𑀅𑀲𑀫𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀅𑀲𑀫𑀸 𑀦𑀸𑀫 𑀚𑀦𑀺𑀓𑀸, 𑀧𑀤𑀼𑀫𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁧.

‘‘𑀲𑀸𑀮𑁄 𑀘 𑀉𑀧𑀲𑀸𑀮𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀧𑀤𑀼𑀫𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨.

‘‘𑀭𑀸𑀥𑀸 𑀘𑁂𑀯 𑀲𑀼𑀭𑀸𑀥𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀲𑁄𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁪.

‘‘𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀧𑀪𑀸 𑀦𑀺𑀤𑁆𑀥𑀸𑀯𑀢𑀻 𑀢𑀲𑁆𑀲, 𑀅𑀲𑀫𑀸 𑀲𑀩𑁆𑀩𑀢𑁄 𑀤𑀺𑀲𑀸.

𑁨𑁫.

‘‘𑀘𑀦𑁆𑀤𑀧𑁆𑀧𑀪𑀸 𑀲𑀽𑀭𑀺𑀬𑀧𑁆𑀧𑀪𑀸, 𑀭𑀢𑀦𑀕𑁆𑀕𑀺𑀫𑀡𑀺𑀧𑁆𑀧𑀪𑀸;

𑀲𑀩𑁆𑀩𑀸𑀧𑀺 𑀢𑀸 𑀳𑀢𑀸 𑀳𑁄𑀦𑁆𑀢𑀺, 𑀧𑀢𑁆𑀯𑀸 𑀚𑀺𑀦𑀧𑀪𑀼𑀢𑁆𑀢𑀫𑀁.

𑁨𑁬.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 ¶ , 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭.

‘‘𑀧𑀭𑀺𑀧𑀓𑁆𑀓𑀫𑀸𑀦𑀲𑁂 𑀲𑀢𑁆𑀢𑁂, 𑀩𑁄𑀥𑀬𑀺𑀢𑁆𑀯𑀸 𑀅𑀲𑁂𑀲𑀢𑁄;

𑀲𑁂𑀲𑀓𑁂 𑀅𑀦𑀼𑀲𑀸𑀲𑀺𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁮.

‘‘𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀯𑀤𑁆𑀥𑀧𑀢𑁆𑀢𑀁𑀯 𑀧𑀸𑀤𑀧𑁄;

𑀚𑀳𑀺𑀢𑁆𑀯𑀸 𑀲𑀩𑁆𑀩𑀲𑀗𑁆𑀔𑀸𑀭𑁂, 𑀦𑀺𑀩𑁆𑀩𑀼𑀢𑁄 𑀲𑁄 𑀬𑀣𑀸 𑀲𑀺𑀔𑀻’’𑀢𑀺.

𑀢𑀢𑁆𑀣 ¶ 𑀭𑀢𑀦𑀕𑁆𑀕𑀺𑀫𑀡𑀺𑀧𑁆𑀧𑀪𑀸𑀢𑀺 𑀭𑀢𑀦𑀧𑁆𑀧𑀪𑀸 𑀘 𑀅𑀕𑁆𑀕𑀺𑀧𑁆𑀧𑀪𑀸 𑀘 𑀫𑀡𑀺𑀧𑁆𑀧𑀪𑀸 𑀘. 𑀳𑀢𑀸𑀢𑀺 𑀅𑀪𑀺𑀪𑀽𑀢𑀸. 𑀚𑀺𑀦𑀧𑀪𑀼𑀢𑁆𑀢𑀫𑀦𑁆𑀢𑀺 𑀚𑀺𑀦𑀲𑁆𑀲 𑀲𑀭𑀻𑀭𑀧𑁆𑀧𑀪𑀁 𑀉𑀢𑁆𑀢𑀫𑀁 𑀧𑀢𑁆𑀯𑀸 𑀳𑀢𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀓𑁆𑀓𑀫𑀸𑀦𑀲𑁂𑀢𑀺 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁂 𑀯𑁂𑀦𑁂𑀬𑁆𑀬𑀲𑀢𑁆𑀢𑁂. 𑀯𑀤𑁆𑀥𑀧𑀢𑁆𑀢𑀦𑁆𑀢𑀺 𑀧𑀼𑀭𑀸𑀡𑀧𑀢𑁆𑀢𑀁. 𑀧𑀸𑀤𑀧𑁄 𑀯𑀸𑀢𑀺 𑀧𑀸𑀤𑀧𑁄 𑀯𑀺𑀬. 𑀲𑀩𑁆𑀩𑀲𑀗𑁆𑀔𑀸𑀭𑁂𑀢𑀺 𑀲𑀩𑁆𑀩𑁂𑀧𑀺 ¶ 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀲𑀗𑁆𑀔𑀸𑀭𑁂. ‘‘𑀳𑀺𑀢𑁆𑀯𑀸 𑀲𑀩𑁆𑀩𑀲𑀗𑁆𑀔𑀸𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀬𑀣𑀸 𑀲𑀺𑀔𑀻𑀢𑀺 𑀅𑀕𑁆𑀕𑀺 𑀯𑀺𑀬 𑀦𑀺𑀭𑀼𑀧𑀸𑀤𑀸𑀦𑁄 𑀦𑀺𑀩𑁆𑀩𑀼𑀢𑀺𑀁 𑀲𑀼𑀕𑀢𑁄 𑀕𑀢𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀤𑀼𑀫𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀅𑀝𑁆𑀞𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁧. 𑀦𑀸𑀭𑀤𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀧𑀤𑀼𑀫𑀩𑀼𑀤𑁆𑀥𑁂 ¶ 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀘 𑀅𑀦𑁆𑀢𑀭𑀳𑀺𑀢𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑀸 𑀫𑀦𑀼𑀲𑁆𑀲𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀫𑀸𑀦𑀸 𑀤𑀲𑀯𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀸 𑀳𑀼𑀢𑁆𑀯𑀸 𑀧𑀭𑀺𑀳𑀸𑀬𑀫𑀸𑀦𑀸 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀢𑀤𑀸 𑀤𑀲𑀩𑀮𑀥𑀭𑁄 𑀢𑁂𑀯𑀺𑀚𑁆𑀚𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑁄 𑀯𑀺𑀫𑀼𑀢𑁆𑀢𑀺𑀲𑀸𑀭𑀤𑁄 𑀦𑀸𑀭𑀤𑁄 𑀦𑀸𑀫 𑀦𑀭𑀲𑀢𑁆𑀢𑀼𑀢𑁆𑀢𑀫𑁄 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀲𑁄 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀥𑀜𑁆𑀜𑀯𑀢𑀻 𑀦𑀸𑀫 𑀦𑀕𑀭𑁂 𑀲𑀓𑀯𑀻𑀭𑀺𑀬𑀯𑀺𑀚𑀺𑀢𑀯𑀸𑀲𑀼𑀤𑁂𑀯𑀲𑁆𑀲 𑀲𑀼𑀤𑁂𑀯𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀦𑀺𑀭𑀽𑀧𑀫𑀸𑀬 𑀅𑀦𑁄𑀫𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀥𑀦𑀜𑁆𑀚𑀬𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦 𑀦𑀸𑀫𑀓𑀭𑀡𑁂 𑀓𑀬𑀺𑀭𑀫𑀸𑀦𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀓𑁆𑀔𑀫𑀸𑀦𑀺 𑀅𑀦𑀼𑀭𑀽𑀧𑀸𑀦𑀺 𑀆𑀪𑀭𑀡𑀸𑀦𑀺 𑀆𑀓𑀸𑀲𑀢𑁄 𑀓𑀧𑁆𑀧𑀭𑀼𑀓𑁆𑀔𑀸𑀤𑀻𑀳𑀺 𑀧𑀢𑀺𑀁𑀲𑀼. 𑀢𑁂𑀦𑀲𑁆𑀲 𑀦𑀭𑀸𑀦𑀁 𑀅𑀭𑀳𑀸𑀦𑀺 𑀆𑀪𑀭𑀡𑀸𑀦𑀺 𑀅𑀤𑀸𑀲𑀻𑀢𑀺 ‘‘𑀦𑀸𑀭𑀤𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼.

𑀲𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀺. 𑀯𑀺𑀚𑀺𑀢𑁄 𑀯𑀺𑀚𑀺𑀢𑀸𑀯𑀻 𑀯𑀺𑀚𑀺𑀢𑀸𑀪𑀺𑀭𑀸𑀫𑁄𑀢𑀺 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀢𑀲𑁆𑀲 𑀦𑀸𑀭𑀤𑀓𑀼𑀫𑀸𑀭𑀲𑁆𑀲 𑀓𑀼𑀮𑀲𑀻𑀮𑀸𑀘𑀸𑀭𑀭𑀽𑀧𑀲𑀫𑁆𑀧𑀦𑁆𑀦𑀁 𑀫𑀦𑁄𑀦𑀼𑀓𑀽𑀮𑀁 𑀯𑀺𑀚𑀺𑀢𑀲𑁂𑀦𑀁 ¶ 𑀦𑀸𑀫 𑀅𑀢𑀺𑀯𑀺𑀬 𑀥𑀜𑁆𑀜𑀁 𑀔𑀢𑁆𑀢𑀺𑀬𑀓𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀁𑀲𑀼. 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀸𑀥𑀺𑀓𑀁 𑀇𑀢𑁆𑀣𑀻𑀦𑀁 𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺. 𑀢𑀲𑁆𑀲𑀸 𑀯𑀺𑀚𑀺𑀢𑀲𑁂𑀦𑀸𑀬 𑀤𑁂𑀯𑀺𑀬𑀸 𑀲𑀩𑁆𑀩𑀮𑁄𑀓𑀸𑀦𑀦𑁆𑀤𑀓𑀭𑁂 𑀦𑀦𑁆𑀤𑀼𑀢𑁆𑀢𑀭𑀓𑀼𑀫𑀸𑀭𑁂 𑀦𑀸𑀫 𑀚𑀸𑀢𑁂 𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀦𑀸𑀦𑀸𑀯𑀺𑀭𑀸𑀕𑀢𑀦𑀼𑀯𑀭𑀯𑀲𑀦𑀦𑀺𑀯𑀲𑀦𑁄 ¶ 𑀆𑀫𑀼𑀓𑁆𑀓𑀫𑀼𑀢𑁆𑀢𑀸𑀳𑀸𑀭𑀫𑀡𑀺𑀓𑀼𑀡𑁆𑀟𑀮𑁄 𑀯𑀭𑀓𑁂𑀬𑀽𑀭𑀫𑀓𑀼𑀝𑀓𑀝𑀓𑀥𑀭𑁄 𑀧𑀭𑀫𑀲𑀼𑀭𑀪𑀺𑀕𑀦𑁆𑀥𑀓𑀼𑀲𑀼𑀫𑀲𑀫𑀮𑀗𑁆𑀓𑀢𑁄 𑀧𑀤𑀲𑀸𑀯 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀲𑀬𑀫𑁂𑀯 𑀯𑀺𑀫𑀮𑀦𑀻𑀮𑀓𑀼𑀯𑀮𑀬𑀤𑀮𑀲𑀤𑀺𑀲𑁂𑀦𑀸𑀢𑀺𑀦𑀺𑀲𑀺𑀢𑁂𑀦𑀸𑀲𑀺𑀦𑀸 𑀧𑀭𑀫𑀭𑀼𑀘𑀺𑀭𑀭𑀢𑀦𑀯𑀺𑀘𑀺𑀢𑁆𑀢𑀁 𑀲𑀓𑁂𑀲𑀫𑀓𑀼𑀝𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀕𑀦𑀢𑀮𑁂 𑀔𑀺𑀧𑀺. 𑀢𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀲𑀢𑁆𑀢𑀭𑀢𑀦𑀫𑀬𑀁 𑀘𑁂𑀢𑀺𑀬𑀁 𑀅𑀓𑀸𑀲𑀺.

𑀫𑀳𑀸𑀧𑀼𑀭𑀺𑀲𑁄 ¶ 𑀧𑀦 𑀤𑁂𑀯𑀤𑀢𑁆𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀧𑀭𑀺𑀤𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀉𑀬𑁆𑀬𑀸𑀦𑁂 𑀧𑀩𑁆𑀩𑀚𑀺. 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸 𑀘 𑀢𑀁 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀲𑀢𑁆𑀢𑀸𑀳𑀁 𑀢𑀢𑁆𑀣𑁂𑀯 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀯𑀺𑀚𑀺𑀢𑀲𑁂𑀦𑀸𑀬 𑀅𑀕𑁆𑀕𑀫𑀳𑁂𑀲𑀺𑀬𑀸 𑀤𑀺𑀦𑁆𑀦𑀁 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀉𑀬𑁆𑀬𑀸𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑀧𑀸𑀮𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀫𑀳𑀸𑀲𑁄𑀡𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀬𑀸𑀘𑀺𑀢𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀥𑀦𑀜𑁆𑀚𑀬𑀼𑀬𑁆𑀬𑀸𑀦𑁂 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑁂𑀳𑀺 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀧𑀤𑀼𑀫𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨.

‘‘𑀲𑁄 𑀩𑀼𑀤𑁆𑀥𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲, 𑀚𑁂𑀝𑁆𑀞𑁄 𑀤𑀬𑀺𑀢𑀑𑀭𑀲𑁄;

𑀆𑀫𑀼𑀓𑁆𑀓𑀫𑀸𑀮𑀸𑀪𑀭𑀡𑁄, 𑀉𑀬𑁆𑀬𑀸𑀦𑀁 𑀉𑀧𑀲𑀗𑁆𑀓𑀫𑀺.

𑁩.

‘‘𑀢𑀢𑁆𑀣𑀸𑀲𑀺 𑀭𑀼𑀓𑁆𑀔𑁄 𑀬𑀲𑀯𑀺𑀧𑀼𑀮𑁄, 𑀅𑀪𑀺𑀭𑀽𑀧𑁄 𑀩𑁆𑀭𑀳𑁆𑀫𑀸 𑀲𑀼𑀘𑀺;

𑀢𑀫𑀚𑁆𑀛𑀧𑁆𑀧𑀢𑁆𑀯𑀸 𑀉𑀧𑀦𑀺𑀲𑀻𑀤𑀺, 𑀫𑀳𑀸𑀲𑁄𑀡𑀲𑁆𑀲 𑀳𑁂𑀝𑁆𑀞𑀢𑁄.

𑁪.

‘‘𑀢𑀢𑁆𑀣 𑀜𑀸𑀡𑀯𑀭𑀼𑀧𑁆𑀧𑀚𑁆𑀚𑀺, 𑀅𑀦𑀦𑁆𑀢𑀁 𑀯𑀚𑀺𑀭𑀽𑀧𑀫𑀁;

𑀢𑁂𑀦 𑀯𑀺𑀘𑀺𑀦𑀺 𑀲𑀗𑁆𑀔𑀸𑀭𑁂, 𑀉𑀓𑁆𑀓𑀼𑀚𑁆𑀚𑀫𑀯𑀓𑀼𑀚𑁆𑀚𑀓𑀁.

𑁫.

‘‘𑀢𑀢𑁆𑀣 ¶ ¶ 𑀲𑀩𑁆𑀩𑀓𑀺𑀮𑁂𑀲𑀸𑀦𑀺, 𑀅𑀲𑁂𑀲𑀫𑀪𑀺𑀯𑀸𑀳𑀬𑀺;

𑀧𑀸𑀧𑀼𑀡𑀻 𑀓𑁂𑀯𑀮𑀁 𑀩𑁄𑀥𑀺𑀁, 𑀩𑀼𑀤𑁆𑀥𑀜𑀸𑀡𑁂 𑀘 𑀘𑀼𑀤𑁆𑀤𑀲.

𑁬.

‘‘𑀧𑀸𑀧𑀼𑀡𑀺𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀁, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀘𑀓𑁆𑀓𑀯𑀢𑁆𑀢𑀺𑀲𑁆𑀲𑀸𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄. 𑀚𑁂𑀝𑁆𑀞𑁄𑀢𑀺 𑀧𑀼𑀩𑁆𑀩𑀚𑁄. 𑀤𑀬𑀺𑀢𑀑𑀭𑀲𑁄𑀢𑀺 𑀤𑀬𑀺𑀢𑁄 𑀧𑀺𑀬𑁄 ¶ 𑀑𑀭𑀲𑁄 𑀧𑀼𑀢𑁆𑀢𑁄, 𑀤𑀬𑀺𑀢𑁄 𑀑𑀭𑀲𑀺 𑀕𑀳𑁂𑀢𑁆𑀯𑀸 𑀮𑀸𑀮𑀺𑀢𑁄 𑀧𑀼𑀢𑁆𑀢𑁄 𑀤𑀬𑀺𑀢𑀑𑀭𑀲𑁄 𑀦𑀸𑀫. 𑀆𑀫𑀼𑀓𑁆𑀓𑀫𑀸𑀮𑀸𑀪𑀭𑀡𑁄𑀢𑀺 𑀆𑀫𑀼𑀓𑁆𑀓𑀫𑀼𑀢𑁆𑀢𑀸𑀳𑀸𑀭𑀓𑁂𑀬𑀽𑀭𑀓𑀝𑀓𑀫𑀓𑀼𑀝𑀓𑀼𑀡𑁆𑀟𑀮𑀫𑀸𑀮𑁄. 𑀉𑀬𑁆𑀬𑀸𑀦𑀦𑁆𑀢𑀺 𑀩𑀳𑀺𑀦𑀕𑀭𑁂 𑀥𑀦𑀜𑁆𑀚𑀬𑀼𑀬𑁆𑀬𑀸𑀦𑀁 𑀦𑀸𑀫𑀸𑀭𑀸𑀫𑀁 𑀅𑀕𑀫𑀸𑀲𑀺.

𑀢𑀢𑁆𑀣𑀸𑀲𑀺 𑀭𑀼𑀓𑁆𑀔𑁄𑀢𑀺 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀏𑀓𑁄 𑀓𑀺𑀭 𑀭𑀼𑀓𑁆𑀔𑁄 𑀭𑀢𑁆𑀢𑀲𑁄𑀡𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀓𑀺𑀭 𑀦𑀯𑀼𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀲𑀫𑁆𑀧𑀦𑁆𑀦𑀯𑀺𑀯𑀺𑀥𑀯𑀺𑀝𑀧𑀲𑀸𑀔𑁄 𑀦𑀻𑀮𑀩𑀳𑀮𑀯𑀺𑀧𑀼𑀮𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄 𑀤𑁂𑀯𑀢𑀸𑀥𑀺𑀯𑀼𑀝𑁆𑀞𑀢𑁆𑀢𑀸 𑀯𑀺𑀕𑀢𑀯𑀺𑀯𑀺𑀥𑀯𑀺𑀳𑀕𑀕𑀡𑀲𑀜𑁆𑀘𑀸𑀭𑁄 𑀥𑀭𑀡𑀻𑀢𑀮𑀢𑀺𑀮𑀓𑀪𑀽𑀢𑁄 𑀢𑀭𑀼𑀭𑀚𑁆𑀚𑀁 𑀯𑀺𑀬 𑀓𑀼𑀭𑀼𑀫𑀸𑀦𑁄 𑀧𑀭𑀫𑀭𑀫𑀡𑀻𑀬𑀤𑀲𑁆𑀲𑀦𑁄 𑀭𑀢𑁆𑀢𑀓𑀼𑀲𑀼𑀫𑀲𑀫𑀮𑀗𑁆𑀓𑀢𑀲𑀩𑁆𑀩𑀲𑀸𑀔𑁄 𑀤𑁂𑀯𑀫𑀦𑀼𑀲𑁆𑀲𑀦𑀬𑀦𑀭𑀲𑀸𑀬𑀦𑀪𑀽𑀢𑁄 𑀅𑀳𑁄𑀲𑀺. 𑀬𑀲𑀯𑀺𑀧𑀼𑀮𑁄𑀢𑀺 𑀯𑀺𑀧𑀼𑀮𑀬𑀲𑁄, 𑀲𑀩𑁆𑀩𑀮𑁄𑀓𑀯𑀺𑀔𑁆𑀬𑀸𑀢𑁄 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀢𑁆𑀣 𑀧𑀸𑀓𑀝𑁄 𑀯𑀺𑀲𑁆𑀲𑀼𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀢𑀢𑁆𑀣𑀸𑀲𑀺 𑀭𑀼𑀓𑁆𑀔𑁄 𑀯𑀺𑀧𑀼𑀮𑁄’’𑀢𑀺 𑀧𑀞𑀦𑁆𑀢𑀺. 𑀩𑁆𑀭𑀳𑀸𑀢𑀺 𑀫𑀳𑀦𑁆𑀢𑁄, 𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀢𑀫𑀚𑁆𑀛𑀧𑁆𑀧𑀢𑁆𑀯𑀸𑀢𑀺 𑀢𑀁 𑀲𑁄𑀡𑀭𑀼𑀓𑁆𑀔𑀁 𑀧𑀢𑁆𑀯𑀸 𑀅𑀥𑀺𑀧𑀢𑁆𑀯𑀸 𑀉𑀧𑀕𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀢𑁄𑀢𑀺 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸.

𑀜𑀸𑀡𑀯𑀭𑀼𑀧𑁆𑀧𑀚𑁆𑀚𑀻𑀢𑀺 𑀜𑀸𑀡𑀯𑀭𑀁 𑀉𑀤𑀧𑀸𑀤𑀺. 𑀅𑀦𑀦𑁆𑀢𑀦𑁆𑀢𑀺 𑀅𑀧𑁆𑀧𑀫𑁂𑀬𑁆𑀬𑀁 𑀅𑀧𑁆𑀧𑀫𑀸𑀡𑀁. 𑀯𑀚𑀺𑀭𑀽𑀧𑀫𑀦𑁆𑀢𑀺 𑀯𑀚𑀺𑀭𑀲𑀤𑀺𑀲𑀁 𑀢𑀺𑀔𑀺𑀡𑀁, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀯𑀺𑀘𑀺𑀦𑀺 𑀲𑀗𑁆𑀔𑀸𑀭𑁂𑀢𑀺 𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀭𑀽𑀧𑀸𑀤𑀺𑀓𑁂 𑀲𑀗𑁆𑀔𑀸𑀭𑁂 𑀯𑀺𑀘𑀺𑀦𑀺. 𑀉𑀓𑁆𑀓𑀼𑀚𑁆𑀚𑀫𑀯𑀓𑀼𑀚𑁆𑀚𑀓𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀯𑀺𑀘𑀺𑀦𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀬𑀸𑀯 𑀕𑁄𑀢𑁆𑀭𑀪𑀼𑀜𑀸𑀡𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀸𑀦𑀼𑀓𑁆𑀓𑀫𑁂𑀦 𑀲𑀓𑀮𑁂 𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀮𑀪𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 ¶ ¶ 𑀲𑁄𑀡𑀭𑀼𑀓𑁆𑀔𑁂. 𑀲𑀩𑁆𑀩𑀓𑀺𑀮𑁂𑀲𑀸𑀦𑀻𑀢𑀺 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑁂, 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑁂𑀘𑀺 ‘‘𑀢𑀢𑁆𑀣 𑀲𑀩𑁆𑀩𑀓𑀺𑀮𑁂𑀲𑁂𑀳𑀻’’𑀢𑀺 𑀧𑀞𑀦𑁆𑀢𑀺. 𑀅𑀲𑁂𑀲𑀦𑁆𑀢𑀺 𑀦𑀺𑀭𑀯𑀲𑁂𑀲𑀁. 𑀅𑀪𑀺𑀯𑀸𑀳𑀬𑀻𑀢𑀺 𑀫𑀕𑁆𑀕𑁄𑀥𑀺𑀦𑀸 𑀘 𑀓𑀺𑀮𑁂𑀲𑁄𑀥𑀺𑀦𑀸 𑀘 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀅𑀪𑀺𑀯𑀸𑀳𑀬𑀺, 𑀯𑀺𑀦𑀸𑀲𑀫𑀼𑀧𑀦𑁂𑀲𑀻𑀢𑀺 𑀅𑀢𑁆𑀣𑁄. 𑀩𑁄𑀥𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀩𑀼𑀤𑁆𑀥𑀜𑀸𑀡𑁂 𑀘 𑀘𑀼𑀤𑁆𑀤𑀲𑀸𑀢𑀺 𑀩𑀼𑀤𑁆𑀥𑀜𑀸𑀡𑀸𑀦𑀺 𑀘𑀼𑀤𑁆𑀤𑀲. 𑀢𑀸𑀦𑀺 𑀓𑀢𑀫𑀸𑀦𑀻𑀢𑀺? 𑀫𑀕𑁆𑀕𑀨𑀮𑀜𑀸𑀡𑀸𑀦𑀺 𑀅𑀝𑁆𑀞, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀻𑀢𑀺 𑀏𑀯𑀫𑀺𑀫𑀸𑀦𑀺 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺 𑀦𑀸𑀫, 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀅𑀧𑀭𑀸𑀦𑀺𑀧𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺 𑀤𑀲𑀩𑀮𑀜𑀸𑀡𑀸𑀦𑀺 𑀲𑀓𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂 𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀥𑀦𑀜𑁆𑀚𑀬𑀼𑀬𑁆𑀬𑀸𑀦𑁂 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑁂 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀲𑀫𑁆𑀫𑀼𑀔𑁂 𑀓𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁆𑀲 𑀧𑀞𑀫𑀸𑀪𑀺𑀲𑀫𑀬𑁄 ¶ 𑀅𑀳𑁄𑀲𑀺. 𑀢𑀤𑀸 𑀓𑀺𑀭 𑀫𑀳𑀸𑀤𑁄𑀡𑀦𑀕𑀭𑁂 𑀤𑁄𑀡𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀕𑀗𑁆𑀕𑀸𑀢𑀻𑀭𑁂 𑀧𑀝𑀺𑀯𑀲𑀢𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀫𑀳𑀸𑀚𑀦𑁂𑀦 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄. 𑀲𑁄 𑀬𑀲𑁆𑀫𑀺𑀁 𑀯𑀺𑀲𑀬𑁂 𑀚𑀦𑀧𑀤𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀩𑀮𑀺𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀯𑀺𑀲𑀬𑀁 𑀅𑀯𑀲𑁆𑀲𑁂𑀦 𑀯𑀸 𑀅𑀢𑀺𑀯𑀲𑁆𑀲𑁂𑀦 𑀯𑀸 𑀲𑀓𑁆𑀔𑀭𑀯𑀲𑁆𑀲𑁂𑀦 𑀯𑀸 𑀯𑀺𑀦𑀸𑀲𑁂𑀢𑀺.

𑀅𑀣 𑀢𑀻𑀭𑀤𑀲𑁆𑀲𑀦𑁄 𑀦𑀸𑀭𑀤𑁄 𑀲𑀢𑁆𑀣𑀸 𑀤𑁄𑀡𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀯𑀺𑀦𑀬𑀦𑁂 𑀩𑀳𑀽𑀦𑀁 𑀧𑀸𑀡𑀻𑀦𑀁 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀸𑀭𑀺𑀢𑁄 𑀢𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀫𑀕𑀫𑀸𑀲𑀺. 𑀢𑀢𑁄 𑀢𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀕𑀯𑀸, 𑀏𑀢𑁆𑀣 𑀖𑁄𑀭𑀯𑀺𑀲𑁄 𑀉𑀕𑁆𑀕𑀢𑁂𑀚𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀸 𑀧𑀝𑀺𑀯𑀲𑀢𑀺, 𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑁆𑀲𑀢𑀺 𑀦 𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀸 𑀧𑀦 𑀢𑁂𑀲𑀁 𑀯𑀘𑀦𑀁 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀅𑀕𑀫𑀸𑀲𑀺. 𑀕𑀦𑁆𑀢𑁆𑀯𑀸 𑀘 𑀢𑀢𑁆𑀣𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀲𑀓𑁆𑀓𑀸𑀭𑀢𑁆𑀣𑀸𑀬 𑀓𑀢𑁂 𑀧𑀭𑀫𑀲𑀼𑀭𑀪𑀺𑀕𑀦𑁆𑀥𑁂 𑀧𑀼𑀧𑁆𑀨𑀲𑀦𑁆𑀣𑀭𑁂 𑀦𑀺𑀲𑀻𑀤𑀺. 𑀫𑀳𑀸𑀚𑀦𑁄 𑀓𑀺𑀭 ‘‘𑀦𑀸𑀭𑀤𑀲𑁆𑀲 𑀘 𑀫𑀼𑀦𑀺𑀭𑀸𑀚𑀲𑁆𑀲 𑀤𑁄𑀡𑀲𑁆𑀲 𑀘 𑀦𑀸𑀕𑀭𑀸𑀚𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀬𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀺.

𑀅𑀣 𑀅𑀳𑀺𑀦𑀸𑀕𑁄 𑀫𑀼𑀦𑀺𑀦𑀸𑀕𑀁 𑀢𑀣𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀲𑀦𑁆𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀳𑀼𑀢𑁆𑀯𑀸 𑀧𑀥𑀽𑀧𑀸𑀬𑀺. 𑀤𑀲𑀩𑀮𑁄𑀧𑀺 𑀧𑀥𑀽𑀧𑀸𑀬𑀺. 𑀧𑀼𑀦 𑀦𑀸𑀕𑀭𑀸𑀚𑀸 𑀧𑀚𑁆𑀚𑀮𑀺 ¶ . 𑀫𑀼𑀦𑀺𑀭𑀸𑀚𑀸𑀧𑀺 𑀧𑀚𑁆𑀚𑀮𑀺. 𑀅𑀣 𑀲𑁄 𑀦𑀸𑀕𑀭𑀸𑀚𑀸 𑀤𑀲𑀩𑀮𑀲𑁆𑀲 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀸𑀳𑀺 𑀥𑀽𑀫𑀚𑀸𑀮𑀸𑀳𑀺 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑀲𑀭𑀻𑀭𑁄 𑀤𑀼𑀓𑁆𑀔𑀁 𑀅𑀲𑀳𑀫𑀸𑀦𑁄 ‘‘𑀯𑀺𑀲𑀯𑁂𑀕𑁂𑀦 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀯𑀺𑀲𑀲𑁆𑀲 𑀯𑁂𑀕𑁂𑀦 𑀲𑀓𑀮𑁄𑀧𑀺 𑀚𑀫𑁆𑀩𑀼𑀤𑀻𑀧𑁄 𑀯𑀺𑀦𑀲𑁆𑀲𑁂𑀬𑁆𑀬. 𑀢𑀁 𑀧𑀦 𑀯𑀺𑀲𑀁 𑀤𑀲𑀩𑀮𑀲𑁆𑀲 𑀲𑀭𑀻𑀭𑁂 𑀏𑀓𑀮𑁄𑀫𑀫𑁆𑀧𑀺 𑀓𑀫𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀲𑁄 𑀦𑀸𑀕𑀭𑀸𑀚𑀸 𑁋 ‘‘𑀓𑀸 𑀦𑀼 𑀔𑁄 𑀲𑀫𑀡𑀲𑁆𑀲 𑀧𑀯𑀢𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀭𑀤𑀲𑀫𑀬𑁂 𑀲𑀽𑀭𑀺𑀬𑀁 𑀯𑀺𑀬 𑀘𑀦𑁆𑀤𑀁 𑀯𑀺𑀬 𑀘 𑀧𑀭𑀺𑀧𑀼𑀡𑁆𑀡𑀁 𑀙𑀩𑁆𑀩𑀡𑁆𑀡𑀸𑀳𑀺 𑀩𑀼𑀤𑁆𑀥𑀭𑀲𑁆𑀫𑀻𑀳𑀺 𑀯𑀺𑀭𑁄𑀘𑀫𑀸𑀦𑀁 𑀯𑀺𑀧𑁆𑀧𑀲𑀦𑁆𑀦𑀯𑀤𑀦𑀲𑁄𑀪𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀳𑁄! 𑀫𑀳𑀺𑀤𑁆𑀥𑀺𑀓𑁄 𑀯𑀢𑀸𑀬𑀁 𑀲𑀫𑀡𑁄, 𑀫𑀬𑀸 𑀧𑀦 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀦𑁆𑀢𑁂𑀦 𑀅𑀧𑀭𑀤𑁆𑀥’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀡𑀁 𑀕𑀯𑁂𑀲𑀻 𑀪𑀕𑀯𑀦𑁆𑀢𑀁𑀬𑁂𑀯 ¶ 𑀲𑀭𑀡𑀫𑀼𑀧𑀕𑀜𑁆𑀙𑀺. 𑀅𑀣 𑀦𑀸𑀭𑀤𑁄 𑀫𑀼𑀦𑀺𑀭𑀸𑀚𑀸 𑀢𑀁 𑀦𑀸𑀕𑀭𑀸𑀚𑀁 𑀯𑀺𑀦𑁂𑀢𑁆𑀯𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑀸𑀤𑀦𑀢𑁆𑀣𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀢𑀤𑀸 𑀧𑀸𑀡𑀻𑀦𑀁 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀫𑀳𑀸𑀤𑁄𑀡𑀁 𑀦𑀸𑀕𑀭𑀸𑀚𑀁, 𑀯𑀺𑀦𑀬𑀦𑁆𑀢𑁄 𑀫𑀳𑀸𑀫𑀼𑀦𑀺;

𑀧𑀸𑀝𑀺𑀳𑁂𑀭𑀁 𑀢𑀤𑀸𑀓𑀸𑀲𑀺, 𑀤𑀲𑁆𑀲𑀬𑀦𑁆𑀢𑁄 𑀲𑀤𑁂𑀯𑀓𑁂.

𑁮.

‘‘𑀢𑀤𑀸 ¶ 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀢𑀫𑁆𑀳𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀭𑀺𑀁𑀲𑀼 𑀲𑀩𑁆𑀩𑀲𑀁𑀲𑀬’’𑀦𑁆𑀢𑀺.

𑀢𑀢𑁆𑀣 𑀧𑀸𑀝𑀺𑀳𑁂𑀭𑀁 𑀢𑀤𑀸𑀓𑀸𑀲𑀻𑀢𑀺 𑀅𑀓𑀸𑀲𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀢𑀤𑀸 𑀤𑁂𑀯𑀫𑀦𑀼𑀲𑁆𑀲𑀸 𑀯𑀸’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀁. 𑀢𑀲𑁆𑀫𑀸 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀜𑁆𑀘 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀭𑀺𑀁𑀲𑀽𑀢𑀺 𑀅𑀢𑀺𑀓𑁆𑀓𑀫𑀺𑀁𑀲𑀼.

𑀬𑀤𑀸 𑀧𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀦𑀦𑁆𑀤𑀼𑀢𑁆𑀢𑀭𑀓𑀼𑀫𑀸𑀭𑀁 𑀑𑀯𑀤𑀺, 𑀢𑀤𑀸 𑀅𑀲𑀻𑀢𑀺𑀬𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀑𑀯𑀤𑀻 𑀲𑀓𑀫𑀢𑁆𑀭𑀚𑀁;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 𑀧𑀦 𑀣𑀼𑀮𑁆𑀮𑀓𑁄𑀝𑁆𑀞𑀺𑀢𑀦𑀕𑀭𑁂 𑀪𑀤𑁆𑀤𑀲𑀸𑀮𑁄 𑀘 𑀯𑀺𑀚𑀺𑀢𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀲𑀳𑀸𑀬𑀓𑀸 𑀅𑀫𑀢𑀭𑀳𑀤𑀁 𑀕𑀯𑁂𑀲𑀫𑀸𑀦𑀸 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑀁 𑀅𑀢𑀺𑀯𑀺𑀲𑀸𑀭𑀤𑀁 𑀦𑀸𑀭𑀤𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀤𑁆𑀤𑀲𑀁𑀲𑀼. 𑀢𑁂 𑀪𑀕𑀯𑀢𑁄 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 ¶ 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑀺 𑀲𑀜𑁆𑀚𑀸𑀢𑀲𑀤𑁆𑀥𑀸 𑀲𑀧𑀭𑀺𑀯𑀸𑀭𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀲𑀼 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀦𑀸𑀭𑀤𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀬𑀲𑁆𑀫𑀺𑀁 𑀲𑀫𑀬𑁂 𑀦𑀸𑀭𑀤𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀜𑀸𑀢𑀺𑀲𑀫𑀸𑀕𑀫𑁂 𑀅𑀢𑁆𑀢𑀦𑁄 𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀯𑀁𑀲𑀁 𑀓𑀣𑁂𑀲𑀺, 𑀢𑀤𑀸 𑀦𑀯𑀼𑀢𑀺𑀓𑁄𑀝𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧.

‘‘𑀬𑀤𑀸 𑀩𑀼𑀤𑁆𑀥𑁄 𑀩𑀼𑀤𑁆𑀥𑀕𑀼𑀡𑀁, 𑀲𑀦𑀺𑀤𑀸𑀦𑀁 𑀧𑀓𑀸𑀲𑀬𑀺;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀲𑀫𑀺𑀁𑀲𑀼 𑀯𑀺𑀫𑀮𑀸 𑀢𑀤𑀸’’𑀢𑀺.

𑀢𑀢𑁆𑀣 ¶ 𑀯𑀺𑀫𑀮𑀸𑀢𑀺 𑀯𑀺𑀕𑀢𑀫𑀮𑀸, 𑀔𑀻𑀡𑀸𑀲𑀯𑀸𑀢𑀺 𑀅𑀢𑁆𑀣𑁄.

𑀬𑀤𑀸 ¶ 𑀧𑀦 𑀫𑀳𑀸𑀤𑁄𑀡𑀦𑀸𑀕𑀭𑀸𑀚𑀲𑁆𑀲 𑀯𑀺𑀦𑀬𑀦𑁂 𑀧𑀲𑀦𑁆𑀦𑁄 𑀯𑁂𑀭𑁄𑀘𑀦𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀢𑁆𑀢𑀭𑀢𑀦𑀫𑀬𑀁 𑀫𑀡𑁆𑀟𑀧𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑀁 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀲𑀚𑀦𑀧𑀤𑁂 𑀅𑀢𑁆𑀢𑀦𑁄 𑀤𑀸𑀦𑀕𑁆𑀕𑀤𑀲𑁆𑀲𑀦𑀢𑁆𑀣𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀸𑀕𑀦𑀸𑀝𑀓𑀸𑀦𑀺 𑀘 𑀢𑀸𑀴𑀸𑀯𑀘𑀭𑁂 𑀯𑀺𑀯𑀺𑀥𑀯𑁂𑀲𑀸𑀮𑀗𑁆𑀓𑀸𑀭𑀥𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑁂𑀦 𑀪𑀕𑀯𑀢𑁄 𑀲𑀧𑀭𑀺𑀯𑀸𑀭𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀪𑁄𑀚𑀦𑀸𑀯𑀲𑀸𑀦𑁂 𑀪𑀕𑀯𑀸 𑀫𑀳𑀸𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀢𑀤𑀸 𑀪𑀢𑁆𑀢𑀸𑀦𑀼𑀫𑁄𑀤𑀦𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀸𑀦𑀁 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨.

‘‘𑀬𑀤𑀸 𑀯𑁂𑀭𑁄𑀘𑀦𑁄 𑀦𑀸𑀕𑁄, 𑀤𑀸𑀦𑀁 𑀤𑀤𑀸𑀢𑀺 𑀲𑀢𑁆𑀣𑀼𑀦𑁄;

𑀢𑀤𑀸 𑀲𑀫𑀺𑀁𑀲𑀼 𑀚𑀺𑀦𑀧𑀼𑀢𑁆𑀢𑀸, 𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀺𑀬𑁄’’𑀢𑀺.

𑀢𑀢𑁆𑀣 𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀺𑀬𑁄𑀢𑀺 𑀲𑀢𑀲𑀳𑀲𑁆𑀲𑀸𑀦𑀁 𑀅𑀲𑀻𑀢𑀺𑀬𑁄.

𑀢𑀤𑀸 ¶ 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀧𑀝𑀺𑀯𑀲𑀢𑀺. 𑀅𑀣 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀦𑀸𑀭𑀤𑁄 𑀪𑀕𑀯𑀸 𑀅𑀲𑀻𑀢𑀺𑀬𑀸 𑀅𑀭𑀳𑀦𑁆𑀢𑀓𑁄𑀝𑀻𑀳𑀺 𑀤𑀲𑀳𑀺 𑀘 𑀅𑀦𑀸𑀕𑀸𑀫𑀺𑀨𑀮𑀝𑁆𑀞𑁂𑀳𑀺 𑀉𑀧𑀸𑀲𑀓𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀢𑀁 𑀅𑀲𑁆𑀲𑀫𑀧𑀤𑀁 𑀅𑀕𑀫𑀸𑀲𑀺. 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀯 𑀧𑀫𑀼𑀤𑀺𑀢𑀳𑀤𑀬𑁄 𑀲𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀦𑀺𑀯𑀸𑀲𑀢𑁆𑀣𑀸𑀬 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀲𑀓𑀮𑀭𑀢𑁆𑀢𑀺𑀁 𑀲𑀢𑁆𑀣𑀼𑀕𑀼𑀡𑀁 𑀓𑀺𑀢𑁆𑀢𑁂𑀢𑁆𑀯𑀸 𑀪𑀕𑀯𑀢𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀉𑀢𑁆𑀢𑀭𑀓𑀼𑀭𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀆𑀳𑀸𑀭𑀁 𑀆𑀳𑀭𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀏𑀯𑀁 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑀢𑁄 𑀅𑀦𑀕𑁆𑀖𑀁 𑀮𑁄𑀳𑀺𑀢𑀘𑀦𑁆𑀤𑀦𑀁 𑀆𑀳𑀭𑀺𑀢𑁆𑀯𑀸 𑀢𑁂𑀦 𑀮𑁄𑀳𑀺𑀢𑀘𑀦𑁆𑀤𑀦𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀢𑀤𑀸 𑀦𑀁 𑀤𑀲𑀩𑀮𑁄 𑀅𑀫𑀭𑀦𑀭𑀧𑀭𑀺𑀯𑀼𑀢𑁄 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀆𑀲𑀺𑀁, 𑀧𑀜𑁆𑀘𑀸𑀪𑀺𑀜𑁆𑀜𑀸𑀲𑀼 𑀧𑀸𑀭𑀕𑀽.

𑁧𑁪.

‘‘𑀢𑀤𑀸𑀧𑀸𑀳𑀁 𑀅𑀲𑀫𑀲𑀫𑀁, 𑀲𑀲𑀗𑁆𑀖𑀁 𑀲𑀧𑀭𑀺𑀚𑁆𑀚𑀦𑀁;

𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑁂𑀢𑁆𑀯𑀸, 𑀘𑀦𑁆𑀤𑀦𑁂𑀦𑀸𑀪𑀺𑀧𑀽𑀚𑀬𑀺𑀁.

𑁧𑁫.

‘‘𑀲𑁄𑀧𑀺 ¶ 𑀫𑀁 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀦𑀸𑀭𑀤𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁬.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁭.

‘‘𑀢𑀲𑁆𑀲𑀸𑀧𑀺 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑁂𑀢𑁆𑀯 𑀫𑀸𑀦𑀲𑀁;

𑀅𑀥𑀺𑀝𑁆𑀞𑀳𑀺𑀁 𑀯𑀢𑀁 𑀉𑀕𑁆𑀕𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀢𑀤𑀸𑀧𑀸𑀳𑀦𑁆𑀢𑀺 𑀢𑀤𑀸𑀧𑀺 𑀅𑀳𑀁. 𑀅𑀲𑀫𑀲𑀫𑀦𑁆𑀢𑀺 𑀅𑀲𑀫𑀸 𑀦𑀸𑀫 𑀅𑀢𑀻𑀢𑀸 𑀩𑀼𑀤𑁆𑀥𑀸, 𑀢𑁂𑀳𑀺 𑀅𑀲𑀫𑁂𑀳𑀺 𑀲𑀫𑀁 𑀢𑀼𑀮𑁆𑀬𑀁 𑀅𑀲𑀫𑀲𑀫𑀁. 𑀅𑀣 𑀯𑀸 𑀅𑀲𑀫𑀸 𑀯𑀺𑀲𑀫𑀸, 𑀲𑀫𑀸 𑀅𑀯𑀺𑀲𑀫𑀸 𑀲𑀸𑀥𑀯𑁄, 𑀢𑁂𑀲𑀼 𑀅𑀲𑀫𑀲𑀫𑁂𑀲𑀼 𑀲𑀫𑁄 ‘‘𑀅𑀲𑀫𑀲𑀫𑀲𑀫𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀲𑀫𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀲𑀫𑀸𑀯𑀺𑀲𑀫𑀲𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀧𑀭𑀺𑀚𑁆𑀚𑀦𑀦𑁆𑀢𑀺 𑀲𑀉𑀧𑀸𑀲𑀓𑀚𑀦𑀁. ‘‘𑀲𑁄𑀧𑀺 𑀫𑀁 𑀢𑀤𑀸 𑀦𑀭𑀫𑀭𑀽𑀦𑀁, 𑀫𑀚𑁆𑀛𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸’’𑀢𑀺𑀧𑀺 𑀧𑀸𑀞𑁄 ¶ , 𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀯. 𑀪𑀺𑀬𑁆𑀬𑁄 𑀳𑀸𑀲𑁂𑀢𑁆𑀯 𑀫𑀸𑀦𑀲𑀦𑁆𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀳𑀸𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸 𑀳𑀤𑀬𑀁. 𑀅𑀥𑀺𑀝𑁆𑀞𑀳𑀺𑀁 𑀯𑀢𑀁 𑀉𑀕𑁆𑀕𑀦𑁆𑀢𑀺 𑀉𑀕𑁆𑀕𑀁 𑀯𑀢𑀁 𑀅𑀥𑀺𑀝𑁆𑀞𑀸𑀲𑀺𑀁. ‘‘𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺𑀧𑀺 𑀧𑀸𑀞𑁄.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀸𑀭𑀤𑀲𑁆𑀲 𑀥𑀜𑁆𑀜𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀅𑀦𑁄𑀫𑀸 𑀦𑀸𑀫 𑀫𑀸𑀢𑀸, 𑀪𑀤𑁆𑀤𑀲𑀸𑀮𑁄 𑀘 𑀚𑀺𑀢𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀸𑀲𑁂𑀝𑁆𑀞𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀉𑀢𑁆𑀢𑀭𑀸 𑀘 𑀨𑀕𑁆𑀕𑀼𑀦𑀻 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀲𑁄𑀡𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺. 𑀢𑀲𑁆𑀲 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀁 𑀬𑁄𑀚𑀦𑀁 𑀨𑀭𑀢𑀺, 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀢𑀲𑁆𑀲 𑀧𑀦 𑀯𑀺𑀚𑀺𑀢𑀲𑁂𑀦𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀦𑀦𑁆𑀤𑀼𑀢𑁆𑀢𑀭𑀓𑀼𑀫𑀸𑀭𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀯𑀺𑀚𑀺𑀢𑁄 𑀯𑀺𑀚𑀺𑀢𑀸𑀯𑀻 𑀯𑀺𑀚𑀺𑀢𑀸𑀪𑀺𑀭𑀸𑀫𑁄𑀢𑀺 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀲𑁄 𑀧𑀤𑀲𑀸𑀯 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮.

‘‘𑀦𑀕𑀭𑀁 𑀥𑀜𑁆𑀜𑀯𑀢𑀻 𑀦𑀸𑀫, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀅𑀦𑁄𑀫𑀸 𑀦𑀸𑀫 𑀚𑀦𑀺𑀓𑀸, 𑀦𑀸𑀭𑀤𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁩.

‘‘𑀪𑀤𑁆𑀤𑀲𑀸𑀮𑁄 𑀚𑀺𑀢𑀫𑀺𑀢𑁆𑀢𑁄, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀯𑀸𑀲𑁂𑀝𑁆𑀞𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀦𑀸𑀭𑀤𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪.

‘‘𑀉𑀢𑁆𑀢𑀭𑀸 ¶ 𑀨𑀕𑁆𑀕𑀼𑀦𑀻 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀲𑁄𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁬.

‘‘𑀅𑀝𑁆𑀞𑀸𑀲𑀻𑀢𑀺𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁨𑁭.

‘‘𑀢𑀲𑁆𑀲 𑀩𑁆𑀬𑀸𑀫𑀧𑁆𑀧𑀪𑀸 𑀓𑀸𑀬𑀸, 𑀦𑀺𑀤𑁆𑀥𑀸𑀯𑀢𑀺 𑀤𑀺𑀲𑁄𑀤𑀺𑀲𑀁;

𑀦𑀺𑀭𑀦𑁆𑀢𑀭𑀁 𑀤𑀺𑀯𑀸𑀭𑀢𑁆𑀢𑀺𑀁, 𑀬𑁄𑀚𑀦𑀁 𑀨𑀭𑀢𑁂 𑀲𑀤𑀸.

𑁨𑁮.

‘‘𑀦 ¶ 𑀓𑁂𑀘𑀺 𑀢𑁂𑀦 𑀲𑀫𑀬𑁂𑀦, 𑀲𑀫𑀦𑁆𑀢𑀸 𑀬𑁄𑀚𑀦𑁂 𑀚𑀦𑀸;

𑀉𑀓𑁆𑀓𑀸𑀧𑀤𑀻𑀧𑁂 𑀉𑀚𑁆𑀚𑀸𑀮𑁂𑀦𑁆𑀢𑀺, 𑀩𑀼𑀤𑁆𑀥𑀭𑀁𑀲𑀻𑀳𑀺 𑀑𑀢𑁆𑀣𑀝𑀸.

𑁨𑁯.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁦.

‘‘𑀬𑀣𑀸 ¶ 𑀉𑀴𑀽𑀳𑀺 𑀕𑀕𑀦𑀁, 𑀯𑀺𑀘𑀺𑀢𑁆𑀢𑀁 𑀉𑀧𑀲𑁄𑀪𑀢𑀺;

𑀢𑀣𑁂𑀯 𑀲𑀸𑀲𑀦𑀁 𑀢𑀲𑁆𑀲, 𑀅𑀭𑀳𑀦𑁆𑀢𑁂𑀳𑀺 𑀲𑁄𑀪𑀢𑀺.

𑁩𑁧.

‘‘𑀲𑀁𑀲𑀸𑀭𑀲𑁄𑀢𑀁 𑀢𑀭𑀡𑀸𑀬, 𑀲𑁂𑀲𑀓𑁂 𑀧𑀝𑀺𑀧𑀦𑁆𑀦𑀓𑁂;

𑀥𑀫𑁆𑀫𑀲𑁂𑀢𑀼𑀁 𑀤𑀴𑁆𑀳𑀁 𑀓𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀦𑀭𑀸𑀲𑀪𑁄.

