📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀘𑀭𑀺𑀬𑀸𑀧𑀺𑀝𑀓-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀘𑀭𑀺𑀬𑀸 ¶ ¶ ¶ 𑀲𑀩𑁆𑀩𑀮𑁄𑀓𑀲𑁆𑀲, 𑀳𑀺𑀢𑀸 𑀬𑀲𑁆𑀲 𑀫𑀳𑁂𑀲𑀺𑀦𑁄;

𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀁 𑀢𑀁, 𑀯𑀦𑁆𑀤𑁂 𑀮𑁄𑀓𑀕𑁆𑀕𑀦𑀸𑀬𑀓𑀁.

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀸, 𑀬𑁂𑀦 𑀦𑀻𑀬𑀦𑁆𑀢𑀺 𑀮𑁄𑀓𑀢𑁄;

𑀯𑀦𑁆𑀤𑁂 𑀢𑀫𑀼𑀢𑁆𑀢𑀫𑀁 𑀥𑀫𑁆𑀫𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀽𑀚𑀺𑀢𑀁.

𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄, 𑀞𑀺𑀢𑁄 𑀫𑀕𑁆𑀕𑀨𑀮𑁂𑀲𑀼 𑀬𑁄;

𑀯𑀦𑁆𑀤𑁂 𑀅𑀭𑀺𑀬𑀲𑀗𑁆𑀖𑀁 𑀢𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑀯𑀦𑁆𑀤𑀦𑀸𑀚𑀦𑀺𑀢𑀁 ¶ 𑀧𑀼𑀜𑁆𑀜𑀁, 𑀇𑀢𑀺 𑀬𑀁 𑀭𑀢𑀦𑀢𑁆𑀢𑀬𑁂;

𑀳𑀢𑀦𑁆𑀢𑀭𑀸𑀬𑁄 𑀲𑀩𑁆𑀩𑀢𑁆𑀣, 𑀳𑀼𑀢𑁆𑀯𑀸𑀳𑀁 𑀢𑀲𑁆𑀲 𑀢𑁂𑀚𑀲𑀸.

𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑀲𑁆𑀫𑀺𑀁, 𑀲𑀫𑁆𑀪𑀢𑀸 𑀬𑀸 𑀲𑀼𑀤𑀼𑀓𑁆𑀓𑀭𑀸;

𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀤𑀸𑀦𑀧𑀸𑀭𑀫𑀺𑀢𑀸𑀤𑀬𑁄.

𑀢𑀸𑀲𑀁 𑀲𑀫𑁆𑀩𑁄𑀥𑀺𑀘𑀭𑀺𑀬𑀸𑀦𑀁, 𑀆𑀦𑀼𑀪𑀸𑀯𑀯𑀺𑀪𑀸𑀯𑀦𑀁;

𑀲𑀓𑁆𑀓𑁂𑀲𑀼 𑀦𑀺𑀕𑁆𑀭𑁄𑀥𑀸𑀭𑀸𑀫𑁂, 𑀯𑀲𑀦𑁆𑀢𑁂𑀦 𑀫𑀳𑁂𑀲𑀺𑀦𑀸.

𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄, 𑀲𑀩𑁆𑀩𑀲𑀸𑀯𑀓𑀓𑁂𑀢𑀼𑀦𑁄;

𑀮𑁄𑀓𑀦𑀸𑀣𑁂𑀦 𑀘𑀭𑀺𑀬𑀸-𑀧𑀺𑀝𑀓𑀁 𑀦𑀸𑀫 𑀤𑁂𑀲𑀺𑀢𑀁.

𑀬𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑁆𑀫𑀺𑀁, 𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑁂𑀲𑀬𑁄;

𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀲𑀢𑁆𑀣𑀼, 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀁.

𑀢𑀲𑁆𑀲 ¶ 𑀲𑀫𑁆𑀩𑁄𑀥𑀺𑀲𑀫𑁆𑀪𑀸𑀭-𑀯𑀺𑀪𑀸𑀕𑀦𑀬𑀬𑁄𑀕𑀢𑁄;

𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀭𑀸 𑀓𑀸𑀢𑀼𑀁, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸.

𑀲𑀳 𑀲𑀁𑀯𑀡𑁆𑀡𑀦𑀁 𑀬𑀲𑁆𑀫𑀸, 𑀥𑀭𑀢𑁂 𑀲𑀢𑁆𑀣𑀼 𑀲𑀸𑀲𑀦𑀁;

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀢𑀺𑀝𑁆𑀞𑀢𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀢𑀲𑁆𑀫𑀸 𑀢𑀁 𑀅𑀯𑀮𑀫𑁆𑀩𑀺𑀢𑁆𑀯𑀸, 𑀑𑀕𑀸𑀳𑀺𑀢𑁆𑀯𑀸 𑀘 𑀲𑀩𑁆𑀩𑀲𑁄;

𑀚𑀸𑀢𑀓𑀸𑀦𑀼𑀧𑀦𑀺𑀲𑁆𑀲𑀸𑀬, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁.

𑀦𑀺𑀲𑁆𑀲𑀺𑀢𑀁 ¶ 𑀯𑀸𑀘𑀦𑀸𑀫𑀕𑁆𑀕𑀁, 𑀲𑀼𑀯𑀺𑀲𑀼𑀤𑁆𑀥𑀫𑀦𑀸𑀓𑀼𑀮𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀦𑀺𑀧𑀼𑀡𑀢𑁆𑀣𑀯𑀺𑀦𑀺𑀘𑁆𑀙𑀬𑀁.

𑀦𑀻𑀢𑀦𑁂𑀬𑁆𑀬𑀢𑁆𑀣𑀪𑁂𑀤𑀸 𑀘, 𑀧𑀸𑀭𑀫𑀻 𑀧𑀭𑀺𑀤𑀻𑀧𑀬𑀁;

𑀓𑀭𑀺𑀲𑁆𑀲𑀸𑀫𑀺 𑀢𑀁 𑀘𑀭𑀺𑀬𑀸-𑀧𑀺𑀝𑀓𑀲𑁆𑀲𑀢𑁆𑀣𑀯𑀡𑁆𑀡𑀦𑀁.

𑀇𑀢𑀺 ¶ 𑀆𑀓𑀗𑁆𑀔𑀫𑀸𑀦𑀲𑁆𑀲, 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀁;

𑀯𑀺𑀪𑀚𑀦𑁆𑀢𑀲𑁆𑀲 𑀢𑀲𑁆𑀲𑀢𑁆𑀣𑀁, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄𑀢𑀺.

𑀢𑀢𑁆𑀣 𑀘𑀭𑀺𑀬𑀸𑀧𑀺𑀝𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀘𑀭𑀺𑀬𑀸𑀧𑀺𑀝𑀓𑀁? 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀲𑀢𑁆𑀣𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀺𑀦𑀻 𑀧𑀭𑀺𑀬𑀢𑁆𑀢𑀻𑀢𑀺 𑀓𑀢𑁆𑀯𑀸, 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑁄 𑀳𑀺 𑀅𑀬𑀁 𑀧𑀺𑀝𑀓𑀲𑀤𑁆𑀤𑁄, ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀯𑀺𑀬. 𑀅𑀣 𑀯𑀸 𑀬𑀲𑁆𑀫𑀸 𑀲𑀸 𑀧𑀭𑀺𑀬𑀢𑁆𑀢𑀺 𑀢𑀲𑁆𑀲𑁂𑀯 𑀲𑀢𑁆𑀣𑀼 𑀧𑀼𑀭𑀺𑀫𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀁 𑀆𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀪𑀸𑀚𑀦𑀪𑀽𑀢𑀸, 𑀢𑀲𑁆𑀫𑀸𑀧𑀺 ‘‘𑀘𑀭𑀺𑀬𑀸𑀧𑀺𑀝𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀪𑀸𑀚𑀦𑀢𑁆𑀣𑁄𑀧𑀺 𑀳𑀺 𑀧𑀺𑀝𑀓𑀲𑀤𑁆𑀤𑁄 𑀦𑀺𑀤𑁆𑀤𑀺𑀝𑁆𑀞𑁄 ‘‘𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬, 𑀓𑀼𑀤𑀸𑀮𑀧𑀺𑀝𑀓𑀁 𑀆𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁮; 𑀅. 𑀦𑀺. 𑁩.𑁭𑁦) 𑀯𑀺𑀬. 𑀢𑀁 𑀧𑀦𑁂𑀢𑀁 𑀘𑀭𑀺𑀬𑀸𑀧𑀺𑀝𑀓𑀁 𑀯𑀺𑀦𑀬𑀧𑀺𑀝𑀓𑀁, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀁. 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀁. 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀸, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀲𑀼 𑀲𑀸𑀲𑀦𑀗𑁆𑀕𑁂𑀲𑀼 𑀕𑀸𑀣𑀸𑀲𑀗𑁆𑀕𑀳𑀁.

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭) 𑁋

𑀏𑀯𑀁 ¶ 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀝𑀺𑀜𑁆𑀜𑀸𑀢𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀓𑀢𑀺𑀧𑀬𑀥𑀫𑁆𑀫𑀓𑁆𑀔𑀦𑁆𑀥𑀲𑀗𑁆𑀕𑀳𑀁. 𑀯𑀕𑁆𑀕𑀢𑁄 𑀅𑀓𑀺𑀢𑁆𑀢𑀺𑀯𑀕𑁆𑀕𑁄, 𑀳𑀢𑁆𑀣𑀺𑀦𑀸𑀕𑀯𑀕𑁆𑀕𑁄, 𑀬𑀼𑀥𑀜𑁆𑀚𑀬𑀯𑀕𑁆𑀕𑁄𑀢𑀺 𑀯𑀕𑁆𑀕𑀢𑁆𑀢𑀬𑀲𑀗𑁆𑀕𑀳𑀁. 𑀘𑀭𑀺𑀬𑀢𑁄 𑀅𑀓𑀺𑀢𑁆𑀢𑀺𑀯𑀕𑁆𑀕𑁂 𑀤𑀲, 𑀳𑀢𑁆𑀣𑀺𑀦𑀸𑀕𑀯𑀕𑁆𑀕𑁂 𑀤𑀲, 𑀬𑀼𑀥𑀜𑁆𑀚𑀬𑀯𑀕𑁆𑀕𑁂 𑀧𑀜𑁆𑀘𑀤𑀲𑀸𑀢𑀺 𑀧𑀜𑁆𑀘𑀢𑀺𑀁𑀲𑀘𑀭𑀺𑀬𑀸𑀲𑀗𑁆𑀕𑀳𑀁. 𑀢𑀻𑀲𑀼 𑀯𑀕𑁆𑀕𑁂𑀲𑀼 𑀅𑀓𑀺𑀢𑁆𑀢𑀺𑀯𑀕𑁆𑀕𑁄 𑀆𑀤𑀺, 𑀘𑀭𑀺𑀬𑀸𑀲𑀼 𑀅𑀓𑀺𑀢𑁆𑀢𑀺𑀘𑀭𑀺𑀬𑀸. 𑀢𑀲𑁆𑀲𑀸𑀧𑀺 𑁋

‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀏𑀢𑁆𑀣𑀦𑁆𑀢𑀭𑁂 𑀬𑀁 𑀘𑀭𑀺𑀢𑀁, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀧𑀸𑀘𑀦’’𑀦𑁆𑀢𑀺. 𑁋

𑀅𑀬𑀁 𑀕𑀸𑀣𑀸 𑀆𑀤𑀺. 𑀢𑀲𑁆𑀲 𑀇𑀢𑁄 𑀧𑀪𑀼𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀳𑁄𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸

𑀲𑀸 ¶ 𑀧𑀦𑀸𑀬𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀬𑀲𑁆𑀫𑀸 𑀤𑀽𑀭𑁂𑀦𑀺𑀤𑀸𑀦𑀁, 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁, 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 ¶ 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀲𑀼𑀡𑀦𑁆𑀢𑁂𑀳𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀲𑀼𑀝𑁆𑀞𑀼 𑀯𑀺𑀜𑁆𑀜𑀸𑀢𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀦𑀺𑀤𑀸𑀦𑀸𑀦𑀁 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑀲𑁆𑀫𑀺𑀜𑁆𑀳𑀺 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑀸𑀯 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑁄 𑀓𑀣𑀸𑀫𑀕𑁆𑀕𑁄 𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑁄 𑀓𑀣𑀸𑀫𑀕𑁆𑀕𑁄 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫. 𑀫𑀳𑀸𑀩𑁄𑀥𑀺𑀫𑀡𑁆𑀟𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼, 𑀢𑀸𑀯 𑀧𑀯𑀢𑁆𑀢𑁄 𑀓𑀣𑀸𑀫𑀕𑁆𑀕𑁄 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀦𑀸𑀫. 𑀇𑀫𑁂𑀲𑀼 𑀢𑀻𑀲𑀼 𑀦𑀺𑀤𑀸𑀦𑁂𑀲𑀼 𑀬𑀲𑁆𑀫𑀸 𑀤𑀽𑀭𑁂𑀦𑀺𑀤𑀸𑀦𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀸𑀦𑀺 𑀲𑀩𑁆𑀩𑀲𑀸𑀥𑀸𑀭𑀡𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 (𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑁂 𑀧𑀦 𑀅𑀢𑁆𑀣𑀺 𑀯𑀺𑀲𑁂𑀲𑁄𑀢𑀺 𑀢𑀺𑀡𑁆𑀡𑀫𑁆𑀧𑀺 𑀦𑀺𑀤𑀸𑀦𑀸𑀦𑀁 𑀅𑀬𑀫𑀸𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀓𑀣𑀸.

𑀤𑀻𑀧𑀗𑁆𑀓𑀭𑀲𑁆𑀲 ¶ 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀮𑁄𑀓𑀦𑀸𑀣𑁄 𑀅𑀢𑁆𑀢𑀦𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑁆𑀪𑀸𑀭𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸, 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀩𑀼𑀤𑁆𑀥𑀪𑀸𑀯𑀸𑀬 𑀉𑀧𑁆𑀧𑀢𑁆𑀢𑀺𑀓𑀸𑀮𑀁 𑀆𑀕𑀫𑀬𑀫𑀸𑀦𑁄, 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀓𑁆𑀬𑀭𑀸𑀚𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀦𑁆𑀢𑁂𑀦 𑀧𑀭𑀺𑀳𑀸𑀭𑁂𑀦 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀯𑀟𑁆𑀠𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀬𑁄𑀩𑁆𑀩𑀦𑀁 𑀧𑀢𑁆𑀯𑀸 𑀏𑀓𑀽𑀦𑀢𑀺𑀁𑀲𑁂 𑀯𑀬𑀲𑁆𑀫𑀺𑀁 𑀓𑀢𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁄, 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸, 𑀯𑁂𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀲𑀽𑀭𑀺𑀬𑁂 𑀅𑀦𑀢𑁆𑀣𑀗𑁆𑀕𑀫𑀺𑀢𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀼𑀭𑀺𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸, 𑀧𑀘𑁆𑀙𑀺𑀫𑀬𑀸𑀫𑁂 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀔𑁂𑀧𑁂𑀢𑁆𑀯𑀸, 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀫𑀪𑀺𑀲𑀫𑁆𑀩𑀼𑀚𑁆𑀛𑀺.

𑀢𑀢𑁄 𑀢𑀢𑁆𑀣𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀁 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩 𑀆𑀤𑀬𑁄; 𑀧𑀝𑀺. 𑀫. 𑁨.𑁩𑁦) 𑀧𑀯𑀢𑁆𑀢𑁂𑀢𑁆𑀯𑀸, 𑀬𑀲𑀸𑀤𑀺𑀓𑁂 𑀯𑁂𑀦𑁂𑀬𑁆𑀬𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀢𑁂 𑀲𑀩𑁆𑀩𑁂𑀯 𑀲𑀝𑁆𑀞𑀺 𑀅𑀭𑀳𑀦𑁆𑀢𑁂 𑀮𑁄𑀓𑀸𑀦𑀼𑀕𑁆𑀕𑀳𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, 𑀉𑀭𑀼𑀯𑁂𑀮𑀁 𑀕𑀘𑁆𑀙𑀦𑁆𑀢𑁄 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 ¶ 𑀤𑀲𑁆𑀲𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 𑀲𑀳𑀲𑁆𑀲𑀚𑀝𑀺𑀮𑀧𑀭𑀺𑀯𑀸𑀭𑁂 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 ¶ 𑀯𑀺𑀦𑁂𑀢𑁆𑀯𑀸, 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀦𑀕𑀭𑀽𑀧𑀘𑀸𑀭𑁂 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑁂 𑀦𑀺𑀲𑀺𑀦𑁆𑀦𑁄 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑁂 𑀤𑁆𑀯𑀸𑀤𑀲𑀦𑀳𑀼𑀢𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀲𑀸𑀲𑀦𑁂 𑀑𑀢𑀸𑀭𑁂𑀢𑁆𑀯𑀸, 𑀫𑀕𑀥𑀭𑀸𑀚𑁂𑀦 𑀓𑀸𑀭𑀺𑀢𑁂 𑀯𑁂𑀴𑀼𑀯𑀦𑀯𑀺𑀳𑀸𑀭𑁂 𑀯𑀺𑀳𑀭𑀢𑀺.

𑀅𑀣𑁂𑀯𑀁 𑀪𑀕𑀯𑀢𑀺 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑁂 𑀞𑀧𑀺𑀢𑁂𑀲𑀼 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁂 𑀚𑀸𑀢𑁂, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑁄 𑀓𑀺𑀭 𑀫𑁂 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀻’’𑀢𑀺 𑀲𑀼𑀢𑁆𑀯𑀸 𑀤𑀲𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂, 𑀅𑀦𑀼𑀓𑁆𑀓𑀫𑁂𑀦 𑀤𑀲 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺 ‘‘𑀧𑀼𑀢𑁆𑀢𑀁 𑀫𑁂 𑀇𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀣𑀸’’𑀢𑀺. 𑀢𑁂𑀲𑀼 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁂𑀲𑀼 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁂𑀦 𑀭𑀜𑁆𑀜𑁄 𑀅𑀥𑀺𑀧𑁆𑀧𑀸𑀬𑁂 𑀆𑀭𑁄𑀘𑀺𑀢𑁂 𑀪𑀕𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀁 ¶ 𑀓𑀧𑀺𑀮𑀯𑀢𑁆𑀣𑀼𑀁 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀲𑀫𑁆𑀧𑀸𑀧𑀼𑀡𑀺. 𑀲𑀓𑁆𑀬𑀭𑀸𑀚𑀸𑀦𑁄 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑀁 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀲𑀦𑀬𑁄𑀕𑁆𑀕𑀁 𑀓𑀸𑀭𑁂𑀢𑁆𑀯𑀸, 𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀳𑀢𑁆𑀣𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸, 𑀲𑀢𑁆𑀣𑀸𑀭𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑀁 𑀧𑀯𑁂𑀲𑁂𑀲𑀼𑀁. 𑀢𑀢𑁆𑀭 𑀪𑀕𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀸𑀓𑀺𑀬𑀸 𑀫𑀸𑀦𑀢𑁆𑀣𑀤𑁆𑀥𑀸 𑀲𑀢𑁆𑀣𑀼 𑀧𑀡𑀺𑀧𑀸𑀢𑀁 𑀦𑀸𑀓𑀁𑀲𑀼. 𑀪𑀕𑀯𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀦𑀁 𑀪𑀜𑁆𑀚𑀺𑀢𑁆𑀯𑀸 𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑁂 𑀓𑀸𑀢𑀼𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀻𑀲𑁂 𑀧𑀸𑀤𑀧𑀁𑀲𑀼𑀁 𑀑𑀓𑀺𑀭𑀫𑀸𑀦𑁄 𑀯𑀺𑀬, 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀢𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄’’𑀢𑀺 𑀯𑀦𑁆𑀤𑀺. 𑀭𑀜𑁆𑀜𑀸 𑀧𑀦 𑀯𑀦𑁆𑀤𑀺𑀢𑁂 𑀢𑁂 𑀞𑀸𑀢𑀼𑀁 𑀦𑀸𑀫 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀲𑀸𑀓𑀺𑀬𑀸 𑀯𑀦𑁆𑀤𑀺𑀁𑀲𑀼.

𑀢𑀤𑀸 𑀓𑀺𑀭 𑀪𑀕𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑀫𑁆𑀧𑀺 𑀅𑀓𑀸𑀲𑀺 𑁋 𑀬𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑁂 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑀮𑁄𑀓𑁂 𑀬𑀣𑀸𑀞𑀺𑀢𑀸 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀲𑀩𑁆𑀩𑁂 𑀤𑁂𑀯𑁂 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀢𑀦𑁄 𑀪𑀯𑀦𑁂 𑀓𑀻𑀴𑀦𑁆𑀢𑁂 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀚𑁄𑀢𑀦𑁆𑀢𑁂 𑀫𑀳𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁂 𑀲𑀦𑁆𑀢𑀸𑀦𑀺 𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀦𑀺 ¶ 𑀅𑀦𑀼𑀪𑀯𑀦𑁆𑀢𑁂 𑀅𑀜𑁆𑀜𑀫𑀜𑁆𑀜𑀁 𑀥𑀫𑁆𑀫𑀁 𑀲𑀸𑀓𑀘𑁆𑀙𑀦𑁆𑀢𑁂 𑀘 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀦𑁄 𑀫𑀁𑀲𑀘𑀓𑁆𑀔𑀼𑀦𑀸𑀯 𑀧𑀲𑁆𑀲𑀦𑁆𑀢𑀺. 𑀢𑀣𑀸 𑀳𑁂𑀝𑁆𑀞𑀸𑀧𑀣𑀯𑀺𑀬𑀁 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼, 𑀲𑁄𑀴𑀲𑀲𑀼 𑀘 𑀉𑀲𑁆𑀲𑀤𑀦𑀺𑀭𑀬𑁂𑀲𑀼, 𑀮𑁄𑀓𑀦𑁆𑀢𑀭𑀦𑀺𑀭𑀬𑁂 𑀘𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑁂 𑀲𑀢𑁆𑀢𑁂 𑀧𑀲𑁆𑀲𑀦𑁆𑀢𑀺. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀁 𑀤𑁂𑀯𑀸 𑀫𑀳𑀘𑁆𑀘𑀤𑁂𑀯𑀸𑀦𑀼𑀪𑀸𑀯𑁂𑀦 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸 𑀕𑀸𑀣𑀸𑀬𑁄 𑀉𑀤𑀸𑀳𑀭𑀦𑁆𑀢𑀸 𑀣𑁄𑀫𑁂𑀦𑁆𑀢𑀺 𑀅𑀧𑁆𑀨𑁄𑀝𑁂𑀦𑁆𑀢𑀺 𑀳𑀲𑀦𑁆𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀪𑀼𑀫𑁆𑀫𑀸 ¶ 𑀫𑀳𑀸𑀭𑀸𑀚𑀺𑀓𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀫𑀸 𑀘 𑀤𑁂𑀯𑀸 𑀢𑀼𑀲𑀺𑀢𑀸 𑀘 𑀦𑀺𑀫𑁆𑀫𑀺𑀢𑀸;

𑀧𑀭𑀦𑀺𑀫𑁆𑀫𑀺𑀢𑀸 𑀬𑁂𑀧𑀺 𑀘 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀆𑀦𑀦𑁆𑀤𑀺𑀢𑀸 𑀯𑀺𑀧𑀼𑀮𑀫𑀓𑀁𑀲𑀼 𑀖𑁄𑀲’’𑀦𑁆𑀢𑀺. (𑀩𑀼. 𑀯𑀁. 𑁧.𑁬)

𑀢𑀤𑀸 ¶ 𑀳𑀺 𑀤𑀲𑀩𑀮𑁄 ‘‘𑀅𑀢𑀼𑀮𑀁 𑀅𑀢𑁆𑀢𑀦𑁄 𑀩𑀼𑀤𑁆𑀥𑀩𑀮𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀆𑀓𑀸𑀲𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑀫𑀸𑀕𑀫𑁂 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸, 𑀤𑁆𑀯𑀸𑀤𑀲𑀬𑁄𑀚𑀦𑀯𑀺𑀢𑁆𑀣𑀢𑁂 𑀲𑀩𑁆𑀩𑀭𑀢𑀦𑀫𑀬𑁂 𑀘𑀗𑁆𑀓𑀫𑁂 𑀞𑀺𑀢𑁄 𑀬𑀣𑀸𑀯𑀼𑀢𑁆𑀢𑀁 𑀤𑁂𑀯𑀫𑀦𑀼𑀲𑁆𑀲𑀦𑀬𑀦𑀯𑀺𑀳𑀗𑁆𑀕𑀸𑀦𑀁 𑀏𑀓𑀦𑀺𑀧𑀸𑀢𑀪𑀽𑀢𑀫𑀘𑁆𑀙𑀭𑀺𑀬𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀁 𑀲𑀫𑀸𑀥𑀺𑀜𑀸𑀡𑀸𑀦𑀼𑀪𑀸𑀯𑀤𑀻𑀧𑀦𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀼𑀦 𑀢𑀲𑁆𑀫𑀺𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸𑀬 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦 𑀳𑁂𑀢𑁂 𑀚𑀸𑀦𑀦𑁆𑀢𑀺 𑀲𑀤𑁂𑀯𑀫𑀸𑀦𑀼𑀲𑀸, 𑀩𑀼𑀤𑁆𑀥𑁄 𑀅𑀬𑀁 𑀓𑀻𑀤𑀺𑀲𑀓𑁄 𑀦𑀭𑀼𑀢𑁆𑀢𑀫𑁄;

𑀇𑀤𑁆𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀜𑁆𑀘 𑀓𑀻𑀤𑀺𑀲𑀁, 𑀩𑀼𑀤𑁆𑀥𑀩𑀮𑀁 𑀮𑁄𑀓𑀳𑀺𑀢𑀲𑁆𑀲 𑀓𑀻𑀤𑀺𑀲𑀁.

‘‘𑀦 𑀳𑁂𑀢𑁂 𑀚𑀸𑀦𑀦𑁆𑀢𑀺 𑀲𑀤𑁂𑀯𑀫𑀸𑀦𑀼𑀲𑀸, 𑀩𑀼𑀤𑁆𑀥𑁄 𑀅𑀬𑀁 𑀏𑀤𑀺𑀲𑀓𑁄 𑀦𑀭𑀼𑀢𑁆𑀢𑀫𑁄;

𑀇𑀤𑁆𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀜𑁆𑀘 𑀏𑀤𑀺𑀲𑀁, 𑀩𑀼𑀤𑁆𑀥𑀩𑀮𑀁 𑀮𑁄𑀓𑀳𑀺𑀢𑀲𑁆𑀲 𑀏𑀤𑀺𑀲𑀁.

‘‘𑀳𑀦𑁆𑀤𑀸𑀳𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑀩𑀮𑀫𑀦𑀼𑀢𑁆𑀢𑀭𑀁;

𑀘𑀗𑁆𑀓𑀫𑀁 𑀫𑀸𑀧𑀬𑀺𑀲𑁆𑀲𑀸𑀫𑀺, 𑀦𑀪𑁂 𑀭𑀢𑀦𑀫𑀡𑁆𑀟𑀺𑀢’’𑀦𑁆𑀢𑀺. (𑀩𑀼. 𑀯𑀁. 𑁧.𑁩-𑁫);

𑀏𑀯𑀁 𑀢𑀣𑀸𑀕𑀢𑁂 𑀅𑀢𑁆𑀢𑀦𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀤𑀻𑀧𑀦𑀁 𑀧𑀸𑀝𑀺𑀳𑀸𑀭𑀺𑀬𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀭𑀸𑀚𑀕𑀳𑁂 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑁂 𑀞𑀺𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸, 𑀢𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑀦𑁆𑀤𑀲𑁆𑀲𑀦𑁂𑀦 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 ‘‘𑀳𑀦𑁆𑀤𑀸𑀳𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀮𑁄𑀓𑀲𑁆𑀲 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀚𑀸𑀢𑀧𑀭𑀺𑀯𑀺𑀢𑀓𑁆𑀓𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀪𑀽𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂𑀦 𑀢𑀸𑀯𑀤𑁂𑀯 𑀆𑀕𑀦𑁆𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀫𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀕𑁆𑀕𑀬𑁆𑀳 𑀢𑀣𑀸𑀕𑀢𑀲𑁆𑀲 𑀫𑀳𑀸𑀪𑀺𑀦𑀻𑀳𑀸𑀭𑀁 𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀜𑁆𑀘 𑀧𑀼𑀘𑁆𑀙𑀺. 𑀪𑀕𑀯𑀸 𑀢𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀫𑀦𑀼𑀲𑁆𑀲𑀸𑀦𑀜𑁆𑀘𑁂𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀩𑁆𑀭𑀳𑁆𑀫𑀸𑀦𑀜𑁆𑀘 𑀅𑀢𑁆𑀢𑀦𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀧𑀭𑀺𑀤𑀻𑀧𑀬𑀦𑁆𑀢𑁄 𑀩𑀼𑀤𑁆𑀥𑀯𑀁𑀲𑀁 𑀤𑁂𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀸𑀭𑀺𑀧𑀼𑀢𑁆𑀢𑁄 ¶ ¶ 𑀫𑀳𑀸𑀧𑀜𑁆𑀜𑁄, 𑀲𑀫𑀸𑀥𑀺𑀚𑁆𑀛𑀸𑀦𑀓𑁄𑀯𑀺𑀤𑁄;

𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀧𑀼𑀘𑁆𑀙𑀢𑀺 𑀮𑁄𑀓𑀦𑀸𑀬𑀓𑀁.

‘‘𑀓𑀻𑀤𑀺𑀲𑁄 𑀢𑁂 𑀫𑀳𑀸𑀯𑀻𑀭, 𑀅𑀪𑀺𑀦𑀻𑀳𑀸𑀭𑁄 𑀦𑀭𑀼𑀢𑁆𑀢𑀫;

𑀓𑀫𑁆𑀳𑀺 𑀓𑀸𑀮𑁂 𑀢𑀬𑀸 𑀥𑀻𑀭, 𑀧𑀢𑁆𑀣𑀺𑀢𑀸 𑀩𑁄𑀥𑀺𑀫𑀼𑀢𑁆𑀢𑀫𑀸.

‘‘𑀤𑀸𑀦𑀁 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸 𑀯𑀻𑀭𑀺𑀬𑀜𑁆𑀘 𑀓𑀻𑀤𑀺𑀲𑀁;

𑀔𑀦𑁆𑀢𑀺 𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸 𑀘 𑀓𑀻𑀤𑀺𑀲𑀸.

‘‘𑀤𑀲 𑀧𑀸𑀭𑀫𑀻 𑀢𑀬𑀸 𑀥𑀻𑀭, 𑀓𑀻𑀤𑀺𑀲𑀻 𑀮𑁄𑀓𑀦𑀸𑀬𑀓;

𑀓𑀣𑀁 𑀉𑀧𑀧𑀸𑀭𑀫𑀻 𑀧𑀼𑀡𑁆𑀡𑀸, 𑀧𑀭𑀫𑀢𑁆𑀣𑀧𑀸𑀭𑀫𑀻 𑀓𑀣𑀁.

‘‘𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀓𑀭𑀯𑀻𑀓𑀫𑀥𑀼𑀭𑀕𑀺𑀭𑁄;

𑀦𑀺𑀩𑁆𑀩𑀸𑀧𑀬𑀦𑁆𑀢𑁄 𑀳𑀤𑀬𑀁, 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓’’𑀦𑁆𑀢𑀺. (𑀩𑀼. 𑀯𑀁. 𑁧.𑁭𑁪-𑁭𑁮);

𑀏𑀯𑀁 𑀪𑀕𑀯𑀢𑀸 𑀩𑀼𑀤𑁆𑀥𑀯𑀁𑀲𑁂 𑀤𑁂𑀲𑀺𑀢𑁂 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀳𑁂𑀢𑀼𑀲𑀫𑁆𑀧𑀤𑀸, 𑀅𑀳𑁄 𑀲𑀫𑀼𑀤𑀸𑀕𑀫𑀲𑀫𑁆𑀧𑀢𑁆𑀢𑀺, 𑀅𑀳𑁄 𑀫𑀳𑀸𑀪𑀺𑀦𑀻𑀳𑀸𑀭𑀲𑀫𑀺𑀚𑁆𑀛𑀦𑀸, 𑀤𑀼𑀓𑁆𑀓𑀭𑀁 𑀯𑀢 𑀪𑀕𑀯𑀢𑀸 𑀓𑀢𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦, 𑀏𑀯𑀁𑀯𑀺𑀥𑀲𑁆𑀲 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀘𑁂𑀢𑀁 𑀨𑀮𑀁, 𑀬𑀤𑀺𑀤𑀁 𑀲𑀩𑁆𑀩𑀜𑁆𑀜𑀼𑀢𑀸 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑁄 𑀏𑀯𑀁𑀫𑀳𑀺𑀤𑁆𑀥𑀺𑀓𑀢𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀢𑀸’’𑀢𑀺 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀁 𑀜𑀸𑀡𑀁 𑀧𑁂𑀲𑁂𑀲𑀺. 𑀲𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀳𑀺𑀭𑀺𑀑𑀢𑁆𑀢𑀧𑁆𑀧𑀁 ¶ 𑀲𑀤𑁆𑀥𑀸𑀯𑀻𑀭𑀺𑀬𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀲𑀻𑀮𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀢𑀬𑁄 𑀲𑀫𑁆𑀫𑀸𑀯𑀺𑀢𑀓𑁆𑀓𑀸 𑀢𑀺𑀲𑁆𑀲𑁄 𑀅𑀦𑀯𑀚𑁆𑀚𑀲𑀜𑁆𑀜𑀸𑀬𑁄 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀧𑀜𑁆𑀘 𑀦𑀺𑀲𑁆𑀲𑀭𑀡𑀺𑀬𑀸 𑀥𑀸𑀢𑀼𑀬𑁄 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑀸𑀡𑀸𑀦𑀺 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸 𑀙 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺 𑀙 𑀕𑀸𑀭𑀯𑀸 𑀙 𑀦𑀺𑀲𑁆𑀲𑀭𑀡𑀺𑀬𑀸 𑀥𑀸𑀢𑀼𑀬𑁄 𑀙 𑀲𑀢𑀢𑀯𑀺𑀳𑀸𑀭𑀸 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺 𑀙 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸 𑀙 𑀅𑀪𑀺𑀜𑁆𑀜𑀸 ¶ 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸 𑀲𑀢𑁆𑀢 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀺 𑀲𑀢𑁆𑀢 𑀲𑀜𑁆𑀜𑀸 𑀲𑀢𑁆𑀢 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀤𑁂𑀲𑀦𑀸 𑀲𑀢𑁆𑀢 𑀔𑀻𑀡𑀸𑀲𑀯𑀩𑀮𑀤𑁂𑀲𑀦𑀸 ¶ 𑀅𑀝𑁆𑀞 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀤𑁂𑀲𑀦𑀸 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑀸 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺 𑀅𑀝𑁆𑀞 𑀅𑀓𑁆𑀔𑀡𑀤𑁂𑀲𑀦𑀸 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀦𑀯 𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸 𑀦𑀯 𑀆𑀖𑀸𑀢𑀧𑁆𑀧𑀝𑀺𑀯𑀺𑀦𑀬𑀸 𑀦𑀯 𑀧𑀜𑁆𑀜𑀸 𑀦𑀯 𑀦𑀸𑀦𑀢𑁆𑀢𑀤𑁂𑀲𑀦𑀸 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸 𑀤𑀲 𑀦𑀸𑀣𑀓𑀭𑀡𑀸 𑀥𑀫𑁆𑀫𑀸 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺 𑀤𑀲 𑀅𑀭𑀺𑀬𑀯𑀸𑀲𑀸 𑀤𑀲 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸 𑀤𑀲 𑀭𑀢𑀦𑀸𑀦𑀺 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑀸 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀻 𑀲𑁄𑀴𑀲 𑀅𑀧𑀭𑀫𑁆𑀧𑀭𑀺𑀬𑀸 𑀥𑀫𑁆𑀫𑀸 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺 𑀧𑀜𑁆𑀜𑀸𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀺 𑀧𑀭𑁄𑀧𑀡𑁆𑀡𑀸𑀲 𑀓𑀼𑀲𑀮𑀥𑀫𑁆𑀫𑀸 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀢𑀫𑀳𑀸𑀯𑀚𑀺𑀭𑀜𑀸𑀡𑀁 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀤𑁂𑀲𑀦𑀸𑀜𑀸𑀡𑀸𑀦𑀺 𑀢𑀣𑀸 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀺𑀓𑁂 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁂 𑀩𑀼𑀤𑁆𑀥𑀕𑀼𑀡𑁂 𑀥𑀫𑁆𑀫𑀦𑁆𑀯𑀬𑀢𑁄 𑀅𑀦𑀼𑀕𑀘𑁆𑀙𑀦𑁆𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑁄 𑀦𑁂𑀯 𑀅𑀦𑁆𑀢𑀁, 𑀦 𑀧𑀫𑀸𑀡𑀁 𑀧𑀲𑁆𑀲𑀺. 𑀣𑁂𑀭𑁄 𑀳𑀺 𑀅𑀢𑁆𑀢𑀦𑁄𑀧𑀺 𑀦𑀸𑀫 𑀕𑀼𑀡𑀸𑀦𑀁 𑀅𑀦𑁆𑀢𑀁 𑀯𑀸 𑀧𑀫𑀸𑀡𑀁 𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀦 ¶ 𑀧𑀲𑁆𑀲𑀢𑀺, 𑀲𑁄 𑀪𑀕𑀯𑀢𑁄 𑀕𑀼𑀡𑀸𑀦𑀁 𑀧𑀫𑀸𑀡𑀁 𑀓𑀺𑀁 𑀧𑀲𑁆𑀲𑀺𑀲𑁆𑀲𑀢𑀺? 𑀬𑀲𑁆𑀲 𑀬𑀲𑁆𑀲 𑀳𑀺 𑀧𑀜𑁆𑀜𑀸 𑀫𑀳𑀢𑀻 𑀜𑀸𑀡𑀁 𑀯𑀺𑀲𑀤𑀁, 𑀲𑁄 𑀲𑁄 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺, 𑀇𑀢𑀺 𑀣𑁂𑀭𑁄 𑀪𑀕𑀯𑀢𑁄 𑀕𑀼𑀡𑀸𑀦𑀁 𑀧𑀫𑀸𑀡𑀁 𑀯𑀸 𑀧𑀭𑀺𑀘𑁆𑀙𑁂𑀤𑀁 𑀯𑀸 𑀅𑀧𑀲𑁆𑀲𑀦𑁆𑀢𑁄 ‘‘𑀫𑀸𑀤𑀺𑀲𑀲𑁆𑀲 𑀦𑀸𑀫 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀞𑀺𑀢𑀲𑁆𑀲 𑀩𑀼𑀤𑁆𑀥𑀕𑀼𑀡𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀧𑀕𑁂𑀯 𑀇𑀢𑀭𑁂𑀲𑀁. 𑀅𑀳𑁄 𑀅𑀘𑀺𑀦𑁆𑀢𑁂𑀬𑁆𑀬𑀸 𑀅𑀧𑀭𑀺𑀫𑁂𑀬𑁆𑀬𑀪𑁂𑀤𑀸 𑀫𑀳𑀸𑀦𑀼𑀪𑀸𑀯𑀸 𑀲𑀩𑁆𑀩𑀜𑁆𑀜𑀼𑀕𑀼𑀡𑀸, 𑀓𑁂𑀯𑀮𑀁 𑀧𑀦𑁂𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀜𑀸𑀡𑀲𑁆𑀲𑁂𑀯 𑀲𑀩𑁆𑀩𑀲𑁄 𑀕𑁄𑀘𑀭𑀸, 𑀦𑀸𑀜𑁆𑀜𑁂𑀲𑀁. 𑀓𑀣𑁂𑀢𑀼𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺𑀧𑀺 𑀯𑀺𑀢𑁆𑀣𑀸𑀭𑀢𑁄 𑀦 𑀲𑀓𑁆𑀓𑀸𑀬𑁂𑀯𑀸’’𑀢𑀺 𑀦𑀺𑀝𑁆𑀞𑀫𑀕𑀫𑀸𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 ¶ 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁, 𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂, 𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀉𑀤𑀸. 𑀅𑀝𑁆𑀞. 𑁫𑁩);

𑀏𑀯𑀁 𑀩𑀼𑀤𑁆𑀥𑀸𑀦𑀁 𑀕𑀼𑀡𑀫𑀳𑀦𑁆𑀢𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑁄 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀭𑀽𑀧𑀸𑀦𑀁 𑀦𑀸𑀫 𑀩𑀼𑀤𑁆𑀥𑀕𑀼𑀡𑀸𑀦𑀁 𑀳𑁂𑀢𑀼𑀪𑀽𑀢𑀸 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸 𑀧𑀸𑀭𑀫𑀺𑀬𑁄 𑀅𑀳𑁄 𑀫𑀳𑀸𑀦𑀼𑀪𑀸𑀯𑀸. 𑀓𑀢𑀫𑀸𑀲𑀼 𑀦𑀼 𑀔𑁄 𑀚𑀸𑀢𑀻𑀲𑀼 𑀧𑀸𑀭𑀫𑀺𑀢𑀸 𑀧𑀭𑀺𑀧𑀸𑀘𑀺𑀢𑀸, 𑀓𑀣𑀁 𑀯𑀸 𑀧𑀭𑀺𑀧𑀸𑀓𑀁 𑀕𑀢𑀸, 𑀳𑀦𑁆𑀤𑀸𑀳𑀁 𑀇𑀫𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑁆𑀧𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀸𑀓𑀝𑀢𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀇𑀫𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀢𑀫𑀸𑀲𑀼 𑀦𑀼 𑀔𑁄, 𑀪𑀦𑁆𑀢𑁂 ¶ , 𑀚𑀸𑀢𑀻𑀲𑀼 𑀇𑀫𑁂 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸 𑀧𑀭𑀺𑀧𑀸𑀘𑀺𑀢𑀸, 𑀓𑀣𑀁 𑀯𑀸 𑀧𑀭𑀺𑀧𑀸𑀓𑀁 𑀕𑀢𑀸’’𑀢𑀺? 𑀅𑀣𑀲𑁆𑀲 𑀪𑀕𑀯𑀸 𑀢𑀲𑁆𑀫𑀺𑀁 𑀭𑀢𑀦𑀘𑀗𑁆𑀓𑀫𑁂 𑀢𑀺𑀲𑀦𑁆𑀥𑀺𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 ‘‘𑀲𑀸𑀭𑀺𑀧𑀼𑀢𑁆𑀢, 𑀫𑀬𑁆𑀳𑀁 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸 𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑁂𑀦 𑀘 𑀲𑀩𑁆𑀩𑁂𑀲𑀼 𑀓𑀧𑁆𑀧𑁂𑀲𑀼 𑀪𑀯𑀢𑁄 𑀪𑀯𑀁 𑀚𑀸𑀢𑀺𑀢𑁄 𑀚𑀸𑀢𑀺𑀁 𑀧𑀭𑀺𑀧𑀘𑁆𑀘𑀦𑁆𑀢𑀸𑀬𑁂𑀯 𑀅𑀳𑁂𑀲𑀼𑀁, 𑀇𑀫𑀲𑁆𑀫𑀺𑀁 𑀧𑀦 𑀪𑀤𑁆𑀤𑀓𑀧𑁆𑀧𑁂 𑀇𑀫𑀸𑀲𑀼 𑀚𑀸𑀢𑀻𑀲𑀼 𑀢𑁂 𑀧𑀭𑀺𑀧𑀓𑁆𑀓𑀸 𑀚𑀸𑀢𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂’’𑀢𑀺𑀆𑀤𑀺𑀦𑀸 𑀘𑀭𑀺𑀬𑀸𑀧𑀺𑀝𑀓𑀁 𑀩𑀼𑀤𑁆𑀥𑀸𑀧𑀤𑀸𑀦𑀺𑀬𑀦𑁆𑀢𑀺 𑀤𑀼𑀢𑀺𑀬𑀸𑀪𑀺𑀥𑀸𑀦𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀪𑀸𑀲𑀺. 𑀅𑀧𑀭𑁂 𑀧𑀦 ‘‘𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀤𑁂𑀯𑀸𑀢𑀺𑀤𑁂𑀯𑁄 𑀤𑁂𑀯𑀩𑁆𑀭𑀳𑁆𑀫𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀑𑀢𑀭𑀺𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 ¶ 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑁄 𑀘𑀭𑀺𑀬𑀸𑀧𑀺𑀝𑀓𑀁 𑀤𑁂𑀲𑁂𑀲𑀻’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀤𑀽𑀭𑁂𑀦𑀺𑀤𑀸𑀦𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀸𑀦𑀺 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀘𑀭𑀺𑀬𑀸𑀧𑀺𑀝𑀓𑀲𑁆𑀲 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁 𑀯𑀺𑀢𑁆𑀣𑀸𑀭𑀢𑁄 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀽𑀭𑁂𑀦𑀺𑀤𑀸𑀦𑀁 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀯𑀺𑀪𑀸𑀯𑀦𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺.

𑁧. 𑀇𑀤𑀸𑀦𑀺 ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀘𑀭𑀺𑀬𑀸𑀧𑀺𑀝𑀓𑀧𑀸𑀴𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀭𑀸𑀬𑀁 ¶ 𑀓𑀧𑁆𑀧-𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 ¶ 𑀘 𑀯𑀺𑀢𑀓𑁆𑀓𑀯𑀺𑀥𑀸𑀦𑀧𑀝𑀺𑀪𑀸𑀕𑀧𑀜𑁆𑀜𑀢𑁆𑀢𑀺𑀓𑀸𑀮𑀧𑀭𑀫𑀸𑀬𑀼𑀲𑀫𑀡𑀯𑁄𑀳𑀸𑀭𑀲𑀫𑀦𑁆𑀢𑀪𑀸𑀯𑀸𑀪𑀺𑀲𑀤𑁆𑀤𑀳𑀦- 𑀙𑁂𑀤𑀦𑀯𑀺𑀦𑀺𑀬𑁄𑀕𑀯𑀺𑀦𑀬𑀓𑀺𑀭𑀺𑀬𑀸𑀮𑁂𑀲𑀦𑁆𑀢𑀭𑀓𑀧𑁆𑀧𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀫𑀳𑀸𑀓𑀧𑁆𑀧𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁩𑁭) 𑀯𑀺𑀢𑀓𑁆𑀓𑁂 𑀆𑀕𑀢𑁄. ‘‘𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁬𑁪𑁨) 𑀯𑀺𑀥𑀸𑀦𑁂, 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀓𑀺𑀭, 𑀪𑁄, 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁬𑁦) 𑀧𑀝𑀺𑀪𑀸𑀕𑁂. 𑀲𑀢𑁆𑀣𑀼𑀲𑀤𑀺𑀲𑁂𑀦𑀸𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. ‘‘𑀇𑀥𑀸𑀬𑀲𑁆𑀫𑀸, 𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁦𑁯𑁮) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁂. ‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁭𑁮; 𑀉𑀤𑀸. 𑁫𑁧) 𑀧𑀭𑀫𑀸𑀬𑀼𑀫𑁆𑀳𑀺. 𑀆𑀬𑀼𑀓𑀧𑁆𑀧𑁄 𑀳𑀺 𑀇𑀥 𑀓𑀧𑁆𑀧𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁨𑁫𑁦) 𑀲𑀫𑀡𑀯𑁄𑀳𑀸𑀭𑁂. ‘‘𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁫.𑁧; 𑀲𑀼. 𑀦𑀺. 𑀫𑀗𑁆𑀕𑀮𑀲𑀼𑀢𑁆𑀢) 𑀲𑀫𑀦𑁆𑀢𑀪𑀸𑀯𑁂. ‘‘𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨) 𑀅𑀪𑀺𑀲𑀤𑁆𑀤𑀳𑀦𑁂, 𑀲𑀤𑁆𑀥𑀸𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺𑀆𑀤𑀻𑀲𑀼 (𑀯𑀺. 𑀯. 𑁧𑁦𑁯𑁪; 𑀚𑀸. 𑁨.𑁨𑁨.𑁧𑁩𑁬𑁮) 𑀙𑁂𑀤𑀦𑁂. ‘‘𑀏𑀯𑀫𑁂𑀯 𑀇𑀢𑁄 𑀤𑀺𑀦𑁆𑀦𑀁, 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀻’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁭.𑁭; 𑀧𑁂. 𑀯. 𑁨𑁦) 𑀯𑀺𑀦𑀺𑀬𑁄𑀕𑁂. ‘‘𑀓𑀧𑁆𑀧𑀓𑀢𑁂𑀦 𑀅𑀓𑀧𑁆𑀧𑀓𑀢𑀁 𑀲𑀁𑀲𑀺𑀩𑁆𑀩𑀺𑀢𑀁 ¶ 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁩𑁭𑁧) 𑀯𑀺𑀦𑀬𑀓𑀺𑀭𑀺𑀬𑀸𑀬𑀁. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼𑀁, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’’𑀢𑀺𑀆𑀤𑀻𑀲𑀼 𑀮𑁂𑀲𑁂. ‘‘𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀲𑀗𑁆𑀖𑀪𑁂𑀤𑀓𑁄…𑀧𑁂… 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺 (𑀇𑀢𑀺𑀯𑀼. 𑁧𑁮; 𑀘𑀽𑀴𑀯. 𑁩𑁫𑁪; 𑀓𑀣𑀸. 𑁬𑁫𑁭, 𑁮𑁬𑁨) 𑀘 𑀆𑀤𑀻𑀲𑀼 𑀅𑀦𑁆𑀢𑀭𑀓𑀧𑁆𑀧𑁂.

‘‘𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 ¶ 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄, 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻’’𑀢𑀺. 𑁋

𑀆𑀤𑀻𑀲𑀼 (𑀲𑀼. 𑀦𑀺. 𑁮𑁦𑁯) 𑀢𑀡𑁆𑀳𑀸𑀤𑀺𑀝𑁆𑀞𑀻𑀲𑀼. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀦𑀺𑀤𑁆𑀤𑁂𑀲𑁂 ‘‘𑀓𑀧𑁆𑀧𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀧𑁆𑀧𑀸 𑀢𑀡𑁆𑀳𑀸𑀓𑀧𑁆𑀧𑁄 𑀤𑀺𑀝𑁆𑀞𑀺𑀓𑀧𑁆𑀧𑁄’’𑀢𑀺 (𑀫𑀳𑀸𑀦𑀺. 𑁨𑁮). ‘‘𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂’’𑀢𑀺𑀆𑀤𑀻𑀲𑀼 ¶ (𑀤𑀻. 𑀦𑀺. 𑁧.𑁨𑁪𑁪; 𑀫. 𑀦𑀺. 𑁧.𑁬𑁮) 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁫𑁬) 𑀫𑀳𑀸𑀓𑀧𑁆𑀧𑁂. 𑀇𑀥𑀸𑀧𑀺 𑀫𑀳𑀸𑀓𑀧𑁆𑀧𑁂𑀬𑁂𑀯 𑀤𑀝𑁆𑀞𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁯; 𑁩.𑁨𑁭𑁫; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧; 𑀅. 𑀦𑀺. 𑀅𑀝𑁆𑀞. 𑁨.𑁩.𑁧𑁨𑁮; 𑀔𑀼. 𑀧𑀸. 𑀅𑀝𑁆𑀞. 𑁫.𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸).

𑀢𑀢𑁆𑀭𑀸𑀬𑀁 𑀧𑀤𑀲𑀺𑀤𑁆𑀥𑀺 𑁋 𑀓𑀧𑁆𑀧𑀻𑀬𑀢𑀻𑀢𑀺 𑀓𑀧𑁆𑀧𑁄, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀲𑀁𑀯𑀘𑁆𑀙𑀭𑀯𑀲𑁂𑀦 𑀕𑀡𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀓𑁂𑀯𑀮𑀁 𑀲𑀸𑀲𑀧𑀭𑀸𑀲𑀺𑀉𑀧𑀫𑀸𑀤𑀻𑀳𑀺 𑀓𑀧𑁆𑀧𑁂𑀢𑀩𑁆𑀩𑁄 𑀧𑀭𑀺𑀓𑀧𑁆𑀧𑁂𑀢𑀩𑁆𑀩𑀧𑀭𑀺𑀫𑀸𑀡𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀻𑀯 𑀤𑀻𑀖𑁄 𑀦𑀼 𑀔𑁄, 𑀪𑀦𑁆𑀢𑁂, 𑀓𑀧𑁆𑀧𑁄𑀢𑀺? 𑀤𑀻𑀖𑁄 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑁄, 𑀲𑁄 𑀦 𑀲𑀼𑀓𑀭𑁄 𑀲𑀗𑁆𑀔𑀸𑀢𑀼𑀁 ‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻’𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻’𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻’𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻’𑀢𑀺 𑀯𑀸. 𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼𑀦𑁆𑀢𑀺? ‘𑀲𑀓𑁆𑀓𑀸, 𑀪𑀺𑀓𑁆𑀔𑀽’𑀢𑀺 𑀪𑀕𑀯𑀸 𑀅𑀯𑁄𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦 𑀫𑀳𑀸𑀲𑀸𑀲𑀧𑀭𑀸𑀲𑀺. 𑀢𑀢𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀏𑀓𑀫𑁂𑀓𑀁 𑀲𑀸𑀲𑀧𑀁 𑀉𑀤𑁆𑀥𑀭𑁂𑀬𑁆𑀬, 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄, 𑀪𑀺𑀓𑁆𑀔𑀼, 𑀫𑀳𑀸𑀲𑀸𑀲𑀧𑀭𑀸𑀲𑀺 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀓𑀧𑁆𑀧𑁄, 𑀏𑀯𑀁 𑀤𑀻𑀖𑁄 𑀔𑁄, 𑀪𑀺𑀓𑁆𑀔𑀼, 𑀓𑀧𑁆𑀧𑁄’’𑀢𑀺 (𑀲𑀁. 𑀦𑀺. 𑁨.𑁧𑁨𑁮).

𑀲𑁆𑀯𑀸𑀬𑀁 ¶ 𑀫𑀳𑀸𑀓𑀧𑁆𑀧𑁄 𑀲𑀁𑀯𑀝𑁆𑀝𑀸𑀤𑀺𑀯𑀲𑁂𑀦 𑀘𑀢𑀼𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑀗𑁆𑀕𑀳𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄, 𑀲𑀁𑀯𑀝𑁆𑀝𑀝𑁆𑀞𑀸𑀬𑀻, 𑀯𑀺𑀯𑀝𑁆𑀝𑁄, 𑀯𑀺𑀯𑀝𑁆𑀝𑀝𑁆𑀞𑀸𑀬𑀻’’𑀢𑀺 (𑀅. 𑀦𑀺. 𑁪.𑁧𑁫𑁬).

𑀢𑀢𑁆𑀣 𑀢𑀬𑁄 𑀲𑀁𑀯𑀝𑁆𑀝𑀸 𑁋 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀆𑀧𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑁋 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺. 𑀬𑀤𑀸 𑀳𑀺 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀯𑀺𑀦𑀲𑁆𑀲𑀢𑀺, 𑀬𑀁 𑀩𑀼𑀤𑁆𑀥𑀸𑀦𑀁 ¶ 𑀆𑀡𑀸𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀢𑀻𑀲𑀼 𑀲𑀁𑀯𑀝𑁆𑀝𑁂𑀲𑀼 𑀬𑀣𑀸𑀓𑁆𑀓𑀫𑀁 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀚𑀸𑀮𑀸𑀬 𑀯𑀸 𑀉𑀤𑀓𑀲𑁆𑀲 𑀯𑀸 𑀯𑀸𑀢𑀲𑁆𑀲 𑀯𑀸 𑀉𑀧𑀘𑁆𑀙𑁂𑀤𑁄 𑀇𑀤𑀁 𑀏𑀓𑀁 ¶ 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀁𑀯𑀝𑁆𑀝𑁄 𑀦𑀸𑀫. 𑀓𑀧𑁆𑀧𑀯𑀺𑀦𑀸𑀲𑀓𑀚𑀸𑀮𑀸𑀤𑀺𑀧𑀘𑁆𑀙𑁂𑀤𑀢𑁄 𑀬𑀸𑀯 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀧𑀽𑀭𑀓𑁄 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀢𑀺, 𑀇𑀤𑀁 𑀤𑀼𑀢𑀺𑀬𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀦𑀸𑀫.

𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄, 𑀇𑀤𑀁 𑀢𑀢𑀺𑀬𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀺𑀯𑀝𑁆𑀝𑁄 𑀦𑀸𑀫. 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀢𑁄 𑀬𑀸𑀯 𑀧𑀼𑀦 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄, 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀻 𑀦𑀸𑀫. 𑀇𑀫𑁂𑀲𑀼 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀕𑀳𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀢𑁂𑀦 𑀲𑀫𑀸𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀸 𑀯𑀺𑀯𑀝𑁆𑀝𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. ‘‘𑀯𑀻𑀲𑀢𑀺𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀕𑀳’’𑀦𑁆𑀢𑀺 𑀏𑀓𑁂. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁆𑀯𑀸𑀬𑀁 𑀫𑀳𑀸𑀓𑀧𑁆𑀧𑁄 𑀲𑀁𑀯𑀝𑁆𑀝𑀸𑀤𑀺𑀯𑀲𑁂𑀦 𑀘𑀢𑀼𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑀗𑁆𑀕𑀳𑁄’’𑀢𑀺.

𑀓𑀧𑁆𑀧𑁂𑀢𑀺 𑀘 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀲𑀢𑀲𑀳𑀲𑁆𑀲𑁂𑀢𑀺 𑀓𑀧𑁆𑀧𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 𑀘𑀸𑀬𑀁 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄, 𑀇𑀥𑀸𑀧𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦𑁂𑀯 𑀩𑀳𑀼𑀯𑀘𑀦𑀁. 𑀲𑀫𑀸𑀦𑀸𑀥𑀺𑀓𑀭𑀡𑀜𑁆𑀳𑁂𑀢𑀁 𑀧𑀤𑀤𑁆𑀯𑀬𑀁. 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀲 𑀧𑀦 𑀅𑀲𑀗𑁆𑀔𑀺𑀬𑁂𑀢𑀺 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀓𑀧𑁆𑀧𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀓𑀭𑀡𑀢𑁄 𑀓𑀧𑁆𑀧𑀸𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀯. 𑀦 𑀳𑀺 𑀯𑀼𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀕𑀳𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀫𑀳𑀸𑀓𑀧𑁆𑀧𑀸𑀦𑀁 𑀘𑀢𑀼𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀢𑀲𑀳𑀲𑁆𑀲𑁂 𑀘 𑀫𑀳𑀸𑀓𑀧𑁆𑀧𑁂𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀲𑀗𑁆𑀔𑀺𑀬𑁂𑀢𑀺 𑀏𑀢𑁆𑀣 𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀲𑀗𑁆𑀔𑀺𑀬𑀸, 𑀕𑀡𑀦𑀁 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺 𑀏𑀓𑁄 𑀕𑀡𑀦𑀯𑀺𑀲𑁂𑀲𑁄’’𑀢𑀺 𑀏𑀓𑁂. 𑀢𑁂 𑀳𑀺 𑀏𑀓𑀢𑁄 𑀧𑀝𑁆𑀞𑀸𑀬 𑀫𑀳𑀸𑀩𑀮𑀓𑁆𑀔𑀧𑀭𑀺𑀬𑁄𑀲𑀸𑀦𑀸𑀦𑀺 𑀏𑀓𑀽𑀦𑀲𑀝𑁆𑀞𑀺𑀝𑁆𑀞𑀸𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀤𑀲𑀫𑀳𑀸𑀩𑀮𑀓𑁆𑀔𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫, 𑀲𑀝𑁆𑀞𑀺𑀫𑀝𑁆𑀞𑀸𑀦𑀦𑁆𑀢𑀭𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺, 𑀲𑀗𑁆𑀔𑁆𑀬𑀸𑀞𑀸𑀦𑀦𑁆𑀢𑀭𑀁 𑀦𑀸𑀫 𑀕𑀡𑀦𑀯𑀺𑀲𑁂𑀲𑁄, 𑀢𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀪𑀸𑀯𑀸𑀪𑀸𑀯𑀢𑁄 ¶ 𑀏𑀓𑀁 𑀞𑀸𑀦𑀦𑁆𑀢𑀭𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀜𑁆𑀘𑀸𑀢𑀺 𑀯𑀺𑀭𑀼𑀤𑁆𑀥𑀫𑁂𑀢𑀁. 𑀦𑀦𑀼 𑀘 𑀅𑀲𑀗𑁆𑀔𑁆𑀬𑀪𑀸𑀯𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀢𑁆𑀢𑁂𑀧𑀺 𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑀪𑀸𑀯𑁄 𑀦 𑀬𑀼𑀚𑁆𑀚𑀢𑀻𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺. 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀢𑁆𑀭𑀸𑀬𑀫𑀸𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑀦𑀸 𑁋

𑀅𑀢𑀻𑀢𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀢𑀡𑁆𑀳𑀗𑁆𑀓𑀭𑁄 𑀫𑁂𑀥𑀗𑁆𑀓𑀭𑁄 𑀲𑀭𑀡𑀗𑁆𑀓𑀭𑁄 ¶ 𑀤𑀻𑀧𑀗𑁆𑀓𑀭𑁄𑀢𑀺 𑀘𑀢𑁆𑀢𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀦𑀼𑀓𑁆𑀓𑀫𑁂𑀦 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑁂𑀲𑀼 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀫𑀭𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 ¶ 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀅𑀜𑁆𑀜𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀺. 𑀢𑀲𑁆𑀲 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀅𑀣𑀲𑁆𑀲 𑀭𑀸𑀲𑀺𑀯𑀟𑁆𑀠𑀓𑁄 𑀅𑀫𑀘𑁆𑀘𑁄 𑀆𑀬𑀧𑁄𑀢𑁆𑀣𑀓𑀁 𑀆𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀪𑀭𑀺𑀢𑁂 𑀲𑀸𑀭𑀕𑀩𑁆𑀪𑁂 𑀯𑀺𑀯𑀭𑀺𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀢𑁂, 𑀓𑀼𑀫𑀸𑀭, 𑀫𑀸𑀢𑀼𑀲𑀦𑁆𑀢𑀓𑀁, 𑀏𑀢𑁆𑀢𑀓𑀁 𑀢𑁂 𑀧𑀺𑀢𑀼𑀲𑀦𑁆𑀢𑀓𑀁, 𑀏𑀢𑁆𑀢𑀓𑀁 𑀢𑁂 𑀅𑀬𑁆𑀬𑀓𑀧𑀬𑁆𑀬𑀓𑀸𑀦’’𑀦𑁆𑀢𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀥𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑀁 𑀥𑀦𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀏𑀯𑀁 𑀩𑀳𑀼𑀁 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀸𑀤𑀬𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸 𑀏𑀓𑀓𑀳𑀸𑀧𑀡𑀫𑁆𑀧𑀺 𑀕𑀳𑁂𑀢𑁆𑀯𑀸 𑀦 𑀕𑀢𑀸, 𑀫𑀬𑀸 𑀧𑀦 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑁂𑀦𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀳𑀺 𑀯𑀺𑀳𑀭𑀢𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀘𑀢𑀽𑀳𑀺 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀭𑀫𑁆𑀫𑀯𑀢𑀻𑀦𑀕𑀭𑀁 𑀦𑀸𑀫 𑀧𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀭𑀫𑁆𑀫𑀯𑀢𑀻𑀦𑀕𑀭𑀯𑀸𑀲𑀺𑀦𑁄 ‘‘𑀲𑀢𑁆𑀣𑀸 𑀓𑀺𑀭 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑀢𑁆𑀯𑀸 𑀲𑀼𑀤𑀲𑁆𑀲𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀳𑀝𑁆𑀞𑀢𑀼𑀝𑁆𑀞𑀸 𑀲𑁄𑀥𑁂𑀦𑁆𑀢𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀲𑀼𑀫𑁂𑀥𑀢𑀸𑀧𑀲𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 ¶ 𑀢𑁂 𑀳𑀝𑁆𑀞𑀢𑀼𑀝𑁆𑀞𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄, 𑀓𑀲𑁆𑀲 𑀢𑀼𑀫𑁆𑀳𑁂 𑀇𑀫𑀁 𑀫𑀕𑁆𑀕𑀁 𑀲𑁄𑀥𑁂𑀣𑀸’’𑀢𑀺 𑀧𑀼𑀘𑁆𑀙𑀺? 𑀢𑁂𑀳𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀲𑁄𑀥𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀅𑀢𑀻𑀢𑁂𑀲𑀼 𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑁄 ¶ 𑀢𑀸𑀯𑀤𑁂𑀯 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 ‘‘𑀫𑀬𑁆𑀳𑀫𑁆𑀧𑀺 𑀑𑀓𑀸𑀲𑀁 𑀤𑁂𑀣, 𑀅𑀳𑀫𑁆𑀧𑀺 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 ¶ 𑀢𑁂𑀳𑀺 𑀤𑀲𑁆𑀲𑀺𑀢𑀁 𑀑𑀓𑀸𑀲𑀁 ‘‘𑀓𑀺𑀜𑁆𑀘𑀸𑀧𑀺 𑀅𑀳𑀁 𑀇𑀫𑀁 𑀇𑀤𑁆𑀥𑀺𑀬𑀸 𑀲𑀢𑁆𑀢𑀭𑀢𑀦𑀯𑀺𑀘𑀺𑀢𑁆𑀢𑀁 𑀓𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑀼𑀁 𑀧𑀳𑁄𑀫𑀺, 𑀅𑀚𑁆𑀚 𑀧𑀦 𑀫𑀬𑀸 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀸𑀬𑀸𑀭𑀳𑀁 𑀧𑀼𑀜𑁆𑀜𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀺𑀡𑀓𑀘𑀯𑀭𑀸𑀤𑀬𑁄 𑀦𑀻𑀳𑀭𑀺𑀢𑁆𑀯𑀸 𑀧𑀁𑀲𑀼𑀁 𑀆𑀳𑀭𑀺𑀢𑁆𑀯𑀸 𑀲𑀫𑀁 𑀓𑀭𑁄𑀦𑁆𑀢𑁄 𑀲𑁄𑀥𑁂𑀢𑀺. 𑀅𑀦𑀺𑀝𑁆𑀞𑀺𑀢𑁂𑀬𑁂𑀯 𑀧𑀦 𑀢𑀲𑁆𑀲 𑀧𑀤𑁂𑀲𑀲𑁆𑀲 𑀲𑁄𑀥𑀦𑁂 𑀤𑀻𑀧𑀗𑁆𑀓𑀭𑁄 𑀪𑀕𑀯𑀸 𑀫𑀳𑀸𑀦𑀼𑀪𑀸𑀯𑀸𑀦𑀁 𑀙𑀴𑀪𑀺𑀜𑁆𑀜𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀘𑀢𑀽𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀫𑀸 𑀘𑀺𑀓𑁆𑀔𑀮𑁆𑀮𑀁 𑀅𑀓𑁆𑀓𑀫𑀦𑁆𑀢𑀽’’𑀢𑀺 𑀅𑀢𑁆𑀢𑀦𑁄 𑀯𑀸𑀓𑀘𑀻𑀭𑀜𑁆𑀘 𑀘𑀫𑁆𑀫𑀔𑀡𑁆𑀟𑀜𑁆𑀘 𑀚𑀝𑀸𑀓𑀮𑀸𑀧𑀜𑁆𑀘 𑀧𑀲𑀸𑀭𑁂𑀢𑁆𑀯𑀸 𑀲𑀬𑀜𑁆𑀘 𑀬𑁂𑀦 𑀪𑀕𑀯𑀸 𑀢𑁂𑀦 𑀲𑀻𑀲𑀁 𑀓𑀢𑁆𑀯𑀸 𑀅𑀯𑀓𑀼𑀚𑁆𑀚𑁄 𑀦𑀺𑀧𑀚𑁆𑀚𑀺. 𑀏𑀯𑀜𑁆𑀘 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀘𑁆𑀙𑀺𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑁄 𑀳𑀼𑀢𑁆𑀯𑀸 𑀅𑀚𑁆𑀚𑁂𑀯 𑀓𑀺𑀮𑁂𑀲𑁂 𑀖𑀸𑀢𑁂𑀲𑁆𑀲𑀸𑀫𑀺. 𑀓𑀺𑀁 𑀫𑀬𑁆𑀳𑀁 𑀏𑀓𑀓𑁂𑀦𑁂𑀯 𑀲𑀁𑀲𑀸𑀭𑀫𑀳𑁄𑀖𑀢𑁄 𑀦𑀺𑀢𑁆𑀣𑀭𑀡𑁂𑀦? 𑀬𑀁𑀦𑀽𑀦𑀸𑀳𑀫𑁆𑀧𑀺 𑀏𑀯𑀭𑀽𑀧𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀁𑀲𑀸𑀭𑀫𑀳𑀡𑁆𑀡𑀯𑀢𑁄 𑀢𑀸𑀭𑁂𑀬𑁆𑀬’’𑀦𑁆𑀢𑀺. 𑀇𑀢𑀺 𑀲𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀫𑀳𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀘𑀺𑀢𑁆𑀢𑀁 𑀧𑀡𑀺𑀥𑁂𑀲𑀺. 𑀅𑀣 𑀪𑀕𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀉𑀲𑁆𑀲𑀻𑀲𑀓𑁂 𑀞𑀢𑁆𑀯𑀸 𑀘𑀺𑀢𑁆𑀢𑀸𑀘𑀸𑀭𑀁 𑀲𑀫𑀺𑀚𑁆𑀛𑀦𑀪𑀸𑀯𑀜𑁆𑀘𑀲𑁆𑀲 𑀜𑀢𑁆𑀯𑀸 ‘‘𑀅𑀬𑀁 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀁 𑀇𑀫𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀢𑁄 𑀅𑀧𑀭𑁂𑀧𑀺 𑀓𑁄𑀡𑁆𑀟𑀜𑁆𑀜𑀪𑀕𑀯𑀦𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀸 𑀬𑀸𑀯 𑀓𑀲𑁆𑀲𑀧𑀤𑀲𑀩𑀮𑀧𑀭𑀺𑀬𑁄𑀲𑀸𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀫𑀳𑀸𑀲𑀢𑁆𑀢𑀁 ‘‘𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀇𑀢𑀺 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀲𑁆𑀲𑁂𑀯 𑀘𑀢𑀼𑀯𑀻𑀲𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸. 𑀬𑀲𑁆𑀫𑀺𑀁 𑀧𑀦 𑀓𑀧𑁆𑀧𑁂 𑀤𑀻𑀧𑀗𑁆𑀓𑀭𑀤𑀲𑀩𑀮𑁄 𑀉𑀤𑀧𑀸𑀤𑀺, 𑀢𑀲𑁆𑀫𑀺𑀁 𑀅𑀜𑁆𑀜𑁂𑀧𑀺 𑀢𑀬𑁄 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑁆𑀬𑀸𑀓𑀭𑀡𑀁 𑀦𑀸𑀳𑁄𑀲𑀺, 𑀢𑀲𑁆𑀫𑀸 𑀢𑁂 𑀇𑀥 ¶ 𑀦 𑀕𑀳𑀺𑀢𑀸. 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀧𑀦 𑀢𑀫𑁆𑀳𑀸 𑀓𑀧𑁆𑀧𑀸 𑀧𑀝𑁆𑀞𑀸𑀬 𑀲𑀩𑁆𑀩𑀩𑀼𑀤𑁆𑀥𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀢𑀡𑁆𑀳𑀗𑁆𑀓𑀭𑁄 𑀫𑁂𑀥𑀗𑁆𑀓𑀭𑁄, 𑀅𑀣𑁄𑀧𑀺 𑀲𑀭𑀡𑀗𑁆𑀓𑀭𑁄;

𑀤𑀻𑀧𑀗𑁆𑀓𑀭𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀓𑁄𑀡𑁆𑀟𑀜𑁆𑀜𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

‘‘𑀫𑀗𑁆𑀕𑀮𑁄 𑀘 𑀲𑀼𑀫𑀦𑁄 𑀘, 𑀭𑁂𑀯𑀢𑁄 𑀲𑁄𑀪𑀺𑀢𑁄 𑀫𑀼𑀦𑀺;

𑀅𑀦𑁄𑀫𑀤𑀲𑁆𑀲𑀻 𑀧𑀤𑀼𑀫𑁄, 𑀦𑀸𑀭𑀤𑁄 𑀧𑀤𑀼𑀫𑀼𑀢𑁆𑀢𑀭𑁄.

‘‘𑀲𑀼𑀫𑁂𑀥𑁄 ¶ ¶ 𑀘 𑀲𑀼𑀚𑀸𑀢𑁄 𑀘, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀅𑀢𑁆𑀣𑀤𑀲𑁆𑀲𑀻 𑀥𑀫𑁆𑀫𑀤𑀲𑁆𑀲𑀻, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄.

‘‘𑀢𑀺𑀲𑁆𑀲𑁄 𑀨𑀼𑀲𑁆𑀲𑁄 𑀘 𑀲𑀫𑁆𑀩𑀼𑀤𑁆𑀥𑁄, 𑀯𑀺𑀧𑀲𑁆𑀲𑀻 𑀲𑀺𑀔𑀺 𑀯𑁂𑀲𑁆𑀲𑀪𑀽;

𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄 𑀘𑀸𑀧𑀺 𑀦𑀸𑀬𑀓𑁄.

‘‘𑀏𑀢𑁂 𑀅𑀳𑁂𑀲𑀼𑀁 𑀲𑀫𑁆𑀩𑀼𑀤𑁆𑀥𑀸, 𑀯𑀻𑀢𑀭𑀸𑀕𑀸 𑀲𑀫𑀸𑀳𑀺𑀢𑀸;

𑀲𑀢𑀭𑀁𑀲𑀻𑀯 𑀉𑀧𑁆𑀧𑀦𑁆𑀦𑀸, 𑀫𑀳𑀸𑀢𑀫𑀯𑀺𑀦𑁄𑀤𑀦𑀸;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯, 𑀦𑀺𑀩𑁆𑀩𑀼𑀢𑀸 𑀢𑁂 𑀲𑀲𑀸𑀯𑀓𑀸’’𑀢𑀺. (𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸);

𑀢𑀢𑁆𑀣 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀘 𑀓𑁄𑀡𑁆𑀟𑀜𑁆𑀜𑀤𑀲𑀩𑀮𑀲𑁆𑀲 𑀘 𑀅𑀦𑁆𑀢𑀭𑁂 𑀫𑀳𑀸𑀓𑀧𑁆𑀧𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀲𑀼𑀜𑁆𑀜𑁄 𑀮𑁄𑀓𑁄 𑀅𑀳𑁄𑀲𑀺, 𑀢𑀣𑀸 𑀪𑀕𑀯𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀘 𑀪𑀕𑀯𑀢𑁄 𑀫𑀗𑁆𑀕𑀮𑀲𑁆𑀲 𑀘 𑀅𑀦𑁆𑀢𑀭𑁂, 𑀢𑀣𑀸 𑀪𑀕𑀯𑀢𑁄 𑀲𑁄𑀪𑀺𑀢𑀲𑁆𑀲 𑀘 𑀪𑀕𑀯𑀢𑁄 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀘 𑀅𑀦𑁆𑀢𑀭𑁂, 𑀢𑀣𑀸 𑀪𑀕𑀯𑀢𑁄 𑀦𑀸𑀭𑀤𑀲𑁆𑀲 𑀘 𑀪𑀕𑀯𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀘 𑀅𑀦𑁆𑀢𑀭𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀩𑀼𑀤𑁆𑀥𑀯𑀁𑀲𑁂 (𑀩𑀼. 𑀯𑀁. 𑁨𑁮.𑁩, 𑁪, 𑁬, 𑁯) 𑁋

‘‘𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄, 𑀓𑁄𑀡𑁆𑀟𑀜𑁆𑀜𑀲𑁆𑀲 𑀘 𑀲𑀢𑁆𑀣𑀼𑀦𑁄;

𑀏𑀢𑁂𑀲𑀁 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸.

‘‘𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀧𑀭𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀦𑀸𑀬𑀓𑁄;

𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸.

‘‘𑀲𑁄𑀪𑀺𑀢𑀲𑁆𑀲 𑀅𑀧𑀭𑁂𑀦, 𑀅𑀦𑁄𑀫𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸.

‘‘𑀦𑀸𑀭𑀤𑀲𑁆𑀲 𑀪𑀕𑀯𑀢𑁄, 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀢𑁆𑀣𑀼𑀦𑁄;

𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸’’𑀢𑀺.

𑀏𑀯𑀁 𑀕𑀡𑀦𑀸𑀢𑀻𑀢𑀢𑀸𑀬 𑀅𑀲𑀗𑁆𑀔𑁆𑀬𑁂𑀬𑁆𑀬𑀢𑁆𑀢𑁂𑀧𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀫𑀳𑀸𑀓𑀧𑁆𑀧𑀸𑀦𑀁 𑀕𑀡𑀦𑀸𑀢𑀺𑀓𑁆𑀓𑀫𑁂𑀦 ‘‘𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂’’𑀢𑀺 𑀯𑀼𑀢𑁆𑀢𑀁, 𑀦 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑀲𑁆𑀲 𑀘 𑀲𑀼𑀫𑁂𑀥𑀤𑀲𑀩𑀮𑀲𑁆𑀲 𑀘 𑀅𑀦𑁆𑀢𑀭𑁂 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀲𑀼𑀚𑀸𑀢𑀤𑀲𑀩𑀮𑀲𑁆𑀲 𑀘 𑀧𑀺𑀬𑀤𑀲𑁆𑀲𑀻𑀤𑀲𑀩𑀮𑀲𑁆𑀲 𑀘 𑀅𑀦𑁆𑀢𑀭𑁂 𑀦𑀯𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀓𑀧𑁆𑀧𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀤𑁆𑀯𑀸𑀲𑀻𑀢𑀼𑀢𑁆𑀢𑀭𑀸𑀦𑀺 𑀅𑀝𑁆𑀞 𑀘 ¶ 𑀲𑀢𑀸𑀦𑀺, 𑀥𑀫𑁆𑀫𑀤𑀲𑁆𑀲𑀻𑀤𑀲𑀩𑀮𑀲𑁆𑀲 𑀘 𑀲𑀺𑀤𑁆𑀥𑀢𑁆𑀣𑀤𑀲𑀩𑀮𑀲𑁆𑀲 𑀘 𑀅𑀦𑁆𑀢𑀭𑁂 𑀯𑀻𑀲𑀢𑀺 𑀓𑀧𑁆𑀧𑀸, 𑀲𑀺𑀤𑁆𑀥𑀢𑁆𑀣𑀤𑀲𑀩𑀮𑀲𑁆𑀲 ¶ 𑀘 𑀢𑀺𑀲𑁆𑀲𑀤𑀲𑀩𑀮𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑁄 𑀓𑀧𑁆𑀧𑁄 ¶ , 𑀪𑀕𑀯𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀘 𑀪𑀕𑀯𑀢𑁄 𑀲𑀺𑀔𑀺𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀝𑁆𑀞𑀺 𑀓𑀧𑁆𑀧𑀸, 𑀪𑀕𑀯𑀢𑁄 𑀘 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀘 𑀓𑀓𑀼𑀲𑀦𑁆𑀥𑀲𑁆𑀲 𑀅𑀦𑁆𑀢𑀭𑁂 𑀢𑀺𑀁𑀲 𑀓𑀧𑁆𑀧𑀸, 𑀇𑀢𑀺 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑀲𑁆𑀲 𑀉𑀧𑁆𑀧𑀦𑁆𑀦𑀓𑀧𑁆𑀧𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀢𑁂𑀲𑀁 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀓𑀧𑁆𑀧𑁂𑀳𑀺 𑀇𑀫𑀺𑀦𑀸 𑀘 𑀪𑀤𑁆𑀤𑀓𑀧𑁆𑀧𑁂𑀦 𑀲𑀤𑁆𑀥𑀺𑀁 𑀲𑀢𑀲𑀳𑀲𑁆𑀲𑀫𑀳𑀸𑀓𑀧𑁆𑀧𑀸. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂’’𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀲𑀩𑁆𑀩𑀁 𑀩𑀼𑀤𑁆𑀥𑀯𑀁𑀲𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀁 𑀳𑁄𑀢𑀻𑀢𑀺 𑀅𑀢𑀺𑀯𑀺𑀢𑁆𑀣𑀸𑀭𑀪𑀻𑀭𑀼𑀓𑀲𑁆𑀲 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑀸 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳. 𑀅𑀢𑁆𑀣𑀺𑀓𑁂𑀳𑀺 𑀩𑀼𑀤𑁆𑀥𑀯𑀁𑀲𑀢𑁄 (𑀩𑀼. 𑀯𑀁. 𑁧.𑁧 𑀆𑀤𑀬𑁄) 𑀕𑀳𑁂𑀢𑀩𑁆𑀩𑁄. 𑀬𑁄𑀧𑀺 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑁄 𑀓𑀣𑀸𑀫𑀕𑁆𑀕𑁄, 𑀲𑁄𑀧𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 (𑀥. 𑀲. 𑀅𑀝𑁆𑀞. 𑀲𑀼𑀫𑁂𑀥𑀓𑀣𑀸) 𑀥𑀫𑁆𑀫𑀲𑀗𑁆𑀕𑀳𑀯𑀡𑁆𑀡𑀦𑀸𑀬 𑀚𑀸𑀢𑀓𑀝𑁆𑀞𑀓𑀣𑀸𑀬 (𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣𑀦𑁆𑀢𑀭𑁂𑀢𑀺 𑀏𑀢𑁆𑀣 𑀅𑀦𑁆𑀢𑀭𑀲𑀤𑁆𑀤𑁄 𑁋

‘‘𑀦𑀤𑀻𑀢𑀻𑀭𑁂𑀲𑀼 𑀲𑀡𑁆𑀞𑀸𑀦𑁂, 𑀲𑀪𑀸𑀲𑀼 𑀭𑀣𑀺𑀬𑀸𑀲𑀼 𑀘;

𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁨𑁮) 𑁋

𑀆𑀤𑀻𑀲𑀼 𑀓𑀸𑀭𑀡𑁂 𑀆𑀕𑀢𑁄. ‘‘𑀅𑀤𑁆𑀤𑀲𑀸 𑀔𑁄 𑀫𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀔𑀡𑁂, 𑀯𑀺𑀚𑁆𑀚𑀼𑀦𑀺𑀘𑁆𑀙𑀭𑀡𑀓𑁆𑀔𑀡𑁂𑀢𑀺 𑀅𑀢𑁆𑀣𑁄. ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀘𑀺𑀢𑁆𑀢𑁂. ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧) 𑀯𑀺𑀯𑀭𑁂. ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁬𑁬) 𑀯𑁂𑀫𑀚𑁆𑀛𑁂. 𑀇𑀥𑀸𑀧𑀺 𑀯𑁂𑀫𑀚𑁆𑀛𑁂𑀬𑁂𑀯 𑀤𑀝𑁆𑀞𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁧; 𑀅. 𑀦𑀺. 𑀅𑀝𑁆𑀞. 𑁨.𑁪.𑁩𑁬), 𑀢𑀲𑁆𑀫𑀸 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀺𑀁 𑀫𑀳𑀸𑀓𑀧𑁆𑀧𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀳𑀼𑀢𑁆𑀯𑀸 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀏𑀯𑀁 ¶ 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀫𑀳𑀸𑀪𑀺𑀦𑀻𑀳𑀸𑀭𑀁 𑀅𑀓𑀸𑀲𑀺, 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀯𑀺𑀘𑀺𑀦𑀺 𑀲𑀫𑀸𑀤𑀺𑀬𑀺, 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀲𑀫𑁆𑀧𑀸𑀤𑁂𑀢𑀼𑀁 ¶ 𑀆𑀭𑀪𑀺, 𑀬𑀫𑁆𑀳𑀺 𑀘𑁂𑀢𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀲𑀩𑁆𑀩𑀲𑁄 𑀧𑀽𑀭𑀺𑀢𑀧𑀸𑀭𑀫𑀻 𑀳𑀼𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀳𑀸𑀓𑀧𑁆𑀧𑀸𑀦𑀁 𑀅𑀦𑁆𑀢𑀭𑁂 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂 𑀓𑀸𑀮𑀯𑀺𑀲𑁂𑀲𑁂𑀢𑀺. 𑀓𑀣𑀁 ¶ 𑀧𑀦𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂’’𑀢𑀺 𑀇𑀤𑀜𑁆𑀳𑀺 𑀫𑀳𑀸𑀓𑀧𑁆𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑀢𑁄 𑀅𑀧𑀭𑀺𑀘𑁆𑀙𑁂𑀤𑀢𑁄 𑀘 𑀲𑀗𑁆𑀔𑁆𑀬𑀸𑀤𑀲𑁆𑀲𑀦𑀁. 𑀲𑀸 𑀔𑁄 𑀧𑀦𑀸𑀬𑀁 𑀲𑀗𑁆𑀔𑁆𑀬𑀸 𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀆𑀤𑀺𑀧𑀭𑀺𑀬𑁄𑀲𑀸𑀦𑀕𑁆𑀕𑀳𑀡𑀁 𑀯𑀺𑀦𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀬𑀢𑁆𑀣 𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀫𑀸𑀭𑀫𑁆𑀪𑁄 𑀬𑀢𑁆𑀣 𑀘 𑀢𑁂 𑀧𑀭𑀺𑀬𑁄𑀲𑀺𑀢𑀸 𑀢𑀤𑀼𑀪𑀬𑀫𑁆𑀧𑀺 𑀅𑀯𑀥𑀺𑀪𑀸𑀯𑁂𑀦 ‘‘𑀏𑀢𑁆𑀣𑀦𑁆𑀢𑀭𑁂’’𑀢𑀺 𑀏𑀢𑁆𑀣 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀯𑀥𑀺 𑀘 𑀧𑀦𑀸𑀬𑀁 𑀅𑀪𑀺𑀯𑀺𑀥𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀦 𑀫𑀭𑀺𑀬𑀸𑀤𑀸𑀯𑀲𑁂𑀦, 𑀆𑀭𑀫𑁆𑀪𑁄𑀲𑀸𑀦𑀓𑀧𑁆𑀧𑀸𑀦𑀁 𑀏𑀓𑀤𑁂𑀲𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀦𑀦𑀼 𑀘 𑀦𑀺𑀧𑁆𑀧𑀤𑁂𑀲𑁂𑀦 𑀢𑁂𑀲𑀁 𑀅𑀧𑀭𑀺𑀬𑀸𑀤𑀸𑀦𑀢𑁄 𑀅𑀪𑀺𑀯𑀺𑀥𑀺 𑀘 𑀇𑀥 𑀦 𑀲𑀫𑁆𑀪𑀯𑀢𑀻𑀢𑀺? 𑀦 𑀇𑀤𑀫𑁂𑀯𑀁 𑀢𑀤𑁂𑀓𑀤𑁂𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑀢𑁄. 𑀬𑁄 𑀳𑀺 𑀢𑀤𑁂𑀓𑀤𑁂𑀲𑀪𑀽𑀢𑁄 𑀓𑀧𑁆𑀧𑁄, 𑀲𑁄 𑀦𑀺𑀧𑁆𑀧𑀤𑁂𑀲𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑁄𑀢𑀺.

𑀬𑀁 𑀘𑀭𑀺𑀢𑀁, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀧𑀸𑀘𑀦𑀦𑁆𑀢𑀺 𑀏𑀢𑁆𑀣 𑀘𑀭𑀺𑀢𑀦𑁆𑀢𑀺 𑀘𑀭𑀺𑀬𑀸, 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀲𑀗𑁆𑀕𑀳𑀸 𑀤𑀸𑀦𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺, 𑀜𑀸𑀢𑀢𑁆𑀣𑀘𑀭𑀺𑀬𑀸𑀮𑁄𑀓𑀢𑁆𑀣𑀘𑀭𑀺𑀬𑀸𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸𑀦𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. 𑀢𑀣𑀸 𑀬𑀸 𑀘𑀺𑀫𑀸 𑀅𑀝𑁆𑀞 𑀘𑀭𑀺𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀆𑀬𑀢𑀦𑀘𑀭𑀺𑀬𑀸, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀢𑀺𑀘𑀭𑀺𑀬𑀸, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺𑀘𑀭𑀺𑀬𑀸, 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀜𑀸𑀡𑀘𑀭𑀺𑀬𑀸, 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼 𑀫𑀕𑁆𑀕𑀘𑀭𑀺𑀬𑀸, 𑀅𑀥𑀺𑀕𑀢𑀨𑀮𑀸𑀦𑀁 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼 𑀧𑀢𑁆𑀢𑀺𑀘𑀭𑀺𑀬𑀸, 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀮𑁄𑀓𑀢𑁆𑀣𑀘𑀭𑀺𑀬𑀸𑀢𑀺. 𑀢𑀢𑁆𑀣 𑀧𑀤𑁂𑀲𑀢𑁄 𑀤𑁆𑀯𑀺𑀦𑁆𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀜𑁆𑀘 𑀦𑀺𑀧𑁆𑀧𑀤𑁂𑀲𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀤𑁆𑀤𑁂𑀲𑁂 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧; 𑀧𑀝𑀺. 𑀫. 𑁧.𑁧𑁯𑁭) ‘‘𑀘𑀭𑀺𑀬𑀸𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑀇𑀭𑀺𑀬𑀸𑀧𑀣𑀘𑀭𑀺𑀬𑀸 𑀆𑀬𑀢𑀦𑀘𑀭𑀺𑀬𑀸’’𑀢𑀺 𑀯𑀺𑀢𑁆𑀣𑀸𑀭𑁄. ‘‘𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀳𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑀺𑀧𑀦𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑁂𑀦 𑀘𑀭𑀢𑀺, 𑀏𑀯𑀫𑁆𑀧𑀺 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀢𑀦𑁆𑀢𑀻𑀢𑀺 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀫𑁆𑀧𑀺 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀻’’𑀢𑀺 𑀬𑀸 ¶ 𑀇𑀫𑀸 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀧𑀸𑀭𑀫𑀺𑀢𑀸𑀲𑁆𑀯𑁂𑀯 𑀲𑀫𑁄𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀭𑀺𑀢𑀦𑁆𑀢𑀺 𑀘𑀭𑀺𑀬𑀸, 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀲𑀗𑁆𑀕𑀳𑀸 ¶ 𑀤𑀸𑀦𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀻’’𑀢𑀺. 𑀳𑁂𑀢𑀼𑀘𑀭𑀺𑀬𑀸𑀬 𑀏𑀯 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀫𑀕𑁆𑀕𑀘𑀭𑀺𑀬𑀸𑀧𑀢𑁆𑀢𑀺𑀘𑀭𑀺𑀬𑀸𑀦𑀁 𑀇𑀥 𑀅𑀦𑀯𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀁 𑀢𑀁 𑀩𑁄𑀥𑀺𑀧𑀸𑀘𑀦’’𑀦𑁆𑀢𑀺.

𑀢𑀢𑁆𑀣 ¶ 𑀲𑀩𑁆𑀩-𑀲𑀤𑁆𑀤𑁄 𑀲𑀩𑁆𑀩𑀲𑀩𑁆𑀩𑀁 𑀆𑀬𑀢𑀦𑀲𑀩𑁆𑀩𑀁 𑀲𑀓𑁆𑀓𑀸𑀬𑀲𑀩𑁆𑀩𑀁 𑀧𑀤𑁂𑀲𑀲𑀩𑁆𑀩𑀦𑁆𑀢𑀺 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫) 𑀲𑀩𑁆𑀩𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀢𑀁 𑀲𑀼𑀡𑀸𑀣, 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀸 𑀘…𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘𑀸’’𑀢𑀺 (𑀲𑀁. 𑀦𑀺. 𑁪.𑁨𑁩) 𑀏𑀢𑁆𑀣 𑀆𑀬𑀢𑀦𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑀁 𑀲𑀩𑁆𑀩𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁬) 𑀲𑀓𑁆𑀓𑀸𑀬𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑁂𑀲𑀫𑁆𑀧𑀺 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁪𑁫) 𑀧𑀤𑁂𑀲𑀲𑀩𑁆𑀩𑀲𑁆𑀫𑀺𑀁. 𑀇𑀥𑀸𑀧𑀺 𑀧𑀤𑁂𑀲𑀲𑀩𑁆𑀩𑀲𑁆𑀫𑀺𑀁 𑀏𑀯 𑀯𑁂𑀤𑀺𑀢𑀩𑁆𑀩𑁄, 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀲𑁆𑀲 𑀘𑀭𑀺𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀩𑁄𑀥𑀻𑀢𑀺 𑀭𑀼𑀓𑁆𑀔𑁄𑀧𑀺 𑀅𑀭𑀺𑀬𑀫𑀕𑁆𑀕𑁄𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀘 ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧) 𑀘 𑀆𑀕𑀢𑀝𑁆𑀞𑀸𑀦𑁂 𑀩𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀭𑀼𑀓𑁆𑀔𑁄 𑀩𑁄𑀥𑀺. ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁄 𑀩𑁄𑀥𑀺. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀩𑀼𑀚𑁆𑀛𑀢𑀺 𑀏𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀪𑀽𑀢𑁂𑀢𑀺 𑀦𑀺𑀩𑁆𑀩𑀸𑀦𑀁 𑀩𑁄𑀥𑀺. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑁂 𑀥𑀫𑁆𑀫𑁂 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀩𑁄𑀥𑀺. 𑀇𑀥𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀭𑀳𑀢𑁆𑀢𑀫𑀕𑁆𑀕𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀺 𑀯𑀸 𑀇𑀥 𑀩𑁄𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧), 𑀫𑀳𑀸𑀩𑁄𑀥𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀪𑀕𑀯𑀢𑁄. 𑀆𑀲𑀯𑀓𑁆𑀔𑀬𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀆𑀲𑀯𑀓𑁆𑀔𑀬𑀜𑀸𑀡𑀁 ‘‘𑀫𑀳𑀸𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑁂 𑀬𑀁 𑀫𑀫 𑀤𑀸𑀦𑀸𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀘𑀭𑀺𑀢𑀁, 𑀢𑀁 𑀲𑀩𑁆𑀩𑀁 𑀅𑀦𑀯𑀲𑁂𑀲𑀁 𑀫𑀳𑀸𑀩𑁄𑀥𑀺𑀬𑀸 𑀧𑀸𑀘𑀦𑀁 𑀲𑀸𑀥𑀓𑀁 𑀦𑀺𑀩𑁆𑀩𑀢𑁆𑀢𑀓𑀦𑁆𑀢𑀺. 𑀏𑀢𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀪𑀸𑀯𑀦𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 ¶ 𑀲𑀩𑁆𑀩𑀦𑁆𑀢𑀺 𑀏𑀢𑁆𑀣𑀦𑁆𑀢𑀭𑁂 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑁂 𑀬𑀁 𑀘𑀭𑀺𑀢𑀁, 𑀢𑀁 𑀲𑀩𑁆𑀩𑀁 𑀲𑀓𑀮𑀫𑁂𑀯 𑀅𑀦𑀯𑀲𑁂𑀲𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀫𑁂𑀯. 𑀏𑀢𑁂𑀦 𑀲𑀩𑁆𑀩𑀲𑀫𑁆𑀪𑀸𑀭𑀪𑀸𑀯𑀦𑀁 𑀤𑀲𑁆𑀲𑁂𑀢𑀺.

𑀢𑀲𑁆𑀲𑁄 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 ¶ 𑀪𑀸𑀯𑀦𑀸 𑀲𑀩𑁆𑀩𑀲𑀫𑁆𑀪𑀸𑀭𑀪𑀸𑀯𑀦𑀸 𑀦𑀺𑀭𑀦𑁆𑀢𑀭𑀪𑀸𑀯𑀦𑀸 𑀘𑀺𑀭𑀓𑀸𑀮𑀪𑀸𑀯𑀦𑀸 𑀲𑀓𑁆𑀓𑀘𑁆𑀘𑀪𑀸𑀯𑀦𑀸 𑀘𑀸𑀢𑀺. 𑀢𑀸𑀲𑀼 ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂’’𑀢𑀺 𑀇𑀫𑀺𑀦𑀸 𑀘𑀺𑀭𑀓𑀸𑀮𑀪𑀸𑀯𑀦𑀸 𑀯𑀼𑀢𑁆𑀢𑀸. 𑀬𑁄 𑀘𑁂𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄, 𑀢𑁂𑀦 𑀧𑀞𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀩𑁆𑀩𑀕𑁆𑀕𑀳𑀡𑁂𑀦 𑀘 𑀦𑀺𑀭𑀦𑁆𑀢𑀭𑀪𑀸𑀯𑀦𑀸, 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀩𑁆𑀩𑀁 𑀘𑀭𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀩𑁆𑀩𑀲𑀫𑁆𑀪𑀸𑀭𑀪𑀸𑀯𑀦𑀸, 𑀩𑁄𑀥𑀺𑀧𑀸𑀘𑀦’’𑀦𑁆𑀢𑀺 ¶ 𑀇𑀫𑀺𑀦𑀸 𑀲𑀓𑁆𑀓𑀘𑁆𑀘𑀪𑀸𑀯𑀦𑀸 𑀯𑀼𑀢𑁆𑀢𑀸 𑀳𑁄𑀢𑀺, 𑀬𑀣𑀸 𑀢𑀁 𑀘𑀭𑀺𑀢𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀘𑁂𑀢𑀺 𑀏𑀯𑀁𑀪𑀽𑀢𑀪𑀸𑀯𑀤𑀻𑀧𑀦𑀢𑁄. 𑀢𑀣𑀸 𑀳𑀺 𑀢𑀁 ‘‘𑀩𑁄𑀥𑀺𑀧𑀸𑀘𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀦 𑀅𑀜𑁆𑀜𑀣𑀸𑀢𑀺. 𑀓𑀣𑀁 𑀧𑀦𑁂𑀢𑁆𑀣 𑀩𑁄𑀥𑀺𑀘𑀭𑀺𑀬𑀸𑀬 𑀦𑀺𑀭𑀦𑁆𑀢𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄? 𑀬𑀤𑀺 𑀘𑀺𑀢𑁆𑀢𑀦𑀺𑀭𑀦𑁆𑀢𑀭𑀢𑀸𑀬 𑀢𑀁 𑀦 𑀬𑀼𑀚𑁆𑀚𑀢𑀺, 𑀦 𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀉𑀤𑁆𑀥𑀁 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀘𑀺𑀢𑁆𑀢𑀢𑁄 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀣 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑁂𑀬𑁆𑀬, 𑀏𑀯𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺, 𑀦 𑀳𑀺 𑀲𑀩𑁆𑀩𑀸𑀦𑀺 𑀢𑁂𑀲𑀁 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀸𑀦𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀏𑀢𑁂𑀦𑁂𑀯 𑀧𑀬𑁄𑀕𑀦𑀺𑀭𑀦𑁆𑀢𑀭𑀢𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀚𑀸𑀢𑀺𑀦𑀺𑀭𑀦𑁆𑀢𑀭𑀢𑀸𑀬 𑀧𑀦 𑀦𑀺𑀭𑀦𑁆𑀢𑀭𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀲𑀜𑁆𑀳𑀺 𑀚𑀸𑀢𑀺𑀬𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀦 𑀫𑀳𑀸𑀧𑀡𑀺𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀭𑀺𑀫𑀢𑁆𑀢𑀪𑀸𑀯𑀸 𑀦 𑀲𑀸 𑀦𑀸𑀫 𑀚𑀸𑀢𑀺 𑀉𑀧𑀮𑀩𑁆𑀪𑀢𑀺, 𑀬𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀢𑀸 𑀦 𑀲𑀺𑀬𑀸 𑀅𑀦𑁆𑀢𑀫𑀲𑁄 𑀤𑀸𑀦𑀧𑀸𑀭𑀫𑀺𑀫𑀢𑁆𑀢𑀁 𑀉𑀧𑀸𑀤𑀸𑀬. 𑀅𑀬𑀜𑁆𑀳𑀺 𑀦𑀺𑀬𑀢𑀺𑀧𑀢𑁆𑀣𑀺𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀥𑀫𑁆𑀫𑀢𑀸. 𑀬𑀸𑀯 𑀘 𑀢𑁂 𑀓𑀫𑁆𑀫𑀸𑀤𑀻𑀲𑀼 𑀯𑀲𑀻𑀪𑀸𑀯𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀧𑁆𑀧𑀤𑁂𑀲𑀫𑁆𑀧𑀺 𑀲𑀫𑁆𑀪𑀸𑀭𑁂𑀲𑀼 𑀧𑀬𑁄𑀕𑀫𑀸𑀧𑀚𑁆𑀚𑀦𑁆𑀢𑀺. 𑀬𑀤𑀸 𑀧𑀦 𑀲𑀩𑁆𑀩𑀲𑁄 𑀓𑀫𑁆𑀫𑀸𑀤𑀻𑀲𑀼 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀣 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀧𑁆𑀧𑀤𑁂𑀲𑀢𑁄 𑀏𑀯 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀲𑀫𑀻𑀳𑀦𑀁 𑀲𑀸𑀢𑀘𑁆𑀘𑀓𑀺𑀭𑀺𑀬𑀸 𑀘 𑀲𑀫𑁆𑀧𑀚𑁆𑀚𑀢𑀺. 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀧𑀦 𑀲𑀩𑁆𑀩𑀓𑀸𑀮𑀁 𑀳𑁄𑀢𑀺, 𑀏𑀯𑀁 𑀬𑁂𑀦 𑀬𑁂𑀦 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀥𑀺𑀧𑁆𑀧𑀸𑀬𑀁 𑀲𑀫𑀺𑀚𑁆𑀛𑀦𑀁 𑀲𑀫𑁆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀲𑀩𑁆𑀩𑀲𑀫𑁆𑀪𑀸𑀭𑀪𑀸𑀯𑀦𑀸 𑀘𑀺𑀭𑀓𑀸𑀮𑀪𑀸𑀯𑀦𑀸 𑀦𑀺𑀭𑀦𑁆𑀢𑀭𑀪𑀸𑀯𑀦𑀸 𑀲𑀓𑁆𑀓𑀘𑁆𑀘𑀪𑀸𑀯𑀦𑀸 𑀘𑀸𑀢𑀺 𑀘𑀢𑀲𑁆𑀲𑁄𑀧𑀺 𑀪𑀸𑀯𑀦𑀸 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭 𑀬𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀘𑀭𑀺𑀢𑀁 𑀩𑁄𑀥𑀺𑀲𑀫𑁆𑀪𑀸𑀭𑀸 𑀩𑁄𑀥𑀺𑀘𑀭𑀺𑀬𑀸 𑀅𑀕𑁆𑀕𑀬𑀸𑀦𑀁 𑀧𑀸𑀭𑀫𑀺𑀬𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀬𑀲𑁆𑀫𑀸 𑀘 𑀧𑀭𑀢𑁄 𑀯𑀺𑀪𑀸𑀕𑁂𑀦 ¶ 𑀯𑀓𑁆𑀔𑀫𑀸𑀦𑀸𑀦𑀁 ¶ 𑀤𑀸𑀦𑀧𑀸𑀭𑀫𑀺𑀆𑀤𑀻𑀦𑀁 𑀘𑀭𑀺𑀢𑀦𑁆𑀢𑀺 𑀇𑀤𑀁 𑀅𑀯𑀺𑀲𑁂𑀲𑀯𑀘𑀦𑀁, 𑀢𑀲𑁆𑀫𑀸 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀸𑀭𑀫𑀺𑀬𑁄 𑀇𑀥 𑀲𑀁𑀯𑀡𑁆𑀡𑁂𑀢𑀩𑁆𑀩𑀸. 𑀢𑀸 𑀧𑀭𑀢𑁄 𑀧𑀓𑀺𑀡𑁆𑀡𑀓𑀓𑀣𑀸𑀬𑀁 𑀲𑀩𑁆𑀩𑀸𑀓𑀸𑀭𑁂𑀦 𑀲𑀁𑀯𑀡𑁆𑀡𑀬𑀺𑀲𑁆𑀲𑀸𑀫.

𑁨. 𑀇𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀘𑀭𑀺𑀢𑀁 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀫𑀳𑀸𑀩𑁄𑀥𑀺𑀬𑀸 𑀧𑀭𑀺𑀧𑀸𑀘𑀦𑀫𑁂𑀯𑀸𑀢𑀺 𑀅𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀕𑀫𑀦𑁂𑀦 𑀅𑀢𑀺𑀲𑀬𑀢𑁄 𑀩𑁄𑀥𑀺𑀧𑀭𑀺𑀧𑀸𑀘𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀓𑀢𑀺𑀧𑀬𑀸 𑀧𑀼𑀩𑁆𑀩𑀘𑀭𑀺𑀬𑀸 𑀯𑀺𑀪𑀸𑀕𑀢𑁄 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀢𑀻𑀢𑀓𑀧𑁆𑀧𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀢𑀻𑀢𑀓𑀧𑁆𑀧𑁂𑀢𑀺 𑀇𑀢𑁄 𑀧𑀼𑀭𑀺𑀫𑁂 𑀧𑀼𑀭𑀺𑀫𑀢𑀭𑁂 𑀯𑀸 𑀲𑀩𑁆𑀩𑀲𑁆𑀫𑀺𑀁 𑀅𑀢𑀺𑀓𑁆𑀓𑀦𑁆𑀢𑁂 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂 𑀫𑀳𑀸𑀓𑀧𑁆𑀧𑁂, 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑁂𑀲𑀼 𑀘𑀢𑀽𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀽𑀢𑀺 𑀅𑀢𑁆𑀣𑁄. 𑀘𑀭𑀺𑀢𑀦𑁆𑀢𑀺 𑀘𑀺𑀡𑁆𑀡𑀁 𑀤𑀸𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀁. 𑀞𑀧𑀬𑀺𑀢𑁆𑀯𑀸𑀢𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀳𑁂𑀢𑁆𑀯𑀸, 𑀅𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀯𑀸𑀪𑀯𑁂𑀢𑀺 𑀪𑀯𑁂 𑀘 𑀅𑀪𑀯𑁂 ¶ 𑀘, ‘‘𑀇𑀢𑀺𑀪𑀯𑀸𑀪𑀯𑀓𑀣’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁭) 𑀏𑀢𑁆𑀣 𑀳𑀺 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀪𑀯𑀸𑀪𑀯𑀸𑀢𑀺 𑀯𑀼𑀢𑁆𑀢𑀸. ‘‘𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄’’𑀢𑀺 (𑀉𑀤𑀸. 𑁨𑁦) 𑀏𑀢𑁆𑀣 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀼𑀤𑁆𑀥𑀺𑀳𑀸𑀦𑀺𑀲𑀲𑁆𑀲𑀢𑀼𑀘𑁆𑀙𑁂𑀤𑀧𑀼𑀜𑁆𑀜𑀧𑀸𑀧𑀸𑀦𑀺𑀪𑀯𑀸𑀪𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. ‘‘𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁪.𑁯; 𑀇𑀢𑀺𑀯𑀼. 𑁧𑁦𑁫) 𑀏𑀢𑁆𑀣 𑀧𑀦 𑀧𑀡𑀻𑀢𑀧𑀡𑀻𑀢𑀢𑀭𑀸𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀪𑁂𑀲𑀚𑁆𑀚𑀸𑀦𑀺 𑀪𑀯𑀸𑀪𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀼 𑀧𑀡𑀻𑀢𑀢𑀭𑀸 𑀧𑀡𑀻𑀢𑀢𑀫𑀸 𑀪𑀯𑀸𑀪𑀯𑀸𑀢𑀺𑀧𑀺 𑀯𑀤𑀦𑁆𑀢𑀺 𑀏𑀯, 𑀢𑀲𑁆𑀫𑀸 𑀇𑀥𑀸𑀧𑀺 𑀲𑁄 𑀏𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀪𑀯𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀫𑁆𑀳𑀺 𑀓𑀧𑁆𑀧𑁂𑀢𑀺 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂. 𑀧𑀯𑀓𑁆𑀔𑀺𑀲𑁆𑀲𑀦𑁆𑀢𑀺 𑀓𑀣𑀬𑀺𑀲𑁆𑀲𑀁. 𑀲𑀼𑀡𑁄𑀳𑀻𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀲𑀯𑀦𑁂 𑀦𑀺𑀬𑁄𑀚𑁂𑀢𑀺. 𑀫𑁂𑀢𑀺 𑀫𑀫 𑀲𑀦𑁆𑀢𑀺𑀓𑁂, 𑀫𑀫 𑀪𑀸𑀲𑀢𑁄𑀢𑀺 𑀅𑀢𑁆𑀣𑁄.

𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧. 𑀅𑀓𑀺𑀢𑁆𑀢𑀺𑀯𑀕𑁆𑀕𑁄

𑁧. 𑀅𑀓𑀺𑀢𑁆𑀢𑀺𑀘𑀭𑀺𑀬𑀸𑀯𑀡𑁆𑀡𑀦𑀸

𑁩. 𑀏𑀯𑀁 ¶ ¶ 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀘 𑀧𑀭𑀺𑀲𑀸𑀬 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀬𑀸𑀬 𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀧𑀼𑀩𑁆𑀩𑀘𑀭𑀺𑀢𑀁 𑀪𑀯𑀦𑁆𑀢𑀭𑀧𑀝𑀺𑀘𑁆𑀙𑀦𑁆𑀦𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁄 ‘‘𑀬𑀤𑀸 𑀅𑀳𑀁 𑀩𑁆𑀭𑀳𑀸𑀭𑀜𑁆𑀜𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀩𑁆𑀭𑀳𑀸𑀭𑀜𑁆𑀜𑁂𑀢𑀺 𑀫𑀳𑀸𑀅𑀭𑀜𑁆𑀜𑁂, 𑀅𑀭𑀜𑁆𑀜𑀸𑀦𑀺𑀬𑀁, 𑀫𑀳𑀦𑁆𑀢𑁂 𑀯𑀦𑁂𑀢𑀺 𑀅𑀢𑁆𑀣𑁄. 𑀲𑀼𑀜𑁆𑀜𑁂𑀢𑀺 𑀚𑀦𑀯𑀺𑀯𑀺𑀢𑁆𑀢𑁂. 𑀯𑀺𑀧𑀺𑀦𑀓𑀸𑀦𑀦𑁂𑀢𑀺 𑀯𑀺𑀧𑀺𑀦𑀪𑀽𑀢𑁂 𑀓𑀸𑀦𑀦𑁂, 𑀧𑀤𑀤𑁆𑀯𑀬𑁂𑀦𑀸𑀧𑀺 𑀢𑀲𑁆𑀲 𑀅𑀭𑀜𑁆𑀜𑀲𑁆𑀲 𑀕𑀳𑀦𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀲𑀩𑁆𑀩𑀫𑁂𑀢𑀁 𑀓𑀸𑀭𑀤𑀻𑀧𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀯𑀺𑀳𑀭𑀸𑀫𑀻𑀢𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀳𑀺 𑀲𑀫𑀼𑀧𑁆𑀧𑀸𑀤𑀺𑀢𑀲𑀼𑀔𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀲𑀭𑀻𑀭𑀤𑀼𑀓𑁆𑀔𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀸𑀫𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀫𑀺. 𑀅𑀓𑀺𑀢𑁆𑀢𑀺 𑀦𑀸𑀫 𑀢𑀸𑀧𑀲𑁄𑀢𑀺 𑀏𑀯𑀁𑀦𑀸𑀫𑀓𑁄 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀬𑀤𑀸 𑀅𑀳𑀁 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀸 𑀢𑀤𑀸 𑀅𑀢𑁆𑀢𑀦𑁄 𑀅𑀓𑀺𑀢𑁆𑀢𑀺𑀢𑀸𑀧𑀲𑀪𑀸𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀯𑀤𑀢𑀺. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀅𑀢𑀻𑀢𑁂 𑀓𑀺𑀭 𑀇𑀫𑀲𑁆𑀫𑀺𑀁𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀦𑀸𑀫 𑀭𑀸𑀚𑀺𑀦𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀅𑀓𑀺𑀢𑁆𑀢𑀻’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀪𑀕𑀺𑀦𑀻𑀧𑀺 𑀚𑀸𑀬𑀺. ‘‘𑀬𑀲𑀯𑀢𑀻’’𑀢𑀺𑀲𑁆𑀲𑀸 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀫𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑁄 𑀢𑁂𑀲𑀁 𑀧𑁂𑀢𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀢𑁆𑀯𑀸 𑀓𑀢𑀺𑀧𑀬𑀤𑀺𑀯𑀲𑀸𑀢𑀺𑀓𑁆𑀓𑀫𑁂𑀦 𑀭𑀢𑀦𑀸𑀯𑀮𑁄𑀓𑀦𑀁 𑀆𑀬𑀼𑀢𑁆𑀢𑀓𑀧𑀼𑀭𑀺𑀲𑁂𑀳𑀺 𑀓𑀸𑀭𑀬𑀫𑀸𑀦𑁄 ‘‘𑀏𑀢𑁆𑀢𑀓𑀁 𑀫𑀢𑁆𑀢𑀺𑀓𑀁, 𑀏𑀢𑁆𑀢𑀓𑀁 𑀧𑁂𑀢𑁆𑀢𑀺𑀓𑀁, 𑀏𑀢𑁆𑀢𑀓𑀁 𑀧𑀺𑀢𑀸𑀫𑀳’’𑀦𑁆𑀢𑀺 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀇𑀤𑀁 𑀥𑀦𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀥𑀦𑀲𑁆𑀲 𑀲𑀁𑀳𑀸𑀭𑀓𑀸, 𑀲𑀩𑁆𑀩𑁂 𑀇𑀫𑀁 𑀥𑀦𑀁 𑀧𑀳𑀸𑀬𑁂𑀯 𑀕𑀢𑀸, 𑀅𑀳𑀁 𑀧𑀦 𑀦𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀥𑀦𑁂𑀦 𑀅𑀢𑁆𑀣𑀺𑀓𑀸 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀲𑁆𑀲 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺.

𑀲𑁄 ¶ ¶ 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀥𑀦𑁂 𑀅𑀔𑀻𑀬𑀫𑀸𑀦𑁂 ‘‘𑀓𑀺𑀁 𑀫𑁂 𑀇𑀫𑀸𑀬 𑀥𑀦𑀓𑀻𑀴𑀸𑀬, 𑀅𑀢𑁆𑀣𑀺𑀓𑀸 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀪𑀭𑀺𑀢𑁂 𑀲𑀸𑀭𑀕𑀩𑁆𑀪𑁂 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀤𑀺𑀦𑁆𑀦𑀁𑀬𑁂𑀯 𑀳𑀭𑀦𑁆𑀢𑀽’’𑀢𑀺 𑀕𑁂𑀳𑀁 𑀧𑀳𑀸𑀬 𑀜𑀸𑀢𑀺𑀧𑀭𑀺𑀯𑀝𑁆𑀝𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀪𑀕𑀺𑀦𑀺𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀧𑀡𑁆𑀡𑀲𑀸𑀮𑀁 𑀓𑀭𑀺𑀢𑁆𑀯𑀸 𑀯𑀲𑀢𑀺. 𑀬𑁂𑀦 𑀧𑀦 𑀤𑁆𑀯𑀸𑀭𑁂𑀦 𑀢𑀤𑀸 𑀦𑀺𑀓𑁆𑀔𑀫𑀺, 𑀢𑀁 𑀅𑀓𑀺𑀢𑁆𑀢𑀺𑀤𑁆𑀯𑀸𑀭𑀁 𑀦𑀸𑀫 𑀚𑀸𑀢𑀁. 𑀬𑁂𑀦 𑀢𑀺𑀢𑁆𑀣𑁂𑀦 𑀦𑀤𑀺𑀁 𑀑𑀢𑀺𑀡𑁆𑀡𑁄, 𑀢𑀁 𑀅𑀓𑀺𑀢𑁆𑀢𑀺𑀢𑀺𑀢𑁆𑀣𑀁 𑀦𑀸𑀫 𑀚𑀸𑀢𑀁. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀯𑀸𑀲𑀺𑀦𑁄 𑀢𑀲𑁆𑀲 𑀕𑀼𑀡𑁂𑀳𑀺 𑀆𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑀸 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀫𑀳𑀸𑀧𑀭𑀺𑀯𑀸𑀭𑁄 𑀅𑀳𑁄𑀲𑀺, 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀦𑀺𑀩𑁆𑀩𑀢𑁆𑀢𑀺, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑀸, 𑀧𑀭𑀺𑀯𑀸𑀭𑁄𑀧𑀺 𑀫𑀳𑀦𑁆𑀢𑁄, 𑀓𑀸𑀬𑀯𑀺𑀯𑁂𑀓𑀫𑀢𑁆𑀢𑀫𑁆𑀧𑀺 𑀇𑀥 𑀦 𑀮𑀪𑀢𑀺, 𑀫𑀬𑀸 𑀏𑀓𑀸𑀓𑀺𑀦𑀸 𑀯𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀭𑀫𑀧𑁆𑀧𑀺𑀘𑁆𑀙𑀪𑀸𑀯𑀢𑁄 𑀯𑀺𑀯𑁂𑀓𑀦𑀺𑀦𑁆𑀦𑀢𑀸𑀬 𑀘 𑀓𑀲𑁆𑀲𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀤𑀫𑀺𑀴𑀭𑀝𑁆𑀞𑀁 𑀧𑀢𑁆𑀯𑀸 𑀓𑀸𑀯𑀻𑀭𑀧𑀝𑁆𑀝𑀦𑀲𑀫𑀻𑀧𑁂 𑀉𑀬𑁆𑀬𑀸𑀦𑁂 𑀯𑀺𑀳𑀭𑀦𑁆𑀢𑁄 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑀢𑁆𑀭𑀸𑀧𑀺𑀲𑁆𑀲 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀙𑀟𑁆𑀟𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀓𑀸𑀭𑀤𑀻𑀧𑁂 𑀑𑀢𑀭𑀺. 𑀢𑀤𑀸 𑀓𑀸𑀭𑀤𑀻𑀧𑁄 𑀅𑀳𑀺𑀤𑀻𑀧𑁄 𑀦𑀸𑀫. 𑀲𑁄 𑀢𑀢𑁆𑀣 𑀫𑀳𑀦𑁆𑀢𑀁 𑀓𑀸𑀭𑀭𑀼𑀓𑁆𑀔𑀁 𑀉𑀧𑀦𑀺𑀲𑁆𑀲𑀸𑀬 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀧𑁆𑀧𑀺𑀘𑁆𑀙𑀢𑀸𑀬 𑀧𑀦 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀨𑀮𑀓𑀸𑀮𑁂 𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 𑀨𑀮𑁂 𑀅𑀲𑀢𑀺 𑀧𑀢𑁆𑀢𑀸𑀦𑀺 𑀉𑀤𑀓𑀲𑀺𑀢𑁆𑀢𑀸𑀦𑀺 𑀔𑀸𑀤𑀦𑁆𑀢𑁄 𑀛𑀸𑀦𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑁂𑀲𑀺.

𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀧𑀡𑁆𑀟𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀦𑀼 𑀔𑁄 𑀅𑀬𑀁 𑀢𑀸𑀧𑀲𑁄 𑀏𑀯𑀁 𑀤𑀼𑀓𑁆𑀓𑀭𑀁 𑀢𑀧𑀁 𑀘𑀭𑀢𑀺, 𑀲𑀓𑁆𑀓𑀢𑁆𑀢𑀁 𑀦𑀼 𑀔𑁄 𑀧𑀢𑁆𑀣𑁂𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀁, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦𑀁. 𑀅𑀬𑀜𑁆𑀳𑀺 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑁄 𑀚𑀻𑀯𑀺𑀢𑁂 𑀦𑀺𑀭𑀧𑁂𑀓𑁆𑀔𑁄 𑀉𑀤𑀓𑀲𑀺𑀢𑁆𑀢𑀸𑀦𑀺 𑀓𑀸𑀭𑀧𑀢𑁆𑀢𑀸𑀦𑀺 𑀔𑀸𑀤𑀢𑀺, 𑀲𑀘𑁂 𑀲𑀓𑁆𑀓𑀢𑁆𑀢𑀁 𑀧𑀢𑁆𑀣𑁂𑀢𑀺 𑀅𑀢𑁆𑀢𑀦𑁄 𑀲𑀺𑀢𑁆𑀢𑀸𑀦𑀺 𑀓𑀸𑀭𑀧𑀢𑁆𑀢𑀸𑀦𑀺 𑀫𑀬𑁆𑀳𑀁 𑀤𑀲𑁆𑀲𑀢𑀺, 𑀦𑁄 𑀘𑁂, 𑀦 𑀤𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺 ¶ . 𑀩𑁄𑀥𑀺𑀲𑀢𑁆𑀢𑁄𑀧𑀺 𑀓𑀸𑀭𑀧𑀢𑁆𑀢𑀸𑀦𑀺 𑀲𑁂𑀤𑁂𑀢𑁆𑀯𑀸 ‘‘𑀲𑀻𑀢𑀮𑀻𑀪𑀽𑀢𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀧𑀼𑀭𑀢𑁄 𑀲𑀓𑁆𑀓𑁄 𑀩𑁆𑀭𑀸𑀳𑁆𑀫𑀡𑀭𑀽𑀧𑁂𑀦 ¶ 𑀪𑀺𑀓𑁆𑀔𑀸𑀬 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀬𑀸𑀘𑀓𑁄 𑀤𑀺𑀝𑁆𑀞𑁄’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀅𑀚𑁆𑀚 𑀫𑀫 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀓𑀪𑀸𑀚𑀦𑁂𑀦𑁂𑀯 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀤𑀸𑀦𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀲𑁂𑀲𑁂𑀢𑁆𑀯𑀸𑀯 𑀢𑀲𑁆𑀲 𑀪𑀺𑀓𑁆𑀔𑀸𑀪𑀸𑀚𑀦𑁂 𑀧𑀓𑁆𑀔𑀺𑀧𑀺. 𑀲𑀓𑁆𑀓𑁄 𑀢𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀢𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀧𑀭𑀺𑀬𑁂𑀝𑁆𑀞𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀧𑀻𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑀺.

𑀤𑀼𑀢𑀺𑀬𑀤𑀺𑀯𑀲𑁂 ¶ 𑀧𑀦 𑀓𑀸𑀭𑀧𑀢𑁆𑀢𑀸𑀦𑀺 𑀧𑀘𑀺𑀢𑁆𑀯𑀸 ‘‘𑀳𑀺𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑀁 𑀅𑀮𑀪𑀺𑀁, 𑀅𑀚𑁆𑀚 𑀦𑀼 𑀔𑁄 𑀓𑀣’’𑀦𑁆𑀢𑀺 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺. 𑀲𑀓𑁆𑀓𑁄𑀧𑀺 𑀢𑀣𑁂𑀯 𑀆𑀕𑀫𑀺. 𑀫𑀳𑀸𑀲𑀢𑁆𑀢𑁄 𑀧𑀼𑀦𑀧𑀺 𑀢𑀣𑁂𑀯 𑀤𑀢𑁆𑀯𑀸 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀢𑀺𑀬𑀤𑀺𑀯𑀲𑁂 𑀘 𑀢𑀣𑁂𑀯 𑀤𑀢𑁆𑀯𑀸 ‘‘𑀅𑀳𑁄 𑀯𑀢 𑀫𑁂 𑀮𑀸𑀪𑀸, 𑀩𑀳𑀼𑀁 𑀯𑀢 𑀧𑀼𑀜𑁆𑀜𑀁 𑀧𑀲𑀯𑀸𑀫𑀺, 𑀲𑀘𑀸𑀳𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀮𑀪𑁂𑀬𑁆𑀬𑀁, 𑀏𑀯𑀫𑁂𑀯 𑀫𑀸𑀲𑀫𑁆𑀧𑀺 𑀤𑁆𑀯𑁂𑀫𑀸𑀲𑀫𑁆𑀧𑀺 𑀤𑀸𑀦𑀁 𑀤𑀤𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀻𑀲𑀼𑀧𑀺 𑀤𑀺𑀯𑀲𑁂𑀲𑀼 ‘‘𑀢𑁂𑀦 𑀤𑀸𑀦𑁂𑀦 𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀦 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀦 𑀲𑀸𑀯𑀓𑀩𑁄𑀥𑀺𑀁 𑀦 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀣𑁂𑀫𑀺, 𑀅𑀧𑀺 𑀘 𑀇𑀤𑀁 𑀫𑁂 𑀤𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀬𑀣𑀸𑀥𑀺𑀓𑀸𑀭𑀁 𑀘𑀺𑀢𑁆𑀢𑀁 𑀞𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀢𑀤𑀸 𑀫𑀁 𑀢𑀧𑀢𑁂𑀚𑁂𑀦, 𑀲𑀦𑁆𑀢𑀢𑁆𑀢𑁄 𑀢𑀺𑀤𑀺𑀯𑀸𑀪𑀺𑀪𑀽;

𑀥𑀸𑀭𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀁, 𑀪𑀺𑀓𑁆𑀔𑀸𑀬 𑀫𑀁 𑀉𑀧𑀸𑀕𑀫𑀺.

𑁫.

‘‘𑀧𑀯𑀦𑀸 𑀆𑀪𑀢𑀁 𑀧𑀡𑁆𑀡𑀁, 𑀅𑀢𑁂𑀮𑀜𑁆𑀘 𑀅𑀮𑁄𑀡𑀺𑀓𑀁;

𑀫𑀫 𑀤𑁆𑀯𑀸𑀭𑁂 𑀞𑀺𑀢𑀁 𑀤𑀺𑀲𑁆𑀯𑀸, 𑀲𑀓𑀝𑀸𑀳𑁂𑀦 𑀆𑀓𑀺𑀭𑀺𑀁.

𑁬.

‘‘𑀢𑀲𑁆𑀲 𑀤𑀢𑁆𑀯𑀸𑀦𑀳𑀁 𑀧𑀡𑁆𑀡𑀁, 𑀦𑀺𑀓𑀼𑀚𑁆𑀚𑀺𑀢𑁆𑀯𑀸𑀦 𑀪𑀸𑀚𑀦𑀁;

𑀧𑀼𑀦𑁂𑀲𑀦𑀁 𑀚𑀳𑀺𑀢𑁆𑀯𑀸𑀦, 𑀧𑀸𑀯𑀺𑀲𑀺𑀁 𑀧𑀡𑁆𑀡𑀲𑀸𑀮𑀓𑀁.

𑁭.

‘‘𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺, 𑀉𑀧𑀕𑀜𑁆𑀙𑀺 𑀫𑀫𑀦𑁆𑀢𑀺𑀓𑀁;

𑀅𑀓𑀫𑁆𑀧𑀺𑀢𑁄 𑀅𑀦𑁄𑀮𑀕𑁆𑀕𑁄, 𑀏𑀯𑀫𑁂𑀯𑀫𑀤𑀸𑀲𑀳𑀁.

𑁮.

‘‘𑀦 𑀫𑁂 𑀢𑀧𑁆𑀧𑀘𑁆𑀘𑀬𑀸 𑀅𑀢𑁆𑀣𑀺, 𑀲𑀭𑀻𑀭𑀲𑁆𑀫𑀺𑀁 𑀯𑀺𑀯𑀡𑁆𑀡𑀺𑀬𑀁;

𑀧𑀻𑀢𑀺𑀲𑀼𑀔𑁂𑀦 𑀭𑀢𑀺𑀬𑀸, 𑀯𑀻𑀢𑀺𑀦𑀸𑀫𑁂𑀫𑀺 𑀢𑀁 𑀤𑀺𑀯𑀁.

𑁯.

‘‘𑀬𑀤𑀺 𑀫𑀸𑀲𑀫𑁆𑀧𑀺 𑀤𑁆𑀯𑁂𑀫𑀸𑀲𑀁, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀯𑀭𑀁 𑀮𑀪𑁂;

𑀅𑀓𑀫𑁆𑀧𑀺𑀢𑁄 𑀅𑀦𑁄𑀮𑀻𑀦𑁄, 𑀤𑀤𑁂𑀬𑁆𑀬𑀁 𑀤𑀸𑀦𑀫𑀼𑀢𑁆𑀢𑀫𑀁.

𑁧𑁦.

‘‘𑀦 ¶ ¶ 𑀢𑀲𑁆𑀲 𑀤𑀸𑀦𑀁 𑀤𑀤𑀫𑀸𑀦𑁄, 𑀬𑀲𑀁 𑀮𑀸𑀪𑀜𑁆𑀘 𑀧𑀢𑁆𑀣𑀬𑀺𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑀬𑀸𑀦𑁄, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀆𑀘𑀭𑀺’’𑀦𑁆𑀢𑀺.

𑀢𑀢𑁆𑀣 𑀢𑀤𑀸𑀢𑀺 𑀬𑀤𑀸 𑀅𑀳𑀁 𑀅𑀓𑀺𑀢𑁆𑀢𑀺𑀦𑀸𑀫𑀓𑁄 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁 𑀤𑀻𑀧𑁂 𑀓𑀸𑀭𑀸𑀭𑀜𑁆𑀜𑁂 𑀯𑀺𑀳𑀭𑀸𑀫𑀺, 𑀢𑀤𑀸 ¶ . 𑀫𑀦𑁆𑀢𑀺 𑀫𑀫. 𑀢𑀧𑀢𑁂𑀚𑁂𑀦𑀸𑀢𑀺 𑀲𑀻𑀮𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦. 𑀲𑀻𑀮𑀜𑁆𑀳𑀺 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀢𑀧𑀦𑀢𑁄 ‘‘𑀢𑀧𑁄’’𑀢𑀺 𑀯𑀼𑀘𑁆𑀘𑀢𑀺, 𑀦𑁂𑀓𑁆𑀔𑀫𑁆𑀫𑀯𑀻𑀭𑀺𑀬𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦 𑀯𑀸. 𑀢𑀸𑀧𑀺 𑀳𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲 𑀓𑁄𑀲𑀚𑁆𑀚𑀲𑁆𑀲 𑀘 𑀢𑀧𑀦𑀢𑁄 ‘‘𑀢𑀧𑁄’’𑀢𑀺 𑀯𑀼𑀘𑁆𑀘𑀢𑀺, 𑀉𑀓𑁆𑀓𑀁𑀲𑀕𑀢𑀸 𑀘 𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀢𑀺. 𑀔𑀦𑁆𑀢𑀺𑀲𑀁𑀯𑀭𑀲𑁆𑀲 𑀘𑀸𑀧𑀺 𑀧𑀭𑀫𑀼𑀓𑁆𑀓𑀁𑀲𑀕𑀫𑀦𑀢𑁄 ‘‘𑀔𑀦𑁆𑀢𑀺𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑁂𑀯. ‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄’’𑀢𑀺 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁪) 𑀳𑀺 𑀯𑀼𑀢𑁆𑀢𑀁. 𑀲𑀦𑁆𑀢𑀢𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀸𑀦𑀼𑀪𑀸𑀯𑀚𑀦𑀺𑀢𑁂𑀦 𑀥𑀫𑁆𑀫𑀢𑀸𑀲𑀺𑀤𑁆𑀥𑁂𑀦 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀲𑁆𑀲 𑀉𑀡𑁆𑀳𑀸𑀓𑀸𑀭𑁂𑀦 𑀲𑀦𑁆𑀢𑀸𑀧𑀺𑀢𑁄. 𑀢𑀺𑀤𑀺𑀯𑀸𑀪𑀺𑀪𑀽𑀢𑀺 𑀤𑁂𑀯𑀮𑁄𑀓𑀸𑀥𑀺𑀧𑀢𑀺, 𑀲𑀓𑁆𑀓𑁄𑀢𑀺 𑀅𑀢𑁆𑀣𑁄. 𑀧𑀡𑁆𑀡𑀲𑀸𑀮𑀸𑀬 𑀲𑀫𑀻𑀧𑁂 𑀕𑀳𑀺𑀢𑀫𑁆𑀧𑀺 𑀓𑀸𑀭𑀧𑀡𑁆𑀡𑀁 𑀧𑀡𑁆𑀡𑀲𑀸𑀮𑀸𑀬 𑀅𑀭𑀜𑁆𑀜𑀫𑀚𑁆𑀛𑀕𑀢𑀢𑁆𑀢𑀸 ‘‘𑀧𑀯𑀦𑀸 𑀆𑀪𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀢𑁂𑀮𑀜𑁆𑀘 𑀅𑀮𑁄𑀡𑀺𑀓𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀼𑀴𑀸𑀭𑀪𑀸𑀯𑁂𑀧𑀺 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀦𑀥𑀫𑁆𑀫𑀲𑁆𑀲 𑀫𑀳𑀸𑀚𑀼𑀢𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀫𑀫 𑀤𑁆𑀯𑀸𑀭𑁂𑀢𑀺 𑀫𑀬𑁆𑀳𑀁 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑁂. 𑀲𑀓𑀝𑀸𑀳𑁂𑀦 𑀆𑀓𑀺𑀭𑀺𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀤𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀧𑀼𑀦𑁂𑀲𑀦𑀁 𑀚𑀳𑀺𑀢𑁆𑀯𑀸𑀦𑀸𑀢𑀺 ‘‘𑀏𑀓𑀤𑀺𑀯𑀲𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀖𑀸𑀲𑁂𑀲𑀦𑀁 𑀦 𑀲𑀮𑁆𑀮𑁂𑀔’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀸𑀦𑀧𑀻𑀢𑀺𑀬𑀸 𑀢𑀺𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀧𑀼𑀦 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀁 𑀅𑀓𑀢𑁆𑀯𑀸.

𑀅𑀓𑀫𑁆𑀧𑀺𑀢𑁄𑀢𑀺 𑀲𑀼𑀤𑀽𑀭𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑁂𑀦 𑀅𑀘𑀮𑀺𑀢𑁄 𑀤𑀸𑀦𑀚𑁆𑀛𑀸𑀲𑀬𑀢𑁄 𑀘𑀮𑀦𑀫𑀢𑁆𑀢𑀫𑁆𑀧𑀺 𑀅𑀓𑀸𑀭𑀺𑀢𑁄. 𑀅𑀦𑁄𑀮𑀕𑁆𑀕𑁄𑀢𑀺 𑀮𑁄𑀪𑀯𑀲𑁂𑀦 𑀈𑀲𑀓𑀫𑁆𑀧𑀺 𑀅𑀮𑀕𑁆𑀕𑁄. 𑀢𑀢𑀺𑀬𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀼𑀢𑀺𑀬𑀫𑁆𑀧𑀻𑀢𑀺 𑀇𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀯𑀫𑁂𑀯𑀫𑀤𑀸𑀲𑀳𑀦𑁆𑀢𑀺 𑀬𑀣𑀸 𑀧𑀞𑀫𑀁, 𑀏𑀯𑀫𑁂𑀯𑀁 𑀤𑀼𑀢𑀺𑀬𑀫𑁆𑀧𑀺, 𑀢𑀢𑀺𑀬𑀫𑁆𑀧𑀺 𑀅𑀤𑀸𑀲𑀺𑀁 𑀅𑀳𑀁.

𑀦 𑀫𑁂 𑀢𑀧𑁆𑀧𑀘𑁆𑀘𑀬𑀸𑀢𑀺 𑀕𑀸𑀣𑀸𑀬 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑀢𑁆𑀣 𑀢𑀧𑁆𑀧𑀘𑁆𑀘𑀬𑀸𑀢𑀺 𑀤𑀸𑀦𑀧𑀘𑁆𑀘𑀬𑀸 𑀢𑀻𑀲𑀼 𑀤𑀺𑀯𑀲𑁂𑀲𑀼 𑀙𑀺𑀦𑁆𑀦𑀸𑀳𑀸𑀭𑀢𑀸𑀬 𑀲𑀭𑀻𑀭𑀲𑁆𑀫𑀺𑀁 𑀬𑁂𑀦 𑀯𑁂𑀯𑀡𑁆𑀡𑀺𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀫𑁆𑀧𑀺 𑀫𑁂 𑀲𑀭𑀻𑀭𑀲𑁆𑀫𑀺𑀁 𑀯𑀺𑀯𑀡𑁆𑀡𑀺𑀬𑀁 𑀤𑀸𑀦𑀧𑀘𑁆𑀘𑀬𑀸𑀬𑁂𑀯 𑀦𑀢𑁆𑀣𑀺 ¶ . 𑀓𑀲𑁆𑀫𑀸? 𑀤𑀸𑀦𑀯𑀺𑀲𑀬𑁂𑀦 𑀧𑀻𑀢𑀺𑀲𑀼𑀔𑁂𑀦 𑀤𑀸𑀦𑀯𑀺𑀲𑀬𑀸𑀬 𑀏𑀯 𑀘 𑀭𑀢𑀺𑀬𑀸. 𑀯𑀻𑀢𑀺𑀦𑀸𑀫𑁂𑀫𑀺 𑀢𑀁 𑀤𑀺𑀯𑀦𑁆𑀢𑀺 𑀢𑀁 𑀲𑀓𑀮𑀁 𑀢𑀺𑀫𑀢𑁆𑀢𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀫𑀺, 𑀦 𑀓𑁂𑀯𑀮𑀜𑁆𑀘 𑀢𑀻𑀡𑀺 𑀏𑀯 𑀤𑀺𑀯𑀲𑀸𑀦𑀺, 𑀅𑀣 𑀔𑁄 𑀫𑀸𑀲𑀤𑁆𑀯𑀺𑀫𑀸𑀲𑀫𑀢𑁆𑀢𑀫𑁆𑀧𑀺 𑀓𑀸𑀮𑀁, 𑀏𑀯𑀫𑁂𑀯 𑀤𑀸𑀢𑀼𑀁 𑀧𑀳𑁄𑀫𑀻𑀢𑀺 𑀤𑀲𑁆𑀲𑁂𑀢𑀼𑀁 ¶ ‘‘𑀬𑀤𑀺 𑀫𑀸𑀲𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁄𑀮𑀻𑀦𑁄𑀢𑀺 𑀅𑀮𑀻𑀦𑀘𑀺𑀢𑁆𑀢𑁄, 𑀤𑀸𑀦𑁂 𑀅𑀲𑀗𑁆𑀓𑀼𑀘𑀺𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀭𑀽𑀧𑁂𑀦 𑀆𑀕𑀢𑀲𑁆𑀲 𑀲𑀓𑁆𑀓𑀲𑁆𑀲. 𑀬𑀲𑀦𑁆𑀢𑀺 𑀓𑀺𑀢𑁆𑀢𑀺𑀁, 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀯𑀸. 𑀮𑀸𑀪𑀜𑁆𑀘𑀸𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀪𑀸𑀯𑁂𑀦 𑀮𑀤𑁆𑀥𑀩𑁆𑀩𑀁 𑀮𑀸𑀪𑀁 𑀯𑀸 𑀦 𑀧𑀢𑁆𑀣𑀬𑀺𑀁. 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀢𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀣𑀬𑀸𑀦𑁄 𑀆𑀓𑀗𑁆𑀔𑀫𑀸𑀦𑁄 𑀢𑀸𑀦𑀺 𑀢𑀻𑀲𑀼 𑀤𑀺𑀯𑀲𑁂𑀲𑀼 𑀅𑀦𑁂𑀓𑀯𑀸𑀭𑀁 𑀉𑀧𑁆𑀧𑀦𑁆𑀦𑀸𑀦𑀺 𑀤𑀸𑀦𑀫𑀬𑀸𑀦𑀺 ¶ 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀤𑀸𑀦𑀲𑁆𑀲 𑀯𑀸 𑀧𑀭𑀺𑀯𑀸𑀭𑀪𑀽𑀢𑀸𑀦𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀆𑀘𑀭𑀺𑀁 𑀅𑀓𑀸𑀲𑀺𑀦𑁆𑀢𑀺.

𑀇𑀢𑀺 𑀪𑀕𑀯𑀸 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀲𑀼𑀤𑀼𑀓𑁆𑀓𑀭𑀁 𑀧𑀼𑀜𑁆𑀜𑀘𑀭𑀺𑀢𑀫𑀢𑁆𑀢𑀫𑁂𑀯 𑀇𑀥 𑀫𑀳𑀸𑀣𑁂𑀭𑀲𑁆𑀲 𑀧𑀓𑀸𑀲𑁂𑀲𑀺. 𑀚𑀸𑀢𑀓𑀤𑁂𑀲𑀦𑀸𑀬𑀁 𑀧𑀦 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀓𑁆𑀓𑀲𑁆𑀲 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀚𑀸𑀦𑀦𑀁 𑀯𑀭𑁂𑀦 𑀉𑀧𑀦𑀺𑀫𑀦𑁆𑀢𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀭𑀲𑀫𑁆𑀧𑀝𑀺𑀘𑁆𑀙𑀦𑀲𑀻𑀲𑁂𑀦 𑀥𑀫𑁆𑀫𑀤𑁂𑀲𑀦𑀸 𑀤𑁂𑀬𑁆𑀬𑀥𑀫𑁆𑀫𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀧𑀼𑀦 𑀲𑀓𑁆𑀓𑀲𑁆𑀲 𑀅𑀦𑀸𑀕𑀫𑀦𑀲𑁆𑀲 𑀘 𑀆𑀓𑀗𑁆𑀔𑀫𑀸𑀦𑀢𑀸 𑀘 𑀧𑀓𑀸𑀲𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀓𑀺𑀢𑁆𑀢𑀺𑀁 𑀤𑀺𑀲𑁆𑀯𑀸𑀦 𑀲𑀫𑁆𑀫𑀦𑁆𑀢𑀁, 𑀲𑀓𑁆𑀓𑁄 𑀪𑀽𑀢𑀧𑀢𑀻 𑀩𑁆𑀭𑀯𑀺;

𑀓𑀺𑀁 𑀧𑀢𑁆𑀣𑀬𑀁 𑀫𑀳𑀸𑀩𑁆𑀭𑀳𑁆𑀫𑁂, 𑀏𑀓𑁄 𑀲𑀫𑁆𑀫𑀲𑀺 𑀖𑀫𑁆𑀫𑀦𑀺.

‘‘𑀤𑀼𑀓𑁆𑀔𑁄 𑀧𑀼𑀦𑀩𑁆𑀪𑀯𑁄 𑀲𑀓𑁆𑀓, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁;

𑀲𑀫𑁆𑀫𑁄𑀳𑀫𑀭𑀡𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀫𑀺, 𑀯𑀸𑀲𑀯.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀬𑁂𑀦 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘, 𑀥𑀦𑀥𑀜𑁆𑀜𑀁 𑀧𑀺𑀬𑀸𑀦𑀺 𑀘;

𑀮𑀤𑁆𑀥𑀸 𑀦𑀭𑀸 𑀦 𑀢𑀧𑁆𑀧𑀦𑁆𑀢𑀺, 𑀲𑁄 𑀮𑁄𑀪𑁄 𑀦 𑀫𑀬𑀻 𑀯𑀲𑁂.

𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂…𑀧𑁂… 𑀫𑀦𑀲𑀺𑀘𑁆𑀙𑀲𑀺.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀜𑁆𑀘, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀬𑁂𑀦 𑀚𑀸𑀢𑁂𑀦 𑀚𑀻𑀬𑀦𑁆𑀢𑀺, 𑀲𑁄 𑀤𑁄𑀲𑁄 𑀦 𑀫𑀬𑀻 𑀯𑀲𑁂.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂…𑀧𑁂… 𑀫𑀦𑀲𑀺𑀘𑁆𑀙𑀲𑀺.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀩𑀸𑀮𑀁 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

‘‘𑀓𑀺𑀁 ¶ 𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

‘‘𑀅𑀦𑀬𑀁 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦𑀁.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂…𑀧𑁂… 𑀫𑀦𑀲𑀺𑀘𑁆𑀙𑀲𑀺.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

‘‘𑀓𑀺𑀁 𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

‘‘𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀥𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀼𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂…𑀧𑁂… 𑀫𑀦𑀲𑀺𑀘𑁆𑀙𑀲𑀺.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀁, 𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸.

‘‘𑀤𑀤𑀢𑁄 ¶ 𑀫𑁂 𑀦 𑀔𑀻𑀬𑁂𑀣, 𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀁;

𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀁, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂…𑀧𑁂… 𑀫𑀦𑀲𑀺𑀘𑁆𑀙𑀲𑀺.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀦 𑀫𑀁 𑀧𑀼𑀦 𑀉𑀧𑁂𑀬𑁆𑀬𑀸𑀲𑀺, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

‘‘𑀩𑀳𑀽𑀳𑀺 𑀯𑀢𑀘𑀭𑀺𑀬𑀸𑀳𑀺, 𑀦𑀭𑀸 𑀘 𑀅𑀣 𑀦𑀸𑀭𑀺𑀬𑁄;

𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀦𑁆𑀢𑀺, 𑀓𑀺𑀁 𑀦𑀼 𑀫𑁂 𑀤𑀲𑁆𑀲𑀦𑁂 𑀪𑀬𑀁.

‘‘𑀢𑀁 𑀢𑀸𑀤𑀺𑀲𑀁 𑀤𑁂𑀯𑀯𑀡𑁆𑀡𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀤𑀺𑀲𑁆𑀯𑀸 𑀢𑀧𑁄 𑀧𑀫𑀚𑁆𑀚𑁂𑀬𑁆𑀬𑀁, 𑀏𑀢𑀁 𑀢𑁂 𑀤𑀲𑁆𑀲𑀦𑁂 𑀪𑀬’’𑀦𑁆𑀢𑀺. (𑀚𑀸. 𑁧.𑁧𑁩.𑁮𑁩-𑁧𑁦𑁩);

𑀅𑀣 𑀲𑀓𑁆𑀓𑁄 ‘‘𑀲𑀸𑀥𑀼, 𑀪𑀦𑁆𑀢𑁂, 𑀦 𑀢𑁂 𑀇𑀢𑁄 𑀧𑀝𑁆𑀞𑀸𑀬 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀫𑀳𑀸𑀲𑀢𑁆𑀢𑁄 𑀬𑀸𑀯𑀚𑀻𑀯𑀁 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀢𑀤𑀸 𑀲𑀓𑁆𑀓𑁄 𑀅𑀳𑁄𑀲𑀺, 𑀮𑁄𑀓𑀦𑀸𑀣𑁄 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄.

𑀢𑀲𑁆𑀲 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑀤𑀺𑀲𑀁 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻. 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀢𑀸𑀬 𑀲𑀻𑀮𑀧𑀸𑀭𑀫𑀻. 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 ¶ 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀯𑀻𑀭𑀺𑀬𑀧𑀸𑀭𑀫𑀻. 𑀔𑀦𑁆𑀢𑀺𑀲𑀁𑀯𑀭𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀕𑀫𑀦𑀢𑁄 𑀔𑀦𑁆𑀢𑀺𑀧𑀸𑀭𑀫𑀻. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀬𑀸 𑀲𑀘𑁆𑀘𑀧𑀸𑀭𑀫𑀻. 𑀲𑀩𑁆𑀩𑀢𑁆𑀣 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑁂𑀦 𑀫𑁂𑀢𑁆𑀢𑀸𑀧𑀸𑀭𑀫𑀻. 𑀲𑀢𑁆𑀢𑀲𑀗𑁆𑀔𑀸𑀭𑀓𑀢𑀯𑀺𑀧𑁆𑀧𑀓𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀉𑀧𑁂𑀓𑁆𑀔𑀸𑀧𑀸𑀭𑀫𑀻. 𑀢𑀸𑀲𑀁 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀅𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀧𑀳𑀸𑀬 𑀉𑀧𑀓𑀸𑀭𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀸𑀧𑀦𑀧𑀼𑀭𑁂𑀘𑀭𑀸 𑀲𑀳𑀚𑀸𑀢𑀸 𑀘 𑀉𑀧𑀸𑀬𑀓𑁄𑀲𑀮𑁆𑀮𑀪𑀽𑀢𑀸 𑀅𑀢𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀲𑀸𑀥𑀦𑀻 𑀘 𑀧𑀜𑁆𑀜𑀸 𑀧𑀜𑁆𑀜𑀸𑀧𑀸𑀭𑀫𑀻𑀢𑀺 𑀇𑀫𑀸𑀧𑀺 𑀤𑀲 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺.

𑀤𑀸𑀦𑀚𑁆𑀛𑀸𑀲𑀬𑀲𑁆𑀲 ¶ 𑀧𑀦 𑀅𑀢𑀺𑀉𑀴𑀸𑀭𑀪𑀸𑀯𑁂𑀦 𑀤𑀸𑀦𑀫𑀼𑀔𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀲𑀫𑀓𑀸 𑀫𑀳𑀸𑀓𑀭𑀼𑀡𑀸, 𑀤𑁆𑀯𑁂𑀧𑀺 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸, 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀢𑀻𑀡𑀺 𑀩𑁄𑀥𑀺𑀲𑀢𑁆𑀢𑀲𑀼𑀘𑀭𑀺𑀢𑀸𑀦𑀺, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀉𑀲𑁆𑀲𑀸𑀳𑀸𑀤𑀬𑁄 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄, 𑀲𑀤𑁆𑀥𑀸𑀤𑀬𑁄 𑀧𑀜𑁆𑀘 𑀫𑀳𑀸𑀩𑁄𑀥𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀅𑀮𑁄𑀪𑀚𑁆𑀛𑀸𑀲𑀬𑀸𑀤𑀬𑁄 𑀙 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸, 𑀢𑀺𑀡𑁆𑀡𑁄 𑀢𑀸𑀭𑁂𑀲𑁆𑀲𑀸𑀫𑀻𑀢𑀺𑀆𑀤𑀬𑁄 𑀲𑀢𑁆𑀢 𑀧𑀝𑀺𑀜𑁆𑀜𑀸 𑀥𑀫𑁆𑀫𑀸, 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸𑀢𑀺𑀆𑀤𑀬𑁄 (𑀤𑀻. 𑀦𑀺. 𑁩.𑁩𑁫𑁮; 𑀅. 𑀦𑀺. 𑁮.𑁩𑁦) 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸 (𑀤𑀻. 𑀦𑀺. 𑁩.𑁩𑁫𑁮), 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸, 𑀤𑀸𑀦𑀚𑁆𑀛𑀸𑀲𑀬𑀸𑀤𑀬𑁄 𑀤𑀲 𑀫𑀳𑀸𑀧𑀼𑀭𑀺𑀲𑀚𑁆𑀛𑀸𑀲𑀬𑀸, 𑀤𑀸𑀦𑀲𑀻𑀮𑀸𑀤𑀬𑁄 𑀤𑀲 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀬𑁄 𑀬𑁂 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀧𑁆𑀧𑀪𑁂𑀤𑀸 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀸 ¶ 𑀫𑀳𑀸𑀩𑁄𑀥𑀺𑀲𑀢𑁆𑀢𑀕𑀼𑀡𑀸. 𑀢𑁂 𑀲𑀩𑁆𑀩𑁂𑀧𑀺 𑀬𑀣𑀸𑀭𑀳𑀁 𑀇𑀥 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸.

𑀅𑀧𑀺 𑀘𑁂𑀢𑁆𑀣 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑀤𑀺𑀲𑀁 𑀕𑁂𑀳𑀢𑁄 𑀦𑀺𑀓𑁆𑀔𑀫𑀦𑀁, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀩𑀳𑀼𑀚𑀦𑀲𑀫𑁆𑀫𑀢𑀲𑁆𑀲 𑀲𑀢𑁄 𑀧𑀭𑀫𑀧𑁆𑀧𑀺𑀘𑁆𑀙𑀪𑀸𑀯𑁂𑀦 𑀓𑀼𑀮𑁂𑀲𑀼 𑀕𑀡𑁂𑀲𑀼 𑀘 𑀅𑀮𑀕𑁆𑀕𑀢𑀸, 𑀅𑀘𑁆𑀘𑀦𑁆𑀢𑀫𑁂𑀯 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀚𑀺𑀕𑀼𑀘𑁆𑀙𑀸, 𑀧𑀯𑀺𑀯𑁂𑀓𑀸𑀪𑀺𑀭𑀢𑀺, 𑀓𑀸𑀬𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀸𑀕𑁄, 𑀅𑀦𑀸𑀳𑀸𑀭𑀲𑁆𑀲𑁂𑀯 𑀲𑀢𑁄 𑀤𑀺𑀯𑀲𑀢𑁆𑀢𑀬𑀫𑁆𑀧𑀺 𑀤𑀸𑀦𑀧𑀻𑀢𑀺𑀬𑀸 𑀧𑀭𑀺𑀢𑀼𑀝𑁆𑀞𑀲𑁆𑀲 𑀦𑀺𑀩𑁆𑀩𑀺𑀓𑀸𑀭𑀲𑀭𑀻𑀭𑀬𑀸𑀧𑀦𑀁, 𑀫𑀸𑀲𑀤𑁆𑀯𑀺𑀫𑀸𑀲𑀫𑀢𑁆𑀢𑀫𑁆𑀧𑀺 𑀓𑀸𑀮𑀁 𑀬𑀸𑀘𑀓𑁂 𑀲𑀢𑀺 𑀆𑀳𑀸𑀭𑀁 𑀢𑀣𑁂𑀯 𑀤𑀢𑁆𑀯𑀸 ‘‘𑀤𑀸𑀦𑀕𑀢𑁂𑀦𑁂𑀯 𑀧𑀻𑀢𑀺𑀲𑀼𑀔𑁂𑀦 𑀲𑀭𑀻𑀭𑀁 𑀬𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀘𑁆𑀘𑀸𑀕𑁂 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀲𑀸𑀥𑀓𑁄 𑀉𑀴𑀸𑀭𑁄 𑀤𑀸𑀦𑀚𑁆𑀛𑀸𑀲𑀬𑁄, 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 ¶ 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀬𑀸 𑀅𑀓𑀭𑀡𑀳𑁂𑀢𑀼𑀪𑀽𑀢𑀸 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀻𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂, 𑀅𑀩𑁆𑀪𑀼𑀢𑀸 𑀘 𑀫𑀳𑁂𑀲𑀺𑀦𑁄;

𑀫𑀳𑀸𑀓𑀸𑀭𑀼𑀡𑀺𑀓𑀸 𑀥𑀻𑀭𑀸, 𑀲𑀩𑁆𑀩𑀮𑁄𑀓𑁂𑀓𑀩𑀦𑁆𑀥𑀯𑀸.

‘‘𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀘, 𑀲𑀤𑀸 𑀲𑀤𑁆𑀥𑀫𑁆𑀫𑀕𑁄𑀘𑀭𑀸;

𑀩𑁄𑀥𑀺𑀲𑀢𑁆𑀢𑀸 𑀫𑀳𑀸𑀲𑀢𑁆𑀢𑀸, 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄.

‘‘𑀫𑀳𑀸𑀯𑀸𑀢𑀲𑀫𑀼𑀤𑁆𑀥𑀢-𑀯𑀻𑀘𑀺𑀫𑀸𑀮𑁄 𑀫𑀳𑁄𑀤𑀥𑀺;

𑀅𑀧𑀺 𑀮𑀗𑁆𑀖𑁂𑀬𑁆𑀬 𑀯𑁂𑀮𑀦𑁆𑀢𑀁, 𑀩𑁄𑀥𑀺𑀲𑀢𑁆𑀢𑀸 𑀦 𑀥𑀫𑁆𑀫𑀢𑀁.

‘‘𑀮𑁄𑀓𑁂 ¶ 𑀲𑀜𑁆𑀚𑀸𑀢𑀯𑀤𑁆𑀥𑀸𑀧𑀺, 𑀦 𑀢𑁂 𑀪𑀸𑀯𑀺𑀢𑀪𑀸𑀯𑀺𑀦𑁄;

𑀮𑀺𑀫𑁆𑀧𑀦𑁆𑀢𑀺 𑀮𑁄𑀓𑀥𑀫𑁆𑀫𑁂𑀳𑀺, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

‘‘𑀬𑁂𑀲𑀁 𑀯𑁂 𑀅𑀢𑁆𑀢𑀦𑀺 𑀲𑁆𑀦𑁂𑀳𑁄, 𑀦𑀺𑀳𑀻𑀬𑀢𑀺 𑀬𑀣𑀸 𑀬𑀣𑀸;

𑀲𑀢𑁆𑀢𑁂𑀲𑀼 𑀓𑀭𑀼𑀡𑀸𑀲𑁆𑀦𑁂𑀳𑁄, 𑀯𑀟𑁆𑀠𑀢𑁂𑀯 𑀢𑀣𑀸 𑀢𑀣𑀸.

‘‘𑀬𑀣𑀸 𑀘𑀺𑀢𑁆𑀢𑀁 𑀯𑀲𑁂 𑀳𑁄𑀢𑀺, 𑀦 𑀘 𑀘𑀺𑀢𑁆𑀢𑀯𑀲𑀸𑀦𑀼𑀕𑀸;

𑀢𑀣𑀸 𑀓𑀫𑁆𑀫𑀁 𑀯𑀲𑁂 𑀳𑁄𑀢𑀺, 𑀦 𑀘 𑀓𑀫𑁆𑀫𑀯𑀲𑀸𑀦𑀼𑀕𑀸.

‘‘𑀤𑁄𑀲𑁂𑀳𑀺 𑀦𑀸𑀪𑀺𑀪𑀽𑀬𑀦𑁆𑀢𑀺, 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑀺 𑀯𑀸 𑀦 𑀢𑁂;

𑀘𑀭𑀦𑁆𑀢𑀸 𑀩𑁄𑀥𑀺𑀧𑀭𑀺𑀬𑁂𑀝𑁆𑀞𑀺𑀁, 𑀧𑀼𑀭𑀺𑀲𑀸𑀚𑀸𑀦𑀺𑀬𑀸 𑀩𑀼𑀥𑀸.

‘‘𑀢𑁂𑀲𑀼 ¶ 𑀘𑀺𑀢𑁆𑀢𑀧𑁆𑀧𑀲𑀸𑀤𑁄𑀧𑀺, 𑀤𑀼𑀓𑁆𑀔𑀢𑁄 𑀧𑀭𑀺𑀫𑁄𑀘𑀬𑁂;

𑀧𑀕𑁂𑀯𑀸𑀦𑀼𑀓𑀺𑀭𑀺𑀬𑀸 𑀢𑁂𑀲𑀁, 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀘𑀭𑀺𑀬𑀸𑀧𑀺𑀝𑀓𑀲𑀁𑀯𑀡𑁆𑀡𑀦𑀸𑀬

𑀅𑀓𑀺𑀢𑁆𑀢𑀺𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁧-𑁧𑁨. 𑀤𑀼𑀢𑀺𑀬𑀲𑁆𑀫𑀺𑀁 𑀧𑀼𑀦𑀸𑀧𑀭𑀦𑁆𑀢𑀺 𑀧𑀼𑀦 𑀅𑀧𑀭𑀁, 𑀦 𑀓𑁂𑀯𑀮𑀫𑀺𑀤𑀁 𑀅𑀓𑀺𑀢𑁆𑀢𑀺𑀘𑀭𑀺𑀬𑀫𑁂𑀯, 𑀅𑀣 𑀔𑁄 𑀧𑀼𑀦 𑀅𑀧𑀭𑀁 𑀅𑀜𑁆𑀜𑀁 𑀲𑀗𑁆𑀔𑀘𑀭𑀺𑀬𑀫𑁆𑀧𑀺 𑀧𑀯𑀓𑁆𑀔𑀺𑀲𑁆𑀲𑀁, 𑀲𑀼𑀡𑁄𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀔𑀲𑀯𑁆𑀳𑀬𑁄𑀢𑀺 𑀲𑀗𑁆𑀔𑀦𑀸𑀫𑁄. 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀓𑀸𑀫𑁄𑀢𑀺 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑀼𑀁 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀓𑀸𑀫𑁄. 𑀉𑀧𑀕𑀘𑁆𑀙𑀸𑀫𑀺 𑀧𑀝𑁆𑀝𑀦𑀦𑁆𑀢𑀺 𑀢𑀸𑀫𑀮𑀺𑀢𑁆𑀢𑀺𑀧𑀝𑁆𑀝𑀦𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀸𑀫𑀺. 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀅𑀥𑀺𑀕𑀢𑀢𑁆𑀢𑀸 𑀲𑀬𑀫𑁂𑀯 𑀪𑀽𑀢𑀦𑁆𑀢𑀺 𑀲𑀬𑀫𑁆𑀪𑀼𑀁. 𑀓𑀺𑀮𑁂𑀲𑀫𑀸𑀭𑀸𑀤𑀻𑀲𑀼 𑀓𑁂𑀦𑀘𑀺𑀧𑀺 𑀦 𑀧𑀭𑀸𑀚𑀺𑀢𑀦𑁆𑀢𑀺 𑀅𑀧𑀭𑀸𑀚𑀺𑀢𑀁, 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀢𑀸𑀬 𑀓𑀞𑀺𑀦𑀪𑀽𑀫𑀺𑀬𑀸𑀢𑀺 𑀖𑀫𑁆𑀫𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀢𑁆𑀢𑀸𑀬 𑀲𑀓𑁆𑀔𑀭𑀯𑀸𑀮𑀼𑀓𑀸𑀦𑀺𑀘𑀺𑀢𑀢𑁆𑀢𑀸 𑀔𑀭𑀸𑀬 𑀓𑀓𑁆𑀔𑀴𑀸𑀬 𑀪𑀽𑀫𑀺𑀬𑀸 ¶ .

𑁧𑁩. 𑀢𑀦𑁆𑀢𑀺 𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁. 𑀇𑀫𑀫𑀢𑁆𑀣𑀦𑁆𑀢𑀺 𑀇𑀫𑀁 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 ‘‘𑀇𑀤𑀁 𑀔𑁂𑀢𑁆𑀢’’𑀦𑁆𑀢𑀺𑀆𑀤𑀺𑀓𑀁 ¶ 𑀅𑀢𑁆𑀣𑀁. 𑀯𑀺𑀘𑀺𑀦𑁆𑀢𑀬𑀺𑀦𑁆𑀢𑀺 𑀢𑀤𑀸 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀪𑀽𑀢𑁄 𑀘𑀺𑀦𑁆𑀢𑁂𑀲𑀺𑀦𑁆𑀢𑀺 𑀲𑀢𑁆𑀣𑀸 𑀯𑀤𑀢𑀺. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀅𑀢𑀻𑀢𑁂 𑀅𑀬𑀁 𑀩𑀸𑀭𑀸𑀡𑀲𑀻 𑀫𑁄𑀴𑀺𑀦𑀻 𑀦𑀸𑀫 𑀅𑀳𑁄𑀲𑀺. 𑀫𑁄𑀴𑀺𑀦𑀻𑀦𑀕𑀭𑁂 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀗𑁆𑀔𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀙𑀲𑀼 𑀞𑀸𑀦𑁂𑀲𑀼 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀕𑁂𑀳𑁂 𑀥𑀦𑁂 𑀔𑀻𑀡𑁂 𑀤𑀸𑀦𑀁 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑀭𑀺𑀓𑁆𑀔𑀻𑀡𑁂𑀬𑁂𑀯 𑀥𑀦𑁂 𑀦𑀸𑀯𑀸𑀬 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀸𑀯𑀁 𑀪𑀡𑁆𑀟𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀸𑀯𑀸𑀳𑀁 𑀆𑀕𑀘𑁆𑀙𑀺𑀲𑁆𑀲𑀸𑀫𑀺, 𑀢𑀸𑀯 𑀫𑁂 𑀤𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀦𑁆𑀢𑀸 𑀧𑀯𑀢𑁆𑀢𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀯𑀼𑀢𑁄 𑀉𑀧𑀸𑀳𑀦𑀁 𑀆𑀭𑀼𑀬𑁆𑀳 𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦 𑀧𑀝𑁆𑀝𑀦𑀕𑀸𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀕𑀦𑁆𑀥𑀫𑀸𑀤𑀦𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀥𑀦𑀸𑀳𑀭𑀡𑀢𑁆𑀣𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀭𑀺𑀲𑁄 𑀥𑀦𑀁 𑀆𑀳𑀭𑀺𑀢𑀼𑀁 𑀕𑀘𑁆𑀙𑀢𑀺, 𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑁂 𑀅𑀦𑁆𑀢𑀭𑀸𑀬𑁄, 𑀦𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀏𑀲 𑀫𑀁 𑀤𑀺𑀲𑁆𑀯𑀸 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀜𑁆𑀘 𑀫𑀬𑁆𑀳𑀁 𑀤𑀢𑁆𑀯𑀸 𑀉𑀧𑀸𑀳𑀦𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀧𑀢𑀺𑀝𑁆𑀞𑀁 𑀮𑀪𑀺𑀲𑁆𑀲𑀢𑀺, 𑀓𑀭𑀺𑀲𑁆𑀲𑀸𑀫𑀺𑀲𑁆𑀲 𑀅𑀦𑀼𑀕𑁆𑀕𑀳’’𑀦𑁆𑀢𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀘𑀡𑁆𑀟𑀯𑀸𑀢𑀸𑀢𑀧𑁂𑀦 𑀅𑀗𑁆𑀕𑀸𑀭𑀲𑀦𑁆𑀣𑀢𑀲𑀤𑀺𑀲𑀁 𑀉𑀡𑁆𑀳𑀯𑀸𑀮𑀼𑀓𑀁 𑀫𑀤𑁆𑀤𑀦𑁆𑀢𑁄 𑀢𑀲𑁆𑀲 𑀅𑀪𑀺𑀫𑀼𑀔𑀁 𑀆𑀕𑀜𑁆𑀙𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 𑀳𑀝𑁆𑀞𑀢𑀼𑀝𑁆𑀞𑁄 ‘‘𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑁂 𑀆𑀕𑀢𑀁, 𑀅𑀚𑁆𑀚 𑀫𑀬𑀸 𑀏𑀢𑁆𑀣 𑀩𑀻𑀚𑀁 𑀭𑁄𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀫𑀳𑀁 𑀧𑀝𑀺𑀧𑀣𑁂 𑀤𑀺𑀲𑁆𑀯𑀸, 𑀇𑀫𑀫𑀢𑁆𑀣𑀁 𑀯𑀺𑀘𑀺𑀦𑁆𑀢𑀬𑀺’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀇𑀤𑀁 𑀔𑁂𑀢𑁆𑀢𑀦𑁆𑀢𑀺𑀆𑀤𑀺 𑀘𑀺𑀦𑁆𑀢𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀔𑁂𑀢𑁆𑀢𑀦𑁆𑀢𑀺 ¶ 𑀔𑀺𑀢𑁆𑀢𑀁 𑀩𑀻𑀚𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀢𑀸𑀬𑀢𑀻𑀢𑀺 𑀔𑁂𑀢𑁆𑀢𑀁, 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀯𑀺𑀭𑀼𑀳𑀦𑀪𑀽𑀫𑀺. 𑀇𑀥 𑀧𑀦 𑀔𑁂𑀢𑁆𑀢𑀁 𑀯𑀺𑀬𑀸𑀢𑀺 𑀔𑁂𑀢𑁆𑀢𑀁, 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀢𑁂𑀦𑁂𑀯𑀸𑀳 ‘‘𑀧𑀼𑀜𑁆𑀜𑀓𑀸𑀫𑀲𑁆𑀲 𑀚𑀦𑁆𑀢𑀼𑀦𑁄’’𑀢𑀺.

𑁧𑁪. 𑀫𑀳𑀸𑀕𑀫𑀦𑁆𑀢𑀺 𑀯𑀺𑀧𑀼𑀮𑀨𑀮𑀸𑀕𑀫𑀁, 𑀲𑀲𑁆𑀲𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀦𑁆𑀢𑀺 𑀅𑀢𑁆𑀣𑁄. 𑀩𑀻𑀚𑀁 𑀦 𑀭𑁄𑀧𑁂𑀢𑀻𑀢𑀺 𑀩𑀻𑀚𑀁 𑀦 𑀯𑀧𑀢𑀺.

𑁧𑁫.

𑀔𑁂𑀢𑁆𑀢𑀯𑀭𑀼𑀢𑁆𑀢𑀫𑀦𑁆𑀢𑀺 𑀔𑁂𑀢𑁆𑀢𑀯𑀭𑁂𑀲𑀼𑀧𑀺 𑀉𑀢𑁆𑀢𑀫𑀁. 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀳𑀺 𑀯𑀺𑀲𑁂𑀲𑀢𑁄 𑀅𑀭𑀺𑀬𑀲𑀸𑀯𑀓𑀸 ¶ 𑀔𑁂𑀢𑁆𑀢𑀯𑀭𑀸, 𑀢𑀢𑁄𑀧𑀺 𑀅𑀕𑁆𑀕𑀪𑀽𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀔𑁂𑀢𑁆𑀢𑀯𑀭𑀼𑀢𑁆𑀢𑀫𑁄. 𑀓𑀸𑀭𑀦𑁆𑀢𑀺 𑀲𑀓𑁆𑀓𑀸𑀭𑀁. 𑀬𑀤𑀺 𑀦 𑀓𑀭𑁄𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀤𑀫𑀻𑀤𑀺𑀲𑀁 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀧𑀽𑀚𑀸𑀲𑀓𑁆𑀓𑀸𑀭𑀁 𑀬𑀤𑀺 𑀦 𑀓𑀭𑁄𑀫𑀺, 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄 𑀦𑀸𑀫𑀸𑀳𑀁 𑀦 𑀪𑀯𑁂𑀬𑁆𑀬𑀦𑁆𑀢𑀺.

𑁧𑁬-𑁧𑁭. 𑀬𑀣𑀸 𑀅𑀫𑀘𑁆𑀘𑁄𑀢𑀺𑀆𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀕𑀸𑀣𑀸𑀦𑀁 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀬𑁄 𑀓𑁄𑀘𑀺 𑀭𑀜𑁆𑀜𑀸 𑀫𑀼𑀤𑁆𑀤𑀸𑀥𑀺𑀓𑀸𑀭𑁂 𑀞𑀧𑀺𑀢𑁄 𑀮𑀜𑁆𑀙𑀦𑀥𑀭𑁄 𑀅𑀫𑀘𑁆𑀘𑀧𑀼𑀭𑀺𑀲𑁄 𑀲𑁂𑀦𑀸𑀧𑀢𑀺 𑀯𑀸 𑀲𑁄 𑀅𑀦𑁆𑀢𑁂𑀧𑀼𑀭𑁂 𑀚𑀦𑁂 𑀩𑀳𑀺𑀤𑁆𑀥𑀸 𑀘 𑀩𑀮𑀓𑀸𑀬𑀸𑀤𑀻𑀲𑀼 𑀭𑀜𑁆𑀜𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀦 𑀧𑀝𑀺𑀧𑀚𑁆𑀚𑀢𑀺 𑀦 𑀢𑁂𑀲𑀁 𑀥𑀦𑀥𑀜𑁆𑀜𑀁 𑀤𑁂𑀢𑀺, 𑀢𑀁 𑀢𑀁 𑀓𑀢𑁆𑀢𑀩𑁆𑀩𑀁 𑀯𑀢𑁆𑀢𑀁 𑀧𑀭𑀺𑀳𑀸𑀧𑁂𑀢𑀺. 𑀲𑁄 𑀫𑀼𑀤𑁆𑀤𑀺𑀢𑁄 𑀧𑀭𑀺𑀳𑀸𑀬𑀢𑀺 𑀫𑀼𑀤𑁆𑀤𑀸𑀥𑀺𑀓𑀸𑀭𑀮𑀤𑁆𑀥𑀯𑀺𑀪𑀯𑀢𑁄 ¶ 𑀧𑀭𑀺𑀥𑀁𑀲𑀢𑀺, 𑀏𑀯𑀫𑁂𑀯 𑀅𑀳𑀫𑁆𑀧𑀺 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀭𑀢𑁄 𑀮𑀤𑁆𑀥𑀩𑁆𑀩𑀧𑀼𑀜𑁆𑀜𑀨𑀮𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀓𑀸𑀫𑁄 𑀤𑀓𑁆𑀔𑀺𑀡𑀸𑀬 𑀯𑀺𑀧𑀼𑀮𑀨𑀮𑀪𑀸𑀯𑀓𑀭𑀡𑁂𑀦 𑀯𑀺𑀧𑀼𑀮𑀁 𑀤𑀺𑀲𑁆𑀯𑀸𑀦 𑀢𑀁 𑀤𑀓𑁆𑀔𑀺𑀡𑀁 𑀉𑀴𑀸𑀭𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲 𑀤𑀸𑀦𑀁 𑀬𑀤𑀺 𑀦 𑀤𑀤𑀸𑀫𑀺 𑀧𑀼𑀜𑁆𑀜𑀢𑁄 𑀆𑀬𑀢𑀺𑀁 𑀧𑀼𑀜𑁆𑀜𑀨𑀮𑀢𑁄 𑀘 𑀧𑀭𑀺𑀥𑀁𑀲𑀸𑀫𑀺. 𑀢𑀲𑁆𑀫𑀸 𑀇𑀥 𑀫𑀬𑀸 𑀧𑀼𑀜𑁆𑀜𑀁 𑀓𑀸𑀢𑀩𑁆𑀩𑀫𑁂𑀯𑀸𑀢𑀺.

𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑁄 𑀤𑀽𑀭𑀢𑁄𑀯 𑀉𑀧𑀸𑀳𑀦𑀸 𑀑𑀭𑁄𑀳𑀺𑀢𑁆𑀯𑀸 𑀯𑁂𑀕𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀇𑀫𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀢𑀢𑁆𑀣 𑀯𑀸𑀮𑀼𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂 𑀯𑀦𑁆𑀤𑀺𑀢𑁆𑀯𑀸 𑀯𑀸𑀲𑀺𑀢𑀧𑀭𑀺𑀲𑁆𑀲𑀸𑀯𑀺𑀢𑁂𑀦 𑀉𑀤𑀓𑁂𑀦 𑀢𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸, 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀉𑀧𑀸𑀳𑀦𑀁 𑀧𑀼𑀜𑁆𑀙𑀺𑀢𑁆𑀯𑀸, 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀢𑀲𑁆𑀲 𑀧𑀸𑀤𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀉𑀧𑀸𑀳𑀦𑀁 𑀆𑀭𑀼𑀬𑁆𑀳, 𑀇𑀫𑀁 𑀙𑀢𑁆𑀢𑀁 𑀫𑀢𑁆𑀣𑀓𑁂 𑀓𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀙𑀢𑁆𑀢𑀼𑀧𑀸𑀳𑀦𑀁 𑀅𑀤𑀸𑀲𑀺. 𑀲𑁄𑀧𑀺𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀲𑀁𑀯𑀟𑁆𑀠𑀦𑀢𑁆𑀣𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮.

‘‘𑀏𑀯𑀸𑀳𑀁 ¶ 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀑𑀭𑁄𑀳𑀺𑀢𑁆𑀯𑀸 𑀉𑀧𑀸𑀳𑀦𑀸;

𑀢𑀲𑁆𑀲 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑁆𑀯𑀸, 𑀅𑀤𑀸𑀲𑀺𑀁 𑀙𑀢𑁆𑀢𑀼𑀧𑀸𑀳𑀦’’𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀅𑀣𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀯𑀸 𑀯𑀺𑀯𑀭𑀫𑀤𑀸𑀲𑀺. 𑀉𑀤𑀓𑀁 𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀫𑀳𑀸𑀚𑀦𑁄 𑀫𑀭𑀡𑀪𑀬𑀪𑀻𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑁆𑀯𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀓𑀁 𑀉𑀧𑀝𑁆𑀞𑀸𑀓𑀁 𑀕𑀳𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀲𑀧𑁆𑀧𑀺𑀦𑀸 𑀲𑀤𑁆𑀥𑀺𑀁 𑀲𑀓𑁆𑀔𑀭𑀘𑀼𑀡𑁆𑀡𑀸𑀦𑀺 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺𑀢𑁆𑀯𑀸 𑀢𑀫𑁆𑀧𑀺 𑀔𑀸𑀤𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀽𑀧𑀓𑀬𑀝𑁆𑀞𑀺𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀇𑀫𑀸𑀬 𑀤𑀺𑀲𑀸𑀬 𑀅𑀫𑁆𑀳𑀸𑀓𑀁 𑀦𑀕𑀭’’𑀦𑁆𑀢𑀺 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀫𑀘𑁆𑀙𑀓𑀘𑁆𑀙𑀧𑀧𑀭𑀺𑀧𑀦𑁆𑀣𑀢𑁄 𑀅𑀢𑁆𑀢𑀸𑀦𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀧𑀫𑁄𑀘𑁂𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀉𑀲𑀪𑀫𑀢𑁆𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀁 𑀆𑀭𑀪𑀺. 𑀫𑀳𑀸𑀚𑀦𑁄 𑀧𑀦 𑀢𑀢𑁆𑀣𑁂𑀯 𑀯𑀺𑀦𑀸𑀲𑀁 ¶ 𑀧𑀸𑀧𑀼𑀡𑀺. 𑀢𑀲𑁆𑀲 𑀢𑀭𑀦𑁆𑀢𑀲𑁆𑀲𑁂𑀯 𑀲𑀢𑁆𑀢 𑀤𑀺𑀯𑀲𑀸 𑀕𑀢𑀸. 𑀲𑁄 𑀢𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀮𑁄𑀡𑁄𑀤𑀓𑁂𑀦 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀅𑀳𑁄𑀲𑀺𑀬𑁂𑀯.

𑀢𑀤𑀸 ¶ 𑀧𑀦 𑀈𑀤𑀺𑀲𑀸𑀦𑀁 𑀧𑀼𑀭𑀺𑀲𑀯𑀺𑀲𑁂𑀲𑀸𑀦𑀁 𑀭𑀓𑁆𑀔𑀡𑀢𑁆𑀣𑀸𑀬 𑀘𑀢𑀽𑀳𑀺 𑀮𑁄𑀓𑀧𑀸𑀮𑁂𑀳𑀺 𑀞𑀧𑀺𑀢𑀸 𑀫𑀡𑀺𑀫𑁂𑀔𑀮𑀸 𑀦𑀸𑀫 𑀤𑁂𑀯𑀥𑀻𑀢𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀲𑀢𑁆𑀢𑀸𑀳𑀁 𑀧𑀫𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀇𑀥 𑀫𑀭𑀺𑀲𑁆𑀲, 𑀅𑀢𑀺𑀯𑀺𑀬 𑀕𑀸𑀭𑀬𑁆𑀳𑀸 𑀅𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀁𑀯𑀺𑀕𑁆𑀕𑀳𑀤𑀬𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀤𑀺𑀩𑁆𑀩𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀇𑀤𑀁 𑀤𑀺𑀩𑁆𑀩𑀪𑁄𑀚𑀦𑀁 𑀪𑀼𑀜𑁆𑀚𑀸’’𑀢𑀺 𑀆𑀳. 𑀲𑁄 𑀢𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 ‘‘𑀦𑀸𑀳𑀁 𑀪𑀼𑀜𑁆𑀚𑀸𑀫𑀺, 𑀉𑀧𑁄𑀲𑀣𑀺𑀓𑁄𑀫𑁆𑀳𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄 𑁋

‘‘𑀬𑀁 𑀢𑁆𑀯𑀁 𑀲𑀼𑀔𑁂𑀦𑀸𑀪𑀺𑀲𑀫𑁂𑀓𑁆𑀔𑀲𑁂 𑀫𑀁, 𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁 𑀇𑀢𑀺 𑀫𑀁 𑀯𑀤𑁂𑀲𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀺 𑀫𑀳𑀸𑀦𑀼𑀪𑀸𑀯𑁂, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀽’’𑀢𑀺. (𑀚𑀸. 𑁧.𑁧𑁦.𑁪𑁨) 𑁋

𑀆𑀳. 𑀲𑀸 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀻 𑁋

‘‘𑀤𑁂𑀯𑀻 𑀅𑀳𑀁 𑀲𑀗𑁆𑀔 𑀫𑀳𑀸𑀦𑀼𑀪𑀸𑀯𑀸, 𑀇𑀥𑀸𑀕𑀢𑀸 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂;

𑀅𑀦𑀼𑀓𑀫𑁆𑀧𑀺𑀓𑀸 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑀸, 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀸𑀲𑁆𑀫𑀺.

‘‘𑀇𑀥𑀦𑁆𑀦𑀧𑀸𑀦𑀁 𑀲𑀬𑀦𑀸𑀲𑀦𑀜𑁆𑀘, 𑀬𑀸𑀦𑀸𑀦𑀺 𑀦𑀸𑀦𑀸𑀯𑀺𑀯𑀺𑀥𑀸𑀦𑀺 𑀲𑀗𑁆𑀔;

𑀲𑀩𑁆𑀩𑀲𑁆𑀲 ¶ 𑀢𑁆𑀬𑀸𑀳𑀁 𑀧𑀝𑀺𑀧𑀸𑀤𑀬𑀸𑀫𑀺, 𑀬𑀁 𑀓𑀺𑀜𑁆𑀘𑀺 𑀢𑀼𑀬𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺. (𑀚𑀸. 𑁧.𑁧𑁦.𑁪𑁩-𑁪𑁪) 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀤𑁂𑀯𑀥𑀻𑀢𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀫𑀬𑁆𑀳𑀁 ‘𑀇𑀤𑀜𑁆𑀘𑀺𑀤𑀜𑁆𑀘 𑀤𑀫𑁆𑀫𑀻’𑀢𑀺 𑀯𑀤𑀢𑀺, 𑀬𑀜𑁆𑀘𑁂𑀲𑀸 𑀫𑀬𑁆𑀳𑀁 𑀤𑁂𑀢𑀺, 𑀢𑀫𑁆𑀧𑀺 𑀫𑀫 𑀧𑀼𑀜𑁆𑀜𑁂𑀦𑁂𑀯, 𑀢𑀁 𑀧𑀦 𑀧𑀼𑀜𑁆𑀜𑀁 𑀅𑀬𑀁 𑀤𑁂𑀯𑀥𑀻𑀢𑀸 𑀚𑀸𑀦𑀸𑀢𑀺 𑀦𑀼 𑀔𑁄, 𑀉𑀤𑀸𑀳𑀼 𑀦 𑀚𑀸𑀦𑀸𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀜𑁆𑀘 𑀳𑀼𑀢𑀜𑁆𑀘 𑀫𑀬𑁆𑀳𑀁, 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀁 𑀲𑀼𑀕𑀢𑁆𑀢𑁂;

𑀲𑀼𑀲𑁆𑀲𑁄𑀡𑀺 𑀲𑀼𑀩𑁆𑀪𑀽𑀭𑀼 𑀯𑀺𑀮𑀕𑁆𑀕𑀫𑀚𑁆𑀛𑁂, 𑀓𑀺𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺. (𑀚𑀸. 𑁧.𑁧𑁦.𑁪𑁫);

𑀢𑀢𑁆𑀣 ¶ ¶ 𑀬𑀺𑀝𑁆𑀞𑀦𑁆𑀢𑀺 𑀤𑀸𑀦𑀯𑀲𑁂𑀦 𑀬𑀚𑀺𑀢𑀁. 𑀳𑀼𑀢𑀦𑁆𑀢𑀺 𑀆𑀳𑀼𑀦𑀧𑀸𑀳𑀼𑀦𑀯𑀲𑁂𑀦 𑀤𑀺𑀦𑁆𑀦𑀁. 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀦𑁆𑀢𑀺 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀲𑀩𑁆𑀩𑀲𑁆𑀲 𑀢𑁆𑀯𑀁 𑀇𑀲𑁆𑀲𑀭𑀸, ‘‘𑀅𑀬𑀁 𑀇𑀫𑀲𑁆𑀲 𑀯𑀺𑀧𑀸𑀓𑁄, 𑀅𑀬𑀁 𑀇𑀫𑀲𑁆𑀲𑀸’’𑀢𑀺 𑀩𑁆𑀬𑀸𑀓𑀭𑀺𑀢𑀼𑀁 𑀲𑀫𑀢𑁆𑀣𑀸. 𑀲𑀼𑀲𑁆𑀲𑁄𑀡𑀻𑀢𑀺 𑀲𑀼𑀦𑁆𑀤𑀭𑀚𑀖𑀦𑁂. 𑀲𑀼𑀩𑁆𑀪𑀽𑀭𑀽𑀢𑀺 𑀲𑀼𑀦𑁆𑀤𑀭𑁂𑀳𑀺 𑀪𑀫𑀼𑀓𑁂𑀳𑀺 𑀊𑀭𑀽𑀳𑀺 𑀘 𑀲𑀫𑀦𑁆𑀦𑀸𑀕𑀢𑁂. 𑀯𑀺𑀮𑀕𑁆𑀕𑀫𑀚𑁆𑀛𑁂𑀢𑀺 𑀯𑀺𑀮𑀕𑁆𑀕𑀢𑀦𑀼𑀫𑀚𑁆𑀛𑁂. 𑀓𑀺𑀲𑁆𑀲 𑀫𑁂𑀢𑀺 𑀫𑀬𑀸 𑀓𑀢𑀓𑀫𑁆𑀫𑁂𑀲𑀼 𑀓𑀢𑀭𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀅𑀧𑁆𑀧𑀢𑀺𑀝𑁆𑀞𑁂 𑀫𑀳𑀸𑀲𑀫𑀼𑀤𑁆𑀤𑁂 𑀅𑀚𑁆𑀚 𑀧𑀢𑀺𑀝𑁆𑀞𑀁 𑀮𑀪𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀥𑀻𑀢𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 ‘𑀬𑀁 𑀅𑀢𑁆𑀢𑀦𑀸 𑀓𑀼𑀲𑀮𑀓𑀫𑁆𑀫𑀁 𑀓𑀢𑀁, 𑀢𑀁 𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻’𑀢𑀺 𑀲𑀜𑁆𑀜𑀸𑀬 𑀧𑀼𑀘𑁆𑀙𑀢𑀺 𑀫𑀜𑁆𑀜𑁂, 𑀓𑀣𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀦𑀸𑀯𑀸𑀪𑀺𑀭𑀼𑀳𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀙𑀢𑁆𑀢𑀼𑀧𑀸𑀳𑀦𑀤𑀸𑀦𑀧𑀼𑀜𑁆𑀜𑀫𑁂𑀯 𑀢𑀲𑁆𑀲 𑀓𑀸𑀭𑀡𑀦𑁆𑀢𑀺 𑀓𑀣𑁂𑀦𑁆𑀢𑀻 𑁋

‘‘𑀖𑀫𑁆𑀫𑁂 𑀧𑀣𑁂 𑀩𑁆𑀭𑀸𑀳𑁆𑀫𑀡 𑀏𑀓𑀪𑀺𑀓𑁆𑀔𑀼𑀁, 𑀉𑀕𑁆𑀖𑀝𑁆𑀝𑀧𑀸𑀤𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁;

𑀧𑀝𑀺𑀧𑀸𑀤𑀬𑀻 𑀲𑀗𑁆𑀔 𑀉𑀧𑀸𑀳𑀦𑀸𑀦𑀺, 𑀲𑀸 𑀤𑀓𑁆𑀔𑀺𑀡𑀸 𑀓𑀸𑀫𑀤𑀼𑀳𑀸 𑀢𑀯𑀚𑁆𑀚𑀸’’𑀢𑀺. (𑀚𑀸. 𑁧.𑁧𑁦.𑁪𑁬) 𑁋

𑀕𑀸𑀣𑀫𑀸𑀳.

𑀢𑀢𑁆𑀣 𑀏𑀓𑀪𑀺𑀓𑁆𑀔𑀼𑀦𑁆𑀢𑀺 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀦𑁆𑀥𑀸𑀬𑀸𑀳. 𑀉𑀕𑁆𑀖𑀝𑁆𑀝𑀧𑀸𑀤𑀦𑁆𑀢𑀺 𑀉𑀡𑁆𑀳𑀯𑀸𑀮𑀼𑀓𑀸𑀬 𑀖𑀝𑁆𑀝𑀧𑀸𑀤𑀁, 𑀯𑀺𑀩𑀸𑀥𑀺𑀢𑀧𑀸𑀤𑀦𑁆𑀢𑀺 ¶ 𑀅𑀢𑁆𑀣𑁄. 𑀢𑀲𑀺𑀢𑀦𑁆𑀢𑀺 𑀧𑀺𑀧𑀸𑀲𑀺𑀢𑀁. 𑀧𑀝𑀺𑀧𑀸𑀤𑀬𑀻𑀢𑀺 𑀧𑀝𑀺𑀧𑀸𑀤𑁂𑀲𑀺 𑀬𑁄𑀚𑁂𑀲𑀺. 𑀓𑀸𑀫𑀤𑀼𑀳𑀸𑀢𑀺 𑀲𑀩𑁆𑀩𑀓𑀸𑀫𑀤𑀸𑀬𑀺𑀓𑀸.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀏𑀯𑀭𑀽𑀧𑁂𑀧𑀺 𑀦𑀸𑀫 𑀅𑀧𑁆𑀧𑀢𑀺𑀝𑁆𑀞𑁂 𑀫𑀳𑀸𑀲𑀫𑀼𑀤𑁆𑀤𑁂 𑀫𑀬𑀸 𑀤𑀺𑀦𑁆𑀦𑀁 𑀙𑀢𑁆𑀢𑀼𑀧𑀸𑀳𑀦𑀤𑀸𑀦𑀁 𑀫𑀫 𑀲𑀩𑁆𑀩𑀓𑀸𑀫𑀤𑀤𑀁 𑀚𑀸𑀢𑀁 𑀅𑀳𑁄 𑀲𑀼𑀤𑀺𑀦𑁆𑀦’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑁋

‘‘𑀲𑀸 𑀳𑁄𑀢𑀼 𑀦𑀸𑀯𑀸 𑀨𑀮𑀓𑀽𑀧𑀧𑀦𑁆𑀦𑀸, 𑀅𑀦𑀯𑀲𑁆𑀲𑀼𑀢𑀸 𑀏𑀭𑀓𑀯𑀸𑀢𑀬𑀼𑀢𑁆𑀢𑀸;

𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀦 𑀳𑁂𑀢𑁆𑀣 𑀪𑀽𑀫𑀺, 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀁 𑀧𑀸𑀧𑀬𑀲𑁆𑀲𑀽’’𑀢𑀺. (𑀚𑀸. 𑁧.𑁧𑁦.𑁪𑁭) 𑁋

𑀕𑀸𑀣𑀫𑀸𑀳.

𑀢𑀢𑁆𑀣 ¶ ¶ 𑀨𑀮𑀓𑀽𑀧𑀧𑀦𑁆𑀦𑀸𑀢𑀺 𑀫𑀳𑀸𑀦𑀸𑀯𑀢𑀸𑀬 𑀩𑀳𑀽𑀳𑀺 𑀨𑀮𑀓𑁂𑀳𑀺 𑀉𑀧𑁂𑀢𑀸. 𑀉𑀤𑀓𑀧𑁆𑀧𑀯𑁂𑀲𑀦𑀸𑀪𑀸𑀯𑁂𑀦 𑀅𑀦𑀯𑀲𑁆𑀲𑀼𑀢𑀸. 𑀲𑀫𑁆𑀫𑀸 𑀕𑀳𑁂𑀢𑁆𑀯𑀸 𑀕𑀫𑀦𑀓𑀯𑀸𑀢𑁂𑀦 𑀏𑀭𑀓𑀯𑀸𑀢𑀬𑀼𑀢𑁆𑀢𑀸.

𑀤𑁂𑀯𑀥𑀻𑀢𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀳𑀝𑁆𑀞𑀸 𑀤𑀻𑀖𑀢𑁄 𑀅𑀝𑁆𑀞𑀉𑀲𑀪𑀁 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀉𑀲𑀪𑀁 𑀕𑀫𑁆𑀪𑀻𑀭𑀢𑁄 𑀯𑀻𑀲𑀢𑀺𑀬𑀝𑁆𑀞𑀺𑀓𑀁 𑀲𑀢𑁆𑀢𑀭𑀢𑀦𑀫𑀬𑀁 𑀦𑀸𑀯𑀁 𑀫𑀸𑀧𑁂𑀢𑁆𑀯𑀸 𑀓𑀽𑀧𑀨𑀺𑀬𑀸𑀭𑀺𑀢𑁆𑀢𑀬𑀼𑀢𑁆𑀢𑀸𑀦𑀺 𑀇𑀦𑁆𑀤𑀦𑀻𑀮𑀭𑀚𑀢𑀲𑀼𑀯𑀡𑁆𑀡𑀫𑀬𑀸𑀤𑀻𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀽𑀭𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀦𑀸𑀯𑀁 𑀆𑀭𑁄𑀧𑁂𑀲𑀺, 𑀉𑀧𑀝𑁆𑀞𑀸𑀓𑀁 𑀧𑀦𑀲𑁆𑀲 𑀦 𑀑𑀮𑁄𑀓𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀓𑀢𑀓𑀮𑁆𑀬𑀸𑀡𑀢𑁄 𑀢𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺, 𑀲𑁄 𑀅𑀦𑀼𑀫𑁄𑀤𑀺. 𑀅𑀣 𑀤𑁂𑀯𑀥𑀻𑀢𑀸 𑀢𑀫𑁆𑀧𑀺 𑀆𑀮𑀺𑀗𑁆𑀕𑁂𑀢𑁆𑀯𑀸 𑀦𑀸𑀯𑀸𑀬 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀦𑀸𑀯𑀁 𑀫𑁄𑀴𑀺𑀦𑀻𑀦𑀕𑀭𑀁 𑀦𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑁂 𑀥𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀸 𑀢𑀢𑁆𑀣 𑀯𑀺𑀢𑁆𑀢𑀸 𑀲𑀼𑀫𑀦𑀸 𑀧𑀢𑀻𑀢𑀸, 𑀦𑀸𑀯𑀁 𑀲𑀼𑀘𑀺𑀢𑁆𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸;

𑀆𑀤𑀸𑀬 𑀲𑀗𑁆𑀔𑀁 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁, 𑀉𑀧𑀸𑀦𑀬𑀻 𑀦𑀕𑀭𑀁 𑀲𑀸𑀥𑀼𑀭𑀫𑁆𑀫’’𑀦𑁆𑀢𑀺. (𑀚𑀸. 𑁧.𑁧𑁦.𑁪𑁮);

𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀺 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀪𑀸𑀯𑁂𑀦 𑀲𑀢𑁆𑀢𑀲𑀼 𑀘𑁂𑀢𑀦𑀸𑀲𑀼 𑀆𑀤𑀺𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀅𑀢𑀺𑀉𑀴𑀸𑀭𑀨𑀮𑀸 𑀘 𑀚𑀸𑀢𑀸. 𑀇𑀤𑀫𑁆𑀧𑀺 𑀢𑀲𑁆𑀲 𑀤𑀸𑀦𑀲𑁆𑀲 ¶ 𑀅𑀧𑁆𑀧𑀫𑀢𑁆𑀢𑀨𑀮𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀭𑀺𑀫𑀸𑀡𑀨𑀮𑀜𑁆𑀳𑀺 𑀢𑀁 𑀤𑀸𑀦𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁯.

‘‘𑀢𑁂𑀦𑁂𑀯𑀸𑀳𑀁 𑀲𑀢𑀕𑀼𑀡𑀢𑁄, 𑀲𑀼𑀔𑀼𑀫𑀸𑀮𑁄 𑀲𑀼𑀔𑁂𑀥𑀺𑀢𑁄;

𑀅𑀧𑀺 𑀘 𑀤𑀸𑀦𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀏𑀯𑀁 𑀢𑀲𑁆𑀲 𑀅𑀤𑀸𑀲𑀳’’𑀦𑁆𑀢𑀺.

𑀢𑀢𑁆𑀣 𑀢𑁂𑀦𑀸𑀢𑀺 𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄, 𑀲𑀢𑀕𑀼𑀡𑀢𑁄𑀢𑀺 𑀲𑀢𑀕𑀼𑀡𑁂𑀦 𑀅𑀳𑀁 𑀢𑀤𑀸 𑀲𑀗𑁆𑀔𑀪𑀽𑀢𑁄 𑀲𑀼𑀔𑀼𑀫𑀸𑀮𑁄, 𑀢𑀲𑁆𑀫𑀸 𑀲𑀼𑀔𑁂𑀥𑀺𑀢𑁄 𑀲𑀼𑀔𑀲𑀁𑀯𑀟𑁆𑀠𑁄, 𑀅𑀧𑀺 𑀘 𑀏𑀯𑀁 𑀲𑀦𑁆𑀢𑁂𑀧𑀺 𑀤𑀸𑀦𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀏𑀯𑀁 𑀫𑀬𑁆𑀳𑀁 𑀤𑀸𑀦𑀧𑀸𑀭𑀫𑀻 𑀧𑀭𑀺𑀧𑀽𑀭𑁂𑀢𑀽𑀢𑀺 𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀢𑁆𑀢𑀦𑁄 𑀲𑀭𑀻𑀭𑀤𑀼𑀓𑁆𑀔𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀙𑀢𑁆𑀢𑀼𑀧𑀸𑀳𑀦𑀁 𑀅𑀤𑀸𑀲𑀺𑀦𑁆𑀢𑀺 𑀅𑀢𑁆𑀢𑀦𑁄 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀉𑀴𑀸𑀭𑀪𑀸𑀯𑀁 𑀲𑀢𑁆𑀣𑀸 𑀧𑀯𑁂𑀤𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 ¶ 𑀬𑀸𑀯𑀚𑀻𑀯𑀁 𑀅𑀫𑀺𑀢𑀥𑀦𑀕𑁂𑀳𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑀸𑀦𑀸𑀦𑀺 𑀤𑀢𑁆𑀯𑀸 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀧𑀭𑀺𑀲𑁄 𑀤𑁂𑀯𑀦𑀕𑀭𑀁 𑀧𑀽𑀭𑁂𑀲𑀺.

𑀢𑀤𑀸 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀧𑀼𑀭𑀺𑀲𑁄 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀮𑁄𑀓𑀦𑀸𑀣𑁄 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑁄.

𑀢𑀲𑁆𑀲 ¶ 𑀲𑀼𑀯𑀺𑀲𑀼𑀤𑁆𑀥𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀲𑀻𑀮𑀸𑀤𑀺𑀯𑀲𑁂𑀦 𑀲𑀻𑀮𑀧𑀸𑀭𑀫𑀻 𑀤𑀸𑀦𑀲𑀻𑀮𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀓𑀼𑀲𑀮𑀥𑀫𑁆𑀫𑀯𑀲𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀤𑀸𑀦𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀢𑀣𑀸 𑀫𑀳𑀸𑀲𑀫𑀼𑀤𑁆𑀤𑀢𑀭𑀡𑀯𑀸𑀬𑀸𑀫𑀯𑀲𑁂𑀦 𑀘 𑀯𑀻𑀭𑀺𑀬𑀧𑀸𑀭𑀫𑀻, 𑀢𑀤𑀢𑁆𑀣𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀯𑀲𑁂𑀦 𑀔𑀦𑁆𑀢𑀺𑀧𑀸𑀭𑀫𑀻, 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀘𑁆𑀘𑀧𑀸𑀭𑀫𑀻, 𑀲𑀩𑁆𑀩𑀢𑁆𑀣 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑀯𑀲𑁂𑀦 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀲𑀢𑁆𑀢𑀲𑀗𑁆𑀔𑀸𑀭𑀓𑀢𑀯𑀺𑀧𑁆𑀧𑀓𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀉𑀧𑁂𑀓𑁆𑀔𑀸𑀧𑀸𑀭𑀫𑀻, 𑀲𑀩𑁆𑀩𑀧𑀸𑀭𑀫𑀻𑀦𑀁 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀅𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀧𑀳𑀸𑀬 𑀉𑀧𑀓𑀸𑀭𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀸𑀧𑀦𑀧𑀼𑀭𑁂𑀘𑀭𑀸 𑀲𑀳𑀚𑀸𑀢𑀸 𑀘 𑀉𑀧𑀸𑀬𑀓𑁄𑀲𑀮𑁆𑀮𑀪𑀽𑀢𑀸 𑀧𑀜𑁆𑀜𑀸 𑀧𑀜𑁆𑀜𑀸𑀧𑀸𑀭𑀫𑀻𑀢𑀺 𑀇𑀫𑀸𑀧𑀺 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺.

𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀧𑀦 𑀅𑀢𑀺𑀉𑀴𑀸𑀭𑀪𑀸𑀯𑁂𑀦 𑀤𑀸𑀦𑀧𑀸𑀭𑀫𑀻𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀬𑀲𑁆𑀫𑀸 𑀘𑁂𑀢𑁆𑀣 𑀤𑀲 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀫𑀳𑀸𑀓𑀭𑀼𑀡𑀸𑀤𑀬𑁄 𑀩𑁄𑀥𑀺𑀲𑀢𑁆𑀢𑀕𑀼𑀡𑀸 𑀇𑀥𑀸𑀧𑀺 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀅𑀢𑁆𑀢𑀦𑁄 𑀪𑁄𑀕𑀲𑀼𑀔𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 ‘‘𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀤𑀸𑀦𑀲𑀫𑁆𑀪𑀸𑀭𑀲𑀁𑀳𑀭𑀡𑀢𑁆𑀣𑀁 𑀲𑀫𑀼𑀤𑁆𑀤𑀢𑀭𑀡𑀁, 𑀢𑀢𑁆𑀣 𑀘 𑀲𑀫𑀼𑀤𑁆𑀤𑀧𑀢𑀺𑀢𑀲𑁆𑀲𑀧𑀺 𑀉𑀧𑁄𑀲𑀣𑀸𑀥𑀺𑀝𑁆𑀞𑀸𑀦𑀁, 𑀲𑀻𑀮𑀔𑀡𑁆𑀟𑀪𑀬𑁂𑀦 𑀤𑁂𑀯𑀥𑀻𑀢𑀸𑀬𑀧𑀺 𑀉𑀧𑀕𑀢𑀸𑀬 𑀆𑀳𑀸𑀭𑀸𑀦𑀸𑀳𑀭𑀡𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑁂𑀲𑀼 𑀲𑁂𑀲𑀘𑀭𑀺𑀢𑁂𑀲𑀼 𑀇𑀫𑀺𑀦𑀸𑀯 𑀦𑀬𑁂𑀦 𑀕𑀼𑀡𑀦𑀺𑀤𑁆𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁 ¶ . 𑀢𑀢𑁆𑀣 𑀢𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂, 𑀅𑀩𑁆𑀪𑀼𑀢𑀸 𑀘 𑀫𑀳𑁂𑀲𑀺𑀦𑁄…𑀧𑁂…;

𑀧𑀕𑁂𑀯𑀸𑀦𑀼𑀓𑀺𑀭𑀺𑀬𑀸 𑀢𑁂𑀲𑀁, 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀼𑀭𑀼𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁨𑁦.

𑀢𑀢𑀺𑀬𑁂 ¶ 𑀇𑀦𑁆𑀤𑀧𑀢𑁆𑀣𑁂 𑀧𑀼𑀭𑀼𑀢𑁆𑀢𑀫𑁂𑀢𑀺 𑀇𑀦𑁆𑀤𑀧𑀢𑁆𑀣𑀦𑀸𑀫𑀓𑁂 𑀓𑀼𑀭𑀼𑀭𑀝𑁆𑀞𑀲𑁆𑀲 𑀧𑀼𑀭𑀯𑀭𑁂 𑀉𑀢𑁆𑀢𑀫𑀦𑀕𑀭𑁂. 𑀭𑀸𑀚𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀧𑀭𑀺𑀲𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸. 𑀓𑀼𑀲𑀮𑁂 𑀤𑀲𑀳𑀼𑀧𑀸𑀕𑀢𑁄𑀢𑀺 𑀓𑀼𑀲𑀮𑁂𑀳𑀺 ¶ 𑀤𑀲𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀤𑀸𑀦𑀸𑀤𑀻𑀳𑀺 𑀤𑀲𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺, 𑀤𑀲𑀳𑀺 𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀯𑀸 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁧. 𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸𑀢𑀺 𑀓𑀮𑀺𑀗𑁆𑀕𑀭𑀝𑁆𑀞𑀲𑀗𑁆𑀔𑀸𑀢𑀯𑀺𑀲𑀬𑀸. 𑀩𑁆𑀭𑀸𑀳𑁆𑀫𑀡𑀸 𑀉𑀧𑀕𑀜𑁆𑀙𑀼 𑀫𑀦𑁆𑀢𑀺 𑀓𑀮𑀺𑀗𑁆𑀕𑀭𑀸𑀚𑁂𑀦 𑀉𑀬𑁆𑀬𑁄𑀚𑀺𑀢𑀸 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸 𑀫𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 𑀧𑀦 𑀆𑀬𑀸𑀘𑀼𑀁 𑀫𑀁 𑀳𑀢𑁆𑀣𑀺𑀦𑀸𑀕𑀦𑁆𑀢𑀺 𑀳𑀢𑁆𑀣𑀺𑀪𑀽𑀢𑀁 𑀫𑀳𑀸𑀦𑀸𑀕𑀁 𑀫𑀁 𑀆𑀬𑀸𑀘𑀺𑀁𑀲𑀼. 𑀥𑀜𑁆𑀜𑀦𑁆𑀢𑀺 𑀥𑀦𑀸𑀬𑀺𑀢𑀩𑁆𑀩𑀲𑀺𑀭𑀺𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁. 𑀫𑀗𑁆𑀕𑀮𑀲𑀫𑁆𑀫𑀢𑀦𑁆𑀢𑀺 𑀢𑀸𑀬𑀬𑁂𑀯 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀫𑀗𑁆𑀕𑀮𑀁 𑀅𑀪𑀺𑀯𑀼𑀟𑁆𑀠𑀺𑀓𑀸𑀭𑀡𑀦𑁆𑀢𑀺 𑀅𑀪𑀺𑀲𑀫𑁆𑀫𑀢𑀁 𑀚𑀦𑁂𑀳𑀺.

𑁨𑁨. 𑀅𑀯𑀼𑀝𑁆𑀞𑀺𑀓𑁄𑀢𑀺 𑀯𑀲𑁆𑀲𑀭𑀳𑀺𑀢𑁄. 𑀤𑀼𑀩𑁆𑀪𑀺𑀓𑁆𑀔𑁄𑀢𑀺 𑀤𑀼𑀮𑁆𑀮𑀪𑀪𑁄𑀚𑀦𑁄. 𑀙𑀸𑀢𑀓𑁄 𑀫𑀳𑀸𑀢𑀺 𑀫𑀳𑀢𑀻 𑀚𑀺𑀖𑀘𑁆𑀙𑀸𑀩𑀸𑀥𑀸 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀤𑀤𑀸𑀳𑀻𑀢𑀺 𑀤𑁂𑀳𑀺. 𑀦𑀻𑀮𑀦𑁆𑀢𑀺 𑀦𑀻𑀮𑀯𑀡𑁆𑀡𑀁. 𑀅𑀜𑁆𑀚𑀦𑀲𑀯𑁆𑀳𑀬𑀦𑁆𑀢𑀺 𑀅𑀜𑁆𑀚𑀦𑀲𑀤𑁆𑀤𑁂𑀦 𑀅𑀯𑁆𑀳𑀸𑀢𑀩𑁆𑀩𑀁, 𑀅𑀜𑁆𑀚𑀦𑀦𑀸𑀫𑀓𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀳𑀸𑀓𑀁 𑀓𑀮𑀺𑀗𑁆𑀕𑀭𑀝𑁆𑀞𑀁 𑀅𑀯𑀼𑀝𑁆𑀞𑀺𑀓𑀁, 𑀢𑁂𑀦 𑀇𑀤𑀸𑀦𑀺 𑀫𑀳𑀸𑀤𑀼𑀩𑁆𑀪𑀺𑀓𑁆𑀔𑀁 𑀢𑀢𑁆𑀣 𑀫𑀳𑀦𑁆𑀢𑀁 𑀙𑀸𑀢𑀓𑀪𑀬𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀯𑀽𑀧𑀲𑀫𑀢𑁆𑀣𑀸𑀬 𑀇𑀫𑀁 𑀅𑀜𑁆𑀚𑀦𑀕𑀺𑀭𑀺𑀲𑀗𑁆𑀓𑀸𑀲𑀁 𑀢𑀼𑀬𑁆𑀳𑀁 𑀅𑀜𑁆𑀚𑀦𑀦𑀸𑀫𑀓𑀁 𑀫𑀗𑁆𑀕𑀮𑀳𑀢𑁆𑀣𑀺𑀁 𑀤𑁂𑀳𑀺, 𑀇𑀫𑀲𑁆𑀫𑀺𑀜𑁆𑀳𑀺 𑀢𑀢𑁆𑀣 𑀦𑀻𑀢𑁂 𑀤𑁂𑀯𑁄 𑀯𑀲𑁆𑀲𑀺𑀲𑁆𑀲𑀢𑀺, 𑀢𑁂𑀦 𑀢𑀁 𑀲𑀩𑁆𑀩𑀪𑀬𑀁 𑀯𑀽𑀧𑀲𑀫𑁆𑀫𑀺𑀲𑁆𑀲𑀢𑀻𑀢𑀺. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀅𑀢𑀻𑀢𑁂 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀭𑀼𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀬𑁄𑀕𑀯𑀺𑀳𑀺𑀢𑀸𑀦𑀺 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀢𑁄 𑀧𑀺𑀢𑀭𑀸 𑀉𑀧𑀭𑀚𑁆𑀚𑁂 𑀞𑀧𑀺𑀢𑁄, 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 ¶ 𑀅𑀓𑁄𑀧𑁂𑀦𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀥𑀦𑀜𑁆𑀚𑀬𑁄 𑀦𑀸𑀫 𑀦𑀸𑀫𑁂𑀦. 𑀲𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺. 𑀢𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀢𑀸 𑀤𑀸𑀦𑀸𑀪𑀺𑀭𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀢𑁆𑀣𑀭𑀺.

𑀢𑀲𑁆𑀫𑀺𑀁 ¶ 𑀓𑀸𑀮𑁂 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑀼𑀩𑁆𑀪𑀺𑀓𑁆𑀔𑀪𑀬𑀁 𑀙𑀸𑀢𑀓𑀪𑀬𑀁 𑀭𑁄𑀕𑀪𑀬𑀦𑁆𑀢𑀺 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀤𑀦𑁆𑀢𑀧𑀼𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀪𑀯𑀦𑀤𑁆𑀯𑀸𑀭𑁂 𑀉𑀓𑁆𑀓𑀼𑀝𑁆𑀞𑀺𑀫𑀓𑀁𑀲𑀼 ‘‘𑀤𑁂𑀯𑀁 𑀯𑀲𑁆𑀲𑀸𑀧𑁂𑀳𑀺 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀏𑀢𑁂 𑀯𑀺𑀭𑀯𑀦𑁆𑀢𑀻’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀓𑀺𑀁 𑀓𑀭𑁄𑀦𑁆𑀢𑀻𑀢𑀺. ‘‘𑀤𑁂𑀯𑁄 𑀯𑀲𑁆𑀲𑀢𑀽’’𑀢𑀺 𑀤𑀸𑀦𑀁 𑀤𑀢𑁆𑀯𑀸 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀲𑀫𑀸𑀤𑀺𑀦𑁆𑀦𑀲𑀻𑀮𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀦𑁆𑀣𑀭𑁂 𑀲𑀢𑁆𑀢𑀸𑀳𑀁 𑀦𑀺𑀧𑀚𑁆𑀚𑀦𑁆𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀤𑁂𑀯𑁄 𑀦 𑀯𑀲𑁆𑀲𑀺, 𑀏𑀯𑀁 𑀭𑀸𑀚𑀸 𑀅𑀳𑀁 𑀫𑀬𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀓𑀸𑀲𑀺𑀁, 𑀤𑁂𑀯𑁄 𑀦 𑀯𑀲𑁆𑀲𑀢𑀺, 𑀓𑀺𑀦𑁆𑀢𑀺 𑀓𑀭𑁄𑀫𑀸𑀢𑀺. 𑀤𑁂𑀯, 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀥𑀦𑀜𑁆𑀚𑀬𑀲𑁆𑀲 𑀦𑀸𑀫 𑀓𑀼𑀭𑀼𑀭𑀸𑀚𑀲𑁆𑀲 𑀫𑀗𑁆𑀕𑀮𑀳𑀢𑁆𑀣𑀺𑀫𑁆𑀳𑀺 𑀆𑀦𑀻𑀢𑁂 𑀤𑁂𑀯𑁄 𑀯𑀲𑁆𑀲𑀺𑀲𑁆𑀲𑀢𑀻𑀢𑀺 ¶ . 𑀲𑁄 𑀭𑀸𑀚𑀸 𑀩𑀮𑀯𑀸𑀳𑀦𑀲𑀫𑁆𑀧𑀦𑁆𑀦𑁄 𑀤𑀼𑀧𑁆𑀧𑀲𑀳𑁄, 𑀓𑀣𑀫𑀲𑁆𑀲 𑀳𑀢𑁆𑀣𑀺𑀁 𑀆𑀦𑁂𑀲𑁆𑀲𑀸𑀫𑀸𑀢𑀺. 𑀫𑀳𑀸𑀭𑀸𑀚, 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀤𑀸𑀦𑀚𑁆𑀛𑀸𑀲𑀬𑁄 𑀲𑁄 𑀭𑀸𑀚𑀸 𑀤𑀸𑀦𑀸𑀪𑀺𑀭𑀢𑁄 𑀬𑀸𑀘𑀺𑀢𑁄 𑀲𑀫𑀸𑀦𑁄 𑀅𑀮𑀗𑁆𑀓𑀢𑀲𑀻𑀲𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀲𑀸𑀤𑀲𑀫𑁆𑀧𑀦𑁆𑀦𑀸𑀦𑀺 𑀅𑀓𑁆𑀔𑀻𑀦𑀺𑀧𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀲𑀓𑀮𑀭𑀚𑁆𑀚𑀫𑁆𑀧𑀺 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀤𑀤𑁂𑀬𑁆𑀬, 𑀳𑀢𑁆𑀣𑀺𑀫𑁆𑀳𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀅𑀯𑀲𑁆𑀲𑀁 𑀬𑀸𑀘𑀺𑀢𑁄 𑀲𑀫𑀸𑀦𑁄 𑀤𑀲𑁆𑀲𑀢𑀻𑀢𑀺. 𑀓𑁂 𑀧𑀦 𑀬𑀸𑀘𑀺𑀢𑀼𑀁 𑀲𑀫𑀢𑁆𑀣𑀸𑀢𑀺? 𑀩𑁆𑀭𑀸𑀳𑁆𑀫𑀡𑀸, 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀳𑀢𑁆𑀣𑀺𑀬𑀸𑀘𑀦𑀢𑁆𑀣𑀁 𑀧𑁂𑀲𑁂𑀲𑀺. 𑀢𑁂 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀢𑀼𑀭𑀺𑀢𑀕𑀫𑀦𑀁 𑀕𑀦𑁆𑀢𑁆𑀯𑀸 𑀓𑀢𑀺𑀧𑀸𑀳𑀁 𑀦𑀕𑀭𑀤𑁆𑀯𑀸𑀭𑁂 𑀤𑀸𑀦𑀲𑀸𑀮𑀸𑀲𑀼 𑀪𑀼𑀜𑁆𑀚𑀦𑁆𑀢𑀸 𑀲𑀭𑀻𑀭𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀭𑀜𑁆𑀜𑁄 𑀤𑀸𑀦𑀕𑁆𑀕𑀁 𑀆𑀕𑀫𑀦𑀧𑀣𑁂 𑀓𑀸𑀮𑀁 𑀆𑀕𑀫𑀬𑀫𑀸𑀦𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀸𑀢𑁄𑀯 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀅𑀮𑀗𑁆𑀓𑀢𑀯𑀭𑀯𑀸𑀭𑀡𑀔𑀦𑁆𑀥𑀕𑀢𑁄 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀤𑀸𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀲𑀢𑁆𑀢𑀝𑁆𑀞𑀚𑀦𑀸𑀦𑀁 𑀲𑀳𑀢𑁆𑀣𑁂𑀦 𑀤𑀸𑀦𑀁 𑀤𑀢𑁆𑀯𑀸 ‘‘𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ¶ 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀆𑀭𑀓𑁆𑀔𑀲𑁆𑀲 𑀩𑀮𑀯𑀢𑀸𑀬 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀉𑀮𑁆𑀮𑁄𑀓𑀬𑀫𑀸𑀦𑀸 𑀤𑁆𑀯𑀸𑀭𑀢𑁄 𑀦𑀸𑀢𑀺𑀤𑀽𑀭𑁂 𑀉𑀦𑁆𑀦𑀢𑀝𑁆𑀞𑀸𑀦𑁂 𑀞𑀺𑀢𑀸 𑀲𑀫𑁆𑀧𑀢𑁆𑀢𑀁 𑀭𑀸𑀚𑀸𑀦𑀁 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀚𑀬𑀸𑀧𑁂𑀲𑀼𑀁. 𑀭𑀸𑀚𑀸 𑀯𑀚𑀺𑀭𑀗𑁆𑀓𑀼𑀲𑁂𑀦 𑀯𑀸𑀭𑀡𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑁂 ‘‘𑀓𑀺𑀁 𑀇𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀓𑀮𑀺𑀗𑁆𑀕𑀭𑀝𑁆𑀞𑀁 𑀤𑀼𑀩𑁆𑀪𑀺𑀓𑁆𑀔𑀪𑀬𑁂𑀦 𑀙𑀸𑀢𑀓𑀪𑀬𑁂𑀦 𑀭𑁄𑀕𑀪𑀬𑁂𑀦 𑀘 𑀉𑀧𑀤𑁆𑀤𑀼𑀢𑀁. 𑀲𑁄 𑀉𑀧𑀤𑁆𑀤𑀯𑁄 𑀇𑀫𑀲𑁆𑀫𑀺𑀁 𑀢𑀯 𑀫𑀗𑁆𑀕𑀮𑀳𑀢𑁆𑀣𑀺𑀫𑁆𑀳𑀺 𑀦𑀻𑀢𑁂 ¶ 𑀯𑀽𑀧𑀲𑀫𑁆𑀫𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀇𑀫𑀁 𑀅𑀜𑁆𑀚𑀦𑀯𑀡𑁆𑀡𑀁 𑀦𑀸𑀕𑀁 𑀅𑀫𑁆𑀳𑀸𑀓𑀁 𑀤𑁂𑀳𑀻’’𑀢𑀺 𑀆𑀳𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 ‘‘𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸…𑀧𑁂… 𑀅𑀜𑁆𑀚𑀦𑀲𑀯𑁆𑀳𑀬’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯.

𑀅𑀣 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑁂 𑀬𑀸𑀘𑀓𑀸𑀦𑀁 𑀫𑀦𑁄𑀭𑀣𑀯𑀺𑀖𑀸𑀢𑁄 𑀲𑀺𑀬𑀸, 𑀫𑀬𑁆𑀳𑀜𑁆𑀘 𑀲𑀫𑀸𑀤𑀸𑀦𑀪𑁂𑀤𑁄 𑀲𑀺𑀬𑀸’’𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀢𑀭𑀺𑀢𑁆𑀯𑀸 ‘‘𑀲𑀘𑁂 𑀅𑀦𑀮𑀗𑁆𑀓𑀢𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀲𑀫𑀦𑁆𑀢𑀢𑁄 𑀑𑀮𑁄𑀓𑁂𑀢𑁆𑀯𑀸 𑀅𑀦𑀮𑀗𑁆𑀓𑀢𑀝𑁆𑀞𑀸𑀦𑀁 𑀅𑀤𑀺𑀲𑁆𑀯𑀸 𑀲𑁄𑀡𑁆𑀟𑀸𑀬 𑀦𑀁 𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀳𑀢𑁆𑀣𑁂𑀲𑀼 𑀞𑀧𑁂𑀢𑁆𑀯𑀸 𑀭𑀢𑀦𑀪𑀺𑀗𑁆𑀕𑀸𑀭𑁂𑀦 𑀧𑀼𑀧𑁆𑀨𑀕𑀦𑁆𑀥𑀯𑀸𑀲𑀺𑀢𑀁 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀅𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁩.

‘‘𑀦 𑀫𑁂 𑀬𑀸𑀘𑀓𑀫𑀦𑀼𑀧𑁆𑀧𑀢𑁆𑀢𑁂, 𑀧𑀝𑀺𑀓𑁆𑀔𑁂𑀧𑁄 𑀅𑀦𑀼𑀘𑁆𑀙𑀯𑁄;

𑀫𑀸 𑀫𑁂 𑀪𑀺𑀚𑁆𑀚𑀺 𑀲𑀫𑀸𑀤𑀸𑀦𑀁, 𑀤𑀲𑁆𑀲𑀸𑀫𑀺 𑀯𑀺𑀧𑀼𑀮𑀁 𑀕𑀚𑀁.

𑁨𑁪.

‘‘𑀦𑀸𑀕𑀁 𑀕𑀳𑁂𑀢𑁆𑀯𑀸 𑀲𑁄𑀡𑁆𑀟𑀸𑀬, 𑀪𑀺𑀗𑁆𑀕𑀸𑀭𑁂 𑀭𑀢𑀦𑀸𑀫𑀬𑁂;

𑀚𑀮𑀁 𑀳𑀢𑁆𑀣𑁂 𑀆𑀓𑀺𑀭𑀺𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀁 𑀕𑀚’’𑀦𑁆𑀢𑀺.

𑀢𑀢𑁆𑀣 ¶ 𑀬𑀸𑀘𑀓𑀫𑀦𑀼𑀧𑁆𑀧𑀢𑁆𑀢𑁂𑀢𑀺 𑀬𑀸𑀘𑀓𑁂 𑀅𑀦𑀼𑀧𑁆𑀧𑀢𑁆𑀢𑁂. 𑀅𑀦𑀼𑀘𑁆𑀙𑀯𑁄𑀢𑀺 𑀅𑀦𑀼𑀘𑁆𑀙𑀯𑀺𑀓𑁄 𑀧𑀢𑀺𑀭𑀽𑀧𑁄. 𑀫𑀸 𑀫𑁂 𑀪𑀺𑀚𑁆𑀚𑀺 𑀲𑀫𑀸𑀤𑀸𑀦𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁆𑀣𑀸𑀬 𑀲𑀩𑁆𑀩𑀲𑁆𑀲 𑀬𑀸𑀘𑀓𑀲𑁆𑀲 𑀲𑀩𑁆𑀩𑀁 𑀅𑀦𑀯𑀚𑁆𑀚𑀁 𑀇𑀘𑁆𑀙𑀺𑀢𑀁 𑀤𑀤𑀦𑁆𑀢𑁄 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀲𑁆𑀲𑀸𑀫𑀻𑀢𑀺 𑀬𑀁 𑀫𑀬𑁆𑀳𑀁 𑀲𑀫𑀸𑀤𑀸𑀦𑀁, 𑀢𑀁 𑀫𑀸 𑀪𑀺𑀚𑁆𑀚𑀺. 𑀢𑀲𑁆𑀫𑀸 𑀤𑀲𑁆𑀲𑀸𑀫𑀺 𑀯𑀺𑀧𑀼𑀮𑀁 𑀕𑀚𑀦𑁆𑀢𑀺 𑀫𑀳𑀦𑁆𑀢𑀁 𑀇𑀫𑀁 𑀫𑀗𑁆𑀕𑀮𑀳𑀢𑁆𑀣𑀺𑀁 𑀤𑀲𑁆𑀲𑀸𑀫𑀻𑀢𑀺. 𑀅𑀤𑀦𑁆𑀢𑀺 𑀅𑀤𑀸𑀲𑀺𑀁.

𑁨𑁫.

𑀢𑀲𑁆𑀫𑀺𑀁 𑀧𑀦 𑀳𑀢𑁆𑀣𑀺𑀫𑁆𑀳𑀺 𑀤𑀺𑀦𑁆𑀦𑁂 𑀅𑀫𑀘𑁆𑀘𑀸 𑀩𑁄𑀥𑀺𑀲𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀲𑁆𑀫𑀸, 𑀫𑀳𑀸𑀭𑀸𑀚, 𑀫𑀗𑁆𑀕𑀮𑀳𑀢𑁆𑀣𑀺𑀁 𑀤𑀤𑀢𑁆𑀣, 𑀦𑀦𑀼 𑀅𑀜𑁆𑀜𑁄 𑀳𑀢𑁆𑀣𑀻 𑀤𑀸𑀢𑀩𑁆𑀩𑁄, 𑀭𑀜𑁆𑀜𑀸 𑀦𑀸𑀫 𑀏𑀯𑀭𑀽𑀧𑁄 𑀑𑀧𑀯𑀬𑁆𑀳𑁄 𑀫𑀗𑁆𑀕𑀮𑀳𑀢𑁆𑀣𑀻 𑀇𑀲𑁆𑀲𑀭𑀺𑀬𑀁 𑀅𑀪𑀺𑀯𑀺𑀚𑀬𑀜𑁆𑀘 𑀆𑀓𑀗𑁆𑀔𑀦𑁆𑀢𑁂𑀦 𑀦 𑀤𑀸𑀢𑀩𑁆𑀩𑁄’’𑀢𑀺 ¶ . 𑀫𑀳𑀸𑀲𑀢𑁆𑀢𑁄 𑀬𑀁 𑀫𑀁 𑀬𑀸𑀘𑀓𑀸 𑀬𑀸𑀘𑀦𑁆𑀢𑀺, 𑀢𑀤𑁂𑀯 𑀫𑀬𑀸 𑀤𑀸𑀢𑀩𑁆𑀩𑀁, 𑀲𑀘𑁂 𑀧𑀦 𑀫𑀁 𑀭𑀚𑁆𑀚𑀁 𑀬𑀸𑀘𑁂𑀬𑁆𑀬𑀼𑀁, 𑀭𑀚𑁆𑀚𑀫𑁆𑀧𑀺 𑀢𑁂𑀲𑀁 𑀤𑀤𑁂𑀬𑁆𑀬𑀁, 𑀫𑀬𑁆𑀳𑀁 𑀭𑀚𑁆𑀚𑀢𑁄𑀧𑀺 𑀚𑀻𑀯𑀺𑀢𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀧𑀺𑀬𑀢𑀭𑀁, 𑀢𑀲𑁆𑀫𑀸 𑀢𑀁 𑀳𑀢𑁆𑀣𑀺𑀁 𑀅𑀤𑀸𑀲𑀺𑀦𑁆𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑁂𑀦, 𑀢𑀲𑁆𑀫𑀺𑀁 𑀦𑀸𑀕𑁂 𑀳𑀢𑁆𑀣𑀺𑀫𑁆𑀳𑀺 𑀤𑀺𑀦𑁆𑀦𑁂.

𑁨𑁬. 𑀫𑀗𑁆𑀕𑀮𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀗𑁆𑀕𑀮𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀲𑀗𑁆𑀕𑀸𑀫𑀯𑀺𑀚𑀬𑀼𑀢𑁆𑀢𑀫𑀦𑁆𑀢𑀺 𑀲𑀗𑁆𑀕𑀸𑀫𑀯𑀺𑀚𑀬𑀸 𑀉𑀢𑁆𑀢𑀫𑀁, 𑀲𑀗𑁆𑀕𑀸𑀫𑀯𑀺𑀚𑀬𑁂 𑀯𑀸 𑀉𑀢𑁆𑀢𑀫𑀁 𑀧𑀥𑀸𑀦𑀁 𑀧𑀯𑀭𑀁 𑀦𑀸𑀕𑀁. 𑀓𑀺𑀁 𑀢𑁂 𑀭𑀚𑁆𑀚𑀁 ¶ 𑀓𑀭𑀺𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀦𑀸𑀕𑁂 𑀅𑀧𑀕𑀢𑁂 𑀢𑀯 𑀭𑀚𑁆𑀚𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀭𑀚𑁆𑀚𑀓𑀺𑀘𑁆𑀘𑀁 𑀦 𑀓𑀭𑀺𑀲𑁆𑀲𑀢𑀺, 𑀭𑀚𑁆𑀚𑀫𑁆𑀧𑀺 𑀅𑀧𑀕𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁭. 𑀭𑀚𑁆𑀚𑀫𑁆𑀧𑀺 𑀫𑁂 𑀤𑀤𑁂 𑀲𑀩𑁆𑀩𑀦𑁆𑀢𑀺 𑀢𑀺𑀝𑁆𑀞𑀢𑀼 𑀦𑀸𑀕𑁄 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀇𑀤𑀁 𑀫𑁂 𑀲𑀩𑁆𑀩𑀁 𑀓𑀼𑀭𑀼𑀭𑀝𑁆𑀞𑀫𑁆𑀧𑀺 𑀬𑀸𑀘𑀓𑀸𑀦𑀁 𑀤𑀤𑁂𑀬𑁆𑀬𑀁. 𑀲𑀭𑀻𑀭𑀁 𑀤𑀚𑁆𑀚𑀫𑀢𑁆𑀢𑀦𑁄𑀢𑀺 𑀭𑀚𑁆𑀚𑁂𑀧𑀺 𑀯𑀸 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀅𑀢𑁆𑀢𑀦𑁄 𑀲𑀭𑀻𑀭𑀫𑁆𑀧𑀺 𑀬𑀸𑀘𑀓𑀸𑀦𑀁 𑀤𑀤𑁂𑀬𑁆𑀬𑀁, 𑀲𑀩𑁆𑀩𑁄𑀧𑀺 𑀳𑀺 𑀫𑁂 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁄 𑀧𑀭𑀺𑀕𑁆𑀕𑀳𑁄 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀫𑀬𑀸 𑀧𑀭𑀺𑀘𑁆𑀘𑀢𑁆𑀢𑁄. 𑀬𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁 𑀲𑀩𑁆𑀩𑀜𑁆𑀜𑀼𑀢𑀸 𑀘 𑀤𑀸𑀦𑀧𑀸𑀭𑀫𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀧𑀸𑀭𑀫𑀺𑀬𑁄 𑀅𑀧𑀽𑀭𑁂𑀦𑁆𑀢𑁂𑀦 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀲𑁆𑀫𑀸 𑀦𑀸𑀕𑀁 𑀅𑀤𑀸𑀲𑀺𑀁 𑀅𑀳𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀫𑁆𑀧𑀺 𑀢𑀲𑁆𑀫𑀺𑀁 𑀦𑀸𑀕𑁂 𑀆𑀦𑀻𑀢𑁂 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑁂𑀯𑁄 𑀦 𑀯𑀲𑁆𑀲𑀢𑁂𑀯. 𑀓𑀮𑀺𑀗𑁆𑀕𑀭𑀸𑀚𑀸 ‘‘𑀇𑀤𑀸𑀦𑀺𑀧𑀺 𑀦 𑀯𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀼𑀭𑀼𑀭𑀸𑀚𑀸 𑀕𑀭𑀼𑀥𑀫𑁆𑀫𑁂 𑀭𑀓𑁆𑀔𑀢𑀺, 𑀢𑁂𑀦𑀲𑁆𑀲 𑀭𑀝𑁆𑀞𑁂 𑀅𑀦𑁆𑀯𑀤𑁆𑀥𑀫𑀸𑀲𑀁 𑀅𑀦𑀼𑀤𑀲𑀸𑀳𑀁 𑀤𑁂𑀯𑁄 𑀯𑀲𑁆𑀲𑀢𑀺, 𑀭𑀜𑁆𑀜𑁄 𑀕𑀼𑀡𑀸𑀦𑀼𑀪𑀸𑀯𑁄 𑀏𑀲, 𑀦 𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸’’𑀢𑀺 𑀚𑀸𑀦𑀺𑀢𑁆𑀯𑀸 ‘‘𑀫𑀬𑀫𑁆𑀧𑀺 𑀕𑀭𑀼𑀥𑀫𑁆𑀫𑁂 𑀭𑀓𑁆𑀔𑀺𑀲𑁆𑀲𑀸𑀫, 𑀕𑀘𑁆𑀙𑀣 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀲𑁆𑀲 𑀲𑀦𑁆𑀢𑀺𑀓𑁂 𑀢𑁂 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 𑀆𑀦𑁂𑀣𑀸’’𑀢𑀺 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀕𑀭𑀼𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀲𑀻𑀮𑀸𑀦𑀺, 𑀢𑀸𑀦𑀺 𑀩𑁄𑀥𑀺𑀲𑀢𑁆𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀢𑀺, 𑀬𑀣𑀸 𑀘 𑀩𑁄𑀥𑀺𑀲𑀢𑁆𑀢𑁄. 𑀏𑀯𑀫𑀲𑁆𑀲 𑀫𑀸𑀢𑀸 ¶ 𑀅𑀕𑁆𑀕𑀫𑀳𑁂𑀲𑀻, 𑀓𑀦𑀺𑀝𑁆𑀞𑀪𑀸𑀢𑀸 𑀉𑀧𑀭𑀸𑀚𑀸, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄, 𑀭𑀚𑁆𑀚𑀼𑀕𑁆𑀕𑀸𑀳𑀓𑁄 𑀅𑀫𑀘𑁆𑀘𑁄, 𑀲𑀸𑀭𑀣𑀺 𑀲𑁂𑀝𑁆𑀞𑀺, 𑀤𑁄𑀡𑀫𑀸𑀧𑀓𑁄 𑀤𑁄𑀯𑀸𑀭𑀺𑀓𑁄, 𑀦𑀕𑀭𑀲𑁄𑀪𑀺𑀦𑀻 𑀯𑀡𑁆𑀡𑀤𑀸𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀭𑀸𑀚𑀸 𑀫𑀸𑀢𑀸 𑀫𑀳𑁂𑀲𑀻 𑀘, 𑀉𑀧𑀭𑀸𑀚𑀸 𑀧𑀼𑀭𑁄𑀳𑀺𑀢𑁄;

𑀭𑀚𑁆𑀚𑀼𑀕𑁆𑀕𑀸𑀳𑁄 𑀲𑀸𑀭𑀣𑀻 𑀲𑁂𑀝𑁆𑀞𑀺, 𑀤𑁄𑀡𑁄 𑀤𑁄𑀯𑀸𑀭𑀺𑀓𑁄 𑀢𑀣𑀸;

𑀕𑀡𑀺𑀓𑀸 𑀢𑁂 𑀏𑀓𑀸𑀤𑀲, 𑀕𑀭𑀼𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺.

𑀢𑁂 ¶ 𑀅𑀫𑀘𑁆𑀘𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀲𑀢𑁆𑀢𑁄 ‘‘𑀫𑀬𑁆𑀳𑀁 𑀕𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀫𑀸𑀢𑀸 𑀧𑀦 𑀫𑁂 𑀲𑀼𑀭𑀓𑁆𑀔𑀺𑀢𑀁 𑀭𑀓𑁆𑀔𑀢𑀺, 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 ‘‘𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀲𑀺𑀓𑁆𑀔𑀸𑀓𑀸𑀫𑀲𑁆𑀲 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄 𑀳𑁄𑀢𑀺, 𑀤𑁂𑀣 𑀦𑁄’’𑀢𑀺 𑀬𑀸𑀘𑀺𑀢𑁄 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀦 𑀘𑀭𑀺𑀢𑀩𑁆𑀩𑁄, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀁, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩’’𑀦𑁆𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀫𑀸𑀢𑀼 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀆𑀳.

𑀤𑀽𑀢𑀸 ¶ 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯𑀺, 𑀢𑀼𑀫𑁆𑀳𑁂 𑀓𑀺𑀭 𑀕𑀭𑀼𑀥𑀫𑁆𑀫𑀁 𑀭𑀓𑁆𑀔𑀣, 𑀢𑀁 𑀦𑁄 𑀤𑁂𑀣𑀸’’𑀢𑀺 𑀯𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺 𑀢𑀣𑁂𑀯 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀯𑀢𑁆𑀯𑀸𑀯 𑀢𑁂𑀳𑀺 𑀬𑀸𑀘𑀺𑀢𑀸 𑀅𑀤𑀸𑀲𑀺. 𑀢𑀣𑀸 𑀫𑀳𑁂𑀲𑀺𑀆𑀤𑀬𑁄𑀧𑀺. 𑀢𑁂 𑀲𑀩𑁆𑀩𑁂𑀲𑀫𑁆𑀧𑀺 𑀲𑀦𑁆𑀢𑀺𑀓𑁂 𑀲𑀼𑀯𑀡𑁆𑀡𑀧𑀝𑁆𑀝𑁂 𑀕𑀭𑀼𑀥𑀫𑁆𑀫𑁂 𑀮𑀺𑀔𑀸𑀧𑁂𑀢𑁆𑀯𑀸 𑀤𑀦𑁆𑀢𑀧𑀼𑀭𑀁 𑀕𑀦𑁆𑀢𑁆𑀯𑀸 𑀓𑀮𑀺𑀗𑁆𑀕𑀭𑀜𑁆𑀜𑁄 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑁄𑀧𑀺 𑀭𑀸𑀚𑀸 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀯𑀢𑁆𑀢𑀫𑀸𑀦𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀧𑀽𑀭𑁂𑀲𑀺. 𑀢𑀢𑁄 𑀲𑀓𑀮𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑁂𑀯𑁄 𑀯𑀲𑁆𑀲𑀺. 𑀢𑀻𑀡𑀺 𑀪𑀬𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺. 𑀭𑀝𑁆𑀞𑀁 𑀔𑁂𑀫𑀁 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀧𑀭𑀺𑀲𑁄 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀢𑀤𑀸 𑀕𑀡𑀺𑀓𑀸𑀤𑀬𑁄 𑀉𑀧𑁆𑀧𑀮𑀯𑀡𑁆𑀡𑀸𑀤𑀬𑁄 𑀅𑀳𑁂𑀲𑀼𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀕𑀡𑀺𑀓𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀧𑀼𑀡𑁆𑀡𑁄 𑀤𑁄𑀯𑀸𑀭𑀺𑀓𑁄 𑀢𑀤𑀸;

𑀭𑀚𑁆𑀚𑀼𑀕𑁆𑀕𑀸𑀳𑁄 𑀘 𑀓𑀘𑁆𑀘𑀸𑀦𑁄, 𑀤𑁄𑀡𑀫𑀸𑀧𑀓𑁄 𑀘 𑀓𑁄𑀮𑀺𑀢𑁄.

‘‘𑀲𑀸𑀭𑀺𑀧𑀼𑀢𑁆𑀢𑁄 𑀢𑀤𑀸 𑀲𑁂𑀝𑁆𑀞𑀺, 𑀅𑀦𑀼𑀭𑀼𑀤𑁆𑀥𑁄 𑀘 𑀲𑀸𑀭𑀣𑀺;

𑀩𑁆𑀭𑀸𑀳𑁆𑀫𑀡𑁄 𑀓𑀲𑁆𑀲𑀧𑁄 𑀣𑁂𑀭𑁄, 𑀉𑀧𑀭𑀸𑀚𑀸𑀦𑀦𑁆𑀤𑀧𑀡𑁆𑀟𑀺𑀢𑁄.

‘‘𑀫𑀳𑁂𑀲𑀻 ¶ 𑀭𑀸𑀳𑀼𑀮𑀫𑀸𑀢𑀸, 𑀫𑀸𑀬𑀸𑀤𑁂𑀯𑀻 𑀚𑀦𑁂𑀢𑁆𑀢𑀺𑀓𑀸;

𑀓𑀼𑀭𑀼𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺. (𑀥. 𑀧. 𑀅𑀝𑁆𑀞. 𑁨.𑁩𑁬𑁧 𑀳𑀁𑀲𑀖𑀸𑀢𑀓𑀪𑀺𑀓𑁆𑀔𑀼𑀯𑀢𑁆𑀣𑀼);

𑀇𑀥𑀸𑀧𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀆𑀤𑀬𑁄 𑀲𑁂𑀲𑀥𑀫𑁆𑀫𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺.

𑀓𑀼𑀭𑀼𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀳𑀸𑀲𑀼𑀤𑀲𑁆𑀲𑀦𑀘𑀭𑀺𑀬𑀸𑀯𑀡𑁆𑀡𑀦𑀸

𑁨𑁮. 𑀘𑀢𑀼𑀢𑁆𑀣𑁂 ¶ 𑀓𑀼𑀲𑀸𑀯𑀢𑀺𑀫𑁆𑀳𑀺 𑀦𑀕𑀭𑁂𑀢𑀺 𑀓𑀼𑀲𑀸𑀯𑀢𑀻𑀦𑀸𑀫𑀓𑁂 𑀦𑀕𑀭𑁂, 𑀬𑀲𑁆𑀫𑀺𑀁 𑀞𑀸𑀦𑁂 𑀏𑀢𑀭𑀳𑀺 𑀓𑀼𑀲𑀺𑀦𑀸𑀭𑀸 𑀦𑀺𑀯𑀺𑀝𑁆𑀞𑀸. 𑀫𑀳𑀻𑀧𑀢𑀻𑀢𑀺 𑀔𑀢𑁆𑀢𑀺𑀬𑁄, 𑀦𑀸𑀫𑁂𑀦 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫. 𑀘𑀓𑁆𑀓𑀯𑀢𑁆𑀢𑀻𑀢𑀺 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺 𑀘𑀢𑀽𑀳𑀺 𑀯𑀸 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀯𑀢𑁆𑀢𑀢𑀺, 𑀢𑁂𑀳𑀺 𑀘 𑀧𑀭𑀁 𑀧𑀯𑀢𑁆𑀢𑁂𑀢𑀺, 𑀧𑀭𑀳𑀺𑀢𑀸𑀬 𑀘 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀅𑀣 𑀯𑀸 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘 𑀲𑀫𑀦𑁆𑀦𑀸𑀕𑀢𑁂𑀦, 𑀧𑀭𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀻𑀬𑀲𑁆𑀲 𑀆𑀡𑀸𑀲𑀗𑁆𑀔𑀸𑀢𑀲𑁆𑀲 𑀘𑀓𑁆𑀓𑀲𑁆𑀲 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺𑀧𑀺 𑀘𑀓𑁆𑀓𑀯𑀢𑁆𑀢𑀻. 𑀧𑀭𑀺𑀡𑀸𑀬𑀓𑀭𑀢𑀦𑀧𑀼𑀩𑁆𑀩𑀗𑁆𑀕𑀫𑁂𑀦 ¶ 𑀳𑀢𑁆𑀣𑀺𑀭𑀢𑀦𑀸𑀤𑀺𑀧𑀫𑀼𑀔𑁂𑀦 𑀫𑀳𑀸𑀩𑀮𑀓𑀸𑀬𑁂𑀦 𑀧𑀼𑀜𑁆𑀜𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀓𑀸𑀬𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀩𑁆𑀩𑀮𑁄. 𑀬𑀤𑀸 𑀆𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀅𑀢𑀻𑀢𑁂 𑀓𑀺𑀭 𑀫𑀳𑀸𑀧𑀼𑀭𑀺𑀲𑁄 𑀲𑀼𑀤𑀲𑁆𑀲𑀦𑀢𑁆𑀢𑀪𑀸𑀯𑀢𑁄 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀥𑀭𑀫𑀸𑀦𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀏𑀓𑀁 𑀣𑁂𑀭𑀁 𑀅𑀭𑀜𑁆𑀜𑀯𑀸𑀲𑀁 𑀯𑀲𑀦𑁆𑀢𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀇𑀥 𑀫𑀬𑀸 𑀅𑀬𑁆𑀬𑀲𑁆𑀲 𑀧𑀡𑁆𑀡𑀲𑀸𑀮𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀳𑀸𑀬 𑀤𑀩𑁆𑀩𑀲𑀫𑁆𑀪𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀯𑀸𑀲𑀬𑁄𑀕𑁆𑀕𑀁 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑀁 𑀓𑀢𑁆𑀯𑀸 ‘‘𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀧𑀭𑀺𑀪𑁄𑀕𑀁, 𑀦 𑀦𑀼 𑀔𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺. 𑀣𑁂𑀭𑁄 𑀅𑀦𑁆𑀢𑁄𑀕𑀸𑀫𑀢𑁄 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑁂 𑀦𑀺𑀲𑀻𑀤𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀨𑀸𑀲𑀼𑀓𑀸, 𑀪𑀦𑁆𑀢𑁂, 𑀧𑀡𑁆𑀡𑀲𑀸𑀮𑀸’’𑀢𑀺 𑀧𑀼𑀘𑁆𑀙𑀺. 𑀨𑀸𑀲𑀼𑀓𑀸, 𑀪𑀤𑁆𑀤𑀫𑀼𑀔, 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀸𑀢𑀺. 𑀯𑀲𑀺𑀲𑁆𑀲𑀣, 𑀪𑀦𑁆𑀢𑁂, 𑀇𑀥𑀸𑀢𑀺? 𑀆𑀫, 𑀉𑀧𑀸𑀲𑀓𑀸𑀢𑀺. 𑀲𑁄 𑀅𑀥𑀺𑀯𑀸𑀲𑀦𑀸𑀓𑀸𑀭𑁂𑀦𑁂𑀯 ‘‘𑀯𑀲𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀦𑀺𑀩𑀤𑁆𑀥𑀁 𑀫𑀬𑁆𑀳𑀁 𑀖𑀭𑀤𑁆𑀯𑀸𑀭𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸 𑀦𑀺𑀘𑁆𑀘𑀁 𑀅𑀢𑁆𑀢𑀦𑁄 ¶ 𑀖𑀭𑁂𑀬𑁂𑀯 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀓𑀸𑀭𑀸𑀧𑁂𑀲𑀺. 𑀲𑁄 𑀧𑀡𑁆𑀡𑀲𑀸𑀮𑀸𑀬𑀁 𑀓𑀝𑀲𑀸𑀭𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀲𑀺, 𑀅𑀧𑀲𑁆𑀲𑁂𑀦𑀁 𑀦𑀺𑀓𑁆𑀔𑀺𑀧𑀺, 𑀧𑀸𑀤𑀓𑀞𑀮𑀺𑀓𑀁 𑀞𑀧𑁂𑀲𑀺, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺, 𑀘𑀗𑁆𑀓𑀫𑀁 𑀓𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀺, 𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀧𑀡𑁆𑀡𑀲𑀸𑀮𑀁 𑀓𑀡𑁆𑀝𑀓𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀧𑀺, 𑀢𑀣𑀸 𑀧𑁄𑀓𑁆𑀔𑀭𑀡𑀺𑀁 𑀘𑀗𑁆𑀓𑀫𑀜𑁆𑀘. 𑀢𑁂𑀲𑀁 𑀅𑀦𑁆𑀢𑁄𑀯𑀢𑀺𑀧𑀭𑀺𑀬𑀦𑁆𑀢𑁂 𑀢𑀸𑀮𑀧𑀦𑁆𑀢𑀺𑀬𑁄 𑀭𑁄𑀧𑁂𑀲𑀺. 𑀏𑀯𑀫𑀸𑀤𑀺𑀦𑀸 ¶ 𑀆𑀯𑀸𑀲𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀢𑀺𑀘𑀻𑀯𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀅𑀤𑀸𑀲𑀺. 𑀣𑁂𑀭𑀲𑁆𑀲 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑁂𑀦 𑀢𑀺𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀧𑀢𑁆𑀢𑀣𑀸𑀮𑀓𑀧𑀭𑀺𑀲𑁆𑀲𑀸𑀯𑀦𑀥𑀫𑀓𑀭𑀡𑀧𑀭𑀺𑀪𑁄𑀕𑀪𑀸𑀚𑀦𑀙𑀢𑁆𑀢𑀼𑀧𑀸𑀳𑀦𑀉𑀤𑀓𑀢𑀼𑀫𑁆𑀩𑀲𑀽𑀘𑀺𑀓𑀢𑁆𑀢𑀭- 𑀬𑀝𑁆𑀞𑀺𑀆𑀭𑀓𑀡𑁆𑀝𑀓𑀧𑀺𑀧𑁆𑀨𑀮𑀺𑀦𑀔𑀘𑁆𑀙𑁂𑀤𑀦𑀧𑀤𑀻𑀧𑁂𑀬𑁆𑀬𑀸𑀤𑀺 𑀧𑀩𑁆𑀩𑀚𑀺𑀢𑀸𑀦𑀁 𑀧𑀭𑀺𑀪𑁄𑀕𑀚𑀸𑀢𑀁 𑀅𑀤𑀺𑀦𑁆𑀦𑀁 𑀦𑀸𑀫 𑀦𑀸𑀳𑁄𑀲𑀺. 𑀲𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀬𑀸𑀯𑀚𑀻𑀯𑀁 𑀣𑁂𑀭𑀁 𑀉𑀧𑀝𑁆𑀞𑀳𑀺. 𑀣𑁂𑀭𑁄 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑁨𑁯. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑁄 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 𑀘𑀓𑁆𑀓𑀯𑀢𑁆𑀢𑀻. 𑀢𑀲𑁆𑀲𑀺𑀲𑁆𑀲𑀭𑀺𑀬𑀸𑀦𑀼𑀪𑀸𑀯𑁄 ‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫 𑀅𑀳𑁄𑀲𑀺 𑀔𑀢𑁆𑀢𑀺𑀬𑁄 ¶ 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁨𑁪𑁨) 𑀦𑀬𑁂𑀦 𑀲𑀼𑀢𑁆𑀢𑁂 𑀆𑀕𑀢𑁄 𑀏𑀯. 𑀢𑀲𑁆𑀲 𑀓𑀺𑀭 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀩𑁆𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀓𑀢𑀸𑀬 𑀏𑀓𑀺𑀲𑁆𑀲𑀸 𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀣𑀲𑀳𑀲𑁆𑀲𑀸𑀦𑀺 𑀢𑀲𑁆𑀲 𑀤𑀺𑀦𑁆𑀦𑀲𑁆𑀲 𑀫𑀜𑁆𑀘𑀧𑀻𑀞𑀲𑁆𑀲, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀢𑀲𑁆𑀲 𑀤𑀺𑀦𑁆𑀦𑀲𑁆𑀲 𑀧𑀤𑀻𑀧𑀲𑁆𑀲, 𑀘𑀢𑀼𑀭𑀸𑀲𑀻𑀢𑀺 𑀧𑁄𑀓𑁆𑀔𑀭𑀡𑀺𑀲𑀳𑀲𑁆𑀲𑀸𑀦𑀺 𑀏𑀓𑀧𑁄𑀓𑁆𑀔𑀭𑀡𑀺𑀬𑀸, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀘 𑀧𑀢𑁆𑀢𑀣𑀸𑀮𑀓𑀸𑀤𑀺𑀧𑀭𑀺𑀪𑁄𑀕𑀸𑀭𑀳𑀲𑁆𑀲 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀤𑀸𑀦𑀲𑁆𑀲, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀧𑀜𑁆𑀘𑀕𑁄𑀭𑀲𑀤𑀸𑀦𑀲𑁆𑀲, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑁆𑀞𑀲𑀳𑀲𑁆𑀲𑀸𑀦𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀤𑀸𑀦𑀲𑁆𑀲, 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀪𑁄𑀚𑀦𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀲𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸𑀥𑀺𑀭𑀸𑀚𑀸 𑀳𑀼𑀢𑁆𑀯𑀸 𑀲𑀓𑀮𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀫𑀡𑁆𑀟𑀮𑀁 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀦𑁆𑀢𑁄 𑀅𑀦𑁂𑀓𑀲𑀢𑁂𑀲𑀼 𑀞𑀸𑀦𑁂𑀲𑀼 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀬𑁄 𑀬𑀁 𑀇𑀘𑁆𑀙𑀢𑀺, 𑀲𑁄 𑀤𑀸𑀦𑀲𑀸𑀮𑀸𑀲𑀼 𑀆𑀕𑀦𑁆𑀢𑁆𑀯𑀸 𑀢𑀁 𑀕𑀡𑁆𑀳𑀸𑀢𑀽’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀣𑀸𑀳𑀁 𑀤𑀺𑀯𑀲𑁂 𑀢𑀺𑀓𑁆𑀔𑀢𑁆𑀢𑀼𑀁, 𑀖𑁄𑀲𑀸𑀧𑁂𑀫𑀺 𑀢𑀳𑀺𑀁 𑀢𑀳𑀺’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂. ‘‘𑀢𑀤𑀸𑀳’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀢𑀤𑀸 𑀅𑀳𑀁, 𑀫𑀳𑀸𑀲𑀼𑀤𑀲𑁆𑀲𑀦𑀓𑀸𑀮𑁂𑀢𑀺 ¶ 𑀅𑀢𑁆𑀣𑁄. 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂, 𑀢𑀲𑁆𑀲 𑀢𑀲𑁆𑀲 𑀧𑀸𑀓𑀸𑀭𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘𑀸𑀢𑀺 ¶ 𑀅𑀢𑁆𑀣𑁄. 𑀓𑁄 𑀓𑀺𑀁 𑀇𑀘𑁆𑀙𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀲𑀢𑁆𑀢𑁄 𑀅𑀦𑁆𑀦𑀸𑀤𑀻𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀇𑀘𑁆𑀙𑀢𑀺. 𑀧𑀢𑁆𑀣𑁂𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀲𑁆𑀲 𑀓𑀺𑀁 𑀤𑀻𑀬𑀢𑀼 𑀥𑀦𑀦𑁆𑀢𑀺 𑀅𑀦𑁂𑀓𑀯𑀸𑀭𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺 𑀘 𑀤𑀸𑀦𑀖𑁄𑀲𑀦𑀸𑀬 𑀧𑀯𑀢𑁆𑀢𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀏𑀢𑁂𑀦 𑀤𑀸𑀦𑀧𑀸𑀭𑀫𑀺𑀬𑀸 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀭𑀳𑀺𑀢𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀤𑀸𑀦𑀧𑀸𑀭𑀫𑀻𑀢𑀺.

𑁩𑁦. 𑀇𑀤𑀸𑀦𑀺 𑀤𑀸𑀦𑀖𑁄𑀲𑀦𑀸𑀬 𑀢𑀲𑁆𑀲 𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀧𑀼𑀕𑁆𑀕𑀮𑀧𑀭𑀺𑀓𑀺𑀢𑁆𑀢𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁄 𑀙𑀸𑀢𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀙𑀸𑀢𑀓𑁄𑀢𑀺 𑀚𑀺𑀖𑀘𑁆𑀙𑀺𑀢𑁄. 𑀢𑀲𑀺𑀢𑁄𑀢𑀺 𑀧𑀺𑀧𑀸𑀲𑀺𑀢𑁄. 𑀓𑁄 𑀫𑀸𑀮𑀁 𑀓𑁄 𑀯𑀺𑀮𑁂𑀧𑀦𑀦𑁆𑀢𑀺𑀧𑀺 ‘‘𑀇𑀘𑁆𑀙𑀢𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀦𑀕𑁆𑀕𑁄𑀢𑀺 𑀯𑀢𑁆𑀣𑀯𑀺𑀓𑀮𑁄, 𑀯𑀢𑁆𑀣𑁂𑀦 𑀅𑀢𑁆𑀣𑀺𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀤𑀳𑀺𑀲𑁆𑀲𑀢𑀻𑀢𑀺 𑀦𑀺𑀯𑀸𑀲𑀺𑀲𑁆𑀲𑀢𑀺.

𑁩𑁧. 𑀓𑁄 𑀧𑀣𑁂 𑀙𑀢𑁆𑀢𑀫𑀸𑀤𑁂𑀢𑀻𑀢𑀺 𑀓𑁄 𑀧𑀣𑀺𑀓𑁄 𑀧𑀣𑁂 𑀫𑀕𑁆𑀕𑁂 𑀅𑀢𑁆𑀢𑀦𑁄 𑀯𑀲𑁆𑀲𑀯𑀸𑀢𑀸𑀢𑀧𑀭𑀓𑁆𑀔𑀡𑀢𑁆𑀣𑀁 𑀙𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀙𑀢𑁆𑀢𑁂𑀦 𑀅𑀢𑁆𑀣𑀺𑀓𑁄𑀢𑀺 𑀅𑀢𑁆𑀣𑁄. 𑀓𑁄𑀧𑀸𑀳𑀦𑀸 𑀫𑀼𑀤𑀽 𑀲𑀼𑀪𑀸𑀢𑀺 𑀤𑀲𑁆𑀲𑀦𑀻𑀬𑀢𑀸𑀬 𑀲𑀼𑀪𑀸 𑀲𑀼𑀔𑀲𑀫𑁆𑀨𑀲𑁆𑀲𑀢𑀸𑀬 𑀫𑀼𑀤𑀽 𑀉𑀧𑀸𑀳𑀦𑀸 𑀅𑀢𑁆𑀢𑀦𑁄 𑀧𑀸𑀤𑀸𑀦𑀁 𑀘𑀓𑁆𑀔𑀽𑀦𑀜𑁆𑀘 𑀭𑀓𑁆𑀔𑀡𑀢𑁆𑀣𑀁. 𑀓𑁄 𑀆𑀤𑁂𑀢𑀻𑀢𑀺 𑀓𑁄 𑀢𑀸𑀳𑀺 𑀅𑀢𑁆𑀣𑀺𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀬𑀜𑁆𑀘 𑀧𑀸𑀢𑁄 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀫𑀚𑁆𑀛𑀦𑁆𑀳𑀺𑀓𑁂 𑀘𑀸𑀢𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. ‘‘𑀤𑀺𑀯𑀲𑁂 𑀢𑀺𑀓𑁆𑀔𑀢𑁆𑀢𑀼𑀁 𑀖𑁄𑀲𑀸𑀧𑁂𑀫𑀻’’𑀢𑀺 𑀳𑀺 𑀯𑀼𑀢𑁆𑀢𑀁.

𑁩𑁨. 𑀦 𑀢𑀁 𑀤𑀲𑀲𑀼 𑀞𑀸𑀦𑁂𑀲𑀽𑀢𑀺 𑀢𑀁 𑀤𑀸𑀦𑀁 𑀦 𑀤𑀲𑀲𑀼 𑀞𑀸𑀦𑁂𑀲𑀼 𑀧𑀝𑀺𑀬𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀦𑀧𑀺 𑀞𑀸𑀦𑀲𑀢𑁂𑀲𑀼 𑀯𑀸 𑀧𑀝𑀺𑀬𑀢𑁆𑀢𑀁, 𑀅𑀧𑀺 𑀘 𑀔𑁄 𑀅𑀦𑁂𑀓𑀲𑀢𑁂𑀲𑀼 𑀞𑀸𑀦𑁂𑀲𑀼 𑀧𑀝𑀺𑀬𑀢𑁆𑀢𑀁. 𑀬𑀸𑀘𑀓𑁂 𑀥𑀦𑀦𑁆𑀢𑀺 𑀬𑀸𑀘𑀓𑁂 𑀉𑀤𑁆𑀤𑀺𑀲𑁆𑀲 𑀥𑀦𑀁 𑀧𑀝𑀺𑀬𑀢𑁆𑀢𑀁 𑀉𑀧𑀓𑁆𑀔𑀝𑀁. 𑀤𑁆𑀯𑀸𑀤𑀲𑀬𑁄𑀚𑀦𑀸𑀬𑀸𑀫𑁂 𑀳𑀺 𑀦𑀕𑀭𑁂 𑀲𑀢𑁆𑀢𑀬𑁄𑀚𑀦𑀯𑀺𑀢𑁆𑀣𑀢𑁂 𑀲𑀢𑁆𑀢𑀲𑀼 𑀧𑀸𑀓𑀸𑀭𑀦𑁆𑀢𑀭𑁂𑀲𑀼 𑀲𑀢𑁆𑀢 𑀢𑀸𑀮𑀧𑀦𑁆𑀢𑀺𑀧𑀭𑀺𑀓𑁆𑀔𑁂𑀧𑀸, 𑀢𑀸𑀲𑀼 𑀢𑀸𑀮𑀧𑀦𑁆𑀢𑀻𑀲𑀼 𑀘𑀢𑀼𑀭𑀸𑀲𑀻𑀢𑀺 𑀧𑁄𑀓𑁆𑀔𑀭𑀡𑀺𑀲𑀳𑀲𑁆𑀲𑀸𑀦𑀺 𑀧𑀸𑀝𑀺𑀬𑁂𑀓𑁆𑀓𑀁 𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀫𑀳𑀸𑀤𑀸𑀦𑀁 𑀧𑀝𑁆𑀞𑀧𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀧𑀝𑁆𑀞𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀏𑀯𑀭𑀽𑀧𑀁 𑀤𑀸𑀦𑀁 𑀅𑀦𑁆𑀦𑀁 𑀅𑀦𑁆𑀦𑀢𑁆𑀣𑀺𑀓𑀲𑁆𑀲, 𑀧𑀸𑀦𑀁 𑀧𑀸𑀦𑀢𑁆𑀣𑀺𑀓𑀲𑁆𑀲, 𑀯𑀢𑁆𑀣𑀁 𑀯𑀢𑁆𑀣𑀢𑁆𑀣𑀺𑀓𑀲𑁆𑀲, 𑀬𑀸𑀦𑀁 𑀬𑀸𑀦𑀢𑁆𑀣𑀺𑀓𑀲𑁆𑀲, 𑀲𑀬𑀦𑀁 𑀲𑀬𑀦𑀢𑁆𑀣𑀺𑀓𑀲𑁆𑀲, 𑀇𑀢𑁆𑀣𑀺𑀁 𑀇𑀢𑁆𑀣𑀺𑀢𑁆𑀣𑀺𑀓𑀲𑁆𑀲, 𑀳𑀺𑀭𑀜𑁆𑀜𑀁 𑀳𑀺𑀭𑀜𑁆𑀜𑀢𑁆𑀣𑀺𑀓𑀲𑁆𑀲, 𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀢𑁆𑀣𑀺𑀓𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁨.𑁨𑁫𑁪).

𑁩𑁩. 𑀢𑀢𑁆𑀣𑀸𑀬𑀁 ¶ 𑀤𑀸𑀦𑀲𑁆𑀲 𑀧𑀯𑀢𑁆𑀢𑀺𑀢𑀸𑀓𑀸𑀭𑁄 𑁋 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀇𑀢𑁆𑀣𑀻𑀦𑀜𑁆𑀘 𑀧𑀼𑀭𑀺𑀲𑀸𑀦𑀜𑁆𑀘 𑀅𑀦𑀼𑀘𑁆𑀙𑀯𑀺𑀓𑁂 𑀅𑀮𑀗𑁆𑀓𑀸𑀭𑁂 𑀓𑀸𑀭𑁂𑀢𑁆𑀯𑀸 𑀇𑀢𑁆𑀣𑀺𑀫𑀢𑁆𑀢𑀫𑁂𑀯 𑀢𑀢𑁆𑀣 𑀧𑀭𑀺𑀘𑀸𑀭𑀯𑀲𑁂𑀦 𑀲𑁂𑀲𑀜𑁆𑀘 𑀲𑀩𑁆𑀩𑀁 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 ¶ 𑀞𑀧𑁂𑀢𑁆𑀯𑀸 ‘‘𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀤𑀸𑀦𑀁 𑀤𑁂𑀢𑀺, 𑀢𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀫𑀳𑀸𑀚𑀦𑀸 𑀧𑁄𑀓𑁆𑀔𑀭𑀡𑀺𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀯𑀢𑁆𑀣𑀸𑀤𑀻𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀬𑁂𑀲𑀁 𑀢𑀸𑀤𑀺𑀲𑀸𑀦𑀺 𑀅𑀢𑁆𑀣𑀺, 𑀢𑁂 𑀧𑀳𑀸𑀬 𑀕𑀘𑁆𑀙𑀦𑁆𑀢𑀺 ¶ . 𑀬𑁂𑀲𑀁 𑀦𑀢𑁆𑀣𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀬𑁂 𑀳𑀢𑁆𑀣𑀺𑀬𑀸𑀦𑀸𑀤𑀻𑀲𑀼𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀯𑀺𑀘𑀭𑀺𑀢𑁆𑀯𑀸 𑀯𑀭𑀲𑀬𑀦𑁂𑀲𑀼𑀧𑀺 𑀲𑀬𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀢𑁆𑀣𑀻𑀳𑀺𑀧𑀺 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀢𑁆𑀢𑀯𑀺𑀥𑀭𑀢𑀦𑀧𑀲𑀸𑀥𑀦𑀸𑀦𑀺 𑀧𑀲𑀸𑀥𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀬𑀁 𑀬𑀁 𑀅𑀢𑁆𑀣𑀺𑀓𑀸, 𑀢𑀁 𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀦𑀢𑁆𑀣𑀺𑀓𑀸 𑀑𑀳𑀸𑀬 𑀕𑀘𑁆𑀙𑀦𑁆𑀢𑀺. 𑀢𑀫𑁆𑀧𑀺 𑀤𑀸𑀦𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑁂𑀯𑀲𑀺𑀓𑀁 𑀤𑀻𑀬𑀢𑁂𑀯. 𑀢𑀤𑀸 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀅𑀜𑁆𑀜𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀦 𑀢𑀲𑁆𑀲 𑀤𑀸𑀦𑀲𑁆𑀲 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀅𑀳𑁄𑀲𑀺. 𑀭𑀢𑁆𑀢𑀺𑀜𑁆𑀘𑀸𑀧𑀺 𑀤𑀺𑀯𑀸𑀧𑀺 𑀬𑀤𑀸 𑀬𑀤𑀸 𑀅𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀢𑀤𑀸 𑀤𑀻𑀬𑀢𑁂𑀯. 𑀏𑀯𑀁 𑀫𑀳𑀸𑀧𑀼𑀭𑀺𑀲𑁄 𑀬𑀸𑀯𑀚𑀻𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀬𑀤𑀺 𑀏𑀢𑀺 𑀯𑀦𑀺𑀩𑁆𑀩𑀓𑁄’’𑀢𑀺𑀆𑀤𑀺.

𑀢𑀢𑁆𑀣 𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀬𑀤𑀺 𑀏𑀢𑀻𑀢𑀺 𑀏𑀢𑁂𑀦𑀲𑁆𑀲 𑀬𑀣𑀸𑀓𑀸𑀮𑀁 𑀤𑀸𑀦𑀁 𑀤𑀲𑁆𑀲𑁂𑀢𑀺. 𑀬𑀸𑀘𑀓𑀸𑀦𑀜𑁆𑀳𑀺 𑀮𑀸𑀪𑀸𑀲𑀸𑀬 𑀉𑀧𑀲𑀗𑁆𑀓𑀫𑀦𑀓𑀸𑀮𑁄 𑀏𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀤𑀸𑀦𑀲𑁆𑀲 𑀓𑀸𑀮𑁄 𑀦𑀸𑀫. 𑀯𑀦𑀺𑀩𑁆𑀩𑀓𑁄𑀢𑀺 𑀬𑀸𑀘𑀓𑁄. 𑀮𑀤𑁆𑀥𑀸 𑀬𑀤𑀺𑀘𑁆𑀙𑀓𑀁 𑀪𑁄𑀕𑀦𑁆𑀢𑀺 𑀏𑀢𑁂𑀦 𑀬𑀣𑀸𑀪𑀺𑀭𑀼𑀘𑀺𑀢𑀁 𑀤𑀸𑀦𑀁. 𑀬𑁄 𑀬𑁄 𑀳𑀺 𑀬𑀸𑀘𑀓𑁄 𑀬𑀁 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲 𑀢𑀁𑀢𑀤𑁂𑀯 𑀩𑁄𑀥𑀺𑀲𑀢𑁆𑀢𑁄 𑀤𑁂𑀢𑀺. 𑀦 𑀢𑀲𑁆𑀲 𑀫𑀳𑀕𑁆𑀖𑀤𑀼𑀮𑁆𑀮𑀪𑀸𑀤𑀺𑀪𑀸𑀯𑀁 𑀅𑀢𑁆𑀢𑀦𑁄 𑀉𑀧𑀭𑁄𑀥𑀁 𑀘𑀺𑀦𑁆𑀢𑁂𑀲𑀺. 𑀧𑀽𑀭𑀳𑀢𑁆𑀣𑁄𑀯 𑀕𑀘𑁆𑀙𑀢𑀻𑀢𑀺 𑀏𑀢𑁂𑀦 𑀬𑀸𑀯𑀤𑀺𑀘𑁆𑀙𑀓𑀁 𑀤𑀸𑀦𑀁 𑀤𑀲𑁆𑀲𑁂𑀢𑀺, 𑀬𑀢𑁆𑀢𑀓𑀜𑁆𑀳𑀺 𑀬𑀸𑀘𑀓𑀸 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀢𑀓𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸𑀯 𑀫𑀳𑀸𑀲𑀢𑁆𑀢𑁄 𑀤𑁂𑀢𑀺 𑀉𑀴𑀸𑀭𑀚𑁆𑀛𑀸𑀲𑀬𑀢𑀸𑀬 𑀘 𑀫𑀳𑀺𑀤𑁆𑀥𑀺𑀓𑀢𑀸𑀬 𑀘.

𑁩𑁪. ‘‘𑀬𑀸𑀯𑀚𑀻𑀯𑀺𑀓’’𑀦𑁆𑀢𑀺 𑀏𑀢𑁂𑀦 𑀤𑀸𑀦𑀲𑁆𑀲 𑀓𑀸𑀮𑀧𑀭𑀺𑀬𑀦𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀳𑀺 𑀫𑀳𑀸𑀲𑀢𑁆𑀢𑀸 𑀬𑀸𑀯𑀧𑀸𑀭𑀺𑀧𑀽𑀭𑀺 𑀯𑁂𑀫𑀚𑁆𑀛𑁂 𑀦 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀭𑁄𑀦𑁆𑀢𑀺, 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑁂 𑀲𑀗𑁆𑀓𑁄𑀘𑀸𑀪𑀸𑀯𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀅𑀯𑁄𑀲𑀸𑀦𑀸𑀧𑀢𑁆𑀢𑀺𑀢𑁄 𑀫𑀭𑀡𑁂𑀦𑀧𑀺 𑀅𑀦𑀼𑀧𑀘𑁆𑀙𑁂𑀤𑁄 𑀏𑀯, 𑀢𑀢𑁄 𑀧𑀭𑀫𑁆𑀧𑀺 𑀢𑀣𑁂𑀯 𑀧𑀝𑀺𑀧𑀚𑁆𑀚𑀦𑀢𑁄, ‘‘𑀬𑀸𑀯𑀚𑀻𑀯𑀺𑀓’’𑀦𑁆𑀢𑀺 𑀧𑀦 𑀫𑀳𑀸𑀲𑀼𑀤𑀲𑁆𑀲𑀦𑀘𑀭𑀺𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀧𑀸𑀳𑀁 𑀤𑁂𑀲𑁆𑀲𑀁 𑀥𑀦𑀁 𑀤𑀫𑁆𑀫𑀻𑀢𑀺 𑀇𑀤𑀁 𑀥𑀦𑀁 𑀦𑀸𑀫 𑀫𑀬𑁆𑀳𑀁 ¶ 𑀦 𑀤𑁂𑀲𑁆𑀲𑀁 𑀅𑀫𑀦𑀸𑀧𑀦𑁆𑀢𑀺 𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑁄 𑀕𑁂𑀳𑀢𑁄 𑀘 𑀥𑀦𑀁 𑀦𑀻𑀳𑀭𑀸𑀧𑁂𑀫𑀺. 𑀦𑀧𑀺 𑀦𑀢𑁆𑀣𑀺 𑀦𑀺𑀘𑀬𑁄 𑀫𑀬𑀻𑀢𑀺 𑀫𑀫 𑀲𑀫𑀻𑀧𑁂 𑀥𑀦𑀦𑀺𑀘𑀬𑁄 𑀥𑀦𑀲𑀗𑁆𑀕𑀳𑁄 𑀦𑀸𑀧𑀺 𑀦𑀢𑁆𑀣𑀺, 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀲𑀫𑀡𑁄 𑀯𑀺𑀬 𑀅𑀲𑀗𑁆𑀕𑀳𑁄𑀧𑀺 𑀦 𑀳𑁄𑀫𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀬𑁂𑀦 𑀅𑀚𑁆𑀛𑀸𑀲𑀬𑁂𑀦 𑀢𑀲𑁆𑀲𑀺𑀤𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀺𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑁩𑁫. 𑀇𑀤𑀸𑀦𑀺 ¶ ¶ 𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸𑀧𑀺 𑀆𑀢𑀼𑀭𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀺𑀤𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀤𑀲𑁆𑀲𑀦𑀁 𑁋 𑀬𑀣𑀸 𑀦𑀸𑀫 𑀆𑀢𑀼𑀭𑁄 𑀭𑁄𑀕𑀸𑀪𑀺𑀪𑀽𑀢𑁄 𑀧𑀼𑀭𑀺𑀲𑁄 𑀭𑁄𑀕𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀼𑀓𑀸𑀫𑁄 𑀥𑀦𑁂𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀦𑀸 𑀯𑁂𑀚𑁆𑀚𑀁 𑀢𑀺𑀓𑀺𑀘𑁆𑀙𑀓𑀁 𑀢𑀧𑁆𑀧𑁂𑀢𑁆𑀯𑀸 𑀆𑀭𑀸𑀥𑁂𑀢𑁆𑀯𑀸 𑀬𑀣𑀸𑀯𑀺𑀥𑀺 𑀧𑀝𑀺𑀧𑀚𑁆𑀚𑀦𑁆𑀢𑁄 𑀢𑀢𑁄 𑀭𑁄𑀕𑀢𑁄 𑀯𑀺𑀫𑀼𑀘𑁆𑀘𑀢𑀺.

𑁩𑁬. 𑀢𑀣𑁂𑀯 𑀏𑀯𑀫𑁂𑀯 𑀅𑀳𑀫𑁆𑀧𑀺 𑀅𑀝𑁆𑀝𑀪𑀽𑀢𑀁 𑀲𑀓𑀮𑀮𑁄𑀓𑀁 𑀓𑀺𑀮𑁂𑀲𑀭𑁄𑀕𑀢𑁄 𑀲𑀓𑀮𑀲𑀁𑀲𑀸𑀭𑀤𑀼𑀓𑁆𑀔𑀭𑁄𑀕𑀢𑁄 𑀘 𑀧𑀭𑀺𑀫𑁄𑀘𑁂𑀢𑀼𑀓𑀸𑀫𑁄 𑀢𑀲𑁆𑀲 𑀢𑀢𑁄 𑀧𑀭𑀺𑀫𑁄𑀘𑀦𑀲𑁆𑀲 𑀅𑀬𑀁 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀧𑀸𑀭𑀫𑀺𑀉𑀧𑀸𑀬𑁄𑀢𑀺 𑀚𑀸𑀦𑀫𑀸𑀦𑁄 𑀩𑀼𑀚𑁆𑀛𑀫𑀸𑀦𑁄 𑀅𑀲𑁂𑀲𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀸𑀦𑀜𑁆𑀘 𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀫𑀳𑀸𑀤𑀸𑀦𑀲𑁆𑀲 𑀯𑀲𑁂𑀦 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀁 𑀧𑀭𑀺𑀧𑀽𑀭𑁂𑀢𑀼𑀁 𑀅𑀢𑁆𑀢𑀦𑁄 𑀘 𑀦 𑀫𑀬𑁆𑀳𑀁 𑀤𑀸𑀦𑀧𑀸𑀭𑀫𑀻 𑀧𑀭𑀺𑀧𑀼𑀡𑁆𑀡𑀸, 𑀢𑀲𑁆𑀫𑀸 𑀊𑀦𑀫𑀦𑀦𑁆𑀢𑀺 𑀧𑀯𑀢𑁆𑀢𑀁 𑀊𑀦𑀁 𑀫𑀦𑀁 𑀧𑀽𑀭𑀬𑀺𑀢𑀼𑀁 𑀧𑀯𑀢𑁆𑀢𑀬𑀺𑀢𑀼𑀁 𑀯𑀦𑀺𑀩𑁆𑀩𑀓𑁂 𑀬𑀸𑀘𑀓𑁂 𑀅𑀤𑀸𑀲𑀺𑀁 𑀢𑀁 𑀤𑀸𑀦𑀁 𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁 𑀤𑀤𑀸𑀫𑀺, 𑀢𑀜𑁆𑀘 𑀔𑁄 𑀢𑀲𑁆𑀫𑀺𑀁 𑀤𑀸𑀦𑀥𑀫𑁆𑀫𑁂 𑀢𑀲𑁆𑀲 𑀘 𑀨𑀮𑁂 𑀦𑀺𑀭𑀸𑀮𑀬𑁄 𑀅𑀦𑀧𑁂𑀓𑁆𑀔𑁄 𑀅𑀧𑀘𑁆𑀘𑀸𑀲𑁄 𑀓𑀺𑀜𑁆𑀘𑀺𑀧𑀺 𑀅𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀓𑁂𑀯𑀮𑀁 𑀲𑀫𑁆𑀩𑁄𑀥𑀺𑀫𑀦𑀼𑀧𑀢𑁆𑀢𑀺𑀬𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀅𑀥𑀺𑀕𑀦𑁆𑀢𑀼𑀁 𑀤𑁂𑀫𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀁 𑀥𑀫𑁆𑀫𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀫𑀳𑀸𑀩𑁆𑀬𑀽𑀳𑀓𑀽𑀝𑀸𑀕𑀸𑀭𑀤𑁆𑀯𑀸𑀭𑁂 𑀏𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁆𑀣 𑀲𑁄𑀯𑀡𑁆𑀡𑀫𑀬𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀯𑀡𑁆𑀡𑀫𑀬𑀁 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀭𑀚𑀢𑀫𑀬𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀛𑀸𑀦𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀭𑀡𑀲𑀫𑀬𑁂 𑀤𑀲𑁆𑀲𑀦𑀸𑀬 𑀉𑀧𑀕𑀢𑀸𑀦𑀁 𑀲𑀼𑀪𑀤𑁆𑀤𑀸𑀤𑁂𑀯𑀻𑀧𑀫𑀼𑀔𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀇𑀢𑁆𑀣𑀸𑀕𑀸𑀭𑀲𑀳𑀲𑁆𑀲𑀸𑀦𑀁 𑀅𑀫𑀘𑁆𑀘𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀜𑁆𑀘 𑁋

‘‘𑀅𑀦𑀺𑀘𑁆𑀘𑀸 ¶ 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺. (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬; 𑁨.𑁧𑁪𑁩) 𑁋

𑀇𑀫𑀸𑀬 𑀕𑀸𑀣𑀸𑀬 𑀑𑀯𑀤𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺.

𑀢𑀤𑀸 𑀲𑀼𑀪𑀤𑁆𑀤𑀸𑀤𑁂𑀯𑀻 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀸𑀳𑀼𑀮𑁄, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀧𑀦 𑀮𑁄𑀓𑀦𑀸𑀣𑁄.

𑀇𑀥𑀸𑀧𑀺 ¶ ¶ 𑀤𑀲 𑀧𑀸𑀭𑀫𑀺𑀬𑁄 𑀲𑀭𑀽𑀧𑀢𑁄 𑀮𑀩𑁆𑀪𑀦𑁆𑀢𑀺 𑀏𑀯, 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀧𑀦 𑀉𑀴𑀸𑀭𑀢𑀸𑀬 𑀤𑀸𑀦𑀧𑀸𑀭𑀫𑀻 𑀏𑀯 𑀧𑀸𑀴𑀺𑀬𑀁 𑀆𑀕𑀢𑀸. 𑀲𑁂𑀲𑀥𑀫𑁆𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸 𑀏𑀯. 𑀢𑀣𑀸 𑀉𑀴𑀸𑀭𑁂 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑁂 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑁂𑀧𑀺 𑀞𑀺𑀢𑀲𑁆𑀲 𑀢𑀸𑀤𑀺𑀲𑀁 𑀪𑁄𑀕𑀲𑀼𑀔𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀤𑀽𑀭𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀣𑀸𑀭𑀽𑀧𑁂 𑀫𑀳𑀸𑀤𑀸𑀦𑁂 𑀧𑀯𑀢𑁆𑀢𑁂𑀦𑁆𑀢𑀲𑁆𑀲𑁂𑀯 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸𑀧𑀺 𑀯𑀺𑀧𑀲𑁆𑀲𑀦𑀸𑀬 𑀅𑀦𑀼𑀲𑁆𑀲𑀼𑀓𑁆𑀓𑀦𑀁 𑀲𑀩𑁆𑀩𑀢𑁆𑀣 𑀅𑀦𑀺𑀲𑁆𑀲𑀗𑁆𑀕𑀢𑀸𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀳𑀸𑀕𑁄𑀯𑀺𑀦𑁆𑀤𑀘𑀭𑀺𑀬𑀸𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀲𑀢𑁆𑀢𑀭𑀸𑀚𑀧𑀼𑀭𑁄𑀳𑀺𑀢𑁄𑀢𑀺 𑀲𑀢𑁆𑀢𑀪𑀽𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀼𑀲𑀸𑀲𑀓𑀧𑀼𑀭𑁄𑀳𑀺𑀢𑁄. 𑀧𑀽𑀚𑀺𑀢𑁄 𑀦𑀭𑀤𑁂𑀯𑁂𑀳𑀻𑀢𑀺 𑀢𑁂𑀳𑀺 𑀏𑀯 𑀅𑀜𑁆𑀜𑁂𑀳𑀺 𑀘 𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑁂𑀳𑁂𑀯 𑀔𑀢𑁆𑀢𑀺𑀬𑁂𑀳𑀺 𑀘𑀢𑀼𑀧𑀘𑁆𑀘𑀬𑀧𑀽𑀚𑀸𑀬 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁂𑀦 𑀘 𑀧𑀽𑀚𑀺𑀢𑁄. 𑀫𑀳𑀸𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑁄𑀢𑀺 𑀫𑀳𑀸𑀦𑀼𑀪𑀸𑀯𑀢𑀸𑀬 𑀕𑁄𑀯𑀺𑀦𑁆𑀤𑀲𑁆𑀲𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑀢𑀸𑀬 𑀘 ‘‘𑀫𑀳𑀸𑀕𑁄𑀯𑀺𑀦𑁆𑀤𑁄’’𑀢𑀺 𑀲𑀗𑁆𑀔𑀁 𑀕𑀢𑁄 𑀩𑁆𑀭𑀸𑀳𑁆𑀫𑀡𑁄, 𑀅𑀪𑀺𑀲𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀬𑀁 𑀲𑀫𑀜𑁆𑀜𑀸 𑀚𑀸𑀢𑀸, 𑀦𑀸𑀫𑁂𑀦 𑀧𑀦 𑀚𑁄𑀢𑀺𑀧𑀸𑀮𑁄 𑀦𑀸𑀫. 𑀢𑀲𑁆𑀲 𑀓𑀺𑀭 𑀚𑀸𑀢𑀤𑀺𑀯𑀲𑁂 𑀲𑀩𑁆𑀩𑀸𑀯𑀼𑀥𑀸𑀦𑀺 𑀚𑁄𑀢𑀺𑀁𑀲𑀼. 𑀭𑀸𑀚𑀸𑀧𑀺 𑀧𑀘𑁆𑀘𑀽𑀲𑀲𑀫𑀬𑁂 𑀅𑀢𑁆𑀢𑀦𑁄 𑀫𑀗𑁆𑀕𑀮𑀸𑀯𑀼𑀥𑀁 𑀧𑀚𑁆𑀚𑀮𑀺𑀢𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀅𑀢𑁆𑀢𑀦𑁄 𑀧𑀼𑀭𑁄𑀳𑀺𑀢𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀭𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀦 𑀓𑁂𑀯𑀮𑀁 𑀭𑀸𑀚𑀕𑁂𑀳𑁂𑀬𑁂𑀯, 𑀲𑀓𑀮𑀦𑀕𑀭𑁂𑀧𑀺 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀦 ¶ 𑀢𑀁 𑀦𑀺𑀲𑁆𑀲𑀸𑀬 𑀢𑀼𑀬𑁆𑀳𑀁 𑀅𑀦𑁆𑀢𑀭𑀸𑀬𑁄 𑀅𑀢𑁆𑀣𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀦 𑀧𑀜𑁆𑀜𑀸𑀬 𑀢𑁂𑀦 𑀲𑀫𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀧𑀼𑀭𑁄𑀳𑀺𑀢𑁂𑀦 𑀲𑀫𑀲𑁆𑀲𑀸𑀲𑀺𑀢𑁄 𑀢𑀼𑀝𑁆𑀞𑀘𑀺𑀢𑁆𑀢𑁄 ‘‘𑀓𑀼𑀫𑀸𑀭𑀲𑁆𑀲 𑀔𑀻𑀭𑀫𑀽𑀮𑀁 𑀳𑁄𑀢𑀽’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀫𑀬𑁆𑀳𑀁 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀲𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀅𑀧𑀭𑀪𑀸𑀕𑁂 𑀅𑀮𑀫𑀢𑁆𑀣𑀤𑀲𑁆𑀲𑁄 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀼𑀲𑀸𑀲𑀓𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀲𑀢𑁆𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀳𑀺 𑀅𑀦𑀢𑁆𑀣𑁂𑀳𑀺 𑀧𑀸𑀮𑁂𑀢𑁆𑀯𑀸 𑀅𑀢𑁆𑀣𑁂𑀳𑀺 𑀦𑀺𑀬𑁄𑀚𑁂𑀲𑀺. 𑀇𑀢𑀺 𑀚𑁄𑀢𑀺𑀢𑀢𑁆𑀢𑀸 𑀧𑀸𑀮𑀦𑀲𑀫𑀢𑁆𑀣𑀢𑀸𑀬 ¶ 𑀘 ‘‘𑀚𑁄𑀢𑀺𑀧𑀸𑀮𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀫𑁂𑀦 𑀚𑁄𑀢𑀺𑀧𑀸𑀮𑁄 𑀦𑀸𑀫𑀸’’𑀢𑀺 (𑀤𑀻. 𑀦𑀺. 𑁨.𑁩𑁦𑁪).

𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑁄 𑀤𑀺𑀲𑀫𑁆𑀧𑀢𑀺𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀢𑀼 𑀢𑀲𑁆𑀲 𑀘 𑀭𑀜𑁆𑀜𑁄 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀧𑀼𑀢𑁆𑀢𑁄 𑀭𑁂𑀡𑀼, 𑀲𑀳𑀸𑀬𑀸 𑀘𑀲𑁆𑀲 𑀲𑀢𑁆𑀢𑀪𑀽, 𑀩𑁆𑀭𑀳𑁆𑀫𑀤𑀢𑁆𑀢𑁄, 𑀯𑁂𑀲𑁆𑀲𑀪𑀽 ¶ , 𑀪𑀭𑀢𑁄, 𑀤𑁆𑀯𑁂 𑀘 𑀥𑀢𑀭𑀝𑁆𑀞𑀸𑀢𑀺 𑀇𑀫𑁂 𑀲𑀢𑁆𑀢 𑀭𑀸𑀚𑀸𑀦𑁄 𑀬𑀣𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀯𑀤𑀦𑁆𑀢𑀺. 𑀏𑀯𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑁂 𑀅𑀦𑀼𑀲𑀸𑀲𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑀢𑀮𑁂 𑀲𑀩𑁆𑀩𑁂𑀲𑀁 𑀭𑀸𑀚𑀽𑀦𑀁 𑀅𑀜𑁆𑀜𑁂𑀲𑀜𑁆𑀘 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑁂𑀯𑀦𑀸𑀕𑀕𑀳𑀧𑀢𑀺𑀓𑀸𑀦𑀁 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀁 𑀧𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑁂𑀲𑀼 𑀓𑀼𑀲𑀮𑀢𑀸𑀬 ‘‘𑀫𑀳𑀸𑀕𑁄𑀯𑀺𑀦𑁆𑀤𑁄’’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀬𑀣𑀸𑀳 ‘‘𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄 𑀩𑁆𑀭𑀸𑀳𑁆𑀫𑀡𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀤𑀻. 𑀦𑀺. 𑁨.𑁩𑁦𑁫). 𑀢𑁂𑀦 𑀯𑀼𑀢𑁆𑀢𑀁 𑁋

𑁩𑁭.

‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀲𑀢𑁆𑀢𑀭𑀸𑀚𑀧𑀼𑀭𑁄𑀳𑀺𑀢𑁄;

𑀧𑀽𑀚𑀺𑀢𑁄 𑀦𑀭𑀤𑁂𑀯𑁂𑀳𑀺, 𑀫𑀳𑀸𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀅𑀣 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀫𑀼𑀲𑁆𑀲𑀸𑀳𑀺𑀢𑁂𑀳𑀺 𑀭𑀸𑀚𑀽𑀳𑀺 𑀢𑁂𑀲𑀁 𑀅𑀦𑀼𑀬𑀼𑀢𑁆𑀢𑁂𑀳𑀺 𑀔𑀢𑁆𑀢𑀺𑀬𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀦𑁂𑀕𑀫𑀚𑀸𑀦𑀧𑀤𑁂𑀳𑀺 𑀘 𑀉𑀧𑀭𑀽𑀧𑀭𑀺 𑀉𑀧𑀦𑀻𑀢𑁄 𑀲𑀫𑀦𑁆𑀢𑀢𑁄 𑀫𑀳𑁄𑀖𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑁄 𑀅𑀧𑀭𑀺𑀫𑁂𑀬𑁆𑀬𑁄 𑀉𑀴𑀸𑀭𑁄 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺, 𑀬𑀣𑀸 𑀢𑀁 𑀅𑀧𑀭𑀺𑀫𑀸𑀡𑀸𑀲𑀼 𑀚𑀸𑀢𑀻𑀲𑀼 𑀉𑀧𑀘𑀺𑀢𑀯𑀺𑀧𑀼𑀮𑀧𑀼𑀜𑁆𑀜𑀲𑀜𑁆𑀘𑀬𑀲𑁆𑀲 𑀉𑀴𑀸𑀭𑀸𑀪𑀺𑀚𑀸𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀲𑁆𑀲 𑀧𑁂𑀲𑀮𑀲𑁆𑀲 𑀧𑀭𑀺𑀬𑁄𑀤𑀸𑀢𑀲𑀩𑁆𑀩𑀲𑀺𑀧𑁆𑀧𑀲𑁆𑀲 𑀲𑀩𑁆𑀩𑀲𑀢𑁆𑀢𑁂𑀲𑀼 𑀧𑀼𑀢𑁆𑀢𑀲𑀤𑀺𑀲𑀫𑀳𑀸𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑀺𑀦𑀺𑀤𑁆𑀥𑀫𑀼𑀤𑀼𑀳𑀤𑀬𑀲𑁆𑀲. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑀬𑁆𑀳𑀁 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄, 𑀬𑀁𑀦𑀽𑀦𑀸𑀳𑀁 𑀇𑀫𑀺𑀦𑀸 𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀤𑀸𑀦𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀬𑁆𑀬’’𑀦𑁆𑀢𑀺. 𑀲𑁄 𑀦𑀕𑀭𑀲𑁆𑀲 𑀫𑀚𑁆𑀛𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀅𑀧𑀭𑀺𑀫𑀺𑀢𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀫𑀳𑀸𑀤𑀸𑀦𑀁 ¶ 𑀧𑀯𑀢𑁆𑀢𑁂𑀲𑀺. 𑀬𑀁 𑀬𑀁 𑀉𑀧𑀸𑀬𑀦𑀁 𑀆𑀦𑀻𑀬𑀢𑀺, 𑀬𑀜𑁆𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀪𑀺𑀲𑀗𑁆𑀔𑀭𑀻𑀬𑀢𑀺, 𑀲𑀩𑁆𑀩𑀁 𑀢𑀁 𑀤𑀸𑀦𑀲𑀸𑀮𑀸𑀲𑀼 𑀏𑀯 𑀧𑁂𑀲𑁂𑀲𑀺. 𑀏𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀳𑀸𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀘𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀺𑀢𑁆𑀢𑀺 𑀯𑀸 𑀲𑀦𑁆𑀢𑁄𑀲𑁄 𑀯𑀸 𑀦𑀸𑀳𑁄𑀲𑀺, 𑀓𑀼𑀢𑁄 𑀧𑀦 𑀲𑀗𑁆𑀓𑁄𑀘𑁄. 𑀤𑀸𑀦𑀕𑁆𑀕𑀜𑁆𑀘𑀲𑁆𑀲 𑀮𑀸𑀪𑀸𑀲𑀸𑀬 𑀆𑀕𑀘𑁆𑀙𑀦𑁆𑀢𑁂𑀳𑀺 𑀤𑁂𑀬𑁆𑀬𑀥𑀫𑁆𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀘 𑀫𑀳𑀸𑀲𑀢𑁆𑀢𑀲𑁆𑀲 𑀘 𑀕𑀼𑀡𑀯𑀺𑀲𑁂𑀲𑁂 𑀓𑀺𑀢𑁆𑀢𑀬𑀦𑁆𑀢𑁂𑀳𑀺 𑀫𑀳𑀸𑀚𑀦𑀓𑀸𑀬𑁂𑀳𑀺 𑀅𑀦𑁆𑀢𑁄𑀦𑀕𑀭𑀁 𑀩𑀳𑀺𑀦𑀕𑀭𑀜𑁆𑀘 ¶ 𑀲𑀫𑀦𑁆𑀢𑀢𑁄 𑀏𑀓𑁄𑀖𑀪𑀽𑀢𑀁 𑀓𑀧𑁆𑀧𑀯𑀼𑀝𑁆𑀞𑀸𑀦𑀫𑀳𑀸𑀯𑀸𑀬𑀼𑀲𑀗𑁆𑀖𑀝𑁆𑀝𑀧𑀭𑀺𑀩𑁆𑀪𑀫𑀺𑀢𑀁 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑀁 𑀏𑀓𑀓𑁄𑀮𑀸𑀳𑀮𑀁 𑀏𑀓𑀦𑀺𑀦𑁆𑀦𑀸𑀤𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩𑁮.