𑁩𑁨.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀢𑁂𑀧𑀺 𑀔𑀻𑀡𑀸𑀲𑀯𑀸 𑀅𑀢𑀼𑀮𑀢𑁂𑀚𑀸;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄𑀢𑀺 𑀯𑀺𑀯𑀺𑀥𑀭𑀢𑀦𑀯𑀺𑀘𑀺𑀢𑁆𑀢𑀓𑀜𑁆𑀘𑀦𑀫𑀬𑀕𑁆𑀖𑀺𑀓𑀲𑀤𑀺𑀲𑀭𑀽𑀧𑀲𑁄𑀪𑁄. 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀢𑀲𑁆𑀲 𑀧𑀪𑀸𑀬 𑀤𑀲𑀲𑀳𑀲𑁆𑀲𑀻𑀧𑀺 𑀮𑁄𑀓𑀥𑀸𑀢𑀼 𑀯𑀺𑀭𑁄𑀘𑀢𑀺, 𑀯𑀺𑀭𑀸𑀚𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀢𑀲𑁆𑀲 𑀩𑁆𑀬𑀸𑀫𑀧𑁆𑀧𑀪𑀸 𑀓𑀸𑀬𑀸, 𑀦𑀺𑀤𑁆𑀥𑀸𑀯𑀢𑀺 𑀤𑀺𑀲𑁄𑀤𑀺𑀲’’𑀦𑁆𑀢𑀺 𑀆𑀳. 𑀢𑀢𑁆𑀣 𑀩𑁆𑀬𑀸𑀫𑀧𑁆𑀧𑀪𑀸 𑀓𑀸𑀬𑀸𑀢𑀺 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬𑀸𑀢𑀺 𑀩𑁆𑀬𑀸𑀫𑀧𑁆𑀧𑀪𑀸, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑀦 𑀓𑁂𑀘𑀻𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄, 𑀢𑀲𑁆𑀲 𑀉𑀚𑁆𑀚𑀸𑀮𑁂𑀦𑁆𑀢𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀉𑀓𑁆𑀓𑀸𑀢𑀺 ¶ 𑀤𑀡𑁆𑀟𑀤𑀻𑀧𑀺𑀓𑀸. 𑀉𑀓𑁆𑀓𑀸 𑀯𑀸 𑀧𑀤𑀻𑀧𑁂 𑀯𑀸 𑀓𑁂𑀘𑀺𑀧𑀺 𑀚𑀦𑀸 𑀦 𑀉𑀚𑁆𑀚𑀸𑀮𑁂𑀦𑁆𑀢𑀺 𑀦 𑀧𑀚𑁆𑀚𑀸𑀮𑁂𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀩𑀼𑀤𑁆𑀥𑀲𑀭𑀻𑀭𑀧𑁆𑀧𑀪𑀸𑀬 𑀑𑀪𑀸𑀲𑀺𑀢𑀢𑁆𑀢𑀸. 𑀩𑀼𑀤𑁆𑀥𑀭𑀁𑀲𑀻𑀳𑀻𑀢𑀺 𑀩𑀼𑀤𑁆𑀥𑀭𑀲𑁆𑀫𑀻𑀳𑀺. 𑀑𑀢𑁆𑀣𑀝𑀸𑀢𑀺 𑀅𑀥𑀺𑀕𑀢𑀸.

𑀉𑀴𑀽𑀳𑀻𑀢𑀺 𑀢𑀸𑀭𑀸𑀳𑀺, 𑀬𑀣𑀸 𑀢𑀸𑀭𑀸𑀳𑀺 𑀕𑀕𑀦𑀢𑀮𑀁 𑀯𑀺𑀘𑀺𑀢𑁆𑀢𑀁 𑀲𑁄𑀪𑀢𑀺, 𑀢𑀣𑁂𑀯 𑀢𑀲𑁆𑀲 𑀲𑀸𑀲𑀦𑀁 𑀅𑀭𑀳𑀦𑁆𑀢𑁂𑀳𑀺 𑀯𑀺𑀘𑀺𑀢𑁆𑀢𑀁 𑀉𑀧𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀲𑀸𑀭𑀲𑁄𑀢𑀁 𑀢𑀭𑀡𑀸𑀬𑀸𑀢𑀺 𑀲𑀁𑀲𑀸𑀭𑀲𑀸𑀕𑀭𑀲𑁆𑀲 𑀢𑀭𑀡𑀢𑁆𑀣𑀁. 𑀲𑁂𑀲𑀓𑁂 𑀧𑀝𑀺𑀧𑀦𑁆𑀦𑀓𑁂𑀢𑀺 𑀅𑀭𑀳𑀦𑁆𑀢𑁂 𑀞𑀧𑁂𑀢𑁆𑀯𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂𑀳𑀺 𑀲𑀤𑁆𑀥𑀺𑀁 𑀲𑁂𑀲𑁂 𑀲𑁂𑀓𑁆𑀔𑀧𑀼𑀕𑁆𑀕𑀮𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁂𑀢𑀼𑀦𑁆𑀢𑀺 𑀫𑀕𑁆𑀕𑀲𑁂𑀢𑀼𑀁, 𑀲𑁂𑀲𑀧𑀼𑀕𑁆𑀕𑀮𑁂 𑀲𑀁𑀲𑀸𑀭𑀢𑁄 𑀢𑀸𑀭𑁂𑀢𑀼𑀁 𑀥𑀫𑁆𑀫𑀲𑁂𑀢𑀼𑀁 𑀞𑀧𑁂𑀢𑁆𑀯𑀸 𑀓𑀢𑀲𑀩𑁆𑀩𑀓𑀺𑀘𑁆𑀘𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀦𑀸𑀭𑀤𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀦𑀯𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁨. 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀦𑀸𑀭𑀤𑀩𑀼𑀤𑁆𑀥𑀲𑁆𑀲 ¶ ¶ ¶ 𑀲𑀸𑀲𑀦𑀁 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀲𑁄 𑀘 𑀓𑀧𑁆𑀧𑁄 𑀯𑀺𑀦𑀲𑁆𑀲𑀺𑀢𑁆𑀣. 𑀢𑀢𑁄 𑀧𑀭𑀁 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀸 𑀮𑁄𑀓𑁂 𑀦 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀩𑀼𑀤𑁆𑀥𑀲𑀼𑀜𑁆𑀜𑁄 𑀯𑀺𑀕𑀢𑀩𑀼𑀤𑁆𑀥𑀸𑀮𑁄𑀓𑁄 𑀅𑀳𑁄𑀲𑀺. 𑀢𑀢𑁄 𑀓𑀧𑁆𑀧𑁂𑀲𑀼 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄 𑀯𑀺𑀚𑀺𑀢𑀫𑀸𑀭𑁄 𑀑𑀳𑀺𑀢𑀪𑀸𑀭𑁄 𑀫𑁂𑀭𑀼𑀲𑀸𑀭𑁄 𑀅𑀲𑀁𑀲𑀸𑀭𑁄 𑀲𑀢𑁆𑀢𑀲𑀸𑀭𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁄 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀲𑁄𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀳𑀁𑀲𑀯𑀢𑀻𑀦𑀕𑀭𑁂 𑀲𑀩𑁆𑀩𑀚𑀦𑀸𑀦𑀦𑁆𑀤𑀓𑀭𑀲𑁆𑀲𑀸𑀦𑀦𑁆𑀤𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀉𑀤𑀺𑀢𑁄𑀤𑀺𑀢𑀓𑀼𑀮𑁂 𑀚𑀸𑀢𑀸𑀬 𑀲𑀼𑀚𑀸𑀢𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑀸 𑀤𑁂𑀯𑀢𑀸𑀳𑀺 𑀓𑀢𑀸𑀭𑀓𑁆𑀔𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀳𑀁𑀲𑀯𑀢𑀼𑀬𑁆𑀬𑀸𑀦𑁂 𑀧𑀤𑀼𑀫𑀼𑀢𑁆𑀢𑀭𑀓𑀼𑀫𑀸𑀭𑀁 𑀯𑀺𑀚𑀸𑀬𑀺. 𑀧𑀝𑀺𑀲𑀦𑁆𑀥𑀺𑀬𑀜𑁆𑀘𑀲𑁆𑀲 𑀚𑀸𑀢𑀺𑀬𑀜𑁆𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀅𑀳𑁂𑀲𑀼𑀁.

𑀢𑀲𑁆𑀲 𑀓𑀺𑀭 𑀚𑀸𑀢𑀺𑀬𑀁 𑀧𑀤𑀼𑀫𑀯𑀲𑁆𑀲𑀁 𑀯𑀲𑁆𑀲𑀺. 𑀢𑁂𑀦𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀜𑀸𑀢𑀓𑀸 ‘‘𑀧𑀤𑀼𑀫𑀼𑀢𑁆𑀢𑀭𑀓𑀼𑀫𑀸𑀭𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀦𑀭𑀯𑀸𑀳𑀦-𑀬𑀲𑀯𑀸𑀳𑀦-𑀯𑀲𑀯𑀢𑁆𑀢𑀺𑀦𑀸𑀫𑀓𑀸 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀢𑀬𑁄 𑀘𑀲𑁆𑀲 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀯𑀲𑀼𑀤𑀢𑁆𑀢𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀁 𑀇𑀢𑁆𑀣𑀻𑀦𑀁 𑀲𑀢𑀲𑀳𑀲𑁆𑀲𑀸𑀦𑀺 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀯𑀲𑀼𑀤𑀢𑁆𑀢𑀸𑀬 𑀤𑁂𑀯𑀺𑀬𑀸 𑀧𑀼𑀢𑁆𑀢𑁂 𑀲𑀩𑁆𑀩𑀕𑀼𑀡𑀸𑀦𑀼𑀢𑁆𑀢𑀭𑁂 𑀉𑀢𑁆𑀢𑀭𑀓𑀼𑀫𑀸𑀭𑁂 𑀦𑀸𑀫 𑀉𑀧𑁆𑀧𑀦𑁆𑀦𑁂 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑁋 ‘‘𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀯 𑀯𑀲𑀯𑀢𑁆𑀢𑀺𑀦𑀸𑀫𑀓𑁄 𑀧𑀸𑀲𑀸𑀤𑁄 𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀁 𑀯𑀺𑀬 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀤𑁂𑀯𑀯𑀺𑀫𑀸𑀦𑀫𑀺𑀯 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀘 𑀕𑀕𑀦𑀢𑀮𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀫𑀚𑁆𑀛𑁂𑀓𑀭𑁄𑀦𑁆𑀢𑁄 𑀲𑁄𑀪𑀺𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸𑀬 𑀆𑀕𑀢𑀧𑀸𑀲𑀸𑀤𑁄 𑀯𑀺𑀬 𑀪𑀽𑀫𑀺𑀬𑀁 𑀑𑀢𑀭𑀺.

𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀢𑀢𑁄 𑀧𑀸𑀲𑀸𑀤𑀢𑁄 𑀑𑀢𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀤𑁆𑀥𑀚𑀪𑀽𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀤𑁂𑀯𑀤𑀢𑁆𑀢𑀺𑀬𑀸𑀦𑀺 𑀧𑀸𑀭𑀼𑀧𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀩𑁆𑀩𑀚𑀺. 𑀧𑀸𑀲𑀸𑀤𑁄 𑀧𑀦𑀸𑀕𑀦𑁆𑀢𑁆𑀯𑀸 𑀲𑀓𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁂𑀦 𑀲𑀳𑀕𑀢𑀸𑀬 𑀧𑀭𑀺𑀲𑀸𑀬 𑀞𑀧𑁂𑀢𑁆𑀯𑀸 𑀇𑀢𑁆𑀣𑀺𑀬𑁄 𑀲𑀩𑁆𑀩𑁂 𑀧𑀩𑁆𑀩𑀚𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 𑀢𑁂𑀳𑀺 𑀲𑀳 𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀉𑀚𑁆𑀚𑁂𑀦𑀺𑀦𑀺𑀕𑀫𑁂 ¶ 𑀭𑀼𑀘𑀸𑀦𑀦𑁆𑀤𑀲𑁂𑀝𑁆𑀞𑀺𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 ¶ 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀼𑀫𑀺𑀢𑁆𑀢𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀲𑀮𑀮𑀩𑁄𑀥𑀺𑀁 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀢𑁆𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀞𑀫𑁂 𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀤𑀼𑀢𑀺𑀬𑁂 𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀢𑀢𑀺𑀬𑁂 𑀬𑀸𑀫𑁂 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀬𑀸𑀯 𑀕𑁄𑀢𑁆𑀭𑀪𑀼𑀜𑀸𑀡𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀲𑀓𑀮𑀩𑀼𑀤𑁆𑀥𑀕𑀼𑀡𑁂 ¶ 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀸𑀘𑀺𑀡𑁆𑀡𑀁 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑀤𑀸 𑀓𑀺𑀭 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀩𑁆𑀪𑀦𑁆𑀢𑀭𑀁 𑀲𑀓𑀮𑀫𑁆𑀧𑀺 𑀅𑀮𑀗𑁆𑀓𑀭𑁄𑀦𑁆𑀢𑀁 𑀯𑀺𑀬 𑀧𑀤𑀼𑀫𑀯𑀲𑁆𑀲𑀁 𑀯𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀦𑀸𑀭𑀤𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀅𑀓𑁆𑀔𑁄𑀪𑁄 𑀲𑀸𑀕𑀭𑀽𑀧𑀫𑁄.

𑁨.

‘‘𑀫𑀡𑁆𑀟𑀓𑀧𑁆𑀧𑁄 𑀯𑀸 𑀲𑁄 𑀆𑀲𑀺, 𑀬𑀫𑁆𑀳𑀺 𑀩𑀼𑀤𑁆𑀥𑁄 𑀅𑀚𑀸𑀬𑀣;

𑀉𑀲𑁆𑀲𑀦𑁆𑀦𑀓𑀼𑀲𑀮𑀸 𑀚𑀦𑀢𑀸, 𑀢𑀫𑁆𑀳𑀺 𑀓𑀧𑁆𑀧𑁂 𑀅𑀚𑀸𑀬𑀣𑀸’’𑀢𑀺.

𑀢𑀢𑁆𑀣 𑀲𑀸𑀕𑀭𑀽𑀧𑀫𑁄𑀢𑀺 𑀲𑀸𑀕𑀭𑀲𑀤𑀺𑀲𑀕𑀫𑁆𑀪𑀻𑀭𑀪𑀸𑀯𑁄. 𑀫𑀡𑁆𑀟𑀓𑀧𑁆𑀧𑁄 𑀯𑀸 𑀲𑁄 𑀆𑀲𑀻𑀢𑀺 𑀏𑀢𑁆𑀣 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀫𑀡𑁆𑀟𑀓𑀧𑁆𑀧𑁄 𑀦𑀸𑀫. 𑀤𑀼𑀯𑀺𑀥𑁄 𑀳𑀺 𑀓𑀧𑁆𑀧𑁄 𑀲𑀼𑀜𑁆𑀜𑀓𑀧𑁆𑀧𑁄 𑀅𑀲𑀼𑀜𑁆𑀜𑀓𑀧𑁆𑀧𑁄 𑀘𑀸𑀢𑀺. 𑀢𑀢𑁆𑀣 𑀲𑀼𑀜𑁆𑀜𑀓𑀧𑁆𑀧𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀘𑀓𑁆𑀓𑀯𑀢𑁆𑀢𑀺𑀦𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀕𑀼𑀡𑀯𑀦𑁆𑀢𑀧𑀼𑀕𑁆𑀕𑀮𑀲𑀼𑀜𑁆𑀜𑀢𑁆𑀢𑀸 ‘‘𑀲𑀼𑀜𑁆𑀜𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺.

𑀅𑀲𑀼𑀜𑁆𑀜𑀓𑀧𑁆𑀧𑁄 𑀧𑀜𑁆𑀘𑀯𑀺𑀥𑁄 𑁋 𑀲𑀸𑀭𑀓𑀧𑁆𑀧𑁄 𑀫𑀡𑁆𑀟𑀓𑀧𑁆𑀧𑁄 𑀯𑀭𑀓𑀧𑁆𑀧𑁄 𑀲𑀸𑀭𑀫𑀡𑁆𑀟𑀓𑀧𑁆𑀧𑁄 𑀪𑀤𑁆𑀤𑀓𑀧𑁆𑀧𑁄𑀢𑀺. 𑀢𑀢𑁆𑀣 𑀕𑀼𑀡𑀲𑀸𑀭𑀭𑀳𑀺𑀢𑁂 𑀓𑀧𑁆𑀧𑁂 𑀕𑀼𑀡𑀲𑀸𑀭𑀼𑀧𑁆𑀧𑀸𑀤𑀓𑀲𑁆𑀲 𑀕𑀼𑀡𑀲𑀸𑀭𑀚𑀦𑀦𑀲𑁆𑀲 𑀏𑀓𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀢𑀼𑀪𑀸𑀯𑁂𑀦 ‘‘𑀲𑀸𑀭𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀤𑁆𑀯𑁂 𑀮𑁄𑀓𑀦𑀸𑀬𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 ‘‘𑀫𑀡𑁆𑀟𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀢𑀬𑁄 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀼 𑀧𑀞𑀫𑁄 𑀤𑀼𑀢𑀺𑀬𑀁 𑀩𑁆𑀬𑀸𑀓𑀭𑁄𑀢𑀺, 𑀤𑀼𑀢𑀺𑀬𑁄 𑀢𑀢𑀺𑀬𑀦𑁆𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀧𑀫𑀼𑀤𑀺𑀢𑀳𑀤𑀬𑀸 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀧𑀡𑀺𑀥𑀸𑀦𑀯𑀲𑁂𑀦 𑀯𑀭𑀬𑀦𑁆𑀢𑀺. 𑀢𑀲𑁆𑀫𑀸 ‘‘𑀯𑀭𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀢𑁆𑀣 𑀧𑀦 𑀓𑀧𑁆𑀧𑁂 ¶ 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀧𑀼𑀭𑀺𑀫𑀓𑀧𑁆𑀧𑀢𑁄 𑀯𑀺𑀲𑀺𑀝𑁆𑀞𑀢𑀭𑀢𑁆𑀢𑀸 𑀲𑀸𑀭𑀢𑀭𑀢𑁆𑀢𑀸 ‘‘𑀲𑀸𑀭𑀫𑀡𑁆𑀟𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀧𑀜𑁆𑀘 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 ‘‘𑀪𑀤𑁆𑀤𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀅𑀢𑀺𑀤𑀼𑀮𑁆𑀮𑀪𑁄. 𑀢𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀓𑀮𑁆𑀬𑀸𑀡𑀲𑀼𑀔𑀩𑀳𑀼𑀮𑀸 𑀳𑁄𑀦𑁆𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀢𑀺𑀳𑁂𑀢𑀼𑀓𑀸 𑀓𑀺𑀮𑁂𑀲𑀓𑁆𑀔𑀬𑀁 𑀓𑀭𑁄𑀦𑁆𑀢𑀺, 𑀤𑀼𑀳𑁂𑀢𑀼𑀓𑀸 𑀲𑀼𑀕𑀢𑀺𑀕𑀸𑀫𑀺𑀦𑁄 ¶ 𑀳𑁄𑀦𑁆𑀢𑀺, 𑀅𑀳𑁂𑀢𑀼𑀓𑀸 𑀳𑁂𑀢𑀼𑀁 𑀧𑀝𑀺𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀓𑀧𑁆𑀧𑁄 ‘‘𑀪𑀤𑁆𑀤𑀓𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀲𑀼𑀜𑁆𑀜𑀓𑀧𑁆𑀧𑁄 𑀧𑀜𑁆𑀘𑀯𑀺𑀥𑁄’’𑀢𑀺𑀆𑀤𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀏𑀓𑁄 𑀩𑀼𑀤𑁆𑀥𑁄 𑀲𑀸𑀭𑀓𑀧𑁆𑀧𑁂, 𑀫𑀡𑁆𑀟𑀓𑀧𑁆𑀧𑁂 𑀚𑀺𑀦𑀸 𑀤𑀼𑀯𑁂;

𑀯𑀭𑀓𑀧𑁆𑀧𑁂 𑀢𑀬𑁄 𑀩𑀼𑀤𑁆𑀥𑀸, 𑀲𑀸𑀭𑀫𑀡𑁆𑀟𑁂 𑀘𑀢𑀼𑀭𑁄 𑀩𑀼𑀤𑁆𑀥𑀸;

𑀧𑀜𑁆𑀘 𑀩𑀼𑀤𑁆𑀥𑀸 𑀪𑀤𑁆𑀤𑀓𑀧𑁆𑀧𑁂, 𑀢𑀢𑁄 𑀦𑀢𑁆𑀣𑀸𑀥𑀺𑀓𑀸 𑀚𑀺𑀦𑀸’’𑀢𑀺.

𑀬𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀲𑀸𑀭𑀓𑀧𑁆𑀧𑁄𑀧𑀺 𑀲𑀫𑀸𑀦𑁄 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀫𑀡𑁆𑀟𑀓𑀧𑁆𑀧𑀲𑀤𑀺𑀲𑀢𑁆𑀢𑀸 ‘‘𑀫𑀡𑁆𑀟𑀓𑀧𑁆𑀧𑁄’’𑀢𑀺 𑀯𑀼𑀢𑁆𑀢𑁄. 𑀑𑀧𑀫𑁆𑀫𑀢𑁆𑀣𑁂 𑀯𑀸-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀉𑀲𑁆𑀲𑀦𑁆𑀦𑀓𑀼𑀲𑀮𑀸𑀢𑀺 𑀉𑀧𑀘𑀺𑀢𑀧𑀼𑀜𑁆𑀜𑀸. 𑀚𑀦𑀢𑀸𑀢𑀺 𑀚𑀦𑀲𑀫𑀽𑀳𑁄.

𑀧𑀤𑀼𑀫𑀼𑀢𑁆𑀢𑀭𑁄 𑀧𑀦 𑀧𑀭𑀺𑀲𑀼𑀢𑁆𑀢𑀭𑁄 𑀪𑀕𑀯𑀸 𑀲𑀢𑁆𑀢𑀸𑀳𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑁋 ‘‘𑀧𑀣𑀯𑀺𑀬𑀁 𑀧𑀸𑀤𑀁 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀤𑀓𑁆𑀔𑀺𑀡𑀁 ¶ 𑀧𑀸𑀤𑀁 𑀅𑀪𑀺𑀦𑀻𑀳𑀭𑀺. 𑀅𑀣 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀫𑀮𑀓𑁄𑀫𑀮𑀓𑁂𑀲𑀭𑀓𑀡𑁆𑀡𑀺𑀓𑀸𑀦𑀺 𑀚𑀮𑀚𑀸𑀫𑀮𑀸𑀯𑀺𑀓𑀮𑀯𑀺𑀧𑀼𑀮𑀧𑀮𑀸𑀲𑀸𑀦𑀺 𑀣𑀮𑀚𑀸𑀦𑀺 𑀚𑀮𑀚𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀢𑁂𑀲𑀁 𑀓𑀺𑀭 𑀥𑀼𑀭𑀧𑀢𑁆𑀢𑀸𑀦𑀺 𑀦𑀯𑀼𑀢𑀺𑀳𑀢𑁆𑀣𑀸𑀦𑀺 𑀓𑁂𑀲𑀭𑀸𑀦𑀺 𑀢𑀺𑀁𑀲𑀳𑀢𑁆𑀣𑀸𑀦𑀺 𑀓𑀡𑁆𑀡𑀺𑀓𑀸 𑀤𑁆𑀯𑀸𑀤𑀲𑀳𑀢𑁆𑀣𑀸 𑀏𑀓𑁂𑀓𑀲𑁆𑀲 𑀦𑀯𑀖𑀝𑀧𑁆𑀧𑀫𑀸𑀡𑀸 𑀭𑁂𑀡𑀯𑁄 𑀅𑀳𑁂𑀲𑀼𑀁. 𑀲𑀢𑁆𑀣𑀸 𑀧𑀦 𑀉𑀩𑁆𑀩𑁂𑀥𑀢𑁄 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑁄 𑀅𑀳𑁄𑀲𑀺. 𑀢𑀲𑁆𑀲 𑀉𑀪𑀺𑀦𑁆𑀦𑀁 𑀩𑀸𑀳𑀸𑀦𑀫𑀦𑁆𑀢𑀭𑀁 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀦𑀮𑀸𑀝𑀁 𑀧𑀜𑁆𑀘𑀳𑀢𑁆𑀣𑀁 𑀳𑀢𑁆𑀣𑀧𑀸𑀤𑀸 𑀏𑀓𑀸𑀤𑀲𑀳𑀢𑁆𑀣𑀸 𑀅𑀳𑁂𑀲𑀼𑀁. 𑀢𑀲𑁆𑀲 𑀏𑀓𑀸𑀤𑀲𑀳𑀢𑁆𑀣𑁂𑀦 𑀧𑀸𑀤𑁂𑀦 𑀤𑁆𑀯𑀸𑀤𑀲𑀳𑀢𑁆𑀣𑀸𑀬 𑀓𑀡𑁆𑀡𑀺𑀓𑀸𑀬 𑀅𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀦𑀯𑀖𑀝𑀧𑁆𑀧𑀫𑀸𑀡𑀸 𑀭𑁂𑀡𑀯𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀁 𑀲𑀭𑀻𑀭𑀧𑁆𑀧𑀤𑁂𑀲𑀁 𑀉𑀕𑁆𑀕𑀦𑁆𑀢𑁆𑀯𑀸 𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀺𑀢𑀁 𑀯𑀺𑀬 𑀓𑀢𑁆𑀯𑀸 𑀧𑀘𑁆𑀘𑁄𑀢𑁆𑀣𑀭𑀦𑁆𑀢𑀺. 𑀢𑀤𑀼𑀧𑀸𑀤𑀸𑀬 𑀲𑀢𑁆𑀣𑀸 𑀧𑀤𑀼𑀫𑀼𑀢𑁆𑀢𑀭𑁄𑀢𑁆𑀯𑁂𑀯 𑀮𑁄𑀓𑁂 𑀧𑀜𑁆𑀜𑀸𑀬𑀺𑀢𑁆𑀣𑀸𑀢𑀺 𑀲𑀁𑀬𑀼𑀢𑁆𑀢𑀪𑀸𑀡𑀓𑀸 𑀯𑀤𑀦𑁆𑀢𑀺.

𑀅𑀣 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁄 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀪𑀽𑀢𑁂 𑀲𑀢𑁆𑀢𑁂 𑀑𑀮𑁄𑀓𑁂𑀦𑁆𑀢𑁄 𑀫𑀺𑀣𑀺𑀮𑀦𑀕𑀭𑁂 𑀤𑁂𑀯𑀮𑀁 ¶ 𑀲𑀼𑀚𑀸𑀢𑀜𑁆𑀘𑀸𑀢𑀺 𑀤𑁆𑀯𑁂 𑀭𑀸𑀚𑀧𑀼𑀢𑁆𑀢𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀤𑀺𑀲𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀅𑀦𑀺𑀮𑀧𑀣𑁂𑀦 𑀕𑀦𑁆𑀢𑁆𑀯𑀸 𑀫𑀺𑀣𑀺𑀮𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁂𑀦 𑀤𑁆𑀯𑁂𑀧𑀺 𑀭𑀸𑀚𑀓𑀼𑀫𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀢𑁂𑀧𑀺 𑀘 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀲𑀫𑁆𑀧𑀢𑁆𑀢𑁄, 𑀳𑀦𑁆𑀤 𑀦𑀁 𑀫𑀬𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀧𑀭𑀺𑀯𑀸𑀭𑀸 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀤𑀸 𑀤𑀲𑀩𑀮𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ 𑀪𑀕𑀯𑀢𑁄, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑀭𑀤𑀢𑀸𑀧𑀲𑀲𑀫𑀸𑀕𑀫𑁂 𑀫𑀳𑀸𑀚𑀦𑀁 𑀦𑀺𑀭𑀬𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀢𑁆𑀢𑀢𑀺𑀁𑀲𑀲𑀢𑀲𑀳𑀲𑁆𑀲𑀲𑀗𑁆𑀔𑁂 𑀲𑀢𑁆𑀢𑀓𑀸𑀬𑁂 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺, 𑀲𑁄 𑀤𑀼𑀢𑀺𑀬𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀢𑀢𑁄 𑀧𑀭𑀫𑁆𑀧𑀺 𑀯𑀲𑁆𑀲𑀦𑁆𑀢𑁂, 𑀢𑀧𑁆𑀧𑀬𑀦𑁆𑀢𑁂 𑀘 𑀧𑀸𑀡𑀺𑀦𑁄;

𑀲𑀢𑁆𑀢𑀢𑁆𑀢𑀺𑀁𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 𑀧𑀦 𑀆𑀦𑀦𑁆𑀤𑀫𑀳𑀸𑀭𑀸𑀚𑀸 𑀯𑀻𑀲𑀢𑀺𑀬𑀸 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀯𑀻𑀲𑀢𑀺𑀬𑀸 𑀅𑀫𑀘𑁆𑀘𑁂𑀳𑀺 𑀘 𑀲𑀤𑁆𑀥𑀺𑀁 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀫𑀺𑀣𑀺𑀮𑀦𑀕𑀭𑁂 𑀧𑀸𑀢𑀼𑀭𑀳𑁄𑀲𑀺. 𑀧𑀤𑀼𑀫𑀼𑀢𑁆𑀢𑀭𑁄 𑀘 𑀪𑀕𑀯𑀸 𑀢𑁂 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀕𑀦𑁆𑀢𑁆𑀯𑀸 𑀧𑀺𑀢𑀼𑀲𑀗𑁆𑀕𑀳𑀁 𑀓𑀼𑀭𑀼𑀫𑀸𑀦𑁄 ¶ 𑀳𑀁𑀲𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀯𑀲𑀢𑀺. 𑀢𑀢𑁆𑀣 𑀲𑁄 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀯𑀺𑀬 𑀓𑀧𑀺𑀮𑀧𑀼𑀭𑁂 𑀕𑀕𑀦𑀢𑀮𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀩𑀼𑀤𑁆𑀥𑀯𑀁𑀲𑀁 𑀓𑀣𑁂𑀲𑀺, 𑀢𑀤𑀸 𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀆𑀦𑀦𑁆𑀤𑀁 𑀉𑀧𑀲𑀗𑁆𑀓𑀫𑀺;

𑀧𑀺𑀢𑀼𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸, 𑀆𑀳𑀦𑀻 𑀅𑀫𑀢𑀤𑀼𑀦𑁆𑀤𑀼𑀪𑀺𑀁.

𑁬.

‘‘𑀆𑀳𑀢𑁂 ¶ 𑀅𑀫𑀢𑀪𑁂𑀭𑀺𑀫𑁆𑀳𑀺, 𑀯𑀲𑁆𑀲𑀦𑁆𑀢𑁂 𑀥𑀫𑁆𑀫𑀯𑀼𑀝𑁆𑀞𑀺𑀬𑀸;

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀆𑀦𑀦𑁆𑀤𑀁 𑀉𑀧𑀲𑀗𑁆𑀓𑀫𑀻𑀢𑀺 𑀧𑀺𑀢𑀭𑀁 𑀆𑀦𑀦𑁆𑀤𑀭𑀸𑀚𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀳𑀦𑀻𑀢𑀺 𑀅𑀪𑀺𑀳𑀦𑀺. 𑀆𑀳𑀢𑁂𑀢𑀺 𑀆𑀳𑀢𑀸𑀬. 𑀅𑀫𑀢𑀪𑁂𑀭𑀺𑀫𑁆𑀳𑀻𑀢𑀺 𑀅𑀫𑀢𑀪𑁂𑀭𑀺𑀬𑀸, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀆𑀲𑁂𑀯𑀺𑀢𑁂’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀆𑀲𑁂𑀯𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀦𑁆𑀢𑁂 𑀥𑀫𑁆𑀫𑀯𑀼𑀝𑁆𑀞𑀺𑀬𑀸𑀢𑀺 𑀥𑀫𑁆𑀫𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀅𑀪𑀺𑀲𑀫𑀬𑀓𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑁋

𑁭.

‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼’’𑀦𑁆𑀢𑀺. 𑁋 𑀆𑀳;

𑀢𑀢𑁆𑀣 ¶ 𑀑𑀯𑀸𑀤𑀓𑁄𑀢𑀺 𑀲𑀭𑀡𑀲𑀻𑀮𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀕𑀼𑀡𑀸𑀦𑀺𑀲𑀁𑀲𑀯𑀡𑁆𑀡𑀦𑀸𑀬 𑀑𑀯𑀤𑀢𑀻𑀢𑀺 𑀑𑀯𑀸𑀤𑀓𑁄. 𑀯𑀺𑀜𑁆𑀜𑀸𑀧𑀓𑁄𑀢𑀺 𑀘𑀢𑀼𑀲𑀘𑁆𑀘𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀧𑀓𑁄, 𑀩𑁄𑀥𑀓𑁄. 𑀢𑀸𑀭𑀓𑁄𑀢𑀺 𑀘𑀢𑀼𑀭𑁄𑀖𑀢𑀸𑀭𑀓𑁄.

𑀬𑀤𑀸 𑀧𑀦 𑀲𑀢𑁆𑀣𑀸 𑀫𑀺𑀣𑀺𑀮𑀦𑀕𑀭𑁂 𑀫𑀺𑀣𑀺𑀮𑀼𑀬𑁆𑀬𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀕𑀡𑀫𑀚𑁆𑀛𑁂 𑀫𑀸𑀖𑀧𑀼𑀡𑁆𑀡𑀫𑀸𑀬 𑀧𑀼𑀡𑁆𑀡𑀘𑀦𑁆𑀤𑀲𑀤𑀺𑀲𑀯𑀤𑀦𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀢𑁆𑀣𑀼𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀬𑀤𑀸 𑀧𑀦 𑀪𑀕𑀯𑀸 𑀯𑁂𑀪𑀸𑀭𑀧𑀩𑁆𑀩𑀢𑀓𑀽𑀝𑁂 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺𑀢𑁆𑀯𑀸 𑀧𑀩𑁆𑀩𑀢𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀬𑀤𑀸 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀯𑀲𑀺 𑀯𑁂𑀪𑀸𑀭𑀧𑀩𑁆𑀩𑀢𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀧𑀼𑀦 ¶ 𑀪𑀕𑀯𑀢𑀺 𑀕𑀼𑀡𑀯𑀢𑀺 𑀢𑀺𑀮𑁄𑀓𑀦𑀸𑀣𑁂 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀼𑀭𑀼𑀫𑀸𑀦𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀧𑀼𑀦 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁂, 𑀕𑀸𑀫𑀦𑀺𑀕𑀫𑀭𑀝𑁆𑀞𑀢𑁄;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀢𑁆𑀣 ¶ 𑀕𑀸𑀫𑀦𑀺𑀕𑀫𑀭𑀝𑁆𑀞𑀢𑁄𑀢𑀺 𑀕𑀸𑀫𑀦𑀺𑀕𑀫𑀭𑀝𑁆𑀞𑁂𑀳𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀢𑀲𑁆𑀲 𑀕𑀸𑀫𑀦𑀺𑀕𑀫𑀭𑀝𑁆𑀞𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑁂𑀓𑀥𑀦𑀓𑁄𑀝𑀺𑀓𑁄 𑀚𑀝𑀺𑀮𑁄 𑀦𑀸𑀫 𑀫𑀳𑀸𑀭𑀝𑁆𑀞𑀺𑀓𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀯𑀭𑀤𑀸𑀦𑀫𑀤𑀸𑀲𑀺. 𑀲𑁄𑀧𑀺 𑀢𑀁 𑀪𑀢𑁆𑀢𑀸𑀦𑀼𑀫𑁄𑀤𑀦𑀸𑀯𑀲𑀸𑀦𑁂 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧.

‘‘𑀅𑀳𑀁 ¶ 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀦𑀸𑀫 𑀭𑀝𑁆𑀞𑀺𑀓𑁄;

𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁, 𑀲𑀪𑀢𑁆𑀢𑀁 𑀤𑀼𑀲𑁆𑀲𑀫𑀤𑀸𑀲𑀳𑀁.

𑁧𑁨.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀲𑀢𑀲𑀳𑀲𑁆𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁪.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀳𑀺𑀁;

𑀅𑀓𑀸𑀲𑀺𑀁 𑀉𑀕𑁆𑀕𑀤𑀴𑁆𑀳𑀁 𑀥𑀺𑀢𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀦𑁆𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀲𑀪𑀢𑁆𑀢𑀁 𑀤𑀼𑀲𑁆𑀲𑀫𑀤𑀸𑀲𑀳𑀦𑁆𑀢𑀺 𑀲𑀘𑀻𑀯𑀭𑀁 𑀪𑀢𑁆𑀢𑀁 𑀅𑀤𑀸𑀲𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀉𑀕𑁆𑀕𑀤𑀴𑀳𑀦𑁆𑀢𑀺 𑀅𑀢𑀺𑀤𑀴𑁆𑀳𑀁. 𑀥𑀺𑀢𑀺𑀦𑁆𑀢𑀺 𑀯𑀻𑀭𑀺𑀬𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀦𑀸𑀳𑁂𑀲𑀼𑀁. 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀫𑁂𑀯 𑀲𑀭𑀡𑀫𑀕𑀫𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫.

‘‘𑀩𑁆𑀬𑀸𑀳𑀢𑀸 𑀢𑀺𑀢𑁆𑀣𑀺𑀬𑀸 𑀲𑀩𑁆𑀩𑁂, 𑀯𑀺𑀫𑀦𑀸 𑀤𑀼𑀫𑁆𑀫𑀦𑀸 𑀢𑀤𑀸;

𑀦 𑀢𑁂𑀲𑀁 𑀓𑁂𑀘𑀺 𑀧𑀭𑀺𑀘𑀭𑀦𑁆𑀢𑀺, 𑀭𑀝𑁆𑀞𑀢𑁄 𑀦𑀺𑀘𑁆𑀙𑀼𑀪𑀦𑁆𑀢𑀺 𑀢𑁂.

𑁧𑁬.

‘‘𑀲𑀩𑁆𑀩𑁂 ¶ 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀉𑀧𑀕𑀜𑁆𑀙𑀼𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑁂;

𑀢𑀼𑀯𑀁 𑀦𑀸𑀣𑁄 𑀫𑀳𑀸𑀯𑀻𑀭, 𑀲𑀭𑀡𑀁 𑀳𑁄𑀳𑀺 𑀘𑀓𑁆𑀔𑀼𑀫.

𑁧𑁭.

‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀳𑀺.

𑁧𑁮.

‘‘𑀏𑀯𑀁 ¶ 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀓𑀁 𑀢𑀺𑀢𑁆𑀣𑀺𑀬𑁂𑀳𑀺 𑀢𑀁;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀳𑀻’’𑀢𑀺.

𑀢𑀢𑁆𑀣 ¶ 𑀩𑁆𑀬𑀸𑀳𑀢𑀸𑀢𑀺 𑀯𑀺𑀳𑀢𑀫𑀸𑀦𑀤𑀧𑁆𑀧𑀸. 𑀢𑀺𑀢𑁆𑀣𑀺𑀬𑀸𑀢𑀺 𑀏𑀢𑁆𑀣 𑀢𑀺𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀺𑀢𑁆𑀣𑀓𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀺𑀢𑁆𑀣𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀯𑀲𑁂𑀦 𑀢𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀺𑀢𑁆𑀣𑀁, 𑀮𑀤𑁆𑀥𑀺. 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀉𑀧𑁆𑀧𑀸𑀤𑀓𑁄 𑀢𑀺𑀢𑁆𑀣𑀓𑀭𑁄, 𑀢𑀺𑀢𑁆𑀣𑁂 𑀪𑀯𑀸 𑀢𑀺𑀢𑁆𑀣𑀺𑀬𑀸𑀢𑀺. 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀓𑀺𑀭 𑀪𑀕𑀯𑀢𑁄 𑀓𑀸𑀮𑁂 𑀢𑀺𑀢𑁆𑀣𑀺𑀬𑀸 𑀦𑀸𑀳𑁂𑀲𑀼𑀁. 𑀬𑁂 𑀧𑀦 𑀲𑀦𑁆𑀢𑀺, 𑀢𑁂𑀧𑀺 𑀈𑀤𑀺𑀲𑀸 𑀅𑀳𑁂𑀲𑀼𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀩𑁆𑀬𑀸𑀳𑀢𑀸 𑀢𑀺𑀢𑁆𑀣𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀫𑀦𑀸𑀢𑀺 𑀯𑀺𑀭𑀽𑀧𑀫𑀸𑀦𑀲𑀸. 𑀤𑀼𑀫𑁆𑀫𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦 𑀢𑁂𑀲𑀁 𑀓𑁂𑀘𑀺 𑀧𑀭𑀺𑀘𑀭𑀦𑁆𑀢𑀻𑀢𑀺 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀓𑁂𑀘𑀺𑀧𑀺 𑀧𑀼𑀭𑀺𑀲𑀸 𑀧𑀭𑀺𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺, 𑀦 𑀪𑀺𑀓𑁆𑀔𑀁 𑀤𑁂𑀦𑁆𑀢𑀺, 𑀦 𑀲𑀓𑁆𑀓𑀭𑁄𑀦𑁆𑀢𑀺, 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀦 𑀫𑀸𑀦𑁂𑀦𑁆𑀢𑀺, 𑀦 𑀧𑀽𑀚𑁂𑀦𑁆𑀢𑀺, 𑀦 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑀝𑁆𑀞𑀢𑁄𑀢𑀺 𑀲𑀓𑀮𑀭𑀝𑁆𑀞𑀢𑁄𑀧𑀺. 𑀦𑀺𑀘𑁆𑀙𑀼𑀪𑀦𑁆𑀢𑀻𑀢𑀺 𑀦𑀻𑀳𑀭𑀦𑁆𑀢𑀺, 𑀉𑀲𑁆𑀲𑀸𑀤𑁂𑀦𑁆𑀢𑀺 𑀢𑁂𑀲𑀁 𑀦𑀺𑀯𑀸𑀲𑀁 𑀦 𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀢𑀺𑀢𑁆𑀣𑀺𑀬𑀸.

𑀉𑀧𑀕𑀜𑁆𑀙𑀼𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑁂𑀢𑀺 𑀏𑀯𑀁 𑀢𑁂𑀳𑀺 𑀭𑀝𑁆𑀞𑀯𑀸𑀲𑀻𑀳𑀺 𑀫𑀦𑀼𑀲𑁆𑀲𑁂𑀳𑀺 𑀉𑀲𑁆𑀲𑀸𑀤𑀺𑀬𑀫𑀸𑀦𑀸 𑀲𑀩𑁆𑀩𑁂𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀫𑀸𑀕𑀦𑁆𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑀫𑁂𑀯 𑀲𑀭𑀡𑀫𑀕𑀫𑀁𑀲𑀼. ‘‘𑀢𑁆𑀯𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀦𑀸𑀣𑁄 𑀕𑀢𑀺 𑀧𑀭𑀸𑀬𑀦𑀁 𑀲𑀭𑀡’’𑀦𑁆𑀢𑀺 𑀏𑀯𑀁 𑀯𑀢𑁆𑀯𑀸 𑀲𑀭𑀡𑀫𑀕𑀫𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀦𑀼𑀓𑀫𑁆𑀧𑀢𑀻𑀢𑀺 𑀅𑀦𑀼𑀓𑀫𑁆𑀧𑀓𑁄. 𑀓𑀭𑀼𑀡𑀸𑀬 𑀘𑀭𑀢𑀻𑀢𑀺 𑀓𑀸𑀭𑀼𑀡𑀺𑀓𑁄. 𑀲𑀫𑁆𑀧𑀢𑁆𑀢𑁂𑀢𑀺 𑀲𑀫𑀸𑀕𑀢𑁂 𑀲𑀭𑀡𑀫𑀼𑀧𑀕𑀢𑁂 𑀢𑀺𑀢𑁆𑀣𑀺𑀬𑁂. 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀳𑀻𑀢𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀦𑀺𑀭𑀸𑀓𑀼𑀮𑀦𑁆𑀢𑀺 𑀅𑀦𑀸𑀓𑀼𑀮𑀁, 𑀅𑀜𑁆𑀜𑁂𑀳𑀺 𑀮𑀤𑁆𑀥𑀺𑀓𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀜𑁆𑀜𑀓𑀦𑁆𑀢𑀺 𑀲𑀼𑀜𑁆𑀜𑀁 𑀭𑀺𑀢𑁆𑀢𑀁 𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺. 𑀢𑀦𑁆𑀢𑀺 𑀢𑀁 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀺 𑀯𑀘𑀦𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀘𑀺𑀢𑁆𑀢𑀦𑁆𑀢𑀺 𑀯𑀺𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀁. 𑀯𑀲𑀻𑀪𑀽𑀢𑁂𑀳𑀻𑀢𑀺 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀳𑀺.

𑀢𑀲𑁆𑀲 ¶ 𑀧𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀳𑀁𑀲𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀧𑀺𑀢𑀸 𑀧𑀦𑀲𑁆𑀲 𑀆𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑁂𑀯𑀻, 𑀤𑁂𑀯𑀮𑁄 𑀘 𑀲𑀼𑀚𑀸𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀼𑀫𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀫𑀺𑀢𑀸 𑀘 𑀅𑀲𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀮𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀘𑀲𑁆𑀲 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 ¶ 𑀕𑀡𑁆𑀳𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼 𑀅𑀳𑁄𑀲𑀺, 𑀯𑀲𑀼𑀤𑀢𑁆𑀢𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀉𑀢𑁆𑀢𑀭𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀧𑀤𑀼𑀫𑀼𑀢𑁆𑀢𑀭𑁄 𑀧𑀦 𑀪𑀕𑀯𑀸 𑀧𑀭𑀫𑀸𑀪𑀺𑀭𑀸𑀫𑁂 𑀦𑀦𑁆𑀤𑀸𑀭𑀸𑀫𑁂 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀥𑀸𑀢𑀼𑀬𑁄 𑀧𑀦𑀲𑁆𑀲 𑀦 𑀯𑀺𑀓𑀺𑀭𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀫𑀸𑀕𑀫𑁆𑀫 𑀤𑁆𑀯𑀸𑀤𑀲𑀬𑁄𑀚𑀦𑀼𑀩𑁆𑀩𑁂𑀥𑀁 𑀲𑀢𑁆𑀢𑀭𑀢𑀦𑀫𑀬𑀁 𑀘𑁂𑀢𑀺𑀬𑀫𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁯.

‘‘𑀦𑀕𑀭𑀁 𑀳𑀁𑀲𑀯𑀢𑀻 𑀦𑀸𑀫, 𑀆𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀚𑀸𑀢𑀸 𑀦𑀸𑀫 𑀚𑀦𑀺𑀓𑀸, 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁪.

‘‘𑀤𑁂𑀯𑀮𑁄 ¶ 𑀘 𑀲𑀼𑀚𑀸𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀼𑀫𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁫.

‘‘𑀅𑀫𑀺𑀢𑀸 𑀘 𑀅𑀲𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀲𑀮𑀮𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁭.

‘‘𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁨𑁮.

‘‘𑀓𑀼𑀝𑁆𑀝𑀸 𑀓𑀯𑀸𑀝𑀸 𑀪𑀺𑀢𑁆𑀢𑀻 𑀘, 𑀭𑀼𑀓𑁆𑀔𑀸 𑀦𑀕𑀲𑀺𑀮𑀼𑀘𑁆𑀘𑀬𑀸;

𑀦 𑀢𑀲𑁆𑀲𑀸𑀯𑀭𑀡𑀁 𑀅𑀢𑁆𑀣𑀺, 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀬𑁄𑀚𑀦𑁂.

𑁨𑁯.

‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁦.

‘‘𑀲𑀦𑁆𑀢𑀸𑀭𑁂𑀢𑁆𑀯𑀸 𑀩𑀳𑀼𑀚𑀦𑀁, 𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀲𑀁𑀲𑀬𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀦𑀕𑀲𑀺𑀮𑀼𑀘𑁆𑀘𑀬𑀸𑀢𑀺 𑀦𑀕𑀲𑀗𑁆𑀔𑀸𑀢𑀸 𑀲𑀺𑀮𑀼𑀘𑁆𑀘𑀬𑀸. 𑀆𑀯𑀭𑀡𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀁 𑀢𑀺𑀭𑁄𑀓𑀭𑀡𑀁. 𑀤𑁆𑀯𑀸𑀤𑀲𑀬𑁄𑀚𑀦𑁂𑀢𑀺 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑁂 𑀞𑀸𑀦𑁂 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸 𑀨𑀭𑀺𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀇𑀢𑁄 𑀧𑀝𑁆𑀞𑀸𑀬 𑀧𑀸𑀭𑀫𑀺𑀧𑀽𑀭𑀡𑀸𑀤𑀺𑀧𑀼𑀦𑀧𑁆𑀧𑀼𑀦𑀸𑀕𑀢𑀫𑀢𑁆𑀣𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀺𑀲𑁂𑀲𑀢𑁆𑀣𑀫𑁂𑀯 𑀯𑀢𑁆𑀯𑀸 𑀕𑀫𑀺𑀲𑁆𑀲𑀸𑀫. 𑀬𑀤𑀺 ¶ 𑀧𑀦 𑀯𑀼𑀢𑁆𑀢𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀯𑀓𑁆𑀔𑀸𑀫, 𑀓𑀤𑀸 𑀅𑀦𑁆𑀢𑀁 𑀕𑀫𑀺𑀲𑁆𑀲𑀢𑀺 𑀅𑀬𑀁 𑀲𑀁𑀯𑀡𑁆𑀡𑀦𑀸𑀢𑀺.

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀤𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁩. 𑀲𑀼𑀫𑁂𑀥𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑁂 ¶ ¶ 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀸𑀲𑀦𑁂𑀧𑀺𑀲𑁆𑀲 𑀅𑀦𑁆𑀢𑀭𑀳𑀺𑀢𑁂 𑀲𑀢𑁆𑀢𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀸 𑀦𑀼𑀧𑁆𑀧𑀚𑁆𑀚𑀺𑀁𑀲𑀼, 𑀩𑀼𑀤𑁆𑀥𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀁. 𑀇𑀢𑁄 𑀧𑀝𑁆𑀞𑀸𑀬 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀲𑀼𑀫𑁂𑀥𑁄 𑀲𑀼𑀚𑀸𑀢𑁄 𑀘𑀸𑀢𑀺 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀅𑀥𑀺𑀕𑀢𑀫𑁂𑀥𑁄 𑀲𑀼𑀫𑁂𑀥𑁄 𑀦𑀸𑀫 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀼𑀤𑀲𑁆𑀲𑀦𑀦𑀕𑀭𑁂 𑀲𑀼𑀤𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀤𑀢𑁆𑀢𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑁂 𑀢𑀭𑀼𑀡𑀤𑀺𑀯𑀲𑀓𑀭𑁄 𑀯𑀺𑀬 𑀲𑀮𑀺𑀮𑀥𑀭𑀯𑀺𑀯𑀭𑀕𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀲𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀲𑀼𑀘𑀦𑁆𑀤𑀦-𑀓𑀜𑁆𑀘𑀦-𑀲𑀺𑀭𑀺𑀯𑀟𑁆𑀠𑀦𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀼𑀫𑀦𑀫𑀳𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀼𑀫𑀦𑀤𑁂𑀯𑀺𑀬𑀸 𑀧𑀼𑀦𑀩𑁆𑀩𑀲𑀼𑀫𑀺𑀢𑁆𑀢𑁂 𑀦𑀸𑀫 𑀧𑀼𑀢𑁆𑀢𑁂 𑀚𑀸𑀢𑁂 𑀳𑀢𑁆𑀣𑀺𑀬𑀸𑀦𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀫𑀦𑀼𑀲𑁆𑀲𑀸𑀦𑀜𑁆𑀘 𑀓𑁄𑀝𑀺𑀲𑀢𑀫𑀦𑀼𑀧𑀩𑁆𑀩𑀚𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀟𑁆𑀠𑀫𑀸𑀲𑀁 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀦𑀓𑀼𑀮𑀦𑀺𑀕𑀫𑁂 𑀦𑀓𑀼𑀮𑀲𑁂𑀝𑁆𑀞𑀺𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀺𑀭𑀺𑀯𑀟𑁆𑀠𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀦𑀻𑀧𑀩𑁄𑀥𑀺𑀫𑀽𑀮𑁂 𑀯𑀻𑀲𑀢𑀺𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀪𑀩𑁆𑀩𑀧𑀼𑀕𑁆𑀕𑀮𑁂 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀲𑀭𑀡𑀓𑀼𑀫𑀸𑀭𑀜𑁆𑀘 𑀲𑀩𑁆𑀩𑀓𑀸𑀫𑀺𑀓𑀼𑀫𑀸𑀭𑀜𑁆𑀘 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀜𑁆𑀘 𑀓𑁄𑀝𑀺𑀲𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑁂 ¶ 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀲𑀼𑀤𑀲𑁆𑀲𑀦𑀦𑀕𑀭𑀲𑀫𑀻𑀧𑁂 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁂𑀦 𑀅𑀢𑁆𑀢𑀦𑁄 𑀪𑀸𑀢𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀧𑀭𑀺𑀯𑀸𑀭𑀸𑀦𑀁 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀅𑀬𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 ¶ ¶ 𑀅𑀧𑀭𑁂𑀦, 𑀲𑀼𑀫𑁂𑀥𑁄 𑀦𑀸𑀫 𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀉𑀕𑁆𑀕𑀢𑁂𑀚𑁄, 𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀫𑀼𑀦𑀺.