‘‘𑀢𑀤𑀸𑀳𑀁 𑀲𑀢𑁆𑀢𑀭𑀚𑁆𑀚𑁂𑀲𑀼, 𑀬𑀁 𑀫𑁂 𑀆𑀲𑀺 𑀉𑀧𑀸𑀬𑀦𑀁;

𑀢𑁂𑀦 𑀤𑁂𑀫𑀺 𑀫𑀳𑀸𑀤𑀸𑀦𑀁, 𑀅𑀓𑁆𑀔𑁄𑀪𑀁 𑀲𑀸𑀕𑀭𑀽𑀧𑀫’’𑀦𑁆𑀢𑀺.

𑀢𑀢𑁆𑀣 𑀢𑀤𑀸𑀳𑀦𑁆𑀢𑀺 𑀬𑀤𑀸 𑀲𑀢𑁆𑀢𑀭𑀸𑀚𑀧𑀼𑀭𑁄𑀳𑀺𑀢𑁄 𑀫𑀳𑀸𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑁄 𑀳𑁄𑀫𑀺, 𑀢𑀤𑀸 𑀅𑀳𑀁. 𑀲𑀢𑁆𑀢𑀭𑀚𑁆𑀚𑁂𑀲𑀽𑀢𑀺 𑀭𑁂𑀡𑀼𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀭𑀚𑁆𑀚𑁂𑀲𑀼. 𑀅𑀓𑁆𑀔𑁄𑀪𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑁂𑀳𑀺 𑀘 𑀩𑀸𑀳𑀺𑀭𑁂𑀳𑀺 𑀘 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 ¶ 𑀅𑀧𑁆𑀧𑀝𑀺𑀲𑁂𑀥𑀦𑀻𑀬𑀢𑀸𑀬 𑀓𑁂𑀦𑀘𑀺 𑀅𑀓𑁆𑀔𑁄𑀪𑀦𑀻𑀬𑀁. ‘‘𑀅𑀘𑁆𑀘𑀼𑀩𑁆𑀪’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀢𑀺𑀧𑀼𑀡𑁆𑀡𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀘 𑀉𑀴𑀸𑀭𑀪𑀸𑀯𑁂𑀦 𑀯𑀺𑀧𑀼𑀮𑀪𑀸𑀯𑁂𑀦 𑀘 𑀅𑀢𑀺𑀯𑀺𑀬 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀕𑀭𑀽𑀧𑀫𑀦𑁆𑀢𑀺 𑀲𑀸𑀕𑀭𑀲𑀤𑀺𑀲𑀁, 𑀬𑀣𑀸 𑀲𑀸𑀕𑀭𑁂 𑀉𑀤𑀓𑀁 𑀲𑀓𑀮𑁂𑀦𑀧𑀺 𑀮𑁄𑀓𑁂𑀦 𑀳𑀭𑀦𑁆𑀢𑁂𑀦 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀢𑀲𑁆𑀲 𑀤𑀸𑀦𑀕𑁆𑀕𑁂 𑀤𑁂𑀬𑁆𑀬𑀥𑀫𑁆𑀫𑀦𑁆𑀢𑀺.

𑁩𑁯. 𑀑𑀲𑀸𑀦𑀕𑀸𑀣𑀸𑀬 𑀯𑀭𑀁 𑀥𑀦𑀦𑁆𑀢𑀺 𑀉𑀢𑁆𑀢𑀫𑀁 𑀇𑀘𑁆𑀙𑀺𑀢𑀁 𑀯𑀸 𑀥𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀧𑀞𑀫𑀓𑀧𑁆𑀧𑀺𑀓𑀫𑀳𑀸𑀫𑁂𑀖𑁄 𑀯𑀺𑀬 𑀫𑀳𑀸𑀯𑀲𑁆𑀲𑀁 𑀅𑀯𑀺𑀪𑀸𑀕𑁂𑀦 𑀫𑀳𑀦𑁆𑀢𑀁 𑀤𑀸𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀦𑁆𑀢𑁄 𑀤𑀸𑀦𑀩𑁆𑀬𑀸𑀯𑀝𑁄 𑀳𑀼𑀢𑁆𑀯𑀸𑀧𑀺 𑀲𑁂𑀲𑀁 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀅𑀢𑁆𑀣𑀥𑀫𑁆𑀫𑁂 𑀅𑀧𑁆𑀧𑀫𑀢𑁆𑀢𑁄 𑀅𑀦𑀼𑀲𑀸𑀲𑀢𑀺. 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀯𑀺𑀚𑁆𑀚𑀸𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀢𑀺, 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀢𑀺. 𑀢𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 ‘‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁧𑁨). 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑀬𑁆𑀳𑀁 𑀅𑀬𑀁 𑀅𑀪𑀽𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 ‘𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀽𑀢𑀁 𑀏𑀯 𑀓𑀭𑁂𑀬𑁆𑀬’’𑀦𑁆𑀢𑀺. 𑀲𑁄 ‘‘𑀢𑁂 𑀲𑀢𑁆𑀢 𑀭𑀸𑀚𑀸𑀦𑁄 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀜𑁆𑀘 𑀆𑀧𑀼𑀘𑁆𑀙𑀺𑀢𑁆𑀯𑀸 𑀩𑁆𑀭𑀳𑁆𑀫𑀸𑀦𑀁 ¶ 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀢𑁆𑀢𑀁 𑀧𑀡𑀺𑀥𑀸𑀬 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀺. 𑀢𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀧𑀼𑀭𑀺𑀲𑁄 𑀧𑀼𑀘𑁆𑀙𑀺 𑁋

‘‘𑀯𑀡𑁆𑀡𑀯𑀸 ¶ 𑀬𑀲𑀯𑀸 𑀲𑀺𑀭𑀺𑀫𑀸, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲;

𑀅𑀚𑀸𑀦𑀦𑁆𑀢𑀸 𑀢𑀁 𑀧𑀼𑀘𑁆𑀙𑀸𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁧𑁮);

𑀢𑀲𑁆𑀲 𑀩𑁆𑀭𑀳𑁆𑀫𑀸 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀦𑁆𑀢𑁄 𑁋

‘‘𑀫𑀁 𑀯𑁂 𑀓𑀼𑀫𑀸𑀭𑀁 𑀚𑀸𑀦𑀦𑁆𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀲𑀦𑀦𑁆𑀢𑀦𑀁;

𑀲𑀩𑁆𑀩𑁂 𑀚𑀸𑀦𑀦𑁆𑀢𑀺 𑀫𑀁 𑀤𑁂𑀯𑀸, 𑀏𑀯𑀁 𑀕𑁄𑀯𑀺𑀦𑁆𑀤 𑀚𑀸𑀦𑀸𑀳𑀻’’𑀢𑀺. (𑀤𑀻. 𑀦𑀺. 𑁨.𑁩𑁧𑁮) 𑁋

𑀯𑀢𑁆𑀯𑀸 𑀢𑁂𑀦 𑁋

‘‘𑀆𑀲𑀦𑀁 ¶ 𑀉𑀤𑀓𑀁 𑀧𑀚𑁆𑀚𑀁, 𑀫𑀥𑀼𑀲𑀸𑀓𑀜𑁆𑀘 𑀩𑁆𑀭𑀳𑁆𑀫𑀼𑀦𑁄;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁧𑁮) 𑁋

𑀉𑀧𑀦𑀻𑀢𑀁 𑀅𑀢𑀺𑀣𑀺𑀲𑀓𑁆𑀓𑀸𑀭𑀁 𑀅𑀦𑀢𑁆𑀣𑀺𑀓𑁄𑀧𑀺 𑀩𑁆𑀭𑀳𑁆𑀫𑀸 𑀢𑀲𑁆𑀲 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁 𑀯𑀺𑀲𑁆𑀲𑀸𑀲𑀓𑀭𑀡𑀢𑁆𑀣𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀅𑀕𑁆𑀖𑀁, 𑀬𑀁, 𑀢𑁆𑀯𑀁 𑀕𑁄𑀯𑀺𑀦𑁆𑀤, 𑀪𑀸𑀲𑀲𑀻’’𑀢𑀺. 𑀯𑀢𑁆𑀯𑀸 𑀑𑀓𑀸𑀲𑀤𑀸𑀦𑀢𑁆𑀣𑀁 𑁋

‘‘𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘;

𑀓𑀢𑀸𑀯𑀓𑀸𑀲𑁄 𑀧𑀼𑀘𑁆𑀙𑀲𑁆𑀲𑀼, 𑀬𑀁𑀓𑀺𑀜𑁆𑀘𑀺 𑀅𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁧𑁮) 𑁋

𑀑𑀓𑀸𑀲𑀫𑀓𑀸𑀲𑀺.

𑀅𑀣 𑀦𑀁 𑀫𑀳𑀸𑀧𑀼𑀭𑀺𑀲𑁄 𑀲𑀫𑁆𑀧𑀭𑀸𑀬𑀺𑀓𑀁 𑀏𑀯 𑀅𑀢𑁆𑀣𑀁 𑁋

‘‘𑀧𑀼𑀘𑁆𑀙𑀸𑀫𑀺 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁, 𑀓𑀗𑁆𑀔𑀻 𑀅𑀓𑀗𑁆𑀔𑀺𑀁 𑀧𑀭𑀯𑁂𑀤𑀺𑀬𑁂𑀲𑀼;

𑀓𑀢𑁆𑀣𑀝𑁆𑀞𑀺𑀢𑁄 𑀓𑀺𑀫𑁆𑀳𑀺 𑀘 𑀲𑀺𑀓𑁆𑀔𑀫𑀸𑀦𑁄, 𑀧𑀧𑁆𑀧𑁄𑀢𑀺 𑀫𑀘𑁆𑀘𑁄 𑀅𑀫𑀢𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁧𑁯) 𑁋

𑀧𑀼𑀘𑁆𑀙𑀺.

𑀢𑀲𑁆𑀲 𑀩𑁆𑀭𑀳𑁆𑀫𑀸 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

‘‘𑀳𑀺𑀢𑁆𑀯𑀸 𑀫𑀫𑀢𑁆𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂, 𑀏𑀓𑁄𑀤𑀺𑀪𑀽𑀢𑁄 𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄;

𑀦𑀺𑀭𑀸𑀫𑀕𑀦𑁆𑀥𑁄 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸, 𑀏𑀢𑁆𑀣𑀝𑁆𑀞𑀺𑀢𑁄 𑀏𑀢𑁆𑀣 𑀘 𑀲𑀺𑀓𑁆𑀔𑀫𑀸𑀦𑁄;

𑀧𑀧𑁆𑀧𑁄𑀢𑀺 𑀫𑀘𑁆𑀘𑁄 𑀅𑀫𑀢𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁧𑁯) 𑁋

𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑀁 𑀓𑀣𑁂𑀲𑀺.

𑀢𑀢𑁆𑀣 ¶ ¶ 𑀫𑀁 𑀯𑁂 𑀓𑀼𑀫𑀸𑀭𑀁 𑀚𑀸𑀦𑀦𑁆𑀢𑀻𑀢𑀺 𑀯𑁂 𑀏𑀓𑀁𑀲𑁂𑀦 𑀫𑀁 ‘‘𑀓𑀼𑀫𑀸𑀭𑁄’’𑀢𑀺 𑀚𑀸𑀦𑀦𑁆𑀢𑀺. 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀲𑁂𑀝𑁆𑀞𑀮𑁄𑀓𑁂. 𑀲𑀦𑀦𑁆𑀢𑀦𑀦𑁆𑀢𑀺 𑀘𑀺𑀭𑀢𑀦𑀁 𑀧𑁄𑀭𑀸𑀡𑀁. 𑀏𑀯𑀁, 𑀕𑁄𑀯𑀺𑀦𑁆𑀤, 𑀚𑀸𑀦𑀸𑀳𑀻𑀢𑀺, 𑀕𑁄𑀯𑀺𑀦𑁆𑀤, 𑀏𑀯𑀁 𑀫𑀁 𑀥𑀸𑀭𑁂𑀳𑀺.

𑀆𑀲𑀦𑀦𑁆𑀢𑀺 ¶ 𑀇𑀤𑀁 𑀪𑁄𑀢𑁄 𑀩𑁆𑀭𑀳𑁆𑀫𑀼𑀦𑁄 𑀦𑀺𑀲𑀻𑀤𑀦𑀢𑁆𑀣𑀸𑀬 𑀆𑀲𑀦𑀁 𑀧𑀜𑁆𑀜𑀢𑁆𑀢𑀁. 𑀇𑀤𑀁 𑀉𑀤𑀓𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀸𑀤𑀸𑀦𑀁 𑀥𑁄𑀯𑀦𑀢𑁆𑀣𑀁 𑀧𑀸𑀦𑀻𑀬𑀁 𑀧𑀺𑀧𑀸𑀲𑀳𑀭𑀡𑀢𑁆𑀣𑀸𑀬. 𑀇𑀤𑀁 𑀧𑀚𑁆𑀚𑀁 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀧𑀸𑀤𑀩𑁆𑀪𑀜𑁆𑀚𑀦𑀢𑁂𑀮𑀁. 𑀇𑀤𑀁 𑀫𑀥𑀼𑀲𑀸𑀓𑀁 𑀅𑀢𑀓𑁆𑀓𑀁 𑀅𑀮𑁄𑀡𑀺𑀓𑀁 𑀅𑀥𑀽𑀧𑀦𑀁 𑀉𑀤𑀓𑁂𑀦 𑀲𑁂𑀤𑀺𑀢𑀁 𑀲𑀸𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀤𑀸 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀁 𑀘𑀢𑀼𑀫𑀸𑀲𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀧𑀭𑀫𑀼𑀓𑁆𑀓𑀝𑁆𑀞𑀁 𑀅𑀳𑁄𑀲𑀺. 𑀢𑀲𑁆𑀲𑀺𑀫𑁂 𑀲𑀩𑁆𑀩𑁂 𑀅𑀕𑁆𑀖𑁂 𑀓𑀢𑁆𑀯𑀸 𑀧𑀼𑀘𑁆𑀙𑀸𑀫, 𑀢𑀬𑀺𑀤𑀁 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄 𑀪𑀯𑀁 𑀇𑀤𑀁 𑀅𑀕𑁆𑀖𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀫𑀳𑀸𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀼𑀦𑁄 𑀦𑁂𑀲𑀁 𑀅𑀧𑀭𑀺𑀪𑀼𑀜𑁆𑀚𑀦𑀁 𑀚𑀸𑀦𑀦𑁆𑀢𑁄𑀧𑀺 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀆𑀘𑀺𑀡𑁆𑀡𑀁 𑀅𑀢𑀺𑀣𑀺𑀧𑀽𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀩𑁆𑀭𑀳𑁆𑀫𑀸𑀧𑀺𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁄 ‘‘𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀅𑀕𑁆𑀖𑀁, 𑀬𑀁 𑀢𑁆𑀯𑀁, 𑀕𑁄𑀯𑀺𑀦𑁆𑀤, 𑀪𑀸𑀲𑀲𑀻’’𑀢𑀺 𑀆𑀳.

𑀢𑀢𑁆𑀣 𑀢𑀲𑁆𑀲 𑀢𑁂 𑀆𑀲𑀦𑁂 𑀫𑀬𑀁 𑀦𑀺𑀲𑀺𑀦𑁆𑀦𑀸 𑀦𑀸𑀫 𑀳𑁄𑀫, 𑀧𑀸𑀤𑁄𑀤𑀓𑁂𑀦 𑀧𑀸𑀤𑀸 𑀥𑁄𑀢𑀸 𑀦𑀸𑀫 𑀳𑁄𑀦𑁆𑀢𑀼, 𑀧𑀸𑀦𑀻𑀬𑀁 𑀧𑀻𑀢𑀸 𑀦𑀸𑀫 𑀳𑁄𑀫, 𑀧𑀸𑀤𑀩𑁆𑀪𑀜𑁆𑀚𑀦𑁂𑀦 𑀧𑀸𑀤𑀸 𑀫𑀓𑁆𑀔𑀺𑀢𑀸 𑀦𑀸𑀫 𑀳𑁄𑀦𑁆𑀢𑀼, 𑀉𑀤𑀓𑀲𑀸𑀓𑀫𑁆𑀧𑀺 𑀧𑀭𑀺𑀪𑀼𑀢𑁆𑀢𑀁 𑀦𑀸𑀫 𑀳𑁄𑀢𑀽𑀢𑀺 𑀅𑀢𑁆𑀣𑁄.

𑀓𑀗𑁆𑀔𑀻 𑀅𑀓𑀗𑁆𑀔𑀺𑀁 𑀧𑀭𑀯𑁂𑀤𑀺𑀬𑁂𑀲𑀽𑀢𑀺 𑀅𑀳𑀁 𑀲𑀯𑀺𑀘𑀺𑀓𑀺𑀘𑁆𑀙𑁄 𑀧𑀭𑁂𑀦 𑀲𑀬𑀁 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀧𑀭𑀲𑁆𑀲 𑀧𑀸𑀓𑀝𑁂𑀲𑀼 𑀧𑀭𑀯𑁂𑀤𑀺𑀬𑁂𑀲𑀼 𑀧𑀜𑁆𑀳𑁂𑀲𑀼 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀁.

𑀳𑀺𑀢𑁆𑀯𑀸 𑀫𑀫𑀢𑁆𑀢𑀦𑁆𑀢𑀺 ‘‘𑀇𑀤𑀁 𑀫𑀫, 𑀇𑀤𑀁 𑀫𑀫𑀸’’𑀢𑀺 𑀧𑀯𑀢𑁆𑀢𑀦𑀓𑀁 𑀉𑀧𑀓𑀭𑀡𑀢𑀡𑁆𑀳𑀁 𑀘𑀚𑀺𑀢𑁆𑀯𑀸. 𑀫𑀦𑀼𑀚𑁂𑀲𑀽𑀢𑀺 𑀲𑀢𑁆𑀢𑁂𑀲𑀼. 𑀩𑁆𑀭𑀳𑁆𑀫𑁂𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀮𑀧𑀢𑀺. 𑀏𑀓𑁄𑀤𑀺𑀪𑀽𑀢𑁄𑀢𑀺 𑀏𑀓𑁄 𑀉𑀤𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀓𑁄𑀤𑀺𑀪𑀽𑀢𑁄 𑀏𑀓𑀻𑀪𑀽𑀢𑁄, 𑀏𑀓𑁂𑀦 𑀓𑀸𑀬𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀲𑀫𑀸𑀥𑀺. 𑀢𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀏𑀓𑁄𑀤𑀺𑀪𑀽𑀢𑁄, 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀳𑀺 𑀲𑀫𑀸𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀢𑀁 𑀏𑀓𑁄𑀤𑀺𑀪𑀸𑀯𑀁 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄’’𑀢𑀺 𑀆𑀳. 𑀓𑀭𑀼𑀡𑀚𑁆𑀛𑀸𑀦𑁂 𑀅𑀥𑀺𑀫𑀼𑀢𑁆𑀢𑁄, 𑀢𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀭𑀸𑀫𑀕𑀦𑁆𑀥𑁄𑀢𑀺 𑀓𑀺𑀮𑁂𑀲𑀲𑀗𑁆𑀔𑀸𑀢𑀯𑀺𑀲𑁆𑀲𑀕𑀦𑁆𑀥𑀭𑀳𑀺𑀢𑁄. 𑀏𑀢𑁆𑀣𑀝𑁆𑀞𑀺𑀢𑁄𑀢𑀺 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄, 𑀏𑀢𑁂 𑀥𑀫𑁆𑀫𑁂 𑀲𑀫𑁆𑀧𑀸𑀤𑁂𑀢𑁆𑀯𑀸. 𑀏𑀢𑁆𑀣 𑀘 𑀲𑀺𑀓𑁆𑀔𑀫𑀸𑀦𑁄𑀢𑀺 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀫𑀸𑀦𑁄 ¶ , 𑀏𑀢𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁨.𑁨𑁯𑁩 𑀆𑀤𑀬𑁄) 𑀆𑀕𑀢𑁄𑀬𑁂𑀯𑀸𑀢𑀺.

𑀅𑀣 𑀫𑀳𑀸𑀧𑀼𑀭𑀺𑀲𑁄 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀫𑀕𑀦𑁆𑀥𑁂 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀇𑀤𑀸𑀦𑁂𑀯𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀩𑁆𑀭𑀳𑁆𑀫𑀸𑀧𑀺 ¶ ‘‘𑀲𑀸𑀥𑀼, 𑀫𑀳𑀸𑀧𑀼𑀭𑀺𑀲, 𑀧𑀩𑁆𑀩𑀚𑀲𑁆𑀲𑀼. 𑀏𑀯𑀁 𑀲𑀢𑀺 𑀫𑀬𑁆𑀳𑀫𑁆𑀧𑀺 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀫𑀦𑀁 𑀲𑁆𑀯𑀸𑀕𑀫𑀦𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁, 𑀢𑀸𑀢, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀧𑀼𑀭𑀺𑀲𑁄 𑀧𑀞𑀫𑀯𑀬𑁂 𑀞𑀺𑀢𑁄, 𑀏𑀯𑀁 𑀫𑀳𑀦𑁆𑀢𑀁 𑀦𑀸𑀫 𑀲𑀫𑁆𑀧𑀢𑁆𑀢𑀺𑀁 𑀇𑀲𑁆𑀲𑀭𑀺𑀬𑀜𑁆𑀘 𑀧𑀳𑀸𑀬 𑀧𑀩𑁆𑀩𑀚𑀦𑀁 𑀦𑀸𑀫 𑀕𑀦𑁆𑀥𑀳𑀢𑁆𑀣𑀺𑀦𑁄 𑀅𑀬𑁄𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 ¶ 𑀯𑀦𑀕𑀫𑀦𑀁 𑀯𑀺𑀬 𑀅𑀢𑀺𑀉𑀴𑀸𑀭𑀁, 𑀩𑀼𑀤𑁆𑀥𑀢𑀦𑁆𑀢𑀺 𑀦𑀸𑀫𑁂𑀲𑀸’’𑀢𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀕𑀢𑁄. 𑀫𑀳𑀸𑀲𑀢𑁆𑀢𑁄𑀧𑀺 ‘‘𑀫𑀫 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀁, 𑀅𑀳𑀁 𑀭𑀸𑀚𑀓𑀼𑀮𑀸𑀦𑀁 𑀅𑀢𑁆𑀣𑀁 𑀅𑀦𑀼𑀲𑀸𑀲𑀸𑀫𑀺, 𑀢𑀲𑁆𑀫𑀸 𑀢𑁂𑀲𑀁 𑀆𑀭𑁄𑀘𑁂𑀢𑁆𑀯𑀸 𑀲𑀘𑁂 𑀢𑁂𑀧𑀺 𑀧𑀩𑁆𑀩𑀚𑀦𑁆𑀢𑀺 𑀲𑀼𑀦𑁆𑀤𑀭𑀫𑁂𑀯, 𑀦𑁄 𑀘𑁂 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑁂𑀡𑀼𑀲𑁆𑀲 𑀢𑀸𑀯 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀅𑀢𑁆𑀢𑀦𑁄 𑀲𑀁𑀯𑁂𑀕𑀳𑁂𑀢𑀼𑀁 𑀏𑀓𑀦𑁆𑀢𑁂𑀦 𑀧𑀩𑁆𑀩𑀚𑀺𑀢𑀼𑀓𑀸𑀫𑀢𑀜𑁆𑀘𑀲𑁆𑀲 𑀦𑀺𑀯𑁂𑀤𑁂𑀢𑁆𑀯𑀸 𑀢𑁂𑀦 ‘‘𑀬𑀤𑀺 𑀏𑀯𑀁 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀢𑁂𑀦𑁂𑀯 𑀦𑀬𑁂𑀦 𑀲𑀢𑁆𑀢𑀪𑀽𑀆𑀤𑀬𑁄 𑀙 𑀔𑀢𑁆𑀢𑀺𑀬𑁂, 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂, 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺, 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬𑁄 𑀘 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀢𑁆𑀢𑀸𑀳𑀫𑀢𑁆𑀢𑀫𑁂𑀯 𑀢𑁂𑀲𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀞𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑀤𑀺𑀲𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺.

𑀢𑀲𑁆𑀲 𑀢𑁂 𑀲𑀢𑁆𑀢𑀭𑀸𑀚𑀸𑀦𑁄 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀯 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑀸 𑀅𑀳𑁄𑀲𑀺 𑀫𑀳𑀢𑀻 𑀧𑀭𑀺𑀲𑀸. 𑀅𑀦𑁂𑀓𑀬𑁄𑀚𑀦𑀯𑀺𑀢𑁆𑀣𑀸𑀭𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀫𑀳𑀸𑀧𑀼𑀭𑀺𑀲𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺, 𑀫𑀳𑀸𑀚𑀦𑀁 𑀧𑀼𑀜𑁆𑀜𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀕𑀢𑀕𑀢𑀝𑁆𑀞𑀸𑀦𑁂 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀯𑀺𑀬 𑀳𑁄𑀢𑀺. 𑀫𑀦𑀼𑀲𑁆𑀲𑀸 ‘‘𑀕𑁄𑀯𑀺𑀦𑁆𑀤𑀧𑀡𑁆𑀟𑀺𑀢𑁄 𑀓𑀺𑀭 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀧𑀼𑀭𑁂𑀢𑀭𑀫𑁂𑀯 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑀁 𑀧𑀯𑁂𑀲𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑁂𑀦 𑀧𑀢𑀺𑀫𑀸𑀦𑁂𑀦𑁆𑀢𑀺. 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑁄𑀖𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀉𑀧𑁆𑀧𑀚𑁆𑀚𑀺. 𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀚𑀦𑀁 𑀧𑀼𑀜𑁆𑀜𑁂 𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀻𑀮𑀲𑀫𑁆𑀧𑀤𑀸𑀬 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁂 𑀓𑀲𑀺𑀡𑀧𑀭𑀺𑀓𑀫𑁆𑀫𑁂 𑀛𑀸𑀦𑁂𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀽𑀢𑀺. 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀬𑀸𑀯𑀢𑀸𑀬𑀼𑀓𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑁆𑀣. 𑀢𑀲𑁆𑀲 ¶ 𑀬𑁂 𑀲𑀸𑀲𑀦𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀆𑀚𑀸𑀦𑀺𑀁𑀲𑀼, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀦 𑀆𑀚𑀸𑀦𑀺𑀁𑀲𑀼, 𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀦𑀺𑀫𑁆𑀫𑀸𑀦𑀭𑀢𑀻𑀦𑀁…𑀧𑁂… 𑀢𑀼𑀲𑀺𑀢𑀸𑀦𑀁 𑀬𑀸𑀫𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀲𑀩𑁆𑀩𑀦𑀺𑀳𑀻𑀦𑀸, 𑀢𑁂 𑀕𑀦𑁆𑀥𑀩𑁆𑀩𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑀼𑀁. 𑀇𑀢𑀺 𑀫𑀳𑀸𑀚𑀦𑁄 𑀬𑁂𑀪𑀼𑀬𑁆𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀲𑀕𑁆𑀕𑀽𑀧𑀕𑁄 𑀘 𑀅𑀳𑁄𑀲𑀺. 𑀢𑀲𑁆𑀫𑀸 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸 𑀧𑀭𑀺𑀧𑀽𑀭𑀺𑀁𑀲𑀼. 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀲𑀼𑀜𑁆𑀜𑀸 𑀯𑀺𑀬 𑀅𑀳𑁂𑀲𑀼𑀁.

𑀇𑀥𑀸𑀧𑀺 ¶ 𑀅𑀓𑀺𑀢𑁆𑀢𑀺𑀚𑀸𑀢𑀓𑁂 (𑀚𑀸. 𑁧.𑁧𑁩.𑁮𑁩 𑀆𑀤𑀬𑁄) 𑀯𑀺𑀬 𑀩𑁄𑀥𑀺𑀲𑀫𑁆𑀪𑀸𑀭𑀦𑀺𑀤𑁆𑀥𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀢𑀤𑀸 𑀲𑀢𑁆𑀢 𑀭𑀸𑀚𑀸𑀦𑁄 𑀫𑀳𑀸𑀣𑁂𑀭𑀸 𑀅𑀳𑁂𑀲𑀼𑀁, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀮𑁄𑀓𑀦𑀸𑀣𑁄. 𑀢𑀣𑀸 𑀭𑁂𑀡𑀼𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑁄𑀥𑁂𑀦 𑀬𑀣𑀸 𑀲𑀓𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑀦𑀁, 𑀢𑀣𑀸 𑀫𑀳𑀢𑀺 𑀲𑀢𑁆𑀢𑀯𑀺𑀥𑁂 𑀭𑀚𑁆𑀚𑁂 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀦𑁂 𑀅𑀧𑁆𑀧𑀫𑀸𑀤𑁄, ‘‘𑀩𑁆𑀭𑀳𑁆𑀫𑀼𑀦𑀸𑀧𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀻’’𑀢𑀺 𑀧𑀯𑀢𑁆𑀢𑀲𑀫𑁆𑀪𑀸𑀯𑀦𑀁 𑀬𑀣𑀸𑀪𑀽𑀢𑀁 𑀓𑀸𑀢𑀼𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀢𑁂𑀦 𑀩𑁆𑀭𑀳𑁆𑀫𑀼𑀦𑁄 𑀅𑀢𑁆𑀢𑀦𑀺 𑀲𑀫𑀸𑀧𑀚𑁆𑀚𑀦𑀁, 𑀩𑁆𑀭𑀳𑁆𑀫𑀼𑀦𑁄 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀢𑁆𑀢𑀳𑀺 𑀭𑀸𑀚𑀽𑀳𑀺 𑀲𑀓𑀮𑁂𑀦 𑀘 𑀮𑁄𑀓𑁂𑀦 𑀉𑀧𑀦𑀻𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑁂𑀢𑁆𑀯𑀸 𑀅𑀧𑀭𑀺𑀫𑀸𑀡𑀸𑀬 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀧𑀭𑀺𑀲𑀸𑀬 𑀅𑀦𑀼𑀧𑀩𑁆𑀩𑀚𑁆𑀚𑀸𑀦𑀺𑀫𑀺𑀢𑁆𑀢𑀸𑀬 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀝𑁆𑀞𑀸𑀦𑀁, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀲𑁆𑀲 𑀯𑀺𑀬 𑀅𑀢𑁆𑀢𑀦𑁄 𑀲𑀸𑀲𑀦𑀲𑁆𑀲 𑀘𑀺𑀭𑀓𑀸𑀮𑀸𑀦𑀼𑀧𑁆𑀧𑀩𑀦𑁆𑀥𑁄𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀺𑀫𑀺𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁦. 𑀙𑀝𑁆𑀞𑁂 𑀫𑀺𑀣𑀺𑀮𑀸𑀬𑀁 𑀧𑀼𑀭𑀼𑀢𑁆𑀢𑀫𑁂𑀢𑀺 𑀫𑀺𑀣𑀺𑀮𑀸𑀦𑀸𑀫𑀓𑁂 𑀯𑀺𑀤𑁂𑀳𑀸𑀦𑀁 𑀉𑀢𑁆𑀢𑀫𑀦𑀕𑀭𑁂. 𑀦𑀺𑀫𑀺 𑀦𑀸𑀫 𑀫𑀳𑀸𑀭𑀸𑀚𑀸𑀢𑀺 𑀦𑁂𑀫𑀺𑀁 𑀖𑀝𑁂𑀦𑁆𑀢𑁄 𑀯𑀺𑀬 𑀉𑀧𑁆𑀧𑀦𑁆𑀦𑁄 ‘‘𑀦𑀺𑀫𑀻’’𑀢𑀺 𑀮𑀤𑁆𑀥𑀦𑀸𑀫𑁄, 𑀫𑀳𑀦𑁆𑀢𑁂𑀳𑀺 𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑁂𑀳𑀺 𑀫𑀳𑀢𑀸 𑀘 ¶ 𑀭𑀸𑀚𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑁄 𑀭𑀸𑀚𑀸𑀢𑀺 𑀫𑀳𑀸𑀭𑀸𑀚𑀸. 𑀧𑀡𑁆𑀟𑀺𑀢𑁄 𑀓𑀼𑀲𑀮𑀢𑁆𑀣𑀺𑀓𑁄𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀧𑀼𑀜𑁆𑀜𑀢𑁆𑀣𑀺𑀓𑁄.

𑀅𑀢𑀻𑀢𑁂 𑀓𑀺𑀭 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀸𑀦𑀕𑀭𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 ¶ 𑀫𑀖𑀤𑁂𑀯𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀳𑀲𑁆𑀲𑀸𑀦𑀺 𑀉𑀧𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 ‘‘𑀬𑀤𑀸 𑀫𑁂 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀸𑀦𑀺 𑀧𑀲𑁆𑀲𑁂𑀬𑁆𑀬𑀸𑀲𑀺, 𑀢𑀤𑀸 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀓𑀧𑁆𑀧𑀓𑀲𑁆𑀲 𑀯𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑁂𑀦 𑀧𑀮𑀺𑀢𑀸𑀦𑀺 𑀤𑀺𑀲𑁆𑀯𑀸 𑀆𑀭𑁄𑀘𑀺𑀢𑁂 𑀲𑀼𑀯𑀡𑁆𑀡𑀲𑀡𑁆𑀟𑀸𑀲𑁂𑀦 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀮𑀺𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀧𑀸𑀢𑀼𑀪𑀽𑀢𑁄 𑀔𑁄 𑀫𑀬𑁆𑀳𑀁 𑀤𑁂𑀯𑀤𑀽𑀢𑁄’’𑀢𑀺 𑀲𑀁𑀯𑁂𑀕𑀚𑀸𑀢𑁄 ‘‘𑀇𑀤𑀸𑀦𑀺 𑀫𑀬𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀕𑀸𑀫𑀯𑀭𑀁 𑀓𑀧𑁆𑀧𑀓𑀲𑁆𑀲 𑀤𑀢𑁆𑀯𑀸 𑀚𑁂𑀝𑁆𑀞𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑁋

‘‘𑀉𑀢𑁆𑀢𑀫𑀗𑁆𑀕𑀭𑀼𑀳𑀸 𑀫𑀬𑁆𑀳𑀁, 𑀇𑀫𑁂 𑀚𑀸𑀢𑀸 𑀯𑀬𑁄𑀳𑀭𑀸;

𑀧𑀸𑀢𑀼𑀪𑀽𑀢𑀸 𑀤𑁂𑀯𑀤𑀽𑀢𑀸, 𑀧𑀩𑁆𑀩𑀚𑁆𑀚𑀸𑀲𑀫𑀬𑁄 𑀫𑀫𑀸’’𑀢𑀺. (𑀚𑀸. 𑁧.𑁧.𑁯) 𑁋

𑀯𑀢𑁆𑀯𑀸 ¶ 𑀲𑀸𑀥𑀼𑀓𑀁 𑀭𑀚𑁆𑀚𑁂 𑀲𑀫𑀦𑀼𑀲𑀸𑀲𑀺𑀢𑁆𑀯𑀸 𑀬𑀤𑀺𑀧𑀺 𑀅𑀢𑁆𑀢𑀦𑁄 𑀅𑀜𑁆𑀜𑀸𑀦𑀺𑀧𑀺 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼 𑀅𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀘𑁆𑀘𑀼𑀦𑁄 𑀲𑀦𑁆𑀢𑀺𑀓𑁂 𑀞𑀺𑀢𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑁄 𑀲𑀁𑀯𑀺𑀕𑁆𑀕𑀳𑀤𑀬𑁄 𑀧𑀩𑁆𑀩𑀚𑁆𑀚𑀁 𑀭𑁄𑀘𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀁 𑀤𑀺𑀲𑁆𑀯𑀸, 𑀫𑀖𑀤𑁂𑀯𑁄 𑀤𑀺𑀲𑀫𑁆𑀧𑀢𑀺;

𑀲𑀁𑀯𑁂𑀕𑀁 𑀅𑀮𑀪𑀻 𑀥𑀻𑀭𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀻’’𑀢𑀺. (𑀫. 𑀦𑀺. 𑀅𑀝𑁆𑀞. 𑁨.𑁩𑁦𑁯);

𑀲𑁄 𑀧𑀼𑀢𑁆𑀢𑀁 ‘‘𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀯𑀢𑁆𑀢𑁂𑀬𑁆𑀬𑀸𑀲𑀺 𑀬𑀣𑀸 𑀫𑀬𑀸 𑀧𑀝𑀺𑀧𑀦𑁆𑀦𑀁, 𑀫𑀸 𑀔𑁄 𑀢𑁆𑀯𑀁 𑀅𑀦𑁆𑀢𑀺𑀫𑀧𑀼𑀭𑀺𑀲𑁄 𑀅𑀳𑁄𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀛𑀸𑀦𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺. 𑀧𑀼𑀢𑁆𑀢𑁄𑀧𑀺𑀲𑁆𑀲 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺. 𑀢𑀣𑀸 𑀢𑀲𑁆𑀲 𑀧𑀼𑀢𑁆𑀢𑁄, 𑀢𑀣𑀸 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀏𑀯𑀁 𑀤𑁆𑀯𑀻𑀳𑀺 𑀊𑀦𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀲𑀻𑀲𑁂 𑀧𑀮𑀺𑀢𑀁 𑀤𑀺𑀲𑁆𑀯𑀸𑀯 𑀧𑀩𑁆𑀩𑀚𑀺𑀢𑀸𑀦𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄𑀯 ‘‘𑀧𑀯𑀢𑁆𑀢𑀢𑀺 𑀦𑀼 𑀔𑁄 𑀫𑀬𑀸 𑀫𑀦𑀼𑀲𑁆𑀲𑀮𑁄𑀓𑁂 𑀓𑀢𑀁 𑀓𑀮𑁆𑀬𑀸𑀡𑀁 𑀦 𑀧𑀯𑀢𑁆𑀢𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀅𑀤𑁆𑀤𑀲 ¶ ‘‘𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀁, 𑀇𑀤𑀸𑀦𑀺 𑀦𑀧𑁆𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀲𑁄 ‘‘𑀦 𑀔𑁄 𑀧𑀦𑀸𑀳𑀁 𑀫𑀬𑁆𑀳𑀁 𑀧𑀯𑁂𑀡𑀺𑀬𑀸 𑀉𑀘𑁆𑀙𑀺𑀚𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀁𑀲𑁂 𑀚𑀸𑀢𑀭𑀜𑁆𑀜𑁄 𑀏𑀯 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀁𑀲𑀲𑁆𑀲 𑀦𑁂𑀫𑀺𑀁 𑀖𑀝𑁂𑀦𑁆𑀢𑁄 𑀯𑀺𑀬 𑀦𑀺𑀩𑁆𑀩𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁂𑀫𑀺𑀁 𑀖𑀝𑁂𑀦𑁆𑀢𑁄 𑀯𑀺𑀬 𑀉𑀧𑁆𑀧𑀦𑁆𑀦𑁄𑀢𑀺 ¶ 𑀦𑀺𑀫𑀻𑀢𑀺 𑀮𑀤𑁆𑀥𑀦𑀸𑀫𑁄’’𑀢𑀺.

𑀢𑀲𑁆𑀲 𑀳𑀺 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀺𑀢𑀭𑀸 𑀆𑀦𑀻𑀢𑀸 𑀮𑀓𑁆𑀔𑀡𑀧𑀸𑀞𑀓𑀸. 𑀮𑀓𑁆𑀔𑀡𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀬𑀁 𑀓𑀼𑀫𑀸𑀭𑁄 𑀢𑀼𑀫𑁆𑀳𑀸𑀓𑀁 𑀯𑀁𑀲𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀧𑀺𑀢𑀼𑀧𑀺𑀢𑀸𑀫𑀳𑁂𑀳𑀺𑀧𑀺 𑀫𑀳𑀸𑀦𑀼𑀪𑀸𑀯𑁄 𑀫𑀳𑀸𑀧𑀼𑀜𑁆𑀜𑁄’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 ‘‘𑀦𑀺𑀫𑀻’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺, 𑀲𑁄 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀻𑀮𑁂 𑀉𑀧𑁄𑀲𑀣𑀓𑀫𑁆𑀫𑁂 𑀘 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀮𑀺𑀢𑀁 𑀤𑀺𑀲𑁆𑀯𑀸 𑀓𑀧𑁆𑀧𑀓𑀲𑁆𑀲 𑀕𑀸𑀫𑀯𑀭𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀲𑀫𑀦𑀼𑀲𑀸𑀲𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺.

𑀦𑀺𑀫𑀺𑀭𑀸𑀚𑀸 𑀧𑀦 𑀤𑀸𑀦𑀚𑁆𑀛𑀸𑀲𑀬𑀢𑀸𑀬 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀘𑀸𑀢𑀺 𑀧𑀜𑁆𑀘 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀏𑀓𑁂𑀓𑀸𑀬 𑀤𑀸𑀦𑀲𑀸𑀮𑀸𑀬 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀓𑀢𑁆𑀯𑀸 𑀤𑁂𑀯𑀲𑀺𑀓𑀁 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀧𑀭𑀺𑀘𑁆𑀘𑀚𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺, 𑀧𑀓𑁆𑀔𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀓𑀫𑁆𑀫𑀁 𑀲𑀫𑀸𑀤𑀺𑀬𑀺 ¶ , 𑀫𑀳𑀸𑀚𑀦𑀫𑁆𑀧𑀺 𑀤𑀸𑀦𑀸𑀤𑀻𑀲𑀼 𑀧𑀼𑀜𑁆𑀜𑁂𑀲𑀼 𑀲𑀫𑀸𑀤𑀧𑁂𑀲𑀺, 𑀲𑀕𑁆𑀕𑀫𑀕𑁆𑀕𑀁 𑀆𑀘𑀺𑀓𑁆𑀔𑀺, 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀲𑀺, 𑀧𑀸𑀧𑀢𑁄 𑀦𑀺𑀯𑀸𑀭𑁂𑀲𑀺. 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀫𑀳𑀸𑀚𑀦𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀤𑁂𑀯𑀮𑁄𑀓𑁄 𑀧𑀭𑀺𑀧𑀽𑀭𑀺, 𑀦𑀺𑀭𑀬𑁄 𑀢𑀼𑀘𑁆𑀙𑁄 𑀯𑀺𑀬 𑀅𑀳𑁄𑀲𑀺. 𑀢𑀤𑀸 𑀧𑀦 𑀅𑀢𑁆𑀢𑀦𑁄 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀉𑀴𑀸𑀭𑀪𑀸𑀯𑀁 𑀲𑀯𑀺𑀲𑁂𑀲𑀁 𑀤𑀸𑀦𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀪𑀸𑀯𑀜𑁆𑀘 𑀧𑀯𑁂𑀤𑁂𑀦𑁆𑀢𑁄 𑀲𑀢𑁆𑀣𑀸 𑁋

𑁪𑁧.

‘‘𑀢𑀤𑀸𑀳𑀁 𑀫𑀸𑀧𑀬𑀺𑀢𑁆𑀯𑀸𑀦, 𑀘𑀢𑀼𑀲𑁆𑀲𑀸𑀮𑀁 𑀘𑀢𑀼𑀫𑁆𑀫𑀼𑀔𑀁;

𑀢𑀢𑁆𑀣 𑀤𑀸𑀦𑀁 𑀧𑀯𑀢𑁆𑀢𑁂𑀲𑀺𑀁, 𑀫𑀺𑀕𑀧𑀓𑁆𑀔𑀺𑀦𑀭𑀸𑀤𑀺𑀦’’𑀦𑁆𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀦𑀺𑀫𑀺𑀭𑀸𑀚𑀓𑀸𑀮𑁂. 𑀫𑀸𑀧𑀬𑀺𑀢𑁆𑀯𑀸𑀦𑀸𑀢𑀺 𑀓𑀸𑀭𑀸𑀧𑁂𑀢𑁆𑀯𑀸. 𑀘𑀢𑀼𑀲𑁆𑀲𑀸𑀮𑀦𑁆𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀫𑁆𑀩𑀦𑁆𑀥𑀲𑀸𑀮𑀁. 𑀘𑀢𑀼𑀫𑁆𑀫𑀼𑀔𑀦𑁆𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀬𑀼𑀢𑁆𑀢𑀁. 𑀤𑀸𑀦𑀲𑀸𑀮𑀸𑀬 𑀳𑀺 𑀫𑀳𑀦𑁆𑀢𑀪𑀸𑀯𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀬𑀸𑀘𑀓𑀚𑀦𑀲𑁆𑀲 𑀘 𑀩𑀳𑀼𑀪𑀸𑀯𑀢𑁄 𑀦 𑀲𑀓𑁆𑀓𑀸 𑀏𑀓𑁂𑀦𑁂𑀯 𑀤𑁆𑀯𑀸𑀭𑁂𑀦 ¶ 𑀤𑀸𑀦𑀥𑀫𑁆𑀫𑀁 𑀧𑀭𑀺𑀬𑀦𑁆𑀢𑀁 𑀓𑀸𑀢𑀼𑀁 𑀤𑁂𑀬𑁆𑀬𑀥𑀫𑁆𑀫𑀜𑁆𑀘 𑀧𑀭𑀺𑀬𑁄𑀲𑀸𑀧𑁂𑀢𑀼𑀦𑁆𑀢𑀺 𑀲𑀸𑀮𑀸𑀬 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑁆𑀢𑀸𑀭𑀺 𑀫𑀳𑀸𑀤𑁆𑀯𑀸𑀭𑀸𑀦𑀺 𑀓𑀸𑀭𑀸𑀧𑁂𑀲𑀺. 𑀢𑀢𑁆𑀣 𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁄𑀡𑀸 𑀤𑁂𑀬𑁆𑀬𑀥𑀫𑁆𑀫𑁄 𑀭𑀸𑀲𑀺𑀓𑀢𑁄 𑀢𑀺𑀝𑁆𑀞𑀢𑀺. 𑀅𑀭𑀼𑀡𑀼𑀕𑁆𑀕𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑀓𑀢𑀺𑀬𑀸 𑀲𑀁𑀯𑁂𑀲𑀦𑀓𑀸𑀮𑁄, 𑀢𑀸𑀯 𑀤𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀇𑀢𑀭𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀅𑀦𑁂𑀓𑀲𑀢𑀸 𑀧𑀤𑀻𑀧𑀸 𑀛𑀸𑀬𑀦𑁆𑀢𑀺. 𑀬𑀤𑀸 𑀬𑀤𑀸 𑀅𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀢𑀤𑀸 𑀤𑀻𑀬𑀢𑁂𑀯. 𑀢𑀜𑁆𑀘 𑀤𑀸𑀦𑀁 𑀦 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀜𑁆𑀜𑁂𑀯 ¶ , 𑀅𑀣 𑀔𑁄 𑀅𑀟𑁆𑀠𑀸𑀦𑀁 𑀫𑀳𑀸𑀪𑁄𑀕𑀸𑀦𑀫𑁆𑀧𑀺 𑀉𑀧𑀓𑀧𑁆𑀧𑀦𑀯𑀲𑁂𑀦 𑀫𑀳𑀸𑀲𑀼𑀤𑀲𑁆𑀲𑀦𑀤𑀸𑀦𑀲𑀤𑀺𑀲𑀁 𑀉𑀴𑀸𑀭𑀢𑀭𑀧𑀡𑀻𑀢𑀢𑀭𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄 𑀲𑀩𑁆𑀩𑁂𑀧𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀧𑀝𑀺𑀕𑁆𑀕𑀳𑁂𑀲𑀼𑀜𑁆𑀘𑁂𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀼 𑀘. 𑀲𑀓𑀮𑀚𑀫𑁆𑀩𑀼𑀤𑀻𑀧𑀜𑁆𑀳𑀺 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑁄 𑀢𑀤𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀬𑀣𑀸 𑀘 𑀫𑀦𑀼𑀲𑁆𑀲𑀸𑀦𑀁, 𑀏𑀯𑀁 𑀫𑀺𑀕𑀧𑀓𑁆𑀔𑀺𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀤𑀸𑀦𑀲𑀸𑀮𑀸𑀬 𑀩𑀳𑀺 𑀏𑀓𑀫𑀦𑁆𑀢𑁂 𑀢𑁂𑀲𑀁 𑀉𑀧𑀓𑀧𑁆𑀧𑀦𑀯𑀲𑁂𑀦 𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀤𑀸𑀦𑀁 𑀧𑀯𑀢𑁆𑀢𑁂𑀲𑀺𑀁, 𑀫𑀺𑀕𑀧𑀓𑁆𑀔𑀺𑀦𑀭𑀸𑀤𑀺𑀦’’𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀺𑀭𑀘𑁆𑀙𑀸𑀦𑀸𑀦𑀫𑁂𑀯, 𑀧𑁂𑀢𑀸𑀦𑀫𑁆𑀧𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀢𑁆𑀢𑀺𑀁 𑀤𑀸𑀧𑁂𑀲𑀺. 𑀬𑀣𑀸 𑀘 𑀏𑀓𑀺𑀲𑁆𑀲𑀸 𑀤𑀸𑀦𑀲𑀸𑀮𑀸𑀬, 𑀏𑀯𑀁 𑀧𑀜𑁆𑀘𑀲𑀼𑀧𑀺 𑀤𑀸𑀦𑀲𑀸𑀮𑀸𑀲𑀼 𑀤𑀸𑀦𑀁 𑀧𑀯𑀢𑁆𑀢𑀺𑀢𑁆𑀣. 𑀧𑀸𑀴𑀺𑀬𑀁 𑀧𑀦 ‘‘𑀢𑀤𑀸𑀳𑀁 𑀫𑀸𑀧𑀬𑀺𑀢𑁆𑀯𑀸𑀦, 𑀘𑀢𑀼𑀲𑁆𑀲𑀸𑀮𑀁 𑀘𑀢𑀼𑀫𑁆𑀫𑀼𑀔’’𑀦𑁆𑀢𑀺 𑀏𑀓𑀁 𑀯𑀺𑀬 𑀯𑀼𑀢𑁆𑀢𑀁, 𑀢𑀁 𑀦𑀕𑀭𑀫𑀚𑁆𑀛𑁂 𑀤𑀸𑀦𑀲𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁨. 𑀇𑀤𑀸𑀦𑀺 𑀢𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀘𑁆𑀙𑀸𑀤𑀦𑀜𑁆𑀘 𑀲𑀬𑀦𑀁, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦’’𑀦𑁆𑀢𑀺 𑀆𑀳.

𑀢𑀢𑁆𑀣 𑀅𑀘𑁆𑀙𑀸𑀤𑀦𑀦𑁆𑀢𑀺 𑀔𑁄𑀫𑀲𑀼𑀔𑀼𑀫𑀸𑀤𑀺𑀦𑀸𑀦𑀸𑀯𑀺𑀥𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁. 𑀲𑀬𑀦𑀦𑁆𑀢𑀺 𑀫𑀜𑁆𑀘𑀧𑀮𑁆𑀮𑀗𑁆𑀓𑀸𑀤𑀺𑀜𑁆𑀘𑁂𑀯 𑀕𑁄𑀦𑀓𑀘𑀺𑀢𑁆𑀢𑀓𑀸𑀤𑀺𑀜𑁆𑀘 𑀅𑀦𑁂𑀓𑀯𑀺𑀥𑀁 𑀲𑀬𑀺𑀢𑀩𑁆𑀩𑀓𑀁, 𑀆𑀲𑀦𑀫𑁆𑀧𑀺 𑀘𑁂𑀢𑁆𑀣 𑀲𑀬𑀦𑀕𑁆𑀕𑀳𑀡𑁂𑀦𑁂𑀯 ¶ 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀬𑀣𑀸𑀪𑀺𑀭𑀼𑀘𑀺𑀢𑀁 𑀦𑀸𑀦𑀕𑁆𑀕𑀭𑀲𑀁 𑀅𑀦𑁆𑀦𑀜𑁆𑀘𑁂𑀯 𑀧𑀸𑀦𑀜𑁆𑀘 𑀅𑀯𑀲𑀺𑀝𑁆𑀞𑀁 𑀦𑀸𑀦𑀸𑀯𑀺𑀥𑀪𑁄𑀚𑀦𑀯𑀺𑀓𑀢𑀺𑀜𑁆𑀘. 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀬𑀼𑀧𑀭𑀺𑀬𑁄𑀲𑀸𑀦𑀸 𑀅𑀳𑁄𑀭𑀢𑁆𑀢𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸.

𑁪𑁩-𑁪. 𑀇𑀤𑀸𑀦𑀺 𑀢𑀲𑁆𑀲 𑀤𑀸𑀦𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀆𑀭𑀩𑁆𑀪 𑀤𑀸𑀦𑀧𑀸𑀭𑀫𑀺𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸 𑀢𑀤𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀧𑀯𑀢𑁆𑀢𑁄, 𑀢𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀧𑀺 𑀲𑁂𑀯𑀓𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀲𑁂𑀯𑀓𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀓𑀸𑀮𑀸𑀦𑀼𑀓𑀸𑀮𑀁 𑀲𑁂𑀯𑀦𑀯𑀲𑁂𑀦 ¶ 𑀉𑀧𑀕𑀢𑁄 𑀮𑀤𑁆𑀥𑀩𑁆𑀩𑀥𑀦𑀳𑁂𑀢𑀼 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀲𑀩𑁆𑀩𑀣𑀸𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀳𑀺 𑀬𑀣𑀸 𑀲𑁄 𑀆𑀭𑀸𑀥𑀺𑀢𑁄 𑀳𑁄𑀢𑀺, 𑀏𑀯𑀁 𑀆𑀭𑀸𑀥𑀦𑀻𑀬𑀁 𑀆𑀭𑀸𑀥𑀦𑀫𑁂𑀯 𑀏𑀲𑀢𑀺 𑀕𑀯𑁂𑀲𑀢𑀺, 𑀢𑀣𑀸 𑀅𑀳𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀫𑀺𑀪𑀽𑀢𑀁 𑀅𑀦𑀼𑀢𑁆𑀢𑀭𑀁 𑀩𑀼𑀤𑁆𑀥𑀪𑀸𑀯𑀁 𑀲𑁂𑀯𑁂𑀢𑀼𑀓𑀸𑀫𑁄 𑀢𑀲𑁆𑀲 𑀆𑀭𑀸𑀥𑀦𑀢𑁆𑀣𑀁 𑀲𑀩𑁆𑀩𑀪𑀯𑁂 𑀲𑀩𑁆𑀩𑀲𑁆𑀫𑀺𑀁 ¶ 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀤𑀸𑀦𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀯𑀲𑁂𑀦 𑀤𑀸𑀦𑁂𑀦 𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀩𑁄𑀥𑀺𑀲𑀗𑁆𑀔𑀸𑀢𑀢𑁄 𑀅𑀭𑀺𑀬𑀫𑀕𑁆𑀕𑀜𑀸𑀡𑀢𑁄 𑀚𑀸𑀢𑀢𑁆𑀢𑀸 ‘‘𑀩𑁄𑀥𑀺𑀚’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀭𑀢𑁄 𑀲𑀩𑁆𑀩𑀣𑀸 𑀦𑀸𑀦𑀽𑀧𑀸𑀬𑁂𑀳𑀺 𑀏𑀲𑀺𑀲𑁆𑀲𑀸𑀫𑀺 𑀕𑀯𑁂𑀲𑀺𑀲𑁆𑀲𑀸𑀫𑀺, 𑀢𑀁 𑀉𑀢𑁆𑀢𑀫𑀁 𑀩𑁄𑀥𑀺𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀸𑀤𑀺𑀁 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀇𑀘𑁆𑀙𑀸𑀫𑀺 𑀅𑀪𑀺𑀧𑀢𑁆𑀣𑁂𑀫𑀻𑀢𑀺.

𑀏𑀯𑀫𑀺𑀥 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀉𑀴𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀤𑀸𑀦𑀧𑀸𑀭𑀫𑀺𑀯𑀲𑁂𑀦𑁂𑀯 𑀤𑁂𑀲𑀦𑀸 𑀓𑀢𑀸. 𑀚𑀸𑀢𑀓𑀤𑁂𑀲𑀦𑀸𑀬𑀁 𑀧𑀦𑀲𑁆𑀲 𑀲𑀻𑀮𑀧𑀸𑀭𑀫𑀺𑀆𑀤𑀻𑀦𑀫𑁆𑀧𑀺 𑀧𑀭𑀺𑀧𑀽𑀭𑀡𑀁 𑀯𑀺𑀪𑀸𑀯𑀺𑀢𑀫𑁂𑀯, 𑀢𑀣𑀸 𑀳𑀺𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀸𑀚𑀦𑀁 𑀢𑀢𑁆𑀣 𑀧𑀢𑀺𑀝𑁆𑀞𑀧𑁂𑀦𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀲𑀼𑀥𑀫𑁆𑀫𑀸𑀬𑀁 𑀤𑁂𑀯𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 ‘‘𑀅𑀳𑁄 𑀅𑀫𑁆𑀳𑀸𑀓𑀁 𑀦𑀺𑀫𑀺𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀸, 𑀏𑀯𑀭𑀽𑀧𑀸𑀧𑀺 𑀦𑀸𑀫 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀫𑀳𑀸𑀚𑀦𑀲𑁆𑀲 𑀩𑀼𑀤𑁆𑀥𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀕𑀼𑀡𑁂 𑀯𑀡𑁆𑀡𑁂𑀦𑁆𑀢𑀸 𑀅𑀪𑀺𑀢𑁆𑀣𑀯𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀘𑁆𑀙𑁂𑀭𑀁 𑀯𑀢 𑀮𑁄𑀓𑀲𑁆𑀫𑀺𑀁, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸;

𑀬𑀤𑀸 𑀅𑀳𑀼 𑀦𑀺𑀫𑀺𑀭𑀸𑀚𑀸, 𑀧𑀡𑁆𑀟𑀺𑀢𑁄 𑀓𑀼𑀲𑀮𑀢𑁆𑀣𑀺𑀓𑁄’’𑀢𑀺. (𑀚𑀸. 𑁨.𑁨𑁨.𑁪𑁨𑁧) 𑁋

𑀆𑀤𑀺.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀤𑁂𑀯𑀸 𑀩𑁄𑀥𑀺𑀲𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 ¶ 𑀫𑀳𑀸𑀧𑀼𑀭𑀺𑀲𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀧𑀘𑁆𑀙𑀺𑀫𑀬𑀸𑀫𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀤𑀸𑀦𑀁 𑀦𑀼 𑀔𑁄 𑀯𑀭𑀁, 𑀉𑀤𑀸𑀳𑀼 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀲𑁄 𑀢𑀁 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀢𑀁 𑀓𑀸𑀭𑀡𑀁 𑀆𑀯𑀚𑁆𑀚𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀢𑀣𑀸 𑀯𑀺𑀢𑀓𑁆𑀓𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀳𑀦𑁆𑀤𑀲𑁆𑀲 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀞𑀺𑀢𑁄 𑀢𑁂𑀦 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀤𑁂𑀯𑀭𑀸𑀚𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 ¶ ‘‘𑀓𑀺𑀁, 𑀫𑀳𑀸𑀭𑀸𑀚, 𑀘𑀺𑀦𑁆𑀢𑁂𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀓𑁆𑀓𑁄 𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀯 𑀉𑀢𑁆𑀢𑀫𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀺.

‘‘𑀦 ¶ 𑀳𑁂𑀢𑁂 𑀲𑀼𑀮𑀪𑀸 𑀓𑀸𑀬𑀸, 𑀬𑀸𑀘𑀬𑁄𑀕𑁂𑀦 𑀓𑁂𑀦𑀘𑀺;

𑀬𑁂 𑀓𑀸𑀬𑁂 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀦𑀕𑀸𑀭𑀸 𑀢𑀧𑀲𑁆𑀲𑀺𑀦𑁄’’𑀢𑀺. (𑀚𑀸. 𑁨.𑁨𑁨.𑁪𑁨𑁯-𑁪𑁩𑁦) 𑁋

𑀆𑀳.

𑀢𑀢𑁆𑀣 𑀧𑀼𑀣𑀼𑀢𑀺𑀢𑁆𑀣𑀸𑀬𑀢𑀦𑁂𑀲𑀼 𑀫𑁂𑀣𑀼𑀦𑀯𑀺𑀭𑀢𑀺𑀫𑀢𑁆𑀢𑀁 𑀳𑀻𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫, 𑀢𑁂𑀦 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑀧𑀚𑁆𑀚𑀢𑀺. 𑀛𑀸𑀦𑀲𑁆𑀲 𑀉𑀧𑀘𑀸𑀭𑀫𑀢𑁆𑀢𑀁 𑀫𑀚𑁆𑀛𑀺𑀫𑀁 𑀦𑀸𑀫, 𑀢𑁂𑀦 𑀤𑁂𑀯𑀢𑁆𑀢𑀁 𑀉𑀧𑀧𑀚𑁆𑀚𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀁 𑀧𑀦 𑀉𑀢𑁆𑀢𑀫𑀁 𑀦𑀸𑀫, 𑀢𑁂𑀦 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀜𑁆𑀳𑀺 𑀩𑀸𑀳𑀺𑀭𑀓𑀸 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀲𑀼𑀚𑁆𑀛𑀢𑀻’’𑀢𑀺. 𑀲𑀸𑀲𑀦𑁂 𑀧𑀦 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀘𑁂𑀢𑀦𑀸 𑀳𑀻𑀦𑀢𑀸𑀬 𑀳𑀻𑀦𑀁 𑀦𑀸𑀫, 𑀢𑁂𑀦 𑀬𑀣𑀸𑀧𑀢𑁆𑀣𑀺𑀢𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀁 𑀫𑀚𑁆𑀛𑀺𑀫𑀁 𑀦𑀸𑀫, 𑀢𑁂𑀦 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀉𑀢𑁆𑀢𑀫𑀁 𑀦𑀸𑀫, 𑀢𑁂𑀦 𑀯𑀺𑀲𑀼𑀚𑁆𑀛𑀢𑀻𑀢𑀺. 𑀇𑀢𑀺 𑀲𑀓𑁆𑀓𑁄 ‘‘𑀫𑀳𑀸𑀭𑀸𑀚, 𑀤𑀸𑀦𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀯 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀫𑀳𑀧𑁆𑀨𑀮𑁄’’𑀢𑀺 𑀯𑀡𑁆𑀡𑁂𑀲𑀺. 𑀓𑀸𑀬𑀸𑀢𑀺 𑀩𑁆𑀭𑀳𑁆𑀫𑀕𑀡𑀸. 𑀬𑀸𑀘𑀬𑁄𑀕𑁂𑀦𑀸𑀢𑀺 𑀬𑀸𑀘𑀦𑀬𑀼𑀢𑁆𑀢𑁂𑀦. ‘‘𑀬𑀸𑀚𑀬𑁄𑀕𑁂𑀦𑀸’’𑀢𑀺𑀧𑀺 𑀧𑀸𑀴𑀺, 𑀬𑀚𑀦𑀬𑀼𑀢𑁆𑀢𑁂𑀦, 𑀤𑀸𑀦𑀬𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀧𑀲𑁆𑀲𑀺𑀦𑁄𑀢𑀺 𑀢𑀧𑀦𑀺𑀲𑁆𑀲𑀺𑀢𑀓𑀸. 𑀇𑀫𑀸𑀬𑀧𑀺 𑀕𑀸𑀣𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲𑁂𑀯 𑀫𑀳𑀸𑀦𑀼𑀪𑀸𑀯𑀢𑀁 𑀤𑀻𑀧𑁂𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀓𑀺𑀜𑁆𑀘𑀸𑀧𑀺, 𑀫𑀳𑀸𑀭𑀸𑀚, 𑀤𑀸𑀦𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀯 𑀫𑀳𑀧𑁆𑀨𑀮𑀁, 𑀤𑁆𑀯𑁂𑀧𑀺 𑀧𑀦𑁂𑀢𑁂 𑀫𑀳𑀸𑀧𑀼𑀭𑀺𑀲𑀓𑀢𑁆𑀢𑀩𑁆𑀩𑀸𑀯 ¶ . 𑀤𑁆𑀯𑀻𑀲𑀼𑀧𑀺 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀦𑀜𑁆𑀘 𑀤𑁂𑀳𑀺 𑀲𑀻𑀮𑀜𑁆𑀘 𑀭𑀓𑁆𑀔𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀅𑀣 𑀦𑀁 𑀤𑁂𑀯𑀕𑀡𑁄 ‘‘𑀫𑀳𑀸𑀭𑀸𑀚, 𑀓𑀼𑀳𑀺𑀁 𑀕𑀢𑀢𑁆𑀣𑀸’’𑀢𑀺 𑀆𑀳. 𑀲𑀓𑁆𑀓𑁄 ‘‘𑀫𑀺𑀣𑀺𑀮𑀸𑀬𑀁 𑀦𑀺𑀫𑀺𑀭𑀜𑁆𑀜𑁄 𑀓𑀗𑁆𑀔 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀯𑀺𑀢𑁆𑀣𑀸𑀭𑀢𑁄 𑀯𑀡𑁆𑀡𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀸 ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀦𑀺𑀫𑀺𑀭𑀸𑀚𑀸𑀦𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸, 𑀲𑀸𑀥𑀼 𑀦𑀁 𑀧𑀓𑁆𑀓𑁄𑀲𑀸𑀧𑁂𑀳𑀻’’𑀢𑀺 𑀯𑀤𑀺𑀁𑀲𑀼. 𑀲𑀓𑁆𑀓𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀸𑀢𑀮𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀦𑀺𑀫𑀺𑀭𑀸𑀚𑀸𑀦𑀁 𑀯𑁂𑀚𑀬𑀦𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺 ¶ . 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀣𑁂𑀦 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀫𑀳𑀸𑀲𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀬𑀣𑀸𑀓𑀫𑁆𑀫𑀁 𑀧𑀸𑀧𑀓𑀫𑁆𑀫𑀻𑀦𑀁 𑀧𑀼𑀜𑁆𑀜𑀓𑀫𑁆𑀫𑀻𑀦𑀜𑁆𑀘 𑀞𑀸𑀦𑀸𑀦𑀺 𑀆𑀘𑀺𑀓𑁆𑀔𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀤𑁂𑀯𑀮𑁄𑀓𑀁 𑀦𑁂𑀲𑀺 ¶ . 𑀤𑁂𑀯𑀸𑀧𑀺 𑀔𑁄 ‘‘𑀦𑀺𑀫𑀺𑀭𑀸𑀚𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑀯𑀸𑀲𑀧𑀼𑀧𑁆𑀨𑀳𑀢𑁆𑀣𑀸 𑀬𑀸𑀯 𑀘𑀺𑀢𑁆𑀢𑀓𑀽𑀝𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑀺𑀩𑁆𑀩𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀸 𑀲𑀼𑀥𑀫𑁆𑀫𑀁 𑀤𑁂𑀯𑀲𑀪𑀁 𑀆𑀦𑀬𑀺𑀁𑀲𑀼. 𑀭𑀸𑀚𑀸 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀤𑁂𑀯𑀲𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑁂𑀦 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀦 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 ‘‘𑀅𑀮𑀁, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀇𑀫𑁂𑀳𑀺 𑀬𑀸𑀘𑀺𑀢𑀓𑀽𑀧𑀫𑁂𑀳𑀺 𑀓𑀸𑀫𑁂𑀳𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢𑀸𑀳𑀫𑁂𑀯 𑀞𑀢𑁆𑀯𑀸 ‘‘𑀕𑀘𑁆𑀙𑀸𑀫𑀳𑀁 𑀫𑀦𑀼𑀲𑁆𑀲𑀮𑁄𑀓𑀁, 𑀢𑀢𑁆𑀣 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀓𑁆𑀓𑁄 ‘‘𑀦𑀺𑀫𑀺𑀭𑀸𑀚𑀸𑀦𑀁 𑀫𑀺𑀣𑀺𑀮𑀁 𑀦𑁂𑀳𑀻’’𑀢𑀺 𑀫𑀸𑀢𑀮𑀺𑀁 𑀆𑀡𑀸𑀧𑁂𑀲𑀺. 𑀲𑁄 𑀢𑀁 𑀯𑁂𑀚𑀬𑀦𑁆𑀢𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂𑀦 𑀫𑀺𑀣𑀺𑀮𑀁 𑀧𑀸𑀧𑀼𑀡𑀺. 𑀫𑀳𑀸𑀚𑀦𑁄 𑀤𑀺𑀩𑁆𑀩𑀭𑀣𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺. 𑀫𑀸𑀢𑀮𑀺 𑀲𑀻𑀳𑀧𑀜𑁆𑀚𑀭𑁂 𑀫𑀳𑀸𑀲𑀢𑁆𑀢𑀁 𑀑𑀢𑀸𑀭𑁂𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀫𑀳𑀸𑀚𑀦𑁄𑀧𑀺 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀓𑀻𑀤𑀺𑀲𑁄, 𑀤𑁂𑀯, 𑀤𑁂𑀯𑀮𑁄𑀓𑁄’’𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣, 𑀏𑀯𑀁 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀣𑀸’’𑀢𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀮𑀺𑀢𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺. 𑀫𑀸𑀢𑀮𑀺 𑀆𑀦𑀦𑁆𑀤𑁄. 𑀘𑀢𑀼𑀭𑀸𑀲𑀻𑀢𑀺 𑀭𑀸𑀚𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀧𑀭𑀺𑀲𑀸. 𑀦𑀺𑀫𑀺𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑁄𑀥𑀺𑀲𑀫𑁆𑀪𑀸𑀭𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀧𑀯𑀢𑁆𑀢𑀺𑀢𑀁 𑀓𑀮𑁆𑀬𑀸𑀡𑀯𑀢𑁆𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀲𑁆𑀲𑀸𑀫𑀻𑀢𑀺 𑀫𑀳𑀸𑀓𑀭𑀼𑀡𑀸𑀬 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑀁, 𑀉𑀴𑀸𑀭𑁄 𑀤𑀸𑀦𑀚𑁆𑀛𑀸𑀲𑀬𑁄, 𑀢𑀤𑀦𑀼𑀭𑀽𑀧𑀸 𑀤𑀸𑀦𑀸𑀤𑀻𑀲𑀼 𑀧𑀝𑀺𑀧𑀢𑁆𑀢𑀺, 𑀫𑀳𑀸𑀚𑀦𑀲𑁆𑀲 𑀘 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀁, 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀢𑁆𑀣𑀝𑀬𑀲𑀢𑀸, 𑀲𑀓𑁆𑀓𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀉𑀧𑀲𑀗𑁆𑀓𑀫𑀦𑁂 𑀅𑀢𑀺𑀯𑀺𑀫𑁆𑀳𑀬𑀢𑀸, 𑀢𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀫𑀦𑁆𑀢𑀺𑀬𑀫𑀸𑀦𑁄𑀧𑀺 ¶ 𑀢𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀧𑀭𑀺𑀩𑁆𑀭𑀽𑀳𑀦𑀢𑁆𑀣𑀁 𑀧𑀼𑀦 𑀫𑀦𑀼𑀲𑁆𑀲𑀯𑀸𑀲𑀽𑀧𑀕𑀫𑀦𑀁, 𑀮𑀸𑀪𑀲𑀫𑁆𑀧𑀢𑁆𑀢𑀻𑀲𑀼 𑀲𑀩𑁆𑀩𑀢𑁆𑀣 𑀅𑀮𑀕𑁆𑀕𑀪𑀸𑀯𑁄𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺.

𑀦𑀺𑀫𑀺𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀦𑁆𑀤𑀓𑀼𑀫𑀸𑀭𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁫. 𑀲𑀢𑁆𑀢𑀫𑁂 ¶ ¶ 𑀏𑀓𑀭𑀸𑀚𑀲𑁆𑀲 𑀅𑀢𑁆𑀭𑀚𑁄𑀢𑀺 𑀏𑀓𑀭𑀸𑀚𑀲𑁆𑀲 𑀦𑀸𑀫 𑀓𑀸𑀲𑀺𑀭𑀜𑁆𑀜𑁄 𑀑𑀭𑀲𑀧𑀼𑀢𑁆𑀢𑁄. 𑀦𑀕𑀭𑁂 𑀧𑀼𑀧𑁆𑀨𑀯𑀢𑀺𑀬𑀸𑀢𑀺 𑀧𑀼𑀧𑁆𑀨𑀯𑀢𑀺𑀦𑀸𑀫𑀓𑁂 𑀦𑀕𑀭𑁂. 𑀘𑀦𑁆𑀤𑀲𑀯𑁆𑀳𑀬𑁄𑀢𑀺 𑀘𑀦𑁆𑀤𑀲𑀤𑁆𑀤𑁂𑀦 𑀅𑀯𑁆𑀳𑀸𑀢𑀩𑁆𑀩𑁄, 𑀘𑀦𑁆𑀤𑀦𑀸𑀫𑁄𑀢𑀺 𑀅𑀢𑁆𑀣𑁄.

𑀅𑀢𑀻𑀢𑁂 𑀓𑀺𑀭 𑀅𑀬𑀁 𑀩𑀸𑀭𑀸𑀡𑀲𑀻 𑀧𑀼𑀧𑁆𑀨𑀯𑀢𑀻 𑀦𑀸𑀫 𑀅𑀳𑁄𑀲𑀺. 𑀢𑀢𑁆𑀣 𑀯𑀲𑀯𑀢𑁆𑀢𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀏𑀓𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀕𑁄𑀢𑀫𑀺𑀬𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. ‘‘𑀘𑀦𑁆𑀤𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀫𑀓𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀅𑀧𑀭𑁄𑀧𑀺 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 ‘‘𑀲𑀽𑀭𑀺𑀬𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀏𑀓𑀸 𑀥𑀻𑀢𑀸 𑀉𑀧𑁆𑀧𑀦𑁆𑀦𑀸, ‘‘𑀲𑁂𑀮𑀸’’𑀢𑀺𑀲𑁆𑀲𑀸 𑀦𑀸𑀫𑀫𑀓𑀁𑀲𑀼. 𑀯𑁂𑀫𑀸𑀢𑀺𑀓𑀸 𑀘 𑀦𑁂𑀲𑀁 𑀪𑀤𑁆𑀤𑀲𑁂𑀦𑁄 𑀲𑀽𑀭𑁄 𑀘𑀸𑀢𑀺 𑀤𑁆𑀯𑁂 𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀺𑀧𑁆𑀧𑁂𑀲𑀼 𑀘 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀘 𑀧𑀸𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀭𑀸𑀚𑀸 𑀅𑀦𑀼𑀘𑁆𑀙𑀯𑀺𑀓𑀁 𑀘𑀦𑁆𑀤𑀁 𑀦𑀸𑀫 𑀭𑀸𑀚𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀓𑁄 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 ‘‘𑀯𑀸𑀲𑀼𑀮𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀔𑀡𑁆𑀟𑀳𑀸𑀮𑁄 𑀦𑀸𑀫 𑀧𑀼𑀭𑁄𑀳𑀺𑀢𑁄, 𑀢𑀁 𑀭𑀸𑀚𑀸 𑀯𑀺𑀦𑀺𑀘𑁆𑀙𑀬𑁂 𑀞𑀧𑁂𑀲𑀺. 𑀲𑁄 𑀮𑀜𑁆𑀚𑀯𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀭𑁄𑀢𑀺, 𑀲𑀸𑀫𑀺𑀓𑁂 𑀘 𑀅𑀲𑁆𑀲𑀸𑀫𑀺𑀓𑁂 𑀓𑀭𑁄𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀅𑀝𑁆𑀝𑀧𑀭𑀸𑀚𑀺𑀢𑁄 𑀏𑀓𑁄 𑀧𑀼𑀭𑀺𑀲𑁄 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀉𑀧𑀓𑁆𑀓𑁄𑀲𑁂𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀽𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀁 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀲𑀸𑀫𑀺 𑀔𑀡𑁆𑀟𑀳𑀸𑀮𑁄 𑀯𑀺𑀦𑀺𑀘𑁆𑀙𑀬𑁂 𑀯𑀺𑀮𑁄𑀧𑀁 𑀔𑀸𑀤𑀢𑀺, 𑀅𑀳𑀁 𑀢𑁂𑀦 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀧𑀭𑀸𑀚𑀬𑀁 𑀧𑀸𑀧𑀺𑀢𑁄’’𑀢𑀺 𑀅𑀝𑁆𑀝𑀲𑁆𑀲𑀭𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀦𑁂𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀫𑀤𑀸𑀲𑀺.

𑀭𑀸𑀚𑀸 ‘‘𑀩𑁄𑀥𑀺𑀲𑀢𑁆𑀢𑁂𑀦 𑀓𑀺𑀭 𑀅𑀝𑁆𑀝𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀇𑀢𑁄 𑀧𑀝𑁆𑀞𑀸𑀬 ¶ 𑀢𑁆𑀯𑀫𑁂𑀯 𑀅𑀝𑁆𑀝𑀓𑀭𑀡𑁂 𑀯𑀺𑀦𑀺𑀘𑁆𑀙𑀬𑀁 𑀯𑀺𑀦𑀺𑀘𑁆𑀙𑀺𑀦𑀸𑀳𑀻’’𑀢𑀺 𑀯𑀺𑀦𑀺𑀘𑁆𑀙𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀤𑀸𑀲𑀺. 𑀔𑀡𑁆𑀟𑀳𑀸𑀮𑀲𑁆𑀲 𑀆𑀬𑁄 𑀧𑀘𑁆𑀙𑀺𑀚𑁆𑀚𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ¶ 𑀑𑀢𑀸𑀭𑀸𑀧𑁂𑀓𑁆𑀔𑁄 𑀯𑀺𑀘𑀭𑀺. 𑀲𑁄 𑀧𑀦 𑀭𑀸𑀚𑀸 𑀫𑀼𑀥𑀧𑁆𑀧𑀲𑀦𑁆𑀦𑁄. 𑀲𑁄 𑀏𑀓𑀤𑀺𑀯𑀲𑀁 𑀲𑀼𑀧𑀺𑀦𑀦𑁆𑀢𑁂𑀦 𑀤𑁂𑀯𑀮𑁄𑀓𑀁 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀧𑀼𑀭𑁄𑀳𑀺𑀢𑀁 ¶ 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑀁 𑀆𑀘𑀺𑀓𑁆𑀔𑀸’’𑀢𑀺 𑀆𑀳. 𑀲𑁄 ‘‘𑀅𑀢𑀺𑀤𑀸𑀦𑀁 𑀤𑀤𑀦𑁆𑀢𑁄 𑀲𑀩𑁆𑀩𑀘𑀢𑀼𑀓𑁆𑀓𑁂𑀦 𑀬𑀜𑁆𑀜𑀁 𑀬𑀚𑀲𑁆𑀲𑀽’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑀸 ‘‘𑀓𑀺𑀁 𑀅𑀢𑀺𑀤𑀸𑀦’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀸 𑀧𑀺𑀬𑀪𑀭𑀺𑀬𑀸 𑀧𑀺𑀬𑀥𑀻𑀢𑀭𑁄 𑀫𑀳𑀸𑀯𑀺𑀪𑀯𑀲𑁂𑀝𑁆𑀞𑀺𑀦𑁄 𑀫𑀗𑁆𑀕𑀮𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂 𑀬𑀜𑁆𑀜𑀢𑁆𑀣𑀸𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀬𑀚𑀦𑀁 𑀅𑀢𑀺𑀤𑀸𑀦𑀁 𑀦𑀸𑀫𑀸’’𑀢𑀺 𑀲𑀜𑁆𑀜𑀸𑀧𑁂𑀲𑀺. 𑀇𑀢𑀺 𑀲𑁄 ‘‘𑀲𑀕𑁆𑀕𑀫𑀕𑁆𑀕𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀭𑀬𑀫𑀕𑁆𑀕𑀁 𑀆𑀘𑀺𑀓𑁆𑀔𑀺.

𑀭𑀸𑀚𑀸𑀧𑀺 𑀢𑀲𑁆𑀫𑀺𑀁 𑀧𑀡𑁆𑀟𑀺𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 ‘‘𑀢𑁂𑀦 𑀯𑀼𑀢𑁆𑀢𑀯𑀺𑀥𑀺 𑀲𑀕𑁆𑀕𑀫𑀕𑁆𑀕𑁄’’𑀢𑀺 𑀲𑀜𑁆𑀜𑀸𑀬 𑀢𑀁 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄 𑀫𑀳𑀦𑁆𑀢𑀁 𑀬𑀜𑁆𑀜𑀸𑀯𑀸𑀝𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀭𑀸𑀚𑀓𑀼𑀫𑀸𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀔𑀡𑁆𑀟𑀳𑀸𑀮𑁂𑀦 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀁 𑀬𑀜𑁆𑀜𑀧𑀲𑀼𑀢𑀝𑁆𑀞𑀸𑀦𑁂 𑀦𑁂𑀣𑀸𑀢𑀺 𑀆𑀡𑀸𑀧𑁂𑀲𑀺. 𑀲𑀩𑁆𑀩𑀜𑁆𑀘 𑀬𑀜𑁆𑀜𑀲𑀫𑁆𑀪𑀸𑀭𑀁 𑀉𑀧𑀓𑁆𑀔𑀝𑀁 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀅𑀓𑀸𑀲𑀺. 𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀔𑀡𑁆𑀟𑀳𑀸𑀮𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀧𑀼𑀦𑀧𑀺 𑀢𑀣𑀸 𑀢𑀁 𑀆𑀡𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀔𑀡𑁆𑀟𑀳𑀸𑀮𑁂𑀦 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁂𑀦 𑀫𑀬𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀫𑁂𑀯 𑀫𑀭𑀡𑀁 𑀇𑀘𑁆𑀙𑀦𑁆𑀢𑁂𑀦 𑀫𑀳𑀸𑀚𑀦𑀲𑁆𑀲 𑀅𑀦𑀬𑀩𑁆𑀬𑀲𑀦𑀁 𑀉𑀧𑁆𑀧𑀸𑀤𑀺𑀢’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀭𑀸𑀚𑀸𑀦𑀁 𑀢𑀢𑁄 𑀤𑀼𑀕𑁆𑀕𑀳𑀺𑀢𑀕𑁆𑀕𑀸𑀳𑀢𑁄 𑀯𑀺𑀯𑁂𑀘𑁂𑀢𑀼𑀁 𑀯𑀸𑀬𑀫𑀺𑀢𑁆𑀯𑀸𑀧𑀺 𑀦𑀸𑀲𑀓𑁆𑀔𑀺. 𑀫𑀳𑀸𑀚𑀦𑁄 𑀧𑀭𑀺𑀤𑁂𑀯𑀺, 𑀫𑀳𑀦𑁆𑀢𑀁 𑀓𑀸𑀭𑀼𑀜𑁆𑀜𑀫𑀓𑀸𑀲𑀺. 𑀫𑀳𑀸𑀚𑀦𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲𑁂𑀯 𑀬𑀜𑁆𑀜𑀸𑀯𑀸𑀝𑁂 𑀲𑀩𑁆𑀩𑀓𑀫𑁆𑀫𑀸𑀦𑀺 𑀦𑀺𑀝𑁆𑀞𑀸𑀧𑁂𑀲𑀺. 𑀭𑀸𑀚𑀧𑀼𑀢𑁆𑀢𑀁 𑀦𑁂𑀢𑁆𑀯𑀸 𑀕𑀻𑀯𑀸𑀬 𑀦𑀸𑀫𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀔𑀡𑁆𑀟𑀳𑀸𑀮𑁄 𑀲𑀼𑀯𑀡𑁆𑀡𑀧𑀸𑀢𑀺𑀁 𑀉𑀧𑀦𑀸𑀫𑁂𑀢𑁆𑀯𑀸 𑀔𑀕𑁆𑀕𑀁 𑀆𑀤𑀸𑀬 ‘‘𑀢𑀲𑁆𑀲 𑀕𑀻𑀯𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀘𑀦𑁆𑀤𑀸 𑀦𑀸𑀫 𑀭𑀸𑀚𑀧𑀼𑀢𑁆𑀢𑀲𑁆𑀲 𑀤𑁂𑀯𑀻 ‘‘𑀅𑀜𑁆𑀜𑀁 𑀫𑁂 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀘𑁆𑀘𑀩𑀮𑁂𑀦 𑀲𑀸𑀫𑀺𑀓𑀲𑁆𑀲 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀭𑀺𑀲𑀸𑀬 𑀅𑀦𑁆𑀢𑀭𑁂 𑀯𑀺𑀘𑀭𑀦𑁆𑀢𑀻 ‘‘𑀇𑀤𑀁 𑀏𑀓𑀦𑁆𑀢𑁂𑀦𑁂𑀯 𑀧𑀸𑀧𑀓𑀫𑁆𑀫𑀁, 𑀬𑀁 𑀔𑀡𑁆𑀟𑀳𑀸𑀮𑁄 𑀲𑀕𑁆𑀕𑀫𑀕𑁆𑀕𑁄𑀢𑀺 𑀓𑀭𑁄𑀢𑀺. 𑀇𑀫𑀺𑀦𑀸 𑀫𑀬𑁆𑀳𑀁 𑀲𑀘𑁆𑀘𑀯𑀘𑀦𑁂𑀦 𑀫𑀫 𑀲𑀸𑀫𑀺𑀓𑀲𑁆𑀲 𑀲𑁄𑀢𑁆𑀣𑀺 𑀳𑁄𑀢𑀼.

‘‘𑀬𑀸 𑀤𑁂𑀯𑀢𑀸 𑀇𑀥 𑀮𑁄𑀓𑁂, 𑀲𑀩𑁆𑀩𑀸 𑀢𑀸 𑀲𑀭𑀡𑀁 𑀕𑀢𑀸;

𑀅𑀦𑀸𑀣𑀁 𑀢𑀸𑀬𑀣 𑀫𑀫𑀁, 𑀬𑀣𑀸𑀳𑀁 𑀧𑀢𑀺𑀫𑀸 𑀲𑀺𑀬’’𑀦𑁆𑀢𑀺. 𑁋

𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀺. 𑀲𑀓𑁆𑀓𑁄 ¶ 𑀤𑁂𑀯𑀭𑀸𑀚𑀸 𑀢𑀲𑁆𑀲𑀸 𑀧𑀭𑀺𑀤𑁂𑀯𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀚𑀮𑀺𑀢𑀁 𑀅𑀬𑁄𑀓𑀽𑀝𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀢𑀸𑀲𑁂𑀢𑁆𑀯𑀸 ¶ 𑀲𑀩𑁆𑀩𑁂 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀲𑀓𑁆𑀓𑁄𑀧𑀺 𑀢𑀤𑀸 𑀅𑀢𑁆𑀢𑀦𑁄 𑀤𑀺𑀩𑁆𑀩𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀯𑀚𑀺𑀭𑀁 𑀧𑀭𑀺𑀩𑁆𑀪𑀫𑀦𑁆𑀢𑁄 ‘‘𑀅𑀭𑁂, 𑀧𑀸𑀧𑀭𑀸𑀚 𑀓𑀸𑀴𑀓𑀡𑁆𑀡𑀺, 𑀓𑀤𑀸 𑀢𑀬𑀸 𑀧𑀸𑀡𑀸𑀢𑀺𑀧𑀸𑀢𑁂𑀦 𑀲𑀼𑀕𑀢𑀺𑀕𑀫𑀦𑀁 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀘𑀦𑁆𑀤𑀓𑀼𑀫𑀸𑀭𑀁 𑀲𑀩𑁆𑀩𑀜𑁆𑀘 𑀇𑀫𑀁 𑀚𑀦𑀁 𑀩𑀦𑁆𑀥𑀦𑀢𑁄 ¶ 𑀫𑁄𑀘𑁂𑀳𑀺, 𑀦𑁄 𑀘𑁂 𑀫𑁄𑀘𑁂𑀲𑁆𑀲𑀲𑀺, 𑀏𑀢𑁆𑀣𑁂𑀯 𑀢𑁂 𑀇𑀫𑀲𑁆𑀲 𑀘 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀻𑀲𑀁 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁄 𑀘 𑀲𑀻𑀖𑀁 𑀲𑀩𑁆𑀩𑁂 𑀩𑀦𑁆𑀥𑀦𑀸 𑀫𑁄𑀘𑁂𑀲𑀼𑀁.

𑀅𑀣 𑀫𑀳𑀸𑀚𑀦𑁄 𑀏𑀓𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀲𑀳𑀲𑀸 𑀬𑀜𑁆𑀜𑀸𑀯𑀸𑀝𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀔𑀡𑁆𑀟𑀳𑀸𑀮𑀲𑁆𑀲 𑀏𑀓𑁂𑀓𑀁 𑀮𑁂𑀟𑁆𑀟𑀼𑀧𑁆𑀧𑀳𑀸𑀭𑀁 𑀤𑁂𑀦𑁆𑀢𑁄 𑀢𑀢𑁆𑀣𑁂𑀯 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀫𑁆𑀧𑀺 𑀫𑀸𑀭𑁂𑀢𑀼𑀁 𑀆𑀭𑀪𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀺𑀢𑀭𑀁 𑀧𑀮𑀺𑀲𑁆𑀲𑀚𑀺𑀢𑁆𑀯𑀸 𑀞𑀺𑀢𑁄 𑀫𑀸𑀭𑁂𑀢𑀼𑀁 𑀦 𑀅𑀤𑀸𑀲𑀺. 𑀫𑀳𑀸𑀚𑀦𑁄 ‘‘𑀚𑀻𑀯𑀺𑀢𑀁 𑀢𑀸𑀯𑀲𑁆𑀲 𑀧𑀸𑀧𑀭𑀜𑁆𑀜𑁄 𑀤𑁂𑀫, 𑀙𑀢𑁆𑀢𑀁 𑀧𑀦𑀲𑁆𑀲 𑀦 𑀤𑀲𑁆𑀲𑀸𑀫, 𑀦𑀕𑀭𑁂 𑀯𑀸𑀲𑀁 𑀯𑀸 𑀦 𑀤𑀲𑁆𑀲𑀸𑀫, 𑀢𑀁 𑀘𑀡𑁆𑀟𑀸𑀮𑀁 𑀓𑀢𑁆𑀯𑀸 𑀩𑀳𑀺𑀦𑀕𑀭𑁂 𑀯𑀸𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀯𑁂𑀲𑀁 𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀯𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀸𑀬 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀘𑀡𑁆𑀟𑀸𑀮𑀁 𑀓𑀢𑁆𑀯𑀸 𑀘𑀡𑁆𑀟𑀸𑀮𑀕𑀸𑀫𑀁 𑀧𑀳𑀺𑀡𑀺𑀁𑀲𑀼. 𑀬𑁂 𑀧𑀦 𑀢𑀁 𑀧𑀲𑀼𑀖𑀸𑀢𑀬𑀜𑁆𑀜𑀁 𑀬𑀚𑀺𑀁𑀲𑀼 𑀘𑁂𑀯 𑀬𑀚𑀸𑀧𑁂𑀲𑀼𑀜𑁆𑀘 𑀅𑀦𑀼𑀫𑁄𑀤𑀺𑀁𑀲𑀼 𑀘, 𑀲𑀩𑁆𑀩𑁂 𑀢𑁂 𑀦𑀺𑀭𑀬𑀧𑀭𑀸𑀬𑀦𑀸 𑀅𑀳𑁂𑀲𑀼𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑁂 𑀧𑀢𑀺𑀝𑁆𑀞𑀸 𑀦𑀺𑀭𑀬𑀁, 𑀬𑀣𑀸 𑀢𑀁 𑀧𑀸𑀧𑀓𑀁 𑀓𑀭𑀺𑀢𑁆𑀯𑀸𑀦;

𑀦 𑀳𑀺 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸, 𑀮𑀩𑁆𑀪𑀸 𑀲𑀼𑀕𑀢𑀺𑀁 𑀇𑀢𑁄 𑀕𑀦𑁆𑀢𑀼’’𑀦𑁆𑀢𑀺. (𑀚𑀸. 𑁨.𑁨𑁨.𑁧𑁧𑁪𑁩);

𑀅𑀣 𑀲𑀩𑁆𑀩𑀸𑀧𑀺 𑀭𑀸𑀚𑀧𑀭𑀺𑀲𑀸 𑀦𑀸𑀕𑀭𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀲𑀫𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀲𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁄 𑀢𑀁 𑀅𑀢𑁆𑀢𑀦𑁄 𑀫𑀳𑀸𑀚𑀦𑀲𑁆𑀲 𑀘 𑀅𑀓𑀸𑀭𑀡𑁂𑀦𑁂𑀯 𑀉𑀧𑁆𑀧𑀦𑁆𑀦𑀁 𑀅𑀦𑀬𑀩𑁆𑀬𑀲𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀲𑁆𑀲𑀸𑀳𑀚𑀸𑀢𑁄 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀲𑀻𑀮𑀸𑀦𑀺 𑀭𑀓𑁆𑀔𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀲𑀫𑀸𑀤𑀺𑀬𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁬.

‘‘𑀢𑀤𑀸𑀳𑀁 𑀬𑀚𑀦𑀸 𑀫𑀼𑀢𑁆𑀢𑁄, 𑀦𑀺𑀓𑁆𑀔𑀦𑁆𑀢𑁄 𑀬𑀜𑁆𑀜𑀯𑀸𑀝𑀢𑁄;

𑀲𑀁𑀯𑁂𑀕𑀁 𑀚𑀦𑀬𑀺𑀢𑁆𑀯𑀸𑀦, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺’’𑀦𑁆𑀢𑀺. 𑁋 𑀆𑀤𑀺;

𑀢𑀢𑁆𑀣 ¶ ¶ 𑀬𑀚𑀦𑀸 𑀫𑀼𑀢𑁆𑀢𑁄𑀢𑀺 𑀔𑀡𑁆𑀟𑀳𑀸𑀮𑁂𑀦 𑀯𑀺𑀳𑀺𑀢𑀬𑀜𑁆𑀜𑀯𑀺𑀥𑀺𑀢𑁄 𑀯𑀼𑀢𑁆𑀢𑀦𑀬𑁂𑀦 𑀖𑀸𑀢𑁂𑀢𑀩𑁆𑀩𑀢𑁄 𑀫𑀼𑀢𑁆𑀢𑁄. 𑀦𑀺𑀓𑁆𑀔𑀦𑁆𑀢𑁄 𑀬𑀜𑁆𑀜𑀯𑀸𑀝𑀢𑁄𑀢𑀺 𑀅𑀪𑀺𑀲𑁂𑀓𑀓𑀭𑀡𑀢𑁆𑀣𑀸𑀬 𑀉𑀲𑁆𑀲𑀸𑀳𑀚𑀸𑀢𑁂𑀦 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀢𑀢𑁄 𑀬𑀜𑁆𑀜𑀪𑀽𑀫𑀺𑀢𑁄 𑀦𑀺𑀕𑁆𑀕𑀢𑁄. 𑀲𑀁𑀯𑁂𑀕𑀁 𑀚𑀦𑀬𑀺𑀢𑁆𑀯𑀸𑀦𑀸𑀢𑀺 𑀏𑀯𑀁 ‘‘𑀩𑀳𑀼𑀅𑀦𑁆𑀢𑀭𑀸𑀬𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄’’𑀢𑀺 𑀅𑀢𑀺𑀯𑀺𑀬 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀦𑁆𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀢𑀸 𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 ¶ 𑀫𑀳𑀸𑀤𑀸𑀦𑀫𑀤𑀸𑀲𑀺𑀁. 𑀏𑀢𑁂𑀦 𑀅𑀪𑀺𑀲𑁂𑀓𑀓𑀭𑀡𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀫𑀳𑀸𑀤𑀸𑀦𑀲𑁆𑀲 𑀧𑀯𑀢𑁆𑀢𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁪𑁭. 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀤𑀢𑁆𑀯𑀸𑀦𑀸𑀢𑀺 𑀤𑀓𑁆𑀔𑀺𑀡𑀸𑀭𑀳𑁂 𑀧𑀼𑀕𑁆𑀕𑀮𑁂 𑀤𑁂𑀬𑁆𑀬𑀥𑀫𑁆𑀫𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀅𑀧𑀺 𑀙𑀧𑁆𑀧𑀜𑁆𑀘 𑀭𑀢𑁆𑀢𑀺𑀬𑁄𑀢𑀺 𑀅𑀧𑁆𑀧𑁂𑀓𑀤𑀸 𑀙𑀧𑀺 𑀧𑀜𑁆𑀘𑀧𑀺 𑀭𑀢𑁆𑀢𑀺𑀬𑁄 𑀅𑀢𑁆𑀢𑀦𑁄 𑀧𑀺𑀯𑀦𑀔𑀸𑀤𑀦𑀪𑀼𑀜𑁆𑀚𑀦𑀸𑀦𑀺 𑀦 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀤𑀸 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀫𑀳𑀸𑀫𑁂𑀖𑁄 𑀯𑀺𑀬 𑀅𑀪𑀺𑀯𑀲𑁆𑀲𑀦𑁆𑀢𑁄 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀸𑀦𑀲𑀸𑀮𑀸𑀲𑀼 𑀅𑀦𑁆𑀦𑀧𑀸𑀦𑀸𑀤𑀺𑀉𑀴𑀸𑀭𑀼𑀴𑀸𑀭𑀧𑀡𑀻𑀢𑀧𑀡𑀻𑀢𑀫𑁂𑀯 𑀬𑀸𑀘𑀓𑀸𑀦𑀁 𑀬𑀣𑀸𑀭𑀼𑀘𑀺𑀢𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀻𑀬𑀢𑀺, 𑀢𑀣𑀸𑀧𑀺 𑀅𑀢𑁆𑀢𑀦𑁄 𑀲𑀚𑁆𑀚𑀺𑀢𑀁 𑀆𑀳𑀸𑀭𑀁 𑀭𑀸𑀚𑀸𑀭𑀳𑀪𑁄𑀚𑀦𑀫𑁆𑀧𑀺 𑀬𑀸𑀘𑀓𑀸𑀦𑀁 𑀅𑀤𑀢𑁆𑀯𑀸 𑀦 𑀪𑀼𑀜𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀸𑀳𑀁 𑀧𑀺𑀯𑀸𑀫𑀻’’𑀢𑀺𑀆𑀤𑀺.

𑁪𑁮. 𑀇𑀤𑀸𑀦𑀺 𑀢𑀣𑀸 𑀬𑀸𑀘𑀓𑀸𑀦𑀁 𑀤𑀸𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀉𑀧𑀫𑀁 𑀢𑀸𑀯 𑀆𑀳𑀭𑀢𑀺 ‘‘𑀬𑀣𑀸𑀧𑀺 𑀯𑀸𑀡𑀺𑀚𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀯𑀸𑀡𑀺𑀚𑁄 𑀪𑀡𑁆𑀟𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑁂𑀦 𑀧𑀸𑀪𑀢𑁂𑀦 𑀩𑀳𑀼𑀁 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀯𑀺𑀧𑀼𑀮𑀁 𑀪𑀡𑁆𑀟𑀲𑀦𑁆𑀦𑀺𑀘𑀬𑀁 𑀓𑀢𑁆𑀯𑀸 𑀤𑁂𑀲𑀓𑀸𑀮𑀁 𑀚𑀸𑀦𑀦𑁆𑀢𑁄 𑀬𑀢𑁆𑀣𑀲𑁆𑀲 𑀮𑀸𑀪𑁄 𑀉𑀤𑀬𑁄 𑀫𑀳𑀸 𑀳𑁄𑀢𑀺, 𑀢𑀢𑁆𑀣 𑀤𑁂𑀲𑁂 𑀓𑀸𑀮𑁂 𑀯𑀸 𑀢𑀁 𑀪𑀡𑁆𑀟𑀁 𑀳𑀭𑀢𑀺 𑀉𑀧𑀦𑁂𑀢𑀺 𑀯𑀺𑀓𑁆𑀓𑀺𑀡𑀸𑀢𑀺.

𑁪𑁯. 𑀲𑀓𑀪𑀼𑀢𑁆𑀢𑀸𑀧𑀻𑀢𑀺 𑀲𑀓𑀪𑀼𑀢𑁆𑀢𑀢𑁄𑀧𑀺 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀢𑁄𑀧𑀺. ‘‘𑀲𑀓𑀧𑀭𑀺𑀪𑀼𑀢𑁆𑀢𑀸𑀧𑀻’’𑀢𑀺𑀧𑀺 𑀧𑀸𑀞𑁄. 𑀧𑀭𑁂𑀢𑀺 𑀧𑀭𑀲𑁆𑀫𑀺𑀁 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁂. 𑀲𑀢𑀪𑀸𑀕𑁄𑀢𑀺 𑀅𑀦𑁂𑀓𑀲𑀢𑀪𑀸𑀕𑁄 𑀆𑀬𑀢𑀺𑀁 𑀪𑀯𑀺𑀲𑁆𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀸𑀡𑀺𑀚𑁂𑀦 𑀓𑀻𑀢𑀪𑀡𑁆𑀟𑀁 𑀢𑀢𑁆𑀣𑁂𑀯 𑀅𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀢𑀣𑀸𑀭𑀽𑀧𑁂 𑀤𑁂𑀲𑁂 𑀓𑀸𑀮𑁂 𑀘 𑀯𑀺𑀓𑁆𑀓𑀺𑀡𑀺𑀬𑀫𑀸𑀦𑀁 𑀩𑀳𑀼𑀁 𑀉𑀤𑀬𑀁 𑀯𑀺𑀧𑀼𑀮𑀁 𑀨𑀮𑀁 𑀳𑁄𑀢𑀺, 𑀢𑀣𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀢𑁆𑀢𑀦𑀸 𑀅𑀦𑀼𑀧𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀲𑁆𑀫𑀺𑀁 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀅𑀦𑁂𑀓𑀲𑀢𑀪𑀸𑀕𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑀸 ¶ 𑀅𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀧𑀭𑀲𑁆𑀲 𑀤𑀸𑀢𑀩𑁆𑀩𑀫𑁂𑀯𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀢𑀕𑀼𑀡𑀸 ¶ 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀳𑀲𑁆𑀲𑀕𑀼𑀡𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀯𑀺𑀢𑁆𑀣𑀸𑀭𑁄. 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀘𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁 𑀤𑀸𑀦𑀲𑀁𑀯𑀺𑀪𑀸𑀕𑀲𑁆𑀲 𑀯𑀺𑀧𑀸𑀓𑀁, 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀦 𑀅𑀤𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀦 𑀘 𑀦𑁂𑀲𑀁 𑀫𑀘𑁆𑀙𑁂𑀭𑀫𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬. 𑀬𑁄𑀧𑀺 𑀦𑁂𑀲𑀁 𑀅𑀲𑁆𑀲 𑀘𑀭𑀺𑀫𑁄 𑀆𑀮𑁄𑀧𑁄 𑀘𑀭𑀺𑀫𑀁 𑀓𑀩𑀴𑀁, 𑀢𑀢𑁄𑀧𑀺 𑀦 𑀅𑀲𑀁𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺 (𑀇𑀢𑀺𑀯𑀼. 𑁨𑁬).

𑁫𑁦. 𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸𑀢𑀺 𑀏𑀢𑀁 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀲𑀗𑁆𑀔𑀸𑀢𑀜𑁆𑀘𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀜𑁆𑀘 ¶ 𑀅𑀢𑁆𑀣𑀯𑀲𑀁 𑀓𑀸𑀭𑀡𑀁 𑀚𑀸𑀦𑀺𑀢𑁆𑀯𑀸. 𑀦 𑀧𑀝𑀺𑀓𑁆𑀓𑀫𑀸𑀫𑀺 𑀤𑀸𑀦𑀢𑁄𑀢𑀺 𑀤𑀸𑀦𑀧𑀸𑀭𑀫𑀺𑀢𑁄 𑀈𑀲𑀓𑀫𑁆𑀧𑀺 𑀦 𑀦𑀺𑀯𑀢𑁆𑀢𑀸𑀫𑀺 𑀅𑀪𑀺𑀓𑁆𑀓𑀫𑀸𑀫𑀺 𑀏𑀯. 𑀓𑀺𑀫𑀢𑁆𑀣𑀁? 𑀲𑀫𑁆𑀩𑁄𑀥𑀺𑀫𑀦𑀼𑀧𑀢𑁆𑀢𑀺𑀬𑀸𑀢𑀺 𑀲𑀫𑁆𑀩𑁄𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀢𑁆𑀢𑀺𑀬𑀢𑁆𑀣𑀁, 𑀅𑀥𑀺𑀕𑀦𑁆𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀚𑀦𑁂𑀦 𑀧𑀺𑀢𑀭𑀺 𑀘𑀡𑁆𑀟𑀸𑀮𑀕𑀸𑀫𑀁 𑀧𑀯𑁂𑀲𑀺𑀢𑁂 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀭𑀺𑀩𑁆𑀩𑀬𑀁 𑀤𑀸𑀧𑁂𑀲𑀺 𑀦𑀺𑀯𑀸𑀲𑀦𑀸𑀦𑀺 𑀧𑀸𑀭𑀼𑀧𑀦𑀸𑀦𑀺 𑀘. 𑀲𑁄𑀧𑀺 𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀅𑀮𑀪𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁂 𑀉𑀬𑁆𑀬𑀸𑀦𑀓𑀻𑀴𑀸𑀤𑀺𑀅𑀢𑁆𑀣𑀁 𑀩𑀳𑀺𑀕𑀢𑁂 𑀉𑀧𑀲𑀗𑁆𑀓𑀫𑀢𑀺, 𑀧𑀼𑀢𑁆𑀢𑀲𑀜𑁆𑀜𑀸𑀬 𑀧𑀦 𑀦 𑀯𑀦𑁆𑀤𑀢𑀺, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀓𑀭𑁄𑀢𑀺, ‘‘𑀘𑀺𑀭𑀁 𑀚𑀻𑀯, 𑀲𑀸𑀫𑀻’’𑀢𑀺 𑀯𑀤𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀤𑀺𑀝𑁆𑀞𑀤𑀺𑀯𑀲𑁂 𑀅𑀢𑀺𑀭𑁂𑀓𑀲𑀫𑁆𑀫𑀸𑀦𑀁 𑀓𑀭𑁄𑀢𑀺. 𑀲𑁄 𑀏𑀯𑀁 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀧𑀭𑀺𑀲𑁄 𑀤𑁂𑀯𑀮𑁄𑀓𑀁 𑀧𑀽𑀭𑁂𑀲𑀺.

𑀢𑀤𑀸 𑀔𑀡𑁆𑀟𑀳𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀕𑁄𑀢𑀫𑀻 𑀤𑁂𑀯𑀻 𑀫𑀳𑀸𑀫𑀸𑀬𑀸, 𑀘𑀦𑁆𑀤𑀸 𑀭𑀸𑀚𑀥𑀻𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀯𑀸𑀲𑀼𑀮𑁄 𑀭𑀸𑀳𑀼𑀮𑁄, 𑀲𑁂𑀮𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀲𑀽𑀭𑁄 𑀫𑀳𑀸𑀓𑀲𑁆𑀲𑀧𑁄, 𑀪𑀤𑁆𑀤𑀲𑁂𑀦𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀲𑀽𑀭𑀺𑀬𑀓𑀼𑀫𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀘𑀦𑁆𑀤𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀤𑀸 𑀔𑀡𑁆𑀟𑀳𑀸𑀮𑀲𑁆𑀲 𑀓𑀓𑁆𑀔𑀴𑀨𑀭𑀼𑀲𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀝𑁆𑀝𑀲𑁆𑀲 𑀯𑀺𑀦𑀺𑀘𑁆𑀙𑀬𑁄, 𑀅𑀢𑁆𑀢𑀸𑀦𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲𑁂𑀯 𑀔𑀡𑁆𑀟𑀳𑀸𑀮𑀲𑁆𑀲 𑀢𑀣𑀸 𑀬𑀜𑁆𑀜𑀯𑀺𑀥𑀸𑀦𑀁 𑀚𑀸𑀦𑀺𑀢𑁆𑀯𑀸𑀧𑀺 𑀢𑀲𑁆𑀲 𑀉𑀧𑀭𑀺 𑀘𑀺𑀢𑁆𑀢𑀧𑁆𑀧𑀓𑁄𑀧𑀸𑀪𑀸𑀯𑁄, 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼 𑀲𑀢𑁆𑀢𑀼 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄𑀧𑀺 ‘‘𑀫𑀸𑀤𑀺𑀲𑀲𑁆𑀲 𑀦𑀸𑀫 𑀕𑀭𑀽𑀳𑀺 𑀯𑀺𑀭𑁄𑀥𑁄 𑀦 𑀬𑀼𑀢𑁆𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀧𑀼𑀭𑀺𑀲𑀧𑀲𑀼𑀁 𑀓𑀢𑁆𑀯𑀸 𑀖𑀸𑀢𑀸𑀧𑁂𑀢𑀼𑀓𑀸𑀫𑀲𑁆𑀲 𑀧𑀺𑀢𑀼 𑀆𑀡𑀸𑀬𑀁 𑀅𑀯𑀝𑁆𑀞𑀸𑀦𑀁, 𑀓𑁄𑀲𑀺𑀬𑀸 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀲𑀻𑀲𑀁 ¶ 𑀙𑀺𑀦𑁆𑀤𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑁂 ¶ 𑀧𑀼𑀭𑁄𑀳𑀺𑀢𑁂 𑀅𑀢𑁆𑀢𑀦𑁄 𑀧𑀺𑀢𑀭𑀺 𑀧𑀼𑀢𑁆𑀢𑁂 𑀲𑀩𑁆𑀩𑀲𑀢𑁆𑀢𑁂𑀲𑀼 𑀘 𑀫𑁂𑀢𑁆𑀢𑀸𑀨𑀭𑀡𑁂𑀦 𑀲𑀫𑀘𑀺𑀢𑁆𑀢𑀢𑀸, 𑀫𑀳𑀸𑀚𑀦𑁂 𑀧𑀺𑀢𑀭𑀁 𑀫𑀸𑀭𑁂𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑁂 𑀲𑀬𑀁 𑀧𑀮𑀺𑀲𑁆𑀲𑀚𑀺𑀢𑁆𑀯𑀸 𑀢𑀲𑁆𑀲 𑀚𑀻𑀯𑀺𑀢𑀤𑀸𑀦𑀜𑁆𑀘, 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 𑀫𑀳𑀸𑀤𑀸𑀦𑀁 𑀤𑀤𑀢𑁄𑀧𑀺 𑀤𑀸𑀦𑁂𑀦 𑀅𑀢𑀺𑀢𑁆𑀢𑀪𑀸𑀯𑁄, 𑀫𑀳𑀸𑀚𑀦𑁂𑀦 𑀘𑀡𑁆𑀟𑀸𑀮𑁂𑀲𑀼 𑀯𑀸𑀲𑀸𑀧𑀺𑀢𑀲𑁆𑀲 𑀧𑀺𑀢𑀼 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀢𑁆𑀯𑀸 𑀧𑁄𑀲𑀦𑀁, 𑀫𑀳𑀸𑀚𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺.

𑀘𑀦𑁆𑀤𑀓𑀼𑀫𑀸𑀭𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀺𑀯𑀺𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁫𑁧. 𑀅𑀝𑁆𑀞𑀫𑁂 ¶ 𑀅𑀭𑀺𑀝𑁆𑀞𑀲𑀯𑁆𑀳𑀬𑁂 𑀦𑀕𑀭𑁂𑀢𑀺 𑀅𑀭𑀺𑀝𑁆𑀞𑀧𑀼𑀭𑀦𑀸𑀫𑀓𑁂 𑀦𑀕𑀭𑁂. 𑀲𑀺𑀯𑀺 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄𑀢𑀺 𑀲𑀺𑀯𑀻𑀢𑀺 𑀕𑁄𑀢𑁆𑀢𑀢𑁄 𑀏𑀯𑀁𑀦𑀸𑀫𑀓𑁄 𑀭𑀸𑀚𑀸 𑀅𑀳𑁄𑀲𑀺.

𑀅𑀢𑀻𑀢𑁂 𑀓𑀺𑀭 𑀲𑀺𑀯𑀺𑀭𑀝𑁆𑀞𑁂 𑀅𑀭𑀺𑀝𑁆𑀞𑀧𑀼𑀭𑀦𑀕𑀭𑁂 𑀲𑀺𑀯𑀺𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. ‘‘𑀲𑀺𑀯𑀺𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀫𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀆𑀕𑀦𑁆𑀢𑁆𑀯𑀸 𑀧𑀺𑀢𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀳𑀼𑀢𑁆𑀯𑀸 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀅𑀝𑁆𑀞𑀫𑀻𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀲𑀼 𑀲𑀬𑀁 𑀤𑀸𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀤𑀸𑀦𑀕𑁆𑀕𑀁 𑀑𑀮𑁄𑀓𑁂𑀢𑀺.

𑀲𑁄 𑀏𑀓𑀤𑀸 𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀸𑀢𑁄𑀯 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑀸 𑀤𑀺𑀦𑁆𑀦𑀤𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀩𑀸𑀳𑀺𑀭𑀯𑀢𑁆𑀣𑀼𑀁 𑀅𑀢𑁆𑀢𑀦𑀸 𑀅𑀤𑀺𑀦𑁆𑀦𑀁 𑀦𑀸𑀫 𑀅𑀤𑀺𑀲𑁆𑀯𑀸 ‘‘𑀦 𑀫𑁂 𑀩𑀸𑀳𑀺𑀭𑀓𑀤𑀸𑀦𑀁 𑀢𑀣𑀸 𑀘𑀺𑀢𑁆𑀢𑀁 𑀢𑁄𑀲𑁂𑀢𑀺, 𑀬𑀣𑀸 𑀅𑀚𑁆𑀛𑀢𑁆𑀢𑀺𑀓𑀤𑀸𑀦𑀁, 𑀅𑀳𑁄 𑀯𑀢 𑀫𑀫 𑀤𑀸𑀦𑀲𑀸𑀮𑀁 𑀕𑀢𑀓𑀸𑀮𑁂 𑀓𑁄𑀘𑀺 𑀬𑀸𑀘𑀓𑁄 𑀩𑀸𑀳𑀺𑀭𑀯𑀢𑁆𑀣𑀼𑀁 𑀅𑀬𑀸𑀘𑀺𑀢𑁆𑀯𑀸 ¶ 𑀅𑀚𑁆𑀛𑀢𑁆𑀢𑀺𑀓𑀫𑁂𑀯 𑀬𑀸𑀘𑁂𑀬𑁆𑀬, 𑀲𑀘𑁂 𑀳𑀺 𑀫𑁂 𑀓𑁄𑀘𑀺 𑀲𑀭𑀻𑀭𑁂 𑀫𑀁𑀲𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀲𑀻𑀲𑀁 𑀯𑀸 𑀳𑀤𑀬𑀫𑀁𑀲𑀁 𑀯𑀸 𑀅𑀓𑁆𑀔𑀻𑀦𑀺 𑀯𑀸 𑀉𑀧𑀟𑁆𑀠𑀲𑀭𑀻𑀭𑀁 𑀯𑀸 𑀲𑀓𑀮𑀫𑁂𑀯 𑀯𑀸 𑀅𑀢𑁆𑀢𑀪𑀸𑀯𑀁 𑀤𑀸𑀲𑀪𑀸𑀯𑁂𑀦 𑀬𑀸𑀘𑁂𑀬𑁆𑀬, 𑀢𑀁𑀢𑀤𑁂𑀯𑀲𑁆𑀲 ¶ 𑀅𑀥𑀺𑀧𑁆𑀧𑀸𑀬𑀁 𑀧𑀽𑀭𑁂𑀦𑁆𑀢𑁄 𑀤𑀸𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀧𑀸𑀴𑀺𑀬𑀁 𑀧𑀦 𑀅𑀓𑁆𑀔𑀻𑀦𑀁 𑀏𑀯 𑀯𑀲𑁂𑀦 𑀆𑀕𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸’’.

𑁫𑁨.

‘‘𑀬𑀁𑀓𑀺𑀜𑁆𑀘𑀺 𑀫𑀸𑀦𑀼𑀲𑀁 𑀤𑀸𑀦𑀁, 𑀅𑀤𑀺𑀦𑁆𑀦𑀁 𑀫𑁂 𑀦 𑀯𑀺𑀚𑁆𑀚𑀢𑀺;

𑀬𑁄𑀧𑀺 𑀬𑀸𑀘𑁂𑀬𑁆𑀬 𑀫𑀁 𑀘𑀓𑁆𑀔𑀼𑀁, 𑀤𑀤𑁂𑀬𑁆𑀬𑀁 𑀅𑀯𑀺𑀓𑀫𑁆𑀧𑀺𑀢𑁄’’𑀢𑀺.

𑀢𑀢𑁆𑀣 𑀫𑀸𑀦𑀼𑀲𑀁 𑀤𑀸𑀦𑀦𑁆𑀢𑀺 𑀧𑀓𑀢𑀺𑀫𑀦𑀼𑀲𑁆𑀲𑁂𑀳𑀺 𑀤𑀸𑀢𑀩𑁆𑀩𑀤𑀸𑀦𑀁 𑀅𑀦𑁆𑀦𑀧𑀸𑀦𑀸𑀤𑀺. 𑀏𑀯𑀁 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀉𑀴𑀸𑀭𑁂 𑀤𑀸𑀦𑀚𑁆𑀛𑀸𑀲𑀬𑁂 𑀉𑀧𑁆𑀧𑀦𑁆𑀦𑁂 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀲𑁆𑀲 𑀓𑀸𑀭𑀡𑀁 𑀆𑀯𑀚𑁆𑀚𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀤𑀺𑀲𑁆𑀯𑀸 ‘‘𑀲𑀺𑀯𑀺𑀭𑀸𑀚𑀸 𑀅𑀚𑁆𑀚 𑀲𑀫𑁆𑀧𑀢𑁆𑀢𑀬𑀸𑀘𑀓𑀸 𑀘𑀓𑁆𑀔𑀽𑀦𑀺 𑀘𑁂 𑀬𑀸𑀘𑀦𑁆𑀢𑀺, 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀦𑁂𑀲𑀁 𑀤𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀻’’𑀢𑀺 𑀲𑀓𑁆𑀓𑁄 𑀤𑁂𑀯𑀧𑀭𑀺𑀲𑀸𑀬 ¶ 𑀯𑀢𑁆𑀯𑀸 ‘‘𑀲𑁄 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀢𑀁 𑀤𑀸𑀢𑀼𑀁, 𑀉𑀤𑀸𑀳𑀼 𑀦𑁄𑀢𑀺 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑁂 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁂 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁂 𑀤𑀸𑀦𑀕𑁆𑀕𑀁 𑀕𑀘𑁆𑀙𑀦𑁆𑀢𑁂 𑀚𑀭𑀸𑀚𑀺𑀡𑁆𑀡𑁄 𑀅𑀦𑁆𑀥𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀲 𑀘𑀓𑁆𑀔𑀼𑀧𑀣𑁂 𑀏𑀓𑀲𑁆𑀫𑀺𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀉𑀪𑁄 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀭𑀸𑀚𑀸𑀦𑀁 𑀚𑀬𑀸𑀧𑁂𑀢𑁆𑀯𑀸 𑀞𑀺𑀢𑁄 𑀩𑁄𑀥𑀺𑀲𑀢𑁆𑀢𑁂𑀦 𑀢𑀤𑀪𑀺𑀫𑀼𑀔𑀁 𑀯𑀸𑀭𑀡𑀁 𑀧𑁂𑀲𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀇𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀢𑀯 𑀤𑀸𑀦𑀚𑁆𑀛𑀸𑀲𑀬𑀁 𑀦𑀺𑀲𑁆𑀲𑀸𑀬 𑀲𑀫𑀼𑀕𑁆𑀕𑀢𑁂𑀦 𑀓𑀺𑀢𑁆𑀢𑀺𑀖𑁄𑀲𑁂𑀦 𑀲𑀓𑀮𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀦𑀺𑀭𑀦𑁆𑀢𑀭𑀁 𑀨𑀼𑀝𑁄, 𑀅𑀳𑀜𑁆𑀘 𑀅𑀦𑁆𑀥𑁄, 𑀢𑀲𑁆𑀫𑀸 𑀢𑀁 𑀬𑀸𑀘𑀸𑀫𑀻’’𑀢𑀺 𑀉𑀧𑀘𑀸𑀭𑀯𑀲𑁂𑀦 𑀏𑀓𑀁 𑀘𑀓𑁆𑀔𑀼𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫𑁩.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀲𑁆𑀲𑀭𑁄;

𑀦𑀺𑀲𑀺𑀦𑁆𑀦𑁄 𑀤𑁂𑀯𑀧𑀭𑀺𑀲𑀸𑀬, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁫𑁪.

‘‘𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂, 𑀲𑀺𑀯𑀺𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀯𑀺𑀥𑀁 𑀤𑀸𑀦𑀁, 𑀅𑀤𑁂𑀬𑁆𑀬𑀁 𑀲𑁄 𑀦 𑀧𑀲𑁆𑀲𑀢𑀺.

𑁫𑁫.

‘‘𑀢𑀣𑀁 𑀦𑀼 𑀯𑀺𑀢𑀣𑀁 𑀦𑁂𑀢𑀁, 𑀳𑀦𑁆𑀤 𑀯𑀻𑀫𑀁𑀲𑀬𑀸𑀫𑀺 𑀢𑀁;

𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀬𑁆𑀬𑀸𑀣, 𑀬𑀸𑀯 𑀚𑀸𑀦𑀸𑀫𑀺 𑀢𑀁 𑀫𑀦𑀁.

𑁫𑁬.

‘‘𑀧𑀯𑁂𑀥𑀫𑀸𑀦𑁄 𑀧𑀮𑀺𑀢𑀲𑀺𑀭𑁄, 𑀯𑀮𑀺𑀕𑀢𑁆𑀢𑁄 𑀚𑀭𑀸𑀢𑀼𑀭𑁄;

𑀅𑀦𑁆𑀥𑀯𑀡𑁆𑀡𑁄𑀯 𑀳𑀼𑀢𑁆𑀯𑀸𑀦, 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺.

𑁫𑁭.

‘‘𑀲𑁄 ¶ 𑀢𑀤𑀸 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀯𑀸𑀫𑀁 𑀤𑀓𑁆𑀔𑀺𑀡𑀩𑀸𑀳𑀼 𑀘;

𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁫𑁮.

‘‘‘𑀬𑀸𑀘𑀸𑀫𑀺 𑀢𑀁 𑀫𑀳𑀸𑀭𑀸𑀚, 𑀥𑀫𑁆𑀫𑀺𑀓 𑀭𑀝𑁆𑀞𑀯𑀟𑁆𑀠𑀦;

𑀢𑀯 𑀤𑀸𑀦𑀭𑀢𑀸 𑀓𑀺𑀢𑁆𑀢𑀺, 𑀉𑀕𑁆𑀕𑀢𑀸 𑀤𑁂𑀯𑀫𑀸𑀦𑀼𑀲𑁂.

𑁫𑁯.

‘‘‘𑀉𑀪𑁄𑀧𑀺 𑀦𑁂𑀢𑁆𑀢𑀸 𑀦𑀬𑀦𑀸, 𑀅𑀦𑁆𑀥𑀸 𑀉𑀧𑀳𑀢𑀸 𑀫𑀫;

𑀏𑀓𑀁 𑀫𑁂 𑀦𑀬𑀦𑀁 𑀤𑁂𑀳𑀺, 𑀢𑁆𑀯𑀫𑁆𑀧𑀺 𑀏𑀓𑁂𑀦 𑀬𑀸𑀧𑀬𑀸’’’𑀢𑀺.

𑀢𑀢𑁆𑀣 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀯𑀺𑀥𑀁 𑀤𑀸𑀦𑀦𑁆𑀢𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀁 𑀯𑀺𑀯𑀺𑀥𑀁 𑀤𑀸𑀦𑀁 𑀘𑀺𑀦𑁆𑀢𑁂𑀦𑁆𑀢𑁄, 𑀆𑀯𑀚𑁆𑀚𑁂𑀦𑁆𑀢𑁄 𑀤𑀸𑀦𑀁 𑀯𑀸 𑀅𑀢𑁆𑀢𑀦𑀸 𑀤𑀺𑀦𑁆𑀦𑀁 𑀯𑀺𑀯𑀺𑀥𑀁 𑀩𑀸𑀳𑀺𑀭𑀁 𑀤𑁂𑀬𑁆𑀬𑀥𑀫𑁆𑀫𑀁 𑀘𑀺𑀦𑁆𑀢𑁂𑀦𑁆𑀢𑁄. 𑀅𑀤𑁂𑀬𑁆𑀬𑀁 𑀲𑁄 𑀦 𑀧𑀲𑁆𑀲𑀢𑀻𑀢𑀺 𑀩𑀸𑀳𑀺𑀭𑀁 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀫𑁆𑀧𑀺 𑀅𑀤𑁂𑀬𑁆𑀬𑀁 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦 𑀧𑀲𑁆𑀲𑀢𑀺, ‘‘𑀘𑀓𑁆𑀔𑀽𑀦𑀺𑀧𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀻𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀁 𑀦𑀼 𑀯𑀺𑀢𑀣𑀁 𑀦𑁂𑀢𑀦𑁆𑀢𑀺 𑀏𑀢𑀁 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀦𑁄𑀧𑀺 ¶ 𑀅𑀤𑁂𑀬𑁆𑀬𑀲𑁆𑀲 𑀅𑀤𑀲𑁆𑀲𑀦𑀁 𑀤𑁂𑀬𑁆𑀬𑀪𑀸𑀯𑁂𑀦𑁂𑀯 𑀤𑀲𑁆𑀲𑀦𑀁 𑀘𑀺𑀦𑁆𑀢𑀦𑀁 𑀲𑀘𑁆𑀘𑀁 𑀦𑀼 𑀔𑁄, 𑀉𑀤𑀸𑀳𑀼, 𑀅𑀲𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀢𑀤𑀸 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀯𑀸𑀫𑀁 𑀤𑀓𑁆𑀔𑀺𑀡𑀩𑀸𑀳𑀼 𑀘𑀸𑀢𑀺 𑀯𑀸𑀫𑀩𑀸𑀳𑀼𑀁 𑀤𑀓𑁆𑀔𑀺𑀡𑀩𑀸𑀳𑀼𑀜𑁆𑀘 𑀢𑀤𑀸 𑀧𑀕𑁆𑀕𑀳𑁂𑀢𑁆𑀯𑀸, 𑀉𑀪𑁄 𑀩𑀸𑀳𑀽 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀭𑀝𑁆𑀞𑀯𑀟𑁆𑀠𑀦𑀸𑀢𑀺 𑀭𑀝𑁆𑀞𑀯𑀟𑁆𑀠𑀻𑀓𑀭. 𑀢𑁆𑀯𑀫𑁆𑀧𑀺 𑀏𑀓𑁂𑀦 𑀬𑀸𑀧𑀬𑀸𑀢𑀺 𑀏𑀓𑁂𑀦 𑀘𑀓𑁆𑀔𑀼𑀦𑀸 𑀲𑀫𑀯𑀺𑀲𑀫𑀁 𑀧𑀲𑁆𑀲𑀦𑁆𑀢𑁄 𑀲𑀓𑀁 𑀅𑀢𑁆𑀢𑀪𑀸𑀯𑀁 𑀢𑁆𑀯𑀁 𑀬𑀸𑀧𑁂𑀳𑀺, 𑀅𑀳𑀫𑁆𑀧𑀺 𑀪𑀯𑀢𑁄 𑀮𑀤𑁆𑀥𑁂𑀦 𑀏𑀓𑁂𑀦 𑀬𑀸𑀧𑁂𑀫𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀇𑀤𑀸𑀦𑁂𑀯𑀸𑀳𑀁 𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑁄, 𑀅𑀬𑀜𑁆𑀘 𑀫𑁂 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀬 𑀘𑀓𑁆𑀔𑀼𑀁 𑀬𑀸𑀘𑀢𑀺, 𑀅𑀳𑁄 𑀯𑀢 𑀫𑁂 𑀮𑀸𑀪𑀸, 𑀅𑀚𑁆𑀚 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀯𑀢 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀅𑀳𑁄𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁬𑁦.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀓𑀢𑀜𑁆𑀚𑀮𑀻 𑀯𑁂𑀤𑀚𑀸𑀢𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁬𑁧.

‘‘‘𑀇𑀤𑀸𑀦𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀧𑀸𑀲𑀸𑀤𑀢𑁄 𑀇𑀥𑀸𑀕𑀢𑁄;

𑀢𑁆𑀯𑀁 𑀫𑀫 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀦𑁂𑀢𑁆𑀢𑀁 𑀬𑀸𑀘𑀺𑀢𑀼𑀫𑀸𑀕𑀢𑁄.

𑁬𑁨.

‘‘‘𑀅𑀳𑁄 ¶ 𑀫𑁂 𑀫𑀸𑀦𑀲𑀁 𑀲𑀺𑀤𑁆𑀥𑀁, 𑀲𑀗𑁆𑀓𑀧𑁆𑀧𑁄 𑀧𑀭𑀺𑀧𑀽𑀭𑀺𑀢𑁄;

𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀤𑀸𑀦𑀯𑀭𑀁, 𑀅𑀚𑁆𑀚 𑀤𑀲𑁆𑀲𑀸𑀫𑀺 𑀬𑀸𑀘𑀓𑁂’’’𑀢𑀺.

𑀢𑀢𑁆𑀣 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀭𑀽𑀧𑀥𑀭𑀲𑁆𑀲 𑀲𑀓𑁆𑀓𑀲𑁆𑀲. 𑀳𑀝𑁆𑀞𑁄𑀢𑀺 𑀢𑀼𑀝𑁆𑀞𑁄. 𑀲𑀁𑀯𑀺𑀕𑁆𑀕𑀫𑀸𑀦𑀲𑁄𑀢𑀺 𑀫𑀫 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀯𑀺𑀬 𑀇𑀫𑀺𑀦𑀸 𑀩𑁆𑀭𑀸𑀳𑁆𑀫𑀡𑁂𑀦 𑀘𑀓𑁆𑀔𑀼 𑀬𑀸𑀘𑀺𑀢𑀁, 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁄 𑀯𑀢𑀫𑁆𑀳𑀻𑀢𑀺 𑀲𑀁𑀯𑀺𑀕𑁆𑀕𑀘𑀺𑀢𑁆𑀢𑁄. 𑀯𑁂𑀤𑀚𑀸𑀢𑁄𑀢𑀺 𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑁄. 𑀅𑀩𑁆𑀭𑀯𑀺𑀦𑁆𑀢𑀺 𑀅𑀪𑀸𑀲𑀺𑀁. 𑀫𑀸𑀦𑀲𑀦𑁆𑀢𑀺 𑀫𑀦𑀲𑀺 𑀪𑀯𑀁 𑀫𑀸𑀦𑀲𑀁, 𑀤𑀸𑀦𑀚𑁆𑀛𑀸𑀲𑀬𑁄, ‘‘𑀘𑀓𑁆𑀔𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀤𑀸𑀦𑀚𑁆𑀛𑀸𑀲𑀬𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀓𑀧𑁆𑀧𑁄𑀢𑀺 𑀫𑀦𑁄𑀭𑀣𑁄. 𑀧𑀭𑀺𑀧𑀽𑀭𑀺𑀢𑁄𑀢𑀺 𑀧𑀭𑀺𑀧𑀼𑀡𑁆𑀡𑁄.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀫 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀯𑀺𑀬 𑀤𑀼𑀘𑁆𑀘𑀚𑀫𑁆𑀧𑀺 𑀘𑀓𑁆𑀔𑀼𑀁 𑀫𑀁 𑀬𑀸𑀘𑀢𑀺, 𑀲𑀺𑀬𑀸 𑀦𑀼 𑀔𑁄 𑀓𑀸𑀬𑀘𑀺 𑀤𑁂𑀯𑀢𑀸𑀬 𑀅𑀦𑀼𑀲𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺. 𑀢𑁂𑀦𑀸𑀳 𑀪𑀕𑀯𑀸 𑀚𑀸𑀢𑀓𑀤𑁂𑀲𑀦𑀸𑀬𑀁 𑁋

‘‘𑀓𑁂𑀦𑀸𑀦𑀼𑀲𑀺𑀝𑁆𑀞𑁄 ¶ 𑀇𑀥𑀫𑀸𑀕𑀢𑁄𑀲𑀺, 𑀯𑀦𑀺𑀩𑁆𑀩𑀓 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑀼𑀁;

𑀲𑀼𑀤𑀼𑀘𑁆𑀘𑀚𑀁 ¶ 𑀬𑀸𑀘𑀲𑀺 𑀉𑀢𑁆𑀢𑀫𑀗𑁆𑀕𑀁, 𑀬𑀫𑀸𑀳𑀼 𑀦𑁂𑀢𑁆𑀢𑀁 𑀧𑀼𑀭𑀺𑀲𑁂𑀦 𑀤𑀼𑀘𑁆𑀘𑀚’’𑀦𑁆𑀢𑀺.(𑀚𑀸. 𑁧.𑁧𑁫.𑁫𑁩);

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀭𑀽𑀧𑀥𑀭𑁄 𑀲𑀓𑁆𑀓𑁄 𑀆𑀳 𑁋

‘‘𑀬𑀫𑀸𑀳𑀼 𑀤𑁂𑀯𑁂𑀲𑀼 𑀲𑀼𑀚𑀫𑁆𑀧𑀢𑀻𑀢𑀺, 𑀫𑀖𑀯𑀸𑀢𑀺 𑀦𑀁 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂;

𑀢𑁂𑀦𑀸𑀦𑀼𑀲𑀺𑀝𑁆𑀞𑁄 𑀇𑀥𑀫𑀸𑀕𑀢𑁄𑀲𑁆𑀫𑀺, 𑀯𑀦𑀺𑀩𑁆𑀩𑀓𑁄 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑀼𑀁.

‘‘𑀯𑀦𑀺𑀩𑁆𑀩𑀢𑁄 𑀫𑀬𑁆𑀳𑀁 𑀯𑀦𑀺𑀁 𑀅𑀦𑀼𑀢𑁆𑀢𑀭𑀁, 𑀤𑀤𑀸𑀳𑀺 𑀢𑁂 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑁄;

𑀤𑀤𑀸𑀳𑀺 𑀫𑁂 𑀘𑀓𑁆𑀔𑀼𑀧𑀣𑀁 𑀅𑀦𑀼𑀢𑁆𑀢𑀭𑀁, 𑀬𑀫𑀸𑀳𑀼 𑀦𑁂𑀢𑁆𑀢𑀁 𑀧𑀼𑀭𑀺𑀲𑁂𑀦 𑀤𑀼𑀘𑁆𑀘𑀚’’𑀦𑁆𑀢𑀺. (𑀚𑀸. 𑁧.𑁧𑁫.𑁫𑁪-𑁫𑁫);

𑀫𑀳𑀸𑀲𑀢𑁆𑀢𑁄 𑀆𑀳 𑁋

‘‘𑀬𑁂𑀦 𑀅𑀢𑁆𑀣𑁂𑀦 𑀆𑀕𑀘𑁆𑀙𑀺, 𑀬𑀫𑀢𑁆𑀣𑀫𑀪𑀺𑀧𑀢𑁆𑀣𑀬𑀁;

𑀢𑁂 𑀢𑁂 𑀇𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀮𑀪 𑀘𑀓𑁆𑀔𑀽𑀦𑀺 𑀩𑁆𑀭𑀸𑀳𑁆𑀫𑀡.

‘‘𑀏𑀓𑀁 ¶ 𑀢𑁂 𑀬𑀸𑀘𑀫𑀸𑀦𑀲𑁆𑀲, 𑀉𑀪𑀬𑀸𑀦𑀺 𑀤𑀤𑀸𑀫𑀳𑀁;

𑀲 𑀘𑀓𑁆𑀔𑀼𑀫𑀸 𑀕𑀘𑁆𑀙 𑀚𑀦𑀲𑁆𑀲 𑀧𑁂𑀓𑁆𑀔𑀢𑁄,

𑀬𑀤𑀺𑀘𑁆𑀙𑀲𑁂 𑀢𑁆𑀯𑀁 𑀢𑀤 𑀢𑁂 𑀲𑀫𑀺𑀚𑁆𑀛𑀢𑀽’’𑀢𑀺. (𑀚𑀸. 𑁧.𑁧𑁫.𑁫𑁬-𑁫𑁭);

𑀢𑀢𑁆𑀣 𑀯𑀦𑀺𑀩𑁆𑀩𑀓𑀸𑀢𑀺 𑀢𑀁 𑀆𑀮𑀧𑀢𑀺. 𑀘𑀓𑁆𑀔𑀼𑀧𑀣𑀸𑀦𑀻𑀢𑀺 𑀤𑀲𑁆𑀲𑀦𑀲𑁆𑀲 𑀧𑀣𑀪𑀸𑀯𑀢𑁄 𑀘𑀓𑁆𑀔𑀽𑀦𑀫𑁂𑀯𑁂𑀢𑀁 𑀦𑀸𑀫𑀁. 𑀬𑀫𑀸𑀳𑀽𑀢𑀺 𑀬𑀁 𑀮𑁄𑀓𑁂 ‘‘𑀤𑀼𑀘𑁆𑀘𑀚’’𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀯𑀦𑀺𑀩𑁆𑀩𑀢𑁄𑀢𑀺 𑀬𑀸𑀘𑀦𑁆𑀢𑀲𑁆𑀲. 𑀯𑀦𑀺𑀦𑁆𑀢𑀺 𑀬𑀸𑀘𑀦𑀁. 𑀢𑁂 𑀢𑁂𑀢𑀺 𑀢𑁂 𑀢𑀯 𑀢𑀲𑁆𑀲 𑀅𑀦𑁆𑀥𑀲𑁆𑀲 𑀲𑀗𑁆𑀓𑀧𑁆𑀧𑀸. 𑀲 𑀘𑀓𑁆𑀔𑀼𑀫𑀸𑀢𑀺 𑀲𑁄 𑀢𑁆𑀯𑀁 𑀫𑀫 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀳𑀼𑀢𑁆𑀯𑀸. 𑀢𑀤 𑀢𑁂 𑀲𑀫𑀺𑀚𑁆𑀛𑀢𑀽𑀢𑀺 𑀬𑀁 𑀢𑁆𑀯𑀁 𑀫𑀫 𑀲𑀦𑁆𑀢𑀺𑀓𑀸 𑀇𑀘𑁆𑀙𑀲𑀺, 𑀢𑀁 𑀢𑁂 𑀲𑀫𑀺𑀚𑁆𑀛𑀢𑀽𑀢𑀺.

𑀭𑀸𑀚𑀸 𑀏𑀢𑁆𑀢𑀓𑀁 𑀓𑀣𑁂𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀲𑀓𑁆𑀓𑁂𑀦 𑀅𑀦𑀼𑀲𑀺𑀝𑁆𑀞𑁄 𑀇𑀥𑀸𑀕𑀢𑁄𑀲𑁆𑀫𑀻𑀢𑀺 𑀪𑀡𑀢𑀺, 𑀦𑀽𑀦 𑀇𑀫𑀲𑁆𑀲 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀘𑀓𑁆𑀔𑀼 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀇𑀥𑁂𑀯 𑀫𑀬𑀸 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀸𑀢𑀼𑀁 𑀅𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀤𑀸𑀬 𑀅𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀺𑀯𑀓𑀁 𑀦𑀸𑀫 𑀯𑁂𑀚𑁆𑀚𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀅𑀣 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀭𑀸𑀚𑀸 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀢𑀼𑀓𑀸𑀫𑁄’’𑀢𑀺 𑀲𑀓𑀮𑀦𑀕𑀭𑁂 𑀏𑀓𑀓𑁄𑀮𑀸𑀳𑀮𑀁 ¶ 𑀅𑀳𑁄𑀲𑀺. 𑀅𑀣 𑀦𑀁 𑀭𑀜𑁆𑀜𑁄 𑀜𑀸𑀢𑀺𑀲𑁂𑀦𑀸𑀧𑀢𑀺𑀆𑀤𑀬𑁄 𑀭𑀸𑀚𑀯𑀮𑁆𑀮𑀪𑀸 ¶ 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀦𑀸𑀕𑀭𑀸 𑀑𑀭𑁄𑀥𑀸 𑀘 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀸𑀦𑀸𑀉𑀧𑀸𑀬𑁂𑀳𑀺 𑀦𑀺𑀯𑀸𑀭𑁂𑀲𑀼𑀁. 𑀭𑀸𑀚𑀸𑀧𑀺 𑀦𑁂 𑀅𑀦𑀼𑀯𑀸𑀭𑁂𑀲𑀺 𑀢𑁂𑀦𑀸𑀳 𑁋

‘‘𑀫𑀸 𑀦𑁄 𑀤𑁂𑀯 𑀅𑀤𑀸 𑀘𑀓𑁆𑀔𑀼𑀁, 𑀫𑀸 𑀦𑁄 𑀲𑀩𑁆𑀩𑁂 𑀧𑀭𑀸𑀓𑀭𑀺;

𑀥𑀦𑀁 𑀤𑁂𑀳𑀺 𑀫𑀳𑀸𑀭𑀸𑀚, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.

‘‘𑀬𑀼𑀢𑁆𑀢𑁂 𑀤𑁂𑀯 𑀭𑀣𑁂 𑀤𑁂𑀳𑀺, 𑀆𑀚𑀸𑀦𑀻𑀬𑁂 𑀘𑀮𑀗𑁆𑀓𑀢𑁂;

𑀦𑀸𑀕𑁂 𑀤𑁂𑀳𑀺 𑀫𑀳𑀸𑀭𑀸𑀚, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑁂.

‘‘𑀬𑀣𑀸 𑀢𑀁 𑀲𑀺𑀯𑀬𑁄 𑀲𑀩𑁆𑀩𑁂, 𑀲𑀬𑁄𑀕𑁆𑀕𑀸 𑀲𑀭𑀣𑀸 𑀲𑀤𑀸;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑁂𑀬𑁆𑀬𑀼𑀁, 𑀏𑀯𑀁 𑀤𑁂𑀳𑀺 𑀭𑀣𑁂𑀲𑀪𑀸’’𑀢𑀺. (𑀚𑀸. 𑁧.𑁧𑁫.𑁫𑁮-𑁬𑁦);

𑀅𑀣 𑀭𑀸𑀚𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀬𑁄 𑀯𑁂 𑀤𑀲𑁆𑀲𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄;

𑀪𑀽𑀫𑁆𑀬𑀁 𑀲𑁄 𑀧𑀢𑀺𑀢𑀁 𑀧𑀸𑀲𑀁, 𑀕𑀻𑀯𑀸𑀬𑀁 𑀧𑀝𑀺𑀫𑀼𑀜𑁆𑀘𑀢𑀺.

‘‘𑀬𑁄 ¶ 𑀯𑁂 𑀤𑀲𑁆𑀲𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄;

𑀧𑀸𑀧𑀸 𑀧𑀸𑀧𑀢𑀭𑁄 𑀳𑁄𑀢𑀺, 𑀲𑀫𑁆𑀧𑀢𑁆𑀢𑁄 𑀬𑀫𑀲𑀸𑀥𑀦𑀁.

‘‘𑀬𑀜𑁆𑀳𑀺 𑀬𑀸𑀘𑁂 𑀢𑀜𑁆𑀳𑀺 𑀤𑀤𑁂, 𑀬𑀁 𑀦 𑀬𑀸𑀘𑁂 𑀦 𑀢𑀁 𑀤𑀤𑁂;

𑀲𑁆𑀯𑀸𑀳𑀁 𑀢𑀫𑁂𑀯 𑀤𑀲𑁆𑀲𑀸𑀫𑀺, 𑀬𑀁 𑀫𑀁 𑀬𑀸𑀘𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀚𑀸. 𑁧.𑁧𑁫.𑁬𑁧-𑁬𑁩);

𑀢𑀢𑁆𑀣 𑀫𑀸 𑀦𑁄, 𑀤𑁂𑀯𑀸𑀢𑀺 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀤𑁂𑀯, 𑀫𑀸 𑀘𑀓𑁆𑀔𑀼𑀁 𑀅𑀤𑀸𑀲𑀺. 𑀫𑀸 𑀦𑁄 𑀲𑀩𑁆𑀩𑁂 𑀧𑀭𑀸𑀓𑀭𑀻𑀢𑀺 𑀅𑀫𑁆𑀳𑁂 𑀲𑀩𑁆𑀩𑁂 𑀫𑀸 𑀧𑀭𑀺𑀘𑁆𑀘𑀚𑀺. 𑀅𑀓𑁆𑀔𑀻𑀲𑀼 𑀳𑀺 𑀤𑀺𑀦𑁆𑀦𑁂𑀲𑀼 𑀢𑁆𑀯𑀁 𑀭𑀚𑁆𑀚𑀁 𑀦 𑀓𑀭𑀺𑀲𑁆𑀲𑀲𑀺, 𑀏𑀯𑀁 𑀢𑀬𑀸 𑀫𑀬𑀁 𑀧𑀭𑀺𑀘𑁆𑀘𑀢𑁆𑀢𑀸 𑀦𑀸𑀫 𑀪𑀯𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳𑀁𑀲𑀼. 𑀧𑀭𑀺𑀓𑀺𑀭𑁂𑀬𑁆𑀬𑀼𑀦𑁆𑀢𑀺 𑀧𑀭𑀺𑀯𑀸𑀭𑁂𑀬𑁆𑀬𑀼𑀁. 𑀏𑀯𑀁 𑀤𑁂𑀳𑀻𑀢𑀺 𑀬𑀣𑀸 𑀢𑀁 𑀅𑀯𑀺𑀓𑀮𑀘𑀓𑁆𑀔𑀼𑀁 𑀲𑀺𑀯𑀬𑁄 𑀘𑀺𑀭𑀁 𑀧𑀭𑀺𑀯𑀸𑀭𑁂𑀬𑁆𑀬𑀼𑀁, 𑀏𑀯𑀁 𑀤𑁂𑀳𑀺 𑀥𑀦𑀫𑁂𑀯𑀲𑁆𑀲 𑀤𑁂𑀳𑀺, 𑀫𑀸 𑀅𑀓𑁆𑀔𑀻𑀦𑀺, 𑀅𑀓𑁆𑀔𑀻𑀲𑀼 𑀳𑀺 𑀤𑀺𑀦𑁆𑀦𑁂𑀲𑀼 𑀦 𑀢𑀁 𑀲𑀺𑀯𑀬𑁄 𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀝𑀺𑀫𑀼𑀜𑁆𑀘𑀢𑀻𑀢𑀺 𑀧𑀝𑀺𑀧𑀯𑁂𑀲𑁂𑀢𑀺. 𑀧𑀸𑀧𑀸 𑀧𑀸𑀧𑀢𑀭𑁄 𑀳𑁄𑀢𑀻𑀢𑀺 𑀮𑀸𑀫𑀓𑀸 𑀮𑀸𑀫𑀓𑀢𑀭𑁄 𑀦𑀸𑀫 𑀳𑁄𑀢𑀺. 𑀲𑀫𑁆𑀧𑀢𑁆𑀢𑁄 𑀬𑀫𑀲𑀸𑀥𑀦𑀦𑁆𑀢𑀺 𑀬𑀫𑀲𑁆𑀲 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀉𑀲𑁆𑀲𑀤𑀦𑀺𑀭𑀬𑀁 𑀏𑀲 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀬𑀜𑁆𑀳𑀺 𑀬𑀸𑀘𑁂𑀢𑀺 ¶ 𑀬𑀁 𑀯𑀢𑁆𑀣𑀼𑀁 𑀬𑀸𑀘𑀓𑁄 𑀬𑀸𑀘𑀢𑀺, 𑀤𑀸𑀬𑀓𑁄𑀧𑀺 𑀢𑀤𑁂𑀯 𑀤𑀤𑁂𑀬𑁆𑀬, 𑀦 𑀅𑀬𑀸𑀘𑀺𑀢𑀁, 𑀅𑀬𑀜𑁆𑀘 𑀩𑁆𑀭𑀸𑀳𑁆𑀫𑀡𑁄 𑀘𑀓𑁆𑀔𑀼𑀁 𑀫𑀁 𑀬𑀸𑀘𑀢𑀺, 𑀦 𑀫𑀼𑀢𑁆𑀢𑀸𑀤𑀺𑀓𑀁 𑀥𑀦𑀁, 𑀢𑀁 𑀤𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.

𑀅𑀣 ¶ 𑀦𑀁 ‘‘𑀆𑀬𑀼𑀆𑀤𑀻𑀲𑀼 𑀓𑀺𑀁 𑀧𑀢𑁆𑀣𑁂𑀢𑁆𑀯𑀸 𑀘𑀓𑁆𑀔𑀽𑀦𑀺 𑀤𑁂𑀲𑀺 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 ‘‘𑀦𑀸𑀳𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑁆𑀯𑀸 𑀤𑁂𑀫𑀺, 𑀅𑀧𑀺 𑀘 𑀩𑁄𑀥𑀺𑀲𑀢𑁆𑀢𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀧𑁄𑀭𑀸𑀡𑀓𑀫𑀕𑁆𑀕𑁄 𑀏𑀲, 𑀬𑀤𑀺𑀤𑀁 𑀤𑀸𑀦𑀧𑀸𑀭𑀫𑀺𑀧𑀽𑀭𑀡𑀁 𑀦𑀸𑀫𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀆𑀬𑀼𑀁 𑀦𑀼 𑀯𑀡𑁆𑀡𑀁 𑀦𑀼 𑀲𑀼𑀔𑀁 𑀩𑀮𑀁 𑀦𑀼, 𑀓𑀺𑀁 𑀧𑀢𑁆𑀣𑀬𑀸𑀦𑁄 𑀦𑀼 𑀚𑀦𑀺𑀦𑁆𑀤 𑀤𑁂𑀲𑀺;

𑀓𑀣𑀜𑁆𑀳𑀺 𑀭𑀸𑀚𑀸 𑀲𑀺𑀯𑀺𑀦𑀁 𑀅𑀦𑀼𑀢𑁆𑀢𑀭𑁄, 𑀘𑀓𑁆𑀔𑀽𑀦𑀺 𑀤𑀚𑁆𑀚𑀸 𑀧𑀭𑀮𑁄𑀓𑀳𑁂𑀢𑀼.

‘‘𑀦 𑀯𑀸𑀳𑀫𑁂𑀢𑀁 𑀬𑀲𑀲𑀸 𑀤𑀤𑀸𑀫𑀺, 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂 𑀦 𑀥𑀦𑀁 𑀦 𑀭𑀝𑁆𑀞𑀁;

𑀲𑀢𑀜𑁆𑀘 𑀥𑀫𑁆𑀫𑁄 𑀘𑀭𑀺𑀢𑁄 𑀧𑀼𑀭𑀸𑀡𑁄, 𑀇𑀘𑁆𑀘𑁂𑀯 𑀤𑀸𑀦𑁂 𑀭𑀫𑀢𑁂 𑀫𑀦𑁄 𑀫𑀫𑀸’’𑀢𑀺. (𑀚𑀸. 𑁧.𑁧𑁫.𑁬𑁪-𑁬𑁫);

𑀢𑀢𑁆𑀣 ¶ 𑀧𑀭𑀮𑁄𑀓𑀳𑁂𑀢𑀽𑀢𑀺, 𑀫𑀳𑀸𑀭𑀸𑀚, 𑀓𑀣𑀁 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀇𑀲𑁆𑀲𑀭𑀺𑀬𑀁 𑀧𑀳𑀸𑀬 𑀧𑀭𑀮𑁄𑀓𑀳𑁂𑀢𑀼 𑀘𑀓𑁆𑀔𑀽𑀦𑀺 𑀤𑀤𑁂𑀬𑁆𑀬𑀸𑀢𑀺.

𑀦 𑀯𑀸𑀳𑀦𑁆𑀢𑀺 𑀦 𑀯𑁂 𑀅𑀳𑀁. 𑀬𑀲𑀲𑀸𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸 𑀇𑀲𑁆𑀲𑀭𑀺𑀬𑀲𑁆𑀲 𑀓𑀸𑀭𑀡𑀸, 𑀅𑀧𑀺𑀘 𑀲𑀢𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀥𑀫𑁆𑀫𑁄 𑀩𑀼𑀤𑁆𑀥𑀓𑀸𑀭𑀓𑁄 𑀘𑀭𑀺𑀢𑁄 𑀆𑀘𑀭𑀺𑀢𑁄 𑀆𑀘𑀺𑀡𑁆𑀡𑁄 𑀧𑀼𑀭𑀸𑀢𑀦𑁄 𑀇𑀘𑁆𑀘𑁂𑀯 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀤𑀸𑀦𑁂𑀬𑁂𑀯 𑀈𑀤𑀺𑀲𑁄 𑀫𑀫 𑀫𑀦𑁄 𑀦𑀺𑀭𑀢𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀭𑀸𑀚𑀸 𑀅𑀫𑀘𑁆𑀘𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀺𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀲𑀺 𑁋 ‘‘𑀏𑀳𑀺, 𑀲𑀺𑀯𑀓, 𑀫𑀫 𑀉𑀪𑁄𑀧𑀺 𑀅𑀓𑁆𑀔𑀻𑀦𑀺 𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀢𑀼𑀁 𑀲𑀻𑀖𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀢𑁆𑀣𑁂 𑀧𑀢𑀺𑀝𑁆𑀞𑀧𑁂𑀳𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁩.

‘‘𑀏𑀳𑀺 𑀲𑀺𑀯𑀓 𑀉𑀝𑁆𑀞𑁂𑀳𑀺, 𑀫𑀸 𑀤𑀦𑁆𑀥𑀬𑀺 𑀫𑀸 𑀧𑀯𑁂𑀥𑀬𑀺;

𑀉𑀪𑁄𑀧𑀺 𑀦𑀬𑀦𑀁 𑀤𑁂𑀳𑀺, 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀦𑀺𑀩𑁆𑀩𑀓𑁂.

𑁬𑁪.

‘‘𑀢𑀢𑁄 𑀲𑁄 𑀘𑁄𑀤𑀺𑀢𑁄 𑀫𑀬𑁆𑀳𑀁, 𑀲𑀺𑀯𑀓𑁄 𑀯𑀘𑀦𑀁𑀓𑀭𑁄;

𑀉𑀤𑁆𑀥𑀭𑀺𑀢𑁆𑀯𑀸𑀦 𑀧𑀸𑀤𑀸𑀲𑀺, 𑀢𑀸𑀮𑀫𑀺𑀜𑁆𑀚𑀁𑀯 𑀬𑀸𑀘𑀓𑁂’’𑀢𑀺.

𑀢𑀢𑁆𑀣 ¶ 𑀉𑀝𑁆𑀞𑁂𑀳𑀻𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀓𑀭𑁄𑀳𑀺. 𑀇𑀫𑀲𑁆𑀫𑀺𑀁 𑀫𑀫 𑀘𑀓𑁆𑀔𑀼𑀤𑀸𑀦𑁂 𑀲𑀳𑀸𑀬𑀓𑀺𑀘𑁆𑀘𑀁 𑀓𑀭𑁄𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀸 𑀤𑀦𑁆𑀢𑀬𑀻𑀢𑀺 𑀫𑀸 𑀘𑀺𑀭𑀸𑀬𑀺. 𑀅𑀬𑀜𑁆𑀳𑀺 𑀅𑀢𑀺𑀤𑀼𑀮𑁆𑀮𑀪𑁄 𑀘𑀺𑀭𑀓𑀸𑀮𑀁 𑀧𑀢𑁆𑀣𑀺𑀢𑁄 𑀫𑀬𑀸 𑀉𑀢𑁆𑀢𑀫𑁄 𑀤𑀸𑀦𑀓𑁆𑀔𑀡𑁄 𑀧𑀝𑀺𑀮𑀤𑁆𑀥𑁄, 𑀲𑁄 𑀫𑀸 𑀯𑀺𑀭𑀚𑁆𑀛𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸 𑀧𑀯𑁂𑀥𑀬𑀻𑀢𑀺 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀝𑁂𑀫𑀻’’𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀯𑀲𑁂𑀦 𑀫𑀸 𑀯𑁂𑀥𑀬𑀺 𑀲𑀭𑀻𑀭𑀓𑀫𑁆𑀧𑀁 𑀫𑀸 𑀆𑀧𑀚𑁆𑀚𑀺. 𑀉𑀪𑁄𑀧𑀺 ¶ 𑀦𑀬𑀦𑀦𑁆𑀢𑀺 𑀉𑀪𑁄𑀧𑀺 𑀦𑀬𑀦𑁂. 𑀯𑀦𑀺𑀩𑁆𑀩𑀓𑁂𑀢𑀺 𑀬𑀸𑀘𑀓𑀲𑁆𑀲 𑀫𑀬𑁆𑀳𑀦𑁆𑀢𑀺 𑀫𑀬𑀸. 𑀉𑀤𑁆𑀥𑀭𑀺𑀢𑁆𑀯𑀸𑀦 𑀧𑀸𑀤𑀸𑀲𑀻𑀢𑀺 𑀲𑁄 𑀯𑁂𑀚𑁆𑀚𑁄 𑀭𑀜𑁆𑀜𑁄 𑀅𑀓𑁆𑀔𑀺𑀓𑀽𑀧𑀢𑁄 𑀉𑀪𑁄𑀧𑀺 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀭𑀜𑁆𑀜𑁄 𑀳𑀢𑁆𑀣𑁂 𑀅𑀤𑀸𑀲𑀺.

𑀤𑁂𑀦𑁆𑀢𑁄 𑀘 𑀦 𑀲𑀢𑁆𑀣𑀓𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀳𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀼𑀢𑁆𑀢𑀁 𑀫𑀸𑀤𑀺𑀲𑀲𑁆𑀲 𑀲𑀼𑀲𑀺𑀓𑁆𑀔𑀺𑀢𑀯𑁂𑀚𑁆𑀚𑀲𑁆𑀲 𑀭𑀜𑁆𑀜𑁄 𑀅𑀓𑁆𑀔𑀻𑀲𑀼 𑀲𑀢𑁆𑀣𑀧𑀸𑀢𑀦’’𑀦𑁆𑀢𑀺 𑀪𑁂𑀲𑀚𑁆𑀚𑀸𑀦𑀺 𑀖𑀁𑀲𑁂𑀢𑁆𑀯𑀸 𑀪𑁂𑀲𑀚𑁆𑀚𑀘𑀼𑀡𑁆𑀡𑁂𑀦 𑀦𑀻𑀮𑀼𑀧𑁆𑀧𑀮𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀺𑀁 𑀉𑀧𑀲𑀺𑀗𑁆𑀖𑀸𑀧𑁂𑀲𑀺, 𑀅𑀓𑁆𑀔𑀺 𑀧𑀭𑀺𑀯𑀢𑁆𑀢𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀭𑀺𑀪𑀸𑀯𑁂𑀢𑁆𑀯𑀸 𑀧𑀼𑀦𑀧𑀺 𑀉𑀧𑀲𑀺𑀗𑁆𑀖𑀸𑀧𑁂𑀲𑀺, 𑀅𑀓𑁆𑀔𑀺 𑀅𑀓𑁆𑀔𑀺𑀓𑀽𑀧𑀢𑁄 𑀫𑀼𑀘𑁆𑀘𑀺, 𑀩𑀮𑀯𑀢𑀭𑀸 𑀯𑁂𑀤𑀦𑀸 𑀉𑀤𑀧𑀸𑀤𑀺, 𑀢𑀢𑀺𑀬𑀯𑀸𑀭𑁂 𑀔𑀭𑀢𑀭𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀉𑀧𑀦𑀸𑀫𑁂𑀲𑀺, 𑀅𑀓𑁆𑀔𑀺 𑀑𑀲𑀥𑀩𑀮𑁂𑀦 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀅𑀓𑁆𑀔𑀺𑀓𑀽𑀧𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑁆𑀳𑀸𑀭𑀼𑀲𑀼𑀢𑁆𑀢𑀓𑁂𑀦 𑀑𑀮𑀫𑁆𑀩𑀫𑀸𑀦𑀁 𑀅𑀝𑁆𑀞𑀸𑀲𑀺, 𑀅𑀥𑀺𑀫𑀢𑁆𑀢𑀸 ¶ 𑀯𑁂𑀤𑀦𑀸 𑀉𑀤𑀧𑀸𑀤𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺, 𑀦𑀺𑀯𑀢𑁆𑀣𑀲𑀸𑀝𑀓𑀸𑀧𑀺 𑀮𑁄𑀳𑀺𑀢𑁂𑀦 𑀢𑁂𑀫𑀺𑀁𑀲𑀼. 𑀑𑀭𑁄𑀥𑀸 𑀘 𑀅𑀫𑀘𑁆𑀘𑀸 𑀘 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀧𑀢𑀺𑀢𑁆𑀯𑀸 ‘‘𑀤𑁂𑀯, 𑀅𑀓𑁆𑀔𑀻𑀦𑀺 𑀫𑀸 𑀤𑁂𑀳𑀺, 𑀤𑁂𑀯, 𑀅𑀓𑁆𑀔𑀻𑀦𑀺 𑀫𑀸 𑀤𑁂𑀳𑀻’’𑀢𑀺 𑀫𑀳𑀸𑀧𑀭𑀺𑀤𑁂𑀯𑀁 𑀧𑀭𑀺𑀤𑁂𑀯𑀺𑀁𑀲𑀼.

𑀭𑀸𑀚𑀸 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 ‘‘𑀢𑀸𑀢, 𑀫𑀸 𑀧𑀧𑀜𑁆𑀘𑀁 𑀓𑀭𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀸𑀫𑀳𑀢𑁆𑀣𑁂𑀦 𑀅𑀓𑁆𑀔𑀺𑀁 𑀥𑀸𑀭𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀲𑀢𑁆𑀣𑀓𑀁 𑀆𑀤𑀸𑀬 𑀅𑀓𑁆𑀔𑀺𑀲𑀼𑀢𑁆𑀢𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀓𑁆𑀔𑀺𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑁄 𑀯𑀸𑀫𑀓𑁆𑀔𑀺𑀦𑀸 𑀤𑀓𑁆𑀔𑀺𑀡𑀓𑁆𑀔𑀺𑀁 𑀑𑀮𑁄𑀓𑁂𑀢𑁆𑀯𑀸 𑀧𑀭𑀺𑀘𑁆𑀘𑀸𑀕𑀧𑀻𑀢𑀺𑀬𑀸 𑀅𑀪𑀺𑀪𑀼𑀬𑁆𑀬𑀫𑀸𑀦𑀁 𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑁂𑀦𑁆𑀢𑁄 ‘‘𑀏𑀳𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀫 𑀇𑀢𑁄 𑀘𑀓𑁆𑀔𑀼𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀫𑁂𑀯 𑀧𑀺𑀬𑀢𑀭𑀁, 𑀢𑀲𑁆𑀲 𑀫𑁂 𑀇𑀤𑀁 𑀅𑀓𑁆𑀔𑀺𑀤𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀓𑁆𑀔𑀺𑀁 𑀅𑀤𑀸𑀲𑀺. 𑀲𑁄 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀓𑁆𑀔𑀺𑀫𑁆𑀳𑀺 𑀞𑀧𑁂𑀲𑀺, 𑀢𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀯𑀺𑀓𑀲𑀺𑀢𑀦𑀻𑀮𑀼𑀧𑁆𑀧𑀮𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀯𑀸𑀫𑀓𑁆𑀔𑀺𑀦𑀸 𑀢𑀲𑁆𑀲 𑀢𑀁 𑀅𑀓𑁆𑀔𑀺𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀲𑀼𑀤𑀺𑀦𑁆𑀦𑀁 𑀫𑀬𑀸 𑀅𑀓𑁆𑀔𑀻’’𑀢𑀺 𑀅𑀦𑁆𑀢𑁄𑀲𑀫𑀼𑀕𑁆𑀕𑀢𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀲𑀭𑀻𑀭𑁄 𑀳𑀼𑀢𑁆𑀯𑀸 𑀅𑀧𑀭𑀫𑁆𑀧𑀺 𑀅𑀤𑀸𑀲𑀺. 𑀲𑀓𑁆𑀓𑁄𑀧𑀺 𑀢𑀁 ¶ 𑀢𑀣𑁂𑀯 𑀓𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄.

𑀭𑀜𑁆𑀜𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑁆𑀔𑀻𑀦𑀺 𑀆𑀯𑀸𑀝𑀪𑀸𑀯𑀁 𑀅𑀧𑁆𑀧𑀢𑁆𑀢𑀸𑀦𑀺 𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀁 𑀯𑀺𑀬 𑀉𑀕𑁆𑀕𑀢𑁂𑀦 𑀫𑀁𑀲𑀧𑀺𑀡𑁆𑀟𑁂𑀦 𑀧𑀽𑀭𑁂𑀢𑁆𑀯𑀸 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀲𑁆𑀲 𑀯𑀺𑀬 𑀭𑀼𑀳𑀺𑀁𑀲𑀼, 𑀯𑁂𑀤𑀦𑀸 𑀧𑀘𑁆𑀙𑀺𑀚𑁆𑀚𑀺. 𑀅𑀣 𑀫𑀳𑀸𑀲𑀢𑁆𑀢𑁄 𑀓𑀢𑀺𑀧𑀸𑀳𑀁 𑀧𑀸𑀲𑀸𑀤𑁂 𑀯𑀲𑀺𑀢𑁆𑀯𑀸 ‘‘𑀓𑀺𑀁 𑀅𑀦𑁆𑀥𑀲𑁆𑀲 𑀭𑀚𑁆𑀚𑁂𑀦𑀸𑀢𑀺 𑀅𑀫𑀘𑁆𑀘𑀸𑀦𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 ¶ 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀫𑀼𑀔𑀥𑁄𑀯𑀦𑀸𑀤𑀺𑀤𑀸𑀬𑀓𑁄 𑀏𑀓𑁄 𑀧𑀼𑀭𑀺𑀲𑁄 𑀫𑀬𑁆𑀳𑀁 𑀲𑀦𑁆𑀢𑀺𑀓𑁂 𑀳𑁄𑀢𑀼, 𑀲𑀭𑀻𑀭𑀓𑀺𑀘𑁆𑀘𑀝𑁆𑀞𑀸𑀦𑁂𑀲𑀼𑀧𑀺 𑀫𑁂 𑀭𑀚𑁆𑀚𑀼𑀓𑀁 𑀩𑀦𑁆𑀥𑀣𑀸’’𑀢𑀺 𑀯𑀢𑁆𑀯𑀸 𑀲𑀺𑀯𑀺𑀓𑀸𑀬 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀅𑀫𑀘𑁆𑀘𑀸𑀧𑀺 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀤𑀸𑀦𑀁 𑀆𑀯𑀚𑁆𑀚𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀭𑀸𑀚𑀲𑁆𑀲 𑀯𑀭𑀁 𑀤𑀢𑁆𑀯𑀸 𑀘𑀓𑁆𑀔𑀼𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀧𑀤𑀲𑀤𑁆𑀤𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁂𑀦 𑀘 ‘‘𑀓𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑁂 𑁋

‘‘𑀲𑀓𑁆𑀓𑁄𑀳𑀫𑀲𑁆𑀫𑀺 ¶ 𑀤𑁂𑀯𑀺𑀦𑁆𑀤𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀯𑀭𑀁 𑀯𑀭𑀲𑁆𑀲𑀼 𑀭𑀸𑀚𑀻𑀲𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺. (𑀚𑀸. 𑁧.𑁧𑁫.𑁭𑁧) 𑁋

𑀯𑀢𑁆𑀯𑀸 𑀢𑁂𑀦 𑁋

‘‘𑀧𑀳𑀽𑀢𑀁 𑀫𑁂 𑀥𑀦𑀁 𑀲𑀓𑁆𑀓, 𑀩𑀮𑀁 𑀓𑁄𑀲𑁄 𑀘𑀦𑀧𑁆𑀧𑀓𑁄;

𑀅𑀦𑁆𑀥𑀲𑁆𑀲 𑀫𑁂 𑀲𑀢𑁄 𑀤𑀸𑀦𑀺, 𑀫𑀭𑀡𑀜𑁆𑀜𑁂𑀯 𑀭𑀼𑀘𑁆𑀘𑀢𑀻’’𑀢𑀺. (𑀚𑀸. 𑁧.𑁧𑁫.𑁭𑁨) 𑁋

𑀯𑀼𑀢𑁆𑀢𑁂 𑀅𑀣 𑀦𑀁 𑀲𑀓𑁆𑀓𑁄 𑀆𑀳 𑁋 ‘‘𑀲𑀺𑀯𑀺𑀭𑀸𑀚, 𑀓𑀺𑀁 𑀧𑀦 𑀢𑁆𑀯𑀁 𑀫𑀭𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀭𑀡𑀁 𑀭𑁄𑀘𑁂𑀲𑀺, 𑀉𑀤𑀸𑀳𑀼 𑀅𑀦𑁆𑀥𑀪𑀸𑀯𑁂𑀦𑀸’’𑀢𑀺. 𑀅𑀦𑁆𑀥𑀪𑀸𑀯𑁂𑀦, 𑀤𑁂𑀯𑀸𑀢𑀺. ‘‘𑀫𑀳𑀸𑀭𑀸𑀚, 𑀤𑀸𑀦𑀁 𑀦𑀸𑀫 𑀦 𑀓𑁂𑀯𑀮𑀁 𑀲𑀫𑁆𑀧𑀭𑀸𑀬𑀢𑁆𑀣𑀫𑁂𑀯 𑀤𑀺𑀬𑁆𑀬𑀢𑀺, 𑀤𑀺𑀝𑁆𑀞𑀥𑀫𑁆𑀫𑀢𑁆𑀣𑀸𑀬𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀯 𑀤𑀸𑀦𑀧𑀼𑀜𑁆𑀜𑀫𑁂𑀯 𑀦𑀺𑀲𑁆𑀲𑀸𑀬 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀳𑀺, 𑀢𑀲𑁆𑀲 𑀩𑀮𑁂𑀦𑁂𑀯 𑀢𑁂 𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀬𑀸 𑀫𑀳𑀸𑀤𑀸𑀦𑀁 𑀲𑀼𑀤𑀺𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑁋

‘‘𑀬𑁂 ¶ 𑀫𑀁 𑀬𑀸𑀘𑀺𑀢𑀼𑀫𑀸𑀬𑀦𑁆𑀢𑀺, 𑀦𑀸𑀦𑀸𑀕𑁄𑀢𑁆𑀢𑀸 𑀯𑀦𑀺𑀩𑁆𑀩𑀓𑀸;

𑀬𑁄𑀧𑀺 𑀫𑀁 𑀬𑀸𑀘𑀢𑁂 𑀢𑀢𑁆𑀣, 𑀲𑁄𑀧𑀺 𑀫𑁂 𑀫𑀦𑀲𑁄 𑀧𑀺𑀬𑁄;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀘𑀓𑁆𑀔𑀼 𑀫𑁂 𑀉𑀧𑀧𑀚𑁆𑀚𑀣𑀸’’𑀢𑀺. (𑀚𑀸. 𑁧.𑁧𑁫.𑁭𑁪) 𑁋

𑀆𑀳.

𑀢𑀢𑁆𑀣 𑀬𑁂 𑀫𑀦𑁆𑀢𑀺 𑀬𑁂 𑀫𑀁 𑀬𑀸𑀘𑀺𑀢𑀼𑀫𑀸𑀕𑀘𑁆𑀙𑀦𑁆𑀢𑀺, 𑀢𑁂𑀲𑀼𑀧𑀺 𑀆𑀕𑀢𑁂𑀲𑀼 𑀬𑁄 𑀇𑀫𑀁 𑀦𑀸𑀫 𑀤𑁂𑀳𑀻𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ¶ 𑀫𑀁 𑀬𑀸𑀘𑀢𑁂, 𑀲𑁄𑀧𑀺 𑀫𑁂 𑀫𑀦𑀲𑁄 𑀧𑀺𑀬𑁄. 𑀏𑀢𑁂𑀦𑀸𑀢𑀺 𑀲𑀘𑁂 𑀫𑀬𑁆𑀳𑀁 𑀲𑀩𑁆𑀩𑁂𑀧𑀺 𑀬𑀸𑀘𑀓𑀸 𑀧𑀺𑀬𑀸, 𑀲𑀘𑁆𑀘𑀫𑁂𑀯𑁂𑀢𑀁 𑀫𑀬𑀸 𑀯𑀼𑀢𑁆𑀢𑀁, 𑀏𑀢𑁂𑀦 𑀫𑁂 𑀲𑀘𑁆𑀘𑀯𑀘𑀦𑁂𑀦 𑀏𑀓𑀁 𑀘𑀓𑁆𑀔𑀼 𑀉𑀧𑀧𑀚𑁆𑀚𑀣 𑀉𑀧𑁆𑀧𑀚𑁆𑀚𑀢𑀽𑀢𑀺.

𑀅𑀣𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀧𑀞𑀫𑀁 𑀘𑀓𑁆𑀔𑀼 𑀉𑀤𑀧𑀸𑀤𑀺. 𑀢𑀢𑁄 𑀤𑀼𑀢𑀺𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁆𑀣𑀸𑀬 𑁋

‘‘𑀬𑀁 𑀫𑀁 𑀲𑁄 𑀬𑀸𑀘𑀺𑀢𑀼𑀁 𑀆𑀕𑀸, 𑀤𑁂𑀳𑀺 𑀘𑀓𑁆𑀔𑀼𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀢𑀲𑁆𑀲 𑀘𑀓𑁆𑀔𑀽𑀦𑀺 𑀧𑀸𑀤𑀸𑀲𑀺𑀁, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀦𑀺𑀩𑁆𑀩𑀢𑁄.

‘‘𑀪𑀺𑀬𑁆𑀬𑁄 𑀫𑀁 𑀆𑀯𑀺𑀲𑀻 𑀧𑀻𑀢𑀺, 𑀲𑁄𑀫𑀦𑀲𑁆𑀲𑀜𑁆𑀘𑀦𑀧𑁆𑀧𑀓𑀁;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀤𑀼𑀢𑀺𑀬𑀁 𑀫𑁂 𑀉𑀧𑀧𑀚𑁆𑀚𑀣𑀸’’𑀢𑀺. (𑀚𑀸. 𑁧.𑁧𑁫.𑁭𑁫-𑁭𑁬) 𑁋

𑀆𑀳.

𑀢𑀢𑁆𑀣 𑀬𑀁 𑀫𑀦𑁆𑀢𑀺 𑀬𑁄 𑀫𑀁. 𑀲𑁄𑀢𑀺 𑀲𑁄 𑀘𑀓𑁆𑀔𑀼𑀬𑀸𑀘𑀓𑁄 𑀩𑁆𑀭𑀸𑀳𑁆𑀫𑀡𑁄. 𑀆𑀕𑀸𑀢𑀺 𑀆𑀕𑀢𑁄. 𑀯𑀦𑀺𑀩𑁆𑀩𑀢𑁄𑀢𑀺 𑀬𑀸𑀘𑀦𑁆𑀢𑀲𑁆𑀲. 𑀫𑀁 𑀆𑀯𑀺𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀘𑀓𑁆𑀔𑀽𑀦𑀺 𑀤𑀢𑁆𑀯𑀸 𑀅𑀦𑁆𑀥𑀓𑀸𑀮𑁂𑀧𑀺 𑀢𑀣𑀸𑀭𑀽𑀧𑀁 𑀯𑁂𑀤𑀦𑀁 𑀅𑀕𑀡𑁂𑀢𑁆𑀯𑀸 ‘‘𑀅𑀳𑁄 𑀲𑀼𑀤𑀺𑀦𑁆𑀦𑀁 𑀫𑁂 𑀤𑀸𑀦’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀁 𑀫𑀁 𑀪𑀺𑀬𑁆𑀬𑁄 𑀅𑀢𑀺𑀭𑁂𑀓𑀢𑀭𑀸 𑀧𑀻𑀢𑀺 𑀆𑀯𑀺𑀲𑀺. 𑀲𑁄𑀫𑀦𑀲𑁆𑀲𑀜𑁆𑀘𑀦𑀧𑁆𑀧𑀓𑀦𑁆𑀢𑀺 𑀅𑀧𑀭𑀺𑀫𑀸𑀡𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀏𑀢𑁂𑀦𑀸𑀢𑀺 𑀲𑀘𑁂 𑀢𑀤𑀸 𑀫𑀫 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀲𑀘𑁆𑀘𑀫𑁂𑀯𑁂𑀢𑀁 𑀫𑀬𑀸 𑀯𑀼𑀢𑁆𑀢𑀁, 𑀏𑀢𑁂𑀦 𑀫𑁂 𑀲𑀘𑁆𑀘𑀯𑀘𑀦𑁂𑀦 𑀤𑀼𑀢𑀺𑀬𑀫𑁆𑀧𑀺 𑀘𑀓𑁆𑀔𑀼 𑀉𑀧𑀧𑀚𑁆𑀚𑀢𑀽𑀢𑀺.

𑀢𑀁𑀔𑀡𑀜𑁆𑀜𑁂𑀯 𑀤𑀼𑀢𑀺𑀬𑀫𑁆𑀧𑀺 𑀘𑀓𑁆𑀔𑀼 𑀉𑀤𑀧𑀸𑀤𑀺. 𑀢𑀸𑀦𑀺 𑀧𑀦𑀲𑁆𑀲 𑀘𑀓𑁆𑀔𑀽𑀦𑀺 𑀦𑁂𑀯 𑀧𑀸𑀓𑀢𑀺𑀓𑀸𑀦𑀺, 𑀦 𑀤𑀺𑀩𑁆𑀩𑀸𑀦𑀺. 𑀲𑀓𑁆𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀺 𑀤𑀺𑀦𑁆𑀦𑀁 𑀘𑀓𑁆𑀔𑀼𑀁 𑀧𑀼𑀦 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀉𑀧𑀳𑀢𑀘𑀓𑁆𑀔𑀼𑀦𑁄 𑀘 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫 𑀦𑀼𑀧𑁆𑀧𑀚𑁆𑀚𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀧𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀯𑀺𑀧𑀭𑀻𑀢𑀁 𑀅𑀢𑁆𑀢𑀦𑁄 𑀤𑀸𑀦𑀧𑀻𑀢𑀺𑀁 𑀉𑀧𑀸𑀤𑀸𑀬 𑀧𑀻𑀢𑀺𑀨𑀭𑀡𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺 ‘‘𑀲𑀘𑁆𑀘𑀧𑀸𑀭𑀫𑀺𑀢𑀸𑀘𑀓𑁆𑀔𑀽𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁫.

‘‘𑀤𑀤𑀫𑀸𑀦𑀲𑁆𑀲 ¶ 𑀤𑁂𑀦𑁆𑀢𑀲𑁆𑀲, 𑀤𑀺𑀦𑁆𑀦𑀤𑀸𑀦𑀲𑁆𑀲 𑀫𑁂 𑀲𑀢𑁄;

𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀦𑀢𑁆𑀣𑀺, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸’’𑀢𑀺.

𑀢𑀢𑁆𑀣 𑀤𑀤𑀫𑀸𑀦𑀲𑁆𑀲𑀸𑀢𑀺 𑀘𑀓𑁆𑀔𑀽𑀦𑀺 𑀤𑀸𑀢𑀼𑀁 𑀯𑁂𑀚𑁆𑀚𑁂𑀦 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲. 𑀤𑁂𑀦𑁆𑀢𑀲𑁆𑀲𑀸𑀢𑀺 𑀉𑀧𑁆𑀧𑀸𑀝𑀺𑀢𑀸𑀦𑀺 𑀢𑀸𑀦𑀺 𑀲𑀓𑁆𑀓𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀳𑀢𑁆𑀣𑁂 𑀞𑀧𑁂𑀦𑁆𑀢𑀲𑁆𑀲. 𑀤𑀺𑀦𑁆𑀦𑀤𑀸𑀦𑀲𑁆𑀲𑀸𑀢𑀺 𑀘𑀓𑁆𑀔𑀼𑀤𑀸𑀦𑀁 𑀤𑀺𑀦𑁆𑀦𑀯𑀢𑁄. 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸𑀢𑀺 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄. 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸𑀢𑀺 𑀢𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯 𑀳𑁂𑀢𑀽𑀢𑀺 𑀅𑀢𑁆𑀣𑁄.

𑁬𑁬. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀼𑀤𑀼𑀮𑁆𑀮𑀪𑀢𑀸𑀬 𑀏𑀯𑀁 𑀲𑀼𑀤𑀼𑀓𑁆𑀓𑀭𑀁 𑀫𑀬𑀸 𑀓𑀢𑀦𑁆𑀢𑀺 𑀦 𑀘𑀓𑁆𑀔𑀽𑀦𑀁 𑀦 𑀅𑀢𑁆𑀢𑀪𑀸𑀯𑀲𑁆𑀲𑀧𑀺 𑀅𑀧𑁆𑀧𑀺𑀬𑀢𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀫𑁂 𑀤𑁂𑀲𑁆𑀲𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀸 𑀦 𑀫𑁂 𑀦 𑀤𑁂𑀲𑁆𑀲𑀺𑀬𑁄𑀢𑀺 𑀧𑀞𑀫𑁄 𑀦-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄. 𑀅𑀢𑁆𑀢𑀸 𑀦 𑀫𑁂 𑀓𑀼𑀚𑁆𑀛𑀺𑀢𑀩𑁆𑀩𑁄, 𑀦 𑀅𑀧𑁆𑀧𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀢𑀸𑀦𑀁 𑀫𑁂 𑀦 𑀤𑁂𑀲𑁆𑀲𑀺𑀬’’𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀫𑁂 𑀅𑀢𑁆𑀢𑀸𑀦𑀁 𑀅𑀳𑀁 𑀦 𑀤𑁂𑀲𑁆𑀲𑀺𑀬𑀁 𑀦 𑀓𑀼𑀚𑁆𑀛𑁂𑀬𑁆𑀬𑀁 𑀦 𑀓𑀼𑀚𑁆𑀛𑀺𑀢𑀼𑀁 𑀅𑀭𑀳𑀸𑀫𑀺 𑀦 𑀲𑁄 𑀫𑀬𑀸 𑀓𑀼𑀚𑁆𑀛𑀺𑀢𑀩𑁆𑀩𑁄𑀢𑀺. ‘‘𑀅𑀢𑁆𑀢𑀸𑀧𑀺 𑀫𑁂 𑀦 𑀤𑁂𑀲𑁆𑀲𑀺𑀬𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀤𑀸𑀲𑀳𑀦𑁆𑀢𑀺 𑀅𑀤𑀸𑀲𑀺𑀁 𑀅𑀳𑀁. ‘‘𑀅𑀤𑀸𑀲𑀺𑀳’’𑀦𑁆𑀢𑀺𑀧𑀺 𑀧𑀸𑀞𑁄.

𑀢𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀘𑁆𑀘𑀓𑀺𑀭𑀺𑀬𑀸𑀬 𑀘𑀓𑁆𑀔𑀽𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑀸 𑀭𑀸𑀚𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀺𑀢𑀸𑀯 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀓𑁆𑀓𑁄 𑀫𑀳𑀸𑀚𑀦𑀫𑀚𑁆𑀛𑁂 𑀆𑀓𑀸𑀲𑁂 𑀞𑀢𑁆𑀯𑀸 𑁋

‘‘𑀥𑀫𑁆𑀫𑁂𑀦 ¶ 𑀪𑀸𑀲𑀺𑀢𑀸 𑀕𑀸𑀣𑀸, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦;

𑀏𑀢𑀸𑀦𑀺 𑀢𑀯 𑀦𑁂𑀢𑁆𑀢𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀧𑀝𑀺𑀤𑀺𑀲𑁆𑀲𑀭𑁂.

‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀲𑁆𑀲𑀦𑀁 𑀅𑀦𑀼𑀪𑁄𑀦𑁆𑀢𑀼 𑀢𑁂’’𑀢𑀺. (𑀚𑀸. 𑁧.𑁧𑁫.𑁭𑁭-𑁭𑁮) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀣𑀼𑀢𑀺𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀕𑁂𑀳𑀤𑁆𑀯𑀸𑀭𑁂 𑀲𑀼𑀲𑀚𑁆𑀚𑀺𑀢𑁂 𑀫𑀳𑀸𑀫𑀡𑁆𑀟𑀧𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀘𑀓𑁆𑀔𑀼𑀧𑀝𑀺𑀮𑀸𑀪𑁂𑀦 𑀢𑀼𑀝𑁆𑀞𑀳𑀝𑁆𑀞𑀧𑀫𑀼𑀤𑀺𑀢𑀸𑀦𑀁 𑀤𑀝𑁆𑀞𑀼𑀁 𑀆𑀕𑀢𑀸𑀦𑀁 𑀦𑀸𑀕𑀭𑀸𑀦𑀁 𑀚𑀸𑀦𑀧𑀤𑀸𑀦𑀁 𑀭𑀸𑀚𑀧𑀭𑀺𑀲𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

‘‘𑀓𑁄 𑀦𑀻𑀥 𑀯𑀺𑀢𑁆𑀢𑀁 𑀦 𑀤𑀤𑁂𑀬𑁆𑀬 𑀬𑀸𑀘𑀺𑀢𑁄, 𑀅𑀧𑀺 𑀯𑀺𑀲𑀺𑀝𑁆𑀞𑀁 𑀲𑀼𑀧𑀺𑀬𑀫𑁆𑀧𑀺 𑀅𑀢𑁆𑀢𑀦𑁄;

𑀢𑀤𑀺𑀗𑁆𑀖 𑀲𑀩𑁆𑀩𑁂 𑀲𑀺𑀯𑀬𑁄 𑀲𑀫𑀸𑀕𑀢𑀸, 𑀤𑀺𑀩𑁆𑀩𑀸𑀦𑀺 𑀦𑁂𑀢𑁆𑀢𑀸𑀦𑀺 𑀫𑀫𑀚𑁆𑀚 𑀧𑀲𑁆𑀲𑀣.

‘‘𑀢𑀺𑀭𑁄𑀓𑀼𑀝𑁆𑀝𑀁 ¶ 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀲𑁆𑀲𑀦𑀁 𑀅𑀦𑀼𑀪𑁄𑀦𑁆𑀢𑀺 𑀫𑁂.

‘‘𑀦 ¶ 𑀘𑀸𑀕𑀫𑀢𑁆𑀢𑀸 𑀧𑀭𑀫𑀢𑁆𑀣𑀺 𑀓𑀺𑀜𑁆𑀘𑀺, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢𑁂;

𑀤𑀢𑁆𑀯𑀸𑀦 𑀫𑀸𑀦𑀼𑀲𑀁 𑀘𑀓𑁆𑀔𑀼𑀁, 𑀮𑀤𑁆𑀥𑀁 𑀫𑁂 𑀘𑀓𑁆𑀔𑀼 𑀅𑀫𑀸𑀦𑀼𑀲𑀁.

‘‘𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀯𑀬𑁄, 𑀤𑁂𑀣 𑀤𑀸𑀦𑀸𑀦𑀺 𑀪𑀼𑀜𑁆𑀚𑀣;

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀣 𑀞𑀸𑀦’’𑀦𑁆𑀢𑀺. (𑀚𑀸. 𑁧.𑁧𑁫.𑁭𑁯-𑁮𑁨) 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀥𑀫𑁆𑀫𑁂𑀦 𑀪𑀸𑀲𑀺𑀢𑀸𑀢𑀺, 𑀫𑀳𑀸𑀭𑀸𑀚, 𑀇𑀫𑀸 𑀢𑁂 𑀕𑀸𑀣𑀸 𑀥𑀫𑁆𑀫𑁂𑀦 𑀲𑀪𑀸𑀯𑁂𑀦𑁂𑀯 𑀪𑀸𑀲𑀺𑀢𑀸. 𑀤𑀺𑀩𑁆𑀩𑀸𑀦𑀻𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑀬𑀼𑀢𑁆𑀢𑀸𑀦𑀺. 𑀧𑀝𑀺𑀤𑀺𑀲𑁆𑀲𑀭𑁂𑀢𑀺 𑀧𑀝𑀺𑀤𑀺𑀲𑁆𑀲𑀦𑁆𑀢𑀺. 𑀢𑀺𑀭𑁄𑀓𑀼𑀝𑁆𑀝𑀦𑁆𑀢𑀺 𑀧𑀭𑀓𑀼𑀝𑁆𑀝𑀁. 𑀢𑀺𑀭𑁄𑀲𑁂𑀮𑀦𑁆𑀢𑀺 𑀧𑀭𑀲𑁂𑀮𑀁. 𑀲𑀫𑀢𑀺𑀕𑁆𑀕𑀬𑁆𑀳𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀫𑀦𑁆𑀢𑀸 𑀤𑀲𑀤𑀺𑀲𑀸 𑀬𑁄𑀚𑀦𑀲𑀢𑀁 𑀭𑀽𑀧𑀤𑀲𑁆𑀲𑀦𑀁 𑀅𑀦𑀼𑀪𑁄𑀦𑁆𑀢𑀼 𑀲𑀸𑀥𑁂𑀦𑁆𑀢𑀼.

𑀓𑁄 𑀦𑀻𑀥𑀸𑀢𑀺 𑀓𑁄 𑀦𑀼 𑀇𑀥. 𑀅𑀧𑀺 𑀯𑀺𑀲𑀺𑀝𑁆𑀞𑀦𑁆𑀢𑀺 𑀉𑀢𑁆𑀢𑀫𑀫𑁆𑀧𑀺 𑀲𑀫𑀸𑀦𑀁. 𑀦 𑀘𑀸𑀕𑀫𑀢𑁆𑀢𑀸𑀢𑀺 𑀘𑀸𑀕𑀧𑁆𑀧𑀫𑀸𑀡𑀢𑁄 𑀅𑀜𑁆𑀜𑀁 𑀯𑀭𑀁 𑀦𑀸𑀫 𑀦𑀢𑁆𑀣𑀺. 𑀇𑀥 𑀚𑀻𑀯𑀺𑀢𑁂𑀢𑀺 𑀇𑀫𑀲𑁆𑀫𑀺𑀁 ¶ 𑀚𑀻𑀯𑀮𑁄𑀓𑁂. ‘‘𑀇𑀥 𑀚𑀻𑀯𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀚𑀻𑀯𑀫𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀫𑀸𑀦𑀼𑀲𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼 𑀫𑀬𑀸 𑀮𑀤𑁆𑀥𑀁, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀘𑀸𑀕𑀢𑁄 𑀉𑀢𑁆𑀢𑀫𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀁 𑀫𑀬𑀸 𑀮𑀤𑁆𑀥𑀁 𑀤𑀺𑀩𑁆𑀩𑀘𑀓𑁆𑀔𑀼𑀁 𑀤𑀺𑀲𑁆𑀯𑀸𑀧𑀺.

𑀇𑀢𑀺 𑀇𑀫𑀸𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀦 𑀓𑁂𑀯𑀮𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀅𑀣 𑀔𑁄 𑀅𑀦𑁆𑀯𑀤𑁆𑀥𑀫𑀸𑀲𑀫𑁆𑀧𑀺 𑀉𑀧𑁄𑀲𑀣𑁂 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺.

𑀢𑀤𑀸 𑀯𑁂𑀚𑁆𑀚𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀲𑀺𑀯𑀺𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀣𑀸 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀩𑀸𑀳𑀺𑀭𑀤𑁂𑀬𑁆𑀬𑀥𑀫𑁆𑀫𑀯𑀢𑁆𑀣𑀼 𑀦 𑀳𑁄𑀢𑀺, 𑀏𑀯𑀁 𑀅𑀧𑀭𑀺𑀫𑀺𑀢𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀢𑁂𑀦 𑀅𑀧𑀭𑀺𑀢𑀼𑀝𑁆𑀞𑀲𑁆𑀲 𑀓𑀣𑀁 𑀦𑀼 𑀔𑁄 𑀅𑀳𑀁 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀁 𑀤𑀸𑀦𑀁 𑀤𑀤𑁂𑀬𑁆𑀬𑀁, 𑀓𑀤𑀸 𑀦𑀼 𑀔𑁄 𑀫𑀁 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 ¶ 𑀅𑀚𑁆𑀛𑀢𑁆𑀢𑀺𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀬𑀸𑀘𑁂𑀬𑁆𑀬, 𑀲𑀘𑁂 𑀳𑀺 𑀓𑁄𑀘𑀺 𑀬𑀸𑀘𑀓𑁄 𑀫𑁂 𑀳𑀤𑀬𑀫𑀁𑀲𑀲𑁆𑀲 𑀦𑀸𑀫𑀁 𑀕𑀡𑁆𑀳𑁂𑀬𑁆𑀬, 𑀓𑀡𑀬𑁂𑀦 𑀦𑀁 𑀦𑀻𑀳𑀭𑀺𑀢𑁆𑀯𑀸 𑀧𑀲𑀦𑁆𑀦𑀉𑀤𑀓𑀢𑁄 𑀲𑀦𑀸𑀴𑀁 𑀧𑀤𑀼𑀫𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬 𑀮𑁄𑀳𑀺𑀢𑀩𑀺𑀦𑁆𑀤𑀼𑀁 𑀧𑀕𑁆𑀖𑀭𑀦𑁆𑀢𑀁 ¶ 𑀳𑀤𑀬𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀺. 𑀲𑀘𑁂 𑀲𑀭𑀻𑀭𑀫𑀁𑀲𑀲𑁆𑀲 𑀦𑀸𑀫𑀁 𑀕𑀡𑁆𑀳𑁂𑀬𑁆𑀬, 𑀅𑀯𑀮𑁂𑀔𑀦𑁂𑀦 𑀢𑀸𑀮𑀕𑀼𑀴𑀧𑀝𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀯𑀺𑀬 𑀲𑀭𑀻𑀭𑀫𑀁𑀲𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀲𑁆𑀲𑀸𑀫𑀺. 𑀲𑀘𑁂 𑀮𑁄𑀳𑀺𑀢𑀲𑁆𑀲 𑀦𑀸𑀫𑀁 𑀕𑀡𑁆𑀳𑁂𑀬𑁆𑀬, 𑀅𑀲𑀺𑀦𑀸 𑀯𑀺𑀚𑁆𑀛𑀺𑀢𑁆𑀯𑀸 𑀬𑀦𑁆𑀢𑀫𑀼𑀔𑁂 𑀯𑀸 𑀧𑀢𑀺𑀢𑁆𑀯𑀸 𑀉𑀧𑀦𑀻𑀢𑀁 𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀮𑁄𑀳𑀺𑀢𑀁 𑀤𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀓𑁄𑀘𑀺 ‘‘𑀕𑁂𑀳𑁂 𑀫𑁂 𑀓𑀫𑁆𑀫𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀢𑁆𑀣 𑀫𑁂 𑀤𑀸𑀲𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀯𑀤𑁂𑀬𑁆𑀬, 𑀭𑀸𑀚𑀯𑁂𑀲𑀁 𑀅𑀧𑀦𑁂𑀢𑁆𑀯𑀸 𑀢𑀲𑁆𑀲 𑀅𑀢𑁆𑀢𑀸𑀦𑀁 𑀲𑀸𑀯𑁂𑀢𑁆𑀯𑀸 𑀤𑀸𑀲𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺. 𑀲𑀘𑁂 𑀯𑀸 𑀧𑀦 𑀓𑁄𑀘𑀺 𑀅𑀓𑁆𑀔𑀻𑀦𑀁 𑀦𑀸𑀫𑀁 𑀕𑀡𑁆𑀳𑁂𑀬𑁆𑀬, 𑀢𑀸𑀮𑀫𑀺𑀜𑁆𑀚𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀲𑁆𑀲 𑀤𑀲𑁆𑀲𑀸𑀫𑀻𑀢𑀺 𑀏𑀯𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀸 𑀉𑀴𑀸𑀭𑀢𑀭𑀸 𑀧𑀭𑀺𑀯𑀺𑀢𑀓𑁆𑀓𑀼𑀧𑁆𑀧𑀢𑁆𑀢𑀺, 𑀘𑀓𑁆𑀔𑀼𑀬𑀸𑀘𑀓𑀁 𑀮𑀪𑀺𑀢𑁆𑀯𑀸 𑀅𑀫𑀘𑁆𑀘𑀧𑀸𑀭𑀺𑀲𑀚𑁆𑀚𑀸𑀤𑀻𑀳𑀺 𑀦𑀺𑀯𑀸𑀭𑀺𑀬𑀫𑀸𑀦𑀲𑁆𑀲𑀸𑀧𑀺 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑀺𑀢𑀓𑁆𑀓𑀸𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀬𑀸 𑀘 𑀧𑀭𑀫𑀸 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸, 𑀢𑀲𑁆𑀲𑀸 𑀧𑀻𑀢𑀺𑀫𑀦𑀢𑀸𑀬 𑀅𑀯𑀺𑀢𑀣𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀓𑁆𑀓𑀲𑁆𑀲 𑀧𑀼𑀭𑀢𑁄 𑀲𑀘𑁆𑀘𑀓𑀺𑀭𑀺𑀬𑀸𑀓𑀭𑀡𑀁, 𑀢𑁂𑀦 𑀘 𑀅𑀢𑁆𑀢𑀦𑁄 𑀘𑀓𑁆𑀔𑀽𑀦𑀁 𑀧𑀝𑀺𑀧𑀸𑀓𑀢𑀺𑀓𑀪𑀸𑀯𑁄, 𑀢𑁂𑀲𑀜𑁆𑀘 𑀤𑀺𑀩𑁆𑀩𑀸𑀦𑀼𑀪𑀸𑀯𑀢𑀸𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀲𑀺𑀯𑀺𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑁂𑀲𑁆𑀲𑀦𑁆𑀢𑀭𑀘𑀭𑀺𑀬𑀸𑀯𑀡𑁆𑀡𑀦𑀸

𑁬𑁭. 𑀦𑀯𑀫𑁂 ¶ 𑀬𑀸 𑀫𑁂 𑀅𑀳𑁄𑀲𑀺 𑀚𑀦𑀺𑀓𑀸𑀢𑀺 𑀏𑀢𑁆𑀣 𑀫𑁂𑀢𑀺 𑀯𑁂𑀲𑁆𑀲𑀦𑁆𑀢𑀭𑀪𑀽𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀯𑀤𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀨𑀼𑀲𑁆𑀲𑀢𑀻 𑀦𑀸𑀫 𑀔𑀢𑁆𑀢𑀺𑀬𑀸’’𑀢𑀺. 𑀢𑀤𑀸 𑀳𑀺𑀲𑁆𑀲 𑀫𑀸𑀢𑀸 ‘‘𑀨𑀼𑀲𑁆𑀲𑀢𑀻’’𑀢𑀺 𑀏𑀯𑀁𑀦𑀸𑀫𑀺𑀓𑀸 𑀔𑀢𑁆𑀢𑀺𑀬𑀸𑀦𑀻 𑀅𑀳𑁄𑀲𑀺. 𑀲𑀸 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀽𑀢𑀺 𑀲𑀸 𑀢𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑀚𑀸𑀢𑀺𑀬𑀁. 𑀏𑀓𑀢𑁆𑀣𑁂 𑀳𑀺 𑀏𑀢𑀁 𑀩𑀳𑀼𑀯𑀘𑀦𑀁. 𑀲𑀓𑁆𑀓𑀲𑁆𑀲 𑀫𑀳𑁂𑀲𑀻 𑀧𑀺𑀬𑀸 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀬𑀸 𑀫𑁂 𑀅𑀳𑁄𑀲𑀺 𑀚𑀦𑀺𑀓𑀸 𑀇𑀫𑀲𑁆𑀫𑀺𑀁 𑀘𑀭𑀺𑀫𑀢𑁆𑀢𑀪𑀸𑀯𑁂, 𑀲𑀸 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀨𑀼𑀲𑁆𑀲𑀢𑀻 𑀦𑀸𑀫, 𑀢𑀢𑁆𑀣 𑀅𑀢𑀻𑀢𑀸𑀬 𑀚𑀸𑀢𑀺𑀬𑀸 𑀔𑀢𑁆𑀢𑀺𑀬𑀸, 𑀬𑀢𑁆𑀣𑀸𑀳𑀁 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀯𑁂𑀲𑁆𑀲𑀦𑁆𑀢𑀭𑁄 ¶ 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁, 𑀢𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑀸𑀬 𑀲𑀓𑁆𑀓𑀲𑁆𑀲 𑀫𑀳𑁂𑀲𑀻 𑀧𑀺𑀬𑀸 𑀅𑀳𑁄𑀲𑀻𑀢𑀺. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀇𑀢𑁄 𑀳𑀺 𑀏𑀓𑀦𑀯𑀼𑀢𑁂 𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀁 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁂 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀓𑁂𑀦𑀘𑀺 𑀭𑀜𑁆𑀜𑀸 𑀧𑁂𑀲𑀺𑀢𑀁 𑀫𑀳𑀕𑁆𑀖𑀁 𑀘𑀦𑁆𑀤𑀦𑀲𑀸𑀭𑀁 𑀅𑀢𑁆𑀢𑀦𑁄 ¶ 𑀚𑁂𑀝𑁆𑀞𑀥𑀻𑀢𑀸𑀬 𑀅𑀤𑀸𑀲𑀺. 𑀲𑀸 𑀢𑁂𑀦 𑀲𑀼𑀔𑀼𑀫𑀁 𑀘𑀦𑁆𑀤𑀦𑀘𑀼𑀡𑁆𑀡𑀁 𑀓𑀸𑀭𑁂𑀢𑁆𑀯𑀸 𑀲𑀫𑀼𑀕𑁆𑀕𑀁 𑀧𑀽𑀭𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀧𑀽𑀚𑁂𑀢𑁆𑀯𑀸 𑀲𑁂𑀲𑀘𑀼𑀡𑁆𑀡𑀸𑀦𑀺 𑀕𑀦𑁆𑀥𑀓𑀼𑀝𑀺𑀬𑀁 𑀯𑀺𑀓𑀺𑀭𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀸 𑀢𑀢𑁄 𑀘𑀼𑀢𑀸 𑀢𑀲𑁆𑀲𑀸 𑀘𑀦𑁆𑀤𑀦𑀘𑀼𑀡𑁆𑀡𑀧𑀽𑀚𑀸𑀬 𑀨𑀮𑁂𑀦 𑀭𑀢𑁆𑀢𑀘𑀦𑁆𑀤𑀦𑀧𑀭𑀺𑀧𑁆𑀨𑁄𑀲𑀺𑀢𑁂𑀦 𑀯𑀺𑀬 𑀲𑀭𑀻𑀭𑁂𑀦 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑀻 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀲𑁆𑀲𑀸 𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑀢𑀁 𑀜𑀢𑁆𑀯𑀸 𑀢𑀲𑁆𑀲𑀸 𑀅𑀦𑀼𑀓𑀫𑁆𑀧𑀸𑀬 ‘‘𑀪𑀤𑁆𑀤𑁂, 𑀨𑀼𑀲𑁆𑀲𑀢𑀺 𑀤𑀲 𑀢𑁂 𑀯𑀭𑁂 𑀤𑀫𑁆𑀫𑀺, 𑀢𑁂 𑀕𑀡𑁆𑀳𑀲𑁆𑀲𑀽’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁮.

‘‘𑀢𑀲𑁆𑀲𑀸 𑀆𑀬𑀼𑀓𑁆𑀔𑀬𑀁 𑀜𑀢𑁆𑀯𑀸, 𑀤𑁂𑀯𑀺𑀦𑁆𑀤𑁄 𑀏𑀢𑀤𑀩𑁆𑀭𑀯𑀺;

‘𑀤𑀤𑀸𑀫𑀺 𑀢𑁂 𑀤𑀲 𑀯𑀭𑁂, 𑀯𑀭 𑀪𑀤𑁆𑀤𑁂 𑀬𑀤𑀺𑀘𑁆𑀙𑀲𑀻’’’𑀢𑀺.

𑀢𑀢𑁆𑀣 𑀯𑀭𑀸𑀢𑀺 𑀯𑀭𑀲𑁆𑀲𑀼 𑀯𑀭𑀁 𑀕𑀡𑁆𑀳. 𑀪𑀤𑁆𑀤𑁂, 𑀬𑀤𑀺𑀘𑁆𑀙𑀲𑀻𑀢𑀺, 𑀪𑀤𑁆𑀤𑁂, 𑀨𑀼𑀲𑁆𑀲𑀢𑀺 𑀬𑀁 𑀇𑀘𑁆𑀙𑀲𑀺 𑀬𑀁 𑀢𑀯 𑀧𑀺𑀬𑀁, 𑀢𑀁 𑀤𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 ‘‘𑀯𑀭𑀁 𑀯𑀭𑀲𑁆𑀲𑀼 𑀧𑀝𑀺𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺.

𑁬𑁯. 𑀧𑀼𑀦𑀺𑀤𑀫𑀩𑁆𑀭𑀯𑀻𑀢𑀺 𑀧𑀼𑀦 𑀇𑀤𑀁 𑀲𑀸 𑀅𑀢𑁆𑀢𑀦𑁄 𑀘𑀯𑀦𑀥𑀫𑁆𑀫𑀢𑀁 𑀅𑀚𑀸𑀦𑀦𑁆𑀢𑀻 ‘‘𑀓𑀺𑀁 𑀦𑀼 𑀫𑁂 𑀅𑀧𑀭𑀸𑀥𑀢𑁆𑀣𑀻’’𑀢𑀺𑀆𑀤𑀺𑀓𑀁 𑀅𑀪𑀸𑀲𑀺. 𑀲𑀸 𑀳𑀺 𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀓𑁆𑀔𑀬𑀁 ¶ 𑀅𑀚𑀸𑀦𑀦𑁆𑀢𑀻 𑀅𑀬𑀁 ‘‘𑀯𑀭𑀁 𑀕𑀡𑁆𑀳𑀸’’𑀢𑀺 𑀯𑀤𑀦𑁆𑀢𑁄 ‘‘𑀓𑀢𑁆𑀣𑀘𑀺 𑀫𑀫 𑀉𑀧𑁆𑀧𑀚𑁆𑀚𑀦𑀁 𑀇𑀘𑁆𑀙𑀢𑀻’’𑀢𑀺 𑀜𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀅𑀧𑀭𑀸𑀥𑀢𑁆𑀣𑀻𑀢𑀺 𑀅𑀧𑀭𑀸𑀥𑁄 𑀅𑀢𑁆𑀣𑀺. 𑀓𑀺𑀁 𑀦𑀼 𑀤𑁂𑀲𑁆𑀲𑀸 𑀅𑀳𑀁 𑀢𑀯𑀸𑀢𑀺 𑀓𑀺𑀁 𑀓𑀸𑀭𑀡𑀁 𑀅𑀳𑀁 𑀢𑀯 𑀤𑁂𑀲𑁆𑀲𑀸 𑀓𑀼𑀚𑁆𑀛𑀺𑀢𑀩𑁆𑀩𑀸 𑀅𑀧𑁆𑀧𑀺𑀬𑀸 𑀚𑀸𑀢𑀸. 𑀭𑀫𑁆𑀫𑀸 𑀘𑀸𑀯𑁂𑀲𑀺 𑀫𑀁 𑀞𑀸𑀦𑀸𑀢𑀺 𑀭𑀫𑀡𑀻𑀬𑀸 𑀇𑀫𑀲𑁆𑀫𑀸 𑀞𑀸𑀦𑀸 𑀘𑀸𑀯𑁂𑀲𑀺. 𑀯𑀸𑀢𑁄𑀯 𑀥𑀭𑀡𑀻𑀭𑀼𑀳𑀦𑁆𑀢𑀺 𑀬𑁂𑀦 𑀩𑀮𑀯𑀸 𑀫𑀸𑀮𑀼𑀢𑁄 𑀯𑀺𑀬 𑀭𑀼𑀓𑁆𑀔𑀁 𑀉𑀫𑁆𑀫𑀽𑀮𑁂𑀦𑁆𑀢𑁄 𑀇𑀫𑀫𑁆𑀳𑀸 𑀤𑁂𑀯𑀮𑁄𑀓𑀸 𑀘𑀸𑀯𑁂𑀢𑀼𑀓𑀸𑀫𑁄𑀲𑀺 𑀓𑀺𑀁 𑀦𑀼 𑀓𑀸𑀭𑀡𑀦𑁆𑀢𑀺 𑀢𑀁 𑀧𑀼𑀘𑁆𑀙𑀢𑀺.

𑁭𑁦. 𑀢𑀲𑁆𑀲𑀺𑀤𑀦𑁆𑀢𑀺 𑀢𑀲𑁆𑀲𑀸 𑀇𑀤𑀁. 𑀦 𑀘𑁂𑀯 𑀢𑁂 𑀓𑀢𑀁 𑀧𑀸𑀧𑀦𑁆𑀢𑀺 𑀦 𑀘𑁂𑀯 𑀢𑀬𑀸 𑀓𑀺𑀜𑁆𑀘𑀺 𑀧𑀸𑀧𑀁 𑀓𑀢𑀁 𑀬𑁂𑀦 𑀢𑁂 𑀅𑀧𑀭𑀸𑀥𑁄 ¶ 𑀲𑀺𑀬𑀸. 𑀦 𑀘 𑀫𑁂 𑀢𑁆𑀯𑀁𑀲𑀺 𑀅𑀧𑁆𑀧𑀺𑀬𑀸𑀢𑀺 𑀫𑀫 𑀢𑁆𑀯𑀁 𑀦 𑀘𑀸𑀧𑀺 𑀅𑀧𑁆𑀧𑀺𑀬𑀸, 𑀬𑁂𑀦 𑀤𑁂𑀲𑁆𑀲𑀸 𑀦𑀸𑀫 𑀫𑀫 𑀅𑀧𑁆𑀧𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁧. 𑀇𑀤𑀸𑀦𑀺 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀯𑀭𑁂 𑀤𑀸𑀢𑀼𑀓𑀸𑀫𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀓𑀁𑀬𑁂𑀯 𑀢𑁂 𑀆𑀬𑀼, 𑀘𑀯𑀦𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀯𑀭𑁂 𑀕𑀡𑁆𑀳𑀸𑀧𑁂𑀦𑁆𑀢𑁄 ‘‘𑀧𑀝𑀺𑀕𑁆𑀕𑀡𑁆𑀳 𑀫𑀬𑀸 𑀤𑀺𑀦𑁆𑀦𑁂, 𑀯𑀭𑁂 𑀤𑀲 𑀯𑀭𑀼𑀢𑁆𑀢𑀫𑁂’’𑀢𑀺 𑀆𑀳.

𑀢𑀢𑁆𑀣 𑀯𑀭𑀼𑀢𑁆𑀢𑀫𑁂𑀢𑀺 𑀯𑀭𑁂𑀲𑀼 𑀉𑀢𑁆𑀢𑀫𑁂 𑀅𑀕𑁆𑀕𑀯𑀭𑁂.

𑁭𑁨. 𑀤𑀺𑀦𑁆𑀦𑀯𑀭𑀸𑀢𑀺 ¶ ‘‘𑀯𑀭𑁂 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀤𑀸𑀦𑀯𑀲𑁂𑀦 𑀤𑀺𑀦𑁆𑀦𑀯𑀭𑀸. 𑀢𑀼𑀝𑁆𑀞𑀳𑀝𑁆𑀞𑀸𑀢𑀺 𑀇𑀘𑁆𑀙𑀺𑀢𑀮𑀸𑀪𑀧𑀭𑀺𑀢𑁄𑀲𑁂𑀦 𑀢𑀼𑀝𑁆𑀞𑀸 𑀘𑁂𑀯 𑀢𑀲𑁆𑀲 𑀘 𑀲𑀺𑀔𑀸𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀳𑀸𑀲𑀯𑀲𑁂𑀦 𑀳𑀝𑁆𑀞𑀸 𑀘. 𑀧𑀫𑁄𑀤𑀺𑀢𑀸𑀢𑀺 𑀩𑀮𑀯𑀧𑀸𑀫𑁄𑀚𑁆𑀚𑁂𑀦 𑀧𑀫𑀼𑀤𑀺𑀢𑀸. 𑀫𑀫𑀁 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀢𑁂𑀲𑀼 𑀯𑀭𑁂𑀲𑀼 𑀫𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑀺𑀢𑁆𑀯𑀸. 𑀤𑀲 𑀯𑀭𑁂 𑀯𑀭𑀻𑀢𑀺 𑀲𑀸 𑀅𑀢𑁆𑀢𑀦𑁄 𑀔𑀻𑀡𑀸𑀬𑀼𑀓𑀪𑀸𑀯𑀁 𑀜𑀢𑁆𑀯𑀸 𑀲𑀓𑁆𑀓𑁂𑀦 𑀯𑀭𑀤𑀸𑀦𑀢𑁆𑀣𑀁 𑀓𑀢𑁄𑀓𑀸𑀲𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑀁 𑀑𑀮𑁄𑀓𑁂𑀦𑁆𑀢𑀻 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀲𑀺𑀯𑀺𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑁄 𑀦𑀻𑀮𑀦𑁂𑀢𑁆𑀢𑀢𑀸 𑀦𑀻𑀮𑀪𑀫𑀼𑀓𑀢𑀸 𑀨𑀼𑀲𑁆𑀲𑀢𑀻𑀢𑀺𑀦𑀸𑀫𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀧𑀼𑀢𑁆𑀢𑀧𑀝𑀺𑀮𑀸𑀪𑁄 𑀅𑀦𑀼𑀦𑁆𑀦𑀢𑀓𑀼𑀘𑁆𑀙𑀺𑀪𑀸𑀯𑁄 𑀅𑀮𑀫𑁆𑀩𑀢𑁆𑀣𑀦𑀢𑀸 𑀅𑀧𑀮𑀺𑀢𑀪𑀸𑀯𑁄 𑀲𑀼𑀔𑀼𑀫𑀘𑁆𑀙𑀯𑀺𑀢𑀸 𑀯𑀚𑁆𑀛𑀚𑀦𑀸𑀦𑀁 𑀫𑁄𑀘𑀦𑀲𑀫𑀢𑁆𑀣𑀢𑀸 𑀘𑀸𑀢𑀺 𑀇𑀫𑁂 𑀤𑀲 𑀯𑀭𑁂 𑀕𑀡𑁆𑀳𑀺.

𑀇𑀢𑀺 𑀲𑀸 𑀤𑀲 𑀯𑀭𑁂 𑀕𑀳𑁂𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀫𑀤𑁆𑀤𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀚𑀸𑀬𑀫𑀸𑀦𑀸 𑀘 𑀲𑀸 𑀘𑀦𑁆𑀤𑀦𑀘𑀼𑀡𑁆𑀡𑀧𑀭𑀺𑀧𑁆𑀨𑁄𑀲𑀺𑀢𑁂𑀦 𑀯𑀺𑀬 𑀲𑀭𑀻𑀭𑁂𑀦 𑀚𑀸𑀢𑀸. 𑀢𑁂𑀦𑀲𑁆𑀲𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀨𑀼𑀲𑁆𑀲𑀢𑀻’’ 𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀺𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀉𑀢𑁆𑀢𑀫𑀭𑀽𑀧𑀥𑀭𑀸 ¶ 𑀅𑀳𑁄𑀲𑀺. 𑀅𑀣 𑀦𑀁 𑀚𑁂𑀢𑀼𑀢𑁆𑀢𑀭𑀦𑀕𑀭𑁂 𑀲𑀺𑀯𑀺𑀫𑀳𑀸𑀭𑀸𑀚𑀸 𑀧𑀼𑀢𑁆𑀢𑀲𑁆𑀲 𑀲𑀜𑁆𑀚𑀬𑀓𑀼𑀫𑀸𑀭𑀲𑁆𑀲𑀢𑁆𑀣𑀸𑀬 𑀆𑀦𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀁 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁩.

‘‘𑀢𑀢𑁄 𑀘𑀼𑀢𑀸 𑀲𑀸 𑀨𑀼𑀲𑁆𑀲𑀢𑀻, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀣;

𑀚𑁂𑀢𑀼𑀢𑁆𑀢𑀭𑀫𑁆𑀳𑀺 𑀦𑀕𑀭𑁂, 𑀲𑀜𑁆𑀚𑀬𑁂𑀦 𑀲𑀫𑀸𑀕𑀫𑀻’’𑀢𑀺.

𑀲𑀸 𑀲𑀜𑁆𑀚𑀬𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸. 𑀅𑀣 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀬𑀸 𑀨𑀼𑀲𑁆𑀲𑀢𑀺𑀬𑀸 𑀤𑀺𑀦𑁆𑀦𑀯𑀭𑁂𑀲𑀼 𑀦𑀯 𑀯𑀭𑀸 𑀲𑀫𑀺𑀤𑁆𑀥𑀸’’𑀢𑀺 𑀤𑀺𑀲𑁆𑀯𑀸 ‘‘𑀧𑀼𑀢𑁆𑀢𑀯𑀭𑁄 𑀦 𑀲𑀫𑀺𑀤𑁆𑀥𑁄, 𑀢𑀫𑁆𑀧𑀺𑀲𑁆𑀲𑀸 𑀲𑀫𑀺𑀚𑁆𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀢𑀤𑀸 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀔𑀻𑀡𑀸𑀬𑀼𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀸𑀭𑀺𑀲, 𑀢𑀬𑀸 𑀫𑀦𑀼𑀲𑁆𑀲𑀮𑁄𑀓𑁂 ¶ 𑀲𑀺𑀯𑀺𑀲𑀜𑁆𑀚𑀬𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀲𑁆𑀲 𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀘𑀯𑀦𑀥𑀫𑁆𑀫𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀫𑀳𑀸𑀲𑀢𑁆𑀢𑁄𑀧𑀺 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑁄. 𑀲𑁂𑀲𑀸 𑀤𑁂𑀯𑀧𑀼𑀢𑁆𑀢𑀸𑀧𑀺 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀅𑀫𑀘𑁆𑀘𑀸𑀦𑀁 𑀕𑁂𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀫𑀳𑀸𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀨𑀼𑀲𑁆𑀲𑀢𑀺𑀤𑁂𑀯𑀻 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀤𑀸𑀢𑀼𑀁 𑀤𑁄𑀳𑀴𑀺𑀦𑀻 𑀅𑀳𑁄𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀤𑁄𑀳𑀴𑀁 𑀲𑀼𑀢𑁆𑀯𑀸 𑀦𑁂𑀫𑀺𑀢𑁆𑀢𑀓𑁂 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀤𑀸𑀦𑀸𑀪𑀺𑀭𑀢𑁄 𑀉𑀴𑀸𑀭𑁄 𑀲𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀤𑀸𑀦𑁂𑀦 𑀢𑀺𑀢𑁆𑀢𑀺𑀁 𑀦 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀫𑀡𑀩𑁆𑀭𑀸𑀳𑁆𑀫𑀡𑀚𑀺𑀡𑁆𑀡𑀸𑀢𑀼𑀭𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑁂 ¶ 𑀲𑀦𑁆𑀢𑀧𑁆𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑁄 𑀆𑀬𑀲𑁆𑀲 𑀧𑀫𑀸𑀡𑀁 𑀦𑀸𑀳𑁄𑀲𑀺. 𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁪.

‘‘𑀬𑀤𑀸𑀳𑀁 𑀨𑀼𑀲𑁆𑀲𑀢𑀺𑀬𑀸 𑀓𑀼𑀘𑁆𑀙𑀺𑀁, 𑀑𑀓𑁆𑀓𑀦𑁆𑀢𑁄 𑀧𑀺𑀬𑀫𑀸𑀢𑀼𑀬𑀸;

𑀫𑀫 𑀢𑁂𑀚𑁂𑀦 𑀫𑁂 𑀫𑀸𑀢𑀸, 𑀢𑀤𑀸 𑀤𑀸𑀦𑀭𑀢𑀸 𑀅𑀳𑀼.

𑁭𑁫.

‘‘𑀅𑀥𑀦𑁂 ¶ 𑀆𑀢𑀼𑀭𑁂 𑀚𑀺𑀡𑁆𑀡𑁂, 𑀬𑀸𑀘𑀓𑁂 𑀅𑀤𑁆𑀥𑀺𑀓𑁂 𑀚𑀦𑁂;

𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀔𑀻𑀡𑁂, 𑀤𑁂𑀢𑀺 𑀤𑀸𑀦𑀁 𑀅𑀓𑀺𑀜𑁆𑀘𑀦𑁂’’𑀢𑀺;

𑀢𑀢𑁆𑀣 𑀫𑀫 𑀢𑁂𑀚𑁂𑀦𑀸𑀢𑀺 𑀫𑀫 𑀤𑀸𑀦𑀚𑁆𑀛𑀸𑀲𑀬𑀸𑀦𑀼𑀪𑀸𑀯𑁂𑀦. 𑀔𑀻𑀡𑁂𑀢𑀺 𑀪𑁄𑀕𑀸𑀤𑀻𑀳𑀺 𑀧𑀭𑀺𑀓𑁆𑀔𑀻𑀡𑁂 𑀧𑀸𑀭𑀺𑀚𑀼𑀜𑁆𑀜𑀧𑁆𑀧𑀢𑁆𑀢𑁂. 𑀅𑀓𑀺𑀜𑁆𑀘𑀦𑁂𑀢𑀺 𑀅𑀧𑀭𑀺𑀕𑁆𑀕𑀳𑁂. 𑀲𑀩𑁆𑀩𑀢𑁆𑀣 𑀯𑀺𑀲𑀬𑁂 𑀪𑀼𑀫𑁆𑀫𑀁. 𑀅𑀥𑀦𑀸𑀤𑀬𑁄 𑀳𑀺 𑀤𑀸𑀦𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀬𑀸 𑀯𑀺𑀲𑀬𑁄.

𑀤𑁂𑀯𑀻 𑀫𑀳𑀦𑁆𑀢𑁂𑀦 𑀧𑀭𑀺𑀳𑀸𑀭𑁂𑀦 𑀕𑀩𑁆𑀪𑀁 𑀥𑀸𑀭𑁂𑀦𑁆𑀢𑀻 𑀤𑀲𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑁂 𑀦𑀕𑀭𑀁 𑀤𑀝𑁆𑀞𑀼𑀓𑀸𑀫𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀤𑁂𑀯𑀦𑀕𑀭𑀁 𑀯𑀺𑀬 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀺𑀁 𑀭𑀣𑀯𑀭𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑁂𑀲𑀺. 𑀢𑀲𑁆𑀲𑀸 𑀯𑁂𑀲𑁆𑀲𑀯𑀻𑀣𑀺𑀬𑀸 𑀫𑀚𑁆𑀛𑀧𑁆𑀧𑀢𑁆𑀢𑀓𑀸𑀮𑁂 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀯𑁂𑀲𑁆𑀲𑀯𑀻𑀣𑀺𑀬𑀁𑀬𑁂𑀯𑀲𑁆𑀲𑀸 𑀲𑀽𑀢𑀺𑀖𑀭𑀁 𑀓𑀸𑀭𑁂𑀢𑁆𑀯𑀸 ¶ 𑀆𑀭𑀓𑁆𑀔𑀁 𑀕𑀡𑁆𑀳𑀸𑀧𑁂𑀲𑀺. 𑀲𑀸 𑀢𑀢𑁆𑀣 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑁂𑀦𑀸𑀳 𑁋

𑁭𑁬.

‘‘𑀤𑀲𑀫𑀸𑀲𑁂 𑀥𑀸𑀭𑀬𑀺𑀢𑁆𑀯𑀸𑀦, 𑀓𑀭𑁄𑀦𑁆𑀢𑁂 𑀧𑀼𑀭𑀁 𑀧𑀤𑀓𑁆𑀔𑀺𑀡𑀁;

𑀯𑁂𑀲𑁆𑀲𑀸𑀦𑀁 𑀯𑀻𑀣𑀺𑀬𑀸 𑀫𑀚𑁆𑀛𑁂, 𑀚𑀦𑁂𑀲𑀺 𑀨𑀼𑀲𑁆𑀲𑀢𑀻 𑀫𑀫𑀁.

𑁭𑁭. ‘‘𑀦 𑀫𑀬𑁆𑀳𑀁 𑀫𑀢𑁆𑀢𑀺𑀓𑀁 𑀦𑀸𑀫𑀁, 𑀦𑀸𑀧𑀺 𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀁.

𑀚𑀸𑀢𑁂𑀢𑁆𑀣 𑀯𑁂𑀲𑁆𑀲𑀯𑀻𑀣𑀺𑀬𑀁, 𑀢𑀲𑁆𑀫𑀸 𑀯𑁂𑀲𑁆𑀲𑀦𑁆𑀢𑀭𑁄 𑀅𑀳𑀽’’𑀢𑀺.

𑀢𑀢𑁆𑀣 𑀓𑀭𑁄𑀦𑁆𑀢𑁂 𑀧𑀼𑀭𑀁 𑀧𑀤𑀓𑁆𑀔𑀺𑀡𑀦𑁆𑀢𑀺 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀲𑀜𑁆𑀚𑀬𑀫𑀳𑀸𑀭𑀸𑀚𑁂 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀼𑀭𑀼𑀫𑀸𑀦𑁂. 𑀯𑁂𑀲𑁆𑀲𑀸𑀦𑀦𑁆𑀢𑀺 𑀯𑀸𑀡𑀺𑀚𑀸𑀦𑀁.

𑀦 𑀫𑀢𑁆𑀢𑀺𑀓𑀁 𑀦𑀸𑀫𑀦𑁆𑀢𑀺 𑀦 𑀫𑀸𑀢𑀼𑀆𑀕𑀢𑀁 𑀫𑀸𑀢𑀸𑀫𑀳𑀸𑀤𑀻𑀦𑀁 𑀦𑀸𑀫𑀁. 𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀦𑁆𑀢𑀺 𑀧𑀺𑀢𑀼 𑀇𑀤𑀦𑁆𑀢𑀺 𑀧𑁂𑀢𑁆𑀢𑀺𑀓𑀁 ¶ , 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄, 𑀢𑀁 𑀧𑁂𑀢𑁆𑀢𑀺𑀓𑀁 𑀲𑀫𑁆𑀪𑀯𑁄 𑀏𑀢𑀲𑁆𑀲𑀸𑀢𑀺 𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀁, 𑀦𑀸𑀫𑀁. 𑀫𑀸𑀢𑀸𑀧𑀺𑀢𑀼𑀲𑀫𑁆𑀩𑀦𑁆𑀥𑀯𑀲𑁂𑀦 𑀦 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀚𑀸𑀢𑁂𑀢𑁆𑀣𑀸𑀢𑀺 𑀚𑀸𑀢𑁄 𑀏𑀢𑁆𑀣. ‘‘𑀚𑀸𑀢𑁄𑀫𑁆𑀳𑀻’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀫𑀸 𑀯𑁂𑀲𑁆𑀲𑀦𑁆𑀢𑀭𑁄 𑀅𑀳𑀽𑀢𑀺 𑀬𑀲𑁆𑀫𑀸 𑀢𑀤𑀸 𑀯𑁂𑀲𑁆𑀲𑀯𑀻𑀣𑀺𑀬𑀁 𑀚𑀸𑀢𑁄, 𑀢𑀲𑁆𑀫𑀸 𑀯𑁂𑀲𑁆𑀲𑀦𑁆𑀢𑀭𑁄 𑀦𑀸𑀫 𑀅𑀳𑁄𑀲𑀺, 𑀯𑁂𑀲𑁆𑀲𑀦𑁆𑀢𑀭𑁄𑀢𑀺 𑀦𑀸𑀫𑀁 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄.

𑀫𑀳𑀸𑀲𑀢𑁆𑀢𑁄 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀯𑀺𑀲𑀤𑁄 𑀳𑀼𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀏𑀯 𑀫𑀸𑀢𑀼 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀅𑀫𑁆𑀫, 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀅𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀆𑀳. 𑀅𑀣𑀲𑁆𑀲 𑀫𑀸𑀢𑀸 ‘‘𑀢𑀸𑀢, 𑀬𑀣𑀸𑀚𑁆𑀛𑀸𑀲𑀬𑀁 𑀤𑀸𑀦𑀁 𑀤𑁂𑀳𑀻’’𑀢𑀺 𑀳𑀢𑁆𑀣𑀲𑀫𑀻𑀧𑁂 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀉𑀫𑁆𑀫𑀗𑁆𑀕𑀚𑀸𑀢𑀓𑁂 ¶ (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀚𑀸𑀢𑀫𑀢𑁆𑀢𑁄𑀯 𑀓𑀣𑁂𑀲𑀺. 𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀢𑀺𑀤𑀻𑀖𑀸𑀤𑀺𑀤𑁄𑀲𑀯𑀺𑀯𑀚𑁆𑀚𑀺𑀢𑀸 𑀫𑀥𑀼𑀭𑀔𑀻𑀭𑀸 𑀘𑀢𑀼𑀲𑀝𑁆𑀞𑀺𑀥𑀸𑀢𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀲𑀤𑁆𑀥𑀺𑀁 𑀚𑀸𑀢𑀸𑀦𑀁 𑀲𑀝𑁆𑀞𑀺𑀬𑀸 𑀤𑀸𑀭𑀓𑀲𑀳𑀲𑁆𑀲𑀸𑀦𑀫𑁆𑀧𑀺 𑀥𑀸𑀢𑀺𑀬𑁄 𑀤𑀸𑀧𑁂𑀲𑀺. 𑀲𑁄 𑀲𑀝𑁆𑀞𑀺𑀤𑀸𑀭𑀓𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀢𑀺. 𑀢𑀲𑁆𑀲 𑀭𑀸𑀚𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀓𑀼𑀫𑀸𑀭𑀧𑀺𑀴𑀦𑁆𑀥𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀘𑀢𑀼𑀧𑀜𑁆𑀘𑀯𑀲𑁆𑀲𑀺𑀓𑀓𑀸𑀮𑁂 𑀢𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀧𑀼𑀦 𑀢𑀸𑀳𑀺 𑀤𑀻𑀬𑀫𑀸𑀦𑀁 𑀦 𑀕𑀡𑁆𑀳𑀸𑀢𑀺. 𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀫𑀫 𑀧𑀼𑀢𑁆𑀢𑁂𑀦 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀅𑀧𑀭𑀫𑁆𑀧𑀺 𑀓𑀸𑀭𑁂𑀲𑀺. 𑀢𑀫𑁆𑀧𑀺 𑀤𑁂𑀢𑀺. 𑀤𑀸𑀭𑀓𑀓𑀸𑀮𑁂𑀬𑁂𑀯 𑀥𑀸𑀢𑀻𑀦𑀁 𑀦𑀯𑀯𑀸𑀭𑁂 𑀧𑀺𑀴𑀦𑁆𑀥𑀦𑀁 𑀅𑀤𑀸𑀲𑀺.

𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀧𑀦 𑀲𑀬𑀦𑀧𑀻𑀞𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀩𑀸𑀳𑀺𑀭𑀓𑀤𑀸𑀦𑀁 𑀤𑁂𑀫𑀺, 𑀦 𑀢𑀁 𑀫𑀁 𑀧𑀭𑀺𑀢𑁄𑀲𑁂𑀢𑀺, 𑀅𑀚𑁆𑀛𑀢𑁆𑀢𑀺𑀓𑀤𑀸𑀦𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀺. 𑀲𑀘𑁂 𑀳𑀺 𑀫𑀁 𑀓𑁄𑀘𑀺 𑀳𑀤𑀬𑀁 𑀬𑀸𑀘𑁂𑀬𑁆𑀬, 𑀳𑀤𑀬𑀁 𑀦𑀻𑀳𑀭𑀺𑀢𑁆𑀯𑀸 𑀤𑀤𑁂𑀬𑁆𑀬𑀁. 𑀲𑀘𑁂 𑀅𑀓𑁆𑀔𑀻𑀦𑀺 𑀬𑀸𑀘𑁂𑀬𑁆𑀬, 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀤𑁂𑀬𑁆𑀬𑀁. 𑀲𑀘𑁂 𑀲𑀓𑀮𑀲𑀭𑀻𑀭𑁂 𑀫𑀁𑀲𑀁 𑀭𑀼𑀥𑀺𑀭𑀫𑁆𑀧𑀺 𑀯𑀸 𑀬𑀸𑀘𑁂𑀬𑁆𑀬, 𑀲𑀓𑀮𑀲𑀭𑀻𑀭𑀢𑁄 𑀫𑀁𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀭𑀼𑀥𑀺𑀭𑀫𑁆𑀧𑀺 𑀅𑀲𑀺𑀦𑀸 𑀯𑀺𑀚𑁆𑀛𑀺𑀢𑁆𑀯𑀸 𑀤𑀤𑁂𑀬𑁆𑀬𑀁. 𑀅𑀣𑀸𑀧𑀺 𑀓𑁄𑀘𑀺 ‘𑀤𑀸𑀲𑁄 𑀫𑁂 𑀳𑁄𑀳𑀻’𑀢𑀺 𑀯𑀤𑁂𑀬𑁆𑀬, 𑀅𑀢𑁆𑀢𑀸𑀦𑀁 𑀢𑀲𑁆𑀲 𑀲𑀸𑀯𑁂𑀢𑁆𑀯𑀸 𑀤𑀤𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀲𑀪𑀸𑀯𑀁 𑀲𑀭𑀲𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺. 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀑𑀦𑀫𑀺𑀢𑁆𑀯𑀸 𑀚𑁂𑀢𑀼𑀢𑁆𑀢𑀭𑀦𑀕𑀭𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁮.

‘‘𑀬𑀤𑀸𑀳𑀁 𑀤𑀸𑀭𑀓𑁄 𑀳𑁄𑀫𑀺, 𑀚𑀸𑀢𑀺𑀬𑀸 𑀅𑀝𑁆𑀞𑀯𑀲𑁆𑀲𑀺𑀓𑁄;

𑀢𑀤𑀸 𑀦𑀺𑀲𑀚𑁆𑀚 𑀧𑀸𑀲𑀸𑀤𑁂, 𑀤𑀸𑀦𑀁 𑀤𑀸𑀢𑀼𑀁 𑀯𑀺𑀘𑀺𑀦𑁆𑀢𑀬𑀺𑀁.

𑁭𑁯.

‘‘𑀳𑀤𑀬𑀁 ¶ 𑀤𑀤𑁂𑀬𑁆𑀬𑀁 𑀘𑀓𑁆𑀔𑀼𑀁, 𑀫𑀁𑀲𑀫𑁆𑀧𑀺 𑀭𑀼𑀥𑀺𑀭𑀫𑁆𑀧𑀺 𑀘;

𑀤𑀤𑁂𑀬𑁆𑀬𑀁 𑀓𑀸𑀬𑀁 𑀲𑀸𑀯𑁂𑀢𑁆𑀯𑀸, 𑀬𑀤𑀺 𑀓𑁄𑀘𑀺 𑀬𑀸𑀘𑀬𑁂 𑀫𑀫𑀁.

𑁮𑁦.

‘‘𑀲𑀪𑀸𑀯𑀁 𑀘𑀺𑀦𑁆𑀢𑀬𑀦𑁆𑀢𑀲𑁆𑀲, 𑀅𑀓𑀫𑁆𑀧𑀺𑀢𑀫𑀲𑀡𑁆𑀞𑀺𑀢𑀁;

𑀅𑀓𑀫𑁆𑀧𑀺 𑀢𑀢𑁆𑀣 𑀧𑀣𑀯𑀻, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸’’𑀢𑀺.

𑀢𑀢𑁆𑀣 𑀲𑀸𑀯𑁂𑀢𑁆𑀯𑀸𑀢𑀺 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀅𑀳𑀁 𑀇𑀫𑀲𑁆𑀲 𑀤𑀸𑀲𑁄’’𑀢𑀺 𑀤𑀸𑀲𑀪𑀸𑀯𑀁 𑀲𑀸𑀯𑁂𑀢𑁆𑀯𑀸. 𑀬𑀤𑀺 𑀓𑁄𑀘𑀺 𑀬𑀸𑀘𑀬𑁂 𑀫𑀫𑀦𑁆𑀢𑀺 𑀓𑁄𑀘𑀺 𑀫𑀁 𑀬𑀤𑀺 𑀬𑀸𑀘𑁂𑀬𑁆𑀬. 𑀲𑀪𑀸𑀯𑀁 𑀘𑀺𑀦𑁆𑀢𑀬𑀦𑁆𑀢𑀲𑁆𑀲𑀸𑀢𑀺 𑀅𑀯𑀺𑀧𑀭𑀻𑀢𑀁 𑀅𑀢𑁆𑀢𑀦𑁄 𑀬𑀣𑀸𑀪𑀽𑀢𑀁 𑀲𑀪𑀸𑀯𑀁 𑀅𑀢𑀺𑀢𑁆𑀢𑀺𑀫𑀁 ¶ 𑀬𑀣𑀸𑀚𑁆𑀛𑀸𑀲𑀬𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀫, 𑀫𑀬𑀺 𑀘𑀺𑀦𑁆𑀢𑁂𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀓𑀫𑁆𑀧𑀺𑀢𑀦𑁆𑀢𑀺 𑀓𑀫𑁆𑀧𑀺𑀢𑀭𑀳𑀺𑀢𑀁. 𑀅𑀲𑀡𑁆𑀞𑀺𑀢𑀦𑁆𑀢𑀺 𑀲𑀗𑁆𑀓𑁄𑀘𑀭𑀳𑀺𑀢𑀁. 𑀬𑁂𑀦 𑀳𑀺 𑀮𑁄𑀪𑀸𑀤𑀺𑀦𑀸 𑀅𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀓𑁆𑀔𑀸𑀤𑀺𑀤𑀸𑀦𑁂 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑀗𑁆𑀔𑀸𑀢𑀁 𑀓𑀫𑁆𑀧𑀺𑀢𑀁 𑀲𑀗𑁆𑀓𑁄𑀘𑀲𑀗𑁆𑀔𑀸𑀢𑀁 𑀲𑀡𑁆𑀞𑀺𑀢𑀜𑁆𑀘 𑀲𑀺𑀬𑀸, 𑀢𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀅𑀓𑀫𑁆𑀧𑀻𑀢𑀺 𑀅𑀘𑀮𑀺. 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸𑀢𑀺 𑀲𑀺𑀦𑁂𑀭𑀼𑀫𑁆𑀳𑀺 𑀉𑀝𑁆𑀞𑀺𑀢𑀦𑀦𑁆𑀤𑀦𑀯𑀦𑀨𑀸𑀭𑀼𑀲𑀓𑀯𑀦𑀫𑀺𑀲𑁆𑀲𑀓𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀸𑀤𑀺𑀓𑀧𑁆𑀧𑀓𑀢𑀭𑀼𑀯𑀦𑀁 𑀲𑀺𑀦𑁂𑀭𑀼𑀯𑀦𑀁. 𑀅𑀣 𑀯𑀸 𑀲𑀺𑀦𑁂𑀭𑀼 𑀘 𑀚𑀫𑁆𑀩𑀼𑀤𑀻𑀧𑀸𑀤𑀻𑀲𑀼 𑀭𑀫𑀡𑀻𑀬𑀯𑀦𑀜𑁆𑀘 𑀲𑀺𑀦𑁂𑀭𑀼𑀯𑀦𑀁 ¶ , 𑀢𑀁 𑀯𑀦𑀁 𑀯𑀝𑀁𑀲𑀓𑀁 𑀏𑀢𑀺𑀲𑁆𑀲𑀸𑀢𑀺 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑀏𑀯𑀜𑁆𑀘 𑀧𑀣𑀯𑀺𑀓𑀫𑁆𑀧𑀦𑁂 𑀯𑀢𑁆𑀢𑀫𑀸𑀦𑁂 𑀫𑀥𑀼𑀭𑀕𑀫𑁆𑀪𑀻𑀭𑀤𑁂𑀯𑁄 𑀕𑀚𑁆𑀚𑀦𑁆𑀢𑁄 𑀔𑀡𑀺𑀓𑀯𑀲𑁆𑀲𑀁 𑀯𑀲𑁆𑀲𑀺, 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼, 𑀫𑀳𑀸𑀲𑀫𑀼𑀤𑁆𑀤𑁄 𑀉𑀩𑁆𑀪𑀺𑀚𑁆𑀚𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀧𑁆𑀨𑁄𑀝𑁂𑀲𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀲𑀸𑀥𑀼𑀓𑀸𑀭𑀫𑀤𑀸𑀲𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂𑀬𑁂𑀯 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀺𑀢𑀸 𑀭𑀚𑁆𑀚𑀁 𑀤𑀸𑀢𑀼𑀓𑀸𑀫𑁄 𑀫𑀸𑀢𑀭𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀫𑀤𑁆𑀤𑀭𑀸𑀚𑀓𑀼𑀮𑀢𑁄 𑀫𑀸𑀢𑀼𑀮𑀥𑀻𑀢𑀭𑀁 𑀫𑀤𑁆𑀤𑀺𑀁 𑀦𑀸𑀫 𑀭𑀸𑀚𑀓𑀜𑁆𑀜𑀁 𑀆𑀦𑁂𑀢𑁆𑀯𑀸 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀓𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀫𑀳𑀸𑀲𑀢𑁆𑀢𑁄 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀅𑀦𑁆𑀯𑀤𑁆𑀥𑀫𑀸𑀲𑀁 𑀤𑀸𑀦𑀁 𑀑𑀮𑁄𑀓𑁂𑀢𑀼𑀁 𑀉𑀧𑀲𑀗𑁆𑀓𑀫𑀢𑀺. 𑀅𑀧𑀭𑀪𑀸𑀕𑁂 𑀫𑀤𑁆𑀤𑀺𑀤𑁂𑀯𑀻 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀓𑀜𑁆𑀘𑀦𑀚𑀸𑀮𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀢𑁂𑀦𑀲𑁆𑀲 ‘‘𑀚𑀸𑀮𑀺𑀓𑀼𑀫𑀸𑀭𑁄’’𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀲𑀸 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀢𑀁 𑀓𑀡𑁆𑀳𑀸𑀚𑀺𑀦𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀢𑁂𑀦𑀲𑁆𑀲𑀸 ‘‘𑀓𑀡𑁆𑀳𑀸𑀚𑀺𑀦𑀸’’𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁧.

‘‘𑀅𑀦𑁆𑀯𑀤𑁆𑀥𑀫𑀸𑀲𑁂 𑀧𑀦𑁆𑀦𑀭𑀲𑁂, 𑀧𑀼𑀡𑁆𑀡𑀫𑀸𑀲𑁂 𑀉𑀧𑁄𑀲𑀣𑁂;

𑀧𑀘𑁆𑀘𑀬𑀁 𑀦𑀸𑀕𑀫𑀸𑀭𑀼𑀬𑁆𑀳, 𑀤𑀸𑀦𑀁 𑀤𑀸𑀢𑀼𑀁 𑀉𑀧𑀸𑀕𑀫𑀺’’𑀦𑁆𑀢𑀺.

𑀢𑀢𑁆𑀣 𑀅𑀦𑁆𑀯𑀤𑁆𑀥𑀫𑀸𑀲𑁂𑀢𑀺 𑀅𑀦𑀼𑀅𑀤𑁆𑀥𑀫𑀸𑀲𑁂, 𑀅𑀤𑁆𑀥𑀫𑀸𑀲𑁂 𑀅𑀤𑁆𑀥𑀫𑀸𑀲𑁂𑀢𑀺 𑀅𑀢𑁆𑀣𑁄. 𑀧𑀼𑀡𑁆𑀡𑀫𑀸𑀲𑁂𑀢𑀺 𑀧𑀼𑀡𑁆𑀡𑀫𑀸𑀲𑀺𑀬𑀁, 𑀫𑀸𑀲𑀧𑀭𑀺𑀧𑀽𑀭𑀺𑀬𑀸 ¶ 𑀘𑀦𑁆𑀤𑀧𑀭𑀺𑀧𑀽𑀭𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑁂 𑀧𑀦𑁆𑀦𑀭𑀲𑁂 𑀤𑀸𑀦𑀁 𑀤𑀸𑀢𑀼𑀁 𑀉𑀧𑀸𑀕𑀫𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀧𑀘𑁆𑀘𑀬𑀁 𑀦𑀸𑀕𑀫𑀸𑀭𑀼𑀬𑁆𑀳 𑀅𑀤𑁆𑀥𑀫𑀸𑀲𑁂 𑀅𑀤𑁆𑀥𑀫𑀸𑀲𑁂 𑀤𑀸𑀦𑀁 𑀤𑀸𑀢𑀼𑀁 𑀤𑀸𑀦𑀲𑀸𑀮𑀁 𑀉𑀧𑀸𑀕𑀫𑀺𑀁, 𑀏𑀯𑀁 𑀉𑀧𑀕𑀘𑁆𑀙𑀦𑁆𑀢𑁄 𑀘 𑀬𑀤𑀸 𑀏𑀓𑀲𑁆𑀫𑀺𑀁 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀫𑀸𑀲𑀺𑀉𑀧𑁄𑀲𑀣𑁂 𑀤𑀸𑀦𑀁 𑀤𑀸𑀢𑀼𑀁 𑀉𑀧𑀸𑀕𑀫𑀺𑀁, 𑀢𑀤𑀸 𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸 𑀩𑁆𑀭𑀸𑀳𑁆𑀫𑀡𑀸 𑀉𑀧𑀕𑀜𑁆𑀙𑀼 ¶ 𑀫𑀦𑁆𑀢𑀺 𑀢𑀢𑁆𑀣 𑀧𑀘𑁆𑀘𑀬𑀁 𑀦𑀸𑀕𑀦𑁆𑀢𑀺 𑀧𑀘𑁆𑀘𑀬𑀦𑀸𑀫𑀓𑀁 𑀫𑀗𑁆𑀕𑀮𑀳𑀢𑁆𑀣𑀺𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀚𑀸𑀢𑀤𑀺𑀯𑀲𑁂 𑀏𑀓𑀸 𑀆𑀓𑀸𑀲𑀘𑀸𑀭𑀺𑀦𑀻 𑀓𑀭𑁂𑀡𑀼𑀓𑀸 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀁 𑀲𑀩𑁆𑀩𑀲𑁂𑀢𑀳𑀢𑁆𑀣𑀺𑀧𑁄𑀢𑀓𑀁 𑀆𑀦𑁂𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀫𑀳𑀸𑀲𑀢𑁆𑀢𑀁 ¶ 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀮𑀤𑁆𑀥𑀢𑁆𑀢𑀸 ‘‘𑀧𑀘𑁆𑀘𑀬𑁄’’𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀧𑀘𑁆𑀘𑀬𑀦𑀸𑀫𑀓𑀁 𑀑𑀧𑀯𑀬𑁆𑀳𑀁 𑀳𑀢𑁆𑀣𑀺𑀦𑀸𑀕𑀁 𑀆𑀭𑀼𑀬𑁆𑀳 𑀤𑀸𑀦𑀁 𑀤𑀸𑀢𑀼𑀁 𑀉𑀧𑀸𑀕𑀫𑀺𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁨.

‘‘𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸, 𑀩𑁆𑀭𑀸𑀳𑁆𑀫𑀡𑀸 𑀉𑀧𑀕𑀜𑁆𑀙𑀼 𑀫𑀁;

𑀅𑀬𑀸𑀘𑀼𑀁 𑀫𑀁 𑀳𑀢𑁆𑀣𑀺𑀦𑀸𑀕𑀁, 𑀥𑀜𑁆𑀜𑀁 𑀫𑀗𑁆𑀕𑀮𑀲𑀫𑁆𑀫𑀢𑀁.

𑁮𑁩.

‘‘𑀅𑀯𑀼𑀝𑁆𑀞𑀺𑀓𑁄 𑀚𑀦𑀧𑀤𑁄, 𑀤𑀼𑀩𑁆𑀪𑀺𑀓𑁆𑀔𑁄 𑀙𑀸𑀢𑀓𑁄 𑀫𑀳𑀸;

𑀤𑀤𑀸𑀳𑀺 𑀧𑀯𑀭𑀁 𑀦𑀸𑀕𑀁, 𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫’’𑀦𑁆𑀢𑀺.

𑀢𑀢𑁆𑀣 ‘‘𑀓𑀮𑀺𑀗𑁆𑀕𑀭𑀝𑁆𑀞𑀯𑀺𑀲𑀬𑀸’’𑀢𑀺𑀆𑀤𑀺𑀕𑀸𑀣𑀸 𑀳𑁂𑀝𑁆𑀞𑀸 𑀓𑀼𑀭𑀼𑀭𑀸𑀚𑀘𑀭𑀺𑀢𑁂𑀧𑀺 (𑀘𑀭𑀺𑀬𑀸. 𑁧.𑁨𑁧-𑁨𑁨) 𑀆𑀕𑀢𑀸 𑀏𑀯, 𑀢𑀲𑁆𑀫𑀸 𑀢𑀸𑀲𑀁 𑀅𑀢𑁆𑀣𑁄 𑀓𑀣𑀸𑀫𑀕𑁆𑀕𑁄 𑀘 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀫𑀗𑁆𑀕𑀮𑀳𑀢𑁆𑀣𑀺𑀦𑁄 𑀲𑁂𑀢𑀢𑁆𑀢𑀸 ‘‘𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑁋

𑁮𑁪.

‘‘𑀤𑀤𑀸𑀫𑀺 𑀦 𑀯𑀺𑀓𑀫𑁆𑀧𑀸𑀫𑀺, 𑀬𑀁 𑀫𑀁 𑀬𑀸𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀲𑀦𑁆𑀢𑀁 𑀦𑀧𑁆𑀧𑀝𑀺𑀕𑀽𑀳𑀸𑀫𑀺, 𑀤𑀸𑀦𑁂 𑀫𑁂 𑀭𑀫𑀢𑁂 𑀫𑀦𑁄’’𑀢𑀺. 𑁋

𑀅𑀢𑁆𑀢𑀦𑁄 𑀤𑀸𑀦𑀸𑀪𑀺𑀭𑀢𑀺𑀁 𑀧𑀯𑁂𑀤𑁂𑀦𑁆𑀢𑁄 𑁋

𑁮𑁫.

‘‘𑀦 𑀫𑁂 𑀬𑀸𑀘𑀓𑀫𑀦𑀼𑀧𑁆𑀧𑀢𑁆𑀢𑁂, 𑀧𑀝𑀺𑀓𑁆𑀔𑁂𑀧𑁄 𑀅𑀦𑀼𑀘𑁆𑀙𑀯𑁄;

𑀫𑀸 𑀫𑁂 𑀪𑀺𑀚𑁆𑀚𑀺 𑀲𑀫𑀸𑀤𑀸𑀦𑀁, 𑀤𑀲𑁆𑀲𑀸𑀫𑀺 𑀯𑀺𑀧𑀼𑀮𑀁 𑀕𑀚’’𑀦𑁆𑀢𑀺. (𑀘𑀭𑀺𑀬𑀸. 𑁧.𑁨𑁩) 𑁋

𑀧𑀝𑀺𑀚𑀸𑀦𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳 𑀅𑀦𑀮𑀗𑁆𑀓𑀢𑀝𑁆𑀞𑀸𑀦𑀁 𑀑𑀮𑁄𑀓𑀦𑀢𑁆𑀣𑀁 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀅𑀦𑀮𑀗𑁆𑀓𑀢𑀝𑁆𑀞𑀸𑀦𑀁 𑀅𑀤𑀺𑀲𑁆𑀯𑀸 𑀓𑀼𑀲𑀼𑀫𑀫𑀺𑀲𑁆𑀲𑀕𑀦𑁆𑀥𑁄𑀤𑀓𑀪𑀭𑀺𑀢𑀁 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀪𑁄𑀦𑁆𑀢𑁄 𑀇𑀢𑁄 𑀏𑀣𑀸’’𑀢𑀺 ¶ 𑀅𑀮𑀗𑁆𑀓𑀢𑀭𑀚𑀢𑀤𑀸𑀫𑀲𑀤𑀺𑀲𑀁 𑀳𑀢𑁆𑀣𑀺𑀲𑁄𑀡𑁆𑀟𑀁 𑀢𑁂𑀲𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀅𑀮𑀗𑁆𑀓𑀢𑀯𑀸𑀭𑀡𑀁 𑀅𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁬.

‘‘𑀦𑀸𑀕𑀁 𑀕𑀳𑁂𑀢𑁆𑀯𑀸 𑀲𑁄𑀡𑁆𑀟𑀸𑀬, 𑀪𑀺𑀗𑁆𑀕𑀸𑀭𑁂 𑀭𑀢𑀦𑀸𑀫𑀬𑁂;

𑀚𑀮𑀁 𑀳𑀢𑁆𑀣𑁂 𑀆𑀓𑀺𑀭𑀺𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀁 𑀕𑀚’’𑀦𑁆𑀢𑀺. (𑀘𑀭𑀺𑀬𑀸. 𑁧.𑁨𑁪);

𑀢𑀢𑁆𑀣 ¶ 𑀲𑀦𑁆𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁. 𑀦𑀧𑁆𑀧𑀝𑀺𑀕𑀽𑀳𑀸𑀫𑀻𑀢𑀺 𑀦 𑀧𑀝𑀺𑀘𑁆𑀙𑀸𑀤𑁂𑀫𑀺. 𑀬𑁄 𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 ‘‘𑀫𑀬𑁆𑀳𑀫𑁂𑀯 𑀳𑁄𑀢𑀽’’𑀢𑀺 𑀘𑀺𑀦𑁆𑀢𑁂𑀢𑀺, 𑀬𑀸𑀘𑀺𑀢𑁄 𑀯𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀲𑁄 𑀬𑀸𑀘𑀓𑀸𑀦𑀁 𑀅𑀪𑀺𑀫𑀼𑀔𑁂 𑀞𑀺𑀢𑀫𑁆𑀧𑀺 𑀅𑀢𑁆𑀣𑀢𑁄 𑀧𑀝𑀺𑀘𑁆𑀙𑀸𑀤𑁂𑀢𑀺 𑀦𑀸𑀫. 𑀫𑀳𑀸𑀲𑀢𑁆𑀢𑁄 𑀧𑀦 𑀅𑀢𑁆𑀢𑀦𑁄 𑀲𑀻𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀤𑀸𑀦𑀁 𑀤𑀸𑀢𑀼𑀓𑀸𑀫𑁄𑀯, 𑀓𑀣𑀁 𑀩𑀸𑀳𑀺𑀭𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀦𑁆𑀢𑀁 𑀦𑀧𑁆𑀧𑀝𑀺𑀕𑀽𑀳𑀸𑀫𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀤𑀸𑀦𑁂 𑀫𑁂 𑀭𑀫𑀢𑁂 𑀫𑀦𑁄’’𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀢𑀲𑁆𑀲 𑀧𑀦 𑀳𑀢𑁆𑀣𑀺𑀦𑁄 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀅𑀮𑀗𑁆𑀓𑀸𑀭𑀸 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 ¶ 𑀅𑀕𑁆𑀖𑀦𑁆𑀢𑀺, 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀅𑀮𑀗𑁆𑀓𑀸𑀭𑀸 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀳𑁂𑀝𑁆𑀞𑀸 𑀉𑀤𑀭𑁂 𑀓𑀫𑁆𑀩𑀮𑀁 𑀲𑀢𑀲𑀳𑀲𑁆𑀲𑀁, 𑀧𑀺𑀝𑁆𑀞𑀺𑀬𑀁 𑀫𑀼𑀢𑁆𑀢𑀸𑀚𑀸𑀮𑀁 𑀫𑀡𑀺𑀚𑀸𑀮𑀁 𑀓𑀜𑁆𑀘𑀦𑀚𑀸𑀮𑀦𑁆𑀢𑀺 𑀢𑀻𑀡𑀺 𑀚𑀸𑀮𑀸𑀦𑀺 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀉𑀪𑁄 𑀓𑀡𑁆𑀡𑀸𑀮𑀗𑁆𑀓𑀸𑀭𑀸 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀧𑀺𑀝𑁆𑀞𑀺𑀬𑀁 𑀅𑀢𑁆𑀣𑀢𑀓𑀫𑁆𑀩𑀮𑀁 𑀲𑀢𑀲𑀳𑀲𑁆𑀲𑀁, 𑀓𑀼𑀫𑁆𑀪𑀸𑀮𑀗𑁆𑀓𑀸𑀭𑁄 𑀲𑀢𑀲𑀳𑀲𑁆𑀲𑀁, 𑀢𑀬𑁄 𑀯𑀝𑀁𑀲𑀓𑀸 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀓𑀡𑁆𑀡𑀘𑀽𑀴𑀸𑀮𑀗𑁆𑀓𑀸𑀭𑁄 𑀲𑀢𑀲𑀳𑀲𑁆𑀲𑀁, 𑀤𑁆𑀯𑀺𑀦𑁆𑀦𑀁 𑀤𑀦𑁆𑀢𑀸𑀦𑀁 𑀅𑀮𑀗𑁆𑀓𑀸𑀭𑀸 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀲𑁄𑀡𑁆𑀟𑀸𑀬 𑀲𑁄𑀯𑀢𑁆𑀣𑀺𑀓𑀸𑀮𑀗𑁆𑀓𑀸𑀭𑁄 𑀲𑀢𑀲𑀳𑀲𑁆𑀲𑀁, 𑀦𑀗𑁆𑀕𑀼𑀝𑁆𑀞𑀸𑀮𑀗𑁆𑀓𑀸𑀭𑁄 𑀲𑀢𑀲𑀳𑀲𑁆𑀲𑀁, 𑀆𑀭𑁄𑀳𑀡𑀦𑀺𑀲𑁆𑀲𑁂𑀡𑀺 𑀲𑀢𑀲𑀳𑀲𑁆𑀲𑀁, 𑀪𑀼𑀜𑁆𑀚𑀦𑀓𑀝𑀸𑀳𑀁 𑀲𑀢𑀲𑀳𑀲𑁆𑀲𑀁, 𑀞𑀧𑁂𑀢𑁆𑀯𑀸 𑀅𑀦𑀕𑁆𑀖𑀪𑀡𑁆𑀟𑀁 𑀇𑀤𑀁 𑀢𑀸𑀯 𑀏𑀢𑁆𑀢𑀓𑀁 𑀘𑀢𑀼𑀯𑀻𑀲𑀢𑀺 𑀲𑀢𑀲𑀳𑀲𑁆𑀲𑀸𑀦𑀺 𑀅𑀕𑁆𑀖𑀢𑀺. 𑀙𑀢𑁆𑀢𑀧𑀺𑀡𑁆𑀟𑀺𑀬𑀁 𑀧𑀦 𑀫𑀡𑀺, 𑀘𑀽𑀴𑀸𑀫𑀡𑀺, 𑀫𑀼𑀢𑁆𑀢𑀸𑀳𑀸𑀭𑁂 𑀫𑀡𑀺, 𑀅𑀗𑁆𑀓𑀼𑀲𑁂 𑀫𑀡𑀺, 𑀳𑀢𑁆𑀣𑀺𑀓𑀡𑁆𑀞𑀯𑁂𑀞𑀦𑀫𑀼𑀢𑁆𑀢𑀸𑀳𑀸𑀭𑁂 𑀫𑀡𑀺, 𑀳𑀢𑁆𑀣𑀺𑀓𑀼𑀫𑁆𑀪𑁂 𑀫𑀡𑀻𑀢𑀺 𑀇𑀫𑀸𑀦𑀺 𑀙 𑀅𑀦𑀕𑁆𑀖𑀸𑀦𑀺, 𑀳𑀢𑁆𑀣𑀻𑀧𑀺 𑀅𑀦𑀕𑁆𑀖𑁄 𑀏𑀯𑀸𑀢𑀺 𑀳𑀢𑁆𑀣𑀺𑀦𑀸 𑀲𑀤𑁆𑀥𑀺𑀁 𑀲𑀢𑁆𑀢 𑀅𑀦𑀕𑁆𑀖𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀸𑀲𑀺. 𑀢𑀣𑀸 𑀳𑀢𑁆𑀣𑀺𑀦𑁄 𑀧𑀭𑀺𑀘𑀸𑀭𑀓𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀳𑀢𑁆𑀣𑀺𑀫𑁂𑀡𑁆𑀟𑀳𑀢𑁆𑀣𑀺𑀕𑁄𑀧𑀓𑁂𑀳𑀺 𑀲𑀤𑁆𑀥𑀺𑀁 𑀅𑀤𑀸𑀲𑀺. 𑀲𑀳 𑀤𑀸𑀦𑁂𑀦 𑀧𑀦𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀽𑀫𑀺𑀓𑀫𑁆𑀧𑀸𑀤𑀬𑁄 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁭.

‘‘𑀧𑀼𑀦𑀸𑀧𑀭𑀁 𑀤𑀤𑀦𑁆𑀢𑀲𑁆𑀲, 𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫𑀁;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸’’𑀢𑀺.

𑀚𑀸𑀢𑀓𑁂𑀧𑀺 (𑀚𑀸. 𑁨.𑁨𑁨.𑁧𑁬𑁭𑁩) 𑀯𑀼𑀢𑁆𑀢𑀁 𑁋

‘‘𑀢𑀤𑀸𑀲𑀺 ¶ 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀳𑀢𑁆𑀣𑀺𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀫𑁂𑀤𑀦𑀻 𑀲𑀫𑁆𑀧𑀓𑀫𑁆𑀧𑀣𑀸’’𑀢𑀺.

𑁮𑁮. 𑀢𑀲𑁆𑀲 ¶ 𑀦𑀸𑀕𑀲𑁆𑀲 𑀤𑀸𑀦𑁂𑀦𑀸𑀢𑀺 𑀙𑀳𑀺 𑀅𑀦𑀕𑁆𑀖𑁂𑀳𑀺 𑀲𑀤𑁆𑀥𑀺𑀁 𑀘𑀢𑀼𑀯𑀻𑀲𑀢𑀺𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀅𑀮𑀗𑁆𑀓𑀸𑀭𑀪𑀡𑁆𑀟𑀲𑀳𑀺𑀢𑀲𑁆𑀲 𑀢𑀲𑁆𑀲 𑀫𑀗𑁆𑀕𑀮𑀳𑀢𑁆𑀣𑀺𑀲𑁆𑀲 𑀧𑀭𑀺𑀘𑁆𑀘𑀸𑀕𑁂𑀦. 𑀲𑀺𑀯𑀬𑁄𑀢𑀺 𑀲𑀺𑀯𑀺𑀭𑀸𑀚𑀓𑀼𑀫𑀸𑀭𑀸 𑀘𑁂𑀯 𑀲𑀺𑀯𑀺𑀭𑀝𑁆𑀞𑀯𑀸𑀲𑀺𑀦𑁄 𑀘. ‘‘𑀲𑀺𑀯𑀬𑁄’’𑀢𑀺 𑀘 𑀤𑁂𑀲𑀦𑀸𑀲𑀻𑀲𑀫𑁂𑀢𑀁. 𑀢𑀢𑁆𑀣 𑀳𑀺 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀚𑀸𑀦𑀧𑀤𑀸 𑀦𑀸𑀕𑀭𑀸 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀘 𑀲𑀜𑁆𑀚𑀬𑀫𑀳𑀸𑀭𑀸𑀚𑀁 𑀨𑀼𑀲𑁆𑀲𑀢𑀺𑀤𑁂𑀯𑀺𑀁 𑀫𑀤𑁆𑀤𑀺𑀤𑁂𑀯𑀺𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀏𑀯. 𑀓𑀼𑀤𑁆𑀥𑀸𑀢𑀺 𑀤𑁂𑀯𑀢𑀸𑀯𑀢𑁆𑀢𑀦𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀼𑀤𑁆𑀥𑀸. 𑀲𑀫𑀸𑀕𑀢𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑀸. 𑀢𑁂 ¶ 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸 𑀳𑀢𑁆𑀣𑀺𑀁 𑀮𑀪𑀺𑀢𑁆𑀯𑀸 𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀸𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀦𑀕𑀭𑀫𑀚𑁆𑀛𑁂𑀦 𑀧𑀸𑀬𑀺𑀁𑀲𑀼. 𑀫𑀳𑀸𑀚𑀦𑁂𑀦 𑀘 ‘‘𑀅𑀫𑁆𑀪𑁄 𑀩𑁆𑀭𑀸𑀳𑁆𑀫𑀡𑀸, 𑀅𑀫𑁆𑀳𑀸𑀓𑀁 𑀳𑀢𑁆𑀣𑀻 𑀓𑀼𑀢𑁄 𑀅𑀪𑀺𑀭𑀼𑀴𑁆𑀳𑁄’’𑀢𑀺 𑀯𑀼𑀢𑁆𑀢𑁂 ‘‘𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑁂𑀦 𑀦𑁄 𑀳𑀢𑁆𑀣𑀻 𑀤𑀺𑀦𑁆𑀦𑁄, 𑀓𑁂 𑀢𑀼𑀫𑁆𑀳𑁂’’𑀢𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀖𑀝𑁆𑀝𑁂𑀦𑁆𑀢𑀸 𑀅𑀕𑀫𑀁𑀲𑀼. 𑀅𑀣 𑀅𑀫𑀘𑁆𑀘𑁂 𑀆𑀤𑀺𑀁 𑀓𑀢𑁆𑀯𑀸 𑀫𑀳𑀸𑀚𑀦𑀸 𑀭𑀸𑀚𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀭𑀜𑁆𑀜𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸𑀦𑀁 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀔𑁂𑀢𑁆𑀢𑀁 𑀯𑀸 𑀯𑀢𑁆𑀣𑀼 𑀯𑀸 𑀤𑀸𑀲𑀺𑀤𑀸𑀲𑀧𑀭𑀺𑀘𑀸𑀭𑀺𑀓𑀸 𑀯𑀸 𑀤𑀸𑀢𑀩𑁆𑀩𑀸 𑀲𑀺𑀬𑀸, 𑀓𑀣𑀜𑁆𑀳𑀺 𑀦𑀸𑀫𑀸𑀬𑀁 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸 𑀭𑀸𑀚𑀸𑀭𑀳𑀁 𑀫𑀗𑁆𑀕𑀮𑀳𑀢𑁆𑀣𑀺𑀁 𑀤𑀲𑁆𑀲𑀢𑀺, 𑀦 𑀇𑀤𑀸𑀦𑀺 𑀏𑀯𑀁 𑀭𑀚𑁆𑀚𑀁 𑀯𑀺𑀦𑀸𑀲𑁂𑀢𑀼𑀁 𑀤𑀲𑁆𑀲𑀸𑀫𑀸’’𑀢𑀺 𑀉𑀚𑁆𑀛𑀸𑀬𑀺𑀢𑁆𑀯𑀸 𑀲𑀜𑁆𑀚𑀬𑀫𑀳𑀸𑀭𑀸𑀚𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀅𑀦𑀼𑀦𑀻𑀬𑀫𑀸𑀦𑀸 𑀅𑀦𑀦𑀼𑀬𑀦𑁆𑀢𑀸 𑀅𑀕𑀫𑀁𑀲𑀼. 𑀓𑁂𑀯𑀮𑀁 𑀧𑀦 𑁋

‘‘𑀫𑀸 𑀦𑀁 𑀤𑀡𑁆𑀟𑁂𑀦 𑀲𑀢𑁆𑀣𑁂𑀦, 𑀦 𑀳𑀺 𑀲𑁄 𑀩𑀦𑁆𑀥𑀦𑀸𑀭𑀳𑁄;

𑀧𑀩𑁆𑀩𑀸𑀚𑁂𑀳𑀺 𑀘 𑀦𑀁 𑀭𑀝𑁆𑀞𑀸, 𑀯𑀗𑁆𑀓𑁂 𑀯𑀲𑀢𑀼 𑀧𑀩𑁆𑀩𑀢𑁂’’𑀢𑀺. (𑀚𑀸. 𑁨.𑁨𑁨.𑁧𑁬𑁮𑁭) 𑁋

𑀯𑀤𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀧𑀩𑁆𑀩𑀸𑀚𑁂𑀲𑀼𑀁 𑀲𑀓𑀸 𑀭𑀝𑁆𑀞𑀸, 𑀯𑀗𑁆𑀓𑀁 𑀕𑀘𑁆𑀙𑀢𑀼 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀧𑀩𑁆𑀩𑀸𑀚𑁂𑀲𑀼𑀦𑁆𑀢𑀺 𑀭𑀚𑁆𑀚𑀢𑁄 𑀩𑀳𑀺 𑀯𑀸𑀲𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑀫𑀓𑀁𑀲𑀼; 𑁋

𑀭𑀸𑀚𑀸𑀧𑀺 ‘‘𑀫𑀳𑀸 𑀔𑁄 𑀅𑀬𑀁 𑀧𑀝𑀺𑀧𑀓𑁆𑀔𑁄, 𑀳𑀦𑁆𑀤 𑀫𑀫 𑀧𑀼𑀢𑁆𑀢𑁄 𑀓𑀢𑀺𑀧𑀸𑀳𑀁 𑀭𑀚𑁆𑀚𑀢𑁄 𑀩𑀳𑀺 𑀯𑀲𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

‘‘𑀏𑀲𑁄 ¶ 𑀘𑁂 𑀲𑀺𑀯𑀻𑀦𑀁 𑀙𑀦𑁆𑀤𑁄, 𑀙𑀦𑁆𑀤𑀁 𑀦𑀧𑁆𑀧𑀦𑀼𑀤𑀸𑀫𑀲𑁂;

𑀇𑀫𑀁 𑀲𑁄 𑀯𑀲𑀢𑀼 𑀭𑀢𑁆𑀢𑀺𑀁, 𑀓𑀸𑀫𑁂 𑀘 𑀧𑀭𑀺𑀪𑀼𑀜𑁆𑀚𑀢𑀼.

‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀳𑀼𑀢𑁆𑀯𑀸, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀼 𑀦’’𑀦𑁆𑀢𑀺. (𑀚𑀸. 𑁨.𑁨𑁨.𑁧𑁬𑁮𑁮-𑁧𑁬𑁮𑁯) 𑁋

𑀯𑀢𑁆𑀯𑀸 ¶ 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀓𑀢𑁆𑀢𑀸𑀭𑀁 𑀧𑁂𑀲𑁂𑀲𑀺 ‘‘𑀇𑀫𑀁 𑀧𑀯𑀢𑁆𑀢𑀺𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺.

𑀫𑀳𑀸𑀲𑀢𑁆𑀢𑁄𑀧𑀺 𑀢𑀁 𑀲𑀼𑀢𑁆𑀯𑀸 𑁋

‘‘𑀓𑀺𑀲𑁆𑀫𑀺𑀁 𑀫𑁂 𑀲𑀺𑀯𑀬𑁄 𑀓𑀼𑀤𑁆𑀥𑀸, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀤𑀼𑀓𑁆𑀓𑀝𑀁;

𑀢𑀁 𑀫𑁂 𑀓𑀢𑁆𑀢𑁂 𑀯𑀺𑀬𑀸𑀘𑀺𑀓𑁆𑀔, 𑀓𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀫’’𑀦𑁆𑀢𑀺. (𑀚𑀸. 𑁨.𑁨𑁨.𑁧𑁭𑁦𑁧) 𑁋

𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀢𑁂𑀦 ‘‘𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀺𑀤𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑁋

‘‘𑀳𑀤𑀬𑀁 𑀘𑀓𑁆𑀔𑀼𑀫𑁆𑀧𑀳𑀁 𑀤𑀚𑁆𑀚𑀁, 𑀓𑀺𑀁 𑀫𑁂 𑀩𑀸𑀳𑀺𑀭𑀓𑀁 𑀥𑀦𑀁;

𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀫𑀡𑀺.

‘‘𑀤𑀓𑁆𑀔𑀺𑀡𑀁 ¶ 𑀯𑀸𑀧𑀳𑀁 𑀩𑀸𑀳𑀼𑀁, 𑀤𑀺𑀲𑁆𑀯𑀸 𑀬𑀸𑀘𑀓𑀫𑀸𑀕𑀢𑁂;

𑀤𑀤𑁂𑀬𑁆𑀬𑀁 𑀦 𑀯𑀺𑀓𑀫𑁆𑀧𑁂𑀬𑁆𑀬𑀁, 𑀤𑀸𑀦𑁂 𑀫𑁂 𑀭𑀫𑀢𑁂 𑀫𑀦𑁄.

‘‘𑀓𑀸𑀫𑀁 𑀫𑀁 𑀲𑀺𑀯𑀬𑁄 𑀲𑀩𑁆𑀩𑁂, 𑀧𑀩𑁆𑀩𑀸𑀚𑁂𑀦𑁆𑀢𑀼 𑀳𑀦𑀦𑁆𑀢𑀼 𑀯𑀸;

𑀦𑁂𑀯 𑀤𑀸𑀦𑀸 𑀯𑀺𑀭𑀫𑀺𑀲𑁆𑀲𑀁, 𑀓𑀸𑀫𑀁 𑀙𑀺𑀦𑁆𑀤𑀦𑁆𑀢𑀼 𑀲𑀢𑁆𑀢𑀥𑀸’’𑀢𑀺. (𑀚𑀸. 𑁨.𑁨𑁨.𑁧𑁭𑁦𑁩-𑁧𑁭𑁦𑁫) 𑁋

𑀯𑀢𑁆𑀯𑀸 ‘‘𑀦𑀸𑀕𑀭𑀸 𑀫𑁂 𑀏𑀓𑀤𑀺𑀯𑀲𑀁 𑀤𑀸𑀦𑀁 𑀤𑀸𑀢𑀼𑀁 𑀑𑀓𑀸𑀲𑀁 𑀤𑁂𑀦𑁆𑀢𑀼, 𑀲𑁆𑀯𑁂 𑀤𑀸𑀦𑀁 𑀤𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀓𑀢𑁆𑀢𑀸𑀭𑀁 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑁂𑀲𑁂𑀢𑁆𑀯𑀸 ‘‘𑀅𑀳𑀁 𑀲𑁆𑀯𑁂 𑀲𑀢𑁆𑀢𑀲𑀢𑀓𑀁 𑀦𑀸𑀫 𑀫𑀳𑀸𑀤𑀸𑀦𑀁 𑀤𑀲𑁆𑀲𑀸𑀫𑀺 ¶ , 𑀲𑀢𑁆𑀢𑀳𑀢𑁆𑀣𑀺𑀲𑀢𑀸𑀦𑀺 𑀲𑀢𑁆𑀢𑀅𑀲𑁆𑀲𑀲𑀢𑀸𑀦𑀺 𑀲𑀢𑁆𑀢𑀭𑀣𑀲𑀢𑀸𑀦𑀺 𑀲𑀢𑁆𑀢𑀇𑀢𑁆𑀣𑀺𑀲𑀢𑀸𑀦𑀺 𑀲𑀢𑁆𑀢𑀤𑀸𑀲𑀲𑀢𑀸𑀦𑀺 𑀲𑀢𑁆𑀢𑀤𑀸𑀲𑀺𑀲𑀢𑀸𑀦𑀺 𑀲𑀢𑁆𑀢𑀥𑁂𑀦𑀼𑀲𑀢𑀸𑀦𑀺 𑀧𑀝𑀺𑀬𑀸𑀤𑁂𑀳𑀺, 𑀦𑀸𑀦𑀧𑁆𑀧𑀓𑀸𑀭𑀜𑁆𑀘 𑀅𑀦𑁆𑀦𑀧𑀸𑀦𑀸𑀤𑀺𑀁 𑀲𑀩𑁆𑀩𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀉𑀧𑀝𑁆𑀞𑀧𑁂𑀳𑀻’’𑀢𑀺 𑀲𑀩𑁆𑀩𑀓𑀫𑁆𑀫𑀺𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀢𑁆𑀯𑀸 𑀏𑀓𑀓𑁄𑀯 𑀫𑀤𑁆𑀤𑀺𑀤𑁂𑀯𑀺𑀬𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀪𑀤𑁆𑀤𑁂 𑀫𑀤𑁆𑀤𑀺, 𑀅𑀦𑀼𑀕𑀸𑀫𑀺𑀓𑀦𑀺𑀥𑀺𑀁 𑀦𑀺𑀤𑀳𑀫𑀸𑀦𑀸, 𑀲𑀻𑀮𑀯𑀦𑁆𑀢𑁂𑀲𑀼 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀢𑀫𑁆𑀧𑀺 𑀤𑀸𑀦𑁂 𑀦𑀺𑀬𑁄𑀚𑁂𑀢𑁆𑀯𑀸 𑀢𑀲𑁆𑀲𑀸 𑀅𑀢𑁆𑀢𑀦𑁄 𑀕𑀫𑀦𑀓𑀸𑀭𑀡𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀅𑀳𑀁 𑀯𑀦𑀁 𑀯𑀲𑀦𑀢𑁆𑀣𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀥𑁂𑀯 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀯𑀲𑀸𑀳𑀻’’𑀢𑀺 𑀆𑀳. 𑀲𑀸 ‘‘𑀦𑀸𑀳𑀁, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂𑀳𑀺 𑀯𑀺𑀦𑀸 𑀏𑀓𑀤𑀺𑀯𑀲𑀫𑁆𑀧𑀺 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀤𑀼𑀢𑀺𑀬𑀤𑀺𑀯𑀲𑁂 𑀲𑀢𑁆𑀢𑀲𑀢𑀓𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀢𑀲𑁆𑀲 𑀲𑀢𑁆𑀢𑀲𑀢𑀓𑀁 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲𑁂𑀯 𑀲𑀸𑀬𑀁 𑀅𑀳𑁄𑀲𑀺. 𑀅𑀮𑀗𑁆𑀓𑀢𑀭𑀣𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀲𑁆𑀯𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀓𑀸𑀫𑀓𑀸𑀦𑀁 𑀢𑁂𑀲𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑁄𑀤𑀦𑁆𑀢𑀸𑀦𑀁𑀬𑁂𑀯 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀢𑀁 𑀤𑀺𑀯𑀲𑀁 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀢𑁄 𑀑𑀢𑀭𑀺. 𑀫𑀤𑁆𑀤𑀺𑀤𑁂𑀯𑀻 𑀲𑀲𑁆𑀲𑀼𑀲𑀲𑀼𑀭𑁂𑀳𑀺 𑀦𑀸𑀦𑀸𑀦𑀬𑁂𑀳𑀺 𑀬𑀸𑀘𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑁂 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑁂𑀲𑀺𑀢𑁆𑀣𑀺𑀬𑁄 𑀅𑀧𑀮𑁄𑀓𑁂𑀢𑁆𑀯𑀸 𑀤𑁆𑀯𑁂 𑀧𑀼𑀢𑁆𑀢𑁂 𑀆𑀤𑀸𑀬 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀭𑀣𑁂 𑀅𑀝𑁆𑀞𑀸𑀲𑀺.

𑀫𑀳𑀸𑀧𑀼𑀭𑀺𑀲𑁄 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀭𑀣𑁂 𑀞𑀺𑀢𑁄 𑀫𑀳𑀸𑀚𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣𑀸’’𑀢𑀺 𑀑𑀯𑀸𑀤𑀫𑀲𑁆𑀲 𑀤𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 ‘‘𑀧𑀼𑀢𑁆𑀢𑁄 𑀫𑁂 𑀤𑀸𑀦𑀯𑀺𑀢𑁆𑀢𑀓𑁄 𑀤𑀸𑀦𑀁 𑀤𑁂𑀢𑀽’’𑀢𑀺 𑀆𑀪𑀭𑀡𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀭𑀢𑀦𑀧𑀽𑀭𑀸𑀦𑀺 𑀲𑀓𑀝𑀸𑀦𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑁂𑀲𑁂𑀲𑀺. 𑀲𑁄𑀧𑀺 𑀅𑀢𑁆𑀢𑀦𑁄 𑀓𑀸𑀬𑀸𑀭𑀼𑀴𑁆𑀳𑀫𑁂𑀯 𑀆𑀪𑀭𑀡𑀪𑀡𑁆𑀟𑀁 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 ¶ 𑀅𑀝𑁆𑀞𑀸𑀭𑀲 𑀯𑀸𑀭𑁂 𑀤𑀢𑁆𑀯𑀸 𑀲𑁂𑀲𑀁 𑀲𑀩𑁆𑀩𑀫𑀤𑀸𑀲𑀺. 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀭𑀣𑀧𑁆𑀧𑀫𑀸𑀡𑁂 𑀞𑀸𑀦𑁂 𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀭𑀣𑀁 𑀦𑀕𑀭𑀸𑀪𑀺𑀫𑀼𑀔𑀁 𑀅𑀓𑀸𑀲𑀺. 𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀲𑀺. 𑀢𑁂𑀦 𑀓𑀸𑀭𑀼𑀜𑁆𑀜𑁂𑀦 𑀧𑀣𑀯𑀺𑀓𑀫𑁆𑀧𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀦𑀺𑀘𑁆𑀙𑀼𑀪𑀫𑀸𑀦𑀸𑀦’’𑀦𑁆𑀢𑀺𑀆𑀤𑀺.

𑁮𑁯-𑁯𑁦. 𑀢𑀢𑁆𑀣 𑀦𑀺𑀘𑁆𑀙𑀼𑀪𑀫𑀸𑀦𑀸𑀦𑀦𑁆𑀢𑀺 𑀢𑁂𑀲𑀼 𑀲𑀺𑀯𑀻𑀲𑀼 𑀦𑀺𑀓𑁆𑀓𑀟𑁆𑀠𑀦𑁆𑀢𑁂𑀲𑀼, 𑀧𑀩𑁆𑀩𑀸𑀚𑁂𑀦𑁆𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀯𑀸 𑀦𑀺𑀓𑁆𑀔𑀫𑀦𑁆𑀢𑀸𑀦𑀁. 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑀼𑀦𑁆𑀢𑀺 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀁 𑀤𑀸𑀢𑀼𑀁. 𑀆𑀬𑀸𑀘𑀺𑀲𑁆𑀲𑀦𑁆𑀢𑀺 𑀬𑀸𑀘𑀺𑀁. 𑀲𑀸𑀯𑀬𑀺𑀢𑁆𑀯𑀸𑀢𑀺 𑀖𑁄𑀲𑀸𑀧𑁂𑀢𑁆𑀯𑀸. 𑀓𑀡𑁆𑀡𑀪𑁂𑀭𑀺𑀦𑁆𑀢𑀺 𑀬𑀼𑀕𑀮𑀫𑀳𑀸𑀪𑁂𑀭𑀺𑀁. 𑀤𑀤𑀸𑀫𑀳𑀦𑁆𑀢𑀺 𑀤𑀤𑀸𑀫𑀺 𑀅𑀳𑀁.

𑁯𑁧. 𑀅𑀣𑁂𑀢𑁆𑀣𑀸𑀢𑀺 𑀅𑀣𑁂𑀯𑀁 𑀤𑀸𑀦𑁂 𑀤𑀻𑀬𑀫𑀸𑀦𑁂 𑀏𑀢𑀲𑁆𑀫𑀺𑀁 𑀤𑀸𑀦𑀕𑁆𑀕𑁂. 𑀢𑀼𑀫𑀽𑀮𑁄𑀢𑀺 𑀏𑀓𑀓𑁄𑀮𑀸𑀳𑀮𑀻𑀪𑀽𑀢𑁄. 𑀪𑁂𑀭𑀯𑁄𑀢𑀺 ¶ 𑀪𑀬𑀸𑀯𑀳𑁄. 𑀫𑀳𑀸𑀲𑀢𑁆𑀢𑀜𑁆𑀳𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀲𑁄 𑀪𑀬𑀁 𑀚𑀦𑁂𑀢𑀺, 𑀢𑀲𑁆𑀲 𑀪𑀬𑀚𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁. ‘‘𑀤𑀸𑀦𑁂𑀦𑀺𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀁 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸𑀦𑀁 𑀤𑀸𑀦𑁂𑀦 𑀳𑁂𑀢𑀼𑀦𑀸 𑀲𑀺𑀯𑀬𑁄 𑀭𑀝𑁆𑀞𑀢𑁄 𑀦𑀻𑀳𑀭𑀦𑁆𑀢𑀺 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀢𑀣𑀸𑀧𑀺 𑀧𑀼𑀦 𑀘 𑀏𑀯𑀭𑀽𑀧𑀁 𑀤𑀸𑀦𑀁 𑀤𑁂𑀢𑀺 𑀅𑀬𑀦𑁆𑀢𑀺.

𑁯𑁨-𑁯𑁪. 𑀇𑀤𑀸𑀦𑀺 𑀢𑀁 𑀤𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀢𑁆𑀣𑀺’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀕𑀯𑀦𑁆𑀢𑀺 𑀥𑁂𑀦𑀼𑀁. 𑀘𑀢𑀼𑀯𑀸𑀳𑀺𑀁 𑀭𑀣𑀁 𑀤𑀢𑁆𑀯𑀸𑀢𑀺 𑀯𑀳𑀦𑁆𑀢𑀻𑀢𑀺 𑀯𑀸𑀳𑀺𑀦𑁄, 𑀅𑀲𑁆𑀲𑀸, 𑀘𑀢𑀼𑀭𑁄 𑀆𑀚𑀜𑁆𑀜𑀲𑀺𑀦𑁆𑀥𑀯𑁂 ¶ 𑀭𑀣𑀜𑁆𑀘 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀢𑁆𑀢𑁄 𑀳𑀺 𑀢𑀣𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀲𑀳𑀚𑀸𑀢𑁂 𑀲𑀝𑁆𑀞𑀺𑀲𑀳𑀲𑁆𑀲𑁂 𑀅𑀫𑀘𑁆𑀘𑁂 𑀲𑁂𑀲𑀚𑀦𑀜𑁆𑀘 𑀅𑀲𑁆𑀲𑀼𑀧𑀼𑀡𑁆𑀡𑀫𑀼𑀔𑀁 𑀅𑀦𑀼𑀩𑀤𑁆𑀥𑀦𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀭𑀣𑀁 𑀧𑀸𑀚𑁂𑀦𑁆𑀢𑁄 𑀫𑀤𑁆𑀤𑀺𑀁 𑀆𑀳 𑁋 ‘‘𑀲𑀘𑁂, 𑀪𑀤𑁆𑀤𑁂, 𑀧𑀘𑁆𑀙𑀢𑁄 𑀬𑀸𑀘𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀉𑀧𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀑𑀮𑁄𑀓𑁂𑀦𑁆𑀢𑀻 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀁 𑀕𑀫𑀦𑀓𑀸𑀮𑁂 𑀓𑀢𑀤𑀸𑀦𑀜𑁆𑀘 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀘𑀢𑁆𑀢𑀸𑀭𑁄 𑀩𑁆𑀭𑀸𑀳𑁆𑀫𑀡𑀸 𑀆𑀕𑀦𑁆𑀢𑁆𑀯𑀸 ‘‘𑀯𑁂𑀲𑁆𑀲𑀦𑁆𑀢𑀭𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀸𑀦𑀁 𑀤𑀢𑁆𑀯𑀸 𑀭𑀣𑁂𑀦 𑀕𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀲𑁆𑀲𑁂 𑀬𑀸𑀘𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀫𑀤𑁆𑀤𑀻 𑀢𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀬𑀸𑀘𑀓𑀸, 𑀤𑁂𑀯𑀸’’𑀢𑀺 𑀆𑀭𑁄𑀘𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀭𑀣𑀁 𑀞𑀧𑁂𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀅𑀲𑁆𑀲𑁂 𑀬𑀸𑀘𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀅𑀲𑁆𑀲𑁂 𑀅𑀤𑀸𑀲𑀺. 𑀢𑁂 𑀢𑁂 𑀕𑀳𑁂𑀢𑁆𑀯𑀸 𑀕𑀢𑀸. 𑀅𑀲𑁆𑀲𑁂𑀲𑀼 ¶ 𑀧𑀦 𑀤𑀺𑀦𑁆𑀦𑁂𑀲𑀼 𑀭𑀣𑀥𑀼𑀭𑀁 𑀆𑀓𑀸𑀲𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀅𑀣 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀭𑁄𑀳𑀺𑀢𑀫𑀺𑀕𑀯𑀡𑁆𑀡𑁂𑀦𑀸𑀕𑀦𑁆𑀢𑁆𑀯𑀸 𑀭𑀣𑀥𑀼𑀭𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑁂𑀲𑀁 𑀤𑁂𑀯𑀧𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑁋

‘‘𑀇𑀗𑁆𑀖 𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺, 𑀘𑀺𑀢𑁆𑀢𑀭𑀽𑀧𑀁𑀯 𑀤𑀺𑀲𑁆𑀲𑀢𑀺;

𑀫𑀺𑀕𑀭𑁄𑀳𑀺𑀘𑁆𑀘𑀯𑀡𑁆𑀡𑁂𑀦, 𑀤𑀓𑁆𑀔𑀺𑀡𑀲𑁆𑀲𑀸 𑀯𑀳𑀦𑁆𑀢𑀺 𑀫’’𑀦𑁆𑀢𑀺. (𑀚𑀸. 𑁨.𑁨𑁨.𑁧𑁮𑁬𑁪) 𑁋

𑀫𑀤𑁆𑀤𑀺𑀬𑀸 𑀆𑀳.

𑀢𑀢𑁆𑀣 𑀘𑀺𑀢𑁆𑀢𑀭𑀽𑀧𑀁𑀯𑀸𑀢𑀺 𑀅𑀘𑁆𑀙𑀭𑀺𑀬𑀭𑀽𑀧𑀁 𑀯𑀺𑀬. 𑀤𑀓𑁆𑀔𑀺𑀡𑀲𑁆𑀲𑀸𑀢𑀺 𑀲𑀼𑀲𑀺𑀓𑁆𑀔𑀺𑀢𑀅𑀲𑁆𑀲𑀸 𑀯𑀺𑀬 𑀫𑀁 𑀯𑀳𑀦𑁆𑀢𑀺.

𑀅𑀣 𑀦𑀁 𑀏𑀯𑀁 𑀕𑀘𑁆𑀙𑀦𑁆𑀢𑀁 𑀅𑀧𑀭𑁄 𑀩𑁆𑀭𑀸𑀳𑁆𑀫𑀡𑁄 𑀆𑀕𑀦𑁆𑀢𑁆𑀯𑀸 𑀭𑀣𑀁 𑀬𑀸𑀘𑀺. 𑀫𑀳𑀸𑀲𑀢𑁆𑀢𑁄 𑀧𑀼𑀢𑁆𑀢𑀤𑀸𑀭𑀁 𑀑𑀢𑀸𑀭𑁂𑀢𑁆𑀯𑀸 𑀭𑀣𑀁 𑀅𑀤𑀸𑀲𑀺. 𑀭𑀣𑁂 𑀧𑀦 𑀤𑀺𑀦𑁆𑀦𑁂 𑀤𑁂𑀯𑀧𑀼𑀢𑁆𑀢𑀸 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀩𑁆𑀩𑁂𑀧𑀺 𑀧𑀢𑁆𑀢𑀺𑀓𑀸𑀯 𑀅𑀳𑁂𑀲𑀼𑀁. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀫𑀤𑁆𑀤𑀺, 𑀢𑁆𑀯𑀁 𑀓𑀡𑁆𑀳𑀸𑀚𑀺𑀦𑀁 𑀕𑀡𑁆𑀳𑀸𑀳𑀺, 𑀅𑀳𑀁 𑀚𑀸𑀮𑀺𑀓𑀼𑀫𑀸𑀭𑀁 𑀕𑀡𑁆𑀳𑀸𑀫𑀻’’𑀢𑀺 𑀉𑀪𑁄𑀧𑀺 𑀤𑁆𑀯𑁂 𑀤𑀸𑀭𑀓𑁂 𑀅𑀗𑁆𑀓𑁂𑀦𑀸𑀤𑀸𑀬 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀮𑁆𑀮𑀸𑀧𑀸 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑁂 𑀫𑀦𑀼𑀲𑁆𑀲𑁂 𑀯𑀗𑁆𑀓𑀧𑀩𑁆𑀩𑀢𑀲𑁆𑀲 𑀫𑀕𑁆𑀕𑀁 𑀧𑀼𑀘𑁆𑀙𑀦𑁆𑀢𑀸 𑀲𑀬𑀫𑁂𑀯 𑀑𑀦𑀢𑁂𑀲𑀼 𑀨𑀮𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀤𑀸𑀭𑀓𑀸𑀦𑀁 𑀤𑀤𑀦𑁆𑀢𑀸 𑀅𑀢𑁆𑀣𑀓𑀸𑀫𑀸𑀳𑀺 ¶ 𑀤𑁂𑀯𑀢𑀸𑀳𑀺 𑀫𑀕𑁆𑀕𑀲𑁆𑀲 𑀲𑀗𑁆𑀔𑀺𑀧𑀺𑀢𑀢𑁆𑀢𑀸 𑀢𑀤𑀳𑁂𑀯 𑀘𑁂𑀢𑀭𑀝𑁆𑀞𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀼𑀯𑀸𑀳𑀺𑀁 𑀭𑀣𑀁 𑀤𑀢𑁆𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀞𑀢𑁆𑀯𑀸 𑀘𑀸𑀢𑀼𑀫𑁆𑀫𑀳𑀸𑀧𑀣𑁂𑀢𑀺 𑀅𑀢𑁆𑀢𑀦𑁄 𑀕𑀫𑀦𑀫𑀕𑁆𑀕𑁂𑀦 𑀧𑀲𑁆𑀲𑀢𑁄 𑀆𑀕𑀢𑁂𑀦 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀆𑀕𑀢𑀫𑀕𑁆𑀕𑁂𑀦 𑀘 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀢𑁆𑀢𑀸 𑀘𑀢𑀼𑀓𑁆𑀓𑀲𑀗𑁆𑀔𑀸𑀢𑁂 ¶ 𑀘𑀢𑀼𑀫𑀳𑀸𑀧𑀣𑁂 𑀞𑀢𑁆𑀯𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀭𑀣𑀁 𑀤𑀢𑁆𑀯𑀸. 𑀏𑀓𑀸𑀓𑀺𑀬𑁄𑀢𑀺 𑀅𑀫𑀘𑁆𑀘𑀲𑁂𑀯𑀓𑀸𑀤𑀺𑀲𑀳𑀸𑀬𑀸𑀪𑀸𑀯𑁂𑀦 𑀏𑀓𑀓𑁄. 𑀢𑁂𑀦𑁂𑀯𑀸𑀳 ‘‘𑀅𑀤𑀼𑀢𑀺𑀬𑁄’’𑀢𑀺. 𑀫𑀤𑁆𑀤𑀺𑀤𑁂𑀯𑀺𑀁 𑀇𑀤𑀫𑀩𑁆𑀭𑀯𑀻𑀢𑀺 𑀫𑀤𑁆𑀤𑀺𑀤𑁂𑀯𑀺𑀁 𑀇𑀤𑀁 𑀅𑀪𑀸𑀲𑀺.

𑁯𑁬-𑁯𑁯. 𑀧𑀤𑀼𑀫𑀁 𑀧𑀼𑀡𑁆𑀟𑀭𑀻𑀓𑀁𑀯𑀸𑀢𑀺 𑀧𑀤𑀼𑀫𑀁 𑀯𑀺𑀬, 𑀧𑀼𑀡𑁆𑀟𑀭𑀻𑀓𑀁 𑀯𑀺𑀬 𑀘. 𑀓𑀡𑁆𑀳𑀸𑀚𑀺𑀦𑀕𑁆𑀕𑀳𑀻𑀢𑀺 𑀓𑀡𑁆𑀳𑀸𑀚𑀺𑀦𑀁 𑀅𑀕𑁆𑀕𑀳𑁂𑀲𑀺. 𑀅𑀪𑀺𑀚𑀸𑀢𑀸𑀢𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀸. 𑀯𑀺𑀲𑀫𑀁 𑀲𑀫𑀦𑁆𑀢𑀺 𑀯𑀺𑀲𑀫𑀁 𑀲𑀫𑀜𑁆𑀘 𑀪𑀽𑀫𑀺𑀧𑁆𑀧𑀤𑁂𑀲𑀁. 𑀏𑀦𑁆𑀢𑀻𑀢𑀺 𑀆𑀕𑀘𑁆𑀙𑀦𑁆𑀢𑀺. 𑀅𑀦𑀼𑀫𑀕𑁆𑀕𑁂 𑀧𑀝𑀺𑀧𑁆𑀧𑀣𑁂𑀢𑀺 𑀅𑀦𑀼𑀫𑀕𑁆𑀕𑁂 𑀯𑀸 𑀧𑀝𑀺𑀧𑀣𑁂 𑀯𑀸𑀢𑀺 𑀯𑀸-𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀓𑀭𑀼𑀡𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀓𑀭𑀼𑀡𑀸𑀬𑀺𑀢𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀁 𑀢𑁂 𑀧𑀝𑀺𑀯𑁂𑀤𑁂𑀦𑁆𑀢𑀻𑀢𑀺 𑀇𑀫𑁂 𑀏𑀯𑀁 𑀲𑀼𑀔𑀼𑀫𑀸𑀮𑀸 𑀧𑀤𑀲𑀸 𑀕𑀘𑁆𑀙𑀦𑁆𑀢𑀺, 𑀤𑀽𑀭𑁂𑀯 𑀇𑀢𑁄 𑀯𑀗𑁆𑀓𑀧𑀩𑁆𑀩𑀢𑁄𑀢𑀺 𑀢𑁂 𑀢𑀤𑀸 𑀅𑀫𑁆𑀳𑁂𑀲𑀼 𑀓𑀸𑀭𑀼𑀜𑁆𑀜𑀯𑀲𑁂𑀦 𑀅𑀢𑁆𑀢𑀦𑀸 𑀤𑀼𑀓𑁆𑀔𑀁 𑀧𑀝𑀺𑀮𑀪𑀦𑁆𑀢𑀺, 𑀢𑀣𑀸 𑀅𑀢𑁆𑀢𑀦𑁄 ¶ 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀧𑀝𑀺𑀯𑁂𑀤𑁂𑀦𑁆𑀢𑀺 𑀯𑀸𑀢𑀺 𑀅𑀢𑁆𑀣𑁄.

𑁧𑁦𑁦-𑁧. 𑀧𑀯𑀦𑁂𑀢𑀺 𑀫𑀳𑀸𑀯𑀦𑁂. 𑀨𑀮𑀺𑀦𑁂𑀢𑀺 𑀨𑀮𑀯𑀦𑁆𑀢𑁂. 𑀉𑀩𑁆𑀩𑀺𑀤𑁆𑀥𑀸𑀢𑀺 𑀉𑀤𑁆𑀥𑀁 𑀉𑀕𑁆𑀕𑀢𑀸 𑀉𑀘𑁆𑀘𑀸. 𑀉𑀧𑀕𑀘𑁆𑀙𑀦𑁆𑀢𑀺 𑀤𑀸𑀭𑀓𑁂𑀢𑀺 𑀬𑀣𑀸 𑀨𑀮𑀸𑀦𑀺 𑀤𑀸𑀭𑀓𑀸𑀦𑀁 𑀳𑀢𑁆𑀣𑀽𑀧𑀕𑀬𑁆𑀳𑀓𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀭𑀼𑀓𑁆𑀔𑀸 𑀲𑀬𑀫𑁂𑀯 𑀲𑀸𑀔𑀸𑀳𑀺 𑀑𑀦𑀫𑀺𑀢𑁆𑀯𑀸 𑀤𑀸𑀭𑀓𑁂 𑀉𑀧𑁂𑀦𑁆𑀢𑀺.

𑁧𑁦𑁨. 𑀅𑀘𑁆𑀙𑀭𑀺𑀬𑀦𑁆𑀢𑀺 𑀅𑀘𑁆𑀙𑀭𑀸𑀬𑁄𑀕𑁆𑀕𑀁, 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀁. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁. 𑀮𑁄𑀫𑀸𑀦𑀁 𑀳𑀁𑀲𑀦𑀲𑀫𑀢𑁆𑀣𑀢𑀸𑀬 𑀮𑁄𑀫𑀳𑀁𑀲𑀦𑀁. 𑀲𑀸𑀳𑀼𑀓𑀸𑀭𑀦𑁆𑀢𑀺 𑀲𑀸𑀥𑀼𑀓𑀸𑀭𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀢𑁆𑀣𑀺𑀭𑀢𑀦𑀪𑀸𑀯𑁂𑀦 𑀲𑀩𑁆𑀩𑁂𑀳𑀺 𑀅𑀗𑁆𑀕𑁂𑀳𑀺 𑀅𑀯𑀬𑀯𑁂𑀳𑀺 𑀲𑁄𑀪𑀢𑀻𑀢𑀺 𑀲𑀩𑁆𑀩𑀗𑁆𑀕𑀲𑁄𑀪𑀦𑀸.

𑁧𑁦𑁩-𑁪. 𑀅𑀘𑁆𑀙𑁂𑀭𑀁 𑀯𑀢𑀸𑀢𑀺 𑀅𑀘𑁆𑀙𑀭𑀺𑀬𑀁 𑀯𑀢. 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀢𑁂𑀚𑁂𑀦𑀸𑀢𑀺 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦. 𑀲𑀗𑁆𑀔𑀺𑀧𑀺𑀁𑀲𑀼 𑀧𑀣𑀁 𑀬𑀓𑁆𑀔𑀸𑀢𑀺 𑀤𑁂𑀯𑀢𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀘𑁄𑀤𑀺𑀢𑀸 𑀢𑀁 𑀫𑀕𑁆𑀕𑀁 𑀧𑀭𑀺𑀓𑁆𑀔𑀬𑀁 𑀧𑀸𑀧𑁂𑀲𑀼𑀁, 𑀅𑀧𑁆𑀧𑀓𑀁 𑀅𑀓𑀁𑀲𑀼, 𑀢𑀁 𑀧𑀦 𑀤𑀸𑀭𑀓𑁂𑀲𑀼 𑀓𑀭𑀼𑀡𑀸𑀬 𑀓𑀢𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑀼𑀓𑀫𑁆𑀧𑀸𑀬 𑀤𑀸𑀭𑀓𑁂’’𑀢𑀺. 𑀚𑁂𑀢𑀼𑀢𑁆𑀢𑀭𑀦𑀕𑀭𑀢𑁄 𑀳𑀺 𑀲𑀼𑀯𑀡𑁆𑀡𑀕𑀺𑀭𑀺𑀢𑀸𑀮𑁄 𑀦𑀸𑀫 𑀧𑀩𑁆𑀩𑀢𑁄 𑀧𑀜𑁆𑀘 𑀬𑁄𑀚𑀦𑀸𑀦𑀺, 𑀢𑀢𑁄 𑀓𑁄𑀦𑁆𑀢𑀺𑀫𑀸𑀭𑀸 𑀦𑀸𑀫 𑀦𑀤𑀻 𑀧𑀜𑁆𑀘 𑀬𑁄𑀚𑀦𑀸𑀦𑀺, 𑀢𑀢𑁄 𑀫𑀸𑀭𑀜𑁆𑀚𑀦𑀸𑀕𑀺𑀭𑀺 𑀦𑀸𑀫 𑀧𑀩𑁆𑀩𑀢𑁄 𑀧𑀜𑁆𑀘 𑀬𑁄𑀚𑀦𑀸𑀦𑀺, 𑀢𑀢𑁄 𑀤𑀡𑁆𑀟𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀬𑁄𑀚𑀦𑀸𑀦𑀺, 𑀢𑀢𑁄 𑀫𑀸𑀢𑀼𑀮𑀦𑀕𑀭𑀁 𑀤𑀲 ¶ 𑀬𑁄𑀚𑀦𑀸𑀦𑀺, 𑀇𑀢𑀺 𑀢𑀁 𑀭𑀝𑁆𑀞𑀁 𑀚𑁂𑀢𑀼𑀢𑁆𑀢𑀭𑀦𑀕𑀭𑀢𑁄 𑀢𑀺𑀁𑀲 𑀬𑁄𑀚𑀦𑀸𑀦𑀺 𑀳𑁄𑀢𑀺. 𑀤𑁂𑀯𑀢𑀸 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀘𑁄𑀤𑀺𑀢𑀸 𑀫𑀕𑁆𑀕𑀁 𑀧𑀭𑀺𑀓𑁆𑀔𑀬𑀁 𑀧𑀸𑀧𑁂𑀲𑀼𑀁. 𑀢𑀁 𑀲𑀩𑁆𑀩𑀁 𑀏𑀓𑀸𑀳𑁂𑀦𑁂𑀯 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀦𑁂𑀯, 𑀘𑁂𑀢𑀭𑀝𑁆𑀞𑀫𑀼𑀧𑀸𑀕𑀫𑀼’’𑀦𑁆𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀘𑁂𑀢𑀭𑀝𑁆𑀞𑁂 𑀫𑀸𑀢𑀼𑀮𑀦𑀕𑀭𑀁 𑀧𑀢𑁆𑀯𑀸 𑀢𑀲𑁆𑀲 𑀦𑀕𑀭𑀲𑁆𑀲 𑀤𑁆𑀯𑀸𑀭𑀲𑀫𑀻𑀧𑁂 𑀲𑀸𑀮𑀸𑀬𑀁 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀫𑀤𑁆𑀤𑀺𑀤𑁂𑀯𑀻 𑀧𑀸𑀤𑁂𑀲𑀼 𑀭𑀚𑀁 𑀧𑀼𑀜𑁆𑀙𑀺𑀢𑁆𑀯𑀸 𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 ‘‘𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲 𑀘𑀓𑁆𑀔𑀼𑀧𑀣𑁂 𑀲𑀸𑀮𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺𑀬𑁄 𑀘 𑀦𑀺𑀓𑁆𑀔𑀫𑀦𑁆𑀢𑀺𑀬𑁄 𑀘 𑀇𑀢𑁆𑀣𑀺𑀬𑁄 𑀢𑀁 𑀤𑀺𑀲𑁆𑀯𑀸 𑀧𑀭𑀺𑀯𑀸𑀭𑁂𑀲𑀼𑀁. 𑀫𑀳𑀸𑀚𑀦𑁄 𑀢𑀜𑁆𑀘 𑀯𑁂𑀲𑁆𑀲𑀦𑁆𑀢𑀭𑀜𑁆𑀘 𑀧𑀼𑀢𑁆𑀢𑁂 𑀘𑀲𑁆𑀲 𑀢𑀣𑀸 𑀆𑀕𑀢𑁂 𑀤𑀺𑀲𑁆𑀯𑀸 𑀭𑀸𑀚𑀽𑀦𑀁 𑀆𑀘𑀺𑀓𑁆𑀔𑀺. 𑀲𑀝𑁆𑀞𑀺𑀲𑀳𑀲𑁆𑀲𑀸 𑀭𑀸𑀚𑀸𑀦𑁄 𑀭𑁄𑀤𑀦𑁆𑀢𑀸 𑀧𑀭𑀺𑀤𑁂𑀯𑀦𑁆𑀢𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀫𑀕𑁆𑀕𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 ¶ 𑀢𑀣𑀸 𑀆𑀕𑀫𑀦𑀓𑀸𑀭𑀡𑀁 𑀧𑀼𑀘𑁆𑀙𑀺𑀁𑀲𑀼.

𑀫𑀳𑀸𑀲𑀢𑁆𑀢𑁄 𑀳𑀢𑁆𑀣𑀺𑀤𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀅𑀢𑁆𑀢𑀦𑁄 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀼, 𑀭𑀸𑀚𑀸 𑀧𑀦 𑀫𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀢𑀺, 𑀢𑀲𑁆𑀫𑀸 𑀯𑀗𑁆𑀓𑀧𑀩𑁆𑀩𑀢𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀁 𑀢𑀢𑁆𑀣 𑀯𑀸𑀲𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀢𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀢𑁂𑀳𑀺 𑀕𑀳𑀺𑀢𑀸𑀭𑀓𑁆𑀔𑁄 𑀢𑀁 𑀭𑀢𑁆𑀢𑀺𑀁 𑀲𑀸𑀮𑀸𑀬𑀫𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦𑁆𑀦𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀯𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀢𑁂 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀭𑀢𑁄 𑀧𑀦𑁆𑀦𑀭𑀲𑀬𑁄𑀚𑀦𑀫𑀕𑁆𑀕𑀁 𑀢𑁂𑀳𑀺 𑀆𑀘𑀺𑀓𑁆𑀔𑀺𑀢𑀦𑀺𑀬𑀸𑀫𑁂𑀦𑁂𑀯 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦𑁫.

‘‘𑀲𑀝𑁆𑀞𑀺𑀭𑀸𑀚𑀲𑀳𑀲𑁆𑀲𑀸𑀦𑀺, 𑀢𑀤𑀸 𑀯𑀲𑀦𑁆𑀢𑀺 𑀫𑀸𑀢𑀼𑀮𑁂;

𑀲𑀩𑁆𑀩𑁂 𑀧𑀜𑁆𑀚𑀮𑀺𑀓𑀸 𑀳𑀼𑀢𑁆𑀯𑀸, 𑀭𑁄𑀤𑀫𑀸𑀦𑀸 𑀉𑀧𑀸𑀕𑀫𑀼𑀁.

𑁧𑁦𑁬.

‘‘𑀢𑀢𑁆𑀣 𑀯𑀢𑁆𑀢𑁂𑀢𑁆𑀯𑀸 𑀲𑀮𑁆𑀮𑀸𑀧𑀁, 𑀘𑁂𑀢𑁂𑀳𑀺 𑀘𑁂𑀢𑀧𑀼𑀢𑁆𑀢𑁂𑀳𑀺;

𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑀗𑁆𑀓𑀁 𑀅𑀕𑀫𑀼 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀢𑀢𑁆𑀣 𑀯𑀢𑁆𑀢𑁂𑀢𑁆𑀯𑀸 𑀲𑀮𑁆𑀮𑀸𑀧𑀦𑁆𑀢𑀺 𑀢𑀢𑁆𑀣 𑀢𑁂𑀳𑀺 𑀭𑀸𑀚𑀽𑀳𑀺 𑀲𑀫𑀸𑀕𑀫𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀫𑀸𑀦𑀸 𑀓𑀣𑀁 𑀧𑀯𑀢𑁆𑀢𑁂𑀢𑁆𑀯𑀸. 𑀘𑁂𑀢𑀧𑀼𑀢𑁆𑀢𑁂𑀳𑀻𑀢𑀺 𑀘𑁂𑀢𑀭𑀸𑀚𑀧𑀼𑀢𑁆𑀢𑁂𑀳𑀺. 𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀦𑀸𑀢𑀺 𑀢𑁂 𑀭𑀸𑀚𑀸𑀦𑁄 𑀢𑀢𑁄 𑀯𑀦𑀤𑁆𑀯𑀸𑀭𑀝𑁆𑀞𑀸𑀦𑁂 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀯𑀗𑁆𑀓𑀁 𑀅𑀕𑀫𑀼 𑀧𑀩𑁆𑀩𑀢𑀦𑁆𑀢𑀺 𑀅𑀫𑁆𑀳𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀯𑀗𑁆𑀓𑀧𑀩𑁆𑀩𑀢𑀁 𑀉𑀤𑁆𑀤𑀺𑀲𑁆𑀲 𑀅𑀕𑀫𑀫𑁆𑀳𑀸.

𑀅𑀣 ¶ 𑀫𑀳𑀸𑀲𑀢𑁆𑀢𑁄 𑀢𑁂𑀳𑀺 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀧𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀢𑀢𑁆𑀣 ¶ 𑀯𑀲𑀺𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑁄 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀧𑀸𑀤𑁂𑀦 𑀕𑀦𑁆𑀢𑁆𑀯𑀸 𑀓𑁂𑀢𑀼𑀫𑀢𑀻𑀦𑀤𑀻𑀢𑀻𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀦𑀘𑀭𑀓𑁂𑀦 𑀤𑀺𑀦𑁆𑀦𑀁 𑀫𑀥𑀼𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀢𑀲𑁆𑀲 𑀲𑀼𑀯𑀡𑁆𑀡𑀲𑀽𑀘𑀺𑀁 𑀤𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀲𑀸𑀦𑀼𑀧𑀩𑁆𑀩𑀢𑀲𑀺𑀔𑀭𑁂 𑀞𑀺𑀢𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀫𑀽𑀮𑁂 𑀣𑁄𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑁄 𑀦𑀸𑀮𑀺𑀓𑀧𑀩𑁆𑀩𑀢𑀁 𑀧𑀭𑀺𑀳𑀭𑀦𑁆𑀢𑁄 𑀫𑀼𑀘𑀮𑀺𑀦𑁆𑀤𑀲𑀭𑀁 𑀕𑀦𑁆𑀢𑁆𑀯𑀸 𑀲𑀭𑀢𑀻𑀭𑁂𑀦 𑀧𑀼𑀩𑁆𑀩𑀼𑀢𑁆𑀢𑀭𑀓𑀡𑁆𑀡𑀁 𑀧𑀢𑁆𑀯𑀸 𑀏𑀓𑀧𑀤𑀺𑀓𑀫𑀕𑁆𑀕𑁂𑀦𑁂𑀯 𑀯𑀦𑀖𑀝𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑁆𑀫 𑀕𑀺𑀭𑀺𑀯𑀺𑀤𑀼𑀕𑁆𑀕𑀸𑀦𑀁 𑀦𑀤𑀻𑀧𑀪𑀯𑀸𑀦𑀁 𑀧𑀼𑀭𑀢𑁄 𑀘𑀢𑀼𑀭𑀲𑁆𑀲𑀧𑁄𑀓𑁆𑀔𑀭𑀡𑀺𑀁 𑀧𑀸𑀧𑀼𑀡𑀺.

𑁧𑁦𑁭. 𑀢𑀲𑁆𑀫𑀺𑀁 ¶ 𑀔𑀡𑁂 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀳𑀸𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀝𑁆𑀞𑁄, 𑀯𑀲𑀦𑀝𑁆𑀞𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙 𑀯𑀗𑁆𑀓𑀧𑀩𑁆𑀩𑀢𑀓𑀼𑀘𑁆𑀙𑀺𑀫𑁆𑀳𑀺 𑀭𑀫𑀡𑀻𑀬𑁂 𑀞𑀸𑀦𑁂 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀳𑀻’’𑀢𑀺. 𑀲𑁄 𑀢𑀢𑁆𑀣 𑀤𑁆𑀯𑁂 𑀧𑀡𑁆𑀡𑀲𑀸𑀮𑀸𑀬𑁄 𑀤𑁆𑀯𑁂 𑀘𑀗𑁆𑀓𑀫𑁂 𑀤𑁆𑀯𑁂 𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀫𑀸𑀧𑁂𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀦𑀸𑀦𑀸𑀧𑀼𑀧𑁆𑀨𑀯𑀺𑀘𑀺𑀢𑁆𑀢𑁂 𑀭𑀼𑀓𑁆𑀔𑁂 𑀨𑀮𑀺𑀢𑁂 𑀭𑀼𑀓𑁆𑀔𑁂 𑀧𑀼𑀧𑁆𑀨𑀕𑀘𑁆𑀙𑁂 𑀓𑀤𑀮𑀺𑀯𑀦𑀸𑀤𑀻𑀦𑀺 𑀘 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑁂 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀧𑀝𑀺𑀬𑀸𑀤𑁂𑀢𑁆𑀯𑀸 ‘‘𑀬𑁂𑀓𑁂𑀘𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀢𑁂 𑀕𑀡𑁆𑀳𑀦𑁆𑀢𑀽’’𑀢𑀺 𑀅𑀓𑁆𑀔𑀭𑀸𑀦𑀺 𑀮𑀺𑀔𑀺𑀢𑁆𑀯𑀸 𑀅𑀫𑀦𑀼𑀲𑁆𑀲𑁂 𑀘 𑀪𑁂𑀭𑀯𑀲𑀤𑁆𑀤𑁂 𑀫𑀺𑀕𑀧𑀓𑁆𑀔𑀺𑀦𑁄 𑀘 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀫𑀳𑀸𑀲𑀢𑁆𑀢𑁄 𑀏𑀓𑀧𑀤𑀺𑀓𑀫𑀕𑁆𑀕𑀁 𑀤𑀺𑀲𑁆𑀯𑀸 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀤𑁆𑀤𑀺𑀜𑁆𑀘 𑀧𑀼𑀢𑁆𑀢𑁂 𑀘 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀓𑁆𑀓𑁂𑀦 𑀤𑀺𑀦𑁆𑀦𑁄𑀲𑁆𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀯𑀺𑀝𑁆𑀞𑁄 𑀔𑀕𑁆𑀕𑀜𑁆𑀘 𑀥𑀦𑀼𑀜𑁆𑀘 𑀅𑀧𑀦𑁂𑀢𑁆𑀯𑀸 𑀲𑀸𑀝𑀓𑁂 𑀑𑀫𑀼𑀜𑁆𑀘𑀺𑀢𑁆𑀯𑀸 𑀇𑀲𑀺𑀯𑁂𑀲𑀁 𑀕𑀳𑁂𑀢𑁆𑀯𑀸 𑀓𑀢𑁆𑀢𑀭𑀤𑀡𑁆𑀟𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀤𑀺𑀲𑁂𑀦 𑀉𑀧𑀲𑀫𑁂𑀦 𑀤𑀸𑀭𑀓𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀫𑀤𑁆𑀤𑀺𑀤𑁂𑀯𑀻𑀧𑀺 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀅𑀲𑁆𑀲𑀫𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀇𑀲𑀺𑀯𑁂𑀲𑀁 𑀕𑀡𑁆𑀳𑀺. 𑀧𑀘𑁆𑀙𑀸 𑀧𑀼𑀢𑁆𑀢𑁂𑀧𑀺 𑀢𑀸𑀧𑀲𑀓𑀼𑀫𑀸𑀭𑀓𑁂 𑀓𑀭𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀫𑀤𑁆𑀤𑀺𑀁 𑀯𑀭𑀁 𑀬𑀸𑀘𑀺 ‘‘𑀫𑀬𑀁 𑀇𑀢𑁄 𑀧𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑀸 𑀦𑀸𑀫, 𑀇𑀢𑁆𑀣𑀻 𑀘 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀫𑀮𑀁, 𑀫𑀸 𑀤𑀸𑀦𑀺 𑀅𑀓𑀸𑀮𑁂 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀸’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀫𑁆𑀧𑀺 𑀯𑀭𑀁 𑀬𑀸𑀘𑀺 ‘‘𑀤𑁂𑀯, 𑀢𑀼𑀫𑁆𑀳𑁂 𑀧𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀳𑁄𑀣, 𑀅𑀳𑀁 𑀨𑀮𑀸𑀨𑀮𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀬𑁄 𑀚𑀦𑁂 𑀧𑀝𑀺𑀚𑀕𑁆𑀕𑀺. 𑀇𑀢𑀺 𑀘𑀢𑁆𑀢𑀸𑀭𑁄 𑀔𑀢𑁆𑀢𑀺𑀬𑀸 𑀯𑀗𑁆𑀓𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀲𑀢𑁆𑀢𑀫𑀸𑀲𑀫𑀢𑁆𑀢𑀁 𑀯𑀲𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀫𑀦𑁆𑀢𑀬𑀺𑀢𑁆𑀯𑀸 𑀤𑁂𑀯𑀺𑀦𑁆𑀤𑁄, 𑀯𑀺𑀲𑁆𑀲𑀓𑀫𑁆𑀫𑀁 𑀫𑀳𑀺𑀤𑁆𑀥𑀺𑀓’’𑀦𑁆𑀢𑀺𑀆𑀤𑀺.

𑀢𑀢𑁆𑀣 ¶ 𑀆𑀫𑀦𑁆𑀢𑀬𑀺𑀢𑁆𑀯𑀸𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸. 𑀫𑀳𑀺𑀤𑁆𑀥𑀺𑀓𑀦𑁆𑀢𑀺 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀁. 𑀅𑀲𑁆𑀲𑀫𑀁 𑀲𑀼𑀓𑀢𑀦𑁆𑀢𑀺 𑀅𑀲𑁆𑀲𑀫𑀧𑀤𑀁 𑀲𑀼𑀓𑀢𑀁 𑀓𑀢𑁆𑀯𑀸. 𑀭𑀫𑁆𑀫𑀁 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀯𑀲𑀦𑀸𑀦𑀼𑀘𑁆𑀙𑀯𑀺𑀓𑀁 𑀧𑀡𑁆𑀡𑀲𑀸𑀮𑀁. 𑀲𑀼𑀫𑀸𑀧𑀬𑀸𑀢𑀺 𑀲𑀼𑀝𑁆𑀞𑀼 𑀫𑀸𑀧𑀬. 𑀆𑀡𑀸𑀧𑁂𑀲𑀻𑀢𑀺 𑀯𑀘𑀦𑀲𑁂𑀲𑁄. 𑀲𑀼𑀫𑀸𑀧𑀬𑀻𑀢𑀺 𑀲𑀫𑁆𑀫𑀸 𑀫𑀸𑀧𑁂𑀲𑀺.

𑁧𑁧𑁧. 𑀅𑀲𑀼𑀜𑁆𑀜𑁄𑀢𑀺 ¶ 𑀬𑀣𑀸 𑀲𑁄 𑀅𑀲𑁆𑀲𑀫𑁄 𑀅𑀲𑀼𑀜𑁆𑀜𑁄 𑀳𑁄𑀢𑀺, 𑀏𑀯𑀁 𑀢𑀲𑁆𑀲 𑀅𑀲𑀼𑀜𑁆𑀜𑀪𑀸𑀯𑀓𑀭𑀡𑁂𑀦 ¶ 𑀅𑀲𑀼𑀜𑁆𑀜𑁄 𑀳𑁄𑀫𑀺. ‘‘𑀅𑀲𑀼𑀜𑁆𑀜𑁂’’𑀢𑀺 𑀯𑀸 𑀧𑀸𑀞𑁄, 𑀫𑀫 𑀯𑀲𑀦𑁂𑀦𑁂𑀯 𑀅𑀲𑀼𑀜𑁆𑀜𑁂 𑀅𑀲𑁆𑀲𑀫𑁂 𑀤𑀸𑀭𑀓𑁂 𑀅𑀦𑀼𑀭𑀓𑁆𑀔𑀦𑁆𑀢𑁄 𑀯𑀲𑀸𑀫𑀺 𑀢𑀢𑁆𑀣 𑀢𑀺𑀝𑁆𑀞𑀸𑀫𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑁂 𑀲𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀸𑀧𑀺 𑀫𑁂𑀢𑁆𑀢𑀁 𑀧𑀝𑀺𑀮𑀪𑀺𑀁𑀲𑀼.

𑀏𑀯𑀁 𑀢𑁂𑀲𑀼 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀓𑀮𑀺𑀗𑁆𑀕𑀭𑀝𑁆𑀞𑀯𑀸𑀲𑀻 𑀚𑀽𑀚𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀫𑀺𑀢𑁆𑀢𑀢𑀸𑀧𑀦𑀸𑀬 𑀦𑀸𑀫 𑀪𑀭𑀺𑀬𑀸𑀬 ‘‘𑀦𑀸𑀳𑀁 𑀢𑁂 𑀦𑀺𑀘𑁆𑀘𑀁 𑀥𑀜𑁆𑀜𑀓𑁄𑀝𑁆𑀝𑀦𑀉𑀤𑀓𑀸𑀳𑀭𑀡𑀬𑀸𑀕𑀼𑀪𑀢𑁆𑀢𑀧𑀘𑀦𑀸𑀤𑀻𑀦𑀺 𑀓𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀧𑀭𑀺𑀘𑀸𑀭𑀓𑀁 𑀫𑁂 𑀤𑀸𑀲𑀁 𑀯𑀸 𑀤𑀸𑀲𑀺𑀁 𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀼𑀢𑁄𑀳𑀁 𑀢𑁂 𑀪𑁄𑀢𑀺 𑀤𑀼𑀕𑁆𑀕𑀢𑁄 𑀤𑀸𑀲𑀁 𑀯𑀸 𑀤𑀸𑀲𑀺𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀬 ‘‘𑀏𑀲 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀯𑀗𑁆𑀓𑀧𑀩𑁆𑀩𑀢𑁂 𑀯𑀲𑀢𑀺. 𑀢𑀲𑁆𑀲 𑀧𑀼𑀢𑁆𑀢𑁂 𑀫𑀬𑁆𑀳𑀁 𑀧𑀭𑀺𑀘𑀸𑀭𑀓𑁂 𑀬𑀸𑀘𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀓𑀺𑀮𑁂𑀲𑀯𑀲𑁂𑀦 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀢𑀲𑁆𑀲𑀸 𑀯𑀘𑀦𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀸𑀣𑁂𑀬𑁆𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀚𑁂𑀢𑀼𑀢𑁆𑀢𑀭𑀦𑀕𑀭𑀁 𑀧𑀢𑁆𑀯𑀸 ‘‘𑀓𑀼𑀳𑀺𑀁 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺.

𑀫𑀳𑀸𑀚𑀦𑁄 ‘‘𑀇𑀫𑁂𑀲𑀁 𑀬𑀸𑀘𑀓𑀸𑀦𑀁 𑀅𑀢𑀺𑀤𑀸𑀦𑁂𑀦 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄, 𑀏𑀯𑀁 𑀅𑀫𑁆𑀳𑀸𑀓𑀁 𑀭𑀸𑀚𑀸𑀦𑀁 𑀦𑀸𑀲𑁂𑀢𑁆𑀯𑀸 𑀧𑀼𑀦𑀧𑀺 𑀇𑀥𑁂𑀯 𑀆𑀕𑀘𑁆𑀙𑀢𑀻’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀺𑀳𑀢𑁆𑀣𑁄 𑀉𑀧𑀓𑁆𑀓𑁄𑀲𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀁 𑀅𑀦𑀼𑀩𑀦𑁆𑀥𑀺. 𑀲𑁄 𑀤𑁂𑀯𑀢𑀸𑀯𑀺𑀕𑁆𑀕𑀳𑀺𑀢𑁄 𑀳𑀼𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀗𑁆𑀓𑀧𑀩𑁆𑀩𑀢𑀕𑀸𑀫𑀺𑀫𑀕𑁆𑀕𑀁 𑀅𑀪𑀺𑀭𑀼𑀴𑁆𑀳𑁄 𑀅𑀦𑀼𑀓𑁆𑀓𑀫𑁂𑀦 𑀯𑀦𑀤𑁆𑀯𑀸𑀭𑀁 𑀧𑀢𑁆𑀯𑀸 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀫𑀕𑁆𑀕𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀢𑁂𑀳𑀺 𑀭𑀸𑀚𑀽𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑀓𑁆𑀔𑀡𑀢𑁆𑀣𑀸𑀬 𑀞𑀧𑀺𑀢𑁂𑀦 𑀘𑁂𑀢𑀧𑀼𑀢𑁆𑀢𑁂𑀦 𑀲𑀫𑀸𑀕𑀜𑁆𑀙𑀺. 𑀢𑁂𑀦 ‘‘𑀓𑀳𑀁, 𑀪𑁄 𑀩𑁆𑀭𑀸𑀳𑁆𑀫𑀡, 𑀕𑀘𑁆𑀙𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀤𑁆𑀥𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀧𑀼𑀢𑁆𑀢𑁂 𑀯𑀸 𑀤𑁂𑀯𑀺𑀁 𑀯𑀸 𑀬𑀸𑀘𑀺𑀢𑀼𑀁 𑀕𑀘𑁆𑀙𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀸 𑀔𑁄, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀢𑀢𑁆𑀣 𑀕𑀜𑁆𑀙𑀺, 𑀲𑀘𑁂 𑀕𑀘𑁆𑀙𑀲𑀺, 𑀏𑀢𑁆𑀣𑁂𑀯 𑀢𑁂 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀬𑁆𑀳𑀁 𑀲𑀼𑀦𑀔𑀸𑀦𑀁 𑀖𑀸𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀲𑀦𑁆𑀢𑀚𑁆𑀚𑀺𑀢𑁄 𑀫𑀭𑀡𑀪𑀬𑀪𑀻𑀢𑁄 ‘‘𑀅𑀳𑀫𑀲𑁆𑀲 𑀧𑀺𑀢𑀭𑀸 𑀧𑁂𑀲𑀺𑀢𑁄 𑀤𑀽𑀢𑁄, ‘𑀢𑀁 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄’’𑀢𑀺 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀘𑁂𑀢𑀧𑀼𑀢𑁆𑀢𑁄 𑀢𑀼𑀝𑁆𑀞𑀳𑀝𑁆𑀞𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀯𑀗𑁆𑀓𑀧𑀩𑁆𑀩𑀢𑀕𑀸𑀫𑀺𑀫𑀕𑁆𑀕𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀢𑁄 𑀧𑀭𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀘𑁆𑀘𑀼𑀢𑁂𑀦 𑀦𑀸𑀫 𑀢𑀸𑀧𑀲𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦𑀸𑀧𑀺 𑀫𑀕𑁆𑀕𑁂 𑀆𑀘𑀺𑀓𑁆𑀔𑀺𑀢𑁂 𑀢𑁂𑀦 𑀆𑀘𑀺𑀓𑁆𑀔𑀺𑀢𑀲𑀜𑁆𑀜𑀸𑀬 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀲𑁆𑀲𑀫𑀧𑀤𑀝𑁆𑀞𑀸𑀦𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀫𑀤𑁆𑀤𑀺𑀤𑁂𑀯𑀺𑀬𑀸 𑀨𑀮𑀸𑀨𑀮𑀢𑁆𑀣𑀁 ¶ 𑀕𑀢𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀪𑁄 𑀤𑀸𑀭𑀓𑁂 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁨.

‘‘𑀧𑀯𑀦𑁂 𑀯𑀲𑀫𑀸𑀦𑀲𑁆𑀲, 𑀅𑀤𑁆𑀥𑀺𑀓𑁄 𑀫𑀁 𑀉𑀧𑀸𑀕𑀫𑀺;

𑀅𑀬𑀸𑀘𑀺 𑀧𑀼𑀢𑁆𑀢𑀓𑁂 𑀫𑀬𑁆𑀳𑀁, 𑀚𑀸𑀮𑀺𑀁 𑀓𑀡𑁆𑀳𑀸𑀚𑀺𑀦𑀁 𑀘𑀼𑀪𑁄’’𑀢𑀺.

𑀏𑀯𑀁 ¶ 𑀩𑁆𑀭𑀸𑀳𑁆𑀫𑀡𑁂𑀦 𑀤𑀸𑀭𑀓𑁂𑀲𑀼 𑀬𑀸𑀘𑀺𑀢𑁂𑀲𑀼 𑀫𑀳𑀸𑀲𑀢𑁆𑀢𑁄 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀬𑀸𑀘𑀓𑁄 𑀅𑀥𑀺𑀕𑀢𑁄, 𑀅𑀚𑁆𑀚𑀸𑀳𑀁 𑀅𑀦𑀯𑀲𑁂𑀲𑀢𑁄 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀲𑀸𑀭𑀺𑀢𑀳𑀢𑁆𑀣𑁂 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀢𑁄𑀲𑁂𑀦𑁆𑀢𑁄 𑀲𑀓𑀮𑀜𑁆𑀘 𑀢𑀁 𑀧𑀩𑁆𑀩𑀢𑀓𑀼𑀘𑁆𑀙𑀺𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 ‘‘𑀤𑀤𑀸𑀫𑀺 𑀢𑀯 𑀫𑀬𑁆𑀳𑀁 𑀧𑀼𑀢𑁆𑀢𑀓𑁂, 𑀅𑀧𑀺 𑀘 𑀫𑀤𑁆𑀤𑀺𑀤𑁂𑀯𑀻 𑀧𑀦 𑀧𑀸𑀢𑁄𑀯 𑀨𑀮𑀸𑀨𑀮𑀢𑁆𑀣𑀸𑀬 𑀯𑀦𑀁 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀆𑀕𑀫𑀺𑀲𑁆𑀲𑀢𑀺, 𑀢𑀸𑀬 𑀆𑀕𑀢𑀸𑀬 𑀢𑁂 𑀧𑀼𑀢𑁆𑀢𑀓𑁂 𑀤𑀲𑁆𑀲𑁂𑀢𑁆𑀯𑀸 𑀢𑁆𑀯𑀜𑁆𑀘 𑀫𑀽𑀮𑀨𑀮𑀸𑀨𑀮𑀁 𑀔𑀸𑀤𑀺𑀢𑁆𑀯𑀸 𑀏𑀓𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀯𑀺𑀕𑀢𑀧𑀭𑀺𑀲𑁆𑀲𑀫𑁄 𑀧𑀸𑀢𑁄𑀯 𑀕𑀫𑀺𑀲𑁆𑀲𑀲𑀻’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀸𑀫𑀜𑁆𑀘𑁂𑀲 𑀉𑀴𑀸𑀭𑀚𑁆𑀛𑀸𑀲𑀬𑀢𑀸𑀬 𑀧𑀼𑀢𑁆𑀢𑀓𑁂 𑀤𑀤𑀸𑀢𑀺, 𑀫𑀸𑀢𑀸 𑀧𑀦 𑀯𑀘𑁆𑀙𑀕𑀺𑀤𑁆𑀥𑀸 𑀆𑀕𑀦𑁆𑀢𑁆𑀯𑀸 𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀫𑁆𑀧𑀺 𑀓𑀭𑁂𑀬𑁆𑀬, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀚𑁆𑀚𑁂𑀯 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀼𑀢𑁆𑀢𑀸 𑀘𑁂 𑀢𑁂 𑀫𑀬𑁆𑀳𑀁 𑀤𑀺𑀦𑁆𑀦𑀸, 𑀓𑀺𑀁 𑀤𑀸𑀦𑀺 𑀫𑀸𑀢𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑁂𑀲𑀺𑀢𑁂𑀳𑀺, 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀚𑁆𑀚𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀲𑀘𑁂, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀧𑀼𑀢𑁆𑀢𑀺𑀁 𑀫𑀸𑀢𑀭𑀁 𑀤𑀝𑁆𑀞𑀼𑀁 𑀦 𑀇𑀘𑁆𑀙𑀲𑀺, 𑀇𑀫𑁂 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀚𑁂𑀢𑀼𑀢𑁆𑀢𑀭𑀦𑀕𑀭𑀁 𑀕𑀘𑁆𑀙, 𑀢𑀢𑁆𑀣 𑀲𑀜𑁆𑀚𑀬𑀫𑀳𑀸𑀭𑀸𑀚𑀸 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀢𑁂 𑀥𑀦𑀁 𑀤𑀲𑁆𑀲𑀢𑀺, 𑀢𑁂𑀦 𑀤𑀸𑀲𑀤𑀸𑀲𑀺𑀬𑁄 𑀕𑀡𑁆𑀳𑀺𑀲𑁆𑀲𑀲𑀺, 𑀲𑀼𑀔𑀜𑁆𑀘 𑀚𑀻𑀯𑀺𑀲𑁆𑀲𑀲𑀺, 𑀅𑀜𑁆𑀜𑀣𑀸 𑀇𑀫𑁂 𑀲𑀼𑀔𑀼𑀫𑀸𑀮𑀸 𑀭𑀸𑀚𑀤𑀸𑀭𑀓𑀸, 𑀓𑀺𑀁 𑀢𑁂 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳.

𑀩𑁆𑀭𑀸𑀳𑁆𑀫𑀡𑁄 ‘‘𑀏𑀯𑀫𑁆𑀧𑀺 𑀫𑀬𑀸 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀭𑀸𑀚𑀤𑀡𑁆𑀟𑀢𑁄 𑀪𑀸𑀬𑀸𑀫𑀺, 𑀫𑀬𑁆𑀳𑀫𑁂𑀯 𑀕𑀸𑀫𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀇𑀫𑀁 𑀢𑁂𑀲𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀤𑀸𑀭𑀓𑀸 ‘‘𑀧𑀺𑀢𑀸 𑀦𑁄 𑀔𑁄 𑀅𑀫𑁆𑀳𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀢𑀼𑀓𑀸𑀫𑁄’’𑀢𑀺 𑀧𑀓𑁆𑀓𑀫𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀕𑀦𑁆𑀢𑁆𑀯𑀸 𑀧𑀤𑀼𑀫𑀺𑀦𑀺𑀕𑀘𑁆𑀙𑁂 𑀦𑀺𑀮𑀻𑀬𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀅𑀤𑀺𑀲𑁆𑀯𑀸𑀯 ‘‘𑀢𑁆𑀯𑀁 ¶ ‘𑀤𑀸𑀭𑀓𑁂 𑀤𑀤𑀸𑀫𑀻’𑀢𑀺 𑀯𑀢𑁆𑀯𑀸 𑀢𑁂 𑀅𑀧𑀓𑁆𑀓𑀫𑀸𑀧𑁂𑀲𑀺, 𑀏𑀲𑁄 𑀢𑁂 𑀲𑀸𑀥𑀼𑀪𑀸𑀯𑁄’’𑀢𑀺 𑀆𑀳. 𑀅𑀣 𑀫𑀳𑀸𑀲𑀢𑁆𑀢𑁄 𑀲𑀳𑀲𑀸𑀯 𑀉𑀝𑁆𑀞𑀳𑀺𑀢𑁆𑀯𑀸 𑀤𑀸𑀭𑀓𑁂 𑀕𑀯𑁂𑀲𑀦𑁆𑀢𑁄 𑀧𑀤𑀼𑀫𑀺𑀦𑀺𑀕𑀘𑁆𑀙𑁂 𑀦𑀺𑀮𑀻𑀦𑁂 𑀤𑀺𑀲𑁆𑀯𑀸 ‘‘𑀏𑀣, 𑀢𑀸𑀢𑀸, 𑀫𑀸 𑀫𑀬𑁆𑀳𑀁 𑀤𑀸𑀦𑀧𑀸𑀭𑀫𑀺𑀬𑀸 𑀅𑀦𑁆𑀢𑀭𑀸𑀬𑀁 𑀅𑀓𑀢𑁆𑀣, 𑀫𑀫 𑀤𑀸𑀦𑀚𑁆𑀛𑀸𑀲𑀬𑀁 𑀫𑀢𑁆𑀣𑀓𑀁 𑀧𑀸𑀧𑁂𑀣, 𑀅𑀬𑀜𑁆𑀘 𑀩𑁆𑀭𑀸𑀳𑁆𑀫𑀡𑁄 𑀢𑀼𑀫𑁆𑀳𑁂 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀬𑁆𑀬𑀓𑀲𑁆𑀲 𑀲𑀜𑁆𑀚𑀬𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀺 ¶ , 𑀢𑀸𑀢 𑀚𑀸𑀮𑀺, 𑀢𑁆𑀯𑀁 𑀪𑀼𑀚𑀺𑀲𑁆𑀲𑁄 𑀳𑁄𑀢𑀼𑀓𑀸𑀫𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀢𑁆𑀯𑀸 𑀪𑀼𑀚𑀺𑀲𑁆𑀲𑁄 𑀪𑀯𑁂𑀬𑁆𑀬𑀸𑀲𑀺, 𑀓𑀡𑁆𑀳𑀸𑀚𑀺𑀦𑁂 𑀢𑁆𑀯𑀁 𑀤𑀸𑀲𑀲𑀢𑀁 𑀤𑀸𑀲𑀺𑀲𑀢𑀁 𑀳𑀢𑁆𑀣𑀺𑀲𑀢𑀁 𑀅𑀲𑁆𑀲𑀲𑀢𑀁 𑀉𑀲𑀪𑀲𑀢𑀁 𑀦𑀺𑀓𑁆𑀔𑀲𑀢𑀦𑁆𑀢𑀺 𑀲𑀩𑁆𑀩𑀲𑀢𑀁 𑀤𑀢𑁆𑀯𑀸 𑀪𑀼𑀚𑀺𑀲𑁆𑀲𑀸 𑀪𑀯𑁂𑀬𑁆𑀬𑀸𑀲𑀻’’𑀢𑀺 𑀓𑀼𑀫𑀸𑀭𑁂 𑀅𑀕𑁆𑀖𑀸𑀧𑁂𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀕𑀦𑁆𑀢𑁆𑀯𑀸 𑀓𑀫𑀡𑁆𑀟𑀮𑀼𑀦𑀸 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀅𑀢𑀺𑀯𑀺𑀬 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑀼𑀢𑁆𑀯𑀸 𑀧𑀣𑀯𑀺𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀧𑀺𑀬𑀧𑀼𑀢𑁆𑀢𑀤𑀸𑀦𑀁 𑀅𑀤𑀸𑀲𑀺. 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀣𑀯𑀺𑀓𑀫𑁆𑀧𑀸𑀤𑀬𑁄 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁩.

‘‘𑀬𑀸𑀘𑀓𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀳𑀸𑀲𑁄 𑀫𑁂 𑀉𑀧𑀧𑀚𑁆𑀚𑀣;

𑀉𑀪𑁄 𑀧𑀼𑀢𑁆𑀢𑁂 𑀕𑀳𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀩𑁆𑀭𑀸𑀳𑁆𑀫𑀡𑁂 𑀢𑀤𑀸.

𑁧𑁧𑁪.

‘‘𑀲𑀓𑁂 ¶ 𑀧𑀼𑀢𑁆𑀢𑁂 𑀘𑀚𑀦𑁆𑀢𑀲𑁆𑀲, 𑀚𑀽𑀚𑀓𑁂 𑀩𑁆𑀭𑀸𑀳𑁆𑀫𑀡𑁂 𑀬𑀤𑀸;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸’’𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀤𑀸𑀭𑀓𑁂 𑀅𑀕𑀦𑁆𑀢𑀼𑀓𑀸𑀫𑁂 𑀮𑀢𑀸𑀬 𑀳𑀢𑁆𑀣𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀆𑀓𑀟𑁆𑀠𑀺. 𑀢𑁂𑀲𑀁 𑀩𑀦𑁆𑀥𑀝𑁆𑀞𑀸𑀦𑁂 𑀙𑀯𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺. 𑀲𑁄 𑀮𑀢𑀸𑀤𑀡𑁆𑀟𑁂𑀦 𑀧𑀳𑀭𑀦𑁆𑀢𑁄 𑀆𑀓𑀟𑁆𑀠𑀺. 𑀢𑁂 𑀧𑀺𑀢𑀭𑀁 𑀑𑀮𑁄𑀓𑁂𑀢𑁆𑀯𑀸.

‘‘𑀅𑀫𑁆𑀫𑀸 𑀘 𑀢𑀸𑀢 𑀦𑀺𑀓𑁆𑀔𑀦𑁆𑀢𑀸, 𑀢𑁆𑀯𑀜𑁆𑀘 𑀦𑁄 𑀢𑀸𑀢 𑀤𑀲𑁆𑀲𑀲𑀺;

𑀫𑀸 𑀦𑁄 𑀢𑁆𑀯𑀁 𑀢𑀸𑀢 𑀅𑀤𑀤𑀸, 𑀬𑀸𑀯 𑀅𑀫𑁆𑀫𑀸𑀧𑀺 𑀏𑀢𑀼 𑀦𑁄;

𑀢𑀤𑀸𑀬𑀁 𑀩𑁆𑀭𑀸𑀳𑁆𑀫𑀡𑁄 𑀓𑀸𑀫𑀁, 𑀯𑀺𑀓𑁆𑀓𑀺𑀡𑀸𑀢𑀼 𑀳𑀦𑀸𑀢𑀼 𑀯𑀸’’𑀢𑀺. (𑀚𑀸. 𑁨.𑁨𑁨.𑁨𑁧𑁨𑁬) 𑁋

𑀯𑀢𑁆𑀯𑀸 𑀧𑀼𑀦𑀧𑀺 𑀅𑀬𑀁 𑀏𑀯𑀭𑀽𑀧𑁄 𑀖𑁄𑀭𑀤𑀲𑁆𑀲𑀦𑁄 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑁄 𑁋

‘‘𑀫𑀦𑀼𑀲𑁆𑀲𑁄 𑀉𑀤𑀸𑀳𑀼 𑀬𑀓𑁆𑀔𑁄, 𑀫𑀁𑀲𑀮𑁄𑀳𑀺𑀢𑀪𑁄𑀚𑀦𑁄;

𑀕𑀸𑀫𑀸 𑀅𑀭𑀜𑁆𑀜𑀫𑀸𑀕𑀫𑁆𑀫, 𑀥𑀦𑀁 𑀢𑀁 𑀢𑀸𑀢 𑀬𑀸𑀘𑀢𑀺;

𑀦𑀻𑀬𑀫𑀸𑀦𑁂 𑀧𑀺𑀲𑀸𑀘𑁂𑀦, 𑀓𑀺𑀁 𑀦𑀼 𑀢𑀸𑀢 𑀉𑀤𑀺𑀓𑁆𑀔𑀲𑀻’’𑀢𑀺. (𑀚𑀸. 𑁨.𑁨𑁨.𑁨𑁧𑁩𑁦-𑁨𑁧𑁩𑁧) 𑁋

𑀆𑀤𑀻𑀦𑀺 𑀯𑀤𑀦𑁆𑀢𑀸 𑀧𑀭𑀺𑀤𑁂𑀯𑀺𑀁𑀲𑀼. 𑀢𑀢𑁆𑀣 𑀥𑀦𑀦𑁆𑀢𑀺 𑀧𑀼𑀢𑁆𑀢𑀥𑀦𑀁.

𑀚𑀽𑀚𑀓𑁄 ¶ 𑀤𑀸𑀭𑀓𑁂 𑀢𑀣𑀸 𑀧𑀭𑀺𑀤𑁂𑀯𑀦𑁆𑀢𑁂𑀬𑁂𑀯 𑀧𑁄𑀣𑁂𑀦𑁆𑀢𑁄𑀯 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀤𑀸𑀭𑀓𑀸𑀦𑀁 𑀓𑀭𑀼𑀡𑀁 𑀧𑀭𑀺𑀤𑁂𑀯𑀺𑀢𑁂𑀦 𑀢𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀓𑀸𑀭𑀼𑀜𑁆𑀜𑀪𑀸𑀯𑁂𑀦 𑀩𑀮𑀯𑀲𑁄𑀓𑁄 𑀉𑀧𑁆𑀧𑀚𑁆𑀚𑀺, 𑀯𑀺𑀧𑁆𑀧𑀝𑀺𑀲𑀸𑀭𑁄 𑀘 𑀉𑀤𑀧𑀸𑀤𑀺. 𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀯𑁂𑀡𑀺𑀁 𑀅𑀦𑀼𑀲𑁆𑀲𑀭𑀺. ‘‘𑀲𑀩𑁆𑀩𑁂𑀯 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀩𑀼𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 ¶ 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁄, 𑀧𑀼𑀢𑁆𑀢𑀤𑀸𑀦𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀅𑀜𑁆𑀜𑀢𑀭𑀁, 𑀢𑀲𑁆𑀫𑀸 𑀯𑁂𑀲𑁆𑀲𑀦𑁆𑀢𑀭 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀦𑀼𑀢𑀸𑀧𑁄 𑀦 𑀢𑁂 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀪𑀸𑀲𑁂𑀢𑁆𑀯𑀸 ‘‘𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀫 𑀢𑁂 𑀦 𑀓𑀺𑀜𑁆𑀘𑀺 𑀳𑁄𑀦𑁆𑀢𑀻’’𑀢𑀺 𑀅𑀢𑁆𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀤𑀴𑁆𑀳𑀲𑀫𑀸𑀤𑀸𑀦𑀁 𑀅𑀥𑀺𑀝𑁆𑀞𑀸𑀬 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀧𑀸𑀲𑀸𑀡𑀨𑀮𑀓𑁂 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀦𑀺𑀲𑀻𑀤𑀺.

𑀅𑀣 𑀫𑀤𑁆𑀤𑀺𑀤𑁂𑀯𑀻 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀻 ‘‘𑀫𑀸 𑀫𑀳𑀸𑀲𑀢𑁆𑀢𑀲𑁆𑀲 𑀤𑀸𑀦𑀦𑁆𑀢𑀭𑀸𑀬𑁄 𑀳𑁄𑀢𑀽’’𑀢𑀺 ¶ 𑀯𑀸𑀴𑀫𑀺𑀕𑀭𑀽𑀧𑀥𑀭𑀸𑀳𑀺 𑀤𑁂𑀯𑀢𑀸𑀳𑀺 𑀉𑀧𑀭𑀼𑀤𑁆𑀥𑀫𑀕𑁆𑀕𑀸 𑀢𑁂𑀲𑀼 𑀅𑀧𑀕𑀢𑁂𑀲𑀼 𑀘𑀺𑀭𑁂𑀦 𑀅𑀲𑁆𑀲𑀫𑀁 𑀧𑀢𑁆𑀯𑀸 ‘‘𑀅𑀚𑁆𑀚 𑀫𑁂 𑀤𑀼𑀲𑁆𑀲𑀼𑀧𑀺𑀦𑀁 𑀤𑀺𑀝𑁆𑀞𑀁, 𑀤𑀼𑀦𑁆𑀦𑀺𑀫𑀺𑀢𑁆𑀢𑀸𑀦𑀺 𑀘 𑀉𑀧𑁆𑀧𑀦𑁆𑀦𑀸𑀦𑀺, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀻 𑀅𑀲𑁆𑀲𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀢𑁆𑀢𑀓𑁂 𑀅𑀧𑀲𑁆𑀲𑀦𑁆𑀢𑀻 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀦 𑀔𑁄 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀓𑁂 𑀧𑀲𑁆𑀲𑀸𑀫𑀺, 𑀓𑀼𑀳𑀺𑀁 𑀢𑁂 𑀕𑀢𑀸’’𑀢𑀺 𑀆𑀳. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀸 𑀧𑀼𑀢𑁆𑀢𑀓𑁂 𑀉𑀧𑀥𑀸𑀭𑁂𑀦𑁆𑀢𑀻 𑀢𑀳𑀺𑀁 𑀢𑀳𑀺𑀁 𑀉𑀧𑀥𑀸𑀯𑀺𑀢𑁆𑀯𑀸 𑀕𑀯𑁂𑀲𑀦𑁆𑀢𑀻 𑀅𑀤𑀺𑀲𑁆𑀯𑀸 𑀧𑀼𑀦𑀧𑀺 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀓𑁆𑀔𑀴𑀓𑀣𑀸𑀬 𑀦𑀁 𑀧𑀼𑀢𑁆𑀢𑀲𑁄𑀓𑀁 𑀚𑀳𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

‘‘𑀦𑀽𑀦 𑀫𑀤𑁆𑀤𑀻 𑀯𑀭𑀸𑀭𑁄𑀳𑀸, 𑀭𑀸𑀚𑀧𑀼𑀢𑁆𑀢𑀻 𑀬𑀲𑀲𑁆𑀲𑀺𑀦𑀻;

𑀧𑀸𑀢𑁄 𑀕𑀢𑀸𑀲𑀺 𑀉𑀜𑁆𑀙𑀸𑀬, 𑀓𑀺𑀫𑀺𑀤𑀁 𑀲𑀸𑀬𑀫𑀸𑀕𑀢𑀸’’𑀢𑀺. (𑀚𑀸. 𑁨.𑁨𑁨.𑁨𑁨𑁨𑁫) 𑁋

𑀯𑀢𑁆𑀯𑀸 𑀢𑀸𑀬 𑀘𑀺𑀭𑀸𑀬𑀦𑀓𑀸𑀭𑀡𑁂 𑀓𑀣𑀺𑀢𑁂 𑀧𑀼𑀦𑀧𑀺 𑀤𑀸𑀭𑀓𑁂 𑀲𑀦𑁆𑀥𑀸𑀬 𑀦 𑀓𑀺𑀜𑁆𑀘𑀺 𑀆𑀳. 𑀲𑀸 𑀧𑀼𑀢𑁆𑀢𑀲𑁄𑀓𑁂𑀦 𑀢𑁂 𑀉𑀧𑀥𑀸𑀭𑁂𑀦𑁆𑀢𑀻 𑀧𑀼𑀦𑀧𑀺 𑀯𑀸𑀢𑀯𑁂𑀕𑁂𑀦 𑀯𑀦𑀸𑀦𑀺 𑀯𑀺𑀘𑀭𑀺. 𑀢𑀸𑀬 𑀏𑀓𑀭𑀢𑁆𑀢𑀺𑀬𑀁 𑀯𑀺𑀘𑀭𑀺𑀢𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀁 𑀧𑀦𑁆𑀦𑀭𑀲𑀬𑁄𑀚𑀦𑀫𑀢𑁆𑀢𑀁 𑀅𑀳𑁄𑀲𑀺. 𑀅𑀣 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀳𑀸𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀞𑀺𑀢𑀸 𑀤𑀸𑀭𑀓𑀸𑀦𑀁 𑀅𑀤𑀲𑁆𑀲𑀦𑁂𑀦 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑀸 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀙𑀺𑀦𑁆𑀦𑀓𑀤𑀮𑀻 𑀯𑀺𑀬 𑀪𑀽𑀫𑀺𑀬𑀁 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀢𑀺. 𑀲𑁄 ‘‘𑀫𑀢𑀸’’𑀢𑀺 𑀲𑀜𑁆𑀜𑀸𑀬 𑀓𑀫𑁆𑀧𑀫𑀸𑀦𑁄 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁄𑀧𑀺 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 ‘‘𑀚𑀸𑀦𑀺𑀲𑁆𑀲𑀸𑀫𑀺 𑀢𑀸𑀯 𑀚𑀻𑀯𑀢𑀺, 𑀦 𑀚𑀻𑀯𑀢𑀻’’𑀢𑀺 𑀲𑀢𑁆𑀢𑀫𑀸𑀲𑁂 𑀓𑀸𑀬𑀲𑀁𑀲𑀕𑁆𑀕𑀁 𑀅𑀦𑀸𑀧𑀦𑁆𑀦𑀧𑀼𑀩𑁆𑀩𑁄𑀧𑀺 ¶ 𑀅𑀜𑁆𑀜𑀲𑁆𑀲 𑀅𑀪𑀸𑀯𑁂𑀦 𑀢𑀲𑁆𑀲𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀊𑀭𑀽𑀲𑀼 𑀞𑀧𑁂𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀉𑀭𑀜𑁆𑀘 𑀫𑀼𑀔𑀜𑁆𑀘 𑀳𑀤𑀬𑀜𑁆𑀘 𑀧𑀭𑀺𑀫𑀚𑁆𑀚𑀺. 𑀫𑀤𑁆𑀤𑀻𑀧𑀺 𑀔𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 ‘‘𑀤𑁂𑀯, 𑀤𑀸𑀭𑀓𑀸 𑀢𑁂 𑀓𑀼𑀳𑀺𑀁 𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀤𑁂𑀯𑀺, 𑀏𑀓𑀲𑁆𑀲 𑀫𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀁 𑀬𑀸𑀘𑀺𑀢𑁆𑀯𑀸 𑀆𑀕𑀢𑀲𑁆𑀲 𑀤𑀸𑀲𑀢𑁆𑀣𑀸𑀬 𑀤𑀺𑀦𑁆𑀦𑀸’’𑀢𑀺 𑀯𑀢𑁆𑀯𑀸 𑀢𑀸𑀬 ‘‘𑀓𑀲𑁆𑀫𑀸, 𑀤𑁂𑀯, 𑀧𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀤𑀢𑁆𑀯𑀸 𑀫𑀫 𑀲𑀩𑁆𑀩𑀭𑀢𑁆𑀢𑀺𑀁 𑀧𑀭𑀺𑀤𑁂𑀯𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺𑀬𑀸 𑀦𑀸𑀘𑀺𑀓𑁆𑀔𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀞𑀫𑀫𑁂𑀯 𑀯𑀼𑀢𑁆𑀢𑁂 𑀢𑀯 𑀘𑀺𑀢𑁆𑀢𑀤𑀼𑀓𑁆𑀔𑀁 𑀩𑀳𑀼 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀧𑀦 𑀲𑀭𑀻𑀭𑀤𑀼𑀓𑁆𑀔𑁂𑀦 𑀢𑀦𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑁋

‘‘𑀫𑀁 𑀧𑀲𑁆𑀲 𑀫𑀤𑁆𑀤𑀺 𑀫𑀸 𑀧𑀼𑀢𑁆𑀢𑁂, 𑀫𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑀲𑀺;

𑀮𑀘𑁆𑀙𑀸𑀫 𑀧𑀼𑀢𑁆𑀢𑁂 𑀚𑀻𑀯𑀦𑁆𑀢𑀸, 𑀅𑀭𑁄𑀕𑀸 𑀘 𑀪𑀯𑀸𑀫𑀲𑁂’’𑀢𑀺. (𑀚𑀸. 𑁨.𑁨𑁨.𑁨𑁨𑁬𑁦) 𑁋

𑀲𑁄 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦 𑁋

‘‘𑀧𑀼𑀢𑁆𑀢𑁂 ¶ 𑀧𑀲𑀼𑀜𑁆𑀘 𑀥𑀜𑁆𑀜𑀜𑁆𑀘, 𑀬𑀜𑁆𑀘 𑀅𑀜𑁆𑀜𑀁 𑀖𑀭𑁂 𑀥𑀦𑀁;

𑀤𑀚𑁆𑀚𑀸 𑀲𑀧𑁆𑀧𑀼𑀭𑀺𑀲𑁄 𑀤𑀸𑀦𑀁, 𑀤𑀺𑀲𑁆𑀯𑀸 𑀬𑀸𑀘𑀓𑀫𑀸𑀕𑀢𑀁;

𑀅𑀦𑀼𑀫𑁄𑀤𑀸𑀳𑀺 𑀫𑁂 𑀫𑀤𑁆𑀤𑀺, 𑀧𑀼𑀢𑁆𑀢𑀓𑁂 𑀤𑀸𑀦𑀫𑀼𑀢𑁆𑀢𑀫’’𑀦𑁆𑀢𑀺. (𑀚𑀸. 𑁨.𑁨𑁨.𑁨𑁨𑁬𑁧) 𑁋

𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀦𑀁 𑀢𑀁 𑀅𑀦𑀼𑀫𑁄𑀤𑀸𑀧𑁂𑀲𑀺.

𑀲𑀸𑀧𑀺 𑁋

‘‘𑀅𑀦𑀼𑀫𑁄𑀤𑀸𑀫𑀺 𑀢𑁂 𑀤𑁂𑀯, 𑀧𑀼𑀢𑁆𑀢𑀓𑁂 𑀤𑀸𑀦𑀫𑀼𑀢𑁆𑀢𑀫𑀁;

𑀤𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀪𑀺𑀬𑁆𑀬𑁄 𑀤𑀸𑀦𑀁 𑀤𑀤𑁄 𑀪𑀯𑀸’’𑀢𑀺. (𑀚𑀸. 𑁨.𑁨𑁨.𑁨𑁨𑁬𑁨) 𑁋

𑀯𑀢𑁆𑀯𑀸 𑀅𑀦𑀼𑀫𑁄𑀤𑀺.

𑀏𑀯𑀁 𑀢𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁂𑀲𑀼 𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀳𑀺𑀬𑁆𑀬𑁄 𑀚𑀽𑀚𑀓𑀲𑁆𑀲 𑀧𑀣𑀯𑀺𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀤𑀸𑀭𑀓𑁂 𑀅𑀤𑀸𑀲𑀺. 𑀇𑀤𑀸𑀦𑀺 𑀦𑀁 𑀓𑁄𑀘𑀺 𑀳𑀻𑀦𑀧𑀼𑀭𑀺𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀤𑁆𑀤𑀺𑀤𑁂𑀯𑀺𑀁 𑀬𑀸𑀘𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀢𑀢𑁄 𑀭𑀸𑀚𑀸 𑀦𑀺𑀧𑁆𑀧𑀘𑁆𑀘𑀬𑁄 𑀪𑀯𑁂𑀬𑁆𑀬, 𑀳𑀦𑁆𑀤𑀸𑀳𑀁 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀤𑁆𑀤𑀺𑀁 𑀬𑀸𑀘𑀺𑀢𑁆𑀯𑀸 𑀧𑀸𑀭𑀫𑀺𑀓𑀽𑀝𑀁 𑀕𑀸𑀳𑀸𑀧𑁂𑀢𑁆𑀯𑀸 𑀓𑀲𑁆𑀲𑀘𑀺 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀓𑀢𑁆𑀯𑀸 𑀧𑀼𑀦 𑀦𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀧𑀼𑀭𑀺𑀲𑁄 ‘‘𑀅𑀢𑀺𑀣𑀺 𑀦𑁄 𑀆𑀕𑀢𑁄’’𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑁂𑀦𑀢𑁆𑀣𑁂𑀦 𑀇𑀥𑀸𑀕𑀢𑁄𑀲𑀻’’𑀢𑀺 ¶ 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀓𑁆𑀓𑁄 𑀫𑀤𑁆𑀤𑀺𑀤𑁂𑀯𑀺𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁫.

‘‘𑀧𑀼𑀦𑀤𑁂𑀯 𑀲𑀓𑁆𑀓𑁄 𑀑𑀭𑀼𑀬𑁆𑀳, 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑀦𑁆𑀦𑀺𑀪𑁄;

𑀅𑀬𑀸𑀘𑀺 𑀫𑀁 𑀫𑀤𑁆𑀤𑀺𑀤𑁂𑀯𑀺𑀁, 𑀲𑀻𑀮𑀯𑀦𑁆𑀢𑀺𑀁 𑀧𑀢𑀺𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀧𑀼𑀦𑀤𑁂𑀯𑀸𑀢𑀺 𑀤𑀸𑀭𑀓𑁂 𑀤𑀺𑀦𑁆𑀦𑀤𑀺𑀯𑀲𑀢𑁄 𑀧𑀘𑁆𑀙𑀸 𑀏𑀯. 𑀢𑀤𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀑𑀭𑀼𑀬𑁆𑀳𑀸𑀢𑀺 𑀤𑁂𑀯𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸. 𑀩𑁆𑀭𑀸𑀳𑁆𑀫𑀡𑀲𑀦𑁆𑀦𑀺𑀪𑁄𑀢𑀺 𑀩𑁆𑀭𑀸𑀳𑁆𑀫𑀡𑀲𑀫𑀸𑀦𑀯𑀡𑁆𑀡𑁄.

𑀅𑀣 ¶ 𑀫𑀳𑀸𑀲𑀢𑁆𑀢𑁄 ‘‘𑀳𑀺𑀬𑁆𑀬𑁄 𑀫𑁂 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀦𑁆𑀦𑀸, 𑀅𑀳𑀫𑁆𑀧𑀺 𑀅𑀭𑀜𑁆𑀜𑁂 𑀏𑀓𑀓𑁄𑀯, 𑀓𑀣𑀁 𑀢𑁂 𑀫𑀤𑁆𑀤𑀺𑀁 𑀲𑀻𑀮𑀯𑀦𑁆𑀢𑀺𑀁 ¶ 𑀧𑀢𑀺𑀩𑁆𑀩𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸𑀯 𑀧𑀲𑀸𑀭𑀺𑀢𑀳𑀢𑁆𑀣𑁂 𑀅𑀦𑀕𑁆𑀖𑀭𑀢𑀦𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀅𑀲𑀚𑁆𑀚𑀺𑀢𑁆𑀯𑀸 𑀅𑀩𑀚𑁆𑀛𑀺𑀢𑁆𑀯𑀸 𑀅𑀦𑁄𑀮𑀻𑀦𑀫𑀸𑀦𑀲𑁄 ‘‘𑀅𑀚𑁆𑀚 𑀫𑁂 𑀤𑀸𑀦𑀧𑀸𑀭𑀫𑀻 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀕𑀺𑀭𑀺𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀯𑀺𑀬 𑁋

‘‘𑀤𑀤𑀸𑀫𑀺 𑀦 𑀯𑀺𑀓𑀫𑁆𑀧𑀸𑀫𑀺, 𑀬𑀁 𑀫𑀁 𑀬𑀸𑀘𑀲𑀺 𑀩𑁆𑀭𑀸𑀳𑁆𑀫𑀡;

𑀲𑀦𑁆𑀢𑀁 𑀦𑀧𑁆𑀧𑀝𑀺𑀕𑀽𑀳𑀸𑀫𑀺, 𑀤𑀸𑀦𑁂 𑀫𑁂 𑀭𑀫𑀢𑀻 𑀫𑀦𑁄’’𑀢𑀺. (𑀚𑀸. 𑁨.𑁨𑁨.𑁨𑁨𑁭𑁮) 𑁋

𑀯𑀢𑁆𑀯𑀸 𑀲𑀻𑀖𑀫𑁂𑀯 𑀓𑀫𑀡𑁆𑀟𑀮𑀼𑀦𑀸 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀪𑀭𑀺𑀬𑀫𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁬.

‘‘𑀫𑀤𑁆𑀤𑀺𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀉𑀤𑀓𑀜𑁆𑀚𑀮𑀺 𑀧𑀽𑀭𑀺𑀬;

𑀧𑀲𑀦𑁆𑀦𑀫𑀦𑀲𑀗𑁆𑀓𑀧𑁆𑀧𑁄, 𑀢𑀲𑁆𑀲 𑀫𑀤𑁆𑀤𑀺𑀁 𑀅𑀤𑀸𑀲𑀳’’𑀦𑁆𑀢𑀺.

𑀢𑀢𑁆𑀣 𑀉𑀤𑀓𑀜𑁆𑀚𑀮𑀻𑀢𑀺 𑀉𑀤𑀓𑀁 𑀅𑀜𑁆𑀚𑀮𑀺𑀁, ‘‘𑀉𑀤𑀓’’𑀦𑁆𑀢𑀺 𑀘 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀉𑀤𑀓𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀜𑁆𑀚𑀮𑀺𑀁 𑀧𑀲𑀸𑀭𑀺𑀢𑀳𑀢𑁆𑀣𑀢𑀮𑀁 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀲𑀦𑁆𑀦𑀫𑀦𑀲𑀗𑁆𑀓𑀧𑁆𑀧𑁄𑀢𑀺 ‘‘𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀤𑀸𑀦𑀧𑀸𑀭𑀫𑀺𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀦𑁆𑀦𑀲𑀤𑁆𑀥𑀸𑀧𑀲𑀸𑀤𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄. 𑀢𑀗𑁆𑀔𑀡𑀜𑁆𑀜𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀲𑀩𑁆𑀩𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. ‘‘𑀇𑀤𑀸𑀦𑀺𑀲𑁆𑀲 𑀦 𑀤𑀽𑀭𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀤𑁂𑀯𑀕𑀡𑀸 𑀩𑁆𑀭𑀳𑁆𑀫𑀕𑀡𑀸 𑀅𑀢𑀺𑀯𑀺𑀬 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁭.

‘‘𑀫𑀤𑁆𑀤𑀺𑀬𑀸 𑀤𑀻𑀬𑀫𑀸𑀦𑀸𑀬, 𑀕𑀕𑀦𑁂 𑀤𑁂𑀯𑀸 𑀧𑀫𑁄𑀤𑀺𑀢𑀸;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸’’𑀢𑀺.

𑀢𑀢𑁄 ¶ 𑀧𑀦 𑀤𑀻𑀬𑀫𑀸𑀦𑀸𑀬 𑀫𑀤𑁆𑀤𑀺𑀬𑀸 𑀤𑁂𑀯𑀺𑀬𑀸 𑀭𑀼𑀡𑁆𑀡𑀁 𑀯𑀸 𑀤𑀼𑀫𑁆𑀫𑀼𑀔𑀁 𑀯𑀸 𑀪𑀸𑀓𑀼𑀝𑀺𑀫𑀢𑁆𑀢𑀁 𑀯𑀸 𑀦𑀸𑀳𑁄𑀲𑀺, 𑀏𑀯𑀁 𑀘𑀲𑁆𑀲𑀸 𑀅𑀳𑁄𑀲𑀺 ‘‘𑀬𑀁 𑀤𑁂𑀯𑁄 𑀇𑀘𑁆𑀙𑀢𑀺, 𑀢𑀁 𑀓𑀭𑁄𑀢𑀽’’𑀢𑀺.

‘‘𑀓𑁄𑀫𑀸𑀭𑀻 ¶ 𑀬𑀲𑁆𑀲𑀸𑀳𑀁 𑀪𑀭𑀺𑀬𑀸, 𑀲𑀸𑀫𑀺𑀓𑁄 𑀫𑀫 𑀇𑀲𑁆𑀲𑀭𑁄;

𑀬𑀲𑁆𑀲𑀺𑀘𑁆𑀙𑁂 𑀢𑀲𑁆𑀲 𑀫𑀁 𑀤𑀚𑁆𑀚𑀸, 𑀯𑀺𑀓𑁆𑀓𑀺𑀡𑁂𑀬𑁆𑀬 𑀳𑀦𑁂𑀬𑁆𑀬 𑀯𑀸’’𑀢𑀺. (𑀚𑀸. 𑁨.𑁨𑁨.𑁨𑁨𑁮𑁨) 𑁋

𑀆𑀳.

𑀫𑀳𑀸𑀧𑀼𑀭𑀺𑀲𑁄𑀧𑀺 ‘‘𑀅𑀫𑁆𑀪𑁄, 𑀩𑁆𑀭𑀸𑀳𑁆𑀫𑀡, 𑀫𑀤𑁆𑀤𑀺𑀢𑁄 𑀫𑁂 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀧𑀺𑀬𑀢𑀭𑀁, 𑀇𑀤𑀁 𑀫𑁂 𑀤𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀅𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁮.

‘‘𑀚𑀸𑀮𑀺𑀁 𑀓𑀡𑁆𑀳𑀸𑀚𑀺𑀦𑀁 𑀥𑀻𑀢𑀁, 𑀫𑀤𑁆𑀤𑀺𑀤𑁂𑀯𑀺𑀁 𑀧𑀢𑀺𑀩𑁆𑀩𑀢𑀁;

𑀘𑀚𑀫𑀸𑀦𑁄 𑀦 𑀘𑀺𑀦𑁆𑀢𑁂𑀲𑀺𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁧𑁧𑁯.

𑀦 ¶ 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀫𑀤𑁆𑀤𑀺𑀤𑁂𑀯𑀻 𑀦 𑀤𑁂𑀲𑁆𑀲𑀺𑀬𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀧𑀺𑀬𑁂 𑀅𑀤𑀸𑀲𑀳’’𑀦𑁆𑀢𑀺.

𑀢𑀢𑁆𑀣 𑀘𑀚𑀫𑀸𑀦𑁄 𑀦 𑀘𑀺𑀦𑁆𑀢𑁂𑀲𑀺𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑁄 𑀲𑀦𑁆𑀢𑀸𑀧𑀯𑀲𑁂𑀦 𑀦 𑀘𑀺𑀦𑁆𑀢𑁂𑀲𑀺𑀁, 𑀯𑀺𑀲𑁆𑀲𑀝𑁆𑀞𑁄 𑀳𑀼𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀧𑀦𑀸𑀬𑀁 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂 𑀚𑀸𑀢𑀺𑀲𑀫𑁆𑀧𑀦𑁆𑀦𑁂 𑀔𑀢𑁆𑀢𑀺𑀬𑁂 𑀧𑀭𑀲𑁆𑀲 𑀤𑀸𑀲𑀪𑀸𑀯𑁂𑀦 𑀧𑀭𑀺𑀘𑁆𑀘𑀚𑀺, 𑀦 𑀳𑀺 𑀬𑁂𑀲𑀁 𑀓𑁂𑀲𑀜𑁆𑀘𑀺𑀧𑀺 𑀪𑀼𑀚𑀺𑀲𑁆𑀲𑀸𑀦𑀁 𑀅𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀁 𑀲𑀸𑀥𑀼𑀥𑀫𑁆𑀫𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀦𑀼𑀥𑀫𑁆𑀫𑀪𑀸𑀯𑀢𑁄. 𑀅𑀬𑀜𑁆𑀳𑀺 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀅𑀦𑀼𑀕𑀢𑀥𑀫𑁆𑀫𑀢𑀸, 𑀬𑀤𑀺𑀤𑀁 𑀲𑀩𑁆𑀩𑀲𑁆𑀲 𑀅𑀢𑁆𑀢𑀦𑀺𑀬𑀲𑁆𑀲 𑀫𑀫𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀼𑀦𑁄 𑀅𑀦𑀯𑀲𑁂𑀲𑀧𑀭𑀺𑀘𑁆𑀘𑀸𑀕𑁄, 𑀦 𑀳𑀺 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀭𑀳𑀺𑀢𑀁 𑀤𑀸𑀦𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀢𑀼𑀁 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀫𑀫𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀼𑀁 𑀬𑀸𑀘𑀦𑁆𑀢𑀲𑁆𑀲 𑀬𑀸𑀘𑀓𑀲𑁆𑀲 𑀦 𑀧𑀭𑀺𑀘𑁆𑀘𑀚𑀺𑀢𑀼𑀁 𑀬𑀼𑀢𑁆𑀢𑀁, 𑀧𑁄𑀭𑀸𑀡𑁄𑀧𑀺 𑀘𑀸𑀬𑀫𑀦𑀼𑀥𑀫𑁆𑀫𑁄. 𑀲𑀩𑁆𑀩𑁂𑀲𑀜𑁆𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀬𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀥𑀫𑁆𑀫𑁄 𑀓𑀼𑀮𑀯𑀁𑀲𑁄 𑀓𑀼𑀮𑀧𑁆𑀧𑀯𑁂𑀡𑀻, 𑀬𑀤𑀺𑀤𑀁 𑀲𑀩𑁆𑀩𑀲𑁆𑀲 𑀧𑀭𑀺𑀘𑁆𑀘𑀸𑀕𑁄. 𑀢𑀢𑁆𑀣 𑀘 𑀯𑀺𑀲𑁂𑀲𑀢𑁄 𑀧𑀺𑀬𑀢𑀭𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁄, 𑀦 𑀳𑀺 𑀓𑁂𑀘𑀺 𑀩𑁄𑀥𑀺𑀲𑀢𑁆𑀢𑀸 𑀯𑀁𑀲𑀸𑀦𑀼𑀕𑀢𑀁 𑀭𑀚𑁆𑀚𑀺𑀲𑁆𑀲𑀭𑀺𑀬𑀸𑀤𑀺𑀥𑀦𑀧𑀭𑀺𑀘𑁆𑀘𑀸𑀕𑀁, 𑀅𑀢𑁆𑀢𑀦𑁄 𑀲𑀻𑀲𑀦𑀬𑀦𑀸𑀤𑀺𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀁, 𑀧𑀺𑀬𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁, 𑀓𑀼𑀮𑀯𑀁𑀲𑀧𑀢𑀺𑀝𑁆𑀞𑀸𑀧𑀓𑀧𑀺𑀬𑀧𑀼𑀢𑁆𑀢𑀧𑀭𑀺𑀘𑁆𑀘𑀸𑀕𑀁, 𑀫𑀦𑀸𑀧𑀘𑀸𑀭𑀺𑀦𑀻𑀧𑀺𑀬𑀪𑀭𑀺𑀬𑀸𑀧𑀭𑀺𑀘𑁆𑀘𑀸𑀕𑀦𑁆𑀢𑀺 ¶ 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀩𑀼𑀤𑁆𑀥𑀸 𑀦𑀸𑀫 𑀪𑀽𑀢𑀧𑀼𑀩𑁆𑀩𑀸 𑀅𑀢𑁆𑀣𑀺. 𑀢𑀣𑀸 𑀳𑀺 𑀫𑀗𑁆𑀕𑀮𑁂 𑀪𑀕𑀯𑀢𑀺 𑀩𑁄𑀥𑀺𑀲𑀢𑁆𑀢𑀪𑀽𑀢𑁂 ¶ 𑀩𑁄𑀥𑀺𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁂 𑀘 𑀘𑀭𑀺𑀫𑀢𑁆𑀢𑀪𑀸𑀯𑀢𑁄 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀲𑀧𑀼𑀢𑁆𑀢𑀤𑀸𑀭𑁂 𑀏𑀓𑀲𑁆𑀫𑀺𑀁 𑀧𑀩𑁆𑀩𑀢𑁂 𑀯𑀲𑀦𑁆𑀢𑁂 𑀔𑀭𑀤𑀸𑀞𑀺𑀓𑁄 𑀦𑀸𑀫 𑀬𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑁆𑀯𑁂 𑀤𑀸𑀭𑀓𑁂 𑀬𑀸𑀘𑀺.

𑀫𑀳𑀸𑀲𑀢𑁆𑀢𑁄 ‘‘𑀤𑀤𑀸𑀫𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀓𑁂’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀓𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀦𑁆𑀢𑁄 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀅𑀤𑀸𑀲𑀺. 𑀬𑀓𑁆𑀔𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀫𑀳𑀸𑀲𑀢𑁆𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀼𑀴𑀸𑀮𑀓𑀮𑀸𑀧𑀁 𑀯𑀺𑀬 𑀤𑁆𑀯𑁂 𑀤𑀸𑀭𑀓𑁂 𑀔𑀸𑀤𑀺. 𑀅𑀕𑁆𑀕𑀺𑀚𑀸𑀮𑀁 𑀯𑀺𑀬 𑀮𑁄𑀳𑀺𑀢𑀥𑀸𑀭𑀁 𑀉𑀕𑁆𑀕𑀺𑀭𑀫𑀸𑀦𑀁 𑀬𑀓𑁆𑀔𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 ‘‘𑀯𑀜𑁆𑀘𑁂𑀲𑀺 𑀯𑀢 𑀫𑀁 𑀬𑀓𑁆𑀔𑁄’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀑𑀓𑀸𑀲𑀁 𑀅𑀤𑁂𑀦𑁆𑀢𑀲𑁆𑀲 𑀉𑀧𑀸𑀬𑀓𑁄𑀲𑀮𑁆𑀮𑀲𑁆𑀲 𑀲𑀼𑀪𑀸𑀯𑀺𑀢𑀢𑁆𑀢𑀸 𑀅𑀢𑀻𑀢𑀥𑀫𑁆𑀫𑀸𑀦𑀁 ¶ 𑀅𑀧𑁆𑀧𑀝𑀺𑀲𑀦𑁆𑀥𑀺𑀲𑀪𑀸𑀯𑀢𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀲𑀼𑀧𑀭𑀺𑀫𑀤𑁆𑀤𑀺𑀢𑀪𑀸𑀯𑀢𑁄 𑀘 𑀏𑀯𑀁 𑀇𑀢𑁆𑀢𑀭𑀝𑁆𑀞𑀺𑀢𑀺𑀓𑁂𑀦 𑀧𑀪𑀗𑁆𑀕𑀼𑀦𑀸 𑀅𑀲𑀸𑀭𑁂𑀦 𑀲𑀗𑁆𑀔𑀸𑀭𑀓𑀮𑀸𑀧𑁂𑀦 ‘‘𑀧𑀽𑀭𑀺𑀢𑀸 𑀯𑀢 𑀫𑁂 𑀤𑀸𑀦𑀧𑀸𑀭𑀫𑀻, 𑀫𑀳𑀦𑁆𑀢𑀁 𑀯𑀢 𑀫𑁂 𑀅𑀢𑁆𑀣𑀁 𑀲𑀸𑀥𑁂𑀢𑁆𑀯𑀸 𑀇𑀤𑀁 𑀅𑀥𑀺𑀕𑀢’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑀺. 𑀲𑁄 𑀇𑀤𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀢𑀲𑁆𑀫𑀺𑀁 𑀔𑀡𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 ‘‘𑀇𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀢𑀲𑁆𑀲 𑀢𑀁 𑀧𑀢𑁆𑀣𑀦𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀫𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀏𑀯𑀁 𑀅𑀜𑁆𑀜𑁂𑀧𑀺 𑀩𑁄𑀥𑀺𑀲𑀢𑁆𑀢𑀸 𑀅𑀢𑁆𑀢𑀦𑁄 𑀧𑀺𑀬𑀢𑀭𑀁 𑀧𑀼𑀢𑁆𑀢𑀤𑀸𑀭𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼.

𑀅𑀧𑀺 𑀘 𑀬𑀣𑀸 𑀦𑀸𑀫 𑀓𑁄𑀘𑀺 𑀧𑀼𑀭𑀺𑀲𑁄 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀕𑀸𑀫𑀁 𑀯𑀸 𑀚𑀦𑀧𑀤𑀁 𑀯𑀸 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀸 𑀧𑀫𑀸𑀤𑁂𑀦 𑀧𑀽𑀢𑀺𑀪𑀽𑀢𑀁 𑀥𑀦𑀁 𑀥𑀸𑀭𑁂𑀬𑁆𑀬, 𑀢𑀫𑁂𑀦𑀁 𑀲𑁄 𑀕𑀸𑀳𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 ‘‘𑀅𑀳𑀁 𑀔𑁄 𑀇𑀫𑀲𑁆𑀲 𑀭𑀜𑁆𑀜𑁄 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀥𑀸𑀭𑁂𑀫𑀺, 𑀢𑁂𑀦𑀸𑀳𑀁 𑀭𑀜𑁆𑀜𑀸 𑀩𑀦𑁆𑀥𑀦𑀸𑀕𑀸𑀭𑁂 𑀧𑀯𑁂𑀲𑀺𑀢𑁄, 𑀲𑀘𑀸𑀳𑀁 𑀇𑀥𑁂𑀯 𑀳𑁄𑀫𑀺, 𑀅𑀢𑁆𑀢𑀸𑀦𑀜𑁆𑀘 𑀚𑀻𑀬𑁂𑀬𑁆𑀬, 𑀧𑀼𑀢𑁆𑀢𑀤𑀸𑀭𑀓𑀫𑁆𑀫𑀓𑀭𑀧𑁄𑀭𑀺𑀲𑀸 𑀘 𑀫𑁂 𑀚𑀻𑀯𑀺𑀓𑀸𑀧𑀕𑀢𑀸 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑁂𑀬𑁆𑀬𑀼𑀁. 𑀬𑀁𑀦𑀽𑀦𑀸𑀳𑀁 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀸 𑀓𑀦𑀺𑀝𑁆𑀞𑀪𑀸𑀢𑀭𑀁 𑀯𑀸 𑀇𑀥 𑀞𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑁂𑀬𑁆𑀬𑀁 ¶ . 𑀏𑀯𑀸𑀳𑀁 𑀇𑀢𑁄 𑀩𑀦𑁆𑀥𑀦𑀢𑁄 𑀫𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀬𑀣𑀸𑀫𑀺𑀢𑁆𑀢𑀁 𑀬𑀣𑀸𑀲𑀦𑁆𑀤𑀺𑀝𑁆𑀞𑀁 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀤𑀢𑁆𑀯𑀸 𑀢𑀫𑁆𑀧𑀺 𑀩𑀦𑁆𑀥𑀦𑀢𑁄 𑀫𑁄𑀘𑁂𑀫𑀺, 𑀅𑀧𑁆𑀧𑀫𑀢𑁆𑀢𑁄𑀯 𑀳𑀼𑀢𑁆𑀯𑀸 𑀉𑀝𑁆𑀞𑀸𑀦𑀩𑀮𑁂𑀦 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀓𑀭𑁂𑀬𑁆𑀬. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀭𑀸𑀚𑀸 𑀯𑀺𑀬 𑀓𑀫𑁆𑀫𑀁, 𑀩𑀦𑁆𑀥𑀦𑀸𑀕𑀸𑀭𑁄 𑀯𑀺𑀬 𑀲𑀁𑀲𑀸𑀭𑁄, 𑀭𑀜𑁆𑀜𑀸 𑀩𑀦𑁆𑀥𑀦𑀸𑀕𑀸𑀭𑁂 𑀞𑀧𑀺𑀢𑀧𑀼𑀭𑀺𑀲𑁄 𑀯𑀺𑀬 𑀓𑀫𑁆𑀫𑀯𑀲𑁂𑀦 𑀲𑀁𑀲𑀸𑀭𑀘𑀸𑀭𑀓𑁂 𑀞𑀺𑀢𑁄 𑀫𑀳𑀸𑀧𑀼𑀭𑀺𑀲𑁄, 𑀢𑀲𑁆𑀲 𑀩𑀦𑁆𑀥𑀦𑀸𑀕𑀸𑀭𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀧𑀼𑀢𑁆𑀢𑀲𑁆𑀲 𑀯𑀸 𑀪𑀸𑀢𑀼𑀦𑁄 𑀯𑀸 𑀧𑀭𑀸𑀥𑀻𑀦𑀪𑀸𑀯𑀓𑀭𑀡𑁂𑀦 𑀢𑁂𑀲𑀁 𑀅𑀢𑁆𑀢𑀦𑁄 𑀘 𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁 ¶ 𑀯𑀺𑀬 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀤𑀺𑀓𑁂 𑀧𑀭𑁂𑀲𑀁 𑀤𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁, 𑀢𑀲𑁆𑀲 𑀯𑀺𑀕𑀢𑀤𑀼𑀓𑁆𑀔𑀲𑁆𑀲 𑀢𑁂𑀳𑀺 𑀲𑀤𑁆𑀥𑀺𑀁 𑀬𑀣𑀸𑀥𑀺𑀧𑁆𑀧𑁂𑀢𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀦𑀁 𑀯𑀺𑀬 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 ¶ 𑀅𑀧𑀕𑀢𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀩𑀼𑀤𑁆𑀥𑀪𑀸𑀯𑁂𑀦 𑀤𑀲𑀩𑀮𑀸𑀤𑀺𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑁆𑀧𑀢𑁆𑀢𑀺𑀲𑀫𑀦𑁆𑀦𑀸𑀕𑀫𑁄 𑀅𑀢𑁆𑀢𑀦𑁄 𑀯𑀘𑀦𑀓𑀸𑀭𑀓𑀸𑀦𑀁 𑀯𑀺𑀚𑁆𑀚𑀢𑁆𑀢𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀲𑀫𑀦𑁆𑀦𑀸𑀕𑀫𑁄 𑀘𑀸𑀢𑀺 𑀏𑀯𑀁 𑀅𑀦𑀯𑀚𑁆𑀚𑀲𑀪𑀸𑀯𑁄 𑀏𑀯 𑀫𑀳𑀸𑀧𑀼𑀭𑀺𑀲𑀸𑀦𑀁 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀦𑁂𑀲𑀁 𑀅𑀗𑁆𑀕𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂 𑀬𑀸 𑀘𑁄𑀤𑀦𑀸, 𑀲𑀸𑀧𑀺 𑀯𑀺𑀲𑁄𑀥𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀏𑀯𑀁 𑀧𑀦 𑀫𑀳𑀸𑀲𑀢𑁆𑀢𑁂𑀦 𑀫𑀤𑁆𑀤𑀺𑀤𑁂𑀯𑀺𑀬𑀸 𑀤𑀺𑀦𑁆𑀦𑀸𑀬 𑀲𑀓𑁆𑀓𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀳𑀼𑀢𑁆𑀯𑀸 𑁋

‘‘𑀲𑀩𑁆𑀩𑁂 𑀚𑀺𑀢𑀸 𑀢𑁂 𑀧𑀘𑁆𑀘𑀽𑀳𑀸, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀦𑀺𑀦𑁆𑀦𑀸𑀤𑀺𑀢𑀸 𑀢𑁂 𑀧𑀣𑀯𑀻, 𑀲𑀤𑁆𑀤𑁄 𑀢𑁂 𑀢𑀺𑀤𑀺𑀯𑀁 𑀕𑀢𑁄. (𑀚𑀸. 𑁨.𑁨𑁨.𑁨𑁨𑁮𑁩-𑁨𑁨𑁮𑁪);

‘‘𑀤𑀼𑀤𑁆𑀤𑀤𑀁 𑀤𑀤𑀫𑀸𑀦𑀸𑀦𑀁, 𑀤𑀼𑀓𑁆𑀓𑀭𑀁 𑀓𑀫𑁆𑀫 𑀓𑀼𑀩𑁆𑀩𑀢𑀁;

𑀅𑀲𑀦𑁆𑀢𑁄 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀲𑀢𑀁 𑀥𑀫𑁆𑀫𑁄 𑀤𑀼𑀭𑀦𑁆𑀦𑀬𑁄.

‘‘𑀢𑀲𑁆𑀫𑀸 𑀲𑀢𑀜𑁆𑀘 𑀅𑀲𑀢𑀁, 𑀦𑀸𑀦𑀸 𑀳𑁄𑀢𑀺 𑀇𑀢𑁄 𑀕𑀢𑀺;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀦𑀸’’𑀢𑀺. (𑀚𑀸. 𑁨.𑁨𑁨.𑁨𑁨𑁮𑁬-𑁨𑁨𑁮𑁭) 𑁋

𑀆𑀤𑀺𑀦𑀸 𑀦𑀬𑁂𑀦 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀸𑀦𑀼𑀫𑁄𑀤𑀦𑀯𑀲𑁂𑀦 𑀣𑀼𑀢𑀺𑀁 𑀅𑀓𑀸𑀲𑀺.

𑀢𑀢𑁆𑀣 𑀧𑀘𑁆𑀘𑀽𑀳𑀸𑀢𑀺 𑀧𑀘𑁆𑀘𑀢𑁆𑀣𑀺𑀓𑀸. 𑀤𑀺𑀩𑁆𑀩𑀸𑀢𑀺 𑀤𑀺𑀩𑁆𑀩𑀬𑀲𑀧𑀝𑀺𑀩𑀸𑀳𑀓𑀸. 𑀫𑀸𑀦𑀼𑀲𑀸𑀢𑀺 𑀫𑀦𑀼𑀲𑁆𑀲𑀬𑀲𑀧𑀝𑀺𑀩𑀸𑀳𑀓𑀸. 𑀓𑁂 𑀧𑀦 𑀢𑁂𑀢𑀺? 𑀫𑀘𑁆𑀙𑀭𑀺𑀬𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂 𑀧𑀼𑀢𑁆𑀢𑀤𑀸𑀭𑀁 𑀤𑁂𑀦𑁆𑀢𑁂𑀦 𑀫𑀳𑀸𑀲𑀢𑁆𑀢𑁂𑀦 𑀚𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀤𑁆𑀤𑀤𑀦𑁆𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀺𑀤𑀼𑀤𑁆𑀤𑀤𑀁 𑀤𑀤𑀫𑀸𑀦𑀸𑀦𑀁 ¶ 𑀢𑀫𑁂𑀯 𑀤𑀼𑀓𑁆𑀓𑀭𑀁 𑀓𑀼𑀩𑁆𑀩𑀢𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀓𑀫𑁆𑀫𑀁 𑀅𑀜𑁆𑀜𑁂 𑀲𑀸𑀯𑀓𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀧𑀕𑁂𑀯 𑀅𑀲𑀦𑁆𑀢𑁄 𑀫𑀘𑁆𑀙𑀭𑀺𑀦𑁄. 𑀢𑀲𑁆𑀫𑀸 𑀲𑀢𑀁 𑀥𑀫𑁆𑀫𑁄 𑀤𑀼𑀭𑀦𑁆𑀦𑀬𑁄 𑀲𑀸𑀥𑀽𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁄 𑀅𑀜𑁆𑀜𑁂𑀳𑀺 𑀤𑀼𑀭𑀦𑀼𑀕𑀫𑁄.

𑀏𑀯𑀁 𑀲𑀓𑁆𑀓𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀦𑀼𑀫𑁄𑀤𑀦𑀯𑀲𑁂𑀦 𑀣𑀼𑀢𑀺𑀁 𑀓𑀢𑁆𑀯𑀸 𑀫𑀤𑁆𑀤𑀺𑀤𑁂𑀯𑀺𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑁋

‘‘𑀤𑀤𑀸𑀫𑀺 ¶ 𑀪𑁄𑀢𑁄 𑀪𑀭𑀺𑀬𑀁, 𑀫𑀤𑁆𑀤𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀦𑀁;

𑀢𑁆𑀯𑀜𑁆𑀘𑁂𑀯 𑀫𑀤𑁆𑀤𑀺𑀬𑀸 𑀙𑀦𑁆𑀦𑁄, 𑀫𑀤𑁆𑀤𑀻 𑀘 𑀧𑀢𑀺𑀦𑁄 𑀢𑀯𑀸’’𑀢𑀺. (𑀚𑀸. 𑁨.𑁨𑁨.𑁨𑁨𑁮𑁯) 𑁋

𑀯𑀢𑁆𑀯𑀸 𑀢𑀁 𑀫𑀤𑁆𑀤𑀺𑀁 𑀧𑀝𑀺𑀤𑀢𑁆𑀯𑀸 𑀤𑀺𑀩𑁆𑀩𑀢𑁆𑀢𑀪𑀸𑀯𑁂𑀦 𑀚𑀮𑀦𑁆𑀢𑁄 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀆𑀓𑀸𑀲𑁂 𑀞𑀢𑁆𑀯𑀸 𑀅𑀢𑁆𑀢𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀲𑀓𑁆𑀓𑁄𑀳𑀫𑀲𑁆𑀫𑀺 ¶ 𑀤𑁂𑀯𑀺𑀦𑁆𑀤𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀯𑀭𑀁 𑀯𑀭𑀲𑁆𑀲𑀼 𑀭𑀸𑀚𑀺𑀲𑀺, 𑀯𑀭𑁂 𑀅𑀝𑁆𑀞 𑀤𑀤𑀸𑀫𑀺 𑀢𑁂’’𑀢𑀺. (𑀚𑀸. 𑁨.𑁨𑁨.𑁨𑁨𑁯𑁨) 𑁋

𑀯𑀢𑁆𑀯𑀸 𑀯𑀭𑁂𑀳𑀺 𑀦𑀺𑀫𑀦𑁆𑀢𑁂𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 ‘‘𑀧𑀺𑀢𑀸 𑀫𑀁 𑀧𑀼𑀦𑀤𑁂𑀯 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑀼, 𑀯𑀚𑁆𑀛𑀧𑁆𑀧𑀢𑁆𑀢𑀁 𑀯𑀥𑀢𑁄 𑀫𑁄𑀘𑁂𑀬𑁆𑀬𑀁, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀯𑀲𑁆𑀲𑀬𑁄 𑀪𑀯𑁂𑀬𑁆𑀬𑀁, 𑀧𑀭𑀤𑀸𑀭𑀁 𑀦 𑀕𑀘𑁆𑀙𑁂𑀬𑁆𑀬𑀁, 𑀇𑀢𑁆𑀣𑀻𑀦𑀁 𑀯𑀲𑀁 𑀦 𑀕𑀘𑁆𑀙𑁂𑀬𑁆𑀬𑀁, 𑀧𑀼𑀢𑁆𑀢𑁄 𑀫𑁂 𑀤𑀻𑀖𑀸𑀬𑀼𑀓𑁄 𑀲𑀺𑀬𑀸, 𑀅𑀦𑁆𑀦𑀧𑀸𑀦𑀸𑀤𑀺𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼𑀓𑁄 𑀲𑀺𑀬𑀸, 𑀢𑀜𑁆𑀘 𑀅𑀧𑀭𑀺𑀓𑁆𑀔𑀬𑀁 𑀧𑀲𑀦𑁆𑀦𑀘𑀺𑀢𑁆𑀢𑁄 𑀤𑀤𑁂𑀬𑁆𑀬𑀁, 𑀏𑀯𑀁 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀇𑀥𑀸𑀕𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀯𑀭𑁂 𑀬𑀸𑀘𑀺. 𑀲𑀓𑁆𑀓𑁄 ‘‘𑀦𑀘𑀺𑀭𑀲𑁆𑀲𑁂𑀯 𑀧𑀺𑀢𑀸 𑀲𑀜𑁆𑀚𑀬𑀫𑀳𑀸𑀭𑀸𑀚𑀸 𑀇𑀥𑁂𑀯 𑀆𑀕𑀦𑁆𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀢𑀺, 𑀇𑀢𑀭𑁄 𑀘 𑀲𑀩𑁆𑀩𑁄 𑀢𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀫𑀸 𑀘𑀺𑀦𑁆𑀢𑀬𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀘 𑀫𑀤𑁆𑀤𑀺𑀤𑁂𑀯𑀻 𑀘 𑀲𑀫𑁆𑀫𑁄𑀤𑀫𑀸𑀦𑀸 𑀲𑀓𑁆𑀓𑀤𑀢𑁆𑀢𑀺𑀬𑁂 𑀅𑀲𑁆𑀲𑀫𑁂 𑀯𑀲𑀺𑀁𑀲𑀼.

𑀚𑀽𑀚𑀓𑁂𑀧𑀺 𑀓𑀼𑀫𑀸𑀭𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑁂𑀯𑀢𑀸 𑀆𑀭𑀓𑁆𑀔𑀫𑀓𑀁𑀲𑀼. 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀸 𑀤𑁂𑀯𑀥𑀻𑀢𑀸 𑀭𑀢𑁆𑀢𑀺𑀪𑀸𑀕𑁂 𑀆𑀕𑀦𑁆𑀢𑁆𑀯𑀸 𑀫𑀤𑁆𑀤𑀺𑀯𑀡𑁆𑀡𑁂𑀦 𑀓𑀼𑀫𑀸𑀭𑁂 𑀧𑀝𑀺𑀚𑀕𑁆𑀕𑀺. 𑀲𑁄 𑀤𑁂𑀯𑀢𑀸𑀯𑀺𑀕𑁆𑀕𑀳𑀺𑀢𑁄 𑀳𑀼𑀢𑁆𑀯𑀸 ‘‘𑀓𑀮𑀺𑀗𑁆𑀕𑀭𑀝𑁆𑀞𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀟𑁆𑀠𑀫𑀸𑀲𑁂𑀦 𑀚𑁂𑀢𑀼𑀢𑁆𑀢𑀭𑀦𑀕𑀭𑀫𑁂𑀯 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀸 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀺𑀦𑁆𑀦𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀤𑀸𑀭𑀓𑁂 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 ¶ 𑀲𑀤𑁆𑀥𑀺𑀁 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀥𑀦𑀁 𑀤𑀢𑁆𑀯𑀸 𑀓𑀼𑀫𑀸𑀭𑁂 𑀓𑀺𑀡𑀺𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂 𑀓𑀢𑁆𑀯𑀸 𑀭𑀸𑀚𑀸 𑀤𑀸𑀭𑀓𑀁 𑀨𑀼𑀲𑁆𑀲𑀢𑀺𑀤𑁂𑀯𑀻 𑀤𑀸𑀭𑀺𑀓𑀁 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀸𑀚𑀧𑀼𑀢𑁆𑀢𑀺𑀬𑀸 𑀘 𑀧𑀯𑀢𑁆𑀢𑀺𑀁 𑀲𑀼𑀡𑀺𑀁𑀲𑀼.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀪𑀽𑀦𑀳𑀘𑁆𑀘𑀁 𑀯𑀢 𑀫𑀬𑀸 𑀓𑀢’’𑀦𑁆𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀢𑀸𑀯𑀤𑁂𑀯 𑀤𑁆𑀯𑀸𑀤𑀲𑀅𑀓𑁆𑀔𑁄𑀪𑀦𑀻𑀧𑀭𑀺𑀫𑀸𑀡𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀗𑁆𑀓𑀧𑀩𑁆𑀩𑀢𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺 𑀲𑀤𑁆𑀥𑀺𑀁 𑀨𑀼𑀲𑁆𑀲𑀢𑀺𑀤𑁂𑀯𑀺𑀬𑀸 𑀘𑁂𑀯 ¶ 𑀤𑀸𑀭𑀓𑁂𑀳𑀺 𑀘. 𑀅𑀦𑀼𑀓𑁆𑀓𑀫𑁂𑀦 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂𑀦 𑀘 𑀲𑀼𑀡𑀺𑀲𑀸𑀬 𑀘 𑀲𑀫𑀸𑀕𑀜𑁆𑀙𑀺. 𑀯𑁂𑀲𑁆𑀲𑀦𑁆𑀢𑀭𑁄 𑀧𑀺𑀬𑀧𑀼𑀢𑁆𑀢𑁂 𑀤𑀺𑀲𑁆𑀯𑀸 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺, 𑀢𑀣𑀸 𑀫𑀤𑁆𑀤𑀻 𑀫𑀸𑀢𑀸𑀧𑀺𑀢𑀭𑁄 𑀲𑀳𑀚𑀸𑀢𑀸 𑀲𑀝𑁆𑀞𑀺𑀲𑀳𑀲𑁆𑀲𑀸 𑀘 𑀅𑀫𑀘𑁆𑀘𑀸. 𑀢𑀁 𑀓𑀸𑀭𑀼𑀜𑁆𑀜𑀁 𑀧𑀲𑁆𑀲𑀦𑁆𑀢𑁂𑀲𑀼 𑀏𑀓𑁄𑀧𑀺 𑀲𑀓𑀪𑀸𑀯𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 ¶ 𑀦𑀸𑀲𑀓𑁆𑀔𑀺, 𑀲𑀓𑀮𑀁 𑀅𑀲𑁆𑀲𑀫𑀧𑀤𑀁 𑀬𑀼𑀕𑀦𑁆𑀥𑀭𑀯𑀸𑀢𑀧𑀫𑀤𑁆𑀤𑀺𑀢𑀁 𑀯𑀺𑀬 𑀲𑀸𑀮𑀯𑀦𑀁 𑀅𑀳𑁄𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑁂𑀲𑀁 𑀯𑀺𑀲𑀜𑁆𑀜𑀺𑀪𑀸𑀯𑀯𑀺𑀦𑁄𑀤𑀦𑀢𑁆𑀣𑀁 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀺, 𑀢𑁂𑀫𑁂𑀢𑀼𑀓𑀸𑀫𑀸 𑀢𑁂𑀫𑁂𑀦𑁆𑀢𑀺, 𑀧𑁄𑀓𑁆𑀔𑀭𑁂 𑀧𑀢𑀺𑀢𑀯𑀲𑁆𑀲𑀁 𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀤𑀓𑀁 𑀕𑀘𑁆𑀙𑀢𑀺. 𑀲𑀩𑁆𑀩𑁂 𑀲𑀜𑁆𑀜𑀁 𑀧𑀝𑀺𑀮𑀪𑀺𑀁𑀲𑀼. 𑀢𑀤𑀸𑀧𑀺 𑀧𑀣𑀯𑀺𑀓𑀫𑁆𑀧𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀅𑀘𑁆𑀙𑀭𑀺𑀬𑀸 𑀧𑀸𑀢𑀼𑀭𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨𑁦.

‘‘𑀧𑀼𑀦𑀸𑀧𑀭𑀁 𑀩𑁆𑀭𑀳𑀸𑀭𑀜𑁆𑀜𑁂, 𑀫𑀸𑀢𑀸𑀧𑀺𑀢𑀼𑀲𑀫𑀸𑀕𑀫𑁂;

𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁂, 𑀲𑀮𑁆𑀮𑀧𑀦𑁆𑀢𑁂 𑀲𑀼𑀔𑀁 𑀤𑀼𑀔𑀁.

𑁧𑁨𑁧.

‘‘𑀳𑀺𑀭𑁄𑀢𑁆𑀢𑀧𑁆𑀧𑁂𑀦 𑀕𑀭𑀼𑀦𑀸, 𑀉𑀪𑀺𑀦𑁆𑀦𑀁 𑀉𑀧𑀲𑀗𑁆𑀓𑀫𑀺;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸’’𑀢𑀺.

𑀢𑀢𑁆𑀣 𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁂𑀢𑀺 𑀫𑀸𑀢𑀸𑀧𑀺𑀢𑀭𑁄 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀁 𑀆𑀕𑀢𑀚𑀦𑁂 𑀓𑀭𑀼𑀡𑀁 𑀧𑀭𑀺𑀤𑁂𑀯𑀫𑀸𑀦𑁂. 𑀲𑀮𑁆𑀮𑀧𑀦𑁆𑀢𑁂 𑀲𑀼𑀔𑀁 𑀤𑀼𑀔𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀆𑀮𑀸𑀧𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑁂. 𑀳𑀺𑀭𑁄𑀢𑁆𑀢𑀧𑁆𑀧𑁂𑀦 𑀕𑀭𑀼𑀦𑀸 𑀉𑀪𑀺𑀦𑁆𑀦𑀦𑁆𑀢𑀺 𑀇𑀫𑁂 𑀲𑀺𑀯𑀻𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀤𑀽𑀲𑀓𑀁 𑀥𑀫𑁆𑀫𑁂 𑀞𑀺𑀢𑀁 𑀫𑀁 𑀧𑀩𑁆𑀩𑀸𑀚𑀬𑀺𑀁𑀲𑀽𑀢𑀺 𑀘𑀺𑀢𑁆𑀢𑀧𑁆𑀧𑀓𑁄𑀧𑀁 𑀅𑀓𑀢𑁆𑀯𑀸 𑀉𑀪𑁄𑀲𑀼 𑀏𑀢𑁂𑀲𑀼 𑀫𑀸𑀢𑀸𑀧𑀺𑀢𑀽𑀲𑀼 𑀥𑀫𑁆𑀫𑀕𑀸𑀭𑀯𑀲𑀫𑀼𑀲𑁆𑀲𑀺𑀢𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑁂𑀦𑁂𑀯 𑀬𑀣𑀸𑀭𑀽𑀧𑁂 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀫𑁂 𑀥𑀫𑁆𑀫𑀢𑁂𑀚𑁂𑀦 𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺.

𑀅𑀣 ¶ 𑀲𑀜𑁆𑀚𑀬𑀫𑀳𑀸𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀓𑁂𑀲𑀫𑀲𑁆𑀲𑀼𑀓𑀫𑁆𑀫𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀁 𑀤𑁂𑀯𑀭𑀸𑀚𑀸𑀦𑀫𑀺𑀯 𑀯𑀺𑀭𑁄𑀘𑀫𑀸𑀦𑀁 𑀲𑀳 𑀫𑀤𑁆𑀤𑀺𑀤𑁂𑀯𑀺𑀬𑀸 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀢𑀸𑀯𑀤𑁂𑀯 𑀘 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀤𑀲𑀅𑀓𑁆𑀔𑁄𑀪𑀦𑀻𑀧𑀭𑀺𑀫𑀸𑀡𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀘 𑀧𑀼𑀢𑁆𑀢𑀁 𑀧𑀭𑀺𑀯𑀸𑀭𑀬𑀺𑀢𑁆𑀯𑀸 𑀯𑀗𑁆𑀓𑀧𑀩𑁆𑀩𑀢𑀢𑁄 𑀬𑀸𑀯 𑀚𑁂𑀢𑀼𑀢𑁆𑀢𑀭𑀦𑀕𑀭𑀸 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀲𑀼𑀔𑁂𑀦𑁂𑀯 𑀦𑀕𑀭𑀁 𑀧𑀯𑁂𑀲𑁂𑀲𑀺. 𑀫𑀳𑀸𑀚𑀦𑁄 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀲𑀺. 𑀘𑁂𑀮𑀼𑀓𑁆𑀔𑁂𑀧𑀸𑀤𑀬𑁄 𑀧𑀯𑀢𑁆𑀢𑀺𑀁𑀲𑀼. 𑀦𑀕𑀭𑁂 𑀘 𑀦𑀦𑁆𑀤𑀺𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀅𑀦𑁆𑀢𑀫𑀲𑁄 𑀩𑀺𑀴𑀸𑀭𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂𑀲𑀁 𑀩𑀦𑁆𑀥𑀦𑁂 𑀞𑀺𑀢𑀸𑀦𑀁 𑀩𑀦𑁆𑀥𑀦𑀫𑁄𑀓𑁆𑀔𑁄 𑀅𑀳𑁄𑀲𑀺. 𑀲𑁄 𑀦𑀕𑀭𑀁 𑀧𑀯𑀺𑀝𑁆𑀞𑀤𑀺𑀯𑀲𑁂𑀬𑁂𑀯 𑀧𑀘𑁆𑀘𑀽𑀲𑀓𑀸𑀮𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁆𑀯𑁂 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀫𑀸𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀬𑀸𑀘𑀓𑀸 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑁂𑀲𑀸𑀳𑀁 𑀓𑀺𑀁 𑀤𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 ¶ 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ¶ 𑀢𑀸𑀯𑀤𑁂𑀯 𑀭𑀸𑀚𑀦𑀺𑀯𑁂𑀲𑀦𑀲𑁆𑀲 𑀧𑀼𑀭𑀺𑀫𑀯𑀢𑁆𑀣𑀼𑀁 𑀧𑀘𑁆𑀙𑀺𑀫𑀯𑀢𑁆𑀣𑀼𑀜𑁆𑀘 𑀓𑀝𑀺𑀧𑁆𑀧𑀫𑀸𑀡𑀁 𑀧𑀽𑀭𑁂𑀦𑁆𑀢𑁄 𑀖𑀦𑀫𑁂𑀖𑁄 𑀯𑀺𑀬 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀺. 𑀲𑀓𑀮𑀦𑀕𑀭𑁂 𑀚𑀡𑁆𑀡𑀼𑀧𑁆𑀧𑀫𑀸𑀡𑀁 𑀯𑀲𑁆𑀲𑀸𑀧𑁂𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁨𑁨.

‘‘𑀧𑀼𑀦𑀸𑀧𑀭𑀁 𑀩𑁆𑀭𑀳𑀸𑀭𑀜𑁆𑀜𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀜𑀸𑀢𑀺𑀪𑀺;

𑀧𑀯𑀺𑀲𑀸𑀫𑀺 𑀧𑀼𑀭𑀁 𑀭𑀫𑁆𑀫𑀁, 𑀚𑁂𑀢𑀼𑀢𑁆𑀢𑀭𑀁 𑀧𑀼𑀭𑀼𑀢𑁆𑀢𑀫𑀁.

𑁧𑁨𑁩.

‘‘𑀭𑀢𑀦𑀸𑀦𑀺 𑀲𑀢𑁆𑀢 𑀯𑀲𑁆𑀲𑀺𑀁𑀲𑀼, 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀣;

𑀢𑀤𑀸𑀧𑀺 𑀧𑀣𑀯𑀻 𑀓𑀫𑁆𑀧𑀺, 𑀲𑀺𑀦𑁂𑀭𑀼𑀯𑀦𑀯𑀝𑀁𑀲𑀓𑀸.

𑁧𑁨𑁪.

‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺.

𑀏𑀯𑀁 𑀲𑀢𑁆𑀢𑀭𑀢𑀦𑀯𑀲𑁆𑀲𑁂 𑀯𑀼𑀝𑁆𑀞𑁂 𑀧𑀼𑀦𑀤𑀺𑀯𑀲𑁂 𑀫𑀳𑀸𑀲𑀢𑁆𑀢𑁄 ‘‘𑀬𑁂𑀲𑀁 𑀓𑀼𑀮𑀸𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀯𑀢𑁆𑀣𑀽𑀲𑀼 𑀯𑀼𑀝𑁆𑀞𑀥𑀦𑀁, 𑀢𑁂𑀲𑀜𑁆𑀜𑁂𑀯 𑀳𑁄𑀢𑀽’’𑀢𑀺 𑀤𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀯𑀢𑁆𑀣𑀼𑀲𑁆𑀫𑀺𑀁 𑀥𑀦𑁂𑀦 𑀲𑀤𑁆𑀥𑀺𑀁 𑀓𑁄𑀝𑁆𑀞𑀸𑀕𑀸𑀭𑁂𑀲𑀼 𑀑𑀓𑀺𑀭𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀅𑀘𑁂𑀢𑀦𑀸𑀬𑀁 𑀧𑀣𑀯𑀻𑀢𑀺 𑀘𑁂𑀢𑀦𑀸𑀭𑀳𑀺𑀢𑀸 𑀅𑀬𑀁 𑀫𑀳𑀸𑀪𑀽𑀢𑀸 𑀧𑀣𑀯𑀻, 𑀤𑁂𑀯𑀢𑀸 𑀧𑀦 𑀘𑁂𑀢𑀦𑀸𑀲𑀳𑀺𑀢𑀸. 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀦𑁆𑀢𑀺 𑀅𑀘𑁂𑀢𑀦𑀢𑁆𑀢𑀸 𑀏𑀯 𑀲𑀼𑀔𑀁 𑀤𑀼𑀓𑁆𑀔𑀁 𑀅𑀚𑀸𑀦𑀺𑀢𑁆𑀯𑀸. 𑀲𑀢𑀺𑀧𑀺 𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀬𑀲𑀁𑀬𑁄𑀕𑁂 ¶ 𑀢𑀁 𑀦𑀸𑀦𑀼𑀪𑀯𑀦𑁆𑀢𑀻. 𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀦𑁆𑀢𑀺 𑀏𑀯𑀁𑀪𑀽𑀢𑀸𑀧𑀺 𑀲𑀸 𑀫𑀳𑀸𑀧𑀣𑀯𑀻 𑀫𑀫 𑀤𑀸𑀦𑀧𑀼𑀜𑁆𑀜𑀸𑀦𑀼𑀪𑀸𑀯𑀳𑁂𑀢𑀼. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸𑀢𑀺 𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀳𑀤𑀬𑀫𑀁𑀲𑀸𑀤𑀻𑀦𑀺𑀧𑀺 𑀬𑀸𑀘𑀓𑀸𑀦𑀁 𑀤𑀤𑁂𑀬𑁆𑀬𑀦𑁆𑀢𑀺 𑀤𑀸𑀦𑀚𑁆𑀛𑀸𑀲𑀬𑀼𑀧𑁆𑀧𑀸𑀤𑁂 𑀫𑀗𑁆𑀕𑀮𑀳𑀢𑁆𑀣𑀺𑀤𑀸𑀦𑁂 𑀧𑀩𑁆𑀩𑀸𑀚𑀦𑀓𑀸𑀮𑁂 𑀧𑀯𑀢𑁆𑀢𑀺𑀢𑀫𑀳𑀸𑀤𑀸𑀦𑁂 𑀧𑀼𑀢𑁆𑀢𑀤𑀸𑀦𑁂 𑀪𑀭𑀺𑀬𑀸𑀤𑀸𑀦𑁂 𑀯𑀗𑁆𑀓𑀧𑀩𑁆𑀩𑀢𑁂 𑀜𑀸𑀢𑀺𑀲𑀫𑀸𑀕𑀫𑁂 𑀦𑀕𑀭𑀁 𑀧𑀯𑀺𑀝𑁆𑀞𑀤𑀺𑀯𑀲𑁂 𑀭𑀢𑀦𑀯𑀲𑁆𑀲𑀓𑀸𑀮𑁂𑀢𑀺 𑀇𑀫𑁂𑀲𑀼 𑀞𑀸𑀦𑁂𑀲𑀼 𑀲𑀢𑁆𑀢𑀯𑀸𑀭𑀁 𑀅𑀓𑀫𑁆𑀧𑀺𑀢𑁆𑀣. 𑀏𑀯𑀁 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀦𑀸𑀤𑀺𑀅𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀳𑁂𑀢𑀼𑀪𑀽𑀢𑀸𑀦𑀺 𑀬𑀸𑀯𑀢𑀸𑀬𑀼𑀓𑀁 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀼𑀲𑀺𑀢𑀧𑀼𑀭𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀢𑁄 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸, 𑀤𑀸𑀦𑀁 𑀤𑀢𑁆𑀯𑀸𑀦 𑀔𑀢𑁆𑀢𑀺𑀬𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀣𑀸’’𑀢𑀺. (𑀚𑀸. 𑁨.𑁨𑁨.𑁨𑁪𑁪𑁦);

𑀢𑀤𑀸 𑀚𑀽𑀚𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀅𑀫𑀺𑀢𑁆𑀢𑀢𑀸𑀧𑀦𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 ¶ , 𑀘𑁂𑀢𑀧𑀼𑀢𑁆𑀢𑁄 𑀙𑀦𑁆𑀦𑁄, 𑀅𑀘𑁆𑀘𑀼𑀢𑀢𑀸𑀧𑀲𑁄 ¶ 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀫𑀤𑁆𑀤𑀻 𑀭𑀸𑀳𑀼𑀮𑀫𑀸𑀢𑀸, 𑀚𑀸𑀮𑀺𑀓𑀼𑀫𑀸𑀭𑁄 𑀭𑀸𑀳𑀼𑀮𑁄, 𑀓𑀡𑁆𑀳𑀸𑀚𑀺𑀦𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀫𑀳𑀸𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀫𑀸𑀢𑀼 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀤𑀸𑀢𑀼𑀓𑀸𑀫𑀢𑀸𑀤𑁄𑀳𑀴𑁄, 𑀢𑀣𑀸 𑀤𑀻𑀬𑀫𑀸𑀦𑁂𑀧𑀺 𑀥𑀦𑀲𑁆𑀲 𑀧𑀭𑀺𑀓𑁆𑀔𑀬𑀸𑀪𑀸𑀯𑁄, 𑀚𑀸𑀢𑀓𑁆𑀔𑀡𑁂 𑀏𑀯 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀅𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁, 𑀘𑀢𑀼𑀧𑀜𑁆𑀘𑀯𑀲𑁆𑀲𑀺𑀓𑀓𑀸𑀮𑁂 𑀅𑀢𑁆𑀢𑀦𑁄 𑀅𑀮𑀗𑁆𑀓𑀸𑀭𑀲𑁆𑀲 𑀥𑀸𑀢𑀻𑀦𑀁 𑀳𑀢𑁆𑀣𑀕𑀢𑀲𑁆𑀲 𑀧𑀼𑀦 𑀅𑀕𑁆𑀕𑀳𑁂𑀢𑀼𑀓𑀸𑀫𑀢𑀸, 𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀳𑀤𑀬𑀫𑀁𑀲𑀸𑀤𑀺𑀓𑀲𑁆𑀲 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑀲𑁆𑀲 𑀤𑀸𑀢𑀼𑀓𑀸𑀫𑀢𑀸𑀢𑀺 𑀏𑀯𑀫𑀸𑀤𑀺𑀓𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀦𑀸𑀤𑀺𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀳𑁂𑀢𑀼𑀪𑀽𑀢𑀸 𑀇𑀥 𑀫𑀳𑀸𑀧𑀼𑀭𑀺𑀲𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂, 𑀅𑀩𑁆𑀪𑀼𑀢𑀸 𑀘 𑀫𑀳𑁂𑀲𑀺𑀦𑁄…𑀧𑁂…;

𑀢𑁂𑀲𑀼 𑀘𑀺𑀢𑁆𑀢𑀧𑁆𑀧𑀲𑀸𑀤𑁄𑀧𑀺, 𑀤𑀼𑀓𑁆𑀔𑀢𑁄 𑀧𑀭𑀺𑀫𑁄𑀘𑀬𑁂;

𑀧𑀕𑁂𑀯𑀸𑀦𑀼𑀓𑀺𑀭𑀺𑀬𑀸 𑀢𑁂𑀲𑀁, 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀯𑁂𑀲𑁆𑀲𑀦𑁆𑀢𑀭𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁨𑁫-𑁬. 𑀤𑀲𑀫𑁂 ¶ 𑀬𑀤𑀸 𑀳𑁄𑀫𑀺, 𑀲𑀲𑀓𑁄𑀢𑀺 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀩𑁄𑀥𑀺𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀬𑀤𑀸 𑀲𑀲𑀧𑀡𑁆𑀟𑀺𑀢𑁄 𑀳𑁄𑀫𑀺. 𑀩𑁄𑀥𑀺𑀲𑀢𑁆𑀢𑀸 𑀳𑀺 𑀓𑀫𑁆𑀫𑀯𑀲𑀺𑀧𑁆𑀧𑀢𑁆𑀢𑀸𑀧𑀺 𑀢𑀸𑀤𑀺𑀲𑀸𑀦𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀧𑀯𑀦𑀘𑀸𑀭𑀓𑁄𑀢𑀺 𑀫𑀳𑀸𑀯𑀦𑀘𑀸𑀭𑀻. 𑀤𑀩𑁆𑀩𑀸𑀤𑀺𑀢𑀺𑀡𑀸𑀦𑀺 𑀭𑀼𑀓𑁆𑀔𑀕𑀘𑁆𑀙𑁂𑀲𑀼 𑀧𑀡𑁆𑀡𑀸𑀦𑀺 𑀬𑀁𑀓𑀺𑀜𑁆𑀘𑀺 𑀲𑀸𑀓𑀁 𑀭𑀼𑀓𑁆𑀔𑀢𑁄 𑀧𑀢𑀺𑀢𑀨𑀮𑀸𑀦𑀺 𑀘 𑀪𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀢𑀺𑀡𑀧𑀡𑁆𑀡𑀲𑀸𑀓𑀨𑀮𑀪𑀓𑁆𑀔𑁄. 𑀧𑀭𑀳𑁂𑀞𑀦𑀯𑀺𑀯𑀚𑁆𑀚𑀺𑀢𑁄𑀢𑀺 𑀧𑀭𑀧𑀻𑀴𑀸𑀯𑀺𑀭𑀳𑀺𑀢𑁄. 𑀲𑀼𑀢𑁆𑀢𑀧𑁄𑀢𑁄 𑀘𑀸𑀢𑀺 𑀉𑀤𑁆𑀤𑀧𑁄𑀢𑁄 𑀘. 𑀅𑀳𑀁 𑀢𑀤𑀸𑀢𑀺 𑀬𑀤𑀸𑀳𑀁 𑀲𑀲𑀓𑁄 𑀳𑁄𑀫𑀺, 𑀢𑀤𑀸 𑀏𑀢𑁂 𑀫𑀓𑁆𑀓𑀝𑀸𑀤𑀬𑁄 𑀢𑀬𑁄 𑀲𑀳𑀸𑀬𑁂 𑀑𑀯𑀤𑀸𑀫𑀺.

𑁧𑁨𑁭. 𑀓𑀺𑀭𑀺𑀬𑁂 𑀓𑀮𑁆𑀬𑀸𑀡𑀧𑀸𑀧𑀓𑁂𑀢𑀺 𑀓𑀼𑀲𑀮𑁂 𑀘𑁂𑀯 𑀅𑀓𑀼𑀲𑀮𑁂 𑀘 𑀓𑀫𑁆𑀫𑁂. 𑀧𑀸𑀧𑀸𑀦𑀻𑀢𑀺 𑀅𑀦𑀼𑀲𑀸𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀧𑀸𑀧𑀸𑀦𑀺 ¶ 𑀧𑀭𑀺𑀯𑀚𑁆𑀚𑁂𑀣𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑀸𑀦𑀺 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀣. 𑀓𑀮𑁆𑀬𑀸𑀡𑁂 𑀅𑀪𑀺𑀦𑀺𑀯𑀺𑀲𑁆𑀲𑀣𑀸𑀢𑀺 𑀤𑀸𑀦𑀁 𑀲𑀻𑀮𑀁…𑀧𑁂… 𑀤𑀺𑀝𑁆𑀞𑀼𑀚𑀼𑀓𑀫𑁆𑀫𑀦𑁆𑀢𑀺 𑀇𑀤𑀁 ¶ 𑀓𑀮𑁆𑀬𑀸𑀡𑀁, 𑀇𑀫𑀲𑁆𑀫𑀺𑀁 𑀓𑀮𑁆𑀬𑀸𑀡𑁂 𑀅𑀢𑁆𑀢𑀦𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀸𑀦𑀺 𑀅𑀪𑀺𑀫𑀼𑀔𑀪𑀸𑀯𑁂𑀦 𑀦𑀺𑀯𑀺𑀲𑁆𑀲𑀣, 𑀇𑀫𑀁 𑀓𑀮𑁆𑀬𑀸𑀡𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀣𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀜𑀸𑀡𑀲𑀫𑁆𑀧𑀦𑁆𑀦𑀢𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀕𑀢𑀸𑀦𑀁 𑀑𑀯𑀸𑀤𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀢𑀲𑁆𑀲 𑀑𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀯𑀲𑀦𑁆𑀢𑀺. 𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀆𑀓𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 𑀘𑀦𑁆𑀤𑀧𑀸𑀭𑀺𑀧𑀽𑀭𑀺𑀁 𑀤𑀺𑀲𑁆𑀯𑀸 ‘‘𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀑𑀯𑀤𑀺. 𑀢𑁂𑀦𑀸𑀳 𑁋

𑁧𑁨𑁮.

‘‘𑀉𑀧𑁄𑀲𑀣𑀫𑁆𑀳𑀺 𑀤𑀺𑀯𑀲𑁂, 𑀘𑀦𑁆𑀤𑀁 𑀤𑀺𑀲𑁆𑀯𑀸𑀦 𑀧𑀽𑀭𑀺𑀢𑀁;

𑀏𑀢𑁂𑀲𑀁 𑀢𑀢𑁆𑀣 𑀆𑀘𑀺𑀓𑁆𑀔𑀺𑀁, 𑀤𑀺𑀯𑀲𑁄 𑀅𑀚𑁆𑀚𑀼𑀧𑁄𑀲𑀣𑁄.

𑁧𑁨𑁯.

‘‘𑀤𑀸𑀦𑀸𑀦𑀺 𑀧𑀝𑀺𑀬𑀸𑀤𑁂𑀣, 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀤𑀸𑀢𑀯𑁂;

𑀤𑀢𑁆𑀯𑀸 𑀤𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑁂, 𑀉𑀧𑀯𑀲𑁆𑀲𑀣𑀼𑀧𑁄𑀲𑀣’’𑀦𑁆𑀢𑀺.

𑀢𑀢𑁆𑀣 𑀘𑀦𑁆𑀤𑀁 𑀤𑀺𑀲𑁆𑀯𑀸 𑀦 𑀧𑀽𑀭𑀺𑀢𑀦𑁆𑀢𑀺 𑀚𑀼𑀡𑁆𑀳𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀺𑀬𑀁 𑀈𑀲𑀓𑀁 𑀅𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀘𑀦𑁆𑀤𑀁 𑀦 𑀧𑀭𑀺𑀧𑀽𑀭𑀺𑀢𑀁 𑀤𑀺𑀲𑁆𑀯𑀸 𑀢𑀢𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀫𑁂𑀯 𑀉𑀧𑁄𑀲𑀣𑀫𑁆𑀳𑀺 𑀤𑀺𑀯𑀲𑁂 𑀧𑀦𑁆𑀦𑀭𑀲𑁂 𑀏𑀢𑁂𑀲𑀁 𑀫𑀓𑁆𑀓𑀝𑀸𑀤𑀻𑀦𑀁 𑀫𑀬𑁆𑀳𑀁 ¶ 𑀲𑀳𑀸𑀬𑀸𑀦𑀁 𑀤𑀺𑀯𑀲𑁄 𑀅𑀚𑁆𑀚𑀼𑀧𑁄𑀲𑀣𑁄. 𑀢𑀲𑁆𑀫𑀸 ‘‘𑀤𑀸𑀦𑀸𑀦𑀺 𑀧𑀝𑀺𑀬𑀸𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀉𑀧𑁄𑀲𑀣𑀤𑀺𑀯𑀲𑁂 𑀧𑀝𑀺𑀧𑀢𑁆𑀢𑀺𑀯𑀺𑀥𑀸𑀦𑀁 𑀆𑀘𑀺𑀓𑁆𑀔𑀺𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀤𑀸𑀦𑀸𑀦𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑁂. 𑀧𑀝𑀺𑀬𑀸𑀤𑁂𑀣𑀸𑀢𑀺 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀲𑀚𑁆𑀚𑁂𑀣. 𑀤𑀸𑀢𑀯𑁂𑀢𑀺 𑀤𑀸𑀢𑀼𑀁. 𑀉𑀧𑀯𑀲𑁆𑀲𑀣𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀣, 𑀉𑀧𑁄𑀲𑀣𑀲𑀻𑀮𑀸𑀦𑀺 𑀭𑀓𑁆𑀔𑀣, 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑀸𑀘𑀓𑁂 𑀲𑀫𑁆𑀧𑀢𑁆𑀢𑁂 𑀢𑀼𑀫𑁆𑀳𑁂𑀳𑀺 𑀔𑀸𑀤𑀺𑀢𑀩𑁆𑀩𑀸𑀳𑀸𑀭𑀢𑁄 𑀤𑀢𑁆𑀯𑀸 𑀔𑀸𑀤𑁂𑀬𑁆𑀬𑀸𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀢𑁂 ‘‘𑀲𑀸𑀥𑀽’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀢𑁂𑀲𑀼 𑀉𑀤𑁆𑀤𑀧𑁄𑀢𑁄 𑀧𑀸𑀢𑁄𑀯 ‘‘𑀕𑁄𑀘𑀭𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀻𑀢𑀻𑀭𑀁 𑀕𑀢𑁄. 𑀅𑀣𑁂𑀓𑁄 𑀩𑀸𑀴𑀺𑀲𑀺𑀓𑁄 𑀲𑀢𑁆𑀢 𑀭𑁄𑀳𑀺𑀢𑀫𑀘𑁆𑀙𑁂 𑀉𑀤𑁆𑀥𑀭𑀺𑀢𑁆𑀯𑀸 𑀯𑀮𑁆𑀮𑀺𑀬𑀸 𑀆𑀯𑀼𑀡𑀺𑀢𑁆𑀯𑀸 𑀦𑀤𑀻𑀢𑀻𑀭𑁂 𑀯𑀸𑀮𑀼𑀓𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁄 𑀦𑀤𑀺𑀬𑀸 𑀅𑀥𑁄 𑀲𑁄𑀢𑀁 ¶ 𑀪𑀲𑁆𑀲𑀺. 𑀉𑀤𑁆𑀤𑁄 𑀫𑀘𑁆𑀙𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀯𑀸𑀮𑀼𑀓𑀁 𑀯𑀺𑀬𑀽𑀳𑀺𑀢𑁆𑀯𑀸 𑀫𑀘𑁆𑀙𑁂 𑀤𑀺𑀲𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁂𑀲𑀁 𑀲𑀸𑀫𑀺𑀓𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀖𑁄𑀲𑁂𑀢𑁆𑀯𑀸 𑀲𑀸𑀫𑀺𑀓𑀁 𑀅𑀧𑀲𑁆𑀲𑀦𑁆𑀢𑁄 𑀯𑀮𑁆𑀮𑀺𑀬𑀁 𑀟𑀁𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 ‘‘𑀯𑁂𑀮𑀸𑀬𑀫𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀲𑀺𑀗𑁆𑀕𑀸𑀮𑁄𑀧𑀺 𑀕𑁄𑀘𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀏𑀓𑀲𑁆𑀲 𑀔𑁂𑀢𑁆𑀢𑀕𑁄𑀧𑀓𑀲𑁆𑀲 𑀓𑀼𑀝𑀺𑀬𑀁 𑀤𑁆𑀯𑁂 𑀫𑀁𑀲𑀲𑀽𑀮𑀸𑀦𑀺 𑀏𑀓𑀁 𑀕𑁄𑀥𑀁 𑀏𑀓𑀜𑁆𑀘 𑀤𑀥𑀺𑀯𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁂𑀲𑀁 𑀲𑀸𑀫𑀺𑀓𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 ¶ 𑀖𑁄𑀲𑁂𑀢𑁆𑀯𑀸 𑀲𑀸𑀫𑀺𑀓𑀁 𑀅𑀤𑀺𑀲𑁆𑀯𑀸 𑀤𑀥𑀺𑀯𑀸𑀭𑀓𑀲𑁆𑀲 𑀉𑀕𑁆𑀕𑀳𑀡𑀭𑀚𑁆𑀚𑀼𑀓𑀁 𑀕𑀻𑀯𑀸𑀬𑀁 𑀧𑀯𑁂𑀲𑁂𑀢𑁆𑀯𑀸 𑀫𑀁𑀲𑀲𑀽𑀮𑁂 𑀘 𑀕𑁄𑀥𑀜𑁆𑀘 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 ‘‘𑀯𑁂𑀮𑀸𑀬𑀫𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀫𑀓𑁆𑀓𑀝𑁄𑀧𑀺 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑁆𑀩𑀧𑀺𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 ‘‘𑀯𑁂𑀮𑀸𑀬𑀫𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀢𑀺𑀡𑁆𑀡𑀫𑁆𑀧𑀺 ‘‘𑀅𑀳𑁄 𑀇𑀥 𑀦𑀽𑀦 𑀬𑀸𑀘𑀓𑁄 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁩𑁦.

‘‘𑀢𑁂 𑀫𑁂 𑀲𑀸𑀥𑀽𑀢𑀺 𑀯𑀢𑁆𑀯𑀸𑀦, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁;

𑀤𑀸𑀦𑀸𑀦𑀺 𑀧𑀝𑀺𑀬𑀸𑀤𑁂𑀢𑁆𑀯𑀸, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀺𑀲𑀼’’𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀯𑁂𑀮𑀸𑀬𑀫𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀩𑁆𑀩𑀸𑀤𑀺𑀢𑀺𑀡𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂𑀬𑁂𑀯 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀬𑀸𑀘𑀓𑀸𑀦𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀺𑀮𑀢𑀡𑁆𑀟𑀼𑀮𑀸𑀤𑀬𑁄𑀧𑀺 𑀫𑀬𑁆𑀳𑀁 ¶ 𑀦𑀢𑁆𑀣𑀺, 𑀲𑀘𑁂 𑀫𑁂 𑀲𑀦𑁆𑀢𑀺𑀓𑀁 𑀬𑀸𑀘𑀓𑁄 𑀆𑀕𑀫𑀺𑀲𑁆𑀲𑀢𑀺, 𑀅𑀳𑀁 𑀢𑀺𑀡𑁂𑀦 𑀬𑀸𑀧𑁂𑀫𑀺, 𑀅𑀢𑁆𑀢𑀦𑁄 𑀲𑀭𑀻𑀭𑀫𑀁𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

𑁧𑁩𑁧.

‘‘𑀅𑀳𑀁 𑀦𑀺𑀲𑀚𑁆𑀚 𑀘𑀺𑀦𑁆𑀢𑁂𑀲𑀺𑀁, 𑀤𑀸𑀦𑀁 𑀤𑀓𑁆𑀔𑀺𑀡𑀦𑀼𑀘𑁆𑀙𑀯𑀁;

𑀬𑀤𑀺𑀳𑀁 𑀮𑀪𑁂 𑀤𑀓𑁆𑀔𑀺𑀡𑁂𑀬𑁆𑀬𑀁, 𑀓𑀺𑀁 𑀫𑁂 𑀤𑀸𑀦𑀁 𑀪𑀯𑀺𑀲𑁆𑀲𑀢𑀺.

𑁧𑁩𑁨.

‘‘𑀦 𑀫𑁂 𑀅𑀢𑁆𑀣𑀺 𑀢𑀺𑀮𑀸 𑀫𑀼𑀕𑁆𑀕𑀸, 𑀫𑀸𑀲𑀸 𑀯𑀸 𑀢𑀡𑁆𑀟𑀼𑀮𑀸 𑀖𑀢𑀁;

𑀅𑀳𑀁 𑀢𑀺𑀡𑁂𑀦 𑀬𑀸𑀧𑁂𑀫𑀺, 𑀦 𑀲𑀓𑁆𑀓𑀸 𑀢𑀺𑀡 𑀤𑀸𑀢𑀯𑁂.

𑁧𑁩𑁩.

‘‘𑀬𑀤𑀺 𑀓𑁄𑀘𑀺 𑀏𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀪𑀺𑀓𑁆𑀔𑀸𑀬 𑀫𑀫 𑀲𑀦𑁆𑀢𑀺𑀓𑁂;

𑀤𑀚𑁆𑀚𑀸𑀳𑀁 𑀲𑀓𑀫𑀢𑁆𑀢𑀸𑀦𑀁, 𑀦 𑀲𑁄 𑀢𑀼𑀘𑁆𑀙𑁄 𑀕𑀫𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀤𑀸𑀦𑀁 𑀤𑀓𑁆𑀔𑀺𑀡𑀦𑀼𑀘𑁆𑀙𑀯𑀦𑁆𑀢𑀺 𑀤𑀓𑁆𑀔𑀺𑀡𑀸𑀪𑀸𑀯𑁂𑀦 𑀅𑀦𑀼𑀘𑁆𑀙𑀯𑀺𑀓𑀁 𑀤𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀤𑀸𑀢𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑀁 𑀘𑀺𑀦𑁆𑀢𑁂𑀲𑀺𑀁. 𑀬𑀤𑀺𑀳𑀁 𑀮𑀪𑁂𑀢𑀺 𑀬𑀤𑀺 𑀅𑀳𑀁 𑀓𑀺𑀜𑁆𑀘𑀺 𑀤𑀓𑁆𑀔𑀺𑀡𑁂𑀬𑁆𑀬𑀁 𑀅𑀚𑁆𑀚 𑀮𑀪𑁂𑀬𑁆𑀬𑀁. 𑀓𑀺𑀁 𑀫𑁂 𑀤𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑀺𑀁 𑀫𑀫 𑀤𑀸𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺. 𑀦 𑀲𑀓𑁆𑀓𑀸 𑀢𑀺𑀡 𑀤𑀸𑀢𑀯𑁂𑀢𑀺 𑀬𑀤𑀺 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀤𑀸𑀢𑀼𑀁 𑀢𑀺𑀮𑀫𑀼𑀕𑁆𑀕𑀸𑀤𑀺𑀓𑀁 𑀫𑀬𑁆𑀳𑀁 𑀦𑀢𑁆𑀣𑀺, 𑀬𑀁 𑀧𑀦 𑀫𑀫 𑀆𑀳𑀸𑀭𑀪𑀽𑀢𑀁, 𑀢𑀁 𑀦 𑀲𑀓𑁆𑀓𑀸 𑀢𑀺𑀡𑀁 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀤𑀸𑀢𑀼𑀁. 𑀤𑀚𑁆𑀚𑀸𑀳𑀁 𑀲𑀓𑀫𑀢𑁆𑀢𑀸𑀦𑀦𑁆𑀢𑀺 𑀓𑀺𑀁 𑀯𑀸 𑀫𑀬𑁆𑀳𑀁 𑀏𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀘𑀺𑀦𑁆𑀢𑀸𑀬, 𑀦𑀦𑀼 𑀇𑀤𑀫𑁂𑀯 𑀫𑀬𑁆𑀳𑀁 𑀅𑀦𑀯𑀚𑁆𑀚𑀁 𑀅𑀧𑀭𑀸𑀥𑀻𑀦𑀢𑀸𑀬 𑀲𑀼𑀮𑀪𑀁 𑀧𑀭𑁂𑀲𑀜𑁆𑀘 𑀧𑀭𑀺𑀪𑁄𑀕𑀸𑀭𑀳𑀁 𑀲𑀭𑀻𑀭𑀁 𑀲𑀘𑁂 𑀓𑁄𑀘𑀺 𑀤𑀓𑁆𑀔𑀺𑀡𑁂𑀬𑁆𑀬𑁄 ¶ 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀺, 𑀢𑀬𑀺𑀤𑀁 𑀲𑀓𑀫𑀢𑁆𑀢𑀸𑀦𑀁 𑀢𑀲𑁆𑀲 𑀤𑀚𑁆𑀚𑀸𑀫𑀳𑀁. 𑀏𑀯𑀁 𑀲𑀦𑁆𑀢𑁂 𑀦 𑀲𑁄 𑀢𑀼𑀘𑁆𑀙𑁄 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄 𑀅𑀭𑀺𑀢𑁆𑀢𑀳𑀢𑁆𑀣𑁄 𑀳𑀼𑀢𑁆𑀯𑀸 𑀕𑀫𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀣𑀸𑀪𑀽𑀢𑀲𑀪𑀸𑀯𑀁 𑀧𑀭𑀺𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀸𑀦𑀼𑀪𑀸𑀯𑁂𑀦 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 ‘‘𑀲𑀲𑀭𑀸𑀚𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀉𑀤𑁆𑀤𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀅𑀝𑁆𑀞𑀸𑀲𑀺. 𑀢𑁂𑀦 ‘‘𑀓𑀺𑀫𑀢𑁆𑀣𑀁, 𑀩𑁆𑀭𑀸𑀳𑁆𑀫𑀡, 𑀞𑀺𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁂 𑀲𑀘𑁂 𑀓𑀜𑁆𑀘𑀺 𑀆𑀳𑀸𑀭𑀁 𑀮𑀪𑁂𑀬𑁆𑀬𑀁, 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁂𑀬𑁆𑀬𑀦𑁆𑀢𑀺. 𑀲𑁄 ‘‘𑀲𑀸𑀥𑀽𑀢𑀺 𑀢𑁂 𑀆𑀳𑀸𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀢𑁆𑀢 𑀫𑁂 𑀭𑁄𑀳𑀺𑀢𑀸 𑀫𑀘𑁆𑀙𑀸, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀸;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺. (𑀚𑀸. 𑁧.𑁪.𑁬𑁧);

𑀩𑁆𑀭𑀸𑀳𑁆𑀫𑀡𑁄 ¶ ‘‘𑀧𑀕𑁂𑀯 𑀢𑀸𑀯 𑀳𑁄𑀢𑀼, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀲𑀺𑀗𑁆𑀕𑀸𑀮𑀲𑁆𑀲 𑀫𑀓𑁆𑀓𑀝𑀲𑁆𑀲 𑀘 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺𑀧𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑁂𑀳𑀺 𑀤𑁂𑀬𑁆𑀬𑀥𑀫𑁆𑀫𑁂𑀳𑀺 𑀦𑀺𑀫𑀦𑁆𑀢𑀺𑀢𑁄 ‘‘𑀧𑀕𑁂𑀯 𑀢𑀸𑀯 𑀳𑁄𑀢𑀼, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀤𑀼𑀲𑁆𑀲 𑀫𑁂 𑀔𑁂𑀢𑁆𑀢𑀧𑀸𑀮𑀲𑁆𑀲, 𑀭𑀢𑁆𑀢𑀺𑀪𑀢𑁆𑀢𑀁 𑀅𑀧𑀸𑀪𑀢𑀁;

𑀫𑀁𑀲𑀲𑀽𑀮𑀸 𑀘 𑀤𑁆𑀯𑁂 𑀕𑁄𑀥𑀸, 𑀏𑀓𑀜𑁆𑀘 𑀤𑀥𑀺𑀯𑀸𑀭𑀓𑀁;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺.

‘‘𑀅𑀫𑁆𑀩𑀧𑀓𑁆𑀓𑀁 𑀤𑀓𑀁 𑀲𑀻𑀢𑀁, 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺. (𑀚𑀸. 𑁧.𑁪.𑁬𑁨-𑁬𑁩);

𑀢𑀢𑁆𑀣 𑀤𑀼𑀲𑁆𑀲𑀸𑀢𑀺 𑀅𑀫𑀼𑀲𑁆𑀲. 𑀭𑀢𑁆𑀢𑀺𑀪𑀢𑁆𑀢𑀁 𑀅𑀧𑀸𑀪𑀢𑀦𑁆𑀢𑀺 𑀭𑀢𑁆𑀢𑀺𑀪𑁄𑀚𑀦𑀢𑁄 𑀅𑀧𑀦𑀻𑀢𑀁. 𑀫𑀁𑀲𑀲𑀽𑀮𑀸 𑀘 𑀤𑁆𑀯𑁂 𑀕𑁄𑀥𑀸𑀢𑀺 𑀅𑀗𑁆𑀕𑀸𑀭𑀧𑀓𑁆𑀓𑀸𑀦𑀺 ¶ 𑀤𑁆𑀯𑁂 𑀫𑀁𑀲𑀲𑀽𑀮𑀸𑀦𑀺 𑀏𑀓𑀸 𑀘 𑀕𑁄𑀥𑀸. 𑀤𑀥𑀺𑀯𑀸𑀭𑀓𑀦𑁆𑀢𑀺 𑀤𑀥𑀺𑀯𑀸𑀭𑀓𑁄.

𑁧𑁩𑁪. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀲𑀲𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦𑀸𑀧𑀺 ‘‘𑀓𑀺𑀫𑀢𑁆𑀣𑀫𑀸𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀣𑁂𑀯𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸’’𑀢𑀺𑀆𑀤𑀺.

𑀢𑀢𑁆𑀣 ¶ 𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀭𑀺𑀯𑀺𑀢𑀓𑁆𑀓𑀁 𑀚𑀸𑀦𑀺𑀢𑁆𑀯𑀸. 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀺𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑀭𑀽𑀧𑀯𑀢𑀸 𑀅𑀢𑁆𑀢𑀪𑀸𑀯𑁂𑀦. 𑀆𑀲𑀬𑀦𑁆𑀢𑀺 𑀯𑀲𑀦𑀕𑀼𑀫𑁆𑀩𑀁.

𑁧𑁩𑁫-𑁭. 𑀲𑀦𑁆𑀢𑀼𑀝𑁆𑀞𑁄𑀢𑀺 𑀲𑀫𑀁 𑀲𑀩𑁆𑀩𑀪𑀸𑀕𑁂𑀦𑁂𑀯 𑀢𑀼𑀝𑁆𑀞𑁄. 𑀖𑀸𑀲𑀳𑁂𑀢𑀽𑀢𑀺 𑀆𑀳𑀸𑀭𑀳𑁂𑀢𑀼. 𑀅𑀤𑀺𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀅𑀩𑁄𑀥𑀺𑀲𑀢𑁆𑀢𑁂𑀳𑀺 𑀅𑀤𑀺𑀦𑁆𑀦𑀧𑀼𑀩𑁆𑀩𑀁. 𑀤𑀸𑀦𑀯𑀭𑀦𑁆𑀢𑀺 𑀉𑀢𑁆𑀢𑀫𑀤𑀸𑀦𑀁. ‘‘𑀅𑀚𑁆𑀚 𑀤𑀲𑁆𑀲𑀸𑀫𑀺 𑀢𑁂 𑀅𑀳’’𑀦𑁆𑀢𑀺 𑀯𑀢𑁆𑀯𑀸 𑀢𑀼𑀯𑀁 𑀲𑀻𑀮𑀕𑀼𑀡𑀽𑀧𑁂𑀢𑁄, 𑀅𑀬𑀼𑀢𑁆𑀢𑀁 𑀢𑁂 𑀧𑀭𑀳𑁂𑀞𑀦𑀦𑁆𑀢𑀺 𑀢𑀁 𑀧𑀸𑀡𑀸𑀢𑀺𑀧𑀸𑀢𑀢𑁄 𑀅𑀧𑀦𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀧𑀭𑀺𑀪𑁄𑀕𑀬𑁄𑀕𑁆𑀕𑀁 𑀅𑀢𑁆𑀢𑀸𑀦𑀁 𑀓𑀢𑁆𑀯𑀸 𑀤𑀸𑀢𑀼𑀁 ‘‘𑀏𑀳𑀺 𑀅𑀕𑁆𑀕𑀺𑀁 𑀧𑀤𑀻𑀧𑁂𑀳𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀳𑀁 𑀧𑀘𑀺𑀲𑁆𑀲𑀫𑀢𑁆𑀢𑀸𑀦𑀦𑁆𑀢𑀺 𑀢𑀬𑀸 𑀓𑀢𑁂 𑀅𑀗𑁆𑀕𑀸𑀭𑀕𑀩𑁆𑀪𑁂 𑀅𑀳𑀫𑁂𑀯 𑀧𑀢𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀘𑀺𑀲𑁆𑀲𑀁. 𑀧𑀓𑁆𑀓𑀁 𑀢𑁆𑀯𑀁 𑀪𑀓𑁆𑀔𑀬𑀺𑀲𑁆𑀲𑀲𑀻𑀢𑀺 𑀢𑀣𑀸 𑀧𑀦 𑀧𑀓𑁆𑀓𑀁 𑀢𑁆𑀯𑀁 𑀔𑀸𑀤𑀺𑀲𑁆𑀲𑀲𑀺.

𑁧𑁩𑁮-𑁯. 𑀦𑀸𑀦𑀸𑀓𑀝𑁆𑀞𑁂 ¶ 𑀲𑀫𑀸𑀦𑀬𑀻𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑀯𑁂𑀲𑀥𑀸𑀭𑀻 𑀲𑀓𑁆𑀓𑁄 𑀦𑀸𑀦𑀸𑀤𑀸𑀭𑀽𑀦𑀺 𑀲𑀫𑀸𑀦𑁂𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀫𑀳𑀦𑁆𑀢𑀁 𑀅𑀓𑀸𑀲𑀺 𑀘𑀺𑀢𑀓𑀁, 𑀓𑀢𑁆𑀯𑀸 𑀅𑀗𑁆𑀕𑀸𑀭𑀕𑀩𑁆𑀪𑀓𑀦𑁆𑀢𑀺 𑀯𑀻𑀢𑀘𑁆𑀘𑀺𑀓𑀁 𑀯𑀺𑀕𑀢𑀥𑀽𑀫𑀁 𑀅𑀗𑁆𑀕𑀸𑀭𑀪𑀭𑀺𑀢𑀩𑁆𑀪𑀦𑁆𑀢𑀭𑀁 𑀲𑀫𑀦𑁆𑀢𑀢𑁄 𑀚𑀮𑀫𑀸𑀦𑀁 𑀫𑀫 𑀲𑀭𑀻𑀭𑀲𑁆𑀲 𑀦𑀺𑀫𑀼𑀚𑁆𑀚𑀦𑀧𑁆𑀧𑀳𑁄𑀦𑀓𑀁 𑀢𑀗𑁆𑀔𑀡𑀜𑁆𑀜𑁂𑀯 𑀫𑀳𑀦𑁆𑀢𑀁 𑀘𑀺𑀢𑀓𑀁 𑀅𑀓𑀸𑀲𑀺, 𑀲𑀳𑀲𑀸 𑀇𑀤𑁆𑀥𑀺𑀬𑀸 𑀅𑀪𑀺𑀦𑀺𑀫𑁆𑀫𑀺𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀕𑁆𑀕𑀺𑀁 𑀢𑀢𑁆𑀣 𑀧𑀤𑀻𑀧𑁂𑀲𑀺, 𑀬𑀣𑀸 𑀲𑁄 𑀔𑀺𑀧𑁆𑀧𑀁 𑀫𑀳𑀸𑀪𑀯𑁂’’𑀢𑀺.

𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀻𑀖𑀁 𑀫𑀳𑀦𑁆𑀢𑁄 𑀬𑀣𑀸 𑀪𑀯𑁂𑀬𑁆𑀬, 𑀢𑀣𑀸 𑀧𑀤𑀻𑀧𑁂𑀲𑀺. 𑀨𑁄𑀝𑁂𑀢𑁆𑀯𑀸 𑀭𑀚𑀕𑀢𑁂 𑀕𑀢𑁆𑀢𑁂𑀢𑀺 ‘‘𑀲𑀘𑁂 𑀮𑁄𑀫𑀦𑁆𑀢𑀭𑁂𑀲𑀼 𑀧𑀸𑀡𑀓𑀸 𑀅𑀢𑁆𑀣𑀺, 𑀢𑁂 𑀫𑀸 𑀫𑀭𑀺𑀁𑀲𑀽’’𑀢𑀺 𑀧𑀁𑀲𑀼𑀕𑀢𑁂 𑀫𑀫 𑀕𑀢𑁆𑀢𑁂 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀥𑀼𑀦𑀺𑀢𑁆𑀯𑀸. 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀦𑁆𑀢𑀺 𑀦 𑀢𑀸𑀯 𑀓𑀝𑁆𑀞𑀸𑀦𑀺 𑀆𑀤𑀺𑀢𑁆𑀢𑀸𑀦𑀻𑀢𑀺 𑀢𑁂𑀲𑀁 𑀆𑀤𑀻𑀧𑀦𑀁 𑀉𑀤𑀺𑀓𑁆𑀔𑀦𑁆𑀢𑁄 𑀣𑁄𑀓𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁.

𑁧𑁪𑁦. 𑀬𑀤𑀸 𑀫𑀳𑀸𑀓𑀝𑁆𑀞𑀧𑀼𑀜𑁆𑀚𑁄, 𑀆𑀤𑀺𑀢𑁆𑀢𑁄 𑀥𑀫𑀥𑀫𑀸𑀬𑀢𑀻𑀢𑀺 𑀬𑀤𑀸 𑀧𑀦 𑀲𑁄 𑀤𑀸𑀭𑀼𑀭𑀸𑀲𑀺 𑀲𑀫𑀦𑁆𑀢𑀢𑁄 𑀆𑀤𑀺𑀢𑁆𑀢𑁄 𑀯𑀸𑀬𑀼𑀯𑁂𑀕𑀲𑀫𑀼𑀤𑁆𑀥𑀝𑀸𑀦𑀁 𑀚𑀸𑀮𑀲𑀺𑀔𑀸𑀦𑀁 𑀯𑀲𑁂𑀦 ‘‘𑀥𑀫𑀥𑀫𑀸’’𑀢𑀺 𑀏𑀯𑀁 𑀓𑀭𑁄𑀢𑀺. 𑀢𑀤𑀼𑀧𑁆𑀧𑀢𑀺𑀢𑁆𑀯𑀸 𑀧𑀢𑀢𑀺, 𑀫𑀚𑁆𑀛𑁂 𑀚𑀸𑀮𑀲𑀺𑀔𑀦𑁆𑀢𑀭𑁂𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀫𑀫 𑀲𑀭𑀻𑀭𑀲𑁆𑀲 𑀛𑀸𑀧𑀦𑀲𑀫𑀢𑁆𑀣𑁄 𑀅𑀬𑀁 𑀅𑀗𑁆𑀕𑀸𑀭𑀭𑀸𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀚𑀸𑀮𑀲𑀺𑀔𑀸𑀦𑀁 ¶ 𑀅𑀩𑁆𑀪𑀦𑁆𑀢𑀭𑀪𑀽𑀢𑁂 𑀢𑀲𑁆𑀲 𑀅𑀗𑁆𑀕𑀸𑀭𑀭𑀸𑀲𑀺𑀲𑁆𑀲 𑀫𑀚𑁆𑀛𑁂 𑀧𑀤𑀼𑀫𑀧𑀼𑀜𑁆𑀚𑁂 𑀭𑀸𑀚𑀳𑀁𑀲𑁄 𑀯𑀺𑀬 𑀧𑀫𑀼𑀤𑀺𑀢𑀘𑀺𑀢𑁆𑀢𑁄 𑀲𑀓𑀮𑀲𑀭𑀻𑀭𑀁 𑀤𑀸𑀦𑀫𑀼𑀔𑁂 𑀤𑀢𑁆𑀯𑀸 𑀧𑀢𑀢𑀺.

𑁧𑁪𑁧-𑁨. 𑀧𑀯𑀺𑀝𑁆𑀞𑀁 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀬𑀣𑀸 𑀖𑀫𑁆𑀫𑀓𑀸𑀮𑁂 𑀲𑀻𑀢𑀮𑀁 𑀉𑀤𑀓𑀁 𑀬𑁂𑀦 𑀓𑁂𑀦𑀘𑀺 𑀧𑀯𑀺𑀝𑁆𑀞𑀁 𑀢𑀲𑁆𑀲 ¶ 𑀤𑀭𑀣𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑀺, 𑀅𑀲𑁆𑀲𑀸𑀤𑀁 𑀧𑀻𑀢𑀺𑀜𑁆𑀘 𑀉𑀧𑁆𑀧𑀸𑀤𑁂𑀢𑀺. 𑀢𑀣𑁂𑀯 𑀚𑀮𑀺𑀢𑀁 𑀅𑀕𑁆𑀕𑀺𑀦𑁆𑀢𑀺 𑀏𑀯𑀁 𑀢𑀣𑀸 𑀧𑀚𑁆𑀚𑀮𑀺𑀢𑀁 𑀅𑀗𑁆𑀕𑀸𑀭𑀭𑀸𑀲𑀺 𑀢𑀤𑀸 𑀫𑀫 𑀧𑀯𑀺𑀝𑁆𑀞𑀲𑁆𑀲 𑀉𑀲𑀼𑀫𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀺. 𑀅𑀜𑁆𑀜𑀤𑀢𑁆𑀣𑀼 𑀤𑀸𑀦𑀧𑀻𑀢𑀺𑀬𑀸 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀫𑁄 𑀏𑀯 𑀅𑀳𑁄𑀲𑀺. 𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀙𑀯𑀺𑀘𑀫𑁆𑀫𑀸𑀤𑀺𑀓𑁄 𑀲𑀩𑁆𑀩𑁄 𑀲𑀭𑀻𑀭𑀸𑀯𑀬𑀯𑁄 𑀤𑀸𑀦𑀫𑀼𑀔𑁂 𑀚𑀼𑀳𑀺𑀢𑀩𑁆𑀩𑀢𑀁 𑀉𑀧𑀕𑀢𑁄 𑀅𑀪𑀺𑀧𑀢𑁆𑀣𑀺𑀢𑁄 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁪𑁩.

‘‘𑀙𑀯𑀺𑀁 𑀘𑀫𑁆𑀫𑀁 𑀫𑀁𑀲𑀁 𑀦𑁆𑀳𑀸𑀭𑀼𑀁, 𑀅𑀝𑁆𑀞𑀺𑀁 𑀳𑀤𑀬𑀩𑀦𑁆𑀥𑀦𑀁;

𑀓𑁂𑀯𑀮𑀁 𑀲𑀓𑀮𑀁 𑀓𑀸𑀬𑀁, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀳’’𑀦𑁆𑀢𑀺.

𑀢𑀢𑁆𑀣 𑀳𑀤𑀬𑀩𑀦𑁆𑀥𑀦𑀦𑁆𑀢𑀺 𑀳𑀤𑀬𑀫𑀁𑀲𑀧𑁂𑀲𑀺. 𑀢𑀜𑁆𑀳𑀺 𑀳𑀤𑀬𑀯𑀢𑁆𑀣𑀼𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀞𑀺𑀢𑀢𑁆𑀢𑀸 ‘‘𑀳𑀤𑀬𑀩𑀦𑁆𑀥𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀳𑀤𑀬𑀩𑀦𑁆𑀥𑀦𑀦𑁆𑀢𑀺 𑀳𑀤𑀬𑀜𑁆𑀘 𑀩𑀦𑁆𑀥𑀦𑀜𑁆𑀘, 𑀳𑀤𑀬𑀫𑀁𑀲𑀜𑁆𑀘𑁂𑀯 ¶ 𑀢𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀞𑀺𑀢𑀬𑀓𑀦𑀫𑀁𑀲𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀲𑀓𑀮𑀁 𑀓𑀸𑀬𑀦𑁆𑀢𑀺 𑀅𑀦𑀯𑀲𑁂𑀲𑀁 𑀲𑀩𑁆𑀩𑀁 𑀲𑀭𑀻𑀭𑀁.

𑀏𑀯𑀁 𑀢𑀲𑁆𑀫𑀺𑀁 𑀅𑀕𑁆𑀕𑀺𑀫𑁆𑀳𑀺 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀡𑁆𑀳𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄𑀧𑀺 𑀳𑀺𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀭𑀽𑀧𑀥𑀭𑀁 𑀲𑀓𑁆𑀓𑀁 𑀏𑀯𑀫𑀸𑀳 𑁋 ‘‘𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀓𑀢𑁄 𑀅𑀕𑁆𑀕𑀺 𑀅𑀢𑀺𑀲𑀻𑀢𑀮𑁄, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺? 𑀧𑀡𑁆𑀟𑀺𑀢, 𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑁄, 𑀲𑀓𑁆𑀓𑁄𑀳𑀫𑀲𑁆𑀫𑀺, 𑀢𑀯 𑀯𑀻𑀫𑀁𑀲𑀦𑀢𑁆𑀣𑀁 𑀆𑀕𑀢𑁄 𑀏𑀯𑀫𑀓𑀸𑀲𑀺𑀦𑁆𑀢𑀺. ‘‘𑀲𑀓𑁆𑀓, 𑀢𑁆𑀯𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀲𑀓𑀮𑁄𑀧𑀺 𑀘𑁂 𑀮𑁄𑀓𑁄 𑀫𑀁 𑀤𑀸𑀦𑁂𑀦 𑀯𑀻𑀫𑀁𑀲𑁂𑀬𑁆𑀬, 𑀦𑁂𑀯 𑀫𑁂 𑀅𑀤𑀸𑀢𑀼𑀓𑀸𑀫𑀢𑀁 𑀓𑀣𑀜𑁆𑀘𑀺𑀧𑀺 𑀉𑀧𑁆𑀧𑀸𑀤𑁂𑀬𑁆𑀬 𑀧𑀲𑁆𑀲𑁂𑀣 𑀦’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺.

𑀅𑀣 𑀦𑀁 𑀲𑀓𑁆𑀓𑁄 ‘‘𑀲𑀲𑀧𑀡𑁆𑀟𑀺𑀢, 𑀢𑀯 𑀕𑀼𑀡𑀸 𑀲𑀓𑀮𑀓𑀧𑁆𑀧𑀫𑁆𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀽’’𑀢𑀺 𑀧𑀩𑁆𑀩𑀢𑀁 𑀧𑀻𑀴𑁂𑀢𑁆𑀯𑀸 𑀧𑀩𑁆𑀩𑀢𑀭𑀲𑀁 𑀆𑀤𑀸𑀬 𑀘𑀦𑁆𑀤𑀫𑀡𑁆𑀟𑀮𑁂 𑀲𑀲𑀮𑀓𑁆𑀔𑀡𑀁 𑀆𑀮𑀺𑀔𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀢𑀲𑁆𑀫𑀺𑀁 ¶ 𑀯𑀦𑀲𑀡𑁆𑀟𑁂 𑀢𑀢𑁆𑀣𑁂𑀯 𑀯𑀦𑀕𑀼𑀫𑁆𑀩𑁂 𑀢𑀭𑀼𑀡𑀤𑀩𑁆𑀩𑀢𑀺𑀡𑀧𑀻𑀞𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀧𑀡𑁆𑀟𑀺𑀢𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀦𑀺𑀘𑁆𑀘𑀲𑀻𑀮𑀁 𑀉𑀧𑁄𑀲𑀣𑀲𑀻𑀮𑀜𑁆𑀘 𑀧𑀽𑀭𑁂𑀢𑁆𑀯𑀸 𑀬𑀣𑀸𑀭𑀳𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀢𑀤𑀸 𑀉𑀤𑁆𑀤𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀺𑀗𑁆𑀕𑀸𑀮𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀫𑀓𑁆𑀓𑀝𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀲𑀧𑀡𑁆𑀟𑀺𑀢𑁄 𑀧𑀦 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀲𑀻𑀮𑀸𑀤𑀺𑀧𑀸𑀭𑀫𑀺𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀲𑀢𑀺𑀧𑀺 𑀢𑀺𑀭𑀘𑁆𑀙𑀸𑀦𑀼𑀧𑀧𑀢𑁆𑀢𑀺𑀬𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀓𑀼𑀲𑀮𑀸𑀤𑀺𑀢𑁄 𑀬𑀣𑀸𑀪𑀽𑀢𑀸𑀯𑀩𑁄𑀥𑁄, 𑀢𑁂𑀲𑀼 𑀅𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀪𑀬𑀢𑁄 𑀤𑀺𑀲𑁆𑀯𑀸 ¶ 𑀲𑀼𑀝𑁆𑀞𑀼 𑀅𑀓𑀼𑀲𑀮𑀢𑁄 𑀑𑀭𑀫𑀡𑀁, 𑀲𑀫𑁆𑀫𑀤𑁂𑀯 𑀘 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀧𑀦𑀁, 𑀧𑀭𑁂𑀲𑀜𑁆𑀘 ‘‘𑀇𑀫𑁂 𑀦𑀸𑀫 𑀧𑀸𑀧𑀥𑀫𑁆𑀫𑀸 𑀢𑁂 𑀏𑀯𑀁 𑀕𑀳𑀺𑀢𑀸 𑀏𑀯𑀁 𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀯𑀺𑀭𑀫𑀡𑁂 𑀦𑀺𑀬𑁄𑀚𑀦𑀁, 𑀇𑀤𑀁 𑀤𑀸𑀦𑀁 𑀦𑀸𑀫, 𑀇𑀤𑀁 𑀲𑀻𑀮𑀁 𑀦𑀸𑀫, 𑀇𑀤𑀁 𑀉𑀧𑁄𑀲𑀣𑀓𑀫𑁆𑀫𑀁 𑀦𑀸𑀫, 𑀏𑀢𑁆𑀣 𑀧𑀢𑀺𑀝𑁆𑀞𑀺𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀳𑀢𑁆𑀣𑀕𑀢𑀸 𑀏𑀯𑀸𑀢𑀺𑀆𑀤𑀺𑀦𑀸 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑀦𑀁, 𑀅𑀢𑁆𑀢𑀦𑁄 𑀲𑀭𑀻𑀭𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀁, 𑀧𑀭𑁂𑀲𑀁 𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑀁, 𑀉𑀴𑀸𑀭𑁄 𑀘 𑀤𑀸𑀦𑀚𑁆𑀛𑀸𑀲𑀬𑁄𑀢𑀺 𑀏𑀯𑀫𑀸𑀤𑀬𑁄 𑀇𑀥 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋 ‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂…𑀧𑁂… 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 ¶ ‘‘𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁂 𑀤𑀲𑀧𑀺 𑀘𑀭𑀺𑀬𑀸𑀯𑀺𑀲𑁂𑀲𑁂 𑀉𑀤𑀸𑀦𑁂𑀢𑁆𑀯𑀸 𑀦𑀺𑀕𑀫𑁂𑀢𑀺. 𑀢𑀢𑁆𑀣 𑀅𑀳𑀫𑁂𑀯 𑀢𑀤𑀸 𑀆𑀲𑀺𑀁, 𑀬𑁄 𑀢𑁂 𑀤𑀸𑀦𑀯𑀭𑁂 𑀅𑀤𑀸𑀢𑀺 𑀬𑁄 𑀢𑀸𑀦𑀺 𑀉𑀢𑁆𑀢𑀫𑀤𑀸𑀦𑀸𑀦𑀺 𑀅𑀤𑀸𑀲𑀺, 𑀲𑁄 𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑀡𑀸𑀤𑀺𑀓𑁄 𑀅𑀳𑀫𑁂𑀯 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀳𑁄𑀲𑀺𑀁, 𑀦 𑀅𑀜𑁆𑀜𑁄𑀢𑀺. 𑀇𑀢𑀺 𑀢𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀲𑀢𑀺𑀧𑀺 𑀲𑀻𑀮𑀸𑀤𑀺𑀧𑀸𑀭𑀫𑀻𑀦𑀁 𑀬𑀣𑀸𑀭𑀳𑀁 𑀧𑀽𑀭𑀺𑀢𑀪𑀸𑀯𑁂 𑀅𑀢𑁆𑀢𑀦𑁄 𑀧𑀦 𑀢𑀤𑀸 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀅𑀢𑀺𑀯𑀺𑀬 𑀉𑀴𑀸𑀭𑀪𑀸𑀯𑀁 𑀲𑀦𑁆𑀥𑀸𑀬 𑀤𑀸𑀦𑀧𑀸𑀭𑀫𑀺𑀯𑀲𑁂𑀦𑁂𑀯 𑀤𑁂𑀲𑀦𑀁 𑀆𑀭𑁄𑀧𑁂𑀲𑀺. 𑀏𑀢𑁂 𑀤𑀸𑀦𑀧𑀭𑀺𑀓𑁆𑀔𑀸𑀭𑀸, 𑀏𑀢𑁂 𑀤𑀸𑀦𑀲𑁆𑀲 𑀧𑀸𑀭𑀫𑀻𑀢𑀺 𑀬𑁂 𑀇𑀫𑁂 ¶ 𑀅𑀓𑀺𑀢𑁆𑀢𑀺𑀚𑀸𑀢𑀓𑀸𑀤𑀻𑀲𑀼 (𑀚𑀸. 𑁧.𑁧𑁩.𑁮𑁩 𑀆𑀤𑀬𑁄) 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀸 𑀫𑀬𑀸 𑀧𑀯𑀢𑁆𑀢𑀺𑀢𑀸 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀸 𑀫𑀫 𑀲𑀭𑀻𑀭𑀸𑀯𑀬𑀯𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀸 𑀧𑀭𑀫𑀓𑁄𑀝𑀺𑀓𑀸, 𑀓𑀺𑀜𑁆𑀘𑀸𑀧𑀺 𑀢𑁂 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸 𑀤𑀸𑀦𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀕𑀫𑀦𑁂𑀦 𑀤𑀸𑀦𑀧𑀸𑀭𑀫𑀻 𑀏𑀯, 𑀢𑀣𑀸𑀧𑀺 𑀫𑀫 𑀤𑀸𑀦𑀲𑁆𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀪𑀽𑀢𑀲𑁆𑀲 𑀧𑀭𑀺𑀓𑁆𑀔𑀭𑀡𑀢𑁄𑀲𑀦𑁆𑀢𑀸𑀦𑀲𑁆𑀲 𑀧𑀭𑀺𑀪𑀸𑀯𑀦𑀸𑀯𑀲𑁂𑀦 𑀅𑀪𑀺𑀲𑀗𑁆𑀔𑀭𑀡𑀢𑁄 𑀏𑀢𑁂 𑀤𑀸𑀦𑀧𑀭𑀺𑀓𑁆𑀔𑀸𑀭𑀸 𑀦𑀸𑀫. 𑀬𑀲𑁆𑀲 𑀧𑀦𑁂𑀢𑁂 𑀧𑀭𑀺𑀓𑁆𑀔𑀸𑀭𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀻𑀯𑀺𑀢𑀁 𑀬𑀸𑀘𑀓𑁂 𑀤𑀢𑁆𑀯𑀸, 𑀇𑀫𑀁 𑀧𑀸𑀭𑀫𑀺 𑀧𑀽𑀭𑀬𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀞𑀧𑁂𑀢𑁆𑀯𑀸 𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑀁 𑀲𑁂𑀲𑀸𑀲𑀼 𑀦𑀯𑀲𑀼 𑀘𑀭𑀺𑀬𑀸𑀲𑀼 𑀬𑀣𑀸𑀭𑀳𑀁 𑀤𑀸𑀦𑀧𑀸𑀭𑀫𑀺𑀤𑀸𑀦𑀉𑀧𑀧𑀸𑀭𑀫𑀺𑀬𑁄 𑀯𑁂𑀤𑀺𑀢𑀩𑁆𑀩𑀸, 𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑁂 (𑀘𑀭𑀺𑀬𑀸. 𑁧.𑁧𑁨𑁫 𑀆𑀤𑀬𑁄) 𑀧𑀦 𑀤𑀸𑀦𑀧𑀭𑀫𑀢𑁆𑀣𑀧𑀸𑀭𑀫𑀻. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀪𑀺𑀓𑁆𑀔𑀸𑀬 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀲𑀓𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀁;

𑀤𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀤𑀸𑀦𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁧.𑀢𑀲𑁆𑀲𑀼𑀤𑁆𑀤𑀸𑀦);

𑀓𑀺𑀜𑁆𑀘𑀸𑀧𑀺 𑀳𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀣𑀸𑀯𑀼𑀢𑁆𑀢𑁂 𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑁆𑀫𑀡𑀸𑀤𑀺𑀓𑀸𑀮𑁂 𑀅𑀜𑁆𑀜𑀲𑁆𑀫𑀺𑀜𑁆𑀘 𑀫𑀳𑀸𑀚𑀦𑀓𑀫𑀳𑀸𑀲𑀼𑀢𑀲𑁄𑀫𑀸𑀤𑀺𑀓𑀸𑀮𑁂 ¶ 𑀤𑀸𑀦𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀢𑀣𑀸𑀧𑀺 𑀏𑀓𑀦𑁆𑀢𑁂𑀦𑁂𑀯 𑀲𑀲𑀧𑀡𑁆𑀟𑀺𑀢𑀓𑀸𑀮𑁂 𑀤𑀸𑀦𑀧𑀸𑀭𑀫𑀺𑀬𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀪𑀸𑀯𑁄 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺.

𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀘𑀭𑀺𑀬𑀸𑀧𑀺𑀝𑀓𑀲𑀁𑀯𑀡𑁆𑀡𑀦𑀸𑀬

𑀤𑀲𑀯𑀺𑀥𑀘𑀭𑀺𑀬𑀸𑀲𑀗𑁆𑀕𑀳𑀲𑁆𑀲 𑀯𑀺𑀲𑁂𑀲𑀢𑁄

𑀤𑀸𑀦𑀧𑀸𑀭𑀫𑀺𑀯𑀺𑀪𑀸𑀯𑀦𑀲𑁆𑀲

𑀧𑀞𑀫𑀯𑀕𑁆𑀕𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀳𑀢𑁆𑀣𑀺𑀦𑀸𑀕𑀯𑀕𑁆𑀕𑁄

𑁧. 𑀫𑀸𑀢𑀼𑀧𑁄𑀲𑀓𑀘𑀭𑀺𑀬𑀸𑀯𑀡𑁆𑀡𑀦𑀸

𑁧. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 ¶ ¶ ¶ 𑀧𑀞𑀫𑁂 𑀓𑀼𑀜𑁆𑀚𑀭𑁄𑀢𑀺 𑀳𑀢𑁆𑀣𑀻. 𑀫𑀸𑀢𑀼𑀧𑁄𑀲𑀓𑁄𑀢𑀺 𑀅𑀦𑁆𑀥𑀸𑀬 𑀚𑀭𑀸𑀚𑀺𑀡𑁆𑀡𑀸𑀬 𑀫𑀸𑀢𑀼𑀬𑀸 𑀧𑀝𑀺𑀚𑀕𑁆𑀕𑀦𑀓𑁄. 𑀫𑀳𑀺𑀬𑀸𑀢𑀺 𑀪𑀽𑀫𑀺𑀬𑀁. 𑀕𑀼𑀡𑁂𑀦𑀸𑀢𑀺 𑀲𑀻𑀮𑀕𑀼𑀡𑁂𑀦, 𑀢𑀤𑀸 𑀫𑀫 𑀲𑀤𑀺𑀲𑁄 𑀦𑀢𑁆𑀣𑀺.

𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀤𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀲𑀩𑁆𑀩𑀲𑁂𑀢𑁄 𑀅𑀪𑀺𑀭𑀽𑀧𑁄 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀫𑀳𑀸𑀳𑀢𑁆𑀣𑀻 𑀅𑀦𑁂𑀓𑀳𑀢𑁆𑀣𑀺𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀫𑀸𑀢𑀸 𑀧𑀦𑀲𑁆𑀲 𑀅𑀦𑁆𑀥𑀸. 𑀲𑁄 𑀫𑀥𑀼𑀭𑀨𑀮𑀸𑀨𑀮𑀸𑀦𑀺 𑀳𑀢𑁆𑀣𑀻𑀦𑀁 𑀳𑀢𑁆𑀣𑁂𑀲𑀼 𑀤𑀢𑁆𑀯𑀸 𑀫𑀸𑀢𑀼 𑀧𑁂𑀲𑁂𑀢𑀺. 𑀳𑀢𑁆𑀣𑀺𑀦𑁄 𑀢𑀲𑁆𑀲𑀸 𑀅𑀤𑀢𑁆𑀯𑀸 𑀲𑀬𑀁 𑀔𑀸𑀤𑀦𑁆𑀢𑀺. 𑀲𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀬𑀽𑀣𑀁 𑀧𑀳𑀸𑀬 𑀫𑀸𑀢𑀭𑀫𑁂𑀯 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀅𑀜𑁆𑀜𑁂𑀲𑀁 𑀳𑀢𑁆𑀣𑀻𑀦𑀁 𑀅𑀚𑀸𑀦𑀦𑁆𑀢𑀸𑀦𑀁 𑀫𑀸𑀢𑀭𑀁 𑀕𑀳𑁂𑀢𑁆𑀯𑀸 𑀘𑀡𑁆𑀟𑁄𑀭𑀡𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀦𑀴𑀺𑀦𑀺𑀁 𑀉𑀧𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀧𑀩𑁆𑀩𑀢𑀕𑀼𑀳𑀸𑀬 𑀫𑀸𑀢𑀭𑀁 𑀞𑀧𑁂𑀢𑁆𑀯𑀸 𑀧𑁄𑀲𑁂𑀲𑀺.

𑁨-𑁩. 𑀧𑀯𑀦𑁂 𑀤𑀺𑀲𑁆𑀯𑀸 𑀯𑀦𑀘𑀭𑁄𑀢𑀺 𑀏𑀓𑁄 𑀯𑀦𑀘𑀭𑀓𑁄 𑀧𑀼𑀭𑀺𑀲𑁄 𑀢𑀲𑁆𑀫𑀺𑀁 𑀫𑀳𑀸𑀯𑀦𑁂 𑀯𑀺𑀘𑀭𑀦𑁆𑀢𑁄 𑀫𑀁 𑀤𑀺𑀲𑁆𑀯𑀸. 𑀭𑀜𑁆𑀜𑁄 𑀫𑀁 𑀧𑀝𑀺𑀯𑁂𑀤𑀬𑀻𑀢𑀺 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀁 𑀆𑀭𑁄𑀘𑁂𑀲𑀺.

𑀲𑁄 𑀳𑀺 𑀫𑀕𑁆𑀕𑀫𑀽𑀴𑁆𑀳𑁄 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀅𑀦𑀸𑀣𑁄, 𑀦 𑀔𑁄 𑀧𑀦𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀁 𑀏𑀲 𑀫𑀬𑀺 𑀞𑀺𑀢𑁂 𑀇𑀥 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 ¶ 𑀪𑀬𑁂𑀦 𑀧𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀦𑀢𑁆𑀣𑀺 𑀢𑁂 𑀫𑀁 𑀦𑀺𑀲𑁆𑀲𑀸𑀬 𑀪𑀬𑀁, 𑀫𑀸 𑀧𑀮𑀸𑀬𑀺, 𑀓𑀲𑁆𑀫𑀸 𑀢𑁆𑀯𑀁 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀸𑀫𑀺, 𑀅𑀳𑀁 𑀫𑀕𑁆𑀕𑀫𑀽𑀴𑁆𑀳𑁄 𑀅𑀚𑁆𑀚 𑀫𑁂 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀪𑁄 𑀧𑀼𑀭𑀺𑀲, 𑀫𑀸 𑀪𑀸𑀬𑀺, 𑀅𑀳𑀁 𑀢𑀁 𑀫𑀦𑀼𑀲𑁆𑀲𑀧𑀣𑁂 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀢𑁄 𑀦𑀻𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑁄𑀧𑀺 𑀧𑀸𑀧𑁄 ‘‘𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀲𑀜𑁆𑀜𑀁 𑀧𑀩𑁆𑀩𑀢𑀲𑀜𑁆𑀜𑀜𑁆𑀘 𑀓𑀭𑁄𑀦𑁆𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀻 𑀫𑀢𑁄 ¶ . 𑀲𑁄 𑀧𑀼𑀭𑀺𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀦𑁄 𑀤𑀺𑀝𑁆𑀞𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀯𑀸𑀦𑀼𑀘𑁆𑀙𑀯𑁄, 𑀫𑀳𑀸𑀭𑀸𑀚, 𑀕𑀚𑁄 𑀯𑀲𑀢𑀺 𑀓𑀸𑀦𑀦𑁂’’𑀢𑀺𑀆𑀤𑀺.

𑀢𑀢𑁆𑀣 ¶ 𑀢𑀯𑀸𑀦𑀼𑀘𑁆𑀙𑀯𑁄𑀢𑀺 𑀢𑀯 𑀑𑀧𑀯𑀬𑁆𑀳𑀁 𑀓𑀸𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑁄 𑀬𑀼𑀢𑁆𑀢𑁄. 𑀦 𑀢𑀲𑁆𑀲 𑀧𑀭𑀺𑀓𑁆𑀔𑀸𑀬𑀢𑁆𑀣𑁄𑀢𑀺 𑀢𑀲𑁆𑀲 𑀕𑀳𑀡𑁂 𑀕𑀫𑀦𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀲𑀫𑀦𑁆𑀢𑀢𑁄 𑀔𑀡𑀺𑀢𑀩𑁆𑀩𑀧𑀭𑀺𑀓𑁆𑀔𑀸𑀬 𑀯𑀸 𑀓𑀭𑁂𑀡𑀼𑀬𑀸 𑀓𑀡𑁆𑀡𑀧𑀼𑀝𑁂𑀦 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀔𑀺𑀢𑁆𑀢𑀧𑀸𑀲𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑀩𑁆𑀩𑀆𑀴𑀓𑀲𑀗𑁆𑀔𑀸𑀢𑀆𑀮𑀸𑀦𑁂𑀦 𑀯𑀸 𑀬𑀢𑁆𑀣 𑀧𑀯𑀺𑀝𑁆𑀞𑁄 𑀓𑀢𑁆𑀣𑀘𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑀯𑀜𑁆𑀘𑀦𑀓𑀸𑀲𑀼𑀬𑀸 𑀯𑀸 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀲𑀳𑀕𑀳𑀺𑀢𑁂𑀢𑀺 𑀕𑀳𑀡𑀲𑀫𑀓𑀸𑀮𑀁 𑀏𑀯. 𑀏𑀳𑀺𑀢𑀻𑀢𑀺 𑀆𑀕𑀫𑀺𑀲𑁆𑀲𑀢𑀺.

𑀭𑀸𑀚𑀸 𑀇𑀫𑀁 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀺𑀦𑀸 𑀯𑀼𑀢𑁆𑀢𑀁 𑀳𑀢𑁆𑀣𑀺𑀦𑀸𑀕𑀁 𑀆𑀦𑁂𑀳𑀻’’𑀢𑀺 𑀳𑀢𑁆𑀣𑀸𑀘𑀭𑀺𑀬𑀁 𑀲𑀳 𑀧𑀭𑀺𑀯𑀸𑀭𑁂𑀦 𑀧𑁂𑀲𑁂𑀲𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀦𑀴𑀺𑀦𑀺𑀁 𑀧𑀯𑀺𑀲𑀺𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀁 𑀧𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪.

‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀸𑀚𑀸𑀧𑀺 𑀢𑀼𑀝𑁆𑀞𑀫𑀸𑀦𑀲𑁄;

𑀧𑁂𑀲𑁂𑀲𑀺 𑀳𑀢𑁆𑀣𑀺𑀤𑀫𑀓𑀁, 𑀙𑁂𑀓𑀸𑀘𑀭𑀺𑀬𑀁 𑀲𑀼𑀲𑀺𑀓𑁆𑀔𑀺𑀢𑀁.

𑁫.

‘‘𑀕𑀦𑁆𑀢𑁆𑀯𑀸 𑀲𑁄 𑀳𑀢𑁆𑀣𑀺𑀤𑀫𑀓𑁄, 𑀅𑀤𑁆𑀤𑀲 𑀧𑀤𑀼𑀫𑀲𑁆𑀲𑀭𑁂;

𑀪𑀺𑀲𑀫𑀼𑀴𑀸𑀮𑀁 𑀉𑀤𑁆𑀥𑀭𑀦𑁆𑀢𑀁, 𑀬𑀸𑀧𑀦𑀢𑁆𑀣𑀸𑀬 𑀫𑀸𑀢𑀼𑀬𑀸’’𑀢𑀺.

𑀢𑀢𑁆𑀣 𑀙𑁂𑀓𑀸𑀘𑀭𑀺𑀬𑀦𑁆𑀢𑀺 𑀳𑀢𑁆𑀣𑀺𑀩𑀦𑁆𑀥𑀦𑀸𑀤𑀺𑀯𑀺𑀥𑀺𑀫𑁆𑀳𑀺 𑀓𑀼𑀲𑀮𑀁 𑀳𑀢𑁆𑀣𑀸𑀘𑀭𑀺𑀬𑀁. 𑀲𑀼𑀲𑀺𑀓𑁆𑀔𑀺𑀢𑀦𑁆𑀢𑀺 𑀳𑀢𑁆𑀣𑀻𑀦𑀁 𑀲𑀺𑀓𑁆𑀔𑀸𑀧𑀦𑀯𑀺𑀚𑁆𑀚𑀸𑀬 𑀦𑀺𑀝𑁆𑀞𑀗𑁆𑀕𑀫𑀦𑁂𑀦 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑀁.

𑁬. 𑀯𑀺𑀜𑁆𑀜𑀸𑀬 𑀫𑁂 𑀲𑀻𑀮𑀕𑀼𑀡𑀦𑁆𑀢𑀺 ‘‘𑀪𑀤𑁆𑀤𑁄 𑀅𑀬𑀁 𑀳𑀢𑁆𑀣𑀸𑀚𑀸𑀦𑀻𑀬𑁄 𑀦 𑀫𑀦𑁆𑀤𑁄, 𑀦 𑀘𑀡𑁆𑀟𑁄, 𑀦 𑀯𑁄𑀫𑀺𑀲𑁆𑀲𑀲𑀻𑀮𑁄 𑀯𑀸’’𑀢𑀺 𑀫𑀫 𑀲𑀻𑀮𑀕𑀼𑀡𑀁 𑀚𑀸𑀦𑀺𑀢𑁆𑀯𑀸. 𑀓𑀣𑀁? 𑀮𑀓𑁆𑀔𑀡𑀁 ¶ 𑀉𑀧𑀥𑀸𑀭𑀬𑀻𑀢𑀺 𑀲𑀼𑀲𑀺𑀓𑁆𑀔𑀺𑀢𑀳𑀢𑁆𑀣𑀺𑀲𑀺𑀧𑁆𑀧𑀢𑁆𑀢𑀸 𑀫𑀫 𑀮𑀓𑁆𑀔𑀡𑀁 𑀲𑀫𑀦𑁆𑀢𑀢𑁄 𑀉𑀧𑀥𑀸𑀭𑁂𑀲𑀺. 𑀢𑁂𑀦 𑀲𑁄 𑀏𑀳𑀺 𑀧𑀼𑀢𑁆𑀢𑀸𑀢𑀺 𑀯𑀢𑁆𑀯𑀸𑀦, 𑀫𑀫 𑀲𑁄𑀡𑁆𑀟𑀸𑀬 𑀅𑀕𑁆𑀕𑀳𑀺.

𑁭. 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀸𑀘𑀭𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀇𑀤𑀁 𑀪𑀬𑀁 𑀫𑀬𑁆𑀳𑀁 𑀏𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀸 𑀉𑀧𑁆𑀧𑀦𑁆𑀦𑀁, 𑀅𑀳𑀁 𑀔𑁄 𑀧𑀦 𑀫𑀳𑀸𑀩𑀮𑁄 𑀳𑀢𑁆𑀣𑀺𑀲𑀳𑀲𑁆𑀲𑀫𑁆𑀧𑀺 𑀯𑀺𑀤𑁆𑀥𑀁𑀲𑁂𑀢𑀼𑀁 𑀲𑀫𑀢𑁆𑀣𑁄, 𑀧𑀳𑁄𑀫𑀺 𑀓𑀼𑀚𑁆𑀛𑀺𑀢𑁆𑀯𑀸 𑀲𑀭𑀝𑁆𑀞𑀓𑀁 𑀲𑁂𑀦𑀸𑀯𑀸𑀳𑀦𑀁 𑀦𑀸𑀲𑁂𑀢𑀼𑀁, 𑀲𑀘𑁂 𑀧𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀺, 𑀲𑀻𑀮𑀁 𑀫𑁂 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑀺𑀬𑀫𑀸𑀦𑁄𑀧𑀺 ¶ 𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀲𑀻𑀲𑀁 𑀑𑀦𑀸𑀫𑁂𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀅𑀝𑁆𑀞𑀸𑀲𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀁 𑀫𑁂 𑀢𑀤𑀸 𑀧𑀸𑀓𑀢𑀺𑀓𑀁, 𑀲𑀭𑀻𑀭𑀸𑀦𑀼𑀕𑀢𑀁 𑀩𑀮’’𑀦𑁆𑀢𑀺𑀆𑀤𑀺.

𑀢𑀢𑁆𑀣 ¶ 𑀧𑀸𑀓𑀢𑀺𑀓𑀦𑁆𑀢𑀺 𑀲𑀪𑀸𑀯𑀲𑀺𑀤𑁆𑀥𑀁. 𑀲𑀭𑀻𑀭𑀸𑀦𑀼𑀕𑀢𑀦𑁆𑀢𑀺 𑀲𑀭𑀻𑀭𑀫𑁂𑀯 𑀅𑀦𑀼𑀕𑀢𑀁 𑀓𑀸𑀬𑀩𑀮𑀁, 𑀦 𑀉𑀧𑀸𑀬𑀓𑀼𑀲𑀮𑀢𑀸𑀲𑀗𑁆𑀔𑀸𑀢𑀜𑀸𑀡𑀸𑀦𑀼𑀕𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀚𑁆𑀚 𑀦𑀸𑀕𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀚𑁆𑀚𑀓𑀸𑀮𑁂 𑀅𑀦𑁂𑀓𑁂𑀲𑀁 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀲𑀫𑀼𑀤𑀺𑀢𑀸𑀦𑀁. 𑀩𑀮𑁂𑀦 𑀲𑀫𑀲𑀸𑀤𑀺𑀲𑀦𑁆𑀢𑀺 𑀢𑁂𑀲𑀁 𑀲𑀭𑀻𑀭𑀩𑀮𑁂𑀦 𑀲𑀫𑀲𑀫𑀫𑁂𑀯 𑀳𑀼𑀢𑁆𑀯𑀸 𑀲𑀤𑀺𑀲𑀁, 𑀦 𑀉𑀧𑀫𑀸𑀫𑀢𑁆𑀢𑁂𑀦. 𑀫𑀗𑁆𑀕𑀮𑀳𑀢𑁆𑀣𑀺𑀓𑀼𑀮𑁂 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀉𑀧𑁆𑀧𑀦𑁆𑀦𑁄𑀢𑀺.

𑁮. 𑀬𑀤𑀺𑀳𑀁 𑀢𑁂𑀲𑀁 𑀧𑀓𑀼𑀧𑁆𑀧𑁂𑀬𑁆𑀬𑀦𑁆𑀢𑀺 𑀫𑀁 𑀕𑀳𑀡𑀸𑀬 𑀉𑀧𑀕𑀢𑀸𑀦𑀁 𑀢𑁂𑀲𑀁 𑀅𑀳𑀁 𑀬𑀤𑀺 𑀓𑀼𑀚𑁆𑀛𑁂𑀬𑁆𑀬𑀁, 𑀢𑁂𑀲𑀁 𑀚𑀻𑀯𑀺𑀢𑀫𑀤𑁆𑀤𑀦𑁂 𑀧𑀝𑀺𑀩𑀮𑁄 𑀪𑀯𑁂𑀬𑁆𑀬𑀁. 𑀦 𑀓𑁂𑀯𑀮𑀁 𑀢𑁂𑀲𑀜𑁆𑀜𑁂𑀯, 𑀅𑀣 𑀔𑁄 𑀬𑀸𑀯 𑀭𑀚𑁆𑀚𑀫𑁆𑀧𑀺 𑀫𑀸𑀦𑀼𑀲𑀦𑁆𑀢𑀺 𑀬𑀢𑁄 𑀭𑀚𑁆𑀚𑀢𑁄 𑀢𑁂𑀲𑀁 𑀆𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀩𑁆𑀩𑀫𑁆𑀧𑀺 𑀭𑀚𑁆𑀚𑀁 𑀧𑁄𑀣𑁂𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁂𑀬𑁆𑀬𑀁.

𑁯. 𑀅𑀧𑀺 𑀘𑀸𑀳𑀁 𑀲𑀻𑀮𑀭𑀓𑁆𑀔𑀸𑀬𑀸𑀢𑀺 𑀏𑀯𑀁 𑀲𑀫𑀢𑁆𑀣𑁄𑀧𑀺 𑀘 𑀅𑀳𑀁 𑀅𑀢𑁆𑀢𑀦𑀺 𑀧𑀢𑀺𑀝𑁆𑀞𑀺𑀢𑀸𑀬 𑀲𑀻𑀮𑀭𑀓𑁆𑀔𑀸𑀬 𑀲𑀻𑀮𑀕𑀼𑀢𑁆𑀢𑀺𑀬𑀸 𑀕𑀼𑀢𑁆𑀢𑁄 𑀩𑀦𑁆𑀥𑁄 𑀯𑀺𑀬. 𑀦 𑀓𑀭𑁄𑀫𑀺 𑀘𑀺𑀢𑁆𑀢𑁂 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀢𑀲𑁆𑀲 𑀲𑀻𑀮𑀲𑁆𑀲 𑀅𑀜𑁆𑀜𑀣𑀢𑁆𑀢𑀪𑀽𑀢𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑁄𑀣𑀦𑀸𑀤𑀺𑀯𑀺𑀥𑀺𑀁 𑀫𑀬𑁆𑀳𑀁 𑀘𑀺𑀢𑁆𑀢𑁂 𑀦 𑀓𑀭𑁄𑀫𑀺, 𑀢𑀢𑁆𑀣 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀫𑀺. 𑀧𑀓𑁆𑀔𑀺𑀧𑀦𑁆𑀢𑀁 𑀫𑀫𑀸𑀴𑀓𑁂𑀢𑀺 𑀆𑀮𑀸𑀦𑀢𑁆𑀣𑀫𑁆𑀪𑁂 𑀧𑀓𑁆𑀔𑀺𑀧𑀦𑁆𑀢𑀁, ‘‘𑀤𑀺𑀲𑁆𑀯𑀸𑀧𑀻’’𑀢𑀺 𑀯𑀘𑀦𑀲𑁂𑀲𑁄. 𑀓𑀲𑁆𑀫𑀸𑀢𑀺 𑀘𑁂, 𑀲𑀻𑀮𑀧𑀸𑀭𑀫𑀺𑀧𑀽𑀭𑀺𑀬𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀻𑀮𑀁 𑀅𑀔𑀡𑁆𑀟𑁂𑀦𑁆𑀢𑀲𑁆𑀲 𑀫𑁂 𑀦𑀘𑀺𑀭𑀲𑁆𑀲𑁂𑀯 𑀲𑀻𑀮𑀧𑀸𑀭𑀫𑀻 𑀧𑀭𑀺𑀧𑀽𑀭𑁂𑀲𑁆𑀲𑀢𑀻𑀢𑀺 𑀲𑀻𑀮𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀢𑁆𑀣𑀁 𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀘𑀺𑀢𑁆𑀢𑁂 𑀦 𑀓𑀭𑁄𑀫𑀻𑀢𑀺 𑀬𑁄𑀚𑀦𑀸.

𑁧𑁦. ‘‘𑀬𑀤𑀺 𑀢𑁂 𑀫’’𑀦𑁆𑀢𑀺 𑀕𑀸𑀣𑀸𑀬𑀧𑀺 𑀲𑀻𑀮𑀭𑀓𑁆𑀔𑀸𑀬 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀻𑀮𑀲𑁆𑀲 ¶ 𑀅𑀥𑀺𑀝𑁆𑀞𑀺𑀢𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑁄𑀝𑁆𑀝𑁂𑀬𑁆𑀬𑀼𑀦𑁆𑀢𑀺 𑀪𑀺𑀦𑁆𑀤𑁂𑀬𑁆𑀬𑀼𑀁. 𑀲𑀻𑀮𑀔𑀡𑁆𑀟𑀪𑀬𑀸 𑀫𑀫𑀸𑀢𑀺 𑀫𑀫 𑀲𑀻𑀮𑀲𑁆𑀲 𑀔𑀡𑁆𑀟𑀦𑀪𑀬𑁂𑀦.

𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂 𑀦𑀺𑀘𑁆𑀘𑀮𑁂 𑀞𑀺𑀢𑁂 𑀳𑀢𑁆𑀣𑀸𑀘𑀭𑀺𑀬𑁄 𑀧𑀤𑀼𑀫𑀲𑀭𑀁 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀳𑀺 𑀧𑀼𑀢𑁆𑀢𑀸’’𑀢𑀺 𑀭𑀚𑀢𑀤𑀸𑀫𑀲𑀤𑀺𑀲𑀸𑀬 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀢𑁆𑀢𑀫𑀸𑀦𑁄𑀯 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀭𑀸𑀚𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀲𑀺. 𑀳𑀢𑁆𑀣𑀸𑀘𑀭𑀺𑀬𑁄 𑀩𑁄𑀥𑀺𑀲𑀢𑁆𑀢𑀁 𑀓𑀢𑀕𑀦𑁆𑀥𑀧𑀭𑀺𑀪𑀡𑁆𑀟𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀳𑀢𑁆𑀣𑀺𑀲𑀸𑀮𑀁 𑀦𑁂𑀢𑁆𑀯𑀸 𑀯𑀺𑀘𑀺𑀢𑁆𑀭𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 ¶ 𑀤𑀸𑀧𑁂𑀲𑀺. 𑀲𑁄 ‘‘𑀫𑀸𑀢𑀭𑀁 𑀯𑀺𑀦𑀸 𑀕𑁄𑀘𑀭𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀡𑁆𑀟𑀁 𑀦 𑀕𑀡𑁆𑀳𑀺. 𑀬𑀸𑀘𑀺𑀢𑁄𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑁋

‘‘𑀲𑀸 ¶ 𑀦𑀽𑀦𑀲𑀸 𑀓𑀧𑀡𑀺𑀓𑀸, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺. 𑁋

𑀆𑀳. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑁋

‘‘𑀓𑀸 𑀦𑀼 𑀢𑁂 𑀲𑀸 𑀫𑀳𑀸𑀦𑀸𑀕, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺. 𑁋 𑀧𑀼𑀘𑁆𑀙𑀺𑀢𑁆𑀯𑀸 𑁋

‘‘𑀫𑀸𑀢𑀸 𑀫𑁂 𑀲𑀸 𑀫𑀳𑀸𑀭𑀸𑀚, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺. 𑁋

𑀯𑀼𑀢𑁆𑀢𑁂 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄 ‘‘𑀫𑀸𑀢𑀸 𑀫𑁂 𑀕𑁄𑀘𑀭𑀁 𑀦 𑀮𑀪𑀺𑀢𑁆𑀣𑀸’’𑀢𑀺 𑀯𑀤𑀢𑁄 𑀇𑀫𑀲𑁆𑀲 𑀕𑁄𑀘𑀭𑀁 𑀅𑀕𑀡𑁆𑀳𑀦𑁆𑀢𑀲𑁆𑀲. 𑀢𑀲𑁆𑀫𑀸 𑁋

‘‘𑀫𑀼𑀜𑁆𑀘𑀣𑁂𑀢𑀁 𑀫𑀳𑀸𑀦𑀸𑀕𑀁, 𑀬𑁄𑀬𑀁 𑀪𑀭𑀢𑀺 𑀫𑀸𑀢𑀭𑀁;

𑀲𑀫𑁂𑀢𑀼 𑀫𑀸𑀢𑀭𑀸 𑀦𑀸𑀕𑁄, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀻’’𑀢𑀺. 𑁋 𑀯𑀢𑁆𑀯𑀸 𑀫𑀼𑀜𑁆𑀘𑀸𑀧𑁂𑀲𑀺 𑁋

‘‘𑀫𑀼𑀢𑁆𑀢𑁄 𑀘 𑀩𑀦𑁆𑀥𑀦𑀸 𑀦𑀸𑀕𑁄, 𑀫𑀼𑀢𑁆𑀢𑀤𑀸𑀫𑀸𑀬 𑀓𑀼𑀜𑁆𑀚𑀭𑁄;

𑀫𑀼𑀳𑀼𑀢𑁆𑀢𑀁 𑀅𑀲𑁆𑀲𑀸𑀲𑀬𑀺𑀢𑁆𑀯𑀸, 𑀅𑀕𑀫𑀸 𑀬𑁂𑀦 𑀧𑀩𑁆𑀩𑀢𑁄’’𑀢𑀺.

𑀢𑀢𑁆𑀣 𑀓𑀧𑀡𑀺𑀓𑀸𑀢𑀺 𑀯𑀭𑀸𑀓𑀸. 𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀻𑀢𑀺 𑀅𑀦𑁆𑀥𑀢𑀸𑀬 𑀧𑀼𑀢𑁆𑀢𑀯𑀺𑀬𑁄𑀕𑀤𑀼𑀓𑁆𑀔𑁂𑀦 𑀘 𑀧𑀭𑀺𑀤𑁂𑀯𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀭𑀼𑀓𑁆𑀔𑀓𑀴𑀺𑀗𑁆𑀕𑀭𑁂 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺. 𑀘𑀡𑁆𑀟𑁄𑀭𑀡𑀁 𑀧𑀢𑀻𑀢𑀺 𑀘𑀡𑁆𑀟𑁄𑀭𑀡𑀧𑀩𑁆𑀩𑀢𑀸𑀪𑀺𑀫𑀼𑀔𑀻, 𑀢𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀧𑀭𑀺𑀩𑁆𑀪𑀫𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀅𑀕𑀫𑀸 𑀬𑁂𑀦 𑀧𑀩𑁆𑀩𑀢𑁄𑀢𑀺 𑀲𑁄 𑀳𑀢𑁆𑀣𑀺𑀦𑀸𑀕𑁄 ¶ 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑀭𑀸𑀚𑀥𑀫𑁆𑀫𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀫𑀳𑀸𑀚𑀦𑁂𑀦 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀤𑀳𑁂𑀯 𑀫𑀸𑀢𑀭𑀸 𑀲𑀫𑀸𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑀸 𑀢𑀼𑀝𑁆𑀞𑀫𑀸𑀦𑀲𑀸 𑁋

‘‘𑀘𑀺𑀭𑀁 ¶ 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀬𑁄 𑀫𑁂 𑀧𑀼𑀢𑁆𑀢𑀁 𑀧𑀫𑁄𑀘𑁂𑀲𑀺, 𑀲𑀤𑀸 𑀯𑀼𑀤𑁆𑀥𑀸𑀧𑀘𑀸𑀬𑀺𑀓’’𑀦𑁆𑀢𑀺. (𑀚𑀸. 𑁧.𑁧𑁧.𑁧𑁨) 𑁋

𑀭𑀜𑁆𑀜𑁄 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀦𑀴𑀺𑀦𑀺𑀬𑀸 𑀅𑀯𑀺𑀤𑀽𑀭𑁂 𑀕𑀸𑀫𑀁 𑀫𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼 𑀘𑀲𑁆𑀲 𑀦𑀺𑀩𑀤𑁆𑀥𑀁 𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺 ¶ . 𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀭𑀺 𑀫𑀢𑀸𑀬 𑀢𑀲𑁆𑀲𑀸 𑀲𑀭𑀻𑀭𑀧𑀭𑀺𑀳𑀸𑀭𑀁 𑀓𑀢𑁆𑀯𑀸 𑀓𑀼𑀭𑀡𑁆𑀟𑀓𑀅𑀲𑁆𑀲𑀫𑀧𑀤𑀁 𑀦𑀸𑀫 𑀕𑀢𑁄. 𑀢𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀳𑀺𑀫𑀯𑀦𑁆𑀢𑀢𑁄 𑀑𑀢𑀭𑀺𑀢𑁆𑀯𑀸 𑀧𑀜𑁆𑀘𑀲𑀢𑀸 𑀇𑀲𑀬𑁄 𑀯𑀲𑀺𑀁𑀲𑀼. 𑀢𑀁 𑀯𑀢𑁆𑀢𑀁 𑀢𑁂𑀲𑀁 𑀤𑀢𑁆𑀯𑀸 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀸𑀦𑀭𑀽𑀧𑀁 𑀲𑀺𑀮𑀸𑀧𑀝𑀺𑀫𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀳𑀢𑁆𑀣𑀺𑀫𑀳𑀁 𑀦𑀸𑀫 𑀓𑀭𑀺𑀁𑀲𑀼.

𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀳𑀢𑁆𑀣𑀺𑀦𑀻 𑀫𑀳𑀸𑀫𑀸𑀬𑀸, 𑀯𑀦𑀘𑀭𑀓𑁄 𑀤𑁂𑀯𑀤𑀢𑁆𑀢𑁄, 𑀫𑀸𑀢𑀼𑀧𑁄𑀲𑀓𑀳𑀢𑁆𑀣𑀺𑀦𑀸𑀕𑁄 𑀮𑁄𑀓𑀦𑀸𑀣𑁄.

𑀇𑀥𑀸𑀧𑀺 𑀤𑀸𑀦𑀧𑀸𑀭𑀫𑀺𑀆𑀤𑀬𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀲𑀻𑀮𑀧𑀸𑀭𑀫𑀻 𑀧𑀦 𑀅𑀢𑀺𑀲𑀬𑀯𑀢𑀻𑀢𑀺 𑀲𑀸 𑀏𑀯 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸. 𑀢𑀣𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀉𑀧𑁆𑀧𑀦𑁆𑀦𑁄𑀧𑀺 𑀩𑁆𑀭𑀳𑁆𑀫𑀧𑀼𑀩𑁆𑀩𑀤𑁂𑀯𑀧𑀼𑀩𑁆𑀩𑀸𑀘𑀭𑀺𑀬𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑁂𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦𑀧𑀺 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀫𑀸𑀢𑀼𑀬𑀸 𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 ‘‘𑀫𑀸𑀢𑀸 𑀦𑀸𑀫𑁂𑀲𑀸 𑀧𑀼𑀢𑁆𑀢𑀲𑁆𑀲 𑀩𑀳𑀽𑀧𑀓𑀸𑀭𑀸, 𑀢𑀲𑁆𑀫𑀸 𑀫𑀸𑀢𑀼𑀧𑀝𑁆𑀞𑀸𑀦𑀁 𑀦𑀸𑀫 𑀧𑀡𑁆𑀟𑀺𑀢𑁂𑀦 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀅𑀦𑁂𑀓𑁂𑀲𑀁 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀇𑀲𑁆𑀲𑀭𑀸𑀥𑀺𑀧𑀢𑀺 𑀫𑀳𑀸𑀦𑀼𑀪𑀸𑀯𑁄 𑀬𑀽𑀣𑀧𑀢𑀺 𑀳𑀼𑀢𑁆𑀯𑀸 𑀢𑁂𑀳𑀺 𑀅𑀦𑀼𑀯𑀢𑁆𑀢𑀺𑀬𑀫𑀸𑀦𑁄 𑀏𑀓𑀓𑀯𑀺𑀳𑀸𑀭𑁂 𑀅𑀦𑁆𑀢𑀭𑀸𑀬𑀁 𑀅𑀕𑀡𑁂𑀢𑁆𑀯𑀸 𑀬𑀽𑀣𑀁 𑀧𑀳𑀸𑀬 𑀏𑀓𑀓𑁄 𑀳𑀼𑀢𑁆𑀯𑀸 𑀉𑀧𑀓𑀸𑀭𑀺𑀔𑁂𑀢𑁆𑀢𑀁 𑀧𑀽𑀚𑁂𑀲𑁆𑀲𑀸𑀫𑀻𑀢𑀺 𑀫𑀸𑀢𑀼𑀧𑁄𑀲𑀦𑀁, 𑀫𑀕𑁆𑀕𑀫𑀽𑀴𑁆𑀳𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀕𑁄𑀘𑀭𑀲𑀫𑁆𑀧𑀸𑀧𑀦𑀁, 𑀢𑁂𑀦 𑀘 𑀓𑀢𑀸𑀧𑀭𑀸𑀥𑀲𑀳𑀦𑀁 ¶ , 𑀳𑀢𑁆𑀣𑀸𑀘𑀭𑀺𑀬𑀧𑁆𑀧𑀫𑀼𑀔𑀸𑀦𑀁 𑀅𑀢𑁆𑀢𑀸𑀦𑀁 𑀩𑀦𑁆𑀥𑀺𑀢𑀼𑀁 𑀆𑀕𑀢𑀧𑀼𑀭𑀺𑀲𑀸𑀦𑀁 𑀲𑀫𑀢𑁆𑀣𑁄𑀧𑀺 𑀲𑀫𑀸𑀦𑁄 𑀲𑀦𑁆𑀢𑀸𑀲𑀦𑀫𑀢𑁆𑀢𑁂𑀦𑀧𑀺 𑀢𑁂𑀲𑀁 𑀧𑀻𑀴𑀦𑀸 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀜𑁆𑀘 𑀲𑀻𑀮𑀲𑁆𑀲 𑀔𑀡𑁆𑀟𑀸𑀤𑀺𑀪𑀸𑀯𑁄𑀢𑀺 𑀢𑀣𑀸 𑀅𑀓𑀢𑁆𑀯𑀸 𑀲𑀼𑀤𑀦𑁆𑀢𑁂𑀦 𑀑𑀧𑀯𑀬𑁆𑀳𑁄 𑀯𑀺𑀬 𑀲𑀼𑀔𑁂𑀦𑁂𑀯 𑀕𑀳𑀡𑀽𑀧𑀕𑀫𑀦𑀁, 𑀫𑀸𑀢𑀭𑀁 𑀯𑀺𑀦𑀸 𑀦 𑀓𑀜𑁆𑀘𑀺 𑀅𑀚𑁆𑀛𑁄𑀳𑀭𑀺𑀲𑁆𑀲𑀸𑀫𑀻𑀢𑀺 𑀲𑀢𑁆𑀢𑀸𑀳𑀫𑁆𑀧𑀺 𑀅𑀦𑀸𑀳𑀸𑀭𑀢𑀸, 𑀇𑀫𑀺𑀦𑀸𑀧𑀸𑀳𑀁 𑀩𑀦𑁆𑀥𑀸𑀧𑀺𑀢𑁄𑀢𑀺 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀭𑀸𑀚𑀸𑀦𑀁 𑀫𑁂𑀢𑁆𑀢𑀸𑀬 𑀨𑀭𑀡𑀁, 𑀢𑀲𑁆𑀲 𑀘 𑀦𑀸𑀦𑀸𑀦𑀬𑁂𑀳𑀺 𑀥𑀫𑁆𑀫𑀤𑁂𑀲𑀦𑀸𑀢𑀺 𑀏𑀯𑀫𑀸𑀤𑀬𑁄 𑀇𑀥 𑀫𑀳𑀸𑀧𑀼𑀭𑀺𑀲𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀏𑀢𑁂, 𑀅𑀩𑁆𑀪𑀼𑀢𑀸 𑀘 𑀫𑀳𑁂𑀲𑀺𑀦𑁄…𑀧𑁂… 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀫𑀸𑀢𑀼𑀧𑁄𑀲𑀓𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀪𑀽𑀭𑀺𑀤𑀢𑁆𑀢𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑁂 ¶ ¶ 𑀪𑀽𑀭𑀺𑀤𑀢𑁆𑀢𑁄𑀢𑀺 𑀪𑀽𑀭𑀺𑀲𑀫𑀤𑀢𑁆𑀢𑁄. 𑀤𑀢𑁆𑀢𑁄𑀢𑀺 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀁 𑀦𑀸𑀫𑀁. 𑀬𑀲𑁆𑀫𑀸 𑀧𑀦𑁂𑀲𑁄 𑀦𑀸𑀕𑀪𑀯𑀦𑁂 𑀯𑀺𑀭𑀽𑀧𑀓𑁆𑀔𑀫𑀳𑀸𑀭𑀸𑀚𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀘 𑀉𑀧𑁆𑀧𑀦𑁆𑀦𑁂 𑀧𑀜𑁆𑀳𑁂 𑀲𑀫𑁆𑀫𑀤𑁂𑀯 𑀯𑀺𑀦𑀺𑀘𑁆𑀙𑀺𑀦𑀸𑀢𑀺, 𑀏𑀓𑀤𑀺𑀯𑀲𑀜𑁆𑀘 𑀯𑀺𑀭𑀽𑀧𑀓𑁆𑀔𑀫𑀳𑀸𑀭𑀸𑀚𑁂 𑀦𑀸𑀕𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀺𑀤𑀲𑀧𑀼𑀭𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀤𑁂𑀯𑀸𑀦𑀫𑀦𑁆𑀢𑀭𑁂 𑀧𑀜𑁆𑀳𑁄 𑀲𑀫𑀼𑀝𑁆𑀞𑀸𑀲𑀺. 𑀢𑀁 𑀓𑁄𑀘𑀺 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀓𑁆𑀓𑁂𑀦 𑀧𑀦 𑀅𑀦𑀼𑀜𑁆𑀜𑀸𑀢𑁄 𑀧𑀮𑁆𑀮𑀗𑁆𑀓𑀯𑀭𑀕𑀢𑁄 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄𑀯 𑀓𑀣𑁂𑀲𑀺. 𑀅𑀣 𑀦𑀁 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 ‘‘𑀤𑀢𑁆𑀢, 𑀢𑁆𑀯𑀁 𑀧𑀣𑀯𑀺𑀲𑀫𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀇𑀢𑁄 𑀧𑀝𑁆𑀞𑀸𑀬 𑀪𑀽𑀭𑀺𑀤𑀢𑁆𑀢𑁄 𑀦𑀸𑀫𑀸’’𑀢𑀺 𑀆𑀳. 𑀪𑀽𑀭𑀻𑀢𑀺 𑀳𑀺 𑀧𑀣𑀯𑀺𑀬𑀸 𑀦𑀸𑀫𑀁, 𑀢𑀲𑁆𑀫𑀸 𑀪𑀽𑀭𑀺𑀲𑀫𑀢𑀸𑀬 𑀪𑀽𑀢𑁂 𑀅𑀢𑁆𑀣𑁂 𑀭𑀫𑀢𑀻𑀢𑀺 𑀘 𑀪𑀽𑀭𑀺𑀲𑀗𑁆𑀔𑀸𑀢𑀸𑀬 𑀫𑀳𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀲𑀢𑁆𑀢𑁄 ‘‘𑀪𑀽𑀭𑀺𑀤𑀢𑁆𑀢𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀫𑀳𑀢𑀺𑀬𑀸 𑀧𑀦 𑀦𑀸𑀕𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀺𑀤𑁆𑀥𑀺𑀓𑁄 𑀘𑀸𑀢𑀺.

𑀅𑀢𑀻𑀢𑁂 𑀳𑀺 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑀺𑀢𑁄 𑀯𑀦𑁂 𑀯𑀲𑀦𑁆𑀢𑁄 𑀅𑀜𑁆𑀜𑀢𑀭𑀸𑀬 𑀦𑀸𑀕𑀫𑀸𑀡𑀯𑀺𑀓𑀸𑀬 ¶ 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀤𑁆𑀯𑁂 𑀤𑀸𑀭𑀓𑀸 𑀚𑀸𑀬𑀺𑀁𑀲𑀼 𑁋 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘. 𑀧𑀼𑀢𑁆𑀢𑀲𑁆𑀲 ‘‘𑀲𑀸𑀕𑀭𑀩𑁆𑀭𑀳𑁆𑀫𑀤𑀢𑁆𑀢𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼 𑀥𑀻𑀢𑀸𑀬 ‘‘𑀲𑀫𑀼𑀤𑁆𑀤𑀚𑀸’’𑀢𑀺. 𑀲𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀅𑀣 𑀥𑀢𑀭𑀝𑁆𑀞𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁂 𑀦𑀸𑀕𑀪𑀯𑀦𑁂 𑀦𑀸𑀕𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀢𑀁 𑀅𑀪𑀽𑀢𑀯𑀸𑀤𑀺𑀓𑁂𑀦 𑀘𑀺𑀢𑁆𑀢𑀘𑀽𑀴𑁂𑀦 𑀦𑀸𑀫 𑀓𑀘𑁆𑀙𑀧𑁂𑀦 ‘‘𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀢𑀼𑀬𑁆𑀳𑀁 𑀤𑀸𑀢𑀼𑀓𑀸𑀫𑁄, 𑀲𑀸 𑀔𑁄 𑀧𑀦 𑀭𑀸𑀚𑀥𑀻𑀢𑀸 𑀲𑀫𑀼𑀤𑁆𑀤𑀚𑀸 𑀦𑀸𑀫 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀘𑀸’’𑀢𑀺 𑀓𑀣𑀺𑀢𑀁 𑀲𑀼𑀢𑁆𑀯𑀸 𑀥𑀢𑀭𑀝𑁆𑀞𑁄 𑀘𑀢𑁆𑀢𑀸𑀭𑁄 𑀦𑀸𑀕𑀫𑀸𑀡𑀯𑀓𑁂 𑀧𑁂𑀲𑁂𑀢𑁆𑀯𑀸 𑀢𑀁 𑀤𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀁 𑀦𑀸𑀕𑀯𑀺𑀪𑀺𑀁𑀲𑀺𑀓𑀸𑀬 𑀪𑀺𑀁𑀲𑀸𑀧𑁂𑀢𑁆𑀯𑀸 ‘‘𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀫𑀳𑀦𑁆𑀢𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀢𑁆𑀯𑀸 𑀫𑀳𑀢𑀺𑀬𑀸 𑀦𑀸𑀕𑀺𑀤𑁆𑀥𑀺𑀬𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀲𑁆𑀲 𑀥𑀻𑀢𑀭𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑀸 𑀅𑀧𑀭𑀪𑀸𑀕𑁂 𑀥𑀢𑀭𑀝𑁆𑀞𑀁 𑀧𑀝𑀺𑀘𑁆𑀘 𑀲𑀼𑀤𑀲𑁆𑀲𑀦𑁄, 𑀤𑀢𑁆𑀢𑁄, 𑀲𑀼𑀪𑁄𑀕𑁄, 𑀅𑀭𑀺𑀝𑁆𑀞𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑁂 𑀧𑀝𑀺𑀮𑀪𑀺. 𑀢𑁂𑀲𑀼 𑀤𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁄, 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑁂𑀦 𑀢𑀼𑀝𑁆𑀞𑀘𑀺𑀢𑁆𑀢𑁂𑀦 ‘‘𑀪𑀽𑀭𑀺𑀤𑀢𑁆𑀢𑁄’’𑀢𑀺 𑀕𑀳𑀺𑀢𑀦𑀸𑀫𑀢𑁆𑀢𑀸 ‘‘𑀪𑀽𑀭𑀺𑀤𑀢𑁆𑀢𑁄’’𑀢𑁆𑀯𑁂𑀯 ¶ 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣 𑀦𑁂𑀲𑀁 𑀧𑀺𑀢𑀸 𑀬𑁄𑀚𑀦𑀲𑀢𑀺𑀓𑀁 𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀪𑀸𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀫𑀳𑀦𑁆𑀢𑁄 𑀬𑀲𑁄 𑀅𑀳𑁄𑀲𑀺. 𑀲𑁄𑀴𑀲𑀲𑁄𑀴𑀲𑀦𑀸𑀕𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀧𑀺𑀢𑀼𑀧𑀺 𑀏𑀓𑀬𑁄𑀚𑀦𑀲𑀢𑀫𑁂𑀯 𑀭𑀚𑁆𑀚𑀁 𑀅𑀳𑁄𑀲𑀺. 𑀢𑀬𑁄 𑀧𑀼𑀢𑁆𑀢𑀸 𑀫𑀸𑀲𑁂 𑀫𑀸𑀲𑁂 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀦𑁆𑀯𑀤𑁆𑀥𑀫𑀸𑀲𑀁 𑀆𑀕𑀘𑁆𑀙𑀢𑀺.

𑀲𑁄 ¶ 𑀏𑀓𑀤𑀺𑀯𑀲𑀁 𑀯𑀺𑀭𑀽𑀧𑀓𑁆𑀔𑀫𑀳𑀸𑀭𑀸𑀚𑁂𑀦 𑀲𑀤𑁆𑀥𑀺𑀁 𑀲𑀓𑁆𑀓𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀢𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀁 𑀲𑀼𑀥𑀫𑁆𑀫𑀤𑁂𑀯𑀲𑀪𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀤𑁂𑀯𑀘𑁆𑀙𑀭𑀸𑀧𑀭𑀺𑀯𑀸𑀭𑀁 𑀅𑀢𑀺𑀫𑀦𑁄𑀳𑀭𑀁 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀦𑀸𑀕𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲 𑀤𑀼𑀮𑁆𑀮𑀪𑀁, 𑀓𑀼𑀢𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀦𑀸𑀕𑀢𑁆𑀢𑀪𑀸𑀯𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 ‘‘𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀢𑁆𑀯𑀸 𑀲𑀻𑀮𑀫𑁂𑀯 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺, 𑀢𑀁 𑀩𑁄𑀥𑀺𑀧𑀭𑀺𑀧𑀸𑀘𑀦𑀁 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀆𑀳 𑁋 ‘‘𑀅𑀫𑁆𑀫𑀢𑀸𑀢𑀸, 𑀅𑀳𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀳𑀺 ‘‘𑀇𑀥𑁂𑀯 𑀉𑀧𑁄𑀲𑀣𑀁 𑀉𑀧𑀯𑀲𑀸𑀳𑀺, 𑀩𑀳𑀺𑀕𑀢𑀸𑀦𑀁 𑀦𑀸𑀕𑀸𑀦𑀁 𑀫𑀳𑀦𑁆𑀢𑀁 𑀪𑀬’’𑀦𑁆𑀢𑀺 ¶ 𑀯𑀼𑀢𑁆𑀢𑁂 𑀏𑀓𑀯𑀸𑀭𑀁 𑀢𑀣𑀸 𑀓𑀢𑁆𑀯𑀸 𑀦𑀸𑀕𑀓𑀜𑁆𑀜𑀸𑀳𑀺 𑀉𑀧𑀤𑁆𑀤𑀼𑀢𑁄 𑀧𑀼𑀦𑀯𑀸𑀭𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀅𑀳𑀁 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀬𑀫𑀼𑀦𑀸𑀢𑀻𑀭𑁂 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀪𑁄𑀕𑁂 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀸𑀕𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑀸 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀭𑀽𑀧𑀓𑁆𑀔𑁂𑀦 𑀫𑀳𑀸𑀭𑀜𑁆𑀜𑀸, 𑀤𑁂𑀯𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀯𑀺𑀭𑀽𑀧𑀓𑁆𑀔𑁂𑀦 𑀫𑀳𑀸𑀭𑀜𑁆𑀜𑀸𑀢𑀺 𑀯𑀺𑀭𑀽𑀧𑀓𑁆𑀔𑁂𑀦 𑀦𑀸𑀫 𑀦𑀸𑀕𑀸𑀥𑀺𑀧𑀢𑀺𑀫𑀳𑀸𑀭𑀸𑀚𑁂𑀦. 𑀤𑁂𑀯𑀮𑁄𑀓𑀦𑁆𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀁. 𑀅𑀕𑀜𑁆𑀙𑀳𑀦𑁆𑀢𑀺 𑀅𑀕𑀜𑁆𑀙𑀺𑀁, 𑀉𑀧𑀲𑀗𑁆𑀓𑀫𑀺𑀁 𑀅𑀳𑀁.

𑁧𑁨. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂. 𑀧𑀲𑁆𑀲𑀺𑀁 𑀢𑁆𑀯𑀸𑀳𑀦𑁆𑀢𑀺 𑀅𑀤𑁆𑀤𑀓𑁆𑀔𑀺𑀁 𑀅𑀳𑀁 𑀢𑀼-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑁄. 𑀏𑀓𑀦𑁆𑀢𑀁 𑀲𑀼𑀔𑀲𑀫𑀧𑁆𑀧𑀺𑀢𑁂𑀢𑀺 𑀏𑀓𑀦𑁆𑀢𑀁 𑀅𑀘𑁆𑀘𑀦𑁆𑀢𑀫𑁂𑀯 𑀲𑀼𑀔𑁂𑀦 𑀲𑀫𑀗𑁆𑀕𑀻𑀪𑀽𑀢𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀲𑀕𑁆𑀕𑀸. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀁 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁 𑀬𑀸𑀯 𑀲𑀼𑀔𑀸 𑀲𑀕𑁆𑀕𑀸’’𑀢𑀺 ¶ (𑀫. 𑀦𑀺. 𑁩.𑁨𑁫𑁫) 𑀘. 𑀢𑀁𑀲𑀕𑁆𑀕𑀕𑀫𑀦𑀢𑁆𑀣𑀸𑀬𑀸𑀢𑀺 𑀢𑀲𑁆𑀫𑀺𑀁 𑀲𑀕𑁆𑀕𑀲𑁆𑀫𑀺𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀕𑀫𑀦𑀢𑁆𑀣𑀸𑀬. 𑀲𑀻𑀮𑀩𑁆𑀩𑀢𑀦𑁆𑀢𑀺 𑀲𑀻𑀮𑀲𑀗𑁆𑀔𑀸𑀢𑀁 𑀯𑀢𑀁. 𑀅𑀣 𑀯𑀸 𑀲𑀻𑀮𑀩𑁆𑀩𑀢𑀦𑁆𑀢𑀺 𑀉𑀧𑁄𑀲𑀣𑀲𑀻𑀮𑀜𑁆𑀘𑁂𑀯 ‘‘𑀫𑀫 𑀘𑀫𑁆𑀫𑀁 𑀘𑀫𑁆𑀫𑀢𑁆𑀣𑀺𑀓𑀸 𑀳𑀭𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑀧𑀭𑀺𑀘𑁆𑀘𑀸𑀕𑀲𑀫𑀸𑀤𑀺𑀬𑀦𑀲𑀗𑁆𑀔𑀸𑀢𑀁 𑀯𑀢𑀜𑁆𑀘.

𑁧𑁩. 𑀲𑀭𑀻𑀭𑀓𑀺𑀘𑁆𑀘𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁. 𑀪𑀼𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀓𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀩𑁆𑀩𑀺𑀲𑁂𑀯𑀦𑀸𑀦𑀺 𑀓𑀸𑀢𑀼𑀁 𑀲𑀭𑀻𑀭𑀝𑁆𑀞𑀺𑀢𑀺𑀫𑀢𑁆𑀢𑀓𑀁 𑀆𑀳𑀸𑀭𑀁 𑀆𑀳𑀭𑀺𑀢𑁆𑀯𑀸. 𑀘𑀢𑀼𑀭𑁄 𑀅𑀗𑁆𑀕𑁂𑀢𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸. 𑀲𑁂𑀫𑀻𑀢𑀺 𑀲𑀬𑀸𑀫𑀺.

𑁧𑁪. 𑀙𑀯𑀺𑀬𑀸𑀢𑀺𑀆𑀤𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀤𑀲𑁆𑀲𑀦𑀁. 𑀢𑀢𑁆𑀣 𑀘 𑀙𑀯𑀺𑀘𑀫𑁆𑀫𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀁 𑀅𑀗𑁆𑀕𑀁, 𑀲𑁂𑀲𑀸𑀦𑀺 𑀏𑀓𑁂𑀓𑀫𑁂𑀯, 𑀫𑀁𑀲𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀭𑀼𑀥𑀺𑀭𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀦𑀸𑀢𑀺 𑀏𑀢𑁂𑀳𑀺 ¶ . 𑀳𑀭𑀸𑀢𑀼 𑀲𑁄𑀢𑀺 𑀬𑀲𑁆𑀲 𑀏𑀢𑁂𑀳𑀺 𑀙𑀯𑀺𑀆𑀤𑀻𑀳𑀺 𑀓𑀭𑀡𑀻𑀬𑀁 𑀅𑀢𑁆𑀣𑀺, 𑀢𑀲𑁆𑀲 𑀫𑀬𑀸 𑀤𑀺𑀦𑁆𑀦𑀫𑁂𑀯𑁂𑀢𑀁. 𑀲𑀩𑁆𑀩𑀁 𑀲𑁄 𑀳𑀭𑀢𑀽𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁂 𑀅𑀦𑀧𑁂𑀓𑁆𑀔𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀺.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀤𑀻𑀖𑁄 𑀅𑀤𑁆𑀥𑀸 𑀯𑀻𑀢𑀺𑀯𑀢𑁆𑀢𑁄. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑁄 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀲𑁄𑀫𑀤𑀢𑁆𑀢𑁂𑀦 𑀦𑀸𑀫 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀦 𑀲𑀳 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀬𑁂 𑀦𑀸𑀕𑀓𑀜𑁆𑀜𑀸𑀳𑀺 𑀧𑀭𑀺𑀯𑀸𑀭𑀺𑀬𑀫𑀸𑀦𑀁 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀸𑀯𑀤𑁂𑀯 𑀦𑀸𑀕𑀓𑀜𑁆𑀜𑀸𑀬𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀕𑀢𑀸. 𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑁄 𑀦𑀼 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀤𑁂𑀯𑁄 𑀯𑀸 𑀬𑀓𑁆𑀔𑁄 𑀯𑀸 𑀦𑀸𑀕𑁄 𑀯𑀸’’𑀢𑀺? 𑀩𑁄𑀥𑀺𑀲𑀢𑁆𑀢𑁄 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺 𑀓𑀢𑁆𑀯𑀸 𑀲𑀘𑀸𑀬𑀁 𑀇𑀢𑁄 𑀕𑀘𑁆𑀙𑁂𑀬𑁆𑀬, 𑀇𑀥 𑀫𑁂 𑀯𑀸𑀲𑀁 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑀁 𑀓𑀭𑁂𑀬𑁆𑀬, 𑀢𑁂𑀦 𑀫𑁂 𑀉𑀧𑁄𑀲𑀣𑀯𑀸𑀲𑀲𑁆𑀲 𑀅𑀦𑁆𑀢𑀭𑀸𑀬𑁄𑀧𑀺 𑀲𑀺𑀬𑀸. 𑀬𑀁𑀦𑀽𑀦𑀸𑀳𑀁 𑀇𑀢𑁄 𑀇𑀫𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀫𑀳𑀢𑀺𑀬𑀸 𑀲𑀫𑁆𑀧𑀢𑁆𑀢𑀺𑀬𑀸 𑀬𑁄𑀚𑁂𑀬𑁆𑀬𑀁. 𑀏𑀯𑀸𑀬𑀁 𑀢𑀢𑁆𑀣𑁂𑀯 𑀅𑀪𑀺𑀭𑀫𑀺𑀲𑁆𑀲𑀢𑀺, 𑀢𑁂𑀦 𑀫𑁂 𑀉𑀧𑁄𑀲𑀣𑀓𑀫𑁆𑀫𑀁 𑀅𑀤𑁆𑀥𑀦𑀺𑀬𑀁 𑀲𑀺𑀬𑀸𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀩𑁆𑀭𑀸𑀳𑁆𑀫𑀡, 𑀫𑀳𑀦𑁆𑀢𑀁 𑀢𑁂 𑀬𑀲𑀁 𑀤𑀲𑁆𑀲𑀸𑀫𑀺, 𑀭𑀫𑀡𑀻𑀬𑀁 𑀦𑀸𑀕𑀪𑀯𑀦𑀁, 𑀏𑀳𑀺 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. 𑀲𑀸𑀫𑀺, 𑀧𑀼𑀢𑁆𑀢𑁄 𑀫𑁂 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀆𑀕𑀘𑁆𑀙𑀦𑁆𑀢𑁂 𑀆𑀕𑀫𑀺𑀲𑁆𑀲𑀸𑀫𑀻𑀢𑀺. 𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑀁 𑀆𑀦𑁂𑀳𑀻𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀆𑀦𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀢𑁂 𑀉𑀪𑁄𑀧𑀺 𑀆𑀤𑀸𑀬 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀸𑀕𑀪𑀯𑀦𑀁 ¶ 𑀆𑀦𑁂𑀲𑀺. 𑀢𑁂𑀲𑀁 𑀢𑀢𑁆𑀣 𑀤𑀺𑀩𑁆𑀩𑁄 𑀅𑀢𑁆𑀢𑀪𑀸𑀯𑁄 𑀧𑀸𑀢𑀼𑀪𑀯𑀺. 𑀅𑀣 𑀢𑁂𑀲𑀁 𑀫𑀳𑀸𑀲𑀢𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀤𑀢𑁆𑀯𑀸 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀦𑀸𑀕𑀓𑀜𑁆𑀜𑀸𑀲𑀢𑀸𑀦𑀺 𑀅𑀤𑀸𑀲𑀺. 𑀢𑁂 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑁆𑀧𑀫𑀢𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀦𑁆𑀯𑀤𑁆𑀥𑀫𑀸𑀲𑀁 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀢𑀢𑁄 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂𑀦 𑀢𑁂 𑀅𑀢𑁆𑀣𑁄, 𑀢𑀁 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁄 𑀅𑀪𑀺𑀭𑀫𑀸’’𑀢𑀺 𑀯𑀢𑁆𑀯𑀸 𑀲𑁄𑀫𑀤𑀢𑁆𑀢𑁂𑀦𑀧𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀁𑀯𑀘𑁆𑀙𑀭𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀫𑀦𑁆𑀤𑀧𑀼𑀜𑁆𑀜𑀢𑀸𑀬 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀫𑁆𑀧𑀺 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀤𑀻𑀬𑀫𑀸𑀦𑀁 𑀩𑀳𑀼𑀁 𑀥𑀦𑀁 𑀲𑀩𑁆𑀩𑀓𑀸𑀫𑀤𑀤𑀁 𑀫𑀡𑀺𑀭𑀢𑀦𑀫𑁆𑀧𑀺 𑀅𑀮𑀓𑁆𑀔𑀺𑀓𑀢𑀸𑀬 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀦𑀸𑀕𑀫𑀸𑀡𑀯𑀓𑁂 𑀆𑀡𑀸𑀧𑁂𑀢𑁆𑀯𑀸 𑀢𑀁 𑀲𑀧𑀼𑀢𑁆𑀢𑀓𑀁 𑀫𑀦𑀼𑀲𑁆𑀲𑀮𑁄𑀓𑀁 𑀧𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀤𑀺𑀩𑁆𑀩𑀸𑀪𑀭𑀡𑀸𑀦𑀺 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀘 𑀑𑀫𑀼𑀜𑁆𑀘𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 ¶ 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀁𑀲𑀼, 𑀢𑀲𑁆𑀫𑀺𑀁 𑀔𑀡𑁂 𑀢𑀸𑀦𑀺 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀅𑀕𑀫𑀁𑀲𑀼. 𑀅𑀣 𑀧𑀞𑀫𑀦𑀺𑀯𑀢𑁆𑀣𑀓𑀸𑀲𑀸𑀯𑀧𑀺𑀮𑁄𑀢𑀺𑀓𑀸𑀯 𑀲𑀭𑀻𑀭𑁂 𑀧𑀝𑀺𑀫𑀼𑀜𑁆𑀘𑀺, 𑀥𑀦𑀼𑀲𑀭𑀲𑀢𑁆𑀢𑀺𑀬𑁄 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀧𑀼𑀭𑀺𑀫𑀦𑀺𑀬𑀸𑀫𑁂𑀦𑁂𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀼𑀁.

𑀢𑁂𑀦 ¶ 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀲𑀼𑀧𑀡𑁆𑀡𑀭𑀸𑀚𑀢𑁄 𑀮𑀤𑁆𑀥𑀁 𑀅𑀮𑀫𑁆𑀧𑀸𑀬𑀦𑀫𑀦𑁆𑀢𑀁 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀑𑀲𑀥𑀸𑀦𑀺 𑀫𑀦𑁆𑀢𑀽𑀧𑀘𑀸𑀭𑀜𑁆𑀘 𑀅𑀢𑁆𑀢𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑀲𑁆𑀲 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀺. 𑀲𑁄 ‘‘𑀮𑀤𑁆𑀥𑁄 𑀫𑁂 𑀚𑀻𑀯𑀺𑀓𑀽𑀧𑀸𑀬𑁄’’𑀢𑀺 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀢𑀸𑀧𑀲𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀬𑀫𑀼𑀦𑀸𑀢𑀻𑀭𑀁 𑀧𑀢𑁆𑀯𑀸 𑀢𑀁 𑀫𑀦𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 𑀫𑀳𑀸𑀫𑀕𑁆𑀕𑁂𑀦 𑀕𑀘𑁆𑀙𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀯𑀦𑀢𑁄 𑀢𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀦𑀸𑀕𑀫𑀸𑀡𑀯𑀺𑀓𑀸 𑀢𑀁 𑀲𑀩𑁆𑀩𑀓𑀸𑀫𑀤𑀤𑀁 𑀫𑀡𑀺𑀭𑀢𑀦𑀁 𑀆𑀤𑀸𑀬 𑀬𑀫𑀼𑀦𑀸𑀢𑀻𑀭𑁂 𑀯𑀸𑀮𑀼𑀓𑀸𑀭𑀸𑀲𑀺𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲𑁄𑀪𑀸𑀲𑁂𑀦 𑀭𑀢𑁆𑀢𑀺𑀬𑀁 𑀓𑀻𑀴𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀦𑁆𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀲𑀼𑀧𑀡𑁆𑀡𑁄’’𑀢𑀺 𑀲𑀜𑁆𑀜𑀸𑀬 𑀪𑀬𑀢𑀚𑁆𑀚𑀺𑀢𑀸 𑀫𑀡𑀺𑀭𑀢𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀅𑀕𑀫𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑀢𑀁 𑀫𑀡𑀺𑀭𑀢𑀦𑀁 𑀆𑀤𑀸𑀬 𑀧𑀸𑀬𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀺𑀕𑀯𑀥𑀸𑀬 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑁄 𑀢𑀲𑁆𑀲 𑀳𑀢𑁆𑀣𑁂 ¶ 𑀢𑀁 𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀪𑀽𑀭𑀺𑀤𑀢𑁆𑀢𑀲𑁆𑀲 𑀲𑀩𑁆𑀩𑀓𑀸𑀫𑀤𑀤𑀁 𑀫𑀡𑀺𑀭𑀢𑀦’’𑀦𑁆𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 𑀢𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀢𑁂𑀦 𑀲𑀤𑁆𑀥𑀺𑀁 𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑀁 𑀓𑀢𑁆𑀯𑀸 𑀫𑀦𑁆𑀢𑀯𑀸𑀤𑀺𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀘𑁂 𑀫𑁂 𑀢𑁆𑀯𑀁 𑀇𑀫𑀁 𑀫𑀡𑀺𑀭𑀢𑀦𑀁 𑀤𑀲𑁆𑀲𑀲𑀺, 𑀏𑀯𑀸𑀳𑀁 𑀢𑁂 𑀫𑀳𑀸𑀦𑀼𑀪𑀸𑀯𑀁 𑀦𑀸𑀕𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀬𑀁 𑀢𑁆𑀯𑀁 𑀕𑀳𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘𑀭𑀦𑁆𑀢𑁄 𑀩𑀳𑀼𑀥𑀦𑀁 𑀮𑀘𑁆𑀙𑀲𑀻’’𑀢𑀺. ‘‘𑀢𑁂𑀦 𑀳𑀺 𑀤𑀲𑁆𑀲𑁂𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀁 𑀉𑀧𑁄𑀲𑀣𑀓𑀭𑀡𑀝𑁆𑀞𑀸𑀦𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀪𑁄𑀕𑁂 𑀆𑀪𑀼𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑀁 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀫𑀳𑀸𑀲𑀢𑁆𑀢𑁄 𑀢𑀁 𑀦𑁂𑀲𑀸𑀤𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀧𑁄𑀲𑀣𑀲𑁆𑀲 𑀫𑁂 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀸𑀢𑀺 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑀺𑀢𑁄𑀧𑀺 𑀦 𑀇𑀘𑁆𑀙𑀺. 𑀢𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸 𑀲𑀬𑀁 𑀕𑀦𑁆𑀢𑀼𑀓𑀸𑀫𑁄 𑀫𑀬𑀸 𑀤𑀻𑀬𑀫𑀸𑀦𑀫𑁆𑀧𑀺 𑀫𑀡𑀺𑀭𑀢𑀦𑀁 𑀕𑀡𑁆𑀳𑀺𑀢𑀼𑀁 𑀦 𑀇𑀘𑁆𑀙𑀺. 𑀇𑀤𑀸𑀦𑀺 𑀧𑀦 𑀅𑀳𑀺𑀕𑀼𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀲𑀘𑀸𑀳𑀁 ¶ 𑀇𑀫𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑁄 𑀓𑀼𑀚𑁆𑀛𑁂𑀬𑁆𑀬𑀁, 𑀲𑀻𑀮𑀁 𑀫𑁂 𑀔𑀡𑁆𑀟𑀁 𑀪𑀯𑀺𑀲𑁆𑀲𑀢𑀺. 𑀫𑀬𑀸 𑀔𑁄 𑀧𑀦 𑀧𑀞𑀫𑀁𑀬𑁂𑀯 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀉𑀧𑁄𑀲𑀣𑁄 𑀅𑀥𑀺𑀝𑁆𑀞𑀺𑀢𑁄, 𑀲𑁄 𑀬𑀣𑀸𑀥𑀺𑀝𑁆𑀞𑀺𑀢𑁄𑀯 𑀳𑁄𑀢𑀼. 𑀅𑀮𑀫𑁆𑀧𑀸𑀬𑀦𑁄 𑀫𑀁 𑀙𑀺𑀦𑁆𑀤𑀢𑀼 𑀯𑀸 𑀫𑀸 𑀯𑀸, 𑀦𑁂𑀯𑀲𑁆𑀲 𑀓𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀪𑁄𑀕𑀦𑁆𑀢𑀭𑁂 𑀲𑀻𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄𑀧𑀺 ‘‘𑀪𑁄 𑀅𑀮𑀫𑁆𑀧𑀸𑀬𑀦, 𑀇𑀫𑀁 𑀦𑀸𑀕𑀁 𑀕𑀡𑁆𑀳, 𑀫𑀡𑀺𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀅𑀮𑀫𑁆𑀧𑀸𑀬𑀦𑁄 𑀦𑀸𑀕𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀫𑀡𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀅𑀕𑀡𑁂𑀢𑁆𑀯𑀸 ‘‘𑀕𑀡𑁆𑀳, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀳𑀢𑁆𑀣𑁂 𑀔𑀺𑀧𑀺. 𑀲𑁄 𑀢𑀲𑁆𑀲 𑀳𑀢𑁆𑀣𑀢𑁄 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀢𑀫𑀢𑁆𑀢𑁄𑀯 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀕𑀢𑁄. 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀫𑀡𑀺𑀭𑀢𑀦𑀢𑁄 𑀪𑀽𑀭𑀺𑀤𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀢𑁄 𑀘 𑀧𑀭𑀺𑀳𑀸𑀬𑀺𑀢𑁆𑀯𑀸 𑀦𑀺𑀧𑁆𑀧𑀘𑁆𑀘𑀬𑁄𑀯 𑀧𑀓𑁆𑀓𑀦𑁆𑀢𑁄.

𑁧𑁫. 𑀅𑀮𑀫𑁆𑀧𑀸𑀬𑀦𑁄𑀧𑀺 𑀫𑀳𑀸𑀦𑀼𑀪𑀸𑀯𑁂𑀳𑀺 𑀑𑀲𑀥𑁂𑀳𑀺 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀫𑀓𑁆𑀔𑁂𑀢𑁆𑀯𑀸 𑀣𑁄𑀓𑀁 𑀔𑀸𑀤𑀺𑀢𑁆𑀯𑀸 𑀔𑁂𑀴𑀁 ¶ 𑀅𑀢𑁆𑀢𑀦𑁄 𑀓𑀸𑀬𑀲𑁆𑀫𑀺𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀤𑀺𑀩𑁆𑀩𑀫𑀦𑁆𑀢𑀁 𑀚𑀧𑁆𑀧𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀲𑀻𑀲𑁂 𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑁄 𑀫𑀼𑀔𑀫𑀲𑁆𑀲 𑀯𑀺𑀯𑀭𑀺𑀢𑁆𑀯𑀸 𑀑𑀲𑀥𑀁 𑀔𑀸𑀤𑀺𑀢𑁆𑀯𑀸 𑀫𑀼𑀔𑁂 𑀲𑀳𑀔𑁂𑀴𑀁 𑀑𑀲𑀺𑀜𑁆𑀘𑀺. 𑀲𑀼𑀘𑀺𑀚𑀸𑀢𑀺𑀓𑁄 𑀫𑀳𑀸𑀲𑀢𑁆𑀢𑁄 𑀲𑀻𑀮𑀪𑁂𑀤𑀪𑀬𑁂𑀦 𑀅𑀓𑀼𑀚𑁆𑀛𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦 𑀉𑀫𑁆𑀫𑀻𑀮𑁂𑀲𑀺. 𑀅𑀣 𑀦𑀁 𑀑𑀲𑀥𑀫𑀦𑁆𑀢𑀩𑀮𑁂𑀦 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀲𑀻𑀲𑀁 𑀓𑀢𑁆𑀯𑀸 𑀲𑀜𑁆𑀘𑀸𑀮𑁂𑀢𑁆𑀯𑀸 𑀕𑀳𑀺𑀢𑀕𑁄𑀘𑀭𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀪𑀽𑀫𑀺𑀬𑀁 𑀤𑀻𑀖𑀲𑁄 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ¶ 𑀫𑀲𑀽𑀭𑀓𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀳𑀢𑁆𑀣𑁂𑀳𑀺 𑀧𑀭𑀺𑀫𑀤𑁆𑀤𑀺. 𑀅𑀝𑁆𑀞𑀻𑀦𑀺 𑀘𑀼𑀡𑁆𑀡𑀺𑀬𑀫𑀸𑀦𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁.

𑀧𑀼𑀦 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀤𑀼𑀲𑁆𑀲𑀁 𑀧𑁄𑀣𑁂𑀦𑁆𑀢𑁄 𑀯𑀺𑀬 𑀧𑁄𑀣𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀏𑀯𑀭𑀽𑀧𑀁 ¶ 𑀤𑀼𑀓𑁆𑀔𑀁 𑀅𑀦𑀼𑀪𑁄𑀦𑁆𑀢𑁄𑀧𑀺 𑀦𑁂𑀯 𑀓𑀼𑀚𑁆𑀛𑀺𑀢𑁆𑀣. 𑀅𑀜𑁆𑀜𑀤𑀢𑁆𑀣𑀼 𑀅𑀢𑁆𑀢𑀦𑁄 𑀲𑀻𑀮𑀫𑁂𑀯 𑀆𑀯𑀚𑁆𑀚𑁂𑀲𑀺. 𑀇𑀢𑀺 𑀲𑁄 𑀫𑀳𑀸𑀲𑀢𑁆𑀢𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀯𑀮𑁆𑀮𑀻𑀳𑀺 𑀧𑁂𑀴𑀁 𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀢𑀢𑁆𑀣 𑀧𑀓𑁆𑀔𑀺𑀧𑀺. 𑀲𑀭𑀻𑀭𑀁 𑀧𑀦𑀲𑁆𑀲 𑀫𑀳𑀦𑁆𑀢𑀁 𑀢𑀢𑁆𑀣 𑀦 𑀧𑀯𑀺𑀲𑀢𑀺. 𑀅𑀣 𑀦𑀁 𑀧𑀡𑁆𑀳𑀺𑀬𑀸 𑀓𑁄𑀝𑁆𑀝𑁂𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑁂𑀴𑀁 𑀆𑀤𑀸𑀬 𑀏𑀓𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀑𑀢𑀸𑀭𑁂𑀢𑁆𑀯𑀸 ‘‘𑀦𑀸𑀕𑀲𑁆𑀲 𑀦𑀘𑁆𑀘𑀁 𑀤𑀝𑁆𑀞𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀅𑀮𑀫𑁆𑀧𑀸𑀬𑀦𑁄 ‘‘𑀦𑀺𑀓𑁆𑀔𑀫 𑀫𑀳𑀸𑀦𑀸𑀕𑀸’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀫𑀬𑀸 𑀧𑀭𑀺𑀲𑀁 𑀢𑁄𑀲𑁂𑀦𑁆𑀢𑁂𑀦 𑀓𑀻𑀴𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀅𑀮𑀫𑁆𑀧𑀸𑀬𑀦𑁄 𑀩𑀳𑀼𑀥𑀦𑀁 𑀮𑀪𑀺𑀢𑁆𑀯𑀸 𑀢𑀼𑀝𑁆𑀞𑁄 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀬𑀁 𑀬𑀁 𑀏𑀲 𑀫𑀁 𑀓𑀸𑀭𑁂𑀢𑀺, 𑀢𑀁 𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀦𑀁 𑀲𑁄 𑀧𑁂𑀴𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 ‘‘𑀫𑀳𑀸 𑀳𑁄𑀳𑀻’’𑀢𑀺 𑀆𑀳, 𑀲𑁄 𑀫𑀳𑀸 𑀅𑀳𑁄𑀲𑀺. ‘‘𑀔𑀼𑀤𑁆𑀤𑀓𑁄 𑀯𑀝𑁆𑀝𑁄 𑀯𑀺𑀨𑀡𑁄 𑀏𑀓𑀨𑀡𑁄 𑀤𑁆𑀯𑀺𑀨𑀡𑁄 𑀬𑀸𑀯 𑀲𑀳𑀲𑁆𑀲𑀨𑀡𑁄 𑀉𑀘𑁆𑀘𑁄 𑀦𑀻𑀘𑁄 𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀤𑀺𑀲𑁆𑀲𑀫𑀸𑀦𑀉𑀧𑀟𑁆𑀠𑀓𑀸𑀬𑁄 𑀦𑀻𑀮𑁄 𑀧𑀻𑀢𑁄 𑀮𑁄𑀳𑀺𑀢𑁄 𑀑𑀤𑀸𑀢𑁄 𑀫𑀜𑁆𑀚𑀺𑀝𑁆𑀞𑁄 𑀳𑁄𑀳𑀺, 𑀥𑀽𑀫𑀁 𑀯𑀺𑀲𑁆𑀲𑀚𑁆𑀚𑁂𑀳𑀺, 𑀚𑀸𑀮𑀲𑀺𑀔𑀁 𑀉𑀤𑀓𑀜𑁆𑀘 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀯𑀼𑀢𑁆𑀢𑀁 𑀢𑀁 𑀢𑀁 𑀆𑀓𑀸𑀭𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀘𑁆𑀘𑀁 𑀤𑀲𑁆𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀩𑀳𑀼𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀁 𑀅𑀤𑀁𑀲𑀼. 𑀇𑀢𑀺 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀢𑀲𑀳𑀲𑁆𑀲𑀫𑀢𑁆𑀢𑀁 𑀮𑀪𑀺. 𑀲𑁄 𑀓𑀺𑀜𑁆𑀘𑀸𑀧𑀺 𑀫𑀳𑀸𑀲𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 ‘‘𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀧𑀦 𑀥𑀦𑀁 𑀮𑀪𑀺𑀢𑁆𑀯𑀸 ‘‘𑀕𑀸𑀫𑀓𑁂𑀧𑀺 𑀢𑀸𑀯 𑀫𑀬𑀸 𑀏𑀢𑁆𑀢𑀓𑀁 𑀥𑀦𑀁 𑀮𑀤𑁆𑀥𑀁, 𑀦𑀕𑀭𑁂 𑀓𑀺𑀭 𑀩𑀳𑀼𑀥𑀦𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀥𑀦𑀮𑁄𑀪𑁂𑀦 𑀦 𑀫𑀼𑀜𑁆𑀘𑀺.

𑀲𑁄 𑀢𑀲𑁆𑀫𑀺𑀁 𑀕𑀸𑀫𑁂 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀭𑀢𑀦𑀫𑀬𑀁 𑀧𑁂𑀴𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀫𑀳𑀸𑀲𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀔𑀬𑀸𑀦𑀓𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 ¶ 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀢𑀁 𑀓𑀻𑀴𑀸𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺, 𑀦𑀸𑀕𑀭𑀸𑀚𑀲𑁆𑀲 𑀫𑀥𑀼𑀮𑀸𑀚𑀁 𑀤𑁂𑀢𑀺, 𑀅𑀩𑀤𑁆𑀥𑀲𑀢𑁆𑀢𑀼𑀜𑁆𑀘 𑀤𑁂𑀢𑀺. 𑀲𑁄 𑀕𑁄𑀘𑀭𑀁 𑀦 𑀕𑀡𑁆𑀳𑀺 𑀅𑀯𑀺𑀲𑁆𑀲𑀚𑁆𑀚𑀦𑀪𑀬𑁂𑀦. 𑀕𑁄𑀘𑀭𑀁 𑀅𑀕𑀡𑁆𑀳𑀦𑁆𑀢𑀫𑁆𑀧𑀺 𑀘 𑀦𑀁 𑀘𑀢𑁆𑀢𑀸𑀭𑁄 𑀦𑀕𑀭𑀤𑁆𑀯𑀸𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀫𑀸𑀲𑀫𑀢𑁆𑀢𑀁 𑀓𑀻𑀴𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀁𑀲𑀺𑀢𑁄 𑀅𑀓𑀢𑀜𑁆𑀜𑀼𑀦𑀸’’𑀢𑀺𑀆𑀤𑀺.

𑀢𑀢𑁆𑀣 ¶ ¶ 𑀲𑀁𑀲𑀺𑀢𑁄𑀢𑀺 𑀏𑀲𑁄 𑀦𑀸𑀕𑁄 𑀅𑀫𑀼𑀓𑀲𑁆𑀲 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀲𑀬𑀺𑀢𑁄𑀢𑀺 𑀏𑀯𑀁 𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑀺𑀢𑁄. 𑀅𑀓𑀢𑀜𑁆𑀜𑀼𑀦𑀸𑀢𑀺 𑀅𑀢𑁆𑀢𑀦𑀸 𑀓𑀢𑀁 𑀉𑀧𑀓𑀸𑀭𑀁 𑀅𑀚𑀸𑀦𑀦𑁆𑀢𑁂𑀦 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑀸 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀮𑀫𑁆𑀧𑀸𑀬𑀦𑁄𑀢𑀺 𑀅𑀮𑀫𑁆𑀧𑀸𑀬𑀦𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑁂𑀦 ‘‘𑀅𑀮𑀫𑁆𑀧𑀸𑀬𑀦𑁄’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑁄 𑀅𑀳𑀺𑀢𑀼𑀡𑁆𑀟𑀺𑀓𑀩𑁆𑀭𑀸𑀳𑁆𑀫𑀡𑁄. 𑀫𑀫𑀕𑁆𑀕𑀳𑀻𑀢𑀺 𑀫𑀁 𑀅𑀕𑁆𑀕𑀳𑁂𑀲𑀺. 𑀓𑀻𑀴𑁂𑀢𑀺 𑀫𑀁 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀅𑀢𑁆𑀢𑀦𑁄 𑀚𑀻𑀯𑀺𑀓𑀢𑁆𑀣𑀁 𑀫𑀁 𑀓𑀻𑀴𑀸𑀧𑁂𑀢𑀺.

𑁧𑁭. 𑀢𑀺𑀡𑀢𑁄𑀧𑀺 𑀮𑀳𑀼𑀓𑁄 𑀫𑀫𑀸𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀢𑀺𑀡𑀲𑀮𑀸𑀓𑀧𑀭𑀺𑀘𑁆𑀘𑀸𑀕𑀢𑁄𑀧𑀺 𑀮𑀳𑀼𑀓𑁄 𑀳𑀼𑀢𑁆𑀯𑀸 𑀫𑀫 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀣𑀯𑀻𑀉𑀧𑁆𑀧𑀢𑀦𑀁 𑀯𑀺𑀬𑀸𑀢𑀺 𑀲𑀻𑀮𑀯𑀻𑀢𑀺𑀓𑁆𑀓𑀫𑁄 𑀧𑀦 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸𑀬 𑀫𑀳𑀸𑀧𑀣𑀯𑀺𑀬𑀸 𑀧𑀭𑀺𑀯𑀢𑁆𑀢𑀦𑀁 𑀯𑀺𑀬 𑀢𑀢𑁄𑀧𑀺 𑀢𑀁 𑀪𑀸𑀭𑀺𑀬𑀢𑀭𑀁 𑀳𑀼𑀢𑁆𑀯𑀸 𑀫𑀬𑁆𑀳𑀁 𑀉𑀧𑀝𑁆𑀞𑀸𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁮. 𑀦𑀺𑀭𑀦𑁆𑀢𑀭𑀁 𑀚𑀸𑀢𑀺𑀲𑀢𑀦𑁆𑀢𑀺 𑀫𑀫 𑀚𑀸𑀢𑀻𑀦𑀁 𑀅𑀦𑁂𑀓𑀲𑀢𑀫𑁆𑀧𑀺 𑀅𑀦𑁂𑀓𑀲𑀢𑀸𑀲𑀼𑀧𑀺 𑀚𑀸𑀢𑀻𑀲𑀼 𑀦𑀺𑀭𑀦𑁆𑀢𑀭𑀫𑁂𑀯 𑀲𑀻𑀮𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀦𑀳𑁂𑀢𑀼. 𑀫𑀫 𑀚𑀻𑀯𑀺𑀢𑀁 𑀘𑀚𑁂𑀬𑁆𑀬𑀁 𑀘𑀚𑀺𑀢𑀼𑀁 𑀲𑀓𑁆𑀓𑁄𑀫𑀺. 𑀦𑁂𑀯 𑀲𑀻𑀮𑀁 𑀧𑀪𑀺𑀦𑁆𑀤𑁂𑀬𑁆𑀬𑀦𑁆𑀢𑀺 𑀲𑀻𑀮𑀁 𑀧𑀦 𑀲𑀫𑀸𑀤𑀺𑀦𑁆𑀦𑀁 𑀏𑀓𑀫𑁆𑀧𑀺 𑀦𑁂𑀯 𑀪𑀺𑀦𑁆𑀤𑁂𑀬𑁆𑀬𑀁 𑀦 𑀯𑀺𑀦𑀸𑀲𑁂𑀬𑁆𑀬𑀁. 𑀘𑀢𑀼𑀤𑁆𑀤𑀻𑀧𑀸𑀦 𑀳𑁂𑀢𑀽𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑀺𑀭𑀺𑀬𑀸𑀧𑀺 𑀓𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁯. 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀤𑀸 𑀲𑀻𑀮𑀫𑁂𑀯 𑀭𑀓𑁆𑀔𑀺𑀢𑀁, 𑀢𑀸𑀬 𑀘 𑀲𑀻𑀮𑀭𑀓𑁆𑀔𑀸𑀬 𑀢𑀣𑀸 𑀅𑀦𑀢𑁆𑀣𑀓𑀸𑀭𑀓𑁂𑀲𑀼 𑀦𑁂𑀲𑀸𑀤𑀅𑀮𑀫𑁆𑀧𑀸𑀬𑀦𑀩𑁆𑀭𑀸𑀳𑁆𑀫𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 ¶ 𑀦 𑀓𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀏𑀯𑀁 𑀧𑀦 𑀫𑀳𑀸𑀲𑀢𑁆𑀢𑁂 𑀅𑀳𑀺𑀢𑀼𑀡𑁆𑀟𑀺𑀓𑀳𑀢𑁆𑀣𑀕𑀢𑁂 𑀢𑀲𑁆𑀲 𑀫𑀸𑀢𑀸 𑀤𑀼𑀲𑁆𑀲𑀼𑀧𑀺𑀦𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀜𑁆𑀘 𑀢𑀢𑁆𑀣 𑀅𑀧𑀲𑁆𑀲𑀦𑁆𑀢𑀻 𑀲𑁄𑀓𑀸𑀪𑀺𑀪𑀽𑀢𑀸 𑀅𑀳𑁄𑀲𑀺. 𑀅𑀣𑀲𑁆𑀲𑀸 𑀚𑁂𑀝𑁆𑀞𑀧𑀼𑀢𑁆𑀢𑁄 𑀲𑀼𑀤𑀲𑁆𑀲𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀼𑀪𑁄𑀕𑀁 ‘‘𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀼 𑀫𑀳𑀸𑀦𑀤𑀻𑀲𑀼 𑀲𑀢𑁆𑀢𑀲𑀼 𑀫𑀳𑀸𑀲𑀭𑁂𑀲𑀼 𑀪𑀽𑀭𑀺𑀤𑀢𑁆𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀏𑀳𑀻’’𑀢𑀺 𑀧𑀳𑀺𑀡𑀺. 𑀓𑀸𑀡𑀸𑀭𑀺𑀝𑁆𑀞𑀁 ‘‘𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀤𑁂𑀯𑀢𑀸𑀳𑀺 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸𑀳𑀺 𑀪𑀽𑀭𑀺𑀤𑀢𑁆𑀢𑁄 𑀢𑀢𑁆𑀣 𑀦𑀻𑀢𑁄, 𑀢𑀢𑁄 𑀦𑀁 𑀆𑀦𑁂𑀳𑀻’’𑀢𑀺 𑀧𑀳𑀺𑀡𑀺. 𑀲𑀬𑀁 𑀧𑀦 ‘‘𑀫𑀦𑀼𑀲𑁆𑀲𑀮𑁄𑀓𑁂 𑀕𑀯𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀧𑀲𑀯𑁂𑀲𑁂𑀦 𑀦𑀸𑀕𑀪𑀯𑀦𑀢𑁄 ¶ 𑀦𑀺𑀓𑁆𑀔𑀫𑀺. 𑀅𑀘𑁆𑀘𑀺𑀫𑀼𑀔𑀻 𑀦𑀸𑀫𑀲𑁆𑀲 𑀯𑁂𑀫𑀸𑀢𑀺𑀓𑀸 𑀪𑀕𑀺𑀦𑀻 𑀩𑁄𑀥𑀺𑀲𑀢𑁆𑀢𑁂 𑀅𑀥𑀺𑀫𑀢𑁆𑀢𑀲𑀺𑀦𑁂𑀳𑀸 𑀢𑀁 𑀅𑀦𑀼𑀩𑀦𑁆𑀥𑀺. 𑀢𑀁 𑀫𑀡𑁆𑀟𑀽𑀓𑀘𑁆𑀙𑀸𑀧𑀺𑀁 𑀓𑀢𑁆𑀯𑀸 𑀚𑀝𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀉𑀧𑁄𑀲𑀣𑀓𑀭𑀡𑀝𑁆𑀞𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀕𑀯𑁂𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀢𑀤𑀸 𑀅𑀮𑀫𑁆𑀧𑀸𑀬𑀦𑁄 𑀭𑀸𑀚𑀗𑁆𑀕𑀡𑁂 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀭𑀜𑁆𑀜𑁄 𑀪𑀽𑀭𑀺𑀤𑀢𑁆𑀢𑀲𑁆𑀲 𑀓𑀻𑀴𑀁 𑀤𑀲𑁆𑀲𑁂𑀢𑀼𑀁 𑀧𑁂𑀴𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀏𑀳𑀺 𑀫𑀳𑀸𑀦𑀸𑀕𑀸’’𑀢𑀺 𑀲𑀜𑁆𑀜𑀫𑀤𑀸𑀲𑀺.

𑀫𑀳𑀸𑀲𑀢𑁆𑀢𑁄 ¶ 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀚𑁂𑀝𑁆𑀞𑀪𑀸𑀢𑀺𑀓𑀁 𑀤𑀺𑀲𑁆𑀯𑀸 𑀧𑁂𑀴𑀢𑁄 𑀦𑀺𑀓𑁆𑀔𑀫𑁆𑀫 𑀢𑀤𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀫𑀳𑀸𑀚𑀦𑁄 𑀪𑀻𑀢𑁄 𑀧𑀝𑀺𑀓𑁆𑀓𑀫𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑁂𑀴𑀫𑁂𑀯 𑀧𑀸𑀯𑀺𑀲𑀺. 𑀅𑀮𑀫𑁆𑀧𑀸𑀬𑀦𑁄 ‘‘𑀇𑀫𑀺𑀦𑀸 𑀅𑀬𑀁 𑀢𑀸𑀧𑀲𑁄 𑀤𑀝𑁆𑀞𑁄’’𑀢𑀺 𑀲𑀜𑁆𑀜𑀸𑀬 ‘‘𑀫𑀸 𑀪𑀸𑀬𑀺, 𑀫𑀸 𑀪𑀸𑀬𑀻’’𑀢𑀺 𑀆𑀳. 𑀲𑀼𑀤𑀲𑁆𑀲𑀦𑁄 ‘‘𑀅𑀬𑀁 𑀦𑀸𑀕𑁄 𑀫𑀬𑁆𑀳𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀫𑀬𑀸 𑀲𑀤𑀺𑀲𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀢𑁂𑀦 𑀯𑀸𑀤𑀧𑁆𑀧𑀝𑀺𑀯𑀸𑀤𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀇𑀫𑀁 𑀦𑀸𑀕𑀁 𑀕𑀳𑁂𑀢𑁆𑀯𑀸 𑀕𑀚𑁆𑀚𑀲𑀺, 𑀅𑀳𑀁 𑀢𑀁 𑀇𑀫𑀸𑀬 𑀫𑀡𑁆𑀟𑀽𑀓𑀘𑁆𑀙𑀸𑀧𑀺𑀬𑀸 𑀇𑀘𑁆𑀙𑀦𑁆𑀢𑁄 𑀦𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀺𑀦𑀺𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀸 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀚𑀝𑀦𑁆𑀢𑀭𑁂 𑀦𑀺𑀧𑀦𑁆𑀦𑀸 𑀢𑀺𑀓𑁆𑀔𑀢𑁆𑀢𑀼𑀁 𑀫𑀡𑁆𑀟𑀽𑀓𑀯𑀲𑁆𑀲𑀺𑀢𑀁 𑀯𑀲𑁆𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀁𑀲𑀓𑀽𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑀮𑁂 𑀢𑀻𑀡𑀺 𑀯𑀺𑀲𑀩𑀺𑀦𑁆𑀤𑀽𑀦𑀺 𑀧𑀸𑀢𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀚𑀝𑀦𑁆𑀢𑀭𑀫𑁂𑀯 𑀧𑀸𑀯𑀺𑀲𑀺.

𑀲𑀼𑀤𑀲𑁆𑀲𑀦𑁄 𑀯𑀺𑀲𑀩𑀺𑀦𑁆𑀤𑀼𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀤𑀁 𑀩𑀺𑀦𑁆𑀤𑀼𑀁 𑀲𑀘𑁂 𑀧𑀣𑀯𑀺𑀬𑀁 𑀧𑀸𑀢𑁂𑀲𑁆𑀲𑀢𑀺, 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀬𑁄 𑀲𑀩𑁆𑀩𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀆𑀓𑀸𑀲𑁂 𑀔𑀺𑀧𑀺𑀲𑁆𑀲𑀢𑀺, 𑀲𑀢𑁆𑀢𑀯𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑀺𑀲𑁆𑀲𑀢𑀺. 𑀲𑀘𑁂 𑀉𑀤𑀓𑁂 𑀧𑀸𑀢𑁂𑀲𑁆𑀲𑀢𑀺, 𑀬𑀸𑀯𑀢𑀸 𑀢𑀢𑁆𑀣 𑀉𑀤𑀓𑀚𑀸𑀢𑀸 𑀧𑀸𑀡𑀸 𑀲𑀩𑁆𑀩𑁂 𑀫𑀭𑁂𑀬𑁆𑀬𑀼’’𑀦𑁆𑀢𑀺 ¶ 𑀯𑀢𑁆𑀯𑀸 𑀭𑀸𑀚𑀸𑀦𑀁 𑀲𑀤𑁆𑀤𑀳𑀸𑀧𑁂𑀢𑀼𑀁 𑀢𑀬𑁄 𑀆𑀯𑀸𑀝𑁂 𑀔𑀡𑀸𑀧𑁂𑀢𑁆𑀯𑀸 𑀏𑀓𑀁 𑀦𑀸𑀦𑀸𑀪𑁂𑀲𑀚𑁆𑀚𑀸𑀦𑀁 𑀧𑀽𑀭𑁂𑀲𑀺, 𑀤𑀼𑀢𑀺𑀬𑀁 𑀕𑁄𑀫𑀬𑀲𑁆𑀲, 𑀢𑀢𑀺𑀬𑀁 𑀤𑀺𑀩𑁆𑀩𑁄𑀲𑀥𑀸𑀦𑀜𑁆𑀘𑁂𑀯 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀆𑀯𑀸𑀝𑁂 𑀯𑀺𑀲𑀩𑀺𑀦𑁆𑀤𑀼𑀁 𑀧𑀓𑁆𑀔𑀺𑀧𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀥𑀽𑀫𑀸𑀬𑀺𑀢𑁆𑀯𑀸 𑀚𑀸𑀮𑀸 𑀉𑀝𑁆𑀞𑀳𑀺. 𑀲𑀸 𑀕𑀦𑁆𑀢𑁆𑀯𑀸 𑀕𑁄𑀫𑀬𑀸𑀯𑀸𑀝𑀁 𑀕𑀡𑁆𑀳𑀺. 𑀢𑀢𑁄𑀧𑀺 𑀚𑀸𑀮𑀸 𑀉𑀝𑁆𑀞𑀸𑀬 𑀤𑀺𑀩𑁆𑀩𑁄𑀲𑀥𑀧𑀼𑀡𑁆𑀡𑀁 𑀕𑀳𑁂𑀢𑁆𑀯𑀸 𑀤𑀺𑀩𑁆𑀩𑁄𑀲𑀥𑀸𑀦𑀺 𑀛𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀺. 𑀅𑀮𑀫𑁆𑀧𑀸𑀬𑀦𑀁 𑀢𑀢𑁆𑀣 𑀆𑀯𑀸𑀝𑀲𑁆𑀲 𑀅𑀯𑀺𑀤𑀽𑀭𑁂 𑀞𑀺𑀢𑀁 𑀉𑀲𑀼𑀫𑀸 𑀨𑀭𑀺𑀢𑁆𑀯𑀸 𑀲𑀭𑀻𑀭𑀘𑁆𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀢𑀸. 𑀲𑁂𑀢𑀓𑀼𑀝𑁆𑀞𑀻 𑀅𑀳𑁄𑀲𑀺. 𑀲𑁄 𑀪𑀬𑀢𑀚𑁆𑀚𑀺𑀢𑁄 ‘‘𑀦𑀸𑀕𑀭𑀸𑀚𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀭𑀢𑀦𑀧𑁂𑀴𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 ¶ 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀤𑁂𑀯𑀮𑀻𑀴𑀸𑀬 𑀞𑀺𑀢𑁄. 𑀲𑀼𑀤𑀲𑁆𑀲𑀦𑁄 𑀘 𑀅𑀘𑁆𑀘𑀺𑀫𑀼𑀔𑀻 𑀘 𑀢𑀣𑁂𑀯 𑀅𑀝𑁆𑀞𑀁𑀲𑀼.

𑀢𑀢𑁄 𑀲𑀼𑀤𑀲𑁆𑀲𑀦𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑁂 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀪𑀽𑀭𑀺𑀤𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀢𑀸𑀢, 𑀏𑀯𑀁 𑀫𑀳𑀸𑀦𑀼𑀪𑀸𑀯𑀁 𑀢𑀁 𑀅𑀮𑀫𑁆𑀧𑀸𑀬𑀦𑁄 𑀓𑀣𑀁 𑀕𑀡𑁆𑀳𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀸𑀢𑀼𑀮𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀣 𑀲𑀼𑀤𑀲𑁆𑀲𑀦𑁄 ‘‘𑀫𑀸𑀢𑀼𑀮, 𑀫𑀫 𑀫𑀸𑀢𑀸 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀓𑀺𑀮𑀫𑀢𑀺, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀇𑀥 𑀧𑀧𑀜𑁆𑀘𑀁 𑀓𑀸𑀢𑀼’’𑀦𑁆𑀢𑀺 𑀫𑀸𑀢𑀼𑀮𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀪𑀽𑀭𑀺𑀤𑀢𑁆𑀢𑀅𑀘𑁆𑀘𑀺𑀫𑀼𑀔𑀻𑀳𑀺 𑀲𑀤𑁆𑀥𑀺𑀁 𑀦𑀸𑀕𑀪𑀯𑀦𑀫𑁂𑀯 𑀕𑀢𑁄.

𑀅𑀣 ¶ 𑀢𑀢𑁆𑀣 𑀫𑀳𑀸𑀧𑀼𑀭𑀺𑀲𑁄 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑁄 𑀕𑀺𑀮𑀸𑀦𑀧𑀼𑀘𑁆𑀙𑀦𑀢𑁆𑀣𑀁 𑀆𑀕𑀢𑀸𑀬 𑀫𑀳𑀢𑀺𑀬𑀸 𑀦𑀸𑀕𑀧𑀭𑀺𑀲𑀸𑀬 𑀯𑁂𑀤𑁂 𑀘 𑀬𑀜𑁆𑀜𑁂 𑀘 𑀩𑁆𑀭𑀸𑀳𑁆𑀫𑀡𑁂 𑀘 𑀲𑀫𑁆𑀪𑀸𑀯𑁂𑀢𑁆𑀯𑀸 𑀓𑀸𑀡𑀸𑀭𑀺𑀝𑁆𑀞𑁂 𑀓𑀣𑁂𑀦𑁆𑀢𑁂 𑀢𑀁 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀸𑀦𑀸𑀦𑀬𑁂𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀻𑀮𑀲𑀫𑁆𑀧𑀤𑀸𑀬 ¶ 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀬 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁. 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀤𑀢𑁆𑀢𑁄, 𑀲𑁄𑀫𑀤𑀢𑁆𑀢𑁄 𑀆𑀦𑀦𑁆𑀤𑁄, 𑀅𑀘𑁆𑀘𑀺𑀫𑀼𑀔𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀲𑀼𑀤𑀲𑁆𑀲𑀦𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀼𑀪𑁄𑀕𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀓𑀸𑀡𑀸𑀭𑀺𑀝𑁆𑀞𑁄 𑀲𑀼𑀦𑀓𑁆𑀔𑀢𑁆𑀢𑁄, 𑀪𑀽𑀭𑀺𑀤𑀢𑁆𑀢𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀲𑁂𑀲𑀧𑀸𑀭𑀫𑀺𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀇𑀥𑀸𑀧𑀺 𑀬𑁄𑀚𑀦𑀲𑀢𑀺𑀓𑁂 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀝𑁆𑀞𑀸𑀦𑁂 𑀲𑁄𑀴𑀲𑀳𑀺 𑀦𑀸𑀕𑀓𑀜𑁆𑀜𑀸𑀲𑀳𑀲𑁆𑀲𑁂𑀳𑀺 𑀘𑀺𑀢𑁆𑀢𑀭𑀽𑀧𑀁 𑀯𑀺𑀬 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑁂 𑀦𑀸𑀕𑀮𑁄𑀓𑀺𑀲𑁆𑀲𑀭𑀺𑀬𑁂 𑀞𑀺𑀢𑁄𑀧𑀺 𑀇𑀲𑁆𑀲𑀭𑀺𑀬𑀫𑀤𑀁 𑀅𑀓𑀢𑁆𑀯𑀸 𑀅𑀦𑁆𑀯𑀤𑁆𑀥𑀫𑀸𑀲𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀦𑀁, 𑀲𑀓𑀮𑀸𑀬 𑀦𑀸𑀕𑀧𑀭𑀺𑀲𑀸𑀬 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀸𑀬 𑀢𑀸𑀯𑀢𑀺𑀁𑀲𑀧𑀭𑀺𑀲𑀸𑀬 𑀘 𑀲𑀫𑀼𑀝𑁆𑀞𑀺𑀢𑀧𑀜𑁆𑀳𑀸𑀦𑀁 𑀢𑀁𑀢𑀁𑀧𑀭𑀺𑀲𑀫𑀚𑁆𑀛𑁂 𑀓𑀼𑀫𑀼𑀤𑀦𑀸𑀮𑀓𑀮𑀸𑀧𑀁 𑀯𑀺𑀬 𑀲𑀼𑀦𑀺𑀲𑀺𑀢𑀲𑀢𑁆𑀣𑁂𑀦 𑀅𑀢𑁆𑀢𑀦𑁄 𑀧𑀜𑁆𑀜𑀸𑀲𑀢𑁆𑀣𑁂𑀦 𑀢𑀸𑀯𑀤𑁂𑀯 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀸𑀦𑀼𑀓𑀽𑀮𑀥𑀫𑁆𑀫𑀤𑁂𑀲𑀦𑀸, 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀲𑀭𑀻𑀭𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀸𑀥𑀺𑀝𑁆𑀞𑀸𑀦𑀁, 𑀢𑀢𑁆𑀣 𑀘 𑀧𑀝𑀺𑀜𑁆𑀜𑀸𑀬 𑀯𑀺𑀲𑀁𑀯𑀸𑀤𑀦𑀪𑀬𑁂𑀦 ¶ 𑀅𑀳𑀺𑀢𑀼𑀡𑁆𑀟𑀺𑀓𑀳𑀢𑁆𑀣𑀕𑀫𑀦𑀁, 𑀢𑀲𑁆𑀫𑀺𑀜𑁆𑀘 𑀫𑀼𑀔𑁂 𑀯𑀺𑀲𑀫𑀺𑀲𑁆𑀲𑀔𑁂𑀴𑀧𑀸𑀢𑀦𑀁 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀆𑀯𑀺𑀜𑁆𑀙𑀦𑀁 𑀓𑀟𑁆𑀠𑀦𑀁 𑀪𑀽𑀫𑀺𑀬𑀁 𑀖𑀁𑀲𑀦𑀁 𑀫𑀤𑁆𑀤𑀦𑀁 𑀧𑁄𑀣𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀦𑀸𑀦𑀧𑁆𑀧𑀓𑀸𑀭𑀯𑀺𑀧𑁆𑀧𑀓𑀸𑀭𑀁 𑀓𑀭𑁄𑀦𑁆𑀢𑁂𑀧𑀺 𑀏𑀯𑀭𑀽𑀧𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑁄𑀧𑀺 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑁂𑀦 𑀢𑀁 𑀙𑀸𑀭𑀺𑀓𑀁 𑀓𑀸𑀢𑀼𑀁 𑀲𑀫𑀢𑁆𑀣𑀲𑁆𑀲𑀸𑀧𑀺 𑀲𑀻𑀮𑀧𑀸𑀭𑀫𑀺𑀁 𑀆𑀯𑀚𑁆𑀚𑀺𑀢𑁆𑀯𑀸 𑀲𑀻𑀮𑀔𑀡𑁆𑀟𑀦𑀪𑀬𑁂𑀦 𑀈𑀲𑀓𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀸𑀪𑀸𑀯𑁄, 𑀥𑀦𑀁 𑀮𑀪𑀸𑀧𑁂𑀫𑀻𑀢𑀺 𑀯𑀸 𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑀁, 𑀲𑀼𑀪𑁄𑀕𑁂𑀦 𑀧𑀼𑀦𑀸𑀦𑀻𑀢𑀲𑁆𑀲 𑀅𑀓𑀢𑀜𑁆𑀜𑀼𑀦𑁄 𑀫𑀺𑀢𑁆𑀢𑀤𑀼𑀩𑁆𑀪𑀺𑀲𑁆𑀲 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀻𑀮𑀁 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸𑀧𑀺 𑀅𑀓𑀼𑀚𑁆𑀛𑀦𑀁, 𑀓𑀸𑀡𑀸𑀭𑀺𑀝𑁆𑀞𑁂𑀦 𑀓𑀣𑀺𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀁 𑀪𑀸𑀲𑀺𑀢𑁆𑀯𑀸 𑀦𑀸𑀕𑀧𑀭𑀺𑀲𑀸𑀬 𑀲𑀻𑀮𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀜𑁆𑀘 𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀢𑁂𑀦𑁂𑀢𑀁 ¶ 𑀯𑀼𑀘𑁆𑀘𑀢𑀺 𑁋 ‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂…𑀧𑁂… 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀪𑀽𑀭𑀺𑀤𑀢𑁆𑀢𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀫𑁆𑀧𑁂𑀬𑁆𑀬𑀦𑀸𑀕𑀘𑀭𑀺𑀬𑀸𑀯𑀡𑁆𑀡𑀦𑀸

𑁨𑁦. 𑀢𑀢𑀺𑀬𑁂 ¶ 𑀘𑀫𑁆𑀧𑁂𑀬𑁆𑀬𑀓𑁄𑀢𑀺 𑀅𑀗𑁆𑀕𑀫𑀕𑀥𑀭𑀝𑁆𑀞𑀸𑀦𑀁 𑀅𑀦𑁆𑀢𑀭𑁂 𑀘𑀫𑁆𑀧𑀸 𑀦𑀸𑀫 𑀦𑀤𑀻, 𑀢𑀲𑁆𑀲𑀸 𑀳𑁂𑀝𑁆𑀞𑀸 𑀦𑀸𑀕𑀪𑀯𑀦𑀫𑁆𑀧𑀺 𑀅𑀯𑀺𑀤𑀽𑀭𑀪𑀯𑀢𑁆𑀢𑀸 𑀘𑀫𑁆𑀧𑀸 𑀦𑀸𑀫, 𑀢𑀢𑁆𑀣 𑀚𑀸𑀢𑁄 𑀦𑀸𑀕𑀭𑀸𑀚𑀸 𑀘𑀫𑁆𑀧𑁂𑀬𑁆𑀬𑀓𑁄. 𑀢𑀤𑀸𑀧𑀺 𑀥𑀫𑁆𑀫𑀺𑀓𑁄 𑀆𑀲𑀺𑀦𑁆𑀢𑀺 𑀢𑀲𑁆𑀫𑀺𑀁 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂𑀧𑀺 𑀅𑀳𑀁 𑀥𑀫𑁆𑀫𑀘𑀸𑀭𑀻 𑀅𑀳𑁄𑀲𑀺𑀁.

𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀤𑀸 𑀘𑀫𑁆𑀧𑀸𑀦𑀸𑀕𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀫𑁆𑀧𑁂𑀬𑁆𑀬𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺, 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄. 𑀲𑁄 𑀢𑀢𑁆𑀣 𑀦𑀸𑀕𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀤𑁂𑀯𑀭𑀸𑀚𑀪𑁄𑀕𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀧𑀸𑀭𑀫𑀺𑀧𑀽𑀭𑀡𑀲𑁆𑀲 𑀅𑀦𑁄𑀓𑀸𑀲𑀪𑀸𑀯𑀢𑁄 ‘‘𑀓𑀺𑀁 𑀫𑁂 𑀇𑀫𑀸𑀬 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸, 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀢𑁆𑀯𑀸 𑀇𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀧𑀸𑀭𑀫𑀺𑀬𑁄 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀸𑀲𑀸𑀤𑁂𑀬𑁂𑀯 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀮𑀗𑁆𑀓𑀢𑀦𑀸𑀕𑀫𑀸𑀡𑀯𑀺𑀓𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀲𑁄 ‘‘𑀇𑀥 𑀫𑁂 𑀲𑀻𑀮𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀸𑀲𑀸𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀲𑀻𑀤𑀢𑀺. 𑀢𑀢𑁆𑀭𑀸𑀧𑀺 𑀢𑀸 𑀆𑀕𑀘𑁆𑀙𑀦𑁆𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀥 𑀫𑁂 𑀲𑀻𑀮𑀲𑁆𑀲 𑀲𑀁𑀓𑀺𑀮𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀇𑀢𑁄 𑀦𑀸𑀕𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 ¶ 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀲𑁆𑀲 𑀧𑀘𑁆𑀘𑀦𑁆𑀢𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀫𑀕𑁆𑀕𑀲𑀫𑀻𑀧𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 ‘‘𑀫𑀫 𑀘𑀫𑁆𑀫𑀸𑀤𑀻𑀳𑀺 𑀅𑀢𑁆𑀣𑀺𑀓𑀸 𑀘𑀫𑁆𑀫𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀼, 𑀓𑀻𑀴𑀸𑀲𑀧𑁆𑀧𑀁 𑀯𑀸 𑀓𑀸𑀢𑀼𑀓𑀸𑀫𑀸 𑀓𑀻𑀴𑀸𑀲𑀧𑁆𑀧𑀁 𑀓𑀭𑁄𑀦𑁆𑀢𑀽’’𑀢𑀺 𑀲𑀭𑀻𑀭𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑁄𑀕𑁂 ¶ 𑀆𑀪𑀼𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀉𑀧𑁄𑀲𑀣𑀯𑀸𑀲𑀁 𑀯𑀲𑀢𑀺 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀜𑁆𑀘𑀤𑀲𑀺𑀬𑀜𑁆𑀘, 𑀧𑀸𑀝𑀺𑀧𑀤𑁂 𑀦𑀸𑀕𑀪𑀯𑀦𑀁 𑀕𑀘𑁆𑀙𑀢𑀺. 𑀢𑀲𑁆𑀲𑁂𑀯𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀲𑁆𑀲 𑀤𑀻𑀖𑁄 𑀅𑀤𑁆𑀥𑀸 𑀯𑀻𑀢𑀺𑀯𑀢𑁆𑀢𑁄.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑀼𑀫𑀦𑀸𑀬 𑀦𑀸𑀫 𑀅𑀢𑁆𑀢𑀦𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 ‘‘𑀤𑁂𑀯, 𑀢𑁆𑀯𑀁 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀉𑀧𑀯𑀲𑀲𑀺, 𑀲𑁄 𑀘 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄’’𑀢𑀺 𑀯𑀼𑀢𑁆𑀢𑁄 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀞𑀢𑁆𑀯𑀸 ‘‘𑀲𑀘𑁂 𑀫𑀁, 𑀪𑀤𑁆𑀤𑁂, 𑀓𑁄𑀘𑀺 𑀧𑀳𑀭𑀺𑀢𑁆𑀯𑀸 𑀓𑀺𑀮𑀫𑁂𑀲𑁆𑀲𑀢𑀺, 𑀇𑀫𑀺𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀉𑀤𑀓𑀁 𑀆𑀯𑀺𑀮𑀁 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀲𑀼𑀧𑀡𑁆𑀡𑁄 𑀕𑀡𑁆𑀳𑀺𑀲𑁆𑀲𑀢𑀺, 𑀉𑀤𑀓𑀁 𑀧𑀓𑁆𑀓𑀼𑀣𑀺𑀲𑁆𑀲𑀢𑀺. 𑀲𑀘𑁂 𑀅𑀳𑀺𑀢𑀼𑀡𑁆𑀟𑀺𑀓𑁄 𑀕𑀡𑁆𑀳𑀺𑀲𑁆𑀲𑀢𑀺, 𑀉𑀤𑀓𑀁 𑀮𑁄𑀳𑀺𑀢𑀯𑀡𑁆𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀢𑀲𑁆𑀲𑀸 𑀆𑀘𑀺𑀓𑁆𑀔𑀺𑀢𑁆𑀯𑀸 𑀘𑀸𑀢𑀼𑀤𑁆𑀤𑀲𑀻𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀦𑀺𑀧𑀚𑁆𑀚𑀺 𑀲𑀭𑀻𑀭𑀲𑁄𑀪𑀸𑀬 𑀯𑀫𑁆𑀫𑀺𑀓𑀁 𑀲𑁄𑀪𑀬𑀫𑀸𑀦𑁄. 𑀲𑀭𑀻𑀭𑀜𑁆𑀳𑀺𑀲𑁆𑀲 𑀭𑀚𑀢𑀤𑀸𑀫𑀁 𑀯𑀺𑀬 𑀲𑁂𑀢𑀁 𑀅𑀳𑁄𑀲𑀺, 𑀫𑀢𑁆𑀣𑀓𑁄 𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑁄 𑀯𑀺𑀬, 𑀲𑀭𑀻𑀭𑀁 𑀦𑀗𑁆𑀕𑀮𑀲𑀻𑀲𑀧𑁆𑀧𑀫𑀸𑀡𑀁 𑀪𑀽𑀭𑀺𑀤𑀢𑁆𑀢𑀓𑀸𑀮𑁂 (𑀚𑀸. 𑁨.𑁨𑁨.𑁭𑁮𑁪 𑀆𑀤𑀬𑁄) 𑀧𑀦 𑀊𑀭𑀼𑀧𑁆𑀧𑀫𑀸𑀡𑀁, 𑀲𑀗𑁆𑀔𑀧𑀸𑀮𑀓𑀸𑀮𑁂 (𑀚𑀸. 𑁨.𑁧𑁭.𑁧𑁪𑁩 𑀆𑀤𑀬𑁄) 𑀏𑀓𑀤𑁄𑀡𑀺𑀓𑀦𑀸𑀯𑀧𑁆𑀧𑀫𑀸𑀡𑀁.