𑁨.

‘‘𑀧𑀲𑀦𑁆𑀦𑀦𑁂𑀢𑁆𑀢𑁄 𑀲𑀼𑀫𑀼𑀔𑁄, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀳𑀺𑀢𑁂𑀲𑀻 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀩𑀳𑀽 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸.

𑁩.

‘‘𑀬𑀤𑀸 𑀩𑀼𑀤𑁆𑀥𑁄 𑀧𑀸𑀧𑀼𑀡𑀺𑀢𑁆𑀯𑀸, 𑀓𑁂𑀯𑀮𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀲𑀼𑀤𑀲𑁆𑀲𑀦𑀫𑁆𑀳𑀺 𑀦𑀕𑀭𑁂, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁪.

‘‘𑀢𑀲𑁆𑀲𑀸𑀪𑀺𑀲𑀫𑀬𑀸 𑀢𑀻𑀡𑀺, 𑀅𑀳𑁂𑀲𑀼𑀁 𑀥𑀫𑁆𑀫𑀤𑁂𑀲𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀉𑀕𑁆𑀕𑀢𑁂𑀚𑁄𑀢𑀺 𑀉𑀕𑁆𑀕𑀢𑀢𑁂𑀚𑁄. 𑀧𑀲𑀦𑁆𑀦𑀦𑁂𑀢𑁆𑀢𑁄𑀢𑀺 𑀲𑀼𑀝𑁆𑀞𑀼 𑀧𑀲𑀦𑁆𑀦𑀦𑀬𑀦𑁄, 𑀥𑁄𑀯𑀺𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀫𑀡𑀺𑀕𑀼𑀴𑀺𑀓𑀸 𑀯𑀺𑀬 𑀧𑀲𑀦𑁆𑀦𑀸𑀦𑀺 𑀦𑁂𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 ‘‘𑀧𑀲𑀦𑁆𑀦𑀦𑁂𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀫𑀼𑀤𑀼𑀲𑀺𑀦𑀺𑀤𑁆𑀥𑀦𑀻𑀮𑀯𑀺𑀫𑀮𑀲𑀼𑀔𑀼𑀫𑀧𑀔𑀼𑀫𑀸𑀘𑀺𑀢𑀲𑀼𑀧𑁆𑀧𑀲𑀦𑁆𑀦𑀦𑀬𑀦𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀧𑁆𑀧𑀲𑀦𑁆𑀦𑀧𑀜𑁆𑀘𑀦𑀬𑀦𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀫𑀼𑀔𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀭𑀤𑀲𑀫𑀬𑀘𑀦𑁆𑀤𑀲𑀤𑀺𑀲𑀯𑀤𑀦𑁄. 𑀩𑁆𑀭𑀳𑀸𑀢𑀺 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀲𑀭𑀻𑀭𑀢𑁆𑀢𑀸 𑀩𑁆𑀭𑀳𑀸 𑀫𑀳𑀦𑁆𑀢𑁄, 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀲𑀭𑀻𑀭𑀧𑁆𑀧𑀫𑀸𑀡𑁄𑀢𑀺 𑀅𑀢𑁆𑀣𑁄. 𑀉𑀚𑀽𑀢𑀺 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄 𑀉𑀚𑀼𑀫𑁂𑀯 𑀉𑀕𑁆𑀕𑀢𑀲𑀭𑀻𑀭𑁄 𑀤𑁂𑀯𑀦𑀕𑀭𑁂 𑀲𑀫𑀼𑀲𑁆𑀲𑀺𑀢𑀲𑀼𑀯𑀡𑁆𑀡𑀢𑁄𑀭𑀡𑀲𑀤𑀺𑀲𑀯𑀭𑀲𑀭𑀻𑀭𑁄𑀢𑀺 𑀅𑀢𑁆𑀣𑁄. 𑀧𑀢𑀸𑀧𑀯𑀸𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑀲𑀭𑀻𑀭𑁄. 𑀳𑀺𑀢𑁂𑀲𑀻𑀢𑀺 𑀳𑀺𑀢𑀕𑀯𑁂𑀲𑀻. 𑀅𑀪𑀺𑀲𑀫𑀬𑀸 𑀢𑀻𑀡𑀻𑀢𑀺 𑀅𑀪𑀺𑀲𑀫𑀬𑀸 𑀢𑀬𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄𑀢𑀺.

𑀬𑀤𑀸 𑀧𑀦 𑀪𑀕𑀯𑀸 𑀓𑀼𑀫𑁆𑀪𑀓𑀡𑁆𑀡𑀲𑀤𑀺𑀲𑀸𑀦𑀼𑀪𑀸𑀯𑀁 𑀓𑀼𑀫𑁆𑀪𑀓𑀡𑁆𑀡𑀁 𑀦𑀸𑀫 𑀫𑀦𑀼𑀲𑁆𑀲𑀪𑀓𑁆𑀔𑀁 𑀬𑀓𑁆𑀔𑀁 𑀫𑀳𑀸𑀅𑀝𑀯𑀺𑀫𑀼𑀔𑁂 𑀲𑀦𑁆𑀤𑀺𑀲𑁆𑀲𑀫𑀸𑀦𑀖𑁄𑀭𑀲𑀭𑀻𑀭𑀁 𑀯𑀢𑁆𑀢𑀦𑀺𑀅𑀝𑀯𑀺𑀲𑀜𑁆𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑁆𑀯𑀸 𑀏𑀓𑀓𑁄𑀯 𑀅𑀲𑀳𑀸𑀬𑁄 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀲𑀺𑀭𑀺𑀲𑀬𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄 𑀬𑀓𑁆𑀔𑁄 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀤𑀡𑁆𑀟𑀸𑀳𑀢𑁄 𑀖𑁄𑀭𑀯𑀺𑀲𑁄 𑀆𑀲𑀺𑀯𑀺𑀲𑁄 𑀯𑀺𑀬 𑀲𑀁𑀓𑀼𑀤𑁆𑀥𑁄 𑀤𑀲𑀩𑀮𑀁 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 𑀖𑁄𑀭𑀢𑀭𑀁 𑀓𑀢𑁆𑀯𑀸 𑀧𑀩𑁆𑀩𑀢𑀲𑀤𑀺𑀲𑀁 ¶ 𑀲𑀻𑀲𑀁 𑀓𑀢𑁆𑀯𑀸 𑀲𑀽𑀭𑀺𑀬𑀫𑀡𑁆𑀟𑀮𑀲𑀤𑀺𑀲𑀸𑀦𑀺 ¶ 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀗𑁆𑀕𑀮𑀲𑀻𑀲𑀲𑀤𑀺𑀲𑀸𑀢𑀺𑀤𑀻𑀖𑀯𑀺𑀧𑀼𑀮𑀢𑀺𑀔𑀺𑀡𑀤𑀸𑀞𑀸𑀬𑁄 𑀓𑀢𑁆𑀯𑀸 𑀑𑀮𑀫𑁆𑀩𑀦𑀻𑀮𑀯𑀺𑀧𑀼𑀮𑀯𑀺𑀲𑀫𑁄𑀤𑀭𑁄 𑀢𑀸𑀮𑀓𑁆𑀔𑀦𑁆𑀥𑀲𑀤𑀺𑀲𑀩𑀸𑀳𑀼𑀘𑀺𑀧𑀺𑀝𑀓𑀯𑀺𑀭𑀽𑀧𑀯𑀗𑁆𑀓𑀦𑀸𑀲𑁄 𑀧𑀩𑁆𑀩𑀢𑀩𑀺𑀮𑀲𑀤𑀺𑀲𑀯𑀺𑀧𑀼𑀮𑀭𑀢𑁆𑀢𑀫𑀼𑀔𑁄 𑀣𑀽𑀮𑀧𑀺𑀗𑁆𑀕𑀮𑀔𑀭𑀨𑀭𑀼𑀲𑀓𑁂𑀲𑁄 𑀅𑀢𑀺𑀪𑀬𑀸𑀦𑀓𑀤𑀲𑁆𑀲𑀦𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 ¶ 𑀧𑀼𑀭𑀢𑁄 𑀞𑀢𑁆𑀯𑀸 𑀧𑀥𑀽𑀧𑀸𑀬𑀦𑁆𑀢𑁄 𑀧𑀚𑁆𑀚𑀮𑀦𑁆𑀢𑁄 𑀧𑀸𑀲𑀸𑀡𑀧𑀩𑁆𑀩𑀢𑀕𑁆𑀕𑀺𑀚𑀸𑀮-𑀲𑀮𑀺𑀮-𑀓𑀤𑁆𑀤𑀫-𑀙𑀸𑀭𑀺𑀓𑀸𑀬𑀼𑀥𑀗𑁆𑀕𑀸𑀭-𑀯𑀸𑀮𑀼𑀓𑀧𑁆𑀧𑀓𑀸𑀭𑀸 𑀦𑀯𑀯𑀺𑀥𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄 𑀯𑀲𑁆𑀲𑁂𑀢𑁆𑀯𑀸𑀧𑀺 𑀪𑀕𑀯𑀢𑁄 𑀮𑁄𑀫𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀴𑀯𑀓𑁄 𑀯𑀺𑀬 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀬𑀁 𑀪𑀕𑀯𑀸 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑁂𑀦 𑀢𑀁 𑀬𑀓𑁆𑀔𑀁 𑀯𑀺𑀦𑀬𑀫𑀼𑀧𑀦𑁂𑀲𑀺. 𑀢𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀓𑀺𑀭𑀲𑁆𑀲 𑀭𑀝𑁆𑀞𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀓𑀝𑀪𑀭𑀺𑀢𑁂𑀦 𑀪𑀢𑁆𑀢𑁂𑀦 𑀲𑀳 𑀭𑀸𑀚𑀓𑀼𑀫𑀸𑀭𑀁 𑀆𑀳𑀭𑀺𑀢𑁆𑀯𑀸 𑀬𑀓𑁆𑀔𑀲𑁆𑀲 𑀅𑀤𑀁𑀲𑀼. 𑀅𑀣 𑀬𑀓𑁆𑀔𑁄 𑀭𑀸𑀚𑀓𑀼𑀫𑀸𑀭𑀁 𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀺. 𑀅𑀝𑀯𑀺𑀤𑁆𑀯𑀸𑀭𑁂 𑀞𑀺𑀢𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑀤𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀤𑀲𑀩𑀮𑁄 𑀬𑀓𑁆𑀔𑀲𑁆𑀲 𑀫𑀦𑁄𑀦𑀼𑀓𑀽𑀮𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄. 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀸𑀡𑀻𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺, 𑀲𑁄 𑀤𑀼𑀢𑀺𑀬𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀧𑀼𑀦𑀸𑀧𑀭𑀁 𑀓𑀼𑀫𑁆𑀪𑀓𑀡𑁆𑀡𑀁, 𑀬𑀓𑁆𑀔𑀁 𑀲𑁄 𑀤𑀫𑀬𑀻 𑀚𑀺𑀦𑁄;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 𑀧𑀦 𑀉𑀧𑀓𑀸𑀭𑀺𑀦𑀕𑀭𑁂 𑀲𑀺𑀭𑀺𑀦𑀦𑁆𑀤𑀦𑀼𑀬𑁆𑀬𑀸𑀦𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑀬𑀺, 𑀢𑀤𑀸 𑀅𑀲𑀻𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀧𑀼𑀦𑀸𑀧𑀭𑀁 𑀅𑀫𑀺𑀢𑀬𑀲𑁄, 𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑀬𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀲𑀼𑀫𑁂𑀥𑀲𑁆𑀲𑀸𑀧𑀺 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀲𑀼𑀤𑀲𑁆𑀲𑀦𑀦𑀕𑀭𑁂 𑀓𑁄𑀝𑀺𑀲𑀢𑀔𑀻𑀡𑀸𑀲𑀯𑀸 𑀅𑀳𑁂𑀲𑀼𑀁. 𑀧𑀼𑀦 𑀤𑁂𑀯𑀓𑀽𑀝𑁂 𑀧𑀩𑁆𑀩𑀢𑁂 𑀓𑀣𑀺𑀦𑀢𑁆𑀣𑀢𑁂 𑀤𑀼𑀢𑀺𑀬𑁂 𑀦𑀯𑀼𑀢𑀺𑀓𑁄𑀝𑀺𑀬𑁄. 𑀧𑀼𑀦 𑀢𑀢𑀺𑀬𑁂 𑀪𑀕𑀯𑀢𑀺 𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 𑀅𑀲𑀻𑀢𑀺𑀓𑁄𑀝𑀺𑀬𑁄 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮.

‘‘𑀲𑀼𑀤𑀲𑁆𑀲𑀦𑀁 ¶ 𑀦𑀸𑀫 𑀦𑀕𑀭𑀁, 𑀉𑀧𑀕𑀜𑁆𑀙𑀺 𑀚𑀺𑀦𑁄 𑀬𑀤𑀸;

𑀢𑀤𑀸 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽, 𑀲𑀫𑀺𑀁𑀲𑀼 𑀲𑀢𑀓𑁄𑀝𑀺𑀬𑁄.

𑁯.

‘‘𑀧𑀼𑀦𑀸𑀧𑀭𑀁 𑀤𑁂𑀯𑀓𑀽𑀝𑁂, 𑀪𑀺𑀓𑁆𑀔𑀽𑀦𑀁 𑀓𑀣𑀺𑀦𑀢𑁆𑀣𑀢𑁂;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁦.

‘‘𑀧𑀼𑀦𑀸𑀧𑀭𑀁 ¶ ¶ 𑀤𑀲𑀩𑀮𑁄, 𑀬𑀤𑀸 𑀘𑀭𑀢𑀺 𑀘𑀸𑀭𑀺𑀓𑀁;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑁄 𑀦𑀸𑀫 𑀲𑀩𑁆𑀩𑀚𑀦𑀼𑀢𑁆𑀢𑀭𑁄 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀁𑀬𑁂𑀯 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀤𑀸 𑀤𑀲𑀩𑀮𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑀪𑁄𑀚𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄 𑀫𑀬𑁆𑀳𑀁, 𑀖𑀭𑁂 𑀲𑀦𑁆𑀦𑀺𑀘𑀺𑀢𑀁 𑀥𑀦𑀁.

𑁧𑁨.

‘‘𑀓𑁂𑀯𑀮𑀁 𑀲𑀩𑁆𑀩𑀁 𑀤𑀢𑁆𑀯𑀸𑀦, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀲𑀭𑀡𑀁 𑀢𑀲𑁆𑀲𑀽𑀧𑀕𑀜𑁆𑀙𑀺𑀁, 𑀧𑀩𑁆𑀩𑀚𑁆𑀚𑀜𑁆𑀘𑀸𑀪𑀺𑀭𑁄𑀘𑀬𑀺𑀁.

𑁧𑁩.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀓𑀭𑁄𑀦𑁆𑀢𑁄 𑀅𑀦𑀼𑀫𑁄𑀤𑀦𑀁;

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑀩𑁆𑀬𑀸𑀓𑀭𑀡𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑁧𑁫.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁬.

‘‘𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀁 𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁭.

‘‘𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺.

𑀢𑀢𑁆𑀣 ¶ ¶ 𑀲𑀦𑁆𑀦𑀺𑀘𑀺𑀢𑀦𑁆𑀢𑀺 𑀦𑀺𑀤𑀳𑀺𑀢𑀁 𑀦𑀺𑀥𑀸𑀦𑀯𑀲𑁂𑀦. 𑀓𑁂𑀯𑀮𑀦𑁆𑀢𑀺 𑀲𑀓𑀮𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀦𑁆𑀢𑀺 𑀅𑀲𑁂𑀲𑀢𑁄 𑀤𑀢𑁆𑀯𑀸. 𑀲𑀲𑀗𑁆𑀖𑁂𑀢𑀺 𑀲𑀲𑀗𑁆𑀖𑀲𑁆𑀲. 𑀢𑀲𑁆𑀲𑀽𑀧𑀕𑀜𑁆𑀙𑀺𑀦𑁆𑀢𑀺 𑀢𑀁 𑀉𑀧𑀕𑀜𑁆𑀙𑀺𑀁, 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀪𑀺𑀭𑁄𑀘𑀬𑀺𑀦𑁆𑀢𑀺 𑀧𑀩𑁆𑀩𑀚𑀺𑀁. 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑁂𑀲𑀽𑀢𑀺 𑀅𑀢𑁆𑀣𑁄.

𑀢𑀲𑁆𑀲 ¶ 𑀧𑀦 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀫𑀸𑀢𑀸 𑀲𑀼𑀤𑀢𑁆𑀢𑀸 𑀦𑀸𑀫, 𑀲𑀭𑀡𑁄 𑀘 𑀲𑀩𑁆𑀩𑀓𑀸𑀫𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀸𑀕𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑀸𑀫𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀦𑀻𑀧𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺, 𑀲𑀼𑀫𑀦𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀧𑀼𑀦𑀩𑁆𑀩𑀲𑀼𑀫𑀺𑀢𑁆𑀢𑁄 𑀦𑀸𑀫 𑀧𑀼𑀢𑁆𑀢𑁄, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀲𑁂𑀲𑀁 𑀕𑀸𑀣𑀸𑀲𑀼 𑀤𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮.

‘‘𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁, 𑀲𑀼𑀤𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀤𑀢𑁆𑀢𑀸 𑀦𑀸𑀫 𑀚𑀦𑀺𑀓𑀸, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁩.

‘‘𑀲𑀭𑀡𑁄 𑀲𑀩𑁆𑀩𑀓𑀸𑀫𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀸𑀕𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀫𑁂𑀥𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪.

‘‘𑀭𑀸𑀫𑀸 𑀘𑁂𑀯 𑀲𑀼𑀭𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀦𑀻𑀧𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁬.

‘‘𑀅𑀝𑁆𑀞𑀸𑀲𑀻𑀢𑀺𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸.

𑁨𑁭.

‘‘𑀘𑀓𑁆𑀓𑀯𑀢𑁆𑀢𑀺𑀫𑀡𑀻 𑀦𑀸𑀫, 𑀬𑀣𑀸 𑀢𑀧𑀢𑀺 𑀬𑁄𑀚𑀦𑀁;

𑀢𑀣𑁂𑀯 𑀢𑀲𑁆𑀲 𑀭𑀢𑀦𑀁, 𑀲𑀫𑀦𑁆𑀢𑀸 𑀨𑀭𑀢𑀺 𑀬𑁄𑀚𑀦𑀁.

𑁨𑁮.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁯.

‘‘𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑁂𑀳𑀺 ¶ , 𑀩𑀮𑀧𑁆𑀧𑀢𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀲𑀫𑀸𑀓𑀼𑀮𑀫𑀺𑀤𑀁 𑀆𑀲𑀺, 𑀅𑀭𑀳𑀦𑁆𑀢𑁂𑀳𑀺 𑀲𑀸𑀥𑀼𑀳𑀺.

𑁩𑁦.

‘‘𑀢𑁂𑀧𑀺 𑀲𑀩𑁆𑀩𑁂 𑀅𑀫𑀺𑀢𑀬𑀲𑀸, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀦𑀺𑀭𑀽𑀧𑀥𑀻;

𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸 𑀢𑁂 𑀫𑀳𑀸𑀬𑀲𑀸’’𑀢𑀺.

𑀢𑀢𑁆𑀣 ¶ 𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸𑀢𑀺 𑀬𑀣𑀸 𑀦𑀸𑀫 𑀕𑀕𑀦𑁂 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑁄 𑀢𑀸𑀭𑀸𑀕𑀡𑁂 𑀑𑀪𑀸𑀲𑁂𑀢𑀺 𑀧𑀓𑀸𑀲𑁂𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀑𑀪𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸’’𑀢𑀺 𑀧𑀞𑀦𑁆𑀢𑀺, 𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀯.

𑀘𑀓𑁆𑀓𑀯𑀢𑁆𑀢𑀺𑀫𑀡𑀻 𑀦𑀸𑀫𑀸𑀢𑀺 𑀬𑀣𑀸 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀫𑀡𑀺𑀭𑀢𑀦𑀁 𑀘𑀢𑀼𑀳𑀢𑁆𑀣𑀸𑀬𑀸𑀫𑀁 𑀲𑀓𑀝𑀦𑀸𑀪𑀺𑀲𑀫𑀧𑀭𑀺𑀡𑀸𑀳𑀁 𑀘𑀢𑀼𑀭𑀸𑀲𑀻𑀢𑀺𑀫𑀡𑀺𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑀲𑁆𑀲 𑀲𑀭𑀤𑀲𑀫𑀬𑀧𑀭𑀺𑀧𑀼𑀡𑁆𑀡𑀭𑀚𑀦𑀺𑀓𑀭𑀲𑁆𑀲 𑀲𑀺𑀭𑀺𑀲𑀫𑀼𑀤𑀬𑀲𑁄𑀪𑀁 𑀅𑀯𑁆𑀳𑀬𑀦𑁆𑀢𑀫𑀺𑀯 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀢𑁄 𑀧𑀭𑀫𑀭𑀫𑀡𑀻𑀬𑀤𑀲𑁆𑀲𑀦𑀁 ¶ 𑀫𑀡𑀺𑀭𑀢𑀦𑀫𑀸𑀕𑀘𑁆𑀙𑀢𑀺, 𑀢𑀲𑁆𑀲𑁂𑀯𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀲𑀫𑀦𑁆𑀢𑀢𑁄 𑀬𑁄𑀚𑀦𑀧𑁆𑀧𑀫𑀸𑀡𑀁 𑀑𑀓𑀸𑀲𑀁 𑀆𑀪𑀸 𑀨𑀭𑀢𑀺, 𑀏𑀯𑀫𑁂𑀯 𑀢𑀲𑁆𑀲 𑀲𑀼𑀫𑁂𑀥𑀲𑁆𑀲𑀸𑀧𑀺 𑀪𑀕𑀯𑀢𑁄 𑀲𑀭𑀻𑀭𑀢𑁄 𑀆𑀪𑀸𑀭𑀢𑀦𑀁 𑀲𑀫𑀦𑁆𑀢𑀢𑁄 𑀬𑁄𑀚𑀦𑀁 𑀨𑀭𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑁂𑀳𑀻𑀢𑀺 𑀢𑁂𑀯𑀺𑀚𑁆𑀚𑁂𑀳𑀺 𑀙𑀴𑀪𑀺𑀜𑁆𑀜𑁂𑀳𑀺 𑀘𑀸𑀢𑀺 𑀅𑀢𑁆𑀣𑁄. 𑀩𑀮𑀧𑁆𑀧𑀢𑁆𑀢𑁂𑀳𑀻𑀢𑀺 𑀇𑀤𑁆𑀥𑀺𑀩𑀮𑀧𑁆𑀧𑀢𑁆𑀢𑁂𑀳𑀺. 𑀢𑀸𑀤𑀺𑀳𑀻𑀢𑀺 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁂𑀳𑀺. 𑀲𑀫𑀸𑀓𑀼𑀮𑀦𑁆𑀢𑀺 𑀲𑀗𑁆𑀓𑀺𑀡𑁆𑀡𑀁 𑀏𑀓𑀓𑀸𑀲𑀸𑀯𑀧𑀚𑁆𑀚𑁄𑀢𑀁. 𑀇𑀤𑀦𑁆𑀢𑀺 𑀲𑀸𑀲𑀦𑀁 𑀲𑀦𑁆𑀥𑀸𑀬𑀸𑀳, 𑀫𑀳𑀻𑀢𑀮𑀁 𑀯𑀸. 𑀅𑀫𑀺𑀢𑀬𑀲𑀸𑀢𑀺 𑀅𑀫𑀺𑀢𑀧𑀭𑀺𑀯𑀸𑀭𑀸, 𑀅𑀢𑀼𑀮𑀓𑀺𑀢𑁆𑀢𑀺𑀖𑁄𑀲𑁄 𑀯𑀸. 𑀦𑀺𑀭𑀽𑀧𑀥𑀻𑀢𑀺 𑀘𑀢𑀼𑀭𑀽𑀧𑀥𑀺𑀯𑀺𑀭𑀳𑀺𑀢𑀸. 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀼𑀫𑁂𑀥𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀏𑀓𑀸𑀤𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁪. 𑀲𑀼𑀚𑀸𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀢𑀢𑁄 ¶ 𑀢𑀲𑁆𑀲𑀸𑀧𑀭𑀪𑀸𑀕𑁂 𑀢𑀲𑁆𑀫𑀺𑀁𑀬𑁂𑀯 𑀫𑀡𑁆𑀟𑀓𑀧𑁆𑀧𑁂 𑀅𑀦𑀼𑀧𑀼𑀩𑁆𑀩𑁂𑀦 𑀅𑀧𑀭𑀺𑀫𑀺𑀢𑀸𑀬𑀼𑀓𑁂𑀲𑀼 𑀲𑀢𑁆𑀢𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀲𑀼𑀚𑀸𑀢𑀭𑀽𑀧𑀓𑀸𑀬𑁄 𑀧𑀭𑀺𑀲𑀼𑀤𑁆𑀥𑀚𑀸𑀢𑁄 𑀲𑀼𑀚𑀸𑀢𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀲𑁄𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀼𑀫𑀗𑁆𑀕𑀮𑀦𑀕𑀭𑁂 𑀉𑀕𑁆𑀕𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀧𑀪𑀸𑀯𑀢𑀺𑀬𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑁄 ¶ 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀼𑀔𑀁 𑀚𑀦𑀬𑀦𑁆𑀢𑁄 𑀚𑀸𑀢𑁄𑀢𑀺 ‘‘𑀲𑀼𑀚𑀸𑀢𑁄’’ 𑀢𑁆𑀯𑁂𑀯𑀲𑁆𑀲 𑀦𑀸𑀫𑀫𑀓𑀁𑀲𑀼. 𑀲𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀲𑀺𑀭𑀻 𑀉𑀧𑀲𑀺𑀭𑀻 𑀲𑀺𑀭𑀺𑀦𑀦𑁆𑀤𑁄 𑀘𑀸𑀢𑀺 𑀢𑀲𑁆𑀲 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀺𑀭𑀻𑀦𑀦𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀺𑀭𑀻𑀦𑀦𑁆𑀤𑀸𑀤𑁂𑀯𑀺𑀬𑀸 𑀉𑀧𑀲𑁂𑀦𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀳𑀁𑀲𑀯𑀳𑀁 𑀦𑀸𑀫 𑀯𑀭𑀢𑀼𑀭𑀗𑁆𑀕𑀫𑀸𑀭𑀼𑀬𑁆𑀳 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀧𑀦 𑀧𑀩𑁆𑀩𑀚𑀦𑁆𑀢𑀁 𑀫𑀦𑀼𑀲𑁆𑀲𑀸𑀦𑀁 𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀅𑀣 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀦𑀯 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀺𑀭𑀻𑀦𑀦𑁆𑀤𑀦𑀦𑀕𑀭𑁂 𑀲𑀺𑀭𑀻𑀦𑀦𑁆𑀤𑀦𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸𑀬 𑀤𑀺𑀦𑁆𑀦𑀁 𑀧𑀭𑀫𑀫𑀥𑀼𑀭𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀼𑀦𑀦𑁆𑀤𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀯𑁂𑀴𑀼𑀩𑁄𑀥𑀺𑀁 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀢𑁆𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀲𑀽𑀭𑀺𑀬𑁂 𑀥𑀭𑀫𑀸𑀦𑁂𑀬𑁂𑀯 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀼𑀘𑀺𑀡𑁆𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑁄 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀲𑀼𑀤𑀲𑁆𑀲𑀦𑀓𑀼𑀫𑀸𑀭𑀁 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀤𑁂𑀯𑀓𑀼𑀫𑀸𑀭𑀜𑁆𑀘 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑁂 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀲𑀼𑀫𑀗𑁆𑀕𑀮𑀦𑀕𑀭𑀲𑀫𑀻𑀧𑁂 𑀲𑀼𑀫𑀗𑁆𑀕𑀮𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁂𑀦 𑀅𑀢𑁆𑀢𑀦𑁄 𑀪𑀸𑀢𑀺𑀓𑀁 𑀲𑀼𑀤𑀲𑁆𑀲𑀦𑀓𑀼𑀫𑀸𑀭𑀁 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀤𑁂𑀯𑀓𑀼𑀫𑀸𑀭𑀜𑁆𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀧𑀭𑀺𑀯𑀸𑀭𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀢𑁆𑀣 𑀅𑀲𑀻𑀢𑀺𑀬𑀸 𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀬𑀤𑀸 𑀧𑀦 𑀪𑀕𑀯𑀸 𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑀤𑁆𑀯𑀸𑀭𑁂 𑀫𑀳𑀸𑀲𑀸𑀮𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀯𑀲𑁆𑀲𑀸𑀯𑀸𑀲𑀁 𑀉𑀧𑀸𑀕𑀫𑀺, 𑀢𑀤𑀸 𑀲𑀢𑁆𑀢𑀢𑁆𑀢𑀺𑀁𑀲𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀲𑀼𑀚𑀸𑀢𑁄 𑀤𑀲𑀩𑀮𑁄 𑀧𑀺𑀢𑀼𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀢𑀤𑀸 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀢𑀢𑁆𑀣𑁂𑀯 ¶ 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀲𑀼𑀚𑀸𑀢𑁄 𑀦𑀸𑀫 𑀦𑀸𑀬𑀓𑁄;

𑀲𑀻𑀳𑀳𑀦𑀼𑀲𑀪𑀓𑁆𑀔𑀦𑁆𑀥𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀸𑀲𑀤𑁄.

𑁨.

‘‘𑀘𑀦𑁆𑀤𑁄𑀯 ¶ 𑀯𑀺𑀫𑀮𑁄 𑀩𑀼𑀤𑁆𑀥𑁄, 𑀲𑀢𑀭𑀁𑀲𑀻𑀯 𑀧𑀢𑀸𑀧𑀯𑀸;

𑀏𑀯𑀁 𑀲𑁄𑀪𑀢𑀺 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀦𑁆𑀢𑁄 𑀲𑀺𑀭𑀺𑀬𑀸 𑀲𑀤𑀸.

𑁩.

‘‘𑀧𑀸𑀧𑀼𑀡𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀓𑁂𑀯𑀮𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀲𑀼𑀫𑀗𑁆𑀕𑀮𑀫𑁆𑀳𑀺 𑀦𑀕𑀭𑁂, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁪.

‘‘𑀤𑁂𑀲𑁂𑀦𑁆𑀢𑁂 𑀧𑀯𑀭𑀁 𑀥𑀫𑁆𑀫𑀁, 𑀲𑀼𑀚𑀸𑀢𑁂 𑀮𑁄𑀓𑀦𑀸𑀬𑀓𑁂;

𑀅𑀲𑀻𑀢𑀺𑀓𑁄𑀝𑀻 𑀅𑀪𑀺𑀲𑀫𑀺𑀁𑀲𑀼, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂.

𑁫.

‘‘𑀬𑀤𑀸 𑀲𑀼𑀚𑀸𑀢𑁄 𑀅𑀫𑀺𑀢𑀬𑀲𑁄, 𑀤𑁂𑀯𑁂 𑀯𑀲𑁆𑀲𑀁 𑀉𑀧𑀸𑀕𑀫𑀺;

𑀲𑀢𑁆𑀢𑀢𑁆𑀢𑀺𑀁𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬.

‘‘𑀬𑀤𑀸 𑀲𑀼𑀚𑀸𑀢𑁄 𑀅𑀲𑀫𑀲𑀫𑁄, 𑀉𑀧𑀕𑀘𑁆𑀙𑀺 𑀧𑀺𑀢𑀼𑀲𑀦𑁆𑀢𑀺𑀓𑀁;

𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀻𑀢𑀺 𑀬𑀲𑁆𑀫𑀺𑀁 𑀫𑀡𑁆𑀟𑀓𑀧𑁆𑀧𑁂 𑀲𑀼𑀫𑁂𑀥𑁄 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣𑁂𑀯 𑀓𑀧𑁆𑀧𑁂 𑀲𑀼𑀚𑀸𑀢𑁄𑀧𑀺 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀻𑀳𑀳𑀦𑀽𑀢𑀺 ¶ 𑀲𑀻𑀳𑀲𑁆𑀲 𑀯𑀺𑀬 𑀳𑀦𑀼 𑀅𑀲𑁆𑀲𑀸𑀢𑀺 𑀲𑀻𑀳𑀳𑀦𑀼. 𑀲𑀻𑀳𑀲𑁆𑀲 𑀧𑀦 𑀳𑁂𑀝𑁆𑀞𑀺𑀫𑀳𑀦𑀼𑀫𑁂𑀯 𑀧𑀼𑀡𑁆𑀡𑀁 𑀳𑁄𑀢𑀺, 𑀦 𑀉𑀧𑀭𑀺𑀫𑀁. 𑀅𑀲𑁆𑀲 𑀧𑀦 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀻𑀳𑀲𑁆𑀲 𑀳𑁂𑀝𑁆𑀞𑀺𑀫𑀳𑀦𑀼 𑀯𑀺𑀬 𑀤𑁆𑀯𑁂𑀧𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀤𑁆𑀯𑀸𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀻𑀳𑀳𑀦𑀽’’𑀢𑀺. 𑀉𑀲𑀪𑀓𑁆𑀔𑀦𑁆𑀥𑁄𑀢𑀺 𑀉𑀲𑀪𑀲𑁆𑀲𑁂𑀯 𑀲𑀫𑀧𑁆𑀧𑀯𑀝𑁆𑀝𑀓𑁆𑀔𑀦𑁆𑀥𑁄, 𑀲𑀼𑀯𑀝𑁆𑀝𑀺𑀢𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀲𑀢𑀭𑀁𑀲𑀻𑀯𑀸𑀢𑀺 𑀤𑀺𑀯𑀲𑀓𑀭𑁄 𑀯𑀺𑀬. 𑀲𑀺𑀭𑀺𑀬𑀸𑀢𑀺 𑀩𑀼𑀤𑁆𑀥𑀲𑀺𑀭𑀺𑀬𑀸. 𑀩𑁄𑀥𑀺𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀲𑀫𑁆𑀩𑁄𑀥𑀺𑀁.

𑀲𑀼𑀥𑀫𑁆𑀫𑀯𑀢𑀻𑀦𑀕𑀭𑁂 𑀲𑀼𑀥𑀫𑁆𑀫𑀼𑀬𑁆𑀬𑀸𑀦𑁂 𑀆𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀺 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑀢𑁄 𑀧𑀭𑀁 𑀢𑀺𑀤𑀺𑀯𑁄𑀭𑁄𑀳𑀡𑁂 𑀪𑀕𑀯𑀢𑁄 𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 ‘‘𑀲𑀼𑀤𑀲𑁆𑀲𑀦𑀓𑀼𑀫𑀸𑀭𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀺 𑀕𑀳𑁂𑀢𑁆𑀯𑀸 𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑁄 𑀲𑀼𑀚𑀸𑀢𑀁 𑀦𑀭𑀸𑀲𑀪𑀁 ¶ 𑀉𑀧𑀲𑀗𑁆𑀓𑀫𑀺. 𑀢𑁂𑀲𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑀦𑁆𑀦𑀺𑀧𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀲𑀦𑁆𑀦𑀺𑀧𑀸𑀢𑀸 ¶ 𑀢𑀬𑁄 𑀆𑀲𑀼𑀁, 𑀲𑀼𑀚𑀸𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮.

‘‘𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀁, 𑀅𑀧𑁆𑀧𑀢𑁆𑀢𑀸𑀦𑀁 𑀪𑀯𑀸𑀪𑀯𑁂;

𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀺, 𑀧𑀞𑀫𑀁 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑁂.

𑁯.

‘‘𑀧𑀼𑀦𑀸𑀧𑀭𑀁 𑀲𑀦𑁆𑀦𑀺𑀧𑀸𑀢𑁂, 𑀢𑀺𑀤𑀺𑀯𑁄𑀭𑁄𑀳𑀡𑁂 𑀚𑀺𑀦𑁂;

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁦.

‘‘𑀉𑀧𑀲𑀗𑁆𑀓𑀫𑀦𑁆𑀢𑁄 𑀦𑀭𑀸𑀲𑀪𑀁, 𑀲𑀼𑀤𑀲𑁆𑀲𑀦𑁄 𑀅𑀕𑁆𑀕𑀲𑀸𑀯𑀓𑁄;

𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀻’’𑀢𑀺.

𑀢𑀢𑁆𑀣 𑀅𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀪𑀯𑀸𑀪𑀯𑁂 𑀅𑀲𑀫𑁆𑀧𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑀯𑀢𑁆𑀢𑀸 𑀪𑀯𑀸𑀪𑀯𑁂’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀢𑀺𑀤𑀺𑀯𑁄𑀭𑁄𑀳𑀡𑁂𑀢𑀺 𑀲𑀕𑁆𑀕𑀮𑁄𑀓𑀢𑁄 𑀑𑀢𑀭𑀦𑁆𑀢𑁂 𑀓𑀢𑁆𑀢𑀼𑀓𑀸𑀭𑀓𑁂 𑀤𑀝𑁆𑀞𑀩𑁆𑀩𑁄. 𑀓𑀸𑀭𑀓𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀺𑀤𑀺𑀯𑁄𑀭𑁄𑀳𑀡𑁂𑀢𑀺 𑀢𑀺𑀤𑀺𑀯𑀢𑁄 𑀑𑀢𑀭𑀡𑁂. 𑀚𑀺𑀦𑁂𑀢𑀺 𑀚𑀺𑀦𑀲𑁆𑀲, 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀁 𑀤𑀝𑁆𑀞𑀩𑁆𑀩𑀁.

𑀢𑀤𑀸 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑀼𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀤𑁆𑀥𑀺𑀁 𑀘𑀢𑀼𑀫𑀳𑀸𑀤𑀻𑀧𑀭𑀚𑁆𑀚𑀁 𑀤𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑀓𑀮𑀤𑀻𑀧𑀯𑀸𑀲𑀺𑀦𑁄 ¶ 𑀚𑀦𑀸 𑀭𑀝𑁆𑀞𑀼𑀧𑁆𑀧𑀸𑀤𑀁 𑀕𑀳𑁂𑀢𑁆𑀯𑀸 𑀆𑀭𑀸𑀫𑀺𑀓𑀓𑀺𑀘𑁆𑀘𑀁 𑀲𑀸𑀥𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀘𑁆𑀘𑀁 𑀫𑀳𑀸𑀤𑀸𑀦𑀫𑀤𑀁𑀲𑀼. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄;

𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀆𑀲𑀺𑀁, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁩.

‘‘𑀘𑀢𑀼𑀤𑀻𑀧𑁂 𑀫𑀳𑀸𑀭𑀚𑁆𑀚𑀁 𑀭𑀢𑀦𑁂 𑀲𑀢𑁆𑀢 𑀉𑀢𑁆𑀢𑀫𑁂;

𑀩𑀼𑀤𑁆𑀥𑁂 𑀦𑀺𑀬𑁆𑀬𑀸𑀢𑀬𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁪.

‘‘𑀆𑀭𑀸𑀫𑀺𑀓𑀸 ¶ 𑀚𑀦𑀧𑀤𑁂, 𑀉𑀝𑁆𑀞𑀸𑀦𑀁 𑀧𑀝𑀺𑀧𑀺𑀡𑁆𑀟𑀺𑀬;

𑀉𑀧𑀦𑁂𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁.

𑁧𑁫.

‘‘𑀲𑁄𑀧𑀺 ¶ 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀤𑀲𑀲𑀳𑀲𑁆𑀲𑀺𑀫𑁆𑀳𑀺 𑀇𑀲𑁆𑀲𑀭𑁄;

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁭.

‘‘𑀢𑀲𑁆𑀲𑀸𑀧𑀺 𑀘𑀯𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑁂𑀲𑀳𑀁;

𑀅𑀥𑀺𑀝𑁆𑀞𑀳𑀺𑀁 𑀯𑀢𑀁 𑀉𑀕𑁆𑀕𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁮.

‘‘𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁯.

‘‘𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺.

𑀢𑀢𑁆𑀣 𑀘𑀢𑀼𑀤𑀻𑀧𑀫𑁆𑀳𑀻𑀢𑀺 𑀲𑀧𑀭𑀺𑀯𑀸𑀭𑀤𑀻𑀧𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀮𑀺𑀓𑁆𑀔𑀘𑀭𑁄𑀢𑀺 𑀘𑀓𑁆𑀓𑀭𑀢𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀆𑀓𑀸𑀲𑀘𑀭𑁄. 𑀭𑀢𑀦𑁂 𑀲𑀢𑁆𑀢𑀸𑀢𑀺 𑀳𑀢𑁆𑀣𑀺𑀭𑀢𑀦𑀸𑀤𑀻𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺. 𑀉𑀢𑁆𑀢𑀫𑁂𑀢𑀺 𑀉𑀢𑁆𑀢𑀫𑀸𑀦𑀺. 𑀅𑀣 𑀯𑀸 𑀉𑀢𑁆𑀢𑀫𑁂 𑀩𑀼𑀤𑁆𑀥𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀬𑁆𑀬𑀸𑀢𑀬𑀺𑀢𑁆𑀯𑀸𑀦𑀸𑀢𑀺 𑀤𑀢𑁆𑀯𑀸𑀦. 𑀉𑀝𑁆𑀞𑀸𑀦𑀦𑁆𑀢𑀺 𑀭𑀝𑁆𑀞𑀼𑀧𑁆𑀧𑀸𑀤𑀁, 𑀆𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀺𑀡𑁆𑀟𑀺𑀬𑀸𑀢𑀺 𑀭𑀸𑀲𑀺𑀁 𑀓𑀢𑁆𑀯𑀸 𑀲𑀁𑀓𑀟𑁆𑀠𑀺𑀢𑁆𑀯𑀸. 𑀧𑀘𑁆𑀘𑀬𑀦𑁆𑀢𑀺 ¶ 𑀘𑀻𑀯𑀭𑀸𑀤𑀺𑀯𑀺𑀯𑀺𑀥𑀁 𑀧𑀘𑁆𑀘𑀬𑀁. 𑀤𑀲𑀲𑀳𑀲𑁆𑀲𑀺𑀫𑁆𑀳𑀺 𑀇𑀲𑁆𑀲𑀭𑁄𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀁 𑀇𑀲𑁆𑀲𑀭𑁄, 𑀢𑀤𑁂𑀢𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀦𑁆𑀢𑀸𑀦𑀁 𑀮𑁄𑀓𑀥𑀸𑀢𑀽𑀦𑀁 𑀇𑀲𑁆𑀲𑀭𑁄 𑀪𑀕𑀯𑀸. 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀫𑀢𑁆𑀣𑀓𑁂𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀲𑀼𑀚𑀸𑀢𑀲𑁆𑀲 𑀪𑀕𑀯𑀢𑁄 𑀲𑀼𑀫𑀗𑁆𑀕𑀮𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀉𑀕𑁆𑀕𑀢𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀲𑀼𑀤𑀲𑁆𑀲𑀦𑁄 𑀘 𑀲𑀼𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀦𑀸𑀭𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀦𑀸𑀕𑀸 𑀘 𑀦𑀸𑀕𑀲𑀫𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀫𑀳𑀸𑀯𑁂𑀴𑀼𑀭𑀼𑀓𑁆𑀔𑁄 𑀩𑁄𑀥𑀺, 𑀲𑁄 𑀓𑀺𑀭 𑀫𑀦𑁆𑀤𑀘𑁆𑀙𑀺𑀤𑁆𑀤𑁄 𑀖𑀦𑀓𑁆𑀔𑀦𑁆𑀥𑁄 𑀧𑀭𑀫𑀭𑀫𑀡𑀻𑀬𑁄 𑀯𑁂𑀴𑀼𑀭𑀺𑀬𑀫𑀡𑀺𑀯𑀡𑁆𑀡𑁂𑀳𑀺 𑀯𑀺𑀫𑀮𑁂𑀳𑀺 𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑀯𑀺𑀧𑀼𑀮𑀲𑀸𑀔𑁄 𑀫𑀬𑀽𑀭𑀧𑀺𑀜𑁆𑀙𑀓𑀮𑀸𑀧𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 ¶ 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀺𑀭𑀻𑀦𑀦𑁆𑀤𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀉𑀧𑀲𑁂𑀦𑁄 𑀦𑀸𑀫 𑀧𑀼𑀢𑁆𑀢𑁄. 𑀢𑀼𑀭𑀗𑁆𑀕𑀯𑀭𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀲𑁄 𑀧𑀦 𑀘𑀦𑁆𑀤𑀯𑀢𑀻𑀦𑀕𑀭𑁂 𑀲𑀺𑀮𑀸𑀭𑀸𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁦.

‘‘𑀲𑀼𑀫𑀗𑁆𑀕𑀮𑀁 ¶ 𑀦𑀸𑀫 𑀦𑀕𑀭𑀁, 𑀉𑀕𑁆𑀕𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀧𑀪𑀸𑀯𑀢𑀻 𑀦𑀸𑀫, 𑀲𑀼𑀚𑀸𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁫.

‘‘𑀲𑀼𑀤𑀲𑁆𑀲𑀦𑁄 𑀲𑀼𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀦𑀸𑀭𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀚𑀸𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁬.

‘‘𑀦𑀸𑀕𑁄 𑀘 𑀦𑀸𑀕𑀲𑀫𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀯𑁂𑀴𑀽𑀢𑀺 𑀯𑀼𑀘𑁆𑀘𑀢𑀺.

𑁨𑁭.

‘‘𑀲𑁄 𑀘 𑀭𑀼𑀓𑁆𑀔𑁄 𑀖𑀦𑀓𑁆𑀔𑀦𑁆𑀥𑁄, 𑀅𑀘𑁆𑀙𑀺𑀤𑁆𑀤𑁄 𑀳𑁄𑀢𑀺 𑀧𑀢𑁆𑀢𑀺𑀓𑁄;

𑀉𑀚𑀼 𑀯𑀁𑀲𑁄 𑀩𑁆𑀭𑀳𑀸 𑀳𑁄𑀢𑀺, 𑀤𑀲𑁆𑀲𑀦𑀻𑀬𑁄 𑀫𑀦𑁄𑀭𑀫𑁄.

𑁨𑁮.

‘‘𑀏𑀓𑀓𑁆𑀔𑀦𑁆𑀥𑁄 𑀧𑀯𑀟𑁆𑀠𑀺𑀢𑁆𑀯𑀸, 𑀢𑀢𑁄 𑀲𑀸𑀔𑀸 𑀧𑀪𑀺𑀚𑁆𑀚𑀢𑀺;

𑀬𑀣𑀸 𑀲𑀼𑀩𑀤𑁆𑀥𑁄 𑀫𑁄𑀭𑀳𑀢𑁆𑀣𑁄, 𑀏𑀯𑀁 𑀲𑁄𑀪𑀢𑀺 𑀲𑁄 𑀤𑀼𑀫𑁄.

𑁨𑁯.

‘‘𑀦 𑀢𑀲𑁆𑀲 𑀓𑀡𑁆𑀝𑀓𑀸 𑀳𑁄𑀦𑁆𑀢𑀺, 𑀦𑀸𑀧𑀺 𑀙𑀺𑀤𑁆𑀤𑀁 𑀫𑀳𑀸 𑀅𑀳𑀼;

𑀯𑀺𑀢𑁆𑀣𑀺𑀡𑁆𑀡𑀲𑀸𑀔𑁄 𑀅𑀯𑀺𑀭𑀮𑁄, 𑀲𑀦𑁆𑀤𑀘𑁆𑀙𑀸𑀬𑁄 𑀫𑀦𑁄𑀭𑀫𑁄.

𑁩𑁧.

‘‘𑀧𑀜𑁆𑀜𑀸𑀲𑀭𑀢𑀦𑁄 𑀆𑀲𑀺, 𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀚𑀺𑀦𑁄;

𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁄, 𑀲𑀩𑁆𑀩𑀕𑀼𑀡𑀫𑀼𑀧𑀸𑀕𑀢𑁄.

𑁩𑁨.

‘‘𑀢𑀲𑁆𑀲 ¶ 𑀧𑀪𑀸 𑀅𑀲𑀫𑀲𑀫𑀸, 𑀦𑀺𑀤𑁆𑀥𑀸𑀯𑀢𑀺 𑀲𑀫𑀦𑁆𑀢𑀢𑁄;

𑀅𑀧𑁆𑀧𑀫𑀸𑀡𑁄 𑀅𑀢𑀼𑀮𑀺𑀬𑁄, 𑀑𑀧𑀫𑁆𑀫𑁂𑀳𑀺 𑀅𑀦𑀽𑀧𑀫𑁄.

𑁩𑁩.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁪.

‘‘𑀬𑀣𑀸𑀧𑀺 ¶ 𑀲𑀸𑀕𑀭𑁂 𑀊𑀫𑀻, 𑀕𑀕𑀦𑁂 𑀢𑀸𑀭𑀓𑀸 𑀬𑀣𑀸;

𑀏𑀯𑀁 𑀢𑀤𑀸 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀘𑀺𑀢𑁆𑀢𑀺𑀢𑀁.

𑁩𑁫.

‘‘𑀲𑁄 𑀘 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀕𑀼𑀡𑀸𑀦𑀺 𑀘 𑀢𑀸𑀦𑀺 𑀅𑀢𑀼𑀮𑀺𑀬𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀅𑀘𑁆𑀙𑀺𑀤𑁆𑀤𑁄𑀢𑀺 𑀅𑀧𑁆𑀧𑀘𑁆𑀙𑀺𑀤𑁆𑀤𑁄. ‘‘𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 ‘‘𑀙𑀺𑀤𑁆𑀤𑀁 𑀳𑁄𑀢𑀺 𑀧𑀭𑀺𑀢𑁆𑀢𑀓’’𑀦𑁆𑀢𑀺 𑀧𑀞𑀦𑁆𑀢𑀺. 𑀧𑀢𑁆𑀢𑀺𑀓𑁄𑀢𑀺 𑀩𑀳𑀼𑀧𑀢𑁆𑀢𑁄, 𑀓𑀸𑀘𑀫𑀡𑀺𑀯𑀡𑁆𑀡𑁂𑀳𑀺 ¶ 𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀉𑀚𑀽𑀢𑀺 𑀅𑀯𑀗𑁆𑀓𑁄 𑀅𑀓𑀼𑀝𑀺𑀮𑁄. 𑀯𑀁𑀲𑁄𑀢𑀺 𑀯𑁂𑀴𑀼. 𑀩𑁆𑀭𑀳𑀸𑀢𑀺 𑀲𑀫𑀦𑁆𑀢𑀢𑁄 𑀫𑀳𑀸. 𑀏𑀓𑀓𑁆𑀔𑀦𑁆𑀥𑁄𑀢𑀺 𑀅𑀯𑀦𑀺𑀭𑀼𑀳𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀘𑀸𑀢𑀺 𑀅𑀢𑁆𑀣𑁄. 𑀧𑀯𑀟𑁆𑀠𑀺𑀢𑁆𑀯𑀸𑀢𑀺 𑀯𑀟𑁆𑀠𑀺𑀢𑁆𑀯𑀸. 𑀢𑀢𑁄 𑀲𑀸𑀔𑀸 𑀧𑀪𑀺𑀚𑁆𑀚𑀢𑀻𑀢𑀺 𑀢𑀢𑁄 𑀯𑀁𑀲𑀕𑁆𑀕𑀢𑁄 𑀧𑀜𑁆𑀘𑀯𑀺𑀥𑀸 𑀲𑀸𑀔𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀪𑀺𑀚𑁆𑀚𑀺𑀢𑁆𑀣. ‘‘𑀢𑀢𑁄 𑀲𑀸𑀔𑀸 𑀧𑀪𑀺𑀚𑁆𑀚𑀣𑀸’’𑀢𑀺𑀧𑀺 𑀧𑀸𑀞𑁄. 𑀲𑀼𑀩𑀤𑁆𑀥𑁄𑀢𑀺 𑀲𑀼𑀝𑁆𑀞𑀼 𑀧𑀜𑁆𑀘𑀩𑀦𑁆𑀥𑀦𑀸𑀓𑀸𑀭𑁂𑀦 𑀩𑀤𑁆𑀥𑁄. 𑀫𑁄𑀭𑀳𑀢𑁆𑀣𑁄𑀢𑀺 𑀆𑀢𑀧𑀲𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀓𑀢𑁄 𑀩𑀤𑁆𑀥𑁄 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑁄 𑀯𑀼𑀘𑁆𑀘𑀢𑀺.

𑀦 𑀢𑀲𑁆𑀲 𑀓𑀡𑁆𑀝𑀓𑀸 𑀳𑁄𑀦𑁆𑀢𑀻𑀢𑀺 𑀢𑀲𑁆𑀲 𑀯𑀁𑀲𑀲𑁆𑀲 𑀓𑀡𑁆𑀝𑀓𑀺𑀦𑁄𑀧𑀺 𑀭𑀼𑀓𑁆𑀔𑀲𑁆𑀲 𑀓𑀡𑁆𑀝𑀓𑀸 𑀦𑀸𑀳𑁂𑀲𑀼𑀁. 𑀅𑀯𑀺𑀭𑀮𑁄𑀢𑀺 𑀅𑀯𑀺𑀭𑀮𑀲𑀸𑀔𑀸𑀲𑀜𑁆𑀙𑀦𑁆𑀦𑁄. 𑀲𑀦𑁆𑀤𑀘𑁆𑀙𑀸𑀬𑁄𑀢𑀺 𑀖𑀦𑀘𑁆𑀙𑀸𑀬𑁄, 𑀅𑀯𑀺𑀭𑀮𑀢𑁆𑀢𑀸𑀯 𑀲𑀦𑁆𑀤𑀘𑁆𑀙𑀸𑀬𑁄𑀢𑀺 𑀯𑀼𑀢𑁆𑀢𑁄. 𑀧𑀜𑁆𑀜𑀸𑀲𑀭𑀢𑀦𑁄 𑀆𑀲𑀻𑀢𑀺 𑀧𑀜𑁆𑀜𑀸𑀲𑀳𑀢𑁆𑀣𑁄 𑀅𑀳𑁄𑀲𑀺. 𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁄𑀢𑀺 𑀲𑀩𑁆𑀩𑁂𑀦 𑀆𑀓𑀸𑀭𑁂𑀦 𑀯𑀭𑁂𑀳𑀺𑀬𑁂𑀯 𑀉𑀧𑁂𑀢𑁄 𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁄 𑀦𑀸𑀫. 𑀲𑀩𑁆𑀩𑀕𑀼𑀡𑀫𑀼𑀧𑀸𑀕𑀢𑁄𑀢𑀺 𑀅𑀦𑀦𑁆𑀢𑀭𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀫𑀢𑁆𑀢𑀁.

𑀅𑀧𑁆𑀧𑀫𑀸𑀡𑁄𑀢𑀺 𑀧𑀫𑀸𑀡𑀭𑀳𑀺𑀢𑁄, 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀸 𑀅𑀧𑁆𑀧𑀫𑀸𑀡𑁄. 𑀅𑀢𑀼𑀮𑀺𑀬𑁄𑀢𑀺 𑀅𑀢𑀼𑀮𑁄, 𑀓𑁂𑀦𑀘𑀺 𑀅𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀑𑀧𑀫𑁆𑀫𑁂𑀳𑀻𑀢𑀺 𑀉𑀧𑀫𑀺𑀢𑀩𑁆𑀩𑁂𑀳𑀺. 𑀅𑀦𑀽𑀧𑀫𑁄𑀢𑀺 𑀉𑀧𑀫𑀸𑀭𑀳𑀺𑀢𑁄, ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀲𑀤𑀺𑀲𑁄’’𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄 𑀅𑀦𑀽𑀧𑀫𑁄𑀢𑀺 𑀅𑀢𑁆𑀣𑁄. 𑀕𑀼𑀡𑀸𑀦𑀺 ¶ 𑀘 𑀢𑀸𑀦𑀻𑀢𑀺 𑀕𑀼𑀡𑀸 𑀘 𑀢𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀬𑁄 𑀕𑀼𑀡𑀸𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀚𑀸𑀢𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀤𑁆𑀯𑀸𑀤𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁫. 𑀧𑀺𑀬𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀲𑀼𑀚𑀸𑀢𑀲𑁆𑀲 ¶ 𑀧𑀦 𑀅𑀧𑀭𑀪𑀸𑀕𑁂 𑀇𑀢𑁄 𑀅𑀝𑁆𑀞𑀓𑀧𑁆𑀧𑀲𑀢𑀸𑀥𑀺𑀓𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀧𑀺𑀬𑀤𑀲𑁆𑀲𑀻, 𑀅𑀢𑁆𑀣𑀤𑀲𑁆𑀲𑀻, 𑀥𑀫𑁆𑀫𑀤𑀲𑁆𑀲𑀻𑀢𑀺 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀧𑀺𑀬𑀤𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀼𑀥𑀜𑁆𑀜𑀯𑀢𑀻𑀦𑀕𑀭𑁂 𑀲𑀼𑀤𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 ¶ 𑀘𑀦𑁆𑀤𑀲𑀤𑀺𑀲𑀯𑀤𑀦𑀸𑀬 𑀘𑀦𑁆𑀤𑀸𑀤𑁂𑀯𑀺𑀬𑀸 𑀦𑀸𑀫 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀯𑀭𑀼𑀡𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀧𑀦 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀮𑁄𑀓𑀲𑁆𑀲 𑀧𑀺𑀬𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀯𑀺𑀲𑁂𑀲𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀧𑀺𑀬𑀤𑀲𑁆𑀲𑀻’’𑀢𑁆𑀯𑁂𑀯 𑀦𑀸𑀫𑀫𑀓𑀁𑀲𑀼. 𑀲𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀲𑀼𑀦𑀺𑀫𑁆𑀫𑀮𑀯𑀺𑀫𑀮𑀕𑀺𑀭𑀺𑀩𑁆𑀭𑀳𑀸𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀯𑀺𑀫𑀮𑀸𑀫𑀳𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀢𑁆𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀯𑀺𑀫𑀮𑀸𑀤𑁂𑀯𑀺𑀬𑀸 𑀓𑀜𑁆𑀘𑀦𑀯𑁂𑀴𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀆𑀚𑀜𑁆𑀜𑀭𑀣𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀏𑀓𑀸 𑀘 𑀦𑀁 𑀧𑀼𑀭𑀺𑀲𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀧𑀼𑀭𑀺𑀲𑁄 𑀙 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀯𑀭𑀼𑀡𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀯𑀲𑀪𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀼𑀚𑀸𑀢𑀸𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀓𑀓𑀼𑀥𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀧𑀜𑁆𑀜𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀢𑀢𑁆𑀣𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀁 𑀜𑀢𑁆𑀯𑀸 𑀆𑀓𑀸𑀲𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀉𑀲𑀪𑀯𑀢𑀻𑀦𑀕𑀭𑀲𑀫𑀻𑀧𑁂 𑀉𑀲𑀪𑀯𑀢𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀓𑁄𑀝𑀺𑀧𑀭𑀺𑀯𑀼𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄.

𑀧𑀼𑀦 ¶ 𑀉𑀲𑀪𑀯𑀢𑀺𑀬𑀸 𑀦𑀸𑀫 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀲𑀼𑀤𑀲𑁆𑀲𑀦𑀧𑀩𑁆𑀩𑀢𑁂 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀤𑁂𑀯𑀭𑀸𑀚𑀸 𑀧𑀝𑀺𑀯𑀲𑀢𑀺. 𑀲𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀅𑀳𑁄𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀦 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀩𑀮𑀺𑀁 𑀉𑀧𑀲𑀁𑀳𑀭𑀦𑁆𑀢𑀺. 𑀲𑁄 𑀲𑀼𑀤𑀲𑁆𑀲𑀦𑁄 𑀤𑁂𑀯𑀭𑀸𑀚𑀸 𑀦𑀭𑀭𑀸𑀚𑁂𑀦 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀮𑀺𑀁 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀅𑀣 𑀧𑀺𑀬𑀤𑀲𑁆𑀲𑀻 𑀪𑀕𑀯𑀸 ‘‘𑀢𑀲𑁆𑀲 𑀲𑀼𑀤𑀲𑁆𑀲𑀦𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀢𑀁 𑀤𑀺𑀝𑁆𑀞𑀺𑀕𑀢𑀁 ¶ 𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁 𑀤𑁂𑀯𑀭𑀸𑀚𑁂 𑀬𑀓𑁆𑀔𑀲𑀫𑀸𑀕𑀫𑀁 𑀕𑀢𑁂 𑀢𑀲𑁆𑀲 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑀁 𑀆𑀭𑀼𑀳𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀫𑀼𑀜𑁆𑀘𑀦𑁆𑀢𑁄 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂 𑀲𑀭𑀤𑀲𑀫𑀬𑁂 𑀲𑀽𑀭𑀺𑀬𑁄 𑀯𑀺𑀬 𑀦𑀺𑀲𑀻𑀤𑀺. 𑀢𑀲𑁆𑀲 𑀧𑀭𑀺𑀯𑀸𑀭𑀧𑀭𑀺𑀘𑀸𑀭𑀺𑀓𑀸 𑀤𑁂𑀯𑀢𑀸𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀳𑀺 𑀤𑀲𑀩𑀮𑀁 𑀧𑀽𑀚𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀲𑀼𑀤𑀲𑁆𑀲𑀦𑁄𑀧𑀺 ¶ 𑀤𑁂𑀯𑀭𑀸𑀚𑀸 𑀬𑀓𑁆𑀔𑀲𑀫𑀸𑀕𑀫𑀢𑁄 𑀆𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀪𑀯𑀦𑀢𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀜𑁆𑀜𑁂𑀲𑀼 𑀧𑀦 𑀤𑀺𑀯𑀲𑁂𑀲𑀼 𑀫𑀫 𑀪𑀯𑀦𑀲𑁆𑀲 𑀏𑀤𑀺𑀲𑀻 𑀅𑀦𑁂𑀓𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀯𑀺𑀪𑀽𑀢𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀓𑁄 𑀦𑀼 𑀔𑁄 𑀇𑀥 𑀧𑀯𑀺𑀝𑁆𑀞𑁄 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀉𑀤𑀬𑀕𑀺𑀭𑀺𑀲𑀺𑀔𑀭𑀫𑀢𑁆𑀣𑀓𑁂 𑀲𑀭𑀤𑀲𑀫𑀬𑀤𑀺𑀯𑀲𑀓𑀭𑀫𑀺𑀯 𑀙𑀩𑁆𑀩𑀡𑁆𑀡𑀭𑀁𑀲𑀺𑀚𑀸𑀮𑁂𑀦 𑀅𑀪𑀺𑀚𑁆𑀚𑀮𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀼𑀡𑁆𑀟𑀓𑀲𑀫𑀡𑁄 𑀫𑀫 𑀧𑀭𑀺𑀯𑀸𑀭𑁂𑀦 𑀧𑀭𑀺𑀚𑀦𑁂𑀦 𑀧𑀭𑀺𑀯𑀼𑀢𑁄 𑀯𑀭𑀲𑀬𑀦𑁂 𑀦𑀺𑀲𑀺𑀦𑁆𑀦𑁄’’𑀢𑀺 𑀓𑁄𑀥𑀸𑀪𑀺𑀪𑀽𑀢𑀫𑀸𑀦𑀲𑁄 𑁋 ‘‘𑀳𑀦𑁆𑀤𑀸𑀳𑀁 𑀇𑀫𑀲𑁆𑀲 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀓𑀮𑀁 𑀢𑀁 𑀧𑀩𑁆𑀩𑀢𑀁 𑀏𑀓𑀚𑀸𑀮𑀫𑀓𑀸𑀲𑀺. ‘‘𑀇𑀫𑀺𑀦𑀸 𑀅𑀕𑁆𑀕𑀺𑀚𑀸𑀮𑁂𑀦 𑀙𑀸𑀭𑀺𑀓𑀸𑀪𑀽𑀢𑁄 𑀫𑀼𑀡𑁆𑀟𑀓𑀲𑀫𑀡𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀅𑀦𑁂𑀓𑀭𑀁𑀲𑀺𑀚𑀸𑀮𑀯𑀺𑀲𑀭𑀯𑀺𑀧𑁆𑀨𑀼𑀭𑀺𑀢𑀯𑀭𑀲𑀭𑀻𑀭𑀁 𑀧𑀲𑀦𑁆𑀦𑀯𑀤𑀦𑀯𑀡𑁆𑀡𑀲𑁄𑀪𑀁 𑀯𑀺𑀧𑁆𑀧𑀲𑀦𑁆𑀦𑀘𑁆𑀙𑀯𑀺𑀭𑀸𑀕𑀁 𑀤𑀲𑀩𑀮𑀫𑀪𑀺𑀚𑁆𑀚𑀮𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀫𑀡𑁄 𑀅𑀕𑁆𑀕𑀺𑀤𑀸𑀳𑀁 𑀲𑀳𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀁 𑀲𑀫𑀡𑀁 𑀉𑀤𑀓𑁄𑀖𑁂𑀦 𑀑𑀲𑀸𑀤𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑁄𑀖𑀁 𑀯𑀺𑀫𑀸𑀦𑀸𑀪𑀺𑀫𑀼𑀔𑀁 𑀧𑀯𑀢𑁆𑀢𑁂𑀲𑀺.

𑀢𑀢𑁄 𑀉𑀤𑀓𑁄𑀖𑁂𑀦 𑀧𑀼𑀡𑁆𑀡𑁂 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀁 𑀯𑀸 𑀲𑀭𑀻𑀭𑁂 𑀮𑁄𑀫𑀫𑀢𑁆𑀢𑀁 𑀯𑀸 𑀦 𑀢𑁂𑀫𑀺𑀢𑁆𑀣. 𑀢𑀢𑁄 𑀲𑀼𑀤𑀲𑁆𑀲𑀦𑁄 𑀤𑁂𑀯𑀭𑀸𑀚𑀸 𑁋 ‘‘𑀇𑀫𑀺𑀦𑀸 𑀲𑀫𑀡𑁄 𑀦𑀺𑀭𑀲𑁆𑀲𑀸𑀲𑁄 𑀫𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀦𑁆𑀢𑁆𑀯𑀸 𑀉𑀤𑀓𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀲𑀺𑀢𑀚𑀮𑀥𑀭𑀯𑀺𑀯𑀭𑀕𑀢𑀁 𑀲𑀭𑀤𑀲𑀫𑀬𑀭𑀚𑀦𑀺𑀓𑀭𑀫𑀺𑀯 𑀯𑀺𑀯𑀺𑀥𑀭𑀁𑀲𑀺𑀚𑀸𑀮𑀯𑀺𑀲𑀭𑁂𑀦 𑀯𑀺𑀭𑁄𑀘𑀫𑀸𑀦𑀁 𑀲𑀓𑀧𑀭𑀺𑀲𑀧𑀭𑀺𑀯𑀼𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑁋 ‘‘𑀳𑀦𑁆𑀤 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀓𑁄𑀥𑁂𑀦 𑀦𑀯𑀯𑀺𑀥𑀆𑀯𑀼𑀥𑀯𑀲𑁆𑀲𑀁 𑀯𑀲𑁆𑀲𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑀸𑀯𑀼𑀥𑀸𑀦𑀺 𑀦𑀸𑀦𑀸𑀯𑀺𑀥𑀧𑀭𑀫𑀭𑀼𑀘𑀺𑀭𑀤𑀲𑁆𑀲𑀦𑀸 𑀲𑀼𑀭𑀪𑀺𑀓𑀼𑀲𑀼𑀫𑀫𑀸𑀮𑀸 𑀳𑀼𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀁𑀲𑀼.

𑀢𑀢𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀲𑀼𑀤𑀲𑁆𑀲𑀦𑁄 𑀤𑁂𑀯𑀭𑀸𑀚𑀸 𑀧𑀭𑀫𑀓𑀼𑀧𑀺𑀢𑀫𑀸𑀦𑀲𑁄 𑀪𑀕𑀯𑀦𑁆𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀢𑁄 𑀦𑀻𑀳𑀭𑀺𑀢𑀼𑀓𑀸𑀫𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀲𑀫𑀡𑁄 𑀚𑀻𑀯𑀢𑀺 𑀯𑀸 𑀫𑀢𑁄 𑀯𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑁋 ‘‘𑀅𑀳𑁄 𑀫𑀳𑀸𑀦𑀼𑀪𑀸𑀯𑁄 𑀅𑀬𑀁 𑀲𑀫𑀡𑁄, 𑀦𑀸𑀳𑀁 𑀇𑀫𑀁 𑀲𑀫𑀡𑀁 𑀇𑀢𑁄 ¶ 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀲𑀓𑁆𑀓𑁄𑀫𑀺. 𑀬𑀤𑀺 ¶ 𑀳𑀺 𑀫𑀁 𑀓𑁄𑀘𑀺 𑀚𑀸𑀦𑀺𑀲𑁆𑀲𑀢𑀺, 𑀅𑀦𑀧𑁆𑀧𑀓𑁄 𑀫𑁂 𑀅𑀬𑀲𑁄 𑀪𑀯𑀺𑀲𑁆𑀲𑀢𑀺. 𑀬𑀸𑀯𑀺𑀫𑀁 𑀓𑁄𑀘𑀺 ¶ 𑀦 𑀧𑀲𑁆𑀲𑀢𑀺, 𑀢𑀸𑀯 𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀅𑀣 𑀤𑀲𑀩𑀮𑁄 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺, 𑀬𑀣𑀸 𑀦𑀁 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀧𑀲𑁆𑀲𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀤𑀺𑀯𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀭𑀸𑀚𑀸𑀦𑁄 𑀢𑀲𑁆𑀲𑁂𑀯 𑀉𑀧𑀳𑀸𑀭𑀤𑀸𑀦𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂 𑀪𑀕𑀯𑀢𑁄 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀼𑀤𑀲𑁆𑀲𑀦𑀁 𑀤𑁂𑀯𑀭𑀸𑀚𑀸𑀦𑀁 𑀦𑀭𑀭𑀸𑀚𑀸𑀦𑁄 𑀤𑀺𑀲𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 𑀤𑁂𑀯𑀭𑀸𑀚𑀸 𑀫𑀼𑀦𑀺𑀭𑀸𑀚𑀲𑁆𑀲 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄 𑀧𑀸𑀤𑀧𑀭𑀺𑀘𑀭𑀺𑀬𑀁 𑀓𑀭𑁄𑀢𑀺, 𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸, 𑀅𑀳𑁄 𑀩𑀼𑀤𑁆𑀥𑀕𑀼𑀡𑀸 𑀯𑀺𑀲𑀺𑀝𑁆𑀞𑀸’’𑀢𑀺 𑀪𑀕𑀯𑀢𑀺, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀩𑁆𑀩𑁂 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀢𑁆𑀣 𑀧𑀺𑀬𑀤𑀲𑁆𑀲𑀻 𑀪𑀕𑀯𑀸 𑀢𑀁 𑀲𑀼𑀤𑀲𑁆𑀲𑀦𑀁 𑀤𑁂𑀯𑀭𑀸𑀚𑀸𑀦𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀬𑀤𑀸 𑀧𑀦 𑀦𑀯𑀬𑁄𑀚𑀦𑀧𑁆𑀧𑀫𑀸𑀡𑁂 𑀓𑀼𑀫𑀼𑀤𑀦𑀕𑀭𑁂 𑀩𑀼𑀤𑁆𑀥𑀧𑀘𑁆𑀘𑀢𑁆𑀣𑀺𑀓𑁄 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀲𑁄𑀡𑀢𑁆𑀣𑁂𑀭𑁄 𑀦𑀸𑀫 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀺𑀢𑀭𑀁 𑀖𑀸𑀢𑁂𑀢𑁆𑀯𑀸 𑀧𑀼𑀦 𑀧𑀺𑀬𑀤𑀲𑁆𑀲𑀻𑀩𑀼𑀤𑁆𑀥𑀲𑁆𑀲 𑀯𑀥𑀸𑀬 𑀦𑀸𑀦𑀧𑁆𑀧𑀓𑀸𑀭𑀁 𑀧𑀬𑁄𑀕𑀁 𑀓𑀢𑁆𑀯𑀸𑀧𑀺 𑀖𑀸𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑁄 𑀤𑁄𑀡𑀫𑀼𑀔𑀦𑀸𑀕𑀭𑀸𑀚𑀸𑀭𑁄𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀧𑀮𑁄𑀪𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘‘𑀬𑀤𑀸 𑀧𑀦𑀸𑀬𑀁 𑀲𑀫𑀡𑁄 𑀧𑀺𑀬𑀤𑀲𑁆𑀲𑀻 𑀇𑀫𑀁 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀢𑀤𑀸 𑀤𑁄𑀡𑀫𑀼𑀔𑀁 𑀦𑀸𑀫 𑀕𑀚𑀯𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀺𑀬𑀤𑀲𑁆𑀲𑀻𑀲𑀫𑀡𑀁 𑀫𑀸𑀭𑁂𑀳𑀻’’𑀢𑀺.

𑀅𑀣 𑀲𑁄 𑀆𑀭𑁄𑀳𑁄 𑀳𑀺𑀢𑀸𑀳𑀺𑀢𑀯𑀺𑀘𑀸𑀭𑀡𑀭𑀳𑀺𑀢𑁄 𑀭𑀸𑀚𑀯𑀮𑁆𑀮𑀪𑁄 𑁋 ‘‘𑀅𑀬𑀁 𑀲𑀫𑀡𑁄 𑀞𑀸𑀦𑀦𑁆𑀢𑀭𑀸𑀧𑀺 𑀫𑀁 𑀘𑀸𑀯𑁂𑀬𑁆𑀬𑀸’’𑀢𑀺 𑀫𑀦𑁆𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀤𑀲𑀩𑀮𑀲𑁆𑀲 𑀦𑀕𑀭𑀧𑁆𑀧𑀯𑁂𑀲𑀦𑀲𑀫𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀼𑀚𑀸𑀢𑀫𑀢𑁆𑀣𑀓𑀧𑀺𑀡𑁆𑀟𑀓𑀼𑀫𑁆𑀪𑀦𑀮𑀸𑀝𑀁 𑀥𑀦𑀼𑀲𑀤𑀺𑀲𑀤𑀻𑀖𑀲𑀼𑀡𑁆𑀟𑀢𑀝𑀁 𑀲𑀼𑀯𑀺𑀧𑀼𑀮𑀫𑀼𑀤𑀼𑀓𑀡𑁆𑀡𑀁 𑀫𑀥𑀼𑀧𑀺𑀗𑁆𑀕𑀮𑀦𑀬𑀦𑀁 𑀲𑀼𑀦𑁆𑀤𑀭𑀓𑁆𑀔𑀦𑁆𑀥𑀸𑀲𑀦𑀁 𑀅𑀦𑀼𑀯𑀝𑁆𑀝𑀖𑀦𑀚𑀖𑀦𑀁 𑀦𑀺𑀘𑀺𑀢𑀕𑀽𑀴𑁆𑀳𑀚𑀸𑀡𑀼𑀅𑀦𑁆𑀢𑀭𑀁 𑀈𑀲𑀸𑀲𑀤𑀺𑀲𑀭𑀼𑀘𑀺𑀭𑀤𑀦𑁆𑀢𑀁 𑀲𑀼𑀯𑀸𑀮𑀥𑀺𑀁 𑀅𑀧𑀘𑀺𑀢𑀫𑁂𑀘𑀓𑀁 𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀅𑀲𑀺𑀢𑀚𑀮𑀥𑀭𑀲𑀤𑀺𑀲𑀘𑀸𑀭𑀼𑀤𑀲𑁆𑀲𑀦𑀁 𑀲𑀻𑀳𑀯𑀺𑀓𑁆𑀓𑀦𑁆𑀢𑀮𑀮𑀺𑀢𑀕𑀸𑀫𑀺𑀦𑀁 𑀚𑀗𑁆𑀕𑀫𑀫𑀺𑀯 𑀥𑀭𑀸𑀥𑀭𑀁 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑀁 𑀲𑀢𑁆𑀢𑀥𑀸 𑀧𑀪𑀺𑀦𑁆𑀦𑀁 𑀲𑀩𑁆𑀩𑀲𑁄 𑀯𑀺𑀲𑁆𑀲𑀯𑀦𑁆𑀢𑀁 𑀯𑀺𑀕𑁆𑀕𑀳𑀯𑀦𑁆𑀢𑀫𑀺𑀯 𑀅𑀦𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀡𑁆𑀟𑀓𑀩𑀴𑀜𑁆𑀚𑀦𑀥𑀽𑀧𑀮𑁂𑀧𑀸𑀤𑀺𑀯𑀺𑀲𑁂𑀲𑁂𑀳𑀺 𑀪𑀺𑀬𑁆𑀬𑁄𑀧𑀺 𑀫𑀢𑁆𑀢𑀧𑁆𑀧𑀫𑀢𑁆𑀢𑀁 𑀓𑀢𑁆𑀯𑀸 𑀅𑀭𑀺𑀯𑀸𑀭𑀡𑀯𑀸𑀭𑀡𑀁 𑀏𑀭𑀸𑀯𑀡𑀯𑀸𑀭𑀡𑀫𑀺𑀯 𑀅𑀭𑀺𑀚𑀦𑀯𑀸𑀭𑀡𑀁 𑀫𑀼𑀦𑀺𑀯𑀸𑀭𑀡𑀁 𑀫𑀸𑀭𑀡𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀅𑀣 ¶ 𑀲𑁄 𑀤𑁆𑀯𑀺𑀭𑀤𑀯𑀭𑁄 𑀫𑀼𑀢𑁆𑀢𑀫𑀢𑁆𑀢𑁄𑀯 𑀕𑀚𑀫𑀳𑀺𑀁𑀲𑀢𑀼𑀭𑀗𑁆𑀕𑀦𑀭𑀦𑀸𑀭𑀺𑀬𑁄 𑀳𑀦𑁆𑀢𑁆𑀯𑀸 𑀳𑀢𑀭𑀼𑀥𑀺𑀭𑀧𑀭𑀺𑀭𑀜𑁆𑀚𑀺𑀢𑀲𑀤𑀦𑁆𑀢𑀓𑀭𑀲𑀭𑀻𑀭𑁄 𑀅𑀦𑁆𑀢𑀚𑀸𑀮𑀧𑀭𑀺𑀬𑁄𑀦𑀤𑁆𑀥𑀦𑀬𑀦𑁄 𑀲𑀓𑀝𑀓𑀯𑀸𑀝𑀓𑀽𑀝𑀸𑀕𑀸𑀭𑀤𑁆𑀯𑀸𑀭𑀢𑁄𑀭𑀡𑀸𑀤𑀻𑀦𑀺 𑀪𑀜𑁆𑀚𑀺𑀢𑁆𑀯𑀸 𑀓𑀸𑀓-𑀓𑀼𑀮𑀮-𑀕𑀺𑀚𑁆𑀛𑀸𑀤𑀻𑀳𑀺 𑀅𑀦𑀼𑀧𑀭𑀺𑀬𑀸𑀬𑀫𑀸𑀦𑁄 𑀳𑀢𑀫𑀳𑀺𑀁𑀲𑀦𑀭𑀢𑀼𑀭𑀗𑁆𑀕𑀤𑀺𑀭𑀤𑀸𑀤𑀻𑀦𑀁 𑀅𑀗𑁆𑀕𑀸𑀦𑀺 𑀆𑀮𑀼𑀫𑁆𑀧𑀺𑀢𑁆𑀯𑀸 𑀫𑀦𑀼𑀲𑁆𑀲𑀪𑀓𑁆𑀔𑁄 ¶ 𑀬𑀓𑁆𑀔𑁄 𑀯𑀺𑀬 𑀪𑀓𑁆𑀔𑀬𑀦𑁆𑀢𑁄 𑀤𑀽𑀭𑀢𑁄𑀯 𑀤𑀲𑀩𑀮𑀁 𑀲𑀺𑀲𑁆𑀲𑀕𑀡𑀧𑀭𑀺𑀯𑀼𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀦𑀺𑀮𑀕𑀭𑀼𑀴𑀲𑀤𑀺𑀲𑀯𑁂𑀕𑁄 𑀯𑁂𑀕𑁂𑀦 𑀪𑀕𑀯𑀦𑁆𑀢𑀫𑀪𑀺𑀕𑀜𑁆𑀙𑀺.

𑀅𑀣 𑀧𑀼𑀭𑀯𑀸𑀲𑀺𑀦𑁄 𑀧𑀦 𑀚𑀦𑀸 𑀪𑀬𑀲𑀦𑁆𑀢𑀸𑀧𑀧𑀭𑀺𑀧𑀽𑀭𑀺𑀢𑀫𑀸𑀦𑀲𑀸 𑀧𑀸𑀲𑀸𑀤𑀧𑀸𑀓𑀸𑀭𑀘𑀬𑀢𑀭𑀽𑀧𑀕𑀢𑀸 𑀢𑀣𑀸𑀕𑀢𑀸𑀪𑀺𑀫𑀼𑀔𑀫𑀪𑀺𑀥𑀸𑀯𑀦𑁆𑀢𑀁 𑀤𑀺𑀲𑁆𑀯𑀸 𑀳𑀸𑀳𑀸𑀓𑀸𑀭𑀲𑀤𑁆𑀤𑀫𑀓𑀁𑀲𑀼. 𑀓𑁂𑀘𑀺 ¶ 𑀧𑀦 𑀉𑀧𑀸𑀲𑀓𑀸 𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀦𑀬𑁂𑀳𑀺 𑀦𑀺𑀯𑀸𑀭𑀬𑀺𑀢𑀼𑀫𑀸𑀭𑀪𑀺𑀁𑀲𑀼. 𑀅𑀣 𑀲𑁄 𑀩𑀼𑀤𑁆𑀥𑀦𑀸𑀕𑁄 𑀳𑀢𑁆𑀣𑀺𑀦𑀸𑀕𑀫𑀸𑀬𑀦𑁆𑀢𑀫𑁄𑀮𑁄𑀓𑁂𑀢𑁆𑀯𑀸 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑀻𑀢𑀮𑀳𑀤𑀬𑁄 𑀫𑁂𑀢𑁆𑀢𑀸𑀬 𑀢𑀁 𑀨𑀭𑀺. 𑀢𑀢𑁄 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀫𑁂𑀢𑁆𑀢𑀸𑀨𑀭𑀡𑁂𑀦 𑀫𑀼𑀤𑀼𑀓𑀢𑀳𑀤𑀬𑀲𑀦𑁆𑀢𑀸𑀦𑁄 𑀅𑀢𑁆𑀢𑀦𑁄 𑀤𑁄𑀲𑀸𑀧𑀭𑀸𑀥𑀁 𑀜𑀢𑁆𑀯𑀸 𑀮𑀚𑁆𑀚𑀸𑀬 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀣𑀯𑀺𑀬𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀲𑀺𑀭𑀲𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀦𑀺𑀧𑀢𑀺. 𑀏𑀯𑀁 𑀦𑀺𑀧𑀦𑁆𑀦𑁄 𑀧𑀦 𑀲𑁄 𑀢𑀺𑀫𑀺𑀭𑀦𑀺𑀓𑀭𑀲𑀤𑀺𑀲𑀲𑀭𑀻𑀭𑁄 𑀲𑀜𑁆𑀙𑀸𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀯𑀭𑀓𑀦𑀓𑀕𑀺𑀭𑀺𑀲𑀺𑀔𑀭𑀲𑀫𑀻𑀧𑀫𑀼𑀧𑀕𑀢𑁄 𑀅𑀲𑀺𑀢𑀲𑀮𑀺𑀮𑀥𑀭𑀦𑀺𑀓𑀭𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣.

𑀅𑀣𑁂𑀯𑀁 𑀫𑀼𑀦𑀺𑀭𑀸𑀚𑀧𑀸𑀤𑀫𑀽𑀮𑁂 𑀓𑀭𑀺𑀭𑀸𑀚𑀸𑀦𑀁 𑀲𑀺𑀭𑀲𑀸 𑀦𑀺𑀧𑀢𑀦𑁆𑀢𑀁 𑀤𑀺𑀲𑁆𑀯𑀸 𑀦𑀸𑀕𑀭𑀚𑀦𑀸 𑀧𑀭𑀫𑀧𑀻𑀢𑀺𑀧𑀽𑀭𑀺𑀢𑀳𑀤𑀬𑀸 𑀲𑀸𑀥𑀼𑀓𑀸𑀭𑀲𑀻𑀳𑀦𑀸𑀤𑀁 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀲𑀼𑀭𑀪𑀺𑀓𑀼𑀲𑀼𑀫𑀫𑀸𑀮𑀸𑀘𑀦𑁆𑀤𑀦𑀕𑀦𑁆𑀥𑀘𑀼𑀡𑁆𑀡𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀧𑀽𑀚𑁂𑀲𑀼𑀁. 𑀲𑀫𑀦𑁆𑀢𑀢𑁄 𑀘𑁂𑀮𑀼𑀓𑁆𑀔𑁂𑀧𑀸 𑀧𑀯𑀢𑁆𑀢𑀺𑀁𑀲𑀼. 𑀕𑀕𑀦𑀢𑀮𑁂 𑀲𑀼𑀭𑀤𑀼𑀦𑁆𑀤𑀼𑀪𑀺𑀬𑁄 𑀅𑀪𑀺𑀦𑀤𑀺𑀁𑀲𑀼. 𑀅𑀣 𑀪𑀕𑀯𑀸 𑀢𑀫𑀲𑀺𑀢𑀕𑀺𑀭𑀺𑀲𑀺𑀔𑀭𑀫𑀺𑀯 𑀧𑀸𑀤𑀫𑀽𑀮𑁂 𑀦𑀺𑀧𑀦𑁆𑀦𑀁 𑀤𑀺𑀭𑀤𑀯𑀭𑀁 𑀑𑀮𑁄𑀓𑁂𑀢𑁆𑀯𑀸 𑀅𑀗𑁆𑀓𑀼𑀲𑀥𑀚𑀚𑀸𑀮𑀲𑀗𑁆𑀔𑀘𑀓𑁆𑀓𑀸𑀮𑀗𑁆𑀓𑀢𑁂𑀦 𑀓𑀭𑀢𑀮𑁂𑀦 𑀕𑀚𑀯𑀭𑀫𑀢𑁆𑀣𑀓𑀁 𑀧𑀭𑀸𑀫𑀲𑀺𑀢𑁆𑀯𑀸 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀸𑀦𑀼𑀓𑀽𑀮𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀢𑀁 𑀅𑀦𑀼𑀲𑀸𑀲𑀺 𑁋

‘‘𑀕𑀚𑀯𑀭 𑀯𑀤𑀢𑁄 𑀲𑀼𑀡𑁄𑀳𑀺 𑀯𑀸𑀘𑀁, 𑀫𑀫 𑀳𑀺𑀢𑀫𑀢𑁆𑀣𑀬𑀼𑀢𑀜𑁆𑀘 𑀢𑀁 𑀪𑀚𑀸𑀳𑀺;

𑀢𑀯 𑀯𑀥𑀦𑀺𑀭𑀢𑀁 𑀧𑀤𑀼𑀝𑁆𑀞𑀪𑀸𑀯𑀁, 𑀅𑀧𑀦𑀬 𑀲𑀦𑁆𑀢𑀫𑀼𑀧𑁂𑀳𑀺 𑀘𑀸𑀭𑀼𑀤𑀦𑁆𑀢𑀺.

‘‘𑀮𑁄𑀪𑁂𑀦 ¶ 𑀤𑁄𑀲𑁂𑀦 𑀘 𑀫𑁄𑀳𑀢𑁄 𑀯𑀸, 𑀬𑁄 𑀧𑀸𑀡𑀺𑀦𑁄 𑀳𑀺𑀁𑀲𑀢𑀺 𑀯𑀸𑀭𑀡𑀺𑀦𑁆𑀤;

𑀲𑁄 𑀧𑀸𑀡𑀖𑀸𑀢𑀻 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁, 𑀤𑀼𑀓𑁆𑀔𑀁 𑀲𑀼𑀖𑁄𑀭𑀁 𑀦𑀭𑀓𑁂𑀦𑀼𑀪𑁄𑀢𑀺.

‘‘𑀫𑀸𑀓𑀸𑀲𑀺 𑀫𑀸𑀢𑀗𑁆𑀕 𑀧𑀼𑀦𑁂𑀯𑀭𑀽𑀧𑀁, 𑀓𑀫𑁆𑀫𑀁 𑀧𑀫𑀸𑀤𑁂𑀦 𑀫𑀤𑁂𑀦 𑀯𑀸𑀧𑀺;

𑀅𑀯𑀻𑀘𑀺𑀬𑀁 𑀤𑀼𑀓𑁆𑀔𑀫𑀲𑀬𑁆𑀳 𑀓𑀧𑁆𑀧𑀁, 𑀧𑀧𑁆𑀧𑁄𑀢𑀺 𑀧𑀸𑀡𑀁 𑀅𑀢𑀺𑀧𑀸𑀢𑀬𑀦𑁆𑀢𑁄.

‘‘𑀤𑀼𑀓𑁆𑀔𑀁 𑀲𑀼𑀖𑁄𑀭𑀁 𑀦𑀭𑀓𑁂𑀦𑀼𑀪𑁄𑀢𑁆𑀯𑀸, 𑀫𑀦𑀼𑀲𑁆𑀲𑀮𑁄𑀓𑀁 𑀬𑀤𑀺 𑀬𑀸𑀢𑀺 𑀪𑀺𑀬𑁆𑀬𑁄;

𑀅𑀧𑁆𑀧𑀸𑀬𑀼𑀓𑁄 𑀳𑁄𑀢𑀺 𑀯𑀺𑀭𑀽𑀧𑀭𑀽𑀧𑁄, 𑀯𑀺𑀳𑀺𑀁𑀲𑀓𑁄 𑀤𑀼𑀓𑁆𑀔𑀯𑀺𑀲𑁂𑀲𑀪𑀸𑀕𑀻.

‘‘𑀬𑀣𑀸 ¶ 𑀘 𑀧𑀸𑀡𑀸 𑀧𑀭𑀫𑀁 𑀧𑀺𑀬𑀸 𑀢𑁂, 𑀫𑀳𑀸𑀚𑀦𑁂 𑀓𑀼𑀜𑁆𑀚𑀭 𑀫𑀦𑁆𑀤𑀦𑀸𑀕;

𑀢𑀣𑀸 𑀧𑀭𑀲𑁆𑀲𑀸𑀧𑀺 𑀧𑀺𑀬𑀸𑀢𑀺 𑀜𑀢𑁆𑀯𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀧𑀭𑀺𑀯𑀚𑁆𑀚𑀦𑀻𑀬𑁄.

‘‘𑀤𑁄𑀲𑁂 ¶ 𑀘 𑀳𑀺𑀁𑀲𑀸𑀦𑀺𑀭𑀢𑁂 𑀯𑀺𑀤𑀺𑀢𑁆𑀯𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁂 𑀕𑀼𑀡𑁂 𑀘;

𑀧𑀸𑀡𑀸𑀢𑀺𑀧𑀸𑀢𑀁 𑀧𑀭𑀺𑀯𑀚𑁆𑀚𑀬 𑀢𑁆𑀯𑀁, 𑀲𑀕𑁆𑀕𑁂 𑀲𑀼𑀔𑀁 𑀇𑀘𑁆𑀙𑀲𑀺 𑀘𑁂 𑀧𑀭𑀢𑁆𑀣.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁄 𑀲𑀼𑀤𑀦𑁆𑀢𑁄, 𑀧𑀺𑀬𑁄 𑀫𑀦𑀸𑀧𑁄 𑀪𑀯𑀢𑀻𑀥 𑀮𑁄𑀓𑁂;

𑀓𑀸𑀬𑀲𑁆𑀲 𑀪𑁂𑀤𑀸 𑀘 𑀧𑀭𑀁 𑀧𑀦𑀲𑁆𑀲, 𑀲𑀕𑁆𑀕𑀸𑀥𑀺𑀯𑀸𑀲𑀁 𑀓𑀣𑀬𑀦𑁆𑀢𑀺 𑀩𑀼𑀤𑁆𑀥𑀸.

‘‘𑀤𑀼𑀓𑁆𑀔𑀸𑀕𑀫𑀁 𑀦𑀺𑀘𑁆𑀙𑀢𑀺 𑀓𑁄𑀘𑀺 𑀮𑁄𑀓𑁂, 𑀲𑀩𑁆𑀩𑁄𑀧𑀺 𑀚𑀸𑀢𑁄 𑀲𑀼𑀔𑀫𑁂𑀲𑀢𑁂𑀯;

𑀢𑀲𑁆𑀫𑀸 𑀫𑀳𑀸𑀦𑀸𑀕 𑀯𑀺𑀳𑀸𑀬 𑀳𑀺𑀁𑀲𑀁, 𑀪𑀸𑀯𑁂𑀳𑀺 𑀫𑁂𑀢𑁆𑀢𑀁 𑀓𑀭𑀼𑀡𑀜𑁆𑀘 𑀓𑀸𑀮𑁂’’𑀢𑀺.

𑀅𑀣𑁂𑀯𑀁 ¶ 𑀤𑀲𑀩𑀮𑁂𑀦𑀸𑀦𑀼𑀲𑀸𑀲𑀺𑀬𑀫𑀸𑀦𑁄 𑀤𑀦𑁆𑀢𑀺𑀯𑀭𑁄 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀫𑀯𑀺𑀦𑀻𑀢𑁄 𑀯𑀺𑀦𑀬𑀸𑀘𑀸𑀭𑀲𑀫𑁆𑀧𑀦𑁆𑀦𑁄 𑀲𑀺𑀲𑁆𑀲𑁄 𑀯𑀺𑀬 𑀅𑀳𑁄𑀲𑀺. 𑀏𑀯𑀁 𑀲𑁄 𑀧𑀺𑀬𑀤𑀲𑁆𑀲𑀻 𑀪𑀕𑀯𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀯𑀺𑀬 𑀥𑀦𑀧𑀸𑀮𑀁 𑀤𑁄𑀡𑀫𑀼𑀔𑀁 𑀓𑀭𑀺𑀯𑀭𑀁 𑀤𑀫𑀺𑀢𑁆𑀯𑀸 𑀢𑀢𑁆𑀣 𑀫𑀳𑀸𑀚𑀦𑀲𑀫𑀸𑀕𑀫𑁂 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀲𑀼𑀚𑀸𑀢𑀲𑁆𑀲 𑀅𑀧𑀭𑁂𑀦, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀤𑀼𑀭𑀸𑀲𑀤𑁄 𑀅𑀲𑀫𑀲𑀫𑁄, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀬𑀲𑁄.

𑁨.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀫𑀺𑀢𑀬𑀲𑁄, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀢𑀺;

𑀲𑀩𑁆𑀩𑀁 𑀢𑀫𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁩.

‘‘𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀅𑀳𑁂𑀲𑀼𑀁 𑀅𑀪𑀺𑀲𑀫𑀬𑀸 𑀢𑀬𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪.

‘‘𑀲𑀼𑀤𑀲𑁆𑀲𑀦𑁄 𑀤𑁂𑀯𑀭𑀸𑀚𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀭𑁄𑀘𑀬𑀺;

𑀢𑀲𑁆𑀲 𑀤𑀺𑀝𑁆𑀞𑀺𑀁 𑀯𑀺𑀦𑁄𑀤𑁂𑀦𑁆𑀢𑁄, 𑀲𑀢𑁆𑀣𑀸 𑀥𑀫𑁆𑀫𑀫𑀤𑁂𑀲𑀬𑀺.

𑁫.

‘‘𑀚𑀦𑀲𑀦𑁆𑀦𑀺𑀧𑀸𑀢𑁄 ¶ 𑀅𑀢𑀼𑀮𑁄, 𑀫𑀳𑀸𑀲𑀦𑁆𑀦𑀺𑀧𑀢𑀻 𑀢𑀤𑀸;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬.

‘‘𑀬𑀤𑀸 𑀤𑁄𑀡𑀫𑀼𑀔𑀁 𑀳𑀢𑁆𑀣𑀺𑀁, 𑀯𑀺𑀦𑁂𑀲𑀺 𑀦𑀭𑀲𑀸𑀭𑀣𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀲𑀼𑀫𑀗𑁆𑀕𑀮𑀦𑀕𑀭𑁂 𑀧𑀸𑀮𑀺𑀢𑁄 𑀦𑀸𑀫 𑀭𑀸𑀚𑀧𑀼𑀢𑁆𑀢𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀲𑀩𑁆𑀩𑀤𑀲𑁆𑀲𑀺𑀓𑀼𑀫𑀸𑀭𑁄 𑀘𑀸𑀢𑀺 𑀤𑁆𑀯𑁂 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀢𑁂 𑀧𑀺𑀬𑀤𑀲𑁆𑀲𑀺𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑁂 ‘‘𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 ¶ 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀕𑀯𑀢𑁄 𑀪𑀢𑁆𑀢𑀸𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀧𑀦 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀲𑀼𑀤𑀲𑁆𑀲𑀦𑀤𑁂𑀯𑀭𑀸𑀚𑀲𑁆𑀲 𑀲𑀫𑀸𑀕𑀫𑁂 𑀦𑀯𑀼𑀢𑀺𑀓𑁄𑀝𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀢𑁆𑀣𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀤𑀼𑀢𑀺𑀬𑁄 ¶ 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀤𑁄𑀡𑀫𑀼𑀔𑀯𑀺𑀦𑀬𑀦𑁂 𑀅𑀲𑀻𑀢𑀺𑀓𑁄𑀝𑀺𑀬𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀲𑀸𑀧𑀺 𑀧𑀺𑀬𑀤𑀲𑁆𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁮.

‘‘𑀢𑀢𑁄 𑀧𑀭𑀁 𑀦𑀯𑀼𑀢𑀺𑀓𑁄𑀝𑀻, 𑀲𑀫𑀺𑀁𑀲𑀼 𑀏𑀓𑀢𑁄 𑀫𑀼𑀦𑀻;

𑀢𑀢𑀺𑀬𑁂 𑀲𑀦𑁆𑀦𑀺𑀧𑀸𑀢𑀫𑁆𑀳𑀺, 𑀅𑀲𑀻𑀢𑀺𑀓𑁄𑀝𑀺𑀬𑁄 𑀅𑀳𑀽’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀧𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀧𑀭𑀫𑀸𑀭𑀸𑀫𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀧𑀜𑁆𑀘𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑁋 ‘‘𑀇𑀢𑁄 𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑀘𑁆𑀘𑀬𑁂𑀦 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀓𑀲𑁆𑀲𑀧𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁦.

‘‘𑀢𑀲𑁆𑀲 ¶ 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀲𑀸𑀤𑀁 𑀚𑀦𑀬𑀺𑀁 𑀅𑀳𑀁;

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺, 𑀲𑀗𑁆𑀖𑀸𑀭𑀸𑀫𑀁 𑀅𑀫𑀸𑀧𑀬𑀺𑀁.

𑁧𑁧.

‘‘𑀢𑀲𑁆𑀲 𑀤𑀢𑁆𑀯𑀸𑀦 𑀆𑀭𑀸𑀫𑀁, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀲𑀭𑀡𑁂 𑀧𑀜𑁆𑀘𑀲𑀻𑀮𑁂 𑀘, 𑀤𑀴𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬𑀺𑀁.

𑁧𑁨.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁪.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 ¶ 𑀲𑀭𑀡𑁂 𑀧𑀜𑁆𑀘𑀲𑀻𑀮𑁂 𑀘𑀸𑀢𑀺 𑀢𑀻𑀡𑀺 𑀲𑀭𑀡𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂𑀢𑀺 𑀇𑀢𑁄 𑀅𑀝𑁆𑀞𑀲𑀢𑀸𑀥𑀺𑀓𑀲𑁆𑀲 𑀓𑀧𑁆𑀧𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀲 ¶ 𑀧𑀦 𑀪𑀕𑀯𑀢𑁄 𑀲𑀼𑀥𑀜𑁆𑀜𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀧𑀺𑀢𑀸 𑀲𑀼𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀘𑀦𑁆𑀤𑀸 𑀦𑀸𑀫 𑀤𑁂𑀯𑀻, 𑀧𑀸𑀮𑀺𑀢𑁄 𑀘 𑀲𑀩𑁆𑀩𑀤𑀲𑁆𑀲𑀻 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑁄𑀪𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀚𑀸𑀢𑀸 𑀘 𑀥𑀫𑁆𑀫𑀤𑀺𑀦𑁆𑀦𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀓𑀓𑀼𑀥𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀯𑀺𑀫𑀮𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺, 𑀓𑀜𑁆𑀘𑀦𑀸𑀯𑁂𑀴𑁄 𑀦𑀸𑀫 𑀧𑀼𑀢𑁆𑀢𑁄, 𑀲𑁄 𑀆𑀚𑀜𑁆𑀜𑀭𑀣𑁂𑀦 𑀦𑀺𑀓𑁆𑀔𑀫𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫.

‘‘𑀲𑀼𑀥𑀜𑁆𑀜𑀁 𑀦𑀸𑀫 𑀦𑀕𑀭𑀁, 𑀲𑀼𑀤𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀦𑁆𑀤𑀸 𑀦𑀸𑀫𑀸𑀲𑀺 𑀚𑀦𑀺𑀓𑀸, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁦.

‘‘𑀧𑀸𑀮𑀺𑀢𑁄 𑀲𑀩𑁆𑀩𑀤𑀲𑁆𑀲𑀻 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑁄𑀪𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁧.

‘‘𑀲𑀼𑀚𑀸𑀢𑀸 ¶ 𑀥𑀫𑁆𑀫𑀤𑀺𑀦𑁆𑀦𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀓𑀓𑀼𑀥𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁩.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀫𑀺𑀢𑀬𑀲𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀲𑀸𑀮𑀭𑀸𑀚𑀸𑀯 𑀤𑀺𑀲𑁆𑀲𑀢𑀺.

𑁨𑁪.

‘‘𑀅𑀕𑁆𑀕𑀺𑀘𑀦𑁆𑀤𑀲𑀽𑀭𑀺𑀬𑀸𑀦𑀁, 𑀦𑀢𑁆𑀣𑀺 𑀢𑀸𑀤𑀺𑀲𑀺𑀓𑀸 𑀧𑀪𑀸;

𑀬𑀣𑀸 𑀅𑀳𑀼 𑀧𑀪𑀸 𑀢𑀲𑁆𑀲, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁫.