𑀢𑀤𑀸 ¶ 𑀏𑀓𑁄 𑀩𑀸𑀭𑀸𑀡𑀲𑀺𑀫𑀸𑀡𑀯𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀅𑀮𑀫𑁆𑀧𑀸𑀬𑀦𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀫𑀕𑁆𑀕𑁂𑀦 𑀅𑀢𑁆𑀢𑀦𑁄 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀫𑁂 𑀢𑀼𑀘𑁆𑀙𑀳𑀢𑁆𑀣𑁂𑀦 𑀕𑀸𑀫𑀁 𑀕𑀦𑁆𑀢𑀼𑀁, 𑀇𑀫𑀁 𑀦𑀸𑀕𑀁 𑀕𑀳𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀓𑀻𑀴𑀸𑀧𑁂𑀦𑁆𑀢𑁄 𑀥𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑁄𑀲𑀥𑀸𑀦𑀺 𑀕𑀳𑁂𑀢𑁆𑀯𑀸 𑀤𑀺𑀩𑁆𑀩𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀤𑀺𑀩𑁆𑀩𑀫𑀦𑁆𑀢𑀁 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑀢𑁆𑀢𑀲𑁆𑀲 𑀓𑀡𑁆𑀡𑁂𑀲𑀼 𑀢𑀢𑁆𑀢𑀲𑀮𑀸𑀓𑀸𑀧𑀯𑁂𑀲𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺, 𑀫𑀢𑁆𑀣𑀓𑁂 𑀲𑀺𑀔𑀭𑁂𑀦 𑀅𑀪𑀺𑀫𑀦𑁆𑀣𑀺𑀬𑀫𑀸𑀦𑁄 𑀯𑀺𑀬. 𑀲𑁄 ‘‘𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀪𑁄𑀕𑀦𑁆𑀢𑀭𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀳𑀺𑀢𑀼𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀯𑀺𑀲𑀁 𑀉𑀕𑁆𑀕𑀢𑁂𑀚𑀁, 𑀲𑀘𑀸𑀳𑀁 𑀓𑀼𑀚𑁆𑀛𑀺𑀢𑁆𑀯𑀸 ¶ 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺, 𑀏𑀢𑀲𑁆𑀲 𑀲𑀭𑀻𑀭𑀁 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀢𑀺, 𑀅𑀣 𑀫𑁂 𑀲𑀻𑀮𑀁 𑀔𑀡𑁆𑀟𑀁 𑀪𑀯𑀺𑀲𑁆𑀲𑀢𑀺, 𑀦 𑀦𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀲𑀻𑀲𑀁 𑀪𑁄𑀕𑀦𑁆𑀢𑀭𑁂 𑀞𑀧𑁂𑀲𑀺. 𑀅𑀳𑀺𑀢𑀼𑀡𑁆𑀟𑀺𑀓𑀩𑁆𑀭𑀸𑀳𑁆𑀫𑀡𑁄 ¶ 𑀑𑀲𑀥𑀁 𑀔𑀸𑀤𑀺𑀢𑁆𑀯𑀸 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀔𑁂𑀴𑀁 𑀫𑀳𑀸𑀲𑀢𑁆𑀢𑀲𑁆𑀲 𑀲𑀭𑀻𑀭𑁂 𑀑𑀲𑀺𑀜𑁆𑀘𑀺. 𑀑𑀲𑀥𑀸𑀦𑀜𑁆𑀘 𑀫𑀦𑁆𑀢𑀲𑁆𑀲 𑀘 𑀆𑀦𑀼𑀪𑀸𑀯𑁂𑀦 𑀔𑁂𑀴𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂 𑀨𑁄𑀝𑀸𑀦𑀁 𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺.

𑀅𑀣 𑀲𑁄 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀤𑀻𑀖𑀲𑁄 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀲𑀻𑀲𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀻𑀴𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀫𑀼𑀔𑀁 𑀯𑀺𑀯𑀭𑀺. 𑀅𑀣𑀲𑁆𑀲 𑀫𑀼𑀔𑁂 𑀔𑁂𑀴𑀁 𑀑𑀲𑀺𑀜𑁆𑀘𑀺𑀢𑁆𑀯𑀸 𑀑𑀲𑀥𑀫𑀦𑁆𑀢𑀩𑀮𑁂𑀦 𑀤𑀦𑁆𑀢𑁂 𑀪𑀺𑀦𑁆𑀤𑀺. 𑀫𑀼𑀔𑀁 𑀮𑁄𑀳𑀺𑀢𑀲𑁆𑀲 𑀧𑀽𑀭𑀺. 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀲𑀻𑀮𑀪𑁂𑀤𑀪𑀬𑁂𑀦 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑀫𑁆𑀧𑀺 𑀦𑀸𑀓𑀸𑀲𑀺. 𑀲𑁄𑀧𑀺 ‘‘𑀦𑀸𑀕𑀭𑀸𑀚𑀸𑀦𑀁 𑀤𑀼𑀩𑁆𑀩𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀗𑁆𑀕𑀼𑀝𑁆𑀞𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀻𑀦𑀺 𑀲𑀁𑀘𑀼𑀡𑁆𑀡𑀬𑀫𑀸𑀦𑁄 𑀯𑀺𑀬 𑀲𑀓𑀮𑀲𑀭𑀻𑀭𑀁 𑀫𑀤𑁆𑀤𑀺𑀢𑁆𑀯𑀸 𑀧𑀝𑁆𑀝𑀓𑀯𑁂𑀞𑀦𑀁 𑀦𑀸𑀫 𑀯𑁂𑀞𑁂𑀲𑀺, 𑀢𑀦𑁆𑀢𑀫𑀚𑁆𑀚𑀺𑀢𑀁 𑀦𑀸𑀫 𑀫𑀚𑁆𑀚𑀺, 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀤𑀼𑀲𑁆𑀲𑀧𑁄𑀣𑀦𑀁 𑀦𑀸𑀫 𑀧𑁄𑀣𑁂𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀅𑀳𑁄𑀲𑀺, 𑀲𑁄 𑀫𑀳𑀸𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀲𑀺.

𑀅𑀣𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀁 𑀜𑀢𑁆𑀯𑀸 𑀯𑀮𑁆𑀮𑀻𑀳𑀺 𑀧𑁂𑀴𑀁 𑀓𑀭𑀺𑀢𑁆𑀯𑀸 𑀢𑀢𑁆𑀣 𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀓𑀻𑀴𑀸𑀧𑁂𑀲𑀺. 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑁂𑀲𑀼 𑀯𑀝𑁆𑀝𑀘𑀢𑀼𑀭𑀲𑁆𑀲𑀸𑀤𑀻𑀲𑀼 𑀲𑀡𑁆𑀞𑀸𑀦𑁂𑀲𑀼 𑀅𑀡𑀼𑀁𑀣𑀽𑀮𑀸𑀤𑀻𑀲𑀼 𑀧𑀫𑀸𑀡𑁂𑀲𑀼 𑀬𑀁 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀇𑀘𑁆𑀙𑀢𑀺, 𑀫𑀳𑀸𑀲𑀢𑁆𑀢𑁄 𑀢𑀁 𑀢𑀤𑁂𑀯 𑀓𑀢𑁆𑀯𑀸 𑀦𑀘𑁆𑀘𑀢𑀺, 𑀨𑀡𑀲𑀢𑀫𑁆𑀧𑀺 𑀨𑀡𑀲𑀳𑀲𑁆𑀲𑀫𑁆𑀧𑀺 𑀓𑀭𑁄𑀢𑀺𑀬𑁂𑀯. 𑀫𑀳𑀸𑀚𑀦𑁄 𑀧𑀲𑀻𑀤𑀺𑀢𑁆𑀯𑀸 𑀩𑀳𑀼𑀥𑀦𑀫𑀤𑀸𑀲𑀺. 𑀏𑀓𑀤𑀺𑀯𑀲𑀫𑁂𑀯 𑀓𑀳𑀸𑀧𑀡𑀲𑀳𑀲𑁆𑀲𑀜𑁆𑀘𑁂𑀯 𑀲𑀳𑀲𑁆𑀲𑀕𑁆𑀖𑀦𑀺𑀓𑁂 𑀘 𑀧𑀭𑀺𑀓𑁆𑀔𑀸𑀭𑁂 𑀮𑀪𑀺. 𑀩𑁆𑀭𑀸𑀳𑁆𑀫𑀡𑁄 ¶ 𑀆𑀤𑀺𑀢𑁄𑀯 ‘‘𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀁 𑀧𑀦 𑀥𑀦𑀁 𑀮𑀪𑀺𑀢𑁆𑀯𑀸 ‘‘𑀧𑀘𑁆𑀘𑀦𑁆𑀢𑀕𑀸𑀫𑁂𑀬𑁂𑀯 𑀢𑀸𑀯 𑀫𑁂 𑀏𑀢𑁆𑀢𑀓𑀁 𑀥𑀦𑀁 𑀮𑀤𑁆𑀥𑀁, 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀤𑀲𑁆𑀲𑀺𑀢𑁂 𑀓𑀻𑀯 𑀩𑀳𑀼𑀁 𑀥𑀦𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀲𑀓𑀝𑀜𑁆𑀘 𑀲𑀼𑀔𑀬𑀸𑀦𑀓𑀜𑁆𑀘 𑀕𑀳𑁂𑀢𑁆𑀯𑀸 𑀲𑀓𑀝𑁂 𑀧𑀭𑀺𑀓𑁆𑀔𑀸𑀭𑁂 𑀞𑀧𑁂𑀢𑁆𑀯𑀸 𑀲𑀼𑀔𑀬𑀸𑀦𑀓𑁂 𑀦𑀺𑀲𑀺𑀦𑁆𑀦𑁄 ‘‘𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀸𑀲𑀢𑁆𑀢𑀁 ¶ 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀓𑀻𑀴𑀸𑀧𑁂𑀦𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀉𑀕𑁆𑀕𑀲𑁂𑀦𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀓𑀻𑀴𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀕𑀫𑀸𑀲𑀺. 𑀲𑁄 𑀫𑀡𑁆𑀟𑀽𑀓𑁂 𑀫𑀸𑀭𑁂𑀢𑁆𑀯𑀸 𑀦𑀸𑀕𑀭𑀜𑁆𑀜𑁄 𑀤𑁂𑀢𑀺. 𑀦𑀸𑀕𑀭𑀸𑀚𑀸 ‘‘𑀧𑀼𑀦𑀧𑁆𑀧𑀼𑀦𑀁 𑀫𑀁 𑀦𑀺𑀲𑁆𑀲𑀸𑀬 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀦 𑀔𑀸𑀤𑀢𑀺. 𑀅𑀣𑀲𑁆𑀲 𑀫𑀥𑀼𑀮𑀸𑀚𑁂 𑀅𑀤𑀸𑀲𑀺. 𑀢𑁂𑀧𑀺 ‘‘𑀲𑀘𑀸𑀳𑀁 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀅𑀦𑁆𑀢𑁄𑀧𑁂𑀴𑀸𑀬𑀫𑁂𑀯 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦 𑀔𑀸𑀤𑀢𑀺.

𑁨𑁧. 𑀩𑁆𑀭𑀸𑀳𑁆𑀫𑀡𑁄 ¶ 𑀫𑀸𑀲𑀫𑀢𑁆𑀢𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀤𑁆𑀯𑀸𑀭𑀕𑀸𑀫𑀓𑁂 𑀢𑀁 𑀓𑀻𑀴𑀸𑀧𑁂𑀦𑁆𑀢𑁄 𑀩𑀳𑀼𑀥𑀦𑀁 𑀮𑀪𑀺. 𑀭𑀸𑀚𑀸𑀧𑀺 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀫𑁆𑀧𑀺 𑀓𑀻𑀴𑀸𑀧𑁂𑀳𑀻’’𑀢𑀺 𑀆𑀳. ‘‘𑀲𑀸𑀥𑀼, 𑀤𑁂𑀯, 𑀲𑁆𑀯𑁂 𑀧𑀦𑁆𑀦𑀭𑀲𑁂 𑀢𑀼𑀫𑁆𑀳𑀸𑀓𑀁 𑀓𑀻𑀴𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀲𑁆𑀯𑁂 𑀦𑀸𑀕𑀭𑀸𑀚𑀸 𑀭𑀸𑀚𑀗𑁆𑀕𑀡𑁂 𑀦𑀘𑁆𑀘𑀺𑀲𑁆𑀲𑀢𑀺, 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀲𑁆𑀲𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀭𑀸𑀚𑀗𑁆𑀕𑀡𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀭𑀢𑀦𑀧𑁂𑀴𑀸𑀬 𑀫𑀳𑀸𑀲𑀢𑁆𑀢𑀁 𑀦𑁂𑀢𑁆𑀯𑀸 𑀯𑀺𑀘𑀺𑀢𑁆𑀢𑀢𑁆𑀣𑀭𑁂 𑀧𑁂𑀴𑀁 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸𑀧𑀺 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀺. 𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀦𑀘𑁆𑀘𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀢𑁂𑀦 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀚𑀦𑁄 𑀲𑀓𑀪𑀸𑀯𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀭𑀺 𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀤𑀸𑀧𑀺 𑀫𑀁 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀢𑀤𑀸𑀧𑀻𑀢𑀺 𑀬𑀤𑀸𑀳𑀁 𑀘𑀫𑁆𑀧𑁂𑀬𑁆𑀬𑀓𑁄 𑀦𑀸𑀕𑀭𑀸𑀚𑀸 𑀳𑁄𑀫𑀺, 𑀢𑀤𑀸𑀧𑀺. 𑀥𑀫𑁆𑀫𑀘𑀸𑀭𑀺𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 ¶ 𑀏𑀯 𑀘𑀭𑀢𑀺, 𑀦 𑀅𑀡𑀼𑀫𑀢𑁆𑀢𑀫𑁆𑀧𑀺 𑀅𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀘𑀸𑀭𑀻. 𑀉𑀧𑀯𑀼𑀝𑁆𑀞𑀉𑀧𑁄𑀲𑀣𑀦𑁆𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀭𑀺𑀬𑀼𑀧𑁄𑀲𑀣𑀲𑀻𑀮𑀲𑁆𑀲 𑀭𑀓𑁆𑀔𑀡𑀯𑀲𑁂𑀦 𑀉𑀧𑀯𑀲𑀺𑀢𑀉𑀧𑁄𑀲𑀣𑀁. 𑀭𑀸𑀚𑀤𑁆𑀯𑀸𑀭𑀫𑁆𑀳𑀺 𑀓𑀻𑀴𑀢𑀻𑀢𑀺 𑀩𑀸𑀭𑀸𑀡𑀲𑀺𑀬𑀁 𑀉𑀕𑁆𑀕𑀲𑁂𑀦𑀭𑀜𑁆𑀜𑁄 𑀕𑁂𑀳𑀤𑁆𑀯𑀸𑀭𑁂 𑀓𑀻𑀴𑀸𑀧𑁂𑀢𑀺.

𑁨𑁨. 𑀬𑀁 𑀬𑀁 𑀲𑁄 𑀯𑀡𑁆𑀡𑀁 𑀘𑀺𑀦𑁆𑀢𑀬𑀻𑀢𑀺 𑀲𑁄 𑀅𑀳𑀺𑀢𑀼𑀡𑁆𑀟𑀺𑀓𑀩𑁆𑀭𑀸𑀳𑁆𑀫𑀡𑁄 ‘‘𑀬𑀁 𑀬𑀁 𑀦𑀻𑀮𑀸𑀤𑀺𑀯𑀡𑁆𑀡𑀁 𑀳𑁄𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀻𑀮𑀁 𑀯 𑀧𑀻𑀢𑀮𑁄𑀳𑀺𑀢’’𑀦𑁆𑀢𑀺. 𑀢𑀢𑁆𑀣 𑀦𑀻𑀮𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀕𑀸𑀣𑀸𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄, 𑀢𑁂𑀦 𑀯𑀸𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑀁 𑀑𑀤𑀸𑀢𑀸𑀤𑀺𑀯𑀡𑁆𑀡𑀯𑀺𑀲𑁂𑀲𑀜𑁆𑀘𑁂𑀯 𑀯𑀝𑁆𑀝𑀸𑀤𑀺𑀲𑀡𑁆𑀞𑀸𑀦𑀯𑀺𑀲𑁂𑀲𑀜𑁆𑀘 𑀅𑀡𑀼𑀁𑀣𑀽𑀮𑀸𑀤𑀺𑀧𑀫𑀸𑀡𑀯𑀺𑀲𑁂𑀲𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑁆𑀢𑁄𑀢𑀺 𑀢𑀲𑁆𑀲 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀘𑀺𑀢𑁆𑀢𑀁 𑀅𑀦𑀼𑀯𑀢𑁆𑀢𑀦𑁆𑀢𑁄. 𑀘𑀺𑀦𑁆𑀢𑀺𑀢𑀲𑀦𑁆𑀦𑀺𑀪𑁄𑀢𑀺 𑀢𑁂𑀦 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀓𑀸𑀭𑁂𑀦 𑀧𑁂𑀓𑁆𑀔𑀚𑀦𑀲𑁆𑀲 𑀉𑀧𑀝𑁆𑀞𑀳𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁩. 𑀦 𑀓𑁂𑀯𑀮𑀜𑁆𑀘 𑀢𑁂𑀦 𑀘𑀺𑀦𑁆𑀢𑀺𑀢𑀸𑀓𑀸𑀭𑀤𑀲𑁆𑀲𑀦𑀁 𑀏𑀯 𑀫𑀬𑁆𑀳𑀁 𑀆𑀦𑀼𑀪𑀸𑀯𑁄. 𑀅𑀧𑀺 𑀘 𑀣𑀮𑀁 𑀓𑀭𑁂𑀬𑁆𑀬𑀫𑀼𑀤𑀓𑀁, 𑀉𑀤𑀓𑀫𑁆𑀧𑀺 𑀣𑀮𑀁 𑀓𑀭𑁂𑀢𑀺 𑀣𑀮𑀁 𑀫𑀳𑀸𑀧𑀣𑀯𑀺𑀁 𑀕𑀳𑁂𑀢𑁆𑀯𑀸 𑀉𑀤𑀓𑀁, 𑀉𑀤𑀓𑀫𑁆𑀧𑀺 𑀕𑀳𑁂𑀢𑁆𑀯𑀸 𑀧𑀣𑀯𑀺𑀁 𑀓𑀸𑀢𑀼𑀁 ¶ 𑀲𑀓𑁆𑀓𑀼𑀡𑁂𑀬𑁆𑀬𑀁 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀘. 𑀬𑀤𑀺𑀳𑀁 𑀢𑀲𑁆𑀲 𑀓𑀼𑀧𑁆𑀧𑁂𑀬𑁆𑀬𑀦𑁆𑀢𑀺 𑀢𑀲𑁆𑀲 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀅𑀳𑀁 𑀬𑀤𑀺 𑀓𑀼𑀚𑁆𑀛𑁂𑀬𑁆𑀬𑀁. 𑀔𑀡𑁂𑀦 𑀙𑀸𑀭𑀺𑀓𑀁 𑀓𑀭𑁂𑀢𑀺 𑀓𑁄𑀥𑀼𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀪𑀲𑁆𑀫𑀁 𑀓𑀭𑁂𑀬𑁆𑀬𑀁.

𑁨𑁪. 𑀏𑀯𑀁 ¶ 𑀪𑀕𑀯𑀸 𑀢𑀤𑀸 𑀅𑀢𑁆𑀢𑀦𑁄 𑀉𑀧𑁆𑀧𑀚𑁆𑀚𑀦𑀓𑀸𑀦𑀢𑁆𑀣𑀧𑀝𑀺𑀩𑀸𑀳𑀦𑁂 𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀢𑀁 𑀧𑀝𑀺𑀩𑀸𑀳𑀦𑀁 𑀦 𑀓𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀘𑀺𑀢𑁆𑀢𑀯𑀲𑀻 𑀳𑁂𑀲𑁆𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲𑀢𑁆𑀣𑁄 𑁋 ‘‘𑀅𑀬𑀁 𑀅𑀳𑀺𑀢𑀼𑀡𑁆𑀟𑀺𑀓𑁄 𑀫𑀁 𑀅𑀢𑀺𑀯𑀺𑀬 𑀩𑀸𑀥𑀢𑀺, 𑀦 𑀫𑁂 𑀆𑀦𑀼𑀪𑀸𑀯𑀁 𑀚𑀸𑀦𑀸𑀢𑀺, 𑀳𑀦𑁆𑀤𑀲𑁆𑀲 𑀫𑁂 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑁂𑀦𑀸𑀧𑀺 𑀬𑀤𑀺 𑀘𑀺𑀢𑁆𑀢𑀯𑀲𑀻 𑀅𑀪𑀯𑀺𑀲𑁆𑀲𑀁, 𑀅𑀣 𑀲𑁄 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀢𑀺. 𑀅𑀳𑀁 𑀬𑀣𑀸𑀲𑀫𑀸𑀤𑀺𑀦𑁆𑀦𑀢𑁄 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀺 𑀲𑀻𑀮𑀢𑁄. 𑀢𑀣𑀸 𑀘 𑀲𑀢𑀺 𑀲𑀻𑀮𑁂𑀦 𑀧𑀭𑀺𑀳𑀻𑀦𑀲𑁆𑀲 𑀔𑀡𑁆𑀟𑀺𑀢𑀲𑀻𑀮𑀲𑁆𑀲 𑀬𑁆𑀯𑀸𑀬𑀁 𑀫𑀬𑀸 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀅𑀪𑀺𑀧𑀢𑁆𑀣𑀺𑀢𑁄 ¶ , 𑀉𑀢𑁆𑀢𑀫𑀢𑁆𑀣𑁄 𑀩𑀼𑀤𑁆𑀥𑀪𑀸𑀯𑁄 𑀲𑁄 𑀦 𑀲𑀺𑀚𑁆𑀛𑀢𑀺.

𑁨𑁫. 𑀓𑀸𑀫𑀁 𑀪𑀺𑀚𑁆𑀚𑀢𑀼𑀬𑀁 𑀓𑀸𑀬𑁄𑀢𑀺 𑀅𑀬𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄 𑀓𑀸𑀬𑁄 𑀓𑀺𑀜𑁆𑀘𑀸𑀧𑀺 𑀪𑀺𑀚𑁆𑀚𑀢𑀼 𑀯𑀺𑀦𑀲𑁆𑀲𑀢𑀼, 𑀇𑀥𑁂𑀯 𑀇𑀫𑀲𑁆𑀫𑀺𑀁 𑀏𑀯 𑀞𑀸𑀦𑁂 𑀫𑀳𑀸𑀯𑀸𑀢𑁂 𑀔𑀺𑀢𑁆𑀢𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑀻𑀬𑀢𑀼, 𑀦𑁂𑀯 𑀲𑀻𑀮𑀁 𑀧𑀪𑀺𑀦𑁆𑀤𑁂𑀬𑁆𑀬𑀁, 𑀯𑀺𑀓𑀺𑀭𑀦𑁆𑀢𑁂 𑀪𑀼𑀲𑀁 𑀯𑀺𑀬𑀸𑀢𑀺 𑀲𑀻𑀮𑀁 𑀧𑀦 𑀉𑀢𑁆𑀢𑀫𑀢𑁆𑀣𑀲𑀺𑀤𑁆𑀥𑀺𑀬𑀸 𑀳𑁂𑀢𑀼𑀪𑀽𑀢𑀁 𑀇𑀫𑀲𑁆𑀫𑀺𑀁 𑀓𑀴𑁂𑀯𑀭𑁂 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑀦𑁆𑀢𑁂𑀧𑀺 𑀦𑁂𑀯 𑀪𑀺𑀦𑁆𑀤𑁂𑀬𑁆𑀬𑀁, 𑀓𑀸𑀬𑀚𑀻𑀯𑀺𑀢𑁂𑀲𑀼 𑀦𑀺𑀭𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀲𑀻𑀮𑀧𑀸𑀭𑀫𑀺𑀁𑀬𑁂𑀯 𑀧𑀽𑀭𑁂𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀢𑀤𑀸 𑀅𑀥𑀺𑀯𑀸𑀲𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀣 𑀫𑀳𑀸𑀲𑀢𑁆𑀢𑀲𑁆𑀲 𑀧𑀦 𑀅𑀳𑀺𑀢𑀼𑀡𑁆𑀟𑀺𑀓𑀳𑀢𑁆𑀣𑀕𑀢𑀲𑁆𑀲 𑀫𑀸𑀲𑁄 𑀧𑀭𑀺𑀧𑀽𑀭𑀺, 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀺𑀭𑀸𑀳𑀸𑀭𑁄𑀯 𑀅𑀳𑁄𑀲𑀺. 𑀲𑀼𑀫𑀦𑀸 ‘‘𑀅𑀢𑀺𑀘𑀺𑀭𑀸𑀬𑀢𑀺 𑀫𑁂 𑀲𑀸𑀫𑀺𑀓𑁄, 𑀓𑁄 𑀦𑀼 𑀔𑁄 𑀧𑀯𑀢𑁆𑀢𑀻’’𑀢𑀺 𑀧𑁄𑀓𑁆𑀔𑀭𑀡𑀺𑀁 𑀑𑀮𑁄𑀓𑁂𑀦𑁆𑀢𑀻 𑀮𑁄𑀳𑀺𑀢𑀯𑀡𑁆𑀡𑀁 𑀉𑀤𑀓𑀁 𑀤𑀺𑀲𑁆𑀯𑀸 ‘‘𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀫𑁆𑀫𑀺𑀓𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀕𑀳𑀺𑀢𑀝𑁆𑀞𑀸𑀦𑀁 𑀓𑀺𑀮𑀫𑀺𑀢𑀝𑁆𑀞𑀸𑀦𑀜𑁆𑀘 𑀤𑀺𑀲𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀆𑀓𑀸𑀲𑁂 𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀦𑀘𑁆𑀘𑀦𑁆𑀢𑁄𑀯 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀮𑀚𑁆𑀚𑀺𑀢𑁄 𑀧𑁂𑀴𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀭𑀸𑀚𑀸 𑀢𑀲𑁆𑀲 𑀧𑁂𑀴𑀁 𑀧𑀯𑀺𑀝𑁆𑀞𑀓𑀸𑀮𑁂 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀆𑀓𑀸𑀲𑁂 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀸 𑀦𑀼 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑀸 𑀦𑀸𑀕𑀓𑀜𑁆𑀜𑀸𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀦𑀸𑀕𑀭𑀸𑀚𑀸 𑀇𑀫𑀁 𑀤𑀺𑀲𑁆𑀯𑀸 ¶ 𑀮𑀚𑁆𑀚𑀺𑀢𑁄 𑀧𑁂𑀴𑀁 𑀧𑀯𑀺𑀝𑁆𑀞𑁄, 𑀅𑀬𑀜𑁆𑀘 𑀬𑀣𑀸𑀤𑀲𑁆𑀲𑀺𑀢𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀲𑁆𑀲𑁂𑀯 ¶ , 𑀦 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲𑀸’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 ‘‘𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀅𑀬𑀁 𑀦𑀸𑀕𑀭𑀸𑀚𑀸, 𑀓𑀣𑀁 𑀦𑀸𑀫 𑀇𑀫𑀲𑁆𑀲 𑀳𑀢𑁆𑀣𑀁 𑀕𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀬𑀁 𑀥𑀫𑁆𑀫𑀘𑀸𑀭𑀻 𑀲𑀻𑀮𑀯𑀸 𑀦𑀸𑀕𑀭𑀸𑀚𑀸, 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀲𑀼 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀤𑀸𑀦𑀫𑀼𑀔𑁂 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀫𑀳𑀸𑀫𑀕𑁆𑀕𑀲𑀫𑀻𑀧𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀦𑀺𑀧𑀚𑁆𑀚𑀢𑀺, 𑀢𑀢𑁆𑀣𑀸𑀬𑀫𑁂𑀢𑁂𑀦 𑀕𑀳𑀺𑀢𑁄, 𑀇𑀫𑀲𑁆𑀲 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀸 𑀅𑀦𑁂𑀓𑀲𑀳𑀲𑁆𑀲𑀸 𑀇𑀢𑁆𑀣𑀺𑀬𑁄, 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸 𑀦𑀸𑀕𑀪𑀯𑀦𑀲𑀫𑁆𑀧𑀢𑁆𑀢𑀺, 𑀅𑀬𑀁 𑀫𑀳𑀺𑀤𑁆𑀥𑀺𑀓𑁄 ¶ 𑀫𑀳𑀸𑀦𑀼𑀪𑀸𑀯𑁄 𑀲𑀓𑀮𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄, 𑀓𑁂𑀯𑀮𑀁 ‘𑀲𑀻𑀮𑀁 𑀫𑁂 𑀪𑀺𑀚𑁆𑀚𑀺𑀲𑁆𑀲𑀢𑀻’𑀢𑀺 𑀏𑀯𑀭𑀽𑀧𑀁 𑀯𑀺𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀜𑁆𑀘 𑀅𑀦𑀼𑀪𑁄𑀢𑀻’’𑀢𑀺 𑀘 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀢𑀸𑀯𑀤𑁂𑀯 𑀢𑀲𑁆𑀲 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑀳𑀼𑀁 𑀥𑀦𑀁 𑀫𑀳𑀦𑁆𑀢𑀜𑁆𑀘 𑀬𑀲𑀁 𑀇𑀲𑁆𑀲𑀭𑀺𑀬𑀜𑁆𑀘 𑀤𑀢𑁆𑀯𑀸 𑁋 ‘‘𑀳𑀦𑁆𑀤, 𑀪𑁄, 𑀇𑀫𑀁 𑀦𑀸𑀕𑀭𑀸𑀚𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀫𑀳𑀸𑀲𑀢𑁆𑀢𑁄 𑀦𑀸𑀕𑀯𑀡𑁆𑀡𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑁂𑀦 𑀤𑁂𑀯𑀓𑀼𑀫𑀸𑀭𑁄 𑀯𑀺𑀬 𑀅𑀝𑁆𑀞𑀸𑀲𑀺. 𑀲𑀼𑀫𑀦𑀸𑀧𑀺 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀦𑀸𑀕𑀭𑀸𑀚𑀸 𑀭𑀜𑁆𑀜𑁄 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 ‘‘𑀏𑀳𑀺, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀦𑀺𑀯𑁂𑀲𑀦𑀁 𑀧𑀲𑁆𑀲𑀺𑀢𑀼𑀁 𑀆𑀕𑀘𑁆𑀙𑀸𑀳𑀻’’𑀢𑀺 𑀬𑀸𑀘𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀫𑀼𑀢𑁆𑀢𑁄 𑀘𑀫𑁆𑀧𑁂𑀬𑁆𑀬𑀓𑁄 𑀦𑀸𑀕𑁄, 𑀭𑀸𑀚𑀸𑀦𑀁 𑀏𑀢𑀤𑀩𑁆𑀭𑀯𑀺;

‘𑀦𑀫𑁄 𑀢𑁂 𑀓𑀸𑀲𑀺𑀭𑀸𑀚𑀢𑁆𑀣𑀼, 𑀦𑀫𑁄 𑀢𑁂 𑀓𑀸𑀲𑀺𑀯𑀟𑁆𑀠𑀦;

𑀅𑀜𑁆𑀚𑀮𑀺𑀁 𑀢𑁂 𑀧𑀕𑁆𑀕𑀡𑁆𑀳𑀸𑀫𑀺, 𑀧𑀲𑁆𑀲𑁂𑀬𑁆𑀬𑀁 𑀫𑁂 𑀦𑀺𑀯𑁂𑀲𑀦’’𑀦𑁆𑀢𑀺.

𑀅𑀣 𑀭𑀸𑀚𑀸 𑀢𑀲𑁆𑀲 𑀦𑀸𑀕𑀪𑀯𑀦𑀕𑀫𑀦𑀁 𑀅𑀦𑀼𑀚𑀸𑀦𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀲𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀸𑀧𑁂𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀲𑀩𑁆𑀩𑀸 𑀭𑀸𑀚𑀧𑀭𑀺𑀲𑀸 𑀬𑀸𑀯𑀤𑀺𑀘𑁆𑀙𑀓𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀓𑀁 𑀥𑀦𑀁 𑀕𑀡𑁆𑀳𑀢𑀽’’𑀢𑀺. 𑀭𑀜𑁆𑀜𑁄 𑀘 𑀅𑀦𑁂𑀓𑁂𑀳𑀺 𑀲𑀓𑀝𑀲𑀢𑁂𑀳𑀺 𑀥𑀦𑀁 𑀧𑁂𑀲𑁂𑀲𑀺. ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀩𑁆𑀩𑀢𑁆𑀣 𑀲𑀁𑀯𑀺𑀤𑀳𑀺𑀢𑀩𑁆𑀩𑀸’’𑀢𑀺 𑀤𑀲𑀳𑀺 𑀭𑀸𑀚𑀥𑀫𑁆𑀫𑀓𑀣𑀸𑀳𑀺 𑀑𑀯𑀤𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀕𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀓𑀺𑀭 𑀚𑀫𑁆𑀩𑀼𑀤𑀻𑀧𑀢𑀮𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀚𑀸𑀢𑀁. 𑀫𑀳𑀸𑀲𑀢𑁆𑀢𑁄 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀲𑀧𑀭𑀺𑀲𑁄 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀢𑀤𑀸 𑀅𑀳𑀺𑀢𑀼𑀡𑁆𑀟𑀺𑀓𑁄 ¶ 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀼𑀫𑀦𑀸 𑀭𑀸𑀳𑀼𑀮𑀫𑀸𑀢𑀸, 𑀉𑀕𑁆𑀕𑀲𑁂𑀦𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀘𑀫𑁆𑀧𑁂𑀬𑁆𑀬𑀓𑁄 𑀦𑀸𑀕𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 ¶ 𑀇𑀥𑀸𑀧𑀺 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀇𑀥 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀘𑁆𑀙𑀭𑀺𑀬𑀸𑀦𑀼𑀪𑀸𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸 𑀏𑀯𑀸𑀢𑀺.

𑀘𑀫𑁆𑀧𑁂𑀬𑁆𑀬𑀦𑀸𑀕𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀽𑀴𑀩𑁄𑀥𑀺𑀘𑀭𑀺𑀬𑀸𑀯𑀡𑁆𑀡𑀦𑀸

𑁨𑁬. 𑀘𑀢𑀼𑀢𑁆𑀣𑁂 ¶ 𑀘𑀽𑀴𑀩𑁄𑀥𑀻𑀢𑀺 𑀫𑀳𑀸𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑀢𑁆𑀢𑀪𑀸𑀯𑀁 𑀉𑀧𑀸𑀤𑀸𑀬 𑀇𑀥 ‘‘𑀘𑀽𑀴𑀩𑁄𑀥𑀻’’𑀢𑀺 𑀲𑀫𑀜𑁆𑀜𑀸 𑀆𑀭𑁄𑀧𑀺𑀢𑀸, 𑀦 𑀧𑀦 𑀇𑀫𑀲𑁆𑀫𑀺𑀁 𑀏𑀯 𑀚𑀸𑀢𑀓𑁂 (𑀚𑀸. 𑁧.𑁧𑁦.𑁪𑁯 𑀆𑀤𑀬𑁄) 𑀅𑀢𑁆𑀢𑀦𑁄 𑀚𑁂𑀝𑁆𑀞𑀪𑀸𑀢𑀺𑀓𑀸𑀤𑀺𑀦𑁄 𑀫𑀳𑀸𑀩𑁄𑀥𑀺𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀲𑀻𑀮𑀯𑀸𑀢𑀺 𑀲𑀼𑀝𑁆𑀞𑀼 𑀲𑀻𑀮𑀯𑀸, 𑀲𑀫𑁆𑀧𑀦𑁆𑀦𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀪𑀯𑀁 𑀤𑀺𑀲𑁆𑀯𑀸𑀦 𑀪𑀬𑀢𑁄𑀢𑀺 𑀓𑀸𑀫𑀸𑀤𑀺𑀪𑀯𑀁 𑀪𑀸𑀬𑀺𑀢𑀩𑁆𑀩𑀪𑀸𑀯𑁂𑀦 𑀧𑀲𑁆𑀲𑀺𑀢𑁆𑀯𑀸. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀏𑀢𑁆𑀣 𑀘-𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦 ‘‘𑀤𑀺𑀲𑁆𑀯𑀸𑀦𑀸’’𑀢𑀺 𑀧𑀤𑀁 𑀆𑀓𑀟𑁆𑀠𑀻𑀬𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁 𑀅𑀧𑀸𑀬𑀤𑀼𑀓𑁆𑀔𑀁 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀲𑀁𑀯𑁂𑀕𑀯𑀢𑁆𑀣𑀽𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀩𑁆𑀩𑀫𑁆𑀧𑀺 𑀓𑀸𑀫𑀸𑀤𑀺𑀪𑁂𑀤𑀁 𑀪𑀯𑀁 𑀲𑀁𑀲𑀸𑀭𑀪𑀬𑀢𑁄 𑀉𑀧𑀝𑁆𑀞𑀳𑀫𑀸𑀦𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀸𑀦𑀁 𑀢𑀲𑁆𑀲 𑀉𑀧𑀸𑀬𑀪𑀽𑀢𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀤𑀼𑀧𑀸𑀬𑀪𑀽𑀢𑀸 𑀘 𑀧𑀩𑁆𑀩𑀚𑁆𑀚𑀸𑀢𑀺 𑀇𑀤𑀁 𑀢𑀺𑀯𑀺𑀥𑀫𑁆𑀧𑀺 𑀦𑁂𑀓𑁆𑀔𑀫𑁆𑀫𑀁 𑀅𑀦𑀼𑀲𑁆𑀲𑀯𑀸𑀤𑀺𑀲𑀺𑀤𑁆𑀥𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀤𑀺𑀲𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀅𑀦𑁂𑀓𑀸𑀤𑀻𑀦𑀯𑀸𑀓𑀼𑀮𑀸 𑀕𑀳𑀝𑁆𑀞𑀪𑀸𑀯𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄𑀢𑀺.

𑁨𑁭. 𑀤𑀼𑀢𑀺𑀬𑀺𑀓𑀸𑀢𑀺 𑀧𑁄𑀭𑀸𑀡𑀤𑀼𑀢𑀺𑀬𑀺𑀓𑀸, 𑀕𑀺𑀳𑀺𑀓𑀸𑀮𑁂 𑀧𑀚𑀸𑀧𑀢𑀺𑀪𑀽𑀢𑀸. 𑀓𑀦𑀓𑀲𑀦𑁆𑀦𑀺𑀪𑀸𑀢𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀸. 𑀯𑀝𑁆𑀝𑁂 𑀅𑀦𑀧𑁂𑀓𑁆𑀔𑀸𑀢𑀺 𑀲𑀁𑀲𑀸𑀭𑁂 𑀦𑀺𑀭𑀸𑀮𑀬𑀸. 𑀦𑁂𑀓𑁆𑀔𑀫𑁆𑀫𑀁 𑀅𑀪𑀺𑀦𑀺𑀓𑁆𑀔𑀫𑀻𑀢𑀺 𑀦𑁂𑀓𑁆𑀔𑀫𑁆𑀫𑀢𑁆𑀣𑀸𑀬 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺, 𑀧𑀩𑁆𑀩𑀚𑀻𑀢𑀺 𑀅𑀢𑁆𑀣𑁄.

𑁨𑁮. 𑀆𑀮𑀬𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀆𑀮𑀬𑁄, 𑀢𑀡𑁆𑀳𑀸, 𑀢𑀤𑀪𑀸𑀯𑁂𑀦 𑀦𑀺𑀭𑀸𑀮𑀬𑀸. 𑀢𑀢𑁄 𑀏𑀯 𑀜𑀸𑀢𑀻𑀲𑀼 𑀢𑀡𑁆𑀳𑀸𑀩𑀦𑁆𑀥𑀦𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀩𑀦𑁆𑀥𑀼. 𑀏𑀯𑀁 𑀕𑀺𑀳𑀺𑀩𑀦𑁆𑀥𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀬𑀁 𑀳𑁄𑀢𑀺 𑀩𑀦𑁆𑀥𑀦𑀁 ¶ , 𑀢𑀲𑁆𑀲𑀸𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀧𑁂𑀓𑁆𑀔𑀸 𑀓𑀼𑀮𑁂 𑀕𑀡𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀮𑁂𑀢𑀺 𑀉𑀧𑀝𑁆𑀞𑀸𑀓𑀓𑀼𑀮𑁂. 𑀕𑀡𑁂𑀢𑀺 𑀢𑀸𑀧𑀲𑀕𑀡𑁂, 𑀲𑁂𑀲𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀉𑀧𑀸𑀕𑀫𑀼𑀦𑁆𑀢𑀺 𑀉𑀪𑁄𑀧𑀺 𑀫𑀬𑀁 𑀉𑀧𑀸𑀕𑀫𑀺𑀫𑁆𑀳𑀸.

𑁨𑁯. 𑀢𑀢𑁆𑀣𑀸𑀢𑀺 ¶ 𑀩𑀸𑀭𑀸𑀡𑀲𑀺𑀲𑀸𑀫𑀦𑁆𑀢𑁂. 𑀦𑀺𑀧𑀓𑀸𑀢𑀺 𑀧𑀜𑁆𑀜𑀯𑀦𑁆𑀢𑁄. 𑀦𑀺𑀭𑀸𑀓𑀼𑀮𑁂𑀢𑀺 𑀚𑀦𑀲𑀜𑁆𑀘𑀸𑀭𑀭𑀳𑀺𑀢𑀢𑁆𑀢𑀸 𑀚𑀦𑁂𑀳𑀺 𑀅𑀦𑀸𑀓𑀼𑀮𑁂, 𑀅𑀧𑁆𑀧𑀲𑀤𑁆𑀤𑁂𑀢𑀺 𑀫𑀺𑀕𑀧𑀓𑁆𑀔𑀻𑀦𑀁 𑀉𑀝𑁆𑀞𑀸𑀧𑀦𑀢𑁄 𑀢𑁂𑀲𑀁 𑀯𑀲𑁆𑀲𑀺𑀢𑀲𑀤𑁆𑀤𑁂𑀦𑀸𑀧𑀺 𑀯𑀺𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀲𑀤𑁆𑀤𑁂. 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀫𑀼𑀪𑁄𑀢𑀺 ¶ 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀫𑀬𑀁 𑀉𑀪𑁄 𑀚𑀦𑀸 𑀢𑀤𑀸 𑀯𑀲𑀸𑀫.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀇𑀫𑀲𑁆𑀫𑀺𑀁 𑀏𑀯 𑀪𑀤𑁆𑀤𑀓𑀧𑁆𑀧𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑁂 𑀏𑀓𑀲𑁆𑀲 𑀫𑀳𑀸𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀲𑀫𑀬𑁂 ‘‘𑀩𑁄𑀥𑀺𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀦𑀲𑁆𑀲 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀢𑀲𑁆𑀲 𑀅𑀦𑀺𑀘𑁆𑀙𑀫𑀸𑀦𑀓𑀲𑁆𑀲𑁂𑀯 𑀫𑀸𑀢𑀸𑀧𑀺𑀢𑀭𑁄 𑀲𑀫𑀚𑀸𑀢𑀺𑀓𑀁 𑀓𑀼𑀮𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀼𑀁. 𑀲𑀸𑀧𑀺 𑀩𑁆𑀭𑀳𑁆𑀫𑀮𑁄𑀓𑀘𑀼𑀢𑀸𑀯 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀸. 𑀢𑁂𑀲𑀁 𑀅𑀦𑀺𑀘𑁆𑀙𑀫𑀸𑀦𑀸𑀦𑀁 𑀏𑀯 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑀺𑀁𑀲𑀼. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦 𑀦𑁂𑀲𑀁 𑀓𑀺𑀮𑁂𑀲𑀫𑀼𑀤𑀸𑀘𑀸𑀭𑁄 𑀦 𑀪𑀽𑀢𑀧𑀼𑀩𑁆𑀩𑁄, 𑀲𑀸𑀭𑀸𑀕𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑀦𑀫𑁆𑀧𑀺 𑀦𑀸𑀳𑁄𑀲𑀺, 𑀓𑀸 𑀧𑀦 𑀓𑀣𑀸 𑀇𑀢𑀭𑀲𑀁𑀲𑀕𑁆𑀕𑁂. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀅𑀳𑁂𑀲𑀼𑀁.

𑀅𑀧𑀭𑀪𑀸𑀕𑁂 𑀫𑀳𑀸𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀲𑀼 𑀓𑀸𑀮𑀁𑀓𑀢𑁂𑀲𑀼 𑀢𑁂𑀲𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑁆𑀯𑀁 𑀇𑀫𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀕𑀳𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀸𑀳𑀻’’𑀢𑀺 𑀆𑀳. ‘‘𑀢𑁆𑀯𑀁 𑀧𑀦 𑀅𑀬𑁆𑀬𑀧𑀼𑀢𑁆𑀢𑀸’’𑀢𑀺? ‘‘𑀫𑀬𑁆𑀳𑀁 𑀥𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀧𑀩𑁆𑀩𑀚𑁆𑀚𑀸 𑀇𑀢𑁆𑀣𑀻𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺? ‘‘𑀯𑀝𑁆𑀝𑀢𑀺, 𑀪𑀤𑁆𑀤𑁂’’𑀢𑀺. ‘‘𑀢𑁂𑀦 𑀳𑀺 𑀫𑀬𑁆𑀳𑀫𑁆𑀧𑀺 𑀥𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀉𑀪𑁄𑀧𑀺 𑀲𑀩𑁆𑀩𑀁 𑀯𑀺𑀪𑀯𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀦𑁆𑀢𑀸 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦𑁂𑀯 𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀫𑀼𑀪𑁄’’𑀢𑀺.

𑁩𑁦. 𑀅𑀣𑁂𑀓𑀤𑀺𑀯𑀲𑀁 ¶ 𑀭𑀸𑀚𑀸 𑀉𑀬𑁆𑀬𑀸𑀦𑀓𑀻𑀴𑀁 𑀕𑀢𑁄. 𑀉𑀬𑁆𑀬𑀸𑀦𑀲𑁆𑀲 𑀏𑀓𑀧𑀲𑁆𑀲𑁂 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀁 𑀢𑁂𑀲𑀁 𑀲𑀫𑀻𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀫𑀧𑀸𑀲𑀸𑀤𑀺𑀓𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 ¶ 𑀧𑀭𑀺𑀩𑁆𑀩𑀸𑀚𑀺𑀓𑀁 𑀑𑀮𑁄𑀓𑁂𑀦𑁆𑀢𑁄 𑀓𑀺𑀮𑁂𑀲𑀯𑀲𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 ‘‘𑀅𑀬𑀁 𑀢𑁂 𑀧𑀭𑀺𑀩𑁆𑀩𑀸𑀚𑀺𑀓𑀸 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺. 𑀢𑁂𑀦 ‘‘𑀦 𑀘 𑀓𑀺𑀜𑁆𑀘𑀺 𑀳𑁄𑀢𑀺, 𑀓𑁂𑀯𑀮𑀁 𑀏𑀓𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀧𑀺 𑀘 𑀔𑁄 𑀧𑀦 𑀕𑀺𑀳𑀺𑀓𑀸𑀮𑁂 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 ‘‘𑀅𑀬𑀁 𑀓𑀺𑀭𑁂𑀢𑀲𑁆𑀲 𑀦 𑀓𑀺𑀜𑁆𑀘𑀺 𑀳𑁄𑀢𑀺, 𑀅𑀧𑀺 𑀘 𑀔𑁄 𑀧𑀦𑀲𑁆𑀲 𑀕𑀺𑀳𑀺𑀓𑀸𑀮𑁂 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀳𑁄𑀲𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀅𑀦𑁆𑀢𑁂𑀧𑀼𑀭𑀁 𑀧𑀯𑁂𑀲𑁂𑀬𑁆𑀬𑀁, 𑀢𑁂𑀦𑁂𑀯𑀲𑁆𑀲 𑀇𑀫𑀺𑀲𑁆𑀲𑀸 ¶ 𑀧𑀝𑀺𑀧𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀥𑀩𑀸𑀮𑁄 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀲𑀺 ‘‘𑀇𑀫𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀭𑀸𑀚𑀦𑀺𑀯𑁂𑀲𑀦𑀁 𑀦𑁂𑀳𑀻’’𑀢𑀺.

𑀲𑁄 𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ‘‘𑀅𑀥𑀫𑁆𑀫𑁄 𑀮𑁄𑀓𑁂 𑀯𑀢𑁆𑀢𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀁 𑀏𑀯 𑀢𑀁 𑀆𑀤𑀸𑀬 𑀧𑀸𑀬𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀧𑀭𑀺𑀤𑁂𑀯𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀏𑀓𑀯𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀦 𑀑𑀮𑁄𑀓𑁂𑀲𑀺. ‘‘𑀲𑀘𑁂 𑀧𑀦𑀸𑀳𑀁 𑀯𑀸𑀭𑁂𑀲𑁆𑀲𑀸𑀫𑀺, 𑀢𑁂𑀲𑀼 𑀘𑀺𑀢𑁆𑀢𑀁 𑀧𑀤𑁄𑀲𑁂𑀢𑁆𑀯𑀸 𑀫𑀬𑁆𑀳𑀁 𑀲𑀻𑀮𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀻𑀮𑀧𑀸𑀭𑀫𑀺𑀁𑀬𑁂𑀯 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀬𑁆𑀬𑀸𑀦𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸, 𑀭𑀸𑀚𑀸 𑀅𑀤𑁆𑀤𑀲 𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀢𑀼𑀬𑁆𑀳𑁂𑀲𑀸 𑀓𑀸 𑀓𑀲𑁆𑀲 𑀪𑀭𑀺𑀬𑀸𑀢𑀺 𑀢𑀼𑀬𑁆𑀳𑀁 𑀢𑀯 𑀏𑀲𑀸 𑀓𑀸, 𑀓𑀺𑀁 𑀪𑀭𑀺𑀬𑀸, 𑀉𑀤𑀸𑀳𑀼 𑀪𑀕𑀺𑀦𑀻 𑀯𑀸 𑀲𑀫𑀸𑀦𑀸 𑀓𑀲𑁆𑀲 𑀅𑀜𑁆𑀜𑀲𑁆𑀲 𑀪𑀭𑀺𑀬𑀸.

𑁩𑁧. 𑀦 𑀫𑀬𑁆𑀳𑀁 𑀪𑀭𑀺𑀬𑀸 𑀏𑀲𑀸𑀢𑀺 𑀓𑀸𑀫𑀜𑁆𑀘𑁂𑀲𑀸 𑀫𑀬𑁆𑀳𑀁 𑀕𑀺𑀳𑀺𑀓𑀸𑀮𑁂 𑀪𑀭𑀺𑀬𑀸 𑀅𑀳𑁄𑀲𑀺, 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀫𑀬𑁆𑀳𑀁 𑀪𑀭𑀺𑀬𑀸 𑀏𑀲𑀸, 𑀦𑀸𑀧𑀺 𑀅𑀳𑀁 𑀏𑀢𑀺𑀲𑁆𑀲𑀸 𑀲𑀸𑀫𑀺𑀓𑁄, 𑀓𑁂𑀯𑀮𑀁 𑀧𑀦 𑀲𑀳𑀥𑀫𑁆𑀫𑀸 𑀏𑀓𑀲𑀸𑀲𑀦𑀻, 𑀅𑀳𑀫𑁆𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀅𑀬𑀫𑁆𑀧𑀺 𑀧𑀭𑀺𑀩𑁆𑀩𑀸𑀚𑀺𑀓𑀸𑀢𑀺 𑀲𑀫𑀸𑀦𑀥𑀫𑁆𑀫𑀸 𑀧𑀭𑀺𑀩𑁆𑀩𑀸𑀚𑀓𑀲𑀸𑀲𑀦𑁂𑀦 𑀏𑀓𑀲𑀸𑀲𑀦𑀻, 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀢𑀺 𑀅𑀢𑁆𑀣𑁄.

𑁩𑁨. 𑀢𑀺𑀲𑁆𑀲𑀸 𑀲𑀸𑀭𑀢𑁆𑀢𑀕𑀥𑀺𑀢𑁄𑀢𑀺 𑀓𑀸𑀫𑀭𑀸𑀕𑁂𑀦 𑀲𑀸𑀭𑀢𑁆𑀢𑁄 𑀳𑀼𑀢𑁆𑀯𑀸 𑀧𑀝𑀺𑀩𑀤𑁆𑀥𑁄. 𑀕𑀸𑀳𑀸𑀧𑁂𑀢𑁆𑀯𑀸𑀦 𑀘𑁂𑀝𑀓𑁂𑀢𑀺 𑀘𑁂𑀝𑀓𑁂𑀳𑀺 𑀕𑀡𑁆𑀳𑀸𑀧𑁂𑀢𑁆𑀯𑀸 𑀘𑁂𑀝𑀓𑁂 𑀯𑀸 𑀅𑀢𑁆𑀢𑀦𑁄 𑀭𑀸𑀚𑀧𑀼𑀭𑀺𑀲𑁂 𑀆𑀡𑀸𑀧𑁂𑀢𑁆𑀯𑀸 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀦𑀺𑀧𑁆𑀧𑀻𑀴𑀬𑀦𑁆𑀢𑁄 𑀩𑀮𑀲𑀸𑀢𑀺 𑀢𑀁 𑀅𑀦𑀺𑀘𑁆𑀙𑀫𑀸𑀦𑀁 𑀏𑀯 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀸𑀤𑀺𑀦𑀸 𑀦𑀺𑀧𑁆𑀧𑀻𑀴𑀬𑀦𑁆𑀢𑁄 𑀩𑀸𑀥𑁂𑀦𑁆𑀢𑁄, 𑀢𑀣𑀸𑀧𑀺 𑀅𑀕𑀘𑁆𑀙𑀦𑁆𑀢𑀺𑀁 𑀩𑀮𑀲𑀸 𑀩𑀮𑀓𑁆𑀓𑀸𑀭𑁂𑀦 𑀭𑀸𑀚𑀧𑀼𑀭𑀺𑀲𑁂𑀳𑀺 𑀕𑀡𑁆𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑁆𑀢𑁂𑀧𑀼𑀭𑀁 𑀧𑀯𑁂𑀲𑁂𑀲𑀺.

𑁩𑁩. 𑀑𑀤𑀧𑀢𑁆𑀢𑀓𑀺𑀬𑀸𑀢𑀺 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀕𑀳𑀺𑀢𑀪𑀭𑀺𑀬𑀸 𑀑𑀤𑀧𑀢𑁆𑀢𑀺𑀓𑀸 𑀦𑀸𑀫, 𑀇𑀤𑀁 𑀯𑀘𑀦𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀪𑀸𑀯𑁂𑀦 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 ¶ 𑀤𑀝𑁆𑀞𑀩𑁆𑀩𑀁 ¶ , 𑀲𑀸 𑀧𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀯𑀺𑀯𑀸𑀳𑀯𑀲𑁂𑀦 𑀫𑀸𑀢𑀸𑀧𑀺𑀢𑀽𑀳𑀺 𑀲𑀫𑁆𑀧𑀝𑀺𑀧𑀸𑀤𑀺𑀢𑀸, ‘‘𑀑𑀤𑀧𑀢𑁆𑀢𑀓𑀺𑀬𑀸’’𑀢𑀺 𑀘 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁. 𑀲𑀳𑀚𑀸𑀢𑀺 𑀧𑀩𑁆𑀩𑀚𑁆𑀚𑀸𑀚𑀸𑀢𑀺𑀯𑀲𑁂𑀦 𑀲𑀳𑀚𑀸𑀢𑀸, 𑀢𑁂𑀦𑁂𑀯𑀸𑀳 ‘‘𑀏𑀓𑀲𑀸𑀲𑀦𑀻’’𑀢𑀺. ‘‘𑀏𑀓𑀲𑀸𑀲𑀦𑀻’’𑀢𑀺 𑀘 𑀇𑀤𑀁 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀁, 𑀏𑀓𑀲𑀸𑀲𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀦𑀬𑀦𑁆𑀢𑀺𑀬𑀸𑀢𑀺 𑀦𑀻𑀬𑀦𑁆𑀢𑀺𑀬𑀸. 𑀓𑁄𑀧𑁄 𑀫𑁂 𑀉𑀧𑀧𑀚𑁆𑀚𑀣𑀸𑀢𑀺 𑀅𑀬𑀁 𑀢𑁂 𑀕𑀺𑀳𑀺𑀓𑀸𑀮𑁂 𑀪𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀻 𑀲𑀻𑀮𑀯𑀢𑀻, 𑀧𑀩𑁆𑀩𑀚𑀺𑀢𑀓𑀸𑀮𑁂 𑀘 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀪𑀸𑀯𑀢𑁄 𑀲𑀳𑀚𑀸𑀢𑀸 𑀪𑀕𑀺𑀦𑀻, 𑀲𑀸 𑀢𑀼𑀬𑁆𑀳𑀁 𑀧𑀼𑀭𑀢𑁄 𑀩𑀮𑀓𑁆𑀓𑀸𑀭𑁂𑀦 𑀆𑀓𑀟𑁆𑀠𑀺𑀢𑁆𑀯𑀸 𑀦𑀻𑀬𑀢𑀺. ‘‘𑀩𑁄𑀥𑀺𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀢𑁂 𑀧𑀼𑀭𑀺𑀲𑀪𑀸𑀯’’𑀦𑁆𑀢𑀺 ¶ 𑀧𑀼𑀭𑀺𑀲𑀫𑀸𑀦𑁂𑀦 𑀉𑀲𑁆𑀲𑀸𑀳𑀺𑀢𑁄 𑀘𑀺𑀭𑀓𑀸𑀮𑀲𑀬𑀺𑀢𑁄 𑀯𑀫𑁆𑀫𑀺𑀓𑀩𑀺𑀮𑀢𑁄 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀖𑀝𑁆𑀝𑀺𑀢𑁄 ‘‘𑀲𑀼𑀲𑀽’’𑀢𑀺 𑀨𑀡𑀁 𑀓𑀭𑁄𑀦𑁆𑀢𑁄 𑀆𑀲𑀺𑀯𑀺𑀲𑁄 𑀯𑀺𑀬 𑀫𑁂 𑀘𑀺𑀢𑁆𑀢𑀢𑁄 𑀓𑁄𑀧𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀺.

𑁩𑁪-𑁫. 𑀲𑀳𑀓𑁄𑀧𑁂 𑀲𑀫𑀼𑀧𑁆𑀧𑀦𑁆𑀦𑁂𑀢𑀺 𑀓𑁄𑀧𑀼𑀧𑁆𑀧𑀢𑁆𑀢𑀺𑀬𑀸 𑀲𑀳, 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀩𑁆𑀩𑀢𑀫𑀦𑀼𑀲𑁆𑀲𑀭𑀺𑀦𑁆𑀢𑀺 𑀅𑀢𑁆𑀢𑀦𑁄 𑀲𑀻𑀮𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀲𑀺𑀁. 𑀢𑀢𑁆𑀣𑁂𑀯 𑀓𑁄𑀧𑀁 𑀦𑀺𑀕𑁆𑀕𑀡𑁆𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀏𑀯 𑀆𑀲𑀦𑁂 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀢𑀁 𑀓𑁄𑀧𑀁 𑀦𑀺𑀯𑀸𑀭𑁂𑀲𑀺𑀁. 𑀦𑀸𑀤𑀸𑀲𑀺𑀁 𑀯𑀟𑁆𑀠𑀺𑀢𑀽𑀧𑀭𑀻𑀢𑀺 𑀢𑀢𑁄 𑀏𑀓𑀯𑀸𑀭𑀼𑀧𑁆𑀧𑀢𑁆𑀢𑀺𑀢𑁄 𑀉𑀧𑀭𑀺 𑀉𑀤𑁆𑀥𑀁 𑀯𑀟𑁆𑀠𑀺𑀢𑀼𑀁 𑀦 𑀅𑀤𑀸𑀲𑀺𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑁄𑀧𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀏𑀯 ‘‘𑀦𑀦𑀼 𑀢𑁆𑀯𑀁, 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓, 𑀲𑀩𑁆𑀩𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀢𑁂 𑀓𑀺𑀫𑀺𑀤𑀁 𑀲𑀻𑀮𑀫𑀢𑁆𑀢𑁂𑀧𑀺 𑀉𑀧𑀓𑁆𑀔𑀮𑀦𑀁, 𑀢𑀬𑀺𑀤𑀁 𑀕𑀼𑀦𑁆𑀦𑀁 𑀔𑀼𑀭𑀫𑀢𑁆𑀢𑁄𑀤𑀓𑁂 𑀑𑀲𑀻𑀤𑀦𑁆𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀧𑀭𑀢𑀻𑀭𑀁 𑀕𑀡𑁆𑀳𑀺𑀢𑀼𑀓𑀸𑀫𑀢𑀸 𑀯𑀺𑀬 𑀳𑁄𑀢𑀻’’𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀢𑀲𑁆𑀫𑀺𑀁 𑀏𑀯 𑀔𑀡𑁂 𑀓𑁄𑀧𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀉𑀧𑁆𑀧𑀚𑁆𑀚𑀦𑀯𑀲𑁂𑀦𑀲𑁆𑀲 𑀯𑀟𑁆𑀠𑀺𑀢𑀼𑀁 𑀦 𑀅𑀤𑀸𑀲𑀺𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑀤𑀺 𑀦𑀁 𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺𑀆𑀤𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀩𑁆𑀭𑀸𑀳𑁆𑀫𑀡𑀺𑀁 𑀲𑁄 𑀭𑀸𑀚𑀸 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀢𑀺𑀡𑁆𑀳𑀸𑀬𑀧𑀺 𑀦𑀺𑀲𑀺𑀢𑀸𑀬 𑀲𑀢𑁆𑀢𑀺𑀬𑀸 𑀓𑁄𑀝𑁆𑀝𑁂𑀬𑁆𑀬, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀬𑀤𑀺 𑀙𑀺𑀦𑁆𑀤𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀻𑀮𑀁 𑀅𑀢𑁆𑀢𑀦𑁄 𑀲𑀻𑀮𑀧𑀸𑀭𑀫𑀺𑀁 𑀦𑁂𑀯 𑀪𑀺𑀦𑁆𑀤𑁂𑀬𑁆𑀬𑀁. 𑀓𑀲𑁆𑀫𑀸? 𑀩𑁄𑀥𑀺𑀬𑀸 𑀏𑀯 𑀓𑀸𑀭𑀡𑀸, 𑀲𑀩𑁆𑀩𑀢𑁆𑀣 𑀅𑀔𑀡𑁆𑀟𑀺𑀢𑀲𑀻𑀮𑁂𑀦𑁂𑀯 𑀲𑀓𑁆𑀓𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀢𑀼𑀁, 𑀦 𑀇𑀢𑀭𑁂𑀦𑀸𑀢𑀺.

𑁩𑁬. 𑀦 ¶ 𑀫𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀤𑁂𑀲𑁆𑀲𑀸𑀢𑀺 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀚𑀸𑀢𑀺𑀬𑀸 𑀕𑁄𑀢𑁆𑀢𑁂𑀦 𑀓𑀼𑀮𑀧𑁆𑀧𑀤𑁂𑀲𑁂𑀦 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘𑀺𑀭𑀧𑀭𑀺𑀘𑀬𑁂𑀦 𑀧𑀩𑁆𑀩𑀚𑁆𑀚𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 ¶ 𑀦 𑀫𑁂 𑀤𑁂𑀲𑁆𑀲𑀸 𑀦 𑀅𑀧𑁆𑀧𑀺𑀬𑀸, 𑀏𑀢𑀺𑀲𑁆𑀲𑀸 𑀫𑀫 𑀅𑀧𑁆𑀧𑀺𑀬𑀪𑀸𑀯𑁄 𑀓𑁄𑀘𑀺 𑀦𑀢𑁆𑀣𑀺. 𑀦𑀧𑀺 𑀫𑁂 𑀩𑀮𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀫𑀬𑁆𑀳𑀫𑁆𑀧𑀺 𑀩𑀮𑀁 𑀦 𑀦 𑀯𑀺𑀚𑁆𑀚𑀢𑀺, 𑀅𑀢𑁆𑀣𑀺 𑀏𑀯. 𑀅𑀳𑀁 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄, 𑀇𑀘𑁆𑀙𑀫𑀸𑀦𑁄 𑀲𑀳𑀲𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀆𑀓𑀟𑁆𑀠𑀦𑁆𑀢𑁂 𑀧𑀼𑀭𑀺𑀲𑁂 𑀦𑀺𑀧𑁆𑀧𑁄𑀣𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀦𑁆𑀢𑀺 𑀢𑀢𑁄 𑀧𑀭𑀺𑀩𑁆𑀩𑀸𑀚𑀺𑀓𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀫𑀬𑁆𑀳𑀁 𑀧𑀺𑀬𑀁. 𑀢𑀲𑁆𑀫𑀸 𑀲𑀻𑀮𑀸𑀦𑀼𑀭𑀓𑁆𑀔𑀺𑀲𑁆𑀲𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀲𑀻𑀮𑀫𑁂𑀯 𑀅𑀦𑀼𑀭𑀓𑁆𑀔𑀺𑀲𑁆𑀲𑀁.

𑀅𑀣 𑀲𑁄 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸𑀯 𑀲𑀻𑀖𑀢𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀲𑀸 𑀬𑀲𑀲𑁆𑀲 𑀅𑀕𑀼𑀡𑀁 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀅𑀢𑁆𑀢𑀦𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀲𑀁𑀯𑁂𑀕𑁂𑀦 𑀧𑀩𑁆𑀩𑀚𑀺𑀢𑀪𑀸𑀯𑀜𑁆𑀘 𑀓𑀣𑁂𑀲𑀺. 𑀭𑀸𑀚𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 ¶ 𑀢𑀲𑁆𑀲𑀸 𑀫𑀦𑀁 𑀅𑀮𑀪𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀺𑀓𑀸 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸, 𑀲𑁄𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀇𑀫𑀸𑀬 𑀆𑀓𑀟𑁆𑀠𑀺𑀢𑁆𑀯𑀸 𑀦𑀻𑀬𑀫𑀸𑀦𑀸𑀬 𑀦 𑀓𑀺𑀜𑁆𑀘𑀺 𑀯𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀲𑀩𑁆𑀩𑀢𑁆𑀣 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀁 𑀏𑀯𑀭𑀽𑀧𑁂𑀲𑀼 𑀕𑀼𑀡𑀯𑀦𑁆𑀢𑁂𑀲𑀼 𑀯𑀺𑀧𑁆𑀧𑀓𑀸𑀭𑁄, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀇𑀫𑀁, 𑀢𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁 𑀔𑀫𑀸𑀧𑁂𑀬𑁆𑀬’’𑀦𑁆𑀢𑀺? 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀭𑀺𑀩𑁆𑀩𑀸𑀚𑀺𑀓𑀁 𑀉𑀬𑁆𑀬𑀸𑀦𑀁 𑀆𑀦𑁂𑀣𑀸’’𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑁄 𑀧𑀩𑁆𑀩𑀚𑀺𑀢, 𑀓𑀺𑀁 𑀫𑀬𑀸 𑀢𑀸𑀬 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀦𑀻𑀬𑀫𑀸𑀦𑀸𑀬 𑀓𑁄𑀧𑁄 𑀢𑁂 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺. 𑀫𑀳𑀸𑀲𑀢𑁆𑀢𑁄 𑀆𑀳 𑁋

‘‘𑀉𑀧𑁆𑀧𑀚𑁆𑀚𑀺 𑀫𑁂 𑀦 𑀫𑀼𑀘𑁆𑀘𑀺𑀢𑁆𑀣, 𑀦 𑀫𑁂 𑀫𑀼𑀘𑁆𑀘𑀺𑀢𑁆𑀣 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀔𑀺𑀧𑁆𑀧𑀫𑁂𑀯 𑀦𑀺𑀯𑀸𑀭𑀬𑀺’’𑀦𑁆𑀢𑀺. (𑀚𑀸. 𑁧.𑁧𑁦.𑁫𑁨);

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀓𑀺𑀁 𑀦𑀼 𑀔𑁄 𑀏𑀲 𑀓𑁄𑀧𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀸𑀤𑀺𑀓’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀺 𑁋

‘‘𑀓𑀺𑀁 ¶ 𑀢𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑀺𑀁 𑀢𑁂 𑀦𑁄 𑀫𑀼𑀘𑁆𑀘𑀺 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀓𑀢𑀫𑀁 𑀢𑀁 𑀦𑀺𑀯𑀸𑀭𑀬𑀻’’𑀢𑀺. (𑀚𑀸. 𑁧.𑁧𑁦.𑁫𑁩);

𑀢𑀢𑁆𑀣 ¶ 𑀉𑀧𑁆𑀧𑀚𑁆𑀚𑀻𑀢𑀺 𑀏𑀓𑀯𑀸𑀭𑀁 𑀉𑀧𑁆𑀧𑀚𑁆𑀚𑀺, 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀺. 𑀦 𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀓𑀸𑀬𑀯𑀘𑀻𑀯𑀺𑀓𑀸𑀭𑀼𑀧𑁆𑀧𑀸𑀤𑀦𑀯𑀲𑁂𑀦 𑀧𑀦 𑀦 𑀫𑀼𑀘𑁆𑀘𑀺𑀢𑁆𑀣, 𑀦 𑀦𑀁 𑀩𑀳𑀺 𑀧𑀯𑀢𑁆𑀢𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀻𑀢𑀺 𑀬𑀣𑀸 𑀦𑀸𑀫 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀉𑀧𑁆𑀧𑀦𑁆𑀦𑀁 𑀭𑀚𑀁 𑀯𑀺𑀧𑀼𑀮𑀸 𑀅𑀓𑀸𑀮𑀯𑀼𑀝𑁆𑀞𑀺𑀥𑀸𑀭𑀸 𑀞𑀸𑀦𑀲𑁄 𑀦𑀺𑀯𑀸𑀭𑁂𑀢𑀺, 𑀏𑀯𑀁 𑀢𑀁 𑀯𑀽𑀧𑀲𑀫𑁂𑀦𑁆𑀢𑁄 𑀦𑀺𑀯𑀸𑀭𑀬𑀺𑀁, 𑀦𑀺𑀯𑀸𑀭𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀣𑀲𑁆𑀲 𑀫𑀳𑀸𑀧𑀼𑀭𑀺𑀲𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀓𑁄𑀥𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑁄 𑁋

‘‘𑀬𑀫𑁆𑀳𑀺 𑀚𑀸𑀢𑁂 𑀦 𑀧𑀲𑁆𑀲𑀢𑀺, 𑀅𑀚𑀸𑀢𑁂 𑀲𑀸𑀥𑀼 𑀧𑀲𑁆𑀲𑀢𑀺;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

‘‘𑀬𑁂𑀦 𑀚𑀸𑀢𑁂𑀦 𑀦𑀦𑁆𑀤𑀦𑁆𑀢𑀺, 𑀅𑀫𑀺𑀢𑁆𑀢𑀸 𑀤𑀼𑀓𑁆𑀔𑀫𑁂𑀲𑀺𑀦𑁄;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

‘‘𑀬𑀲𑁆𑀫𑀺𑀜𑁆𑀘 ¶ 𑀚𑀸𑀬𑀫𑀸𑀦𑀫𑁆𑀳𑀺, 𑀲𑀤𑀢𑁆𑀣𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

‘‘𑀬𑁂𑀦𑀸𑀪𑀺𑀪𑀽𑀢𑁄 𑀓𑀼𑀲𑀮𑀁 𑀚𑀳𑀸𑀢𑀺, 𑀧𑀭𑀓𑁆𑀓𑀭𑁂 𑀯𑀺𑀧𑀼𑀮𑀜𑁆𑀘𑀸𑀧𑀺 𑀅𑀢𑁆𑀣𑀁;

𑀲 𑀪𑀻𑀫𑀲𑁂𑀦𑁄 𑀩𑀮𑀯𑀸 𑀧𑀫𑀤𑁆𑀤𑀻, 𑀓𑁄𑀥𑁄 𑀫𑀳𑀸𑀭𑀸𑀚𑀸 𑀦 𑀫𑁂 𑀅𑀫𑀼𑀘𑁆𑀘𑀣.

‘‘𑀓𑀝𑁆𑀞𑀲𑁆𑀫𑀺𑀁 𑀫𑀦𑁆𑀣𑀫𑀸𑀦𑀲𑁆𑀫𑀺𑀁, 𑀧𑀸𑀯𑀓𑁄 𑀦𑀸𑀫 𑀚𑀸𑀬𑀢𑀺;

𑀢𑀫𑁂𑀯 𑀓𑀝𑁆𑀞𑀁 𑀟𑀳𑀢𑀺, 𑀬𑀲𑁆𑀫𑀸 𑀲𑁄 𑀚𑀸𑀬𑀢𑁂 𑀕𑀺𑀦𑀺.

‘‘𑀏𑀯𑀁 𑀫𑀦𑁆𑀤𑀲𑁆𑀲 𑀧𑁄𑀲𑀲𑁆𑀲, 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄;

𑀲𑀸𑀭𑀫𑁆𑀪𑀸 𑀚𑀸𑀬𑀢𑁂 𑀓𑁄𑀥𑁄, 𑀲𑀧𑀺 𑀢𑁂𑀦𑁂𑀯 𑀟𑀬𑁆𑀳𑀢𑀺.

‘‘𑀅𑀕𑁆𑀕𑀻𑀯 𑀢𑀺𑀡𑀓𑀝𑁆𑀞𑀲𑁆𑀫𑀺𑀁, 𑀓𑁄𑀥𑁄 𑀬𑀲𑁆𑀲 𑀧𑀯𑀟𑁆𑀠𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

‘‘𑀅𑀦𑀺𑀦𑁆𑀥𑁄 𑀥𑀽𑀫𑀓𑁂𑀢𑀽𑀯, 𑀓𑁄𑀥𑁄 𑀬𑀲𑁆𑀲𑀽𑀧𑀲𑀫𑁆𑀫𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. (𑀚𑀸. 𑁧.𑁧𑁦.𑁫𑁪-𑁬𑁧) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀢𑁆𑀣 ¶ 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀢𑁆𑀣𑀫𑁆𑀧𑀺 𑀦 𑀧𑀲𑁆𑀲𑀢𑀺, 𑀧𑀕𑁂𑀯 𑀧𑀭𑀢𑁆𑀣𑀁. 𑀲𑀸𑀥𑀼 𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀢𑁆𑀣𑀁 𑀧𑀭𑀢𑁆𑀣𑀁 𑀉𑀪𑀬𑀢𑁆𑀣𑀜𑁆𑀘 ¶ 𑀲𑀫𑁆𑀫𑀤𑁂𑀯 𑀧𑀲𑁆𑀲𑀢𑀺. 𑀤𑀼𑀫𑁆𑀫𑁂𑀥𑀕𑁄𑀘𑀭𑁄𑀢𑀺 𑀦𑀺𑀧𑁆𑀧𑀜𑁆𑀜𑀸𑀦𑀁 𑀯𑀺𑀲𑀬𑀪𑀽𑀢𑁄, 𑀦𑀺𑀧𑁆𑀧𑀜𑁆𑀜𑁄 𑀯𑀸 𑀕𑁄𑀘𑀭𑁄 𑀆𑀳𑀸𑀭𑁄 𑀇𑀦𑁆𑀥𑀦𑀁 𑀏𑀢𑀲𑁆𑀲𑀸𑀢𑀺 𑀤𑀼𑀫𑁆𑀫𑁂𑀥𑀕𑁄𑀘𑀭𑁄. 𑀤𑀼𑀓𑁆𑀔𑀫𑁂𑀲𑀺𑀦𑁄𑀢𑀺 𑀤𑀼𑀓𑁆𑀔𑀁 𑀇𑀘𑁆𑀙𑀦𑁆𑀢𑀸. 𑀲𑀤𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀼𑀟𑁆𑀠𑀺𑀁. 𑀧𑀭𑀓𑁆𑀓𑀭𑁂𑀢𑀺 𑀅𑀧𑀦𑁂𑀬𑁆𑀬 𑀯𑀺𑀦𑀸𑀲𑁂𑀬𑁆𑀬. 𑀲𑀪𑀻𑀫𑀲𑁂𑀦𑁄𑀢𑀺 𑀲𑁄 𑀪𑀻𑀫𑀸𑀬 𑀪𑀬𑀚𑀦𑀦𑀺𑀬𑀸 𑀫𑀳𑀢𑀺𑀬𑀸 𑀓𑀺𑀮𑁂𑀲𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀧𑀫𑀤𑁆𑀤𑀻𑀢𑀺 𑀩𑀮𑀯𑀪𑀸𑀯𑁂𑀦 𑀲𑀢𑁆𑀢𑁂 𑀧𑀫𑀤𑁆𑀤𑀦𑀲𑀻𑀮𑁄. 𑀦 𑀫𑁂 𑀅𑀫𑀼𑀘𑁆𑀘𑀣𑀸𑀢𑀺 𑀫𑀫 𑀲𑀦𑁆𑀢𑀺𑀓𑀸 𑀫𑁄𑀓𑁆𑀔𑀁 𑀦 𑀮𑀪𑀺, 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀤𑀫𑀺𑀢𑁄, 𑀦𑀺𑀩𑁆𑀩𑀺𑀲𑁂𑀯𑀦𑁄 𑀓𑀢𑁄𑀢𑀺 𑀅𑀢𑁆𑀣𑁄. 𑀔𑀻𑀭𑀁 𑀯𑀺𑀬 𑀯𑀸 𑀫𑀼𑀳𑀼𑀢𑁆𑀢𑀁 𑀤𑀥𑀺𑀪𑀸𑀯𑁂𑀦 𑀘𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀳𑀺𑀢𑁆𑀣𑀸𑀢𑀺𑀧𑀺 𑀅𑀢𑁆𑀣𑁄.

𑀫𑀦𑁆𑀣𑀫𑀸𑀦𑀲𑁆𑀫𑀺𑀦𑁆𑀢𑀺 𑀅𑀭𑀡𑀺𑀲𑀳𑀺𑀢𑁂 𑀫𑀣𑀺𑀬𑀫𑀸𑀦𑁂. ‘‘𑀫𑀣𑀫𑀸𑀦𑀲𑁆𑀫𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀬𑀲𑁆𑀫𑀸𑀢𑀺 𑀬𑀢𑁄 𑀓𑀝𑁆𑀞𑀸 ¶ . 𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄𑀢𑀺 𑀩𑀸𑀮𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲. 𑀲𑀸𑀭𑀫𑁆𑀪𑀸 𑀚𑀸𑀬𑀢𑁂𑀢𑀺 𑀓𑀭𑀡𑀼𑀢𑁆𑀢𑀭𑀺𑀬𑀓𑀭𑀡𑀮𑀓𑁆𑀔𑀡𑀸 𑀲𑀸𑀭𑀫𑁆𑀪𑀸 𑀅𑀭𑀡𑀺𑀫𑀦𑁆𑀣𑀦𑀢𑁄 𑀯𑀺𑀬 𑀧𑀸𑀯𑀓𑁄 𑀓𑁄𑀥𑁄 𑀚𑀸𑀬𑀢𑁂. 𑀲𑀧𑀺 𑀢𑁂𑀦𑁂𑀯𑀸𑀢𑀺 𑀲𑁄𑀧𑀺 𑀩𑀸𑀮𑁄 𑀢𑁂𑀦𑁂𑀯 𑀓𑁄𑀥𑁂𑀦 𑀓𑀝𑁆𑀞𑀁 𑀯𑀺𑀬 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀅𑀦𑀺𑀦𑁆𑀥𑁄 𑀥𑀽𑀫𑀓𑁂𑀢𑀽𑀯𑀸𑀢𑀺 𑀅𑀦𑀺𑀦𑁆𑀥𑀦𑁄 𑀅𑀕𑁆𑀕𑀺 𑀯𑀺𑀬. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑁂 𑀘𑀦𑁆𑀤𑁄 𑀯𑀺𑀬 𑀮𑀤𑁆𑀥𑁄, 𑀬𑀲𑁄 𑀅𑀧𑀭𑀸𑀧𑀭𑀁 𑀆𑀧𑀽𑀭𑀢𑀻𑀢𑀺.

𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀧𑀭𑀺𑀩𑁆𑀩𑀸𑀚𑀺𑀓𑀫𑁆𑀧𑀺 𑀭𑀸𑀚𑀕𑁂𑀳𑀢𑁄 𑀆𑀕𑀢𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀩𑁆𑀩𑀚𑁆𑀚𑀸𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀸 𑀇𑀥𑁂𑀯 𑀉𑀬𑁆𑀬𑀸𑀦𑁂 𑀯𑀲𑀣, 𑀅𑀳𑀁 𑀯𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂 𑀉𑀪𑁄𑀧𑀺 𑀢𑀢𑁆𑀣𑁂𑀯 𑀯𑀲𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀧𑀭𑀺𑀩𑁆𑀩𑀸𑀚𑀺𑀓𑀸 𑀓𑀸𑀮𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺.

𑀢𑀤𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 ¶ 𑀧𑀳𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑀤𑀺𑀲𑀁 𑀕𑁂𑀳𑀢𑁄 𑀦𑀺𑀓𑁆𑀔𑀫𑀦𑀁, 𑀢𑀣𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀩𑀳𑀼𑀚𑀦𑀲𑀫𑁆𑀫𑀢𑀲𑁆𑀲 𑀲𑀢𑁄 𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀬 𑀓𑀼𑀮𑁂𑀲𑀼 𑀘 𑀕𑀡𑁂𑀲𑀼 𑀘 𑀅𑀮𑀕𑁆𑀕𑀢𑀸, 𑀅𑀘𑁆𑀘𑀦𑁆𑀢𑀫𑁂𑀯 𑀮𑀸𑀪𑀲𑀓𑁆𑀓𑀸𑀭𑀚𑀺𑀕𑀼𑀘𑁆𑀙𑀸𑀬 ¶ 𑀧𑀯𑀺𑀯𑁂𑀓𑀸𑀪𑀺𑀭𑀢𑀺, 𑀅𑀢𑀺𑀲𑀬𑀯𑀢𑀻 𑀘 𑀅𑀪𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺, 𑀢𑀣𑀸𑀭𑀽𑀧𑀸𑀬 𑀲𑀻𑀮𑀯𑀢𑀺𑀬𑀸 𑀓𑀮𑁆𑀬𑀸𑀡𑀥𑀫𑁆𑀫𑀸𑀬 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀅𑀦𑀦𑀼𑀜𑁆𑀜𑀸𑀢𑀸 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀩𑀮𑀓𑁆𑀓𑀸𑀭𑁂𑀦 𑀧𑀭𑀸𑀫𑀲𑀺𑀬𑀫𑀸𑀦𑀸𑀬 𑀲𑀻𑀮𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀯𑀺𑀓𑀸𑀭𑀸𑀦𑀸𑀧𑀢𑁆𑀢𑀺, 𑀓𑀢𑀸𑀧𑀭𑀸𑀥𑁂 𑀘 𑀢𑀲𑁆𑀫𑀺𑀁 𑀭𑀸𑀚𑀺𑀦𑀺 𑀉𑀧𑀕𑀢𑁂 𑀳𑀺𑀢𑀘𑀺𑀢𑁆𑀢𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀳𑀺 𑀲𑀫𑀦𑀼𑀲𑀸𑀲𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀇𑀥 𑀫𑀳𑀸𑀧𑀼𑀭𑀺𑀲𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 ‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂…𑀧𑁂… 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀘𑀽𑀴𑀩𑁄𑀥𑀺𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀳𑀺𑀁𑀲𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁩𑁭. 𑀧𑀜𑁆𑀘𑀫𑁂 ¶ 𑀫𑀳𑀺𑀁𑀲𑁄 𑀧𑀯𑀦𑀘𑀸𑀭𑀓𑁄𑀢𑀺 𑀫𑀳𑀸𑀯𑀦𑀘𑀸𑀭𑀻 𑀯𑀦𑀫𑀳𑀺𑀁𑀲𑁄 𑀬𑀤𑀸 𑀳𑁄𑀫𑀻𑀢𑀺 𑀬𑁄𑀚𑀦𑀸. 𑀧𑀯𑀟𑁆𑀠𑀓𑀸𑀬𑁄𑀢𑀺 𑀯𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀜𑁆𑀘 𑀣𑀽𑀮𑀪𑀸𑀯𑁂𑀦 𑀅𑀪𑀺𑀯𑀟𑁆𑀠𑀓𑀸𑀬𑁄. 𑀩𑀮𑀯𑀸𑀢𑀺 𑀫𑀳𑀸𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄. 𑀫𑀳𑀦𑁆𑀢𑁄𑀢𑀺 𑀯𑀺𑀧𑀼𑀮𑀲𑀭𑀻𑀭𑁄. 𑀳𑀢𑁆𑀣𑀺𑀓𑀮𑀪𑀧𑁆𑀧𑀫𑀸𑀡𑁄 𑀓𑀺𑀭 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀸𑀬𑁄 𑀳𑁄𑀢𑀺. 𑀪𑀻𑀫𑀤𑀲𑁆𑀲𑀦𑁄𑀢𑀺 𑀫𑀳𑀸𑀲𑀭𑀻𑀭𑀢𑀸𑀬 𑀯𑀦𑀫𑀳𑀺𑀁𑀲𑀚𑀸𑀢𑀺𑀢𑀸𑀬 𑀘 𑀲𑀻𑀮𑀁 𑀅𑀚𑀸𑀦𑀦𑁆𑀢𑀸𑀦𑀁 𑀪𑀬𑀁 𑀚𑀦𑀦𑀢𑁄 𑀪𑀬𑀸𑀦𑀓𑀤𑀲𑁆𑀲𑀦𑁄.

𑁩𑁮. 𑀧𑀩𑁆𑀪𑀸𑀭𑁂𑀢𑀺 𑀑𑀮𑀫𑁆𑀩𑀓𑀲𑀺𑀮𑀸𑀓𑀼𑀘𑁆𑀙𑀺𑀬𑀁. 𑀤𑀓𑀸𑀲𑀬𑁂𑀢𑀺 𑀚𑀮𑀸𑀲𑀬𑀲𑀫𑀻𑀧𑁂. 𑀳𑁄𑀢𑁂𑀢𑁆𑀣 𑀞𑀸𑀦𑀦𑁆𑀢𑀺 𑀏𑀢𑁆𑀣 𑀫𑀳𑀸𑀯𑀦𑁂 𑀬𑁄 𑀓𑁄𑀘𑀺 𑀧𑀤𑁂𑀲𑁄 𑀯𑀦𑀫𑀳𑀺𑀁𑀲𑀸𑀦𑀁 𑀢𑀺𑀝𑁆𑀞𑀦𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣.

𑁩𑁯. 𑀯𑀺𑀘𑀭𑀦𑁆𑀢𑁄𑀢𑀺 𑀯𑀺𑀳𑀸𑀭𑀨𑀸𑀲𑀼𑀓𑀁 𑀯𑀻𑀫𑀁𑀲𑀺𑀢𑀼𑀁 𑀯𑀺𑀘𑀭𑀦𑁆𑀢𑁄. 𑀞𑀸𑀦𑀁 𑀅𑀤𑁆𑀤𑀲 𑀪𑀤𑁆𑀤𑀓𑀦𑁆𑀢𑀺 𑀏𑀯𑀁 𑀯𑀺𑀘𑀭𑀦𑁆𑀢𑁄 𑀢𑀲𑁆𑀫𑀺𑀁 𑀫𑀳𑀸𑀭𑀜𑁆𑀜𑁂 𑀪𑀤𑁆𑀤𑀓𑀁 𑀫𑀬𑁆𑀳𑀁 𑀨𑀸𑀲𑀼𑀓𑀁 𑀭𑀼𑀓𑁆𑀔𑀫𑀽𑀮𑀝𑁆𑀞𑀸𑀦𑀁 𑀅𑀤𑁆𑀤𑀓𑁆𑀔𑀺𑀁. 𑀤𑀺𑀲𑁆𑀯𑀸 𑀘 𑀢𑀁 𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀢𑀺𑀝𑁆𑀞𑀸𑀫𑀺 𑀘 𑀲𑀬𑀸𑀫𑀺 𑀘 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸 𑀢𑀁 ¶ 𑀭𑀼𑀓𑁆𑀔𑀫𑀽𑀮𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀞𑀸𑀦𑀲𑀬𑀦𑁂𑀳𑀺 𑀯𑀻𑀢𑀺𑀦𑀸𑀫𑁂𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁪𑁦. 𑀢𑀤𑀸 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀫𑀳𑀺𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀫𑀳𑀸𑀲𑀭𑀻𑀭𑁄 𑀳𑀢𑁆𑀣𑀺𑀓𑀮𑀪𑀧𑁆𑀧𑀫𑀸𑀡𑁄 𑀧𑀩𑁆𑀩𑀢𑀧𑀸𑀤𑀧𑀩𑁆𑀪𑀸𑀭𑀕𑀺𑀭𑀺𑀤𑀼𑀕𑁆𑀕𑀯𑀦𑀖𑀝𑀸𑀤𑀻𑀲𑀼 ¶ 𑀯𑀺𑀘𑀭𑀦𑁆𑀢𑁄 𑀏𑀓𑀁 𑀨𑀸𑀲𑀼𑀓𑀁 𑀫𑀳𑀸𑀭𑀼𑀓𑁆𑀔𑀫𑀽𑀮𑀁 𑀤𑀺𑀲𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸 𑀢𑀢𑁆𑀣 𑀯𑀲𑀢𑀺. 𑀅𑀣𑁂𑀓𑁄 𑀮𑁄𑀮𑀫𑀓𑁆𑀓𑀝𑁄 𑀭𑀼𑀓𑁆𑀔𑀸 𑀑𑀢𑀭𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀢𑁆𑀯𑀸 𑀲𑀺𑀗𑁆𑀕𑁂𑀲𑀼 𑀕𑀡𑁆𑀳𑀺𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑁄 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀤𑁄𑀮𑀸𑀬𑀦𑁆𑀢𑁄 𑀓𑀻𑀴𑀺. 𑀩𑁄𑀥𑀺𑀲𑀢𑁆𑀢𑁄 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀤𑀸𑀬 𑀢𑀁 𑀢𑀲𑁆𑀲 𑀅𑀦𑀸𑀘𑀸𑀭𑀁 𑀦 𑀫𑀦𑀲𑀸𑀓𑀸𑀲𑀺. 𑀫𑀓𑁆𑀓𑀝𑁄 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣𑁂𑀢𑁆𑀣 𑀓𑀧𑀺 𑀫𑀸𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀓𑀧𑀺 𑀫𑀸𑀕𑀦𑁆𑀢𑁆𑀯𑀸𑀢𑀺 𑀓𑀧𑀺 𑀆𑀕𑀦𑁆𑀢𑁆𑀯𑀸, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀧𑀸𑀧𑁄𑀢𑀺 𑀮𑀸𑀫𑀓𑁄. 𑀅𑀦𑀭𑀺𑀬𑁄𑀢𑀺 𑀅𑀦𑀬𑁂 𑀇𑀭𑀺𑀬𑀦𑁂𑀦 𑀅𑀬𑁂 𑀘 𑀦 𑀇𑀭𑀺𑀬𑀦𑁂𑀦 𑀅𑀦𑀭𑀺𑀬𑁄, 𑀦𑀺𑀳𑀻𑀦𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀮𑀳𑀽𑀢𑀺 𑀮𑁄𑀮𑁄. 𑀔𑀦𑁆𑀥𑁂𑀢𑀺 𑀔𑀦𑁆𑀥𑀧𑁆𑀧𑀤𑁂𑀲𑁂. 𑀫𑀼𑀢𑁆𑀢𑁂𑀢𑀻𑀢𑀺 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺. 𑀑𑀳𑀤𑁂𑀢𑀻𑀢𑀺 𑀓𑀭𑀻𑀲𑀁 𑀑𑀲𑁆𑀲𑀚𑁆𑀚𑀢𑀺. 𑀢𑀦𑁆𑀢𑀺 𑀢𑀁 𑀫𑀁, 𑀢𑀤𑀸 𑀫𑀳𑀺𑀁𑀲𑀪𑀽𑀢𑀁 𑀫𑀁.

𑁪𑁧. 𑀲𑀓𑀺𑀫𑁆𑀧𑀺 ¶ 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑁆𑀧𑀺 𑀤𑀽𑀲𑁂𑀢𑀺 𑀫𑀁 𑀲𑀩𑁆𑀩𑀓𑀸𑀮𑀫𑁆𑀧𑀺. 𑀢𑁂𑀦𑀸𑀳 ‘‘𑀤𑀽𑀲𑁂𑀢𑀺 𑀫𑀁 𑀲𑀩𑁆𑀩𑀓𑀸𑀮’’𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀤𑀺𑀯𑀲𑀫𑀢𑁆𑀢𑀁, 𑀅𑀣 𑀔𑁄 𑀲𑀩𑁆𑀩𑀓𑀸𑀮𑀫𑁆𑀧𑀺 𑀫𑀁 𑀧𑀲𑁆𑀲𑀸𑀯𑀸𑀤𑀻𑀳𑀺 𑀤𑀽𑀲𑁂𑀢𑀺. 𑀬𑀤𑀸 𑀬𑀤𑀸 𑀫𑀼𑀢𑁆𑀢𑀸𑀤𑀻𑀦𑀺 𑀓𑀸𑀢𑀼𑀓𑀸𑀫𑁄, 𑀢𑀤𑀸 𑀢𑀤𑀸 𑀫𑀬𑁆𑀳𑀫𑁂𑀯 𑀉𑀧𑀭𑀺 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀤𑁆𑀤𑀼𑀢𑁄𑀢𑀺 𑀩𑀸𑀥𑀺𑀢𑁄, 𑀢𑁂𑀦 𑀲𑀺𑀗𑁆𑀕𑁂𑀲𑀼 𑀑𑀮𑀫𑁆𑀩𑀦𑀸𑀤𑀺𑀦𑀸 𑀫𑀼𑀢𑁆𑀢𑀸𑀤𑀺𑀅𑀲𑀼𑀘𑀺𑀫𑀓𑁆𑀔𑀡𑁂𑀦 𑀢𑀲𑁆𑀲 𑀘 𑀅𑀧𑀳𑀭𑀡𑀢𑁆𑀣𑀁 𑀅𑀦𑁂𑀓𑀯𑀸𑀭𑀁 𑀲𑀺𑀗𑁆𑀕𑀓𑁄𑀝𑀻𑀳𑀺 𑀯𑀸𑀮𑀕𑁆𑀕𑁂𑀦 𑀘 𑀅𑀦𑁂𑀓𑀯𑀸𑀭𑀁 𑀓𑀤𑁆𑀤𑀫𑀧𑀁𑀲𑀼𑀫𑀺𑀲𑁆𑀲𑀓𑀁 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀥𑁄𑀯𑀦𑁂𑀦 𑀘 𑀦𑀺𑀧𑁆𑀧𑀻𑀴𑀺𑀢𑁄 𑀳𑁄𑀫𑀻𑀢𑀺 𑀅𑀢𑁆𑀣𑁄.

𑁪𑁨. 𑀬𑀓𑁆𑀔𑁄𑀢𑀺 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀫𑀁 𑀇𑀤𑀫𑀩𑁆𑀭𑀯𑀻𑀢𑀺 𑀭𑀼𑀓𑁆𑀔𑀓𑁆𑀔𑀦𑁆𑀥𑁂 𑀞𑀢𑁆𑀯𑀸 ‘‘𑀫𑀳𑀺𑀁𑀲𑀭𑀸𑀚, 𑀓𑀲𑁆𑀫𑀸 𑀇𑀫𑀲𑁆𑀲 𑀤𑀼𑀝𑁆𑀞𑀫𑀓𑁆𑀓𑀝𑀲𑁆𑀲 𑀅𑀯𑀫𑀸𑀦𑀁 𑀲𑀳𑀲𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀦𑀸𑀲𑁂𑀳𑁂𑀢𑀁 𑀙𑀯𑀁 𑀧𑀸𑀧𑀁 ¶ , 𑀲𑀺𑀗𑁆𑀕𑁂𑀳𑀺 𑀘 𑀔𑀼𑀭𑁂𑀳𑀺 𑀘𑀸𑀢𑀺 𑀇𑀤𑀁 𑀯𑀘𑀦𑀁 𑀫𑀁 𑀅𑀪𑀸𑀲𑀺.

𑁪𑁩. 𑀏𑀯𑀁 𑀯𑀼𑀢𑁆𑀢𑁂 𑀢𑀤𑀸 𑀬𑀓𑁆𑀔𑁂𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀲𑁆𑀫𑀺𑀁 𑀬𑀓𑁆𑀔𑁂 𑀏𑀯𑀁 𑀯𑀼𑀢𑁆𑀢𑁂 𑀲𑀢𑀺. 𑀅𑀳𑀁 𑀢𑀁 𑀇𑀤𑀫𑀩𑁆𑀭𑀯𑀺𑀦𑁆𑀢𑀺 𑀅𑀳𑀁 𑀢𑀁 𑀬𑀓𑁆𑀔𑀁 𑀇𑀤𑀁 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀅𑀩𑁆𑀭𑀯𑀺𑀁 𑀅𑀪𑀸𑀲𑀺𑀁. 𑀓𑀼𑀡𑀧𑁂𑀦𑀸𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑁂𑀦 𑀲𑀼𑀘𑀺𑀚𑀸𑀢𑀺𑀓𑀸𑀦𑀁 𑀲𑀸𑀥𑀽𑀦𑀁 𑀧𑀭𑀫𑀚𑀺𑀕𑀼𑀘𑁆𑀙𑀦𑀻𑀬𑀢𑀸𑀬 𑀅𑀢𑀺𑀤𑀼𑀕𑁆𑀕𑀦𑁆𑀥𑀯𑀸𑀬𑀦𑁂𑀦 𑀘 𑀓𑀼𑀡𑀧𑀲𑀤𑀺𑀲𑀢𑀸𑀬 𑀓𑀼𑀡𑀧𑁂𑀦. 𑀧𑀸𑀧𑁂𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀧𑀸𑀧𑁂𑀦. 𑀅𑀦𑀭𑀺𑀬𑁂𑀦𑀸𑀢𑀺 𑀅𑀦𑀭𑀺𑀬𑀸𑀦𑀁 ¶ 𑀅𑀲𑀸𑀥𑀽𑀦𑀁 𑀫𑀸𑀕𑀯𑀺𑀓𑀦𑁂𑀲𑀸𑀤𑀸𑀤𑀻𑀦𑀁 𑀳𑀻𑀦𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀢𑁆𑀢𑀸 𑀅𑀦𑀭𑀺𑀬𑁂𑀦, 𑀓𑀺𑀁 𑀓𑁂𑀦 𑀓𑀸𑀭𑀡𑁂𑀦, 𑀢𑁆𑀯𑀁 𑀤𑁂𑀯𑀢𑁂 𑀫𑀁 𑀫𑀓𑁆𑀔𑁂𑀲𑀺, 𑀅𑀬𑀼𑀢𑁆𑀢𑀁 𑀢𑀬𑀸 𑀯𑀼𑀢𑁆𑀢𑀁 𑀫𑀁 𑀧𑀸𑀧𑁂 𑀦𑀺𑀬𑁄𑀚𑁂𑀦𑁆𑀢𑀺𑀬𑀸𑀢𑀺 𑀤𑀲𑁆𑀲𑁂𑀢𑀺.

𑁪𑁪. 𑀇𑀤𑀸𑀦𑀺 𑀢𑀲𑁆𑀫𑀺𑀁 𑀧𑀸𑀧𑀥𑀫𑁆𑀫𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀤𑀺𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑀤𑁆𑀤𑁂 𑀤𑁂𑀯𑀢𑁂, 𑀅𑀳𑀁 𑀢𑀲𑁆𑀲 𑀬𑀤𑀺 𑀓𑀼𑀚𑁆𑀛𑁂𑀬𑁆𑀬𑀁, 𑀢𑀢𑁄𑀧𑀺 𑀮𑀸𑀫𑀓𑀢𑀭𑁄 𑀪𑀯𑁂𑀬𑁆𑀬𑀁. 𑀬𑁂𑀦 𑀳𑀺 𑀅𑀥𑀫𑁆𑀫𑀘𑀭𑀡𑁂𑀦 𑀲𑁄 𑀩𑀸𑀮𑀫𑀓𑁆𑀓𑀝𑁄 𑀦𑀺𑀳𑀻𑀦𑁄 𑀦𑀸𑀫 𑀚𑀸𑀢𑁄, 𑀲𑀘𑁂 𑀧𑀦𑀸𑀳𑀁 𑀢𑀢𑁄𑀧𑀺 𑀩𑀮𑀯𑀢𑀭𑀁 𑀧𑀸𑀧𑀥𑀫𑁆𑀫𑀁 𑀘𑀭𑁂𑀬𑁆𑀬𑀁, 𑀦𑀦𑀼 𑀢𑁂𑀦 𑀢𑀢𑁄 𑀧𑀸𑀧𑀢𑀭𑁄 𑀪𑀯𑁂𑀬𑁆𑀬𑀁, 𑀅𑀝𑁆𑀞𑀸𑀦𑀜𑁆𑀘𑁂𑀢𑀁 𑀬𑀤𑀺𑀳𑀁 𑀇𑀥𑀮𑁄𑀓𑀧𑀭𑀮𑁄𑀓𑀁 𑀢𑀤𑀼𑀢𑁆𑀢𑀭𑀺 𑀘 𑀚𑀸𑀦𑀺𑀢𑁆𑀯𑀸 𑀞𑀺𑀢𑁄 𑀏𑀓𑀦𑁆𑀢𑁂𑀦𑁂𑀯 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀏𑀯𑀭𑀽𑀧𑀁 𑀧𑀸𑀧𑀥𑀫𑁆𑀫𑀁 𑀘𑀭𑁂𑀬𑁆𑀬𑀦𑁆𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀻𑀮𑀜𑁆𑀘 𑀫𑁂 𑀧𑀪𑀺𑀚𑁆𑀚𑁂𑀬𑁆𑀬𑀸𑀢𑀺 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀏𑀯𑀭𑀽𑀧𑀁 𑀧𑀸𑀧𑀁 𑀓𑀭𑁂𑀬𑁆𑀬𑀁, 𑀫𑀬𑁆𑀳𑀁 𑀲𑀻𑀮𑀧𑀸𑀭𑀫𑀻 𑀔𑀡𑁆𑀟𑀺𑀢𑀸 𑀲𑀺𑀬𑀸. 𑀯𑀺𑀜𑁆𑀜𑀽 𑀘 𑀕𑀭𑀳𑁂𑀬𑁆𑀬𑀼 𑀫𑀦𑁆𑀢𑀺 𑀧𑀡𑁆𑀟𑀺𑀢𑀸 𑀘 𑀤𑁂𑀯𑀫𑀦𑀼𑀲𑁆𑀲𑀸 𑀫𑀁 𑀕𑀭𑀳𑁂𑀬𑁆𑀬𑀼𑀁 ‘‘𑀧𑀲𑁆𑀲𑀣, 𑀪𑁄, 𑀅𑀬𑀁 𑀩𑁄𑀥𑀺𑀲𑀢𑁆𑀢𑁄 𑀩𑁄𑀥𑀺𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀏𑀯𑀭𑀽𑀧𑀁 𑀧𑀸𑀧𑀁 𑀅𑀓𑀸𑀲𑀻’’𑀢𑀺.

𑁪𑁫. 𑀳𑀻𑀴𑀺𑀢𑀸 𑀚𑀻𑀯𑀺𑀢𑀸 𑀯𑀸𑀧𑀻𑀢𑀺 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀏𑀯𑀁 𑀯𑀺𑀜𑁆𑀜𑀽𑀳𑀺 𑀳𑀻𑀴𑀺𑀢𑀸 𑀕𑀭𑀳𑀺𑀢𑀸 𑀚𑀻𑀯𑀺𑀢𑀸𑀧𑀺 𑀧𑀭𑀺𑀲𑀼𑀤𑁆𑀥𑁂𑀦 𑀧𑀭𑀺𑀲𑀼𑀤𑁆𑀥𑀲𑀻𑀮𑁂𑀦 𑀳𑀼𑀢𑁆𑀯𑀸 𑀫𑀢𑀁 𑀯𑀸 𑀫𑀭𑀡𑀫𑁂𑀯 𑀯𑀭𑀁 𑀉𑀢𑁆𑀢𑀫𑀁 𑀲𑁂𑀬𑁆𑀬𑁄. 𑀓𑁆𑀬𑀸𑀳𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 ¶ , 𑀓𑀸𑀳𑀸𑀫𑀺 𑀧𑀭𑀳𑁂𑀞𑀦𑀦𑁆𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀘 𑀅𑀳𑀁 𑀫𑀬𑁆𑀳𑀁 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀫𑁆𑀧𑀺 𑀧𑀭𑀲𑀢𑁆𑀢𑀯𑀺𑀳𑀺𑀁𑀲𑀦𑀁 𑀓𑀺𑀁 𑀓𑀸𑀳𑀸𑀫𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀢𑀲𑁆𑀲 𑀓𑀭𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀬𑀁 𑀧𑀦 𑀅𑀜𑁆𑀜𑁂𑀧𑀺 𑀫𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀏𑀯𑀁 ¶ 𑀅𑀦𑀸𑀘𑀸𑀭𑀁 𑀓𑀭𑀺𑀲𑁆𑀲𑀢𑀺, 𑀢𑀢𑁄 𑀬𑁂𑀲𑀁 𑀘𑀡𑁆𑀟𑀫𑀳𑀺𑀁𑀲𑀸𑀦𑀁 𑀏𑀯𑀁 𑀓𑀭𑀺𑀲𑁆𑀲𑀢𑀺, 𑀢𑁂 𑀏𑀯 𑀏𑀢𑀁 𑀯𑀥𑀺𑀲𑁆𑀲𑀦𑁆𑀢𑀺, 𑀲𑀸 𑀏𑀢𑀲𑁆𑀲 𑀅𑀜𑁆𑀜𑁂𑀳𑀺 𑀫𑀸𑀭𑀡𑀸 𑀫𑀬𑁆𑀳𑀁 𑀤𑀼𑀓𑁆𑀔𑀢𑁄 𑀘 𑀧𑀸𑀡𑀸𑀢𑀺𑀧𑀸𑀢𑀢𑁄 𑀘 𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁬.

‘‘𑀫𑀫𑁂𑀯𑀸𑀬𑀁 𑀫𑀜𑁆𑀜𑀫𑀸𑀦𑁄, 𑀅𑀜𑁆𑀜𑁂𑀧𑁂𑀯𑀁 𑀓𑀭𑀺𑀲𑁆𑀲𑀢𑀺;

𑀢𑁂𑀯 𑀢𑀲𑁆𑀲 𑀯𑀥𑀺𑀲𑁆𑀲𑀦𑁆𑀢𑀺, 𑀲𑀸 𑀫𑁂 𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀫𑀫𑁂𑀯𑀸𑀬𑀦𑁆𑀢𑀺 𑀫𑀁 𑀯𑀺𑀬 𑀅𑀬𑀁. 𑀅𑀜𑁆𑀜𑁂𑀧𑀻𑀢𑀺 𑀅𑀜𑁆𑀜𑁂𑀲𑀫𑁆𑀧𑀺. 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁪𑁭. 𑀳𑀻𑀦𑀫𑀚𑁆𑀛𑀺𑀫𑀉𑀓𑁆𑀓𑀝𑁆𑀞𑁂𑀢𑀺 ¶ 𑀳𑀻𑀦𑁂 𑀘 𑀫𑀚𑁆𑀛𑀺𑀫𑁂 𑀘 𑀉𑀓𑁆𑀓𑀝𑁆𑀞𑁂 𑀘 𑀦𑀺𑀫𑀺𑀢𑁆𑀢𑀪𑀽𑀢𑁂. 𑀲𑀳𑀦𑁆𑀢𑁄 𑀅𑀯𑀫𑀸𑀦𑀺𑀢𑀦𑁆𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀢𑁂𑀳𑀺 𑀧𑀯𑀢𑁆𑀢𑀺𑀢𑀁 𑀅𑀯𑀫𑀸𑀦𑀁 𑀧𑀭𑀺𑀪𑀯𑀁 𑀲𑀳𑀦𑁆𑀢𑁄 𑀔𑀫𑀦𑁆𑀢𑁄. 𑀏𑀯𑀁 𑀮𑀪𑀢𑀺 𑀲𑀧𑁆𑀧𑀜𑁆𑀜𑁄𑀢𑀺 𑀏𑀯𑀁 𑀳𑀻𑀦𑀸𑀤𑀻𑀲𑀼 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀧𑀭𑀸𑀥𑀁 𑀲𑀳𑀦𑁆𑀢𑁄 𑀲𑀻𑀮𑀸𑀤𑀺𑀧𑀸𑀭𑀫𑀺𑀬𑁄 𑀩𑁆𑀭𑀽𑀳𑁂𑀢𑁆𑀯𑀸 𑀫𑀦𑀲𑀸 𑀬𑀣𑀸𑀧𑀢𑁆𑀣𑀺𑀢𑀁 𑀬𑀣𑀺𑀘𑁆𑀙𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀮𑀪𑀢𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀲𑁆𑀲 𑀢𑀁 𑀦 𑀤𑀽𑀭𑁂𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀓𑀸𑀲𑁂𑀦𑁆𑀢𑁄 𑀤𑁂𑀯𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀅𑀜𑁆𑀜𑀢𑁆𑀣 𑀕𑀢𑁄. 𑀅𑀜𑁆𑀜𑁄 𑀘𑀡𑁆𑀟𑀫𑀳𑀺𑀁𑀲𑁄 𑀦𑀺𑀯𑀸𑀲𑀨𑀸𑀲𑀼𑀢𑀸𑀬 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀼𑀝𑁆𑀞𑀫𑀓𑁆𑀓𑀝𑁄 ‘‘𑀲𑁄 𑀏𑀯 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀣𑁂𑀯 𑀅𑀦𑀸𑀘𑀸𑀭𑀁 𑀅𑀓𑀸𑀲𑀺. 𑀅𑀣 𑀦𑀁 𑀲𑁄 𑀯𑀺𑀥𑀼𑀦𑀦𑁆𑀢𑁄 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀺𑀗𑁆𑀕𑁂𑀦 𑀳𑀤𑀬𑁂 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀤𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀲𑀜𑁆𑀘𑀼𑀡𑁆𑀡𑁂𑀲𑀺.

𑀢𑀤𑀸 𑀲𑀻𑀮𑀯𑀸 𑀫𑀳𑀺𑀁𑀲𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀳𑀢𑁆𑀣𑀺𑀦𑀸𑀕- (𑀘𑀭𑀺𑀬𑀸. 𑁨.𑁧 𑀆𑀤𑀬𑁄) 𑀪𑀽𑀭𑀺𑀤𑀢𑁆𑀢- (𑀘𑀭𑀺𑀬𑀸. 𑁨.𑁧𑁧 𑀆𑀤𑀬𑁄) 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚- (𑀘𑀭𑀺𑀬𑀸. 𑁨.𑁨𑁦 𑀆𑀤𑀬𑁄) 𑀘𑀭𑀺𑀬𑀸𑀲𑀼 𑀯𑀺𑀬 𑀇𑀥 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀳𑀺𑀁𑀲𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀭𑀼𑀭𑀼𑀫𑀺𑀕𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁮. 𑀙𑀝𑁆𑀞𑁂 ¶ ¶ 𑀲𑀼𑀢𑀢𑁆𑀢𑀓𑀦𑀓𑀲𑀦𑁆𑀦𑀺𑀪𑁄𑀢𑀺 𑀬𑀣𑀸 𑀲𑀼𑀝𑁆𑀞𑀼 𑀅𑀧𑀕𑀢𑀲𑀩𑁆𑀩𑀓𑀸𑀴𑀓𑁄 𑀳𑁄𑀢𑀺, 𑀏𑀯𑀁 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀢𑀢𑁆𑀢𑀓𑀦𑀓𑀲𑀦𑁆𑀦𑀺𑀪𑁄. 𑀫𑀺𑀕𑀭𑀸𑀚𑀸 𑀭𑀼𑀭𑀼 𑀦𑀸𑀫𑀸𑀢𑀺 𑀚𑀸𑀢𑀺𑀲𑀺𑀤𑁆𑀥𑁂𑀦 𑀦𑀸𑀫𑁂𑀦 𑀭𑀼𑀭𑀼 𑀦𑀸𑀫 𑀫𑀺𑀕𑀭𑀸𑀚𑀸, 𑀚𑀸𑀢𑀺𑀢𑁄 𑀭𑀼𑀭𑀼, 𑀫𑀺𑀕𑀸𑀦𑀜𑁆𑀘 𑀭𑀸𑀚𑀸𑀢𑀺 𑀅𑀢𑁆𑀣𑁄. 𑀧𑀭𑀫𑀲𑀻𑀮𑀲𑀫𑀸𑀳𑀺𑀢𑁄𑀢𑀺 𑀉𑀢𑁆𑀢𑀫𑀲𑀻𑀮𑀲𑀫𑀸𑀳𑀺𑀢𑁄, 𑀯𑀺𑀲𑀼𑀤𑁆𑀥𑀲𑀻𑀮𑁄 𑀘𑁂𑀯 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀘, 𑀯𑀺𑀲𑀼𑀤𑁆𑀥𑀲𑀻𑀮𑁂 𑀯𑀸 𑀲𑀫𑁆𑀫𑀸 𑀆𑀳𑀺𑀢𑀘𑀺𑀢𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀭𑀼𑀭𑀼𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀲𑀭𑀻𑀭𑀘𑁆𑀙𑀯𑀺 𑀲𑀼𑀝𑁆𑀞𑀼 𑀢𑀸𑀧𑁂𑀢𑁆𑀯𑀸 𑀫𑀚𑁆𑀚𑀺𑀢𑀓𑀜𑁆𑀘𑀦𑀧𑀝𑁆𑀝𑀯𑀡𑁆𑀡𑁄 𑀅𑀳𑁄𑀲𑀺, 𑀳𑀢𑁆𑀣𑀧𑀸𑀤𑀸 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬, 𑀦𑀗𑁆𑀕𑀼𑀝𑁆𑀞𑀁 𑀘𑀫𑀭𑀻𑀦𑀗𑁆𑀕𑀼𑀝𑁆𑀞𑀁 𑀯𑀺𑀬, 𑀲𑀺𑀗𑁆𑀕𑀸𑀦𑀺 𑀭𑀚𑀢𑀤𑀸𑀫𑀯𑀡𑁆𑀡𑀸𑀦𑀺 𑀅𑀓𑁆𑀔𑀻𑀦𑀺 𑀲𑀼𑀫𑀚𑁆𑀚𑀺𑀢𑀫𑀡𑀺𑀕𑀼𑀴𑀺𑀓𑀸 ¶ 𑀯𑀺𑀬, 𑀫𑀼𑀔𑀁 𑀑𑀤𑀳𑀺𑀢𑁆𑀯𑀸 𑀞𑀧𑀺𑀢𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀸 𑀯𑀺𑀬. 𑀲𑁄 𑀚𑀦𑀲𑀁𑀲𑀕𑁆𑀕𑀁 𑀧𑀳𑀸𑀬 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑁄 𑀧𑀭𑀺𑀯𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀏𑀓𑀓𑁄𑀯 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀭𑀫𑀡𑀻𑀬𑁂 𑀲𑀸𑀮𑀫𑀺𑀲𑁆𑀲𑀓𑁂 𑀲𑀼𑀧𑀼𑀧𑁆𑀨𑀺𑀢𑀧𑀯𑀦𑁂 𑀯𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁯.

‘‘𑀭𑀫𑁆𑀫𑁂 𑀧𑀤𑁂𑀲𑁂 𑀭𑀫𑀡𑀻𑀬𑁂, 𑀯𑀺𑀯𑀺𑀢𑁆𑀢𑁂 𑀅𑀫𑀦𑀼𑀲𑁆𑀲𑀓𑁂;

𑀢𑀢𑁆𑀣 𑀯𑀸𑀲𑀁 𑀉𑀧𑀕𑀜𑁆𑀙𑀺𑀁, 𑀕𑀗𑁆𑀕𑀸𑀓𑀽𑀮𑁂 𑀫𑀦𑁄𑀭𑀫𑁂’’𑀢𑀺.

𑀢𑀢𑁆𑀣 𑀭𑀫𑁆𑀫𑁂 𑀧𑀤𑁂𑀲𑁂𑀢𑀺 𑀫𑀼𑀢𑁆𑀢𑀸𑀢𑀮𑀲𑀤𑀺𑀲𑀯𑀸𑀮𑀼𑀓𑀸𑀘𑀼𑀡𑁆𑀡𑀧𑀡𑁆𑀟𑀭𑁂𑀳𑀺 𑀪𑀽𑀫𑀺𑀪𑀸𑀕𑁂𑀳𑀺 𑀲𑀺𑀦𑀺𑀤𑁆𑀥𑀳𑀭𑀺𑀢𑀢𑀺𑀡𑀲𑀜𑁆𑀘𑀭𑀺𑀢𑁂𑀳𑀺 𑀯𑀦𑀢𑁆𑀣𑀮𑁂𑀳𑀺 𑀘𑀺𑀢𑁆𑀢𑀢𑁆𑀣𑀭𑀡𑁂𑀳𑀺 𑀯𑀺𑀬 𑀦𑀸𑀦𑀸𑀯𑀡𑁆𑀡𑀯𑀺𑀘𑀺𑀢𑁆𑀢𑁂𑀳𑀺 𑀲𑀺𑀮𑀸𑀢𑀮𑁂𑀳𑀺 𑀫𑀡𑀺𑀓𑁆𑀔𑀦𑁆𑀥𑀦𑀺𑀫𑁆𑀫𑀮𑀲𑀮𑀺𑀮𑁂𑀳𑀺 𑀚𑀮𑀸𑀲𑀬𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀘 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀬 𑀭𑀢𑁆𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀢𑀺𑀡𑀚𑀸𑀢𑀺𑀬𑀸 𑀲𑀜𑁆𑀙𑀦𑁆𑀦𑀢𑁆𑀢𑀸 𑀭𑀫𑁆𑀫𑁂 𑀅𑀭𑀜𑁆𑀜𑀧𑁆𑀧𑀤𑁂𑀲𑁂. 𑀭𑀫𑁆𑀫𑀡𑀻𑀬𑁂𑀢𑀺 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀮𑀗𑁆𑀓𑀢𑀯𑀺𑀧𑀼𑀮𑀲𑀸𑀔𑀸𑀯𑀺𑀦𑀤𑁆𑀥𑁂𑀳𑀺 𑀦𑀸𑀦𑀸𑀯𑀺𑀥𑀤𑀺𑀚𑀕𑀡𑀽𑀧𑀓𑀽𑀚𑀺𑀢𑁂𑀳𑀺 𑀯𑀺𑀯𑀺𑀥𑀢𑀭𑀼𑀮𑀢𑀸𑀯𑀦𑀯𑀺𑀭𑀸𑀚𑀺𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀅𑀫𑁆𑀩𑀲𑀸𑀮𑀯𑀦𑀲𑀡𑁆𑀟𑀫𑀡𑁆𑀟𑀺𑀢𑁂𑀳𑀺 𑀯𑀦𑀕𑀳𑀦𑁂𑀳𑀺 𑀉𑀧𑀲𑁄𑀪𑀺𑀢𑀢𑁆𑀢𑀸 𑀢𑀢𑁆𑀣 𑀧𑀯𑀺𑀝𑁆𑀞𑀲𑁆𑀲 𑀚𑀦𑀲𑁆𑀲 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀫𑀡𑀻𑀬𑁂. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀭𑀼𑀭𑀼𑀫𑀺𑀕𑀭𑀸𑀚𑀚𑀸𑀢𑀓𑁂 𑁋

‘‘𑀏𑀢𑀲𑁆𑀫𑀺𑀁 ¶ 𑀯𑀦𑀲𑀡𑁆𑀟𑀲𑁆𑀫𑀺𑀁, 𑀅𑀫𑁆𑀩𑀸 𑀲𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑁄, 𑀏𑀢𑁆𑀣𑁂𑀲𑁄 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺. (𑀚𑀸. 𑁧.𑁧𑁩.𑁧𑁧𑁯);

𑀯𑀺𑀯𑀺𑀢𑁆𑀢𑁂𑀢𑀺 𑀚𑀦𑀯𑀸𑀲𑀯𑀺𑀭𑀳𑁂𑀦 𑀲𑀼𑀜𑁆𑀜𑁂. 𑀅𑀫𑀦𑀼𑀲𑁆𑀲𑀓𑁂𑀢𑀺 𑀲𑀜𑁆𑀘𑀭𑀡𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀢𑀢𑁆𑀣 𑀅𑀪𑀸𑀯𑁂𑀦 𑀫𑀦𑀼𑀲𑁆𑀲𑀭𑀳𑀺𑀢𑁂 ¶ . 𑀫𑀦𑁄𑀭𑀫𑁂𑀢𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀢𑁄 𑀧𑀯𑀺𑀯𑁂𑀓𑀓𑀸𑀫𑀸𑀦𑀁 𑀫𑀦𑁄 𑀭𑀫𑁂𑀢𑀻𑀢𑀺 𑀫𑀦𑁄𑀭𑀫𑁂.

𑁫𑁦. 𑀅𑀣 𑀉𑀧𑀭𑀺𑀕𑀗𑁆𑀕𑀸𑀬𑀸𑀢𑀺 𑀏𑀢𑁆𑀣 𑀅𑀣𑀸𑀢𑀺 𑀅𑀥𑀺𑀓𑀸𑀭𑁂 𑀦𑀺𑀧𑀸𑀢𑁄, 𑀢𑁂𑀦 𑀫𑀬𑀺 𑀢𑀢𑁆𑀣 𑀢𑀣𑀸 𑀯𑀲𑀦𑁆𑀢𑁂 𑀇𑀤𑀁 𑀅𑀥𑀺𑀓𑀸𑀭𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀻𑀧𑁂𑀢𑀺. 𑀉𑀧𑀭𑀺𑀕𑀗𑁆𑀕𑀸𑀬𑀸𑀢𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀉𑀧𑀭𑀺𑀲𑁄𑀢𑁂. 𑀥𑀦𑀺𑀓𑁂𑀳𑀺 𑀧𑀭𑀺𑀧𑀻𑀴𑀺𑀢𑁄𑀢𑀺 𑀇𑀡𑀁 𑀕𑀳𑁂𑀢𑁆𑀯𑀸 𑀢𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀡𑀸𑀬𑀺𑀓𑁂𑀳𑀺 𑀘𑁄𑀤𑀺𑀬𑀫𑀸𑀦𑁄.

𑀏𑀓𑁄 𑀓𑀺𑀭 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 ‘‘𑀅𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀓𑀺𑀮𑀫𑀺𑀲𑁆𑀲𑀢𑀻’’𑀢𑀺 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀦 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀕𑀻𑀢𑀯𑀸𑀤𑀺𑀢𑀦𑀘𑁆𑀘𑀔𑀸𑀤𑀦𑀪𑁄𑀚𑀦𑀢𑁄 𑀉𑀤𑁆𑀥𑀁 𑀦 𑀓𑀺𑀜𑁆𑀘𑀺 𑀅𑀜𑁆𑀜𑀸𑀲𑀺. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀢𑁆𑀯𑀸 𑀥𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑁄 𑀢𑁂𑀲𑀁 𑀅𑀘𑁆𑀘𑀬𑁂𑀦 ¶ 𑀇𑀢𑁆𑀣𑀺𑀥𑀼𑀢𑁆𑀢𑀲𑀼𑀭𑀸𑀥𑀼𑀢𑁆𑀢𑀸𑀤𑀺𑀧𑀭𑀺𑀯𑀼𑀢𑁄 𑀦𑀸𑀦𑀸𑀩𑁆𑀬𑀲𑀦𑀫𑀼𑀔𑁂𑀳𑀺 𑀲𑀩𑁆𑀩𑀁 𑀥𑀦𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀇𑀡𑀁 𑀆𑀤𑀸𑀬 𑀢𑀫𑁆𑀧𑀺 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀥𑀦𑀺𑀓𑁂𑀳𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦, 𑀢𑁂𑀦𑁂𑀯𑀫𑁆𑀳𑀺 𑀅𑀢𑁆𑀢𑀪𑀸𑀯𑁂𑀦 𑀅𑀜𑁆𑀜𑁄 𑀯𑀺𑀬 𑀚𑀸𑀢𑁄, 𑀫𑀭𑀡𑀁 𑀫𑁂 𑀲𑁂𑀬𑁆𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀡𑀸𑀬𑀺𑀓𑁂 𑀆𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀇𑀡𑀧𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣, 𑀕𑀗𑁆𑀕𑀸𑀢𑀻𑀭𑁂 𑀫𑁂 𑀦𑀺𑀳𑀺𑀢𑀁 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁 𑀅𑀢𑁆𑀣𑀺, 𑀢𑀁 𑀯𑁄 𑀤𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀅𑀕𑀫𑀁𑀲𑀼. 𑀲𑁄 ‘‘𑀇𑀥 𑀥𑀦𑀁, 𑀏𑀢𑁆𑀣 𑀥𑀦’’𑀦𑁆𑀢𑀺 𑀦𑀺𑀥𑀺𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀯𑀺𑀬 ‘‘𑀏𑀯𑀁 𑀫𑁂 𑀇𑀡𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀮𑀸𑀬𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀧𑀢𑀺. 𑀲𑁄 𑀘𑀡𑁆𑀟𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑁄 𑀓𑀸𑀭𑀼𑀜𑁆𑀜𑀭𑀯𑀁 𑀭𑀯𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀉𑀧𑀭𑀺𑀕𑀗𑁆𑀕𑀸𑀬𑀸’’𑀢𑀺𑀆𑀤𑀺.

𑀢𑀢𑁆𑀣 𑀚𑀻𑀯𑀸𑀫𑀺 𑀯𑀸 𑀫𑀭𑀸𑀫𑀺 𑀯𑀸𑀢𑀺 𑀇𑀫𑀲𑁆𑀫𑀺𑀁 𑀕𑀗𑁆𑀕𑀸𑀲𑁄𑀢𑁂 𑀧𑀢𑀺𑀢𑁄 𑀚𑀻𑀯𑀸𑀫𑀺 𑀯𑀸 𑀫𑀭𑀸𑀫𑀺 𑀯𑀸, 𑀚𑀻𑀯𑀺𑀢𑀁 𑀯𑀸 𑀫𑁂 𑀏𑀢𑁆𑀣 𑀳𑁄𑀢𑀼 𑀫𑀭𑀡𑀁 𑀯𑀸, 𑀉𑀪𑀬𑀣𑀸𑀧𑀺 𑀇𑀡𑀸𑀬𑀺𑀓𑀧𑀻𑀴𑀸 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁧. 𑀫𑀚𑁆𑀛𑁂 𑀕𑀗𑁆𑀕𑀸𑀬 ¶ 𑀕𑀘𑁆𑀙𑀢𑀻𑀢𑀺 𑀲𑁄 𑀧𑀼𑀭𑀺𑀲𑁄 𑀭𑀢𑁆𑀢𑀺𑀦𑁆𑀤𑀺𑀯𑀁 𑀕𑀗𑁆𑀕𑀸𑀬 𑀯𑀼𑀬𑁆𑀳𑀫𑀸𑀦𑁄 𑀚𑀻𑀯𑀺𑀢𑀧𑁂𑀫𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀫𑀭𑀡𑀁 𑀅𑀧𑁆𑀧𑀢𑁆𑀢𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀓𑀭𑀼𑀡𑀁 𑀭𑀯𑀁 𑀭𑀯𑀦𑁆𑀢𑁄 𑀕𑀗𑁆𑀕𑀸𑀬 𑀫𑀚𑁆𑀛𑁂 𑀫𑀳𑁄𑀤𑀓𑁂𑀦 𑀕𑀘𑁆𑀙𑀢𑀺.

𑁫𑁨. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀢𑀲𑁆𑀲 𑀢𑀁 𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀦𑀼𑀲𑁆𑀲𑀲𑀤𑁆𑀤𑁄 𑀲𑀽𑀬𑀢𑀺, 𑀫𑀸 𑀫𑀬𑀺 𑀇𑀥 𑀥𑀭𑀦𑁆𑀢𑁂 𑀫𑀭𑀢𑀼, 𑀚𑀻𑀯𑀺𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀬𑀦𑀕𑀼𑀫𑁆𑀩𑀸 𑀯𑀼𑀝𑁆𑀞𑀸𑀬 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀫𑀸 𑀪𑀸𑀬𑀺, 𑀚𑀻𑀯𑀺𑀢𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀲𑁆𑀲𑀸𑀲𑁂𑀢𑁆𑀯𑀸 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀢𑀻𑀭𑀁 𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀨𑀮𑀸𑀨𑀮𑀸𑀦𑀺 𑀤𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀢𑀁 𑀆𑀳 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲 ¶ , 𑀅𑀳𑀁 𑀢𑀁 𑀩𑀸𑀭𑀸𑀡𑀲𑀺𑀕𑀸𑀫𑀺𑀫𑀕𑁆𑀕𑀁 𑀧𑀸𑀧𑁂𑀲𑁆𑀲𑀸𑀫𑀺, 𑀢𑁆𑀯𑀁 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀓𑀜𑁆𑀘𑀦𑀫𑀺𑀕𑁄 𑀯𑀲𑀢𑀻’𑀢𑀺 𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀲𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑀕𑁆𑀕𑁂 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀲𑀸𑀳𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀓𑀭𑀼𑀡𑀁 𑀧𑀭𑀺𑀤𑁂𑀯𑀢𑁄’’𑀢𑀺𑀆𑀤𑀺.

𑀢𑀢𑁆𑀣 𑀓𑁄𑀲𑀺 𑀢𑁆𑀯𑀁 𑀦𑀭𑁄𑀢𑀺 𑀢𑁆𑀯𑀁 𑀓𑁄 𑀫𑀦𑀼𑀲𑁆𑀲𑁄 𑀅𑀲𑀺, 𑀓𑀼𑀢𑁄 𑀇𑀥 𑀯𑀼𑀬𑁆𑀳𑀫𑀸𑀦𑁄 𑀆𑀕𑀢𑁄𑀲𑀻𑀢𑀺 𑀅𑀢𑁆𑀣𑁄.

𑁫𑁩. 𑀅𑀢𑁆𑀢𑀦𑁄 ¶ 𑀓𑀭𑀡𑀦𑁆𑀢𑀺 𑀅𑀢𑁆𑀢𑀦𑁄 𑀓𑀺𑀭𑀺𑀬𑀁. 𑀥𑀦𑀺𑀓𑁂𑀳𑀺 𑀪𑀻𑀢𑁄𑀢𑀺 𑀇𑀡𑀸𑀬𑀺𑀓𑁂𑀳𑀺 𑀉𑀩𑁆𑀩𑀺𑀕𑁆𑀕𑁄. 𑀢𑀲𑀺𑀢𑁄𑀢𑀺 𑀉𑀢𑁆𑀭𑀲𑁆𑀢𑁄.

𑁫𑁪. 𑀢𑀲𑁆𑀲 𑀓𑀢𑁆𑀯𑀸𑀦 𑀓𑀸𑀭𑀼𑀜𑁆𑀜𑀁, 𑀘𑀚𑀺𑀢𑁆𑀯𑀸 𑀫𑀫 𑀚𑀻𑀯𑀺𑀢𑀦𑁆𑀢𑀺 𑀓𑀸𑀭𑀼𑀜𑁆𑀜𑀁 𑀓𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀫𑀫 𑀚𑀻𑀯𑀺𑀢𑀁 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀧𑀯𑀺𑀲𑀺𑀢𑁆𑀯𑀸 𑀦𑀻𑀳𑀭𑀺𑀁 𑀢𑀲𑁆𑀲𑀸𑀢𑀺 𑀦𑀤𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀉𑀚𑀼𑀓𑀫𑁂𑀯 𑀕𑀦𑁆𑀢𑁆𑀯𑀸 𑀫𑀫 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁄 𑀢𑀁 𑀦𑀻𑀳𑀭𑀺𑀁. 𑀢𑀲𑁆𑀲𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. ‘‘𑀢𑀢𑁆𑀣𑀸’’𑀢𑀺𑀧𑀺 𑀧𑀸𑀴𑀺, 𑀢𑀢𑁆𑀣 𑀦𑀤𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀥𑀓𑀸𑀭𑀫𑁆𑀳𑀺 𑀭𑀢𑁆𑀢𑀺𑀬𑀸𑀢𑀺 𑀭𑀢𑁆𑀢𑀺𑀬𑀸 𑀅𑀦𑁆𑀥𑀓𑀸𑀭𑀲𑀫𑀬𑁂, 𑀓𑀸𑀴𑀧𑀓𑁆𑀔𑀭𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁫𑁫. 𑀅𑀲𑁆𑀲𑀢𑁆𑀣𑀓𑀸𑀮𑀫𑀜𑁆𑀜𑀸𑀬𑀸𑀢𑀺 𑀧𑀭𑀺𑀲𑁆𑀲𑀫𑀁 𑀅𑀧𑀦𑁂𑀢𑁆𑀯𑀸 𑀨𑀮𑀸𑀨𑀮𑀸𑀦𑀺 𑀤𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀓𑀺𑀮𑀫𑀣𑀲𑁆𑀲 ¶ 𑀯𑀺𑀕𑀢𑀓𑀸𑀮𑀁 𑀚𑀸𑀦𑀺𑀢𑁆𑀯𑀸. 𑀏𑀓𑀁 𑀢𑀁 𑀯𑀭𑀁 𑀬𑀸𑀘𑀸𑀫𑀻𑀢𑀺 𑀅𑀳𑀁 𑀢𑀁 𑀏𑀓𑀁 𑀯𑀭𑀁 𑀬𑀸𑀘𑀸𑀫𑀺, 𑀫𑀬𑁆𑀳𑀁 𑀏𑀓𑀁 𑀯𑀭𑀁 𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑀁 𑀯𑀭𑀦𑁆𑀢𑀺 𑀘𑁂? 𑀆𑀳 𑁋 𑀫𑀸 𑀫𑀁 𑀓𑀲𑁆𑀲𑀘𑀺 𑀧𑀸𑀯𑀤𑀸𑀢𑀺 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀫𑀺𑀕𑁄 𑀯𑀲𑀢𑀻’’𑀢𑀺 𑀓𑀲𑁆𑀲𑀘𑀺 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀫𑀁 𑀫𑀸 𑀧𑀸𑀯𑀤.

𑀅𑀣 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀩𑀸𑀭𑀸𑀡𑀲𑀺𑀁 𑀧𑀯𑀺𑀝𑁆𑀞𑀤𑀺𑀯𑀲𑁂𑀬𑁂𑀯 𑀲𑁄 𑀭𑀸𑀚𑀸 ‘‘𑀅𑀳𑀁, 𑀤𑁂𑀯, 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀺𑀕𑀁 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀲𑀼𑀧𑀺𑀦𑁂𑀦 𑀅𑀤𑁆𑀤𑀲𑀁, 𑀅𑀳𑀜𑁆𑀳𑀺 𑀲𑀘𑁆𑀘𑀲𑀼𑀧𑀺𑀦𑀸, 𑀅𑀤𑁆𑀥𑀸 𑀲𑁄 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀓𑀜𑁆𑀘𑀦𑀫𑀺𑀕𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀮𑀪𑀺𑀲𑁆𑀲𑀸𑀫𑀺 𑀘𑁂 𑀚𑀻𑀯𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀼𑀢𑁆𑀢𑁄 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀲𑀘𑁂 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀣𑀺, 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀼𑀯𑀡𑁆𑀡𑀫𑀺𑀕𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀤𑁂𑀯, 𑀳𑁄𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂 𑀞𑀧𑁂𑀢𑁆𑀯𑀸 𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀬𑁄 𑀲𑀼𑀯𑀡𑁆𑀡𑀫𑀺𑀕𑀁 ¶ 𑀆𑀘𑀺𑀓𑁆𑀔𑀺𑀲𑁆𑀲𑀢𑀺, 𑀢𑀲𑁆𑀲 𑀳𑀢𑁆𑀣𑀺𑀦𑀸 𑀲𑀤𑁆𑀥𑀺𑀁 𑀇𑀫𑀁 𑀤𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑁋

‘‘𑀢𑀲𑁆𑀲 𑀕𑀸𑀫𑀯𑀭𑀁 𑀤𑀫𑁆𑀫𑀺, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;

𑀬𑁄 𑀫𑁂𑀢𑀁 𑀫𑀺𑀕𑀫𑀓𑁆𑀔𑀸𑀢𑀺, 𑀫𑀺𑀕𑀸𑀦𑀁 𑀫𑀺𑀕𑀫𑀼𑀢𑁆𑀢𑀫’’𑀦𑁆𑀢𑀺. (𑀚𑀸. 𑁧.𑁧𑁩.𑁧𑁧𑁭) 𑁋

𑀕𑀸𑀣𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑁂 𑀯𑀸𑀘𑀸𑀧𑁂𑀲𑀺. 𑀅𑀣 𑀲𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀭𑀜𑁆𑀜𑁄 𑀏𑀯𑀭𑀽𑀧𑀁 𑀫𑀺𑀕𑀁 ¶ 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀫𑀁 𑀭𑀸𑀚𑀸𑀦𑀁 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀘𑁆𑀘𑀁, 𑀪𑁄, 𑀅𑀤𑁆𑀤𑀲𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀲𑀘𑁆𑀘𑀁, 𑀤𑁂𑀯, 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀼, 𑀅𑀳𑀁 𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀢𑀫𑁂𑀯 𑀧𑀼𑀭𑀺𑀲𑀁 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑀸 𑀧𑀼𑀭𑀺𑀲𑁂𑀦 𑀤𑀲𑁆𑀲𑀺𑀢𑀁 𑀧𑀤𑁂𑀲𑀁 ¶ 𑀆𑀯𑀼𑀥𑀳𑀢𑁆𑀣𑁂 𑀧𑀼𑀭𑀺𑀲𑁂 𑀲𑀫𑀦𑁆𑀢𑀢𑁄𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀲𑀬𑀁 𑀓𑀢𑀺𑀧𑀬𑁂𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀏𑀓𑀫𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀲𑁄𑀧𑀺 𑀧𑀼𑀭𑀺𑀲𑁄 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀳𑀢𑁄 𑀩𑀮𑀓𑀸𑀬𑀲𑁆𑀲 𑀲𑀤𑁆𑀤𑁄, 𑀅𑀤𑁆𑀥𑀸 𑀢𑀫𑁆𑀳𑀸 𑀫𑁂 𑀧𑀼𑀭𑀺𑀲𑀸 𑀪𑀬𑁂𑀦 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀜𑀢𑁆𑀯𑀸 𑀉𑀝𑁆𑀞𑀸𑀬 𑀲𑀓𑀮𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀭𑀸𑀚𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀭𑀸𑀚𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀕𑀩𑀮𑁄 𑀅𑀯𑀢𑁆𑀣𑀭𑀦𑁆𑀢𑁄 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 ‘‘𑀇𑀫𑀁 𑀫𑀺𑀕𑀁 𑀲𑀦𑁆𑀢𑀸𑀲𑁂𑀢𑁆𑀯𑀸 𑀲𑀘𑁂 𑀧𑀮𑀸𑀬𑀢𑀺, 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 𑁋

‘‘𑀆𑀕𑀫𑁂𑀳𑀺 𑀫𑀳𑀸𑀭𑀸𑀚, 𑀫𑀸 𑀫𑀁 𑀯𑀺𑀚𑁆𑀛𑀺 𑀭𑀣𑁂𑀲𑀪;

𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀏𑀢𑁆𑀣𑁂𑀲𑁄 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺. (𑀚𑀸. 𑁧.𑁧𑁩.𑁧𑁨𑁧) 𑁋

𑀕𑀸𑀣𑀁 𑀅𑀪𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀫𑀥𑀼𑀭𑀓𑀣𑀸𑀬 𑀩𑀚𑁆𑀛𑀺𑀢𑁆𑀯𑀸 𑀲𑀭𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀕𑀸𑀭𑀯𑁂𑀦 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀲𑀩𑁆𑀩𑀸𑀯𑀼𑀥𑀸𑀦𑀺 𑀅𑀧𑀦𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫𑁬.

‘‘𑀦𑀕𑀭𑀁 𑀕𑀦𑁆𑀢𑁆𑀯𑀸𑀦 𑀆𑀘𑀺𑀓𑁆𑀔𑀺, 𑀧𑀼𑀘𑁆𑀙𑀺𑀢𑁄 𑀥𑀦𑀳𑁂𑀢𑀼𑀓𑁄;

𑀭𑀸𑀚𑀸𑀦𑀁 𑀲𑁄 𑀕𑀳𑁂𑀢𑁆𑀯𑀸𑀦, 𑀉𑀧𑀕𑀜𑁆𑀙𑀺 𑀫𑀫𑀦𑁆𑀢𑀺𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑁄 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀸𑀧𑀧𑀼𑀭𑀺𑀲𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀣𑀸 𑀫𑀬𑀸 𑀧𑀸𑀡𑀲𑀁𑀲𑀬𑀢𑁄 𑀫𑁄𑀘𑀺𑀢𑁄 𑀩𑀸𑀭𑀸𑀡𑀲𑀺𑀦𑀕𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀩𑁆𑀩𑀥𑀦𑀦𑀺𑀫𑀺𑀢𑁆𑀢𑀁 𑀭𑀜𑁆𑀜𑁄 𑀫𑀁 𑀆𑀘𑀺𑀓𑁆𑀔𑀺, 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑁄 𑀭𑀜𑁆𑀜𑁄 𑀕𑀸𑀳𑀸𑀧𑁂𑀢𑀼𑀁 𑀫𑀕𑁆𑀕𑀤𑁂𑀲𑀓𑁄 𑀳𑀼𑀢𑁆𑀯𑀸 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀫𑀼𑀧𑀸𑀕𑀫𑀻𑀢𑀺.

𑀫𑀳𑀸𑀲𑀢𑁆𑀢𑁄 𑀲𑀼𑀯𑀡𑁆𑀡𑀓𑀺𑀗𑁆𑀓𑀺𑀡𑀺𑀓𑀁 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀫𑀥𑀼𑀭𑀲𑁆𑀲𑀭𑁂𑀦 𑀭𑀸𑀚𑀸𑀦𑀁 𑀧𑀼𑀦 𑀧𑀼𑀘𑁆𑀙𑀺 𑁋 ‘‘𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀏𑀢𑁆𑀣𑁂𑀲𑁄 ¶ 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀧𑀸𑀧𑀧𑀼𑀭𑀺𑀲𑁄 𑀣𑁄𑀓𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀲𑁄𑀢𑀧𑀣𑁂 𑀅𑀝𑁆𑀞𑀸𑀲𑀺 ¶ . 𑀭𑀸𑀚𑀸 ‘‘𑀇𑀫𑀺𑀦𑀸 𑀫𑁂 𑀢𑁆𑀯𑀁 𑀤𑀲𑁆𑀲𑀺𑀢𑁄’’𑀢𑀺 𑀢𑀁 𑀧𑀼𑀭𑀺𑀲𑀁 𑀦𑀺𑀤𑁆𑀤𑀺𑀲𑀺. 𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑁋

‘‘𑀲𑀘𑁆𑀘𑀁 𑀓𑀺𑀭𑁂𑀯 𑀫𑀸𑀳𑀁𑀲𑀼, 𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥;

𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 𑀲𑁂𑀬𑁆𑀬𑁄, 𑀦 𑀢𑁆𑀯𑁂𑀯𑁂𑀓𑀘𑁆𑀘𑀺𑀬𑁄 𑀦𑀭𑁄’’𑀢𑀺. (𑀚𑀸. 𑁧.𑁧𑁩.𑁧𑁨𑁩) 𑁋

𑀕𑀸𑀣𑀫𑀸𑀳. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀁𑀯𑁂𑀕𑀚𑀸𑀢𑁄 𑁋

‘‘𑀓𑀺𑀁 𑀦𑀼 𑀭𑀼𑀭𑀼 𑀕𑀭𑀳𑀲𑀺 𑀫𑀺𑀕𑀸𑀦𑀁, 𑀓𑀺𑀁 𑀧𑀓𑁆𑀔𑀻𑀦𑀁 𑀓𑀺𑀁 𑀧𑀦 𑀫𑀸𑀦𑀼𑀲𑀸𑀦𑀁;

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺𑀦𑀧𑁆𑀧𑀭𑀽𑀧𑀁, 𑀲𑀼𑀢𑁆𑀯𑀸𑀦 𑀢𑀁 𑀫𑀸𑀦𑀼𑀲𑀺𑀁 𑀪𑀸𑀲𑀫𑀸𑀦’’𑀦𑁆𑀢𑀺. (𑀚𑀸. 𑁧.𑁧𑁩.𑁧𑁨𑁪) 𑁋

𑀕𑀸𑀣𑀫𑀸𑀳. 𑀢𑀢𑁄 𑀫𑀳𑀸𑀧𑀼𑀭𑀺𑀲𑁄 ‘‘𑀫𑀳𑀸𑀭𑀸𑀚, 𑀦 𑀫𑀺𑀕𑀁 𑀦 𑀧𑀓𑁆𑀔𑀺𑀁 𑀕𑀭𑀳𑀸𑀫𑀺, 𑀫𑀦𑀼𑀲𑁆𑀲𑀁 𑀧𑀦 𑀕𑀭𑀳𑀸𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀬𑀫𑀼𑀤𑁆𑀥𑀭𑀺𑀁 𑀯𑀸𑀳𑀦𑁂 𑀯𑀼𑀬𑁆𑀳𑀫𑀸𑀦𑀁, 𑀫𑀳𑁄𑀤𑀓𑁂 𑀲𑀮𑀺𑀮𑁂 𑀲𑀻𑀖𑀲𑁄𑀢𑁂;

𑀢𑀢𑁄𑀦𑀺𑀤𑀸𑀦𑀁 𑀪𑀬𑀫𑀸𑀕𑀢𑀁 𑀫𑀫, 𑀤𑀼𑀓𑁆𑀔𑁄 𑀳𑀯𑁂 𑀭𑀸𑀚 𑀅𑀲𑀩𑁆𑀪𑀺 𑀲𑀗𑁆𑀕𑀫𑁄’’𑀢𑀺. (𑀚𑀸. 𑁧.𑁧𑁩.𑁧𑁨𑁫) 𑁋

𑀆𑀳.

𑀢𑀢𑁆𑀣 𑀦𑀺𑀧𑁆𑀮𑀯𑀺𑀢𑀦𑁆𑀢𑀺 𑀉𑀤𑁆𑀥𑀭𑀺𑀢𑀁, 𑀏𑀓𑀘𑁆𑀘𑀺𑀬𑁄𑀢𑀺 𑀏𑀓𑀘𑁆𑀘𑁄 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀸𑀧𑀧𑀼𑀭𑀺𑀲𑁄 𑀉𑀤𑀓𑁂 𑀧𑀢𑀦𑁆𑀢𑁄𑀧𑀺 ¶ 𑀉𑀢𑁆𑀢𑀸𑀭𑀺𑀢𑁄 𑀦𑀢𑁆𑀯𑁂𑀯 𑀲𑁂𑀬𑁆𑀬𑁄. 𑀓𑀝𑁆𑀞𑀜𑁆𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀦 𑀯𑀺𑀦𑀸𑀲𑀸𑀬, 𑀢𑀲𑁆𑀫𑀸 𑀢𑀢𑁄 𑀓𑀝𑁆𑀞𑀫𑁂𑀯 𑀯𑀭𑀢𑀭𑀦𑁆𑀢𑀺. 𑀫𑀺𑀕𑀸𑀦𑀦𑁆𑀢𑀺 𑀭𑀼𑀭𑀼𑀫𑀺𑀕𑀭𑀸𑀚, 𑀫𑀺𑀕𑀸𑀦𑀁 𑀓𑀺𑀁 𑀅𑀜𑁆𑀜𑀢𑀭𑀁 𑀕𑀭𑀳𑀲𑀺, 𑀉𑀤𑀸𑀳𑀼 𑀧𑀓𑁆𑀔𑀻𑀦𑀁 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺𑀦𑀧𑁆𑀧𑀭𑀽𑀧𑀦𑁆𑀢𑀺 𑀫𑀳𑀦𑁆𑀢𑀁 𑀪𑀬𑀁 𑀫𑀁 𑀧𑀝𑀺𑀮𑀪𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀬 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀯𑀸𑀳𑀦𑁂𑀢𑀺 𑀧𑀢𑀺𑀢𑀧𑀢𑀺𑀢𑁂 𑀯𑀳𑀺𑀢𑀼𑀁 𑀲𑀫𑀢𑁆𑀣𑁂 𑀕𑀗𑁆𑀕𑀸𑀯𑀳𑁂. 𑀫𑀳𑁄𑀤𑀓𑁂 ¶ 𑀲𑀮𑀺𑀮𑁂𑀢𑀺 𑀫𑀳𑁄𑀤𑀓𑀻𑀪𑀽𑀢𑁂 𑀲𑀮𑀺𑀮𑁂. 𑀉𑀪𑀬𑁂𑀦𑀸𑀧𑀺 𑀕𑀗𑁆𑀕𑀸𑀯𑀳𑀲𑁆𑀲 𑀩𑀳𑀽𑀤𑀓𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁄 𑀦𑀺𑀤𑀸𑀦𑀦𑁆𑀢𑀺, 𑀫𑀳𑀸𑀭𑀸𑀚, 𑀬𑁄 𑀫𑀬𑁆𑀳𑀁 𑀢𑀬𑀸 𑀤𑀲𑁆𑀲𑀺𑀢𑁄 𑀧𑀼𑀭𑀺𑀲𑁄, 𑀏𑀲𑁄 𑀫𑀬𑀸 𑀕𑀗𑁆𑀕𑀸𑀬 𑀯𑀼𑀬𑁆𑀳𑀫𑀸𑀦𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁄 𑀢𑀢𑁄 𑀉𑀢𑁆𑀢𑀸𑀭𑀺𑀢𑁄, 𑀢𑀢𑁄𑀦𑀺𑀤𑀸𑀦𑀁 𑀇𑀤𑀁 𑀫𑀬𑁆𑀳𑀁 𑀪𑀬𑀫𑀸𑀕𑀢𑀁, 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀫𑀸𑀕𑀫𑁄 𑀦𑀸𑀫 𑀤𑀼𑀓𑁆𑀔𑁄𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀯𑀁 𑀩𑀳𑀽𑀧𑀓𑀸𑀭𑀲𑁆𑀲 𑀦𑀸𑀫 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀯𑀺𑀚𑁆𑀛𑀺𑀢𑁆𑀯𑀸 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀭𑀁 𑀲𑀦𑁆𑀦𑀬𑁆𑀳𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫𑁭.

‘‘𑀬𑀸𑀯𑀢𑀸 𑀓𑀭𑀡𑀁 𑀲𑀩𑁆𑀩𑀁, 𑀭𑀜𑁆𑀜𑁄 𑀆𑀭𑁄𑀘𑀺𑀢𑀁 𑀫𑀬𑀸;

𑀭𑀸𑀚𑀸 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀉𑀲𑀼𑀁 𑀢𑀲𑁆𑀲 𑀧𑀓𑀧𑁆𑀧𑀬𑀺;

𑀇𑀥𑁂𑀯 𑀖𑀸𑀢𑀬𑀺𑀲𑁆𑀲𑀸𑀫𑀺, 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀅𑀦𑀭𑀺𑀬’’𑀦𑁆𑀢𑀺.

𑀢𑀢𑁆𑀣 𑀬𑀸𑀯𑀢𑀸 𑀓𑀭𑀡𑀦𑁆𑀢𑀺 𑀬𑀁 𑀢𑀲𑁆𑀲 𑀫𑀬𑀸 𑀓𑀢𑀁 𑀉𑀧𑀓𑀸𑀭𑀓𑀭𑀡𑀁, 𑀢𑀁 𑀲𑀩𑁆𑀩𑀁. 𑀧𑀓𑀧𑁆𑀧𑀬𑀻𑀢𑀺 𑀲𑀦𑁆𑀦𑀬𑁆𑀳𑀺. 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑁆𑀢𑀺 𑀅𑀢𑁆𑀢𑀦𑁄 𑀫𑀺𑀢𑁆𑀢𑁂𑀲𑀼 𑀉𑀧𑀓𑀸𑀭𑀻𑀲𑀼 𑀤𑀼𑀩𑁆𑀪𑀦𑀲𑀻𑀮𑀁.

𑀢𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀏𑀲 𑀩𑀸𑀮𑁄 𑀫𑀁 𑀦𑀺𑀲𑁆𑀲𑀸𑀬 𑀫𑀸 𑀦𑀲𑁆𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀯𑀥𑁄 𑀦𑀸𑀫𑁂𑀲 𑀩𑀸𑀮𑀲𑁆𑀲 𑀯𑀸 𑀧𑀡𑁆𑀟𑀺𑀢𑀲𑁆𑀲 𑀯𑀸 𑀦 𑀲𑀸𑀥𑀽𑀳𑀺 𑀧𑀲𑀁𑀲𑀺𑀢𑁄, 𑀅𑀜𑁆𑀜𑀤𑀢𑁆𑀣𑀼 𑀕𑀭𑀳𑀺𑀢𑁄 𑀏𑀯, 𑀢𑀲𑁆𑀫𑀸 𑀫𑀸 𑀇𑀫𑀁 𑀖𑀸𑀢𑁂𑀳𑀺, 𑀅𑀬𑀁 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀼, 𑀬𑀜𑁆𑀘𑁂𑀯 𑀢𑀲𑁆𑀲 ‘𑀤𑀲𑁆𑀲𑀸𑀫𑀻’𑀢𑀺 𑀢𑀬𑀸 𑀧𑀝𑀺𑀜𑁆𑀜𑀸𑀢𑀁, 𑀢𑀫𑁆𑀧𑀺 𑀅𑀳𑀸𑀧𑁂𑀢𑁆𑀯𑀸𑀯 𑀤𑁂𑀳𑀻’’𑀢𑀺 𑀆𑀳. ‘‘𑀅𑀳𑀜𑁆𑀘 𑀢𑁂 𑀬𑀁 𑀇𑀘𑁆𑀙𑀺𑀢𑀁, 𑀢𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀢𑁆𑀢𑀸𑀦𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁫𑁮.

‘‘𑀢𑀫𑀳𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀦𑀺𑀫𑁆𑀫𑀺𑀦𑀺𑀁 𑀫𑀫 𑀅𑀢𑁆𑀢𑀦𑀸;

𑀢𑀺𑀝𑁆𑀞𑀢𑁂𑀲𑁄 𑀫𑀳𑀸𑀭𑀸𑀚, 𑀓𑀸𑀫𑀓𑀸𑀭𑁄 𑀪𑀯𑀸𑀫𑀺 𑀢𑁂’’𑀢𑀺.

𑀢𑀢𑁆𑀣 𑀦𑀺𑀫𑁆𑀫𑀺𑀦𑀺𑀦𑁆𑀢𑀺 𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀧𑀸𑀧𑀧𑀼𑀕𑁆𑀕𑀮𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀫𑀫 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁂𑀦 𑀢𑀁 𑀧𑀭𑀺𑀯𑀢𑁆𑀢𑁂𑀲𑀺𑀁 ¶ , 𑀅𑀢𑁆𑀢𑀸𑀦𑀁 𑀭𑀜𑁆𑀜𑁄 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀭𑀸𑀚𑀳𑀢𑁆𑀣𑀢𑁄 𑀧𑀢𑁆𑀢𑀁 𑀢𑀲𑁆𑀲 𑀫𑀭𑀡𑀁 𑀦𑀺𑀯𑀸𑀭𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀝𑁆𑀞𑀢𑁂𑀲𑁄𑀢𑀺𑀆𑀤𑀺 𑀯𑀺𑀦𑀺𑀫𑀬𑀸𑀓𑀸𑀭𑀤𑀲𑁆𑀲𑀦𑀁 ¶ .

𑁫𑁯. 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀲𑁄 𑀅𑀢𑁆𑀢𑀯𑀺𑀦𑀺𑀫𑀬𑁄 𑀓𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀤𑀸 𑀫𑀁 𑀦𑀺𑀲𑁆𑀲𑀸𑀬 𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀧𑀼𑀭𑀺𑀲𑀁 𑀢𑀲𑁆𑀫𑀺𑀁 𑀭𑀜𑁆𑀜𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀓𑀸𑀫𑁂 𑀅𑀳𑀁 𑀅𑀢𑁆𑀢𑀸𑀦𑀁 𑀭𑀜𑁆𑀜𑁄 𑀧𑀭𑀺𑀘𑁆𑀘𑀚𑀦𑁆𑀢𑁄 𑀫𑀫 𑀲𑀻𑀮𑀫𑁂𑀯 𑀅𑀦𑀼𑀭𑀓𑁆𑀔𑀺𑀁, 𑀚𑀻𑀯𑀺𑀢𑀁 𑀧𑀦 𑀦𑀸𑀭𑀓𑁆𑀔𑀺𑀁. 𑀬𑀁 𑀧𑀦𑀸𑀳𑀫𑁂𑀯 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀁 𑀲𑀻𑀮𑀯𑀸 𑀆𑀲𑀺𑀁, 𑀢𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀏𑀯 𑀓𑀸𑀭𑀡𑀸𑀢𑀺.

𑀅𑀣 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀭𑀡𑁂 𑀦𑀺𑀯𑀸𑀭𑁂𑀦𑁆𑀢𑁂 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀕𑀘𑁆𑀙, 𑀪𑁄, 𑀫𑀺𑀕𑀭𑀸𑀚𑀲𑁆𑀲 𑀅𑀦𑀼𑀕𑁆𑀕𑀳𑁂𑀦 𑀫𑀫 𑀳𑀢𑁆𑀣𑀢𑁄 ¶ 𑀫𑀭𑀡𑀸 𑀫𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀢𑀜𑁆𑀘𑀲𑁆𑀲 𑀥𑀦𑀁 𑀤𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀬𑀣𑀸𑀭𑀼𑀘𑀺𑀬𑀸𑀯 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑀁 𑀦𑀕𑀭𑀁 𑀦𑁂𑀢𑁆𑀯𑀸 𑀦𑀕𑀭𑀜𑁆𑀘 𑀩𑁄𑀥𑀺𑀲𑀢𑁆𑀢𑀜𑁆𑀘 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀥𑀫𑁆𑀫𑀁 𑀤𑁂𑀲𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀤𑁂𑀯𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀘 𑀭𑀸𑀚𑀧𑀭𑀺𑀲𑀸𑀬 𑀘 𑀫𑀥𑀼𑀭𑀸𑀬 𑀫𑀦𑀼𑀲𑁆𑀲𑀪𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀤𑀲𑀳𑀺 𑀭𑀸𑀚𑀥𑀫𑁆𑀫𑁂𑀳𑀺 𑀑𑀯𑀤𑀺𑀢𑁆𑀯𑀸 𑀫𑀳𑀸𑀚𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀭𑀸𑀚𑀸𑀧𑀺 𑀫𑀳𑀸𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀼𑀕𑀢𑀺𑀧𑀭𑀸𑀬𑀦𑁄 𑀅𑀳𑁄𑀲𑀺.

𑀢𑀤𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀭𑀼𑀭𑀼𑀫𑀺𑀕𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀇𑀥𑀸𑀧𑀺 𑀧𑀯𑀺𑀯𑁂𑀓𑀸𑀭𑀸𑀫𑀢𑀸𑀬 𑀚𑀦𑀲𑀁𑀲𑀕𑁆𑀕𑀁 𑀅𑀦𑀺𑀘𑁆𑀙𑀢𑁄 𑀬𑀽𑀣𑀁 𑀧𑀳𑀸𑀬 𑀏𑀓𑀓𑀯𑀺𑀳𑀸𑀭𑁄, 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑀲𑁆𑀲 𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀝𑁆𑀝𑀲𑁆𑀲𑀭𑀁 𑀲𑀼𑀢𑁆𑀯𑀸 𑀲𑀬𑀺𑀢𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀕𑀗𑁆𑀕𑀸𑀬 𑀫𑀳𑀢𑀺 𑀉𑀤𑀓𑁄𑀖𑁂 𑀯𑀢𑁆𑀢𑀫𑀸𑀦𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀢𑀻𑀭𑀁 𑀧𑀸𑀧𑁂𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀨𑀮𑀸𑀨𑀮𑀸𑀤𑀻𑀦𑀺 𑀤𑀢𑁆𑀯𑀸 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀁, 𑀧𑀼𑀦 𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀅𑀭𑀜𑁆𑀜𑀢𑁄 𑀦𑀻𑀳𑀭𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑁂 𑀑𑀢𑀸𑀭𑀡𑀁, 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀚𑁆𑀛𑀺𑀲𑁆𑀲𑀸𑀫𑀻𑀢𑀺 𑀅𑀪𑀺𑀫𑀼𑀔𑁂 𑀞𑀺𑀢𑀲𑁆𑀲 𑀭𑀜𑁆𑀜𑁄 𑀦𑀺𑀩𑁆𑀪𑀬𑁂𑀦 𑀳𑀼𑀢𑁆𑀯𑀸 𑀧𑀝𑀺𑀫𑀼𑀔𑀫𑁂𑀯 𑀕𑀦𑁆𑀢𑁆𑀯𑀸 𑀧𑀞𑀫𑀢𑀭𑀁 𑀫𑀦𑀼𑀲𑁆𑀲𑀪𑀸𑀲𑀸𑀬 𑀆𑀮𑀧𑀺𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀁, 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀸𑀧𑀧𑀼𑀭𑀺𑀲𑀁 ¶ 𑀳𑀦𑁆𑀢𑀼𑀓𑀸𑀫𑀁 𑀭𑀸𑀚𑀸𑀦𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸 𑀧𑀼𑀦𑀧𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀭𑀡𑀢𑁄 𑀧𑀫𑁄𑀘𑀦𑀁, 𑀢𑀲𑁆𑀲 𑀘 𑀭𑀜𑁆𑀜𑁄 𑀬𑀣𑀸𑀧𑀝𑀺𑀜𑁆𑀜𑀁 𑀥𑀦𑀤𑀸𑀧𑀦𑀁, 𑀭𑀜𑁆𑀜𑀸 𑀅𑀢𑁆𑀢𑀦𑁄 𑀯𑀭𑁂 𑀤𑀻𑀬𑀫𑀸𑀦𑁂 𑀢𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀧𑀦𑀁, 𑀭𑀸𑀚𑀸𑀦𑀜𑁆𑀘 𑀤𑁂𑀯𑀺𑀜𑁆𑀘 𑀧𑀫𑀼𑀔𑀁 𑀓𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀸𑀦𑀸𑀤𑀻𑀲𑀼 ¶ 𑀧𑀼𑀜𑁆𑀜𑁂𑀲𑀼 𑀢𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀁, 𑀮𑀤𑁆𑀥𑀸𑀪𑀬𑀸𑀦𑀁 𑀫𑀺𑀕𑀸𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀲𑀲𑁆𑀲𑀔𑀸𑀤𑀦𑀢𑁄 𑀦𑀺𑀯𑀸𑀭𑀡𑀁, 𑀧𑀡𑁆𑀡𑀲𑀜𑁆𑀜𑀸𑀬 𑀘 𑀢𑀲𑁆𑀲 𑀬𑀸𑀯𑀚𑁆𑀚𑀓𑀸𑀮𑀸 𑀣𑀸𑀯𑀭𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀭𑀼𑀭𑀼𑀫𑀺𑀕𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀸𑀢𑀗𑁆𑀕𑀘𑀭𑀺𑀬𑀸𑀯𑀡𑁆𑀡𑀦𑀸

𑁬𑁦. 𑀲𑀢𑁆𑀢𑀫𑁂 ¶ 𑀚𑀝𑀺𑀮𑁄𑀢𑀺 𑀚𑀝𑀸𑀯𑀦𑁆𑀢𑁄, 𑀚𑀝𑀸𑀩𑀦𑁆𑀥𑀓𑁂𑀲𑁄𑀢𑀺 𑀅𑀢𑁆𑀣𑁄. 𑀉𑀕𑁆𑀕𑀢𑀸𑀧𑀦𑁄𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀸𑀧𑀦𑀢𑁄 𑀦𑀺𑀕𑁆𑀕𑀡𑁆𑀳𑀦𑀢𑁄 𑀢𑀧𑀲𑀗𑁆𑀔𑀸𑀢𑀁 𑀉𑀕𑁆𑀕𑀢𑀸𑀧𑀦𑀁 𑀏𑀢𑀲𑁆𑀲𑀸𑀢𑀺 𑀉𑀕𑁆𑀕𑀢𑀸𑀧𑀦𑁄, 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀦𑀧𑁆𑀧𑀓𑀸𑀭𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑁂 𑀅𑀦𑀢𑁆𑀣𑁂 𑀉𑀕𑁆𑀕𑀺𑀭𑀡𑀢𑁄 𑀩𑀳𑀺 𑀙𑀟𑁆𑀟𑀸𑀧𑀦𑀢𑁄 𑀖𑁄𑀭𑀪𑀻𑀫𑀪𑀬𑀸𑀦𑀓𑀝𑁆𑀞𑁂𑀦 𑀯𑀸 ‘‘𑀉𑀕𑁆𑀕𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀓𑀺𑀮𑁂𑀲𑁂 𑀯𑀻𑀭𑀺𑀬𑀸𑀢𑀧𑁂𑀦 𑀲𑀦𑁆𑀢𑀸𑀧𑀦𑀢𑁄 𑀉𑀕𑁆𑀕𑁂 𑀢𑀸𑀧𑁂𑀢𑀻𑀢𑀺 𑀉𑀕𑁆𑀕𑀢𑀸𑀧𑀦𑁄. 𑀫𑀸𑀢𑀗𑁆𑀕𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺 𑀦𑀸𑀫𑁂𑀦 𑀫𑀸𑀢𑀗𑁆𑀕𑁄 𑀦𑀸𑀫. 𑀫𑀸𑀢𑀗𑁆𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀬𑀸 𑀚𑀸𑀢𑀺𑀬𑀸 𑀆𑀕𑀢𑀁 𑀳𑀺𑀲𑁆𑀲 𑀏𑀢𑀁 𑀦𑀸𑀫𑀁. 𑀲𑀻𑀮𑀯𑀸𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑁄. 𑀲𑀼𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀳𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄, 𑀛𑀸𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀢𑀺 𑀅𑀢𑁆𑀣𑁄.

𑀢𑀤𑀸 𑀳𑀺 𑀩𑁄𑀥𑀺𑀲𑀢𑁆𑀢𑁄 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀭𑀽𑀧𑁂𑀦 𑀤𑀼𑀤𑁆𑀤𑀲𑀺𑀓𑁄 𑀩𑀳𑀺𑀦𑀕𑀭𑁂 𑀘𑀡𑁆𑀟𑀸𑀮𑀕𑀸𑀫𑁂 𑀯𑀲𑀢𑀺. ‘‘𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁄’’𑀢𑀺 𑀧𑀓𑀸𑀲𑀦𑀸𑀫𑁄. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀦𑀕𑀭𑁂 𑀦𑀓𑁆𑀔𑀢𑁆𑀢𑁂 𑀖𑁄𑀲𑀺𑀢𑁂 𑀬𑁂𑀪𑀼𑀬𑁆𑀬𑁂𑀦 𑀦𑀸𑀕𑀭𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑀺. 𑀅𑀜𑁆𑀜𑀢𑀭𑀸𑀧𑀺 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀜𑁆𑀜𑀸 𑀲𑁄𑀴𑀲𑀧𑀦𑁆𑀦𑀭𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀭𑀽𑀧𑁂𑀦 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 ‘‘𑀅𑀢𑁆𑀢𑀦𑁄 ¶ 𑀯𑀺𑀪𑀯𑀸𑀦𑀼𑀭𑀽𑀧𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀧𑀳𑀽𑀢𑀔𑀚𑁆𑀚𑀪𑁄𑀚𑁆𑀚𑀸𑀤𑀻𑀦𑀺 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀲𑀩𑁆𑀩𑀲𑁂𑀢𑀁 𑀯𑀴𑀯𑀸𑀭𑀣𑀫𑀸𑀭𑀼𑀬𑁆𑀳 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀢𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀦𑀸𑀫𑁂𑀲𑀸, 𑀲𑀸 𑀓𑀺𑀭 𑀤𑀼𑀲𑁆𑀲𑀡𑁆𑀞𑀺𑀢𑀁 𑀭𑀽𑀧𑀁 ‘‘𑀅𑀯𑀫𑀗𑁆𑀕𑀮’’𑀦𑁆𑀢𑀺 𑀢𑀁 𑀤𑀝𑁆𑀞𑀼𑀁 𑀦 𑀇𑀘𑁆𑀙𑀢𑀺, 𑀢𑁂𑀦𑀲𑁆𑀲𑀸 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸’’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀧𑀝𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀚𑀚𑁆𑀚𑀭𑀺𑀢𑀫𑀼𑀔𑀪𑀸𑀕𑀁 𑀯𑁂𑀡𑀼𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀪𑀸𑀚𑀦𑀳𑀢𑁆𑀣𑁄 𑀦𑀕𑀭𑀁 𑀧𑀯𑀺𑀲𑀢𑀺 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀤𑀽𑀭𑀢𑁄𑀯 𑀢𑁂𑀲𑀁 𑀤𑀽𑀭𑀻𑀓𑀭𑀡𑀢𑁆𑀣𑀁 𑀢𑁂𑀦 𑀯𑁂𑀡𑀼𑀤𑀡𑁆𑀟𑁂𑀦 𑀲𑀜𑁆𑀜𑀁 𑀓𑀭𑁄𑀦𑁆𑀢𑁄. 𑀅𑀣 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 ‘‘𑀉𑀲𑁆𑀲𑀭𑀣 𑀉𑀲𑁆𑀲𑀭𑀣𑀸’’𑀢𑀺 𑀉𑀲𑁆𑀲𑀸𑀭𑀡𑀁 𑀓𑀭𑁄𑀦𑁆𑀢𑁂𑀳𑀺 𑀅𑀢𑁆𑀢𑀦𑁄 𑀧𑀼𑀭𑀺𑀲𑁂𑀳𑀺 𑀦𑀻𑀬𑀫𑀸𑀦𑀸 𑀦𑀕𑀭𑀤𑁆𑀯𑀸𑀭𑀫𑀚𑁆𑀛𑁂 𑀫𑀸𑀢𑀗𑁆𑀕𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀆𑀳. ‘‘𑀅𑀬𑁆𑀬𑁂, 𑀫𑀸𑀢𑀗𑁆𑀕𑀘𑀡𑁆𑀟𑀸𑀮𑁄’’𑀢𑀺 ¶ 𑀘 𑀯𑀼𑀢𑁆𑀢𑁂 ‘‘𑀈𑀤𑀺𑀲𑀁 𑀤𑀺𑀲𑁆𑀯𑀸 𑀕𑀢𑀸𑀦𑀁 𑀓𑀼𑀢𑁄 𑀯𑀼𑀟𑁆𑀠𑀻’’𑀢𑀺 𑀬𑀸𑀦𑀁 𑀦𑀺𑀯𑀢𑁆𑀢𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀬𑀁 𑀫𑀬𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀩𑀳𑀼𑀁 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀁 𑀮𑀪𑁂𑀬𑁆𑀬𑀸𑀫, 𑀢𑀲𑁆𑀲 𑀦𑁄 𑀫𑀸𑀢𑀗𑁆𑀕𑁂𑀦 ¶ 𑀅𑀦𑁆𑀢𑀭𑀸𑀬𑁄 𑀓𑀢𑁄’’𑀢𑀺 𑀓𑀼𑀧𑀺𑀢𑀸 ‘‘𑀕𑀡𑁆𑀳𑀣, 𑀘𑀡𑁆𑀟𑀸𑀮’’𑀦𑁆𑀢𑀺 𑀮𑁂𑀟𑁆𑀟𑀽𑀳𑀺 𑀧𑀳𑀭𑀺𑀢𑁆𑀯𑀸 𑀯𑀺𑀲𑀜𑁆𑀜𑀻𑀪𑀽𑀢𑀁 𑀧𑀸𑀢𑁂𑀢𑁆𑀯𑀸 𑀅𑀕𑀫𑀁𑀲𑀼.

𑀲𑁄 𑀦 𑀘𑀺𑀭𑁂𑀦𑁂𑀯 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀅𑀬𑁆𑀬𑀸, 𑀤𑁆𑀯𑀸𑀭𑀁 𑀦𑀸𑀫 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀯 𑀓𑀢’’𑀦𑁆𑀢𑀺? ‘‘𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡’’𑀦𑁆𑀢𑀺. ‘‘𑀏𑀯𑀁 𑀲𑀩𑁆𑀩𑀲𑀸𑀥𑀸𑀭𑀡𑀤𑁆𑀯𑀸𑀭𑁂 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑀦𑁆𑀢𑀁 𑀫𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀦𑀼𑀲𑁆𑀲𑀸 𑀇𑀫𑀁 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀼’’𑀦𑁆𑀢𑀺 𑀭𑀣𑀺𑀓𑀸𑀬 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀳𑀦𑁆𑀤𑀸𑀳𑀁 𑀇𑀫𑀺𑀲𑁆𑀲𑀸 𑀫𑀸𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲𑀸 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀤𑁆𑀥𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀧𑀚𑁆𑀚𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀧𑀺𑀢𑀸 ‘‘𑀖𑀭𑀤𑁆𑀯𑀸𑀭𑁂 𑀫𑀸𑀢𑀗𑁆𑀕𑁄 𑀦𑀺𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀲𑁆𑀲 𑀓𑀸𑀓𑀡𑀺𑀓𑀁 𑀤𑁂𑀣, 𑀢𑁂𑀮𑁂𑀦 𑀲𑀭𑀻𑀭𑀁 𑀫𑀓𑁆𑀔𑁂𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺 𑀆𑀳. 𑀲𑁄 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀤𑁆𑀥𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀺’’𑀘𑁆𑀘𑁂𑀯 𑀆𑀳. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑁋 ‘‘𑀤𑁆𑀯𑁂 𑀓𑀸𑀓𑀡𑀺𑀓𑁂 𑀤𑁂𑀣, 𑀫𑀸𑀲𑀓𑀁 𑀧𑀸𑀤𑀁 𑀓𑀳𑀸𑀧𑀡𑀁 𑀤𑁆𑀯𑁂 𑀢𑀻𑀡𑀺 𑀬𑀸𑀯 𑀓𑀳𑀸𑀧𑀡𑀲𑀢𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺 𑀏𑀯. 𑀏𑀯𑀁 𑀢𑁂𑀲𑀁 𑀫𑀦𑁆𑀢𑁂𑀦𑁆𑀢𑀸𑀦𑀁 𑀏𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄.

𑀅𑀣 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀸𑀢𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀢, 𑀫𑀸𑀢𑀗𑁆𑀕 ¶ , 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀧𑀭𑀸𑀥𑀁 𑀔𑀫, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀕𑀡𑁆𑀳𑀸𑀳𑀺 𑀬𑀸𑀯 𑀲𑀢𑀲𑀳𑀲𑁆𑀲𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺, 𑀦𑀺𑀧𑀚𑁆𑀚𑀺 𑀏𑀯. 𑀢𑀲𑁆𑀲𑁂𑀯𑀁 𑀙 𑀤𑀺𑀯𑀲𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 𑀲𑀫𑀦𑁆𑀢𑀸 𑀲𑀸𑀫𑀦𑁆𑀢𑀖𑀭𑀸 𑀧𑀝𑀺𑀯𑀺𑀲𑀓𑀖𑀭𑀸 𑀘 𑀫𑀦𑀼𑀲𑁆𑀲𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸𑀢𑀗𑁆𑀕𑀁 𑀯𑀸 𑀉𑀝𑁆𑀞𑀸𑀧𑁂𑀣, 𑀤𑀸𑀭𑀺𑀓𑀁 𑀯𑀸 𑀤𑁂𑀣, 𑀫𑀸 𑀅𑀫𑁆𑀳𑁂 𑀦𑀸𑀲𑀬𑀺𑀢𑁆𑀣𑀸’’𑀢𑀺 𑀆𑀳𑀁𑀲𑀼. 𑀢𑀤𑀸 𑀓𑀺𑀭 𑀅𑀬𑀁 𑀢𑀲𑁆𑀫𑀺𑀁 𑀤𑁂𑀲𑁂 𑀤𑁂𑀲𑀥𑀫𑁆𑀫𑁄 ‘‘𑀬𑀲𑁆𑀲 𑀖𑀭𑀤𑁆𑀯𑀸𑀭𑁂 𑀏𑀯𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀘𑀡𑁆𑀟𑀸𑀮𑁄 𑀫𑀭𑀢𑀺, 𑀢𑁂𑀦 𑀖𑀭𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀲𑀢𑁆𑀢𑀖𑀭𑀯𑀸𑀲𑀺𑀦𑁄 𑀘𑀡𑁆𑀟𑀸𑀮𑀸 𑀳𑁄𑀦𑁆𑀢𑀻’’𑀢𑀺.

𑀢𑀢𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀸𑀢𑀸𑀧𑀺𑀢𑀭𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀧𑀝𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀘𑀡𑁆𑀟𑀸𑀮𑀸𑀦𑀼𑀘𑁆𑀙𑀯𑀺𑀓𑀁 𑀧𑀭𑀺𑀓𑁆𑀔𑀸𑀭𑀁 𑀤𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀁 𑀏𑀯 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀳𑀦𑁆𑀤, 𑀤𑀸𑀦𑀺 𑀤𑀸𑀭𑀺𑀓𑀁 𑀉𑀝𑁆𑀞𑀸𑀬 𑀕𑀡𑁆𑀳𑀸𑀳𑀻’’𑀢𑀺 𑀅𑀤𑀁𑀲𑀼. 𑀲𑀸 𑀧𑀲𑁆𑀲𑁂 𑀞𑀢𑁆𑀯𑀸 ‘‘𑀉𑀝𑁆𑀞𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀅𑀳𑀁 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑁄, 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀫𑀁 𑀉𑀝𑁆𑀞𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀢𑀣𑀸 𑀅𑀓𑀸𑀲𑀺. 𑀫𑀸𑀢𑀗𑁆𑀕𑁄 ‘‘𑀫𑀬𑀁 𑀅𑀦𑁆𑀢𑁄𑀦𑀕𑀭𑁂 𑀯𑀲𑀺𑀢𑀼𑀁 𑀦 𑀮𑀪𑀸𑀫, 𑀏𑀳𑀺, 𑀩𑀳𑀺𑀦𑀕𑀭𑁂 𑀘𑀡𑁆𑀟𑀸𑀮𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀅𑀧𑀲𑁆𑀲𑀸𑀬 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺. ‘‘𑀢𑀲𑁆𑀲𑀸 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸’’𑀢𑀺 𑀚𑀸𑀢𑀓𑀪𑀸𑀡𑀓𑀸 𑀯𑀤𑀦𑁆𑀢𑀺.

𑀏𑀯𑀁 ¶ ¶ 𑀧𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀚𑀸𑀢𑀺𑀲𑀫𑁆𑀪𑁂𑀤𑀯𑀻𑀢𑀺𑀓𑁆𑀓𑀫𑀁 𑀅𑀓𑀢𑁆𑀯𑀸𑀯 𑀓𑀢𑀺𑀧𑀸𑀳𑀁 𑀕𑁂𑀳𑁂 𑀯𑀲𑀺𑀢𑁆𑀯𑀸 𑀩𑀮𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀜𑁆𑀜𑀁 𑀫𑀬𑁆𑀳𑀁 𑀘𑀡𑁆𑀟𑀸𑀮𑀕𑁂𑀳𑁂 𑀯𑀸𑀲𑀸𑀧𑁂𑀲𑀺𑀁, 𑀳𑀦𑁆𑀤, 𑀤𑀸𑀦𑀺 𑀢𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀇𑀤𑁆𑀥𑀺𑀬𑀸 𑀘𑀡𑁆𑀟𑀸𑀮𑀕𑀸𑀫𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀸𑀫𑀺, 𑀓𑀺𑀲𑁆𑀲 𑀫𑀁 𑀅𑀦𑀸𑀣𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀁 ‘‘𑀢𑁆𑀯𑀁, 𑀪𑀤𑁆𑀤𑁂, 𑀫𑀸 𑀘𑀺𑀦𑁆𑀢𑀬𑀺, 𑀢𑀯 𑀧𑁄𑀭𑀸𑀡𑀓𑀬𑀲𑀢𑁄 𑀇𑀤𑀸𑀦𑀺 𑀫𑀳𑀦𑁆𑀢𑀢𑀭𑀁 𑀬𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀧𑀦 ‘𑀫𑀳𑀸𑀩𑁆𑀭𑀳𑁆𑀫𑀸 𑀫𑁂 𑀲𑀸𑀫𑀺𑀓𑁄 ¶ , 𑀦 𑀫𑀸𑀢𑀗𑁆𑀕𑁄, 𑀲𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀢𑁄, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀡𑁆𑀡𑀫𑀸𑀬 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀻’𑀢𑀺 𑀧𑀭𑀺𑀲𑀸𑀲𑀼 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄.

𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀧𑀺 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀚𑀦𑀫𑀚𑁆𑀛𑁂 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀢𑀣𑀸 𑀓𑀣𑁂𑀲𑀺. 𑀅𑀣 𑀧𑀼𑀡𑁆𑀡𑀫𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀕𑀕𑀦𑀫𑀚𑁆𑀛𑁂 𑀞𑀺𑀢𑀓𑀸𑀮𑁂 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀁 𑀲𑀓𑀮𑀁 𑀓𑀸𑀲𑀺𑀭𑀝𑁆𑀞𑀜𑁆𑀘 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀸 𑀉𑀧𑀭𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀫𑀳𑀸𑀚𑀦𑁂𑀦 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀘𑀡𑁆𑀟𑀸𑀮𑀕𑀸𑀫𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀪𑀢𑁆𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀁 𑀘𑀡𑁆𑀟𑀸𑀮𑀕𑀸𑀫𑀓𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀕𑁂𑀳𑀁 𑀲𑀼𑀤𑁆𑀥𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀮𑀗𑁆𑀓𑀭𑀺𑀁𑀲𑀼. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀘 𑀢𑀤𑀸 𑀉𑀢𑀼𑀦𑀻 𑀳𑁄𑀢𑀺. 𑀫𑀳𑀸𑀲𑀢𑁆𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺𑀬𑀁 𑀧𑀭𑀸𑀫𑀲𑀺𑀢𑁆𑀯𑀸 ‘‘𑀪𑀤𑁆𑀤𑁂, 𑀕𑀩𑁆𑀪𑁄 𑀢𑁂 𑀧𑀢𑀺𑀝𑁆𑀞𑀺𑀢𑁄, 𑀢𑁆𑀯𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀲𑀺, 𑀢𑁆𑀯𑀫𑁆𑀧𑀺 𑀧𑀼𑀢𑁆𑀢𑁄𑀧𑀺 𑀢𑁂 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀣, 𑀢𑀯 𑀲𑀻𑀲𑀥𑁄𑀯𑀦𑀉𑀤𑀓𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀦𑀁 𑀅𑀪𑀺𑀲𑁂𑀓𑁄𑀤𑀓𑀁 𑀪𑀯𑀺𑀲𑁆𑀲𑀢𑀺, 𑀦𑁆𑀳𑀸𑀦𑁄𑀤𑀓𑀁 𑀧𑀦 𑀢𑁂 𑀅𑀫𑀢𑁄𑀤𑀓𑀁 𑀪𑀯𑀺𑀲𑁆𑀲𑀢𑀺, 𑀬𑁂 𑀦𑀁 𑀲𑀻𑀲𑁂 𑀆𑀲𑀺𑀜𑁆𑀘𑀺𑀲𑁆𑀲𑀦𑁆𑀢𑀺, 𑀢𑁂 𑀲𑀩𑁆𑀩𑀭𑁄𑀕𑁂𑀳𑀺 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺, 𑀓𑀸𑀴𑀓𑀡𑁆𑀡𑀺𑀬𑀸 𑀘 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺, 𑀢𑀯 𑀧𑀸𑀤𑀧𑀺𑀝𑁆𑀞𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑀸 𑀲𑀳𑀲𑁆𑀲𑀁 𑀤𑀲𑁆𑀲𑀦𑁆𑀢𑀺, 𑀓𑀣𑀸𑀲𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀯𑀦𑁆𑀤𑀦𑁆𑀢𑀸 𑀲𑀢𑀁 𑀤𑀲𑁆𑀲𑀦𑁆𑀢𑀺, 𑀘𑀓𑁆𑀔𑀼𑀧𑀣𑁂 𑀞𑀢𑁆𑀯𑀸 𑀯𑀦𑁆𑀤𑀦𑁆𑀢𑀸 𑀏𑀓𑁂𑀓𑀁 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀯𑀦𑁆𑀤𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀘𑀦𑁆𑀤𑀫𑀡𑁆𑀟𑀮𑀁 𑀧𑀸𑀯𑀺𑀲𑀺.

𑀩𑁆𑀭𑀳𑁆𑀫𑀪𑀢𑁆𑀢𑀸 ¶ 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀫𑀳𑀦𑁆𑀢𑁂𑀦 ¶ 𑀲𑀓𑁆𑀓𑀸𑀭𑁂𑀦 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁. 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀜𑁆𑀘𑀲𑁆𑀲𑀸 𑀦𑀺𑀯𑁂𑀲𑀦𑀁 𑀓𑀸𑀭𑁂𑀲𑀼𑀁. 𑀢𑀢𑁆𑀣 𑀦𑁂𑀢𑁆𑀯𑀸 𑀉𑀴𑀸𑀭𑀁 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑀦𑀸𑀫𑁂𑀲𑀼𑀁. 𑀧𑀼𑀢𑁆𑀢𑀮𑀸𑀪𑀸𑀤𑀺 𑀲𑀩𑁆𑀩𑁄 𑀩𑁄𑀥𑀺𑀲𑀢𑁆𑀢𑁂𑀦 𑀯𑀼𑀢𑁆𑀢𑀲𑀤𑀺𑀲𑁄𑀯 𑀅𑀳𑁄𑀲𑀺. 𑀲𑁄𑀴𑀲𑀲𑀳𑀲𑁆𑀲𑀸 𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀧𑀼𑀢𑁆𑀢𑁂𑀦 𑀲𑀳 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀺, 𑀲𑀳𑀲𑁆𑀲𑀫𑀢𑁆𑀢𑀸 𑀦𑀁 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀤𑀸𑀦𑀁 𑀤𑀻𑀬𑀢𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀅𑀝𑁆𑀞𑀸𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀳𑀦𑁆𑀤𑀲𑁆𑀲 ¶ 𑀤𑀓𑁆𑀔𑀺𑀡𑁂𑀬𑁆𑀬𑁂 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣 𑀓𑀼𑀫𑀸𑀭𑁄 𑀕𑀸𑀣𑀫𑀸𑀳 𑁋

‘‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻, 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂, 𑀓𑁄 𑀭𑁂 𑀢𑀼𑀯𑀁 𑀳𑁄𑀲𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺. (𑀚𑀸. 𑁧.𑁧𑁫.𑁧);

𑀢𑁂𑀦 𑀯𑀼𑀢𑁆𑀢𑀁 𑀅𑀦𑀸𑀘𑀸𑀭𑀁 𑀅𑀲𑀳𑀫𑀸𑀦𑀸 𑀤𑁂𑀯𑀢𑀸 𑀢𑀲𑁆𑀲 𑀢𑁂𑀲𑀜𑁆𑀘 𑀲𑁄𑀴𑀲𑀲𑀳𑀲𑁆𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀼𑀔𑀁 𑀯𑀺𑀧𑀭𑀺𑀯𑀢𑁆𑀢𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀲𑁆𑀲 𑀅𑀦𑀸𑀘𑀸𑀭𑀁 𑀅𑀲𑀳𑀦𑁆𑀢𑁂𑀳𑀺 𑀬𑀓𑁆𑀔𑁂𑀳𑀺 𑀲𑁄 𑀯𑀺𑀧𑁆𑀧𑀓𑀸𑀭𑁄 𑀓𑀢𑁄, 𑀅𑀧𑀺 𑀘 𑀔𑁄 𑀧𑀦 𑀇𑀫𑀁 𑀉𑀘𑁆𑀙𑀺𑀝𑁆𑀞𑀧𑀺𑀡𑁆𑀟𑀓𑀁 𑀢𑁂𑀲𑀁 𑀫𑀼𑀔𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀯𑀽𑀧𑀲𑀫𑁂𑀳𑀻’’𑀢𑀺 𑀆𑀳. 𑀲𑀸𑀧𑀺 𑀢𑀣𑀸 𑀓𑀢𑁆𑀯𑀸 𑀢𑀁 𑀯𑀽𑀧𑀲𑀫𑁂𑀲𑀺. 𑀅𑀣 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀦𑀸𑀫 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀲𑀤𑀺𑀲𑀸 𑀪𑀯𑀦𑁆𑀢𑀺, 𑀦 𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀯𑀺𑀬 𑀚𑀸𑀢𑀺𑀫𑀢𑁆𑀢𑁂𑀦, 𑀫𑀦𑁆𑀢𑀲𑀚𑁆𑀛𑀸𑀬𑀦𑀫𑀢𑁆𑀢𑁂𑀦 𑀯𑀸 𑀫𑀸𑀦𑀢𑁆𑀣𑀤𑁆𑀥𑀸’’𑀢𑀺 𑀯𑀢𑁆𑀯𑀸 𑀬𑁂 𑀢𑀤𑀸 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀘𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘, 𑀢𑀢𑁆𑀣𑁂𑀯𑀲𑁆𑀲 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀲𑀻𑀢𑀺.

𑀢𑀤𑀸 𑀯𑁂𑀢𑁆𑀢𑀯𑀢𑀻𑀦𑀕𑀭𑁂 𑀚𑀸𑀢𑀺𑀫𑀦𑁆𑀢𑁄 𑀦𑀸𑀫 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀫𑀸𑀦𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 ‘‘𑀢𑀲𑁆𑀲 𑀫𑀸𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸𑀲𑀦𑁆𑀦𑁂 𑀉𑀧𑀭𑀺𑀲𑁄𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁧.

‘‘𑀅𑀳𑀜𑁆𑀘 𑀩𑁆𑀭𑀸𑀳𑁆𑀫𑀡𑁄 𑀏𑀓𑁄, 𑀕𑀗𑁆𑀕𑀸𑀓𑀽𑀮𑁂 𑀯𑀲𑀸𑀫𑀼𑀪𑁄;

𑀅𑀳𑀁 𑀯𑀲𑀸𑀫𑀺 𑀉𑀧𑀭𑀺, 𑀳𑁂𑀝𑁆𑀞𑀸 𑀯𑀲𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀅𑀣 ¶ ¶ 𑀫𑀳𑀸𑀲𑀢𑁆𑀢𑁄 𑀏𑀓𑀤𑀺𑀯𑀲𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 ‘‘𑀇𑀤𑀁 𑀚𑀸𑀢𑀺𑀫𑀦𑁆𑀢𑀲𑁆𑀲 𑀚𑀝𑀸𑀲𑀼 𑀮𑀕𑁆𑀕𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀦𑀤𑀺𑀬𑀁 𑀧𑀸𑀢𑁂𑀲𑀺. 𑀢𑀁 𑀢𑀲𑁆𑀲 𑀉𑀤𑀓𑀁 𑀆𑀘𑀫𑁂𑀦𑁆𑀢𑀲𑁆𑀲 𑀚𑀝𑀸𑀲𑀼 𑀮𑀕𑁆𑀕𑀺, 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀦𑀲𑁆𑀲 𑀯𑀲𑀮𑀸’’𑀢𑀺 𑀯𑀢𑁆𑀯𑀸 ‘‘𑀓𑀼𑀢𑁄𑀬𑀁 𑀓𑀸𑀴𑀓𑀡𑁆𑀡𑀻 𑀆𑀕𑀢𑁄, 𑀉𑀧𑀥𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀤𑁆𑀥𑀁𑀲𑁄𑀢𑀁 𑀕𑀘𑁆𑀙𑀦𑁆𑀢𑁄 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁𑀚𑀸𑀢𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀘𑀡𑁆𑀟𑀸𑀮𑁄𑀲𑁆𑀫𑀻’’𑀢𑀺. ‘‘𑀢𑀬𑀸 𑀦𑀤𑀺𑀬𑀁 𑀤𑀦𑁆𑀢𑀓𑀝𑁆𑀞𑀁 𑀧𑀸𑀢𑀺𑀢’’𑀦𑁆𑀢𑀺? ‘‘𑀆𑀫, 𑀫𑀬𑀸’’𑀢𑀺. ‘‘𑀦𑀲𑁆𑀲, 𑀯𑀲𑀮, 𑀘𑀡𑁆𑀟𑀸𑀮, 𑀓𑀸𑀴𑀓𑀡𑁆𑀡𑀺, 𑀫𑀸 𑀇𑀥 𑀯𑀲𑀺, 𑀳𑁂𑀝𑁆𑀞𑀸𑀲𑁄𑀢𑁂 𑀯𑀲𑀸’’𑀢𑀺 𑀯𑀢𑁆𑀯𑀸 𑀳𑁂𑀝𑁆𑀞𑀸𑀲𑁄𑀢𑁂 𑀯𑀲𑀦𑁆𑀢𑁂𑀦𑀧𑀺 𑀧𑀸𑀢𑀺𑀢𑁂 𑀤𑀦𑁆𑀢𑀓𑀝𑁆𑀞𑁂 𑀧𑀝𑀺𑀲𑁄𑀢𑀁 𑀆𑀕𑀦𑁆𑀢𑁆𑀯𑀸 ¶ 𑀚𑀝𑀸𑀲𑀼 𑀮𑀕𑁆𑀕𑀦𑁆𑀢𑁂 ‘‘𑀦𑀲𑁆𑀲, 𑀯𑀲𑀮, 𑀲𑀘𑁂 𑀇𑀥 𑀯𑀲𑀺𑀲𑁆𑀲𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀢𑀥𑀸 𑀢𑁂 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁨.

‘‘𑀯𑀺𑀘𑀭𑀦𑁆𑀢𑁄 𑀅𑀦𑀼𑀓𑀽𑀮𑀫𑁆𑀳𑀺, 𑀉𑀤𑁆𑀥𑀁 𑀫𑁂 𑀅𑀲𑁆𑀲𑀫𑀤𑁆𑀤𑀲;

𑀢𑀢𑁆𑀣 𑀫𑀁 𑀧𑀭𑀺𑀪𑀸𑀲𑁂𑀢𑁆𑀯𑀸, 𑀅𑀪𑀺𑀲𑀧𑀺 𑀫𑀼𑀤𑁆𑀥𑀨𑀸𑀮𑀦’’𑀦𑁆𑀢𑀺.

𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀅𑀦𑀼𑀓𑀽𑀮𑀫𑁆𑀳𑀻𑀢𑀺 𑀉𑀘𑁆𑀙𑀺𑀝𑁆𑀞𑀤𑀦𑁆𑀢𑀓𑀝𑁆𑀞𑁂 𑀅𑀢𑁆𑀢𑀦𑁄 𑀚𑀝𑀸𑀲𑀼 𑀮𑀕𑁆𑀕𑁂 𑀢𑀲𑁆𑀲 𑀆𑀕𑀫𑀦𑀕𑀯𑁂𑀲𑀦𑀯𑀲𑁂𑀦 𑀕𑀗𑁆𑀕𑀸𑀬 𑀢𑀻𑀭𑁂 𑀅𑀦𑀼𑀯𑀺𑀘𑀭𑀦𑁆𑀢𑁄. 𑀉𑀤𑁆𑀥𑀁 𑀫𑁂 𑀅𑀲𑁆𑀲𑀫𑀤𑁆𑀤𑀲𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀉𑀧𑀭𑀺𑀲𑁄𑀢𑁂 𑀫𑀫 𑀅𑀲𑁆𑀲𑀫𑀁 𑀧𑀡𑁆𑀡𑀲𑀸𑀮𑀁 𑀅𑀤𑁆𑀤𑀓𑁆𑀔𑀺. 𑀢𑀢𑁆𑀣 𑀫𑀁 𑀧𑀭𑀺𑀪𑀸𑀲𑁂𑀢𑁆𑀯𑀸𑀢𑀺 𑀫𑀫 𑀅𑀲𑁆𑀲𑀫𑀁 𑀆𑀕𑀦𑁆𑀢𑁆𑀯𑀸 𑀚𑀸𑀢𑀺𑀁 𑀲𑀼𑀢𑁆𑀯𑀸 𑀢𑀢𑁄𑀯 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸 ‘‘𑀦𑀲𑁆𑀲, 𑀯𑀲𑀮 𑀘𑀡𑁆𑀟𑀸𑀮, 𑀓𑀸𑀴𑀓𑀡𑁆𑀡𑀺 𑀫𑀸 𑀇𑀥 𑀯𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀪𑀬𑁂𑀦 𑀲𑀦𑁆𑀢𑀚𑁆𑀚𑁂𑀢𑁆𑀯𑀸. 𑀅𑀪𑀺𑀲𑀧𑀺 𑀫𑀼𑀤𑁆𑀥𑀨𑀸𑀮𑀦𑀦𑁆𑀢𑀺 ‘‘𑀲𑀘𑁂 𑀚𑀻𑀯𑀺𑀢𑀼𑀓𑀸𑀫𑁄𑀲𑀺, 𑀏𑀢𑁆𑀢𑁄𑀯 𑀲𑀻𑀖𑀁 𑀧𑀮𑀸𑀬𑀲𑁆𑀲𑀽’’𑀢𑀺 𑀯𑀢𑁆𑀯𑀸 ‘‘𑀲𑀘𑁂 𑀦 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀽’’𑀢𑀺 𑀫𑁂 𑀅𑀪𑀺𑀲𑀧𑀁 𑀅𑀤𑀸𑀲𑀺.

𑀓𑀺𑀁 𑀧𑀦 𑀢𑀲𑁆𑀲 𑀅𑀪𑀺𑀲𑀧𑁂𑀦 𑀫𑀼𑀤𑁆𑀥𑀸 𑀨𑀮𑀢𑀻𑀢𑀺? 𑀦 𑀨𑀮𑀢𑀺, 𑀓𑀼𑀳𑀓𑁄 𑀧𑀦 𑀲𑁄, 𑀏𑀯𑀫𑀬𑀁 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀲𑀼𑀤𑀽𑀭𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀲𑀜𑁆𑀜𑀸𑀬 𑀲𑀦𑁆𑀢𑀸𑀲𑀦𑀢𑁆𑀣𑀁 𑀢𑀣𑀸 𑀆𑀳.

𑁬𑁩. 𑀬𑀤𑀺𑀳𑀁 𑀢𑀲𑁆𑀲 𑀧𑀓𑀼𑀧𑁆𑀧𑁂𑀬𑁆𑀬𑀦𑁆𑀢𑀺 𑀢𑀲𑁆𑀲 𑀫𑀸𑀦𑀢𑁆𑀣𑀤𑁆𑀥𑀲𑁆𑀲 𑀓𑀽𑀝𑀚𑀝𑀺𑀮𑀲𑁆𑀲 𑀅𑀳𑀁 𑀬𑀤𑀺 𑀓𑀼𑀚𑁆𑀛𑁂𑀬𑁆𑀬𑀁. 𑀬𑀤𑀺 𑀲𑀻𑀮𑀁 𑀦 𑀕𑁄𑀧𑀬𑁂𑀢𑀺 𑀲𑀻𑀮𑀁 𑀬𑀤𑀺 𑀦 𑀭𑀓𑁆𑀔𑁂𑀬𑁆𑀬𑀁, 𑀇𑀤𑀁 𑀲𑀻𑀮𑀁 𑀦𑀸𑀫 𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀁 𑀲𑀫𑁆𑀫𑀤𑁂𑀯 𑀭𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑀤𑀺 𑀦 𑀘𑀺𑀦𑁆𑀢𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀑𑀮𑁄𑀓𑁂𑀢𑁆𑀯𑀸𑀦𑀳𑀁 𑀢𑀲𑁆𑀲, 𑀓𑀭𑁂𑀬𑁆𑀬𑀁 𑀙𑀸𑀭𑀺𑀓𑀁 𑀯𑀺𑀬𑀸𑀢𑀺 𑀲𑀘𑀸𑀳𑀁 𑀢𑀤𑀸 𑀢𑀲𑁆𑀲 𑀅𑀧𑁆𑀧𑀢𑀻𑀢𑁄 𑀅𑀪𑀯𑀺𑀲𑁆𑀲𑀁 ¶ . 𑀫𑀫 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀫𑀬𑀺 𑀅𑀪𑀺𑀧𑁆𑀧𑀲𑀦𑁆𑀦𑀸 𑀤𑁂𑀯𑀢𑀸 𑀔𑀡𑁂𑀦𑁂𑀯 𑀢𑀁 𑀪𑀲𑁆𑀫𑀫𑀼𑀝𑁆𑀞𑀺𑀁 𑀯𑀺𑀬 𑀯𑀺𑀤𑁆𑀥𑀁𑀲𑁂𑀬𑁆𑀬𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀣𑀸 𑀧𑀦 ¶ 𑀢𑀤𑀸 𑀅𑀢𑁆𑀢𑀦𑁄 𑀅𑀧𑁆𑀧𑀢𑀻𑀢𑀪𑀸𑀯𑁂 𑀲𑀢𑀺 𑀤𑁂𑀯𑀢𑀸𑀳𑀺 𑀲𑀸𑀥𑁂𑀢𑀩𑁆𑀩𑀁 𑀢𑀲𑁆𑀲 𑀅𑀦𑀢𑁆𑀣𑀁 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀁 𑀯𑀺𑀬 𑀓𑀢𑁆𑀯𑀸 𑀤𑁂𑀲𑁂𑀲𑀺 ‘‘𑀓𑀭𑁂𑀬𑁆𑀬𑀁 𑀙𑀸𑀭𑀺𑀓𑀁 𑀯𑀺𑀬𑀸’’𑀢𑀺.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘‘𑀩𑁄𑀥𑀺𑀲𑀢𑁆𑀢𑁄𑀯 𑀢𑀁 𑀚𑀝𑀺𑀮𑀁 𑀇𑀘𑁆𑀙𑀫𑀸𑀦𑁄 𑀇𑀤𑁆𑀥𑀺𑀬𑀸 𑀙𑀸𑀭𑀺𑀓𑀁 𑀓𑀭𑁂𑀬𑁆𑀬, 𑀏𑀯𑀜𑁆𑀳𑀺 𑀲𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑁄 𑀉𑀚𑀼𑀓𑀫𑁂𑀯 𑀦𑀻𑀢𑁄 𑀳𑁄𑀢𑀻’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀢𑁆𑀯𑀁 𑀇𑀤𑁆𑀥𑀺𑀬𑀸 𑀧𑀭𑀽𑀧𑀖𑀸𑀢𑀁 𑀯𑀤𑀲𑀺, 𑀇𑀤𑁆𑀥𑀺 𑀦𑀸𑀫𑁂𑀲𑀸 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺, 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺, 𑀫𑀦𑁄𑀫𑀬𑀸 𑀇𑀤𑁆𑀥𑀺, 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀅𑀭𑀺𑀬𑀸 𑀇𑀤𑁆𑀥𑀺, 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺, 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑁆𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 ¶ 𑀇𑀤𑁆𑀥𑀻𑀢𑀺 𑀤𑀲𑀯𑀺𑀥𑀸. 𑀢𑀢𑁆𑀣 ‘‘𑀓𑀢𑀭𑀁 𑀇𑀤𑁆𑀥𑀺𑀁 𑀯𑀤𑁂𑀲𑀻’’𑀢𑀺? ‘‘𑀪𑀸𑀯𑀦𑀸𑀫𑀬’’𑀦𑁆𑀢𑀺. ‘‘𑀓𑀺𑀁 𑀧𑀦 𑀪𑀸𑀯𑀦𑀸𑀫𑀬𑀸𑀬 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀻’’𑀢𑀺? 𑀆𑀫, 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 ‘‘𑀏𑀓𑀯𑀸𑀭𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀬𑀣𑀸 𑀳𑀺 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑁂𑀦 𑀉𑀤𑀓𑀪𑀭𑀺𑀢𑁂 𑀖𑀝𑁂 𑀔𑀺𑀢𑁆𑀢𑁂 𑀧𑀭𑁄𑀧𑀺 𑀧𑀳𑀭𑀻𑀬𑀢𑀺, 𑀖𑀝𑁄𑀧𑀺 𑀪𑀺𑀚𑁆𑀚𑀢𑀺, 𑀏𑀯𑀫𑁂𑀯 𑀪𑀸𑀯𑀦𑀸𑀫𑀬𑀸𑀬 𑀇𑀤𑁆𑀥𑀺𑀬𑀸 𑀏𑀓𑀯𑀸𑀭𑀁 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀸 𑀦𑀲𑁆𑀲𑀢𑀺.

𑀅𑀣 𑀲𑁄 ‘‘𑀪𑀸𑀯𑀦𑀸𑀫𑀬𑀸𑀬 𑀇𑀤𑁆𑀥𑀺𑀬𑀸 𑀦𑁂𑀯 𑀏𑀓𑀯𑀸𑀭𑀁 𑀦 𑀤𑁆𑀯𑁂𑀯𑀸𑀭𑀁 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀓𑀺𑀁 𑀪𑀸𑀯𑀦𑀸𑀫𑀬𑀸 𑀇𑀤𑁆𑀥𑀺 𑀓𑀼𑀲𑀮𑀸 𑀅𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸’’𑀢𑀺? 𑀚𑀸𑀦𑀦𑁆𑀢𑁄 ‘‘𑀪𑀸𑀯𑀦𑀸𑀫𑀬𑀸 𑀇𑀤𑁆𑀥𑀺 𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀭𑀽𑀧𑀸𑀯𑀘𑀭𑀸 𑀘𑀸’’𑀢𑀺 𑀯𑀓𑁆𑀔𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀓𑀼𑀲𑀮𑀸𑀤𑀻𑀲𑀼 𑀓𑀢𑀭𑀁 𑀓𑁄𑀝𑁆𑀞𑀸𑀲𑀁 𑀪𑀚𑀢𑀻’’𑀢𑀺? 𑀚𑀸𑀦𑀦𑁆𑀢𑁄 𑀯𑀓𑁆𑀔𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀅𑀓𑀼𑀲𑀮𑀸𑀯 𑀤𑀼𑀓𑁆𑀔𑀯𑁂𑀤𑀦𑀸𑀯 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀯 𑀓𑀸𑀫𑀸𑀯𑀘𑀭𑀸𑀯𑀸’’𑀢𑀺. 𑀏𑀯𑀁 𑀲𑀦𑁆𑀢𑁂 ‘‘𑀢𑀯 𑀧𑀜𑁆𑀳𑁄 𑀦𑁂𑀯 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀫𑁂𑀢𑀺, 𑀦 𑀯𑁂𑀤𑀦𑀸𑀢𑁆𑀢𑀺𑀓𑁂𑀦 𑀦 𑀯𑀺𑀢𑀓𑁆𑀓𑀢𑁆𑀢𑀺𑀓𑁂𑀦 𑀦 𑀪𑀽𑀫𑀦𑁆𑀢𑀭𑁂𑀦𑀸’’𑀢𑀺 𑀧𑀸𑀴𑀺𑀬𑀸 𑀯𑀺𑀭𑁄𑀥𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀬𑀤𑀺 𑀧𑀦 𑀲𑁄 ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀜𑁆𑀜𑀺𑀲𑁆𑀲𑀸 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁 𑀧𑀸𑀧𑀓𑁂𑀦 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺 ‘𑀅𑀳𑁄 𑀯𑀢 𑀬𑀁 𑀢𑀁 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁 𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀓𑁆𑀔𑀫𑁂𑀬𑁆𑀬𑀸’𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀮𑀼𑀫𑁆𑀧𑀲𑁆𑀲 𑀉𑀧𑀖𑀸𑀢𑁄 𑀳𑁄𑀢𑀻’’𑀢𑀺 ¶ 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑀼𑀴𑁆𑀳𑀁 𑀓𑀼𑀮𑀼𑀫𑁆𑀧𑀲𑀼𑀢𑁆𑀢𑀁 𑀉𑀤𑀸𑀳𑀭𑁂𑀬𑁆𑀬. 𑀢𑀲𑁆𑀲𑀸𑀧𑀺 ‘‘𑀢𑁆𑀯𑀁 𑀅𑀢𑁆𑀣𑀁 𑀦 𑀚𑀸𑀦𑀸𑀲𑀺. 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀳𑀺 𑀏𑀢𑁆𑀣 𑀦 𑀪𑀸𑀯𑀦𑀸𑀫𑀬𑀸 𑀇𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸, 𑀆𑀣𑀩𑁆𑀩𑀦𑀺𑀓𑀸 𑀇𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀸 𑀮𑀩𑁆𑀪𑀢𑀻𑀢𑀺 𑀪𑀸𑀯𑀦𑀸𑀫𑀬𑀸𑀬 𑀇𑀤𑁆𑀥𑀺𑀬𑀸 𑀧𑀭𑀽𑀧𑀖𑀸𑀢𑁄 𑀦 𑀲𑀫𑁆𑀪𑀯𑀢𑀺𑀬𑁂𑀯𑀸’’𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀦𑁄 𑀘𑁂 𑀲𑀜𑁆𑀜𑀢𑁆𑀢𑀺𑀁 𑀉𑀧𑁂𑀢𑀺, 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀕𑀸𑀣𑀸𑀬 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀧𑀦 𑀢𑁂𑀦 𑀅𑀪𑀺𑀲𑀧𑀺𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀲𑀘𑀸𑀳𑀁 𑀏𑀢𑀲𑁆𑀲 𑀓𑀼𑀚𑁆𑀛𑀺𑀲𑁆𑀲𑀸𑀫𑀺, 𑀲𑀻𑀮𑀁 𑀫𑁂 𑀅𑀭𑀓𑁆𑀔𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀉𑀧𑀸𑀬𑁂𑀦𑁂𑀯𑀲𑁆𑀲 𑀫𑀸𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀲𑀸 𑀘𑀲𑁆𑀲 𑀭𑀓𑁆𑀔𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀯𑀸𑀭𑁂𑀲𑀺. 𑀫𑀦𑀼𑀲𑁆𑀲𑀸 𑀲𑀽𑀭𑀺𑀬𑀲𑁆𑀲 𑀅𑀦𑀼𑀕𑁆𑀕𑀫𑀦𑁂𑀦 𑀉𑀩𑁆𑀩𑀸𑀴𑁆𑀳𑀸 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀦 𑀫𑁂𑀢𑀁 𑀓𑀫𑁆𑀫𑀁, 𑀕𑀗𑁆𑀕𑀸𑀢𑀻𑀭𑁂 𑀧𑀦 𑀏𑀓𑁄 𑀘𑀡𑁆𑀟𑀸𑀮𑀢𑀸𑀧𑀲𑁄 𑀯𑀲𑀢𑀺, 𑀢𑀲𑁆𑀲𑁂𑀢𑀁 𑀓𑀫𑁆𑀫𑀁 𑀲𑀺𑀬𑀸’’𑀢𑀺 𑀆𑀳 ¶ . 𑀫𑀦𑀼𑀲𑁆𑀲𑀸 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑀸𑀧𑀲𑁄 𑀫𑀁 𑀦𑀺𑀭𑀧𑀭𑀸𑀥𑀁 𑀅𑀪𑀺𑀲𑀧𑀺, 𑀢𑀲𑁆𑀫𑀺𑀁 𑀆𑀕𑀦𑁆𑀢𑁆𑀯𑀸 𑀔𑀫𑀸𑀧𑀦𑀢𑁆𑀣𑀁 𑀫𑀫 𑀧𑀸𑀤𑁂𑀲𑀼 𑀧𑀢𑀺𑀢𑁂 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀁 𑀆𑀓𑀟𑁆𑀠𑀦𑁆𑀢𑀸 𑀆𑀦𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ‘‘𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. ‘‘𑀦 𑀲𑀓𑁆𑀓𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀲𑀘𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺. ‘‘𑀅𑀣, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀸’’𑀢𑀺. 𑀫𑀳𑀸𑀲𑀢𑁆𑀢𑁄 ‘‘𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀆𑀳𑀭𑀣𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀢𑀸𑀧𑀲𑀲𑁆𑀲 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀢𑀸𑀧𑀲𑀁 𑀑𑀢𑀸𑀭𑁂𑀢𑁆𑀯𑀸 𑀉𑀤𑀓𑁂 𑀞𑀧𑁂𑀣, 𑀬𑀤𑀸 𑀲𑀽𑀭𑀺𑀬𑁄 𑀤𑀺𑀲𑁆𑀲𑀢𑀺, 𑀢𑀤𑀸 𑀢𑀸𑀧𑀲𑁄 𑀉𑀤𑀓𑁂 𑀦𑀺𑀫𑀼𑀚𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀺𑀬𑀭𑀲𑁆𑀫𑀻𑀳𑀺 𑀨𑀼𑀝𑁆𑀞𑀫𑀢𑁆𑀢𑁂𑀯 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀪𑀺𑀚𑁆𑀚𑀺. 𑀢𑀸𑀧𑀲𑁄 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁪.

‘‘𑀬𑀁 ¶ 𑀲𑁄 𑀢𑀤𑀸 𑀫𑀁 𑀅𑀪𑀺𑀲𑀧𑀺, 𑀓𑀼𑀧𑀺𑀢𑁄 𑀤𑀼𑀝𑁆𑀞𑀫𑀸𑀦𑀲𑁄;

𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 𑀦𑀺𑀧𑀢𑀺, 𑀬𑁄𑀕𑁂𑀦 𑀢𑀁 𑀧𑀫𑁄𑀘𑀬𑀺’’𑀦𑁆𑀢𑀺.

𑀢𑀢𑁆𑀣 𑀬𑀁 𑀲𑁄 𑀢𑀤𑀸 𑀫𑀁 𑀅𑀪𑀺𑀲𑀧𑀻𑀢𑀺 𑀲𑁄 𑀚𑀸𑀢𑀺𑀫𑀦𑁆𑀢𑀚𑀝𑀺𑀮𑁄 𑀬𑀁 𑀫𑀼𑀤𑁆𑀥𑀨𑀸𑀮𑀦𑀁 𑀲𑀦𑁆𑀥𑀸𑀬 𑀢𑀤𑀸 𑀫𑀁 𑀅𑀪𑀺𑀲𑀧𑀺, 𑀫𑀬𑁆𑀳𑀁 𑀲𑀧𑀁 𑀅𑀤𑀸𑀲𑀺. 𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 ¶ 𑀦𑀺𑀧𑀢𑀻𑀢𑀺 𑀢𑀁 𑀫𑀬𑁆𑀳𑀁 𑀉𑀧𑀭𑀺 𑀢𑁂𑀦 𑀇𑀘𑁆𑀙𑀺𑀢𑀁 𑀢𑀲𑁆𑀲𑁂𑀯 𑀧𑀦 𑀉𑀧𑀭𑀺 𑀦𑀺𑀧𑀢𑀺 𑀦𑀺𑀧𑀢𑀦𑀪𑀸𑀯𑁂𑀦 𑀅𑀝𑁆𑀞𑀸𑀲𑀺. 𑀏𑀯𑀜𑁆𑀳𑁂𑀢𑀁 𑀳𑁄𑀢𑀺 𑀬𑀣𑀸 𑀢𑀁 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀧𑀤𑀼𑀲𑁆𑀲𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺…𑀧𑁂… 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’𑀢𑀺 (𑀥. 𑀧. 𑁧𑁨𑁫; 𑀲𑀼. 𑀦𑀺. 𑁬𑁬𑁭; 𑀚𑀸. 𑁧.𑁫.𑁯𑁪). 𑀬𑁄𑀕𑁂𑀦 𑀢𑀁 𑀧𑀫𑁄𑀘𑀬𑀺𑀦𑁆𑀢𑀺 𑀢𑀁 𑀢𑀲𑁆𑀲 𑀪𑀸𑀲𑀺𑀢𑀁 𑀫𑀢𑁆𑀣𑀓𑀨𑀸𑀮𑀦𑀁 𑀉𑀧𑀸𑀬𑁂𑀦 𑀢𑀢𑁄 𑀧𑀫𑁄𑀘𑁂𑀲𑀺𑀁, 𑀢𑀁 𑀯𑀸 𑀚𑀝𑀺𑀮𑀁 𑀢𑀢𑁄 𑀧𑀫𑁄𑀘𑁂𑀲𑀺𑀁, 𑀬𑁂𑀦 𑀉𑀧𑀸𑀬𑁂𑀦 𑀢𑀁 𑀦 𑀳𑁄𑀢𑀺, 𑀢𑀣𑀸 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀬𑀜𑁆𑀳𑀺 𑀢𑁂𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀦𑀲𑀫𑀺𑀤𑁆𑀥𑀸𑀳𑀺 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑀭𑀺𑀧𑀽𑀭𑀺𑀢𑀸𑀳𑀺 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀳𑀺 𑀲𑀼𑀲𑀗𑁆𑀔𑀢𑀲𑀦𑁆𑀢𑀸𑀦𑁂 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑁂 𑀫𑀳𑀸𑀲𑀢𑁆𑀢𑁂 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀁 𑀅𑀪𑀺𑀲𑀧𑀲𑀗𑁆𑀔𑀸𑀢𑀁 𑀨𑀭𑀼𑀲𑀯𑀘𑀦𑀁 𑀧𑀬𑀼𑀢𑁆𑀢𑀁, 𑀢𑀁 𑀫𑀳𑀸𑀲𑀢𑁆𑀢𑀲𑁆𑀲 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀢𑁄 𑀢𑀲𑁆𑀲 𑀘 𑀅𑀚𑁆𑀛𑀸𑀲𑀬𑀨𑀭𑀼𑀲𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑀼𑀢𑁆𑀯𑀸 𑀲𑀘𑁂 𑀲𑁄 𑀫𑀳𑀸𑀲𑀢𑁆𑀢𑀁 𑀦 𑀔𑀫𑀸𑀧𑁂𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀚𑀸𑀢𑀁, 𑀔𑀫𑀸𑀧𑀺𑀢𑁂 𑀧𑀦 𑀫𑀳𑀸𑀲𑀢𑁆𑀢𑁂 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀚𑁆𑀚𑀺 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀢𑁄. 𑀅𑀬𑀜𑁆𑀳𑀺 𑀅𑀭𑀺𑀬𑀽𑀧𑀯𑀸𑀤𑀧𑀸𑀧𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀘 𑀥𑀫𑁆𑀫𑀢𑀸. 𑀢𑀢𑁆𑀣 𑀬𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁂𑀦 𑀲𑀽𑀭𑀺𑀬𑀼𑀕𑁆𑀕𑀫𑀦𑀦𑀺𑀯𑀸𑀭𑀡𑀁 𑀓𑀢𑀁, 𑀅𑀬𑀫𑁂𑀢𑁆𑀣 𑀬𑁄𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄 𑀉𑀧𑀸𑀬𑁄. 𑀢𑁂𑀦 𑀳𑀺 𑀉𑀩𑁆𑀩𑀸𑀴𑁆𑀳𑀸 𑀫𑀦𑀼𑀲𑁆𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀸𑀧𑀲𑀁 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑀼𑀁. 𑀲𑁄𑀧𑀺 𑀘 𑀫𑀳𑀸𑀲𑀢𑁆𑀢𑀲𑁆𑀲 ¶ 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦𑀲𑁆𑀲 𑀫𑀢𑁆𑀣𑀓𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑁆𑀲 𑀞𑀧𑀦𑀁, 𑀢𑀲𑁆𑀲 𑀘 𑀲𑀢𑁆𑀢𑀥𑀸 𑀨𑀸𑀮𑀦𑀁 𑀓𑀢𑀁, 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁, 𑀅𑀜𑁆𑀜𑀣𑀸 𑀳𑀺 𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀲𑀫𑀸𑀦𑀸 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀦 𑀧𑀦 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀻𑀢𑀺 𑀫𑀳𑀸𑀲𑀢𑁆𑀢𑀫𑁆𑀧𑀺 ¶ 𑀢𑁂𑀦 𑀲𑀤𑀺𑀲𑀁 𑀓𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁. 𑀢𑀤𑀲𑁆𑀲 𑀦𑁂𑀲𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺.

𑁬𑁫. 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀢𑀤𑀸 𑀢𑀲𑁆𑀫𑀺𑀁 𑀢𑀸𑀧𑀲𑁂 𑀘𑀺𑀢𑁆𑀢𑀁 𑀅𑀤𑀽𑀲𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀻𑀮𑀫𑁂𑀯 𑀭𑀓𑁆𑀔𑀺𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀭𑀓𑁆𑀔𑀺𑀁 𑀫𑀫 𑀲𑀻𑀮’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀢𑀤𑀸 𑀫𑀡𑁆𑀟𑀩𑁆𑀬𑁄 𑀉𑀤𑁂𑀦𑁄, 𑀫𑀸𑀢𑀗𑁆𑀕𑁄 𑀮𑁄𑀓𑀦𑀸𑀣𑁄.

𑀇𑀥𑀸𑀧𑀺 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀦𑀺𑀳𑀻𑀦𑀚𑀸𑀢𑀺𑀓𑀲𑁆𑀲 𑀲𑀢𑁄 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀸𑀦𑀦𑀺𑀕𑁆𑀕𑀳𑁄, 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀯𑀲𑁆𑀲𑀬𑁄 ¶ 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂𑀬𑁂𑀯 𑀬𑀣𑀸𑀥𑀺𑀧𑁆𑀧𑀸𑀬𑀁 𑀛𑀸𑀦𑀸𑀪𑀺𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑀦𑀁, 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀉𑀧𑀸𑀬𑀲𑀫𑁆𑀧𑀸𑀤𑀦𑀁, 𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑀲𑁆𑀲 𑀫𑀸𑀦𑀦𑀺𑀕𑁆𑀕𑀳𑁄, 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑀲𑁆𑀲 𑀫𑀸𑀦𑀦𑀺𑀕𑁆𑀕𑀳𑁄, 𑀢𑀲𑁆𑀲 𑀘 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀪𑀸𑀯𑀺𑀦𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑀲𑁆𑀲 𑀅𑀧𑀦𑀬𑀦𑀁, 𑀫𑀳𑀸𑀧𑀭𑀸𑀥𑀲𑁆𑀲𑀸𑀧𑀺 𑀢𑀲𑁆𑀲 𑀅𑀓𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀮𑀸𑀦𑀼𑀭𑀓𑁆𑀔𑀡𑀁, 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸.

𑀫𑀸𑀢𑀗𑁆𑀕𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀘𑀭𑀺𑀬𑀸𑀯𑀡𑁆𑀡𑀦𑀸

𑁬𑁬. 𑀅𑀝𑁆𑀞𑀫𑁂 𑀫𑀳𑀸𑀧𑀓𑁆𑀔𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄. 𑀫𑀳𑀺𑀤𑁆𑀥𑀺𑀓𑁄𑀢𑀺 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀥𑀫𑁆𑀫𑁄 𑀦𑀸𑀫 𑀫𑀳𑀸𑀬𑀓𑁆𑀔𑁄𑀢𑀺 𑀦𑀸𑀫𑁂𑀦 𑀥𑀫𑁆𑀫𑁄 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄 𑀤𑁂𑀯𑀧𑀼𑀢𑁆𑀢𑁄. 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀩𑁆𑀩𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑀓𑁄.

𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀥𑀫𑁆𑀫𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 ¶ 𑀤𑀺𑀩𑁆𑀩𑀭𑀣𑀫𑀪𑀺𑀭𑀼𑀬𑁆𑀳 𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂𑀲𑀼 𑀲𑀼𑀔𑀓𑀣𑀸𑀬 ¶ 𑀦𑀺𑀲𑀺𑀦𑁆𑀦𑁂𑀲𑀼 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀯𑀺𑀭𑀫𑀺𑀢𑁆𑀯𑀸 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑀁 𑀧𑀽𑀭𑁂𑀣, 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀪𑀯𑀣, 𑀲𑀕𑁆𑀕𑀧𑀭𑀸𑀬𑀦𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺𑀲𑁆𑀲𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁭.

‘‘𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂, 𑀲𑀫𑀸𑀤𑀧𑁂𑀦𑁆𑀢𑁄 𑀫𑀳𑀸𑀚𑀦𑀁;

𑀘𑀭𑀸𑀫𑀺 𑀕𑀸𑀫𑀦𑀺𑀕𑀫𑀁, 𑀲𑀫𑀺𑀢𑁆𑀢𑁄 𑀲𑀧𑀭𑀺𑀚𑁆𑀚𑀦𑁄’’𑀢𑀺.

𑀢𑀢𑁆𑀣 𑀲𑀫𑀺𑀢𑁆𑀢𑁄𑀢𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀯𑀸𑀤𑀻𑀳𑀺 𑀲𑀳𑀸𑀬𑁂𑀳𑀺 𑀲𑀲𑀳𑀸𑀬𑁄.

𑀢𑁂𑀦 ¶ 𑀘 𑀲𑀫𑀬𑁂𑀦 𑀅𑀥𑀫𑁆𑀫𑁄 𑀦𑀸𑀫𑁂𑀓𑁄 𑀤𑁂𑀯𑀧𑀼𑀢𑁆𑀢𑁄 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. ‘‘𑀲𑁄 𑀧𑀸𑀡𑀁 𑀳𑀦𑀣, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀢𑁆𑀢𑁂 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀦𑁆𑀢𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀚𑀫𑁆𑀩𑀼𑀤𑀻𑀧𑀁 𑀯𑀸𑀫𑀁 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁮.

‘‘𑀧𑀸𑀧𑁄 𑀓𑀤𑀭𑀺𑀬𑁄 𑀬𑀓𑁆𑀔𑁄, 𑀤𑀻𑀧𑁂𑀦𑁆𑀢𑁄 𑀤𑀲 𑀧𑀸𑀧𑀓𑁂;

𑀲𑁄𑀧𑁂𑀢𑁆𑀣 𑀫𑀳𑀺𑀬𑀸 𑀘𑀭𑀢𑀺, 𑀲𑀫𑀺𑀢𑁆𑀢𑁄 𑀲𑀧𑀭𑀺𑀚𑁆𑀚𑀦𑁄’’𑀢𑀺.

𑀢𑀢𑁆𑀣 𑀧𑀸𑀧𑁄𑀢𑀺 𑀧𑀸𑀧𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀓𑀤𑀭𑀺𑀬𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀻. 𑀬𑀓𑁆𑀔𑁄𑀢𑀺 𑀤𑁂𑀯𑀧𑀼𑀢𑁆𑀢𑁄. 𑀤𑀻𑀧𑁂𑀦𑁆𑀢𑁄 𑀤𑀲 𑀧𑀸𑀧𑀓𑁂𑀢𑀺 𑀲𑀩𑁆𑀩𑀮𑁄𑀓𑁂 𑀕𑁄𑀘𑀭𑀁 𑀦𑀸𑀫 𑀲𑀢𑁆𑀢𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀬 𑀚𑀸𑀢𑀁. 𑀢𑀲𑁆𑀫𑀸 𑀲𑀢𑁆𑀢𑁂 𑀯𑀥𑀺𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀘 𑀅𑀢𑁆𑀢𑀸 𑀧𑀻𑀡𑁂𑀢𑀩𑁆𑀩𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀦𑁆𑀢𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑁂 𑀤𑀲 𑀮𑀸𑀫𑀓𑀥𑀫𑁆𑀫𑁂 𑀓𑀢𑁆𑀢𑀩𑁆𑀩𑁂 𑀓𑀢𑁆𑀯𑀸 𑀧𑀓𑀸𑀲𑁂𑀦𑁆𑀢𑁄. 𑀲𑁄𑀧𑁂𑀢𑁆𑀣𑀸𑀢𑀺 𑀲𑁄𑀧𑀺 𑀅𑀥𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂. 𑀫𑀳𑀺𑀬𑀸𑀢𑀺 𑀪𑀽𑀫𑀺𑀬𑀸 𑀆𑀲𑀦𑁆𑀦𑁂, 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑁂𑀢𑀺 𑀅𑀢𑁆𑀣𑁄.

𑁬𑁯. 𑀢𑀢𑁆𑀣 𑀬𑁂 𑀲𑀢𑁆𑀢𑀸 𑀲𑀸𑀥𑀼𑀓𑀫𑁆𑀫𑀺𑀓𑀸 𑀥𑀫𑁆𑀫𑀕𑀭𑀼𑀦𑁄, 𑀢𑁂 𑀥𑀫𑁆𑀫𑀁 𑀤𑁂𑀯𑀧𑀼𑀢𑁆𑀢𑀁 𑀢𑀣𑀸 𑀆𑀕𑀘𑁆𑀙𑀦𑁆𑀢𑀫𑁂𑀯 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀸 𑀬𑀸𑀯 𑀘𑀓𑁆𑀔𑀼𑀧𑀣𑀲𑀫𑀢𑀺𑀓𑁆𑀓𑀫𑀦𑀸 𑀢𑀸𑀯 𑀅𑀪𑀺𑀢𑁆𑀣𑀯𑀦𑁆𑀢𑀺 ¶ , 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀲𑀓𑁆𑀓𑀘𑁆𑀘𑀁 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺. 𑀬𑁂 𑀧𑀦 𑀲𑀢𑁆𑀢𑀸 𑀧𑀸𑀧𑀲𑀫𑀸𑀘𑀸𑀭𑀸 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀢𑁂 𑀅𑀥𑀫𑁆𑀫𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑀺 ¶ , 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀸𑀧𑀸𑀦𑀺 𑀲𑀫𑀸𑀘𑀭𑀦𑁆𑀢𑀺. 𑀏𑀯𑀁 𑀢𑁂 𑀢𑀤𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸 𑀘𑁂𑀯 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀓𑀺𑀭𑀺𑀬𑀸 𑀘 𑀳𑀼𑀢𑁆𑀯𑀸 𑀮𑁄𑀓𑁂 𑀯𑀺𑀘𑀭𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀥𑀫𑁆𑀫𑀯𑀸𑀤𑀻 𑀅𑀥𑀫𑁆𑀫𑁄 𑀘, 𑀉𑀪𑁄 𑀧𑀘𑁆𑀘𑀦𑀺𑀓𑀸 𑀫𑀬’’𑀦𑁆𑀢𑀺.

𑀏𑀯𑀁 𑀧𑀦 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀅𑀣𑁂𑀓𑀤𑀺𑀯𑀲𑀁 𑀢𑁂𑀲𑀁 𑀭𑀣𑀸 𑀆𑀓𑀸𑀲𑁂 𑀲𑀫𑁆𑀫𑀼𑀔𑀸 𑀅𑀳𑁂𑀲𑀼𑀁. 𑀅𑀣 𑀦𑁂𑀲𑀁 𑀧𑀭𑀺𑀲𑀸 ‘‘𑀢𑀼𑀫𑁆𑀳𑁂 𑀓𑀲𑁆𑀲, 𑀢𑀼𑀫𑁆𑀳𑁂 𑀓𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀬𑀁 𑀥𑀫𑁆𑀫𑀲𑁆𑀲, 𑀫𑀬𑀁 𑀅𑀥𑀫𑁆𑀫𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀤𑁆𑀯𑀺𑀥𑀸 𑀚𑀸𑀢𑀸. 𑀥𑀫𑁆𑀫𑀲𑁆𑀲 𑀧𑀦 𑀅𑀥𑀫𑁆𑀫𑀲𑁆𑀲 𑀘 𑀭𑀣𑀸 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀈𑀲𑀸𑀬 𑀈𑀲𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼. ‘‘𑀢𑀯 𑀭𑀣𑀁 𑀑𑀓𑁆𑀓𑀫𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀫𑀕𑁆𑀕𑀁 𑀤𑁂𑀳𑀺, 𑀢𑀯 𑀭𑀣𑀁 𑀑𑀓𑁆𑀓𑀫𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀫𑀕𑁆𑀕𑀁 𑀤𑁂𑀳𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀫𑀕𑁆𑀕𑀤𑀸𑀧𑀦𑀢𑁆𑀣𑀁 𑀯𑀺𑀯𑀸𑀤𑀁 𑀅𑀓𑀁𑀲𑀼. 𑀧𑀭𑀺𑀲𑀸 ¶ 𑀘 𑀦𑁂𑀲𑀁 𑀆𑀯𑀼𑀥𑀸𑀦𑀺 𑀅𑀪𑀺𑀳𑀭𑀺𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑀸 𑀅𑀳𑁂𑀲𑀼𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀥𑀼𑀭𑁂 𑀥𑀼𑀭𑀁 𑀖𑀝𑁆𑀝𑀬𑀦𑁆𑀢𑀸, 𑀲𑀫𑀺𑀫𑁆𑀳𑀸 𑀧𑀝𑀺𑀧𑀣𑁂 𑀉𑀪𑁄’’.

𑁭𑁦.

‘‘𑀓𑀮𑀳𑁄 𑀯𑀢𑁆𑀢𑀢𑀻 𑀪𑁂𑀲𑁆𑀫𑀸, 𑀓𑀮𑁆𑀬𑀸𑀡𑀧𑀸𑀧𑀓𑀲𑁆𑀲 𑀘;

𑀫𑀕𑁆𑀕𑀸 𑀑𑀓𑁆𑀓𑀫𑀦𑀢𑁆𑀣𑀸𑀬, 𑀫𑀳𑀸𑀬𑀼𑀤𑁆𑀥𑁄 𑀉𑀧𑀝𑁆𑀞𑀺𑀢𑁄’’𑀢𑀺.

𑀢𑀢𑁆𑀣 𑀥𑀼𑀭𑁂 𑀥𑀼𑀭𑀦𑁆𑀢𑀺 𑀏𑀓𑀲𑁆𑀲 𑀭𑀣𑀻𑀲𑀸𑀬 𑀇𑀢𑀭𑀲𑁆𑀲 𑀭𑀣𑀻𑀲𑀁 𑀖𑀝𑁆𑀝𑀬𑀦𑁆𑀢𑀸. 𑀲𑀫𑀺𑀫𑁆𑀳𑀸𑀢𑀺 𑀲𑀫𑀸𑀕𑀢𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀧𑀼𑀦 𑀉𑀪𑁄𑀢𑀺 𑀯𑀘𑀦𑀁 𑀉𑀪𑁄𑀧𑀺 𑀫𑀬𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀦𑀻𑀓𑀸 𑀳𑀼𑀢𑁆𑀯𑀸 𑀮𑁄𑀓𑁂 𑀯𑀺𑀘𑀭𑀦𑁆𑀢𑀸 𑀏𑀓𑀤𑀺𑀯𑀲𑀁 𑀧𑀝𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑀸 𑀤𑁆𑀯𑀻𑀲𑀼 𑀧𑀭𑀺𑀲𑀸𑀲𑀼 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀫𑀕𑁆𑀕𑀢𑁄 𑀑𑀓𑁆𑀓𑀦𑁆𑀢𑀸𑀲𑀼 𑀲𑀳 𑀭𑀣𑁂𑀦 𑀫𑀬𑀁 𑀉𑀪𑁄 𑀏𑀯 𑀲𑀫𑀸𑀕𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑁂𑀲𑁆𑀫𑀸𑀢𑀺 𑀪𑀬𑀚𑀦𑀓𑁄. 𑀓𑀮𑁆𑀬𑀸𑀡𑀧𑀸𑀧𑀓𑀲𑁆𑀲 𑀘𑀸𑀢𑀺 𑀓𑀮𑁆𑀬𑀸𑀡𑀲𑁆𑀲 𑀘 𑀧𑀸𑀧𑀓𑀲𑁆𑀲 𑀘. 𑀫𑀳𑀸𑀬𑀼𑀤𑁆𑀥𑁄 𑀉𑀧𑀝𑁆𑀞𑀺𑀢𑁄𑀢𑀺 𑀫𑀳𑀸𑀲𑀗𑁆𑀕𑀸𑀫𑁄 ¶ 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀆𑀲𑀺.

𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺 𑀧𑀭𑀺𑀲𑀸𑀬 𑀘 𑀬𑀼𑀚𑁆𑀛𑀺𑀢𑀼𑀓𑀸𑀫𑀢𑀸 𑀚𑀸𑀢𑀸. 𑀢𑀢𑁆𑀣 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑀁 𑀆𑀳 𑁋 ‘‘𑀲𑀫𑁆𑀫, 𑀢𑁆𑀯𑀁 𑀅𑀥𑀫𑁆𑀫𑁄, 𑀅𑀳𑀁 𑀥𑀫𑁆𑀫𑁄, 𑀫𑀕𑁆𑀕𑁄 𑀫𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑁄, 𑀢𑀯 𑀭𑀣𑀁 𑀑𑀓𑁆𑀓𑀫𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀫𑀕𑁆𑀕𑀁 𑀤𑁂𑀳𑀻’’𑀢𑀺. 𑀇𑀢𑀭𑁄 ‘‘𑀅𑀳𑀁 𑀤𑀴𑁆𑀳𑀬𑀸𑀦𑁄 𑀩𑀮𑀯𑀸 𑀅𑀲𑀦𑁆𑀢𑀸𑀲𑀻, 𑀢𑀲𑁆𑀫𑀸 𑀫𑀕𑁆𑀕𑀁 𑀦 𑀤𑁂𑀫𑀺, 𑀬𑀼𑀤𑁆𑀥𑀁 𑀧𑀦 𑀓𑀭𑀺𑀲𑁆𑀲𑀸𑀫𑀺, 𑀬𑁄 𑀬𑀼𑀤𑁆𑀥𑁂 𑀚𑀺𑀦𑀺𑀲𑁆𑀲𑀢𑀺, 𑀢𑀲𑁆𑀲 𑀫𑀕𑁆𑀕𑁄 𑀳𑁄𑀢𑀽’’𑀢𑀺 𑀆𑀳. 𑀢𑁂𑀦𑁂𑀯𑀸𑀳 𑁋

‘‘𑀬𑀲𑁄𑀓𑀭𑁄 ¶ 𑀧𑀼𑀜𑁆𑀜𑀓𑀭𑁄𑀳𑀫𑀲𑁆𑀫𑀺, 𑀲𑀤𑀸𑀢𑁆𑀣𑀼𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀫𑀕𑁆𑀕𑀸𑀭𑀳𑁄 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄, 𑀥𑀫𑁆𑀫𑁄 𑀅𑀳𑀁 𑀤𑁂𑀳𑀺 𑀅𑀥𑀫𑁆𑀫 𑀫𑀕𑁆𑀕𑀁.

‘‘𑀅𑀥𑀫𑁆𑀫𑀬𑀸𑀦𑀁 𑀤𑀴𑁆𑀳𑀫𑀸𑀭𑀼𑀳𑀺𑀢𑁆𑀯𑀸, 𑀅𑀲𑀦𑁆𑀢𑀲𑀦𑁆𑀢𑁄 𑀩𑀮𑀯𑀸𑀳𑀫𑀲𑁆𑀫𑀺;

𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀁, 𑀫𑀕𑁆𑀕𑀁 𑀅𑀳𑀁 𑀥𑀫𑁆𑀫 𑀅𑀤𑀺𑀦𑁆𑀦𑀧𑀼𑀩𑁆𑀩𑀁.

‘‘𑀥𑀫𑁆𑀫𑁄 ¶ 𑀳𑀯𑁂 𑀧𑀸𑀢𑀼𑀭𑀳𑁄𑀲𑀺 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀅𑀥𑀫𑁆𑀫𑁄 𑀉𑀤𑀧𑀸𑀤𑀺 𑀮𑁄𑀓𑁂;

𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀲𑀦𑀦𑁆𑀢𑀦𑁄 𑀘, 𑀉𑀬𑁆𑀬𑀸𑀳𑀺 𑀚𑁂𑀝𑁆𑀞𑀲𑁆𑀲 𑀓𑀦𑀺𑀝𑁆𑀞 𑀫𑀕𑁆𑀕𑀸.

‘‘𑀦 𑀬𑀸𑀘𑀦𑀸𑀬 𑀦𑀧𑀺 𑀧𑀸𑀢𑀺𑀭𑀽𑀧𑀸, 𑀦 𑀅𑀭𑀳𑀢𑀸 𑀢𑁂𑀳𑀁 𑀤𑀤𑁂𑀬𑁆𑀬 𑀫𑀕𑁆𑀕𑀁;

𑀬𑀼𑀤𑁆𑀥𑀜𑁆𑀘 𑀦𑁄 𑀳𑁄𑀢𑀼 𑀉𑀪𑀺𑀦𑁆𑀦𑀫𑀚𑁆𑀚, 𑀬𑀼𑀤𑁆𑀥𑀫𑁆𑀳𑀺 𑀬𑁄 𑀚𑁂𑀲𑁆𑀲𑀢𑀺 𑀢𑀲𑁆𑀲 𑀫𑀕𑁆𑀕𑁄.

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀲𑀝𑁄𑀳𑀫𑀲𑁆𑀫𑀺, 𑀫𑀳𑀩𑁆𑀩𑀮𑁄 𑀅𑀫𑀺𑀢𑀬𑀲𑁄 𑀅𑀢𑀼𑀮𑁆𑀬𑁄;

𑀕𑀼𑀡𑁂𑀳𑀺 𑀲𑀩𑁆𑀩𑁂𑀳𑀺 𑀉𑀧𑁂𑀢𑀭𑀽𑀧𑁄, 𑀥𑀫𑁆𑀫𑁄 𑀅𑀥𑀫𑁆𑀫 𑀢𑁆𑀯𑀁 𑀓𑀣𑀁 𑀯𑀺𑀚𑁂𑀲𑁆𑀲𑀲𑀺.

‘‘𑀮𑁄𑀳𑁂𑀦 𑀯𑁂 𑀳𑀜𑁆𑀜𑀢𑀺 𑀚𑀸𑀢𑀭𑀽𑀧𑀁, 𑀦 𑀚𑀸𑀢𑀭𑀽𑀧𑁂𑀦 𑀳𑀦𑀦𑁆𑀢𑀺 𑀮𑁄𑀳𑀁;

𑀲𑀘𑁂 𑀅𑀥𑀫𑁆𑀫𑁄 𑀳𑀜𑁆𑀙𑀢𑀺 𑀥𑀫𑁆𑀫𑀫𑀚𑁆𑀚, 𑀅𑀬𑁄 𑀲𑀼𑀯𑀡𑁆𑀡𑀁 𑀯𑀺𑀬 𑀤𑀲𑁆𑀲𑀦𑁂𑀬𑁆𑀬𑀁.

‘‘𑀲𑀘𑁂 ¶ 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫, 𑀦 𑀢𑀼𑀬𑁆𑀳𑀁 𑀯𑀼𑀟𑁆𑀠𑀸 𑀘 𑀕𑀭𑀽 𑀘 𑀅𑀢𑁆𑀣𑀺;

𑀫𑀕𑁆𑀕𑀜𑁆𑀘 𑀢𑁂 𑀤𑀫𑁆𑀫𑀺 𑀧𑀺𑀬𑀸𑀧𑁆𑀧𑀺𑀬𑁂𑀦, 𑀯𑀸𑀘𑀸 𑀤𑀼𑀭𑀼𑀢𑁆𑀢𑀸𑀦𑀺𑀧𑀺 𑀢𑁂 𑀔𑀫𑀸𑀫𑀻’’𑀢𑀺. (𑀚𑀸. 𑁧.𑁧𑁧.𑁨𑁬-𑁩𑁨);

𑀇𑀫𑀸 𑀳𑀺 𑀢𑁂𑀲𑀁 𑀯𑀘𑀦𑀧𑀝𑀺𑀯𑀘𑀦𑀓𑀣𑀸.

𑀢𑀢𑁆𑀣 𑀬𑀲𑁄𑀓𑀭𑁄𑀢𑀺 𑀥𑀫𑁆𑀫𑁂 𑀦𑀺𑀬𑁄𑀚𑀦𑀯𑀲𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀬𑀲𑀤𑀸𑀬𑀓𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀤𑀸𑀢𑁆𑀣𑀼𑀢𑁄𑀢𑀺 𑀲𑀤𑀸 𑀣𑀼𑀢𑁄 𑀦𑀺𑀘𑁆𑀘𑀧𑁆𑀧𑀲𑀢𑁆𑀣𑁄. 𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀦𑁆𑀢𑀺 𑀲𑁄𑀫𑁆𑀳𑀺 𑀅𑀳𑀁 𑀅𑀥𑀫𑁆𑀫𑁄 𑀅𑀥𑀫𑁆𑀫𑀬𑀸𑀦𑀭𑀣𑀁 𑀅𑀪𑀺𑀭𑀼𑀴𑁆𑀳𑁄 𑀅𑀪𑀻𑀢𑁄 𑀩𑀮𑀯𑀸, 𑀓𑀺𑀁𑀓𑀸𑀭𑀡𑀸 𑀅𑀚𑁆𑀚, 𑀪𑁄 𑀥𑀫𑁆𑀫, 𑀓𑀲𑁆𑀲𑀘𑀺 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀫𑀕𑁆𑀕𑀁 𑀢𑀼𑀬𑁆𑀳𑀁 𑀤𑀫𑁆𑀫𑀺. 𑀧𑀸𑀢𑀼𑀭𑀳𑁄𑀲𑀻𑀢𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄 𑀧𑀼𑀩𑁆𑀩𑁂 𑀧𑀸𑀢𑀼𑀭𑀳𑁄𑀲𑀺, 𑀧𑀘𑁆𑀙𑀸 𑀅𑀥𑀫𑁆𑀫𑁄. 𑀚𑁂𑀝𑁆𑀞𑁄 𑀘𑀸𑀢𑀺 𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁂𑀦 𑀅𑀳𑀁 𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀧𑁄𑀭𑀸𑀡𑀓𑁄 𑀘, 𑀢𑁆𑀯𑀁 𑀧𑀦 𑀓𑀦𑀺𑀝𑁆𑀞𑁄, 𑀢𑀲𑁆𑀫𑀸 ‘‘𑀫𑀕𑁆𑀕𑀸 𑀉𑀬𑁆𑀬𑀸𑀳𑀻’’𑀢𑀺 𑀯𑀤𑀢𑀺.

𑀦𑀧𑀺 ¶ ¶ 𑀧𑀸𑀢𑀺𑀭𑀽𑀧𑀸𑀢𑀺 𑀅𑀳𑀜𑁆𑀳𑀺 𑀪𑁄𑀢𑁄 𑀦𑁂𑀯 𑀬𑀸𑀘𑀦𑀸𑀬 𑀦 𑀧𑀝𑀺𑀭𑀽𑀧𑀯𑀘𑀦𑁂𑀦 𑀦 𑀫𑀕𑁆𑀕𑀸𑀭𑀳𑀢𑀸𑀬 𑀫𑀕𑁆𑀕𑀁 𑀤𑀤𑁂𑀬𑁆𑀬𑀁. 𑀅𑀦𑀼𑀯𑀺𑀲𑀝𑁄𑀢𑀺 𑀅𑀳𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀢𑁆𑀢𑀦𑁄 𑀕𑀼𑀡𑁂𑀦 𑀧𑀢𑁆𑀣𑀝𑁄 𑀧𑀜𑁆𑀜𑀸𑀢𑁄. 𑀮𑁄𑀳𑁂𑀦𑀸𑀢𑀺 𑀅𑀬𑁄𑀫𑀼𑀝𑁆𑀞𑀺𑀓𑁂𑀦. 𑀳𑀜𑁆𑀙𑀢𑀻𑀢𑀺 𑀳𑀦𑀺𑀲𑁆𑀲𑀢𑀺. 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫𑀸𑀢𑀺 𑀲𑀘𑁂 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀲𑀺 𑀅𑀥𑀫𑁆𑀫. 𑀯𑀼𑀟𑁆𑀠𑀸 𑀘 𑀕𑀭𑀽 𑀘𑀸𑀢𑀺 𑀬𑀤𑀺 𑀢𑀼𑀬𑁆𑀳𑀁 𑀇𑀫𑁂 𑀯𑀼𑀟𑁆𑀠𑀸 𑀇𑀫𑁂 𑀕𑀭𑀽 𑀧𑀡𑁆𑀟𑀺𑀢𑀸𑀢𑀺 𑀏𑀢𑀁 𑀦𑀢𑁆𑀣𑀺. 𑀧𑀺𑀬𑀸𑀧𑁆𑀧𑀺𑀬𑁂𑀦𑀸𑀢𑀺 𑀧𑀺𑀬𑁂𑀦 𑀯𑀺𑀬 𑀅𑀧𑁆𑀧𑀺𑀬𑁂𑀦, 𑀅𑀧𑁆𑀧𑀺𑀬𑁂𑀦𑀧𑀺 𑀤𑀤𑀦𑁆𑀢𑁄 (𑀚𑀸. 𑀅𑀝𑁆𑀞. 𑁪.𑁧𑁧.𑁩𑁨) 𑀧𑀺𑀬𑁂𑀦 𑀯𑀺𑀬 𑀢𑁂 𑀫𑀕𑁆𑀕𑀁 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁭𑁧. 𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀫𑀁 𑀧𑀸𑀧𑀧𑀼𑀕𑁆𑀕𑀮𑀁 𑀲𑀩𑁆𑀩𑀮𑁄𑀓𑀲𑁆𑀲 𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀏𑀯𑀁 𑀫𑀬𑀸 𑀯𑀺𑀮𑁄𑀫𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 ‘𑀅𑀦𑀸𑀘𑀸𑀭 𑀫𑀸 𑀇𑀥 𑀢𑀺𑀝𑁆𑀞, 𑀲𑀻𑀖𑀁 𑀧𑀝𑀺𑀓𑁆𑀓𑀫 𑀯𑀺𑀦𑀲𑁆𑀲𑀸’𑀢𑀺 𑀯𑀤𑁂𑀬𑁆𑀬𑀁, 𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀫𑀫 𑀥𑀫𑁆𑀫𑀢𑁂𑀚𑁂𑀦 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀓𑀺𑀭𑁂𑀬𑁆𑀬, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀲𑁆𑀯𑀸𑀳𑀁 𑀲𑀩𑁆𑀩𑀮𑁄𑀓𑀁 ¶ 𑀅𑀦𑀼𑀓𑀫𑁆𑀧𑀦𑁆𑀢𑁄 ‘𑀮𑁄𑀓𑀢𑁆𑀣𑀘𑀭𑀺𑀬𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’𑀢𑀺 𑀧𑀝𑀺𑀧𑀚𑁆𑀚𑀸𑀫𑀺, 𑀅𑀬𑀁 𑀔𑁄 𑀧𑀦 𑀧𑀸𑀧𑁄 𑀆𑀬𑀢𑀺𑀁 𑀫𑀳𑀸𑀤𑀼𑀓𑁆𑀔𑀪𑀸𑀕𑀻, 𑀲𑁆𑀯𑀸𑀬𑀁 𑀫𑀬𑀸 𑀯𑀺𑀲𑁂𑀲𑀢𑁄 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑁄, 𑀢𑀲𑁆𑀫𑀸𑀲𑁆𑀲 𑀫𑀕𑁆𑀕𑀁 𑀤𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀲𑀻𑀮𑀁 𑀲𑀼𑀯𑀺𑀲𑀼𑀤𑁆𑀥𑀁 𑀅𑀔𑀡𑁆𑀟𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂 ‘‘𑀲𑀘𑁂 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀣𑁄𑀓𑀁 𑀫𑀕𑁆𑀕𑀢𑁄 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀏𑀯 𑀅𑀥𑀫𑁆𑀫𑁄 𑀭𑀣𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀁𑀲𑀺𑀭𑁄 𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀏𑀯 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀤𑀺𑀳𑀁 𑀢𑀲𑁆𑀲 𑀓𑀼𑀧𑁆𑀧𑁂𑀬𑁆𑀬’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀬𑀤𑀺𑀳𑀁 𑀢𑀲𑁆𑀲 𑀓𑀼𑀧𑁆𑀧𑁂𑀬𑁆𑀬𑀦𑁆𑀢𑀺 𑀢𑀲𑁆𑀲 𑀅𑀥𑀫𑁆𑀫𑀲𑁆𑀲 𑀬𑀤𑀺 𑀅𑀳𑀁 𑀓𑀼𑀚𑁆𑀛𑁂𑀬𑁆𑀬𑀁. 𑀬𑀤𑀺 𑀪𑀺𑀦𑁆𑀤𑁂 𑀢𑀧𑁄𑀕𑀼𑀡𑀦𑁆𑀢𑀺 𑀢𑁂𑀦𑁂𑀯𑀲𑁆𑀲 𑀓𑀼𑀚𑁆𑀛𑀦𑁂𑀦 𑀫𑀬𑁆𑀳𑀁 𑀢𑀧𑁄𑀕𑀼𑀡𑀁 𑀲𑀻𑀮𑀲𑀁𑀯𑀭𑀁 𑀬𑀤𑀺 𑀯𑀺𑀦𑀸𑀲𑁂𑀬𑁆𑀬𑀁. 𑀲𑀳𑀧𑀭𑀺𑀚𑀦𑀁 𑀢𑀲𑁆𑀲𑀸𑀢𑀺 𑀲𑀧𑀭𑀺𑀚𑀦𑀁 𑀢𑀁 𑀅𑀥𑀫𑁆𑀫𑀁. 𑀭𑀚𑀪𑀽𑀢𑀦𑁆𑀢𑀺 𑀭𑀚𑀫𑀺𑀯 𑀪𑀽𑀢𑀁, 𑀭𑀚𑀪𑀸𑀯𑀁 𑀧𑀢𑁆𑀢𑀁 𑀅𑀳𑀁 𑀓𑀭𑁂𑀬𑁆𑀬𑀁.

𑁭𑁨. 𑀅𑀧𑀺𑀘𑀸𑀳𑀦𑁆𑀢𑀺 𑀏𑀢𑁆𑀣 𑀅𑀳𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀻𑀮𑀭𑀓𑁆𑀔𑀸𑀬𑀸𑀢𑀺 𑀲𑀻𑀮𑀭𑀓𑁆𑀔𑀡𑀢𑁆𑀣𑀁. 𑀦𑀺𑀩𑁆𑀩𑀸𑀧𑁂𑀢𑁆𑀯𑀸𑀦𑀸𑀢𑀺 𑀧𑀝𑀺𑀓𑀘𑁆𑀘𑁂𑀯 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑁆𑀲 𑀉𑀧𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑀲𑁆𑀫𑀺𑀁 𑀅𑀥𑀫𑁆𑀫𑁂 𑀉𑀧𑁆𑀧𑀚𑁆𑀚𑀦𑀓𑀓𑁄𑀥𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑁂𑀦𑁂𑀯 𑀤𑁄𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑁂𑀦 𑀫𑀸𑀦𑀲𑀁 𑀯𑀽𑀧𑀲𑀫𑁂𑀢𑁆𑀯𑀸. 𑀲𑀳 𑀚𑀦𑁂𑀦𑁄𑀓𑁆𑀓𑀫𑀺𑀢𑁆𑀯𑀸𑀢𑀺 𑀫𑀬𑁆𑀳𑀁 𑀧𑀭𑀺𑀚𑀦𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀧𑀸𑀧𑀲𑁆𑀲 𑀅𑀥𑀫𑁆𑀫𑀲𑁆𑀲 𑀅𑀳𑀁 𑀫𑀕𑁆𑀕𑀁 𑀅𑀤𑀸𑀲𑀺𑀁.

𑁭𑁩. 𑀲𑀳 ¶ 𑀧𑀣𑀢𑁄 𑀑𑀓𑁆𑀓𑀦𑁆𑀢𑁂𑀢𑀺 𑀯𑀼𑀢𑁆𑀢𑀦𑀬𑁂𑀦 𑀘𑀺𑀢𑁆𑀢𑀲𑁆𑀲 𑀯𑀽𑀧𑀲𑀫𑀁 𑀓𑀢𑁆𑀯𑀸 ‘‘𑀫𑀕𑁆𑀕𑀁 𑀢𑁂 𑀤𑀫𑁆𑀫𑀻’’𑀢𑀺 𑀘 𑀯𑀢𑁆𑀯𑀸 𑀣𑁄𑀓𑀁 𑀫𑀕𑁆𑀕𑀢𑁄 𑀲𑀳 𑀑𑀓𑁆𑀓𑀫𑀦𑁂𑀦. 𑀧𑀸𑀧𑀬𑀓𑁆𑀔𑀲𑁆𑀲𑀸𑀢𑀺 𑀅𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀲𑁆𑀲. 𑀢𑀸𑀯𑀤𑁂𑀢𑀺 𑀢𑀗𑁆𑀔𑀡𑀁 ¶ 𑀏𑀯 𑀫𑀳𑀸𑀧𑀣𑀯𑀻 𑀯𑀺𑀯𑀭𑀫𑀤𑀸𑀲𑀺. 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀕𑁆𑀕𑀜𑁆𑀘 𑀢𑁂 𑀤𑀫𑁆𑀫𑀻’’𑀢𑀺 𑀕𑀸𑀣𑀸𑀬 𑀓𑀣𑀺𑀢𑀓𑁆𑀔𑀡𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀢𑀲𑁆𑀫𑀺𑀁 𑀪𑀽𑀫𑀺𑀬𑀁 𑀧𑀢𑀺𑀢𑁂 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀲𑀓𑀮𑀁 𑀯𑀭𑀸𑀯𑀭𑀁 𑀥𑀸𑀭𑁂𑀦𑁆𑀢𑀻𑀧𑀺 𑀫𑀳𑀸𑀧𑀣𑀯𑀻 ‘‘𑀦𑀸𑀳𑀫𑀺𑀫𑀁 𑀧𑀸𑀧𑀧𑀼𑀭𑀺𑀲𑀁 𑀥𑀸𑀭𑁂𑀫𑀻’’𑀢𑀺 𑀓𑀣𑁂𑀦𑁆𑀢𑀻 𑀯𑀺𑀬 𑀢𑁂𑀦 𑀞𑀺𑀢𑀝𑁆𑀞𑀸𑀦𑁂 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀢𑀲𑁆𑀫𑀺𑀁 𑀦𑀺𑀧𑀢𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁂 𑀭𑀣𑀥𑀼𑀭𑁂 𑀬𑀣𑀸𑀞𑀺𑀢𑁄𑀯 𑀲𑀧𑀭𑀺𑀚𑀦𑁄 𑀫𑀳𑀢𑀸 𑀤𑁂𑀯𑀸𑀦𑀼𑀪𑀸𑀯𑁂𑀦 𑀕𑀫𑀦𑀫𑀕𑁆𑀕𑁂𑀦𑁂𑀯 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀸𑀯𑀺𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀔𑀦𑁆𑀢𑀻𑀩𑀮𑁄 ¶ 𑀬𑀼𑀤𑁆𑀥𑀩𑀮𑀁 𑀯𑀺𑀚𑁂𑀢𑁆𑀯𑀸, 𑀳𑀦𑁆𑀢𑁆𑀯𑀸 𑀅𑀥𑀫𑁆𑀫𑀁 𑀦𑀺𑀳𑀦𑀺𑀢𑁆𑀯 𑀪𑀽𑀫𑁆𑀬𑀸;

𑀧𑀸𑀬𑀸𑀲𑀺 𑀯𑀺𑀢𑁆𑀢𑁄 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦𑀁, 𑀫𑀕𑁆𑀕𑁂𑀦𑁂𑀯 𑀅𑀢𑀺𑀩𑀮𑁄 𑀲𑀘𑁆𑀘𑀦𑀺𑀓𑁆𑀓𑀫𑁄’’𑀢𑀺. (𑀚𑀸. 𑁧.𑁧𑁧.𑁩𑁪);

𑀢𑀤𑀸 𑀅𑀥𑀫𑁆𑀫𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀧𑀭𑀺𑀲𑀸 𑀤𑁂𑀯𑀤𑀢𑁆𑀢𑀧𑀭𑀺𑀲𑀸, 𑀥𑀫𑁆𑀫𑁄 𑀮𑁄𑀓𑀦𑀸𑀣𑁄, 𑀢𑀲𑁆𑀲 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸.

𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀇𑀥𑀸𑀧𑀺 𑀤𑀺𑀩𑁆𑀩𑁂𑀳𑀺 𑀆𑀬𑀼𑀯𑀡𑁆𑀡𑀬𑀲𑀲𑀼𑀔𑀆𑀥𑀺𑀧𑀢𑁂𑀬𑁆𑀬𑁂𑀳𑀺 𑀤𑀺𑀩𑁆𑀩𑁂𑀳𑁂𑀯 𑀉𑀴𑀸𑀭𑁂𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀲𑁆𑀲 𑀲𑀫𑀗𑁆𑀕𑀻𑀪𑀽𑀢𑀲𑁆𑀲 𑀅𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑀸𑀳𑀺 𑀅𑀘𑁆𑀙𑀭𑀸𑀳𑀺 𑀲𑀩𑁆𑀩𑀓𑀸𑀮𑀁 𑀧𑀭𑀺𑀘𑀸𑀭𑀺𑀬𑀫𑀸𑀦𑀲𑁆𑀲 𑀫𑀳𑀢𑀺 𑀧𑀫𑀸𑀤𑀝𑁆𑀞𑀸𑀦𑁂 𑀞𑀺𑀢𑀲𑁆𑀲 𑀲𑀢𑁄 𑀈𑀲𑀓𑀫𑁆𑀧𑀺 𑀧𑀫𑀸𑀤𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 ‘‘𑀮𑁄𑀓𑀢𑁆𑀣𑀘𑀭𑀺𑀬𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀲𑁂 𑀫𑀸𑀲𑁂 𑀧𑀼𑀡𑁆𑀡𑀫𑀺𑀬𑀁 𑀥𑀫𑁆𑀫𑀁 𑀤𑀻𑀧𑁂𑀦𑁆𑀢𑁄 𑀲𑀧𑀭𑀺𑀚𑀦𑁄 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀺𑀢𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀩𑁆𑀩𑀲𑀢𑁆𑀢𑁂 𑀅𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑁆𑀯𑀸 𑀥𑀫𑁆𑀫𑁂 𑀦𑀺𑀬𑁄𑀚𑀦𑀁, 𑀅𑀥𑀫𑁆𑀫𑁂𑀦 𑀲𑀫𑀸𑀕𑀢𑁄𑀧𑀺 𑀢𑁂𑀦 𑀓𑀢𑀁 𑀅𑀦𑀸𑀘𑀸𑀭𑀁 𑀅𑀕𑀡𑁂𑀢𑁆𑀯𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀓𑁄𑀧𑁂𑀢𑁆𑀯𑀸 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀫𑁂𑀯 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀅𑀔𑀡𑁆𑀟𑀁 𑀲𑀼𑀯𑀺𑀲𑀼𑀤𑁆𑀥𑀜𑁆𑀘 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀮𑀲𑁆𑀲 𑀭𑀓𑁆𑀔𑀡𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀮𑀻𑀦𑀲𑀢𑁆𑀢𑀼𑀘𑀭𑀺𑀬𑀸𑀯𑀡𑁆𑀡𑀦𑀸

𑁭𑁪. 𑀦𑀯𑀫𑁂 ¶ 𑀧𑀜𑁆𑀘𑀸𑀮𑀭𑀝𑁆𑀞𑁂𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀦𑀕𑀭𑀯𑀭𑁂, 𑀓𑀧𑀺𑀮𑀸𑀬𑀦𑁆𑀢𑀺 ‘‘𑀓𑀧𑀺𑀮𑀸’’𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑁂 ¶ 𑀉𑀢𑁆𑀢𑀫𑀦𑀕𑀭𑁂. ‘‘𑀦𑀕𑀭𑀯𑀭𑁂’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀧𑀼𑀭𑀼𑀢𑁆𑀢𑀫𑁂’’𑀢𑀺 𑀯𑀘𑀦𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑀦𑀕𑀭𑀸𑀦𑀁 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀕𑁆𑀕𑀦𑀕𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀚𑀬𑀤𑁆𑀤𑀺𑀲𑁄 𑀦𑀸𑀫𑀸𑀢𑀺 𑀭𑀜𑁆𑀜𑀸 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑁂 𑀚𑀺𑀢𑁂 𑀚𑀸𑀢𑁄, 𑀅𑀢𑁆𑀢𑀦𑁄 𑀯𑀸 𑀧𑀘𑁆𑀘𑀸𑀫𑀺𑀢𑁆𑀢𑀪𑀽𑀢𑀁 𑀬𑀓𑁆𑀔𑀺𑀦𑀻𑀲𑀗𑁆𑀔𑀸𑀢𑀁 𑀚𑀬𑀤𑁆𑀤𑀺𑀲𑀁 𑀚𑀺𑀢𑁄𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀲𑀻𑀮𑀕𑀼𑀡𑀫𑀼𑀧𑀸𑀕𑀢𑁄𑀢𑀺 𑀆𑀘𑀸𑀭𑀲𑀻𑀮𑀜𑁆𑀘𑁂𑀯 𑀉𑀲𑁆𑀲𑀸𑀳𑀲𑀫𑁆𑀧𑀢𑁆𑀢𑀺𑀬𑀸𑀤𑀺𑀭𑀸𑀚𑀕𑀼𑀡𑀜𑁆𑀘 ¶ 𑀉𑀧𑀸𑀕𑀢𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑁭𑁫. 𑀢𑀲𑁆𑀲 𑀭𑀜𑁆𑀜𑁄𑀢𑀺 𑀚𑀬𑀤𑁆𑀤𑀺𑀲𑀭𑀸𑀚𑀲𑁆𑀲, 𑀅𑀳𑀁 𑀧𑀼𑀢𑁆𑀢𑁄 𑀅𑀳𑁄𑀲𑀺𑀦𑁆𑀢𑀺 𑀯𑀘𑀦𑀲𑁂𑀲𑁄. 𑀲𑀼𑀢𑀥𑀫𑁆𑀫𑁄𑀢𑀺 𑀬𑀸𑀯𑀢𑀸 𑀭𑀸𑀚𑀧𑀼𑀢𑁆𑀢𑁂𑀦 𑀲𑁄𑀢𑀩𑁆𑀩𑀥𑀫𑁆𑀫𑁄 𑀦𑀸𑀫, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀼𑀢𑀢𑁆𑀢𑀸 𑀲𑀼𑀢𑀥𑀫𑁆𑀫𑁄, 𑀩𑀳𑀼𑀲𑁆𑀲𑀼𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀢𑀥𑀫𑁆𑀫𑁄𑀢𑀺 𑀯𑀺𑀲𑁆𑀲𑀼𑀢𑀥𑀫𑁆𑀫𑁄, 𑀥𑀫𑁆𑀫𑀘𑀭𑀺𑀬𑀸𑀬 𑀲𑀫𑀘𑀭𑀺𑀬𑀸𑀬 𑀧𑀓𑀸𑀲𑁄 𑀧𑀜𑁆𑀜𑀸𑀢𑁄, 𑀮𑁄𑀓𑁂 𑀧𑀢𑁆𑀣𑀝𑀓𑀺𑀢𑁆𑀢𑀺𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀅𑀮𑀻𑀦𑀲𑀢𑁆𑀢𑁄𑀢𑀺 𑀏𑀯𑀁𑀦𑀸𑀫𑁄. 𑀕𑀼𑀡𑀯𑀸𑀢𑀺 𑀉𑀴𑀸𑀭𑁂𑀳𑀺 𑀫𑀳𑀸𑀧𑀼𑀭𑀺𑀲𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀼𑀭𑀓𑁆𑀔𑀧𑀭𑀺𑀚𑀦𑁄 𑀲𑀤𑀸𑀢𑀺 𑀲𑀤𑁆𑀥𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀫𑁆𑀫𑀤𑁂𑀯 𑀲𑀗𑁆𑀕𑀳𑀡𑀢𑁄 𑀘 𑀲𑀩𑁆𑀩𑀓𑀸𑀮𑀁 𑀲𑀫𑁆𑀪𑀢𑁆𑀢𑀧𑀭𑀺𑀯𑀸𑀭𑀚𑀦𑁄.

𑁭𑁬. 𑀧𑀺𑀢𑀸 𑀫𑁂 𑀫𑀺𑀕𑀯𑀁 𑀕𑀦𑁆𑀢𑁆𑀯𑀸, 𑀧𑁄𑀭𑀺𑀲𑀸𑀤𑀁 𑀉𑀧𑀸𑀕𑀫𑀻𑀢𑀺 𑀫𑀬𑁆𑀳𑀁 𑀧𑀺𑀢𑀸 𑀚𑀬𑀤𑁆𑀤𑀺𑀲𑀭𑀸𑀚𑀸 𑀫𑀺𑀕𑀯𑀁 𑀘𑀭𑀦𑁆𑀢𑁄 𑀅𑀭𑀜𑁆𑀜𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀧𑁄𑀭𑀺𑀲𑀸𑀤𑀁 𑀫𑀦𑀼𑀲𑁆𑀲𑀔𑀸𑀤𑀓𑀁 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑀁 𑀉𑀧𑀕𑀜𑁆𑀙𑀺, 𑀢𑁂𑀦 𑀲𑀫𑀸𑀕𑀫𑀺.

𑀚𑀬𑀤𑁆𑀤𑀺𑀲𑀭𑀸𑀚𑀸 𑀓𑀺𑀭 𑀏𑀓𑀤𑀺𑀯𑀲𑀁 ‘‘𑀫𑀺𑀕𑀯𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀤𑀦𑀼𑀭𑀽𑀧𑁂𑀦 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀓𑀧𑀺𑀮𑀦𑀕𑀭𑀢𑁄 𑀦𑀺𑀓𑁆𑀔𑀫𑀺. 𑀢𑀁 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀫𑁂𑀯 𑀢𑀓𑁆𑀓𑀲𑀺𑀮𑀸𑀯𑀸𑀲𑀻 𑀦𑀦𑁆𑀤𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸 𑀦𑀸𑀫 𑀓𑀣𑁂𑀢𑀼𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀯𑀲𑀦𑀕𑁂𑀳𑀁 𑀧𑀭𑀺𑀩𑁆𑀩𑀬𑀜𑁆𑀘 𑀤𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 ‘‘𑀬𑀲𑁆𑀲 𑀧𑀲𑁆𑀲𑁂𑀦 𑀫𑀺𑀕𑁄 𑀧𑀮𑀸𑀬𑀢𑀺, 𑀢𑀲𑁆𑀲𑁂𑀯 𑀲𑁄 𑀕𑀻𑀯𑀸’’𑀢𑀺 𑀯𑀢𑁆𑀯𑀸 𑀫𑀺𑀕𑁂 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑁄 𑀧𑀲𑀤𑀫𑀺𑀕𑁄 𑀫𑀳𑀸𑀚𑀦𑀲𑁆𑀲 𑀧𑀤𑀲𑀤𑁆𑀤𑁂𑀦 𑀆𑀲𑀬𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 ¶ 𑀧𑀮𑀸𑀬𑀺. 𑀅𑀫𑀘𑁆𑀘𑀸 𑀧𑀭𑀺𑀳𑀸𑀲𑀁 𑀓𑀭𑀺𑀁𑀲𑀼. 𑀭𑀸𑀚𑀸 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀢𑀺𑀬𑁄𑀚𑀦𑀫𑀢𑁆𑀣𑀓𑁂 𑀢𑀁 𑀧𑀭𑀺𑀓𑁆𑀔𑀻𑀡𑀚𑀯𑀁 𑀞𑀺𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀧𑀢𑀺𑀢𑀁 𑀔𑀕𑁆𑀕𑁂𑀦 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀅𑀦𑀢𑁆𑀣𑀺𑀓𑁄𑀧𑀺 ‘‘𑀫𑀁𑀲𑁂𑀦 𑀫𑀺𑀕𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀘𑀦𑀫𑁄𑀘𑀦𑀢𑁆𑀣𑀁 𑀓𑀸𑀚𑁂 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀫𑀽𑀮𑁂 𑀤𑀩𑁆𑀩𑀢𑀺𑀡𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 ¶ 𑀕𑀦𑁆𑀢𑀼𑀁 𑀆𑀭𑀪𑀺.

𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀚𑁂𑀝𑁆𑀞𑀪𑀸𑀢𑀸 𑀚𑀸𑀢𑀤𑀺𑀯𑀲𑁂 𑀏𑀯 𑀏𑀓𑀸𑀬 𑀬𑀓𑁆𑀔𑀺𑀦𑀺𑀬𑀸 𑀔𑀸𑀤𑀺𑀢𑀼𑀁 𑀕𑀳𑀺𑀢𑁄 𑀆𑀭𑀓𑁆𑀔𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀩𑀤𑁆𑀥𑀸𑀬 𑀢𑀸𑀬 𑀦𑀺𑀤𑁆𑀥𑀫𑀦𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀺𑀬𑀸 𑀉𑀭𑁂 𑀞𑀧𑀺𑀢𑁄 𑀫𑀸𑀢𑀼𑀲𑀜𑁆𑀜𑀸𑀬 ¶ 𑀫𑀼𑀔𑁂𑀦 𑀣𑀦𑀕𑁆𑀕𑀳𑀡𑁂𑀦 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀬𑀫𑀸𑀦𑁄 𑀢𑀤𑀸𑀳𑀸𑀭𑁄𑀧𑀬𑁄𑀕𑀺𑀢𑀸𑀬 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀦𑁆𑀢𑀭𑀥𑀸𑀧𑀦𑀢𑁆𑀣𑀁 𑀬𑀓𑁆𑀔𑀺𑀦𑀺𑀬𑀸 𑀤𑀺𑀦𑁆𑀦𑀑𑀲𑀥𑀫𑀽𑀮𑀸𑀦𑀼𑀪𑀸𑀯𑁂𑀦 𑀅𑀦𑁆𑀢𑀭𑀳𑀺𑀢𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀚𑀻𑀯𑀦𑁆𑀢𑁄 𑀢𑀸𑀬 𑀬𑀓𑁆𑀔𑀺𑀦𑀺𑀬𑀸 𑀫𑀢𑀸𑀬 𑀢𑀁 𑀑𑀲𑀥𑀫𑀽𑀮𑀁 𑀅𑀢𑁆𑀢𑀦𑁄 𑀧𑀫𑀸𑀤𑁂𑀦 𑀦𑀸𑀲𑁂𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄𑀯 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀦𑁆𑀢𑁄 𑀦𑀕𑁆𑀕𑁄 𑀉𑀩𑁆𑀩𑀺𑀕𑁆𑀕𑀯𑀺𑀭𑀽𑀧𑀤𑀲𑁆𑀲𑀦𑁄 𑀭𑀸𑀚𑀧𑀼𑀭𑀺𑀲𑁂𑀳𑀺 𑀧𑀲𑁆𑀲𑀺𑀢𑁆𑀯𑀸 𑀅𑀦𑀼𑀩𑀤𑁆𑀥𑁄 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀫𑀽𑀮𑁂 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀪𑀓𑁆𑀔𑁄𑀲𑀺 𑀫𑁂’’𑀢𑀺 𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀫𑁂 𑀧𑀺𑀢𑀼𑀫𑀕𑁆𑀕𑀳𑁂𑀲𑀺, 𑀪𑀓𑁆𑀔𑁄𑀲𑀺 𑀫𑀫 𑀫𑀸 𑀘𑀮𑀻’’𑀢𑀺𑀆𑀤𑀺.

𑀢𑀢𑁆𑀣 𑀲𑁄 𑀫𑁂 𑀧𑀺𑀢𑀼𑀫𑀕𑁆𑀕𑀳𑁂𑀲𑀻𑀢𑀺 𑀲𑁄 𑀧𑁄𑀭𑀺𑀲𑀸𑀤𑁄 𑀫𑀫 𑀧𑀺𑀢𑀭𑀁 𑀚𑀬𑀤𑁆𑀤𑀺𑀲𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀭𑀼𑀓𑁆𑀔𑀲𑀫𑀻𑀧𑀫𑀸𑀕𑀢𑀁 ‘‘𑀫𑀫 𑀪𑀓𑁆𑀔𑁄 𑀢𑁆𑀯𑀁 𑀆𑀕𑀢𑁄𑀲𑀺, 𑀳𑀢𑁆𑀣𑀧𑀭𑀺𑀧𑁆𑀨𑀦𑁆𑀤𑀦𑀸𑀤𑀺𑀯𑀲𑁂𑀦 𑀫𑀸 𑀘𑀮𑀺, 𑀘𑀮𑀦𑁆𑀢𑀫𑁆𑀧𑀺 𑀅𑀳𑀁 𑀢𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀺.

𑁭𑁭. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑀲𑁆𑀲. 𑀢𑀲𑀺𑀢𑀯𑁂𑀥𑀺𑀢𑁄𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑁂𑀦 𑀢𑀲𑀺𑀢𑁄 𑀲𑀭𑀻𑀭𑀧𑀭𑀺𑀓𑀫𑁆𑀧𑁂𑀦 𑀯𑁂𑀥𑀺𑀢𑁄. 𑀊𑀭𑀼𑀓𑁆𑀔𑀫𑁆𑀪𑁄𑀢𑀺 𑀉𑀪𑀺𑀦𑁆𑀦𑀁 𑀊𑀭𑀽𑀦𑀁 𑀣𑀤𑁆𑀥𑀪𑀸𑀯𑁄, 𑀬𑁂𑀦 𑀲𑁄 𑀢𑀢𑁄 𑀧𑀮𑀸𑀬𑀺𑀢𑀼𑀁 𑀦𑀸𑀲𑀓𑁆𑀔𑀺.

𑀫𑀺𑀕𑀯𑀁 𑀕𑀳𑁂𑀢𑁆𑀯𑀸 𑀫𑀼𑀜𑁆𑀘𑀲𑁆𑀲𑀽𑀢𑀺 𑀏𑀢𑁆𑀣 𑀫𑀺𑀕𑀯𑀦𑁆𑀢𑀺 𑀫𑀺𑀕𑀯𑀯𑀲𑁂𑀦 𑀮𑀤𑁆𑀥𑀢𑁆𑀢𑀸 𑀢𑀁 𑀫𑀺𑀕𑀫𑀁𑀲𑀁 ‘‘𑀫𑀺𑀕𑀯’’𑀦𑁆𑀢𑀺 𑀆𑀳, 𑀇𑀫𑀁 𑀫𑀺𑀕𑀫𑀁𑀲𑀁 𑀕𑀳𑁂𑀢𑁆𑀯𑀸 𑀫𑀁 𑀫𑀼𑀜𑁆𑀘𑀲𑁆𑀲𑀽𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀭𑀸𑀚𑀸 𑀦𑀁 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀊𑀭𑀼𑀓𑁆𑀔𑀫𑁆𑀪𑀁 𑀧𑀢𑁆𑀯𑀸 𑀔𑀸𑀡𑀼𑀓𑁄 𑀯𑀺𑀬 𑀅𑀝𑁆𑀞𑀸𑀲𑀺. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀪𑀓𑁆𑀔𑁄𑀲𑀺 𑀫𑁂 𑀆𑀕𑀢𑁄𑀲𑀻’’𑀢𑀺 𑀆𑀳. 𑀅𑀣 𑀦𑀁 𑀭𑀸𑀚𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 ‘‘𑀲𑀘𑁂 𑀆𑀳𑀸𑀭𑀢𑁆𑀣𑀺𑀓𑁄, 𑀇𑀫𑀁 𑀢𑁂 𑀫𑀁𑀲𑀁 𑀤𑀤𑀸𑀫𑀺, 𑀢𑀁 𑀕𑀳𑁂𑀢𑁆𑀯𑀸 𑀔𑀸𑀤, 𑀫𑀁 𑀫𑀼𑀜𑁆𑀘𑀸𑀳𑀻’’𑀢𑀺 𑀆𑀳 ¶ . 𑀢𑀁 𑀲𑀼𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 ‘‘𑀓𑀺𑀫𑀺𑀤𑀁 𑀫𑀬𑁆𑀳𑀫𑁂𑀯 𑀲𑀦𑁆𑀢𑀓𑀁 ¶ 𑀤𑀢𑁆𑀯𑀸 𑀫𑀬𑀸 𑀯𑁄𑀳𑀸𑀭𑀁 𑀓𑀭𑁄𑀲𑀺, 𑀦𑀦𑀼 𑀇𑀫𑀁 𑀫𑀁𑀲𑀜𑁆𑀘 𑀢𑁆𑀯𑀜𑁆𑀘 𑀫𑀫 𑀳𑀢𑁆𑀣𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀫𑁂𑀯 𑀲𑀦𑁆𑀢𑀓𑀁, 𑀢𑀲𑁆𑀫𑀸 𑀢𑀁 𑀧𑀞𑀫𑀁 𑀔𑀸𑀤𑀺𑀢𑁆𑀯𑀸 𑀧𑀘𑁆𑀙𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀅𑀣 𑀭𑀸𑀚𑀸 ‘‘𑀫𑀁𑀲𑀦𑀺𑀓𑁆𑀓𑀬𑁂𑀦𑀸𑀬𑀁 𑀦 𑀫𑀁 𑀫𑀼𑀜𑁆𑀘𑀢𑀺, 𑀫𑀬𑀸 𑀘 𑀫𑀺𑀕𑀯𑀁 𑀆𑀕𑀘𑁆𑀙𑀦𑁆𑀢𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 ‘𑀆𑀕𑀦𑁆𑀢𑁆𑀯𑀸 𑀢𑁂 𑀥𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀧𑀝𑀺𑀜𑁆𑀜𑀸 𑀓𑀢𑀸. 𑀲𑀘𑀸𑀬𑀁 𑀬𑀓𑁆𑀔𑁄 𑀅𑀦𑀼𑀚𑀸𑀦𑀺𑀲𑁆𑀲𑀢𑀺, 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀝𑀺𑀜𑁆𑀜𑀁 𑀫𑁄𑀘𑁂𑀢𑁆𑀯𑀸 𑀧𑀼𑀦 𑀇𑀫𑀲𑁆𑀲 𑀬𑀓𑁆𑀔𑀲𑁆𑀲 𑀪𑀢𑁆𑀢𑀢𑁆𑀣𑀁 𑀆𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 ‘‘𑀲𑀘𑁂 𑀢𑁆𑀯𑀁 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀕𑀦𑁆𑀢𑀼𑀓𑀸𑀫𑁄𑀲𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀢𑀩𑁆𑀩𑀁 𑀥𑀦𑀁 𑀤𑀢𑁆𑀯𑀸 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀲𑀻𑀖𑀁 ¶ 𑀧𑀼𑀦 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀭𑀸𑀚𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀢𑁂𑀦 𑀯𑀺𑀲𑁆𑀲𑀝𑁆𑀞𑁄 ‘‘𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀧𑀸𑀢𑁄𑀯 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀦𑀺𑀫𑀺𑀢𑁆𑀢𑀸𑀦𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀅𑀢𑁆𑀢𑀦𑁄 𑀩𑀮𑀓𑀸𑀬𑀁 𑀉𑀧𑀕𑀦𑁆𑀢𑁆𑀯𑀸 𑀢𑁂𑀦 𑀧𑀭𑀺𑀯𑀼𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀦𑁆𑀤𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀤𑀢𑁆𑀯𑀸 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀇𑀫𑀁 𑀢𑀓𑁆𑀓𑀲𑀺𑀮𑀫𑁂𑀯 𑀦𑁂𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀤𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑁄𑀭𑀺𑀲𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀧𑁂𑀢𑀼𑀁 𑀅𑀦𑀼𑀲𑀸𑀲𑀦𑀺𑀜𑁆𑀘 𑀤𑁂𑀦𑁆𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁮.

‘‘𑀫𑀺𑀕𑀯𑀁 𑀕𑀳𑁂𑀢𑁆𑀯𑀸 𑀫𑀼𑀜𑁆𑀘𑀲𑁆𑀲𑀼, 𑀓𑀢𑁆𑀯𑀸 𑀆𑀕𑀫𑀦𑀁 𑀧𑀼𑀦;

𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀁 𑀤𑀢𑁆𑀯𑀸, 𑀧𑀺𑀢𑀸 𑀆𑀫𑀦𑁆𑀢𑀬𑀻 𑀫𑀫𑀁.

𑁭𑁯.

‘‘𑀭𑀚𑁆𑀚𑀁 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚, 𑀫𑀸 𑀧𑀫𑀚𑁆𑀚𑀺 𑀧𑀼𑀭𑀁 𑀇𑀤𑀁;

𑀓𑀢𑀁 𑀫𑁂 𑀧𑁄𑀭𑀺𑀲𑀸𑀤𑁂𑀦, 𑀫𑀫 𑀆𑀕𑀫𑀦𑀁 𑀧𑀼𑀦𑀸’’𑀢𑀺.

𑀢𑀢𑁆𑀣 𑀆𑀕𑀫𑀦𑀁 𑀧𑀼𑀦𑀸𑀢𑀺 𑀧𑀼𑀦 𑀆𑀕𑀫𑀦𑀁 𑀧𑀝𑀺𑀜𑁆𑀜𑀸𑀢𑀲𑁆𑀲 𑀧𑁄𑀭𑀺𑀲𑀸𑀤𑀲𑁆𑀲 𑀲𑀗𑁆𑀕𑀭𑀁 𑀓𑀢𑁆𑀯𑀸. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀁 𑀤𑀢𑁆𑀯𑀸𑀢𑀺 𑀢𑀓𑁆𑀓𑀲𑀺𑀮𑀢𑁄 𑀆𑀕𑀢𑀲𑁆𑀲 𑀦𑀦𑁆𑀤𑀦𑀸𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀢𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀘𑀢𑀼𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀥𑀦𑀁 𑀤𑀢𑁆𑀯𑀸. 𑀧𑀺𑀢𑀸 𑀆𑀫𑀦𑁆𑀢𑀬𑀻 𑀫𑀫𑀦𑁆𑀢𑀺 𑀫𑀫 𑀧𑀺𑀢𑀸 𑀚𑀬𑀤𑁆𑀤𑀺𑀲𑀭𑀸𑀚𑀸 𑀫𑀁 𑀆𑀫𑀦𑁆𑀢𑁂𑀲𑀺.

𑀓𑀣𑀁 ¶ 𑀆𑀫𑀦𑁆𑀢𑁂𑀲𑀻𑀢𑀺 𑀘𑁂? 𑀆𑀳 ‘‘𑀭𑀚𑁆𑀚’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀢𑁆𑀢, 𑀢𑁆𑀯𑀁 𑀇𑀫𑀁 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚, 𑀬𑀣𑀸𑀳𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀫𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀳𑀺. 𑀢𑁆𑀯𑀁 𑀇𑀤𑀁 𑀧𑀼𑀭𑀁 𑀭𑀓𑁆𑀔𑀦𑁆𑀢𑁄 𑀭𑀚𑁆𑀚𑀜𑁆𑀘 𑀓𑀸𑀭𑁂𑀦𑁆𑀢𑁄 𑀫𑀸 𑀧𑀫𑀸𑀤𑀫𑀸𑀧𑀚𑁆𑀚𑀺, 𑀅𑀲𑀼𑀓𑀲𑁆𑀫𑀺𑀁 ¶ 𑀞𑀸𑀦𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀧𑁄𑀭𑀺𑀲𑀸𑀤𑁂𑀦 𑀬𑀓𑁆𑀔𑁂𑀦 𑀓𑀢𑀫𑁂𑀢𑀁 𑀫𑀬𑀸 𑀲𑀗𑁆𑀕𑀭𑀁 𑀫𑀫 𑀧𑀼𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑀦𑀁 𑀉𑀤𑁆𑀤𑀺𑀲𑁆𑀲, 𑀓𑁂𑀯𑀮𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀤𑀸𑀦𑀢𑁆𑀣𑀁 𑀇𑀥𑀸𑀕𑀢𑁄 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣𑀸𑀳𑀁 𑀕𑀫𑀺𑀲𑁆𑀲𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀢𑀢𑁆𑀣 𑀅𑀕𑀫𑀸𑀲𑀺, 𑀅𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀢𑁆𑀯𑀁, 𑀢𑀸𑀢, 𑀕𑀫𑀺𑀲𑁆𑀲𑀲𑀺𑀬𑁂𑀯, 𑀅𑀳𑀫𑁆𑀧𑀺 𑀢𑀬𑀸 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀺𑀬𑁂𑀯𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀫𑀬𑀁 𑀉𑀪𑁄𑀧𑀺 𑀦 𑀪𑀯𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀅𑀳𑀫𑁂𑀯 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀯𑀸𑀭𑁂𑀦𑁆𑀢𑀁 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀧𑀺𑀢𑀼 𑀅𑀢𑁆𑀣𑀸𑀬 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑁄𑀢𑁆𑀣𑀺𑀪𑀸𑀯𑀸𑀬 𑀧𑀺𑀢𑀭𑀺 𑀲𑀸𑀲𑀺𑀢𑀯𑀸𑀤𑀁 𑀧𑀬𑀼𑀜𑁆𑀚𑀫𑀸𑀦𑁂 𑀫𑀸𑀢𑀼𑀪𑀕𑀺𑀦𑀺𑀪𑀭𑀺𑀬𑀸𑀲𑀼 𑀘 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀻𑀲𑀼 𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀦𑀕𑀭𑀢𑁄 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑀫𑀼𑀔𑀁 𑀫𑀳𑀸𑀚𑀦𑀁 𑀅𑀦𑀼𑀩𑀦𑁆𑀥𑀦𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀺𑀢𑀭𑀸 𑀅𑀓𑁆𑀔𑀸𑀢𑀦𑀬𑁂𑀦 𑀬𑀓𑁆𑀔𑀯𑀸𑀲𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄𑀧𑀺 ‘‘𑀔𑀢𑁆𑀢𑀺𑀬𑀸 𑀦𑀸𑀫 𑀩𑀳𑀼𑀫𑀸𑀬𑀸, 𑀓𑁄 𑀚𑀸𑀦𑀸𑀢𑀺 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀭𑀜𑁆𑀜𑁄 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀓𑀼𑀫𑀸𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀺𑀢𑀭𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀢𑁆𑀢𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀦𑀢𑁆𑀣𑀺 𑀫𑁂 𑀪𑀬’’𑀦𑁆𑀢𑀺 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑁆𑀯𑀸𑀯 𑀦𑀺𑀲𑀻𑀤𑀺. 𑀫𑀳𑀸𑀲𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁦.

‘‘𑀫𑀸𑀢𑀸𑀧𑀺𑀢𑀽 𑀘 𑀯𑀦𑁆𑀤𑀺𑀢𑁆𑀯𑀸, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀅𑀢𑁆𑀢𑀦𑀸;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀦𑀼𑀁 𑀔𑀕𑁆𑀕𑀁, 𑀧𑁄𑀭𑀺𑀲𑀸𑀤𑀁 𑀉𑀧𑀸𑀕𑀫𑀺’’𑀦𑁆𑀢𑀺.