‘‘𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀆𑀬𑀼 𑀢𑀸𑀯𑀢𑀓𑀁 𑀅𑀳𑀼;

𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁬.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀬𑀼𑀕𑀸𑀦𑀺𑀧𑀺 𑀢𑀸𑀦𑀺 𑀅𑀢𑀼𑀮𑀺𑀬𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀲𑀸𑀮𑀭𑀸𑀚𑀸 𑀯𑀸𑀢𑀺 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀧𑀭𑀫𑀭𑀫𑀡𑀻𑀬𑀤𑀲𑁆𑀲𑀦𑁄 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀲𑀸𑀮𑀭𑀸𑀚𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀬𑀼𑀕𑀸𑀦𑀺𑀧𑀺 𑀢𑀸𑀦𑀻𑀢𑀺 𑀅𑀕𑁆𑀕𑀲𑀸𑀯𑀓𑀬𑀼𑀕𑀸𑀤𑀻𑀦𑀺 𑀬𑀼𑀕𑀴𑀸𑀦𑀺. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀺𑀬𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀢𑁂𑀭𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁬. 𑀅𑀢𑁆𑀣𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀧𑀺𑀬𑀤𑀲𑁆𑀲𑀺𑀫𑁆𑀳𑀺 ¶ ¶ ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀘 𑀅𑀦𑁆𑀢𑀭𑀳𑀺𑀢𑁂 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀅𑀧𑀭𑀺𑀫𑀺𑀢𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀧𑀭𑀫𑀢𑁆𑀣𑀤𑀲𑁆𑀲𑀻 𑀅𑀢𑁆𑀣𑀤𑀲𑁆𑀲𑀻 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀧𑀭𑀫𑀲𑁄𑀪𑀦𑁂 𑀲𑁄𑀪𑀦𑁂 𑀦𑀸𑀫 𑀦𑀕𑀭𑁂 𑀲𑀸𑀕𑀭𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀤𑀲𑁆𑀲𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲 𑀫𑀸𑀲𑁂 𑀕𑀩𑁆𑀪𑁂 𑀯𑀲𑀺𑀢𑁆𑀯𑀸 𑀲𑀼𑀘𑀺𑀦𑁆𑀥𑀦𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀫𑀳𑀸𑀧𑀼𑀭𑀺𑀲𑁂 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀲𑀼𑀘𑀺𑀭𑀓𑀸𑀮𑀦𑀺𑀳𑀺𑀢𑀸𑀦𑀺 𑀓𑀼𑀮𑀧𑀭𑀫𑁆𑀧𑀭𑀸𑀕𑀢𑀸𑀦𑀺 𑀫𑀳𑀸𑀦𑀺𑀥𑀸𑀦𑀸𑀦𑀺 𑀥𑀦𑀲𑀸𑀫𑀺𑀓𑀸 𑀧𑀝𑀺𑀮𑀪𑀺𑀁𑀲𑀽𑀢𑀺 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀅𑀢𑁆𑀣𑀤𑀲𑁆𑀲𑀻’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀅𑀫𑀭𑀕𑀺𑀭𑀺-𑀲𑀼𑀭𑀕𑀺𑀭𑀺-𑀕𑀺𑀭𑀺𑀯𑀸𑀳𑀦𑀦𑀸𑀫𑀓𑀸 𑀧𑀭𑀫𑀲𑀼𑀭𑀪𑀺𑀚𑀦𑀓𑀸 𑀢𑀬𑁄 𑀘𑀲𑁆𑀲 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀯𑀺𑀲𑀸𑀔𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀢𑁆𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀯𑀺𑀲𑀸𑀔𑀸𑀤𑁂𑀯𑀺𑀬𑀸 𑀲𑁂𑀮𑀓𑀼𑀫𑀸𑀭𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀅𑀲𑁆𑀲𑀭𑀸𑀚𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀦𑀯 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑁄 𑀫𑀳𑀸𑀧𑀼𑀭𑀺𑀲𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀘𑀺𑀦𑁆𑀥𑀭𑀦𑀸𑀕𑀺𑀬𑀸 𑀉𑀧𑀳𑀸𑀭𑀢𑁆𑀣𑀸𑀬 𑀆𑀦𑀻𑀢𑀁 𑀫𑀥𑀼𑀧𑀸𑀬𑀸𑀲𑀁 𑀫𑀳𑀸𑀚𑀦𑁂𑀦 𑀲𑀦𑁆𑀤𑀺𑀲𑁆𑀲𑀫𑀸𑀦𑀲𑀩𑁆𑀩𑀲𑀭𑀻𑀭𑀸𑀬 𑀦𑀸𑀕𑀺𑀬𑀸 𑀲𑀳 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀭𑀼𑀡𑀢𑀭𑀼𑀲𑀢𑀲𑀫𑀮𑀗𑁆𑀓𑀢𑁂 𑀢𑀭𑀼𑀡𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀭𑀼𑀘𑀺𑀦𑀸 𑀫𑀳𑀸𑀭𑀼𑀘𑀺𑀦𑀸 𑀦𑀸𑀫 𑀦𑀸𑀕𑀭𑀸𑀚𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀓𑀼𑀲𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀘𑀫𑁆𑀧𑀓𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀧𑀜𑁆𑀜𑀸𑀲𑀳𑀢𑁆𑀣𑀸𑀬𑀸𑀫𑀯𑀺𑀢𑁆𑀣𑀢𑀁 𑀓𑀼𑀲𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀦𑀯𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀭𑀺𑀬𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑁂 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀅𑀦𑁄𑀫𑀦𑀕𑀭𑀲𑀫𑀻𑀧𑁂 𑀅𑀦𑁄𑀫𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 ¶ 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀦 ¶ 𑀪𑀕𑀯𑀢𑀺 𑀮𑁄𑀓𑀦𑀸𑀬𑀓𑁂 𑀤𑁂𑀯𑀮𑁄𑀓𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀢𑀢𑁆𑀣 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀪𑀕𑀯𑀸 𑀅𑀢𑁆𑀣𑀤𑀲𑁆𑀲𑀻 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀯𑀺𑀬 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀲𑁄𑀪𑀦𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀢𑀢𑁆𑀣𑁂𑀯 ¶ 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀫𑀳𑀸𑀢𑀫𑀁 𑀦𑀺𑀳𑀦𑁆𑀢𑁆𑀯𑀸𑀦, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁨.

‘‘𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀅𑀫𑀢𑁂𑀦 𑀢𑀧𑁆𑀧𑀬𑀻 𑀮𑁄𑀓𑀁, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑀁.

𑁩.

‘‘𑀢𑀲𑁆𑀲𑀸𑀧𑀺 𑀮𑁄𑀓𑀦𑀸𑀣𑀲𑁆𑀲, 𑀅𑀳𑁂𑀲𑀼𑀁 𑀅𑀪𑀺𑀲𑀫𑀬𑀸 𑀢𑀬𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪.

‘‘𑀬𑀤𑀸 𑀩𑀼𑀤𑁆𑀥𑁄 𑀅𑀢𑁆𑀣𑀤𑀲𑁆𑀲𑀻, 𑀘𑀭𑀢𑀺 𑀤𑁂𑀯𑀘𑀸𑀭𑀺𑀓𑀁;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫.

‘‘𑀧𑀼𑀦𑀸𑀧𑀭𑀁 𑀬𑀤𑀸 𑀩𑀼𑀤𑁆𑀥𑁄, 𑀤𑁂𑀲𑁂𑀲𑀺 𑀧𑀺𑀢𑀼𑀲𑀦𑁆𑀢𑀺𑀓𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀓𑀧𑁆𑀧𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀯𑀭𑀓𑀧𑁆𑀧𑁄 ‘‘𑀫𑀡𑁆𑀟𑀓𑀧𑁆𑀧𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. ‘‘𑀬𑀲𑁆𑀫𑀺𑀁 𑀓𑀧𑁆𑀧𑁂 𑀢𑀬𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀲𑁄 𑀓𑀧𑁆𑀧𑁄 𑀯𑀭𑀓𑀧𑁆𑀧𑁄’’𑀢𑀺 𑀳𑁂𑀝𑁆𑀞𑀸 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀯𑀭𑀓𑀧𑁆𑀧𑁄 𑀇𑀥 ‘‘𑀫𑀡𑁆𑀟𑀓𑀧𑁆𑀧𑁄’’𑀢𑀺 𑀯𑀼𑀢𑁆𑀢𑁄. 𑀦𑀺𑀳𑀦𑁆𑀢𑁆𑀯𑀸𑀦𑀸𑀢𑀺 𑀦𑀺𑀳𑀦𑀺𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀦𑁆𑀢𑁄𑀢𑀺 𑀲𑀫𑀸𑀦𑁄. 𑀅𑀫𑀢𑁂𑀦𑀸𑀢𑀺 𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀫𑀢𑀧𑀸𑀦𑁂𑀦. 𑀢𑀧𑁆𑀧𑀬𑀻𑀢𑀺 𑀅𑀢𑀧𑁆𑀧𑀬𑀺, 𑀧𑀻𑀡𑁂𑀲𑀻𑀢𑀺 𑀅𑀢𑁆𑀣𑁄. 𑀤𑀲𑀲𑀳𑀲𑁆𑀲𑀻𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁. 𑀤𑁂𑀯𑀘𑀸𑀭𑀺𑀓𑀦𑁆𑀢𑀺 𑀤𑁂𑀯𑀸𑀦𑀁 𑀯𑀺𑀦𑀬𑀦𑀢𑁆𑀣𑀁 𑀤𑁂𑀯𑀮𑁄𑀓𑀘𑀸𑀭𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀲𑀼𑀘𑀦𑁆𑀤𑀓𑀦𑀕𑀭𑁂 𑀓𑀺𑀭 𑀲𑀦𑁆𑀢𑁄 𑀘 𑀭𑀸𑀚𑀧𑀼𑀢𑁆𑀢𑁄 𑀉𑀧𑀲𑀦𑁆𑀢𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀲𑀩𑁆𑀩𑀲𑀫𑀬𑀦𑁆𑀢𑀭𑁂𑀲𑀼 𑀘 𑀲𑀸𑀭𑀫𑀤𑀺𑀲𑁆𑀯𑀸 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 ¶ 𑀘𑀢𑁆𑀢𑀸𑀭𑁄 𑀧𑀡𑁆𑀟𑀺𑀢𑁂 𑀯𑀺𑀲𑀸𑀭𑀤𑁂 𑀘 𑀫𑀦𑀼𑀲𑁆𑀲𑁂 𑀞𑀧𑁂𑀲𑀼𑀁 𑁋 ‘‘𑀬𑀁 𑀧𑀦 𑀢𑀼𑀫𑁆𑀳𑁂 𑀧𑀡𑁆𑀟𑀺𑀢𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀲𑁆𑀲𑀣 𑀲𑀼𑀡𑀸𑀣 𑀯𑀸, 𑀢𑀁 𑀅𑀫𑁆𑀳𑀸𑀓𑀁 𑀆𑀕𑀦𑁆𑀢𑁆𑀯𑀸 ¶ 𑀆𑀭𑁄𑀘𑁂𑀣𑀸’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀅𑀢𑁆𑀣𑀤𑀲𑁆𑀲𑀻 𑀮𑁄𑀓𑀦𑀸𑀣𑁄 𑀲𑀼𑀘𑀦𑁆𑀤𑀓𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀢𑁂𑀳𑀺 𑀦𑀺𑀯𑁂𑀤𑀺𑀢𑀸 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀤𑀲𑀩𑀮𑀲𑁆𑀲 𑀢𑀢𑁆𑀣𑀸𑀕𑀫𑀦𑀁 𑀧𑀝𑀺𑀯𑁂𑀤𑁂𑀲𑀼𑀁. 𑀢𑀢𑁄 𑀢𑁂 𑀲𑀦𑁆𑀢𑁄𑀧𑀲𑀦𑁆𑀢𑀸 𑀢𑀣𑀸𑀕𑀢𑀸𑀕𑀫𑀦𑀁 𑀲𑀼𑀢𑁆𑀯𑀸 𑀧𑀳𑀝𑁆𑀞𑀫𑀸𑀦𑀲𑀸 𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀤𑀲𑀩𑀮𑀁 𑀅𑀲𑀫𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀅𑀲𑀤𑀺𑀲𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀓𑀮𑀦𑀕𑀭𑀯𑀸𑀲𑀻𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀥𑀫𑁆𑀫𑀓𑀣𑀁 𑀲𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀺𑀭 𑀤𑀺𑀯𑀲𑁂 𑀅𑀝𑁆𑀞𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀺 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

𑀬𑀤𑀸 𑀧𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀲𑁂𑀮𑀢𑁆𑀣𑁂𑀭𑀲𑁆𑀲 ¶ 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀅𑀝𑁆𑀞𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀧𑀲𑀸𑀤𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀫𑀳𑀸𑀫𑀗𑁆𑀕𑀮𑀲𑀫𑀸𑀕𑀫𑁂 𑀫𑀸𑀖𑀧𑀼𑀡𑁆𑀡𑀫𑀸𑀬𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀅𑀝𑁆𑀞𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀲𑀸𑀧𑀺 𑀘 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭.

‘‘𑀅𑀝𑁆𑀞𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀝𑁆𑀞𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮.

‘‘𑀅𑀝𑁆𑀞𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀯𑀺𑀫𑀮𑀸𑀦𑀁 𑀫𑀳𑁂𑀲𑀺𑀦’’𑀦𑁆𑀢𑀺.

𑀢𑀤𑀸 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀘𑀫𑁆𑀧𑀓𑀦𑀕𑀭𑁂 𑀲𑀼𑀲𑀻𑀫𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀮𑁄𑀓𑀲𑀫𑁆𑀫𑀢𑁄 𑀅𑀳𑁄𑀲𑀺. 𑀲𑁄 𑀲𑀩𑁆𑀩𑀯𑀺𑀪𑀯𑀚𑀸𑀢𑀁 𑀤𑀻𑀦𑀸𑀦𑀸𑀣𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ¶ 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀳𑀼𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀯𑀚𑁆𑀚𑀲𑀸𑀯𑀚𑁆𑀚𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀆𑀕𑀫𑀬𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀅𑀢𑁆𑀣𑀤𑀲𑁆𑀲𑀺𑀫𑁆𑀳𑀺 𑀮𑁄𑀓𑀦𑀸𑀬𑀓𑁂 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀦𑀕𑀭𑁂 𑀅𑀝𑁆𑀞𑀦𑁆𑀦𑀁 ¶ 𑀧𑀭𑀺𑀲𑀸𑀦𑀁 𑀫𑀚𑁆𑀛𑁂 𑀥𑀫𑁆𑀫𑀸𑀫𑀢𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀕𑁆𑀕𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀸𑀦𑀺 𑀫𑀦𑁆𑀤𑀸𑀭𑀯𑀧𑀤𑀼𑀫𑀧𑀸𑀭𑀺𑀘𑁆𑀙𑀢𑁆𑀢𑀓𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀤𑁂𑀯𑀮𑁄𑀓𑀢𑁄 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀤𑀺𑀲𑁆𑀲𑀫𑀸𑀦𑀲𑀭𑀻𑀭𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑁄 𑀯𑀺𑀬 𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀧𑀼𑀧𑁆𑀨𑀫𑀡𑁆𑀟𑀧𑀁 𑀧𑀼𑀧𑁆𑀨𑀫𑀬𑀕𑁆𑀖𑀺𑀢𑁄𑀭𑀡𑀳𑁂𑀫𑀚𑀸𑀮𑀸𑀤𑀻𑀦𑀺 𑀧𑀼𑀧𑁆𑀨𑀫𑀬𑀸𑀦𑀺 𑀓𑀢𑁆𑀯𑀸 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀘𑁆𑀙𑀢𑁆𑀢𑁂𑀦 𑀤𑀲𑀩𑀮𑀁 𑀧𑀽𑀚𑁂𑀲𑀺. 𑀲𑁄𑀧𑀺 𑀦𑀁 𑀪𑀕𑀯𑀸 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀲𑀼𑀲𑀻𑀫𑁄 𑀦𑀸𑀫 𑀦𑀸𑀫𑁂𑀦, 𑀫𑀳𑀺𑀬𑀸 𑀲𑁂𑀝𑁆𑀞𑀲𑀫𑁆𑀫𑀢𑁄.

𑁧𑁦.

‘‘𑀤𑀺𑀩𑁆𑀩𑀁 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀁;

𑀤𑁂𑀯𑀮𑁄𑀓𑀸 𑀳𑀭𑀺𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁.

𑁧𑁧.

‘‘𑀲𑁄𑀧𑀺 ¶ 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁨.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁩.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀚𑀝𑀺𑀮𑁄𑀢𑀺 𑀚𑀝𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀚𑀝𑀺𑀮𑁄. 𑀫𑀳𑀺𑀬𑀸 𑀲𑁂𑀝𑁆𑀞𑀲𑀫𑁆𑀫𑀢𑁄𑀢𑀺 𑀲𑀓𑀮𑁂𑀦𑀧𑀺 𑀮𑁄𑀓𑁂𑀦 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀧𑀯𑀭𑁄𑀢𑀺 𑀏𑀯𑀁 𑀲𑀫𑁆𑀫𑀢𑁄 𑀲𑀫𑁆𑀪𑀸𑀯𑀺𑀢𑁄𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑁄𑀪𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀲𑀸𑀕𑀭𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀤𑀲𑁆𑀲𑀦𑀸 𑀦𑀸𑀫 𑀫𑀸𑀢𑀸, 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀪𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀥𑀫𑁆𑀫𑀸 𑀘 𑀲𑀼𑀥𑀫𑁆𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀘𑀫𑁆𑀧𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺. 𑀲𑀭𑀻𑀭𑀧𑁆𑀧𑀪𑀸 ¶ 𑀲𑀫𑀦𑁆𑀢𑀢𑁄 𑀲𑀩𑁆𑀩𑀓𑀸𑀮𑀁 𑀬𑁄𑀚𑀦𑀫𑀢𑁆𑀢𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀁, 𑀯𑀺𑀲𑀸𑀔𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀲𑁂𑀮𑁄 𑀦𑀸𑀫 𑀧𑀼𑀢𑁆𑀢𑁄, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪.

‘‘𑀲𑁄𑀪𑀦𑀁 𑀦𑀸𑀫 𑀦𑀕𑀭𑀁, 𑀲𑀸𑀕𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀤𑀲𑁆𑀲𑀦𑀸 𑀦𑀸𑀫 𑀚𑀦𑀺𑀓𑀸, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁯.

‘‘𑀲𑀦𑁆𑀢𑁄 ¶ 𑀘 𑀉𑀧𑀲𑀦𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀪𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁦.

‘‘𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀘𑀫𑁆𑀧𑀓𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁨.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀅𑀲𑀻𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀲𑁄𑀪𑀢𑁂 𑀲𑀸𑀮𑀭𑀸𑀚𑀸𑀯, 𑀉𑀴𑀼𑀭𑀸𑀚𑀸𑀯 𑀧𑀽𑀭𑀺𑀢𑁄.

𑁨𑁩.

‘‘𑀢𑀲𑁆𑀲 𑀧𑀸𑀓𑀢𑀺𑀓𑀸 𑀭𑀁𑀲𑀻, 𑀅𑀦𑁂𑀓𑀲𑀢𑀓𑁄𑀝𑀺𑀬𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀨𑀭𑀦𑁆𑀢𑀺 𑀬𑁄𑀚𑀦𑀁 𑀲𑀤𑀸.

𑁨𑁪.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀦𑀭𑀸𑀲𑀪𑁄, 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀫𑀼𑀦𑀺;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁫.

‘‘𑀅𑀢𑀼𑀮𑀁 𑀤𑀲𑁆𑀲𑁂𑀢𑁆𑀯𑀸 𑀑𑀪𑀸𑀲𑀁, 𑀯𑀺𑀭𑁄𑀘𑁂𑀢𑁆𑀯𑀸 𑀲𑀤𑁂𑀯𑀓𑁂;

𑀲𑁄𑀧𑀺 𑀅𑀦𑀺𑀘𑁆𑀘𑀢𑀁 𑀧𑀢𑁆𑀢𑁄, 𑀬𑀣𑀕𑁆𑀕𑀼𑀧𑀸𑀤𑀸𑀦𑀲𑀗𑁆𑀔𑀬𑀸’’𑀢𑀺.

𑀢𑀢𑁆𑀣 𑀉𑀴𑀼𑀭𑀸𑀚𑀸𑀯 𑀧𑀽𑀭𑀺𑀢𑁄𑀢𑀺 𑀲𑀭𑀤𑀲𑀫𑀬𑀧𑀭𑀺𑀧𑀼𑀡𑁆𑀡𑀯𑀺𑀫𑀮𑀲𑀓𑀮𑀫𑀡𑁆𑀟𑀮𑁄 𑀢𑀸𑀭𑀓𑀭𑀸𑀚𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀸𑀓𑀢𑀺𑀓𑀸𑀢𑀺 ¶ 𑀧𑀓𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸, 𑀦 𑀅𑀥𑀺𑀝𑁆𑀞𑀸𑀦𑀯𑀲𑁂𑀦. 𑀬𑀤𑀸 𑀇𑀘𑁆𑀙𑀢𑀺 𑀪𑀕𑀯𑀸, 𑀢𑀤𑀸 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀧𑀺 𑀘𑀓𑁆𑀓𑀯𑀸𑀴𑁂 𑀆𑀪𑀸𑀬 𑀨𑀭𑁂𑀬𑁆𑀬. 𑀭𑀁𑀲𑀻𑀢𑀺 𑀭𑀲𑁆𑀫𑀺𑀬𑁄. 𑀉𑀧𑀸𑀤𑀸𑀦𑀲𑀗𑁆𑀔𑀬𑀸𑀢𑀺 𑀉𑀧𑀸𑀤𑀸𑀦𑀓𑁆𑀔𑀬𑀸 𑀇𑀦𑁆𑀥𑀦𑀓𑁆𑀔𑀬𑀸 𑀅𑀕𑁆𑀕𑀺 𑀯𑀺𑀬. 𑀲𑁄𑀧𑀺 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀔𑀬𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑀼𑀧𑀫𑀦𑀕𑀭𑁂 𑀅𑀦𑁄𑀫𑀸𑀭𑀸𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀥𑀸𑀢𑀼𑀬𑁄 𑀧𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑁂𑀦 𑀯𑀺𑀓𑀺𑀭𑀺𑀁𑀲𑀼. 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀲𑀼 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀢𑁆𑀣𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘𑀼𑀤𑁆𑀤𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁭. 𑀥𑀫𑁆𑀫𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀅𑀢𑁆𑀣𑀤𑀲𑁆𑀲𑀺𑀫𑁆𑀳𑀺 ¶ ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀅𑀦𑁆𑀢𑀭𑀓𑀧𑁆𑀧𑁂 𑀘 𑀯𑀻𑀢𑀺𑀯𑀢𑁆𑀢𑁂 𑀅𑀧𑀭𑀺𑀫𑀺𑀢𑀸𑀬𑀼𑀓𑁂𑀲𑀼 𑀲𑀢𑁆𑀢𑁂𑀲𑀼 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀥𑀫𑁆𑀫𑀤𑀲𑁆𑀲𑀻 𑀦𑀸𑀫 𑀲𑀢𑁆𑀣𑀸 𑀮𑁄𑀓𑀸𑀮𑁄𑀓𑀓𑀭𑁄 𑀮𑁄𑀪𑀸𑀤𑀺𑀮𑁄𑀓𑀫𑀮𑀯𑀺𑀦𑀬𑀓𑀭𑁄 𑀮𑁄𑀓𑁂𑀓𑀦𑀸𑀬𑀓𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀲𑁄𑀧𑀺 𑀪𑀕𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀭𑀡𑀦𑀕𑀭𑁂 𑀲𑀩𑁆𑀩𑀮𑁄𑀓𑀲𑀭𑀡𑀲𑁆𑀲 𑀲𑀭𑀡𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀦𑀦𑁆𑀤𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀭𑀡𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀧𑀸𑀯𑀼𑀲𑁆𑀲𑀓𑀸𑀮𑁂 𑀲𑀮𑀺𑀮𑀥𑀭𑀯𑀺𑀯𑀭𑀕𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀦𑀺𑀓𑁆𑀔𑀫𑀺. 𑀫𑀳𑀸𑀧𑀼𑀭𑀺𑀲𑁂 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂𑀬𑁂𑀯 𑀅𑀥𑀺𑀓𑀭𑀡𑀯𑁄𑀳𑀸𑀭𑀲𑀢𑁆𑀣𑀧𑁄𑀢𑁆𑀣𑀓𑁂𑀲𑀼 𑀅𑀥𑀫𑁆𑀫𑀺𑀬𑀸 𑀯𑁄𑀳𑀸𑀭𑀸 𑀲𑀬𑀫𑁂𑀯 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀥𑀫𑁆𑀫𑀺𑀓𑀯𑁄𑀳𑀸𑀭𑀸𑀬𑁂𑀯 𑀅𑀝𑁆𑀞𑀁𑀲𑀼. 𑀢𑁂𑀦𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀥𑀫𑁆𑀫𑀤𑀲𑁆𑀲𑀻’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀅𑀝𑁆𑀞𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀅𑀭𑀚-𑀯𑀺𑀭𑀚-𑀲𑀼𑀤𑀲𑁆𑀲𑀦𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀯𑀺𑀘𑀺𑀓𑁄𑀴𑀺𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀁 𑀇𑀢𑁆𑀣𑀻𑀦𑀁 𑀯𑀻𑀲𑀢𑀺𑀲𑀳𑀲𑁆𑀲𑀸𑀥𑀺𑀓𑀁 𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀯𑀺𑀘𑀺𑀓𑁄𑀴𑀺𑀤𑁂𑀯𑀺𑀬𑀸 𑀧𑀼𑀜𑁆𑀜𑀯𑀟𑁆𑀠𑀦𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀅𑀢𑀺𑀯𑀺𑀬 𑀲𑀼𑀔𑀼𑀫𑀸𑀮𑁄 𑀤𑁂𑀯𑀲𑀫𑁆𑀧𑀢𑁆𑀢𑀺𑀫𑀺𑀯 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀫𑀸𑀦𑁄 𑀫𑀚𑁆𑀛𑀺𑀫𑀬𑀸𑀫𑁂 𑀯𑀼𑀝𑁆𑀞𑀸𑀬 𑀲𑀺𑀭𑀺𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 𑀦𑀺𑀤𑁆𑀤𑁄𑀧𑀕𑀢𑀸𑀦𑀁 𑀇𑀢𑁆𑀣𑀻𑀦𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀦𑀦𑁆𑀢𑀭𑀫𑁂𑀯𑀲𑁆𑀲 𑀲𑀼𑀤𑀲𑁆𑀲𑀦𑀧𑀸𑀲𑀸𑀤𑁄 𑀕𑀕𑀦𑀢𑀮𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀤𑀼𑀢𑀺𑀬𑁄 𑀤𑀺𑀯𑀲𑀓𑀭𑁄 𑀯𑀺𑀬 𑀤𑀺𑀩𑁆𑀩𑀯𑀺𑀫𑀸𑀦𑀁 𑀯𑀺𑀬 𑀘 𑀕𑀦𑁆𑀢𑁆𑀯𑀸 ¶ 𑀭𑀢𑁆𑀢𑀓𑀼𑀭𑀯𑀓𑀢𑀭𑀼𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀩𑁆𑀭𑀳𑁆𑀫𑀼𑀦𑀸 𑀉𑀧𑀦𑀻𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀸𑀲𑀸𑀤𑀢𑁄 𑀑𑀢𑀭𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀧𑀸𑀲𑀸𑀤𑁄 𑀧𑀼𑀦 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀁 𑀅𑀦𑁆𑀢𑁄𑀓𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀇𑀢𑁆𑀣𑀺𑀬𑁄𑀧𑀺 𑀲𑀧𑀭𑀺𑀯𑀸𑀭𑀸 𑀧𑀸𑀲𑀸𑀤𑀢𑁄 𑀑𑀢𑀭𑀺𑀢𑁆𑀯𑀸 𑀅𑀟𑁆𑀠𑀕𑀸𑀯𑀼𑀢𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀢𑁆𑀣 𑀇𑀢𑁆𑀣𑀺𑀬𑁄 𑀘 𑀢𑀸𑀲𑀁 𑀧𑀭𑀺𑀘𑀸𑀭𑀺𑀓𑀸 𑀘𑁂𑀝𑀺𑀓𑀸𑀬𑁄 𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀢𑀁 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺.

𑀅𑀣 𑀥𑀫𑁆𑀫𑀤𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀘𑀺𑀓𑁄𑀴𑀺𑀤𑁂𑀯𑀺𑀬𑀸 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 ¶ 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀩𑀤𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 ¶ 𑀲𑀺𑀭𑀺𑀯𑀟𑁆𑀠𑀦𑁂𑀦 𑀦𑀸𑀫 𑀬𑀯𑀧𑀸𑀮𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀩𑀺𑀫𑁆𑀩𑀺𑀚𑀸𑀮𑀩𑁄𑀥𑀺𑀁 𑀉𑀧𑀕𑀦𑁆𑀢𑁆𑀯𑀸 𑀢𑁂𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸𑀯 𑀩𑁄𑀥𑀺𑀲𑀫𑀻𑀧𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀓𑀢𑀩𑁆𑀭𑀳𑁆𑀫𑀬𑀸𑀘𑀦𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀲𑁆𑀲 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁆𑀲 𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀁 𑀜𑀢𑁆𑀯𑀸 𑀅𑀝𑁆𑀞𑀸𑀭𑀲𑀬𑁄𑀚𑀦𑀺𑀓𑀫𑀕𑁆𑀕𑀁 𑀏𑀓𑀸𑀳𑁂𑀦𑁂𑀯 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀥𑀫𑁆𑀫𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸, 𑀅𑀢𑀺𑀭𑁄𑀘𑀢𑀺 𑀲𑀤𑁂𑀯𑀓𑁂.

𑁨.

‘‘𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀫𑀦𑁆𑀥𑀓𑀸𑀭𑀦𑁆𑀢𑀺 𑀢𑀫𑀲𑀗𑁆𑀔𑀸𑀢𑀁 𑀫𑁄𑀳𑀦𑁆𑀥𑀓𑀸𑀭𑀦𑁆𑀢𑀺 𑀅𑀢𑁆𑀣𑁄.

𑀬𑀤𑀸 𑀧𑀦 𑀢𑀕𑀭𑀦𑀸𑀫𑀓𑁂 𑀦𑀕𑀭𑁂 𑀲𑀜𑁆𑀚𑀬𑁄 𑀦𑀸𑀫 𑀭𑀸𑀚𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑀁 𑀔𑁂𑀫𑀢𑁄 𑀘 𑀤𑀺𑀲𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀁 𑀦𑀯𑀼𑀢𑀺𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀲𑀩𑁆𑀩𑁂𑀬𑁂𑀯 𑀧𑀜𑁆𑀘𑀸𑀪𑀺𑀜𑁆𑀜𑀸𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀳𑁂𑀲𑀼𑀁. 𑀅𑀣 𑀲𑀢𑁆𑀣𑀸 𑀥𑀫𑁆𑀫𑀤𑀲𑁆𑀲𑀻 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀲𑀜𑁆𑀚𑀬𑀲𑁆𑀲 𑀢𑀸𑀧𑀲𑀲𑁆𑀲 𑀅𑀲𑁆𑀲𑀫𑀧𑀤𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀢𑁂𑀲𑀁 𑀢𑀸𑀧𑀲𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺, 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩.

‘‘𑀬𑀤𑀸 𑀩𑀼𑀤𑁆𑀥𑁄 𑀥𑀫𑁆𑀫𑀤𑀲𑁆𑀲𑀻, 𑀯𑀺𑀦𑁂𑀲𑀺 𑀲𑀜𑁆𑀚𑀬𑀁 𑀇𑀲𑀺𑀁;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 𑀧𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑀲𑀩𑀮𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀢𑀁 𑀉𑀧𑀲𑀗𑁆𑀓𑀫𑀺, 𑀢𑀤𑀸 𑀅𑀲𑀻𑀢𑀺𑀬𑀸 𑀓𑁄𑀝𑀻𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀬𑀤𑀸 ¶ ¶ 𑀲𑀓𑁆𑀓𑁄 𑀉𑀧𑀕𑀜𑁆𑀙𑀺, 𑀲𑀧𑀭𑀺𑀲𑁄 𑀯𑀺𑀦𑀸𑀬𑀓𑀁;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 ¶ 𑀧𑀦 𑀲𑀭𑀡𑀦𑀕𑀭𑁂 𑀯𑁂𑀫𑀸𑀢𑀺𑀓𑀪𑀸𑀢𑀺𑀓𑀁 𑀧𑀤𑀼𑀫𑀓𑀼𑀫𑀸𑀭𑀁 𑀨𑀼𑀲𑁆𑀲𑀤𑁂𑀯𑀓𑀼𑀫𑀸𑀭𑀜𑁆𑀘 𑀲𑀧𑀭𑀺𑀯𑀸𑀭𑁂 𑀧𑀩𑁆𑀩𑀸𑀚𑁂𑀲𑀺, 𑀢𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀪𑀕𑀯𑀢𑁄 𑀤𑁂𑀯𑀮𑁄𑀓𑀢𑁄 𑀑𑀭𑁄𑀳𑀡𑁂 𑀲𑀢𑀓𑁄𑀝𑀻𑀦𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀲𑀼𑀤𑀲𑁆𑀲𑀦𑀸𑀭𑀸𑀫𑁂 𑀢𑁂𑀭𑀲𑀦𑁆𑀦𑀁 𑀥𑀼𑀢𑀕𑀼𑀡𑀸𑀦𑀁 𑀕𑀼𑀡𑁂 𑀆𑀦𑀺𑀲𑀁𑀲𑁂 𑀧𑀓𑀸𑀲𑁂𑀢𑁆𑀯𑀸 𑀳𑀸𑀭𑀺𑀢𑀁 𑀦𑀸𑀫 𑀫𑀳𑀸𑀲𑀸𑀯𑀓𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺, 𑀢𑀤𑀸 𑀅𑀲𑀻𑀢𑀺𑀬𑀸 𑀓𑁄𑀝𑀻𑀦𑀁 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀢𑀲𑁆𑀲𑀸𑀧𑀺 𑀤𑁂𑀯𑀤𑁂𑀯𑀲𑁆𑀲, 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀅𑀳𑀼𑀁;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁬.

‘‘𑀬𑀤𑀸 𑀩𑀼𑀤𑁆𑀥𑁄 𑀥𑀫𑁆𑀫𑀤𑀲𑁆𑀲𑀻, 𑀲𑀭𑀡𑁂 𑀯𑀲𑁆𑀲𑀁 𑀉𑀧𑀸𑀕𑀫𑀺;

𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁭.

‘‘𑀧𑀼𑀦𑀸𑀧𑀭𑀁 𑀬𑀤𑀸 𑀩𑀼𑀤𑁆𑀥𑁄, 𑀤𑁂𑀯𑀢𑁄 𑀏𑀢𑀺 𑀫𑀸𑀦𑀼𑀲𑀁;

𑀢𑀤𑀸𑀧𑀺 𑀲𑀢𑀓𑁄𑀝𑀻𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮.

‘‘𑀧𑀼𑀦𑀸𑀧𑀭𑀁 𑀬𑀤𑀸 𑀩𑀼𑀤𑁆𑀥𑁄, 𑀧𑀓𑀸𑀲𑁂𑀲𑀺 𑀥𑀼𑀢𑁂 𑀕𑀼𑀡𑁂;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑁂𑀳𑀺 𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺 𑀘 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀓𑁆𑀓𑁄 𑀆𑀲𑀺𑀁 𑀧𑀼𑀭𑀺𑀦𑁆𑀤𑀤𑁄;

𑀤𑀺𑀩𑁆𑀩𑁂𑀦 𑀕𑀦𑁆𑀥𑀫𑀸𑀮𑁂𑀦, 𑀢𑀼𑀭𑀺𑀬𑁂𑀦𑀸𑀪𑀺𑀧𑀽𑀚𑀬𑀺𑀁.

𑁧𑁦.

‘‘𑀲𑁄𑀧𑀺 ¶ 𑀫𑀁 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀤𑁂𑀯𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁧.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁨.

‘‘𑀢𑀲𑁆𑀲𑀸𑀧𑀺 ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀲𑁆𑀲 ¶ 𑀧𑀦 𑀪𑀕𑀯𑀢𑁄 𑀲𑀭𑀡𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀲𑀭𑀡𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀦𑀦𑁆𑀤𑀸 𑀦𑀸𑀫 𑀫𑀸𑀢𑀸, 𑀧𑀤𑀼𑀫𑁄 𑀘 𑀨𑀼𑀲𑁆𑀲𑀤𑁂𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀔𑁂𑀫𑀸 𑀘 𑀲𑀩𑁆𑀩𑀦𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀩𑀺𑀫𑁆𑀩𑀺𑀚𑀸𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀧𑀦𑀲𑁆𑀲 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀁, 𑀯𑀺𑀘𑀺𑀓𑁄𑀴𑀺𑀤𑁂𑀯𑀻 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀧𑀼𑀜𑁆𑀜𑀯𑀟𑁆𑀠𑀦𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀧𑀸𑀲𑀸𑀤𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩.

‘‘𑀲𑀭𑀡𑀁 𑀦𑀸𑀫 𑀦𑀕𑀭𑀁, 𑀲𑀭𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀦𑀦𑁆𑀤𑀸 𑀦𑀸𑀫 𑀚𑀦𑀺𑀓𑀸, 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁮.

‘‘𑀧𑀤𑀼𑀫𑁄 𑀨𑀼𑀲𑁆𑀲𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀼𑀦𑁂𑀢𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁯.

‘‘𑀔𑁂𑀫𑀸 𑀘 𑀲𑀩𑁆𑀩𑀦𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀩𑀺𑀫𑁆𑀩𑀺𑀚𑀸𑀮𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁧.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀅𑀲𑀻𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀅𑀢𑀺𑀭𑁄𑀘𑀢𑀺 𑀢𑁂𑀚𑁂𑀦, 𑀤𑀲𑀲𑀳𑀲𑁆𑀲𑀺𑀫𑁆𑀳𑀺 𑀥𑀸𑀢𑀼𑀬𑀸.

𑁨𑁨.

‘‘𑀲𑀼𑀨𑀼𑀮𑁆𑀮𑁄 𑀲𑀸𑀮𑀭𑀸𑀚𑀸𑀯, 𑀯𑀺𑀚𑁆𑀚𑀽𑀯 𑀕𑀕𑀦𑁂 𑀬𑀣𑀸;

𑀫𑀚𑁆𑀛𑀦𑁆𑀳𑀺𑀓𑁂𑀯 𑀲𑀽𑀭𑀺𑀬𑁄, 𑀏𑀯𑀁 𑀲𑁄 𑀉𑀧𑀲𑁄𑀪𑀣.

𑁨𑁩.

‘‘𑀢𑀲𑁆𑀲𑀸𑀧𑀺 ¶ 𑀅𑀢𑀼𑀮𑀢𑁂𑀚𑀲𑁆𑀲, 𑀲𑀫𑀓𑀁 𑀆𑀲𑀺 𑀚𑀻𑀯𑀺𑀓𑀁;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁪.

‘‘𑀑𑀪𑀸𑀲𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀯𑀺𑀫𑀮𑀁 𑀓𑀢𑁆𑀯𑀸𑀦 𑀲𑀸𑀲𑀦𑀁;

𑀘𑀯𑀺 𑀘𑀦𑁆𑀤𑁄𑀯 𑀕𑀕𑀦𑁂, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀩𑀺𑀫𑁆𑀩𑀺𑀚𑀸𑀮𑁄𑀢𑀺 𑀭𑀢𑁆𑀢𑀓𑀼𑀭𑀯𑀓𑀭𑀼𑀓𑁆𑀔𑁄. 𑀤𑀲𑀲𑀳𑀲𑁆𑀲𑀺𑀫𑁆𑀳𑀺 𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸. 𑀯𑀺𑀚𑁆𑀚𑀽𑀯𑀸𑀢𑀺 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬. 𑀉𑀧𑀲𑁄𑀪𑀣𑀸𑀢𑀺 𑀬𑀣𑀸 𑀕𑀕𑀦𑁂 𑀯𑀺𑀚𑁆𑀚𑀼 𑀘 𑀫𑀚𑁆𑀚𑀦𑁆𑀳𑀺𑀓𑁂 𑀲𑀽𑀭𑀺𑀬𑁄 𑀘 𑀉𑀧𑀲𑁄𑀪𑀢𑀺, 𑀏𑀯𑀁 𑀲𑁄 𑀪𑀕𑀯𑀸 𑀉𑀧𑀲𑁄𑀪𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀫𑀓𑀦𑁆𑀢𑀺 𑀲𑀩𑁆𑀩𑁂𑀳𑀺 𑀦𑀭𑀲𑀢𑁆𑀢𑁂𑀳𑀺 𑀲𑀫𑀫𑁂𑀯 𑀢𑀲𑁆𑀲 𑀆𑀬𑀼 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀘𑀯𑀻𑀢𑀺 𑀘𑀼𑀢𑁄. 𑀘𑀦𑁆𑀤𑁄𑀯𑀸𑀢𑀺 ¶ ¶ 𑀕𑀕𑀦𑀢𑁄 𑀘𑀦𑁆𑀤𑀺𑀫𑀸 𑀯𑀺𑀬 𑀘𑀯𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀤𑀲𑁆𑀲𑀻 𑀓𑀺𑀭 𑀪𑀕𑀯𑀸 𑀲𑀸𑀮𑀯𑀢𑀻𑀦𑀕𑀭𑁂 𑀓𑁂𑀲𑀸𑀭𑀸𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀲𑀼 𑀧𑀸𑀓𑀝𑀫𑁂𑀯𑀸𑀢𑀺.

𑀥𑀫𑁆𑀫𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀧𑀦𑁆𑀦𑀭𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁮. 𑀲𑀺𑀤𑁆𑀥𑀢𑁆𑀣𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀥𑀫𑁆𑀫𑀤𑀲𑁆𑀲𑀺𑀫𑁆𑀳𑀺 ¶ 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀅𑀦𑁆𑀢𑀭𑀳𑀺𑀢𑁂 𑀘𑀲𑁆𑀲 𑀲𑀸𑀲𑀦𑁂 𑀢𑀲𑁆𑀫𑀺𑀁 𑀓𑀧𑁆𑀧𑁂 𑀅𑀢𑀻𑀢𑁂 𑀓𑀧𑁆𑀧𑀲𑀳𑀲𑁆𑀲𑁂 𑀘 𑀲𑀢𑁆𑀢𑀲𑀼 𑀓𑀧𑁆𑀧𑀲𑀢𑁂𑀲𑀼 𑀘 𑀙𑀲𑀼 𑀓𑀧𑁆𑀧𑁂𑀲𑀼 𑀘 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀇𑀢𑁄 𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀮𑁄𑀓𑀢𑁆𑀣𑀘𑀭𑁄 𑀅𑀥𑀺𑀕𑀢𑀧𑀭𑀫𑀢𑁆𑀣𑁄 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀦𑀺𑀳𑀦𑀺𑀢𑁆𑀯𑀸 𑀢𑀫𑀁 𑀲𑀩𑁆𑀩𑀁, 𑀲𑀽𑀭𑀺𑀬𑁄 𑀅𑀩𑁆𑀪𑀼𑀕𑁆𑀕𑀢𑁄 𑀬𑀣𑀸’’𑀢𑀺.

𑀲𑀺𑀤𑁆𑀥𑀢𑁆𑀣𑁄 𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀯𑁂𑀪𑀸𑀭𑀦𑀕𑀭𑁂 𑀉𑀤𑁂𑀦𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀨𑀲𑁆𑀲𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀯𑀻𑀭𑀺𑀬𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀚𑀸𑀢𑁂 𑀧𑀦 𑀫𑀳𑀸𑀧𑀼𑀭𑀺𑀲𑁂 𑀲𑀩𑁆𑀩𑁂𑀲𑀁 𑀆𑀭𑀤𑁆𑀥𑀓𑀫𑁆𑀫𑀦𑁆𑀢𑀸 𑀘 𑀇𑀘𑁆𑀙𑀺𑀢𑀸 𑀘 𑀅𑀢𑁆𑀣𑀸 𑀲𑀺𑀤𑁆𑀥𑀺𑀫𑀕𑀫𑀁𑀲𑀼. 𑀢𑀲𑁆𑀫𑀸 𑀧𑀦𑀲𑁆𑀲 𑀜𑀸𑀢𑀓𑀸 ‘‘𑀲𑀺𑀤𑁆𑀥𑀢𑁆𑀣𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀺. 𑀢𑀲𑁆𑀲 𑀓𑁄𑀓𑀸-𑀲𑀼𑀧𑁆𑀧𑀮-𑀧𑀤𑀼𑀫𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑁄𑀫𑀦𑀲𑁆𑀲𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀸𑀤𑁂𑀯𑀺𑀬𑀸 𑀧𑀼𑀢𑁆𑀢𑁂 𑀅𑀦𑀼𑀧𑀫𑀓𑀼𑀫𑀸𑀭𑁂 𑀉𑀧𑁆𑀧𑀦𑁆𑀦𑁂 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀁 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀻𑀭𑀺𑀬𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀦𑀼𑀲𑁆𑀲𑀸 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀢𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀅𑀲𑀤𑀺𑀲𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀲𑀼𑀦𑁂𑀢𑁆𑀢𑀸𑀬 𑀦𑀸𑀫 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 ¶ 𑀤𑀺𑀦𑁆𑀦𑀁 ¶ 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀩𑀤𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀭𑀼𑀡𑁂𑀦 𑀦𑀸𑀫 𑀬𑀯𑀧𑀸𑀮𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀓𑀡𑀺𑀓𑀸𑀭𑀩𑁄𑀥𑀺𑀁 𑀉𑀧𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ¶ 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀁 𑀤𑀺𑀲𑁆𑀯𑀸 𑀅𑀦𑀺𑀮𑀧𑀣𑁂𑀦 𑀕𑀦𑁆𑀢𑁆𑀯𑀸 𑀕𑀬𑀸𑀫𑀺𑀕𑀤𑀸𑀬𑁂 𑀑𑀢𑀭𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨.

‘‘𑀲𑁄𑀧𑀺 𑀧𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀁, 𑀲𑀦𑁆𑀢𑀸𑀭𑁂𑀦𑁆𑀢𑁄 𑀲𑀤𑁂𑀯𑀓𑀁;

𑀅𑀪𑀺𑀯𑀲𑁆𑀲𑀺 𑀥𑀫𑁆𑀫𑀫𑁂𑀖𑁂𑀦, 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀲𑀤𑁂𑀯𑀓𑀁.

𑁩.

‘‘𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀅𑀳𑁂𑀲𑀼𑀁 𑀅𑀪𑀺𑀲𑀫𑀬𑀸 𑀢𑀬𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀲𑀤𑁂𑀯𑀓𑀦𑁆𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁. 𑀥𑀫𑁆𑀫𑀫𑁂𑀖𑁂𑀦𑀸𑀢𑀺 𑀥𑀫𑁆𑀫𑀓𑀣𑀸𑀫𑁂𑀖𑀯𑀲𑁆𑀲𑁂𑀦. 𑀧𑀼𑀦 𑀪𑀻𑀫𑀭𑀣𑀦𑀕𑀭𑁂 𑀪𑀻𑀫𑀭𑀣𑁂𑀦 𑀦𑀸𑀫 𑀭𑀜𑁆𑀜𑀸 𑀦𑀺𑀫𑀦𑁆𑀢𑀺𑀢𑁄 𑀦𑀕𑀭𑀫𑀚𑁆𑀛𑁂 𑀓𑀢𑁂 𑀲𑀦𑁆𑀣𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀲𑀯𑀦𑀲𑀼𑀔𑁂𑀦 𑀧𑀭𑀫𑀫𑀥𑀼𑀭𑁂𑀦 𑀧𑀡𑁆𑀟𑀺𑀢𑀚𑀦𑀳𑀤𑀬𑀗𑁆𑀕𑀫𑁂𑀦 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀤𑀲 𑀤𑀺𑀲𑀸 𑀧𑀭𑀺𑀧𑀽𑀭𑁂𑀦𑁆𑀢𑁄 𑀥𑀫𑁆𑀫𑀸𑀫𑀢𑀤𑀼𑀦𑁆𑀤𑀼𑀪𑀺𑀫𑀸𑀳𑀦𑀺, 𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀧𑀼𑀦𑀸𑀧𑀭𑀁 𑀪𑀻𑀫𑀭𑀣𑁂, 𑀬𑀤𑀸 𑀆𑀳𑀦𑀺 𑀤𑀼𑀦𑁆𑀤𑀼𑀪𑀺𑀁;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 𑀧𑀦 𑀯𑁂𑀪𑀸𑀭𑀦𑀕𑀭𑁂 𑀜𑀸𑀢𑀺𑀲𑀫𑀸𑀕𑀫𑁂 𑀩𑀼𑀤𑁆𑀥𑀯𑀁𑀲𑀁 𑀤𑁂𑀲𑁂𑀦𑁆𑀢𑁄 𑀦𑀯𑀼𑀢𑀺𑀓𑁄𑀝𑀻𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺, 𑀲𑁄 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀬𑀤𑀸 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀯𑁂𑀪𑀸𑀭𑁂 𑀲𑁄 𑀧𑀼𑀭𑀼𑀢𑁆𑀢𑀫𑁂;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀅𑀫𑀭𑀭𑀼𑀘𑀺𑀭𑀤𑀲𑁆𑀲𑀦𑁂 𑀅𑀫𑀭𑀦𑀕𑀭𑁂 𑀦𑀸𑀫 𑀲𑀫𑁆𑀩𑀮𑁄 𑀘 𑀲𑀼𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀪𑀸𑀢𑀭𑁄 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁. 𑀅𑀣 𑀲𑀺𑀤𑁆𑀥𑀢𑁆𑀣𑁄 𑀲𑀢𑁆𑀣𑀸 𑀢𑁂𑀲𑀁 𑀭𑀸𑀚𑀽𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 ¶ 𑀤𑀺𑀲𑁆𑀯𑀸 𑀕𑀕𑀦𑀢𑀮𑁂𑀦 𑀕𑀦𑁆𑀢𑁆𑀯𑀸 𑀅𑀫𑀭𑀦𑀕𑀭𑀫𑀚𑁆𑀛𑁂 𑀑𑀢𑀭𑀺𑀢𑁆𑀯𑀸 𑀘𑀓𑁆𑀓𑀸𑀮𑀗𑁆𑀓𑀢𑀢𑀮𑁂𑀳𑀺 𑀘𑀭𑀡𑁂𑀳𑀺 𑀧𑀣𑀯𑀺𑀢𑀮𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀧𑀤𑀘𑁂𑀢𑀺𑀬𑀸𑀦𑀺 ¶ 𑀤𑀲𑁆𑀲𑁂𑀢𑁆𑀯𑀸 𑀅𑀫𑀭𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀫𑀭𑀫𑀡𑀻𑀬𑁂 𑀅𑀢𑁆𑀢𑀦𑁄 𑀓𑀭𑀼𑀡𑀸𑀲𑀻𑀢𑀮𑁂 𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺. 𑀢𑀢𑁄 𑀤𑁆𑀯𑁂𑀧𑀺 𑀪𑀸𑀢𑀺𑀓𑀭𑀸𑀚𑀸𑀦𑁄 𑀤𑀲𑀩𑀮𑀲𑁆𑀲 𑀧𑀤𑀘𑁂𑀢𑀺𑀬𑀸𑀦𑀺 𑀤𑀺𑀲𑁆𑀯𑀸 𑀧𑀤𑀸𑀦𑀺 𑀅𑀦𑀼𑀕𑀦𑁆𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀁 𑀅𑀥𑀺𑀕𑀢𑀧𑀭𑀫𑀢𑁆𑀣𑀁 𑀲𑀢𑁆𑀣𑀸𑀭𑀁 ¶ 𑀲𑀩𑁆𑀩𑀮𑁄𑀓𑀦𑁂𑀢𑀸𑀭𑀁 𑀲𑀧𑀭𑀺𑀯𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀲𑁆𑀲 𑀢𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀜𑁆𑀚𑀸𑀢𑀲𑀤𑁆𑀥𑀸 𑀳𑀼𑀢𑁆𑀯𑀸 𑀲𑀩𑁆𑀩𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀓𑁄𑀝𑀺𑀲𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀯𑁂𑀪𑀸𑀭𑀦𑀕𑀭𑁂 𑀜𑀸𑀢𑀺𑀲𑀫𑀸𑀕𑀫𑁂 𑀧𑀩𑁆𑀩𑀚𑀺𑀢𑀸𑀦𑀁 𑀦𑀯𑀼𑀢𑀺𑀓𑁄𑀝𑀻𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀲𑀼𑀤𑀲𑁆𑀲𑀦𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀲𑀻𑀢𑀺𑀓𑁄𑀝𑀻𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀫𑀺𑀫𑁆𑀧𑀺 𑀤𑁆𑀯𑀺𑀧𑀤𑀼𑀢𑁆𑀢𑀫𑁂;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭.

‘‘𑀓𑁄𑀝𑀺𑀲𑀢𑀸𑀦𑀁 𑀦𑀯𑀼𑀢𑀻𑀦𑀁, 𑀅𑀲𑀻𑀢𑀺𑀬𑀸𑀧𑀺 𑀘 𑀓𑁄𑀝𑀺𑀦𑀁;

𑀏𑀢𑁂 𑀆𑀲𑀼𑀁 𑀢𑀬𑁄 𑀞𑀸𑀦𑀸, 𑀯𑀺𑀫𑀮𑀸𑀦𑀁 𑀲𑀫𑀸𑀕𑀫𑁂’’𑀢𑀺.

𑀢𑀢𑁆𑀣 𑀦𑀯𑀼𑀢𑀻𑀦𑀁, 𑀅𑀲𑀻𑀢𑀺𑀬𑀸𑀧𑀺 𑀘 𑀓𑁄𑀝𑀺𑀦𑀦𑁆𑀢𑀺 𑀦𑀯𑀼𑀢𑀻𑀦𑀁 𑀓𑁄𑀝𑀻𑀦𑀁 𑀅𑀲𑀻𑀢𑀺𑀬𑀸𑀧𑀺 𑀘 𑀓𑁄𑀝𑀻𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂 𑀆𑀲𑀼𑀁 𑀢𑀬𑁄 𑀞𑀸𑀦𑀸𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀸𑀦𑀺 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀞𑀸𑀦𑀸𑀦𑁂 𑀢𑀸𑀦𑀺 𑀢𑀻𑀡𑀺 𑀅𑀳𑁂𑀲𑀼’’𑀦𑁆𑀢𑀺𑀧𑀺 𑀧𑀸𑀞𑁄.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀼𑀭𑀲𑁂𑀦𑀦𑀕𑀭𑁂 𑀫𑀗𑁆𑀕𑀮𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀯𑁂𑀤𑀯𑁂𑀤𑀗𑁆𑀕𑀸𑀦𑀁 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁂𑀓𑀓𑁄𑀝𑀺𑀲𑀗𑁆𑀔𑀁 𑀥𑀦𑀲𑀦𑁆𑀦𑀺𑀘𑀬𑀁 𑀤𑀻𑀦𑀸𑀦𑀸𑀣𑀸𑀤𑀻𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀺𑀯𑁂𑀓𑀸𑀭𑀸𑀫𑁄 𑀳𑀼𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑁋 ‘‘𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 𑀅𑀬𑀁 𑀚𑀫𑁆𑀩𑀼𑀤𑀻𑀧𑁄 𑀧𑀜𑁆𑀜𑀸𑀬𑀢𑀺, 𑀇𑀤𑁆𑀥𑀺𑀬𑀸 𑀢𑀁 𑀚𑀫𑁆𑀩𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁄 𑀨𑀮𑀁 𑀆𑀳𑀭𑀺𑀢𑁆𑀯𑀸 𑀦𑀯𑀼𑀢𑀺𑀓𑁄𑀝𑀺𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀁 𑀲𑀺𑀤𑁆𑀥𑀢𑁆𑀣𑀁 𑀲𑀢𑁆𑀣𑀸𑀭𑀁 𑀲𑀼𑀭𑀲𑁂𑀦𑀯𑀺𑀳𑀸𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀚𑀫𑁆𑀩𑀼𑀨𑀮𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺 ¶ . 𑀅𑀣 𑀲𑀢𑁆𑀣𑀸 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑁋 ‘‘𑀇𑀢𑁄 𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀢𑀸𑀧𑀲𑁄;

𑀉𑀕𑁆𑀕𑀢𑁂𑀚𑁄 𑀤𑀼𑀧𑁆𑀧𑀲𑀳𑁄, 𑀅𑀪𑀺𑀜𑁆𑀜𑀸𑀩𑀮𑀲𑀫𑀸𑀳𑀺𑀢𑁄.

𑁯.

‘‘𑀚𑀫𑁆𑀩𑀼𑀢𑁄 𑀨𑀮𑀫𑀸𑀦𑁂𑀢𑁆𑀯𑀸, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀤𑀸𑀲𑀳𑀁;

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁦.

‘‘𑀧𑀲𑁆𑀲𑀣 ¶ 𑀇𑀫𑀁 𑀢𑀸𑀧𑀲𑀁, 𑀚𑀝𑀺𑀮𑀁 𑀉𑀕𑁆𑀕𑀢𑀸𑀧𑀦𑀁;

𑀘𑀢𑀼𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁧.

‘‘𑀧𑀥𑀸𑀦𑀁 ¶ 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁨.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀤𑀼𑀧𑁆𑀧𑀲𑀳𑁄𑀢𑀺 𑀤𑀼𑀭𑀸𑀲𑀤𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀯𑁂𑀪𑀸𑀭𑀁 𑀦𑀸𑀫 𑀅𑀳𑁄𑀲𑀺. 𑀉𑀤𑁂𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀚𑀬𑀲𑁂𑀦𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁, 𑀲𑀼𑀨𑀲𑁆𑀲𑀸 𑀦𑀸𑀫 𑀫𑀸𑀢𑀸, 𑀲𑀫𑁆𑀩𑀮𑁄 𑀘 𑀲𑀼𑀫𑀺𑀢𑁆𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀭𑁂𑀯𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀻𑀯𑀮𑀸 𑀘 𑀲𑀼𑀭𑀸𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀓𑀡𑀺𑀓𑀸𑀭𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺. 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼, 𑀲𑁄𑀫𑀦𑀲𑁆𑀲𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺, 𑀅𑀦𑀼𑀧𑀫𑁄 𑀦𑀸𑀫 𑀧𑀼𑀢𑁆𑀢𑁄, 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩.

‘‘𑀯𑁂𑀪𑀸𑀭𑀁 𑀦𑀸𑀫 𑀦𑀕𑀭𑀁, 𑀉𑀤𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀨𑀲𑁆𑀲𑀸 𑀦𑀸𑀫 𑀚𑀦𑀺𑀓𑀸, 𑀲𑀺𑀤𑁆𑀥𑀺𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁮.

‘‘𑀲𑀫𑁆𑀩𑀮𑁄 𑀘 𑀲𑀼𑀫𑀺𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀭𑁂𑀯𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁯.

‘‘𑀲𑀻𑀯𑀮𑀸 𑀘 𑀲𑀼𑀭𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀓𑀡𑀺𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁧.

‘‘𑀲𑁄 ¶ 𑀩𑀼𑀤𑁆𑀥𑁄 𑀲𑀝𑁆𑀞𑀺𑀭𑀢𑀦𑀁, 𑀅𑀳𑁄𑀲𑀺 𑀦𑀪𑀫𑀼𑀕𑁆𑀕𑀢𑁄;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁨𑁨.

‘‘𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀅𑀢𑀼𑀮𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁩.

‘‘𑀯𑀺𑀧𑀼𑀮𑀁 ¶ 𑀧𑀪𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀧𑀼𑀧𑁆𑀨𑀸𑀧𑁂𑀢𑁆𑀯𑀸𑀦 𑀲𑀸𑀯𑀓𑁂;

𑀯𑀺𑀮𑀸𑀲𑁂𑀢𑁆𑀯𑀸 𑀲𑀫𑀸𑀧𑀢𑁆𑀬𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀲𑀝𑁆𑀞𑀺𑀭𑀢𑀦𑀦𑁆𑀢𑀺 𑀲𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀦𑀪𑀁 𑀉𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄𑀢𑀺 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀓𑀦𑀓𑀫𑀬𑀅𑀕𑁆𑀖𑀺𑀬𑀲𑀤𑀺𑀲𑀤𑀲𑁆𑀲𑀦𑁄𑀢𑀺 𑀅𑀢𑁆𑀣𑁄. 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀤𑀲𑀲𑀳𑀲𑁆𑀲𑀺𑀬𑀁 𑀯𑀺𑀭𑁄𑀘𑀢𑀺. 𑀯𑀺𑀧𑀼𑀮𑀦𑁆𑀢𑀺 𑀉𑀴𑀸𑀭𑀁 𑀑𑀪𑀸𑀲𑀁. 𑀧𑀼𑀧𑁆𑀨𑀸𑀧𑁂𑀢𑁆𑀯𑀸𑀦𑀸𑀢𑀺 ¶ 𑀛𑀸𑀦𑀸𑀪𑀺𑀜𑁆𑀜𑀸𑀫𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀧𑁆𑀨𑁂𑀳𑀺 𑀧𑀼𑀧𑁆𑀨𑀺𑀢𑁂 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀮𑀸𑀲𑁂𑀢𑁆𑀯𑀸𑀢𑀺 𑀯𑀺𑀮𑀸𑀲𑀬𑀺𑀢𑁆𑀯𑀸 𑀓𑀻𑀴𑀺𑀢𑁆𑀯𑀸. 𑀲𑀫𑀸𑀧𑀢𑁆𑀬𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀅𑀪𑀺𑀜𑁆𑀜𑀸𑀳𑀺 𑀘. 𑀦𑀺𑀩𑁆𑀩𑀼𑀢𑁄𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄.

𑀲𑀺𑀤𑁆𑀥𑀢𑁆𑀣𑁄 𑀓𑀺𑀭 𑀲𑀢𑁆𑀣𑀸 𑀓𑀜𑁆𑀘𑀦𑀯𑁂𑀴𑀼𑀦𑀕𑀭𑁂 𑀅𑀦𑁄𑀫𑀼𑀬𑁆𑀬𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀢𑁆𑀣𑁂𑀯𑀲𑁆𑀲 𑀭𑀢𑀦𑀫𑀬𑀁 𑀘𑀢𑀼𑀬𑁄𑀚𑀦𑀼𑀩𑁆𑀩𑁂𑀥𑀁 𑀘𑁂𑀢𑀺𑀬𑀫𑀓𑀁𑀲𑀽𑀢𑀺. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀺𑀤𑁆𑀥𑀢𑁆𑀣𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀲𑁄𑀴𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁧𑁯. 𑀢𑀺𑀲𑁆𑀲𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀢𑀲𑁆𑀲 ¶ 𑀧𑀦 𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀏𑀓𑁄 𑀓𑀧𑁆𑀧𑁄 𑀩𑀼𑀤𑁆𑀥𑀲𑀼𑀜𑁆𑀜𑁄 𑀅𑀳𑁄𑀲𑀺. 𑀇𑀢𑁄 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀢𑀺𑀲𑁆𑀲𑁄, 𑀨𑀼𑀲𑁆𑀲𑁄𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀢𑀺𑀲𑁆𑀲𑁄 𑀦𑀸𑀫 𑀫𑀳𑀸𑀧𑀼𑀭𑀺𑀲𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀔𑁂𑀫𑀓𑀦𑀕𑀭𑁂 𑀚𑀦𑀲𑀦𑁆𑀥𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀤𑀼𑀫𑀤𑀮𑀲𑀤𑀺𑀲𑀦𑀬𑀦𑀸𑀬 𑀧𑀤𑀼𑀫𑀸𑀦𑀸𑀫𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 ¶ 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀦𑁄𑀫𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀲𑀢𑁆𑀢𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀕𑀼𑀳𑀸𑀲𑁂𑀮-𑀦𑀸𑀭𑀺𑀲𑀬-𑀦𑀺𑀲𑀪𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑁂𑀢𑁆𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀼𑀪𑀤𑁆𑀤𑀸𑀤𑁂𑀯𑀺𑀬𑀸 𑀧𑀼𑀢𑁆𑀢𑁂 𑀆𑀦𑀦𑁆𑀤𑀓𑀼𑀫𑀸𑀭𑁂 𑀉𑀧𑁆𑀧𑀦𑁆𑀦𑁂 𑀲𑁄𑀦𑀼𑀢𑁆𑀢𑀭𑀁 𑀦𑀸𑀫 𑀅𑀦𑀼𑀢𑁆𑀢𑀭𑀁 𑀢𑀼𑀭𑀗𑁆𑀕𑀯𑀭𑀫𑀸𑀭𑀼𑀬𑁆𑀳 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀯𑀻𑀭𑀦𑀺𑀕𑀫𑁂 𑀯𑀻𑀭𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀮𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀚𑀺𑀢𑀲𑀗𑁆𑀕𑀸𑀫𑀓𑁂𑀦 𑀦𑀸𑀫 𑀬𑀯𑀧𑀸𑀮𑁂𑀦 𑀉𑀧𑀦𑀻𑀢𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀅𑀲𑀦𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀅𑀥𑀺𑀕𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀬𑀲𑀯𑀢𑀻 𑀦𑀕𑀭𑁂 𑀩𑁆𑀭𑀳𑁆𑀫𑀤𑁂𑀯𑀁 𑀉𑀤𑀬𑀜𑁆𑀘 𑀤𑁆𑀯𑁂 𑀭𑀸𑀚𑀧𑀼𑀢𑁆𑀢𑁂 𑀲𑀧𑀭𑀺𑀯𑀸𑀭𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀬𑀲𑀯𑀢𑀻𑀫𑀺𑀕𑀤𑀸𑀬𑁂 ¶ 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁂𑀦 𑀭𑀸𑀚𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀧𑀭𑀺𑀯𑀸𑀭𑀸𑀦𑀁 𑀅𑀯𑀺𑀲𑀸𑀭𑀺𑀦𑀸 𑀩𑁆𑀬𑀸𑀧𑀺𑀦𑀸 𑀫𑀥𑀼𑀭𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄𑀯 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀸𑀦𑀁 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀧𑀭𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀅𑀦𑀦𑁆𑀢𑀢𑁂𑀚𑁄 𑀅𑀫𑀺𑀢𑀬𑀲𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁨.

‘‘𑀢𑀫𑀦𑁆𑀥𑀓𑀸𑀭𑀁 ¶ 𑀯𑀺𑀥𑀫𑀺𑀢𑁆𑀯𑀸, 𑀑𑀪𑀸𑀲𑁂𑀢𑁆𑀯𑀸 𑀲𑀤𑁂𑀯𑀓𑀁;

𑀅𑀦𑀼𑀓𑀫𑁆𑀧𑀓𑁄 𑀫𑀳𑀸𑀯𑀻𑀭𑁄, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁩.

‘‘𑀢𑀲𑁆𑀲𑀸𑀧𑀺 𑀅𑀢𑀼𑀮𑀸 𑀇𑀤𑁆𑀥𑀺, 𑀅𑀢𑀼𑀮𑀁 𑀲𑀻𑀮𑀁 𑀲𑀫𑀸𑀥𑀺 𑀘;

𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁪.

‘‘𑀲𑁄 ¶ 𑀩𑀼𑀤𑁆𑀥𑁄 𑀤𑀲𑀲𑀳𑀲𑁆𑀲𑀺𑀫𑁆𑀳𑀺, 𑀯𑀺𑀜𑁆𑀜𑀸𑀧𑁂𑀲𑀺 𑀕𑀺𑀭𑀁 𑀲𑀼𑀘𑀺𑀁;

𑀓𑁄𑀝𑀺𑀲𑀢𑀸𑀦𑀺 𑀅𑀪𑀺𑀲𑀫𑀺𑀁𑀲𑀼, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂’’𑀢𑀺.

𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀧𑀸𑀭𑀁 𑀕𑀦𑁆𑀢𑁆𑀯𑀸. 𑀤𑀲𑀲𑀳𑀲𑁆𑀲𑀺𑀫𑁆𑀳𑀻𑀢𑀺 𑀤𑀲𑀲𑀳𑀲𑁆𑀲𑀺𑀬𑀁 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀢𑀺𑀲𑁆𑀲𑁂𑀦 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑁄𑀝𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀕𑀡𑀯𑀸𑀲𑀁 𑀧𑀳𑀸𑀬 𑀩𑁄𑀥𑀺𑀫𑀽𑀮𑀫𑀼𑀧𑀕𑀫𑀦𑀲𑀫𑀬𑁂 𑀅𑀜𑁆𑀜𑀢𑁆𑀭 𑀕𑀢𑀸. 𑀲𑀸 𑀢𑀺𑀲𑁆𑀲𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑀲𑀯𑀢𑀻𑀫𑀺𑀕𑀤𑀸𑀬𑀁 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀫𑀪𑀺𑀯𑀸𑀤𑁂𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀲𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀦𑀯𑀼𑀢𑀺𑀬𑀸 𑀓𑁄𑀝𑀻𑀦𑀁 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀧𑀼𑀦 𑀫𑀳𑀸𑀫𑀗𑁆𑀕𑀮𑀲𑀫𑀸𑀕𑀫𑁂 𑀫𑀗𑁆𑀕𑀮𑀧𑀭𑀺𑀬𑁄𑀲𑀸𑀦𑁂 𑀲𑀝𑁆𑀞𑀺𑀬𑀸 𑀓𑁄𑀝𑀻𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀤𑀼𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀲𑀝𑁆𑀞𑀺𑀓𑁄𑀝𑀺𑀬𑁄;

𑀩𑀦𑁆𑀥𑀦𑀸𑀢𑁄 𑀧𑀫𑁄𑀘𑁂𑀲𑀺, 𑀲𑀢𑁆𑀢𑁂 𑀦𑀭𑀫𑀭𑀽 𑀢𑀤𑀸’’𑀢𑀺.

𑀢𑀢𑁆𑀣 𑀤𑀼𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀻𑀦𑀦𑁆𑀢𑀺 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺 𑀦𑀯𑀼𑀢𑀺𑀓𑁄𑀝𑀺𑀧𑀸𑀡𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀩𑀦𑁆𑀥𑀦𑀸𑀢𑁄𑀢𑀺 𑀩𑀦𑁆𑀥𑀦𑀢𑁄, 𑀤𑀲𑀳𑀺 𑀲𑀁𑀬𑁄𑀚𑀦𑁂𑀳𑀺 𑀧𑀭𑀺𑀫𑁄𑀘𑁂𑀲𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀧𑀭𑀺𑀫𑁄𑀘𑀺𑀢𑁂 𑀲𑀢𑁆𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀭𑀫𑀭𑀽’’𑀢𑀺 𑀆𑀳. 𑀦𑀭𑀫𑀭𑀽𑀢𑀺 𑀦𑀭𑀸𑀫𑀭𑁂.

𑀬𑀲𑀯𑀢𑀻𑀦𑀕𑀭𑁂 𑀓𑀺𑀭 𑀅𑀦𑁆𑀢𑁄𑀯𑀲𑁆𑀲𑀁 𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀯𑀸𑀭𑁂𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀉𑀪𑀢𑁄 𑀲𑀼𑀚𑀸𑀢𑀲𑁆𑀲 ¶ 𑀲𑀼𑀚𑀸𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀦𑀸𑀭𑀺𑀯𑀸𑀳𑀦𑀓𑀼𑀫𑀸𑀭𑁄 𑀦𑀸𑀭𑀺𑀯𑀸𑀳𑀦𑀦𑀕𑀭𑀁 𑀅𑀦𑀼𑀧𑁆𑀧𑀢𑁆𑀢𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀲𑀧𑀭𑀺𑀯𑀸𑀭𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀲𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀲𑀤𑀺𑀲𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀧𑀼𑀢𑁆𑀢𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀲𑁆𑀲 𑀢𑀺𑀲𑁆𑀲𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺. 𑀢𑀲𑁆𑀲 𑀓𑀺𑀭 𑀲𑀸 𑀧𑀩𑁆𑀩𑀚𑁆𑀚𑀸 𑀲𑀩𑁆𑀩𑀤𑀺𑀲𑀸𑀲𑀼 𑀧𑀸𑀓𑀝𑀸 𑀅𑀳𑁄𑀲𑀺. 𑀢𑀲𑁆𑀫𑀸 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀦𑀸𑀭𑀺𑀯𑀸𑀳𑀦𑀓𑀼𑀫𑀸𑀭𑀁 𑀫𑀳𑀸𑀚𑀦𑁄 𑀅𑀦𑀼𑀧𑀩𑁆𑀩𑀚𑀺. 𑀢𑀤𑀸 𑀢𑀣𑀸𑀕𑀢𑁄 𑀦𑀯𑀼𑀢𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀫𑀚𑁆𑀛𑀕𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺 ¶ , 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀔𑁂𑀫𑀯𑀢𑀻𑀦𑀕𑀭𑁂 ¶ 𑀜𑀸𑀢𑀺𑀲𑀫𑀸𑀕𑀫𑁂 𑀩𑀼𑀤𑁆𑀥𑀯𑀁𑀲𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀼𑀕𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀺𑀲𑁆𑀲𑁂 𑀮𑁄𑀓𑀕𑁆𑀕𑀦𑀸𑀬𑀓𑁂;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭.

‘‘𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮.

‘‘𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀧𑀼𑀧𑁆𑀨𑀺𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀬𑀸’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀬𑀲𑀯𑀢𑀻𑀦𑀕𑀭𑁂 𑀲𑀼𑀚𑀸𑀢𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀇𑀤𑁆𑀥𑀁 𑀨𑀻𑀢𑀁 𑀚𑀦𑀧𑀤𑀁 𑀅𑀦𑁂𑀓𑀓𑁄𑀝𑀺𑀥𑀦𑀲𑀦𑁆𑀦𑀺𑀘𑀬𑀁 𑀅𑀦𑀼𑀭𑀸𑀕𑀫𑀼𑀧𑀕𑀢𑀳𑀤𑀬𑀜𑁆𑀘 𑀧𑀭𑀺𑀚𑀦𑀁 𑀢𑀺𑀡𑀦𑀴𑀫𑀺𑀯 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀚𑀸𑀢𑀺𑀆𑀤𑀻𑀲𑀼 𑀲𑀁𑀯𑀺𑀕𑁆𑀕𑀳𑀤𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀳𑀼𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄 𑀳𑀼𑀢𑁆𑀯𑀸 𑀲𑀧𑀢𑀺𑀲𑁆𑀲𑁄 𑀢𑀺𑀲𑁆𑀲𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀳𑀦𑁆𑀤𑀸𑀳𑀁 𑀫𑀦𑁆𑀤𑀸𑀭𑀯𑀧𑀸𑀭𑀺𑀘𑁆𑀙𑀢𑁆𑀢𑀓𑀸𑀤𑀻𑀳𑀺 𑀤𑀺𑀩𑁆𑀩𑀓𑀼𑀲𑀼𑀫𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀇𑀤𑁆𑀥𑀺𑀬𑀸 𑀲𑀕𑁆𑀕𑀮𑁄𑀓𑀁 𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀮𑀢𑀸𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀤𑀼𑀫𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀦𑁆𑀤𑀸𑀭𑀯𑀸𑀤𑀻𑀳𑀺 𑀤𑀺𑀩𑁆𑀩𑀓𑀼𑀲𑀼𑀫𑁂𑀳𑀺 𑀭𑀢𑀦𑀫𑀬𑀁 𑀘𑀗𑁆𑀓𑁄𑀝𑀓𑀁 𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀧𑀽𑀭𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀕𑀦𑀢𑀮𑁂𑀦 𑀆𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀲𑀼𑀭𑀪𑀺𑀓𑀼𑀲𑀼𑀫𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑀺. 𑀏𑀓𑀜𑁆𑀘 𑀫𑀡𑀺𑀤𑀡𑁆𑀟𑀓𑀁 𑀲𑀼𑀯𑀡𑁆𑀡𑀫𑀬𑀓𑀡𑁆𑀡𑀺𑀓𑀁 𑀧𑀤𑀼𑀫𑀭𑀸𑀕𑀫𑀡𑀺𑀫𑀬𑀧𑀡𑁆𑀡𑀁 𑀲𑀼𑀕𑀦𑁆𑀥𑀓𑁂𑀲𑀭𑀘𑁆𑀙𑀢𑁆𑀢𑀁 𑀯𑀺𑀬 𑀧𑀤𑀼𑀫𑀘𑁆𑀙𑀢𑁆𑀢𑀁 𑀪𑀕𑀯𑀢𑁄 𑀲𑀺𑀭𑀲𑀺 𑀥𑀸𑀭𑀬𑀦𑁆𑀢𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀅𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀸 𑀦𑀁 𑁋 ‘‘𑀇𑀢𑁄 𑀤𑁆𑀯𑁂𑀦𑀯𑀼𑀢𑁂 𑀓𑀧𑁆𑀧𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀅𑀳𑀁 ¶ 𑀢𑁂𑀦 𑀲𑀫𑀬𑁂𑀦, 𑀲𑀼𑀚𑀸𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀳𑀸𑀪𑁄𑀕𑀁 𑀙𑀟𑁆𑀟𑀬𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀇𑀲𑀺𑀧𑀩𑁆𑀩𑀚𑀁.

𑁧𑁦.

‘‘𑀫𑀬𑀺 ¶ 𑀧𑀩𑁆𑀩𑀚𑀺𑀢𑁂 𑀲𑀦𑁆𑀢𑁂, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄;

𑀩𑀼𑀤𑁆𑀥𑁄𑀢𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀧𑀻𑀢𑀺 𑀫𑁂 𑀉𑀧𑀧𑀚𑁆𑀚𑀣.

𑁧𑁧.

‘‘𑀤𑀺𑀩𑁆𑀩𑀁 ¶ 𑀫𑀦𑁆𑀤𑀸𑀭𑀯𑀁 𑀧𑀼𑀧𑁆𑀨𑀁, 𑀧𑀤𑀼𑀫𑀁 𑀧𑀸𑀭𑀺𑀙𑀢𑁆𑀢𑀓𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀥𑀼𑀦𑀫𑀸𑀦𑁄 𑀉𑀧𑀸𑀕𑀫𑀺𑀁.

𑁧𑁨.

‘‘𑀘𑀸𑀢𑀼𑀯𑀡𑁆𑀡𑀧𑀭𑀺𑀯𑀼𑀢𑀁, 𑀢𑀺𑀲𑁆𑀲𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀢𑀫𑀳𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸, 𑀫𑀢𑁆𑀣𑀓𑁂 𑀥𑀸𑀭𑀬𑀺𑀁 𑀚𑀺𑀦𑀁.

𑁧𑁩.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀚𑀦𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁫.

‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀫𑀬𑀺 𑀧𑀩𑁆𑀩𑀚𑀺𑀢𑁂𑀢𑀺 𑀫𑀬𑀺 𑀧𑀩𑁆𑀩𑀚𑀺𑀢𑀪𑀸𑀯𑀁 𑀉𑀧𑀕𑀢𑁂. ‘‘𑀫𑀫 𑀧𑀩𑁆𑀩𑀚𑀺𑀢𑀁 𑀲𑀦𑁆𑀢’’𑀦𑁆𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, 𑀲𑁄 𑀧𑀫𑀸𑀤𑀮𑁂𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀧𑀚𑁆𑀚𑀣𑀸𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀉𑀪𑁄 𑀳𑀢𑁆𑀣𑁂𑀳𑀻𑀢𑀺 𑀉𑀪𑁂𑀳𑀺 𑀳𑀢𑁆𑀣𑁂𑀳𑀺. 𑀧𑀕𑁆𑀕𑀬𑁆𑀳𑀸𑀢𑀺 𑀕𑀳𑁂𑀢𑁆𑀯𑀸𑀦. 𑀥𑀼𑀦𑀫𑀸𑀦𑁄𑀢𑀺 𑀯𑀸𑀓𑀘𑀻𑀭𑀸𑀦𑀺 𑀯𑀺𑀥𑀼𑀦𑀫𑀸𑀦𑁄𑀯. 𑀘𑀸𑀢𑀼𑀯𑀡𑁆𑀡𑀧𑀭𑀺𑀯𑀼𑀢𑀦𑁆𑀢𑀺 𑀘𑀢𑀼𑀧𑀭𑀺𑀲𑀧𑀭𑀺𑀯𑀼𑀢𑀁, 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀧𑀭𑀺𑀯𑀼𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀯𑀡𑁆𑀡𑁂𑀳𑀺 𑀧𑀭𑀺𑀯𑀼𑀢’’𑀦𑁆𑀢𑀺 𑀧𑀞𑀦𑁆𑀢𑀺 𑀓𑁂𑀘𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀔𑁂𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀚𑀦𑀲𑀦𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀧𑀤𑀼𑀫𑀸 𑀦𑀸𑀫 𑀚𑀦𑀺𑀓𑀸, 𑀩𑁆𑀭𑀳𑁆𑀫𑀤𑁂𑀯𑁄 𑀘 𑀉𑀤𑀬𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀫𑀗𑁆𑀕𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀨𑀼𑀲𑁆𑀲𑀸 𑀘 𑀲𑀼𑀤𑀢𑁆𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀅𑀲𑀦𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼, 𑀲𑀼𑀪𑀤𑁆𑀤𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀆𑀦𑀦𑁆𑀤𑁄 𑀦𑀸𑀫 𑀧𑀼𑀢𑁆𑀢𑁄, 𑀢𑀼𑀭𑀗𑁆𑀕𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁬.

‘‘𑀔𑁂𑀫𑀓𑀁 𑀦𑀸𑀫 𑀦𑀕𑀭𑀁, 𑀚𑀦𑀲𑀦𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀧𑀤𑀼𑀫𑀸 𑀦𑀸𑀫 𑀚𑀦𑀺𑀓𑀸, 𑀢𑀺𑀲𑁆𑀲𑀲𑁆𑀲 𑀘 𑀫𑀳𑁂𑀲𑀺𑀦𑁄.

𑁨𑁧.

‘‘𑀩𑁆𑀭𑀳𑁆𑀫𑀤𑁂𑀯𑁄 ¶ ¶ 𑀘 𑀉𑀤𑀬𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀫𑀗𑁆𑀕𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀢𑀺𑀲𑁆𑀲𑀲𑁆𑀲 𑀘 𑀫𑀳𑁂𑀲𑀺𑀦𑁄.

𑁨𑁨.

‘‘𑀨𑀼𑀲𑁆𑀲𑀸 ¶ 𑀘𑁂𑀯 𑀲𑀼𑀤𑀢𑁆𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑀦𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁪.

‘‘𑀲𑁄 𑀩𑀼𑀤𑁆𑀥𑁄 𑀲𑀝𑁆𑀞𑀺𑀭𑀢𑀦𑁄, 𑀅𑀳𑀼 𑀉𑀘𑁆𑀘𑀢𑁆𑀢𑀦𑁂 𑀚𑀺𑀦𑁄;

𑀅𑀦𑀽𑀧𑀫𑁄 𑀅𑀲𑀤𑀺𑀲𑁄, 𑀳𑀺𑀫𑀯𑀸 𑀯𑀺𑀬 𑀤𑀺𑀲𑁆𑀲𑀢𑀺.

𑁨𑁫.

‘‘𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀆𑀬𑀼 𑀆𑀲𑀺 𑀅𑀦𑀼𑀢𑁆𑀢𑀭𑁄;

𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀮𑁄𑀓𑁂 𑀅𑀝𑁆𑀞𑀸𑀲𑀺 𑀘𑀓𑁆𑀔𑀼𑀫𑀸.

𑁨𑁬.

‘‘𑀉𑀢𑁆𑀢𑀫𑀁 𑀧𑀯𑀭𑀁 𑀲𑁂𑀝𑁆𑀞𑀁, 𑀅𑀦𑀼𑀪𑁄𑀢𑁆𑀯𑀸 𑀫𑀳𑀸𑀬𑀲𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁭.

‘‘𑀯𑀮𑀸𑀳𑀓𑁄𑀯 𑀅𑀦𑀺𑀮𑁂𑀦, 𑀲𑀽𑀭𑀺𑀬𑁂𑀦 𑀯𑀺𑀬 𑀉𑀲𑁆𑀲𑀯𑁄;

𑀅𑀦𑁆𑀥𑀓𑀸𑀭𑁄𑀯 𑀧𑀤𑀻𑀧𑁂𑀦, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀉𑀘𑁆𑀘𑀢𑁆𑀢𑀦𑁂𑀢𑀺 𑀉𑀘𑁆𑀘𑀪𑀸𑀯𑁂𑀦. 𑀳𑀺𑀫𑀯𑀸 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀳𑀺𑀫𑀯𑀸𑀯 𑀧𑀤𑀺𑀲𑁆𑀲𑀢𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑀣𑀸 𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄 𑀳𑀺𑀫𑀯𑀸 𑀧𑀜𑁆𑀘𑀧𑀩𑁆𑀩𑀢𑁄 𑀲𑀼𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀉𑀘𑁆𑀘𑀪𑀸𑀯𑁂𑀦 𑀘 𑀲𑁄𑀫𑁆𑀫𑀪𑀸𑀯𑁂𑀦 𑀘 𑀅𑀢𑀺𑀭𑀫𑀡𑀻𑀬𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺, 𑀏𑀯𑀁 𑀪𑀕𑀯𑀸𑀧𑀺 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀢𑁆𑀢𑀭𑁄𑀢𑀺 𑀦𑀸𑀢𑀺𑀤𑀻𑀖𑁄 𑀦𑀸𑀢𑀺𑀭𑀲𑁆𑀲𑁄. 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑀁 𑀧𑀯𑀭𑀁 𑀲𑁂𑀝𑁆𑀞𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀉𑀲𑁆𑀲𑀯𑁄𑀢𑀺 𑀳𑀺𑀫𑀩𑀺𑀦𑁆𑀤𑀼 𑀯𑀮𑀸𑀳𑀓𑀉𑀲𑁆𑀲𑀯𑀅𑀦𑁆𑀥𑀓𑀸𑀭𑀸 𑀯𑀺𑀬 𑀅𑀦𑀺𑀮𑀲𑀽𑀭𑀺𑀬𑀤𑀻𑀧𑁂𑀳𑀺 𑀅𑀦𑀺𑀘𑁆𑀘𑀢𑀸𑀦𑀺𑀮𑀲𑀽𑀭𑀺𑀬𑀤𑀻𑀧𑁂𑀳𑀺 𑀉𑀧𑀤𑁆𑀤𑀼𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀲𑀸𑀯𑀓𑁄 𑀪𑀕𑀯𑀸𑀢𑀺 𑀅𑀢𑁆𑀣𑁄.

𑀢𑀺𑀲𑁆𑀲𑁄 𑀓𑀺𑀭 𑀪𑀕𑀯𑀸 𑀲𑀼𑀦𑀦𑁆𑀤𑀯𑀢𑀻𑀦𑀕𑀭𑁂 𑀲𑀼𑀦𑀦𑁆𑀤𑀸𑀭𑀸𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀲𑀼 𑀧𑀸𑀓𑀝𑀫𑁂𑀯𑀸𑀢𑀺.

𑀢𑀺𑀲𑁆𑀲𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀲𑀢𑁆𑀢𑀭𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁨𑁦. 𑀨𑀼𑀲𑁆𑀲𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀢𑀲𑁆𑀲 ¶ ¶ ¶ 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸 𑀅𑀧𑀭𑀺𑀫𑀺𑀢𑀸𑀬𑀼𑀓𑀸 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀳𑀸𑀬𑀺𑀢𑁆𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀢𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀨𑀼𑀲𑁆𑀲𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀲𑁄𑀧𑀺 𑀪𑀕𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀓𑀸𑀲𑀺𑀓𑀦𑀕𑀭𑁂 𑀚𑀬𑀲𑁂𑀦𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀺𑀭𑀺𑀫𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀺𑀭𑀺𑀫𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀲𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀕𑀭𑀼𑀴𑀧𑀓𑁆𑀔-𑀳𑀁𑀲-𑀲𑀼𑀯𑀡𑁆𑀡𑀪𑀸𑀭𑀸𑀢𑀺 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀓𑀺𑀲𑀸𑀕𑁄𑀢𑀫𑀺𑀧𑁆𑀧𑀫𑀼𑀔𑀸𑀦𑀺 𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀅𑀦𑀼𑀧𑀫𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀅𑀮𑀗𑁆𑀓𑀢𑀕𑀚𑀯𑀭𑀓𑁆𑀔𑀦𑁆𑀥𑀕𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀧𑀩𑁆𑀩𑀚𑀺𑀢𑀁 𑀚𑀦𑀓𑁄𑀝𑀺 𑀅𑀦𑀼𑀧𑀩𑁆𑀩𑀚𑀺. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀙 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀢𑀢𑁄 𑀕𑀡𑀁 𑀧𑀳𑀸𑀬 𑀲𑀢𑁆𑀢𑀸𑀳𑀁 𑀏𑀓𑀘𑀭𑀺𑀬𑀁 𑀅𑀦𑀼𑀩𑁆𑀭𑀽𑀳𑀬𑀫𑀸𑀦𑁄 𑀯𑀲𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀅𑀜𑁆𑀜𑀢𑀭𑁂 𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀬 𑀲𑀺𑀭𑀺𑀯𑀟𑁆𑀠𑀸𑀬 𑀦𑀸𑀫 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀺𑀁𑀲𑀧𑀸𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀺𑀭𑀺𑀯𑀟𑁆𑀠𑁂𑀦 𑀦𑀸𑀫 𑀉𑀧𑀸𑀲𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀆𑀫𑀮𑀓𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑁄𑀝𑀻𑀦𑀁 𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀲𑀗𑁆𑀓𑀲𑁆𑀲𑀦𑀕𑀭𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀑𑀢𑀭𑀺𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀳𑀼 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀅𑀦𑀽𑀧𑀫𑁄 𑀅𑀲𑀫𑀲𑀫𑁄, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁨.

‘‘𑀲𑁄𑀧𑀺 𑀲𑀩𑁆𑀩𑀁 𑀢𑀫𑀁 𑀳𑀦𑁆𑀢𑁆𑀯𑀸, 𑀯𑀺𑀚𑀝𑁂𑀢𑁆𑀯𑀸 𑀫𑀳𑀸𑀚𑀝𑀁;

𑀲𑀤𑁂𑀯𑀓𑀁 𑀢𑀧𑁆𑀧𑀬𑀦𑁆𑀢𑁄, 𑀅𑀪𑀺𑀯𑀲𑁆𑀲𑀺 𑀅𑀫𑀢𑀫𑁆𑀩𑀼𑀦𑀸.

𑁩.

‘‘𑀥𑀫𑁆𑀫𑀘𑀓𑁆𑀓𑀁 ¶ ¶ 𑀧𑀯𑀢𑁆𑀢𑁂𑀦𑁆𑀢𑁂, 𑀨𑀼𑀲𑁆𑀲𑁂 𑀦𑀓𑁆𑀔𑀢𑁆𑀢𑀫𑀗𑁆𑀕𑀮𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 ¶ 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀻𑀢𑀺 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 ‘‘𑀫𑀡𑁆𑀟𑀓𑀧𑁆𑀧𑁄’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄. 𑀯𑀺𑀚𑀝𑁂𑀢𑁆𑀯𑀸𑀢𑀺 𑀧𑀝𑀺𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀫𑀳𑀸𑀚𑀝𑀦𑁆𑀢𑀺 𑀏𑀢𑁆𑀣 𑀚𑀝𑀸𑀢𑀺 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀳𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀲𑀁𑀲𑀺𑀩𑁆𑀩𑀦𑀢𑁄 𑀲𑀼𑀢𑁆𑀢𑀕𑀼𑀫𑁆𑀩𑀚𑀸𑀮𑀧𑀽𑀯𑀲𑀗𑁆𑀔𑀸𑀢𑀸 𑀚𑀝𑀸 𑀯𑀺𑀬𑀸𑀢𑀺 𑀚𑀝𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀫𑀳𑀸𑀚𑀝𑀁. 𑀲𑀤𑁂𑀯𑀓𑀦𑁆𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁. 𑀅𑀪𑀺𑀯𑀲𑁆𑀲𑀻𑀢𑀺 𑀧𑀸𑀯𑀲𑁆𑀲𑀺. 𑀅𑀫𑀢𑀫𑁆𑀩𑀼𑀦𑀸𑀢𑀺 𑀅𑀫𑀢𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑀓𑀣𑀸𑀲𑀮𑀺𑀮𑁂𑀦 𑀢𑀧𑁆𑀧𑀬𑀦𑁆𑀢𑁄 𑀧𑀸𑀯𑀲𑁆𑀲𑀻𑀢𑀺 𑀅𑀢𑁆𑀣𑁄.

𑀬𑀤𑀸 𑀧𑀦 𑀩𑀸𑀭𑀸𑀡𑀲𑀻𑀦𑀕𑀭𑁂 𑀲𑀺𑀭𑀺𑀯𑀟𑁆𑀠𑁄 𑀦𑀸𑀫 𑀭𑀸𑀚𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑁂𑀦 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀢𑀸𑀧𑀲𑀸𑀦𑀁 𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀲𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀦𑀯𑀼𑀢𑀺𑀬𑀸 𑀲𑀢𑀲𑀳𑀲𑁆𑀲𑀸𑀦𑀁 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀅𑀦𑀼𑀧𑀫𑀓𑀼𑀫𑀸𑀭𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀅𑀲𑀻𑀢𑀺𑀬𑀸 𑀲𑀢𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼;

𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀡𑁆𑀡𑀓𑀼𑀚𑁆𑀚𑀦𑀕𑀭𑁂 𑀲𑀼𑀭𑀓𑁆𑀔𑀺𑀢𑁄 𑀭𑀸𑀚𑀧𑀼𑀢𑁆𑀢𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀥𑀫𑁆𑀫𑀲𑁂𑀦𑀓𑀼𑀫𑀸𑀭𑁄 𑀘 𑀨𑀼𑀲𑁆𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑁂 𑀲𑀝𑁆𑀞𑀺𑀬𑀸 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀻𑀤𑀺𑀢𑁆𑀯𑀸 𑀢𑁂 𑀲𑀧𑀭𑀺𑀯𑀸𑀭𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀲𑀝𑁆𑀞𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀓𑀸𑀲𑀺𑀦𑀕𑀭𑁂 𑀚𑀬𑀲𑁂𑀦𑀭𑀜𑁆𑀜𑁄 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀜𑀸𑀢𑀻𑀦𑀁 𑀲𑀫𑀸𑀕𑀫𑁂 𑀩𑀼𑀤𑁆𑀥𑀯𑀁𑀲𑀁 𑀤𑁂𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀺 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀫𑀚𑁆𑀛𑀕𑀢𑁄 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀫𑀳𑀸𑀫𑀗𑁆𑀕𑀮𑀲𑀫𑀸𑀕𑀫𑁂 𑀫𑀗𑁆𑀕𑀮𑀓𑀣𑀁 𑀲𑀼𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀫𑀚𑁆𑀛𑀕𑀢𑁄 𑀲𑀼𑀕𑀢𑁄 ¶ 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀲𑀦𑁆𑀦𑀺𑀧𑀸𑀢𑀸 ¶ 𑀢𑀬𑁄 𑀆𑀲𑀼𑀁, 𑀨𑀼𑀲𑁆𑀲𑀲𑁆𑀲𑀧𑀺 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁬.

‘‘𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁 ¶ , 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁭.

‘‘𑀘𑀢𑁆𑀢𑀸𑀮𑀻𑀲𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀯𑁄𑀘𑁆𑀙𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀦’’𑀦𑁆𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀅𑀭𑀺𑀦𑁆𑀤𑀫𑀦𑀕𑀭𑁂 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀢𑁂𑀧𑀺𑀝𑀓𑀥𑀭𑁄 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺, 𑀲𑀻𑀮𑀧𑀸𑀭𑀫𑀺𑀜𑁆𑀘 𑀧𑀽𑀭𑁂𑀲𑀺. 𑀲𑁄𑀧𑀺 𑀦𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀔𑀢𑁆𑀢𑀺𑀬𑁄;

𑀙𑀟𑁆𑀟𑀬𑀺𑀢𑁆𑀯𑀸 𑀫𑀳𑀸𑀭𑀚𑁆𑀚𑀁, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁯.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀨𑀼𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁦.

‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁨.

‘‘𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁩.

‘‘𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀲𑀺𑀓𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀚𑀬𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀺𑀭𑀺𑀫𑀸 𑀦𑀸𑀫 𑀫𑀸𑀢𑀸, 𑀲𑀼𑀭𑀓𑁆𑀔𑀺𑀢𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀲𑀪𑀺𑀬𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀘𑀸𑀮𑀸 𑀘 𑀉𑀧𑀘𑀸𑀮𑀸 ¶ 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀆𑀫𑀮𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺 ¶ , 𑀆𑀬𑀼 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀓𑀺𑀲𑀸𑀕𑁄𑀢𑀫𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻, 𑀅𑀦𑀼𑀧𑀫𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪.

‘‘𑀓𑀸𑀲𑀺𑀓𑀁 𑀦𑀸𑀫 𑀦𑀕𑀭𑀁, 𑀚𑀬𑀲𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀺𑀭𑀺𑀫𑀸 𑀦𑀸𑀫 𑀚𑀦𑀺𑀓𑀸, 𑀨𑀼𑀲𑁆𑀲𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄…𑀧𑁂. ¶ …;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀆𑀫𑀡𑁆𑀟𑁄𑀢𑀺 𑀧𑀯𑀼𑀘𑁆𑀘𑀢𑀺…𑀧𑁂….

𑁨𑁨.

‘‘𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀲𑁄𑀧𑀺 𑀅𑀘𑁆𑀘𑀼𑀕𑁆𑀕𑀢𑁄 𑀫𑀼𑀦𑀺;

𑀲𑁄𑀪𑀢𑁂 𑀲𑀢𑀭𑀁𑀲𑀻𑀯, 𑀉𑀴𑀼𑀭𑀸𑀚𑀸𑀯 𑀧𑀽𑀭𑀺𑀢𑁄.

𑁨𑁩.

‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁪.

‘‘𑀑𑀯𑀤𑀺𑀢𑁆𑀯𑀸 𑀩𑀳𑀽 𑀲𑀢𑁆𑀢𑁂, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀩𑀳𑀽 𑀚𑀦𑁂;

𑀲𑁄𑀧𑀺 𑀲𑀢𑁆𑀣𑀸 𑀅𑀢𑀼𑀮𑀬𑀲𑁄, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀆𑀫𑀡𑁆𑀟𑁄𑀢𑀺 𑀆𑀫𑀮𑀓𑀭𑀼𑀓𑁆𑀔𑁄. 𑀑𑀯𑀤𑀺𑀢𑁆𑀯𑀸𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸, 𑀅𑀦𑀼𑀲𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁄𑀧𑀺 𑀲𑀢𑁆𑀣𑀸 𑀅𑀢𑀼𑀮𑀬𑀲𑁄𑀢𑀺 𑀲𑁄𑀧𑀺 𑀲𑀢𑁆𑀣𑀸 𑀅𑀫𑀺𑀢𑀬𑀲𑁄𑀢𑀺 𑀅𑀢𑁆𑀣𑁄. ‘‘𑀲𑁄 𑀚𑀳𑀺𑀢𑁆𑀯𑀸 𑀅𑀫𑀺𑀢𑀬𑀲𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀲𑁄 𑀲𑀩𑁆𑀩𑀫𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀺𑀲𑁂𑀲𑀁 𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀨𑀼𑀲𑁆𑀲𑁄 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀼𑀲𑀺𑀦𑀸𑀭𑀸𑀬𑀁 𑀲𑁂𑀦𑀸𑀭𑀸𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀥𑀸𑀢𑀼𑀬𑁄 𑀓𑀺𑀭𑀲𑁆𑀲 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁂𑀲𑀼𑀁. 𑀲𑁂𑀲𑀕𑀸𑀣𑀸𑀲𑀼 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀨𑀼𑀲𑁆𑀲𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀅𑀝𑁆𑀞𑀸𑀭𑀲𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁨𑁧. 𑀯𑀺𑀧𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀨𑀼𑀲𑁆𑀲𑀲𑁆𑀲 ¶ ¶ 𑀩𑀼𑀤𑁆𑀥𑀲𑁆𑀲 𑀅𑀧𑀭𑀪𑀸𑀕𑁂 𑀲𑀸𑀦𑁆𑀢𑀭𑀓𑀧𑁆𑀧𑁂 𑀢𑀲𑁆𑀫𑀺𑀜𑁆𑀘 𑀓𑀧𑁆𑀧𑁂 𑀯𑀻𑀢𑀺𑀯𑀢𑁆𑀢𑁂 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀚𑀺𑀢𑀲𑀩𑁆𑀩𑀓𑀧𑁆𑀧𑁄 𑀧𑀭𑀳𑀺𑀢𑀦𑀺𑀭𑀢𑀲𑀗𑁆𑀓𑀧𑁆𑀧𑁄 𑀲𑀩𑁆𑀩𑀢𑁆𑀣 𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀲𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑁂𑀓𑀭𑀢𑀦𑀫𑀡𑀺𑀯𑀺𑀲𑀭𑀲𑀫𑀼𑀚𑁆𑀚𑁄𑀢𑀺𑀢𑀪𑀯𑀦𑁂 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀅𑀦𑁂𑀓𑀩𑀦𑁆𑀥𑀼𑀫𑀢𑁄 𑀩𑀦𑁆𑀥𑀼𑀫𑀢𑁄 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀺𑀬𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀫𑀸𑀢𑀼𑀤𑀭𑀢𑁄 𑀅𑀲𑀺𑀢𑀦𑀻𑀭𑀤𑀭𑀸𑀚𑀺𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀦𑀺𑀓𑁆𑀔𑀫𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲 𑀮𑀓𑁆𑀔𑀡𑀧𑀸𑀞𑀓𑀸 𑀜𑀸𑀢𑀓𑀸 𑀘 ¶ 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀫𑁆𑀫𑀺𑀲𑀲𑀜𑁆𑀚𑀦𑀺𑀢𑀦𑁆𑀥𑀓𑀸𑀭𑀯𑀺𑀭𑀳𑁂𑀦 𑀯𑀺𑀲𑀼𑀤𑁆𑀥𑀁 𑀧𑀲𑁆𑀲𑀦𑁆𑀢𑀺, 𑀯𑀺𑀯𑀝𑁂𑀳𑀺 𑀯𑀸 𑀅𑀓𑁆𑀔𑀻𑀳𑀺 𑀧𑀲𑁆𑀲𑀢𑀻𑀢𑀺 ‘‘𑀯𑀺𑀧𑀲𑁆𑀲𑀻’’𑀢𑀺 𑀦𑀸𑀫𑀫𑀓𑀁𑀲𑀼. ‘‘𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻’’𑀢𑀺 𑀯𑀤𑀦𑁆𑀢𑀺. 𑀲𑁄 𑀅𑀝𑁆𑀞𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀦𑀦𑁆𑀤-𑀲𑀼𑀦𑀦𑁆𑀤-𑀲𑀺𑀭𑀺𑀫𑀸𑀦𑀸𑀫𑀓𑀸 𑀢𑀬𑁄 𑀘𑀲𑁆𑀲 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁.