𑁮𑁧. 𑀲𑀲𑀢𑁆𑀣𑀳𑀢𑁆𑀣𑀽𑀧𑀕𑀢𑀦𑁆𑀢𑀺 𑀲𑀲𑀢𑁆𑀣𑀳𑀢𑁆𑀣𑀁 𑀉𑀧𑀕𑀢𑀁 𑀆𑀯𑀼𑀥𑀧𑀸𑀡𑀺𑀁 𑀫𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸. 𑀓𑀤𑀸𑀘𑀺 𑀲𑁄 𑀢𑀲𑀺𑀲𑁆𑀲𑀢𑀻𑀢𑀺 𑀲𑁄 𑀬𑀓𑁆𑀔𑁄 𑀅𑀧𑀺 𑀢𑀲𑁂𑀬𑁆𑀬. 𑀢𑁂𑀦 𑀪𑀺𑀚𑁆𑀚𑀺𑀲𑁆𑀲𑀢𑀺 𑀲𑀻𑀮𑀦𑁆𑀢𑀺 𑀢𑁂𑀦 𑀢𑀲𑁆𑀲 𑀢𑀸𑀲𑀼𑀧𑁆𑀧𑀸𑀤𑀦𑁂𑀦 𑀫𑀬𑁆𑀳𑀁 𑀲𑀻𑀮𑀁 𑀯𑀺𑀦𑀲𑁆𑀲𑀢𑀺 𑀲𑀁𑀓𑀺𑀮𑀺𑀲𑁆𑀲𑀢𑀺. 𑀧𑀭𑀺𑀢𑀸𑀲𑀁 𑀓𑀢𑁂 𑀫𑀬𑀻𑀢𑀺 𑀫𑀬𑀺 𑀢𑀲𑁆𑀲 𑀧𑀭𑀺𑀢𑀸𑀲𑀁 𑀓𑀢𑁂 𑀲𑀢𑀺.

𑁮𑁨. 𑀲𑀻𑀮𑀔𑀡𑁆𑀟𑀪𑀬𑀸 𑀫𑀬𑁆𑀳𑀁, 𑀢𑀲𑁆𑀲 𑀤𑁂𑀲𑁆𑀲𑀁 𑀦 𑀩𑁆𑀬𑀸𑀳𑀭𑀺𑀦𑁆𑀢𑀺 𑀬𑀣𑀸 𑀘 𑀲𑀻𑀮𑀪𑁂𑀤𑀪𑀬𑁂𑀦 𑀦𑀺𑀳𑀺𑀢𑀲𑀢𑁆𑀣𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀏𑀯𑀁 𑀫𑀬𑁆𑀳𑀁 𑀲𑀻𑀮𑀔𑀡𑁆𑀟𑀪𑀬𑀸 ¶ 𑀏𑀯 𑀢𑀲𑁆𑀲 𑀧𑁄𑀭𑀺𑀲𑀸𑀤𑀲𑁆𑀲 𑀤𑁂𑀲𑁆𑀲𑀁 𑀅𑀦𑀺𑀝𑁆𑀞𑀫𑁆𑀧𑀺 𑀦 𑀩𑁆𑀬𑀸𑀳𑀭𑀺𑀁, 𑀓𑁂𑀯𑀮𑀁 𑀧𑀦 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀳𑀺𑀢𑀯𑀸𑀤𑀻 𑀇𑀤𑀁 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀯𑀘𑀦𑀁 𑀅𑀪𑀸𑀲𑀺𑀁.

𑀫𑀳𑀸𑀲𑀢𑁆𑀢𑁄 ¶ 𑀘 𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀞𑀺𑀢𑁄. 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 𑀢𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 ‘‘𑀓𑁄𑀲𑀺 𑀢𑁆𑀯𑀁, 𑀓𑀼𑀢𑁄 𑀆𑀕𑀢𑁄, 𑀓𑀺𑀁 𑀫𑀁 𑀦 𑀚𑀸𑀦𑀸𑀲𑀺 ‘𑀮𑀼𑀤𑁆𑀤𑁄 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀓𑁄’𑀢𑀺, 𑀓𑀲𑁆𑀫𑀸 𑀘 𑀇𑀥𑀸𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀓𑀼𑀫𑀸𑀭𑁄 ‘‘𑀅𑀳𑀁 𑀚𑀬𑀤𑁆𑀤𑀺𑀲𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀢𑁆𑀯𑀁 𑀧𑁄𑀭𑀺𑀲𑀸𑀤𑀓𑁄𑀢𑀺 𑀚𑀸𑀦𑀸𑀫𑀺, 𑀧𑀺𑀢𑀼 𑀚𑀻𑀯𑀺𑀢𑀁 𑀭𑀓𑁆𑀔𑀺𑀢𑀼𑀁 𑀇𑀥𑀸𑀕𑀢𑁄, 𑀢𑀲𑁆𑀫𑀸 𑀢𑀁 𑀫𑀼𑀜𑁆𑀘, 𑀫𑀁 𑀔𑀸𑀤𑀸’’𑀢𑀺 𑀆𑀳. 𑀧𑀼𑀦 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 𑀫𑀼𑀔𑀸𑀓𑀸𑀭𑁂𑀦𑁂𑀯 ‘‘𑀢𑀁 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀅𑀳𑀁 𑀚𑀸𑀦𑀸𑀫𑀺, 𑀤𑀼𑀓𑁆𑀓𑀭𑀁 𑀧𑀦 𑀢𑀬𑀸 𑀓𑀢𑀁 𑀏𑀯𑀁 𑀆𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀦 𑀇𑀤𑀁 𑀤𑀼𑀓𑁆𑀓𑀭𑀁, 𑀬𑀁 𑀧𑀺𑀢𑀼 𑀅𑀢𑁆𑀣𑁂 𑀚𑀻𑀯𑀺𑀢𑀧𑀭𑀺𑀘𑁆𑀘𑀚𑀦𑀁, 𑀫𑀸𑀢𑀸𑀧𑀺𑀢𑀼𑀳𑁂𑀢𑀼 𑀳𑀺 𑀏𑀯𑀭𑀽𑀧𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀏𑀓𑀦𑁆𑀢𑁂𑀦𑁂𑀯 𑀲𑀕𑁆𑀕𑁂 𑀧𑀫𑁄𑀤𑀢𑀺, 𑀅𑀳𑀜𑁆𑀘 ‘𑀅𑀫𑀭𑀡𑀥𑀫𑁆𑀫𑁄 𑀦𑀸𑀫 𑀓𑁄𑀘𑀺 𑀲𑀢𑁆𑀢𑁄 𑀦𑀢𑁆𑀣𑀻’𑀢𑀺 𑀚𑀸𑀦𑀸𑀫𑀺, 𑀅𑀢𑁆𑀢𑀦𑀸 𑀘 𑀓𑀺𑀜𑁆𑀘𑀺 𑀓𑀢𑀁 𑀧𑀸𑀧𑀁 𑀦𑀸𑀫 𑀦 𑀲𑀭𑀸𑀫𑀺, 𑀢𑀲𑁆𑀫𑀸 𑀫𑀭𑀡𑀢𑁄𑀧𑀺 𑀫𑁂 𑀪𑀬𑀁 𑀦𑀢𑁆𑀣𑀺, 𑀇𑀤𑀁 𑀲𑀭𑀻𑀭𑀁 𑀫𑀬𑀸 𑀢𑁂 𑀦𑀺𑀲𑁆𑀲𑀝𑁆𑀞𑀁, 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀔𑀸𑀤𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁩.

‘‘𑀉𑀚𑁆𑀚𑀸𑀮𑁂𑀳𑀺 𑀫𑀳𑀸𑀅𑀕𑁆𑀕𑀺𑀁, 𑀧𑀧𑀢𑀺𑀲𑁆𑀲𑀸𑀫𑀺 𑀭𑀼𑀓𑁆𑀔𑀢𑁄;

𑀢𑁆𑀯𑀁 𑀧𑀓𑁆𑀓𑀓𑀸𑀮𑀫𑀜𑁆𑀜𑀸𑀬, 𑀪𑀓𑁆𑀔𑀬 𑀫𑀁 𑀧𑀺𑀢𑀸𑀫𑀳𑀸’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 ‘‘𑀦 𑀲𑀓𑁆𑀓𑀸 𑀇𑀫𑀲𑁆𑀲 𑀫𑀁𑀲𑀁 𑀔𑀸𑀤𑀺𑀢𑀼𑀁, 𑀉𑀧𑀸𑀬𑁂𑀦 𑀇𑀫𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀭𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀦𑀺𑀤𑁆𑀥𑀽𑀫𑁂 𑀅𑀗𑁆𑀕𑀸𑀭𑁂 𑀓𑀭𑁄𑀳𑀺, 𑀢𑀢𑁆𑀣 𑀢𑁂 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀢𑀣𑀸 𑀓𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀢𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀬𑀁 𑀧𑀼𑀭𑀺𑀲𑀲𑀻𑀳𑁄 𑀫𑀭𑀡𑀢𑁄𑀧𑀺 𑀪𑀬𑀁 𑀦𑀢𑁆𑀣𑀺, 𑀏𑀯𑀁 𑀦𑀺𑀩𑁆𑀪𑀬𑁄 𑀦𑀸𑀫 𑀦 𑀫𑀬𑀸 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺 𑀮𑁄𑀫𑀳𑀁𑀲𑀚𑀸𑀢𑁄 𑀓𑀼𑀫𑀸𑀭𑀁 𑀑𑀮𑁄𑀓𑁂𑀲𑀺. 𑀓𑀼𑀫𑀸𑀭𑁄 𑀓𑀺𑀲𑁆𑀲 𑀫𑀁 𑀑𑀮𑁄𑀓𑁂𑀲𑀺, 𑀦 𑀬𑀣𑀸𑀯𑀼𑀢𑁆𑀢𑀁 𑀓𑀭𑁄𑀲𑀻𑀢𑀺. 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 𑀫𑀳𑀸𑀲𑀢𑁆𑀢𑀁 ‘‘𑀲𑀢𑁆𑀢𑀥𑀸 𑀢𑀲𑁆𑀲 𑀫𑀼𑀤𑁆𑀥𑀸 𑀨𑀮𑁂𑀬𑁆𑀬, 𑀬𑁄 𑀢𑀁 𑀔𑀸𑀤𑁂𑀬𑁆𑀬𑀸’’𑀢𑀺 𑀆𑀳. ‘‘𑀲𑀘𑁂 𑀫𑀁 𑀦 𑀔𑀸𑀤𑀺𑀢𑀼𑀓𑀸𑀫𑁄𑀲𑀺, 𑀅𑀣 𑀓𑀲𑁆𑀫𑀸 𑀅𑀕𑁆𑀕𑀺𑀁 𑀓𑀸𑀭𑁂𑀲𑀻’’𑀢𑀺? ‘‘𑀢𑀯 𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣’’𑀦𑁆𑀢𑀺. ‘‘𑀢𑁆𑀯𑀁 𑀇𑀤𑀸𑀦𑀺 𑀫𑀁 𑀓𑀣𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀲𑀺, 𑀲𑁆𑀯𑀸𑀳𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀅𑀢𑁆𑀢𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀦 𑀅𑀤𑀸𑀲𑀺’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀇𑀤𑀜𑁆𑀳𑀺 ¶ ¶ 𑀲𑁄 𑀩𑁆𑀭𑀸𑀳𑁆𑀫𑀡𑀁 𑀫𑀜𑁆𑀜𑀫𑀸𑀦𑁄, 𑀲𑀲𑁄 𑀅𑀯𑀸𑀲𑁂𑀲𑀺 𑀲𑀓𑁂 𑀲𑀭𑀻𑀭𑁂;

𑀢𑁂𑀦𑁂𑀯 𑀲𑁄 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄, 𑀲𑀲𑀢𑁆𑀣𑀼𑀢𑁄 𑀓𑀸𑀫𑀤𑀼𑀳𑀚𑁆𑀚 𑀬𑀓𑁆𑀔𑀸’’𑀢𑀺.(𑀚𑀸. 𑁧.𑁧𑁬.𑁯𑁩) 𑁋

𑀕𑀸𑀣𑀫𑀸𑀳.

𑀢𑀢𑁆𑀣 𑀲𑀲𑁄 𑀅𑀯𑀸𑀲𑁂𑀲𑀺 𑀲𑀓𑁂 𑀲𑀭𑀻𑀭𑁂𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀳𑁂𑀢𑀼 𑀇𑀫𑀁 𑀲𑀭𑀻𑀭𑀁 𑀔𑀸𑀤𑀺𑀢𑁆𑀯𑀸 𑀇𑀥 𑀯𑀲𑀸𑀢𑀺 𑀏𑀯𑀁 𑀲𑀓𑁂 𑀲𑀭𑀻𑀭𑁂 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀤𑁂𑀦𑁆𑀢𑁄 𑀢𑀁 𑀩𑁆𑀭𑀸𑀳𑁆𑀫𑀡𑀭𑀽𑀧𑀁 𑀲𑀓𑁆𑀓𑀁 𑀢𑀢𑁆𑀣 𑀯𑀸𑀲𑁂𑀲𑀺. 𑀲𑀲𑀢𑁆𑀣𑀼𑀢𑁄𑀢𑀺 ‘‘𑀲𑀲𑀻’’𑀢𑀺 𑀏𑀯𑀁 𑀲𑀲𑀲𑀤𑁆𑀤𑁂𑀦 𑀣𑀼𑀢𑁄. 𑀓𑀸𑀫𑀤𑀼𑀳𑁄𑀢𑀺 𑀓𑀸𑀫𑀯𑀟𑁆𑀠𑀦𑁄. 𑀬𑀓𑁆𑀔𑀸𑀢𑀺 𑀤𑁂𑀯.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀘𑀦𑁆𑀤𑁂 𑀲𑀲𑀮𑀓𑁆𑀔𑀡𑀁 𑀓𑀧𑁆𑀧𑀝𑁆𑀞𑀺𑀬𑀁 𑀧𑀸𑀝𑀺𑀳𑀸𑀭𑀺𑀬𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀓𑁆𑀓𑁂𑀦𑀧𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀅𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑁋

‘‘𑀘𑀦𑁆𑀤𑁄 𑀬𑀣𑀸 𑀭𑀸𑀳𑀼𑀫𑀼𑀔𑀸 𑀧𑀫𑀼𑀢𑁆𑀢𑁄, 𑀯𑀺𑀭𑁄𑀘𑀢𑁂 𑀧𑀦𑁆𑀦𑀭𑀲𑁂𑀯 𑀪𑀸𑀡𑀼𑀫𑀸;

𑀏𑀯𑀁 𑀢𑀼𑀯𑀁 𑀧𑁄𑀭𑀺𑀲𑀸𑀤𑀸 𑀧𑀫𑀼𑀢𑁆𑀢𑁄, 𑀯𑀺𑀭𑁄𑀘 𑀓𑀧𑀺𑀮𑁂 𑀫𑀳𑀸𑀦𑀼𑀪𑀸𑀯;

𑀆𑀫𑁄𑀤𑀬𑀁 𑀧𑀺𑀢𑀭𑀁 𑀫𑀸𑀢𑀭𑀜𑁆𑀘, 𑀲𑀩𑁆𑀩𑁄 𑀘 𑀢𑁂 𑀦𑀦𑁆𑀤𑀢𑀼 𑀜𑀸𑀢𑀺𑀧𑀓𑁆𑀔𑁄’’𑀢𑀺. (𑀚𑀸. 𑁧.𑁧𑁬.𑁯𑁪) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀕𑀘𑁆𑀙 𑀫𑀳𑀸𑀯𑀻𑀭𑀸’’𑀢𑀺 𑀓𑀼𑀫𑀸𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄𑀧𑀺 𑀢𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 ¶ 𑀤𑀢𑁆𑀯𑀸 ‘‘𑀬𑀓𑁆𑀔𑁄 𑀦𑀼 𑀔𑁄 𑀏𑀲, 𑀦𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 ‘‘𑀬𑀓𑁆𑀔𑀸𑀦𑀁 𑀅𑀓𑁆𑀔𑀻𑀦𑀺 𑀭𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀅𑀦𑀺𑀫𑀺𑀲𑀸𑀦𑀺 𑀘, 𑀙𑀸𑀬𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀅𑀲𑀫𑁆𑀪𑀻𑀢𑁄 𑀳𑁄𑀢𑀺, 𑀦 𑀇𑀫𑀲𑁆𑀲 𑀢𑀣𑀸. 𑀢𑀲𑁆𑀫𑀸 𑀦𑀸𑀬𑀁 𑀬𑀓𑁆𑀔𑁄 𑀫𑀦𑀼𑀲𑁆𑀲𑁄 𑀏𑀲𑁄, 𑀫𑀬𑁆𑀳𑀁 𑀓𑀺𑀭 𑀧𑀺𑀢𑀼 𑀢𑀬𑁄 𑀪𑀸𑀢𑀭𑁄 𑀬𑀓𑁆𑀔𑀺𑀦𑀺𑀬𑀸 𑀕𑀳𑀺𑀢𑀸, 𑀢𑁂𑀲𑀼 𑀢𑀸𑀬 𑀤𑁆𑀯𑁂 𑀔𑀸𑀤𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀓𑁄 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑀝𑀺𑀚𑀕𑁆𑀕𑀺𑀢𑁄 𑀪𑀯𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀦𑀬𑀕𑁆𑀕𑀸𑀳𑁂𑀦 𑀅𑀦𑀼𑀫𑀸𑀦𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀯𑀺𑀬 𑀅𑀯𑀺𑀧𑀭𑀻𑀢𑀢𑁄 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀺𑀢𑀼 𑀆𑀘𑀺𑀓𑁆𑀔𑀺𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀢𑁆𑀯𑀁 𑀬𑀓𑁆𑀔𑁄, 𑀧𑀺𑀢𑀼 𑀫𑁂 𑀚𑁂𑀝𑁆𑀞𑀪𑀸𑀢𑀺𑀓𑁄𑀲𑀺, 𑀏𑀳𑀺 𑀫𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. 𑀢𑁂𑀦 ¶ 𑀯𑀼𑀢𑁆𑀢𑀁 ‘‘𑀢𑁆𑀯𑀁 𑀧𑀺𑀢𑀸𑀫𑀳𑀸’’𑀢𑀺, 𑀢𑁆𑀯𑀁 𑀫𑀫 𑀫𑀳𑀸𑀧𑀺𑀢𑀸𑀢𑀺 ¶ 𑀅𑀢𑁆𑀣𑁄. 𑀇𑀢𑀭𑁂𑀦 ‘‘𑀦𑀸𑀳𑀁 𑀫𑀦𑀼𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀲𑀤𑁆𑀥𑀸𑀢𑀩𑁆𑀩𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀓𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀲𑀺. 𑀢𑀸𑀧𑀲𑁂𑀦 ‘‘𑀓𑀺𑀁 𑀓𑀭𑁄𑀦𑁆𑀢𑀸 𑀧𑀺𑀢𑀸 𑀧𑀼𑀢𑁆𑀢𑀸 𑀅𑀭𑀜𑁆𑀜𑁂 𑀯𑀺𑀘𑀭𑀣𑀸’’𑀢𑀺 𑀧𑀺𑀢𑀼𑀪𑀸𑀯𑁂 𑀓𑀣𑀺𑀢𑁂 𑀧𑁄𑀭𑀺𑀲𑀸𑀤𑁄 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀕𑀘𑁆𑀙, 𑀢𑀸𑀢, 𑀢𑁆𑀯𑀁, 𑀦 𑀫𑁂 𑀭𑀚𑁆𑀚𑁂𑀦 𑀅𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳’’𑀦𑁆𑀢𑀺 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁪.

‘‘𑀇𑀢𑀺 𑀲𑀻𑀮𑀯𑀢𑀁 𑀳𑁂𑀢𑀼, 𑀦𑀸𑀭𑀓𑁆𑀔𑀺𑀁 𑀫𑀫 𑀚𑀻𑀯𑀺𑀢𑀁;

𑀧𑀩𑁆𑀩𑀸𑀚𑁂𑀲𑀺𑀁 𑀘𑀳𑀁 𑀢𑀲𑁆𑀲, 𑀲𑀤𑀸 𑀧𑀸𑀡𑀸𑀢𑀺𑀧𑀸𑀢𑀺𑀓’’𑀦𑁆𑀢𑀺.

𑀢𑀢𑁆𑀣 𑀲𑀻𑀮𑀯𑀢𑀁 𑀳𑁂𑀢𑀽𑀢𑀺 𑀲𑀻𑀮𑀯𑀦𑁆𑀢𑀸𑀦𑀁 𑀫𑀫 𑀧𑀺𑀢𑀽𑀦𑀁 𑀳𑁂𑀢𑀼. 𑀅𑀣 𑀯𑀸 𑀲𑀻𑀮𑀯𑀢𑀁 𑀳𑁂𑀢𑀽𑀢𑀺 𑀲𑀻𑀮𑀯𑀢𑀳𑁂𑀢𑀼, 𑀫𑀬𑁆𑀳𑀁 𑀲𑀻𑀮𑀯𑀢𑀲𑀫𑀸𑀤𑀸𑀦𑀦𑀺𑀫𑀺𑀢𑁆𑀢𑀁 𑀢𑀲𑁆𑀲 𑀅𑀪𑀺𑀚𑁆𑀚𑀦𑀢𑁆𑀣𑀁. 𑀢𑀲𑁆𑀲𑀸𑀢𑀺 𑀢𑀁 𑀧𑁄𑀭𑀺𑀲𑀸𑀤𑀁.

𑀅𑀣 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀫𑀳𑀸𑀧𑀺𑀢𑀭𑀁 𑀧𑀩𑁆𑀩𑀚𑀺𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀓𑀼𑀫𑀸𑀭𑁄 𑀓𑀺𑀭 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁂𑀦 𑀭𑀜𑁆𑀜𑀸 𑀦𑀸𑀕𑀭𑁂𑀳𑀺 𑀦𑁂𑀕𑀫𑀚𑀸𑀦𑀧𑀤𑁂𑀳𑀺 𑀘 𑀧𑀘𑁆𑀘𑀼𑀕𑁆𑀕𑀢𑁄 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀗𑁆𑀔𑀡𑀜𑁆𑀜𑁂𑀯 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀏𑀳𑀺, 𑀪𑀸𑀢𑀺𑀓, 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. ‘‘𑀅𑀮𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀫𑀬𑁆𑀳𑀁 𑀉𑀬𑁆𑀬𑀸𑀦𑁂 𑀯𑀲𑀸’’𑀢𑀺. ‘‘𑀦 𑀆𑀕𑀘𑁆𑀙𑀸𑀫𑀻’’𑀢𑀺. 𑀭𑀸𑀚𑀸 𑀢𑀲𑁆𑀲 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 𑀕𑀸𑀫𑀁 𑀦𑀺𑀯𑁂𑀲𑁂𑀢𑁆𑀯𑀸 𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀺. 𑀲𑁄 𑀘𑀽𑀴𑀓𑀫𑁆𑀫𑀸𑀲𑀤𑀫𑁆𑀫𑀦𑀺𑀕𑀫𑁄 𑀦𑀸𑀫 𑀚𑀸𑀢𑁄.

𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑁄𑀭𑀺𑀲𑀸𑀤𑁄 𑀅𑀗𑁆𑀕𑀼𑀮𑀺𑀫𑀸𑀮𑁄, 𑀓𑀦𑀺𑀝𑁆𑀞𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀅𑀕𑁆𑀕𑀫𑀳𑁂𑀲𑀻 𑀭𑀸𑀳𑀼𑀮𑀫𑀸𑀢𑀸, 𑀅𑀮𑀻𑀦𑀲𑀢𑁆𑀢𑀼𑀓𑀼𑀫𑀸𑀭𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀧𑀺𑀢𑀭𑀸 𑀦𑀺𑀯𑀸𑀭𑀺𑀬𑀫𑀸𑀦𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀺𑀢𑀼 𑀚𑀻𑀯𑀺𑀢𑀭𑀓𑁆𑀔𑀡𑀢𑁆𑀣𑀁 ‘‘𑀧𑁄𑀭𑀺𑀲𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 ¶ 𑀦𑀺𑀘𑁆𑀙𑀬𑁄, 𑀢𑀲𑁆𑀲 𑀘 𑀲𑀦𑁆𑀢𑀸𑀲𑀧𑀭𑀺𑀳𑀭𑀡𑀢𑁆𑀣𑀁 𑀦𑀺𑀳𑀺𑀢𑀲𑀢𑁆𑀣𑀲𑁆𑀲 𑀕𑀫𑀦𑀁, ‘‘𑀅𑀢𑁆𑀢𑀦𑁄 𑀲𑀻𑀮𑀔𑀡𑁆𑀟𑀦𑀁 𑀫𑀸 𑀳𑁄𑀢𑀽’’𑀢𑀺 𑀢𑁂𑀦 𑀧𑀺𑀬𑀯𑀸𑀘𑀸𑀬 𑀲𑀫𑀼𑀤𑀸𑀘𑀸𑀭𑁄, 𑀢𑁂𑀦 𑀘 𑀦𑀸𑀦𑀸𑀦𑀬𑁂𑀳𑀺 𑀧𑀭𑀺𑀕𑁆𑀕𑀡𑁆𑀳𑀺𑀬𑀫𑀸𑀦𑀲𑁆𑀲 𑀫𑀭𑀡𑀲𑀦𑁆𑀢𑀸𑀲𑀸𑀪𑀸𑀯𑁄, 𑀧𑀺𑀢𑀼 𑀅𑀢𑁆𑀣𑁂 𑀫𑀬𑁆𑀳𑀁 𑀲𑀭𑀻𑀭𑀁 𑀲𑀨𑀮𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀳𑀝𑁆𑀞𑀢𑀼𑀝𑁆𑀞𑀪𑀸𑀯𑁄, 𑀲𑀓𑁆𑀓𑁂𑀦𑀸𑀧𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀲𑀲𑀚𑀸𑀢𑀺𑀬𑀫𑁆𑀧𑀺 𑀧𑀭𑀺𑀘𑁆𑀘𑀸𑀕𑀢𑁆𑀣𑀁 ¶ 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀪𑀸𑀯𑀲𑁆𑀲 𑀚𑀸𑀦𑀦𑀁, 𑀢𑁂𑀦 ¶ 𑀲𑀫𑀸𑀕𑀫𑁂𑀧𑀺 𑀑𑀲𑁆𑀲𑀝𑁆𑀞𑁂𑀧𑀺 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀸𑀪𑀸𑀯𑁄, 𑀢𑀲𑁆𑀲 𑀘 𑀫𑀦𑀼𑀲𑁆𑀲𑀪𑀸𑀯𑀫𑀳𑀸𑀧𑀺𑀢𑀼𑀪𑀸𑀯𑀸𑀦𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑀁, 𑀜𑀸𑀢𑀫𑀢𑁆𑀢𑁂 𑀘 𑀢𑀁 𑀓𑀼𑀮𑀲𑀦𑁆𑀢𑀓𑁂 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀢𑀸, 𑀥𑀫𑁆𑀫𑀤𑁂𑀲𑀦𑀸𑀬 𑀲𑀁𑀯𑁂𑀚𑁂𑀢𑁆𑀯𑀸 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺. 𑀏𑀯𑀫𑀸𑀤𑀬𑁄 𑀇𑀥 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀅𑀮𑀻𑀦𑀲𑀢𑁆𑀢𑀼𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀔𑀧𑀸𑀮𑀘𑀭𑀺𑀬𑀸𑀯𑀡𑁆𑀡𑀦𑀸

𑁮𑁫. 𑀤𑀲𑀫𑁂 𑀲𑀗𑁆𑀔𑀧𑀸𑀮𑁄𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀤𑁂𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸𑀬 𑀫𑀳𑀢𑀺𑀬𑀸 𑀦𑀸𑀕𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀺𑀤𑁆𑀥𑀺𑀓𑁄. 𑀳𑁂𑀝𑁆𑀞𑀸 𑀤𑁆𑀯𑁂, 𑀉𑀧𑀭𑀺 𑀤𑁆𑀯𑁂𑀢𑀺 𑀘𑀢𑀲𑁆𑀲𑁄 𑀤𑀸𑀞𑀸 𑀆𑀯𑀼𑀥𑀸 𑀏𑀢𑀲𑁆𑀲𑀸𑀢𑀺 𑀤𑀸𑀞𑀸𑀯𑀼𑀥𑁄. 𑀉𑀕𑁆𑀕𑀢𑁂𑀚𑀯𑀺𑀲𑀢𑀸𑀬 𑀖𑁄𑀭𑀯𑀺𑀲𑁄. 𑀦𑀸𑀕𑀬𑁄𑀦𑀺𑀲𑀺𑀤𑁆𑀥𑀸𑀳𑀺 𑀤𑁆𑀯𑀻𑀳𑀺 𑀚𑀺𑀯𑁆𑀳𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀤𑁆𑀯𑀺𑀚𑀺𑀯𑁆𑀳𑁄. 𑀫𑀳𑀸𑀦𑀼𑀪𑀸𑀯𑀸𑀦𑀫𑁆𑀧𑀺 𑀉𑀭𑁂𑀦 𑀕𑀫𑀦𑀢𑁄 ‘‘𑀉𑀭𑀕𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀦𑀸𑀕𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑀢𑁄 𑀉𑀭𑀕𑀸𑀥𑀺𑀪𑀽.

𑁮𑁬. 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀦𑁆𑀥𑀺𑀪𑀸𑀯𑁂𑀦 𑀕𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀘𑀢𑀼𑀧𑁆𑀧𑀣𑁂. 𑀅𑀧𑀭𑀸𑀧𑀭𑀁 𑀫𑀳𑀸𑀚𑀦𑀲𑀜𑁆𑀘𑀭𑀡𑀝𑁆𑀞𑀸𑀦𑀪𑀽𑀢𑁂 𑀫𑀳𑀸𑀫𑀕𑁆𑀕𑁂. 𑀢𑀢𑁄 𑀏𑀯 𑀫𑀳𑀸𑀚𑀦𑀲𑀫𑀸𑀓𑀺𑀡𑁆𑀡𑀪𑀸𑀯𑁂𑀦 𑀦𑀸𑀦𑀸𑀚𑀦𑀲𑀫𑀸𑀓𑀼𑀮𑁂. 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀘𑀢𑀼𑀭𑁄 𑀅𑀗𑁆𑀕𑁂. 𑀅𑀥𑀺𑀝𑁆𑀞𑀸𑀬 𑀅𑀥𑀺𑀝𑁆𑀞𑀳𑀺𑀢𑁆𑀯𑀸, 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸. 𑀬𑀤𑀸𑀳𑀁 𑀲𑀗𑁆𑀔𑀧𑀸𑀮𑁄 𑀦𑀸𑀫 𑀬𑀣𑀸𑀯𑀼𑀢𑁆𑀢𑀭𑀽𑀧𑁄 𑀦𑀸𑀕𑀭𑀸𑀚𑀸 𑀳𑁄𑀫𑀺, 𑀢𑀤𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀞𑀸𑀦𑁂 𑀯𑀸𑀲𑀁 𑀉𑀧𑁄𑀲𑀣𑀯𑀸𑀲𑀯𑀲𑁂𑀦 𑀦𑀺𑀯𑀸𑀲𑀁 𑀅𑀓𑀧𑁆𑀧𑀬𑀺𑀁 𑀓𑀧𑁆𑀧𑁂𑀲𑀺𑀁.

𑀫𑀳𑀸𑀲𑀢𑁆𑀢𑁄 𑀳𑀺 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀧𑀲𑀼𑀢𑁄 𑀳𑀼𑀢𑁆𑀯𑀸 𑀩𑁄𑀥𑀺𑀧𑀭𑀺𑀬𑁂𑀲𑀦𑀯𑀲𑁂𑀦 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑀕𑀢𑀻𑀲𑀼 𑀲𑀁𑀲𑀭𑀦𑁆𑀢𑁄 𑀓𑀤𑀸𑀘𑀺 𑀤𑁂𑀯𑀪𑁄𑀕𑀲𑀤𑀺𑀲𑀲𑀫𑁆𑀧𑀢𑁆𑀢𑀺𑀓𑁂 𑀦𑀸𑀕𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀗𑁆𑀔𑀧𑀸𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄. 𑀲𑁄 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀬𑁄𑀦𑀺𑀁 𑀧𑀢𑁆𑀣𑁂𑀦𑁆𑀢𑁄 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺. 𑀅𑀣𑀲𑁆𑀲 𑀦𑀸𑀕𑀪𑀯𑀦𑁂 ¶ 𑀯𑀲𑀦𑁆𑀢𑀲𑁆𑀲 𑀉𑀧𑁄𑀲𑀣𑀯𑀸𑀲𑁄 ¶ 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑀻𑀮𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀢𑁂𑀦 𑀲𑁄 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀡𑁆𑀳𑀯𑀡𑁆𑀡𑀸𑀬 𑀦𑀤𑀺𑀬𑀸 𑀅𑀯𑀺𑀤𑀽𑀭𑁂 𑀫𑀳𑀸𑀫𑀕𑁆𑀕𑀲𑁆𑀲 𑀘 𑀏𑀓𑀧𑀤𑀺𑀓𑀫𑀕𑁆𑀕𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑀁 𑀯𑀫𑁆𑀫𑀺𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑁂𑀲𑀼 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 ‘‘𑀫𑀫 𑀘𑀫𑁆𑀫𑀸𑀤𑀻𑀦𑀺 𑀅𑀢𑁆𑀣𑀺𑀓𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀅𑀢𑁆𑀢𑀸𑀦𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀧𑀸𑀝𑀺𑀧𑀤𑁂 𑀦𑀸𑀕𑀪𑀯𑀦𑀁 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀲𑀗𑁆𑀔𑀧𑀸𑀮𑁄’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯.

𑁮𑁭. 𑀬𑀁 𑀧𑀦𑁂𑀢𑁆𑀣 𑀙𑀯𑀺𑀬𑀸 𑀘𑀫𑁆𑀫𑁂𑀦𑀸𑀢𑀺𑀆𑀤𑀺𑀓𑀁 ‘‘𑀘𑀢𑀼𑀭𑁄 𑀅𑀗𑁆𑀕𑁂 𑀅𑀥𑀺𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀘𑀢𑀼𑀭𑀗𑁆𑀕𑀸𑀥𑀺𑀝𑁆𑀞𑀸𑀦𑀤𑀲𑁆𑀲𑀦𑀁. 𑀙𑀯𑀺𑀘𑀫𑁆𑀫𑀸𑀦𑀺 𑀳𑀺 𑀇𑀥 𑀏𑀓𑀫𑀗𑁆𑀕𑀁. 𑀏𑀯𑀁 𑀉𑀧𑁄𑀲𑀣𑀯𑀸𑀲𑀁 𑀯𑀲𑀦𑁆𑀢𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀤𑀻𑀖𑁄 𑀅𑀤𑁆𑀥𑀸 𑀯𑀻𑀢𑀺𑀯𑀢𑁆𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀢𑀣𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀲𑁄𑀴𑀲 𑀪𑁄𑀚𑀧𑀼𑀢𑁆𑀢𑀸 ‘‘𑀫𑀁𑀲𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀯𑀼𑀥𑀳𑀢𑁆𑀣𑀸 𑀅𑀭𑀜𑁆𑀜𑁂 𑀘𑀭𑀦𑁆𑀢𑀸 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀸 𑀢𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀅𑀚𑁆𑀚 𑀕𑁄𑀥𑀸𑀧𑁄𑀢𑀓𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸, 𑀇𑀫𑀁 𑀦𑀸𑀕𑀭𑀸𑀚𑀸𑀦𑀁 𑀯𑀥𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸 𑀔𑁄 𑀧𑀦𑁂𑀲 𑀕𑀬𑁆𑀳𑀫𑀸𑀦𑁄 𑀧𑀮𑀸𑀬𑁂𑀬𑁆𑀬𑀸𑀢𑀺 𑀬𑀣𑀸𑀦𑀺𑀧𑀦𑁆𑀦𑀓𑀁𑀬𑁂𑀯 𑀦𑀁 𑀪𑁄𑀕𑁂𑀲𑀼 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀽𑀮𑀸𑀦𑀺 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲𑀸𑀧𑀺 𑀲𑀭𑀻𑀭𑀁 𑀫𑀳𑀦𑁆𑀢𑀁 𑀏𑀓𑀤𑁄𑀡𑀺𑀓𑀦𑀸𑀯𑀧𑁆𑀧𑀫𑀸𑀡𑀁 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀲𑀼𑀫𑀦𑀧𑀼𑀧𑁆𑀨𑀤𑀸𑀫𑀁 𑀯𑀺𑀬 𑀚𑀺𑀜𑁆𑀚𑀼𑀓𑀨𑀮𑀲𑀤𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀚𑀬𑀲𑀼𑀫𑀦𑀧𑀼𑀧𑁆𑀨𑀲𑀤𑀺𑀲𑁂𑀦 𑀘 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑀁 𑀅𑀢𑀺𑀯𑀺𑀬 𑀲𑁄𑀪𑀢𑀺. 𑀲𑁄 𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀚𑀦𑀸𑀦𑀁 𑀧𑀤𑀲𑀤𑁆𑀤𑁂𑀦 𑀪𑁄𑀕𑀦𑁆𑀢𑀭𑀢𑁄 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀭𑀢𑁆𑀢𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀢𑁂 𑀲𑀽𑀮𑀳𑀢𑁆𑀣𑁂 ¶ 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀸𑀦𑀁 𑀤𑀸𑀦𑀫𑀼𑀔𑁂 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 ‘‘𑀇𑀫𑁂 𑀫𑀫 𑀲𑀭𑀻𑀭𑀁 𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀭𑁄𑀦𑁆𑀢𑁂 𑀦 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀔𑀡𑁆𑀟𑀪𑀬𑁂𑀦 𑀤𑀴𑁆𑀳𑀁 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀲𑀁 𑀪𑁄𑀕𑀦𑁆𑀢𑀭𑁂 𑀏𑀯 𑀧𑀯𑁂𑀲𑁂𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀅𑀣 𑀦𑀁 𑀢𑁂 𑀉𑀧𑀕𑀦𑁆𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀢𑀺𑀔𑀺𑀡𑀲𑀽𑀮𑁂𑀳𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀺𑀚𑁆𑀛𑀺𑀢𑁆𑀯𑀸 𑀲𑀓𑀡𑁆𑀝𑀓𑀸 𑀓𑀸𑀴𑀯𑁂𑀢𑁆𑀢𑀬𑀝𑁆𑀞𑀺𑀬𑁄 𑀧𑀳𑀸𑀭𑀫𑀼𑀔𑁂𑀳𑀺 𑀧𑀯𑁂𑀲𑁂𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀓𑀸𑀚𑁂𑀳𑀺 𑀆𑀤𑀸𑀬 𑀫𑀳𑀸𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀲𑀽𑀮𑁂𑀳𑀺 𑀯𑀺𑀚𑁆𑀛𑀦𑀢𑁄 𑀧𑀝𑁆𑀞𑀸𑀬 𑀏𑀓𑀝𑁆𑀞𑀸𑀦𑁂𑀧𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀢𑁂 𑀦 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀅𑀝𑁆𑀞𑀳𑀺 𑀓𑀸𑀚𑁂𑀳𑀺 𑀆𑀤𑀸𑀬 𑀦𑀻𑀬𑀫𑀸𑀦𑀲𑁆𑀲 𑀲𑀻𑀲𑀁 𑀑𑀮𑀫𑁆𑀩𑀺𑀢𑁆𑀯𑀸 𑀪𑀽𑀫𑀺𑀁 𑀧𑀳𑀭𑀢𑀺 ¶ . 𑀅𑀣 𑀦𑀁 ‘‘𑀲𑀻𑀲𑀫𑀲𑁆𑀲 𑀑𑀮𑀫𑁆𑀩𑀢𑀻’’𑀢𑀺 𑀫𑀳𑀸𑀫𑀕𑁆𑀕𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀼𑀔𑀼𑀫𑁂𑀦 𑀲𑀽𑀮𑁂𑀦 𑀦𑀸𑀲𑀸𑀧𑀼𑀝𑁂 𑀯𑀺𑀚𑁆𑀛𑀺𑀢𑁆𑀯𑀸 𑀭𑀚𑁆𑀚𑀼𑀓𑀁 𑀧𑀯𑁂𑀲𑁂𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀚𑀓𑁄𑀝𑀺𑀬𑀁 𑀮𑀕𑁆𑀕𑁂𑀢𑁆𑀯𑀸 𑀧𑀼𑀦𑀧𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁮.

‘‘𑀅𑀤𑁆𑀤𑀲𑀁𑀲𑀼 ¶ 𑀪𑁄𑀚𑀧𑀼𑀢𑁆𑀢𑀸, 𑀔𑀭𑀸 𑀮𑀼𑀤𑁆𑀤𑀸 𑀅𑀓𑀸𑀭𑀼𑀡𑀸;

𑀉𑀧𑀕𑀜𑁆𑀙𑀼𑀁 𑀫𑀫𑀁 𑀢𑀢𑁆𑀣, 𑀤𑀡𑁆𑀟𑀫𑀼𑀕𑁆𑀕𑀭𑀧𑀸𑀡𑀺𑀦𑁄.

𑁮𑁯.

‘‘𑀦𑀸𑀲𑀸𑀬 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸, 𑀦𑀗𑁆𑀕𑀼𑀝𑁆𑀞𑁂 𑀧𑀺𑀝𑁆𑀞𑀺𑀓𑀡𑁆𑀝𑀓𑁂;

𑀓𑀸𑀚𑁂 𑀆𑀭𑁄𑀧𑀬𑀺𑀢𑁆𑀯𑀸𑀦, 𑀪𑁄𑀚𑀧𑀼𑀢𑁆𑀢𑀸 𑀳𑀭𑀺𑀁𑀲𑀼 𑀫’’𑀦𑁆𑀢𑀺.

𑀢𑀢𑁆𑀣 𑀪𑁄𑀚𑀧𑀼𑀢𑁆𑀢𑀸𑀢𑀺 𑀮𑀼𑀤𑁆𑀤𑀧𑀼𑀢𑁆𑀢𑀸. 𑀔𑀭𑀸𑀢𑀺 𑀓𑀓𑁆𑀔𑀴𑀸, 𑀨𑀭𑀼𑀲𑀓𑀸𑀬𑀯𑀘𑀻𑀓𑀫𑁆𑀫𑀦𑁆𑀢𑀸. 𑀮𑀼𑀤𑁆𑀤𑀸𑀢𑀺 𑀤𑀸𑀭𑀼𑀡𑀸, 𑀖𑁄𑀭𑀫𑀸𑀦𑀲𑀸. 𑀅𑀓𑀸𑀭𑀼𑀡𑀸𑀢𑀺 𑀦𑀺𑀓𑁆𑀓𑀭𑀼𑀡𑀸. 𑀤𑀡𑁆𑀟𑀫𑀼𑀕𑁆𑀕𑀭𑀧𑀸𑀡𑀺𑀦𑁄𑀢𑀺 𑀘𑀢𑀼𑀭𑀲𑁆𑀲𑀤𑀡𑁆𑀟𑀳𑀢𑁆𑀣𑀸. 𑀦𑀸𑀲𑀸𑀬 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀭𑀚𑁆𑀚𑀼𑀓𑀁 𑀧𑀯𑁂𑀲𑁂𑀢𑀼𑀁 𑀲𑀼𑀔𑀼𑀫𑁂𑀦 𑀲𑀽𑀮𑁂𑀦 𑀦𑀸𑀲𑀸𑀧𑀼𑀝𑁂 𑀯𑀺𑀚𑁆𑀛𑀺𑀢𑁆𑀯𑀸. 𑀦𑀗𑁆𑀕𑀼𑀝𑁆𑀞𑁂 𑀧𑀺𑀝𑁆𑀞𑀺𑀓𑀡𑁆𑀝𑀓𑁂𑀢𑀺 𑀦𑀗𑁆𑀕𑀼𑀝𑁆𑀞𑀧𑁆𑀧𑀤𑁂𑀲𑁂 𑀢𑀢𑁆𑀣 𑀢𑀢𑁆𑀣 𑀧𑀺𑀝𑁆𑀞𑀺𑀓𑀡𑁆𑀝𑀓𑀲𑀫𑀻𑀧𑁂 𑀘 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀚𑁂 𑀆𑀭𑁄𑀧𑀬𑀺𑀢𑁆𑀯𑀸𑀦𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀩𑀤𑁆𑀥𑁂𑀲𑀼 𑀅𑀝𑁆𑀞𑀲𑀼 𑀯𑁂𑀢𑁆𑀢𑀮𑀢𑀸𑀫𑀡𑁆𑀟𑀮𑁂𑀲𑀼 ¶ 𑀏𑀓𑁂𑀓𑀲𑁆𑀫𑀺𑀁 𑀑𑀯𑀺𑀚𑁆𑀛𑀺𑀢𑀁 𑀏𑀓𑁂𑀓𑀁 𑀓𑀸𑀚𑀁 𑀤𑁆𑀯𑁂 𑀤𑁆𑀯𑁂 𑀪𑁄𑀚𑀧𑀼𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀔𑀦𑁆𑀥𑀁 𑀆𑀭𑁄𑀧𑁂𑀢𑁆𑀯𑀸.

𑁯𑁦. 𑀲𑀲𑀸𑀕𑀭𑀦𑁆𑀢𑀁 𑀧𑀣𑀯𑀺𑀦𑁆𑀢𑀺 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀫𑀳𑀸𑀧𑀣𑀯𑀺𑀁. 𑀲𑀓𑀸𑀦𑀦𑀁 𑀲𑀧𑀩𑁆𑀩𑀢𑀦𑁆𑀢𑀺 𑀲𑀤𑁆𑀥𑀺𑀁 𑀓𑀸𑀦𑀦𑁂𑀳𑀺 𑀧𑀩𑁆𑀩𑀢𑁂𑀳𑀺 𑀘𑀸𑀢𑀺 𑀲𑀓𑀸𑀦𑀦𑀁 𑀲𑀧𑀩𑁆𑀩𑀢𑀜𑁆𑀘. 𑀦𑀸𑀲𑀸𑀯𑀸𑀢𑁂𑀦 𑀛𑀸𑀧𑀬𑁂𑀢𑀺 𑀲𑀘𑀸𑀳𑀁 𑀇𑀘𑁆𑀙𑀫𑀸𑀦𑁄 𑀇𑀘𑁆𑀙𑀦𑁆𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁, 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀲𑀓𑀸𑀦𑀦𑀁 𑀲𑀧𑀩𑁆𑀩𑀢𑀁 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀛𑀸𑀧𑁂𑀬𑁆𑀬𑀁, 𑀲𑀳 𑀦𑀸𑀲𑀸𑀯𑀸𑀢𑀯𑀺𑀲𑁆𑀲𑀚𑁆𑀚𑀦𑁂𑀦 𑀙𑀸𑀭𑀺𑀓𑀁 𑀓𑀭𑁂𑀬𑁆𑀬𑀁, 𑀏𑀢𑀸𑀤𑀺𑀲𑁄 𑀢𑀤𑀸 𑀫𑀬𑁆𑀳𑀁 𑀆𑀦𑀼𑀪𑀸𑀯𑁄.

𑁯𑁧. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀽𑀮𑁂𑀳𑀺 𑀯𑀺𑀦𑀺𑀯𑀺𑀚𑁆𑀛𑀦𑁆𑀢𑁂, 𑀓𑁄𑀝𑁆𑀝𑀬𑀦𑁆𑀢𑁂𑀧𑀺 𑀲𑀢𑁆𑀢𑀺𑀪𑀺. 𑀪𑁄𑀚𑀧𑀼𑀢𑁆𑀢𑁂 𑀦 𑀓𑀼𑀧𑁆𑀧𑀸𑀫𑀻𑀢𑀺 𑀤𑀼𑀩𑁆𑀩𑀮𑀪𑀸𑀯𑀓𑀭𑀡𑀢𑁆𑀣𑀁 𑀯𑁂𑀢𑁆𑀢𑀮𑀢𑀸𑀧𑀯𑁂𑀲𑀦𑀢𑁆𑀣𑀜𑁆𑀘 𑀲𑀸𑀭𑀤𑀸𑀭𑀽𑀳𑀺 𑀢𑀘𑁆𑀙𑁂𑀢𑁆𑀯𑀸 𑀓𑀢𑁂𑀳𑀺 𑀢𑀺𑀔𑀺𑀡𑀲𑀽𑀮𑁂𑀳𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀺𑀚𑁆𑀛𑀦𑁆𑀢𑁂𑀧𑀺 𑀤𑀼𑀩𑁆𑀩𑀮𑀪𑀸𑀯𑀓𑀭𑀡𑀢𑁆𑀣𑀁 𑀢𑀺𑀔𑀺𑀡𑀸𑀳𑀺 𑀲𑀢𑁆𑀢𑀻𑀳𑀺 𑀢𑀳𑀺𑀁 𑀢𑀳𑀺𑀁 𑀓𑁄𑀝𑁆𑀝𑀬𑀦𑁆𑀢𑁂𑀧𑀺 𑀪𑁄𑀚𑀧𑀼𑀢𑁆𑀢𑀸𑀦𑀁 𑀮𑀼𑀤𑁆𑀤𑀸𑀦𑀁 𑀦 𑀓𑀼𑀧𑁆𑀧𑀸𑀫𑀺. 𑀏𑀲𑀸 𑀫𑁂 𑀲𑀻𑀮𑀧𑀸𑀭𑀫𑀻𑀢𑀺 𑀏𑀯𑀁 𑀫𑀳𑀸𑀦𑀼𑀪𑀸𑀯𑀲𑁆𑀲 𑀢𑀣𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀬𑀸 𑀫𑁂 𑀫𑀬𑁆𑀳𑀁 𑀲𑀻𑀮𑀔𑀡𑁆𑀟𑀪𑀬𑁂𑀦 𑀢𑁂𑀲𑀁 ¶ 𑀅𑀓𑀼𑀚𑁆𑀛𑀦𑀸, 𑀏𑀲𑀸 𑀏𑀓𑀦𑁆𑀢𑁂𑀦𑁂𑀯 𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀪𑀸𑀯𑁂𑀦 𑀧𑀯𑀢𑁆𑀢𑀸 𑀫𑀬𑁆𑀳𑀁 𑀲𑀻𑀮𑀧𑀸𑀭𑀫𑀻, 𑀲𑀻𑀮𑀯𑀲𑁂𑀦 𑀧𑀭𑀫𑀢𑁆𑀣𑀧𑀸𑀭𑀫𑀻𑀢𑀺 𑀅𑀢𑁆𑀣𑁄.

𑀢𑀣𑀸 𑀧𑀦 𑀩𑁄𑀥𑀺𑀲𑀢𑁆𑀢𑁂 𑀢𑁂𑀳𑀺 𑀦𑀻𑀬𑀫𑀸𑀦𑁂 𑀫𑀺𑀣𑀺𑀮𑀦𑀕𑀭𑀯𑀸𑀲𑀻 𑀆𑀴𑀸𑀭𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀧𑀜𑁆𑀘𑀲𑀓𑀝𑀲𑀢𑀸𑀦𑀺 𑀆𑀤𑀸𑀬 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑁂 𑀪𑁄𑀚𑀧𑀼𑀢𑁆𑀢𑁂 𑀫𑀳𑀸𑀲𑀢𑁆𑀢𑀁 𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂 𑀮𑀼𑀤𑁆𑀤𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀲𑁆𑀲𑀸𑀬𑀁 𑀦𑀸𑀕𑁄 𑀦𑀻𑀬𑀢𑀺, 𑀦𑁂𑀢𑁆𑀯𑀸 𑀘𑀺𑀫𑀁 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀢𑁂 ‘‘𑀇𑀫𑀲𑁆𑀲 𑀦𑀸𑀕𑀲𑁆𑀲 𑀫𑀁𑀲𑀁 𑀲𑀸𑀤𑀼𑀜𑁆𑀘 𑀫𑀼𑀤𑀼𑀜𑁆𑀘 𑀣𑀽𑀮𑀜𑁆𑀘 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀲𑁄 𑀢𑁂𑀲𑀁 𑀲𑁄𑀴𑀲𑀯𑀸𑀳𑀕𑁄𑀡𑁂 𑀧𑀲𑀢𑀁 𑀧𑀲𑀢𑀁 𑀲𑀼𑀯𑀡𑁆𑀡𑀫𑀸𑀲𑀓𑁂 𑀲𑀩𑁆𑀩𑁂𑀲𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 ¶ 𑀪𑀭𑀺𑀬𑀸𑀦𑀫𑁆𑀧𑀺 𑀢𑁂𑀲𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀤𑀢𑁆𑀯𑀸 ‘‘𑀲𑀫𑁆𑀫𑀸, 𑀅𑀬𑀁 𑀫𑀳𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀸, 𑀅𑀢𑁆𑀢𑀦𑁄 𑀲𑀻𑀮𑀕𑀼𑀡𑁂𑀦 𑀢𑀼𑀫𑁆𑀳𑀸𑀓𑀁 𑀦 𑀤𑀼𑀩𑁆𑀪𑀺, 𑀇𑀫𑀁 𑀓𑀺𑀮𑀫𑀦𑁆𑀢𑁂𑀳𑀺 𑀩𑀳𑀼𑀁 𑀢𑀼𑀫𑁆𑀳𑁂𑀳𑀺 𑀅𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀫𑀦𑀸𑀧𑁄 𑀪𑀓𑁆𑀔𑁄, 𑀩𑀳𑀽 𑀘 𑀦𑁄 𑀉𑀭𑀕𑀸 𑀪𑀼𑀢𑁆𑀢𑀧𑀼𑀩𑁆𑀩𑀸, 𑀢𑀣𑀸𑀧𑀺 𑀢𑀯 𑀯𑀘𑀦𑀁 𑀅𑀫𑁆𑀳𑁂𑀳𑀺 𑀧𑀽𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 ¶ 𑀇𑀫𑀁 𑀦𑀸𑀕𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑀸𑀬 𑀢𑀸 𑀓𑀡𑁆𑀝𑀓𑀸𑀘𑀺𑀢𑀸 𑀆𑀯𑀼𑀢𑀸 𑀓𑀸𑀴𑀯𑁂𑀢𑁆𑀢𑀮𑀢𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀆𑀭𑀪𑀺𑀁𑀲𑀼.

𑀅𑀣 𑀲𑁄 𑀦𑀸𑀕𑀭𑀸𑀚𑀸𑀦𑀁 𑀓𑀺𑀮𑀫𑀦𑁆𑀢𑀁 𑀤𑀺𑀲𑁆𑀯𑀸 𑀅𑀓𑀺𑀮𑀫𑁂𑀦𑁆𑀢𑁄𑀯 𑀅𑀲𑀺𑀦𑀸 𑀮𑀢𑀸 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀭𑀓𑀸𑀦𑀁 𑀓𑀡𑁆𑀡𑀯𑁂𑀥𑀢𑁄 𑀧𑀝𑀺𑀳𑀭𑀡𑀦𑀺𑀬𑀸𑀫𑁂𑀦 𑀅𑀤𑀼𑀓𑁆𑀔𑀸𑀧𑁂𑀦𑁆𑀢𑁄 𑀲𑀡𑀺𑀓𑀁 𑀦𑀻𑀳𑀭𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀪𑁄𑀚𑀧𑀼𑀢𑁆𑀢𑀸 𑀬𑀁 𑀩𑀦𑁆𑀥𑀦𑀁 𑀢𑀲𑁆𑀲 𑀦𑀢𑁆𑀣𑀼𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑀝𑀺𑀫𑀼𑀓𑁆𑀓𑀁, 𑀢𑀁 𑀩𑀦𑁆𑀥𑀦𑀁 𑀲𑀡𑀺𑀓𑀁 𑀫𑁄𑀘𑀬𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀫𑀼𑀳𑀼𑀢𑁆𑀢𑀁 𑀧𑀸𑀘𑀻𑀦𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀆𑀴𑀸𑀭𑀁 𑀑𑀮𑁄𑀓𑁂𑀲𑀺. 𑀮𑀼𑀤𑁆𑀤𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀉𑀭𑀕𑁄 𑀤𑀼𑀩𑁆𑀩𑀮𑁄, 𑀫𑀢𑀓𑀸𑀮𑁂 𑀕𑀳𑁂𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀮𑀻𑀬𑀺𑀁𑀲𑀼. 𑀆𑀴𑀸𑀭𑁄 𑀫𑀳𑀸𑀲𑀢𑁆𑀢𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀕𑀘𑁆𑀙𑁂𑀯 𑀔𑁄 𑀢𑁆𑀯𑀁, 𑀫𑀳𑀸𑀦𑀸𑀕, 𑀫𑀸 𑀢𑀁 𑀮𑀼𑀤𑁆𑀤𑀸 𑀧𑀼𑀦 𑀕𑀳𑁂𑀲𑀼’’𑀦𑁆𑀢𑀺 𑀯𑀤𑀦𑁆𑀢𑁄 𑀣𑁄𑀓𑀁 𑀢𑀁 𑀦𑀸𑀕𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀴𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀕𑀪𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 𑀢𑀻𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀳𑀦𑁆𑀢𑀫𑀲𑁆𑀲 𑀬𑀲𑀁 𑀤𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀆𑀴𑀸𑀭𑁄 𑀦𑀸𑀕𑀪𑀯𑀦𑁂 𑀏𑀓𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀤𑀺𑀩𑁆𑀩𑁂 ¶ 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀇𑀘𑁆𑀙𑀸𑀫𑀳𑀁, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 𑀦𑀸𑀕𑀭𑀸𑀚𑀲𑁆𑀲 𑀓𑀣𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑀸 𑀲𑀫𑀸𑀕𑀢𑁄 𑀢𑁂𑀦 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀲𑀦𑁆𑀦𑁂𑀦 ‘‘𑀢𑁆𑀯𑀁 𑀉𑀴𑀸𑀭𑀪𑁄𑀕𑀸 𑀫𑀜𑁆𑀜𑁂 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀮𑀼𑀤𑁆𑀤𑀸𑀦𑀁 𑀳𑀢𑁆𑀣𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀸𑀧𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸 𑁋

‘‘𑀤𑀺𑀝𑁆𑀞𑀸 𑀫𑀬𑀸 𑀫𑀸𑀦𑀼𑀲𑀓𑀸𑀧𑀺 𑀓𑀸𑀫𑀸, 𑀅𑀲𑀲𑁆𑀲𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸;

𑀆𑀤𑀻𑀦𑀯𑀁 ¶ 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀲𑀤𑁆𑀥𑀸𑀬𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺, 𑀭𑀸𑀚.

‘‘𑀤𑀼𑀫𑀧𑁆𑀨𑀮𑀸𑀦𑀻𑀯 ¶ 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀤𑁆𑀥𑀸 𑀘 𑀲𑀭𑀻𑀭𑀪𑁂𑀤𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄’’𑀢𑀺. (𑀚𑀸. 𑁨.𑁧𑁭.𑁧𑁯𑁧-𑁧𑁯𑁨) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑁋

‘‘𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀦𑀸𑀕𑀜𑁆𑀘 𑀲𑀼𑀢𑁆𑀯𑀸𑀦 𑀢𑀯𑀜𑁆𑀘𑀴𑀸𑀭, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺. (𑀚𑀸. 𑁨.𑁧𑁭.𑁧𑁯𑁩) 𑁋

𑀆𑀳.

𑀅𑀣𑀲𑁆𑀲 𑀢𑀸𑀧𑀲𑁄 𑁋

‘‘𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀦𑀸𑀕𑀜𑁆𑀘 𑀲𑀼𑀢𑁆𑀯𑀸𑀦 𑀫𑀫𑀜𑁆𑀘 𑀭𑀸𑀚, 𑀓𑀭𑁄𑀳𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺. (𑀚𑀸. 𑁨.𑁧𑁭.𑁧𑁯𑁪) 𑁋

𑀏𑀯𑀁 ¶ 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀢𑁆𑀣𑁂𑀯 𑀘𑀢𑁆𑀢𑀸𑀭𑁄 𑀯𑀲𑁆𑀲𑀸𑀦𑀫𑀸𑀲𑁂 𑀯𑀲𑀺𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀬𑀸𑀯𑀚𑀻𑀯𑀁 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀸𑀯𑀚𑀻𑀯𑀁 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺. 𑀲𑁄𑀧𑀺 𑀭𑀸𑀚𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀢𑀤𑀸 𑀆𑀴𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀲𑀭𑀻𑀭𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀧𑀸𑀭𑀫𑀻, 𑀢𑀣𑀸𑀭𑀽𑀧𑁂𑀦𑀧𑀺 𑀯𑀺𑀲𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀢𑀣𑀸𑀭𑀽𑀧𑀸𑀬𑀧𑀺 𑀧𑀻𑀴𑀸𑀬 𑀲𑀢𑀺 𑀲𑀻𑀮𑀲𑁆𑀲 𑀅𑀪𑀺𑀦𑁆𑀦𑀢𑀸 𑀲𑀻𑀮𑀧𑀸𑀭𑀫𑀻, 𑀤𑁂𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀪𑁄𑀕𑀁 𑀧𑀳𑀸𑀬 𑀦𑀸𑀕𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀓𑀭𑀡𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, ‘‘𑀤𑀸𑀦𑀸𑀤𑀺𑀅𑀢𑁆𑀣𑀁 𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 ¶ 𑀲𑀁𑀯𑀺𑀤𑀳𑀦𑀁 𑀧𑀜𑁆𑀜𑀸𑀧𑀸𑀭𑀫𑀻, 𑀓𑀸𑀫𑀯𑀺𑀢𑀓𑁆𑀓𑀯𑀺𑀦𑁄𑀤𑀦𑀁 𑀅𑀥𑀺𑀯𑀸𑀲𑀦𑀯𑀻𑀭𑀺𑀬𑀜𑁆𑀘 𑀯𑀻𑀭𑀺𑀬𑀧𑀸𑀭𑀫𑀻, 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀔𑀦𑁆𑀢𑀺𑀧𑀸𑀭𑀫𑀻, 𑀲𑀘𑁆𑀘𑀲𑀫𑀸𑀤𑀸𑀦𑀁 𑀲𑀘𑁆𑀘𑀧𑀸𑀭𑀫𑀻, 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁 ¶ 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀪𑁄𑀚𑀧𑀼𑀢𑁆𑀢𑁂 𑀉𑀧𑀸𑀤𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀪𑀸𑀯𑁄 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀯𑁂𑀤𑀦𑀸𑀬 𑀲𑀢𑁆𑀢𑀲𑀗𑁆𑀔𑀸𑀭𑀓𑀢𑀯𑀺𑀧𑁆𑀧𑀓𑀸𑀭𑁂𑀲𑀼 𑀘 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀏𑀯𑀁 𑀤𑀲 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺. 𑀲𑀻𑀮𑀧𑀸𑀭𑀫𑀻 𑀧𑀦 𑀅𑀢𑀺𑀲𑀬𑀯𑀢𑀻𑀢𑀺 𑀓𑀢𑁆𑀯𑀸 𑀲𑀸 𑀏𑀯 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸. 𑀢𑀣𑀸 𑀇𑀥 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 ‘‘𑀬𑁄𑀚𑀦𑀲𑀢𑀺𑀓𑁂 𑀦𑀸𑀕𑀪𑀯𑀦𑀝𑁆𑀞𑀸𑀦𑁂’’𑀢𑀺𑀆𑀤𑀺𑀦𑀸 𑀪𑀽𑀭𑀺𑀤𑀢𑁆𑀢𑀘𑀭𑀺𑀬𑀸𑀬𑀁 (𑀘𑀭𑀺𑀬𑀸. 𑁨.𑁧𑁧 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀭𑀳𑀁 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀲𑀗𑁆𑀔𑀧𑀸𑀮𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀢𑁂𑀢𑀺 𑀬𑁂 𑀳𑀢𑁆𑀣𑀺𑀦𑀸𑀕𑀘𑀭𑀺𑀬𑀸𑀤𑀬𑁄 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀦𑀺𑀤𑁆𑀤𑀺𑀝𑁆𑀞𑀸 𑀅𑀦𑀦𑁆𑀢𑀭𑀕𑀸𑀣𑀸𑀬 𑀘 ‘‘𑀳𑀢𑁆𑀣𑀺𑀦𑀸𑀕𑁄 𑀪𑀽𑀭𑀺𑀤𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀉𑀤𑁆𑀤𑀸𑀦𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸 𑀦𑀯 𑀘𑀭𑀺𑀬𑀸, 𑀢𑁂 𑀲𑀩𑁆𑀩𑁂 𑀯𑀺𑀲𑁂𑀲𑀢𑁄 𑀲𑀻𑀮𑀧𑀸𑀭𑀫𑀺𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑀻𑀮𑀁 𑀩𑀮𑀁 𑀏𑀢𑁂𑀲𑀦𑁆𑀢𑀺 𑀲𑀻𑀮𑀩𑀮𑀸. 𑀲𑀻𑀮𑀲𑁆𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀪𑀽𑀢𑀲𑁆𑀲 𑀧𑀭𑀺𑀓𑁆𑀔𑀭𑀡𑀢𑁄 𑀲𑀦𑁆𑀢𑀸𑀦𑀲𑁆𑀲 𑀘 𑀧𑀭𑀺𑀪𑀸𑀯𑀦𑀸𑀯𑀲𑁂𑀦 𑀅𑀪𑀺𑀲𑀗𑁆𑀔𑀭𑀡𑀢𑁄 𑀧𑀭𑀺𑀓𑁆𑀔𑀸𑀭𑀸. 𑀉𑀓𑁆𑀓𑀁𑀲𑀕𑀢𑀸𑀬 𑀲𑀻𑀮𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑀸 𑀅𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀧𑀤𑁂𑀲𑁄 𑀏𑀢𑁂𑀲𑀁 𑀅𑀢𑁆𑀣𑀺, 𑀦 𑀦𑀺𑀧𑁆𑀧𑀤𑁂𑀲𑁄𑀢𑀺 𑀧𑀤𑁂𑀲𑀺𑀓𑀸 𑀲𑀧𑁆𑀧𑀤𑁂𑀲𑀸. 𑀓𑀲𑁆𑀫𑀸𑀢𑀺 𑀘𑁂? 𑀆𑀳 ‘‘𑀚𑀻𑀯𑀺𑀢𑀁 𑀧𑀭𑀺𑀭𑀓𑁆𑀔𑀺𑀢𑁆𑀯𑀸, 𑀲𑀻𑀮𑀸𑀦𑀺 𑀅𑀦𑀼𑀭𑀓𑁆𑀔𑀺𑀲’’𑀦𑁆𑀢𑀺, 𑀬𑀲𑁆𑀫𑀸 𑀏𑀢𑁂𑀲𑀼 𑀳𑀢𑁆𑀣𑀺𑀦𑀸𑀕𑀘𑀭𑀺𑀬𑀸𑀤𑀻𑀲𑀼 (𑀘𑀭𑀺𑀬𑀸. 𑁨.𑁧 𑀆𑀤𑀬𑁄) 𑀅𑀳𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀏𑀓𑀤𑁂𑀲𑁂𑀦 ¶ 𑀧𑀭𑀺𑀭𑀓𑁆𑀔𑀺𑀢𑁆𑀯𑀸𑀯 𑀲𑀻𑀮𑀸𑀦𑀺 𑀅𑀦𑀼𑀭𑀓𑁆𑀔𑀺𑀁, 𑀚𑀻𑀯𑀺𑀢𑀁 𑀦 𑀲𑀩𑁆𑀩𑀣𑀸 𑀧𑀭𑀺𑀘𑁆𑀘𑀚𑀺𑀁, 𑀏𑀓𑀦𑁆𑀢𑁂𑀦𑁂𑀯 𑀧𑀦 𑀲𑀗𑁆𑀔𑀧𑀸𑀮𑀲𑁆𑀲 𑀫𑁂 𑀲𑀢𑁄 𑀲𑀩𑁆𑀩𑀓𑀸𑀮𑀫𑁆𑀧𑀺 𑀚𑀻𑀯𑀺𑀢𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀬𑁆𑀬𑀢𑁆𑀢𑀁, 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀲𑁆𑀲 𑀧𑀦 𑀫𑁂 𑀫𑀳𑀸𑀦𑀼𑀪𑀸𑀯𑀲𑁆𑀲 𑀉𑀕𑁆𑀕𑀯𑀺𑀲𑀢𑁂𑀚𑀲𑁆𑀲 𑀲𑀢𑁄 𑀲𑀫𑀸𑀦𑀲𑁆𑀲 𑀲𑀩𑁆𑀩𑀓𑀸𑀮𑀫𑁆𑀧𑀺 𑀢𑁂𑀳𑀺 𑀮𑀼𑀤𑁆𑀤𑁂𑀳𑀺 𑀲𑀫𑀸𑀕𑀫𑁂 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀧𑀘𑁆𑀙𑀸𑀧𑀺 𑀲𑀢𑁄 𑀏𑀯𑀁 𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀻𑀮𑀸𑀦𑀼𑀭𑀓𑁆𑀔𑀡𑀢𑁆𑀣𑀫𑁂𑀯 𑀚𑀻𑀯𑀺𑀢𑀁 𑀏𑀓𑀁𑀲𑁂𑀦𑁂𑀯 𑀦𑀺𑀬𑁆𑀬𑀢𑁆𑀢𑀁 𑀦𑀻𑀬𑀸𑀢𑀺𑀢𑀁 𑀤𑀸𑀦𑀫𑀼𑀔𑁂 𑀦𑀺𑀲𑁆𑀲𑀝𑁆𑀞𑀁, 𑀢𑀲𑁆𑀫𑀸 𑀲𑀸 𑀲𑀻𑀮𑀧𑀸𑀭𑀫𑀻𑀢𑀺 𑀬𑀲𑁆𑀫𑀸 𑀘𑁂𑀢𑀤𑁂𑀯𑀁, 𑀢𑀲𑁆𑀫𑀸 𑀢𑁂𑀦 𑀓𑀸𑀭𑀡𑁂𑀦 𑀲𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀪𑀸𑀯𑀁 𑀧𑀢𑁆𑀢𑀸 𑀫𑀬𑁆𑀳𑀁 𑀲𑀻𑀮𑀧𑀸𑀭𑀫𑀻𑀢𑀺 𑀤𑀲𑁆𑀲𑁂𑀢𑀻𑀢𑀺.

𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀘𑀭𑀺𑀬𑀸𑀧𑀺𑀝𑀓𑀲𑀁𑀯𑀡𑁆𑀡𑀦𑀸𑀬

𑀤𑀲𑀯𑀺𑀥𑀘𑀭𑀺𑀬𑀸𑀲𑀗𑁆𑀕𑀳𑀲𑁆𑀲 𑀯𑀺𑀲𑁂𑀲𑀢𑁄

𑀲𑀻𑀮𑀧𑀸𑀭𑀫𑀺𑀯𑀺𑀪𑀸𑀯𑀦𑀲𑁆𑀲

𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀬𑀼𑀥𑀜𑁆𑀚𑀬𑀯𑀕𑁆𑀕𑁄

𑁧. 𑀬𑀼𑀥𑀜𑁆𑀚𑀬𑀘𑀭𑀺𑀬𑀸𑀯𑀡𑁆𑀡𑀦𑀸

𑁧. 𑀢𑀢𑀺𑀬𑀯𑀕𑁆𑀕𑀲𑁆𑀲 ¶ ¶ ¶ 𑀧𑀞𑀫𑁂 𑀅𑀫𑀺𑀢𑀬𑀲𑁄𑀢𑀺 𑀅𑀧𑀭𑀺𑀫𑀺𑀢𑀧𑀭𑀺𑀯𑀸𑀭𑀯𑀺𑀪𑀯𑁄. 𑀭𑀸𑀚𑀧𑀼𑀢𑁆𑀢𑁄 𑀬𑀼𑀥𑀜𑁆𑀚𑀬𑁄𑀢𑀺 𑀭𑀫𑁆𑀫𑀦𑀕𑀭𑁂 𑀲𑀩𑁆𑀩𑀤𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀦𑀸𑀫𑁂𑀦 𑀬𑀼𑀥𑀜𑁆𑀚𑀬𑁄 𑀦𑀸𑀫.

𑀅𑀬𑀜𑁆𑀳𑀺 𑀩𑀸𑀭𑀸𑀡𑀲𑀻 𑀉𑀤𑀬𑀚𑀸𑀢𑀓𑁂 (𑀚𑀸. 𑁧.𑁧𑁧.𑁩𑁭 𑀆𑀤𑀬𑁄) 𑀲𑀼𑀭𑀼𑀦𑁆𑀥𑀦𑀦𑀕𑀭𑀁 𑀦𑀸𑀫 𑀚𑀸𑀢𑀸. 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑁂 (𑀚𑀸. 𑁨.𑁧𑁭.𑁧𑁯𑁫 𑀆𑀤𑀬𑁄) 𑀲𑀼𑀤𑀲𑁆𑀲𑀦𑀁 𑀦𑀸𑀫, 𑀲𑁄𑀡𑀦𑀦𑁆𑀤𑀚𑀸𑀢𑀓𑁂 (𑀚𑀸. 𑁨.𑁨𑁦.𑁯𑁨 𑀆𑀤𑀬𑁄) 𑀩𑁆𑀭𑀳𑁆𑀫𑀯𑀟𑁆𑀠𑀦𑀁 𑀦𑀸𑀫, 𑀔𑀡𑁆𑀟𑀳𑀸𑀮𑀚𑀸𑀢𑀓𑁂(𑀚𑀸. 𑁨.𑁨𑁨.𑁯𑁮𑁨 𑀆𑀤𑀬𑁄) 𑀧𑀼𑀧𑁆𑀨𑀯𑀢𑀻 𑀦𑀸𑀫, 𑀇𑀫𑀲𑁆𑀫𑀺𑀁 𑀧𑀦 𑀬𑀼𑀥𑀜𑁆𑀚𑀬𑀚𑀸𑀢𑀓𑁂 (𑀚𑀸. 𑁧.𑁧𑁧.𑁭𑁩 𑀆𑀤𑀬𑁄) 𑀭𑀫𑁆𑀫𑀦𑀕𑀭𑀁 𑀦𑀸𑀫 𑀅𑀳𑁄𑀲𑀺, 𑀏𑀯𑀫𑀲𑁆𑀲 𑀓𑀤𑀸𑀘𑀺 𑀦𑀸𑀫𑀁 𑀧𑀭𑀺𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀸𑀚𑀧𑀼𑀢𑁆𑀢𑁄𑀢𑀺 𑀭𑀫𑁆𑀫𑀦𑀕𑀭𑁂 𑀲𑀩𑁆𑀩𑀤𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀢𑁆𑀢𑁄’’𑀢𑀺. 𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀧𑀼𑀢𑁆𑀢𑀲𑀳𑀲𑁆𑀲𑀁 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀚𑁂𑀝𑁆𑀞𑀧𑀼𑀢𑁆𑀢𑁄, 𑀢𑀲𑁆𑀲 𑀭𑀸𑀚𑀸 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀲𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀭𑀣𑀯𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀯𑀺𑀪𑀯𑁂𑀦 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀕𑁆𑀕𑀢𑀺𑀡𑀕𑁆𑀕𑀲𑀸𑀔𑀕𑁆𑀕𑀫𑀓𑁆𑀓𑀝𑀓𑀲𑀼𑀢𑁆𑀢𑀚𑀸𑀮𑀸𑀤𑀻𑀲𑀼 𑀫𑀼𑀢𑁆𑀢𑀸𑀚𑀸𑀮𑀸𑀓𑀸𑀭𑁂𑀦 𑀮𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀽 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀲𑀸𑀭𑀣𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀢𑁂, 𑀤𑁂𑀯, 𑀳𑀺𑀫𑀲𑀫𑀬𑁂 𑀧𑀢𑀦𑀓𑀉𑀲𑁆𑀲𑀸𑀯𑀩𑀺𑀦𑁆𑀤𑀽 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀤𑀺𑀯𑀲𑀪𑀸𑀕𑀁 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀓𑀸𑀮𑁂 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀢𑁂 𑀅𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀲𑀸𑀭𑀣𑀺, 𑀓𑀳𑀁 𑀢𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀽, 𑀦 𑀢𑁂 𑀇𑀤𑀸𑀦𑀺 𑀧𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑁂𑀯, 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 ¶ 𑀲𑀩𑁆𑀩𑁂 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀬𑀣𑀸 𑀇𑀫𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑀗𑁆𑀔𑀸𑀭𑀸𑀧𑀺 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀲𑀤𑀺𑀲𑀸𑀯, 𑀢𑀲𑁆𑀫𑀸 𑀫𑀬𑀸 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀅𑀧𑀻𑀴𑀺𑀢𑁂𑀦𑁂𑀯 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀤𑀺𑀢𑁆𑀢𑁂 𑀯𑀺𑀬 𑀢𑀬𑁄 𑀪𑀯𑁂 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀬 𑀯𑀺𑀦𑀺𑀘𑁆𑀙𑀬𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀫𑁂𑀯 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀁 ¶ ¶ 𑀲𑀽𑀭𑀺𑀬𑀸𑀢𑀧𑁂, 𑀧𑀢𑀺𑀢𑀁 𑀤𑀺𑀲𑁆𑀯𑀸𑀦 𑀲𑀁𑀯𑀺𑀚𑀺𑀁.

𑁨.

‘‘𑀢𑀜𑁆𑀜𑁂𑀯𑀸𑀥𑀺𑀧𑀢𑀺𑀁 𑀓𑀢𑁆𑀯𑀸, 𑀲𑀁𑀯𑁂𑀕𑀫𑀦𑀼𑀩𑁆𑀭𑀽𑀳𑀬𑀺𑀁;

𑀫𑀸𑀢𑀸𑀧𑀺𑀢𑀽 𑀘 𑀯𑀦𑁆𑀤𑀺𑀢𑁆𑀯𑀸, 𑀧𑀩𑁆𑀩𑀚𑁆𑀚𑀫𑀦𑀼𑀬𑀸𑀘𑀳’’𑀦𑁆𑀢𑀺.

𑀢𑀢𑁆𑀣 𑀲𑀽𑀭𑀺𑀬𑀸𑀢𑀧𑁂𑀢𑀺 𑀲𑀽𑀭𑀺𑀬𑀸𑀢𑀧𑀳𑁂𑀢𑀼, 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀦𑀺𑀫𑀺𑀢𑁆𑀢𑀁. ‘‘𑀲𑀽𑀭𑀺𑀬𑀸𑀢𑀧𑁂𑀦𑀸’’𑀢𑀺𑀧𑀺 𑀧𑀸𑀞𑁄. 𑀧𑀢𑀺𑀢𑀁 𑀤𑀺𑀲𑁆𑀯𑀸𑀦𑀸𑀢𑀺 𑀯𑀺𑀦𑀝𑁆𑀞𑀁 𑀧𑀲𑁆𑀲𑀺𑀢𑁆𑀯𑀸, 𑀧𑀼𑀩𑁆𑀩𑁂 𑀭𑀼𑀓𑁆𑀔𑀕𑁆𑀕𑀸𑀤𑀻𑀲𑀼 𑀫𑀼𑀢𑁆𑀢𑀸𑀚𑀸𑀮𑀸𑀤𑀺𑀆𑀓𑀸𑀭𑁂𑀦 𑀮𑀕𑁆𑀕𑀁 𑀳𑀼𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀁 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀯𑀺𑀦𑀝𑁆𑀞𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸. 𑀲𑀁𑀯𑀺𑀚𑀺𑀦𑁆𑀢𑀺 𑀬𑀣𑀸 𑀏𑀢𑀸𑀦𑀺, 𑀏𑀯𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀸𑀦𑀺𑀧𑀺 𑀮𑀳𑀼𑀁 𑀮𑀳𑀼𑀁 𑀪𑀺𑀚𑁆𑀚𑀫𑀸𑀦𑀲𑀪𑀸𑀯𑀸𑀦𑀻𑀢𑀺 𑀅𑀦𑀺𑀘𑁆𑀘𑀢𑀸𑀫𑀦𑀲𑀺𑀓𑀸𑀭𑀯𑀲𑁂𑀦 𑀲𑀁𑀯𑁂𑀕𑀫𑀸𑀧𑀚𑁆𑀚𑀺𑀁.

𑀢𑀜𑁆𑀜𑁂𑀯𑀸𑀥𑀺𑀧𑀢𑀺𑀁 𑀓𑀢𑁆𑀯𑀸, 𑀲𑀁𑀯𑁂𑀕𑀫𑀦𑀼𑀩𑁆𑀭𑀽𑀳𑀬𑀺𑀦𑁆𑀢𑀺 𑀢𑀜𑁆𑀜𑁂𑀯 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀦𑀁 𑀅𑀦𑀺𑀘𑁆𑀘𑀢𑀁 𑀅𑀥𑀺𑀧𑀢𑀺𑀁 𑀫𑀼𑀔𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀢𑀣𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀇𑀢𑁆𑀢𑀭𑀝𑁆𑀞𑀺𑀢𑀺𑀓𑀢𑀁 𑀧𑀭𑀺𑀢𑁆𑀢𑀓𑀸𑀮𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀏𑀓𑀯𑀸𑀭𑀁 𑀉𑀧𑁆𑀧𑀦𑁆𑀦𑀁 𑀲𑀁𑀯𑁂𑀕𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑀦𑁂𑀦 𑀅𑀦𑀼𑀯𑀟𑁆𑀠𑁂𑀲𑀺𑀁. 𑀧𑀩𑁆𑀩𑀚𑁆𑀚𑀫𑀦𑀼𑀬𑀸𑀘𑀳𑀦𑁆𑀢𑀺 ‘‘𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀽 𑀯𑀺𑀬 𑀦 𑀘𑀺𑀭𑀝𑁆𑀞𑀺𑀢𑀺𑀓𑁂 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑁂 𑀫𑀬𑀸 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀅𑀦𑀪𑀺𑀪𑀽𑀢𑁂𑀦𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀬𑀢𑁆𑀣 𑀏𑀢𑀸𑀦𑀺 𑀦 𑀲𑀦𑁆𑀢𑀺, 𑀢𑀁 𑀅𑀫𑀢𑀁 𑀫𑀳𑀸𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀢𑁂 𑀅𑀳𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁. 𑀏𑀯𑀁 𑀫𑀳𑀸𑀲𑀢𑁆𑀢𑁂𑀦 𑀧𑀩𑁆𑀩𑀚𑁆𑀚𑀸𑀬 𑀬𑀸𑀘𑀺𑀢𑀸𑀬 𑀲𑀓𑀮𑀦𑀕𑀭𑁂 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀫𑀳𑁄𑀲𑀺 𑁋 ‘‘𑀉𑀧𑀭𑀸𑀚𑀸 𑀓𑀺𑀭 𑀬𑀼𑀥𑀜𑁆𑀚𑀬𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄’’𑀢𑀺 ¶ .

𑀢𑁂𑀦 𑀘 𑀲𑀫𑀬𑁂𑀦 𑀓𑀸𑀲𑀺𑀭𑀝𑁆𑀞𑀯𑀸𑀲𑀺𑀦𑁄 𑀭𑀸𑀚𑀸𑀦𑀁 𑀤𑀝𑁆𑀞𑀼𑀁 𑀆𑀕𑀦𑁆𑀢𑁆𑀯𑀸 𑀭𑀫𑁆𑀫𑀓𑁂 𑀧𑀝𑀺𑀯𑀲𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀇𑀢𑀺 𑀲𑀧𑀭𑀺𑀲𑁄 𑀭𑀸𑀚𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 𑀤𑁂𑀯𑀻 𑀘 𑀲𑀩𑁆𑀩𑁂 𑀘 𑀑𑀭𑁄𑀥𑀸 𑀫𑀳𑀸𑀲𑀢𑁆𑀢𑀁 ‘‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀓𑀼𑀫𑀸𑀭, 𑀧𑀩𑁆𑀩𑀚𑀻’’𑀢𑀺 𑀦𑀺𑀯𑀸𑀭𑁂𑀲𑀼𑀁. 𑀢𑀢𑁆𑀣 𑀭𑀸𑀚𑀸 ‘‘𑀲𑀘𑁂 𑀢𑁂 𑀓𑀸𑀫𑁂𑀳𑀺 𑀊𑀦𑀁, 𑀅𑀳𑀁 𑀢𑁂 𑀧𑀭𑀺𑀧𑀽𑀭𑀬𑀸𑀫𑀺, 𑀅𑀚𑁆𑀚𑁂𑀯 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. 𑀢𑀲𑁆𑀲 𑀫𑀳𑀸𑀲𑀢𑁆𑀢𑁄 𑁋

‘‘𑀫𑀸 𑀫𑀁 𑀤𑁂𑀯 𑀦𑀺𑀯𑀸𑀭𑁂𑀳𑀺, 𑀧𑀩𑁆𑀩𑀚𑀦𑁆𑀢𑀁 𑀭𑀣𑁂𑀲𑀪;

𑀫𑀸𑀳𑀁 𑀓𑀸𑀫𑁂𑀳𑀺 𑀲𑀫𑁆𑀫𑀢𑁆𑀢𑁄, 𑀚𑀭𑀸𑀬 𑀯𑀲𑀫𑀦𑁆𑀯𑀕𑀽’’𑀢𑀺. (𑀚𑀸. 𑁧.𑁧𑁧.𑁭𑁭) 𑁋

𑀅𑀢𑁆𑀢𑀦𑁄 ¶ 𑀧𑀩𑁆𑀩𑀚𑁆𑀚𑀸𑀙𑀦𑁆𑀤𑀫𑁂𑀯 𑀯𑀢𑁆𑀯𑀸 𑀢𑀁 𑀲𑀼𑀢𑁆𑀯𑀸 𑀲𑀤𑁆𑀥𑀺𑀁 𑀑𑀭𑁄𑀥𑁂𑀳𑀺 𑀫𑀸𑀢𑀼𑀬𑀸 𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑀺𑀬𑀸 𑁋

‘‘𑀉𑀲𑁆𑀲𑀸𑀯𑁄𑀯 ¶ 𑀢𑀺𑀡𑀕𑁆𑀕𑀫𑁆𑀳𑀺, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀏𑀯𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀫𑀸 𑀫𑀁 𑀅𑀫𑁆𑀫 𑀦𑀺𑀯𑀸𑀭𑀬𑀸’’𑀢𑀺. (𑀚𑀸. 𑁧.𑁧𑁧.𑁭𑁯) 𑁋

𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀢𑁂𑀳𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 𑀅𑀪𑀺𑀲𑀁𑀯𑀟𑁆𑀠𑀫𑀸𑀦𑀲𑀁𑀯𑁂𑀕𑀢𑁆𑀢𑀸 𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑁄 𑀧𑀺𑀬𑀢𑀭𑁂 𑀫𑀳𑀢𑀺 𑀜𑀸𑀢𑀺𑀧𑀭𑀺𑀯𑀝𑁆𑀝𑁂 𑀉𑀴𑀸𑀭𑁂 𑀭𑀸𑀚𑀺𑀲𑁆𑀲𑀭𑀺𑀬𑁂 𑀘 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑁄 𑀧𑀩𑁆𑀩𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩.

‘‘𑀬𑀸𑀘𑀦𑁆𑀢𑀺 𑀫𑀁 𑀧𑀜𑁆𑀚𑀮𑀺𑀓𑀸, 𑀲𑀦𑁂𑀕𑀫𑀸 𑀲𑀭𑀝𑁆𑀞𑀓𑀸;

𑀅𑀚𑁆𑀚𑁂𑀯 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚, 𑀇𑀤𑁆𑀥𑀁 𑀨𑀻𑀢𑀁 𑀫𑀳𑀸𑀫𑀳𑀺𑀁.

𑁪.

‘‘𑀲𑀭𑀸𑀚𑀓𑁂 𑀲𑀳𑁄𑀭𑁄𑀥𑁂, 𑀲𑀦𑁂𑀕𑀫𑁂 𑀲𑀭𑀝𑁆𑀞𑀓𑁂;

𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁂, 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺’’𑀦𑁆𑀢𑀺.

𑀢𑀢𑁆𑀣 𑀧𑀜𑁆𑀚𑀮𑀺𑀓𑀸𑀢𑀺 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀓𑀸. 𑀲𑀦𑁂𑀕𑀫𑀸 𑀲𑀭𑀝𑁆𑀞𑀓𑀸𑀢𑀺 𑀦𑁂𑀕𑀫𑁂𑀳𑀺 𑀘𑁂𑀯 𑀭𑀝𑁆𑀞𑀯𑀸𑀲𑀻𑀳𑀺 𑀘 𑀲𑀤𑁆𑀥𑀺𑀁 𑀲𑀩𑁆𑀩𑁂 𑀭𑀸𑀚𑀧𑀼𑀭𑀺𑀲𑀸 ‘‘𑀫𑀸 𑀔𑁄, 𑀢𑁆𑀯𑀁 𑀤𑁂𑀯, 𑀧𑀩𑁆𑀩𑀚𑀻’’𑀢𑀺 𑀫𑀁 𑀬𑀸𑀘𑀦𑁆𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀦 𑀅𑀚𑁆𑀚𑁂𑀯 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚, 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀅𑀪𑀺𑀯𑀼𑀤𑁆𑀥𑀺𑀬𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀘, 𑀇𑀤𑁆𑀥𑀁 𑀯𑀺𑀪𑀯𑀲𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀲𑁆𑀲𑀸𑀤𑀺𑀦𑀺𑀧𑁆𑀨𑀢𑁆𑀢𑀺𑀬𑀸 𑀘, 𑀨𑀻𑀢𑀁 𑀇𑀫𑀁 𑀫𑀳𑀸𑀫𑀳𑀺𑀁 𑀅𑀦𑀼𑀲𑀸𑀲, 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀳𑀻𑀢𑀺 𑀬𑀸𑀘𑀦𑁆𑀢𑀺. 𑀏𑀯𑀁 𑀧𑀦 𑀲𑀳 𑀭𑀜𑁆𑀜𑀸𑀢𑀺 𑀲𑀭𑀸𑀚𑀓𑁂, 𑀢𑀣𑀸 𑀲𑀳𑁄𑀭𑁄𑀥𑁂 𑀲𑀦𑁂𑀕𑀫𑁂 𑀲𑀭𑀝𑁆𑀞𑀓𑁂 𑀫𑀳𑀸𑀚𑀦𑁂 𑀬𑀣𑀸 𑀲𑀼𑀡𑀦𑁆𑀢𑀸𑀦𑀫𑁆𑀧𑀺 𑀧𑀕𑁂𑀯 𑀧𑀲𑁆𑀲𑀦𑁆𑀢𑀸𑀦𑀁 𑀫𑀳𑀦𑁆𑀢𑀁 𑀓𑀸𑀭𑀼𑀜𑁆𑀜𑀁 𑀳𑁄𑀢𑀺, 𑀏𑀯𑀁 𑀓𑀭𑀼𑀡𑀁 𑀧𑀭𑀺𑀤𑁂𑀯𑀦𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀅𑀦𑀧𑁂𑀓𑁆𑀔𑁄 𑀅𑀮𑀕𑁆𑀕𑀘𑀺𑀢𑁆𑀢𑁄 ‘‘𑀅𑀳𑀁 𑀢𑀤𑀸 𑀧𑀩𑁆𑀩𑀚𑀺’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁫-𑁬. 𑀇𑀤𑀸𑀦𑀺 ¶ 𑀬𑀤𑀢𑁆𑀣𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀲𑀤𑀺𑀲𑀁 𑀭𑀚𑁆𑀚𑀲𑀺𑀭𑀺𑀁 𑀧𑀺𑀬𑀢𑀭𑁂 𑀜𑀸𑀢𑀺𑀩𑀦𑁆𑀥𑀯𑁂 𑀧𑀳𑀸𑀬 𑀲𑀺𑀦𑀺𑀤𑁆𑀥𑀁 𑀧𑀭𑀺𑀕𑁆𑀕𑀳𑀧𑀭𑀺𑀚𑀦𑀁 𑀮𑁄𑀓𑀸𑀪𑀺𑀫𑀢𑀁 𑀫𑀳𑀦𑁆𑀢𑀁 𑀬𑀲𑀜𑁆𑀘 𑀦𑀺𑀭𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀓𑁂𑀯𑀮𑀦𑁆𑀢𑀺 𑀅𑀦𑀯𑀲𑁂𑀲𑀁 𑀇𑀢𑁆𑀣𑀸𑀕𑀸𑀭𑀁 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀜𑁆𑀘 𑀧𑀣𑀯𑀺𑀁 𑀧𑀩𑁆𑀩𑀚𑁆𑀚𑀸𑀥𑀺𑀧𑁆𑀧𑀸𑀬𑁂𑀦 𑀘𑀚𑀫𑀸𑀦𑁄 𑀏𑀯𑀁 𑀫𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀲𑀓𑁆𑀓𑀸 𑀅𑀥𑀺𑀕𑀦𑁆𑀢𑀼𑀦𑁆𑀢𑀺 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸 𑀦 𑀓𑀺𑀜𑁆𑀘𑀺 𑀘𑀺𑀦𑁆𑀢𑁂𑀲𑀺𑀁, 𑀦 𑀢𑀢𑁆𑀣 𑀈𑀲𑀓𑀁 𑀮𑀕𑁆𑀕𑀁 𑀚𑀦𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀸𑀢𑀸𑀧𑀺𑀢𑀭𑁄 𑀢𑀜𑁆𑀘 𑀫𑀳𑀸𑀬𑀲𑀁 𑀭𑀚𑁆𑀚𑀜𑁆𑀘 𑀫𑁂 𑀦 𑀤𑁂𑀲𑁆𑀲𑀁 ¶ , 𑀧𑀺𑀬𑀫𑁂𑀯, 𑀢𑀢𑁄 𑀧𑀦 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀫𑀬𑁆𑀳𑀁 𑀧𑀺𑀬𑀢𑀭𑀁, 𑀢𑀲𑁆𑀫𑀸 𑀫𑀸𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀭𑀚𑁆𑀚𑀁 𑀅𑀳𑀁 𑀢𑀤𑀸 𑀧𑀭𑀺𑀘𑁆𑀘𑀚𑀺𑀦𑁆𑀢𑀺.

𑀢𑀤𑁂𑀢𑀁 ¶ 𑀲𑀩𑁆𑀩𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀫𑀳𑀸𑀲𑀢𑁆𑀢𑁂 𑀦𑀺𑀓𑁆𑀔𑀫𑀦𑁆𑀢𑁂 𑀢𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀬𑀼𑀥𑀺𑀝𑁆𑀞𑀺𑀮𑀓𑀼𑀫𑀸𑀭𑁄 𑀦𑀸𑀫 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀦𑀼𑀩𑀦𑁆𑀥𑀺. 𑀢𑁂 𑀉𑀪𑁄𑀧𑀺 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀫𑀳𑀸𑀚𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑁄𑀭𑀫𑁂 𑀞𑀸𑀦𑁂 𑀅𑀲𑁆𑀲𑀫𑀧𑀤𑀁 𑀓𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀤𑀻𑀳𑀺 𑀬𑀸𑀯𑀚𑀻𑀯𑀁 𑀬𑀸𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑀸 𑀅𑀳𑁂𑀲𑀼𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀉𑀪𑁄 𑀓𑀼𑀫𑀸𑀭𑀸 𑀧𑀩𑁆𑀩𑀚𑀺𑀢𑀸, 𑀬𑀼𑀥𑀜𑁆𑀚𑀬𑁄 𑀬𑀼𑀥𑀺𑀝𑁆𑀞𑀺𑀮𑁄;

𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄, 𑀲𑀗𑁆𑀕𑀁 𑀙𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄’’𑀢𑀺. (𑀚𑀸. 𑁧.𑁧𑁧.𑁮𑁩);

𑀢𑀢𑁆𑀣 𑀲𑀗𑁆𑀕𑀁 𑀙𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄𑀢𑀺 𑀫𑀘𑁆𑀘𑀼𑀫𑀸𑀭𑀲𑁆𑀲 𑀲𑀳𑀓𑀸𑀭𑀺𑀓𑀸𑀭𑀡𑀪𑀽𑀢𑀢𑁆𑀢𑀸 𑀲𑀦𑁆𑀢𑀓𑀁 𑀭𑀸𑀕𑀤𑁄𑀲𑀫𑁄𑀳𑀲𑀗𑁆𑀕𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑀸𑀢𑀺.

𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀬𑀼𑀥𑀺𑀝𑁆𑀞𑀺𑀮𑀓𑀼𑀫𑀸𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀬𑀼𑀥𑀜𑁆𑀚𑀬𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀺𑀢𑀫𑀳𑀸𑀤𑀸𑀦𑀸𑀦𑀺 𑀘𑁂𑀯 𑀭𑀚𑁆𑀚𑀸𑀤𑀺𑀧𑀭𑀺𑀘𑁆𑀘𑀸𑀕𑁄 𑀘 𑀤𑀸𑀦𑀧𑀸𑀭𑀫𑀻, 𑀓𑀸𑀬𑀯𑀘𑀻𑀲𑀁𑀯𑀭𑁄 𑀲𑀻𑀮𑀧𑀸𑀭𑀫𑀻, 𑀧𑀩𑁆𑀩𑀚𑁆𑀚𑀸 𑀘 𑀛𑀸𑀦𑀸𑀥𑀺𑀕𑀫𑁄 𑀘 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀥𑀺𑀕𑀫𑀧𑀭𑀺𑀬𑁄𑀲𑀸𑀦𑀸 𑀧𑀜𑁆𑀜𑀸 𑀤𑀸𑀦𑀸𑀤𑀻𑀦𑀁 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑀧𑀭𑀺𑀕𑁆𑀕𑀡𑁆𑀳𑀦𑀧𑀜𑁆𑀜𑀸 𑀘 𑀧𑀜𑁆𑀜𑀸𑀧𑀸𑀭𑀫𑀻, 𑀲𑀩𑁆𑀩𑀢𑁆𑀣 𑀢𑀤𑀢𑁆𑀣𑀲𑀸𑀥𑀦𑀁 𑀯𑀻𑀭𑀺𑀬𑀁 𑀯𑀻𑀭𑀺𑀬𑀧𑀸𑀭𑀫𑀻 ¶ , 𑀜𑀸𑀡𑀔𑀦𑁆𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀘 𑀔𑀦𑁆𑀢𑀺𑀧𑀸𑀭𑀫𑀻, 𑀧𑀝𑀺𑀜𑁆𑀜𑀸𑀬 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀧𑀸𑀭𑀫𑀻, 𑀲𑀩𑁆𑀩𑀢𑁆𑀣 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑀢𑀸𑀬 𑀫𑁂𑀢𑁆𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀘 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀲𑀢𑁆𑀢𑀲𑀗𑁆𑀔𑀸𑀭𑀓𑀢𑀯𑀺𑀧𑁆𑀧𑀓𑀸𑀭𑀉𑀧𑁂𑀓𑁆𑀔𑀦𑀯𑀲𑁂𑀦 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀘 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺. 𑀯𑀺𑀲𑁂𑀲𑀢𑁄 𑀧𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀓𑀺𑀢𑁆𑀢𑀺𑀘𑀭𑀺𑀬𑀸𑀬𑀁 𑀯𑀺𑀬 𑀇𑀥𑀸𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀘𑁆𑀙𑀭𑀺𑀬𑀕𑀼𑀡𑀸 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀁 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂, 𑀅𑀩𑁆𑀪𑀼𑀢𑀸 𑀘 𑀫𑀳𑁂𑀲𑀺𑀦𑁄…𑀧𑁂… 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀢𑁄’’𑀢𑀺.

𑀬𑀼𑀥𑀜𑁆𑀚𑀬𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑁄𑀫𑀦𑀲𑁆𑀲𑀘𑀭𑀺𑀬𑀸𑀯𑀡𑁆𑀡𑀦𑀸

𑁭. 𑀤𑀼𑀢𑀺𑀬𑁂 ¶ ¶ 𑀇𑀦𑁆𑀤𑀧𑀢𑁆𑀣𑁂 𑀧𑀼𑀭𑀼𑀢𑁆𑀢𑀫𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑀯𑀭𑁂. 𑀓𑀸𑀫𑀺𑀢𑁄𑀢𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀳𑀺 ‘‘𑀅𑀳𑁄 𑀯𑀢 𑀏𑀓𑁄 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀯𑀁 𑀘𑀺𑀭𑀓𑀸𑀮𑁂 𑀧𑀢𑁆𑀣𑀺𑀢𑁄. 𑀤𑀬𑀺𑀢𑁄𑀢𑀺 𑀧𑀺𑀬𑀸𑀬𑀺𑀢𑁄. 𑀲𑁄𑀫𑀦𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑁄𑀢𑀺 ‘‘𑀲𑁄𑀫𑀦𑀲𑁆𑀲𑁄’’𑀢𑀺 𑀏𑀯𑀁 𑀧𑀓𑀸𑀲𑀦𑀸𑀫𑁄.

𑁮. 𑀲𑀻𑀮𑀯𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀻𑀮𑁂𑀦 𑀘𑁂𑀯 𑀆𑀘𑀸𑀭𑀲𑀻𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀕𑀼𑀡𑀲𑀫𑁆𑀧𑀦𑁆𑀦𑁄𑀢𑀺 𑀲𑀤𑁆𑀥𑀸𑀩𑀸𑀳𑀼𑀲𑀘𑁆𑀘𑀸𑀤𑀺𑀕𑀼𑀡𑁂𑀳𑀺 𑀉𑀧𑁂𑀢𑁄, 𑀧𑀭𑀺𑀧𑀼𑀡𑁆𑀡𑁄 𑀯𑀸. 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑀯𑀸𑀢𑀺 𑀢𑀁𑀢𑀁𑀇𑀢𑀺𑀓𑀢𑁆𑀢𑀩𑁆𑀩𑀲𑀸𑀥𑀦𑁂𑀦 𑀉𑀧𑀸𑀬𑀓𑁄𑀲𑀮𑁆𑀮𑀲𑀗𑁆𑀔𑀸𑀢𑁂𑀦 𑀘 𑀲𑀼𑀦𑁆𑀤𑀭𑁂𑀦 𑀧𑀝𑀺𑀪𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀯𑀼𑀟𑁆𑀠𑀸𑀧𑀘𑀸𑀬𑀻𑀢𑀺 𑀫𑀸𑀢𑀸𑀧𑀺𑀢𑀭𑁄 𑀓𑀼𑀮𑁂 𑀚𑁂𑀝𑁆𑀞𑀸𑀢𑀺 𑀏𑀯𑀁 𑀬𑁂 𑀚𑀸𑀢𑀺𑀯𑀼𑀟𑁆𑀠𑀸, 𑀬𑁂 𑀘 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀼𑀟𑁆𑀠𑀸, 𑀢𑁂𑀲𑀁 𑀅𑀧𑀘𑀸𑀬𑀦𑀲𑀻𑀮𑁄. 𑀳𑀺𑀭𑀻𑀫𑀸𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀳𑀺𑀭𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑀗𑁆𑀕𑀳𑁂𑀲𑀼 𑀘 𑀓𑁄𑀯𑀺𑀤𑁄𑀢𑀺 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀲𑀗𑁆𑀕𑀡𑁆𑀳𑀦𑁂𑀲𑀼 𑀓𑀼𑀲𑀮𑁄. 𑀏𑀯𑀭𑀽𑀧𑁄 𑀭𑁂𑀡𑀼𑀲𑁆𑀲 𑀦𑀸𑀫 𑀓𑀼𑀭𑀼𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀲𑁄𑀫𑀦𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑁄 𑀬𑀤𑀸 𑀳𑁄𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁯. 𑀢𑀲𑁆𑀲 𑀭𑀜𑁆𑀜𑁄 𑀧𑀢𑀺𑀓𑀭𑁄𑀢𑀺 𑀢𑁂𑀦 𑀓𑀼𑀭𑀼𑀭𑀸𑀚𑁂𑀦 𑀧𑀢𑀺 𑀅𑀪𑀺𑀓𑁆𑀔𑀡𑀁 𑀉𑀧𑀓𑀢𑁆𑀢𑀩𑁆𑀩𑀪𑀸𑀯𑁂𑀦 𑀧𑀢𑀺𑀓𑀭𑁄 𑀯𑀮𑁆𑀮𑀪𑁄. 𑀓𑀼𑀳𑀓𑀢𑀸𑀧𑀲𑁄𑀢𑀺 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀮𑀓𑁆𑀔𑀡𑁂𑀦 𑀓𑁄𑀳𑀜𑁆𑀜𑁂𑀦 ¶ 𑀚𑀻𑀯𑀺𑀢𑀓𑀧𑁆𑀧𑀦𑀓𑁄 𑀏𑀓𑁄 𑀢𑀸𑀧𑀲𑁄, 𑀢𑀲𑁆𑀲 𑀭𑀜𑁆𑀜𑁄 𑀲𑀓𑁆𑀓𑀸𑀢𑀩𑁆𑀩𑁄 𑀅𑀳𑁄𑀲𑀺. 𑀆𑀭𑀸𑀫𑀦𑁆𑀢𑀺 𑀨𑀮𑀸𑀭𑀸𑀫𑀁, 𑀬𑀢𑁆𑀣 𑀏𑀴𑀸𑀮𑀼𑀓𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀢𑀺𑀧𑀼𑀲𑀸𑀤𑀺𑀯𑀮𑁆𑀮𑀺𑀨𑀮𑀸𑀦𑀺 𑀘𑁂𑀯 𑀢𑀡𑁆𑀟𑀼𑀮𑁂𑀬𑁆𑀬𑀓𑀸𑀤𑀺𑀲𑀸𑀓𑀜𑁆𑀘 𑀭𑁄𑀧𑀻𑀬𑀢𑀺. 𑀫𑀸𑀮𑀸𑀯𑀘𑁆𑀙𑀦𑁆𑀢𑀺 𑀚𑀸𑀢𑀺𑀅𑀢𑀺𑀫𑀼𑀢𑁆𑀢𑀓𑀸𑀤𑀺𑀧𑀼𑀧𑁆𑀨𑀕𑀘𑁆𑀙𑀁, 𑀢𑁂𑀦 𑀧𑀼𑀧𑁆𑀨𑀸𑀭𑀸𑀫𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀆𑀭𑀸𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀫𑀸𑀮𑀸𑀯𑀘𑁆𑀙𑀜𑁆𑀘 𑀬𑀣𑀸𑀯𑀼𑀢𑁆𑀢𑀨𑀮𑀯𑀘𑁆𑀙𑀜𑁆𑀘 𑀭𑁄𑀧𑁂𑀢𑁆𑀯𑀸 𑀢𑀢𑁄 𑀮𑀤𑁆𑀥𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑁄 𑀚𑀻𑀯𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀢𑀤𑀸 𑀫𑀳𑀸𑀭𑀓𑁆𑀔𑀺𑀢𑁄 𑀦𑀸𑀫 𑀢𑀸𑀧𑀲𑁄 𑀧𑀜𑁆𑀘𑀲𑀢𑀢𑀸𑀧𑀲𑀧𑀭𑀺𑀯𑀸𑀭𑁄 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀇𑀦𑁆𑀤𑀧𑀢𑁆𑀣𑀦𑀕𑀭𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀲𑀧𑀭𑀺𑀲𑁄 𑀧𑀺𑀡𑁆𑀟𑀸𑀬 ¶ 𑀘𑀭𑀦𑁆𑀢𑁄 𑀭𑀸𑀚𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀭𑀸𑀚𑀸 𑀇𑀲𑀺𑀕𑀡𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂 𑀧𑀲𑀦𑁆𑀦𑁄 𑀅𑀮𑀗𑁆𑀓𑀢𑀫𑀳𑀸𑀢𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀯𑀲𑁆𑀲𑀸𑀭𑀢𑁆𑀢𑀁 𑀫𑀫 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀦𑀺𑀯𑁂𑀲𑀦𑁂 𑀪𑀼𑀜𑁆𑀚𑀦𑁆𑀢𑀺.

𑀭𑀸𑀚𑀸 ¶ 𑀧𑀦 𑀅𑀧𑀼𑀢𑁆𑀢𑀓𑁄 𑀧𑀼𑀢𑁆𑀢𑁂 𑀧𑀢𑁆𑀣𑁂𑀢𑀺, 𑀧𑀼𑀢𑁆𑀢𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀯𑀲𑁆𑀲𑀸𑀭𑀢𑁆𑀢𑀘𑁆𑀘𑀬𑁂𑀦 𑀫𑀳𑀸𑀭𑀓𑁆𑀔𑀺𑀢𑁄 ‘‘𑀳𑀺𑀫𑀯𑀦𑁆𑀢𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑀸 𑀓𑀢𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀏𑀓𑀲𑁆𑀲 𑀲𑀦𑁆𑀤𑀘𑁆𑀙𑀸𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀲𑀧𑀭𑀺𑀲𑁄 𑀦𑀺𑀲𑀻𑀤𑀺. 𑀢𑀸𑀧𑀲𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀭𑀸𑀚𑀸 𑀅𑀧𑀼𑀢𑁆𑀢𑀓𑁄, 𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀭𑀸𑀚𑀧𑀼𑀢𑁆𑀢𑀁 𑀮𑀪𑁂𑀬𑁆𑀬𑀸’’𑀢𑀺. 𑀫𑀳𑀸𑀭𑀓𑁆𑀔𑀺𑀢𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀉𑀤𑀸𑀳𑀼 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀫𑀸 𑀢𑀼𑀫𑁆𑀳𑁂 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀚𑁆𑀚 𑀧𑀘𑁆𑀘𑀽𑀲𑀓𑀸𑀮𑁂 𑀏𑀓𑁄 ¶ 𑀤𑁂𑀯𑀧𑀼𑀢𑁆𑀢𑁄 𑀘𑀯𑀺𑀢𑁆𑀯𑀸 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀆𑀳.

𑀢𑀁 𑀲𑀼𑀢𑁆𑀯𑀸 𑀏𑀓𑁄 𑀓𑀽𑀝𑀚𑀝𑀺𑀮𑁄 ‘‘𑀇𑀤𑀸𑀦𑀺 𑀭𑀸𑀚𑀓𑀼𑀮𑀽𑀧𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀧𑀲𑀸𑀦𑀁 𑀕𑀫𑀦𑀓𑀸𑀮𑁂 𑀕𑀺𑀮𑀸𑀦𑀸𑀮𑀬𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. 𑀫𑀳𑀸𑀭𑀓𑁆𑀔𑀺𑀢𑁄 𑀢𑀲𑁆𑀲 𑀦𑀺𑀧𑀦𑁆𑀦𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀇𑀲𑀺𑀕𑀡𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄. 𑀓𑀼𑀳𑀓𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀫𑀳𑀸𑀭𑀓𑁆𑀔𑀺𑀢𑀲𑁆𑀲 𑀉𑀧𑀝𑁆𑀞𑀸𑀓𑀢𑀸𑀧𑀲𑁄 𑀆𑀕𑀢𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀢𑁆𑀯𑀸 𑀭𑀜𑁆𑀜𑀸 𑀯𑁂𑀕𑁂𑀦 𑀧𑀓𑁆𑀓𑁄𑀲𑀸𑀧𑀺𑀢𑁄 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀭𑀸𑀚𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀇𑀲𑀻𑀦𑀁 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀢𑀺𑀔𑀺𑀧𑁆𑀧𑀁 𑀦𑀺𑀯𑀢𑁆𑀢𑀺𑀢𑁆𑀣, 𑀓𑁂𑀦𑀢𑁆𑀣𑁂𑀦 𑀆𑀕𑀢𑀢𑁆𑀣𑀸’’𑀢𑀺 𑀆𑀳.

𑀫𑀳𑀸𑀭𑀸𑀚, 𑀇𑀲𑀺𑀕𑀡𑁄 𑀲𑀼𑀔𑀦𑀺𑀲𑀺𑀦𑁆𑀦𑁄 ‘‘𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀭𑀜𑁆𑀜𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀳𑀁 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀉𑀤𑀸𑀳𑀼 𑀦𑁄’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀫𑀳𑀺𑀤𑁆𑀥𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀘𑀯𑀺𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀥𑀫𑁆𑀫𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 ‘‘𑀅𑀚𑀸𑀦𑀦𑁆𑀢𑀸 𑀕𑀩𑁆𑀪𑀁 𑀦𑀸𑀲𑁂𑀬𑁆𑀬𑀼𑀁, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 ¶ 𑀢𑀸𑀯 𑀦’’𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀓𑀣𑀦𑀢𑁆𑀣𑀸𑀬 𑀆𑀕𑀢𑁄, 𑀓𑀣𑀺𑀢𑀁 𑀯𑁄 𑀫𑀬𑀸, 𑀕𑀘𑁆𑀙𑀸𑀫𑀳’’𑀦𑁆𑀢𑀺. 𑀭𑀸𑀚𑀸 ‘‘𑀪𑀦𑁆𑀢𑁂, 𑀦 𑀲𑀓𑁆𑀓𑀸 𑀕𑀦𑁆𑀢𑀼’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀓𑀼𑀳𑀓𑀢𑀸𑀧𑀲𑀁 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀓𑀼𑀮𑁂 𑀪𑀼𑀜𑁆𑀚𑀦𑁆𑀢𑁄 𑀯𑀲𑀢𑀺, ‘‘𑀤𑀺𑀩𑁆𑀩𑀘𑀓𑁆𑀔𑀼𑀓𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀚𑀸𑀢𑀲𑁆𑀲 𑀘 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀲𑁄𑀫𑀦𑀲𑁆𑀲𑁄’’𑀢𑀺 ¶ 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀢𑀺. 𑀓𑀼𑀳𑀓𑀢𑀸𑀧𑀲𑁄𑀧𑀺 𑀉𑀬𑁆𑀬𑀸𑀦𑀲𑁆𑀲 𑀏𑀓𑀧𑀲𑁆𑀲𑁂 𑀦𑀸𑀦𑀧𑁆𑀧𑀓𑀸𑀭𑀁 𑀲𑀽𑀧𑁂𑀬𑁆𑀬𑀲𑀸𑀓𑀜𑁆𑀘 𑀨𑀮𑀯𑀮𑁆𑀮𑀺𑀆𑀤𑀬𑁄 𑀘 𑀭𑁄𑀧𑁂𑀢𑁆𑀯𑀸 𑀧𑀡𑁆𑀡𑀺𑀓𑀸𑀦𑀁 𑀳𑀢𑁆𑀣𑁂 𑀯𑀺𑀓𑁆𑀓𑀺𑀡𑀦𑁆𑀢𑁄 𑀥𑀦𑀁 𑀲𑀁𑀳𑀭𑀢𑀺. 𑀅𑀣 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 ¶ 𑀓𑀼𑀧𑀺𑀢𑁄. 𑀲𑁄 ‘‘𑀢𑀸𑀢, 𑀤𑀺𑀩𑁆𑀩𑀘𑀓𑁆𑀔𑀼𑀢𑀸𑀧𑀲𑁂 𑀫𑀸 𑀧𑀫𑀚𑁆𑀚𑀸’’𑀢𑀺 𑀓𑀼𑀫𑀸𑀭𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀢𑁄.

𑁧𑁦-𑁧𑁩. 𑀅𑀣𑁂𑀓𑀤𑀺𑀯𑀲𑀁 𑀓𑀼𑀫𑀸𑀭𑁄 ‘‘𑀚𑀝𑀺𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀓𑀽𑀝𑀚𑀝𑀺𑀮𑀁 𑀏𑀓𑀁 𑀕𑀦𑁆𑀥𑀺𑀓𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑁆𑀯𑁂 𑀖𑀝𑁂 𑀕𑀳𑁂𑀢𑁆𑀯𑀸 𑀲𑀸𑀓𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀓𑀁 𑀲𑀺𑀜𑁆𑀘𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀽𑀝𑀚𑀝𑀺𑀮𑁄 𑀅𑀢𑁆𑀢𑀦𑁄 𑀲𑀫𑀡𑀥𑀫𑁆𑀫𑀁 𑀅𑀓𑀢𑁆𑀯𑀸 𑀧𑀡𑁆𑀡𑀺𑀓𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀜𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺 𑀧𑀡𑁆𑀡𑀺𑀓𑀕𑀳𑀧𑀢𑀺𑀓𑀸’’𑀢𑀺 𑀢𑀁 𑀮𑀚𑁆𑀚𑀸𑀧𑁂𑀢𑁆𑀯𑀸 𑀅𑀯𑀦𑁆𑀤𑀺𑀢𑁆𑀯𑀸 𑀏𑀯 𑀦𑀺𑀓𑁆𑀔𑀫𑀺.

𑀓𑀽𑀝𑀚𑀝𑀺𑀮𑁄 ‘‘𑀅𑀬𑀁 𑀇𑀤𑀸𑀦𑁂𑀯 𑀏𑀯𑀭𑀽𑀧𑁄, 𑀧𑀘𑁆𑀙𑀸 ‘𑀓𑁄 𑀚𑀸𑀦𑀸𑀢𑀺 𑀓𑀺𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀇𑀤𑀸𑀦𑁂𑀯 𑀦𑀁 𑀦𑀸𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀆𑀕𑀫𑀦𑀓𑀸𑀮𑁂 𑀧𑀸𑀲𑀸𑀡𑀨𑀮𑀓𑀁 𑀏𑀓𑀫𑀦𑁆𑀢𑀁 𑀔𑀺𑀧𑀺𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀢𑀺𑀡𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀯𑀺𑀬 𑀫𑀜𑁆𑀘𑁂 𑀦𑀺𑀧𑀚𑁆𑀚𑀺. 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀦𑀺𑀯𑁂𑀲𑀦𑀁 𑀅𑀧𑀯𑀺𑀲𑀺𑀢𑁆𑀯𑀸𑀯 ‘‘𑀫𑀫 𑀲𑀸𑀫𑀺𑀓𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀦𑀺𑀧𑀦𑁆𑀦𑀓𑀁 𑀤𑀺𑀲𑁆𑀯𑀸 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀧𑀼𑀘𑁆𑀙𑀺 𑁋 ‘‘𑀓𑁂𑀦, 𑀢𑁆𑀯𑀁 𑀪𑀦𑁆𑀢𑁂, 𑀏𑀯𑀁 𑀯𑀺𑀳𑁂𑀞𑀺𑀢𑁄, 𑀓𑀫𑀚𑁆𑀚 𑀬𑀫𑀮𑁄𑀓𑀁 𑀦𑁂𑀫𑀺, 𑀢𑀁 𑀫𑁂 𑀲𑀻𑀖𑀁 𑀆𑀘𑀺𑀓𑁆𑀔𑀸’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀓𑀽𑀝𑀚𑀝𑀺𑀮𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 𑀉𑀝𑁆𑀞𑀸𑀬 𑀤𑀺𑀝𑁆𑀞𑁄, ¶ 𑀫𑀳𑀸𑀭𑀸𑀚, 𑀢𑁆𑀯𑀁 𑀫𑁂, 𑀧𑀲𑁆𑀲𑀺𑀢𑁆𑀯𑀸 𑀢𑀬𑀺 𑀯𑀺𑀲𑁆𑀲𑀸𑀲𑁂𑀦 𑀅𑀳𑀁 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀯 𑀧𑀼𑀢𑁆𑀢𑁂𑀦𑀫𑁆𑀳𑀺 𑀏𑀯𑀁 𑀯𑀺𑀳𑁂𑀞𑀺𑀢𑁄𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑁄𑀭𑀖𑀸𑀢𑀓𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣 𑀓𑀼𑀫𑀸𑀭𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀭𑀻𑀭𑀜𑁆𑀘𑀲𑁆𑀲 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀭𑀣𑀺𑀬𑀸 𑀭𑀣𑀺𑀬𑀁 𑀯𑀺𑀓𑀺𑀭𑀣𑀸’’𑀢𑀺. 𑀢𑁂 𑀫𑀸𑀢𑀭𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑀺𑀢𑀁 𑀓𑀼𑀫𑀸𑀭𑀁 𑀆𑀓𑀟𑁆𑀠𑀺𑀁𑀲𑀼 𑁋 ‘‘𑀭𑀜𑁆𑀜𑀸 𑀢𑁂 𑀯𑀥𑁄 𑀆𑀡𑀢𑁆𑀢𑁄’’𑀢𑀺. 𑀓𑀼𑀫𑀸𑀭𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀫𑀸𑀢𑀼 𑀅𑀗𑁆𑀓𑀢𑁄 𑀯𑀼𑀝𑁆𑀞𑀸𑀬 𑁋 ‘‘𑀭𑀜𑁆𑀜𑁄 𑀫𑀁 𑀤𑀲𑁆𑀲𑁂𑀣, 𑀲𑀦𑁆𑀢𑀺 𑀭𑀸𑀚𑀓𑀺𑀘𑁆𑀘𑀸𑀦𑀻’’𑀢𑀺 𑀆𑀳. 𑀢𑁂 𑀓𑀼𑀫𑀸𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀕𑁄𑀡𑀁 𑀯𑀺𑀬 𑀭𑀚𑁆𑀚𑀼𑀬𑀸 𑀧𑀭𑀺𑀓𑀟𑁆𑀠𑀦𑁆𑀢𑀸 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀫𑀳𑀁 𑀤𑀺𑀲𑁆𑀯𑀸𑀦 𑀓𑀼𑀳𑀓’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀣𑀼𑀲𑀭𑀸𑀲𑀺𑀁𑀯 𑀅𑀢𑀡𑁆𑀟𑀼𑀮𑀦𑁆𑀢𑀺 𑀢𑀡𑁆𑀟𑀼𑀮𑀓𑀡𑁂𑀳𑀺 𑀯𑀺𑀭𑀳𑀺𑀢𑀁 𑀣𑀼𑀲𑀭𑀸𑀲𑀺𑀁 𑀯𑀺𑀬, 𑀤𑀼𑀫𑀁𑀯 𑀭𑀼𑀓𑁆𑀔𑀁 𑀯𑀺𑀬, 𑀅𑀦𑁆𑀢𑁄 𑀫𑀳𑀸𑀲𑀼𑀲𑀺𑀭𑀁. 𑀓𑀤𑀮𑀺𑀁𑀯 𑀅𑀲𑀸𑀭𑀓𑀁 𑀲𑀻𑀮𑀸𑀤𑀺𑀲𑀸𑀭𑀭𑀳𑀺𑀢𑀁 𑀢𑀸𑀧𑀲𑀁 𑀅𑀳𑀁 𑀤𑀺𑀲𑁆𑀯𑀸 𑀦𑀢𑁆𑀣𑀺 𑀇𑀫𑀲𑁆𑀲 𑀲𑀢𑀁 𑀲𑀸𑀥𑀽𑀦𑀁 𑀛𑀸𑀦𑀸𑀤𑀺𑀥𑀫𑁆𑀫𑁄. 𑀓𑀲𑁆𑀫𑀸? 𑀲𑀸𑀫𑀜𑁆𑀜𑀸 𑀲𑀫𑀡𑀪𑀸𑀯𑀸 𑀲𑀻𑀮𑀫𑀢𑁆𑀢𑀢𑁄𑀧𑀺 𑀅𑀧𑀕𑀢𑁄 𑀧𑀭𑀺𑀳𑀻𑀦𑁄 ¶ 𑀅𑀬𑀁, 𑀢𑀣𑀸 𑀳𑀺 𑀅𑀬𑀁 𑀳𑀺𑀭𑀻𑀲𑀼𑀓𑁆𑀓𑀥𑀫𑁆𑀫𑀚𑀳𑀺𑀢𑁄 𑀧𑀚𑀳𑀺𑀢𑀳𑀺𑀭𑀺𑀲𑀗𑁆𑀔𑀸𑀢𑀲𑀼𑀓𑁆𑀓𑀥𑀫𑁆𑀫𑁄. 𑀚𑀻𑀯𑀺𑀢𑀯𑀼𑀢𑁆𑀢𑀺𑀓𑀸𑀭𑀡𑀸𑀢𑀺 ‘‘𑀓𑁂𑀯𑀮𑀁 𑀚𑀻𑀯𑀺𑀢𑀲𑁆𑀲𑁂𑀯 𑀳𑁂𑀢𑀼 𑀅𑀬𑀁 𑀢𑀸𑀧𑀲𑀮𑀺𑀗𑁆𑀕𑁂𑀦 𑀘𑀭𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀦𑁆𑀢𑀺𑀳𑀻𑀢𑀺 𑀧𑀭𑀦𑁆𑀢𑁄 𑀧𑀘𑁆𑀘𑀦𑁆𑀢𑁄 𑀦𑀺𑀯𑀸𑀲𑀪𑀽𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀭𑀦𑁆𑀢𑀺𑀦𑁄, 𑀲𑀻𑀫𑀦𑁆𑀢𑀭𑀺𑀓𑀯𑀸𑀲𑀺𑀦𑁄. 𑀢𑁂𑀳𑀺 𑀧𑀭𑀦𑁆𑀢𑀻𑀳𑀺 𑀅𑀝𑀯𑀺𑀓𑁂𑀳𑀺 𑀧𑀘𑁆𑀘𑀦𑁆𑀢𑀤𑁂𑀲𑁄 𑀔𑁄𑀪𑀺𑀢𑁄 𑀅𑀳𑁄𑀲𑀺. 𑀢𑀁 𑀧𑀘𑁆𑀘𑀦𑁆𑀢𑀓𑁄𑀧𑀁 𑀦𑀺𑀲𑁂𑀥𑁂𑀢𑀼𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀦𑁆𑀢𑁄 𑀫𑀫 𑀧𑀺𑀢𑀸 𑀓𑀼𑀭𑀼𑀭𑀸𑀚𑀸 ‘‘𑀢𑀸𑀢 𑀲𑁄𑀫𑀦𑀲𑁆𑀲𑀓𑀼𑀫𑀸𑀭, 𑀫𑀬𑁆𑀳𑀁 𑀲𑀸𑀫𑀺𑀓𑀁 𑀉𑀕𑁆𑀕𑀢𑀸𑀧𑀦𑀁 𑀖𑁄𑀭𑀢𑀧𑀁 𑀧𑀭𑀫𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀚𑀝𑀺𑀮𑀁 𑀫𑀸 𑀧𑀫𑀚𑁆𑀚𑀺. 𑀲𑁄 𑀳𑀺 𑀅𑀫𑁆𑀳𑀸𑀓𑀁 𑀲𑀩𑁆𑀩𑀓𑀸𑀫𑀤𑀤𑁄, 𑀢𑀲𑁆𑀫𑀸 𑀬𑀤𑀺𑀘𑁆𑀙𑀓𑀁 𑀘𑀺𑀢𑁆𑀢𑀭𑀼𑀘𑀺𑀬𑀁 𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀓𑀽𑀮𑀁 𑀧𑀯𑀢𑁆𑀢𑁂𑀳𑀺 𑀅𑀦𑀼𑀯𑀢𑁆𑀢𑁂𑀳𑀻’’𑀢𑀺 𑀢𑀤𑀸 𑀫𑀁 𑀅𑀦𑀼𑀲𑀸𑀲𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁪. 𑀢𑀫𑀳𑀁 𑀕𑀦𑁆𑀢𑁆𑀯𑀸𑀦𑀼𑀧𑀝𑁆𑀞𑀸𑀦𑀦𑁆𑀢𑀺 𑀧𑀺𑀢𑀼 𑀯𑀘𑀦𑀁 𑀅𑀦𑀢𑀺𑀓𑁆𑀓𑀦𑁆𑀢𑁄 𑀢𑀁 𑀓𑀽𑀝𑀢𑀸𑀧𑀲𑀁 𑀉𑀧𑀝𑁆𑀞𑀸𑀦𑀢𑁆𑀣𑀁 𑀕𑀦𑁆𑀢𑁆𑀯𑀸 𑀢𑀁 𑀲𑀸𑀓𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀡𑁆𑀡𑀺𑀓𑁄 𑀅𑀬’’𑀦𑁆𑀢𑀺 𑀘 𑀜𑀢𑁆𑀯𑀸 𑀓𑀘𑁆𑀘𑀺 𑀢𑁂, 𑀕𑀳𑀧𑀢𑀺, 𑀓𑀼𑀲𑀮𑀦𑁆𑀢𑀺, 𑀕𑀳𑀧𑀢𑀺, ¶ 𑀢𑁂 𑀲𑀭𑀻𑀭𑀲𑁆𑀲 𑀓𑀘𑁆𑀘𑀺 𑀓𑀼𑀲𑀮𑀁 𑀓𑀼𑀲𑀮𑀫𑁂𑀯, 𑀢𑀣𑀸 𑀳𑀺 𑀲𑀸𑀓𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀓𑀁 𑀆𑀲𑀺𑀜𑁆𑀘𑀲𑀺. 𑀓𑀺𑀁 𑀯𑀸 𑀢𑀯 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀆𑀳𑀭𑀻𑀬𑀢𑀼, 𑀢𑀣𑀸 𑀳𑀺 𑀧𑀡𑁆𑀡𑀺𑀓𑀯𑀼𑀢𑁆𑀢𑀺𑀁 𑀅𑀦𑀼𑀢𑀺𑀝𑁆𑀞𑀲𑀻𑀢𑀺 𑀇𑀤𑀁 𑀯𑀘𑀦𑀁 𑀅𑀪𑀸𑀲𑀺𑀁.

𑁧𑁫. 𑀢𑁂𑀦 ¶ 𑀲𑁄 𑀓𑀼𑀧𑀺𑀢𑁄 𑀆𑀲𑀻𑀢𑀺 𑀢𑁂𑀦 𑀫𑀬𑀸 𑀯𑀼𑀢𑁆𑀢𑀕𑀳𑀧𑀢𑀺𑀯𑀸𑀤𑁂𑀦 𑀲𑁄 𑀫𑀸𑀦𑀦𑀺𑀲𑁆𑀲𑀺𑀢𑁄 𑀫𑀸𑀦𑀁 𑀅𑀮𑁆𑀮𑀻𑀦𑁄 𑀓𑀼𑀳𑀓𑁄 𑀫𑀬𑁆𑀳𑀁 𑀓𑀼𑀧𑀺𑀢𑁄 𑀓𑀼𑀤𑁆𑀥𑁄 𑀅𑀳𑁄𑀲𑀺. 𑀓𑀼𑀤𑁆𑀥𑁄 𑀘 𑀲𑀫𑀸𑀦𑁄 ‘‘𑀖𑀸𑀢𑀸𑀧𑁂𑀫𑀺 𑀢𑀼𑀯𑀁 𑀅𑀚𑁆𑀚, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀸𑀫𑀺 𑀯𑀸’’𑀢𑀺 𑀆𑀳.

𑀢𑀢𑁆𑀣 𑀢𑀼𑀯𑀁 𑀅𑀚𑁆𑀚𑀸𑀢𑀺, 𑀢𑁆𑀯𑀁 𑀅𑀚𑁆𑀚, 𑀇𑀤𑀸𑀦𑀺𑀬𑁂𑀯 𑀭𑀜𑁆𑀜𑁄 𑀆𑀕𑀢𑀓𑀸𑀮𑁂𑀢𑀺 𑀅𑀢𑁆𑀣𑁄.

𑁧𑁬. 𑀦𑀺𑀲𑁂𑀥𑀬𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀦𑁆𑀢𑀺 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀦𑀕𑀭𑀁 𑀅𑀧𑀯𑀺𑀝𑁆𑀞𑁄 𑀢𑀗𑁆𑀔𑀡𑀜𑁆𑀜𑁂𑀯 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀓𑀼𑀳𑀓𑀁 𑀓𑀼𑀳𑀓𑀢𑀸𑀧𑀲𑀁 𑀓𑀘𑁆𑀘𑀺 𑀢𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁, 𑀲𑀫𑁆𑀫𑀸𑀦𑁄 𑀢𑁂 𑀧𑀯𑀢𑁆𑀢𑀺𑀢𑁄𑀢𑀺 𑀓𑀼𑀫𑀸𑀭𑁂𑀦 𑀢𑁂 𑀲𑀫𑁆𑀫𑀸𑀦𑁄 𑀧𑀯𑀢𑁆𑀢𑀺𑀢𑁄 𑀅𑀳𑁄𑀲𑀺.

𑁧𑁭. 𑀓𑀼𑀫𑀸𑀭𑁄 𑀬𑀣𑀸 𑀦𑀸𑀲𑀺𑀬𑁄𑀢𑀺 𑀬𑀣𑀸 𑀓𑀼𑀫𑀸𑀭𑁄 𑀦𑀸𑀲𑀺𑀬𑁄 𑀦𑀸𑀲𑁂𑀢𑀩𑁆𑀩𑁄 𑀖𑀸𑀢𑀸𑀧𑁂𑀢𑀩𑁆𑀩𑁄, 𑀢𑀣𑀸 𑀲𑁄 𑀧𑀸𑀧𑁄 𑀢𑀲𑁆𑀲 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺. 𑀆𑀡𑀸𑀧𑁂𑀲𑀻𑀢𑀺 𑀫𑀬𑁆𑀳𑀁 𑀲𑀸𑀫𑀺𑀓𑁂 𑀇𑀫𑀲𑁆𑀫𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀢𑀸𑀧𑀲𑁂 𑀲𑀢𑀺 𑀓𑀺𑀁 𑀫𑀫 𑀦 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀼𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄 𑀦𑀢𑁆𑀣𑀺, 𑀢𑀢𑁄𑀧𑀺 𑀅𑀬𑀫𑁂𑀯 𑀲𑁂𑀬𑁆𑀬𑁄𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀡𑀸𑀧𑁂𑀲𑀺.

𑁧𑁮. 𑀓𑀺𑀦𑁆𑀢𑀺 ¶ ? 𑀲𑀻𑀲𑀁 𑀢𑀢𑁆𑀣𑁂𑀯 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀢𑀁 𑀓𑀼𑀫𑀸𑀭𑀁 𑀧𑀲𑁆𑀲𑀣, 𑀢𑀢𑁆𑀣𑁂𑀯 𑀢𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀭𑀻𑀭𑀜𑁆𑀘𑀲𑁆𑀲 𑀓𑀢𑁆𑀯𑀸𑀦 𑀘𑀢𑀼𑀔𑀡𑁆𑀟𑀺𑀓𑀁 𑀘𑀢𑀼𑀭𑁄 𑀔𑀡𑁆𑀟𑁂 𑀓𑀢𑁆𑀯𑀸 𑀭𑀣𑀺𑀬𑀸 𑀭𑀣𑀺𑀬𑀁 𑀦𑀻𑀬𑀦𑁆𑀢𑀸 𑀯𑀻𑀣𑀺𑀢𑁄 𑀯𑀻𑀣𑀺𑀁 𑀯𑀺𑀓𑁆𑀔𑀺𑀧𑀦𑁆𑀢𑀸 𑀤𑀲𑁆𑀲𑁂𑀣. 𑀓𑀲𑁆𑀫𑀸? 𑀲𑀸 𑀕𑀢𑀺 𑀚𑀝𑀺𑀮𑀳𑀻𑀴𑀺𑀢𑀸𑀢𑀺 𑀬𑁂𑀳𑀺 𑀅𑀬𑀁 𑀚𑀝𑀺𑀮𑁄 𑀳𑀻𑀴𑀺𑀢𑁄, 𑀢𑁂𑀲𑀁 𑀚𑀝𑀺𑀮𑀳𑀻𑀴𑀺𑀢𑀸𑀦𑀁 𑀲𑀸 𑀕𑀢𑀺 𑀲𑀸 𑀦𑀺𑀧𑁆𑀨𑀢𑁆𑀢𑀺 𑀲𑁄 𑀯𑀺𑀧𑀸𑀓𑁄𑀢𑀺. 𑀚𑀝𑀺𑀮𑀳𑀻𑀴𑀺𑀢𑀸𑀢𑀺 𑀯𑀸 𑀚𑀝𑀺𑀮𑀳𑀻𑀴𑀦𑀳𑁂𑀢𑀼 𑀲𑀸 𑀢𑀲𑁆𑀲 𑀦𑀺𑀧𑁆𑀨𑀢𑁆𑀢𑀻𑀢𑀺 𑀏𑀯𑀜𑁆𑀘𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁯. 𑀢𑀢𑁆𑀣𑀸𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀆𑀡𑀸𑀬𑀁, 𑀢𑀲𑁆𑀫𑀺𑀁 𑀯𑀸 𑀢𑀸𑀧𑀲𑀲𑁆𑀲 𑀧𑀭𑀺𑀪𑀯𑁂. 𑀓𑀸𑀭𑀡𑀺𑀓𑀸𑀢𑀺 𑀖𑀸𑀢𑀓𑀸, 𑀘𑁄𑀭𑀖𑀸𑀢𑀓𑀸𑀢𑀺 𑀅𑀢𑁆𑀣𑁄. 𑀘𑀡𑁆𑀟𑀸𑀢𑀺 𑀓𑀼𑀭𑀽𑀭𑀸. 𑀮𑀼𑀤𑁆𑀤𑀸𑀢𑀺 𑀲𑀼𑀤𑀸𑀭𑀼𑀡𑀸. 𑀅𑀓𑀸𑀭𑀼𑀡𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀓𑀢𑀁. ‘‘𑀅𑀓𑀭𑀼𑀡𑀸’’𑀢𑀺𑀧𑀺 𑀧𑀸𑀴𑀺, 𑀦𑀺𑀓𑁆𑀓𑀭𑀼𑀡𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀼 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀫𑀫 𑀫𑀸𑀢𑀼 𑀲𑀼𑀥𑀫𑁆𑀫𑀸𑀬 𑀤𑁂𑀯𑀺𑀬𑀸 𑀉𑀘𑁆𑀙𑀗𑁆𑀕𑁂 𑀦𑀺𑀲𑀺𑀦𑁆𑀦𑀲𑁆𑀲. ‘‘𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀆𑀓𑀟𑁆𑀠𑀺𑀢𑁆𑀯𑀸 𑀦𑀬𑀦𑁆𑀢𑀺 𑀫𑀦𑁆𑀢𑀺 𑀫𑀸𑀢𑀭𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀗𑁆𑀓𑁂 ¶ 𑀦𑀺𑀲𑀻𑀤𑀸𑀧𑀺𑀢𑀁 ¶ 𑀫𑀁 𑀭𑀸𑀚𑀸𑀡𑀸𑀬 𑀢𑁂 𑀘𑁄𑀭𑀖𑀸𑀢𑀓𑀸 𑀕𑁄𑀡𑀁 𑀯𑀺𑀬 𑀭𑀚𑁆𑀚𑀼𑀬𑀸 𑀆𑀓𑀟𑁆𑀠𑀺𑀢𑁆𑀯𑀸 𑀆𑀖𑀸𑀢𑀦𑀁 𑀦𑀬𑀦𑁆𑀢𑀺. 𑀓𑀼𑀫𑀸𑀭𑁂 𑀧𑀦 𑀦𑀻𑀬𑀫𑀸𑀦𑁂 𑀤𑀸𑀲𑀺𑀕𑀡𑀧𑀭𑀺𑀯𑀼𑀢𑀸 𑀲𑀤𑁆𑀥𑀺𑀁 𑀑𑀭𑁄𑀥𑁂𑀳𑀺 𑀲𑀼𑀥𑀫𑁆𑀫𑀸 𑀤𑁂𑀯𑀻 𑀦𑀸𑀕𑀭𑀸𑀧𑀺 ‘‘𑀫𑀬𑀁 𑀦𑀺𑀭𑀧𑀭𑀸𑀥𑀁 𑀓𑀼𑀫𑀸𑀭𑀁 𑀫𑀸𑀭𑁂𑀢𑀼𑀁 𑀦 𑀤𑀲𑁆𑀲𑀸𑀫𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀁𑀲𑀼.

𑁨𑁦. 𑀩𑀦𑁆𑀥𑀢𑀁 𑀕𑀸𑀴𑁆𑀳𑀩𑀦𑁆𑀥𑀦𑀦𑁆𑀢𑀺 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀦𑁆𑀢𑀸𑀦𑀁 𑀢𑁂𑀲𑀁 𑀓𑀸𑀭𑀡𑀺𑀓𑀧𑀼𑀭𑀺𑀲𑀸𑀦𑀁. 𑀭𑀸𑀚𑀓𑀺𑀭𑀺𑀬𑀸𑀦𑀺 𑀅𑀢𑁆𑀣𑀺 𑀫𑁂𑀢𑀺 𑀫𑀬𑀸 𑀭𑀜𑁆𑀜𑁄 𑀯𑀢𑁆𑀢𑀩𑁆𑀩𑀸𑀦𑀺 𑀭𑀸𑀚𑀓𑀺𑀘𑁆𑀘𑀸𑀦𑀺 𑀅𑀢𑁆𑀣𑀺. 𑀢𑀲𑁆𑀫𑀸 𑀭𑀜𑁆𑀜𑁄 𑀤𑀲𑁆𑀲𑁂𑀣 𑀫𑀁 𑀔𑀺𑀧𑁆𑀧𑀦𑁆𑀢𑀺 𑀢𑁂𑀲𑀁 𑀅𑀳𑀁 𑀏𑀯𑀁 𑀯𑀘𑀦𑀁 𑀅𑀯𑀘𑀁.

𑁨𑁧. 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼, 𑀧𑀸𑀧𑀲𑁆𑀲 𑀧𑀸𑀧𑀲𑁂𑀯𑀺𑀦𑁄𑀢𑀺 𑀅𑀢𑁆𑀢𑀦𑀸 𑀧𑀸𑀧𑀲𑀻𑀮𑀲𑁆𑀲 𑀮𑀸𑀫𑀓𑀸𑀘𑀸𑀭𑀲𑁆𑀲 𑀓𑀽𑀝𑀢𑀸𑀧𑀲𑀲𑁆𑀲 𑀲𑁂𑀯𑀦𑀢𑁄 𑀧𑀸𑀧𑀲𑁂𑀯𑀺𑀦𑁄 𑀭𑀜𑁆𑀜𑁄 𑀫𑀁 𑀤𑀲𑁆𑀲𑀬𑀺𑀁𑀲𑀼. 𑀤𑀺𑀲𑁆𑀯𑀸𑀦 𑀢𑀁 𑀲𑀜𑁆𑀜𑀸𑀧𑁂𑀲𑀺𑀦𑁆𑀢𑀺 𑀢𑀁 𑀫𑀫 𑀧𑀺𑀢𑀭𑀁 𑀓𑀼𑀭𑀼𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀲𑁆𑀫𑀸 𑀫𑀁, 𑀤𑁂𑀯, 𑀫𑀸𑀭𑀸𑀧𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀓𑀲𑁆𑀫𑀸 𑀘 𑀧𑀦 𑀢𑁆𑀯𑀁 𑀫𑀬𑁆𑀳𑀁 𑀲𑀸𑀫𑀺𑀓𑀁 𑀤𑀺𑀩𑁆𑀩𑀘𑀓𑁆𑀔𑀼𑀢𑀸𑀧𑀲𑀁 𑀕𑀳𑀧𑀢𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀺. 𑀇𑀤𑀜𑁆𑀘𑀺𑀤𑀜𑁆𑀘 𑀯𑀺𑀧𑁆𑀧𑀓𑀸𑀭𑀁 𑀓𑀭𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀕𑀳𑀧𑀢𑀺𑀜𑁆𑀜𑁂𑀯 ‘𑀕𑀳𑀧𑀢𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀓𑁄 𑀫𑀬𑁆𑀳𑀁 𑀤𑁄𑀲𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀦𑀸𑀦𑀸𑀯𑀺𑀥𑀸𑀦𑀺 𑀫𑀸𑀮𑀸𑀯𑀘𑁆𑀙𑀸𑀦𑀺 𑀭𑁄𑀧𑁂𑀢𑁆𑀯𑀸 𑀧𑀼𑀧𑁆𑀨𑀧𑀡𑁆𑀡𑀨𑀮𑀸𑀨𑀮𑀸𑀤𑀻𑀦𑀁 𑀯𑀺𑀓𑁆𑀓𑀺𑀡𑀦𑀁 𑀳𑀢𑁆𑀣𑀢𑁄 𑀘𑀲𑁆𑀲 𑀢𑀸𑀦𑀺 𑀤𑁂𑀯𑀲𑀺𑀓𑀁 𑀯𑀺𑀓𑁆𑀓𑀺𑀡𑀦𑁆𑀢𑁂𑀳𑀺 𑀫𑀸𑀮𑀸𑀓𑀸𑀭𑀧𑀡𑁆𑀡𑀺𑀓𑁂𑀳𑀺 𑀲𑀤𑁆𑀤𑀳𑀸𑀧𑁂𑀢𑁆𑀯𑀸 ‘‘𑀫𑀸𑀮𑀸𑀯𑀢𑁆𑀣𑀼𑀧𑀡𑁆𑀡𑀯𑀢𑁆𑀣𑀽𑀦𑀺 𑀉𑀧𑀥𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀡𑁆𑀡𑀲𑀸𑀮𑀜𑁆𑀘𑀲𑁆𑀲 𑀧𑀯𑀺𑀲𑀺𑀢𑁆𑀯𑀸 𑀧𑀼𑀧𑁆𑀨𑀸𑀤𑀺𑀯𑀺𑀓𑁆𑀓𑀺𑀬𑀮𑀤𑁆𑀥𑀁 𑀓𑀳𑀸𑀧𑀡𑀓𑀪𑀡𑁆𑀟𑀺𑀓𑀁 𑀅𑀢𑁆𑀢𑀦𑁄 𑀧𑀼𑀭𑀺𑀲𑁂𑀳𑀺 𑀦𑀻𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀲𑀺𑀁 𑀢𑀲𑁆𑀲 𑀓𑀽𑀝𑀢𑀸𑀧𑀲𑀪𑀸𑀯𑀁 𑀚𑀸𑀦𑀸𑀧𑁂𑀲𑀺𑀁. 𑀫𑀫𑀜𑁆𑀘 𑀯𑀲𑀫𑀸𑀦𑀬𑀺𑀦𑁆𑀢𑀺 𑀢𑁂𑀦 𑀲𑀜𑁆𑀜𑀸𑀧𑀦𑁂𑀦 ‘‘𑀲𑀘𑁆𑀘𑀁 𑀔𑁄 𑀧𑀦 𑀓𑀼𑀫𑀸𑀭𑁄 𑀯𑀤𑀢𑀺, 𑀅𑀬𑀁 𑀓𑀽𑀝𑀢𑀸𑀧𑀲𑁄 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑁄 𑀯𑀺𑀬 𑀳𑀼𑀢𑁆𑀯𑀸 𑀇𑀤𑀸𑀦𑀺 ¶ 𑀫𑀳𑀸𑀧𑀭𑀺𑀕𑁆𑀕𑀳𑁄 𑀚𑀸𑀢𑁄’’𑀢𑀺 𑀬𑀣𑀸 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀦𑁄 𑀫𑀫 𑀯𑀲𑁂 𑀯𑀢𑁆𑀢𑀢𑀺, 𑀏𑀯𑀁 𑀭𑀸𑀚𑀸𑀦𑀁 𑀫𑀫 𑀯𑀲𑀫𑀸𑀦𑁂𑀲𑀺𑀁.

𑀢𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀏𑀯𑀭𑀽𑀧𑀲𑁆𑀲 𑀩𑀸𑀮𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀯𑀲𑀦𑀢𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺 𑁋 ‘‘𑀦 𑀫𑁂, 𑀫𑀳𑀸𑀭𑀸𑀚, 𑀇𑀥 𑀯𑀸𑀲𑁂𑀦 𑀅𑀢𑁆𑀣𑁄, 𑀅𑀦𑀼𑀚𑀸𑀦𑀸𑀣 𑀫𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 ‘‘𑀢𑀸𑀢, 𑀫𑀬𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀢𑁂 𑀯𑀥𑁄 𑀆𑀡𑀢𑁆𑀢𑁄, 𑀔𑀫 𑀫𑀬𑁆𑀳𑀁 𑀅𑀧𑀭𑀸𑀥’’𑀦𑁆𑀢𑀺 𑀫𑀳𑀸𑀲𑀢𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀇𑀫𑀁 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀤𑁂𑀯, 𑀓𑀺𑀫𑀢𑁆𑀣𑀺 𑀫𑀸𑀦𑀼𑀲𑀓𑁂𑀲𑀼 ¶ 𑀪𑁄𑀕𑁂𑀲𑀼, 𑀅𑀳𑀁 𑀧𑀼𑀩𑁆𑀩𑁂 𑀤𑀻𑀖𑀭𑀢𑁆𑀢𑀁 ¶ 𑀤𑀺𑀩𑁆𑀩𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀁, 𑀦 𑀢𑀢𑁆𑀣𑀸𑀧𑀺 𑀫𑁂 𑀲𑀗𑁆𑀕𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑁂𑀯𑀸𑀳𑀁, 𑀦 𑀢𑀸𑀤𑀺𑀲𑀲𑁆𑀲 𑀩𑀸𑀮𑀲𑁆𑀲 𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀦𑁄 𑀲𑀦𑁆𑀢𑀺𑀓𑁂 𑀯𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀑𑀯𑀤𑀦𑁆𑀢𑁄 𑁋

‘‘𑀅𑀦𑀺𑀲𑀫𑁆𑀫 𑀓𑀢𑀁 𑀓𑀫𑁆𑀫𑀁, 𑀅𑀦𑀯𑀢𑁆𑀣𑀸𑀬 𑀘𑀺𑀦𑁆𑀢𑀺𑀢𑀁;

𑀪𑁂𑀲𑀚𑁆𑀚𑀲𑁆𑀲𑁂𑀯 𑀯𑁂𑀪𑀗𑁆𑀕𑁄, 𑀯𑀺𑀧𑀸𑀓𑁄 𑀳𑁄𑀢𑀺 𑀧𑀸𑀧𑀓𑁄.

‘‘𑀦𑀺𑀲𑀫𑁆𑀫 𑀘 𑀓𑀢𑀁 𑀓𑀫𑁆𑀫𑀁, 𑀲𑀫𑁆𑀫𑀸𑀯𑀢𑁆𑀣𑀸𑀬 𑀘𑀺𑀦𑁆𑀢𑀺𑀢𑀁;

𑀪𑁂𑀲𑀚𑁆𑀚𑀲𑁆𑀲𑁂𑀯 𑀲𑀫𑁆𑀧𑀢𑁆𑀢𑀺, 𑀯𑀺𑀧𑀸𑀓𑁄 𑀳𑁄𑀢𑀺 𑀪𑀤𑁆𑀭𑀓𑁄.

‘‘𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

‘‘𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚, 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀺.

‘‘𑀦𑀺𑀲𑀫𑁆𑀫 𑀤𑀡𑁆𑀟𑀁 𑀧𑀡𑀬𑁂𑀬𑁆𑀬 𑀇𑀲𑁆𑀲𑀭𑁄, 𑀯𑁂𑀕𑀸 𑀓𑀢𑀁 𑀢𑀧𑁆𑀧𑀢𑀺 𑀪𑀽𑀫𑀺𑀧𑀸𑀮;

𑀲𑀫𑁆𑀫𑀸𑀧𑀡𑀻𑀥𑀻 𑀘 𑀦𑀭𑀲𑁆𑀲 𑀅𑀢𑁆𑀣𑀸, 𑀅𑀦𑀸𑀦𑀼𑀢𑀧𑁆𑀧𑀸 𑀢𑁂 𑀪𑀯𑀦𑁆𑀢𑀺 𑀧𑀘𑁆𑀙𑀸.

‘‘𑀅𑀦𑀸𑀦𑀼𑀢𑀧𑁆𑀧𑀸𑀦𑀺 𑀳𑀺 𑀬𑁂 𑀓𑀭𑁄𑀦𑁆𑀢𑀺, 𑀯𑀺𑀪𑀚𑁆𑀚 𑀓𑀫𑁆𑀫𑀸𑀬𑀢𑀦𑀸𑀦𑀺 𑀮𑁄𑀓𑁂;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀲𑀼𑀔𑀼𑀤𑁆𑀭𑀬𑀸𑀦𑀺, 𑀪𑀯𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀫𑀢𑀸𑀦𑀺 𑀢𑀸𑀦𑀺.

‘‘𑀆𑀕𑀘𑁆𑀙𑀼𑀁 ¶ 𑀤𑁄𑀯𑀸𑀭𑀺𑀓𑀸 𑀔𑀕𑁆𑀕𑀩𑀦𑁆𑀥𑀸, 𑀓𑀸𑀲𑀸𑀯𑀺𑀬𑀸 𑀳𑀦𑁆𑀢𑀼 𑀫𑀫𑀁 𑀚𑀦𑀺𑀦𑁆𑀤;

𑀫𑀸𑀢𑀼𑀜𑁆𑀘 𑀅𑀗𑁆𑀓𑀲𑁆𑀫𑀺𑀫𑀳𑀁 𑀦𑀺𑀲𑀺𑀦𑁆𑀦𑁄, 𑀆𑀓𑀟𑁆𑀠𑀺𑀢𑁄 𑀲𑀳𑀲𑀸 𑀢𑁂𑀳𑀺 𑀤𑁂𑀯.

‘‘𑀓𑀝𑀼𑀓𑀜𑁆𑀳𑀺 ¶ 𑀲𑀫𑁆𑀩𑀸𑀥𑀁 𑀲𑀼𑀓𑀺𑀘𑁆𑀙𑀁 𑀧𑀢𑁆𑀢𑁄, 𑀫𑀥𑀼𑀭𑀫𑁆𑀧𑀺𑀬𑀁 𑀚𑀻𑀯𑀺𑀢𑀁 𑀮𑀤𑁆𑀥 𑀭𑀸𑀚;

𑀓𑀺𑀘𑁆𑀙𑁂𑀦𑀳𑀁 𑀅𑀚𑁆𑀚 𑀯𑀥𑀸 𑀧𑀫𑀼𑀢𑁆𑀢𑁄, 𑀧𑀩𑁆𑀩𑀚𑁆𑀚𑀫𑁂𑀯𑀸𑀪𑀺𑀫𑀦𑁄𑀳𑀫𑀲𑁆𑀫𑀻’’𑀢𑀺. (𑀚𑀸. 𑁧.𑁧𑁫.𑁨𑁨𑁭-𑁨𑁩𑁪) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀢𑁆𑀣 ¶ 𑀅𑀦𑀺𑀲𑀫𑁆𑀫𑀸𑀢𑀺 𑀅𑀦𑀼𑀧𑀥𑀸𑀭𑁂𑀢𑁆𑀯𑀸. 𑀅𑀦𑀯𑀢𑁆𑀣𑀸𑀬𑀸𑀢𑀺 𑀅𑀯𑀯𑀢𑁆𑀣𑀧𑁂𑀢𑁆𑀯𑀸. 𑀯𑁂𑀪𑀗𑁆𑀕𑁄𑀢𑀺 𑀯𑀺𑀧𑀢𑁆𑀢𑀺. 𑀯𑀺𑀧𑀸𑀓𑁄𑀢𑀺 𑀦𑀺𑀧𑁆𑀨𑀢𑁆𑀢𑀺. 𑀅𑀲𑀜𑁆𑀜𑀢𑁄𑀢𑀺 𑀅𑀲𑀁𑀯𑀼𑀢𑁄 𑀤𑀼𑀲𑁆𑀲𑀻𑀮𑁄. 𑀧𑀡𑀬𑁂𑀬𑁆𑀬𑀸𑀢𑀺 𑀧𑀝𑁆𑀞𑀧𑁂𑀬𑁆𑀬. 𑀯𑁂𑀕𑀸𑀢𑀺 𑀯𑁂𑀕𑁂𑀦 𑀲𑀳𑀲𑀸. 𑀲𑀫𑁆𑀫𑀸𑀧𑀡𑀻𑀥𑀻 𑀘𑀸𑀢𑀺 𑀲𑀫𑁆𑀫𑀸𑀧𑀡𑀺𑀥𑀺𑀦𑀸, 𑀬𑁄𑀦𑀺𑀲𑁄 𑀞𑀧𑀺𑀢𑁂𑀦 𑀘𑀺𑀢𑁆𑀢𑁂𑀦 𑀓𑀢𑀸 𑀦𑀭𑀲𑁆𑀲 𑀅𑀢𑁆𑀣𑀸 𑀧𑀘𑁆𑀙𑀸 𑀅𑀦𑀸𑀦𑀼𑀢𑀧𑁆𑀧𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀪𑀚𑁆𑀚𑀸𑀢𑀺 𑀇𑀫𑀸𑀦𑀺 𑀓𑀸𑀢𑀼𑀁 𑀬𑀼𑀢𑁆𑀢𑀸𑀦𑀺, 𑀇𑀫𑀸𑀦𑀺 𑀅𑀬𑀼𑀢𑁆𑀢𑀸𑀦𑀻𑀢𑀺 𑀏𑀯𑀁 𑀧𑀜𑁆𑀜𑀸𑀬 𑀯𑀺𑀪𑀚𑀺𑀢𑁆𑀯𑀸. 𑀓𑀫𑁆𑀫𑀸𑀬𑀢𑀦𑀸𑀦𑀻𑀢𑀺 𑀓𑀫𑁆𑀫𑀸𑀦𑀺. 𑀩𑀼𑀤𑁆𑀥𑀸𑀦𑀼𑀫𑀢𑀸𑀦𑀻𑀢𑀺 𑀧𑀡𑁆𑀟𑀺𑀢𑁂𑀳𑀺 𑀅𑀦𑀼𑀫𑀢𑀸𑀦𑀺 𑀅𑀦𑀯𑀚𑁆𑀚𑀸𑀦𑀺 𑀳𑁄𑀦𑁆𑀢𑀺. 𑀓𑀝𑀼𑀓𑀦𑁆𑀢𑀺 𑀤𑀼𑀓𑁆𑀔𑀁 𑀅𑀲𑀸𑀢𑀁, 𑀲𑀫𑁆𑀩𑀸𑀥𑀁 𑀲𑀼𑀓𑀺𑀘𑁆𑀙𑀁 𑀫𑀭𑀡𑀪𑀬𑀁 𑀧𑀢𑁆𑀢𑁄𑀫𑁆𑀳𑀺. 𑀮𑀤𑁆𑀥𑀸𑀢𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀚𑀻𑀯𑀺𑀢𑀁 𑀮𑀪𑀺𑀢𑁆𑀯𑀸. 𑀧𑀩𑁆𑀩𑀚𑁆𑀚𑀫𑁂𑀯𑀸𑀪𑀺𑀫𑀦𑁄𑀢𑀺 𑀧𑀩𑁆𑀩𑀚𑁆𑀚𑀸𑀪𑀺𑀫𑀼𑀔𑀘𑀺𑀢𑁆𑀢𑁄 𑀏𑀯𑀸𑀳𑀫𑀲𑁆𑀫𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁂𑀦 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀭𑀸𑀚𑀸 𑀤𑁂𑀯𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑁂𑀯𑀺, 𑀢𑁆𑀯𑀁 𑀧𑀼𑀢𑁆𑀢𑀁 𑀦𑀺𑀯𑀢𑁆𑀢𑁂𑀳𑀻’’𑀢𑀺. 𑀤𑁂𑀯𑀻𑀧𑀺 𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑁆𑀚𑀫𑁂𑀯 𑀭𑁄𑀘𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀘𑁂 𑀫𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀺, 𑀢𑀁 𑀔𑀫𑀣𑀸’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀕𑀢𑁂 𑀘 𑀧𑀦 𑀫𑀳𑀸𑀲𑀢𑁆𑀢𑁂 𑀫𑀳𑀸𑀚𑀦𑁄 𑀓𑀽𑀝𑀚𑀝𑀺𑀮𑀁 𑀧𑁄𑀣𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀦𑀸𑀕𑀭𑁂𑀳𑀺 𑀅𑀫𑀘𑁆𑀘𑀧𑀸𑀭𑀺𑀲𑀚𑁆𑀚𑀸𑀤𑀻𑀳𑀺 𑀭𑀸𑀚𑀧𑀼𑀭𑀺𑀲𑁂𑀳𑀺 𑀅𑀲𑁆𑀲𑀼𑀫𑀼𑀔𑁂𑀳𑀺 𑀅𑀦𑀼𑀩𑀦𑁆𑀥𑀺𑀬𑀫𑀸𑀦𑁄 𑀢𑁂 𑀦𑀺𑀯𑀢𑁆𑀢𑁂𑀲𑀺. 𑀫𑀦𑀼𑀲𑁆𑀲𑁂𑀲𑀼 𑀦𑀺𑀯𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀯𑀡𑁆𑀡𑁂𑀦𑀸𑀕𑀦𑁆𑀢𑁆𑀯𑀸 𑀤𑁂𑀯𑀢𑀸𑀳𑀺 𑀦𑀻𑀢𑁄 𑀲𑀢𑁆𑀢 𑀧𑀩𑁆𑀩𑀢𑀭𑀸𑀚𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸𑀬 𑀧𑀡𑁆𑀡𑀲𑀸𑀮𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁨𑁨.

‘‘𑀲𑁄 𑀫𑀁 𑀢𑀢𑁆𑀣 𑀔𑀫𑀸𑀧𑁂𑀲𑀺, 𑀫𑀳𑀸𑀭𑀚𑁆𑀚𑀁 𑀅𑀤𑀸𑀲𑀺 𑀫𑁂;

𑀲𑁄𑀳𑀁 𑀢𑀫𑀁 𑀤𑀸𑀮𑀬𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬’’𑀦𑁆𑀢𑀺.

𑀢𑀢𑁆𑀣 ¶ 𑀢𑀫𑀁 𑀤𑀸𑀮𑀬𑀺𑀢𑁆𑀯𑀸𑀢𑀺 𑀓𑀸𑀫𑀸𑀤𑀻𑀦𑀯𑀤𑀲𑁆𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀫𑁆𑀫𑁄𑀳𑀢𑀫𑀁 𑀯𑀺𑀥𑀫𑀺𑀢𑁆𑀯𑀸. 𑀧𑀩𑁆𑀩𑀚𑀺𑀦𑁆𑀢𑀺 𑀉𑀧𑀸𑀕𑀘𑁆𑀙𑀺𑀁. 𑀅𑀦𑀕𑀸𑀭𑀺𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀁.

𑁨𑁩. 𑀇𑀤𑀸𑀦𑀺 ¶ 𑀬𑀤𑀢𑁆𑀣𑀁 𑀢𑀤𑀸 𑀢𑀁 𑀭𑀸𑀚𑀺𑀲𑁆𑀲𑀭𑀺𑀬𑀁 𑀧𑀭𑀺𑀘𑁆𑀘𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀫𑁂 𑀤𑁂𑀲𑁆𑀲’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁄𑀯.

𑀏𑀯𑀁 𑀧𑀦 𑀫𑀳𑀸𑀲𑀢𑁆𑀢𑁂 𑀧𑀩𑁆𑀩𑀚𑀺𑀢𑁂 𑀬𑀸𑀯 𑀲𑁄𑀴𑀲𑀯𑀲𑁆𑀲𑀓𑀸𑀮𑀸 𑀭𑀸𑀚𑀓𑀼𑀮𑁂 ¶ 𑀧𑀭𑀺𑀘𑀸𑀭𑀺𑀓𑀯𑁂𑀲𑁂𑀦 𑀤𑁂𑀯𑀢𑀸𑀬𑁂𑀯 𑀦𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 𑀢𑀢𑁆𑀣 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀢𑀤𑀸 𑀓𑀼𑀳𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀫𑀸𑀢𑀸 𑀫𑀳𑀸𑀫𑀸𑀬𑀸, 𑀫𑀳𑀸𑀭𑀓𑁆𑀔𑀺𑀢𑀢𑀸𑀧𑀲𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀲𑁄𑀫𑀦𑀲𑁆𑀲𑀓𑀼𑀫𑀸𑀭𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀬𑀼𑀥𑀜𑁆𑀚𑀬𑀘𑀭𑀺𑀬𑀸𑀬𑀁 (𑀘𑀭𑀺𑀬𑀸. 𑁩.𑁧 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀲 𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀇𑀥𑀸𑀧𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀅𑀢𑀺𑀲𑀬𑀯𑀢𑀻𑀢𑀺 𑀲𑀸 𑀏𑀯 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸. 𑀢𑀣𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀏𑀯 𑀭𑀸𑀚𑀓𑀺𑀘𑁆𑀘𑁂𑀲𑀼 𑀲𑀫𑀢𑁆𑀣𑀢𑀸, 𑀢𑀲𑁆𑀲 𑀢𑀸𑀧𑀲𑀲𑁆𑀲 𑀓𑀽𑀝𑀚𑀝𑀺𑀮𑀪𑀸𑀯𑀧𑀭𑀺𑀕𑁆𑀕𑀡𑁆𑀳𑀦𑀁, 𑀢𑁂𑀦 𑀧𑀬𑀼𑀢𑁆𑀢𑁂𑀦 𑀭𑀜𑁆𑀜𑀸 𑀯𑀥𑁂 𑀆𑀡𑀢𑁆𑀢𑁂 𑀲𑀦𑁆𑀢𑀸𑀲𑀸𑀪𑀸𑀯𑁄, 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀸𑀦𑀸𑀦𑀬𑁂𑀳𑀺 𑀢𑀲𑁆𑀲 𑀲𑀤𑁄𑀲𑀢𑀁 𑀅𑀢𑁆𑀢𑀦𑁄 𑀘 𑀦𑀺𑀭𑀧𑀭𑀸𑀥𑀢𑀁 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀧𑀓𑀸𑀲𑁂𑀢𑁆𑀯𑀸 𑀭𑀜𑁆𑀜𑁄 𑀘 𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀢𑀁 𑀩𑀸𑀮𑀪𑀸𑀯𑀜𑁆𑀘 𑀧𑀝𑁆𑀞𑀧𑁂𑀢𑁆𑀯𑀸 𑀢𑁂𑀦 𑀔𑀫𑀸𑀧𑀺𑀢𑁂𑀧𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀸𑀲𑀢𑁄 𑀭𑀚𑁆𑀚𑀺𑀲𑁆𑀲𑀭𑀺𑀬𑀢𑁄 𑀘 𑀲𑀁𑀯𑁂𑀕𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀬𑀸𑀘𑀺𑀬𑀫𑀸𑀦𑁂𑀦𑀧𑀺 𑀳𑀢𑁆𑀣𑀕𑀢𑀁 𑀭𑀚𑁆𑀚𑀲𑀺𑀭𑀺𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑁂𑀢𑁆𑀯𑀸 𑀓𑀢𑁆𑀣𑀘𑀺 𑀅𑀮𑀕𑁆𑀕𑀘𑀺𑀢𑁆𑀢𑁂𑀦 𑀳𑀼𑀢𑁆𑀯𑀸 𑀧𑀩𑁆𑀩𑀚𑀦𑀁, 𑀧𑀩𑁆𑀩𑀚𑀺𑀢𑁆𑀯𑀸 𑀧𑀯𑀺𑀯𑁂𑀓𑀸𑀭𑀸𑀫𑁂𑀦 𑀳𑀼𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀧𑁆𑀧𑀓𑀲𑀺𑀭𑁂𑀦 𑀛𑀸𑀦𑀸𑀪𑀺𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀲𑁄𑀫𑀦𑀲𑁆𑀲𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀬𑁄𑀖𑀭𑀘𑀭𑀺𑀬𑀸𑀯𑀡𑁆𑀡𑀦𑀸

𑁨𑁪. 𑀢𑀢𑀺𑀬𑁂 𑀅𑀬𑁄𑀖𑀭𑀫𑁆𑀳𑀺 𑀲𑀁𑀯𑀟𑁆𑀠𑁄𑀢𑀺 𑀅𑀫𑀦𑀼𑀲𑁆𑀲𑀉𑀧𑀤𑁆𑀤𑀯𑀧𑀭𑀺𑀯𑀚𑁆𑀚𑀦𑀢𑁆𑀣𑀁 𑀘𑀢𑀼𑀭𑀲𑁆𑀲𑀲𑀸𑀮𑀯𑀲𑁂𑀦 𑀓𑀢𑁂 𑀫𑀳𑀢𑀺 𑀲𑀩𑁆𑀩𑀅𑀬𑁄𑀫𑀬𑁂 𑀕𑁂𑀳𑁂 𑀲𑀁𑀯𑀟𑁆𑀠𑁄. 𑀦𑀸𑀫𑁂𑀦𑀸𑀲𑀺 𑀅𑀬𑁄𑀖𑀭𑁄𑀢𑀺 𑀅𑀬𑁄𑀖𑀭𑁂 𑀚𑀸𑀢𑀲𑀁𑀯𑀟𑁆𑀠𑀪𑀸𑀯𑁂𑀦𑁂𑀯 ‘‘𑀅𑀬𑁄𑀖𑀭𑀓𑀼𑀫𑀸𑀭𑁄’’𑀢𑀺 𑀦𑀸𑀫𑁂𑀦 𑀧𑀸𑀓𑀝𑁄 𑀅𑀳𑁄𑀲𑀺.

𑁨𑁫-𑁬. 𑀢𑀤𑀸 ¶ ¶ 𑀳𑀺 𑀓𑀸𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀲𑀧𑀢𑁆𑀢𑀺 ‘‘𑀢𑀯 𑀚𑀸𑀢𑀁 𑀚𑀸𑀢𑀁 𑀧𑀚𑀁 𑀔𑀸𑀤𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 ¶ 𑀬𑀓𑁆𑀔𑀺𑀦𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲𑀸 𑀯𑀺𑀚𑀸𑀢𑀓𑀸𑀮𑁂 𑀤𑁆𑀯𑁂 𑀯𑀸𑀭𑁂 𑀧𑀼𑀢𑁆𑀢𑁂 𑀔𑀸𑀤𑀺. 𑀢𑀢𑀺𑀬𑀯𑀸𑀭𑁂 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀭𑀸𑀚𑀸 ‘‘𑀤𑁂𑀯𑀺𑀬𑀸 𑀚𑀸𑀢𑀁 𑀚𑀸𑀢𑀁 𑀧𑀚𑀁 𑀏𑀓𑀸 𑀬𑀓𑁆𑀔𑀺𑀦𑀻 𑀔𑀸𑀤𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀲𑀫𑁆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀫𑀦𑀼𑀲𑁆𑀲𑀸 𑀦𑀸𑀫 𑀅𑀬𑁄𑀖𑀭𑀲𑁆𑀲 𑀪𑀸𑀬𑀦𑁆𑀢𑀺, 𑀅𑀬𑁄𑀖𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 𑀓𑀫𑁆𑀫𑀸𑀭𑁂 𑀆𑀡𑀸𑀧𑁂𑀢𑁆𑀯𑀸 𑀣𑀫𑁆𑀪𑁂 𑀆𑀤𑀺𑀁 𑀓𑀢𑁆𑀯𑀸 𑀅𑀬𑁄𑀫𑀬𑁂𑀳𑁂𑀯 𑀲𑀩𑁆𑀩𑀕𑁂𑀳𑀲𑀫𑁆𑀪𑀸𑀭𑁂𑀳𑀺 𑀘𑀢𑀼𑀭𑀲𑁆𑀲𑀲𑀸𑀮𑀁 𑀫𑀳𑀦𑁆𑀢𑀁 𑀅𑀬𑁄𑀖𑀭𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑀺𑀧𑀓𑁆𑀓𑀕𑀩𑁆𑀪𑀁 𑀤𑁂𑀯𑀺𑀁 𑀢𑀢𑁆𑀣 𑀯𑀸𑀲𑁂𑀲𑀺. 𑀲𑀸 𑀢𑀢𑁆𑀣 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. ‘‘𑀅𑀬𑁄𑀖𑀭𑀓𑀼𑀫𑀸𑀭𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀫𑀳𑀦𑁆𑀢𑀁 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀭𑀸𑀚𑀸 𑀤𑁂𑀯𑀺𑀁 𑀅𑀦𑁆𑀢𑁂𑀧𑀼𑀭𑀁 𑀆𑀦𑁂𑀲𑀺. 𑀬𑀓𑁆𑀔𑀺𑀦𑀻𑀧𑀺 𑀉𑀤𑀓𑀯𑀸𑀭𑀁 𑀕𑀦𑁆𑀢𑁆𑀯𑀸 𑀯𑁂𑀲𑁆𑀲𑀯𑀡𑀲𑁆𑀲 𑀉𑀤𑀓𑀁 𑀯𑀳𑀦𑁆𑀢𑀻 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸.

𑀫𑀳𑀸𑀲𑀢𑁆𑀢𑁄 𑀅𑀬𑁄𑀖𑀭𑁂𑀬𑁂𑀯 𑀯𑀟𑁆𑀠𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀢𑀢𑁆𑀣𑁂𑀯 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺. 𑀭𑀸𑀚𑀸 𑀧𑀼𑀢𑁆𑀢𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀯𑀺𑀤𑀺𑀢𑁆𑀯𑀸 ‘‘𑀭𑀚𑁆𑀚𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 𑁋 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀣𑀸’’𑀢𑀺. 𑀢𑁂 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀫𑀗𑁆𑀕𑀮𑀯𑀸𑀭𑀡𑀁 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀲𑀭𑀻𑀭𑀲𑁄𑀪𑀁 𑀑𑀮𑁄𑀓𑁂𑀢𑁆𑀯𑀸 𑀩𑀮𑀯𑀲𑀺𑀦𑁂𑀳𑁂𑀦 𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀫𑁂 𑀧𑀼𑀢𑁆𑀢𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑁄, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑁂𑀦 𑀚𑀻𑀯𑀺𑀢𑁄 𑀮𑀤𑁆𑀥𑁄’’𑀢𑀺𑀆𑀤𑀺.

𑀢𑀢𑁆𑀣 𑀤𑀼𑀓𑁆𑀔𑁂𑀦𑀸𑀢𑀺, 𑀢𑀸𑀢, 𑀢𑀯 𑀪𑀸𑀢𑀺𑀓𑀸 𑀤𑁆𑀯𑁂 𑀏𑀓𑀸𑀬 𑀬𑀓𑁆𑀔𑀺𑀦𑀺𑀬𑀸 𑀔𑀸𑀤𑀺𑀢𑀸, 𑀢𑀼𑀬𑁆𑀳𑀁 𑀧𑀦 𑀢𑀢𑁄 𑀅𑀫𑀦𑀼𑀲𑁆𑀲𑀪𑀬𑀢𑁄 𑀦𑀺𑀯𑀸𑀭𑀡𑀢𑁆𑀣𑀁 𑀓𑀢𑁂𑀦 𑀤𑀼𑀓𑁆𑀔𑁂𑀦 𑀫𑀳𑀢𑀸 𑀆𑀬𑀸𑀲𑁂𑀦 𑀚𑀻𑀯𑀺𑀢𑁄 𑀮𑀤𑁆𑀥𑁄. 𑀲𑀁𑀧𑀻𑀴𑁂 𑀧𑀢𑀺𑀧𑁄𑀲𑀺𑀢𑁄𑀢𑀺 𑀦𑀸𑀦𑀸𑀯𑀺𑀥𑀸𑀬 𑀅𑀫𑀦𑀼𑀲𑁆𑀲𑀭𑀓𑁆𑀔𑀸𑀬 ¶ 𑀲𑀫𑁆𑀩𑀸𑀥𑁂 𑀅𑀬𑁄𑀖𑀭𑁂 𑀯𑀺𑀚𑀸𑀬𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑁄𑀴𑀲𑀯𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀩𑀸𑀥𑁂 𑀲𑀁𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀚𑁆𑀚𑁂𑀯, 𑀧𑀼𑀢𑁆𑀢, 𑀧𑀝𑀺𑀧𑀚𑁆𑀚, 𑀓𑁂𑀯𑀮𑀁 𑀯𑀲𑀼𑀥𑀁 𑀇𑀫𑀦𑁆𑀢𑀺 𑀓𑀜𑁆𑀘𑀦𑀫𑀸𑀮𑀸𑀮𑀗𑁆𑀓𑀢𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀅𑀪𑀺𑀲𑀺𑀜𑁆𑀘𑀺𑀬𑀫𑀸𑀦𑁄 ¶ 𑀇𑀫𑀁 𑀓𑀼𑀮𑀲𑀦𑁆𑀢𑀓𑀁 𑀓𑁂𑀯𑀮𑀁 𑀲𑀓𑀮𑀁 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀢𑀢𑁄𑀬𑁂𑀯 𑀲𑀳 𑀭𑀝𑁆𑀞𑁂𑀳𑀻𑀢𑀺 𑀲𑀭𑀝𑁆𑀞𑀓𑀁 𑀲𑀳 𑀦𑀺𑀕𑀫𑁂𑀳𑀺 𑀫𑀳𑀸𑀕𑀸𑀫𑁂𑀳𑀻𑀢𑀺 𑀲𑀦𑀺𑀕𑀫𑀁 𑀅𑀧𑀭𑀺𑀫𑀺𑀢𑁂𑀦 𑀧𑀭𑀺𑀯𑀸𑀭𑀚𑀦𑁂𑀦 𑀲𑀤𑁆𑀥𑀺𑀁 𑀲𑀚𑀦𑀁 𑀇𑀫𑀁 𑀯𑀲𑀼𑀥𑀁 𑀫𑀳𑀸𑀧𑀣𑀯𑀺𑀁 𑀅𑀚𑁆𑀚𑁂𑀯, 𑀧𑀼𑀢𑁆𑀢, 𑀧𑀝𑀺𑀧𑀚𑁆𑀚, 𑀭𑀚𑁆𑀚𑀁 𑀓𑀸𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀯𑀦𑁆𑀤𑀺𑀢𑁆𑀯𑀸 𑀔𑀢𑁆𑀢𑀺𑀬𑀁. 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀦𑁆𑀢𑀺 𑀔𑀢𑁆𑀢𑀺𑀬𑀁 𑀓𑀸𑀲𑀺𑀭𑀸𑀚𑀸𑀦𑀁 𑀫𑀫 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀇𑀤𑀁 𑀯𑀘𑀦𑀁 𑀅𑀪𑀸𑀲𑀺𑀁.

𑁨𑁭. 𑀬𑁂 ¶ 𑀓𑁂𑀘𑀺 𑀫𑀳𑀺𑀬𑀸 𑀲𑀢𑁆𑀢𑀸𑀢𑀺 𑀇𑀫𑀺𑀲𑁆𑀲𑀸 𑀫𑀳𑀸𑀧𑀣𑀯𑀺𑀬𑀸 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀦𑀸𑀫. 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀸𑀢𑀺 𑀮𑀸𑀫𑀓𑀸 𑀘𑁂𑀯 𑀉𑀢𑁆𑀢𑀫𑀸 𑀘, 𑀉𑀪𑀺𑀦𑁆𑀦𑀁 𑀯𑁂𑀫𑀚𑁆𑀛𑁂 𑀪𑀯𑀢𑁆𑀢𑀸 𑀫𑀚𑁆𑀛𑀺𑀫𑀸 𑀘. 𑀲𑀓𑁂 𑀕𑁂𑀳𑁂𑀢𑀺 𑀲𑀩𑁆𑀩𑁂 𑀢𑁂 𑀲𑀓𑁂 𑀕𑁂𑀳𑁂. 𑀲𑀓𑀜𑀸𑀢𑀺𑀪𑀻𑀢𑀺 𑀲𑀓𑁂𑀳𑀺 𑀜𑀸𑀢𑀻𑀳𑀺 𑀲𑀫𑁆𑀫𑁄𑀤𑀫𑀸𑀦𑀸 𑀯𑀺𑀲𑁆𑀲𑀝𑁆𑀞𑀸 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀬𑀣𑀸𑀯𑀺𑀪𑀯𑀁 𑀯𑀟𑁆𑀠𑀦𑁆𑀢𑀺.

𑁨𑁮. 𑀇𑀤𑀁 𑀮𑁄𑀓𑁂 𑀉𑀢𑁆𑀢𑀭𑀺𑀬𑀦𑁆𑀢𑀺 𑀇𑀤𑀁 𑀧𑀦 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀲𑀤𑀺𑀲𑀁, 𑀫𑀬𑁆𑀳𑀁 𑀏𑀯 𑀆𑀯𑁂𑀡𑀺𑀓𑀁. 𑀓𑀺𑀁 𑀧𑀦 𑀢𑀁 𑀲𑀁𑀧𑀻𑀴𑁂 𑀫𑀫 𑀧𑁄𑀲𑀦𑀦𑁆𑀢𑀺 𑀲𑀫𑁆𑀩𑀸𑀥𑁂 𑀫𑀫 𑀲𑀁𑀯𑀟𑁆𑀠𑀦𑀁. 𑀢𑀣𑀸 𑀳𑀺 𑀅𑀬𑁄𑀖𑀭𑀫𑁆𑀳𑀺 𑀲𑀁𑀯𑀟𑁆𑀠𑁄, 𑀅𑀧𑁆𑀧𑀪𑁂 𑀘𑀦𑁆𑀤𑀲𑀽𑀭𑀺𑀬𑁂𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀧𑀪𑀸𑀭𑀳𑀺𑀢𑁂 𑀅𑀬𑁄𑀖𑀭𑁂 𑀲𑀁𑀯𑀟𑁆𑀠𑁄𑀫𑁆𑀳𑀻𑀢𑀺 𑀲𑀁𑀯𑀟𑁆𑀠𑁄 𑀅𑀫𑁆𑀳𑀺.

𑁨𑁯. 𑀧𑀽𑀢𑀺𑀓𑀼𑀡𑀧𑀲𑀫𑁆𑀧𑀼𑀡𑁆𑀡𑀸𑀢𑀺 𑀧𑀽𑀢𑀺𑀕𑀦𑁆𑀥𑀦𑀸𑀦𑀧𑁆𑀧𑀓𑀸𑀭𑀓𑀼𑀡𑀧𑀲𑀫𑁆𑀧𑀼𑀡𑁆𑀡𑀸 𑀕𑀽𑀣𑀦𑀺𑀭𑀬𑀲𑀤𑀺𑀲𑀸. 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄 𑀚𑀻𑀯𑀺𑀢𑀲𑀁𑀲𑀬𑁂 𑀯𑀢𑁆𑀢𑀫𑀸𑀦𑁂 𑀓𑀣𑀁 𑀫𑀼𑀘𑁆𑀘𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀢𑀢𑁄 𑀖𑁄𑀭𑀢𑀭𑁂𑀢𑀺 𑀢𑀢𑁄𑀧𑀺 𑀕𑀩𑁆𑀪𑀯𑀸𑀲𑀢𑁄 𑀤𑀸𑀭𑀼𑀡𑀢𑀭𑁂, 𑀅𑀯𑀺𑀲𑁆𑀲𑀝𑁆𑀞𑀯𑀸𑀲𑁂𑀦 𑀤𑀼𑀓𑁆𑀔𑁂. 𑀧𑀓𑁆𑀔𑀺𑀢𑁆𑀢𑀬𑁄𑀖𑀭𑁂𑀢𑀺 𑀧𑀓𑁆𑀔𑀺𑀢𑁆𑀢𑁄 𑀅𑀬𑁄𑀖𑀭𑁂, 𑀩𑀦𑁆𑀥𑀦𑀸𑀕𑀸𑀭𑁂 𑀞𑀧𑀺𑀢𑁄 𑀯𑀺𑀬 𑀅𑀳𑁄𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁩𑁦. 𑀬𑀤𑀺𑀳𑀦𑁆𑀢𑀺 𑀏𑀢𑁆𑀣 𑀬𑀤𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀸𑀤𑀺𑀲𑀦𑁆𑀢𑀺 𑀬𑀸𑀤𑀺𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀸𑀤𑀺𑀲𑀁 𑀧𑀭𑀫𑀤𑀸𑀭𑀼𑀡𑀁 𑀤𑀼𑀓𑁆𑀔𑀁 𑀧𑀢𑁆𑀯𑀸 𑀅𑀳𑀁 𑀭𑀚𑁆𑀚𑁂𑀲𑀼 𑀬𑀤𑀺 𑀭𑀚𑁆𑀚𑀸𑀫𑀺 𑀬𑀤𑀺 𑀭𑀫𑀺𑀲𑁆𑀲𑀸𑀫𑀺, 𑀏𑀯𑀁 𑀲𑀦𑁆𑀢𑁂 𑀧𑀸𑀧𑀸𑀦𑀁 𑀮𑀸𑀫𑀓𑀸𑀦𑀁 𑀦𑀺𑀳𑀻𑀦𑀧𑀼𑀭𑀺𑀲𑀸𑀦𑀁 𑀉𑀢𑁆𑀢𑀫𑁄 𑀦𑀺𑀳𑀻𑀦𑀢𑀫𑁄 𑀲𑀺𑀬𑀁 ¶ .

𑁩𑁧. 𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀺 𑀓𑀸𑀬𑁂𑀦𑀸𑀢𑀺 𑀅𑀧𑀭𑀺𑀫𑀼𑀢𑁆𑀢𑀕𑀩𑁆𑀪𑀯𑀸𑀲𑀸𑀤𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀉𑀓𑁆𑀓𑀡𑁆𑀞𑀺𑀢𑁄 𑀦𑀺𑀩𑁆𑀩𑀺𑀦𑁆𑀦𑁄 𑀅𑀫𑁆𑀳𑀺. 𑀭𑀚𑁆𑀚𑁂𑀦𑀫𑁆𑀳𑀺 𑀅𑀦𑀢𑁆𑀣𑀺𑀓𑁄𑀢𑀺 𑀭𑀚𑁆𑀚𑁂𑀦𑀧𑀺 𑀅𑀦𑀢𑁆𑀣𑀺𑀓𑁄 𑀅𑀫𑁆𑀳𑀺. 𑀬𑀓𑁆𑀔𑀺𑀦𑀺𑀬𑀸 𑀳𑀢𑁆𑀣𑀢𑁄 𑀫𑀼𑀢𑁆𑀢𑁄𑀧𑀺 𑀳𑀺 𑀦𑀸𑀳𑀁 𑀅𑀚𑀭𑀸𑀫𑀭𑁄, 𑀓𑀺𑀁 ¶ 𑀫𑁂 𑀭𑀚𑁆𑀚𑁂𑀦, 𑀭𑀚𑁆𑀚𑀜𑁆𑀳𑀺 𑀦𑀸𑀫 𑀲𑀩𑁆𑀩𑁂𑀲𑀁 𑀅𑀦𑀢𑁆𑀣𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁, 𑀢𑀢𑁆𑀣 𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀼𑀦𑁆𑀦𑀺𑀓𑁆𑀔𑀫𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀧𑀭𑀺𑀬𑁂𑀲𑀺𑀲𑁆𑀲𑀁, 𑀬𑀢𑁆𑀣 𑀫𑀁 𑀫𑀘𑁆𑀘𑀼 𑀦 𑀫𑀤𑁆𑀤𑀺𑀬𑁂𑀢𑀺 𑀬𑀢𑁆𑀣 𑀞𑀺𑀢𑀁 𑀫𑀁 𑀫𑀳𑀸𑀲𑁂𑀦𑁄 𑀫𑀘𑁆𑀘𑀼𑀭𑀸𑀚𑀸 𑀦 𑀫𑀤𑁆𑀤𑀺𑀬𑁂 𑀦 𑀑𑀢𑁆𑀣𑀭𑁂𑀬𑁆𑀬 𑀦 𑀅𑀪𑀺𑀪𑀯𑁂𑀬𑁆𑀬, 𑀢𑀁 𑀦𑀺𑀩𑁆𑀩𑀼𑀢𑀺𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻𑀢𑀺.

𑁩𑁨. 𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦𑀸𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑁂 𑀆𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀘 𑀬𑁄𑀦𑀺𑀲𑁄 𑀘𑀺𑀦𑁆𑀢𑁂𑀢𑁆𑀯𑀸. 𑀯𑀺𑀭𑀯𑀦𑁆𑀢𑁂 𑀫𑀳𑀸𑀚𑀦𑁂𑀢𑀺 𑀫𑀬𑀸 𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀸𑀲𑀳𑀦𑁂𑀦 𑀯𑀺𑀭𑀯𑀦𑁆𑀢𑁂 𑀧𑀭𑀺𑀤𑁂𑀯𑀦𑁆𑀢𑁂 𑀫𑀸𑀢𑀸𑀧𑀺𑀢𑀼𑀧𑁆𑀧𑀫𑀼𑀔𑁂 𑀫𑀳𑀦𑁆𑀢𑁂 𑀚𑀦𑁂. 𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸𑀢𑀺 𑀬𑀣𑀸 𑀦𑀸𑀫 𑀫𑀳𑀸𑀩𑀮𑁄 𑀳𑀢𑁆𑀣𑀺𑀦𑀸𑀕𑁄 𑀤𑀼𑀩𑁆𑀩𑀮𑀢𑀭𑀁 𑀭𑀚𑁆𑀚𑀼𑀩𑀦𑁆𑀥𑀦𑀁 𑀲𑀼𑀔𑁂𑀦𑁂𑀯 𑀙𑀺𑀦𑁆𑀤𑀢𑀺, 𑀏𑀯𑀫𑁂𑀯 𑀜𑀸𑀢𑀺𑀲𑀗𑁆𑀕𑀸𑀤𑀺𑀪𑁂𑀤𑀲𑁆𑀲 ¶ 𑀢𑀲𑁆𑀫𑀺𑀁 𑀚𑀦𑁂 𑀢𑀡𑁆𑀳𑀸𑀩𑀦𑁆𑀥𑀦𑀲𑁆𑀲 𑀙𑀺𑀦𑁆𑀤𑀦𑁂𑀦 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸 𑀓𑀸𑀦𑀦𑀲𑀗𑁆𑀔𑀸𑀢𑀁 𑀫𑀳𑀸𑀯𑀦𑀁 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑀯𑀲𑁂𑀦 𑀧𑀸𑀯𑀺𑀲𑀺𑀁. 𑀑𑀲𑀸𑀦𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯.

𑀢𑀢𑁆𑀣 𑀘 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀥𑀺𑀧𑁆𑀧𑀸𑀬𑀁 𑀚𑀸𑀦𑀺𑀢𑁆𑀯𑀸 ‘‘𑀢𑀸𑀢, 𑀓𑀺𑀁𑀓𑀸𑀭𑀡𑀸 𑀧𑀩𑁆𑀩𑀚𑀲𑀻’’𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑁄 ‘‘𑀤𑁂𑀯, 𑀅𑀳𑀁 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀤𑀲 𑀫𑀸𑀲𑁂 𑀕𑀽𑀣𑀦𑀺𑀭𑀬𑁂 𑀯𑀺𑀬 𑀯𑀲𑀺𑀢𑁆𑀯𑀸 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄 𑀬𑀓𑁆𑀔𑀺𑀦𑀺𑀬𑀸 𑀪𑀬𑁂𑀦 𑀲𑁄𑀴𑀲𑀯𑀲𑁆𑀲𑀸𑀦𑀺 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑁄 𑀩𑀳𑀺 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀮𑀪𑀺𑀁, 𑀉𑀲𑁆𑀲𑀤𑀦𑀺𑀭𑀬𑁂 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀅𑀳𑁄𑀲𑀺𑀁, 𑀬𑀓𑁆𑀔𑀺𑀦𑀺𑀢𑁄 𑀫𑀼𑀢𑁆𑀢𑁄𑀧𑀺 𑀅𑀚𑀭𑀸𑀫𑀭𑁄 𑀦 𑀳𑁄𑀫𑀺, 𑀫𑀘𑁆𑀘𑀼 𑀦𑀸𑀫𑁂𑀲 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀚𑀺𑀦𑀺𑀢𑀼𑀁, 𑀪𑀯𑁂 𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀺, 𑀬𑀸𑀯 𑀫𑁂 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑀸𑀦𑀺 𑀦𑀸𑀕𑀘𑁆𑀙𑀦𑁆𑀢𑀺, 𑀢𑀸𑀯𑀤𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀥𑀫𑁆𑀫𑀁 𑀘𑀭𑀺𑀲𑁆𑀲𑀸𑀫𑀺, 𑀅𑀮𑀁 𑀫𑁂 𑀭𑀚𑁆𑀚𑁂𑀦, 𑀅𑀦𑀼𑀚𑀸𑀦𑀸𑀳𑀺 𑀫𑀁, 𑀤𑁂𑀯, 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑁋

‘‘𑀬𑀫𑁂𑀓𑀭𑀢𑁆𑀢𑀺𑀁 ¶ 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺. (𑀚𑀸. 𑁧.𑁧𑁫.𑁩𑁬𑁩) 𑁋

𑀆𑀤𑀺𑀦𑀸 𑀘𑀢𑀼𑀯𑀻𑀲𑀢𑀺𑀬𑀸 𑀕𑀸𑀣𑀸𑀳𑀺 𑀧𑀺𑀢𑀼 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀢𑀼𑀫𑁆𑀳𑀸𑀓𑀫𑁂𑀯 𑀳𑁄𑀢𑀼, 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑀸𑀦𑀺 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂’’𑀢𑀺 𑀯𑀢𑁆𑀯𑀸 𑀅𑀬𑀤𑀸𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀢𑁆𑀢𑀳𑀢𑁆𑀣𑀻 𑀯𑀺𑀬, 𑀓𑀜𑁆𑀘𑀦𑀧𑀜𑁆𑀚𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀻𑀳𑀧𑁄𑀢𑀓𑁄 𑀯𑀺𑀬, 𑀓𑀸𑀫𑁂 𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀧𑀺𑀢𑀸 ‘‘𑀅𑀬𑀁 𑀦𑀸𑀫 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀓𑀺𑀫𑀗𑁆𑀕𑀁 𑀧𑀦𑀸𑀳𑀁, 𑀫𑀫𑀸𑀧𑀺 𑀭𑀚𑁆𑀚𑁂𑀦 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 ¶ 𑀭𑀚𑁆𑀚𑀁 𑀧𑀳𑀸𑀬 𑀢𑁂𑀦 𑀲𑀤𑁆𑀥𑀺𑀁 𑀏𑀯 𑀦𑀺𑀓𑁆𑀔𑀫𑀺. 𑀢𑀲𑁆𑀫𑀺𑀁 𑀦𑀺𑀓𑁆𑀔𑀫𑀦𑁆𑀢𑁂 𑀤𑁂𑀯𑀻𑀧𑀺 𑀅𑀫𑀘𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄𑀧𑀻𑀢𑀺 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀪𑁄𑀕𑁂 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀫𑀸𑀕𑀫𑁄 𑀫𑀳𑀸 𑀅𑀳𑁄𑀲𑀺, 𑀧𑀭𑀺𑀲𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀚𑀸𑀢𑀸, 𑀢𑁂 𑀆𑀤𑀸𑀬 𑀫𑀳𑀸𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺.

𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀲𑁆𑀲 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀧𑁂𑀲𑁂𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀸𑀬𑀸𑀫𑀁 𑀲𑀢𑁆𑀢𑀬𑁄𑀚𑀦𑀯𑀺𑀢𑁆𑀣𑀸𑀭𑀁 𑀅𑀲𑁆𑀲𑀫𑀧𑀤𑀁 𑀓𑀸𑀭𑁂𑀲𑀺, 𑀲𑀩𑁆𑀩𑁂 𑀘 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀇𑀥 𑀫𑀳𑀸𑀲𑀢𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀑𑀯𑀸𑀤𑀤𑀸𑀦𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑀢𑀸 𑀘 𑀧𑀭𑀺𑀲𑀸𑀬 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺 𑀘 𑀲𑀩𑁆𑀩𑀸 𑀫𑀳𑀸𑀕𑁄𑀯𑀺𑀦𑁆𑀤𑀘𑀭𑀺𑀬𑀸𑀬𑀁 (𑀘𑀭𑀺𑀬𑀸. 𑁧.𑁩𑁭 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀢𑀤𑀸 ¶ 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀅𑀬𑁄𑀖𑀭𑀧𑀡𑁆𑀟𑀺𑀢𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀲𑁂𑀲𑀧𑀸𑀭𑀫𑀺𑀦𑀺𑀤𑁆𑀥𑀸𑀭𑀡𑀸 𑀆𑀦𑀼𑀪𑀸𑀯𑀯𑀺𑀪𑀸𑀯𑀦𑀸 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀅𑀬𑁄𑀖𑀭𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀪𑀺𑀲𑀘𑀭𑀺𑀬𑀸𑀯𑀡𑁆𑀡𑀦𑀸

𑁩𑁪.

𑀘𑀢𑀼𑀢𑁆𑀣𑁂 ¶ 𑀬𑀤𑀸 𑀳𑁄𑀫𑀺, 𑀓𑀸𑀲𑀻𑀦𑀁 𑀧𑀼𑀭𑀯𑀭𑀼𑀢𑁆𑀢𑀫𑁂𑀢𑀺 ‘‘𑀓𑀸𑀲𑀻’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑀲𑁆𑀲 𑀭𑀝𑁆𑀞𑀲𑁆𑀲 𑀦𑀕𑀭𑀯𑀭𑁂 𑀩𑀸𑀭𑀸𑀡𑀲𑀺𑀬𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀚𑀸𑀢𑀲𑀁𑀯𑀟𑁆𑀠𑁄 𑀳𑀼𑀢𑁆𑀯𑀸 𑀯𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀪𑀕𑀺𑀦𑀻 𑀘 𑀪𑀸𑀢𑀭𑁄 𑀲𑀢𑁆𑀢, 𑀦𑀺𑀩𑁆𑀩𑀢𑁆𑀢𑀸 𑀲𑁄𑀢𑁆𑀢𑀺𑀬𑁂 𑀓𑀼𑀮𑁂𑀢𑀺 𑀉𑀧𑀓𑀜𑁆𑀘𑀦𑀸𑀤𑀬𑁄 𑀙 𑀅𑀳𑀜𑁆𑀘𑀸𑀢𑀺 𑀪𑀸𑀢𑀭𑁄 𑀲𑀢𑁆𑀢 𑀲𑀩𑁆𑀩𑀓𑀦𑀺𑀝𑁆𑀞𑀸 𑀓𑀜𑁆𑀘𑀦𑀤𑁂𑀯𑀻 𑀦𑀸𑀫 𑀪𑀕𑀺𑀦𑀻 𑀘𑀸𑀢𑀺 𑀲𑀩𑁆𑀩𑁂 𑀫𑀬𑀁 𑀅𑀝𑁆𑀞 𑀚𑀦𑀸 𑀫𑀦𑁆𑀢𑀚𑁆𑀛𑁂𑀦𑀦𑀺𑀭𑀢𑀢𑀸𑀬 𑀲𑁄𑀢𑁆𑀢𑀺𑀬𑁂 𑀉𑀤𑀺𑀢𑁄𑀤𑀺𑀢𑁂 𑀫𑀳𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀢𑀤𑀸 𑀦𑀺𑀩𑁆𑀩𑀢𑁆𑀢𑀸 𑀚𑀸𑀢𑀸𑀢𑀺 𑀅𑀢𑁆𑀣𑁄.

𑁩𑁫.

𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 ‘‘𑀓𑀜𑁆𑀘𑀦𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀣𑀲𑁆𑀲 𑀧𑀤𑀲𑀸 𑀯𑀺𑀘𑀭𑀡𑀓𑀸𑀮𑁂 𑀅𑀧𑀭𑁄 𑀧𑀼𑀢𑁆𑀢𑁄 𑀯𑀺𑀚𑀸𑀬𑀺. ‘‘𑀉𑀧𑀓𑀜𑁆𑀘𑀦𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑀢𑁆𑀢𑀁 ‘‘𑀫𑀳𑀸𑀓𑀜𑁆𑀘𑀦𑀓𑀼𑀫𑀸𑀭𑁄’’𑀢𑀺 ¶ 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑀩𑁆𑀩𑀓𑀦𑀺𑀝𑁆𑀞𑀸 𑀧𑀦 𑀏𑀓𑀸 𑀥𑀻𑀢𑀸. 𑀢𑀲𑁆𑀲𑀸 ‘‘𑀓𑀜𑁆𑀘𑀦𑀤𑁂𑀯𑀻’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀜𑁆𑀙𑀺.

𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀖𑀭𑀸𑀯𑀸𑀲𑁂𑀦 𑀩𑀦𑁆𑀥𑀺𑀢𑀼𑀓𑀸𑀫𑀸 ‘‘𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑀼𑀮𑀢𑁄 𑀢𑁂 𑀤𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀅𑀫𑁆𑀫, 𑀢𑀸𑀢, 𑀦 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄. 𑀫𑀬𑁆𑀳𑀜𑁆𑀳𑀺 𑀲𑀩𑁆𑀩𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀆𑀤𑀺𑀢𑁆𑀢𑁄 𑀯𑀺𑀬 𑀲𑀧𑁆𑀧𑀝𑀺𑀪𑀬𑁄, 𑀩𑀦𑁆𑀥𑀦𑀸𑀕𑀸𑀭𑀁 𑀯𑀺𑀬 𑀧𑀮𑀺𑀩𑀼𑀤𑁆𑀥𑀦𑀁, 𑀉𑀓𑁆𑀓𑀸𑀭𑀪𑀽𑀫𑀺 𑀯𑀺𑀬 𑀚𑀺𑀕𑀼𑀘𑁆𑀙𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀦 𑀫𑁂 𑀘𑀺𑀢𑁆𑀢𑀁 𑀓𑀸𑀫𑁂𑀲𑀼 𑀭𑀚𑁆𑀚𑀢𑀺, 𑀅𑀜𑁆𑀜𑁂 𑀯𑁄 𑀧𑀼𑀢𑁆𑀢𑀸 𑀅𑀢𑁆𑀣𑀺, 𑀢𑁂 ¶ 𑀖𑀭𑀸𑀯𑀸𑀲𑁂𑀦 𑀦𑀺𑀫𑀦𑁆𑀢𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁄𑀧𑀺 𑀲𑀳𑀸𑀬𑁂𑀳𑀺 𑀬𑀸𑀘𑀸𑀧𑀺𑀢𑁄𑀧𑀺 𑀦 𑀇𑀘𑁆𑀙𑀺, 𑀅𑀣 𑀦𑀁 ¶ 𑀲𑀳𑀸𑀬𑀸 ‘‘𑀲𑀫𑁆𑀫, 𑀓𑀺𑀁 𑀧𑀦 𑀢𑁆𑀯𑀁 𑀧𑀢𑁆𑀣𑀬𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀇𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀅𑀢𑁆𑀢𑀦𑁄 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁂𑀲𑀁 𑀧𑀼𑀩𑁆𑀩𑀚𑁄 𑀆𑀲𑀺’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀏𑀢𑁂𑀲𑀁 𑀧𑀼𑀩𑁆𑀩𑀚𑁄 𑀆𑀲𑀺𑀦𑁆𑀢𑀺 𑀏𑀢𑁂𑀲𑀁 𑀉𑀧𑀓𑀜𑁆𑀘𑀦𑀓𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀚𑁂𑀝𑁆𑀞𑀪𑀸𑀢𑀺𑀓𑁄 𑀅𑀳𑀁 𑀢𑀤𑀸 𑀅𑀳𑁄𑀲𑀺𑀁. 𑀳𑀺𑀭𑀻𑀲𑀼𑀓𑁆𑀓𑀫𑀼𑀧𑀸𑀕𑀢𑁄𑀢𑀺 𑀲𑀼𑀓𑁆𑀓𑀯𑀺𑀧𑀸𑀓𑀢𑁆𑀢𑀸 𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁄𑀥𑀦𑀢𑁄 𑀘 𑀲𑀼𑀓𑁆𑀓𑀁 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁 𑀳𑀺𑀭𑀺𑀁 𑀪𑀼𑀲𑀁 𑀆𑀕𑀢𑁄, 𑀅𑀢𑀺𑀯𑀺𑀬 𑀧𑀸𑀧𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀆𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀁 𑀤𑀺𑀲𑁆𑀯𑀸𑀦 𑀪𑀬𑀢𑁄, 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁄 𑀅𑀳𑀦𑁆𑀢𑀺 𑀓𑀸𑀫𑀪𑀯𑀸𑀤𑀻𑀦𑀁 𑀯𑀲𑁂𑀦 𑀲𑀩𑁆𑀩𑀁 𑀪𑀯𑀁 𑀧𑀓𑁆𑀔𑀦𑁆𑀤𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀁 𑀘𑀡𑁆𑀟𑀳𑀢𑁆𑀣𑀺𑀁 𑀯𑀺𑀬, 𑀳𑀺𑀁𑀲𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀁 𑀯𑀥𑀓𑀁 𑀯𑀺𑀬, 𑀲𑀻𑀳𑀁 𑀯𑀺𑀬, 𑀬𑀓𑁆𑀔𑀁 𑀯𑀺𑀬, 𑀭𑀓𑁆𑀔𑀲𑀁 𑀯𑀺𑀬, 𑀖𑁄𑀭𑀯𑀺𑀲𑀁 𑀯𑀺𑀬, 𑀆𑀲𑀺𑀯𑀺𑀲𑀁 𑀯𑀺𑀬, 𑀆𑀤𑀺𑀢𑁆𑀢𑀁 𑀅𑀗𑁆𑀕𑀸𑀭𑀁 𑀯𑀺𑀬, 𑀲𑀧𑁆𑀧𑀝𑀺𑀪𑀬𑀁 𑀪𑀬𑀸𑀦𑀓𑀪𑀸𑀯𑀢𑁄 𑀧𑀲𑁆𑀲𑀺𑀢𑁆𑀯𑀸 𑀢𑀢𑁄 𑀫𑀼𑀘𑁆𑀘𑀦𑀢𑁆𑀣𑀜𑁆𑀘 𑀧𑀩𑁆𑀩𑀚𑁆𑀚𑀸𑀪𑀺𑀭𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀓𑀣𑀁 𑀦𑀼 𑀔𑁄 𑀥𑀫𑁆𑀫𑀘𑀭𑀺𑀬𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀬𑁆𑀬𑀁, 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀓𑀼𑀲𑀮𑀥𑀫𑁆𑀫𑀧𑀞𑀫𑀚𑁆𑀛𑀸𑀦𑀸𑀤𑀺𑀅𑀪𑀺𑀭𑀢𑁄 𑀢𑀤𑀸 𑀅𑀳𑀁 𑀆𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁩𑁬. 𑀧𑀳𑀺𑀢𑀸𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀧𑁂𑀲𑀺𑀢𑀸. 𑀏𑀓𑀫𑀸𑀦𑀲𑀸𑀢𑀺 𑀲𑀫𑀸𑀦𑀚𑁆𑀛𑀸𑀲𑀬𑀸 𑀧𑀼𑀩𑁆𑀩𑁂 𑀫𑀬𑀸 𑀏𑀓𑀘𑁆𑀙𑀦𑁆𑀤𑀸 𑀫𑀦𑀸𑀧𑀘𑀸𑀭𑀺𑀦𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀳𑀺𑀢𑀢𑁆𑀢𑀸 𑀧𑀦 𑀫𑀫 𑀧𑀝𑀺𑀓𑁆𑀓𑀽𑀮𑀁 𑀅𑀫𑀦𑀸𑀧𑀁 𑀯𑀤𑀦𑁆𑀢𑀸. 𑀓𑀸𑀫𑁂𑀳𑀺 𑀫𑀁 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀫𑀳𑀸𑀧𑀺𑀢𑀽𑀳𑀺 𑀯𑀸 𑀏𑀓𑀫𑀸𑀦𑀲𑀸 𑀓𑀸𑀫𑁂𑀳𑀺 𑀫𑀁 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀓𑀼𑀮𑀯𑀁𑀲𑀁 𑀥𑀸𑀭𑁂𑀳𑀻𑀢𑀺 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀁 𑀥𑀸𑀭𑁂𑀳𑀺 𑀧𑀢𑀺𑀝𑁆𑀞𑀧𑁂𑀳𑀻𑀢𑀺 𑀓𑀸𑀫𑁂𑀳𑀺 𑀫𑀁 𑀦𑀺𑀫𑀦𑁆𑀢𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁩𑁭. 𑀬𑀁 ¶ 𑀢𑁂𑀲𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀢𑁂𑀲𑀁 𑀫𑀫 𑀧𑀺𑀬𑀲𑀳𑀸𑀬𑀸𑀦𑀁 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁. 𑀕𑀺𑀳𑀺𑀥𑀫𑁆𑀫𑁂 𑀲𑀼𑀔𑀸𑀯𑀳𑀦𑁆𑀢𑀺 𑀕𑀺𑀳𑀺𑀪𑀸𑀯𑁂 𑀲𑀢𑀺 𑀕𑀳𑀝𑁆𑀞𑀪𑀸𑀯𑁂 𑀞𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀜𑀸𑀬𑀸𑀦𑀼𑀕𑀢𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀘 𑀲𑀼𑀔𑀲𑁆𑀲 𑀆𑀯𑀳𑀦𑀢𑁄 𑀲𑀼𑀔𑀸𑀯𑀳𑀁. 𑀢𑀁 𑀫𑁂 𑀅𑀳𑁄𑀲𑀺 𑀓𑀞𑀺𑀦𑀦𑁆𑀢𑀺 𑀢𑀁 𑀢𑁂𑀲𑀁 𑀫𑀬𑁆𑀳𑀁 𑀲𑀳𑀸𑀬𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀯𑀘𑀦𑀁 𑀏𑀓𑀦𑁆𑀢𑁂𑀦𑁂𑀯 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀢𑁆𑀢𑀸 𑀅𑀫𑀦𑀸𑀧𑀪𑀸𑀯𑁂𑀦 𑀫𑁂 𑀓𑀞𑀺𑀦𑀁 𑀨𑀭𑀼𑀲𑀁 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑀨𑀸𑀮𑀲𑀤𑀺𑀲𑀁 𑀉𑀪𑁄𑀧𑀺 𑀓𑀡𑁆𑀡𑁂 𑀛𑀸𑀧𑁂𑀦𑁆𑀢𑀁 𑀯𑀺𑀬 ¶ 𑀅𑀳𑁄𑀲𑀺.

𑁩𑁮. 𑀢𑁂 𑀫𑀁 𑀢𑀤𑀸 𑀉𑀓𑁆𑀔𑀺𑀧𑀦𑁆𑀢𑀦𑁆𑀢𑀺 𑀢𑁂 𑀫𑀬𑁆𑀳𑀁 𑀲𑀳𑀸𑀬𑀸 𑀫𑀸𑀢𑀸𑀧𑀺𑀢𑀽𑀳𑀺 𑀅𑀢𑁆𑀢𑀦𑁄 𑀘 𑀉𑀧𑀦𑀺𑀫𑀦𑁆𑀢𑀦𑀯𑀲𑁂𑀦 𑀅𑀦𑁂𑀓𑀯𑀸𑀭𑀁 𑀉𑀧𑀦𑀻𑀬𑀫𑀸𑀦𑁂 𑀓𑀸𑀫𑁂 𑀉𑀤𑁆𑀥𑀫𑀼𑀤𑁆𑀥𑀁 𑀔𑀺𑀧𑀦𑁆𑀢𑀁 𑀙𑀟𑁆𑀟𑁂𑀦𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀁 𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀧𑀢𑁆𑀣𑀺𑀢𑀁 𑀫𑀫𑀸𑀢𑀺 𑀇𑀢𑁄 𑀯𑀺𑀲𑀼𑀤𑁆𑀥𑀢𑀭𑀁 𑀓𑀺𑀁 𑀦𑀼 𑀔𑁄 𑀇𑀫𑀺𑀦𑀸 𑀧𑀢𑁆𑀣𑀺𑀢𑀦𑁆𑀢𑀺 𑀫𑀬𑀸 𑀅𑀪𑀺𑀧𑀢𑁆𑀣𑀺𑀢𑀁 𑀫𑀫 𑀢𑀁 𑀧𑀢𑁆𑀣𑀦𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀢𑁆𑀯𑀁 𑀧𑀢𑁆𑀣𑀬𑀲𑁂, 𑀲𑀫𑁆𑀫, 𑀬𑀤𑀺 𑀓𑀸𑀫𑁂 𑀦 𑀪𑀼𑀜𑁆𑀚𑀲𑀻’’𑀢𑀺.

𑁩𑁯. 𑀅𑀢𑁆𑀣𑀓𑀸𑀫𑁄𑀢𑀺 ¶ 𑀅𑀢𑁆𑀢𑀦𑁄 𑀅𑀢𑁆𑀣𑀓𑀸𑀫𑁄, 𑀧𑀸𑀧𑀪𑀻𑀭𑀽𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀢𑀓𑀸𑀫𑁄’’𑀢𑀺𑀧𑀺 𑀧𑀸𑀴𑀺. 𑀳𑀺𑀢𑁂𑀲𑀺𑀦𑀦𑁆𑀢𑀺 𑀫𑀬𑁆𑀳𑀁 𑀳𑀺𑀢𑁂𑀲𑀻𑀦𑀁 𑀧𑀺𑀬𑀲𑀳𑀸𑀬𑀸𑀦𑀁. 𑀓𑁂𑀘𑀺 ‘‘𑀅𑀢𑁆𑀣𑀓𑀸𑀫𑀳𑀺𑀢𑁂𑀲𑀺𑀦’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁.

𑁪𑁦. 𑀧𑀺𑀢𑀼 𑀫𑀸𑀢𑀼 𑀘 𑀲𑀸𑀯𑀬𑀼𑀦𑁆𑀢𑀺 𑀢𑁂 𑀫𑀬𑁆𑀳𑀁 𑀲𑀳𑀸𑀬𑀸 𑀅𑀦𑀺𑀯𑀢𑁆𑀢𑀦𑀻𑀬𑀁 𑀫𑀫 𑀧𑀩𑁆𑀩𑀚𑁆𑀚𑀸𑀙𑀦𑁆𑀤𑀁 𑀯𑀺𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑀢𑀸𑀤𑀻𑀧𑀓𑀁 𑀫𑀬𑁆𑀳𑀁 𑀯𑀘𑀦𑀁 𑀧𑀺𑀢𑀼 𑀫𑀸𑀢𑀼 𑀘 𑀲𑀸𑀯𑁂𑀲𑀼𑀁. ‘‘𑀬𑀕𑁆𑀖𑁂, 𑀅𑀫𑁆𑀫𑀢𑀸𑀢𑀸, 𑀚𑀸𑀦𑀸𑀣, 𑀏𑀓𑀦𑁆𑀢𑁂𑀦𑁂𑀯 𑀫𑀳𑀸𑀓𑀜𑁆𑀘𑀦𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀦 𑀲𑁄 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀓𑀸𑀫𑁂𑀲𑀼 𑀉𑀧𑀦𑁂𑀢𑀼’’𑀦𑁆𑀢𑀺 𑀅𑀯𑁄𑀘𑀼𑀁. 𑀫𑀸𑀢𑀸𑀧𑀺𑀢𑀸 𑀏𑀯𑀫𑀸𑀳𑀽𑀢𑀺 𑀢𑀤𑀸 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀭𑁄 𑀫𑀫 𑀲𑀳𑀸𑀬𑁂𑀳𑀺 𑀯𑀼𑀢𑁆𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀩𑁆𑀩𑁂𑀯 𑀧𑀩𑁆𑀩𑀚𑀸𑀫, 𑀪𑁄’’𑀢𑀺, 𑀬𑀤𑀺 𑀫𑀳𑀸𑀓𑀜𑁆𑀘𑀦𑀓𑀼𑀫𑀸𑀭𑀲𑁆𑀲 𑀦𑁂𑀓𑁆𑀔𑀫𑁆𑀫𑀁 𑀅𑀪𑀺𑀭𑀼𑀘𑀺𑀢𑀁, 𑀬𑀁 𑀢𑀲𑁆𑀲 𑀅𑀪𑀺𑀭𑀼𑀘𑀺𑀢𑀁, 𑀢𑀤𑀫𑁆𑀳𑀸𑀓𑀫𑁆𑀧𑀺 𑀅𑀪𑀺𑀭𑀼𑀘𑀺𑀢𑀫𑁂𑀯, 𑀢𑀲𑁆𑀫𑀸 𑀲𑀩𑁆𑀩𑁂𑀯 𑀧𑀩𑁆𑀩𑀚𑀸𑀫, 𑀪𑁄𑀢𑀺. ‘‘𑀪𑁄’’𑀢𑀺 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀮𑀧𑀦𑀁. ‘‘𑀧𑀩𑁆𑀩𑀚𑀸𑀫 𑀔𑁄’’𑀢𑀺𑀧𑀺 𑀧𑀸𑀞𑁄, 𑀧𑀩𑁆𑀩𑀚𑀸𑀫 𑀏𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀺 𑀧𑀩𑁆𑀩𑀚𑁆𑀚𑀸𑀙𑀦𑁆𑀤𑀁 𑀯𑀺𑀤𑀺𑀢𑁆𑀯𑀸 𑀉𑀧𑀓𑀜𑁆𑀘𑀦𑀸𑀤𑀬𑁄 𑀙 𑀪𑀸𑀢𑀭𑁄 𑀪𑀕𑀺𑀦𑀻 𑀘 𑀓𑀜𑁆𑀘𑀦𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸𑀯 𑀅𑀳𑁂𑀲𑀼𑀁, 𑀢𑁂𑀦 𑀢𑁂𑀧𑀺 𑀫𑀸𑀢𑀸𑀧𑀺𑀢𑀽𑀳𑀺 𑀖𑀭𑀸𑀯𑀸𑀲𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑀸 𑀦 𑀇𑀘𑁆𑀙𑀺𑀁𑀲𑀼𑀬𑁂𑀯. 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼 ‘‘𑀲𑀩𑁆𑀩𑁂𑀯 𑀧𑀩𑁆𑀩𑀚𑀸𑀫, 𑀪𑁄’’𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀅𑀥𑀺𑀧𑁆𑀧𑀸𑀬𑀁 𑀢𑀲𑁆𑀲 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑀸𑀢, 𑀬𑀤𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀲𑀺, 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀢𑀯 𑀲𑀦𑁆𑀢𑀓𑀁 𑀬𑀣𑀸𑀲𑀼𑀔𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀆𑀳𑀁𑀲𑀼. 𑀅𑀣 𑀦𑀁 𑀫𑀳𑀸𑀧𑀼𑀭𑀺𑀲𑁄 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀢𑁂𑀦 𑀲𑀤𑁆𑀥𑀺𑀁 𑀫𑀸𑀢𑀸𑀧𑀺𑀢𑀭𑁄 𑀙 𑀪𑀸𑀢𑀭𑁄 𑀘 𑀪𑀕𑀺𑀦𑀻 𑀘 𑀏𑀓𑁄 𑀤𑀸𑀲𑁄 𑀏𑀓𑀸 𑀤𑀸𑀲𑀻 𑀏𑀓𑁄 𑀘 𑀲𑀳𑀸𑀬𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀅𑀕𑀫𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁧.

‘‘𑀉𑀪𑁄 ¶ 𑀫𑀸𑀢𑀸 𑀧𑀺𑀢𑀸 𑀫𑀬𑁆𑀳𑀁, 𑀪𑀕𑀺𑀦𑀻 𑀘 𑀲𑀢𑁆𑀢 𑀪𑀸𑀢𑀭𑁄;

𑀅𑀫𑀺𑀢𑀥𑀦𑀁 𑀙𑀟𑁆𑀟𑀬𑀺𑀢𑁆𑀯𑀸, 𑀧𑀯𑀺𑀲𑀺𑀫𑁆𑀳𑀸 𑀫𑀳𑀸𑀯𑀦’’𑀦𑁆𑀢𑀺.

𑀚𑀸𑀢𑀓𑀝𑁆𑀞𑀓𑀣𑀸𑀬𑀁 (𑀚𑀸. 𑀅𑀝𑁆𑀞. 𑁪.𑁧𑁪.𑁭𑁭 𑀪𑀺𑀲𑀚𑀸𑀢𑀓𑀯𑀡𑁆𑀡𑀦𑀸) 𑀧𑀦 ‘‘𑀫𑀸𑀢𑀸𑀧𑀺𑀢𑀽𑀲𑀼 𑀓𑀸𑀮𑀁𑀓𑀢𑁂𑀲𑀼 𑀢𑁂𑀲𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀻’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘 𑀢𑁂 𑀩𑁄𑀥𑀺𑀲𑀢𑁆𑀢𑀧𑁆𑀧𑀫𑀼𑀔𑀸 𑀏𑀓𑀁 𑀧𑀤𑀼𑀫𑀲𑀭𑀁 𑀦𑀺𑀲𑁆𑀲𑀸𑀬 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀬𑀸𑀧𑀬𑀺𑀁𑀲𑀼. 𑀢𑁂𑀲𑀼 𑀉𑀧𑀓𑀜𑁆𑀘𑀦𑀸𑀤𑀬𑁄 𑀅𑀝𑁆𑀞 𑀚𑀦𑀸 𑀯𑀸𑀭𑁂𑀦 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀸𑀲𑀸𑀡𑀨𑀮𑀓𑁂 𑀅𑀢𑁆𑀢𑀦𑁄 𑀇𑀢𑀭𑁂𑀲𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀖𑀡𑁆𑀝𑀺𑀲𑀜𑁆𑀜𑀁 ¶ 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀦𑁆𑀢𑀺. 𑀲𑁂𑀲𑀸𑀧𑀺 𑀖𑀡𑁆𑀝𑀺𑀲𑀜𑁆𑀜𑀸𑀬 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺.

𑀅𑀧𑀭𑀪𑀸𑀕𑁂 𑀪𑀺𑀲𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀣𑁂𑀯 𑀔𑀸𑀤𑀦𑁆𑀢𑀺. 𑀢𑀢𑁆𑀣 𑀢𑁂 𑀖𑁄𑀭𑀢𑀧𑀸 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀯𑀺𑀳𑀭𑀺𑀁𑀲𑀼. 𑀅𑀣 𑀦𑁂𑀲𑀁 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀇𑀫𑁂 𑀇𑀲𑀬𑁄 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀳𑀸𑀲𑀢𑁆𑀢𑀲𑁆𑀲 𑀓𑁄𑀝𑁆𑀞𑀸𑀲𑁂 𑀢𑀬𑁄 𑀤𑀺𑀯𑀲𑁂 𑀅𑀦𑁆𑀢𑀭𑀥𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀧𑀞𑀫𑀤𑀺𑀯𑀲𑁂 𑀓𑁄𑀝𑁆𑀞𑀸𑀲𑀁 𑀅𑀤𑀺𑀲𑁆𑀯𑀸 ‘‘𑀫𑀫 𑀓𑁄𑀝𑁆𑀞𑀸𑀲𑁄 𑀧𑀫𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀫𑀫 𑀤𑁄𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀡𑀸𑀫𑀦𑀯𑀲𑁂𑀦 𑀫𑀫 𑀓𑁄𑀝𑁆𑀞𑀸𑀲𑀁 𑀦 𑀞𑀧𑀺𑀢𑀁 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀢𑀺𑀬𑀤𑀺𑀯𑀲𑁂 ‘‘𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀖𑀡𑁆𑀝𑀺𑀲𑀜𑁆𑀜𑀁 𑀤𑀢𑁆𑀯𑀸 𑀢𑀸𑀬 𑀲𑀜𑁆𑀜𑀸𑀬 𑀲𑀩𑁆𑀩𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀢𑀻𑀲𑀼𑀧𑀺 𑀤𑀺𑀯𑀲𑁂𑀲𑀼 ¶ 𑀢𑁂𑀳𑀺 𑀚𑁂𑀝𑁆𑀞𑀓𑁄𑀝𑁆𑀞𑀸𑀲𑀲𑁆𑀲 𑀞𑀧𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀓𑁄𑀝𑁆𑀞𑀸𑀲𑁄 𑀞𑀧𑀺𑀢𑁄, 𑀫𑀬𑀸 𑀧𑀦 𑀦 𑀮𑀤𑁆𑀥𑁄, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 ¶ 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀯 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁.

𑀢𑀲𑁆𑀫𑀺𑀁 𑀅𑀲𑁆𑀲𑀫𑁂 𑀭𑀼𑀓𑁆𑀔𑀤𑁂𑀯𑀢𑀸𑀧𑀺 𑀅𑀢𑁆𑀢𑀦𑁄 𑀪𑀯𑀦𑀢𑁄 𑀑𑀢𑀭𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀏𑀓𑁄 𑀯𑀸𑀭𑀡𑁄 𑀅𑀳𑀺𑀢𑀼𑀡𑁆𑀟𑀺𑀓𑀳𑀢𑁆𑀣𑀢𑁄 𑀧𑀮𑀸𑀬𑀺𑀢𑁆𑀯𑀸 𑀫𑀼𑀢𑁆𑀢𑁄 𑀲𑀧𑁆𑀧𑀓𑀻𑀴𑀸𑀧𑀦𑀓𑁄 𑀏𑀓𑁄 𑀯𑀸𑀦𑀭𑁄 𑀘 𑀢𑁂𑀳𑀺 𑀇𑀲𑀻𑀳𑀺 𑀓𑀢𑀧𑀭𑀺𑀘𑀬𑀸 𑀢𑀤𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀲𑀓𑁆𑀓𑁄𑀧𑀺 ‘‘𑀇𑀲𑀺𑀕𑀡𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑁄 𑀉𑀧𑀓𑀜𑁆𑀘𑀦𑀢𑀸𑀧𑀲𑁄 𑀉𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑁂𑀲𑀸𑀦𑀁 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀳𑀁 𑀲𑀜𑁆𑀜𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀜𑁆𑀜𑁂𑀯 𑀲𑁄𑀥𑁂𑀢𑀼𑀁 𑀮𑀪𑀸𑀫𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀮𑀪𑀲𑀻’’𑀢𑀺 𑀯𑀼𑀢𑁆𑀢𑁂 𑀇𑀲𑀺𑀕𑀡𑀫𑀚𑁆𑀛𑁂 𑀞𑀢𑁆𑀯𑀸 𑀲𑀧𑀣𑀁 𑀓𑀭𑁄𑀦𑁆𑀢𑁄 𑁋

‘‘𑀅𑀲𑁆𑀲𑀁 𑀕𑀯𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀪𑀭𑀺𑀬𑀜𑁆𑀘 𑀲𑁄 𑀇𑀥 𑀮𑀪𑀢𑀁 𑀫𑀦𑀸𑀧𑀁;

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀲𑀫𑀗𑁆𑀕𑀺 𑀳𑁄𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀻’’𑀢𑀺. (𑀚𑀸. 𑁧.𑁧𑁪.𑁭𑁮) 𑁋

𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺. 𑀇𑀫𑀜𑁆𑀳𑀺 𑀲𑁄 ‘‘𑀬𑀢𑁆𑀢𑀓𑀸𑀦𑀺 𑀧𑀺𑀬𑀯𑀢𑁆𑀣𑀽𑀦𑀺 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁂 𑀢𑀢𑁆𑀢𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀣𑀼𑀓𑀸𑀫𑁂 𑀕𑀭𑀳𑀦𑁆𑀢𑁄 𑀆𑀳.

𑀢𑀁 ¶ 𑀲𑀼𑀢𑁆𑀯𑀸 𑀇𑀲𑀺𑀕𑀡𑁄 ‘‘𑀫𑀸𑀭𑀺𑀲, 𑀫𑀸 𑀓𑀣𑀬, 𑀅𑀢𑀺𑀪𑀸𑀭𑀺𑀬𑁄 𑀢𑁂 𑀲𑀧𑀣𑁄’’𑀢𑀺 𑀓𑀡𑁆𑀡𑁂 𑀧𑀺𑀤𑀳𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 ‘‘𑀅𑀢𑀺𑀪𑀸𑀭𑀺𑀬𑁄 𑀢𑁂 𑀲𑀧𑀣𑁄, 𑀦, 𑀢𑁆𑀯𑀁 𑀢𑀸𑀢, 𑀕𑀡𑁆𑀳𑀲𑀺, 𑀢𑀯 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸’’𑀢𑀺 𑀆𑀳. 𑀲𑁂𑀲𑀸𑀧𑀺 𑀲𑀧𑀣𑀁 𑀓𑀭𑁄𑀦𑁆𑀢𑀸 𑀬𑀣𑀸𑀓𑁆𑀓𑀫𑀁 𑁋

‘‘𑀫𑀸𑀮𑀜𑁆𑀘 𑀲𑁄 𑀓𑀸𑀲𑀺𑀓𑀘𑀦𑁆𑀤𑀦𑀜𑁆𑀘, 𑀥𑀸𑀭𑁂𑀢𑀼 𑀧𑀼𑀢𑁆𑀢𑀲𑁆𑀲 𑀩𑀳𑀽 𑀪𑀯𑀦𑁆𑀢𑀼;

𑀓𑀸𑀫𑁂𑀲𑀼 ¶ 𑀢𑀺𑀩𑁆𑀩𑀁 𑀓𑀼𑀭𑀼𑀢𑀁 𑀅𑀧𑁂𑀓𑁆𑀔𑀁, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀧𑀳𑀽𑀢𑀥𑀜𑁆𑀜𑁄 ¶ 𑀓𑀲𑀺𑀫𑀸 𑀬𑀲𑀲𑁆𑀲𑀻, 𑀧𑀼𑀢𑁆𑀢𑁂 𑀕𑀺𑀳𑀻 𑀥𑀦𑀺𑀫𑀸 𑀲𑀩𑁆𑀩𑀓𑀸𑀫𑁂;

𑀯𑀬𑀁 𑀅𑀧𑀲𑁆𑀲𑀁 𑀖𑀭𑀫𑀸𑀯𑀲𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀲𑁄 𑀔𑀢𑁆𑀢𑀺𑀬𑁄 𑀳𑁄𑀢𑀼 𑀧𑀲𑀬𑁆𑀳𑀓𑀸𑀭𑀻, 𑀭𑀸𑀚𑀸𑀪𑀺𑀭𑀸𑀚𑀸 𑀩𑀮𑀯𑀸 𑀬𑀲𑀲𑁆𑀲𑀻;

𑀲𑀘𑀸𑀢𑀼𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀲𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀼 𑀅𑀯𑀻𑀢𑀭𑀸𑀕𑁄, 𑀫𑀼𑀳𑀼𑀢𑁆𑀢𑀦𑀓𑁆𑀔𑀢𑁆𑀢𑀧𑀣𑁂𑀲𑀼 𑀬𑀼𑀢𑁆𑀢𑁄;

𑀧𑀽𑀚𑁂𑀢𑀼 𑀦𑀁 𑀭𑀝𑁆𑀞𑀧𑀢𑀻 𑀬𑀲𑀲𑁆𑀲𑀻, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀅𑀚𑁆𑀛𑀸𑀬𑀓𑀁 𑀲𑀩𑁆𑀩𑀲𑀫𑀦𑁆𑀢𑀯𑁂𑀤𑀁, 𑀢𑀧𑀲𑁆𑀲𑀺𑀦𑀁 𑀫𑀜𑁆𑀜𑀢𑀼 𑀲𑀩𑁆𑀩𑀮𑁄𑀓𑁄;

𑀧𑀽𑀚𑁂𑀦𑁆𑀢𑀼 𑀦𑀁 𑀚𑀸𑀦𑀧𑀤𑀸 𑀲𑀫𑁂𑀘𑁆𑀘, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀘𑀢𑀼𑀲𑁆𑀲𑀤𑀁 𑀕𑀸𑀫𑀯𑀭𑀁 𑀲𑀫𑀺𑀤𑁆𑀥𑀁, 𑀤𑀺𑀦𑁆𑀦𑀜𑁆𑀳𑀺 𑀲𑁄 𑀪𑀼𑀜𑁆𑀚𑀢𑀼 𑀯𑀸𑀲𑀯𑁂𑀦;

𑀅𑀯𑀻𑀢𑀭𑀸𑀕𑁄 𑀫𑀭𑀡𑀁 𑀉𑀧𑁂𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀲𑁄 𑀕𑀸𑀫𑀡𑀻 𑀳𑁄𑀢𑀼 𑀲𑀳𑀸𑀬𑀫𑀚𑁆𑀛𑁂, 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀧𑀫𑁄𑀤𑀫𑀸𑀦𑁄;

𑀲𑁄 𑀭𑀸𑀚𑀢𑁄 𑀩𑁆𑀬𑀲𑀦𑀫𑀸𑀮𑀢𑁆𑀣 𑀓𑀺𑀜𑁆𑀘𑀺, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀢𑀁 𑀏𑀓𑀭𑀸𑀚𑀸 𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀇𑀢𑁆𑀣𑀻𑀲𑀳𑀲𑁆𑀲𑀲𑁆𑀲 𑀞𑀧𑁂𑀢𑀼 𑀅𑀕𑁆𑀕𑁂;

𑀲𑀻𑀫𑀦𑁆𑀢𑀺𑀦𑀻𑀦𑀁 𑀧𑀯𑀭𑀸 𑀪𑀯𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑀸 𑀅𑀳𑀸𑀲𑀺.

‘‘𑀇𑀲𑀻𑀦𑀜𑁆𑀳𑀺 ¶ 𑀲𑀸 𑀲𑀩𑁆𑀩𑀲𑀫𑀸𑀕𑀢𑀸𑀦𑀁, 𑀪𑀼𑀜𑁆𑀚𑁂𑀬𑁆𑀬 𑀲𑀸𑀤𑀼𑀁 𑀅𑀯𑀺𑀓𑀫𑁆𑀧𑀫𑀸𑀦𑀸;

𑀘𑀭𑀸𑀢𑀼 ¶ 𑀮𑀸𑀪𑁂𑀦 𑀯𑀺𑀓𑀢𑁆𑀣𑀫𑀸𑀦𑀸, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑀡 𑀬𑀸 𑀅𑀳𑀸𑀲𑀺.

‘‘𑀆𑀯𑀸𑀲𑀺𑀓𑁄 ¶ 𑀳𑁄𑀢𑀼 𑀫𑀳𑀸𑀯𑀺𑀳𑀸𑀭𑁂, 𑀦𑀯𑀓𑀫𑁆𑀫𑀺𑀓𑁄 𑀳𑁄𑀢𑀼 𑀕𑀚𑀗𑁆𑀕𑀮𑀸𑀬𑀁;

𑀆𑀮𑁄𑀓𑀲𑀦𑁆𑀥𑀺𑀁 𑀤𑀺𑀯𑀲𑀁 𑀓𑀭𑁄𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀲𑁄 𑀩𑀚𑁆𑀛𑀢𑀁 𑀧𑀸𑀲𑀲𑀢𑁂𑀳𑀺 𑀙𑀫𑁆𑀳𑀺, 𑀭𑀫𑁆𑀫𑀸 𑀯𑀦𑀸 𑀦𑀻𑀬𑀢𑀼 𑀭𑀸𑀚𑀥𑀸𑀦𑀺𑀁;

𑀢𑀼𑀢𑁆𑀢𑁂𑀳𑀺 𑀲𑁄 𑀳𑀜𑁆𑀜𑀢𑀼 𑀧𑀸𑀘𑀦𑁂𑀳𑀺, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

‘‘𑀅𑀮𑀓𑁆𑀓𑀫𑀸𑀮𑀻 𑀢𑀺𑀧𑀼𑀓𑀡𑁆𑀡𑀧𑀺𑀝𑁆𑀞𑁄, 𑀮𑀝𑁆𑀞𑀻𑀳𑀢𑁄 𑀲𑀧𑁆𑀧𑀫𑀼𑀔𑀁 𑀉𑀧𑁂𑀢𑀼;

𑀲𑀓𑀘𑁆𑀙𑀩𑀦𑁆𑀥𑁄 𑀯𑀺𑀲𑀺𑀔𑀁 𑀘𑀭𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀻’’𑀢𑀺. (𑀚𑀸. 𑁧.𑁧𑁪.𑁭𑁯-𑁯𑁦) 𑁋

𑀇𑀫𑀸 𑀕𑀸𑀣𑀸𑀬𑁄 𑀅𑀯𑁄𑀘𑀼𑀁.

𑀢𑀢𑁆𑀣 𑀢𑀺𑀩𑁆𑀩𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀩𑀳𑀮𑀁 𑀅𑀧𑁂𑀓𑁆𑀔𑀁 𑀓𑀭𑁄𑀢𑀼. 𑀓𑀲𑀺𑀫𑀸𑀢𑀺 𑀲𑀫𑁆𑀧𑀦𑁆𑀦𑀓𑀲𑀺𑀓𑀫𑁆𑀫𑁄. 𑀧𑀼𑀢𑁆𑀢𑁂 𑀕𑀺𑀳𑀻 𑀥𑀦𑀺𑀫𑀸 𑀲𑀩𑁆𑀩𑀓𑀸𑀫𑁂𑀢𑀺 𑀧𑀼𑀢𑁆𑀢𑁂 𑀮𑀪𑀢𑀼, 𑀕𑀺𑀳𑀻 𑀳𑁄𑀢𑀼, 𑀲𑀢𑁆𑀢𑀯𑀺𑀥𑁂𑀦 𑀥𑀦𑁂𑀦 𑀥𑀦𑀺𑀫𑀸 𑀳𑁄𑀢𑀼, 𑀭𑀽𑀧𑀸𑀤𑀺𑀪𑁂𑀤𑁂 𑀲𑀩𑁆𑀩𑀓𑀸𑀫𑁂 𑀮𑀪𑀢𑀼. 𑀯𑀬𑀁 𑀅𑀧𑀲𑁆𑀲𑀦𑁆𑀢𑀺 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀅𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀬𑀁 𑀅𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀁 𑀖𑀭𑀫𑁂𑀯 𑀆𑀯𑀲𑀢𑀼. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀭𑀸𑀚𑀽𑀦𑀁 𑀅𑀦𑁆𑀢𑀭𑁂 𑀅𑀢𑀺𑀭𑀸𑀚𑀸. 𑀅𑀯𑀻𑀢𑀭𑀸𑀕𑁄𑀢𑀺 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀢𑀡𑁆𑀳𑀸𑀬 𑀲𑀢𑀡𑁆𑀳𑁄. 𑀢𑀧𑀲𑁆𑀲𑀺𑀦𑀦𑁆𑀢𑀺 𑀢𑀧𑀲𑀻𑀮𑀁, 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀦𑀁 𑀫𑀜𑁆𑀜𑀢𑀼. 𑀘𑀢𑀼𑀲𑁆𑀲𑀤𑀦𑁆𑀢𑀺 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀢𑀸𑀬 𑀫𑀦𑀼𑀲𑁆𑀲𑁂𑀳𑀺 𑀧𑀳𑀽𑀢𑀥𑀜𑁆𑀜𑀢𑀸𑀬 𑀥𑀜𑁆𑀜𑁂𑀦 𑀲𑀼𑀮𑀪𑀤𑀸𑀭𑀼𑀢𑀸𑀬 𑀤𑀸𑀭𑀽𑀳𑀺 𑀲𑀫𑁆𑀧𑀦𑁆𑀦𑁄𑀤𑀓𑀢𑀸𑀬 𑀉𑀤𑀓𑁂𑀦𑀸𑀢𑀺 𑀘𑀢𑀽𑀳𑀺 𑀉𑀲𑁆𑀲𑀦𑁆𑀦𑀁. 𑀯𑀸𑀲𑀯𑁂𑀦𑀸𑀢𑀺 𑀯𑀸𑀲𑀯𑁂𑀦 𑀤𑀺𑀦𑁆𑀦𑀁 𑀯𑀺𑀬 𑀅𑀘𑀮𑀁, 𑀯𑀸𑀲𑀯𑀢𑁄 𑀮𑀤𑁆𑀥𑀯𑀭𑀸𑀦𑀼𑀪𑀸𑀯𑁂𑀦𑁂𑀯 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀅𑀯𑀻𑀢𑀭𑀸𑀕𑁄𑀢𑀺 𑀅𑀯𑀺𑀕𑀢𑀭𑀸𑀕𑁄 𑀓𑀤𑁆𑀤𑀫𑁂 𑀲𑀽𑀓𑀭𑁄 𑀯𑀺𑀬 𑀓𑀸𑀫𑀧𑀗𑁆𑀓𑁂 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀼.

𑀕𑀸𑀫𑀡𑀻𑀢𑀺 ¶ 𑀕𑀸𑀫𑀚𑁂𑀝𑁆𑀞𑀓𑁄. 𑀢𑀦𑁆𑀢𑀺 𑀢𑀁 𑀇𑀢𑁆𑀣𑀺𑀁. 𑀏𑀓𑀭𑀸𑀚𑀸𑀢𑀺 𑀅𑀕𑁆𑀕𑀭𑀸𑀚𑀸. 𑀇𑀢𑁆𑀣𑀻𑀲𑀳𑀲𑁆𑀲𑀲𑁆𑀲𑀸𑀢𑀺 𑀯𑀘𑀦𑀫𑀝𑁆𑀞𑀢𑀸𑀬 𑀯𑀼𑀢𑁆𑀢𑀁. 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 ¶ 𑀞𑀧𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀻𑀫𑀦𑁆𑀢𑀺𑀦𑀻𑀦𑀦𑁆𑀢𑀺 𑀲𑀻𑀫𑀦𑁆𑀢𑀥𑀭𑀸𑀦𑀁, 𑀇𑀢𑁆𑀣𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑀫𑀸𑀕𑀢𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸. 𑀅𑀯𑀺𑀓𑀫𑁆𑀧𑀫𑀸𑀦𑀸𑀢𑀺 𑀅𑀦𑁄𑀲𑀓𑁆𑀓𑀫𑀸𑀦𑀸 𑀲𑀸𑀤𑀼𑀭𑀲𑀁 𑀪𑀼𑀜𑁆𑀚𑀢𑀽𑀢𑀺 𑀅𑀢𑁆𑀣𑁄. 𑀘𑀭𑀸𑀢𑀼 𑀮𑀸𑀪𑁂𑀦 𑀯𑀺𑀓𑀢𑁆𑀣𑀫𑀸𑀦𑀸𑀢𑀺 𑀮𑀸𑀪𑀳𑁂𑀢𑀼 𑀲𑀺𑀗𑁆𑀕𑀸𑀭𑀯𑁂𑀲𑀁 𑀕𑀳𑁂𑀢𑁆𑀯𑀸 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀼𑀁 𑀘𑀭𑀢𑀼. 𑀆𑀯𑀸𑀲𑀺𑀓𑁄𑀢𑀺 𑀆𑀯𑀸𑀲𑀚𑀕𑁆𑀕𑀦𑀓𑁄. 𑀕𑀚𑀗𑁆𑀕𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀢𑁆𑀣 𑀓𑀺𑀭 𑀤𑀩𑁆𑀩𑀲𑀫𑁆𑀪𑀸𑀭𑀸 𑀲𑀼𑀮𑀪𑀸. 𑀆𑀮𑁄𑀓𑀲𑀦𑁆𑀥𑀺𑀁 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑁂𑀦 𑀏𑀓𑀫𑁂𑀯 𑀯𑀸𑀢𑀧𑀸𑀦𑀁 𑀓𑀭𑁄𑀢𑀼. 𑀲𑁄 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀕𑀚𑀗𑁆𑀕𑀮𑀦𑀕𑀭𑀁 𑀦𑀺𑀲𑁆𑀲𑀸𑀬 ¶ 𑀬𑁄𑀚𑀦𑀺𑀓𑁂 𑀫𑀳𑀸𑀯𑀺𑀳𑀸𑀭𑁂 𑀆𑀯𑀸𑀲𑀺𑀓𑁄 𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀚𑀺𑀡𑁆𑀡𑁂 𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄𑀯 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺, 𑀢𑀁 𑀲𑀦𑁆𑀥𑀸𑀬𑀸𑀳.

𑀧𑀸𑀲𑀲𑀢𑁂𑀳𑀻𑀢𑀺 𑀩𑀳𑀽𑀳𑀺 𑀧𑀸𑀲𑁂𑀳𑀺. 𑀙𑀫𑁆𑀳𑀻𑀢𑀺 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀕𑀻𑀯𑀸𑀬 𑀓𑀝𑀺𑀪𑀸𑀕𑁂 𑀘𑀸𑀢𑀺 𑀙𑀲𑀼 𑀞𑀸𑀦𑁂𑀲𑀼. 𑀢𑀼𑀢𑁆𑀢𑁂𑀳𑀻𑀢𑀺 𑀤𑁆𑀯𑀺𑀓𑀡𑁆𑀝𑀓𑀸𑀳𑀺 𑀤𑀻𑀖𑀮𑀝𑁆𑀞𑀻𑀳𑀺. 𑀧𑀸𑀘𑀦𑁂𑀳𑀻𑀢𑀺 𑀭𑀲𑁆𑀲𑀧𑀸𑀘𑀦𑁂𑀳𑀺, 𑀅𑀗𑁆𑀓𑀼𑀲𑀓𑁂𑀳𑀺 𑀯𑀸. 𑀅𑀮𑀓𑁆𑀓𑀫𑀸𑀮𑀻𑀢𑀺 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀓𑀡𑁆𑀞𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀸𑀬 𑀅𑀮𑀓𑁆𑀓𑀫𑀸𑀮𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀢𑀺𑀧𑀼𑀓𑀡𑁆𑀡𑀧𑀺𑀝𑁆𑀞𑁄𑀢𑀺 𑀢𑀺𑀧𑀼𑀧𑀺𑀴𑀦𑁆𑀥𑀦𑁂𑀦 𑀧𑀺𑀴𑀦𑁆𑀥𑀺𑀢𑀧𑀺𑀝𑁆𑀞𑀺𑀓𑀡𑁆𑀡𑁄 𑀓𑀡𑁆𑀡𑀧𑀺𑀝𑁆𑀞𑁄. 𑀮𑀝𑁆𑀞𑀺𑀳𑀢𑁄𑀢𑀺 𑀲𑀧𑁆𑀧𑀓𑀻𑀴𑀸𑀧𑀦𑀁 𑀲𑀺𑀓𑁆𑀔𑀸𑀧𑀬𑀫𑀸𑀦𑁄 𑀮𑀝𑁆𑀞𑀺𑀬𑀸 𑀳𑀢𑁄 𑀳𑀼𑀢𑁆𑀯𑀸. 𑀲𑀩𑁆𑀩𑀁 𑀢𑁂 𑀓𑀸𑀫𑀪𑁄𑀕𑀁 𑀖𑀭𑀸𑀯𑀸𑀲𑀁 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀤𑀼𑀓𑁆𑀔𑀜𑁆𑀘 𑀚𑀺𑀕𑀼𑀘𑁆𑀙𑀦𑁆𑀢𑀸 𑀢𑀣𑀸 𑀢𑀣𑀸 𑀲𑀧𑀣𑀁 𑀓𑀭𑁄𑀦𑁆𑀢𑀸 𑀏𑀯𑀫𑀸𑀳𑀁𑀲𑀼.

𑀅𑀣 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀩𑁆𑀩𑁂𑀳𑀺 𑀇𑀫𑁂𑀳𑀺 𑀲𑀧𑀣𑁄 𑀓𑀢𑁄, 𑀫𑀬𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀧𑀣𑀁 𑀓𑀭𑁄𑀦𑁆𑀢𑁄 𑁋

‘‘𑀬𑁄 𑀯𑁂 𑀅𑀦𑀝𑁆𑀞𑀁𑀯 𑀦𑀝𑁆𑀞𑀦𑁆𑀢𑀺 𑀘𑀸𑀳, 𑀓𑀸𑀫𑁂𑀯 𑀲𑁄 𑀮𑀪𑀢𑀁 𑀪𑀼𑀜𑁆𑀚𑀢𑀜𑁆𑀘;

𑀅𑀕𑀸𑀭𑀫𑀚𑁆𑀛𑁂 𑀫𑀭𑀡𑀁 𑀉𑀧𑁂𑀢𑀼, 𑀬𑁄 𑀯𑀸 𑀪𑁄𑀦𑁆𑀢𑁄 𑀲𑀗𑁆𑀓𑀢𑀺 𑀓𑀜𑁆𑀘𑀺 𑀤𑁂𑀯𑀸’’𑀢𑀺. (𑀚𑀸. 𑁧.𑁧𑁪.𑁯𑁧) 𑁋

𑀇𑀫𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀪𑁄𑀦𑁆𑀢𑁄𑀢𑀺 𑀪𑀯𑀦𑁆𑀢𑁄. 𑀲𑀗𑁆𑀓𑀢𑀻𑀢𑀺 𑀆𑀲𑀗𑁆𑀓𑀢𑀺. 𑀓𑀜𑁆𑀘𑀻𑀢𑀺 𑀅𑀜𑁆𑀜𑀢𑀭𑀁.

𑀅𑀣 ¶ 𑀲𑀓𑁆𑀓𑁄 ‘‘𑀲𑀩𑁆𑀩𑁂𑀧𑀺𑀫𑁂 𑀓𑀸𑀫𑁂𑀲𑀼 𑀦𑀺𑀭𑀧𑁂𑀓𑁆𑀔𑀸’’𑀢𑀺 𑀚𑀸𑀦𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀦 𑀇𑀫𑁂𑀲𑀼 𑀓𑁂𑀦𑀘𑀺𑀧𑀺 𑀪𑀺𑀲𑀸𑀦𑀺 𑀦𑀻𑀢𑀸𑀦𑀺, 𑀦𑀸𑀧𑀺 𑀢𑀬𑀸 𑀅𑀦𑀝𑁆𑀞𑀁 𑀦𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀧𑀺𑀘 𑀅𑀳𑀁 𑀢𑀼𑀫𑁆𑀳𑁂 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀅𑀦𑁆𑀢𑀭𑀥𑀸𑀧𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀯𑀻𑀫𑀁𑀲𑀫𑀸𑀦𑁄 ¶ 𑀇𑀲𑀺𑀦𑁄 𑀪𑀺𑀲𑀸𑀦𑀺, 𑀢𑀻𑀭𑁂 𑀕𑀳𑁂𑀢𑁆𑀯𑀸𑀦 𑀣𑀮𑁂 𑀦𑀺𑀥𑁂𑀲𑀺𑀁;

𑀲𑀼𑀤𑁆𑀥𑀸 𑀅𑀧𑀸𑀧𑀸 𑀇𑀲𑀬𑁄 𑀯𑀲𑀦𑁆𑀢𑀺, 𑀏𑀢𑀸𑀦𑀺 𑀢𑁂 𑀩𑁆𑀭𑀳𑁆𑀫𑀘𑀸𑀭𑀻 𑀪𑀺𑀲𑀸𑀦𑀻’’𑀢𑀺. (𑀚𑀸. 𑁧.𑁧𑁪.𑁯𑁫) 𑁋

𑀑𑀲𑀸𑀦𑀕𑀸𑀣𑀫𑀸𑀳.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑁋

‘‘𑀦 𑀢𑁂 𑀦𑀝𑀸 𑀦𑁄 𑀧𑀦 𑀓𑀻𑀴𑀦𑁂𑀬𑁆𑀬𑀸, 𑀦 𑀩𑀦𑁆𑀥𑀯𑀸 𑀦𑁄 𑀧𑀦 𑀢𑁂 𑀲𑀳𑀸𑀬𑀸;

𑀓𑀺𑀲𑁆𑀫𑀺𑀁 𑀯𑀼𑀧𑀢𑁆𑀣𑀫𑁆𑀪 𑀲𑀳𑀲𑁆𑀲𑀦𑁂𑀢𑁆𑀢, 𑀇𑀲𑀻𑀳𑀺 𑀢𑁆𑀯𑀁 𑀓𑀻𑀴𑀲𑀺 𑀤𑁂𑀯𑀭𑀸𑀚𑀸’’𑀢𑀺. (𑀚𑀸. 𑁧.𑁧𑁪.𑁯𑁬) 𑁋

𑀲𑀓𑁆𑀓𑀁 𑀢𑀚𑁆𑀚𑁂𑀲𑀺.

𑀅𑀣 𑀦𑀁 𑀲𑀓𑁆𑀓𑁄 𑁋

‘‘𑀆𑀘𑀭𑀺𑀬𑁄 𑀫𑁂𑀲𑀺 𑀧𑀺𑀢𑀸 𑀘 𑀫𑀬𑁆𑀳𑀁, 𑀏𑀲𑀸 𑀧𑀢𑀺𑀝𑁆𑀞𑀸 𑀔𑀮𑀺𑀢𑀲𑁆𑀲 𑀩𑁆𑀭𑀳𑁆𑀫𑁂;

𑀏𑀓𑀸𑀧𑀭𑀸𑀥𑀁 𑀔𑀫 𑀪𑀽𑀭𑀺𑀧𑀜𑁆𑀜, 𑀦 𑀧𑀡𑁆𑀟𑀺𑀢𑀸 𑀓𑁄𑀥𑀩𑀮𑀸 𑀪𑀯𑀦𑁆𑀢𑀻’’𑀢𑀺. (𑀚𑀸. 𑁧.𑁧𑁪.𑁯𑁭) 𑁋

𑀔𑀫𑀸𑀧𑁂𑀲𑀺.

𑀫𑀳𑀸𑀲𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀔𑀫𑀺𑀢𑁆𑀯𑀸 𑀲𑀬𑀁 𑀇𑀲𑀺𑀕𑀡𑀁 𑀔𑀫𑀸𑀧𑁂𑀦𑁆𑀢𑁄 𑁋

‘‘𑀲𑀼𑀯𑀸𑀲𑀺𑀢𑀁 𑀇𑀲𑀺𑀦𑀁 𑀏𑀓𑀭𑀢𑁆𑀢𑀁, 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀤𑁆𑀤𑀲𑀸𑀫;

𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀼𑀫𑀦𑀸 𑀪𑀯𑀦𑁆𑀢𑀼, 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀘𑁆𑀘𑀼𑀧𑀸𑀤𑀻 𑀪𑀺𑀲𑀸𑀦𑀻’’𑀢𑀺. (𑀚𑀸. 𑁧.𑁧𑁪.𑁯𑁮) 𑁋

𑀆𑀳.

𑀢𑀢𑁆𑀣 ¶ 𑀦 𑀢𑁂 𑀦𑀝𑀸𑀢𑀺, 𑀤𑁂𑀯𑀭𑀸𑀚, 𑀫𑀬𑀁 𑀢𑀯 𑀦𑀝𑀸 𑀯𑀸 𑀓𑀻𑀴𑀺𑀢𑀩𑁆𑀩𑀬𑀼𑀢𑁆𑀢𑀓𑀸 𑀯𑀸 𑀦 𑀳𑁄𑀫. 𑀦𑀸𑀧𑀺 𑀢𑀯 𑀜𑀸𑀢𑀓𑀸, 𑀲𑀳𑀸𑀬𑀸 𑀳𑀲𑁆𑀲𑀁 𑀓𑀸𑀢𑀩𑁆𑀩𑀸. 𑀅𑀣 𑀢𑁆𑀯𑀁 𑀓𑀺𑀲𑁆𑀫𑀺𑀁 𑀯𑀼𑀧𑀢𑁆𑀣𑀫𑁆𑀪𑀸𑀢𑀺 𑀓𑀺𑀁 𑀉𑀧𑀢𑁆𑀣𑀫𑁆𑀪𑀓𑀁 𑀓𑀢𑁆𑀯𑀸, 𑀓𑀺𑀁 𑀦𑀺𑀲𑁆𑀲𑀸𑀬 𑀇𑀲𑀻𑀳𑀺 𑀲𑀤𑁆𑀥𑀺𑀁 𑀓𑀻𑀴𑀲𑀻𑀢𑀺 𑀅𑀢𑁆𑀣𑁄. 𑀏𑀲𑀸 𑀧𑀢𑀺𑀝𑁆𑀞𑀸𑀢𑀺 𑀏𑀲𑀸 𑀢𑀯 𑀧𑀸𑀤𑀘𑁆𑀙𑀸𑀬𑀸 𑀅𑀚𑁆𑀚 𑀫𑀫 𑀔𑀮𑀺𑀢𑀲𑁆𑀲 𑀅𑀧𑀭𑀸𑀥𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀢𑀼. 𑀲𑀼𑀯𑀸𑀲𑀺𑀢𑀦𑁆𑀢𑀺 𑀆𑀬𑀲𑁆𑀫𑀦𑁆𑀢𑀸𑀦𑀁 𑀇𑀲𑀻𑀦𑀁 𑀏𑀓𑀭𑀢𑁆𑀢𑀺𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀲𑀺𑀢𑀁 𑀲𑀼𑀯𑀲𑀺𑀢𑀫𑁂𑀯. 𑀓𑀺𑀁𑀓𑀸𑀭𑀡𑀸? 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀁 𑀅𑀤𑁆𑀤𑀲𑀸𑀫. 𑀲𑀘𑁂 𑀳𑀺 𑀫𑀬𑀁 𑀦𑀕𑀭𑁂 𑀅𑀯𑀲𑀺𑀫𑁆𑀳𑀸, 𑀦 𑀇𑀫𑀁 𑀅𑀤𑁆𑀤𑀲𑀸𑀫. 𑀪𑁄𑀦𑁆𑀢𑁄𑀢𑀺 𑀪𑀯𑀦𑁆𑀢𑁄. 𑀲𑀩𑁆𑀩𑁂𑀧𑀺 𑀲𑀼𑀫𑀦𑀸 𑀪𑀯𑀦𑁆𑀢𑀼 𑀢𑀼𑀲𑁆𑀲𑀦𑁆𑀢𑀼, 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀔𑀫𑀦𑁆𑀢𑀼, 𑀓𑀺𑀁𑀓𑀸𑀭𑀡𑀸? 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀘𑁆𑀘𑀼𑀧𑀸𑀤𑀻 𑀪𑀺𑀲𑀸𑀦𑀺 ¶ 𑀬𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀪𑀺𑀲𑀸𑀦𑀺 𑀅𑀮𑀪𑀻𑀢𑀺. 𑀲𑀓𑁆𑀓𑁄 ¶ 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀢𑁄. 𑀇𑀲𑀺𑀕𑀡𑁄𑀧𑀺 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀢𑀤𑀸 𑀉𑀧𑀓𑀜𑁆𑀘𑀦𑀸𑀤𑀬𑁄 𑀙 𑀪𑀸𑀢𑀭𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀅𑀦𑀼𑀭𑀼𑀤𑁆𑀥𑀧𑀼𑀡𑁆𑀡𑀆𑀦𑀦𑁆𑀤𑀢𑁆𑀣𑁂𑀭𑀸, 𑀪𑀕𑀺𑀦𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀤𑀸𑀲𑀻 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀤𑀸𑀲𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀲𑀸𑀢𑀸𑀕𑀺𑀭𑁄, 𑀯𑀸𑀭𑀡𑁄 𑀧𑀸𑀮𑀺𑀮𑁂𑀬𑁆𑀬𑀦𑀸𑀕𑁄, 𑀯𑀸𑀦𑀭𑁄 𑀫𑀥𑀼𑀯𑀸𑀲𑀺𑀝𑁆𑀞𑁄, 𑀲𑀓𑁆𑀓𑁄 𑀓𑀸𑀴𑀼𑀤𑀸𑀬𑀻, 𑀫𑀳𑀸𑀓𑀜𑁆𑀘𑀦𑀢𑀸𑀧𑀲𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀲 𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀅𑀘𑁆𑀘𑀦𑁆𑀢𑀫𑁂𑀯 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀢𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀪𑀺𑀲𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁨. 𑀧𑀜𑁆𑀘𑀫𑁂 𑀦𑀕𑀭𑁂 𑀩𑁆𑀭𑀳𑁆𑀫𑀯𑀟𑁆𑀠𑀦𑁂𑀢𑀺 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀸𑀫𑀓𑁂 𑀦𑀕𑀭𑁂. 𑀓𑀼𑀮𑀯𑀭𑁂𑀢𑀺 𑀅𑀕𑁆𑀕𑀓𑀼𑀮𑁂. 𑀲𑁂𑀝𑁆𑀞𑁂𑀢𑀺 𑀧𑀸𑀲𑀁𑀲𑀢𑀫𑁂. 𑀫𑀳𑀸𑀲𑀸𑀮𑁂𑀢𑀺 𑀫𑀳𑀸𑀲𑀸𑀭𑁂. 𑀅𑀚𑀸𑀬𑀳𑀦𑁆𑀢𑀺 𑀅𑀚𑀸𑀬𑀺𑀁 𑀅𑀳𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀩𑁆𑀭𑀳𑁆𑀫𑀯𑀟𑁆𑀠𑀦’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀬𑀤𑀸 𑀳𑁄𑀫𑀺 𑀪𑀯𑀸𑀫𑀺 𑀧𑀝𑀺𑀯𑀲𑀸𑀫𑀺, 𑀢𑀤𑀸 𑀅𑀪𑀺𑀚𑀸𑀢𑀲𑀫𑁆𑀧𑀢𑁆𑀢𑀺𑀬𑀸 𑀉𑀤𑀺𑀢𑁄𑀤𑀺𑀢𑀪𑀸𑀯𑁂𑀦 𑀅𑀕𑁆𑀕𑁂 𑀯𑀺𑀚𑁆𑀚𑀸𑀯𑀢𑀲𑀫𑁆𑀧𑀢𑁆𑀢𑀺𑀬𑀸 𑀲𑁂𑀝𑁆𑀞𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀢𑀸𑀬 𑀫𑀳𑀸𑀲𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀅𑀳𑀁 𑀉𑀧𑁆𑀧𑀚𑁆𑀚𑀺𑀦𑁆𑀢𑀺.

𑀢𑀤𑀸 ¶ 𑀳𑀺 𑀫𑀳𑀸𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀲𑁄𑀡𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀅𑀜𑁆𑀜𑁄𑀧𑀺 𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀚𑀸𑀢𑀲𑁆𑀲 ‘‘𑀦𑀦𑁆𑀤𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂𑀲𑀁 𑀉𑀕𑁆𑀕𑀳𑀺𑀢𑀯𑁂𑀤𑀸𑀦𑀁 𑀲𑀩𑁆𑀩𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀧𑁆𑀧𑀢𑁆𑀢𑀸𑀦𑀁 𑀯𑀬𑀧𑁆𑀧𑀢𑁆𑀢𑀸𑀦𑀁 𑀭𑀽𑀧𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀳𑀝𑁆𑀞𑀸 𑀫𑀸𑀢𑀸𑀧𑀺𑀢𑀭𑁄 ‘‘𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀲𑁆𑀲𑀸𑀫𑀸’’𑀢𑀺 𑀧𑀞𑀫𑀁 𑀲𑁄𑀡𑀓𑀼𑀫𑀸𑀭𑀁 𑀆𑀳𑀁𑀲𑀼 𑁋 ‘‘𑀢𑀸𑀢, 𑀢𑁂 𑀧𑀢𑀺𑀭𑀽𑀧𑀓𑀼𑀮𑀢𑁄 𑀤𑀸𑀭𑀺𑀓𑀁 ¶ 𑀆𑀦𑁂𑀲𑁆𑀲𑀸𑀫, 𑀢𑁆𑀯𑀁 𑀓𑀼𑀝𑀼𑀫𑁆𑀩𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺.

𑀫𑀳𑀸𑀲𑀢𑁆𑀢𑁄 ¶ ‘‘𑀅𑀮𑀁 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦, 𑀅𑀳𑀁 𑀬𑀸𑀯𑀚𑀻𑀯𑀁 𑀢𑀼𑀫𑁆𑀳𑁂 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀺 𑀢𑀤𑀸 𑀢𑀬𑁄𑀧𑀺 𑀪𑀯𑀸 𑀆𑀤𑀺𑀢𑁆𑀢𑀁 𑀅𑀕𑀸𑀭𑀁 𑀯𑀺𑀬 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀘 𑀉𑀧𑀝𑁆𑀞𑀳𑀺𑀁𑀲𑀼. 𑀯𑀺𑀲𑁂𑀲𑀢𑁄 𑀧𑀦𑁂𑀲 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑀸 𑀢𑁂 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀸𑀧𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀢𑁂𑀦 𑀳𑀺 𑀢𑁆𑀯𑀁 𑀓𑀼𑀝𑀼𑀫𑁆𑀩𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦𑀸𑀧𑀺 ‘‘𑀦𑀸𑀳𑀁 𑀫𑀫 𑀪𑀸𑀢𑀭𑀸 𑀙𑀟𑁆𑀟𑀺𑀢𑀔𑁂𑀴𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀸𑀫𑀺, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀪𑀸𑀢𑀭𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀇𑀫𑁂 𑀏𑀯𑀁 𑀢𑀭𑀼𑀡𑀸 𑀓𑀸𑀫𑁂 𑀚𑀳𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑀦𑁆𑀢𑀺 𑀲𑀩𑁆𑀩𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀓𑀺𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑁆𑀚𑀸𑀬, 𑀲𑀩𑁆𑀩𑁂 𑀲𑀳𑁂𑀯 𑀧𑀩𑁆𑀩𑀚𑀸𑀫𑀸’’𑀢𑀺 𑀯𑀢𑁆𑀯𑀸 𑀜𑀸𑀢𑀻𑀦𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀢𑁆𑀯𑀸 𑀤𑀸𑀲𑀚𑀦𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀲𑀩𑁆𑀩𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀫𑀡𑁆𑀟𑀺𑀢𑀁 𑀫𑀳𑀸𑀲𑀭𑀁 𑀦𑀺𑀲𑁆𑀲𑀸𑀬 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀯𑀲𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁪𑁩.

‘‘𑀢𑀤𑀸𑀧𑀺 𑀮𑁄𑀓𑀁 𑀤𑀺𑀲𑁆𑀯𑀸𑀦, 𑀅𑀦𑁆𑀥𑀻𑀪𑀽𑀢𑀁 𑀢𑀫𑁄𑀢𑁆𑀣𑀝𑀁;

𑀘𑀺𑀢𑁆𑀢𑀁 𑀪𑀯𑀢𑁄 𑀧𑀢𑀺𑀓𑀼𑀝𑀢𑀺, 𑀢𑀼𑀢𑁆𑀢𑀯𑁂𑀕𑀳𑀢𑀁 𑀯𑀺𑀬.

𑁪𑁪.

‘‘𑀤𑀺𑀲𑁆𑀯𑀸𑀦 𑀯𑀺𑀯𑀺𑀥𑀁 𑀧𑀸𑀧𑀁, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀓𑀤𑀸𑀳𑀁 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁.

𑁪𑁫.

‘‘𑀢𑀤𑀸𑀧𑀺 𑀫𑀁 𑀦𑀺𑀫𑀦𑁆𑀢𑀺𑀁𑀲𑀼, 𑀓𑀸𑀫𑀪𑁄𑀕𑁂𑀳𑀺 𑀜𑀸𑀢𑀬𑁄;

𑀢𑁂𑀲𑀫𑁆𑀧𑀺 𑀙𑀦𑁆𑀤𑀫𑀸𑀘𑀺𑀓𑁆𑀔𑀺𑀁, 𑀫𑀸 𑀦𑀺𑀫𑀦𑁆𑀢𑁂𑀣 𑀢𑁂𑀳𑀺 𑀫𑀁.

𑁪𑁬.

‘‘𑀬𑁄 ¶ 𑀫𑁂 𑀓𑀦𑀺𑀝𑁆𑀞𑀓𑁄 𑀪𑀸𑀢𑀸, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀧𑀡𑁆𑀟𑀺𑀢𑁄;

𑀲𑁄𑀧𑀺 𑀫𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺.

𑁪𑁭.

‘‘𑀅𑀳𑀁 ¶ 𑀲𑁄𑀡𑁄 𑀘 𑀦𑀦𑁆𑀤𑁄 𑀘, 𑀉𑀪𑁄 𑀫𑀸𑀢𑀸𑀧𑀺𑀢𑀸 𑀫𑀫;

𑀢𑀤𑀸𑀧𑀺 𑀪𑁄𑀕𑁂 𑀙𑀟𑁆𑀟𑁂𑀢𑁆𑀯𑀸, 𑀧𑀸𑀯𑀺𑀲𑀺𑀫𑁆𑀳𑀸 𑀫𑀳𑀸𑀯𑀦’’𑀦𑁆𑀢𑀺.

𑀢𑀢𑁆𑀣 𑀢𑀤𑀸𑀧𑀻𑀢𑀺 𑀬𑀤𑀸 𑀅𑀳𑀁 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑁂 𑀲𑁄𑀡𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀅𑀳𑁄𑀲𑀺𑀁, 𑀢𑀤𑀸𑀧𑀺. 𑀮𑁄𑀓𑀁 𑀤𑀺𑀲𑁆𑀯𑀸𑀦𑀸𑀢𑀺 𑀲𑀓𑀮𑀫𑁆𑀧𑀺 𑀲𑀢𑁆𑀢𑀮𑁄𑀓𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸. 𑀅𑀦𑁆𑀥𑀻𑀪𑀽𑀢𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀯𑀺𑀭𑀳𑁂𑀦 ¶ 𑀅𑀦𑁆𑀥𑀚𑀸𑀢𑀁 𑀅𑀦𑁆𑀥𑀪𑀸𑀯𑀁 𑀧𑀢𑁆𑀢𑀁. 𑀢𑀫𑁄𑀢𑁆𑀣𑀝𑀦𑁆𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂𑀦 𑀅𑀪𑀺𑀪𑀽𑀢𑀁. 𑀘𑀺𑀢𑁆𑀢𑀁 𑀪𑀯𑀢𑁄 𑀧𑀢𑀺𑀓𑀼𑀝𑀢𑀻𑀢𑀺 𑀚𑀸𑀢𑀺𑀆𑀤𑀺𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀓𑀸𑀫𑀸𑀤𑀺𑀪𑀯𑀢𑁄 𑀫𑀫 𑀘𑀺𑀢𑁆𑀢𑀁 𑀲𑀗𑁆𑀓𑀼𑀝𑀢𑀺 𑀲𑀦𑁆𑀦𑀺𑀮𑀻𑀬𑀢𑀺 𑀦 𑀯𑀺𑀲𑀭𑀢𑀺. 𑀢𑀼𑀢𑁆𑀢𑀯𑁂𑀕𑀳𑀢𑀁 𑀯𑀺𑀬𑀸𑀢𑀺 𑀢𑀼𑀢𑁆𑀢𑀁 𑀯𑀼𑀘𑁆𑀘𑀢𑀺 𑀅𑀬𑁄𑀓𑀡𑁆𑀝𑀓𑀲𑀻𑀲𑁄 𑀤𑀻𑀖𑀤𑀡𑁆𑀟𑁄, 𑀬𑁄 𑀧𑀢𑁄𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑁂𑀕𑀲𑀸 𑀅𑀪𑀺𑀳𑀢𑁄 𑀬𑀣𑀸 𑀳𑀢𑁆𑀣𑀸𑀚𑀸𑀦𑀻𑀬𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀫𑀫 𑀘𑀺𑀢𑁆𑀢𑀁 𑀢𑀤𑀸 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀕𑀧𑁆𑀧𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀤𑀺𑀲𑁆𑀯𑀸𑀦 𑀯𑀺𑀯𑀺𑀥𑀁 𑀧𑀸𑀧𑀦𑁆𑀢𑀺 𑀕𑁂𑀳𑀁 𑀆𑀯𑀲𑀦𑁆𑀢𑁂𑀳𑀺 𑀖𑀭𑀸𑀯𑀸𑀲𑀦𑀺𑀫𑀺𑀢𑁆𑀢𑀁 𑀙𑀦𑁆𑀤𑀤𑁄𑀲𑀸𑀤𑀺𑀯𑀲𑁂𑀦 𑀓𑀭𑀻𑀬𑀫𑀸𑀦𑀁 𑀦𑀸𑀦𑀸𑀯𑀺𑀥𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀓𑀫𑁆𑀫𑀜𑁆𑀘𑁂𑀯 𑀢𑀦𑁆𑀦𑀺𑀫𑀺𑀢𑁆𑀢𑀜𑁆𑀘 𑀦𑁂𑀲𑀁 𑀮𑀸𑀫𑀓𑀪𑀸𑀯𑀁 𑀧𑀲𑁆𑀲𑀺𑀢𑁆𑀯𑀸. 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸𑀢𑀺 ‘‘𑀓𑀤𑀸 𑀦𑀼 𑀔𑁄 𑀅𑀳𑀁 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀅𑀬𑀩𑀦𑁆𑀥𑀦𑀁 𑀖𑀭𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑀦𑀯𑀲𑁂𑀦 𑀯𑀦𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀢𑀤𑀸 𑀲𑁄𑀡𑀓𑀼𑀫𑀸𑀭𑀓𑀸𑀮𑁂 𑀘𑀺𑀦𑁆𑀢𑁂𑀲𑀺𑀁 𑀅𑀳𑀁. 𑀢𑀤𑀸𑀧𑀺 𑀫𑀁 𑀦𑀺𑀫𑀦𑁆𑀢𑀺𑀁𑀲𑀽𑀢𑀺 𑀦 𑀓𑁂𑀯𑀮𑀁 𑀅𑀬𑁄𑀖𑀭𑀧𑀡𑁆𑀟𑀺𑀢𑀸𑀤𑀺𑀓𑀸𑀮𑁂𑀬𑁂𑀯, 𑀅𑀣 𑀔𑁄 𑀢𑀤𑀸𑀧𑀺 𑀢𑀲𑁆𑀫𑀺𑀁 𑀲𑁄𑀡𑀓𑀼𑀫𑀸𑀭𑀓𑀸𑀮𑁂𑀧𑀺 𑀫𑀁 𑀫𑀸𑀢𑀸𑀧𑀺𑀢𑀼𑀆𑀤𑀬𑁄 𑀜𑀸𑀢𑀬𑁄 𑀓𑀸𑀫𑀪𑁄𑀕𑀺𑀦𑁄 𑀓𑀸𑀫𑀚𑁆𑀛𑀸𑀲𑀬𑀸 ‘‘𑀏𑀳𑀺, 𑀢𑀸𑀢, 𑀇𑀫𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀯𑀺𑀪𑀯𑀁 𑀧𑀝𑀺𑀧𑀚𑁆𑀚, 𑀓𑀼𑀮𑀯𑀁𑀲𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀉𑀴𑀸𑀭𑁂𑀳𑀺 𑀪𑁄𑀕𑁂𑀳𑀺 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑁂𑀲𑀫𑁆𑀧𑀺 𑀙𑀦𑁆𑀤𑀫𑀸𑀘𑀺𑀓𑁆𑀔𑀺𑀦𑁆𑀢𑀺 𑀢𑁂𑀲𑀫𑁆𑀧𑀺 𑀫𑀫 𑀜𑀸𑀢𑀻𑀦𑀁 𑀢𑁂𑀳𑀺 𑀓𑀸𑀫𑀪𑁄𑀕𑁂𑀳𑀺 𑀫𑀸 𑀫𑀁 𑀦𑀺𑀫𑀦𑁆𑀢𑀬𑀺𑀢𑁆𑀣𑀸𑀢𑀺 𑀅𑀢𑁆𑀢𑀦𑁄 𑀙𑀦𑁆𑀤𑀫𑁆𑀧𑀺 𑀆𑀘𑀺𑀓𑁆𑀔𑀺𑀁, 𑀧𑀩𑁆𑀩𑀚𑁆𑀚𑀸𑀬 𑀦𑀺𑀦𑁆𑀦𑀚𑁆𑀛𑀸𑀲𑀬𑀫𑁆𑀧𑀺 𑀓𑀣𑁂𑀲𑀺𑀁, 𑀬𑀣𑀸𑀚𑁆𑀛𑀸𑀲𑀬𑀁 𑀧𑀝𑀺𑀧𑀚𑁆𑀚𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑁄𑀧𑀺 𑀫𑀁 𑀅𑀦𑀼 𑀲𑀺𑀓𑁆𑀔𑀦𑁆𑀢𑁄𑀢𑀺 ‘‘𑀇𑀫𑁂 𑀓𑀸𑀫𑀸 𑀦𑀸𑀫 𑀅𑀧𑁆𑀧𑀲𑁆𑀲𑀸𑀤𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀽𑀧𑀸𑀬𑀸𑀲𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁪; 𑁨.𑁪𑁩-𑁪𑁫; 𑀧𑀸𑀘𑀺.𑁪𑁧𑁭) 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀬𑀣𑀸𑀳𑀁 𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀦𑁆𑀢𑁄 𑀧𑀩𑁆𑀩𑀚𑁆𑀚𑀁 𑀭𑁄𑀘𑁂𑀲𑀺𑀁. 𑀲𑁄𑀧𑀺 𑀦𑀦𑁆𑀤𑀧𑀡𑁆𑀟𑀺𑀢𑁄 ¶ 𑀢𑀣𑁂𑀯 𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑁂𑀦 𑀫𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁄 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀻𑀢𑀺. 𑀅𑀳𑀁 𑀲𑁄𑀡𑁄 𑀘 𑀦𑀦𑁆𑀤𑁄 𑀘𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀲𑁄𑀡𑀦𑀸𑀫𑀓𑁄 𑀅𑀳𑀁 𑀫𑀬𑁆𑀳𑀁 𑀓𑀦𑀺𑀝𑁆𑀞𑀪𑀸𑀢𑀸 𑀦𑀦𑁆𑀤𑁄 𑀘𑀸𑀢𑀺. 𑀉𑀪𑁄 𑀫𑀸𑀢𑀸𑀧𑀺𑀢𑀸 ¶ 𑀫𑀫𑀸𑀢𑀺 ‘‘𑀇𑀫𑁂 𑀦𑀸𑀫 𑀧𑀼𑀢𑁆𑀢𑀓𑀸 𑀏𑀯𑀁 𑀢𑀭𑀼𑀡𑀓𑀸𑀮𑁂𑀧𑀺 𑀓𑀸𑀫𑁂 𑀚𑀳𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀸 𑀫𑀸𑀢𑀸𑀧𑀺𑀢𑀭𑁄 𑀘. 𑀪𑁄𑀕𑁂 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑀫𑀺𑀤𑁆𑀥𑁂 𑀫𑀳𑀸 𑀪𑁄𑀕𑁂 𑀅𑀦𑀧𑁂𑀓𑁆𑀔𑀘𑀺𑀢𑁆𑀢𑀸 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀬𑀁 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀫𑀳𑀸𑀯𑀦𑀁 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁂𑀦 𑀧𑀯𑀺𑀲𑀺𑀫𑁆𑀳𑀸𑀢𑀺 𑀅𑀢𑁆𑀣𑁄.

𑀧𑀯𑀺𑀲𑀺𑀢𑁆𑀯𑀸 𑀘 𑀢𑁂 𑀢𑀢𑁆𑀣 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀯𑀲𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀪𑀸𑀢𑀭𑁄 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀁𑀲𑀼. 𑀢𑁂𑀲𑀼 𑀦𑀦𑁆𑀤𑀧𑀡𑁆𑀟𑀺𑀢𑁄 ‘‘𑀫𑀬𑀸 𑀆𑀪𑀢𑀨𑀮𑀸𑀨𑀮𑀸𑀦𑁂𑀯 𑀫𑀸𑀢𑀸𑀧𑀺𑀢𑀭𑁄 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀳𑀺𑀬𑁆𑀬𑁄 𑀘 𑀧𑀼𑀭𑀺𑀫𑀕𑁄𑀘𑀭𑀕𑀳𑀺𑀢𑀝𑁆𑀞𑀸𑀦𑀢𑁄 𑀘 ¶ 𑀬𑀸𑀦𑀺 𑀢𑀸𑀦𑀺 𑀅𑀯𑀲𑁂𑀲𑀸𑀦𑀺 𑀨𑀮𑀸𑀨𑀮𑀸𑀦𑀺 𑀧𑀸𑀢𑁄𑀯 𑀆𑀦𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀔𑀸𑀤𑀸𑀧𑁂𑀢𑀺. 𑀢𑁂 𑀢𑀸𑀦𑀺 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀳𑁄𑀦𑁆𑀢𑀺. 𑀲𑁄𑀡𑀧𑀡𑁆𑀟𑀺𑀢𑁄 𑀧𑀦 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀫𑀥𑀼𑀭𑀫𑀥𑀼𑀭𑀸𑀦𑀺 𑀲𑀼𑀧𑀓𑁆𑀓𑀸𑀦𑀺 𑀆𑀳𑀭𑀺𑀢𑁆𑀯𑀸 𑀉𑀧𑀦𑀸𑀫𑁂𑀢𑀺. 𑀅𑀣 𑀦𑀁 𑀢𑁂 ‘‘𑀢𑀸𑀢, 𑀓𑀦𑀺𑀝𑁆𑀞𑁂𑀦 𑀆𑀪𑀢𑀸𑀦𑀺 𑀫𑀬𑀁 𑀔𑀸𑀤𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀚𑀸𑀢𑀸, 𑀇𑀤𑀸𑀦𑀺 𑀦𑁄 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀢𑀲𑁆𑀲 𑀨𑀮𑀸𑀨𑀮𑀸𑀦𑀺 𑀧𑀭𑀺𑀪𑁄𑀕𑀁 𑀦 𑀮𑀪𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀧𑀼𑀦𑀤𑀺𑀯𑀲𑀸𑀤𑀻𑀲𑀼𑀧𑀺 𑀢𑀣𑁂𑀯𑀸𑀢𑀺, 𑀏𑀯𑀁 𑀲𑁄 𑀧𑀜𑁆𑀘𑀸𑀪𑀺𑀜𑁆𑀜𑀢𑀸𑀬 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀆𑀳𑀭𑀢𑀺, 𑀢𑁂 𑀧𑀦 𑀦 𑀔𑀸𑀤𑀦𑁆𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑀼𑀫𑀸𑀮𑀸, 𑀦𑀦𑁆𑀤𑁄 𑀘 𑀬𑀸𑀦𑀺 𑀢𑀸𑀦𑀺 𑀅𑀧𑀓𑁆𑀓𑀸𑀦𑀺 𑀤𑀼𑀧𑁆𑀧𑀓𑁆𑀓𑀸𑀦𑀺 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀸𑀧𑁂𑀢𑀺, 𑀏𑀯𑀁 𑀲𑀦𑁆𑀢𑁂 𑀇𑀫𑁂 𑀦 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀯𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀅𑀣 𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀦𑀦𑁆𑀤, 𑀇𑀢𑁄 𑀧𑀝𑁆𑀞𑀸𑀬 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀫𑀫𑀸𑀕𑀫𑀦𑀁 𑀧𑀢𑀺𑀫𑀸𑀦𑁂𑀳𑀺, 𑀉𑀪𑁄 𑀏𑀓𑀢𑁄𑀯 𑀔𑀸𑀤𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀆𑀳. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀦 𑀢𑀲𑁆𑀲 𑀯𑀘𑀦𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 ‘‘𑀦 𑀢𑁆𑀯𑀁 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀓𑀭𑁄𑀲𑀺, 𑀅𑀳𑀁 𑀚𑁂𑀝𑁆𑀞𑁄, 𑀫𑀸𑀢𑀸𑀧𑀺𑀢𑀭𑁄 𑀘 𑀫𑀫𑁂𑀯 𑀪𑀸𑀭𑁄, 𑀅𑀳𑀫𑁂𑀯 𑀦𑁂 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀢𑁆𑀯𑀁 ¶ 𑀇𑀢𑁄 𑀅𑀜𑁆𑀜𑀢𑁆𑀣 𑀬𑀸𑀳𑀻’’𑀢𑀺 𑀢𑀲𑁆𑀲 𑀅𑀘𑁆𑀙𑀭𑀁 𑀧𑀳𑀭𑀺.

𑀲𑁄 𑀢𑁂𑀦 𑀧𑀡𑀸𑀫𑀺𑀢𑁄 𑀢𑀢𑁆𑀣 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀲𑀺𑀡𑀁 ¶ 𑀑𑀮𑁄𑀓𑁂𑀢𑁆𑀯𑀸 𑀢𑀁𑀤𑀺𑀯𑀲𑀫𑁂𑀯 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀺𑀦𑁂𑀭𑀼𑀧𑀸𑀤𑀢𑁄 𑀭𑀢𑀦𑀯𑀸𑀮𑀼𑀓𑀁 𑀆𑀳𑀭𑀺𑀢𑁆𑀯𑀸 𑀫𑀫 𑀪𑀸𑀢𑀼 𑀧𑀡𑁆𑀡𑀲𑀸𑀮𑀸𑀧𑀭𑀺𑀯𑁂𑀡𑀁 𑀆𑀓𑀺𑀭𑀺𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀉𑀤𑀸𑀳𑀼 𑀅𑀦𑁄𑀢𑀢𑁆𑀢𑀢𑁄 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺? 𑀅𑀣 𑀯𑀸 𑀫𑁂 𑀪𑀸𑀢𑀸 𑀤𑁂𑀯𑀢𑀸𑀯𑀲𑁂𑀦 𑀔𑀫𑁂𑀬𑁆𑀬, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑀜𑁆𑀘 𑀤𑁂𑀯𑀭𑀸𑀚𑀸𑀦𑀁 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀏𑀯𑀁 𑀧𑀦 𑀦 𑀲𑁄𑀪𑀺𑀲𑁆𑀲𑀢𑀺, 𑀅𑀬𑀁 𑀔𑁄 𑀫𑀦𑁄𑀚𑁄 𑀩𑁆𑀭𑀳𑁆𑀫𑀯𑀟𑁆𑀠𑀦𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸, 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀏𑀯𑀁 𑀲𑀦𑁆𑀢𑁂 𑀫𑀫 𑀪𑀸𑀢𑀼 𑀕𑀼𑀡𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺.

𑀲𑁄 𑀢𑀸𑀯𑀤𑁂𑀯 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑁂 𑀢𑀲𑁆𑀲 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 ‘‘𑀏𑀓𑁄 𑀢𑀸𑀧𑀲𑁄 𑀢𑀼𑀫𑁆𑀳𑁂 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀢𑁆𑀯𑀸 𑀢𑁂𑀦 𑀓𑀢𑁄𑀓𑀸𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀢𑀯 𑀤𑀲𑁆𑀲𑀸𑀫𑀻’’𑀢𑀺. ‘‘𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀣𑀸’’𑀢𑀺? ‘‘𑀫𑀳𑀸𑀭𑀸𑀚, 𑀓𑀲𑁆𑀲𑀘𑀺 𑀯𑀥𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸𑀯 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀤𑁆𑀥𑀺𑀁 𑀢𑀁 𑀆𑀤𑀸𑀬 𑀓𑁄𑀲𑀮𑀭𑀝𑁆𑀞𑀁 ¶ 𑀕𑀦𑁆𑀢𑁆𑀯𑀸 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑁆𑀯𑀸 ‘‘𑀬𑀼𑀤𑁆𑀥𑀁 𑀯𑀸 𑀦𑁄 𑀤𑁂𑀢𑀼, 𑀯𑀲𑁂 𑀯𑀸 𑀯𑀢𑁆𑀢𑀢𑀽’’𑀢𑀺 𑀓𑁄𑀲𑀮𑀭𑀜𑁆𑀜𑁄 𑀤𑀽𑀢𑀁 𑀧𑀸𑀳𑁂𑀲𑀺. 𑀢𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑁂𑀦 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑁂 𑀆𑀭𑀤𑁆𑀥𑁂 𑀅𑀢𑁆𑀢𑀦𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀧𑀻𑀴𑀦𑀁 𑀦 𑀳𑁄𑀢𑀺, 𑀏𑀯𑀁 𑀓𑀢𑁆𑀯𑀸 𑀬𑀣𑀸 𑀘 𑀓𑁄𑀲𑀮𑀭𑀸𑀚𑀸 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀢𑀺, 𑀏𑀯𑀁 𑀯𑀘𑀦𑀧𑀝𑀺𑀯𑀘𑀦𑀳𑀭𑀡𑁂𑀳𑀺 𑀲𑀁𑀯𑀺𑀤𑀳𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀸𑀧𑁂𑀲𑀺.

𑀲𑁄 𑀢𑁂𑀦 𑀧𑀭𑀺𑀢𑀼𑀝𑁆𑀞𑁄 𑀦𑀦𑁆𑀤𑀧𑀡𑁆𑀟𑀺𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀬𑀣𑀸 𑀫𑀬𑁆𑀳𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀣𑀸 𑀓𑀢𑀁, 𑀩𑀳𑀽𑀧𑀓𑀸𑀭𑀸 𑀫𑁂 𑀢𑀼𑀫𑁆𑀳𑁂, 𑀓𑀺𑀫𑀳𑀁 ¶ 𑀢𑀼𑀫𑁆𑀳𑀸𑀓𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀳𑀜𑁆𑀳𑀺 𑀢𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀉𑀧𑀟𑁆𑀠𑀭𑀚𑁆𑀚𑀫𑁆𑀧𑀺 𑀤𑀸𑀢𑀼𑀁 𑀇𑀘𑁆𑀙𑀸𑀫𑀺, 𑀓𑀺𑀫𑀗𑁆𑀕𑀁 𑀧𑀦 𑀳𑀢𑁆𑀣𑀺𑀅𑀲𑁆𑀲𑀭𑀣𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀭𑀚𑀢𑀲𑀼𑀯𑀡𑁆𑀡𑀤𑀸𑀲𑀺𑀤𑀸𑀲𑀧𑀭𑀺𑀚𑀦𑀧𑀭𑀺𑀘𑁆𑀙𑁂𑀤’’𑀦𑁆𑀢𑀺? 𑀢𑀁 𑀲𑀼𑀢𑁆𑀯𑀸 𑀦𑀦𑁆𑀤𑀧𑀡𑁆𑀟𑀺𑀢𑁄 ‘‘𑀦 𑀫𑁂 𑀢𑁂, 𑀫𑀳𑀸𑀭𑀸𑀚, 𑀭𑀚𑁆𑀚𑁂𑀦 𑀅𑀢𑁆𑀣𑁄, 𑀦𑀸𑀧𑀺 𑀳𑀢𑁆𑀣𑀺𑀬𑀸𑀦𑀸𑀤𑀻𑀳𑀺, 𑀅𑀧𑀺 𑀘 𑀔𑁄 𑀢𑁂 𑀭𑀝𑁆𑀞𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀅𑀲𑁆𑀲𑀫𑁂 𑀫𑀫 𑀫𑀸𑀢𑀸𑀧𑀺𑀢𑀭𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀲𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀝𑁆𑀞𑀳𑀦𑁆𑀢𑁄 𑀏𑀓𑀲𑁆𑀫𑀺𑀁 ¶ 𑀅𑀧𑀭𑀸𑀥𑁂 𑀫𑀫 𑀚𑁂𑀝𑁆𑀞𑀪𑀸𑀢𑀺𑀓𑁂𑀦 𑀲𑁄𑀡𑀧𑀡𑁆𑀟𑀺𑀢𑁂𑀦 𑀦𑀸𑀫 𑀫𑀳𑁂𑀲𑀺𑀦𑀸 𑀧𑀡𑀸𑀫𑀺𑀢𑁄, 𑀲𑁆𑀯𑀸𑀳𑀁 𑀢𑀁 𑀆𑀤𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀢𑀲𑁆𑀲 𑀫𑁂 𑀢𑁆𑀯𑀁 𑀔𑀫𑀸𑀧𑀦𑁂 𑀲𑀳𑀸𑀬𑁄 𑀳𑁄𑀳𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘𑀢𑀼𑀯𑀻𑀲𑀢𑀺𑀅𑀓𑁆𑀔𑁄𑀪𑀦𑀻 𑀧𑀭𑀺𑀫𑀸𑀡𑀸𑀬 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀏𑀓𑀲𑀢𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀦𑀦𑁆𑀤𑀧𑀡𑁆𑀟𑀺𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀢𑀁 𑀅𑀲𑁆𑀲𑀫𑀧𑀤𑀁 𑀧𑀢𑁆𑀯𑀸 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀤𑁂𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁂𑀦 𑀓𑀸𑀚𑁂𑀦 𑀅𑀦𑁄𑀢𑀢𑁆𑀢𑀢𑁄 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀆𑀲𑀦𑁆𑀦𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑀁 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑀁 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀦𑁆𑀤𑀧𑀡𑁆𑀟𑀺𑀢𑁄 𑀦𑀁 𑀔𑀫𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀦𑀦𑁆𑀤𑀧𑀡𑁆𑀟𑀺𑀢𑀁 𑀫𑀸𑀢𑀭𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀬𑀸𑀯𑀚𑀻𑀯𑀁 𑀧𑀺𑀢𑀭𑀁 𑀧𑀝𑀺𑀚𑀕𑁆𑀕𑀺. 𑀢𑁂𑀲𑀁 𑀧𑀦 𑀭𑀸𑀚𑀽𑀦𑀁 𑁋

‘‘𑀆𑀦𑀦𑁆𑀤𑁄 𑀘 𑀧𑀫𑁄𑀤𑁄 𑀘, 𑀲𑀤𑀸 𑀳𑀲𑀺𑀢𑀓𑀻𑀴𑀺𑀢𑀁;

𑀫𑀸𑀢𑀭𑀁 𑀧𑀭𑀺𑀘𑀭𑀺𑀢𑁆𑀯𑀸𑀦, 𑀮𑀩𑁆𑀪𑀫𑁂𑀢𑀁 𑀯𑀺𑀚𑀸𑀦𑀢𑀸.

‘‘𑀆𑀦𑀦𑁆𑀤𑁄 𑀘 𑀧𑀫𑁄𑀤𑁄 𑀘, 𑀲𑀤𑀸 𑀳𑀲𑀺𑀢𑀓𑀻𑀴𑀺𑀢𑀁;

𑀧𑀺𑀢𑀭𑀁 𑀧𑀭𑀺𑀘𑀭𑀺𑀢𑁆𑀯𑀸𑀦, 𑀮𑀩𑁆𑀪𑀫𑁂𑀢𑀁 𑀯𑀺𑀚𑀸𑀦𑀢𑁄.

‘‘𑀤𑀸𑀦𑀜𑁆𑀘 𑀧𑁂𑀬𑁆𑀬𑀯𑀚𑁆𑀚𑀜𑁆𑀘, 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;

𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

‘‘𑀏𑀢𑁂 ¶ 𑀘 𑀲𑀗𑁆𑀕𑀳𑀸 𑀦𑀸𑀲𑁆𑀲𑀼, 𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸;

𑀮𑀪𑁂𑀣 𑀫𑀸𑀦𑀁 𑀧𑀽𑀚𑀁 𑀯𑀸, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀓𑀸𑀭𑀡𑀸.

‘‘𑀬𑀲𑁆𑀫𑀸 𑀘 𑀲𑀗𑁆𑀕𑀳𑀸 𑀏𑀢𑁂, 𑀲𑀫𑁆𑀫𑀧𑁂𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀫𑀳𑀢𑁆𑀢𑀁 𑀧𑀧𑁆𑀧𑁄𑀦𑁆𑀢𑀺, 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀺 𑀢𑁂.

‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂;

𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀁, 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸.

‘‘𑀢𑀲𑁆𑀫𑀸 𑀳𑀺 𑀦𑁂 𑀦𑀫𑀲𑁆𑀲𑁂𑀬𑁆𑀬, 𑀲𑀓𑁆𑀓𑀭𑁂𑀬𑁆𑀬 𑀘 𑀧𑀡𑁆𑀟𑀺𑀢𑁄;

𑀅𑀦𑁆𑀦𑁂𑀦 ¶ 𑀅𑀣 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀉𑀘𑁆𑀙𑀸𑀤𑀦𑁂𑀦 𑀦𑁆𑀳𑀸𑀧𑀦𑁂𑀦, 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘.

‘‘𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. (𑀚𑀸. 𑁨.𑁨𑁦.𑁧𑁭𑁬-𑁧𑁮𑁩) 𑁋

𑀩𑀼𑀤𑁆𑀥𑀮𑀻𑀴𑀸𑀬 ¶ 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀸𑀦𑁄 𑀲𑀩𑀮𑀓𑀸𑀬𑀸 𑀧𑀲𑀻𑀤𑀺𑀁𑀲𑀼. 𑀅𑀣 𑀦𑁂 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀤𑀸𑀦𑀸𑀤𑀻𑀲𑀼 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀦𑀕𑀭𑀁 𑀧𑀽𑀭𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺 𑀫𑀸𑀢𑀭𑀁 𑀦𑀦𑁆𑀤𑀧𑀡𑁆𑀟𑀺𑀢𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀬𑀸𑀯𑀚𑀻𑀯𑀁 𑀧𑀺𑀢𑀭𑀁 𑀧𑀝𑀺𑀚𑀕𑁆𑀕𑀺. 𑀢𑁂 𑀉𑀪𑁄𑀧𑀺 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑀸 𑀅𑀳𑁂𑀲𑀼𑀁.

𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀦𑀦𑁆𑀤𑀧𑀡𑁆𑀟𑀺𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀫𑀦𑁄𑀚𑁄 𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀏𑀓𑀲𑀢𑀭𑀸𑀚𑀸𑀦𑁄 𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀘𑁂𑀯 𑀅𑀜𑁆𑀜𑀢𑀭𑀣𑁂𑀭𑀸 𑀘, 𑀘𑀢𑀼𑀯𑀻𑀲𑀢𑀺𑀅𑀓𑁆𑀔𑁄𑀪𑀦𑀻𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀲𑁄𑀡𑀧𑀡𑁆𑀟𑀺𑀢𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀓𑀺𑀜𑁆𑀘𑀸𑀧𑀺 𑀲𑀸𑀢𑀺𑀲𑀬𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀢𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄 𑀘 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀅𑀘𑁆𑀘𑀦𑁆𑀢𑀫𑁂𑀯 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀢𑀸, 𑀫𑀸𑀢𑀸𑀧𑀺𑀢𑀽𑀲𑀼 𑀢𑀺𑀩𑁆𑀩𑁄 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀪𑀸𑀯𑁄 ¶ , 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑁂𑀦 𑀅𑀢𑀺𑀢𑁆𑀢𑀺, 𑀲𑀢𑀺𑀧𑀺 𑀦𑁂𑀲𑀁 𑀉𑀧𑀝𑁆𑀞𑀸𑀦𑁂 𑀲𑀩𑁆𑀩𑀓𑀸𑀮𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀳𑀺 𑀯𑀻𑀢𑀺𑀦𑀸𑀫𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀦𑀺𑀝𑁆𑀞𑀺𑀢𑀸.

𑁬. 𑀢𑁂𑀫𑀺𑀬𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁮. 𑀙𑀝𑁆𑀞𑁂 𑀓𑀸𑀲𑀺𑀭𑀸𑀚𑀲𑁆𑀲 𑀅𑀢𑁆𑀭𑀚𑁄𑀢𑀺 𑀓𑀸𑀲𑀺𑀭𑀜𑁆𑀜𑁄 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄 𑀬𑀤𑀸 𑀳𑁄𑀫𑀺, 𑀢𑀤𑀸 𑀫𑀽𑀕𑀧𑀓𑁆𑀔𑁄𑀢𑀺 𑀦𑀸𑀫𑁂𑀦, 𑀢𑁂𑀫𑀺𑀬𑁄𑀢𑀺 𑀯𑀤𑀦𑁆𑀢𑀺 𑀫𑀦𑁆𑀢𑀺 𑀢𑁂𑀫𑀺𑀬𑁄𑀢𑀺 𑀦𑀸𑀫𑁂𑀦 𑀫𑀽𑀕𑀧𑀓𑁆𑀔𑀯𑀢𑀸𑀥𑀺𑀝𑁆𑀞𑀸𑀦𑁂𑀦 ‘‘𑀫𑀽𑀕𑀧𑀓𑁆𑀔𑁄’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀯 𑀫𑀁 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀺 𑀚𑀸𑀢𑀤𑀺𑀯𑀲𑁂 𑀲𑀓𑀮𑀓𑀸𑀲𑀺𑀭𑀝𑁆𑀞𑁂 ¶ 𑀤𑁂𑀯𑁄 𑀯𑀲𑁆𑀲𑀺, 𑀬𑀲𑁆𑀫𑀸 𑀘 𑀲𑁄 𑀭𑀜𑁆𑀜𑁄 𑀘𑁂𑀯 𑀅𑀫𑀘𑁆𑀘𑀸𑀤𑀻𑀦𑀜𑁆𑀘 𑀳𑀤𑀬𑀁 𑀉𑀴𑀸𑀭𑁂𑀦 𑀧𑀻𑀢𑀺𑀲𑀺𑀦𑁂𑀳𑁂𑀦 𑀢𑁂𑀫𑀬𑀫𑀸𑀦𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 ‘‘𑀢𑁂𑀫𑀺𑀬𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺.

𑁪𑁯. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀦𑁆𑀢𑀺 ¶ 𑀲𑁄𑀴𑀲𑀦𑁆𑀦𑀁 𑀓𑀸𑀲𑀺𑀭𑀜𑁆𑀜𑁄 𑀇𑀢𑁆𑀣𑀸𑀕𑀸𑀭𑀲𑀳𑀲𑁆𑀲𑀸𑀦𑀁. 𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄𑀢𑀺 𑀧𑀼𑀢𑁆𑀢𑁄 𑀦 𑀮𑀩𑁆𑀪𑀢𑀺. 𑀦 𑀓𑁂𑀯𑀮𑀜𑁆𑀘 𑀧𑀼𑀢𑁆𑀢𑁄 𑀏𑀯, 𑀥𑀻𑀢𑀸𑀧𑀺𑀲𑁆𑀲 𑀦𑀢𑁆𑀣𑀺 𑀏𑀯. 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦, 𑀦𑀺𑀩𑁆𑀩𑀢𑁆𑀢𑁄 𑀅𑀳𑀫𑁂𑀓𑀓𑁄𑀢𑀺 𑀅𑀧𑀼𑀢𑁆𑀢𑀓𑀲𑁆𑀲𑁂𑀯 𑀢𑀲𑁆𑀲 𑀭𑀜𑁆𑀜𑁄 𑀩𑀳𑀽𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀢𑀻𑀢𑀢𑁆𑀢𑀸 𑀅𑀦𑁂𑀓𑁂𑀲𑀁 𑀅𑀳𑁄𑀭𑀢𑁆𑀢𑀸𑀦𑀁 𑀅𑀧𑀕𑀫𑀦𑁂𑀦 𑀲𑀓𑁆𑀓𑀤𑀢𑁆𑀢𑀺𑀬𑁄 𑀅𑀳𑀫𑁂𑀓𑀓𑁄𑀯 𑀩𑁄𑀥𑀺𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄, 𑀢𑀤𑀸 𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁄𑀢𑀺 𑀲𑀢𑁆𑀣𑀸 𑀯𑀤𑀢𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀓𑀸𑀲𑀺𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀲𑁄𑀴𑀲𑀲𑀳𑀲𑁆𑀲𑀸 𑀇𑀢𑁆𑀣𑀺𑀬𑁄 𑀅𑀳𑁂𑀲𑀼𑀁. 𑀢𑀸𑀲𑀼 𑀏𑀓𑀸𑀧𑀺 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀦 𑀮𑀪𑀢𑀺. 𑀦𑀸𑀕𑀭𑀸 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀏𑀓𑁄𑀧𑀺 𑀧𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀚𑀸𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀸𑀦𑀁 ‘‘𑀧𑀼𑀢𑁆𑀢𑀁 𑀧𑀢𑁆𑀣𑁂𑀳𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀲𑁄𑀴𑀲𑀲𑀳𑀲𑁆𑀲𑀸 𑀇𑀢𑁆𑀣𑀺𑀬𑁄 ‘‘𑀧𑀼𑀢𑁆𑀢𑀁 𑀧𑀢𑁆𑀣𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑀸 𑀘𑀦𑁆𑀤𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀸𑀤𑀻𑀦𑀺 𑀓𑀢𑁆𑀯𑀸 𑀧𑀢𑁆𑀣𑁂𑀦𑁆𑀢𑀺𑀬𑁄𑀧𑀺 𑀦 𑀮𑀪𑀺𑀁𑀲𑀼. 𑀅𑀕𑁆𑀕𑀫𑀳𑁂𑀲𑀻 𑀧𑀦𑀲𑁆𑀲 𑀫𑀤𑁆𑀤𑀭𑀸𑀚𑀥𑀻𑀢𑀸 𑀘𑀦𑁆𑀤𑀸𑀤𑁂𑀯𑀻 𑀦𑀸𑀫 𑀲𑀻𑀮𑀲𑀫𑁆𑀧𑀦𑁆𑀦𑀸 𑀅𑀳𑁄𑀲𑀺. 𑀭𑀸𑀚𑀸 ‘‘𑀢𑁆𑀯𑀫𑁆𑀧𑀺 𑀧𑀼𑀢𑁆𑀢𑀁 𑀧𑀢𑁆𑀣𑁂𑀳𑀻’’𑀢𑀺 𑀆𑀳. 𑀲𑀸 𑀧𑀼𑀡𑁆𑀡𑀫𑀤𑀺𑀯𑀲𑁂 𑀉𑀧𑁄𑀲𑀣𑀺𑀓𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀅𑀔𑀡𑁆𑀟𑀲𑀻𑀮𑀸, 𑀇𑀫𑀺𑀦𑀸 𑀫𑁂 𑀲𑀘𑁆𑀘𑁂𑀦 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀺. 𑀢𑀲𑁆𑀲𑀸 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 ¶ 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀘𑀦𑁆𑀤𑀸𑀤𑁂𑀯𑀺𑀬𑀸 𑀧𑀼𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀁 𑀧𑀼𑀢𑁆𑀢𑀁 𑀉𑀧𑀥𑀸𑀭𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀉𑀧𑀭𑀺𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀫𑁆𑀫, 𑀢𑀬𑀺 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀦𑁆𑀦𑁂 𑀧𑀸𑀭𑀫𑀺𑀬𑁄 𑀘 𑀢𑁂 𑀧𑀽𑀭𑁂𑀲𑁆𑀲𑀦𑁆𑀢𑀺, 𑀫𑀳𑀸𑀚𑀦𑀲𑁆𑀲 𑀘 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀓𑀸𑀲𑀺𑀭𑀜𑁆𑀜𑁄 𑀘𑀦𑁆𑀤𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀧𑀼𑀢𑁆𑀢𑀁 𑀧𑀢𑁆𑀣𑁂𑀢𑀺, 𑀢𑀲𑁆𑀲𑀸 ¶ 𑀓𑀼𑀘𑁆𑀙𑀺𑀬𑀁 𑀉𑀧𑁆𑀧𑀚𑁆𑀚𑀸𑀳𑀻’’𑀢𑀺 𑀆𑀳.

𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀲𑀳𑀸𑀬𑀸 𑀧𑀜𑁆𑀘𑀲𑀢𑀸 𑀤𑁂𑀯𑀧𑀼𑀢𑁆𑀢𑀸 𑀔𑀻𑀡𑀸𑀬𑀼𑀓𑀸 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀅𑀫𑀘𑁆𑀘𑀪𑀭𑀺𑀬𑀸𑀦𑀁 𑀓𑀼𑀘𑁆𑀙𑀻𑀲𑀼 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀁𑀲𑀼. 𑀤𑁂𑀯𑀻 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀤𑀸𑀧𑁂𑀲𑀺. 𑀲𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁𑀤𑀺𑀯𑀲𑀫𑁂𑀯 𑀅𑀫𑀘𑁆𑀘𑀕𑁂𑀳𑁂𑀲𑀼 ¶ 𑀧𑀜𑁆𑀘𑀓𑀼𑀫𑀸𑀭𑀲𑀢𑀸𑀦𑀺 𑀯𑀺𑀚𑀸𑀬𑀺𑀁𑀲𑀼. 𑀉𑀪𑀬𑀫𑁆𑀧𑀺 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑀸 𑀏𑀢𑁂’’𑀢𑀺 𑀧𑀜𑁆𑀘𑀦𑁆𑀦𑀁 𑀤𑀸𑀭𑀓𑀲𑀢𑀸𑀦𑀁 𑀧𑀜𑁆𑀘𑀥𑀸𑀢𑀺𑀲𑀢𑀸𑀦𑀺 𑀧𑁂𑀲𑁂𑀢𑁆𑀯𑀸 𑀓𑀼𑀫𑀸𑀭𑀧𑀲𑀸𑀥𑀦𑀸𑀦𑀺 𑀘 𑀧𑁂𑀲𑁂𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀧𑀦 𑀅𑀢𑀺𑀤𑀻𑀖𑀸𑀤𑀺𑀤𑁄𑀲𑀯𑀺𑀯𑀚𑁆𑀚𑀺𑀢𑀸 𑀅𑀮𑀫𑁆𑀩𑀢𑁆𑀣𑀦𑀸 𑀫𑀥𑀼𑀭𑀣𑀜𑁆𑀜𑀸 𑀘𑀢𑀼𑀲𑀝𑁆𑀞𑀺𑀥𑀸𑀢𑀺𑀬𑁄 𑀤𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀘𑀦𑁆𑀤𑀸𑀤𑁂𑀯𑀺𑀬𑀸𑀧𑀺 𑀯𑀭𑀁 𑀅𑀤𑀸𑀲𑀺. 𑀲𑀸 𑀕𑀳𑀺𑀢𑀓𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀤𑀸𑀭𑀓𑁄 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀢𑀺. 𑀅𑀣 𑀦𑀁 𑀏𑀓𑀫𑀸𑀲𑀺𑀓𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼. 𑀭𑀸𑀚𑀸 𑀧𑀺𑀬𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀆𑀮𑀺𑀗𑁆𑀕𑀺𑀢𑁆𑀯𑀸 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀫𑀬𑀫𑀸𑀦𑁄 𑀦𑀺𑀲𑀻𑀤𑀺.

𑁫𑁦. 𑀢𑀲𑁆𑀫𑀺𑀁 𑀔𑀡𑁂 𑀘𑀢𑁆𑀢𑀸𑀭𑁄 𑀘𑁄𑀭𑀸 𑀆𑀦𑀻𑀢𑀸. 𑀭𑀸𑀚𑀸 𑀢𑁂𑀲𑀼 𑀏𑀓𑀲𑁆𑀲 𑀲𑀓𑀡𑁆𑀝𑀓𑀸𑀳𑀺 𑀓𑀲𑀸𑀳𑀺 𑀧𑀳𑀸𑀭𑀲𑀳𑀲𑁆𑀲𑀁 𑀆𑀡𑀸𑀧𑁂𑀲𑀺, 𑀏𑀓𑀲𑁆𑀲 𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑀧𑁆𑀧𑀯𑁂𑀲𑀦𑀁, 𑀏𑀓𑀲𑁆𑀲 𑀲𑀭𑀻𑀭𑁂 𑀲𑀢𑁆𑀢𑀺𑀧𑁆𑀧𑀳𑀸𑀭𑀤𑀸𑀦𑀁, 𑀏𑀓𑀲𑁆𑀲 𑀲𑀽𑀮𑀸𑀭𑁄𑀧𑀦𑀁. 𑀫𑀳𑀸𑀲𑀢𑁆𑀢𑁄 𑀧𑀺𑀢𑀼 𑀓𑀣𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀅𑀳𑁄 𑀫𑀫 𑀧𑀺𑀢𑀸 𑀭𑀚𑁆𑀚𑀁 𑀦𑀺𑀲𑁆𑀲𑀸𑀬 𑀪𑀸𑀭𑀺𑀬𑀁 𑀦𑀺𑀭𑀬𑀕𑀸𑀫𑀺𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀦𑀁 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀅𑀮𑀗𑁆𑀓𑀢𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀲𑀼𑀁.

𑀲𑁄 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀝𑀺𑀩𑀼𑀤𑁆𑀥𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀫𑀳𑀦𑁆𑀢𑀁 𑀲𑀺𑀭𑀺𑀯𑀺𑀪𑀯𑀁 𑀧𑀲𑁆𑀲𑀺. 𑀅𑀣𑀲𑁆𑀲 𑀧𑀓𑀢𑀺𑀬𑀸𑀧𑀺 𑀲𑀁𑀯𑁂𑀕𑀧𑁆𑀧𑀢𑁆𑀢𑀲𑁆𑀲 𑀅𑀢𑀺𑀭𑁂𑀓𑀢𑀭𑀁 𑀪𑀬𑀁 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀓𑀼𑀢𑁄 𑀦𑀼 𑀔𑁄 𑀅𑀳𑀁 𑀇𑀫𑀁 𑀭𑀸𑀚𑀕𑁂𑀳𑀁 𑀆𑀕𑀢𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀚𑀸𑀢𑀺𑀲𑁆𑀲𑀭𑀜𑀸𑀡𑁂𑀦 𑀤𑁂𑀯𑀮𑁄𑀓𑀢𑁄 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀧𑀭𑀁 𑀑𑀮𑁄𑀓𑁂𑀦𑁆𑀢𑁄 𑀉𑀲𑁆𑀲𑀤𑀦𑀺𑀭𑀬𑁂 𑀧𑀓𑁆𑀓𑀪𑀸𑀯𑀁 ¶ 𑀧𑀲𑁆𑀲𑀺. 𑀢𑀢𑁄 𑀧𑀭𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀭𑀸𑀚𑀪𑀸𑀯𑀁 𑀧𑀲𑁆𑀲𑀺. 𑀅𑀣 𑀲𑁄 ‘‘𑀅𑀳𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 ¶ 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀲𑁆𑀲𑀤𑀦𑀺𑀭𑀬𑁂 𑀧𑀘𑁆𑀘𑀺𑀁, 𑀇𑀤𑀸𑀦𑀺 𑀧𑀼𑀦𑀧𑀺 𑀇𑀫𑀲𑁆𑀫𑀺𑀁 𑀘𑁄𑀭𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀺, 𑀧𑀺𑀢𑀸𑀧𑀺 𑀫𑁂 𑀳𑀺𑀬𑁆𑀬𑁄 𑀘𑀢𑀽𑀲𑀼 𑀘𑁄𑀭𑁂𑀲𑀼 𑀆𑀦𑀻𑀢𑁂𑀲𑀼 𑀢𑀣𑀸𑀭𑀽𑀧𑀁 𑀨𑀭𑀼𑀲𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁 𑀓𑀣𑀁 𑀓𑀣𑁂𑀲𑀺. 𑀦 𑀫𑁂 𑀇𑀫𑀺𑀦𑀸 𑀅𑀯𑀺𑀤𑀺𑀢𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑁂𑀦 𑀭𑀚𑁆𑀚𑁂𑀦 𑀅𑀢𑁆𑀣𑁄, 𑀓𑀣𑀁 𑀦𑀼 𑀔𑁄 𑀇𑀫𑀫𑁆𑀳𑀸 𑀘𑁄𑀭𑀕𑁂𑀳𑀸 𑀫𑀼𑀘𑁆𑀘𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀏𑀓𑀸 𑀤𑁂𑀯𑀥𑀻𑀢𑀸 ‘‘𑀢𑀸𑀢 𑀢𑁂𑀫𑀺𑀬𑀓𑀼𑀫𑀸𑀭, 𑀫𑀸 𑀪𑀸𑀬𑀺, 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀯 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀭𑀚𑁆𑀚𑀲𑀗𑁆𑀔𑀸𑀢𑀸 ¶ 𑀅𑀦𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀲𑁄𑀴𑀲𑀲𑀁𑀯𑀘𑁆𑀙𑀭𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀅𑀘𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀳𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀺𑀘𑁆𑀙𑀸𑀮𑀤𑁆𑀥𑀁 𑀧𑀺𑀬𑀁 𑀧𑀼𑀢𑁆𑀢’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀓𑀺𑀘𑁆𑀙𑀸𑀮𑀤𑁆𑀥𑀦𑁆𑀢𑀺 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀘𑀺𑀭𑀓𑀸𑀮𑀧𑀢𑁆𑀣𑀦𑀸𑀬 𑀮𑀤𑁆𑀥𑀁. 𑀅𑀪𑀺𑀚𑀸𑀢𑀦𑁆𑀢𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀁. 𑀓𑀸𑀬𑀚𑀼𑀢𑀺𑀬𑀸 𑀘𑁂𑀯 𑀜𑀸𑀡𑀚𑀼𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀚𑀼𑀢𑀺𑀦𑁆𑀥𑀭𑀁. 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀲𑀬𑀦𑁂 𑀧𑁄𑀲𑁂𑀢𑀺 𑀫𑀁 𑀧𑀺𑀢𑀸𑀢𑀺 𑀧𑀺𑀢𑀸 𑀫𑁂 𑀓𑀸𑀲𑀺𑀭𑀸𑀚𑀸 ‘‘𑀫𑀸 𑀦𑀁 𑀓𑀼𑀫𑀸𑀭𑀁 𑀭𑀚𑁄 𑀯𑀸 𑀉𑀲𑁆𑀲𑀸𑀯𑁄 𑀯𑀸’’𑀢𑀺 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀲𑀺𑀭𑀺𑀲𑀬𑀦𑁂 𑀲𑀬𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀁 𑀧𑁄𑀲𑁂𑀢𑀺.

𑁫𑁧. 𑀦𑀺𑀤𑁆𑀤𑀸𑀬𑀫𑀸𑀦𑁄 𑀲𑀬𑀦𑀯𑀭𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀳𑀁 𑀑𑀮𑁄𑀓𑁂𑀦𑁆𑀢𑁄 𑀧𑀡𑁆𑀟𑀭𑀁 𑀲𑁂𑀢𑀘𑁆𑀙𑀢𑁆𑀢𑀁 𑀅𑀤𑁆𑀤𑀲𑀁. 𑀬𑁂𑀦𑀸𑀳𑀁 𑀦𑀺𑀭𑀬𑀁 𑀕𑀢𑁄𑀢𑀺 𑀬𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀢𑀢𑁄 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀅𑀳𑀁 𑀦𑀺𑀭𑀬𑀁 𑀕𑀢𑁄, 𑀲𑁂𑀢𑀘𑁆𑀙𑀢𑁆𑀢𑀲𑀻𑀲𑁂𑀦 𑀭𑀚𑁆𑀚𑀁 𑀯𑀤𑀢𑀺.

𑁫𑁨. 𑀲𑀳 𑀤𑀺𑀝𑁆𑀞𑀲𑁆𑀲 𑀫𑁂 𑀙𑀢𑁆𑀢𑀦𑁆𑀢𑀺 𑀢𑀁 𑀲𑁂𑀢𑀘𑁆𑀙𑀢𑁆𑀢𑀁 𑀤𑀺𑀝𑁆𑀞𑀲𑁆𑀲 𑀤𑀺𑀝𑁆𑀞𑀯𑀢𑁄 𑀫𑁂 𑀲𑀳 𑀢𑁂𑀦 𑀤𑀲𑁆𑀲𑀦𑁂𑀦, 𑀤𑀲𑁆𑀲𑀦𑀲𑀫𑀓𑀸𑀮𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀸𑀲𑁄 𑀉𑀧𑁆𑀧𑀚𑁆𑀚𑀺 𑀪𑁂𑀭𑀯𑁄𑀢𑀺 𑀲𑀼𑀧𑀭𑀺𑀯𑀺𑀤𑀺𑀢𑀸𑀤𑀻𑀦𑀯𑀢𑁆𑀢𑀸 𑀪𑀬𑀸𑀦𑀓𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀉𑀤𑀧𑀸𑀤𑀺. 𑀯𑀺𑀦𑀺𑀘𑁆𑀙𑀬𑀁 𑀲𑀫𑀸𑀧𑀦𑁆𑀦𑁄, 𑀓𑀣𑀸𑀳𑀁 𑀇𑀫𑀁 𑀫𑀼𑀜𑁆𑀘𑀺𑀲𑁆𑀲𑀦𑁆𑀢𑀺 𑀓𑀣𑀁 𑀦𑀼 𑀔𑁄 𑀅𑀳𑀁 𑀇𑀫𑀁 𑀭𑀚𑁆𑀚𑀁 𑀓𑀸𑀴𑀓𑀡𑁆𑀡𑀺𑀁 𑀫𑀼𑀜𑁆𑀘𑁂𑀬𑁆𑀬𑀦𑁆𑀢𑀺 𑀏𑀯𑀁 𑀯𑀺𑀘𑀸𑀭𑀡𑀁 𑀆𑀧𑀚𑁆𑀚𑀺𑀁.

𑁫𑁩. 𑀧𑀼𑀩𑁆𑀩𑀲𑀸𑀮𑁄𑀳𑀺𑀢𑀸 𑀫𑀬𑁆𑀳𑀦𑁆𑀢𑀺 𑀧𑀼𑀩𑁆𑀩𑁂 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀫 𑀫𑀸𑀢𑀼𑀪𑀽𑀢𑀧𑀼𑀩𑁆𑀩𑀸 𑀢𑀲𑁆𑀫𑀺𑀁 𑀙𑀢𑁆𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀬𑁆𑀳𑀁 𑀅𑀢𑁆𑀣𑀓𑀸𑀫𑀺𑀦𑀻 𑀳𑀺𑀢𑁂𑀲𑀺𑀦𑀻. 𑀲𑀸 𑀫𑀁 𑀤𑀺𑀲𑁆𑀯𑀸𑀦 𑀤𑀼𑀓𑁆𑀔𑀺𑀢𑀁, 𑀢𑀻𑀲𑀼 𑀞𑀸𑀦𑁂𑀲𑀼 𑀬𑁄𑀚𑀬𑀻𑀢𑀺 𑀲𑀸 𑀤𑁂𑀯𑀢𑀸 𑀫𑀁 𑀢𑀣𑀸 ¶ 𑀘𑁂𑀢𑁄𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀁 𑀤𑀺𑀲𑁆𑀯𑀸 𑀫𑀽𑀕𑀧𑀓𑁆𑀔𑀩𑀥𑀺𑀭𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀭𑀚𑁆𑀚𑀤𑀼𑀓𑁆𑀔𑀢𑁄 𑀦𑀺𑀓𑁆𑀔𑀫𑀦𑀓𑀸𑀭𑀡𑁂𑀲𑀼 𑀬𑁄𑀚𑁂𑀲𑀺.

𑁫𑁪. 𑀧𑀡𑁆𑀟𑀺𑀘𑁆𑀘𑀬𑀦𑁆𑀢𑀺 𑀧𑀡𑁆𑀟𑀺𑀘𑁆𑀘𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀫𑀸 𑀯𑀺𑀪𑀸𑀯𑀬𑀸𑀢𑀺 𑀫𑀸 𑀧𑀓𑀸𑀲𑁂𑀳𑀺. 𑀩𑀸𑀮𑀫𑀢𑁄𑀢𑀺 𑀩𑀸𑀮𑁄𑀢𑀺 𑀜𑀸𑀢𑁄. 𑀲𑀩𑁆𑀩𑁄𑀢𑀺 𑀲𑀓𑀮𑁄 𑀅𑀦𑁆𑀢𑁄𑀚𑀦𑁄 𑀘𑁂𑀯 𑀩𑀳𑀺𑀚𑀦𑁄 𑀘. 𑀑𑀘𑀺𑀦𑀸𑀬𑀢𑀽𑀢𑀺 𑀦𑀻𑀳𑀭𑀣𑁂𑀢𑀁 ¶ 𑀓𑀸𑀴𑀓𑀡𑁆𑀡𑀺𑀦𑁆𑀢𑀺 𑀅𑀯𑀚𑀸𑀦𑀸𑀢𑀼. 𑀏𑀯𑀁 𑀢𑀯 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀯𑀚𑀸𑀦𑀺𑀢𑀩𑁆𑀩𑀪𑀸𑀯𑁂 𑀲𑀢𑀺 𑀢𑀼𑀬𑁆𑀳𑀁 𑀕𑁂𑀳𑀢𑁄 𑀦𑀺𑀓𑁆𑀔𑀫𑀦𑁂𑀦 𑀳𑀺𑀢𑀁 𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀁 𑀪𑀯𑀺𑀲𑁆𑀲𑀢𑀺.

𑁫𑁫. 𑀢𑁂𑀢𑀁 ¶ 𑀯𑀘𑀦𑀦𑁆𑀢𑀺 𑀢𑁂 𑀏𑀢𑀁 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀳𑀻𑀢𑀺 𑀯𑀘𑀦𑀁. 𑀅𑀢𑁆𑀣𑀓𑀸𑀫𑀸𑀲𑀺 𑀫𑁂 𑀅𑀫𑁆𑀫𑀸𑀢𑀺 𑀅𑀫𑁆𑀫 𑀤𑁂𑀯𑀢𑁂, 𑀫𑀫 𑀅𑀢𑁆𑀣𑀓𑀸𑀫𑀸 𑀅𑀲𑀺. 𑀳𑀺𑀢𑀓𑀸𑀫𑀸𑀢𑀺 𑀢𑀲𑁆𑀲𑁂𑀯 𑀧𑀭𑀺𑀬𑀸𑀬𑀯𑀘𑀦𑀁. 𑀅𑀢𑁆𑀣𑁄𑀢𑀺 𑀯𑀸 𑀏𑀢𑁆𑀣 𑀲𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀳𑀺𑀢𑀦𑁆𑀢𑀺 𑀢𑀲𑁆𑀲 𑀓𑀸𑀭𑀡𑀪𑀽𑀢𑀁 𑀧𑀼𑀜𑁆𑀜𑀁.

𑁫𑁬. 𑀲𑀸𑀕𑀭𑁂𑀯 𑀣𑀮𑀁 𑀮𑀪𑀺𑀦𑁆𑀢𑀺 𑀘𑁄𑀭𑀕𑁂𑀳𑁂 𑀯𑀢𑀸𑀳𑀁 𑀚𑀸𑀢𑁄, 𑀅𑀳𑀼 𑀫𑁂 𑀫𑀳𑀸𑀯𑀢𑀸𑀦𑀢𑁆𑀣𑁄𑀢𑀺 𑀲𑁄𑀓𑀲𑀸𑀕𑀭𑁂 𑀑𑀲𑀻𑀤𑀦𑁆𑀢𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀅𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀸𑀕𑀭𑁂 𑀑𑀲𑀻𑀤𑀦𑁆𑀢𑁄 𑀯𑀺𑀬 𑀣𑀮𑀁 𑀧𑀢𑀺𑀝𑁆𑀞𑀁 𑀅𑀮𑀪𑀺𑀁, 𑀭𑀚𑁆𑀚𑀓𑀼𑀮𑀢𑁄 𑀦𑀺𑀓𑁆𑀔𑀫𑀦𑁄𑀧𑀸𑀬𑀁 𑀅𑀮𑀪𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀬𑁄 𑀅𑀗𑁆𑀕𑁂 𑀅𑀥𑀺𑀝𑁆𑀞𑀳𑀺𑀦𑁆𑀢𑀺 𑀬𑀸𑀯 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀁, 𑀢𑀸𑀯 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀓𑀸𑀭𑀡𑀸𑀦𑀺 𑀅𑀥𑀺𑀝𑁆𑀞𑀳𑀺𑀁.

𑁫𑁭. 𑀇𑀤𑀸𑀦𑀺 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀕𑁄 𑀅𑀳𑁄𑀲𑀺’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀓𑁆𑀔𑁄𑀢𑀺 𑀧𑀻𑀞𑀲𑀧𑁆𑀧𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 𑀧𑀦 𑀫𑀳𑀸𑀲𑀢𑁆𑀢𑁂 𑀤𑁂𑀯𑀢𑀸𑀬 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀚𑀸𑀢𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀽𑀕𑀸𑀤𑀺𑀪𑀸𑀯𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀥𑀸𑀢𑀺𑀆𑀤𑀬𑁄 𑀘 ‘‘𑀫𑀽𑀕𑀸𑀦𑀁 𑀳𑀦𑀼𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀏𑀯𑀭𑀽𑀧𑀁 𑀦 𑀳𑁄𑀢𑀺, 𑀩𑀥𑀺𑀭𑀸𑀦𑀁 𑀓𑀡𑁆𑀡𑀲𑁄𑀢𑀁 𑀦𑀸𑀫 𑀏𑀯𑀭𑀽𑀧𑀁 𑀦 𑀳𑁄𑀢𑀺, 𑀧𑀻𑀞𑀲𑀧𑁆𑀧𑀻𑀦𑀁 𑀳𑀢𑁆𑀣𑀧𑀸𑀤𑀸 𑀦𑀸𑀫 𑀏𑀯𑀭𑀽𑀧𑀸 𑀦 𑀳𑁄𑀦𑁆𑀢𑀺, 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑁂𑀦, 𑀯𑀻𑀫𑀁𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀔𑀻𑀭𑁂𑀦 𑀢𑀸𑀯 𑀯𑀻𑀫𑀁𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀓𑀮𑀤𑀺𑀯𑀲𑀁 𑀔𑀻𑀭𑀁 𑀦 𑀤𑁂𑀦𑁆𑀢𑀺. 𑀲𑁄 𑀲𑀼𑀲𑁆𑀲𑀦𑁆𑀢𑁄𑀧𑀺 𑀔𑀻𑀭𑀢𑁆𑀣𑀸𑀬 𑀲𑀤𑁆𑀤𑀁 𑀦 𑀓𑀭𑁄𑀢𑀺.

𑀅𑀣𑀲𑁆𑀲 𑀫𑀸𑀢𑀸 ‘‘𑀧𑀼𑀢𑁆𑀢𑁄 𑀫𑁂 𑀙𑀸𑀢𑁄, 𑀔𑀻𑀭𑀫𑀲𑁆𑀲 𑀤𑁂𑀣𑀸’’𑀢𑀺 𑀔𑀻𑀭𑀁 𑀤𑀸𑀧𑁂𑀲𑀺. 𑀏𑀯𑀁 𑀅𑀦𑁆𑀢𑀭𑀦𑁆𑀢𑀭𑀸 𑀔𑀻𑀭𑀁 𑀅𑀤𑀢𑁆𑀯𑀸 𑀏𑀓𑀲𑀁𑀯𑀘𑁆𑀙𑀭𑀁 𑀯𑀻𑀫𑀁𑀲𑀦𑁆𑀢𑀸𑀧𑀺 𑀅𑀦𑁆𑀢𑀭𑀁 𑀦 𑀧𑀲𑁆𑀲𑀺𑀁𑀲𑀼. 𑀢𑀢𑁄 ‘‘𑀓𑀼𑀫𑀸𑀭𑀓𑀸 𑀦𑀸𑀫 𑀧𑀽𑀯𑀔𑀚𑁆𑀚𑀓𑀁 𑀧𑀺𑀬𑀸𑀬𑀦𑁆𑀢𑀺, 𑀨𑀮𑀸𑀨𑀮𑀁 𑀧𑀺𑀬𑀸𑀬𑀦𑁆𑀢𑀺, 𑀓𑀻𑀴𑀦𑀪𑀡𑁆𑀟𑀓𑀁 𑀧𑀺𑀬𑀸𑀬𑀦𑁆𑀢𑀺, 𑀪𑁄𑀚𑀦𑀁 𑀧𑀺𑀬𑀸𑀬𑀦𑁆𑀢𑀻’’𑀢𑀺 𑀢𑀸𑀦𑀺 𑀢𑀸𑀦𑀺 𑀧𑀮𑁄𑀪𑀦𑀻𑀬𑀸𑀦𑀺 𑀉𑀧𑀦𑁂𑀢𑁆𑀯𑀸 𑀯𑀻𑀫𑀁𑀲𑀦𑀯𑀲𑁂𑀦 𑀧𑀮𑁄𑀪𑁂𑀦𑁆𑀢𑀸 𑀬𑀸𑀯 𑀧𑀜𑁆𑀘𑀯𑀲𑁆𑀲𑀓𑀸𑀮𑀸 𑀅𑀦𑁆𑀢𑀭𑀁 𑀦 𑀧𑀲𑁆𑀲𑀺𑀁𑀲𑀼. 𑀅𑀣 𑀦𑀁 ‘‘𑀤𑀸𑀭𑀓𑀸 𑀦𑀸𑀫 ¶ 𑀅𑀕𑁆𑀕𑀺𑀢𑁄 𑀪𑀸𑀬𑀦𑁆𑀢𑀺, 𑀫𑀢𑁆𑀢𑀳𑀢𑁆𑀣𑀺𑀢𑁄 𑀪𑀸𑀬𑀦𑁆𑀢𑀺, 𑀲𑀧𑁆𑀧𑀢𑁄 𑀪𑀸𑀬𑀦𑁆𑀢𑀺, 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀼𑀭𑀺𑀲𑀢𑁄 𑀪𑀸𑀬𑀦𑁆𑀢𑀺, 𑀢𑁂𑀳𑀺 𑀯𑀻𑀫𑀁𑀲𑀺𑀲𑁆𑀲𑀸𑀫𑀸’’𑀢𑀺 𑀬𑀣𑀸 𑀢𑁂𑀳𑀺𑀲𑁆𑀲 𑀅𑀦𑀢𑁆𑀣𑁄 𑀦 𑀚𑀸𑀬𑀢𑀺, 𑀢𑀣𑀸 𑀧𑀼𑀭𑀺𑀫𑀫𑁂𑀯 𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀢𑀺𑀪𑀬𑀸𑀦𑀓𑀸𑀓𑀸𑀭𑁂𑀦 𑀉𑀧𑀕𑀘𑁆𑀙𑀦𑁆𑀢𑁂 𑀓𑀸𑀭𑁂𑀲𑀼𑀁.

𑀫𑀳𑀸𑀲𑀢𑁆𑀢𑁄 ¶ ¶ 𑀦𑀺𑀭𑀬𑀪𑀬𑀁 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀇𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀦𑀺𑀭𑀬𑁄 𑀪𑀸𑀬𑀺𑀢𑀩𑁆𑀩𑁄’’𑀢𑀺 𑀦𑀺𑀘𑁆𑀘𑀮𑁄𑀯 𑀳𑁄𑀢𑀺. 𑀏𑀯𑀫𑁆𑀧𑀺 𑀯𑀻𑀫𑀁𑀲𑀺𑀢𑁆𑀯𑀸 𑀅𑀦𑁆𑀢𑀭𑀁 𑀦 𑀧𑀲𑁆𑀲𑀦𑁆𑀢𑀸 𑀧𑀼𑀦 ‘‘𑀤𑀸𑀭𑀓𑀸 𑀦𑀸𑀫 𑀲𑀫𑀚𑁆𑀚𑀢𑁆𑀣𑀺𑀓𑀸 𑀳𑁄𑀦𑁆𑀢𑀻’’𑀢𑀺 𑀲𑀫𑀚𑁆𑀚𑀁 𑀓𑀸𑀭𑁂𑀢𑁆𑀯𑀸𑀧𑀺 𑀫𑀳𑀸𑀲𑀢𑁆𑀢𑀁 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀗𑁆𑀔𑀲𑀤𑁆𑀤𑁂𑀳𑀺 𑀪𑁂𑀭𑀺𑀲𑀤𑁆𑀤𑁂𑀳𑀺 𑀘 𑀲𑀳𑀲𑀸 𑀏𑀓𑀦𑀺𑀦𑁆𑀦𑀸𑀤𑀁 𑀓𑀸𑀭𑁂𑀢𑁆𑀯𑀸𑀧𑀺 𑀅𑀦𑁆𑀥𑀓𑀸𑀭𑁂 𑀖𑀝𑁂𑀳𑀺 𑀤𑀻𑀧𑀁 𑀉𑀧𑀦𑁂𑀢𑁆𑀯𑀸 𑀲𑀳𑀲𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸𑀧𑀺 𑀲𑀓𑀮𑀲𑀭𑀻𑀭𑀁 𑀨𑀸𑀡𑀺𑀢𑁂𑀦 𑀫𑀓𑁆𑀔𑁂𑀢𑁆𑀯𑀸 𑀩𑀳𑀼𑀫𑀓𑁆𑀔𑀺𑀓𑁂 𑀞𑀸𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸𑀧𑀺 𑀦𑁆𑀳𑀸𑀧𑀦𑀸𑀤𑀻𑀦𑀺 𑀅𑀓𑀢𑁆𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀫𑀢𑁆𑀣𑀓𑁂 𑀦𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀢𑀢𑁆𑀣 𑀘 𑀧𑀮𑀺𑀧𑀦𑁆𑀦𑀁 𑀲𑀬𑀫𑀸𑀦𑀁 𑀧𑀭𑀺𑀳𑀸𑀲𑁂𑀳𑀺 𑀅𑀓𑁆𑀓𑁄𑀲𑀦𑁂𑀳𑀺 𑀘 𑀖𑀝𑁆𑀝𑁂𑀢𑁆𑀯𑀸𑀧𑀺 𑀳𑁂𑀝𑁆𑀞𑀸𑀫𑀜𑁆𑀘𑁂 𑀅𑀕𑁆𑀕𑀺𑀓𑀧𑀮𑁆𑀮𑀁 𑀓𑀢𑁆𑀯𑀸 𑀉𑀡𑁆𑀳𑀲𑀦𑁆𑀢𑀸𑀧𑁂𑀦 𑀧𑀻𑀴𑁂𑀢𑁆𑀯𑀸𑀧𑀻𑀢𑀺 𑀏𑀯𑀁 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀯𑀻𑀫𑀁𑀲𑀦𑁆𑀢𑀸𑀧𑀺𑀲𑁆𑀲 𑀅𑀦𑁆𑀢𑀭𑀁 𑀦 𑀧𑀲𑁆𑀲𑀺𑀁𑀲𑀼.

𑀫𑀳𑀸𑀲𑀢𑁆𑀢𑁄 𑀳𑀺 𑀲𑀩𑁆𑀩𑀢𑁆𑀣 𑀦𑀺𑀭𑀬𑀪𑀬𑀫𑁂𑀯 𑀆𑀯𑀚𑁆𑀚𑁂𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀁 𑀅𑀯𑀺𑀓𑁄𑀧𑁂𑀦𑁆𑀢𑁄 𑀦𑀺𑀘𑁆𑀘𑀮𑁄𑀯 𑀅𑀳𑁄𑀲𑀺. 𑀏𑀯𑀁 𑀧𑀦𑁆𑀦𑀭𑀲𑀯𑀲𑁆𑀲𑀸𑀦𑀺 𑀯𑀻𑀫𑀁𑀲𑀺𑀢𑁆𑀯𑀸 𑀅𑀣 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 ‘‘𑀧𑀻𑀞𑀲𑀧𑁆𑀧𑀺𑀦𑁄 𑀯𑀸 𑀳𑁄𑀦𑁆𑀢𑀼 𑀫𑀽𑀕𑀩𑀥𑀺𑀭𑀸 𑀯𑀸 𑀭𑀚𑀦𑀻𑀬𑁂𑀲𑀼 𑀅𑀭𑀚𑁆𑀚𑀦𑁆𑀢𑀸 𑀤𑀼𑀲𑁆𑀲𑀦𑀻𑀬𑁂𑀲𑀼 𑀅𑀤𑀼𑀲𑁆𑀲𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀦𑀸𑀝𑀓𑀸𑀦𑀺𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀯𑀻𑀫𑀁𑀲𑀺𑀲𑁆𑀲𑀸𑀫𑀸’’𑀢𑀺 𑀓𑀼𑀫𑀸𑀭𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀁 𑀯𑀺𑀬 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀁 𑀧𑀼𑀧𑁆𑀨𑀕𑀦𑁆𑀥𑀤𑀸𑀫𑀸𑀤𑀻𑀳𑀺 𑀏𑀓𑀸𑀫𑁄𑀤𑀧𑀫𑁄𑀤𑀁 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀪𑀸𑀯𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀸 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀸 𑀇𑀢𑁆𑀣𑀺𑀬𑁄 𑀉𑀧𑀝𑁆𑀞𑀧𑁂𑀲𑀼𑀁 𑁋 ‘‘𑀕𑀘𑁆𑀙𑀣 𑀦𑀘𑁆𑀘𑀸𑀤𑀻𑀳𑀺 𑀓𑀼𑀫𑀸𑀭𑀁 𑀅𑀪𑀺𑀭𑀫𑀸𑀧𑁂𑀣𑀸’’𑀢𑀺. 𑀢𑀸 𑀉𑀧𑀕𑀦𑁆𑀢𑁆𑀯𑀸 𑀢𑀣𑀸 𑀓𑀸𑀢𑀼𑀁 𑀯𑀸𑀬𑀫𑀺𑀁𑀲𑀼. 𑀲𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀢𑀸𑀬 ‘‘𑀇𑀫𑀸 𑀫𑁂 𑀲𑀭𑀻𑀭𑀲𑀫𑁆𑀨𑀲𑁆𑀲𑀁 𑀫𑀸 𑀯𑀺𑀦𑁆𑀤𑀺𑀁𑀲𑀽’’𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑀼𑀦𑁆𑀥𑀺. 𑀢𑀸 𑀢𑀲𑁆𑀲 𑀲𑀭𑀻𑀭𑀲𑀫𑁆𑀨𑀲𑁆𑀲𑀁 𑀅𑀯𑀺𑀦𑁆𑀤𑀦𑁆𑀢𑀺𑀬𑁄 ‘‘𑀣𑀤𑁆𑀥𑀲𑀭𑀻𑀭𑁄 𑀏𑀲, 𑀦𑀸𑀬𑀁 𑀫𑀦𑀼𑀲𑁆𑀲𑁄, 𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀓𑀫𑀺𑀁𑀲𑀼.

𑀏𑀯𑀁 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀲𑁄𑀴𑀲𑀳𑀺 𑀫𑀳𑀸𑀯𑀻𑀫𑀁𑀲𑀸𑀳𑀺 𑀅𑀦𑁂𑀓𑀸𑀳𑀺 𑀘 𑀔𑀼𑀤𑁆𑀤𑀓𑀯𑀻𑀫𑀁𑀲𑀸𑀳𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 ‘‘𑀢𑀸𑀢, 𑀢𑁂𑀫𑀺𑀬𑀓𑀼𑀫𑀸𑀭, 𑀫𑀬𑀁 𑀢𑀯 𑀅𑀫𑀽𑀕𑀸𑀤𑀺𑀪𑀸𑀯𑀁 𑀚𑀸𑀦𑀸𑀫, 𑀦 𑀳𑀺 𑀢𑁂𑀲𑀁 𑀏𑀯𑀭𑀽𑀧𑀸𑀦𑀺 𑀫𑀼𑀔𑀓𑀡𑁆𑀡𑀲𑁄𑀢𑀧𑀸𑀤𑀸𑀦𑀺 𑀳𑁄𑀦𑁆𑀢𑀺, 𑀢𑁆𑀯𑀁 𑀅𑀫𑁆𑀳𑁂𑀳𑀺 ¶ 𑀧𑀢𑁆𑀣𑁂𑀢𑁆𑀯𑀸 𑀮𑀤𑁆𑀥𑀧𑀼𑀢𑁆𑀢𑀓𑁄, 𑀫𑀸 𑀦𑁄 𑀦𑀸𑀲𑁂𑀳𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀦𑀁 𑀲𑀦𑁆𑀢𑀺𑀓𑀸 𑀕𑀭𑀳𑀢𑁄 𑀫𑁄𑀘𑁂𑀳𑀻’’𑀢𑀺 𑀲𑀳 𑀯𑀺𑀲𑀼𑀁 𑀯𑀺𑀲𑀼𑀜𑁆𑀘 𑀅𑀦𑁂𑀓𑀯𑀸𑀭𑀁 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀳𑀺 𑀏𑀯𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺.

𑁫𑁮. 𑀅𑀣 ¶ 𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀉𑀪𑁄 𑀧𑀸𑀤𑁂 𑀓𑀡𑁆𑀡𑀲𑁄𑀢𑁂 𑀚𑀺𑀯𑁆𑀳𑀁 𑀉𑀪𑁄 𑀘 𑀳𑀢𑁆𑀣𑁂 𑀓𑀼𑀲𑀮𑁂𑀳𑀺 𑀧𑀼𑀭𑀺𑀲𑁂𑀳𑀺 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 ‘‘𑀬𑀤𑀺𑀧𑀺 𑀅𑀧𑀻𑀞𑀲𑀧𑁆𑀧𑀺𑀆𑀤𑀻𑀦𑀁 𑀯𑀺𑀬𑀲𑁆𑀲 𑀧𑀸𑀤𑀸𑀤𑀬𑁄, 𑀢𑀣𑀸𑀧𑀺 𑀅𑀬𑀁 𑀧𑀻𑀞𑀲𑀧𑁆𑀧𑀺 𑀫𑀽𑀕𑀩𑀥𑀺𑀭𑁄 𑀫𑀜𑁆𑀜𑁂, 𑀈𑀤𑀺𑀲𑁂 𑀓𑀸𑀴𑀓𑀡𑁆𑀡𑀺𑀧𑀼𑀭𑀺𑀲𑁂 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲𑀦𑁆𑀢𑁂 𑀢𑀬𑁄 𑀅𑀦𑁆𑀢𑀭𑀸𑀬𑀸 𑀧𑀜𑁆𑀜𑀸𑀬𑀦𑁆𑀢𑀺 ¶ 𑀚𑀻𑀯𑀺𑀢𑀲𑁆𑀲 𑀯𑀸 𑀙𑀢𑁆𑀢𑀲𑁆𑀲 𑀯𑀸 𑀫𑀳𑁂𑀲𑀺𑀬𑀸 𑀯𑀸’’𑀢𑀺 𑀮𑀓𑁆𑀔𑀡𑀧𑀸𑀞𑀓𑁂𑀳𑀺 𑀇𑀤𑀸𑀦𑀺 𑀓𑀣𑀺𑀢𑀁. 𑀚𑀸𑀢𑀤𑀺𑀯𑀲𑁂 𑀧𑀦 ‘‘𑀢𑀼𑀫𑁆𑀳𑀸𑀓𑀁 𑀤𑁄𑀫𑀦𑀲𑁆𑀲𑀧𑀭𑀺𑀳𑀭𑀡𑀢𑁆𑀣𑀁 ‘𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑁄’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀫𑀘𑁆𑀘𑁂𑀳𑀺 𑀆𑀭𑁄𑀘𑀺𑀢𑀁 𑀲𑀼𑀢𑁆𑀯𑀸 𑀅𑀦𑁆𑀢𑀭𑀸𑀬𑀪𑀬𑁂𑀦 𑀪𑀻𑀢𑁄 ‘‘𑀕𑀘𑁆𑀙𑀣 𑀦𑀁 𑀅𑀯𑀫𑀗𑁆𑀕𑀮𑀭𑀣𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀻𑀳𑀭𑀸𑀧𑁂𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀦𑀺𑀔𑀡𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀅𑀳𑁄𑀲𑀺 𑁋 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁄 𑀫𑁂 𑀳𑀢𑁆𑀣𑀧𑀸𑀤𑁂 𑀘𑀸’’𑀢𑀺𑀆𑀤𑀺.

𑀢𑀢𑁆𑀣 𑀫𑀤𑁆𑀤𑀺𑀬𑀸𑀢𑀺 𑀫𑀤𑁆𑀤𑀦𑀯𑀲𑁂𑀦 𑀯𑀻𑀫𑀁𑀲𑀺𑀢𑁆𑀯𑀸. 𑀅𑀦𑀽𑀦𑀢𑀦𑁆𑀢𑀺 𑀳𑀢𑁆𑀣𑀸𑀤𑀻𑀳𑀺 𑀅𑀯𑀺𑀓𑀮𑀢𑀁. 𑀦𑀺𑀦𑁆𑀤𑀺𑀲𑀼𑀦𑁆𑀢𑀺 ‘‘𑀏𑀯𑀁 𑀅𑀦𑀽𑀦𑀸𑀯𑀬𑀯𑁄𑀧𑀺 𑀲𑀫𑀸𑀦𑁄 𑀫𑀽𑀕𑀸𑀤𑀺 𑀯𑀺𑀬 𑀤𑀺𑀲𑁆𑀲𑀫𑀸𑀦𑁄 ‘‘𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀅𑀪𑀩𑁆𑀩𑁄, 𑀓𑀸𑀴𑀓𑀡𑁆𑀡𑀺𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀕𑀭𑀳𑀺𑀁𑀲𑀼. ‘‘𑀦𑀺𑀤𑁆𑀤𑀺𑀲𑀼’’𑀦𑁆𑀢𑀺𑀧𑀺 𑀧𑀸𑀞𑁄, 𑀯𑀤𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁫𑁯. 𑀙𑀟𑁆𑀟𑀦𑀁 𑀅𑀦𑀼𑀫𑁄𑀤𑀺𑀲𑀼𑀦𑁆𑀢𑀺 𑀭𑀸𑀚𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑀸 𑀲𑀩𑁆𑀩𑁂𑀧𑀺 𑀚𑀦𑀧𑀤𑀯𑀸𑀲𑀺𑀦𑁄 𑀲𑁂𑀦𑀸𑀧𑀢𑀺𑀧𑀼𑀭𑁄𑀳𑀺𑀢𑀧𑁆𑀧𑀫𑀼𑀔𑀸 𑀭𑀸𑀚𑀧𑀼𑀭𑀺𑀲𑀸 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀫𑀦𑀸 𑀲𑀫𑀸𑀦𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀦𑁆𑀢𑀭𑀸𑀬𑀧𑀭𑀺𑀳𑀭𑀡𑀢𑁆𑀣𑀁 𑀭𑀜𑁆𑀜𑀸 𑀆𑀡𑀢𑁆𑀢𑀸 𑀪𑀽𑀫𑀺𑀬𑀁 𑀦𑀺𑀔𑀡𑀦𑀯𑀲𑁂𑀦 𑀫𑀫 𑀙𑀟𑁆𑀟𑀦𑀁 𑀫𑀼𑀔𑀲𑀗𑁆𑀓𑁄𑀘𑀁 𑀅𑀓𑀢𑁆𑀯𑀸 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀸𑀥𑀼 𑀲𑀼𑀝𑁆𑀞𑀼 𑀇𑀤𑀁 𑀓𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀅𑀦𑀼𑀫𑁄𑀤𑀺𑀁𑀲𑀼.

𑁬𑁦. 𑀲𑁄 𑀫𑁂 𑀅𑀢𑁆𑀣𑁄 𑀲𑀫𑀺𑀚𑁆𑀛𑀣𑀸𑀢𑀺 𑀬𑀲𑁆𑀲𑀢𑁆𑀣𑀸𑀬 𑀬𑀤𑀢𑁆𑀣𑀁 𑀢𑀢𑁄 𑀫𑀽𑀕𑀸𑀤𑀺𑀪𑀸𑀯𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀤𑀼𑀓𑁆𑀓𑀭𑀘𑀭𑀡𑀁 𑀘𑀺𑀡𑁆𑀡𑀁 𑀘𑀭𑀺𑀢𑀁, 𑀲𑁄 𑀅𑀢𑁆𑀣𑁄 𑀫𑀫 𑀲𑀫𑀺𑀚𑁆𑀛𑀢𑀺. 𑀢𑁂𑀲𑀁 𑀫𑀫 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁 𑀫𑀢𑀺𑀁 𑀅𑀥𑀺𑀧𑁆𑀧𑀸𑀬𑀁 𑀲𑀼𑀢𑁆𑀯𑀸 𑀲𑁄 𑀅𑀳𑀁 𑀫𑀫 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑁂𑀦 𑀳𑀝𑁆𑀞𑁄 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀔𑀡𑀦𑀸𑀦𑀼𑀚𑀸𑀦𑀦𑁂𑀦 𑀲𑀁𑀯𑀺𑀕𑁆𑀕𑀫𑀸𑀦𑀲𑁄𑀯 𑀅𑀳𑁄𑀲𑀺𑀦𑁆𑀢𑀺 𑀯𑀘𑀦𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁧. 𑀏𑀯𑀁 ¶ 𑀓𑀼𑀫𑀸𑀭𑀲𑁆𑀲 𑀪𑀽𑀫𑀺𑀬𑀁 𑀦𑀺𑀔𑀡𑀦𑁂 𑀭𑀜𑁆𑀜𑀸 𑀆𑀡𑀢𑁆𑀢𑁂 𑀘𑀦𑁆𑀤𑀸𑀤𑁂𑀯𑀻 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀯𑀭𑁄 𑀤𑀺𑀦𑁆𑀦𑁄, 𑀫𑀬𑀸 ¶ 𑀘 𑀕𑀳𑀺𑀢𑀓𑀁 𑀓𑀢𑁆𑀯𑀸 𑀞𑀧𑀺𑀢𑁄, 𑀢𑀁 𑀫𑁂 𑀇𑀤𑀸𑀦𑀺 𑀤𑁂𑀣𑀸’’𑀢𑀺. ‘‘𑀕𑀡𑁆𑀳, 𑀤𑁂𑀯𑀻’’𑀢𑀺. ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀭𑀚𑁆𑀚𑀁 𑀤𑁂𑀣𑀸’’𑀢𑀺. ‘‘𑀧𑀼𑀢𑁆𑀢𑁄 𑀢𑁂 𑀓𑀸𑀴𑀓𑀡𑁆𑀡𑀻, 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀬𑀸𑀯𑀚𑀻𑀯𑀁 𑀅𑀤𑁂𑀦𑁆𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀤𑁂𑀣𑀸’’𑀢𑀺. ‘‘𑀢𑀫𑁆𑀧𑀺 𑀦 𑀲𑀓𑁆𑀓𑀸’’𑀢𑀺. ‘‘𑀙 𑀯𑀲𑁆𑀲𑀸𑀦𑀺, 𑀧𑀜𑁆𑀘𑀘𑀢𑁆𑀢𑀸𑀭𑀺𑀢𑀻𑀡𑀺𑀤𑁆𑀯𑁂𑀏𑀓𑀁 𑀯𑀲𑁆𑀲𑀁, 𑀲𑀢𑁆𑀢 𑀫𑀸𑀲𑁂, 𑀙𑀧𑀜𑁆𑀘𑀘𑀢𑁆𑀢𑀸𑀭𑁄𑀢𑀬𑁄𑀤𑁆𑀯𑁂𑀏𑀓𑀁 𑀫𑀸𑀲𑀁𑀅𑀤𑁆𑀥𑀫𑀸𑀲𑀁𑀲𑀢𑁆𑀢𑀸𑀳𑀁 𑀤𑁂𑀣𑀸’’𑀢𑀺. 𑀲𑀸𑀥𑀼 𑀕𑀡𑁆𑀳𑀸𑀢𑀺.

𑀲𑀸 𑀧𑀼𑀢𑁆𑀢𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 ‘‘𑀢𑁂𑀫𑀺𑀬𑀓𑀼𑀫𑀸𑀭𑀲𑁆𑀲 𑀇𑀤𑀁 𑀭𑀚𑁆𑀚’’𑀦𑁆𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑁄𑀧𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀫𑀢𑁆𑀣𑀓𑁂 𑀓𑀸𑀭𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 ¶ 𑀆𑀕𑀢𑀁 𑀅𑀮𑀗𑁆𑀓𑀢𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀬𑀸𑀘𑀺 𑁋 ‘‘𑀢𑀸𑀢 𑀢𑁂𑀫𑀺𑀬, 𑀢𑀁 𑀦𑀺𑀲𑁆𑀲𑀸𑀬 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀦𑀺𑀤𑁆𑀤𑀁 𑀅𑀮𑀪𑀺𑀢𑁆𑀯𑀸 𑀭𑁄𑀤𑀫𑀸𑀦𑀸𑀬 𑀫𑁂 𑀅𑀓𑁆𑀔𑀻𑀦𑀺 𑀉𑀧𑁆𑀧𑀓𑁆𑀓𑀸𑀦𑀺, 𑀲𑁄𑀓𑁂𑀦 𑀳𑀤𑀬𑀁 𑀪𑀺𑀚𑁆𑀚𑀢𑀺 𑀯𑀺𑀬, 𑀢𑀯 𑀅𑀧𑀻𑀞𑀲𑀧𑁆𑀧𑀺𑀆𑀤𑀺𑀪𑀸𑀯𑀁 𑀚𑀸𑀦𑀸𑀫𑀺, 𑀫𑀸 𑀫𑀁 𑀅𑀦𑀸𑀣𑀁 𑀓𑀭𑀻’’𑀢𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀙 𑀤𑀺𑀯𑀲𑁂 𑀬𑀸𑀘𑀺. 𑀙𑀝𑁆𑀞𑁂 𑀤𑀺𑀯𑀲𑁂 𑀭𑀸𑀚𑀸 𑀲𑀼𑀦𑀦𑁆𑀤𑀁 𑀦𑀸𑀫 𑀲𑀸𑀭𑀣𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑁆𑀯𑁂 𑀧𑀸𑀢𑁄𑀯 𑀅𑀯𑀫𑀗𑁆𑀕𑀮𑀭𑀣𑁂𑀦 𑀓𑀼𑀫𑀸𑀭𑀁 𑀦𑀻𑀳𑀭𑀺𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀪𑀽𑀫𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀧𑀣𑀯𑀺𑀯𑀟𑁆𑀠𑀦𑀓𑀓𑀫𑁆𑀫𑀁 𑀓𑀢𑁆𑀯𑀸 𑀏𑀳𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀻 ‘‘𑀢𑀸𑀢, 𑀓𑀸𑀲𑀺𑀭𑀸𑀚𑀸 𑀢𑀁 𑀲𑁆𑀯𑁂 𑀆𑀫𑀓𑀲𑀼𑀲𑀸𑀦𑁂 𑀦𑀺𑀔𑀡𑀺𑀢𑀼𑀁 𑀆𑀡𑀸𑀧𑁂𑀲𑀺. 𑀲𑁆𑀯𑁂 𑀫𑀭𑀡𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀆𑀳.

𑀫𑀳𑀸𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 ‘‘𑀢𑁂𑀫𑀺𑀬, 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀢𑀬𑀸 𑀓𑀢𑁄 𑀯𑀸𑀬𑀸𑀫𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄’’𑀢𑀺 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀅𑀳𑁄𑀲𑀺. 𑀫𑀸𑀢𑀼𑀬𑀸 𑀧𑀦𑀲𑁆𑀲 𑀳𑀤𑀬𑀁 𑀪𑀺𑀚𑁆𑀚𑀦𑀸𑀓𑀸𑀭𑀁 𑀯𑀺𑀬 𑀅𑀳𑁄𑀲𑀺. 𑀅𑀣 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀸𑀢𑁄𑀯 𑀲𑀸𑀭𑀣𑀺 𑀭𑀣𑀁 𑀆𑀤𑀸𑀬 𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀤𑁂𑀯𑀺, 𑀫𑀸 𑀫𑀬𑁆𑀳𑀁 𑀓𑀼𑀚𑁆𑀛𑀺, 𑀭𑀜𑁆𑀜𑁄 𑀆𑀡𑀸’’𑀢𑀺 𑀧𑀼𑀢𑁆𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀦𑀺𑀧𑀦𑁆𑀦𑀁 𑀤𑁂𑀯𑀺𑀁 𑀧𑀺𑀝𑁆𑀞𑀺𑀳𑀢𑁆𑀣𑁂𑀦 𑀅𑀧𑀦𑁂𑀢𑁆𑀯𑀸 𑀓𑀼𑀫𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀺. 𑀤𑁂𑀯𑀻 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺𑀢𑁆𑀯𑀸 𑀫𑀳𑀸𑀢𑀮𑁂 𑀑𑀳𑀻𑀬𑀺.

𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀫𑀸𑀢𑀼 𑀲𑁄𑀓𑁄 𑀩𑀮𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀣𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀧𑀺 ‘‘𑀲𑀘𑁂 𑀓𑀣𑁂𑀲𑁆𑀲𑀸𑀫𑀺 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀓𑀢𑁄 ¶ 𑀯𑀸𑀬𑀸𑀫𑁄 𑀫𑁄𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀓𑀣𑁂𑀦𑁆𑀢𑁄 𑀧𑀦𑀸𑀳𑀁 𑀅𑀢𑁆𑀢𑀦𑁄 𑀘 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀲𑀸𑀭𑀣𑀺 ‘‘𑀫𑀳𑀸𑀲𑀢𑁆𑀢𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑀸𑀪𑀺𑀫𑀼𑀔𑀁 ¶ 𑀭𑀣𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀘𑀻𑀦𑀤𑁆𑀯𑀸𑀭𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺. 𑀭𑀣𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀢𑀺𑀬𑁄𑀚𑀦𑀝𑁆𑀞𑀸𑀦𑀁 𑀕𑀢𑁄. 𑀫𑀳𑀸𑀲𑀢𑁆𑀢𑁄 𑀲𑀼𑀝𑁆𑀞𑀼𑀢𑀭𑀁 𑀢𑀼𑀝𑁆𑀞𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀢𑀢𑁆𑀣 𑀯𑀦𑀖𑀝𑀁 𑀲𑀸𑀭𑀣𑀺𑀲𑁆𑀲 𑀆𑀫𑀓𑀲𑀼𑀲𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑁄 ‘‘𑀇𑀤𑀁 𑀞𑀸𑀦𑀁 𑀲𑀼𑀦𑁆𑀤𑀭’’𑀦𑁆𑀢𑀺 𑀭𑀣𑀁 𑀑𑀓𑁆𑀓𑀫𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀭𑀣𑀸 𑀑𑀭𑀼𑀬𑁆𑀳 𑀫𑀳𑀸𑀲𑀢𑁆𑀢𑀲𑁆𑀲 𑀆𑀪𑀭𑀡𑀪𑀡𑁆𑀟𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀓𑀼𑀤𑀸𑀮𑀁 𑀆𑀤𑀸𑀬 𑀅𑀯𑀺𑀤𑀽𑀭𑁂 𑀆𑀯𑀸𑀝𑀁 𑀔𑀡𑀺𑀢𑀼𑀁 𑀆𑀭𑀪𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁆𑀳𑀸𑀧𑁂𑀢𑁆𑀯𑀸 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀦𑁆𑀳𑀸𑀧𑁂𑀢𑁆𑀯𑀸𑀢𑀺 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀸𑀧𑁂𑀢𑁆𑀯𑀸. 𑀅𑀦𑀼𑀮𑀺𑀫𑁆𑀧𑀺𑀢𑁆𑀯𑀸𑀢𑀺 𑀲𑀼𑀭𑀪𑀺𑀯𑀺𑀮𑁂𑀧𑀦𑁂𑀦 𑀯𑀺𑀮𑀺𑀫𑁆𑀧𑁂𑀢𑁆𑀯𑀸. 𑀯𑁂𑀞𑁂𑀢𑁆𑀯𑀸 𑀭𑀸𑀚𑀯𑁂𑀞𑀦𑀦𑁆𑀢𑀺 𑀓𑀸𑀲𑀺𑀭𑀸𑀚𑀽𑀦𑀁 𑀧𑀯𑁂𑀡𑀺𑀬𑀸𑀕𑀢𑀁 𑀭𑀸𑀚𑀫𑀓𑀼𑀝𑀁 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀭𑀸𑀚𑀸𑀪𑀺𑀲𑁂𑀓𑀦𑀺𑀬𑀸𑀫𑁂𑀦 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸. 𑀙𑀢𑁆𑀢𑁂𑀦 𑀓𑀸𑀭𑁂𑀲𑀼𑀁 𑀧𑀼𑀭𑀁 𑀧𑀤𑀓𑁆𑀔𑀺𑀡𑀦𑁆𑀢𑀺 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦 𑀫𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑁂𑀲𑀼𑀁.

𑁬𑁨. 𑀲𑀢𑁆𑀢𑀸𑀳𑀁 𑀥𑀸𑀭𑀬𑀺𑀢𑁆𑀯𑀸𑀦𑀸𑀢𑀺 𑀫𑀬𑁆𑀳𑀁 𑀫𑀸𑀢𑀼 𑀘𑀦𑁆𑀤𑀸𑀤𑁂𑀯𑀺𑀬𑀸 𑀯𑀭𑀮𑀸𑀪𑀦𑀯𑀲𑁂𑀦 𑀮𑀤𑁆𑀥𑀁 𑀲𑀢𑁆𑀢𑀸𑀳𑀁 𑀫𑀫 𑀲𑁂𑀢𑀘𑁆𑀙𑀢𑁆𑀢𑀁 ¶ 𑀥𑀸𑀭𑀬𑀺𑀢𑁆𑀯𑀸. 𑀉𑀕𑁆𑀕𑀢𑁂 𑀭𑀯𑀺𑀫𑀡𑁆𑀟𑀮𑁂𑀢𑀺 𑀢𑀢𑁄 𑀧𑀼𑀦𑀤𑀺𑀯𑀲𑁂 𑀲𑀽𑀭𑀺𑀬𑀫𑀡𑁆𑀟𑀮𑁂 𑀉𑀕𑁆𑀕𑀢𑀫𑀢𑁆𑀢𑁂 𑀅𑀯𑀫𑀗𑁆𑀕𑀮𑀭𑀣𑁂𑀦 𑀫𑀁 𑀦𑀕𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀔𑀡𑀦𑀢𑁆𑀣𑀁 𑀲𑀸𑀭𑀣𑀺 𑀲𑀼𑀦𑀦𑁆𑀤𑁄 𑀯𑀦𑀫𑀼𑀧𑀕𑀘𑁆𑀙𑀺.

𑁬𑁩. 𑀲𑀚𑁆𑀚𑀲𑁆𑀲𑀦𑁆𑀢𑀺 𑀲𑀦𑁆𑀦𑀤𑁆𑀥𑁄 𑀅𑀲𑁆𑀲𑀁, 𑀬𑀼𑀕𑁂 𑀬𑁄𑀚𑀺𑀢𑀲𑁆𑀲𑀁 𑀫𑁂 𑀭𑀣𑀁 𑀫𑀕𑁆𑀕𑀢𑁄 𑀉𑀓𑁆𑀓𑀫𑀸𑀧𑀦𑀯𑀲𑁂𑀦 𑀏𑀓𑁄𑀓𑀸𑀲𑁂 𑀓𑀢𑁆𑀯𑀸. 𑀳𑀢𑁆𑀣𑀫𑀼𑀘𑁆𑀘𑀺𑀢𑁄𑀢𑀺 𑀫𑀼𑀘𑁆𑀘𑀺𑀢𑀳𑀢𑁆𑀣𑁄, 𑀭𑀣𑀧𑀸𑀘𑀦𑀢𑁄 𑀫𑀼𑀢𑁆𑀢𑀳𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀳𑀢𑁆𑀣𑀫𑀼𑀘𑁆𑀘𑀺𑀢𑁄𑀢𑀺 𑀳𑀢𑁆𑀣𑀫𑀼𑀢𑁆𑀢𑁄 𑀫𑀫 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀸𑀲𑀼𑀦𑁆𑀢𑀺 𑀆𑀯𑀸𑀝𑀁. 𑀦𑀺𑀔𑀸𑀢𑀼𑀦𑁆𑀢𑀺 𑀦𑀺𑀔𑀡𑀺𑀢𑀼𑀁.

𑁬𑁪-𑁫. 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀫𑀬𑀸 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀫𑀽𑀕𑀯𑀢𑀸𑀤𑀺𑀅𑀥𑀺𑀝𑁆𑀞𑀸𑀦𑁂𑀦 𑀤𑀼𑀓𑁆𑀓𑀭𑀘𑀭𑀺𑀬𑀸 ¶ 𑀅𑀥𑀺𑀝𑁆𑀞𑀺𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀝𑁆𑀞𑀺𑀢𑀫𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀢𑁆𑀣 𑀢𑀚𑁆𑀚𑁂𑀦𑁆𑀢𑁄 𑀯𑀺𑀯𑀺𑀥𑀓𑀸𑀭𑀡𑀸𑀢𑀺 𑀤𑁆𑀯𑀺𑀫𑀸𑀲𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑁄𑀴𑀲𑀲𑀁𑀯𑀘𑁆𑀙𑀭𑀸 𑀣𑀜𑁆𑀜𑀧𑀝𑀺𑀲𑁂𑀥𑀦𑀸𑀤𑀻𑀳𑀺 𑀯𑀺𑀯𑀺𑀥𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀸𑀭𑀡𑁂𑀳𑀺 𑀢𑀚𑁆𑀚𑀬𑀦𑁆𑀢𑁄 𑀪𑀬𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀯𑀺𑀳𑁂𑀞𑀺𑀬𑀫𑀸𑀦𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀣 ¶ 𑀫𑀳𑀸𑀲𑀢𑁆𑀢𑁄 𑀲𑀼𑀦𑀦𑁆𑀤𑁂 𑀓𑀸𑀲𑀼𑀁 𑀔𑀡𑀦𑁆𑀢𑁂 ‘‘𑀅𑀬𑀁 𑀫𑁂 𑀯𑀸𑀬𑀸𑀫𑀓𑀸𑀮𑁄’’𑀢𑀺 𑀉𑀝𑁆𑀞𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 𑀭𑀣𑀸 𑀑𑀢𑀭𑀺𑀢𑀼𑀁 𑀫𑁂 𑀩𑀮𑀁 𑀅𑀢𑁆𑀣𑀻𑀢𑀺 𑀜𑀢𑁆𑀯𑀸 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀧𑀸𑀤𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀯𑀸𑀢𑀧𑀼𑀡𑁆𑀡𑀪𑀲𑁆𑀢𑀘𑀫𑁆𑀫𑀁 𑀯𑀺𑀬 𑀉𑀕𑁆𑀕𑀦𑁆𑀢𑁆𑀯𑀸 𑀭𑀣𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀲𑁄 𑀑𑀢𑀭𑀺𑀢𑁆𑀯𑀸 𑀓𑀢𑀺𑀧𑀬𑁂 𑀯𑀸𑀭𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀢𑁆𑀯𑀸 ‘‘𑀬𑁄𑀚𑀦𑀲𑀢𑀫𑁆𑀧𑀺 𑀕𑀦𑁆𑀢𑀼𑀁 𑀫𑁂 𑀩𑀮𑀁 𑀅𑀢𑁆𑀣𑀻’’𑀢𑀺 𑀜𑀢𑁆𑀯𑀸 𑀭𑀣𑀁 𑀧𑀘𑁆𑀙𑀺𑀫𑀦𑁆𑀢𑁂 𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀓𑀸𑀦𑀁 𑀓𑀻𑀴𑀦𑀬𑀸𑀦𑀓𑀁 𑀯𑀺𑀬 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀘𑁂 𑀲𑀸𑀭𑀣𑀺 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑁂𑀬𑁆𑀬, 𑀅𑀢𑁆𑀣𑀺 𑀫𑁂 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑀼𑀁 𑀩𑀮’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀲𑀸𑀥𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙 𑀓𑀸𑀲𑀺𑀭𑀸𑀚𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑁄𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀘 𑀫𑀸𑀦𑀼𑀲𑁂𑀳𑀺 𑀘 𑀅𑀮𑀗𑁆𑀓𑀸𑀭𑁂𑀳𑀺 𑀲𑀓𑁆𑀓𑀁 𑀯𑀺𑀬 𑀢𑀁 𑀅𑀮𑀗𑁆𑀓𑀭𑀺. 𑀲𑁄 𑀤𑁂𑀯𑀭𑀸𑀚𑀮𑀻𑀴𑀸𑀬 𑀲𑀸𑀭𑀣𑀺𑀲𑁆𑀲 𑀔𑀡𑀦𑁄𑀓𑀸𑀲𑀁 𑀕𑀦𑁆𑀢𑁆𑀯𑀸 𑀆𑀯𑀸𑀝𑀢𑀻𑀭𑁂 𑀞𑀢𑁆𑀯𑀸 𑁋

‘‘𑀓𑀺𑀦𑁆𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀡𑀲𑀺 𑀲𑀸𑀭𑀣𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀓𑀸𑀲𑀼𑀬𑀸 𑀓𑀭𑀺𑀲𑁆𑀲𑀲𑀻’’𑀢𑀺. (𑀚𑀸. 𑁨.𑁨𑁨.𑁩) 𑁋

𑀆𑀳.

𑀢𑁂𑀦 ¶ 𑀉𑀤𑁆𑀥𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑁋

‘‘𑀭𑀜𑁆𑀜𑁄 𑀫𑀽𑀕𑁄 𑀘 𑀧𑀓𑁆𑀔𑁄 𑀘, 𑀧𑀼𑀢𑁆𑀢𑁄 𑀚𑀸𑀢𑁄 𑀅𑀘𑁂𑀢𑀲𑁄;

𑀲𑁄𑀫𑁆𑀳𑀺 𑀭𑀜𑁆𑀜𑀸 𑀲𑀫𑀚𑁆𑀛𑀺𑀝𑁆𑀞𑁄, 𑀧𑀼𑀢𑁆𑀢𑀁 𑀫𑁂 𑀦𑀺𑀔𑀡𑀁 𑀯𑀦𑁂’’𑀢𑀺. (𑀚𑀸. 𑁨.𑁨𑁨.𑁪) 𑁋

𑀯𑀼𑀢𑁆𑀢𑁂 𑀫𑀳𑀸𑀲𑀢𑁆𑀢𑁄 𑁋

‘‘𑀦 ¶ 𑀩𑀥𑀺𑀭𑁄 𑀦 𑀫𑀽𑀕𑁄𑀲𑁆𑀫𑀺, 𑀦 𑀧𑀓𑁆𑀔𑁄 𑀦 𑀘 𑀯𑀻𑀓𑀮𑁄;

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂.

‘‘𑀊𑀭𑀽 𑀩𑀸𑀳𑀼𑀜𑁆𑀘 𑀫𑁂 𑀧𑀲𑁆𑀲, 𑀪𑀸𑀲𑀺𑀢𑀜𑁆𑀘 𑀲𑀼𑀡𑁄𑀳𑀺 𑀫𑁂;

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂’’𑀢𑀺. (𑀚𑀸. 𑁨.𑁨𑁨.𑁫-𑁬) 𑁋

𑀯𑀢𑁆𑀯𑀸 𑀧𑀼𑀦 𑀢𑁂𑀦 𑀆𑀯𑀸𑀝𑀔𑀡𑀦𑀁 𑀧𑀳𑀸𑀬 𑀉𑀤𑁆𑀥𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀫𑀦𑀼𑀲𑁆𑀲𑁄 𑀯𑀸 𑀤𑁂𑀯𑁄 𑀯𑀸’’𑀢𑀺 𑀅𑀚𑀸𑀦𑀦𑁆𑀢𑁂𑀦 𑁋

‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺. (𑀚𑀸. 𑁨.𑁨𑁨.𑁭) 𑁋

𑀯𑀼𑀢𑁆𑀢𑁂 𑁋

‘‘𑀦𑀫𑁆𑀳𑀺 ¶ 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀓𑀸𑀲𑀺𑀭𑀜𑁆𑀜𑁄 𑀅𑀳𑀁 𑀧𑀼𑀢𑁆𑀢𑁄, 𑀬𑀁 𑀓𑀸𑀲𑀼𑀬𑀸 𑀦𑀺𑀔𑀜𑁆𑀜𑀲𑀺.

‘‘𑀢𑀲𑁆𑀲 𑀭𑀜𑁆𑀜𑁄 𑀅𑀳𑀁 𑀧𑀼𑀢𑁆𑀢𑁄, 𑀬𑀁 𑀢𑁆𑀯𑀁 𑀲𑀫𑁆𑀫𑀽𑀧𑀚𑀻𑀯𑀲𑀺;

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂.

‘‘𑀬𑀲𑁆𑀲 ¶ 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄.

‘‘𑀬𑀣𑀸 𑀭𑀼𑀓𑁆𑀔𑁄 𑀢𑀣𑀸 𑀭𑀸𑀚𑀸, 𑀬𑀣𑀸 𑀲𑀸𑀔𑀸 𑀢𑀣𑀸 𑀅𑀳𑀁;

𑀬𑀣𑀸 𑀙𑀸𑀬𑀽𑀧𑀕𑁄 𑀧𑁄𑀲𑁄, 𑀏𑀯𑀁 𑀢𑁆𑀯𑀫𑀲𑀺 𑀲𑀸𑀭𑀣𑀺;

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂’’𑀢𑀺. (𑀚𑀸. 𑁨.𑁨𑁨.𑁮-𑁧𑁧) 𑁋

𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑁂𑀦 𑀦𑀺𑀯𑀢𑁆𑀢𑀦𑀢𑁆𑀣𑀁 𑀬𑀸𑀘𑀺𑀢𑁄 𑀅𑀦𑀺𑀯𑀢𑁆𑀢𑀦𑀓𑀸𑀭𑀡𑀁 𑀧𑀩𑁆𑀩𑀚𑁆𑀚𑀸𑀙𑀦𑁆𑀤𑀁 𑀢𑀲𑁆𑀲 𑀘 𑀳𑁂𑀢𑀼 𑀦𑀺𑀭𑀬𑀪𑀬𑀸𑀤𑀺𑀓𑀁 𑀅𑀢𑀻𑀢𑀪𑀯𑁂 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 𑀢𑀸𑀬 𑀥𑀫𑁆𑀫𑀓𑀣𑀸𑀬 𑀢𑀸𑀬 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀢𑀲𑁆𑀫𑀺𑀫𑁆𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁂 𑀚𑀸𑀢𑁂 𑀭𑀜𑁆𑀜𑁄 𑀇𑀫𑀁 𑁋

‘‘𑀭𑀣𑀁 𑀦𑀺𑀬𑁆𑀬𑀸𑀢𑀬𑀺𑀢𑁆𑀯𑀸𑀦, 𑀅𑀦𑀡𑁄 𑀏𑀳𑀺 𑀲𑀸𑀭𑀣𑀺;

𑀅𑀦𑀡𑀲𑁆𑀲 𑀳𑀺 𑀧𑀩𑁆𑀩𑀚𑁆𑀚𑀸, 𑀏𑀢𑀁 𑀇𑀲𑀻𑀳𑀺 𑀯𑀡𑁆𑀡𑀺𑀢’’𑀦𑁆𑀢𑀺. (𑀚𑀸. 𑁨.𑁨𑁨.𑁪𑁪) 𑁋

𑀯𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀲𑁄 𑀭𑀣𑀁 𑀆𑀪𑀭𑀡𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀸𑀯𑀤𑁂𑀯 ‘‘𑀫𑀳𑀸𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 ¶ 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀢𑁄 𑀦𑀺𑀕𑁆𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀇𑀢𑁆𑀣𑀸𑀕𑀸𑀭𑁂𑀳𑀺 𑀦𑀸𑀕𑀭𑀚𑀸𑀦𑀧𑀤𑁂𑀳𑀺 𑀘. 𑀫𑀳𑀸𑀲𑀢𑁆𑀢𑁄𑀧𑀺 𑀔𑁄 𑀲𑀸𑀭𑀣𑀺𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀚𑀸𑀢𑁄. 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀯𑀺𑀲𑁆𑀲𑀓𑀫𑁆𑀫𑀁 𑀧𑁂𑀲𑁂𑀲𑀺 𑁋 ‘‘𑀢𑁂𑀫𑀺𑀬𑀧𑀡𑁆𑀟𑀺𑀢𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀅𑀲𑁆𑀲𑀫𑀧𑀤𑀁 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀘 𑀫𑀸𑀧𑁂𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀺𑀬𑁄𑀚𑀦𑀺𑀓𑁂 𑀯𑀦𑀲𑀡𑁆𑀟𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀧𑁄𑀓𑁆𑀔𑀭𑀡𑀻𑀨𑀮𑀭𑀼𑀓𑁆𑀔𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀘 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀫𑀸𑀧𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀲𑀓𑁆𑀓𑀤𑀢𑁆𑀢𑀺𑀬𑀪𑀸𑀯𑀁 𑀜𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀯𑀢𑁆𑀣𑀸𑀦𑀺 𑀅𑀧𑀦𑁂𑀢𑁆𑀯𑀸 𑀢𑀸𑀧𑀲𑀯𑁂𑀲𑀁 ¶ 𑀕𑀳𑁂𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑁂 𑀦𑀺𑀲𑀺𑀦𑁆𑀦𑁄 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀅𑀲𑁆𑀲𑀫𑁂 𑀦𑀺𑀲𑀻𑀤𑀺.

𑀓𑀸𑀲𑀺𑀭𑀸𑀚𑀸𑀧𑀺 𑀲𑀸𑀭𑀣𑀺𑀦𑀸 𑀤𑀲𑁆𑀲𑀺𑀢𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀅𑀲𑁆𑀲𑀫𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑁂𑀦 𑀲𑀳 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀢𑁂𑀫𑀺𑀬𑀧𑀡𑁆𑀟𑀺𑀢𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 ¶ 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀘 𑀓𑀸𑀫𑀸𑀤𑀻𑀦𑀯𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀘 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀭𑀸𑀚𑀸𑀦𑀁 𑀲𑀁𑀯𑁂𑀚𑁂𑀲𑀺. 𑀲𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀖𑀭𑀸𑀯𑀸𑀲𑁂 𑀉𑀓𑁆𑀓𑀡𑁆𑀞𑀺𑀢𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀫𑀘𑁆𑀘𑁂 𑀇𑀢𑁆𑀣𑀸𑀕𑀸𑀭𑁂 𑀘 𑀧𑀼𑀘𑁆𑀙𑀺. 𑀢𑁂𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀅𑀣 𑀭𑀸𑀚𑀸 𑀘𑀦𑁆𑀤𑀸𑀤𑁂𑀯𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑁄𑀴𑀲 𑀲𑀳𑀲𑁆𑀲𑁂 𑀑𑀭𑁄𑀥𑁂 𑀘 𑀅𑀫𑀘𑁆𑀘𑀸𑀤𑀺𑀓𑁂 𑀘 𑀧𑀩𑁆𑀩𑀚𑀺𑀢𑀼𑀓𑀸𑀫𑁂 𑀜𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀬𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀢𑁂 𑀧𑀩𑁆𑀩𑀚𑀦𑁆𑀢𑀽’’𑀢𑀺. 𑀲𑀼𑀯𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑀸𑀤𑀻𑀦𑀺 𑀘 𑀯𑀺𑀯𑀭𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀦𑀸𑀕𑀭𑀸 𑀘 𑀬𑀣𑀸𑀧𑀲𑀸𑀭𑀺𑀢𑁂𑀬𑁂𑀯 𑀆𑀧𑀡𑁂 𑀯𑀺𑀯𑀝𑀤𑁆𑀯𑀸𑀭𑀸𑀦𑁂𑀯 𑀕𑁂𑀳𑀸𑀦𑀺 𑀘 𑀧𑀳𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀫𑀳𑀸𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑀓𑁆𑀓𑀤𑀢𑁆𑀢𑀺𑀬𑀁 𑀢𑀺𑀬𑁄𑀚𑀦𑀺𑀓𑀁 𑀅𑀲𑁆𑀲𑀫𑀧𑀤𑀁 𑀧𑀭𑀺𑀧𑀽𑀭𑀺.

𑀲𑀸𑀫𑀦𑁆𑀢𑀭𑀸𑀚𑀸𑀦𑁄 ‘‘𑀓𑀸𑀲𑀺𑀭𑀸𑀚𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀳𑁂𑀲𑁆𑀲𑀸𑀫𑀸’’𑀢𑀺 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁂𑀯𑀦𑀕𑀭𑀲𑀤𑀺𑀲𑀁 𑀦𑀕𑀭𑀁 𑀲𑀢𑁆𑀢𑀭𑀢𑀦𑀪𑀭𑀺𑀢𑀁 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀁 𑀭𑀸𑀚𑀦𑀺𑀯𑁂𑀲𑀦𑀜𑁆𑀘 𑀤𑀺𑀲𑁆𑀯𑀸 ‘‘𑀇𑀫𑀁 𑀥𑀦𑀁 𑀦𑀺𑀲𑁆𑀲𑀸𑀬 𑀪𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑀸𑀯𑀤𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀸𑀬𑀸𑀲𑀼𑀁. 𑀢𑁂𑀲𑀁 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀯𑀦𑀦𑁆𑀢𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀲𑀩𑁆𑀩𑁂 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀅𑀧𑀭𑁂𑀧𑀺 𑀅𑀧𑀭𑁂𑀧𑀻𑀢𑀺 𑀫𑀳𑀸𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀲𑀩𑁆𑀩𑁂 𑀨𑀮𑀸𑀨𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀬𑁄 𑀓𑀸𑀫𑀸𑀤𑀺𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀲𑁄 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀏𑀯𑀁 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀲𑀩𑁆𑀩𑁂𑀧𑀺 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑀸 𑀅𑀳𑁂𑀲𑀼𑀁. 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀫𑀳𑀸𑀲𑀢𑁆𑀢𑁂 𑀇𑀲𑀺𑀕𑀡𑁂𑀧𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀫𑀳𑀸𑀲𑀢𑁆𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑁆𑀣. 𑀢𑀤𑀸 𑀙𑀢𑁆𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀲𑀸𑀭𑀣𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀢𑁂𑀫𑀺𑀬𑀧𑀡𑁆𑀟𑀺𑀢𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 ¶ 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀇𑀥 𑀫𑀢𑁆𑀣𑀓𑀁 𑀧𑀢𑁆𑀢𑀸, 𑀲𑁂𑀲𑀧𑀸𑀭𑀫𑀺𑀬𑁄𑀧𑀺 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀫𑀸𑀲𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀭𑀬𑀪𑀬𑀁 𑀧𑀸𑀧𑀪𑀻𑀭𑀼𑀢𑀸 𑀭𑀚𑁆𑀚𑀚𑀺𑀕𑀼𑀘𑁆𑀙𑀸 𑀦𑁂𑀓𑁆𑀔𑀫𑁆𑀫𑀦𑀺𑀫𑀺𑀢𑁆𑀢𑀁 𑀫𑀽𑀕𑀸𑀤𑀺𑀪𑀸𑀯𑀸𑀥𑀺𑀝𑁆𑀞𑀸𑀦𑀁 𑀢𑀢𑁆𑀣 𑀘 𑀯𑀺𑀭𑁄𑀥𑀺𑀧𑁆𑀧𑀘𑁆𑀘𑀬𑀲𑀫𑁄𑀥𑀸𑀦𑁂𑀧𑀺 𑀦𑀺𑀘𑁆𑀘𑀮𑀪𑀸𑀯𑁄𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀢𑁂𑀫𑀺𑀬𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀦𑀺𑀝𑁆𑀞𑀺𑀢𑀸.

𑁭. 𑀓𑀧𑀺𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 ¶ 𑀬𑀤𑀸 𑀅𑀳𑀁 𑀓𑀧𑀺 𑀆𑀲𑀺𑀦𑁆𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀳𑀁 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀅𑀲𑁆𑀲𑀧𑁄𑀢𑀓𑀧𑁆𑀧𑀫𑀸𑀡𑁄 𑀫𑀳𑀸𑀲𑀭𑀻𑀭𑁄 𑀓𑀧𑀺 𑀳𑁄𑀫𑀺. 𑀦𑀤𑀻𑀓𑀽𑀮𑁂 𑀤𑀭𑀻𑀲𑀬𑁂𑀢𑀺 𑀏𑀓𑀺𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀏𑀓𑀲𑁆𑀫𑀺𑀁 𑀤𑀭𑀻𑀪𑀸𑀕𑁂 𑀬𑀤𑀸 𑀯𑀸𑀲𑀁 𑀓𑀧𑁆𑀧𑁂𑀫𑀻𑀢𑀺 𑀅𑀢𑁆𑀣𑁄.

𑀢𑀤𑀸 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀬𑀽𑀣𑀧𑀭𑀺𑀳𑀭𑀡𑀁 𑀅𑀓𑀢𑁆𑀯𑀸 𑀏𑀓𑀘𑀭𑁄 𑀳𑀼𑀢𑁆𑀯𑀸 𑀯𑀺𑀳𑀸𑀲𑀺. 𑀢𑀲𑁆𑀲𑀸 𑀧𑀦 𑀦𑀤𑀺𑀬𑀸 𑀯𑁂𑀫𑀚𑁆𑀛𑁂 𑀏𑀓𑁄 𑀤𑀻𑀧𑀓𑁄 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀫𑁆𑀩𑀧𑀦𑀲𑀸𑀤𑀻𑀳𑀺 𑀨𑀮𑀭𑀼𑀓𑁆𑀔𑁂𑀳𑀺 𑀲𑀫𑁆𑀧𑀦𑁆𑀦𑁄. 𑀩𑁄𑀥𑀺𑀲𑀢𑁆𑀢𑁄 ¶ 𑀣𑀸𑀫𑀚𑀯𑀲𑀫𑁆𑀧𑀦𑁆𑀦𑀢𑀸𑀬 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀤𑀻𑀧𑀓𑀲𑁆𑀲 𑀧𑀦 𑀦𑀤𑀺𑀬𑀸 𑀘 𑀫𑀚𑁆𑀛𑁂 𑀏𑀓𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀢𑀢𑀺. 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀢𑀲𑁆𑀫𑀺𑀁 𑀤𑀻𑀧𑀓𑁂 𑀧𑀢𑀢𑀺. 𑀲𑁄 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀲𑀸𑀬𑀁 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂𑀧𑀺 𑀢𑀣𑁂𑀯 𑀓𑀭𑁄𑀢𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀏𑀓𑁄 𑀓𑀼𑀫𑁆𑀪𑀻𑀮𑁄 𑀲𑀧𑀚𑀸𑀧𑀢𑀺𑀓𑁄 𑀢𑀲𑁆𑀲𑀁 𑀦𑀤𑀺𑀬𑀁 𑀯𑀲𑀢𑀺. 𑀢𑀲𑁆𑀲 𑀪𑀭𑀺𑀬𑀸 𑀩𑁄𑀥𑀺𑀲𑀢𑁆𑀢𑀁 𑀅𑀧𑀭𑀸𑀧𑀭𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀼𑀫𑁆𑀪𑀻𑀮𑀁 𑀆𑀳 𑁋 ‘‘𑀫𑀬𑁆𑀳𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀇𑀫𑀲𑁆𑀲 𑀯𑀸𑀦𑀭𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀤𑁆𑀤𑁂, 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀚𑁆𑀚 𑀢𑀁 𑀲𑀸𑀬𑀁 𑀤𑀻𑀧𑀓𑀢𑁄 𑀆𑀕𑀘𑁆𑀙𑀦𑁆𑀢𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀯𑀲𑀁 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸 ¶ 𑀲𑀸𑀬𑀦𑁆𑀳𑀲𑀫𑀬𑁂 𑀤𑀻𑀧𑀓𑁂 𑀞𑀺𑀢𑁄𑀯 𑀧𑀸𑀲𑀸𑀡𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀧𑀸𑀲𑀸𑀡𑁄 𑀇𑀤𑀸𑀦𑀺 𑀉𑀘𑁆𑀘𑀢𑀭𑁄 𑀔𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀺 𑀉𑀤𑀓𑀧𑁆𑀧𑀫𑀸𑀡𑀜𑁆𑀘 𑀧𑀸𑀲𑀸𑀡𑀧𑁆𑀧𑀫𑀸𑀡𑀜𑁆𑀘 𑀲𑀼𑀯𑀯𑀢𑁆𑀣𑀸𑀧𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀚𑁆𑀚 𑀇𑀫𑀺𑀲𑁆𑀲𑀸 𑀦𑀤𑀺𑀬𑀸 𑀉𑀤𑀓𑀁 𑀦𑁂𑀯 𑀳𑀸𑀬𑀢𑀺, 𑀅𑀣 𑀘 𑀧𑀦𑀸𑀬𑀁 𑀧𑀸𑀲𑀸𑀡𑁄 𑀫𑀳𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀏𑀢𑁆𑀣 𑀫𑀬𑁆𑀳𑀁 𑀕𑀳𑀡𑀢𑁆𑀣𑀸𑀬 𑀓𑀼𑀫𑁆𑀪𑀻𑀮𑁄 𑀦𑀺𑀧𑀦𑁆𑀦𑁄’’𑀢𑀺?

𑀲𑁄 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀧𑀸𑀲𑀸𑀡𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀪𑁄, 𑀧𑀸𑀲𑀸𑀡𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀯𑀘𑀦𑀁 𑀅𑀮𑀪𑀦𑁆𑀢𑁄 𑀬𑀸𑀯𑀢𑀢𑀺𑀬𑀁 ‘‘𑀪𑁄, 𑀧𑀸𑀲𑀸𑀡𑀸’’𑀢𑀺 𑀆𑀳. 𑀧𑀸𑀲𑀸𑀡𑁄 𑀧𑀝𑀺𑀯𑀘𑀦𑀁 𑀦 𑀤𑁂𑀢𑀺. 𑀧𑀼𑀦𑀧𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀁, 𑀪𑁄 𑀧𑀸𑀲𑀸𑀡, 𑀅𑀚𑁆𑀚 𑀫𑀬𑁆𑀳𑀁 𑀧𑀝𑀺𑀯𑀘𑀦𑀁 𑀦 𑀤𑁂𑀲𑀻’’𑀢𑀺 ¶ 𑀆𑀳. 𑀓𑀼𑀫𑁆𑀪𑀻𑀮𑁄 ‘‘𑀅𑀤𑁆𑀥𑀸 𑀅𑀬𑀁 𑀧𑀸𑀲𑀸𑀡𑁄 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀯𑀸𑀦𑀭𑀺𑀦𑁆𑀤𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀢𑀺 𑀫𑀜𑁆𑀜𑁂, 𑀅𑀚𑁆𑀚 𑀧𑀦 𑀫𑀬𑀸 𑀑𑀢𑁆𑀣𑀭𑀺𑀢𑀢𑁆𑀢𑀸 𑀦 𑀤𑁂𑀢𑀺, 𑀳𑀦𑁆𑀤𑀸𑀳𑀁 𑀤𑀲𑁆𑀲𑀸𑀫𑀺𑀲𑁆𑀲 𑀧𑀝𑀺𑀯𑀘𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀯𑀸𑀦𑀭𑀺𑀦𑁆𑀤𑀸’’𑀢𑀺 𑀆𑀳. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀓𑀼𑀫𑁆𑀪𑀻𑀮𑁄’’𑀢𑀺 ¶ . ‘‘𑀓𑀺𑀫𑀢𑁆𑀣𑀁 𑀏𑀢𑁆𑀣 𑀦𑀺𑀧𑀦𑁆𑀦𑁄𑀲𑀻’’𑀢𑀺? ‘‘𑀢𑀯 𑀳𑀤𑀬𑀁 𑀧𑀢𑁆𑀣𑀬𑀫𑀸𑀦𑁄’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀜𑁆𑀜𑁄 𑀫𑁂 𑀕𑀫𑀦𑀫𑀕𑁆𑀕𑁄 𑀦𑀢𑁆𑀣𑀺, 𑀧𑀝𑀺𑀭𑀼𑀤𑁆𑀥𑀁 𑀯𑀢 𑀫𑁂 𑀕𑀫𑀦’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀧𑀻𑀴𑀺𑀢𑁄 𑀲𑀼𑀲𑀼𑀫𑀸𑀭𑁂𑀦, 𑀕𑀫𑀦𑀁 𑀦 𑀮𑀪𑀸𑀫𑀳𑀁’’.

𑁬𑁮.

‘‘𑀬𑀫𑁆𑀳𑁄𑀓𑀸𑀲𑁂 𑀅𑀳𑀁 𑀞𑀢𑁆𑀯𑀸, 𑀑𑀭𑀸 𑀧𑀸𑀭𑀁 𑀧𑀢𑀸𑀫𑀳𑀁;

𑀢𑀢𑁆𑀣𑀘𑁆𑀙𑀺 𑀲𑀢𑁆𑀢𑀼𑀯𑀥𑀓𑁄, 𑀓𑀼𑀫𑁆𑀪𑀻𑀮𑁄 𑀮𑀼𑀤𑁆𑀤𑀤𑀲𑁆𑀲𑀦𑁄’’𑀢𑀺.

𑀢𑀢𑁆𑀣 ‘‘𑀧𑀻𑀴𑀺𑀢𑁄 𑀲𑀼𑀲𑀼𑀫𑀸𑀭𑁂𑀦𑀸’’𑀢𑀺 𑀅𑀤𑁆𑀥𑀕𑀸𑀣𑀸𑀬 𑀯𑀼𑀢𑁆𑀢𑀫𑁂𑀯𑀢𑁆𑀣𑀁. ‘‘𑀬𑀫𑁆𑀳𑁄𑀓𑀸𑀲𑁂’’𑀢𑀺 𑀕𑀸𑀣𑀸𑀬 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑀢𑁆𑀣 𑀬𑀫𑁆𑀳𑁄𑀓𑀸𑀲𑁂𑀢𑀺 𑀬𑀲𑁆𑀫𑀺𑀁 𑀦𑀤𑀻𑀫𑀚𑁆𑀛𑁂 𑀞𑀺𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑀗𑁆𑀔𑀸𑀢𑁂 𑀧𑀤𑁂𑀲𑁂 𑀞𑀢𑁆𑀯𑀸. 𑀑𑀭𑀸𑀢𑀺 𑀤𑀻𑀧𑀓𑀲𑀗𑁆𑀔𑀸𑀢𑀸 𑀑𑀭𑀢𑀻𑀭𑀸. 𑀧𑀸𑀭𑀦𑁆𑀢𑀺 𑀢𑀤𑀸 𑀫𑀫 𑀯𑀲𑀦𑀝𑁆𑀞𑀸𑀦𑀪𑀽𑀢𑀁 𑀦𑀤𑀺𑀬𑀸 𑀧𑀭𑀢𑀻𑀭𑀁. 𑀧𑀢𑀸𑀫𑀳𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀧𑀢𑀸𑀫𑀺 𑀅𑀳𑀁. 𑀢𑀢𑁆𑀣𑀘𑁆𑀙𑀻𑀢𑀺 𑀢𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀧𑁆𑀧𑀤𑁂𑀲𑁂 𑀲𑀢𑁆𑀢𑀼𑀪𑀽𑀢𑁄 𑀯𑀥𑀓𑁄 𑀏𑀓𑀦𑁆𑀢𑁂𑀦𑁂𑀯 𑀖𑀸𑀢𑀓𑁄 𑀧𑀘𑁆𑀘𑀢𑁆𑀣𑀺𑀓𑁄 𑀮𑀼𑀤𑁆𑀤𑀤𑀲𑁆𑀲𑀦𑁄 𑀖𑁄𑀭𑀭𑀽𑀧𑁄 𑀪𑀬𑀸𑀦𑀓𑀤𑀲𑁆𑀲𑀦𑁄 𑀦𑀺𑀲𑀻𑀤𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀜𑁆𑀜𑁄 𑀫𑁂 𑀕𑀫𑀦𑀫𑀕𑁆𑀕𑁄 𑀦𑀢𑁆𑀣𑀺, 𑀅𑀚𑁆𑀚 𑀫𑀬𑀸 𑀓𑀼𑀫𑁆𑀪𑀻𑀮𑁄 𑀯𑀜𑁆𑀘𑁂𑀢𑀩𑁆𑀩𑁄, 𑀏𑀯𑀜𑁆𑀳𑀺 𑀅𑀬𑀜𑁆𑀘 𑀫𑀳𑀢𑀸 𑀧𑀸𑀧𑀢𑁄 𑀫𑀬𑀸 𑀧𑀭𑀺𑀫𑁄𑀘𑀺𑀢𑁄 𑀲𑀺𑀬𑀸, 𑀫𑀬𑁆𑀳𑀜𑁆𑀘 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺. 𑀲𑁄 𑀓𑀼𑀫𑁆𑀪𑀻𑀮𑀁 𑀆𑀳 𑁋 ‘‘𑀲𑀫𑁆𑀫, 𑀓𑀼𑀫𑁆𑀪𑀻𑀮, 𑀅𑀳𑀁 𑀢𑀼𑀬𑁆𑀳𑀁 𑀉𑀧𑀭𑀺 𑀧𑀢𑀺𑀲𑁆𑀲𑀸𑀫𑀻’’𑀢𑀺. 𑀓𑀼𑀫𑁆𑀪𑀻𑀮𑁄 ¶ ‘‘𑀯𑀸𑀦𑀭𑀺𑀦𑁆𑀤, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀇𑀢𑁄 𑀆𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 ‘‘𑀅𑀳𑀁 𑀆𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀫𑀁 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀕𑀡𑁆𑀳𑀸𑀳𑀻’’𑀢𑀺 𑀅𑀯𑁄𑀘. 𑀓𑀼𑀫𑁆𑀪𑀻𑀮𑀸𑀦𑀜𑁆𑀘 𑀫𑀼𑀔𑁂 𑀯𑀺𑀯𑀝𑁂 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑀦𑁆𑀢𑀺. 𑀲𑁄 𑀢𑀁 𑀓𑀸𑀭𑀡𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀫𑀼𑀔𑀁 𑀯𑀺𑀯𑀭𑀺. 𑀅𑀣𑀲𑁆𑀲 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑀺𑀁𑀲𑀼. 𑀲𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 ¶ 𑀲𑀩𑁆𑀩𑀲𑁄 𑀦𑀺𑀫𑁆𑀫𑀻𑀮𑀺𑀢𑀓𑁆𑀔𑀻 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀢𑀣𑀸𑀪𑀸𑀯𑀁 𑀜𑀢𑁆𑀯𑀸 𑀤𑀻𑀧𑀓𑀢𑁄 𑀉𑀧𑁆𑀧𑀢𑀺𑀢𑁄 𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀻𑀮𑀲𑁆𑀲 𑀫𑀢𑁆𑀣𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀢𑀢𑁄 𑀉𑀧𑁆𑀧𑀢𑀦𑁆𑀢𑁄 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑁄 𑀧𑀭𑀢𑀻𑀭𑁂 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁬𑁯.

‘‘𑀲𑁄 𑀫𑀁 𑀅𑀲𑀁𑀲𑀺 𑀏𑀳𑀻𑀢𑀺, 𑀅𑀳𑀫𑁆𑀧𑁂𑀫𑀻𑀢𑀺 𑀢𑀁 𑀯𑀤𑀺𑀁;

𑀢𑀲𑁆𑀲 𑀫𑀢𑁆𑀣𑀓𑀫𑀓𑁆𑀓𑀫𑁆𑀫, 𑀧𑀭𑀓𑀽𑀮𑁂 𑀧𑀢𑀺𑀝𑁆𑀞𑀳𑀺’’𑀦𑁆𑀢𑀺.

𑀢𑀢𑁆𑀣 𑀅𑀲𑀁𑀲𑀻𑀢𑀺 𑀅𑀪𑀸𑀲𑀺. 𑀅𑀳𑀫𑁆𑀧𑁂𑀫𑀻𑀢𑀺 𑀅𑀳𑀫𑁆𑀧𑀺 𑀆𑀕𑀘𑁆𑀙𑀸𑀫𑀻𑀢𑀺 𑀢𑀁 𑀓𑀣𑁂𑀲𑀺𑀁.

𑀬𑀲𑁆𑀫𑀸 ¶ 𑀧𑀦 𑀢𑀁 𑀤𑀻𑀧𑀓𑀁 𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀸𑀤𑀺𑀨𑀮𑀭𑀼𑀓𑁆𑀔𑀲𑀡𑁆𑀟𑀫𑀡𑁆𑀟𑀺𑀢𑀁 𑀭𑀫𑀡𑀻𑀬𑀁 𑀦𑀺𑀯𑀸𑀲𑀬𑁄𑀕𑁆𑀕𑀜𑁆𑀘, ‘‘𑀆𑀕𑀘𑁆𑀙𑀸𑀫𑀻’’𑀢𑀺 𑀧𑀦 𑀧𑀝𑀺𑀜𑁆𑀜𑀸𑀬 𑀤𑀺𑀦𑁆𑀦𑀢𑁆𑀢𑀸 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀫𑀳𑀸𑀲𑀢𑁆𑀢𑁄𑀧𑀺 ‘‘𑀆𑀕𑀫𑀺𑀲𑁆𑀲𑀸𑀫𑁂𑀯𑀸’’𑀢𑀺 𑀢𑀣𑀸 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁦.

‘‘𑀦 𑀢𑀲𑁆𑀲 𑀅𑀮𑀺𑀓𑀁 𑀪𑀡𑀺𑀢𑀁, 𑀬𑀣𑀸 𑀯𑀸𑀘𑀁 𑀅𑀓𑀸𑀲𑀳’’𑀦𑁆𑀢𑀺.

𑀬𑀲𑁆𑀫𑀸 𑀘𑁂𑀢𑀁 𑀲𑀘𑁆𑀘𑀸𑀦𑀼𑀭𑀓𑁆𑀔𑀡𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑀢𑀁, 𑀢𑀲𑁆𑀫𑀸 𑀆𑀳 𑁋

‘‘𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺.

𑀓𑀼𑀫𑁆𑀪𑀻𑀮𑁄 𑀧𑀦 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀯𑀸𑀦𑀭𑀺𑀦𑁆𑀤𑁂𑀦 𑀅𑀢𑀺𑀅𑀘𑁆𑀙𑁂𑀭𑀓𑀁 𑀓𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑁄 𑀯𑀸𑀦𑀭𑀺𑀦𑁆𑀤, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀫𑀺𑀢𑁆𑀢𑁂 𑀅𑀪𑀺𑀪𑀯𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀢𑀼𑀬𑁆𑀳𑀁 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀣𑀺 𑀫𑀜𑁆𑀜𑁂’’𑀢𑀺 𑀆𑀳 𑁋

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤, 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺. (𑀚𑀸. 𑁧.𑁨.𑁧𑁪𑁭);

𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲. 𑀏𑀢𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁂 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀺. 𑀘𑀢𑀼𑀭𑁄 𑀥𑀫𑁆𑀫𑀸𑀢𑀺 𑀘𑀢𑁆𑀢𑀸𑀭𑁄 𑀕𑀼𑀡𑀸. 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀁, ‘‘𑀫𑀫 ¶ 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀫𑀼𑀲𑀸𑀯𑀸𑀤𑀁 𑀅𑀓𑀢𑁆𑀯𑀸 𑀆𑀕𑀢𑁄 𑀏𑀯𑀸𑀢𑀺 𑀏𑀢𑀁 𑀢𑁂 𑀯𑀘𑀻𑀲𑀘𑁆𑀘𑀁. 𑀥𑀫𑁆𑀫𑁄𑀢𑀺 𑀯𑀺𑀘𑀸𑀭𑀡𑀧𑀜𑁆𑀜𑀸, ‘‘𑀏𑀯𑀁 𑀓𑀢𑁂 𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀯𑀢𑁆𑀢𑀸 𑀢𑁂 𑀏𑀲𑀸 𑀯𑀺𑀘𑀸𑀭𑀡𑀧𑀜𑁆𑀜𑀸. 𑀥𑀺𑀢𑀻𑀢𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀻𑀭𑀺𑀬𑀁 𑀯𑀼𑀘𑁆𑀘𑀢𑀺, 𑀏𑀢𑀫𑁆𑀧𑀺 𑀢𑁂 𑀅𑀢𑁆𑀣𑀺. 𑀘𑀸𑀕𑁄𑀢𑀺 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀢𑁆𑀯𑀁 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀬𑀁 𑀧𑀦𑀸𑀳𑀁 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀫𑀬𑁆𑀳𑀫𑁂𑀯𑁂𑀲 𑀤𑁄𑀲𑁄 ¶ . 𑀤𑀺𑀝𑁆𑀞𑀦𑁆𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑀁. 𑀲𑁄 𑀅𑀢𑀺𑀯𑀢𑁆𑀢𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸 𑀢𑀯 𑀏𑀯𑀁 𑀏𑀢𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀢𑁆𑀣𑀺, 𑀲𑁄 𑀬𑀣𑀸 𑀫𑀁 𑀢𑁆𑀯𑀁 𑀅𑀚𑁆𑀚 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀣𑁂𑀯 𑀅𑀢𑁆𑀢𑀦𑁄 𑀧𑀘𑁆𑀘𑀸𑀫𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀢𑀺 𑀅𑀪𑀺𑀪𑀯𑀢𑀻𑀢𑀺.

𑀏𑀯𑀁 𑀓𑀼𑀫𑁆𑀪𑀻𑀮𑁄 𑀩𑁄𑀥𑀺𑀲𑀢𑁆𑀢𑀁 𑀧𑀲𑀁𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀢𑁄. 𑀢𑀤𑀸 𑀓𑀼𑀫𑁆𑀪𑀻𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀪𑀭𑀺𑀬𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸, 𑀓𑀧𑀺𑀭𑀸𑀚𑀸 𑀧𑀦 𑀮𑁄𑀓𑀦𑀸𑀣𑁄.

𑀢𑀲𑁆𑀲 ¶ 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀉𑀤𑀓𑀲𑁆𑀲 𑀧𑀸𑀲𑀸𑀡𑀲𑁆𑀲 𑀘 𑀧𑀫𑀸𑀡𑀯𑀯𑀢𑁆𑀣𑀸𑀦𑁂𑀦 𑀇𑀤𑀸𑀦𑀺 𑀧𑀸𑀲𑀸𑀡𑁄 𑀉𑀘𑁆𑀘𑀢𑀭𑁄 𑀔𑀸𑀬𑀢𑀻𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀧𑀸𑀲𑀸𑀡𑀲𑁆𑀲 𑀉𑀧𑀭𑀺 𑀲𑀼𑀲𑀼𑀫𑀸𑀭𑀲𑁆𑀲 𑀦𑀺𑀧𑀦𑁆𑀦𑀪𑀸𑀯𑀚𑀸𑀦𑀦𑀁, 𑀧𑀸𑀲𑀸𑀡𑁂𑀦 𑀓𑀣𑀦𑀸𑀧𑀤𑁂𑀲𑁂𑀦 𑀢𑀲𑁆𑀲𑀢𑁆𑀣𑀲𑁆𑀲 𑀦𑀺𑀘𑁆𑀙𑀬𑀕𑀫𑀦𑀁, 𑀲𑀼𑀲𑀼𑀫𑀸𑀭𑀲𑁆𑀲 𑀉𑀧𑀭𑀺 𑀅𑀓𑁆𑀓𑀫𑀺𑀢𑁆𑀯𑀸 𑀲𑀳𑀲𑀸 𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀲𑀻𑀖𑀓𑀸𑀭𑀺𑀢𑀸𑀬 𑀢𑀲𑁆𑀲 𑀫𑀳𑀢𑀸 𑀧𑀸𑀧𑀢𑁄 𑀧𑀭𑀺𑀫𑁄𑀘𑀦𑀁, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀭𑀓𑁆𑀔𑀡𑀁, 𑀲𑀘𑁆𑀘𑀯𑀸𑀘𑀸𑀦𑀼𑀭𑀓𑁆𑀔𑀡𑀜𑁆𑀘𑀸𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀓𑀧𑀺𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀘𑁆𑀘𑀢𑀸𑀧𑀲𑀘𑀭𑀺𑀬𑀸𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀢𑀸𑀧𑀲𑁄 𑀲𑀘𑁆𑀘𑀲𑀯𑁆𑀳𑀬𑁄𑀢𑀺 𑀲𑀘𑁆𑀘𑀲𑀤𑁆𑀤𑁂𑀦 𑀅𑀯𑁆𑀳𑀸𑀢𑀩𑁆𑀩𑁄 𑀲𑀘𑁆𑀘𑀦𑀸𑀫𑀓𑁄 𑀢𑀸𑀧𑀲𑁄 𑀬𑀤𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀳𑁄𑀫𑀺, 𑀢𑀤𑀸. 𑀲𑀘𑁆𑀘𑁂𑀦 𑀮𑁄𑀓𑀁 𑀧𑀸𑀮𑁂𑀲𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀯𑀺𑀲𑀁𑀯𑀸𑀤𑀺𑀪𑀸𑀯𑁂𑀦 𑀲𑀢𑁆𑀢𑀮𑁄𑀓𑀁 𑀚𑀫𑁆𑀩𑀼𑀤𑀻𑀧𑁂 𑀢𑀢𑁆𑀣 𑀢𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑀁 𑀧𑀸𑀧𑀢𑁄 𑀦𑀸𑀦𑀸𑀯𑀺𑀥𑀸 𑀅𑀦𑀢𑁆𑀣𑀢𑁄 𑀘 𑀭𑀓𑁆𑀔𑀺𑀁. 𑀲𑀫𑀕𑁆𑀕𑀁 𑀚𑀦𑀫𑀓𑀸𑀲𑀳𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸𑀧𑀦𑁆𑀦𑀁 𑀫𑀳𑀸𑀚𑀦𑀁 𑀓𑀮𑀳𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀬𑀁 𑀆𑀦𑀺𑀲𑀁𑀲𑀓𑀣𑀦𑁂𑀦 𑀲𑀫𑀕𑁆𑀕𑀁 𑀅𑀯𑀺𑀯𑀤𑀫𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀁 𑀅𑀳𑀫𑀓𑀸𑀲𑀺𑀁.

𑀢𑀤𑀸 ¶ 𑀳𑀺 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 ‘‘𑀲𑀘𑁆𑀘𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. 𑀆𑀘𑀭𑀺𑀬𑁂𑀦 𑀅𑀦𑀼𑀜𑁆𑀜𑀸𑀢𑁄 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀢𑁂𑀳𑀺 𑀅𑀪𑀺𑀦𑀦𑁆𑀤𑀺𑀬𑀫𑀸𑀦𑁄 𑀢𑁂𑀲𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁 ¶ 𑀓𑀢𑀺𑀧𑀸𑀳𑀁 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀯𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀢𑀼𑀓𑀸𑀫𑀸 𑀲𑀩𑁆𑀩𑀁 𑀯𑀺𑀪𑀯𑀚𑀸𑀢𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀖𑀭𑀸𑀯𑀸𑀲𑁂𑀦 𑀦𑀺𑀫𑀦𑁆𑀢𑁂𑀲𑀼𑀁.

𑀫𑀳𑀸𑀲𑀢𑁆𑀢𑁄 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄 𑀅𑀢𑁆𑀢𑀦𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀧𑀭𑀺𑀩𑁆𑀭𑀽𑀳𑁂𑀢𑀼𑀓𑀸𑀫𑁄 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀧𑀩𑁆𑀩𑀚𑁆𑀚𑀸𑀬 𑀆𑀦𑀺𑀲𑀁𑀲𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀢𑁄 𑀓𑀣𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑁄𑀤𑀫𑀸𑀦𑀸𑀦𑀁 𑀅𑀧𑀭𑀺𑀫𑀸𑀡𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀦𑀦𑁆𑀢𑀁 𑀬𑀲𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀸𑀦𑀸𑀕𑁄𑀯 𑀅𑀬𑀲𑀗𑁆𑀔𑀮𑀺𑀓𑀁 𑀖𑀭𑀩𑀦𑁆𑀥𑀦𑀁 𑀙𑀺𑀦𑁆𑀤𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀨𑀮𑁂𑀳𑀺 ¶ 𑀬𑀸𑀧𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀬𑀫𑀸𑀦𑁄 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑁂 𑀬𑁂𑀪𑀼𑀬𑁆𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀧𑀲𑀼𑀢𑁂 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀸𑀧𑀦𑁆𑀦𑁂. 𑀤𑀺𑀲𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀤𑀺𑀤𑀁 𑀇𑀫𑁂 𑀲𑀢𑁆𑀢𑁂 𑀏𑀯𑀁 𑀧𑀸𑀧𑀧𑀲𑀼𑀢𑁂 𑀯𑀺𑀯𑀸𑀤𑀸𑀧𑀦𑁆𑀦𑁂 𑀘 𑀤𑀺𑀲𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀡𑀁. 𑀅𑀳𑀜𑁆𑀳𑀺 ‘𑀲𑀢𑁆𑀢𑁂 𑀲𑀁𑀲𑀸𑀭𑀧𑀗𑁆𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀧𑀢𑀺𑀝𑁆𑀞𑀧𑁂𑀲𑁆𑀲𑀸𑀫𑀻’𑀢𑀺 𑀫𑀳𑀸𑀲𑀫𑁆𑀩𑁄𑀥𑀺𑀬𑀸𑀦𑀁 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀸 𑀢𑀁 𑀧𑀝𑀺𑀜𑁆𑀜𑀁 𑀅𑀯𑀺𑀲𑀁𑀯𑀸𑀤𑁂𑀦𑁆𑀢𑁄 𑀬𑀁𑀦𑀽𑀦𑀸𑀳𑀁 𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀢𑁂 𑀢𑁂 𑀲𑀢𑁆𑀢𑁂 𑀧𑀸𑀧𑀢𑁄 𑀑𑀭𑀫𑀸𑀧𑁂𑀬𑁆𑀬𑀁, 𑀯𑀺𑀯𑀸𑀤𑀜𑁆𑀘 𑀦𑁂𑀲𑀁 𑀯𑀽𑀧𑀲𑀫𑁂𑀬𑁆𑀬’’𑀦𑁆𑀢𑀺.

𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀫𑀳𑀸𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀲𑀦𑁆𑀢𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀳𑀸𑀬 𑀇𑀤𑁆𑀥𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀸𑀦𑀼𑀓𑀽𑀮𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸𑀧𑀦𑁆𑀦𑁂 𑀲𑀢𑁆𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀯𑀺𑀭𑁄𑀥𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑁂 𑀲𑀳𑀺𑀢𑁂 𑀅𑀓𑀸𑀲𑀺. 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀜𑁆𑀘 𑀧𑀸𑀧𑁂 𑀆𑀤𑀻𑀦𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀢𑁄 𑀲𑀢𑁆𑀢𑁂 𑀯𑀺𑀯𑁂𑀘𑁂𑀢𑁆𑀯𑀸 𑀏𑀓𑀘𑁆𑀘𑁂 𑀤𑀲𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀓𑀘𑁆𑀘𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 ¶ 𑀲𑀻𑀮𑀲𑀁𑀯𑀭𑁂 𑀇𑀦𑁆𑀤𑁆𑀭𑀺𑀬𑀕𑀼𑀢𑁆𑀢𑀺𑀬𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑁂 𑀧𑀯𑀺𑀯𑁂𑀓𑀯𑀸𑀲𑁂 𑀛𑀸𑀦𑀸𑀪𑀺𑀜𑁆𑀜𑀸𑀲𑀼 𑀘 𑀬𑀣𑀸𑀭𑀳𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁧.

‘‘𑀧𑀼𑀦𑀸𑀧𑀭𑀁 ¶ 𑀬𑀤𑀸 𑀳𑁄𑀫𑀺, 𑀢𑀸𑀧𑀲𑁄 𑀲𑀘𑁆𑀘𑀲𑀯𑁆𑀳𑀬𑁄;

𑀲𑀘𑁆𑀘𑁂𑀦 𑀮𑁄𑀓𑀁 𑀧𑀸𑀮𑁂𑀲𑀺𑀁, 𑀲𑀫𑀕𑁆𑀕𑀁 𑀚𑀦𑀫𑀓𑀸𑀲𑀳’’𑀦𑁆𑀢𑀺.

𑀇𑀥𑀸𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀕𑀼𑀡𑀸𑀦𑀼𑀪𑀸𑀯𑀸 𑀘 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀲𑀘𑁆𑀘𑀢𑀸𑀧𑀲𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀝𑁆𑀝𑀧𑁄𑀢𑀓𑀘𑀭𑀺𑀬𑀸𑀯𑀡𑁆𑀡𑀦𑀸

𑁭𑁨. 𑀦𑀯𑀫𑁂 𑀫𑀕𑀥𑁂 𑀯𑀝𑁆𑀝𑀧𑁄𑀢𑀓𑁄𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀕𑀥𑀭𑀝𑁆𑀞𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀧𑁆𑀧𑀤𑁂𑀲𑁂 ¶ 𑀯𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀘𑀺𑀭𑀦𑀺𑀓𑁆𑀔𑀦𑁆𑀢𑀢𑀸𑀬 𑀢𑀭𑀼𑀡𑁄 𑀫𑀁𑀲𑀧𑁂𑀲𑀺𑀪𑀽𑀢𑁄, 𑀢𑀢𑁄 𑀏𑀯 𑀅𑀚𑀸𑀢𑀧𑀓𑁆𑀔𑁄 𑀯𑀝𑁆𑀝𑀓𑀘𑁆𑀙𑀸𑀧𑀓𑁄 𑀬𑀤𑀸 𑀅𑀳𑀁 𑀓𑀼𑀮𑀸𑀯𑀓𑁂𑀬𑁂𑀯 𑀳𑁄𑀫𑀺.

𑁭𑁩. 𑀫𑀼𑀔𑀢𑀼𑀡𑁆𑀟𑀓𑁂𑀦𑀸𑀳𑀭𑀺𑀢𑁆𑀯𑀸𑀢𑀺 𑀫𑀬𑁆𑀳𑀁 𑀫𑀸𑀢𑀸 𑀅𑀢𑁆𑀢𑀦𑁄 𑀫𑀼𑀔𑀢𑀼𑀡𑁆𑀟𑀓𑁂𑀦 𑀓𑀸𑀮𑁂𑀦 𑀓𑀸𑀮𑀁 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀫𑀁 𑀧𑁄𑀲𑁂𑀢𑀺. 𑀢𑀲𑁆𑀲𑀸 𑀨𑀲𑁆𑀲𑁂𑀦 𑀚𑀻𑀯𑀸𑀫𑀻𑀢𑀺 𑀧𑀭𑀺𑀲𑁂𑀤𑀦𑀢𑁆𑀣𑀜𑁆𑀘𑁂𑀯 𑀧𑀭𑀺𑀪𑀸𑀯𑀦𑀢𑁆𑀣𑀜𑁆𑀘 𑀲𑀫𑁆𑀫𑀤𑁂𑀯 𑀓𑀸𑀮𑁂𑀦 𑀓𑀸𑀮𑀁 𑀫𑀫𑀁 𑀅𑀥𑀺𑀲𑀬𑀦𑀯𑀲𑁂𑀦 𑀨𑀼𑀲𑀦𑁆𑀢𑀺𑀬𑀸 𑀢𑀲𑁆𑀲𑀸 𑀫𑀫 𑀫𑀸𑀢𑀼𑀬𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑁂𑀦 𑀚𑀻𑀯𑀸𑀫𑀺 𑀯𑀺𑀳𑀭𑀸𑀫𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀫𑀺. 𑀦𑀢𑁆𑀣𑀺 𑀫𑁂 𑀓𑀸𑀬𑀺𑀓𑀁 𑀩𑀮𑀦𑁆𑀢𑀺 𑀫𑀬𑁆𑀳𑀁 𑀧𑀦 𑀅𑀢𑀺𑀢𑀭𑀼𑀡𑀢𑀸𑀬 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀩𑀮𑀁 𑀦𑀢𑁆𑀣𑀺.

𑁭𑁪. 𑀲𑀁𑀯𑀘𑁆𑀙𑀭𑁂𑀢𑀺 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂. 𑀕𑀺𑀫𑁆𑀳𑀲𑀫𑀬𑁂𑀢𑀺 𑀕𑀺𑀫𑁆𑀳𑀓𑀸𑀮𑁂. 𑀲𑀼𑀓𑁆𑀔𑀭𑀼𑀓𑁆𑀔𑀲𑀸𑀔𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀦𑀲𑀫𑀼𑀧𑁆𑀧𑀦𑁆𑀦𑁂𑀦 𑀅𑀕𑁆𑀕𑀺𑀦𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀤𑀯𑀟𑀸𑀳𑁄 𑀧𑀤𑀺𑀧𑁆𑀧𑀢𑀺 𑀧𑀚𑁆𑀚𑀮𑀢𑀺, 𑀲𑁄 𑀢𑀣𑀸 𑀧𑀤𑀻𑀧𑀺𑀢𑁄. 𑀉𑀧𑀕𑀘𑁆𑀙𑀢𑀺 𑀅𑀫𑁆𑀳𑀸𑀓𑀦𑁆𑀢𑀺 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀽𑀦𑀜𑁆𑀘𑀸𑀢𑀺 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀧𑁆𑀧𑀤𑁂𑀲𑀁 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀲𑀼𑀤𑁆𑀥𑀲𑁆𑀲𑀸𑀧𑀺 𑀲𑀼𑀤𑁆𑀥𑀪𑀸𑀯𑀓𑀭𑀡𑁂𑀦 𑀧𑀸𑀯𑀦𑀢𑁄 𑀧𑀸𑀯𑀓𑁄𑀢𑀺 𑀘 𑀕𑀢𑀫𑀕𑁆𑀕𑁂 𑀇𑀦𑁆𑀥𑀦𑀲𑁆𑀲 𑀪𑀲𑁆𑀫𑀪𑀸𑀯𑀸𑀯𑀳𑀦𑀢𑁄 𑀓𑀡𑁆𑀳𑀯𑀢𑁆𑀢𑀦𑀻𑀢𑀺 𑀘 𑀮𑀤𑁆𑀥𑀦𑀸𑀫𑁄 𑀅𑀕𑁆𑀕𑀺 𑀯𑀦𑀭𑀼𑀓𑁆𑀔𑀕𑀘𑁆𑀙𑁂 𑀤𑀳𑀦𑁆𑀢𑁄 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀕𑀘𑁆𑀙𑀢𑀺.

𑁭𑁫. 𑀏𑀯𑀁 ¶ 𑀉𑀧𑀕𑀫𑀦𑀢𑁄 𑀢𑀤𑀸𑀧𑀺 𑀲𑀤𑁆𑀤𑀸𑀬𑀦𑁆𑀢𑁄𑀢𑀺 ‘‘𑀥𑀫𑀥𑀫’’𑀇𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄, 𑀅𑀦𑀼𑀭𑀯𑀤𑀲𑁆𑀲𑀦𑀜𑁆𑀳𑁂𑀢𑀁 𑀤𑀸𑀯𑀕𑁆𑀕𑀺𑀦𑁄. 𑀫𑀳𑀸𑀲𑀺𑀔𑀻𑀢𑀺 𑀧𑀩𑁆𑀩𑀢𑀓𑀽𑀝𑀲𑀤𑀺𑀲𑀸𑀦𑀁 𑀇𑀦𑁆𑀥𑀦𑀸𑀦𑀁 𑀯𑀲𑁂𑀦 𑀫𑀳𑀢𑀺𑀬𑁄 ¶ 𑀲𑀺𑀔𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀲𑀺𑀔𑀻. 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀅𑀭𑀜𑁆𑀜𑀧𑁆𑀧𑀤𑁂𑀲𑀁 𑀛𑀸𑀧𑁂𑀦𑁆𑀢𑁄 𑀤𑀳𑀦𑁆𑀢𑁄 𑀅𑀕𑁆𑀕𑀺 𑀫𑀫 𑀲𑀫𑀻𑀧𑀝𑁆𑀞𑀸𑀦𑀁 𑀉𑀧𑀸𑀕𑀫𑀺.

𑁭𑁬. 𑀅𑀕𑁆𑀕𑀺𑀯𑁂𑀕𑀪𑀬𑀸𑀢𑀺 𑀯𑁂𑀕𑁂𑀦 𑀆𑀕𑀘𑁆𑀙𑀢𑁄 𑀅𑀕𑁆𑀕𑀺𑀦𑁄 𑀪𑀬𑁂𑀦 𑀪𑀻𑀢𑀸. 𑀢𑀲𑀺𑀢𑀸𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑀫𑀼𑀝𑁆𑀞𑀺𑀢𑁂𑀦 𑀓𑀸𑀬𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑁂𑀦 𑀘 𑀉𑀢𑁆𑀭𑀸𑀲𑀸. 𑀫𑀸𑀢𑀸𑀧𑀺𑀢𑀸𑀢𑀺 𑀫𑀸𑀢𑀸𑀧𑀺𑀢𑀭𑁄. 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑀬𑀼𑀦𑁆𑀢𑀺 𑀅𑀕𑁆𑀕𑀺𑀦𑀸 𑀅𑀦𑀼𑀧𑀤𑁆𑀤𑀼𑀢𑀝𑁆𑀞𑀸𑀦𑀕𑀫𑀦𑁂𑀦 𑀅𑀢𑁆𑀢𑀦𑁄 𑀲𑁄𑀢𑁆𑀣𑀺𑀪𑀸𑀯𑀫𑀓𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀫𑀳𑀸𑀕𑁂𑀡𑁆𑀟𑀼𑀓𑀧𑁆𑀧𑀫𑀸𑀡𑁄 𑀫𑀳𑀸𑀲𑀭𑀻𑀭𑁄 𑀅𑀳𑁄𑀲𑀺. 𑀢𑀁 𑀫𑀸𑀢𑀸𑀧𑀺𑀢𑀭𑁄 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑀦𑁆𑀢𑀸 𑀅𑀢𑁆𑀢𑀲𑀺𑀦𑁂𑀳𑁂𑀦 𑀘 𑀅𑀪𑀺𑀪𑀼𑀬𑁆𑀬𑀫𑀸𑀦𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼.

𑁭𑁭. 𑀧𑀸𑀤𑁂 𑀧𑀓𑁆𑀔𑁂 𑀧𑀚𑀳𑀸𑀫𑀻𑀢𑀺 𑀅𑀢𑁆𑀢𑀦𑁄 𑀉𑀪𑁄 𑀧𑀸𑀤𑁂 𑀉𑀪𑁄 𑀧𑀓𑁆𑀔𑁂 𑀘 𑀪𑀽𑀫𑀺𑀬𑀁 𑀆𑀓𑀸𑀲𑁂 𑀘 𑀕𑀫𑀦𑀲𑀚𑁆𑀚𑁂 𑀓𑀭𑁄𑀦𑁆𑀢𑁄 𑀧𑀲𑀸𑀭𑁂𑀫𑀺 𑀇𑀭𑀺𑀬𑀸𑀫𑀺 𑀯𑀸𑀬𑀫𑀸𑀫𑀺. ‘‘𑀧𑀝𑀻𑀳𑀸𑀫𑀻’’𑀢𑀺𑀧𑀺 𑀧𑀸𑀞𑁄, 𑀯𑁂𑀳𑀸𑀲𑀕𑀫𑀦𑀬𑁄𑀕𑁆𑀕𑁂 𑀓𑀸𑀢𑀼𑀁 𑀈𑀳𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀧𑀢𑀻𑀳𑀸𑀫𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀸𑀤𑁂 𑀧𑀓𑁆𑀔𑁂 𑀘 ¶ 𑀧𑀢𑀺 𑀯𑀺𑀲𑀼𑀁 𑀈𑀳𑀸𑀫𑀺, 𑀕𑀫𑀦𑀢𑁆𑀣𑀁 𑀯𑀸𑀬𑀫𑀸𑀫𑀺, 𑀢𑀁 𑀧𑀦 𑀯𑀸𑀬𑀸𑀫𑀓𑀭𑀡𑀢𑁆𑀣𑀫𑁂𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀦𑀢𑁆𑀣𑀺 𑀫𑁂 𑀓𑀸𑀬𑀺𑀓𑀁 𑀩𑀮𑀁. 𑀲𑁄𑀳𑀁 𑀅𑀕𑀢𑀺𑀓𑁄 𑀢𑀢𑁆𑀣𑀸𑀢𑀺 𑀲𑁄 𑀅𑀳𑀁 𑀏𑀯𑀁𑀪𑀽𑀢𑁄 𑀧𑀸𑀤𑀧𑀓𑁆𑀔𑀯𑁂𑀓𑀮𑁆𑀮𑁂𑀦 𑀕𑀫𑀦𑀯𑀺𑀭𑀳𑀺𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀧𑀕𑀫𑀦𑁂𑀦 𑀯𑀸 𑀅𑀧𑁆𑀧𑀝𑀺𑀲𑀭𑀡𑁄, 𑀢𑀢𑁆𑀣 𑀤𑀸𑀯𑀕𑁆𑀕𑀺𑀉𑀧𑀤𑁆𑀤𑀼𑀢𑁂 𑀯𑀦𑁂, 𑀢𑀲𑁆𑀫𑀺𑀁 𑀯𑀸 𑀓𑀼𑀮𑀸𑀯𑀓𑁂 𑀞𑀺𑀢𑁄𑀯 𑀏𑀯𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑁂𑀦 𑀢𑀤𑀸 𑀘𑀺𑀦𑁆𑀢𑁂𑀲𑀺𑀁. 𑀤𑀼𑀢𑀺𑀬𑀜𑁆𑀘𑁂𑀢𑁆𑀣 𑀅𑀳𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

𑁭𑁮.

𑀇𑀤𑀸𑀦𑀺 𑀢𑀤𑀸 𑀅𑀢𑁆𑀢𑀦𑁄 𑀘𑀺𑀦𑁆𑀢𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳;

𑀢𑀢𑁆𑀣 𑀬𑁂𑀲𑀸𑀳𑀁 𑀉𑀧𑀥𑀸𑀯𑁂𑀬𑁆𑀬𑀁, 𑀪𑀻𑀢𑁄 𑀢𑀲𑀺𑀢𑀯𑁂𑀥𑀺𑀢𑁄𑀢𑀺 𑀫𑀭𑀡𑀪𑀬𑁂𑀦 𑀪𑀻𑀢𑁄 𑀢𑀢𑁄 𑀏𑀯 𑀘𑀺𑀢𑁆𑀢𑀼𑀢𑁆𑀭𑀸𑀲𑁂𑀦 𑀢𑀲𑀺𑀢𑁄 𑀲𑀭𑀻𑀭𑀓𑀫𑁆𑀧𑀦𑁂𑀦 𑀯𑁂𑀥𑀺𑀢𑁄 𑀬𑁂𑀲𑀫𑀳𑀁 𑀧𑀓𑁆𑀔𑀦𑁆𑀢𑀭𑀁 𑀏𑀢𑀭𑀳𑀺 𑀤𑀸𑀯𑀕𑁆𑀕𑀺𑀉𑀧𑀤𑁆𑀤𑀼𑀢𑁄 𑀚𑀮𑀤𑀼𑀕𑁆𑀕𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀧𑀯𑀺𑀲𑀺𑀢𑀼𑀁 𑀉𑀧𑀥𑀸𑀯𑁂𑀬𑁆𑀬𑀁 𑀢𑁂 𑀫𑀫 𑀫𑀸𑀢𑀸𑀧𑀺𑀢𑀭𑁄 𑀫𑀁 𑀏𑀓𑀓𑀁 𑀏𑀯 𑀑𑀳𑀸𑀬 𑀚𑀳𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀸. 𑀓𑀣𑀁 𑀫𑁂 𑀅𑀚𑁆𑀚 𑀓𑀸𑀢𑀯𑁂𑀢𑀺 𑀓𑀣𑀁 𑀦𑀼 𑀔𑁄 𑀫𑀬𑀸 𑀅𑀚𑁆𑀚 𑀓𑀸𑀢𑀩𑁆𑀩𑀁, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀕𑀼𑀡𑁄 𑀦𑀸𑀫 𑀅𑀢𑁆𑀣𑀺, 𑀲𑀘𑁆𑀘𑀕𑀼𑀡𑁄 𑀦𑀸𑀫 𑀅𑀢𑁆𑀣𑀺, 𑀅𑀢𑀻𑀢𑁂 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸 𑀲𑀘𑁆𑀘𑀸𑀦𑀼𑀤𑀬𑀓𑀸𑀭𑀼𑀜𑁆𑀜𑀔𑀦𑁆𑀢𑀺𑀲𑀫𑀦𑁆𑀦𑀸𑀕𑀢𑀸 ¶ 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀫𑁂𑀢𑁆𑀢𑀸𑀪𑀸𑀯𑀦𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀦𑀸𑀫 𑀅𑀢𑁆𑀣𑀺, 𑀢𑁂𑀳𑀺 𑀘 𑀧𑀝𑀺𑀯𑀺𑀤𑁆𑀥𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀕𑀼𑀡𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀫𑀬𑀺 𑀘𑀸𑀧𑀺 𑀏𑀓𑀁 𑀲𑀘𑁆𑀘𑀁 𑀅𑀢𑁆𑀣𑀺. 𑀲𑀁𑀯𑀺𑀚𑁆𑀚𑀫𑀸𑀦𑁄 𑀏𑀓𑁄 𑀲𑀪𑀸𑀯𑀥𑀫𑁆𑀫𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀢𑀻𑀢𑀩𑀼𑀤𑁆𑀥𑁂 𑀘𑁂𑀯 𑀢𑁂𑀳𑀺 𑀧𑀝𑀺𑀯𑀺𑀤𑁆𑀥𑀕𑀼𑀡𑁂 𑀘 𑀆𑀯𑀚𑁆𑀚𑁂𑀢𑁆𑀯𑀸 𑀫𑀬𑀺 𑀯𑀺𑀚𑁆𑀚𑀫𑀸𑀦𑀁 𑀲𑀘𑁆𑀘𑀁 𑀲𑀪𑀸𑀯𑀥𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀅𑀚𑁆𑀚 𑀫𑀬𑀸 𑀅𑀢𑁆𑀢𑀦𑁄 𑀘𑁂𑀯 𑀇𑀥 𑀯𑀸𑀲𑀻𑀦𑀁 𑀲𑁂𑀲𑀧𑀸𑀡𑀻𑀦𑀜𑁆𑀘 𑀲𑁄𑀢𑁆𑀣𑀺𑀪𑀸𑀯𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂 𑀞𑀢𑁆𑀯𑀸 𑀬𑀣𑀸𑀘𑀺𑀦𑁆𑀢𑀺𑀢𑀁 𑀧𑀝𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁭𑁯.

‘‘𑀅𑀢𑁆𑀣𑀺 𑀮𑁄𑀓𑁂 𑀲𑀻𑀮𑀕𑀼𑀡𑁄, 𑀲𑀘𑁆𑀘𑀁 𑀲𑁄𑀘𑁂𑀬𑁆𑀬𑀦𑀼𑀤𑁆𑀤𑀬𑀸;

𑀢𑁂𑀦 𑀲𑀘𑁆𑀘𑁂𑀦 𑀓𑀸𑀳𑀸𑀫𑀺, 𑀲𑀘𑁆𑀘𑀓𑀺𑀭𑀺𑀬𑀫𑀼𑀢𑁆𑀢𑀫𑀁.

𑁮𑁦.

‘‘𑀆𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀩𑀮𑀁, 𑀲𑀭𑀺𑀢𑁆𑀯𑀸 𑀧𑀼𑀩𑁆𑀩𑀓𑁂 𑀚𑀺𑀦𑁂;

𑀲𑀘𑁆𑀘𑀩𑀮𑀫𑀯𑀲𑁆𑀲𑀸𑀬, 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀳’’𑀦𑁆𑀢𑀺.

𑁮𑁧. 𑀢𑀢𑁆𑀣 ¶ 𑀫𑀳𑀸𑀲𑀢𑁆𑀢𑁄 𑀅𑀢𑀻𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀁 𑀲𑀘𑁆𑀘𑀲𑀪𑀸𑀯𑀁 𑀆𑀭𑀩𑁆𑀪 𑀬𑀁 𑀕𑀸𑀣𑀁 𑀯𑀢𑁆𑀯𑀸 𑀢𑀤𑀸 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑀺 𑀧𑀓𑁆𑀔𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀦𑁆𑀢𑀺 𑀧𑀓𑁆𑀔𑀸 𑀅𑀧𑀢𑀦𑀸𑀢𑀺 𑀫𑀬𑁆𑀳𑀁 𑀧𑀓𑁆𑀔𑀸 𑀦𑀸𑀫 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀦𑁄 𑀘 𑀔𑁄 𑀲𑀓𑁆𑀓𑀸 𑀏𑀢𑁂𑀳𑀺 𑀉𑀧𑁆𑀧𑀢𑀺𑀢𑀼𑀁 𑀆𑀓𑀸𑀲𑁂𑀦 𑀕𑀦𑁆𑀢𑀼𑀦𑁆𑀢𑀺 𑀅𑀧𑀢𑀦𑀸. 𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸𑀢𑀺 𑀧𑀸𑀤𑀸𑀧𑀺 𑀫𑁂 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀯𑀜𑁆𑀘𑀺𑀢𑀼𑀁 𑀧𑀤𑀯𑀸𑀭𑀕𑀫𑀦𑁂𑀦 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀜𑁆𑀘𑀦𑀸. 𑀫𑀸𑀢𑀸𑀧𑀺𑀢𑀸 𑀘 𑀦𑀺𑀓𑁆𑀔𑀦𑁆𑀢𑀸𑀢𑀺 𑀬𑁂 𑀫𑀁 𑀅𑀜𑁆𑀜𑀢𑁆𑀣 𑀦𑁂𑀬𑁆𑀬𑀼𑀁, 𑀢𑁂𑀧𑀺 𑀫𑀭𑀡𑀪𑀬𑁂𑀦 𑀫𑀫 𑀫𑀸𑀢𑀸𑀧𑀺𑀢𑀭𑁄 𑀦𑀺𑀓𑁆𑀔𑀦𑁆𑀢𑀸. 𑀚𑀸𑀢𑀯𑁂𑀤𑀸𑀢𑀺 𑀅𑀕𑁆𑀕𑀺𑀁 𑀆𑀮𑀧𑀢𑀺. 𑀲𑁄 𑀳𑀺 𑀚𑀸𑀢𑁄𑀯 𑀯𑁂𑀤𑀺𑀬𑀢𑀺, 𑀥𑀽𑀫𑀚𑀸𑀮𑀼𑀝𑁆𑀞𑀸𑀦𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀚𑀸𑀢𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀓𑁆𑀓𑀫𑀸𑀢𑀺 𑀧𑀝𑀺𑀕𑀘𑁆𑀙 𑀦𑀺𑀯𑀢𑁆𑀢𑀸𑀢𑀺 𑀚𑀸𑀢𑀯𑁂𑀤𑀁 𑀆𑀡𑀸𑀧𑁂𑀢𑀺.

𑀇𑀢𑀺 ¶ 𑀫𑀳𑀸𑀲𑀢𑁆𑀢𑁄 ‘‘𑀲𑀘𑁂 𑀫𑀬𑁆𑀳𑀁 𑀧𑀓𑁆𑀔𑀸𑀦𑀁 𑀅𑀢𑁆𑀣𑀺𑀪𑀸𑀯𑁄, 𑀢𑁂 𑀘 𑀧𑀲𑀸𑀭𑁂𑀢𑁆𑀯𑀸 𑀆𑀓𑀸𑀲𑁂 𑀅𑀧𑀢𑀦𑀪𑀸𑀯𑁄, 𑀧𑀸𑀤𑀸𑀦𑀁 𑀅𑀢𑁆𑀣𑀺𑀪𑀸𑀯𑁄, 𑀢𑁂 𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀯𑀜𑁆𑀘𑀦𑀪𑀸𑀯𑁄, 𑀫𑀸𑀢𑀸𑀧𑀺𑀢𑀽𑀦𑀁 𑀫𑀁 𑀓𑀼𑀮𑀸𑀯𑀓𑁂𑀬𑁂𑀯 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀪𑀸𑀯𑁄 𑀘 𑀲𑀘𑁆𑀘𑀲𑀪𑀸𑀯𑀪𑀽𑀢𑁄 ¶ 𑀏𑀯, 𑀚𑀸𑀢𑀯𑁂𑀤, 𑀏𑀢𑁂𑀦 𑀲𑀘𑁆𑀘𑁂𑀦 𑀢𑁆𑀯𑀁 𑀇𑀢𑁄 𑀧𑀝𑀺𑀓𑁆𑀓𑀫𑀸’’𑀢𑀺 𑀓𑀼𑀮𑀸𑀯𑀓𑁂 𑀦𑀺𑀧𑀦𑁆𑀦𑁄𑀯 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀢𑀲𑁆𑀲 𑀲𑀳 𑀲𑀘𑁆𑀘𑀓𑀺𑀭𑀺𑀬𑀸𑀬 𑀲𑁄𑀴𑀲𑀓𑀭𑀻𑀲𑀫𑀢𑁆𑀢𑁂 𑀞𑀸𑀦𑁂 𑀚𑀸𑀢𑀯𑁂𑀤𑁄 𑀧𑀝𑀺𑀓𑁆𑀓𑀫𑀺. 𑀧𑀝𑀺𑀓𑁆𑀓𑀫𑀦𑁆𑀢𑁄 𑀘 𑀦 𑀛𑀸𑀬𑀫𑀸𑀦𑁄𑀯 𑀅𑀭𑀜𑁆𑀜𑀁 𑀕𑀢𑁄, 𑀉𑀤𑀓𑁂 𑀧𑀦 𑀑𑀧𑀺𑀮𑀸𑀧𑀺𑀢𑀉𑀓𑁆𑀓𑀸 𑀯𑀺𑀬 𑀢𑀢𑁆𑀣𑁂𑀯 𑀦𑀺𑀩𑁆𑀩𑀸𑀬𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮𑁨.

‘‘𑀲𑀳 𑀲𑀘𑁆𑀘𑁂 𑀓𑀢𑁂 𑀫𑀬𑁆𑀳𑀁, 𑀫𑀳𑀸𑀧𑀚𑁆𑀚𑀮𑀺𑀢𑁄 𑀲𑀺𑀔𑀻;

𑀯𑀚𑁆𑀚𑁂𑀲𑀺 𑀲𑁄𑀴𑀲𑀓𑀭𑀻𑀲𑀸𑀦𑀺, 𑀉𑀤𑀓𑀁 𑀧𑀢𑁆𑀯𑀸 𑀬𑀣𑀸 𑀲𑀺𑀔𑀻’’𑀢𑀺.

𑀲𑀸 𑀧𑀦𑁂𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀝𑁆𑀝𑀓𑀬𑁄𑀦𑀺𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀯𑀚𑁆𑀚𑀦𑀧𑀼𑀩𑁆𑀩𑀺𑀓𑀸 𑀲𑀘𑁆𑀘𑀓𑀺𑀭𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀢𑀺 𑀆𑀳 ‘‘𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺. 𑀢𑁂𑀦𑁂𑀯 𑀳𑀺 𑀢𑀲𑁆𑀲 𑀞𑀸𑀦𑀲𑁆𑀲 𑀲𑀓𑀮𑁂𑀧𑀺 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀅𑀕𑁆𑀕𑀺𑀦𑀸 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸 𑀢𑀁 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀫 𑀚𑀸𑀢𑀁.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀲𑀘𑁆𑀘𑀓𑀺𑀭𑀺𑀬𑀯𑀲𑁂𑀦 𑀅𑀢𑁆𑀢𑀦𑁄 𑀢𑀢𑁆𑀣 𑀯𑀸𑀲𑀻𑀦𑀁 𑀲𑀢𑁆𑀢𑀸𑀦𑀜𑁆𑀘 𑀲𑁄𑀢𑁆𑀣𑀺𑀁 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀏𑀢𑀭𑀳𑀺 𑀫𑀸𑀢𑀸𑀧𑀺𑀢𑀭𑁄 𑀅𑀳𑁂𑀲𑀼𑀁, 𑀯𑀝𑁆𑀝𑀓𑀭𑀸𑀚𑀸 𑀧𑀦 𑀮𑁄𑀓𑀦𑀸𑀣𑁄.

𑀢𑀲𑁆𑀲 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄𑀧𑀺 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀤𑀸𑀯𑀕𑁆𑀕𑀺𑀫𑁆𑀳𑀺 𑀢𑀣𑀸 𑀪𑁂𑀭𑀯𑀸𑀓𑀸𑀭𑁂𑀦 𑀅𑀯𑀢𑁆𑀣𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂 𑀢𑀲𑁆𑀫𑀺𑀁 𑀯𑀬𑁂 𑀏𑀓𑀓𑁄 𑀳𑀼𑀢𑁆𑀯𑀸𑀧𑀺 𑀲𑀸𑀭𑀤𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀘𑁆𑀘𑀸𑀤𑀺𑀥𑀫𑁆𑀫𑀕𑀼𑀡𑁂 𑀩𑀼𑀤𑁆𑀥𑀕𑀼𑀡𑁂 𑀘 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀏𑀯 𑀆𑀦𑀼𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀓𑀺𑀭𑀺𑀬𑀸𑀬 𑀢𑀢𑁆𑀣 𑀯𑀸𑀲𑀻𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀲𑁄𑀢𑁆𑀣𑀺𑀪𑀸𑀯𑀸𑀧𑀸𑀤𑀦𑀸𑀤𑀬𑁄 𑀆𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸.

𑀯𑀝𑁆𑀝𑀧𑁄𑀢𑀓𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀫𑀘𑁆𑀙𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁮𑁩. 𑀤𑀲𑀫𑁂 ¶ 𑀬𑀤𑀸 𑀳𑁄𑀫𑀺, 𑀫𑀘𑁆𑀙𑀭𑀸𑀚𑀸 𑀫𑀳𑀸𑀲𑀭𑁂𑀢𑀺 𑀅𑀢𑀻𑀢𑁂 𑀫𑀘𑁆𑀙𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀧𑁄𑀓𑁆𑀔𑀭𑀡𑀺𑀝𑁆𑀞𑀸𑀦𑁂 ¶ 𑀯𑀮𑁆𑀮𑀺𑀕𑀳𑀦𑀧𑀭𑀺𑀓𑁆𑀔𑀺𑀢𑁆𑀢𑁂 𑀏𑀓𑀲𑁆𑀫𑀺𑀁 𑀫𑀳𑀸𑀲𑀭𑁂 𑀫𑀘𑁆𑀙𑀸𑀦𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀭𑀜𑁆𑀚𑀦𑀢𑁄 𑀬𑀤𑀸 𑀅𑀳𑀁 𑀭𑀸𑀚𑀸 𑀳𑁄𑀫𑀺, 𑀫𑀘𑁆𑀙𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣 𑀧𑀝𑀺𑀯𑀲𑀸𑀫𑀺 𑀢𑀤𑀸. 𑀉𑀡𑁆𑀳𑁂𑀢𑀺 𑀉𑀡𑁆𑀳𑀓𑀸𑀮𑁂 𑀕𑀺𑀫𑁆𑀳𑀲𑀫𑀬𑁂. 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀢𑀺 𑀆𑀤𑀺𑀘𑁆𑀘𑀲𑀦𑁆𑀢𑀸𑀧𑁂𑀦. 𑀲𑀭𑁂 𑀉𑀤𑀓 𑀔𑀻𑀬𑀣𑀸𑀢𑀺 𑀢𑀲𑁆𑀫𑀺𑀁 𑀲𑀭𑁂 𑀉𑀤𑀓𑀁 𑀔𑀻𑀬𑀺𑀢𑁆𑀣 𑀙𑀺𑀚𑁆𑀚𑀺𑀢𑁆𑀣. 𑀢𑀲𑁆𑀫𑀺𑀜𑁆𑀳𑀺 𑀭𑀝𑁆𑀞𑁂 𑀢𑀤𑀸 𑀤𑁂𑀯𑁄 𑀦 𑀯𑀲𑁆𑀲𑀺, 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀺𑀁𑀲𑀼, 𑀯𑀸𑀧𑀺𑀆𑀤𑀻𑀲𑀼 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀅𑀕𑀫𑀸𑀲𑀺, 𑀫𑀘𑁆𑀙𑀓𑀘𑁆𑀙𑀧𑀸 𑀓𑀮𑀮𑀕𑀳𑀦𑀁 𑀧𑀯𑀺𑀲𑀺𑀁𑀲𑀼. 𑀢𑀲𑁆𑀫𑀺𑀫𑁆𑀧𑀺 𑀲𑀭𑁂 𑀫𑀘𑁆𑀙𑀸 𑀓𑀤𑁆𑀤𑀫𑀕𑀳𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀮𑀻𑀬𑀺𑀁𑀲𑀼.

𑁮𑁪. 𑀢𑀢𑁄𑀢𑀺 𑀢𑀢𑁄 𑀉𑀤𑀓𑀧𑀭𑀺𑀓𑁆𑀔𑀬𑀢𑁄 𑀅𑀧𑀭𑀪𑀸𑀕𑁂. 𑀓𑀼𑀮𑀮𑀲𑁂𑀦𑀓𑀸𑀢𑀺 𑀓𑀼𑀮𑀮𑀸𑀘𑁂𑀯 𑀲𑁂𑀦𑀸 𑀘. 𑀪𑀓𑁆𑀔𑀬𑀦𑁆𑀢𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀫𑀘𑁆𑀙𑁂 𑀉𑀧𑀦𑀺𑀲𑀻𑀤𑀺𑀬𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀮𑀮𑀧𑀺𑀝𑁆𑀞𑁂 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀓𑀮𑀮𑀕𑀳𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀫𑀘𑁆𑀙𑁂 𑀓𑀸𑀓𑀸 𑀯𑀸 𑀇𑀢𑀭𑁂 𑀯𑀸 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘 𑀓𑀡𑀬𑀕𑁆𑀕𑀲𑀤𑀺𑀲𑁂𑀳𑀺 𑀢𑀼𑀡𑁆𑀟𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑁂 𑀪𑀓𑁆𑀔𑀬𑀦𑁆𑀢𑀺.

𑁮𑁫. 𑀅𑀣 𑀫𑀳𑀸𑀲𑀢𑁆𑀢𑁄 𑀫𑀘𑁆𑀙𑀸𑀦𑀁 𑀢𑀁 𑀩𑁆𑀬𑀲𑀦𑀁 𑀤𑀺𑀲𑁆𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑀳𑀤𑀬𑁄 ‘‘𑀞𑀧𑁂𑀢𑁆𑀯𑀸 𑀫𑀁 𑀇𑀫𑁂 𑀫𑀫 𑀜𑀸𑀢𑀓𑁂 𑀇𑀫𑀲𑁆𑀫𑀸 𑀤𑀼𑀓𑁆𑀔𑀸 𑀫𑁄𑀘𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀺, 𑀓𑁂𑀦 𑀦𑀼 𑀔𑁄 𑀅𑀳𑀁 𑀉𑀧𑀸𑀬𑁂𑀦 𑀢𑁂 𑀇𑀢𑁄 𑀤𑀼𑀓𑁆𑀔𑀢𑁄 𑀫𑁄𑀘𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀬𑀁𑀦𑀽𑀦𑀸𑀳𑀁 𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀁 𑀫𑀬𑀺 𑀘 𑀲𑀁𑀯𑀺𑀚𑁆𑀚𑀫𑀸𑀦𑀁 𑀲𑀘𑁆𑀘𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀫𑀫 𑀜𑀸𑀢𑀺𑀲𑀗𑁆𑀖𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀤𑁂𑀬𑁆𑀬𑀁, 𑀢𑁂𑀦 𑀘 𑀲𑀓𑀮𑀲𑁆𑀲𑀸𑀧𑀺 𑀆𑀳𑀸𑀭𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀮𑁄𑀓𑀲𑁆𑀲 𑀫𑀳𑀸𑀉𑀧𑀓𑀸𑀭𑁄 𑀲𑀫𑁆𑀧𑀸𑀤𑀺𑀢𑁄 𑀫𑀬𑀸’’𑀢𑀺 𑀦𑀺𑀘𑁆𑀙𑀬𑀁 𑀓𑀢𑁆𑀯𑀸 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑀼𑀁 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀘𑀺𑀦𑁆𑀢𑁂𑀲𑀳’’𑀦𑁆𑀢𑀺𑀆𑀤𑀺.

𑀢𑀢𑁆𑀣 ¶ 𑀲𑀳 𑀜𑀸𑀢𑀻𑀳𑀺 𑀧𑀻𑀴𑀺𑀢𑁄𑀢𑀺 𑀫𑀬𑁆𑀳𑀁 𑀜𑀸𑀢𑀻𑀳𑀺 𑀲𑀤𑁆𑀥𑀺𑀁 𑀢𑁂𑀦 𑀉𑀤𑀓𑀧𑀭𑀺𑀓𑁆𑀔𑀬𑁂𑀦 𑀧𑀻𑀴𑀺𑀢𑁄. 𑀲𑀳𑀸𑀢𑀺 𑀯𑀸 𑀦𑀺𑀧𑀸𑀢𑀫𑀢𑁆𑀢𑀁. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀢𑁂𑀦 𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑀺𑀢𑁂𑀳𑀺 𑀜𑀸𑀢𑀻𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀧𑀻𑀴𑀺𑀢𑁄, 𑀜𑀸𑀢𑀺𑀲𑀗𑁆𑀖𑀤𑀼𑀓𑁆𑀔𑀤𑀼𑀓𑁆𑀔𑀺𑀢𑁄𑀢𑀺 𑀅𑀢𑁆𑀣𑁄.

𑁮𑁬. 𑀥𑀫𑁆𑀫𑀢𑁆𑀣𑀦𑁆𑀢𑀺 ¶ 𑀥𑀫𑁆𑀫𑀪𑀽𑀢𑀁 𑀅𑀢𑁆𑀣𑀁, 𑀥𑀫𑁆𑀫𑀢𑁄 𑀯𑀸 𑀅𑀦𑀧𑁂𑀢𑀁 𑀅𑀢𑁆𑀣𑀁. 𑀓𑀺𑀁 𑀢𑀁? 𑀲𑀘𑁆𑀘𑀁. 𑀅𑀤𑁆𑀤𑀲𑀧𑀲𑁆𑀲𑀬𑀦𑁆𑀢𑀺 𑀫𑀬𑁆𑀳𑀁 𑀜𑀸𑀢𑀻𑀦𑀜𑁆𑀘 𑀅𑀧𑀲𑁆𑀲𑀬𑀁 𑀅𑀤𑁆𑀤𑀲𑀁. 𑀅𑀢𑀺𑀓𑁆𑀔𑀬𑀦𑁆𑀢𑀺 𑀫𑀳𑀸𑀯𑀺𑀦𑀸𑀲𑀁.

𑁮𑁭. 𑀲𑀤𑁆𑀥𑀫𑁆𑀫𑀦𑁆𑀢𑀺 𑀲𑀢𑀁 𑀲𑀸𑀥𑀽𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 ¶ 𑀏𑀓𑀲𑁆𑀲𑀸𑀧𑀺 𑀧𑀸𑀡𑀺𑀦𑁄 𑀅𑀳𑀺𑀁𑀲𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀁. 𑀅𑀦𑀼𑀲𑁆𑀲𑀭𑀺𑀢𑁆𑀯𑀸. 𑀧𑀭𑀫𑀢𑁆𑀣𑀁 𑀯𑀺𑀘𑀺𑀦𑁆𑀢𑀬𑀦𑁆𑀢𑀺 𑀢𑀁 𑀔𑁄 𑀧𑀦 𑀧𑀭𑀫𑀢𑁆𑀣𑀁 𑀲𑀘𑁆𑀘𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀁 𑀓𑀢𑁆𑀯𑀸 𑀘𑀺𑀦𑁆𑀢𑀬𑀦𑁆𑀢𑁄. 𑀬𑀁 𑀮𑁄𑀓𑁂 𑀥𑀼𑀯𑀲𑀲𑁆𑀲𑀢𑀦𑁆𑀢𑀺 𑀬𑀤𑁂𑀢𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀏𑀓𑀲𑁆𑀲𑀸𑀧𑀺 𑀧𑀸𑀡𑀺𑀦𑁄 𑀅𑀳𑀺𑀁𑀲𑀦𑀁, 𑀢𑀁 𑀲𑀩𑁆𑀩𑀓𑀸𑀮𑀁 𑀢𑀣𑀪𑀸𑀯𑁂𑀦 𑀥𑀼𑀯𑀁 𑀲𑀲𑁆𑀲𑀢𑀁 𑀯𑀺𑀘𑀺𑀦𑁆𑀢𑀬𑀁 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁮. 𑀇𑀤𑀸𑀦𑀺 𑀢𑀁 𑀥𑀫𑁆𑀫𑀁 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀁 𑀕𑀳𑁂𑀢𑁆𑀯𑀸 𑀲𑀘𑁆𑀘𑀯𑀘𑀦𑀁 𑀧𑀬𑁄𑀚𑁂𑀢𑀼𑀓𑀸𑀫𑁄 𑀓𑀸𑀮𑀯𑀡𑁆𑀡𑀁 𑀓𑀤𑁆𑀤𑀫𑀁 𑀤𑁆𑀯𑀺𑀥𑀸 𑀯𑀺𑀬𑀽𑀳𑀺𑀢𑁆𑀯𑀸 𑀅𑀜𑁆𑀚𑀦𑀭𑀼𑀓𑁆𑀔𑀲𑀸𑀭𑀖𑀝𑀺𑀓𑀯𑀡𑁆𑀡𑀫𑀳𑀸𑀲𑀭𑀻𑀭𑁄 𑀲𑀼𑀥𑁄𑀢𑀮𑁄𑀳𑀺𑀢𑀓𑀫𑀡𑀺𑀲𑀤𑀺𑀲𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 ‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦’’𑀦𑁆𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀦𑁆𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀸𑀦𑀁 𑀲𑀭𑀸𑀫𑀺 𑀅𑀦𑀼𑀲𑁆𑀲𑀭𑀸𑀫𑀺. 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀦𑁆𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀢𑀸𑀲𑀼 𑀢𑀸𑀲𑀼 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀯𑀺𑀜𑁆𑀜𑀼𑀢𑀁 𑀯𑀺𑀚𑀸𑀦𑀦𑀪𑀸𑀯𑀁 𑀧𑀢𑁆𑀢𑁄𑀲𑁆𑀫𑀺, 𑀉𑀤𑁆𑀥𑀁 𑀆𑀭𑁄𑀳𑀦𑀯𑀲𑁂𑀦 𑀇𑀢𑁄 𑀬𑀸𑀯 𑀫𑀬𑁆𑀳𑀁 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀅𑀦𑀼𑀲𑁆𑀲𑀭𑀡𑀲𑀫𑀢𑁆𑀣𑀢𑀸 𑀯𑀺𑀜𑁆𑀜𑀼𑀢𑀧𑁆𑀧𑀢𑁆𑀢𑀺 𑀏𑀯, 𑀏𑀢𑁆𑀣𑀦𑁆𑀢𑀭𑁂 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀔𑀸𑀤𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀧𑀺 𑀢𑀡𑁆𑀟𑀼𑀮𑀓𑀡𑀧𑁆𑀧𑀫𑀸𑀡𑀫𑁆𑀧𑀺 𑀫𑀘𑁆𑀙𑀁 𑀫𑀬𑀸 𑀦 𑀔𑀸𑀤𑀺𑀢𑀧𑀼𑀩𑁆𑀩𑀁, 𑀅𑀜𑁆𑀜𑀫𑁆𑀧𑀺 𑀓𑀜𑁆𑀘𑀺 𑀧𑀸𑀡𑀁 𑀲𑀜𑁆𑀘𑀺𑀘𑁆𑀘 𑀳𑀺𑀁𑀲𑀺𑀢𑀁 𑀩𑀸𑀥𑀺𑀢𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀕𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀁.

𑁮𑁯. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦𑀸𑀢𑀺 ‘‘𑀬𑀤𑁂𑀢𑀁 𑀫𑀬𑀸 𑀓𑀲𑁆𑀲𑀘𑀺 𑀧𑀸𑀡𑀲𑁆𑀲 𑀅𑀳𑀺𑀁𑀲𑀦𑀁 𑀯𑀼𑀢𑁆𑀢𑀁, 𑀲𑀘𑁂 𑀏𑀢𑀁 𑀲𑀘𑁆𑀘𑀁 𑀢𑀣𑀁 𑀅𑀯𑀺𑀧𑀭𑀻𑀢𑀁, 𑀏𑀢𑁂𑀦 𑀲𑀘𑁆𑀘𑀯𑀘𑀦𑁂𑀦 𑀧𑀚𑁆𑀚𑀼𑀦𑁆𑀦𑁄 𑀫𑁂𑀖𑁄 𑀅𑀪𑀺𑀯𑀲𑁆𑀲𑀢𑀼, 𑀜𑀸𑀢𑀺𑀲𑀗𑁆𑀖𑀁 𑀫𑁂 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑀽’’𑀢𑀺 𑀯𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀘𑁂𑀝𑀓𑀁 𑀆𑀡𑀸𑀧𑁂𑀦𑁆𑀢𑁄 𑀯𑀺𑀬 𑀧𑀚𑁆𑀚𑀼𑀦𑁆𑀦𑀁 𑀤𑁂𑀯𑀭𑀸𑀚𑀸𑀦𑀁 𑀆𑀮𑀧𑀦𑁆𑀢𑁄 ‘‘𑀅𑀪𑀺𑀢𑁆𑀣𑀦𑀬𑀸’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀅𑀪𑀺𑀢𑁆𑀣𑀦𑀬 𑀧𑀚𑁆𑀚𑀼𑀦𑁆𑀦𑀸𑀢𑀺 𑀧𑀚𑁆𑀚𑀼𑀦𑁆𑀦𑁄 𑀯𑀼𑀘𑁆𑀘𑀢𑀺 𑀫𑁂𑀖𑁄, 𑀅𑀬𑀁 𑀧𑀦 𑀫𑁂𑀖𑀯𑀲𑁂𑀦 𑀮𑀤𑁆𑀥𑀦𑀸𑀫𑀁 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀭𑀸𑀚𑀸𑀦𑀁 ¶ 𑀆𑀮𑀧𑀢𑀺. 𑀅𑀬𑀁 𑀳𑀺𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 ¶ 𑁋 𑀤𑁂𑀯𑁄 𑀦𑀸𑀫 𑀅𑀦𑀪𑀺𑀢𑁆𑀣𑀦𑀬𑀦𑁆𑀢𑁄 𑀯𑀺𑀚𑁆𑀚𑀼𑀮𑀢𑀸 𑀅𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀧𑀯𑀲𑁆𑀲𑀦𑁆𑀢𑁄𑀧𑀺 𑀦 𑀲𑁄𑀪𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀅𑀪𑀺𑀢𑁆𑀣𑀦𑀬𑀦𑁆𑀢𑁄 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀯𑀲𑁆𑀲𑀸𑀧𑁂𑀳𑀻𑀢𑀺. 𑀦𑀺𑀥𑀺𑀁 𑀓𑀸𑀓𑀲𑁆𑀲 𑀦𑀸𑀲𑀬𑀸𑀢𑀺 𑀓𑀸𑀓𑀸 𑀓𑀮𑀮𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁂 𑀫𑀘𑁆𑀙𑁂 𑀢𑀼𑀡𑁆𑀟𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 ¶ , 𑀢𑀲𑁆𑀫𑀸 𑀢𑁂𑀲𑀁 𑀅𑀦𑁆𑀢𑁄𑀓𑀮𑀮𑁂 𑀫𑀘𑁆𑀙𑀸 ‘‘𑀦𑀺𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀁 𑀓𑀸𑀓𑀲𑀗𑁆𑀖𑀲𑁆𑀲 𑀦𑀺𑀥𑀺𑀁 𑀤𑁂𑀯𑀁 𑀯𑀲𑁆𑀲𑀸𑀧𑁂𑀦𑁆𑀢𑁄 𑀉𑀤𑀓𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀸𑀲𑁂𑀳𑀺. 𑀓𑀸𑀓𑀁 𑀲𑁄𑀓𑀸𑀬 𑀭𑀦𑁆𑀥𑁂𑀳𑀻𑀢𑀺 𑀓𑀸𑀓𑀲𑀗𑁆𑀖𑁄 𑀇𑀫𑀲𑁆𑀫𑀺𑀁 𑀫𑀳𑀸𑀲𑀭𑁂 𑀉𑀤𑀓𑁂𑀦 𑀧𑀼𑀡𑁆𑀡𑁂 𑀫𑀘𑁆𑀙𑁂 𑀅𑀮𑀪𑀫𑀸𑀦𑁄 𑀲𑁄𑀘𑀺𑀲𑁆𑀲𑀢𑀺, 𑀢𑀁 𑀓𑀸𑀓𑀕𑀡𑀁 𑀢𑁆𑀯𑀁 𑀇𑀫𑀁 𑀓𑀤𑁆𑀤𑀫𑀁 𑀧𑀽𑀭𑁂𑀦𑁆𑀢𑁄 𑀲𑁄𑀓𑀸𑀬 𑀭𑀦𑁆𑀥𑁂𑀳𑀺, 𑀲𑁄𑀓𑀲𑁆𑀲𑀢𑁆𑀣𑀸𑀬 𑀧𑀦 𑀯𑀲𑁆𑀲𑀸𑀧𑀬𑀣, 𑀬𑀣𑀸 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀁 𑀲𑁄𑀓𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀫𑀘𑁆𑀙𑁂 𑀲𑁄𑀓𑀸 𑀧𑀫𑁄𑀘𑀬𑀸𑀢𑀺 𑀫𑀫 𑀜𑀸𑀢𑀓𑁂 𑀲𑀩𑁆𑀩𑁂𑀯 𑀫𑀘𑁆𑀙𑁂 𑀇𑀫𑀫𑁆𑀳𑀸 𑀫𑀭𑀡𑀲𑁄𑀓𑀸 𑀧𑀫𑁄𑀘𑁂𑀳𑀺. ‘‘𑀫𑀜𑁆𑀘 𑀲𑁄𑀓𑀸 𑀧𑀫𑁄𑀘𑀬𑀸’’𑀢𑀺 (𑀚𑀸. 𑁧.𑁧.𑁭𑁫) 𑀚𑀸𑀢𑀓𑁂 𑀧𑀞𑀦𑁆𑀢𑀺. 𑀢𑀢𑁆𑀣 𑀘-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀫𑀜𑁆𑀘 𑀫𑀫 𑀜𑀸𑀢𑀓𑁂 𑀘𑀸𑀢𑀺 𑀲𑀩𑁆𑀩𑁂𑀯 𑀫𑀭𑀡𑀲𑁄𑀓𑀸 𑀧𑀫𑁄𑀘𑁂𑀳𑀺 (𑀚𑀸. 𑀅𑀝𑁆𑀞. 𑁧.𑁧.𑁭𑁫). 𑀫𑀘𑁆𑀙𑀸𑀦𑀜𑁆𑀳𑀺 𑀅𑀦𑀼𑀤𑀓𑀪𑀸𑀯𑁂𑀦 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀖𑀸𑀲𑀪𑀸𑀯𑀁 𑀕𑀘𑁆𑀙𑀸𑀫𑀸𑀢𑀺 𑀫𑀳𑀸𑀫𑀭𑀡𑀲𑁄𑀓𑁄, 𑀫𑀳𑀸𑀲𑀢𑁆𑀢𑀲𑁆𑀲 𑀧𑀦 𑀢𑁂𑀲𑀁 𑀅𑀦𑀬𑀩𑁆𑀬𑀲𑀦𑀁 𑀧𑀝𑀺𑀘𑁆𑀘 𑀓𑀭𑀼𑀡𑀸𑀬𑀢𑁄 𑀓𑀭𑀼𑀡𑀸𑀧𑀢𑀺𑀭𑀽𑀧𑀫𑀼𑀔𑁂𑀦 𑀲𑁄𑀓𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀘𑁂𑀝𑀓𑀁 𑀆𑀡𑀸𑀧𑁂𑀦𑁆𑀢𑁄 𑀯𑀺𑀬 𑀧𑀚𑁆𑀚𑀼𑀦𑁆𑀦𑀁 𑀆𑀮𑀧𑀺𑀢𑁆𑀯𑀸 𑀲𑀓𑀮𑁂 𑀓𑁄𑀲𑀮𑀭𑀝𑁆𑀞𑁂 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀺 𑀲𑀻𑀮𑀢𑁂𑀚𑁂𑀦 𑀲𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑀓𑀸𑀮𑀫𑁂𑀯 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀭𑀸𑀚𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀫𑀳𑀸𑀧𑀼𑀭𑀺𑀲𑁄 𑀫𑀘𑁆𑀙𑀭𑀸𑀚𑀸 𑀜𑀸𑀢𑀻𑀦𑀁 𑀫𑀭𑀡𑀲𑁄𑀓𑁂𑀦 𑀯𑀲𑁆𑀲𑀸𑀧𑀦𑀁 𑀇𑀘𑁆𑀙𑀢𑀺, 𑀲𑀓𑀮𑀁 𑀓𑁄𑀲𑀮𑀭𑀝𑁆𑀞𑀁 𑀏𑀓𑀫𑁂𑀖𑀁 𑀓𑀢𑁆𑀯𑀸 𑀯𑀲𑁆𑀲𑀸𑀧𑁂𑀳𑀻’’𑀢𑀺 𑀆𑀳.

𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀁 𑀯𑀮𑀸𑀳𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑁂𑀖𑀕𑀻𑀢𑀁 𑀕𑀸𑀬𑀦𑁆𑀢𑁄 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀅𑀪𑀺𑀫𑀼𑀔𑁄 𑀧𑀓𑁆𑀔𑀦𑁆𑀤𑀺. 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂 𑀔𑀮𑀫𑀡𑁆𑀟𑀮𑀫𑀢𑁆𑀢𑀁 𑀏𑀓𑀁 𑀫𑁂𑀖𑀫𑀡𑁆𑀟𑀮𑀁 𑀉𑀝𑁆𑀞𑀸𑀬 𑀲𑀢𑀧𑀝𑀮𑀁 𑀲𑀳𑀲𑁆𑀲𑀧𑀝𑀮𑀁 𑀳𑀼𑀢𑁆𑀯𑀸 𑀅𑀪𑀺𑀢𑁆𑀣𑀦𑀬𑀦𑁆𑀢𑀁 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀦𑁆𑀢𑀁 𑀅𑀥𑁄𑀫𑀼𑀔𑀞𑀧𑀺𑀢𑀉𑀤𑀓𑀓𑀼𑀫𑁆𑀪𑀸𑀓𑀸𑀭𑁂𑀦 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀲𑀓𑀮𑀁 𑀓𑁄𑀲𑀮𑀭𑀝𑁆𑀞𑀁 𑀫𑀳𑁄𑀖𑁂𑀦 ¶ 𑀅𑀚𑁆𑀛𑁄𑀢𑁆𑀣𑀭𑀺. 𑀤𑁂𑀯𑁄 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀯𑀲𑁆𑀲𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀢𑀁 𑀫𑀳𑀸𑀲𑀭𑀁 𑀧𑀽𑀭𑁂𑀲𑀺. 𑀫𑀘𑁆𑀙𑀸 𑀫𑀭𑀡𑀪𑀬𑀢𑁄 𑀫𑀼𑀘𑁆𑀘𑀺𑀁𑀲𑀼. 𑀓𑀸𑀓𑀸𑀤𑀬𑁄 ¶ 𑀅𑀧𑀢𑀺𑀝𑁆𑀞𑀸 𑀅𑀳𑁂𑀲𑀼𑀁. 𑀦 𑀓𑁂𑀯𑀮𑀁 𑀫𑀘𑁆𑀙𑀸 𑀏𑀯, 𑀫𑀦𑀼𑀲𑁆𑀲𑀸𑀧𑀺 𑀯𑀺𑀯𑀺𑀥𑀲𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀸 𑀘𑀢𑀼𑀧𑁆𑀧𑀤𑀸𑀤𑀬𑁄𑀧𑀻𑀢𑀺 𑀲𑀩𑁆𑀩𑁂𑀧𑀺 𑀯𑀲𑁆𑀲𑀽𑀧𑀚𑀻𑀯𑀺𑀦𑁄 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

𑁯𑁦.

‘‘𑀲𑀳 𑀓𑀢𑁂 𑀲𑀘𑁆𑀘𑀯𑀭𑁂, 𑀧𑀚𑁆𑀚𑀼𑀦𑁆𑀦𑁄 𑀅𑀪𑀺𑀕𑀚𑁆𑀚𑀺𑀬;

𑀣𑀮𑀁 𑀦𑀺𑀦𑁆𑀦𑀜𑁆𑀘 𑀧𑀽𑀭𑁂𑀦𑁆𑀢𑁄, 𑀔𑀡𑁂𑀦 𑀅𑀪𑀺𑀯𑀲𑁆𑀲𑀣𑀸’’𑀢𑀺.

𑀢𑀢𑁆𑀣 ¶ 𑀔𑀡𑁂𑀦 𑀅𑀪𑀺𑀯𑀲𑁆𑀲𑀣𑀸𑀢𑀺 𑀅𑀤𑀦𑁆𑀥𑀸𑀬𑀺𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀔𑀡𑁂𑀦𑁂𑀯 𑀅𑀪𑀺𑀯𑀲𑁆𑀲𑀺.

𑁯𑁧. 𑀓𑀢𑁆𑀯𑀸 𑀯𑀻𑀭𑀺𑀬𑀫𑀼𑀢𑁆𑀢𑀫𑀦𑁆𑀢𑀺 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀓𑁄𑀲𑀚𑁆𑀚𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀜𑀸𑀢𑀢𑁆𑀣𑀘𑀭𑀺𑀬𑀸𑀲𑀫𑁆𑀧𑀸𑀤𑀦𑀫𑀼𑀔𑁂𑀦 𑀫𑀳𑀢𑁄 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀁 𑀉𑀢𑁆𑀢𑀫𑀁 𑀯𑀻𑀭𑀺𑀬𑀁 𑀓𑀢𑁆𑀯𑀸. 𑀲𑀘𑁆𑀘𑀢𑁂𑀚𑀩𑀮𑀲𑁆𑀲𑀺𑀢𑁄 𑀫𑀫 𑀲𑀘𑁆𑀘𑀸𑀦𑀼𑀪𑀸𑀯𑀩𑀮𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸 𑀢𑀤𑀸 𑀫𑀳𑀸𑀫𑁂𑀖𑀁 𑀯𑀲𑁆𑀲𑀸𑀧𑁂𑀲𑀺𑀁. 𑀬𑀲𑁆𑀫𑀸 𑀘𑁂𑀢𑀤𑁂𑀯𑀁, 𑀢𑀲𑁆𑀫𑀸 ‘‘𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺 𑀫𑀳𑀸𑀫𑀘𑁆𑀙𑀭𑀸𑀚𑀓𑀸𑀮𑁂 𑀅𑀢𑁆𑀢𑀦𑁄 𑀲𑀘𑁆𑀘𑀧𑀸𑀭𑀫𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀳𑀸𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑀳𑀤𑀬𑁄 𑀲𑀓𑀮𑀭𑀝𑁆𑀞𑁂 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀸𑀧𑀦𑀯𑀲𑁂𑀦 𑀫𑀳𑀸𑀚𑀦𑀁 𑀫𑀭𑀡𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀢𑀤𑀸 𑀧𑀚𑁆𑀚𑀼𑀦𑁆𑀦𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀫𑀘𑁆𑀙𑀕𑀡𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀘𑁆𑀙𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄𑀧𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀔𑀸𑀤𑀦𑀝𑁆𑀞𑀸𑀦𑁂 𑀫𑀘𑁆𑀙𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀡𑁆𑀟𑀼𑀮𑀓𑀡𑀫𑀢𑁆𑀢𑀫𑁆𑀧𑀺 𑀫𑀘𑁆𑀙𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀲𑁆𑀲𑀘𑀺𑀧𑀺 𑀧𑀸𑀡𑀺𑀦𑁄 𑀅𑀔𑀸𑀤𑀦𑀁, 𑀢𑀺𑀝𑁆𑀞𑀢𑀼 𑀔𑀸𑀤𑀦𑀁 𑀏𑀓𑀲𑀢𑁆𑀢𑀲𑁆𑀲𑀧𑀺 𑀅𑀯𑀺𑀳𑁂𑀞𑀦𑀁, 𑀢𑀣𑀸 𑀲𑀘𑁆𑀘𑀓𑀭𑀡𑁂𑀦 𑀤𑁂𑀯𑀲𑁆𑀲 𑀯𑀲𑁆𑀲𑀸𑀧𑀦𑀁, 𑀉𑀤𑀓𑁂 𑀧𑀭𑀺𑀓𑁆𑀔𑀻𑀡𑁂 𑀓𑀮𑀮𑀕𑀳𑀦𑁂 𑀦𑀺𑀫𑀼𑀚𑁆𑀚𑀦𑀯𑀲𑁂𑀦 𑀅𑀢𑁆𑀢𑀦𑀸 𑀅𑀦𑀼𑀪𑀯𑀫𑀸𑀦𑀁 𑀤𑀼𑀓𑁆𑀔𑀁 𑀯𑀻𑀭𑀪𑀸𑀯𑁂𑀦 𑀅𑀕𑀡𑁂𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑀲𑁆𑀲𑁂𑀯 𑀢𑀁 𑀤𑀼𑀓𑁆𑀔𑀁 𑀅𑀢𑁆𑀢𑀦𑁄 𑀳𑀤𑀬𑁂 𑀓𑀢𑁆𑀯𑀸 𑀅𑀲𑀳𑀦𑁆𑀢𑀲𑁆𑀲 𑀲𑀩𑁆𑀩𑀪𑀸𑀯𑁂𑀦 𑀓𑀭𑀼𑀡𑀸𑀬𑀦𑀸, 𑀢𑀣𑀸 𑀘 𑀧𑀝𑀺𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀫𑀘𑁆𑀙𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀓𑀡𑁆𑀳𑀤𑀻𑀧𑀸𑀬𑀦𑀘𑀭𑀺𑀬𑀸𑀯𑀡𑁆𑀡𑀦𑀸

𑁯𑁨. 𑀏𑀓𑀸𑀤𑀲𑀫𑁂 ¶ ¶ 𑀓𑀡𑁆𑀳𑀤𑀻𑀧𑀸𑀬𑀦𑁄 𑀇𑀲𑀻𑀢𑀺 𑀏𑀯𑀁𑀦𑀸𑀫𑀓𑁄 𑀢𑀸𑀧𑀲𑁄. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀤𑀸 𑀤𑀻𑀧𑀸𑀬𑀦𑁄 𑀦𑀸𑀫 𑀅𑀢𑁆𑀢𑀦𑁄 𑀲𑀳𑀸𑀬𑀁 𑀫𑀡𑁆𑀟𑀩𑁆𑀬𑀢𑀸𑀧𑀲𑀁 𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀲𑀻𑀮𑀕𑀼𑀡𑁂𑀦 𑀢𑀁 𑀅𑀯𑀺𑀚𑀳𑀦𑁆𑀢𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀽𑀮𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀢𑀲𑁆𑀲 𑀲𑀭𑀻𑀭𑀢𑁄 𑀧𑀕𑁆𑀖𑀭𑀺𑀢𑁆𑀯𑀸 𑀧𑀢𑀺𑀢𑀧𑀢𑀺𑀢𑁂𑀳𑀺 𑀮𑁄𑀳𑀺𑀢𑀩𑀺𑀦𑁆𑀤𑀽𑀳𑀺 𑀲𑀼𑀓𑁆𑀔𑁂𑀳𑀺 𑀓𑀸𑀴𑀯𑀡𑁆𑀡𑀲𑀭𑀻𑀭𑀢𑀸𑀬 ‘‘𑀓𑀡𑁆𑀳𑀤𑀻𑀧𑀸𑀬𑀦𑁄’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀭𑁄𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀻𑀢𑀺 𑀲𑀸𑀥𑀺𑀓𑀸𑀦𑀺 𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀦𑀪𑀺𑀭𑀢𑁄 𑀘𑀭𑀺𑀁 ¶ 𑀅𑀳𑀦𑁆𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀘𑁂𑀯 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀅𑀦𑀪𑀺𑀭𑀢𑀺𑀯𑀸𑀲𑀁 𑀯𑀲𑀦𑁆𑀢𑁄 𑀅𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀁. 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀫𑁂𑀯 𑀳𑀺 𑀢𑀤𑀸 𑀫𑀳𑀸𑀲𑀢𑁆𑀢𑁄 𑀅𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺. 𑀢𑀢𑁄 𑀧𑀭𑀁 𑀅𑀦𑀪𑀺𑀭𑀢𑀺𑀯𑀸𑀲𑀁 𑀯𑀲𑀺.

𑀓𑀲𑁆𑀫𑀸 𑀧𑀦 𑀫𑀳𑀸𑀧𑀼𑀭𑀺𑀲𑁄 𑀅𑀦𑁂𑀓𑀲𑀢𑀲𑀳𑀲𑁆𑀲𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀅𑀪𑀺𑀭𑀫𑀺𑀢𑁆𑀯𑀸 𑀇𑀥 𑀢𑀁 𑀦𑀸𑀪𑀺𑀭𑀫𑀺? 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀘𑀜𑁆𑀘𑀮𑀪𑀸𑀯𑀢𑁄. 𑀓𑀲𑁆𑀫𑀸 𑀘 𑀧𑀼𑀦 𑀦 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀻𑀢𑀺? 𑀧𑀞𑀫𑀁 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁂𑀦 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺. 𑀅𑀣𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀁 𑀯𑀺𑀦𑁄𑀤𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄𑀧𑀺 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀢𑀸𑀯 𑀫𑀳𑀦𑁆𑀢𑀁 𑀯𑀺𑀪𑀯𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀦𑁆𑀢𑁄 𑀬𑀁 𑀧𑀚𑀳𑀺, 𑀧𑀼𑀦 𑀢𑀤𑀢𑁆𑀣𑀫𑁂𑀯 𑀦𑀺𑀯𑀢𑁆𑀢𑁄, ‘‘𑀏𑀴𑀫𑀽𑀕𑁄 𑀘𑀧𑀮𑁄 𑀯𑀢𑀸𑀬𑀁 𑀓𑀡𑁆𑀳𑀤𑀻𑀧𑀸𑀬𑀦𑁄’’𑀢𑀺 𑀇𑀫𑀁 𑀅𑀧𑀯𑀸𑀤𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀳𑀺𑀭𑁄𑀢𑁆𑀢𑀧𑁆𑀧𑀪𑁂𑀤𑀪𑀬𑁂𑀦. 𑀅𑀧𑀺 𑀘 𑀧𑀩𑁆𑀩𑀚𑁆𑀚𑀸𑀧𑀼𑀜𑁆𑀜𑀁 𑀦𑀸𑀫𑁂𑀢𑀁 𑀯𑀺𑀜𑁆𑀜𑀽𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑀁, 𑀢𑁂𑀳𑀺 𑀘 𑀅𑀦𑀼𑀝𑁆𑀞𑀺𑀢𑀁, 𑀢𑀲𑁆𑀫𑀸𑀧𑀺 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀲𑀳𑀸𑀧𑀺 𑀤𑁄𑀫𑀦𑀲𑁆𑀲𑁂𑀦 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀫𑀸𑀦𑁄𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀺, 𑀦 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀲𑀤𑁆𑀥𑀸𑀬 𑀦𑀺𑀓𑁆𑀔𑀫𑁆𑀫 𑀧𑀼𑀦 𑀦𑀺𑀯𑀢𑁆𑀢𑁄, 𑀲𑁄 𑀏𑀴𑀫𑀽𑀕𑁄 𑀘𑀧𑀮𑁄 𑀯𑀢𑀸𑀬𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀘𑀭𑀸𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀜𑁆𑀘 ¶ 𑀲𑀢𑀜𑁆𑀘 𑀞𑀸𑀦𑀁, 𑀏𑀯𑀫𑁆𑀧𑀳𑀁 𑀧𑀼𑀜𑁆𑀜𑀓𑀭𑁄 𑀪𑀯𑀸𑀫𑀻’’𑀢𑀺. (𑀚𑀸. 𑁧.𑁧𑁦.𑁬𑁬);

𑁯𑁩. 𑀦 ¶ 𑀓𑁄𑀘𑀺 𑀏𑀢𑀁 𑀚𑀸𑀦𑀸𑀢𑀻𑀢𑀺 𑀏𑀢𑀁 𑀫𑀫 𑀅𑀦𑀪𑀺𑀭𑀢𑀺𑀫𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 𑀅𑀪𑀺𑀭𑀢𑀺𑀯𑀺𑀭𑀳𑀺𑀢𑀘𑀺𑀢𑁆𑀢𑀁 𑀓𑁄𑀘𑀺 𑀫𑀦𑀼𑀲𑁆𑀲𑀪𑀽𑀢𑁄 𑀦 𑀚𑀸𑀦𑀸𑀢𑀺. 𑀓𑀲𑁆𑀫𑀸? 𑀅𑀳𑀜𑁆𑀳𑀺 𑀓𑀲𑁆𑀲𑀘𑀺 𑀦𑀸𑀘𑀺𑀓𑁆𑀔𑀺𑀁 𑀫𑀫 𑀫𑀸𑀦𑀲𑁂 𑀘𑀺𑀢𑁆𑀢𑁂 𑀅𑀭𑀢𑀺 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑀲𑁆𑀲𑀘𑀺𑀧𑀺 𑀦 𑀓𑀣𑁂𑀲𑀺𑀁, 𑀢𑀲𑁆𑀫𑀸 𑀦 𑀓𑁄𑀘𑀺 𑀫𑀦𑀼𑀲𑁆𑀲𑀪𑀽𑀢𑁄 𑀏𑀢𑀁 𑀚𑀸𑀦𑀸𑀢𑀻𑀢𑀺.

𑁯𑁪.

‘‘𑀲𑀩𑁆𑀭𑀳𑁆𑀫𑀘𑀸𑀭𑀻 ¶ 𑀫𑀡𑁆𑀟𑀩𑁆𑀬𑁄, 𑀲𑀳𑀸𑀬𑁄 𑀫𑁂 𑀫𑀳𑀸𑀇𑀲𑀺;

𑀧𑀼𑀩𑁆𑀩𑀓𑀫𑁆𑀫𑀲𑀫𑀸𑀬𑀼𑀢𑁆𑀢𑁄, 𑀲𑀽𑀮𑀫𑀸𑀭𑁄𑀧𑀦𑀁 𑀮𑀪𑀺.

.

𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀲𑀫𑀸𑀦𑀲𑀺𑀓𑁆𑀔𑀢𑀸𑀬 𑀲𑀩𑁆𑀭𑀳𑁆𑀫𑀘𑀸𑀭𑀻. 𑀫𑀡𑁆𑀟𑀩𑁆𑀬𑁄𑀢𑀺 𑀏𑀯𑀁𑀦𑀸𑀫𑀓𑁄. 𑀲𑀳𑀸𑀬𑁄𑀢𑀺 𑀕𑀺𑀳𑀺𑀓𑀸𑀮𑁂 𑀧𑀩𑁆𑀩𑀚𑀺𑀢𑀓𑀸𑀮𑁂 𑀘 𑀤𑀴𑁆𑀳𑀫𑀺𑀢𑁆𑀢𑀢𑀸𑀬 𑀧𑀺𑀬𑀲𑀳𑀸𑀬𑁄. 𑀫𑀳𑀸𑀇𑀲𑀻𑀢𑀺 𑀫𑀳𑀸𑀦𑀼𑀪𑀸𑀯𑁄 𑀇𑀲𑀺. 𑀧𑀼𑀩𑁆𑀩𑀓𑀫𑁆𑀫𑀲𑀫𑀸𑀬𑀼𑀢𑁆𑀢𑁄, 𑀲𑀽𑀮𑀫𑀸𑀭𑁄𑀧𑀦𑀁 𑀮𑀪𑀻𑀢𑀺 𑀓𑀢𑁄𑀓𑀸𑀲𑁂𑀦 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑁂𑀦 𑀬𑀼𑀢𑁆𑀢𑁄 𑀲𑀽𑀮𑀸𑀭𑁄𑀧𑀦𑀁 𑀮𑀪𑀺, 𑀲𑀽𑀮𑀁 𑀉𑀢𑁆𑀢𑀸𑀲𑀺𑀢𑁄𑀢𑀺.

𑀢𑀢𑁆𑀭𑀸𑀬𑀁 ¶ 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀯𑀁𑀲𑀭𑀝𑁆𑀞𑁂 𑀓𑁄𑀲𑀫𑁆𑀩𑀺𑀬𑀁 𑀓𑁄𑀲𑀫𑁆𑀩𑀺𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑀫𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀤𑀻𑀧𑀸𑀬𑀦𑁄 𑀦𑀸𑀫. 𑀢𑀸𑀤𑀺𑀲𑀲𑁆𑀲𑁂𑀯 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀢𑀲𑁆𑀲 𑀧𑀺𑀬𑀲𑀳𑀸𑀬𑁄 𑀅𑀳𑁄𑀲𑀺, 𑀦𑀸𑀫𑁂𑀦 𑀫𑀡𑁆𑀟𑀩𑁆𑀬𑁄 𑀦𑀸𑀫. 𑀢𑁂 𑀉𑀪𑁄𑀧𑀺 𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀜𑀸𑀢𑀺𑀫𑀺𑀢𑁆𑀢𑀧𑀭𑀺𑀚𑀦𑀲𑁆𑀲 𑀭𑁄𑀤𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑁄 𑀧𑀭𑁄𑀧𑀡𑁆𑀡𑀸𑀲𑀯𑀲𑁆𑀲𑀸𑀦𑀺 𑀯𑀲𑀺𑀁𑀲𑀼, 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑁂 𑀛𑀸𑀦𑀫𑀢𑁆𑀢𑀫𑁆𑀧𑀺 𑀦 𑀦𑀺𑀩𑁆𑀩𑀢𑁆𑀢𑁂𑀲𑀼𑀁.

𑀢𑁂 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 ¶ 𑀓𑀸𑀲𑀺𑀭𑀝𑁆𑀞𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀭𑁂𑀓𑀲𑁆𑀫𑀺𑀁 𑀦𑀺𑀕𑀫𑁂 𑀤𑀻𑀧𑀸𑀬𑀦𑀲𑁆𑀲 𑀕𑀺𑀳𑀺𑀲𑀳𑀸𑀬𑁄 𑀫𑀡𑁆𑀟𑀩𑁆𑀬𑁄 𑀦𑀸𑀫 𑀧𑀝𑀺𑀯𑀲𑀢𑀺. 𑀢𑁂 𑀉𑀪𑁄𑀧𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀲𑁄 𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺. 𑀢𑁂 𑀢𑀢𑁆𑀣 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀩𑀸𑀭𑀸𑀡𑀲𑀺𑀲𑀫𑀻𑀧𑁂 𑀅𑀢𑀺𑀫𑀼𑀢𑁆𑀢𑀓𑀲𑀼𑀲𑀸𑀦𑁂 𑀯𑀲𑀺𑀁𑀲𑀼. 𑀢𑀢𑁆𑀣 𑀤𑀻𑀧𑀸𑀬𑀦𑁄 ¶ 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦 𑀢𑀲𑁆𑀫𑀺𑀁 𑀦𑀺𑀕𑀫𑁂 𑀫𑀡𑁆𑀟𑀩𑁆𑀬𑀲𑁆𑀲 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀫𑀡𑁆𑀟𑀩𑁆𑀬𑀢𑀸𑀧𑀲𑁄 𑀢𑀢𑁆𑀣𑁂𑀯 𑀯𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀘𑁄𑀭𑁄 𑀅𑀦𑁆𑀢𑁄𑀦𑀕𑀭𑁂 𑀘𑁄𑀭𑀺𑀓𑀁 𑀓𑀢𑁆𑀯𑀸 𑀥𑀦𑀲𑀸𑀭𑀁 𑀆𑀤𑀸𑀬 𑀦𑀺𑀓𑁆𑀔𑀦𑁆𑀢𑁄 𑀧𑀝𑀺𑀩𑀼𑀤𑁆𑀥𑁂𑀳𑀺 𑀕𑁂𑀳𑀲𑀸𑀫𑀺𑀓𑁂𑀳𑀺 𑀦𑀕𑀭𑀸𑀭𑀓𑁆𑀔𑀓𑀫𑀦𑀼𑀲𑁆𑀲𑁂𑀳𑀺 𑀘 𑀅𑀦𑀼𑀩𑀤𑁆𑀥𑁄 𑀦𑀺𑀤𑁆𑀥𑀫𑀦𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀕𑁂𑀦 𑀲𑀼𑀲𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀪𑀡𑁆𑀟𑀺𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀫𑀦𑀼𑀲𑁆𑀲𑀸 𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 ‘‘𑀅𑀭𑁂 𑀤𑀼𑀝𑁆𑀞𑀚𑀝𑀺𑀮, 𑀭𑀢𑁆𑀢𑀺𑀁, 𑀘𑁄𑀭𑀺𑀓𑀁 𑀓𑀢𑁆𑀯𑀸 𑀤𑀺𑀯𑀸 𑀢𑀸𑀧𑀲𑀯𑁂𑀲𑁂𑀦 𑀘𑀭𑀲𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼. 𑀭𑀸𑀚𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 ‘‘𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸’’𑀢𑀺 𑀆𑀳. 𑀢𑀁 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀔𑀤𑀺𑀭𑀲𑀽𑀮𑁂 𑀆𑀭𑁄𑀧𑀬𑀺𑀁𑀲𑀼. 𑀢𑀸𑀧𑀲𑀲𑁆𑀲 𑀲𑀭𑀻𑀭𑁂 𑀲𑀽𑀮𑀁 𑀦 𑀧𑀯𑀺𑀲𑀢𑀺. 𑀢𑀢𑁄 𑀦𑀺𑀫𑁆𑀩𑀲𑀽𑀮𑀁 𑀆𑀳𑀭𑀺𑀁𑀲𑀼, 𑀢𑀫𑁆𑀧𑀺 𑀦 𑀧𑀯𑀺𑀲𑀢𑀺. 𑀢𑀢𑁄 𑀅𑀬𑀲𑀽𑀮𑀁 𑀆𑀳𑀭𑀺𑀁𑀲𑀼, 𑀢𑀫𑁆𑀧𑀺 𑀦 𑀧𑀯𑀺𑀲𑀢𑀺. 𑀢𑀸𑀧𑀲𑁄 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀼𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀉𑀧𑁆𑀧𑀚𑁆𑀚𑀺. 𑀢𑁂𑀦 𑀧𑀼𑀩𑁆𑀩𑀓𑀫𑁆𑀫𑀁 𑀅𑀤𑁆𑀤𑀲 𑁋 𑀲𑁄 𑀓𑀺𑀭 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀯𑀟𑁆𑀠𑀓𑀻𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀭𑀼𑀓𑁆𑀔𑀢𑀘𑁆𑀙𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀓𑁆𑀔𑀺𑀓𑀁 𑀕𑀳𑁂𑀢𑁆𑀯𑀸 𑀓𑁄𑀯𑀺𑀴𑀸𑀭𑀲𑀓𑀮𑀺𑀓𑀸𑀬 𑀲𑀽𑀮𑁂𑀦 𑀯𑀺𑀬 𑀯𑀺𑀚𑁆𑀛𑀺. 𑀢𑀲𑁆𑀲 𑀢𑀁 𑀧𑀸𑀧𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀑𑀓𑀸𑀲𑀁 𑀮𑀪𑀺. 𑀲𑁄 ‘‘𑀦 𑀲𑀓𑁆𑀓𑀸 𑀇𑀢𑁄 𑀧𑀸𑀧𑀢𑁄 𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺 𑀜𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑁂 𑀆𑀳 𑁋 ‘‘𑀲𑀘𑁂 𑀫𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑀼𑀓𑀸𑀫𑀢𑁆𑀣, 𑀓𑁄𑀯𑀺𑀴𑀸𑀭𑀲𑀽𑀮𑀁 𑀆𑀳𑀭𑀣𑀸’’𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀢𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑁆𑀯𑀸 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀢𑀤𑀸 ¶ 𑀓𑀡𑁆𑀳𑀤𑀻𑀧𑀸𑀬𑀦𑁄 ‘‘𑀘𑀺𑀭𑀤𑀺𑀝𑁆𑀞𑁄 𑀫𑁂 𑀲𑀳𑀸𑀬𑁄’’𑀢𑀺 𑀫𑀡𑁆𑀟𑀩𑁆𑀬𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀺𑀁, 𑀲𑀫𑁆𑀫, 𑀓𑀸𑀭𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀓𑀸𑀭𑀓𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑁆𑀢𑀦𑁄 𑀫𑀦𑁄𑀧𑀤𑁄𑀲𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺 𑀦 𑀲𑀓𑁆𑀔𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀫𑁆𑀫, 𑀬𑁂𑀳𑀺 𑀅𑀳𑀁 𑀕𑀳𑀺𑀢𑁄, 𑀦𑁂𑀯 𑀢𑁂𑀲𑀁 𑀦 𑀭𑀜𑁆𑀜𑁄 𑀉𑀧𑀭𑀺 𑀫𑀬𑁆𑀳𑀁 𑀫𑀦𑁄𑀧𑀤𑁄𑀲𑁄 ¶ 𑀅𑀢𑁆𑀣𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀸𑀤𑀺𑀲𑀲𑁆𑀲 𑀲𑀻𑀮𑀯𑀢𑁄 𑀙𑀸𑀬𑀸 𑀫𑀬𑁆𑀳𑀁 𑀲𑀼𑀔𑀸’’𑀢𑀺 𑀯𑀢𑁆𑀯𑀸 𑀓𑀡𑁆𑀳𑀤𑀻𑀧𑀸𑀬𑀦𑁄 𑀲𑀽𑀮𑀁 𑀦𑀺𑀲𑁆𑀲𑀸𑀬 𑀦𑀺𑀲𑀻𑀤𑀺. 𑀆𑀭𑀓𑁆𑀔𑀓𑀧𑀼𑀭𑀺𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀅𑀦𑀺𑀲𑀸𑀫𑁂𑀢𑁆𑀯𑀸 𑀫𑁂 𑀓𑀢’’𑀦𑁆𑀢𑀺 𑀯𑁂𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀢𑁆𑀯𑀁 𑀲𑀽𑀮𑀁 𑀦𑀺𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀤𑀻𑀧𑀸𑀬𑀦𑀁 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀇𑀫𑀁 𑀢𑀸𑀧𑀲𑀁 𑀭𑀓𑁆𑀔𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀲𑁆𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀇𑀫𑀲𑁆𑀲 𑀓𑀸𑀭𑀓𑀪𑀸𑀯𑀁 𑀜𑀢𑁆𑀯𑀸 𑀏𑀯𑀁 𑀓𑀭𑁄𑀲𑀻’’𑀢𑀺. 𑀲𑁄 𑀓𑀫𑁆𑀫𑀲𑁆𑀲 𑀅𑀯𑀺𑀲𑁄𑀥𑀺𑀢𑀪𑀸𑀯𑀁 𑀆𑀘𑀺𑀓𑁆𑀔𑀺. 𑀅𑀣𑀲𑁆𑀲 𑀤𑀻𑀧𑀸𑀬𑀦𑁄 ‘‘𑀭𑀜𑁆𑀜𑀸 𑀦𑀸𑀫 𑀦𑀺𑀲𑀫𑁆𑀫𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁.

‘‘𑀅𑀮𑀲𑁄 ¶ 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀽’’𑀢𑀺. (𑀚𑀸. 𑁧.𑁪.𑁧𑁨𑁭; 𑁧.𑁫.𑁪; 𑁧.𑁧𑁦.𑁧𑁫𑁩; 𑁧.𑁧𑁫.𑁨𑁨𑁯) 𑁋

𑀆𑀤𑀻𑀦𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀭𑀸𑀚𑀸 𑀫𑀡𑁆𑀟𑀩𑁆𑀬𑀢𑀸𑀧𑀲𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀽𑀮𑀁 𑀳𑀭𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀲𑀽𑀮𑀁 𑀳𑀭𑀦𑁆𑀢𑀸 𑀳𑀭𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀫𑀡𑁆𑀟𑀩𑁆𑀬𑁄 𑀆𑀳 𑁋 ‘‘𑀫𑀳𑀸𑀭𑀸𑀚, 𑀅𑀳𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀤𑁄𑀲𑁂𑀦 𑀏𑀯𑀭𑀽𑀧𑀁 𑀅𑀬𑀲𑀁 𑀧𑀢𑁆𑀢𑁄, 𑀫𑀫 𑀲𑀭𑀻𑀭𑀢𑁄 𑀲𑀽𑀮𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀲𑀘𑁂𑀧𑀺 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀤𑀸𑀢𑀼𑀓𑀸𑀫𑁄, 𑀓𑀓𑀘𑁂𑀦 𑀇𑀫𑀁 𑀲𑀽𑀮𑀁 𑀘𑀫𑁆𑀫𑀲𑀫𑀁 𑀓𑀢𑁆𑀯𑀸 𑀙𑀺𑀦𑁆𑀤𑀸𑀧𑁂𑀳𑀻’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀲𑀽𑀮𑀁 𑀅𑀦𑁆𑀢𑁄𑀬𑁂𑀯 𑀅𑀳𑁄𑀲𑀺, 𑀦 𑀓𑀜𑁆𑀘𑀺 𑀧𑀻𑀴𑀁 𑀚𑀦𑁂𑀲𑀺. 𑀢𑀤𑀸 𑀓𑀺𑀭 𑀲𑀼𑀔𑀼𑀫𑀁 𑀲𑀓𑀮𑀺𑀓𑀳𑀻𑀭𑀁 𑀕𑀳𑁂𑀢𑁆𑀯𑀸 𑀫𑀓𑁆𑀔𑀺𑀓𑀸𑀬 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀲𑀺, 𑀢𑀁 𑀢𑀲𑁆𑀲 𑀅𑀦𑁆𑀢𑁄 𑀏𑀯 𑀅𑀳𑁄𑀲𑀺. 𑀲𑁄 𑀢𑁂𑀦 𑀓𑀸𑀭𑀡𑁂𑀦 𑀅𑀫𑀭𑀺𑀢𑁆𑀯𑀸, 𑀅𑀢𑁆𑀢𑀦𑁄 𑀆𑀬𑀼𑀓𑁆𑀔𑀬𑁂𑀦𑁂𑀯 𑀫𑀭𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦 𑀫𑀢𑁄𑀢𑀺. 𑀭𑀸𑀚𑀸 𑀢𑀸𑀧𑀲𑁂 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀉𑀪𑁄𑀧𑀺 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀸𑀧𑁂𑀦𑁆𑀢𑁄 𑀧𑀝𑀺𑀚𑀕𑁆𑀕𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀆𑀡𑀺𑀫𑀡𑁆𑀟𑀩𑁆𑀬𑁄 𑀦𑀸𑀫 𑀚𑀸𑀢𑁄. 𑀲𑁄 𑀭𑀸𑀚𑀸𑀦𑀁 𑀉𑀧𑀦𑀺𑀲𑁆𑀲𑀸𑀬 𑀢𑀢𑁆𑀣𑁂𑀯 𑀯𑀲𑀺. 𑀤𑀻𑀧𑀸𑀬𑀦𑁄 𑀧𑀦 𑀢𑀲𑁆𑀲 𑀯𑀡𑀁 𑀨𑀸𑀲𑀼𑀓𑀁 𑀓𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀺𑀳𑀺𑀲𑀳𑀸𑀬𑀫𑀡𑁆𑀟𑀩𑁆𑀬𑁂𑀦 𑀓𑀸𑀭𑀺𑀢𑀁 𑀧𑀡𑁆𑀡𑀲𑀸𑀮𑀫𑁂𑀯 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋

𑁯𑁫.

‘‘𑀢𑀫𑀳𑀁 ¶ 𑀉𑀧𑀝𑁆𑀞𑀳𑀺𑀢𑁆𑀯𑀸𑀦, 𑀆𑀭𑁄𑀕𑁆𑀬𑀫𑀦𑀼𑀧𑀸𑀧𑀬𑀺𑀁;

𑀆𑀧𑀼𑀘𑁆𑀙𑀺𑀢𑁆𑀯𑀸𑀦 𑀆𑀕𑀜𑁆𑀙𑀺𑀁, 𑀬𑀁 𑀫𑀬𑁆𑀳𑀁 𑀲𑀓𑀫𑀲𑁆𑀲𑀫’’𑀦𑁆𑀢𑀺.

𑀢𑀢𑁆𑀣 𑀆𑀧𑀼𑀘𑁆𑀙𑀺𑀢𑁆𑀯𑀸𑀦𑀸𑀢𑀺 𑀫𑀬𑁆𑀳𑀁 𑀲𑀳𑀸𑀬𑀁 𑀫𑀡𑁆𑀟𑀩𑁆𑀬𑀢𑀸𑀧𑀲𑀁 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀬𑀁 𑀫𑀬𑁆𑀳𑀁 𑀲𑀓𑀫𑀲𑁆𑀲𑀫𑀦𑁆𑀢𑀺 𑀬𑀁 𑀢𑀁 𑀫𑀬𑁆𑀳𑀁 𑀕𑀺𑀳𑀺𑀲𑀳𑀸𑀬𑁂𑀦 𑀫𑀡𑁆𑀟𑀩𑁆𑀬𑀩𑁆𑀭𑀸𑀳𑁆𑀫𑀡𑁂𑀦 𑀓𑀸𑀭𑀺𑀢𑀁 𑀲𑀓𑀁 𑀫𑀫 𑀲𑀦𑁆𑀢𑀓𑀁 𑀅𑀲𑁆𑀲𑀫𑀧𑀤𑀁 𑀧𑀡𑁆𑀡𑀲𑀸𑀮𑀸, 𑀢𑀁 𑀉𑀧𑀸𑀕𑀜𑁆𑀙𑀺𑀁.

𑁯𑁬. 𑀢𑀁 𑀧𑀦 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀲𑀳𑀸𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀲𑀼𑀢𑁆𑀯𑀸𑀯 𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀧𑀼𑀢𑁆𑀢𑀤𑀸𑀭𑁄 𑀩𑀳𑀼𑀕𑀦𑁆𑀥𑀫𑀸𑀮𑀨𑀸𑀡𑀺𑀢𑀸𑀤𑀻𑀦𑀺 𑀆𑀤𑀸𑀬 𑀧𑀡𑁆𑀡𑀲𑀸𑀮𑀁 ¶ 𑀕𑀦𑁆𑀢𑁆𑀯𑀸 𑀤𑀻𑀧𑀸𑀬𑀦𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀸𑀦𑀓𑀁 𑀧𑀸𑀬𑁂𑀢𑁆𑀯𑀸 𑀆𑀡𑀺𑀫𑀡𑁆𑀟𑀩𑁆𑀬𑀲𑁆𑀲 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀬𑀜𑁆𑀜𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀺. 𑀢𑀢𑁆𑀣 𑀘𑁂𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀆𑀲𑀺𑀯𑀺𑀲𑁄 𑀯𑀲𑀢𑀺. 𑀓𑀼𑀫𑀸𑀭𑁂𑀦 𑀪𑀽𑀫𑀺𑀬𑀁 𑀧𑀳𑀢𑀕𑁂𑀡𑁆𑀟𑀼𑀓𑁄 𑀕𑀦𑁆𑀢𑁆𑀯𑀸 𑀯𑀫𑁆𑀫𑀺𑀓𑀩𑀺𑀮𑁂 𑀆𑀲𑀺𑀯𑀺𑀲𑀲𑁆𑀲 𑀫𑀢𑁆𑀣𑀓𑁂 𑀧𑀢𑀺. 𑀓𑀼𑀫𑀸𑀭𑁄 𑀅𑀚𑀸𑀦𑀦𑁆𑀢𑁄 𑀩𑀺𑀮𑁂 𑀳𑀢𑁆𑀣𑀁 𑀧𑀯𑁂𑀲𑁂𑀲𑀺.

𑀅𑀣 𑀦𑀁 𑀓𑀼𑀤𑁆𑀥𑁄 𑀆𑀲𑀺𑀯𑀺𑀲𑁄 𑀳𑀢𑁆𑀣𑁂 𑀟𑀁𑀲𑀺. 𑀲𑁄 𑀯𑀺𑀲𑀯𑁂𑀕𑁂𑀦 𑀫𑀼𑀘𑁆𑀙𑀺𑀢𑁄 𑀢𑀢𑁆𑀣𑁂𑀯 𑀧𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀧𑁆𑀧𑁂𑀦 𑀤𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀓𑀼𑀫𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀑𑀲𑀥𑁂𑀦 𑀯𑀸 𑀫𑀦𑁆𑀢𑁂𑀦 𑀯𑀸 𑀧𑀼𑀢𑁆𑀢𑀓𑀁 𑀦𑁄 𑀦𑀻𑀭𑁄𑀕𑀁 𑀓𑀭𑁄𑀣𑀸’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀅𑀳𑀁 𑀑𑀲𑀥𑀁 𑀦 𑀚𑀸𑀦𑀸𑀫𑀺, 𑀦𑀸𑀳𑀁 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑀺𑀢𑁄𑀫𑁆𑀳𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀓𑀼𑀫𑀸𑀭𑀓𑁂 𑀫𑁂𑀢𑁆𑀢𑀁 𑀓𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀣𑀸’’𑀢𑀺. 𑀢𑀸𑀧𑀲𑁄 ‘‘𑀲𑀸𑀥𑀼 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀬𑀜𑁆𑀜𑀤𑀢𑁆𑀢𑀲𑁆𑀲 𑀲𑀻𑀲𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 ¶ 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳𑀸𑀬𑁄 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀆𑀕𑀜𑁆𑀙𑀼𑀁 𑀧𑀸𑀳𑀼𑀦𑀸𑀕𑀢𑀦𑁆𑀢𑀺 𑀅𑀢𑀺𑀣𑀺𑀅𑀪𑀺𑀕𑀫𑀦𑀁 𑀅𑀪𑀺𑀕𑀫𑀺𑀁𑀲𑀼.

𑁯𑁭. 𑀯𑀝𑁆𑀝𑀫𑀦𑀼𑀓𑁆𑀔𑀺𑀧𑀦𑁆𑀢𑀺 𑀔𑀺𑀧𑀦𑀯𑀝𑁆𑀝𑀲𑀡𑁆𑀞𑀸𑀦𑀢𑀸𑀬 ‘‘𑀯𑀝𑁆𑀝’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀕𑁂𑀡𑁆𑀟𑀼𑀓𑀁 𑀅𑀦𑀼𑀓𑁆𑀔𑀺𑀧𑀦𑁆𑀢𑁄, 𑀕𑁂𑀡𑁆𑀟𑀼𑀓𑀓𑀻𑀴𑀁 𑀓𑀻𑀴𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀲𑀺𑀯𑀺𑀲𑀫𑀓𑁄𑀧𑀬𑀻𑀢𑀺 𑀪𑀽𑀫𑀺𑀬𑀁 𑀧𑀝𑀺𑀳𑀢𑁄 𑀳𑀼𑀢𑁆𑀯𑀸 𑀯𑀫𑁆𑀫𑀺𑀓𑀩𑀺𑀮𑀕𑀢𑁂𑀦 𑀕𑁂𑀡𑁆𑀟𑀼𑀓𑁂𑀦 𑀢𑀢𑁆𑀣 𑀞𑀺𑀢𑀁 𑀓𑀡𑁆𑀳𑀲𑀧𑁆𑀧𑀁 𑀲𑀻𑀲𑁂 𑀧𑀳𑀭𑀺𑀢𑁆𑀯𑀸 𑀭𑁄𑀲𑁂𑀲𑀺.

𑁯𑁮. 𑀯𑀝𑁆𑀝𑀕𑀢𑀁 𑀫𑀕𑁆𑀕𑀁, 𑀅𑀦𑁆𑀯𑁂𑀲𑀦𑁆𑀢𑁄𑀢𑀺 𑀢𑁂𑀦 𑀯𑀝𑁆𑀝𑁂𑀦 𑀕𑀢𑀁 𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑁄. 𑀆𑀲𑀺𑀯𑀺𑀲𑀲𑁆𑀲 𑀳𑀢𑁆𑀣𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀧𑀭𑀸𑀫𑀲𑀻𑀢𑀺 𑀯𑀫𑁆𑀫𑀺𑀓𑀩𑀺𑀮𑀁 𑀧𑀯𑁂𑀲𑀺𑀢𑁂𑀦 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀆𑀲𑀻𑀯𑀺𑀲𑀲𑁆𑀲 𑀲𑀻𑀲𑀁 𑀨𑀼𑀲𑀺.

𑁯𑁯. 𑀯𑀺𑀲𑀩𑀮𑀲𑁆𑀲𑀺𑀢𑁄𑀢𑀺 ¶ 𑀯𑀺𑀲𑀩𑀮𑀦𑀺𑀲𑁆𑀲𑀺𑀢𑁄 𑀅𑀢𑁆𑀢𑀦𑁄 𑀯𑀺𑀲𑀯𑁂𑀕𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀲𑀧𑁆𑀧𑁄. 𑀅𑀟𑀁𑀲𑀺 𑀤𑀸𑀭𑀓𑀁 𑀔𑀡𑁂𑀢𑀺 𑀢𑀲𑁆𑀫𑀺𑀁 𑀧𑀭𑀸𑀫𑀲𑀺𑀢𑀓𑁆𑀔𑀡𑁂 𑀏𑀯 𑀢𑀁 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀁 𑀟𑀁𑀲𑀺.

𑁧𑁦𑁦. 𑀲𑀳𑀤𑀝𑁆𑀞𑁄𑀢𑀺 𑀟𑀁𑀲𑁂𑀦 𑀲𑀳𑁂𑀯, 𑀤𑀝𑁆𑀞𑀲𑀫𑀓𑀸𑀮𑀫𑁂𑀯. 𑀆𑀲𑀺𑀯𑀺𑀲𑁂𑀦𑀸𑀢𑀺 𑀖𑁄𑀭𑀯𑀺𑀲𑁂𑀦. 𑀢𑁂𑀦𑀸𑀢𑀺 𑀢𑁂𑀦 𑀤𑀸𑀭𑀓𑀲𑁆𑀲 𑀯𑀺𑀲𑀯𑁂𑀕𑁂𑀦 𑀫𑀼𑀘𑁆𑀙𑀺𑀢𑀲𑁆𑀲 ¶ 𑀪𑀽𑀫𑀺𑀬𑀁 𑀧𑀢𑀦𑁂𑀦 𑀅𑀳𑀁 𑀤𑀼𑀓𑁆𑀔𑀺𑀢𑁄 𑀅𑀳𑁄𑀲𑀺𑀁. 𑀫𑀫 𑀯𑀸𑀳𑀲𑀺 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀢𑀁 𑀤𑀸𑀭𑀓𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀤𑀼𑀓𑁆𑀔𑀁 𑀫𑀫 𑀯𑀸𑀳𑀲𑀺, 𑀫𑀬𑁆𑀳𑀁 𑀲𑀭𑀻𑀭𑁂 𑀯𑀺𑀬 𑀫𑀫 𑀓𑀭𑀼𑀡𑀸𑀬 𑀯𑀸𑀳𑁂𑀲𑀺.

𑁧𑁦𑁧. 𑀢𑁆𑀬𑀸𑀳𑀦𑁆𑀢𑀺 𑀢𑁂 𑀢𑀲𑁆𑀲 𑀤𑀸𑀭𑀓𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀳𑀁 ‘‘𑀫𑀸 𑀲𑁄𑀘𑀣, 𑀫𑀸 𑀧𑀭𑀺𑀤𑁂𑀯𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀲𑁆𑀲𑀸𑀲𑁂𑀢𑁆𑀯𑀸. 𑀲𑁄𑀓𑀲𑀮𑁆𑀮𑀺𑀢𑁂𑀢𑀺 𑀲𑁄𑀓𑀲𑀮𑁆𑀮𑀯𑀦𑁆𑀢𑁂. 𑀅𑀕𑁆𑀕𑀦𑁆𑀢𑀺 𑀲𑁂𑀝𑁆𑀞𑀁 𑀢𑀢𑁄 𑀏𑀯 𑀯𑀭𑀁 𑀉𑀢𑁆𑀢𑀫𑀁 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺𑀁.

𑁧𑁦𑁨. 𑀇𑀤𑀸𑀦𑀺 𑀢𑀁 𑀲𑀘𑁆𑀘𑀓𑀺𑀭𑀺𑀬𑀁 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀸𑀳𑀫𑁂𑀯𑀸’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀲𑀢𑁆𑀢𑀸𑀳𑀫𑁂𑀯𑀸𑀢𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢 𑀅𑀳𑀸𑀦𑀺 𑀏𑀯. 𑀧𑀲𑀦𑁆𑀦𑀘𑀺𑀢𑁆𑀢𑁄𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀧𑀲𑀦𑁆𑀦𑀫𑀸𑀦𑀲𑁄. 𑀧𑀼𑀜𑁆𑀜𑀢𑁆𑀣𑀺𑀓𑁄𑀢𑀺 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄, 𑀥𑀫𑁆𑀫𑀘𑁆𑀙𑀦𑁆𑀤𑀬𑀼𑀢𑁆𑀢𑁄. 𑀅𑀣𑀸𑀧𑀭𑀁 𑀬𑀁 𑀘𑀭𑀺𑀢𑀦𑁆𑀢𑀺 𑀅𑀣 𑀢𑀲𑁆𑀫𑀸 𑀲𑀢𑁆𑀢𑀸𑀳𑀸 𑀉𑀢𑁆𑀢𑀭𑀺 𑀬𑀁 𑀫𑀫 𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀁.

𑁧𑁦𑁩. 𑀅𑀓𑀸𑀫𑀓𑁄𑀯𑀸𑀳𑀻𑀢𑀺 𑀧𑀩𑁆𑀩𑀚𑁆𑀚𑀁 𑀅𑀦𑀺𑀘𑁆𑀙𑀦𑁆𑀢𑁄 𑀏𑀯. 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺 𑀲𑀘𑁂 𑀅𑀢𑀺𑀭𑁂𑀓𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀅𑀦𑀪𑀺𑀭𑀢𑀺𑀯𑀸𑀲𑀁 𑀯𑀲𑀦𑁆𑀢𑁂𑀦 𑀫𑀬𑀸 𑀓𑀲𑁆𑀲𑀘𑀺 𑀅𑀚𑀸𑀦𑀸𑀧𑀺𑀢𑀪𑀸𑀯𑁄 𑀲𑀘𑁆𑀘𑁄, 𑀏𑀢𑁂𑀦 𑀲𑀘𑁆𑀘𑁂𑀦 𑀬𑀜𑁆𑀜𑀤𑀢𑁆𑀢𑀓𑀼𑀫𑀸𑀭𑀲𑁆𑀲 𑀲𑁄𑀢𑁆𑀣𑀺 𑀳𑁄𑀢𑀼, 𑀚𑀻𑀯𑀺𑀢𑀁 𑀧𑀝𑀺𑀮𑀪𑀢𑀽𑀢𑀺.

𑀏𑀯𑀁 ¶ 𑀧𑀦 𑀫𑀳𑀸𑀲𑀢𑁆𑀢𑁂𑀦 𑀲𑀘𑁆𑀘𑀓𑀺𑀭𑀺𑀬𑀸𑀬 𑀓𑀢𑀸𑀬 𑀬𑀜𑁆𑀜𑀤𑀢𑁆𑀢𑀲𑁆𑀲 𑀲𑀭𑀻𑀭𑀢𑁄 𑀯𑀺𑀲𑀁 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀓𑀼𑀫𑀸𑀭𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀫𑁆𑀫, 𑀢𑀸𑀢𑀸’’𑀢𑀺 𑀯𑀢𑁆𑀯𑀸 𑀯𑀼𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦𑁪.

‘‘𑀲𑀳 𑀲𑀘𑁆𑀘𑁂 𑀓𑀢𑁂 𑀫𑀬𑁆𑀳𑀁, 𑀯𑀺𑀲𑀯𑁂𑀕𑁂𑀦 𑀯𑁂𑀥𑀺𑀢𑁄;

𑀅𑀩𑀼𑀚𑁆𑀛𑀺𑀢𑁆𑀯𑀸𑀦 𑀯𑀼𑀝𑁆𑀞𑀸𑀲𑀺, 𑀅𑀭𑁄𑀕𑁄 𑀘𑀸𑀲𑀺 𑀫𑀸𑀡𑀯𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀫 𑀲𑀘𑁆𑀘𑀓𑀭𑀡𑁂𑀦 𑀲𑀳 𑀲𑀫𑀸𑀦𑀓𑀸𑀮𑀫𑁂𑀯 𑀢𑀢𑁄 𑀧𑀼𑀩𑁆𑀩𑁂 𑀯𑀺𑀲𑀯𑁂𑀕𑁂𑀦 𑀯𑁂𑀥𑀺𑀢𑁄 𑀓𑀫𑁆𑀧𑀺𑀢𑁄 ¶ 𑀯𑀺𑀲𑀜𑁆𑀜𑀺𑀪𑀸𑀯𑁂𑀦 𑀅𑀩𑀼𑀚𑁆𑀛𑀺𑀢𑁆𑀯𑀸 𑀞𑀺𑀢𑁄 𑀯𑀺𑀕𑀢𑀯𑀺𑀲𑀢𑁆𑀢𑀸 𑀧𑀝𑀺𑀮𑀤𑁆𑀥𑀲𑀜𑁆𑀜𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀺. 𑀲𑁄 𑀫𑀸𑀡𑀯𑁄 𑀓𑀼𑀫𑀸𑀭𑁄 𑀯𑀺𑀲𑀯𑁂𑀕𑀸𑀪𑀸𑀯𑁂𑀦 𑀅𑀭𑁄𑀕𑁄 𑀘 𑀅𑀳𑁄𑀲𑀻𑀢𑀺.

𑀇𑀤𑀸𑀦𑀺 𑀲𑀢𑁆𑀣𑀸 𑀢𑀲𑁆𑀲𑀸 𑀅𑀢𑁆𑀢𑀦𑁄 𑀲𑀘𑁆𑀘𑀓𑀺𑀭𑀺𑀬𑀸𑀬 𑀧𑀭𑀫𑀢𑁆𑀣𑀧𑀸𑀭𑀫𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺 𑀆𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯 ¶ . 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 (𑀚𑀸. 𑀅𑀝𑁆𑀞. 𑁪.𑁧𑁦.𑁬𑁨) 𑀧𑀦 ‘‘𑀫𑀳𑀸𑀲𑀢𑁆𑀢𑀲𑁆𑀲 𑀲𑀘𑁆𑀘𑀓𑀺𑀭𑀺𑀬𑀸𑀬 𑀓𑀼𑀫𑀸𑀭𑀲𑁆𑀲 𑀣𑀦𑀧𑁆𑀧𑀤𑁂𑀲𑀢𑁄 𑀉𑀤𑁆𑀥𑀁 𑀯𑀺𑀲𑀁 𑀪𑀲𑁆𑀲𑀺𑀢𑁆𑀯𑀸 𑀯𑀺𑀕𑀢𑀁. 𑀤𑀸𑀭𑀓𑀲𑁆𑀲 𑀧𑀺𑀢𑀼 𑀲𑀘𑁆𑀘𑀓𑀺𑀭𑀺𑀬𑀸𑀬 𑀓𑀝𑀺𑀢𑁄 𑀉𑀤𑁆𑀥𑀁, 𑀫𑀸𑀢𑀼 𑀲𑀘𑁆𑀘𑀓𑀺𑀭𑀺𑀬𑀸𑀬 𑀅𑀯𑀲𑀺𑀝𑁆𑀞𑀲𑀭𑀻𑀭𑀢𑁄 𑀯𑀺𑀲𑀁 𑀪𑀲𑁆𑀲𑀺𑀢𑁆𑀯𑀸 𑀯𑀺𑀕𑀢’’𑀦𑁆𑀢𑀺 𑀆𑀕𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀬𑀲𑁆𑀫𑀸 𑀤𑀸𑀦𑀁 𑀦𑀸𑀪𑀺𑀦𑀦𑁆𑀤𑀺𑀁 𑀓𑀤𑀸𑀘𑀺, 𑀤𑀺𑀲𑁆𑀯𑀸𑀦𑀳𑀁 𑀅𑀢𑀺𑀣𑀺𑀁 𑀯𑀸𑀲𑀓𑀸𑀮𑁂;

𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀼𑀁, 𑀩𑀳𑀼𑀲𑁆𑀲𑀼𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;

𑀅𑀓𑀸𑀫𑀓𑁄 𑀯𑀸𑀧𑀺 𑀅𑀳𑀁 𑀤𑀤𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄.

‘‘𑀆𑀲𑀻𑀯𑀺𑀲𑁄 𑀢𑀸𑀢 𑀧𑀳𑀽𑀢𑀢𑁂𑀚𑁄, 𑀬𑁄 𑀢𑀁 𑀅𑀤𑀁𑀲𑀻 𑀧𑀢𑀭𑀸 𑀉𑀤𑀺𑀘𑁆𑀘;

𑀢𑀲𑁆𑀫𑀺𑀜𑁆𑀘 𑀫𑁂 𑀅𑀧𑁆𑀧𑀺𑀬𑀢𑀸𑀬 𑀅𑀚𑁆𑀚, 𑀧𑀺𑀢𑀭𑀺 𑀘 𑀢𑁂 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼, 𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄’’𑀢𑀺.

𑀢𑀢𑁆𑀣 𑀯𑀸𑀲𑀓𑀸𑀮𑁂𑀢𑀺 𑀯𑀲𑀦𑀢𑁆𑀣𑀸𑀬 𑀕𑁂𑀳𑀁 𑀆𑀕𑀢𑀓𑀸𑀮𑁂. 𑀦 𑀘𑀸𑀧𑀺 ¶ 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀼𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀬𑀁 𑀦𑁂𑀯 𑀤𑀸𑀦𑀁 𑀅𑀪𑀺𑀦𑀦𑁆𑀤𑀢𑀺, 𑀦 𑀅𑀫𑁆𑀳𑁂𑀢𑀺 𑀇𑀫𑀁 𑀫𑀫 𑀅𑀧𑁆𑀧𑀺𑀬𑀪𑀸𑀯𑀁 𑀦𑁂𑀯 𑀚𑀸𑀦𑀺𑀁𑀲𑀼. 𑀅𑀳𑀜𑁆𑀳𑀺 𑀢𑁂 𑀧𑀺𑀬𑀘𑀓𑁆𑀔𑀽𑀳𑀺𑀬𑁂𑀯 𑀑𑀮𑁄𑀓𑁂𑀫𑀻𑀢𑀺 𑀤𑀻𑀧𑁂𑀢𑀺. 𑀏𑀢𑁂𑀦 𑀲𑀘𑁆𑀘𑁂𑀦𑀸𑀢𑀺 𑀲𑀘𑁂 𑀅𑀳𑀁 𑀤𑀤𑀫𑀸𑀦𑁄𑀧𑀺 𑀯𑀺𑀧𑀸𑀓𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑀺𑀘𑁆𑀙𑀸𑀬 𑀤𑁂𑀫𑀺, 𑀅𑀦𑀺𑀘𑁆𑀙𑀪𑀸𑀯𑀜𑁆𑀘 𑀫𑁂 𑀧𑀭𑁂 𑀦 𑀚𑀸𑀦𑀦𑁆𑀢𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀇𑀢𑀭𑀕𑀸𑀣𑀸𑀬, 𑀢𑀸𑀢𑀸𑀢𑀺 𑀧𑀼𑀢𑁆𑀢𑀁 𑀆𑀮𑀧𑀢𑀺. 𑀧𑀳𑀽𑀢𑀢𑁂𑀚𑁄𑀢𑀺 𑀩𑀮𑀯𑀯𑀺𑀲𑁄. 𑀧𑀢𑀭𑀸𑀢𑀺 𑀧𑀤𑀭𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀉𑀤𑀺𑀘𑁆𑀘𑀸𑀢𑀺 𑀉𑀤𑁆𑀥𑀁 𑀕𑀦𑁆𑀢𑁆𑀯𑀸, 𑀯𑀫𑁆𑀫𑀺𑀓𑀩𑀺𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢 𑀬𑀜𑁆𑀜𑀤𑀢𑁆𑀢, 𑀢𑀲𑁆𑀫𑀺𑀜𑁆𑀘 𑀆𑀲𑀺𑀯𑀺𑀲𑁂 𑀢𑀯 𑀘 𑀧𑀺𑀢𑀭𑀺 𑀅𑀧𑁆𑀧𑀺𑀬𑀪𑀸𑀯𑁂𑀦 𑀫𑀬𑁆𑀳𑀁 𑀓𑁄𑀘𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀜𑁆𑀘 𑀧𑀦 𑀅𑀧𑁆𑀧𑀺𑀬𑀪𑀸𑀯𑀁 𑀞𑀧𑁂𑀢𑁆𑀯𑀸 𑀅𑀚𑁆𑀚 𑀫𑀬𑀸 𑀦 𑀓𑁄𑀘𑀺 𑀚𑀸𑀦𑀸𑀧𑀺𑀢𑀧𑀼𑀩𑁆𑀩𑁄, 𑀲𑀘𑁂 𑀏𑀢𑀁 𑀲𑀘𑁆𑀘𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 𑀓𑀼𑀫𑀸𑀭𑁂 𑀅𑀭𑁄𑀕𑁂 𑀚𑀸𑀢𑁂 𑀢𑀲𑁆𑀲 𑀧𑀺𑀢𑀭𑀁 ‘‘𑀤𑀸𑀦𑀁 𑀤𑀤𑀦𑁆𑀢𑁂𑀦 𑀦𑀸𑀫 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 ¶ 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀦𑀺𑀯𑁂𑀲𑁂𑀢𑁆𑀯𑀸 𑀲𑀬𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 𑀅𑀳𑁄𑀲𑀺.

𑀢𑀤𑀸 𑀫𑀡𑁆𑀟𑀩𑁆𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀢𑀲𑁆𑀲 𑀪𑀭𑀺𑀬𑀸 𑀯𑀺𑀲𑀸𑀔𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑀢𑁆𑀣𑁂𑀭𑁄, 𑀆𑀡𑀺𑀫𑀡𑁆𑀟𑀩𑁆𑀬𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀓𑀡𑁆𑀳𑀤𑀻𑀧𑀸𑀬𑀦𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀇𑀥 𑀧𑀸𑀴𑀺𑀬𑀸 𑀆𑀭𑀼𑀴𑁆𑀳𑀸 𑀲𑀘𑁆𑀘𑀧𑀸𑀭𑀫𑀻, 𑀲𑁂𑀲𑀸 𑀘 𑀧𑀸𑀭𑀫𑀺𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀅𑀦𑀯𑀲𑁂𑀲𑀫𑀳𑀸𑀪𑁄𑀕𑀧𑀭𑀺𑀘𑁆𑀘𑀸𑀕𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀓𑀡𑁆𑀳𑀤𑀻𑀧𑀸𑀬𑀦𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀫𑀳𑀸𑀲𑀼𑀢𑀲𑁄𑀫𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁦𑁫. 𑀤𑁆𑀯𑀸𑀤𑀲𑀫𑁂 𑀲𑀼𑀢𑀲𑁄𑀫𑁄 𑀫𑀳𑀻𑀧𑀢𑀻𑀢𑀺 𑀏𑀯𑀁𑀦𑀸𑀫𑁄 𑀔𑀢𑁆𑀢𑀺𑀬𑁄. 𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀓𑁄𑀭𑀩𑁆𑀬𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀲𑀼𑀢𑀯𑀺𑀢𑁆𑀢𑀢𑀸𑀬 𑀘𑀦𑁆𑀤𑀲𑀫𑀸𑀦𑀲𑁄𑀫𑁆𑀫𑀯𑀭𑀯𑀡𑁆𑀡𑀢𑀸𑀬 𑀘 ‘‘𑀲𑀼𑀢𑀲𑁄𑀫𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀲𑀩𑁆𑀩𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀧𑁆𑀧𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 ¶ 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀕𑀳𑀺𑀢𑁄 𑀧𑁄𑀭𑀺𑀲𑀸𑀤𑁂𑀦𑀸𑀢𑀺 𑀧𑀼𑀭𑀺𑀲𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀤𑀦𑀢𑁄 𑀔𑀸𑀤𑀦𑀢𑁄 ‘‘𑀧𑁄𑀭𑀺𑀲𑀸𑀤𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑀸 𑀤𑁂𑀯𑀢𑀸𑀩𑀮𑀺𑀓𑀫𑁆𑀫𑀢𑁆𑀣𑀁 𑀕𑀳𑀺𑀢𑁄.

𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀺 𑀢𑀤𑀸 𑀫𑀁𑀲𑀁 𑀯𑀺𑀦𑀸 𑀅𑀪𑀼𑀜𑁆𑀚𑀦𑁆𑀢𑁄 𑀅𑀜𑁆𑀜𑀁 𑀫𑀁𑀲𑀁 𑀅𑀮𑀪𑀦𑁆𑀢𑁂𑀦 𑀪𑀢𑁆𑀢𑀓𑀸𑀭𑀓𑁂𑀦 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀸𑀧𑀺𑀢𑁄 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑁂 𑀖𑀸𑀢𑁂𑀢𑁆𑀯𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀦𑁆𑀢𑁄 ‘‘𑀧𑁄𑀭𑀺𑀲𑀸𑀤𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀅𑀫𑀘𑁆𑀘𑀧𑀸𑀭𑀺𑀲𑀚𑁆𑀚𑀧𑁆𑀧𑀫𑀼𑀔𑁂𑀳𑀺 𑀦𑀸𑀕𑀭𑁂𑀳𑀺 𑀦𑁂𑀕𑀫𑀚𑀸𑀦𑀧𑀤𑁂𑀳𑀺 𑀘 𑀉𑀲𑁆𑀲𑀸𑀳𑀺𑀢𑁂𑀦 𑀓𑀸𑀴𑀳𑀢𑁆𑀣𑀺𑀦𑀸 𑀦𑀸𑀫 𑀅𑀢𑁆𑀢𑀦𑁄 𑀲𑁂𑀦𑀸𑀧𑀢𑀺𑀦𑀸 ‘‘𑀤𑁂𑀯, 𑀬𑀤𑀺 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀦𑀢𑁄 𑀯𑀺𑀭𑀫𑀸𑀳𑀻’’𑀢𑀺 𑀯𑀼𑀢𑁆𑀢𑁄 ‘‘𑀭𑀚𑁆𑀚𑀁 𑀧𑀚𑀳𑀦𑁆𑀢𑁄𑀧𑀺 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀦𑀢𑁄 𑀦 𑀑𑀭𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄 ¶ 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀯𑀲𑀦𑁆𑀢𑁄 𑀔𑀸𑀡𑀼𑀧𑁆𑀧𑀳𑀸𑀭𑁂𑀦 𑀧𑀸𑀤𑁂 𑀚𑀸𑀢𑀲𑁆𑀲 𑀯𑀡𑀲𑁆𑀲 𑀨𑀸𑀲𑀼𑀪𑀸𑀯𑀸𑀬 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀔𑀢𑁆𑀢𑀺𑀬𑀸𑀦𑀁 𑀕𑀮𑀮𑁄𑀳𑀺𑀢𑁂𑀦 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀯𑀢𑀸𑀬 𑀆𑀬𑀸𑀘𑀦𑀁 𑀓𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀦𑀸𑀳𑀸𑀭𑀢𑀸𑀬 𑀯𑀡𑁂 𑀨𑀸𑀲𑀼𑀓𑁂 𑀚𑀸𑀢𑁂 ‘‘𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀫𑁂 𑀲𑁄𑀢𑁆𑀣𑀺 𑀅𑀳𑁄𑀲𑀻’’𑀢𑀺 𑀲𑀜𑁆𑀜𑀸𑀬 ‘‘𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀢𑁆𑀣𑀁 𑀭𑀸𑀚𑀸𑀦𑁄 ¶ 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀅𑀢𑀻𑀢𑀪𑀯𑁂 𑀲𑀳𑀸𑀬𑀪𑀽𑀢𑁂𑀦 𑀬𑀓𑁆𑀔𑁂𑀦 𑀲𑀫𑀸𑀕𑀦𑁆𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀫𑀦𑁆𑀢𑀩𑀮𑁂𑀦 𑀅𑀥𑀺𑀓𑀢𑀭𑀣𑀸𑀫𑀚𑀯𑀧𑀭𑀓𑁆𑀓𑀫𑀲𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀲𑀢𑀭𑀸𑀚𑀸𑀦𑁄 𑀆𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀑𑀮𑀫𑁆𑀩𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀓𑀭𑀡𑀲𑀚𑁆𑀚𑁄 𑀅𑀳𑁄𑀲𑀺.

𑀅𑀣 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀁 𑀩𑀮𑀺𑀓𑀫𑁆𑀫𑀁 𑀅𑀦𑀺𑀘𑁆𑀙𑀦𑁆𑀢𑀻 ‘‘𑀉𑀧𑀸𑀬𑁂𑀦 𑀦𑀁 𑀦𑀺𑀲𑁂𑀥𑁂𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑀭𑀽𑀧𑁂𑀦 𑀢𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀅𑀦𑀼𑀩𑀤𑁆𑀥𑁄 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀤𑀺𑀩𑁆𑀩𑀭𑀽𑀧𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 ‘‘𑀢𑁆𑀯𑀁 𑀫𑀼𑀲𑀸𑀯𑀸𑀤𑀻 𑀢𑀬𑀸 ‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀆𑀦𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀧𑀝𑀺𑀲𑁆𑀲𑀼𑀢𑀁. 𑀇𑀤𑀸𑀦𑀺 𑀬𑁂 𑀯𑀸 𑀢𑁂 𑀯𑀸 𑀤𑀼𑀩𑁆𑀩𑀮𑀭𑀸𑀚𑀸𑀦𑁄 𑀆𑀦𑁂𑀲𑀺. 𑀚𑀫𑁆𑀩𑀼𑀤𑀻𑀧𑁂 𑀚𑁂𑀝𑁆𑀞𑀓𑀁 𑀲𑀼𑀢𑀲𑁄𑀫𑀭𑀸𑀚𑀸𑀦𑀁 𑀲𑀘𑁂 𑀦𑀸𑀦𑁂𑀲𑁆𑀲𑀲𑀺, 𑀦 𑀫𑁂 𑀢𑁂 𑀩𑀮𑀺𑀓𑀫𑁆𑀫𑁂𑀦 𑀅𑀢𑁆𑀣𑁄’’𑀢𑀺 𑀆𑀳.

𑀲𑁄 ‘‘𑀤𑀺𑀝𑁆𑀞𑀸 𑀫𑁂 𑀅𑀢𑁆𑀢𑀦𑁄 𑀤𑁂𑀯𑀢𑀸’’𑀢𑀺 𑀢𑀼𑀲𑀺𑀢𑁆𑀯𑀸 ‘‘𑀲𑀸𑀫𑀺, 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀅𑀚𑁆𑀚𑁂𑀯 𑀲𑀼𑀢𑀲𑁄𑀫𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑁂𑀕𑁂𑀦 𑀫𑀺𑀕𑀸𑀚𑀺𑀦𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀅𑀲𑀁𑀯𑀺𑀳𑀺𑀢𑀸𑀬 𑀆𑀭𑀓𑁆𑀔𑀸𑀬 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀦 𑀲𑀻𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 ¶ 𑀅𑀦𑁆𑀢𑁄𑀉𑀬𑁆𑀬𑀸𑀦𑀕𑀢𑁂𑀬𑁂𑀯 𑀩𑀮𑀯𑀧𑀘𑁆𑀘𑀽𑀲𑁂 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀧𑀸𑀢𑁄𑀯 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺. 𑀢𑀤𑀸 𑀢𑀓𑁆𑀓𑀲𑀺𑀮𑀢𑁄 𑀦𑀦𑁆𑀤𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀘𑀢𑀲𑁆𑀲𑁄 𑀲𑀢𑀸𑀭𑀳𑀕𑀸𑀣𑀸𑀬𑁄 𑀕𑀳𑁂𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑁆𑀫 𑀢𑀁 𑀦𑀕𑀭𑀁 𑀧𑀢𑁆𑀢𑁄 𑀭𑀸𑀚𑀸𑀦𑀁 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀚𑀬𑀢𑀼 𑀪𑀯𑀁, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀚𑀬𑀸𑀧𑁂𑀲𑀺.

𑀭𑀸𑀚𑀸 𑀳𑀢𑁆𑀣𑀺𑀦𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀼𑀢𑁄 𑀦𑀼, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀆𑀕𑀘𑁆𑀙𑀲𑀺, 𑀓𑀺𑀫𑀺𑀘𑁆𑀙𑀲𑀺, 𑀓𑀺𑀁 𑀢𑁂 𑀤𑀚𑁆𑀚’’𑀦𑁆𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 ‘‘𑀢𑀼𑀫𑁆𑀳𑁂 ‘𑀲𑀼𑀢𑀯𑀺𑀢𑁆𑀢𑀓𑀸’𑀢𑀺 𑀲𑀼𑀢𑁆𑀯𑀸 𑀘𑀢𑀲𑁆𑀲𑁄 𑀲𑀢𑀸𑀭𑀳𑀕𑀸𑀣𑀸𑀬𑁄 𑀆𑀤𑀸𑀬 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂𑀢𑀼𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀉𑀬𑁆𑀬𑀸𑀦𑀁 ¶ 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑁄𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀸 𑀉𑀓𑁆𑀓𑀡𑁆𑀞𑀻’’𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙𑀣 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑀼𑀓𑀕𑁂𑀳𑁂 𑀦𑀺𑀯𑀸𑀲𑀁 𑀖𑀸𑀲𑀘𑁆𑀙𑀸𑀤𑀦𑀜𑁆𑀘 𑀲𑀁𑀯𑀺𑀤𑀳𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀦𑁆𑀢𑀁 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀑𑀴𑀸𑀭𑀺𑀓𑀸𑀦𑀺 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀫𑀲𑁆𑀲𑀼𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀉𑀩𑁆𑀩𑀝𑁆𑀝𑀺𑀢𑀲𑀭𑀻𑀭𑁄 𑀧𑁄𑀓𑁆𑀔𑀭𑀡𑀺𑀬𑀸 𑀭𑀸𑀚𑀯𑀺𑀪𑀯𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀉𑀤𑀓𑀕𑁆𑀕𑀳𑀡𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀅𑀣𑀲𑁆𑀲 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑁂 𑀉𑀧𑀳𑀭𑀺𑀁𑀲𑀼. 𑀧𑁄𑀭𑀺𑀲𑀸𑀤𑁄 ‘‘𑀅𑀮𑀗𑁆𑀓𑀢𑀓𑀸𑀮𑁂 𑀭𑀸𑀚𑀸 𑀪𑀸𑀭𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀮𑁆𑀮𑀳𑀼𑀓𑀓𑀸𑀮𑁂𑀬𑁂𑀯 𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀦𑁆𑀢𑁄 𑀔𑀕𑁆𑀕𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘‘𑀅𑀳𑀫𑀲𑁆𑀫𑀺 𑀧𑁄𑀭𑀺𑀲𑀸𑀤𑁄’’𑀢𑀺 𑀦𑀸𑀫𑀁 𑀲𑀸𑀯𑁂𑀢𑁆𑀯𑀸 𑀉𑀤𑀓𑀸 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀳𑀢𑁆𑀣𑀸𑀭𑁄𑀳𑀸𑀤𑀬𑁄 𑀳𑀢𑁆𑀣𑀺𑀆𑀤𑀺𑀢𑁄 𑀪𑀲𑁆𑀲𑀺𑀁𑀲𑀼. 𑀩𑀮𑀓𑀸𑀬𑁄 𑀤𑀽𑀭𑁂 𑀞𑀺𑀢𑁄 𑀢𑀢𑁄𑀯 𑀧𑀮𑀸𑀬𑀺. 𑀇𑀢𑀭𑁄 𑀅𑀢𑁆𑀢𑀦𑁄 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀧𑁄𑀭𑀺𑀲𑀸𑀤𑁄 ¶ 𑀭𑀸𑀚𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀧𑀸𑀓𑀸𑀭𑀁 𑀮𑀗𑁆𑀖𑀺𑀢𑁆𑀯𑀸 𑀧𑀼𑀭𑀢𑁄 𑀧𑀕𑀮𑀺𑀢𑀫𑀤𑀫𑀢𑁆𑀢𑀯𑀭𑀯𑀸𑀭𑀡𑁂 𑀓𑀼𑀫𑁆𑀪𑁂 𑀅𑀓𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀢𑀓𑀽𑀝𑀸𑀦𑀺 𑀯𑀺𑀬 𑀧𑀸𑀢𑁂𑀦𑁆𑀢𑁄 𑀯𑀸𑀢𑀚𑀯𑀸𑀦𑀺𑀧𑀺 𑀅𑀲𑁆𑀲𑀭𑀢𑀦𑀸𑀦𑀺 𑀧𑀺𑀝𑁆𑀞𑀺𑀬𑀁 𑀅𑀓𑁆𑀓𑀫𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑁄 𑀭𑀣𑀲𑀻𑀲𑁂 𑀅𑀓𑁆𑀓𑀫𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑁄 𑀪𑀫𑀭𑀺𑀓𑀁 𑀪𑀫𑀦𑁆𑀢𑁄 𑀯𑀺𑀬 𑀦𑀻𑀮𑀓𑀸𑀦𑀺 𑀦𑀺𑀕𑁆𑀭𑁄𑀥𑀧𑀢𑁆𑀢𑀸𑀦𑀺 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀏𑀓𑀯𑁂𑀕𑁂𑀦𑁂𑀯 𑀢𑀺𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀓𑀜𑁆𑀘𑀺 𑀅𑀦𑀼𑀩𑀦𑁆𑀥𑀦𑁆𑀢𑀁 ¶ 𑀅𑀤𑀺𑀲𑁆𑀯𑀸 𑀲𑀡𑀺𑀓𑀁 𑀕𑀘𑁆𑀙𑀦𑁆𑀢𑁄 𑀲𑀼𑀢𑀲𑁄𑀫𑀲𑁆𑀲 𑀓𑁂𑀲𑁂𑀳𑀺 𑀉𑀤𑀓𑀩𑀺𑀦𑁆𑀤𑀽𑀦𑀺 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀢𑀦𑁆𑀢𑀸𑀦𑀺 ‘‘𑀅𑀲𑁆𑀲𑀼𑀩𑀺𑀦𑁆𑀤𑀽𑀦𑀻’’𑀢𑀺 𑀲𑀜𑁆𑀜𑀸𑀬 ‘‘𑀓𑀺𑀫𑀺𑀤𑀁 𑀲𑀼𑀢𑀲𑁄𑀫𑁄𑀧𑀺 𑀫𑀭𑀡𑀁 𑀅𑀦𑀼𑀲𑁄𑀘𑀦𑁆𑀢𑁄 𑀭𑁄𑀤𑀢𑀻’’𑀢𑀺 𑀆𑀳.

𑀫𑀳𑀸𑀲𑀢𑁆𑀢𑁄 ‘‘𑀦𑀸𑀳𑀁 𑀫𑀭𑀡𑀢𑁄 𑀅𑀦𑀼𑀲𑁄𑀘𑀸𑀫𑀺, 𑀓𑀼𑀢𑁄 𑀭𑁄𑀤𑀦𑀸, 𑀅𑀧𑀺 𑀘 𑀔𑁄 𑀲𑀗𑁆𑀕𑀭𑀁 𑀓𑀢𑁆𑀯𑀸 𑀲𑀘𑁆𑀘𑀸𑀧𑀦𑀁 𑀦𑀸𑀫 𑀧𑀡𑁆𑀟𑀺𑀢𑀸𑀦𑀁 𑀆𑀘𑀺𑀡𑁆𑀡𑀁, 𑀢𑀁 𑀦 𑀦𑀺𑀧𑁆𑀨𑀚𑁆𑀚𑀢𑀻’’𑀢𑀺 𑀅𑀦𑀼𑀲𑁄𑀘𑀸𑀫𑀺. 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀘𑀢𑀲𑁆𑀲𑁄 𑀲𑀢𑀸𑀭𑀳𑀕𑀸𑀣𑀸𑀬𑁄 𑀆𑀤𑀸𑀬 𑀢𑀓𑁆𑀓𑀲𑀺𑀮𑀢𑁄 𑀆𑀕𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 ‘‘𑀦𑁆𑀳𑀸𑀬𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀼𑀡𑀺𑀲𑁆𑀲𑀸𑀫𑀺, 𑀬𑀸𑀯 𑀫𑀫𑀸𑀕𑀫𑀦𑀸 𑀆𑀕𑀫𑁂𑀳𑀻’’𑀢𑀺 𑀲𑀗𑁆𑀕𑀭𑀁 𑀓𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀢𑁄, 𑀢𑁆𑀯𑀜𑁆𑀘 𑀢𑀸 𑀕𑀸𑀣𑀸𑀬𑁄 𑀲𑁄𑀢𑀼𑀁 𑀅𑀤𑀢𑁆𑀯𑀸 𑀫𑀁 𑀕𑀡𑁆𑀳𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀕𑀳𑀺𑀢𑁄 𑀧𑁄𑀭𑀺𑀲𑀸𑀤𑁂𑀦, 𑀩𑁆𑀭𑀸𑀳𑁆𑀫𑀡𑁂 𑀲𑀗𑁆𑀕𑀭𑀁 𑀲𑀭𑀺’’𑀦𑁆𑀢𑀺.

𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁂 𑀲𑀗𑁆𑀕𑀭𑀁 𑀲𑀭𑀺𑀦𑁆𑀢𑀺 𑀦𑀦𑁆𑀤𑀩𑁆𑀭𑀸𑀳𑁆𑀫𑀡𑁂 𑀅𑀢𑁆𑀢𑀦𑀸 𑀓𑀢𑀁 𑀧𑀝𑀺𑀜𑁆𑀜𑀁 𑀅𑀦𑀼𑀲𑁆𑀲𑀭𑀺𑀁.

𑁧𑁦𑁬. 𑀆𑀯𑀼𑀡𑀺𑀢𑁆𑀯𑀸 ¶ 𑀓𑀭𑀢𑁆𑀢𑀮𑁂𑀢𑀺 𑀢𑀢𑁆𑀣 𑀢𑀢𑁆𑀣 𑀉𑀬𑁆𑀬𑀸𑀦𑀸𑀤𑀻𑀲𑀼 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀆𑀦𑀻𑀢𑀸𑀦𑀁 𑀏𑀓𑀲𑀢𑀔𑀢𑁆𑀢𑀺𑀬𑀸𑀦𑀁 𑀳𑀢𑁆𑀣𑀢𑀮𑁂 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀭𑀼𑀓𑁆𑀔𑁂 𑀮𑀫𑁆𑀩𑀦𑀢𑁆𑀣𑀁 𑀭𑀚𑁆𑀚𑀼𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀏𑀢𑁂𑀲𑀁 𑀧𑀫𑀺𑀮𑀸𑀧𑁂𑀢𑁆𑀯𑀸𑀢𑀺 𑀏𑀢𑁂 𑀏𑀓𑀲𑀢𑀔𑀢𑁆𑀢𑀺𑀬𑁂 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀉𑀤𑁆𑀥𑀁𑀧𑀸𑀤𑁂 𑀅𑀥𑁄𑀲𑀺𑀭𑁂 𑀓𑀢𑁆𑀯𑀸 𑀧𑀡𑁆𑀳𑀺𑀬𑀸 𑀲𑀻𑀲𑀁 𑀧𑀳𑀭𑀦𑁆𑀢𑁄 𑀪𑀫𑀡𑀯𑀲𑁂𑀦 𑀳𑀢𑁆𑀣𑀢𑀮𑁂 𑀆𑀯𑀼𑀡𑀺𑀢𑁆𑀯𑀸 𑀭𑀼𑀓𑁆𑀔𑁂 𑀆𑀮𑀫𑁆𑀩𑀦𑀯𑀲𑁂𑀦 𑀲𑀩𑁆𑀩𑀲𑁄 𑀆𑀳𑀸𑀭𑀽𑀧𑀘𑁆𑀙𑁂𑀤𑁂𑀦 𑀘 𑀲𑀩𑁆𑀩𑀣𑀸 𑀧𑀫𑀺𑀮𑀸𑀧𑁂𑀢𑁆𑀯𑀸 𑀯𑀺𑀲𑁄𑀲𑁂𑀢𑁆𑀯𑀸 𑀔𑁂𑀤𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀜𑁆𑀜𑀢𑁆𑀣𑁂𑀢𑀺 𑀩𑀮𑀺𑀓𑀫𑁆𑀫𑀢𑁆𑀣𑁂 𑀲𑀸𑀥𑁂𑀢𑀩𑁆𑀩𑁂. 𑀉𑀧𑀦𑀬𑀻 𑀫𑀫𑀦𑁆𑀢𑀺 𑀫𑀁 𑀉𑀧𑀦𑁂𑀲𑀺.

𑁧𑁦𑁭. 𑀢𑀣𑀸 𑀉𑀧𑀦𑀻𑀬𑀫𑀸𑀦𑁄 𑀧𑀦 𑀫𑀳𑀸𑀲𑀢𑁆𑀢𑁄 𑀧𑁄𑀭𑀺𑀲𑀸𑀤𑁂𑀦 ‘‘𑀓𑀺𑀁 𑀢𑁆𑀯𑀁 𑀫𑀭𑀡𑀢𑁄 𑀪𑀸𑀬𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀳𑀁 𑀫𑀭𑀡𑀢𑁄 𑀪𑀸𑀬𑀸𑀫𑀺, 𑀢𑀲𑁆𑀲 𑀧𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀬𑀸 𑀓𑀢𑁄 𑀲𑀗𑁆𑀕𑀭𑁄 𑀦 𑀧𑀭𑀺𑀫𑁄𑀘𑀺𑀢𑁄’’𑀢𑀺 𑀅𑀦𑀼𑀲𑁄𑀘𑀸𑀫𑀺. ‘‘𑀲𑀘𑁂 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀲𑀺, 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀘 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀧𑀼𑀦 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀸𑀳𑀫𑀺𑀤𑀁 𑀲𑀤𑁆𑀤𑀳𑀸𑀫𑀺, 𑀬𑀁 𑀢𑁆𑀯𑀁 𑀫𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀫𑀫 𑀳𑀢𑁆𑀣𑀁 𑀆𑀕𑀫𑀺𑀲𑁆𑀲𑀸𑀲𑀻’’𑀢𑀺. ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀸𑀘𑀭𑀺𑀬𑀓𑀼𑀮𑁂 𑀲𑀺𑀓𑁆𑀔𑀺𑀢𑁄 𑀲𑀳𑀸𑀬𑁄 𑀳𑀼𑀢𑁆𑀯𑀸 ¶ ‘𑀅𑀳𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦 𑀫𑀼𑀲𑀸 𑀓𑀣𑁂𑀫𑀻’𑀢𑀺 𑀓𑀺𑀁 𑀦 𑀲𑀤𑁆𑀤𑀳𑀲𑀻’’𑀢𑀺? 𑀓𑀺𑀜𑁆𑀘𑀸𑀧𑀺 𑀫𑁂 𑀏𑀢𑁂𑀦 𑀯𑀸𑀘𑀸𑀫𑀢𑁆𑀢𑀓𑁂𑀦 𑁋

‘‘𑀅𑀲𑀺𑀜𑁆𑀘 ¶ 𑀲𑀢𑁆𑀢𑀺𑀜𑁆𑀘 𑀧𑀭𑀸𑀫𑀲𑀸𑀫𑀺, 𑀲𑀧𑀣𑀫𑁆𑀧𑀺 𑀢𑁂 𑀲𑀫𑁆𑀫 𑀅𑀳𑀁 𑀓𑀭𑁄𑀫𑀺;

𑀢𑀬𑀸 𑀧𑀫𑀼𑀢𑁆𑀢𑁄 𑀅𑀦𑀡𑁄 𑀪𑀯𑀺𑀢𑁆𑀯𑀸, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲’’𑀦𑁆𑀢𑀺. (𑀚𑀸. 𑁨.𑁨𑁧.𑁪𑁦𑁭) 𑁋

𑀫𑀳𑀸𑀲𑀢𑁆𑀢𑁂𑀦 𑀇𑀫𑀸𑀬 𑀕𑀸𑀣𑀸𑀬 𑀯𑀼𑀢𑁆𑀢𑀸𑀬 𑀧𑁄𑀭𑀺𑀲𑀸𑀤𑁄 ‘‘𑀅𑀬𑀁 𑀲𑀼𑀢𑀲𑁄𑀫𑁄 ‘𑀔𑀢𑁆𑀢𑀺𑀬𑁂𑀳𑀺 𑀅𑀓𑀢𑁆𑀢𑀩𑁆𑀩𑀁 𑀲𑀧𑀣𑀁 𑀓𑀭𑁄𑀫𑀻’𑀢𑀺 𑀯𑀤𑀢𑀺, 𑀕𑀦𑁆𑀢𑁆𑀯𑀸 𑀅𑀦𑀸𑀕𑀘𑁆𑀙𑀦𑁆𑀢𑁄𑀧𑀺 𑀫𑀫 𑀳𑀢𑁆𑀣𑀢𑁄 𑀦 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

‘‘𑀬𑁄 𑀢𑁂 𑀓𑀢𑁄 𑀲𑀗𑁆𑀕𑀭𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀭𑀝𑁆𑀞𑁂 𑀲𑀓𑁂 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂𑀦;

𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡 𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀲𑁆𑀲𑀽’’𑀢𑀺. (𑀚𑀸. 𑁨.𑁨𑁧.𑁪𑁦𑁮) 𑁋

𑀯𑀺𑀲𑁆𑀲𑀚𑁆𑀚𑁂𑀲𑀺.

𑀫𑀳𑀸𑀲𑀢𑁆𑀢𑁄 ¶ 𑀭𑀸𑀳𑀼𑀫𑀼𑀔𑀸 𑀫𑀼𑀢𑁆𑀢𑁄 𑀘𑀦𑁆𑀤𑁄 𑀯𑀺𑀬 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀔𑀺𑀧𑁆𑀧𑀫𑁂𑀯 𑀢𑀁 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀲𑁂𑀦𑀸𑀧𑀺𑀲𑁆𑀲 ‘‘𑀲𑀼𑀢𑀲𑁄𑀫𑀭𑀸𑀚𑀸 𑀧𑀡𑁆𑀟𑀺𑀢𑁄, 𑀧𑁄𑀭𑀺𑀲𑀸𑀤𑀁 𑀤𑀫𑁂𑀢𑁆𑀯𑀸 𑀲𑀻𑀳𑀫𑀼𑀔𑀸 𑀧𑀫𑀼𑀢𑁆𑀢𑀫𑀢𑁆𑀢𑀯𑀭𑀯𑀸𑀭𑀡𑁄 𑀯𑀺𑀬 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀘 ‘‘𑀭𑀸𑀚𑀸𑀦𑀁 𑀧𑁄𑀭𑀺𑀲𑀸𑀤𑀲𑁆𑀲 𑀤𑀢𑁆𑀯𑀸 𑀆𑀕𑀢𑀸’’𑀢𑀺 𑀕𑀭𑀳𑀪𑀬𑁂𑀦 𑀘 𑀩𑀳𑀺𑀦𑀕𑀭𑁂𑀬𑁂𑀯 𑀦𑀺𑀯𑀺𑀝𑁆𑀞𑀸 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀘𑁆𑀘𑀺𑀢𑁆𑀣, 𑀫𑀳𑀸𑀭𑀸𑀚, 𑀧𑁄𑀭𑀺𑀲𑀸𑀤𑁂𑀦 𑀦 𑀓𑀺𑀮𑀫𑀺𑀢𑁄’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀧𑁄𑀭𑀺𑀲𑀸𑀤𑁂𑀦 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀤𑀼𑀓𑁆𑀓𑀭𑀁 𑀓𑀢𑀁, 𑀢𑀣𑀸𑀭𑀽𑀧𑁄 𑀦𑀸𑀫 𑀘𑀡𑁆𑀟𑁄 𑀲𑀸𑀳𑀲𑀺𑀓𑁄 𑀫𑀫𑀁 𑀲𑀤𑁆𑀤𑀳𑀺𑀢𑁆𑀯𑀸 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑁄𑀧𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀦𑀸𑀕𑀭𑀸 𑀢𑀼𑀲𑀺𑀁𑀲𑀼.

𑀲𑁄𑀧𑀺 𑀥𑀫𑁆𑀫𑀲𑁄𑀡𑁆𑀟𑀢𑀸𑀬 𑀫𑀸𑀢𑀸𑀧𑀺𑀢𑀭𑁄𑀧𑀺 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀥𑀫𑁆𑀫𑀕𑀭𑀼𑀢𑀸𑀬 𑀲𑀬𑀁 𑀦𑀻𑀘𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀆𑀪𑀢𑀸 𑀲𑀢𑀸𑀭𑀳𑀕𑀸𑀣𑀸 𑀲𑀼𑀡𑁄𑀫𑀺 𑀆𑀘𑀭𑀺𑀬𑀸’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑁂𑀦 𑀬𑀸𑀘𑀺𑀢𑀓𑀸𑀮𑁂 𑀕𑀦𑁆𑀥𑁂𑀳𑀺 𑀳𑀢𑁆𑀣𑁂 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑀢𑁄 𑀫𑀦𑁄𑀭𑀫𑀁 𑀧𑁄𑀢𑁆𑀣𑀓𑀁 𑀦𑀻𑀳𑀭𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 ‘‘𑀢𑁂𑀦 𑀳𑀺 ¶ , 𑀫𑀳𑀸𑀭𑀸𑀚, 𑀲𑀼𑀡𑁄𑀳𑀻’’𑀢𑀺 𑀧𑁄𑀢𑁆𑀣𑀓𑀁 𑀯𑀸𑀘𑁂𑀦𑁆𑀢𑁄 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀲𑀓𑀺𑀤𑁂𑀯 ¶ 𑀲𑀼𑀢𑀲𑁄𑀫, 𑀲𑀩𑁆𑀪𑀺 𑀳𑁄𑀢𑀺 𑀲𑀫𑀸𑀕𑀫𑁄;

𑀲𑀸 𑀦𑀁 𑀲𑀗𑁆𑀕𑀢𑀺 𑀧𑀸𑀮𑁂𑀢𑀺, 𑀦𑀸𑀲𑀩𑁆𑀪𑀺 𑀩𑀳𑀼𑀲𑀗𑁆𑀕𑀫𑁄.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸, 𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;

𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺, 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺.

‘‘𑀦𑀪𑀜𑁆𑀘 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;

𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀲𑀢𑀜𑁆𑀘 𑀥𑀫𑁆𑀫𑁄 𑀅𑀲𑀢𑀜𑁆𑀘 𑀭𑀸𑀚𑀸’’𑀢𑀺. (𑀚𑀸. 𑁨.𑁨𑁧.𑁪𑁧𑁧-𑁪𑁧𑁪, 𑁪𑁪𑁫-𑁪𑁪𑁮);

𑀢𑀸 ¶ 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀲𑀨𑀮𑀁 𑀫𑁂 𑀆𑀕𑀫𑀦’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 ‘‘𑀇𑀫𑀸 𑀕𑀸𑀣𑀸 𑀦𑁂𑀯 𑀲𑀸𑀯𑀓𑀪𑀸𑀲𑀺𑀢𑀸, 𑀦 𑀇𑀲𑀺𑀪𑀸𑀲𑀺𑀢𑀸, 𑀦 𑀓𑀯𑀺𑀪𑀸𑀲𑀺𑀢𑀸, 𑀦 𑀤𑁂𑀯𑀪𑀸𑀲𑀺𑀢𑀸, 𑀲𑀩𑁆𑀩𑀜𑁆𑀜𑀼𑀦𑀸𑀯 𑀪𑀸𑀲𑀺𑀢𑀸. 𑀓𑀺𑀁 𑀦𑀼 𑀔𑁄 𑀅𑀕𑁆𑀖’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀇𑀫𑀁 𑀲𑀓𑀮𑀫𑁆𑀧𑀺 𑀘𑀓𑁆𑀓𑀯𑀸𑀴𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀢𑁆𑀢𑀭𑀢𑀦𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀺𑀦𑁆𑀦𑁂𑀧𑀺 𑀦𑁂𑀯 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑀁 𑀦𑀸𑀫 𑀳𑁄𑀢𑀺, 𑀅𑀳𑀁 𑀔𑁄 𑀧𑀦𑀲𑁆𑀲 𑀢𑀺𑀬𑁄𑀚𑀦𑀲𑀢𑀺𑀓𑁂 𑀓𑀼𑀭𑀼𑀭𑀝𑁆𑀞𑁂 𑀲𑀢𑁆𑀢𑀬𑁄𑀚𑀦𑀺𑀓𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀭𑀚𑁆𑀚𑀁 𑀤𑀸𑀢𑀼𑀁 𑀧𑀳𑁄𑀫𑀺. 𑀭𑀚𑁆𑀚𑀁 𑀓𑀸𑀢𑀼𑀁 𑀧𑀦𑀲𑁆𑀲 𑀪𑀸𑀕𑁆𑀬𑀁 𑀦𑀢𑁆𑀣𑀺, 𑀢𑀣𑀸 𑀳𑀺𑀲𑁆𑀲 𑀅𑀗𑁆𑀕𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦 𑀅𑀧𑁆𑀧𑀸𑀦𑀼𑀪𑀸𑀯𑀢𑀸 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀤𑀺𑀦𑁆𑀦𑀫𑁆𑀧𑀺 𑀭𑀚𑁆𑀚𑀁 𑀦 𑀇𑀫𑀲𑁆𑀫𑀺𑀁 𑀢𑀺𑀝𑁆𑀞𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀅𑀜𑁆𑀜𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀇𑀫𑀸 𑀕𑀸𑀣𑀸𑀬𑁄 𑀤𑁂𑀲𑁂𑀢𑁆𑀯𑀸 𑀓𑀺𑀁 𑀮𑀪𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀏𑀓𑁂𑀓𑀸𑀬 𑀲𑀢𑀁 𑀲𑀢𑀁, 𑀫𑀳𑀸𑀭𑀸𑀚, 𑀢𑁂𑀦𑁂𑀯 𑀲𑀢𑀸𑀭𑀳𑀕𑀸𑀣𑀸 𑀦𑀸𑀫 𑀚𑀸𑀢𑀸’’𑀢𑀺. 𑀅𑀣𑀲𑁆𑀲 𑀫𑀳𑀸𑀲𑀢𑁆𑀢𑁄 ‘‘𑀢𑁆𑀯𑀁 𑀆𑀘𑀭𑀺𑀬, 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸 𑀯𑀺𑀘𑀭𑀡𑀪𑀡𑁆𑀟𑀲𑁆𑀲 𑀅𑀕𑁆𑀖𑀁 𑀦 𑀚𑀸𑀦𑀸𑀲𑀻’’𑀢𑀺.

‘‘𑀲𑀳𑀲𑁆𑀲𑀺𑀬𑀸 ¶ 𑀇𑀫𑀸 𑀕𑀸𑀣𑀸, 𑀦𑀬𑀺𑀫𑀸 𑀕𑀸𑀣𑀸 𑀲𑀢𑀸𑀭𑀳𑀸;

𑀘𑀢𑁆𑀢𑀸𑀭𑀺 𑀢𑁆𑀯𑀁 𑀲𑀳𑀲𑁆𑀲𑀸𑀦𑀺, 𑀔𑀺𑀧𑁆𑀧𑀁 𑀕𑀡𑁆𑀳𑀸𑀳𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. (𑀚𑀸. 𑁨.𑁨𑁧.𑁪𑁧𑁫);

𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀤𑀸𑀧𑁂𑀢𑁆𑀯𑀸 𑀏𑀓𑀜𑁆𑀘 𑀲𑀼𑀔𑀬𑀸𑀦𑀓𑀁 𑀤𑀢𑁆𑀯𑀸 𑀫𑀳𑀢𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁂𑀦𑁂𑀯 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀩𑁆𑀭𑀸𑀳𑁆𑀫𑀡𑁂𑀦 𑀆𑀪𑀢𑀁 𑀲𑀤𑁆𑀥𑀫𑁆𑀫𑀭𑀢𑀦𑀁 𑀧𑀽𑀚𑁂𑀢𑁆𑀯𑀸 𑀢𑀲𑁆𑀲 𑀘 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻𑀢𑀺 𑀧𑁄𑀭𑀺𑀲𑀸𑀤𑀲𑁆𑀲 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀆𑀕𑀢𑁄. 𑀢𑀢𑁆𑀣 𑀬𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀓𑀢𑁆𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀢𑀁 𑀓𑀢𑀁, 𑀇𑀤𑀸𑀦𑀺 𑀧𑁄𑀭𑀺𑀲𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀯𑀸 ‘‘𑀢𑁂𑀦 𑀳𑀺, 𑀢𑀸𑀢 𑀲𑀼𑀢𑀲𑁄𑀫, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀺, 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀘𑁄𑀭𑀁 𑀕𑀡𑁆𑀳𑀺𑀲𑁆𑀲𑀸𑀫, 𑀫𑀸 𑀕𑀘𑁆𑀙 𑀘𑁄𑀭𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺 𑀬𑀸𑀘𑀺𑀁𑀲𑀼. 𑀲𑁄𑀴𑀲𑀲𑀳𑀲𑁆𑀲𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀲𑁂𑀲𑀧𑀭𑀺𑀚𑀦𑀸𑀧𑀺 ‘‘𑀅𑀫𑁆𑀳𑁂 𑀅𑀦𑀸𑀣𑁂 𑀓𑀢𑁆𑀯𑀸 𑀓𑀼𑀳𑀺𑀁 𑀕𑀘𑁆𑀙𑀲𑀺 𑀤𑁂𑀯𑀸’’𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. ‘‘𑀧𑀼𑀦𑀧𑀺 𑀓𑀺𑀭 𑀭𑀸𑀚𑀸 𑀘𑁄𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀫𑀳𑀸𑀲𑀢𑁆𑀢𑁄 ‘‘𑀧𑀝𑀺𑀜𑁆𑀜𑀸𑀬 𑀲𑀘𑁆𑀘𑀸𑀧𑀦𑀁 𑀦𑀸𑀫 𑀲𑀸𑀥𑀽𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀆𑀘𑀺𑀡𑁆𑀡𑀁, 𑀲𑁄𑀧𑀺 𑀫𑀫𑀁 𑀲𑀤𑁆𑀤𑀳𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀲𑁆𑀫𑀸 𑀕𑀫𑀺𑀲𑁆𑀲𑀸𑀫𑀺𑀬𑁂𑀯𑀸’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀲𑁂𑀲𑀚𑀦𑀁 𑀅𑀦𑀼𑀲𑀸𑀲𑁂𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀦𑁆𑀢𑁂𑀦 𑀇𑀢𑁆𑀣𑀸𑀕𑀸𑀭𑀸𑀤𑀺𑀦𑀸 𑀚𑀦𑁂𑀦 𑀅𑀦𑀼𑀕𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀢𑀁 𑀚𑀦𑀁 𑀦𑀺𑀯𑀢𑁆𑀢𑁂𑀢𑀼𑀁 𑀫𑀕𑁆𑀕𑁂 𑀤𑀡𑁆𑀟𑀓𑁂𑀦 𑀢𑀺𑀭𑀺𑀬𑀁 𑀮𑁂𑀔𑀁 𑀓𑀢𑁆𑀯𑀸 ‘‘𑀇𑀫𑀁 𑀫𑀫 𑀮𑁂𑀔𑀁 𑀫𑀸 𑀅𑀢𑀺𑀓𑁆𑀓𑀫𑀺𑀁𑀲𑀽’’𑀢𑀺 ¶ 𑀯𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄 𑀢𑁂𑀚𑀯𑀢𑁄 𑀫𑀳𑀸𑀲𑀢𑁆𑀢𑀲𑁆𑀲 𑀆𑀡𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀸𑀲𑀤𑁆𑀤𑁂𑀦 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀆𑀕𑀢𑀫𑀕𑁆𑀕𑁂𑀦𑁂𑀯 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀼𑀘𑁆𑀙𑀺 𑀫𑀁 𑀧𑁄𑀭𑀺𑀲𑀸𑀤𑁄’’𑀢𑀺𑀆𑀤𑀺.

𑀢𑀢𑁆𑀣 𑀓𑀺𑀁 𑀢𑁆𑀯𑀁 𑀇𑀘𑁆𑀙𑀲𑀺 𑀦𑀺𑀲𑀚𑁆𑀚𑀦𑁆𑀢𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀦𑁆𑀢𑀼𑀁 𑀫𑀫 𑀳𑀢𑁆𑀣𑀢𑁄 𑀦𑀺𑀲𑁆𑀲𑀚𑁆𑀚𑀦𑀁 𑀓𑀺𑀁 𑀇𑀘𑁆𑀙𑀲𑀺, 𑀢𑁆𑀯𑀁 ‘‘𑀫𑀬𑀸 𑀢𑀓𑁆𑀓𑀲𑀺𑀮𑀸𑀤𑀻𑀲𑀼 𑀘𑀺𑀭𑀧𑀭𑀺𑀘𑀺𑀢𑁄 𑀲𑀘𑁆𑀘𑀯𑀸𑀤𑀻 𑀘𑀸’’𑀢𑀺 𑀯𑀤𑀲𑀺, 𑀢𑀲𑁆𑀫𑀸 𑀬𑀣𑀸 𑀫𑀢𑀺 𑀢𑁂 𑀓𑀸𑀳𑀸𑀫𑀺, 𑀬𑀣𑀸𑀭𑀼𑀘𑀺 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀬𑀤𑀺 𑀫𑁂 𑀢𑁆𑀯𑀁 𑀧𑀼𑀦𑁂𑀳𑀺𑀲𑀻𑀢𑀺 𑀲𑀘𑁂 𑀧𑀼𑀦 𑀢𑁆𑀯𑀁 𑀏𑀓𑀁𑀲𑁂𑀦𑁂𑀯 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀲𑀺.

𑁧𑁦𑁮. 𑀧𑀡𑁆𑀳𑁂 𑀆𑀕𑀫𑀦𑀁 𑀫𑀫𑀸𑀢𑀺 𑀧𑀕𑁂𑀯 𑀫𑀫 𑀆𑀕𑀫𑀦𑀁 𑀢𑀲𑁆𑀲 ¶ 𑀧𑁄𑀭𑀺𑀲𑀸𑀤𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀸𑀢𑁄𑀯 𑀆𑀕𑀫𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀲𑁆𑀲𑀯𑀁 𑀓𑀢𑁆𑀯𑀸. 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑀬𑀺𑀁 𑀢𑀤𑀸𑀢𑀺 𑀢𑀤𑀸 𑀧𑁄𑀭𑀺𑀲𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀇𑀤𑀁 𑀯𑁄 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀣𑀸’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀲𑀺𑀁.

𑁧𑁦𑁯. 𑀓𑀲𑁆𑀫𑀸 𑀧𑀦 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑀬𑀺𑀦𑁆𑀢𑀺? 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀢𑀁 𑀥𑀫𑁆𑀫𑀦𑁆𑀢𑀺 𑀬𑀲𑁆𑀫𑀸 𑀧𑀦 𑀧𑀝𑀺𑀜𑁆𑀜𑀸𑀬 𑀲𑀘𑁆𑀘𑀸𑀧𑀦𑀁 𑀦𑀸𑀫 𑀲𑀢𑀁 𑀲𑀸𑀥𑀽𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀯𑁂𑀡𑀻 𑀓𑀼𑀮𑀯𑀁𑀲𑁄, 𑀢𑀲𑁆𑀫𑀸 𑀢𑀁 𑀲𑀘𑁆𑀘𑀧𑀸𑀭𑀫𑀺𑀢𑀸𑀥𑀫𑁆𑀫𑀁 𑀧𑀼𑀩𑁆𑀩𑀓𑀁 𑀧𑁄𑀭𑀸𑀡𑀁 𑀚𑀺𑀦𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑁂𑀯𑀺𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑁄𑀭𑀺𑀲𑀸𑀤𑀁 𑀉𑀧𑀸𑀕𑀫𑀺𑀁.

𑁧𑁧𑁦. 𑀦𑀢𑁆𑀣𑀺 𑀫𑁂 𑀲𑀁𑀲𑀬𑁄 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑁄𑀭𑀺𑀲𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀦𑁂 ‘‘𑀅𑀬𑀁 𑀫𑀁 𑀓𑀺𑀁 𑀦𑀼 ¶ 𑀔𑁄 𑀖𑀸𑀢𑁂𑀲𑁆𑀲𑀢𑀺, 𑀉𑀤𑀸𑀳𑀼 𑀦𑁄’’𑀢𑀺 𑀫𑀬𑁆𑀳𑀁 𑀲𑀁𑀲𑀬𑁄 𑀦𑀢𑁆𑀣𑀺. ‘‘𑀘𑀡𑁆𑀟𑁄 𑀲𑀸𑀳𑀲𑀺𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀲𑀢𑀔𑀢𑁆𑀢𑀺𑀬𑁂 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀓𑀭𑀡𑀲𑀚𑁆𑀚𑁄 𑀏𑀓𑀦𑁆𑀢𑁂𑀦𑁂𑀯 𑀖𑀸𑀢𑁂𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁄 𑀏𑀯 𑀓𑁂𑀯𑀮𑀁 𑀲𑀘𑁆𑀘𑀯𑀸𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀁 𑀉𑀧𑀸𑀕𑀫𑀺𑀁. 𑀬𑀲𑁆𑀫𑀸 𑀘𑁂𑀢𑀤𑁂𑀯𑀁, 𑀢𑀲𑁆𑀫𑀸 𑀲𑀘𑁆𑀘𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀧𑀭𑀫𑀢𑁆𑀣𑀪𑀸𑀯𑀧𑁆𑀧𑀢𑁆𑀢𑀸 𑀲𑀘𑁆𑀘𑀧𑀸𑀭𑀫𑀻𑀢𑀺.

𑀉𑀧𑀸𑀕𑀢𑁂 𑀧𑀦 𑀫𑀳𑀸𑀲𑀢𑁆𑀢𑁂 𑀯𑀺𑀓𑀲𑀺𑀢𑀧𑀼𑀡𑁆𑀟𑀭𑀻𑀓𑀧𑀤𑀼𑀫𑀲𑀲𑁆𑀲𑀺𑀭𑀺𑀓𑀫𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀯𑀺𑀕𑀢𑀫𑀭𑀡𑀪𑀬𑁄 𑀳𑀼𑀢𑁆𑀯𑀸 𑀆𑀕𑀢𑁄, 𑀓𑀺𑀲𑁆𑀲 𑀦𑀼 𑀔𑁄 𑀏𑀲 𑀆𑀦𑀼𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀢𑀲𑁆𑀲 𑀫𑀜𑁆𑀜𑁂 𑀥𑀫𑁆𑀫𑀲𑁆𑀲 𑀲𑀼𑀢𑀢𑁆𑀢𑀸 𑀅𑀬𑀁 𑀏𑀯𑀁 𑀢𑁂𑀚𑀯𑀸 ¶ 𑀦𑀺𑀩𑁆𑀪𑀬𑁄 𑀘 𑀚𑀸𑀢𑁄, 𑀅𑀳𑀫𑁆𑀧𑀺 𑀢𑀁 𑀲𑀼𑀢𑁆𑀯𑀸 𑀢𑁂𑀚𑀯𑀸 𑀦𑀺𑀩𑁆𑀪𑀬𑁄 𑀘 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 𑀫𑀳𑀸𑀲𑀢𑁆𑀢𑀁 𑀆𑀳 𑁋 ‘‘𑀲𑀼𑀡𑁄𑀫 𑀲𑀢𑀸𑀭𑀳𑀕𑀸𑀣𑀸𑀬𑁄 𑀬𑀸𑀲𑀁 𑀲𑀯𑀦𑀢𑁆𑀣𑀁 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀢𑁄’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁 𑀧𑁄𑀭𑀺𑀲𑀸𑀤𑁄 𑀧𑀸𑀧𑀥𑀫𑁆𑀫𑁄, 𑀇𑀫𑀁 𑀣𑁄𑀓𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀮𑀚𑁆𑀚𑀸𑀧𑁂𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑁋

‘‘𑀅𑀥𑀫𑁆𑀫𑀺𑀓𑀲𑁆𑀲 𑀮𑀼𑀤𑁆𑀤𑀲𑁆𑀲, 𑀦𑀺𑀘𑁆𑀘𑀁 𑀮𑁄𑀳𑀺𑀢𑀧𑀸𑀡𑀺𑀦𑁄;

𑀦𑀢𑁆𑀣𑀺 𑀲𑀘𑁆𑀘𑀁 𑀓𑀼𑀢𑁄 𑀥𑀫𑁆𑀫𑁄, 𑀓𑀺𑀁 𑀲𑀼𑀢𑁂𑀦 𑀓𑀭𑀺𑀲𑁆𑀲𑀲𑀻’’𑀢𑀺. (𑀚𑀸. 𑁨.𑁨𑁧.𑁪𑁨𑁭) 𑁋

𑀯𑀢𑁆𑀯𑀸 𑀧𑀼𑀦 𑀢𑁂𑀦 𑀲𑀼𑀝𑁆𑀞𑀼𑀢𑀭𑀁 𑀲𑀜𑁆𑀚𑀸𑀢𑀲𑀯𑀦𑀸𑀤𑀭𑁂𑀦 𑁋

‘‘𑀲𑀼𑀢𑁆𑀯𑀸 𑀥𑀫𑁆𑀫𑀁 𑀯𑀺𑀚𑀸𑀦𑀦𑁆𑀢𑀺, 𑀦𑀭𑀸 𑀓𑀮𑁆𑀬𑀸𑀡𑀧𑀸𑀧𑀓𑀁;

𑀅𑀧𑀺 𑀕𑀸𑀣𑀸 𑀲𑀼𑀡𑀺𑀢𑁆𑀯𑀸𑀦, 𑀥𑀫𑁆𑀫𑁂 𑀫𑁂 𑀭𑀫𑀢𑁂 𑀫𑀦𑁄’’𑀢𑀺. (𑀚𑀸. 𑁨.𑁨𑁧.𑁪𑁪𑁪) 𑁋

𑀯𑀼𑀢𑁆𑀢𑁂 ¶ ‘‘𑀅𑀬𑀁 𑀅𑀢𑀺𑀯𑀺𑀬 𑀲𑀜𑁆𑀚𑀸𑀢𑀸𑀤𑀭𑁄 𑀲𑁄𑀢𑀼𑀓𑀸𑀫𑁄, 𑀳𑀦𑁆𑀤𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀲𑀫𑁆𑀫, 𑀲𑀸𑀥𑀼𑀓𑀁 𑀲𑀼𑀡𑁄𑀳𑀺 𑀫𑀦𑀲𑀺𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀦𑀦𑁆𑀤𑀩𑁆𑀭𑀸𑀳𑁆𑀫𑀡𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀕𑀸𑀣𑀸𑀦𑀁 𑀲𑀓𑁆𑀓𑀘𑁆𑀘𑀁 𑀣𑀼𑀢𑀺𑀁 𑀓𑀢𑁆𑀯𑀸 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀏𑀓𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀤𑁂𑀯𑀢𑀸𑀲𑀼 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸𑀲𑀼 𑀫𑀳𑀸𑀲𑀢𑁆𑀢𑁄 𑀧𑁄𑀭𑀺𑀲𑀸𑀤𑀲𑁆𑀲 𑁋

‘‘𑀲𑀓𑀺𑀤𑁂𑀯 ¶ 𑀫𑀳𑀸𑀭𑀸𑀚, 𑀲𑀩𑁆𑀪𑀺 𑀳𑁄𑀢𑀺 𑀲𑀫𑀸𑀕𑀫𑁄;

𑀲𑀸 𑀦𑀁 𑀲𑀗𑁆𑀕𑀢𑀺 𑀧𑀸𑀮𑁂𑀢𑀺, 𑀦𑀸𑀲𑀩𑁆𑀪𑀺 𑀩𑀳𑀼𑀲𑀗𑁆𑀕𑀫𑁄.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸, 𑀅𑀢𑁆𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;

𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺, 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺.

‘‘𑀦𑀪𑀜𑁆𑀘 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;

𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀲𑀢𑀜𑁆𑀘 𑀥𑀫𑁆𑀫𑁄 𑀅𑀲𑀢𑀜𑁆𑀘 𑀭𑀸𑀚𑀸’’𑀢𑀺. (𑀚𑀸. 𑁨.𑁨𑁧.𑁪𑁧𑁧-𑁪𑁧𑁪) 𑁋

𑀥𑀫𑁆𑀫𑀁 ¶ 𑀓𑀣𑁂𑀲𑀺. 𑀢𑀲𑁆𑀲 𑀢𑁂𑀦 𑀲𑀼𑀓𑀣𑀺𑀢𑀢𑁆𑀢𑀸 𑀘𑁂𑀯 𑀅𑀢𑁆𑀢𑀦𑁄 𑀘 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀕𑀸𑀣𑀸 𑀲𑀼𑀡𑀦𑁆𑀢𑀲𑁆𑀲𑁂𑀯 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀧𑀭𑀺𑀧𑀽𑀭𑀺. 𑀲𑁄 𑀩𑁄𑀥𑀺𑀲𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀲𑀫𑁆𑀫 𑀲𑀼𑀢𑀲𑁄𑀫, 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀳𑀺𑀭𑀜𑁆𑀜𑀸𑀤𑀺𑀁 𑀦 𑀧𑀲𑁆𑀲𑀸𑀫𑀺, 𑀏𑀓𑁂𑀓𑀸𑀬 𑀕𑀸𑀣𑀸𑀬 𑀏𑀓𑁂𑀓𑀁 𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀢𑁆𑀯𑀁 𑀅𑀢𑁆𑀢𑀦𑁄𑀧𑀺 𑀳𑀺𑀢𑀸𑀦𑀺 𑀅𑀚𑀸𑀦𑀦𑁆𑀢𑁄 𑀧𑀭𑀲𑁆𑀲 𑀓𑀺𑀁 𑀦𑀸𑀫 𑀯𑀭𑀁 𑀤𑀲𑁆𑀲𑀲𑀻’’𑀢𑀺 𑀅𑀧𑀲𑀸𑀤𑁂𑀢𑁆𑀯𑀸 𑀧𑀼𑀦 𑀢𑁂𑀦 ‘‘𑀯𑀭𑀁 𑀕𑀡𑁆𑀳𑀣𑀸’’𑀢𑀺 𑀬𑀸𑀘𑀺𑀢𑁄 𑀲𑀩𑁆𑀩𑀧𑀞𑀫𑀁 ‘‘𑀅𑀳𑀁 𑀘𑀺𑀭𑀓𑀸𑀮𑀁 𑀢𑀁 𑀅𑀭𑁄𑀕𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀯𑀭𑀁 𑀬𑀸𑀘𑀺. 𑀲𑁄 ‘‘𑀅𑀬𑀁 𑀇𑀤𑀸𑀦𑀺 𑀫𑁂 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑀲𑁆𑀲 𑀫𑀳𑀸𑀦𑀢𑁆𑀣𑀓𑀭𑀲𑁆𑀲 𑀫𑀬𑁆𑀳𑀫𑁂𑀯 𑀚𑀻𑀯𑀺𑀢𑀫𑀺𑀘𑁆𑀙𑀢𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀯𑀜𑁆𑀘𑁂𑀢𑁆𑀯𑀸 𑀯𑀭𑀲𑁆𑀲 𑀕𑀳𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀅𑀤𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀳𑀺 𑀉𑀧𑀸𑀬𑀓𑀼𑀲𑀮𑀢𑀸𑀬 𑀢𑀲𑁆𑀲 𑀘𑀺𑀭𑀁 𑀚𑀻𑀯𑀺𑀢𑀼𑀓𑀸𑀫𑀢𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀬𑀸𑀘𑀺. 𑀅𑀣 ‘‘𑀧𑀭𑁄𑀲𑀢𑀁 𑀔𑀢𑁆𑀢𑀺𑀬𑀸𑀦𑀁 𑀚𑀻𑀯𑀺𑀢𑀁 𑀤𑁂𑀳𑀻’’𑀢𑀺 𑀤𑀼𑀢𑀺𑀬𑀁 𑀯𑀭𑀁, 𑀢𑁂𑀲𑀁 𑀲𑀓𑁂 𑀭𑀝𑁆𑀞𑁂 𑀧𑀝𑀺𑀧𑀸𑀤𑀦𑀁 𑀢𑀢𑀺𑀬𑀁 𑀯𑀭𑀁, 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀦𑀢𑁄 𑀯𑀺𑀭𑀫𑀡𑀁 𑀘𑀢𑀼𑀢𑁆𑀣𑀁 𑀯𑀭𑀁 𑀬𑀸𑀘𑀺. 𑀲𑁄 ¶ 𑀢𑀻𑀡𑀺 𑀯𑀭𑀸𑀦𑀺 𑀤𑀢𑁆𑀯𑀸 𑀘𑀢𑀼𑀢𑁆𑀣𑀁 𑀯𑀭𑀁 𑀅𑀤𑀸𑀢𑀼𑀓𑀸𑀫𑁄 ‘‘𑀅𑀜𑁆𑀜𑀁 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸𑀧𑀺 𑀫𑀳𑀸𑀲𑀢𑁆𑀢𑁂𑀦 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀢𑀫𑁆𑀧𑀺 𑀅𑀤𑀸𑀲𑀺𑀬𑁂𑀯.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀧𑁄𑀭𑀺𑀲𑀸𑀤𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀭𑀸𑀚𑀸𑀦𑁄 𑀫𑁄𑀘𑀸𑀧𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀤𑀸𑀭𑀓𑀸𑀦𑀁 𑀓𑀡𑁆𑀡𑀢𑁄 𑀲𑀼𑀢𑁆𑀢𑀯𑀝𑁆𑀝𑀺 𑀯𑀺𑀬 𑀲𑀡𑀺𑀓𑀁 𑀭𑀚𑁆𑀚𑀼𑀬𑁄 𑀦𑀻𑀳𑀭𑀺𑀢𑁆𑀯𑀸 𑀧𑁄𑀭𑀺𑀲𑀸𑀤𑁂𑀦 𑀏𑀓𑀁 𑀢𑀘𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑁂𑀦 𑀖𑀁𑀲𑀺𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑀢𑀮𑀸𑀦𑀺 𑀫𑀓𑁆𑀔𑁂𑀲𑀺. 𑀢𑀗𑁆𑀔𑀡𑀁 𑀏𑀯 𑀨𑀸𑀲𑀼𑀓𑀁 𑀅𑀳𑁄𑀲𑀺. 𑀤𑁆𑀯𑀻𑀳𑀢𑀻𑀳𑀁 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀢𑁂 𑀅𑀭𑁄𑀕𑁂 𑀓𑀸𑀭𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀪𑀺𑀚𑁆𑀚𑀦𑀓𑀲𑀪𑀸𑀯𑀁 ¶ 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀸𑀭𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀁 𑀩𑀸𑀭𑀸𑀡𑀲𑀺𑀁 𑀦𑁂𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀢𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀕𑀭𑀁 𑀧𑁂𑀲𑁂𑀢𑁆𑀯𑀸 𑀇𑀦𑁆𑀤𑀧𑀢𑁆𑀣𑀦𑀕𑀭𑀢𑁄 𑀆𑀕𑀢𑀸𑀬 𑀅𑀢𑁆𑀢𑀦𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀢𑁄 𑀢𑀼𑀝𑁆𑀞𑀧𑀫𑀼𑀤𑀺𑀢𑁂𑀦 𑀦𑀸𑀕𑀭𑀚𑀦𑁂𑀦 𑀲𑀫𑁆𑀧𑀭𑀺𑀯𑀸𑀭𑀺𑀬𑀫𑀸𑀦𑁄 𑀅𑀦𑁆𑀢𑁂𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀢𑀮𑀁 𑀅𑀪𑀺𑀭𑀼𑀳𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀫𑀳𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑁄 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄 𑀧𑀸𑀭𑀫𑀺𑀬𑁄 𑀅𑀦𑀼𑀩𑁆𑀭𑀽𑀳𑁂𑀲𑀺. 𑀢𑁂𑀧𑀺 𑀭𑀸𑀚𑀸𑀦𑁄 𑀫𑀳𑀸𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑀬𑀺𑀁𑀲𑀼.

𑀢𑀤𑀸 𑀧𑁄𑀭𑀺𑀲𑀸𑀤𑁄 ¶ 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀓𑀸𑀴𑀳𑀢𑁆𑀣𑀺𑀅𑀫𑀘𑁆𑀘𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀦𑀦𑁆𑀤𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀭𑀸𑀚𑀸𑀦𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀲𑀼𑀢𑀲𑁄𑀫𑀫𑀳𑀸𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄𑀧𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀅𑀮𑀻𑀦𑀲𑀢𑁆𑀢𑀼𑀘𑀭𑀺𑀬𑀸𑀯𑀡𑁆𑀡𑀦𑀸𑀬 (𑀘𑀭𑀺𑀬𑀸 𑀅𑀝𑁆𑀞. 𑁨.𑁭𑁪 𑀆𑀤𑀬𑁄) 𑀯𑀺𑀬 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀫𑀳𑀸𑀲𑀼𑀢𑀲𑁄𑀫𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀧𑀸𑀭𑀫𑀻 𑀦𑀺𑀝𑁆𑀞𑀺𑀢𑀸.

𑁧𑁩. 𑀲𑀼𑀯𑀡𑁆𑀡𑀲𑀸𑀫𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁧𑁧. 𑀢𑁂𑀭𑀲𑀫𑁂 ¶ 𑀲𑀸𑀫𑁄 𑀬𑀤𑀸 𑀯𑀦𑁂 𑀆𑀲𑀺𑀦𑁆𑀢𑀺 𑀳𑀺𑀫𑀯𑀦𑁆𑀢𑀲𑁆𑀫𑀺𑀁 𑀫𑀺𑀕𑀲𑀫𑁆𑀫𑀢𑀸𑀬 𑀦𑀸𑀫 𑀦𑀤𑀺𑀬𑀸 𑀢𑀻𑀭𑁂 𑀫𑀳𑀢𑀺 𑀅𑀭𑀜𑁆𑀜𑁂 𑀲𑀸𑀫𑁄 𑀦𑀸𑀫 𑀢𑀸𑀧𑀲𑀓𑀼𑀫𑀸𑀭𑁄 𑀬𑀤𑀸 𑀅𑀳𑁄𑀲𑀺. 𑀲𑀓𑁆𑀓𑁂𑀦 𑀅𑀪𑀺𑀦𑀺𑀫𑁆𑀫𑀺𑀢𑁄𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀉𑀧𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀚𑀸𑀢𑀢𑁆𑀢𑀸 𑀲𑀓𑁆𑀓𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄 𑀚𑀦𑀺𑀢𑁄. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀦𑀤𑀺𑀬𑀸 𑀢𑀻𑀭𑁂 𑀏𑀓𑁄 𑀦𑁂𑀲𑀸𑀤𑀕𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀣 𑀚𑁂𑀝𑁆𑀞𑀦𑁂𑀲𑀸𑀤𑀲𑁆𑀲 𑀧𑀼𑀢𑁆𑀢𑁄 𑀚𑀸𑀢𑁄. 𑀢𑀲𑁆𑀲 ‘‘𑀤𑀼𑀓𑀽𑀮𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀢𑀲𑁆𑀲𑀸 𑀏𑀯 𑀦𑀤𑀺𑀬𑀸 𑀧𑀭𑀢𑀻𑀭𑁂𑀧𑀺 𑀏𑀓𑁄 𑀦𑁂𑀲𑀸𑀤𑀕𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀣 𑀚𑁂𑀝𑁆𑀞𑀦𑁂𑀲𑀸𑀤𑀲𑁆𑀲 𑀥𑀻𑀢𑀸 𑀚𑀸𑀢𑀸. 𑀢𑀲𑁆𑀲𑀸 ‘‘𑀧𑀸𑀭𑀺𑀓𑀸’’𑀢𑀺 𑀦𑀸𑀫𑀫𑀓𑀁𑀲𑀼. 𑀢𑁂 𑀉𑀪𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀢𑁄 𑀆𑀕𑀢𑀸 𑀲𑀼𑀤𑁆𑀥𑀲𑀢𑁆𑀢𑀸. 𑀢𑁂𑀲𑀁 𑀯𑀬𑀧𑁆𑀧𑀢𑁆𑀢𑀸𑀦𑀁 𑀅𑀦𑀺𑀘𑁆𑀙𑀫𑀸𑀦𑀸𑀦𑀁𑀬𑁂𑀯 𑀆𑀯𑀸𑀳𑀯𑀺𑀯𑀸𑀳𑀁 ¶ 𑀓𑀭𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀓𑀺𑀮𑁂𑀲𑀲𑀫𑀼𑀤𑁆𑀤𑀁 𑀅𑀦𑁄𑀢𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀸𑀦𑁄 𑀯𑀺𑀬 𑀏𑀓𑀢𑁄 𑀯𑀲𑀺𑀁𑀲𑀼. 𑀦 𑀘 𑀓𑀺𑀜𑁆𑀘𑀺 𑀦𑁂𑀲𑀸𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺.

𑀅𑀣 𑀤𑀼𑀓𑀽𑀮𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀢𑀸𑀢, 𑀢𑁆𑀯𑀁 𑀦𑁂𑀲𑀸𑀤𑀓𑀫𑁆𑀫𑀁 𑀦 𑀓𑀭𑁄𑀲𑀺, 𑀦𑁂𑀯 𑀖𑀭𑀸𑀯𑀸𑀲𑀁 𑀇𑀘𑁆𑀙𑀲𑀺, 𑀓𑀺𑀁 𑀦𑀸𑀫 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀢𑀼𑀫𑁆𑀳𑁂𑀲𑀼 𑀅𑀦𑀼𑀚𑀸𑀦𑀦𑁆𑀢𑁂𑀲𑀼 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀧𑀩𑁆𑀩𑀚𑀸𑀳𑀻’’𑀢𑀺. 𑀤𑁆𑀯𑁂𑀧𑀺 𑀚𑀦𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀫𑀺𑀕𑀲𑀫𑁆𑀫𑀢𑀸 𑀦𑀸𑀫 𑀦𑀤𑀻 𑀳𑀺𑀫𑀯𑀦𑁆𑀢𑀢𑁄 𑀑𑀢𑀭𑀺𑀢𑁆𑀯𑀸 𑀕𑀗𑁆𑀕𑀁 𑀧𑀢𑁆𑀢𑀸, 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀕𑀗𑁆𑀕𑀁 𑀧𑀳𑀸𑀬 𑀫𑀺𑀕𑀲𑀫𑁆𑀫𑀢𑀸𑀪𑀺𑀫𑀼𑀔𑀸 𑀅𑀪𑀺𑀭𑀼𑀳𑀺𑀁𑀲𑀼. 𑀢𑀤𑀸 ¶ 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀲𑁆𑀲𑀫𑀁 𑀫𑀸𑀧𑁂𑀲𑀺. 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑁆𑀓𑀤𑀢𑁆𑀢𑀺𑀬𑁂 𑀅𑀲𑁆𑀲𑀫𑁂 𑀓𑀸𑀫𑀸𑀯𑀘𑀭𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀧𑀝𑀺𑀯𑀲𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀢𑁂𑀲𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀢𑀺.

𑀲𑁄 𑀏𑀓𑀤𑀺𑀯𑀲𑀁 ‘‘𑀢𑁂𑀲𑀁 𑀘𑀓𑁆𑀔𑀽 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀯𑁄 𑀘𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀬𑁄 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀚𑀕𑁆𑀕𑀦𑀓𑀁 𑀧𑀼𑀢𑁆𑀢𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀚𑀸𑀦𑀸𑀫𑀺 𑀢𑀼𑀫𑁆𑀳𑀸𑀓𑀁 𑀲𑀼𑀤𑁆𑀥𑀘𑀺𑀢𑁆𑀢𑀢𑀁, 𑀢𑀲𑁆𑀫𑀸 𑀧𑀸𑀭𑀺𑀓𑀸𑀬 𑀉𑀢𑀼𑀦𑀺𑀓𑀸𑀮𑁂 𑀦𑀸𑀪𑀺𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑁂𑀬𑁆𑀬𑀸𑀣 ¶ , 𑀏𑀯𑀁 𑀯𑁄 𑀧𑀼𑀢𑁆𑀢𑁄 𑀚𑀸𑀬𑀺𑀲𑁆𑀲𑀢𑀺, 𑀲𑁄 𑀯𑁄 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀤𑀼𑀓𑀽𑀮𑀧𑀡𑁆𑀟𑀺𑀢𑁄 𑀢𑀁 𑀓𑀸𑀭𑀡𑀁 𑀧𑀸𑀭𑀺𑀓𑀸𑀬 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀲𑁆𑀲𑀸 𑀉𑀢𑀼𑀦𑀺𑀓𑀸𑀮𑁂 𑀦𑀸𑀪𑀺𑀁 𑀧𑀭𑀸𑀫𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑁂𑀦𑁂𑀯𑀲𑁆𑀲 ‘‘𑀲𑀼𑀯𑀡𑁆𑀡𑀲𑀸𑀫𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀅𑀧𑀭𑀪𑀸𑀕𑁂 𑀯𑀟𑁆𑀠𑀺𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀫𑁆𑀧𑀺 𑀫𑀸𑀢𑀸𑀧𑀺𑀢𑀭𑁄 𑀭𑀓𑁆𑀔𑀦𑁆𑀢𑀸 𑀅𑀲𑁆𑀲𑀫𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀯𑀦𑀫𑀽𑀮𑀨𑀮𑀸𑀨𑀮𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀯𑀦𑁂 𑀨𑀮𑀸𑀨𑀮𑀁 𑀆𑀤𑀸𑀬 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀢𑁄 𑀅𑀯𑀺𑀤𑀽𑀭𑁂 𑀫𑁂𑀖𑁂 𑀉𑀝𑁆𑀞𑀺𑀢𑁂 𑀭𑀼𑀓𑁆𑀔𑀫𑀽𑀮𑀁 𑀧𑀯𑀺𑀲𑀺𑀢𑁆𑀯𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀞𑀺𑀢𑀸𑀦𑀁 𑀲𑀭𑀻𑀭𑀢𑁄 𑀲𑁂𑀤𑀕𑀦𑁆𑀥𑀫𑀺𑀲𑁆𑀲𑀓𑁂 𑀉𑀤𑀓𑁂 𑀢𑀲𑁆𑀫𑀺𑀁 𑀯𑀫𑁆𑀫𑀺𑀓𑀩𑀺𑀮𑁂 𑀞𑀺𑀢𑀲𑁆𑀲 𑀆𑀲𑀺𑀯𑀺𑀲𑀲𑁆𑀲 𑀦𑀸𑀲𑀸𑀧𑀼𑀝𑀁 𑀧𑀯𑀺𑀝𑁆𑀞𑁂 𑀆𑀲𑀺𑀯𑀺𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀦𑀸𑀲𑀸𑀯𑀸𑀢𑁂𑀦 𑀧𑀳𑀭𑀺. 𑀤𑁆𑀯𑁂 𑀅𑀦𑁆𑀥𑀸 𑀳𑀼𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀯𑀺𑀭𑀯𑀺𑀁𑀲𑀼. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀫𑀫 𑀫𑀸𑀢𑀸𑀧𑀺𑀢𑀭𑁄 𑀅𑀢𑀺𑀘𑀺𑀭𑀸𑀬𑀦𑁆𑀢𑀺, 𑀓𑀸 𑀦𑀼 𑀔𑁄 𑀢𑁂𑀲𑀁 𑀧𑀯𑀢𑁆𑀢𑀻’’𑀢𑀺 𑀧𑀝𑀺𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀲𑀤𑁆𑀤𑀫𑀓𑀸𑀲𑀺. 𑀢𑁂 𑀢𑀲𑁆𑀲 𑀲𑀤𑁆𑀤𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀝𑀺𑀲𑀤𑁆𑀤𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 ‘‘𑀢𑀸𑀢 𑀲𑀸𑀫, 𑀇𑀥 𑀧𑀭𑀺𑀧𑀦𑁆𑀣𑁄 𑀅𑀢𑁆𑀣𑀺, 𑀫𑀸 𑀆𑀕𑀫𑀻’’𑀢𑀺 𑀯𑀢𑁆𑀯𑀸 𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀲𑀬𑀫𑁂𑀯 𑀲𑀫𑀸𑀕𑀫𑀺𑀁𑀲𑀼. 𑀲𑁄 ‘‘𑀓𑁂𑀦 𑀯𑁄 𑀓𑀸𑀭𑀡𑁂𑀦 𑀘𑀓𑁆𑀔𑀽𑀦𑀺 𑀯𑀺𑀦𑀝𑁆𑀞𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀸𑀢, 𑀫𑀬𑀁 𑀦 𑀚𑀸𑀦𑀸𑀫, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀞𑀺𑀢𑀸, 𑀅𑀣 𑀦 𑀧𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂 𑀏𑀯 𑀅𑀜𑁆𑀜𑀸𑀲𑀺 ‘‘𑀢𑀢𑁆𑀣 𑀆𑀲𑀺𑀯𑀺𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀓𑀼𑀤𑁆𑀥𑁂𑀦 𑀦𑀸𑀲𑀸𑀯𑀸𑀢𑁄 𑀯𑀺𑀲𑁆𑀲𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀣 ¶ ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀯𑁄 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀢𑁂𑀲𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀺𑀲𑀜𑁆𑀘𑀭𑀡𑀝𑁆𑀞𑀸𑀦𑁂 𑀭𑀚𑁆𑀚𑀼𑀓𑁂 𑀩𑀦𑁆𑀥𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀅𑀲𑁆𑀲𑀫𑁂 𑀞𑀧𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀨𑀮𑀸𑀦𑀺 𑀆𑀳𑀭𑀢𑀺, 𑀧𑀸𑀢𑁄𑀯 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀢𑀺, 𑀧𑀸𑀦𑀻𑀬𑀁 𑀆𑀳𑀭𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀤𑀦𑁆𑀢𑀓𑀝𑁆𑀞𑀫𑀼𑀔𑁄𑀤𑀓𑀸𑀦𑀺 ¶ 𑀤𑀢𑁆𑀯𑀸 𑀫𑀥𑀼𑀭𑀨𑀮𑀸𑀨𑀮𑀁 𑀤𑁂𑀢𑀺. 𑀢𑁂𑀳𑀺 𑀫𑀼𑀔𑁂 𑀯𑀺𑀓𑁆𑀔𑀸𑀮𑀺𑀢𑁂 𑀲𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀅𑀯𑀺𑀤𑀽𑀭𑁂𑀬𑁂𑀯 𑀅𑀘𑁆𑀙𑀢𑀺 𑁋 ‘‘𑀓𑀺𑀁 𑀦𑀼 𑀔𑁄 𑀇𑀫𑁂 𑀆𑀡𑀸𑀧𑁂𑀦𑁆𑀢𑀻’’𑀢𑀺. 𑀯𑀺𑀲𑁂𑀲𑁂𑀦 𑀘 𑀫𑁂𑀢𑁆𑀢𑀁 𑀩𑀳𑀼𑀮𑀫𑀓𑀸𑀲𑀺, 𑀢𑁂𑀦𑀲𑁆𑀲 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀸 𑀅𑀳𑁂𑀲𑀼𑀁 ¶ . 𑀬𑀣𑀸 𑀘𑀲𑁆𑀲 𑀲𑀢𑁆𑀢𑀸, 𑀏𑀯𑀁 𑀲𑀢𑁆𑀢𑀸𑀦𑀁 𑀲𑁄 𑀩𑁄𑀥𑀺𑀲𑀢𑁆𑀢𑁄 𑀅𑀧𑁆𑀧𑀝𑀺𑀓𑁆𑀓𑀽𑀮𑁄. 𑀏𑀯𑀁 𑀲𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀨𑀮𑀸𑀨𑀮𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑁄𑀧𑀺 𑀆𑀕𑀘𑁆𑀙𑀦𑁆𑀢𑁄𑀧𑀺 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀏𑀯 𑀅𑀳𑁄𑀲𑀺. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀺𑀧𑀓𑁆𑀔𑀲𑀢𑁆𑀢𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑀸, 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀧𑀦𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀢𑀺𑀭𑀘𑁆𑀙𑀸𑀦𑀕𑀢𑀸 𑀫𑀼𑀤𑀼𑀘𑀺𑀢𑁆𑀢𑀢𑀁 𑀧𑀝𑀺𑀮𑀪𑀺𑀁𑀲𑀼. 𑀇𑀢𑀺 𑀲𑁄 𑀲𑀩𑁆𑀩𑀢𑁆𑀣 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀅𑀪𑀻𑀭𑀽 𑀅𑀦𑀼𑀢𑁆𑀭𑀸𑀲𑀻 𑀩𑁆𑀭𑀳𑁆𑀫𑀸 𑀯𑀺𑀬 𑀅𑀯𑁂𑀭𑁄 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀯𑀦𑁂 𑀲𑀻𑀳𑀩𑁆𑀬𑀕𑁆𑀖𑁂 𑀘, 𑀫𑁂𑀢𑁆𑀢𑀸𑀬𑀫𑀼𑀧𑀦𑀸𑀫𑀬𑀺’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀫𑁂𑀢𑁆𑀢𑀸𑀬𑀫𑀼𑀧𑀦𑀸𑀫𑀬𑀺𑀦𑁆𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑁂 𑀲𑀻𑀳𑀩𑁆𑀬𑀕𑁆𑀖𑁂𑀧𑀺 𑀨𑀭𑀺, 𑀧𑀕𑁂𑀯 𑀲𑁂𑀲𑀲𑀢𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀫𑁂𑀢𑁆𑀢𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦𑀸𑀢𑀺 𑀫𑁂𑀢𑁆𑀢𑀸𑀬𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸. 𑀢𑀁 𑀫𑁂𑀢𑁆𑀢𑀸𑀬𑀁 𑀉𑀧𑀦𑀸𑀫𑀬𑀺𑀁 𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁄 𑀉𑀧𑀦𑁂𑀲𑀺𑀁. ‘‘𑀲𑀻𑀳𑀩𑁆𑀬𑀕𑁆𑀖𑁂𑀳𑀻’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀦 𑀓𑁂𑀯𑀮𑀫𑀳𑀫𑁂𑀯, 𑀅𑀣 𑀔𑁄 𑀧𑀯𑀦𑁂 𑀲𑀻𑀳𑀩𑁆𑀬𑀕𑁆𑀖𑁂𑀳𑀺, 𑀬𑀲𑁆𑀫𑀺𑀁 𑀫𑀳𑀸𑀯𑀦𑁂 𑀢𑀤𑀸 𑀅𑀳𑀁 𑀯𑀺𑀳𑀭𑀸𑀫𑀺, 𑀢𑀢𑁆𑀣 𑀲𑀻𑀳𑀩𑁆𑀬𑀕𑁆𑀖𑁂𑀳𑀺 𑀲𑀤𑁆𑀥𑀺𑀁 𑀅𑀳𑀁 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀁 𑀉𑀧𑀦𑀸𑀫𑁂𑀲𑀺𑀁. 𑀲𑀻𑀳𑀩𑁆𑀬𑀕𑁆𑀖𑀸𑀧𑀺 𑀳𑀺 𑀢𑀤𑀸 𑀫𑀫𑀸𑀦𑀼𑀪𑀸𑀯𑁂𑀦 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀧𑀝𑀺𑀮𑀪𑀺𑀁𑀲𑀼, 𑀧𑀕𑁂𑀯 𑀇𑀢𑀭𑁂 𑀲𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁧𑁨. 𑀧𑀲𑀤𑀫𑀺𑀕𑀯𑀭𑀸𑀳𑁂𑀳𑀻𑀢𑀺 𑀧𑀲𑀤𑀫𑀺𑀕𑁂𑀳𑀺 𑀘𑁂𑀯 𑀯𑀦𑀲𑀽𑀓𑀭𑁂𑀳𑀺 𑀘. 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀏𑀢𑁂𑀳𑀺 𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑀺𑀢𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀲𑀺𑀁.

𑁧𑁧𑁩. 𑀇𑀤𑀸𑀦𑀺 𑀢𑀤𑀸 𑀅𑀢𑁆𑀢𑀦𑁄 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀮𑀤𑁆𑀥𑀁 𑀆𑀦𑀺𑀲𑀁𑀲𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑀼𑀁 ‘‘𑀦 𑀫𑀁 𑀓𑁄𑀘𑀺 𑀉𑀢𑁆𑀢𑀲𑀢𑀻’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀲𑀩𑀺𑀴𑀸𑀭𑀸𑀤𑀺𑀓𑁄 𑀪𑀻𑀭𑀼𑀓𑀚𑀸𑀢𑀺𑀓𑁄𑀧𑀺 𑀓𑁄𑀘𑀺 𑀲𑀢𑁆𑀢𑁄 𑀫𑀁 𑀦 𑀉𑀢𑁆𑀢𑀲𑀢𑀺 𑀦 𑀉𑀩𑁆𑀩𑀺𑀚𑁆𑀚𑁂𑀢𑀺. 𑀅𑀳𑀫𑁆𑀧𑀺 𑀓𑀲𑁆𑀲𑀘𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀢𑀺𑀭𑀘𑁆𑀙𑀸𑀦𑀢𑁄 𑀬𑀓𑁆𑀔𑀸𑀤𑀺𑀅𑀫𑀦𑀼𑀲𑁆𑀲𑀢𑁄 𑀮𑀼𑀤𑁆𑀤𑀮𑁄𑀳𑀺𑀢𑀧𑀸𑀡𑀺𑀫𑀦𑀼𑀲𑁆𑀲𑀢𑁄𑀢𑀺 𑀓𑀼𑀢𑁄𑀘𑀺𑀧𑀺 𑀦 𑀪𑀸𑀬𑀸𑀫𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀫𑁂𑀢𑁆𑀢𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄 𑀘𑀺𑀭𑀓𑀸𑀮𑀁 𑀪𑀸𑀯𑀺𑀢𑀸𑀬 𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀸𑀬𑀸𑀦𑀼𑀪𑀸𑀯𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑁄 𑀢𑀲𑁆𑀫𑀺𑀁 𑀧𑀯𑀦𑁂 𑀫𑀳𑀸𑀅𑀭𑀜𑁆𑀜𑁂 𑀢𑀤𑀸 𑀭𑀫𑀸𑀫𑀺 𑀅𑀪𑀺𑀭𑀫𑀸𑀫𑀻𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀯𑀁 ¶ ¶ 𑀧𑀦 𑀫𑀳𑀸𑀲𑀢𑁆𑀢𑁄 𑀲𑀩𑁆𑀩𑀲𑀢𑁆𑀢𑁂 𑀫𑁂𑀢𑁆𑀢𑀸𑀬𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑀢𑁄 𑀫𑀥𑀼𑀭𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀅𑀲𑁆𑀲𑀫𑁂 𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀸𑀦𑀻𑀬𑀁 ¶ 𑀆𑀤𑀸𑀬 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀤𑁆𑀯𑁂 𑀫𑀺𑀕𑁂 𑀏𑀓𑀢𑁄 𑀓𑀢𑁆𑀯𑀸 𑀢𑁂𑀲𑀁 𑀧𑀺𑀝𑁆𑀞𑀺𑀬𑀁 𑀧𑀸𑀦𑀻𑀬𑀖𑀝𑀁 𑀞𑀧𑁂𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀦𑀤𑀻𑀢𑀺𑀢𑁆𑀣𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀸𑀭𑀸𑀡𑀲𑀺𑀬𑀁 𑀧𑀻𑀴𑀺𑀬𑀓𑁆𑀔𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀫𑀺𑀕𑀫𑀁𑀲𑀮𑁄𑀪𑁂𑀦 𑀫𑀸𑀢𑀭𑀁 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀘𑀭𑀦𑁆𑀢𑁄 𑀫𑀺𑀕𑀲𑀫𑁆𑀫𑀢𑀁 𑀦𑀤𑀺𑀁 𑀧𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀫𑀲𑁆𑀲 𑀧𑀸𑀦𑀻𑀬𑀕𑀳𑀡𑀢𑀺𑀢𑁆𑀣𑀁 𑀧𑀢𑁆𑀢𑁄. 𑀫𑀺𑀕𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀁 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀁 𑀯𑀺𑀘𑀭𑀦𑁆𑀢𑁄 𑀫𑀦𑀼𑀲𑁆𑀲𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀤𑁂𑀯𑁄 𑀦𑀼 𑀔𑁄 𑀏𑀲 𑀦𑀸𑀕𑁄 𑀦𑀼 𑀔𑁄, 𑀲𑀘𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑀳𑀲𑀸 𑀧𑀓𑁆𑀓𑀫𑁂𑀬𑁆𑀬𑀸𑀢𑀺. 𑀬𑀁𑀦𑀽𑀦𑀸𑀳𑀁 𑀏𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀦𑁆𑀳𑀢𑁆𑀯𑀸 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀧𑀽𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀫𑀁𑀲𑀓𑀽𑀝𑁂 𑀞𑀧𑀦𑀓𑀸𑀮𑁂 ‘‘𑀇𑀤𑀸𑀦𑀺 𑀢𑀁 𑀯𑀺𑀚𑁆𑀛𑀺𑀢𑀼𑀁 𑀲𑀫𑀬𑁄’’𑀢𑀺 𑀯𑀺𑀲𑀧𑀻𑀢𑁂𑀦 𑀲𑀭𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂 𑀯𑀺𑀚𑁆𑀛𑀺. 𑀲𑀭𑁄 𑀯𑀸𑀫𑀧𑀲𑁆𑀲𑁂𑀦 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀯𑀺𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀫𑀺𑀕𑀕𑀡𑁄 𑀪𑀻𑀢𑁄 𑀧𑀮𑀸𑀬𑀺.

𑀲𑀸𑀫𑀧𑀡𑁆𑀟𑀺𑀢𑁄 𑀧𑀦 𑀯𑀺𑀤𑁆𑀥𑁄𑀧𑀺 𑀧𑀸𑀦𑀻𑀬𑀖𑀝𑀁 𑀬𑀣𑀸 𑀯𑀸 𑀢𑀣𑀸 𑀯𑀸 𑀅𑀦𑀯𑀲𑀼𑀫𑁆𑀪𑁂𑀢𑁆𑀯𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀡𑀺𑀓𑀁 𑀑𑀢𑀸𑀭𑁂𑀢𑁆𑀯𑀸 𑀯𑀸𑀮𑀼𑀓𑀁 𑀩𑁆𑀬𑀽𑀳𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑀦𑀝𑁆𑀞𑀸𑀦𑀤𑀺𑀲𑀸𑀪𑀸𑀕𑁂𑀦 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀼𑀔𑁂𑀦 𑀮𑁄𑀳𑀺𑀢𑀁 𑀙𑀟𑁆𑀟𑁂𑀢𑁆𑀯𑀸 ‘‘𑀫𑀫 𑀓𑁄𑀘𑀺 𑀯𑁂𑀭𑀻 𑀦𑀸𑀫 𑀦𑀢𑁆𑀣𑀺, 𑀫𑀫𑀧𑀺 𑀓𑀢𑁆𑀣𑀘𑀺 𑀯𑁂𑀭𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑁄 𑀦𑀼 𑀫𑀁 𑀉𑀲𑀼𑀦𑀸 𑀯𑀺𑀚𑁆𑀛𑀺, 𑀧𑀫𑀢𑁆𑀢𑀁 𑀉𑀤𑀳𑀸𑀭𑀓𑀁;

𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄, 𑀓𑁄 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀢𑀻’’𑀢𑀺. (𑀚𑀸. 𑁨.𑁨𑁨.𑁨𑁯𑁬);

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀬𑀁 𑀫𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀢𑀺𑀢𑁄𑀧𑀺 𑀦𑁂𑀯 𑀫𑀁 𑀅𑀓𑁆𑀓𑁄𑀲𑀢𑀺 𑀦 𑀧𑀭𑀺𑀪𑀸𑀲𑀢𑀺, 𑀫𑀫 𑀳𑀤𑀬𑀫𑀁𑀲𑀁 𑀲𑀫𑁆𑀩𑀸𑀳𑀦𑁆𑀢𑁄 𑀯𑀺𑀬 𑀧𑀺𑀬𑀯𑀘𑀦𑁂𑀦 𑀲𑀫𑀼𑀤𑀸𑀘𑀭𑀢𑀺, 𑀕𑀫𑀺𑀲𑁆𑀲𑀸𑀫𑀺𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀸 𑀘 𑀯𑀺𑀤𑁆𑀥𑀪𑀸𑀯𑀁 𑀆𑀯𑀺𑀓𑀢𑁆𑀯𑀸 ‘‘𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄’’𑀢𑀺 𑀫𑀳𑀸𑀲𑀢𑁆𑀢𑀁 𑀧𑀼𑀘𑁆𑀙𑀺.

𑀲𑁄 ¶ ‘‘𑀲𑀸𑀫𑁄 𑀦𑀸𑀫𑀸𑀳𑀁 𑀤𑀼𑀓𑀽𑀮𑀧𑀡𑁆𑀟𑀺𑀢𑀲𑁆𑀲 𑀦𑀸𑀫 𑀦𑁂𑀲𑀸𑀤𑀇𑀲𑀺𑀦𑁄 𑀧𑀼𑀢𑁆𑀢𑁄, 𑀓𑀺𑀲𑁆𑀲 𑀧𑀦 𑀫𑀁 𑀯𑀺𑀚𑁆𑀛𑀻’’𑀢𑀺 𑀆𑀳. 𑀲𑁄 𑀧𑀞𑀫𑀁 ‘‘𑀫𑀺𑀕𑀲𑀜𑁆𑀜𑀸𑀬𑀸’’𑀢𑀺 𑀫𑀼𑀲𑀸𑀯𑀸𑀤𑀁 𑀯𑀢𑁆𑀯𑀸 ‘‘𑀅𑀳𑀁 𑀇𑀫𑀁 𑀦𑀺𑀭𑀧𑀭𑀸𑀥𑀁 𑀅𑀓𑀸𑀭𑀡𑁂𑀦 ¶ 𑀯𑀺𑀚𑁆𑀛𑀺’’𑀦𑁆𑀢𑀺 𑀅𑀦𑀼𑀲𑁄𑀘𑀺𑀢𑁆𑀯𑀸 𑀬𑀣𑀸𑀪𑀽𑀢𑀁 𑀆𑀯𑀺𑀓𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸 𑀢𑁂𑀳𑀺 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀲𑀸𑀫𑁄 𑀫𑀬𑀸 𑀯𑀺𑀤𑁆𑀥𑁄’’𑀢𑀺 𑀯𑀢𑁆𑀯𑀸 𑀢𑁂 𑀧𑀭𑀺𑀤𑁂𑀯𑀦𑁆𑀢𑁂 𑀲𑁄𑀓𑀲𑀫𑀸𑀧𑀦𑁆𑀦𑁂 ‘‘𑀬𑀁 𑀲𑀸𑀫𑁂𑀦 𑀓𑀢𑁆𑀢𑀩𑁆𑀩𑀁 𑀧𑀭𑀺𑀘𑀸𑀭𑀺𑀓𑀓𑀫𑁆𑀫𑀁, 𑀢𑀁 𑀓𑀢𑁆𑀯𑀸 𑀅𑀳𑀁 𑀯𑁄 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀲𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀺𑀢𑁆𑀯𑀸 𑀢𑀲𑁆𑀲 𑀉𑀭𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀲𑀭𑀻𑀭𑁂 𑀉𑀲𑀼𑀫𑀸 𑀯𑀢𑁆𑀢𑀢𑁂𑀯, 𑀯𑀺𑀲𑀯𑁂𑀕𑁂𑀦 𑀯𑀺𑀲𑀜𑁆𑀜𑀺𑀢𑀁 𑀆𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀺𑀲𑀪𑀸𑀯𑀢𑁆𑀣𑀸𑀬 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋

‘‘𑀬𑀁 𑀓𑀺𑀜𑁆𑀘𑀺𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀫𑀬𑁆𑀳𑀜𑁆𑀘𑁂𑀯 𑀧𑀺𑀢𑀼𑀘𑁆𑀘 𑀢𑁂;

𑀲𑀩𑁆𑀩𑁂𑀦 𑀢𑁂𑀦 𑀓𑀼𑀲𑀮𑁂𑀦, 𑀯𑀺𑀲𑀁 𑀲𑀸𑀫𑀲𑁆𑀲 𑀳𑀜𑁆𑀜𑀢𑀽’’𑀢𑀺. (𑀚𑀸. 𑁨.𑁨𑁨.𑁩𑁮𑁮) 𑁋

𑀫𑀸𑀢𑀭𑀸,

‘‘𑀬𑀁 𑀓𑀺𑀜𑁆𑀘𑀺𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀫𑀬𑁆𑀳𑀜𑁆𑀘𑁂𑀯 𑀫𑀸𑀢𑀼𑀘𑁆𑀘 𑀢𑁂;

𑀲𑀩𑁆𑀩𑁂𑀦 𑀢𑁂𑀦 𑀓𑀼𑀲𑀮𑁂𑀦, 𑀯𑀺𑀲𑀁 𑀲𑀸𑀫𑀲𑁆𑀲 𑀳𑀜𑁆𑀜𑀢𑀽’’𑀢𑀺. (𑀚𑀸. 𑁨.𑁨𑁨.𑁩𑁯𑁬) 𑁋

𑀧𑀺𑀢𑀭𑀸,

‘‘𑀧𑀩𑁆𑀩𑀢𑁆𑀬𑀸𑀳𑀁 𑀕𑀦𑁆𑀥𑀫𑀸𑀤𑀦𑁂, 𑀘𑀺𑀭𑀭𑀢𑁆𑀢𑀦𑀺𑀯𑀸𑀲𑀺𑀦𑀻;

𑀦 𑀫𑁂 𑀧𑀺𑀬𑀢𑀭𑁄 𑀓𑁄𑀘𑀺, 𑀅𑀜𑁆𑀜𑁄 𑀲𑀸𑀫𑁂𑀦 𑀯𑀺𑀚𑁆𑀚𑀢𑀺;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀯𑀺𑀲𑀁 𑀲𑀸𑀫𑀲𑁆𑀲 𑀳𑀜𑁆𑀜𑀢𑀽’’𑀢𑀺. (𑀚𑀸. 𑁨.𑁨𑁨.𑁩𑁯𑁮) 𑁋

𑀤𑁂𑀯𑀢𑀸𑀬 𑀘 𑀲𑀘𑁆𑀘𑀓𑀺𑀭𑀺𑀬𑀸𑀬 𑀓𑀢𑀸𑀬 𑀫𑀳𑀸𑀲𑀢𑁆𑀢𑁄 𑀔𑀺𑀧𑁆𑀧𑀁 𑀯𑀼𑀝𑁆𑀞𑀸𑀲𑀺. 𑀧𑀤𑀼𑀫𑀧𑀢𑁆𑀢𑀧𑀮𑀸𑀲𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀆𑀩𑀸𑀥𑁄 𑀯𑀺𑀕𑀢𑁄. 𑀯𑀺𑀤𑁆𑀥𑀝𑁆𑀞𑀸𑀦𑀁 𑀅𑀭𑁄𑀕𑀁 𑀧𑀸𑀓𑀢𑀺𑀓𑀫𑁂𑀯 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀢𑀽𑀦𑀁 𑀘𑀓𑁆𑀔𑀽𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀇𑀢𑀺 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀅𑀭𑁄𑀕𑀢𑀸, 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀘𑀓𑁆𑀔𑀼𑀧𑀝𑀺𑀮𑀸𑀪𑁄, 𑀅𑀭𑀼𑀡𑀼𑀕𑁆𑀕𑀫𑀦𑀁, 𑀢𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀅𑀲𑁆𑀲𑀫𑁂𑀬𑁂𑀯 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀩𑁆𑀩𑀁 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺.

𑀅𑀣 ¶ 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀥𑀫𑁆𑀫𑀁 𑀘𑀭, 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀦𑀸 (𑀚𑀸. 𑁨.𑁨𑁨.𑁪𑁧𑁧-𑁪𑁧𑁨) 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀑𑀯𑀤𑀺𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀅𑀤𑀸𑀲𑀺 ¶ . 𑀲𑁄 𑀢𑀲𑁆𑀲 𑀑𑀯𑀸𑀤𑀁 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀦𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀤𑁆𑀥𑀺𑀁 𑀫𑀸𑀢𑀸𑀧𑀺𑀢𑀽𑀳𑀺 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀧𑀺𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀫𑀸𑀢𑀸 𑀪𑀤𑁆𑀤𑀓𑀸𑀧𑀺𑀮𑀸𑀦𑀻, 𑀲𑀸𑀫𑀧𑀡𑁆𑀟𑀺𑀢𑁄 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀲𑀧𑀸𑀭𑀫𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀸𑀫𑀧𑀲𑁆𑀲𑀢𑁄 𑀯𑀺𑀦𑀺𑀯𑀺𑀚𑁆𑀛𑀦𑀯𑀲𑁂𑀦 𑀯𑀺𑀤𑁆𑀥𑁄𑀧𑀺 𑀓𑀺𑀜𑁆𑀘𑀺 𑀓𑀸𑀬𑀯𑀺𑀓𑀸𑀭𑀁 𑀅𑀓𑀢𑁆𑀯𑀸 𑀉𑀤𑀓𑀖𑀝𑀲𑁆𑀲 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑀁, 𑀯𑀥𑀓𑁂 𑀅𑀜𑁆𑀜𑀸𑀢𑁂𑀧𑀺 𑀜𑀸𑀢𑁂 𑀯𑀺𑀬 𑀘𑀺𑀢𑁆𑀢𑀯𑀺𑀓𑀸𑀭𑀸𑀪𑀸𑀯𑁄, 𑀧𑀺𑀬𑀯𑀘𑀦𑁂𑀦 𑀲𑀫𑀼𑀤𑀸𑀘𑀸𑀭𑁄, 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀧𑀼𑀜𑁆𑀜𑀢𑁄 𑀫𑀬𑁆𑀳𑀁 𑀧𑀭𑀺𑀳𑀸𑀦𑀻𑀢𑀺 𑀅𑀦𑀼𑀲𑁄𑀘𑀦𑀫𑀢𑁆𑀢𑀁, 𑀅𑀭𑁄𑀕𑁂 𑀚𑀸𑀢𑁂 𑀭𑀜𑁆𑀜𑁄 𑀓𑀸𑀭𑀼𑀜𑁆𑀜𑀁 𑀫𑁂𑀢𑁆𑀢𑀜𑁆𑀘 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸, 𑀑𑀯𑀸𑀤𑀤𑀸𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀲𑀼𑀯𑀡𑁆𑀡𑀲𑀸𑀫𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀓𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁧𑁪. 𑀘𑀼𑀤𑁆𑀤𑀲𑀫𑁂 𑀏𑀓𑀭𑀸𑀚𑀸𑀢𑀺 𑀯𑀺𑀲𑁆𑀲𑀼𑀢𑁄𑀢𑀺 𑀏𑀓𑀭𑀸𑀚𑀸𑀢𑀺 𑀇𑀫𑀺𑀦𑀸 𑀅𑀦𑁆𑀯𑀢𑁆𑀣𑀦𑀸𑀫𑁂𑀦 𑀚𑀫𑁆𑀩𑀼𑀤𑀻𑀧𑀢𑀮𑁂 𑀧𑀸𑀓𑀝𑁄.

𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀓𑀼𑀲𑀮𑀲𑀻𑀮𑀸𑀘𑀸𑀭𑀲𑀤𑁆𑀥𑀸𑀲𑀼𑀢𑀸𑀤𑀺𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 ¶ 𑀧𑀸𑀭𑀫𑀺𑀧𑀭𑀺𑀪𑀸𑀯𑀦𑁂𑀦 𑀘 𑀚𑀫𑁆𑀩𑀼𑀤𑀻𑀧𑀢𑀮𑁂 𑀅𑀤𑀼𑀢𑀺𑀬𑀢𑁆𑀢𑀸 𑀧𑀥𑀸𑀦𑀪𑀸𑀯𑁂𑀦 𑀘 ‘‘𑀏𑀓𑀭𑀸𑀚𑀸’’𑀢𑀺 𑀧𑀓𑀸𑀲𑀦𑀸𑀫𑁄 𑀅𑀳𑁄𑀲𑀺. 𑀧𑀭𑀫𑀁 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑀲𑀗𑁆𑀔𑀸𑀢𑀜𑁆𑀘𑁂𑀯 𑀲𑀼𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀲𑀗𑁆𑀔𑀸𑀢𑀜𑁆𑀘 𑀧𑀭𑀫𑀁 𑀉𑀢𑁆𑀢𑀫𑀁 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀻𑀮𑀁 ¶ 𑀲𑀫𑀸𑀤𑀸𑀦𑀯𑀲𑁂𑀦 𑀘 𑀅𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀘 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀝𑁆𑀞𑀳𑀺𑀢𑁆𑀯𑀸. 𑀧𑀲𑀸𑀲𑀸𑀫𑀺 𑀫𑀳𑀸𑀫𑀳𑀺𑀦𑁆𑀢𑀺 𑀢𑀺𑀬𑁄𑀚𑀦𑀲𑀢𑀺𑀓𑁂 𑀓𑀸𑀲𑀺𑀭𑀝𑁆𑀞𑁂 𑀫𑀳𑀢𑀺𑀁 𑀫𑀳𑀺𑀁 𑀅𑀦𑀼𑀲𑀸𑀲𑀸𑀫𑀺 𑀭𑀚𑁆𑀚𑀁 𑀓𑀸𑀭𑁂𑀫𑀺.

𑁧𑁧𑁫. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀢𑀺 ¶ 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺 𑀬𑀸𑀯 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀏𑀢𑀲𑁆𑀫𑀺𑀁 𑀤𑀲𑀯𑀺𑀥𑁂 𑀓𑀼𑀲𑀮𑀓𑀫𑁆𑀫𑀧𑀣𑁂, 𑀏𑀢𑁂 𑀯𑀸 𑀅𑀦𑀯𑀲𑁂𑀲𑀢𑁄 𑀲𑀫𑀸𑀤𑀸𑀬 𑀯𑀢𑁆𑀢𑀸𑀫𑀺. 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀻𑀢𑀺 𑀤𑀸𑀦𑀁 𑀧𑀺𑀬𑀯𑀘𑀦𑀁 𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀦𑀓𑀸𑀭𑀡𑁂𑀳𑀺 𑀬𑀤𑀸 𑀏𑀓𑀭𑀸𑀚𑀸𑀢𑀺 𑀯𑀺𑀲𑁆𑀲𑀼𑀢𑁄 𑀳𑁄𑀫𑀺, 𑀢𑀤𑀸 𑀬𑀣𑀸𑀭𑀳𑀁 𑀫𑀳𑀸𑀚𑀦𑀁 𑀲𑀗𑁆𑀕𑀡𑁆𑀳𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁬. 𑀏𑀯𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀻𑀮𑀧𑀭𑀺𑀧𑀽𑀭𑀡𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀫𑀳𑀸𑀚𑀦𑀲𑀗𑁆𑀕𑀡𑁆𑀳𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀧𑁆𑀧𑀫𑀢𑁆𑀢𑀲𑁆𑀲. 𑀇𑀥𑀮𑁄𑀓𑁂 𑀧𑀭𑀢𑁆𑀣 𑀘𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑀁 𑀅𑀧𑁆𑀧𑀫𑀚𑁆𑀚𑀦𑀁, 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀅𑀢𑁆𑀣𑁂, 𑀧𑀭𑀮𑁄𑀓𑁂 𑀬𑀁 𑀅𑀧𑁆𑀧𑀫𑀚𑁆𑀚𑀦𑀁 𑀢𑀢𑁆𑀣 𑀲𑀫𑁆𑀧𑀭𑀸𑀬𑀺𑀓𑁂 𑀅𑀢𑁆𑀣𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀫𑁂 𑀲𑀢𑁄𑀢𑀺 𑀅𑀢𑁆𑀣𑁄. 𑀤𑀩𑁆𑀩𑀲𑁂𑀦𑁄𑀢𑀺 𑀏𑀯𑀁𑀦𑀸𑀫𑀓𑁄 𑀓𑁄𑀲𑀮𑀭𑀸𑀚𑀸. 𑀉𑀧𑀕𑀦𑁆𑀢𑁆𑀯𑀸𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀩𑁆𑀪𑀼𑀬𑁆𑀬𑀸𑀦𑀯𑀲𑁂𑀦 𑀫𑀫 𑀭𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸. 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀧𑀼𑀭𑀁 𑀫𑀫𑀸𑀢𑀺 𑀫𑀫 𑀩𑀸𑀭𑀸𑀡𑀲𑀺𑀦𑀕𑀭𑀁 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑁄.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑀲𑁆𑀲𑁄 𑀫𑀚𑁆𑀛𑁂 𑀏𑀓𑀁 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀏𑀓𑀦𑁆𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀧𑀼𑀢𑁆𑀢𑀁 𑀧𑀭𑀺𑀢𑁄𑀲𑀬𑀫𑀸𑀦𑁄 𑀯𑀺𑀬 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀢𑁄𑀲𑀬𑀫𑀸𑀦𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀢𑀲𑁆𑀲𑁂𑀓𑁄 𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑀁 𑀧𑀤𑀼𑀲𑁆𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀸𑀓𑀝𑁄𑀯 𑀚𑀸𑀢𑁄. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀢𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀦𑁆𑀥𑀩𑀸𑀮, 𑀅𑀬𑀼𑀢𑁆𑀢𑀁 𑀢𑁂 𑀓𑀢𑀁, 𑀦 𑀢𑁆𑀯𑀁 𑀫𑀫 𑀯𑀺𑀚𑀺𑀢𑁂 𑀯𑀲𑀺𑀢𑀼𑀁 𑀅𑀭𑀳𑀲𑀺, 𑀅𑀢𑁆𑀢𑀦𑁄 𑀥𑀦𑀜𑁆𑀘 ¶ 𑀧𑀼𑀢𑁆𑀢𑀤𑀸𑀭𑀜𑁆𑀘 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀬𑀸𑀳𑀻’’𑀢𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑀺.

𑀲𑁄 𑀓𑁄𑀲𑀮𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀤𑀩𑁆𑀩𑀲𑁂𑀦𑀁 𑀦𑀸𑀫 𑀓𑁄𑀲𑀮𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀢𑀁 𑀭𑀸𑀚𑀸𑀦𑀁 𑀆𑀳 𑁋 ‘‘𑀤𑁂𑀯, 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀺𑀫𑁆𑀫𑀓𑁆𑀔𑀺𑀓𑀫𑀥𑀼𑀧𑀝𑀮𑀲𑀤𑀺𑀲𑀁, 𑀅𑀢𑀺𑀫𑀼𑀤𑀼𑀓𑁄 𑀭𑀸𑀚𑀸, 𑀲𑀼𑀔𑁂𑀦𑁂𑀯 𑀢𑀁 𑀭𑀚𑁆𑀚𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑁄𑀲𑀻’’𑀢𑀺. 𑀤𑀩𑁆𑀩𑀲𑁂𑀦𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀳𑀸𑀦𑀼𑀪𑀸𑀯𑀢𑀸𑀬 𑀢𑀲𑁆𑀲 𑀯𑀘𑀦𑀁 𑀅𑀲𑀤𑁆𑀤𑀳𑀦𑁆𑀢𑁄 𑀫𑀦𑀼𑀲𑁆𑀲𑁂 𑀧𑁂𑀲𑁂𑀢𑁆𑀯𑀸 ¶ 𑀓𑀸𑀲𑀺𑀭𑀝𑁆𑀞𑁂 𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀘𑁄𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑁂𑀦 𑀥𑀦𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀅𑀢𑀺𑀯𑀺𑀬 𑀥𑀫𑁆𑀫𑀺𑀓𑁄 𑀭𑀸𑀚𑀸’’𑀢𑀺 𑀜𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑀮𑀯𑀸𑀳𑀦𑀁 𑀆𑀤𑀸𑀬 𑀦𑀺𑀬𑁆𑀬𑀸𑀲𑀺 ¶ . 𑀅𑀣 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀳𑀸𑀬𑁄𑀥𑀸 ‘‘𑀓𑁄𑀲𑀮𑀭𑀸𑀚𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀭𑀚𑁆𑀚𑀲𑀻𑀫𑀁 𑀅𑀦𑁄𑀓𑁆𑀓𑀫𑀦𑁆𑀢𑀫𑁂𑀯 𑀦𑀁 𑀧𑁄𑀣𑁂𑀢𑁆𑀯𑀸 𑀕𑀡𑁆𑀳𑀸𑀫𑀸’’𑀢𑀺 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀯𑀤𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 ‘‘𑀢𑀸𑀢𑀸, 𑀫𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑁂𑀲𑀁 𑀓𑀺𑀮𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀭𑀚𑁆𑀚𑀢𑁆𑀣𑀺𑀓𑀸 𑀭𑀚𑁆𑀚𑀁 𑀕𑀡𑁆𑀳𑀦𑁆𑀢𑀼, 𑀫𑀸 𑀕𑀫𑀺𑀢𑁆𑀣𑀸’’𑀢𑀺 𑀦𑀺𑀯𑀸𑀭𑁂𑀲𑀺. 𑀓𑁄𑀲𑀮𑀭𑀸𑀚𑀸 𑀚𑀦𑀧𑀤𑀫𑀚𑁆𑀛𑀁 𑀧𑀸𑀯𑀺𑀲𑀺. 𑀫𑀳𑀸𑀬𑁄𑀥𑀸 𑀧𑀼𑀦𑀧𑀺 𑀭𑀜𑁆𑀜𑁄 𑀢𑀣𑁂𑀯 𑀯𑀤𑀺𑀁𑀲𑀼. 𑀭𑀸𑀚𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀯𑀸𑀭𑁂𑀲𑀺. 𑀤𑀩𑁆𑀩𑀲𑁂𑀦𑁄 𑀩𑀳𑀺𑀦𑀕𑀭𑁂 𑀞𑀢𑁆𑀯𑀸 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀏𑀓𑀭𑀸𑀚𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀏𑀓𑀭𑀸𑀚𑀸 ‘‘𑀦𑀢𑁆𑀣𑀺 𑀫𑀬𑀸 𑀬𑀼𑀤𑁆𑀥𑀁, 𑀭𑀚𑁆𑀚𑀁 𑀕𑀡𑁆𑀳𑀸𑀢𑀽’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀧𑀼𑀦𑀧𑀺 𑀫𑀳𑀸𑀬𑁄𑀥𑀸 ‘‘𑀤𑁂𑀯, 𑀦 𑀫𑀬𑀁 𑀓𑁄𑀲𑀮𑀭𑀜𑁆𑀜𑁄 𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀤𑁂𑀫, 𑀩𑀳𑀺𑀦𑀕𑀭𑁂𑀬𑁂𑀯 𑀦𑀁 𑀧𑁄𑀣𑁂𑀢𑁆𑀯𑀸 𑀕𑀡𑁆𑀳𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀯𑀸𑀭𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀸𑀦𑀺 𑀅𑀯𑀸𑀧𑀼𑀭𑀸𑀧𑁂𑀢𑁆𑀯𑀸 𑀫𑀳𑀸𑀢𑀮𑁂 𑀧𑀮𑁆𑀮𑀗𑁆𑀓𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀤𑀩𑁆𑀩𑀲𑁂𑀦𑁄 𑀫𑀳𑀦𑁆𑀢𑁂𑀦 𑀩𑀮𑀯𑀸𑀳𑀦𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀫𑁆𑀧𑀺 𑀧𑀝𑀺𑀲𑀢𑁆𑀢𑀼𑀁 𑀅𑀧𑀲𑁆𑀲𑀦𑁆𑀢𑁄 𑀲𑀩𑁆𑀩𑀭𑀚𑁆𑀚𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀢𑀮𑀁 𑀆𑀭𑀼𑀬𑁆𑀳 𑀦𑀺𑀭𑀧𑀭𑀸𑀥𑀁 𑀩𑁄𑀥𑀺𑀲𑀢𑁆𑀢𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀆𑀯𑀸𑀝𑁂 𑀦𑀺𑀔𑀡𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀤𑀩𑁆𑀩𑀲𑁂𑀦𑁄 𑀉𑀧𑀕𑀦𑁆𑀢𑁆𑀯𑀸, 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀧𑀼𑀭𑀁 𑀫𑀫.

𑁧𑁧𑁭.

‘‘𑀭𑀸𑀚𑀽𑀧𑀚𑀻𑀯𑁂 𑀦𑀺𑀕𑀫𑁂, 𑀲𑀩𑀮𑀝𑁆𑀞𑁂 𑀲𑀭𑀝𑁆𑀞𑀓𑁂;

𑀲𑀩𑁆𑀩𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸, 𑀓𑀸𑀲𑀼𑀬𑀸 𑀦𑀺𑀔𑀡𑀻 𑀫𑀫’’𑀦𑁆𑀢𑀺.

𑀢𑀢𑁆𑀣 𑀭𑀸𑀚𑀽𑀧𑀚𑀻𑀯𑁂𑀢𑀺 𑀅𑀫𑀘𑁆𑀘𑀧𑀸𑀭𑀺𑀲𑀚𑁆𑀚𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀆𑀤𑀺𑀓𑁂 𑀭𑀸𑀚𑀸𑀦𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁂. 𑀦𑀺𑀕𑀫𑁂𑀢𑀺 𑀦𑁂𑀕𑀫𑁂. 𑀲𑀩𑀮𑀝𑁆𑀞𑁂𑀢𑀺 𑀲𑁂𑀦𑀸𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀩𑀮𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀩𑀮𑀝𑁆𑀞𑀸, 𑀳𑀢𑁆𑀣𑀸𑀭𑁄𑀳𑀸𑀤𑀬𑁄, 𑀩𑀮𑀝𑁆𑀞𑁂𑀳𑀺 𑀲𑀳𑀸𑀢𑀺 𑀲𑀩𑀮𑀝𑁆𑀞𑁂. 𑀲𑀭𑀝𑁆𑀞𑀓𑁂𑀢𑀺 ¶ 𑀲𑀚𑀦𑀧𑀤𑁂, 𑀭𑀸𑀚𑀽𑀧𑀚𑀻𑀯𑁂 𑀦𑀺𑀕𑀫𑁂 𑀘 𑀅𑀜𑁆𑀜𑀜𑁆𑀘 𑀲𑀩𑁆𑀩𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸. 𑀓𑀸𑀲𑀼𑀬𑀸 𑀦𑀺𑀔𑀡𑀻 𑀫𑀫𑀦𑁆𑀢𑀺 𑀲𑀩𑀮𑀯𑀸𑀳𑀦𑀁 𑀲𑀓𑀮𑀁 𑀫𑀫 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀫𑀫𑁆𑀧𑀺 𑀕𑀮𑀧𑁆𑀧𑀫𑀸𑀡𑁂 𑀆𑀯𑀸𑀝𑁂 𑀦𑀺𑀔𑀡𑀸𑀧𑁂𑀲𑀺. 𑀚𑀸𑀢𑀓𑁂𑀧𑀺 𑁋

‘‘𑀅𑀦𑀼𑀢𑁆𑀢𑀭𑁂 ¶ 𑀓𑀸𑀫𑀕𑀼𑀡𑁂 𑀲𑀫𑀺𑀤𑁆𑀥𑁂, 𑀪𑀼𑀢𑁆𑀯𑀸𑀦 𑀧𑀼𑀩𑁆𑀩𑁂 𑀯𑀲𑀺 𑀏𑀓𑀭𑀸𑀚𑀸;

𑀲𑁄 𑀤𑀸𑀦𑀺 𑀤𑀼𑀕𑁆𑀕𑁂 𑀦𑀭𑀓𑀫𑁆𑀳𑀺 𑀔𑀺𑀢𑁆𑀢𑁄, 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡’’𑀦𑁆𑀢𑀺. (𑀚𑀸. 𑁧.𑁪.𑁯) 𑁋

𑀆𑀯𑀸𑀝𑁂 ¶ 𑀔𑀺𑀢𑁆𑀢𑀪𑀸𑀯𑁄 𑀆𑀕𑀢𑁄. 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 (𑀚𑀸. 𑀅𑀝𑁆𑀞. 𑁩.𑁪.𑁯) 𑀧𑀦 ‘‘𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀼𑀫𑁆𑀫𑀸𑀭𑁂 𑀳𑁂𑀝𑁆𑀞𑀸𑀲𑀻𑀲𑀓𑀁 𑀑𑀮𑀫𑁆𑀩𑁂𑀲𑀻’’𑀢𑀺 𑀯𑀼𑀢𑁆𑀢𑀁.

𑀫𑀳𑀸𑀲𑀢𑁆𑀢𑁄 𑀘𑁄𑀭𑀭𑀸𑀚𑀸𑀦𑀁 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑀸𑀲𑀼𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁧𑁮.

‘‘𑀅𑀫𑀘𑁆𑀘𑀫𑀡𑁆𑀟𑀮𑀁 𑀭𑀚𑁆𑀚𑀁, 𑀨𑀻𑀢𑀁 𑀅𑀦𑁆𑀢𑁂𑀧𑀼𑀭𑀁 𑀫𑀫;

𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀦 𑀕𑀳𑀺𑀢𑀁, 𑀧𑀺𑀬𑀧𑀼𑀢𑁆𑀢𑀁𑀯 𑀧𑀲𑁆𑀲𑀳’’𑀦𑁆𑀢𑀺.

𑀢𑀢𑁆𑀣 𑀅𑀫𑀘𑁆𑀘𑀫𑀡𑁆𑀟𑀮𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀭𑀸𑀚𑀓𑀺𑀘𑁆𑀘𑁂 𑀭𑀜𑁆𑀜𑀸 𑀅𑀫𑀸 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀅𑀫𑀘𑁆𑀘𑀸, 𑀲𑀤𑁆𑀥𑀺𑀁 𑀯𑀸 𑀢𑁂𑀲𑀁 𑀫𑀡𑁆𑀟𑀮𑀁 𑀲𑀫𑀽𑀳𑀁. 𑀨𑀻𑀢𑀦𑁆𑀢𑀺 𑀩𑀮𑀯𑀸𑀳𑀦𑁂𑀦 𑀦𑀕𑀭𑀚𑀦𑀧𑀤𑀸𑀤𑀻𑀳𑀺 𑀲𑀫𑀺𑀤𑁆𑀥𑀁 𑀭𑀚𑁆𑀚𑀁. 𑀇𑀢𑁆𑀣𑀸𑀕𑀸𑀭𑀤𑀸𑀲𑀺𑀤𑀸𑀲𑀧𑀭𑀺𑀚𑀦𑁂𑀳𑀺 𑀘𑁂𑀯 𑀯𑀢𑁆𑀣𑀸𑀪𑀭𑀡𑀸𑀤𑀺𑀉𑀧𑀪𑁄𑀕𑀽𑀧𑀓𑀭𑀡𑁂𑀳𑀺 𑀘 𑀲𑀫𑀺𑀤𑁆𑀥𑀁 𑀫𑀫 𑀅𑀦𑁆𑀢𑁂𑀧𑀼𑀭𑀜𑁆𑀘 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀓𑀁 𑀕𑀡𑁆𑀳𑀦𑁆𑀢𑀁 𑀅𑀫𑀺𑀢𑁆𑀢𑀭𑀸𑀚𑀸𑀦𑀁 𑀬𑀸𑀬 𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀁𑀯 𑀧𑀲𑁆𑀲𑀺𑀁 𑀅𑀳𑀁, 𑀢𑀸𑀬 𑀏𑀯𑀁𑀪𑀽𑀢𑀸𑀬 𑀫𑁂𑀢𑁆𑀢𑀸𑀬 𑀫𑁂 𑀲𑀫𑁄 𑀲𑀓𑀮𑀮𑁄𑀓𑁂 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀁𑀪𑀽𑀢𑀸 𑀏𑀲𑀸 𑀫𑁂 𑀫𑁂𑀢𑁆𑀢𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀺𑀪𑀸𑀯𑀁 𑀧𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀧𑀦 𑀫𑀳𑀸𑀲𑀢𑁆𑀢𑁂 𑀢𑀁 𑀘𑁄𑀭𑀭𑀸𑀚𑀸𑀦𑀁 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀨𑀭𑀺𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁂 𑀢𑀲𑁆𑀲 𑀲𑀭𑀻𑀭𑁂 𑀤𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’’𑀢𑀺 𑀪𑀽𑀫𑀺𑀬𑀁 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀢𑀺. ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀦𑀺𑀭𑀧𑀭𑀸𑀥𑀁 𑀥𑀫𑁆𑀫𑀺𑀓𑀭𑀸𑀚𑀸𑀦𑀁 𑀆𑀯𑀸𑀝𑁂 𑀦𑀺𑀔𑀡𑀸𑀧𑀬𑀺𑀢𑁆𑀣𑀸𑀢𑀺. ‘‘𑀢𑁂𑀦 𑀳𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀉𑀤𑁆𑀥𑀭𑀣𑀸’’𑀢𑀺 𑀆𑀳. 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 ¶ 𑀤𑀩𑁆𑀩𑀲𑁂𑀦𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀢𑀼𑀫𑁆𑀳𑁂𑀯 𑀓𑀸𑀭𑁂𑀣, 𑀅𑀳𑀁 𑀯𑁄 𑀘𑁄𑀭𑁂 𑀧𑀝𑀺𑀩𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀤𑀼𑀝𑁆𑀞𑀸𑀫𑀘𑁆𑀘𑀲𑁆𑀲 𑀭𑀸𑀚𑀸𑀡𑀁 𑀓𑀸𑀭𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀚𑁆𑀚𑀁 𑀅𑀫𑀘𑁆𑀘𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀚𑀦𑀁 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀦𑁄 ¶ 𑀅𑀳𑁄𑀲𑀺.

𑀢𑀤𑀸 𑀤𑀩𑁆𑀩𑀲𑁂𑀦𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀳𑁄𑀲𑀺, 𑀏𑀓𑀭𑀸𑀚𑀸 𑀮𑁄𑀓𑀦𑀸𑀣𑁄.

𑀢𑀲𑁆𑀲 𑀤𑀺𑀯𑀲𑁂 𑀤𑀺𑀯𑀲𑁂 𑀙𑀲𑀼 𑀤𑀸𑀦𑀲𑀸𑀮𑀸𑀲𑀼 𑀙𑀲𑀢𑀲𑀳𑀲𑁆𑀲𑀯𑀺𑀲𑁆𑀲𑀚𑁆𑀚𑀦𑁂𑀦 𑀧𑀘𑁆𑀘𑀢𑁆𑀣𑀺𑀓𑀭𑀜𑁆𑀜𑁄 𑀲𑀓𑀮𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑁂𑀦 𑀘 𑀤𑀸𑀦𑀧𑀸𑀭𑀫𑀻, 𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑀯𑀲𑁂𑀦 𑀧𑀩𑁆𑀩𑀚𑀺𑀢𑀲𑁆𑀲 𑀅𑀦𑀯𑀲𑁂𑀲𑀲𑀻𑀮𑀲𑀁𑀯𑀭𑀯𑀲𑁂𑀦 𑀘 𑀲𑀻𑀮𑀧𑀸𑀭𑀫𑀻, 𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀛𑀸𑀦𑀸𑀥𑀺𑀕𑀫𑀯𑀲𑁂𑀦 𑀘 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀲𑀢𑁆𑀢𑀸𑀦𑀁 ¶ 𑀳𑀺𑀢𑀸𑀳𑀺𑀢𑀯𑀺𑀘𑀸𑀭𑀡𑀯𑀲𑁂𑀦 𑀤𑀸𑀦𑀲𑀻𑀮𑀸𑀤𑀺𑀲𑀁𑀯𑀺𑀤𑀳𑀦𑀯𑀲𑁂𑀦 𑀘 𑀧𑀜𑁆𑀜𑀸𑀧𑀸𑀭𑀫𑀻, 𑀤𑀸𑀦𑀸𑀤𑀺𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀺𑀦𑁄𑀤𑀦𑀯𑀲𑁂𑀦 𑀘 𑀯𑀻𑀭𑀺𑀬𑀧𑀸𑀭𑀫𑀻, 𑀤𑀼𑀝𑁆𑀞𑀸𑀫𑀘𑁆𑀘𑀲𑁆𑀲 𑀤𑀩𑁆𑀩𑀲𑁂𑀦𑀭𑀜𑁆𑀜𑁄 𑀘 𑀅𑀧𑀭𑀸𑀥𑀲𑀳𑀦𑀯𑀲𑁂𑀦 𑀔𑀦𑁆𑀢𑀺𑀧𑀸𑀭𑀫𑀻, 𑀬𑀣𑀸𑀧𑀝𑀺𑀜𑁆𑀜𑀁 𑀤𑀸𑀦𑀸𑀤𑀺𑀦𑀸 𑀅𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀘 𑀲𑀘𑁆𑀘𑀧𑀸𑀭𑀫𑀻, 𑀤𑀸𑀦𑀸𑀤𑀻𑀦𑀁 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀧𑀘𑁆𑀘𑀢𑁆𑀣𑀺𑀓𑁂𑀧𑀺 𑀏𑀓𑀦𑁆𑀢𑁂𑀦 𑀳𑀺𑀢𑀽𑀧𑀲𑀁𑀳𑀸𑀭𑀯𑀲𑁂𑀦 𑀫𑁂𑀢𑁆𑀢𑀸𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑁂𑀦 𑀘 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀤𑀼𑀝𑁆𑀞𑀸𑀫𑀘𑁆𑀘𑁂𑀦 𑀤𑀩𑁆𑀩𑀲𑁂𑀦𑁂𑀦 𑀘 𑀓𑀢𑀸𑀧𑀭𑀸𑀥𑁂 𑀳𑀺𑀢𑁂𑀲𑀻𑀳𑀺 𑀅𑀢𑁆𑀢𑀦𑁄 𑀅𑀫𑀘𑁆𑀘𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁂 𑀉𑀧𑀓𑀸𑀭𑁂 𑀘 𑀅𑀚𑁆𑀛𑀼𑀧𑁂𑀓𑁆𑀔𑀡𑁂𑀦 𑀭𑀚𑁆𑀚𑀲𑀼𑀔𑀧𑁆𑀧𑀢𑁆𑀢𑀓𑀸𑀮𑁂 𑀧𑀘𑁆𑀘𑀢𑁆𑀣𑀺𑀓𑀭𑀜𑁆𑀜𑀸 𑀦𑀭𑀓𑁂 𑀔𑀺𑀢𑁆𑀢𑀓𑀸𑀮𑁂 𑀲𑀫𑀸𑀦𑀘𑀺𑀢𑁆𑀢𑀢𑀸𑀬 𑀘 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀦𑀼𑀚𑁆𑀚 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀚𑀦𑀺𑀦𑁆𑀤, 𑀲𑀼𑀔𑁂𑀦 𑀯𑀸 𑀤𑀼𑀓𑁆𑀔𑀫𑀲𑀬𑁆𑀳𑀲𑀸𑀳𑀺;

𑀉𑀪𑀬𑀢𑁆𑀣 𑀲𑀦𑁆𑀢𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸, 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘 𑀪𑀯𑀦𑁆𑀢𑀺 𑀢𑀼𑀮𑁆𑀬𑀸’’𑀢𑀺. (𑀚𑀸. 𑁧.𑁪.𑁧𑁨);

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀫𑁂𑀢𑁆𑀢𑀸𑀧𑀸𑀭𑀫𑀻 𑀅𑀢𑀺𑀲𑀬𑀯𑀢𑀻, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑀲𑀸 𑀏𑀯 𑀧𑀸𑀴𑀺 𑀆𑀭𑀼𑀴𑁆𑀳𑀸. 𑀢𑀣𑀸 𑀇𑀥 𑀫𑀳𑀸𑀲𑀢𑁆𑀢𑀲𑁆𑀲 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀭𑀲𑀧𑀼𑀢𑁆𑀢𑁂 𑀯𑀺𑀬 𑀲𑀫𑀸𑀦𑀼𑀓𑀫𑁆𑀧𑀢𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺.

𑀏𑀓𑀭𑀸𑀚𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑁂𑀢𑁆𑀢𑀸𑀧𑀸𑀭𑀫𑀻 𑀦𑀺𑀝𑁆𑀞𑀺𑀢𑀸.

𑁧𑁫. 𑀫𑀳𑀸𑀮𑁄𑀫𑀳𑀁𑀲𑀘𑀭𑀺𑀬𑀸𑀯𑀡𑁆𑀡𑀦𑀸

𑁧𑁧𑁯. 𑀧𑀦𑁆𑀦𑀭𑀲𑀫𑁂 ¶ ¶ ‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀻’’𑀢𑀺 𑀏𑀢𑁆𑀣𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀫𑀳𑀸𑀲𑀢𑁆𑀢𑁄 𑀳𑀺 𑀢𑀤𑀸 𑀫𑀳𑀢𑀺 𑀉𑀴𑀸𑀭𑀪𑁄𑀕𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀕𑀭𑀼𑀯𑀸𑀲𑀁 𑀯𑀲𑀦𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀓𑀼𑀮𑀖𑀭𑀁 𑀆𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀜𑀸𑀢𑀓𑁂𑀳𑀺 ‘‘𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀳𑀻’’𑀢𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 𑀅𑀦𑀺𑀘𑁆𑀘𑀢𑀸𑀫𑀦𑀲𑀺𑀓𑀸𑀭𑀫𑀼𑀔𑁂𑀦 𑀲𑀩𑁆𑀩𑀪𑀯𑁂𑀲𑀼 𑀅𑀪𑀺𑀯𑀟𑁆𑀠𑀫𑀸𑀦𑀲𑀁𑀯𑁂𑀕𑁄 𑀓𑀸𑀬𑁂 𑀘 𑀅𑀲𑀼𑀪𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀸𑀥𑀺𑀪𑀽𑀢𑀁 ¶ 𑀓𑀺𑀮𑁂𑀲𑀕𑀳𑀦𑀁 𑀅𑀦𑁄𑀕𑀸𑀳𑁂𑀢𑁆𑀯𑀸𑀯 𑀘𑀺𑀭𑀓𑀸𑀮𑀲𑀫𑁆𑀧𑀭𑀺𑀘𑀺𑀢𑀁 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀁 𑀉𑀧𑀩𑁆𑀭𑀽𑀳𑀬𑀫𑀸𑀦𑁄 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀕𑀼𑀡𑀲𑀫𑁆𑀪𑀸𑀯𑀦𑀸𑀧𑀸𑀓𑀝𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺.

𑀲𑁄 𑀮𑀸𑀪𑀲𑀓𑁆𑀓𑀸𑀭𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀧𑀩𑁆𑀩𑀚𑁆𑀚𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 ‘‘𑀧𑀳𑁄𑀫𑀺 𑀘𑀸𑀳𑀁 𑀮𑀸𑀪𑀸𑀮𑀸𑀪𑀸𑀤𑀻𑀲𑀼 𑀦𑀺𑀩𑁆𑀩𑀺𑀓𑀸𑀭𑁄 𑀳𑁄𑀢𑀼’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀦𑁆𑀢𑁄 ‘‘𑀯𑀺𑀲𑁂𑀲𑀢𑁄 𑀧𑀭𑀧𑀭𑀺𑀪𑀯𑀲𑀳𑀦𑀸𑀤𑀺𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀢𑁆𑀣𑀯𑀢𑁆𑀣𑁂𑀦𑁂𑀯 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀓𑁄𑀧𑀺 𑀅𑀩𑀮𑀩𑀮𑁄 𑀅𑀫𑀦𑁆𑀤𑀫𑀦𑁆𑀤𑁄 𑀯𑀺𑀬 𑀧𑀭𑁂𑀲𑀁 𑀅𑀘𑀺𑀢𑁆𑀢𑀓𑀭𑀽𑀧𑁂𑀦 𑀳𑀻𑀴𑀺𑀢𑀧𑀭𑀺𑀪𑀽𑀢𑁄 𑀳𑀼𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀏𑀓𑀭𑀢𑁆𑀢𑀺𑀯𑀸𑀲𑁂𑀦𑁂𑀯 𑀯𑀺𑀘𑀭𑀢𑀺. 𑀬𑀢𑁆𑀣 𑀧𑀦 𑀫𑀳𑀦𑁆𑀢𑀁 𑀧𑀭𑀺𑀪𑀯𑀁 𑀧𑀝𑀺𑀮𑀪𑀢𑀺, 𑀢𑀢𑁆𑀣 𑀘𑀺𑀭𑀫𑁆𑀧𑀺 𑀯𑀲𑀢𑀺. 𑀲𑁄 𑀦𑀺𑀯𑀢𑁆𑀣𑀯𑀢𑁆𑀣𑁂 𑀚𑀺𑀡𑁆𑀡𑁂 𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀦 𑀢𑀲𑁆𑀫𑀺𑀫𑁆𑀧𑀺 𑀚𑀺𑀡𑁆𑀡𑁂 𑀓𑁂𑀦𑀘𑀺 𑀤𑀺𑀦𑁆𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑁂𑀦𑁂𑀯 𑀘𑀭𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀁 𑀦𑀺𑀕𑀫𑀕𑀸𑀫𑀁 𑀅𑀕𑀫𑀸𑀲𑀺.

𑀢𑀢𑁆𑀣 𑀕𑀸𑀫𑀤𑀸𑀭𑀓𑀸 𑀥𑀼𑀢𑁆𑀢𑀚𑀸𑀢𑀺𑀓𑀸 𑀯𑁂𑀥𑀯𑁂𑀭𑀸 𑀓𑁂𑀘𑀺 𑀭𑀸𑀚𑀯𑀮𑁆𑀮𑀪𑀸𑀦𑀁 𑀧𑀼𑀢𑁆𑀢𑀦𑀢𑁆𑀢𑀼𑀤𑀸𑀲𑀸𑀤𑀬𑁄 𑀘 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀓𑀸𑀮𑁂𑀦 𑀓𑀸𑀮𑀁 𑀓𑀻𑀴𑀸𑀩𑀳𑀼𑀮𑀸 𑀯𑀺𑀘𑀭𑀦𑁆𑀢𑀺. 𑀤𑀼𑀕𑁆𑀕𑀢𑁂 𑀫𑀳𑀮𑁆𑀮𑀓𑁂 𑀧𑀼𑀭𑀺𑀲𑁂 𑀘 𑀇𑀢𑁆𑀣𑀺𑀬𑁄 𑀘 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀪𑀲𑁆𑀫𑀧𑀼𑀝𑁂𑀦 𑀧𑀺𑀝𑁆𑀞𑀺𑀬𑀁 𑀆𑀓𑀺𑀭𑀦𑁆𑀢𑀺, 𑀓𑁂𑀢𑀓𑀻𑀧𑀡𑁆𑀡𑀁 𑀓𑀘𑁆𑀙𑀦𑁆𑀢𑀭𑁂 𑀑𑀮𑀫𑁆𑀩𑁂𑀦𑁆𑀢𑀺, 𑀢𑁂𑀦 𑀯𑀺𑀧𑁆𑀧𑀓𑀸𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁂 ¶ 𑀬𑀣𑀸𑀯𑀚𑁆𑀚𑀓𑀻𑀴𑀺𑀢𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀳𑀲𑀦𑁆𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀢𑀲𑁆𑀫𑀺𑀁 𑀦𑀺𑀕𑀫𑁂 𑀢𑁂 𑀏𑀯𑀁 𑀯𑀺𑀘𑀭𑀦𑁆𑀢𑁂 𑀥𑀼𑀢𑁆𑀢𑀤𑀸𑀭𑀓𑁂 𑀤𑀺𑀲𑁆𑀯𑀸 ‘‘𑀮𑀤𑁆𑀥𑁄 𑀯𑀢 𑀤𑀸𑀦𑀺 𑀫𑁂 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀧𑀭𑀺𑀧𑀽𑀭𑀡𑀽𑀧𑀸𑀬𑁄’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀯𑀺𑀳𑀸𑀲𑀺. 𑀢𑀁 𑀢𑁂 𑀥𑀼𑀢𑁆𑀢𑀤𑀸𑀭𑀓𑀸 𑀧𑀲𑁆𑀲𑀺𑀢𑁆𑀯𑀸 𑀯𑀺𑀧𑁆𑀧𑀓𑀸𑀭𑀁 𑀓𑀸𑀢𑀼𑀁 𑀆𑀭𑀪𑀦𑁆𑀢𑀺.

𑀫𑀳𑀸𑀲𑀢𑁆𑀢𑁄 𑀢𑀁 𑀅𑀲𑀳𑀦𑁆𑀢𑁄 𑀯𑀺𑀬 𑀘 𑀢𑁂𑀳𑀺 𑀪𑀸𑀬𑀦𑁆𑀢𑁄 𑀯𑀺𑀬 𑀘 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀢𑁂 𑀢𑀁 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀲𑁄 𑀢𑁂𑀳𑀺 𑀅𑀦𑀼𑀩𑀦𑁆𑀥𑀺𑀬𑀫𑀸𑀦𑁄 ‘‘𑀏𑀢𑁆𑀣 𑀦𑀢𑁆𑀣𑀺 𑀓𑁄𑀘𑀺 𑀧𑀝𑀺𑀯𑀢𑁆𑀢𑀸’’𑀢𑀺 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀺𑀓𑀁 𑀲𑀻𑀲𑀽𑀧𑀥𑀸𑀦𑀁 𑀓𑀢𑁆𑀯𑀸 𑀲𑀬𑀢𑀺. 𑀥𑀼𑀢𑁆𑀢𑀤𑀸𑀭𑀓𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀑𑀝𑁆𑀞𑀼𑀪𑀦𑀸𑀤𑀺𑀓𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀧𑁆𑀧𑀓𑀸𑀭𑀁 𑀓𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀏𑀯𑀁 𑀢𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀓𑀭𑁄𑀦𑁆𑀢𑀺 𑀏𑀯. 𑀬𑁂 𑀧𑀦 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸, 𑀢𑁂 𑀏𑀯𑀁 𑀓𑀭𑁄𑀦𑁆𑀢𑁂 𑀧𑀲𑁆𑀲𑀦𑁆𑀢𑀺. 𑀢𑁂 𑀢𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀅𑀬𑀁 𑀫𑀳𑀸𑀦𑀼𑀪𑀸𑀯𑁄 𑀢𑀧𑀲𑁆𑀲𑀻 𑀫𑀳𑀸𑀬𑁄𑀕𑀻’’𑀢𑀺 𑀘 𑀜𑀢𑁆𑀯𑀸 𑀉𑀴𑀸𑀭𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀲𑀩𑁆𑀩𑀢𑁆𑀣 𑀏𑀓𑀲𑀤𑀺𑀲𑁄𑀯 𑀳𑁄𑀢𑀺 𑀫𑀚𑁆𑀛𑀢𑁆𑀢𑀪𑀽𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀻’’𑀢𑀺𑀆𑀤𑀺.

𑀢𑀢𑁆𑀣 𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀙𑀯𑀝𑁆𑀞𑀺𑀓𑀁 𑀉𑀧𑀦𑀺𑀥𑀸𑀬𑀸𑀢𑀺 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀓𑀴𑁂𑀯𑀭𑀢𑁄 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀢𑀳𑀺𑀁 𑀢𑀳𑀺𑀁 𑀯𑀺𑀓𑁆𑀔𑀺𑀢𑁆𑀢𑁂𑀲𑀼 𑀅𑀝𑁆𑀞𑀺𑀓𑁂𑀲𑀼 𑀏𑀓𑀁 𑀅𑀝𑁆𑀞𑀺𑀓𑀁 𑀲𑀻𑀲𑀽𑀧𑀥𑀸𑀦𑀁 𑀓𑀢𑁆𑀯𑀸 𑀲𑀼𑀘𑀺𑀫𑁆𑀳𑀺 𑀘 ¶ 𑀅𑀲𑀼𑀘𑀺𑀫𑁆𑀳𑀺 𑀘 𑀲𑀫𑀸𑀦𑀘𑀺𑀢𑁆𑀢𑀢𑀸𑀬 𑀢𑀲𑁆𑀫𑀺𑀁 𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀲𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀕𑀸𑀫𑀡𑁆𑀟𑀮𑀸𑀢𑀺 𑀕𑀸𑀫𑀤𑀸𑀭𑀓𑀸. 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺𑀦𑀧𑁆𑀧𑀓𑀦𑁆𑀢𑀺 𑀬𑀣𑀸𑀯𑀚𑁆𑀚𑀓𑀻𑀴𑀺𑀢𑀸𑀬 𑀑𑀝𑁆𑀞𑀼𑀪𑀦𑀉𑀧𑀳𑀲𑀦𑀉𑀫𑁆𑀫𑀺𑀳𑀦𑀸𑀤𑀻𑀳𑀺 𑀓𑀡𑁆𑀡𑀲𑁄𑀢𑁂 𑀲𑀮𑀸𑀓𑀧𑁆𑀧𑀯𑁂𑀲𑀦𑀸𑀤𑀻𑀳𑀺 𑀘 𑀅𑀢𑀺𑀓𑀓𑁆𑀔𑀴𑀁 𑀅𑀦𑀧𑁆𑀧𑀓𑀁 𑀦𑀸𑀦𑀧𑁆𑀧𑀓𑀸𑀭𑀁 𑀭𑀽𑀧𑀁 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀺.

𑁧𑁨𑁦. 𑀅𑀧𑀭𑁂𑀢𑀺 𑀢𑁂𑀲𑀼 𑀏𑀯 𑀕𑀸𑀫𑀤𑀸𑀭𑀓𑁂𑀲𑀼 𑀏𑀓𑀘𑁆𑀘𑁂. 𑀉𑀧𑀸𑀬𑀦𑀸𑀦𑀽𑀧𑀦𑁂𑀦𑁆𑀢𑀻𑀢𑀺 ‘‘𑀅𑀬𑀁 𑀇𑀫𑁂𑀲𑀼 𑀧𑀭𑀺𑀪𑀯𑀯𑀲𑁂𑀦 𑀏𑀯𑀭𑀽𑀧𑀁 𑀯𑀺𑀧𑁆𑀧𑀓𑀸𑀭𑀁 𑀓𑀭𑁄𑀦𑁆𑀢𑁂𑀲𑀼 𑀦 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀤𑀲𑁆𑀲𑁂𑀢𑀺, 𑀲𑀫𑁆𑀫𑀸𑀦𑀦𑁂 𑀦𑀼 𑀔𑁄 𑀓𑀻𑀤𑀺𑀲𑁄’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀯𑀺𑀯𑀺𑀥𑀁 𑀩𑀳𑀼𑀁 𑀕𑀦𑁆𑀥𑀫𑀸𑀮𑀁 𑀪𑁄𑀚𑀦𑀁 𑀅𑀜𑁆𑀜𑀸𑀦𑀺 𑀘 𑀉𑀧𑀸𑀬𑀦𑀸𑀦𑀺 𑀧𑀡𑁆𑀡𑀸𑀓𑀸𑀭𑀸𑀦𑀺 𑀉𑀧𑀦𑁂𑀦𑁆𑀢𑀺 𑀉𑀧𑀳𑀭𑀦𑁆𑀢𑀺. 𑀅𑀧𑀭𑁂𑀳𑀺 𑀯𑀸 𑀢𑁂𑀳𑀺 𑀅𑀦𑀸𑀘𑀸𑀭𑀕𑀸𑀫𑀤𑀸𑀭𑀓𑁂𑀳𑀺 𑀅𑀜𑁆𑀜𑁂 𑀯𑀺𑀜𑁆𑀜𑀽 𑀫𑀦𑀼𑀲𑁆𑀲𑀸 ‘‘𑀅𑀬𑀁 𑀇𑀫𑁂𑀲𑀁 𑀏𑀯𑀁 𑀯𑀺𑀯𑀺𑀥𑀫𑁆𑀧𑀺 𑀯𑀺𑀧𑁆𑀧𑀓𑀸𑀭𑀁 𑀓𑀭𑁄𑀦𑁆𑀢𑀸𑀦𑀁 𑀦 𑀓𑀼𑀧𑁆𑀧𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀁𑀬𑁂𑀯 𑀢𑁂𑀲𑀼 𑀉𑀧𑀝𑁆𑀞𑀧𑁂𑀢𑀺, 𑀅𑀳𑁄 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄’’𑀢𑀺 𑀳𑀝𑁆𑀞𑀸 ‘‘𑀩𑀳𑀼 𑀯𑀢𑀺𑀫𑁂𑀳𑀺 𑀏𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 ¶ 𑀅𑀧𑀼𑀜𑁆𑀜𑀁 𑀧𑀲𑀼𑀢’’𑀦𑁆𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀲𑀸𑀯 𑀳𑀼𑀢𑁆𑀯𑀸 𑀩𑀳𑀼𑀁 𑀕𑀦𑁆𑀥𑀫𑀸𑀮𑀁 𑀯𑀺𑀯𑀺𑀥𑀁 𑀪𑁄𑀚𑀦𑀁 𑀅𑀜𑁆𑀜𑀸𑀦𑀺 𑀘 𑀉𑀧𑀸𑀬𑀦𑀸𑀦𑀺 𑀉𑀧𑀦𑁂𑀦𑁆𑀢𑀺 𑀉𑀧𑀳𑀭𑀦𑁆𑀢𑀺.

𑁧𑁨𑁧. 𑀬𑁂 ¶ 𑀫𑁂 𑀤𑀼𑀓𑁆𑀔𑀁 𑀉𑀧𑀳𑀭𑀦𑁆𑀢𑀻𑀢𑀺 𑀬𑁂 𑀕𑀸𑀫𑀤𑀸𑀭𑀓𑀸 𑀫𑀬𑁆𑀳𑀁 𑀲𑀭𑀻𑀭𑀤𑀼𑀓𑁆𑀔𑀁 𑀉𑀧𑀳𑀭𑀦𑁆𑀢𑀺 𑀉𑀧𑀦𑁂𑀦𑁆𑀢𑀺. ‘‘𑀉𑀧𑀤𑀳𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄, 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂 𑀘 𑀤𑁂𑀦𑁆𑀢𑀺 𑀲𑀼𑀔𑀁 𑀫𑀫𑀸𑀢𑀺 𑀬𑁂 𑀘 𑀯𑀺𑀜𑁆𑀜𑀽 𑀫𑀦𑀼𑀲𑁆𑀲𑀸 𑀫𑀫 𑀫𑀬𑁆𑀳𑀁 𑀲𑀼𑀔𑀁 𑀤𑁂𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀪𑁄𑀚𑀦𑀸𑀤𑀺𑀲𑀼𑀔𑀽𑀧𑀓𑀭𑀡𑁂𑀳𑀺 𑀫𑀫 𑀲𑀼𑀔𑀁 𑀉𑀧𑀳𑀭𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀳𑁄𑀫𑀻𑀢𑀺 𑀓𑀢𑁆𑀣𑀘𑀺𑀧𑀺 𑀯𑀺𑀓𑀸𑀭𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀲𑀫𑀸𑀦𑀘𑀺𑀢𑁆𑀢𑀢𑀸𑀬 𑀯𑀺𑀯𑀺𑀥𑀸𑀦𑀫𑁆𑀧𑀺 𑀢𑁂𑀲𑀁 𑀚𑀦𑀸𑀦𑀁 𑀲𑀫𑀓𑁄 𑀏𑀓𑀲𑀤𑀺𑀲𑁄 𑀳𑁄𑀫𑀺 𑀪𑀯𑀸𑀫𑀺. 𑀤𑀬𑀸 𑀓𑁄𑀧𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀬𑀲𑁆𑀫𑀸 𑀫𑀬𑁆𑀳𑀁 𑀉𑀧𑀓𑀸𑀭𑀓𑁂 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑀸 𑀤𑀬𑀸, 𑀅𑀧𑀓𑀸𑀭𑀓𑁂 𑀫𑀦𑁄𑀧𑀤𑁄𑀲𑀲𑀗𑁆𑀔𑀸𑀢𑁄 𑀓𑁄𑀧𑁄𑀧𑀺 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀳𑁄𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁨𑁨. 𑀇𑀤𑀸𑀦𑀺 𑀪𑀕𑀯𑀸 𑀢𑀤𑀸 𑀉𑀧𑀓𑀸𑀭𑀻𑀲𑀼 𑀅𑀧𑀓𑀸𑀭𑀻𑀲𑀼 𑀘 𑀲𑀢𑁆𑀢𑁂𑀲𑀼 𑀲𑀫𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑀲𑁆𑀲 𑀅𑀢𑁆𑀢𑀦𑁄 𑀲𑀫𑀸𑀦𑀘𑀺𑀢𑁆𑀢𑀢𑀸 𑀯𑀺𑀓𑀸𑀭𑀸𑀪𑀸𑀯𑁄 𑀬𑀸 𑀘 𑀮𑁄𑀓𑀥𑀫𑁆𑀫𑁂𑀲𑀼 𑀅𑀦𑀼𑀧𑀮𑀺𑀢𑁆𑀢𑀢𑀸 𑀅𑀳𑁄𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀤𑀼𑀓𑁆𑀔𑁂 𑀢𑀼𑀮𑀸𑀪𑀽𑀢𑁄’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳.

𑀢𑀢𑁆𑀣 𑀲𑀼𑀔𑀤𑀼𑀓𑁆𑀔𑁂𑀢𑀺 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘. 𑀢𑀼𑀮𑀸𑀪𑀽𑀢𑁄𑀢𑀺 𑀲𑀫𑀓𑀁 𑀕𑀳𑀺𑀢𑀢𑀼𑀮𑀸 𑀯𑀺𑀬 𑀑𑀦𑀢𑀺𑀉𑀦𑁆𑀦𑀢𑀺𑀅𑀧𑀦𑀢𑀺𑀁 𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑀢𑁆𑀢𑀪𑀽𑀢𑁄, 𑀲𑀼𑀔𑀤𑀼𑀓𑁆𑀔𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀢𑀁𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀮𑀸𑀪𑀸𑀮𑀸𑀪𑀸𑀧𑀺 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁂𑀲𑀽𑀢𑀺 𑀓𑀺𑀢𑁆𑀢𑀻𑀲𑀼. 𑀅𑀬𑀲𑁂𑀲𑀽𑀢𑀺 𑀦𑀺𑀦𑁆𑀤𑀸𑀲𑀼. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀼𑀔𑀸𑀤𑀻𑀲𑀼 𑀮𑁄𑀓𑀥𑀫𑁆𑀫𑁂𑀲𑀼. 𑀇𑀢𑀺 𑀪𑀕𑀯𑀸 𑀢𑀤𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑀩𑁆𑀩𑀮𑁄𑀓𑀥𑀫𑁆𑀫𑁂𑀲𑀼 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 ¶ 𑀅𑀢𑁆𑀢𑀦𑁄 𑀫𑀚𑁆𑀛𑀢𑁆𑀢𑀪𑀸𑀯𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑁂𑀦 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀲𑀺𑀔𑀸𑀧𑁆𑀧𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀏𑀲𑀸 𑀫𑁂 𑀉𑀧𑁂𑀓𑁆𑀔𑀸𑀧𑀸𑀭𑀫𑀻’’𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀇𑀥𑀸𑀧𑀺 𑀫𑀳𑀸𑀲𑀢𑁆𑀢𑀲𑁆𑀲 𑀧𑀞𑀫𑀁 𑀤𑀸𑀦𑀧𑀸𑀭𑀫𑀻 𑀦𑀸𑀫 𑀯𑀺𑀲𑁂𑀲𑀢𑁄 𑀲𑀩𑁆𑀩𑀯𑀺𑀪𑀯𑀧𑀭𑀺𑀘𑁆𑀘𑀸𑀕𑁄 ‘‘𑀬𑁂 𑀓𑁂𑀘𑀺 𑀇𑀫𑀁 𑀲𑀭𑀻𑀭𑀁 𑀕𑀳𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀁 𑀓𑀭𑁄𑀦𑁆𑀢𑀽’’𑀢𑀺 𑀅𑀦𑀧𑁂𑀓𑁆𑀔𑀪𑀸𑀯𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀧𑀭𑀺𑀘𑁆𑀘𑀸𑀕𑁄 𑀘 𑀤𑀸𑀦𑀧𑀸𑀭𑀫𑀻, 𑀳𑀻𑀦𑀸𑀤𑀺𑀓𑀲𑁆𑀲 𑀲𑀩𑁆𑀩𑀲𑁆𑀲 𑀅𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑀁 𑀲𑀻𑀮𑀧𑀸𑀭𑀫𑀻, 𑀓𑀸𑀫𑀲𑁆𑀲𑀸𑀤𑀯𑀺𑀫𑀼𑀔𑀲𑁆𑀲 𑀕𑁂𑀳𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀲𑀢𑁄 𑀓𑀸𑀬𑁂 𑀅𑀲𑀼𑀪𑀲𑀜𑁆𑀜𑀸𑀦𑀼𑀩𑁆𑀭𑀽𑀳𑀦𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀲𑀫𑁆𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀉𑀧𑀓𑀸𑀭𑀥𑀫𑁆𑀫𑀧𑀭𑀺𑀕𑁆𑀕𑀳𑀡𑁂 𑀢𑀧𑁆𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑁂 𑀘 𑀓𑁄𑀲𑀮𑁆𑀮𑀁 𑀅𑀯𑀺𑀧𑀭𑀻𑀢𑀢𑁄 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀦𑀸 𑀘 𑀧𑀜𑁆𑀜𑀸𑀧𑀸𑀭𑀫𑀻 ¶ , 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀺𑀦𑁄𑀤𑀦𑀁 𑀤𑀼𑀓𑁆𑀔𑀸𑀥𑀺𑀯𑀸𑀲𑀦𑀯𑀻𑀭𑀺𑀬𑀜𑁆𑀘 𑀯𑀻𑀭𑀺𑀬𑀧𑀸𑀭𑀫𑀻, 𑀲𑀩𑁆𑀩𑀸𑀧𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀔𑀦𑁆𑀢𑀺𑀧𑀸𑀭𑀫𑀻, 𑀯𑀘𑀻𑀲𑀘𑁆𑀘𑀁 𑀲𑀫𑀸𑀤𑀸𑀦𑀸𑀯𑀺𑀲𑀁𑀯𑀸𑀤𑀦𑁂𑀦 𑀯𑀺𑀭𑀢𑀺𑀲𑀘𑁆𑀘𑀜𑁆𑀘 𑀲𑀘𑁆𑀘𑀧𑀸𑀭𑀫𑀻 ¶ , 𑀅𑀦𑀯𑀚𑁆𑀚𑀥𑀫𑁆𑀫𑁂 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀅𑀦𑁄𑀥𑀺𑀲𑁄 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀪𑀸𑀯𑁄 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀧𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺. 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀘𑁂𑀢𑁆𑀣 𑀅𑀢𑀺𑀲𑀬𑀯𑀢𑀻𑀢𑀺 𑀓𑀢𑁆𑀯𑀸 𑀲𑀸𑀬𑁂𑀯 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸. 𑀢𑀣𑀸 𑀇𑀥 𑀫𑀳𑀸𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑀤𑀺𑀲𑀁 𑀕𑁂𑀳𑀢𑁄 𑀦𑀺𑀓𑁆𑀔𑀫𑀦𑀁, 𑀢𑀣𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀚𑀺𑀕𑀼𑀘𑁆𑀙𑀢𑁄 𑀧𑀭𑁂𑀲𑀁 𑀲𑀫𑁆𑀪𑀸𑀯𑀦𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀦𑀯𑀲𑁂𑀲𑀁 𑀧𑀩𑁆𑀩𑀚𑁆𑀚𑀸𑀕𑀼𑀡𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀫𑀲𑀼𑀔𑀯𑀺𑀳𑀸𑀭𑁄, 𑀧𑀭𑀫𑀧𑁆𑀧𑀺𑀘𑁆𑀙𑀢𑀸, 𑀧𑀯𑀺𑀯𑁂𑀓𑀸𑀪𑀺𑀭𑀢𑀺, 𑀉𑀧𑁂𑀓𑁆𑀔𑀡𑀸𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀦𑁄 𑀓𑀸𑀬𑀚𑀻𑀯𑀺𑀢𑀦𑀺𑀭𑀧𑁂𑀓𑁆𑀔𑀸, 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀉𑀧𑀭𑀺 𑀓𑀢𑀯𑀺𑀧𑁆𑀧𑀓𑀸𑀭𑀸𑀥𑀺𑀯𑀸𑀲𑀦𑀁, 𑀉𑀓𑁆𑀓𑀁𑀲𑀕𑀢𑀲𑀮𑁆𑀮𑁂𑀔𑀯𑀼𑀢𑁆𑀢𑀺, 𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀓𑁆𑀔𑀸𑀦𑀁 𑀓𑀺𑀮𑁂𑀲𑀸𑀦𑀁 𑀢𑀦𑀼𑀪𑀸𑀯𑁂𑀦 𑀔𑀻𑀡𑀸𑀲𑀯𑀸𑀦𑀁 𑀯𑀺𑀬 𑀧𑀭𑁂𑀲𑀁 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑀳𑁂𑀢𑀼𑀪𑀽𑀢𑁂𑀦 𑀲𑀩𑁆𑀩𑀢𑁆𑀣 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑁄 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀼𑀧𑀮𑁂𑀧𑁄, 𑀲𑀩𑁆𑀩𑀧𑀸𑀭𑀫𑀻𑀦𑀁 𑀫𑀼𑀤𑁆𑀥𑀪𑀽𑀢𑀸𑀬 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀲𑀺𑀔𑀸𑀧𑁆𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸𑀦𑀼𑀪𑀸𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀸𑀢𑀺.

𑀫𑀳𑀸𑀮𑁄𑀫𑀳𑀁𑀲𑀘𑀭𑀺𑀬𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑀸𑀦𑀕𑀸𑀣𑀸𑀯𑀡𑁆𑀡𑀦𑀸

‘‘𑀬𑀼𑀥𑀜𑁆𑀚𑀬𑁄’’𑀢𑀺𑀆𑀤𑀺𑀓𑀸 ¶ 𑀉𑀤𑁆𑀤𑀸𑀦𑀕𑀸𑀣𑀸. 𑀢𑀢𑁆𑀣 𑀪𑀺𑀲𑁂𑀦𑀸𑀢𑀺 𑀪𑀺𑀲𑀸𑀧𑀤𑁂𑀲𑁂𑀦 𑀫𑀳𑀸𑀓𑀜𑁆𑀘𑀦𑀘𑀭𑀺𑀬𑀁 (𑀘𑀭𑀺𑀬𑀸. 𑁩.𑁩𑁪 𑀆𑀤𑀬𑁄) 𑀤𑀲𑁆𑀲𑁂𑀢𑀺. 𑀲𑁄𑀡𑀦𑀦𑁆𑀤𑁄𑀢𑀺 𑀇𑀫𑀺𑀦𑀸 𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀁 (𑀘𑀭𑀺𑀬𑀸. 𑁩.𑁪𑁨 𑀆𑀤𑀬𑁄 ) 𑀤𑀲𑁆𑀲𑁂𑀢𑀺. 𑀢𑀣𑀸 𑀫𑀽𑀕𑀧𑀓𑁆𑀔𑁄𑀢𑀺 𑀫𑀽𑀕𑀧𑀓𑁆𑀔𑀸𑀧𑀤𑁂𑀲𑁂𑀦 𑀢𑁂𑀫𑀺𑀬𑀧𑀡𑁆𑀟𑀺𑀢𑀘𑀭𑀺𑀬𑀁 (𑀘𑀭𑀺𑀬𑀸. 𑁩.𑁪𑁮 𑀆𑀤𑀬𑁄) 𑀤𑀲𑁆𑀲𑁂𑀢𑀺. 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀲𑀻𑀲𑁂𑀦 𑀫𑀳𑀸𑀮𑁄𑀫𑀳𑀁𑀲𑀘𑀭𑀺𑀬𑀁 (𑀘𑀭𑀺𑀬𑀸. 𑁩.𑁧𑁧𑁯 𑀆𑀤𑀬𑁄) 𑀤𑀲𑁆𑀲𑁂𑀢𑀺. 𑀆𑀲𑀺 𑀇𑀢𑀺 𑀯𑀼𑀝𑁆𑀞𑀁 𑀫𑀳𑁂𑀲𑀺𑀦𑀸𑀢𑀺 𑀬𑀣𑀸, 𑀲𑀸𑀭𑀺𑀧𑀼𑀢𑁆𑀢, 𑀢𑀼𑀬𑁆𑀳𑀁 𑀏𑀢𑀭𑀳𑀺 𑀤𑁂𑀲𑀺𑀢𑀁, 𑀇𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀺𑀥𑀸𑀦𑁂𑀦 𑀫𑀳𑀦𑁆𑀢𑀸𑀦𑀁 𑀤𑀸𑀦𑀧𑀸𑀭𑀫𑀺𑀆𑀤𑀻𑀦𑀁 𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀏𑀲𑀦𑀢𑁄 𑀫𑀳𑁂𑀲𑀺𑀦𑀸 𑀢𑀤𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁂𑀦 ¶ 𑀫𑀬𑀸 𑀯𑀼𑀝𑁆𑀞𑀁 𑀘𑀺𑀡𑁆𑀡𑀁 𑀘𑀭𑀺𑀢𑀁 𑀧𑀝𑀺𑀧𑀦𑁆𑀦𑀁 𑀆𑀲𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄 ¶ . 𑀇𑀤𑀸𑀦𑀺 𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀯𑀲𑁂𑀦 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀢𑀁 𑀇𑀥 𑀯𑀼𑀢𑁆𑀢𑀁 𑀅𑀯𑀼𑀢𑁆𑀢𑀜𑁆𑀘 𑀅𑀢𑁆𑀢𑀦𑁄 𑀤𑀼𑀓𑁆𑀓𑀭𑀓𑀺𑀭𑀺𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀬𑀤𑀢𑁆𑀣𑀁 𑀲𑀸 𑀧𑀯𑀢𑁆𑀢𑀺𑀢𑀸, 𑀢𑀜𑁆𑀘 𑀲𑀗𑁆𑀔𑁂𑀧𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀩𑀳𑀼𑀩𑁆𑀩𑀺𑀥’’𑀦𑁆𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀩𑀳𑀼𑀩𑁆𑀩𑀺𑀥𑀁 𑀤𑀼𑀓𑁆𑀔𑀦𑁆𑀢𑀺 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀸𑀤𑀺𑀓𑀸𑀮𑁂 𑀓𑀸𑀭𑀧𑀡𑁆𑀡𑀸𑀤𑀺𑀆𑀳𑀸𑀭𑀢𑀸𑀬 𑀢𑀜𑁆𑀘 𑀬𑀸𑀘𑀓𑀲𑁆𑀲 𑀤𑀢𑁆𑀯𑀸 𑀆𑀳𑀸𑀭𑀽𑀧𑀘𑁆𑀙𑁂𑀤𑀸𑀤𑀺𑀦𑀸 𑀘 𑀩𑀳𑀼𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁. 𑀢𑀣𑀸 𑀓𑀼𑀭𑀼𑀭𑀸𑀚𑀸𑀤𑀺𑀓𑀸𑀮𑁂 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸 𑀲𑀫𑁆𑀧𑀢𑁆𑀢𑀻 𑀘 𑀩𑀳𑀼𑀩𑁆𑀩𑀺𑀥𑀸. 𑀪𑀯𑀸𑀪𑀯𑁂𑀢𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀪𑀯𑁂. 𑀪𑀯𑀸𑀪𑀯𑁂 𑀯𑀸 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀩𑀳𑀼𑀯𑀺𑀥𑁂𑀳𑀺 𑀤𑀼𑀓𑁆𑀔𑁂𑀳𑀺 𑀅𑀯𑀺𑀳𑀜𑁆𑀜𑀫𑀸𑀦𑁄 𑀩𑀳𑀼𑀯𑀺𑀥𑀸𑀳𑀺 𑀘 𑀲𑀫𑁆𑀧𑀢𑁆𑀢𑀻𑀳𑀺 𑀅𑀦𑀸𑀓𑀟𑁆𑀠𑀺𑀬𑀫𑀸𑀦𑁄 𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀧𑀲𑀼𑀢𑁄 𑀏𑀯 𑀳𑀼𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀦𑁆𑀦𑁄 𑀉𑀢𑁆𑀢𑀫𑀁 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀸𑀲𑀁 𑀧𑀸𑀭𑀫𑀻𑀦𑀁 𑀧𑀭𑀺𑀧𑀽𑀭𑀡𑀢𑁆𑀣𑀁 𑀏𑀲𑀸 𑀤𑀼𑀓𑁆𑀓𑀭𑀘𑀭𑀺𑀬𑀸 𑀘𑀺𑀭𑀁 𑀧𑀯𑀢𑁆𑀢𑀺𑀢𑀸, 𑀢𑀸𑀲𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀢𑁂𑀦 𑀘 𑀧𑀢𑁆𑀢𑀩𑁆𑀩𑀨𑀮𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀢𑁆𑀯𑀸 𑀤𑀸𑀢𑀩𑁆𑀩𑀓𑀁 𑀤𑀸𑀦𑀁, 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀅𑀲𑁂𑀲𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀤𑀢𑁆𑀯𑀸 𑀤𑀸𑀢𑀩𑁆𑀩𑀓𑀁 𑀤𑀸𑀦𑀦𑁆𑀢𑀺 𑀢𑀤𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑀼𑀁 𑀅𑀕𑁆𑀕𑀬𑀸𑀦𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀦 𑀤𑀸𑀢𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑀁 𑀩𑀸𑀳𑀺𑀭𑀁 𑀭𑀚𑁆𑀚𑀸𑀤𑀺𑀁 𑀅𑀩𑁆𑀪𑀦𑁆𑀢𑀭𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄𑀢𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀧𑀭𑀺𑀬𑁄𑀲𑀸𑀦𑀁 𑀤𑀸𑀦𑀧𑀸𑀭𑀫𑀺𑀤𑀸𑀦𑀉𑀧𑀧𑀸𑀭𑀫𑀺𑀤𑀸𑀦𑀧𑀭𑀫𑀢𑁆𑀣𑀧𑀸𑀭𑀫𑀺𑀧𑁆𑀧𑀪𑁂𑀤𑀁 ¶ 𑀤𑀸𑀦𑀁 𑀅𑀦𑀯𑀲𑁂𑀲𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀓𑀺𑀢𑁆𑀢𑀺𑀩𑁆𑀭𑀸𑀳𑁆𑀫𑀡𑀓𑀸𑀮𑁂 (𑀘𑀭𑀺𑀬𑀸. 𑁧.𑁧 𑀆𑀤𑀬𑁄; 𑀚𑀸. 𑁧.𑁧𑁩.𑁮𑁩 𑀆𑀤𑀬𑁄) 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀓𑀸𑀮𑁂𑀢𑀺 (𑀘𑀭𑀺𑀬𑀸. 𑁧.𑁧𑁧 𑀆𑀤𑀬𑁄; 𑀚𑀸. 𑁧.𑁧𑁦.𑁩𑁯 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀇𑀥 𑀆𑀕𑀢𑁂𑀲𑀼 𑀅𑀦𑀸𑀕𑀢𑁂𑀲𑀼 𑀘 𑀯𑀺𑀲𑀬𑁆𑀳𑀲𑁂𑀝𑁆𑀞𑀺𑀓𑀸𑀮𑁂 (𑀚𑀸. 𑁧.𑁪.𑁧𑁫𑁭 𑀆𑀤𑀬𑁄) 𑀯𑁂𑀮𑀸𑀫𑀓𑀸𑀮𑁂𑀢𑀺 (𑀅. 𑀦𑀺. 𑁯.𑁨𑁦) 𑀏𑀯𑀫𑀸𑀤𑀻𑀲𑀼𑀧𑀺 𑀤𑀸𑀦𑀧𑀸𑀭𑀫𑀺𑀬𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀲𑀧𑀡𑁆𑀟𑀺𑀢𑀓𑀸𑀮𑁂 𑁋

‘‘𑀪𑀺𑀓𑁆𑀔𑀸𑀬 ¶ 𑀉𑀧𑀕𑀢𑀁 𑀤𑀺𑀲𑁆𑀯𑀸, 𑀲𑀓𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀺𑀁;

𑀤𑀸𑀦𑁂𑀦 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀤𑀸𑀦𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁧. 𑀢𑀲𑁆𑀲𑀼𑀤𑁆𑀤𑀸𑀦) 𑁋

𑀏𑀯𑀁 ¶ 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀤𑀸𑀦𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀇𑀢𑀭𑁂𑀲𑀼 𑀧𑀦 𑀬𑀣𑀸𑀭𑀳𑀁 𑀧𑀸𑀭𑀫𑀺𑀉𑀧𑀧𑀸𑀭𑀫𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀅𑀲𑁂𑀲𑀢𑁄𑀢𑀺 𑀢𑀣𑀸 𑀅𑀦𑀯𑀲𑁂𑀲𑀢𑁄 𑀓𑀸𑀬𑀺𑀓𑁄 𑀲𑀁𑀯𑀭𑁄, 𑀯𑀸𑀘𑀲𑀺𑀓𑁄 𑀲𑀁𑀯𑀭𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀲𑀼𑀯𑀺𑀲𑀼𑀤𑁆𑀥𑀸𑀚𑀻𑀯𑀢𑀸𑀢𑀺 𑀏𑀯𑀫𑀸𑀤𑀺𑀓𑀁 𑀩𑁄𑀥𑀺𑀲𑀢𑁆𑀢𑀲𑀻𑀮𑀁 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀲𑀻𑀮𑀧𑀸𑀭𑀫𑀺𑀲𑀻𑀮𑀉𑀧𑀧𑀸𑀭𑀫𑀺𑀲𑀻𑀮𑀧𑀭𑀫𑀢𑁆𑀣𑀧𑀸𑀭𑀫𑀺𑀧𑁆𑀧𑀪𑁂𑀤𑀁 𑀧𑀽𑀭𑁂𑀢𑀩𑁆𑀩𑀁 𑀲𑀩𑁆𑀩𑀁 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑁂𑀢𑁆𑀯𑀸. 𑀇𑀥𑀸𑀧𑀺 𑀲𑀻𑀮𑀯𑀦𑀸𑀕𑀭𑀸𑀚𑀓𑀸𑀮𑁂 (𑀘𑀭𑀺𑀬𑀸. 𑁨.𑁧 𑀆𑀤𑀬𑁄; 𑀚𑀸. 𑁧.𑁧.𑁭𑁨) 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂𑀢𑀺 (𑀘𑀭𑀺𑀬𑀸. 𑁨.𑁨𑁦 𑀆𑀤𑀬𑁄; 𑀚𑀸. 𑁧.𑁧𑁫.𑁨𑁪𑁦 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀇𑀥 𑀆𑀕𑀢𑁂𑀲𑀼, 𑀅𑀦𑀸𑀕𑀢𑁂𑀲𑀼 𑀘 𑀫𑀳𑀸𑀓𑀧𑀺𑀓𑀸𑀮𑁂 (𑀘𑀭𑀺𑀬𑀸. 𑁩.𑁬𑁭 𑀆𑀤𑀬𑁄; 𑀚𑀸. 𑁧.𑁭.𑁮𑁩 𑀆𑀤𑀬𑁄; 𑁧.𑁧𑁬.𑁧𑁭𑁮 𑀆𑀤𑀬𑁄) 𑀙𑀤𑁆𑀤𑀦𑁆𑀢𑀓𑀸𑀮𑁂𑀢𑀺 (𑀚𑀸. 𑁧.𑁧𑁬.𑁯𑁭 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀫𑀳𑀸𑀲𑀢𑁆𑀢𑀲𑁆𑀲 𑀲𑀻𑀮𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀗𑁆𑀔𑀧𑀸𑀮𑀓𑀸𑀮𑁂 𑁋

‘‘𑀲𑀽𑀮𑁂𑀳𑀺 𑀯𑀺𑀦𑀺𑀯𑀺𑀚𑁆𑀛𑀦𑁆𑀢𑁂, 𑀓𑁄𑀝𑁆𑀝𑀬𑀦𑁆𑀢𑁂𑀧𑀺 𑀲𑀢𑁆𑀢𑀺𑀪𑀺;

𑀪𑁄𑀚𑀧𑀼𑀢𑁆𑀢𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀲𑀻𑀮𑀧𑀸𑀭𑀫𑀻’’𑀢𑀺. (𑀘𑀭𑀺𑀬𑀸. 𑁨.𑁯𑁧) 𑁋

𑀏𑀯𑀁 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑀲𑁆𑀲 𑀲𑀻𑀮𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀇𑀢𑀭𑁂𑀲𑀼 𑀧𑀦 𑀬𑀣𑀸𑀭𑀳𑀁 𑀧𑀸𑀭𑀫𑀺𑀉𑀧𑀧𑀸𑀭𑀫𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀦𑁂𑀓𑁆𑀔𑀫𑁆𑀫𑁂 ¶ 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸𑀢𑀺 𑀢𑀣𑀸 𑀢𑀺𑀯𑀺𑀥𑁂𑀧𑀺 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁂 𑀧𑀸𑀭𑀫𑀺𑀁 𑀧𑀭𑀫𑀼𑀓𑁆𑀓𑀁𑀲𑀁 𑀕𑀦𑁆𑀢𑁆𑀯𑀸. 𑀢𑀢𑁆𑀣 𑀬𑀼𑀥𑀜𑁆𑀚𑀬𑀓𑀸𑀮𑁂 (𑀘𑀭𑀺𑀬𑀸. 𑁩.𑁧 𑀆𑀤𑀬𑁄; 𑀚𑀸. 𑁧.𑁧𑁧.𑁭𑁩 𑀆𑀤𑀬𑁄) 𑀲𑁄𑀫𑀦𑀲𑁆𑀲𑀓𑀼𑀫𑀸𑀭𑀓𑀸𑀮𑁂𑀢𑀺 (𑀘𑀭𑀺𑀬𑀸. 𑁩.𑁭 𑀆𑀤𑀬𑁄; 𑀚𑀸. 𑁧.𑁧𑁫.𑁨𑁧𑁧 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀇𑀥 𑀆𑀕𑀢𑁂𑀲𑀼, 𑀅𑀦𑀸𑀕𑀢𑁂𑀲𑀼 𑀘 𑀳𑀢𑁆𑀣𑀺𑀧𑀸𑀮𑀓𑀼𑀫𑀸𑀭𑀓𑀸𑀮𑁂 (𑀚𑀸. 𑁧.𑁧𑁫.𑁩𑁩𑁭 𑀆𑀤𑀬𑁄) 𑀫𑀖𑀤𑁂𑀯𑀓𑀸𑀮𑁂𑀢𑀺 (𑀫. 𑀦𑀺. 𑁨.𑁩𑁦𑁮 𑀆𑀤𑀬𑁄; 𑀚𑀸. 𑁧.𑁧.𑁯) 𑀏𑀯𑀫𑀸𑀤𑀻𑀲𑀼 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀘𑀽𑀴𑀲𑀼𑀢𑀲𑁄𑀫𑀓𑀸𑀮𑁂 𑁋

‘‘𑀫𑀳𑀸𑀭𑀚𑁆𑀚𑀁 𑀳𑀢𑁆𑀣𑀕𑀢𑀁, 𑀔𑁂𑀴𑀧𑀺𑀡𑁆𑀟𑀁𑀯 𑀙𑀟𑁆𑀟𑀬𑀺𑀁;

𑀘𑀚𑀢𑁄 𑀦 𑀳𑁄𑀢𑀺 𑀮𑀕𑁆𑀕𑀦𑀁, 𑀏𑀲𑀸 𑀫𑁂 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸);

𑀏𑀯𑀁 𑀦𑀺𑀲𑁆𑀲𑀗𑁆𑀕𑀢𑀸𑀬 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀇𑀢𑀭𑁂𑀲𑀼 𑀧𑀦 𑀬𑀣𑀸𑀭𑀳𑀁 𑀧𑀸𑀭𑀫𑀺𑀉𑀧𑀧𑀸𑀭𑀫𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀧𑀡𑁆𑀟𑀺𑀢𑁂 ¶ 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀓𑀺𑀁 𑀓𑀼𑀲𑀮𑀁 𑀓𑀺𑀁 𑀅𑀓𑀼𑀲𑀮𑀁 𑀓𑀺𑀁 𑀲𑀸𑀯𑀚𑁆𑀚𑀁 𑀓𑀺𑀁 𑀅𑀦𑀯𑀚𑁆𑀚𑀦𑁆𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑀯𑀺𑀪𑀸𑀕𑀁 𑀓𑀫𑁆𑀫𑀓𑀫𑁆𑀫𑀨𑀮𑀯𑀺𑀪𑀸𑀕𑀁 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀸𑀯𑀳𑀁 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺𑀁 ¶ 𑀧𑀡𑁆𑀟𑀺𑀢𑁂 𑀲𑀧𑁆𑀧𑀜𑁆𑀜𑁂 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸. 𑀏𑀢𑁂𑀦 𑀧𑀜𑁆𑀜𑀸𑀧𑀸𑀭𑀫𑀺𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀯𑀺𑀥𑀼𑀭𑀧𑀡𑁆𑀟𑀺𑀢𑀓𑀸𑀮𑁂 (𑀚𑀸. 𑁨.𑁨𑁨.𑁧𑁩𑁪𑁬 𑀆𑀤𑀬𑁄) 𑀫𑀳𑀸𑀕𑁄𑀯𑀺𑀦𑁆𑀤𑀧𑀡𑁆𑀟𑀺𑀢𑀓𑀸𑀮𑁂 (𑀤𑀻. 𑀦𑀺. 𑁨.𑁨𑁯𑁩 𑀆𑀤𑀬𑁄; 𑀘𑀭𑀺𑀬𑀸 𑁧.𑁩𑁭 𑀆𑀤𑀬𑁄) 𑀓𑀼𑀤𑀸𑀮𑀧𑀡𑁆𑀟𑀺𑀢𑀓𑀸𑀮𑁂 (𑀚𑀸. 𑁧.𑁧.𑁭𑁦) 𑀅𑀭𑀓𑀧𑀡𑁆𑀟𑀺𑀢𑀓𑀸𑀮𑁂 (𑀚𑀸. 𑁧.𑁨.𑁩𑁭 𑀆𑀤𑀬𑁄) 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑀓𑀸𑀮𑁂 𑀫𑀳𑁄𑀲𑀥𑀧𑀡𑁆𑀟𑀺𑀢𑀓𑀸𑀮𑁂𑀢𑀺 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑁂𑀦𑀓𑀧𑀡𑁆𑀟𑀺𑀢𑀓𑀸𑀮𑁂 𑁋

‘‘𑀧𑀜𑁆𑀜𑀸𑀬 𑀯𑀺𑀘𑀺𑀦𑀦𑁆𑀢𑁄𑀳𑀁, 𑀩𑁆𑀭𑀸𑀳𑁆𑀫𑀡𑀁 𑀫𑁄𑀘𑀬𑀺𑀁 𑀤𑀼𑀔𑀸;

𑀧𑀜𑁆𑀜𑀸𑀬 𑀫𑁂 𑀲𑀫𑁄 𑀦𑀢𑁆𑀣𑀺, 𑀏𑀲𑀸 𑀫𑁂 𑀧𑀜𑁆𑀜𑀸𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑁆𑀓𑀣𑀸) 𑁋

𑀅𑀦𑁆𑀢𑁄𑀪𑀲𑁆𑀢𑀕𑀢𑀁 𑀲𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀧𑀜𑁆𑀜𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀯𑀻𑀭𑀺𑀬𑀁 𑀓𑀢𑁆𑀯𑀸𑀦 𑀉𑀢𑁆𑀢𑀫𑀦𑁆𑀢𑀺 ¶ 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀉𑀢𑁆𑀢𑀫𑀁 𑀧𑀥𑀸𑀦𑀁 𑀯𑀻𑀭𑀺𑀬𑀦𑁆𑀢𑀺 𑀯𑀺𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀧𑀸𑀭𑀫𑀺𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀢𑀢𑁆𑀣 𑀫𑀳𑀸𑀲𑀻𑀮𑀯𑀭𑀸𑀚𑀓𑀸𑀮𑁂 (𑀚𑀸. 𑁧.𑁧.𑁫𑁧) 𑀧𑀜𑁆𑀘𑀸𑀯𑀼𑀥𑀓𑀼𑀫𑀸𑀭𑀓𑀸𑀮𑁂 (𑀚𑀸. 𑁧.𑁧.𑁫𑁫) 𑀫𑀳𑀸𑀯𑀸𑀦𑀭𑀺𑀦𑁆𑀤𑀓𑀸𑀮𑁂𑀢𑀺 (𑀚𑀸. 𑁧.𑁧.𑁫𑁭) 𑀏𑀯𑀫𑀸𑀤𑀻𑀲𑀼 𑀯𑀻𑀭𑀺𑀬𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀫𑀳𑀸𑀚𑀦𑀓𑀓𑀸𑀮𑁂 𑁋

‘‘𑀅𑀢𑀻𑀭𑀤𑀲𑁆𑀲𑀻 𑀚𑀮𑀫𑀚𑁆𑀛𑁂, 𑀳𑀢𑀸 𑀲𑀩𑁆𑀩𑁂𑀯 𑀫𑀸𑀦𑀼𑀲𑀸;

𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀦𑀢𑁆𑀣𑀺, 𑀏𑀲𑀸 𑀫𑁂 𑀯𑀻𑀭𑀺𑀬𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀲𑁆𑀲 𑀯𑀻𑀭𑀺𑀬𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀆𑀤𑀺 𑀔𑀦𑁆𑀢𑀺𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑀁 𑀧𑀸𑀧𑁂𑀦𑁆𑀢𑁄 𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀁 𑀧𑀭𑀫𑀓𑁄𑀝𑀺𑀁 𑀕𑀦𑁆𑀢𑁆𑀯𑀸, 𑀔𑀦𑁆𑀢𑀺𑀧𑀸𑀭𑀫𑀺𑀁 𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀳𑀸𑀓𑀧𑀺𑀓𑀸𑀮𑁂 (𑀘𑀭𑀺𑀬𑀸. 𑁩.𑁬𑁭 𑀆𑀤𑀬𑁄; 𑀚𑀸. 𑁧.𑁭.𑁮𑁩 𑀆𑀤𑀬𑁄) 𑀫𑀳𑀺𑀁𑀲𑀭𑀸𑀚𑀓𑀸𑀮𑁂 (𑀚𑀸. 𑁧.𑁩.𑁮𑁨 𑀆𑀤𑀬𑁄) 𑀭𑀼𑀭𑀼𑀫𑀺𑀕𑀭𑀸𑀚𑀓𑀸𑀮𑁂 (𑀚𑀸. 𑁧.𑁧𑁩.𑁧𑁧𑁭 𑀆𑀤𑀬𑁄) 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀓𑀸𑀮𑁂𑀢𑀺 (𑀚𑀸. 𑁧.𑁧𑁧.𑁨𑁬 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀔𑀦𑁆𑀢𑀺𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀔𑀦𑁆𑀢𑀺𑀯𑀸𑀤𑀺𑀓𑀸𑀮𑁂 𑁋

‘‘𑀅𑀘𑁂𑀢𑀦𑀁 ¶ 𑀯 𑀓𑁄𑀝𑁆𑀝𑁂𑀦𑁆𑀢𑁂, 𑀢𑀺𑀡𑁆𑀳𑁂𑀦 𑀨𑀭𑀲𑀼𑀦𑀸 𑀫𑀫𑀁;

𑀓𑀸𑀲𑀺𑀭𑀸𑀚𑁂 𑀦 𑀓𑀼𑀧𑁆𑀧𑀸𑀫𑀺, 𑀏𑀲𑀸 𑀫𑁂 𑀔𑀦𑁆𑀢𑀺𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀅𑀘𑁂𑀢𑀦𑀪𑀸𑀯𑁂𑀦 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀔𑀦𑁆𑀢𑀺𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀓𑀢𑁆𑀯𑀸 𑀤𑀴𑁆𑀳𑀫𑀥𑀺𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀧𑀸𑀭𑀫𑀺𑀲𑀫𑀸𑀤𑀸𑀦𑀲𑁆𑀲 𑀢𑀤𑀼𑀧𑀓𑀸𑀭𑀓𑀲𑀫𑀸𑀤𑀸𑀦𑀲𑁆𑀲 𑀘 𑀅𑀥𑀺𑀝𑁆𑀞𑀸𑀦𑀁 𑀤𑀴𑁆𑀳𑀢𑀭𑀁 𑀅𑀲𑀺𑀣𑀺𑀮𑀁 𑀓𑀢𑁆𑀯𑀸, 𑀢𑀁 𑀢𑀁 𑀯𑀢𑀲𑀫𑀸𑀤𑀸𑀦𑀁 ¶ 𑀅𑀦𑀺𑀯𑀢𑁆𑀢𑀺𑀪𑀸𑀯𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀚𑁄𑀢𑀺𑀧𑀸𑀮𑀓𑀸𑀮𑁂 (𑀫. 𑀦𑀺. 𑁨.𑁨𑁮𑁨 𑀆𑀤𑀬𑁄) 𑀲𑀭𑀪𑀗𑁆𑀕𑀓𑀸𑀮𑁂 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄) 𑀦𑁂𑀫𑀺𑀓𑀸𑀮𑁂𑀢𑀺 (𑀘𑀭𑀺𑀬𑀸. 𑁧.𑁪𑁦 𑀆𑀤𑀬𑁄; 𑀚𑀸.𑁨.𑁨𑁨.𑁪𑁨𑁧 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 ¶ 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀢𑁂𑀫𑀺𑀬𑀓𑀼𑀫𑀸𑀭𑀓𑀸𑀮𑁂 𑁋

‘‘𑀫𑀸𑀢𑀸𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀅𑀢𑁆𑀢𑀸 𑀫𑁂 𑀦 𑀘 𑀤𑁂𑀲𑁆𑀲𑀺𑀬𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀯𑀢𑀫𑀥𑀺𑀝𑁆𑀞𑀳𑀺’’𑀦𑁆𑀢𑀺. (𑀘𑀭𑀺𑀬𑀸. 𑁩.𑁬𑁫) 𑁋

𑀏𑀯𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀲𑀘𑁆𑀘𑀯𑀸𑀘𑀸𑀦𑀼𑀭𑀓𑁆𑀔𑀺𑀬𑀸𑀢𑀺 𑀲𑀘𑁆𑀘𑀯𑀸𑀘𑀁 𑀅𑀦𑀼𑀭𑀓𑁆𑀔𑀺𑀢𑁆𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁂𑀧𑀺 𑀅𑀦𑀭𑀺𑀬𑀯𑁄𑀳𑀸𑀭𑀁 𑀕𑀽𑀣𑀁 𑀯𑀺𑀬 𑀚𑀺𑀕𑀼𑀘𑁆𑀙𑀦𑁆𑀢𑁄 𑀧𑀭𑀺𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁄 𑀅𑀯𑀺𑀲𑀁𑀯𑀸𑀤𑀺𑀪𑀸𑀯𑀁 𑀭𑀓𑁆𑀔𑀺𑀢𑁆𑀯𑀸. 𑀢𑀢𑁆𑀣 𑀓𑀧𑀺𑀭𑀸𑀚𑀓𑀸𑀮𑁂 (𑀘𑀭𑀺𑀬𑀸. 𑁩.𑁬𑁭 𑀆𑀤𑀬𑁄) 𑀲𑀘𑁆𑀘𑀢𑀸𑀧𑀲𑀓𑀸𑀮𑁂 𑀫𑀘𑁆𑀙𑀭𑀸𑀚𑀓𑀸𑀮𑁂𑀢𑀺 𑀏𑀯𑀫𑀸𑀤𑀻𑀲𑀼 𑀲𑀘𑁆𑀘𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀫𑀳𑀸𑀲𑀼𑀢𑀲𑁄𑀫𑀓𑀸𑀮𑁂 𑁋

‘‘𑀲𑀘𑁆𑀘𑀯𑀸𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀘𑀚𑀺𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁;

𑀫𑁄𑀘𑁂𑀲𑀺𑀁 𑀏𑀓𑀲𑀢𑀁 𑀔𑀢𑁆𑀢𑀺𑀬𑁂, 𑀏𑀲𑀸 𑀫𑁂 𑀲𑀘𑁆𑀘𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀚𑀻𑀯𑀺𑀢𑀁 𑀘𑀚𑀺𑀢𑁆𑀯𑀸 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑀲𑁆𑀲 𑀲𑀘𑁆𑀘𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀫𑁂𑀢𑁆𑀢𑀸𑀬 ¶ 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁄 𑀳𑀺𑀢𑀽𑀧𑀲𑀁𑀳𑀸𑀭𑀮𑀓𑁆𑀔𑀡𑀸𑀬 𑀫𑁂𑀢𑁆𑀢𑀸𑀬 𑀧𑀸𑀭𑀫𑀺𑀁 𑀧𑀭𑀫𑀼𑀓𑁆𑀓𑀁𑀲𑀢𑀁 𑀧𑀢𑁆𑀯𑀸. 𑀢𑀢𑁆𑀣 𑀘𑀽𑀴𑀥𑀫𑁆𑀫𑀧𑀸𑀮𑀓𑀸𑀮𑁂 (𑀚𑀸. 𑁧.𑁫.𑁪𑁪 𑀆𑀤𑀬𑁄) 𑀫𑀳𑀸𑀲𑀻𑀮𑀯𑀭𑀸𑀚𑀓𑀸𑀮𑁂 (𑀚𑀸. 𑁧.𑁧.𑁫𑁧) 𑀲𑀸𑀫𑀧𑀡𑁆𑀟𑀺𑀢𑀓𑀸𑀮𑁂𑀢𑀺 (𑀘𑀭𑀺𑀬𑀸. 𑁩.𑁧𑁧𑁧 𑀆𑀤𑀬𑁄; 𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀲𑀼𑀯𑀡𑁆𑀡𑀲𑀸𑀫𑀓𑀸𑀮𑁂 𑁋

‘‘𑀦 𑀫𑀁 𑀓𑁄𑀘𑀺 𑀉𑀢𑁆𑀢𑀲𑀢𑀺, 𑀦𑀧𑀺𑀳𑀁 𑀪𑀸𑀬𑀸𑀫𑀺 𑀓𑀲𑁆𑀲𑀘𑀺;

𑀫𑁂𑀢𑁆𑀢𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀭𑀫𑀸𑀫𑀺 𑀧𑀯𑀦𑁂 𑀢𑀤𑀸’’𑀢𑀺. (𑀘𑀭𑀺𑀬𑀸. 𑁩.𑁧𑁧𑁩) 𑁋

𑀏𑀯𑀁 𑀚𑀻𑀯𑀺𑀢𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀫𑁂𑀢𑁆𑀢𑀸𑀬𑀦𑁆𑀢𑀲𑁆𑀲 𑀫𑁂𑀢𑁆𑀢𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸.

𑀲𑀫𑁆𑀫𑀸𑀦𑀦𑀸𑀯𑀫𑀸𑀦𑀦𑁂𑀢𑀺 𑀲𑀓𑁆𑀓𑀘𑁆𑀘𑀁 𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀺𑀦𑀸 𑀲𑀫𑁆𑀫𑀸𑀦𑀦𑁂 𑀑𑀝𑁆𑀞𑀼𑀪𑀦𑀸𑀤𑀺𑀦𑀸 𑀅𑀯𑀫𑀸𑀦𑀦𑁂 𑀘 ¶ 𑀲𑀩𑁆𑀩𑀢𑁆𑀣 𑀮𑁄𑀓𑀥𑀫𑁆𑀫𑁂 𑀲𑀫𑀓𑁄 𑀲𑀫𑀘𑀺𑀢𑁆𑀢𑁄 𑀦𑀺𑀩𑁆𑀩𑀺𑀓𑀸𑀭𑁄 𑀳𑀼𑀢𑁆𑀯𑀸 𑀉𑀢𑁆𑀢𑀫𑀁 𑀅𑀦𑀼𑀢𑁆𑀢𑀭𑀁 𑀮𑀩𑁆𑀩𑀜𑁆𑀜𑀼𑀢𑀁 𑀅𑀥𑀺𑀕𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀳𑀸𑀯𑀸𑀦𑀭𑀺𑀦𑁆𑀤𑀓𑀸𑀮𑁂 (𑀚𑀸. 𑁧.𑁧.𑁫𑁭) 𑀓𑀸𑀲𑀺𑀭𑀸𑀚𑀓𑀸𑀮𑁂 𑀔𑁂𑀫𑀩𑁆𑀭𑀸𑀳𑁆𑀫𑀡𑀓𑀸𑀮𑁂 𑀅𑀝𑁆𑀞𑀺𑀲𑁂𑀦𑀧𑀭𑀺𑀩𑁆𑀩𑀸𑀚𑀓𑀓𑀸𑀮𑁂𑀢𑀺 (𑀚𑀸. 𑁧.𑁭.𑁫𑁪 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀧𑀽𑀭𑀺𑀢𑀢𑁆𑀢𑀪𑀸𑀯𑀸𑀦𑀁 ¶ 𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀫𑀳𑀸𑀮𑁄𑀫𑀳𑀁𑀲𑀓𑀸𑀮𑁂 𑁋

‘‘𑀲𑀼𑀲𑀸𑀦𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀙𑀯𑀝𑁆𑀞𑀺𑀓𑀁 𑀉𑀧𑀦𑀺𑀥𑀸𑀬𑀳𑀁;

𑀕𑀸𑀫𑀡𑁆𑀟𑀮𑀸 𑀉𑀧𑀸𑀕𑀦𑁆𑀢𑁆𑀯𑀸, 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺𑀦𑀧𑁆𑀧𑀓’’𑀦𑁆𑀢𑀺. (𑀘𑀭𑀺𑀬𑀸. 𑁩.𑁧𑁧𑁯) 𑁋

𑀏𑀯𑀁 𑀕𑀸𑀫𑀤𑀸𑀭𑀓𑁂𑀲𑀼 𑀑𑀝𑁆𑀞𑀼𑀪𑀦𑀸𑀤𑀻𑀳𑀺 𑀘𑁂𑀯 𑀫𑀸𑀮𑀸𑀕𑀦𑁆𑀥𑀽𑀧𑀳𑀸𑀭𑀸𑀤𑀻𑀳𑀺 𑀘 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀲𑀼𑀧𑀺 𑀉𑀧𑁂𑀓𑁆𑀔𑀁 𑀅𑀦𑀢𑀺𑀯𑀢𑁆𑀢𑀦𑁆𑀢𑀲𑁆𑀲 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀧𑀭𑀫𑀢𑁆𑀣𑀧𑀸𑀭𑀫𑀻 𑀦𑀸𑀫 𑀚𑀸𑀢𑀸. 𑀇𑀢𑀺 𑀪𑀕𑀯𑀸 𑁋

‘‘𑀏𑀯𑀁 𑀩𑀳𑀼𑀩𑁆𑀩𑀺𑀥𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀢𑁆𑀢𑀻 𑀘 𑀩𑀳𑀼𑀩𑁆𑀩𑀺𑀥𑀸;

𑀪𑀯𑀸𑀪𑀯𑁂 𑀅𑀦𑀼𑀪𑀯𑀺𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺. 𑁋

𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑀼𑀁 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀅𑀢𑁆𑀢𑀦𑀸 𑀓𑀢𑀁 𑀤𑀼𑀓𑁆𑀓𑀭𑀘𑀭𑀺𑀬𑀁 𑀲𑀗𑁆𑀔𑁂𑀧𑁂𑀦𑁂𑀯 𑀯𑀢𑁆𑀯𑀸 𑀧𑀼𑀦 𑁋

‘‘𑀤𑀢𑁆𑀯𑀸 𑀤𑀸𑀢𑀩𑁆𑀩𑀓𑀁 𑀤𑀸𑀦𑀁, 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀅𑀲𑁂𑀲𑀢𑁄;

𑀦𑁂𑀓𑁆𑀔𑀫𑁆𑀫𑁂 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀧𑀡𑁆𑀟𑀺𑀢𑁂 ¶ 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸, 𑀯𑀻𑀭𑀺𑀬𑀁 𑀓𑀢𑁆𑀯𑀸𑀦 𑀫𑀼𑀢𑁆𑀢𑀫𑀁;

𑀔𑀦𑁆𑀢𑀺𑀬𑀸 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀓𑀢𑁆𑀯𑀸 𑀤𑀴𑁆𑀳𑀫𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀯𑀸𑀘𑀸𑀦𑀼𑀭𑀓𑁆𑀔𑀺𑀬;

𑀫𑁂𑀢𑁆𑀢𑀸𑀬 𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀮𑀸𑀪𑀸𑀮𑀸𑀪𑁂 𑀬𑀲𑀸𑀬𑀲𑁂, 𑀲𑀫𑁆𑀫𑀸𑀦𑀦𑀸𑀯𑀫𑀸𑀦𑀦𑁂;

𑀲𑀩𑁆𑀩𑀢𑁆𑀣 𑀲𑀫𑀓𑁄 𑀳𑀼𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺. 𑁋

𑀅𑀢𑁆𑀢𑀦𑀸 𑀲𑀫𑁆𑀫𑀤𑁂𑀯 𑀧𑀭𑀺𑀧𑀽𑀭𑀺𑀢𑀸 𑀤𑀲 𑀧𑀸𑀭𑀫𑀺𑀬𑁄 𑀤𑀲𑁆𑀲𑁂𑀢𑀺.

𑀧𑀓𑀺𑀡𑁆𑀡𑀓𑀓𑀣𑀸

𑀇𑀫𑀲𑁆𑀫𑀺𑀁 ¶ ¶ 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀬𑀁 𑀉𑀲𑁆𑀲𑀸𑀳𑀚𑀸𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑀲𑀩𑁆𑀩𑀧𑀸𑀭𑀫𑀻𑀲𑀼 𑀧𑀓𑀺𑀡𑁆𑀡𑀓𑀓𑀣𑀸 𑀓𑀣𑁂𑀢𑀩𑁆𑀩𑀸.

𑀢𑀢𑁆𑀭𑀺𑀤𑀁 𑀧𑀜𑁆𑀳𑀓𑀫𑁆𑀫𑀁 𑁋 𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄? 𑀓𑁂𑀦𑀝𑁆𑀞𑁂𑀦 𑀧𑀸𑀭𑀫𑀺𑀬𑁄? 𑀓𑀢𑀺𑀯𑀺𑀥𑀸 𑀘𑁂𑀢𑀸? 𑀓𑁄 𑀢𑀸𑀲𑀁 𑀓𑀫𑁄? 𑀓𑀸𑀦𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺? 𑀓𑁄 𑀧𑀘𑁆𑀘𑀬𑁄? 𑀓𑁄 𑀲𑀁𑀓𑀺𑀮𑁂𑀲𑁄? 𑀓𑀺𑀁 𑀯𑁄𑀤𑀸𑀦𑀁? 𑀓𑁄 𑀧𑀝𑀺𑀧𑀓𑁆𑀔𑁄? 𑀓𑀸 𑀧𑀝𑀺𑀧𑀢𑁆𑀢𑀺? 𑀓𑁄 𑀯𑀺𑀪𑀸𑀕𑁄? 𑀓𑁄 𑀲𑀗𑁆𑀕𑀳𑁄? 𑀓𑁄 𑀲𑀫𑁆𑀧𑀸𑀤𑀦𑀽𑀧𑀸𑀬𑁄? 𑀓𑀺𑀢𑁆𑀢𑀓𑁂𑀦 𑀓𑀸𑀮𑁂𑀦 𑀲𑀫𑁆𑀧𑀸𑀤𑀦𑀁? 𑀓𑁄 𑀆𑀦𑀺𑀲𑀁𑀲𑁄? 𑀓𑀺𑀁 𑀘𑁂𑀢𑀸𑀲𑀁 𑀨𑀮𑀦𑁆𑀢𑀺?

𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋 𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄𑀢𑀺? 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 ¶ 𑀅𑀦𑀼𑀧𑀳𑀢𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀤𑀸𑀦𑀸𑀤𑀬𑁄 𑀕𑀼𑀡𑀸 𑀧𑀸𑀭𑀫𑀺𑀬𑁄.

𑀓𑁂𑀦𑀝𑁆𑀞𑁂𑀦 𑀧𑀸𑀭𑀫𑀺𑀬𑁄𑀢𑀺? 𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀲𑀢𑁆𑀢𑀼𑀢𑁆𑀢𑀫𑀢𑀸𑀬 𑀧𑀭𑀫𑀸 𑀫𑀳𑀸𑀲𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸, 𑀢𑁂𑀲𑀁 𑀪𑀸𑀯𑁄 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸. 𑀅𑀣 𑀯𑀸 𑀧𑀭𑀢𑀻𑀢𑀺 𑀧𑀭𑀫𑁄, 𑀤𑀸𑀦𑀸𑀤𑀺𑀕𑀼𑀡𑀸𑀦𑀁 𑀧𑀽𑀭𑀓𑁄 𑀧𑀸𑀮𑀓𑁄 𑀘𑀸𑀢𑀺 𑀩𑁄𑀥𑀺𑀲𑀢𑁆𑀢𑁄, 𑀧𑀭𑀫𑀲𑁆𑀲 𑀅𑀬𑀁, 𑀧𑀭𑀫𑀲𑁆𑀲 𑀯𑀸 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀯. 𑀅𑀣 𑀯𑀸 𑀧𑀭𑀁 𑀲𑀢𑁆𑀢𑀁 𑀅𑀢𑁆𑀢𑀦𑀺 𑀫𑀯𑀢𑀺 𑀩𑀦𑁆𑀥𑀢𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦, 𑀧𑀭𑀁 𑀯𑀸 𑀅𑀥𑀺𑀓𑀢𑀭𑀁 𑀫𑀚𑁆𑀚𑀢𑀺 𑀲𑀼𑀚𑁆𑀛𑀢𑀺 𑀲𑀁𑀓𑀺𑀮𑁂𑀲𑀫𑀮𑀢𑁄, 𑀧𑀭𑀁 𑀯𑀸 𑀲𑁂𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀯𑀺𑀲𑁂𑀲𑁂𑀦 𑀫𑀬𑀢𑀺 𑀕𑀘𑁆𑀙𑀢𑀺, 𑀧𑀭𑀁 𑀯𑀸 𑀮𑁄𑀓𑀁 𑀧𑀫𑀸𑀡𑀪𑀽𑀢𑁂𑀦 𑀜𑀸𑀡𑀯𑀺𑀲𑁂𑀲𑁂𑀦 𑀇𑀥𑀮𑁄𑀓𑀁 𑀯𑀺𑀬 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀧𑀭𑀁 𑀯𑀸 𑀅𑀢𑀺𑀯𑀺𑀬 𑀲𑀻𑀮𑀸𑀤𑀺𑀕𑀼𑀡𑀕𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀺, 𑀧𑀭𑀁 𑀯𑀸 𑀅𑀢𑁆𑀢𑀪𑀽𑀢𑀢𑁄 𑀥𑀫𑁆𑀫𑀓𑀸𑀬𑀢𑁄 𑀅𑀜𑁆𑀜𑀁 𑀧𑀝𑀺𑀧𑀓𑁆𑀔𑀁 𑀯𑀸 𑀢𑀤𑀦𑀢𑁆𑀣𑀓𑀭𑀁 𑀓𑀺𑀮𑁂𑀲𑀘𑁄𑀭𑀕𑀡𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀧𑀭𑀫𑁄, 𑀫𑀳𑀸𑀲𑀢𑁆𑀢𑁄. 𑀧𑀭𑀫𑀲𑁆𑀲 𑀅𑀬𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀧𑀸𑀭𑁂 𑀯𑀸 𑀦𑀺𑀩𑁆𑀩𑀸𑀦𑁂 𑀫𑀚𑁆𑀚𑀢𑀺 𑀲𑀼𑀚𑁆𑀛𑀢𑀺 𑀲𑀢𑁆𑀢𑁂 𑀘 𑀲𑁄𑀥𑁂𑀢𑀺, 𑀢𑀢𑁆𑀣 𑀯𑀸 𑀲𑀢𑁆𑀢𑁂 𑀫𑀯𑀢𑀺 𑀩𑀦𑁆𑀥𑀢𑀺 𑀬𑁄𑀚𑁂𑀢𑀺, 𑀢𑀁 𑀯𑀸 𑀫𑀬𑀢𑀺 𑀕𑀘𑁆𑀙𑀢𑀺 𑀕𑀫𑁂𑀢𑀺 𑀘, 𑀫𑀼𑀦𑀸𑀢𑀺 𑀯𑀸 𑀢𑀁 𑀬𑀸𑀣𑀸𑀯𑀢𑁄 ¶ , 𑀢𑀢𑁆𑀣 𑀯𑀸 𑀲𑀢𑁆𑀢𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀺, 𑀓𑀺𑀮𑁂𑀲𑀸𑀭𑀬𑁄 ¶ 𑀯𑀸 𑀲𑀢𑁆𑀢𑀸𑀦𑀁 𑀢𑀢𑁆𑀣 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀧𑀸𑀭𑀫𑀻, 𑀫𑀳𑀸𑀧𑀼𑀭𑀺𑀲𑁄. 𑀢𑀲𑁆𑀲 𑀪𑀸𑀯𑁄 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀺𑀢𑀸, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀯. 𑀇𑀫𑀺𑀦𑀸 𑀦𑀬𑁂𑀦 𑀧𑀸𑀭𑀫𑀻𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀺𑀯𑀺𑀥𑀸𑀢𑀺? 𑀲𑀗𑁆𑀔𑁂𑀧𑀢𑁄 𑀤𑀲𑀯𑀺𑀥𑀸. 𑀢𑀸 𑀧𑀦 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀆𑀕𑀢𑀸𑀬𑁂𑀯. 𑀬𑀣𑀸𑀳 𑁋

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁;

𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺, 𑀅𑀦𑀼𑀘𑀺𑀡𑁆𑀡𑀁 𑀫𑀳𑀸𑀧𑀣’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁧𑁬) 𑁋

𑀆𑀤𑀺. 𑀬𑀣𑀸 𑀘𑀸𑀳 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸? 𑀤𑀲 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸. 𑀓𑀢𑀫𑁂 𑀤𑀲? 𑀤𑀸𑀦𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀩𑀼𑀤𑁆𑀥𑀓𑀸𑀭𑀓𑁄 𑀥𑀫𑁆𑀫𑁄, 𑀲𑀻𑀮𑀁, 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸, 𑀯𑀻𑀭𑀺𑀬𑀁, 𑀔𑀦𑁆𑀢𑀺, 𑀲𑀘𑁆𑀘𑀁, 𑀅𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀸, 𑀉𑀧𑁂𑀓𑁆𑀔𑀸 𑀩𑀼𑀤𑁆𑀥𑀓𑀸𑀭𑀓𑁄 𑀥𑀫𑁆𑀫𑁄. 𑀇𑀫𑁂 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀤𑀲 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀤𑀸𑀦𑀁 ¶ 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸 𑀯𑀻𑀭𑀺𑀬𑁂𑀦 𑀧𑀜𑁆𑀘𑀫𑀁;

𑀔𑀦𑁆𑀢𑀺 𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀢𑀺 𑀢𑁂 𑀤𑀲𑀸’’𑀢𑀺. (𑀩𑀼. 𑀯𑀁. 𑁧.𑁭𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁);

𑀓𑁂𑀘𑀺 𑀧𑀦 ‘‘𑀙𑀩𑁆𑀩𑀺𑀥𑀸’’𑀢𑀺 𑀯𑀤𑀦𑁆𑀢𑀺. 𑀢𑀁 𑀏𑀢𑀸𑀲𑀁 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀧𑀦 𑀲𑀗𑁆𑀕𑀳𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑁄 𑀢𑀸𑀲𑀁 𑀓𑀫𑁄𑀢𑀺? 𑀏𑀢𑁆𑀣 𑀓𑀫𑁄𑀢𑀺 𑀤𑁂𑀲𑀦𑀸𑀓𑁆𑀓𑀫𑁄, 𑀲𑁄 𑀘 𑀧𑀞𑀫𑀲𑀫𑀸𑀤𑀸𑀦𑀳𑁂𑀢𑀼𑀓𑁄, 𑀲𑀫𑀸𑀤𑀸𑀦𑀁 𑀧𑀯𑀺𑀘𑀬𑀳𑁂𑀢𑀼𑀓𑀁, 𑀇𑀢𑀺 𑀬𑀣𑀸 𑀆𑀤𑀺𑀫𑁆𑀳𑀺 𑀧𑀯𑀺𑀘𑀺𑀢𑀸 𑀲𑀫𑀸𑀤𑀺𑀦𑁆𑀦𑀸 𑀘, 𑀢𑀣𑀸 𑀤𑁂𑀲𑀺𑀢𑀸. 𑀢𑀢𑁆𑀣 𑀤𑀸𑀦𑀁 𑀲𑀻𑀮𑀲𑁆𑀲 𑀩𑀳𑀽𑀧𑀓𑀸𑀭𑀁 𑀲𑀼𑀓𑀭𑀜𑁆𑀘𑀸𑀢𑀺 𑀢𑀁 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀁. 𑀤𑀸𑀦𑀁 𑀲𑀻𑀮𑀧𑀭𑀺𑀕𑁆𑀕𑀳𑀺𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁 𑀯𑀼𑀢𑁆𑀢𑀁. 𑀲𑀻𑀮𑀁 𑀦𑁂𑀓𑁆𑀔𑀫𑁆𑀫𑀧𑀭𑀺𑀕𑁆𑀕𑀳𑀺𑀢𑀁, 𑀦𑁂𑀓𑁆𑀔𑀫𑁆𑀫𑀁 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁, 𑀧𑀜𑁆𑀜𑀸 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀸, 𑀯𑀻𑀭𑀺𑀬𑀁 𑀔𑀦𑁆𑀢𑀺𑀧𑀭𑀺𑀕𑁆𑀕𑀳𑀺𑀢𑀁, 𑀔𑀦𑁆𑀢𑀺 𑀲𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀸, 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀁, 𑀅𑀥𑀺𑀝𑁆𑀞𑀸𑀦𑀁 𑀫𑁂𑀢𑁆𑀢𑀸𑀧𑀭𑀺𑀕𑁆𑀕𑀳𑀺𑀢𑀁, 𑀫𑁂𑀢𑁆𑀢𑀸 ¶ 𑀉𑀧𑁂𑀓𑁆𑀔𑀸𑀧𑀭𑀺𑀕𑁆𑀕𑀳𑀺𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸𑀢𑀺 𑀫𑁂𑀢𑁆𑀢𑀸𑀦𑀦𑁆𑀢𑀭𑀫𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸 𑀧𑀦 𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀸 𑀓𑀭𑀼𑀡𑀸 𑀘 𑀉𑀧𑁂𑀓𑁆𑀔𑀸𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀓𑀣𑀁 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑁄𑀥𑀺𑀲𑀢𑁆𑀢𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀻’’𑀢𑀺? ‘‘𑀉𑀧𑁂𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑁂𑀲𑀼 𑀓𑀜𑁆𑀘𑀺 𑀓𑀸𑀮𑀁 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀺 ¶ , 𑀦 𑀧𑀦 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀘𑀸’’𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑁋 ‘‘𑀦 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑀸, 𑀲𑀢𑁆𑀢𑀓𑀢𑁂𑀲𑀼 𑀧𑀦 𑀯𑀺𑀧𑁆𑀧𑀓𑀸𑀭𑁂𑀲𑀼 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀻’’𑀢𑀺.

𑀅𑀧𑀭𑁄 𑀦𑀬𑁄 𑁋 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀅𑀧𑁆𑀧𑀨𑀮𑀢𑁆𑀢𑀸 𑀲𑀼𑀓𑀭𑀢𑁆𑀢𑀸 𑀘 𑀆𑀤𑀺𑀫𑁆𑀳𑀺 𑀤𑀸𑀦𑀁 𑀯𑀼𑀢𑁆𑀢𑀁. 𑀲𑀻𑀮𑁂𑀦 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄 𑀪𑁄𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀲𑁆𑀲 𑀅𑀦𑀦𑁆𑀢𑀭𑀁 𑀲𑀻𑀮𑀁 𑀯𑀼𑀢𑁆𑀢𑀁. 𑀦𑁂𑀓𑁆𑀔𑀫𑁆𑀫𑁂𑀦 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀯𑀢𑁆𑀯𑀸 𑀫𑀦𑁄𑀲𑀼𑀘𑀭𑀺𑀢𑀯𑀘𑀦𑀢𑁄 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀲𑀼𑀔𑁂𑀦𑁂𑀯 𑀛𑀸𑀦𑀲𑀫𑀺𑀚𑁆𑀛𑀦𑀢𑁄 𑀓𑀫𑁆𑀫𑀸𑀧𑀭𑀸𑀥𑀧𑁆𑀧𑀳𑀸𑀦𑁂𑀦 𑀧𑀬𑁄𑀕𑀲𑀼𑀤𑁆𑀥𑀺𑀁 𑀯𑀢𑁆𑀯𑀸 𑀓𑀺𑀮𑁂𑀲𑀸𑀧𑀭𑀸𑀥𑀧𑁆𑀧𑀳𑀸𑀦𑁂𑀦 𑀆𑀲𑀬𑀲𑀼𑀤𑁆𑀥𑀺𑀯𑀘𑀦𑀢𑁄 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑁂𑀦 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀯𑀘𑀦𑀢𑁄 𑀘 𑀲𑀻𑀮𑀲𑁆𑀲 ¶ 𑀅𑀦𑀦𑁆𑀢𑀭𑀁 𑀦𑁂𑀓𑁆𑀔𑀫𑁆𑀫𑀁 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬 𑀦𑁂𑀓𑁆𑀔𑀫𑁆𑀫𑀲𑁆𑀲 𑀲𑀺𑀤𑁆𑀥𑀺𑀧𑀭𑀺𑀲𑀼𑀤𑁆𑀥𑀺𑀢𑁄 𑀛𑀸𑀦𑀸𑀪𑀸𑀯𑁂𑀦 𑀧𑀜𑁆𑀜𑀸𑀪𑀸𑀯𑀯𑀘𑀦𑀢𑁄 ‘‘𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸 𑀳𑀺 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀘 𑀲𑀫𑀸𑀥𑀺’’. 𑀲𑀫𑀣𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀯𑀘𑀦𑀢𑁄 𑀧𑀭𑀳𑀺𑀢𑀚𑁆𑀛𑀸𑀦𑁂𑀦 𑀧𑀭𑀳𑀺𑀢𑀓𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀯𑀘𑀦𑀢𑁄 𑀘 𑀦𑁂𑀓𑁆𑀔𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀁 𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀧𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀲𑀢𑁆𑀢𑀲𑀼𑀜𑁆𑀜𑀢𑀸𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀯𑀢𑁆𑀯𑀸 𑀲𑀢𑁆𑀢𑀳𑀺𑀢𑀸𑀬 𑀆𑀭𑀫𑁆𑀪𑀲𑁆𑀲 𑀅𑀘𑁆𑀙𑀭𑀺𑀬𑀢𑀸𑀯𑀘𑀦𑀢𑁄 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀯𑀘𑀦𑀢𑁄 𑀦𑀺𑀲𑀫𑁆𑀫𑀓𑀸𑀭𑀺𑀢𑀁 𑀯𑀢𑁆𑀯𑀸 𑀉𑀝𑁆𑀞𑀸𑀦𑀯𑀘𑀦𑀢𑁄 𑀘 ‘‘𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀳𑀺 𑀉𑀝𑁆𑀞𑀸𑀦𑀁 𑀨𑀮𑀯𑀺𑀲𑁂𑀲𑀫𑀸𑀯𑀳𑀢𑀻’’𑀢𑀺 𑀧𑀜𑁆𑀜𑀸𑀬 𑀅𑀦𑀦𑁆𑀢𑀭𑀁 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁.

𑀯𑀻𑀭𑀺𑀬𑁂𑀦 𑀢𑀺𑀢𑀺𑀓𑁆𑀔𑀸𑀲𑀺𑀤𑁆𑀥𑀺𑀢𑁄 ‘‘𑀯𑀻𑀭𑀺𑀬𑀯𑀸 𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑀢𑁆𑀢𑀸 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀉𑀧𑀦𑀻𑀢𑀁 𑀤𑀼𑀓𑁆𑀔𑀁 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺’’. 𑀯𑀻𑀭𑀺𑀬𑀲𑁆𑀲 𑀢𑀺𑀢𑀺𑀓𑁆𑀔𑀸𑀮𑀗𑁆𑀓𑀸𑀭𑀪𑀸𑀯𑀢𑁄 ‘‘𑀯𑀻𑀭𑀺𑀬𑀯𑀢𑁄 𑀳𑀺 𑀢𑀺𑀢𑀺𑀓𑁆𑀔𑀸 𑀲𑁄𑀪𑀢𑀺’’. 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀲𑀫𑀣𑀦𑀺𑀫𑀺𑀢𑁆𑀢𑀯𑀘𑀦𑀢𑁄 𑀅𑀘𑁆𑀘𑀸𑀭𑀫𑁆𑀪𑁂𑀦 𑀉𑀤𑁆𑀥𑀘𑁆𑀘𑀤𑁄𑀲𑀧𑁆𑀧𑀳𑀸𑀦𑀯𑀘𑀦𑀢𑁄 ‘‘𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀳𑀺 𑀉𑀤𑁆𑀥𑀘𑁆𑀘𑀤𑁄𑀲𑁄 𑀧𑀳𑀻𑀬𑀢𑀺’’. 𑀯𑀻𑀭𑀺𑀬𑀯𑀢𑁄 𑀲𑀸𑀢𑀘𑁆𑀘𑀓𑀭𑀡𑀯𑀘𑀦𑀢𑁄 ‘‘𑀔𑀦𑁆𑀢𑀺𑀩𑀳𑀼𑀮𑁄 𑀳𑀺 𑀅𑀦𑀼𑀤𑁆𑀥𑀢𑁄 𑀲𑀸𑀢𑀘𑁆𑀘𑀓𑀸𑀭𑀻 𑀳𑁄𑀢𑀺’’. 𑀅𑀧𑁆𑀧𑀫𑀸𑀤𑀯𑀢𑁄 ¶ 𑀧𑀭𑀳𑀺𑀢𑀓𑀺𑀭𑀺𑀬𑀸𑀭𑀫𑁆𑀪𑁂 𑀧𑀘𑁆𑀘𑀼𑀧𑀓𑀸𑀭𑀢𑀡𑁆𑀳𑀸𑀪𑀸𑀯𑀯𑀘𑀦𑀢𑁄 ‘‘𑀬𑀸𑀣𑀸𑀯𑀢𑁄 𑀥𑀫𑁆𑀫𑀦𑀺𑀚𑁆𑀛𑀸𑀦𑁂 𑀳𑀺 𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺’’. 𑀧𑀭𑀳𑀺𑀢𑀸𑀭𑀫𑁆𑀪𑁂 𑀧𑀭𑀫𑁂𑀧𑀺 𑀧𑀭𑀓𑀢𑀤𑀼𑀓𑁆𑀔𑀲𑀳𑀦𑀢𑀸𑀯𑀘𑀦𑀢𑁄 𑀘 𑀯𑀻𑀭𑀺𑀬𑀲𑁆𑀲 𑀅𑀦𑀦𑁆𑀢𑀭𑀁 𑀔𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀘𑁆𑀘𑁂𑀦 𑀔𑀦𑁆𑀢𑀺𑀬𑀸 𑀘𑀺𑀭𑀸𑀥𑀺𑀝𑁆𑀞𑀸𑀦𑀢𑁄 𑀅𑀧𑀓𑀸𑀭𑀺𑀦𑁄 𑀅𑀧𑀓𑀸𑀭𑀔𑀦𑁆𑀢𑀺𑀁 𑀯𑀢𑁆𑀯𑀸 𑀢𑀤𑀼𑀧𑀓𑀸𑀭𑀓𑀭𑀡𑁂 𑀅𑀯𑀺𑀲𑀁𑀯𑀸𑀤𑀯𑀘𑀦𑀢𑁄 𑀔𑀦𑁆𑀢𑀺𑀬𑀸 𑀅𑀧𑀯𑀸𑀤𑀯𑀸𑀘𑀸𑀯𑀺𑀓𑀫𑁆𑀧𑀦𑁂𑀦 𑀪𑀽𑀢𑀯𑀸𑀤𑀺𑀢𑀸𑀬 𑀅𑀯𑀺𑀚𑀳𑀦𑀯𑀘𑀦𑀢𑁄 𑀲𑀢𑁆𑀢𑀲𑀼𑀜𑁆𑀜𑀢𑀸𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀯𑀢𑁆𑀯𑀸 𑀢𑀤𑀼𑀧𑀩𑁆𑀭𑀽𑀳𑀺𑀢𑀜𑀸𑀡𑀲𑀘𑁆𑀘𑀯𑀘𑀦𑀢𑁄 𑀘 𑀔𑀦𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀲𑀘𑁆𑀘𑀁 𑀯𑀼𑀢𑁆𑀢𑀁.

𑀅𑀥𑀺𑀝𑁆𑀞𑀸𑀦𑁂𑀦 ¶ 𑀲𑀘𑁆𑀘𑀲𑀺𑀤𑁆𑀥𑀺𑀢𑁄 ‘‘𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑁆𑀲 𑀳𑀺 𑀯𑀺𑀭𑀢𑀺 𑀲𑀺𑀚𑁆𑀛𑀢𑀺’’. 𑀅𑀯𑀺𑀲𑀁𑀯𑀸𑀤𑀺𑀢𑀁 𑀯𑀢𑁆𑀯𑀸 𑀢𑀢𑁆𑀣 𑀅𑀘𑀮𑀪𑀸𑀯𑀯𑀘𑀦𑀢𑁄 ‘‘𑀲𑀘𑁆𑀘𑀲𑀦𑁆𑀥𑁄 𑀳𑀺 𑀤𑀸𑀦𑀸𑀤𑀻𑀲𑀼 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀦𑀺𑀘𑁆𑀘𑀮𑁄𑀯 ¶ 𑀧𑀯𑀢𑁆𑀢𑀢𑀺’’. 𑀜𑀸𑀡𑀲𑀘𑁆𑀘𑀁 𑀯𑀢𑁆𑀯𑀸 𑀲𑀫𑁆𑀪𑀸𑀭𑁂𑀲𑀼 𑀧𑀯𑀢𑁆𑀢𑀺𑀦𑀺𑀝𑁆𑀞𑀸𑀧𑀦𑀯𑀘𑀦𑀢𑁄 ‘‘𑀬𑀣𑀸𑀪𑀽𑀢𑀜𑀸𑀡𑀯𑀸 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁂 𑀅𑀥𑀺𑀝𑁆𑀞𑀸𑀢𑀺, 𑀢𑁂 𑀘 𑀦𑀺𑀝𑁆𑀞𑀸𑀧𑁂𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑀢𑁄’’𑀢𑀺 𑀲𑀘𑁆𑀘𑀲𑁆𑀲 𑀅𑀦𑀦𑁆𑀢𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀫𑁂𑀢𑁆𑀢𑀸𑀬 𑀧𑀭𑀳𑀺𑀢𑀓𑀭𑀡𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀲𑀺𑀤𑁆𑀥𑀺𑀢𑁄 𑀅𑀥𑀺𑀝𑁆𑀞𑀸𑀦𑀁 𑀯𑀢𑁆𑀯𑀸 𑀳𑀺𑀢𑀽𑀧𑀲𑀁𑀳𑀸𑀭𑀯𑀘𑀦𑀢𑁄 ‘‘𑀩𑁄𑀥𑀺𑀲𑀫𑁆𑀪𑀸𑀭𑁂 𑀳𑀺 𑀅𑀥𑀺𑀢𑀺𑀝𑁆𑀞𑀫𑀸𑀦𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀳𑁄𑀢𑀺’’. 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑁆𑀲 𑀲𑀫𑀸𑀤𑀸𑀦𑀸𑀯𑀺𑀓𑁄𑀧𑀦𑁂𑀦 𑀲𑀫𑀸𑀤𑀸𑀦𑀲𑀫𑁆𑀪𑀯𑀢𑁄 𑀘 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀁 𑀫𑁂𑀢𑁆𑀢𑀸 𑀯𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸𑀬 𑀫𑁂𑀢𑁆𑀢𑀸𑀯𑀺𑀲𑀼𑀤𑁆𑀥𑀺𑀢𑁄 𑀲𑀢𑁆𑀢𑁂𑀲𑀼 𑀳𑀺𑀢𑀽𑀧𑀲𑀁𑀳𑀸𑀭𑀁 𑀯𑀢𑁆𑀯𑀸 𑀢𑀤𑀧𑀭𑀸𑀥𑁂𑀲𑀼 𑀉𑀤𑀸𑀲𑀻𑀦𑀢𑀸𑀯𑀘𑀦𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀢𑁆𑀯𑀸 𑀢𑀦𑁆𑀦𑀺𑀲𑁆𑀲𑀦𑁆𑀤𑀪𑀸𑀯𑀦𑀸𑀯𑀘𑀦𑀢𑁄 𑀳𑀺𑀢𑀓𑀸𑀫𑀲𑀢𑁆𑀢𑁂𑀧𑀺 𑀉𑀧𑁂𑀓𑁆𑀔𑀓𑁄𑀢𑀺 𑀅𑀘𑁆𑀙𑀭𑀺𑀬𑀕𑀼𑀡𑀢𑀸𑀯𑀘𑀦𑀢𑁄 𑀘 𑀫𑁂𑀢𑁆𑀢𑀸𑀬 𑀅𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑀸𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀦𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 𑀅𑀯𑀺𑀲𑁂𑀲𑁂𑀦 𑀢𑀸𑀯 𑀲𑀩𑁆𑀩𑀸𑀧𑀺 𑀧𑀸𑀭𑀫𑀺𑀬𑁄 𑀧𑀭𑀸𑀦𑀼𑀕𑁆𑀕𑀳𑀮𑀓𑁆𑀔𑀡𑀸, 𑀧𑀭𑁂𑀲𑀁 𑀉𑀧𑀓𑀸𑀭𑀓𑀭𑀡𑀭𑀲𑀸, 𑀅𑀯𑀺𑀓𑀫𑁆𑀧𑀦𑀭𑀲𑀸 𑀯𑀸, 𑀳𑀺𑀢𑁂𑀲𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀩𑀼𑀤𑁆𑀥𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀫𑀳𑀸𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀤𑀝𑁆𑀞𑀸𑀦𑀸 𑀯𑀸.

𑀯𑀺𑀲𑁂𑀲𑁂𑀦 𑀧𑀦 𑀬𑀲𑁆𑀫𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀅𑀢𑁆𑀢𑀽𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸 𑀤𑀸𑀦𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀅𑀢𑁆𑀣𑀢𑁄 𑀅𑀓𑀢𑁆𑀢𑀩𑁆𑀩𑀯𑀺𑀭𑀢𑀺𑀓𑀢𑁆𑀢𑀩𑁆𑀩𑀓𑀭𑀡𑀘𑁂𑀢𑀦𑀸𑀤𑀬𑁄 𑀘 𑀲𑀻𑀮𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑁄 𑀓𑀸𑀫𑀪𑀯𑁂𑀳𑀺 𑀦𑀺𑀓𑁆𑀔𑀫𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀮𑀓𑁆𑀔𑀡𑀸𑀯𑀩𑁄𑀥𑁄 𑀧𑀜𑁆𑀜𑀸𑀧𑀸𑀭𑀫𑀺𑀢𑀸 ¶ . 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀓𑀸𑀬𑀘𑀺𑀢𑁆𑀢𑁂𑀳𑀺 𑀧𑀭𑀳𑀺𑀢𑀸𑀭𑀫𑁆𑀪𑁄 𑀯𑀻𑀭𑀺𑀬𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀲𑀗𑁆𑀔𑀸𑀭𑀸𑀧𑀭𑀸𑀥𑀲𑀳𑀦𑀁 𑀅𑀤𑁄𑀲𑀧𑁆𑀧𑀥𑀸𑀦𑁄 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀔𑀦𑁆𑀢𑀺𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀯𑀺𑀭𑀢𑀺𑀘𑁂𑀢𑀦𑀸𑀤𑀺𑀪𑁂𑀤𑀁 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑁄 ¶ 𑀅𑀢𑁆𑀣𑀢𑁄 𑀅𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀅𑀦𑀼𑀦𑀬𑀧𑀝𑀺𑀖𑀯𑀺𑀤𑁆𑀥𑀁𑀲𑀦𑀻 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀺 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀸.

𑀢𑀲𑁆𑀫𑀸 𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀸 𑀤𑀸𑀦𑀧𑀸𑀭𑀫𑀻, 𑀤𑁂𑀬𑁆𑀬𑀥𑀫𑁆𑀫𑁂 𑀮𑁄𑀪𑀯𑀺𑀤𑁆𑀥𑀁𑀲𑀦𑀭𑀲𑀸, 𑀅𑀦𑀸𑀲𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀪𑀯𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸. 𑀲𑀻𑀮𑀦𑀮𑀓𑁆𑀔𑀡𑀸 ¶ 𑀲𑀻𑀮𑀧𑀸𑀭𑀫𑀻, 𑀲𑀫𑀸𑀥𑀸𑀦𑀮𑀓𑁆𑀔𑀡𑀸 𑀧𑀢𑀺𑀝𑁆𑀞𑀸𑀦𑀮𑀓𑁆𑀔𑀡𑀸 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀸, 𑀅𑀦𑀯𑀚𑁆𑀚𑀭𑀲𑀸 𑀯𑀸, 𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀺𑀭𑁄𑀢𑁆𑀢𑀧𑁆𑀧𑀧𑀤𑀝𑁆𑀞𑀸𑀦𑀸. 𑀓𑀸𑀫𑀢𑁄 𑀘 𑀪𑀯𑀢𑁄 𑀘 𑀦𑀺𑀓𑁆𑀔𑀫𑀦𑀮𑀓𑁆𑀔𑀡𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀢𑀤𑀸𑀤𑀻𑀦𑀯𑀯𑀺𑀪𑀸𑀯𑀦𑀭𑀲𑀸, 𑀢𑀢𑁄 𑀏𑀯 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀸. 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀧𑀜𑁆𑀜𑀸𑀧𑀸𑀭𑀫𑀻, 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀺𑀓𑁄 𑀯𑀺𑀬, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸, 𑀘𑀢𑀼𑀲𑀘𑁆𑀘𑀧𑀤𑀝𑁆𑀞𑀸𑀦𑀸 𑀯𑀸. 𑀉𑀲𑁆𑀲𑀸𑀳𑀮𑀓𑁆𑀔𑀡𑀸 𑀯𑀻𑀭𑀺𑀬𑀧𑀸𑀭𑀫𑀻, 𑀉𑀧𑀢𑁆𑀣𑀫𑁆𑀪𑀦𑀭𑀲𑀸, 𑀅𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀸 𑀯𑀸. 𑀔𑀫𑀦𑀮𑀓𑁆𑀔𑀡𑀸 𑀔𑀦𑁆𑀢𑀺𑀧𑀸𑀭𑀫𑀻, 𑀇𑀝𑁆𑀞𑀸𑀦𑀺𑀝𑁆𑀞𑀲𑀳𑀦𑀭𑀲𑀸, 𑀅𑀥𑀺𑀯𑀸𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀯𑀺𑀭𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀬𑀣𑀸𑀪𑀽𑀢𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀅𑀯𑀺𑀲𑀁𑀯𑀸𑀤𑀦𑀮𑀓𑁆𑀔𑀡𑀸 𑀲𑀘𑁆𑀘𑀧𑀸𑀭𑀫𑀻, 𑀬𑀣𑀸𑀲𑀪𑀸𑀯𑀯𑀺𑀪𑀸𑀯𑀦𑀭𑀲𑀸, 𑀲𑀸𑀥𑀼𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑁄𑀭𑀘𑁆𑀘𑀧𑀤𑀝𑁆𑀞𑀸𑀦𑀸. 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀅𑀥𑀺𑀝𑁆𑀞𑀸𑀦𑀮𑀓𑁆𑀔𑀡𑀸 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀭𑀲𑀸, 𑀢𑀢𑁆𑀣 𑀅𑀘𑀮𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀩𑁄𑀥𑀺𑀲𑀫𑁆𑀪𑀸𑀭𑀧𑀤𑀝𑁆𑀞𑀸𑀦𑀸. 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀳𑀺𑀢𑀽𑀧𑀲𑀁𑀳𑀸𑀭𑀭𑀲𑀸, 𑀆𑀖𑀸𑀢𑀯𑀺𑀦𑀬𑀦𑀭𑀲𑀸 𑀯𑀸, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸𑀧𑀸𑀭𑀫𑀻, 𑀲𑀫𑀪𑀸𑀯𑀤𑀲𑁆𑀲𑀦𑀭𑀲𑀸, 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀧𑀤𑀝𑁆𑀞𑀸𑀦𑀸.

𑀏𑀢𑁆𑀣 ¶ 𑀘 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀢𑀸 𑀤𑀸𑀦𑀸𑀤𑀻𑀦𑀁 𑀧𑀭𑀺𑀘𑁆𑀘𑀸𑀕𑀸𑀤𑀺𑀮𑀓𑁆𑀔𑀡𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑀺 𑀤𑀸𑀦𑀸𑀤𑀻𑀦𑀺 𑀩𑁄𑀥𑀺𑀲𑀢𑁆𑀢𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀦𑀺 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺.

𑀓𑁄 ¶ 𑀧𑀘𑁆𑀘𑀬𑁄𑀢𑀺? 𑀅𑀪𑀺𑀦𑀻𑀳𑀸𑀭𑁄 𑀢𑀸𑀯 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀬𑁄 𑀳𑀺 𑀅𑀬𑀁 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀏𑀯𑀁 𑀯𑀼𑀢𑁆𑀢𑁄 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀲𑀫𑁆𑀧𑀸𑀤𑀺𑀢𑁄 ‘‘𑀢𑀺𑀡𑁆𑀡𑁄 𑀢𑀸𑀭𑁂𑀬𑁆𑀬𑀁 𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬𑀁 𑀤𑀦𑁆𑀢𑁄 𑀤𑀫𑁂𑀬𑁆𑀬𑀁 𑀲𑀦𑁆𑀢𑁄 𑀲𑀫𑁂𑀬𑁆𑀬𑀁 𑀅𑀲𑁆𑀲𑀢𑁆𑀣𑁄 𑀅𑀲𑁆𑀲𑀸𑀲𑁂𑀬𑁆𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀬𑁆𑀬𑀁 𑀲𑀼𑀤𑁆𑀥𑁄 𑀲𑁄𑀥𑁂𑀬𑁆𑀬𑀁 𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀪𑀺𑀦𑀻𑀳𑀸𑀭𑁄. 𑀲𑁄 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀢𑀧𑁆𑀧𑀯𑀢𑁆𑀢𑀺𑀬𑀸 ¶ 𑀳𑀺 𑀉𑀤𑁆𑀥𑀁 𑀧𑀸𑀭𑀫𑀻𑀦𑀁 𑀧𑀯𑀺𑀘𑀬𑀼𑀧𑀝𑁆𑀞𑀸𑀦𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀦𑀺𑀧𑁆𑀨𑀢𑁆𑀢𑀺𑀬𑁄 𑀫𑀳𑀸𑀧𑀼𑀭𑀺𑀲𑀸𑀦𑀁 𑀲𑀫𑁆𑀪𑀯𑀦𑁆𑀢𑀺.

𑀢𑀢𑁆𑀣 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂𑀬𑁂𑀯 𑀳𑀺 𑀞𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀚𑀸𑀢𑀻𑀲𑀼 𑀞𑀺𑀢𑀲𑁆𑀲. 𑀓𑀲𑁆𑀫𑀸𑀢𑀺 𑀘𑁂? 𑀩𑀼𑀤𑁆𑀥𑀪𑀸𑀯𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀪𑀸𑀯𑀢𑁄.

𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑀸𑀧𑀺 𑀧𑀼𑀭𑀺𑀲𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑁆𑀣𑀺𑀬𑀸 𑀦 𑀧𑀡𑁆𑀟𑀓𑀦𑀧𑀼𑀁𑀲𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀯𑀸 𑀲𑀫𑀺𑀚𑁆𑀛𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄 𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄 𑀘. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁨𑁭𑁯; 𑀯𑀺𑀪. 𑁮𑁦𑁯) 𑀯𑀺𑀢𑁆𑀣𑀸𑀭𑁄. 𑀢𑀲𑁆𑀫𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑁂 𑀞𑀺𑀢𑀲𑁆𑀲 𑀧𑀡𑁆𑀟𑀓𑀸𑀤𑀻𑀦𑀁 𑀯𑀸 𑀧𑀢𑁆𑀣𑀦𑀸 𑀦 𑀲𑀫𑀺𑀚𑁆𑀛𑀢𑀺.

𑀳𑁂𑀢𑀽𑀢𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺. 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲𑀸𑀧𑀺 𑀳𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲.

𑀲𑀢𑁆𑀣𑀸𑀭𑀤𑀲𑁆𑀲𑀦𑀦𑁆𑀢𑀺 ¶ 𑀲𑀢𑁆𑀣𑀼𑀲𑀫𑁆𑀫𑀼𑀔𑀻𑀪𑀸𑀯𑁄. 𑀥𑀭𑀫𑀸𑀦𑀓𑀩𑀼𑀤𑁆𑀥𑀲𑁆𑀲𑁂𑀯 𑀳𑀺 𑀲𑀦𑁆𑀢𑀺𑀓𑁂 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀸 𑀩𑁄𑀥𑀺𑀫𑀽𑀮𑁂 𑀯𑀸 𑀧𑀝𑀺𑀫𑀸𑀬 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀦𑁆𑀢𑀺𑀓𑁂 𑀧𑀢𑁆𑀣𑀦𑀸 𑀦 𑀲𑀫𑀺𑀚𑁆𑀛𑀢𑀺. 𑀓𑀲𑁆𑀫𑀸? 𑀅𑀥𑀺𑀓𑀸𑀭𑀲𑁆𑀲 𑀩𑀮𑀯𑀪𑀸𑀯𑀸𑀪𑀸𑀯𑀢𑁄. 𑀩𑀼𑀤𑁆𑀥𑀸𑀦𑀁 𑀏𑀯 𑀧𑀦 𑀲𑀦𑁆𑀢𑀺𑀓𑁂 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀅𑀚𑁆𑀛𑀸𑀲𑀬𑀲𑁆𑀲 𑀉𑀴𑀸𑀭𑀪𑀸𑀯𑁂𑀦 𑀢𑀤𑀥𑀺𑀓𑀸𑀭𑀲𑁆𑀲 𑀩𑀮𑀯𑀪𑀸𑀯𑀸𑀧𑀢𑁆𑀢𑀺𑀢𑁄.

𑀧𑀩𑁆𑀩𑀚𑁆𑀚𑀸𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀢𑁆𑀣𑁂𑀦𑁆𑀢𑀲𑁆𑀲𑀸𑀧𑀺 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀻𑀲𑀼 𑀢𑀸𑀧𑀲𑁂𑀲𑀼 𑀯𑀸 ¶ 𑀪𑀺𑀓𑁆𑀔𑀽𑀲𑀼 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦𑁄 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑀲𑁆𑀲. 𑀓𑀲𑁆𑀫𑀸? 𑀩𑀼𑀤𑁆𑀥𑀪𑀸𑀯𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀪𑀸𑀯𑀢𑁄. 𑀧𑀩𑁆𑀩𑀚𑀺𑀢𑀸 𑀏𑀯 𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀦 𑀕𑀳𑀝𑁆𑀞𑀪𑀽𑀢𑀸, 𑀢𑀲𑁆𑀫𑀸 𑀧𑀡𑀺𑀥𑀸𑀦𑀓𑀸𑀮𑁂 𑀘 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀁 𑀏𑀯 𑀳𑀺 𑀬𑀼𑀢𑁆𑀢𑀭𑀽𑀧𑀁 𑀓𑀺𑀜𑁆𑀘 𑀕𑀼𑀡𑀲𑀫𑁆𑀧𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄.

𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀤𑀸. 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀜𑁆𑀘𑀸𑀪𑀺𑀜𑁆𑀜𑀲𑁆𑀲𑁂𑀯 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺, 𑀦 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀭𑀳𑀺𑀢𑀲𑁆𑀲. 𑀓𑀲𑁆𑀫𑀸? 𑀧𑀸𑀭𑀫𑀺𑀧𑀯𑀺𑀘𑀬𑀲𑁆𑀲 ¶ 𑀅𑀲𑀫𑀢𑁆𑀣𑀪𑀸𑀯𑀢𑁄, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀧𑀼𑀭𑀺𑀲𑀸 𑀓𑀢𑀸𑀪𑀺𑀦𑀻𑀳𑀸𑀭𑀸 𑀲𑀬𑀫𑁂𑀯 𑀧𑀸𑀭𑀫𑀻 𑀧𑀯𑀺𑀘𑁂𑀢𑀼𑀁 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺.

𑀅𑀥𑀺𑀓𑀸𑀭𑁄𑀢𑀺 𑀅𑀥𑀺𑀓𑁄 𑀉𑀧𑀓𑀸𑀭𑁄. 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑁆𑀧𑀦𑁆𑀦𑁄𑀧𑀺 𑀳𑀺 𑀬𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀥𑀺𑀓𑀁 𑀉𑀧𑀓𑀸𑀭𑀁 𑀓𑀭𑁄𑀢𑀺, 𑀢𑀲𑁆𑀲𑁂𑀯 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲.

𑀙𑀦𑁆𑀤𑀢𑀸𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄. 𑀬𑀲𑁆𑀲 𑀳𑀺 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀅𑀢𑁆𑀣𑀸𑀬 𑀫𑀳𑀦𑁆𑀢𑁄 𑀙𑀦𑁆𑀤𑁄 𑀫𑀳𑀢𑀻 𑀧𑀢𑁆𑀣𑀦𑀸 𑀫𑀳𑀢𑀻 𑀓𑀢𑁆𑀢𑀼𑀓𑀸𑀫𑀢𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀲𑀫𑀺𑀚𑁆𑀛𑀢𑀺, 𑀦 𑀇𑀢𑀭𑀲𑁆𑀲.

𑀢𑀢𑁆𑀭𑀺𑀤𑀁 𑀙𑀦𑁆𑀤𑀫𑀳𑀦𑁆𑀢𑀢𑀸𑀬 𑀑𑀧𑀫𑁆𑀫𑀁 𑁋 𑀬𑁄 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀏𑀓𑁄𑀤𑀓𑀻𑀪𑀽𑀢𑀁 𑀅𑀢𑁆𑀢𑀦𑁄 𑀩𑀸𑀳𑀼𑀩𑀮𑁂𑀦𑁂𑀯 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀢𑁆𑀢𑀁 ¶ 𑀧𑀸𑀧𑀼𑀡𑀸𑀢𑀻𑀢𑀺 𑀲𑀼𑀢𑁆𑀯𑀸 𑀢𑀁 𑀤𑀼𑀓𑁆𑀓𑀭𑀢𑁄 𑀅𑀤𑀳𑀦𑁆𑀢𑁄 ‘‘𑀅𑀳𑀁 𑀢𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺, 𑀦 𑀢𑀢𑁆𑀣 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀬𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀺𑀕𑀢𑀥𑀽𑀫𑀸𑀦𑀁 𑀅𑀗𑁆𑀕𑀸𑀭𑀸𑀦𑀁 𑀧𑀽𑀭𑀁 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀪𑀸𑀕𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄…𑀧𑁂… 𑀦 𑀢𑀢𑁆𑀣 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀬𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀲𑀢𑁆𑀢𑀺𑀲𑀽𑀮𑁂𑀳𑀺 𑀲𑀼𑀦𑀺𑀲𑀺𑀢𑀨𑀮𑁂𑀳𑀺 𑀦𑀺𑀭𑀦𑁆𑀢𑀭𑀁 𑀆𑀓𑀺𑀡𑁆𑀡𑀁 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸…𑀧𑁂… 𑀦 𑀢𑀢𑁆𑀣 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀬𑁄 𑀲𑀓𑀮𑀘𑀓𑁆𑀓𑀯𑀸𑀴𑀁 𑀦𑀺𑀭𑀦𑁆𑀢𑀭𑀁 𑀖𑀦𑀯𑁂𑀴𑀼𑀕𑀼𑀫𑁆𑀩𑀲𑀜𑁆𑀙𑀦𑁆𑀦𑀁 𑀓𑀡𑁆𑀝𑀓𑀮𑀢𑀸𑀯𑀦𑀕𑀳𑀦𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀪𑀸𑀕𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄…𑀧𑁂… 𑀦 𑀢𑀢𑁆𑀣 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀬𑁄 ‘‘𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘 𑀓𑀧𑁆𑀧𑁂 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 ¶ 𑀧𑀢𑁆𑀢𑀩𑁆𑀩’’𑀦𑁆𑀢𑀺 𑀲𑀼𑀢𑁆𑀯𑀸 𑀢𑀁 𑀤𑀼𑀓𑁆𑀓𑀭𑀢𑁄 𑀅𑀤𑀳𑀦𑁆𑀢𑁄 ‘‘𑀅𑀳𑀁 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺, 𑀦 𑀢𑀢𑁆𑀣 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀢𑁆𑀣 𑀙𑀦𑁆𑀤𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀧𑀦𑀸𑀬𑀁 𑀅𑀪𑀺𑀦𑀻𑀳𑀸𑀭𑁄 𑀅𑀢𑁆𑀣𑀢𑁄 𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀫𑁄𑀥𑀸𑀦𑁂𑀦 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀲𑀫𑁆𑀫𑀤𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀡𑀺𑀥𑀸𑀦𑀮𑀓𑁆𑀔𑀡𑁄. ‘‘𑀅𑀳𑁄 𑀯𑀢𑀸𑀳𑀁 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑁂𑀬𑁆𑀬𑀁, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀧𑀢𑁆𑀣𑀦𑀸𑀭𑀲𑁄, 𑀩𑁄𑀥𑀺𑀲𑀫𑁆𑀪𑀸𑀭𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀫𑀳𑀸𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑁄, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑁄 𑀯𑀸. 𑀅𑀘𑀺𑀦𑁆𑀢𑁂𑀬𑁆𑀬𑀁 𑀩𑀼𑀤𑁆𑀥𑀪𑀽𑀫𑀺𑀁 𑀅𑀧𑀭𑀺𑀫𑀸𑀡𑀁 𑀲𑀢𑁆𑀢𑀮𑁄𑀓𑀳𑀺𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀸 ¶ 𑀲𑀩𑁆𑀩𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀫𑀽𑀮𑀪𑀽𑀢𑁄 𑀧𑀭𑀫𑀪𑀤𑁆𑀤𑀓𑁄 𑀧𑀭𑀫𑀓𑀮𑁆𑀬𑀸𑀡𑁄 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑁄 𑀧𑀼𑀜𑁆𑀜𑀯𑀺𑀲𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀲 𑀘 𑀉𑀧𑁆𑀧𑀢𑁆𑀢𑀺𑀬𑀸 𑀲𑀳𑁂𑀯 𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀁 𑀑𑀢𑀺𑀡𑁆𑀡𑁄 𑀦𑀸𑀫 𑀳𑁄𑀢𑀺 𑀦𑀺𑀬𑀢𑀪𑀸𑀯𑀲𑀫𑀥𑀺𑀕𑀫𑀦𑀢𑁄 𑀢𑀢𑁄 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑁄𑀢𑀺 𑀲𑀫𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀲𑀩𑁆𑀩𑀪𑀸𑀯𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀲𑀫𑀸𑀲𑀢𑁆𑀢𑀫𑀸𑀦𑀲𑀢𑀸 𑀩𑁄𑀥𑀺𑀲𑀫𑁆𑀪𑀸𑀭𑀲𑀺𑀓𑁆𑀔𑀸𑀲𑀫𑀢𑁆𑀣𑀢𑀸 𑀘𑀲𑁆𑀲 𑀲𑀦𑁆𑀢𑀺𑀝𑁆𑀞𑀢𑀺. 𑀬𑀣𑀸𑀯𑀼𑀢𑁆𑀢𑀸𑀪𑀺𑀦𑀻𑀳𑀸𑀭𑀲𑀫𑀺𑀚𑁆𑀛𑀦𑁂𑀦 𑀳𑀺 𑀫𑀳𑀸𑀧𑀼𑀭𑀺𑀲𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀦𑀧𑀼𑀩𑁆𑀩𑀮𑀺𑀗𑁆𑀕𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀫𑁆𑀫𑀤𑁂𑀯 𑀲𑀩𑁆𑀩𑀧𑀸𑀭𑀫𑀺𑀬𑁄 𑀧𑀯𑀺𑀘𑀺𑀦𑀺𑀢𑁆𑀯𑀸 𑀲𑀫𑀸𑀤𑀸𑀬 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀢𑀣𑀸 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀳𑀺 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀧𑀝𑀺𑀧𑀚𑁆𑀚𑀺. 𑀬𑀣𑀸𑀳 𑁋

‘‘𑀳𑀦𑁆𑀤 ¶ 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀬𑀸𑀯𑀢𑀸 𑀥𑀫𑁆𑀫𑀥𑀸𑀢𑀼𑀬𑀸;

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁧𑁫-𑁧𑁧𑁬) 𑁋

𑀯𑀺𑀢𑁆𑀣𑀸𑀭𑁄. 𑀢𑀲𑁆𑀲 𑀘 𑀅𑀪𑀺𑀦𑀻𑀳𑀸𑀭𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀘𑀢𑁆𑀢𑀸𑀭𑁄 𑀳𑁂𑀢𑀽 𑀘𑀢𑁆𑀢𑀸𑀭𑀺 𑀘 𑀩𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸? 𑀇𑀥 𑀫𑀳𑀸𑀧𑀼𑀭𑀺𑀲𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀁 𑀫𑀳𑀢𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀁. 𑀢𑀲𑁆𑀲 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀳𑀸𑀩𑁄𑀥𑀺𑀬𑀁 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 𑁋 ‘‘𑀫𑀳𑀸𑀦𑀼𑀪𑀸𑀯𑀸 𑀯𑀢𑀸𑀬𑀁 𑀥𑀫𑁆𑀫𑀥𑀸𑀢𑀼, 𑀬𑀲𑁆𑀲𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀪𑀕𑀯𑀸 𑀏𑀯𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁄 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁄 𑀘𑀸’’𑀢𑀺 ¶ . 𑀲𑁄 𑀢𑀫𑁂𑀯 𑀫𑀳𑀸𑀦𑀼𑀪𑀸𑀯𑀤𑀲𑁆𑀲𑀦𑀁 𑀦𑀺𑀲𑁆𑀲𑀸𑀬 𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀫𑁆𑀩𑁄𑀥𑀺𑀬𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑀺. 𑀅𑀬𑀁 𑀧𑀞𑀫𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀦 𑀳𑁂𑀯 𑀔𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀫𑀳𑀸𑀦𑀼𑀪𑀸𑀯𑀢𑀁, 𑀅𑀧𑀺 𑀘 𑀔𑁄 𑀲𑀼𑀡𑀸𑀢𑀺 ‘‘𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘 𑀪𑀕𑀯𑀸’’𑀢𑀺. 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀫𑁆𑀩𑁄𑀥𑀺𑀬𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀦 𑀳𑁂𑀯 𑀔𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀫𑀳𑀸𑀦𑀼𑀪𑀸𑀯𑀢𑀁, 𑀦𑀧𑀺 𑀢𑀁 𑀧𑀭𑀢𑁄 𑀲𑀼𑀡𑀸𑀢𑀺, 𑀅𑀧𑀺 ¶ 𑀘 𑀔𑁄 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨𑁧-𑁨𑁨) 𑀩𑀼𑀤𑁆𑀥𑀸𑀦𑀼𑀪𑀸𑀯𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀫𑁆𑀩𑁄𑀥𑀺𑀬𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑀺. 𑀅𑀬𑀁 𑀢𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀦 𑀳𑁂𑀯 𑀔𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀫𑀳𑀸𑀦𑀼𑀪𑀸𑀯𑀢𑀁, 𑀦𑀧𑀺 𑀢𑀁 𑀧𑀭𑀢𑁄 𑀲𑀼𑀡𑀸𑀢𑀺, 𑀦𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀧𑀺 𑀘 𑀔𑁄 𑀉𑀴𑀸𑀭𑀚𑁆𑀛𑀸𑀲𑀬𑁄 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁄 ‘‘𑀅𑀳𑀫𑁂𑀢𑀁 𑀩𑀼𑀤𑁆𑀥𑀯𑀁𑀲𑀁 𑀩𑀼𑀤𑁆𑀥𑀢𑀦𑁆𑀢𑀺𑀁 𑀩𑀼𑀤𑁆𑀥𑀧𑀯𑁂𑀡𑀺𑀁 𑀩𑀼𑀤𑁆𑀥𑀥𑀫𑁆𑀫𑀢𑀁 𑀧𑀭𑀺𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀯𑀤𑁂𑀯 𑀥𑀫𑁆𑀫𑀁 𑀏𑀯 𑀲𑀓𑁆𑀓𑀭𑁄𑀦𑁆𑀢𑁄 𑀕𑀭𑀼𑀓𑀭𑁄𑀦𑁆𑀢𑁄 𑀫𑀸𑀦𑁂𑀦𑁆𑀢𑁄 𑀧𑀽𑀚𑁂𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀫𑁆𑀩𑁄𑀥𑀺𑀬𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀢𑀢𑁆𑀣 ¶ 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀳𑁂𑀢𑀽 𑀫𑀳𑀸𑀪𑀺𑀦𑀻𑀳𑀸𑀭𑀸𑀬? 𑀇𑀥 𑀫𑀳𑀸𑀧𑀼𑀭𑀺𑀲𑁄 𑀧𑀓𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺 𑀧𑀼𑀭𑀺𑀫𑀓𑁂𑀲𑀼 𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄. 𑀅𑀬𑀁 𑀧𑀞𑀫𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬. 𑀧𑀼𑀦 𑀘𑀧𑀭𑀁 𑀫𑀳𑀸𑀧𑀼𑀭𑀺𑀲𑁄 𑀧𑀓𑀢𑀺𑀬𑀸 𑀓𑀭𑀼𑀡𑀸𑀚𑁆𑀛𑀸𑀲𑀬𑁄 𑀳𑁄𑀢𑀺 𑀓𑀭𑀼𑀡𑀸𑀥𑀺𑀫𑀼𑀢𑁆𑀢𑁄 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀁 𑀅𑀧𑀦𑁂𑀢𑀼𑀓𑀸𑀫𑁄 𑀅𑀧𑀺 𑀘 𑀅𑀢𑁆𑀢𑀦𑁄 𑀓𑀸𑀬𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀅𑀬𑀁 𑀤𑀼𑀢𑀺𑀬𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬. 𑀧𑀼𑀦 𑀘𑀧𑀭𑀁 𑀫𑀳𑀸𑀧𑀼𑀭𑀺𑀲𑁄 𑀲𑀓𑀮𑀢𑁄𑀧𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀲𑀢𑁆𑀢𑀳𑀺𑀢𑀸𑀬 𑀘 𑀤𑀼𑀓𑁆𑀓𑀭𑀘𑀭𑀺𑀬𑀢𑁄 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀦𑀺𑀩𑁆𑀩𑀺𑀦𑁆𑀦𑁄 𑀳𑁄𑀢𑀺 𑀅𑀦𑀼𑀢𑁆𑀭𑀸𑀲𑀻 𑀬𑀸𑀯 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺. 𑀅𑀬𑀁 𑀢𑀢𑀺𑀬𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬. 𑀧𑀼𑀦 𑀘𑀧𑀭𑀁 𑀫𑀳𑀸𑀧𑀼𑀭𑀺𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀬𑁄 ¶ 𑀅𑀳𑀺𑀢𑀢𑁄 𑀦𑀺𑀯𑀸𑀭𑁂𑀢𑀺, 𑀳𑀺𑀢𑁂 𑀧𑀢𑀺𑀝𑁆𑀞𑀧𑁂𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀢𑀢𑁆𑀭𑀸𑀬𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑁋 𑀏𑀓𑀦𑁆𑀢𑁂𑀦𑁂𑀯𑀲𑁆𑀲 𑀬𑀣𑀸 𑀅𑀚𑁆𑀛𑀸𑀲𑀬𑁄 𑀲𑀫𑁆𑀩𑁄𑀥𑀺𑀦𑀺𑀦𑁆𑀦𑁄 𑀳𑁄𑀢𑀺 𑀲𑀫𑁆𑀩𑁄𑀥𑀺𑀧𑁄𑀡𑁄 𑀲𑀫𑁆𑀩𑁄𑀥𑀺𑀧𑀩𑁆𑀪𑀸𑀭𑁄, 𑀢𑀣𑀸 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀸. 𑀬𑀢𑁄 𑀘𑀸𑀦𑁂𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀲𑀫𑁆𑀩𑁄𑀥𑀺𑀬𑀸 𑀧𑀡𑀺𑀥𑀸𑀦𑀁 𑀓𑀢𑀁 𑀳𑁄𑀢𑀺 𑀫𑀦𑀲𑀸 𑀯𑀸𑀘𑀸𑀬 𑀘 ‘‘𑀅𑀳𑀫𑁆𑀧𑀺 𑀏𑀤𑀺𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀫𑁆𑀫𑀤𑁂𑀯 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀦𑁆𑀦𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀦𑀲𑁆𑀲 𑀇𑀫𑀸𑀦𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀮𑀺𑀗𑁆𑀕𑀸𑀦𑀺 𑀪𑀯𑀦𑁆𑀢𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑁂𑀳𑀺 𑀘 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁂𑀳𑀺 𑀘 𑀫𑀳𑀸𑀯𑀺𑀲𑁂𑀲𑁄 𑀫𑀳𑀦𑁆𑀢𑀁 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑀇𑀦𑁆𑀤𑁆𑀭𑀺𑀬𑀢𑁄 𑀧𑀝𑀺𑀧𑀢𑁆𑀢𑀺𑀢𑁄 𑀓𑁄𑀲𑀮𑁆𑀮𑀢𑁄 𑀘. 𑀇𑀥 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀫𑀳𑀸𑀧𑀼𑀭𑀺𑀲𑁄 𑀬𑀣𑀸 𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀺 𑀯𑀺𑀲𑀤𑀜𑀸𑀡𑁄, 𑀦 𑀢𑀣𑀸 𑀇𑀢𑀭𑁂. 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀢𑁆𑀢𑀳𑀺𑀢𑀸𑀬. 𑀢𑀣𑀸 𑀳𑀺 𑀲𑁄 𑀬𑀣𑀸 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 ¶ 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀧𑀚𑁆𑀚𑀢𑀺, 𑀦 𑀢𑀣𑀸 𑀇𑀢𑀭𑁂. 𑀢𑀢𑁆𑀣 𑀘 𑀓𑁄𑀲𑀮𑁆𑀮𑀁 𑀆𑀯𑀳𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀞𑀸𑀦𑀸𑀞𑀸𑀦𑀓𑀼𑀲𑀮𑀢𑀸𑀬 𑀘.

𑀢𑀣𑀸 𑀫𑀳𑀸𑀧𑀼𑀭𑀺𑀲𑁄 𑀧𑀓𑀢𑀺𑀬𑀸 𑀤𑀸𑀦𑀚𑁆𑀛𑀸𑀲𑀬𑁄 𑀳𑁄𑀢𑀺 𑀤𑀸𑀦𑀸𑀪𑀺𑀭𑀢𑁄, 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀤𑁂𑀢𑀺 𑀏𑀯, 𑀦 𑀤𑀸𑀦𑀢𑁄 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺, 𑀲𑀢𑀢𑀁 𑀲𑀫𑀺𑀢𑀁 𑀲𑀁𑀯𑀺𑀪𑀸𑀕𑀲𑀻𑀮𑁄 𑀳𑁄𑀢𑀺, 𑀧𑀫𑀼𑀤𑀺𑀢𑁄𑀯 𑀤𑁂𑀢𑀺 𑀆𑀤𑀭𑀚𑀸𑀢𑁄, 𑀦 𑀉𑀤𑀸𑀲𑀻𑀦𑀘𑀺𑀢𑁆𑀢𑁄, 𑀫𑀳𑀦𑁆𑀢𑀫𑁆𑀧𑀺 𑀤𑀸𑀦𑀁 𑀤𑀢𑁆𑀯𑀸 𑀦 𑀘 𑀤𑀸𑀦𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀧𑀕𑁂𑀯 𑀅𑀧𑁆𑀧𑀁, 𑀧𑀭𑁂𑀲𑀜𑁆𑀘 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀤𑀸𑀦𑁂 𑀯𑀡𑁆𑀡𑀁 𑀪𑀸𑀲𑀢𑀺, 𑀤𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀭𑁄𑀢𑀺, 𑀅𑀜𑁆𑀜𑁂 𑀘 𑀧𑀭𑁂𑀲𑀁 𑀤𑁂𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 ¶ 𑀳𑁄𑀢𑀺, 𑀪𑀬𑀝𑁆𑀞𑀸𑀦𑁂𑀲𑀼 𑀘 𑀧𑀭𑁂𑀲𑀁 𑀅𑀪𑀬𑀁 𑀤𑁂𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀧𑀸𑀭𑀫𑀺𑀬𑀸 𑀮𑀺𑀗𑁆𑀕𑀸𑀦𑀺.

𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀳𑀺𑀭𑀻𑀬𑀢𑀺 𑀑𑀢𑁆𑀢𑀧𑁆𑀧𑀢𑀺, 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀦𑀚𑀸𑀢𑀺𑀓𑁄 𑀳𑁄𑀢𑀺 𑀲𑁄𑀭𑀢𑁄 𑀲𑀼𑀔𑀲𑀻𑀮𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄 𑀲𑀼𑀯𑀘𑁄 𑀲𑁄𑀯𑀘𑀲𑁆𑀲𑀓𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 ¶ 𑀫𑀼𑀤𑀼𑀚𑀸𑀢𑀺𑀓𑁄 𑀅𑀢𑁆𑀣𑀤𑁆𑀥𑁄 𑀅𑀦𑀢𑀺𑀫𑀸𑀦𑀻, 𑀧𑀭𑀲𑀦𑁆𑀢𑀓𑀁 𑀦𑀸𑀤𑀺𑀬𑀢𑀺 𑀅𑀦𑁆𑀢𑀫𑀲𑁄 𑀢𑀺𑀡𑀲𑀮𑀸𑀓𑀁 𑀉𑀧𑀸𑀤𑀸𑀬, 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁 𑀇𑀡𑀁 𑀯𑀸 𑀕𑀳𑁂𑀢𑁆𑀯𑀸 𑀧𑀭𑀁 𑀦 𑀯𑀺𑀲𑀁𑀯𑀸𑀤𑁂𑀢𑀺, 𑀧𑀭𑀲𑁆𑀫𑀺𑀁 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀩𑁆𑀬𑀸𑀫𑀽𑀴𑁆𑀳𑁂 𑀯𑀺𑀲𑁆𑀲𑀭𑀺𑀢𑁂 𑀯𑀸 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀝𑀺𑀧𑀸𑀤𑁂𑀢𑀺 𑀬𑀣𑀸 𑀢𑀁 𑀦 𑀧𑀭𑀳𑀢𑁆𑀣𑀕𑀢𑀁 𑀳𑁄𑀢𑀺, 𑀅𑀮𑁄𑀮𑀼𑀧𑁆𑀧𑁄 𑀳𑁄𑀢𑀺, 𑀧𑀭𑀧𑀭𑀺𑀕𑁆𑀕𑀳𑁂𑀲𑀼 𑀧𑀸𑀧𑀓𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀇𑀢𑁆𑀣𑀺𑀩𑁆𑀬𑀲𑀦𑀸𑀤𑀻𑀦𑀺 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀪𑀺𑀦𑁆𑀦𑀸𑀦𑀁 𑀲𑀦𑁆𑀥𑀸𑀢𑀸 𑀲𑀳𑀺𑀢𑀸𑀦𑀁 𑀅𑀦𑀼𑀧𑁆𑀧𑀤𑀸𑀢𑀸, 𑀧𑀺𑀬𑀯𑀸𑀤𑀻 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑁄 𑀧𑀼𑀩𑁆𑀩𑀪𑀸𑀲𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀅𑀦𑀪𑀺𑀚𑁆𑀛𑀸𑀮𑀼 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄, 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑁂𑀦 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑁂𑀦 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻 𑀯𑀼𑀤𑁆𑀥𑀸𑀧𑀘𑀸𑀬𑀻 𑀲𑀼𑀯𑀺𑀲𑀼𑀤𑁆𑀥𑀸𑀚𑀻𑀯𑁄 𑀥𑀫𑁆𑀫𑀓𑀸𑀫𑁄 𑀧𑀭𑁂𑀧𑀺 𑀥𑀫𑁆𑀫𑁂 𑀲𑀫𑀸𑀤𑀧𑁂𑀢𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀓𑀺𑀘𑁆𑀘𑀢𑁄 𑀲𑀢𑁆𑀢𑁂 𑀦𑀺𑀯𑀸𑀭𑁂𑀢𑀸 𑀓𑀺𑀘𑁆𑀘𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑀸 𑀅𑀢𑁆𑀢𑀦𑀸 𑀘 𑀢𑀢𑁆𑀣 𑀓𑀺𑀘𑁆𑀘𑁂 𑀬𑁄𑀕𑀁 𑀆𑀧𑀚𑁆𑀚𑀺𑀢𑀸, 𑀓𑀢𑁆𑀯𑀸 𑀯𑀸 𑀧𑀦 𑀲𑀬𑀁 𑀅𑀓𑀢𑁆𑀢𑀩𑁆𑀩𑀁 𑀲𑀻𑀖𑀜𑁆𑀜𑁂𑀯 𑀢𑀢𑁄 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀲𑀻𑀮𑀚𑁆𑀛𑀸𑀲𑀬𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀻𑀮𑀧𑀸𑀭𑀫𑀺𑀬𑀸 𑀮𑀺𑀗𑁆𑀕𑀸𑀦𑀺.

𑀢𑀣𑀸 𑀫𑀦𑁆𑀤𑀓𑀺𑀮𑁂𑀲𑁄 𑀳𑁄𑀢𑀺 𑀫𑀦𑁆𑀤𑀦𑀻𑀯𑀭𑀡𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑁄 𑀅𑀯𑀺𑀓𑁆𑀔𑁂𑀧𑀩𑀳𑀼𑀮𑁄, 𑀦 𑀢𑀲𑁆𑀲 𑀧𑀸𑀧𑀓𑀸 𑀯𑀺𑀢𑀓𑁆𑀓𑀸 𑀘𑀺𑀢𑁆𑀢𑀁 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺, 𑀯𑀺𑀯𑁂𑀓𑀕𑀢𑀲𑁆𑀲 𑀘𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀫𑀺𑀢𑁆𑀢𑀧𑀓𑁆𑀔𑁂𑀧𑀺 𑀢𑀼𑀯𑀝𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀇𑀢𑀭𑀲𑁆𑀫𑀺𑀁, 𑀲𑀢𑀺𑀫𑀸 𑀘 𑀳𑁄𑀢𑀺 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸, 𑀫𑁂𑀥𑀸𑀯𑀻 𑀘 𑀳𑁄𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀦𑀺𑀧𑀓𑁄 𑀘 𑀳𑁄𑀢𑀺 𑀢𑀸𑀲𑀼 𑀢𑀸𑀲𑀼 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀓𑀺𑀭𑀺𑀬𑀸𑀲𑀼, 𑀔𑀦𑁆𑀢𑀺𑀩𑀮𑀲𑀫𑀦𑁆𑀦𑀸𑀕𑀢𑁄 𑀘 𑀳𑁄𑀢𑀺 𑀲𑀩𑁆𑀩𑀲𑀳𑁄, 𑀅𑀘𑀮𑀸𑀥𑀺𑀝𑁆𑀞𑀸𑀦𑁄 𑀘 𑀳𑁄𑀢𑀺 𑀤𑀴𑁆𑀳𑀲𑀫𑀸𑀤𑀸𑀦𑁄 ¶ , 𑀅𑀚𑁆𑀛𑀼𑀧𑁂𑀓𑁆𑀔𑀓𑁄 𑀘 𑀳𑁄𑀢𑀺 𑀉𑀧𑁂𑀓𑁆𑀔𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀏𑀯𑀫𑀸𑀤𑀻𑀦𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸𑀤𑀻𑀦𑀁 𑀯𑀲𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀆𑀤𑀻𑀦𑀁 𑀮𑀺𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀫𑁂𑀢𑁂𑀳𑀺 ¶ 𑀩𑁄𑀥𑀺𑀲𑀫𑁆𑀪𑀸𑀭𑀮𑀺𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀁 𑀯𑀼𑀢𑁆𑀢𑀁 ‘‘𑀫𑀳𑀸𑀪𑀺𑀦𑀻𑀳𑀸𑀭𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀳𑁂𑀢𑀽’’𑀢𑀺. 𑀢𑀢𑁆𑀭𑀺𑀤𑀁 𑀲𑀗𑁆𑀔𑁂𑀧𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀮𑀓𑁆𑀔𑀡𑀁 𑁋 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀼𑀢𑀲𑀫𑁆𑀧𑀦𑁆𑀦𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄 𑀲𑀢𑀺𑀲𑀫𑁆𑀧𑀦𑁆𑀦𑁄 ¶ 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑀓𑀫𑁆𑀫𑀨𑀮𑀜𑁆𑀘, 𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀳𑁂𑀢𑀼𑀪𑀽𑀢𑀁 𑀲𑀢𑁆𑀢𑁂𑀲𑀼 𑀳𑀺𑀢𑁂𑀲𑀺𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀘𑁄𑀤𑀓𑁄 𑀧𑀸𑀧𑀕𑀭𑀳𑀻 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄, 𑀲𑀼𑀢𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀕𑀫𑁆𑀪𑀻𑀭𑀁 𑀥𑀫𑁆𑀫𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺, 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄, 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁, 𑀲𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀺𑀢𑀲𑀢𑀺 𑀳𑁄𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼, 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀲𑀫𑀸𑀳𑀺𑀢𑀘𑀺𑀢𑁆𑀢𑁄, 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀧𑀭𑀻𑀢𑀁 𑀧𑀚𑀸𑀦𑀸𑀢𑀺, 𑀲𑁄 𑀲𑀢𑀺𑀬𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑁄 𑀧𑀜𑁆𑀜𑀸𑀬 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀲𑀫𑀸𑀥𑀺𑀦𑀸 𑀢𑀢𑁆𑀣 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀻𑀭𑀺𑀬𑁂𑀦 𑀅𑀳𑀺𑀢𑀸 𑀲𑀢𑁆𑀢𑁂 𑀦𑀺𑀲𑁂𑀥𑁂𑀢𑁆𑀯𑀸 𑀳𑀺𑀢𑁂 𑀦𑀺𑀬𑁄𑀚𑁂𑀢𑀺. 𑀢𑁂𑀦𑀸𑀳 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺. (𑀅. 𑀦𑀺. 𑁭.𑁩𑁭; 𑀦𑁂𑀢𑁆𑀢𑀺. 𑁧𑁧𑁩) 𑁋

𑀏𑀯𑀁 𑀕𑀼𑀡𑀲𑀫𑀦𑁆𑀦𑀸𑀕𑀢𑀜𑁆𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀫𑀤𑁂𑀯 𑀧𑀭𑀺𑀬𑁄𑀤𑀧𑁂𑀢𑀺. 𑀲𑀼𑀯𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑁄 𑀘 𑀳𑀼𑀢𑁆𑀯𑀸 𑀘𑀢𑀽𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦 𑀘𑀺𑀭𑁂𑀦𑁂𑀯 𑀅𑀝𑁆𑀞𑀗𑁆𑀕𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀫𑀳𑀸𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀪𑀸𑀯𑁂 𑀧𑀢𑀺𑀝𑁆𑀞𑀳𑀢𑀺 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄.

𑀢𑀲𑁆𑀲𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑀮𑀸𑀦𑀺. 𑀅𑀚𑁆𑀛𑀢𑁆𑀢𑀺𑀓𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀅𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑀸 𑀥𑀫𑁆𑀫𑀕𑀸𑀭𑀯𑁂𑀦 𑀅𑀪𑀺𑀭𑀼𑀘𑀺 𑀏𑀓𑀦𑁆𑀢𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀸𑀥𑀺𑀧𑀢𑀺 𑀮𑀚𑁆𑀚𑀸𑀧𑀲𑁆𑀲𑀬𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀩𑀸𑀳𑀺𑀭𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀧𑀭𑀲𑀦𑁆𑀦𑀺𑀲𑁆𑀲𑀬𑀸 𑀅𑀪𑀺𑀭𑀼𑀘𑀺 𑀏𑀓𑀦𑁆𑀢𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 ¶ 𑀮𑁄𑀓𑀸𑀥𑀺𑀧𑀢𑀺 𑀫𑀸𑀦𑀸𑀧𑀲𑁆𑀲𑀬𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 ¶ 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀉𑀧𑀦𑀺𑀲𑁆𑀲𑀬𑀩𑀮𑀁 ¶ 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀭𑀼𑀘𑀺 𑀏𑀓𑀦𑁆𑀢𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀯𑀺𑀲𑀤𑀥𑀸𑀢𑀼𑀓𑁄 𑀲𑀢𑀺𑀲𑀦𑁆𑀦𑀺𑀲𑁆𑀲𑀬𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀧𑀬𑁄𑀕𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀢𑀚𑁆𑀚𑀸 𑀧𑀬𑁄𑀕𑀲𑀫𑁆𑀧𑀤𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀲𑀸𑀢𑀘𑁆𑀘𑀓𑀸𑀭𑀺𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀯𑀺𑀲𑀼𑀤𑁆𑀥𑀧𑀬𑁄𑀕𑁄 𑀦𑀺𑀭𑀦𑁆𑀢𑀭𑀓𑀸𑀭𑀻 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺.

𑀏𑀯𑀫𑀬𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀘𑀢𑀽𑀳𑀺 𑀳𑁂𑀢𑀽𑀳𑀺 𑀘𑀢𑀽𑀳𑀺 𑀘 𑀩𑀮𑁂𑀳𑀺 𑀲𑀫𑁆𑀧𑀦𑁆𑀦𑀲𑀫𑀼𑀤𑀸𑀕𑀫𑁄 𑀅𑀝𑁆𑀞𑀗𑁆𑀕𑀲𑀫𑁄𑀥𑀸𑀦𑀲𑀫𑁆𑀧𑀸𑀤𑀺𑀢𑁄 𑀅𑀪𑀺𑀦𑀻𑀳𑀸𑀭𑁄 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄 𑀫𑀽𑀮𑀓𑀸𑀭𑀡𑀪𑀸𑀯𑀢𑁄. 𑀬𑀲𑁆𑀲 𑀘 𑀧𑀯𑀢𑁆𑀢𑀺𑀬𑀸 𑀫𑀳𑀸𑀧𑀼𑀭𑀺𑀲𑁂 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀲𑀩𑁆𑀩𑀲𑀢𑁆𑀢𑀦𑀺𑀓𑀸𑀬𑀁 𑀅𑀢𑁆𑀢𑀦𑁄 𑀑𑀭𑀲𑀧𑀼𑀢𑁆𑀢𑀁 𑀯𑀺𑀬 𑀧𑀺𑀬𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀦 𑀘𑀲𑁆𑀲 𑀘𑀺𑀢𑁆𑀢𑀁 𑀧𑀼𑀢𑁆𑀢𑀲𑀁𑀓𑀺𑀮𑁂𑀲𑀯𑀲𑁂𑀦 𑀲𑀁𑀓𑀺𑀮𑀺𑀲𑁆𑀲𑀢𑀺. 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑁄 𑀘𑀲𑁆𑀲 𑀅𑀚𑁆𑀛𑀸𑀲𑀬𑁄 𑀧𑀬𑁄𑀕𑁄 𑀘 𑀳𑁄𑀢𑀺. 𑀅𑀢𑁆𑀢𑀦𑁄 𑀘 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦𑁆𑀢𑀺 𑀧𑀭𑀺𑀧𑀘𑁆𑀘𑀦𑁆𑀢𑀺 𑀘. 𑀬𑀢𑁄 𑀘 𑀫𑀳𑀸𑀧𑀼𑀭𑀺𑀲𑁄 𑀉𑀴𑀸𑀭𑀢𑀫𑁂𑀦 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁂𑀦 𑀓𑀼𑀲𑀮𑀸𑀪𑀺𑀲𑀦𑁆𑀤𑁂𑀦 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁂𑀦 𑀲𑀼𑀔𑀲𑁆𑀲𑀸𑀳𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀢𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑁄 𑀉𑀢𑁆𑀢𑀫𑀕𑀸𑀭𑀯𑀝𑁆𑀞𑀸𑀦𑀁 𑀅𑀲𑀤𑀺𑀲𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀜𑁆𑀘 𑀳𑁄𑀢𑀺. 𑀏𑀯𑀫𑀦𑁂𑀓𑀕𑀼𑀡𑁄 𑀅𑀦𑁂𑀓𑀸𑀦𑀺𑀲𑀁𑀲𑁄 𑀫𑀳𑀸𑀪𑀺𑀦𑀻𑀳𑀸𑀭𑁄 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀘 𑀅𑀪𑀺𑀦𑀻𑀳𑀸𑀭𑁄, 𑀏𑀯𑀁 𑀫𑀳𑀸𑀓𑀭𑀼𑀡𑀸 𑀉𑀧𑀸𑀬𑀓𑁄𑀲𑀮𑁆𑀮𑀜𑁆𑀘. 𑀢𑀢𑁆𑀣 𑀉𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫 𑀤𑀸𑀦𑀸𑀤𑀻𑀦𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀸𑀯𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀸 𑀧𑀜𑁆𑀜𑀸, 𑀬𑀸𑀳𑀺 𑀫𑀳𑀸𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀢𑀸𑀳𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸 𑀦𑀺𑀭𑀦𑁆𑀢𑀭𑀁 𑀧𑀭𑀳𑀺𑀢𑀓𑀭𑀡𑀧𑀲𑀼𑀢𑀢𑀸 𑀲𑀼𑀤𑀼𑀓𑁆𑀓𑀭𑁂𑀳𑀺𑀧𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀘𑀭𑀺𑀢𑁂𑀳𑀺 𑀯𑀺𑀲𑀸𑀤𑀸𑀪𑀸𑀯𑁄 𑀧𑀲𑀸𑀤𑀲𑀫𑁆𑀩𑀼𑀤𑁆𑀥𑀺𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀓𑀸𑀮𑁂𑀲𑀼𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀪𑀸𑀯𑁄 𑀘 𑀲𑀫𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺𑀲𑁆𑀲 𑀧𑀜𑁆𑀜𑀸𑀬 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺, 𑀓𑀭𑀼𑀡𑀸𑀬 𑀩𑀼𑀤𑁆𑀥𑀓𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀬 𑀲𑀬𑀁 𑀢𑀭𑀢𑀺, 𑀓𑀭𑀼𑀡𑀸𑀬 𑀧𑀭𑁂 𑀢𑀸𑀭𑁂𑀢𑀺, 𑀧𑀜𑁆𑀜𑀸𑀬 𑀧𑀭𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀭𑀼𑀡𑀸𑀬 𑀧𑀭𑀤𑀼𑀓𑁆𑀔𑀧𑀢𑀺𑀓𑀸𑀭𑀁 𑀆𑀭𑀪𑀢𑀺, 𑀧𑀜𑁆𑀜𑀸𑀬 𑀘 𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀓𑀭𑀼𑀡𑀸𑀬 ¶ 𑀤𑀼𑀓𑁆𑀔𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀣𑀸 𑀧𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀓𑀭𑀼𑀡𑀸𑀬 𑀯𑀝𑁆𑀝𑀁 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀓𑀭𑀼𑀡𑀸𑀬 𑀲𑀁𑀲𑀸𑀭𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀧𑀜𑁆𑀜𑀸𑀬 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺, 𑀧𑀜𑁆𑀜𑀸𑀬 𑀘 𑀲𑀩𑁆𑀩𑀢𑁆𑀣 𑀯𑀺𑀭𑀚𑁆𑀚𑀢𑀺, 𑀓𑀭𑀼𑀡𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑁂𑀲𑀁 𑀅𑀦𑀼𑀕𑁆𑀕𑀳𑀸𑀬 𑀧𑀯𑀢𑁆𑀢𑁄, 𑀓𑀭𑀼𑀡𑀸𑀬 𑀲𑀩𑁆𑀩𑁂𑀧𑀺 𑀅𑀦𑀼𑀓𑀫𑁆𑀧𑀢𑀺, 𑀧𑀜𑁆𑀜𑀸𑀦𑀼𑀕𑀢𑀢𑁆𑀢𑀸 ¶ 𑀦 𑀘 𑀦 𑀲𑀩𑁆𑀩𑀢𑁆𑀣 𑀯𑀺𑀭𑀢𑁆𑀢𑀘𑀺𑀢𑁆𑀢𑁄, 𑀧𑀜𑁆𑀜𑀸𑀬 𑀘 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀪𑀸𑀯𑁄, 𑀓𑀭𑀼𑀡𑀸𑀬 𑀆𑀮𑀲𑀺𑀬𑀤𑀻𑀦𑀢𑀸𑀪𑀸𑀯𑁄, 𑀢𑀣𑀸 𑀧𑀜𑁆𑀜𑀸𑀓𑀭𑀼𑀡𑀸𑀳𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀢𑀧𑀭𑀦𑀸𑀣𑀢𑀸 𑀥𑀻𑀭𑀯𑀻𑀭𑀪𑀸𑀯𑁄, 𑀅𑀦𑀢𑁆𑀢𑀦𑁆𑀢𑀧𑀅𑀧𑀭𑀦𑁆𑀢𑀧𑀢𑀸, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀦𑀺𑀧𑁆𑀨𑀢𑁆𑀢𑀺, 𑀦𑀺𑀩𑁆𑀪𑀬𑀸𑀪𑀺𑀁𑀲𑀦𑀓𑀪𑀸𑀯𑁄, 𑀥𑀫𑁆𑀫𑀸𑀥𑀺𑀧𑀢𑀺𑀮𑁄𑀓𑀸𑀥𑀺𑀧𑀢𑀺𑀢𑀸, 𑀓𑀢𑀜𑁆𑀜𑀼𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀫𑁄𑀳𑀢𑀡𑁆𑀳𑀸𑀯𑀺𑀕𑀫𑁄, 𑀯𑀺𑀚𑁆𑀚𑀸𑀘𑀭𑀡𑀲𑀺𑀤𑁆𑀥𑀺, 𑀩𑀮𑀯𑁂𑀲𑀸𑀭𑀚𑁆𑀚𑀦𑀺𑀧𑁆𑀨𑀢𑁆𑀢𑀻𑀢𑀺 ¶ 𑀲𑀩𑁆𑀩𑀲𑁆𑀲𑀸𑀧𑀺 𑀧𑀸𑀭𑀫𑀺𑀢𑀸𑀨𑀮𑀲𑁆𑀲 𑀯𑀺𑀲𑁂𑀲𑁂𑀦 𑀉𑀧𑀸𑀬𑀪𑀸𑀯𑀢𑁄 𑀧𑀜𑁆𑀜𑀸𑀓𑀭𑀼𑀡𑀸 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀇𑀤𑀜𑁆𑀘 𑀤𑁆𑀯𑀬𑀁 𑀧𑀸𑀭𑀫𑀻𑀦𑀁 𑀯𑀺𑀬 𑀧𑀡𑀺𑀥𑀸𑀦𑀲𑁆𑀲𑀸𑀧𑀺 𑀧𑀘𑁆𑀘𑀬𑁄.

𑀢𑀣𑀸 𑀉𑀲𑁆𑀲𑀸𑀳𑀉𑀫𑁆𑀫𑀗𑁆𑀕𑀅𑀯𑀢𑁆𑀣𑀸𑀦𑀳𑀺𑀢𑀘𑀭𑀺𑀬𑀸 𑀘 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀸 𑀩𑀼𑀤𑁆𑀥𑀪𑀸𑀯𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀩𑀼𑀤𑁆𑀥𑀪𑀽𑀫𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀉𑀲𑁆𑀲𑀸𑀳𑁄 𑀦𑀸𑀫 𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀻𑀭𑀺𑀬𑀁. 𑀉𑀫𑁆𑀫𑀗𑁆𑀕𑁄 𑀦𑀸𑀫 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀉𑀧𑀸𑀬𑀓𑁄𑀲𑀮𑁆𑀮𑀪𑀽𑀢𑀸 𑀧𑀜𑁆𑀜𑀸. 𑀅𑀯𑀢𑁆𑀣𑀸𑀦𑀁 𑀦𑀸𑀫 𑀅𑀥𑀺𑀝𑁆𑀞𑀸𑀦𑀁 𑀅𑀘𑀮𑀸𑀥𑀺𑀝𑁆𑀞𑀸𑀦𑀢𑀸. 𑀳𑀺𑀢𑀘𑀭𑀺𑀬𑀸 𑀦𑀸𑀫 𑀫𑁂𑀢𑁆𑀢𑀸𑀪𑀸𑀯𑀦𑀸 𑀓𑀭𑀼𑀡𑀸𑀪𑀸𑀯𑀦𑀸 𑀘.

𑀢𑀣𑀸 𑀦𑁂𑀓𑁆𑀔𑀫𑁆𑀫𑀧𑀯𑀺𑀯𑁂𑀓𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀦𑀺𑀲𑁆𑀲𑀭𑀡𑀧𑁆𑀧𑀪𑁂𑀤𑀸 𑀙 𑀅𑀚𑁆𑀛𑀸𑀲𑀬𑀸. 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀳𑁄𑀦𑁆𑀢𑀺 𑀓𑀸𑀫𑁂𑀲𑀼 𑀖𑀭𑀸𑀯𑀸𑀲𑁂 𑀘 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀢𑀣𑀸 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀲𑀗𑁆𑀕𑀡𑀺𑀓𑀸𑀬 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀮𑁄𑀪𑀚𑁆𑀛𑀸𑀲𑀬𑀸 𑀮𑁄𑀪𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀤𑁄𑀲𑀚𑁆𑀛𑀸𑀲𑀬𑀸 𑀤𑁄𑀲𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀫𑁄𑀳𑀚𑁆𑀛𑀸𑀲𑀬𑀸 𑀫𑁄𑀳𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀸 𑀲𑀩𑁆𑀩𑀪𑀯𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄𑀢𑀺. 𑀢𑀲𑁆𑀫𑀸 𑀏𑀢𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀙 𑀅𑀚𑁆𑀛𑀸𑀲𑀬𑀸 𑀤𑀸𑀦𑀸𑀤𑀻𑀦𑀁 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀮𑁄𑀪𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀮𑁄𑀪𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑁂𑀦 𑀘 𑀯𑀺𑀦𑀸 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀲𑀫𑁆𑀪𑀯𑀦𑁆𑀢𑀺, 𑀅𑀮𑁄𑀪𑀸𑀤𑀻𑀦𑀜𑁆𑀳𑀺 𑀅𑀥𑀺𑀓𑀪𑀸𑀯𑁂𑀦 𑀧𑀭𑀺𑀘𑁆𑀘𑀸𑀕𑀸𑀤𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸 𑀅𑀮𑁄𑀪𑀚𑁆𑀛𑀸𑀲𑀬𑀸𑀤𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 ¶ 𑀘𑁂𑀢𑁂 𑀏𑀯𑀁 𑀤𑀸𑀦𑀚𑁆𑀛𑀸𑀲𑀬𑀢𑀸𑀤𑀬𑁄𑀧𑀺 𑀩𑁄𑀥𑀺𑀬𑀸 𑀘𑀭𑀦𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀤𑀸𑀦𑀚𑁆𑀛𑀸𑀲𑀬𑀢𑀸𑀬 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀢𑀧𑁆𑀧𑀝𑀺𑀧𑀓𑁆𑀔𑁂 𑀫𑀘𑁆𑀙𑁂𑀭𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄 𑀳𑀼𑀢𑁆𑀯𑀸 𑀲𑀫𑁆𑀫𑀤𑁂𑀯 𑀤𑀸𑀦𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀲𑀻𑀮𑀚𑁆𑀛𑀸𑀲𑀬𑀢𑀸𑀬 𑀤𑀼𑀲𑁆𑀲𑀻𑀮𑁆𑀬𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄 𑀳𑀼𑀢𑁆𑀯𑀸 𑀲𑀫𑁆𑀫𑀤𑁂𑀯 𑀲𑀻𑀮𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀢𑀸𑀬 𑀓𑀸𑀫𑁂𑀲𑀼 𑀖𑀭𑀸𑀯𑀸𑀲𑁂 𑀘 ¶ , 𑀬𑀣𑀸𑀪𑀽𑀢𑀜𑀸𑀡𑀚𑁆𑀛𑀸𑀲𑀬𑀢𑀸𑀬 𑀅𑀜𑁆𑀜𑀸𑀡𑁂 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘, 𑀯𑀻𑀭𑀺𑀬𑀚𑁆𑀛𑀸𑀲𑀬𑀢𑀸𑀬 𑀓𑁄𑀲𑀚𑁆𑀚𑁂, 𑀔𑀦𑁆𑀢𑀺𑀬𑀚𑁆𑀛𑀸𑀲𑀬𑀢𑀸𑀬 𑀅𑀓𑁆𑀔𑀦𑁆𑀢𑀺𑀬𑀁, 𑀲𑀘𑁆𑀘𑀚𑁆𑀛𑀸𑀲𑀬𑀢𑀸𑀬 𑀯𑀺𑀲𑀁𑀯𑀸𑀤𑁂, 𑀅𑀥𑀺𑀝𑁆𑀞𑀸𑀦𑀚𑁆𑀛𑀸𑀲𑀬𑀢𑀸𑀬 𑀅𑀦𑀥𑀺𑀝𑁆𑀞𑀸𑀦𑁂, 𑀫𑁂𑀢𑁆𑀢𑀸𑀚𑁆𑀛𑀸𑀲𑀬𑀢𑀸𑀬 𑀩𑁆𑀬𑀸𑀧𑀸𑀤𑁂, 𑀉𑀧𑁂𑀓𑁆𑀔𑀸𑀚𑁆𑀛𑀸𑀲𑀬𑀢𑀸𑀬 𑀮𑁄𑀓𑀥𑀫𑁆𑀫𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀳𑀼𑀢𑁆𑀯𑀸 𑀲𑀫𑁆𑀫𑀤𑁂𑀯 𑀦𑁂𑀓𑁆𑀔𑀫𑁆𑀫𑀸𑀤𑀺𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀤𑀸𑀦𑀚𑁆𑀛𑀸𑀲𑀬𑀢𑀸𑀤𑀬𑁄 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀧𑀘𑁆𑀘𑀬𑁄.

𑀢𑀣𑀸 𑀅𑀧𑀭𑀺𑀘𑁆𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀢𑀢𑁆𑀣𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀺𑀥𑀺𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑁄𑀫𑀳𑀺𑀁𑀲𑀤𑀸𑀲𑀺𑀤𑀸𑀲𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀕𑁆𑀕𑀳𑀩𑁆𑀬𑀸𑀲𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀔𑁂𑀢𑁆𑀢𑀸𑀤𑀻𑀦𑀁 𑀯𑀢𑁆𑀣𑀼𑀓𑀸𑀫𑀪𑀸𑀯𑁂𑀦 𑀩𑀳𑀼𑀧𑀢𑁆𑀣𑀦𑀻𑀬𑀪𑀸𑀯𑀢𑁄 𑀭𑀸𑀚𑀘𑁄𑀭𑀸𑀤𑀺𑀲𑀸𑀥𑀸𑀭𑀡𑀪𑀸𑀯𑀢𑁄 ¶ 𑀯𑀺𑀯𑀸𑀤𑀸𑀥𑀺𑀝𑁆𑀞𑀸𑀦𑀢𑁄 𑀲𑀧𑀢𑁆𑀢𑀓𑀭𑀡𑀢𑁄 𑀦𑀺𑀲𑁆𑀲𑀸𑀭𑀢𑁄 𑀧𑀝𑀺𑀮𑀸𑀪𑀧𑀭𑀺𑀧𑀸𑀮𑀦𑁂𑀲𑀼 𑀧𑀭𑀯𑀺𑀳𑁂𑀞𑀦𑀳𑁂𑀢𑀼𑀢𑁄 𑀯𑀺𑀦𑀸𑀲𑀦𑀺𑀫𑀺𑀢𑁆𑀢𑀜𑁆𑀘 𑀲𑁄𑀓𑀸𑀤𑀺𑀅𑀦𑁂𑀓𑀯𑀺𑀳𑀺𑀢𑀩𑁆𑀬𑀲𑀦𑀸𑀯𑀳𑀢𑁄 𑀢𑀤𑀸𑀲𑀢𑁆𑀢𑀺𑀦𑀺𑀤𑀸𑀦𑀜𑁆𑀘 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸𑀦𑀁 𑀅𑀧𑀸𑀬𑀽𑀧𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄𑀢𑀺 𑀏𑀯𑀁 𑀯𑀺𑀯𑀺𑀥𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑀸𑀦𑀺 𑀧𑀭𑀺𑀕𑁆𑀕𑀳𑀯𑀢𑁆𑀣𑀽𑀦𑀺 𑀦𑀸𑀫. 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁄𑀬𑁂𑀯 𑀏𑀓𑁄 𑀲𑁄𑀢𑁆𑀣𑀺𑀪𑀸𑀯𑁄𑀢𑀺 𑀧𑀭𑀺𑀘𑁆𑀘𑀸𑀕𑁂 𑀅𑀧𑁆𑀧𑀫𑀸𑀤𑁄 𑀓𑀭𑀡𑀻𑀬𑁄.

𑀅𑀧𑀺 𑀘 𑀬𑀸𑀘𑀓𑁄 𑀬𑀸𑀘𑀫𑀸𑀦𑁄 𑀅𑀢𑁆𑀢𑀦𑁄 𑀕𑀼𑀬𑁆𑀳𑀲𑁆𑀲 𑀆𑀘𑀺𑀓𑁆𑀔𑀦𑀢𑁄 ‘‘𑀫𑀬𑁆𑀳𑀁 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀘, ‘‘𑀧𑀳𑀸𑀬 𑀕𑀫𑀦𑀻𑀬𑀫𑀢𑁆𑀢𑀦𑁄 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀮𑁄𑀓𑀁 𑀬𑀸𑀳𑀻𑀢𑀺 𑀫𑀬𑁆𑀳𑀁 𑀉𑀧𑀤𑁂𑀲𑀓𑁄’’𑀢𑀺 𑀘, ‘‘𑀆𑀤𑀺𑀢𑁆𑀢𑁂 𑀯𑀺𑀬 𑀅𑀕𑀸𑀭𑁂 𑀫𑀭𑀡𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑁂 𑀮𑁄𑀓𑁂 𑀢𑀢𑁄 𑀫𑀬𑁆𑀳𑀁 𑀲𑀦𑁆𑀢𑀓𑀲𑁆𑀲 𑀅𑀧𑀯𑀸𑀳𑀓𑀲𑀳𑀸𑀬𑁄’’𑀢𑀺 𑀘, ‘‘𑀅𑀧𑀯𑀸𑀳𑀺𑀢𑀲𑁆𑀲 𑀘𑀲𑁆𑀲 𑀅𑀛𑀸𑀧𑀦𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀪𑀽𑀢𑁄’’𑀢𑀺 𑀘 𑀤𑀸𑀦𑀲𑀗𑁆𑀔𑀸𑀢𑁂 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀫𑀺𑀁 𑀲𑀳𑀸𑀬𑀪𑀸𑀯𑀢𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀅𑀕𑁆𑀕𑀪𑀽𑀢𑀸𑀬 𑀧𑀭𑀫𑀤𑀼𑀮𑁆𑀮𑀪𑀸𑀬 𑀩𑀼𑀤𑁆𑀥𑀪𑀽𑀫𑀺𑀬𑀸 𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀘 ‘‘𑀧𑀭𑀫𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄’’𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁.

𑀢𑀣𑀸 ¶ ‘‘𑀉𑀴𑀸𑀭𑁂 𑀓𑀫𑁆𑀫𑀦𑀺 𑀅𑀦𑁂𑀦𑀸𑀳𑀁 𑀲𑀫𑁆𑀪𑀸𑀯𑀺𑀢𑁄, 𑀢𑀲𑁆𑀫𑀸 𑀲𑀸 𑀲𑀫𑁆𑀪𑀸𑀯𑀦𑀸 𑀅𑀯𑀺𑀢𑀣𑀸 𑀓𑀸𑀢𑀩𑁆𑀩𑀸’’𑀢𑀺 𑀘, ‘‘𑀏𑀓𑀦𑁆𑀢𑀪𑁂𑀤𑀺𑀢𑀸𑀬 𑀚𑀻𑀯𑀺𑀢𑀲𑁆𑀲 𑀅𑀬𑀸𑀘𑀺𑀢𑁂𑀦𑀸𑀧𑀺 𑀫𑀬𑀸 𑀤𑀸𑀢𑀩𑁆𑀩𑀁, 𑀧𑀕𑁂𑀯 𑀬𑀸𑀘𑀺𑀢𑁂𑀦𑀸’’𑀢𑀺 𑀘, ‘‘𑀉𑀴𑀸𑀭𑀚𑁆𑀛𑀸𑀲𑀬𑁂𑀳𑀺 𑀕𑀯𑁂𑀲𑀺𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀢𑁄 𑀲𑀬𑀫𑁂𑀯𑀸𑀕𑀢𑁄 𑀫𑀫 𑀧𑀼𑀜𑁆𑀜𑁂𑀦𑀸’’𑀢𑀺 𑀘 ‘‘𑀬𑀸𑀘𑀓𑀲𑁆𑀲 𑀤𑀸𑀦𑀸𑀧𑀤𑁂𑀲𑁂𑀦 𑀫𑀬𑁆𑀳𑀫𑁂𑀯𑀸𑀬𑀫𑀦𑀼𑀕𑁆𑀕𑀳𑁄’’𑀢𑀺 𑀘, ‘‘𑀅𑀳𑀁 𑀯𑀺𑀬 𑀅𑀬𑀁 𑀲𑀩𑁆𑀩𑁄𑀧𑀺 𑀮𑁄𑀓𑁄 𑀫𑀬𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀘, ‘‘𑀅𑀲𑀢𑀺 𑀬𑀸𑀘𑀓𑁂 𑀓𑀣𑀁 ¶ 𑀫𑀬𑁆𑀳𑀁 𑀤𑀸𑀦𑀧𑀸𑀭𑀫𑀻 𑀧𑀽𑀭𑁂𑀬𑁆𑀬𑀸’’𑀢𑀺 𑀘, ‘‘𑀬𑀸𑀘𑀓𑀸𑀦𑀫𑁂𑀯 𑀘𑀢𑁆𑀣𑀸𑀬 𑀫𑀬𑀸 𑀲𑀩𑁆𑀩𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀘, ‘‘𑀫𑀁 𑀅𑀬𑀸𑀘𑀺𑀢𑁆𑀯𑀸𑀯 𑀫𑀫 𑀲𑀦𑁆𑀢𑀓𑀁 𑀬𑀸𑀘𑀓𑀸 𑀓𑀤𑀸 𑀲𑀬𑀫𑁂𑀯 𑀕𑀡𑁆𑀳𑁂𑀬𑁆𑀬𑀼’’𑀦𑁆𑀢𑀺 𑀘, ‘‘𑀓𑀣𑀫𑀳𑀁 𑀬𑀸𑀘𑀓𑀸𑀦𑀁 𑀧𑀺𑀬𑁄 𑀘𑀲𑁆𑀲𑀁 𑀫𑀦𑀸𑀧𑁄’’𑀢𑀺 𑀘, ‘‘𑀓𑀣𑀁 𑀯𑀸 𑀢𑁂 𑀫𑀬𑁆𑀳𑀁 𑀧𑀺𑀬𑀸 𑀘𑀲𑁆𑀲𑀼 𑀫𑀦𑀸𑀧𑀸’’𑀢𑀺 𑀘, ‘‘𑀓𑀣𑀁 𑀯𑀸𑀳𑀁 𑀤𑀤𑀫𑀸𑀦𑁄 𑀤𑀢𑁆𑀯𑀸𑀧𑀺 𑀘 𑀅𑀢𑁆𑀢𑀫𑀦𑁄 𑀘𑀲𑁆𑀲𑀁 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄’’𑀢𑀺 𑀘, ‘‘𑀓𑀣𑀁 𑀯𑀸 𑀫𑁂 𑀬𑀸𑀘𑀓𑀸 𑀪𑀯𑁂𑀬𑁆𑀬𑀼𑀁 𑀉𑀴𑀸𑀭𑁄 𑀘 𑀤𑀸𑀦𑀚𑁆𑀛𑀸𑀲𑀬𑁄’’𑀢𑀺 𑀘, ‘‘𑀓𑀣𑀁 𑀯𑀸𑀳𑀫𑀬𑀸𑀘𑀺𑀢𑁄 𑀏𑀯 𑀬𑀸𑀘𑀓𑀸𑀦𑀁 𑀳𑀤𑀬𑀫𑀜𑁆𑀜𑀸𑀬 𑀤𑀤𑁂𑀬𑁆𑀬’’𑀦𑁆𑀢𑀺 𑀘, ‘‘𑀲𑀢𑀺 𑀥𑀦𑁂 𑀬𑀸𑀘𑀓𑁂 𑀘 𑀅𑀧𑀭𑀺𑀘𑁆𑀘𑀸𑀕𑁄 𑀫𑀳𑀢𑀻 𑀫𑀬𑁆𑀳𑀁 𑀯𑀜𑁆𑀘𑀦𑀸’’𑀢𑀺 𑀘, ‘‘𑀓𑀣𑀁 𑀯𑀸𑀳𑀁 𑀅𑀢𑁆𑀢𑀦𑁄 𑀅𑀗𑁆𑀕𑀸𑀦𑀺 𑀚𑀻𑀯𑀺𑀢𑀁 𑀯𑀸𑀧𑀺 𑀬𑀸𑀘𑀓𑀸𑀦𑀁 𑀧𑀭𑀺𑀘𑁆𑀘𑀚𑁂𑀬𑁆𑀬’’𑀦𑁆𑀢𑀺 𑀘 𑀧𑀭𑀺𑀘𑁆𑀘𑀸𑀕𑀦𑀺𑀦𑁆𑀦𑀢𑀸 𑀉𑀧𑀝𑁆𑀞𑀧𑁂𑀢𑀩𑁆𑀩𑀸. 𑀅𑀧𑀺 𑀘 ‘‘𑀅𑀢𑁆𑀣𑁄 𑀦𑀸𑀫𑀸𑀬𑀁 𑀦𑀺𑀭𑀧𑁂𑀓𑁆𑀔𑀁 𑀤𑀸𑀬𑀓𑀫𑀦𑀼𑀕𑀘𑁆𑀙𑀢𑀺, 𑀬𑀣𑀸 𑀢𑀁 𑀦𑀺𑀭𑀧𑁂𑀓𑁆𑀔𑀁 𑀔𑁂𑀧𑀓𑀁 𑀓𑀺𑀝𑀓𑁄’’𑀢𑀺 𑀘 𑀅𑀢𑁆𑀣𑁂 𑀦𑀺𑀭𑀧𑁂𑀓𑁆𑀔𑀢𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁.

𑀬𑀸𑀘𑀫𑀸𑀦𑁄 𑀧𑀦 𑀬𑀤𑀺 𑀧𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺, ‘‘𑀧𑀺𑀬𑁄 𑀫𑀁 𑀬𑀸𑀘𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀅𑀣 𑀉𑀤𑀸𑀲𑀻𑀦𑀧𑀼𑀕𑁆𑀕𑀮𑁄 𑀳𑁄𑀢𑀺, ‘‘𑀅𑀬𑀁 𑀫𑀁 𑀬𑀸𑀘𑀫𑀸𑀦𑁄 𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀫𑀺𑀢𑁆𑀢𑁄 ¶ 𑀳𑁄𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀤𑀤𑀦𑁆𑀢𑁄𑀧𑀺 𑀳𑀺 𑀬𑀸𑀘𑀓𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺. 𑀅𑀣 𑀧𑀦 𑀯𑁂𑀭𑀻 𑀧𑀼𑀕𑁆𑀕𑀮𑁄 𑀬𑀸𑀘𑀢𑀺, ‘‘𑀧𑀘𑁆𑀘𑀢𑁆𑀣𑀺𑀓𑁄 𑀫𑀁 𑀬𑀸𑀘𑀢𑀺, 𑀅𑀬𑀁 𑀫𑀁 𑀬𑀸𑀘𑀫𑀸𑀦𑁄 𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀯𑁂𑀭𑀻 𑀧𑀺𑀬𑁄 𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀺𑀲𑁂𑀲𑁂𑀦 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀏𑀯𑀁 𑀧𑀺𑀬𑀧𑀼𑀕𑁆𑀕𑀮𑁂 𑀯𑀺𑀬 𑀫𑀚𑁆𑀛𑀢𑁆𑀢𑀯𑁂𑀭𑀺𑀧𑀼𑀕𑁆𑀕𑀮𑁂𑀲𑀼𑀧𑀺 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀁 𑀓𑀭𑀼𑀡𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀤𑀸𑀢𑀩𑁆𑀩𑀁.

𑀲𑀘𑁂 𑀧𑀦𑀲𑁆𑀲 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀮𑁄𑀪𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀯𑀺𑀲𑀬𑀸 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀦 𑀩𑁄𑀥𑀺𑀲𑀢𑁆𑀢𑀧𑀝𑀺𑀜𑁆𑀜𑁂𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀦𑀦𑀼 𑀢𑀬𑀸 𑀲𑀧𑁆𑀧𑀼𑀭𑀺𑀲𑀲𑀫𑁆𑀩𑁄𑀥𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀢𑁆𑀣𑀸𑀬 𑀅𑀬𑀁 𑀓𑀸𑀬𑁄 𑀦𑀺𑀲𑁆𑀲𑀝𑁆𑀞𑁄 𑀢𑀧𑁆𑀧𑀭𑀺𑀘𑁆𑀘𑀸𑀕𑀫𑀬𑀜𑁆𑀘 𑀧𑀼𑀜𑁆𑀜𑀁, 𑀢𑀢𑁆𑀣 𑀦𑀸𑀫 ¶ 𑀢𑁂 𑀩𑀸𑀳𑀺𑀭𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀅𑀪𑀺𑀲𑀗𑁆𑀕𑀧𑁆𑀧𑀯𑀢𑁆𑀢𑀺 𑀳𑀢𑁆𑀣𑀺𑀲𑀺𑀦𑀸𑀦𑀲𑀤𑀺𑀲𑀻 𑀳𑁄𑀢𑀺, 𑀢𑀲𑁆𑀫𑀸 𑀢𑀬𑀸 𑀦 𑀓𑀢𑁆𑀣𑀘𑀺 𑀲𑀗𑁆𑀕𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑁄 𑀪𑁂𑀲𑀚𑁆𑀚𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀫𑀽𑀮𑀁 𑀫𑀽𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀧𑀧𑀝𑀺𑀓𑀁 𑀢𑀘𑀁 𑀔𑀦𑁆𑀥𑀁 𑀯𑀺𑀝𑀧𑀁 𑀲𑀸𑀭𑀁 𑀲𑀸𑀔𑀁 𑀧𑀮𑀸𑀲𑀁 𑀧𑀼𑀧𑁆𑀨𑀁 𑀨𑀮𑀁 𑀨𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀦 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 ‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀏𑀢𑁂 𑀳𑀭𑀦𑁆𑀢𑀻’𑀢𑀺 𑀯𑀺𑀢𑀓𑁆𑀓𑀲𑀫𑀼𑀤𑀸𑀘𑀸𑀭𑁄 ¶ 𑀳𑁄𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀚𑁆𑀚𑀦𑁆𑀢𑁂𑀦 𑀫𑀬𑀸 𑀫𑀳𑀸𑀤𑀼𑀓𑁆𑀔𑁂 𑀅𑀓𑀢𑀜𑁆𑀜𑀼𑀓𑁂 𑀦𑀺𑀘𑁆𑀘𑀸𑀲𑀼𑀘𑀺𑀫𑁆𑀳𑀺 𑀓𑀸𑀬𑁂 𑀧𑀭𑁂𑀲𑀁 𑀉𑀧𑀓𑀸𑀭𑀸𑀬 𑀯𑀺𑀦𑀺𑀬𑀼𑀚𑁆𑀚𑀫𑀸𑀦𑁂 𑀅𑀡𑀼𑀫𑀢𑁆𑀢𑁄𑀧𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀓𑁄 𑀯𑀸 𑀏𑀢𑁆𑀣 𑀯𑀺𑀲𑁂𑀲𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀏𑀓𑀦𑁆𑀢𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁂𑀲𑀼, 𑀓𑁂𑀯𑀮𑀁 𑀧𑀦 𑀲𑀫𑁆𑀫𑁄𑀳𑀯𑀺𑀚𑀫𑁆𑀪𑀺𑀢𑀫𑁂𑀢𑀁, 𑀬𑀤𑀺𑀤𑀁 𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀅𑀪𑀺𑀦𑀺𑀯𑁂𑀲𑁄. 𑀢𑀲𑁆𑀫𑀸 𑀩𑀸𑀳𑀺𑀭𑁂𑀲𑀼 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺 𑀓𑀭𑀘𑀭𑀡𑀦𑀬𑀦𑀸𑀤𑀻𑀲𑀼 𑀫𑀁𑀲𑀸𑀤𑀻𑀲𑀼 𑀘 𑀅𑀦𑀧𑁂𑀓𑁆𑀔𑁂𑀦 𑀳𑀼𑀢𑁆𑀯𑀸 ‘𑀢𑀁 𑀢𑀤𑀢𑁆𑀣𑀺𑀓𑀸 𑀳𑀭𑀦𑁆𑀢𑀽’𑀢𑀺 𑀦𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀘𑀲𑁆𑀲 𑀲𑀫𑁆𑀩𑁄𑀥𑀸𑀬 𑀧𑀳𑀺𑀢𑀢𑁆𑀢𑀲𑁆𑀲 𑀓𑀸𑀬𑀚𑀻𑀯𑀺𑀢𑁂𑀲𑀼 𑀦𑀺𑀭𑀧𑁂𑀓𑁆𑀔𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀲𑀼𑀯𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺. 𑀲𑁄 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀦𑁆𑀢𑁄 𑀯𑀺𑀲𑀼𑀤𑁆𑀥𑀸𑀚𑀻𑀯𑁄 𑀜𑀸𑀬𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀅𑀧𑀸𑀬𑀼𑀧𑀸𑀬𑀓𑁄𑀲𑀮𑁆𑀮𑀲𑀫𑀦𑁆𑀦𑀸𑀕𑀫𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦 𑀅𑀪𑀬𑀤𑀸𑀦𑀲𑀤𑁆𑀥𑀫𑁆𑀫𑀤𑀸𑀦𑁂𑀳𑀺 𑀘 𑀲𑀩𑁆𑀩𑀲𑀢𑁆𑀢𑁂 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯 𑀤𑀸𑀦𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀬𑁄.

𑀲𑀻𑀮𑀧𑀸𑀭𑀫𑀺𑀬𑀁 𑀧𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 𑀇𑀤𑀜𑁆𑀳𑀺 𑀲𑀻𑀮𑀁 𑀦𑀸𑀫 𑀕𑀗𑁆𑀕𑁄𑀤𑀓𑀸𑀤𑀻𑀳𑀺 𑀯𑀺𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀤𑁄𑀲𑀫𑀮𑀲𑁆𑀲 𑀯𑀺𑀓𑁆𑀔𑀸𑀮𑀦𑀚𑀮𑀁, 𑀳𑀭𑀺𑀘𑀦𑁆𑀤𑀦𑀸𑀤𑀻𑀳𑀺 𑀯𑀺𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑀲𑁆𑀲 𑀯𑀺𑀦𑀬𑀦𑀁, 𑀳𑀸𑀭𑀫𑀓𑀼𑀝𑀓𑀼𑀡𑁆𑀟𑀮𑀸𑀤𑀻𑀳𑀺 𑀧𑀘𑀼𑀭𑀚𑀦𑀸𑀮𑀗𑁆𑀓𑀸𑀭𑁂𑀳𑀺 𑀅𑀲𑀸𑀥𑀸𑀭𑀡𑁄 𑀲𑀸𑀥𑀽𑀦𑀁 𑀅𑀮𑀗𑁆𑀓𑀸𑀭𑀯𑀺𑀲𑁂𑀲𑁄, 𑀲𑀩𑁆𑀩𑀤𑀺𑀲𑀸𑀯𑀸𑀬𑀦𑀢𑁄 𑀅𑀓𑀺𑀢𑁆𑀢𑀺𑀫𑁄 𑀲𑀩𑁆𑀩𑀓𑀸𑀮𑀸𑀦𑀼𑀭𑀽𑀧𑁄 𑀘 𑀲𑀼𑀭𑀪𑀺𑀕𑀦𑁆𑀥𑁄, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀳𑀺 𑀤𑁂𑀯𑀢𑀸𑀳𑀺 𑀘 𑀯𑀦𑁆𑀤𑀦𑀻𑀬𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀭𑀫𑁄 𑀯𑀲𑀻𑀓𑀭𑀡𑀫𑀦𑁆𑀢𑁄, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑀮𑁄𑀓𑀸𑀭𑁄𑀳𑀡𑀲𑁄𑀧𑀸𑀦𑀧𑀦𑁆𑀢𑀺 ¶ , 𑀛𑀸𑀦𑀸𑀪𑀺𑀜𑁆𑀜𑀸𑀦𑀁 𑀅𑀥𑀺𑀕𑀫𑀽𑀧𑀸𑀬𑁄, 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑁆𑀲 𑀲𑀫𑁆𑀧𑀸𑀧𑀓𑀫𑀕𑁆𑀕𑁄, 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀫𑀺, 𑀬𑀁 𑀬𑀁 𑀯𑀸 𑀧𑀦𑀺𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀲𑀫𑀺𑀚𑁆𑀛𑀦𑀽𑀧𑀸𑀬𑀪𑀸𑀯𑀢𑁄 𑀘𑀺𑀦𑁆𑀢𑀸𑀫𑀡𑀺𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀓𑁂 𑀘 𑀅𑀢𑀺𑀲𑁂𑀢𑀺.

𑀯𑀼𑀢𑁆𑀢𑀜𑁆𑀘𑁂𑀢𑀁 ¶ 𑀪𑀕𑀯𑀢𑀸 𑁋 ‘‘𑀇𑀚𑁆𑀛𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑁩.𑁩𑁩𑁭; 𑀅. 𑀦𑀺. 𑁮.𑁩𑁫). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀅𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 ¶ 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁬𑁫). 𑀢𑀣𑀸 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀻’’𑀢𑀺 (𑀅. 𑀦𑀺. 𑁧𑁧.𑁧). ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺𑀆𑀤𑀺𑀲𑀼𑀢𑁆𑀢𑀸𑀦𑀜𑁆𑀘 (𑀤𑀻. 𑀦𑀺. 𑁨.𑁧𑁫𑁦; 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫) 𑀯𑀲𑁂𑀦 𑀲𑀻𑀮𑀲𑁆𑀲 𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀢𑀣𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀸𑀤𑀻𑀦𑀁 (𑀅. 𑀦𑀺. 𑁭.𑁭𑁨) 𑀯𑀲𑁂𑀦 𑀲𑀻𑀮𑀯𑀺𑀭𑀳𑁂 𑀆𑀤𑀻𑀦𑀯𑀸. 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑀺𑀫𑀺𑀢𑁆𑀢𑀢𑁄 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀧𑀯𑀸𑀤𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀪𑀸𑀯𑀢𑁄 𑀯𑀺𑀜𑁆𑀜𑀽𑀳𑀺 𑀧𑀸𑀲𑀁𑀲𑀪𑀸𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀳𑁂𑀢𑀼𑀢𑁄 𑀲𑁄𑀢𑁆𑀣𑀺𑀝𑁆𑀞𑀸𑀦𑀢𑁄 𑀅𑀢𑀺𑀚𑀦𑀲𑀸𑀧𑀢𑁂𑀬𑁆𑀬𑀸𑀥𑀺𑀧𑀢𑁂𑀬𑁆𑀬𑀸𑀬𑀼𑀭𑀽𑀧𑀝𑁆𑀞𑀸𑀦𑀩𑀦𑁆𑀥𑀼𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀻𑀦𑀁 𑀅𑀢𑀺𑀲𑀬𑀦𑀢𑁄 𑀘 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀲𑀻𑀮𑀯𑀢𑁄 𑀳𑀺 𑀅𑀢𑁆𑀢𑀦𑁄 𑀲𑀻𑀮𑀲𑀫𑁆𑀧𑀤𑀸𑀳𑁂𑀢𑀼 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺 𑁋 ‘‘𑀓𑀢𑀁 𑀯𑀢 𑀫𑀬𑀸 𑀓𑀼𑀲𑀮𑀁, 𑀓𑀢𑀁 𑀓𑀮𑁆𑀬𑀸𑀡𑀁, 𑀓𑀢𑀁 𑀪𑀻𑀭𑀼𑀢𑁆𑀢𑀸𑀡’’𑀦𑁆𑀢𑀺.

𑀢𑀣𑀸 𑀲𑀻𑀮𑀯𑀢𑁄 𑀅𑀢𑁆𑀢𑀸 𑀦 𑀉𑀧𑀯𑀤𑀢𑀺, 𑀦 𑀧𑀭𑁂 𑀯𑀺𑀜𑁆𑀜𑀽, 𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀦𑀁 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀺. ‘‘𑀲𑀻𑀮𑀯𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 𑀯𑀺𑀜𑁆𑀜𑀽𑀦𑀁 𑀧𑀸𑀲𑀁𑀲𑁄 𑀳𑁄𑀢𑀺. 𑀢𑀣𑀸 𑀲𑀻𑀮𑀯𑀢𑁄 𑀬𑁆𑀯𑀸𑀬𑀁 ‘‘𑀓𑀢𑀁 𑀯𑀢 𑀫𑀬𑀸 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀓𑀁, 𑀓𑀢𑀁 𑀓𑀺𑀩𑁆𑀩𑀺𑀲’’𑀦𑁆𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀦 𑀳𑁄𑀢𑀺. 𑀲𑀻𑀮𑀜𑁆𑀘 𑀦𑀸𑀫𑁂𑀢𑀁 𑀅𑀧𑁆𑀧𑀫𑀸𑀤𑀸𑀥𑀺𑀝𑁆𑀞𑀸𑀦𑀢𑁄 𑀪𑁄𑀕𑀩𑁆𑀬𑀲𑀦𑀸𑀤𑀺𑀧𑀭𑀺𑀳𑀸𑀭𑀫𑀼𑀔𑁂𑀦 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄 𑀫𑀗𑁆𑀕𑀮𑀪𑀸𑀯𑀢𑁄 𑀘 𑀧𑀭𑀫𑀁 𑀲𑁄𑀢𑁆𑀣𑀺𑀝𑁆𑀞𑀸𑀦𑀁, 𑀦𑀺𑀳𑀻𑀦𑀚𑀘𑁆𑀘𑁄𑀧𑀺 𑀲𑀻𑀮𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀧𑀽𑀚𑀦𑀻𑀬𑁄 𑀳𑁄𑀢𑀻𑀢𑀺 𑀓𑀼𑀮𑀲𑀫𑁆𑀧𑀢𑁆𑀢𑀺𑀁 𑀅𑀢𑀺𑀲𑁂𑀢𑀺 𑀲𑀻𑀮𑀲𑀫𑁆𑀧𑀤𑀸, ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚? 𑀇𑀥 𑀢𑁂 𑀅𑀲𑁆𑀲 𑀤𑀸𑀲𑁄 𑀓𑀫𑁆𑀫𑀓𑀭𑁄’’𑀢𑀺𑀆𑀤𑀺𑀯𑀘𑀦𑀜𑁆𑀘𑁂𑀢𑁆𑀣 (𑀤𑀻. 𑀦𑀺. 𑁧.𑁧𑁮𑁬) 𑀲𑀸𑀥𑀓𑀁. 𑀘𑁄𑀭𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑁄 𑀧𑀭𑀮𑁄𑀓𑀸𑀦𑀼𑀕𑀫𑀦𑀢𑁄 𑀫𑀳𑀧𑁆𑀨𑀮𑀪𑀸𑀯𑀢𑁄 𑀲𑀫𑀣𑀸𑀤𑀺𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘 𑀩𑀸𑀳𑀺𑀭𑀥𑀦𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀧𑀭𑀫𑀲𑁆𑀲 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀔𑀢𑁆𑀢𑀺𑀬𑀸𑀤𑀻𑀦𑀁 𑀇𑀲𑁆𑀲𑀭𑀺𑀬𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀲𑀻𑀮𑀦𑀺𑀫𑀺𑀢𑁆𑀢𑀜𑁆𑀳𑀺 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀲𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀁, 𑀯𑀲𑁆𑀲𑀲𑀢𑀤𑀻𑀖𑀧𑁆𑀧𑀫𑀸𑀡𑀢𑁄 𑀚𑀻𑀯𑀺𑀢𑀢𑁄 𑀏𑀓𑀸𑀳𑀫𑁆𑀧𑀺 𑀲𑀻𑀮𑀯𑀢𑁄 𑀚𑀻𑀯𑀺𑀢𑀲𑁆𑀲 𑀯𑀺𑀲𑀺𑀝𑁆𑀞𑀢𑀸𑀯𑀘𑀦𑀢𑁄 𑀲𑀢𑀺 𑀘 𑀚𑀻𑀯𑀺𑀢𑁂 𑀲𑀺𑀓𑁆𑀔𑀸𑀦𑀺𑀓𑁆𑀔𑀺𑀧𑀦𑀲𑁆𑀲 𑀫𑀭𑀡𑀢𑀸𑀯𑀘𑀦𑀢𑁄 𑀲𑀻𑀮𑀁 𑀚𑀻𑀯𑀺𑀢𑀢𑁄 𑀯𑀺𑀲𑀺𑀝𑁆𑀞𑀢𑀭𑀁 ¶ ¶ . 𑀯𑁂𑀭𑀻𑀦𑀫𑁆𑀧𑀺 𑀫𑀦𑀼𑀜𑁆𑀜𑀪𑀸𑀯𑀸𑀯𑀳𑀦𑀢𑁄 𑀚𑀭𑀸𑀭𑁄𑀕𑀯𑀺𑀧𑀢𑁆𑀢𑀻𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀧𑀸𑀲𑀸𑀤𑀳𑀫𑁆𑀫𑀺𑀬𑀸𑀤𑀺𑀝𑁆𑀞𑀸𑀦𑀯𑀺𑀲𑁂𑀲𑁂 𑀭𑀸𑀚𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀺𑀝𑁆𑀞𑀸𑀦𑀯𑀺𑀲𑁂𑀲𑁂 𑀘 𑀅𑀢𑀺𑀲𑁂𑀢𑀺 𑀲𑀻𑀮𑀁 𑀲𑀼𑀔𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀲𑀪𑀸𑀯𑀲𑀺𑀦𑀺𑀤𑁆𑀥𑁂 𑀲𑀦𑁆𑀢𑀺𑀓𑀸𑀯𑀘𑀭𑁂𑀧𑀺 𑀩𑀦𑁆𑀥𑀼𑀚𑀦𑁂 𑀫𑀺𑀢𑁆𑀢𑀚𑀦𑁂 𑀘 𑀅𑀢𑀺𑀲𑁂𑀢𑀺 𑀏𑀓𑀦𑁆𑀢𑀳𑀺𑀢𑀲𑀫𑁆𑀧𑀸𑀤𑀦𑀢𑁄 ¶ 𑀧𑀭𑀮𑁄𑀓𑀸𑀦𑀼𑀕𑀫𑀦𑀢𑁄 𑀘 ‘‘𑀦 𑀢𑀁 𑀫𑀸𑀢𑀸𑀧𑀺𑀢𑀸 𑀓𑀬𑀺𑀭𑀸’’𑀢𑀺𑀆𑀤𑀺𑀯𑀘𑀦𑀜𑁆𑀘𑁂𑀢𑁆𑀣 (𑀥. 𑀧. 𑁪𑁩) 𑀲𑀸𑀥𑀓𑀁. 𑀢𑀣𑀸 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀩𑀮𑀓𑀸𑀬𑁂𑀳𑀺 𑀫𑀦𑁆𑀢𑀸𑀕𑀤𑀲𑁄𑀢𑁆𑀣𑀸𑀦𑀧𑁆𑀧𑀬𑁄𑀕𑁂𑀳𑀺 𑀘 𑀤𑀼𑀭𑀸𑀭𑀓𑁆𑀔𑀁 𑀅𑀢𑁆𑀢𑀸𑀦𑀁 𑀆𑀭𑀓𑁆𑀔𑀸𑀪𑀸𑀯𑁂𑀦 𑀲𑀻𑀮𑀫𑁂𑀯 𑀯𑀺𑀲𑀺𑀝𑁆𑀞𑀢𑀭𑀁 𑀅𑀢𑁆𑀢𑀸𑀥𑀻𑀦𑀢𑁄 𑀅𑀧𑀭𑀸𑀥𑀻𑀦𑀢𑁄 𑀫𑀳𑀸𑀯𑀺𑀲𑀬𑀢𑁄 𑀘. 𑀢𑁂𑀦𑁂𑀯𑀸𑀳 𑁋 ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺𑀆𑀤𑀺 (𑀚𑀸. 𑁧.𑁧𑁦.𑁧𑁦𑁨). 𑀏𑀯𑀫𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀸 𑀘𑁂𑀯 𑀲𑀻𑀮𑀲𑀫𑁆𑀧𑀤𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺 𑀅𑀧𑀭𑀺𑀲𑀼𑀤𑁆𑀥𑀸 𑀘 𑀧𑀸𑀭𑀺𑀲𑀼𑀤𑁆𑀥𑀺𑀁.

𑀲𑀘𑁂 𑀧𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀬𑁂𑀦 𑀲𑀻𑀮𑀧𑀝𑀺𑀧𑀓𑁆𑀔𑀸 𑀥𑀫𑁆𑀫𑀸 𑀤𑁄𑀲𑀸𑀤𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀦 𑀩𑁄𑀥𑀺𑀲𑀢𑁆𑀢𑀧𑀝𑀺𑀜𑁆𑀜𑁂𑀦 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀦𑀦𑀼 𑀢𑀬𑀸 𑀲𑀫𑁆𑀩𑁄𑀥𑀸𑀬 𑀧𑀡𑀺𑀥𑀸𑀦𑀁 𑀓𑀢𑀁, 𑀲𑀻𑀮𑀯𑀺𑀓𑀮𑁂𑀦 𑀘 𑀦 𑀲𑀓𑁆𑀓𑀸 𑀮𑁄𑀓𑀺𑀬𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑀼𑀁, 𑀧𑀕𑁂𑀯 𑀮𑁄𑀓𑀼𑀢𑁆𑀢𑀭𑀸, 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀧𑀦 𑀅𑀕𑁆𑀕𑀪𑀽𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀦 𑀲𑀻𑀮𑁂𑀦 𑀧𑀭𑀫𑀼𑀓𑁆𑀓𑀁𑀲𑀕𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀓𑀺𑀓𑀻𑀯 𑀅𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑁂𑀦 𑀲𑀼𑀝𑁆𑀞𑀼𑀢𑀭𑀁 𑀢𑀬𑀸 𑀧𑁂𑀲𑀮𑁂𑀦 𑀪𑀯𑀺𑀢𑀩𑁆𑀩𑀁.

𑀅𑀧𑀺 𑀘 𑀢𑀬𑀸 𑀥𑀫𑁆𑀫𑀤𑁂𑀲𑀦𑀸𑀬 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑀸𑀦𑀁 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺, 𑀲𑀻𑀮𑀯𑀺𑀓𑀮𑀲𑁆𑀲 𑀘 𑀯𑀘𑀦𑀁 𑀦 𑀧𑀘𑁆𑀘𑁂𑀢𑀩𑁆𑀩𑀁 𑀳𑁄𑀢𑀺, 𑀅𑀲𑀧𑁆𑀧𑀸𑀬𑀸𑀳𑀸𑀭𑀯𑀺𑀘𑀸𑀭𑀲𑁆𑀲 𑀯𑀺𑀬 𑀯𑁂𑀚𑁆𑀚𑀲𑁆𑀲 𑀢𑀺𑀓𑀺𑀘𑁆𑀙𑀦𑀁, 𑀢𑀲𑁆𑀫𑀸 𑀓𑀣𑀸𑀳𑀁 𑀲𑀤𑁆𑀥𑁂𑀬𑁆𑀬𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀦𑀁 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑀸𑀦𑀺 𑀓𑀭𑁂𑀬𑁆𑀬𑀦𑁆𑀢𑀺 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀲𑀻𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀺𑀜𑁆𑀘 𑀛𑀸𑀦𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀫𑁂 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀓𑀭𑀡𑀲𑀫𑀢𑁆𑀣𑀢𑀸 𑀧𑀜𑁆𑀜𑀸𑀧𑀸𑀭𑀫𑀺𑀆𑀤𑀺𑀧𑀭𑀺𑀧𑀽𑀭𑀡𑀜𑁆𑀘, 𑀛𑀸𑀦𑀸𑀤𑀬𑁄 𑀘 𑀕𑀼𑀡𑀸 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀺𑀦𑀸 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀫𑁆𑀫𑀤𑁂𑀯 𑀲𑀻𑀮𑀁 𑀧𑀭𑀺𑀲𑁄𑀥𑁂𑀢𑀩𑁆𑀩𑀁.

𑀢𑀣𑀸 ‘‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁯𑁧; 𑀲𑀁. 𑀦𑀺. 𑁨.𑁧𑁫𑁪; 𑀫. 𑀦𑀺. 𑁧.𑁨𑁯𑁧; 𑁨.𑁧𑁦) 𑀖𑀭𑀸𑀯𑀸𑀲𑁂, ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁧𑁭𑁫) ‘‘𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀻’’𑀢𑀺𑀆𑀤𑀺𑀦𑀸 ¶ (𑀫. 𑀦𑀺. 𑁧.𑁧𑁭𑁮) 𑀘 𑀓𑀸𑀫𑁂𑀲𑀼, ‘‘𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑁄 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁮) 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁯𑁧; 𑀲𑀁. 𑀦𑀺. 𑁨.𑁧𑁫𑁪) 𑀧𑀩𑁆𑀩𑀚𑁆𑀚𑀸𑀤𑀻𑀲𑀼 ¶ 𑀆𑀦𑀺𑀲𑀁𑀲𑀧𑀝𑀺𑀲𑀗𑁆𑀔𑀸𑀯𑀲𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀤𑀼𑀓𑁆𑀔𑀓𑁆𑀔𑀦𑁆𑀥- (𑀫. 𑀦𑀺. 𑁧.𑁧𑁬𑁩 𑀆𑀤𑀬𑁄) 𑀆𑀲𑀺𑀯𑀺𑀲𑁄𑀧𑀫𑀲𑀼𑀢𑁆𑀢𑀸- (𑀲𑀁. 𑀦𑀺. 𑁪.𑁨𑁩𑁮) 𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 ¶ ‘‘𑀧𑀜𑁆𑀜𑀸𑀬 𑀯𑀺𑀦𑀸 𑀤𑀸𑀦𑀸𑀤𑀬𑁄 𑀥𑀫𑁆𑀫𑀸 𑀦 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀬𑀣𑀸𑀲𑀓𑀁 𑀩𑁆𑀬𑀸𑀧𑀸𑀭𑀲𑀫𑀢𑁆𑀣𑀸 𑀘 𑀦 𑀳𑁄𑀦𑁆𑀢𑀻’’𑀢𑀺 𑀧𑀜𑁆𑀜𑀸𑀕𑀼𑀡𑀸 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀬𑀣𑁂𑀯 𑀳𑀺 𑀚𑀻𑀯𑀺𑀢𑁂𑀦 𑀯𑀺𑀦𑀸 𑀲𑀭𑀻𑀭𑀬𑀦𑁆𑀢𑀁 𑀦 𑀲𑁄𑀪𑀢𑀺, 𑀦 𑀘 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀲𑀼 𑀧𑀝𑀺𑀧𑀢𑁆𑀢𑀺𑀲𑀫𑀢𑁆𑀣𑀁 𑀳𑁄𑀢𑀺, 𑀬𑀣𑀸 𑀘 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀜𑁆𑀜𑀸𑀡𑁂𑀦 𑀯𑀺𑀦𑀸 𑀬𑀣𑀸𑀲𑀓𑀁 𑀯𑀺𑀲𑀬𑁂𑀲𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦𑀧𑁆𑀧𑀳𑁄𑀦𑁆𑀢𑀺, 𑀏𑀯𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀸𑀬 𑀯𑀺𑀦𑀸 𑀲𑀓𑀺𑀘𑁆𑀘𑀧𑀝𑀺𑀧𑀢𑁆𑀢𑀺𑀬𑀁 𑀅𑀲𑀫𑀢𑁆𑀣𑀸𑀦𑀻𑀢𑀺 𑀧𑀭𑀺𑀘𑁆𑀘𑀸𑀕𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀁 𑀧𑀜𑁆𑀜𑀸 𑀧𑀥𑀸𑀦𑀓𑀸𑀭𑀡𑀁. 𑀉𑀫𑁆𑀫𑀻𑀮𑀺𑀢𑀧𑀜𑁆𑀜𑀸𑀘𑀓𑁆𑀔𑀼𑀓𑀸 𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺𑀧𑀺 𑀤𑀢𑁆𑀯𑀸 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀅𑀧𑀭𑀯𑀫𑁆𑀪𑀓𑀸 𑀘 𑀳𑁄𑀦𑁆𑀢𑀺, 𑀪𑁂𑀲𑀚𑁆𑀚𑀭𑀼𑀓𑁆𑀔𑀸 𑀯𑀺𑀬 𑀯𑀺𑀓𑀧𑁆𑀧𑀭𑀳𑀺𑀢𑀸 𑀓𑀸𑀮𑀢𑁆𑀢𑀬𑁂𑀧𑀺 𑀲𑁄𑀫𑀦𑀲𑁆𑀲𑀚𑀸𑀢𑀸. 𑀧𑀜𑁆𑀜𑀸𑀯𑀲𑁂𑀦 𑀳𑀺 𑀉𑀧𑀸𑀬𑀓𑁄𑀲𑀮𑁆𑀮𑀬𑁄𑀕𑀢𑁄 𑀧𑀭𑀺𑀘𑁆𑀘𑀸𑀕𑁄 𑀧𑀭𑀳𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀤𑀸𑀦𑀧𑀸𑀭𑀫𑀺𑀪𑀸𑀯𑀁 𑀉𑀧𑁂𑀢𑀺. 𑀅𑀢𑁆𑀢𑀢𑁆𑀣𑀜𑁆𑀳𑀺 𑀤𑀸𑀦𑀁 𑀯𑀟𑁆𑀠𑀺𑀲𑀤𑀺𑀲𑀁 𑀳𑁄𑀢𑀺.

𑀢𑀣𑀸 𑀧𑀜𑁆𑀜𑀸𑀬 𑀅𑀪𑀸𑀯𑁂𑀦 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀸𑀯𑀺𑀬𑁄𑀕𑀢𑁄 𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺 𑀏𑀯 𑀦 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀥𑀺𑀝𑁆𑀞𑀸𑀦𑀪𑀸𑀯𑁄. 𑀧𑀜𑁆𑀜𑀯𑀸 𑀏𑀯 𑀘 𑀖𑀭𑀸𑀯𑀸𑀲𑁂 𑀓𑀸𑀫𑀕𑀼𑀡𑁂𑀲𑀼 𑀲𑀁𑀲𑀸𑀭𑁂 𑀘 𑀆𑀤𑀻𑀦𑀯𑀁 𑀧𑀩𑁆𑀩𑀚𑁆𑀚𑀸𑀬 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀧𑀭𑁂 𑀘 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀯𑀻𑀭𑀺𑀬𑀜𑁆𑀘 𑀧𑀜𑁆𑀜𑀸𑀯𑀺𑀭𑀳𑀺𑀢𑀁 𑀬𑀣𑀺𑀘𑁆𑀙𑀺𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀤𑀼𑀭𑀸𑀭𑀫𑁆𑀪𑀪𑀸𑀯𑀢𑁄. 𑀯𑀭𑀫𑁂𑀯 𑀳𑀺 𑀅𑀦𑀸𑀭𑀫𑁆𑀪𑁄 𑀤𑀼𑀭𑀸𑀭𑀫𑁆𑀪𑀢𑁄, 𑀧𑀜𑁆𑀜𑀸𑀲𑀳𑀺𑀢𑁂𑀦 𑀧𑀦 𑀯𑀻𑀭𑀺𑀬𑁂𑀦 𑀦 𑀓𑀺𑀜𑁆𑀘𑀺 𑀤𑀼𑀭𑀥𑀺𑀕𑀫𑀁 𑀉𑀧𑀸𑀬𑀧𑀝𑀺𑀧𑀢𑁆𑀢𑀺𑀢𑁄. 𑀢𑀣𑀸 𑀧𑀜𑁆𑀜𑀯𑀸 𑀏𑀯 𑀧𑀭𑀸𑀧𑀓𑀸𑀭𑀸𑀤𑀻𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺, 𑀦 𑀤𑀼𑀧𑁆𑀧𑀜𑁆𑀜𑁄. 𑀧𑀜𑁆𑀜𑀸𑀯𑀺𑀭𑀳𑀺𑀢𑀲𑁆𑀲 𑀘 𑀧𑀭𑁂𑀳𑀺 𑀉𑀧𑀦𑀻𑀢𑀸 𑀅𑀧𑀓𑀸𑀭𑀸 𑀔𑀦𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀦𑁆𑀢𑀺, 𑀧𑀜𑁆𑀜𑀯𑀢𑁄 𑀧𑀦 𑀢𑁂 𑀔𑀦𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀩𑁆𑀭𑀽𑀳𑀦𑀯𑀲𑁂𑀦 𑀅𑀲𑁆𑀲𑀸 𑀣𑀺𑀭𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀜𑁆𑀜𑀯𑀸 𑀏𑀯 𑀢𑀻𑀡𑀺𑀧𑀺 𑀲𑀘𑁆𑀘𑀸𑀦𑀺 ¶ 𑀦𑁂𑀲𑀁 𑀓𑀸𑀭𑀡𑀸𑀦𑀺 𑀧𑀝𑀺𑀧𑀓𑁆𑀔𑁂 𑀘 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀧𑀭𑁂𑀲𑀁 𑀅𑀯𑀺𑀲𑀁𑀯𑀸𑀤𑀓𑁄 𑀳𑁄𑀢𑀺.

𑀢𑀣𑀸 𑀧𑀜𑁆𑀜𑀸𑀩𑀮𑁂𑀦 𑀅𑀢𑁆𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀥𑀺𑀢𑀺𑀲𑀫𑁆𑀧𑀤𑀸𑀬 𑀲𑀩𑁆𑀩𑀧𑀸𑀭𑀫𑀻𑀲𑀼 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑁄 𑀳𑁄𑀢𑀺. 𑀧𑀜𑁆𑀜𑀯𑀸 𑀏𑀯 𑀘 𑀧𑀺𑀬𑀫𑀚𑁆𑀛𑀢𑁆𑀢𑀯𑁂𑀭𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀳𑀺𑀢𑀽𑀧𑀲𑀁𑀳𑀸𑀭𑀓𑀼𑀲𑀮𑁄 𑀳𑁄𑀢𑀺. 𑀢𑀣𑀸 𑀧𑀜𑁆𑀜𑀸𑀯𑀲𑁂𑀦 𑀮𑀸𑀪𑀸𑀮𑀸𑀪𑀸𑀤𑀺𑀮𑁄𑀓𑀥𑀫𑁆𑀫𑀲𑀦𑁆𑀦𑀺𑀧𑀸𑀢𑁂 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀫𑀚𑁆𑀛𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀸𑀲𑀁 𑀧𑀸𑀭𑀫𑀻𑀦𑀁 𑀧𑀜𑁆𑀜𑀸𑀯 𑀧𑀸𑀭𑀺𑀲𑀼𑀤𑁆𑀥𑀺𑀳𑁂𑀢𑀽𑀢𑀺 𑀧𑀜𑁆𑀜𑀸𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀅𑀧𑀺 𑀘 𑀧𑀜𑁆𑀜𑀸𑀬 𑀯𑀺𑀦𑀸 𑀦 ¶ 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺, 𑀅𑀦𑁆𑀢𑀭𑁂𑀦 𑀘 𑀤𑀺𑀝𑁆𑀞𑀺𑀲𑀫𑁆𑀧𑀤𑀁 𑀦 𑀲𑀻𑀮𑀲𑀫𑁆𑀧𑀤𑀸 ¶ , 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀯𑀺𑀭𑀳𑀺𑀢𑀲𑁆𑀲 𑀦 𑀲𑀫𑀸𑀥𑀺𑀲𑀫𑁆𑀧𑀤𑀸, 𑀅𑀲𑀫𑀸𑀳𑀺𑀢𑁂𑀦 𑀘 𑀦 𑀲𑀓𑁆𑀓𑀸 𑀅𑀢𑁆𑀢𑀳𑀺𑀢𑀫𑀢𑁆𑀢𑀫𑁆𑀧𑀺 𑀲𑀸𑀥𑁂𑀢𑀼𑀁, 𑀧𑀕𑁂𑀯 𑀉𑀓𑁆𑀓𑀁𑀲𑀕𑀢𑀁 𑀧𑀭𑀳𑀺𑀢𑀦𑁆𑀢𑀺 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 ‘‘𑀦𑀦𑀼 𑀢𑀬𑀸 𑀲𑀓𑁆𑀓𑀘𑁆𑀘𑀁 𑀧𑀜𑁆𑀜𑀸𑀬 𑀧𑀭𑀺𑀯𑀼𑀤𑁆𑀥𑀺𑀬𑀁 𑀆𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀅𑀢𑁆𑀢𑀸 𑀑𑀯𑀤𑀺𑀢𑀩𑁆𑀩𑁄. 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀳𑀺 𑀫𑀳𑀸𑀲𑀢𑁆𑀢𑁄 𑀘𑀢𑀼𑀭𑀥𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀺𑀢𑁄 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑁂 𑀦𑀺𑀬𑁆𑀬𑀸𑀦𑀫𑀕𑁆𑀕𑁂 𑀅𑀯𑀢𑀸𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀦𑁂𑀲𑀁 𑀧𑀭𑀺𑀧𑀸𑀘𑁂𑀢𑀺.

𑀢𑀣𑀸 𑀧𑀜𑁆𑀜𑀸𑀩𑀮𑁂𑀦 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀧𑀯𑀺𑀘𑀬𑀩𑀳𑀼𑀮𑁄𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑁆𑀢𑁄 𑀤𑀸𑀦𑀸𑀤𑀬𑁄 𑀕𑀼𑀡𑁂 𑀯𑀺𑀲𑁂𑀲𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑀁 𑀦𑀬𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑀺𑀓𑁆𑀔𑀸𑀬 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁂 𑀧𑀜𑁆𑀜𑀸𑀕𑀼𑀡𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀜𑁆𑀜𑀸𑀧𑀸𑀭𑀫𑀻 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸.

𑀢𑀣𑀸 𑀤𑀺𑀲𑁆𑀲𑀫𑀸𑀦𑀸𑀦𑀺𑀧𑀺 𑀮𑁄𑀓𑀺𑀬𑀸𑀦𑀺 𑀓𑀫𑁆𑀫𑀸𑀦𑀺 𑀦𑀺𑀳𑀻𑀦𑀯𑀻𑀭𑀺𑀬𑁂𑀦 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺, 𑀅𑀕𑀡𑀺𑀢𑀔𑁂𑀤𑁂𑀦 𑀧𑀦 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀤𑀼𑀭𑀥𑀺𑀕𑀫𑀁 𑀦𑀸𑀫 𑀦𑀢𑁆𑀣𑀺. 𑀦𑀺𑀳𑀻𑀦𑀯𑀻𑀭𑀺𑀬𑁄 𑀳𑀺 ‘‘𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀢𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀪𑀺𑀢𑀼𑀫𑁂𑀯 𑀦 𑀲𑀓𑁆𑀓𑀼𑀡𑀸𑀢𑀺. 𑀫𑀚𑁆𑀛𑀺𑀫𑁄 𑀆𑀭𑀪𑀺𑀢𑁆𑀯𑀸 𑀅𑀦𑁆𑀢𑀭𑀸 𑀯𑁄𑀲𑀸𑀦𑀫𑀸𑀧𑀚𑁆𑀚𑀢𑀺. 𑀉𑀓𑁆𑀓𑀝𑁆𑀞𑀯𑀻𑀭𑀺𑀬𑁄 𑀧𑀦 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑁄 𑀆𑀭𑀫𑁆𑀪𑀧𑀸𑀭𑀫𑀺𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀅𑀧𑀺 𑀘 ‘‘𑀬𑀲𑁆𑀲 𑀅𑀢𑁆𑀢𑀦𑁄 𑀏𑀯 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀫𑀼𑀤𑁆𑀥𑀭𑀡𑀢𑁆𑀣𑀫𑀸𑀭𑀫𑁆𑀪𑁄, 𑀢𑀲𑁆𑀲𑀸𑀧𑀺 𑀦 𑀯𑀻𑀭𑀺𑀬𑀲𑁆𑀲 𑀲𑀺𑀣𑀺𑀮𑀪𑀸𑀯𑁂 𑀫𑀦𑁄𑀭𑀣𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀧𑀕𑁂𑀯 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺 ¶ 𑀘 ‘‘𑀭𑀸𑀕𑀸𑀤𑀻𑀦𑀁 𑀤𑁄𑀲𑀕𑀡𑀸𑀦𑀁 𑀫𑀢𑁆𑀢𑀫𑀳𑀸𑀕𑀚𑀸𑀦𑀁 𑀯𑀺𑀬 𑀤𑀼𑀦𑁆𑀦𑀺𑀯𑀸𑀭𑀪𑀸𑀯𑀢𑁄 𑀢𑀦𑁆𑀦𑀺𑀤𑀸𑀦𑀸𑀦𑀜𑁆𑀘 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀲𑀤𑀺𑀲𑀪𑀸𑀯𑀢𑁄 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀤𑀼𑀕𑁆𑀕𑀢𑀻𑀦𑀁 𑀲𑀩𑁆𑀩𑀤𑀸 𑀯𑀺𑀯𑀝𑀫𑀼𑀔𑀪𑀸𑀯𑀢𑁄, 𑀢𑀢𑁆𑀣 𑀦𑀺𑀬𑁄𑀚𑀓𑀸𑀦𑀜𑁆𑀘 𑀧𑀸𑀧𑀫𑀺𑀢𑁆𑀢𑀸𑀦𑀁 𑀲𑀤𑀸 𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄 𑀢𑀤𑁄𑀯𑀸𑀤𑀓𑀸𑀭𑀺𑀢𑀸𑀬 𑀘 𑀩𑀸𑀮𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀲𑀢𑀺𑀲𑀫𑁆𑀪𑀯𑁂 𑀬𑀼𑀢𑁆𑀢𑀁 𑀲𑀬𑀫𑁂𑀯 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀢𑀼𑀦𑁆𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦 𑀤𑀽𑀭𑀻𑀪𑀯𑀦𑁆𑀢𑀻’’𑀢𑀺 𑀘 ‘‘𑀬𑀤𑀺 𑀧𑀦 𑀲𑀫𑁆𑀩𑁄𑀥𑀺 𑀅𑀢𑁆𑀢𑀸𑀥𑀻𑀦𑁂𑀦 𑀯𑀻𑀭𑀺𑀬𑁂𑀦 𑀲𑀓𑁆𑀓𑀸 𑀲𑀫𑀥𑀺𑀕𑀦𑁆𑀢𑀼𑀁, 𑀓𑀺𑀫𑁂𑀢𑁆𑀣 𑀤𑀼𑀓𑁆𑀓𑀭’’𑀦𑁆𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀻𑀭𑀺𑀬𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ¶ 𑀔𑀦𑁆𑀢𑀺 𑀦𑀸𑀫𑀸𑀬𑀁 𑀦𑀺𑀭𑀯𑀲𑁂𑀲𑀕𑀼𑀡𑀧𑀝𑀺𑀧𑀓𑁆𑀔𑀲𑁆𑀲 𑀓𑁄𑀥𑀲𑁆𑀲 𑀯𑀺𑀥𑀫𑀦𑀢𑁄 𑀕𑀼𑀡𑀲𑀫𑁆𑀧𑀸𑀤𑀦𑁂 𑀲𑀸𑀥𑀽𑀦𑀫𑀧𑁆𑀧𑀝𑀺𑀳𑀢𑀫𑀸𑀬𑀼𑀥𑀁, 𑀧𑀭𑀸𑀪𑀺𑀪𑀯𑀲𑀫𑀢𑁆𑀣𑀸𑀦𑀁 𑀅𑀮𑀗𑁆𑀓𑀸𑀭𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑀮𑀲𑀫𑁆𑀧𑀤𑀸, 𑀓𑁄𑀥𑀕𑁆𑀕𑀺𑀯𑀺𑀦𑀬𑀦𑀉𑀤𑀓𑀥𑀸𑀭𑀸, 𑀓𑀮𑁆𑀬𑀸𑀡𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑀜𑁆𑀚𑀸𑀢𑀺𑀤𑁂𑀲𑁄, 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀯𑀘𑀻𑀯𑀺𑀲𑀯𑀽𑀧𑀲𑀫𑀓𑀭𑁄 𑀫𑀦𑁆𑀢𑀸𑀕𑀤𑁄, 𑀲𑀁𑀯𑀭𑁂 𑀞𑀺𑀢𑀸𑀦𑀁 𑀧𑀭𑀫𑀸 𑀥𑀻𑀭𑀧𑀓𑀢𑀺, 𑀕𑀫𑁆𑀪𑀻𑀭𑀸𑀲𑀬𑀢𑀸𑀬 𑀲𑀸𑀕𑀭𑁄, 𑀤𑁄𑀲𑀫𑀳𑀸𑀲𑀸𑀕𑀭𑀲𑁆𑀲 𑀯𑁂𑀮𑀸, 𑀅𑀧𑀸𑀬𑀤𑁆𑀯𑀸𑀭𑀲𑁆𑀲 𑀧𑀺𑀤𑀳𑀦𑀓𑀯𑀸𑀝𑀁, 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀆𑀭𑁄𑀳𑀡𑀲𑁄𑀧𑀸𑀦𑀁, 𑀲𑀩𑁆𑀩𑀕𑀼𑀡𑀸𑀦𑀁 𑀅𑀥𑀺𑀯𑀸𑀲𑀦𑀪𑀽𑀫𑀺, 𑀉𑀢𑁆𑀢𑀫𑀸 𑀓𑀸𑀬𑀯𑀘𑀻𑀫𑀦𑁄𑀯𑀺𑀲𑀼𑀤𑁆𑀥𑀻𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀅𑀧𑀺 ¶ 𑀘 ‘‘𑀏𑀢𑁂 𑀲𑀢𑁆𑀢𑀸 𑀔𑀦𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀇𑀥𑀮𑁄𑀓𑁂 𑀢𑀧𑁆𑀧𑀦𑁆𑀢𑀺, 𑀧𑀭𑀮𑁄𑀓𑁂 𑀘 𑀢𑀧𑀦𑀻𑀬𑀥𑀫𑁆𑀫𑀸𑀦𑀼𑀬𑁄𑀕𑀢𑁄’’𑀢𑀺 𑀘 ‘‘𑀬𑀤𑀺𑀧𑀺 𑀧𑀭𑀸𑀧𑀓𑀸𑀭𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀦 𑀤𑀼𑀓𑁆𑀔𑀲𑁆𑀲 𑀔𑁂𑀢𑁆𑀢𑀪𑀽𑀢𑁄 𑀅𑀢𑁆𑀢𑀪𑀸𑀯𑁄 𑀩𑀻𑀚𑀪𑀽𑀢𑀜𑁆𑀘 𑀓𑀫𑁆𑀫𑀁 𑀫𑀬𑀸𑀯 𑀅𑀪𑀺𑀲𑀗𑁆𑀔𑀢’’𑀦𑁆𑀢𑀺 𑀘 ‘‘𑀢𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀆𑀡𑀡𑁆𑀬𑀓𑀸𑀭𑀡𑀫𑁂𑀢’’𑀦𑁆𑀢𑀺 𑀘 ‘‘𑀅𑀧𑀓𑀸𑀭𑀓𑁂 𑀅𑀲𑀢𑀺 𑀓𑀣𑀁 𑀫𑀬𑁆𑀳𑀁 𑀔𑀦𑁆𑀢𑀺𑀲𑀫𑁆𑀧𑀤𑀸 𑀲𑀫𑁆𑀪𑀯𑀢𑀻’’𑀢𑀺 𑀘 ‘‘𑀬𑀤𑀺𑀧𑀸𑀬𑀁 𑀏𑀢𑀭𑀳𑀺 𑀅𑀧𑀓𑀸𑀭𑀓𑁄, 𑀅𑀬𑀁 𑀦𑀸𑀫 𑀧𑀼𑀩𑁆𑀩𑁂 𑀅𑀦𑁂𑀦 𑀫𑀬𑁆𑀳𑀁 𑀉𑀧𑀓𑀸𑀭𑁄 𑀓𑀢𑁄’’𑀢𑀺 𑀘 ‘‘𑀅𑀧𑀓𑀸𑀭𑁄 𑀏𑀯 𑀯𑀸 𑀔𑀦𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀉𑀧𑀓𑀸𑀭𑁄’’𑀢𑀺 𑀘 ‘‘𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀫𑀬𑁆𑀳𑀁 𑀧𑀼𑀢𑁆𑀢𑀲𑀤𑀺𑀲𑀸, 𑀧𑀼𑀢𑁆𑀢𑀓𑀢𑀸𑀧𑀭𑀸𑀥𑁂𑀲𑀼 𑀘 𑀓𑁄 𑀓𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘 ‘‘𑀬𑁂𑀦 𑀓𑁄𑀥𑀧𑀺𑀲𑀸𑀘𑀸𑀯𑁂𑀲𑁂𑀦 𑀅𑀬𑀁 𑀫𑀬𑁆𑀳𑀁 𑀅𑀧𑀭𑀚𑁆𑀛𑀢𑀺, 𑀲𑁆𑀯𑀸𑀬𑀁 𑀓𑁄𑀥𑀪𑀽𑀢𑀸𑀯𑁂𑀲𑁄 𑀫𑀬𑀸 𑀯𑀺𑀦𑁂𑀢𑀩𑁆𑀩𑁄’’𑀢𑀺 𑀘, ‘‘𑀬𑁂𑀦 𑀅𑀧𑀓𑀸𑀭𑁂𑀦 𑀇𑀤𑀁 𑀫𑀬𑁆𑀳𑀁 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀅𑀳𑀫𑁆𑀧𑀺 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘, ‘‘𑀬𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑀓𑀸𑀭𑁄 𑀓𑀢𑁄, 𑀬𑀢𑁆𑀣 𑀘 𑀓𑀢𑁄, 𑀲𑀩𑁆𑀩𑁂𑀧𑀺 𑀢𑁂 𑀢𑀲𑁆𑀫𑀺𑀁 𑀏𑀯 𑀔𑀡𑁂 𑀦𑀺𑀭𑀼𑀤𑁆𑀥𑀸 𑀓𑀲𑁆𑀲𑀺𑀤𑀸𑀦𑀺 𑀓𑁂𑀦 𑀓𑁄𑀧𑁄 𑀓𑀸𑀢𑀩𑁆𑀩𑁄’’𑀢𑀺 ¶ 𑀘, ‘‘𑀅𑀦𑀢𑁆𑀢𑀢𑀸𑀬 𑀲𑀩𑁆𑀩𑀥𑀫𑁆𑀫𑀸𑀦𑀁 𑀓𑁄 𑀓𑀲𑁆𑀲 𑀅𑀧𑀭𑀚𑁆𑀛𑀢𑀻’’𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀔𑀦𑁆𑀢𑀺𑀲𑀫𑁆𑀧𑀤𑀸 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸.

𑀬𑀤𑀺 𑀧𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀬𑁂𑀦 𑀧𑀭𑀸𑀧𑀓𑀸𑀭𑀦𑀺𑀫𑀺𑀢𑁆𑀢𑀓𑁄 𑀓𑁄𑀥𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀢𑁂𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀔𑀦𑁆𑀢𑀺 𑀦𑀸𑀫𑁂𑀲𑀸 𑀧𑀭𑀸𑀧𑀓𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀧𑀝𑀺𑀧𑀢𑁆𑀢𑀻𑀦𑀁 𑀧𑀘𑁆𑀘𑀼𑀧𑀓𑀸𑀭𑀓𑀸𑀭𑀡’’𑀦𑁆𑀢𑀺 𑀘 ‘‘𑀅𑀧𑀓𑀸𑀭𑁄 𑀘 𑀫𑀬𑁆𑀳𑀁 𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸𑀢𑀺 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂𑀦 𑀲𑀤𑁆𑀥𑀸𑀬 𑀲𑀩𑁆𑀩𑀮𑁄𑀓𑁂 ¶ 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀬 𑀘 𑀧𑀘𑁆𑀘𑀬𑁄’’𑀢𑀺 𑀘, ‘‘𑀇𑀦𑁆𑀤𑁆𑀭𑀺𑀬𑀧𑀓𑀢𑀺 𑀳𑁂𑀲𑀸 𑀬𑀤𑀺𑀤𑀁 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁄. 𑀢𑀢𑁆𑀣 𑀅𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁄 𑀫𑀬𑁆𑀳𑀁 𑀦 𑀲𑀺𑀬𑀸𑀢𑀺 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’𑀢𑀺 𑀘 ‘‘𑀓𑁄𑀥𑀯𑀲𑀺𑀓𑁄 𑀲𑀢𑁆𑀢𑁄 𑀓𑁄𑀥𑁂𑀦 𑀉𑀫𑁆𑀫𑀢𑁆𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄, 𑀢𑀢𑁆𑀣 𑀓𑀺𑀁 𑀧𑀘𑁆𑀘𑀧𑀓𑀸𑀭𑁂𑀦𑀸’’𑀢𑀺 𑀘 ‘‘𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀑𑀭𑀲𑀧𑀼𑀢𑁆𑀢𑀸 𑀯𑀺𑀬 𑀧𑀭𑀺𑀧𑀸𑀮𑀺𑀢𑀸, 𑀢𑀲𑁆𑀫𑀸 𑀦 𑀢𑀢𑁆𑀣 𑀫𑀬𑀸 𑀘𑀺𑀢𑁆𑀢𑀓𑁄𑀧𑁄 𑀓𑀸𑀢𑀩𑁆𑀩𑁄’’𑀢𑀺 𑀘, ‘‘𑀅𑀧𑀭𑀸𑀥𑀓𑁂 𑀘 𑀲𑀢𑀺 𑀕𑀼𑀡𑁂 𑀕𑀼𑀡𑀯𑀢𑀺 𑀫𑀬𑀸 𑀓𑁄𑀧𑁄 𑀦 𑀓𑀸𑀢𑀩𑁆𑀩𑁄’’𑀢𑀺 𑀘, ‘‘𑀅𑀲𑀢𑀺 𑀕𑀼𑀡𑁂 𑀯𑀺𑀲𑁂𑀲𑁂𑀦 𑀓𑀭𑀼𑀡𑀸𑀬𑀺𑀢𑀩𑁆𑀩𑁄’’𑀢𑀺 𑀘 ‘‘𑀓𑁄𑀧𑁂𑀦 𑀘 𑀫𑀬𑁆𑀳𑀁 𑀕𑀼𑀡𑀬𑀲𑀸 𑀦𑀺𑀳𑀻𑀬𑀦𑁆𑀢𑀻’’𑀢𑀺 𑀘, ‘‘𑀓𑀼𑀚𑁆𑀛𑀦𑁂𑀦 𑀫𑀬𑁆𑀳𑀁 𑀤𑀼𑀩𑁆𑀩𑀡𑁆𑀡𑀤𑀼𑀓𑁆𑀔𑀲𑁂𑀬𑁆𑀬𑀸𑀤𑀬𑁄 𑀲𑀧𑀢𑁆𑀢𑀓𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀘, ‘‘𑀓𑁄𑀥𑁄 𑀘 𑀦𑀸𑀫𑀸𑀬𑀁 𑀲𑀩𑁆𑀩𑀸𑀳𑀺𑀢𑀓𑀸𑀭𑀓𑁄 𑀲𑀩𑁆𑀩𑀳𑀺𑀢𑀯𑀺𑀦𑀸𑀲𑀓𑁄 𑀩𑀮𑀯𑀸 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀘, ‘‘𑀲𑀢𑀺 𑀘 𑀔𑀦𑁆𑀢𑀺𑀬𑀸 𑀦 𑀓𑁄𑀘𑀺 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀘, ‘‘𑀅𑀧𑀭𑀸𑀥𑀓𑁂𑀦 𑀅𑀧𑀭𑀸𑀥𑀦𑀺𑀫𑀺𑀢𑁆𑀢𑀁 𑀬𑀁 𑀆𑀬𑀢𑀺𑀁 𑀮𑀤𑁆𑀥𑀩𑁆𑀩𑀁 𑀤𑀼𑀓𑁆𑀔𑀁 𑀲𑀢𑀺 𑀘 𑀔𑀦𑁆𑀢𑀺𑀬𑀸 𑀫𑀬𑁆𑀳𑀁 𑀢𑀤𑀪𑀸𑀯𑁄’’𑀢𑀺 𑀘, ‘‘𑀘𑀺𑀦𑁆𑀢𑀦𑁂𑀦 𑀓𑀼𑀚𑁆𑀛𑀦𑁆𑀢𑁂𑀦 𑀘 𑀫𑀬𑀸 𑀧𑀘𑁆𑀘𑀢𑁆𑀣𑀺𑀓𑁄𑀬𑁂𑀯 𑀅𑀦𑀼𑀯𑀢𑁆𑀢𑀺𑀢𑁄 𑀳𑁄𑀢𑀻’’𑀢𑀺 𑀘, ‘‘𑀓𑁄𑀥𑁂 𑀘 𑀫𑀬𑀸 𑀔𑀦𑁆𑀢𑀺𑀬𑀸 𑀅𑀪𑀺𑀪𑀽𑀢𑁂 𑀢𑀲𑁆𑀲 𑀤𑀸𑀲𑀪𑀽𑀢𑁄 𑀧𑀘𑁆𑀘𑀢𑁆𑀣𑀺𑀓𑁄 𑀲𑀫𑁆𑀫𑀤𑁂𑀯 𑀅𑀪𑀺𑀪𑀽𑀢𑁄 𑀳𑁄𑀢𑀻’’𑀢𑀺 𑀘, ‘‘𑀓𑁄𑀥𑀦𑀺𑀫𑀺𑀢𑁆𑀢𑀁 𑀔𑀦𑁆𑀢𑀺𑀕𑀼𑀡𑀧𑀭𑀺𑀘𑁆𑀘𑀸𑀕𑁄 𑀫𑀬𑁆𑀳𑀁 𑀦 𑀬𑀼𑀢𑁆𑀢𑁄’’𑀢𑀺 𑀘, ‘‘𑀲𑀢𑀺 𑀘 𑀓𑁄𑀥𑁂 𑀕𑀼𑀡𑀯𑀺𑀭𑁄𑀥𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀓𑀣𑀁 𑀫𑁂 𑀲𑀻𑀮𑀸𑀤𑀺𑀥𑀫𑁆𑀫𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀅𑀲𑀢𑀺 𑀘 𑀢𑁂𑀲𑀼 𑀓𑀣𑀸𑀳𑀁 𑀲𑀢𑁆𑀢𑀸𑀦𑀁 ¶ 𑀉𑀧𑀓𑀸𑀭𑀩𑀳𑀼𑀮𑁄 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀉𑀢𑁆𑀢𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀘, ‘‘𑀔𑀦𑁆𑀢𑀺𑀬𑀸 𑀘 𑀲𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀲𑀫𑀸𑀳𑀺𑀢𑀲𑁆𑀲 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀢𑁄 𑀦𑀺𑀩𑁆𑀩𑀸𑀦𑀜𑁆𑀘 𑀅𑀲𑀗𑁆𑀔𑀢𑀸𑀫𑀢𑀲𑀦𑁆𑀢𑀧𑀡𑀻𑀢𑀢𑀸𑀤𑀺𑀪𑀸𑀯𑀢𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺 𑀩𑀼𑀤𑁆𑀥𑀥𑀫𑁆𑀫𑀸 𑀘 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑀸’’𑀢𑀺.

𑀢𑀢𑁄 𑀘 𑀅𑀦𑀼𑀮𑁄𑀫𑀺𑀬𑀁 𑀔𑀦𑁆𑀢𑀺𑀬𑀁 𑀞𑀺𑀢𑁄 𑀓𑁂𑀯𑀮𑀸 𑀇𑀫𑁂 𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑀭𑀳𑀺𑀢𑀸 𑀥𑀫𑁆𑀫𑀫𑀢𑁆𑀢𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺, 𑀦 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺, 𑀦 𑀘 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀺𑀢𑀸, 𑀦 𑀘𑁂𑀢𑁆𑀣 𑀓𑁄𑀘𑀺 𑀓𑀲𑁆𑀲𑀘𑀺 𑀩𑁆𑀬𑀸𑀧𑀸𑀭𑁄𑀢𑀺 ¶ 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀦𑀥𑀺𑀝𑁆𑀞𑀸𑀦𑀢𑀸 𑀦𑀺𑀚𑁆𑀛𑀸𑀦𑀁 𑀔𑀫𑀢𑀺, 𑀬𑁂𑀦 𑀩𑁄𑀥𑀺𑀲𑀢𑁆𑀢𑁄 𑀩𑁄𑀥𑀺𑀬𑀸 𑀦𑀺𑀬𑀢𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀔𑀦𑁆𑀢𑀺𑀧𑀸𑀭𑀫𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 𑀲𑀘𑁆𑀘𑁂𑀦 𑀯𑀺𑀦𑀸 𑀲𑀻𑀮𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘, 𑀲𑀘𑁆𑀘𑀥𑀫𑁆𑀫𑀸𑀢𑀺𑀓𑁆𑀓𑀫𑁂 𑀘 𑀲𑀩𑁆𑀩𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑁄𑀲𑀭𑀡𑀢𑁄 𑀅𑀲𑀘𑁆𑀘𑀲𑀦𑁆𑀥𑀲𑁆𑀲 𑀅𑀧𑀘𑁆𑀘𑀬𑀺𑀓𑀪𑀸𑀯𑀢𑁄 ¶ 𑀆𑀬𑀢𑀺𑀜𑁆𑀘 𑀅𑀦𑀸𑀤𑁂𑀬𑁆𑀬𑀯𑀘𑀦𑀢𑀸𑀯𑀳𑀦𑀢𑁄 𑀲𑀫𑁆𑀧𑀦𑁆𑀦𑀲𑀘𑁆𑀘𑀲𑁆𑀲 𑀘, 𑀲𑀩𑁆𑀩𑀕𑀼𑀡𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀧𑀸𑀭𑀺𑀧𑀽𑀭𑀺𑀲𑀸𑀫𑀢𑁆𑀣𑀺𑀬𑀢𑁄 𑀲𑀪𑀸𑀯𑀥𑀫𑁆𑀫𑀸𑀯𑀺𑀲𑀁𑀯𑀸𑀤𑀦𑁂𑀦 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀓𑀺𑀘𑁆𑀘𑀓𑀭𑀡𑀢𑁄 𑀩𑁄𑀥𑀺𑀲𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀘, 𑀧𑀭𑀺𑀦𑀺𑀧𑁆𑀨𑀢𑁆𑀢𑀺𑀢𑁄𑀢𑀺𑀆𑀤𑀺𑀦𑀸 𑀲𑀘𑁆𑀘𑀧𑀸𑀭𑀫𑀺𑀬𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 𑀤𑀸𑀦𑀸𑀤𑀻𑀲𑀼 𑀤𑀴𑁆𑀳𑀲𑀫𑀸𑀤𑀸𑀦𑀁 𑀢𑀁𑀧𑀝𑀺𑀧𑀓𑁆𑀔𑀲𑀦𑁆𑀦𑀺𑀧𑀸𑀢𑁂 𑀘 𑀦𑁂𑀲𑀁 𑀅𑀘𑀮𑀸𑀥𑀺𑀝𑁆𑀞𑀸𑀦𑀁 𑀢𑀢𑁆𑀣 𑀘 𑀥𑀻𑀭𑀯𑀻𑀭𑀪𑀸𑀯𑀁 𑀯𑀺𑀦𑀸 𑀦 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸 𑀲𑀫𑁆𑀩𑁄𑀥𑀺𑀦𑀺𑀫𑀺𑀢𑁆𑀢𑀸 𑀲𑀫𑁆𑀪𑀯𑀦𑁆𑀢𑀻𑀢𑀺𑀆𑀤𑀺𑀦𑀸 𑀅𑀥𑀺𑀝𑁆𑀞𑀸𑀦𑁂 𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀅𑀢𑁆𑀢𑀳𑀺𑀢𑀫𑀢𑁆𑀢𑁂 𑀅𑀯𑀢𑀺𑀝𑁆𑀞𑀦𑁆𑀢𑁂𑀦𑀸𑀧𑀺 𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑀢𑀁 𑀯𑀺𑀦𑀸 𑀦 𑀲𑀓𑁆𑀓𑀸 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑀼𑀁, 𑀧𑀕𑁂𑀯 𑀲𑀩𑁆𑀩𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁂𑀦𑀸’’𑀢𑀺 𑀘, ‘‘𑀧𑀘𑁆𑀙𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀁 𑀆𑀓𑀗𑁆𑀔𑀦𑁆𑀢𑁂𑀦 𑀇𑀤𑀸𑀦𑀺 𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀆𑀓𑀗𑁆𑀔𑀸 𑀬𑀼𑀢𑁆𑀢𑀭𑀽𑀧𑀸’’𑀢𑀺 𑀘, ‘‘𑀇𑀤𑀸𑀦𑀺 𑀆𑀲𑀬𑀫𑀢𑁆𑀢𑁂𑀦 𑀧𑀭𑁂𑀲𑀁 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀤𑀸 𑀧𑀬𑁄𑀕𑁂𑀦 𑀢𑀁 𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀘, ‘‘𑀇𑀤𑀸𑀦𑀺 𑀫𑀬𑀸 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑁂𑀦 𑀲𑀁𑀯𑀟𑁆𑀠𑀺𑀢𑀸 𑀧𑀘𑁆𑀙𑀸 𑀥𑀫𑁆𑀫𑀲𑀁𑀯𑀺𑀪𑀸𑀕𑀲𑀳𑀸𑀬𑀸 𑀫𑀬𑁆𑀳𑀁 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘, ‘‘𑀏𑀢𑁂𑀳𑀺 𑀯𑀺𑀦𑀸 𑀦 𑀫𑀬𑁆𑀳𑀁 𑀩𑁄𑀥𑀺𑀲𑀫𑁆𑀪𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀯𑀺𑀪𑀽𑀢𑀺𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀫𑀬𑁆𑀳𑀁 𑀏𑀢𑁂 𑀧𑀭𑀫𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀓𑀼𑀲𑀮𑀸𑀬𑀢𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦’’𑀦𑁆𑀢𑀺 𑀘, 𑀲𑀯𑀺𑀲𑁂𑀲𑀁 𑀲𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑀢𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸 ¶ , 𑀓𑀺𑀜𑁆𑀘 𑀓𑀭𑀼𑀡𑀸𑀥𑀺𑀝𑁆𑀞𑀸𑀦𑀢𑁄𑀧𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸. 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀳𑀺 𑀘𑁂𑀢𑀲𑀸 𑀲𑀢𑁆𑀢𑁂𑀲𑀼 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑀦𑀺𑀭𑀢𑀲𑁆𑀲 𑀢𑁂𑀲𑀁 𑀅𑀳𑀺𑀢𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀩𑀮𑀯𑀢𑀻 𑀉𑀧𑁆𑀧𑀚𑁆𑀚𑀢𑀺 𑀤𑀴𑁆𑀳𑀫𑀽𑀮𑀸. 𑀓𑀭𑀼𑀡𑀸 𑀘 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀆𑀤𑀺 𑀘𑀭𑀡𑀁 𑀧𑀢𑀺𑀝𑁆𑀞𑀸 𑀫𑀽𑀮𑀁 𑀫𑀼𑀔𑀁 𑀧𑀫𑀼𑀔𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀫𑁂𑀢𑁆𑀢𑀸𑀬 𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂 𑀲𑀢𑁆𑀢𑁂𑀳𑀺 𑀓𑀢𑀸 𑀯𑀺𑀧𑁆𑀧𑀓𑀸𑀭𑀸 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀲𑀢𑀺 𑀘 𑀘𑀺𑀢𑁆𑀢𑀯𑀺𑀓𑀸𑀭𑁂 𑀤𑀸𑀦𑀸𑀤𑀻𑀦𑀁 𑀲𑀫𑁆𑀪𑀸𑀭𑀸𑀦𑀁 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻’’𑀢𑀺 ¶ 𑀘, ‘‘𑀫𑁂𑀢𑁆𑀢𑀸𑀲𑀺𑀦𑁂𑀳𑁂𑀦 𑀲𑀺𑀦𑁂𑀳𑀺𑀢𑁂 𑀘𑀺𑀢𑁆𑀢𑁂 𑀉𑀧𑁂𑀓𑁆𑀔𑀸𑀬 𑀯𑀺𑀦𑀸 𑀲𑀫𑁆𑀪𑀸𑀭𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀺 𑀦 𑀳𑁄𑀢𑀻’’𑀢𑀺 ¶ 𑀘, ‘‘𑀅𑀦𑀼𑀧𑁂𑀓𑁆𑀔𑀓𑁄 𑀲𑀫𑁆𑀪𑀸𑀭𑁂𑀲𑀼 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀢𑀩𑁆𑀩𑀺𑀧𑀸𑀓𑀜𑁆𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀭𑀺𑀡𑀸𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘, ‘‘𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘, ‘‘𑀉𑀧𑁂𑀓𑁆𑀔𑀸𑀭𑀳𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀁 𑀚𑀻𑀯𑀺𑀢𑀲𑁆𑀲 𑀘 𑀅𑀦𑁆𑀢𑀭𑀸𑀬𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀲𑀻𑀮𑀯𑀺𑀲𑁄𑀥𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘, 𑀢𑀣𑀸 𑀉𑀧𑁂𑀓𑁆𑀔𑀸𑀯𑀲𑁂𑀦 𑀅𑀭𑀢𑀺𑀭𑀢𑀺𑀲𑀳𑀲𑁆𑀲𑁂𑀯 𑀦𑁂𑀓𑁆𑀔𑀫𑁆𑀫𑀩𑀮𑀲𑀺𑀤𑁆𑀥𑀺𑀢𑁄 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀡𑀯𑀲𑁂𑀦 𑀲𑀩𑁆𑀩𑀲𑀫𑁆𑀪𑀸𑀭𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄 𑀅𑀘𑁆𑀘𑀸𑀭𑀤𑁆𑀥𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀦𑀼𑀧𑁂𑀓𑁆𑀔𑀡𑁂 𑀧𑀥𑀸𑀦𑀓𑀺𑀘𑁆𑀘𑀸𑀓𑀭𑀡𑀢𑁄 𑀉𑀧𑁂𑀓𑁆𑀔𑀢𑁄 𑀏𑀯 𑀢𑀺𑀢𑀺𑀓𑁆𑀔𑀸𑀦𑀺𑀚𑁆𑀛𑀸𑀦𑀲𑀫𑁆𑀪𑀯𑀢𑁄 𑀉𑀧𑁂𑀓𑁆𑀔𑀸𑀯𑀲𑁂𑀦 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀲𑀁𑀯𑀸𑀤𑀦𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀡𑁂𑀦 𑀲𑀫𑀸𑀤𑀺𑀦𑁆𑀦𑀥𑀫𑁆𑀫𑁂𑀲𑀼 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑀺𑀤𑁆𑀥𑀺𑀢𑁄 𑀧𑀭𑀸𑀧𑀓𑀸𑀭𑀸𑀤𑀻𑀲𑀼 𑀅𑀦𑀸𑀪𑁄𑀕𑀯𑀲𑁂𑀦𑁂𑀯 𑀫𑁂𑀢𑁆𑀢𑀸𑀯𑀺𑀳𑀸𑀭𑀦𑀺𑀧𑁆𑀨𑀢𑁆𑀢𑀺𑀢𑁄𑀢𑀺 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀦𑀺𑀧𑁆𑀨𑀢𑁆𑀢𑀺𑀬𑁄 𑀉𑀧𑁂𑀓𑁆𑀔𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀏𑀯𑀁 𑀅𑀧𑀭𑀺𑀘𑁆𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀣𑀸 𑀲𑀧𑀭𑀺𑀓𑁆𑀔𑀸𑀭𑀸 𑀧𑀜𑁆𑀘𑀤𑀲 𑀘𑀭𑀡𑀥𑀫𑁆𑀫𑀸 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄. 𑀢𑀢𑁆𑀣 𑀘𑀭𑀡𑀥𑀫𑁆𑀫𑀸 𑀦𑀸𑀫 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀘. 𑀢𑁂𑀲𑀼 𑀲𑀻𑀮𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀢𑁂𑀭𑀲𑀸𑀧𑀺 𑀥𑀼𑀢𑀥𑀫𑁆𑀫𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀘 𑀧𑀭𑀺𑀓𑁆𑀔𑀸𑀭𑀸. 𑀲𑀤𑁆𑀥𑀫𑁆𑀫𑁂𑀲𑀼 𑀲𑀤𑁆𑀥𑀸𑀬 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀽𑀧𑀲𑀫𑀸𑀦𑀼𑀲𑁆𑀲𑀢𑀺𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦- 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀧𑀲𑀸𑀤𑀦𑀻𑀬𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀢𑀤𑀥𑀺𑀫𑀼𑀢𑁆𑀢𑀢𑀸 𑀧𑀭𑀺𑀓𑁆𑀔𑀸𑀭𑁄. 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀅𑀓𑀼𑀲𑀮𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀅𑀧𑀸𑀬𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀓𑀼𑀲𑀮𑀥𑀫𑁆𑀫𑀽𑀧𑀢𑁆𑀣𑀫𑁆𑀪𑀦- 𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀧𑀼𑀕𑁆𑀕𑀮𑀲𑁂𑀦𑀢𑀤𑀥𑀺𑀫𑀼𑀢𑁆𑀢𑀢𑀸. 𑀩𑀸𑀳𑀼𑀲𑀘𑁆𑀘𑀲𑁆𑀲 𑀧𑀼𑀩𑁆𑀩𑀬𑁄𑀕𑀧𑀭𑀺𑀧𑀼𑀘𑁆𑀙𑀓- 𑀪𑀸𑀯𑀲𑀤𑁆𑀥𑀫𑁆𑀫𑀸𑀪𑀺𑀬𑁄𑀕𑀅𑀦𑀯𑀚𑁆𑀚𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺𑀧𑀭𑀺𑀘𑀬𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀢𑀸𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀅𑀧𑁆𑀧𑀲𑁆𑀲𑀼𑀢- 𑀧𑀭𑀺𑀯𑀚𑁆𑀚𑀦𑀩𑀳𑀼𑀲𑁆𑀲𑀼𑀢𑀲𑁂𑀯𑀦𑀢𑀤𑀥𑀺𑀫𑀼𑀢𑁆𑀢𑀢𑀸. 𑀯𑀻𑀭𑀺𑀬𑀲𑁆𑀲 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡- ¶ 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦- 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀤𑀥𑀺𑀫𑀼𑀢𑁆𑀢𑀢𑀸 ¶ . 𑀲𑀢𑀺𑀬𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀤𑀥𑀺𑀫𑀼𑀢𑁆𑀢𑀢𑀸. ¶ 𑀧𑀜𑁆𑀜𑀸𑀬 𑀧𑀭𑀺𑀧𑀼𑀘𑁆𑀙𑀓𑀪𑀸𑀭𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮- 𑀧𑀭𑀺𑀯𑀚𑁆𑀚𑀦𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀤𑀥𑀺𑀫𑀼𑀢𑁆𑀢𑀢𑀸. 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀻𑀮𑀸𑀤𑀺𑀘𑀢𑀼𑀓𑁆𑀓𑀁 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀓𑀭𑀡𑀜𑁆𑀘 𑀧𑀭𑀺𑀓𑁆𑀔𑀸𑀭𑁄. 𑀢𑀢𑁆𑀣 𑀲𑀻𑀮𑀸𑀤𑀻𑀳𑀺 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑁂 𑀆𑀲𑀬𑀲𑀼𑀤𑁆𑀥𑀺𑀬𑀸 𑀆𑀫𑀺𑀲𑀤𑀸𑀦𑁂 𑀉𑀪𑀬𑀲𑀼𑀤𑁆𑀥𑀺𑀬𑀸 𑀥𑀫𑁆𑀫𑀤𑀸𑀦𑁂 𑀲𑀫𑀢𑁆𑀣𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀘𑀭𑀡𑀸𑀤𑀻𑀦𑀁 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀦𑀺𑀤𑁆𑀥𑀸𑀭𑀬𑀺𑀫𑁆𑀳𑀸𑀢𑀺. 𑀏𑀯𑀁 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀤𑀬𑁄𑀧𑀺 𑀤𑀸𑀦𑀸𑀤𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑁄 𑀲𑀁𑀓𑀺𑀮𑁂𑀲𑁄𑀢𑀺? 𑀅𑀯𑀺𑀲𑁂𑀲𑁂𑀦 𑀢𑀡𑁆𑀳𑀸𑀤𑀻𑀳𑀺 𑀧𑀭𑀸𑀫𑀝𑁆𑀞𑀪𑀸𑀯𑁄 𑀧𑀸𑀭𑀫𑀻𑀦𑀁 𑀲𑀁𑀓𑀺𑀮𑁂𑀲𑁄, 𑀯𑀺𑀲𑁂𑀲𑁂𑀦 𑀧𑀦 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀸 𑀤𑀸𑀦𑀧𑀸𑀭𑀫𑀺𑀬𑀸 𑀲𑀁𑀓𑀺𑀮𑁂𑀲𑁄. 𑀲𑀢𑁆𑀢𑀓𑀸𑀮𑀯𑀺𑀓𑀧𑁆𑀧𑀸 𑀲𑀻𑀮𑀧𑀸𑀭𑀫𑀺𑀬𑀸, 𑀓𑀸𑀫𑀪𑀯𑀢𑀤𑀼𑀧𑀲𑀫𑁂𑀲𑀼 𑀅𑀪𑀺𑀭𑀢𑀺𑀅𑀦𑀪𑀺𑀭𑀢𑀺𑀯𑀺𑀓𑀧𑁆𑀧𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸, 𑀅𑀳𑀁 𑀫𑀫𑀸𑀢𑀺 𑀯𑀺𑀓𑀧𑁆𑀧𑀸 𑀧𑀜𑁆𑀜𑀸𑀧𑀸𑀭𑀫𑀺𑀬𑀸, 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀓𑀧𑁆𑀧𑀸 𑀯𑀻𑀭𑀺𑀬𑀧𑀸𑀭𑀫𑀺𑀬𑀸, 𑀅𑀢𑁆𑀢𑀧𑀭𑀯𑀺𑀓𑀧𑁆𑀧𑀸 𑀔𑀦𑁆𑀢𑀺𑀧𑀸𑀭𑀫𑀺𑀬𑀸, 𑀅𑀤𑀺𑀝𑁆𑀞𑀸𑀤𑀻𑀲𑀼 𑀤𑀺𑀝𑁆𑀞𑀸𑀤𑀺𑀯𑀺𑀓𑀧𑁆𑀧𑀸 𑀲𑀘𑁆𑀘𑀧𑀸𑀭𑀫𑀺𑀬𑀸, 𑀩𑁄𑀥𑀺𑀲𑀫𑁆𑀪𑀸𑀭𑀢𑀩𑁆𑀩𑀺𑀧𑀓𑁆𑀔𑁂𑀲𑀼 𑀤𑁄𑀲𑀕𑀼𑀡𑀯𑀺𑀓𑀧𑁆𑀧𑀸 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑀸, 𑀳𑀺𑀢𑀸𑀳𑀺𑀢𑀯𑀺𑀓𑀧𑁆𑀧𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑀸, 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀓𑀧𑁆𑀧𑀸 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀲𑀁𑀓𑀺𑀮𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀺𑀁 𑀯𑁄𑀤𑀸𑀦𑀦𑁆𑀢𑀺? 𑀢𑀡𑁆𑀳𑀸𑀤𑀻𑀳𑀺 𑀅𑀦𑀼𑀧𑀖𑀸𑀢𑁄 𑀬𑀣𑀸𑀯𑀼𑀢𑁆𑀢𑀯𑀺𑀓𑀧𑁆𑀧𑀯𑀺𑀭𑀳𑁄 𑀘 𑀏𑀢𑀸𑀲𑀁 𑀯𑁄𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀧𑀳𑀢𑀸 𑀳𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀴𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬- 𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀫𑀤𑀧𑁆𑀧𑀫𑀸𑀤𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀸𑀤𑀺𑀭𑀳𑀺𑀢𑀸 𑀘 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀧𑀭𑀺𑀲𑀼𑀤𑁆𑀥𑀸 𑀧𑀪𑀲𑁆𑀲𑀭𑀸 𑀪𑀯𑀦𑁆𑀢𑀻𑀢𑀺.

𑀓𑁄 𑀧𑀝𑀺𑀧𑀓𑁆𑀔𑁄𑀢𑀺? 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀧𑀺 𑀲𑀁𑀓𑀺𑀮𑁂𑀲𑀸 𑀲𑀩𑁆𑀩𑁂𑀧𑀺 ¶ 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀏𑀢𑀸𑀲𑀁 𑀧𑀝𑀺𑀧𑀓𑁆𑀔𑁄, 𑀯𑀺𑀲𑁂𑀲𑁂𑀦 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀫𑀘𑁆𑀙𑁂𑀭𑀸𑀤𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺 𑀘 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀤𑀸𑀦𑀨𑀮𑁂𑀲𑀼 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀕𑀼𑀡𑀬𑁄𑀕𑀢𑁄 𑀮𑁄𑀪𑀤𑁄𑀲𑀫𑁄𑀳𑀧𑀝𑀺𑀧𑀓𑁆𑀔𑀁 𑀤𑀸𑀦𑀁, 𑀓𑀸𑀬𑀸𑀤𑀺𑀤𑁄𑀲𑀯𑀗𑁆𑀓𑀸𑀧𑀕𑀫𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀲𑀻𑀮𑀁, 𑀓𑀸𑀫𑀲𑀼𑀔𑀧𑀭𑀽𑀧𑀖𑀸𑀢𑀅𑀢𑁆𑀢𑀓𑀺𑀮𑀫𑀣𑀧𑀭𑀺𑀯𑀚𑁆𑀚𑀦𑀢𑁄 𑀤𑁄𑀲𑀢𑁆𑀢𑀬𑀧𑀝𑀺𑀧𑀓𑁆𑀔𑀁 𑀦𑁂𑀓𑁆𑀔𑀫𑁆𑀫𑀁, 𑀮𑁄𑀪𑀸𑀤𑀻𑀦𑀁 𑀅𑀦𑁆𑀥𑀻𑀓𑀭𑀡𑀢𑁄 𑀜𑀸𑀡𑀲𑁆𑀲 𑀘 𑀅𑀦𑀦𑁆𑀥𑀻𑀓𑀭𑀡𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀧𑀜𑁆𑀜𑀸 ¶ , 𑀅𑀮𑀻𑀦𑀸𑀦𑀼𑀤𑁆𑀥𑀢𑀜𑀸𑀬𑀸𑀭𑀫𑁆𑀪𑀯𑀲𑁂𑀦 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀯𑀻𑀭𑀺𑀬𑀁, 𑀇𑀝𑁆𑀞𑀸𑀦𑀺𑀝𑁆𑀞𑀲𑀼𑀜𑁆𑀜𑀢𑀸𑀦𑀁 𑀔𑀫𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀔𑀦𑁆𑀢𑀺, 𑀲𑀢𑀺𑀧𑀺 𑀧𑀭𑁂𑀲𑀁 𑀉𑀧𑀓𑀸𑀭𑁂 𑀅𑀧𑀓𑀸𑀭𑁂 𑀘 𑀬𑀣𑀸𑀪𑀽𑀢𑀧𑁆𑀧𑀯𑀢𑁆𑀢𑀺𑀬𑀸 ¶ 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀲𑀘𑁆𑀘𑀁, 𑀮𑁄𑀓𑀥𑀫𑁆𑀫𑁂 𑀅𑀪𑀺𑀪𑀼𑀬𑁆𑀬 𑀬𑀣𑀸𑀲𑀫𑀸𑀤𑀺𑀦𑁆𑀦𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀅𑀘𑀮𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀅𑀥𑀺𑀝𑁆𑀞𑀸𑀦𑀁, 𑀦𑀻𑀯𑀭𑀡𑀯𑀺𑀯𑁂𑀓𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀫𑁂𑀢𑁆𑀢𑀸, 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀦𑀼𑀦𑀬𑀧𑀝𑀺𑀖𑀯𑀺𑀤𑁆𑀥𑀁𑀲𑀦𑀢𑁄 𑀲𑀫𑀧𑁆𑀧𑀯𑀢𑁆𑀢𑀺𑀢𑁄 𑀘 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀉𑀧𑁂𑀓𑁆𑀔𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀸 𑀧𑀝𑀺𑀧𑀢𑁆𑀢𑀻𑀢𑀺? 𑀤𑀸𑀦𑀧𑀸𑀭𑀫𑀺𑀬𑀸 𑀢𑀸𑀯 𑀲𑀼𑀔𑀽𑀧𑀓𑀭𑀡𑀲𑀭𑀻𑀭𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀦 𑀪𑀬𑀸𑀧𑀦𑀼𑀤𑀦𑁂𑀦 𑀥𑀫𑁆𑀫𑁄𑀧𑀤𑁂𑀲𑁂𑀦 𑀘 𑀩𑀳𑀼𑀥𑀸 𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀁 𑀧𑀝𑀺𑀧𑀢𑁆𑀢𑀺. 𑀢𑀢𑁆𑀣 𑀆𑀫𑀺𑀲𑀤𑀸𑀦𑀁 𑀅𑀪𑀬𑀤𑀸𑀦𑀁 𑀥𑀫𑁆𑀫𑀤𑀸𑀦𑀦𑁆𑀢𑀺 𑀤𑀸𑀢𑀩𑁆𑀩𑀯𑀢𑁆𑀣𑀼𑀯𑀲𑁂𑀦 𑀢𑀺𑀯𑀺𑀥𑀁 𑀤𑀸𑀦𑀁. 𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀢𑀩𑁆𑀩𑀯𑀢𑁆𑀣𑀼 𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀩𑀸𑀳𑀺𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑀤𑀲𑀯𑀺𑀥𑀁. 𑀅𑀦𑁆𑀦𑀸𑀤𑀻𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀯𑀺𑀥𑀁. 𑀢𑀣𑀸 𑀭𑀽𑀧𑀸𑀭𑀫𑁆𑀫𑀡𑀁 𑀬𑀸𑀯 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀢𑁄 𑀙𑀩𑁆𑀩𑀺𑀥𑀁. 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀜𑁆𑀘 𑀦𑀻𑀮𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀯𑀺𑀥𑀁. 𑀢𑀣𑀸 𑀫𑀡𑀺𑀓𑀦𑀓𑀭𑀚𑀢𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺, 𑀔𑁂𑀢𑁆𑀢𑀯𑀢𑁆𑀣𑀼𑀆𑀭𑀸𑀫𑀸𑀤𑀺, 𑀤𑀸𑀲𑀺𑀤𑀸𑀲𑀕𑁄𑀫𑀳𑀺𑀁𑀲𑀸𑀤𑀺 𑀦𑀸𑀦𑀸𑀯𑀺𑀥𑀯𑀺𑀢𑁆𑀢𑀽𑀧𑀓𑀭𑀡𑀯𑀲𑁂𑀦 𑀅𑀦𑁂𑀓𑀯𑀺𑀥𑀁.

𑀢𑀢𑁆𑀣 𑀫𑀳𑀸𑀧𑀼𑀭𑀺𑀲𑁄 𑀩𑀸𑀳𑀺𑀭𑀁 𑀯𑀢𑁆𑀣𑀼𑀁 𑀤𑁂𑀦𑁆𑀢𑁄 ‘‘𑀬𑁄 𑀬𑁂𑀦 𑀅𑀢𑁆𑀣𑀺𑀓𑁄, 𑀢𑀁 𑀢𑀲𑁆𑀲 𑀤𑁂𑀢𑀺, 𑀤𑁂𑀦𑁆𑀢𑁄 𑀘 𑀢𑀲𑁆𑀲 𑀅𑀢𑁆𑀣𑀺𑀓𑁄’’𑀢𑀺 𑀲𑀬𑀫𑁂𑀯 𑀚𑀸𑀦𑀦𑁆𑀢𑁄 𑀅𑀬𑀸𑀘𑀺𑀢𑁄𑀧𑀺 𑀤𑁂𑀢𑀺 𑀧𑀕𑁂𑀯 𑀬𑀸𑀘𑀺𑀢𑁄. 𑀫𑀼𑀢𑁆𑀢𑀘𑀸𑀕𑁄 𑀤𑁂𑀢𑀺, 𑀦𑁄 𑀅𑀫𑀼𑀢𑁆𑀢𑀘𑀸𑀕𑁄, 𑀧𑀭𑀺𑀬𑀢𑁆𑀢𑀁 𑀤𑁂𑀢𑀺, 𑀦𑁄 𑀅𑀧𑀭𑀺𑀬𑀢𑁆𑀢𑀁 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂. 𑀦 𑀧𑀘𑁆𑀘𑀼𑀧𑀓𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑁄 ¶ 𑀤𑁂𑀢𑀺. 𑀅𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀳𑀺 𑀧𑀭𑀺𑀬𑀢𑁆𑀢𑁂 𑀲𑀁𑀯𑀺𑀪𑀸𑀕𑀸𑀭𑀳𑀁 𑀲𑀁𑀯𑀺𑀪𑀚𑀢𑀺. 𑀦 𑀘 𑀤𑁂𑀢𑀺 𑀧𑀭𑀽𑀧𑀖𑀸𑀢𑀸𑀯𑀳𑀁 𑀲𑀢𑁆𑀣𑀯𑀺𑀲𑀫𑀚𑁆𑀚𑀸𑀤𑀺𑀓𑀁, 𑀦𑀸𑀧𑀺 𑀓𑀻𑀴𑀦𑀓𑀁 𑀬𑀁 𑀅𑀦𑀢𑁆𑀣𑀽𑀧𑀲𑀁𑀳𑀺𑀢𑀁 𑀧𑀫𑀸𑀤𑀸𑀯𑀳𑀜𑁆𑀘. 𑀦 𑀘 𑀕𑀺𑀮𑀸𑀦𑀲𑁆𑀲 𑀬𑀸𑀘𑀓𑀲𑁆𑀲 𑀧𑀸𑀦𑀪𑁄𑀚𑀦𑀸𑀤𑀺𑀅𑀲𑀧𑁆𑀧𑀸𑀬𑀁 𑀧𑀫𑀸𑀡𑀭𑀳𑀺𑀢𑀁 𑀯𑀸 𑀤𑁂𑀢𑀺, 𑀧𑀫𑀸𑀡𑀬𑀼𑀢𑁆𑀢𑀁 𑀧𑀦 𑀲𑀧𑁆𑀧𑀸𑀬𑀫𑁂𑀯 𑀤𑁂𑀢𑀺.

𑀢𑀣𑀸 𑀬𑀸𑀘𑀺𑀢𑁄 𑀕𑀳𑀝𑁆𑀞𑀸𑀦𑀁 𑀕𑀳𑀝𑁆𑀞𑀸𑀦𑀼𑀘𑁆𑀙𑀯𑀺𑀓𑀁 𑀤𑁂𑀢𑀺, 𑀧𑀩𑁆𑀩𑀚𑀺𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀼𑀘𑁆𑀙𑀯𑀺𑀓𑀁 𑀤𑁂𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀸𑀢𑀺 𑀏𑀢𑁂𑀲𑀼 𑀓𑀲𑁆𑀲𑀘𑀺 𑀧𑀻𑀴𑀁 𑀅𑀚𑀦𑁂𑀦𑁆𑀢𑁄 𑀤𑁂𑀢𑀺, 𑀦 𑀘 𑀉𑀴𑀸𑀭𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀮𑀽𑀔𑀁 𑀤𑁂𑀢𑀺, 𑀦 𑀘 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑁄 𑀤𑁂𑀢𑀺, 𑀦 𑀘 𑀧𑀘𑁆𑀘𑀼𑀧𑀓𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑁄 𑀤𑁂𑀢𑀺, 𑀦 𑀘 𑀨𑀮𑀧𑀸𑀝𑀺𑀓𑀗𑁆𑀔𑀻 𑀤𑁂𑀢𑀺 ¶ 𑀅𑀜𑁆𑀜𑀢𑁆𑀭 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸, 𑀦 𑀘 𑀬𑀸𑀘𑀓𑁂 𑀤𑁂𑀬𑁆𑀬𑀥𑀫𑁆𑀫𑀁 𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑁄 𑀤𑁂𑀢𑀺, 𑀦 𑀘 𑀅𑀲𑀜𑁆𑀜𑀢𑀸𑀦𑀁 𑀬𑀸𑀘𑀓𑀸𑀦𑀁 𑀅𑀓𑁆𑀓𑁄𑀲𑀓𑀭𑁄𑀲𑀓𑀸𑀦𑀫𑁆𑀧𑀺 𑀅𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑁂𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀓𑀫𑁆𑀧𑀦𑁆𑀢𑁄 𑀲𑀓𑁆𑀓𑀘𑁆𑀘𑀫𑁂𑀯 𑀤𑁂𑀢𑀺, 𑀦 𑀘 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑀼𑀢𑁆𑀯𑀸 𑀤𑁂𑀢𑀺, 𑀓𑀫𑁆𑀫𑀨𑀮𑀫𑁂𑀯 𑀧𑀦 𑀲𑀤𑁆𑀤𑀳𑀦𑁆𑀢𑁄 𑀤𑁂𑀢𑀺, 𑀦𑀧𑀺 𑀬𑀸𑀘𑀓𑁂 𑀧𑀬𑀺𑀭𑀼𑀧𑀸𑀲𑀦𑀸𑀤𑀻𑀳𑀺 𑀧𑀭𑀺𑀓𑀺𑀮𑁂𑀲𑁂𑀢𑁆𑀯𑀸 𑀤𑁂𑀢𑀺, 𑀅𑀧𑀭𑀺𑀓𑀺𑀮𑁂𑀲𑀦𑁆𑀢𑁄 𑀏𑀯 𑀧𑀦 𑀤𑁂𑀢𑀺, 𑀦 𑀘 𑀧𑀭𑁂𑀲𑀁 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑁄 𑀪𑁂𑀤𑀦𑀸𑀥𑀺𑀧𑁆𑀧𑀸𑀬𑁄 𑀯𑀸 𑀤𑀸𑀦𑀁 𑀤𑁂𑀢𑀺, 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀏𑀯 𑀤𑁂𑀢𑀺, 𑀦𑀧𑀺 𑀨𑀭𑀼𑀲𑀯𑀸𑀘𑁄 𑀪𑀸𑀓𑀼𑀝𑀺𑀫𑀼𑀔𑁄 𑀤𑀸𑀦𑀁 𑀤𑁂𑀢𑀺, 𑀧𑀺𑀬𑀯𑀸𑀤𑀻 𑀧𑀦 𑀧𑀼𑀩𑁆𑀩𑀪𑀸𑀲𑀻 𑀫𑀺𑀢𑀯𑀘𑀦𑁄 𑀳𑀼𑀢𑁆𑀯𑀸 𑀤𑁂𑀢𑀺 ¶ , 𑀬𑀲𑁆𑀫𑀺𑀜𑁆𑀘 𑀤𑁂𑀬𑁆𑀬𑀥𑀫𑁆𑀫𑁂 𑀉𑀴𑀸𑀭𑀫𑀦𑀼𑀜𑁆𑀜𑀢𑀸𑀬 𑀯𑀸 𑀘𑀺𑀭𑀧𑀭𑀺𑀘𑀬𑁂𑀦 𑀯𑀸 𑀕𑁂𑀥𑀲𑀪𑀸𑀯𑀢𑀸𑀬 𑀯𑀸 𑀮𑁄𑀪𑀥𑀫𑁆𑀫𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺, 𑀚𑀸𑀦𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀔𑀺𑀧𑁆𑀧𑀫𑁂𑀯 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀬𑀸𑀘𑀓𑁂 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀤𑁂𑀢𑀺, 𑀬𑀜𑁆𑀘 𑀤𑁂𑀬𑁆𑀬𑀯𑀢𑁆𑀣𑀼 𑀧𑀭𑀺𑀢𑁆𑀢𑀁 𑀬𑀸𑀘𑀓𑁄𑀧𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸𑀧𑀺 𑀅𑀢𑁆𑀢𑀸𑀦𑀁 𑀩𑀸𑀥𑁂𑀢𑁆𑀯𑀸 𑀤𑁂𑀦𑁆𑀢𑁄 𑀬𑀸𑀘𑀓𑀁 𑀲𑀫𑁆𑀫𑀸𑀦𑁂𑀢𑀺 𑀬𑀣𑀸 𑀢𑀁 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄. 𑀦 𑀘 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀬𑀸𑀘𑀺𑀢𑁄 𑀢𑁂 𑀅𑀲𑀜𑁆𑀜𑀸𑀧𑀺𑀢𑁂 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁂 𑀬𑀸𑀘𑀓𑀸𑀦𑀁 𑀤𑁂𑀢𑀺, 𑀲𑀫𑁆𑀫𑀤𑁂𑀯 𑀧𑀦 𑀲𑀜𑁆𑀜𑀸𑀧𑀺𑀢𑁂 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁂 𑀤𑁂𑀢𑀺. 𑀤𑁂𑀦𑁆𑀢𑁄 𑀘 𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀤𑀻𑀦𑀁 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀦𑀁 𑀯𑀸 𑀚𑀸𑀦𑀦𑁆𑀢𑁄 𑀦 𑀤𑁂𑀢𑀺, 𑀢𑀣𑀸 𑀭𑀚𑁆𑀚𑀫𑁆𑀧𑀺 𑀢𑀸𑀤𑀺𑀲𑀸𑀦𑀁 𑀦 𑀤𑁂𑀢𑀺. 𑀬𑁂 𑀮𑁄𑀓𑀲𑁆𑀲 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀦𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑁂 𑀧𑀦 𑀥𑀫𑁆𑀫𑀺𑀓𑀸 𑀥𑀫𑁆𑀫𑁂𑀦 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺, 𑀢𑁂𑀲𑀁 𑀤𑁂𑀢𑀺. 𑀏𑀯𑀁 𑀢𑀸𑀯 𑀩𑀸𑀳𑀺𑀭𑀤𑀸𑀦𑁂 𑀧𑀝𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀚𑁆𑀛𑀢𑁆𑀢𑀺𑀓𑀤𑀸𑀦𑀁 ¶ 𑀧𑀦 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀬𑀣𑀸 𑀦𑀸𑀫 𑀓𑁄𑀘𑀺 𑀧𑀼𑀭𑀺𑀲𑁄 𑀖𑀸𑀲𑀘𑁆𑀙𑀸𑀤𑀦𑀳𑁂𑀢𑀼 𑀅𑀢𑁆𑀢𑀸𑀦𑀁 𑀧𑀭𑀲𑁆𑀲 𑀦𑀺𑀲𑁆𑀲𑀚𑁆𑀚𑀢𑀺, 𑀯𑀺𑀥𑁂𑀬𑁆𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀤𑀸𑀲𑀩𑁆𑀬𑀁, 𑀏𑀯𑀫𑁂𑀯 𑀫𑀳𑀸𑀧𑀼𑀭𑀺𑀲𑁄 𑀲𑀫𑁆𑀩𑁄𑀥𑀺𑀳𑁂𑀢𑀼 𑀦𑀺𑀭𑀸𑀫𑀺𑀲𑀘𑀺𑀢𑁆𑀢𑁄 𑀲𑀢𑁆𑀢𑀸𑀦𑀁 𑀅𑀦𑀼𑀢𑁆𑀢𑀭𑀁 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀤𑀸𑀦𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀢𑀼𑀓𑀸𑀫𑁄 𑀅𑀢𑁆𑀢𑀸𑀦𑀁 𑀧𑀭𑀲𑁆𑀲 𑀦𑀺𑀲𑁆𑀲𑀚𑁆𑀚𑀢𑀺, 𑀯𑀺𑀥𑁂𑀬𑁆𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀬𑀣𑀸𑀓𑀸𑀫𑀓𑀭𑀡𑀻𑀬𑀢𑀁. 𑀓𑀭𑀘𑀭𑀡𑀦𑀬𑀦𑀸𑀤𑀺𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀢𑁂𑀦 𑀢𑁂𑀦 𑀅𑀢𑁆𑀣𑀺𑀓𑀸𑀦𑀁 𑀅𑀓𑀫𑁆𑀧𑀺𑀢𑁄 𑀅𑀦𑁄𑀮𑀻𑀦𑁄 𑀅𑀦𑀼𑀧𑁆𑀧𑀤𑁂𑀢𑀺, 𑀦 𑀢𑀢𑁆𑀣 𑀲𑀚𑁆𑀚𑀢𑀺 𑀦 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺 𑀬𑀣𑀸 𑀢𑀁 𑀩𑀸𑀳𑀺𑀭𑀯𑀢𑁆𑀣𑀼𑀲𑁆𑀫𑀺𑀁, 𑀢𑀣𑀸 𑀳𑀺 𑀫𑀳𑀸𑀧𑀼𑀭𑀺𑀲𑁄 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀩𑀸𑀳𑀺𑀭𑀯𑀢𑁆𑀣𑀼𑀁 𑀧𑀭𑀺𑀘𑁆𑀘𑀚𑀢𑀺 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀸𑀬 𑀯𑀸 𑀬𑀸𑀘𑀓𑀸𑀦𑀁 𑀢𑁂𑀲𑀁 𑀫𑀦𑁄𑀭𑀣𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀅𑀢𑁆𑀢𑀦𑁄 𑀯𑀲𑀻𑀪𑀸𑀯𑀸𑀬 𑀯𑀸, 𑀢𑀢𑁆𑀣 ¶ 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀼𑀢𑁆𑀢𑀘𑀸𑀕𑁄, 𑀏𑀯𑀫𑀳𑀁 𑀦𑀺𑀲𑁆𑀲𑀗𑁆𑀕𑀪𑀸𑀯𑀦𑀸𑀬 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑀁 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀤𑀻𑀬𑀫𑀸𑀦𑀁 𑀬𑀸𑀘𑀓𑀲𑁆𑀲 𑀏𑀓𑀦𑁆𑀢𑁂𑀦𑁂𑀯 𑀳𑀺𑀢𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀤𑁂𑀢𑀺, 𑀦 𑀇𑀢𑀭𑀁. 𑀦 𑀘 𑀫𑀳𑀸𑀧𑀼𑀭𑀺𑀲𑁄 𑀫𑀸𑀭𑀲𑁆𑀲 𑀫𑀸𑀭𑀓𑀸𑀬𑀺𑀓𑀸𑀦𑀁 𑀤𑁂𑀯𑀢𑀸𑀦𑀁 𑀯𑀸 𑀯𑀺𑀳𑀺𑀁𑀲𑀸𑀥𑀺𑀧𑁆𑀧𑀸𑀬𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀯𑀸 𑀚𑀸𑀦𑀫𑀸𑀦𑁄 𑀤𑁂𑀢𑀺 ‘‘𑀫𑀸 𑀢𑁂𑀲𑀁 𑀅𑀦𑀢𑁆𑀣𑁄 𑀅𑀳𑁄𑀲𑀻’’𑀢𑀺. 𑀬𑀣𑀸 𑀘 𑀫𑀸𑀭𑀓𑀸𑀬𑀺𑀓𑀸𑀦𑀁, 𑀏𑀯𑀁 𑀢𑁂𑀳𑀺 𑀅𑀦𑁆𑀯𑀸𑀯𑀺𑀝𑁆𑀞𑀸𑀦𑀫𑁆𑀧𑀺 𑀦 𑀤𑁂𑀢𑀺, 𑀦𑀧𑀺 𑀉𑀫𑁆𑀫𑀢𑁆𑀢𑀓𑀸𑀦𑀁. 𑀇𑀢𑀭𑁂𑀲𑀁 𑀧𑀦 𑀬𑀸𑀘𑀺𑀬𑀫𑀸𑀦𑁄 𑀲𑀫𑀦𑀦𑁆𑀢𑀭𑀫𑁂𑀯 𑀤𑁂𑀢𑀺, 𑀢𑀸𑀤𑀺𑀲𑀸𑀬 𑀬𑀸𑀘𑀦𑀸𑀬 𑀤𑀼𑀮𑁆𑀮𑀪𑀪𑀸𑀯𑀢𑁄 𑀢𑀸𑀤𑀺𑀲𑀲𑁆𑀲 𑀘 𑀤𑀸𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄.

𑀅𑀪𑀬𑀤𑀸𑀦𑀁 𑀧𑀦 𑀭𑀸𑀚𑀢𑁄 𑀘𑁄𑀭𑀢𑁄 𑀅𑀕𑁆𑀕𑀺𑀢𑁄 𑀉𑀤𑀓𑀢𑁄 𑀯𑁂𑀭𑀺𑀧𑀼𑀕𑁆𑀕𑀮𑀢𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑀢𑁄 𑀦𑀸𑀕𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀤𑀺𑀢𑁄 𑀲𑀢𑁆𑀢𑀸𑀦𑀁 𑀪𑀬𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀢𑀢𑁄 𑀧𑀭𑀺𑀢𑁆𑀢𑀸𑀡𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀤𑀸𑀦𑀁 ¶ 𑀧𑀦 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀅𑀯𑀺𑀧𑀭𑀻𑀢𑀸 𑀥𑀫𑁆𑀫𑀤𑁂𑀲𑀦𑀸, 𑀑𑀧𑀸𑀬𑀺𑀓𑁄 𑀳𑀺𑀢𑀲𑁆𑀲 𑀉𑀧𑀤𑁂𑀲𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀯𑀲𑁂𑀦 𑀬𑁂𑀦 𑀲𑀸𑀲𑀦𑁂 𑀅𑀦𑁄𑀢𑀺𑀡𑁆𑀡𑀸𑀦𑀁 𑀅𑀯𑀢𑀸𑀭𑀡𑀁 𑀑𑀢𑀺𑀡𑁆𑀡𑀸𑀦𑀁 𑀧𑀭𑀺𑀧𑀸𑀘𑀦𑀁. 𑀢𑀢𑁆𑀣𑀸𑀬𑀁 𑀦𑀬𑁄 𑁋 𑀲𑀗𑁆𑀔𑁂𑀧𑀢𑁄 𑀢𑀸𑀯 𑀤𑀸𑀦𑀓𑀣𑀸 𑀲𑀻𑀮𑀓𑀣𑀸 𑀲𑀕𑁆𑀕𑀓𑀣𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀁𑀓𑀺𑀮𑁂𑀲𑁄 𑀘 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀸𑀯𑀓𑀩𑁄𑀥𑀺𑀬𑀁 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀭𑀡𑀕𑀫𑀦𑀁 𑀲𑀻𑀮𑀲𑀁𑀯𑀭𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀓𑀫𑁆𑀫𑀓𑀭𑀡𑀯𑀲𑁂𑀦 𑀲𑀫𑀣𑀸𑀦𑀼𑀬𑁄𑀕𑁄 ¶ 𑀭𑀽𑀧𑀓𑀸𑀬𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁂𑀲𑀼 𑀬𑀣𑀸𑀭𑀳𑀁 𑀅𑀪𑀺𑀦𑀺𑀯𑁂𑀲𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁄, 𑀢𑀣𑀸 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀸 𑀲𑀫𑁆𑀫𑀢𑁆𑀢𑀕𑀳𑀡𑀁 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀩𑁄𑀥𑀻𑀢𑀺 𑀏𑀢𑁂𑀲𑀁 𑀕𑀼𑀡𑀲𑀁𑀓𑀺𑀢𑁆𑀢𑀦𑀯𑀲𑁂𑀦 𑀬𑀣𑀸𑀭𑀳𑀁 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀸 𑀧𑀭𑀺𑀬𑁄𑀤𑀧𑀦𑀸 𑀘. 𑀢𑀣𑀸 𑀧𑀘𑁆𑀘𑁂𑀓𑀩𑁄𑀥𑀺𑀬𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀜𑁆𑀘 𑀅𑀥𑀺𑀫𑀼𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀲𑀪𑀸𑀯𑀭𑀲𑀮𑀓𑁆𑀔𑀡𑀸𑀤𑀺𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀯𑀺𑀪𑀸𑀯𑀦𑁂𑀦 𑀬𑀸𑀦𑀤𑁆𑀯𑀬𑁂 𑀧𑀢𑀺𑀝𑁆𑀞𑀸𑀧𑀦𑀸 𑀧𑀭𑀺𑀬𑁄𑀤𑀧𑀦𑀸 𑀘. 𑀏𑀯𑀁 𑀫𑀳𑀸𑀧𑀼𑀭𑀺𑀲𑁄 𑀲𑀢𑁆𑀢𑀸𑀦𑀁 𑀥𑀫𑁆𑀫𑀤𑀸𑀦𑀁 𑀤𑁂𑀢𑀺.

𑀢𑀣𑀸 ¶ 𑀫𑀳𑀸𑀧𑀼𑀭𑀺𑀲𑁄 𑀲𑀢𑁆𑀢𑀸𑀦𑀁 𑀆𑀫𑀺𑀲𑀤𑀸𑀦𑀁 𑀤𑁂𑀦𑁆𑀢𑁄 ‘‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀲𑀢𑁆𑀢𑀸𑀦𑀁 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀧𑀝𑀺𑀪𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀜𑁆𑀘 𑀭𑀫𑀡𑀻𑀬𑀁 𑀅𑀕𑁆𑀕𑀨𑀮𑀲𑀫𑁆𑀧𑀢𑁆𑀢𑀺𑀜𑁆𑀘 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺 𑀅𑀦𑁆𑀦𑀤𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀢𑁆𑀢𑀸𑀦𑀁 𑀓𑀸𑀫𑀓𑀺𑀮𑁂𑀲𑀧𑀺𑀧𑀸𑀲𑀸𑀯𑀽𑀧𑀲𑀫𑀸𑀬 𑀧𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬 𑀳𑀺𑀭𑁄𑀢𑁆𑀢𑀧𑁆𑀧𑀸𑀮𑀗𑁆𑀓𑀸𑀭𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀬𑀸 𑀯𑀢𑁆𑀣𑀸𑀦𑀺 𑀤𑁂𑀢𑀺, 𑀢𑀣𑀸 𑀇𑀤𑁆𑀥𑀺𑀯𑀺𑀥𑀲𑁆𑀲 𑀘𑁂𑀯 𑀦𑀺𑀩𑁆𑀩𑀸𑀦𑀲𑀼𑀔𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀬𑀸 𑀬𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀻𑀮𑀕𑀦𑁆𑀥𑀦𑀺𑀧𑁆𑀨𑀢𑁆𑀢𑀺𑀬𑀸 𑀕𑀦𑁆𑀥𑀁 𑀤𑁂𑀢𑀺, 𑀢𑀣𑀸 𑀩𑀼𑀤𑁆𑀥𑀕𑀼𑀡𑀲𑁄𑀪𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀫𑀸𑀮𑀸𑀯𑀺𑀮𑁂𑀧𑀦𑀁 𑀤𑁂𑀢𑀺, 𑀩𑁄𑀥𑀺𑀫𑀡𑁆𑀟𑀸𑀲𑀦𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀲𑀦𑀁 𑀤𑁂𑀢𑀺, 𑀢𑀣𑀸𑀕𑀢𑀲𑁂𑀬𑁆𑀬𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑁂𑀬𑁆𑀬𑀁 𑀤𑁂𑀢𑀺, 𑀲𑀭𑀡𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀯𑀲𑀣𑀁 𑀤𑁂𑀢𑀺, 𑀧𑀜𑁆𑀘𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺, 𑀩𑁆𑀬𑀸𑀫𑀧𑁆𑀧𑀪𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀭𑀽𑀧𑀤𑀸𑀦𑀁 𑀤𑁂𑀢𑀺, 𑀩𑁆𑀭𑀳𑁆𑀫𑀲𑁆𑀲𑀭𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀤𑁆𑀤𑀤𑀸𑀦𑀁 𑀤𑁂𑀢𑀺, 𑀲𑀩𑁆𑀩𑀮𑁄𑀓𑀲𑁆𑀲 𑀧𑀺𑀬𑀪𑀸𑀯𑀸𑀬 𑀭𑀲𑀤𑀸𑀦𑀁 𑀤𑁂𑀢𑀺, 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑀪𑀸𑀯𑀸𑀬 𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀤𑁂𑀢𑀺, 𑀅𑀚𑀭𑀸𑀫𑀭𑀪𑀸𑀯𑀸𑀬 𑀪𑁂𑀲𑀚𑁆𑀚𑀤𑀸𑀦𑀁 𑀤𑁂𑀢𑀺, 𑀓𑀺𑀮𑁂𑀲𑀤𑀸𑀲𑀩𑁆𑀬𑀯𑀺𑀫𑁄𑀘𑀦𑀢𑁆𑀣𑀁 𑀤𑀸𑀲𑀸𑀦𑀁 𑀪𑀼𑀚𑀺𑀲𑁆𑀲𑀢𑀸𑀤𑀸𑀦𑀁 𑀤𑁂𑀢𑀺, 𑀲𑀤𑁆𑀥𑀫𑁆𑀫𑀸𑀪𑀺𑀭𑀢𑀺𑀬𑀸 𑀅𑀦𑀯𑀚𑁆𑀚𑀔𑀺𑀟𑁆𑀟𑀸𑀭𑀢𑀺𑀳𑁂𑀢𑀼𑀤𑀸𑀦𑀁 𑀤𑁂𑀢𑀺, 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀪𑀸𑀯𑀽𑀧𑀦𑀬𑀦𑀸𑀬 𑀧𑀼𑀢𑁆𑀢𑀤𑀸𑀦𑀁 𑀤𑁂𑀢𑀺, 𑀲𑀓𑀮𑀲𑁆𑀲𑀧𑀺 𑀮𑁄𑀓𑀲𑁆𑀲 𑀧𑀢𑀺𑀪𑀸𑀯𑀽𑀧𑀕𑀫𑀦𑀸𑀬 𑀤𑀸𑀭𑀤𑀸𑀦𑀁 𑀤𑁂𑀢𑀺, 𑀲𑀼𑀪𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀤𑀸𑀦𑀁, 𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀦𑀸𑀦𑀸𑀯𑀺𑀥𑀯𑀺𑀪𑀽𑀲𑀦𑀤𑀸𑀦𑀁, 𑀲𑀤𑁆𑀥𑀫𑁆𑀫𑀓𑁄𑀲𑀸𑀥𑀺𑀕𑀫𑀸𑀬 𑀯𑀺𑀢𑁆𑀢𑀓𑁄𑀲𑀤𑀸𑀦𑀁, 𑀥𑀫𑁆𑀫𑀭𑀸𑀚𑀪𑀸𑀯𑀸𑀬 𑀭𑀚𑁆𑀚𑀤𑀸𑀦𑀁, 𑀛𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀸𑀫𑀼𑀬𑁆𑀬𑀸𑀦𑀢𑀴𑀸𑀓𑀯𑀦𑀤𑀸𑀦𑀁, 𑀘𑀓𑁆𑀓𑀗𑁆𑀓𑀺𑀢𑁂𑀳𑀺 𑀧𑀸𑀤𑁂𑀳𑀺 𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑀸𑀬 𑀘𑀭𑀡𑀤𑀸𑀦𑀁, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀸𑀬 𑀲𑀢𑁆𑀢𑀸𑀦𑀁 𑀲𑀤𑁆𑀥𑀫𑁆𑀫𑀳𑀢𑁆𑀣𑀤𑀸𑀦𑀢𑁆𑀣𑀁 𑀳𑀢𑁆𑀣𑀤𑀸𑀦𑀁, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀝𑀺𑀮𑀸𑀪𑀸𑀬 ¶ 𑀓𑀡𑁆𑀡𑀦𑀸𑀲𑀸𑀤𑀺𑀤𑀸𑀦𑀁, 𑀲𑀫𑀦𑁆𑀢𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀘𑀓𑁆𑀔𑀼𑀤𑀸𑀦𑀁, ‘‘𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀧𑀸𑀭𑀺𑀘𑀭𑀺𑀬𑀸𑀤𑀻𑀲𑀼 𑀲𑀩𑁆𑀩𑀓𑀸𑀮𑀁 ¶ 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑁄, 𑀲𑀩𑁆𑀩𑀮𑁄𑀓𑁂𑀦 𑀘 𑀉𑀧𑀚𑀻𑀯𑀺𑀢𑀩𑁆𑀩𑁄 𑀫𑁂 𑀓𑀸𑀬𑁄 𑀪𑀯𑁂𑀬𑁆𑀬𑀸’’𑀢𑀺 𑀫𑀁𑀲𑀮𑁄𑀳𑀺𑀢𑀸𑀤𑀺𑀤𑀸𑀦𑀁, ‘‘𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀉𑀢𑁆𑀢𑀫𑀗𑁆𑀕𑀤𑀸𑀦𑀁 𑀤𑁂𑀢𑀺.

𑀏𑀯𑀁 𑀤𑀤𑀦𑁆𑀢𑁄 𑀘 𑀦 𑀅𑀦𑁂𑀲𑀦𑀸𑀬 𑀤𑁂𑀢𑀺, 𑀦 𑀘 𑀧𑀭𑁄𑀧𑀖𑀸𑀢𑁂𑀦, 𑀦 𑀪𑀬𑁂𑀦, 𑀦 𑀮𑀚𑁆𑀚𑀸𑀬, 𑀦 𑀤𑀓𑁆𑀔𑀺𑀡𑁂𑀬𑁆𑀬𑀭𑁄𑀲𑀦𑁂𑀦, 𑀦 𑀧𑀡𑀻𑀢𑁂 𑀲𑀢𑀺 𑀮𑀽𑀔𑀁, 𑀦 𑀅𑀢𑁆𑀢𑀼𑀓𑁆𑀓𑀁𑀲𑀦𑁂𑀦, 𑀦 𑀧𑀭𑀯𑀫𑁆𑀪𑀦𑁂𑀦, 𑀦 𑀨𑀮𑀸𑀪𑀺𑀲𑀗𑁆𑀔𑀸𑀬, 𑀦 𑀬𑀸𑀘𑀓𑀚𑀺𑀕𑀼𑀘𑁆𑀙𑀸𑀬, 𑀦 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀢𑀺, 𑀅𑀣 𑀔𑁄 𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀲𑀳𑀢𑁆𑀣𑁂𑀦 𑀤𑁂𑀢𑀺, 𑀓𑀸𑀮𑁂𑀦 𑀤𑁂𑀢𑀺, 𑀘𑀺𑀢𑁆𑀢𑀻𑀓𑀢𑁆𑀯𑀸 𑀤𑁂𑀢𑀺, 𑀅𑀯𑀺𑀪𑀸𑀕𑁂𑀦 𑀤𑁂𑀢𑀺. 𑀢𑀻𑀲𑀼 𑀓𑀸𑀮𑁂𑀲𑀼 𑀲𑁄𑀫𑀦𑀲𑁆𑀲𑀺𑀢𑁄 𑀤𑁂𑀢𑀺, 𑀢𑀢𑁄 ¶ 𑀏𑀯 𑀘 𑀤𑀢𑁆𑀯𑀸 𑀦 𑀧𑀘𑁆𑀙𑀸𑀦𑀼𑀢𑀸𑀧𑀻 𑀳𑁄𑀢𑀺. 𑀦 𑀧𑀝𑀺𑀕𑁆𑀕𑀸𑀳𑀓𑀯𑀲𑁂𑀦 𑀫𑀸𑀦𑀸𑀯𑀫𑀸𑀦𑀁 𑀓𑀭𑁄𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀺𑀬𑀲𑀫𑀼𑀤𑀸𑀘𑀸𑀭𑁄 𑀳𑁄𑀢𑀺 𑀯𑀤𑀜𑁆𑀜𑀽 𑀬𑀸𑀘𑀬𑁄𑀕𑁄 𑀲𑀧𑀭𑀺𑀯𑀸𑀭𑀤𑀸𑀬𑀓𑁄. 𑀅𑀦𑁆𑀦𑀤𑀸𑀦𑀜𑁆𑀳𑀺 𑀤𑁂𑀦𑁆𑀢𑁄 ‘‘𑀢𑀁 𑀲𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀣𑀸𑀤𑀻𑀳𑀺 𑀲𑀤𑁆𑀥𑀺𑀁 𑀤𑁂𑀢𑀺. 𑀢𑀣𑀸 𑀯𑀢𑁆𑀣𑀤𑀸𑀦𑀁 𑀤𑁂𑀦𑁆𑀢𑁄 ‘‘𑀢𑀁 𑀲𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀤𑁂𑀢𑀺. 𑀬𑀸𑀦𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀣𑀸 𑀭𑀽𑀧𑀤𑀸𑀦𑀁 𑀤𑁂𑀦𑁆𑀢𑁄 𑀇𑀢𑀭𑀸𑀭𑀫𑁆𑀫𑀡𑀸𑀦𑀺𑀧𑀺 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑁂𑀢𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀭𑀽𑀧𑀤𑀸𑀦𑀁 𑀦𑀸𑀫 𑀦𑀻𑀮𑀧𑀻𑀢𑀮𑁄𑀳𑀺𑀢𑀑𑀤𑀸𑀢𑀸𑀤𑀺𑀯𑀡𑁆𑀡𑀸𑀲𑀼 𑀧𑀼𑀧𑁆𑀨𑀯𑀢𑁆𑀣𑀥𑀸𑀢𑀽𑀲𑀼 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸 𑀭𑀽𑀧𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀭𑀽𑀧𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀭𑀽𑀧𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀤𑀺𑀲𑁂 𑀤𑀓𑁆𑀔𑀺𑀡𑁂𑀬𑁆𑀬𑁂 𑀤𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸. 𑀏𑀢𑀁 𑀭𑀽𑀧𑀤𑀸𑀦𑀁 𑀦𑀸𑀫.

𑀲𑀤𑁆𑀤𑀤𑀸𑀦𑀁 𑀧𑀦 𑀪𑁂𑀭𑀺𑀲𑀤𑁆𑀤𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀤𑁆𑀤𑀁 𑀓𑀦𑁆𑀤𑀫𑀽𑀮𑀸𑀦𑀺 𑀯𑀺𑀬 𑀉𑀧𑁆𑀧𑀸𑀝𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀁 𑀯𑀺𑀬 𑀘 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀲𑀯𑀢𑁆𑀣𑀼𑀓𑀁 𑀧𑀦 𑀓𑀢𑁆𑀯𑀸 𑀤𑁂𑀦𑁆𑀢𑁄 𑀲𑀤𑁆𑀤𑀤𑀸𑀦𑀁 𑀤𑁂𑀢𑀺 𑀦𑀸𑀫. 𑀢𑀲𑁆𑀫𑀸 𑀬𑀤𑀸 ‘‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀪𑁂𑀭𑀺𑀫𑀼𑀤𑀺𑀗𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀢𑀽𑀭𑀺𑀬𑁂𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑀳𑀸𑀭𑀁 𑀓𑀭𑁄𑀢𑀺 𑀓𑀸𑀭𑁂𑀢𑀺 𑀘, ‘‘𑀲𑀤𑁆𑀤𑀤𑀸𑀦𑀁 𑀫𑁂’’𑀢𑀺 𑀪𑁂𑀭𑀺𑀆𑀤𑀻𑀦𑀺 𑀞𑀧𑁂𑀢𑀺 𑀞𑀧𑀸𑀧𑁂𑀢𑀺 𑀘. 𑀥𑀫𑁆𑀫𑀓𑀣𑀺𑀓𑀸𑀦𑀁 𑀧𑀦 𑀲𑀭𑀪𑁂𑀲𑀚𑁆𑀚𑀁 𑀢𑁂𑀮𑀨𑀸𑀡𑀺𑀢𑀸𑀤𑀺𑀁 𑀤𑁂𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑀺, 𑀲𑀭𑀪𑀜𑁆𑀜𑀁 𑀪𑀡𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀉𑀧𑀦𑀺𑀲𑀺𑀦𑁆𑀦𑀓𑀓𑀣𑀁 ¶ 𑀅𑀦𑀼𑀫𑁄𑀤𑀦𑀓𑀣𑀜𑁆𑀘 𑀓𑀭𑁄𑀢𑀺 𑀓𑀸𑀭𑁂𑀢𑀺 𑀘, 𑀢𑀤𑀸 𑀲𑀤𑁆𑀤𑀤𑀸𑀦𑀁 𑀦𑀸𑀫 𑀳𑁄𑀢𑀺.

𑀢𑀣𑀸 𑀕𑀦𑁆𑀥𑀤𑀸𑀦𑀁 𑀫𑀽𑀮𑀕𑀦𑁆𑀥𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀭𑀚𑀦𑀻𑀬𑀁 𑀕𑀦𑁆𑀥𑀯𑀢𑁆𑀣𑀼𑀁 𑀧𑀺𑀁𑀲𑀺𑀢𑀫𑁂𑀯 𑀯𑀸 𑀕𑀦𑁆𑀥𑀁 𑀬𑀁𑀓𑀺𑀜𑁆𑀘𑀺 𑀮𑀪𑀺𑀢𑁆𑀯𑀸 𑀕𑀦𑁆𑀥𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀕𑀦𑁆𑀥𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀕𑀦𑁆𑀥𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀩𑀼𑀤𑁆𑀥𑀭𑀢𑀦𑀸𑀤𑀻𑀦𑀁 𑀧𑀽𑀚𑀁 𑀓𑀭𑁄𑀢𑀺 𑀓𑀸𑀭𑁂𑀢𑀺 𑀘, 𑀕𑀦𑁆𑀥𑀧𑀽𑀚𑀦𑀢𑁆𑀣𑀸𑀬 𑀅𑀕𑀭𑀼𑀘𑀦𑁆𑀤𑀦𑀸𑀤𑀺𑀓𑁂 𑀕𑀦𑁆𑀥𑀯𑀢𑁆𑀣𑀼𑀓𑁂 𑀧𑀭𑀺𑀘𑁆𑀘𑀚𑀢𑀺. 𑀇𑀤𑀁 𑀕𑀦𑁆𑀥𑀤𑀸𑀦𑀁.

𑀢𑀣𑀸 ¶ 𑀫𑀽𑀮𑀭𑀲𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀭𑀲𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀭𑀲𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀭𑀲𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀭𑀲𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀤𑁂𑀢𑀺, 𑀭𑀲𑀯𑀢𑁆𑀣𑀼𑀫𑁂𑀯 𑀯𑀸 𑀥𑀜𑁆𑀜𑀕𑀯𑀸𑀤𑀺𑀓𑀁 𑀧𑀭𑀺𑀘𑁆𑀘𑀚𑀢𑀺. 𑀇𑀤𑀁 𑀭𑀲𑀤𑀸𑀦𑀁.

𑀢𑀣𑀸 𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀫𑀜𑁆𑀘𑀧𑀻𑀞𑀸𑀤𑀺𑀯𑀲𑁂𑀦 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀸 𑀳𑀺 𑀫𑀜𑁆𑀘𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀤𑀺𑀓𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺𑀓𑀁 𑀯𑀸 𑀲𑀼𑀔𑀲𑀫𑁆𑀨𑀲𑁆𑀲𑀁 ¶ 𑀭𑀚𑀦𑀻𑀬𑀁 𑀅𑀦𑀯𑀚𑁆𑀚𑀁 𑀨𑁄𑀝𑁆𑀞𑀩𑁆𑀩𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀤𑁂𑀢𑀺. 𑀬𑀣𑀸𑀯𑀼𑀢𑁆𑀢𑀁 𑀨𑁄𑀝𑁆𑀞𑀩𑁆𑀩𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀢𑀺, 𑀇𑀤𑀁 𑀨𑁄𑀝𑁆𑀞𑀩𑁆𑀩𑀤𑀸𑀦𑀁.

𑀥𑀫𑁆𑀫𑀤𑀸𑀦𑀁 𑀧𑀦 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀑𑀚𑀧𑀸𑀦𑀚𑀻𑀯𑀺𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀑𑀚𑀸𑀤𑀻𑀲𑀼 𑀳𑀺 𑀅𑀜𑁆𑀜𑀢𑀭𑀁 𑀭𑀚𑀦𑀻𑀬𑀁 𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀥𑀫𑁆𑀫𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀥𑀫𑁆𑀫𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀑𑀚𑀤𑀸𑀦𑀁 𑀤𑁂𑀢𑀺. 𑀅𑀫𑁆𑀩𑀧𑀸𑀦𑀸𑀤𑀺𑀅𑀝𑁆𑀞𑀯𑀺𑀥𑀧𑀸𑀦𑀤𑀸𑀦𑀁 𑀤𑁂𑀢𑀺, 𑀚𑀻𑀯𑀺𑀢𑀤𑀸𑀦𑀦𑁆𑀢𑀺 𑀆𑀪𑀼𑀚𑀺𑀢𑁆𑀯𑀸 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀻𑀦𑀺 𑀤𑁂𑀢𑀺, 𑀅𑀨𑀸𑀲𑀼𑀓𑀪𑀸𑀯𑁂𑀦 𑀅𑀪𑀺𑀪𑀽𑀢𑀸𑀦𑀁 𑀩𑁆𑀬𑀸𑀥𑀺𑀢𑀸𑀦𑀁 𑀯𑁂𑀚𑁆𑀚𑁂 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺, 𑀚𑀸𑀮𑀁 𑀨𑀸𑀮𑀸𑀧𑁂𑀢𑀺, 𑀓𑀼𑀫𑀺𑀦𑀁 𑀯𑀺𑀤𑁆𑀥𑀁𑀲𑀸𑀧𑁂𑀢𑀺, 𑀲𑀓𑀼𑀡𑀧𑀜𑁆𑀚𑀭𑀁 𑀯𑀺𑀤𑁆𑀥𑀁𑀲𑀸𑀧𑁂𑀢𑀺, 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀸𑀭𑁂𑀢𑀺, 𑀫𑀸𑀖𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀢𑀺, 𑀅𑀜𑁆𑀜𑀸𑀦𑀺 𑀘 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀧𑀭𑀺𑀢𑁆𑀢𑀸𑀡𑀢𑁆𑀣𑀁 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺 𑀓𑀸𑀭𑀸𑀧𑁂𑀢𑀺 𑀘. 𑀇𑀤𑀁 𑀥𑀫𑁆𑀫𑀤𑀸𑀦𑀁 𑀦𑀸𑀫.

𑀲𑀩𑁆𑀩𑀫𑁂𑀢𑀁 𑀬𑀣𑀸𑀯𑀼𑀢𑁆𑀢𑀁 𑀤𑀸𑀦𑀲𑀫𑁆𑀧𑀤𑀁 𑀲𑀓𑀮𑀮𑁄𑀓𑀳𑀺𑀢𑀲𑀼𑀔𑀸𑀬 𑀧𑀭𑀺𑀡𑀸𑀫𑁂𑀢𑀺. 𑀅𑀢𑁆𑀢𑀦𑁄 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀓𑀼𑀧𑁆𑀧𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀧𑀭𑀺𑀓𑁆𑀔𑀬𑀲𑁆𑀲 𑀙𑀦𑁆𑀤𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀲𑀫𑀸𑀥𑀺𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀧𑀝𑀺𑀪𑀸𑀦𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀜𑀸𑀡𑀲𑁆𑀲 𑀅𑀧𑀭𑀺𑀓𑁆𑀔𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀡𑀸𑀫𑁂𑀢𑀺 ¶ . 𑀇𑀫𑀜𑁆𑀘 𑀤𑀸𑀦𑀧𑀸𑀭𑀫𑀺𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀫𑀳𑀸𑀲𑀢𑁆𑀢𑁂𑀦 𑀚𑀻𑀯𑀺𑀢𑁂 𑀅𑀦𑀺𑀘𑁆𑀘𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀩𑁆𑀩𑀸 𑀢𑀣𑀸 𑀪𑁄𑀕𑁂𑀲𑀼, 𑀩𑀳𑀼𑀲𑀸𑀥𑀸𑀭𑀡𑀢𑀸 𑀘 𑀦𑁂𑀲𑀁 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸 𑀲𑀢𑀢𑀁 𑀲𑀫𑀺𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀪𑁄𑀕𑁂 𑀕𑀳𑁂𑀢𑀩𑁆𑀩𑀲𑀸𑀭𑀁 𑀕𑀡𑁆𑀳𑀦𑁆𑀢𑁄 𑀆𑀤𑀺𑀢𑁆𑀢𑀢𑁄 𑀯𑀺𑀬 𑀅𑀕𑀸𑀭𑀢𑁄 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀅𑀢𑁆𑀢𑀸𑀦𑀜𑁆𑀘 𑀩𑀳𑀺 𑀦𑀻𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀲𑁂𑀲𑁂𑀢𑀺, 𑀦 𑀓𑀢𑁆𑀣𑀘𑀺 𑀯𑀺𑀪𑀸𑀕𑀁 𑀓𑀭𑁄𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀦𑀺𑀭𑀧𑁂𑀓𑁆𑀔𑁄 𑀦𑀺𑀲𑁆𑀲𑀚𑁆𑀚𑀢𑀺 𑀏𑀯. 𑀅𑀬𑀁 𑀢𑀸𑀯 𑀤𑀸𑀦𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀲𑀻𑀮𑀧𑀸𑀭𑀫𑀺𑀬𑀸 𑀧𑀦 𑀅𑀬𑀁 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑁋 𑀬𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀲𑀻𑀮𑀸𑀮𑀗𑁆𑀓𑀸𑀭𑁂𑀳𑀺 𑀲𑀢𑁆𑀢𑁂 𑀅𑀮𑀗𑁆𑀓𑀭𑀺𑀢𑀼𑀓𑀸𑀫𑁂𑀦 𑀫𑀳𑀸𑀧𑀼𑀭𑀺𑀲𑁂𑀦 𑀆𑀤𑀺𑀢𑁄 𑀅𑀢𑁆𑀢𑀦𑁄 𑀏𑀯 𑀢𑀸𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑀩𑁆𑀩𑀁. 𑀢𑀢𑁆𑀣 𑀘 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 ¶ 𑀲𑀻𑀮𑀁 𑀯𑀺𑀲𑀼𑀚𑁆𑀛𑀢𑀺 𑁋 𑀅𑀚𑁆𑀛𑀸𑀲𑀬𑀯𑀺𑀲𑀼𑀤𑁆𑀥𑀺𑀢𑁄, 𑀲𑀫𑀸𑀤𑀸𑀦𑀢𑁄, 𑀅𑀯𑀻𑀢𑀺𑀓𑁆𑀓𑀫𑀦𑀢𑁄, 𑀲𑀢𑀺 𑀘 𑀯𑀻𑀢𑀺𑀓𑁆𑀓𑀫𑁂 𑀧𑀼𑀦 𑀧𑀝𑀺𑀧𑀸𑀓𑀢𑀺𑀓𑀓𑀭𑀡𑀢𑁄. 𑀯𑀺𑀲𑀼𑀤𑁆𑀥𑀸𑀲𑀬𑀢𑀸𑀬 𑀳𑀺 𑀏𑀓𑀘𑁆𑀘𑁄 ¶ 𑀅𑀢𑁆𑀢𑀸𑀥𑀺𑀧𑀢𑀺 𑀳𑀼𑀢𑁆𑀯𑀸 𑀧𑀸𑀧𑀚𑀺𑀕𑀼𑀘𑁆𑀙𑀦𑀲𑀪𑀸𑀯𑁄 𑀅𑀚𑁆𑀛𑀢𑁆𑀢𑀁 𑀳𑀺𑀭𑀺𑀥𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀳𑁄𑀢𑀺. 𑀢𑀣𑀸 𑀧𑀭𑀢𑁄 𑀲𑀫𑀸𑀤𑀸𑀦𑁂 𑀲𑀢𑀺 𑀏𑀓𑀘𑁆𑀘𑁄 𑀮𑁄𑀓𑀸𑀥𑀺𑀧𑀢𑀺 𑀳𑀼𑀢𑁆𑀯𑀸 𑀧𑀸𑀧𑀢𑁄 𑀉𑀢𑁆𑀢𑀲𑀦𑁆𑀢𑁄 𑀑𑀢𑁆𑀢𑀧𑁆𑀧𑀥𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀳𑁄𑀢𑀺. 𑀇𑀢𑀺 𑀉𑀪𑀬𑀣𑀸𑀧𑀺 𑀏𑀢𑁂 𑀅𑀯𑀻𑀢𑀺𑀓𑁆𑀓𑀫𑀦𑀢𑁄 𑀲𑀻𑀮𑁂 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀅𑀣 𑀧𑀦 𑀓𑀤𑀸𑀘𑀺 𑀲𑀢𑀺𑀲𑀫𑁆𑀫𑁄𑀲𑁂𑀦 𑀲𑀻𑀮𑀲𑁆𑀲 𑀔𑀡𑁆𑀟𑀸𑀤𑀺𑀪𑀸𑀯𑁄 𑀲𑀺𑀬𑀸. 𑀢𑀸𑀬𑀬𑁂𑀯 𑀬𑀣𑀸𑀯𑀼𑀢𑁆𑀢𑀸𑀬 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀔𑀺𑀧𑁆𑀧𑀫𑁂𑀯 𑀦𑀁 𑀯𑀼𑀝𑁆𑀞𑀸𑀦𑀸𑀤𑀺𑀦𑀸 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀢𑀺.

𑀢𑀬𑀺𑀤𑀁 𑀲𑀻𑀮𑀁 𑀯𑀸𑀭𑀺𑀢𑁆𑀢𑀁, 𑀘𑀸𑀭𑀺𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣𑀸𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀸𑀭𑀺𑀢𑁆𑀢𑀲𑀻𑀮𑁂 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑁋 𑀲𑀩𑁆𑀩𑀲𑀢𑁆𑀢𑁂𑀲𑀼 𑀢𑀣𑀸 𑀤𑀬𑀸𑀧𑀦𑁆𑀦𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀣𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀦 𑀆𑀖𑀸𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀧𑀭𑀽𑀧𑀓𑀸𑀭𑀦𑀺𑀭𑀢𑀢𑀸𑀬 𑀧𑀭𑀲𑀦𑁆𑀢𑀓𑁄 𑀅𑀮𑀕𑀤𑁆𑀤𑁄 𑀯𑀺𑀬 𑀦 𑀧𑀭𑀸𑀫𑀲𑀺𑀢𑀩𑁆𑀩𑁄. 𑀲𑀘𑁂 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄𑀧𑀺 𑀆𑀭𑀸𑀘𑀸𑀭𑀻 𑀳𑁄𑀢𑀺 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀯𑀺𑀭𑀳𑀺𑀢𑁄, 𑀧𑀕𑁂𑀯 𑀧𑀭𑀤𑀸𑀭𑀕𑀫𑀦𑀢𑁄. 𑀲𑀘𑁂 𑀧𑀦 𑀅𑀧𑀩𑁆𑀩𑀚𑀺𑀢𑁄 𑀕𑀳𑀝𑁆𑀞𑁄 𑀲𑀫𑀸𑀦𑁄 𑀧𑀭𑁂𑀲𑀁 𑀤𑀸𑀭𑁂𑀲𑀼 𑀲𑀤𑀸 𑀧𑀸𑀧𑀓𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺. 𑀓𑀣𑁂𑀦𑁆𑀢𑁄 𑀘 𑀲𑀘𑁆𑀘𑀁 𑀳𑀺𑀢𑀁 𑀧𑀺𑀬𑀁 𑀯𑀘𑀦𑀁 𑀧𑀭𑀺𑀫𑀺𑀢𑀫𑁂𑀯 𑀘 𑀓𑀸𑀮𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀪𑀸𑀲𑀺𑀢𑀸 𑀳𑁄𑀢𑀺, 𑀲𑀩𑁆𑀩𑀢𑁆𑀣 𑀅𑀦𑀪𑀺𑀚𑁆𑀛𑀸𑀮𑀼 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀕𑁆𑀕𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀲𑀼 𑀦𑀺𑀯𑀺𑀝𑁆𑀞𑀲𑀤𑁆𑀥𑁄 ¶ 𑀳𑁄𑀢𑀺 𑀦𑀺𑀯𑀺𑀝𑁆𑀞𑀧𑁂𑀫𑁄.

𑀇𑀢𑀺 𑀘𑀢𑀼𑀭𑀸𑀧𑀸𑀬𑀯𑀝𑁆𑀝𑀤𑀼𑀓𑁆𑀔𑀸𑀦𑀁 𑀧𑀣𑀪𑀽𑀢𑁂𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀘 𑀑𑀭𑀫𑀺𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀧𑀣𑀪𑀽𑀢𑁂𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀢𑀺𑀝𑁆𑀞𑀺𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀭𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑀢𑀸𑀬 𑀬𑀣𑀸𑀪𑀺𑀧𑀢𑁆𑀣𑀺𑀢𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀽𑀧𑀲𑀁𑀳𑀺𑀢𑀸 𑀫𑀦𑁄𑀭𑀣𑀸 𑀲𑀻𑀖𑀁 𑀲𑀻𑀖𑀁 𑀅𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀏𑀯𑀁𑀪𑀽𑀢𑁄 𑀳𑀺 𑀅𑀬𑀁. 𑀢𑀢𑁆𑀣 𑀳𑀺𑀁𑀲𑀸𑀦𑀺𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑀁 𑀤𑁂𑀢𑀺, 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀫𑁂𑀢𑁆𑀢𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄, 𑀤𑀻𑀖𑀸𑀬𑀼𑀓𑁄 𑀲𑀼𑀔𑀩𑀳𑀼𑀮𑁄 𑀮𑀓𑁆𑀔𑀡𑀯𑀺𑀲𑁂𑀲𑁂 𑀧𑀸𑀧𑀼𑀡𑀸𑀢𑀺, 𑀤𑁄𑀲𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀦𑀺𑀯𑀢𑁆𑀢𑀺𑀬𑀸 𑀘𑁄𑀭𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑁂 𑀪𑁄𑀕𑁂 𑀅𑀥𑀺𑀕𑀘𑁆𑀙𑀢𑀺. 𑀧𑀭𑁂𑀳𑀺 𑀅𑀦𑀸𑀲𑀗𑁆𑀓𑀦𑀻𑀬𑁄 𑀧𑀺𑀬𑁄 𑀫𑀦𑀸𑀧𑁄 𑀯𑀺𑀲𑁆𑀲𑀲𑀦𑀻𑀬𑁄 𑀯𑀺𑀪𑀯𑀲𑀫𑁆𑀧𑀢𑁆𑀢𑀻𑀲𑀼 𑀅𑀮𑀕𑁆𑀕𑀘𑀺𑀢𑁆𑀢𑁄 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀮𑁄𑀪𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑀺𑀯𑀢𑁆𑀢𑀺𑀬𑀸 ¶ 𑀅𑀮𑁄𑀮𑁄 𑀳𑁄𑀢𑀺 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄, 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀅𑀧𑀭𑀺𑀲𑀗𑁆𑀓𑀦𑀻𑀬𑁄 ¶ , 𑀓𑀮𑁆𑀬𑀸𑀡𑁄 𑀘𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀮𑀕𑁆𑀕𑀘𑀺𑀢𑁆𑀢𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑁂𑀲𑀼 𑀅𑀮𑀼𑀤𑁆𑀥𑀸𑀲𑀬𑁄, 𑀦𑁂𑀓𑁆𑀔𑀫𑁆𑀫𑀩𑀳𑀼𑀮𑁄 𑀮𑀓𑁆𑀔𑀡𑀯𑀺𑀲𑁂𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀮𑁄𑀪𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀫𑀼𑀲𑀸𑀯𑀸𑀤𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀫𑀸𑀡𑀪𑀽𑀢𑁄 𑀳𑁄𑀢𑀺 𑀧𑀘𑁆𑀘𑀬𑀺𑀓𑁄 𑀣𑁂𑀢𑁄 𑀆𑀤𑁂𑀬𑁆𑀬𑀯𑀘𑀦𑁄, 𑀤𑁂𑀯𑀢𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄, 𑀲𑀼𑀭𑀪𑀺𑀕𑀦𑁆𑀥𑀫𑀼𑀔𑁄 𑀆𑀭𑀓𑁆𑀔𑀺𑀢𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁄, 𑀮𑀓𑁆𑀔𑀡𑀯𑀺𑀲𑁂𑀲𑁂 𑀘 𑀅𑀥𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀧𑁂𑀲𑀼𑀜𑁆𑀜𑀦𑀺𑀯𑀢𑁆𑀢𑀺𑀬𑀸 𑀧𑀭𑀽𑀧𑀓𑁆𑀓𑀫𑁂𑀳𑀺𑀧𑀺 𑀅𑀪𑁂𑀚𑁆𑀚𑀓𑀸𑀬𑁄 𑀳𑁄𑀢𑀺 𑀅𑀪𑁂𑀚𑁆𑀚𑀧𑀭𑀺𑀯𑀸𑀭𑁄, 𑀲𑀤𑁆𑀥𑀫𑁆𑀫𑁂𑀲𑀼 𑀘 𑀅𑀪𑁂𑀚𑁆𑀚𑀦𑀓𑀲𑀤𑁆𑀥𑁄, 𑀤𑀴𑁆𑀳𑀫𑀺𑀢𑁆𑀢𑁄 𑀪𑀯𑀦𑁆𑀢𑀭𑀧𑀭𑀺𑀘𑀺𑀢𑀸𑀦𑀁 𑀯𑀺𑀬 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀧𑀺𑀬𑁄 𑀅𑀲𑀁𑀓𑀺𑀮𑁂𑀲𑀩𑀳𑀼𑀮𑁄.

𑀨𑀭𑀼𑀲𑀯𑀸𑀘𑀸𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀲𑀼𑀔𑀲𑀻𑀮𑁄 𑀫𑀥𑀼𑀭𑀯𑀘𑀦𑁄 𑀲𑀫𑁆𑀪𑀸𑀯𑀦𑀻𑀬𑁄, 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀘𑀲𑁆𑀲 𑀲𑀭𑁄 𑀦𑀺𑀩𑁆𑀩𑀢𑁆𑀢𑀢𑀺.

𑀲𑀫𑁆𑀨𑀧𑁆𑀧𑀮𑀸𑀧𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀘 𑀆𑀤𑁂𑀬𑁆𑀬𑀯𑀘𑀦𑁄 𑀧𑀭𑀺𑀫𑀺𑀢𑀸𑀮𑀸𑀧𑁄. 𑀫𑀳𑁂𑀲𑀓𑁆𑀔𑁄 𑀘 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄, 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑁂𑀦 𑀧𑀝𑀺𑀪𑀸𑀦𑁂𑀦 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀓𑀼𑀲𑀮𑁄, 𑀩𑀼𑀤𑁆𑀥𑀪𑀽𑀫𑀺𑀬𑀜𑁆𑀘 𑀏𑀓𑀸𑀬 𑀏𑀯 𑀯𑀸𑀘𑀸𑀬 𑀅𑀦𑁂𑀓𑀪𑀸𑀲𑀸𑀦𑀁 𑀲𑀢𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄 𑀳𑁄𑀢𑀺.

𑀅𑀦𑀪𑀺𑀚𑁆𑀛𑀸𑀮𑀼𑀢𑀸𑀬 𑀇𑀘𑁆𑀙𑀺𑀢𑀮𑀸𑀪𑀻 𑀳𑁄𑀢𑀺, 𑀉𑀴𑀸𑀭𑁂𑀲𑀼 𑀘 𑀪𑁄𑀕𑁂𑀲𑀼 𑀭𑀼𑀘𑀺𑀁 𑀧𑀝𑀺𑀮𑀪𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 ¶ 𑀲𑀫𑁆𑀫𑀢𑁄 𑀳𑁄𑀢𑀺, 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑁄, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀁 𑀦 𑀧𑀸𑀧𑀼𑀡𑀸𑀢𑀺, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀘 𑀳𑁄𑀢𑀺.

𑀅𑀩𑁆𑀬𑀸𑀧𑀸𑀤𑁂𑀦 𑀧𑀺𑀬𑀤𑀲𑁆𑀲𑀦𑁄 𑀳𑁄𑀢𑀺, 𑀲𑀢𑁆𑀢𑀸𑀦𑀁 𑀲𑀫𑁆𑀪𑀸𑀯𑀦𑀻𑀬𑁄 𑀧𑀭𑀳𑀺𑀢𑀸𑀪𑀺𑀦𑀦𑁆𑀤𑀺𑀢𑀸𑀬 𑀘 𑀲𑀢𑁆𑀢𑁂 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀲𑀸𑀤𑁂𑀢𑀺, 𑀅𑀮𑀽𑀔𑀲𑀪𑀸𑀯𑁄 𑀘 𑀳𑁄𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻, 𑀫𑀳𑁂𑀲𑀓𑁆𑀔𑁄 𑀘 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄.

𑀫𑀺𑀘𑁆𑀙𑀸𑀤𑀲𑁆𑀲𑀦𑀸𑀪𑀸𑀯𑁂𑀦 𑀓𑀮𑁆𑀬𑀸𑀡𑁂 𑀲𑀳𑀸𑀬𑁂 𑀧𑀝𑀺𑀮𑀪𑀢𑀺, 𑀲𑀻𑀲𑀘𑁆𑀙𑁂𑀤𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀢𑁄 𑀅𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀘 𑀳𑁄𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺 𑀫𑀽𑀮𑀚𑀸𑀢𑀸, 𑀲𑀤𑁆𑀤𑀳𑀢𑀺 𑀘 𑀢𑀣𑀸𑀕𑀢𑀸𑀦𑀁 𑀩𑁄𑀥𑀺𑀁, 𑀲𑀫𑀬𑀦𑁆𑀢𑀭𑁂𑀲𑀼 𑀦𑀸𑀪𑀺𑀭𑀫𑀢𑀺 𑀉𑀓𑁆𑀓𑀸𑀭𑀝𑁆𑀞𑀸𑀦𑁂 ¶ 𑀯𑀺𑀬 𑀭𑀸𑀚𑀳𑀁𑀲𑁄 ¶ , 𑀮𑀓𑁆𑀔𑀡𑀢𑁆𑀢𑀬𑀧𑀭𑀺𑀚𑀸𑀦𑀦𑀓𑀼𑀲𑀮𑁄 𑀳𑁄𑀢𑀺, 𑀅𑀦𑁆𑀢𑁂 𑀘 𑀅𑀦𑀸𑀯𑀭𑀡𑀜𑀸𑀡𑀮𑀸𑀪𑀻, 𑀬𑀸𑀯 𑀩𑁄𑀥𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀘 𑀳𑁄𑀢𑀺, 𑀉𑀴𑀸𑀭𑀼𑀴𑀸𑀭𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀸𑀢𑀺. 𑀇𑀢𑀺 𑀳𑀺𑀤𑀁 𑀲𑀻𑀮𑀁 𑀦𑀸𑀫 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀅𑀥𑀺𑀝𑁆𑀞𑀸𑀦𑀁, 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀧𑀪𑀯𑀪𑀽𑀫𑀺, 𑀲𑀩𑁆𑀩𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀆𑀤𑀺 𑀘𑀭𑀡𑀁 𑀫𑀼𑀔𑀁 𑀧𑀫𑀼𑀔𑀦𑁆𑀢𑀺 𑀩𑀳𑀼𑀫𑀸𑀦𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀬𑀯𑀘𑀻𑀲𑀁𑀬𑀫𑁂 𑀇𑀦𑁆𑀤𑁆𑀭𑀺𑀬𑀤𑀫𑀦𑁂 𑀆𑀚𑀻𑀯𑀯𑀺𑀲𑀼𑀤𑁆𑀥𑀺𑀬𑀁 𑀧𑀘𑁆𑀘𑀬𑀧𑀭𑀺𑀪𑁄𑀕𑁂𑀲𑀼 𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀅𑀧𑁆𑀧𑀫𑀢𑁆𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀫𑀺𑀢𑁆𑀢𑀫𑀼𑀔𑀧𑀘𑁆𑀘𑀢𑁆𑀣𑀺𑀓𑀁 𑀯𑀺𑀬 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀺𑀓𑀻𑀯 𑀅𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀘𑁆𑀘𑀁 𑀲𑀻𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀯𑀸𑀭𑀺𑀢𑁆𑀢𑀲𑀻𑀮𑁂 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀘𑀸𑀭𑀺𑀢𑁆𑀢𑀲𑀻𑀮𑁂 𑀧𑀦 𑀧𑀝𑀺𑀧𑀢𑁆𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀇𑀥 𑀩𑁄𑀥𑀺𑀲𑀢𑁆𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀮𑁂𑀦 𑀓𑀸𑀮𑀁 𑀓𑀢𑁆𑀢𑀸 𑀳𑁄𑀢𑀺, 𑀢𑀣𑀸 𑀢𑁂𑀲𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀝𑁆𑀞𑀸𑀦𑀁 𑀓𑀢𑁆𑀢𑀸 𑀳𑁄𑀢𑀺, 𑀕𑀺𑀮𑀸𑀦𑀸𑀦𑀁 𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀁. 𑀲𑀼𑀪𑀸𑀲𑀺𑀢𑀧𑀤𑀸𑀦𑀺 𑀲𑀼𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀓𑀢𑁆𑀢𑀸 𑀳𑁄𑀢𑀺, 𑀕𑀼𑀡𑀯𑀦𑁆𑀢𑀸𑀦𑀁 𑀕𑀼𑀡𑁂 𑀯𑀡𑁆𑀡𑁂𑀢𑀸 𑀧𑀭𑁂𑀲𑀁 𑀅𑀧𑀓𑀸𑀭𑁂 𑀔𑀦𑁆𑀢𑀸, 𑀉𑀧𑀓𑀸𑀭𑁂 𑀅𑀦𑀼𑀲𑁆𑀲𑀭𑀺𑀢𑀸, 𑀧𑀼𑀜𑁆𑀜𑀸𑀦𑀺 𑀅𑀦𑀼𑀫𑁄𑀤𑀺𑀢𑀸, 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀭𑀺𑀡𑀸𑀫𑁂𑀢𑀸, 𑀲𑀩𑁆𑀩𑀓𑀸𑀮𑀁 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀢𑀺 𑀘 𑀅𑀘𑁆𑀘𑀬𑁂 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀢𑀸𑀤𑀺𑀲𑀸𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀬𑀣𑀸𑀪𑀽𑀢𑀁 𑀆𑀯𑀺𑀓𑀢𑁆𑀢𑀸, 𑀉𑀢𑁆𑀢𑀭𑀺 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀲𑀫𑁆𑀫𑀤𑁂𑀯 𑀧𑀭𑀺𑀧𑀽𑀭𑁂𑀢𑀸.

𑀢𑀣𑀸 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀲𑀼 𑀅𑀢𑁆𑀣𑀽𑀧𑀲𑀁𑀳𑀺𑀢𑀸𑀲𑀼 𑀲𑀢𑁆𑀢𑀸𑀦𑀁 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀳𑀸𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀉𑀧𑁆𑀧𑀦𑁆𑀦𑁂𑀲𑀼 𑀘 𑀲𑀢𑁆𑀢𑀸𑀦𑀁 𑀩𑁆𑀬𑀸𑀥𑀺𑀆𑀤𑀺𑀤𑀼𑀓𑁆𑀔𑁂𑀲𑀼 𑀬𑀣𑀸𑀭𑀳𑀁 ¶ 𑀧𑀢𑀺𑀓𑀸𑀭𑀯𑀺𑀥𑀸𑀬𑀓𑁄. 𑀜𑀸𑀢𑀺𑀪𑁄𑀕𑀸𑀤𑀺𑀩𑁆𑀬𑀲𑀦𑀧𑀢𑀺𑀢𑁂𑀲𑀼 𑀲𑁄𑀓𑀸𑀧𑀦𑁄𑀤𑀦𑁄 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀸𑀯𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀦𑀺𑀕𑁆𑀕𑀳𑀸𑀭𑀳𑀸𑀦𑀁 𑀥𑀫𑁆𑀫𑁂𑀦𑁂𑀯 𑀦𑀺𑀕𑁆𑀕𑀡𑁆𑀳𑀦𑀓𑁄 𑀬𑀸𑀯𑀤𑁂𑀯 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑀦𑀸𑀬. 𑀧𑀕𑁆𑀕𑀳𑀸𑀭𑀳𑀸𑀦𑀁 𑀥𑀫𑁆𑀫𑁂𑀦𑁂𑀯 𑀧𑀕𑁆𑀕𑀡𑁆𑀳𑀦𑀓𑁄. 𑀬𑀸𑀦𑀺 𑀧𑀼𑀭𑀺𑀫𑀓𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀉𑀴𑀸𑀭𑀢𑀫𑀸𑀦𑀺 𑀧𑀭𑀫𑀤𑀼𑀓𑁆𑀓𑀭𑀸𑀦𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸𑀦𑀺 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀸𑀦𑀺 𑀘𑀭𑀺𑀢𑀸𑀦𑀺, 𑀬𑁂𑀳𑀺 𑀦𑁂𑀲𑀁 𑀩𑁄𑀥𑀺𑀲𑀫𑁆𑀪𑀸𑀭𑀸 𑀲𑀫𑁆𑀫𑀤𑁂𑀯 𑀧𑀭𑀺𑀧𑀸𑀓𑀁 𑀅𑀕𑀫𑀁𑀲𑀼, 𑀢𑀸𑀦𑀺 𑀲𑀼𑀢𑁆𑀯𑀸 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀢𑁆𑀭𑀸𑀲𑁄 𑀢𑁂𑀧𑀺 ¶ 𑀫𑀳𑀸𑀧𑀼𑀭𑀺𑀲𑀸 𑀫𑀦𑀼𑀲𑁆𑀲𑀸 𑀏𑀯, 𑀓𑀫𑁂𑀦 𑀧𑀦 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀪𑀸𑀯𑀺𑀢𑀢𑁆𑀢𑀪𑀸𑀯𑀸 𑀢𑀸𑀤𑀺𑀲𑀸𑀬 𑀉𑀴𑀸𑀭𑀢𑀫𑀸𑀬 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀫𑀬𑀸𑀧𑀺 𑀲𑀻𑀮𑀸𑀤𑀺𑀲𑀺𑀓𑁆𑀔𑀸𑀲𑀼 𑀲𑀫𑁆𑀫𑀤𑁂𑀯 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀳𑀫𑁆𑀧𑀺 𑀅𑀦𑀼𑀓𑁆𑀓𑀫𑁂𑀦 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀏𑀓𑀦𑁆𑀢𑀢𑁄 𑀢𑀁 𑀧𑀤𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀲𑀤𑁆𑀥𑀸𑀧𑀼𑀭𑁂𑀘𑀸𑀭𑀺𑀓𑀁 𑀯𑀻𑀭𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀫𑁆𑀫𑀤𑁂𑀯 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺.

𑀢𑀣𑀸 ¶ 𑀧𑀝𑀺𑀘𑁆𑀙𑀦𑁆𑀦𑀓𑀮𑁆𑀬𑀸𑀡𑁄 𑀳𑁄𑀢𑀺 𑀯𑀺𑀯𑀝𑀸𑀧𑀭𑀸𑀥𑁄, 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀤𑀼𑀓𑁆𑀔𑀲𑀳𑁄 𑀅𑀧𑀭𑀺𑀢𑀲𑁆𑀲𑀦𑀚𑀸𑀢𑀺𑀓𑁄 𑀅𑀦𑀼𑀤𑁆𑀥𑀢𑁄 𑀅𑀦𑀼𑀦𑁆𑀦𑀴𑁄 𑀅𑀘𑀧𑀮𑁄 𑀅𑀫𑀼𑀔𑀭𑁄 𑀅𑀯𑀺𑀓𑀺𑀡𑁆𑀡𑀯𑀸𑀘𑁄 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀓𑀼𑀳𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀭𑀳𑀺𑀢𑁄 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑁄, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀸𑀬𑁂 𑀚𑀻𑀯𑀺𑀢𑁂 𑀯𑀸 𑀅𑀧𑁂𑀓𑁆𑀔𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺, 𑀧𑀕𑁂𑀯 𑀅𑀥𑀺𑀫𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀤𑀼𑀲𑁆𑀲𑀻𑀮𑁆𑀬𑀳𑁂𑀢𑀼𑀪𑀽𑀢𑁂 𑀓𑁄𑀥𑀽𑀧𑀦𑀸𑀳𑀸𑀤𑀺𑀓𑁂 𑀉𑀧𑀓𑁆𑀓𑀺𑀮𑁂𑀲𑁂 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺. 𑀅𑀧𑁆𑀧𑀫𑀢𑁆𑀢𑀓𑁂𑀦 𑀘 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀧𑀭𑀺𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺, 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑀸𑀬 𑀯𑀸𑀬𑀫𑀢𑀺.

𑀬𑁂𑀦 𑀬𑀣𑀸𑀮𑀤𑁆𑀥𑀸 𑀲𑀫𑁆𑀧𑀢𑁆𑀢𑀺 𑀳𑀸𑀦𑀪𑀸𑀕𑀺𑀬𑀸 𑀯𑀸 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀢𑀺, 𑀢𑀣𑀸 𑀫𑀳𑀸𑀧𑀼𑀭𑀺𑀲𑁄 𑀅𑀦𑁆𑀥𑀸𑀦𑀁 𑀧𑀭𑀺𑀡𑀸𑀬𑀓𑁄 𑀳𑁄𑀢𑀺, 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀺, 𑀩𑀥𑀺𑀭𑀸𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀜𑁆𑀜𑀁 𑀤𑁂𑀢𑀺, 𑀅𑀢𑁆𑀣𑀫𑀦𑀼𑀕𑁆𑀕𑀸𑀳𑁂𑀢𑀺, 𑀢𑀣𑀸 𑀫𑀽𑀕𑀸𑀦𑀁. 𑀧𑀻𑀞𑀲𑀧𑁆𑀧𑀺𑀓𑀸𑀦𑀁 𑀧𑀻𑀞𑀁 𑀤𑁂𑀢𑀺 𑀬𑀸𑀦𑀁 𑀤𑁂𑀢𑀺 𑀯𑀸𑀳𑁂𑀢𑀺 𑀯𑀸. 𑀅𑀲𑁆𑀲𑀤𑁆𑀥𑀸𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀬 𑀯𑀸𑀬𑀫𑀢𑀺, 𑀓𑀼𑀲𑀻𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀸𑀬, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀲𑀢𑀺𑀲𑀫𑀸𑀬𑁄𑀕𑀸𑀬, 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀦𑀁 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀧𑁆𑀧𑀜𑁆𑀜𑀸𑀦𑀁 𑀧𑀜𑁆𑀜𑀸𑀥𑀺𑀕𑀫𑀸𑀬 𑀯𑀸𑀬𑀫𑀢𑀺. 𑀓𑀸𑀫𑀘𑁆𑀙𑀦𑁆𑀤𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 ¶ 𑀓𑀸𑀫𑀘𑁆𑀙𑀦𑁆𑀤𑀧𑀝𑀺𑀯𑀺𑀦𑁄𑀤𑀦𑀸𑀬 𑀯𑀸𑀬𑀫𑀢𑀺. 𑀩𑁆𑀬𑀸𑀧𑀸𑀤𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀦𑁄𑀤𑀦𑀸𑀬 𑀯𑀸𑀬𑀫𑀢𑀺. 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀅𑀧𑀓𑀢𑀸𑀦𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀯𑀺𑀦𑁄𑀤𑀦𑀸𑀬 𑀯𑀸𑀬𑀫𑀢𑀺. 𑀧𑀼𑀩𑁆𑀩𑀓𑀸𑀭𑀻𑀦𑀁 𑀲𑀢𑁆𑀢𑀸𑀦𑀁 𑀓𑀢𑀜𑁆𑀜𑀼𑀢𑀁 𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀪𑀸𑀲𑀻 𑀧𑀺𑀬𑀯𑀸𑀤𑀻 𑀲𑀗𑁆𑀕𑀸𑀳𑀓𑁄 𑀲𑀤𑀺𑀲𑁂𑀦 𑀅𑀥𑀺𑀓𑁂𑀦 𑀯𑀸 𑀧𑀘𑁆𑀘𑀼𑀧𑀓𑀸𑀭𑁂𑀦 𑀲𑀫𑁆𑀫𑀸𑀦𑁂𑀢𑀸 𑀳𑁄𑀢𑀺.

𑀆𑀧𑀤𑀸𑀲𑀼 ¶ 𑀲𑀳𑀸𑀬𑀓𑀺𑀘𑁆𑀘𑀁 𑀅𑀦𑀼𑀢𑀺𑀝𑁆𑀞𑀢𑀺. 𑀢𑁂𑀲𑀁 𑀢𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀧𑀓𑀢𑀺𑀲𑀪𑀸𑀯𑀜𑁆𑀘 𑀧𑀭𑀺𑀚𑀸𑀦𑀺𑀢𑁆𑀯𑀸 𑀬𑁂𑀳𑀺 𑀬𑀣𑀸 𑀲𑀁𑀯𑀲𑀺𑀢𑀩𑁆𑀩𑀁 𑀳𑁄𑀢𑀺, 𑀢𑁂𑀳𑀺 𑀢𑀣𑀸 𑀲𑀁𑀯𑀲𑀢𑀺. 𑀬𑁂𑀲𑀼 𑀘 𑀬𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀢𑁂𑀲𑀼 𑀢𑀣𑀸 𑀧𑀝𑀺𑀧𑀚𑁆𑀚𑀢𑀺. 𑀢𑀜𑁆𑀘 𑀔𑁄 𑀅𑀓𑀼𑀲𑀮𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦, 𑀦 𑀅𑀜𑁆𑀜𑀣𑀸. 𑀧𑀭𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀬𑀸𑀯𑀤𑁂𑀯 𑀓𑀼𑀲𑀮𑀸𑀪𑀺𑀯𑀟𑁆𑀠𑀺𑀬𑀸. 𑀢𑀣𑀸 𑀳𑀺𑀢𑀚𑁆𑀛𑀸𑀲𑀬𑁂𑀦𑀸𑀧𑀺 𑀧𑀭𑁄 𑀦 𑀳𑀺𑀁𑀲𑀺𑀢𑀩𑁆𑀩𑁄, 𑀦 𑀪𑀡𑁆𑀟𑀺𑀢𑀩𑁆𑀩𑁄, 𑀦 𑀫𑀗𑁆𑀓𑀼𑀪𑀸𑀯𑀫𑀸𑀧𑀸𑀤𑁂𑀢𑀩𑁆𑀩𑁄, 𑀦 𑀧𑀭𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀕𑁆𑀕𑀳𑀝𑁆𑀞𑀸𑀦𑁂 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀦𑀻𑀘𑀢𑀭𑀁 𑀧𑀝𑀺𑀧𑀦𑁆𑀦𑀲𑁆𑀲 𑀅𑀢𑁆𑀢𑀸 𑀉𑀘𑁆𑀘𑀢𑀭𑁂 𑀞𑀧𑁂𑀢𑀩𑁆𑀩𑁄, 𑀦 𑀘 𑀧𑀭𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑁂𑀯𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀅𑀢𑀺𑀲𑁂𑀯𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀅𑀓𑀸𑀮𑀲𑁂𑀯𑀺𑀦𑀸.

𑀲𑁂𑀯𑀺𑀢𑀩𑁆𑀩𑀬𑀼𑀢𑁆𑀢𑁂 𑀧𑀦 𑀲𑀢𑁆𑀢𑁂 𑀤𑁂𑀲𑀓𑀸𑀮𑀸𑀦𑀼𑀭𑀽𑀧𑀁 𑀲𑁂𑀯𑀢𑀺. 𑀦 𑀘 𑀧𑀭𑁂𑀲𑀁 𑀧𑀼𑀭𑀢𑁄 𑀧𑀺𑀬𑁂 𑀯𑀺𑀕𑀭𑀳𑀢𑀺, 𑀅𑀧𑁆𑀧𑀺𑀬𑁂 ¶ 𑀯𑀸 𑀧𑀲𑀁𑀲𑀢𑀺. 𑀦 𑀅𑀯𑀺𑀲𑁆𑀲𑀝𑁆𑀞𑀯𑀺𑀲𑁆𑀲𑀸𑀲𑀻 𑀳𑁄𑀢𑀺. 𑀦 𑀥𑀫𑁆𑀫𑀺𑀓𑀁 𑀉𑀧𑀦𑀺𑀫𑀦𑁆𑀢𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀲𑀜𑁆𑀜𑀢𑁆𑀢𑀺𑀁 𑀉𑀧𑀕𑀘𑁆𑀙𑀢𑀺, 𑀦𑀸𑀥𑀺𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀲𑀤𑁆𑀥𑀸𑀦𑀺𑀲𑀁𑀲𑀓𑀣𑀸𑀬 𑀲𑀫𑁆𑀧𑀳𑀁𑀲𑀢𑀺. 𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁂 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀓𑀣𑀸𑀬 𑀲𑀫𑁆𑀧𑀳𑀁𑀲𑀢𑀺. 𑀲𑀘𑁂 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀧𑀫𑀸𑀤𑀸𑀧𑀦𑁆𑀦𑁂 𑀲𑀢𑁆𑀢𑁂 𑀅𑀪𑀺𑀜𑁆𑀜𑀸𑀩𑀮𑁂𑀦 𑀬𑀣𑀸𑀭𑀳𑀁 𑀦𑀺𑀭𑀬𑀸𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑁄 𑀲𑀁𑀯𑁂𑀚𑁂𑀢𑁆𑀯𑀸 𑀅𑀲𑁆𑀲𑀤𑁆𑀥𑀸𑀤𑀺𑀓𑁂 𑀲𑀤𑁆𑀥𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀲𑀸𑀲𑀦𑁂 𑀑𑀢𑀸𑀭𑁂𑀢𑀺. 𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀧𑀭𑀺𑀧𑀸𑀘𑁂𑀢𑀺. 𑀏𑀯𑀫𑀬𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀸𑀭𑀺𑀢𑁆𑀢𑀪𑀽𑀢𑁄 𑀅𑀧𑀭𑀺𑀫𑀸𑀡𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀉𑀧𑀭𑀽𑀧𑀭𑀺 𑀅𑀪𑀺𑀯𑀟𑁆𑀠𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺 𑀘 𑀬𑀸 𑀲𑀸 ‘‘𑀓𑀺𑀁 𑀲𑀻𑀮𑀁 𑀓𑁂𑀦𑀝𑁆𑀞𑁂𑀦 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀻𑀮𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬 𑀆𑀤𑀬𑁄) 𑀯𑀼𑀢𑁆𑀢𑀸, 𑀲𑀸 𑀲𑀩𑁆𑀩𑀸𑀧𑀺 𑀇𑀥 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 ¶ 𑀢𑀢𑁆𑀣 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀯𑀲𑁂𑀦 𑀲𑀻𑀮𑀓𑀣𑀸 𑀆𑀕𑀢𑀸, 𑀇𑀥 𑀫𑀳𑀸𑀩𑁄𑀥𑀺𑀲𑀢𑁆𑀢𑀯𑀲𑁂𑀦 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀬𑀢𑁄 𑀇𑀤𑀁 𑀲𑀻𑀮𑀁 𑀫𑀳𑀸𑀧𑀼𑀭𑀺𑀲𑁄 𑀬𑀣𑀸 𑀦 𑀅𑀢𑁆𑀢𑀦𑁄 𑀤𑀼𑀕𑁆𑀕𑀢𑀺𑀬𑀁 𑀧𑀭𑀺𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀕𑀢𑀺𑀬𑀫𑁆𑀧𑀺, 𑀦 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀬𑀸, 𑀦 𑀘𑀓𑁆𑀓𑀯𑀢𑁆𑀢𑀺, 𑀦 𑀤𑁂𑀯, 𑀦 𑀲𑀓𑁆𑀓, 𑀦 𑀫𑀸𑀭, 𑀦 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀡𑀸𑀫𑁂𑀢𑀺, 𑀢𑀣𑀸 𑀦 𑀅𑀢𑁆𑀢𑀦𑁄 𑀢𑁂𑀯𑀺𑀚𑁆𑀚𑀢𑀸𑀬, 𑀦 𑀙𑀴𑀪𑀺𑀜𑁆𑀜𑀢𑀸𑀬 ¶ , 𑀦 𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑀸𑀬, 𑀦 𑀲𑀸𑀯𑀓𑀩𑁄𑀥𑀺𑀬𑀸, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀬𑀸, 𑀧𑀭𑀺𑀡𑀸𑀫𑁂𑀢𑀺, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀢𑁆𑀢𑀭𑀲𑀻𑀮𑀸𑀮𑀗𑁆𑀓𑀸𑀭𑀲𑀫𑁆𑀧𑀸𑀤𑀦𑀢𑁆𑀣𑀫𑁂𑀯 𑀧𑀭𑀺𑀡𑀸𑀫𑁂𑀢𑀻𑀢𑀺. 𑀅𑀬𑀁 𑀲𑀻𑀮𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀢𑀣𑀸 𑀬𑀲𑁆𑀫𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸 𑀓𑀸𑀫𑁂𑀳𑀺 𑀘 𑀪𑀯𑁂𑀳𑀺 𑀘 𑀦𑀺𑀓𑁆𑀔𑀫𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀢𑀲𑁆𑀫𑀸 𑀲𑀓𑀮𑀲𑀁𑀓𑀺𑀮𑁂𑀲𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑀸𑀬 𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀫𑀳𑀸𑀲𑀫𑁆𑀩𑀸𑀥𑀢𑀸𑀬 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀦𑀸𑀦𑀸𑀯𑀺𑀥𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀩𑁆𑀬𑀸𑀓𑀼𑀮𑀢𑀸𑀬 𑀘 𑀖𑀭𑀸𑀯𑀸𑀲𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀻𑀦𑀁 𑀅𑀦𑁄𑀓𑀸𑀲𑀢𑀁, 𑀓𑀸𑀫𑀸𑀦𑀜𑁆𑀘 𑀲𑀢𑁆𑀣𑀥𑀸𑀭𑀸𑀮𑀕𑁆𑀕𑀫𑀥𑀼𑀩𑀺𑀦𑁆𑀤𑀼 𑀯𑀺𑀬 𑀘 𑀅𑀯𑀮𑀺𑀬𑁆𑀳𑀫𑀸𑀦𑀸 𑀧𑀭𑀺𑀢𑁆𑀢𑀲𑁆𑀲𑀸𑀤𑀸 𑀯𑀺𑀧𑀼𑀮𑀸𑀦𑀢𑁆𑀣𑀸𑀦𑀼𑀩𑀦𑁆𑀥𑀸𑀢𑀺 𑀘, 𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑁂𑀦 𑀕𑀳𑁂𑀢𑀩𑁆𑀩𑀦𑀘𑁆𑀘𑀁 𑀯𑀺𑀬 𑀧𑀭𑀺𑀢𑁆𑀢𑀓𑀸𑀮𑀽𑀧𑀮𑀩𑁆𑀪𑀸, 𑀉𑀫𑁆𑀫𑀢𑁆𑀢𑀓𑀸𑀮𑀗𑁆𑀓𑀸𑀭𑁄 𑀯𑀺𑀬 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀅𑀦𑀼𑀪𑀯𑀺𑀢𑀩𑁆𑀩𑀸, 𑀓𑀭𑀻𑀲𑀸𑀯𑀘𑁆𑀙𑀸𑀤𑀦𑀸 𑀯𑀺𑀬 𑀧𑀢𑀺𑀓𑀸𑀭𑀪𑀽𑀢𑀸, 𑀉𑀤𑀓𑀢𑁂𑀫𑀺𑀢𑀗𑁆𑀕𑀼𑀮𑀺𑀬𑀸 𑀢𑀦𑀽𑀤𑀓𑀧𑀸𑀦𑀁 𑀯𑀺𑀬 𑀅𑀢𑀺𑀢𑁆𑀢𑀺𑀓𑀭𑀸, 𑀙𑀸𑀢𑀚𑁆𑀛𑀢𑁆𑀢𑀪𑁄𑀚𑀦𑀁 𑀯𑀺𑀬 𑀲𑀸𑀩𑀸𑀥𑀸, 𑀩𑀴𑀺𑀲𑀸𑀫𑀺𑀲𑀁 𑀯𑀺𑀬 𑀩𑁆𑀬𑀲𑀦𑀲𑀦𑁆𑀦𑀺𑀧𑀸𑀢𑀓𑀸𑀭𑀡𑀁, 𑀅𑀕𑁆𑀕𑀺𑀲𑀦𑁆𑀢𑀸𑀧𑁄 𑀯𑀺𑀬 𑀓𑀸𑀮𑀢𑁆𑀢𑀬𑁂𑀧𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸, 𑀫𑀓𑁆𑀓𑀝𑀮𑁂𑀧𑁄 𑀯𑀺𑀬 𑀩𑀦𑁆𑀥𑀦𑀺𑀫𑀺𑀢𑁆𑀢𑀁, 𑀖𑀸𑀢𑀓𑀸𑀯𑀘𑁆𑀙𑀸𑀤𑀦𑀸 𑀯𑀺𑀬 𑀅𑀦𑀢𑁆𑀣𑀘𑁆𑀙𑀸𑀤𑀦𑀸, 𑀲𑀧𑀢𑁆𑀢𑀕𑀸𑀫𑀯𑀸𑀲𑁄 𑀯𑀺𑀬 𑀪𑀬𑀝𑁆𑀞𑀸𑀦𑀪𑀽𑀢𑀸, 𑀧𑀘𑁆𑀘𑀢𑁆𑀣𑀺𑀓𑀧𑁄𑀲𑀓𑁄 ¶ 𑀯𑀺𑀬 𑀓𑀺𑀮𑁂𑀲𑀫𑀸𑀭𑀸𑀤𑀻𑀦𑀁 𑀆𑀫𑀺𑀲𑀪𑀽𑀢𑀸, 𑀙𑀡𑀲𑀫𑁆𑀧𑀢𑁆𑀢𑀺𑀬𑁄 𑀯𑀺𑀬 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸, 𑀓𑁄𑀝𑀭𑀕𑁆𑀕𑀺 𑀯𑀺𑀬 𑀅𑀦𑁆𑀢𑁄𑀤𑀸𑀳𑀓𑀸, 𑀧𑀼𑀭𑀸𑀡𑀓𑀽𑀧𑀸𑀯𑀮𑀫𑁆𑀩𑀻𑀩𑀻𑀭𑀡𑀫𑀥𑀼𑀧𑀺𑀡𑁆𑀟𑀁 𑀯𑀺𑀬 𑀅𑀦𑁂𑀓𑀸𑀤𑀻𑀦𑀯𑀸, 𑀮𑁄𑀡𑀽𑀤𑀓𑀧𑀸𑀦𑀁 𑀯𑀺𑀬 𑀧𑀺𑀧𑀸𑀲𑀸𑀳𑁂𑀢𑀼𑀪𑀽𑀢𑀸, 𑀲𑀼𑀭𑀸𑀫𑁂𑀭𑀬𑀁 𑀯𑀺𑀬 𑀦𑀻𑀘𑀚𑀦𑀲𑁂𑀯𑀺𑀢𑀸, 𑀅𑀧𑁆𑀧𑀲𑁆𑀲𑀸𑀤𑀢𑀸𑀬 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸𑀢𑀺𑀆𑀤𑀺𑀦𑀸 ¶ (𑀫. 𑀦𑀺. 𑁧.𑁨𑁩𑁪; 𑁨.𑁪𑁨; 𑀧𑀸𑀘𑀺. 𑁪𑁧𑁭; 𑀫𑀳𑀸𑀦𑀺. 𑁩; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁪𑁭) 𑀘 𑀦𑀬𑁂𑀦 𑀆𑀤𑀻𑀦𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀧𑀯𑀺𑀯𑁂𑀓𑀉𑀧𑀲𑀫𑀲𑀼𑀔𑀸𑀤𑀻𑀲𑀼 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀦𑁂𑀓𑁆𑀔𑀫𑁆𑀫𑀁 𑀧𑀩𑁆𑀩𑀚𑁆𑀚𑀸𑀫𑀽𑀮𑀓𑀁, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀢𑀸𑀯 𑀅𑀦𑀼𑀝𑁆𑀞𑀸𑀢𑀩𑁆𑀩𑀸. 𑀧𑀩𑁆𑀩𑀚𑁆𑀚𑀫𑀦𑀼𑀢𑀺𑀝𑁆𑀞𑀦𑁆𑀢𑁂𑀦 𑀘 𑀫𑀳𑀸𑀲𑀢𑁆𑀢𑁂𑀦 𑀅𑀲𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀫𑁆𑀫𑀯𑀸𑀤𑀻𑀦𑀁 𑀓𑀺𑀭𑀺𑀬𑀯𑀸𑀤𑀻𑀦𑀁 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀩𑁆𑀩𑀚𑁆𑀚𑀸 𑀅𑀦𑀼𑀝𑁆𑀞𑀸𑀢𑀩𑁆𑀩𑀸.

𑀉𑀧𑁆𑀧𑀦𑁆𑀦𑁂𑀲𑀼 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀢𑁂𑀲𑀁 𑀲𑀸𑀲𑀦𑁂 𑀏𑀯 𑀧𑀩𑁆𑀩𑀚𑀺𑀢𑀩𑁆𑀩𑀁. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀬𑀣𑀸𑀯𑀼𑀢𑁆𑀢𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀢𑀲𑁆𑀲𑀸 𑀏𑀯 𑀳𑀺 𑀲𑀻𑀮𑀧𑀸𑀭𑀫𑀺𑀬𑀸 𑀯𑁄𑀤𑀸𑀧𑀦𑀢𑁆𑀣𑀁 𑀥𑀼𑀢𑀕𑀼𑀡𑀸 𑀲𑀫𑀸𑀤𑀸𑀢𑀩𑁆𑀩𑀸. 𑀲𑀫𑀸𑀤𑀺𑀦𑁆𑀦𑀥𑀼𑀢𑀥𑀫𑁆𑀫𑀸 𑀳𑀺 𑀫𑀳𑀸𑀧𑀼𑀭𑀺𑀲𑀸 𑀲𑀫𑁆𑀫𑀤𑁂𑀯 𑀢𑁂 ¶ 𑀧𑀭𑀺𑀳𑀭𑀦𑁆𑀢𑀸 𑀅𑀧𑁆𑀧𑀺𑀘𑁆𑀙𑀸𑀲𑀦𑁆𑀢𑀼𑀝𑁆𑀞𑀸𑀲𑀮𑁆𑀮𑁂𑀔𑀧𑀯𑀺𑀯𑁂𑀓𑀅𑀲𑀁𑀲𑀕𑁆𑀕𑀯𑀻𑀭𑀺𑀬𑀸𑀭𑀫𑁆𑀪𑀲𑀼𑀪𑀭𑀢𑀸𑀤𑀺- 𑀕𑀼𑀡𑀲𑀮𑀺𑀮𑀯𑀺𑀓𑁆𑀔𑀸𑀮𑀺𑀢𑀓𑀺𑀮𑁂𑀲𑀫𑀮𑀢𑀸𑀬 𑀅𑀦𑀯𑀚𑁆𑀚𑀲𑀻𑀮𑀯𑀢𑀕𑀼𑀡𑀧𑀭𑀺𑀲𑀼𑀤𑁆𑀥𑀲𑀩𑁆𑀩𑀲𑀫𑀸𑀘𑀸𑀭𑀸 𑀧𑁄𑀭𑀸𑀡𑁂 𑀅𑀭𑀺𑀬𑀯𑀁𑀲𑀢𑁆𑀢𑀬𑁂 𑀧𑀢𑀺𑀝𑁆𑀞𑀺𑀢𑀸 𑀘𑀢𑀼𑀢𑁆𑀣𑀁 𑀪𑀸𑀯𑀦𑀸𑀭𑀸𑀫𑀢𑀸𑀲𑀗𑁆𑀔𑀸𑀢𑀁 𑀅𑀭𑀺𑀬𑀯𑀁𑀲𑀁 𑀅𑀥𑀺𑀕𑀦𑁆𑀢𑀼𑀁 𑀘𑀢𑁆𑀢𑀸𑀭𑀻𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀣𑀸𑀭𑀳𑀁 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀏𑀯𑀁 𑀳𑀺𑀲𑁆𑀲 𑀲𑀫𑁆𑀫𑀤𑁂𑀯 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀧𑀭𑀺𑀧𑀽𑀭𑀺𑀢𑀸 𑀳𑁄𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀢𑁂𑀭𑀲𑀳𑀺 𑀥𑀼𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀓𑀲𑀺𑀡𑀸𑀦𑀺, 𑀤𑀲 𑀅𑀲𑀼𑀪𑀸𑀦𑀺, 𑀤𑀲𑀸𑀦𑀼𑀲𑁆𑀲𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸, 𑀏𑀓𑀸 𑀲𑀜𑁆𑀜𑀸, 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀻𑀲𑀸𑀬 𑀲𑀫𑀸𑀥𑀺𑀪𑀸𑀯𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀪𑀸𑀯𑀦𑀸𑀯𑀺𑀥𑀸𑀦𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀦𑀺. 𑀢𑀁 𑀧𑀦𑁂𑀢𑀁 𑀲𑀩𑁆𑀩𑀁 𑀬𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁨 𑀆𑀤𑀬𑁄, 𑁪𑁭, 𑁫𑁫) 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺. 𑀏𑀯𑀫𑁂𑀢𑁆𑀣 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀧𑀜𑁆𑀜𑀸𑀧𑀸𑀭𑀫𑀺𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀬𑀲𑁆𑀫𑀸 𑀧𑀜𑁆𑀜𑀸 𑀆𑀮𑁄𑀓𑁄 𑀯𑀺𑀬 𑀅𑀦𑁆𑀥𑀓𑀸𑀭𑁂𑀦 𑀫𑁄𑀳𑁂𑀦 𑀲𑀳 𑀦 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀫𑁄𑀳𑀓𑀸𑀭𑀡𑀸𑀦𑀺 𑀢𑀸𑀯 𑀩𑁄𑀥𑀺𑀲𑀢𑁆𑀢𑁂𑀦 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣𑀺𑀫𑀸𑀦𑀺 ¶ 𑀫𑁄𑀳𑀓𑀸𑀭𑀡𑀸𑀦𑀺 𑁋 𑀅𑀭𑀢𑀺 𑀢𑀦𑁆𑀤𑀺 𑀯𑀺𑀚𑀫𑁆𑀪𑀺𑀢𑀸 𑀆𑀮𑀲𑀺𑀬𑀁 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀦𑀺𑀤𑁆𑀤𑀸𑀲𑀻𑀮𑀢𑀸 𑀅𑀦𑀺𑀘𑁆𑀙𑀬𑀲𑀻𑀮𑀢𑀸 𑀜𑀸𑀡𑀲𑁆𑀫𑀺𑀁 𑀅𑀓𑀼𑀢𑀽𑀳𑀮𑀢𑀸 𑀫𑀺𑀘𑁆𑀙𑀸𑀥𑀺𑀫𑀸𑀦𑁄 𑀅𑀧𑀭𑀺𑀧𑀼𑀘𑁆𑀙𑀓𑀢𑀸 𑀓𑀸𑀬𑀲𑁆𑀲 𑀦 𑀲𑀫𑁆𑀫𑀸𑀧𑀭𑀺𑀳𑀸𑀭𑁄 ¶ 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑀸 𑀤𑀼𑀧𑁆𑀧𑀜𑁆𑀜𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑁂𑀯𑀦𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀧𑀬𑀺𑀭𑀼𑀧𑀸𑀲𑀦𑀸 𑀅𑀢𑁆𑀢𑀧𑀭𑀺𑀪𑀯𑁄 𑀫𑀺𑀘𑁆𑀙𑀸𑀯𑀺𑀓𑀧𑁆𑀧𑁄 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀢𑀸 𑀅𑀲𑀁𑀯𑁂𑀕𑀲𑀻𑀮𑀢𑀸 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺. 𑀲𑀗𑁆𑀔𑁂𑀧𑀢𑁄 𑀬𑁂 𑀯𑀸 𑀧𑀦 𑀥𑀫𑁆𑀫𑁂 𑀆𑀲𑁂𑀯𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀧𑀜𑁆𑀜𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀭𑀺𑀳𑀸𑀬𑀢𑀺. 𑀇𑀢𑀺 𑀇𑀫𑀸𑀦𑀺 𑀲𑀫𑁆𑀫𑁄𑀳𑀓𑀸𑀭𑀡𑀸𑀦𑀺 𑀧𑀭𑀺𑀯𑀚𑁆𑀚𑁂𑀦𑁆𑀢𑁂𑀦 𑀩𑀸𑀳𑀼𑀲𑀘𑁆𑀘𑁂 𑀛𑀸𑀦𑀸𑀤𑀻𑀲𑀼 𑀘 𑀬𑁄𑀕𑁄 𑀓𑀭𑀡𑀻𑀬𑁄.

𑀢𑀢𑁆𑀣𑀸𑀬𑀁 𑀩𑀸𑀳𑀼𑀲𑀘𑁆𑀘𑀲𑁆𑀲 𑀯𑀺𑀲𑀬𑀯𑀺𑀪𑀸𑀕𑁄 𑁋 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀢𑀣𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀧𑁆𑀧𑀓𑀸𑀭𑀪𑁂𑀤𑀸 𑀘, 𑀬𑀸𑀦𑀺 𑀘 𑀮𑁄𑀓𑁂 𑀅𑀦𑀯𑀚𑁆𑀚𑀸𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺, 𑀬𑁂 𑀘 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀬𑁄𑀕𑁆𑀕𑀸 ¶ 𑀩𑁆𑀬𑀸𑀓𑀭𑀡𑀯𑀺𑀲𑁂𑀲𑀸, 𑀇𑀢𑀺 𑀏𑀯𑀁 𑀧𑀓𑀸𑀭𑀁 𑀲𑀓𑀮𑀫𑁂𑀯 𑀲𑀼𑀢𑀯𑀺𑀲𑀬𑀁 𑀉𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀲𑀢𑀺𑀬𑀸 𑀯𑀻𑀭𑀺𑀬𑁂𑀦 𑀘 𑀲𑀸𑀥𑀼𑀓𑀁 𑀉𑀕𑁆𑀕𑀳𑀡𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀧𑀭𑀺𑀧𑀼𑀘𑁆𑀙𑀸𑀳𑀺 𑀑𑀕𑀸𑀳𑁂𑀢𑁆𑀯𑀸 𑀢𑀢𑁆𑀣 𑀘 𑀧𑀭𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑁂𑀦 𑀲𑀼𑀢𑀫𑀬𑀸 𑀧𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸.

𑀢𑀣𑀸 𑀲𑀢𑁆𑀢𑀸𑀦𑀁 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑀪𑀽𑀢𑀸 𑀆𑀬𑀸𑀧𑀸𑀬𑀉𑀧𑀸𑀬𑀓𑁄𑀲𑀮𑁆𑀮𑀪𑀽𑀢𑀸 𑀘 𑀧𑀜𑁆𑀜𑀸 𑀳𑀺𑀢𑁂𑀲𑀺𑀢𑀁 𑀦𑀺𑀲𑁆𑀲𑀸𑀬 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁 𑀧𑀯𑀢𑁆𑀢𑁂𑀢𑀩𑁆𑀩𑀸. 𑀢𑀣𑀸 𑀔𑀦𑁆𑀥𑀸𑀤𑀻𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑀫𑀼𑀔𑁂𑀦 𑀢𑁂 𑀦𑀺𑀚𑁆𑀛𑀸𑀦𑀁 𑀔𑀫𑀸𑀧𑁂𑀦𑁆𑀢𑁂𑀦 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸. 𑀔𑀦𑁆𑀥𑀸𑀤𑀻𑀦𑀁𑀬𑁂𑀯 𑀧𑀦 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀡𑀯𑀲𑁂𑀦 𑀮𑁄𑀓𑀺𑀬𑀧𑀭𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀧𑀜𑁆𑀜𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑀺𑀤𑀁 𑀬𑀣𑀸𑀭𑀳𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀦 𑀏𑀢𑁆𑀣 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀥𑀫𑁆𑀫𑁂 𑀩𑀸𑀳𑀺𑀭𑀓𑀥𑀫𑁆𑀫𑁂 𑀘 𑀦𑀺𑀩𑁆𑀩𑀺𑀲𑁂𑀲𑀁 𑀧𑀭𑀺𑀚𑀸𑀦𑀦𑁆𑀢𑁄 𑀢𑀢𑁆𑀣 𑀆𑀲𑀗𑁆𑀕𑀁 𑀧𑀚𑀳𑀦𑁆𑀢𑁄 𑀧𑀭𑁂 𑀘 𑀢𑀢𑁆𑀣 𑀢𑀁 𑀚𑀳𑀸𑀧𑁂𑀦𑁆𑀢𑁄 𑀓𑁂𑀯𑀮𑀁 𑀓𑀭𑀼𑀡𑀸𑀯𑀲𑁂𑀦𑁂𑀯 𑀬𑀸𑀯 𑀦 𑀩𑀼𑀤𑁆𑀥𑀕𑀼𑀡𑀸 ¶ 𑀳𑀢𑁆𑀣𑀢𑀮𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑁂 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑁂𑀳𑀺 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀬𑁄 𑀘 𑀮𑁄𑀓𑀺𑀬𑀸 𑀯𑀲𑀻𑀪𑀸𑀯𑀁 𑀧𑀸𑀧𑁂𑀦𑁆𑀢𑁄 𑀧𑀜𑁆𑀜𑀸𑀬 𑀫𑀢𑁆𑀣𑀓𑀁 𑀧𑀸𑀧𑀼𑀡𑀸𑀢𑀺.

𑀢𑀢𑁆𑀣 𑀬𑀸 𑀇𑀫𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀦𑁆𑀢𑀺 𑀲𑀧𑀭𑀺𑀪𑀡𑁆𑀟𑀸 𑀧𑀜𑁆𑀘𑀮𑁄𑀓𑀺𑀬𑀅𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀸 𑀪𑀸𑀯𑀦𑀸𑀧𑀜𑁆𑀜𑀸, 𑀬𑀸 𑀘 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼 𑀪𑀽𑀫𑀺𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀜𑀸𑀡𑀧𑀭𑀺𑀘𑀬𑀁 𑀓𑀢𑁆𑀯𑀸 𑀲𑀻𑀮𑀯𑀺𑀲𑀼𑀤𑁆𑀥𑀺𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀢𑀺 ¶ 𑀫𑀽𑀮𑀪𑀽𑀢𑀸𑀲𑀼 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀯𑀺𑀲𑀼𑀤𑁆𑀥𑀻𑀲𑀼 𑀧𑀢𑀺𑀝𑁆𑀞𑀸𑀬 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺- 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀲𑀭𑀻𑀭𑀪𑀽𑀢𑀸 𑀇𑀫𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 𑀪𑀸𑀯𑀦𑀸𑀧𑀜𑁆𑀜𑀸, 𑀢𑀸𑀲𑀁 𑀲𑀫𑁆𑀧𑀸𑀤𑀦𑀯𑀺𑀥𑀸𑀦𑀁 𑀬𑀲𑁆𑀫𑀸 ‘‘𑀢𑀢𑁆𑀣 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻𑀢𑀺𑀆𑀤𑀺𑀓𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀸𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀬𑁄𑀕𑀺𑀦𑀸’’𑀢𑀺𑀆𑀤𑀺𑀦𑀸 ‘‘𑀔𑀦𑁆𑀥𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀘 𑀯𑀺𑀲𑀬𑀯𑀺𑀪𑀸𑀕𑁂𑀦 𑀲𑀤𑁆𑀥𑀺𑀁 ¶ 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁩𑁦 𑀆𑀤𑀬𑁄) 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀧𑀜𑁆𑀜𑀸 𑀆𑀕𑀢𑀸, 𑀇𑀥 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀅𑀧𑀸𑀧𑁂𑀢𑁆𑀯𑀸 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁𑀬𑁂𑀯 𑀯𑀺𑀧𑀲𑁆𑀲𑀦𑀸 𑀞𑀧𑁂𑀢𑀩𑁆𑀩𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀏𑀯𑀫𑁂𑀢𑁆𑀣 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀸𑀪𑀺𑀦𑀻𑀳𑀸𑀭𑁂𑀦 𑀫𑀳𑀸𑀲𑀢𑁆𑀢𑁂𑀦 𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀢𑁆𑀣𑀁 𑀲𑀩𑁆𑀩𑀓𑀸𑀮𑀁 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁 𑀆𑀩𑀤𑁆𑀥𑀧𑀭𑀺𑀓𑀭𑀡𑁂𑀦, 𑀢𑀲𑁆𑀫𑀸 𑀓𑀸𑀮𑁂𑀦 𑀓𑀸𑀮𑀁 ‘‘𑀓𑁄 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀜𑀸𑀡𑀲𑀫𑁆𑀪𑀸𑀭𑁄 𑀯𑀸 𑀉𑀧𑀘𑀺𑀢𑁄, 𑀓𑀺𑀁 𑀯𑀸 𑀫𑀬𑀸 𑀧𑀭𑀳𑀺𑀢𑀁 𑀓𑀢’’𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀲𑀢𑁆𑀢𑀳𑀺𑀢𑀢𑁆𑀣𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀸𑀬 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀪𑀽𑀢𑀁 𑀯𑀢𑁆𑀣𑀼 𑀓𑀸𑀬𑁂 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑁂𑀦 𑀑𑀲𑁆𑀲𑀚𑀺𑀢𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀸, 𑀢𑀁 𑀲𑀩𑁆𑀩𑀁 𑀲𑀫𑁆𑀩𑁄𑀥𑀺𑀬𑀁 ¶ 𑀦𑀺𑀦𑁆𑀦𑀘𑀺𑀢𑁆𑀢𑁂𑀦𑁂𑀯 𑀓𑀸𑀢𑀩𑁆𑀩𑀁, 𑀩𑁄𑀥𑀺𑀬𑀸 𑀧𑀭𑀺𑀡𑀸𑀫𑁂𑀢𑀩𑁆𑀩𑀁. 𑀉𑀴𑀸𑀭𑁂𑀳𑀺 𑀇𑀢𑁆𑀢𑀭𑁂𑀳𑀺 𑀘 𑀓𑀸𑀫𑁂𑀳𑀺 𑀯𑀺𑀦𑀺𑀯𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀲𑀩𑁆𑀩𑀸𑀲𑀼𑀧𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀉𑀧𑀸𑀬𑀓𑁄𑀲𑀮𑁆𑀮𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀳𑀺𑀢𑁂 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀪𑀯𑀺𑀢𑀩𑁆𑀩𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀲𑀩𑁆𑀩𑀲𑀳𑁂𑀦 𑀅𑀯𑀺𑀲𑀁𑀯𑀸𑀤𑀺𑀦𑀸. 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀅𑀦𑁄𑀥𑀺𑀲𑁄 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀨𑀭𑀺𑀢𑀩𑁆𑀩𑀸. 𑀬𑀸 𑀓𑀸𑀘𑀺 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺, 𑀲𑀩𑁆𑀩𑀸 𑀲𑀸 𑀅𑀢𑁆𑀢𑀦𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸. 𑀲𑀩𑁆𑀩𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀁 𑀅𑀩𑁆𑀪𑀦𑀼𑀫𑁄𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑀸𑀦𑀁 𑀫𑀳𑀦𑁆𑀢𑀢𑀸 𑀫𑀳𑀸𑀦𑀼𑀪𑀸𑀯𑀢𑀸 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀬𑀜𑁆𑀘 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀸, 𑀢𑀁 𑀲𑀩𑁆𑀩𑀁 𑀩𑁄𑀥𑀺𑀦𑀺𑀦𑁆𑀦𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀁 𑀓𑀸𑀢𑀩𑁆𑀩𑀁. 𑀇𑀫𑀺𑀦𑀸 𑀳𑀺 𑀉𑀧𑀸𑀬𑁂𑀦 𑀤𑀸𑀦𑀸𑀤𑀻𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲 𑀣𑀸𑀫𑀯𑀢𑁄 𑀤𑀴𑁆𑀳𑀧𑀭𑀓𑁆𑀓𑀫𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀧𑀭𑀺𑀫𑁂𑀬𑁆𑀬𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀜𑀸𑀡𑀲𑀫𑁆𑀪𑀸𑀭𑁄 𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀘𑀻𑀬𑀢𑀺.

𑀅𑀧𑀺 𑀘 𑀲𑀢𑁆𑀢𑀸𑀦𑀁 𑀧𑀭𑀺𑀪𑁄𑀕𑀢𑁆𑀣𑀁 𑀧𑀭𑀺𑀧𑀸𑀮𑀦𑀢𑁆𑀣𑀜𑁆𑀘 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀚𑀻𑀯𑀺𑀢𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀔𑀼𑀧𑁆𑀧𑀺𑀧𑀸𑀲𑀸𑀲𑀻𑀢𑀼𑀡𑁆𑀳𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀧𑀢𑀺𑀓𑀸𑀭𑁄 ¶ 𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀉𑀧𑀦𑁂𑀢𑀩𑁆𑀩𑁄 𑀘. 𑀬𑀜𑁆𑀘 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀔𑀧𑀢𑀺𑀓𑀸𑀭𑀚𑀁 𑀲𑀼𑀔𑀁 𑀅𑀢𑁆𑀢𑀦𑀸 𑀧𑀝𑀺𑀮𑀪𑀢𑀺, 𑀢𑀣𑀸 𑀭𑀫𑀡𑀻𑀬𑁂𑀲𑀼 𑀆𑀭𑀸𑀫𑀼𑀬𑁆𑀬𑀸𑀦𑀧𑀸𑀲𑀸𑀤𑀢𑀴𑀸𑀓𑀸𑀤𑀻𑀲𑀼 𑀅𑀭𑀜𑁆𑀜𑀸𑀬𑀢𑀦𑁂𑀲𑀼 𑀘 𑀓𑀸𑀬𑀘𑀺𑀢𑁆𑀢𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀅𑀢𑁆𑀢𑀦𑀸 ¶ 𑀲𑀼𑀔𑀁 𑀧𑀝𑀺𑀮𑀪𑀢𑀺, 𑀬𑀜𑁆𑀘 𑀲𑀼𑀡𑀸𑀢𑀺 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀪𑀽𑀢𑀁 𑀈𑀤𑀺𑀲𑀁 𑀦𑀸𑀫 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀻𑀢𑀺, 𑀢𑀁 𑀲𑀩𑁆𑀩𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁄 𑀉𑀧𑀲𑀁𑀳𑀭𑀢𑀻𑀢𑀺. 𑀅𑀬𑀁 𑀢𑀸𑀯 𑀦𑀬𑁄 𑀅𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑁆𑀲.

𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀅𑀢𑁆𑀢𑀦𑀸 𑀬𑀣𑀸𑀦𑀼𑀪𑀽𑀢𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀩𑁆𑀩𑀢𑁆𑀢𑀁 𑀧𑀻𑀢𑀺𑀁 𑀧𑀲𑁆𑀲𑀤𑁆𑀥𑀺𑀁 𑀲𑀼𑀔𑀁 𑀲𑀫𑀸𑀥𑀺𑀁 𑀬𑀣𑀸𑀪𑀽𑀢𑀜𑀸𑀡𑀜𑁆𑀘 𑀲𑀢𑁆𑀢𑁂𑀲𑀼 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀉𑀧𑀲𑀁𑀳𑀭𑀢𑀺 𑀧𑀭𑀺𑀡𑀸𑀫𑁂𑀢𑀺. 𑀢𑀣𑀸 𑀫𑀳𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑁂 𑀢𑀲𑁆𑀲 𑀘 𑀦𑀺𑀫𑀺𑀢𑁆𑀢𑀪𑀽𑀢𑁂 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑀼𑀓𑁆𑀔𑁂 𑀦𑀺𑀫𑀼𑀕𑁆𑀕𑀁 𑀲𑀢𑁆𑀢𑀦𑀺𑀓𑀸𑀬𑀁 𑀤𑀺𑀲𑁆𑀯𑀸 𑀢𑀢𑁆𑀭𑀸𑀧𑀺 𑀙𑁂𑀤𑀦𑀪𑁂𑀤𑀦𑀨𑀸𑀮𑀦𑀧𑀺𑀁𑀲𑀦𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀚𑀦𑀺𑀢𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀦𑀺𑀭𑀦𑁆𑀢𑀭𑀁 𑀘𑀺𑀭𑀓𑀸𑀮𑀁 𑀯𑁂𑀤𑀺𑀬𑀦𑁆𑀢𑁂 𑀦𑀸𑀭𑀓𑁂, 𑀅𑀜𑁆𑀜𑀫𑀜𑁆𑀜𑀁 𑀓𑀼𑀚𑁆𑀛𑀦𑀲𑀦𑁆𑀢𑀸𑀧𑀦𑀯𑀺𑀳𑁂𑀞𑀦𑀳𑀺𑀁𑀲𑀦𑀧𑀭𑀸𑀥𑀻𑀦𑀢𑀸𑀤𑀻𑀳𑀺 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂 𑀢𑀺𑀭𑀘𑁆𑀙𑀸𑀦𑀕𑀢𑁂, 𑀚𑁄𑀢𑀺𑀫𑀸𑀮𑀸𑀓𑀼𑀮𑀲𑀭𑀻𑀭𑁂 𑀔𑀼𑀧𑁆𑀧𑀺𑀧𑀸𑀲𑀸𑀯𑀸𑀢𑀸𑀢𑀧𑀸𑀤𑀻𑀳𑀺 𑀟𑀬𑁆𑀳𑀫𑀸𑀦𑁂 ¶ 𑀘 𑀯𑀺𑀲𑀼𑀲𑁆𑀲𑀫𑀸𑀦𑁂 𑀘 𑀯𑀦𑁆𑀢𑀔𑁂𑀴𑀸𑀤𑀺𑀆𑀳𑀸𑀭𑁂 𑀉𑀤𑁆𑀥𑀩𑀸𑀳𑀼𑀁 𑀯𑀺𑀭𑀯𑀦𑁆𑀢𑁂 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀤𑀺𑀓𑁂 𑀫𑀳𑀸𑀤𑀼𑀓𑁆𑀔𑀁 𑀯𑁂𑀤𑀺𑀬𑀫𑀸𑀦𑁂 𑀧𑁂𑀢𑁂 𑀘, 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑁂 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀓𑀸𑀭𑀡𑀸𑀬𑁄𑀕𑁂𑀦 𑀤𑀼𑀩𑁆𑀩𑀡𑁆𑀡𑀤𑀼𑀤𑁆𑀤𑀲𑀺𑀓𑀤𑀮𑀺𑀤𑁆𑀤𑀸𑀤𑀺𑀪𑀸𑀯𑁂𑀦 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀆𑀩𑀸𑀥𑀬𑁄𑀕𑁂𑀦 𑀩𑀮𑀯𑀦𑁆𑀢𑁂𑀳𑀺 𑀅𑀪𑀺𑀪𑀯𑀦𑀻𑀬𑀢𑁄 𑀧𑀭𑁂𑀲𑀁 𑀯𑀳𑀦𑀢𑁄 𑀧𑀭𑀸𑀥𑀻𑀦𑀢𑁄 𑀘, 𑀦𑀸𑀭𑀓𑁂 𑀧𑁂𑀢𑁂 𑀢𑀺𑀭𑀘𑁆𑀙𑀸𑀦𑀕𑀢𑁂 𑀘, 𑀅𑀢𑀺𑀲𑀬𑀦𑁆𑀢𑁂 𑀅𑀧𑀸𑀬𑀤𑀼𑀓𑁆𑀔𑀦𑀺𑀩𑁆𑀩𑀺𑀲𑁂𑀲𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑁂 𑀫𑀦𑀼𑀲𑁆𑀲𑁂 𑀘, 𑀢𑀣𑀸 𑀯𑀺𑀲𑀬𑀯𑀺𑀲𑀧𑀭𑀺𑀪𑁄𑀕𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸𑀬 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑁂𑀦 𑀟𑀬𑁆𑀳𑀫𑀸𑀦𑁂 𑀯𑀸𑀢𑀯𑁂𑀕𑀲𑀫𑀼𑀝𑁆𑀞𑀺𑀢𑀚𑀸𑀮𑀸𑀲𑀫𑀺𑀤𑁆𑀥𑀲𑀼𑀓𑁆𑀔𑀓𑀝𑁆𑀞𑀲𑀦𑁆𑀦𑀺𑀧𑀸𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀯𑀺𑀬 𑀅𑀦𑀼𑀧𑀲𑀦𑁆𑀢𑀧𑀭𑀺𑀴𑀸𑀳𑀯𑀼𑀢𑁆𑀢𑀺𑀓𑁂 𑀅𑀦𑀼𑀧𑀲𑀦𑁆𑀢𑀦𑀺𑀳𑀢𑀧𑀭𑀸𑀥𑀻𑀦𑁂 𑀓𑀸𑀫𑀸𑀯𑀘𑀭𑀤𑁂𑀯𑁂 𑀘, 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀯𑀺𑀤𑀽𑀭𑀫𑀸𑀓𑀸𑀲𑀁 𑀯𑀺𑀕𑀸𑀳𑀺𑀢𑀲𑀓𑀼𑀦𑁆𑀢𑀸 𑀯𑀺𑀬 𑀩𑀮𑀯𑀢𑀸 𑀤𑀽𑀭𑁂 𑀧𑀸𑀡𑀺𑀦𑀸 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀘, 𑀲𑀢𑀺𑀧𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀬 𑀧𑀸𑀢𑀧𑀭𑀺𑀬𑁄𑀲𑀸𑀦𑀸 𑀅𑀦𑀢𑀺𑀓𑁆𑀓𑀦𑁆𑀢𑀚𑀸𑀢𑀺𑀚𑀭𑀸𑀫𑀭𑀡𑀸 𑀏𑀯𑀸𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑁂𑀦 𑀫𑀳𑀦𑁆𑀢𑀁 𑀲𑀁𑀯𑁂𑀕𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀅𑀦𑁄𑀥𑀺𑀲𑁄 𑀲𑀢𑁆𑀢𑀸 𑀨𑀭𑀺𑀢𑀩𑁆𑀩𑀸. 𑀏𑀯𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀩𑁄𑀥𑀺𑀲𑀫𑁆𑀪𑀸𑀭𑁂 𑀦𑀺𑀭𑀦𑁆𑀢𑀭𑀁 𑀉𑀧𑀘𑀺𑀦𑀦𑁆𑀢𑁂𑀦 𑀬𑀣𑀸 𑀧𑀸𑀭𑀫𑀺𑀬𑁄 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑀸 𑀲𑀸𑀢𑀘𑁆𑀘𑀓𑀸𑀭𑀺𑀦𑀸 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀦𑀸 𑀉𑀲𑁆𑀲𑀸𑀳𑁄 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀯𑀻𑀭𑀺𑀬𑀧𑀸𑀭𑀫𑀻 𑀧𑀭𑀺𑀧𑀽𑀭𑁂𑀢𑀩𑁆𑀩𑀸.

𑀅𑀧𑀺 ¶ 𑀘 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀯𑀺𑀧𑀼𑀮𑁄𑀴𑀸𑀭𑀯𑀺𑀫𑀮𑀦𑀺𑀭𑀼𑀧𑀫𑀦𑀺𑀭𑀽𑀧𑀓𑁆𑀓𑀺𑀮𑁂𑀲𑀕𑀼𑀡𑀦𑀺𑀘𑀬𑀦𑀺𑀥𑀸𑀦𑀪𑀽𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑀲𑁆𑀲 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑀦𑀬𑁄𑀕𑁆𑀕𑀁 𑀯𑀻𑀭𑀺𑀬𑀁 𑀦𑀸𑀫 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀫𑁂𑀯, 𑀬𑀁 𑀦 𑀧𑀘𑀼𑀭𑀚𑀦𑀸 ¶ 𑀲𑁄𑀢𑀼𑀫𑁆𑀧𑀺 𑀲𑀓𑁆𑀓𑀼𑀡𑀦𑁆𑀢𑀺, 𑀧𑀕𑁂𑀯 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀢𑀣𑀸 𑀳𑀺 𑀢𑀺𑀯𑀺𑀥𑀸 𑀅𑀪𑀺𑀦𑀻𑀳𑀸𑀭𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺, 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄, 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺, 𑀓𑀭𑀼𑀡𑁂𑀓𑀭𑀲𑀢𑀸, 𑀩𑀼𑀤𑁆𑀥𑀥𑀫𑁆𑀫𑁂𑀲𑀼 𑀲𑀘𑁆𑀙𑀺𑀓𑀭𑀡𑁂𑀦 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑁄 𑀦𑀺𑀚𑁆𑀛𑀸𑀦𑀔𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀦𑀺𑀭𑀼𑀧𑀮𑁂𑀧𑁄, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀧𑀺𑀬𑀧𑀼𑀢𑁆𑀢𑀲𑀜𑁆𑀜𑀸, 𑀲𑀁𑀲𑀸𑀭𑀤𑀼𑀓𑁆𑀔𑁂𑀳𑀺 𑀅𑀧𑀭𑀺𑀔𑁂𑀤𑁄, 𑀲𑀩𑁆𑀩𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄, 𑀢𑁂𑀦 𑀘 𑀦𑀺𑀭𑀢𑀺𑀫𑀸𑀦𑀢𑀸, 𑀅𑀥𑀺𑀲𑀻𑀮𑀸𑀤𑀺𑀅𑀥𑀺𑀝𑁆𑀞𑀸𑀦𑀁, 𑀢𑀢𑁆𑀣 𑀘 𑀅𑀘𑀜𑁆𑀘𑀮𑀢𑀸, 𑀓𑀼𑀲𑀮𑀓𑀺𑀭𑀺𑀬𑀸𑀲𑀼 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀯𑀺𑀯𑁂𑀓𑀦𑀺𑀦𑁆𑀦𑀘𑀺𑀢𑁆𑀢𑀢𑀸, 𑀛𑀸𑀦𑀸𑀦𑀼𑀬𑁄𑀕𑁄, 𑀅𑀦𑀯𑀚𑁆𑀚𑀥𑀫𑁆𑀫𑁂𑀦 𑀅𑀢𑀺𑀢𑁆𑀢𑀺, 𑀬𑀣𑀸𑀲𑀼𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑁂𑀲𑀁 𑀳𑀺𑀢𑀚𑁆𑀛𑀸𑀲𑀬𑁂𑀦 𑀤𑁂𑀲𑀦𑀸, 𑀲𑀢𑁆𑀢𑀸𑀦𑀁 𑀜𑀸𑀬𑁂 𑀦𑀺𑀯𑁂𑀲𑀦𑀸, 𑀆𑀭𑀫𑁆𑀪𑀤𑀴𑁆𑀳𑀢𑀸, 𑀥𑀻𑀭𑀯𑀻𑀭𑀪𑀸𑀯𑁄, 𑀧𑀭𑀸𑀧𑀯𑀸𑀤𑀧𑀭𑀸𑀧𑀓𑀸𑀭𑁂𑀲𑀼 𑀯𑀺𑀓𑀸𑀭𑀸𑀪𑀸𑀯𑁄, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀲𑀫𑀸𑀧𑀢𑁆𑀢𑀻𑀲𑀼 ¶ 𑀯𑀲𑀻𑀪𑀸𑀯𑁄, 𑀅𑀪𑀺𑀜𑁆𑀜𑀸𑀲𑀼 𑀩𑀮𑀧𑁆𑀧𑀢𑁆𑀢𑀺, 𑀮𑀓𑁆𑀔𑀡𑀢𑁆𑀢𑀬𑀸𑀯𑀩𑁄𑀥𑁄, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀬𑁄𑀕𑀓𑀫𑁆𑀫𑀸𑀪𑀺𑀬𑁄𑀕𑁂𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀦𑀯𑀮𑁄𑀓𑀼𑀢𑁆𑀢𑀭𑀸𑀯𑀓𑁆𑀓𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀓𑀸 𑀲𑀩𑁆𑀩𑀸𑀧𑀺 𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀢𑁆𑀢𑀺 𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦𑁂𑀯 𑀲𑀫𑀺𑀚𑁆𑀛𑀢𑀻𑀢𑀺 𑀅𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑁄𑀲𑁆𑀲𑀚𑁆𑀚𑀦𑁆𑀢𑁂𑀦 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀯𑀻𑀭𑀺𑀬𑀁 𑀬𑀣𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀲𑀫𑁆𑀧𑀚𑁆𑀚𑀫𑀸𑀦𑁂 𑀘 𑀬𑀣𑀸𑀯𑀼𑀢𑁆𑀢𑁂 𑀯𑀻𑀭𑀺𑀬𑁂 𑀔𑀦𑁆𑀢𑀺𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀬𑁄 𑀘 𑀤𑀸𑀦𑀲𑀻𑀮𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀩𑁄𑀥𑀺𑀲𑀫𑁆𑀪𑀸𑀭𑀸 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀲𑀫𑁆𑀧𑀦𑁆𑀦𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀔𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀝𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀲𑀢𑁆𑀢𑀸𑀦𑀁 𑀲𑀼𑀔𑀽𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁂𑀦 𑀩𑀳𑀼𑀥𑀸 𑀅𑀦𑀼𑀕𑁆𑀕𑀳𑀓𑀭𑀡𑀁 𑀤𑀸𑀦𑁂𑀦 𑀧𑀝𑀺𑀧𑀢𑁆𑀢𑀺, 𑀲𑀻𑀮𑁂𑀦 𑀢𑁂𑀲𑀁 𑀚𑀻𑀯𑀺𑀢𑀲𑀸𑀧𑀢𑁂𑀬𑁆𑀬𑀤𑀸𑀭𑀭𑀓𑁆𑀔𑀸𑀅𑀪𑁂𑀤𑀧𑀺𑀬𑀳𑀺𑀢𑀯𑀘𑀦𑀸𑀯𑀺𑀳𑀺𑀁𑀲𑀸𑀤𑀺𑀓𑀸𑀭𑀡𑀸𑀦𑀺, 𑀦𑁂𑀓𑁆𑀔𑀫𑁆𑀫𑁂𑀦 𑀢𑁂𑀲𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀥𑀫𑁆𑀫𑀤𑀸𑀦𑀸𑀤𑀺𑀦𑀸 𑀅𑀦𑁂𑀓𑀯𑀺𑀥𑀸 𑀳𑀺𑀢𑀘𑀭𑀺𑀬𑀸, 𑀧𑀜𑁆𑀜𑀸𑀬 𑀢𑁂𑀲𑀁 𑀳𑀺𑀢𑀓𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀁, 𑀯𑀻𑀭𑀺𑀬𑁂𑀦 𑀢𑀢𑁆𑀣 𑀉𑀲𑁆𑀲𑀸𑀳𑀸𑀭𑀫𑁆𑀪𑀅𑀲𑀁𑀳𑀻𑀭𑀸𑀦𑀺, 𑀔𑀦𑁆𑀢𑀺𑀬𑀸 𑀢𑀤𑀧𑀭𑀸𑀥𑀲𑀳𑀦𑀁, 𑀲𑀘𑁆𑀘𑁂𑀦 𑀦𑁂𑀲𑀁 𑀅𑀯𑀜𑁆𑀘𑀦𑀢𑀤𑀼𑀧𑀓𑀸𑀭𑀓𑀺𑀭𑀺𑀬𑀸𑀲𑀫𑀸𑀤𑀸𑀦𑀸𑀯𑀺𑀲𑀁𑀯𑀸𑀤𑀦𑀸𑀤𑀺, 𑀅𑀥𑀺𑀝𑁆𑀞𑀸𑀦𑁂𑀦 𑀢𑀤𑀼𑀧𑀓𑀸𑀭𑀓𑀭𑀡𑁂 𑀅𑀦𑀢𑁆𑀣𑀲𑀫𑁆𑀧𑀸𑀢𑁂𑀧𑀺 𑀅𑀘𑀮𑀦𑀁, 𑀫𑁂𑀢𑁆𑀢𑀸𑀬 𑀦𑁂𑀲𑀁 𑀳𑀺𑀢𑀲𑀼𑀔𑀸𑀦𑀼𑀘𑀺𑀦𑁆𑀢𑀦𑀁, 𑀉𑀧𑁂𑀓𑁆𑀔𑀸𑀬 𑀦𑁂𑀲𑀁 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀯𑀺𑀓𑀸𑀭𑀸𑀦𑀸𑀧𑀢𑁆𑀢𑀻𑀢𑀺 𑀏𑀯𑀁 𑀅𑀧𑀭𑀺𑀫𑀸𑀡𑁂 𑀲𑀢𑁆𑀢𑁂 𑀆𑀭𑀩𑁆𑀪 𑀅𑀦𑀼𑀓𑀫𑁆𑀧𑀺𑀢𑀲𑀩𑁆𑀩𑀲𑀢𑁆𑀢𑀲𑁆𑀲 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 ¶ 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑁄 𑀅𑀧𑀭𑀺𑀫𑁂𑀬𑁆𑀬𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀽𑀧𑀘𑀬𑁄 𑀏𑀢𑁆𑀣 𑀧𑀝𑀺𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀘𑁂𑀢𑀸𑀲𑀁 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀘 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑀦𑀁.

𑀓𑁄 𑀯𑀺𑀪𑀸𑀕𑁄𑀢𑀺? 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀬𑁄. 𑀢𑀢𑁆𑀣 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀳𑀺𑀢𑀓𑀭𑀡𑀸𑀪𑀺𑀦𑀺𑀦𑁆𑀦𑀸𑀲𑀬𑀧𑀬𑁄𑀕𑀲𑁆𑀲 𑀓𑀡𑁆𑀳𑀥𑀫𑁆𑀫𑀯𑁄𑀓𑀺𑀡𑁆𑀡𑀸 𑀲𑀼𑀓𑁆𑀓𑀥𑀫𑁆𑀫𑀸 𑀧𑀸𑀭𑀫𑀺𑀬𑁄 𑀏𑀯, 𑀢𑁂𑀳𑀺 𑀅𑀯𑁄𑀓𑀺𑀡𑁆𑀡𑀸 𑀲𑀼𑀓𑁆𑀓𑀥𑀫𑁆𑀫𑀸 𑀉𑀧𑀧𑀸𑀭𑀫𑀺𑀬𑁄, 𑀅𑀓𑀡𑁆𑀳𑀅𑀲𑀼𑀓𑁆𑀓𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀓𑁂𑀘𑀺. 𑀲𑀫𑀼𑀤𑀸𑀕𑀫𑀦𑀓𑀸𑀮𑁂𑀲𑀼 𑀯𑀸 𑀧𑀽𑀭𑀺𑀬𑀫𑀸𑀦𑀸 𑀧𑀸𑀭𑀫𑀺𑀬𑁄, 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀼𑀡𑁆𑀡𑀸 𑀉𑀧𑀧𑀸𑀭𑀫𑀺𑀬𑁄, 𑀩𑀼𑀤𑁆𑀥𑀪𑀽𑀫𑀺𑀬𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄. 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 ¶ 𑀯𑀸 𑀧𑀭𑀳𑀺𑀢𑀓𑀭𑀡𑀢𑁄 𑀧𑀸𑀭𑀫𑀺𑀬𑁄, 𑀅𑀢𑁆𑀢𑀳𑀺𑀢𑀓𑀭𑀡𑀢𑁄 𑀉𑀧𑀧𑀸𑀭𑀫𑀺𑀬𑁄, 𑀩𑀼𑀤𑁆𑀥𑀪𑀽𑀫𑀺𑀬𑀁 𑀩𑀮𑀯𑁂𑀲𑀸𑀭𑀚𑁆𑀚𑀲𑀫𑀥𑀺𑀕𑀫𑁂𑀦 𑀉𑀪𑀬𑀳𑀺𑀢𑀧𑀭𑀺𑀧𑀽𑀭𑀡𑀢𑁄 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄.

𑀏𑀯𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀡𑀺𑀥𑀸𑀦𑀸𑀭𑀫𑁆𑀪𑀧𑀭𑀺𑀦𑀺𑀝𑁆𑀞𑀸𑀦𑁂𑀲𑀼 𑀢𑁂𑀲𑀁 𑀯𑀺𑀪𑀸𑀕𑁄𑀢𑀺 𑀅𑀧𑀭𑁂. 𑀤𑁄𑀲𑀽𑀧𑀲𑀫𑀓𑀭𑀼𑀡𑀸𑀧𑀓𑀢𑀺𑀓𑀸𑀦𑀁 𑀪𑀯𑀲𑀼𑀔𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀭𑀫𑀲𑀼𑀔𑀧𑁆𑀧𑀢𑁆𑀢𑀸𑀦𑀁 ¶ 𑀧𑀼𑀜𑁆𑀜𑀽𑀧𑀘𑀬𑀪𑁂𑀤𑀢𑁄 𑀢𑀩𑁆𑀩𑀺𑀪𑀸𑀕𑁄𑀢𑀺 𑀅𑀜𑁆𑀜𑁂. 𑀮𑀚𑁆𑀚𑀸𑀲𑀢𑀺𑀫𑀸𑀦𑀸𑀧𑀲𑁆𑀲𑀬𑀸𑀦𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀥𑀺𑀧𑀢𑀻𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀕𑀭𑀼𑀓𑀸𑀦𑀁 𑀢𑀸𑀭𑀺𑀢𑀢𑀭𑀺𑀢𑀢𑀸𑀭𑀬𑀺𑀢𑀽𑀦𑀁 𑀅𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀸𑀭𑀫𑀻, 𑀉𑀧𑀧𑀸𑀭𑀫𑀻, 𑀧𑀭𑀫𑀢𑁆𑀣𑀧𑀸𑀭𑀫𑀻𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀢𑁄 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑁄𑀢𑀺 𑀓𑁂𑀘𑀺. 𑀘𑀺𑀢𑁆𑀢𑀧𑀡𑀺𑀥𑀺𑀢𑁄 𑀬𑀸𑀯 𑀯𑀘𑀻𑀧𑀡𑀺𑀥𑀺, 𑀢𑀸𑀯 𑀧𑀯𑀢𑁆𑀢𑀸 𑀲𑀫𑁆𑀪𑀸𑀭𑀸 𑀧𑀸𑀭𑀫𑀺𑀬𑁄, 𑀯𑀘𑀻𑀧𑀡𑀺𑀥𑀺𑀢𑁄 𑀬𑀸𑀯 𑀓𑀸𑀬𑀧𑀡𑀺𑀥𑀺, 𑀢𑀸𑀯 𑀧𑀯𑀢𑁆𑀢𑀸 𑀉𑀧𑀧𑀸𑀭𑀫𑀺𑀬𑁄, 𑀓𑀸𑀬𑀧𑀡𑀺𑀥𑀺𑀢𑁄 𑀧𑀪𑀼𑀢𑀺 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀅𑀧𑀭𑁂. 𑀅𑀜𑁆𑀜𑁂 𑀧𑀦 ‘‘𑀧𑀭𑀧𑀼𑀜𑁆𑀜𑀸𑀦𑀼𑀫𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑁆𑀪𑀸𑀭𑀸 𑀧𑀸𑀭𑀫𑀺𑀬𑁄, 𑀧𑀭𑁂𑀲𑀁 𑀓𑀸𑀭𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀉𑀧𑀧𑀸𑀭𑀫𑀺𑀬𑁄, 𑀲𑀬𑀁𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’’𑀢𑀺 𑀯𑀤𑀦𑁆𑀢𑀺.

𑀢𑀣𑀸 𑀪𑀯𑀲𑀼𑀔𑀸𑀯𑀳𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄 𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀲𑀼𑀔𑀸𑀯𑀳𑁄 𑀉𑀧𑀧𑀸𑀭𑀫𑀻, 𑀧𑀭𑁂𑀲𑀁 𑀢𑀤𑀼𑀪𑀬𑀲𑀼𑀔𑀸𑀯𑀳𑁄 𑀧𑀭𑀫𑀢𑁆𑀣𑀧𑀸𑀭𑀫𑀻𑀢𑀺 𑀏𑀓𑁂. 𑀧𑀼𑀢𑁆𑀢𑀤𑀸𑀭𑀥𑀦𑀸𑀤𑀺𑀉𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁄 𑀧𑀦 𑀤𑀸𑀦𑀧𑀸𑀭𑀫𑀻, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀉𑀧𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀧𑀭𑀫𑀢𑁆𑀣𑀧𑀸𑀭𑀫𑀻𑀢𑀺. 𑀢𑀣𑀸 𑀧𑀼𑀢𑁆𑀢𑀤𑀸𑀭𑀸𑀤𑀺𑀓𑀲𑁆𑀲 𑀢𑀺𑀯𑀺𑀥𑀲𑁆𑀲𑀸𑀧𑀺 𑀳𑁂𑀢𑀼 𑀅𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀲𑀻𑀮𑀧𑀸𑀭𑀫𑀺𑀬𑁄, 𑀢𑁂𑀲𑀼 𑀏𑀯 𑀢𑀺𑀯𑀺𑀥𑁂𑀲𑀼 𑀯𑀢𑁆𑀣𑀽𑀲𑀼 𑀆𑀮𑀬𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀯𑀲𑁂𑀦 ¶ 𑀢𑀺𑀲𑁆𑀲𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀗𑁆𑀕𑀚𑀻𑀯𑀺𑀢𑀢𑀡𑁆𑀳𑀁 𑀲𑀫𑀽𑀳𑀦𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀯𑀺𑀦𑀺𑀘𑁆𑀙𑀬𑀓𑀭𑀡𑀯𑀲𑁂𑀦 𑀢𑀺𑀲𑁆𑀲𑁄 𑀧𑀜𑁆𑀜𑀸𑀧𑀸𑀭𑀫𑀺𑀬𑁄. 𑀬𑀣𑀸𑀯𑀼𑀢𑁆𑀢𑀪𑁂𑀤𑀸𑀦𑀁 𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀁 𑀯𑀸𑀬𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀯𑀻𑀭𑀺𑀬𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀗𑁆𑀕𑀚𑀻𑀯𑀺𑀢𑀦𑁆𑀢𑀭𑀸𑀬𑀓𑀭𑀸𑀦𑀁 𑀔𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀔𑀦𑁆𑀢𑀺𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀗𑁆𑀕𑀚𑀻𑀯𑀺𑀢𑀳𑁂𑀢𑀼 𑀲𑀘𑁆𑀘𑀸𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀢𑀺𑀲𑁆𑀲𑁄 𑀲𑀘𑁆𑀘𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀅𑀓𑀼𑀧𑁆𑀧𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀲𑀫𑀺𑀚𑁆𑀛𑀦𑁆𑀢𑀻𑀢𑀺, 𑀉𑀧𑀓𑀭𑀡𑀸𑀤𑀺𑀯𑀺𑀦𑀸𑀲𑁂𑀧𑀺 𑀅𑀘𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀺𑀲𑁆𑀲𑁄 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀸𑀤𑀺𑀉𑀧𑀖𑀸𑀢𑀓𑁂𑀲𑀼𑀧𑀺 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀅𑀯𑀺𑀚𑀳𑀦𑀯𑀲𑁂𑀦 𑀢𑀺𑀲𑁆𑀲𑁄 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑁄, 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀢𑀸𑀧𑀝𑀺𑀮𑀸𑀪𑀯𑀲𑁂𑀦 𑀢𑀺𑀲𑁆𑀲𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑁄𑀢𑀺 𑀏𑀯𑀫𑀸𑀤𑀺𑀦𑀸 𑀏𑀢𑀸𑀲𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀓𑁄 𑀲𑀗𑁆𑀕𑀳𑁄𑀢𑀺? 𑀏𑀢𑁆𑀣 𑀧𑀦 𑀬𑀣𑀸 𑀏𑀢𑀸 𑀯𑀺𑀪𑀸𑀕𑀢𑁄 𑀢𑀺𑀁𑀲𑀯𑀺𑀥𑀸𑀧𑀺 𑀤𑀸𑀦𑀧𑀸𑀭𑀫𑀺𑀆𑀤𑀺𑀪𑀸𑀯𑀢𑁄 𑀤𑀲𑀯𑀺𑀥𑀸, 𑀏𑀯𑀁 𑀤𑀸𑀦𑀲𑀻𑀮𑀔𑀦𑁆𑀢𑀺𑀯𑀻𑀭𑀺𑀬𑀛𑀸𑀦𑀧𑀜𑁆𑀜𑀸𑀲𑀪𑀸𑀯𑁂𑀦 𑀙𑀩𑁆𑀩𑀺𑀥𑀸. 𑀏𑀢𑀸𑀲𑀼 𑀳𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀺𑀬𑀸 𑀲𑀗𑁆𑀕𑀳𑀺𑀢𑀸, 𑀢𑀲𑁆𑀲𑀸 𑀧𑀩𑁆𑀩𑀚𑁆𑀚𑀸𑀪𑀸𑀯𑁂, 𑀦𑀻𑀯𑀭𑀡𑀯𑀺𑀯𑁂𑀓𑀪𑀸𑀯𑁂 𑀧𑀦 𑀛𑀸𑀦𑀧𑀸𑀭𑀫𑀺𑀬𑀸 𑀓𑀼𑀲𑀮𑀥𑀫𑁆𑀫𑀪𑀸𑀯𑁂 ¶ 𑀙𑀳𑀺𑀧𑀺 𑀲𑀗𑁆𑀕𑀳𑀺𑀢𑀸. 𑀲𑀘𑁆𑀘𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀺𑀬𑀸 ¶ 𑀏𑀓𑀤𑁂𑀲𑁄 𑀏𑀯 𑀯𑀘𑀻𑀯𑀺𑀭𑀢𑀺𑀲𑀘𑁆𑀘𑀧𑀓𑁆𑀔𑁂, 𑀜𑀸𑀡𑀲𑀘𑁆𑀘𑀧𑀓𑁆𑀔𑁂 𑀧𑀦 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀲𑀗𑁆𑀕𑀳𑀺𑀢𑀸. 𑀫𑁂𑀢𑁆𑀢𑀸𑀧𑀸𑀭𑀫𑀺 𑀛𑀸𑀦𑀧𑀸𑀭𑀫𑀺𑀬𑀸 𑀏𑀯. 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀛𑀸𑀦𑀧𑀜𑁆𑀜𑀸𑀧𑀸𑀭𑀫𑀻𑀳𑀺. 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀲𑀩𑁆𑀩𑀸𑀳𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺.

𑀏𑀢𑁂𑀲𑀜𑁆𑀘 𑀤𑀸𑀦𑀸𑀤𑀻𑀦𑀁 𑀙𑀦𑁆𑀦𑀁 𑀕𑀼𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀦𑀁 𑀧𑀜𑁆𑀘𑀤𑀲𑀬𑀼𑀕𑀮𑀸𑀤𑀻𑀦𑀺 𑀧𑀜𑁆𑀘𑀤𑀲𑀬𑀼𑀕𑀮𑀸𑀤𑀺𑀲𑀸𑀥𑀓𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀲𑀻𑀮𑀬𑀼𑀕𑀮𑁂𑀦 𑀧𑀭𑀳𑀺𑀢𑀸𑀳𑀺𑀢𑀸𑀦𑀁 𑀓𑀭𑀡𑀸𑀓𑀭𑀡𑀬𑀼𑀕𑀮𑀲𑀺𑀤𑁆𑀥𑀺, 𑀤𑀸𑀦𑀔𑀦𑁆𑀢𑀺𑀬𑀼𑀕𑀮𑁂𑀦 𑀅𑀮𑁄𑀪𑀸𑀤𑁄𑀲𑀬𑀼𑀕𑀮𑀲𑀺𑀤𑁆𑀥𑀺, 𑀤𑀸𑀦𑀯𑀻𑀭𑀺𑀬𑀬𑀼𑀕𑀮𑁂𑀦 𑀘𑀸𑀕𑀲𑀼𑀢𑀬𑀼𑀕𑀮𑀲𑀺𑀤𑁆𑀥𑀺, 𑀤𑀸𑀦𑀛𑀸𑀦𑀬𑀼𑀕𑀮𑁂𑀦 𑀓𑀸𑀫𑀤𑁄𑀲𑀧𑁆𑀧𑀳𑀸𑀦𑀬𑀼𑀕𑀮𑀲𑀺𑀤𑁆𑀥𑀺. 𑀤𑀸𑀦𑀧𑀜𑁆𑀜𑀸𑀬𑀼𑀕𑀮𑁂𑀦 𑀅𑀭𑀺𑀬𑀬𑀸𑀦𑀥𑀼𑀭𑀬𑀼𑀕𑀮𑀲𑀺𑀤𑁆𑀥𑀺, 𑀲𑀻𑀮𑀔𑀦𑁆𑀢𑀺𑀤𑁆𑀯𑀬𑁂𑀦 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀺𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀯𑀻𑀭𑀺𑀬𑀤𑁆𑀯𑀬𑁂𑀦 𑀪𑀸𑀯𑀦𑀸𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀛𑀸𑀦𑀤𑁆𑀯𑀬𑁂𑀦 𑀤𑀼𑀲𑁆𑀲𑀻𑀮𑁆𑀬𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀧𑀜𑁆𑀜𑀸𑀤𑁆𑀯𑀬𑁂𑀦 𑀤𑀸𑀦𑀤𑁆𑀯𑀬𑀲𑀺𑀤𑁆𑀥𑀺, 𑀔𑀦𑁆𑀢𑀺𑀯𑀻𑀭𑀺𑀬𑀬𑀼𑀕𑀮𑁂𑀦 𑀔𑀫𑀸𑀢𑁂𑀚𑀤𑁆𑀯𑀬𑀲𑀺𑀤𑁆𑀥𑀺, 𑀔𑀦𑁆𑀢𑀺𑀛𑀸𑀦𑀬𑀼𑀕𑀮𑁂𑀦 𑀯𑀺𑀭𑁄𑀥𑀸𑀦𑀼𑀭𑁄𑀥𑀧𑁆𑀧𑀳𑀸𑀦𑀬𑀼𑀕𑀮𑀲𑀺𑀤𑁆𑀥𑀺, 𑀔𑀦𑁆𑀢𑀺𑀧𑀜𑁆𑀜𑀸𑀬𑀼𑀕𑀮𑁂𑀦 𑀲𑀼𑀜𑁆𑀜𑀢𑀸𑀔𑀦𑁆𑀢𑀺𑀧𑀝𑀺𑀯𑁂𑀥𑀤𑀼𑀓𑀲𑀺𑀤𑁆𑀥𑀺, 𑀯𑀻𑀭𑀺𑀬𑀛𑀸𑀦𑀤𑀼𑀓𑁂𑀦 𑀧𑀕𑁆𑀕𑀳𑀸𑀯𑀺𑀓𑁆𑀔𑁂𑀧𑀤𑀼𑀓𑀲𑀺𑀤𑁆𑀥𑀺, 𑀯𑀻𑀭𑀺𑀬𑀧𑀜𑁆𑀜𑀸𑀤𑀼𑀓𑁂𑀦 𑀲𑀭𑀡𑀤𑀼𑀓𑀲𑀺𑀤𑁆𑀥𑀺, 𑀛𑀸𑀦𑀧𑀜𑁆𑀜𑀸𑀤𑀼𑀓𑁂𑀦 𑀬𑀸𑀦𑀤𑀼𑀓𑀲𑀺𑀤𑁆𑀥𑀺 ¶ , 𑀤𑀸𑀦𑀲𑀻𑀮𑀔𑀦𑁆𑀢𑀺𑀢𑁆𑀢𑀺𑀓𑁂𑀦 𑀮𑁄𑀪𑀤𑁄𑀲𑀫𑁄𑀳𑀧𑁆𑀧𑀳𑀸𑀦𑀢𑁆𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀯𑀻𑀭𑀺𑀬𑀢𑁆𑀢𑀺𑀓𑁂𑀦 𑀪𑁄𑀕𑀚𑀻𑀯𑀺𑀢𑀓𑀸𑀬𑀲𑀸𑀭𑀸𑀤𑀸𑀦𑀢𑁆𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀛𑀸𑀦𑀢𑁆𑀢𑀺𑀓𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀢𑁆𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀧𑀜𑁆𑀜𑀸𑀢𑀺𑀓𑁂𑀦 𑀆𑀫𑀺𑀲𑀸𑀪𑀬𑀥𑀫𑁆𑀫𑀤𑀸𑀦𑀢𑁆𑀢𑀺𑀓𑀲𑀺𑀤𑁆𑀥𑀻𑀢𑀺. 𑀏𑀯𑀁 𑀇𑀢𑀭𑁂𑀳𑀺𑀧𑀺 𑀢𑀺𑀓𑁂𑀳𑀺 𑀘𑀢𑀼𑀓𑁆𑀓𑀸𑀤𑀻𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀢𑀺𑀓𑀸𑀦𑀺 𑀘 𑀘𑀢𑀼𑀓𑁆𑀓𑀸𑀤𑀻𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀙𑀩𑁆𑀩𑀺𑀥𑀸𑀦𑀫𑁆𑀧𑀺 𑀧𑀦 𑀇𑀫𑀸𑀲𑀁 𑀧𑀸𑀭𑀫𑀻𑀦𑀁 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀧𑀸𑀭𑀫𑀻𑀦𑀁 𑀲𑀫𑀽𑀳𑀲𑀗𑁆𑀕𑀳𑀢𑁄 𑀳𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀥𑀺𑀢𑀺𑀝𑁆𑀞𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀅𑀥𑀺𑀢𑀺𑀝𑁆𑀞𑀢𑀺, 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀜𑁆𑀘 𑀢𑀁 𑀅𑀥𑀺𑀝𑁆𑀞𑀸𑀦𑀜𑁆𑀘, 𑀲𑀘𑁆𑀘𑀲𑁆𑀲 𑀯𑀸 𑀅𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀫𑁂𑀢𑀲𑁆𑀲𑀸𑀢𑀺 𑀯𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀅𑀯𑀺𑀲𑁂𑀲𑀢𑁄 𑀢𑀸𑀯 𑀮𑁄𑀓𑀼𑀢𑁆𑀢𑀭𑀕𑀼𑀡𑁂 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀦𑀼𑀓𑀫𑁆𑀧𑀺𑀢𑀲𑀩𑁆𑀩𑀲𑀢𑁆𑀢𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀲𑀩𑁆𑀩𑀧𑀸𑀭𑀫𑀺𑀧𑀭𑀺𑀕𑁆𑀕𑀳𑀢𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀢𑀸𑀲𑀁 𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 ¶ . 𑀲𑀩𑁆𑀩𑀧𑀸𑀭𑀫𑀺𑀢𑀸𑀕𑀼𑀡𑁂𑀳𑀺 𑀉𑀧𑀲𑀫𑀢𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁. 𑀢𑁂𑀳𑀺 𑀏𑀯 𑀧𑀭𑀳𑀺𑀢𑁄𑀧𑀸𑀬𑀓𑁄𑀲𑀮𑁆𑀮𑀢𑁄 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁.

𑀯𑀺𑀲𑁂𑀲𑀢𑁄 𑀧𑀦 𑀬𑀸𑀘𑀓𑀚𑀦𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀤𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀸𑀦𑀦𑀢𑁄 𑀧𑀝𑀺𑀜𑁆𑀜𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 ¶ 𑀤𑀸𑀦𑀢𑁄 𑀤𑀸𑀦𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁄 𑀫𑀘𑁆𑀙𑀭𑀺𑀬𑀸𑀤𑀺𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀤𑀸𑀦𑀤𑁂𑀬𑁆𑀬𑀥𑀫𑁆𑀫𑀓𑁆𑀔𑀬𑁂𑀲𑀼 𑀮𑁄𑀪𑀤𑁄𑀲𑀫𑁄𑀳𑀪𑀬𑀯𑀽𑀧𑀲𑀫𑀢𑁄 𑀬𑀣𑀸𑀭𑀳𑀁 𑀬𑀣𑀸𑀓𑀸𑀮𑀁 𑀬𑀣𑀸𑀯𑀺𑀥𑀸𑀦𑀜𑁆𑀘 𑀤𑀸𑀦𑀢𑁄 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀤𑀸𑀦𑀁. 𑀢𑀣𑀸 𑀲𑀁𑀯𑀭𑀲𑀫𑀸𑀤𑀸𑀦𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀦𑀢𑁄 𑀤𑀼𑀲𑁆𑀲𑀻𑀮𑁆𑀬𑀧𑀭𑀺𑀘𑁆𑀘𑀸𑀕𑀢𑁄 𑀤𑀼𑀘𑁆𑀘𑀭𑀺𑀢𑀯𑀽𑀧𑀲𑀫𑀦𑀢𑁄 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀲𑀻𑀮𑀁. 𑀬𑀣𑀸𑀧𑀝𑀺𑀜𑁆𑀜𑀁 𑀔𑀫𑀦𑀢𑁄, 𑀧𑀭𑀸𑀧𑀭𑀸𑀥𑀯𑀺𑀓𑀧𑁆𑀧𑀧𑀭𑀺𑀘𑁆𑀘𑀸𑀕𑀢𑁄, 𑀓𑁄𑀥𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄, 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀔𑀦𑁆𑀢𑀺. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀭𑀳𑀺𑀢𑀓𑀭𑀡𑀢𑁄, 𑀯𑀺𑀲𑀤𑀧𑀭𑀺𑀘𑁆𑀘𑀸𑀕𑀢𑁄, 𑀅𑀓𑀼𑀲𑀮𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀯𑀻𑀭𑀺𑀬𑀁. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀮𑁄𑀓𑀳𑀺𑀢𑀸𑀦𑀼𑀘𑀺𑀦𑁆𑀢𑀦𑀢𑁄, 𑀦𑀻𑀯𑀭𑀡𑀧𑀭𑀺𑀘𑁆𑀘𑀸𑀕𑀢𑁄, 𑀘𑀺𑀢𑁆𑀢𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀛𑀸𑀦𑀁. 𑀬𑀣𑀸𑀧𑀝𑀺𑀜𑁆𑀜𑀁 𑀧𑀭𑀳𑀺𑀢𑀽𑀧𑀸𑀬𑀓𑁄𑀲𑀮𑁆𑀮𑀢𑁄, 𑀅𑀦𑀼𑀧𑀸𑀬𑀓𑀺𑀭𑀺𑀬𑀸𑀧𑀭𑀺𑀘𑁆𑀘𑀸𑀕𑀢𑁄, 𑀫𑁄𑀳𑀚𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁄, 𑀲𑀩𑁆𑀩𑀜𑁆𑀜𑀼𑀢𑀸𑀧𑀝𑀺𑀮𑀸𑀪𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀧𑀜𑁆𑀜𑀸.

𑀢𑀢𑁆𑀣 ¶ 𑀜𑁂𑀬𑁆𑀬𑀧𑀝𑀺𑀜𑁆𑀜𑀸𑀦𑀼𑀯𑀺𑀥𑀸𑀦𑁂𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀳𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁. 𑀤𑁄𑀲𑀤𑀼𑀓𑁆𑀔𑀯𑀽𑀧𑀲𑀫𑁂𑀳𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁. 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑁂𑀳𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀢𑀺𑀯𑀺𑀥𑀲𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀢𑀺𑀯𑀺𑀥𑀘𑀸𑀕𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁. 𑀢𑀺𑀯𑀺𑀥𑀯𑀽𑀧𑀲𑀫𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁. 𑀢𑀺𑀯𑀺𑀥𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀘𑀸𑀕𑀽𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀅𑀯𑀺𑀲𑀁𑀯𑀸𑀤𑀦𑀢𑁄 𑀧𑀝𑀺𑀜𑁆𑀜𑀸𑀦𑀼𑀯𑀺𑀥𑀸𑀦𑀢𑁄 𑀘, 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀽𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄 𑀲𑀩𑁆𑀩𑀧𑀭𑀺𑀘𑁆𑀘𑀸𑀕𑀨𑀮𑀢𑁆𑀢𑀸 𑀘, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀘𑀸𑀕𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁄 𑀓𑀸𑀫𑀽𑀧𑀲𑀫𑀦𑀢𑁄 𑀓𑀸𑀫𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁄 𑀘, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀘𑀸𑀕𑀽𑀧𑀲𑀫𑀸𑀥𑀺𑀝𑁆𑀞𑀸𑀦𑀸𑀦𑀺 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑀢𑁄 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀸𑀧𑀺 𑀧𑀸𑀭𑀫𑀺𑀬𑁄 𑀲𑀘𑁆𑀘𑀧𑁆𑀧𑀪𑀸𑀯𑀺𑀢𑀸 𑀘𑀸𑀕𑀧𑀭𑀺𑀩𑁆𑀬𑀜𑁆𑀚𑀺𑀢𑀸 𑀉𑀧𑀲𑀫𑁄𑀧𑀩𑁆𑀭𑀽𑀳𑀺𑀢𑀸 ¶ 𑀧𑀜𑁆𑀜𑀸𑀧𑀭𑀺𑀲𑀼𑀤𑁆𑀥𑀸. 𑀲𑀘𑁆𑀘𑀜𑁆𑀳𑀺 𑀏𑀢𑀸𑀲𑀁 𑀚𑀦𑀓𑀳𑁂𑀢𑀼. 𑀘𑀸𑀕𑁄 𑀧𑀭𑀺𑀕𑁆𑀕𑀸𑀳𑀓𑀳𑁂𑀢𑀼, 𑀉𑀧𑀲𑀫𑁄 𑀧𑀭𑀺𑀯𑀼𑀤𑁆𑀥𑀺𑀳𑁂𑀢𑀼, 𑀧𑀜𑁆𑀜𑀸 𑀧𑀸𑀭𑀺𑀲𑀼𑀤𑁆𑀥𑀺𑀳𑁂𑀢𑀼. 𑀢𑀣𑀸 𑀆𑀤𑀺𑀫𑁆𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀧𑀝𑀺𑀜𑁆𑀜𑀢𑁆𑀢𑀸, 𑀫𑀚𑁆𑀛𑁂 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀓𑀢𑀧𑀡𑀺𑀥𑀸𑀦𑀲𑁆𑀲 𑀧𑀭𑀳𑀺𑀢𑀸𑀬 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀢𑁄. 𑀅𑀦𑁆𑀢𑁂 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀲𑀩𑁆𑀩𑀽𑀧𑀲𑀫𑀧𑀭𑀺𑀬𑁄𑀲𑀸𑀦𑀢𑁆𑀢𑀸. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀢𑀲𑁆𑀫𑀺𑀁 𑀲𑀢𑀺 𑀲𑀫𑁆𑀪𑀯𑀢𑁄 𑀅𑀲𑀢𑀺 𑀅𑀪𑀸𑀯𑀢𑁄 𑀬𑀣𑀸𑀧𑀝𑀺𑀜𑁆𑀜𑀜𑁆𑀘 𑀪𑀸𑀯𑀢𑁄.

𑀢𑀢𑁆𑀣 𑀫𑀳𑀸𑀧𑀼𑀭𑀺𑀲𑀸 𑀲𑀢𑀢𑀫𑀢𑁆𑀢𑀳𑀺𑀢𑀧𑀭𑀳𑀺𑀢𑀓𑀭𑁂𑀳𑀺 𑀕𑀭𑀼𑀧𑀺𑀬𑀪𑀸𑀯𑀓𑀭𑁂𑀳𑀺 𑀲𑀘𑁆𑀘𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀳𑀺 𑀕𑀺𑀳𑀺𑀪𑀽𑀢𑀸 ¶ 𑀆𑀫𑀺𑀲𑀤𑀸𑀦𑁂𑀦 𑀧𑀭𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀓𑀭𑁂𑀳𑀺 𑀕𑀭𑀼𑀧𑀺𑀬𑀪𑀸𑀯𑀓𑀭𑁂𑀳𑀺 𑀉𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀳𑀺 𑀘 𑀧𑀩𑁆𑀩𑀚𑀺𑀢𑀪𑀽𑀢𑀸 𑀥𑀫𑁆𑀫𑀤𑀸𑀦𑁂𑀦 𑀧𑀭𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺.

𑀢𑀢𑁆𑀣 𑀅𑀦𑁆𑀢𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁. 𑀧𑀭𑀺𑀧𑀼𑀡𑁆𑀡𑀘𑀢𑀼𑀭𑀥𑀺𑀝𑁆𑀞𑀸𑀦𑀲𑁆𑀲 𑀳𑀺 𑀘𑀭𑀺𑀫𑀓𑀪𑀯𑀽𑀧𑀧𑀢𑁆𑀢𑀻𑀢𑀺 𑀏𑀓𑁂. 𑀢𑀢𑁆𑀭 𑀳𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀞𑀺𑀢𑀺𑀅𑀪𑀺𑀦𑀺𑀓𑁆𑀔𑀫𑀦𑁂𑀲𑀼 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀲𑀫𑁆𑀧𑀢𑀺𑀚𑀸𑀢𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀤𑀺𑀲𑀸 𑀑𑀮𑁄𑀓𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑀸 𑀯𑀘𑀲𑀸 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭) 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺.

𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 ¶ 𑀚𑀺𑀡𑁆𑀡𑀸𑀢𑀼𑀭𑀫𑀢𑀧𑀩𑁆𑀩𑀚𑀺𑀢𑀤𑀲𑁆𑀲𑀸𑀯𑀺𑀦𑁄 𑀘𑀢𑀼𑀥𑀫𑁆𑀫𑀧𑀤𑁂𑀲𑀓𑁄𑀯𑀺𑀤𑀲𑁆𑀲 𑀬𑁄𑀩𑁆𑀩𑀦𑀸𑀭𑁄𑀕𑁆𑀬𑀚𑀻𑀯𑀺𑀢𑀲𑀫𑁆𑀧𑀢𑁆𑀢𑀺𑀫𑀤𑀸𑀦𑀁 𑀉𑀧𑀲𑀫𑁄. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀫𑀳𑀢𑁄 𑀜𑀸𑀢𑀺𑀧𑀭𑀺𑀯𑀝𑁆𑀝𑀲𑁆𑀲 𑀳𑀢𑁆𑀣𑀕𑀢𑀲𑁆𑀲 𑀘 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑁆𑀲 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁄𑀢𑀺.

𑀤𑀼𑀢𑀺𑀬𑁂 𑀞𑀸𑀦𑁂 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀓𑁂𑀘𑀺. 𑀢𑀢𑁆𑀣 𑀳𑀺 𑀬𑀣𑀸𑀧𑀝𑀺𑀜𑁆𑀜𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄, 𑀢𑀢𑁄 𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀲𑀩𑁆𑀩𑀓𑀺𑀮𑁂𑀲𑀽𑀧𑀓𑁆𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑁄, 𑀢𑀢𑁄 𑀳𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀧𑀭𑀫𑀽𑀧𑀲𑀫𑀧𑁆𑀧𑀢𑁆𑀢𑀺, 𑀢𑀢𑁄 𑀳𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑁄, 𑀢𑀢𑁄 𑀳𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺. 𑀢𑀁 𑀅𑀲𑀺𑀤𑁆𑀥𑀁, 𑀅𑀪𑀺𑀲𑀫𑁆𑀩𑁄𑀥𑀺𑀬𑀸𑀧𑀺 𑀧𑀭𑀫𑀢𑁆𑀣𑀪𑀸𑀯𑀢𑁄.

𑀢𑀢𑀺𑀬𑁂 𑀞𑀸𑀦𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀜𑁆𑀜𑁂. 𑀢𑀢𑁆𑀣 𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬 ¶ 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀤𑁆𑀥𑀫𑁆𑀫𑀫𑀳𑀸𑀬𑀸𑀕𑀓𑀭𑀡𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀬𑀁 𑀉𑀧𑀲𑀦𑁆𑀢𑀲𑁆𑀲 𑀧𑀭𑁂𑀲𑀁 𑀉𑀧𑀲𑀫𑀦𑁂𑀦 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀯𑁂𑀦𑁂𑀬𑁆𑀬𑀸𑀦𑀁 𑀆𑀲𑀬𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺. 𑀢𑀤𑀧𑀺 𑀅𑀲𑀺𑀤𑁆𑀥𑀁, 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲.

𑀘𑀢𑀼𑀢𑁆𑀣𑁂 𑀞𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀧𑀭𑁂. 𑀢𑀢𑁆𑀭 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀧𑀭𑀫𑀢𑁆𑀣𑀲𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑁂𑀦 ¶ 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀧𑀜𑁆𑀜𑀸𑀧𑀬𑁄𑀚𑀦𑀧𑀭𑀺𑀦𑀺𑀝𑁆𑀞𑀸𑀦𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺. 𑀢𑀢𑁆𑀭 𑀫𑀳𑀸𑀧𑀼𑀭𑀺𑀲𑀲𑁆𑀲 𑀯𑀺𑀲𑁂𑀲𑁂𑀦 𑀫𑁂𑀢𑁆𑀢𑀸𑀔𑁂𑀢𑁆𑀢𑁂 𑀅𑀪𑀺𑀚𑀸𑀢𑀺𑀬𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀓𑀭𑀼𑀡𑀸𑀔𑁂𑀢𑁆𑀢𑁂 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀫𑀼𑀤𑀺𑀢𑀸𑀔𑁂𑀢𑁆𑀢𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀉𑀧𑁂𑀓𑁆𑀔𑀸𑀔𑁂𑀢𑁆𑀢𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭 ¶ 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀁𑀯𑀸𑀲𑁂𑀦 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀁𑀯𑁄𑀳𑀸𑀭𑁂𑀦 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀆𑀧𑀤𑀸𑀲𑀼 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀸𑀓𑀘𑁆𑀙𑀸𑀬 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀻𑀮𑀸𑀚𑀻𑀯𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀤𑁄𑀲𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀯𑀺𑀲𑀁𑀯𑀸𑀤𑀦𑀢𑁄. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀮𑁄𑀪𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀦𑀪𑀺𑀲𑀗𑁆𑀕𑀢𑁄. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀪𑀬𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀦𑀧𑀭𑀸𑀥𑀢𑁄. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀫𑁄𑀳𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀬𑀣𑀸 𑀪𑀽𑀢𑀸𑀯𑀩𑁄𑀥𑀢𑁄.

𑀢𑀣𑀸 𑀧𑀞𑀫𑁂𑀦 𑀅𑀤𑀼𑀝𑁆𑀞𑁄 𑀅𑀥𑀺𑀯𑀸𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀅𑀮𑀼𑀤𑁆𑀥𑁄 𑀧𑀝𑀺𑀲𑁂𑀯𑀢𑀺, 𑀢𑀢𑀺𑀬𑁂𑀦 𑀅𑀪𑀻𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀢𑀼𑀢𑁆𑀣𑁂𑀦 𑀅𑀲𑀫𑁆𑀫𑀽𑀴𑁆𑀳𑁄 𑀯𑀺𑀦𑁄𑀤𑁂𑀢𑀺. 𑀧𑀞𑀫𑁂𑀦 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑁆𑀧𑀢𑁆𑀢𑀺, 𑀇𑀢𑀭𑁂𑀳𑀺 𑀧𑀯𑀺𑀯𑁂𑀓𑀉𑀧𑀲𑀫𑀲𑀫𑁆𑀩𑁄𑀥𑀺𑀲𑀼𑀔𑀧𑁆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀅𑀧𑀻𑀢𑀺𑀚𑀓𑀸𑀬𑀲𑀼𑀔𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀚- 𑀉𑀧𑁂𑀓𑁆𑀔𑀸𑀲𑀼𑀔𑀧𑁆𑀧𑀢𑁆𑀢𑀺𑀬𑁄 𑀏𑀢𑁂𑀳𑀺 𑀘𑀢𑀽𑀳𑀺 𑀬𑀣𑀸𑀓𑁆𑀓𑀫𑀁 𑀳𑁄𑀦𑁆𑀢𑀺. 𑀏𑀯𑀫𑀦𑁂𑀓𑀕𑀼𑀡𑀸𑀦𑀼𑀩𑀦𑁆𑀥𑁂𑀳𑀺 ¶ 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀩𑁆𑀩𑀧𑀸𑀭𑀫𑀺𑀲𑀫𑀽𑀳𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀩𑁆𑀩𑀧𑀸𑀭𑀫𑀺𑀲𑀗𑁆𑀕𑀳𑁄, 𑀏𑀯𑀁 𑀓𑀭𑀼𑀡𑀸𑀧𑀜𑁆𑀜𑀸𑀳𑀺𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁄𑀧𑀺 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁄 𑀓𑀭𑀼𑀡𑀸𑀧𑀜𑁆𑀜𑀸𑀳𑀺 𑀲𑀗𑁆𑀕𑀳𑀺𑀢𑁄. 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸 𑀳𑀺 𑀤𑀸𑀦𑀸𑀤𑀺𑀕𑀼𑀡𑀸 𑀫𑀳𑀸𑀩𑁄𑀥𑀺𑀲𑀫𑁆𑀪𑀸𑀭𑀸 𑀪𑀯𑀦𑁆𑀢𑀺 𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀸𑀢𑀺. 𑀏𑀯𑀫𑁂𑀢𑀸𑀲𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀓𑁄 𑀲𑀫𑁆𑀧𑀸𑀤𑀦𑀽𑀧𑀸𑀬𑁄𑀢𑀺? 𑀲𑀓𑀮𑀲𑁆𑀲𑀸𑀧𑀺 𑀧𑀼𑀜𑁆𑀜𑀸𑀤𑀺𑀲𑀫𑁆𑀪𑀸𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀉𑀤𑁆𑀤𑀺𑀲𑁆𑀲 𑀅𑀦𑀯𑀲𑁂𑀲𑀲𑀫𑁆𑀪𑀭𑀡𑀁 𑀅𑀯𑁂𑀓𑀮𑁆𑀮𑀓𑀸𑀭𑀺𑀢𑀸𑀬𑁄𑀕𑁂𑀦, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀆𑀤𑀭𑀩𑀳𑀼𑀫𑀸𑀦𑀬𑁄𑀕𑁂𑀦, 𑀲𑀸𑀢𑀘𑁆𑀘𑀓𑀸𑀭𑀺𑀢𑀸 𑀦𑀺𑀭𑀦𑁆𑀢𑀭𑀬𑁄𑀕𑁂𑀦, 𑀘𑀺𑀭𑀓𑀸𑀮𑀸𑀤𑀺𑀬𑁄𑀕𑁄 𑀘 𑀅𑀦𑁆𑀢𑀭𑀸 𑀅𑀯𑁄𑀲𑀸𑀦𑀸𑀧𑀚𑁆𑀚𑀦𑁂𑀦𑀸𑀢𑀺. 𑀢𑀁 𑀧𑀦𑀲𑁆𑀲 𑀓𑀸𑀮𑀧𑀭𑀺𑀫𑀸𑀡𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀢𑀺 𑀘𑀢𑀼𑀭𑀗𑁆𑀕𑀬𑁄𑀕𑁄 𑀏𑀢𑀸𑀲𑀁 𑀧𑀸𑀭𑀫𑀻𑀦𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄. 𑀢𑀣𑀸 𑀫𑀳𑀸𑀲𑀢𑁆𑀢𑁂𑀦 𑀩𑁄𑀥𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀸𑀬 𑀩𑀼𑀤𑁆𑀥𑀸𑀦𑀁 𑀧𑀼𑀭𑁂𑀢𑀭𑀫𑁂𑀯 𑀅𑀢𑁆𑀢𑀸 ¶ 𑀦𑀺𑀬𑁆𑀬𑀸𑀢𑁂𑀢𑀩𑁆𑀩𑁄 𑁋 ‘‘𑀇𑀫𑀸𑀳𑀁 𑀅𑀢𑁆𑀢𑀪𑀸𑀯𑀁 𑀩𑀼𑀤𑁆𑀥𑀸𑀦𑀁 𑀦𑀺𑀬𑁆𑀬𑀸𑀢𑁂𑀫𑀻’’𑀢𑀺. 𑀢𑀁𑀢𑀁𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀜𑁆𑀘 𑀧𑀝𑀺𑀮𑀸𑀪𑀢𑁄 𑀧𑀼𑀭𑁂𑀢𑀭𑀫𑁂𑀯 𑀤𑀸𑀦𑀫𑀼𑀔𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. ‘‘𑀬𑀁 𑀓𑀺𑀜𑁆𑀘𑀺 𑀫𑀬𑁆𑀳𑀁 𑀉𑀧𑁆𑀧𑀚𑁆𑀚𑀦𑀓𑀁 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀲𑀢𑀺 𑀬𑀸𑀘𑀓𑁂 𑀤𑀲𑁆𑀲𑀸𑀫𑀺, 𑀢𑁂𑀲𑀁 𑀧𑀦 𑀤𑀺𑀦𑁆𑀦𑀸𑀯𑀲𑁂𑀲𑀁 𑀏𑀯 𑀫𑀬𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 ¶ 𑀳𑀺𑀲𑁆𑀲 𑀲𑀫𑁆𑀫𑀤𑁂𑀯 𑀧𑀭𑀺𑀘𑁆𑀘𑀸𑀕𑀸𑀬 𑀓𑀢𑁂 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑁂 𑀬𑀁 𑀉𑀧𑁆𑀧𑀚𑁆𑀚𑀢𑀺 𑀧𑀭𑀺𑀕𑁆𑀕𑀳𑀯𑀢𑁆𑀣𑀼 𑀅𑀯𑀺𑀜𑁆𑀜𑀸𑀡𑀓𑀁 𑀲𑀯𑀺𑀜𑁆𑀜𑀸𑀡𑀓𑀁 𑀯𑀸, 𑀢𑀢𑁆𑀣 𑀬𑁂 𑀇𑀫𑁂 𑀧𑀼𑀩𑁆𑀩𑁂 𑀤𑀸𑀦𑁂 𑀅𑀓𑀢𑀧𑀭𑀺𑀘𑀬𑁄, 𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁄, 𑀉𑀴𑀸𑀭𑀫𑀦𑀼𑀜𑁆𑀜𑀢𑀸, 𑀧𑀭𑀺𑀓𑁆𑀔𑀬𑀘𑀺𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑀸, 𑀢𑁂𑀲𑀼 𑀬𑀤𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀁𑀯𑀺𑀚𑁆𑀚𑀫𑀸𑀦𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘 𑀬𑀸𑀘𑀓𑀚𑀦𑁂 𑀤𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦 𑀓𑀫𑀢𑀺. 𑀢𑁂𑀦 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀅𑀤𑁆𑀥𑀸𑀳𑀁 𑀤𑀸𑀦𑁂 𑀧𑀼𑀩𑁆𑀩𑁂 𑀅𑀓𑀢𑀧𑀭𑀺𑀘𑀬𑁄, 𑀢𑁂𑀦 𑀫𑁂 𑀏𑀢𑀭𑀳𑀺 𑀤𑀸𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑁂 𑀦 𑀲𑀡𑁆𑀞𑀸𑀢𑀻’’𑀢𑀺. 𑀲𑁄 𑀏𑀯𑀁 𑀫𑁂 𑀇𑀢𑁄 𑀧𑀭𑀁 𑀤𑀸𑀦𑀸𑀪𑀺𑀭𑀢𑀁 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀧𑀭𑀺𑀕𑁆𑀕𑀳𑀯𑀢𑁆𑀣𑀼 𑀬𑀸𑀘𑀓𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀻 𑀯𑁄𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀧𑀞𑀫𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁂 𑀲𑀢𑀺 𑀯𑁂𑀓𑀮𑁆𑀮𑁂 𑀘 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀅𑀤𑀸𑀦𑀲𑀻𑀮𑀢𑀸𑀬 𑀏𑀢𑀭𑀳𑀺 𑀏𑀯𑀁 𑀧𑀘𑁆𑀘𑀬𑀯𑀺𑀓𑀮𑁄 𑀚𑀸𑀢𑁄 ¶ , 𑀢𑀲𑁆𑀫𑀸 𑀇𑀤𑀸𑀦𑀺 𑀫𑀬𑀸 𑀧𑀭𑀺𑀢𑁆𑀢𑁂𑀦 𑀯𑀸 𑀳𑀻𑀦𑁂𑀦 𑀯𑀸 𑀬𑀣𑀸𑀮𑀤𑁆𑀥𑁂𑀦 𑀤𑁂𑀬𑁆𑀬𑀥𑀫𑁆𑀫𑁂𑀦 𑀅𑀢𑁆𑀢𑀸𑀦𑀁 𑀧𑀻𑀴𑁂𑀢𑁆𑀯𑀸𑀧𑀺 𑀤𑀸𑀦𑀫𑁂𑀯 𑀤𑀸𑀢𑀩𑁆𑀩𑀁, 𑀬𑁂𑀦𑀸𑀳𑀁 𑀆𑀬𑀢𑀺𑀫𑁆𑀧𑀺 𑀤𑀸𑀦𑀧𑀸𑀭𑀫𑀺𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀇𑀢𑀭𑀻𑀢𑀭𑁂𑀦 𑀢𑀁 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀻 𑀯𑁄𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀤𑀼𑀢𑀺𑀬𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀉𑀴𑀸𑀭𑀫𑀦𑀼𑀜𑁆𑀜𑀢𑀸𑀬 𑀅𑀤𑀸𑀢𑀼𑀓𑀫𑁆𑀬𑀢𑀸𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀦𑀦𑀼 𑀢𑀬𑀸 𑀲𑀧𑁆𑀧𑀼𑀭𑀺𑀲 𑀉𑀴𑀸𑀭𑀢𑀫𑀸 𑀲𑀩𑁆𑀩𑀲𑁂𑀝𑁆𑀞𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀪𑀺𑀧𑀢𑁆𑀣𑀺𑀢𑀸, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀢𑀬𑀸 𑀉𑀴𑀸𑀭𑀫𑀦𑀼𑀜𑁆𑀜𑁂 𑀏𑀯 𑀤𑁂𑀬𑁆𑀬𑀥𑀫𑁆𑀫𑁂 𑀤𑀸𑀢𑀼𑀁 𑀬𑀼𑀢𑁆𑀢𑀭𑀽𑀧’’𑀦𑁆𑀢𑀺. 𑀲𑁄 𑀉𑀴𑀸𑀭𑀁 𑀫𑀦𑀼𑀜𑁆𑀜𑀜𑁆𑀘 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀻 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀢𑀢𑀺𑀬𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁄 𑀤𑀸𑀦𑀁 𑀤𑁂𑀦𑁆𑀢𑁄 𑀬𑀤𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀬𑀁 𑀧𑀲𑁆𑀲𑀢𑀺, 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀅𑀬𑀁 𑀔𑁄 𑀪𑁄𑀕𑀸𑀦𑀁 𑀲𑀪𑀸𑀯𑁄, 𑀬𑀤𑀺𑀤𑀁 𑀔𑀬𑀥𑀫𑁆𑀫𑀢𑀸 𑀯𑀬𑀥𑀫𑁆𑀫𑀢𑀸 𑀘. 𑀅𑀧𑀺 𑀘 ¶ 𑀫𑁂 𑀧𑀼𑀩𑁆𑀩𑁂 𑀢𑀸𑀤𑀺𑀲𑀲𑁆𑀲 𑀤𑀸𑀦𑀲𑁆𑀲 𑀅𑀓𑀢𑀢𑁆𑀢𑀸 𑀏𑀯𑀁 𑀪𑁄𑀕𑀸𑀦𑀁 𑀧𑀭𑀺𑀓𑁆𑀔𑀬𑁄 𑀤𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀬𑀣𑀸𑀮𑀤𑁆𑀥𑁂𑀦 𑀤𑁂𑀬𑁆𑀬𑀥𑀫𑁆𑀫𑁂𑀦 ¶ 𑀧𑀭𑀺𑀢𑁆𑀢𑁂𑀦 𑀯𑀸 𑀯𑀺𑀧𑀼𑀮𑁂𑀦 𑀯𑀸 𑀤𑀸𑀦𑀫𑁂𑀯 𑀤𑀤𑁂𑀬𑁆𑀬𑀁, 𑀬𑁂𑀦𑀸𑀳𑀁 𑀆𑀬𑀢𑀺𑀁 𑀤𑀸𑀦𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀬𑀣𑀸𑀮𑀤𑁆𑀥𑁂𑀦 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀻 𑀯𑁄𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄. 𑀏𑀯𑀁 𑀬𑁂 𑀬𑁂 𑀤𑀸𑀦𑀧𑀸𑀭𑀫𑀺𑀬𑀸 𑀯𑀺𑀦𑀺𑀩𑀦𑁆𑀥𑀪𑀽𑀢𑀸 𑀅𑀦𑀢𑁆𑀣𑀸, 𑀢𑁂𑀲𑀁 𑀢𑁂𑀲𑀁 𑀬𑀣𑀸𑀭𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀯𑀺𑀦𑁄𑀤𑀦𑀁 𑀉𑀧𑀸𑀬𑁄. 𑀬𑀣𑀸 𑀘 𑀤𑀸𑀦𑀧𑀸𑀭𑀫𑀺𑀬𑀸, 𑀏𑀯𑀁 𑀲𑀻𑀮𑀧𑀸𑀭𑀫𑀺𑀆𑀤𑀻𑀲𑀼𑀧𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀺 𑀘 𑀬𑀁 𑀫𑀳𑀸𑀲𑀢𑁆𑀢𑀲𑁆𑀲 𑀩𑀼𑀤𑁆𑀥𑀸𑀦𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁, 𑀢𑀁 𑀲𑀫𑁆𑀫𑀤𑁂𑀯 𑀲𑀩𑁆𑀩𑀧𑀸𑀭𑀫𑀻𑀦𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀞𑀺𑀢𑁄 𑀫𑀳𑀸𑀧𑀼𑀭𑀺𑀲𑁄 𑀢𑀢𑁆𑀣 𑀢𑀢𑁆𑀣 𑀩𑁄𑀥𑀺𑀲𑀫𑁆𑀪𑀸𑀭𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀲𑀭𑀻𑀭𑀲𑁆𑀲 𑀲𑀼𑀔𑀽𑀧𑀓𑀭𑀡𑀸𑀦𑀜𑁆𑀘 𑀉𑀧𑀘𑁆𑀙𑁂𑀤𑀓𑁂𑀲𑀼 𑀤𑀼𑀲𑁆𑀲𑀳𑁂𑀲𑀼𑀧𑀺 𑀓𑀺𑀘𑁆𑀙𑁂𑀲𑀼 𑀤𑀼𑀭𑀪𑀺𑀲𑀫𑁆𑀪𑀯𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀔𑀸𑀭𑀲𑀫𑀼𑀧𑀦𑀻𑀢𑁂𑀲𑀼 𑀅𑀦𑀢𑁆𑀣𑁂𑀲𑀼 𑀢𑀺𑀩𑁆𑀩𑁂𑀲𑀼 𑀧𑀸𑀡𑀳𑀭𑁂𑀲𑀼 ‘‘𑀅𑀬𑀁 𑀫𑀬𑀸 𑀅𑀢𑁆𑀢𑀪𑀸𑀯𑁄 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑁄, 𑀬𑀁 𑀯𑀸 𑀢𑀁 𑀯𑀸 𑀏𑀢𑁆𑀣 𑀳𑁄𑀢𑀽’’𑀢𑀺 𑀢𑀁𑀦𑀺𑀫𑀺𑀢𑁆𑀢𑀁 𑀦 𑀓𑀫𑁆𑀧𑀢𑀺 𑀦 𑀯𑁂𑀥𑀢𑀺, 𑀈𑀲𑀓𑀫𑁆𑀧𑀺 𑀅𑀜𑁆𑀜𑀣𑀢𑁆𑀢𑀁 𑀦 𑀕𑀘𑁆𑀙𑀢𑀺, 𑀓𑀼𑀲𑀮𑀸𑀭𑀫𑁆𑀪𑁂 ¶ 𑀅𑀜𑁆𑀜𑀤𑀢𑁆𑀣𑀼 𑀅𑀘𑀮𑀸𑀥𑀺𑀝𑁆𑀞𑀸𑀦𑁄𑀯 𑀳𑁄𑀢𑀺, 𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀫𑁆𑀧𑀺 𑀏𑀢𑀸𑀲𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄.

𑀅𑀧𑀺 𑀘 𑀲𑀫𑀸𑀲𑀢𑁄 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑀲𑁆𑀲 𑀧𑀭𑀺𑀲𑁄𑀲𑀦𑀁 𑀧𑀭𑁂𑀲𑀼 𑀘 𑀲𑀺𑀦𑁂𑀳𑀲𑁆𑀲 𑀧𑀭𑀺𑀯𑀟𑁆𑀠𑀦𑀁 𑀏𑀢𑀸𑀲𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀸𑀬 𑀳𑀺 𑀓𑀢𑀫𑀳𑀸𑀧𑀡𑀺𑀥𑀸𑀦𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑁂𑀦 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀮𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑁄 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀫𑀳𑀸𑀓𑀭𑀼𑀡𑀸𑀲𑀫𑀸𑀲𑁂𑀯𑀦𑁂𑀦 𑀧𑀦 𑀧𑀺𑀬𑀧𑀼𑀢𑁆𑀢𑁂 𑀯𑀺𑀬 𑀲𑀩𑁆𑀩𑀲𑀢𑁆𑀢𑁂 𑀲𑀫𑁆𑀧𑀲𑁆𑀲𑀫𑀸𑀦𑀲𑁆𑀲 𑀢𑁂𑀲𑀼 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀺𑀦𑁂𑀳𑁄 𑀧𑀭𑀺𑀯𑀟𑁆𑀠𑀢𑀺, 𑀢𑀢𑁄 𑀘 𑀢𑀁𑀢𑀤𑀯𑀢𑁆𑀣𑀸𑀦𑀼𑀭𑀽𑀧𑀁 𑀅𑀢𑁆𑀢𑀧𑀭𑀲𑀦𑁆𑀢𑀸𑀦𑁂𑀲𑀼 𑀮𑁄𑀪𑀤𑁄𑀲𑀫𑁄𑀳𑀯𑀺𑀕𑀫𑁂𑀦 𑀯𑀺𑀤𑀽𑀭𑀻𑀓𑀢𑀫𑀘𑁆𑀙𑀭𑀺𑀬𑀸𑀤𑀺𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑁄 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘𑀢𑀼𑀭𑀥𑀺𑀝𑁆𑀞𑀸𑀦𑀸𑀦𑀼𑀕𑀢𑁂𑀳𑀺 𑀅𑀘𑁆𑀘𑀦𑁆𑀢𑀁 𑀚𑀦𑀲𑁆𑀲 𑀲𑀗𑁆𑀕𑀳𑀓𑀭𑀡𑁂𑀦 𑀉𑀧𑀭𑀺 𑀬𑀸𑀦𑀢𑁆𑀢𑀬𑁂 𑀅𑀯𑀢𑀸𑀭𑀡𑀁 𑀧𑀭𑀺𑀧𑀸𑀘𑀦𑀜𑁆𑀘 𑀓𑀭𑁄𑀢𑀺.

𑀫𑀳𑀸𑀲𑀢𑁆𑀢𑀸𑀦𑀜𑁆𑀳𑀺 𑀫𑀳𑀸𑀓𑀭𑀼𑀡𑀸 𑀫𑀳𑀸𑀧𑀜𑁆𑀜𑀸 𑀘 𑀤𑀸𑀦𑁂𑀦 𑀅𑀮𑀗𑁆𑀓𑀢𑀸, 𑀤𑀸𑀦𑀁 𑀧𑀺𑀬𑀯𑀘𑀦𑁂𑀦, 𑀧𑀺𑀬𑀯𑀘𑀦𑀁 𑀅𑀢𑁆𑀣𑀘𑀭𑀺𑀬𑀸𑀬, 𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀬 𑀅𑀮𑀗𑁆𑀓𑀢𑀸 ¶ 𑀲𑀗𑁆𑀕𑀳𑀺𑀢𑀸 𑀘. 𑀢𑁂𑀲𑀁 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀅𑀢𑁆𑀢𑀦𑀸 𑀦𑀺𑀩𑁆𑀩𑀺𑀲𑁂𑀲𑁂 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀲𑀩𑁆𑀩𑀢𑁆𑀣 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸𑀬 𑀲𑀫𑀸𑀦𑀢𑁆𑀢𑀢𑀸𑀬 𑀲𑀺𑀤𑁆𑀥𑀺. 𑀩𑀼𑀤𑁆𑀥𑀪𑀽𑀢𑀸𑀦𑀫𑁆𑀧𑀺 𑀘 𑀢𑁂𑀳𑁂𑀯 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀺𑀢𑀸𑀪𑀺𑀯𑀼𑀤𑁆𑀥𑁂𑀳𑀺 𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀺𑀓𑀲𑀗𑁆𑀕𑀳𑀓𑀭𑀡𑁂𑀦 𑀅𑀪𑀺𑀯𑀺𑀦𑀬𑀦𑀁 𑀲𑀺𑀚𑁆𑀛𑀢𑀺. 𑀤𑀸𑀦𑀜𑁆𑀳𑀺 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀯𑀼𑀤𑁆𑀥𑀁, 𑀧𑀺𑀬𑀯𑀘𑀦𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦, 𑀅𑀢𑁆𑀣𑀘𑀭𑀺𑀬𑀸 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦, 𑀲𑀫𑀸𑀦𑀢𑁆𑀢𑀢𑀸 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀯𑀼𑀤𑁆𑀥𑀸. 𑀢𑀣𑀸𑀕𑀢𑀸𑀦𑀜𑁆𑀳𑀺 𑀲𑀩𑁆𑀩𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑀸𑀦𑀢𑁆𑀢𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑁂. 𑀢𑀢𑁆𑀭 𑀳𑀺 𑀦𑁂𑀲𑀁 𑀅𑀯𑀺𑀲𑁂𑀲𑀢𑁄 𑀏𑀓𑀻𑀪𑀸𑀯𑁄. 𑀢𑁂𑀦𑁂𑀯𑀸𑀳 ‘‘𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀢𑁆𑀢’’𑀦𑁆𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀲𑀘𑁆𑀘𑁄 𑀘𑀸𑀕𑀻 𑀉𑀧𑀲𑀦𑁆𑀢𑁄, 𑀧𑀜𑁆𑀜𑀯𑀸 𑀅𑀦𑀼𑀓𑀫𑁆𑀧𑀓𑁄;

𑀲𑀫𑁆𑀪𑀢𑀲𑀩𑁆𑀩𑀲𑀫𑁆𑀪𑀸𑀭𑁄, 𑀓𑀁 𑀦𑀸𑀫𑀢𑁆𑀣𑀁 𑀦 𑀲𑀸𑀥𑀬𑁂.

‘‘𑀫𑀳𑀸𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀳𑀺𑀢𑁂𑀲𑀻 𑀘 𑀉𑀧𑁂𑀓𑁆𑀔𑀓𑁄;

𑀦𑀺𑀭𑀧𑁂𑀓𑁆𑀔𑁄 𑀘 𑀲𑀩𑁆𑀩𑀢𑁆𑀣, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄.

‘‘𑀯𑀺𑀭𑀢𑁆𑀢𑁄 𑀲𑀩𑁆𑀩𑀥𑀫𑁆𑀫𑁂𑀲𑀼, 𑀲𑀢𑁆𑀢𑁂𑀲𑀼 𑀘 𑀉𑀧𑁂𑀓𑁆𑀔𑀓𑁄;

𑀲𑀤𑀸 ¶ 𑀲𑀢𑁆𑀢𑀳𑀺𑀢𑁂 𑀬𑀼𑀢𑁆𑀢𑁄, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄.

‘‘𑀲𑀩𑁆𑀩𑀤𑀸 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀘 𑀲𑀼𑀔𑀸𑀬 𑀘;

𑀉𑀬𑁆𑀬𑀼𑀢𑁆𑀢𑁄 𑀅𑀓𑀺𑀮𑀸𑀲𑀽 𑀘, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄’’𑀢𑀺.

𑀓𑀺𑀢𑁆𑀢𑀓𑁂𑀦 𑀓𑀸𑀮𑁂𑀦 𑀲𑀫𑁆𑀧𑀸𑀤𑀦𑀦𑁆𑀢𑀺? 𑀳𑁂𑀝𑁆𑀞𑀺𑀫𑁂𑀦 𑀢𑀸𑀯 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘, 𑀫𑀚𑁆𑀛𑀺𑀫𑁂𑀦 𑀅𑀝𑁆𑀞 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘, 𑀉𑀧𑀭𑀺𑀫𑁂𑀦 𑀧𑀦 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁂 𑀘 𑀪𑁂𑀤𑀸 𑀬𑀣𑀸𑀓𑁆𑀓𑀫𑀁 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀲𑁂𑀦 𑀜𑀸𑀢𑀩𑁆𑀩𑀸. 𑀧𑀜𑁆𑀜𑀸𑀥𑀺𑀓𑀸𑀦𑀜𑁆𑀳𑀺 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺 𑀧𑀜𑁆𑀜𑀸 𑀢𑀺𑀓𑁆𑀔𑀸, 𑀲𑀤𑁆𑀥𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀚𑁆𑀛𑀺𑀫𑀸 𑀳𑁄𑀢𑀺, 𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀦𑁆𑀤𑀸, 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀥𑀺𑀕𑀦𑁆𑀢𑀩𑁆𑀩𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀧𑀭𑁂 𑀧𑀦 ‘‘𑀯𑀻𑀭𑀺𑀬𑀲𑁆𑀲 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀬𑀁 𑀓𑀸𑀮𑀯𑀺𑀪𑀸𑀕𑁄’’𑀢𑀺 𑀯𑀤𑀦𑁆𑀢𑀺. 𑀅𑀯𑀺𑀲𑁂𑀲𑁂𑀦 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀮𑀪𑁂𑀤𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀸 𑀢𑁂𑀲𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑀬𑁄𑀧𑁂𑀢𑁂 𑀓𑀸𑀮𑀪𑁂𑀤𑀸 𑀬𑀼𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀁 𑀢𑀺𑀯𑀺𑀥𑀸 ¶ 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀅𑀪𑀺𑀦𑀻𑀳𑀸𑀭𑀓𑁆𑀔𑀡𑁂 𑀪𑀯𑀦𑁆𑀢𑀺 𑀉𑀕𑁆𑀖𑀳𑀝𑀺𑀢𑀜𑁆𑀜𑀽𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑁂𑀬𑁆𑀬𑀪𑁂𑀤𑁂𑀦. 𑀢𑁂𑀲𑀼 𑀬𑁄 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑁄 𑀕𑀸𑀣𑀸𑀬 𑀢𑀢𑀺𑀬𑀧𑀤𑁂 𑀅𑀧𑀭𑀺𑀬𑁄𑀲𑀺𑀢𑁂 𑀏𑀯 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 ¶ 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀲𑀘𑁂 𑀲𑀸𑀯𑀓𑀩𑁄𑀥𑀺𑀬𑀁 𑀅𑀥𑀺𑀫𑀼𑀢𑁆𑀢𑁄 𑀲𑀺𑀬𑀸.

𑀤𑀼𑀢𑀺𑀬𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑁄 𑀅𑀧𑀭𑀺𑀬𑁄𑀲𑀺𑀢𑁂 𑀏𑀯 𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀤𑁂 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀬𑀤𑀺 𑀲𑀸𑀯𑀓𑀩𑁄𑀥𑀺𑀬𑀁 𑀅𑀥𑀺𑀫𑀼𑀢𑁆𑀢𑁄 𑀲𑀺𑀬𑀸.

𑀇𑀢𑀭𑁄 𑀧𑀦 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑀸𑀬 𑀕𑀸𑀣𑀸𑀬 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺.

𑀢𑀬𑁄𑀧𑁂𑀢𑁂 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀓𑀢𑀸𑀪𑀺𑀦𑀻𑀳𑀸𑀭𑁄 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑀸 𑀘 𑀅𑀦𑀼𑀓𑁆𑀓𑀫𑁂𑀦 𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀸 𑀬𑀣𑀸𑀓𑁆𑀓𑀫𑀁 𑀬𑀣𑀸𑀯𑀼𑀢𑁆𑀢𑀪𑁂𑀤𑁂𑀦 𑀓𑀸𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀲𑀼 𑀢𑁂𑀲𑀼 𑀧𑀦 𑀓𑀸𑀮𑀪𑁂𑀤𑁂𑀲𑀼 𑀅𑀧𑀭𑀺𑀧𑀼𑀡𑁆𑀡𑁂𑀲𑀼 𑀢𑁂 ¶ 𑀢𑁂 𑀫𑀳𑀸𑀲𑀢𑁆𑀢𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑀸𑀧𑀺 𑀢𑀤𑀦𑀼𑀭𑀽𑀧𑁂 𑀲𑀻𑀮𑀸𑀤𑀺𑀲𑀩𑁆𑀩𑀧𑀸𑀭𑀫𑀺𑀥𑀫𑁆𑀫𑁂 𑀆𑀘𑀺𑀦𑀦𑁆𑀢𑀸𑀧𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑀸𑀧𑀺 𑀜𑀸𑀢𑀢𑁆𑀣𑀘𑀭𑀺𑀬𑀸 𑀮𑁄𑀓𑀢𑁆𑀣𑀘𑀭𑀺𑀬𑀸 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸 𑀧𑀭𑀫𑀓𑁄𑀝𑀺𑀁 𑀧𑀸𑀧𑁂𑀦𑁆𑀢𑀸𑀧𑀺 𑀅𑀦𑁆𑀢𑀭𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀜𑀸𑀡𑀲𑁆𑀲 𑀅𑀧𑀭𑀺𑀧𑀘𑁆𑀘𑀦𑀢𑁄 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀅𑀧𑀭𑀺𑀦𑀺𑀝𑁆𑀞𑀸𑀦𑀢𑁄. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀦𑀺𑀧𑁆𑀨𑀸𑀤𑀺𑀢𑀁 𑀯𑀺𑀬 𑀳𑀺 𑀲𑀲𑁆𑀲𑀁 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀦𑀺𑀧𑁆𑀨𑀸𑀤𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀢𑀤𑀦𑀦𑁆𑀢𑀭𑀸 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀯𑀸𑀬𑀫𑀦𑁆𑀢𑁂𑀦𑀸𑀧𑀺 𑀦 𑀲𑀓𑁆𑀓𑀸 𑀅𑀥𑀺𑀕𑀦𑁆𑀢𑀼𑀦𑁆𑀢𑀺 𑀧𑀸𑀭𑀫𑀺𑀧𑀸𑀭𑀺𑀧𑀽𑀭𑀺 𑀬𑀣𑀸𑀯𑀼𑀢𑁆𑀢𑀓𑀸𑀮𑀯𑀺𑀲𑁂𑀲𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁄 𑀆𑀦𑀺𑀲𑀁𑀲𑁄𑀢𑀺? 𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀓𑀧𑁆𑀧𑀓𑁄𑀝𑀺𑀲𑀢𑁂𑀳𑀺𑀧𑀺.

‘‘𑀅𑀯𑀻𑀘𑀺𑀫𑁆𑀳𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀮𑁄𑀓𑀦𑁆𑀢𑀭𑁂𑀲𑀼 𑀘;

𑀦𑀺𑀚𑁆𑀛𑀸𑀫𑀢𑀡𑁆𑀳𑀸 𑀔𑀼𑀧𑁆𑀧𑀺𑀧𑀸𑀲𑀸, 𑀦 𑀳𑁄𑀦𑁆𑀢𑀺 𑀓𑀸𑀮𑀓𑀜𑁆𑀚𑀺𑀓𑀸.

‘‘𑀦 ¶ 𑀳𑁄𑀦𑁆𑀢𑀺 𑀔𑀼𑀤𑁆𑀤𑀓𑀸 𑀧𑀸𑀡𑀸, 𑀉𑀧𑀧𑀚𑁆𑀚𑀦𑁆𑀢𑀸𑀧𑀺 𑀤𑀼𑀕𑁆𑀕𑀢𑀺𑀁;

𑀚𑀸𑀬𑀫𑀸𑀦𑀸 𑀫𑀦𑀼𑀲𑁆𑀲𑁂𑀲𑀼, 𑀚𑀘𑁆𑀘𑀦𑁆𑀥𑀸 𑀦 𑀪𑀯𑀦𑁆𑀢𑀺 𑀢𑁂.

‘‘𑀲𑁄𑀢𑀯𑁂𑀓𑀮𑁆𑀮𑀢𑀸 ¶ 𑀦𑀢𑁆𑀣𑀺, 𑀦 𑀪𑀯𑀦𑁆𑀢𑀺 𑀫𑀽𑀕𑀧𑀓𑁆𑀔𑀺𑀓𑀸;

𑀇𑀢𑁆𑀣𑀺𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀧𑀡𑁆𑀟𑀓𑀸.

‘‘𑀦 𑀪𑀯𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀫𑀼𑀢𑁆𑀢𑀸 𑀆𑀦𑀦𑁆𑀢𑀭𑀺𑀓𑁂𑀳𑀺, 𑀲𑀩𑁆𑀩𑀢𑁆𑀣 𑀲𑀼𑀤𑁆𑀥𑀕𑁄𑀘𑀭𑀸.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑀦𑁆𑀢𑀺, 𑀓𑀫𑁆𑀫𑀓𑀺𑀭𑀺𑀬𑀤𑀲𑁆𑀲𑀦𑀸;

𑀯𑀲𑀫𑀸𑀦𑀸𑀧𑀺 𑀲𑀕𑁆𑀕𑁂𑀲𑀼, 𑀅𑀲𑀜𑁆𑀜𑀁 𑀦𑀽𑀧𑀧𑀚𑁆𑀚𑀭𑁂.

‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼, 𑀳𑁂𑀢𑀼 𑀦𑀸𑀫 𑀦 𑀯𑀺𑀚𑁆𑀚𑀢𑀺;

𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀸 𑀲𑀧𑁆𑀧𑀼𑀭𑀺𑀲𑀸, 𑀯𑀺𑀲𑀁𑀬𑀼𑀢𑁆𑀢𑀸 𑀪𑀯𑀸𑀪𑀯𑁂;

𑀘𑀭𑀦𑁆𑀢𑀺 𑀮𑁄𑀓𑀢𑁆𑀣𑀘𑀭𑀺𑀬𑀸𑀬𑁄, 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀧𑀸𑀭𑀫𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑁋

𑀏𑀯𑀁 𑀲𑀁𑀯𑀡𑁆𑀡𑀺𑀢𑀸 𑀆𑀦𑀺𑀲𑀁𑀲𑀸. 𑀬𑁂 𑀘 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁦𑁦; 𑀤𑀻. 𑀦𑀺. 𑁨.𑁧𑁭) 𑀲𑁄𑀴𑀲 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀧𑁆𑀧𑀓𑀸𑀭𑀸, 𑀬𑁂 𑀘 ‘‘𑀲𑀻𑀢𑀁 𑀩𑁆𑀬𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀉𑀧𑀲𑀫𑁆𑀫𑀢𑀻’’𑀢𑀺𑀆𑀤𑀺𑀦𑀸 (𑀩𑀼. 𑀯𑀁. 𑁨.𑁮𑁩) ‘‘𑀚𑀸𑀬𑀫𑀸𑀦𑁂 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀩𑁄𑀥𑀺𑀲𑀢𑁆𑀢𑁂 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁦𑁧; 𑀤𑀻. 𑀦𑀺. 𑁨.𑁩𑁨) 𑀘 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀧𑁆𑀧𑀓𑀸𑀭𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 ¶ 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀁 𑀓𑀫𑁆𑀫𑀸𑀤𑀻𑀲𑀼 𑀯𑀲𑀻𑀪𑀸𑀯𑁄𑀢𑀺 𑀏𑀯𑀫𑀸𑀤𑀬𑁄 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀓𑀩𑀼𑀤𑁆𑀥𑀯𑀁𑀲𑀸𑀤𑀻𑀲𑀼 𑀤𑀲𑁆𑀲𑀺𑀢𑀸𑀓𑀸𑀭𑀸 𑀆𑀦𑀺𑀲𑀁𑀲𑀸, 𑀢𑁂 𑀲𑀩𑁆𑀩𑁂𑀧𑀺 𑀏𑀢𑀸𑀲𑀁 𑀆𑀦𑀺𑀲𑀁𑀲𑀸. 𑀢𑀣𑀸 𑀬𑀣𑀸𑀦𑀺𑀤𑀲𑁆𑀲𑀺𑀢𑀪𑁂𑀤𑀸 𑀅𑀮𑁄𑀪𑀸𑀤𑁄𑀲𑀸𑀤𑀺𑀕𑀼𑀡𑀬𑀼𑀕𑀮𑀸𑀤𑀬𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺 𑀘 𑀬𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀺𑀢𑀼𑀲𑀫𑁄 𑀳𑁄𑀢𑀺 𑀳𑀺𑀢𑁂𑀲𑀺𑀢𑀸𑀬, 𑀤𑀓𑁆𑀔𑀺𑀡𑁂𑀬𑁆𑀬𑀓𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀧𑀭𑀫𑀜𑁆𑀘 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀳𑁄𑀢𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦. 𑀬𑁂𑀪𑀼𑀬𑁆𑀬𑁂𑀦 𑀘 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀤𑁂𑀯𑀢𑀸𑀳𑀺 𑀅𑀦𑀼𑀧𑀸𑀮𑀻𑀬𑀢𑀺, 𑀫𑁂𑀢𑁆𑀢𑀸𑀓𑀭𑀼𑀡𑀸𑀧𑀭𑀺𑀪𑀸𑀯𑀺𑀢𑀲𑀦𑁆𑀢𑀸𑀦𑀢𑀸𑀬 𑀯𑀸𑀴𑀫𑀺𑀕𑀸𑀤𑀻𑀳𑀺 𑀘 𑀅𑀦𑀪𑀺𑀪𑀯𑀦𑀻𑀬𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀜𑁆𑀘 𑀲𑀢𑁆𑀢𑀦𑀺𑀓𑀸𑀬𑁂 ¶ 𑀧𑀘𑁆𑀘𑀸𑀚𑀸𑀬𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀴𑀸𑀭𑁂𑀦 𑀯𑀡𑁆𑀡𑁂𑀦 𑀉𑀴𑀸𑀭𑁂𑀦 𑀬𑀲𑁂𑀦 𑀉𑀴𑀸𑀭𑁂𑀦 𑀲𑀼𑀔𑁂𑀦 𑀉𑀴𑀸𑀭𑁂𑀦 𑀩𑀮𑁂𑀦 𑀉𑀴𑀸𑀭𑁂𑀦 ¶ 𑀆𑀥𑀺𑀧𑀢𑁂𑀬𑁆𑀬𑁂𑀦 𑀅𑀜𑁆𑀜𑁂 𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑀬𑁄𑀕𑀢𑁄.

𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄, 𑀲𑀼𑀯𑀺𑀲𑀼𑀤𑁆𑀥𑀸 𑀘𑀲𑁆𑀲 𑀲𑀤𑁆𑀥𑀸 𑀳𑁄𑀢𑀺 𑀲𑀼𑀯𑀺𑀲𑀤𑀸, 𑀲𑀼𑀯𑀺𑀲𑀼𑀤𑁆𑀥𑀁 𑀯𑀻𑀭𑀺𑀬𑀁, 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸 𑀲𑀼𑀯𑀺𑀲𑀤𑀸, 𑀫𑀦𑁆𑀤𑀓𑀺𑀮𑁂𑀲𑁄 𑀳𑁄𑀢𑀺 𑀫𑀦𑁆𑀤𑀤𑀭𑀣𑁄 𑀫𑀦𑁆𑀤𑀧𑀭𑀺𑀴𑀸𑀳𑁄, 𑀓𑀺𑀮𑁂𑀲𑀸𑀦𑀁 𑀫𑀦𑁆𑀤𑀪𑀸𑀯𑁂𑀦𑁂𑀯 𑀲𑀼𑀯𑀘𑁄 𑀳𑁄𑀢𑀺 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻, 𑀔𑀫𑁄 𑀳𑁄𑀢𑀺 𑀲𑁄𑀭𑀢𑁄, 𑀲𑀔𑀺𑀮𑁄 𑀳𑁄𑀢𑀺 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑁄, 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺 𑀅𑀦𑀼𑀧𑀦𑀸𑀳𑀻, 𑀅𑀫𑀓𑁆𑀔𑀻 𑀳𑁄𑀢𑀺 𑀅𑀧𑀴𑀸𑀲𑀻, 𑀅𑀦𑀺𑀲𑁆𑀲𑀼𑀓𑀻 𑀳𑁄𑀢𑀺 𑀅𑀫𑀘𑁆𑀙𑀭𑀻, 𑀅𑀲𑀞𑁄 𑀳𑁄𑀢𑀺 𑀅𑀫𑀸𑀬𑀸𑀯𑀻, 𑀅𑀣𑀤𑁆𑀥𑁄 𑀳𑁄𑀢𑀺 𑀅𑀦𑀢𑀺𑀫𑀸𑀦𑀻, 𑀅𑀲𑀸𑀭𑀤𑁆𑀥𑁄 𑀳𑁄𑀢𑀺 𑀅𑀧𑁆𑀧𑀫𑀢𑁆𑀢𑁄, 𑀧𑀭𑀢𑁄 𑀉𑀧𑀢𑀸𑀧𑀲𑀳𑁄 𑀳𑁄𑀢𑀺 𑀧𑀭𑁂𑀲𑀁 𑀅𑀦𑀼𑀧𑀢𑀸𑀧𑀻, 𑀬𑀲𑁆𑀫𑀺𑀜𑁆𑀘 𑀕𑀸𑀫𑀔𑁂𑀢𑁆𑀢𑁂 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀲𑀢𑁆𑀢𑀸𑀦𑀁 𑀪𑀬𑀸𑀤𑀬𑁄 𑀉𑀧𑀤𑁆𑀤𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀬𑁂𑀲𑀼 𑀘 𑀅𑀧𑀸𑀬𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀢𑁆𑀣 𑀧𑀘𑀼𑀭𑀚𑀦𑁄 𑀯𑀺𑀬 𑀤𑀼𑀓𑁆𑀔𑁂𑀦 𑀅𑀥𑀺𑀫𑀢𑁆𑀢𑀁 𑀧𑀻𑀴𑀻𑀬𑀢𑀺, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀁𑀯𑁂𑀕𑀫𑀸𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀣𑀸𑀭𑀳𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀮𑀩𑁆𑀪𑀫𑀸𑀦𑀸 𑀏𑀢𑁂 𑀲𑀢𑁆𑀢𑀸𑀦𑀁 𑀧𑀺𑀢𑀼𑀲𑀫𑀢𑀸𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀸 𑀆𑀦𑀺𑀲𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 𑀆𑀬𑀼𑀲𑀫𑁆𑀧𑀤𑀸 𑀭𑀽𑀧𑀲𑀫𑁆𑀧𑀤𑀸 𑀓𑀼𑀮𑀲𑀫𑁆𑀧𑀤𑀸 𑀇𑀲𑁆𑀲𑀭𑀺𑀬𑀲𑀫𑁆𑀧𑀤𑀸 𑀆𑀤𑁂𑀬𑁆𑀬𑀯𑀘𑀦𑀢𑀸 𑀫𑀳𑀸𑀦𑀼𑀪𑀸𑀯𑀢𑀸𑀢𑀺 𑀏𑀢𑁂𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀭𑀫𑀻𑀦𑀁 𑀆𑀦𑀺𑀲𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀆𑀬𑀼𑀲𑀫𑁆𑀧𑀤𑀸 𑀦𑀸𑀫 𑀢𑀲𑁆𑀲𑀁 𑀢𑀲𑁆𑀲𑀁 𑀉𑀧𑀧𑀢𑁆𑀢𑀺𑀬𑀁 𑀤𑀻𑀖𑀸𑀬𑀼𑀓𑀢𑀸 𑀘𑀺𑀭𑀝𑁆𑀞𑀺𑀢𑀺𑀓𑀢𑀸, 𑀢𑀸𑀬 𑀬𑀣𑀸𑀭𑀤𑁆𑀥𑀸𑀦𑀺 𑀓𑀼𑀲𑀮𑀲𑀫𑀸𑀤𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀩𑀳𑀼𑀜𑁆𑀘 𑀓𑀼𑀲𑀮𑀁 𑀉𑀧𑀘𑀺𑀦𑁄𑀢𑀺. 𑀭𑀽𑀧𑀲𑀫𑁆𑀧𑀤𑀸 𑀦𑀸𑀫 ¶ 𑀅𑀪𑀺𑀭𑀽𑀧𑀢𑀸 𑀤𑀲𑁆𑀲𑀦𑀻𑀬𑀢𑀸 𑀧𑀸𑀲𑀸𑀤𑀺𑀓𑀢𑀸, 𑀢𑀸𑀬 𑀭𑀽𑀧𑀧𑁆𑀧𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀧𑀲𑀸𑀤𑀸𑀯𑀳𑁄 𑀳𑁄𑀢𑀺 𑀲𑀫𑁆𑀪𑀸𑀯𑀦𑀻𑀬𑁄. 𑀓𑀼𑀮𑀲𑀫𑁆𑀧𑀤𑀸 𑀦𑀸𑀫 𑀉𑀴𑀸𑀭𑁂𑀲𑀼 𑀓𑀼𑀮𑁂𑀲𑀼 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀢𑀸𑀬 𑀚𑀸𑀢𑀺𑀫𑀤𑀸𑀤𑀺𑀫𑀤𑀫𑀢𑁆𑀢𑀸𑀦𑀫𑁆𑀧𑀺 𑀉𑀧𑀲𑀗𑁆𑀓𑀫𑀦𑀻𑀬𑁄 𑀳𑁄𑀢𑀺 𑀧𑀬𑀺𑀭𑀼𑀧𑀸𑀲𑀦𑀻𑀬𑁄, 𑀢𑁂𑀦 𑀢𑁂 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀭𑁄𑀢𑀺. 𑀇𑀲𑁆𑀲𑀭𑀺𑀬𑀲𑀫𑁆𑀧𑀤𑀸 𑀦𑀸𑀫 𑀫𑀳𑀸𑀯𑀺𑀪𑀯𑀢𑀸 𑀫𑀳𑁂𑀲𑀓𑁆𑀔𑀢𑀸 𑀫𑀳𑀸𑀧𑀭𑀺𑀯𑀸𑀭𑀢𑀸 𑀘, 𑀢𑀸𑀳𑀺 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀺𑀢𑀼𑀁, 𑀦𑀺𑀕𑁆𑀕𑀳𑁂𑀢𑀩𑁆𑀩𑁂 𑀥𑀫𑁆𑀫𑁂𑀦 𑀦𑀺𑀕𑁆𑀕𑀳𑁂𑀢𑀼𑀜𑁆𑀘 𑀲𑀫𑀢𑁆𑀣𑁄 𑀳𑁄𑀢𑀺.

𑀆𑀤𑁂𑀬𑁆𑀬𑀯𑀘𑀦𑀢𑀸 𑀦𑀸𑀫 𑀲𑀤𑁆𑀥𑁂𑀬𑁆𑀬𑀢𑀸 𑀧𑀘𑁆𑀘𑀬𑀺𑀓𑀢𑀸, 𑀢𑀸𑀬 𑀲𑀢𑁆𑀢𑀸𑀦𑀁 𑀧𑀫𑀸𑀡𑀪𑀽𑀢𑁄 𑀳𑁄𑀢𑀺, 𑀅𑀮𑀗𑁆𑀖𑀦𑀻𑀬𑀸 𑀘𑀲𑁆𑀲 𑀆𑀡𑀸 𑀳𑁄𑀢𑀺. 𑀫𑀳𑀸𑀦𑀼𑀪𑀸𑀯𑀢𑀸 𑀦𑀸𑀫 𑀆𑀦𑀼𑀪𑀸𑀯𑀫𑀳𑀦𑁆𑀢𑀢𑀸, 𑀢𑀸𑀬 𑀧𑀭𑁂𑀳𑀺 𑀦 𑀅𑀪𑀺𑀪𑀽𑀬𑀢𑀺, 𑀲𑀬𑀫𑁂𑀯 ¶ 𑀧𑀦 𑀧𑀭𑁂 𑀅𑀜𑁆𑀜𑀤𑀢𑁆𑀣𑀼 𑀅𑀪𑀺𑀪𑀯𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀘, 𑀏𑀯𑀫𑁂𑀢𑁂 𑀆𑀬𑀼𑀲𑀫𑁆𑀧𑀤𑀸𑀤𑀬𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀭𑀫𑀻𑀦𑀁 𑀆𑀦𑀺𑀲𑀁𑀲𑀸, 𑀲𑀬𑀜𑁆𑀘 𑀅𑀧𑀭𑀺𑀫𑀸𑀡𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀧𑀭𑀺𑀯𑀼𑀟𑁆𑀠𑀺𑀳𑁂𑀢𑀼𑀪𑀽𑀢𑀸 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑀸𑀦𑀁 𑀅𑀯𑀢𑀸𑀭𑀡𑀲𑁆𑀲 𑀧𑀭𑀺𑀧𑀸𑀘𑀦𑀲𑁆𑀲 𑀘 𑀓𑀸𑀭𑀡𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 ¶ 𑀨𑀮𑀦𑁆𑀢𑀺? 𑀲𑀫𑀸𑀲𑀢𑁄 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁄 𑀏𑀢𑀸𑀲𑀁 𑀨𑀮𑀁, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀅𑀦𑁂𑀓𑀕𑀼𑀡𑀕𑀡𑀲𑀫𑀼𑀚𑁆𑀚𑀮𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺- 𑀅𑀥𑀺𑀝𑁆𑀞𑀸𑀦𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀙𑀅𑀲𑀸𑀥𑀸𑀭𑀡𑀜𑀸𑀡𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓- 𑀩𑀼𑀤𑁆𑀥𑀥𑀫𑁆𑀫𑀧𑁆𑀧𑀪𑀼𑀢𑀺𑀅𑀦𑀦𑁆𑀢𑀸𑀧𑀭𑀺𑀫𑀸𑀡 𑀕𑀼𑀡𑀲𑀫𑀼𑀤𑀬𑁄𑀧𑀲𑁄𑀪𑀺𑀦𑀻 𑀥𑀫𑁆𑀫𑀓𑀸𑀬𑀲𑀺𑀭𑀻. 𑀬𑀸𑀯𑀢𑀸 𑀧𑀦 𑀩𑀼𑀤𑁆𑀥𑀕𑀼𑀡𑀸 𑀬𑁂 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀧𑀺 𑀯𑀸𑀘𑀸𑀬 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀫𑁂𑀢𑀸𑀲𑀁 𑀨𑀮𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁, 𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂, 𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸);

𑀏𑀯𑀫𑁂𑀢𑁆𑀣 𑀧𑀸𑀭𑀫𑀻𑀲𑀼 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀤𑀢𑁆𑀯𑀸 𑀤𑀸𑀢𑀩𑁆𑀩𑀓𑀁 𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀸𑀧𑀺 𑀧𑀸𑀭𑀫𑀻 𑀏𑀓𑀚𑁆𑀛𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀢𑁄 ‘‘𑀓𑁄𑀲𑀚𑁆𑀚𑀁 𑀪𑀬𑀢𑁄 𑀤𑀺𑀲𑁆𑀯𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀬𑁄𑀲𑀸𑀦𑀕𑀸𑀣𑀸𑀤𑁆𑀯𑀬𑀁 𑀯𑀼𑀢𑁆𑀢𑀁, 𑀢𑀁 ¶ 𑀬𑁂𑀳𑀺 𑀯𑀻𑀭𑀺𑀬𑀸𑀭𑀫𑁆𑀪𑀫𑁂𑀢𑁆𑀢𑀸𑀪𑀸𑀯𑀦𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑁂𑀳𑀺 𑀬𑀣𑀸𑀯𑀼𑀢𑁆𑀢𑀸 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀯𑀺𑀲𑀤𑀪𑀸𑀯𑀁 𑀕𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀸 𑀘 𑀅𑀢𑁆𑀢𑀦𑁄 𑀯𑀺𑀫𑀼𑀢𑁆𑀢𑀺 𑀧𑀭𑀺𑀧𑀸𑀘𑀺𑀢𑀸, 𑀢𑁂𑀳𑀺 𑀯𑁂𑀦𑁂𑀬𑁆𑀬𑀸𑀦𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀸𑀬 𑀑𑀯𑀸𑀤𑀤𑀸𑀦𑀢𑁆𑀣𑀁 𑀯𑀼𑀢𑁆𑀣𑀁.

𑀢𑀢𑁆𑀣 𑀓𑁄𑀲𑀚𑁆𑀚𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀯𑀻𑀭𑀺𑀬𑀸𑀭𑀫𑁆𑀪𑀜𑁆𑀘 𑀔𑁂𑀫𑀢𑁄𑀢𑀺 𑀇𑀫𑀺𑀦𑀸 𑀧𑀝𑀺𑀧𑀓𑁆𑀔𑁂 𑀆𑀤𑀻𑀦𑀯𑀤𑀲𑁆𑀲𑀦𑀫𑀼𑀔𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑀸 𑀳𑁄𑀣𑀸𑀢𑀺 𑀇𑀫𑀺𑀦𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀦𑀺𑀬𑁄𑀚𑁂𑀢𑀺. 𑀬𑀲𑁆𑀫𑀸 𑀘 𑁋

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀥. 𑀧. 𑁧𑁮𑁩; 𑀤𑀻. 𑀦𑀺. 𑁨.𑁯𑁦; 𑀦𑁂𑀢𑁆𑀢𑀺. 𑁩𑁦, 𑁫𑁦) 𑁋

𑀲𑀗𑁆𑀔𑁂𑀧𑀢𑁄 ¶ . 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀓𑀮𑁂𑀦 𑀩𑀼𑀤𑁆𑀥𑀯𑀘𑀦𑁂𑀦 𑀧𑀓𑀸𑀲𑀺𑀢𑀸 𑀲𑀩𑁆𑀩𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀫𑀧𑁆𑀧𑀥𑀸𑀦𑀸𑀥𑀻𑀦𑀸, 𑀢𑀲𑁆𑀫𑀸 𑀪𑀕𑀯𑀸 𑀯𑀻𑀭𑀺𑀬𑀸𑀭𑀫𑁆𑀪𑁂 𑀦𑀺𑀬𑁄𑀚𑁂𑀢𑁆𑀯𑀸 ‘‘𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻’’𑀢𑀺 𑀆𑀳.

𑀢𑀢𑁆𑀭𑀸𑀬𑀁 ¶ 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀲𑀩𑁆𑀩𑀲𑀁𑀓𑀺𑀮𑁂𑀲𑀫𑀽𑀮𑀪𑀸𑀯𑀢𑁄 𑀲𑀩𑁆𑀩𑀸𑀦𑀢𑁆𑀣𑀯𑀺𑀥𑀸𑀬𑀓𑀦𑁆𑀢𑀺 𑀓𑁄𑀲𑀚𑁆𑀚𑀁 𑀪𑀬𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀯𑀪𑀸𑀯𑀲𑀸𑀥𑀦𑀢𑁄 𑀯𑀻𑀭𑀺𑀬𑀸𑀭𑀫𑁆𑀪𑀜𑁆𑀘 𑀔𑁂𑀫𑀢𑁄 𑀤𑀺𑀲𑁆𑀯𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀫𑁆𑀧𑀸𑀤𑀦𑀯𑀲𑁂𑀦 𑀯𑀻𑀭𑀺𑀬𑀲𑁆𑀲 𑀆𑀭𑀫𑁆𑀪𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀼𑀬𑁄𑀕𑁄, 𑀢𑀢𑁆𑀣 𑀬𑀁 𑀲𑀫𑁆𑀫𑀤𑁂𑀯 𑀦𑀺𑀬𑁄𑀚𑀦, ‘‘𑀆𑀭𑀤𑁆𑀥𑀯𑀻𑀭𑀺𑀬𑀸 𑀳𑁄𑀣𑀸’’𑀢𑀺, 𑀏𑀲𑀸 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀻 𑀅𑀦𑀼𑀲𑀺𑀝𑁆𑀞𑀺 𑀑𑀯𑀸𑀤𑁄𑀢𑀺. 𑀲𑁂𑀲𑀕𑀸𑀣𑀸𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀺𑀯𑀸𑀤𑀦𑁆𑀢𑀺 𑀯𑀺𑀭𑀼𑀤𑁆𑀥𑀯𑀸𑀤𑀁, 𑀙𑀯𑀺𑀯𑀸𑀤𑀯𑀢𑁆𑀣𑀼𑀯𑀲𑁂𑀦 𑀯𑀺𑀯𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀯𑀸𑀤𑀦𑁆𑀢𑀺 𑀯𑀺𑀯𑀸𑀤𑀧𑀝𑀺𑀧𑀓𑁆𑀔𑀁 𑀫𑁂𑀢𑁆𑀢𑀸𑀯𑀘𑀻𑀓𑀫𑁆𑀫𑀁, 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀸. 𑀅𑀣 𑀯𑀸 𑀅𑀯𑀺𑀯𑀸𑀤𑀦𑁆𑀢𑀺 𑀅𑀯𑀺𑀯𑀸𑀤𑀳𑁂𑀢𑀼𑀪𑀽𑀢𑀁 𑀙𑀩𑁆𑀩𑀺𑀥𑀁 𑀲𑀸𑀭𑀡𑀻𑀬𑀥𑀫𑁆𑀫𑀁. 𑀲𑀫𑀕𑁆𑀕𑀸𑀢𑀺 𑀅𑀯𑀕𑁆𑀕𑀸, 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀲𑀳𑀺𑀢𑀸 𑀅𑀯𑀺𑀭𑀫𑀺𑀢𑀸 𑀅𑀯𑀺𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀔𑀺𑀮𑀸𑀢𑀺 𑀲𑀓𑁆𑀓𑀻𑀮𑀸 𑀫𑀼𑀤𑀼𑀲𑀻𑀮𑀸, 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀫𑀼𑀤𑀼𑀳𑀤𑀬𑀸𑀢𑀺 𑀅𑀢𑁆𑀣𑁄. 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻𑀢𑀺 𑀏𑀢𑁆𑀣 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀯𑀸𑀤𑀫𑀦𑀼𑀧𑀕𑀫𑁆𑀫 𑀬𑀤𑀺𑀤𑀁 𑀙𑀲𑀸𑀭𑀡𑀻𑀬𑀥𑀫𑁆𑀫𑀧𑀭𑀺𑀧𑀽𑀭𑀡𑀯𑀲𑁂𑀦 𑀲𑀫𑀕𑁆𑀕𑀯𑀸𑀲𑁂 𑀦𑀺𑀬𑁄𑀚𑀦𑀁, 𑀏𑀲𑀸 𑀩𑀼𑀤𑁆𑀥𑀸𑀦𑀁 𑀅𑀦𑀼𑀲𑀺𑀝𑁆𑀞𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀕𑁆𑀕𑀯𑀸𑀲𑀜𑁆𑀳𑀺 𑀯𑀲𑀫𑀸𑀦𑀸 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑀸 𑀅𑀯𑀺𑀯𑀤𑀫𑀸𑀦𑀸 𑀲𑀼𑀔𑁂𑀦𑁂𑀯 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀲𑀢𑁆𑀣𑀸 𑀲𑀫𑀕𑁆𑀕𑀯𑀸𑀲𑁂 𑀦𑀺𑀬𑁄𑀚𑀦𑀁 𑀅𑀢𑁆𑀢𑀦𑁄 𑀲𑀸𑀲𑀦𑀦𑁆𑀢𑀺 𑀤𑀲𑁆𑀲𑁂𑀲𑀺.

𑀧𑀫𑀸𑀤𑀦𑁆𑀢𑀺 𑀧𑀫𑀚𑁆𑀚𑀦𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀫𑀼𑀲𑁆𑀲𑀦𑀁 𑀅𑀓𑀼𑀲𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑁄 𑀧𑀫𑀸𑀤𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 ¶ 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀯𑀸 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸, 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸, 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸, 𑀑𑀮𑀻𑀦𑀯𑀼𑀢𑁆𑀢𑀺𑀢𑀸, 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸, 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁…𑀧𑁂… 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄’’𑀢𑀺 (𑀯𑀺𑀪. 𑁮𑁪𑁬).

𑀅𑀧𑁆𑀧𑀫𑀸𑀤𑀦𑁆𑀢𑀺 𑀅𑀧𑁆𑀧𑀫𑀚𑁆𑀚𑀦𑀁. 𑀢𑀁 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀢𑁄 𑀳𑀺 𑀅𑀧𑁆𑀧𑀫𑀸𑀤𑁄 𑀦𑀸𑀫 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄, ‘‘𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄’’𑀢𑀺 𑀘 ¶ 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀏𑀯𑁂𑀢𑀁 𑀦𑀸𑀫𑀁. 𑀅𑀧𑀭𑁂 𑀧𑀦 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑀧𑁆𑀧𑀥𑀸𑀦𑀸 𑀢𑀣𑀸 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀅𑀧𑁆𑀧𑀫𑀸𑀤𑁄’’𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀧𑁆𑀧𑀫𑀸𑀤𑀪𑀸𑀯𑀦𑀸 𑀦𑀸𑀫 𑀯𑀺𑀲𑀼𑀁 𑀏𑀓𑀸 𑀪𑀸𑀯𑀦𑀸 𑀦𑀢𑁆𑀣𑀺. 𑀬𑀸 𑀳𑀺 𑀓𑀸𑀘𑀺 𑀧𑀼𑀜𑁆𑀜𑀓𑀺𑀭𑀺𑀬𑀸 𑀓𑀼𑀲𑀮𑀓𑀺𑀭𑀺𑀬𑀸, 𑀲𑀩𑁆𑀩𑀸 𑀲𑀸 𑀅𑀧𑁆𑀧𑀫𑀸𑀤𑀪𑀸𑀯𑀦𑀸𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀲𑀭𑀡𑀕𑀫𑀦𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑀜𑁆𑀘 𑀉𑀧𑀸𑀤𑀸𑀬 𑀲𑀩𑁆𑀩𑀸 𑀲𑀻𑀮𑀪𑀸𑀯𑀦𑀸, 𑀲𑀩𑁆𑀩𑀸 𑀲𑀫𑀸𑀥𑀺𑀪𑀸𑀯𑀦𑀸, 𑀲𑀩𑁆𑀩𑀸 𑀧𑀜𑁆𑀜𑀸𑀪𑀸𑀯𑀦𑀸, 𑀲𑀩𑁆𑀩𑀸 𑀓𑀼𑀲𑀮𑀪𑀸𑀯𑀦𑀸, 𑀅𑀦𑀯𑀚𑁆𑀚𑀪𑀸𑀯𑀦𑀸 ¶ , 𑀅𑀧𑁆𑀧𑀫𑀸𑀤𑀪𑀸𑀯𑀦𑀸. ‘‘𑀅𑀧𑁆𑀧𑀫𑀸𑀤𑁄’’𑀢𑀺 𑀳𑀺 𑀇𑀤𑀁 𑀧𑀤𑀁 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀤𑀻𑀧𑁂𑀢𑀺, 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀓𑀮𑀫𑁆𑀧𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀅𑀧𑁆𑀧𑀫𑀸𑀤𑀧𑀤𑀲𑁆𑀲 𑀅𑀢𑁆𑀣𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 ‘‘𑀅𑀢𑀺𑀢𑁆𑀣𑁂𑀦 𑀧𑀓𑁆𑀔𑀦𑁆𑀤𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀓𑀲𑁆𑀫𑀸? 𑀅𑀧𑁆𑀧𑀫𑀸𑀤𑀧𑀤𑀲𑁆𑀲 𑀫𑀳𑀦𑁆𑀢𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀼𑀲𑀺𑀦𑀸𑀭𑀸𑀬𑀁 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀦𑀺𑀧𑀦𑁆𑀦𑁄 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀬 𑀯𑀲𑁆𑀲𑁂𑀲𑀼 𑀅𑀢𑁆𑀢𑀦𑀸 𑀪𑀸𑀲𑀺𑀢𑀁 𑀥𑀫𑁆𑀫𑀁 𑀏𑀓𑁂𑀦𑁂𑀯 𑀧𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁮) 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀫𑀤𑀸𑀲𑀺. 𑀢𑀣𑀸 𑀘𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀗𑁆𑀕𑀫𑀸𑀦𑀁 𑀧𑀸𑀡𑀸𑀦𑀁 𑀧𑀤𑀚𑀸𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀳𑀢𑁆𑀣𑀺𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸, 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁦 𑀣𑁄𑀓𑀁 𑀯𑀺𑀲𑀤𑀺𑀲𑀁). 𑀢𑀢𑁆𑀣 𑀅𑀧𑁆𑀧𑀫𑀸𑀤𑀪𑀸𑀯𑀦𑀁 𑀲𑀺𑀔𑀸𑀧𑁆𑀧𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀪𑀸𑀯𑁂𑀣𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕’’𑀦𑁆𑀢𑀺 𑀆𑀳.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀏𑀲 𑀲𑀻𑀮𑀸𑀤𑀺𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁𑀬𑁂𑀯 ¶ 𑀅𑀝𑁆𑀞𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄, 𑀢𑀁 𑀪𑀸𑀯𑁂𑀣 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀣. 𑀤𑀲𑁆𑀲𑀦𑀫𑀕𑁆𑀕𑀫𑀢𑁆𑀢𑁂 𑀅𑀞𑀢𑁆𑀯𑀸 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀉𑀧𑁆𑀧𑀸𑀤𑀦𑀯𑀲𑁂𑀦 𑀯𑀟𑁆𑀠𑁂𑀣, 𑀏𑀯𑀁 𑀯𑁄 𑀅𑀧𑁆𑀧𑀫𑀸𑀤𑀪𑀸𑀯𑀦𑀸 𑀲𑀺𑀔𑀸𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻𑀢𑀺 𑀬𑀤𑀺𑀤𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀫𑀚𑁆𑀚𑀦𑀁, 𑀢𑀜𑁆𑀘 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀦𑀸 𑀏𑀲𑀸 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀦𑀼𑀲𑀺𑀝𑁆𑀞𑀺 𑀑𑀯𑀸𑀤𑁄𑀢𑀺.

𑀇𑀢𑀺 ¶ 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀘𑀭𑀺𑀬𑀸𑀧𑀺𑀝𑀓𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀇𑀢𑁆𑀣𑀁 𑀲𑀼𑀤𑀦𑁆𑀢𑀺𑀆𑀤𑀻𑀲𑀼 𑀇𑀢𑁆𑀣𑀦𑁆𑀢𑀺 𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂𑀢𑀺𑀆𑀤𑀺𑀦𑀸 (𑀘𑀭𑀺𑀬𑀸. 𑁧.𑁧) 𑀧𑀓𑀸𑀭𑁂𑀦. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀪𑀕𑀯𑀸𑀢𑀺 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸. 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀬𑀦𑁆𑀢𑀺 𑀧𑀼𑀭𑀺𑀫𑀸𑀲𑀼 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀸𑀤𑀺𑀚𑀸𑀢𑀻𑀲𑀼 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀤𑀼𑀓𑁆𑀓𑀭𑀓𑀺𑀭𑀺𑀬𑀁. 𑀲𑀫𑁆𑀪𑀸𑀯𑀬𑀫𑀸𑀦𑁄𑀢𑀺 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀫𑁆𑀫𑀤𑁂𑀯 𑀧𑀓𑀸𑀲𑁂𑀦𑁆𑀢𑁄. 𑀩𑀼𑀤𑁆𑀥𑀸𑀧𑀤𑀸𑀦𑀺𑀬𑀁 𑀦𑀸𑀫𑀸𑀢𑀺 𑀩𑀼𑀤𑁆𑀥𑀸𑀦𑀁 𑀧𑀼𑀭𑀸𑀢𑀦𑀓𑀫𑁆𑀫𑀁 𑀧𑁄𑀭𑀸𑀡𑀁 𑀤𑀼𑀓𑁆𑀓𑀭𑀓𑀺𑀭𑀺𑀬𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀤𑁂𑀲𑀺𑀢𑀢𑁆𑀢𑀸 𑀩𑀼𑀤𑁆𑀥𑀸𑀧𑀤𑀸𑀦𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑀁. 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀁 𑀥𑀫𑁆𑀫𑀪𑀽𑀢𑀁 𑀯𑀸 𑀓𑀸𑀭𑀡𑀁. 𑀅𑀪𑀸𑀲𑀺𑀢𑁆𑀣𑀸𑀢𑀺 𑀅𑀯𑁄𑀘. 𑀬𑀁 𑀧𑀦𑁂𑀢𑁆𑀣 𑀦 𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 ¶ 𑀘 𑁋

𑀯𑀺𑀲𑀼𑀤𑁆𑀥𑀘𑀭𑀺𑀢𑁄 𑀲𑀢𑁆𑀣𑀸, 𑀩𑀼𑀤𑁆𑀥𑀺𑀘𑀭𑀺𑀬𑀸𑀬 𑀧𑀸𑀭𑀕𑀽;

𑀲𑀩𑁆𑀩𑀘𑀭𑀺𑀬𑀸𑀲𑀼 𑀓𑀼𑀲𑀮𑁄, 𑀮𑁄𑀓𑀸𑀘𑀭𑀺𑀬𑁄 𑀅𑀦𑀼𑀢𑁆𑀢𑀭𑁄.

𑀬𑀁 𑀅𑀘𑁆𑀙𑀭𑀺𑀬𑀥𑀫𑁆𑀫𑀸𑀦𑀁, 𑀲𑀩𑁆𑀩𑀫𑀘𑁆𑀙𑀭𑀺𑀬𑀸𑀢𑀺𑀕𑁄;

𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀬𑀸𑀦𑀁, 𑀆𑀦𑀼𑀪𑀸𑀯𑀯𑀺𑀪𑀸𑀯𑀦𑀁.

𑀤𑁂𑀲𑁂𑀲𑀺 𑀦𑀸𑀣𑁄 𑀘𑀭𑀺𑀬𑀸-𑀧𑀺𑀝𑀓𑀁 𑀬𑀜𑁆𑀘 𑀢𑀸𑀤𑀺𑀦𑁄;

𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀣𑁂𑀭𑀸, 𑀲𑀗𑁆𑀕𑀸𑀬𑀺𑀁𑀲𑀼 𑀢𑀣𑁂𑀯 𑀘.

𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁, 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑀁;

𑀦𑀺𑀲𑁆𑀲𑀸𑀬 𑀬𑀸 𑀲𑀫𑀸𑀭𑀤𑁆𑀥𑀸, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸.

𑀬𑀸 𑀢𑀢𑁆𑀣 𑀧𑀭𑀫𑀢𑁆𑀣𑀸𑀦𑀁, 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀣𑀸𑀭𑀳𑀁;

𑀧𑀓𑀸𑀲𑀦𑀸 𑀧𑀭𑀫𑀢𑁆𑀣-𑀤𑀻𑀧𑀦𑀻 𑀦𑀸𑀫 𑀦𑀸𑀫𑀢𑁄.

𑀲𑀫𑁆𑀧𑀢𑁆𑀢𑀸 𑀧𑀭𑀺𑀦𑀺𑀝𑁆𑀞𑀸𑀦𑀁, 𑀅𑀦𑀸𑀓𑀼𑀮𑀯𑀺𑀦𑀺𑀘𑁆𑀙𑀬𑀸;

𑀲𑀸𑀥𑀺𑀓𑀸𑀬𑀝𑁆𑀞𑀯𑀻𑀲𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄.

𑀇𑀢𑀺 𑀢𑀁 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀢𑀁 𑀅𑀥𑀺𑀕𑀢𑀁 𑀫𑀬𑀸;

𑀧𑀼𑀜𑁆𑀜𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑀑𑀕𑀸𑀳𑁂𑀢𑁆𑀯𑀸 ¶ 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸;

𑀲𑀩𑁆𑀩𑁂𑀧𑀺 𑀤𑁂𑀳𑀺𑀦𑁄 𑀳𑁄𑀦𑁆𑀢𑀼, 𑀯𑀺𑀫𑀼𑀢𑁆𑀢𑀺𑀭𑀲𑀪𑀸𑀕𑀺𑀦𑁄.

𑀘𑀺𑀭𑀁 ¶ 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀦𑀺𑀘𑁆𑀘𑀁, 𑀳𑁄𑀦𑁆𑀢𑀼 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄.

𑀲𑀫𑁆𑀫𑀸 𑀯𑀲𑁆𑀲𑀢𑀼 𑀓𑀸𑀮𑁂𑀦, 𑀤𑁂𑀯𑁄𑀧𑀺 𑀚𑀕𑀢𑀻𑀧𑀢𑀺;

𑀲𑀤𑁆𑀥𑀫𑁆𑀫𑀦𑀺𑀭𑀢𑁄 𑀮𑁄𑀓𑀁, 𑀥𑀫𑁆𑀫𑁂𑀦𑁂𑀯 𑀧𑀲𑀸𑀲𑀢𑀽𑀢𑀺.

𑀇𑀢𑀺 𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀺𑀦𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑁂𑀦

𑀓𑀢𑀸

𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.