𑀲𑀼𑀤𑀲𑁆𑀲𑀦𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀁 𑀇𑀢𑁆𑀣𑀻𑀦𑀁 𑀲𑀢𑀲𑀳𑀲𑁆𑀲𑀁 𑀯𑀻𑀲𑀢𑀺 𑀘 𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. ‘‘𑀲𑀼𑀢𑀦𑀽’’𑀢𑀺𑀧𑀺 𑀲𑀼𑀤𑀲𑁆𑀲𑀦𑀸 𑀯𑀼𑀘𑁆𑀘𑀢𑀺. 𑀲𑁄 𑀅𑀝𑁆𑀞𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀼𑀢𑀦𑀼𑀤𑁂𑀯𑀺𑀬𑀸 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁂 𑀦𑀸𑀫 𑀢𑀦𑀬𑁂 𑀚𑀸𑀢𑁂 𑀆𑀚𑀜𑁆𑀜𑀭𑀣𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀧𑀼𑀭𑀺𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀧𑀼𑀭𑀺𑀲𑁄 𑀅𑀝𑁆𑀞𑀫𑀸𑀲𑀁 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀤𑀲𑁆𑀲𑀦𑀲𑁂𑀝𑁆𑀞𑀺𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀼𑀲𑀼𑀫𑀲𑀫𑀮𑀗𑁆𑀓𑀢𑁂 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀼𑀚𑀸𑀢𑁂𑀦 𑀦𑀸𑀫 𑀬𑀯𑀧𑀸𑀮𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀧𑀸𑀝𑀮𑀺𑀩𑁄𑀥𑀺𑀁 𑀲𑀫𑀮𑀗𑁆𑀓𑀢𑀁 𑀤𑀺𑀲𑁆𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂𑀦 𑀢𑀁 𑀉𑀧𑀸𑀕𑀫𑀺.

𑀢𑀲𑁆𑀲𑀸 𑀧𑀦 𑀧𑀸𑀝𑀮𑀺𑀬𑀸 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀢𑀁 𑀤𑀺𑀯𑀲𑀁 𑀧𑀡𑁆𑀡𑀸𑀲𑀭𑀢𑀦𑁄 𑀳𑀼𑀢𑁆𑀯𑀸 𑀅𑀩𑁆𑀪𑀼𑀕𑁆𑀕𑀢𑁄 𑀲𑀸𑀔𑀸 𑀧𑀡𑁆𑀡𑀸𑀲𑀭𑀢𑀦𑀸 𑀉𑀩𑁆𑀩𑁂𑀥𑁂𑀦 𑀭𑀢𑀦𑀲𑀢𑀁 𑀅𑀳𑁄𑀲𑀺. 𑀢𑀁𑀤𑀺𑀯𑀲𑀫𑁂𑀯 𑀲𑀸 𑀧𑀸𑀝𑀮𑀻 𑀓𑀡𑁆𑀡𑀺𑀓𑀸𑀩𑀤𑁆𑀥𑁂𑀳𑀺 𑀯𑀺𑀬 𑀧𑀼𑀧𑁆𑀨𑁂𑀳𑀺 𑀧𑀭𑀫𑀲𑀼𑀭𑀪𑀺𑀕𑀦𑁆𑀥𑁂𑀳𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀜𑁆𑀙𑀦𑁆𑀦𑀸 𑀅𑀳𑁄𑀲𑀺. 𑀤𑀺𑀩𑁆𑀩𑀕𑀦𑁆𑀥𑁄 𑀯𑀸𑀬𑀢𑀺, 𑀦 𑀓𑁂𑀯𑀮𑀁 𑀢𑀤𑀸 𑀅𑀬𑀫𑁂𑀯 𑀧𑀼𑀧𑁆𑀨𑀺𑀢𑁄, 𑀤𑀲𑀲𑀳𑀲𑁆𑀲𑀺 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 ¶ 𑀧𑀸𑀝𑀮𑀺𑀬𑁄 𑀧𑀼𑀧𑁆𑀨𑀺𑀢𑀸𑀯. 𑀦 𑀓𑁂𑀯𑀮𑀁 ¶ 𑀧𑀸𑀝𑀮𑀺𑀬𑁄𑀯, 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀭𑀼𑀓𑁆𑀔𑀕𑀼𑀫𑁆𑀩𑀮𑀢𑀸𑀬𑁄𑀧𑀺 𑀧𑀼𑀧𑁆𑀨𑀺𑀁𑀲𑀼. 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀓𑀼𑀯𑀮𑀬𑀼𑀧𑁆𑀧𑀮𑀓𑀼𑀫𑀼𑀤𑁂𑀳𑀺 𑀲𑀜𑁆𑀙𑀦𑁆𑀦𑁄 𑀲𑀻𑀢𑀮𑀫𑀥𑀼𑀭𑀲𑀮𑀺𑀮𑁄 𑀅𑀳𑁄𑀲𑀺. 𑀲𑀩𑁆𑀩𑀫𑁆𑀧𑀺 𑀘 𑀤𑀲𑀲𑀳𑀲𑁆𑀲𑀺 𑀘𑀓𑁆𑀓𑀯𑀸𑀴𑀩𑁆𑀪𑀦𑁆𑀢𑀭𑀁 𑀥𑀚𑀫𑀸𑀮𑀸𑀓𑀼𑀮𑀁 𑀅𑀳𑁄𑀲𑀺. 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀫𑀸𑀮𑀸𑀕𑀼𑀮𑀯𑀺𑀧𑁆𑀧𑀓𑀺𑀡𑁆𑀡𑀁 𑀦𑀸𑀦𑀸𑀲𑀼𑀭𑀪𑀺𑀓𑀼𑀲𑀼𑀫𑀲𑀚𑁆𑀚𑀺𑀢𑀥𑀭𑀡𑀻𑀢𑀮𑀁 𑀥𑀽𑀧𑀘𑀼𑀡𑁆𑀡𑀦𑁆𑀥𑀓𑀸𑀭𑀁 𑀅𑀳𑁄𑀲𑀺. 𑀢𑀁 𑀉𑀧𑀕𑀦𑁆𑀢𑁆𑀯𑀸 𑀢𑁂𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑁋 ‘‘𑀬𑀸𑀯 𑀩𑀼𑀤𑁆𑀥𑁄 𑀦 𑀳𑁄𑀫𑀺, 𑀢𑀸𑀯 𑀇𑀢𑁄 𑀦 𑀉𑀝𑁆𑀞𑀳𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀫𑀕𑁆𑀕𑀸𑀦𑀼𑀓𑁆𑀓𑀫𑁂𑀦 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀘𑀢𑁆𑀢𑀸𑀭𑀺 𑀨𑀮𑀜𑀸𑀡𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀘 𑀲𑀓𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂 𑀳𑀢𑁆𑀣𑀕𑀢𑁂 𑀓𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄𑀯 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸. (𑀥. 𑀧. 𑁧𑁫𑁩-𑁧𑁫𑁪);

‘‘𑀅𑀬𑁄𑀖𑀦𑀳𑀢𑀲𑁆𑀲𑁂𑀯, 𑀚𑀮𑀢𑁄 𑀚𑀸𑀢𑀯𑁂𑀤𑀲𑁄;

𑀅𑀦𑀼𑀧𑀼𑀩𑁆𑀩𑀽𑀧𑀲𑀦𑁆𑀢𑀲𑁆𑀲, 𑀬𑀣𑀸 𑀦 𑀜𑀸𑀬𑀢𑁂 𑀕𑀢𑀺.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀓𑀸𑀫𑀩𑀦𑁆𑀥𑁄𑀖𑀢𑀸𑀭𑀺𑀦𑀁;

𑀧𑀜𑁆𑀜𑀸𑀧𑁂𑀢𑀼𑀁 𑀕𑀢𑀻 𑀦𑀢𑁆𑀣𑀺, 𑀧𑀢𑁆𑀢𑀸𑀦𑀁 𑀅𑀘𑀮𑀁 𑀲𑀼𑀔’’𑀦𑁆𑀢𑀺. (𑀉𑀤𑀸. 𑁮𑁦) 𑁋

𑀏𑀯𑀁 ¶ 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑁂𑀫𑀸𑀢𑀺𑀓𑀲𑁆𑀲 𑀪𑀸𑀢𑀺𑀓𑀲𑁆𑀲 𑀔𑀡𑁆𑀟𑀓𑀼𑀫𑀸𑀭𑀲𑁆𑀲 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀑𑀢𑀭𑀺𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀉𑀬𑁆𑀬𑀸𑀦𑀧𑀸𑀮𑁂𑀦 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀧𑀭𑀺𑀯𑀸𑀭𑀸𑀦𑀁 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀅𑀧𑀭𑀺𑀫𑀺𑀢𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀨𑀼𑀲𑁆𑀲𑀲𑁆𑀲 𑀘 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀫𑁂𑀦, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁨.

‘‘𑀅𑀯𑀺𑀚𑁆𑀚𑀁 ¶ 𑀲𑀩𑁆𑀩𑀁 𑀧𑀤𑀸𑀮𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀁, 𑀧𑀓𑁆𑀓𑀸𑀫𑀺 𑀩𑀦𑁆𑀥𑀼𑀫𑀢𑀻𑀧𑀼𑀭𑀁.

𑁩.

‘‘𑀥𑀫𑁆𑀫𑀘𑀓𑁆𑀓𑀁 ¶ 𑀧𑀯𑀢𑁆𑀢𑁂𑀢𑁆𑀯𑀸, 𑀉𑀪𑁄 𑀩𑁄𑀥𑁂𑀲𑀺 𑀦𑀸𑀬𑀓𑁄;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀧𑀤𑀸𑀮𑁂𑀢𑁆𑀯𑀸𑀢𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀯𑀢𑁆𑀢𑁂𑀢𑁆𑀯𑀸 𑀘𑀓𑁆𑀓𑀫𑀸𑀭𑀸𑀫𑁂’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀆𑀭𑀸𑀫𑁂𑀢𑀺 𑀔𑁂𑀫𑁂 𑀫𑀺𑀕𑀤𑀸𑀬𑁂𑀢𑀺 𑀅𑀢𑁆𑀣𑁄. 𑀉𑀪𑁄 𑀩𑁄𑀥𑁂𑀲𑀻𑀢𑀺 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀔𑀡𑁆𑀟𑀁 𑀭𑀸𑀚𑀧𑀼𑀢𑁆𑀢𑀁 𑀢𑀺𑀲𑁆𑀲𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀦𑁆𑀢𑀺 𑀉𑀪𑁄 𑀩𑁄𑀥𑁂𑀲𑀺. 𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀤𑁂𑀯𑀢𑀸𑀦𑀁 𑀅𑀪𑀺𑀲𑀫𑀬𑀯𑀲𑁂𑀦 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀔𑀡𑁆𑀟𑀁 𑀭𑀸𑀚𑀧𑀼𑀢𑁆𑀢𑀁 𑀢𑀺𑀲𑁆𑀲𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀧𑀼𑀦𑀸𑀧𑀭𑀁 𑀅𑀫𑀺𑀢𑀬𑀲𑁄, 𑀢𑀢𑁆𑀣 𑀲𑀘𑁆𑀘𑀁 𑀧𑀓𑀸𑀲𑀬𑀺;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀔𑁂𑀫𑁂 𑀫𑀺𑀕𑀤𑀸𑀬𑁂𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀫𑁆𑀩𑀼𑀤𑁆𑀥𑀫𑀦𑀼𑀧𑀩𑁆𑀩𑀚𑀼’’𑀦𑁆𑀢𑀺 𑀏𑀢𑁆𑀣 𑀏𑀢𑁂 𑀧𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸𑀢𑀸 𑀧𑀼𑀭𑀺𑀲𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀉𑀧𑀝𑁆𑀞𑀸𑀓𑀧𑀼𑀭𑀺𑀲𑀸𑀬𑁂𑀯. 𑀢𑁂 𑀧𑀸𑀢𑁄𑀯 𑀯𑀺𑀧𑀲𑁆𑀲𑀺𑀓𑀼𑀫𑀸𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀫𑀤𑀺𑀲𑁆𑀯𑀸 𑀧𑀸𑀢𑀭𑀸𑀲𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 ‘‘𑀓𑀼𑀳𑀺𑀁 𑀓𑀼𑀫𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁄 ‘‘𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀢𑁆𑀣𑁂𑀯 𑀦𑀁 𑀤𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀦𑁆𑀢𑀸 𑀦𑀺𑀯𑀢𑁆𑀢𑀫𑀸𑀦𑀁 𑀢𑀲𑁆𑀲 𑀲𑀸𑀭𑀣𑀺𑀁 𑀤𑀺𑀲𑁆𑀯𑀸 ‘‘𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀲𑀩𑁆𑀩𑀸𑀪𑀭𑀡𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 ¶ 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀢𑁂 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀢𑀢𑁄 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀥𑀸𑀦𑀘𑀭𑀺𑀬𑀁 𑀘𑀭𑀦𑁆𑀢𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺, 𑀦 𑀔𑁄 𑀧𑀦𑀫𑁂𑀢𑀁 𑀧𑀸𑀢𑀺𑀭𑀽𑀧𑀁 𑀬𑀣𑁂𑀯 𑀫𑀁 𑀇𑀫𑁂 𑀕𑀺𑀳𑀺𑀪𑀽𑀢𑀸 𑀧𑀼𑀩𑁆𑀩𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀺, 𑀇𑀤𑀸𑀦𑀺𑀧𑀺 𑀢𑀣𑁂𑀯 𑀓𑀺𑀁 𑀇𑀫𑀺𑀦𑀸 𑀕𑀡𑁂𑀦𑀸’’𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀕𑀘𑁆𑀙𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑁋 ‘‘𑀅𑀚𑁆𑀚 𑀅𑀯𑁂𑀮𑀸, 𑀲𑀘𑁂 𑀧𑀦𑀸𑀳𑀁 ¶ 𑀅𑀚𑁆𑀚 𑀕𑀫𑀺𑀲𑁆𑀲𑀸𑀫𑀺, 𑀲𑀩𑁆𑀩𑁂𑀧𑀺𑀫𑁂 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑁆𑀯𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀁𑀤𑀺𑀯𑀲𑀜𑁆𑀘 𑀉𑀭𑀼𑀯𑁂𑀮𑀕𑀸𑀫𑀲𑀤𑀺𑀲𑁂 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑁆𑀯𑀸𑀢𑀦𑀸𑀬 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀫𑀳𑀸𑀧𑀼𑀭𑀺𑀲𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑁂 𑀢𑁂𑀲𑀁 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘 𑀧𑀸𑀬𑀸𑀲𑀫𑁂𑀯 𑀧𑀝𑀺𑀬𑀸𑀤𑀬𑀺𑀁𑀲𑀼. 𑀅𑀣 𑀯𑀺𑀧𑀲𑁆𑀲𑀻 𑀫𑀳𑀸𑀧𑀼𑀭𑀺𑀲𑁄 𑀧𑀼𑀦𑀤𑀺𑀯𑀲𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀢𑀲𑁆𑀫𑀺𑀁 𑀕𑀸𑀫𑁂 𑀢𑁂𑀳𑀺 ¶ 𑀧𑀩𑁆𑀩𑀚𑀺𑀢𑀚𑀦𑁂𑀳𑀺 𑀲𑀤𑁆𑀥𑀺𑀁 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀢𑀢𑁆𑀭 𑀢𑁂 𑀧𑀩𑁆𑀩𑀚𑀺𑀢𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀧𑀯𑀺𑀲𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀓𑀸𑀮𑁄 𑀦𑀺𑀓𑁆𑀔𑀫𑀺𑀢𑀼’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑁂 𑀓𑀺𑀭 𑀧𑀩𑁆𑀩𑀚𑀺𑀢𑀸 𑀲𑀸𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑁋 ‘‘𑀅𑀢𑀺𑀯𑀺𑀓𑀸𑀮𑁄 𑀚𑀸𑀢𑁄 𑀉𑀧𑀥𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑀸𑀧𑀺 ‘‘𑀓𑀼𑀳𑀺𑀁 𑀦𑀼 𑀕𑀢𑁄 𑀫𑀳𑀸𑀧𑀼𑀭𑀺𑀲𑁄’’𑀢𑀺 𑀦𑀸𑀦𑀼𑀩𑀦𑁆𑀥𑀺𑀁𑀲𑀼. ‘‘𑀕𑀡𑀯𑀸𑀲𑁂 𑀦𑀺𑀩𑁆𑀩𑀺𑀦𑁆𑀦𑁄 𑀏𑀓𑁄 𑀯𑀺𑀳𑀭𑀺𑀢𑀼𑀓𑀸𑀫𑁄 𑀫𑀜𑁆𑀜𑁂 𑀫𑀳𑀸𑀧𑀼𑀭𑀺𑀲𑁄 𑀩𑀼𑀤𑁆𑀥𑀪𑀽𑀢𑀁𑀬𑁂𑀯 𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀅𑀦𑁆𑀢𑁄𑀚𑀫𑁆𑀩𑀼𑀤𑀻𑀧𑀸𑀪𑀺𑀫𑀼𑀔𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀢𑁂 𑁋 ‘‘𑀯𑀺𑀧𑀲𑁆𑀲𑀺𑀦𑀸 𑀓𑀺𑀭 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀲𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑁂 𑀢𑁂 𑀧𑀩𑁆𑀩𑀚𑀺𑀢𑀸 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀢𑁂𑀲𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀤𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑁄 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀫𑁆𑀩𑀼𑀤𑁆𑀥𑀁 𑀅𑀦𑀼𑀧𑀩𑁆𑀩𑀚𑀼𑀁;

𑀢𑁂𑀲𑀫𑀸𑀭𑀸𑀫𑀧𑀢𑁆𑀢𑀸𑀦𑀁, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀘𑀓𑁆𑀔𑀼𑀫𑀸.

𑁬.

‘‘𑀲𑀩𑁆𑀩𑀸𑀓𑀸𑀭𑁂𑀦 𑀪𑀸𑀲𑀢𑁄, 𑀲𑀼𑀢𑁆𑀯𑀸 𑀉𑀧𑀦𑀺𑀲𑀸𑀤𑀺𑀦𑁄;

𑀢𑁂𑀧𑀺 𑀥𑀫𑁆𑀫𑀯𑀭𑀁 𑀕𑀦𑁆𑀢𑁆𑀯𑀸, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀫𑁆𑀩𑀼𑀤𑁆𑀥𑀁 𑀅𑀦𑀼𑀧𑀩𑁆𑀩𑀚𑀼𑀦𑁆𑀢𑀺 𑀏𑀢𑁆𑀣 𑀅𑀦𑀼𑀦𑀸 𑀬𑁄𑀕𑀢𑁄 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀘𑁆𑀙𑀸 𑀧𑀩𑁆𑀩𑀚𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀕𑀳𑁂𑀢𑀩𑁆𑀩𑀁. ‘‘𑀢𑀢𑁆𑀣 𑀆𑀭𑀸𑀫𑀧𑀢𑁆𑀢𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄. 𑀪𑀸𑀲𑀢𑁄𑀢𑀺 𑀯𑀤𑀢𑁄. 𑀉𑀧𑀦𑀺𑀲𑀸𑀤𑀺𑀦𑁄𑀢𑀺 ¶ 𑀕𑀦𑁆𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀥𑀫𑁆𑀫𑀤𑀸𑀦𑀁 𑀤𑀤𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀧𑀻𑀢𑀺 𑀢𑁂 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸𑀢𑀸 ¶ 𑀧𑀩𑁆𑀩𑀚𑀺𑀢𑀸 𑀯𑀺𑀧𑀲𑁆𑀲𑀺𑀲𑁆𑀲 𑀉𑀧𑀝𑁆𑀞𑀸𑀓𑀪𑀽𑀢𑀸. 𑀕𑀦𑁆𑀢𑁆𑀯𑀸𑀢𑀺 𑀢𑀲𑁆𑀲 𑀥𑀫𑁆𑀫𑀁 𑀜𑀢𑁆𑀯𑀸. 𑀏𑀯𑀁 𑀢𑁂𑀲𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀧𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑁂 𑀘 𑀅𑀕𑁆𑀕𑀲𑀸𑀯𑀓𑁂 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀝𑁆𑀞𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀻 𑀪𑀕𑀯𑀸 𑁋

‘‘𑀔𑀦𑁆𑀢𑀻𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻, 𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘‘𑀲𑀩𑁆𑀩𑀧𑀸𑀧𑀲𑁆𑀲 ¶ 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

‘‘𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩, 𑁧𑁮𑁪, 𑁧𑁮𑁫) 𑁋

𑀇𑀫𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀇𑀫𑀸 𑀧𑀦 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸𑀬𑁄 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑀲𑀳𑀲𑁆𑀲𑀸𑀦𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀯𑀺𑀧𑀲𑁆𑀲𑀺𑀲𑁆𑀲 𑀯𑁂𑀫𑀸𑀢𑀺𑀓𑀸 𑀢𑀬𑁄 𑀪𑀸𑀢𑀭𑁄 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀓𑀺𑀭𑀺𑀬𑀸𑀬 𑀮𑀤𑁆𑀥𑀯𑀭𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀦𑁂𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀸 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀁 𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀕𑀯𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮.

‘‘𑀅𑀝𑁆𑀞𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁯.

‘‘𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀢𑀢𑁆𑀣 𑀪𑀺𑀓𑁆𑀔𑀼𑀕𑀡𑀫𑀚𑁆𑀛𑁂, 𑀲𑀫𑁆𑀩𑀼𑀤𑁆𑀥𑁄 𑀅𑀢𑀺𑀭𑁄𑀘𑀢𑀻’’𑀢𑀺.

𑀢𑀢𑁆𑀣 ¶ 𑀅𑀝𑁆𑀞𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀝𑁆𑀞𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 ¶ 𑀢𑀢𑁆𑀣 𑀔𑁂𑀫𑁂 𑀫𑀺𑀕𑀤𑀸𑀬𑁂. 𑀪𑀺𑀓𑁆𑀔𑀼𑀕𑀡𑀫𑀚𑁆𑀛𑁂𑀢𑀺 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂. ‘‘𑀢𑀲𑁆𑀲 𑀪𑀺𑀓𑁆𑀔𑀼𑀕𑀡𑀫𑀚𑁆𑀛𑁂’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀢𑀼𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀅𑀦𑁂𑀓𑀦𑀸𑀕𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀳𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑀲𑁆𑀲 𑀤𑀲𑀩𑀮𑀲𑁆𑀲 𑀅𑀲𑀫𑀩𑀮𑀲𑀻𑀮𑀲𑁆𑀲 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀲𑁆𑀲 ¶ 𑀲𑀓𑁆𑀓𑀸𑀭𑀓𑀭𑀡𑀢𑁆𑀣𑀁 𑀲𑀢𑁆𑀢𑀭𑀢𑀦𑀫𑀬𑀁 𑀘𑀦𑁆𑀤𑀫𑀡𑁆𑀟𑀮𑀲𑀗𑁆𑀓𑀸𑀲𑀁 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀤𑀺𑀩𑁆𑀩𑀯𑀺𑀪𑀯𑀸𑀦𑀼𑀭𑀽𑀧𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀭𑀢𑀦𑀔𑀘𑀺𑀢𑀁 𑀫𑀳𑀸𑀭𑀳𑀁 𑀲𑀼𑀯𑀡𑁆𑀡𑀫𑀬𑀁 𑀦𑀸𑀦𑀸𑀫𑀡𑀺𑀚𑀼𑀢𑀺𑀯𑀺𑀲𑀭𑀲𑀫𑀼𑀚𑁆𑀚𑀮𑀁 𑀧𑀻𑀞𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀢𑀤𑀸 𑀦𑀁 𑀧𑀻𑀞𑀸𑀦𑀼𑀫𑁄𑀤𑀦𑀸𑀯𑀲𑀸𑀦𑁂 ‘‘𑀇𑀢𑁄 𑀅𑀬𑀁 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀸𑀕𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀅𑀢𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀧𑀼𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑁄.

𑁧𑁧.

‘‘𑀦𑁂𑀓𑀸𑀦𑀁 𑀦𑀸𑀕𑀓𑁄𑀝𑀻𑀦𑀁, 𑀧𑀭𑀺𑀯𑀸𑀭𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀯𑀚𑁆𑀚𑀦𑁆𑀢𑁄 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺, 𑀮𑁄𑀓𑀚𑁂𑀝𑁆𑀞𑀁 𑀉𑀧𑀸𑀕𑀫𑀺𑀁.

𑁧𑁨.

‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑀁, 𑀯𑀺𑀧𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀫𑀡𑀺𑀫𑀼𑀢𑁆𑀢𑀭𑀢𑀦𑀔𑀘𑀺𑀢𑀁, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀁;

𑀦𑀺𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀭𑀸𑀚𑀲𑁆𑀲, 𑀲𑀼𑀯𑀡𑁆𑀡𑀧𑀻𑀞𑀫𑀤𑀸𑀲𑀳𑀁.

𑁧𑁩.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪.

‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁.

𑁧𑁫.

‘‘𑀅𑀚𑀧𑀸𑀮𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀢𑀢𑁆𑀣 𑀧𑀸𑀬𑀸𑀲𑀁 𑀧𑀕𑁆𑀕𑀬𑁆𑀳, 𑀦𑁂𑀭𑀜𑁆𑀚𑀭𑀫𑀼𑀧𑁂𑀳𑀺𑀢𑀺.

𑁧𑁬.

‘‘𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀫𑁆𑀳𑀺, 𑀧𑀸𑀬𑀸𑀲𑀁 𑀅𑀤 𑀲𑁄 𑀚𑀺𑀦𑁄;

𑀧𑀝𑀺𑀬𑀢𑁆𑀢𑀯𑀭𑀫𑀕𑁆𑀕𑁂𑀦, 𑀩𑁄𑀥𑀺𑀫𑀽𑀮𑀫𑀼𑀧𑁂𑀳𑀺𑀢𑀺.

𑁧𑁭.

‘‘𑀢𑀢𑁄 ¶ 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀩𑁄𑀥𑀺𑀫𑀡𑁆𑀟𑀁 𑀅𑀦𑀼𑀢𑁆𑀢𑀭𑁄;

𑀅𑀲𑁆𑀲𑀢𑁆𑀣𑀫𑀽𑀮𑁂 𑀲𑀫𑁆𑀩𑁄𑀥𑀺𑀁, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁧𑁮.

‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁧𑁯.

‘‘𑀅𑀦𑀸𑀲𑀯𑀸 ¶ ¶ 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

𑁨𑁦.

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀅𑀦𑀸𑀲𑀯𑀸 𑀯𑀻𑀢𑀭𑀸𑀕𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺…𑀧𑁂….

𑁨𑁩.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀧𑀼𑀜𑁆𑀜𑀯𑀦𑁆𑀢𑁄𑀢𑀺 𑀧𑀼𑀜𑁆𑀜𑀯𑀸, 𑀲𑀫𑀼𑀧𑀘𑀺𑀢𑀧𑀼𑀜𑁆𑀜𑀲𑀜𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀚𑀼𑀢𑀺𑀦𑁆𑀥𑀭𑁄𑀢𑀺 𑀧𑀪𑀸𑀬𑀼𑀢𑁆𑀢𑁄. 𑀦𑁂𑀓𑀸𑀦𑀁 𑀦𑀸𑀕𑀓𑁄𑀝𑀻𑀦𑀦𑁆𑀢𑀺 𑀅𑀦𑁂𑀓𑀸𑀳𑀺 𑀦𑀸𑀕𑀓𑁄𑀝𑀻𑀳𑀺, 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀯𑀸𑀭𑁂𑀢𑁆𑀯𑀸𑀦𑀸𑀢𑀺 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀯𑀚𑁆𑀚𑀦𑁆𑀢𑁄𑀢𑀺 𑀯𑀸𑀤𑁂𑀦𑁆𑀢𑁄 𑀢𑀸𑀴𑁂𑀦𑁆𑀢𑁄. 𑀫𑀡𑀺𑀫𑀼𑀢𑁆𑀢𑀭𑀢𑀦𑀔𑀘𑀺𑀢𑀦𑁆𑀢𑀺 𑀫𑀡𑀺𑀫𑀼𑀢𑁆𑀢𑀸𑀤𑀻𑀳𑀺 𑀯𑀺𑀯𑀺𑀥𑁂𑀳𑀺 𑀭𑀢𑀦𑁂𑀳𑀺 𑀔𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀦𑁆𑀢𑀺 𑀲𑀩𑁆𑀩𑀸𑀪𑀭𑀡𑁂𑀳𑀺 𑀯𑀸𑀴𑀭𑀽𑀧𑀸𑀤𑀻𑀳𑀺 𑀭𑀢𑀦𑀫𑀬𑁂𑀳𑀺 𑀫𑀡𑁆𑀟𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀯𑀡𑁆𑀡𑀧𑀻𑀞𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁 𑀧𑀻𑀞𑀁. 𑀅𑀤𑀸𑀲𑀳𑀦𑁆𑀢𑀺 𑀅𑀤𑀸𑀲𑀺𑀁 𑀅𑀳𑀁.

𑀢𑀲𑁆𑀲 𑀧𑀦 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀫𑀸𑀢𑀸, 𑀔𑀡𑁆𑀟𑁄 𑀘 𑀢𑀺𑀲𑁆𑀲𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀲𑁄𑀓𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀘𑀦𑁆𑀤𑀸 𑀘 𑀘𑀦𑁆𑀤𑀫𑀺𑀢𑁆𑀢𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀸𑀝𑀮𑀺𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀲𑀩𑁆𑀩𑀓𑀸𑀮𑀁 𑀲𑀢𑁆𑀢 𑀬𑁄𑀚𑀦𑀸𑀦𑀺 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀲𑀼𑀢𑀦𑀼 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀆𑀚𑀜𑁆𑀜𑀭𑀣𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁪.

‘‘𑀦𑀕𑀭𑀁 ¶ 𑀩𑀦𑁆𑀥𑀼𑀫𑀢𑀻 𑀦𑀸𑀫, 𑀩𑀦𑁆𑀥𑀼𑀫𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀩𑀦𑁆𑀥𑀼𑀫𑀢𑀻 𑀦𑀸𑀫, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁯.

‘‘𑀔𑀡𑁆𑀟𑁄 ¶ 𑀘 𑀢𑀺𑀲𑁆𑀲𑀦𑀸𑀫𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀲𑁄𑀓𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁦.

‘‘𑀘𑀦𑁆𑀤𑀸 ¶ 𑀘 𑀘𑀦𑁆𑀤𑀫𑀺𑀢𑁆𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀧𑀸𑀝𑀮𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁩𑁨.

‘‘𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀯𑀺𑀧𑀲𑁆𑀲𑀻 𑀮𑁄𑀓𑀦𑀸𑀬𑀓𑁄;

𑀧𑀪𑀸 𑀦𑀺𑀤𑁆𑀥𑀸𑀯𑀢𑀻 𑀢𑀲𑁆𑀲, 𑀲𑀫𑀦𑁆𑀢𑀸 𑀲𑀢𑁆𑀢𑀬𑁄𑀚𑀦𑁂.

𑁩𑁩.

‘‘𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀩𑀼𑀤𑁆𑀥𑀲𑁆𑀲 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁪.

‘‘𑀩𑀳𑀼𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀩𑀦𑁆𑀥𑀦𑀸 𑀧𑀭𑀺𑀫𑁄𑀘𑀬𑀺;

𑀫𑀕𑁆𑀕𑀸𑀫𑀕𑁆𑀕𑀜𑁆𑀘 𑀆𑀘𑀺𑀓𑁆𑀔𑀺, 𑀅𑀯𑀲𑁂𑀲𑀧𑀼𑀣𑀼𑀚𑁆𑀚𑀦𑁂.

𑁩𑁫.

‘‘𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀤𑁂𑀲𑁂𑀢𑁆𑀯𑀸 𑀅𑀫𑀢𑀁 𑀧𑀤𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁩𑁬.

‘‘𑀇𑀤𑁆𑀥𑀺𑀯𑀭𑀁 𑀧𑀼𑀜𑁆𑀜𑀯𑀭𑀁, 𑀮𑀓𑁆𑀔𑀡𑀜𑁆𑀘 𑀓𑀼𑀲𑀼𑀫𑀺𑀢𑀁;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀩𑀦𑁆𑀥𑀦𑀸𑀢𑀺 𑀤𑁂𑀯𑀫𑀦𑀼𑀲𑁆𑀲𑁂 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀺𑀩𑀦𑁆𑀥𑀦𑀸 𑀫𑁄𑀘𑁂𑀲𑀺, 𑀯𑀺𑀓𑀸𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀸𑀫𑀕𑁆𑀕𑀜𑁆𑀘 𑀆𑀘𑀺𑀓𑁆𑀔𑀻𑀢𑀺 ‘‘𑀅𑀫𑀢𑀸𑀥𑀺𑀕𑀫𑀸𑀬 𑀅𑀬𑀁 𑀫𑀕𑁆𑀕𑁄 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑀸 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀫𑀕𑁆𑀕𑁄 𑀓𑀸𑀬𑀓𑀺𑀮𑀫𑀣𑀸𑀤𑀺𑀓𑁄 𑀦𑀸𑀬𑀁 𑀫𑀕𑁆𑀕𑁄’’𑀢𑀺 𑀲𑁂𑀲𑀧𑀼𑀣𑀼𑀚𑁆𑀚𑀦𑁂 𑀆𑀘𑀺𑀓𑁆𑀔𑀻𑀢𑀺 𑀅𑀢𑁆𑀣𑁄. 𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸𑀦𑀸𑀢𑀺 𑀫𑀕𑁆𑀕𑀜𑀸𑀡𑀸𑀮𑁄𑀓𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀮𑁄𑀓𑀜𑁆𑀘 𑀤𑀲𑁆𑀲𑀬𑀺𑀢𑁆𑀯𑀸. 𑀮𑀓𑁆𑀔𑀡𑀜𑁆𑀘 𑀓𑀼𑀲𑀼𑀫𑀺𑀢𑀦𑁆𑀢𑀺 𑀘𑀺𑀢𑁆𑀢𑀮𑀓𑁆𑀔𑀡𑀸𑀤𑀻𑀳𑀺 𑀨𑀼𑀮𑁆𑀮𑀺𑀢𑀁 𑀫𑀡𑁆𑀟𑀺𑀢𑀁 𑀪𑀕𑀯𑀢𑁄 𑀲𑀭𑀻𑀭𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀕𑀸𑀣𑀸𑀲𑀼 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀯𑀺𑀧𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀏𑀓𑀽𑀦𑀯𑀻𑀲𑀢𑀺𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁨𑁨. 𑀲𑀺𑀔𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀯𑀺𑀧𑀲𑁆𑀲𑀺𑀲𑁆𑀲 ¶ ¶ ¶ 𑀅𑀧𑀭𑀪𑀸𑀕𑁂 𑀅𑀦𑁆𑀢𑀭𑀳𑀺𑀢𑁂 𑀘 𑀢𑀲𑁆𑀫𑀺𑀁 𑀓𑀧𑁆𑀧𑁂 𑀢𑀢𑁄 𑀧𑀭𑀁 𑀏𑀓𑀽𑀦𑀲𑀝𑁆𑀞𑀺𑀬𑀸 𑀓𑀧𑁆𑀧𑁂𑀲𑀼 𑀩𑀼𑀤𑁆𑀥𑀸 𑀮𑁄𑀓𑁂 𑀦 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀅𑀧𑀕𑀢𑀩𑀼𑀤𑁆𑀥𑀸𑀮𑁄𑀓𑁄 𑀅𑀳𑁄𑀲𑀺. 𑀓𑀺𑀮𑁂𑀲𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀦𑀁 𑀏𑀓𑀭𑀚𑁆𑀚𑀁 𑀅𑀧𑀕𑀢𑀓𑀡𑁆𑀝𑀓𑀁 𑀅𑀳𑁄𑀲𑀺. 𑀇𑀢𑁄 𑀧𑀦 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀲𑀺𑀦𑀺𑀤𑁆𑀥𑀲𑀼𑀓𑁆𑀔𑀲𑀸𑀭𑀤𑀸𑀭𑀼𑀧𑀘𑀺𑀢𑁄 𑀧𑀳𑀽𑀢𑀲𑀧𑁆𑀧𑀺𑀲𑀺𑀢𑁆𑀢𑁄 𑀦𑀺𑀥𑀽𑀫𑁄 𑀲𑀺𑀔𑀻 𑀯𑀺𑀬 𑀲𑀺𑀔𑀻 𑀘 𑀯𑁂𑀲𑁆𑀲𑀪𑀽 𑀘𑀸𑀢𑀺 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑀢𑁆𑀣 𑀲𑀺𑀔𑀻 𑀧𑀦 𑀪𑀕𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀓𑀼𑀲𑀮𑀓𑀭𑀡𑀯𑀢𑀻 𑀅𑀭𑀼𑀡𑀯𑀢𑀻𑀦𑀕𑀭𑁂 𑀧𑀭𑀫𑀕𑀼𑀡𑀯𑀢𑁄 𑀅𑀭𑀼𑀡𑀯𑀢𑁄 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀭𑀢𑁆𑀢𑀓𑀦𑀓𑀧𑀝𑀺𑀩𑀺𑀫𑁆𑀩𑀭𑀼𑀘𑀺𑀭𑀧𑁆𑀧𑀪𑀸𑀬 𑀧𑀪𑀸𑀯𑀢𑀺𑀬𑀸 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲 𑀫𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀦𑀺𑀲𑀪𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀦𑁂𑀫𑀺𑀢𑁆𑀢𑀺𑀓𑀸 𑀧𑀦𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀸 𑀉𑀡𑁆𑀳𑀻𑀲𑀲𑁆𑀲 𑀲𑀺𑀔𑀸 𑀯𑀺𑀬 𑀉𑀕𑁆𑀕𑀢𑀢𑁆𑀢𑀸 ‘‘𑀲𑀺𑀔𑀻’’𑀢𑀺 𑀦𑀸𑀫𑀫𑀓𑀁𑀲𑀼. 𑀲𑁄 𑀲𑀢𑁆𑀢𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀲𑀼𑀘𑀦𑁆𑀤𑀓𑀲𑀺𑀭𑀻𑀕𑀺𑀭𑀺𑀬𑀲𑀦𑀸𑀭𑀺𑀯𑀲𑀪 𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀲𑀩𑁆𑀩𑀓𑀸𑀫𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀘𑀢𑀼𑀯𑀻𑀲𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀩𑁆𑀩𑀓𑀸𑀫𑀸𑀤𑁂𑀯𑀺𑀬𑀸 𑀕𑀼𑀡𑀕𑀡𑀸𑀢𑀼𑀮𑁂 𑀅𑀢𑀼𑀮𑁂 𑀦𑀸𑀫 𑀧𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀳𑀢𑁆𑀣𑀺𑀬𑀸𑀦𑁂𑀦 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀲𑀢𑁆𑀢𑀢𑀺𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀝𑁆𑀞𑀫𑀸𑀲𑀁 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀲𑀼𑀤𑀲𑁆𑀲𑀦𑀦𑀺𑀕𑀫𑁂 𑀧𑀺𑀬𑀤𑀲𑁆𑀲𑀻𑀲𑁂𑀝𑁆𑀞𑀺𑀦𑁄 𑀥𑀻𑀢𑀼𑀬𑀸 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀭𑀼𑀡𑀔𑀤𑀺𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀦𑁄𑀫𑀤𑀲𑁆𑀲𑀺𑀦𑀸 𑀦𑀸𑀫 𑀢𑀸𑀧𑀲𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀓𑀼𑀲𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀧𑀼𑀡𑁆𑀟𑀭𑀻𑀓𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺. 𑀢𑀲𑁆𑀲𑀸 𑀓𑀺𑀭 𑀧𑀼𑀡𑁆𑀟𑀭𑀻𑀓𑀩𑁄𑀥𑀺𑀬𑀸𑀧𑀺 𑀧𑀸𑀝𑀮𑀺𑀬𑀸 𑀧𑀫𑀸𑀡𑀫𑁂𑀯 𑀧𑀫𑀸𑀡𑀁 𑀅𑀳𑁄𑀲𑀺. 𑀢𑀁𑀤𑀺𑀯𑀲𑀫𑁂𑀯 𑀲𑁄 𑀧𑀡𑁆𑀡𑀸𑀲𑀭𑀢𑀦𑀓𑁆𑀔𑀦𑁆𑀥𑁄 𑀳𑀼𑀢𑁆𑀯𑀸 𑀅𑀩𑁆𑀪𑀼𑀕𑁆𑀕𑀢𑁄, 𑀲𑀸𑀔𑀸𑀧𑀺𑀲𑁆𑀲 𑀧𑀡𑁆𑀡𑀸𑀲𑀭𑀢𑀦𑀫𑀢𑁆𑀢𑀸𑀯. 𑀲𑁄 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀦 𑀓𑁂𑀯𑀮𑀁 𑀧𑀼𑀧𑁆𑀨𑁂𑀳𑁂𑀯, 𑀨𑀮𑁂𑀳𑀺𑀧𑀺 𑀲𑀜𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀢𑀲𑁆𑀲 𑀏𑀓𑀧𑀲𑁆𑀲𑀢𑁄 𑀢𑀭𑀼𑀡𑀸𑀦𑀺 𑀨𑀮𑀸𑀦𑀺 𑀏𑀓𑀢𑁄 𑀫𑀚𑁆𑀛𑀺𑀫𑀸𑀦𑀺 𑀏𑀓𑀢𑁄 𑀦𑀸𑀢𑀺𑀧𑀓𑁆𑀓𑀸𑀦𑀺 𑀏𑀓𑀢𑁄 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀸𑀦𑀺 𑀯𑀺𑀬 𑀲𑀼𑀭𑀲𑀸𑀦𑀺 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀢𑀢𑁄 𑀢𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀬𑀣𑀸 𑀘 𑀲𑁄 ¶ , 𑀏𑀯𑀁 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂𑀲𑀼 𑀧𑀼𑀧𑁆𑀨𑀽𑀧𑀕𑀸 𑀭𑀼𑀓𑁆𑀔𑀸 𑀧𑀼𑀧𑁆𑀨𑁂𑀳𑀺 𑀨𑀮𑀽𑀧𑀕𑀸 𑀭𑀼𑀓𑁆𑀔𑀸 𑀨𑀮𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸 𑀅𑀳𑁂𑀲𑀼𑀁.

𑀲𑁄 ¶ 𑀢𑀢𑁆𑀣 𑀘𑀢𑀼𑀯𑀻𑀲𑀢𑀺𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀻𑀤𑀺. 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀙𑀢𑁆𑀢𑀺𑀁𑀲 𑀬𑁄𑀚𑀦𑀯𑀺𑀢𑁆𑀣𑀢𑀁 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀲𑀢𑁆𑀢𑀢𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀼𑀭𑀧𑀣𑁂𑀦 𑀕𑀦𑁆𑀢𑁆𑀯𑀸 𑀯𑀺𑀯𑀺𑀥𑀸𑀯𑀭𑀡𑀯𑀢𑀺𑀬𑀸 𑀅𑀭𑀼𑀡𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀲𑀫𑀻𑀧𑁂 𑀫𑀺𑀕𑀸𑀚𑀺𑀦𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀢𑁂𑀳𑀺 𑀫𑀼𑀦𑀺𑀕𑀡𑁂𑀳𑀺 𑀧𑀭𑀺𑀯𑀼𑀢𑁄 𑀢𑁂𑀲𑀁 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀯𑀺𑀧𑀲𑁆𑀲𑀺𑀲𑁆𑀲 ¶ 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀲𑀺𑀔𑀺𑀯𑁆𑀳𑀬𑁄 𑀆𑀲𑀺 𑀚𑀺𑀦𑁄, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨.

‘‘𑀫𑀸𑀭𑀲𑁂𑀦𑀁 𑀧𑀫𑀤𑁆𑀤𑀺𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀺𑀦𑀁.

𑁩.

‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀲𑀺𑀔𑀺𑀫𑁆𑀳𑀺 𑀚𑀺𑀦𑀧𑀼𑀗𑁆𑀕𑀯𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀧𑀼𑀦𑀧𑀺 𑀅𑀭𑀼𑀡𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀲𑀫𑀻𑀧𑁂𑀬𑁂𑀯 𑀅𑀪𑀺𑀪𑀽𑀭𑀸𑀚𑀧𑀼𑀢𑁆𑀢𑀲𑁆𑀲 𑀘 𑀲𑀫𑁆𑀪𑀯𑀭𑀸𑀚𑀧𑀼𑀢𑁆𑀢𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀲𑀧𑀭𑀺𑀯𑀸𑀭𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀅𑀧𑀭𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂, 𑀕𑀡𑀲𑁂𑀝𑁆𑀞𑁂 𑀦𑀭𑀼𑀢𑁆𑀢𑀫𑁂;

𑀦𑀯𑀼𑀢𑁆𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀬𑀤𑀸 𑀧𑀦 𑀲𑀽𑀭𑀺𑀬𑀯𑀢𑀻𑀦𑀕𑀭𑀤𑁆𑀯𑀸𑀭𑁂 𑀘𑀫𑁆𑀧𑀓𑀭𑀼𑀓𑁆𑀔𑀫𑀽𑀮𑁂 𑀢𑀺𑀢𑁆𑀣𑀺𑀬𑀫𑀤𑀫𑀸𑀦𑀪𑀜𑁆𑀚𑀦𑀢𑁆𑀣𑀁 𑀲𑀩𑁆𑀩𑀚𑀦𑀩𑀦𑁆𑀥𑀦𑀫𑁄𑀓𑁆𑀔𑀢𑁆𑀣𑀜𑁆𑀘 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺 ¶ , 𑀢𑀤𑀸 𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫.

‘‘𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀜𑁆𑀘 ¶ , 𑀤𑀲𑁆𑀲𑀬𑀦𑁆𑀢𑁂 𑀲𑀤𑁂𑀯𑀓𑁂;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀅𑀪𑀺𑀪𑀼𑀦𑀸 𑀘 𑀲𑀫𑁆𑀪𑀯𑁂𑀦 𑀘 𑀭𑀸𑀚𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀅𑀭𑀼𑀡𑀯𑀢𑀻𑀦𑀕𑀭𑁂 𑀜𑀸𑀢𑀺𑀲𑀫𑀸𑀕𑀫𑁂 𑀧𑀩𑁆𑀩𑀚𑀺𑀢𑀸𑀦𑀁 𑀅𑀲𑀻𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀥𑀦𑀜𑁆𑀚𑀬𑀦𑀕𑀭𑁂 𑀥𑀦𑀧𑀸𑀮𑀓𑀦𑀸𑀕𑀯𑀺𑀦𑀬𑀦𑀲𑀫𑀬𑁂 𑀧𑀩𑁆𑀩𑀚𑀺𑀢𑀸𑀦𑀁 𑀲𑀢𑁆𑀢𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑀺𑀔𑀺𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭.

‘‘𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮.

‘‘𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 ¶ , 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀼𑀧𑀮𑀺𑀢𑁆𑀢𑁄 𑀧𑀤𑀼𑀫𑀁𑀯, 𑀢𑁄𑀬𑀫𑁆𑀳𑀺 𑀲𑀫𑁆𑀧𑀯𑀟𑁆𑀠𑀺𑀢’’𑀦𑁆𑀢𑀺.

𑀢𑀢𑁆𑀣 𑀅𑀦𑀼𑀧𑀮𑀺𑀢𑁆𑀢𑁄 𑀧𑀤𑀼𑀫𑀁𑀯𑀸𑀢𑀺 𑀢𑁄𑀬𑁂 𑀚𑀸𑀢𑀁 𑀢𑁄𑀬𑁂𑀯 𑀯𑀟𑁆𑀠𑀺𑀢𑀁 𑀧𑀤𑀼𑀫𑀁 𑀯𑀺𑀬 𑀢𑁄𑀬𑁂𑀦 𑀅𑀦𑀼𑀧𑀮𑀺𑀢𑁆𑀢𑀁, 𑀲𑁄𑀧𑀺 𑀪𑀺𑀓𑁆𑀔𑀼𑀲𑀦𑁆𑀦𑀺𑀧𑀸𑀢𑁄 𑀮𑁄𑀓𑁂 𑀚𑀸𑀢𑁄𑀧𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑀢𑀤𑀸 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀓𑀢𑁆𑀣𑀘𑀺 𑀅𑀲𑀁𑀲𑀝𑁆𑀞𑁄 𑀧𑀭𑀺𑀪𑀼𑀢𑁆𑀢𑀦𑀕𑀭𑁂 𑀅𑀭𑀺𑀦𑁆𑀤𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀲𑀺𑀔𑀺𑀫𑁆𑀳𑀺 𑀲𑀢𑁆𑀣𑀭𑀺 𑀧𑀭𑀺𑀪𑀼𑀢𑁆𑀢𑀦𑀕𑀭𑀫𑀦𑀼𑀧𑁆𑀧𑀢𑁆𑀢𑁂 𑀲𑀧𑀭𑀺𑀯𑀸𑀭𑁄 𑀭𑀸𑀚𑀸 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀲𑀸𑀤𑀯𑀟𑁆𑀠𑀺𑀢𑀳𑀤𑀬𑀦𑀬𑀦𑀲𑁄𑀢𑁄 𑀤𑀲𑀩𑀮𑀲𑁆𑀲 𑀅𑀫𑀮𑀘𑀭𑀡𑀓𑀫𑀮𑀬𑀼𑀕𑀴𑁂𑀲𑀼 𑀲𑀧𑀭𑀺𑀯𑀸𑀭𑁄 𑀲𑀺𑀭𑀲𑀸 𑀅𑀪𑀺𑀯𑀦𑁆𑀤𑀺𑀢𑁆𑀯𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀇𑀲𑁆𑀲𑀭𑀺𑀬𑀓𑀼𑀮𑀯𑀺𑀪𑀯𑀲𑀤𑁆𑀥𑀸𑀦𑀼𑀭𑀽𑀧𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀤𑀼𑀲𑁆𑀲𑀪𑀡𑁆𑀟𑀸𑀕𑀸𑀭𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ¶ 𑀫𑀳𑀕𑁆𑀖𑀸𑀦𑀺 𑀯𑀢𑁆𑀣𑀸𑀦𑀺 𑀅𑀤𑀸𑀲𑀺. 𑀅𑀢𑁆𑀢𑀦𑁄 𑀘 𑀩𑀮𑀭𑀽𑀧𑀮𑀓𑁆𑀔𑀡𑀚𑀯𑀲𑀫𑁆𑀧𑀦𑁆𑀦𑀳𑁂𑀫𑀚𑀸𑀮𑀫𑀸𑀮𑀸𑀲𑀫𑀮𑀗𑁆𑀓𑀢𑀁 𑀦𑀯𑀓𑀦𑀓𑀭𑀼𑀘𑀺𑀭𑀤𑀡𑁆𑀟𑀓𑁄𑀲𑀘𑀸𑀫𑀭𑀬𑀼𑀕𑀯𑀺𑀭𑀸𑀚𑀺𑀢𑀁 𑀯𑀺𑀧𑀼𑀮𑀫𑀼𑀤𑀼𑀓𑀡𑁆𑀡𑀁 𑀘𑀦𑁆𑀤𑀭𑀸𑀚𑀺𑀯𑀺𑀭𑀸𑀚𑀺𑀢𑀯𑀤𑀦𑀲𑁄𑀪𑀁 𑀏𑀭𑀸𑀯𑀡𑀯𑀸𑀭𑀡𑀫𑀺𑀯 𑀅𑀭𑀺𑀯𑀸𑀭𑀡𑀁 𑀯𑀭𑀯𑀸𑀭𑀡𑀁 𑀤𑀢𑁆𑀯𑀸 𑀯𑀸𑀭𑀡𑀧𑁆𑀧𑀫𑀸𑀡𑀫𑁂𑀯 ¶ 𑀓𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀜𑁆𑀘 𑀅𑀤𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 𑁋 ‘‘𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁯.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀅𑀭𑀺𑀦𑁆𑀤𑀫𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁦.

‘‘𑀩𑀳𑀼𑀁 𑀤𑀼𑀲𑁆𑀲𑀯𑀭𑀁 𑀤𑀢𑁆𑀯𑀸, 𑀤𑀼𑀲𑁆𑀲𑀓𑁄𑀝𑀺𑀁 𑀅𑀦𑀧𑁆𑀧𑀓𑀁;

𑀅𑀮𑀗𑁆𑀓𑀢𑀁 𑀳𑀢𑁆𑀣𑀺𑀬𑀸𑀦𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀳𑀁.

𑁧𑁧.

‘‘𑀳𑀢𑁆𑀣𑀺𑀬𑀸𑀦𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸, 𑀓𑀧𑁆𑀧𑀺𑀬𑀁 𑀉𑀧𑀦𑀸𑀫𑀬𑀺𑀁;

𑀧𑀽𑀭𑀬𑀺𑀁 𑀫𑀸𑀦𑀲𑀁 𑀫𑀬𑁆𑀳𑀁, 𑀦𑀺𑀘𑁆𑀘𑀁 𑀤𑀴𑁆𑀳𑀫𑀼𑀧𑀝𑁆𑀞𑀺𑀢𑀁.

𑁧𑁨.

‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀺𑀔𑀻 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩.

‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁.

𑁧𑁪.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀢𑀺 𑀢𑀲𑁆𑀲 𑀳𑀢𑁆𑀣𑀺𑀦𑁄 𑀧𑀫𑀸𑀡𑁂𑀦 𑀢𑀼𑀮𑀬𑀺𑀢𑁆𑀯𑀸. 𑀓𑀧𑁆𑀧𑀺𑀬𑀦𑁆𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑀁, 𑀪𑀺𑀓𑁆𑀔𑀽𑀦𑀁 𑀬𑀁 𑀪𑀡𑁆𑀟𑀁 𑀓𑀧𑁆𑀧𑀢𑀺 𑀕𑀳𑁂𑀢𑀼𑀁, 𑀢𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀦𑀸𑀫. 𑀧𑀽𑀭𑀬𑀺𑀁 𑀫𑀸𑀦𑀲𑀁 𑀫𑀬𑁆𑀳𑀦𑁆𑀢𑀺 𑀫𑀫 𑀘𑀺𑀢𑁆𑀢𑀁 𑀤𑀸𑀦𑀧𑀻𑀢𑀺𑀬𑀸 𑀧𑀽𑀭𑀬𑀺𑀁, 𑀫𑀬𑁆𑀳𑀁 𑀳𑀸𑀲𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑀁 𑀤𑀴𑁆𑀳𑀫𑀼𑀧𑀝𑁆𑀞𑀺𑀢𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀦𑀯𑀲𑁂𑀦 𑀤𑀴𑁆𑀳𑀁 𑀉𑀧𑀝𑁆𑀞𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀅𑀭𑀼𑀡𑀯𑀢𑀻 𑀦𑀸𑀫 𑀅𑀳𑁄𑀲𑀺. 𑀅𑀭𑀼𑀡𑀯𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀅𑀪𑀺𑀪𑀽 𑀘 𑀲𑀫𑁆𑀪𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀔𑁂𑀫𑀗𑁆𑀓𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀔𑀺𑀮𑀸 𑀘 𑀫𑀤𑀼𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀼𑀡𑁆𑀟𑀭𑀻𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀜𑁆𑀘𑀲𑁆𑀲 𑀲𑀢𑁆𑀢𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺 ¶ . 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀓𑀸𑀮𑀁 𑀬𑁄𑀚𑀦𑀢𑁆𑀢𑀬𑀁 𑀨𑀭𑀺𑀢𑁆𑀯𑀸 ¶ 𑀅𑀝𑁆𑀞𑀸𑀲𑀺. 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀲𑀩𑁆𑀩𑀓𑀸𑀫𑀸 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻, 𑀅𑀢𑀼𑀮𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁫.

‘‘𑀦𑀕𑀭𑀁 ¶ 𑀅𑀭𑀼𑀡𑀯𑀢𑀻 𑀦𑀸𑀫, 𑀅𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀧𑀪𑀸𑀯𑀢𑀻 𑀦𑀸𑀫 𑀚𑀦𑀺𑀓𑀸, 𑀲𑀺𑀔𑀺𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄.

𑁨𑁦.

‘‘𑀅𑀪𑀺𑀪𑀽 𑀲𑀫𑁆𑀪𑀯𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀔𑁂𑀫𑀗𑁆𑀓𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀺𑀔𑀺𑀲𑁆𑀲𑀸𑀧𑀺 𑀫𑀳𑁂𑀲𑀺𑀦𑁄.

𑁨𑁧.

‘‘𑀲𑀔𑀺𑀮𑀸 𑀘 𑀧𑀤𑀼𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀧𑀼𑀡𑁆𑀟𑀭𑀻𑀓𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁨.

‘‘𑀲𑀺𑀭𑀺𑀯𑀟𑁆𑀠𑁄 𑀘 𑀦𑀦𑁆𑀤𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀘𑀺𑀢𑁆𑀢𑀸 𑀘𑁂𑀯 𑀲𑀼𑀕𑀼𑀢𑁆𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁩.

‘‘𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀲𑀢𑁆𑀢𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁨𑁪.

‘‘𑀢𑀲𑁆𑀲𑀸𑀧𑀺 𑀩𑁆𑀬𑀸𑀫𑀧𑁆𑀧𑀪𑀸 𑀓𑀸𑀬𑀸, 𑀤𑀺𑀯𑀸𑀭𑀢𑁆𑀢𑀺𑀁 𑀦𑀺𑀭𑀦𑁆𑀢𑀭𑀁;

𑀤𑀺𑀲𑁄𑀤𑀺𑀲𑀁 𑀦𑀺𑀘𑁆𑀙𑀭𑀦𑁆𑀢𑀺, 𑀢𑀻𑀡𑀺 𑀬𑁄𑀚𑀦𑀲𑁄 𑀧𑀪𑀸.

𑁨𑁫.

‘‘𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁬.

‘‘𑀥𑀫𑁆𑀫𑀫𑁂𑀖𑀁 𑀧𑀯𑀲𑁆𑀲𑁂𑀢𑁆𑀯𑀸, 𑀢𑁂𑀫𑀬𑀺𑀢𑁆𑀯𑀸 𑀲𑀤𑁂𑀯𑀓𑁂;

𑀔𑁂𑀫𑀦𑁆𑀢𑀁 𑀧𑀸𑀧𑀬𑀺𑀢𑁆𑀯𑀸𑀦, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁭.

‘‘𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 𑀧𑀼𑀡𑁆𑀟𑀭𑀻𑀓𑁄𑀢𑀺 ¶ 𑀲𑁂𑀢𑀫𑁆𑀩𑀭𑀼𑀓𑁆𑀔𑁄. 𑀢𑀻𑀡𑀺 𑀬𑁄𑀚𑀦𑀲𑁄 𑀧𑀪𑀸𑀢𑀺 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀧𑀪𑀸 𑀦𑀺𑀘𑁆𑀙𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀫𑁂𑀖𑀦𑁆𑀢𑀺 𑀥𑀫𑁆𑀫𑀯𑀲𑁆𑀲𑀁, 𑀥𑀫𑁆𑀫𑀯𑀲𑁆𑀲𑀦𑀓𑁄 𑀩𑀼𑀤𑁆𑀥𑀫𑁂𑀖𑁄. 𑀢𑁂𑀫𑀬𑀺𑀢𑁆𑀯𑀸𑀢𑀺 𑀥𑀫𑁆𑀫𑀓𑀣𑀸𑀲𑀮𑀺𑀮𑁂𑀦 𑀢𑁂𑀫𑁂𑀢𑁆𑀯𑀸, 𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀓𑁂𑀢𑀺 𑀲𑀤𑁂𑀯𑀓𑁂 𑀲𑀢𑁆𑀢𑁂. 𑀔𑁂𑀫𑀦𑁆𑀢𑀦𑁆𑀢𑀺 𑀔𑁂𑀫𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 ¶ ¶ . 𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀢𑀫𑁆𑀩𑀦𑀔𑀢𑀼𑀗𑁆𑀕𑀦𑀸𑀲𑀯𑀝𑁆𑀝𑀗𑁆𑀕𑀼𑀮𑀺𑀢𑀸𑀤𑀻𑀳𑀺 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑁆𑀧𑀦𑁆𑀦𑀁, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀪𑀕𑀯𑀢𑁄 𑀲𑀭𑀻𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀔𑀻 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀻𑀮𑀯𑀢𑀻𑀦𑀕𑀭𑁂 𑀅𑀲𑁆𑀲𑀸𑀭𑀸𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺.

‘‘𑀲𑀺𑀔𑀻𑀯 𑀮𑁄𑀓𑁂 𑀢𑀧𑀲𑀸 𑀚𑀮𑀺𑀢𑁆𑀯𑀸, 𑀲𑀺𑀔𑀻𑀯 𑀫𑁂𑀖𑀸𑀕𑀫𑀦𑁂 𑀦𑀤𑀺𑀢𑁆𑀯𑀸;

𑀲𑀺𑀔𑀻 𑀫𑀳𑁂𑀲𑀺𑀦𑁆𑀥𑀦𑀯𑀺𑀧𑁆𑀧𑀳𑀻𑀦𑁄, 𑀲𑀺𑀔𑀻𑀯 𑀲𑀦𑁆𑀢𑀺𑀁 𑀲𑀼𑀕𑀢𑁄 𑀕𑀢𑁄 𑀲𑁄’’.

𑀲𑀺𑀔𑀺𑀲𑁆𑀲 𑀓𑀺𑀭 𑀪𑀕𑀯𑀢𑁄 𑀥𑀸𑀢𑀼𑀬𑁄 𑀏𑀓𑀕𑁆𑀖𑀦𑀸𑀯 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼 𑀦 𑀯𑀺𑀧𑁆𑀧𑀓𑀺𑀭𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀧𑀦 𑀫𑀦𑀼𑀲𑁆𑀲𑀸 𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑀁 𑀲𑀢𑁆𑀢𑀭𑀢𑀦𑀫𑀬𑀁 𑀳𑀺𑀫𑀕𑀺𑀭𑀺𑀲𑀤𑀺𑀲𑀲𑁄𑀪𑀁 𑀣𑀽𑀧𑀫𑀓𑀁𑀲𑀼. 𑀲𑁂𑀲𑀫𑁂𑀢𑁆𑀣 𑀕𑀸𑀣𑀸𑀲𑀼 𑀧𑀸𑀓𑀝𑀫𑁂𑀯𑀸𑀢𑀺.

𑀲𑀺𑀔𑀻𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀯𑀻𑀲𑀢𑀺𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁨𑁩. 𑀯𑁂𑀲𑁆𑀲𑀪𑀽𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀲𑀺𑀔𑀺𑀲𑁆𑀲 ¶ 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀧𑀭𑀪𑀸𑀕𑁂 𑀅𑀦𑁆𑀢𑀭𑀳𑀺𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀫𑀦𑀼𑀲𑁆𑀲𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸 𑀅𑀧𑀭𑀺𑀫𑀺𑀢𑀸𑀬𑀼𑀓𑀸 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀢𑀤𑀸 𑀯𑀺𑀚𑀺𑀢𑀫𑀦𑁄𑀪𑀽 𑀲𑀩𑁆𑀩𑀮𑁄𑀓𑀸𑀪𑀺𑀪𑀽 𑀲𑀬𑀫𑁆𑀪𑀽 𑀯𑁂𑀲𑁆𑀲𑀪𑀽 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀲𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀅𑀦𑁄𑀫𑀦𑀕𑀭𑁂 𑀲𑀼𑀧𑁆𑀧𑀢𑀻𑀢𑀲𑁆𑀲 𑀲𑀼𑀧𑁆𑀧𑀢𑀻𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀻𑀮𑀯𑀢𑀺𑀬𑀸 𑀬𑀲𑀯𑀢𑀺𑀬𑀸 𑀦𑀸𑀫 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀦𑀼𑀧𑀫𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀚𑀸𑀬𑀫𑀸𑀦𑁄𑀯 𑀚𑀦𑀁 𑀢𑁄𑀲𑁂𑀦𑁆𑀢𑁄 𑀯𑀲𑀪𑀦𑀸𑀤𑀁 𑀦𑀤𑀺. 𑀢𑀲𑁆𑀫𑀸 𑀯𑀲𑀪𑀦𑀸𑀤𑀳𑁂𑀢𑀼𑀢𑁆𑀢𑀸 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀯𑁂𑀲𑁆𑀲𑀪𑀽’’𑀢𑀺 𑀦𑀸𑀫𑀫𑀓𑀁𑀲𑀼 ¶ . 𑀲𑁄 𑀙𑀩𑁆𑀩𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀭𑀼𑀘𑀺-𑀲𑀼𑀭𑀼𑀘𑀺-𑀭𑀢𑀺𑀯𑀟𑁆𑀠𑀦𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀢𑀲𑁆𑀲 ¶ 𑀅𑀳𑁂𑀲𑀼𑀁. 𑀲𑀼𑀘𑀺𑀢𑁆𑀢𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀼𑀘𑀺𑀢𑁆𑀢𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀲𑀼𑀧𑁆𑀧𑀩𑀼𑀤𑁆𑀥𑁂 𑀦𑀸𑀫 𑀓𑀼𑀫𑀸𑀭𑁂 𑀉𑀧𑁆𑀧𑀦𑁆𑀦𑁂 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀉𑀬𑁆𑀬𑀸𑀦𑀤𑀲𑁆𑀲𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀤𑁂𑀯𑀤𑀢𑁆𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀲𑀢𑁆𑀢𑀢𑁆𑀢𑀺𑀁𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀅𑀣 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀙 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀘𑀺𑀢𑁆𑀢𑀦𑀺𑀕𑀫𑁂 𑀲𑀦𑁆𑀤𑀺𑀲𑁆𑀲𑀫𑀸𑀦𑀲𑀭𑀻𑀭𑀸𑀬 𑀲𑀺𑀭𑀺𑀯𑀟𑁆𑀠𑀦𑀸𑀬 𑀦𑀸𑀫 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀭𑀺𑀦𑁆𑀤𑀦𑀸𑀕𑀭𑀸𑀚𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀲𑀸𑀮𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀢𑁄 𑀉𑀧𑀸𑀕𑀫𑀺. 𑀢𑀲𑁆𑀲𑀸𑀧𑀺 𑀲𑀸𑀮𑀲𑁆𑀲 𑀢𑀤𑁂𑀯 𑀧𑀸𑀝𑀮𑀺𑀬𑀸 𑀧𑀫𑀸𑀡𑀫𑁂𑀯 𑀧𑀫𑀸𑀡𑀁 𑀅𑀳𑁄𑀲𑀺. 𑀢𑀣𑁂𑀯 𑀧𑀼𑀧𑁆𑀨𑀨𑀮𑀲𑀺𑀭𑀺𑀯𑀺𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀲𑀸𑀮𑀫𑀽𑀮𑀫𑀼𑀧𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀯𑀺𑀕𑀢𑀦𑀻𑀯𑀭𑀡𑀁 𑀲𑀩𑁆𑀩𑀓𑀸𑀫𑀫𑀤𑀸𑀯𑀭𑀡𑀁 𑀅𑀦𑀸𑀯𑀭𑀡𑀜𑀸𑀡𑀁 𑀧𑀝𑀺𑀮𑀪𑀺𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀢𑀢𑁆𑀣𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀲𑁆𑀲 𑀲𑁄𑀡𑀓𑀼𑀫𑀸𑀭𑀲𑁆𑀲 𑀉𑀢𑁆𑀢𑀭𑀓𑀼𑀫𑀸𑀭𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀤𑁂𑀯𑀧𑀣𑁂𑀦 𑀕𑀦𑁆𑀢𑁆𑀯𑀸 𑀅𑀦𑁄𑀫𑀦𑀕𑀭𑀲𑀫𑀻𑀧𑁂 𑀅𑀭𑀼𑀡𑀼𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁂𑀦 𑀓𑀼𑀫𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀧𑀭𑀺𑀯𑀸𑀭𑀸𑀦𑀁 𑀫𑀚𑁆𑀛𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀅𑀲𑀻𑀢𑀺𑀬𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀦 ¶ 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀢𑁆𑀢𑀢𑀺𑀬𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀅𑀦𑁄𑀫𑀦𑀕𑀭𑁂𑀬𑁂𑀯 𑀤𑀺𑀝𑁆𑀞𑀺𑀚𑀸𑀮𑀁 𑀪𑀺𑀦𑁆𑀤𑀦𑁆𑀢𑁄 𑀢𑀺𑀢𑁆𑀣𑀺𑀬𑀫𑀸𑀦𑀤𑁆𑀥𑀚𑀁 𑀧𑀸𑀢𑁂𑀦𑁆𑀢𑁄 𑀫𑀸𑀦𑀫𑀤𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀥𑀫𑁆𑀫𑀤𑁆𑀥𑀚𑀁 𑀲𑀫𑀼𑀲𑁆𑀲𑀬𑀦𑁆𑀢𑁄 𑀦𑀯𑀼𑀢𑀺𑀬𑁄𑀚𑀦𑀯𑀺𑀢𑁆𑀣𑀢𑀸𑀬 𑀫𑀦𑀼𑀲𑁆𑀲𑀧𑀭𑀺𑀲𑀸𑀬 𑀧𑀭𑀺𑀫𑀸𑀡𑀭𑀳𑀺𑀢𑀸𑀬 𑀤𑁂𑀯𑀧𑀭𑀺𑀲𑀸𑀬 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂 𑀧𑀲𑀸𑀤𑁂𑀢𑁆𑀯𑀸 𑀲𑀝𑁆𑀞𑀺𑀓𑁄𑀝𑀺𑀬𑁄 𑀥𑀫𑁆𑀫𑀸𑀫𑀢𑁂𑀦 𑀢𑀧𑁆𑀧𑁂𑀲𑀺, 𑀲𑁄 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.

‘‘𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁨.

‘‘𑀆𑀤𑀺𑀢𑁆𑀢𑀁 ¶ 𑀯𑀢 𑀭𑀸𑀕𑀕𑁆𑀕𑀺, 𑀢𑀡𑁆𑀳𑀸𑀦𑀁 𑀯𑀺𑀚𑀺𑀢𑀁 𑀢𑀤𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩.

‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀯𑁂𑀲𑁆𑀲𑀪𑀽𑀮𑁄𑀓𑀦𑀸𑀬𑀓𑁂;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪.

‘‘𑀧𑀓𑁆𑀓𑀦𑁆𑀢𑁂 ¶ 𑀘𑀸𑀭𑀺𑀓𑀁 𑀭𑀝𑁆𑀞𑁂, 𑀮𑁄𑀓𑀚𑁂𑀝𑁆𑀞𑁂 𑀦𑀭𑀸𑀲𑀪𑁂;

𑀲𑀢𑁆𑀢𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫.

‘‘𑀫𑀳𑀸𑀤𑀺𑀝𑁆𑀞𑀺𑀁 𑀯𑀺𑀦𑁄𑀤𑁂𑀦𑁆𑀢𑁄, 𑀧𑀸𑀝𑀺𑀳𑁂𑀭𑀁 𑀓𑀭𑁄𑀢𑀺 𑀲𑁄;

𑀲𑀫𑀸𑀕𑀢𑀸 𑀦𑀭𑀫𑀭𑀽, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑁂.

𑁬.

‘‘𑀫𑀳𑀸𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀤𑁂𑀯𑀸 𑀘𑁂𑀯 𑀫𑀦𑀼𑀲𑁆𑀲𑀸 𑀘, 𑀩𑀼𑀚𑁆𑀛𑀭𑁂 𑀲𑀝𑁆𑀞𑀺𑀓𑁄𑀝𑀺𑀬𑁄’’𑀢𑀺.

𑀢𑀢𑁆𑀣 𑀆𑀤𑀺𑀢𑁆𑀢𑀦𑁆𑀢𑀺 𑀲𑀓𑀮𑀫𑀺𑀤𑀁 𑀮𑁄𑀓𑀢𑁆𑀢𑀬𑀁 𑀲𑀫𑁆𑀧𑀤𑀺𑀢𑁆𑀢𑀁. 𑀭𑀸𑀕𑀕𑁆𑀕𑀻𑀢𑀺 𑀭𑀸𑀕𑁂𑀦. 𑀢𑀡𑁆𑀳𑀸𑀦𑀁 𑀯𑀺𑀚𑀺𑀢𑀦𑁆𑀢𑀺 𑀢𑀡𑁆𑀳𑀸𑀦𑀁 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀯𑀲𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸𑀢𑀺 𑀳𑀢𑁆𑀣𑀻 𑀯𑀺𑀬 𑀧𑀽𑀢𑀺𑀮𑀢𑀸𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄. 𑀤𑀲𑀲𑀳𑀲𑁆𑀲𑀻𑀢𑀺 𑀤𑀲𑀲𑀳𑀲𑁆𑀲𑀺𑀬𑀁. 𑀲𑀤𑁂𑀯𑀓𑁂𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂. 𑀩𑀼𑀚𑁆𑀛𑀭𑁂𑀢𑀺 𑀩𑀼𑀚𑁆𑀛𑀺𑀁𑀲𑀼.

𑀲𑁄𑀡𑀼𑀢𑁆𑀢𑀭𑀸𑀦𑀁 ¶ 𑀧𑀦 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀫𑀸𑀕𑀫𑁂 𑀧𑀩𑁆𑀩𑀚𑀺𑀢𑀸𑀦𑀁 𑀅𑀲𑀻𑀢𑀺𑀬𑀸 𑀅𑀭𑀳𑀦𑁆𑀢𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀫𑀸𑀖𑀧𑀼𑀡𑁆𑀡𑀫𑀸𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀯𑁂𑀲𑁆𑀲𑀪𑀼𑀦𑀸 𑀲𑀩𑁆𑀩𑀮𑁄𑀓𑀸𑀪𑀺𑀪𑀼𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸 𑀲𑀢𑁆𑀢𑀢𑁆𑀢𑀺𑀁𑀲𑀲𑀳𑀲𑁆𑀲𑀲𑀗𑁆𑀔𑀸 𑀪𑀺𑀓𑁆𑀔𑀽 𑀕𑀡𑀢𑁄 𑀑𑀳𑀻𑀦𑀲𑀫𑀬𑁂 𑀧𑀓𑁆𑀓𑀦𑁆𑀢𑀸, 𑀢𑁂 𑀯𑁂𑀲𑁆𑀲𑀪𑀼𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑁄𑀭𑁂𑀬𑁆𑀬𑀁 𑀦𑀸𑀫 𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀩𑁆𑀩𑁂𑀯 𑀢𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀬 𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

𑀬𑀤𑀸 𑀧𑀦 𑀦𑀸𑀭𑀺𑀯𑀸𑀳𑀦𑀦𑀕𑀭𑁂 𑀉𑀧𑀲𑀦𑁆𑀢𑁄 𑀦𑀸𑀫 𑀭𑀸𑀚𑀧𑀼𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲𑀸𑀦𑀼𑀓𑀫𑁆𑀧𑀸𑀬 𑀪𑀕𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺, 𑀲𑁄𑀧𑀺 𑀪𑀕𑀯𑀢𑁄 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀳𑀤𑀬𑁄 𑀧𑀩𑁆𑀩𑀚𑀺. 𑀢𑀁 𑀲𑀝𑁆𑀞𑀺𑀲𑀳𑀲𑁆𑀲𑀲𑀗𑁆𑀔𑀸 𑀧𑀼𑀭𑀺𑀲𑀸 ¶ 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀯𑁂𑀲𑁆𑀲𑀪𑀽 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀲𑁄 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭.

‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮.

‘‘𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁯.

‘‘𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 ¶ , 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀚𑀭𑀸𑀤𑀺𑀪𑀬𑀢𑀻𑀢𑀸𑀦𑀁, 𑀑𑀭𑀲𑀸𑀦𑀁 𑀫𑀳𑁂𑀲𑀺𑀦𑁄’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀭𑀪𑀯𑀢𑀻𑀦𑀕𑀭𑁂 𑀧𑀭𑀫𑀧𑀺𑀬𑀤𑀲𑁆𑀲𑀦𑁄 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀯𑁂𑀲𑁆𑀲𑀪𑀼𑀫𑁆𑀳𑀺 𑀮𑁄𑀓𑀦𑀸𑀬𑀓𑁂 𑀲𑀭𑀪𑀦𑀕𑀭𑀫𑀼𑀧𑀕𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀳𑀤𑀬𑁄 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀚𑀮𑀚𑀸𑀫𑀮𑀸𑀯𑀺𑀓𑀮𑀓𑀫𑀮𑀫𑀓𑀼𑀮𑀲𑀤𑀺𑀲𑀫𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀢𑁆𑀣𑁂𑀯 𑀪𑀕𑀯𑀢𑁄 𑀦𑀺𑀯𑀸𑀲𑀢𑁆𑀣𑀸𑀬 𑀕𑀦𑁆𑀥𑀓𑀼𑀝𑀺𑀁 𑀓𑀢𑁆𑀯𑀸 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀳𑀸𑀭𑀲𑀳𑀲𑁆𑀲𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀘 𑀯𑀺𑀪𑀯𑀚𑀸𑀢𑀁 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁄 𑀢𑁂𑀭𑀲𑀥𑀼𑀢𑀕𑀼𑀡𑁂𑀲𑀼 𑀦𑀺𑀭𑀢𑁄 𑀩𑁄𑀥𑀺𑀲𑀫𑁆𑀪𑀸𑀭𑀧𑀭𑀺𑀬𑁂𑀲𑀦𑀸𑀬 𑀭𑀢𑁄 ¶ 𑀩𑀼𑀤𑁆𑀥𑀲𑀸𑀲𑀦𑀸𑀪𑀺𑀭𑀢𑁄 𑀯𑀺𑀳𑀸𑀲𑀺. 𑀲𑁄𑀧𑀺 𑀢𑀁 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺 𑁋 ‘‘𑀅𑀦𑀸𑀕𑀢𑁂 𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀅𑀬𑀁 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦.

‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀯𑀻𑀭𑀁, 𑀤𑀸𑀦𑀁 𑀤𑀢𑁆𑀯𑀸 𑀫𑀳𑀸𑀭𑀳𑀁;

𑀅𑀦𑁆𑀦𑀧𑀸𑀦𑁂𑀦 𑀯𑀢𑁆𑀣𑁂𑀦, 𑀲𑀲𑀗𑁆𑀖𑀁 𑀚𑀺𑀦𑀧𑀽𑀚𑀬𑀺𑀁.

𑁧𑁧.

‘‘𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀲𑀫𑀲𑁆𑀲, 𑀘𑀓𑁆𑀓𑀁 𑀯𑀢𑁆𑀢𑀺𑀢𑀫𑀼𑀢𑁆𑀢𑀫𑀁;

𑀲𑀼𑀢𑁆𑀯𑀸𑀦 𑀧𑀡𑀺𑀢𑀁 𑀥𑀫𑁆𑀫𑀁, 𑀧𑀩𑁆𑀩𑀚𑁆𑀚𑀫𑀪𑀺𑀭𑁄𑀘𑀬𑀺𑀁.

𑁧𑁨.

‘‘𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄;

𑀧𑀩𑁆𑀩𑀚𑁆𑀚𑀁 𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀦𑁆𑀢𑀺𑀓𑁂.

𑁧𑁩.

‘‘𑀆𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁄, 𑀯𑀢𑁆𑀢𑀲𑀻𑀮𑀲𑀫𑀸𑀳𑀺𑀢𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀕𑀯𑁂𑀲𑀦𑁆𑀢𑁄, 𑀭𑀫𑀸𑀫𑀺 𑀚𑀺𑀦𑀲𑀸𑀲𑀦𑁂.

𑁧𑁪.

‘‘𑀲𑀤𑁆𑀥𑀸𑀧𑀻𑀢𑀺𑀁 ¶ 𑀉𑀧𑀕𑀦𑁆𑀢𑁆𑀯𑀸, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫𑀺 𑀲𑀢𑁆𑀣𑀭𑀁;

𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀫𑀬𑁆𑀳𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁧𑁫.

‘‘𑀅𑀦𑀺𑀯𑀢𑁆𑀢𑀫𑀸𑀦𑀲𑀁 𑀜𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑁄 𑀏𑀢𑀤𑀩𑁆𑀭𑀯𑀺;

𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬.

‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀁 𑀇𑀫𑀁.

𑁧𑁭.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸’’𑀢𑀺.

𑀢𑀢𑁆𑀣 𑀘𑀓𑁆𑀓𑀁 𑀯𑀢𑁆𑀢𑀺𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁. 𑀧𑀡𑀻𑀢𑀁 𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀧𑀩𑁆𑀩𑀚𑁆𑀚𑀁 𑀕𑀼𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀜𑀢𑁆𑀯𑀸 𑀧𑀩𑁆𑀩𑀚𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀲𑀻𑀮𑀲𑀫𑀸𑀳𑀺𑀢𑁄𑀢𑀺 𑀯𑀢𑁆𑀢𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀲𑀫𑀸𑀳𑀺𑀢𑁄. 𑀢𑁂𑀲𑀁 𑀢𑁂𑀲𑀁 𑀧𑀽𑀭𑀡𑁂 𑀲𑀫𑀸𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀭𑀫𑀸𑀫𑀻𑀢𑀺 𑀅𑀪𑀺𑀭𑀫𑀺𑀁. 𑀲𑀤𑁆𑀥𑀸𑀧𑀻𑀢𑀺𑀦𑁆𑀢𑀺 𑀲𑀤𑁆𑀥𑀜𑁆𑀘 𑀧𑀻𑀢𑀺𑀜𑁆𑀘 𑀉𑀧𑀕𑀦𑁆𑀢𑁆𑀯𑀸. 𑀯𑀦𑁆𑀤𑀸𑀫𑀻𑀢𑀺 𑀅𑀪𑀺𑀯𑀦𑁆𑀤𑀺𑀁, 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀢𑁆𑀣𑀭𑀦𑁆𑀢𑀺 𑀲𑀢𑁆𑀣𑀸𑀭𑀁. 𑀅𑀦𑀺𑀯𑀢𑁆𑀢𑀫𑀸𑀦𑀲𑀦𑁆𑀢𑀺 𑀅𑀦𑁄𑀲𑀓𑁆𑀓𑀺𑀬𑀫𑀸𑀦𑀫𑀸𑀦𑀲𑀁.

𑀢𑀲𑁆𑀲 ¶ ¶ 𑀧𑀦 𑀪𑀕𑀯𑀢𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀲𑀼𑀧𑁆𑀧𑀢𑀻𑀢𑁄 𑀦𑀸𑀫𑀲𑁆𑀲 𑀧𑀺𑀢𑀸 𑀔𑀢𑁆𑀢𑀺𑀬𑁄, 𑀬𑀲𑀯𑀢𑀻 𑀦𑀸𑀫 𑀫𑀸𑀢𑀸, 𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀉𑀧𑀲𑀦𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑀸𑀫𑀸 𑀘 𑀲𑀫𑀸𑀮𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀸𑀮𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀝𑁆𑀞𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺. 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀲𑀼𑀘𑀺𑀢𑁆𑀢𑀸 𑀦𑀸𑀫𑀲𑁆𑀲 𑀪𑀭𑀺𑀬𑀸, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦𑀸𑀫𑀲𑁆𑀲 𑀧𑀼𑀢𑁆𑀢𑁄, 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮.

‘‘𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁, 𑀲𑀼𑀧𑁆𑀧𑀢𑀻𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀬𑀲𑀯𑀢𑀻 𑀦𑀸𑀫, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁩.

‘‘𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀉𑀧𑀲𑀦𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪.

‘‘𑀭𑀸𑀫𑀸 𑀘𑁂𑀯 𑀲𑀫𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀲𑀸𑀮𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁫.

‘‘𑀲𑁄𑀢𑁆𑀣𑀺𑀓𑁄 ¶ 𑀘𑁂𑀯 𑀭𑀫𑁆𑀫𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀕𑁄𑀢𑀫𑀻 𑀲𑀺𑀭𑀺𑀫𑀸 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁬.

‘‘𑀲𑀝𑁆𑀞𑀺𑀭𑀢𑀦𑀫𑀼𑀩𑁆𑀩𑁂𑀥𑁄, 𑀳𑁂𑀫𑀬𑀽𑀧𑀲𑀫𑀽𑀧𑀫𑁄;

𑀓𑀸𑀬𑀸 𑀦𑀺𑀘𑁆𑀙𑀭𑀢𑀻 𑀭𑀲𑁆𑀫𑀺, 𑀭𑀢𑁆𑀢𑀺𑀁𑀯 𑀧𑀩𑁆𑀩𑀢𑁂 𑀲𑀺𑀔𑀻.

𑁨𑁭.

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺, 𑀚𑀦𑀢𑀁 𑀩𑀳𑀼𑀁.

𑁨𑁮.

‘‘𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀢𑁆𑀯𑀸, 𑀯𑀺𑀪𑀚𑀺𑀢𑁆𑀯𑀸 𑀫𑀳𑀸𑀚𑀦𑀁;

𑀥𑀫𑁆𑀫𑀦𑀸𑀯𑀁 𑀞𑀧𑁂𑀢𑁆𑀯𑀸𑀦, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁯.

‘‘𑀤𑀲𑁆𑀲𑀦𑁂𑀬𑁆𑀬𑀁 𑀲𑀩𑁆𑀩𑀚𑀦𑀁, 𑀯𑀺𑀳𑀸𑀭𑀁 𑀇𑀭𑀺𑀬𑀸𑀧𑀣𑀁;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸’’𑀢𑀺.

𑀢𑀢𑁆𑀣 ¶ 𑀳𑁂𑀫𑀬𑀽𑀧𑀲𑀫𑀽𑀧𑀫𑁄𑀢𑀺 ¶ 𑀲𑀼𑀯𑀡𑁆𑀡𑀢𑁆𑀣𑀫𑁆𑀪𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀙𑀭𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺. 𑀭𑀲𑁆𑀫𑀻𑀢𑀺 𑀧𑀪𑀸𑀭𑀲𑁆𑀫𑀺. 𑀭𑀢𑁆𑀢𑀺𑀁𑀯 𑀧𑀩𑁆𑀩𑀢𑁂 𑀲𑀺𑀔𑀻𑀢𑀺 𑀭𑀢𑁆𑀢𑀺𑀬𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀅𑀕𑁆𑀕𑀺 𑀯𑀺𑀬. 𑀭𑀁𑀲𑀺𑀯𑀺𑀚𑁆𑀚𑁄𑀢𑀸 𑀢𑀲𑁆𑀲 𑀓𑀸𑀬𑁂𑀢𑀺 𑀅𑀢𑁆𑀣𑁄. 𑀯𑀺𑀪𑀚𑀺𑀢𑁆𑀯𑀸𑀢𑀺 𑀯𑀺𑀪𑀸𑀕𑀁 𑀓𑀢𑁆𑀯𑀸, 𑀉𑀕𑁆𑀖𑀝𑀺𑀢𑀸𑀤𑀺𑀯𑀲𑁂𑀦 𑀲𑁄𑀢𑀸𑀧𑀦𑁆𑀦𑀸𑀤𑀺𑀯𑀲𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑀸𑀯𑀦𑁆𑀢𑀺 𑀅𑀝𑁆𑀞𑀗𑁆𑀕𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀦𑀸𑀯𑀁, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀤𑀲𑁆𑀲𑀦𑀻𑀬𑁄. 𑀲𑀩𑁆𑀩𑀚𑀦𑀦𑁆𑀢𑀺 𑀲𑀩𑁆𑀩𑁄 𑀚𑀦𑁄, 𑀲𑀲𑀸𑀯𑀓𑀲𑀗𑁆𑀖𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑀦𑁆𑀢𑀺 𑀯𑀺𑀳𑀸𑀭𑁄, 𑀲𑀩𑁆𑀩𑀢𑁆𑀣 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀯𑁂𑀲𑁆𑀲𑀪𑀽 𑀓𑀺𑀭 𑀪𑀕𑀯𑀸 𑀉𑀲𑀪𑀯𑀢𑀻𑀦𑀕𑀭𑁂 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀥𑀸𑀢𑀼𑀬𑁄 𑀧𑀦𑀲𑁆𑀲 𑀯𑀺𑀧𑁆𑀧𑀓𑀺𑀭𑀺𑀁𑀲𑀼.

‘‘𑀉𑀲𑀪𑀯𑀢𑀺𑀧𑀼𑀭𑁂 𑀧𑀼𑀭𑀼𑀢𑁆𑀢𑀫𑁂, 𑀚𑀺𑀦𑀯𑀲𑀪𑁄 𑀪𑀕𑀯𑀸 𑀳𑀺 𑀯𑁂𑀲𑁆𑀲𑀪𑀽;

𑀉𑀧𑀯𑀦𑀯𑀺𑀳𑀭𑁂 𑀫𑀦𑁄𑀭𑀫𑁂, 𑀦𑀺𑀭𑀼𑀧𑀥𑀺𑀲𑁂𑀲𑀫𑀼𑀧𑀸𑀕𑀢𑁄 𑀓𑀺𑀭𑀸’’𑀢𑀺.

𑀲𑁂𑀲𑀁 𑀲𑀩𑁆𑀩𑀢𑁆𑀣 𑀕𑀸𑀣𑀸𑀲𑀼 𑀧𑀸𑀓𑀝𑀫𑁂𑀯𑀸𑀢𑀺.

𑀯𑁂𑀲𑁆𑀲𑀪𑀽𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀏𑀓𑀯𑀻𑀲𑀢𑀺𑀫𑁄 𑀩𑀼𑀤𑁆𑀥𑀯𑀁𑀲𑁄.

𑁨𑁪. 𑀓𑀓𑀼𑀲𑀦𑁆𑀥𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀯𑁂𑀲𑁆𑀲𑀪𑀼𑀫𑁆𑀳𑀺 ¶ ¶ 𑀲𑀬𑀫𑁆𑀪𑀼𑀫𑁆𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀅𑀢𑀺𑀓𑁆𑀓𑀦𑁆𑀢𑁂 𑀏𑀓𑀽𑀦𑀢𑁆𑀢𑀺𑀁𑀲𑀓𑀧𑁆𑀧𑁂𑀲𑀼 𑀚𑀺𑀦𑀤𑀺𑀯𑀲𑀓𑀭𑀸 𑀦𑀼𑀧𑁆𑀧𑀚𑁆𑀚𑀺𑀁𑀲𑀼. 𑀇𑀫𑀲𑁆𑀫𑀺𑀁 𑀧𑀦 𑀪𑀤𑁆𑀤𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄𑀢𑀺. 𑀫𑁂𑀢𑁆𑀢𑁂𑀬𑁆𑀬𑁄 𑀧𑀦 𑀪𑀕𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀓𑀧𑁆𑀧𑁄 𑀧𑀜𑁆𑀘𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀪𑀤𑁆𑀤𑀓𑀧𑁆𑀧𑁄𑀢𑀺 𑀪𑀕𑀯𑀢𑀸 𑀯𑀡𑁆𑀡𑀺𑀢𑁄. 𑀢𑀢𑁆𑀣 𑀓𑀓𑀼𑀲𑀦𑁆𑀥𑁄 𑀦𑀸𑀫 𑀪𑀕𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 ¶ 𑀢𑀢𑁄 𑀘𑀯𑀺𑀢𑁆𑀯𑀸 𑀔𑁂𑀫𑀯𑀢𑀻𑀦𑀕𑀭𑁂 𑀔𑁂𑀫𑀗𑁆𑀓𑀭𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑀲𑁆𑀲 𑀅𑀕𑁆𑀕𑀺𑀤𑀢𑁆𑀢𑀲𑁆𑀲 𑀦𑀸𑀫 𑀧𑀼𑀭𑁄𑀳𑀺𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀺𑀲𑀸𑀔𑀸𑀬 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀬𑀤𑀸 𑀧𑀦 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

𑀬𑀤𑀸 𑀧𑀦 𑀩𑁆𑀭𑀸𑀳𑁆𑀫𑀡𑀸 𑀔𑀢𑁆𑀢𑀺𑀬𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑀤𑀸 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀤𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸 𑀔𑀢𑁆𑀢𑀺𑀬𑁂𑀳𑀺 𑀲𑀓𑁆𑀓𑀭𑀻𑀬𑀦𑁆𑀢𑀺 𑀕𑀭𑀼𑀓𑀭𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀲𑀘𑁆𑀘𑀲𑀦𑁆𑀥𑁄 𑀓𑀓𑀼𑀲𑀦𑁆𑀥𑁄 𑀩𑁄𑀥𑀺𑀲𑀢𑁆𑀢𑁄 𑀯𑀺𑀪𑀯𑀲𑀺𑀭𑀺𑀲𑀫𑀼𑀤𑀬𑁂𑀦𑀸𑀓𑀼𑀮𑁂 𑀅𑀦𑀸𑀓𑀼𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀓𑀫𑁆𑀧𑀬𑀦𑁆𑀢𑁄 𑀉𑀤𑀧𑀸𑀤𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁄 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀔𑁂𑀫𑀯𑀢𑀼𑀬𑁆𑀬𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀲𑀼𑀯𑀡𑁆𑀡𑀮𑀢𑀸𑀢𑁄 𑀅𑀕𑁆𑀕𑀺𑀚𑀸𑀮𑁄 𑀯𑀺𑀬 𑀦𑀺𑀓𑁆𑀔𑀫𑀺. 𑀲𑁄 𑀘𑀢𑁆𑀢𑀸𑀭𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀢𑀲𑁆𑀲 𑀓𑀺𑀭 𑀓𑀸𑀫𑀓𑀸𑀫𑀯𑀡𑁆𑀡𑀓𑀸𑀫𑀲𑀼𑀤𑁆𑀥𑀺𑀦𑀸𑀫𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀭𑁄𑀘𑀺𑀦𑀻𑀩𑁆𑀭𑀸𑀳𑁆𑀫𑀡𑀻𑀧𑀫𑀼𑀔𑀸𑀦𑀺 𑀢𑀺𑀁𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀺 𑀅𑀳𑁂𑀲𑀼𑀁.

𑀲𑁄 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀭𑁄𑀘𑀺𑀦𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀅𑀦𑀼𑀢𑁆𑀢𑀭𑁂 𑀉𑀢𑁆𑀢𑀭𑁂 𑀦𑀸𑀫 𑀓𑀼𑀫𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀬𑀼𑀢𑁆𑀢𑁂𑀦 𑀆𑀚𑀜𑁆𑀜𑀭𑀣𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀲𑀼𑀘𑀺𑀭𑀺𑀦𑁆𑀥𑀦𑀺𑀕𑀫𑁂 𑀯𑀚𑀺𑀭𑀺𑀦𑁆𑀥𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀔𑀤𑀺𑀭𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀼𑀪𑀤𑁆𑀤𑁂𑀦 𑀦𑀸𑀫 𑀬𑀯𑀧𑀸𑀮𑀓𑁂𑀦 𑀉𑀧𑀦𑀻𑀢𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀲𑀺𑀭𑀻𑀲𑀩𑁄𑀥𑀺𑀁 𑀧𑀸𑀝𑀮𑀺𑀬𑀸 ¶ ¶ 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀤𑀺𑀩𑁆𑀩𑀕𑀦𑁆𑀥𑀁 𑀉𑀧𑀯𑀸𑀬𑀫𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀘𑀢𑀼𑀢𑁆𑀢𑀺𑀁𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀘𑀢𑁆𑀢𑀸𑀮𑀻𑀲𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀁 𑀤𑀺𑀲𑁆𑀯𑀸 𑀏𑀓𑀸𑀳𑁂𑀦𑁂𑀯 𑀫𑀓𑀺𑀮𑀦𑀕𑀭𑀲𑀫𑀻𑀧𑁂 𑀲𑀫𑁆𑀪𑀽𑀢𑀁 𑀇𑀲𑀺𑀧𑀢𑀦𑀁 𑀦𑀸𑀫 𑀫𑀺𑀕𑀤𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑀕𑀢𑁄 𑀪𑀕𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀞𑀫𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀦 𑀓𑀡𑁆𑀡𑀓𑀼𑀚𑁆𑀚𑀦𑀕𑀭𑀤𑁆𑀯𑀸𑀭𑁂 𑀫𑀳𑀸𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺, 𑀲𑁄 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀬𑀤𑀸 𑀧𑀦 𑀔𑁂𑀫𑀯𑀢𑀻𑀦𑀕𑀭𑀲𑁆𑀲𑀸𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑁂𑀯𑀸𑀬𑀢𑀦𑁂 𑀅𑀪𑀺𑀫𑀢𑀦𑀭𑀤𑁂𑀯𑁄 𑀦𑀭𑀤𑁂𑀯𑁄 𑀦𑀸𑀫 𑀬𑀓𑁆𑀔𑁄 𑀤𑀺𑀲𑁆𑀲𑀫𑀸𑀦𑀫𑀦𑀼𑀲𑁆𑀲𑀲𑀭𑀻𑀭𑁄 𑀳𑀼𑀢𑁆𑀯𑀸 𑀓𑀦𑁆𑀢𑀸𑀭𑀫𑀚𑁆𑀛𑁂 𑀏𑀓𑀲𑁆𑀲 𑀓𑀫𑀮𑀓𑀼𑀯𑀮𑀬𑀼𑀧𑁆𑀧𑀮𑀲𑀫𑀮𑀗𑁆𑀓𑀢𑀲𑀮𑀺𑀮𑀲𑀻𑀢𑀮𑀲𑁆𑀲 𑀧𑀭𑀫𑀫𑀥𑀼𑀭𑀲𑀺𑀲𑀺𑀭𑀯𑀸𑀭𑀺𑀦𑁄 𑀲𑀩𑁆𑀩𑀚𑀦𑀲𑀼𑀭𑀪𑀺𑀭𑀫𑀲𑁆𑀲 𑀲𑀭𑀲𑁆𑀲 𑀲𑀫𑀻𑀧𑁂 𑀞𑀢𑁆𑀯𑀸 𑀓𑀫𑀮𑀓𑀼𑀯𑀮𑀬𑀓𑀮𑁆𑀮𑀳𑀸𑀭𑀸𑀤𑀻𑀳𑀺 𑀲𑀢𑁆𑀢𑁂 𑀉𑀧𑀮𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀔𑀸𑀤𑀢𑀺 ¶ . 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀧𑀘𑁆𑀙𑀺𑀦𑁆𑀦𑁂 𑀚𑀦𑀲𑀫𑁆𑀧𑀸𑀢𑀭𑀳𑀺𑀢𑁂 𑀫𑀳𑀸𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀲𑀫𑁆𑀧𑀢𑁆𑀢𑁂 𑀲𑀢𑁆𑀢𑁂 𑀔𑀸𑀤𑀢𑀺. 𑀲𑁄 𑀮𑁄𑀓𑀯𑀺𑀲𑁆𑀲𑀼𑀢𑁄 𑀫𑀳𑀸𑀓𑀦𑁆𑀢𑀸𑀭𑀫𑀕𑁆𑀕𑁄 𑀅𑀳𑁄𑀲𑀺. 𑀉𑀪𑀢𑁄𑀓𑀦𑁆𑀢𑀸𑀭𑀤𑁆𑀯𑀸𑀭𑁂 𑀓𑀺𑀭 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀅𑀝𑁆𑀞𑀸𑀲𑀺. 𑀅𑀣 𑀯𑀺𑀕𑀢𑀪𑀯𑀩𑀦𑁆𑀥𑁄 𑀓𑀓𑀼𑀲𑀦𑁆𑀥𑁄 𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄𑀕𑀢𑀁 𑀢𑀁 𑀫𑀳𑁂𑀲𑀓𑁆𑀔𑀁 𑀦𑀭𑀤𑁂𑀯𑀬𑀓𑁆𑀔𑀁 𑀢𑀜𑁆𑀘 𑀚𑀦𑀲𑀫𑀽𑀳𑀫𑀤𑁆𑀤𑀲. 𑀤𑀺𑀲𑁆𑀯𑀸 𑀘 𑀧𑀦 𑀕𑀕𑀦𑀢𑀮𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀚𑀦𑀓𑀸𑀬𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀪𑀕𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀢𑀲𑁆𑀲 𑀦𑀭𑀤𑁂𑀯𑀬𑀓𑁆𑀔𑀲𑁆𑀲 𑀪𑀯𑀦𑁂 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀫𑀗𑁆𑀕𑀮𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺.

𑀅𑀣 𑀔𑁄 𑀲𑁄 𑀫𑀦𑀼𑀲𑁆𑀲𑀪𑀓𑁆𑀔𑁄 𑀬𑀓𑁆𑀔𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀁 𑀇𑀦𑁆𑀤𑀥𑀦𑀼𑀧𑀭𑀺𑀯𑀼𑀢𑀫𑀺𑀯 𑀤𑀺𑀯𑀲𑀓𑀭𑀁 𑀫𑀼𑀦𑀺𑀤𑀺𑀯𑀲𑀓𑀭𑀁 𑀧𑀯𑀦𑀧𑀣𑁂𑀦𑀸𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀤𑀲𑀩𑀮𑁄 𑀫𑀫𑀸𑀦𑀼𑀓𑀫𑁆𑀧𑀸𑀬 𑀇𑀥𑀸𑀕𑀘𑁆𑀙𑀢𑀻’’𑀢𑀺 𑀧𑀲𑀦𑁆𑀦𑀳𑀤𑀬𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀬𑀓𑁆𑀔𑁂𑀳𑀺 𑀲𑀤𑁆𑀥𑀺𑀁 𑀅𑀦𑁂𑀓𑀫𑀺𑀕𑀕𑀡𑀯𑀦𑁆𑀢𑀁 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀦𑀸𑀦𑀸𑀯𑀡𑁆𑀡𑀕𑀦𑁆𑀥𑀸𑀦𑀺 𑀚𑀮𑀚𑀣𑀮𑀚𑀸𑀦𑀺 𑀓𑀼𑀲𑀼𑀫𑀸𑀦𑀺 𑀧𑀭𑀫𑀫𑀦𑁄𑀭𑀫𑀸𑀦𑀺 𑀲𑀼𑀕𑀦𑁆𑀥𑀕𑀦𑁆𑀥𑁂 𑀲𑀫𑀸𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀯𑀺𑀕𑀢𑀭𑀦𑁆𑀥𑀁 𑀓𑀓𑀼𑀲𑀦𑁆𑀥𑀁 𑀮𑁄𑀓𑀦𑀸𑀬𑀓𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀳𑀺 𑀧𑀽𑀚𑀬𑀺𑀢𑁆𑀯𑀸 𑀣𑀼𑀢𑀺𑀲𑀗𑁆𑀕𑀻𑀢𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑁄 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀫𑀦𑀼𑀲𑁆𑀲𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀳𑀤𑀬𑀸 𑀲𑀫𑀸𑀕𑀫𑁆𑀫 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀅𑀣 𑀅𑀧𑁆𑀧𑀝𑀺𑀲𑀦𑁆𑀥𑁄 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀪𑀺𑀧𑀽𑀚𑀺𑀢𑀦𑀭𑀤𑁂𑀯𑀬𑀓𑁆𑀔𑀁 𑀦𑀭𑀤𑁂𑀯𑀬𑀓𑁆𑀔𑀁 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑁂𑀦 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀦𑀺𑀭𑀬𑀓𑀣𑀸𑀬 𑀲𑀦𑁆𑀢𑀸𑀲𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀣𑀁 𑀓𑀣𑁂𑀲𑀺, 𑀢𑀤𑀸 𑀅𑀧𑀭𑀺𑀫𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧.