📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀚𑀸𑀢𑀓-𑀅𑀝𑁆𑀞𑀓𑀣𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑁨. 𑀤𑀼𑀓𑀦𑀺𑀧𑀸𑀢𑁄

𑁧. 𑀤𑀴𑁆𑀳𑀯𑀕𑁆𑀕𑁄

[𑁧𑁫𑁧] 𑁧. 𑀭𑀸𑀚𑁄𑀯𑀸𑀤𑀚𑀸𑀢𑀓𑀯𑀡𑁆𑀡𑀦𑀸

𑀤𑀴𑁆𑀳𑀁 ¶ ¶ ¶ 𑀤𑀴𑁆𑀳𑀲𑁆𑀲 𑀔𑀺𑀧𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑁄𑀯𑀸𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀢𑁂𑀲𑀓𑀼𑀡𑀚𑀸𑀢𑀓𑁂 (𑀚𑀸. 𑁨.𑁧𑁭.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀓𑁄𑀲𑀮𑀭𑀸𑀚𑀸 𑀏𑀓𑀁 𑀅𑀕𑀢𑀺𑀕𑀢𑀁 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀁 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀅𑀮𑁆𑀮𑀳𑀢𑁆𑀣𑁄𑀯 𑀅𑀮𑀗𑁆𑀓𑀢𑀭𑀣𑀁 𑀅𑀪𑀺𑀭𑀼𑀬𑁆𑀳 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀨𑀼𑀮𑁆𑀮𑀧𑀤𑀼𑀫𑀲𑀲𑁆𑀲𑀺𑀭𑀺𑀓𑁂𑀲𑀼 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺. ‘‘𑀪𑀦𑁆𑀢𑁂, 𑀅𑀚𑁆𑀚 𑀏𑀓𑀁 𑀅𑀕𑀢𑀺𑀕𑀢𑀁 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀁 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 ¶ 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀢𑀻𑀭𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑁆𑀮𑀳𑀢𑁆𑀣𑁄𑀯 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄𑀫𑁆𑀳𑀻’’𑀢𑀺. 𑀲𑀢𑁆𑀣𑀸 ‘‘𑀫𑀳𑀸𑀭𑀸𑀚, 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀟𑁆𑀟𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀓𑀼𑀲𑀮𑀁, 𑀲𑀕𑁆𑀕𑀫𑀕𑁆𑀕𑁄 𑀏𑀲. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀬𑀁 𑀢𑀼𑀫𑁆𑀳𑁂 𑀫𑀸𑀤𑀺𑀲𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀸 𑀑𑀯𑀸𑀤𑀁 𑀮𑀪𑀫𑀸𑀦𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑁂𑀬𑁆𑀬𑀸𑀣. 𑀏𑀢𑀤𑁂𑀯 𑀅𑀘𑁆𑀙𑀭𑀺𑀬𑀁, 𑀬𑀁 𑀧𑀼𑀩𑁆𑀩𑁂 𑀭𑀸𑀚𑀸𑀦𑁄 𑀅𑀲𑀩𑁆𑀩𑀜𑁆𑀜𑀽𑀦𑀫𑁆𑀧𑀺 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 ¶ 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀸 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑀬𑀫𑀸𑀦𑀸 𑀅𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀮𑀤𑁆𑀥𑀕𑀩𑁆𑀪𑀧𑀭𑀺𑀳𑀸𑀭𑁄 𑀲𑁄𑀢𑁆𑀣𑀺𑀦𑀸 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲 ‘‘𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀬𑀧𑁆𑀧𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀅𑀦𑀼𑀲𑀸𑀲𑀺. 𑀢𑀲𑁆𑀫𑀺𑀁 𑀏𑀯𑀁 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀫𑀘𑁆𑀘𑀸𑀧𑀺 𑀥𑀫𑁆𑀫𑁂𑀦𑁂𑀯 𑀯𑁄𑀳𑀸𑀭𑀁 𑀯𑀺𑀦𑀺𑀘𑁆𑀙𑀺𑀦𑀺𑀁𑀲𑀼. 𑀯𑁄𑀳𑀸𑀭𑁂𑀲𑀼 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀬𑀫𑀸𑀦𑁂𑀲𑀼 𑀓𑀽𑀝𑀟𑁆𑀟𑀓𑀸𑀭𑀓𑀸 𑀦𑀸𑀫 𑀦𑀸𑀳𑁂𑀲𑀼𑀁, 𑀢𑁂𑀲𑀁 𑀅𑀪𑀸𑀯𑀸 𑀅𑀟𑁆𑀟𑀢𑁆𑀣𑀸𑀬 𑀭𑀸𑀚𑀗𑁆𑀕𑀡𑁂 𑀉𑀧𑀭𑀯𑁄 𑀧𑀘𑁆𑀙𑀺𑀚𑁆𑀚𑀺. 𑀅𑀫𑀘𑁆𑀘𑀸 𑀤𑀺𑀯𑀲𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀜𑁆𑀘𑀺 𑀯𑀺𑀦𑀺𑀘𑁆𑀙𑀬𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀁 𑀅𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀧𑀓𑁆𑀓𑀫𑀦𑁆𑀢𑀺, 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀙𑀟𑁆𑀟𑁂𑀢𑀩𑁆𑀩𑀪𑀸𑀯𑀁 𑀧𑀸𑀧𑀼𑀡𑀺.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀉𑀧𑀭𑀯𑁄 𑀧𑀘𑁆𑀙𑀺𑀚𑁆𑀚𑀺, 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀙𑀟𑁆𑀟𑁂𑀢𑀩𑁆𑀩𑀪𑀸𑀯𑀁 𑀧𑀢𑁆𑀢𑀁, 𑀇𑀤𑀸𑀦𑀺 𑀫𑀬𑀸 𑀅𑀢𑁆𑀢𑀦𑁄 𑀅𑀕𑀼𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀺 ‘𑀅𑀬𑀁 𑀦𑀸𑀫 𑀫𑁂 𑀅𑀕𑀼𑀡𑁄’𑀢𑀺 𑀲𑀼𑀢𑁆𑀯𑀸 𑀢𑀁 𑀧𑀳𑀸𑀬 𑀕𑀼𑀡𑁂𑀲𑀼𑀬𑁂𑀯 𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀓𑁄𑀘𑀺 𑀅𑀕𑀼𑀡𑀯𑀸𑀤𑀻’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑁆𑀢𑁄𑀯𑀴𑀜𑁆𑀚𑀓𑀸𑀦𑀁 𑀅𑀦𑁆𑀢𑀭𑁂 𑀓𑀜𑁆𑀘𑀺 𑀅𑀕𑀼𑀡𑀯𑀸𑀤𑀺𑀁 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑀓𑀣𑀫𑁂𑀯 𑀲𑀼𑀢𑁆𑀯𑀸 ‘‘𑀏𑀢𑁂 𑀫𑀬𑁆𑀳𑀁 𑀪𑀬𑁂𑀦𑀸𑀧𑀺 𑀅𑀕𑀼𑀡𑀁 𑀅𑀯𑀢𑁆𑀯𑀸 𑀕𑀼𑀡𑀫𑁂𑀯 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀩𑀳𑀺𑀯𑀴𑀜𑁆𑀚𑀦𑀓𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀢𑁆𑀣𑀸𑀧𑀺 𑀅𑀤𑀺𑀲𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀧𑀭𑀺𑀕𑁆𑀕𑀡𑁆𑀳𑀺. 𑀩𑀳𑀺𑀦𑀕𑀭𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑀼𑀕𑀸𑀫𑀓𑁂 𑀧𑀭𑀺𑀕𑁆𑀕𑀡𑁆𑀳𑀺. 𑀢𑀢𑁆𑀣𑀸𑀧𑀺 𑀓𑀜𑁆𑀘𑀺 𑀅𑀕𑀼𑀡𑀯𑀸𑀤𑀺𑀁 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑀓𑀣𑀫𑁂𑀯 𑀲𑀼𑀢𑁆𑀯𑀸 ‘‘𑀚𑀦𑀧𑀤𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀫𑀘𑁆𑀘𑁂 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀭𑀣𑀁 𑀆𑀭𑀼𑀬𑁆𑀳 𑀲𑀸𑀭𑀣𑀺𑀫𑁂𑀯 𑀕𑀳𑁂𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑀦𑀧𑀤𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄 𑀬𑀸𑀯 𑀧𑀘𑁆𑀘𑀦𑁆𑀢𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀓𑀜𑁆𑀘𑀺 𑀅𑀕𑀼𑀡𑀯𑀸𑀤𑀺𑀁 ¶ 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑀓𑀣𑀫𑁂𑀯 𑀲𑀼𑀢𑁆𑀯𑀸 𑀧𑀘𑁆𑀘𑀦𑁆𑀢𑀲𑀻𑀫𑀢𑁄 𑀫𑀳𑀸𑀫𑀕𑁆𑀕𑁂𑀦 𑀦𑀕𑀭𑀸𑀪𑀺𑀫𑀼𑀔𑁄𑀬𑁂𑀯 𑀦𑀺𑀯𑀢𑁆𑀢𑀺.

𑀢𑀲𑁆𑀫𑀺𑀁 ¶ ¶ 𑀧𑀦 𑀓𑀸𑀮𑁂 𑀩𑀮𑁆𑀮𑀺𑀓𑁄 𑀦𑀸𑀫 𑀓𑁄𑀲𑀮𑀭𑀸𑀚𑀸𑀧𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀅𑀕𑀼𑀡𑀓𑀣𑀁 𑀕𑀯𑁂𑀲𑀦𑁆𑀢𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄𑀯𑀴𑀜𑁆𑀚𑀓𑀸𑀤𑀻𑀲𑀼 𑀅𑀕𑀼𑀡𑀯𑀸𑀤𑀺𑀁 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑀓𑀣𑀫𑁂𑀯 𑀲𑀼𑀢𑁆𑀯𑀸 𑀚𑀦𑀧𑀤𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀢𑁂 𑀉𑀪𑁄𑀧𑀺 𑀏𑀓𑀲𑁆𑀫𑀺𑀁 𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀓𑀝𑀫𑀕𑁆𑀕𑁂 𑀅𑀪𑀺𑀫𑀼𑀔𑀸 𑀅𑀳𑁂𑀲𑀼𑀁, 𑀭𑀣𑀲𑁆𑀲 𑀉𑀓𑁆𑀓𑀫𑀦𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀅𑀣 𑀩𑀮𑁆𑀮𑀺𑀓𑀭𑀜𑁆𑀜𑁄 𑀲𑀸𑀭𑀣𑀺 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀸𑀭𑀣𑀺𑀁 ‘‘𑀢𑀯 𑀭𑀣𑀁 𑀉𑀓𑁆𑀓𑀫𑀸𑀧𑁂𑀳𑀻’’𑀢𑀺 𑀆𑀳. 𑀲𑁄𑀧𑀺 ‘‘𑀅𑀫𑁆𑀪𑁄 𑀲𑀸𑀭𑀣𑀺, 𑀢𑀯 𑀭𑀣𑀁 𑀉𑀓𑁆𑀓𑀫𑀸𑀧𑁂𑀳𑀺, 𑀇𑀫𑀲𑁆𑀫𑀺𑀁 𑀭𑀣𑁂 𑀩𑀸𑀭𑀸𑀡𑀲𑀺𑀭𑀚𑁆𑀚𑀲𑀸𑀫𑀺𑀓𑁄 𑀩𑁆𑀭𑀳𑁆𑀫𑀤𑀢𑁆𑀢𑀫𑀳𑀸𑀭𑀸𑀚𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀆𑀳. 𑀇𑀢𑀭𑁄𑀧𑀺 𑀦𑀁 ‘‘𑀅𑀫𑁆𑀪𑁄 𑀲𑀸𑀭𑀣𑀺, 𑀇𑀫𑀲𑁆𑀫𑀺𑀁 𑀭𑀣𑁂 𑀓𑁄𑀲𑀮𑀭𑀚𑁆𑀚𑀲𑀸𑀫𑀺𑀓𑁄 𑀩𑀮𑁆𑀮𑀺𑀓𑀫𑀳𑀸𑀭𑀸𑀚𑀸 𑀦𑀺𑀲𑀺𑀦𑁆𑀦𑁄, 𑀢𑀯 𑀭𑀣𑀁 𑀉𑀓𑁆𑀓𑀫𑀸𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀭𑀣𑀲𑁆𑀲 𑀑𑀓𑀸𑀲𑀁 𑀤𑁂𑀳𑀻’’𑀢𑀺 𑀆𑀳. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀸𑀭𑀣𑀺 ‘‘𑀅𑀬𑀫𑁆𑀧𑀺 𑀓𑀺𑀭 𑀭𑀸𑀚𑀸𑀬𑁂𑀯, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀯𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀳𑀭𑀲𑁆𑀲 𑀭𑀣𑀁 𑀉𑀓𑁆𑀓𑀫𑀸𑀧𑁂𑀢𑁆𑀯𑀸 𑀫𑀳𑀮𑁆𑀮𑀓𑀲𑁆𑀲 𑀑𑀓𑀸𑀲𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀁 𑀲𑀸𑀭𑀣𑀺𑀁 𑀓𑁄𑀲𑀮𑀭𑀜𑁆𑀜𑁄 𑀯𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀲𑀫𑀸𑀦𑀯𑀬𑀪𑀸𑀯𑀁 𑀜𑀢𑁆𑀯𑀸 𑀭𑀚𑁆𑀚𑀧𑀭𑀺𑀫𑀸𑀡𑀁 𑀩𑀮𑀁 𑀥𑀦𑀁 𑀬𑀲𑀁 𑀚𑀸𑀢𑀺𑀁 𑀕𑁄𑀢𑁆𑀢𑀁 𑀓𑀼𑀮𑀧𑀤𑁂𑀲𑀦𑁆𑀢𑀺 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀪𑁄𑀧𑀺 𑀢𑀺𑀬𑁄𑀚𑀦𑀲𑀢𑀺𑀓𑀲𑁆𑀲 𑀭𑀚𑁆𑀚𑀲𑁆𑀲 𑀲𑀸𑀫𑀺𑀦𑁄 𑀲𑀫𑀸𑀦𑀩𑀮𑀥𑀦𑀬𑀲𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀸’’𑀢𑀺 𑀜𑀢𑁆𑀯𑀸 ‘‘𑀲𑀻𑀮𑀯𑀦𑁆𑀢𑀲𑁆𑀲 𑀑𑀓𑀸𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑁄 𑀲𑀸𑀭𑀣𑀺, 𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑁄 𑀲𑀻𑀮𑀸𑀘𑀸𑀭𑁄 𑀓𑀻𑀤𑀺𑀲𑁄’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀅𑀬𑀜𑁆𑀘 𑀅𑀬𑀜𑁆𑀘 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀲𑀻𑀮𑀸𑀘𑀸𑀭𑁄’’𑀢𑀺 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀅𑀕𑀼𑀡𑀫𑁂𑀯 𑀕𑀼𑀡𑀢𑁄 𑀧𑀓𑀸𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧.

‘‘𑀤𑀴𑁆𑀳𑀁 𑀤𑀴𑁆𑀳𑀲𑁆𑀲 𑀔𑀺𑀧𑀢𑀺, 𑀩𑀮𑁆𑀮𑀺𑀓𑁄 𑀫𑀼𑀤𑀼𑀦𑀸 𑀫𑀼𑀤𑀼𑀁;

𑀲𑀸𑀥𑀼𑀫𑁆𑀧𑀺 𑀲𑀸𑀥𑀼𑀦𑀸 𑀚𑁂𑀢𑀺, 𑀅𑀲𑀸𑀥𑀼𑀫𑁆𑀧𑀺 𑀅𑀲𑀸𑀥𑀼𑀦𑀸;

𑀏𑀢𑀸𑀤𑀺𑀲𑁄 𑀅𑀬𑀁 𑀭𑀸𑀚𑀸, 𑀫𑀕𑁆𑀕𑀸 𑀉𑀬𑁆𑀬𑀸𑀳𑀺 𑀲𑀸𑀭𑀣𑀻’’𑀢𑀺.

𑀢𑀢𑁆𑀣 ¶ 𑀤𑀴𑁆𑀳𑀁 𑀤𑀴𑁆𑀳𑀲𑁆𑀲 𑀔𑀺𑀧𑀢𑀻𑀢𑀺 𑀬𑁄 𑀤𑀴𑁆𑀳𑁄 𑀳𑁄𑀢𑀺 𑀩𑀮𑀯𑀤𑀴𑁆𑀳𑁂𑀦 𑀧𑀳𑀸𑀭𑁂𑀦 𑀯𑀸 𑀯𑀘𑀦𑁂𑀦 𑀯𑀸 𑀚𑀺𑀦𑀺𑀢𑀩𑁆𑀩𑁄, 𑀢𑀲𑁆𑀲 𑀤𑀴𑁆𑀳𑀫𑁂𑀯 𑀧𑀳𑀸𑀭𑀁 𑀯𑀸 𑀯𑀘𑀦𑀁 𑀯𑀸 𑀔𑀺𑀧𑀢𑀺. 𑀏𑀯𑀁 𑀤𑀴𑁆𑀳𑁄𑀯 𑀳𑀼𑀢𑁆𑀯𑀸 𑀢𑀁 𑀚𑀺𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀩𑀮𑁆𑀮𑀺𑀓𑁄𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀦𑀸𑀫𑀁. 𑀫𑀼𑀤𑀼𑀦𑀸 𑀫𑀼𑀤𑀼𑀦𑁆𑀢𑀺 𑀫𑀼𑀤𑀼𑀧𑀼𑀕𑁆𑀕𑀮𑀁 𑀲𑀬𑀫𑁆𑀧𑀺 𑀫𑀼𑀤𑀼 𑀳𑀼𑀢𑁆𑀯𑀸 𑀫𑀼𑀤𑀼𑀦𑀸𑀯 𑀉𑀧𑀸𑀬𑁂𑀦 𑀚𑀺𑀦𑀸𑀢𑀺. 𑀲𑀸𑀥𑀼𑀫𑁆𑀧𑀺 𑀲𑀸𑀥𑀼𑀦𑀸 𑀚𑁂𑀢𑀻𑀢𑀺 𑀬𑁂 𑀲𑀸𑀥𑀽 𑀲𑀧𑁆𑀧𑀼𑀭𑀺𑀲𑀸, 𑀢𑁂 𑀲𑀬𑀫𑁆𑀧𑀺 𑀲𑀸𑀥𑀼 𑀳𑀼𑀢𑁆𑀯𑀸 𑀲𑀸𑀥𑀼𑀦𑀸𑀯 ¶ 𑀉𑀧𑀸𑀬𑁂𑀦 𑀚𑀺𑀦𑀸𑀢𑀺. 𑀅𑀲𑀸𑀥𑀼𑀫𑁆𑀧𑀺 𑀅𑀲𑀸𑀥𑀼𑀦𑀸𑀢𑀺 𑀬𑁂 𑀧𑀦 𑀅𑀲𑀸𑀥𑀽, 𑀢𑁂 𑀲𑀬𑀫𑁆𑀧𑀺 𑀅𑀲𑀸𑀥𑀼 𑀳𑀼𑀢𑁆𑀯𑀸 𑀅𑀲𑀸𑀥𑀼𑀦𑀸𑀯 𑀉𑀧𑀸𑀬𑁂𑀦 𑀚𑀺𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀸𑀤𑀺𑀲𑁄 𑀅𑀬𑀁 𑀭𑀸𑀚𑀸𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀓𑁄𑀲𑀮𑀭𑀸𑀚𑀸 𑀲𑀻𑀮𑀸𑀘𑀸𑀭𑁂𑀦 𑀏𑀯𑀭𑀽𑀧𑁄. 𑀫𑀕𑁆𑀕𑀸 𑀉𑀬𑁆𑀬𑀸𑀳𑀺 𑀲𑀸𑀭𑀣𑀻𑀢𑀺 𑀅𑀢𑁆𑀢𑀦𑁄 𑀭𑀣𑀁 𑀫𑀕𑁆𑀕𑀸 𑀉𑀓𑁆𑀓𑀫𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀳𑀺, 𑀉𑀧𑁆𑀧𑀣𑁂𑀦 𑀬𑀸𑀳𑀺, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀫𑀕𑁆𑀕𑀁 𑀤𑁂𑀳𑀻𑀢𑀺 𑀯𑀤𑀢𑀺.

𑀅𑀣 ¶ 𑀦𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀸𑀭𑀣𑀺 ‘‘𑀅𑀫𑁆𑀪𑁄, 𑀓𑀺𑀁 𑀧𑀦 𑀢𑀬𑀸 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀕𑀼𑀡𑀓𑀣𑀸 𑀓𑀣𑀺𑀢𑀸’’𑀢𑀺 𑀯𑀢𑁆𑀯𑀸 ‘‘𑀆𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀬𑀤𑀺 𑀧𑀦 𑀏𑀢𑁂 𑀕𑀼𑀡𑀸𑀢𑀺 𑀯𑀤𑀲𑀺, 𑀅𑀕𑀼𑀡𑀸 𑀧𑀦 𑀓𑀻𑀤𑀺𑀲𑀻’’𑀢𑀺 𑀯𑀢𑁆𑀯𑀸 ‘‘𑀏𑀢𑁂 𑀢𑀸𑀯 𑀅𑀕𑀼𑀡𑀸 𑀳𑁄𑀦𑁆𑀢𑀼, 𑀢𑀼𑀫𑁆𑀳𑀸𑀓𑀁 𑀧𑀦 𑀭𑀜𑁆𑀜𑁄 𑀓𑀻𑀤𑀺𑀲𑁄 𑀕𑀼𑀡𑁄’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨.

‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦𑀁;

𑀏𑀢𑀸𑀤𑀺𑀲𑁄 𑀅𑀬𑀁 𑀭𑀸𑀚𑀸, 𑀫𑀕𑁆𑀕𑀸 𑀉𑀬𑁆𑀬𑀸𑀳𑀺 𑀲𑀸𑀭𑀣𑀻’’𑀢𑀺.

𑀢𑀢𑁆𑀣 𑀏𑀢𑀸𑀤𑀺𑀲𑁄𑀢𑀺 𑀏𑀢𑁂𑀳𑀺 ‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀼𑀢𑁆𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀜𑁆𑀳𑀺 𑀓𑀼𑀤𑁆𑀥𑀁 𑀧𑀼𑀕𑁆𑀕𑀮𑀁 𑀲𑀬𑀁 𑀅𑀓𑁆𑀓𑁄𑀥𑁄 𑀳𑀼𑀢𑁆𑀯𑀸 𑀅𑀓𑁆𑀓𑁄𑀥𑁂𑀦 𑀚𑀺𑀦𑀸𑀢𑀺, 𑀅𑀲𑀸𑀥𑀼𑀁 𑀧𑀦 𑀲𑀬𑀁 𑀲𑀸𑀥𑀼 𑀳𑀼𑀢𑁆𑀯𑀸 𑀲𑀸𑀥𑀼𑀦𑀸𑀯 𑀉𑀧𑀸𑀬𑁂𑀦 𑀚𑀺𑀦𑀸𑀢𑀺, 𑀓𑀤𑀭𑀺𑀬𑀁 𑀣𑀤𑁆𑀥𑀫𑀘𑁆𑀙𑀭𑀺𑀁 𑀲𑀬𑀁 𑀤𑀸𑀬𑀓𑁄 𑀳𑀼𑀢𑁆𑀯𑀸 𑀤𑀸𑀦𑁂𑀦 𑀚𑀺𑀦𑀸𑀢𑀺. 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦𑀦𑁆𑀢𑀺 𑀫𑀼𑀲𑀸𑀯𑀸𑀤𑀺𑀁 𑀲𑀬𑀁 𑀲𑀘𑁆𑀘𑀯𑀸𑀤𑀻 𑀳𑀼𑀢𑁆𑀯𑀸 𑀲𑀘𑁆𑀘𑁂𑀦 𑀚𑀺𑀦𑀸𑀢𑀺. 𑀫𑀕𑁆𑀕𑀸 𑀉𑀬𑁆𑀬𑀸𑀳𑀺 𑀲𑀸𑀭𑀣𑀻𑀢𑀺, 𑀲𑀫𑁆𑀫 𑀲𑀸𑀭𑀣𑀺, 𑀫𑀕𑁆𑀕𑀢𑁄 𑀅𑀧𑀕𑀘𑁆𑀙. 𑀏𑀯𑀁𑀯𑀺𑀥𑀲𑀻𑀮𑀸𑀘𑀸𑀭𑀕𑀼𑀡𑀬𑀼𑀢𑁆𑀢𑀲𑁆𑀲 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀫𑀕𑁆𑀕𑀁 𑀤𑁂𑀳𑀺, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀕𑁆𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀩𑀮𑁆𑀮𑀺𑀓𑀭𑀸𑀚𑀸 𑀘 𑀲𑀸𑀭𑀣𑀺 𑀘 𑀉𑀪𑁄𑀧𑀺 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀅𑀲𑁆𑀲𑁂 𑀫𑁄𑀘𑁂𑀢𑁆𑀯𑀸 𑀭𑀣𑀁 𑀅𑀧𑀦𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀕𑁆𑀕𑀁 𑀅𑀤𑀁𑀲𑀼. 𑀩𑀸𑀭𑀸𑀡𑀲𑀺𑀭𑀸𑀚𑀸 𑀩𑀮𑁆𑀮𑀺𑀓𑀭𑀜𑁆𑀜𑁄 ‘‘𑀭𑀜𑁆𑀜𑀸 𑀦𑀸𑀫 𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀢𑀼𑀁 ¶ 𑀯𑀝𑁆𑀝𑀢𑀻’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺. 𑀩𑀮𑁆𑀮𑀺𑀓𑀭𑀸𑀚𑀸𑀧𑀺 𑀢𑀲𑁆𑀲 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀚𑀦𑀧𑀤𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀕𑀼𑀡𑀯𑀸𑀤𑀺𑀁 𑀅𑀤𑀺𑀲𑁆𑀯𑀸𑀯 𑀲𑀓𑀦𑀕𑀭𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀫𑁂𑀯 𑀧𑀽𑀭𑁂𑀲𑀺.

𑀲𑀢𑁆𑀣𑀸 ¶ 𑀓𑁄𑀲𑀮𑀭𑀸𑀚𑀲𑁆𑀲 𑀑𑀯𑀸𑀤𑀢𑁆𑀣𑀸𑀬 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀮𑁆𑀮𑀺𑀓𑀭𑀜𑁆𑀜𑁄 𑀲𑀸𑀭𑀣𑀺 𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀳𑁄𑀲𑀺, 𑀩𑀮𑁆𑀮𑀺𑀓𑀭𑀸𑀚𑀸 𑀆𑀦𑀦𑁆𑀤𑁄, 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀸𑀭𑀣𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀸𑀚𑁄𑀯𑀸𑀤𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁫𑁨] 𑁨. 𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀫𑁂𑀓𑁆𑀔𑀺𑀢𑀓𑀫𑁆𑀫𑀦𑁆𑀢𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀯𑁂𑀲𑀸𑀮𑀺𑀯𑀸𑀲𑀺𑀓𑀁 𑀏𑀓𑀁 𑀦𑁆𑀳𑀸𑀧𑀺𑀢𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀓𑀺𑀭 𑀧𑀺𑀢𑀸 𑀭𑀸𑀚𑀽𑀦𑀁 𑀭𑀸𑀚𑁄𑀭𑁄𑀥𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀭𑀸𑀚𑀓𑀼𑀫𑀸𑀭𑀺𑀓𑀸𑀦𑀜𑁆𑀘 𑀫𑀲𑁆𑀲𑀼𑀓𑀭𑀡𑀓𑁂𑀲𑀲𑀡𑁆𑀞𑀧𑀦𑀅𑀝𑁆𑀞𑀧𑀤𑀝𑁆𑀞𑀧𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀢𑀺𑀲𑀭𑀡𑀕𑀢𑁄 𑀲𑀫𑀸𑀤𑀺𑀦𑁆𑀦𑀧𑀜𑁆𑀘𑀲𑀻𑀮𑁄, 𑀅𑀦𑁆𑀢𑀭𑀦𑁆𑀢𑀭𑁂 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀲𑁄 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀭𑀸𑀚𑀦𑀺𑀯𑁂𑀲𑀦𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀲𑁄 𑀢𑀢𑁆𑀣 𑀏𑀓𑀁 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀺𑀓𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀭𑀸𑀚𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀏𑀢𑀁 𑀓𑀼𑀫𑀸𑀭𑀺𑀓𑀁 𑀮𑀪𑀫𑀸𑀦𑁄 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀫𑀸𑀦𑀲𑁆𑀲 𑀫𑁂 𑀏𑀢𑁆𑀣𑁂𑀯 𑀫𑀭𑀡’’𑀦𑁆𑀢𑀺 𑀆𑀳𑀸𑀭𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑀁 𑀧𑀭𑀺𑀲𑁆𑀲𑀚𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀅𑀣 𑀦𑀁 𑀧𑀺𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀸𑀢, 𑀅𑀯𑀢𑁆𑀣𑀼𑀫𑁆𑀳𑀺 𑀙𑀦𑁆𑀤𑀭𑀸𑀕𑀁 𑀫𑀸 𑀓𑀭𑀺, 𑀳𑀻𑀦𑀚𑀘𑁆𑀘𑁄 𑀢𑁆𑀯𑀁 𑀦𑁆𑀳𑀸𑀧𑀺𑀢𑀧𑀼𑀢𑁆𑀢𑁄, 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀺𑀓𑀸 𑀔𑀢𑁆𑀢𑀺𑀬𑀥𑀻𑀢𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸, 𑀦 𑀲𑀸 𑀢𑀼𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑀸, 𑀅𑀜𑁆𑀜𑀁 𑀢𑁂 𑀚𑀸𑀢𑀺𑀕𑁄𑀢𑁆𑀢𑁂𑀳𑀺 𑀲𑀤𑀺𑀲𑀁 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 𑀧𑀺𑀢𑀼 𑀓𑀣𑀁 𑀦 𑀕𑀡𑁆𑀳𑀺. 𑀅𑀣 𑀦𑀁 𑀫𑀸𑀢𑀸 𑀪𑀸𑀢𑀸 𑀪𑀕𑀺𑀦𑀻 𑀘𑀽𑀴𑀧𑀺𑀢𑀸 𑀘𑀽𑀴𑀫𑀸𑀢𑀸𑀢𑀺 𑀲𑀩𑁆𑀩𑁂𑀧𑀺 𑀜𑀸𑀢𑀓𑀸 𑀘𑁂𑀯 𑀫𑀺𑀢𑁆𑀢𑀲𑀼𑀳𑀚𑁆𑀚𑀸 𑀘 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀦𑁆𑀢𑀸𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑁄 𑀢𑀢𑁆𑀣𑁂𑀯 𑀲𑀼𑀲𑁆𑀲𑀺𑀢𑁆𑀯𑀸 𑀧𑀭𑀺𑀲𑀼𑀲𑁆𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀧𑀺𑀢𑀸 𑀲𑀭𑀻𑀭𑀓𑀺𑀘𑁆𑀘𑀧𑁂𑀢𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀢𑀦𑀼𑀲𑁄𑀓𑁄 ¶ ‘‘𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀁 𑀕𑀦𑁆𑀥𑀫𑀸𑀮𑀸𑀯𑀺𑀮𑁂𑀧𑀦𑀁 𑀕𑀳𑁂𑀢𑁆𑀯𑀸 𑀫𑀳𑀸𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁 𑀦𑀼 𑀔𑁄, 𑀉𑀧𑀸𑀲𑀓, 𑀩𑀳𑀽𑀦𑀺 𑀤𑀺𑀯𑀲𑀸𑀦𑀺 𑀦 𑀤𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀉𑀧𑀸𑀲𑀓, 𑀇𑀤𑀸𑀦𑁂𑀯 𑀢𑀯 𑀧𑀼𑀢𑁆𑀢𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 ¶ 𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺, 𑀧𑀼𑀩𑁆𑀩𑁂𑀧𑀺 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀲𑀻𑀳𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀙 𑀓𑀦𑀺𑀝𑁆𑀞𑀪𑀸𑀢𑀭𑁄 𑀏𑀓𑀸 𑀘 𑀪𑀕𑀺𑀦𑀻 𑀅𑀳𑁄𑀲𑀺, 𑀲𑀩𑁆𑀩𑁂𑀧𑀺 𑀓𑀜𑁆𑀘𑀦𑀕𑀼𑀳𑀸𑀬𑀁 𑀯𑀲𑀦𑁆𑀢𑀺. 𑀢𑀲𑁆𑀲𑀸 𑀧𑀦 𑀕𑀼𑀳𑀸𑀬 𑀅𑀯𑀺𑀤𑀽𑀭𑁂 𑀭𑀚𑀢𑀧𑀩𑁆𑀩𑀢𑁂 𑀏𑀓𑀸 𑀨𑀮𑀺𑀓𑀕𑀼𑀳𑀸 𑀅𑀢𑁆𑀣𑀺, 𑀢𑀢𑁆𑀣𑁂𑀓𑁄 𑀲𑀺𑀗𑁆𑀕𑀸𑀮𑁄 𑀯𑀲𑀢𑀺. 𑀅𑀧𑀭𑀪𑀸𑀕𑁂 𑀲𑀻𑀳𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀢𑁂 𑀪𑀕𑀺𑀦𑀺𑀁 𑀲𑀻𑀳𑀧𑁄𑀢𑀺𑀓𑀁 𑀓𑀜𑁆𑀘𑀦𑀕𑀼𑀳𑀸𑀬𑀁 𑀞𑀧𑁂𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀺𑀢𑁆𑀯𑀸 𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲𑀸 𑀤𑁂𑀦𑁆𑀢𑀺. 𑀲𑁄 𑀲𑀺𑀗𑁆𑀕𑀸𑀮𑁄 𑀢𑀁 𑀲𑀻𑀳𑀧𑁄𑀢𑀺𑀓𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲𑀸 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀥𑀭𑀫𑀸𑀦𑀓𑀸𑀮𑁂 𑀑𑀓𑀸𑀲𑀁 𑀦𑀸𑀮𑀢𑁆𑀣, 𑀲𑁄 𑀲𑀢𑁆𑀢𑀦𑁆𑀦𑀫𑁆𑀧𑀺 𑀢𑁂𑀲𑀁 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑀓𑀸𑀮𑁂 𑀨𑀮𑀺𑀓𑀕𑀼𑀳𑀸𑀬 𑀑𑀢𑀭𑀺𑀢𑁆𑀯𑀸 𑀓𑀜𑁆𑀘𑀦𑀕𑀼𑀳𑀸𑀬 𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀲𑀻𑀳𑀧𑁄𑀢𑀺𑀓𑀸𑀬 ¶ 𑀧𑀼𑀭𑀢𑁄 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀏𑀯𑀭𑀽𑀧𑀁 𑀭𑀳𑀲𑁆𑀲𑀓𑀣𑀁 𑀓𑀣𑁂𑀲𑀺 𑁋 ‘‘𑀲𑀻𑀳𑀧𑁄𑀢𑀺𑀓𑁂, 𑀅𑀳𑀫𑁆𑀧𑀺 𑀘𑀢𑀼𑀧𑁆𑀧𑀤𑁄, 𑀢𑁆𑀯𑀫𑁆𑀧𑀺 𑀘𑀢𑀼𑀧𑁆𑀧𑀤𑀸, 𑀢𑁆𑀯𑀁 𑀫𑁂 𑀧𑀚𑀸𑀧𑀢𑀻 𑀳𑁄𑀳𑀺, 𑀅𑀳𑀁 𑀢𑁂 𑀧𑀢𑀺 𑀪𑀯𑀺𑀲𑁆𑀲𑀸𑀫𑀺, 𑀢𑁂 𑀫𑀬𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀯𑀲𑀺𑀲𑁆𑀲𑀸𑀫, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀫𑀁 𑀓𑀺𑀮𑁂𑀲𑀯𑀲𑁂𑀦 𑀲𑀗𑁆𑀕𑀡𑁆𑀳𑀸𑀳𑀻’’𑀢𑀺. 𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀺𑀗𑁆𑀕𑀸𑀮𑁄 𑀘𑀢𑀼𑀧𑁆𑀧𑀤𑀸𑀦𑀁 𑀅𑀦𑁆𑀢𑀭𑁂 𑀳𑀻𑀦𑁄 𑀧𑀝𑀺𑀓𑀼𑀝𑁆𑀞𑁄 𑀘𑀡𑁆𑀟𑀸𑀮𑀲𑀤𑀺𑀲𑁄, 𑀫𑀬𑀁 𑀉𑀢𑁆𑀢𑀫𑀭𑀸𑀚𑀓𑀼𑀮𑀲𑀫𑁆𑀫𑀢𑀸, 𑀏𑀲 𑀔𑁄 𑀫𑀬𑀸 𑀲𑀤𑁆𑀥𑀺𑀁 𑀅𑀲𑀩𑁆𑀪𑀺𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀣𑀁 𑀓𑀣𑁂𑀢𑀺, 𑀅𑀳𑀁 𑀏𑀯𑀭𑀽𑀧𑀁 𑀓𑀣𑀁 𑀲𑀼𑀢𑁆𑀯𑀸 𑀚𑀻𑀯𑀺𑀢𑁂𑀦 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀦𑀸𑀲𑀸𑀯𑀸𑀢𑀁 𑀲𑀦𑁆𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀁 𑀏𑀯𑀫𑁂𑀯 𑀫𑀭𑀡𑀁 𑀅𑀬𑀼𑀢𑁆𑀢𑀁, 𑀪𑀸𑀢𑀺𑀓𑀸 𑀢𑀸𑀯 𑀫𑁂 𑀆𑀕𑀘𑁆𑀙𑀦𑁆𑀢𑀼, 𑀢𑁂𑀲𑀁 𑀓𑀣𑁂𑀢𑁆𑀯𑀸 ¶ 𑀫𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀺𑀗𑁆𑀕𑀸𑀮𑁄𑀧𑀺 𑀢𑀲𑁆𑀲𑀸 𑀲𑀦𑁆𑀢𑀺𑀓𑀸 𑀧𑀝𑀺𑀯𑀘𑀦𑀁 𑀅𑀮𑀪𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀏𑀲𑀸 𑀫𑀬𑁆𑀳𑀁 𑀓𑀼𑀚𑁆𑀛𑀢𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀨𑀮𑀺𑀓𑀕𑀼𑀳𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀅𑀣𑁂𑀓𑁄 𑀲𑀻𑀳𑀧𑁄𑀢𑀓𑁄 𑀫𑀳𑀺𑀁𑀲𑀯𑀸𑀭𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀪𑀕𑀺𑀦𑀺𑀬𑀸 𑀪𑀸𑀕𑀁 𑀆𑀳𑀭𑀺𑀢𑁆𑀯𑀸 ‘‘𑀅𑀫𑁆𑀫, 𑀫𑀁𑀲𑀁 𑀔𑀸𑀤𑀲𑁆𑀲𑀽’’𑀢𑀺 𑀆𑀳. ‘‘𑀪𑀸𑀢𑀺𑀓, 𑀦𑀸𑀳𑀁 𑀫𑀁𑀲𑀁 𑀔𑀸𑀤𑀸𑀫𑀺, 𑀫𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. ‘‘𑀇𑀤𑀸𑀦𑀺 𑀓𑀳𑀁 𑀲𑁄 𑀲𑀺𑀗𑁆𑀕𑀸𑀮𑁄’’𑀢𑀺 𑀘 𑀯𑀼𑀢𑁆𑀢𑁂 𑀨𑀮𑀺𑀓𑀕𑀼𑀳𑀸𑀬𑀁 𑀦𑀺𑀧𑀦𑁆𑀦𑀁 𑀲𑀺𑀗𑁆𑀕𑀸𑀮𑀁 ‘‘𑀆𑀓𑀸𑀲𑁂 𑀦𑀺𑀧𑀦𑁆𑀦𑁄’’𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀪𑀸𑀢𑀺𑀓, 𑀓𑀺𑀁 𑀦 𑀧𑀲𑁆𑀲𑀲𑀺, 𑀏𑀲𑁄 𑀭𑀚𑀢𑀧𑀩𑁆𑀩𑀢𑁂 𑀆𑀓𑀸𑀲𑁂 𑀦𑀺𑀧𑀦𑁆𑀦𑁄’’𑀢𑀺. 𑀲𑀻𑀳𑀧𑁄𑀢𑀓𑁄 𑀢𑀲𑁆𑀲 𑀨𑀮𑀺𑀓𑀕𑀼𑀳𑀸𑀬𑀁 𑀦𑀺𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀆𑀓𑀸𑀲𑁂 𑀦𑀺𑀧𑀦𑁆𑀦𑁄’’𑀢𑀺 𑀲𑀜𑁆𑀜𑀻 ¶ 𑀳𑀼𑀢𑁆𑀯𑀸 ‘‘𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀻𑀳𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀨𑀮𑀺𑀓𑀕𑀼𑀳𑀁 𑀳𑀤𑀬𑁂𑀦𑁂𑀯 𑀧𑀳𑀭𑀺. 𑀲𑁄 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀧𑀢𑀺. 𑀅𑀣𑀸𑀧𑀭𑁄 𑀆𑀕𑀘𑁆𑀙𑀺, 𑀲𑀸 𑀢𑀲𑁆𑀲𑀧𑀺 𑀢𑀣𑁂𑀯 𑀓𑀣𑁂𑀲𑀺. 𑀲𑁄𑀧𑀺 𑀢𑀣𑁂𑀯 𑀓𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀧𑀢𑀺.

𑀏𑀯𑀁 𑀙𑀲𑀼𑀧𑀺 𑀪𑀸𑀢𑀺𑀓𑁂𑀲𑀼 𑀫𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀸 𑀩𑁄𑀥𑀺𑀲𑀢𑁆𑀢𑁄 𑀆𑀕𑀘𑁆𑀙𑀺. 𑀲𑀸 𑀢𑀲𑁆𑀲𑀧𑀺 𑀢𑀁 𑀓𑀸𑀭𑀡𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀲𑁄 𑀓𑀼𑀳𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀏𑀲𑁄 𑀭𑀚𑀢𑀧𑀩𑁆𑀩𑀢𑀫𑀢𑁆𑀣𑀓𑁂 𑀆𑀓𑀸𑀲𑁂 𑀦𑀺𑀧𑀦𑁆𑀦𑁄’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀺𑀗𑁆𑀕𑀸𑀮𑀸𑀦𑀁 𑀆𑀓𑀸𑀲𑁂 𑀧𑀢𑀺𑀝𑁆𑀞𑀸 𑀦𑀸𑀫 𑀦𑀢𑁆𑀣𑀺, 𑀨𑀮𑀺𑀓𑀕𑀼𑀳𑀸𑀬𑀁 𑀦𑀺𑀧𑀦𑁆𑀦𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀩𑁆𑀩𑀢𑀧𑀸𑀤𑀁 𑀑𑀢𑀭𑀺𑀢𑁆𑀯𑀸 𑀙 𑀪𑀸𑀢𑀺𑀓𑁂 𑀫𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀧𑀭𑀺𑀕𑁆𑀕𑀡𑁆𑀳𑀦𑀧𑀜𑁆𑀜𑀸𑀬 𑀅𑀪𑀸𑀯𑁂𑀦 𑀨𑀮𑀺𑀓𑀕𑀼𑀳𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀳𑀤𑀬𑁂𑀦 𑀧𑀳𑀭𑀺𑀢𑁆𑀯𑀸 𑀫𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀲𑀫𑁂𑀓𑁆𑀔𑀺𑀢𑁆𑀯𑀸 𑀅𑀢𑀺𑀢𑀼𑀭𑀺𑀢𑀁 𑀓𑀭𑁄𑀦𑁆𑀢𑀸𑀦𑀁 𑀓𑀫𑁆𑀫𑀁 𑀦𑀸𑀫 𑀏𑀯𑀭𑀽𑀧𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩.

‘‘𑀅𑀲𑀫𑁂𑀓𑁆𑀔𑀺𑀢𑀓𑀫𑁆𑀫𑀦𑁆𑀢𑀁, 𑀢𑀼𑀭𑀺𑀢𑀸𑀪𑀺𑀦𑀺𑀧𑀸𑀢𑀺𑀦𑀁;

𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺, 𑀉𑀡𑁆𑀳𑀁𑀯𑀚𑁆𑀛𑁄𑀳𑀺𑀢𑀁 𑀫𑀼𑀔𑁂’’𑀢𑀺.

𑀢𑀢𑁆𑀣 ¶ ¶ 𑀅𑀲𑀫𑁂𑀓𑁆𑀔𑀺𑀢𑀓𑀫𑁆𑀫𑀦𑁆𑀢𑀁, 𑀢𑀼𑀭𑀺𑀢𑀸𑀪𑀺𑀦𑀺𑀧𑀸𑀢𑀺𑀦𑀦𑁆𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀬𑀁 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀤𑁄𑀲𑀁 𑀅𑀲𑀫𑁂𑀓𑁆𑀔𑀺𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀢𑀼𑀭𑀺𑀢𑁄 𑀳𑀼𑀢𑁆𑀯𑀸 𑀯𑁂𑀕𑁂𑀦𑁂𑀯 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀅𑀪𑀺𑀦𑀺𑀧𑀢𑀢𑀺 𑀧𑀓𑁆𑀔𑀦𑁆𑀤𑀢𑀺 𑀧𑀝𑀺𑀧𑀚𑁆𑀚𑀢𑀺, 𑀢𑀁 𑀅𑀲𑀫𑁂𑀓𑁆𑀔𑀺𑀢𑀓𑀫𑁆𑀫𑀦𑁆𑀢𑀁 𑀢𑀼𑀭𑀺𑀢𑀸𑀪𑀺𑀦𑀺𑀧𑀸𑀢𑀺𑀦𑀁 𑀏𑀯𑀁 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺, 𑀲𑁄𑀘𑁂𑀦𑁆𑀢𑀺 𑀓𑀺𑀮𑀫𑁂𑀦𑁆𑀢𑀺. 𑀬𑀣𑀸 𑀓𑀺𑀁? 𑀉𑀡𑁆𑀳𑀁𑀯𑀚𑁆𑀛𑁄𑀳𑀺𑀢𑀁 𑀫𑀼𑀔𑁂𑀢𑀺, 𑀬𑀣𑀸 𑀪𑀼𑀜𑁆𑀚𑀦𑁆𑀢𑁂𑀦 ‘‘𑀇𑀤𑀁 𑀲𑀻𑀢𑀮𑀁 𑀇𑀤𑀁 𑀉𑀡𑁆𑀳’’𑀦𑁆𑀢𑀺 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀉𑀡𑁆𑀳𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀫𑀼𑀔𑁂 𑀅𑀚𑁆𑀛𑁄𑀳𑀭𑀺𑀢𑀁 𑀞𑀧𑀺𑀢𑀁 𑀫𑀼𑀔𑀫𑁆𑀧𑀺 𑀓𑀡𑁆𑀞𑀫𑁆𑀧𑀺 𑀓𑀼𑀘𑁆𑀙𑀺𑀫𑁆𑀧𑀺 𑀤𑀳𑀢𑀺 𑀲𑁄𑀘𑁂𑀢𑀺 𑀓𑀺𑀮𑀫𑁂𑀢𑀺, 𑀏𑀯𑀁 𑀢𑀣𑀸𑀭𑀽𑀧𑀁 𑀧𑀼𑀕𑁆𑀕𑀮𑀁 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺.

𑀇𑀢𑀺 𑀲𑁄 𑀲𑀻𑀳𑁄 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 ‘‘𑀫𑀫 𑀪𑀸𑀢𑀺𑀓𑀸 𑀅𑀦𑀼𑀧𑀸𑀬𑀓𑀼𑀲𑀮𑀢𑀸𑀬 ‘𑀲𑀺𑀗𑁆𑀕𑀸𑀮𑀁 𑀫𑀸𑀭𑁂𑀲𑁆𑀲𑀸𑀫𑀸’𑀢𑀺 𑀅𑀢𑀺𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀬𑀁 𑀫𑀢𑀸, 𑀅𑀳𑀁 𑀧𑀦 𑀏𑀯𑀭𑀽𑀧𑀁 𑀅𑀓𑀢𑁆𑀯𑀸 𑀲𑀺𑀗𑁆𑀕𑀸𑀮𑀲𑁆𑀲 𑀨𑀮𑀺𑀓𑀕𑀼𑀳𑀸𑀬𑀁 𑀦𑀺𑀧𑀦𑁆𑀦𑀲𑁆𑀲𑁂𑀯 𑀳𑀤𑀬𑀁 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀲𑀺𑀗𑁆𑀕𑀸𑀮𑀲𑁆𑀲 𑀆𑀭𑁄𑀳𑀦𑀑𑀭𑁄𑀳𑀦𑀫𑀕𑁆𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀤𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺, 𑀧𑀣𑀯𑀺𑀬𑀸 𑀲𑀤𑁆𑀥𑀺𑀁 𑀆𑀓𑀸𑀲𑀁 𑀏𑀓𑀦𑀺𑀦𑁆𑀦𑀸𑀤𑀁 𑀅𑀳𑁄𑀲𑀺. 𑀲𑀺𑀗𑁆𑀕𑀸𑀮𑀲𑁆𑀲 𑀨𑀮𑀺𑀓𑀕𑀼𑀳𑀸𑀬𑀁 𑀦𑀺𑀧𑀦𑁆𑀦𑀲𑁆𑀲𑁂𑀯 𑀲𑀻𑀢𑀢𑀲𑀺𑀢𑀲𑁆𑀲 𑀳𑀤𑀬𑀁 𑀨𑀮𑀺, 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 ¶ ‘‘𑀏𑀯𑀁 𑀲𑁄 𑀲𑀺𑀗𑁆𑀕𑀸𑀮𑁄 𑀲𑀻𑀳𑀦𑀸𑀤𑀁 𑀲𑀼𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪.

‘‘𑀲𑀻𑀳𑁄 𑀘 𑀲𑀻𑀳𑀦𑀸𑀤𑁂𑀦, 𑀤𑀤𑁆𑀤𑀭𑀁 𑀅𑀪𑀺𑀦𑀸𑀤𑀬𑀺;

𑀲𑀼𑀢𑁆𑀯𑀸 𑀲𑀻𑀳𑀲𑁆𑀲 𑀦𑀺𑀕𑁆𑀖𑁄𑀲𑀁, 𑀲𑀺𑀗𑁆𑀕𑀸𑀮𑁄 𑀤𑀤𑁆𑀤𑀭𑁂 𑀯𑀲𑀁;

𑀪𑀻𑀢𑁄 𑀲𑀦𑁆𑀢𑀸𑀲𑀫𑀸𑀧𑀸𑀤𑀺, 𑀳𑀤𑀬𑀜𑁆𑀘𑀲𑁆𑀲 𑀅𑀧𑁆𑀨𑀮𑀻’’𑀢𑀺.

𑀢𑀢𑁆𑀣 𑀲𑀻𑀳𑁄𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑁋 𑀢𑀺𑀡𑀲𑀻𑀳𑁄, 𑀧𑀡𑁆𑀟𑀼𑀲𑀻𑀳𑁄, 𑀓𑀸𑀴𑀲𑀻𑀳𑁄, 𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑁄 𑀓𑁂𑀲𑀭𑀲𑀻𑀳𑁄𑀢𑀺. 𑀢𑁂𑀲𑀼 𑀓𑁂𑀲𑀭𑀲𑀻𑀳𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀤𑀤𑁆𑀤𑀭𑀁 𑀅𑀪𑀺𑀦𑀸𑀤𑀬𑀻𑀢𑀺 𑀢𑁂𑀦 𑀅𑀲𑀦𑀺𑀧𑀸𑀢𑀲𑀤𑁆𑀤𑀲𑀤𑀺𑀲𑁂𑀦 𑀪𑁂𑀭𑀯𑀢𑀭𑁂𑀦 𑀲𑀻𑀳𑀦𑀸𑀤𑁂𑀦 𑀢𑀁 𑀭𑀚𑀢𑀧𑀩𑁆𑀩𑀢𑀁 𑀅𑀪𑀺𑀦𑀸𑀤𑀬𑀺 𑀏𑀓𑀦𑀺𑀦𑁆𑀦𑀸𑀤𑀁 𑀅𑀓𑀸𑀲𑀺. 𑀤𑀤𑁆𑀤𑀭𑁂 𑀯𑀲𑀦𑁆𑀢𑀺 𑀨𑀮𑀺𑀓𑀫𑀺𑀲𑁆𑀲𑀓𑁂 𑀭𑀚𑀢𑀧𑀩𑁆𑀩𑀢𑁂 𑀯𑀲𑀦𑁆𑀢𑁄. 𑀪𑀻𑀢𑁄 𑀲𑀦𑁆𑀢𑀸𑀲𑀫𑀸𑀧𑀸𑀤𑀻𑀢𑀺 𑀫𑀭𑀡𑀪𑀬𑁂𑀦 𑀪𑀻𑀢𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑀁 𑀆𑀧𑀸𑀤𑀺. 𑀳𑀤𑀬𑀜𑁆𑀘𑀲𑁆𑀲 𑀅𑀧𑁆𑀨𑀮𑀻𑀢𑀺 𑀢𑁂𑀦 𑀘𑀲𑁆𑀲 𑀪𑀬𑁂𑀦 𑀳𑀤𑀬𑀁 𑀨𑀮𑀻𑀢𑀺.

𑀏𑀯𑀁 ¶ ¶ 𑀲𑀻𑀳𑁄 𑀲𑀺𑀗𑁆𑀕𑀸𑀮𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀪𑀸𑀢𑀭𑁄 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑁂𑀲𑀁 𑀫𑀢𑀪𑀸𑀯𑀁 𑀪𑀕𑀺𑀦𑀺𑀬𑀸 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀜𑁆𑀘𑀦𑀕𑀼𑀳𑀸𑀬𑀁 𑀯𑀲𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀦𑁆𑀳𑀸𑀧𑀺𑀢𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀻𑀳𑀧𑁄𑀢𑀺𑀓𑀸 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀺𑀓𑀸, 𑀙 𑀓𑀦𑀺𑀝𑁆𑀞𑀪𑀸𑀢𑀭𑁄 𑀅𑀜𑁆𑀜𑀢𑀭𑀣𑁂𑀭𑀸 𑀅𑀳𑁂𑀲𑀼𑀁, 𑀚𑁂𑀝𑁆𑀞𑀪𑀸𑀢𑀺𑀓𑀲𑀻𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀺𑀗𑁆𑀕𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁫𑁩] 𑁩. 𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸

𑀘𑀢𑀼𑀧𑁆𑀧𑀤𑁄 𑀅𑀳𑀁, 𑀲𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀳𑀮𑁆𑀮𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑁂 𑀯𑀢𑁆𑀢𑀫𑀸𑀦𑁂 𑀲𑀢𑁆𑀣𑀭𑀺 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑁂 𑀭𑀫𑀡𑀻𑀬𑁂 𑀲𑁄𑀧𑀸𑀦𑀨𑀮𑀓𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀁 𑀅𑀕𑀫𑀸𑀲𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀧𑀺 𑀧𑀭𑀺𑀯𑁂𑀡𑀫𑁂𑀯 𑀕𑀦𑁆𑀢𑁆𑀯𑀸 ¶ 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀸𑀓𑀝𑀫𑀓𑀸𑀲𑀺. 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀥𑀫𑁆𑀫𑀁 𑀲𑀼𑀡𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁆𑀣𑁂𑀓𑁄 𑀫𑀳𑀮𑁆𑀮𑀓𑀢𑁆𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀫𑀺𑀲𑁆𑀲𑀸 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀲𑀸𑀭𑀺𑀧𑀼𑀢𑁆𑀢𑀁 𑀆𑀮𑀼𑀴𑁂𑀦𑁆𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀅𑀬𑀁 𑀫𑁂 𑀧𑀭𑀺𑀲𑀸 ‘𑀩𑀳𑀼𑀲𑁆𑀲𑀼𑀢𑁄 𑀅𑀬’𑀦𑁆𑀢𑀺 𑀜𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀲𑀦𑁆𑀢𑀭𑀸 𑀉𑀝𑁆𑀞𑀸𑀬 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 ‘‘𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀫𑀬𑀫𑁆𑀧𑀺 𑀢𑀁 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸𑀫, 𑀅𑀫𑁆𑀳𑀸𑀓𑀫𑁆𑀧𑀺 𑀑𑀓𑀸𑀲𑀁 𑀓𑀭𑁄𑀳𑀺, 𑀤𑁂𑀳𑀺 𑀫𑁂 𑀯𑀺𑀦𑀺𑀘𑁆𑀙𑀬𑀁 𑀆𑀯𑁂𑀥𑀺𑀓𑀸𑀬 𑀯𑀸 𑀦𑀺𑀯𑁂𑀥𑀺𑀓𑀸𑀬 𑀯𑀸 𑀦𑀺𑀕𑁆𑀕𑀳𑁂 𑀯𑀸 𑀧𑀕𑁆𑀕𑀳𑁂 𑀯𑀸 𑀯𑀺𑀲𑁂𑀲𑁂 𑀯𑀸 𑀧𑀝𑀺𑀯𑀺𑀲𑁂𑀲𑁂 𑀯𑀸’’𑀢𑀺 𑀆𑀳. 𑀣𑁂𑀭𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀫𑀳𑀮𑁆𑀮𑀓𑁄 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑁄 𑀢𑀼𑀘𑁆𑀙𑁄 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀓𑀣𑁂𑀢𑁆𑀯𑀸𑀯 𑀮𑀚𑁆𑀚𑀫𑀸𑀦𑁄 𑀩𑀻𑀚𑀦𑀺𑀁 𑀞𑀧𑁂𑀢𑁆𑀯𑀸 𑀆𑀲𑀦𑀸 𑀑𑀢𑀭𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 ¶ 𑀧𑀸𑀯𑀺𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀫𑁂𑀯 𑀅𑀕𑀫𑀸𑀲𑀺.

𑀫𑀦𑀼𑀲𑁆𑀲𑀸 𑀉𑀝𑁆𑀞𑀸𑀬 ‘‘𑀕𑀡𑁆𑀳𑀣𑁂𑀢𑀁 𑀢𑀼𑀘𑁆𑀙𑀫𑀳𑀮𑁆𑀮𑀓𑀁, 𑀫𑀥𑀼𑀭𑀥𑀫𑁆𑀫𑀲𑁆𑀲𑀯𑀦𑀁 𑀦𑁄 𑀲𑁄𑀢𑀼𑀁 𑀦 𑀅𑀤𑀸𑀲𑀻’’𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑁄 𑀧𑀮𑀸𑀬𑀦𑁆𑀢𑁄 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀪𑀺𑀦𑁆𑀦𑀧𑀤𑀭𑀸𑀬 𑀯𑀘𑁆𑀘𑀓𑀼𑀝𑀺𑀬𑀸 𑀧𑀢𑀺𑀢𑁆𑀯𑀸 𑀕𑀽𑀣𑀫𑀓𑁆𑀔𑀺𑀢𑁄 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 ¶ 𑀉𑀧𑀸𑀲𑀓𑀸 𑀅𑀯𑁂𑀮𑀸𑀬 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺, 𑀫𑀦𑀼𑀲𑁆𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦 𑀔𑁄 𑀉𑀧𑀸𑀲𑀓𑀸 𑀇𑀤𑀸𑀦𑁂𑀯𑁂𑀲 𑀫𑀳𑀮𑁆𑀮𑀓𑁄 𑀉𑀧𑁆𑀧𑀺𑀮𑀸𑀯𑀺𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀺𑀢𑁆𑀯𑀸 𑀫𑀳𑀸𑀩𑀮𑁂𑀳𑀺 𑀲𑀤𑁆𑀥𑀺𑀁 𑀧𑀬𑁄𑀚𑁂𑀢𑁆𑀯𑀸 𑀕𑀽𑀣𑀫𑀓𑁆𑀔𑀺𑀢𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑁂𑀲 𑀉𑀧𑁆𑀧𑀺𑀮𑀸𑀯𑀺𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀺𑀢𑁆𑀯𑀸 𑀫𑀳𑀸𑀩𑀮𑁂𑀳𑀺 𑀲𑀤𑁆𑀥𑀺𑀁 𑀧𑀬𑁄𑀚𑁂𑀢𑁆𑀯𑀸 𑀕𑀽𑀣𑀫𑀓𑁆𑀔𑀺𑀢𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀧𑀩𑁆𑀩𑀢𑀕𑀼𑀳𑀸𑀬 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀏𑀓𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀲𑀽𑀓𑀭𑀸 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑀫𑁂𑀯 𑀲𑀭𑀁 𑀦𑀺𑀲𑁆𑀲𑀸𑀬 𑀢𑀸𑀧𑀲𑀸𑀧𑀺 𑀧𑀡𑁆𑀡𑀲𑀸𑀮𑀸𑀲𑀼 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀲𑀻𑀳𑁄 𑀫𑀳𑀺𑀁𑀲𑀯𑀸𑀭𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀥𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀢𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀉𑀢𑁆𑀢𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀣𑀽𑀮𑀲𑀽𑀓𑀭𑁄 𑀢𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀕𑁄𑀘𑀭𑀁 𑀕𑀡𑁆𑀳𑀸𑀢𑀺. 𑀲𑀻𑀳𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀜𑁆𑀜𑀁 𑀏𑀓𑀤𑀺𑀯𑀲𑀁 ¶ 𑀇𑀫𑀁 𑀔𑀸𑀤𑀺𑀲𑁆𑀲𑀸𑀫𑀺, 𑀫𑀁 𑀔𑁄 𑀧𑀦 𑀤𑀺𑀲𑁆𑀯𑀸 𑀧𑀼𑀦 𑀦 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀅𑀦𑀸𑀕𑀫𑀦𑀪𑀬𑁂𑀦 𑀲𑀭𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀕𑀦𑁆𑀢𑀼𑀁 𑀆𑀭𑀪𑀺. 𑀲𑀽𑀓𑀭𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀏𑀲 𑀫𑀁 𑀤𑀺𑀲𑁆𑀯𑀸 𑀫𑀫 𑀪𑀬𑁂𑀦 𑀉𑀧𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀬𑁂𑀦 𑀧𑀮𑀸𑀬𑀢𑀺, 𑀅𑀚𑁆𑀚 𑀫𑀬𑀸 𑀇𑀫𑀺𑀦𑀸 𑀲𑀻𑀳𑁂𑀦 𑀲𑀤𑁆𑀥𑀺𑀁 𑀧𑀬𑁄𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀬𑀼𑀤𑁆𑀥𑀢𑁆𑀣𑀸𑀬 𑀅𑀯𑁆𑀳𑀬𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫.

‘‘𑀘𑀢𑀼𑀧𑁆𑀧𑀤𑁄 𑀅𑀳𑀁 𑀲𑀫𑁆𑀫, 𑀢𑁆𑀯𑀫𑁆𑀧𑀺 𑀲𑀫𑁆𑀫 𑀘𑀢𑀼𑀧𑁆𑀧𑀤𑁄;

𑀏𑀳𑀺 𑀲𑀫𑁆𑀫 𑀦𑀺𑀯𑀢𑁆𑀢𑀲𑁆𑀲𑀼, 𑀓𑀺𑀁 𑀦𑀼 𑀪𑀻𑀢𑁄 𑀧𑀮𑀸𑀬𑀲𑀻’’𑀢𑀺.

𑀲𑀻𑀳𑁄 ¶ 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀲𑀫𑁆𑀫 𑀲𑀽𑀓𑀭, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀢𑀬𑀸 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁄 𑀦𑀢𑁆𑀣𑀺, 𑀇𑀢𑁄 𑀧𑀦 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀗𑁆𑀕𑀸𑀫𑁄 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀽𑀓𑀭𑁄 ‘‘𑀲𑀻𑀳𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀸𑀢𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑀸 ‘‘𑀇𑀤𑀸𑀦𑀺 𑀢𑁆𑀯𑀁 𑀲𑀩𑁆𑀩𑁂𑀧𑀺 𑀅𑀫𑁆𑀳𑁂 𑀦𑀸𑀲𑁂𑀲𑁆𑀲𑀲𑀺, 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀺𑀢𑁆𑀯𑀸 𑀲𑀻𑀳𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀁 𑀓𑀢𑁆𑀢𑀼𑀓𑀸𑀫𑁄𑀢𑀺, 𑀲𑀻𑀳𑁄 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀧𑀺 𑀅𑀫𑁆𑀳𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀲𑀸𑀳𑀲𑀺𑀓𑀓𑀫𑁆𑀫𑀁 𑀫𑀸 𑀓𑀭𑀻’’𑀢𑀺 𑀆𑀳𑀁𑀲𑀼. 𑀲𑁄𑀧𑀺 𑀪𑀻𑀢𑀢𑀲𑀺𑀢𑁄 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺. 𑀲𑀽𑀓𑀭𑀸 ‘‘𑀲𑀫𑁆𑀫, 𑀢𑁆𑀯𑀁 𑀏𑀢𑁂𑀲𑀁 𑀢𑀸𑀧𑀲𑀸𑀦𑀁 𑀉𑀘𑁆𑀘𑀸𑀭𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀧𑀽𑀢𑀺𑀕𑀽𑀣𑁂 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀭𑀻𑀭𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀭𑀻𑀭𑀁 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀳𑀺 𑀢𑁂𑀫𑁂𑀢𑁆𑀯𑀸 𑀲𑀻𑀳𑀲𑁆𑀲 𑀆𑀕𑀫𑀦𑀢𑁄 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀯𑀸𑀢𑀬𑁄𑀕𑀁 𑀜𑀢𑁆𑀯𑀸 𑀉𑀧𑀭𑀺𑀯𑀸𑀢𑁂 𑀢𑀺𑀝𑁆𑀞, 𑀲𑀼𑀘𑀺𑀚𑀸𑀢𑀺𑀓𑁄 𑀲𑀻𑀳𑁄 𑀢𑀯 𑀲𑀭𑀻𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀢𑀼𑀬𑁆𑀳𑀁 𑀚𑀬𑀁 𑀤𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑀣𑀸 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀅𑀝𑁆𑀞𑀸𑀲𑀺. 𑀲𑀻𑀳𑁄 𑀢𑀲𑁆𑀲 𑀲𑀭𑀻𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀕𑀽𑀣𑀫𑀓𑁆𑀔𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀫𑁆𑀫 𑀲𑀽𑀓𑀭, 𑀲𑀼𑀦𑁆𑀤𑀭𑁄 𑀢𑁂 𑀮𑁂𑀲𑁄 ¶ 𑀘𑀺𑀦𑁆𑀢𑀺𑀢𑁄, 𑀲𑀘𑁂 𑀢𑁆𑀯𑀁 𑀕𑀽𑀣𑀫𑀓𑁆𑀔𑀺𑀢𑁄 𑀦𑀸𑀪𑀯𑀺𑀲𑁆𑀲, 𑀇𑀥𑁂𑀯 𑀢𑀁 𑀚𑀻𑀯𑀺𑀢𑀓𑁆𑀔𑀬𑀁 𑀅𑀧𑀸𑀧𑁂𑀲𑁆𑀲𑀁, 𑀇𑀤𑀸𑀦𑀺 𑀧𑀦 𑀢𑁂 𑀲𑀭𑀻𑀭𑀁 𑀦𑁂𑀯 𑀫𑀼𑀔𑁂𑀦 𑀟𑀁𑀲𑀺𑀢𑀼𑀁, 𑀦 𑀧𑀸𑀤𑁂𑀦 𑀧𑀳𑀭𑀺𑀢𑀼𑀁 𑀲𑀓𑁆𑀓𑀸, 𑀚𑀬𑀁 𑀢𑁂 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬.

‘‘𑀅𑀲𑀼𑀘𑀺 𑀧𑀽𑀢𑀺𑀮𑁄𑀫𑁄𑀲𑀺, 𑀤𑀼𑀕𑁆𑀕𑀦𑁆𑀥𑁄 𑀯𑀸𑀲𑀺 𑀲𑀽𑀓𑀭;

𑀲𑀘𑁂 𑀬𑀼𑀚𑁆𑀚𑀺𑀢𑀼𑀓𑀸𑀫𑁄𑀲𑀺, 𑀚𑀬𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂’’𑀢𑀺.

𑀢𑀢𑁆𑀣 ¶ 𑀧𑀽𑀢𑀺𑀮𑁄𑀫𑁄𑀢𑀺 𑀫𑀻𑀴𑁆𑀳𑀫𑀓𑁆𑀔𑀺𑀢𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑀮𑁄𑀫𑁄. 𑀤𑀼𑀕𑁆𑀕𑀦𑁆𑀥𑁄 𑀯𑀸𑀲𑀻𑀢𑀺 𑀅𑀦𑀺𑀝𑁆𑀞𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀕𑀦𑁆𑀥𑁄 𑀳𑀼𑀢𑁆𑀯𑀸 𑀯𑀸𑀬𑀲𑀺. 𑀚𑀬𑀁, 𑀲𑀫𑁆𑀫, 𑀤𑀤𑀸𑀫𑀺 𑀢𑁂𑀢𑀺 ‘‘𑀢𑀼𑀬𑁆𑀳𑀁 𑀚𑀬𑀁 𑀤𑁂𑀫𑀺, 𑀅𑀳𑀁 𑀧𑀭𑀸𑀚𑀺𑀢𑁄, 𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 𑀲𑀻𑀳𑁄 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀭𑁂 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀧𑀩𑁆𑀩𑀢𑀕𑀼𑀳𑀫𑁂𑀯 𑀕𑀢𑁄. 𑀲𑀽𑀓𑀭𑁄𑀧𑀺 ‘‘𑀲𑀻𑀳𑁄 𑀫𑁂 𑀚𑀺𑀢𑁄’’𑀢𑀺 𑀜𑀸𑀢𑀓𑀸𑀦𑀁 𑀆𑀭𑁄𑀘𑁂𑀲𑀺 ¶ . 𑀢𑁂 𑀪𑀻𑀢𑀢𑀲𑀺𑀢𑀸 ‘‘𑀧𑀼𑀦 𑀏𑀓𑀤𑀺𑀯𑀲𑀁 𑀆𑀕𑀘𑁆𑀙𑀦𑁆𑀢𑁄 𑀲𑀻𑀳𑁄 𑀲𑀩𑁆𑀩𑁂𑀯 𑀅𑀫𑁆𑀳𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀻’’𑀢𑀺 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀽𑀓𑀭𑁄 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺, 𑀲𑀻𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁫𑁪] 𑁪. 𑀉𑀭𑀕𑀚𑀸𑀢𑀓𑀯𑀡𑁆𑀡𑀦𑀸

𑀇𑀥𑀽𑀭𑀕𑀸𑀦𑀁 𑀧𑀯𑀭𑁄 𑀧𑀯𑀺𑀝𑁆𑀞𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑁂𑀡𑀺𑀪𑀡𑁆𑀟𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄𑀲𑀮𑀭𑀜𑁆𑀜𑁄 𑀓𑀺𑀭 𑀲𑁂𑀯𑀓𑀸 𑀲𑁂𑀡𑀺𑀧𑀫𑀼𑀔𑀸 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀝𑁆𑀞𑀸𑀦𑁂 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀯𑁂𑀭𑀺𑀪𑀸𑀯𑁄 𑀲𑀓𑀮𑀦𑀕𑀭𑁂 𑀧𑀸𑀓𑀝𑁄 𑀚𑀸𑀢𑁄. 𑀢𑁂 𑀦𑁂𑀯 𑀭𑀸𑀚𑀸, 𑀦 𑀜𑀸𑀢𑀺𑀫𑀺𑀢𑁆𑀢𑀸 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀲𑀓𑁆𑀔𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀏𑀓𑀓𑁄𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀢𑁂𑀲𑀼 𑀏𑀓𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺. 𑀲𑀢𑁆𑀣𑀸 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀓𑀮𑁆𑀮𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑁄 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀲𑀢𑁆𑀣𑀸 ¶ 𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀢𑀫𑁂𑀯 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀇𑀢𑀭𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀯𑀺𑀲𑀣, 𑀪𑀦𑁆𑀢𑁂’’𑀢𑀺 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺. 𑀇𑀢𑀭𑁄𑀧𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀧𑀸𑀯𑀺𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑁂 𑀯𑀡𑁆𑀡𑁂𑀢𑁆𑀯𑀸 𑀓𑀮𑁆𑀮𑀘𑀺𑀢𑁆𑀢𑀢𑀁 𑀜𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀇𑀢𑀺 𑀢𑁂 𑀉𑀪𑁄𑀧𑀺 𑀲𑁄𑀢𑀸𑀧𑀦𑁆𑀦𑀸 ¶ 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀏𑀓𑀚𑁆𑀛𑀸𑀲𑀬𑀸 𑀅𑀳𑁂𑀲𑀼𑀁. 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀘 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸𑀯 𑀏𑀓𑀢𑁄 𑀪𑀼𑀜𑁆𑀚𑀺𑀁𑀲𑀼. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀢𑁂 𑀩𑀳𑀽𑀦𑀺 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀦𑀺 𑀘𑁂𑀯 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘 𑀆𑀤𑀸𑀬 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑁂 ¶ 𑀤𑀲𑁆𑀲𑀺𑀢𑁂 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺.

𑀪𑀺𑀓𑁆𑀔𑀽 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀤𑀦𑁆𑀢𑀤𑀫𑀓𑁄, 𑀬𑁂 𑀦𑀸𑀫 𑀤𑁆𑀯𑁂 𑀫𑀳𑀸𑀫𑀢𑁆𑀢𑁂 𑀘𑀺𑀭𑀁 𑀯𑀸𑀬𑀫𑀫𑀸𑀦𑁄𑀧𑀺 𑀦𑁂𑀯 𑀭𑀸𑀚𑀸 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀲𑀓𑁆𑀔𑀺, 𑀦 𑀜𑀸𑀢𑀺𑀫𑀺𑀢𑁆𑀢𑀸𑀤𑀬𑁄 𑀲𑀓𑁆𑀔𑀺𑀁𑀲𑀼, 𑀢𑁂 𑀏𑀓𑀤𑀺𑀯𑀲𑁂𑀦𑁂𑀯 𑀢𑀣𑀸𑀕𑀢𑁂𑀦 𑀤𑀫𑀺𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑀸𑀳𑀁 𑀇𑀫𑁂 𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀅𑀓𑀸𑀲𑀺𑀁, 𑀧𑀼𑀩𑁆𑀩𑁂𑀧𑁂𑀢𑁂 𑀫𑀬𑀸 𑀲𑀫𑀕𑁆𑀕𑀸 𑀓𑀢𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀬𑀁 𑀉𑀲𑁆𑀲𑀯𑁂 𑀖𑁄𑀲𑀺𑀢𑁂 𑀫𑀳𑀸𑀲𑀫𑀚𑁆𑀚𑀁 𑀅𑀳𑁄𑀲𑀺. 𑀩𑀳𑀽 𑀫𑀦𑀼𑀲𑁆𑀲𑀸 𑀘𑁂𑀯 𑀤𑁂𑀯𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀘 𑀲𑀫𑀚𑁆𑀚𑀤𑀲𑁆𑀲𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀭𑁂𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑁄 𑀦𑀸𑀕𑁄 𑀘 𑀲𑀼𑀧𑀡𑁆𑀡𑁄 𑀘 𑀲𑀫𑀚𑁆𑀚𑀁 𑀧𑀲𑁆𑀲𑀫𑀸𑀦𑀸 𑀏𑀓𑀢𑁄 𑀅𑀝𑁆𑀞𑀁𑀲𑀼. 𑀦𑀸𑀕𑁄 𑀲𑀼𑀧𑀡𑁆𑀡𑀲𑁆𑀲 𑀲𑀼𑀧𑀡𑁆𑀡𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀅𑀁𑀲𑁂 𑀳𑀢𑁆𑀣𑀁 𑀞𑀧𑁂𑀲𑀺. 𑀲𑀼𑀧𑀡𑁆𑀡𑁄 ‘‘𑀓𑁂𑀦 𑀫𑁂 𑀅𑀁𑀲𑁂 𑀳𑀢𑁆𑀣𑁄 𑀞𑀧𑀺𑀢𑁄’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀦𑀸𑀕𑀁 𑀲𑀜𑁆𑀚𑀸𑀦𑀺. 𑀦𑀸𑀕𑁄𑀧𑀺 𑀑𑀮𑁄𑀓𑁂𑀦𑁆𑀢𑁄 𑀲𑀼𑀧𑀡𑁆𑀡𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀤𑀻𑀧𑀺𑀝𑁆𑀞𑁂𑀦 𑀧𑀮𑀸𑀬𑀺. 𑀲𑀼𑀧𑀡𑁆𑀡𑁄𑀧𑀺 ‘‘𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀩𑀦𑁆𑀥𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑁄 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀧𑀡𑁆𑀡𑀲𑀸𑀮𑀸𑀬 𑀯𑀲𑀫𑀸𑀦𑁄 𑀤𑀺𑀯𑀸 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁆𑀣𑀁 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀓𑁆𑀓𑀮𑀁 𑀩𑀳𑀺 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀬𑀢𑀺. 𑀦𑀸𑀕𑁄 ‘‘𑀇𑀫𑀁 𑀧𑀩𑁆𑀩𑀚𑀺𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸 𑀯𑀓𑁆𑀓𑀮𑀦𑁆𑀢𑀭𑀁 𑀧𑀸𑀯𑀺𑀲𑀺. 𑀲𑀼𑀧𑀡𑁆𑀡𑁄 𑀅𑀦𑀼𑀩𑀦𑁆𑀥𑀫𑀸𑀦𑁄 𑀢𑀁 𑀢𑀢𑁆𑀣 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 𑀯𑀓𑁆𑀓𑀮𑁂 𑀕𑀭𑀼𑀪𑀸𑀯𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀳𑀁 𑀙𑀸𑀢𑁄, 𑀢𑀼𑀫𑁆𑀳𑀸𑀓𑀁 𑀯𑀓𑁆𑀓𑀮𑀁 𑀕𑀡𑁆𑀳𑀣, 𑀇𑀫𑀁 𑀦𑀸𑀕𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭.

‘‘𑀇𑀥𑀽𑀭𑀕𑀸𑀦𑀁 ¶ ¶ ¶ 𑀧𑀯𑀭𑁄 𑀧𑀯𑀺𑀝𑁆𑀞𑁄, 𑀲𑁂𑀮𑀲𑁆𑀲 𑀯𑀡𑁆𑀡𑁂𑀦 𑀧𑀫𑁄𑀓𑁆𑀔𑀫𑀺𑀘𑁆𑀙𑀁;

𑀩𑁆𑀭𑀳𑁆𑀫𑀜𑁆𑀘 𑀯𑀡𑁆𑀡𑀁 𑀅𑀧𑀘𑀸𑀬𑀫𑀸𑀦𑁄, 𑀩𑀼𑀪𑀼𑀓𑁆𑀔𑀺𑀢𑁄 𑀦𑁄 𑀯𑀺𑀢𑀭𑀸𑀫𑀺 𑀪𑁄𑀢𑁆𑀢𑀼’’𑀦𑁆𑀢𑀺.

𑀢𑀢𑁆𑀣 𑀇𑀥𑀽𑀭𑀕𑀸𑀦𑀁 𑀧𑀯𑀭𑁄 𑀧𑀯𑀺𑀝𑁆𑀞𑁄𑀢𑀺 𑀇𑀫𑀲𑁆𑀫𑀺𑀁 𑀯𑀓𑁆𑀓𑀮𑁂 𑀉𑀭𑀕𑀸𑀦𑀁 𑀧𑀯𑀭𑁄 𑀦𑀸𑀕𑀭𑀸𑀚𑀸 𑀧𑀯𑀺𑀝𑁆𑀞𑁄. 𑀲𑁂𑀮𑀲𑁆𑀲 𑀯𑀡𑁆𑀡𑁂𑀦𑀸𑀢𑀺 𑀫𑀡𑀺𑀯𑀡𑁆𑀡𑁂𑀦, 𑀫𑀡𑀺𑀓𑁆𑀔𑀦𑁆𑀥𑁄 𑀳𑀼𑀢𑁆𑀯𑀸 𑀧𑀯𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀧𑀫𑁄𑀓𑁆𑀔𑀫𑀺𑀘𑁆𑀙𑀦𑁆𑀢𑀺 𑀫𑀫 𑀲𑀦𑁆𑀢𑀺𑀓𑀸 𑀫𑁄𑀓𑁆𑀔𑀁 𑀇𑀘𑁆𑀙𑀫𑀸𑀦𑁄. 𑀩𑁆𑀭𑀳𑁆𑀫𑀜𑁆𑀘 𑀯𑀡𑁆𑀡𑀁 𑀅𑀧𑀘𑀸𑀬𑀫𑀸𑀦𑁄𑀢𑀺 𑀅𑀳𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀩𑁆𑀭𑀳𑁆𑀫𑀯𑀡𑁆𑀡𑀁 𑀲𑁂𑀝𑁆𑀞𑀯𑀡𑁆𑀡𑀁 𑀧𑀽𑀚𑁂𑀦𑁆𑀢𑁄 𑀕𑀭𑀼𑀁 𑀓𑀭𑁄𑀦𑁆𑀢𑁄. 𑀩𑀼𑀪𑀼𑀓𑁆𑀔𑀺𑀢𑁄 𑀦𑁄 𑀯𑀺𑀢𑀭𑀸𑀫𑀺 𑀪𑁄𑀢𑁆𑀢𑀼𑀦𑁆𑀢𑀺 𑀏𑀢𑀁 𑀦𑀸𑀕𑀁 𑀯𑀓𑁆𑀓𑀮𑀦𑁆𑀢𑀭𑀁 𑀧𑀯𑀺𑀝𑁆𑀞𑀁 𑀙𑀸𑀢𑁄𑀧𑀺 𑀲𑀫𑀸𑀦𑁄 𑀪𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀉𑀤𑀓𑁂 𑀞𑀺𑀢𑁄𑀬𑁂𑀯 𑀲𑀼𑀧𑀡𑁆𑀡𑀭𑀸𑀚𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮.

‘‘𑀲𑁄 𑀩𑁆𑀭𑀳𑁆𑀫𑀕𑀼𑀢𑁆𑀢𑁄 𑀘𑀺𑀭𑀫𑁂𑀯 𑀚𑀻𑀯, 𑀤𑀺𑀩𑁆𑀬𑀸 𑀘 𑀢𑁂 𑀧𑀸𑀢𑀼𑀪𑀯𑀦𑁆𑀢𑀼 𑀪𑀓𑁆𑀔𑀸;

𑀬𑁄 𑀩𑁆𑀭𑀳𑁆𑀫𑀯𑀡𑁆𑀡𑀁 𑀅𑀧𑀘𑀸𑀬𑀫𑀸𑀦𑁄, 𑀩𑀼𑀪𑀼𑀓𑁆𑀔𑀺𑀢𑁄 𑀦𑁄 𑀯𑀺𑀢𑀭𑀸𑀲𑀺 𑀪𑁄𑀢𑁆𑀢𑀼’’𑀦𑁆𑀢𑀺.

𑀢𑀢𑁆𑀣 𑀲𑁄 𑀩𑁆𑀭𑀳𑁆𑀫𑀕𑀼𑀢𑁆𑀢𑁄𑀢𑀺 𑀲𑁄 𑀢𑁆𑀯𑀁 𑀩𑁆𑀭𑀳𑁆𑀫𑀕𑁄𑀧𑀺𑀢𑁄 𑀩𑁆𑀭𑀳𑁆𑀫𑀭𑀓𑁆𑀔𑀺𑀢𑁄 𑀳𑀼𑀢𑁆𑀯𑀸. 𑀤𑀺𑀩𑁆𑀬𑀸 𑀘 𑀢𑁂 𑀧𑀸𑀢𑀼𑀪𑀯𑀦𑁆𑀢𑀼 𑀪𑀓𑁆𑀔𑀸𑀢𑀺 𑀤𑁂𑀯𑀢𑀸𑀦𑀁 𑀧𑀭𑀺𑀪𑁄𑀕𑀸𑀭𑀳𑀸 𑀪𑀓𑁆𑀔𑀸 𑀘 𑀢𑀯 𑀧𑀸𑀢𑀼𑀪𑀯𑀦𑁆𑀢𑀼, 𑀫𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀢𑁆𑀯𑀸 𑀦𑀸𑀕𑀫𑀁𑀲𑀔𑀸𑀤𑀓𑁄 𑀅𑀳𑁄𑀲𑀺.

𑀇𑀢𑀺 𑀩𑁄𑀥𑀺𑀲𑀢𑁆𑀢𑁄 𑀉𑀤𑀓𑁂 𑀞𑀺𑀢𑁄𑀯 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀯𑀓𑁆𑀓𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑁂 𑀉𑀪𑁄𑀧𑀺 𑀕𑀳𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀕𑀦𑁆𑀢𑁆𑀯𑀸 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑁂 𑀲𑀫𑀕𑁆𑀕𑁂 𑀅𑀓𑀸𑀲𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀲𑀼𑀔𑀁 𑀯𑀲𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀦𑀸𑀕𑁄 𑀘 𑀲𑀼𑀧𑀡𑁆𑀡𑁄 𑀘 𑀇𑀫𑁂 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀭𑀕𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁫𑁫] 𑁫. 𑀪𑀕𑁆𑀕𑀚𑀸𑀢𑀓𑀯𑀡𑁆𑀡𑀦𑀸

𑀚𑀻𑀯 ¶ ¶ ¶ 𑀯𑀲𑁆𑀲𑀲𑀢𑀁 𑀪𑀕𑁆𑀕𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑀲𑀫𑀻𑀧𑁂 𑀧𑀲𑁂𑀦𑀤𑀺𑀓𑁄𑀲𑀮𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑁂 𑀭𑀸𑀚𑀓𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀔𑀺𑀧𑀺𑀢𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀲𑀢𑁆𑀣𑀸 𑀭𑀸𑀚𑀓𑀸𑀭𑀸𑀫𑁂 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀔𑀺𑀧𑀺. 𑀪𑀺𑀓𑁆𑀔𑀽 ‘‘𑀚𑀻𑀯𑀢𑀼, 𑀪𑀦𑁆𑀢𑁂 𑀪𑀕𑀯𑀸, 𑀚𑀻𑀯𑀢𑀼, 𑀲𑀼𑀕𑀢𑁄’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀫𑀳𑀸𑀲𑀤𑁆𑀤𑀁 𑀅𑀓𑀁𑀲𑀼, 𑀢𑁂𑀦 𑀲𑀤𑁆𑀤𑁂𑀦 𑀥𑀫𑁆𑀫𑀓𑀣𑀸𑀬 𑀅𑀦𑁆𑀢𑀭𑀸𑀬𑁄 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀧𑀺 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀔𑀺𑀧𑀺𑀢𑁂 ‘𑀚𑀻𑀯𑀸’𑀢𑀺 𑀯𑀼𑀢𑁆𑀢𑁄 𑀢𑀧𑁆𑀧𑀘𑁆𑀘𑀬𑀸 𑀚𑀻𑀯𑁂𑀬𑁆𑀬 𑀯𑀸 𑀫𑀭𑁂𑀬𑁆𑀬 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀔𑀺𑀧𑀺𑀢𑁂 ‘𑀚𑀻𑀯𑀸’𑀢𑀺 𑀯𑀢𑁆𑀢𑀩𑁆𑀩𑁄, 𑀬𑁄 𑀯𑀤𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁮𑁮). 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽𑀦𑀁 𑀔𑀺𑀧𑀺𑀢𑁂 ‘‘𑀚𑀻𑀯𑀣, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀺, 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀮𑀧𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 ‘𑀚𑀻𑀯𑀣, 𑀪𑀦𑁆𑀢𑁂’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀦𑀸𑀮𑀧𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀕𑀺𑀳𑀻, 𑀪𑀺𑀓𑁆𑀔𑀯𑁂, 𑀫𑀗𑁆𑀕𑀮𑀺𑀓𑀸, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 ‘‘𑀚𑀻𑀯𑀣, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀦 ‘‘𑀘𑀺𑀭𑀁 𑀚𑀻𑀯𑀸’’𑀢𑀺 𑀯𑀢𑁆𑀢𑀼𑀦𑁆𑀢𑀺. 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀚𑀻𑀯𑀧𑀝𑀺𑀚𑀻𑀯𑀁 𑀦𑀸𑀫 𑀓𑀤𑀸 𑀉𑀧𑁆𑀧𑀦𑁆𑀦’’𑀦𑁆𑀢𑀺? 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀚𑀻𑀯𑀧𑀝𑀺𑀚𑀻𑀯𑀁 𑀦𑀸𑀫 𑀧𑁄𑀭𑀸𑀡𑀓𑀸𑀮𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀺𑀢𑀸 𑀯𑁄𑀳𑀸𑀭𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀲𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀩𑁄𑀥𑀺𑀲𑀢𑁆𑀢𑀁 𑀫𑀡𑀺𑀓𑀪𑀡𑁆𑀟𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀘𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀤𑁄𑀯𑀸𑀭𑀺𑀓𑀲𑁆𑀲 𑀖𑀭𑁂 𑀪𑀢𑁆𑀢𑀁 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁄 ‘‘𑀅𑀯𑁂𑀮𑀸𑀬 𑀆𑀕𑀢𑀸 𑀆𑀕𑀦𑁆𑀢𑀼𑀓𑀸 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 ‘‘𑀩𑀳𑀺𑀦𑀕𑀭𑁂 𑀏𑀓𑀸 𑀲𑀸𑀮𑀸 𑀅𑀢𑁆𑀣𑀺, 𑀲𑀸 𑀧𑀦 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸. 𑀲𑀘𑁂 𑀇𑀘𑁆𑀙𑀣, 𑀢𑀢𑁆𑀣 𑀯𑀲𑀣𑀸’’𑀢𑀺 𑀆𑀳𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀏𑀣, 𑀢𑀸𑀢, 𑀕𑀘𑁆𑀙𑀸𑀫, 𑀫𑀸 𑀬𑀓𑁆𑀔𑀲𑁆𑀲 𑀪𑀸𑀬𑀺𑀢𑁆𑀣, 𑀅𑀳𑀁 𑀢𑀁 𑀤𑀫𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂𑀲𑀼 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 ¶ 𑀧𑀺𑀢𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀕𑀢𑁄. 𑀅𑀣𑀲𑁆𑀲 𑀧𑀺𑀢𑀸 𑀨𑀮𑀓𑁂 𑀦𑀺𑀧𑀚𑁆𑀚𑀺, 𑀲𑀬𑀁 𑀧𑀺𑀢𑀼 𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀢𑁆𑀣 𑀅𑀥𑀺𑀯𑀢𑁆𑀣𑁄 𑀬𑀓𑁆𑀔𑁄 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑁂𑀲𑁆𑀲𑀯𑀡𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀁 𑀲𑀸𑀮𑀁 𑀮𑀪𑀦𑁆𑀢𑁄 ‘‘𑀇𑀫𑀁 𑀲𑀸𑀮𑀁 𑀧𑀯𑀺𑀝𑁆𑀞𑀫𑀦𑀼𑀲𑁆𑀲𑁂𑀲𑀼 𑀬𑁄 𑀔𑀺𑀧𑀺𑀢𑁂 ‘𑀚𑀻𑀯𑀸’𑀢𑀺 𑀯𑀤𑀢𑀺, 𑀬𑁄 𑀘 ‘𑀚𑀻𑀯𑀸’𑀢𑀺 𑀯𑀼𑀢𑁆𑀢𑁂 ‘𑀧𑀝𑀺𑀚𑀻𑀯𑀸’𑀢𑀺 𑀯𑀤𑀢𑀺, 𑀢𑁂 𑀚𑀻𑀯𑀧𑀝𑀺𑀚𑀻𑀯𑀪𑀸𑀡𑀺𑀦𑁄 ¶ 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀔𑀸𑀤𑁂𑀬𑁆𑀬𑀸𑀲𑀻’’𑀢𑀺 𑀮𑀪𑀺. 𑀲𑁄 𑀧𑀺𑀝𑁆𑀞𑀺𑀯𑀁𑀲𑀣𑀽𑀡𑀸𑀬 𑀯𑀲𑀢𑀺. 𑀲𑁄 ‘‘𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀭𑀁 𑀔𑀺𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀼𑀔𑀼𑀫𑀘𑀼𑀡𑁆𑀡𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀘𑀼𑀡𑁆𑀡𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀦𑀸𑀲𑀧𑀼𑀝𑁂 𑀧𑀸𑀯𑀺𑀲𑀺. 𑀲𑁄 𑀨𑀮𑀓𑁂 𑀦𑀺𑀧𑀦𑁆𑀦𑀓𑁄𑀯 𑀔𑀺𑀧𑀺, 𑀩𑁄𑀥𑀺𑀲𑀢𑁆𑀢𑁄 𑀦 ‘‘𑀚𑀻𑀯𑀸’’𑀢𑀺 ¶ 𑀆𑀳. 𑀬𑀓𑁆𑀔𑁄 𑀢𑀁 𑀔𑀸𑀤𑀺𑀢𑀼𑀁 𑀣𑀽𑀡𑀸𑀬 𑀑𑀢𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀑𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀧𑀺𑀢𑀸 𑀔𑀺𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀲𑁄 𑀔𑀺𑀧𑀺𑀢𑁂 ‘𑀚𑀻𑀯𑀸’𑀢𑀺 𑀅𑀯𑀤𑀦𑁆𑀢𑀁 𑀔𑀸𑀤𑀓𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀺𑀢𑀭𑀁 𑀆𑀭𑀩𑁆𑀪 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯.

‘‘𑀚𑀻𑀯 𑀯𑀲𑁆𑀲𑀲𑀢𑀁 𑀪𑀕𑁆𑀕, 𑀅𑀧𑀭𑀸𑀦𑀺 𑀘 𑀯𑀻𑀲𑀢𑀺𑀁;

𑀫𑀸 𑀫𑀁 𑀧𑀺𑀲𑀸𑀘𑀸 𑀔𑀸𑀤𑀦𑁆𑀢𑀼, 𑀚𑀻𑀯 𑀢𑁆𑀯𑀁 𑀲𑀭𑀤𑁄𑀲𑀢’’𑀦𑁆𑀢𑀺.

𑀢𑀢𑁆𑀣 𑀪𑀕𑁆𑀕𑀸𑀢𑀺 𑀧𑀺𑀢𑀭𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀅𑀧𑀭𑀸𑀦𑀺 𑀘 𑀯𑀻𑀲𑀢𑀺𑀦𑁆𑀢𑀺 𑀅𑀧𑀭𑀸𑀦𑀺 𑀘 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀚𑀻𑀯. 𑀫𑀸 𑀫𑀁 𑀧𑀺𑀲𑀸𑀘𑀸 𑀔𑀸𑀤𑀦𑁆𑀢𑀽𑀢𑀺 𑀫𑀁 𑀧𑀺𑀲𑀸𑀘𑀸 𑀫𑀸 𑀔𑀸𑀤𑀦𑁆𑀢𑀼. 𑀚𑀻𑀯 𑀢𑁆𑀯𑀁 𑀲𑀭𑀤𑁄𑀲𑀢𑀦𑁆𑀢𑀺 𑀢𑁆𑀯𑀁 𑀧𑀦 𑀯𑀻𑀲𑀼𑀢𑁆𑀢𑀭𑀁 𑀯𑀲𑁆𑀲𑀲𑀢𑀁 𑀚𑀻𑀯𑀸𑀢𑀺. 𑀲𑀭𑀤𑁄𑀲𑀢𑀜𑁆𑀳𑀺 𑀕𑀡𑀺𑀬𑀫𑀸𑀦𑀁 𑀯𑀲𑁆𑀲𑀲𑀢𑀫𑁂𑀯 𑀳𑁄𑀢𑀺, 𑀢𑀁 𑀧𑀼𑀭𑀺𑀫𑁂𑀳𑀺 𑀯𑀻𑀲𑀸𑀬 𑀲𑀤𑁆𑀥𑀺𑀁 𑀯𑀻𑀲𑀼𑀢𑁆𑀢𑀭𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁.

𑀬𑀓𑁆𑀔𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀁 𑀢𑀸𑀯 𑀫𑀸𑀡𑀯𑀁 ‘𑀚𑀻𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀧𑀺𑀢𑀭𑀁 𑀧𑀦𑀲𑁆𑀲 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑁄 ‘𑀧𑀝𑀺𑀚𑀻𑀯𑀸’𑀢𑀺 𑀅𑀪𑀡𑀦𑁆𑀢𑀸𑀦𑀁 𑀔𑀸𑀤𑀓𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀚𑀻𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀢𑁆𑀢𑀁 𑀆𑀭𑀩𑁆𑀪 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦.

‘‘𑀢𑁆𑀯𑀫𑁆𑀧𑀺 𑀯𑀲𑁆𑀲𑀲𑀢𑀁 𑀚𑀻𑀯𑀁, 𑀅𑀧𑀭𑀸𑀦𑀺 𑀘 𑀯𑀻𑀲𑀢𑀺𑀁;

𑀯𑀺𑀲𑀁 𑀧𑀺𑀲𑀸𑀘𑀸 𑀔𑀸𑀤𑀦𑁆𑀢𑀼, 𑀚𑀻𑀯 𑀢𑁆𑀯𑀁 𑀲𑀭𑀤𑁄𑀲𑀢’’𑀦𑁆𑀢𑀺.

𑀢𑀢𑁆𑀣 ¶ 𑀯𑀺𑀲𑀁 𑀧𑀺𑀲𑀸𑀘𑀸 𑀔𑀸𑀤𑀦𑁆𑀢𑀽𑀢𑀺 𑀧𑀺𑀲𑀸𑀘𑀸 𑀳𑀮𑀸𑀳𑀮𑀯𑀺𑀲𑀁 𑀔𑀸𑀤𑀦𑁆𑀢𑀼.

𑀬𑀓𑁆𑀔𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀉𑀪𑁄𑀧𑀺 𑀫𑁂 𑀦 𑀲𑀓𑁆𑀓𑀸 𑀔𑀸𑀤𑀺𑀢𑀼’’𑀦𑁆𑀢𑀺 𑀧𑀝𑀺𑀦𑀺𑀯𑀢𑁆𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀧𑀼𑀘𑁆𑀙𑀺 𑁋 ‘‘𑀪𑁄 𑀬𑀓𑁆𑀔, 𑀓𑀲𑁆𑀫𑀸 𑀢𑁆𑀯𑀁 𑀇𑀫𑀁 𑀲𑀸𑀮𑀁 𑀧𑀯𑀺𑀝𑁆𑀞𑀫𑀦𑀼𑀲𑁆𑀲𑁂 𑀔𑀸𑀤𑀲𑀻’’𑀢𑀺? ‘‘𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑁂𑀲𑁆𑀲𑀯𑀡𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀮𑀤𑁆𑀥𑀢𑁆𑀢𑀸’’𑀢𑀺. ‘‘𑀓𑀺𑀁 𑀧𑀦 𑀲𑀩𑁆𑀩𑁂𑀯 𑀔𑀸𑀤𑀺𑀢𑀼𑀁 𑀮𑀪𑀲𑀻’’𑀢𑀺? ‘‘𑀚𑀻𑀯𑀧𑀝𑀺𑀚𑀻𑀯𑀪𑀸𑀡𑀺𑀦𑁄 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀔𑀸𑀤𑀸𑀫𑀻’’𑀢𑀺. ‘‘𑀬𑀓𑁆𑀔, 𑀢𑁆𑀯𑀁 𑀧𑀼𑀩𑁆𑀩𑁂𑀧𑀺 𑀅𑀓𑀼𑀲𑀮𑀁 𑀓𑀢𑁆𑀯𑀸 𑀓𑀓𑁆𑀔𑀴𑁄 ¶ 𑀨𑀭𑀼𑀲𑁄 𑀧𑀭𑀯𑀺𑀳𑀺𑀁𑀲𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀇𑀤𑀸𑀦𑀺𑀧𑀺 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀫𑁄 𑀢𑀫𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀲𑁆𑀲𑀽’’𑀢𑀺 𑀢𑀁 𑀬𑀓𑁆𑀔𑀁 𑀤𑀫𑁂𑀢𑁆𑀯𑀸 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀓𑁆𑀔𑀁 𑀧𑁂𑀲𑀦𑀓𑀸𑀭𑀓𑀁 𑀯𑀺𑀬 𑀅𑀓𑀸𑀲𑀺.

𑀧𑀼𑀦𑀤𑀺𑀯𑀲𑁂 ¶ 𑀲𑀜𑁆𑀘𑀭𑀦𑁆𑀢𑀸 𑀫𑀦𑀼𑀲𑁆𑀲𑀸 𑀬𑀓𑁆𑀔𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀘𑀲𑁆𑀲 𑀤𑀫𑀺𑀢𑀪𑀸𑀯𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀤𑁂𑀯, 𑀏𑀓𑁄 𑀫𑀸𑀡𑀯𑁄 𑀢𑀁 𑀬𑀓𑁆𑀔𑀁 𑀤𑀫𑁂𑀢𑁆𑀯𑀸 𑀧𑁂𑀲𑀦𑀓𑀸𑀭𑀓𑀁 𑀯𑀺𑀬 𑀓𑀢𑁆𑀯𑀸 𑀞𑀺𑀢𑁄’’𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀧𑀺𑀢𑀼 𑀘𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺. 𑀲𑁄 𑀬𑀓𑁆𑀔𑀁 𑀩𑀮𑀺𑀧𑀝𑀺𑀕𑁆𑀕𑀸𑀳𑀓𑀁 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀚𑀻𑀯𑀧𑀝𑀺𑀚𑀻𑀯𑀁 𑀦𑀸𑀫 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀬𑀓𑁆𑀔𑁄 𑀅𑀗𑁆𑀕𑀼𑀮𑀺𑀫𑀸𑀮𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀺𑀢𑀸 𑀓𑀲𑁆𑀲𑀧𑁄, 𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀪𑀕𑁆𑀕𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁫𑁬] 𑁬. 𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀅𑀮𑀻𑀦𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀏𑀓𑀸𑀤𑀲𑀦𑀺𑀧𑀸𑀢𑁂 𑀲𑀁𑀯𑀭𑀚𑀸𑀢𑀓𑁂 (𑀚𑀸. 𑁧.𑁧𑁧.𑁯𑁭 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑁄 𑀧𑀦 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀯𑀻𑀭𑀺𑀬𑀁 𑀑𑀲𑁆𑀲𑀚𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺 ¶ 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦𑀦𑀼 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀼𑀩𑁆𑀩𑁂 𑀯𑀻𑀭𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀁𑀲𑀧𑁂𑀲𑀺𑀲𑀤𑀺𑀲𑀲𑁆𑀲 𑀤𑀳𑀭𑀓𑀼𑀫𑀸𑀭𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀅𑀤𑀸𑀲𑀺, 𑀇𑀤𑀸𑀦𑀺 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀯𑀟𑁆𑀠𑀓𑀻𑀕𑀸𑀫𑁄 𑀅𑀳𑁄𑀲𑀺, 𑀢𑀢𑁆𑀣 𑀧𑀜𑁆𑀘𑀲𑀢𑀸 𑀯𑀟𑁆𑀠𑀓𑀻 𑀯𑀲𑀦𑁆𑀢𑀺. 𑀢𑁂 𑀦𑀸𑀯𑀸𑀬 ¶ 𑀉𑀧𑀭𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀅𑀭𑀜𑁆𑀜𑁂 𑀕𑁂𑀳𑀲𑀫𑁆𑀪𑀸𑀭𑀤𑀸𑀭𑀽𑀦𑀺 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣𑁂𑀯 𑀏𑀓𑀪𑀽𑀫𑀺𑀓𑀤𑁆𑀯𑀺𑀪𑀽𑀫𑀺𑀓𑀸𑀤𑀺𑀪𑁂𑀤𑁂 𑀕𑁂𑀳𑀲𑀫𑁆𑀪𑀸𑀭𑁂 𑀲𑀚𑁆𑀚𑁂𑀢𑁆𑀯𑀸 𑀣𑀫𑁆𑀪𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀤𑀸𑀭𑀽𑀲𑀼 𑀲𑀜𑁆𑀜𑀁 𑀓𑀢𑁆𑀯𑀸 𑀦𑀤𑀻𑀢𑀻𑀭𑀁 𑀦𑁂𑀢𑁆𑀯𑀸 𑀦𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀅𑀦𑀼𑀲𑁄𑀢𑁂𑀦 𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀬𑁂 𑀬𑀸𑀤𑀺𑀲𑀸𑀦𑀺 𑀕𑁂𑀳𑀸𑀦𑀺 𑀆𑀓𑀗𑁆𑀔𑀦𑁆𑀢𑀺, 𑀢𑁂𑀲𑀁 𑀢𑀸𑀤𑀺𑀲𑀸𑀦𑀺 𑀓𑀢𑁆𑀯𑀸 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀕𑁂𑀳𑀲𑀫𑁆𑀪𑀸𑀭𑁂 𑀆𑀳𑀭𑀦𑁆𑀢𑀺. 𑀏𑀯𑀁 𑀢𑁂𑀲𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸𑀦𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀤𑀸𑀭𑀽𑀦𑀺 𑀓𑁄𑀝𑁆𑀝𑁂𑀦𑁆𑀢𑀸𑀦𑀁 𑀅𑀯𑀺𑀤𑀽𑀭𑁂 𑀏𑀓𑁄 𑀳𑀢𑁆𑀣𑀻 𑀔𑀤𑀺𑀭𑀔𑀸𑀡𑀼𑀓𑀁 𑀅𑀓𑁆𑀓𑀫𑀺. 𑀢𑀲𑁆𑀲 𑀲𑁄 𑀔𑀸𑀡𑀼𑀓𑁄 𑀧𑀸𑀤𑀁 𑀯𑀺𑀚𑁆𑀛𑀺, 𑀩𑀮𑀯𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺, 𑀧𑀸𑀤𑁄 𑀉𑀤𑁆𑀥𑀼𑀫𑀸𑀬𑀺𑀢𑁆𑀯𑀸 𑀧𑀼𑀩𑁆𑀩𑀁 𑀕𑀡𑁆𑀳𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 ¶ 𑀢𑁂𑀲𑀁 𑀤𑀸𑀭𑀼𑀓𑁄𑀝𑁆𑀝𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀯𑀟𑁆𑀠𑀓𑀻 𑀦𑀺𑀲𑁆𑀲𑀸𑀬 𑀫𑀬𑁆𑀳𑀁 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀢𑀻𑀳𑀺 𑀧𑀸𑀤𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀦𑀺𑀧𑀚𑁆𑀚𑀺, 𑀯𑀟𑁆𑀠𑀓𑀻 𑀢𑀁 𑀉𑀤𑁆𑀥𑀼𑀫𑀸𑀢𑀧𑀸𑀤𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀤𑁂 𑀔𑀸𑀡𑀼𑀓𑀁 𑀤𑀺𑀲𑁆𑀯𑀸 𑀢𑀺𑀔𑀺𑀡𑀯𑀸𑀲𑀺𑀬𑀸 𑀔𑀸𑀡𑀼𑀓𑀲𑁆𑀲 𑀲𑀫𑀦𑁆𑀢𑀢𑁄 𑀑𑀥𑀺𑀁 𑀤𑀢𑁆𑀯𑀸 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀔𑀸𑀡𑀼𑀁 𑀦𑀻𑀳𑀭𑀺𑀢𑁆𑀯𑀸 𑀧𑀼𑀩𑁆𑀩𑀁 𑀫𑁄𑀘𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀫𑀓𑁆𑀔𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀯𑀡𑀁 𑀨𑀸𑀲𑀼𑀓𑀁 𑀓𑀭𑀺𑀁𑀲𑀼.

𑀳𑀢𑁆𑀣𑀻 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀇𑀫𑁂 𑀯𑀟𑁆𑀠𑀓𑀻 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥𑀁, 𑀇𑀤𑀸𑀦𑀺 𑀢𑁂𑀲𑀁 𑀫𑀬𑀸 𑀉𑀧𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀯𑀟𑁆𑀠𑀓𑀻𑀳𑀺 𑀲𑀤𑁆𑀥𑀺𑀁 ¶ 𑀭𑀼𑀓𑁆𑀔𑁂 𑀦𑀻𑀳𑀭𑀢𑀺, 𑀢𑀘𑁆𑀙𑁂𑀦𑁆𑀢𑀸𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀢𑀺, 𑀯𑀸𑀲𑀺𑀆𑀤𑀻𑀦𑀺 𑀉𑀧𑀲𑀁𑀳𑀭𑀢𑀺, 𑀲𑁄𑀡𑁆𑀟𑀸𑀬 𑀯𑁂𑀞𑁂𑀢𑁆𑀯𑀸 𑀓𑀸𑀴𑀲𑀼𑀢𑁆𑀢𑀓𑁄𑀝𑀺𑀬𑀁 𑀕𑀡𑁆𑀳𑀸𑀢𑀺. 𑀯𑀟𑁆𑀠𑀓𑀻𑀧𑀺𑀲𑁆𑀲 𑀪𑁄𑀚𑀦𑀯𑁂𑀮𑀸𑀬 𑀏𑀓𑁂𑀓𑀁 𑀧𑀺𑀡𑁆𑀟𑀁 𑀤𑁂𑀦𑁆𑀢𑀸 𑀧𑀜𑁆𑀘 𑀧𑀺𑀡𑁆𑀟𑀲𑀢𑀸𑀦𑀺 𑀤𑁂𑀦𑁆𑀢𑀺. 𑀢𑀲𑁆𑀲 𑀧𑀦 𑀳𑀢𑁆𑀣𑀺𑀲𑁆𑀲 𑀧𑀼𑀢𑁆𑀢𑁄 𑀲𑀩𑁆𑀩𑀲𑁂𑀢𑁄 𑀳𑀢𑁆𑀣𑀸𑀚𑀸𑀦𑀻𑀬𑀧𑁄𑀢𑀓𑁄 𑀅𑀢𑁆𑀣𑀺, 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀏𑀢𑀭𑀳𑀺 𑀫𑀳𑀮𑁆𑀮𑀓𑁄. 𑀇𑀤𑀸𑀦𑀺 𑀫𑀬𑀸 𑀇𑀫𑁂𑀲𑀁 𑀯𑀟𑁆𑀠𑀓𑀻𑀦𑀁 𑀓𑀫𑁆𑀫𑀓𑀭𑀡𑀢𑁆𑀢𑀸𑀬 𑀧𑀼𑀢𑁆𑀢𑀁 𑀤𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀯𑀟𑁆𑀠𑀓𑀻𑀦𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 ‘‘𑀅𑀬𑀁 𑀳𑀢𑁆𑀣𑀺𑀧𑁄𑀢𑀓𑁄 𑀫𑀫 𑀧𑀼𑀢𑁆𑀢𑁄, 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀅𑀳𑀁 𑀯𑁄 𑀯𑁂𑀚𑁆𑀚𑀯𑁂𑀢𑀦𑀢𑁆𑀣𑀸𑀬 𑀇𑀫𑀁 𑀤𑀫𑁆𑀫𑀺, 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀇𑀢𑁄 𑀧𑀝𑁆𑀞𑀸𑀬 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬, 𑀧𑀼𑀢𑁆𑀢𑀓, 𑀬𑀁 𑀫𑀬𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁, 𑀢𑀁 𑀢𑁆𑀯𑀁 𑀓𑀭𑁄𑀳𑀻’’𑀢𑀺 𑀧𑀼𑀢𑁆𑀢𑀁 𑀑𑀯𑀤𑀺𑀢𑁆𑀯𑀸 𑀯𑀟𑁆𑀠𑀓𑀻𑀦𑀁 𑀤𑀢𑁆𑀯𑀸 𑀲𑀬𑀁 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺.

𑀢𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀺𑀧𑁄𑀢𑀓𑁄 𑀯𑀟𑁆𑀠𑀓𑀻𑀦𑀁 𑀯𑀘𑀦𑀓𑀭𑁄 𑀑𑀯𑀸𑀤𑀓𑁆𑀔𑀫𑁄 𑀳𑀼𑀢𑁆𑀯𑀸 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀢𑁂𑀧𑀺 𑀢𑀁 𑀧𑀜𑁆𑀘𑀳𑀺 𑀧𑀺𑀡𑁆𑀟𑀲𑀢𑁂𑀳𑀺 𑀧𑁄𑀲𑁂𑀦𑁆𑀢𑀺, 𑀲𑁄 ¶ 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀓𑀻𑀴𑀺𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀓𑀻𑀤𑀸𑀭𑀓𑀸𑀧𑀺 𑀢𑀁 𑀲𑁄𑀡𑁆𑀟𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀉𑀤𑀓𑁂𑀧𑀺 𑀣𑀮𑁂𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑀺. 𑀆𑀚𑀸𑀦𑀻𑀬𑀸 𑀧𑀦 𑀳𑀢𑁆𑀣𑀺𑀦𑁄𑀧𑀺 𑀅𑀲𑁆𑀲𑀸𑀧𑀺 𑀧𑀼𑀭𑀺𑀲𑀸𑀧𑀺 𑀉𑀤𑀓𑁂 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀦 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄𑀧𑀺 𑀉𑀤𑀓𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀅𑀓𑀢𑁆𑀯𑀸 𑀩𑀳𑀺𑀦𑀤𑀻𑀢𑀻𑀭𑁂𑀬𑁂𑀯 𑀓𑀭𑁄𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑀭𑀺𑀦𑀤𑀺𑀬𑀸 𑀤𑁂𑀯𑁄 𑀯𑀲𑁆𑀲𑀺, 𑀅𑀣 𑀲𑀼𑀓𑁆𑀔𑀁 𑀳𑀢𑁆𑀣𑀺𑀮𑀡𑁆𑀟𑀁 𑀉𑀤𑀓𑁂𑀦 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀩𑀸𑀭𑀸𑀡𑀲𑀻𑀦𑀕𑀭𑀢𑀺𑀢𑁆𑀣𑁂 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑁂 𑀮𑀕𑁆𑀕𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀭𑀜𑁆𑀜𑁄 𑀳𑀢𑁆𑀣𑀺𑀕𑁄𑀧𑀓𑀸 ‘‘𑀳𑀢𑁆𑀣𑀻 𑀦𑁆𑀳𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀧𑀜𑁆𑀘 𑀳𑀢𑁆𑀣𑀺𑀲𑀢𑀸𑀦𑀺 𑀦𑀬𑀺𑀁𑀲𑀼. 𑀆𑀚𑀸𑀦𑀻𑀬𑀮𑀡𑁆𑀟𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀏𑀓𑁄𑀧𑀺 𑀳𑀢𑁆𑀣𑀻 𑀦𑀤𑀺𑀁 𑀑𑀢𑀭𑀺𑀢𑀼𑀁 𑀦 𑀉𑀲𑁆𑀲𑀳𑀺. 𑀲𑀩𑁆𑀩𑁂𑀧𑀺 𑀦𑀗𑁆𑀕𑀼𑀝𑁆𑀞𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺𑀁𑀲𑀼, 𑀳𑀢𑁆𑀣𑀺𑀕𑁄𑀧𑀓𑀸 𑀳𑀢𑁆𑀣𑀸𑀘𑀭𑀺𑀬𑀸𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂 ‘‘𑀉𑀤𑀓𑁂 𑀧𑀭𑀺𑀧𑀦𑁆𑀣𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀤𑀓𑀁 𑀲𑁄𑀥𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 ¶ 𑀕𑀼𑀫𑁆𑀩𑁂 𑀢𑀁 𑀆𑀚𑀸𑀦𑀻𑀬𑀮𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀇𑀤𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀜𑀢𑁆𑀯𑀸 𑀘𑀸𑀝𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀢𑀁 𑀢𑀢𑁆𑀣 𑀫𑀤𑁆𑀤𑀺𑀢𑁆𑀯𑀸 𑀳𑀢𑁆𑀣𑀻𑀦𑀁 𑀲𑀭𑀻𑀭𑁂 𑀲𑀺𑀜𑁆𑀘𑀸𑀧𑁂𑀲𑀼𑀁, 𑀲𑀭𑀻𑀭𑀸𑀦𑀺 𑀲𑀼𑀕𑀦𑁆𑀥𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀬𑀺𑀁𑀲𑀼.

𑀳𑀢𑁆𑀣𑀸𑀘𑀭𑀺𑀬𑀸 ¶ 𑀭𑀜𑁆𑀜𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀁 𑀳𑀢𑁆𑀣𑀸𑀚𑀸𑀦𑀻𑀬𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀦𑀸𑀯𑀸𑀲𑀗𑁆𑀖𑀸𑀝𑁂𑀳𑀺 𑀦𑀤𑀺𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀉𑀤𑁆𑀥𑀁𑀕𑀸𑀫𑀻𑀳𑀺 𑀦𑀸𑀯𑀸𑀲𑀗𑁆𑀖𑀸𑀝𑁂𑀳𑀺 𑀯𑀟𑁆𑀠𑀓𑀻𑀦𑀁 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀳𑀢𑁆𑀣𑀺𑀧𑁄𑀢𑀓𑁄 𑀦𑀤𑀺𑀬𑀁 𑀓𑀻𑀴𑀦𑁆𑀢𑁄 𑀪𑁂𑀭𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀟𑁆𑀠𑀓𑀻𑀦𑀁 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀯𑀟𑁆𑀠𑀓𑀻 𑀭𑀜𑁆𑀜𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ‘‘𑀤𑁂𑀯, 𑀲𑀘𑁂 𑀤𑀸𑀭𑀽𑀳𑀺 𑀅𑀢𑁆𑀣𑁄, 𑀓𑀺𑀁 𑀓𑀸𑀭𑀡𑀸 𑀆𑀕𑀢𑀢𑁆𑀣, 𑀓𑀺𑀁 𑀧𑁂𑀲𑁂𑀢𑁆𑀯𑀸 𑀆𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. ‘‘𑀦𑀸𑀳𑀁, 𑀪𑀡𑁂, 𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀆𑀕𑀢𑁄, 𑀇𑀫𑀲𑁆𑀲 𑀧𑀦 𑀳𑀢𑁆𑀣𑀺𑀲𑁆𑀲 𑀅𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀕𑀸𑀳𑀸𑀧𑁂𑀢𑁆𑀯𑀸 𑀕𑀘𑁆𑀙𑀣, 𑀤𑁂𑀯𑀸’’𑀢𑀺. 𑀳𑀢𑁆𑀣𑀺𑀧𑁄𑀢𑀓𑁄 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀺. ‘‘𑀓𑀺𑀁 𑀓𑀸𑀭𑀸𑀧𑁂𑀢𑀺, 𑀪𑀡𑁂, 𑀳𑀢𑁆𑀣𑀻’’𑀢𑀺? ‘‘𑀯𑀟𑁆𑀠𑀓𑀻𑀦𑀁 𑀧𑁄𑀲𑀸𑀯𑀦𑀺𑀓𑀁 𑀆𑀳𑀭𑀸𑀧𑁂𑀢𑀺, 𑀤𑁂𑀯𑀸’’𑀢𑀺. ‘‘𑀲𑀸𑀥𑀼, 𑀪𑀡𑁂’’𑀢𑀺 𑀭𑀸𑀚𑀸 𑀳𑀢𑁆𑀣𑀺𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀲𑁄𑀡𑁆𑀟𑀸𑀬 𑀦𑀗𑁆𑀕𑀼𑀝𑁆𑀞𑀲𑁆𑀲 𑀘 𑀲𑀦𑁆𑀢𑀺𑀓𑁂 𑀲𑀢𑀲𑀳𑀲𑁆𑀲𑀲𑀢𑀲𑀳𑀲𑁆𑀲𑀓𑀳𑀸𑀧𑀡𑁂 𑀞𑀧𑀸𑀧𑁂𑀲𑀺. 𑀳𑀢𑁆𑀣𑀻 𑀏𑀢𑁆𑀢𑀓𑁂𑀦𑀸𑀧𑀺 𑀅𑀕𑀦𑁆𑀢𑁆𑀯𑀸 𑀲𑀩𑁆𑀩𑀯𑀟𑁆𑀠𑀓𑀻𑀦𑀁 𑀤𑀼𑀲𑁆𑀲𑀬𑀼𑀕𑁂𑀲𑀼 𑀯𑀟𑁆𑀠𑀓𑀻𑀪𑀭𑀺𑀬𑀸𑀦𑀁 𑀦𑀺𑀯𑀸𑀲𑀦𑀲𑀸𑀝𑀓𑁂𑀲𑀼 𑀤𑀺𑀦𑁆𑀦𑁂𑀲𑀼 𑀲𑀤𑁆𑀥𑀺𑀁𑀓𑀻𑀴𑀺𑀢𑀸𑀦𑀁 𑀤𑀸𑀭𑀓𑀸𑀦𑀜𑁆𑀘 𑀤𑀸𑀭𑀓𑀧𑀭𑀺𑀳𑀸𑀭𑁂 𑀓𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀟𑁆𑀠𑀓𑀻 𑀘 𑀇𑀢𑁆𑀣𑀺𑀬𑁄 𑀘 𑀤𑀸𑀭𑀓𑁂 𑀘 𑀑𑀮𑁄𑀓𑁂𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺.

𑀭𑀸𑀚𑀸 ¶ 𑀢𑀁 𑀆𑀤𑀸𑀬 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀦𑀕𑀭𑀜𑁆𑀘 𑀳𑀢𑁆𑀣𑀺𑀲𑀸𑀮𑀜𑁆𑀘 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑁂𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀧𑀯𑁂𑀲𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀪𑀺𑀲𑁂𑀓𑀁 𑀤𑀢𑁆𑀯𑀸 𑀑𑀧𑀯𑀬𑁆𑀳𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀸𑀬𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀉𑀧𑀟𑁆𑀠𑀭𑀚𑁆𑀚𑀁 𑀳𑀢𑁆𑀣𑀺𑀲𑁆𑀲 ¶ 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀲𑀫𑀸𑀦𑀧𑀭𑀺𑀳𑀸𑀭𑀁 𑀅𑀓𑀸𑀲𑀺. 𑀳𑀢𑁆𑀣𑀺𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀳𑀢𑁆𑀣𑀕𑀢𑀫𑁂𑀯 𑀅𑀳𑁄𑀲𑀺. 𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀳𑀢𑁆𑀣𑀻 𑀧𑀦 𑀲𑀘𑁂 𑀭𑀜𑁆𑀜𑁄 𑀓𑀸𑀮𑀓𑀢𑀪𑀸𑀯𑀁 𑀚𑀸𑀦𑁂𑀬𑁆𑀬, 𑀢𑀢𑁆𑀣𑁂𑀯𑀲𑁆𑀲 𑀳𑀤𑀬𑀁 𑀨𑀮𑁂𑀬𑁆𑀬, 𑀢𑀲𑁆𑀫𑀸 𑀳𑀢𑁆𑀣𑀺𑀁 𑀭𑀜𑁆𑀜𑁄 𑀓𑀸𑀮𑀓𑀢𑀪𑀸𑀯𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀉𑀧𑀝𑁆𑀞𑀳𑀺𑀁𑀲𑀼. 𑀭𑀜𑁆𑀜𑁄 𑀧𑀦 𑀓𑀸𑀮𑀓𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀢𑀼𑀘𑁆𑀙𑀁 𑀓𑀺𑀭 𑀭𑀚𑁆𑀚’’𑀦𑁆𑀢𑀺 𑀅𑀦𑀦𑁆𑀢𑀭𑀲𑀸𑀫𑀦𑁆𑀢𑀓𑁄𑀲𑀮𑀭𑀸𑀚𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀆𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀭𑀺𑀯𑀸𑀭𑁂𑀲𑀺. 𑀦𑀕𑀭𑀯𑀸𑀲𑀺𑀦𑁄 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 ‘𑀇𑀢𑁄 𑀓𑀺𑀭 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀢𑀻’𑀢𑀺 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑀸 𑀆𑀳𑀁𑀲𑀼. 𑀲𑀘𑁂 𑀲𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀫𑀬𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀬𑀼𑀤𑁆𑀥𑀁 𑀤𑀲𑁆𑀲𑀸𑀫, 𑀦 𑀭𑀚𑁆𑀚𑀁, 𑀏𑀢𑁆𑀢𑀓𑀁 𑀓𑀸𑀮𑀁 𑀆𑀕𑀫𑁂𑀣𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀤𑁂𑀯𑀻 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦 𑀫𑀳𑀸𑀚𑀦𑀲𑁆𑀲 𑀅𑀮𑀻𑀦𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀚𑀸𑀢𑁄𑀢𑀺 ‘‘𑀅𑀮𑀻𑀦𑀘𑀺𑀢𑁆𑀢𑀓𑀼𑀫𑀸𑀭𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀚𑀸𑀢𑀤𑀺𑀯𑀲𑀢𑁄𑀬𑁂𑀯 𑀧𑀦𑀲𑁆𑀲 𑀧𑀝𑁆𑀞𑀸𑀬 𑀦𑀸𑀕𑀭𑀸 𑀓𑁄𑀲𑀮𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀁𑀲𑀼. 𑀦𑀺𑀦𑁆𑀦𑀸𑀬𑀓𑀢𑁆𑀢𑀸 𑀲𑀗𑁆𑀕𑀸𑀫𑀲𑁆𑀲 𑀫𑀳𑀦𑁆𑀢𑀫𑁆𑀧𑀺 𑀩𑀮𑀁 𑀬𑀼𑀚𑁆𑀛𑀫𑀸𑀦𑀁 𑀣𑁄𑀓𑀁 𑀣𑁄𑀓𑀁 𑀑𑀲𑀓𑁆𑀓𑀢𑀺. 𑀅𑀫𑀘𑁆𑀘𑀸 𑀤𑁂𑀯𑀺𑀬𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀫𑀬𑀁 ¶ 𑀏𑀯𑀁 𑀑𑀲𑀓𑁆𑀓𑀫𑀸𑀦𑁂 𑀩𑀮𑁂 𑀧𑀭𑀸𑀚𑀬𑀪𑀸𑀯𑀲𑁆𑀲 𑀪𑀸𑀬𑀸𑀫, 𑀅𑀫𑁆𑀳𑀸𑀓𑀁 𑀧𑀦 𑀭𑀜𑁆𑀜𑁄 𑀓𑀸𑀮𑀓𑀢𑀪𑀸𑀯𑀁, 𑀧𑀼𑀢𑁆𑀢𑀲𑁆𑀲 𑀚𑀸𑀢𑀪𑀸𑀯𑀁, 𑀓𑁄𑀲𑀮𑀭𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑀬𑀼𑀚𑁆𑀛𑀸𑀦𑀪𑀸𑀯𑀜𑁆𑀘 𑀭𑀜𑁆𑀜𑁄 𑀲𑀳𑀸𑀬𑀓𑁄 𑀫𑀗𑁆𑀕𑀮𑀳𑀢𑁆𑀣𑀻 𑀦 𑀚𑀸𑀦𑀸𑀢𑀺, 𑀚𑀸𑀦𑀸𑀧𑁂𑀫 𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑀸 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀳𑀢𑁆𑀣𑀺𑀲𑁆𑀲 𑀧𑀸𑀤𑀫𑀽𑀮𑁂 ¶ 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀲𑀸𑀫𑀺, 𑀲𑀳𑀸𑀬𑁄 𑀢𑁂 𑀓𑀸𑀮𑀓𑀢𑁄, 𑀫𑀬𑀁 𑀢𑀼𑀬𑁆𑀳𑀁 𑀳𑀤𑀬𑀨𑀸𑀮𑀦𑀪𑀬𑁂𑀦 𑀦𑀸𑀭𑁄𑀘𑀬𑀺𑀫𑁆𑀳, 𑀅𑀬𑀁 𑀢𑁂 𑀲𑀳𑀸𑀬𑀲𑁆𑀲 𑀧𑀼𑀢𑁆𑀢𑁄, 𑀓𑁄𑀲𑀮𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀦𑀕𑀭𑀁 ¶ 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀯 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀢𑀺, 𑀩𑀮𑀁 𑀑𑀲𑀓𑁆𑀓𑀢𑀺, 𑀢𑀯 𑀧𑀼𑀢𑁆𑀢𑀁 𑀢𑁆𑀯𑀜𑁆𑀜𑁂𑀯 𑀯𑀸 𑀫𑀸𑀭𑁂𑀳𑀺, 𑀭𑀚𑁆𑀚𑀁 𑀯𑀸𑀲𑁆𑀲 𑀕𑀡𑁆𑀳𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀳.

𑀢𑀲𑁆𑀫𑀺𑀁 𑀓𑀸𑀮𑁂 𑀳𑀢𑁆𑀣𑀻 𑀩𑁄𑀥𑀺𑀲𑀢𑁆𑀢𑀁 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀫𑁆𑀪𑁂 𑀞𑀧𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀑𑀢𑀸𑀭𑁂𑀢𑁆𑀯𑀸 𑀤𑁂𑀯𑀺𑀬𑀸 𑀳𑀢𑁆𑀣𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀓𑁄𑀲𑀮𑀭𑀸𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑀺𑀲𑀸𑀮𑀢𑁄 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀅𑀫𑀘𑁆𑀘𑀸 𑀯𑀫𑁆𑀫𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀁 𑀅𑀯𑀸𑀧𑀼𑀭𑀺𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀳𑀢𑁆𑀣𑀻 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀓𑀢𑁆𑀯𑀸 𑀫𑀳𑀸𑀚𑀦𑀁 𑀲𑀦𑁆𑀢𑀸𑀲𑁂𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 𑀩𑀮𑀓𑁄𑀝𑁆𑀞𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑁄𑀲𑀮𑀭𑀸𑀚𑀸𑀦𑀁 𑀘𑀽𑀴𑀸𑀬 𑀕𑀳𑁂𑀢𑁆𑀯𑀸 𑀆𑀦𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀸𑀭𑀡𑀢𑁆𑀣𑀸𑀬𑀲𑁆𑀲 𑀉𑀝𑁆𑀞𑀺𑀢𑁂 𑀯𑀸𑀭𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, ‘𑀓𑀼𑀫𑀸𑀭𑁄 𑀤𑀳𑀭𑁄’𑀢𑀺 𑀲𑀜𑁆𑀜𑀁 𑀫𑀸 𑀓𑀭𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀢𑁆𑀣𑀕𑀢𑀫𑁂𑀯 𑀚𑀸𑀢𑀁, 𑀅𑀜𑁆𑀜𑁄 𑀧𑀝𑀺𑀲𑀢𑁆𑀢𑀼 𑀦𑀸𑀫 𑀉𑀝𑁆𑀞𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀅𑀮𑀻𑀦𑀘𑀺𑀢𑁆𑀢𑀭𑀸𑀚𑀸 𑀦𑀸𑀫 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁧.

‘‘𑀅𑀮𑀻𑀦𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬, 𑀧𑀳𑀝𑁆𑀞𑀸 𑀫𑀳𑀢𑀻 𑀘𑀫𑀽;

𑀓𑁄𑀲𑀮𑀁 𑀲𑁂𑀦𑀸𑀲𑀦𑁆𑀢𑀼𑀝𑁆𑀞𑀁, 𑀚𑀻𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀺.

𑁧𑁨.

‘‘𑀏𑀯𑀁 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄;

𑀪𑀸𑀯𑀬𑀁 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺.

𑀢𑀢𑁆𑀣 ¶ 𑀅𑀮𑀻𑀦𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀮𑀻𑀦𑀘𑀺𑀢𑁆𑀢𑀁 𑀭𑀸𑀚𑀓𑀼𑀫𑀸𑀭𑀁 𑀦𑀺𑀲𑁆𑀲𑀸𑀬. 𑀧𑀳𑀝𑁆𑀞𑀸 𑀫𑀳𑀢𑀻 𑀘𑀫𑀽𑀢𑀺 ‘‘𑀧𑀯𑁂𑀡𑀻𑀭𑀚𑁆𑀚𑀁 𑀦𑁄 𑀤𑀺𑀝𑁆𑀞’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 𑀫𑀳𑀢𑀻 𑀲𑁂𑀦𑀸. 𑀓𑁄𑀲𑀮𑀁 𑀲𑁂𑀦𑀸𑀲𑀦𑁆𑀢𑀼𑀝𑁆𑀞𑀦𑁆𑀢𑀺 𑀓𑁄𑀲𑀮𑀭𑀸𑀚𑀸𑀦𑀁 ¶ 𑀲𑁂𑀦 𑀭𑀚𑁆𑀚𑁂𑀦 𑀅𑀲𑀦𑁆𑀢𑀼𑀝𑁆𑀞𑀁 𑀧𑀭𑀭𑀚𑁆𑀚𑀮𑁄𑀪𑁂𑀦 𑀆𑀕𑀢𑀁. 𑀚𑀻𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀻𑀢𑀺 𑀅𑀫𑀸𑀭𑁂𑀢𑁆𑀯𑀸𑀯 𑀲𑀸 𑀘𑀫𑀽 𑀢𑀁 𑀭𑀸𑀚𑀸𑀦𑀁 𑀳𑀢𑁆𑀣𑀺𑀦𑀸 𑀚𑀻𑀯𑀕𑁆𑀕𑀸𑀳𑀁 𑀕𑀡𑁆𑀳𑀸𑀧𑁂𑀲𑀺. 𑀏𑀯𑀁 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄𑀢𑀺 𑀬𑀣𑀸 𑀲𑀸 𑀘𑀫𑀽, 𑀏𑀯𑀁 𑀅𑀜𑁆𑀜𑁄𑀧𑀺 𑀓𑀼𑀮𑀧𑀼𑀢𑁆𑀢𑁄 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 ¶ 𑀩𑀼𑀤𑁆𑀥𑀁 𑀯𑀸 𑀩𑀼𑀤𑁆𑀥𑀲𑀸𑀯𑀓𑀁 𑀯𑀸 𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸. 𑀪𑀺𑀓𑁆𑀔𑀽𑀢𑀺 𑀧𑀭𑀺𑀲𑀼𑀤𑁆𑀥𑀸𑀥𑀺𑀯𑀘𑀦𑀫𑁂𑀢𑀁. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄 𑀘𑀢𑀼𑀤𑁄𑀲𑀸𑀧𑀕𑀢𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑀸𑀯𑀬𑀁 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀓𑀼𑀲𑀮𑀁 𑀦𑀺𑀭𑀯𑀚𑁆𑀚𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀪𑀸𑀯𑁂𑀦𑁆𑀢𑁄. 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀸𑀧𑀼𑀡𑀦𑀢𑁆𑀣𑀸𑀬 𑀢𑀁 𑀥𑀫𑁆𑀫𑀁 𑀪𑀸𑀯𑁂𑀦𑁆𑀢𑁄. 𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀪𑀸𑀯𑁂𑀦𑁆𑀢𑁄 𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀼𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀘 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀸𑀦𑀺 𑀘 𑀧𑀸𑀧𑀼𑀡𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑁂 𑀤𑀲𑀦𑁆𑀦𑀫𑁆𑀧𑀺 𑀲𑀁𑀬𑁄𑀚𑀦𑀸𑀦𑀁 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀬𑀲𑁆𑀫𑀸 𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀺 𑀔𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀫𑁂𑀯, 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀪𑀕𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀓𑀽𑀝𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀫𑀸𑀢𑀸 𑀫𑀳𑀸𑀫𑀸𑀬𑀸, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀅𑀳𑁄𑀲𑀺, 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀳𑀢𑁆𑀣𑀻 𑀅𑀬𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼, 𑀳𑀢𑁆𑀣𑀺𑀲𑁆𑀲 𑀧𑀺𑀢𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀸𑀫𑀦𑁆𑀢𑀓𑁄𑀲𑀮𑀭𑀸𑀚𑀸 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀅𑀮𑀻𑀦𑀘𑀺𑀢𑁆𑀢𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁫𑁭] 𑁭. 𑀕𑀼𑀡𑀚𑀸𑀢𑀓𑀯𑀡𑁆𑀡𑀦𑀸

𑀬𑁂𑀦 𑀓𑀸𑀫𑀁 𑀧𑀡𑀸𑀫𑁂𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀸𑀝𑀓𑀲𑀳𑀲𑁆𑀲𑀮𑀸𑀪𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀣𑁂𑀭𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀥𑀫𑁆𑀫𑀯𑀸𑀘𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀫𑀳𑀸𑀲𑀸𑀭𑀚𑀸𑀢𑀓𑁂 (𑀚𑀸. 𑁧.𑁧.𑁯𑁨) 𑀆𑀕𑀢𑀫𑁂𑀯. 𑀇𑀢𑀺 𑀣𑁂𑀭𑁂 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁂 𑀭𑀜𑁆𑀜𑁄 ¶ 𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀦𑀁 𑀲𑀸𑀝𑀓𑀸𑀦𑀁 𑀲𑀳𑀲𑁆𑀲𑀁 𑀆𑀳𑀭𑀺𑀬𑀺𑀢𑁆𑀣. 𑀭𑀸𑀚𑀸 𑀢𑀢𑁄 𑀧𑀜𑁆𑀘 𑀲𑀸𑀝𑀓𑀲𑀢𑀸𑀦𑀺 𑀧𑀜𑁆𑀘𑀦𑁆𑀦𑀁 𑀤𑁂𑀯𑀻𑀲𑀢𑀸𑀦𑀁 𑀅𑀤𑀸𑀲𑀺. 𑀢𑀸 𑀲𑀩𑁆𑀩𑀸𑀧𑀺 𑀢𑁂 𑀲𑀸𑀝𑀓𑁂 𑀞𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 𑀲𑀬𑀁 𑀧𑀼𑀭𑀸𑀡𑀲𑀸𑀝𑀓𑁂𑀬𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀭𑀜𑁆𑀜𑁄 𑀧𑀸𑀢𑀭𑀸𑀲𑀝𑁆𑀞𑀸𑀦𑀁 𑀅𑀕𑀫𑀁𑀲𑀼.

𑀭𑀸𑀚𑀸 ¶ ¶ ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀲𑀸𑀝𑀓𑀸 𑀤𑀸𑀧𑀺𑀢𑀸, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀢𑁂 𑀅𑀧𑀸𑀭𑀼𑀧𑀺𑀢𑁆𑀯𑀸𑀯 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀅𑀫𑁆𑀳𑁂𑀳𑀺 𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀸’’𑀢𑀺. ‘‘𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀩𑁆𑀩𑁂 𑀕𑀳𑀺𑀢𑀸’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀤𑀼𑀲𑁆𑀲𑀯𑀡𑀺𑀚𑁆𑀚𑀁 𑀫𑀜𑁆𑀜𑁂 𑀓𑀭𑀺𑀲𑁆𑀲𑀢𑀺, 𑀅𑀢𑀺𑀩𑀳𑀽 𑀢𑁂𑀦 𑀲𑀸𑀝𑀓𑀸 𑀕𑀳𑀺𑀢𑀸’’𑀢𑀺 𑀣𑁂𑀭𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀭𑀺𑀯𑁂𑀡𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀧𑀼𑀘𑁆𑀙𑀺 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀖𑀭𑁂 𑀇𑀢𑁆𑀣𑀺𑀬𑁄 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀦𑁆𑀢𑀺 𑀯𑀸 𑀲𑀼𑀡𑀦𑁆𑀢𑀺 𑀯𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀕𑀡𑁆𑀳𑀦𑁆𑀢𑀺, 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀼𑀡𑀦𑁆𑀢𑀻’’𑀢𑀺. ‘‘𑀓𑀺𑀁 𑀢𑀸 𑀲𑀼𑀡𑀦𑁆𑀢𑀺𑀬𑁂𑀯, 𑀉𑀤𑀸𑀳𑀼 𑀢𑀼𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀁 𑀯𑀸 𑀧𑀸𑀭𑀼𑀧𑀦𑀁 𑀯𑀸 𑀤𑀤𑀦𑁆𑀢𑀻’’𑀢𑀺? ‘‘𑀢𑀸 𑀅𑀚𑁆𑀚, 𑀫𑀳𑀸𑀭𑀸𑀚, 𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀦𑀺 𑀧𑀜𑁆𑀘 𑀲𑀸𑀝𑀓𑀲𑀢𑀸𑀦𑀺 𑀅𑀤𑀁𑀲𑀽’’𑀢𑀺. ‘‘𑀢𑀼𑀫𑁆𑀳𑁂𑀳𑀺 𑀕𑀳𑀺𑀢𑀸𑀦𑀺 𑀢𑀸𑀦𑀺, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀲𑀢𑁆𑀣𑀸𑀭𑀸 𑀢𑀺𑀘𑀻𑀯𑀭𑀫𑁂𑀯 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑀫𑁂𑀯 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀦𑀼𑀜𑁆𑀜𑀸𑀢𑀁, 𑀧𑀝𑀺𑀕𑁆𑀕𑀳𑀡𑀁 𑀧𑀦 𑀅𑀯𑀸𑀭𑀺𑀢𑀁, 𑀢𑀲𑁆𑀫𑀸 𑀫𑀬𑀸𑀧𑀺 𑀅𑀜𑁆𑀜𑁂𑀲𑀁 𑀚𑀺𑀡𑁆𑀡𑀘𑀻𑀯𑀭𑀺𑀓𑀸𑀦𑀁 𑀤𑀸𑀢𑀼𑀁 𑀢𑁂 𑀲𑀸𑀝𑀓𑀸 𑀧𑀝𑀺𑀕𑁆𑀕𑀳𑀺𑀢𑀸’’𑀢𑀺. ‘‘𑀢𑁂 𑀧𑀦 𑀪𑀺𑀓𑁆𑀔𑀽 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀲𑀸𑀝𑀓𑁂 𑀮𑀪𑀺𑀢𑁆𑀯𑀸 𑀧𑁄𑀭𑀸𑀡𑀘𑀻𑀯𑀭𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀧𑁄𑀭𑀸𑀡𑀲𑀗𑁆𑀖𑀸𑀝𑀺𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀧𑁄𑀭𑀸𑀡𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀅𑀦𑁆𑀢𑀭𑀯𑀸𑀲𑀓𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀧𑁄𑀭𑀸𑀡𑀅𑀦𑁆𑀢𑀭𑀯𑀸𑀲𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀧𑀘𑁆𑀘𑀢𑁆𑀣𑀭𑀡𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀧𑁄𑀭𑀸𑀡𑀧𑀘𑁆𑀘𑀢𑁆𑀣𑀭𑀡𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀪𑀼𑀫𑁆𑀫𑀢𑁆𑀣𑀭𑀡𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀧𑁄𑀭𑀸𑀡𑀪𑀼𑀫𑁆𑀫𑀢𑁆𑀣𑀭𑀡𑀁 ¶ 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀧𑀸𑀤𑀧𑀼𑀜𑁆𑀙𑀦𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀧𑁄𑀭𑀸𑀡𑀧𑀸𑀤𑀧𑀼𑀜𑁆𑀙𑀦𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀫𑀳𑀸𑀭𑀸𑀚, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀦𑀸𑀫 𑀯𑀺𑀦𑀺𑀧𑀸𑀢𑁂𑀢𑀼𑀁 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀧𑁄𑀭𑀸𑀡𑀧𑀸𑀤𑀧𑀼𑀜𑁆𑀙𑀦𑀁 𑀯𑀸𑀲𑀺𑀬𑀸 𑀓𑁄𑀝𑁆𑀝𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀫𑀓𑁆𑀔𑁂𑀢𑁆𑀯𑀸 𑀲𑁂𑀦𑀸𑀲𑀦𑁂𑀲𑀼 𑀫𑀢𑁆𑀢𑀺𑀓𑀸𑀮𑁂𑀧𑀦𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀺𑀦𑁆𑀦𑀁 𑀬𑀸𑀯 𑀧𑀸𑀤𑀧𑀼𑀜𑁆𑀙𑀦𑀸𑀧𑀺 𑀦𑀲𑁆𑀲𑀺𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀤𑀺𑀦𑁆𑀦𑀁 𑀦𑀲𑁆𑀲𑀺𑀢𑀼𑀁 𑀦 𑀮𑀩𑁆𑀪𑀢𑀺, 𑀧𑀭𑀺𑀪𑁄𑀕𑀫𑁂𑀯 𑀳𑁄𑀢𑀻’’𑀢𑀺.

𑀭𑀸𑀚𑀸 𑀢𑀼𑀝𑁆𑀞𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀇𑀢𑀭𑀸𑀦𑀺𑀧𑀺 𑀕𑁂𑀳𑁂 𑀞𑀧𑀺𑀢𑀸𑀦𑀺 𑀧𑀜𑁆𑀘 𑀲𑀸𑀝𑀓𑀲𑀢𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀣𑁂𑀭𑁄 𑀧𑀞𑀫𑀮𑀤𑁆𑀥𑀸𑀦𑀺 𑀧𑀜𑁆𑀘 𑀲𑀸𑀝𑀓𑀲𑀢𑀸𑀦𑀺 𑀚𑀺𑀡𑁆𑀡𑀘𑀻𑀯𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀤𑀸𑀲𑀺. 𑀣𑁂𑀭𑀲𑁆𑀲 𑀧𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑀢𑀸𑀦𑀺 ¶ , 𑀢𑁂𑀲𑀼 𑀏𑀓𑁄 𑀤𑀳𑀭𑀪𑀺𑀓𑁆𑀔𑀼 𑀣𑁂𑀭𑀲𑁆𑀲 𑀩𑀳𑀽𑀧𑀓𑀸𑀭𑁄 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺, 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀫𑀼𑀔𑁄𑀤𑀓𑀁 𑀦𑁆𑀳𑀸𑀦𑁄𑀤𑀓𑀁 𑀤𑁂𑀢𑀺, 𑀯𑀘𑁆𑀘𑀓𑀼𑀝𑀺𑀚𑀦𑁆𑀢𑀸𑀖𑀭𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀚𑀕𑁆𑀕𑀢𑀺, 𑀳𑀢𑁆𑀣𑀧𑀭𑀺𑀓𑀫𑁆𑀫𑀧𑀸𑀤𑀧𑀭𑀺𑀓𑀫𑁆𑀫𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀢𑀺. 𑀣𑁂𑀭𑁄 𑀧𑀘𑁆𑀙𑀸 𑀮𑀤𑁆𑀥𑀸𑀦𑀺 𑀧𑀜𑁆𑀘 𑀲𑀸𑀝𑀓𑀲𑀢𑀸𑀦𑀺 ‘‘𑀅𑀬𑀁 𑀫𑁂 𑀩𑀳𑀽𑀧𑀓𑀸𑀭𑁄’’𑀢𑀺 𑀬𑀼𑀢𑁆𑀢𑀯𑀲𑁂𑀦 𑀲𑀩𑁆𑀩𑀸𑀦𑀺 𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀲𑁄𑀧𑀺 𑀲𑀩𑁆𑀩𑁂 𑀢𑁂 𑀲𑀸𑀝𑀓𑁂 𑀪𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑀸𑀦𑀼𑀧𑀚𑁆𑀛𑀸𑀬𑀸𑀦𑀁 𑀅𑀤𑀸𑀲𑀺.

𑀏𑀯𑀁 ¶ 𑀲𑀩𑁆𑀩𑁂𑀧𑀺 𑀢𑁂 𑀮𑀤𑁆𑀥𑀲𑀸𑀝𑀓𑀸 𑀪𑀺𑀓𑁆𑀔𑀽 𑀲𑀸𑀝𑀓𑁂 𑀙𑀺𑀦𑁆𑀤𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀸𑀦𑀺 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀫𑀼𑀔𑁄𑀮𑁄𑀓𑀦𑀤𑀸𑀦𑀁 𑀦𑀸𑀫 𑀅𑀢𑁆𑀣𑀻’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀸𑀦𑀁 𑀫𑀼𑀔𑁄𑀮𑁄𑀓𑀦𑀤𑀸𑀦𑀁 𑀦𑀸𑀫 𑀅𑀢𑁆𑀣𑀻’’𑀢𑀺. ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀣𑁂𑀭𑁂𑀦 𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀦𑀁 𑀲𑀸𑀝𑀓𑀸𑀦𑀁 𑀧𑀜𑁆𑀘 𑀲𑀢𑀸𑀦𑀺 𑀏𑀓𑀲𑁆𑀲𑁂𑀯 𑀤𑀳𑀭𑀪𑀺𑀓𑁆𑀔𑀼𑀦𑁄 𑀤𑀺𑀦𑁆𑀦𑀸𑀦𑀺, 𑀲𑁄 𑀧𑀦 𑀅𑀢𑁆𑀢𑀦𑀸 𑀮𑀤𑁆𑀥𑁂 𑀪𑀸𑀚𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀅𑀤𑀸𑀲𑀻’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄 𑀫𑀼𑀔𑁄𑀮𑁄𑀓𑀦𑀪𑀺𑀓𑁆𑀔𑀁 𑀤𑁂𑀢𑀺 ¶ , 𑀲𑁄 𑀧𑀦𑀲𑁆𑀲 𑀪𑀺𑀓𑁆𑀔𑀼 𑀩𑀳𑀽𑀧𑀓𑀸𑀭𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀧𑀓𑀸𑀭𑀲𑁆𑀲 𑀉𑀧𑀓𑀸𑀭𑀯𑀲𑁂𑀦 𑀕𑀼𑀡𑀯𑀲𑁂𑀦 𑀬𑀼𑀢𑁆𑀢𑀯𑀲𑁂𑀦 ‘𑀉𑀧𑀓𑀸𑀭𑀲𑁆𑀲 𑀦𑀸𑀫 𑀧𑀘𑁆𑀘𑀼𑀧𑀓𑀸𑀭𑁄 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀓𑀢𑀜𑁆𑀜𑀼𑀓𑀢𑀯𑁂𑀤𑀺𑀪𑀸𑀯𑁂𑀦 𑀅𑀤𑀸𑀲𑀺. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀳𑀺 𑀅𑀢𑁆𑀢𑀦𑁄 𑀉𑀧𑀓𑀸𑀭𑀸𑀦𑀜𑁆𑀜𑁂𑀯 𑀧𑀘𑁆𑀘𑀼𑀧𑀓𑀸𑀭𑀁 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑀼𑀢𑁆𑀯𑀸 𑀧𑀩𑁆𑀩𑀢𑀕𑀼𑀳𑀸𑀬𑀁 𑀯𑀲𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀕𑀼𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀑𑀮𑁄𑀓𑁂𑀲𑀺, 𑀢𑀁 𑀧𑀦 𑀧𑀩𑁆𑀩𑀢𑀧𑀸𑀤𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀭𑁄 𑀅𑀳𑁄𑀲𑀺. 𑀢𑀲𑁆𑀲 𑀏𑀓𑀲𑁆𑀫𑀺𑀁 𑀉𑀦𑁆𑀦𑀢𑀝𑁆𑀞𑀸𑀦𑁂 𑀉𑀧𑀭𑀺𑀣𑀤𑁆𑀥𑀓𑀤𑁆𑀤𑀫𑀧𑀺𑀝𑁆𑀞𑁂 𑀫𑀼𑀤𑀽𑀦𑀺 𑀳𑀭𑀺𑀢𑀢𑀺𑀡𑀸𑀦𑀺 𑀚𑀸𑀬𑀺𑀁𑀲𑀼. 𑀲𑀲𑀓𑀸 𑀘𑁂𑀯 𑀳𑀭𑀺𑀡𑀸𑀤𑀬𑁄 𑀘 𑀲𑀮𑁆𑀮𑀳𑀼𑀓𑀫𑀺𑀕𑀸 𑀓𑀤𑁆𑀤𑀫𑀫𑀢𑁆𑀣𑀓𑁂 𑀯𑀺𑀘𑀭𑀦𑁆𑀢𑀸 𑀢𑀸𑀦𑀺 𑀔𑀸𑀤𑀦𑁆𑀢𑀺. 𑀢𑀁 𑀤𑀺𑀯𑀲𑀫𑁆𑀧𑀺 𑀏𑀓𑁄 𑀫𑀺𑀕𑁄 𑀢𑀸𑀦𑀺 𑀔𑀸𑀤𑀦𑁆𑀢𑁄 𑀯𑀺𑀘𑀭𑀢𑀺. 𑀲𑀻𑀳𑁄 ‘‘𑀢𑀁 𑀫𑀺𑀕𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀻𑀳𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺, 𑀫𑀺𑀕𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀯𑀺𑀭𑀯𑀦𑁆𑀢𑁄 𑀧𑀮𑀸𑀬𑀺. 𑀲𑀻𑀳𑁄 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀢𑀺𑀢𑁆𑀯𑀸 ¶ 𑀑𑀲𑀻𑀤𑀺𑀢𑁆𑀯𑀸 𑀉𑀕𑁆𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀣𑀫𑁆𑀪𑀸 𑀯𑀺𑀬 𑀑𑀲𑀻𑀤𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀕𑁄𑀘𑀭𑀧𑁆𑀧𑀲𑀼𑀢𑁄 𑀢𑀁 𑀤𑀺𑀲𑁆𑀯𑀸 𑀪𑀬𑁂𑀦 𑀧𑀮𑀸𑀬𑀺. 𑀲𑀻𑀳𑁄 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀪𑁄 𑀲𑀺𑀗𑁆𑀕𑀸𑀮, 𑀫𑀸 𑀧𑀮𑀸𑀬𑀺, 𑀅𑀳𑀁 𑀓𑀮𑀮𑁂 𑀮𑀕𑁆𑀕𑁄, 𑀚𑀻𑀯𑀺𑀢𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀲𑀺𑀗𑁆𑀕𑀸𑀮𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀢𑀁 𑀉𑀤𑁆𑀥𑀭𑁂𑀬𑁆𑀬𑀁, 𑀉𑀤𑁆𑀥𑀝𑁄 𑀧𑀦 𑀫𑀁 𑀔𑀸𑀤𑁂𑀬𑁆𑀬𑀸𑀲𑀻𑀢𑀺 𑀪𑀸𑀬𑀸𑀫𑀻’’𑀢𑀺 𑀆𑀳. ‘‘𑀫𑀸 𑀪𑀸𑀬𑀺, 𑀦𑀸𑀳𑀁 𑀢𑀁 𑀔𑀸𑀤𑀺𑀲𑁆𑀲𑀸𑀫𑀺, 𑀫𑀳𑀦𑁆𑀢𑀁 𑀧𑀦 𑀢𑁂 𑀕𑀼𑀡𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀓𑁂𑀦𑀼𑀧𑀸𑀬𑁂𑀦 𑀫𑀁 𑀉𑀤𑁆𑀥𑀭𑀸𑀳𑀻’’𑀢𑀺. 𑀲𑀺𑀗𑁆𑀕𑀸𑀮𑁄 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀲𑀫𑀦𑁆𑀢𑀸 𑀓𑀮𑀮𑁂 𑀅𑀧𑀦𑁂𑀢𑁆𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀧𑀸𑀤𑀸𑀦𑀁 𑀘𑀢𑀲𑁆𑀲𑁄 𑀫𑀸𑀢𑀺𑀓𑀸 𑀔𑀡𑀺𑀢𑁆𑀯𑀸 ¶ 𑀉𑀤𑀓𑀸𑀪𑀺𑀫𑀼𑀔𑀁 𑀅𑀓𑀸𑀲𑀺, 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀓𑀮𑀮𑀁 𑀫𑀼𑀤𑀼𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀺𑀗𑁆𑀕𑀸𑀮𑁄 𑀲𑀻𑀳𑀲𑁆𑀲 𑀉𑀤𑀭𑀦𑁆𑀢𑀭𑀁 𑀅𑀢𑁆𑀢𑀦𑁄 𑀲𑀻𑀲𑀁 𑀧𑀯𑁂𑀲𑁂𑀢𑁆𑀯𑀸 ‘‘𑀯𑀸𑀬𑀸𑀫𑀁 𑀓𑀭𑁄𑀳𑀺, 𑀲𑀸𑀫𑀻’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀲𑀻𑀲𑁂𑀦 𑀉𑀤𑀭𑀁 𑀧𑀳𑀭𑀺. 𑀲𑀻𑀳𑁄 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀓𑀮𑀮𑀸 𑀉𑀕𑁆𑀕𑀦𑁆𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀣𑀮𑁂 𑀅𑀝𑁆𑀞𑀸𑀲𑀺. 𑀲𑁄 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀲𑀭𑀁 𑀑𑀭𑀼𑀬𑁆𑀳 𑀓𑀤𑁆𑀤𑀫𑀁 𑀥𑁄𑀯𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀤𑀭𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀏𑀓𑀁 𑀫𑀳𑀺𑀁𑀲𑀁 𑀯𑀥𑀺𑀢𑁆𑀯𑀸 𑀤𑀸𑀞𑀸𑀳𑀺 𑀑𑀯𑀺𑀚𑁆𑀛𑀺𑀢𑁆𑀯𑀸 𑀫𑀁𑀲𑀁 ¶ 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀔𑀸𑀤, 𑀲𑀫𑁆𑀫𑀸’’𑀢𑀺 𑀲𑀺𑀗𑁆𑀕𑀸𑀮𑀲𑁆𑀲 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀢𑁂𑀦 𑀔𑀸𑀤𑀺𑀢𑁂 𑀧𑀘𑁆𑀙𑀸 𑀅𑀢𑁆𑀢𑀦𑀸 𑀔𑀸𑀤𑀺. 𑀧𑀼𑀦 𑀲𑀺𑀗𑁆𑀕𑀸𑀮𑁄 𑀏𑀓𑀁 𑀫𑀁𑀲𑀧𑁂𑀲𑀺𑀁 𑀟𑀁𑀲𑀺𑀢𑁆𑀯𑀸 𑀕𑀡𑁆𑀳𑀺. ‘‘𑀇𑀤𑀁 𑀓𑀺𑀫𑀢𑁆𑀣𑀸𑀬, 𑀲𑀫𑁆𑀫𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀢𑀼𑀫𑁆𑀳𑀸𑀓𑀁 𑀤𑀸𑀲𑀻 𑀅𑀢𑁆𑀣𑀺, 𑀢𑀲𑁆𑀲𑀸 𑀪𑀸𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑀻𑀳𑁄 ‘‘𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀲𑀬𑀫𑁆𑀧𑀺 𑀲𑀻𑀳𑀺𑀬𑀸 𑀅𑀢𑁆𑀣𑀸𑀬 𑀫𑀁𑀲𑀁 𑀕𑀡𑁆𑀳𑀺𑀢𑁆𑀯𑀸 ‘‘𑀏𑀳𑀺, 𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀲𑀔𑀺𑀬𑀸 𑀯𑀲𑀦𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀁𑀲𑀁 𑀔𑀸𑀤𑀸𑀧𑁂𑀢𑁆𑀯𑀸 𑀲𑀺𑀗𑁆𑀕𑀸𑀮𑀜𑁆𑀘 𑀲𑀺𑀗𑁆𑀕𑀸𑀮𑀺𑀜𑁆𑀘 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀤𑀸𑀦𑀺 𑀅𑀳𑀁 𑀢𑀼𑀫𑁆𑀳𑁂 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀕𑀼𑀳𑀸𑀬 𑀤𑁆𑀯𑀸𑀭𑁂 𑀅𑀜𑁆𑀜𑀺𑀲𑁆𑀲𑀸 𑀕𑀼𑀳𑀸𑀬 𑀯𑀲𑀸𑀧𑁂𑀲𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀕𑁄𑀘𑀭𑀸𑀬 𑀕𑀘𑁆𑀙𑀦𑁆𑀢𑀸 𑀲𑀻𑀳𑀺𑀜𑁆𑀘 𑀲𑀺𑀗𑁆𑀕𑀸𑀮𑀺𑀜𑁆𑀘 𑀞𑀧𑁂𑀢𑁆𑀯𑀸 𑀲𑀺𑀗𑁆𑀕𑀸𑀮𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀦𑀸𑀦𑀸𑀫𑀺𑀕𑁂 𑀯𑀥𑀺𑀢𑁆𑀯𑀸 𑀉𑀪𑁄𑀧𑀺 𑀢𑀢𑁆𑀣𑁂𑀯 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀇𑀢𑀭𑀸𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺.

𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀲𑀻𑀳𑀻 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺, 𑀲𑀺𑀗𑁆𑀕𑀸𑀮𑀻𑀧𑀺 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀲𑀻𑀳𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀲𑀻𑀳𑁄 𑀲𑀺𑀗𑁆𑀕𑀸𑀮𑀜𑁆𑀘 𑀲𑀺𑀗𑁆𑀕𑀸𑀮𑀺𑀜𑁆𑀘 𑀲𑀺𑀗𑁆𑀕𑀸𑀮𑀧𑁄𑀢𑀓𑁂 𑀘 𑀅𑀢𑀺𑀯𑀺𑀬 𑀧𑀺𑀬𑀸𑀬𑀢𑀺, 𑀦𑀽𑀦𑀫𑀲𑁆𑀲 𑀲𑀺𑀗𑁆𑀕𑀸𑀮𑀺𑀬𑀸 𑀲𑀤𑁆𑀥𑀺𑀁 𑀲𑀦𑁆𑀣𑀯𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀁 𑀲𑀺𑀦𑁂𑀳𑀁 𑀓𑀭𑁄𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀧𑀻𑀴𑁂𑀢𑁆𑀯𑀸 𑀢𑀚𑁆𑀚𑁂𑀢𑁆𑀯𑀸 𑀇𑀢𑁄 𑀧𑀮𑀸𑀧𑁂𑀬𑁆𑀬’’𑀦𑁆𑀢𑀺 ¶ . 𑀲𑀸 𑀲𑀻𑀳𑀲𑁆𑀲 𑀲𑀺𑀗𑁆𑀕𑀸𑀮𑀁 𑀕𑀳𑁂𑀢𑁆𑀯𑀸 𑀕𑁄𑀘𑀭𑀸𑀬 𑀕𑀢𑀓𑀸𑀮𑁂 𑀲𑀺𑀗𑁆𑀕𑀸𑀮𑀺𑀁 𑀧𑀻𑀴𑁂𑀲𑀺 𑀢𑀚𑁆𑀚𑁂𑀲𑀺 ‘‘𑀓𑀺𑀁𑀓𑀸𑀭𑀡𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀢𑀺 ¶ , 𑀦 𑀧𑀮𑀸𑀬𑀲𑀻’’𑀢𑀺? 𑀧𑀼𑀢𑁆𑀢𑀸𑀧𑀺𑀲𑁆𑀲𑀸 𑀲𑀺𑀗𑁆𑀕𑀸𑀮𑀺𑀧𑀼𑀢𑁆𑀢𑁂 𑀢𑀣𑁂𑀯 𑀢𑀚𑁆𑀚𑀬𑀺𑀁𑀲𑀼. 𑀲𑀺𑀗𑁆𑀕𑀸𑀮𑀻 𑀢𑀫𑀢𑁆𑀣𑀁 𑀲𑀺𑀗𑁆𑀕𑀸𑀮𑀲𑁆𑀲 𑀓𑀣𑁂𑀢𑁆𑀯𑀸 ‘‘𑀲𑀻𑀳𑀲𑁆𑀲 𑀯𑀘𑀦𑁂𑀦 𑀏𑀢𑀸𑀬 𑀏𑀯𑀁 𑀓𑀢𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀫, 𑀘𑀺𑀭𑀁 𑀯𑀲𑀺𑀫𑁆𑀳𑀸, 𑀦𑀸𑀲𑀸𑀧𑁂𑀬𑁆𑀬𑀸𑀧𑀺 𑀦𑁄, 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀲𑀺𑀗𑁆𑀕𑀸𑀮𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀻𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀲𑀸𑀫𑀺, 𑀘𑀺𑀭𑀁 𑀅𑀫𑁆𑀳𑁂𑀳𑀺 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀦𑀺𑀯𑀼𑀢𑁆𑀣𑀁, 𑀅𑀢𑀺𑀘𑀺𑀭𑀁 𑀯𑀲𑀦𑁆𑀢𑀸 𑀦𑀸𑀫 𑀅𑀧𑁆𑀧𑀺𑀬𑀸 𑀳𑁄𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑀓𑀸𑀮𑁂 𑀲𑀻𑀳𑀻 𑀲𑀺𑀗𑁆𑀕𑀸𑀮𑀺𑀁 𑀯𑀺𑀳𑁂𑀞𑁂𑀢𑀺 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀲𑁆𑀫𑀸 𑀯𑀲𑀣, 𑀧𑀮𑀸𑀬𑀣𑀸’𑀢𑀺 𑀢𑀚𑁆𑀚𑁂𑀢𑀺, 𑀲𑀻𑀳𑀧𑁄𑀢𑀓𑀸𑀧𑀺 𑀲𑀺𑀗𑁆𑀕𑀸𑀮𑀧𑁄𑀢𑀓𑁂 𑀢𑀚𑁆𑀚𑁂𑀦𑁆𑀢𑀺. 𑀬𑁄 𑀦𑀸𑀫 𑀬𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀸𑀲𑀁 𑀦 𑀭𑁄𑀘𑁂𑀢𑀺, 𑀢𑁂𑀦 𑀲𑁄 ‘𑀬𑀸𑀳𑀻’𑀢𑀺 𑀦𑀻𑀳𑀭𑀺𑀢𑀩𑁆𑀩𑁄𑀯, 𑀯𑀺𑀳𑁂𑀞𑀦𑀁 𑀦𑀸𑀫 𑀓𑀺𑀫𑀢𑁆𑀣𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩.

‘‘𑀬𑁂𑀦 𑀓𑀸𑀫𑀁 𑀧𑀡𑀸𑀫𑁂𑀢𑀺, 𑀥𑀫𑁆𑀫𑁄 𑀩𑀮𑀯𑀢𑀁 𑀫𑀺𑀕𑀻;

𑀉𑀦𑁆𑀦𑀤𑀦𑁆𑀢𑀻 𑀯𑀺𑀚𑀸𑀦𑀸𑀳𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬’’𑀦𑁆𑀢𑀺.

𑀢𑀢𑁆𑀣 𑀬𑁂𑀦 𑀓𑀸𑀫𑀁 𑀧𑀡𑀸𑀫𑁂𑀢𑀺, 𑀥𑀫𑁆𑀫𑁄 𑀩𑀮𑀯𑀢𑀦𑁆𑀢𑀺 𑀩𑀮𑀯𑀸 𑀦𑀸𑀫 𑀇𑀲𑁆𑀲𑀭𑁄 𑀅𑀢𑁆𑀢𑀦𑁄 𑀲𑁂𑀯𑀓𑀁 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀇𑀘𑁆𑀙𑀢𑀺, 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀲𑁄 𑀧𑀡𑀸𑀫𑁂𑀢𑀺 𑀦𑀻𑀳𑀭𑀢𑀺. 𑀏𑀲 𑀥𑀫𑁆𑀫𑁄 𑀩𑀮𑀯𑀢𑀁 𑀅𑀬𑀁 𑀇𑀲𑁆𑀲𑀭𑀸𑀦𑀁 𑀲𑀪𑀸𑀯𑁄 𑀧𑀯𑁂𑀡𑀺𑀥𑀫𑁆𑀫𑁄𑀯, 𑀢𑀲𑁆𑀫𑀸 𑀲𑀘𑁂 𑀅𑀫𑁆𑀳𑀸𑀓𑀁 𑀯𑀸𑀲𑀁 𑀦 𑀭𑁄𑀘𑁂𑀣, 𑀉𑀚𑀼𑀓𑀫𑁂𑀯 𑀦𑁄 𑀦𑀻𑀳𑀭𑀣 ¶ , 𑀯𑀺𑀳𑁂𑀞𑀦𑁂𑀦 𑀓𑁄 𑀅𑀢𑁆𑀣𑁄𑀢𑀺 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀫𑀺𑀕𑀻𑀢𑀺 𑀲𑀻𑀳𑀁 𑀆𑀮𑀧𑀢𑀺. 𑀲𑁄 𑀳𑀺 𑀫𑀺𑀕𑀭𑀸𑀚𑀢𑀸𑀬 𑀫𑀺𑀕𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀺𑀕𑀻. 𑀉𑀦𑁆𑀦𑀤𑀦𑁆𑀢𑀻𑀢𑀺𑀧𑀺 𑀢𑀫𑁂𑀯 𑀆𑀮𑀧𑀢𑀺. 𑀲𑁄 𑀳𑀺 𑀉𑀦𑁆𑀦𑀢𑀸𑀦𑀁 𑀤𑀦𑁆𑀢𑀸𑀦𑀁 𑀅𑀢𑁆𑀣𑀺𑀢𑀸𑀬 𑀉𑀦𑁆𑀦𑀢𑀸 𑀤𑀦𑁆𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀉𑀦𑁆𑀦𑀤𑀦𑁆𑀢𑀻. ‘‘𑀉𑀦𑁆𑀦𑀢𑀤𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄𑀬𑁂𑀯. 𑀯𑀺𑀚𑀸𑀦𑀸𑀳𑀻𑀢𑀺 ‘‘𑀏𑀲 𑀇𑀲𑁆𑀲𑀭𑀸𑀦𑀁 𑀥𑀫𑁆𑀫𑁄’’𑀢𑀺 𑀏𑀯𑀁 𑀚𑀸𑀦𑀸𑀳𑀺. 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀦𑁆𑀢𑀺 𑀅𑀫𑁆𑀳𑀸𑀓𑀁 𑀢𑀼𑀫𑁆𑀳𑁂 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀲𑀭𑀡𑀁, 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀲𑀦𑁆𑀢𑀺𑀓𑀸 𑀪𑀬𑀁 𑀚𑀸𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀫𑀺𑀲𑁆𑀲𑀸𑀫𑀸𑀢𑀺 𑀤𑀻𑀧𑁂𑀢𑀺.

𑀅𑀧𑀭𑁄 𑀦𑀬𑁄 𑁋 𑀢𑀯 𑀫𑀺𑀕𑀻 𑀲𑀻𑀳𑀻 𑀉𑀦𑁆𑀦𑀤𑀦𑁆𑀢𑀻𑀫𑀫 𑀧𑀼𑀢𑁆𑀢𑀤𑀸𑀭𑀁 𑀢𑀚𑁆𑀚𑁂𑀦𑁆𑀢𑀻 𑀬𑁂𑀦 𑀓𑀸𑀫𑀁 𑀧𑀡𑀸𑀫𑁂𑀢𑀺, 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦 𑀇𑀘𑁆𑀙𑀢𑀺, 𑀢𑁂𑀦 𑀧𑀡𑀸𑀫𑁂𑀢𑀺 𑀧𑀯𑀢𑁆𑀢𑀢𑀺, 𑀯𑀺𑀳𑁂𑀞𑁂𑀢𑀺𑀧𑀺 ¶ 𑀧𑀮𑀸𑀧𑁂𑀢𑀺𑀧𑀺, 𑀏𑀯𑀁 𑀢𑁆𑀯𑀁 𑀯𑀺𑀚𑀸𑀦𑀸𑀳𑀺, 𑀢𑀢𑁆𑀣 𑀓𑀺𑀁 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀓𑀸𑀢𑀼𑀁. 𑀥𑀫𑁆𑀫𑁄 𑀩𑀮𑀯𑀢𑀁 𑀏𑀲 𑀩𑀮𑀯𑀦𑁆𑀢𑀸𑀦𑀁 𑀲𑀪𑀸𑀯𑁄, 𑀇𑀤𑀸𑀦𑀺 𑀫𑀬𑀁 𑀕𑀫𑀺𑀲𑁆𑀲𑀸𑀫. 𑀓𑀲𑁆𑀫𑀸? 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀦𑁆𑀢𑀺.

𑀢𑀲𑁆𑀲 ¶ 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀻𑀳𑁄 𑀲𑀻𑀳𑀺𑀁 𑀆𑀳 𑁋 ‘‘𑀪𑀤𑁆𑀤𑁂, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀫𑀫 𑀕𑁄𑀘𑀭𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀇𑀫𑀺𑀦𑀸 𑀲𑀺𑀗𑁆𑀕𑀸𑀮𑁂𑀦 𑀇𑀫𑀸𑀬 𑀘 𑀲𑀺𑀗𑁆𑀕𑀸𑀮𑀺𑀬𑀸 𑀲𑀤𑁆𑀥𑀺𑀁 𑀆𑀕𑀢𑀪𑀸𑀯𑀁 𑀲𑀭𑀲𑀻’’𑀢𑀺. ‘‘𑀆𑀫, 𑀲𑀭𑀸𑀫𑀻’’𑀢𑀺. ‘‘𑀚𑀸𑀦𑀸𑀲𑀺 𑀧𑀦 𑀫𑀬𑁆𑀳𑀁 𑀲𑀢𑁆𑀢𑀸𑀳𑀁 𑀅𑀦𑀸𑀕𑀫𑀦𑀲𑁆𑀲 𑀓𑀸𑀭𑀡’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀲𑀸𑀫𑀻’’𑀢𑀺. ‘‘𑀪𑀤𑁆𑀤𑁂, 𑀅𑀳𑀁 ‘𑀏𑀓𑀁 𑀫𑀺𑀕𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀮𑀮𑁂 𑀮𑀕𑁆𑀕𑁄, 𑀢𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀅𑀝𑁆𑀞𑀸𑀲𑀺𑀁, 𑀲𑁆𑀯𑀸𑀳𑀁 𑀇𑀫𑀁 𑀲𑀺𑀗𑁆𑀕𑀸𑀮𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀁, 𑀅𑀬𑀁 𑀫𑁂 𑀚𑀻𑀯𑀺𑀢𑀤𑀸𑀬𑀓𑁄 𑀲𑀳𑀸𑀬𑁄. 𑀫𑀺𑀢𑁆𑀢𑀥𑀫𑁆𑀫𑁂 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀳𑀺 𑀫𑀺𑀢𑁆𑀢𑁄 𑀤𑀼𑀩𑁆𑀩𑀮𑁄 𑀦𑀸𑀫 𑀦𑀢𑁆𑀣𑀺, 𑀇𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀘 𑀲𑀳𑀸𑀬𑀺𑀓𑀸𑀬 𑀘 𑀧𑀼𑀢𑁆𑀢𑀓𑀸𑀦𑀜𑁆𑀘 𑀏𑀯𑀭𑀽𑀧𑀁 𑀅𑀯𑀫𑀸𑀦𑀁 𑀫𑀸 𑀅𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀲𑀻𑀳𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪.

‘‘𑀅𑀧𑀺 𑀘𑁂𑀧𑀺 𑀤𑀼𑀩𑁆𑀩𑀮𑁄 𑀫𑀺𑀢𑁆𑀢𑁄, 𑀫𑀺𑀢𑁆𑀢𑀥𑀫𑁆𑀫𑁂𑀲𑀼 𑀢𑀺𑀝𑁆𑀞𑀢𑀺;

𑀲𑁄 𑀜𑀸𑀢𑀓𑁄 𑀘 𑀩𑀦𑁆𑀥𑀼 𑀘, 𑀲𑁄 𑀫𑀺𑀢𑁆𑀢𑁄 𑀲𑁄 𑀘 𑀫𑁂 𑀲𑀔𑀸;

𑀤𑀸𑀞𑀺𑀦𑀺 𑀫𑀸𑀢𑀺𑀫𑀜𑁆𑀜𑀺𑀢𑁆𑀣𑁄, 𑀲𑀺𑀗𑁆𑀕𑀸𑀮𑁄 𑀫𑀫 𑀧𑀸𑀡𑀤𑁄’’𑀢𑀺.

𑀢𑀢𑁆𑀣 𑀅𑀧𑀺 𑀘𑁂𑀧𑀻𑀢𑀺 𑀏𑀓𑁄 𑀅𑀧𑀺𑀲𑀤𑁆𑀤𑁄 𑀅𑀦𑀼𑀕𑁆𑀕𑀳𑀢𑁆𑀣𑁄, 𑀏𑀓𑁄 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀤𑀼𑀩𑁆𑀩𑀮𑁄𑀧𑀺 𑀘𑁂 𑀫𑀺𑀢𑁆𑀢𑁄 𑀫𑀺𑀢𑁆𑀢𑀥𑀫𑁆𑀫𑁂𑀲𑀼 𑀅𑀧𑀺 𑀢𑀺𑀝𑁆𑀞𑀢𑀺, 𑀲𑀘𑁂 𑀞𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀜𑀸𑀢𑀓𑁄 𑀘 𑀩𑀦𑁆𑀥𑀼 𑀘, 𑀲𑁄 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬 𑀫𑀺𑀢𑁆𑀢𑁄, 𑀲𑁄 𑀘 𑀫𑁂 𑀲𑀳𑀸𑀬𑀝𑁆𑀞𑁂𑀦 𑀲𑀔𑀸. 𑀤𑀸𑀞𑀺𑀦𑀺 𑀫𑀸𑀢𑀺𑀫𑀜𑁆𑀜𑀺𑀢𑁆𑀣𑁄𑀢𑀺, 𑀪𑀤𑁆𑀤𑁂, 𑀤𑀸𑀞𑀸𑀲𑀫𑁆𑀧𑀦𑁆𑀦𑁂 𑀲𑀻𑀳𑀺 𑀫𑀸 𑀫𑀬𑁆𑀳𑀁 𑀲𑀳𑀸𑀬𑀁 𑀯𑀸 𑀲𑀳𑀸𑀬𑀺𑀁 𑀯𑀸 𑀅𑀢𑀺𑀫𑀜𑁆𑀜𑀺, 𑀅𑀬𑀜𑁆𑀳𑀺 𑀲𑀺𑀗𑁆𑀕𑀸𑀮𑁄 𑀫𑀫 𑀧𑀸𑀡𑀤𑁄𑀢𑀺.

𑀲𑀸 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑀺𑀁 𑀔𑀫𑀸𑀧𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀧𑀼𑀢𑁆𑀢𑀸𑀬 𑀢𑀸𑀬 𑀲𑀤𑁆𑀥𑀺𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺. 𑀲𑀻𑀳𑀧𑁄𑀢𑀓𑀸𑀧𑀺 𑀲𑀺𑀗𑁆𑀕𑀸𑀮𑀧𑁄𑀢𑀓𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀫𑀸𑀦𑀸 𑀲𑀫𑁆𑀫𑁄𑀤𑀫𑀸𑀦𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑁂𑀧𑀺 ¶ 𑀫𑀺𑀢𑁆𑀢𑀪𑀸𑀯𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑁄𑀤𑀫𑀸𑀦𑀸 𑀯𑀲𑀺𑀁𑀲𑀼. 𑀢𑁂𑀲𑀁 𑀓𑀺𑀭 𑀲𑀢𑁆𑀢𑀓𑀼𑀮𑀧𑀭𑀺𑀯𑀝𑁆𑀝𑁂 𑀅𑀪𑀺𑀚𑁆𑀚𑀫𑀸𑀦𑀸 𑀫𑁂𑀢𑁆𑀢𑀺 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀻𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀼𑀡𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁫𑁮] 𑁮. 𑀲𑀼𑀳𑀦𑀼𑀚𑀸𑀢𑀓𑀯𑀡𑁆𑀡𑀦𑀸

𑀦𑀬𑀺𑀤𑀁 ¶ 𑀯𑀺𑀲𑀫𑀲𑀻𑀮𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀘𑀡𑁆𑀟𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀚𑁂𑀢𑀯𑀦𑁂𑀧𑀺 𑀏𑀓𑁄 𑀪𑀺𑀓𑁆𑀔𑀼 𑀘𑀡𑁆𑀟𑁄 𑀅𑀳𑁄𑀲𑀺 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄 𑀚𑀦𑀧𑀤𑁂𑀧𑀺. 𑀅𑀣𑁂𑀓𑀤𑀺𑀯𑀲𑀁 𑀚𑀸𑀦𑀧𑀤𑁄 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺, 𑀲𑀸𑀫𑀡𑁂𑀭𑀸 𑀘𑁂𑀯 𑀤𑀳𑀭𑀪𑀺𑀓𑁆𑀔𑀽 𑀘 𑀢𑀲𑁆𑀲 𑀘𑀡𑁆𑀟𑀪𑀸𑀯𑀁 𑀚𑀸𑀦𑀦𑁆𑀢𑀺. ‘‘𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀘𑀡𑁆𑀟𑀸𑀦𑀁 𑀓𑀮𑀳𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀓𑀼𑀢𑀽𑀳𑀮𑁂𑀦 𑀢𑀁 𑀪𑀺𑀓𑁆𑀔𑀼𑀁 𑀚𑁂𑀢𑀯𑀦𑀯𑀸𑀲𑀺𑀓𑀲𑁆𑀲 𑀧𑀭𑀺𑀯𑁂𑀡𑀁 𑀧𑀳𑀺𑀡𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀘𑀡𑁆𑀟𑀸 𑀅𑀜𑁆𑀜𑀫𑀜𑁆𑀜𑀁 𑀤𑀺𑀲𑁆𑀯𑀸𑀯 𑀧𑀺𑀬𑀲𑀁𑀯𑀸𑀲𑀁 𑀲𑀁𑀲𑀦𑁆𑀤𑀺𑀁𑀲𑀼 𑀲𑀫𑀺𑀁𑀲𑀼, 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀅𑀓𑀁𑀲𑀼. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀘𑀡𑁆𑀟𑀸 𑀪𑀺𑀓𑁆𑀔𑀽 𑀅𑀜𑁆𑀜𑁂𑀲𑀁 𑀉𑀧𑀭𑀺 𑀘𑀡𑁆𑀟𑀸 𑀨𑀭𑀼𑀲𑀸 𑀲𑀸𑀳𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀉𑀪𑁄𑀧𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀺𑀬𑀲𑀁𑀯𑀸𑀲𑀸 𑀚𑀸𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀢𑁂 𑀅𑀜𑁆𑀜𑁂𑀲𑀁 𑀘𑀡𑁆𑀟𑀸 𑀨𑀭𑀼𑀲𑀸 𑀲𑀸𑀳𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀺𑀬𑀲𑀁𑀯𑀸𑀲𑀸 𑀘 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀩𑁆𑀩𑀢𑁆𑀣𑀲𑀸𑀥𑀓𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀲𑁄 𑀧𑀦 𑀭𑀸𑀚𑀸 𑀣𑁄𑀓𑀁 𑀥𑀦𑀮𑁄𑀪𑀧𑀓𑀢𑀺𑀓𑁄, 𑀢𑀲𑁆𑀲 ¶ 𑀫𑀳𑀸𑀲𑁄𑀡𑁄 𑀦𑀸𑀫 𑀓𑀽𑀝𑀅𑀲𑁆𑀲𑁄 𑀅𑀢𑁆𑀣𑀺. 𑀅𑀣 𑀉𑀢𑁆𑀢𑀭𑀸𑀧𑀣𑀓𑀸 𑀅𑀲𑁆𑀲𑀯𑀸𑀡𑀺𑀚𑀸 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀆𑀦𑁂𑀲𑀼𑀁, 𑀅𑀲𑁆𑀲𑀸𑀦𑀁 𑀆𑀕𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀧𑀼𑀩𑁆𑀩𑁂 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑁂 𑀅𑀕𑁆𑀖𑀸𑀧𑁂𑀢𑁆𑀯𑀸 ¶ 𑀫𑀽𑀮𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀭𑀸𑀚𑀸 𑀢𑀁 𑀧𑀭𑀺𑀳𑀸𑀬𑀫𑀸𑀦𑁄 𑀅𑀜𑁆𑀜𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀅𑀲𑁆𑀲𑁂 𑀅𑀕𑁆𑀖𑀸𑀧𑁂𑀳𑀺, 𑀅𑀕𑁆𑀖𑀸𑀧𑁂𑀦𑁆𑀢𑁄 𑀘 𑀧𑀞𑀫𑀁 𑀫𑀳𑀸𑀲𑁄𑀡𑀁 𑀬𑀣𑀸 𑀢𑁂𑀲𑀁 𑀅𑀲𑁆𑀲𑀸𑀦𑀁 𑀅𑀦𑁆𑀢𑀭𑀁 𑀧𑀯𑀺𑀲𑀢𑀺, 𑀢𑀣𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀲𑁆𑀲𑁂 𑀟𑀁𑀲𑀸𑀧𑁂𑀢𑁆𑀯𑀸 𑀯𑀡𑀺𑀢𑁂 𑀓𑀸𑀭𑀸𑀧𑁂𑀢𑁆𑀯𑀸 𑀤𑀼𑀩𑁆𑀩𑀮𑀓𑀸𑀮𑁂 𑀫𑀽𑀮𑀁 𑀳𑀸𑀧𑁂𑀢𑁆𑀯𑀸 𑀅𑀲𑁆𑀲𑁂 𑀅𑀕𑁆𑀖𑀸𑀧𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺.

𑀅𑀲𑁆𑀲𑀯𑀸𑀡𑀺𑀚𑀸 𑀅𑀦𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀢𑁂𑀦 𑀓𑀢𑀓𑀺𑀭𑀺𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀦𑀕𑀭𑁂 𑀓𑀽𑀝𑀅𑀲𑁆𑀲𑁄 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺 𑀲𑀸𑀫𑀺, 𑀲𑀼𑀳𑀦𑀼 𑀦𑀸𑀫 𑀓𑀽𑀝𑀅𑀲𑁆𑀲𑁄 𑀘𑀡𑁆𑀟𑁄 𑀨𑀭𑀼𑀲𑁄’’𑀢𑀺. ‘‘𑀢𑁂𑀦 ¶ 𑀳𑀺 𑀧𑀼𑀦 𑀆𑀕𑀘𑁆𑀙𑀦𑁆𑀢𑀸 𑀢𑀁 𑀅𑀲𑁆𑀲𑀁 𑀆𑀦𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑀸 𑀢𑀁 𑀓𑀽𑀝𑀲𑁆𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀕𑀘𑁆𑀙𑀺𑀁𑀲𑀼. 𑀭𑀸𑀚𑀸 ‘‘𑀅𑀲𑁆𑀲𑀯𑀸𑀡𑀺𑀚𑀸 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀅𑀲𑁆𑀲𑁂 𑀑𑀮𑁄𑀓𑁂𑀢𑁆𑀯𑀸 𑀫𑀳𑀸𑀲𑁄𑀡𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀅𑀲𑁆𑀲𑀯𑀸𑀡𑀺𑀚𑀸𑀧𑀺 𑀫𑀳𑀸𑀲𑁄𑀡𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀼𑀳𑀦𑀼𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀼𑀁. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀢𑁆𑀯𑀸 𑀲𑀭𑀻𑀭𑀸𑀦𑀺 𑀮𑁂𑀳𑀦𑁆𑀢𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀧𑀲𑁆𑀲𑀲𑀺 𑀇𑀫𑁂 𑀤𑁆𑀯𑁂 𑀓𑀽𑀝𑀲𑁆𑀲𑀸 𑀅𑀜𑁆𑀜𑁂𑀲𑀁 𑀘𑀡𑁆𑀟𑀸 𑀨𑀭𑀼𑀲𑀸 𑀲𑀸𑀳𑀲𑀺𑀓𑀸, 𑀅𑀜𑁆𑀜𑁂 𑀅𑀲𑁆𑀲𑁂 𑀟𑀁𑀲𑀺𑀢𑁆𑀯𑀸 𑀕𑁂𑀮𑀜𑁆𑀜𑀁 𑀧𑀸𑀧𑁂𑀦𑁆𑀢𑀺, 𑀇𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀲𑀭𑀻𑀭𑀁 𑀮𑁂𑀳𑀦𑁆𑀢𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺? 𑀩𑁄𑀥𑀺𑀲𑀢𑁆𑀢𑁄 ‘‘𑀦𑀬𑀺𑀫𑁂, 𑀫𑀳𑀸𑀭𑀸𑀚, 𑀯𑀺𑀲𑀫𑀲𑀻𑀮𑀸, 𑀲𑀫𑀲𑀻𑀮𑀸 𑀲𑀫𑀥𑀸𑀢𑀼𑀓𑀸 𑀘 𑀏𑀢𑁂’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁫.

‘‘𑀦𑀬𑀺𑀤𑀁 𑀯𑀺𑀲𑀫𑀲𑀻𑀮𑁂𑀦, 𑀲𑁄𑀡𑁂𑀦 𑀲𑀼𑀳𑀦𑀽 𑀲𑀳;

𑀲𑀼𑀳𑀦𑀽𑀧𑀺 𑀢𑀸𑀤𑀺𑀲𑁄𑀬𑁂𑀯, 𑀬𑁄 𑀲𑁄𑀡𑀲𑁆𑀲 𑀲𑀕𑁄𑀘𑀭𑁄.

𑁧𑁬.

‘‘𑀧𑀓𑁆𑀔𑀦𑁆𑀤𑀺𑀦𑀸 ¶ 𑀧𑀕𑀩𑁆𑀪𑁂𑀦, 𑀦𑀺𑀘𑁆𑀘𑀁 𑀲𑀦𑁆𑀤𑀸𑀦𑀔𑀸𑀤𑀺𑀦𑀸;

𑀲𑀫𑁂𑀢𑀺 𑀧𑀸𑀧𑀁 𑀧𑀸𑀧𑁂𑀦, 𑀲𑀫𑁂𑀢𑀺 𑀅𑀲𑀢𑀸 𑀅𑀲’’𑀦𑁆𑀢𑀺.

𑀢𑀢𑁆𑀣 𑀦𑀬𑀺𑀤𑀁 𑀯𑀺𑀲𑀫𑀲𑀻𑀮𑁂𑀦, 𑀲𑁄𑀡𑁂𑀦 𑀲𑀼𑀳𑀦𑀽 𑀲𑀳𑀸𑀢𑀺 𑀬𑀁 𑀇𑀤𑀁 𑀲𑀼𑀳𑀦𑀼 𑀓𑀽𑀝𑀲𑁆𑀲𑁄 𑀲𑁄𑀡𑁂𑀦 𑀲𑀤𑁆𑀥𑀺𑀁 𑀧𑁂𑀫𑀁 𑀓𑀭𑁄𑀢𑀺, 𑀇𑀤𑀁 𑀦 𑀅𑀢𑁆𑀢𑀦𑁄 𑀯𑀺𑀲𑀫𑀲𑀻𑀮𑁂𑀦, 𑀅𑀣 𑀔𑁄 𑀅𑀢𑁆𑀢𑀦𑁄 𑀲𑀫𑀲𑀻𑀮𑁂𑀦𑁂𑀯 𑀲𑀤𑁆𑀥𑀺𑀁 𑀓𑀭𑁄𑀢𑀺. 𑀉𑀪𑁄𑀧𑀺 𑀳𑁂𑀢𑁂 𑀅𑀢𑁆𑀢𑀦𑁄 𑀅𑀦𑀸𑀘𑀸𑀭𑀢𑀸𑀬 𑀤𑀼𑀲𑁆𑀲𑀻𑀮𑀢𑀸𑀬 𑀲𑀫𑀲𑀻𑀮𑀸 𑀲𑀫𑀥𑀸𑀢𑀼𑀓𑀸. 𑀲𑀼𑀳𑀦𑀽𑀧𑀺 𑀢𑀸𑀤𑀺𑀲𑁄𑀬𑁂𑀯, 𑀬𑁄 𑀲𑁄𑀡𑀲𑁆𑀲 𑀲𑀕𑁄𑀘𑀭𑁄𑀢𑀺 𑀬𑀸𑀤𑀺𑀲𑁄 𑀲𑁄𑀡𑁄, 𑀲𑀼𑀳𑀦𑀼𑀧𑀺 𑀢𑀸𑀤𑀺𑀲𑁄𑀬𑁂𑀯, 𑀬𑁄 𑀲𑁄𑀡𑀲𑁆𑀲 𑀲𑀕𑁄𑀘𑀭𑁄 𑀬𑀁𑀕𑁄𑀘𑀭𑁄 𑀲𑁄𑀡𑁄, 𑀲𑁄𑀧𑀺 𑀢𑀁𑀕𑁄𑀘𑀭𑁄𑀬𑁂𑀯. 𑀬𑀣𑁂𑀯 𑀳𑀺 𑀲𑁄𑀡𑁄 𑀅𑀲𑁆𑀲𑀕𑁄𑀘𑀭𑁄 𑀅𑀲𑁆𑀲𑁂 𑀟𑀁𑀲𑁂𑀦𑁆𑀢𑁄𑀯 𑀘𑀭𑀢𑀺, 𑀢𑀣𑀸 𑀲𑀼𑀳𑀦𑀼𑀧𑀺. 𑀇𑀫𑀺𑀦𑀸 𑀦𑁂𑀲𑀁 𑀲𑀫𑀸𑀦𑀕𑁄𑀘𑀭𑀢𑀁 𑀤𑀲𑁆𑀲𑁂𑀢𑀺.

𑀢𑁂 ¶ 𑀧𑀦 𑀆𑀘𑀸𑀭𑀕𑁄𑀘𑀭𑁂 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀓𑁆𑀔𑀦𑁆𑀤𑀺𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀓𑁆𑀔𑀦𑁆𑀤𑀺𑀦𑀸𑀢𑀺 𑀅𑀲𑁆𑀲𑀸𑀦𑀁 𑀉𑀧𑀭𑀺 𑀧𑀓𑁆𑀔𑀦𑁆𑀤𑀦𑀲𑀻𑀮𑁂𑀦 𑀧𑀓𑁆𑀔𑀦𑁆𑀤𑀦𑀕𑁄𑀘𑀭𑁂𑀦. 𑀧𑀕𑀩𑁆𑀪𑁂𑀦𑀸𑀢𑀺 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀺𑀲𑀫𑀦𑁆𑀦𑀸𑀕𑀢𑁂𑀦 𑀤𑀼𑀲𑁆𑀲𑀻𑀮𑁂𑀦. 𑀦𑀺𑀘𑁆𑀘𑀁 𑀲𑀦𑁆𑀤𑀸𑀦𑀔𑀸𑀤𑀺𑀦𑀸𑀢𑀺 𑀲𑀤𑀸 𑀅𑀢𑁆𑀢𑀦𑁄 𑀩𑀦𑁆𑀥𑀦𑀬𑁄𑀢𑁆𑀢𑀁 𑀔𑀸𑀤𑀦𑀲𑀻𑀮𑁂𑀦 𑀔𑀸𑀤𑀦𑀕𑁄𑀘𑀭𑁂𑀦 𑀘. 𑀲𑀫𑁂𑀢𑀺 𑀧𑀸𑀧𑀁 𑀧𑀸𑀧𑁂𑀦𑀸𑀢𑀺 𑀏𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀧𑀸𑀧𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀢𑀭𑀲𑁆𑀲 ¶ 𑀧𑀸𑀧𑀁 𑀤𑀼𑀲𑁆𑀲𑀻𑀮𑁆𑀬𑀁 𑀲𑀫𑁂𑀢𑀺. 𑀅𑀲𑀢𑀸 𑀅𑀲𑀦𑁆𑀢𑀺 𑀏𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀅𑀲𑀢𑀸 𑀅𑀦𑀸𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁂𑀦 𑀲𑀳 𑀇𑀢𑀭𑀲𑁆𑀲 𑀅𑀲𑀁 𑀅𑀲𑀸𑀥𑀼𑀓𑀫𑁆𑀫𑀁 𑀲𑀫𑁂𑀢𑀺, 𑀕𑀽𑀣𑀸𑀤𑀻𑀦𑀺 𑀯𑀺𑀬 𑀕𑀽𑀣𑀸𑀤𑀻𑀳𑀺 𑀏𑀓𑀢𑁄 𑀲𑀁𑀲𑀦𑁆𑀤𑀢𑀺 𑀲𑀤𑀺𑀲𑀁 𑀦𑀺𑀩𑁆𑀩𑀺𑀲𑁂𑀲𑀫𑁂𑀯 𑀳𑁄𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀅𑀢𑀺𑀮𑀼𑀤𑁆𑀥𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀧𑀭𑀲𑁆𑀲 𑀲𑀦𑁆𑀢𑀓𑀁 𑀦𑀸𑀫 𑀦𑀸𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀅𑀲𑁆𑀲𑁂 𑀅𑀕𑁆𑀖𑀸𑀧𑁂𑀢𑁆𑀯𑀸 𑀪𑀽𑀢𑀫𑁂𑀯 𑀫𑀽𑀮𑀁 𑀤𑀸𑀧𑁂𑀲𑀺. 𑀅𑀲𑁆𑀲𑀯𑀸𑀡𑀺𑀚𑀸 𑀬𑀣𑀸𑀲𑀪𑀸𑀯𑀫𑁂𑀯 𑀫𑀽𑀮𑀁 𑀮𑀪𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀅𑀕𑀫𑀁𑀲𑀼. 𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁆𑀯𑁂 𑀅𑀲𑁆𑀲𑀸 𑀇𑀫𑁂 𑀤𑁆𑀯𑁂 𑀤𑀼𑀝𑁆𑀞𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀳𑀦𑀼𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁫𑁯] 𑁯. 𑀫𑁄𑀭𑀚𑀸𑀢𑀓𑀯𑀡𑁆𑀡𑀦𑀸

𑀉𑀤𑁂𑀢𑀬𑀁 ¶ 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑀻𑀢𑁄 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀤𑀺𑀲𑁆𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀲𑀭𑀻𑀭𑀁 𑀫𑀸𑀢𑀼𑀕𑀸𑀫𑀁 𑀑𑀮𑁄𑀓𑁂𑀢𑁆𑀯𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀓𑀲𑁆𑀫𑀸 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀘𑀺𑀢𑁆𑀢𑀁 𑀦𑀸𑀮𑀼𑀴𑁂𑀲𑁆𑀲𑀢𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀫𑁆𑀧𑀺 𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀅𑀲𑀫𑀼𑀤𑀸𑀘𑀺𑀡𑁆𑀡𑀓𑀺𑀮𑁂𑀲𑀸 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀔𑀡𑁂𑀦𑁂𑀯 𑀲𑀫𑀼𑀤𑀸𑀘𑀭𑀺𑀁𑀲𑀼. 𑀯𑀺𑀲𑀼𑀤𑁆𑀥𑀸𑀧𑀺 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀫𑀬𑀲𑀲𑀫𑀗𑁆𑀕𑀺𑀦𑁄𑀧𑀺 𑀆𑀬𑀲𑀓𑁆𑀬𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀕𑁂𑀯 𑀅𑀧𑀭𑀺𑀲𑀼𑀤𑁆𑀥𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑁄𑀭𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀡𑁆𑀟𑀓𑀸𑀮𑁂𑀧𑀺 ¶ 𑀓𑀡𑀺𑀓𑀸𑀭𑀫𑀓𑀼𑀴𑀯𑀡𑁆𑀡𑀅𑀡𑁆𑀟𑀓𑁄𑀲𑁄 𑀳𑀼𑀢𑁆𑀯𑀸 𑀅𑀡𑁆𑀟𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀓𑁆𑀔𑀸𑀦𑀁 𑀅𑀦𑁆𑀢𑀭𑁂 𑀲𑀼𑀭𑀢𑁆𑀢𑀭𑀸𑀚𑀺𑀯𑀺𑀭𑀸𑀚𑀺𑀢𑁄, 𑀲𑁄 𑀅𑀢𑁆𑀢𑀦𑁄 ¶ 𑀚𑀻𑀯𑀺𑀢𑀁 𑀭𑀓𑁆𑀔𑀦𑁆𑀢𑁄 𑀢𑀺𑀲𑁆𑀲𑁄 𑀧𑀩𑁆𑀩𑀢𑀭𑀸𑀚𑀺𑀬𑁄 𑀅𑀢𑀺𑀓𑁆𑀓𑀫𑁆𑀫 𑀘𑀢𑀼𑀢𑁆𑀣𑀸𑀬 𑀧𑀩𑁆𑀩𑀢𑀭𑀸𑀚𑀺𑀬𑀸 𑀏𑀓𑀲𑁆𑀫𑀺𑀁 𑀤𑀡𑁆𑀟𑀓𑀳𑀺𑀭𑀜𑁆𑀜𑀧𑀩𑁆𑀩𑀢𑀢𑀮𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑁄 𑀲𑀽𑀭𑀺𑀬𑀁 𑀉𑀕𑁆𑀕𑀘𑁆𑀙𑀦𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁄𑀘𑀭𑀪𑀽𑀫𑀺𑀬𑀁 𑀭𑀓𑁆𑀔𑀸𑀯𑀭𑀡𑀢𑁆𑀣𑀸𑀬 𑀩𑁆𑀭𑀳𑁆𑀫𑀫𑀦𑁆𑀢𑀁 𑀩𑀦𑁆𑀥𑀦𑁆𑀢𑁄 ‘‘𑀉𑀤𑁂𑀢𑀬’’𑀦𑁆𑀢𑀺𑀆𑀤𑀺𑀫𑀸𑀳.

𑁧𑁭.

‘‘𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸,

𑀳𑀭𑀺𑀲𑁆𑀲𑀯𑀡𑁆𑀡𑁄 𑀧𑀣𑀯𑀺𑀧𑁆𑀧𑀪𑀸𑀲𑁄;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀳𑀭𑀺𑀲𑁆𑀲𑀯𑀡𑁆𑀡𑀁 𑀧𑀣𑀯𑀺𑀧𑁆𑀧𑀪𑀸𑀲𑀁,

𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀤𑀺𑀯𑀲’’𑀦𑁆𑀢𑀺.

𑀢𑀢𑁆𑀣 ¶ 𑀉𑀤𑁂𑀢𑀻𑀢𑀺 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀉𑀕𑁆𑀕𑀘𑁆𑀙𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀯𑀸𑀲𑀻𑀦𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀘𑀓𑁆𑀔𑀼𑀧𑀝𑀺𑀮𑀸𑀪𑀓𑀭𑀡𑁂𑀦 𑀬𑀁 𑀢𑁂𑀦 𑀢𑁂𑀲𑀁 𑀤𑀺𑀦𑁆𑀦𑀁 𑀘𑀓𑁆𑀔𑀼, 𑀢𑁂𑀦 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀸. 𑀏𑀓𑀭𑀸𑀚𑀸𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑁂 𑀆𑀮𑁄𑀓𑀓𑀭𑀸𑀦𑀁 𑀅𑀦𑁆𑀢𑀭𑁂 𑀲𑁂𑀝𑁆𑀞𑀯𑀺𑀲𑀺𑀝𑁆𑀞𑀝𑁆𑀞𑁂𑀦 𑀏𑀓𑀭𑀸𑀚𑀸. 𑀳𑀭𑀺𑀲𑁆𑀲𑀯𑀡𑁆𑀡𑁄𑀢𑀺 𑀳𑀭𑀺𑀲𑀫𑀸𑀦𑀯𑀡𑁆𑀡𑁄, 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀧𑀣𑀯𑀺𑀧𑁆𑀧𑀪𑀸𑀲𑁄𑀢𑀺 𑀧𑀣𑀯𑀺𑀬𑀸 𑀧𑀪𑀸𑀲𑁄. 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 𑀢𑀁 𑀏𑀯𑀭𑀽𑀧𑀁 𑀪𑀯𑀦𑁆𑀢𑀁 𑀦𑀫𑀲𑁆𑀲𑀸𑀫𑀺 𑀯𑀦𑁆𑀤𑀸𑀫𑀺. 𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀤𑀺𑀯𑀲𑀦𑁆𑀢𑀺 𑀢𑀬𑀸 𑀅𑀚𑁆𑀚 𑀭𑀓𑁆𑀔𑀺𑀢𑀸 𑀕𑁄𑀧𑀺𑀢𑀸 𑀳𑀼𑀢𑁆𑀯𑀸 𑀇𑀫𑀁 𑀤𑀺𑀯𑀲𑀁 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀲𑀼𑀔𑀁 𑀯𑀺𑀳𑀭𑁂𑀬𑁆𑀬𑀸𑀫.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀲𑀽𑀭𑀺𑀬𑀁 𑀦𑀫𑀲𑁆𑀲𑀺𑀢𑁆𑀯𑀸 𑀤𑀼𑀢𑀺𑀬𑀕𑀸𑀣𑀸𑀬 𑀅𑀢𑀻𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀩𑀼𑀤𑁆𑀥𑁂 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂 𑀘 𑀦𑀫𑀲𑁆𑀲𑀢𑀺.

‘‘𑀬𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂, 𑀢𑁂 𑀫𑁂 𑀦𑀫𑁄 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀼;

𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸, 𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸;

𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀘𑀭𑀢𑀺 𑀏𑀲𑀦𑀸’’𑀢𑀺.

𑀢𑀢𑁆𑀣 𑀬𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀩𑀸𑀳𑀺𑀢𑀧𑀸𑀧𑀸 𑀯𑀺𑀲𑀼𑀤𑁆𑀥𑀺𑀩𑁆𑀭𑀸𑀳𑁆𑀫𑀡𑀸. 𑀯𑁂𑀤𑀕𑀽𑀢𑀺 𑀯𑁂𑀤𑀸𑀦𑀁 𑀧𑀸𑀭𑀁 𑀕𑀢𑀸𑀢𑀺𑀧𑀺 𑀯𑁂𑀤𑀕𑀽, 𑀯𑁂𑀤𑁂𑀳𑀺 𑀧𑀸𑀭𑀁 𑀕𑀢𑀸𑀢𑀺𑀧𑀺 𑀯𑁂𑀤𑀕𑀽. 𑀇𑀥 𑀧𑀦 𑀲𑀩𑁆𑀩𑁂 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑁂 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀢𑁆𑀯𑀸 𑀕𑀢𑀸𑀢𑀺 𑀯𑁂𑀤𑀕𑀽. 𑀢𑁂𑀦𑁂𑀯𑀸𑀳 ¶ ‘‘𑀲𑀩𑁆𑀩𑀥𑀫𑁆𑀫𑁂’’𑀢𑀺. 𑀲𑀩𑁆𑀩𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀥𑀫𑁆𑀫𑁂 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 ¶ 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀢𑁆𑀯𑀸 𑀕𑀢𑀸, 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀩𑁄𑀥𑀺𑀢𑀮𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀲𑀁𑀲𑀸𑀭𑀁 𑀯𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂 𑀫𑁂 𑀦𑀫𑁄𑀢𑀺 𑀢𑁂 𑀫𑀫 𑀇𑀫𑀁 𑀦𑀫𑀓𑁆𑀓𑀸𑀭𑀁 𑀧𑀝𑀺𑀘𑁆𑀙𑀦𑁆𑀢𑀼. 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀽𑀢𑀺 𑀏𑀯𑀁 𑀫𑀬𑀸 𑀦𑀫𑀲𑁆𑀲𑀺𑀢𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀫𑀁 𑀧𑀸𑀮𑁂𑀦𑁆𑀢𑀼 𑀭𑀓𑁆𑀔𑀦𑁆𑀢𑀼 𑀕𑁄𑀧𑁂𑀦𑁆𑀢𑀼. 𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸, 𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀬𑀁 𑀫𑀫 𑀦𑀫𑀓𑁆𑀓𑀸𑀭𑁄 ¶ 𑀅𑀢𑀻𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀼, 𑀢𑁂𑀲𑀜𑁆𑀜𑁂𑀯 𑀘𑀢𑀽𑀲𑀼 𑀘 𑀫𑀕𑁆𑀕𑁂𑀲𑀼 𑀘𑀢𑀽𑀲𑀼 𑀨𑀮𑁂𑀲𑀼 𑀜𑀸𑀡𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀢𑁆𑀣𑀼, 𑀢𑀣𑀸 𑀢𑁂𑀲𑀜𑁆𑀜𑁂𑀯 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀸𑀦𑀁 𑀅𑀢𑁆𑀣𑀼, 𑀬𑀸 𑀘 𑀦𑁂𑀲𑀁 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀯𑀺𑀫𑀼𑀢𑁆𑀢𑀺, 𑀢𑀲𑁆𑀲𑀸 𑀦𑁂𑀲𑀁 𑀯𑀺𑀫𑀼𑀢𑁆𑀢𑀺𑀬𑀸𑀧𑀺 𑀅𑀬𑀁 𑀫𑀬𑁆𑀳𑀁 𑀦𑀫𑀓𑁆𑀓𑀸𑀭𑁄 𑀅𑀢𑁆𑀣𑀽𑀢𑀺. ‘‘𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀘𑀭𑀢𑀺 𑀏𑀲𑀦𑀸’’𑀢𑀺 𑀇𑀤𑀁 𑀧𑀦 𑀧𑀤𑀤𑁆𑀯𑀬𑀁 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀲𑁄 𑀫𑁄𑀭𑁄 𑀇𑀫𑀁 𑀧𑀭𑀺𑀢𑁆𑀢𑀁 𑀇𑀫𑀁 𑀭𑀓𑁆𑀔𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑁄𑀘𑀭𑀪𑀽𑀫𑀺𑀬𑀁 𑀧𑀼𑀧𑁆𑀨𑀨𑀮𑀸𑀤𑀻𑀦𑀁 𑀅𑀢𑁆𑀣𑀸𑀬 𑀦𑀸𑀦𑀧𑁆𑀧𑀓𑀸𑀭𑀸𑀬 𑀏𑀲𑀦𑀸𑀬 𑀘𑀭𑀢𑀺.

𑀏𑀯𑀁 𑀤𑀺𑀯𑀲𑀁 𑀘𑀭𑀺𑀢𑁆𑀯𑀸 𑀲𑀸𑀬𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑀁 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦𑁂 𑀭𑀓𑁆𑀔𑀸𑀯𑀭𑀡𑀢𑁆𑀣𑀸𑀬 𑀧𑀼𑀦 𑀩𑁆𑀭𑀳𑁆𑀫𑀫𑀦𑁆𑀢𑀁 𑀩𑀦𑁆𑀥𑀦𑁆𑀢𑁄 ‘‘𑀅𑀧𑁂𑀢𑀬’’𑀦𑁆𑀢𑀺𑀆𑀤𑀺𑀫𑀸𑀳.

𑁧𑁮.

‘‘𑀅𑀧𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸, 𑀳𑀭𑀺𑀲𑁆𑀲𑀯𑀡𑁆𑀡𑁄 𑀧𑀣𑀯𑀺𑀧𑁆𑀧𑀪𑀸𑀲𑁄;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀳𑀭𑀺𑀲𑁆𑀲𑀯𑀡𑁆𑀡𑀁 𑀧𑀣𑀯𑀺𑀧𑁆𑀧𑀪𑀸𑀲𑀁, 𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀭𑀢𑁆𑀢𑀺𑀁.

‘‘𑀬𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂, 𑀢𑁂 𑀫𑁂 𑀦𑀫𑁄 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀼;

𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸, 𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸;

𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀻’’𑀢𑀺.

𑀢𑀢𑁆𑀣 𑀅𑀧𑁂𑀢𑀻𑀢𑀺 𑀅𑀧𑀬𑀸𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀻𑀢𑀺 𑀇𑀤𑀫𑁆𑀧𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂 ¶ , 𑀲𑁄 𑀫𑁄𑀭𑁄 𑀇𑀫𑀁 𑀧𑀭𑀺𑀢𑁆𑀢𑀁 𑀇𑀫𑀁 𑀭𑀓𑁆𑀔𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀯𑀸𑀲𑀁 𑀓𑀧𑁆𑀧𑀬𑀺𑀢𑁆𑀣, 𑀢𑀲𑁆𑀲 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀇𑀫𑀲𑁆𑀲 𑀧𑀭𑀺𑀢𑁆𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀦𑁂𑀯 𑀪𑀬𑀁, 𑀦 𑀮𑁄𑀫𑀳𑀁𑀲𑁄 𑀅𑀳𑁄𑀲𑀺.

𑀅𑀣𑁂𑀓𑁄 ¶ 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂 𑀦𑁂𑀲𑀸𑀤𑀕𑀸𑀫𑀯𑀸𑀲𑀻 𑀦𑁂𑀲𑀸𑀤𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀺𑀘𑀭𑀦𑁆𑀢𑁄 𑀢𑀲𑁆𑀫𑀺𑀁 ¶ 𑀤𑀡𑁆𑀟𑀓𑀳𑀺𑀭𑀜𑁆𑀜𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑀁 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀔𑁂𑀫𑀸 𑀦𑀸𑀫 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑁂𑀯𑀻 𑀲𑀼𑀧𑀺𑀦𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑁄𑀭𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀧𑀩𑀼𑀤𑁆𑀥𑀓𑀸𑀮𑁂 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀤𑁂𑀯, 𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀫𑁄𑀭𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸’’𑀢𑀺. 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀅𑀫𑀘𑁆𑀘𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀲𑀼𑀢𑁆𑀯𑀸 ‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀫𑁄𑀭𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑀢𑁆𑀣 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑁂𑀲𑀸𑀤𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀦𑁂𑀲𑀸𑀤𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀅𑀣 𑀲𑁄 𑀦𑁂𑀲𑀸𑀤𑀧𑀼𑀢𑁆𑀢𑁄 ‘‘𑀆𑀫, 𑀫𑀳𑀸𑀭𑀸𑀚, 𑀤𑀡𑁆𑀟𑀓𑀳𑀺𑀭𑀜𑁆𑀜𑀧𑀩𑁆𑀩𑀢𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀯𑀲𑀢𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀢𑀁 𑀫𑁄𑀭𑀁 𑀅𑀫𑀸𑀭𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸𑀯 𑀆𑀦𑁂𑀳𑀻’’𑀢𑀺. 𑀦𑁂𑀲𑀸𑀤𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀕𑁄𑀘𑀭𑀪𑀽𑀫𑀺𑀬𑀁 𑀧𑀸𑀲𑁂 𑀑𑀟𑁆𑀟𑁂𑀲𑀺. 𑀫𑁄𑀭𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀧𑀺 𑀧𑀸𑀲𑁄 𑀦 𑀲𑀜𑁆𑀘𑀭𑀢𑀺. 𑀦𑁂𑀲𑀸𑀤𑁄 𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀺𑀘𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀔𑁂𑀫𑀸𑀧𑀺 𑀤𑁂𑀯𑀻 𑀧𑀢𑁆𑀣𑀺𑀢𑀁 𑀅𑀮𑀪𑀫𑀸𑀦𑀸 𑀓𑀸𑀮𑀫𑀓𑀸𑀲𑀺.

𑀭𑀸𑀚𑀸 ‘‘𑀫𑁄𑀭𑀁 𑀫𑁂 𑀦𑀺𑀲𑁆𑀲𑀸𑀬 𑀤𑁂𑀯𑀻 𑀓𑀸𑀮𑀓𑀢𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀤𑀡𑁆𑀟𑀓𑀳𑀺𑀭𑀜𑁆𑀜𑀧𑀩𑁆𑀩𑀢𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀯𑀲𑀢𑀺, 𑀬𑁂 𑀢𑀲𑁆𑀲 𑀫𑀁𑀲𑀁 𑀔𑀸𑀤𑀦𑁆𑀢𑀺, 𑀢𑁂 𑀅𑀚𑀭𑀸 𑀅𑀫𑀭𑀸 𑀳𑁄𑀦𑁆𑀢𑀻’’𑀢𑀺 𑀅𑀓𑁆𑀔𑀭𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑀁 𑀫𑀜𑁆𑀚𑀽𑀲𑀸𑀬 𑀦𑀺𑀓𑁆𑀔𑀺𑀧𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀅𑀜𑁆𑀜𑁄 𑀭𑀸𑀚𑀸 𑀭𑀚𑁆𑀚𑀁 𑀧𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑀁 𑀯𑀸𑀘𑁂𑀢𑁆𑀯𑀸 ‘‘𑀅𑀚𑀭𑁄 𑀅𑀫𑀭𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀦𑁂𑀲𑀸𑀤𑀁 𑀧𑁂𑀲𑁂𑀲𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀙 𑀭𑀸𑀚𑀧𑀭𑀺𑀯𑀝𑁆𑀝𑀸 𑀕𑀢𑀸. 𑀅𑀣 𑀲𑀢𑁆𑀢𑀫𑁄 𑀭𑀸𑀚𑀸 𑀭𑀚𑁆𑀚𑀁 𑀧𑀢𑁆𑀯𑀸 𑀏𑀓𑀁 𑀦𑁂𑀲𑀸𑀤𑀁 𑀧𑀳𑀺𑀡𑀺. 𑀲𑁄 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀧𑀺 𑀧𑀸𑀲𑀲𑁆𑀲 𑀅𑀲𑀜𑁆𑀘𑀭𑀡𑀪𑀸𑀯𑀁, 𑀅𑀢𑁆𑀢𑀦𑁄 ¶ 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀕𑁄𑀘𑀭𑀪𑀽𑀫𑀺𑀕𑀫𑀦𑀪𑀸𑀯𑀜𑁆𑀘𑀲𑁆𑀲 𑀜𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀑𑀢𑀭𑀺𑀢𑁆𑀯𑀸 𑀏𑀓𑀁 𑀫𑁄𑀭𑀺𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀳𑀢𑁆𑀣𑀢𑀸𑀴𑀲𑀤𑁆𑀤𑁂𑀦 𑀦𑀘𑁆𑀘𑀢𑀺, 𑀅𑀘𑁆𑀙𑀭𑀸𑀲𑀤𑁆𑀤𑁂𑀦 𑀘 𑀯𑀲𑁆𑀲𑀢𑀺, 𑀏𑀯𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀫𑁄𑀭𑁂𑀦 𑀧𑀭𑀺𑀢𑁆𑀢𑁂 ¶ 𑀅𑀓𑀢𑁂 𑀧𑀸𑀢𑁄𑀬𑁂𑀯 𑀧𑀸𑀲𑀬𑀝𑁆𑀞𑀺𑀬𑁄 𑀭𑁄𑀧𑁂𑀢𑁆𑀯𑀸 𑀧𑀸𑀲𑁂 𑀑𑀟𑁆𑀟𑁂𑀢𑁆𑀯𑀸 𑀫𑁄𑀭𑀺𑀁 𑀯𑀲𑁆𑀲𑀸𑀧𑁂𑀲𑀺. 𑀫𑁄𑀭𑁄 𑀯𑀺𑀲𑀪𑀸𑀕𑀁 𑀫𑀸𑀢𑀼𑀕𑀸𑀫𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀺𑀮𑁂𑀲𑀸𑀢𑀼𑀭𑁄 𑀳𑀼𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀸𑀲𑁂 𑀩𑀚𑁆𑀛𑀺. 𑀅𑀣 𑀦𑀁 𑀦𑁂𑀲𑀸𑀤𑁄 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀤𑀸𑀲𑀺.

𑀭𑀸𑀚𑀸 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀆𑀲𑀦𑀁 𑀤𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀓𑀲𑁆𑀫𑀸 𑀫𑀁 𑀕𑀡𑁆𑀳𑀸𑀧𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀬𑁂 𑀓𑀺𑀭 𑀢𑀯 𑀫𑀁𑀲𑀁 𑀔𑀸𑀤𑀦𑁆𑀢𑀺, 𑀢𑁂 𑀅𑀚𑀭𑀸 𑀅𑀫𑀭𑀸 𑀳𑁄𑀦𑁆𑀢𑀺, 𑀲𑁆𑀯𑀸𑀳𑀁 𑀢𑀯 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀚𑀭𑁄 𑀅𑀫𑀭𑁄 𑀳𑁄𑀢𑀼𑀓𑀸𑀫𑁄 𑀢𑀁 𑀕𑀡𑁆𑀳𑀸𑀧𑁂𑀲𑀺’’𑀦𑁆𑀢𑀺. ‘‘𑀫𑀳𑀸𑀭𑀸𑀚, 𑀫𑀫 𑀢𑀸𑀯 𑀫𑀁𑀲𑀁 𑀔𑀸𑀤𑀦𑁆𑀢𑀸 𑀅𑀚𑀭𑀸 𑀅𑀫𑀭𑀸 𑀳𑁄𑀦𑁆𑀢𑀼, 𑀅𑀳𑀁 𑀧𑀦 𑀫𑀭𑀺𑀲𑁆𑀲𑀸𑀫𑀻’’𑀢𑀺 ¶ ? ‘‘𑀆𑀫, 𑀫𑀭𑀺𑀲𑁆𑀲𑀲𑀻’’𑀢𑀺. ‘‘𑀫𑀬𑀺 𑀫𑀭𑀦𑁆𑀢𑁂 𑀧𑀦 𑀫𑀫 𑀫𑀁𑀲𑀫𑁂𑀯 𑀔𑀸𑀤𑀺𑀢𑁆𑀯𑀸 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀦 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀢𑁆𑀯𑀁 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀢𑀲𑁆𑀫𑀸 𑀓𑀺𑀭 𑀢𑀯 𑀫𑀁𑀲𑀁 𑀔𑀸𑀤𑀓𑀸 𑀅𑀚𑀭𑀸 𑀅𑀫𑀭𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀫𑀳𑀸𑀭𑀸𑀚, 𑀅𑀳𑀁 𑀧𑀦 𑀦 𑀅𑀓𑀸𑀭𑀡𑀸 𑀲𑀼𑀯𑀡𑁆𑀡𑀯𑀡𑁆𑀡𑁄 𑀚𑀸𑀢𑁄, 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀲𑀬𑀫𑁆𑀧𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁, 𑀲𑀓𑀮𑀘𑀓𑁆𑀓𑀯𑀸𑀴𑀯𑀸𑀲𑀺𑀦𑁄𑀧𑀺 𑀭𑀓𑁆𑀔𑀸𑀧𑁂𑀲𑀺𑀁, 𑀲𑁆𑀯𑀸𑀳𑀁 𑀓𑀸𑀮𑀁 𑀓𑀭𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀜𑁆𑀜𑀲𑁆𑀲 𑀅𑀓𑀼𑀲𑀮𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀫𑁄𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀧𑁄𑀭𑀸𑀡𑀲𑀻𑀮𑀸𑀦𑀼𑀪𑀸𑀯𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁄 𑀚𑀸𑀢𑁄’’𑀢𑀺. ‘‘‘𑀢𑁆𑀯𑀁 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀲𑀻𑀮𑀨𑀮𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁄 𑀚𑀸𑀢𑁄’𑀢𑀺 𑀓𑀣𑀫𑀺𑀤𑀁 𑀅𑀫𑁆𑀳𑁂𑀳𑀺 𑀲𑀤𑁆𑀥𑀸𑀢𑀩𑁆𑀩𑀁. 𑀅𑀢𑁆𑀣𑀺 𑀦𑁄 𑀓𑁄𑀘𑀺 𑀲𑀓𑁆𑀔𑀻’’𑀢𑀺 ¶ ? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀦𑀸𑀫𑀸’’𑀢𑀺? ‘‘𑀫𑀳𑀸𑀭𑀸𑀚, 𑀅𑀳𑀁 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀭𑀢𑀦𑀫𑀬𑁂 𑀭𑀣𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀓𑀸𑀲𑁂 𑀯𑀺𑀘𑀭𑀺𑀁, 𑀲𑁄 𑀫𑁂 𑀭𑀣𑁄 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀸 𑀅𑀦𑁆𑀢𑁄𑀪𑀽𑀫𑀺𑀬𑀁 𑀦𑀺𑀤𑀳𑀸𑀧𑀺𑀢𑁄, 𑀢𑀁 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀢𑁄 𑀉𑀓𑁆𑀔𑀺𑀧𑀸𑀧𑁂𑀳𑀺, 𑀲𑁄 𑀫𑁂 𑀲𑀓𑁆𑀔𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀢𑁄 𑀉𑀤𑀓𑀁 𑀳𑀭𑀸𑀧𑁂𑀢𑁆𑀯𑀸 𑀭𑀣𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀤𑁆𑀤𑀳𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀞𑀧𑁂𑀢𑁆𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀅𑀯𑀲𑁂𑀲𑀸 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸 𑀳𑀼𑀢𑁆𑀯𑀸 𑀅𑀪𑀸𑀯𑀺𑀦𑁄 𑀅𑀦𑀺𑀘𑁆𑀘𑀸 𑀔𑀬𑀯𑀬𑀥𑀫𑁆𑀫𑀸𑀬𑁂𑀯𑀸’’𑀢𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸 𑀧𑀲𑀦𑁆𑀦𑁄 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂𑀦 𑀧𑀽𑀚𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀲𑁄 𑀭𑀚𑁆𑀚𑀁 𑀢𑀲𑁆𑀲𑁂𑀯 𑀧𑀝𑀺𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀆𑀓𑀸𑀲𑁂 ¶ 𑀉𑀧𑁆𑀧𑀢𑀺𑀢𑁆𑀯𑀸 𑀤𑀡𑁆𑀟𑀓𑀳𑀺𑀭𑀜𑁆𑀜𑀧𑀩𑁆𑀩𑀢𑀫𑁂𑀯 𑀅𑀕𑀫𑀸𑀲𑀺. 𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀼𑀯𑀡𑁆𑀡𑀫𑁄𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑁄𑀭𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁬𑁦] 𑁧𑁦. 𑀯𑀺𑀦𑀻𑀮𑀚𑀸𑀢𑀓𑀯𑀡𑁆𑀡𑀦𑀸

𑀏𑀯𑀫𑁂𑀯 𑀦𑀽𑀦 𑀭𑀸𑀚𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀲𑀼𑀕𑀢𑀸𑀮𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁂 𑀳𑀺 𑀕𑀬𑀸𑀲𑀻𑀲𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀼𑀕𑀢𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀧𑀦𑁆𑀦𑁂 𑀉𑀪𑁄𑀧𑀺 𑀣𑁂𑀭𑀸 ¶ 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀆𑀤𑀸𑀬 𑀯𑁂𑀴𑀼𑀯𑀦𑀁 𑀅𑀕𑀫𑀺𑀁𑀲𑀼. 𑀢𑁂 𑀲𑀢𑁆𑀣𑀸𑀭𑀸 ‘‘𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀓𑀺𑀁 ¶ 𑀅𑀓𑀸𑀲𑀻’’𑀢𑀺 𑀧𑀼𑀝𑁆𑀞𑀸 ‘‘𑀪𑀦𑁆𑀢𑁂, 𑀲𑀼𑀕𑀢𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀫 𑀅𑀦𑀼𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀸𑀧𑀼𑀡𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀸𑀬𑀁 𑀯𑀺𑀤𑁂𑀳𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀤𑀸 𑀏𑀓𑀲𑁆𑀲 𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀲𑁆𑀲 𑀕𑁄𑀘𑀭𑀪𑀽𑀫𑀺𑀬𑀁 𑀓𑀸𑀓𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀅𑀳𑁄𑀲𑀺. 𑀲𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄 𑀦𑁂𑀯 𑀫𑀸𑀢𑀼𑀧𑀢𑀺𑀭𑀽𑀧𑀓𑁄 𑀅𑀳𑁄𑀲𑀺, 𑀦 𑀧𑀺𑀢𑀼. 𑀅𑀣𑀲𑁆𑀲 𑀯𑀺𑀦𑀻𑀮𑀓𑀥𑀸𑀢𑀼𑀓𑀢𑁆𑀢𑀸 ‘‘𑀯𑀺𑀦𑀻𑀮𑀓𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀳𑀁𑀲𑀭𑀸𑀚𑀸 𑀅𑀪𑀺𑀡𑁆𑀳𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑁆𑀲𑀢𑀺. 𑀅𑀧𑀭𑁂 𑀧𑀦𑀲𑁆𑀲 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀧𑀺𑀢𑀭𑀁 𑀅𑀪𑀺𑀡𑁆𑀳𑀁 𑀫𑀦𑀼𑀲𑁆𑀲𑀧𑀣𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀸𑀢, 𑀢𑀼𑀫𑁆𑀳𑁂 𑀓𑀲𑁆𑀫𑀸 𑀅𑀪𑀺𑀡𑁆𑀳𑀁 𑀫𑀦𑀼𑀲𑁆𑀲𑀧𑀣𑀁 𑀕𑀘𑁆𑀙𑀣𑀸’’𑀢𑀺? ‘‘𑀢𑀸𑀢𑀸, 𑀏𑀓𑀸𑀬 𑀫𑁂 𑀓𑀸𑀓𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀏𑀓𑁄 𑀧𑀼𑀢𑁆𑀢𑁄 𑀚𑀸𑀢𑁄, ‘𑀯𑀺𑀦𑀻𑀮𑀓𑁄’𑀢𑀺𑀲𑁆𑀲 𑀦𑀸𑀫𑀁, 𑀢𑀫𑀳𑀁 𑀤𑀝𑁆𑀞𑀼𑀁 𑀕𑀘𑁆𑀙𑀸𑀫𑀻’’𑀢𑀺. ‘‘𑀓𑀳𑀁 𑀧𑀦𑁂𑀢𑁂 ¶ 𑀯𑀲𑀦𑁆𑀢𑀻’’𑀢𑀺? ‘‘𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀸𑀬 𑀅𑀯𑀺𑀤𑀽𑀭𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀏𑀓𑀲𑁆𑀫𑀺𑀁 𑀢𑀸𑀮𑀕𑁆𑀕𑁂 𑀯𑀲𑀦𑁆𑀢𑀻’’𑀢𑀺. ‘‘𑀢𑀸𑀢, 𑀫𑀦𑀼𑀲𑁆𑀲𑀧𑀣𑁄 𑀦𑀸𑀫 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄, 𑀢𑀼𑀫𑁆𑀳𑁂 𑀫𑀸 𑀕𑀘𑁆𑀙𑀣, 𑀫𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀧𑀺𑀢𑀭𑀸 𑀆𑀘𑀺𑀓𑁆𑀔𑀺𑀢𑀲𑀜𑁆𑀜𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀺𑀦𑀻𑀮𑀓𑀁 𑀏𑀓𑀲𑁆𑀫𑀺𑀁 𑀤𑀡𑁆𑀟𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀤𑀡𑁆𑀟𑀓𑁄𑀝𑀺𑀬𑀁 𑀟𑀁𑀲𑀺𑀢𑁆𑀯𑀸 𑀫𑀺𑀣𑀺𑀮𑀸𑀦𑀕𑀭𑀫𑀢𑁆𑀣𑀓𑁂𑀦 𑀧𑀸𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀤𑁂𑀳𑀭𑀸𑀚𑀸 𑀲𑀩𑁆𑀩𑀲𑁂𑀢𑀘𑀢𑀼𑀲𑀺𑀦𑁆𑀥𑀯𑀬𑀼𑀢𑁆𑀢𑀭𑀣𑀯𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀯𑀺𑀦𑀻𑀮𑀓𑁄 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀯𑀺𑀤𑁂𑀳𑀭𑀜𑁆𑀜𑀸 𑀓𑀺𑀁 𑀦𑀸𑀦𑀸𑀓𑀸𑀭𑀡𑀁, 𑀏𑀲 𑀘𑀢𑀼𑀲𑀺𑀦𑁆𑀥𑀯𑀬𑀼𑀢𑁆𑀢𑀭𑀣𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀕𑀭𑀁 𑀅𑀦𑀼𑀲𑀜𑁆𑀘𑀭𑀢𑀺, 𑀅𑀳𑀁 𑀧𑀦 𑀳𑀁𑀲𑀬𑀼𑀢𑁆𑀢𑀭𑀣𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺. 𑀲𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯.

‘‘𑀏𑀯𑀫𑁂𑀯 ¶ 𑀦𑀽𑀦 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁;

𑀅𑀲𑁆𑀲𑀸 𑀯𑀳𑀦𑁆𑀢𑀺 𑀆𑀚𑀜𑁆𑀜𑀸, 𑀬𑀣𑀸 𑀳𑀁𑀲𑀸 𑀯𑀺𑀦𑀻𑀮𑀓’’𑀦𑁆𑀢𑀺.

𑀢𑀢𑁆𑀣 𑀏𑀯𑀫𑁂𑀯𑀸𑀢𑀺 𑀏𑀯𑀁 𑀏𑀯, 𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑁂 𑀦𑀺𑀧𑀸𑀢𑁄. 𑀏𑀓𑀁𑀲𑁂𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀯𑁂𑀤𑁂𑀳𑀦𑁆𑀢𑀺 𑀯𑀺𑀤𑁂𑀳𑀭𑀝𑁆𑀞𑀲𑀸𑀫𑀺𑀓𑀁. 𑀫𑀺𑀣𑀺𑀮𑀕𑁆𑀕𑀳𑀦𑁆𑀢𑀺 𑀫𑀺𑀣𑀺𑀮𑀕𑁂𑀳𑀁, 𑀫𑀺𑀣𑀺𑀮𑀸𑀬𑀁 𑀖𑀭𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀲𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀚𑀜𑁆𑀜𑀸𑀢𑀺 𑀓𑀸𑀭𑀡𑀸𑀓𑀸𑀭𑀡𑀸𑀚𑀸𑀦𑀦𑀓𑀸. 𑀬𑀣𑀸 𑀳𑀁𑀲𑀸 𑀯𑀺𑀦𑀻𑀮𑀓𑀦𑁆𑀢𑀺 𑀬𑀣𑀸 𑀇𑀫𑁂 𑀳𑀁𑀲𑀸 𑀫𑀁 𑀯𑀺𑀦𑀻𑀮𑀓𑀁 𑀯𑀳𑀦𑁆𑀢𑀺, 𑀏𑀯𑀫𑁂𑀯 𑀯𑀳𑀦𑁆𑀢𑀻𑀢𑀺.

𑀳𑀁𑀲𑀧𑁄𑀢𑀓𑀸 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀇𑀥𑁂𑀯 𑀦𑀁 𑀧𑀸𑀢𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀧𑀺 ‘‘𑀏𑀯𑀁 𑀓𑀢𑁂 𑀧𑀺𑀢𑀸 𑀦𑁄 𑀓𑀺𑀁 𑀯𑀓𑁆𑀔𑀢𑀻’’𑀢𑀺 𑀕𑀭𑀳𑀪𑀬𑁂𑀦 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀢𑁂𑀦 𑀓𑀢𑀓𑀺𑀭𑀺𑀬𑀁 𑀧𑀺𑀢𑀼 𑀆𑀘𑀺𑀓𑁆𑀔𑀺𑀁𑀲𑀼. 𑀅𑀣 𑀦𑀁 𑀧𑀺𑀢𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑀺𑀁 𑀢𑁆𑀯𑀁 𑀫𑀫 𑀧𑀼𑀢𑁆𑀢𑁂𑀳𑀺 𑀅𑀥𑀺𑀓𑀢𑀭𑁄𑀲𑀺, 𑀬𑁄 𑀫𑀫 𑀧𑀼𑀢𑁆𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀭𑀣𑁂 𑀬𑀼𑀢𑁆𑀢𑀲𑀺𑀦𑁆𑀥𑀯𑁂 𑀯𑀺𑀬 𑀓𑀭𑁄𑀲𑀺, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀺. 𑀇𑀫𑀁 𑀞𑀸𑀦𑀁 𑀢𑀯 𑀅𑀕𑁄𑀘𑀭𑁄, 𑀅𑀢𑁆𑀢𑀦𑁄 𑀫𑀸𑀢𑀼 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀸𑀳𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁦.

‘‘𑀯𑀺𑀦𑀻𑀮 𑀤𑀼𑀕𑁆𑀕𑀁 𑀪𑀚𑀲𑀺, 𑀅𑀪𑀽𑀫𑀺𑀁 𑀢𑀸𑀢 𑀲𑁂𑀯𑀲𑀺;

𑀕𑀸𑀫𑀦𑁆𑀢𑀓𑀸𑀦𑀺 𑀲𑁂𑀯𑀲𑁆𑀲𑀼, 𑀏𑀢𑀁 𑀫𑀸𑀢𑀸𑀮𑀬𑀁 𑀢𑀯𑀸’’𑀢𑀺.

𑀢𑀢𑁆𑀣 𑀯𑀺𑀦𑀻𑀮𑀸𑀢𑀺 𑀢𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀤𑀼𑀕𑁆𑀕𑀁 𑀪𑀚𑀲𑀻𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀕𑀺𑀭𑀺𑀤𑀼𑀕𑁆𑀕𑀁 𑀪𑀚𑀲𑀺. 𑀅𑀪𑀽𑀫𑀺𑀁, 𑀢𑀸𑀢, 𑀲𑁂𑀯𑀲𑀻𑀢𑀺, 𑀢𑀸𑀢, 𑀕𑀺𑀭𑀺𑀯𑀺𑀲𑀫𑀁 𑀦𑀸𑀫 𑀢𑀯 𑀅𑀪𑀽𑀫𑀺 ¶ , 𑀢𑀁 𑀲𑁂𑀯𑀲𑀺 𑀉𑀧𑀕𑀘𑁆𑀙𑀲𑀺. 𑀏𑀢𑀁 𑀫𑀸𑀢𑀸𑀮𑀬𑀁 𑀢𑀯𑀸𑀢𑀺 𑀏𑀢𑀁 𑀕𑀸𑀫𑀦𑁆𑀢𑀁 𑀉𑀓𑁆𑀓𑀸𑀭𑀝𑁆𑀞𑀸𑀦𑀁 𑀆𑀫𑀓𑀲𑀼𑀲𑀸𑀦𑀝𑁆𑀞𑀸𑀦𑀜𑁆𑀘 𑀢𑀯 𑀫𑀸𑀢𑀼 𑀆𑀮𑀬𑀁 𑀕𑁂𑀳𑀁 𑀯𑀲𑀦𑀝𑁆𑀞𑀸𑀦𑀁, 𑀢𑀢𑁆𑀣 𑀕𑀘𑁆𑀙𑀸𑀳𑀻𑀢𑀺. 𑀏𑀯𑀁 𑀢𑀁 𑀢𑀚𑁆𑀚𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀦𑀁 𑀫𑀺𑀣𑀺𑀮𑀦𑀕𑀭𑀲𑁆𑀲 𑀉𑀓𑁆𑀓𑀸𑀭𑀪𑀽𑀫𑀺𑀬𑀜𑁆𑀜𑁂𑀯 𑀑𑀢𑀸𑀭𑁂𑀢𑁆𑀯𑀸 𑀏𑀣𑀸’’𑀢𑀺 𑀧𑀼𑀢𑁆𑀢𑁂 𑀆𑀡𑀸𑀧𑁂𑀲𑀺, 𑀢𑁂 𑀢𑀣𑀸 𑀅𑀓𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀺𑀦𑀻𑀮𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀳𑁂𑀲𑀼𑀁, 𑀧𑀺𑀢𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀯𑀺𑀤𑁂𑀳𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀦𑀻𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀤𑀴𑁆𑀳𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀭𑀸𑀚𑁄𑀯𑀸𑀤𑀜𑁆𑀘 𑀲𑀺𑀗𑁆𑀕𑀸𑀮𑀁, 𑀲𑀽𑀓𑀭𑀁 𑀉𑀭𑀕𑀁 𑀪𑀕𑁆𑀕𑀁;

𑀅𑀮𑀻𑀦𑀘𑀺𑀢𑁆𑀢𑀕𑀼𑀡𑀜𑁆𑀘, 𑀲𑀼𑀳𑀦𑀼 𑀫𑁄𑀭𑀯𑀺𑀦𑀻𑀮𑀁.

𑁨. 𑀲𑀦𑁆𑀣𑀯𑀯𑀕𑁆𑀕𑁄

[𑁧𑁬𑁧] 𑁧. 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦 ¶ ¶ 𑀲𑀦𑁆𑀣𑀯𑀁 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀚𑀸𑀢𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀦𑀯𑀓𑀦𑀺𑀧𑀸𑀢𑁂 𑀕𑀺𑀚𑁆𑀛𑀚𑀸𑀢𑀓𑁂 (𑀚𑀸. 𑁧.𑁯.𑁧 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀤𑀼𑀩𑁆𑀩𑀘𑀢𑀸𑀬 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀫𑀢𑁆𑀢𑀳𑀢𑁆𑀣𑀺𑀧𑀸𑀤𑁂𑀳𑀺 𑀲𑀜𑁆𑀘𑀼𑀡𑁆𑀡𑀺𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀇𑀲𑀺𑀲𑀢𑀸𑀦𑀁 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀢𑁂𑀲𑀼 𑀢𑀸𑀧𑀲𑁂𑀲𑀼 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑁄 𑀦𑀸𑀫𑁂𑀓𑁄 𑀢𑀸𑀧𑀲𑁄 ¶ 𑀅𑀳𑁄𑀲𑀺 𑀤𑀼𑀩𑁆𑀩𑀘𑁄 𑀅𑀦𑁄𑀯𑀸𑀤𑀓𑁄. 𑀲𑁄 𑀏𑀓𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑁄𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀆𑀘𑀭𑀺𑀬, 𑀫𑀢𑀫𑀸𑀢𑀺𑀓𑀁 𑀏𑀓𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑁄𑀲𑁂𑀫𑀻’’𑀢𑀺. ‘‘𑀳𑀢𑁆𑀣𑀺𑀦𑁄 𑀦𑀸𑀫 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸 𑀧𑁄𑀲𑀓𑁂𑀬𑁂𑀯 𑀫𑀸𑀭𑁂𑀦𑁆𑀢𑀺, 𑀫𑀸 𑀢𑀁 𑀧𑁄𑀲𑁂𑀳𑀻’’𑀢𑀺. ‘‘𑀢𑁂𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺 𑀆𑀘𑀭𑀺𑀬𑀸’’𑀢𑀺. ‘‘𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺. 𑀲𑁄 𑀢𑁂𑀦 𑀧𑁄𑀲𑀺𑀬𑀫𑀸𑀦𑁄 𑀅𑀧𑀭𑀪𑀸𑀕𑁂 𑀫𑀳𑀸𑀲𑀭𑀻𑀭𑁄 𑀅𑀳𑁄𑀲𑀺.

𑀅𑀣𑁂𑀓𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀇𑀲𑀬𑁄 𑀯𑀦𑀫𑀽𑀮𑀨𑀮𑀸𑀨𑀮𑀢𑁆𑀣𑀸𑀬 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀓𑀢𑀺𑀧𑀸𑀳𑀁 𑀯𑀲𑀺𑀁𑀲𑀼. 𑀳𑀢𑁆𑀣𑀻𑀧𑀺 𑀅𑀕𑁆𑀕𑀤𑀓𑁆𑀔𑀺𑀡𑀯𑀸𑀢𑁂 𑀧𑀪𑀺𑀦𑁆𑀦𑀫𑀤𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀲𑀸𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑀁 𑀔𑀺𑀧𑀺𑀢𑁆𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀮𑀼𑀜𑁆𑀘𑀺𑀢𑁆𑀯𑀸 ‘‘𑀢𑀁 𑀢𑀸𑀧𑀲𑀁 𑀫𑀸𑀭𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀕𑀳𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑁄 𑀢𑀲𑁆𑀲 𑀕𑁄𑀘𑀭𑀁 ¶ 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀼𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀧𑀓𑀢𑀺𑀲𑀜𑁆𑀜𑀸𑀬𑁂𑀯𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑁄 𑀳𑀢𑁆𑀣𑀻 𑀕𑀳𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀻𑀲𑀁 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀓𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀲𑁂𑀲𑀢𑀸𑀧𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ¶ . 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀸𑀧𑀼𑀭𑀺𑀲𑁂𑀳𑀺 𑀦𑀸𑀫 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀦 𑀓𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁨𑁧.

‘‘𑀦 𑀲𑀦𑁆𑀣𑀯𑀁 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸, 𑀅𑀭𑀺𑀬𑁄 𑀅𑀦𑀭𑀺𑀬𑁂𑀦 𑀧𑀚𑀸𑀦𑀫𑀢𑁆𑀣𑀁;

𑀘𑀺𑀭𑀸𑀦𑀼𑀯𑀼𑀢𑁆𑀣𑁄𑀧𑀺 𑀓𑀭𑁄𑀢𑀺 𑀧𑀸𑀧𑀁, 𑀕𑀚𑁄 𑀬𑀣𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀁.

𑁨𑁨.

‘‘𑀬𑀁 𑀢𑁆𑀯𑁂𑀯 𑀚𑀜𑁆𑀜𑀸 𑀲𑀤𑀺𑀲𑁄 𑀫𑀫𑀦𑁆𑀢𑀺, 𑀲𑀻𑀮𑁂𑀦 𑀧𑀜𑁆𑀜𑀸𑀬 𑀲𑀼𑀢𑁂𑀦 𑀘𑀸𑀧𑀺;

𑀢𑁂𑀦𑁂𑀯 𑀫𑁂𑀢𑁆𑀢𑀺𑀁 𑀓𑀬𑀺𑀭𑀸𑀣 𑀲𑀤𑁆𑀥𑀺𑀁, 𑀲𑀼𑀔𑁄 𑀳𑀯𑁂 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄’’𑀢𑀺.

𑀢𑀢𑁆𑀣 𑀦 𑀲𑀦𑁆𑀣𑀯𑀁 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸𑀢𑀺 𑀓𑀼𑀘𑁆𑀙𑀺𑀢𑁂𑀦 𑀓𑁄𑀥𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀢𑀡𑁆𑀳𑀸𑀲𑀦𑁆𑀣𑀯𑀁 𑀯𑀸 𑀫𑀺𑀢𑁆𑀢𑀲𑀦𑁆𑀣𑀯𑀁 𑀯𑀸 𑀦 𑀓𑀬𑀺𑀭𑀸𑀣. 𑀅𑀭𑀺𑀬𑁄 𑀅𑀦𑀭𑀺𑀬𑁂𑀦 𑀧𑀚𑀸𑀦𑀫𑀢𑁆𑀣𑀦𑁆𑀢𑀺 ¶ 𑀅𑀭𑀺𑀬𑁄𑀢𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀸 𑀆𑀘𑀸𑀭𑀅𑀭𑀺𑀬𑁄 𑀮𑀺𑀗𑁆𑀕𑀅𑀭𑀺𑀬𑁄 𑀤𑀲𑁆𑀲𑀦𑀅𑀭𑀺𑀬𑁄 𑀧𑀝𑀺𑀯𑁂𑀥𑀅𑀭𑀺𑀬𑁄𑀢𑀺. 𑀢𑁂𑀲𑀼 𑀆𑀘𑀸𑀭𑀅𑀭𑀺𑀬𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀧𑀚𑀸𑀦𑀫𑀢𑁆𑀣𑀁 𑀅𑀢𑁆𑀣𑀁 𑀧𑀚𑀸𑀦𑀦𑁆𑀢𑁄 𑀅𑀢𑁆𑀣𑀸𑀦𑀢𑁆𑀣𑀓𑀼𑀲𑀮𑁄 𑀆𑀘𑀸𑀭𑁂 𑀞𑀺𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀅𑀦𑀭𑀺𑀬𑁂𑀦 𑀦𑀺𑀮𑁆𑀮𑀚𑁆𑀚𑁂𑀦 𑀤𑀼𑀲𑁆𑀲𑀻𑀮𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀸? 𑀘𑀺𑀭𑀸𑀦𑀼𑀯𑀼𑀢𑁆𑀣𑁄𑀧𑀺 𑀓𑀭𑁄𑀢𑀺 𑀧𑀸𑀧𑀦𑁆𑀢𑀺, 𑀬𑀲𑁆𑀫𑀸 𑀅𑀦𑀭𑀺𑀬𑁄 𑀘𑀺𑀭𑀁 𑀏𑀓𑀢𑁄 𑀅𑀦𑀼𑀯𑀼𑀢𑁆𑀣𑁄𑀧𑀺 𑀢𑀁 𑀏𑀓𑀢𑁄 𑀦𑀺𑀯𑀸𑀲𑀁 𑀅𑀕𑀡𑁂𑀢𑁆𑀯𑀸 𑀓𑀭𑁄𑀢𑀺 𑀧𑀸𑀧𑀁 𑀮𑀸𑀫𑀓𑀓𑀫𑁆𑀫𑀁 𑀓𑀭𑁄𑀢𑀺𑀬𑁂𑀯. 𑀬𑀣𑀸 𑀓𑀺𑀁? 𑀕𑀚𑁄 𑀬𑀣𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀦𑁆𑀢𑀺, 𑀬𑀣𑀸 𑀲𑁄 𑀕𑀚𑁄 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀁 𑀫𑀸𑀭𑁂𑀦𑁆𑀢𑁄 𑀧𑀸𑀧𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀬𑀁 𑀢𑁆𑀯𑁂𑀯 𑀚𑀜𑁆𑀜𑀸 𑀲𑀤𑀺𑀲𑁄 𑀫𑀫𑀦𑁆𑀢𑀺𑀆𑀤𑀻𑀲𑀼 𑀬𑀁 𑀢𑁆𑀯𑁂𑀯 𑀧𑀼𑀕𑁆𑀕𑀮𑀁 ‘‘𑀅𑀬𑀁 𑀫𑀫 𑀲𑀻𑀮𑀸𑀤𑀻𑀳𑀺 𑀲𑀤𑀺𑀲𑁄’’𑀢𑀺 𑀚𑀸𑀦𑁂𑀬𑁆𑀬, 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀬𑀺𑀭𑀸𑀣, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀫𑁄 𑀲𑀼𑀔𑀸𑀯𑀳𑁄𑀢𑀺.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀦𑁄𑀯𑀸𑀤𑀓𑁂𑀦 𑀦𑀸𑀫 𑀦 𑀪𑀯𑀺𑀢𑀩𑁆𑀩𑀁, 𑀲𑀼𑀲𑀺𑀓𑁆𑀔𑀺𑀢𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀲𑀺𑀕𑀡𑀁 𑀑𑀯𑀤𑀺𑀢𑁆𑀯𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑁄 𑀅𑀬𑀁 𑀤𑀼𑀩𑁆𑀩𑀘𑁄 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁬𑁨] 𑁨. 𑀲𑀦𑁆𑀣𑀯𑀚𑀸𑀢𑀓𑀯𑀡𑁆𑀡𑀦𑀸

𑀦 ¶ 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀧𑀸𑀧𑀺𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀕𑁆𑀕𑀺𑀚𑀼𑀳𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀦𑀗𑁆𑀕𑀼𑀝𑁆𑀞𑀚𑀸𑀢𑀓𑁂 (𑀚𑀸. 𑁧.𑁧.𑁧𑁪𑁪 𑀆𑀤𑀬𑁄) 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀪𑀺𑀓𑁆𑀔𑀽 𑀢𑁂 𑀅𑀕𑁆𑀕𑀺𑀁 𑀚𑀼𑀳𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀚𑀝𑀺𑀮𑀸 𑀦𑀸𑀦𑀧𑁆𑀧𑀓𑀸𑀭𑀁 𑀫𑀺𑀘𑁆𑀙𑀸𑀢𑀧𑀁 𑀓𑀭𑁄𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀯𑀼𑀟𑁆𑀠𑀻’’𑀢𑀺 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. ‘‘𑀦, 𑀪𑀺𑀓𑁆𑀔𑀯𑁂, 𑀏𑀢𑁆𑀣𑀓𑀸𑀘𑀺 𑀯𑀼𑀟𑁆𑀠𑀺 𑀦𑀸𑀫 𑀅𑀢𑁆𑀣𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀕𑁆𑀕𑀺𑀚𑀼𑀳𑀦𑁂 𑀯𑀼𑀟𑁆𑀠𑀺 𑀅𑀢𑁆𑀣𑀻𑀢𑀺 𑀲𑀜𑁆𑀜𑀸𑀬 𑀘𑀺𑀭𑀁 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀅𑀯𑀼𑀟𑁆𑀠𑀺𑀫𑁂𑀯 𑀤𑀺𑀲𑁆𑀯𑀸 ¶ 𑀅𑀕𑁆𑀕𑀺𑀁 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀸𑀔𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀢𑀲𑁆𑀲 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑁂 𑀞𑀺𑀢𑀁 𑀆𑀳𑀁𑀲𑀼 𑁋 ‘‘𑀓𑀺𑀁, 𑀢𑀸𑀢, 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀺𑀲𑁆𑀲𑀲𑀻’’𑀢𑀺. 𑀲𑁄 ‘‘𑀦 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀅𑀭𑀜𑁆𑀜𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀺𑀫𑀦𑁆𑀢𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀧𑁆𑀧𑀺𑀦𑀸 𑀧𑀸𑀬𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀇𑀫𑀁 𑀧𑀸𑀬𑀸𑀲𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀬𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀸𑀬𑀸𑀲𑀁 ¶ 𑀆𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 ‘‘𑀅𑀕𑁆𑀕𑀺𑀁 𑀢𑀸𑀯 𑀪𑀯𑀦𑁆𑀢𑀁 𑀲𑀧𑁆𑀧𑀺𑀬𑀼𑀢𑁆𑀢𑀁 𑀧𑀸𑀬𑀸𑀲𑀁 𑀧𑀸𑀬𑁂𑀫𑀻’’𑀢𑀺 𑀧𑀸𑀬𑀸𑀲𑀁 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺. 𑀩𑀳𑀼𑀲𑀺𑀦𑁂𑀳𑁂 𑀧𑀸𑀬𑀸𑀲𑁂 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯 𑀅𑀕𑁆𑀕𑀺 𑀚𑀮𑀺𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀢𑀸𑀳𑀺 𑀅𑀘𑁆𑀘𑀻𑀳𑀺 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀪𑀻𑀢𑀢𑀲𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀩𑀳𑀺 𑀞𑀢𑁆𑀯𑀸 ‘‘𑀓𑀸𑀧𑀼𑀭𑀺𑀲𑁂𑀳𑀺 𑀦𑀸𑀫 𑀲𑀦𑁆𑀣𑀯𑁄 𑀦 𑀓𑀸𑀢𑀩𑁆𑀩𑁄, 𑀇𑀤𑀸𑀦𑀺 𑀫𑁂 𑀇𑀫𑀺𑀦𑀸 𑀅𑀕𑁆𑀕𑀺𑀦𑀸 𑀓𑀺𑀘𑁆𑀙𑁂𑀦 𑀓𑀢𑀸 𑀧𑀡𑁆𑀡𑀲𑀸𑀮𑀸 𑀛𑀸𑀧𑀺𑀢𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁩.

‘‘𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀧𑀸𑀧𑀺𑀬𑁄, 𑀬𑁄 𑀲𑀦𑁆𑀣𑀯𑁄 𑀓𑀸𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀲𑀦𑁆𑀢𑀧𑁆𑀧𑀺𑀢𑁄 𑀲𑀧𑁆𑀧𑀺𑀦𑀸 𑀧𑀸𑀬𑀲𑁂𑀦, 𑀓𑀺𑀘𑁆𑀙𑀸𑀓𑀢𑀁 𑀧𑀡𑁆𑀡𑀓𑀼𑀝𑀺𑀁 𑀅𑀤𑀬𑁆𑀳𑀻’’𑀢𑀺.

𑀢𑀢𑁆𑀣 𑀦 𑀲𑀦𑁆𑀣𑀯𑀲𑁆𑀫𑀸𑀢𑀺 𑀢𑀡𑁆𑀳𑀸𑀲𑀦𑁆𑀣𑀯𑀸𑀧𑀺 𑀘 𑀫𑀺𑀢𑁆𑀢𑀲𑀦𑁆𑀣𑀯𑀸𑀧𑀺 𑀘𑀸𑀢𑀺 𑀤𑀼𑀯𑀺𑀥𑀸𑀧𑀺 𑀏𑀢𑀲𑁆𑀫𑀸 𑀲𑀦𑁆𑀣𑀯𑀸 𑀧𑀭𑀁 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀧𑀸𑀧𑀢𑀭𑀁 𑀦𑀢𑁆𑀣𑀺, 𑀮𑀸𑀫𑀓𑀢𑀭𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑁄 𑀲𑀦𑁆𑀣𑀯𑁄 𑀓𑀸𑀧𑀼𑀭𑀺𑀲𑁂𑀦𑀸𑀢𑀺 𑀬𑁄 𑀧𑀸𑀧𑀓𑁂𑀦 𑀓𑀸𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀤𑀼𑀯𑀺𑀥𑁄𑀧𑀺 𑀲𑀦𑁆𑀣𑀯𑁄, 𑀢𑀢𑁄 𑀧𑀸𑀧𑀢𑀭𑀁 𑀅𑀜𑁆𑀜𑀁 𑀦𑀢𑁆𑀣𑀺. 𑀓𑀲𑁆𑀫𑀸? 𑀲𑀦𑁆𑀢𑀧𑁆𑀧𑀺𑀢𑁄 ¶ …𑀧𑁂…𑀅𑀤𑀬𑁆𑀳𑀻𑀢𑀺, 𑀬𑀲𑁆𑀫𑀸 𑀲𑀧𑁆𑀧𑀺𑀦𑀸 𑀘 𑀧𑀸𑀬𑀸𑀲𑁂𑀦 𑀘 𑀲𑀦𑁆𑀢𑀧𑁆𑀧𑀺𑀢𑁄𑀧𑀺 𑀅𑀬𑀁 𑀅𑀕𑁆𑀕𑀺 𑀫𑀬𑀸 𑀓𑀺𑀘𑁆𑀙𑁂𑀦 𑀓𑀢𑀁 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀲𑀻𑀢𑀺 𑀅𑀢𑁆𑀣𑁄.

𑀲𑁄 𑀏𑀯𑀁 𑀯𑀢𑁆𑀯𑀸 ‘‘𑀦 𑀫𑁂 𑀢𑀬𑀸 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑀸 𑀅𑀢𑁆𑀣𑁄’’𑀢𑀺 𑀢𑀁 𑀅𑀕𑁆𑀕𑀺𑀁 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀸𑀔𑀸𑀳𑀺 𑀧𑁄𑀣𑁂𑀢𑁆𑀯𑀸 𑀅𑀦𑁆𑀢𑁄𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀁 𑀲𑀸𑀫𑀫𑀺𑀕𑀺𑀁 𑀲𑀻𑀳𑀲𑁆𑀲 𑀘 𑀩𑁆𑀬𑀕𑁆𑀖𑀲𑁆𑀲 𑀘 𑀤𑀻𑀧𑀺𑀦𑁄 𑀘 𑀫𑀼𑀔𑀁 𑀮𑁂𑀳𑀦𑁆𑀢𑀺𑀁 𑀤𑀺𑀲𑁆𑀯𑀸 ¶ ‘‘𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀸 𑀧𑀭𑀁 𑀲𑁂𑀬𑁆𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁪.

‘‘𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀲𑁂𑀬𑁆𑀬𑁄, 𑀬𑁄 𑀲𑀦𑁆𑀣𑀯𑁄 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀲𑀻𑀳𑀲𑁆𑀲 ¶ 𑀩𑁆𑀬𑀕𑁆𑀖𑀲𑁆𑀲 𑀘 𑀤𑀻𑀧𑀺𑀦𑁄 𑀘, 𑀲𑀸𑀫𑀸 𑀫𑀼𑀔𑀁 𑀮𑁂𑀳𑀢𑀺 𑀲𑀦𑁆𑀣𑀯𑁂𑀦𑀸’’𑀢𑀺.

𑀢𑀢𑁆𑀣 𑀲𑀸𑀫𑀸 𑀫𑀼𑀔𑀁 𑀮𑁂𑀳𑀢𑀺 𑀲𑀦𑁆𑀣𑀯𑁂𑀦𑀸𑀢𑀺 𑀲𑀸𑀫𑀸 𑀦𑀸𑀫 𑀫𑀺𑀕𑀻 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀲𑀦𑁆𑀣𑀯𑁂𑀦 𑀲𑀺𑀦𑁂𑀳𑁂𑀦 𑀫𑀼𑀔𑀁 𑀮𑁂𑀳𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁄𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑁂𑀦 𑀲𑀫𑀬𑁂𑀦 𑀢𑀸𑀧𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀦𑁆𑀣𑀯𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁬𑁩] 𑁩. 𑀲𑀼𑀲𑀻𑀫𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯𑀻𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀦𑁆𑀤𑀓𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀓𑀤𑀸𑀘𑀺 𑀏𑀓𑀫𑁂𑀯 𑀓𑀼𑀮𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀓𑀤𑀸𑀘𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀤𑁂𑀢𑀺, 𑀓𑀤𑀸𑀘𑀺 𑀕𑀡𑀩𑀦𑁆𑀥𑀦𑁂𑀦 𑀩𑀳𑀽 𑀏𑀓𑀢𑁄 𑀳𑀼𑀢𑁆𑀯𑀸 𑀤𑁂𑀦𑁆𑀢𑀺, 𑀓𑀤𑀸𑀘𑀺 𑀯𑀻𑀣𑀺𑀲𑀪𑀸𑀕𑁂𑀦, 𑀓𑀤𑀸𑀘𑀺 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀏𑀓𑀘𑁆𑀘𑁂 ‘‘𑀇𑀫𑀁 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼, 𑀏𑀓𑀘𑁆𑀘𑁂 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑀸𑀬 𑀯𑀢𑁆𑀢𑀫𑀸𑀦𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀜𑁆𑀜𑁂𑀯 ¶ , 𑀩𑀼𑀤𑁆𑀥𑀲𑀸𑀯𑀓𑁂𑀳𑀺 ‘‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯𑀸’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀩𑀳𑀼𑀮𑀁 𑀓𑀭𑀺𑀲𑀸𑀫𑀸’’𑀢𑀺 𑀲𑀫𑁆𑀩𑀳𑀼𑀮𑀸𑀬 𑀓𑀣𑀸𑀬 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀸𑀬𑁂𑀯 𑀩𑀳𑀼𑀓𑀸 𑀚𑀸𑀢𑀸, 𑀢𑁂𑀲𑀜𑁆𑀜𑁂𑀯 𑀓𑀣𑀸 𑀧𑀢𑀺𑀝𑁆𑀞𑀸𑀲𑀺 ¶ . 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀩𑀼𑀤𑁆𑀥𑀸𑀦𑀁 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀦𑀸𑀕𑀭𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀅𑀤𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀫𑀳𑀸𑀚𑀦𑀁 𑀫𑀕𑁆𑀕𑀨𑀮𑁂𑀳𑀺 ¶ 𑀧𑀩𑁄𑀥𑁂𑀢𑁆𑀯𑀸 𑀚𑁂𑀢𑀯𑀦𑀯𑀺𑀳𑀸𑀭𑀫𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺.

𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀩𑀼𑀤𑁆𑀥𑀸𑀦𑀁 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀸𑀬 𑀯𑀸𑀬𑀫𑀦𑁆𑀢𑀸𑀧𑀺 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑀁 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀸𑀤𑀫𑀽𑀮𑀁 𑀆𑀕𑀢𑀁, 𑀅𑀳𑁄 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀫𑀳𑀦𑁆𑀢’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀏𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀸𑀬 𑀯𑀸𑀬𑀫𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 𑀯𑀸𑀬𑀫𑀺𑀁𑀲𑀼, 𑀲𑁄 𑀧𑀦 𑀧𑀭𑀺𑀓𑁆𑀔𑀸𑀭𑁄 𑀲𑀩𑁆𑀩𑀓𑀸𑀮𑁂𑀧𑀺 𑀫𑀫𑁂𑀯 𑀧𑀸𑀤𑀫𑀽𑀮𑀁 𑀆𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀲𑀼𑀲𑀻𑀫𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀦 𑀥𑀭𑀫𑀸𑀦𑀓𑀸𑀮𑁂 𑀭𑀜𑁆𑀜𑁄 𑀳𑀢𑁆𑀣𑀺𑀫𑀗𑁆𑀕𑀮𑀓𑀸𑀭𑀓𑁄 𑀅𑀳𑁄𑀲𑀺. 𑀳𑀢𑁆𑀣𑀻𑀦𑀁 𑀫𑀗𑁆𑀕𑀮𑀓𑀭𑀡𑀝𑁆𑀞𑀸𑀦𑁂 𑀆𑀪𑀢𑀉𑀧𑀓𑀭𑀡𑀪𑀡𑁆𑀟𑀜𑁆𑀘 𑀳𑀢𑁆𑀣𑀸𑀮𑀗𑁆𑀓𑀸𑀭𑀜𑁆𑀘 𑀲𑀩𑁆𑀩𑀁 𑀲𑁄𑀬𑁂𑀯 𑀅𑀮𑀢𑁆𑀣. 𑀏𑀯𑀫𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀫𑀗𑁆𑀕𑀮𑁂 𑀓𑁄𑀝𑀺𑀫𑀢𑁆𑀢𑀁 𑀥𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀢𑀲𑁆𑀫𑀺𑀁 𑀓𑀸𑀮𑁂 𑀳𑀢𑁆𑀣𑀺𑀫𑀗𑁆𑀕𑀮𑀙𑀡𑁄 𑀲𑀫𑁆𑀧𑀸𑀧𑀼𑀡𑀺. 𑀲𑁂𑀲𑀸 𑀩𑁆𑀭𑀸𑀳𑁆𑀫𑀡𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀳𑀢𑁆𑀣𑀺𑀫𑀗𑁆𑀕𑀮𑀙𑀡𑁄 𑀲𑀫𑁆𑀧𑀢𑁆𑀢𑁄, 𑀫𑀗𑁆𑀕𑀮𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀦 𑀧𑀼𑀢𑁆𑀢𑁄 𑀅𑀢𑀺𑀤𑀳𑀭𑁄, 𑀦𑁂𑀯 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀢𑀺, 𑀦 𑀳𑀢𑁆𑀣𑀺𑀲𑀼𑀢𑁆𑀢𑀁, 𑀫𑀬𑀁 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀸𑀢𑀼𑀁 𑀅𑀤𑀢𑁆𑀯𑀸 ‘‘𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀢𑁆𑀯𑀸 𑀫𑀬𑀁 𑀥𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀯𑀺𑀘𑀭𑀦𑁆𑀢𑀺. 𑀅𑀣 ‘‘𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 ¶ 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀳𑀢𑁆𑀣𑀺𑀫𑀗𑁆𑀕𑀮𑀓𑀭𑀡𑀁 𑀦𑀸𑀫 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀅𑀫𑁆𑀳𑀸𑀓𑀁 𑀯𑀁𑀲𑁄, 𑀯𑀁𑀲𑁄 𑀘 𑀦𑁄 𑀑𑀲𑀓𑁆𑀓𑀺𑀲𑁆𑀲𑀢𑀺, 𑀥𑀦𑀸 𑀘 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀲𑁄𑀘𑀫𑀸𑀦𑀸 𑀧𑀭𑁄𑀤𑀺.

𑀩𑁄𑀥𑀺𑀲𑀢𑁆𑀢𑁄 ¶ ¶ ‘‘𑀓𑀲𑁆𑀫𑀸, 𑀅𑀫𑁆𑀫, 𑀭𑁄𑀤𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀦𑀦𑀼, 𑀅𑀫𑁆𑀫, 𑀅𑀳𑀁 𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑀸𑀢, 𑀢𑁆𑀯𑀁 𑀦𑁂𑀯 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀲𑀺, 𑀦 𑀳𑀢𑁆𑀣𑀺𑀲𑀼𑀢𑁆𑀢𑀁, 𑀓𑀣𑀁 𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀲𑀻’’𑀢𑀺. ‘‘𑀅𑀫𑁆𑀫, 𑀓𑀤𑀸 𑀧𑀦 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺? ‘‘𑀇𑀢𑁄 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂, 𑀢𑀸𑀢𑀸’’𑀢𑀺. ‘‘𑀅𑀫𑁆𑀫, 𑀢𑀬𑁄 𑀧𑀦 𑀯𑁂𑀤𑁂 𑀧𑀕𑀼𑀡𑁂 𑀓𑀢𑁆𑀯𑀸 𑀳𑀢𑁆𑀣𑀺𑀲𑀼𑀢𑁆𑀢𑀁 𑀚𑀸𑀦𑀦𑀓𑀆𑀘𑀭𑀺𑀬𑁄 𑀓𑀳𑀁 𑀯𑀲𑀢𑀻’’𑀢𑀺? ‘‘𑀢𑀸𑀢, 𑀏𑀯𑀭𑀽𑀧𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀇𑀢𑁄 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀯𑀲𑀢𑀻’’𑀢𑀺. ‘‘𑀅𑀫𑁆𑀫, 𑀅𑀫𑁆𑀳𑀸𑀓𑀁 𑀯𑀁𑀲𑀁 𑀦 𑀦𑀸𑀲𑁂𑀲𑁆𑀲𑀸𑀫𑀺, 𑀅𑀳𑀁 𑀲𑁆𑀯𑁂 𑀏𑀓𑀤𑀺𑀯𑀲𑁂𑀦𑁂𑀯 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀏𑀓𑀭𑀢𑁆𑀢𑁂𑀦𑁂𑀯 𑀢𑀬𑁄 𑀯𑁂𑀤𑁂 𑀘 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀫𑀸 𑀭𑁄𑀤𑀻’’𑀢𑀺 𑀫𑀸𑀢𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀦𑀁 𑀆𑀘𑀭𑀺𑀬𑁄 ‘‘𑀓𑀼𑀢𑁄 𑀆𑀕𑀢𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀢𑁄, 𑀆𑀘𑀭𑀺𑀬𑀸’’𑀢𑀺. ‘‘𑀓𑁂𑀦𑀢𑁆𑀣𑁂𑀦𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀘 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀉𑀕𑁆𑀕𑀡𑁆𑀳𑀦𑀢𑁆𑀣𑀸𑀬𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀉𑀕𑁆𑀕𑀡𑁆𑀳𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀘𑀭𑀺𑀬, 𑀫𑀬𑁆𑀳𑀁 𑀓𑀫𑁆𑀫𑀁 𑀅𑀘𑁆𑀘𑀸𑀬𑀺𑀓’’𑀦𑁆𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀳𑀁 𑀏𑀓𑀤𑀺𑀯𑀲𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀁 𑀆𑀕𑀢𑁄, 𑀅𑀚𑁆𑀚𑁂𑀯𑁂𑀓𑀭𑀢𑁆𑀢𑀺𑀁 𑀫𑀬𑁆𑀳𑀫𑁂𑀯 𑀑𑀓𑀸𑀲𑀁 𑀓𑀭𑁄𑀣, 𑀇𑀢𑁄 𑀢𑀢𑀺𑀬𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀏𑀓𑁂𑀦𑁂𑀯 𑀉𑀤𑁆𑀤𑁂𑀲𑀫𑀕𑁆𑀕𑁂𑀦 𑀲𑀩𑁆𑀩𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀘𑀭𑀺𑀬𑀁 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀪𑀼𑀢𑁆𑀢𑀓𑀸𑀮𑁂 𑀲𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 ¶ 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀭𑀺𑀬𑀢𑁆𑀢𑀺𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀢𑀬𑁄 𑀯𑁂𑀤𑁂 𑀘 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀦𑀺𑀝𑁆𑀞𑀧𑁂𑀢𑁆𑀯𑀸 ‘‘𑀅𑀜𑁆𑀜𑁄𑀧𑀺 𑀅𑀢𑁆𑀣𑀺, 𑀆𑀘𑀭𑀺𑀬𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀢𑀸𑀢, 𑀲𑀩𑁆𑀩𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀘𑀭𑀺𑀬, 𑀇𑀫𑀲𑁆𑀫𑀺𑀁 𑀕𑀦𑁆𑀣𑁂 𑀏𑀢𑁆𑀢𑀓𑀁 𑀧𑀤𑀧𑀘𑁆𑀘𑀸𑀪𑀝𑁆𑀞𑀁, 𑀏𑀢𑁆𑀢𑀓𑀁 𑀲𑀚𑁆𑀛𑀸𑀬𑀲𑀫𑁆𑀫𑁄𑀳𑀝𑁆𑀞𑀸𑀦𑀁, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀏𑀯𑀁 𑀯𑀸𑀘𑁂𑀬𑁆𑀬𑀸𑀣𑀸’’𑀢𑀺 𑀆𑀘𑀭𑀺𑀬𑀲𑁆𑀲 𑀲𑀺𑀧𑁆𑀧𑀁 𑀲𑁄𑀥𑁂𑀢𑁆𑀯𑀸 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀉𑀕𑁆𑀕𑀳𑀺𑀢𑀁 𑀢𑁂, 𑀢𑀸𑀢, 𑀲𑀺𑀧𑁆𑀧’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀅𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀫𑀸𑀢𑀭𑀁 𑀧𑀭𑀺𑀢𑁄𑀲𑁂𑀲𑀺.

𑀧𑀼𑀦𑀤𑀺𑀯𑀲𑁂 ¶ 𑀳𑀢𑁆𑀣𑀺𑀫𑀗𑁆𑀕𑀮𑀙𑀡𑁄 𑀧𑀝𑀺𑀬𑀸𑀤𑀺𑀬𑀺𑀢𑁆𑀣. 𑀲𑀢𑀫𑀢𑁆𑀢𑁂 𑀳𑀢𑁆𑀣𑀺𑀲𑁄𑀡𑁆𑀟𑀸𑀮𑀗𑁆𑀓𑀸𑀭𑁂 𑀘 𑀲𑀼𑀯𑀡𑁆𑀡𑀤𑁆𑀥𑀚𑁂 𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑁂 𑀓𑀢𑁆𑀯𑀸 𑀞𑀧𑁂𑀲𑀼𑀁, 𑀭𑀸𑀚𑀗𑁆𑀕𑀡𑀁 𑀅𑀮𑀗𑁆𑀓𑀭𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 ‘‘𑀫𑀬𑀁 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫, 𑀫𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀅𑀝𑁆𑀞𑀁𑀲𑀼. 𑀲𑀼𑀲𑀻𑀫𑁄𑀧𑀺 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀉𑀧𑀓𑀭𑀡𑀪𑀡𑁆𑀟𑀁 𑀕𑀸𑀳𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀅𑀮𑀗𑁆𑀓𑀢𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀧𑀼𑀭𑀓𑁆𑀔𑀢𑀧𑀭𑀺𑀯𑀸𑀭𑀺𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 ¶ 𑀯𑀁𑀲𑀜𑁆𑀘 𑀅𑀢𑁆𑀢𑀦𑁄 𑀯𑀁𑀲𑀜𑁆𑀘 𑀦𑀸𑀲𑁂𑀢𑁆𑀯𑀸 ‘𑀅𑀜𑁆𑀜𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀸𑀭𑁂𑀢𑁆𑀯𑀸 𑀳𑀢𑁆𑀣𑀸𑀮𑀗𑁆𑀓𑀸𑀭𑀜𑁆𑀘 𑀉𑀧𑀓𑀭𑀡𑀸𑀦𑀺 𑀘 𑀢𑁂𑀲𑀁 𑀤𑀲𑁆𑀲𑀸𑀫𑀸’𑀢𑀺 𑀅𑀯𑀘𑀼𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁫.

‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯𑀻𑀫𑁂, 𑀧𑀭𑁄𑀲𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀸;

𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀲𑀼𑀲𑀻𑀫 𑀩𑁆𑀭𑀽𑀲𑀺, 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦’’𑀦𑁆𑀢𑀺.

𑀢𑀢𑁆𑀣 𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀲𑀼𑀲𑀻𑀫 𑀩𑁆𑀭𑀽𑀲𑀻𑀢𑀺 𑀢𑁂 𑀏𑀢𑁂 𑀢𑀯 𑀲𑀦𑁆𑀢𑀓𑁂 ‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸’’𑀢𑀺 𑀏𑀯𑀁 𑀕𑀢𑁂 𑀧𑀭𑁄𑀲𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂 ¶ 𑀳𑀢𑁆𑀣𑀻 𑀅𑀜𑁆𑀜𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀫𑀻𑀢𑀺 𑀲𑀘𑁆𑀘𑀁 𑀓𑀺𑀭, 𑀪𑁄 𑀲𑀼𑀲𑀻𑀫, 𑀏𑀯𑀁 𑀩𑁆𑀭𑀽𑀲𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀜𑁆𑀘 𑀅𑀢𑁆𑀢𑀦𑁄 𑀘 𑀯𑀁𑀲𑁂 𑀧𑀺𑀢𑀼𑀧𑀺𑀢𑀸𑀫𑀳𑀸𑀦𑀁 𑀆𑀘𑀺𑀡𑁆𑀡𑀁 𑀲𑀭𑀦𑁆𑀢𑁄𑀬𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀬𑀸𑀯 𑀲𑀢𑁆𑀢𑀫𑀓𑀼𑀮𑀧𑀭𑀺𑀯𑀝𑁆𑀝𑀸 𑀢𑀼𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁 𑀅𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸 𑀘 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀺, 𑀲𑁄 𑀢𑁆𑀯𑀁 𑀏𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀅𑀫𑁆𑀳𑀸𑀓𑀜𑁆𑀘 𑀅𑀢𑁆𑀢𑀦𑁄 𑀘 𑀯𑀁𑀲𑀁 𑀦𑀸𑀲𑁂𑀢𑁆𑀯𑀸 𑀲𑀘𑁆𑀘𑀁 𑀓𑀺𑀭 𑀏𑀯𑀁 𑀩𑁆𑀭𑀽𑀲𑀻𑀢𑀺.

𑀲𑀼𑀲𑀻𑀫𑁄 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁬.

‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀫𑀫𑀻𑀫𑁂, 𑀧𑀭𑁄𑀲𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀸;

𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀯𑀤𑀸𑀫𑀺 𑀫𑀸𑀡𑀯, 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦’’𑀦𑁆𑀢𑀺.

𑀢𑀢𑁆𑀣 ¶ 𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀢𑁂 𑀏𑀢𑁂 𑀳𑀢𑁆𑀣𑀻 𑀅𑀜𑁆𑀜𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀫𑀻𑀢𑀺 𑀲𑀘𑁆𑀘𑀫𑁂𑀯 𑀫𑀸𑀡𑀯 𑀯𑀤𑀸𑀫𑀺, 𑀦𑁂𑀯 𑀳𑀢𑁆𑀣𑀻 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁 𑀓𑀺𑀭𑀺𑀬𑀁 𑀅𑀦𑀼𑀲𑁆𑀲𑀭𑀸𑀫𑀺𑀬𑁂𑀯, 𑀦𑁄 𑀦𑀸𑀦𑀼𑀲𑁆𑀲𑀭𑀸𑀫𑀺, 𑀅𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁 𑀳𑀢𑁆𑀣𑀺𑀫𑀗𑁆𑀕𑀮𑀁 𑀢𑀼𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸 𑀓𑀭𑁄𑀦𑁆𑀢𑀻𑀢𑀺 𑀧𑀦 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀏𑀯𑀁 𑀯𑀤𑀸𑀫𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀜𑁆𑀘 𑀅𑀢𑁆𑀢𑀦𑁄 𑀘 𑀯𑀁𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀬𑁂𑀯 𑀓𑀲𑁆𑀫𑀸 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀸𑀭𑀸𑀧𑁂𑀣𑀸’’𑀢𑀺. ‘‘𑀢𑁆𑀯𑀁 𑀓𑀺𑀭, 𑀢𑀸𑀢, 𑀢𑀬𑁄 𑀯𑁂𑀤𑁂 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀦 𑀚𑀸𑀦𑀸𑀲𑀻’’𑀢𑀺 𑀫𑀬𑁆𑀳𑀁 𑀆𑀭𑁄𑀘𑁂𑀲𑀼𑀁, 𑀢𑁂𑀦𑀸𑀳𑀁 𑀅𑀜𑁆𑀜𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀸𑀭𑀸𑀧𑁂𑀫𑀻𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀏𑀢𑁆𑀢𑀓𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀓𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀻𑀲𑀼 𑀯𑁂𑀤𑁂𑀲𑀼 𑀯𑀸 𑀳𑀢𑁆𑀣𑀺𑀲𑀼𑀢𑁆𑀢𑁂𑀲𑀼 𑀯𑀸 𑀏𑀓𑀤𑁂𑀲𑀫𑁆𑀧𑀺 𑀬𑀤𑀺 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀢𑁄 𑀅𑀢𑁆𑀣𑀺, 𑀉𑀝𑁆𑀞𑀳𑀢𑀼, 𑀢𑀬𑁄𑀧𑀺 𑀯𑁂𑀤𑁂 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀲𑀤𑁆𑀥𑀺𑀁 𑀳𑀢𑁆𑀣𑀺𑀫𑀗𑁆𑀕𑀮𑀓𑀭𑀡𑁂𑀦 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂𑀧𑀺 𑀚𑀸𑀦𑀦𑁆𑀢𑁄 𑀦𑀸𑀫 ¶ 𑀦𑀢𑁆𑀣𑀻’’𑀢𑀺 ¶ 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀓𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀲𑁆𑀲 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀉𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀫𑀸𑀢𑀸 𑀫𑀳𑀸𑀫𑀸𑀬𑀸 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸, 𑀲𑀼𑀲𑀻𑀫𑁄 𑀭𑀸𑀚𑀸 𑀆𑀦𑀦𑁆𑀤𑁄, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀲𑀻𑀫𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁬𑁪] 𑁪. 𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 ¶ 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀕𑀺𑀳𑀻 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀧𑀦 𑀢𑁂 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀸𑀢𑀸𑀧𑀺𑀢𑀭𑁄 𑀫𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀫𑀸, 𑀪𑀺𑀓𑁆𑀔𑀯𑁂, 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀚𑁆𑀛𑀸𑀬𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀕𑀼𑀡𑀯𑀲𑁂𑀦 𑀅𑀜𑁆𑀜𑀸𑀢𑀓𑀸𑀦𑀫𑁆𑀧𑀺 𑀉𑀧𑀓𑀸𑀭𑀁 𑀅𑀓𑀁𑀲𑀼, 𑀇𑀫𑀲𑁆𑀲 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀓𑀸𑀭𑀓𑀭𑀡𑀁 𑀪𑀸𑀭𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑁂 𑀕𑀺𑀚𑁆𑀛𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀓𑀸𑀮𑁂 𑀫𑀳𑀢𑀻 𑀯𑀸𑀢𑀯𑀼𑀝𑁆𑀞𑀺 𑀅𑀳𑁄𑀲𑀺. 𑀕𑀺𑀚𑁆𑀛𑀸 𑀯𑀸𑀢𑀯𑀼𑀝𑁆𑀞𑀺𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀻𑀢𑀪𑀬𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀸𑀓𑀸𑀭𑀲𑀫𑀻𑀧𑁂 𑀘 𑀧𑀭𑀺𑀔𑀸𑀲𑀫𑀻𑀧𑁂 𑀘 𑀲𑀻𑀢𑁂𑀦 𑀓𑀫𑁆𑀧𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀢𑁂 𑀕𑀺𑀚𑁆𑀛𑁂 𑀓𑀺𑀮𑀫𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑁄𑀲𑀼𑀲𑀸𑀦𑀁 𑀧𑁂𑀲𑁂𑀢𑁆𑀯𑀸 𑀕𑁄𑀫𑀁𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀤𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀕𑀺𑀚𑁆𑀛𑀸 𑀯𑀽𑀧𑀲𑀦𑁆𑀢𑀸𑀬 𑀯𑀸𑀢𑀯𑀼𑀝𑁆𑀞𑀺𑀬𑀸 ¶ 𑀓𑀮𑁆𑀮𑀲𑀭𑀻𑀭𑀸 𑀳𑀼𑀢𑁆𑀯𑀸 𑀧𑀩𑁆𑀩𑀢𑀫𑁂𑀯 𑀅𑀕𑀫𑀁𑀲𑀼. 𑀢𑁂 𑀢𑀢𑁆𑀣𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀯𑀁 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑀸 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑁄 𑀓𑀢𑁄, 𑀓𑀢𑀽𑀧𑀓𑀸𑀭𑀲𑁆𑀲 𑀘 𑀦𑀸𑀫 𑀧𑀘𑁆𑀘𑀼𑀧𑀓𑀸𑀭𑀁 𑀓𑀸𑀢𑀼𑀁 ¶ 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂𑀲𑀼 𑀬𑁄 𑀬𑀁 𑀯𑀢𑁆𑀣𑀁 𑀯𑀸 𑀆𑀪𑀭𑀡𑀁 𑀯𑀸 𑀮𑀪𑀢𑀺, 𑀢𑁂𑀦 𑀢𑀁 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀆𑀓𑀸𑀲𑀗𑁆𑀕𑀡𑁂 𑀧𑀸𑀢𑁂𑀢𑀩𑁆𑀩’’𑀦𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀕𑀺𑀚𑁆𑀛𑀸 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀆𑀢𑀧𑁂 𑀲𑀼𑀓𑁆𑀔𑀸𑀧𑁂𑀦𑁆𑀢𑀸𑀦𑀁 𑀧𑀫𑀸𑀤𑀁 𑀑𑀮𑁄𑀓𑁂𑀢𑁆𑀯𑀸 𑀲𑁂𑀦𑀸 𑀯𑀺𑀬 𑀫𑀁𑀲𑀧𑁂𑀲𑀺𑀁 𑀲𑀳𑀲𑀸 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀆𑀓𑀸𑀲𑀗𑁆𑀕𑀡𑁂 𑀧𑀸𑀢𑁂𑀦𑁆𑀢𑀺. 𑀲𑁄 𑀕𑀺𑀚𑁆𑀛𑀸𑀦𑀁 𑀆𑀳𑀭𑀡𑀪𑀸𑀯𑀁 𑀜𑀢𑁆𑀯𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀯𑀺𑀲𑀼𑀁𑀬𑁂𑀯 𑀞𑀧𑁂𑀲𑀺. ‘‘𑀕𑀺𑀚𑁆𑀛𑀸 𑀦𑀕𑀭𑀁 𑀯𑀺𑀮𑀼𑀫𑁆𑀧𑀦𑁆𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀏𑀓𑀁 𑀕𑀺𑀚𑁆𑀛𑀫𑁆𑀧𑀺 𑀢𑀸𑀯 𑀕𑀡𑁆𑀳𑀣, 𑀲𑀩𑁆𑀩𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀸𑀲𑁂 𑀘𑁂𑀯 𑀚𑀸𑀮𑀸𑀦𑀺 𑀘 𑀑𑀟𑁆𑀟𑀸𑀧𑁂𑀲𑀺. 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑁄 ¶ 𑀧𑀸𑀲𑁂 𑀩𑀚𑁆𑀛𑀺, 𑀢𑀁 𑀕𑀳𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀦𑁂𑀦𑁆𑀢𑀺. 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑁂 𑀫𑀦𑀼𑀲𑁆𑀲𑁂 𑀕𑀺𑀚𑁆𑀛𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀸 𑀇𑀫𑀁 𑀕𑀺𑀚𑁆𑀛𑀁 𑀩𑀸𑀥𑀬𑀺𑀁𑀲𑀽’’𑀢𑀺 𑀲𑀤𑁆𑀥𑀺𑀜𑁆𑀜𑁂𑀯 𑀅𑀕𑀫𑀸𑀲𑀺. 𑀕𑀺𑀚𑁆𑀛𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀦𑀕𑀭𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀢𑁆𑀣𑀸𑀤𑀻𑀦𑀺 𑀕𑀡𑁆𑀳𑀣𑀸’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀲𑁆𑀲 𑀢𑀸𑀦𑀺 𑀤𑀺𑀦𑁆𑀦𑀸𑀦𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀢𑁂𑀦 𑀚𑀻𑀯𑀺𑀢𑀁 𑀤𑁆𑀯𑀺𑀦𑁆𑀦𑀁, 𑀉𑀧𑀓𑀸𑀭𑀲𑁆𑀲 𑀦𑀸𑀫 𑀧𑀘𑁆𑀘𑀼𑀧𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀅𑀤𑀫𑁆𑀳𑀸’’𑀢𑀺. 𑀅𑀣 𑀦𑀁 𑀭𑀸𑀚𑀸 ‘‘𑀕𑀺𑀚𑁆𑀛𑀸 𑀓𑀺𑀭 𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀓𑀼𑀡𑀧𑀁 𑀧𑀲𑁆𑀲𑀦𑁆𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀑𑀟𑁆𑀟𑀺𑀢𑀁 𑀧𑀸𑀲𑀁 𑀦 𑀧𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁭.

‘‘𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺;

𑀓𑀲𑁆𑀫𑀸 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀻’’𑀢𑀺.

𑀢𑀢𑁆𑀣 ¶ 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀦𑀽𑀢𑀺 𑀦𑀸𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀕𑀺𑀚𑁆𑀛𑁄 𑀦𑀸𑀫 𑀬𑁄𑀚𑀦𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀺 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺, 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀚𑁆𑀚𑀸𑀧𑀻𑀢𑀺 𑀆𑀲𑀸𑀤𑁂𑀢𑁆𑀯𑀸𑀧𑀺, 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸𑀧𑀻𑀢𑀺 𑀅𑀢𑁆𑀣𑁄. ‘‘𑀢𑁆𑀯𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀑𑀟𑁆𑀟𑀺𑀢𑀁 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘 𑀧𑀢𑁆𑀯𑀸𑀧𑀺 𑀓𑀲𑁆𑀫𑀸 𑀦 𑀩𑀼𑀚𑁆𑀛𑀲𑀻’’𑀢𑀺 𑀧𑀼𑀘𑁆𑀙𑀺.

𑀕𑀺𑀚𑁆𑀛𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁮.

‘‘𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀻’’𑀢𑀺.

𑀢𑀢𑁆𑀣 ¶ 𑀧𑀭𑀸𑀪𑀯𑁄𑀢𑀺 𑀯𑀺𑀦𑀸𑀲𑁄. 𑀧𑁄𑀲𑁄𑀢𑀺 𑀲𑀢𑁆𑀢𑁄.

𑀕𑀺𑀚𑁆𑀛𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑁂𑀝𑁆𑀞𑀺𑀁 𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀫𑀳𑀸𑀲𑁂𑀝𑁆𑀞𑀺, 𑀕𑀺𑀚𑁆𑀛𑁂𑀳𑀺 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀯𑀢𑁆𑀣𑀸𑀤𑀻𑀦𑀺 𑀆𑀪𑀢𑀸𑀦𑀻’’𑀢𑀺. ‘‘𑀲𑀘𑁆𑀘𑀁, 𑀤𑁂𑀯𑀸’’𑀢𑀺. ‘‘𑀓𑀳𑀁 𑀢𑀸𑀦𑀻’’𑀢𑀺? ‘‘𑀤𑁂𑀯, 𑀫𑀬𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀯𑀺𑀲𑀼𑀁 𑀞𑀧𑀺𑀢𑀸𑀦𑀺, 𑀬𑀁 𑀬𑁂𑀲𑀁 𑀲𑀦𑁆𑀢𑀓𑀁, 𑀢𑀁 𑀢𑁂𑀲𑀁 𑀤𑀲𑁆𑀲𑀸𑀫𑀺, 𑀇𑀫𑀁 𑀕𑀺𑀚𑁆𑀛𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 𑀕𑀺𑀚𑁆𑀛𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺𑀁 𑀲𑀩𑁆𑀩𑁂𑀲𑀁 𑀲𑀦𑁆𑀢𑀓𑀸𑀦𑀺 𑀤𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺 ¶ . ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁬𑁫] 𑁫. 𑀦𑀓𑀼𑀮𑀚𑀸𑀢𑀓𑀯𑀡𑁆𑀡𑀦𑀸

𑀲𑀤𑁆𑀥𑀺𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑁂𑀡𑀺𑀪𑀡𑁆𑀟𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀉𑀭𑀕𑀚𑀸𑀢𑀓𑁂 (𑀚𑀸. 𑁧.𑁨.𑁭-𑁮) 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑁂 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀇𑀤𑀸𑀦𑁂𑀯 𑀫𑀬𑀸 𑀲𑀫𑀕𑁆𑀕𑀸 𑀓𑀢𑀸, 𑀧𑀼𑀩𑁆𑀩𑁂𑀧𑀸𑀳𑀁 𑀇𑀫𑁂 𑀲𑀫𑀕𑁆𑀕𑁂 𑀅𑀓𑀸𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 ¶ 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀦𑀓𑀼𑀮𑁄, 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀩𑀺𑀮𑁂 𑀲𑀧𑁆𑀧𑁄 𑀘 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀅𑀳𑀺𑀦𑀓𑀼𑀮𑀸 𑀦𑀺𑀘𑁆𑀘𑀓𑀸𑀮𑀁 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀁 𑀓𑀮𑀳𑁂 𑀆𑀤𑀻𑀦𑀯𑀜𑁆𑀘 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀘 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 ‘‘𑀓𑀮𑀳𑀁 𑀦𑀸𑀫 𑀅𑀓𑀢𑁆𑀯𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀲𑀫𑀕𑁆𑀕𑁂 𑀅𑀓𑀸𑀲𑀺. 𑀅𑀣 𑀲𑀧𑁆𑀧𑀲𑁆𑀲 𑀩𑀳𑀺𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀦𑀓𑀼𑀮𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀯𑀫𑁆𑀫𑀺𑀓𑀲𑁆𑀲 𑀩𑀺𑀮𑀤𑁆𑀯𑀸𑀭𑁂 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀅𑀲𑁆𑀲𑀲𑀦𑁆𑀢𑁄 𑀧𑀲𑁆𑀲𑀲𑀦𑁆𑀢𑁄 𑀦𑀺𑀤𑁆𑀤𑀁 𑀉𑀧𑀕𑀜𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀢𑀣𑀸 ¶ 𑀦𑀺𑀤𑁆𑀤𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁂 𑀦𑀺𑀲𑁆𑀲𑀸𑀬 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀲𑀦𑁆𑀥𑀺𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀦, 𑀅𑀡𑁆𑀟𑀚𑁂𑀦 𑀚𑀮𑀸𑀩𑀼𑀚;

𑀯𑀺𑀯𑀭𑀺𑀬 𑀤𑀸𑀞𑀁 𑀲𑁂𑀲𑀺, 𑀓𑀼𑀢𑁄 𑀢𑁂 𑀪𑀬𑀫𑀸𑀕𑀢’’𑀦𑁆𑀢𑀺.

𑀢𑀢𑁆𑀣 ¶ 𑀲𑀦𑁆𑀥𑀺𑀁 𑀓𑀢𑁆𑀯𑀸𑀢𑀺 𑀫𑀺𑀢𑁆𑀢𑀪𑀸𑀯𑀁 𑀓𑀭𑀺𑀢𑁆𑀯𑀸. 𑀅𑀡𑁆𑀟𑀚𑁂𑀦𑀸𑀢𑀺 𑀅𑀡𑁆𑀟𑀓𑁄𑀲𑁂 𑀦𑀺𑀩𑁆𑀩𑀢𑁆𑀢𑁂𑀦 𑀦𑀸𑀕𑁂𑀦. 𑀚𑀮𑀸𑀩𑀼𑀚𑀸𑀢𑀺 𑀦𑀓𑀼𑀮𑀁 𑀆𑀮𑀧𑀢𑀺. 𑀲𑁄 𑀳𑀺 𑀚𑀮𑀸𑀩𑀼𑀫𑁆𑀳𑀺 𑀚𑀸𑀢𑀢𑁆𑀢𑀸 ‘‘𑀚𑀮𑀸𑀩𑀼𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑀭𑀺𑀬𑀸𑀢𑀺 𑀯𑀺𑀯𑀭𑀺𑀢𑁆𑀯𑀸.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦 𑀯𑀼𑀢𑁆𑀢𑁄 𑀦𑀓𑀼𑀮𑁄 ‘‘𑀅𑀬𑁆𑀬, 𑀧𑀘𑁆𑀘𑀸𑀫𑀺𑀢𑁆𑀢𑁄 𑀦𑀸𑀫 𑀦 𑀅𑀯𑀚𑀸𑀦𑀺𑀢𑀩𑁆𑀩𑁄 𑀆𑀲𑀗𑁆𑀓𑀺𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁦.

‘‘𑀲𑀗𑁆𑀓𑁂𑀣𑁂𑀯 𑀅𑀫𑀺𑀢𑁆𑀢𑀲𑁆𑀫𑀺𑀁, 𑀫𑀺𑀢𑁆𑀢𑀲𑁆𑀫𑀺𑀫𑁆𑀧𑀺 𑀦 𑀯𑀺𑀲𑁆𑀲𑀲𑁂;

𑀅𑀪𑀬𑀸 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀅𑀧𑀺 𑀫𑀽𑀮𑀸𑀦𑀺 𑀓𑀦𑁆𑀢𑀢𑀻’’𑀢𑀺.

𑀢𑀢𑁆𑀣 𑀅𑀪𑀬𑀸 𑀪𑀬𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀦 𑀇𑀢𑁄 𑀢𑁂 𑀪𑀬𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀪𑀬𑁄, 𑀓𑁄 𑀲𑁄? 𑀫𑀺𑀢𑁆𑀢𑁄. 𑀬𑀜𑁆𑀳𑀺 𑀫𑀺𑀢𑁆𑀢𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀢𑀢𑁄 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀫𑀽𑀮𑀸𑀦𑀺𑀧𑀺 𑀓𑀦𑁆𑀢𑀢𑀺, 𑀫𑀺𑀢𑁆𑀢𑀲𑁆𑀲 𑀲𑀩𑁆𑀩𑀭𑀦𑁆𑀥𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀫𑀽𑀮𑀖𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀅𑀣 ¶ 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀺, 𑀬𑀣𑀸 𑀲𑀧𑁆𑀧𑁄 𑀢𑀬𑀺 𑀦 𑀤𑀼𑀩𑁆𑀪𑀢𑀺, 𑀏𑀯𑀫𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀢𑀲𑁆𑀫𑀺𑀁 𑀆𑀲𑀗𑁆𑀓𑀁 𑀫𑀸 𑀓𑀭𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀢𑁂𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀧𑁆𑀧𑁄 𑀘 𑀦𑀓𑀼𑀮𑁄 𑀘 𑀇𑀫𑁂 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀓𑀼𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁬𑁬] 𑁬. 𑀉𑀧𑀲𑀸𑀴𑀓𑀚𑀸𑀢𑀓𑀯𑀡𑁆𑀡𑀦𑀸

𑀉𑀧𑀲𑀸𑀴𑀓𑀦𑀸𑀫𑀸𑀦𑀻𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀧𑀲𑀸𑀴𑀓𑀁 𑀦𑀸𑀫 𑀲𑀼𑀲𑀸𑀦𑀲𑀼𑀤𑁆𑀥𑀺𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀅𑀟𑁆𑀠𑁄 𑀅𑀳𑁄𑀲𑀺 𑀫𑀳𑀤𑁆𑀥𑀦𑁄, 𑀤𑀺𑀝𑁆𑀞𑀺𑀕𑀢𑀺𑀓𑀢𑁆𑀢𑀸 𑀧𑀦 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑀸𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀗𑁆𑀕𑀳𑀁 𑀦𑀸𑀫 𑀦 𑀅𑀓𑀸𑀲𑀺. 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀧𑀡𑁆𑀟𑀺𑀢𑁄 𑀅𑀳𑁄𑀲𑀺 𑀜𑀸𑀡𑀲𑀫𑁆𑀧𑀦𑁆𑀦𑁄. 𑀲𑁄 𑀫𑀳𑀮𑁆𑀮𑀓𑀓𑀸𑀮𑁂 𑀧𑀼𑀢𑁆𑀢𑀁 𑀆𑀳 𑁋 ‘‘𑀫𑀸 𑀔𑁄 𑀫𑀁, 𑀢𑀸𑀢, 𑀅𑀜𑁆𑀜𑀲𑁆𑀲 𑀯𑀲𑀮𑀲𑁆𑀲 𑀛𑀸𑀧𑀺𑀢𑀲𑀼𑀲𑀸𑀦𑁂 𑀛𑀸𑀧𑁂𑀳𑀺, 𑀏𑀓𑀲𑁆𑀫𑀺𑀁 𑀧𑀦 𑀅𑀦𑀼𑀘𑁆𑀙𑀺𑀝𑁆𑀞𑀲𑀼𑀲𑀸𑀦𑁂𑀬𑁂𑀯 𑀫𑀁 ¶ 𑀛𑀸𑀧𑁂𑀬𑁆𑀬𑀸𑀲𑀻’’𑀢𑀺. ‘‘𑀢𑀸𑀢, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀛𑀸𑀧𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀞𑀸𑀦𑀁 𑀦 𑀚𑀸𑀦𑀸𑀫𑀺, 𑀲𑀸𑀥𑀼 𑀯𑀢 𑀫𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’𑀢𑀺 𑀢𑀼𑀫𑁆𑀳𑁂𑀯 𑀆𑀘𑀺𑀓𑁆𑀔𑀣𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀁 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀢𑀸𑀢, 𑀇𑀤𑀁 𑀅𑀜𑁆𑀜𑀲𑁆𑀲 𑀯𑀲𑀮𑀲𑁆𑀲 𑀅𑀛𑀸𑀧𑀺𑀢𑀝𑁆𑀞𑀸𑀦𑀁, 𑀏𑀢𑁆𑀣 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀢𑀸 𑀑𑀢𑀭𑀺𑀢𑀼𑀁 𑀆𑀭𑀪𑀺.

𑀲𑀢𑁆𑀣𑀸 𑀧𑀦 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. 𑀢𑀲𑁆𑀫𑀸 𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀞𑀺𑀢𑀮𑀼𑀤𑁆𑀤𑀓𑁄 𑀯𑀺𑀬 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀧𑀩𑁆𑀩𑀢𑀫𑀢𑁆𑀣𑀓𑀸 𑀑𑀢𑀭𑀦𑁆𑀢𑀸𑀦𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀺, 𑀢𑁂 𑀑𑀢𑀭𑀦𑁆𑀢𑀸 𑀲𑀢𑁆𑀣𑀸𑀭𑀁 𑀅𑀤𑁆𑀤𑀲𑀁𑀲𑀼. 𑀲𑀢𑁆𑀣𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀓𑀳𑀁 𑀕𑀫𑀺𑀲𑁆𑀲𑀣 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀧𑀼𑀘𑁆𑀙𑀺. 𑀫𑀸𑀡𑀯𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀏𑀳𑀺, 𑀢𑀯 𑀧𑀺𑀢𑀭𑀸 𑀆𑀘𑀺𑀓𑁆𑀔𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀉𑀪𑁄 𑀧𑀺𑀢𑀸𑀧𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀓𑀢𑀭𑀁 𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀸𑀡𑀯𑁄 ‘‘𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀁 𑀆𑀘𑀺𑀓𑁆𑀔𑀺, 𑀪𑀦𑁆𑀢𑁂’’𑀢𑀺 ¶ 𑀆𑀳. 𑀲𑀢𑁆𑀣𑀸 ‘‘𑀦 𑀔𑁄, 𑀫𑀸𑀡𑀯, 𑀢𑀯 𑀧𑀺𑀢𑀸 𑀇𑀤𑀸𑀦𑁂𑀯 𑀲𑀼𑀲𑀸𑀦𑀲𑀼𑀤𑁆𑀥𑀺𑀓𑁄, 𑀧𑀼𑀩𑁆𑀩𑁂𑀧𑀺 𑀲𑀼𑀲𑀸𑀦𑀲𑀼𑀤𑁆𑀥𑀺𑀓𑁄𑀯, 𑀦 𑀘𑁂𑀲 𑀇𑀤𑀸𑀦𑁂𑀯 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’𑀢𑀺 𑀢𑀯 𑀆𑀘𑀺𑀓𑁆𑀔𑀢𑀺, 𑀧𑀼𑀩𑁆𑀩𑁂𑀧𑀺 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀢𑁆𑀢𑀦𑁄 𑀛𑀸𑀧𑀺𑀢𑀪𑀸𑀯𑀁 𑀆𑀘𑀺𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀇𑀫𑀲𑁆𑀫𑀺𑀜𑁆𑀜𑁂𑀯 𑀭𑀸𑀚𑀕𑀳𑁂 𑀅𑀬𑀫𑁂𑀯 𑀉𑀧𑀲𑀸𑀴𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀬𑀫𑁂𑀯𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀕𑀺𑀚𑁆𑀛𑀓𑀽𑀝𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀺𑀳𑀸𑀲𑀺. 𑀢𑀤𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀧𑀼𑀢𑁆𑀢𑀁 𑀯𑀢𑁆𑀯𑀸 𑀧𑀼𑀢𑁆𑀢𑁂𑀦 ‘‘𑀢𑀼𑀫𑁆𑀳𑁂𑀬𑁂𑀯 𑀫𑁂 𑀢𑀣𑀸𑀭𑀽𑀧𑀁 𑀞𑀸𑀦𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀫𑁂𑀯 𑀞𑀸𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀑𑀢𑀭𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀫𑀸𑀡𑀯𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀏𑀳𑀺, 𑀢𑀯 𑀧𑀺𑀢𑀭𑀸 𑀆𑀘𑀺𑀓𑁆𑀔𑀺𑀢𑀝𑁆𑀞𑀸𑀦𑀲𑁆𑀲 ¶ 𑀉𑀘𑁆𑀙𑀺𑀝𑁆𑀞𑀪𑀸𑀯𑀁 𑀯𑀸 𑀅𑀦𑀼𑀘𑁆𑀙𑀺𑀝𑁆𑀞𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀇𑀤𑀁 𑀢𑀺𑀡𑁆𑀡𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀁 ¶ 𑀅𑀦𑀼𑀘𑁆𑀙𑀺𑀝𑁆𑀞𑀝𑁆𑀞𑀸𑀦’’𑀦𑁆𑀢𑀺 𑀫𑀸𑀡𑀯𑁂𑀦 𑀯𑀼𑀢𑁆𑀢𑁂 ‘‘𑀫𑀸𑀡𑀯, 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀛𑀸𑀧𑀺𑀢𑀓𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀢𑀯𑁂𑀯 𑀧𑀺𑀢𑀸 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑀲𑀸𑀴𑀓𑁄𑀬𑁂𑀯 𑀦𑀸𑀫 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀢𑀦𑁆𑀢𑀭𑁂 𑀘𑀼𑀤𑁆𑀤𑀲 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀛𑀸𑀧𑀺𑀢𑁄. 𑀧𑀣𑀯𑀺𑀬𑀜𑁆𑀳𑀺 𑀅𑀛𑀸𑀧𑀺𑀢𑀝𑁆𑀞𑀸𑀦𑀁 𑀯𑀸 𑀅𑀲𑀼𑀲𑀸𑀦𑀝𑁆𑀞𑀸𑀦𑀁 𑀯𑀸 𑀲𑀻𑀲𑀸𑀦𑀁 𑀅𑀦𑀺𑀯𑁂𑀲𑀺𑀢𑀝𑁆𑀞𑀸𑀦𑀁 𑀯𑀸 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸’’𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁩𑁧.

‘‘𑀉𑀧𑀲𑀸𑀴𑀓𑀦𑀸𑀫𑀸𑀦𑀺 ¶ , 𑀲𑀳𑀲𑁆𑀲𑀸𑀦𑀺 𑀘𑀢𑀼𑀤𑁆𑀤𑀲;

𑀅𑀲𑁆𑀫𑀺𑀁 𑀧𑀤𑁂𑀲𑁂 𑀤𑀟𑁆𑀠𑀸𑀦𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀸𑀫𑀢𑀁.

𑁩𑁨.

‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀏𑀢𑀁 𑀅𑀭𑀺𑀬𑀸 𑀲𑁂𑀯𑀦𑁆𑀢𑀺, 𑀏𑀢𑀁 𑀮𑁄𑀓𑁂 𑀅𑀦𑀸𑀫𑀢’’𑀦𑁆𑀢𑀺.

𑀢𑀢𑁆𑀣 𑀅𑀦𑀸𑀫𑀢𑀦𑁆𑀢𑀺 𑀫𑀢𑀝𑁆𑀞𑀸𑀦𑀁. 𑀢𑀜𑁆𑀳𑀺 𑀉𑀧𑀘𑀸𑀭𑀯𑀲𑁂𑀦 ‘‘𑀅𑀫𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀅𑀦𑀸𑀫𑀢’’𑀦𑁆𑀢𑀺 𑀆𑀳. ‘‘𑀅𑀦𑀫𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀮𑁄𑀓𑀲𑁆𑀫𑀺𑀜𑁆𑀳𑀺 𑀅𑀦𑀫𑀢𑀝𑁆𑀞𑀸𑀦𑀁 𑀅𑀲𑀼𑀲𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘𑀸𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀢𑀼𑀲𑀘𑁆𑀘𑀯𑀢𑁆𑀣𑀼𑀓𑀁 𑀧𑀼𑀩𑁆𑀩𑀪𑀸𑀕𑀲𑀘𑁆𑀘𑀜𑀸𑀡𑀜𑁆𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀘 𑀅𑀢𑁆𑀣𑀺. 𑀅𑀳𑀺𑀁𑀲𑀸𑀢𑀺 𑀧𑀭𑁂𑀲𑀁 𑀅𑀯𑀺𑀳𑁂𑀲𑀸 𑀅𑀯𑀺𑀳𑁂𑀞𑀦𑀸. 𑀲𑀁𑀬𑀫𑁄𑀢𑀺 𑀲𑀻𑀮𑀲𑀁𑀬𑀫𑁄. 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑀁. 𑀇𑀤𑀜𑁆𑀘 𑀕𑀼𑀡𑀚𑀸𑀢𑀁 𑀬𑀫𑁆𑀳𑀺 𑀧𑀼𑀕𑁆𑀕𑀮𑁂 𑀅𑀢𑁆𑀣𑀺, 𑀏𑀢𑀁 𑀅𑀭𑀺𑀬𑀸 𑀲𑁂𑀯𑀦𑁆𑀢𑀻𑀢𑀺, 𑀅𑀭𑀺𑀬𑀸 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀏𑀢𑀁 𑀞𑀸𑀦𑀁 𑀲𑁂𑀯𑀦𑁆𑀢𑀺, 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑀺 𑀪𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀁 𑀮𑁄𑀓𑁂 𑀅𑀦𑀸𑀫𑀢𑀦𑁆𑀢𑀺 𑀏𑀢𑀁 𑀕𑀼𑀡𑀚𑀸𑀢𑀁 𑀮𑁄𑀓𑁂 𑀅𑀫𑀢𑀪𑀸𑀯𑀲𑀸𑀥𑀦𑀢𑁄 𑀅𑀦𑀸𑀫𑀢𑀁 𑀦𑀸𑀫.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀪𑁄 𑀧𑀺𑀢𑀸𑀧𑀼𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. ‘‘𑀢𑀤𑀸 𑀧𑀺𑀢𑀸𑀧𑀼𑀢𑁆𑀢𑀸𑀯 𑀏𑀢𑀭𑀳𑀺 𑀧𑀺𑀢𑀸𑀧𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀧𑀲𑀸𑀴𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁬𑁭] 𑁭. 𑀲𑀫𑀺𑀤𑁆𑀥𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀪𑀼𑀢𑁆𑀯𑀸 ¶ ¶ 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀢𑀧𑁄𑀤𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀫𑀺𑀤𑁆𑀥𑀺𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀦𑁆𑀳𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑀁 𑀅𑀢𑁆𑀢𑀪𑀸𑀯𑀁 𑀲𑀼𑀓𑁆𑀔𑀸𑀧𑀬𑀫𑀸𑀦𑁄 𑀅𑀦𑁆𑀢𑀭𑀯𑀸𑀲𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬 𑀲𑀼𑀯𑀡𑁆𑀡𑀧𑀝𑀺𑀫𑀸. 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀸𑀬𑁂𑀯 𑀳𑀺𑀲𑁆𑀲 ¶ ‘‘𑀲𑀫𑀺𑀤𑁆𑀥𑀻’’𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀭𑀻𑀭𑀲𑁄𑀪𑀕𑁆𑀕𑀁 𑀤𑀺𑀲𑁆𑀯𑀸 𑀏𑀓𑀸 𑀤𑁂𑀯𑀥𑀻𑀢𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀣𑁂𑀭𑀁 𑀏𑀯𑀫𑀸𑀳 𑁋 ‘‘𑀢𑁆𑀯𑀁 𑀔𑁄𑀲𑀺, 𑀪𑀺𑀓𑁆𑀔𑀼, 𑀤𑀳𑀭𑁄 𑀬𑀼𑀯𑀸 𑀲𑀼𑀲𑀼 𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄, 𑀏𑀯𑀭𑀽𑀧𑀲𑁆𑀲 𑀢𑀯 𑀓𑀸𑀫𑁂 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑁄 𑀅𑀢𑁆𑀣𑁄 𑀧𑀩𑁆𑀩𑀚𑁆𑀚𑀸𑀬, 𑀓𑀸𑀫𑁂 𑀢𑀸𑀯 𑀧𑀭𑀺𑀪𑀼𑀜𑁆𑀚𑀲𑁆𑀲𑀼, 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀤𑁂𑀯𑀥𑀻𑀢𑁂, ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀬𑁂 𑀞𑀺𑀢𑁄 𑀫𑀭𑀺𑀲𑁆𑀲𑀸𑀫𑀻’𑀢𑀺 𑀫𑀫 𑀫𑀭𑀡𑀓𑀸𑀮𑀁 𑀦 𑀚𑀸𑀦𑀸𑀫𑀺, 𑀏𑀲 𑀫𑁂 𑀓𑀸𑀮𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀢𑀲𑁆𑀫𑀸 𑀢𑀭𑀼𑀡𑀓𑀸𑀮𑁂𑀬𑁂𑀯 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀸 𑀧𑀝𑀺𑀲𑀦𑁆𑀣𑀸𑀭𑀁 𑀅𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀲𑀫𑀺𑀤𑁆𑀥𑀺, 𑀢𑁆𑀯𑀜𑁆𑀜𑁂𑀯 𑀏𑀢𑀭𑀳𑀺 𑀤𑁂𑀯𑀥𑀻𑀢𑀸𑀬 𑀧𑀮𑁄𑀪𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀥𑀻𑀢𑀭𑁄 𑀧𑀩𑁆𑀩𑀚𑀺𑀢𑁂 𑀧𑀮𑁄𑀪𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀁 𑀚𑀸𑀢𑀲𑁆𑀲𑀭𑀁 𑀦𑀺𑀲𑁆𑀲𑀸𑀬 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀦𑁆𑀳𑀢𑁆𑀯𑀸 𑀏𑀓𑀁 𑀯𑀓𑁆𑀓𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀯𑁄𑀤𑀓𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀏𑀓𑀸 𑀤𑁂𑀯𑀥𑀻𑀢𑀸 𑀩𑁄𑀥𑀺𑀲𑀢𑁆𑀢𑀁 𑀧𑀮𑁄𑀪𑀬𑀫𑀸𑀦𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁩.

‘‘𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀼, 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀺;

𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼, 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

𑀢𑀢𑁆𑀣 ¶ 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀼 𑀢𑁆𑀯𑀁 𑀤𑀳𑀭𑀓𑀸𑀮𑁂 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀯𑀢𑁆𑀣𑀼𑀓𑀸𑀫𑁂 𑀅𑀪𑀼𑀢𑁆𑀯𑀸𑀯 𑀪𑀺𑀓𑁆𑀔𑀸𑀬 𑀘𑀭𑀲𑀺. 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀻𑀢𑀺 𑀦𑀦𑀼 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑀩𑁆𑀩𑀁, 𑀓𑀸𑀫𑁂 𑀅𑀪𑀼𑀢𑁆𑀯𑀸𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀉𑀧𑀕𑀢𑁄𑀲𑀺. 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀽𑀢𑀺 𑀪𑀺𑀓𑁆𑀔𑀼 ¶ 𑀤𑀳𑀭𑀓𑀸𑀮𑁂 𑀢𑀸𑀯 𑀓𑀸𑀫𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀫𑀳𑀮𑁆𑀮𑀓𑀓𑀸𑀮𑁂 𑀪𑀺𑀓𑁆𑀔𑀲𑁆𑀲𑀼. 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀅𑀬𑀁 𑀓𑀸𑀫𑁂 𑀪𑀼𑀜𑁆𑀚𑀦𑀓𑀸𑀮𑁄 𑀤𑀳𑀭𑀓𑀸𑀮𑁄, 𑀢𑀁 𑀫𑀸 𑀅𑀢𑀺𑀓𑁆𑀓𑀫𑀢𑀽𑀢𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀤𑁂𑀯𑀢𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀓𑀸𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁪.

‘‘𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺, 𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺, 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

𑀢𑀢𑁆𑀣 𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀳𑀁 𑀧𑀦 ‘‘𑀧𑀞𑀫𑀯𑀬𑁂 𑀯𑀸 𑀫𑀬𑀸 𑀫𑀭𑀺𑀢𑀩𑁆𑀩𑀁 𑀫𑀚𑁆𑀛𑀺𑀫𑀯𑀬𑁂 𑀯𑀸 𑀧𑀘𑁆𑀙𑀺𑀫𑀯𑀬𑁂 𑀯𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀫𑀭𑀡𑀓𑀸𑀮𑀁 𑀦 𑀚𑀸𑀦𑀸𑀫𑀺. 𑀧𑀡𑁆𑀟𑀺𑀢𑁂𑀦 𑀳𑀺 𑀧𑀼𑀕𑁆𑀕𑀮𑁂𑀦 𑁋

‘‘𑀚𑀻𑀯𑀺𑀢𑀁 𑀩𑁆𑀬𑀸𑀥𑀺 𑀓𑀸𑀮𑁄 𑀘, 𑀤𑁂𑀳𑀦𑀺𑀓𑁆𑀔𑁂𑀧𑀦𑀁 𑀕𑀢𑀺;

𑀧𑀜𑁆𑀘𑁂𑀢𑁂 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’𑀢𑀺.

𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀬𑀲𑁆𑀫𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀬𑀓𑀸𑀮𑁂 𑀳𑁂𑀫𑀦𑁆𑀢𑀸𑀤𑀺𑀉𑀢𑀼𑀓𑀸𑀮𑁂 𑀯𑀸 𑀫𑀬𑀸 𑀫𑀭𑀺𑀢𑀩𑁆𑀩’’𑀦𑁆𑀢𑀺 𑀫𑀬𑁆𑀳𑀫𑁆𑀧𑁂𑀲 𑀙𑀦𑁆𑀦𑁄 𑀳𑀼𑀢𑁆𑀯𑀸 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺, 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀦 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺. 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀫𑀁 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑁄 𑀫𑀸 𑀅𑀢𑀺𑀓𑁆𑀓𑀫𑀢𑀽𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀤𑀳𑀭𑁄𑀯 𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻𑀢𑀺. 𑀤𑁂𑀯𑀥𑀻𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁂𑀯𑀥𑀻𑀢𑀸 𑀅𑀬𑀁 𑀤𑁂𑀯𑀥𑀻𑀢𑀸 𑀅𑀳𑁄𑀲𑀺, 𑀅𑀳𑀫𑁂𑀯 𑀢𑁂𑀦 𑀲𑀫𑀬𑁂𑀦 𑀢𑀸𑀧𑀲𑁄 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑀺𑀤𑁆𑀥𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁬𑁮] 𑁮. 𑀲𑀓𑀼𑀡𑀕𑁆𑀖𑀺𑀚𑀸𑀢𑀓𑀯𑀡𑁆𑀡𑀦𑀸

𑀲𑁂𑀦𑁄 ¶ ¶ 𑀩𑀮𑀲𑀸 𑀧𑀢𑀫𑀸𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀚𑁆𑀛𑀸𑀲𑀬𑀁 𑀲𑀓𑀼𑀡𑁄𑀯𑀸𑀤𑀲𑀼𑀢𑁆𑀢𑀁 (𑀲𑀁. 𑀦𑀺. 𑁫.𑁩𑁭𑁨) 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺 (𑀲𑀁. 𑀦𑀺. 𑁫.𑁩𑁭𑁨) 𑀇𑀫𑀁 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑁂 𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀦𑁆𑀢𑁄 ¶ ‘‘𑀢𑀼𑀫𑁆𑀳𑁂 𑀢𑀸𑀯 𑀢𑀺𑀝𑁆𑀞𑀣, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀲𑀓𑀁 𑀧𑁂𑀢𑁆𑀢𑀺𑀓𑀯𑀺𑀲𑀬𑀁 𑀧𑀳𑀸𑀬 𑀅𑀕𑁄𑀘𑀭𑁂 𑀘𑀭𑀦𑁆𑀢𑀸 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀳𑀢𑁆𑀣𑀧𑀣𑀁 𑀕𑀦𑁆𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀸𑀬𑀓𑁄𑀲𑀮𑁆𑀮𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀳𑀢𑁆𑀣𑀸 𑀫𑀼𑀘𑁆𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀮𑀸𑀧𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑁂 𑀮𑁂𑀟𑁆𑀟𑀼𑀝𑁆𑀞𑀸𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 ‘‘𑀲𑀓𑀯𑀺𑀲𑀬𑁂 𑀕𑁄𑀘𑀭𑀕𑀳𑀡𑀁 𑀧𑀳𑀸𑀬 𑀧𑀭𑀯𑀺𑀲𑀬𑁂 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀝𑀯𑀺𑀧𑀭𑀺𑀬𑀦𑁆𑀢𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀢𑀢𑁆𑀣 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑀼𑀡𑀕𑁆𑀖𑀺 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸 𑀅𑀕𑁆𑀕𑀳𑁂𑀲𑀺. 𑀲𑁄 𑀲𑀓𑀼𑀡𑀕𑁆𑀖𑀺𑀬𑀸 𑀳𑀭𑀺𑀬𑀫𑀸𑀦𑁄 𑀏𑀯𑀁 𑀧𑀭𑀺𑀤𑁂𑀯𑀲𑀺 𑁋 ‘‘𑀫𑀬𑀫𑁂𑀯𑀫𑁆𑀳 𑀅𑀮𑀓𑁆𑀔𑀺𑀓𑀸, 𑀫𑀬𑀁 𑀅𑀧𑁆𑀧𑀧𑀼𑀜𑁆𑀜𑀸, 𑀬𑁂 𑀫𑀬𑀁 𑀅𑀕𑁄𑀘𑀭𑁂 𑀘𑀭𑀺𑀫𑁆𑀳 𑀧𑀭𑀯𑀺𑀲𑀬𑁂, 𑀲𑀘𑁂𑀚𑁆𑀚 𑀫𑀬𑀁 𑀕𑁄𑀘𑀭𑁂 𑀘𑀭𑁂𑀬𑁆𑀬𑀸𑀫 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂, 𑀦 𑀫𑁆𑀬𑀸𑀬𑀁 𑀲𑀓𑀼𑀡𑀕𑁆𑀖𑀺 𑀅𑀮𑀁 𑀅𑀪𑀯𑀺𑀲𑁆𑀲 𑀬𑀤𑀺𑀤𑀁 𑀬𑀼𑀤𑁆𑀥𑀸𑀬𑀸’’𑀢𑀺. ‘‘𑀓𑁄 𑀧𑀦, 𑀢𑁂 𑀮𑀸𑀧, 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄’’𑀢𑀺? ‘‘𑀬𑀤𑀺𑀤𑀁 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀁 𑀮𑁂𑀟𑁆𑀟𑀼𑀝𑁆𑀞𑀸𑀦’’𑀦𑁆𑀢𑀺. 𑀅𑀣 𑀦𑀁 𑀲𑀓𑀼𑀡𑀕𑁆𑀖𑀺 𑀲𑀓𑁂 𑀩𑀮𑁂 𑀅𑀧𑀢𑁆𑀣𑀤𑁆𑀥𑀸 𑀅𑀫𑀼𑀜𑁆𑀘𑀺 𑁋 ‘‘𑀕𑀘𑁆𑀙 𑀔𑁄, 𑀢𑁆𑀯𑀁 𑀮𑀸𑀧, 𑀢𑀢𑁆𑀭𑀧𑀺 𑀫𑁂 𑀕𑀦𑁆𑀢𑁆𑀯𑀸 𑀦 𑀫𑁄𑀓𑁆𑀔𑀲𑀻’’𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀏𑀳𑀺 𑀔𑁄 𑀤𑀸𑀦𑀺 𑀲𑀓𑀼𑀡𑀕𑁆𑀖𑀻’’𑀢𑀺 𑀲𑁂𑀦𑀁 𑀅𑀯𑁆𑀳𑀬𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀓𑀼𑀡𑀕𑁆𑀖𑀺 𑀲𑀓𑁂 𑀩𑀮𑁂 𑀅𑀧𑀢𑁆𑀣𑀤𑁆𑀥𑀸 𑀉𑀪𑁄 𑀧𑀓𑁆𑀔𑁂 𑀲𑀦𑁆𑀦𑀬𑁆𑀳 𑀮𑀸𑀧𑀲𑀓𑀼𑀡𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸. 𑀬𑀤𑀸 𑀧𑀦 𑀢𑀁 𑀮𑀸𑀧𑁄 ‘‘𑀩𑀳𑀼𑀆𑀕𑀢𑀸 𑀔𑁄 𑀫𑁆𑀬𑀸𑀬𑀁 𑀲𑀓𑀼𑀡𑀕𑁆𑀖𑀻’’𑀢𑀺 𑀅𑀜𑁆𑀜𑀸𑀲𑀺, 𑀅𑀣 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀮𑁂𑀟𑁆𑀟𑀼𑀲𑁆𑀲 𑀅𑀦𑁆𑀢𑀭𑀁 𑀧𑀘𑁆𑀘𑀸𑀧𑀸𑀤𑀺. 𑀲𑀓𑀼𑀡𑀕𑁆𑀖𑀺 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀢𑁆𑀣𑁂𑀯 𑀉𑀭𑀁 𑀧𑀘𑁆𑀘𑀢𑀸𑀴𑁂𑀲𑀺. 𑀏𑀯𑀁 𑀲𑀸 𑀪𑀺𑀦𑁆𑀦𑁂𑀦 𑀳𑀤𑀬𑁂𑀦 𑀦𑀺𑀓𑁆𑀔𑀦𑁆𑀢𑁂𑀳𑀺 𑀅𑀓𑁆𑀔𑀻𑀳𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 ¶ 𑀇𑀫𑀁 𑀅𑀢𑀻𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀅𑀕𑁄𑀘𑀭𑁂 𑀘𑀭𑀦𑁆𑀢𑀸 𑀲𑀧𑀢𑁆𑀢𑀳𑀢𑁆𑀣𑀁 𑀕𑀘𑁆𑀙𑀦𑁆𑀢𑀺, 𑀕𑁄𑀘𑀭𑁂 𑀧𑀦 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂 𑀘𑀭𑀦𑁆𑀢𑀸 𑀲𑀧𑀢𑁆𑀢𑁂 𑀦𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀧𑀺 𑀫𑀸 𑀅𑀕𑁄𑀘𑀭𑁂 𑀘𑀭𑀣 𑀧𑀭𑀯𑀺𑀲𑀬𑁂. 𑀅𑀕𑁄𑀘𑀭𑁂 ¶ , 𑀪𑀺𑀓𑁆𑀔𑀯𑁂, 𑀘𑀭𑀢𑀁 𑀧𑀭𑀯𑀺𑀲𑀬𑁂 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄? 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸…𑀧𑁂… 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁫.

‘‘𑀲𑁂𑀦𑁄 ¶ 𑀩𑀮𑀲𑀸 𑀧𑀢𑀫𑀸𑀦𑁄, 𑀮𑀸𑀧𑀁 𑀕𑁄𑀘𑀭𑀞𑀸𑀬𑀺𑀦𑀁;

𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑁄𑀯, 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀻’’𑀢𑀺.

𑀢𑀢𑁆𑀣 𑀩𑀮𑀲𑀸 𑀧𑀢𑀫𑀸𑀦𑁄𑀢𑀺 ‘‘𑀮𑀸𑀧𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑀮𑁂𑀦 𑀣𑀸𑀫𑁂𑀦 𑀧𑀢𑀫𑀸𑀦𑁄. 𑀕𑁄𑀘𑀭𑀞𑀸𑀬𑀺𑀦𑀦𑁆𑀢𑀺 𑀲𑀓𑀯𑀺𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀢𑁆𑀣𑀸𑀬 𑀅𑀝𑀯𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀁. 𑀅𑀚𑁆𑀛𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀧𑀢𑁆𑀢𑁄. 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀭𑀡𑀁 𑀧𑀢𑁆𑀢𑁄.

𑀢𑀲𑁆𑀫𑀺𑀁 𑀧𑀦 𑀫𑀭𑀡𑀁 𑀧𑀢𑁆𑀢𑁂 𑀮𑀸𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀤𑀺𑀝𑁆𑀞𑀸 𑀯𑀢 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀻’’𑀢𑀺 𑀢𑀲𑁆𑀲 𑀳𑀤𑀬𑁂 𑀞𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁬.

‘‘𑀲𑁄𑀳𑀁 𑀦𑀬𑁂𑀦 𑀲𑀫𑁆𑀧𑀦𑁆𑀦𑁄, 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑁄;

𑀅𑀧𑁂𑀢𑀲𑀢𑁆𑀢𑀼 𑀫𑁄𑀤𑀸𑀫𑀺, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀦𑀬𑁂𑀦𑀸𑀢𑀺 𑀉𑀧𑀸𑀬𑁂𑀦. 𑀅𑀢𑁆𑀣𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀅𑀭𑁄𑀕𑀪𑀸𑀯𑀲𑀗𑁆𑀔𑀸𑀢𑀁 𑀯𑀼𑀟𑁆𑀠𑀺𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀲𑁂𑀦𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀮𑀸𑀧𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀓𑀼𑀡𑀕𑁆𑀖𑀺𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁬𑁯] 𑁯. 𑀅𑀭𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 ¶ 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑁂𑀢𑁆𑀢𑀲𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬 𑀪𑀸𑀯𑀺𑀢𑀸𑀬 ¶ 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀏𑀓𑀸𑀤𑀲? 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺, 𑀦𑀸𑀲𑁆𑀲 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺, 𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀺. 𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬…𑀧𑁂… 𑀲𑀼𑀲𑀫𑀸𑀭𑀤𑁆𑀥𑀸𑀬 𑀇𑀫𑁂 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 ¶ 𑀧𑀸𑀝𑀺𑀓𑀗𑁆𑀔𑀸’’𑀢𑀺 (𑀅. 𑀦𑀺. 𑁧𑁧.𑁧𑁫). 𑀇𑀫𑁂 𑀏𑀓𑀸𑀤𑀲𑀸𑀦𑀺𑀲𑀁𑀲𑁂 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀡𑁆𑀡𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀳𑀺𑀢𑁄𑀧𑀺 𑀳𑀺𑀢𑁂𑀦 𑀨𑀭𑀺𑀢𑀩𑁆𑀩𑁄, 𑀅𑀳𑀺𑀢𑁄𑀧𑀺 𑀳𑀺𑀢𑁂𑀦 𑀨𑀭𑀺𑀢𑀩𑁆𑀩𑁄, 𑀫𑀚𑁆𑀛𑀢𑁆𑀢𑁄𑀧𑀺 𑀳𑀺𑀢𑁂𑀦 𑀨𑀭𑀺𑀢𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸 𑀪𑀸𑀯𑁂𑀢𑀩𑁆𑀩𑀸, 𑀘𑀢𑀽𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀅𑀮𑀪𑀦𑁆𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀩𑁆𑀭𑀳𑁆𑀫𑀮𑁄𑀓𑀲𑁆𑀫𑀺𑀁𑀬𑁂𑀯 𑀯𑀲𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀮𑀸𑀪𑀻 𑀅𑀭𑀓𑁄 𑀦𑀸𑀫 𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀲 𑀫𑀳𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀲𑁄 𑀇𑀲𑀺𑀕𑀡𑀁 𑀑𑀯𑀤𑀦𑁆𑀢𑁄 ‘‘𑀧𑀩𑁆𑀩𑀚𑀺𑀢𑁂𑀦 𑀦𑀸𑀫 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸 𑀪𑀸𑀯𑁂𑀢𑀩𑁆𑀩𑀸. 𑀫𑁂𑀢𑁆𑀢𑀘𑀺𑀢𑁆𑀢𑀜𑁆𑀳𑀺 𑀦𑀸𑀫𑁂𑀢𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀢𑀁 𑀲𑀸𑀥𑁂𑀢𑀻’’𑀢𑀺 𑀫𑁂𑀢𑁆𑀢𑀸𑀬 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁩𑁭.

‘‘𑀬𑁄 ¶ 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀢𑀺;

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀅𑀧𑁆𑀧𑀫𑀸𑀡𑁂𑀦 𑀲𑀩𑁆𑀩𑀲𑁄.

𑁩𑁮.

‘‘𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀪𑀸𑀯𑀺𑀢𑀁;

𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁, 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀬𑁄 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀬𑁄 𑀓𑁄𑀘𑀺 𑀅𑀧𑁆𑀧𑀫𑀸𑀡𑁂𑀦 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀲𑀓𑀮𑀁 𑀲𑀢𑁆𑀢𑀮𑁄𑀓𑀁 𑀅𑀦𑀼𑀓𑀫𑁆𑀧𑀢𑀺. 𑀉𑀤𑁆𑀥𑀦𑁆𑀢𑀺 𑀧𑀣𑀯𑀺𑀢𑁄 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀩𑁆𑀭𑀳𑁆𑀫𑀮𑁄𑀓𑀸. 𑀅𑀥𑁄𑀢𑀺 𑀧𑀣𑀯𑀺𑀬𑀸 𑀳𑁂𑀝𑁆𑀞𑀸 𑀉𑀲𑁆𑀲𑀤𑁂 𑀫𑀳𑀸𑀦𑀺𑀭𑀬𑁂. 𑀢𑀺𑀭𑀺𑀬𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀬𑀢𑁆𑀢𑀓𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀘 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀏𑀢𑁆𑀢𑀓𑁂 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀛𑀸 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽𑀢𑀺 𑀏𑀯𑀁 𑀪𑀸𑀯𑀺𑀢𑁂𑀦 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀦𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑁂𑀦. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦, 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀏𑀯𑀁 𑀲𑀩𑁆𑀩𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀪𑀸𑀯𑀺𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀯𑀺𑀓𑀮𑀁. 𑀲𑀼𑀪𑀸𑀯𑀺𑀢𑀦𑁆𑀢𑀺 𑀲𑀼𑀯𑀟𑁆𑀠𑀺𑀢𑀁, 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀦𑁆𑀢𑀺 𑀬𑀁 ‘‘𑀅𑀧𑁆𑀧𑀫𑀸𑀡𑀁 ¶ 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺 𑀏𑀯𑀁 𑀆𑀭𑀫𑁆𑀫𑀡𑀢𑁆𑀢𑀺𑀓𑀯𑀲𑁂𑀦 𑀘 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀅𑀯𑀟𑁆𑀠𑀺𑀢𑁆𑀯𑀸 𑀓𑀢𑀁 𑀧𑀭𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀻𑀢𑀺 𑀢𑀁 𑀧𑀭𑀺𑀢𑁆𑀢𑀁 𑀓𑀫𑁆𑀫𑀁 𑀬𑀁 𑀢𑀁 ‘‘𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀲𑀗𑁆𑀔𑀕𑀢𑀁 𑀭𑀽𑀧𑀸𑀯𑀘𑀭𑀓𑀫𑁆𑀫𑀁, 𑀢𑀢𑁆𑀭 𑀦 𑀅𑀯𑀲𑀺𑀲𑁆𑀲𑀢𑀺. 𑀬𑀣𑀸 𑀦𑀸𑀫 𑀫𑀳𑁄𑀖𑁂𑀦 𑀅𑀚𑁆𑀛𑁄𑀢𑁆𑀣𑀝𑀁 𑀧𑀭𑀺𑀢𑁆𑀢𑁄𑀤𑀓𑀁 𑀑𑀖𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀢𑁂𑀦 𑀅𑀲𑀁𑀳𑀻𑀭𑀫𑀸𑀦𑀁 𑀦𑀸𑀯𑀲𑀺𑀲𑁆𑀲𑀢𑀺 𑀦 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀫𑀳𑁄𑀖𑁄𑀯 𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀢𑀁 𑀧𑀭𑀺𑀢𑁆𑀢𑀓𑀫𑁆𑀫𑀁 𑀢𑀲𑁆𑀲 𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀢𑁂𑀦 𑀫𑀳𑀕𑁆𑀕𑀢𑀓𑀫𑁆𑀫𑁂𑀦 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀕𑁆𑀕𑀳𑀺𑀢𑀯𑀺𑀧𑀸𑀓𑁄𑀓𑀸𑀲𑀁 𑀳𑀼𑀢𑁆𑀯𑀸 𑀦 𑀅𑀯𑀲𑀺𑀲𑁆𑀲𑀢𑀺 𑀦 𑀢𑀺𑀝𑁆𑀞𑀢𑀺, 𑀦 𑀲𑀓𑁆𑀓𑁄𑀢𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁, 𑀅𑀣 𑀔𑁄 𑀫𑀳𑀕𑁆𑀕𑀢𑀓𑀫𑁆𑀫𑀫𑁂𑀯 𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀦 𑀇𑀫𑀁 𑀮𑁄𑀓𑀁 𑀧𑀼𑀦 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀅𑀭𑀓𑁄 𑀧𑀦 𑀲𑀢𑁆𑀣𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀭𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁭𑁦] 𑁧𑁦. 𑀓𑀓𑀡𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀬𑀁 ¶ 𑀧𑀼𑀭𑁂 𑀉𑀡𑁆𑀡𑀫𑀢𑀻𑀢𑀺 𑀇𑀤𑀁 𑀓𑀓𑀡𑁆𑀝𑀓𑀚𑀸𑀢𑀓𑀁 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀓𑀓𑀡𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀲𑀦𑁆𑀣𑀯𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀜𑁆𑀘, 𑀲𑀦𑁆𑀣𑀯𑀁 𑀲𑀼𑀲𑀻𑀫𑀁 𑀕𑀺𑀚𑁆𑀛𑀁;

𑀦𑀓𑀼𑀮𑀁 𑀉𑀧𑀲𑀸𑀴𑀓𑀁, 𑀲𑀫𑀺𑀤𑁆𑀥𑀺 𑀘 𑀲𑀓𑀼𑀡𑀕𑁆𑀖𑀺;

𑀅𑀭𑀓𑀜𑁆𑀘 𑀓𑀓𑀡𑁆𑀝𑀓𑀁.

𑁩. 𑀓𑀮𑁆𑀬𑀸𑀡𑀯𑀕𑁆𑀕𑁄

[𑁧𑁭𑁧] 𑁧. 𑀓𑀮𑁆𑀬𑀸𑀡𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀩𑀥𑀺𑀭𑀲𑀲𑁆𑀲𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀢𑀺𑀲𑀭𑀡𑀕𑀢𑁄 𑀧𑀜𑁆𑀘𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀏𑀓𑀤𑀺𑀯𑀲𑀁 𑀩𑀳𑀽𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀘𑁂𑀯 𑀧𑀼𑀧𑁆𑀨𑀕𑀦𑁆𑀥𑀯𑀢𑁆𑀣𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 ‘‘𑀚𑁂𑀢𑀯𑀦𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀅𑀕𑀫𑀸𑀲𑀺. 𑀢𑀲𑁆𑀲 𑀢𑀢𑁆𑀣 𑀕𑀢𑀓𑀸𑀮𑁂 𑀲𑀲𑁆𑀲𑀼 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀕𑀳𑁂𑀢𑁆𑀯𑀸 𑀥𑀻𑀢𑀭𑀁 𑀤𑀝𑁆𑀞𑀼𑀓𑀸𑀫𑀸 𑀢𑀁 𑀕𑁂𑀳𑀁 𑀅𑀕𑀫𑀸𑀲𑀺, 𑀲𑀸 𑀘 𑀣𑁄𑀓𑀁 𑀩𑀥𑀺𑀭𑀥𑀸𑀢𑀼𑀓𑀸 𑀳𑁄𑀢𑀺. 𑀲𑀸 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀪𑀼𑀢𑁆𑀢𑀪𑁄𑀚𑀦𑀸 ¶ 𑀪𑀢𑁆𑀢𑀲𑀫𑁆𑀫𑀤𑀁 𑀯𑀺𑀦𑁄𑀤𑀬𑀫𑀸𑀦𑀸 𑀥𑀻𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀅𑀫𑁆𑀫, 𑀪𑀢𑁆𑀢𑀸 𑀢𑁂 𑀲𑀫𑁆𑀫𑁄𑀤𑀫𑀸𑀦𑁄 𑀅𑀯𑀺𑀯𑀤𑀫𑀸𑀦𑁄 𑀧𑀺𑀬𑀲𑀁𑀯𑀸𑀲𑀁 𑀯𑀲𑀢𑀻’’𑀢𑀺. ‘‘𑀓𑀺𑀁, 𑀅𑀫𑁆𑀫, 𑀓𑀣𑁂𑀣 𑀬𑀸𑀤𑀺𑀲𑁄 𑀢𑀼𑀫𑁆𑀳𑀸𑀓𑀁 𑀚𑀸𑀫𑀸𑀢𑀸 𑀲𑀻𑀮𑁂𑀦 𑀘𑁂𑀯 𑀆𑀘𑀸𑀭𑀲𑀫𑁆𑀧𑀤𑀸𑀬 𑀘, 𑀢𑀸𑀤𑀺𑀲𑁄 𑀧𑀩𑁆𑀩𑀚𑀺𑀢𑁄𑀧𑀺 𑀤𑀼𑀮𑁆𑀮𑀪𑁄’’𑀢𑀺. 𑀉𑀧𑀸𑀲𑀺𑀓𑀸 𑀥𑀻𑀢𑀼 𑀯𑀘𑀦𑀁 𑀲𑀸𑀥𑀼𑀓𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑁄’’𑀢𑀺 𑀧𑀤𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀅𑀫𑁆𑀫, 𑀓𑀲𑁆𑀫𑀸 𑀢𑁂 𑀪𑀢𑁆𑀢𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀫𑀳𑀸𑀲𑀤𑁆𑀤𑀁 𑀅𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀓𑀮𑀕𑁂𑀳𑀯𑀸𑀲𑀺𑀦𑁄 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀓𑀼𑀝𑀼𑀫𑁆𑀩𑀺𑀓𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀯𑀺𑀭𑀯𑀺𑀁𑀲𑀼. 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀤𑁆𑀯𑀸𑀭𑁂𑀦 𑀲𑀜𑁆𑀘𑀭𑀦𑁆𑀢𑀸 ‘‘𑀓𑀺𑀁 𑀦𑀸𑀫 𑀓𑀺𑀭𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀇𑀫𑀲𑁆𑀫𑀺𑀁 𑀓𑀺𑀭 𑀕𑁂𑀳𑁂 𑀓𑀼𑀝𑀼𑀫𑁆𑀩𑀺𑀓𑁄 𑀧𑀩𑁆𑀩𑀚𑀺𑀢𑁄’’𑀢𑀺. 𑀲𑁄𑀧𑀺 𑀔𑁄 𑀓𑀼𑀝𑀼𑀫𑁆𑀩𑀺𑀓𑁄 𑀤𑀲𑀩𑀮𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀦𑀕𑀭𑀁 𑀧𑀸𑀯𑀺𑀲𑀺.

𑀅𑀣 𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀏𑀓𑁄 𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀓𑀺𑀭 𑀧𑀩𑁆𑀩𑀚𑀺𑀢𑁄𑀢𑀺 𑀢𑀯 𑀕𑁂𑀳𑁂 𑀧𑀼𑀢𑁆𑀢𑀤𑀸𑀭𑀧𑀭𑀺𑀚𑀦𑁄 𑀧𑀭𑀺𑀤𑁂𑀯𑀢𑀻’’𑀢𑀺 𑀆𑀳. 𑀅𑀣𑀲𑁆𑀲 ¶ 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀅𑀧𑀩𑁆𑀩𑀚𑀺𑀢𑀫𑁂𑀯 𑀓𑀺𑀭 𑀫𑀁 ‘𑀧𑀩𑁆𑀩𑀚𑀺𑀢𑁄’𑀢𑀺 𑀯𑀤𑀢𑀺, 𑀉𑀧𑁆𑀧𑀦𑁆𑀦𑁄 𑀔𑁄 𑀧𑀦 𑀫𑁂 𑀓𑀮𑁆𑀬𑀸𑀡𑀲𑀤𑁆𑀤𑁄 𑀦 𑀅𑀦𑁆𑀢𑀭𑀥𑀸𑀧𑁂𑀢𑀩𑁆𑀩𑁄, 𑀅𑀚𑁆𑀚𑁂𑀯 𑀫𑀬𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀉𑀧𑀸𑀲𑀓, 𑀇𑀤𑀸𑀦𑁂𑀯 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀇𑀤𑀸𑀦𑁂𑀯 𑀧𑀘𑁆𑀘𑀸𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀮𑁆𑀬𑀸𑀡𑀲𑀤𑁆𑀤𑁄 𑀦𑀸𑀫 𑀉𑀧𑁆𑀧𑀦𑁆𑀦𑁄 𑀦 𑀅𑀦𑁆𑀢𑀭𑀥𑀸𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀲𑁄 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀤𑀁 𑀓𑀺𑀭 𑀓𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀁 𑀚𑀸𑀢𑀁. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 ‘𑀉𑀧𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀲𑀤𑁆𑀤𑁄 ¶ 𑀦 𑀅𑀦𑁆𑀢𑀭𑀥𑀸𑀧𑁂𑀢𑀩𑁆𑀩𑁄’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 ‘𑀉𑀧𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀲𑀤𑁆𑀤𑁄 𑀯𑀺𑀭𑀸𑀥𑁂𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺 𑀧𑀩𑁆𑀩𑀚𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀸𑀧𑀼𑀡𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀲𑀲𑁆𑀲𑀼 ‘‘𑀥𑀻𑀢𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀕𑁂𑀳𑀁 𑀅𑀕𑀫𑀸𑀲𑀺, 𑀲𑀸 𑀣𑁄𑀓𑀁 𑀩𑀥𑀺𑀭𑀥𑀸𑀢𑀼𑀓𑀸𑀢𑀺 𑀲𑀩𑁆𑀩𑀁 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀢𑀁 𑀧𑀦 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀏𑀓𑁄 𑀧𑀼𑀭𑀺𑀲𑁄 ‘‘𑀢𑀼𑀫𑁆𑀳𑁂 𑀓𑀺𑀭 𑀧𑀩𑁆𑀩𑀚𑀺𑀢𑀸𑀢𑀺 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀫𑀳𑀸𑀧𑀭𑀺𑀤𑁂𑀯𑁄 𑀧𑀯𑀢𑁆𑀢𑀢𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀉𑀧𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀲𑀤𑁆𑀤𑁄 𑀦𑀸𑀫 𑀦 𑀅𑀦𑁆𑀢𑀭𑀥𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀫𑀳𑀸𑀲𑁂𑀝𑁆𑀞𑀺, 𑀇𑀤𑀸𑀦𑁂𑀯 𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀕𑁂𑀳𑀚𑀦𑁄 𑀓𑀺𑀭 𑀫𑀁 𑀅𑀧𑀩𑁆𑀩𑀚𑀺𑀢𑀫𑁂𑀯 ‘𑀧𑀩𑁆𑀩𑀚𑀺𑀢𑁄’𑀢𑀺 𑀯𑀢𑁆𑀯𑀸 𑀧𑀭𑀺𑀤𑁂𑀯𑀢𑀺, 𑀉𑀧𑁆𑀧𑀦𑁆𑀦𑁄 𑀔𑁄 𑀧𑀦 𑀓𑀮𑁆𑀬𑀸𑀡𑀲𑀤𑁆𑀤𑁄 𑀦 𑀅𑀦𑁆𑀢𑀭𑀥𑀸𑀧𑁂𑀢𑀩𑁆𑀩𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦𑀸𑀳𑀻’’𑀢𑀺 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀇𑀫𑀸 𑀕𑀸𑀣𑀸 𑀆𑀳 𑁋

𑁪𑁧.

‘‘𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 ¶ 𑀬𑀤𑀸 𑀚𑀦𑀺𑀦𑁆𑀤, 𑀮𑁄𑀓𑁂 𑀲𑀫𑀜𑁆𑀜𑀁 𑀅𑀦𑀼𑀧𑀸𑀧𑀼𑀡𑀸𑀢𑀺;

𑀢𑀲𑁆𑀫𑀸 𑀦 𑀳𑀺𑀬𑁆𑀬𑁂𑀣 𑀦𑀭𑁄 𑀲𑀧𑀜𑁆𑀜𑁄, 𑀳𑀺𑀭𑀺𑀬𑀸𑀧𑀺 𑀲𑀦𑁆𑀢𑁄 𑀖𑀼𑀭𑀫𑀸𑀤𑀺𑀬𑀦𑁆𑀢𑀺.

𑁪𑁨.

‘‘𑀲𑀸𑀬𑀁 𑀲𑀫𑀜𑁆𑀜𑀸 𑀇𑀥 𑀫𑀚𑁆𑀚 𑀧𑀢𑁆𑀢𑀸, 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀚𑀦𑀺𑀦𑁆𑀤 𑀮𑁄𑀓𑁂;

𑀢𑀸𑀳𑀁 𑀲𑀫𑁂𑀓𑁆𑀔𑀁 𑀇𑀥 𑀧𑀩𑁆𑀩𑀚𑀺𑀲𑁆𑀲𑀁, 𑀦 𑀳𑀺 𑀫𑀢𑁆𑀣𑀺 𑀙𑀦𑁆𑀤𑁄 𑀇𑀥 𑀓𑀸𑀫𑀪𑁄𑀕𑁂’’𑀢𑀺.

𑀢𑀢𑁆𑀣 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀲𑀼𑀦𑁆𑀤𑀭𑀥𑀫𑁆𑀫𑁄. 𑀲𑀫𑀜𑁆𑀜𑀁 𑀅𑀦𑀼𑀧𑀸𑀧𑀼𑀡𑀸𑀢𑀻𑀢𑀺 𑀬𑀤𑀸 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀧𑀩𑁆𑀩𑀚𑀺𑀢𑁄𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀦 𑀳𑀺𑀬𑁆𑀬𑁂𑀣𑀸𑀢𑀺 𑀢𑀢𑁄 𑀲𑀸𑀫𑀜𑁆𑀜𑀢𑁄 𑀦 𑀧𑀭𑀺𑀳𑀸𑀬𑁂𑀣. 𑀳𑀺𑀭𑀺𑀬𑀸𑀧𑀺 𑀲𑀦𑁆𑀢𑁄 𑀥𑀼𑀭𑀫𑀸𑀤𑀺𑀬𑀦𑁆𑀢𑀻𑀢𑀺, 𑀫𑀳𑀸𑀭𑀸𑀚, 𑀲𑀧𑁆𑀧𑀼𑀭𑀺𑀲𑀸 𑀦𑀸𑀫 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀺𑀢𑀸𑀬 𑀳𑀺𑀭𑀺𑀬𑀸 𑀩𑀳𑀺𑀤𑁆𑀥𑀲𑀫𑀼𑀝𑁆𑀞𑀺𑀢𑁂𑀦 𑀑𑀢𑁆𑀢𑀧𑁆𑀧𑁂𑀦𑀧𑀺 𑀏𑀢𑀁 𑀧𑀩𑁆𑀩𑀚𑀺𑀢𑀥𑀼𑀭𑀁 𑀕𑀡𑁆𑀳𑀦𑁆𑀢𑀺. 𑀇𑀥 𑀫𑀚𑁆𑀚 𑀧𑀢𑁆𑀢𑀸𑀢𑀺 𑀇𑀥 𑀫𑀬𑀸 𑀅𑀚𑁆𑀚 𑀧𑀢𑁆𑀢𑀸. 𑀢𑀸𑀳𑀁 𑀲𑀫𑁂𑀓𑁆𑀔𑀦𑁆𑀢𑀺 𑀢𑀁 𑀅𑀳𑀁 𑀕𑀼𑀡𑀯𑀲𑁂𑀦 𑀮𑀤𑁆𑀥𑀲𑀫𑀜𑁆𑀜𑀁 𑀲𑀫𑁂𑀓𑁆𑀔𑀦𑁆𑀢𑁄 𑀧𑀲𑁆𑀲𑀦𑁆𑀢𑁄. 𑀦 𑀳𑀺 𑀫𑀢𑁆𑀣𑀺 𑀙𑀦𑁆𑀤𑁄𑀢𑀺 𑀦 𑀳𑀺 𑀫𑁂 𑀅𑀢𑁆𑀣𑀺 𑀙𑀦𑁆𑀤𑁄. 𑀇𑀥 𑀓𑀸𑀫𑀪𑁄𑀕𑁂𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑀧𑀭𑀺𑀪𑁄𑀕𑁂𑀳𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀏𑀯𑀁 𑀯𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀮𑁆𑀬𑀸𑀡𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁭𑁨] 𑁨. 𑀤𑀤𑁆𑀤𑀭𑀚𑀸𑀢𑀓𑀯𑀡𑁆𑀡𑀦𑀸

𑀓𑁄 𑀦𑀼 𑀲𑀤𑁆𑀤𑁂𑀦 𑀫𑀳𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀩𑀳𑀽 𑀩𑀳𑀼𑀲𑁆𑀲𑀼𑀢𑀸 𑀪𑀺𑀓𑁆𑀔𑀽 𑀫𑀦𑁄𑀲𑀺𑀮𑀸𑀢𑀮𑁂 𑀦𑀤𑀫𑀸𑀦𑀸 𑀢𑀭𑀼𑀡𑀲𑀻𑀳𑀸 𑀯𑀺𑀬 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑀸 ¶ 𑀯𑀺𑀬 𑀲𑀗𑁆𑀖𑀫𑀚𑁆𑀛𑁂 𑀲𑀭𑀪𑀸𑀡𑀁 𑀪𑀡𑀦𑁆𑀢𑀺. 𑀓𑁄𑀓𑀸𑀮𑀺𑀓𑁄 𑀢𑁂𑀲𑀼 𑀲𑀭𑀪𑀸𑀡𑀁 𑀪𑀡𑀦𑁆𑀢𑁂𑀲𑀼 𑀅𑀢𑁆𑀢𑀦𑁄 𑀢𑀼𑀘𑁆𑀙𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸𑀯 ‘‘𑀅𑀳𑀫𑁆𑀧𑀺 𑀲𑀭𑀪𑀸𑀡𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀭𑀪𑀸𑀡𑀁 𑀦 𑀧𑀸𑀧𑁂𑀦𑁆𑀢𑀺. 𑀲𑀘𑁂 𑀅𑀫𑁆𑀳𑀸𑀓𑀫𑁆𑀧𑀺 𑀧𑀸𑀧𑁂𑀬𑁆𑀬𑀼𑀁, 𑀫𑀬𑀫𑁆𑀧𑀺 𑀪𑀡𑁂𑀬𑁆𑀬𑀸𑀫𑀸’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀢𑀢𑁆𑀣 𑀢𑀢𑁆𑀣 𑀓𑀣𑁂𑀦𑁆𑀢𑁄 𑀆𑀳𑀺𑀡𑁆𑀟𑀢𑀺. 𑀢𑀲𑁆𑀲 𑀲𑀸 𑀓𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀚𑀸𑀢𑀸. 𑀪𑀺𑀓𑁆𑀔𑀽 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫 𑀢𑀸𑀯 𑀦’’𑀦𑁆𑀢𑀺 𑀲𑀜𑁆𑀜𑀸𑀬 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀓𑁄𑀓𑀸𑀮𑀺𑀓, 𑀅𑀚𑁆𑀚 𑀲𑀗𑁆𑀖𑀲𑁆𑀲 𑀲𑀭𑀪𑀸𑀡𑀁 𑀪𑀡𑀸𑀳𑀻’’𑀢𑀺. 𑀲𑁄 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀺𑀢𑁆𑀯𑀸𑀯 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀅𑀚𑁆𑀚 𑀲𑀭𑀪𑀸𑀡𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀁 𑀬𑀸𑀕𑀼𑀁 𑀧𑀺𑀯𑀺, 𑀔𑀚𑁆𑀚𑀓𑀁 𑀔𑀸𑀤𑀺, 𑀲𑀧𑁆𑀧𑀸𑀬𑁂𑀦𑁂𑀯 𑀲𑀽𑀧𑁂𑀦 𑀪𑀼𑀜𑁆𑀚𑀺.

𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀥𑀫𑁆𑀫𑀲𑁆𑀲𑀯𑀦𑀓𑀸𑀮𑁂 𑀖𑁄𑀲𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺. 𑀲𑁄 𑀓𑀡𑁆𑀝𑀓𑀼𑀭𑀡𑁆𑀟𑀓𑀯𑀡𑁆𑀡𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 𑀅𑀮𑀗𑁆𑀓𑀢𑀭𑀢𑀦𑀫𑀡𑁆𑀟𑀧𑁂 𑀧𑀜𑁆𑀜𑀢𑁆𑀢𑀯𑀭𑀥𑀫𑁆𑀫𑀸𑀲𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘𑀺𑀢𑁆𑀭𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 ‘‘𑀲𑀭𑀪𑀸𑀡𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀻𑀤𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀭𑀻𑀭𑀸 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀲𑀸𑀭𑀚𑁆𑀚𑀁 𑀑𑀓𑁆𑀓𑀫𑀺, 𑀧𑀼𑀩𑁆𑀩𑀕𑀸𑀣𑀸𑀬 𑀧𑀞𑀫𑀁 𑀧𑀤𑀁 𑀉𑀤𑀸𑀳𑀭𑀺𑀢𑁆𑀯𑀸 𑀅𑀦𑀦𑁆𑀢𑀭𑀁 𑀦 𑀧𑀲𑁆𑀲𑀺. 𑀲𑁄 𑀓𑀫𑁆𑀧𑀫𑀸𑀦𑁄 𑀆𑀲𑀦𑀸 𑀑𑀭𑀼𑀬𑁆𑀳 𑀮𑀚𑁆𑀚𑀺𑀢𑁄 𑀲𑀗𑁆𑀖𑀫𑀚𑁆𑀛𑀢𑁄 𑀅𑀧𑀓𑁆𑀓𑀫𑁆𑀫 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀁 𑀅𑀕𑀫𑀸𑀲𑀺. 𑀅𑀜𑁆𑀜𑁄 𑀩𑀳𑀼𑀲𑁆𑀲𑀼𑀢𑁄 𑀪𑀺𑀓𑁆𑀔𑀼 𑀲𑀭𑀪𑀸𑀡𑀁 𑀪𑀡𑀺. 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽 𑀢𑀲𑁆𑀲 𑀢𑀼𑀘𑁆𑀙𑀪𑀸𑀯𑀁 𑀚𑀸𑀦𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 ¶ 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀧𑀞𑀫𑀁 𑀓𑁄𑀓𑀸𑀮𑀺𑀓𑀲𑁆𑀲 𑀢𑀼𑀘𑁆𑀙𑀪𑀸𑀯𑁄 𑀤𑀼𑀚𑁆𑀚𑀸𑀦𑁄, 𑀇𑀤𑀸𑀦𑀺 ¶ 𑀧𑀦𑁂𑀲 𑀲𑀬𑀁 𑀦𑀤𑀺𑀢𑁆𑀯𑀸 𑀧𑀸𑀓𑀝𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀓𑀸𑀮𑀺𑀓𑁄 𑀇𑀤𑀸𑀦𑁂𑀯 𑀦𑀤𑀺𑀢𑁆𑀯𑀸 𑀧𑀸𑀓𑀝𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀦𑀤𑀺𑀢𑁆𑀯𑀸 𑀧𑀸𑀓𑀝𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀲𑀻𑀳𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀳𑀽𑀦𑀁 ¶ 𑀲𑀻𑀳𑀸𑀦𑀁 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀅𑀦𑁂𑀓𑀲𑀻𑀳𑀧𑀭𑀺𑀯𑀸𑀭𑁄 𑀭𑀚𑀢𑀕𑀼𑀳𑀸𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀺𑀲𑁆𑀲𑀸𑀬 𑀕𑀼𑀳𑀸𑀬 𑀏𑀓𑁄 𑀲𑀺𑀗𑁆𑀕𑀸𑀮𑁄𑀧𑀺 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀤𑁂𑀯𑁂 𑀯𑀲𑁆𑀲𑀺𑀢𑁆𑀯𑀸 𑀯𑀺𑀕𑀢𑁂 𑀲𑀩𑁆𑀩𑁂 𑀲𑀻𑀳𑀸 𑀲𑀻𑀳𑀭𑀸𑀚𑀲𑁆𑀲𑁂𑀯 𑀕𑀼𑀳𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑀸 𑀲𑀻𑀳𑀓𑀻𑀴𑀁 𑀓𑀻𑀴𑀺𑀁𑀲𑀼. 𑀢𑁂𑀲𑀁 𑀏𑀯𑀁 𑀦𑀤𑀺𑀢𑁆𑀯𑀸 𑀓𑀻𑀴𑀦𑀓𑀸𑀮𑁂 𑀲𑁄𑀧𑀺 𑀲𑀺𑀗𑁆𑀕𑀸𑀮𑁄 𑀦𑀤𑀢𑀺. 𑀲𑀻𑀳𑀸 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀺𑀗𑁆𑀕𑀸𑀮𑁄 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦𑀤𑀢𑀻’’𑀢𑀺 𑀮𑀚𑁆𑀚𑀺𑀢𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀢𑁂𑀲𑀁 𑀢𑀼𑀡𑁆𑀳𑀻𑀪𑀽𑀢𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀲𑀻𑀳𑀧𑁄𑀢𑀓𑁄 ‘‘𑀢𑀸𑀢, 𑀇𑀫𑁂 𑀲𑀻𑀳𑀸 𑀦𑀤𑀺𑀢𑁆𑀯𑀸 𑀲𑀻𑀳𑀓𑀻𑀴𑀁 𑀓𑀻𑀴𑀦𑁆𑀢𑀸 𑀏𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀮𑀚𑁆𑀚𑀸𑀬 𑀢𑀼𑀡𑁆𑀳𑀻 𑀚𑀸𑀢𑀸, 𑀓𑁄 𑀦𑀸𑀫𑁂𑀲 𑀅𑀢𑁆𑀢𑀦𑁄 𑀲𑀤𑁆𑀤𑁂𑀦 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀢𑀻’’𑀢𑀺 𑀧𑀺𑀢𑀭𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁩.

‘‘𑀓𑁄 𑀦𑀼 𑀲𑀤𑁆𑀤𑁂𑀦 𑀫𑀳𑀢𑀸, 𑀅𑀪𑀺𑀦𑀸𑀤𑁂𑀢𑀺 𑀤𑀤𑁆𑀤𑀭𑀁;

𑀢𑀁 𑀲𑀻𑀳𑀸 𑀦𑀧𑁆𑀧𑀝𑀺𑀦𑀤𑀦𑁆𑀢𑀺, 𑀓𑁄 𑀦𑀸𑀫𑁂𑀲𑁄 𑀫𑀺𑀕𑀸𑀥𑀺𑀪𑀽’’𑀢𑀺.

𑀢𑀢𑁆𑀣 𑀅𑀪𑀺𑀦𑀸𑀤𑁂𑀢𑀺 𑀤𑀤𑁆𑀤𑀭𑀦𑁆𑀢𑀺 𑀤𑀤𑁆𑀤𑀭𑀁 𑀭𑀚𑀢𑀧𑀩𑁆𑀩𑀢𑀁 𑀏𑀓𑀦𑀸𑀤𑀁 𑀓𑀭𑁄𑀢𑀺. 𑀫𑀺𑀕𑀸𑀥𑀺𑀪𑀽𑀢𑀺 𑀧𑀺𑀢𑀭𑀁 𑀆𑀮𑀧𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀫𑀺𑀕𑀸𑀥𑀺𑀪𑀽 𑀫𑀺𑀕𑀚𑁂𑀝𑁆𑀞𑀓 𑀲𑀻𑀳𑀭𑀸𑀚 𑀧𑀼𑀘𑁆𑀙𑀸𑀫𑀺 𑀢𑀁 ‘‘𑀓𑁄 𑀦𑀸𑀫𑁂𑀲𑁄’’𑀢𑀺.

𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀺𑀢𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁪.

‘‘𑀅𑀥𑀫𑁄 𑀫𑀺𑀕𑀚𑀸𑀢𑀸𑀦𑀁, 𑀲𑀺𑀗𑁆𑀕𑀸𑀮𑁄 𑀢𑀸𑀢 𑀯𑀲𑁆𑀲𑀢𑀺;

𑀚𑀸𑀢𑀺𑀫𑀲𑁆𑀲 𑀚𑀺𑀕𑀼𑀘𑁆𑀙𑀦𑁆𑀢𑀸, 𑀢𑀼𑀡𑁆𑀳𑀻 𑀲𑀻𑀳𑀸 𑀲𑀫𑀘𑁆𑀘𑀭𑁂’’𑀢𑀺.

𑀢𑀢𑁆𑀣 𑀲𑀫𑀘𑁆𑀘𑀭𑁂𑀢𑀺 𑀲𑀦𑁆𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀅𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀲𑀫𑀘𑁆𑀙𑀭𑁂’’𑀢𑀺 𑀮𑀺𑀔𑀦𑁆𑀢𑀺.

𑀲𑀢𑁆𑀣𑀸 ¶ ¶ ‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀓𑀸𑀮𑀺𑀓𑁄 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀦𑀸𑀤𑁂𑀦 𑀅𑀢𑁆𑀢𑀸𑀦𑀁 𑀧𑀸𑀓𑀝𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀲𑀻𑀳𑀧𑁄𑀢𑀓𑁄 𑀭𑀸𑀳𑀼𑀮𑁄, 𑀲𑀻𑀳𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀤𑁆𑀤𑀭𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁭𑁩] 𑁩. 𑀫𑀓𑁆𑀓𑀝𑀚𑀸𑀢𑀓𑀯𑀡𑁆𑀡𑀦𑀸

𑀢𑀸𑀢𑀫𑀸𑀡𑀯𑀓𑁄 ¶ 𑀏𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑁂 𑀉𑀤𑁆𑀤𑀸𑀮𑀓𑀚𑀸𑀢𑀓𑁂 (𑀚𑀸. 𑁧.𑁧𑁪.𑁬𑁨 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀦𑀸𑀬𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀓𑀼𑀳𑀓𑁄, 𑀧𑀼𑀩𑁆𑀩𑁂𑀧𑀺 𑀫𑀓𑁆𑀓𑀝𑁄 𑀳𑀼𑀢𑁆𑀯𑀸 𑀅𑀕𑁆𑀕𑀺𑀲𑁆𑀲 𑀓𑀸𑀭𑀡𑀸 𑀓𑁄𑀳𑀜𑁆𑀜𑀁 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀲𑀺. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀓𑀸𑀮𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀧𑁂𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 ‘‘𑀓𑀺𑀁 𑀫𑁂 𑀤𑀸𑀦𑀺 𑀖𑀭𑀸𑀯𑀸𑀲𑁂𑀦, 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀫𑀺𑀢𑁆𑀢𑀯𑀕𑁆𑀕𑀁 𑀧𑀳𑀸𑀬 𑀧𑀼𑀢𑁆𑀢𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀲𑁆𑀲𑀸𑀦𑀓𑀸𑀮𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀸𑀭𑀤𑀸𑀭𑀽𑀦𑀺 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀯𑀺𑀲𑀺𑀩𑁆𑀩𑀦𑁆𑀢𑁄 𑀨𑀮𑀓𑀢𑁆𑀣𑀭𑁂 𑀦𑀺𑀧𑀚𑁆𑀚𑀺, 𑀧𑀼𑀢𑁆𑀢𑁄𑀧𑀺𑀲𑁆𑀲 𑀢𑀸𑀧𑀲𑀓𑀼𑀫𑀸𑀭𑀓𑁄 𑀧𑀺𑀢𑀼 𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑁄𑀯 𑀦𑀺𑀲𑀻𑀤𑀺.

𑀅𑀣𑁂𑀓𑁄 𑀯𑀦𑀫𑀓𑁆𑀓𑀝𑁄 𑀲𑀻𑀢𑁂𑀦 𑀧𑀻𑀴𑀺𑀬𑀫𑀸𑀦𑁄 𑀢𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀢𑀁 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀳𑀁 𑀏𑀢𑁆𑀣 𑀧𑀯𑀺𑀲𑀺𑀲𑁆𑀲𑀸𑀫𑀺, ‘𑀫𑀓𑁆𑀓𑀝𑁄 𑀫𑀓𑁆𑀓𑀝𑁄’𑀢𑀺 𑀫𑀁 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀺𑀲𑁆𑀲𑀦𑁆𑀢𑀺, 𑀅𑀕𑁆𑀕𑀺𑀁 𑀯𑀺𑀲𑀺𑀩𑁆𑀩𑁂𑀢𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀅𑀢𑁆𑀣𑀺 𑀤𑀸𑀦𑀺 𑀫𑁂 𑀉𑀧𑀸𑀬𑁄, 𑀢𑀸𑀧𑀲𑀯𑁂𑀲𑀁 𑀕𑀳𑁂𑀢𑁆𑀯𑀸 𑀓𑁄𑀳𑀜𑁆𑀜𑀁 𑀓𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀲𑁆𑀲 𑀫𑀢𑀢𑀸𑀧𑀲𑀲𑁆𑀲 𑀯𑀓𑁆𑀓𑀮𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀧𑀘𑁆𑀙𑀺𑀜𑁆𑀘 𑀅𑀗𑁆𑀓𑀼𑀲𑀬𑀝𑁆𑀞𑀺𑀜𑁆𑀘 ¶ 𑀕𑀳𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀏𑀓𑀁 𑀢𑀸𑀮𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀁𑀓𑀼𑀝𑀺𑀢𑁄 𑀅𑀝𑁆𑀞𑀸𑀲𑀺. 𑀢𑀸𑀧𑀲𑀓𑀼𑀫𑀸𑀭𑀓𑁄 𑀢𑀁 𑀤𑀺𑀲𑁆𑀯𑀸 𑀫𑀓𑁆𑀓𑀝𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀏𑀓𑁄 𑀫𑀳𑀮𑁆𑀮𑀓𑀢𑀸𑀧𑀲𑁄 𑀲𑀻𑀢𑁂𑀦 𑀧𑀻𑀴𑀺𑀢𑁄 𑀅𑀕𑁆𑀕𑀺𑀁 𑀯𑀺𑀲𑀺𑀩𑁆𑀩𑁂𑀢𑀼𑀁 𑀆𑀕𑀢𑁄 ¶ 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀺𑀢𑀼 𑀢𑀸𑀧𑀲𑀲𑁆𑀲 𑀓𑀣𑁂𑀢𑁆𑀯𑀸 ‘‘𑀏𑀢𑀁 𑀧𑀡𑁆𑀡𑀲𑀸𑀮𑀁 𑀧𑀯𑁂𑀲𑁂𑀢𑁆𑀯𑀸 𑀯𑀺𑀲𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀺𑀢𑀭𑀁 𑀆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁫.

‘‘𑀢𑀸𑀢 ¶ 𑀫𑀸𑀡𑀯𑀓𑁄 𑀏𑀲𑁄, 𑀢𑀸𑀮𑀫𑀽𑀮𑀁 𑀅𑀧𑀲𑁆𑀲𑀺𑀢𑁄;

𑀅𑀕𑀸𑀭𑀓𑀜𑁆𑀘𑀺𑀤𑀁 𑀅𑀢𑁆𑀣𑀺, 𑀳𑀦𑁆𑀤 𑀤𑁂𑀫𑀲𑁆𑀲𑀕𑀸𑀭𑀓’’𑀦𑁆𑀢𑀺.

𑀢𑀢𑁆𑀣 𑀫𑀸𑀡𑀯𑀓𑁄𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁. 𑀢𑁂𑀦 ‘‘𑀢𑀸𑀢, 𑀏𑀲𑁄 𑀏𑀓𑁄 𑀫𑀸𑀡𑀯𑀓𑁄 𑀲𑀢𑁆𑀢𑁄 𑀏𑀓𑁄 𑀢𑀸𑀧𑀲𑁄’’𑀢𑀺 𑀤𑀻𑀧𑁂𑀢𑀺. 𑀢𑀸𑀮𑀫𑀽𑀮𑀁 𑀅𑀧𑀲𑁆𑀲𑀺𑀢𑁄𑀢𑀺 𑀢𑀸𑀮𑀓𑁆𑀔𑀦𑁆𑀥𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄. 𑀅𑀕𑀸𑀭𑀓𑀜𑁆𑀘𑀺𑀤𑀁 𑀅𑀢𑁆𑀣𑀻𑀢𑀺 𑀇𑀤𑀜𑁆𑀘 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑀺𑀢𑀸𑀕𑀸𑀭𑀁 𑀅𑀢𑁆𑀣𑀺, 𑀧𑀡𑁆𑀡𑀲𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀤𑁂𑀫𑀲𑁆𑀲𑀕𑀸𑀭𑀓𑀦𑁆𑀢𑀺 𑀏𑀢𑀲𑁆𑀲 𑀏𑀓𑀫𑀦𑁆𑀢𑁂 𑀯𑀲𑀦𑀢𑁆𑀣𑀸𑀬 𑀅𑀕𑀸𑀭𑀓𑀁 𑀤𑁂𑀫.

𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀫𑀓𑁆𑀓𑀝𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀸𑀢, 𑀫𑀦𑀼𑀲𑁆𑀲𑀸𑀦𑀁 𑀦𑀸𑀫 𑀦 𑀏𑀯𑀭𑀽𑀧𑀁 𑀫𑀼𑀔𑀁 𑀳𑁄𑀢𑀺, 𑀫𑀓𑁆𑀓𑀝𑁄 𑀏𑀲, 𑀦𑀬𑀺𑀥 𑀧𑀓𑁆𑀓𑁄𑀲𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀫𑀸 𑀔𑁄 𑀢𑁆𑀯𑀁 𑀢𑀸𑀢 𑀧𑀓𑁆𑀓𑁄𑀲𑀺, 𑀤𑀽𑀲𑁂𑀬𑁆𑀬 𑀦𑁄 𑀅𑀕𑀸𑀭𑀓𑀁;

𑀦𑁂𑀢𑀸𑀤𑀺𑀲𑀁 𑀫𑀼𑀔𑀁 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀲𑀻𑀮𑀺𑀦𑁄’’𑀢𑀺.

𑀢𑀢𑁆𑀣 𑀤𑀽𑀲𑁂𑀬𑁆𑀬 𑀦𑁄 𑀅𑀕𑀸𑀭𑀓𑀦𑁆𑀢𑀺 𑀅𑀬𑀜𑁆𑀳𑀺 𑀇𑀥 𑀧𑀯𑀺𑀝𑁆𑀞𑁄 𑀲𑀫𑀸𑀦𑁄 𑀇𑀫𑀁 𑀓𑀺𑀘𑁆𑀙𑁂𑀦 𑀓𑀢𑀁 𑀧𑀡𑁆𑀡𑀲𑀸𑀮𑀁 𑀅𑀕𑁆𑀕𑀺𑀦𑀸 𑀯𑀸 𑀛𑀸𑀧𑁂𑀦𑁆𑀢𑁄 𑀉𑀘𑁆𑀘𑀸𑀭𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑁄 𑀤𑀽𑀲𑁂𑀬𑁆𑀬. 𑀦𑁂𑀢𑀸𑀤𑀺𑀲𑀦𑁆𑀢𑀺 ‘‘𑀏𑀢𑀸𑀤𑀺𑀲𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀲𑀻𑀮𑀺𑀦𑁄 𑀫𑀼𑀔𑀁 𑀦 𑀳𑁄𑀢𑀺, 𑀫𑀓𑁆𑀓𑀝𑁄 𑀏𑀲𑁄’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑀁 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 ‘‘𑀓𑀺𑀁 𑀏𑀢𑁆𑀣 𑀢𑀺𑀝𑁆𑀞𑀲𑀻’’𑀢𑀺 𑀔𑀺𑀧𑀺𑀢𑁆𑀯𑀸 𑀢𑀁 𑀧𑀮𑀸𑀧𑁂𑀲𑀺. 𑀫𑀓𑁆𑀓𑀝𑁄 𑀯𑀓𑁆𑀓𑀮𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀦𑀲𑀡𑁆𑀟𑀁 𑀧𑀸𑀯𑀺𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀓𑁆𑀓𑀝𑁄 𑀅𑀬𑀁 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀢𑀸𑀧𑀲𑀓𑀼𑀫𑀸𑀭𑁄 𑀭𑀸𑀳𑀼𑀮𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀓𑁆𑀓𑀝𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁭𑁪] 𑁪. 𑀤𑀼𑀩𑁆𑀪𑀺𑀬𑀫𑀓𑁆𑀓𑀝𑀚𑀸𑀢𑀓𑀡𑁆𑀡𑀦𑀸

𑀅𑀤𑀫𑁆𑀳 ¶ ¶ 𑀢𑁂 𑀯𑀸𑀭𑀺 𑀧𑀳𑀽𑀢𑀭𑀽𑀧𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀤𑁂𑀯𑀤𑀢𑁆𑀢𑀲𑁆𑀲 𑀅𑀓𑀢𑀜𑁆𑀜𑀼𑀫𑀺𑀢𑁆𑀢𑀤𑀼𑀩𑁆𑀪𑀺𑀪𑀸𑀯𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻, 𑀧𑀼𑀩𑁆𑀩𑁂𑀧𑀺 𑀏𑀯𑀭𑀽𑀧𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀸𑀲𑀺𑀭𑀝𑁆𑀞𑁂 𑀯𑀢𑁆𑀢𑀦𑀺𑀫𑀳𑀸𑀫𑀕𑁆𑀕𑁂 𑀏𑀓𑁄 𑀕𑀫𑁆𑀪𑀻𑀭𑁄 𑀉𑀤𑀧𑀸𑀦𑁄 𑀳𑁄𑀢𑀺 𑀅𑀦𑁄𑀢𑀭𑀡𑀻𑀬𑁄 𑀢𑀺𑀭𑀘𑁆𑀙𑀸𑀦𑀸𑀦𑀁, 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀧𑀼𑀜𑁆𑀜𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀸 𑀤𑀻𑀖𑀭𑀚𑁆𑀚𑀼𑀓𑁂𑀦 𑀯𑀸𑀭𑀓𑁂𑀦 𑀉𑀤𑀓𑀁 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀏𑀓𑀺𑀲𑁆𑀲𑀸 𑀤𑁄𑀡𑀺𑀬𑀸 𑀧𑀽𑀭𑁂𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀸𑀦𑀻𑀬𑀁 𑀤𑁂𑀦𑁆𑀢𑀺. 𑀢𑀲𑁆𑀲 𑀲𑀸𑀫𑀦𑁆𑀢𑀢𑁄 𑀫𑀳𑀦𑁆𑀢𑀁 𑀅𑀭𑀜𑁆𑀜𑀁, 𑀢𑀢𑁆𑀣 𑀩𑀳𑀽 𑀫𑀓𑁆𑀓𑀝𑀸 𑀯𑀲𑀦𑁆𑀢𑀺. 𑀅𑀣 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀫𑀦𑀼𑀲𑁆𑀲𑀲𑀜𑁆𑀘𑀸𑀭𑁄 𑀧𑀘𑁆𑀙𑀺𑀚𑁆𑀚𑀺, 𑀢𑀺𑀭𑀘𑁆𑀙𑀸𑀦𑀸 𑀧𑀸𑀦𑀻𑀬𑀁 𑀦 𑀮𑀪𑀺𑀁𑀲𑀼. 𑀏𑀓𑁄 𑀫𑀓𑁆𑀓𑀝𑁄 𑀧𑀺𑀧𑀸𑀲𑀸𑀢𑀼𑀭𑁄 𑀳𑀼𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀉𑀤𑀧𑀸𑀦𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀘𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀕𑀘𑁆𑀙𑀦𑁆𑀢𑁄 𑀧𑀸𑀦𑀻𑀬𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀞𑀺𑀢𑁄 𑀢𑀁 𑀫𑀓𑁆𑀓𑀝𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀧𑀺𑀧𑀸𑀲𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑀸𑀦𑀻𑀬𑀁 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀤𑁄𑀡𑀺𑀬𑀁 𑀆𑀓𑀺𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀤𑀢𑁆𑀯𑀸 𑀘 𑀧𑀦 ‘‘𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀫𑀓𑁆𑀓𑀝𑁄 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀼𑀔𑀫𑀓𑁆𑀓𑀝𑀺𑀓𑀁 𑀓𑀭𑁄𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀪𑀺𑀁𑀲𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀭𑁂 𑀤𑀼𑀝𑁆𑀞𑀫𑀓𑁆𑀓𑀝, 𑀅𑀳𑀁 𑀢𑀯 𑀧𑀺𑀧𑀸𑀲𑀺𑀢𑀲𑁆𑀲 𑀓𑀺𑀮𑀦𑁆𑀢𑀲𑁆𑀲 𑀩𑀳𑀼𑀁 ¶ 𑀧𑀸𑀦𑀻𑀬𑀁 𑀅𑀤𑀸𑀲𑀺𑀁, 𑀇𑀤𑀸𑀦𑀺 𑀢𑁆𑀯𑀁 𑀫𑀬𑁆𑀳𑀁 𑀫𑀼𑀔𑀫𑀓𑁆𑀓𑀝𑀺𑀓𑀁 𑀓𑀭𑁄𑀲𑀺, 𑀅𑀳𑁄 𑀧𑀸𑀧𑀚𑀦𑀲𑁆𑀲 𑀦𑀸𑀫 𑀓𑀢𑁄 𑀉𑀧𑀓𑀸𑀭𑁄 𑀦𑀺𑀭𑀢𑁆𑀣𑀓𑁄’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀅𑀤𑀫𑁆𑀳 ¶ 𑀢𑁂 𑀯𑀸𑀭𑀺 𑀧𑀳𑀽𑀢𑀭𑀽𑀧𑀁, 𑀖𑀫𑁆𑀫𑀸𑀪𑀺𑀢𑀢𑁆𑀢𑀲𑁆𑀲 𑀧𑀺𑀧𑀸𑀲𑀺𑀢𑀲𑁆𑀲;

𑀲𑁄 𑀤𑀸𑀦𑀺 𑀧𑀺𑀢𑁆𑀯𑀸𑀦 𑀓𑀺𑀭𑀺𑀗𑁆𑀓𑀭𑁄𑀲𑀺, 𑀅𑀲𑀗𑁆𑀕𑀫𑁄 𑀧𑀸𑀧𑀚𑀦𑁂𑀦 𑀲𑁂𑀬𑁆𑀬𑁄’’𑀢𑀺.

𑀢𑀢𑁆𑀣 𑀲𑁄 𑀤𑀸𑀦𑀺 𑀧𑀺𑀢𑁆𑀯𑀸𑀦 𑀓𑀺𑀭𑀺𑀗𑁆𑀓𑀭𑁄𑀲𑀻𑀢𑀺 𑀲𑁄 𑀇𑀤𑀸𑀦𑀺 𑀢𑁆𑀯𑀁 𑀫𑀬𑀸 𑀤𑀺𑀦𑁆𑀦𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀫𑀼𑀔𑀫𑀓𑁆𑀓𑀝𑀺𑀓𑀁 𑀓𑀭𑁄𑀦𑁆𑀢𑁄 ‘‘𑀓𑀺𑀭𑀺 𑀓𑀺𑀭𑀻’’𑀢𑀺 𑀲𑀤𑁆𑀤𑀁 𑀓𑀭𑁄𑀲𑀺. 𑀅𑀲𑀗𑁆𑀕𑀫𑁄 𑀧𑀸𑀧𑀚𑀦𑁂𑀦 𑀲𑁂𑀬𑁆𑀬𑁄𑀢𑀺 𑀧𑀸𑀧𑀚𑀦𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀫𑁄 𑀦 𑀲𑁂𑀬𑁆𑀬𑁄, 𑀅𑀲𑀗𑁆𑀕𑀫𑁄𑀯 𑀲𑁂𑀬𑁆𑀬𑁄𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀲𑁄 𑀫𑀺𑀢𑁆𑀢𑀤𑀼𑀩𑁆𑀪𑀻 𑀫𑀓𑁆𑀓𑀝𑁄 ‘‘𑀢𑁆𑀯𑀁 ‘𑀏𑀢𑁆𑀢𑀓𑁂𑀦𑀯𑁂𑀢𑀁 𑀦𑀺𑀝𑁆𑀞𑀺𑀢’𑀦𑁆𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺, 𑀇𑀤𑀸𑀦𑀺 𑀢𑁂 𑀲𑀻𑀲𑁂 𑀯𑀘𑁆𑀘𑀁 𑀧𑀸𑀢𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁮.

‘‘𑀓𑁄 𑀢𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀲𑀻𑀮𑀯𑀸 𑀦𑀸𑀫 𑀫𑀓𑁆𑀓𑀝𑁄;

𑀇𑀤𑀸𑀦𑀺 𑀔𑁄 𑀢𑀁 𑀑𑀳𑀘𑁆𑀙𑀁, 𑀏𑀲𑀸 𑀅𑀲𑁆𑀫𑀸𑀓 𑀥𑀫𑁆𑀫𑀢𑀸’’𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑁄 𑀩𑁆𑀭𑀸𑀳𑁆𑀫𑀡, ‘‘𑀫𑀓𑁆𑀓𑀝𑁄 𑀓𑀢𑀕𑀼𑀡𑀚𑀸𑀦𑀦𑀓𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀲𑀻𑀮𑀯𑀸 𑀦𑀸𑀫 𑀅𑀢𑁆𑀣𑀻’’𑀢𑀺 𑀓𑀳𑀁 𑀢𑀬𑀸 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀇𑀤𑀸𑀦𑀺 𑀔𑁄 𑀅𑀳𑀁 𑀢𑀁 𑀑𑀳𑀘𑁆𑀙𑀁 𑀯𑀘𑁆𑀘𑀁 𑀢𑁂 𑀲𑀻𑀲𑁂 𑀓𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀺, 𑀅𑀲𑁆𑀫𑀸𑀓𑀜𑁆𑀳𑀺 𑀫𑀓𑁆𑀓𑀝𑀸𑀦𑀁 𑀦𑀸𑀫 𑀏𑀲𑀸 𑀥𑀫𑁆𑀫𑀢𑀸 𑀅𑀬𑀁 𑀚𑀸𑀢𑀺𑀲𑀪𑀸𑀯𑁄, 𑀬𑀤𑀺𑀤𑀁 𑀉𑀧𑀓𑀸𑀭𑀓𑀲𑁆𑀲 𑀲𑀻𑀲𑁂 𑀯𑀘𑁆𑀘𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀉𑀝𑁆𑀞𑀸𑀬 𑀕𑀦𑁆𑀢𑀼𑀁 𑀆𑀭𑀪𑀺. 𑀫𑀓𑁆𑀓𑀝𑁄 𑀢𑀗𑁆𑀔𑀡𑀜𑁆𑀜𑁂𑀯 𑀉𑀧𑁆𑀧𑀢𑀺𑀢𑁆𑀯𑀸 𑀲𑀸𑀔𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀑𑀮𑀫𑁆𑀩𑀓𑀁 𑀑𑀢𑀭𑀦𑁆𑀢𑁄 𑀯𑀺𑀬 𑀢𑀲𑁆𑀲 𑀲𑀻𑀲𑁂 𑀯𑀘𑁆𑀘𑀁 𑀧𑀸𑀢𑁂𑀢𑁆𑀯𑀸 𑀯𑀺𑀭𑀯𑀦𑁆𑀢𑁄 𑀯𑀦𑀲𑀡𑁆𑀟𑀁 𑀧𑀸𑀯𑀺𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀦𑁆𑀳𑀢𑁆𑀯𑀸 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀫𑀬𑀸 𑀓𑀢𑀕𑀼𑀡𑀁 𑀦 𑀚𑀸𑀦𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀓𑁆𑀓𑀝𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀩𑁆𑀪𑀺𑀬𑀫𑀓𑁆𑀓𑀝𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁭𑁫] 𑁫. 𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑁂𑀲𑀼 ¶ 𑀓𑀺𑀭 𑀪𑀽𑀢𑁂𑀲𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀲𑀤𑀺𑀲𑀫𑁂𑀯.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀫𑀳𑀸𑀧𑀭𑀺𑀯𑀸𑀭𑁄 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀧𑀩𑁆𑀩𑀢𑀸 𑀑𑀭𑀼𑀬𑁆𑀳 𑀧𑀘𑁆𑀘𑀦𑁆𑀢𑁂 𑀏𑀓𑀁 𑀕𑀸𑀫𑀁 𑀦𑀺𑀲𑁆𑀲𑀸𑀬 ¶ 𑀧𑀡𑁆𑀡𑀲𑀸𑀮𑀸𑀬𑀁 𑀯𑀸𑀲𑀁 𑀉𑀧𑀕𑀜𑁆𑀙𑀺. 𑀅𑀣𑁂𑀓𑁄 𑀮𑁄𑀮𑀫𑀓𑁆𑀓𑀝𑁄 𑀇𑀲𑀺𑀕𑀡𑁂 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑁂 𑀅𑀲𑁆𑀲𑀫𑀧𑀤𑀁 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀸 𑀉𑀢𑁆𑀢𑀺𑀡𑁆𑀡𑀸 𑀓𑀭𑁄𑀢𑀺, 𑀧𑀸𑀦𑀻𑀬𑀖𑀝𑁂𑀲𑀼 𑀉𑀤𑀓𑀁 𑀙𑀟𑁆𑀟𑁂𑀢𑀺, 𑀓𑀼𑀡𑁆𑀟𑀺𑀓𑀁 𑀪𑀺𑀦𑁆𑀤𑀢𑀺, 𑀅𑀕𑁆𑀕𑀺𑀲𑀸𑀮𑀸𑀬𑀁 𑀯𑀘𑁆𑀘𑀁 𑀓𑀭𑁄𑀢𑀺. 𑀢𑀸𑀧𑀲𑀸 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀳𑀺𑀫𑀯𑀦𑁆𑀢𑁄 𑀧𑀼𑀧𑁆𑀨𑀨𑀮𑀲𑀫𑀺𑀤𑁆𑀥𑁄 𑀭𑀫𑀡𑀻𑀬𑁄, 𑀢𑀢𑁆𑀣𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀺𑀓𑁂 𑀆𑀧𑀼𑀘𑁆𑀙𑀺𑀁𑀲𑀼. 𑀫𑀦𑀼𑀲𑁆𑀲𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀫𑀬𑀁 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀆𑀕𑀫𑀺𑀲𑁆𑀲𑀸𑀫, 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀳𑀽𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀲𑁄 𑀫𑀓𑁆𑀓𑀝𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑁄𑀳𑀜𑁆𑀜𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀭𑀸𑀥𑁂𑀢𑁆𑀯𑀸 𑀫𑀬𑁆𑀳𑀫𑁆𑀧𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀸𑀧𑀲𑀘𑀭𑀡𑀁 𑀘𑀭𑀦𑁆𑀢𑁄 𑀯𑀺𑀬 𑀲𑀻𑀮𑀯𑀸 𑀯𑀺𑀬 𑀘 𑀳𑀼𑀢𑁆𑀯𑀸 𑀢𑀸𑀧𑀲𑀸𑀦𑀁 ¶ 𑀅𑀯𑀺𑀤𑀽𑀭𑁂 𑀲𑀽𑀭𑀺𑀬𑀁 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀻𑀮𑀯𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀸 𑀲𑀻𑀮𑀯𑀦𑁆𑀢𑀸 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀲𑀩𑁆𑀩𑁂𑀲𑀼 𑀓𑀺𑀭 𑀪𑀽𑀢𑁂𑀲𑀼, 𑀲𑀦𑁆𑀢𑀺 𑀲𑀻𑀮𑀲𑀫𑀸𑀳𑀺𑀢𑀸;

𑀧𑀲𑁆𑀲 𑀲𑀸𑀔𑀫𑀺𑀕𑀁 𑀚𑀫𑁆𑀫𑀁, 𑀆𑀤𑀺𑀘𑁆𑀘𑀫𑀼𑀧𑀢𑀺𑀝𑁆𑀞𑀢𑀻’’𑀢𑀺.

𑀢𑀢𑁆𑀣 𑀲𑀦𑁆𑀢𑀺 𑀲𑀻𑀮𑀲𑀫𑀸𑀳𑀺𑀢𑀸𑀢𑀺 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀲𑀻𑀮𑀯𑀦𑁆𑀢𑀸 𑀘 𑀲𑀫𑀸𑀳𑀺𑀢𑀸 𑀘 𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀚𑀫𑁆𑀫𑀦𑁆𑀢𑀺 𑀮𑀸𑀫𑀓𑀁. 𑀆𑀤𑀺𑀘𑁆𑀘𑀫𑀼𑀧𑀢𑀺𑀝𑁆𑀞𑀢𑀻𑀢𑀺 𑀲𑀽𑀭𑀺𑀬𑀁 𑀦𑀫𑀲𑁆𑀲𑀫𑀸𑀦𑁄 𑀢𑀺𑀝𑁆𑀞𑀢𑀺.

𑀏𑀯𑀁 𑀢𑁂 𑀫𑀦𑀼𑀲𑁆𑀲𑁂 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑁂 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀼𑀫𑁆𑀳𑁂 𑀇𑀫𑀲𑁆𑀲 𑀮𑁄𑀮𑀫𑀓𑁆𑀓𑀝𑀲𑁆𑀲 𑀲𑀻𑀮𑀸𑀘𑀸𑀭𑀁 𑀅𑀚𑀸𑀦𑀺𑀢𑁆𑀯𑀸 𑀅𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀦𑁆𑀦𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀦𑀸𑀲𑁆𑀲 ¶ 𑀲𑀻𑀮𑀁 𑀯𑀺𑀚𑀸𑀦𑀸𑀣, 𑀅𑀦𑀜𑁆𑀜𑀸𑀬 𑀧𑀲𑀁𑀲𑀣;

𑀅𑀕𑁆𑀕𑀺𑀳𑀼𑀢𑁆𑀢𑀜𑁆𑀘 𑀉𑀳𑀦𑁆𑀦𑀁, 𑀤𑁆𑀯𑁂 𑀘 𑀪𑀺𑀦𑁆𑀦𑀸 𑀓𑀫𑀡𑁆𑀟𑀮𑀽’’𑀢𑀺.

𑀢𑀢𑁆𑀣 𑀅𑀦𑀜𑁆𑀜𑀸𑀬𑀸𑀢𑀺 𑀅𑀚𑀸𑀦𑀺𑀢𑁆𑀯𑀸. 𑀉𑀳𑀦𑁆𑀦𑀦𑁆𑀢𑀺 𑀇𑀫𑀺𑀦𑀸 𑀧𑀸𑀧𑀫𑀓𑁆𑀓𑀝𑁂𑀦 𑀊𑀳𑀤𑀁. 𑀓𑀫𑀡𑁆𑀟𑀮𑀽𑀢𑀺 𑀓𑀼𑀡𑁆𑀟𑀺𑀓𑀸. ‘‘𑀤𑁆𑀯𑁂 𑀘 𑀓𑀼𑀡𑁆𑀟𑀺𑀓𑀸 𑀢𑁂𑀦 𑀪𑀺𑀦𑁆𑀦𑀸’’𑀢𑀺 𑀏𑀯𑀫𑀲𑁆𑀲 𑀅𑀕𑀼𑀡𑀁 𑀓𑀣𑁂𑀲𑀺.

𑀫𑀦𑀼𑀲𑁆𑀲𑀸 𑀫𑀓𑁆𑀓𑀝𑀲𑁆𑀲 𑀓𑀼𑀳𑀓𑀪𑀸𑀯𑀁 𑀜𑀢𑁆𑀯𑀸 𑀮𑁂𑀟𑁆𑀟𑀼𑀜𑁆𑀘 𑀬𑀝𑁆𑀞𑀺𑀜𑁆𑀘 𑀕𑀳𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 𑀇𑀲𑀺𑀕𑀡𑀲𑁆𑀲 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀇𑀲𑀬𑁄𑀧𑀺 𑀳𑀺𑀫𑀯𑀦𑁆𑀢𑀫𑁂𑀯 𑀕𑀦𑁆𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀓𑁆𑀓𑀝𑁄 𑀅𑀬𑀁 𑀓𑀼𑀳𑀓𑁄 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁭𑁬] 𑁬. 𑀓𑀴𑀸𑀬𑀫𑀼𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸

𑀩𑀸𑀮𑁄 ¶ 𑀯𑀢𑀸𑀬𑀁 𑀤𑀼𑀫𑀲𑀸𑀔𑀕𑁄𑀘𑀭𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀯𑀲𑁆𑀲𑀓𑀸𑀮𑁂 𑀓𑁄𑀲𑀮𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺. 𑀢𑀢𑁆𑀣 𑀞𑀺𑀢𑀸 𑀬𑁄𑀥𑀸 𑀤𑁆𑀯𑁂 𑀢𑀻𑀡𑀺 𑀬𑀼𑀤𑁆𑀥𑀸𑀦𑀺 𑀓𑀢𑁆𑀯𑀸 𑀧𑀘𑁆𑀘𑀢𑁆𑀣𑀺𑀓𑁂 𑀅𑀪𑀺𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀭𑀸𑀚𑀸 𑀅𑀓𑀸𑀮𑁂 𑀯𑀲𑁆𑀲𑀸𑀦𑁂𑀬𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀲𑀫𑀻𑀧𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀓𑀸𑀮𑁂 𑀦𑀺𑀓𑁆𑀔𑀦𑁆𑀢𑁄, 𑀓𑀦𑁆𑀤𑀭𑀧𑀤𑀭𑀸𑀤𑀬𑁄 𑀉𑀤𑀓𑀧𑀽𑀭𑀸, 𑀤𑀼𑀕𑁆𑀕𑀫𑁄 𑀫𑀕𑁆𑀕𑁄, 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺, 𑀲𑁄 𑀫𑀁 ‘𑀓𑀳𑀁 𑀕𑀘𑁆𑀙𑀲𑀺, 𑀫𑀳𑀸𑀭𑀸𑀚𑀸’𑀢𑀺 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀅𑀣𑀸𑀳𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀦 𑀔𑁄 𑀧𑀦 𑀫𑀁 𑀲𑀢𑁆𑀣𑀸 𑀲𑀫𑁆𑀧𑀭𑀸𑀬𑀺𑀓𑁂𑀦𑁂𑀯𑀢𑁆𑀣𑁂𑀦 𑀅𑀦𑀼𑀕𑁆𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦𑀸𑀧𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺𑀬𑁂𑀯, 𑀢𑀲𑁆𑀫𑀺𑀁 𑀲𑀘𑁂 𑀫𑁂 𑀕𑀫𑀦𑁂𑀦 𑀅𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀺, ‘𑀅𑀓𑀸𑀮𑁄, 𑀫𑀳𑀸𑀭𑀸𑀚𑀸’𑀢𑀺 𑀯𑀓𑁆𑀔𑀢𑀺. 𑀲𑀘𑁂 𑀧𑀦 𑀯𑀼𑀟𑁆𑀟𑀺 𑀪𑀯𑀺𑀲𑁆𑀲𑀢𑀺, 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀅𑀳𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀦𑀺𑀓𑁆𑀔𑀦𑁆𑀢𑁄 ‘𑀢𑀼𑀫𑁆𑀳𑁂 𑀯𑀦𑁆𑀤𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄𑀫𑁆𑀳𑀻’’𑀢𑀺 ¶ . 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺, 𑀫𑀳𑀸𑀭𑀸𑀚, 𑀭𑀸𑀚𑀸𑀦𑁄 𑀲𑁂𑀦𑀸𑀬 𑀅𑀩𑁆𑀪𑀼𑀕𑁆𑀕𑀘𑁆𑀙𑀫𑀸𑀦𑀸𑀬 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀓𑀸𑀮𑁂 𑀅𑀩𑁆𑀪𑀼𑀕𑁆𑀕𑀫𑀦𑀁 𑀦𑀸𑀫 𑀦 𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀲𑀩𑁆𑀩𑀢𑁆𑀣𑀓𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀅𑀣 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀧𑀘𑁆𑀘𑀦𑁆𑀢𑀬𑁄𑀥𑀸 𑀧𑀡𑁆𑀡𑀁 𑀧𑁂𑀲𑁂𑀲𑀼𑀁. 𑀭𑀸𑀚𑀸 𑀯𑀲𑁆𑀲𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺, 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀲𑁆𑀲𑀸𑀦𑀁 𑀓𑀴𑀸𑀬𑁂 𑀲𑁂𑀤𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀤𑁄𑀡𑀺𑀬𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀉𑀬𑁆𑀬𑀸𑀦𑁂 𑀫𑀓𑁆𑀓𑀝𑁂𑀲𑀼 𑀏𑀓𑁄 𑀫𑀓𑁆𑀓𑀝𑁄 𑀭𑀼𑀓𑁆𑀔𑀸 𑀑𑀢𑀭𑀺𑀢𑁆𑀯𑀸 𑀢𑀢𑁄 𑀓𑀴𑀸𑀬𑁂 𑀕𑀳𑁂𑀢𑁆𑀯𑀸 𑀫𑀼𑀔𑀁 𑀧𑀽𑀭𑁂𑀢𑁆𑀯𑀸 𑀳𑀢𑁆𑀣𑁂𑀳𑀺𑀧𑀺 𑀕𑀳𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀆𑀭𑀪𑀺, 𑀅𑀣𑀲𑁆𑀲 𑀔𑀸𑀤𑀫𑀸𑀦𑀲𑁆𑀲 𑀳𑀢𑁆𑀣𑀓𑁄 𑀏𑀓𑁄 𑀓𑀴𑀸𑀬𑁄 𑀪𑀽𑀫𑀺𑀬𑀁 𑀧𑀢𑀺. 𑀲𑁄 𑀫𑀼𑀔𑁂𑀦 𑀘 𑀳𑀢𑁆𑀣𑁂𑀳𑀺 𑀘 𑀕𑀳𑀺𑀢𑁂 𑀲𑀩𑁆𑀩𑁂 ¶ 𑀓𑀴𑀸𑀬𑁂 𑀙𑀟𑁆𑀟𑁂𑀢𑁆𑀯𑀸 𑀭𑀼𑀓𑁆𑀔𑀸 𑀑𑀭𑀼𑀬𑁆𑀳 𑀢𑀫𑁂𑀯 𑀓𑀴𑀸𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀓𑀴𑀸𑀬𑀁 𑀅𑀤𑀺𑀲𑁆𑀯𑀸𑀯 𑀧𑀼𑀦 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀟𑁆𑀟𑁂 𑀲𑀳𑀲𑁆𑀲𑀧𑀭𑀸𑀚𑀺𑀢𑁄 𑀯𑀺𑀬 𑀲𑁄𑀘𑀫𑀸𑀦𑁄 𑀤𑀼𑀫𑁆𑀫𑀼𑀔𑁄 𑀭𑀼𑀓𑁆𑀔𑀲𑀸𑀔𑀸𑀬𑀁 𑀦𑀺𑀲𑀻𑀤𑀺. 𑀭𑀸𑀚𑀸 𑀫𑀓𑁆𑀓𑀝𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ¶ ‘‘𑀧𑀲𑁆𑀲𑀣, 𑀓𑀺𑀁 𑀦𑀸𑀫𑁂𑀢𑀁 𑀫𑀓𑁆𑀓𑀝𑁂𑀦 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀩𑀳𑀼𑀁 𑀅𑀦𑀯𑀮𑁄𑀓𑁂𑀢𑁆𑀯𑀸 𑀅𑀧𑁆𑀧𑀁 𑀑𑀮𑁄𑀓𑁂𑀢𑁆𑀯𑀸 𑀤𑀼𑀩𑁆𑀩𑀼𑀤𑁆𑀥𑀺𑀦𑁄 𑀩𑀸𑀮𑀸 𑀏𑀯𑀭𑀽𑀧𑀁 𑀓𑀭𑁄𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁧.

‘‘𑀩𑀸𑀮𑁄 𑀯𑀢𑀸𑀬𑀁 𑀤𑀼𑀫𑀲𑀸𑀔𑀕𑁄𑀘𑀭𑁄, 𑀧𑀜𑁆𑀜𑀸 𑀚𑀦𑀺𑀦𑁆𑀤 𑀦𑀬𑀺𑀫𑀲𑁆𑀲 𑀯𑀺𑀚𑁆𑀚𑀢𑀺;

𑀓𑀴𑀸𑀬𑀫𑀼𑀝𑁆𑀞𑀺𑀁 𑀅𑀯𑀓𑀺𑀭𑀺𑀬 𑀓𑁂𑀯𑀮𑀁, 𑀏𑀓𑀁 𑀓𑀴𑀸𑀬𑀁 𑀧𑀢𑀺𑀢𑀁 𑀕𑀯𑁂𑀲𑀢𑀻’’𑀢𑀺.

𑀢𑀢𑁆𑀣 𑀤𑀼𑀫𑀲𑀸𑀔𑀕𑁄𑀘𑀭𑁄𑀢𑀺 𑀫𑀓𑁆𑀓𑀝𑁄. 𑀲𑁄 𑀳𑀺 𑀤𑀼𑀫𑀲𑀸𑀔𑀸𑀲𑀼 𑀕𑁄𑀘𑀭𑀁 𑀕𑀡𑁆𑀳𑀸𑀢𑀺, 𑀲𑀸𑀯 𑀅𑀲𑁆𑀲 𑀕𑁄𑀘𑀭𑁄 𑀲𑀜𑁆𑀘𑀭𑀡𑀪𑀽𑀫𑀺𑀪𑀽𑀢𑀸, 𑀢𑀲𑁆𑀫𑀸 ‘‘𑀤𑀼𑀫𑀲𑀸𑀔𑀕𑁄𑀘𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀚𑀦𑀺𑀦𑁆𑀤𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀭𑀸𑀚𑀸 𑀳𑀺 𑀧𑀭𑀫𑀺𑀲𑁆𑀲𑀭𑀪𑀸𑀯𑁂𑀦 𑀚𑀦𑀲𑁆𑀲 𑀇𑀦𑁆𑀤𑁄𑀢𑀺 𑀚𑀦𑀺𑀦𑁆𑀤𑁄. 𑀓𑀴𑀸𑀬𑀫𑀼𑀝𑁆𑀞𑀺𑀦𑁆𑀢𑀺 𑀘𑀡𑀓𑀫𑀼𑀝𑁆𑀞𑀺𑀁. ‘‘𑀓𑀸𑀴𑀭𑀸𑀚𑀫𑀸𑀲𑀫𑀼𑀝𑁆𑀞𑀺’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀅𑀯𑀓𑀺𑀭𑀺𑀬𑀸𑀢𑀺 𑀅𑀯𑀓𑀺𑀭𑀺𑀢𑁆𑀯𑀸. 𑀓𑁂𑀯𑀮𑀦𑁆𑀢𑀺 𑀲𑀩𑁆𑀩𑀁. 𑀕𑀯𑁂𑀲𑀢𑀻𑀢𑀺 𑀪𑀽𑀫𑀺𑀬𑀁 𑀧𑀢𑀺𑀢𑀁 𑀏𑀓𑀫𑁂𑀯 𑀧𑀭𑀺𑀬𑁂𑀲𑀢𑀺.

𑀏𑀯𑀁 ¶ 𑀯𑀢𑁆𑀯𑀸 𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁨.

‘‘𑀏𑀯𑀫𑁂𑀯 𑀫𑀬𑀁 𑀭𑀸𑀚, 𑀬𑁂 𑀘𑀜𑁆𑀜𑁂 𑀅𑀢𑀺𑀮𑁄𑀪𑀺𑀦𑁄;

𑀅𑀧𑁆𑀧𑁂𑀦 𑀩𑀳𑀼𑀁 𑀚𑀺𑀬𑁆𑀬𑀸𑀫, 𑀓𑀴𑀸𑀬𑁂𑀦𑁂𑀯 𑀯𑀸𑀦𑀭𑁄’’𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀏𑀯𑀫𑁂𑀯 𑀫𑀬𑀜𑁆𑀘 𑀬𑁂 𑀘𑀜𑁆𑀜𑁂 𑀮𑁄𑀪𑀸𑀪𑀺𑀪𑀽𑀢𑀸 𑀚𑀦𑀸 𑀲𑀩𑁆𑀩𑁂𑀧𑀺 𑀅𑀧𑁆𑀧𑁂𑀦 𑀩𑀳𑀼𑀁 𑀚𑀺𑀬𑁆𑀬𑀸𑀫. 𑀫𑀬𑀜𑁆𑀳𑀺 𑀏𑀢𑀭𑀳𑀺 𑀅𑀓𑀸𑀮𑁂 𑀯𑀲𑁆𑀲𑀸𑀦𑀲𑀫𑀬𑁂 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀅𑀧𑁆𑀧𑀓𑀲𑁆𑀲 𑀅𑀢𑁆𑀣𑀲𑁆𑀲 𑀓𑀸𑀭𑀡𑀸 𑀩𑀳𑀼𑀓𑀸 𑀅𑀢𑁆𑀣𑀸 𑀧𑀭𑀺𑀳𑀸𑀬𑀸𑀫. 𑀓𑀴𑀸𑀬𑁂𑀦𑁂𑀯 𑀯𑀸𑀦𑀭𑁄𑀢𑀺 𑀬𑀣𑀸 𑀅𑀬𑀁 𑀯𑀸𑀦𑀭𑁄 𑀏𑀓𑀁 𑀓𑀴𑀸𑀬𑀁 𑀧𑀭𑀺𑀬𑁂𑀲𑀫𑀸𑀦𑁄 𑀢𑁂𑀦𑁂𑀓𑁂𑀦 𑀓𑀴𑀸𑀬𑁂𑀦 𑀲𑀩𑁆𑀩𑀓𑀴𑀸𑀬𑁂𑀳𑀺 𑀧𑀭𑀺𑀳𑀻𑀦𑁄, 𑀏𑀯𑀁 𑀫𑀬𑀫𑁆𑀧𑀺 ¶ 𑀅𑀓𑀸𑀮𑁂𑀦 𑀓𑀦𑁆𑀤𑀭𑀧𑀤𑀭𑀸𑀤𑀻𑀲𑀼 𑀧𑀽𑀭𑁂𑀲𑀼 𑀕𑀘𑁆𑀙𑀫𑀸𑀦𑀸 𑀅𑀧𑁆𑀧𑀫𑀢𑁆𑀢𑀓𑀁 𑀅𑀢𑁆𑀣𑀁 𑀧𑀭𑀺𑀬𑁂𑀲𑀫𑀸𑀦𑀸 𑀩𑀳𑀽𑀳𑀺 𑀳𑀢𑁆𑀣𑀺𑀯𑀸𑀳𑀦𑀅𑀲𑁆𑀲𑀯𑀸𑀳𑀦𑀸𑀤𑀻𑀳𑀺 𑀘𑁂𑀯 𑀩𑀮𑀓𑀸𑀬𑁂𑀦 𑀘 𑀧𑀭𑀺𑀳𑀸𑀬𑀺𑀲𑁆𑀲𑀸𑀫. 𑀢𑀲𑁆𑀫𑀸 𑀅𑀓𑀸𑀮𑁂 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀭𑀜𑁆𑀜𑁄 𑀑𑀯𑀸𑀤𑀁 𑀅𑀤𑀸𑀲𑀺.

𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀧𑀸𑀯𑀺𑀲𑀺. 𑀘𑁄𑀭𑀸𑀧𑀺 ‘‘𑀭𑀸𑀚𑀸 𑀓𑀺𑀭 𑀘𑁄𑀭𑀫𑀤𑁆𑀤𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀘𑀦𑁆𑀢𑀢𑁄 𑀧𑀮𑀸𑀬𑀺𑀁𑀲𑀼. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀘𑁄𑀭𑀸 ‘‘𑀓𑁄𑀲𑀮𑀭𑀸𑀚𑀸 𑀓𑀺𑀭 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀭𑀸𑀚𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀴𑀸𑀬𑀫𑀼𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁭𑁭] 𑁭. 𑀢𑀺𑀦𑁆𑀤𑀼𑀓𑀚𑀸𑀢𑀓𑀯𑀡𑁆𑀡𑀦𑀸

𑀥𑀦𑀼𑀳𑀢𑁆𑀣𑀓𑀮𑀸𑀧𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀸 𑀳𑀺 𑀫𑀳𑀸𑀩𑁄𑀥𑀺𑀚𑀸𑀢𑀓𑁂 (𑀚𑀸. 𑁨.𑁧𑁮.𑁧𑁨𑁪 𑀆𑀤𑀬𑁄) 𑀯𑀺𑀬 𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀯𑀺𑀬 𑀘 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀯𑀡𑁆𑀡𑀁 𑀯𑀡𑁆𑀡𑀺𑀢𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸, 𑀧𑀼𑀩𑁆𑀩𑁂𑀧𑀺 𑀧𑀜𑁆𑀜𑀯𑀸 𑀉𑀧𑀸𑀬𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀯𑀸𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀕𑀡𑀧𑀭𑀺𑀯𑀸𑀭𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲𑀸𑀲𑀦𑁆𑀦𑁂 𑀏𑀓𑁄 𑀧𑀘𑁆𑀘𑀦𑁆𑀢𑀕𑀸𑀫𑀓𑁄 𑀓𑀤𑀸𑀘𑀺 𑀯𑀲𑀢𑀺, 𑀓𑀤𑀸𑀘𑀺 𑀉𑀩𑁆𑀩𑀲𑀢𑀺. 𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀫𑀚𑁆𑀛𑁂 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑁄 𑀫𑀥𑀼𑀭𑀨𑀮𑁄 𑀏𑀓𑁄 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀯𑀸𑀦𑀭𑀕𑀡𑁄 𑀉𑀩𑁆𑀩𑀲𑀺𑀢𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀨𑀮𑀸𑀦𑀺 𑀔𑀸𑀤𑀢𑀺. 𑀅𑀣𑀸𑀧𑀭𑀲𑁆𑀫𑀺𑀁 𑀨𑀮𑀯𑀸𑀭𑁂 𑀲𑁄 𑀕𑀸𑀫𑁄 𑀧𑀼𑀦 𑀆𑀯𑀸𑀲𑁄 𑀅𑀳𑁄𑀲𑀺 𑀤𑀴𑁆𑀳𑀧𑀭𑀺𑀓𑁆𑀔𑀺𑀢𑁆𑀢𑁄 𑀤𑁆𑀯𑀸𑀭𑀬𑀼𑀢𑁆𑀢𑁄, 𑀲𑁄𑀧𑀺 𑀭𑀼𑀓𑁆𑀔𑁄 𑀨𑀮𑀪𑀸𑀭𑀦𑀫𑀺𑀢𑀲𑀸𑀔𑁄 ¶ 𑀅𑀝𑁆𑀞𑀸𑀲𑀺. 𑀯𑀸𑀦𑀭𑀕𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀁 𑀧𑀼𑀩𑁆𑀩𑁂 𑀅𑀲𑀼𑀓𑀕𑀸𑀫𑁂 𑀢𑀺𑀦𑁆𑀤𑀼𑀓𑀨𑀮𑀸𑀦𑀺 𑀔𑀸𑀤𑀸𑀫, 𑀨𑀮𑀺𑀢𑁄 𑀦𑀼 𑀔𑁄 𑀲𑁄 𑀏𑀢𑀭𑀳𑀺 𑀭𑀼𑀓𑁆𑀔𑁄, 𑀉𑀤𑀸𑀳𑀼 𑀦𑁄, 𑀆𑀯𑀲𑀺𑀢𑁄 𑀲𑁄 𑀕𑀸𑀫𑁄, 𑀉𑀤𑀸𑀳𑀼 𑀦𑁄’’𑀢𑀺. 𑀏𑀯𑀜𑁆𑀘 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙 𑀇𑀫𑀁 𑀧𑀯𑀢𑁆𑀢𑀺𑀁 𑀚𑀸𑀦𑀸𑀳𑀻’’𑀢𑀺 𑀏𑀓𑀁 𑀯𑀸𑀦𑀭𑀁 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀲𑁆𑀲 𑀘 𑀨𑀮𑀺𑀢𑀪𑀸𑀯𑀁 𑀕𑀸𑀫𑀲𑁆𑀲 𑀘 𑀕𑀸𑀴𑁆𑀳𑀯𑀸𑀲𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀯𑀸𑀦𑀭𑀸𑀦𑀁 𑀆𑀭𑁄𑀘𑁂𑀲𑀺.

𑀯𑀸𑀦𑀭𑀸 𑀢𑀲𑁆𑀲 𑀨𑀮𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀫𑀥𑀼𑀭𑀸𑀦𑀺 𑀢𑀺𑀦𑁆𑀤𑀼𑀓𑀨𑀮𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀯𑀸𑀦𑀭𑀺𑀦𑁆𑀤𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀯𑀸𑀦𑀭𑀺𑀦𑁆𑀤𑁄 ‘‘𑀕𑀸𑀫𑁄 𑀆𑀯𑀸𑀲𑁄 𑀅𑀦𑀸𑀯𑀸𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀯𑀸𑀲𑁄, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀦 𑀕𑀦𑁆𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀳𑀺 𑀩𑀳𑀼𑀫𑀸𑀬𑀸 𑀳𑁄𑀦𑁆𑀢𑀻’’𑀢𑀺. ‘‘𑀤𑁂𑀯, 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀮𑁆𑀮𑀸𑀦𑀯𑁂𑀮𑀸𑀬 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀩𑀳𑀽 𑀕𑀦𑁆𑀢𑁆𑀯𑀸 𑀯𑀸𑀦𑀭𑀺𑀦𑁆𑀤𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀸 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀮𑁆𑀮𑀸𑀦𑀓𑀸𑀮𑀁 𑀆𑀕𑀫𑀬𑀫𑀸𑀦𑀸 𑀫𑀳𑀸𑀧𑀸𑀲𑀸𑀡𑀧𑀺𑀝𑁆𑀞𑁂 𑀲𑀬𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀫𑀦𑀼𑀲𑁆𑀲𑁂𑀲𑀼 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁂𑀲𑀼 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀨𑀮𑀸𑀦𑀺 𑀔𑀸𑀤𑀺𑀁𑀲𑀼. 𑀅𑀣𑁂𑀓𑁄 𑀧𑀼𑀭𑀺𑀲𑁄 𑀲𑀭𑀻𑀭𑀓𑀺𑀘𑁆𑀘𑁂𑀦 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑀕𑀢𑁄 𑀯𑀸𑀦𑀭𑁂 ¶ 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀆𑀘𑀺𑀓𑁆𑀔𑀺. 𑀩𑀳𑀽 𑀫𑀦𑀼𑀲𑁆𑀲𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀦𑀸𑀦𑀸𑀯𑀼𑀥𑀳𑀢𑁆𑀣𑀸 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀦𑀺 𑀆𑀤𑀸𑀬 ‘‘𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀯𑀸𑀦𑀭𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀭𑀼𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀸 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 ‘‘𑀦𑀢𑁆𑀣𑀺 𑀦𑁄 𑀅𑀜𑁆𑀜𑀁 𑀧𑀝𑀺𑀲𑁆𑀲𑀭𑀡𑀁 𑀅𑀜𑁆𑀜𑀢𑁆𑀭 𑀯𑀸𑀦𑀭𑀺𑀦𑁆𑀤𑁂𑀦𑀸’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁫𑁩.

‘‘𑀥𑀦𑀼𑀳𑀢𑁆𑀣𑀓𑀮𑀸𑀧𑁂𑀳𑀺, 𑀦𑁂𑀢𑁆𑀢𑀺𑀁𑀲𑀯𑀭𑀥𑀸𑀭𑀺𑀪𑀺;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀡𑁆𑀡𑀫𑁆𑀳, 𑀓𑀣𑀁 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀥𑀦𑀼𑀳𑀢𑁆𑀣𑀓𑀮𑀸𑀧𑁂𑀳𑀻𑀢𑀺 𑀥𑀦𑀼𑀓𑀮𑀸𑀧𑀳𑀢𑁆𑀣𑁂𑀳𑀺, 𑀥𑀦𑀽𑀦𑀺 𑀘𑁂𑀯 𑀲𑀭𑀓𑀮𑀸𑀧𑁂 𑀘 𑀕𑀳𑁂𑀢𑁆𑀯𑀸 𑀞𑀺𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀦𑁂𑀢𑁆𑀢𑀺𑀁𑀲𑀯𑀭𑀥𑀸𑀭𑀺𑀪𑀻𑀢𑀺 𑀦𑁂𑀢𑁆𑀢𑀺𑀁𑀲𑀸 𑀯𑀼𑀘𑁆𑀘𑀦𑁆𑀢𑀺 𑀔𑀕𑁆𑀕𑀸, 𑀉𑀢𑁆𑀢𑀫𑀔𑀕𑁆𑀕𑀥𑀸𑀭𑀻𑀳𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀺𑀡𑁆𑀡𑀫𑁆𑀳𑀸𑀢𑀺 𑀧𑀭𑀺𑀯𑀸𑀭𑀺𑀢𑀫𑁆𑀳. 𑀓𑀣𑀦𑁆𑀢𑀺 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀅𑀫𑁆𑀳𑀸𑀓𑀁 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀢𑁂𑀲𑀁 ¶ 𑀓𑀣𑀁 𑀲𑀼𑀢𑁆𑀯𑀸 𑀯𑀸𑀦𑀭𑀺𑀦𑁆𑀤𑁄 ‘‘𑀫𑀸 𑀪𑀸𑀬𑀺𑀢𑁆𑀣, 𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀼𑀓𑀺𑀘𑁆𑀘𑀸, 𑀅𑀚𑁆𑀚𑀧𑀺 𑀫𑀚𑁆𑀛𑀺𑀫𑀬𑀸𑀫𑁄 𑀯𑀢𑁆𑀢𑀢𑀺, 𑀅𑀧𑀺 𑀦𑀸𑀫 𑀢𑁂𑀲𑀁 ‘𑀅𑀫𑁆𑀳𑁂 𑀫𑀸𑀭𑁂𑀲𑁆𑀲𑀸𑀫𑀸’𑀢𑀺 𑀧𑀭𑀺𑀯𑀸𑀭𑀺𑀢𑀸𑀦𑀁 𑀇𑀫𑀲𑁆𑀲 𑀓𑀺𑀘𑁆𑀘𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀁 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀯𑀸𑀦𑀭𑁂 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁪.

‘‘𑀅𑀧𑁆𑀧𑁂𑀯 𑀩𑀳𑀼𑀓𑀺𑀘𑁆𑀘𑀸𑀦𑀁, 𑀅𑀢𑁆𑀣𑁄 𑀚𑀸𑀬𑁂𑀣 𑀓𑁄𑀘𑀺 𑀦𑀁;

𑀅𑀢𑁆𑀣𑀺 𑀭𑀼𑀓𑁆𑀔𑀲𑁆𑀲 𑀅𑀘𑁆𑀙𑀺𑀦𑁆𑀦𑀁, 𑀔𑀚𑁆𑀚𑀣𑀜𑁆𑀜𑁂𑀯 𑀢𑀺𑀦𑁆𑀤𑀼𑀓’’𑀦𑁆𑀢𑀺.

𑀢𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀧𑁆𑀧𑁂𑀯 𑀩𑀳𑀼𑀓𑀺𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀅𑀢𑁆𑀣𑀺 𑀭𑀼𑀓𑁆𑀔𑀲𑁆𑀲 𑀅𑀘𑁆𑀙𑀺𑀦𑁆𑀦𑀦𑁆𑀢𑀺 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀨𑀮𑀸𑀦𑀁 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀯𑀲𑁂𑀦 𑀅𑀘𑁆𑀙𑀺𑀦𑁆𑀦𑀁 𑀩𑀳𑀼 𑀞𑀸𑀦𑀁 𑀅𑀢𑁆𑀣𑀺. 𑀔𑀚𑁆𑀚𑀣𑀜𑁆𑀜𑁂𑀯 𑀢𑀺𑀦𑁆𑀤𑀼𑀓𑀦𑁆𑀢𑀺 𑀢𑀺𑀦𑁆𑀤𑀼𑀓𑀨𑀮𑀁 𑀔𑀚𑁆𑀚𑀣𑀜𑁆𑀜𑁂𑀯. 𑀢𑀼𑀫𑁆𑀳𑁂 𑀳𑀺 𑀬𑀸𑀯𑀢𑀓𑁂𑀦 𑀯𑁄 𑀅𑀢𑁆𑀣𑁄 𑀅𑀢𑁆𑀣𑀺, 𑀢𑀢𑁆𑀢𑀓𑀁 𑀔𑀸𑀤𑀣, 𑀅𑀫𑁆𑀳𑀸𑀓𑀁 𑀧𑀳𑀭𑀡𑀓𑀸𑀮𑀁 𑀚𑀸𑀦𑀺𑀲𑁆𑀲𑀸𑀫𑀸𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀓𑀧𑀺𑀕𑀡𑀁 𑀲𑀫𑀲𑁆𑀲𑀸𑀲𑁂𑀲𑀺. 𑀏𑀢𑁆𑀢𑀓𑀜𑁆𑀳𑀺 𑀅𑀲𑁆𑀲𑀸𑀲𑀁 𑀅𑀮𑀪𑀫𑀸𑀦𑀸 𑀲𑀩𑁆𑀩𑁂𑀧𑀺 𑀢𑁂 𑀨𑀮𑀺𑀢𑁂𑀦 𑀳𑀤𑀬𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑁂𑀬𑁆𑀬𑀼𑀁. 𑀫𑀳𑀸𑀲𑀢𑁆𑀢𑁄 𑀧𑀦 𑀏𑀯𑀁 𑀯𑀸𑀦𑀭𑀕𑀡𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀲𑀩𑁆𑀩𑁂 𑀯𑀸𑀦𑀭𑁂 𑀲𑀫𑀸𑀦𑁂𑀣𑀸’’𑀢𑀺 𑀆𑀳. 𑀲𑀫𑀸𑀦𑁂𑀦𑁆𑀢𑀸 𑀢𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀁 𑀲𑁂𑀦𑀓𑀁 𑀦𑀸𑀫 𑀯𑀸𑀦𑀭𑀁 𑀅𑀤𑀺𑀲𑁆𑀯𑀸 ‘‘𑀲𑁂𑀦𑀓𑁄 𑀦𑀸𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. ‘‘𑀲𑀘𑁂 𑀲𑁂𑀦𑀓𑁄 𑀦𑀸𑀕𑀢𑁄, 𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣, 𑀇𑀤𑀸𑀦𑀺 𑀯𑁄 𑀲𑁄 ¶ 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑁂𑀦𑀓𑁄𑀧𑀺 𑀔𑁄 𑀯𑀸𑀦𑀭𑀕𑀡𑀲𑁆𑀲 𑀕𑀫𑀦𑀓𑀸𑀮𑁂 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀘𑁆𑀙𑀸 𑀧𑀩𑀼𑀤𑁆𑀥𑁄 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀯𑀸𑀦𑀭𑀕𑀡𑀲𑁆𑀲 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀜𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀭𑀺𑀬𑀦𑁆𑀢𑁂 𑀕𑁂𑀳𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺𑀬𑀸 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀔𑁂𑀢𑁆𑀢𑀁 𑀕𑀘𑁆𑀙𑀦𑁆𑀢𑁄 𑀕𑀸𑀫𑀤𑀸𑀭𑀓𑁄 𑀯𑀺𑀬 𑀏𑀓𑀁 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 ¶ 𑀉𑀧𑀭𑀺𑀯𑀸𑀢𑁂 𑀞𑀢𑁆𑀯𑀸 𑀕𑀸𑀫𑀁 𑀧𑀤𑀻𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀫𑀓𑁆𑀓𑀝𑁂 𑀙𑀟𑁆𑀟𑁂𑀢𑁆𑀯𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀅𑀕𑀫𑀁𑀲𑀼. 𑀯𑀸𑀦𑀭𑀸 𑀧𑀮𑀸𑀬𑀦𑁆𑀢𑀸 𑀲𑁂𑀦𑀓𑀲𑁆𑀲𑀢𑁆𑀣𑀸𑀬 𑀏𑀓𑁂𑀓𑀁 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀪𑀸𑀕𑀺𑀦𑁂𑀬𑁆𑀬𑁄 𑀲𑁂𑀦𑀓𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀅𑀳𑁄𑀲𑀺, 𑀯𑀸𑀦𑀭𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀯𑀸𑀦𑀭𑀺𑀦𑁆𑀤𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀦𑁆𑀤𑀼𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁭𑁮] 𑁮. 𑀓𑀘𑁆𑀙𑀧𑀚𑀸𑀢𑀓𑀯𑀡𑁆𑀡𑀦𑀸

𑀚𑀦𑀺𑀢𑁆𑀢𑀁 𑀫𑁂 𑀪𑀯𑀺𑀢𑁆𑀢𑀁 𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀳𑀺𑀯𑀸𑀢𑀓𑀭𑁄𑀕𑀫𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀅𑀳𑀺𑀯𑀸𑀢𑀓𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀆𑀳𑀁𑀲𑀼 𑁋 ‘‘𑀢𑀸𑀢, 𑀫𑀸 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲, 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀚𑀻𑀯𑀺𑀢𑀁 𑀭𑀓𑁆𑀔, 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀫𑀳𑀸𑀦𑀺𑀥𑀸𑀦𑀁 𑀅𑀢𑁆𑀣𑀺, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑁂𑀬𑁆𑀬𑀸𑀲𑀻’’𑀢𑀺. 𑀧𑀼𑀢𑁆𑀢𑁄 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀆𑀕𑀦𑁆𑀢𑁆𑀯𑀸 𑀫𑀳𑀸𑀦𑀺𑀥𑀸𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀘𑁂𑀯 𑀯𑀢𑁆𑀣𑀘𑁆𑀙𑀸𑀤𑀦𑀸𑀤𑀻𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀅𑀳𑀺𑀯𑀸𑀢𑀓𑀭𑁄𑀕𑁄 𑀉𑀧𑁆𑀧𑀦𑁆𑀦𑁄𑀢𑀺 𑀅𑀲𑁆𑀲𑀼𑀫𑁆𑀳, 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀫𑀼𑀢𑁆𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺, 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀔𑁄, 𑀉𑀧𑀸𑀲𑀓, 𑀪𑀬𑁂 𑀉𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀆𑀮𑀬𑀁 𑀓𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀢𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀼, 𑀅𑀦𑀸𑀮𑀬𑀁 𑀧𑀦 𑀓𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑀸 𑀚𑀻𑀯𑀺𑀢𑀁 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀕𑀸𑀫𑀓𑁂 𑀓𑀼𑀫𑁆𑀪𑀓𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑀺. 𑀢𑀤𑀸 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀦𑀤𑀺𑀬𑀸 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁄 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑁄𑀲𑀺. 𑀲𑁄 𑀩𑀳𑀼𑀉𑀤𑀓𑀓𑀸𑀮𑁂 𑀦𑀤𑀺𑀬𑀸 𑀲𑀤𑁆𑀥𑀺𑀁 𑀏𑀓𑁄𑀤𑀓𑁄 𑀳𑁄𑀢𑀺, 𑀉𑀤𑀓𑁂 𑀫𑀦𑁆𑀤𑀻𑀪𑀽𑀢𑁂 ¶ 𑀯𑀺𑀲𑀼𑀁 𑀳𑁄𑀢𑀺. 𑀫𑀘𑁆𑀙𑀓𑀘𑁆𑀙𑀧𑀸 ¶ 𑀧𑀦 ‘‘𑀇𑀫𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀲𑀼𑀯𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸’’𑀢𑀺 𑀚𑀸𑀦𑀦𑁆𑀢𑀺. 𑀅𑀣 𑀢𑀲𑁆𑀫𑀺𑀁 𑀲𑀭𑁂 𑀦𑀺𑀩𑁆𑀩𑀢𑁆𑀢𑀫𑀘𑁆𑀙𑀓𑀘𑁆𑀙𑀧𑀸 ‘‘𑀇𑀫𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀉𑀤𑀓𑀲𑁆𑀲 𑀏𑀓𑀸𑀩𑀤𑁆𑀥𑀓𑀸𑀮𑁂𑀬𑁂𑀯 𑀢𑀫𑁆𑀳𑀸 𑀲𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀦𑀤𑀺𑀁 𑀅𑀕𑀫𑀺𑀁𑀲𑀼. 𑀏𑀓𑁄 𑀧𑀦 𑀓𑀘𑁆𑀙𑀧𑁄 ‘‘𑀇𑀤𑀁 𑀫𑁂 𑀚𑀸𑀢𑀝𑁆𑀞𑀸𑀦𑀁 𑀯𑀟𑁆𑀠𑀺𑀢𑀝𑁆𑀞𑀸𑀦𑀁, 𑀫𑀸𑀢𑀸𑀧𑀺𑀢𑀽𑀳𑀺 𑀯𑀲𑀺𑀢𑀝𑁆𑀞𑀸𑀦𑀁, 𑀦 𑀲𑀓𑁆𑀓𑁄𑀫𑀺 𑀇𑀫𑀁 𑀚𑀳𑀺𑀢𑀼’’𑀦𑁆𑀢𑀺 𑀦𑀤𑀺𑀁 𑀦 𑀅𑀕𑀫𑀸𑀲𑀺. 𑀅𑀣 𑀦𑀺𑀤𑀸𑀖𑀲𑀫𑀬𑁂 𑀢𑀢𑁆𑀣 𑀉𑀤𑀓𑀁 𑀙𑀺𑀚𑁆𑀚𑀺, 𑀲𑁄 𑀓𑀘𑁆𑀙𑀧𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀢𑁆𑀢𑀺𑀓𑀕𑀳𑀡𑀝𑁆𑀞𑀸𑀦𑁂 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀧𑀸𑀯𑀺𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀢𑁆𑀢𑀺𑀓𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀸𑀓𑀼𑀤𑁆𑀤𑀸𑀮𑁂𑀦 𑀪𑀽𑀫𑀺𑀁 𑀔𑀡𑀦𑁆𑀢𑁄 𑀓𑀘𑁆𑀙𑀧𑀲𑁆𑀲 𑀧𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀢𑁆𑀢𑀺𑀓𑀧𑀺𑀡𑁆𑀟𑀁 𑀯𑀺𑀬 𑀓𑀼𑀤𑁆𑀤𑀸𑀮𑁂𑀦𑁂𑀯 𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀸𑀢𑁂𑀲𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀯𑀲𑀦𑀝𑁆𑀞𑀸𑀦𑁂 𑀆𑀮𑀬𑀁 𑀚𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀁 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁫𑁫.

‘‘𑀚𑀦𑀺𑀢𑁆𑀢𑀁 𑀫𑁂 𑀪𑀯𑀺𑀢𑁆𑀢𑀁 𑀫𑁂, 𑀇𑀢𑀺 𑀧𑀗𑁆𑀓𑁂 𑀅𑀯𑀲𑁆𑀲𑀬𑀺𑀁;

𑀢𑀁 𑀫𑀁 𑀧𑀗𑁆𑀓𑁄 𑀅𑀚𑁆𑀛𑀪𑀯𑀺, 𑀬𑀣𑀸 𑀤𑀼𑀩𑁆𑀩𑀮𑀓𑀁 𑀢𑀣𑀸;

𑀢𑀁 𑀢𑀁 𑀯𑀤𑀸𑀫𑀺 𑀪𑀕𑁆𑀕𑀯, 𑀲𑀼𑀡𑁄𑀳𑀺 𑀯𑀘𑀦𑀁 𑀫𑀫.

𑁫𑁬.

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀲𑀼𑀔𑀁 𑀬𑀢𑁆𑀭𑀸𑀥𑀺𑀕𑀘𑁆𑀙𑀢𑀺;

𑀢𑀁 𑀚𑀦𑀺𑀢𑁆𑀢𑀁 𑀪𑀯𑀺𑀢𑁆𑀢𑀜𑁆𑀘, 𑀧𑀼𑀭𑀺𑀲𑀲𑁆𑀲 𑀧𑀚𑀸𑀦𑀢𑁄;

𑀬𑀫𑁆𑀳𑀺 𑀚𑀻𑀯𑁂 𑀢𑀫𑁆𑀳𑀺 𑀕𑀘𑁆𑀙𑁂, 𑀦 𑀦𑀺𑀓𑁂𑀢𑀳𑀢𑁄 𑀲𑀺𑀬𑀸’’𑀢𑀺.

𑀢𑀢𑁆𑀣 𑀚𑀦𑀺𑀢𑁆𑀢𑀁 𑀫𑁂 𑀪𑀯𑀺𑀢𑁆𑀢𑀁 𑀫𑁂𑀢𑀺 𑀇𑀤𑀁 𑀫𑀫 𑀚𑀸𑀢𑀝𑁆𑀞𑀸𑀦𑀁, 𑀇𑀤𑀁 𑀫𑀫 𑀯𑀟𑁆𑀠𑀺𑀢𑀝𑁆𑀞𑀸𑀦𑀁. 𑀇𑀢𑀺 𑀧𑀗𑁆𑀓𑁂 𑀅𑀯𑀲𑁆𑀲𑀬𑀺𑀦𑁆𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀳𑀁 𑀇𑀫𑀲𑁆𑀫𑀺𑀁 𑀓𑀤𑁆𑀤𑀫𑁂 𑀅𑀯𑀲𑁆𑀲𑀬𑀺𑀁 𑀦𑀺𑀧𑀚𑁆𑀚𑀺𑀁, 𑀯𑀸𑀲𑀁 𑀓𑀧𑁆𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀪𑀯𑀻𑀢𑀺 𑀅𑀥𑀺𑀅𑀪𑀯𑀺 𑀯𑀺𑀦𑀸𑀲𑀁 𑀧𑀸𑀧𑁂𑀲𑀺. 𑀪𑀕𑁆𑀕𑀯𑀸𑀢𑀺 𑀓𑀼𑀫𑁆𑀪𑀓𑀸𑀭𑀁 𑀆𑀮𑀧𑀢𑀺. 𑀓𑀼𑀫𑁆𑀪𑀓𑀸𑀭𑀸𑀦𑀜𑁆𑀳𑀺 𑀦𑀸𑀫𑀕𑁄𑀢𑁆𑀢𑀧𑀜𑁆𑀜𑀢𑁆𑀢𑀺 𑀏𑀲𑀸, 𑀬𑀤𑀺𑀤𑀁 𑀪𑀕𑁆𑀕𑀯𑀸𑀢𑀺. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑁆𑀲𑀸𑀤𑀁. 𑀢𑀁 ¶ 𑀚𑀦𑀺𑀢𑁆𑀢𑀁 𑀪𑀯𑀺𑀢𑁆𑀢𑀜𑁆𑀘𑀸𑀢𑀺 𑀢𑀁 𑀚𑀸𑀢𑀝𑁆𑀞𑀸𑀦𑀜𑁆𑀘 𑀯𑀟𑁆𑀠𑀺𑀢𑀝𑁆𑀞𑀸𑀦𑀜𑁆𑀘. ‘‘𑀚𑀸𑀦𑀺𑀢𑁆𑀢𑀁 𑀪𑀸𑀯𑀺𑀢𑁆𑀢’’𑀦𑁆𑀢𑀺 𑀤𑀻𑀖𑀯𑀲𑁂𑀦𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀧𑀚𑀸𑀦𑀢𑁄𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀦𑁆𑀢𑀲𑁆𑀲. 𑀦 𑀦𑀺𑀓𑁂𑀢𑀳𑀢𑁄 𑀲𑀺𑀬𑀸𑀢𑀺 𑀦𑀺𑀓𑁂𑀢𑁂 𑀆𑀮𑀬𑀁 𑀓𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀦𑀺𑀓𑁂𑀢𑁂𑀦 𑀳𑀢𑁄, 𑀏𑀯𑀭𑀽𑀧𑀁 𑀫𑀭𑀡𑀤𑀼𑀓𑁆𑀔𑀁 𑀧𑀸𑀧𑀺𑀢𑁄 𑀦 𑀪𑀯𑁂𑀬𑁆𑀬𑀸𑀢𑀺.

𑀏𑀯𑀁 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀑𑀯𑀤𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀧𑀲𑁆𑀲𑀣 𑀇𑀫𑀁 𑀓𑀘𑁆𑀙𑀧𑀁, 𑀅𑀬𑀁 ¶ 𑀅𑀜𑁆𑀜𑁂𑀲𑀁 𑀫𑀘𑁆𑀙𑀓𑀘𑁆𑀙𑀧𑀸𑀦𑀁 𑀫𑀳𑀸𑀦𑀤𑀺𑀁 𑀕𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀆𑀮𑀬𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ¶ 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀕𑀦𑁆𑀢𑁆𑀯𑀸 𑀫𑀫 𑀫𑀢𑁆𑀢𑀺𑀓𑀕𑀳𑀡𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲𑀸𑀳𑀁 𑀫𑀢𑁆𑀢𑀺𑀓𑀁 𑀕𑀡𑁆𑀳𑀦𑁆𑀢𑁄 𑀫𑀳𑀸𑀓𑀼𑀤𑁆𑀤𑀸𑀮𑁂𑀦 𑀧𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀢𑁆𑀢𑀺𑀓𑀧𑀺𑀡𑁆𑀟𑀁 𑀯𑀺𑀬 𑀦𑀁 𑀣𑀮𑁂 𑀧𑀸𑀢𑁂𑀲𑀺𑀁, 𑀅𑀬𑀁 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀏𑀯𑀫𑁂𑀲 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀆𑀮𑀬𑀁 𑀓𑀢𑁆𑀯𑀸 𑀫𑀭𑀡𑀁 𑀧𑀢𑁆𑀢𑁄, 𑀢𑀼𑀫𑁆𑀳𑁂𑀧𑀺 𑀫𑀸 𑀇𑀫𑀺𑀦𑀸 𑀓𑀘𑁆𑀙𑀧𑁂𑀦 𑀲𑀤𑀺𑀲𑀸 𑀅𑀳𑀼𑀯𑀢𑁆𑀣, 𑀇𑀢𑁄 𑀧𑀝𑁆𑀞𑀸𑀬 ‘𑀫𑀬𑁆𑀳𑀁 𑀭𑀽𑀧𑀁 𑀫𑀬𑁆𑀳𑀁 𑀲𑀤𑁆𑀤𑁄 𑀫𑀬𑁆𑀳𑀁 𑀕𑀦𑁆𑀥𑁄 𑀫𑀬𑁆𑀳𑀁 𑀭𑀲𑁄 𑀫𑀬𑁆𑀳𑀁 𑀨𑁄𑀝𑁆𑀞𑀩𑁆𑀩𑁄 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀫𑀬𑁆𑀳𑀁 𑀥𑀻𑀢𑀸 𑀫𑀬𑁆𑀳𑀁 𑀤𑀸𑀲𑀤𑀸𑀲𑀺𑀧𑀭𑀺𑀘𑁆𑀙𑁂𑀤𑁄 𑀫𑀬𑁆𑀳𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡’𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀉𑀧𑀪𑁄𑀕𑀯𑀲𑁂𑀦 𑀫𑀸 𑀕𑀡𑁆𑀳𑀺𑀢𑁆𑀣, 𑀏𑀓𑀓𑁄𑀯𑁂𑀲 𑀲𑀢𑁆𑀢𑁄 𑀢𑀻𑀲𑀼 𑀪𑀯𑁂𑀲𑀼 𑀧𑀭𑀺𑀯𑀢𑁆𑀢𑀢𑀻’’𑀢𑀺. 𑀏𑀯𑀁 𑀩𑀼𑀤𑁆𑀥𑀮𑀻𑀮𑀸𑀬 𑀫𑀳𑀸𑀚𑀦𑀲𑁆𑀲 𑀑𑀯𑀸𑀤𑀫𑀤𑀸𑀲𑀺, 𑀲𑁄 𑀑𑀯𑀸𑀤𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀢𑁆𑀣𑀭𑀺𑀢𑁆𑀯𑀸 𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀣𑁂𑀯 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. ‘‘𑀢𑀤𑀸 𑀓𑀘𑁆𑀙𑀧𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀼𑀫𑁆𑀪𑀓𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀘𑁆𑀙𑀧𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁭𑁯] 𑁯. 𑀲𑀢𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀢𑀜𑁆𑀘 ¶ 𑀅𑀧𑁆𑀧𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀯𑀻𑀲𑀢𑀺𑀯𑀺𑀥𑀁 𑀅𑀦𑁂𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀩𑀳𑀽 𑀪𑀺𑀓𑁆𑀔𑀽 𑀯𑁂𑀚𑁆𑀚𑀓𑀫𑁆𑀫𑁂𑀦 𑀤𑀽𑀢𑀓𑀫𑁆𑀫𑁂𑀦 𑀧𑀳𑀺𑀡𑀓𑀫𑁆𑀫𑁂𑀦 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑁂𑀦𑀸𑀢𑀺 𑀏𑀯𑀭𑀽𑀧𑀸𑀬 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀼𑀁. 𑀲𑀸 𑀲𑀸𑀓𑁂𑀢𑀚𑀸𑀢𑀓𑁂 (𑀚𑀸. 𑁧.𑁨.𑁧𑁭𑁩-𑁧𑁭𑁪) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀢𑀣𑀸 𑀚𑀻𑀯𑀺𑀓𑀓𑀧𑁆𑀧𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀏𑀢𑀭𑀳𑀺 𑀔𑁄 𑀩𑀳𑀽 𑀪𑀺𑀓𑁆𑀔𑀽 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀢𑁂 𑀧𑀦 𑀏𑀯𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀬𑀓𑁆𑀔𑀢𑁆𑀢𑀪𑀸𑀯𑀸 𑀧𑁂𑀢𑀢𑁆𑀢𑀪𑀸𑀯𑀸 𑀦 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺, 𑀥𑀼𑀭𑀕𑁄𑀡𑀸 𑀳𑀼𑀢𑁆𑀯𑀸𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀏𑀢𑁂𑀲𑀁 𑀳𑀺𑀢𑀢𑁆𑀣𑀸𑀬 𑀲𑀼𑀔𑀢𑁆𑀣𑀸𑀬 ¶ 𑀅𑀢𑁆𑀢𑀚𑁆𑀛𑀸𑀲𑀬𑀁 𑀲𑀓𑀧𑀝𑀺𑀪𑀸𑀦𑀁 𑀏𑀓𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀅𑀦𑁂𑀲𑀦𑀸𑀬 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸. 𑀅𑀦𑁂𑀲𑀦𑀸𑀬 𑀳𑀺 𑀉𑀧𑁆𑀧𑀦𑁆𑀦𑁄 𑀧𑀺𑀡𑁆𑀟𑀧𑀸𑀢𑁄 𑀆𑀤𑀺𑀢𑁆𑀢𑀮𑁄𑀳𑀕𑀼𑀴𑀲𑀤𑀺𑀲𑁄 𑀳𑀮𑀸𑀳𑀮𑀯𑀺𑀲𑀽𑀧𑀫𑁄. 𑀅𑀦𑁂𑀲𑀦𑀸 𑀳𑀺 𑀦𑀸𑀫𑁂𑀲𑀸 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀕𑀭𑀳𑀺𑀢𑀩𑁆𑀩𑀸 𑀧𑀝𑀺𑀓𑀼𑀝𑁆𑀞𑀸. 𑀅𑀦𑁂𑀲𑀦𑀸𑀬 ¶ 𑀉𑀧𑁆𑀧𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀳𑀺 𑀳𑀸𑀲𑁄 𑀯𑀸 𑀲𑁄𑀫𑀦𑀲𑁆𑀲𑀁 𑀯𑀸 𑀦𑀢𑁆𑀣𑀺. 𑀏𑀯𑀁 𑀉𑀧𑁆𑀧𑀦𑁆𑀦𑁄 𑀳𑀺 𑀧𑀺𑀡𑁆𑀟𑀧𑀸𑀢𑁄 𑀫𑀫 𑀲𑀸𑀲𑀦𑁂 𑀘𑀡𑁆𑀟𑀸𑀮𑀲𑁆𑀲 𑀉𑀘𑁆𑀙𑀺𑀝𑁆𑀞𑀪𑁄𑀚𑀦𑀲𑀤𑀺𑀲𑁄, 𑀢𑀲𑁆𑀲 𑀧𑀭𑀺𑀪𑁄𑀕𑁄 𑀲𑀢𑀥𑀫𑁆𑀫𑀫𑀸𑀡𑀯𑀲𑁆𑀲 𑀘𑀡𑁆𑀟𑀸𑀮𑀼𑀘𑁆𑀙𑀺𑀝𑁆𑀞𑀪𑀢𑁆𑀢𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀸𑀣𑁂𑀬𑁆𑀬𑀢𑀡𑁆𑀟𑀼𑀮𑁂 𑀘 𑀪𑀢𑁆𑀢𑀧𑀼𑀝𑀜𑁆𑀘 𑀕𑀳𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀫𑀸𑀡𑀯𑁄 𑀅𑀢𑁆𑀣𑀺 𑀲𑀢𑀥𑀫𑁆𑀫𑁄 𑀦𑀸𑀫 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄𑀧𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀡𑁆𑀟𑀼𑀮𑁂 𑀘 𑀪𑀢𑁆𑀢𑀧𑀼𑀝𑀜𑁆𑀘 𑀅𑀕𑀳𑁂𑀢𑁆𑀯𑀸𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺, 𑀢𑁂 𑀉𑀪𑁄𑀧𑀺 𑀫𑀳𑀸𑀫𑀕𑁆𑀕𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀁 ‘‘𑀓𑀺𑀁𑀚𑀸𑀢𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀅𑀳𑀁 𑀘𑀡𑁆𑀟𑀸𑀮𑁄’’𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀁𑀚𑀸𑀢𑀺𑀓𑁄𑀲𑀻’’𑀢𑀺 𑀫𑀸𑀡𑀯𑀁 𑀧𑀼𑀘𑁆𑀙𑀺 ¶ . ‘‘𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑁄 𑀅𑀳’’𑀦𑁆𑀢𑀺. ‘‘𑀲𑀸𑀥𑀼 𑀕𑀘𑁆𑀙𑀸𑀫𑀸’’𑀢𑀺 𑀢𑁂 𑀉𑀪𑁄𑀧𑀺 𑀫𑀕𑁆𑀕𑀁 𑀅𑀕𑀫𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀸𑀢𑀭𑀸𑀲𑀯𑁂𑀮𑀸𑀬 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀪𑀢𑁆𑀢𑀧𑀼𑀝𑀁 𑀫𑁄𑀘𑁂𑀢𑁆𑀯𑀸 ‘‘𑀫𑀸𑀡𑀯, 𑀪𑀢𑁆𑀢𑀁 𑀪𑀼𑀜𑁆𑀚𑀸𑀳𑀻’’𑀢𑀺 𑀆𑀳. ‘‘𑀦𑀢𑁆𑀣𑀺, 𑀅𑀭𑁂 𑀘𑀡𑁆𑀟𑀸𑀮, 𑀫𑀫 𑀪𑀢𑁆𑀢𑁂𑀦 𑀅𑀢𑁆𑀣𑁄’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀼𑀝𑀓𑀪𑀢𑁆𑀢𑀁 𑀉𑀘𑁆𑀙𑀺𑀝𑁆𑀞𑀁 𑀅𑀓𑀢𑁆𑀯𑀸𑀯 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀅𑀜𑁆𑀜𑀲𑁆𑀫𑀺𑀁 𑀧𑀡𑁆𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀝𑀓𑀪𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀥𑁄𑀢𑀳𑀢𑁆𑀣𑀧𑀸𑀤𑁄 𑀢𑀡𑁆𑀟𑀼𑀮𑁂 𑀘 𑀲𑁂𑀲𑀪𑀢𑁆𑀢𑀜𑁆𑀘 𑀆𑀤𑀸𑀬 ‘‘𑀕𑀘𑁆𑀙𑀸𑀫, 𑀫𑀸𑀡𑀯𑀸’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀢𑁂 𑀲𑀓𑀮𑀤𑀺𑀯𑀲𑀁 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀉𑀪𑁄𑀧𑀺 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀧𑀼𑀝𑀁 𑀫𑁄𑀘𑁂𑀢𑁆𑀯𑀸 𑀫𑀸𑀡𑀯𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀆𑀭𑀪𑀺. 𑀫𑀸𑀡𑀯𑁄 𑀲𑀓𑀮𑀤𑀺𑀯𑀲𑀁 𑀫𑀕𑁆𑀕𑀕𑀫𑀦𑁂𑀦 𑀓𑀺𑀮𑀦𑁆𑀢𑁄 𑀙𑀸𑀢𑀚𑁆𑀛𑀢𑁆𑀢𑁄 ‘‘𑀲𑀘𑁂 𑀫𑁂 𑀪𑀢𑁆𑀢𑀁 𑀤𑀲𑁆𑀲𑀢𑀺, 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀇𑀢𑀭𑁄 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀪𑀼𑀜𑁆𑀚𑀢𑁂𑀯. 𑀫𑀸𑀡𑀯𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀘𑀡𑁆𑀟𑀸𑀮𑁄 𑀫𑀬𑁆𑀳𑀁 𑀅𑀯𑀢𑁆𑀯𑀸𑀯 𑀲𑀩𑁆𑀩𑀁 𑀪𑀼𑀜𑁆𑀚𑀢𑀺 ¶ 𑀦𑀺𑀧𑁆𑀧𑀻𑀴𑁂𑀢𑁆𑀯𑀸𑀧𑀺 𑀢𑀁 𑀕𑀳𑁂𑀢𑁆𑀯𑀸 𑀉𑀧𑀭𑀺 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀲𑁂𑀲𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀪𑀼𑀜𑁆𑀚𑀺. 𑀅𑀣𑀲𑁆𑀲 𑀪𑀼𑀢𑁆𑀢𑀫𑀢𑁆𑀢𑀲𑁆𑀲𑁂𑀯 ‘‘𑀫𑀬𑀸 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀸𑀦𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀢𑀁, 𑀘𑀡𑁆𑀟𑀸𑀮𑀲𑁆𑀲 𑀦𑀸𑀫 𑀫𑁂 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀪𑀼𑀢𑁆𑀢’’𑀦𑁆𑀢𑀺 𑀩𑀮𑀯𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀮𑁄𑀳𑀺𑀢𑀁 𑀪𑀢𑁆𑀢𑀁 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑀺. 𑀲𑁄 ‘‘𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀯𑀢 𑀫𑁂 𑀓𑀸𑀭𑀡𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀢𑀸𑀬 𑀧𑀭𑀺𑀤𑁂𑀯𑀫𑀸𑀦𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁭.

‘‘𑀢𑀜𑁆𑀘 ¶ 𑀅𑀧𑁆𑀧𑀜𑁆𑀘 𑀉𑀘𑁆𑀙𑀺𑀝𑁆𑀞𑀁, 𑀢𑀜𑁆𑀘 𑀓𑀺𑀘𑁆𑀙𑁂𑀦 𑀦𑁄 𑀅𑀤𑀸;

𑀲𑁄𑀳𑀁 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄, 𑀬𑀁 𑀪𑀼𑀢𑁆𑀢𑀁 𑀢𑀫𑁆𑀧𑀺 𑀉𑀕𑁆𑀕𑀢’’𑀦𑁆𑀢𑀺.

𑀢𑀢𑁆𑀭𑀸𑀬𑀁 ¶ 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀫𑀬𑀸 𑀪𑀼𑀢𑁆𑀢𑀁, 𑀢𑀁 𑀅𑀧𑁆𑀧𑀜𑁆𑀘 𑀉𑀘𑁆𑀙𑀺𑀝𑁆𑀞𑀜𑁆𑀘, 𑀢𑀜𑁆𑀘 𑀲𑁄 𑀘𑀡𑁆𑀟𑀸𑀮𑁄 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀫𑀁 𑀅𑀤𑀸𑀲𑀺, 𑀅𑀣 𑀔𑁄 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀅𑀤𑀸𑀲𑀺, 𑀲𑁄𑀳𑀁 𑀧𑀭𑀺𑀲𑀼𑀤𑁆𑀥𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄, 𑀢𑁂𑀦𑁂𑀯 𑀫𑁂 𑀬𑀁 𑀪𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀤𑁆𑀥𑀺𑀁 𑀮𑁄𑀳𑀺𑀢𑁂𑀦 𑀉𑀕𑁆𑀕𑀢𑀦𑁆𑀢𑀺.

𑀏𑀯𑀁 𑀫𑀸𑀡𑀯𑁄 𑀧𑀭𑀺𑀤𑁂𑀯𑀺𑀢𑁆𑀯𑀸 ‘‘𑀓𑀺𑀁 𑀤𑀸𑀦𑀺 𑀫𑁂 𑀏𑀯𑀭𑀽𑀧𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀢𑁂𑀦𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀓𑀲𑁆𑀲𑀘𑀺 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸𑀯 𑀅𑀦𑀸𑀣𑀫𑀭𑀡𑀁 𑀧𑀢𑁆𑀢𑁄.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀢𑀥𑀫𑁆𑀫𑀫𑀸𑀡𑀯𑀲𑁆𑀲 𑀢𑀁 𑀘𑀡𑁆𑀟𑀸𑀮𑀼𑀘𑁆𑀙𑀺𑀝𑁆𑀞𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀬𑀼𑀢𑁆𑀢𑀪𑁄𑀚𑀦𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀦𑁂𑀯 𑀳𑀸𑀲𑁄, 𑀦 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀏𑀯𑀫𑁂𑀯 𑀬𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀢𑀣𑀸𑀮𑀤𑁆𑀥𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀕𑀭𑀳𑀺𑀢𑀚𑀻𑀯𑀺𑀢𑀪𑀸𑀯𑀢𑁄 𑀦𑁂𑀯 𑀳𑀸𑀲𑁄, 𑀦 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁮.

‘‘𑀏𑀯𑀁 𑀥𑀫𑁆𑀫𑀁 𑀦𑀺𑀭𑀁𑀓𑀢𑁆𑀯𑀸, 𑀬𑁄 𑀅𑀥𑀫𑁆𑀫𑁂𑀦 𑀚𑀻𑀯𑀢𑀺;

𑀲𑀢𑀥𑀫𑁆𑀫𑁄𑀯 𑀮𑀸𑀪𑁂𑀦, 𑀮𑀤𑁆𑀥𑁂𑀦𑀧𑀺 𑀦 𑀦𑀦𑁆𑀤𑀢𑀻’’𑀢𑀺.

𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀥𑀫𑁆𑀫𑀁. 𑀦𑀺𑀭𑀁𑀓𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸. 𑀅𑀥𑀫𑁆𑀫𑁂𑀦𑀸𑀢𑀺 𑀏𑀓𑀯𑀻𑀲𑀢𑀺𑀬𑀸 𑀅𑀦𑁂𑀲𑀦𑀲𑀗𑁆𑀔𑀸𑀢𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦. 𑀲𑀢𑀥𑀫𑁆𑀫𑁄𑀢𑀺 𑀢𑀲𑁆𑀲 𑀦𑀸𑀫𑀁, ‘‘𑀲𑀦𑁆𑀢𑀥𑀫𑁆𑀫𑁄’’𑀢𑀺𑀧𑀺 𑀧𑀸𑀞𑁄. 𑀦 𑀦𑀦𑁆𑀤𑀢𑀻𑀢𑀺 𑀬𑀣𑀸 𑀲𑀢𑀥𑀫𑁆𑀫𑁄 𑀫𑀸𑀡𑀯𑁄 ‘‘𑀘𑀡𑁆𑀟𑀸𑀮𑀼𑀘𑁆𑀙𑀺𑀝𑁆𑀞𑀓𑀁 𑀫𑁂 𑀮𑀤𑁆𑀥’’𑀦𑁆𑀢𑀺 𑀢𑁂𑀦 𑀮𑀸𑀪𑁂𑀦 𑀦 ¶ 𑀦𑀦𑁆𑀤𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀅𑀦𑁂𑀲𑀦𑀸𑀬 𑀮𑀤𑁆𑀥𑀮𑀸𑀪𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀦 𑀦𑀦𑁆𑀤𑀢𑀺 𑀦 𑀢𑀼𑀲𑁆𑀲𑀢𑀺, ‘‘𑀩𑀼𑀤𑁆𑀥𑀕𑀭𑀳𑀺𑀢𑀚𑀻𑀯𑀺𑀓𑀸𑀬 𑀚𑀻𑀯𑀸𑀫𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲 𑀲𑀢𑀥𑀫𑁆𑀫𑀫𑀸𑀡𑀯𑀲𑁆𑀲𑁂𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀸𑀣𑀫𑀭𑀡𑀁 𑀫𑀭𑀺𑀢𑀼𑀁 𑀯𑀭𑀦𑁆𑀢𑀺.

𑀏𑀯𑀁 ¶ 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀫𑀸𑀡𑀯𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀅𑀳𑀫𑁂𑀯 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀅𑀳𑁄𑀲𑀺’’𑀦𑁆𑀢𑀺.

𑀲𑀢𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁮𑁦] 𑁧𑁦. 𑀤𑀼𑀤𑁆𑀤𑀤𑀚𑀸𑀢𑀓𑀯𑀡𑁆𑀡𑀦𑀸

𑀤𑀼𑀤𑁆𑀤𑀤𑀁 ¶ 𑀤𑀤𑀫𑀸𑀦𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀕𑀡𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀤𑁆𑀯𑁂 𑀲𑀳𑀸𑀬𑀓𑀸 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑀸 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀅𑀤𑀁𑀲𑀼. 𑀢𑁂𑀲𑀼 𑀕𑀡𑀚𑁂𑀝𑁆𑀞𑀓𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀤𑀸𑀦𑁂 𑀩𑀳𑀼𑀤𑀸𑀬𑀓𑀸𑀧𑀺 𑀅𑀢𑁆𑀣𑀺 𑀅𑀧𑁆𑀧𑀤𑀸𑀬𑀓𑀸𑀧𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 ‘𑀇𑀤𑀁 𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’’’𑀢𑀺 𑀤𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑀢𑁆𑀣𑀸 ‘‘𑀢𑀼𑀫𑁆𑀳𑁂𑀳𑀺 𑀔𑁄 𑀉𑀧𑀸𑀲𑀓𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀏𑀯𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁂𑀳𑀺 𑀫𑀳𑀸𑀓𑀫𑁆𑀫𑀁 𑀓𑀢𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀤𑀸𑀦𑀁 𑀤𑀢𑁆𑀯𑀸 𑀏𑀯𑀫𑁂𑀯 𑀦𑀺𑀬𑁆𑀬𑀸𑀤𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀤𑁆𑀯𑀸𑀭𑀕𑀸𑀫𑁂 𑀲𑀧𑀭𑀺𑀯𑀸𑀭𑁄 𑀪𑀺𑀓𑁆𑀔𑀸𑀬 𑀘𑀭𑀺. 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀬𑀁 𑀘𑀭𑀺, 𑀫𑀦𑀼𑀲𑁆𑀲𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀕𑀡𑀩𑀦𑁆𑀥𑀦𑁂𑀦 𑀙𑀦𑁆𑀤𑀓𑀁 ¶ 𑀲𑀁𑀳𑀭𑀺𑀢𑁆𑀯𑀸 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀇𑀲𑀺𑀕𑀡𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀤𑀸𑀦𑀧𑀭𑀺𑀬𑁄𑀲𑀸𑀦𑁂 𑀕𑀡𑀚𑁂𑀝𑁆𑀞𑀓𑁄 𑀏𑀯𑀫𑁂𑀯 𑀯𑀢𑁆𑀯𑀸 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀤𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀯𑀼𑀲𑁄, 𑀘𑀺𑀢𑁆𑀢𑀧𑁆𑀧𑀲𑀸𑀤𑁂 𑀲𑀢𑀺 𑀅𑀧𑁆𑀧𑀓𑀁 𑀦𑀸𑀫 𑀤𑀸𑀦𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁫𑁯.

‘‘𑀤𑀼𑀤𑁆𑀤𑀤𑀁 ¶ 𑀤𑀤𑀫𑀸𑀦𑀸𑀦𑀁, 𑀤𑀼𑀓𑁆𑀓𑀭𑀁 𑀓𑀫𑁆𑀫 𑀓𑀼𑀩𑁆𑀩𑀢𑀁;

𑀅𑀲𑀦𑁆𑀢𑁄 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀲𑀢𑀁 𑀥𑀫𑁆𑀫𑁄 𑀤𑀼𑀭𑀦𑁆𑀦𑀬𑁄.

𑁬𑁦.

‘‘𑀢𑀲𑁆𑀫𑀸 𑀲𑀢𑀜𑁆𑀘 𑀅𑀲𑀢𑀁, 𑀦𑀸𑀦𑀸 𑀳𑁄𑀢𑀺 𑀇𑀢𑁄 𑀕𑀢𑀺;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀡𑀸’’𑀢𑀺.

𑀢𑀢𑁆𑀣 𑀤𑀼𑀤𑁆𑀤𑀤𑀦𑁆𑀢𑀺 𑀤𑀸𑀦𑀁 𑀦𑀸𑀫 𑀮𑁄𑀪𑀤𑁄𑀲𑀯𑀲𑀺𑀓𑁂𑀳𑀺 𑀅𑀧𑀡𑁆𑀟𑀺𑀢𑁂𑀳𑀺 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 ‘‘𑀤𑀼𑀤𑁆𑀤𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀤𑀤𑀫𑀸𑀦𑀸𑀦𑀁. 𑀤𑀼𑀓𑁆𑀓𑀭𑀁 𑀓𑀫𑁆𑀫 𑀓𑀼𑀩𑁆𑀩𑀢𑀦𑁆𑀢𑀺 𑀢𑀤𑁂𑀯 𑀤𑀸𑀦𑀓𑀫𑁆𑀫𑀁 𑀲𑀩𑁆𑀩𑁂𑀳𑀺 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀼𑀓𑁆𑀓𑀭𑀁. 𑀢𑀁 𑀓𑀼𑀭𑀼𑀫𑀸𑀦𑀸𑀦𑀁. 𑀅𑀲𑀦𑁆𑀢𑁄𑀢𑀺 𑀅𑀧𑀡𑁆𑀟𑀺𑀢𑀸 𑀩𑀸𑀮𑀸. 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀻𑀢𑀺 𑀢𑀁 ¶ 𑀓𑀫𑁆𑀫𑀁 𑀦𑀸𑀦𑀼𑀓𑀭𑁄𑀦𑁆𑀢𑀺. 𑀲𑀢𑀁 𑀥𑀫𑁆𑀫𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀲𑀪𑀸𑀯𑁄. 𑀤𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀼𑀭𑀦𑁆𑀦𑀬𑁄𑀢𑀺 𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀤𑀼𑀚𑁆𑀚𑀸𑀦𑁄, 𑀏𑀯𑀭𑀽𑀧𑀲𑁆𑀲 𑀤𑀸𑀦𑀲𑁆𑀲 𑀏𑀯𑀭𑀽𑀧𑁄 𑀨𑀮𑀯𑀺𑀧𑀸𑀓𑁄 𑀳𑁄𑀢𑀻𑀢𑀺 𑀤𑀼𑀭𑀦𑀼𑀩𑁄𑀥𑁄. 𑀅𑀧𑀺𑀘 𑀤𑀼𑀭𑀦𑁆𑀦𑀬𑁄𑀢𑀺 𑀤𑀼𑀭𑀥𑀺𑀕𑀫𑁄, 𑀅𑀧𑀡𑁆𑀟𑀺𑀢𑁂𑀳𑀺 𑀤𑀸𑀦𑀁 𑀤𑀢𑁆𑀯𑀸 𑀤𑀸𑀦𑀨𑀮𑀁 𑀦𑀸𑀫 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸𑀢𑀺𑀧𑀺 𑀅𑀢𑁆𑀣𑁄. 𑀦𑀸𑀦𑀸 𑀳𑁄𑀢𑀺 𑀇𑀢𑁄 𑀕𑀢𑀻𑀢𑀺 𑀇𑀢𑁄 𑀘𑀯𑀺𑀢𑁆𑀯𑀸 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀦𑀸𑀦𑀸 𑀳𑁄𑀢𑀺. 𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀻𑀢𑀺 𑀅𑀧𑀡𑁆𑀟𑀺𑀢𑀸 𑀤𑀼𑀲𑁆𑀲𑀻𑀮𑀸 𑀤𑀸𑀦𑀁 𑀅𑀤𑀢𑁆𑀯𑀸 𑀲𑀻𑀮𑀁 𑀅𑀭𑀓𑁆𑀔𑀺𑀢𑁆𑀯𑀸 𑀦𑀺𑀭𑀬𑀁 𑀕𑀘𑁆𑀙𑀦𑁆𑀢𑀺. 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀡𑀸𑀢𑀺 𑀧𑀡𑁆𑀟𑀺𑀢𑀸 𑀧𑀦 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀢𑁆𑀯𑀸 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀳𑁄𑀦𑁆𑀢𑀺, 𑀫𑀳𑀦𑁆𑀢𑀁 𑀲𑀕𑁆𑀕𑀲𑀼𑀔𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀯𑀲𑁆𑀲𑀸𑀢𑀺𑀓𑁆𑀓𑀫𑁂 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀤𑁆𑀤𑀤𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀮𑁆𑀬𑀸𑀡𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀮𑁆𑀬𑀸𑀡𑀥𑀫𑁆𑀫𑀁 ¶ 𑀤𑀤𑁆𑀤𑀭𑀁, 𑀫𑀓𑁆𑀓𑀝𑀺 𑀤𑀼𑀩𑁆𑀪𑀺𑀫𑀓𑁆𑀓𑀝𑀁;

𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀜𑁆𑀘𑁂𑀯, 𑀓𑀴𑀸𑀬𑀫𑀼𑀝𑁆𑀞𑀺 𑀢𑀺𑀦𑁆𑀤𑀼𑀓𑀁;

𑀓𑀘𑁆𑀙𑀧𑀁 𑀲𑀢𑀥𑀫𑁆𑀫𑀜𑁆𑀘, 𑀤𑀼𑀤𑁆𑀤𑀤𑀦𑁆𑀢𑀺 𑀘 𑀢𑁂 𑀤𑀲.

𑁪. 𑀅𑀲𑀤𑀺𑀲𑀯𑀕𑁆𑀕𑁄

[𑁧𑁮𑁧] 𑁧. 𑀅𑀲𑀤𑀺𑀲𑀚𑀸𑀢𑀓𑀯𑀡𑁆𑀡𑀦𑀸

𑀥𑀦𑀼𑀕𑁆𑀕𑀳𑁄 ¶ 𑀅𑀲𑀤𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀕𑀯𑀢𑁄 𑀫𑀳𑀸𑀦𑀺𑀓𑁆𑀔𑀫𑀧𑀸𑀭𑀫𑀺𑀁 𑀯𑀡𑁆𑀡𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀲𑁄𑀢𑁆𑀣𑀺𑀦𑀸 𑀚𑀸𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀅𑀲𑀤𑀺𑀲𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀲𑁆𑀲 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀅𑀜𑁆𑀜𑁄 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀲𑁄𑀢𑁆𑀣𑀺𑀦𑀸 𑀚𑀸𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀅𑀝𑁆𑀞𑀸𑀭𑀲 𑀘 𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀲𑀼 𑀇𑀲𑁆𑀲𑀸𑀲𑀲𑀺𑀧𑁆𑀧𑁂 𑀅𑀲𑀤𑀺𑀲𑁄 𑀳𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀫𑀺. 𑀭𑀸𑀚𑀸 𑀓𑀸𑀮𑀁 𑀓𑀭𑁄𑀦𑁆𑀢𑁄 ‘‘𑀅𑀲𑀤𑀺𑀲𑀓𑀼𑀫𑀸𑀭𑀲𑁆𑀲 𑀭𑀚𑁆𑀚𑀁 𑀤𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀑𑀧𑀭𑀚𑁆𑀚𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀭𑀚𑁆𑀚𑁂 𑀤𑀻𑀬𑀫𑀸𑀦𑁂 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺, 𑀩𑁆𑀭𑀳𑁆𑀫𑀤𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀬𑁆𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀓𑀺𑀜𑁆𑀘𑀺𑀧𑀺 𑀦 𑀇𑀘𑁆𑀙𑀺, 𑀓𑀦𑀺𑀝𑁆𑀞𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀧𑀓𑀢𑀺𑀬𑀸 𑀯𑀲𑀦𑀸𑀓𑀸𑀭𑁂𑀦𑁂𑀯 𑀯𑀲𑀺. 𑀭𑀸𑀚𑀧𑀸𑀤𑀫𑀽𑀮𑀺𑀓𑀸 ‘‘𑀅𑀲𑀤𑀺𑀲𑀓𑀼𑀫𑀸𑀭𑁄 ¶ 𑀭𑀚𑁆𑀚𑀁 𑀧𑀢𑁆𑀣𑁂𑀢𑀻’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀲𑁄𑀧𑀺 𑀢𑁂𑀲𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀺𑀦𑁆𑀦𑀘𑀺𑀢𑁆𑀢𑁄 ‘‘𑀪𑀸𑀢𑀭𑀁 𑀫𑁂 𑀕𑀡𑁆𑀳𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀧𑀬𑁄𑀚𑁂𑀲𑀺.

𑀅𑀣𑁂𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑁆𑀣𑀘𑀭𑀓𑁄 𑀢𑀁 𑀓𑀸𑀭𑀡𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀁 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 ‘‘𑀏𑀓𑁄 𑀥𑀦𑀼𑀕𑁆𑀕𑀳𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀺𑀢𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 ‘‘𑀓𑀺𑀢𑁆𑀢𑀓𑀁 𑀪𑁄𑀕𑀁 𑀇𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺 ¶ . ‘‘𑀏𑀓𑀲𑀁𑀯𑀘𑁆𑀙𑀭𑁂𑀦 𑀲𑀢𑀲𑀳𑀲𑁆𑀲’’𑀦𑁆𑀢𑀺. ‘‘𑀲𑀸𑀥𑀼 𑀆𑀕𑀘𑁆𑀙𑀢𑀽’’𑀢𑀺. 𑀅𑀣 𑀦𑀁 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑀁 𑀧𑀼𑀘𑁆𑀙𑀺 𑁋 ‘‘𑀢𑁆𑀯𑀁 𑀥𑀦𑀕𑁆𑀕𑀳𑁄𑀲𑀻’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀲𑀸𑀥𑀼 𑀫𑀁 𑀉𑀧𑀝𑁆𑀞𑀳𑀲𑁆𑀲𑀽’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺. 𑀢𑀲𑁆𑀲 𑀧𑀭𑀺𑀩𑁆𑀩𑀬𑀁 𑀤𑀻𑀬𑀫𑀸𑀦𑀁 ¶ 𑀤𑀺𑀲𑁆𑀯𑀸 ‘‘𑀅𑀢𑀺𑀩𑀳𑀼𑀁 𑀮𑀪𑀢𑀻’’𑀢𑀺 𑀧𑁄𑀭𑀸𑀡𑀓𑀥𑀦𑀼𑀕𑁆𑀕𑀳𑀸 𑀉𑀚𑁆𑀛𑀸𑀬𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑀲𑀫𑀻𑀧𑁂 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀫𑀳𑀸𑀲𑀬𑀦𑁂 𑀦𑀺𑀧𑀦𑁆𑀦𑁄 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀭𑀼𑀓𑁆𑀔𑀕𑁆𑀕𑁂 𑀏𑀓𑀁 𑀅𑀫𑁆𑀩𑀧𑀺𑀡𑁆𑀟𑀺𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀦 𑀲𑀓𑁆𑀓𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀥𑀦𑀼𑀕𑁆𑀕𑀳𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀅𑀫𑁆𑀩𑀧𑀺𑀡𑁆𑀟𑀺𑀁 𑀲𑀭𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺 𑀆𑀳. 𑀦 𑀢𑀁, 𑀤𑁂𑀯, 𑀅𑀫𑁆𑀳𑀸𑀓𑀁 𑀕𑀭𑀼, 𑀤𑁂𑀯𑁂𑀦 𑀧𑀦 𑀦𑁄 𑀩𑀳𑀼𑀯𑀸𑀭𑁂 𑀓𑀫𑁆𑀫𑀁 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀅𑀥𑀼𑀦𑀸𑀕𑀢𑁄 𑀥𑀦𑀼𑀕𑁆𑀕𑀳𑁄 𑀅𑀫𑁆𑀳𑁂𑀳𑀺 𑀩𑀳𑀼𑀢𑀭𑀁 𑀮𑀪𑀢𑀺, 𑀢𑀁 𑀧𑀸𑀢𑀸𑀧𑁂𑀣𑀸𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀲𑀺, 𑀢𑀸𑀢, 𑀏𑀢𑀁 𑀧𑀸𑀢𑁂𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚, 𑀏𑀓𑀁 𑀑𑀓𑀸𑀲𑀁 𑀮𑀪𑀫𑀸𑀦𑁄 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀢𑀭𑁄𑀓𑀸𑀲’’𑀦𑁆𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀲𑀬𑀦𑀲𑁆𑀲 𑀅𑀦𑁆𑀢𑁄𑀓𑀸𑀲’’𑀦𑁆𑀢𑀺. 𑀭𑀸𑀚𑀸 𑀲𑀬𑀦𑀁 𑀳𑀭𑀸𑀧𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀢𑁆𑀣𑁂 𑀥𑀦𑀼 𑀦𑀢𑁆𑀣𑀺, 𑀦𑀺𑀯𑀸𑀲𑀦𑀦𑁆𑀢𑀭𑁂 𑀥𑀦𑀼𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀲𑁆𑀫𑀸 ‘‘𑀲𑀸𑀡𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀸𑀡𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁄𑀲𑀸𑀡𑀺𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑀭𑀺𑀦𑀺𑀯𑀢𑁆𑀣𑀁 𑀲𑁂𑀢𑀯𑀢𑁆𑀣𑀁 𑀳𑀭𑀺𑀢𑁆𑀯𑀸 𑀏𑀓𑀁 𑀭𑀢𑁆𑀢𑀧𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀭𑀢𑁆𑀢𑀧𑀝𑀁 𑀉𑀤𑀭𑁂 𑀩𑀦𑁆𑀥𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑀢𑁄 𑀲𑀦𑁆𑀥𑀺𑀬𑀼𑀢𑁆𑀢𑀁 𑀔𑀕𑁆𑀕𑀁 𑀦𑀻𑀳𑀭𑀺𑀢𑁆𑀯𑀸 𑀯𑀸𑀫𑀧𑀲𑁆𑀲𑁂 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀜𑁆𑀘𑀼𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀘𑀸𑀧𑀦𑀸𑀴𑀺𑀁 𑀧𑀺𑀝𑁆𑀞𑀺𑀬𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀦𑁆𑀥𑀺𑀬𑀼𑀢𑁆𑀢𑀫𑁂𑀡𑁆𑀟𑀓𑀫𑀳𑀸𑀥𑀦𑀼𑀁 𑀆𑀤𑀸𑀬 𑀧𑀯𑀸𑀴𑀯𑀡𑁆𑀡𑀁 𑀚𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀉𑀡𑁆𑀳𑀻𑀲𑀁 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀢𑀺𑀔𑀺𑀡𑀔𑀼𑀭𑀧𑁆𑀧𑀁 𑀦𑀔𑁂𑀳𑀺 𑀧𑀭𑀺𑀯𑀢𑁆𑀢𑀬𑀫𑀸𑀦𑁄 𑀲𑀸𑀡𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀧𑀣𑀯𑀺𑀁 𑀨𑀸𑀮𑁂𑀢𑁆𑀯𑀸 𑀅𑀮𑀗𑁆𑀓𑀢𑀦𑀸𑀕𑀓𑀼𑀫𑀸𑀭𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀭𑀔𑀺𑀧𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀓𑀺𑀁, 𑀫𑀳𑀸𑀭𑀸𑀚, 𑀏𑀢𑀁 𑀅𑀫𑁆𑀩𑀧𑀺𑀡𑁆𑀟𑀺𑀁 𑀉𑀤𑁆𑀥𑀁 𑀆𑀭𑁄𑀳𑀦𑀓𑀡𑁆𑀟𑁂𑀦 𑀧𑀸𑀢𑁂𑀫𑀺, 𑀉𑀤𑀸𑀳𑀼 ¶ 𑀅𑀥𑁄 𑀑𑀭𑁄𑀳𑀦𑀓𑀡𑁆𑀟𑁂𑀦𑀸’’𑀢𑀺 ¶ . ‘‘𑀢𑀸𑀢, 𑀩𑀳𑀽 𑀫𑀬𑀸 𑀆𑀭𑁄𑀳𑀦𑀓𑀡𑁆𑀟𑁂𑀦 𑀧𑀸𑀢𑁂𑀦𑁆𑀢𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀑𑀭𑁄𑀳𑀦𑀓𑀡𑁆𑀟𑁂𑀦 𑀧𑀦 𑀧𑀸𑀢𑁂𑀦𑁆𑀢𑀸 𑀫𑀬𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀑𑀭𑁄𑀳𑀦𑀓𑀡𑁆𑀟𑁂𑀦 𑀧𑀸𑀢𑁂𑀳𑀻’’𑀢𑀺. ‘‘𑀫𑀳𑀸𑀭𑀸𑀚, 𑀇𑀤𑀁 𑀓𑀡𑁆𑀟𑀁 𑀤𑀽𑀭𑀁 𑀆𑀭𑁄𑀳𑀺𑀲𑁆𑀲𑀢𑀺, 𑀬𑀸𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀁, 𑀢𑀸𑀯 𑀕𑀦𑁆𑀢𑁆𑀯𑀸 𑀲𑀬𑀁 𑀑𑀭𑁄𑀳𑀺𑀲𑁆𑀲𑀢𑀺, 𑀬𑀸𑀯𑀲𑁆𑀲 𑀑𑀭𑁄𑀳𑀦𑀁, 𑀢𑀸𑀯 𑀢𑀼𑀫𑁆𑀳𑁂𑀳𑀺 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀅𑀣 𑀦𑀁 𑀧𑀼𑀦 𑀆𑀳 𑁋 ‘‘𑀫𑀳𑀸𑀭𑀸𑀚, 𑀇𑀤𑀁 𑀓𑀡𑁆𑀟𑀁 𑀧𑀦 𑀆𑀭𑁄𑀳𑀫𑀸𑀦𑀁 𑀅𑀫𑁆𑀩𑀧𑀺𑀡𑁆𑀟𑀺𑀯𑀡𑁆𑀝𑀁 𑀬𑀸𑀯𑀫𑀚𑁆𑀛𑀁 𑀓𑀦𑁆𑀢𑀫𑀸𑀦𑀁 𑀆𑀭𑁄𑀳𑀺𑀲𑁆𑀲𑀢𑀺, 𑀑𑀭𑁄𑀳𑀫𑀸𑀦𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀕𑀦𑁆𑀢𑁆𑀯𑀸 𑀉𑀚𑀼𑀜𑁆𑀜𑁂𑀯 𑀧𑀢𑀺𑀢𑁆𑀯𑀸 𑀅𑀫𑁆𑀩𑀧𑀺𑀡𑁆𑀟𑀺𑀁 𑀕𑀳𑁂𑀢𑁆𑀯𑀸 𑀑𑀢𑀭𑀺𑀲𑁆𑀲𑀢𑀺, 𑀧𑀲𑁆𑀲, 𑀫𑀳𑀸𑀭𑀸𑀚𑀸’’𑀢𑀺 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀓𑀡𑁆𑀟𑀁 ¶ 𑀔𑀺𑀧𑀺. 𑀢𑀁 𑀓𑀡𑁆𑀟𑀁 𑀅𑀫𑁆𑀩𑀧𑀺𑀡𑁆𑀟𑀺𑀯𑀡𑁆𑀝𑀁 𑀬𑀸𑀯𑀫𑀚𑁆𑀛𑀁 𑀓𑀦𑁆𑀢𑀫𑀸𑀦𑀁 𑀅𑀪𑀺𑀭𑀼𑀳𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀸𑀦𑀺 𑀢𑀁 𑀓𑀡𑁆𑀟𑀁 𑀬𑀸𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀁 𑀕𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀞𑀫𑀁 𑀔𑀺𑀢𑁆𑀢𑀓𑀡𑁆𑀟𑀢𑁄 𑀅𑀥𑀺𑀓𑀢𑀭𑀁 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀅𑀜𑁆𑀜𑀁 𑀓𑀡𑁆𑀟𑀁 𑀔𑀺𑀧𑀺, 𑀢𑀁 𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀓𑀡𑁆𑀟𑀧𑀼𑀗𑁆𑀔𑁂 𑀧𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀬𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀪𑀺𑀭𑀼𑀳𑀺. 𑀢𑀢𑁆𑀣 𑀦𑀁 𑀤𑁂𑀯𑀢𑀸 𑀅𑀕𑁆𑀕𑀳𑁂𑀲𑀼𑀁, 𑀦𑀺𑀯𑀢𑁆𑀢𑀦𑀓𑀡𑁆𑀟𑀲𑁆𑀲 𑀯𑀸𑀢𑀙𑀺𑀦𑁆𑀦𑀲𑀤𑁆𑀤𑁄 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀫𑀳𑀸𑀚𑀦𑁂𑀦 ‘‘𑀓𑀺𑀁 𑀏𑀲𑁄 𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀦𑀺𑀯𑀢𑁆𑀢𑀦𑀓𑀡𑁆𑀟𑀲𑁆𑀲 𑀲𑀤𑁆𑀤𑁄’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀓𑀡𑁆𑀟𑀲𑁆𑀲 𑀧𑀢𑀦𑀪𑀸𑀯𑀁 𑀜𑀢𑁆𑀯𑀸 𑀪𑀻𑀢𑀢𑀲𑀺𑀢𑀁 𑀫𑀳𑀸𑀚𑀦𑀁 ‘‘𑀫𑀸 𑀪𑀸𑀬𑀺𑀢𑁆𑀣𑀸’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀓𑀡𑁆𑀟𑀲𑁆𑀲 𑀪𑀽𑀫𑀺𑀬𑀁 𑀧𑀢𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀓𑀡𑁆𑀟𑀁 𑀑𑀢𑀭𑀫𑀸𑀦𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀕𑀦𑁆𑀢𑁆𑀯𑀸 𑀉𑀚𑀼𑀜𑁆𑀜𑁂𑀯 𑀧𑀢𑀺𑀢𑁆𑀯𑀸 𑀅𑀫𑁆𑀩𑀧𑀺𑀡𑁆𑀟𑀺𑀁 𑀙𑀺𑀦𑁆𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀫𑁆𑀩𑀧𑀺𑀡𑁆𑀟𑀺𑀬𑀸 𑀘 𑀓𑀡𑁆𑀟𑀲𑁆𑀲 𑀘 𑀪𑀽𑀫𑀺𑀬𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀫𑁆𑀩𑀧𑀺𑀡𑁆𑀟𑀺𑀁, 𑀏𑀓𑁂𑀦 𑀳𑀢𑁆𑀣𑁂𑀦 𑀓𑀡𑁆𑀟𑀁 𑀅𑀕𑁆𑀕𑀳𑁂𑀲𑀺. 𑀫𑀳𑀸𑀚𑀦𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀦 𑀦𑁄 𑀏𑀯𑀭𑀽𑀧𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑀁 𑀧𑀲𑀁𑀲𑀢𑀺 ¶ 𑀉𑀦𑁆𑀦𑀤𑀢𑀺 𑀅𑀧𑁆𑀨𑁄𑀝𑁂𑀢𑀺 𑀅𑀗𑁆𑀕𑀼𑀮𑀺𑀬𑁄 𑀯𑀺𑀥𑀽𑀦𑀢𑀺, 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀢𑀺. 𑀭𑀸𑀚𑀧𑀭𑀺𑀲𑀸𑀬 𑀢𑀼𑀝𑁆𑀞𑀧𑀳𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀺𑀦𑁆𑀦𑀥𑀦𑀁 𑀓𑁄𑀝𑀺𑀫𑀢𑁆𑀢𑀁 𑀅𑀳𑁄𑀲𑀺. 𑀭𑀸𑀚𑀸𑀧𑀺𑀲𑁆𑀲 𑀥𑀦𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀯𑀺𑀬 𑀩𑀳𑀼𑀁 𑀥𑀦𑀁 𑀫𑀳𑀦𑁆𑀢𑀜𑁆𑀘 𑀬𑀲𑀁 𑀅𑀤𑀸𑀲𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁂 𑀢𑁂𑀦 𑀭𑀜𑁆𑀜𑀸 𑀲𑀓𑁆𑀓𑀢𑁂 𑀕𑀭𑀼𑀓𑀢𑁂 𑀢𑀢𑁆𑀣 𑀯𑀲𑀦𑁆𑀢𑁂 ‘‘𑀅𑀲𑀤𑀺𑀲𑀓𑀼𑀫𑀸𑀭𑁄 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀦𑀢𑁆𑀣𑀻’’𑀢𑀺 𑀲𑀢𑁆𑀢 𑀭𑀸𑀚𑀸𑀦𑁄 𑀆𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀁 ¶ 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀭𑀜𑁆𑀜𑁄 𑀧𑀡𑁆𑀡𑀁 𑀧𑁂𑀲𑁂𑀲𑀼𑀁. 𑀭𑀸𑀚𑀸 𑀫𑀭𑀡𑀪𑀬𑀪𑀻𑀢𑁄 ‘‘𑀓𑀼𑀳𑀺𑀁 𑀫𑁂 𑀪𑀸𑀢𑀸 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀓𑀁 𑀲𑀸𑀫𑀦𑁆𑀢𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀫𑀫 𑀪𑀸𑀢𑀺𑀓𑁂 𑀅𑀦𑀸𑀕𑀘𑁆𑀙𑀦𑁆𑀢𑁂 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀦𑀢𑁆𑀣𑀺, 𑀕𑀘𑁆𑀙𑀣 𑀢𑀲𑁆𑀲 𑀫𑀫 𑀯𑀘𑀦𑁂𑀦 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀤𑀽𑀢𑁂 𑀧𑀸𑀳𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 ‘‘𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀓𑀡𑁆𑀟𑁂 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀅𑀲𑀤𑀺𑀲𑀓𑀼𑀫𑀸𑀭𑁄 𑀆𑀕𑀢𑁄, 𑀅𑀜𑁆𑀜𑀁 𑀏𑀓𑀓𑀡𑁆𑀟𑀁 𑀔𑀺𑀧𑀦𑁆𑀢𑁄 𑀲𑀩𑁆𑀩𑁂𑀲𑀁 𑀯𑁄 𑀚𑀻𑀯𑀺𑀢𑀁 𑀳𑀭𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑁂𑀦 𑀅𑀢𑁆𑀣𑀺𑀓𑀸 𑀧𑀮𑀸𑀬𑀦𑁆𑀢𑀽’’𑀢𑀺 𑀅𑀝𑁆𑀝𑀸𑀮𑀓𑁂 𑀞𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀜𑁆𑀘𑀦𑀧𑀸𑀢𑀺𑀫𑀓𑀼𑀮𑁂𑀬𑁂𑀯 𑀓𑀡𑁆𑀟𑀁 𑀧𑀸𑀢𑁂𑀲𑀺. 𑀢𑁂 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 𑀫𑀭𑀡𑀪𑀬𑀪𑀻𑀢𑀸 𑀲𑀩𑁆𑀩𑁂𑀯 𑀧𑀮𑀸𑀬𑀺𑀁𑀲𑀼. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀲𑀢𑁆𑀢 𑀭𑀸𑀚𑀸𑀦𑁄 𑀧𑀮𑀸𑀧𑁂𑀢𑁆𑀯𑀸 𑀓𑀦𑀺𑀝𑁆𑀞𑀪𑀸𑀢𑀭𑀁 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ ¶ ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀅𑀲𑀤𑀺𑀲𑀓𑀼𑀫𑀸𑀭𑁄 𑀲𑀢𑁆𑀢 𑀭𑀸𑀚𑀸𑀦𑁄 𑀧𑀮𑀸𑀧𑁂𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁄’’𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁬𑁧.

‘‘𑀥𑀦𑀼𑀕𑁆𑀕𑀳𑁄 𑀅𑀲𑀤𑀺𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀩𑁆𑀩𑀮𑁄;

𑀤𑀽𑀭𑁂𑀧𑀸𑀢𑀻 𑀅𑀓𑁆𑀔𑀡𑀯𑁂𑀥𑀻, 𑀫𑀳𑀸𑀓𑀸𑀬𑀧𑁆𑀧𑀤𑀸𑀮𑀦𑁄.

𑁬𑁨.

‘‘𑀲𑀩𑁆𑀩𑀸𑀫𑀺𑀢𑁆𑀢𑁂 𑀭𑀡𑀁 𑀓𑀢𑁆𑀯𑀸, 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀺;

𑀪𑀸𑀢𑀭𑀁 𑀲𑁄𑀢𑁆𑀣𑀺𑀁 𑀓𑀢𑁆𑀯𑀸𑀦, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺.

𑀢𑀢𑁆𑀣 𑀅𑀲𑀤𑀺𑀲𑁄𑀢𑀺 𑀦 𑀓𑁂𑀯𑀮𑀁 𑀦𑀸𑀫𑁂𑀦𑁂𑀯, 𑀩𑀮𑀯𑀻𑀭𑀺𑀬𑀧𑀜𑁆𑀜𑀸𑀳𑀺𑀧𑀺 𑀅𑀲𑀤𑀺𑀲𑁄𑀯. 𑀫𑀳𑀩𑁆𑀩𑀮𑁄𑀢𑀺 𑀓𑀸𑀬𑀩𑀮𑁂𑀦𑀧𑀺 𑀧𑀜𑁆𑀜𑀸𑀩𑀮𑁂𑀦𑀧𑀺 𑀫𑀳𑀩𑁆𑀩𑀮𑁄. 𑀤𑀽𑀭𑁂𑀧𑀸𑀢𑀻𑀢𑀺 𑀬𑀸𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀸 𑀢𑀸𑀯𑀢𑀺𑀁𑀲𑀪𑀯𑀦𑀸 𑀘 𑀓𑀡𑁆𑀟𑀁 𑀧𑁂𑀲𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀤𑀽𑀭𑁂𑀧𑀸𑀢𑀻. 𑀅𑀓𑁆𑀔𑀡𑀯𑁂𑀥𑀻𑀢𑀺 𑀅𑀯𑀺𑀭𑀸𑀥𑀺𑀢𑀯𑁂𑀥𑀻. 𑀅𑀣 𑀯𑀸 𑀅𑀓𑁆𑀔𑀡𑀸 𑀯𑀼𑀘𑁆𑀘𑀢𑀺 𑀯𑀺𑀚𑁆𑀚𑀼, 𑀬𑀸𑀯 𑀏𑀓𑀸 𑀯𑀺𑀚𑁆𑀚𑀼 𑀦𑀺𑀘𑁆𑀙𑀭𑀢𑀺, 𑀢𑀸𑀯 𑀢𑁂𑀦𑁄𑀪𑀸𑀲𑁂𑀦 𑀲𑀢𑁆𑀢𑀝𑁆𑀞 ¶ 𑀯𑀸𑀭𑁂 𑀓𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀚𑁆𑀛𑀢𑀻𑀢𑀺 𑀅𑀓𑁆𑀔𑀡𑀯𑁂𑀥𑀻. 𑀫𑀳𑀸𑀓𑀸𑀬𑀧𑁆𑀧𑀤𑀸𑀮𑀦𑁄𑀢𑀺 𑀫𑀳𑀦𑁆𑀢𑁂 𑀓𑀸𑀬𑁂 𑀧𑀤𑀸𑀮𑁂𑀢𑀺. 𑀘𑀫𑁆𑀫𑀓𑀸𑀬𑁄, 𑀤𑀸𑀭𑀼𑀓𑀸𑀬𑁄, 𑀮𑁄𑀳𑀓𑀸𑀬𑁄, 𑀅𑀬𑁄𑀓𑀸𑀬𑁄, 𑀯𑀸𑀮𑀺𑀓𑀓𑀸𑀬𑁄, 𑀉𑀤𑀓𑀓𑀸𑀬𑁄, 𑀨𑀮𑀓𑀓𑀸𑀬𑁄𑀢𑀺 𑀇𑀫𑁂 𑀲𑀢𑁆𑀢 𑀫𑀳𑀸𑀓𑀸𑀬𑀸 𑀦𑀸𑀫. 𑀢𑀢𑁆𑀣 𑀅𑀜𑁆𑀜𑁄 𑀘𑀫𑁆𑀫𑀓𑀸𑀬𑀧𑀤𑀸𑀮𑀦𑁄 𑀫𑀳𑀺𑀁𑀲𑀘𑀫𑁆𑀫𑀁 𑀯𑀺𑀦𑀺𑀯𑀺𑀚𑁆𑀛𑀢𑀺, 𑀲𑁄 𑀧𑀦 𑀲𑀢𑀫𑁆𑀧𑀺 𑀫𑀳𑀺𑀁𑀲𑀘𑀫𑁆𑀫𑀸𑀦𑀁 𑀯𑀺𑀦𑀺𑀯𑀺𑀚𑁆𑀛𑀢𑀺𑀬𑁂𑀯. 𑀅𑀜𑁆𑀜𑁄 𑀅𑀝𑁆𑀞𑀗𑁆𑀕𑀼𑀮𑀩𑀳𑀮𑀁 𑀉𑀤𑀼𑀫𑁆𑀩𑀭𑀧𑀤𑀭𑀁, 𑀘𑀢𑀼𑀭𑀗𑁆𑀕𑀼𑀮𑀩𑀳𑀮𑀁 𑀅𑀲𑀦𑀧𑀤𑀭𑀁 𑀯𑀺𑀦𑀺𑀯𑀺𑀚𑁆𑀛𑀢𑀺, 𑀲𑁄 𑀧𑀦 𑀨𑀮𑀓𑀲𑀢𑀫𑁆𑀧𑀺 𑀏𑀓𑀢𑁄 𑀩𑀤𑁆𑀥𑀁 𑀯𑀺𑀦𑀺𑀯𑀺𑀚𑁆𑀛𑀢𑀺, 𑀢𑀣𑀸 𑀤𑁆𑀯𑀗𑁆𑀕𑀼𑀮𑀩𑀳𑀮𑀁 𑀢𑀫𑁆𑀩𑀮𑁄𑀳𑀧𑀝𑁆𑀝𑀁, 𑀅𑀗𑁆𑀕𑀼𑀮𑀩𑀳𑀮𑀁 𑀅𑀬𑀧𑀝𑁆𑀝𑀁. 𑀯𑀸𑀮𑀺𑀓𑀲𑀓𑀝𑀲𑁆𑀲 𑀩𑀤𑀭𑀲𑀓𑀝𑀲𑁆𑀲 𑀧𑀮𑀸𑀮𑀲𑀓𑀝𑀲𑁆𑀲 𑀯𑀸 𑀧𑀘𑁆𑀙𑀸𑀪𑀸𑀕𑁂𑀦 𑀓𑀡𑁆𑀟𑀁 𑀧𑀯𑁂𑀲𑁂𑀢𑁆𑀯𑀸 𑀧𑀼𑀭𑁂𑀪𑀸𑀕𑁂𑀦 𑀅𑀢𑀺𑀧𑀸𑀢𑁂𑀢𑀺, 𑀧𑀓𑀢𑀺𑀬𑀸 𑀉𑀤𑀓𑁂 𑀘𑀢𑀼𑀉𑀲𑀪𑀝𑁆𑀞𑀸𑀦𑀁 𑀓𑀡𑁆𑀟𑀁 𑀧𑁂𑀲𑁂𑀢𑀺, 𑀣𑀮𑁂 𑀅𑀝𑁆𑀞𑀉𑀲𑀪𑀦𑁆𑀢𑀺 𑀏𑀯𑀁 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀫𑀳𑀸𑀓𑀸𑀬𑀸𑀦𑀁 𑀧𑀤𑀸𑀮𑀦𑀢𑁄 𑀫𑀳𑀸𑀓𑀸𑀬𑀧𑁆𑀧𑀤𑀸𑀮𑀦𑁄. 𑀲𑀩𑁆𑀩𑀸𑀫𑀺𑀢𑁆𑀢𑁂𑀢𑀺 𑀲𑀩𑁆𑀩𑁂 𑀅𑀫𑀺𑀢𑁆𑀢𑁂. 𑀭𑀡𑀁 𑀓𑀢𑁆𑀯𑀸𑀢𑀺 𑀬𑀼𑀤𑁆𑀥𑀁 𑀓𑀢𑁆𑀯𑀸 𑀧𑀮𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀻𑀢𑀺 𑀏𑀓𑀫𑁆𑀧𑀺 𑀦 𑀯𑀺𑀳𑁂𑀞𑁂𑀲𑀺. 𑀅𑀯𑀺𑀳𑁂𑀞𑀬𑀦𑁆𑀢𑁄𑀬𑁂𑀯 𑀧𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀡𑁆𑀟𑀧𑁂𑀲𑀦𑁂𑀦𑁂𑀯 𑀭𑀡𑀁 𑀓𑀢𑁆𑀯𑀸. 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻𑀢𑀺 𑀲𑀻𑀮𑀲𑀁𑀬𑀫𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁄.

𑀏𑀯𑀁 ¶ 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀦𑀺𑀝𑁆𑀞𑀪𑀸𑀢𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀅𑀲𑀤𑀺𑀲𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑀤𑀺𑀲𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁮𑁨] 𑁨. 𑀲𑀗𑁆𑀕𑀸𑀫𑀸𑀯𑀘𑀭𑀚𑀸𑀢𑀓𑀯𑀡𑁆𑀡𑀦𑀸

𑀲𑀗𑁆𑀕𑀸𑀫𑀸𑀯𑀘𑀭𑁄 ¶ 𑀲𑀽𑀭𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀭𑀺 𑀳𑀺 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀦𑀦𑁆𑀤𑀭𑀸𑀚𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀧𑀺𑀮𑀧𑀼𑀭𑀸 𑀦𑀺𑀓𑁆𑀔𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀆𑀤𑀸𑀬 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀕𑁂𑀳𑀸 𑀦𑀺𑀓𑁆𑀔𑀫𑀦𑀓𑀸𑀮𑁂 ‘‘𑀦𑀦𑁆𑀤𑀓𑀼𑀫𑀸𑀭𑁄 𑀓𑀺𑀭 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀯𑀸𑀢𑀧𑀸𑀦𑀦𑁆𑀢𑀭𑁂𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀇𑀤𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀯𑀼𑀢𑁆𑀢𑀯𑀘𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 ¶ 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀬𑀁𑀦𑀽𑀦𑀸𑀳𑀁 𑀦𑀦𑁆𑀤𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀯𑀲𑀦𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀘𑁆𑀘𑀺, 𑀦𑀦𑁆𑀤, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀪𑀺𑀭𑀫𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀦𑀸𑀪𑀺𑀭𑀫𑀸𑀫𑀻’’𑀢𑀺. ‘‘𑀳𑀺𑀫𑀯𑀦𑁆𑀢𑀘𑀸𑀭𑀺𑀓𑀁 𑀕𑀢𑀧𑀼𑀩𑁆𑀩𑁄𑀲𑀺 𑀦𑀦𑁆𑀤𑀸’’𑀢𑀺? ‘‘𑀦 𑀕𑀢𑀧𑀼𑀩𑁆𑀩𑁄, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀫𑀸’’𑀢𑀺. ‘‘𑀦𑀢𑁆𑀣𑀺 𑀫𑁂, 𑀪𑀦𑁆𑀢𑁂, 𑀇𑀤𑁆𑀥𑀺, 𑀓𑀢𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 ‘‘𑀅𑀳𑀁 𑀢𑀁, 𑀦𑀦𑁆𑀤, 𑀫𑀫 𑀇𑀤𑁆𑀥𑀺𑀩𑀮𑁂𑀦 𑀦𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀛𑀸𑀫𑀔𑁂𑀢𑁆𑀢𑁂 𑀛𑀸𑀫𑀔𑀸𑀡𑀼𑀓𑁂 𑀦𑀺𑀲𑀺𑀦𑁆𑀦𑀁 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀦𑀗𑁆𑀕𑀼𑀝𑁆𑀞𑀁 𑀛𑀸𑀫𑀮𑁄𑀫𑀁 𑀙𑀺𑀦𑁆𑀦𑀙𑀯𑀺𑀁 𑀘𑀫𑁆𑀫𑀫𑀢𑁆𑀢𑀁 𑀮𑁄𑀳𑀺𑀢𑀧𑀮𑀺𑀕𑀼𑀡𑁆𑀞𑀺𑀢𑀁 𑀏𑀓𑀁 𑀧𑀮𑀼𑀝𑁆𑀞𑀫𑀓𑁆𑀓𑀝𑀺𑀁 𑀤𑀲𑁆𑀲𑁂𑀲𑀺 𑁋 ‘‘𑀧𑀲𑁆𑀲𑀲𑀺, 𑀦𑀦𑁆𑀤, 𑀏𑀢𑀁 𑀫𑀓𑁆𑀓𑀝𑀺’’𑀦𑁆𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀲𑀼𑀝𑁆𑀞𑀼 𑀧𑀘𑁆𑀘𑀓𑁆𑀔𑀁 𑀓𑀭𑁄𑀳𑀻’’𑀢𑀺.

𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀫𑀦𑁄𑀲𑀺𑀮𑀸𑀢𑀮𑀁, 𑀅𑀦𑁄𑀢𑀢𑁆𑀢𑀤𑀳𑀸𑀤𑀬𑁄 𑀲𑀢𑁆𑀢 𑀫𑀳𑀸𑀲𑀭𑁂, 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄, 𑀲𑀼𑀯𑀡𑁆𑀡𑀧𑀩𑁆𑀩𑀢𑀭𑀚𑀢𑀧𑀩𑁆𑀩𑀢𑀫𑀡𑀺𑀧𑀩𑁆𑀩𑀢𑀧𑀝𑀺𑀫𑀡𑁆𑀟𑀺𑀢𑀁 𑀅𑀦𑁂𑀓𑀲𑀢𑀭𑀸𑀫𑀡𑁂𑀬𑁆𑀬𑀓𑀁 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀸𑀯𑀢𑀺𑀁𑀲𑀪𑀯𑀦𑀁 𑀢𑁂, 𑀦𑀦𑁆𑀤, 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 ¶ , 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀏𑀳𑀺, 𑀦𑀦𑁆𑀤, 𑀢𑀸𑀯𑀢𑀺𑀁𑀲𑀪𑀯𑀦𑀁 𑀢𑁂 𑀤𑀲𑁆𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀦𑁂𑀢𑁆𑀯𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀟𑁆𑀠𑀢𑀺𑀬𑀓𑁄𑀝𑀺𑀲𑀗𑁆𑀔𑀸 𑀢𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀧𑀜𑁆𑀘𑀲𑀢𑀸 𑀓𑀓𑀼𑀝𑀧𑀸𑀤𑀸 𑀤𑁂𑀯𑀘𑁆𑀙𑀭𑀸𑀬𑁄𑀧𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀢𑀸 𑀧𑀜𑁆𑀘𑀲𑀢𑀸 𑀅𑀘𑁆𑀙𑀭𑀸 𑀓𑀺𑀮𑁂𑀲𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀸𑀧𑁂𑀲𑀺. ‘‘𑀧𑀲𑁆𑀲𑀲𑀺, 𑀦𑀦𑁆𑀤, 𑀇𑀫𑀸 𑀓𑀓𑀼𑀝𑀧𑀸𑀤𑀺𑀦𑀺𑀬𑁄 𑀅𑀘𑁆𑀙𑀭𑀸𑀬𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀏𑀢𑀸 𑀲𑁄𑀪𑀦𑁆𑀢𑀺, 𑀉𑀤𑀸𑀳𑀼 𑀚𑀦𑀧𑀤𑀓𑀮𑁆𑀬𑀸𑀡𑀻’’𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀉𑀧𑀦𑀺𑀥𑀸𑀬 𑀲𑀸 𑀧𑀮𑀼𑀝𑁆𑀞𑀫𑀓𑁆𑀓𑀝𑀻, 𑀏𑀯𑀫𑁂𑀯 𑀇𑀫𑀸 𑀉𑀧𑀦𑀺𑀥𑀸𑀬 𑀚𑀦𑀧𑀤𑀓𑀮𑁆𑀬𑀸𑀡𑀻’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀲𑀺 𑀦𑀦𑁆𑀤𑀸’’𑀢𑀺? ‘‘𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸, 𑀪𑀦𑁆𑀢𑁂, 𑀇𑀫𑀸 𑀅𑀘𑁆𑀙𑀭𑀸 𑀮𑀪𑀦𑁆𑀢𑀻’’𑀢𑀺? ‘‘𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸’’𑀢𑀺. ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀇𑀫𑀸𑀲𑀁 ¶ 𑀧𑀝𑀺𑀮𑀸𑀪𑀢𑁆𑀣𑀸𑀬 𑀪𑀕𑀯𑀸 𑀧𑀸𑀝𑀺𑀪𑁄𑀕𑁄 𑀳𑁄𑀢𑀺, 𑀅𑀳𑀁 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀭𑁄𑀳𑀺, 𑀦𑀦𑁆𑀤, 𑀅𑀳𑀁 𑀢𑁂 𑀧𑀸𑀝𑀺𑀪𑁄𑀕𑁄’’𑀢𑀺. 𑀏𑀯𑀁 𑀣𑁂𑀭𑁄 𑀤𑁂𑀯𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀢𑀣𑀸𑀕𑀢𑀁 𑀧𑀸𑀝𑀺𑀪𑁄𑀕𑀁 𑀕𑀳𑁂𑀢𑁆𑀯𑀸 ‘‘𑀫𑀸, 𑀪𑀦𑁆𑀢𑁂, 𑀅𑀢𑀺𑀧𑀧𑀜𑁆𑀘𑀁 𑀓𑀭𑁄𑀣, 𑀏𑀣 𑀕𑀘𑁆𑀙𑀸𑀫, 𑀅𑀳𑀁 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ¶ 𑀢𑀁 𑀆𑀤𑀸𑀬 𑀚𑁂𑀢𑀯𑀦𑀫𑁂𑀯 𑀧𑀘𑁆𑀘𑀸𑀕𑀫𑀺. 𑀣𑁂𑀭𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀆𑀭𑀪𑀺.

𑀲𑀢𑁆𑀣𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢, 𑀫𑀬𑁆𑀳𑀁 𑀓𑀦𑀺𑀝𑁆𑀞𑀪𑀸𑀢𑀸 𑀦𑀦𑁆𑀤𑁄 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀤𑁂𑀯𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀤𑁂𑀯𑀘𑁆𑀙𑀭𑀸𑀦𑀁 𑀓𑀸𑀭𑀡𑀸 𑀫𑀁 𑀧𑀸𑀝𑀺𑀪𑁄𑀕𑀁 𑀅𑀕𑁆𑀕𑀳𑁂𑀲𑀻’’𑀢𑀺 𑀢𑀲𑁆𑀲 𑀆𑀘𑀺𑀓𑁆𑀔𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀢𑀺 𑀅𑀲𑀻𑀢𑀺𑀬𑀸 𑀫𑀳𑀸𑀲𑀸𑀯𑀓𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀘 𑀲𑁂𑀲𑀪𑀺𑀓𑁆𑀔𑀽𑀦𑀁 𑀆𑀘𑀺𑀓𑁆𑀔𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀦𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀆𑀯𑀼𑀲𑁄 𑀦𑀦𑁆𑀤, 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀤𑁂𑀯𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 ‘𑀤𑁂𑀯𑀘𑁆𑀙𑀭𑀸 𑀮𑀪𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀤𑀲𑀩𑀮𑀁 𑀧𑀸𑀝𑀺𑀪𑁄𑀕𑀁 𑀕𑀡𑁆𑀳𑀻’’𑀢𑀺 𑀯𑀢𑁆𑀯𑀸 ‘‘𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀯 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀸𑀢𑀼𑀕𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀓𑀺𑀮𑁂𑀲𑀲𑀦𑁆𑀦𑀺𑀲𑁆𑀲𑀺𑀢𑁄, 𑀢𑀲𑁆𑀲 𑀢𑁂 𑀇𑀢𑁆𑀣𑀻𑀦𑀁 𑀅𑀢𑁆𑀣𑀸𑀬 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀓𑀫𑁆𑀫𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 ¶ 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀣𑁂𑀭𑀁 𑀮𑀚𑁆𑀚𑀸𑀧𑁂𑀲𑀺 𑀦𑀺𑀢𑁆𑀢𑁂𑀚𑀁 𑀅𑀓𑀸𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑁂𑀧𑀺 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀅𑀯𑀲𑁂𑀲𑀪𑀺𑀓𑁆𑀔𑀽 𑀘 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀮𑀚𑁆𑀚𑀸𑀧𑀬𑀺𑀁𑀲𑀼.

𑀲𑁄 ‘‘𑀅𑀬𑀼𑀢𑁆𑀢𑀁 𑀯𑀢 𑀫𑁂 𑀓𑀢’’𑀦𑁆𑀢𑀺 𑀳𑀺𑀭𑀺𑀬𑀸 𑀘 𑀑𑀢𑁆𑀢𑀧𑁆𑀧𑁂𑀦 𑀘 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀧𑀝𑀺𑀲𑁆𑀲𑀯𑀁 𑀫𑀼𑀜𑁆𑀘𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸𑀧𑀺 ‘‘𑀬𑀤𑀸 𑀢𑁆𑀯𑀁, 𑀦𑀦𑁆𑀤, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑀤𑀸𑀬𑁂𑀯𑀸𑀳𑀁 𑀧𑀝𑀺𑀲𑁆𑀲𑀯𑀸 𑀫𑀼𑀢𑁆𑀢𑁄’’𑀢𑀺 𑀆𑀳. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀬𑀸𑀯 𑀑𑀯𑀸𑀤𑀓𑁆𑀔𑀫𑁄 𑀘𑀸𑀬𑀁, 𑀆𑀯𑀼𑀲𑁄, 𑀦𑀦𑁆𑀤𑀢𑁆𑀣𑁂𑀭𑁄 𑀏𑀓𑁄𑀯𑀸𑀤𑁂𑀦𑁂𑀯 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀦𑀦𑁆𑀤𑁄 𑀑𑀯𑀸𑀤𑀓𑁆𑀔𑀫𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀸𑀘𑀭𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀳𑀢𑁆𑀣𑀸𑀘𑀭𑀺𑀬𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀏𑀓𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀧𑀢𑁆𑀢𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲 𑀫𑀗𑁆𑀕𑀮𑀳𑀢𑁆𑀣𑀺𑀁 𑀲𑀼𑀲𑀺𑀓𑁆𑀔𑀺𑀢𑀁 𑀓𑀢𑁆𑀯𑀸 𑀲𑀺𑀓𑁆𑀔𑀸𑀧𑁂𑀲𑀺. 𑀲𑁄 𑀭𑀸𑀚𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀩𑀸𑀭𑀸𑀡𑀲𑀺𑀁 ¶ 𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀭𑀜𑁆𑀜𑁄 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀩𑁆𑀭𑀳𑁆𑀫𑀤𑀢𑁆𑀢𑁄 ‘‘𑀬𑀼𑀤𑁆𑀥𑀁 𑀤𑀲𑁆𑀲𑀸𑀫𑀻’’𑀢𑀺 ¶ 𑀧𑀸𑀓𑀸𑀭𑀤𑁆𑀯𑀸𑀭𑀝𑁆𑀝𑀸𑀮𑀓𑀕𑁄𑀧𑀼𑀭𑁂𑀲𑀼 𑀩𑀮𑀓𑀸𑀬𑀁 𑀆𑀭𑁄𑀧𑁂𑀢𑁆𑀯𑀸 𑀬𑀼𑀤𑁆𑀥𑀁 𑀅𑀤𑀸𑀲𑀺. 𑀲𑀧𑀢𑁆𑀢𑀭𑀸𑀚𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀯𑀫𑁆𑀫𑁂𑀦 𑀙𑀸𑀤𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑀫𑁆𑀫𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀢𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀢𑀺𑀔𑀺𑀡𑀁 𑀅𑀗𑁆𑀓𑀼𑀲𑀁 𑀆𑀤𑀸𑀬 ‘‘𑀦𑀕𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀸𑀫𑀺𑀢𑁆𑀢𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀳𑀢𑁆𑀣𑀕𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑀺𑀁 𑀦𑀕𑀭𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺. 𑀲𑁄 𑀉𑀡𑁆𑀳𑀓𑀮𑀮𑀸𑀦𑀺 𑀘𑁂𑀯 𑀬𑀦𑁆𑀢𑀧𑀸𑀲𑀸𑀡𑁂 𑀘 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀘 𑀧𑀳𑀭𑀡𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂 𑀤𑀺𑀲𑁆𑀯𑀸 𑀫𑀭𑀡𑀪𑀬𑀪𑀻𑀢𑁄 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀝𑀺𑀓𑁆𑀓𑀫𑀺. 𑀅𑀣 𑀦𑀁 𑀳𑀢𑁆𑀣𑀸𑀘𑀭𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀲𑀽𑀭𑁄 𑀲𑀗𑁆𑀕𑀸𑀫𑀸𑀯𑀘𑀭𑁄, 𑀏𑀯𑀭𑀽𑀧𑁂 𑀞𑀸𑀦𑁂 𑀧𑀝𑀺𑀓𑁆𑀓𑀫𑀦𑀁 ¶ 𑀦𑀸𑀫 𑀢𑀼𑀬𑁆𑀳𑀁 𑀦𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀁 𑀑𑀯𑀤𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁬𑁩.

‘‘𑀲𑀗𑁆𑀕𑀸𑀫𑀸𑀯𑀘𑀭𑁄 𑀲𑀽𑀭𑁄, 𑀩𑀮𑀯𑀸 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀓𑀺𑀁 𑀦𑀼 𑀢𑁄𑀭𑀡𑀫𑀸𑀲𑀚𑁆𑀚, 𑀧𑀝𑀺𑀓𑁆𑀓𑀫𑀲𑀺 𑀓𑀼𑀜𑁆𑀚𑀭.

𑁬𑁪.

‘‘𑀑𑀫𑀤𑁆𑀤 𑀔𑀺𑀧𑁆𑀧𑀁 𑀧𑀮𑀺𑀖𑀁, 𑀏𑀲𑀺𑀓𑀸𑀦𑀺 𑀘 𑀅𑀩𑁆𑀩𑀳;

𑀢𑁄𑀭𑀡𑀸𑀦𑀺 𑀘 𑀫𑀤𑁆𑀤𑀺𑀢𑁆𑀯𑀸, 𑀔𑀺𑀧𑁆𑀧𑀁 𑀧𑀯𑀺𑀲 𑀓𑀼𑀜𑁆𑀚𑀭𑀸’’𑀢𑀺.

𑀢𑀢𑁆𑀣 𑀇𑀢𑀺 𑀯𑀺𑀲𑁆𑀲𑀼𑀢𑁄𑀢𑀺, 𑀢𑀸𑀢, 𑀢𑁆𑀯𑀁 𑀧𑀯𑀢𑁆𑀢𑀲𑀫𑁆𑀧𑀳𑀸𑀭𑀁 𑀲𑀗𑁆𑀕𑀸𑀫𑀁 𑀫𑀤𑁆𑀤𑀺𑀢𑁆𑀯𑀸 𑀅𑀯𑀘𑀭𑀡𑀢𑁄 𑀲𑀗𑁆𑀕𑀸𑀫𑀸𑀯𑀘𑀭𑁄, 𑀣𑀺𑀭𑀳𑀤𑀬𑀢𑀸𑀬 𑀲𑀽𑀭𑁄, 𑀣𑀸𑀫𑀲𑀫𑁆𑀧𑀢𑁆𑀢𑀺𑀬𑀸 𑀩𑀮𑀯𑀸𑀢𑀺 𑀏𑀯𑀁 𑀯𑀺𑀲𑁆𑀲𑀼𑀢𑁄 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄. 𑀢𑁄𑀭𑀡𑀫𑀸𑀲𑀚𑁆𑀚𑀸𑀢𑀺 𑀦𑀕𑀭𑀤𑁆𑀯𑀸𑀭𑀲𑀗𑁆𑀔𑀸𑀢𑀁 𑀢𑁄𑀭𑀡𑀁 𑀧𑀢𑁆𑀯𑀸. 𑀧𑀝𑀺𑀓𑁆𑀓𑀫𑀲𑀻𑀢𑀺 𑀓𑀺𑀁 𑀦𑀼 𑀔𑁄 𑀑𑀲𑀓𑁆𑀓𑀲𑀺, 𑀓𑁂𑀦 𑀓𑀸𑀭𑀡𑁂𑀦 𑀦𑀺𑀯𑀢𑁆𑀢𑀲𑀻𑀢𑀺 𑀯𑀤𑀢𑀺. 𑀑𑀫𑀤𑁆𑀤𑀸𑀢𑀺 𑀅𑀯𑀫𑀤𑁆𑀤 𑀅𑀥𑁄 𑀧𑀸𑀢𑀬. 𑀏𑀲𑀺𑀓𑀸𑀦𑀺 𑀘 𑀅𑀩𑁆𑀩𑀳𑀸𑀢𑀺 𑀦𑀕𑀭𑀤𑁆𑀯𑀸𑀭𑁂 𑀲𑁄𑀴𑀲𑀭𑀢𑀦𑀁 𑀅𑀝𑁆𑀞𑀭𑀢𑀦𑀁 𑀪𑀽𑀫𑀺𑀬𑀁 𑀧𑀯𑁂𑀲𑁂𑀢𑁆𑀯𑀸 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀦𑀺𑀔𑀸𑀢𑀸 𑀏𑀲𑀺𑀓𑀢𑁆𑀣𑀫𑁆𑀪𑀸 𑀳𑁄𑀦𑁆𑀢𑀺, 𑀢𑁂 𑀔𑀺𑀧𑁆𑀧𑀁 𑀉𑀤𑁆𑀥𑀭 𑀮𑀼𑀜𑁆𑀘𑀸𑀳𑀻𑀢𑀺 𑀆𑀡𑀸𑀧𑁂𑀢𑀺. 𑀢𑁄𑀭𑀡𑀸𑀦𑀺 𑀘 𑀫𑀤𑁆𑀤𑀺𑀢𑁆𑀯𑀸𑀢𑀺 𑀦𑀕𑀭𑀤𑁆𑀯𑀸𑀭𑀲𑁆𑀲 𑀧𑀺𑀝𑁆𑀞𑀲𑀗𑁆𑀖𑀸𑀝𑁂 𑀫𑀤𑁆𑀤𑀺𑀢𑁆𑀯𑀸. 𑀔𑀺𑀧𑁆𑀧𑀁 𑀧𑀯𑀺𑀲𑀸𑀢𑀺 𑀲𑀻𑀖𑀁 𑀦𑀕𑀭𑀁 𑀧𑀯𑀺𑀲. 𑀓𑀼𑀜𑁆𑀚𑀭𑀸𑀢𑀺 𑀦𑀸𑀕𑀁 𑀆𑀮𑀧𑀢𑀺.

𑀢𑀁 𑀲𑀼𑀢𑁆𑀯𑀸 𑀦𑀸𑀕𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀓𑁄𑀯𑀸𑀤𑁂𑀦𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀏𑀲𑀺𑀓𑀢𑁆𑀣𑀫𑁆𑀪𑁂 𑀲𑁄𑀡𑁆𑀟𑀸𑀬 𑀧𑀮𑀺𑀯𑁂𑀞𑁂𑀢𑁆𑀯𑀸 𑀅𑀳𑀺𑀘𑁆𑀙𑀢𑁆𑀢𑀓𑀸𑀦𑀺 𑀯𑀺𑀬 𑀮𑀼𑀜𑁆𑀘𑀺𑀢𑁆𑀯𑀸 𑀢𑁄𑀭𑀡𑀁 𑀫𑀤𑁆𑀤𑀺𑀢𑁆𑀯𑀸 𑀧𑀮𑀺𑀖𑀁 𑀑𑀢𑀸𑀭𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀅𑀤𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀳𑀢𑁆𑀣𑀻 𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀳𑀢𑁆𑀣𑀸𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀗𑁆𑀕𑀸𑀫𑀸𑀯𑀘𑀭𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁮𑁩] 𑁩. 𑀯𑀸𑀮𑁄𑀤𑀓𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀮𑁄𑀤𑀓𑀁 ¶ 𑀅𑀧𑁆𑀧𑀭𑀲𑀁 𑀦𑀺𑀳𑀻𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀯𑀺𑀖𑀸𑀲𑀸𑀤𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀲𑀢𑀸 𑀉𑀧𑀸𑀲𑀓𑀸 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀧𑀼𑀢𑁆𑀢𑀤𑀸𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀲𑀢𑁆𑀣𑀼 ¶ 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀸 𑀏𑀓𑀢𑁄𑀯 𑀯𑀺𑀘𑀭𑀦𑁆𑀢𑀺. 𑀢𑁂𑀲𑀼 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀏𑀓𑁄𑀧𑀺 𑀧𑀼𑀣𑀼𑀚𑁆𑀚𑀦𑁄 𑀦𑀸𑀫 𑀦𑀢𑁆𑀣𑀺, 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀦𑁆𑀢𑀸𑀧𑀺 𑀢𑁂 𑀉𑀧𑀸𑀲𑀓𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸𑀯 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀢𑁂𑀲𑀁 𑀧𑀦 𑀤𑀦𑁆𑀢𑀓𑀝𑁆𑀞𑀫𑀼𑀔𑁄𑀤𑀓𑀯𑀢𑁆𑀣𑀕𑀦𑁆𑀥𑀫𑀸𑀮𑀤𑀸𑀬𑀓𑀸 𑀧𑀜𑁆𑀘𑀲𑀢𑀸 𑀘𑀽𑀴𑀼𑀧𑀝𑁆𑀞𑀸𑀓𑀸 𑀯𑀺𑀖𑀸𑀲𑀸𑀤𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀺. 𑀢𑁂 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀉𑀝𑁆𑀞𑀸𑀬 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑀤𑀻𑀢𑀻𑀭𑁂 𑀉𑀦𑁆𑀦𑀤𑀦𑁆𑀢𑀸 𑀫𑀮𑁆𑀮𑀬𑀼𑀤𑁆𑀥𑀁 𑀬𑀼𑀚𑁆𑀛𑀦𑁆𑀢𑀺. 𑀢𑁂 𑀧𑀦 𑀧𑀜𑁆𑀘𑀲𑀢𑀸 𑀉𑀧𑀸𑀲𑀓𑀸 𑀅𑀧𑁆𑀧𑀲𑀤𑁆𑀤𑀸 𑀅𑀧𑁆𑀧𑀦𑀺𑀕𑁆𑀖𑁄𑀲𑀸 𑀧𑀝𑀺𑀲𑀮𑁆𑀮𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀯𑀺𑀖𑀸𑀲𑀸𑀤𑀸𑀦𑀁 𑀉𑀘𑁆𑀘𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀏𑀲𑁄, 𑀆𑀦𑀦𑁆𑀤, 𑀲𑀤𑁆𑀤𑁄’’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀺𑀖𑀸𑀲𑀸𑀤𑀲𑀤𑁆𑀤𑁄, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄, 𑀆𑀦𑀦𑁆𑀤, 𑀇𑀫𑁂 𑀯𑀺𑀖𑀸𑀲𑀸𑀤𑀸 𑀇𑀤𑀸𑀦𑁂𑀯 𑀯𑀺𑀖𑀸𑀲𑀁 𑀔𑀸𑀤𑀺𑀢𑁆𑀯𑀸 𑀉𑀦𑁆𑀦𑀤𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 𑀉𑀦𑁆𑀦𑀤𑀦𑁆𑀢𑀺𑀬𑁂𑀯, 𑀇𑀫𑁂𑀧𑀺 𑀉𑀧𑀸𑀲𑀓𑀸 𑀦 𑀇𑀤𑀸𑀦𑁂𑀯 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀧𑀼𑀩𑁆𑀩𑁂𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺. 𑀅𑀣𑁂𑀓𑀲𑁆𑀫𑀺𑀁 𑀓𑀸𑀮𑁂 𑀲𑁄 𑀭𑀸𑀚𑀸 ‘‘𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑁂 𑀲𑀺𑀦𑁆𑀥𑀯𑁂 𑀓𑀧𑁆𑀧𑀸𑀧𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀕𑀦𑁆𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 ‘‘𑀲𑀺𑀦𑁆𑀥𑀯𑀸 𑀓𑀺𑀮𑀦𑁆𑀢𑀸 𑀅𑀮𑁆𑀮𑀭𑀲𑀫𑁂𑀯 𑀦𑁂𑀲𑀁 𑀫𑀼𑀤𑁆𑀤𑀺𑀓𑀧𑀸𑀦𑀁 𑀤𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀲𑀺𑀦𑁆𑀥𑀯𑀸 𑀕𑀦𑁆𑀥𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀅𑀲𑁆𑀲𑀲𑀸𑀮𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀞𑀸𑀦𑁂𑀲𑀼 𑀅𑀝𑁆𑀞𑀁𑀲𑀼. 𑀢𑁂𑀲𑀁 𑀧𑀦 ¶ 𑀤𑀺𑀦𑁆𑀦𑀸𑀯𑀲𑀺𑀝𑁆𑀞𑀓𑀁 𑀅𑀧𑁆𑀧𑀭𑀲𑀁 𑀩𑀳𑀼𑀓𑀲𑀝𑀁 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 ‘‘𑀇𑀤𑀁 𑀓𑀺𑀁 𑀓𑀭𑁄𑀫𑀸’’𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺𑀁𑀲𑀼. 𑀭𑀸𑀚𑀸 𑀉𑀤𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀫𑀓𑀘𑀺𑀧𑀺𑀮𑁄𑀢𑀺𑀓𑀸𑀳𑀺 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 ‘‘𑀬𑁂 𑀕𑀤𑁆𑀭𑀪𑀸 𑀲𑀺𑀦𑁆𑀥𑀯𑀸𑀦𑀁 𑀦𑀺𑀯𑀸𑀧𑀁 𑀧𑀳𑀺𑀁𑀲𑀼, 𑀢𑁂𑀲𑀁 𑀤𑀸𑀧𑁂𑀣𑀸’’𑀢𑀺 𑀤𑀸𑀧𑁂𑀲𑀺. 𑀕𑀤𑁆𑀭𑀪𑀸 𑀓𑀲𑀝𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀯𑀺𑀭𑀯𑀦𑁆𑀢𑀸 𑀭𑀸𑀚𑀗𑁆𑀕𑀡𑁂 𑀯𑀺𑀘𑀭𑀺𑀁𑀲𑀼. 𑀭𑀸𑀚𑀸 𑀫𑀳𑀸𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑀬𑀫𑀸𑀦𑁄 𑀲𑀫𑀻𑀧𑁂 𑀞𑀺𑀢𑀁 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀲𑁆𑀲, 𑀇𑀫𑁂 ¶ 𑀕𑀤𑁆𑀭𑀪𑀸 𑀓𑀲𑀝𑁄𑀤𑀓𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀯𑀺𑀭𑀯𑀦𑁆𑀢𑀸 𑀉𑀧𑁆𑀧𑀢𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀲𑀺𑀦𑁆𑀥𑀯𑀓𑀼𑀮𑁂 𑀚𑀸𑀢𑀲𑀺𑀦𑁆𑀥𑀯𑀸 𑀧𑀦 𑀕𑀦𑁆𑀥𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀦 𑀉𑀧𑁆𑀧𑀺𑀮𑀯𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁫.

‘‘𑀯𑀸𑀮𑁄𑀤𑀓𑀁 𑀅𑀧𑁆𑀧𑀭𑀲𑀁 𑀦𑀺𑀳𑀻𑀦𑀁, 𑀧𑀺𑀢𑁆𑀯𑀸 𑀫𑀤𑁄 𑀚𑀸𑀬𑀢𑀺 𑀕𑀤𑁆𑀭𑀪𑀸𑀦𑀁;

𑀇𑀫𑀜𑁆𑀘 𑀧𑀺𑀢𑁆𑀯𑀸𑀦 𑀭𑀲𑀁 𑀧𑀡𑀻𑀢𑀁, 𑀫𑀤𑁄 𑀦 𑀲𑀜𑁆𑀚𑀸𑀬𑀢𑀺 𑀲𑀺𑀦𑁆𑀥𑀯𑀸𑀦’’𑀦𑁆𑀢𑀺.

𑀢𑀢𑁆𑀣 ¶ 𑀯𑀸𑀮𑁄𑀤𑀓𑀦𑁆𑀢𑀺 𑀫𑀓𑀘𑀺𑀯𑀸𑀮𑁂𑀳𑀺 𑀧𑀭𑀺𑀲𑁆𑀲𑀸𑀯𑀺𑀢𑀉𑀤𑀓𑀁. ‘‘𑀯𑀸𑀮𑀼𑀤𑀓’’𑀦𑁆𑀢𑀺𑀧𑀺 𑀧𑀸𑀞𑁄. 𑀦𑀺𑀳𑀻𑀦𑀦𑁆𑀢𑀺 𑀦𑀺𑀳𑀻𑀦𑀭𑀲𑀪𑀸𑀯𑁂𑀦 𑀦𑀺𑀳𑀻𑀦𑀁. 𑀦 𑀲𑀜𑁆𑀚𑀸𑀬𑀢𑀻𑀢𑀺 𑀲𑀺𑀦𑁆𑀥𑀯𑀸𑀦𑀁 𑀫𑀤𑁄 𑀦 𑀚𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀦𑁆𑀢𑀺 𑀧𑀼𑀘𑁆𑀙𑀺.

𑀅𑀣𑀲𑁆𑀲 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁬.

‘‘𑀅𑀧𑁆𑀧𑀁 𑀧𑀺𑀯𑀺𑀢𑁆𑀯𑀸𑀦 𑀦𑀺𑀳𑀻𑀦𑀚𑀘𑁆𑀘𑁄, 𑀲𑁄 𑀫𑀚𑁆𑀚𑀢𑀻 𑀢𑁂𑀦 𑀚𑀦𑀺𑀦𑁆𑀤 𑀧𑀼𑀝𑁆𑀞𑁄;

𑀥𑁄𑀭𑀬𑁆𑀳𑀲𑀻𑀮𑀻 𑀘 𑀓𑀼𑀮𑀫𑁆𑀳𑀺 𑀚𑀸𑀢𑁄, 𑀦 𑀫𑀚𑁆𑀚𑀢𑀻 𑀅𑀕𑁆𑀕𑀭𑀲𑀁 𑀧𑀺𑀯𑀺𑀢𑁆𑀯𑀸’’𑀢𑀺.

𑀢𑀢𑁆𑀣 𑀢𑁂𑀦 𑀚𑀦𑀺𑀦𑁆𑀤 𑀧𑀼𑀝𑁆𑀞𑁄𑀢𑀺 𑀚𑀦𑀺𑀦𑁆𑀤 𑀉𑀢𑁆𑀢𑀫𑀭𑀸𑀚 𑀬𑁄 𑀦𑀺𑀳𑀻𑀦𑀚𑀘𑁆𑀘𑁄, 𑀢𑁂𑀦 𑀦𑀺𑀳𑀻𑀦𑀚𑀘𑁆𑀘𑀪𑀸𑀯𑁂𑀦 𑀧𑀼𑀝𑁆𑀞𑁄 𑀫𑀚𑁆𑀚𑀢𑀺 𑀧𑀫𑀚𑁆𑀚𑀢𑀺. 𑀥𑁄𑀭𑀬𑁆𑀳𑀲𑀻𑀮𑀻𑀢𑀺 𑀥𑁄𑀭𑀬𑁆𑀳𑀲𑀻𑀮𑁄 𑀥𑀼𑀭𑀯𑀳𑀦𑀓𑀆𑀘𑀸𑀭𑁂𑀦 𑀲𑀫𑁆𑀧𑀦𑁆𑀦𑁄 𑀚𑀸𑀢𑀺𑀲𑀺𑀦𑁆𑀥𑀯𑁄. 𑀅𑀕𑁆𑀕𑀭𑀲𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀕𑀳𑀺𑀢𑀁 𑀫𑀼𑀤𑁆𑀤𑀺𑀓𑀭𑀲𑀁 𑀧𑀺𑀯𑀺𑀢𑁆𑀯𑀸𑀧𑀺 𑀦 𑀫𑀚𑁆𑀚𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀤𑁆𑀭𑀪𑁂 𑀭𑀸𑀚𑀗𑁆𑀕𑀡𑀸 𑀦𑀻𑀳𑀭𑀸𑀧𑁂𑀢𑁆𑀯𑀸 𑀢𑀲𑁆𑀲𑁂𑀯 𑀑𑀯𑀸𑀤𑁂 𑀞𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀜𑁆𑀘𑀲𑀢𑀸 ¶ 𑀕𑀤𑁆𑀭𑀪𑀸 𑀇𑀫𑁂 𑀯𑀺𑀖𑀸𑀲𑀸𑀤𑀸 𑀅𑀳𑁂𑀲𑀼𑀁, 𑀧𑀜𑁆𑀘𑀲𑀢𑀸 𑀲𑀺𑀦𑁆𑀥𑀯𑀸 𑀇𑀫𑁂 𑀉𑀧𑀸𑀲𑀓𑀸, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀸𑀮𑁄𑀤𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁮𑁪] 𑁪. 𑀕𑀺𑀭𑀺𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀤𑀽𑀲𑀺𑀢𑁄 ¶ 𑀕𑀺𑀭𑀺𑀤𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀺𑀧𑀓𑁆𑀔𑀲𑁂𑀯𑀺𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑁂 (𑀚𑀸. 𑁧.𑁧.𑁨𑁬) 𑀓𑀣𑀺𑀢𑀫𑁂𑀯. 𑀲𑀢𑁆𑀣𑀸 𑀧𑀦 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀯𑀺𑀧𑀓𑁆𑀔𑀁 𑀲𑁂𑀯𑀢𑀺, 𑀧𑀼𑀩𑁆𑀩𑁂𑀧𑁂𑀲 𑀯𑀺𑀧𑀓𑁆𑀔𑀲𑁂𑀯𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀲𑀸𑀫𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺. 𑀭𑀜𑁆𑀜𑁄 𑀧𑀦 𑀧𑀡𑁆𑀟𑀯𑁄 𑀦𑀸𑀫 𑀫𑀗𑁆𑀕𑀮𑀲𑁆𑀲𑁄, 𑀢𑀲𑁆𑀲 𑀕𑀺𑀭𑀺𑀤𑀢𑁆𑀢𑁄 𑀦𑀸𑀫 𑀅𑀲𑁆𑀲𑀩𑀦𑁆𑀥𑁄, 𑀲𑁄 𑀔𑀜𑁆𑀚𑁄 𑀅𑀳𑁄𑀲𑀺. 𑀅𑀲𑁆𑀲𑁄 𑀫𑀼𑀔𑀭𑀚𑁆𑀚𑀼𑀓𑁂 𑀕𑀳𑁂𑀢𑁆𑀯𑀸 𑀢𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀁 𑀏𑀲 𑀲𑀺𑀓𑁆𑀔𑀸𑀧𑁂𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲 𑀅𑀦𑀼𑀲𑀺𑀓𑁆𑀔𑀦𑁆𑀢𑁄 𑀔𑀜𑁆𑀚𑁄 𑀅𑀳𑁄𑀲𑀺. 𑀢𑀲𑁆𑀲 𑀅𑀲𑁆𑀲𑀲𑁆𑀲 𑀔𑀜𑁆𑀚𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁, 𑀭𑀸𑀚𑀸 𑀯𑁂𑀚𑁆𑀚𑁂 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀅𑀲𑁆𑀲𑀲𑁆𑀲 𑀲𑀭𑀻𑀭𑁂 𑀭𑁄𑀕𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀭𑁄𑀕𑀫𑀲𑁆𑀲 𑀦 𑀧𑀲𑁆𑀲𑀸𑀫𑀸’’𑀢𑀺 𑀭𑀜𑁆𑀜𑁄 𑀓𑀣𑀬𑀺𑀁𑀲𑀼. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙 𑀯𑀬𑀲𑁆𑀲, 𑀏𑀢𑁆𑀣 𑀓𑀸𑀭𑀡𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀔𑀜𑁆𑀚𑀅𑀲𑁆𑀲𑀩𑀦𑁆𑀥𑀲𑀁𑀲𑀕𑁆𑀕𑁂𑀦 𑀢𑀲𑁆𑀲 𑀔𑀜𑁆𑀚𑀪𑀽𑀢𑀪𑀸𑀯𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑀁𑀲𑀕𑁆𑀕𑀤𑁄𑀲𑁂𑀦 𑀦𑀸𑀫 𑀏𑀯𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋-

𑁬𑁭.

‘‘𑀤𑀽𑀲𑀺𑀢𑁄 𑀕𑀺𑀭𑀺𑀤𑀢𑁆𑀢𑁂𑀦, 𑀳𑀬𑁄 𑀲𑀸𑀫𑀲𑁆𑀲 𑀧𑀡𑁆𑀟𑀯𑁄;

𑀧𑁄𑀭𑀸𑀡𑀁 𑀧𑀓𑀢𑀺𑀁 𑀳𑀺𑀢𑁆𑀯𑀸, 𑀢𑀲𑁆𑀲𑁂𑀯𑀸𑀦𑀼𑀯𑀺𑀥𑀺𑀬𑁆𑀬𑀢𑀻’’𑀢𑀺.

𑀢𑀢𑁆𑀣 𑀳𑀬𑁄 𑀲𑀸𑀫𑀲𑁆𑀲𑀸𑀢𑀺 𑀲𑀸𑀫𑀲𑁆𑀲 𑀭𑀜𑁆𑀜𑁄 𑀫𑀗𑁆𑀕𑀮𑀲𑁆𑀲𑁄. 𑀧𑁄𑀭𑀸𑀡𑀁 𑀧𑀓𑀢𑀺𑀁 𑀳𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑁄𑀭𑀸𑀡𑀧𑀓𑀢𑀺𑀁 𑀲𑀺𑀗𑁆𑀕𑀸𑀭𑀪𑀸𑀯𑀁 𑀧𑀳𑀸𑀬. 𑀅𑀦𑀼𑀯𑀺𑀥𑀺𑀬𑁆𑀬𑀢𑀻𑀢𑀺 𑀅𑀦𑀼𑀲𑀺𑀓𑁆𑀔𑀢𑀺.

𑀅𑀣 ¶ 𑀦𑀁 𑀭𑀸𑀚𑀸 ‘‘𑀇𑀤𑀸𑀦𑀺 𑀯𑀬𑀲𑁆𑀲 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀼𑀦𑁆𑀤𑀭𑀁 𑀅𑀲𑁆𑀲𑀩𑀦𑁆𑀥𑀁 𑀮𑀪𑀺𑀢𑁆𑀯𑀸 𑀬𑀣𑀸 𑀧𑁄𑀭𑀸𑀡𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁮.

‘‘𑀲𑀘𑁂 ¶ 𑀘 𑀢𑀦𑀼𑀚𑁄 𑀧𑁄𑀲𑁄, 𑀲𑀺𑀔𑀭𑀸𑀓𑀸𑀭𑀓𑀧𑁆𑀧𑀺𑀢𑁄;

𑀆𑀦𑀦𑁂 𑀦𑀁 𑀕𑀳𑁂𑀢𑁆𑀯𑀸𑀦, 𑀫𑀡𑁆𑀟𑀮𑁂 𑀧𑀭𑀺𑀯𑀢𑁆𑀢𑀬𑁂;

𑀔𑀺𑀧𑁆𑀧𑀫𑁂𑀯 𑀧𑀳𑀦𑁆𑀢𑁆𑀯𑀸𑀦, 𑀢𑀲𑁆𑀲𑁂𑀯𑀸𑀦𑀼𑀯𑀺𑀥𑀺𑀬𑁆𑀬𑀢𑀻’’𑀢𑀺.

𑀢𑀢𑁆𑀣 𑀢𑀦𑀼𑀚𑁄𑀢𑀺 𑀢𑀲𑁆𑀲 𑀅𑀦𑀼𑀚𑁄. 𑀅𑀦𑀼𑀭𑀽𑀧𑀁 𑀚𑀸𑀢𑁄 𑀳𑀺 𑀅𑀦𑀼𑀚𑁄, 𑀢𑀲𑁆𑀲 𑀅𑀦𑀼𑀚𑁄 𑀢𑀦𑀼𑀚𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀳𑀺, 𑀫𑀳𑀸𑀭𑀸𑀚, 𑀢𑀲𑁆𑀲 𑀲𑀺𑀗𑁆𑀕𑀸𑀭𑀲𑁆𑀲 𑀆𑀘𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀅𑀲𑁆𑀲𑀲𑁆𑀲 𑀅𑀦𑀼𑀭𑀽𑀧𑀁 𑀚𑀸𑀢𑁄 𑀲𑀺𑀗𑁆𑀕𑀸𑀭𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀧𑁄𑀲𑁄. 𑀲𑀺𑀔𑀭𑀸𑀓𑀸𑀭𑀓𑀧𑁆𑀧𑀺𑀢𑁄𑀢𑀺 𑀲𑀺𑀔𑀭𑁂𑀦 𑀲𑀼𑀦𑁆𑀤𑀭𑁂𑀦 𑀆𑀓𑀸𑀭𑁂𑀦 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼 𑀢𑀁 𑀅𑀲𑁆𑀲𑀁 𑀆𑀦𑀦𑁂 𑀕𑀳𑁂𑀢𑁆𑀯𑀸 𑀅𑀲𑁆𑀲𑀫𑀡𑁆𑀟𑀮𑁂 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯𑁂𑀲 𑀢𑀁 𑀔𑀜𑁆𑀚𑀪𑀸𑀯𑀁 𑀧𑀳𑀸𑀬 ‘‘𑀅𑀬𑀁 𑀲𑀺𑀗𑁆𑀕𑀸𑀭𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀅𑀲𑁆𑀲𑀕𑁄𑀧𑀓𑁄 𑀫𑀁 𑀲𑀺𑀓𑁆𑀔𑀸𑀧𑁂𑀢𑀻’’𑀢𑀺 𑀲𑀜𑁆𑀜𑀸𑀬 𑀔𑀺𑀧𑁆𑀧𑀫𑁂𑀯 𑀢𑀲𑁆𑀲 𑀅𑀦𑀼𑀯𑀺𑀥𑀺𑀬𑁆𑀬𑀢𑀺 𑀅𑀦𑀼𑀲𑀺𑀓𑁆𑀔𑀺𑀲𑁆𑀲𑀢𑀺, 𑀧𑀓𑀢𑀺𑀪𑀸𑀯𑁂𑀬𑁂𑀯 𑀞𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀭𑀸𑀚𑀸 𑀢𑀣𑀸 ¶ 𑀓𑀸𑀭𑁂𑀲𑀺, 𑀅𑀲𑁆𑀲𑁄 𑀧𑀓𑀢𑀺𑀪𑀸𑀯𑁂 𑀧𑀢𑀺𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺 𑀦𑀸𑀫 𑀆𑀲𑀬𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀕𑀺𑀭𑀺𑀤𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀅𑀲𑁆𑀲𑁄 𑀯𑀺𑀧𑀓𑁆𑀔𑀲𑁂𑀯𑀓𑁄 𑀪𑀺𑀓𑁆𑀔𑀼, 𑀭𑀸𑀚𑀸 𑀆𑀦𑀦𑁆𑀤𑁄, 𑀅𑀫𑀘𑁆𑀘𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀺𑀭𑀺𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁮𑁫] 𑁫. 𑀅𑀦𑀪𑀺𑀭𑀢𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑁄𑀤𑀓𑁂 𑀆𑀯𑀺𑀮𑁂 𑀅𑀧𑁆𑀧𑀲𑀦𑁆𑀦𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑁄 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀩𑀳𑀽 𑀔𑀢𑁆𑀢𑀺𑀬𑀓𑀼𑀫𑀸𑀭𑁂 𑀘 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂 𑀘 𑀫𑀦𑁆𑀢𑁂 𑀯𑀸𑀘𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀢𑁆𑀣𑀸𑀮𑀗𑁆𑀓𑀸𑀭𑀤𑀸𑀲𑀤𑀸𑀲𑀺𑀔𑁂𑀢𑁆𑀢𑀯𑀢𑁆𑀣𑀼𑀕𑁄𑀫𑀳𑀺𑀁𑀲𑀧𑀼𑀢𑁆𑀢𑀤𑀸𑀭𑀸𑀤𑀻𑀦𑀁 ¶ 𑀅𑀢𑁆𑀣𑀸𑀬 𑀘𑀺𑀦𑁆𑀢𑀬𑀫𑀸𑀦𑁄 𑀭𑀸𑀕𑀤𑁄𑀲𑀫𑁄𑀳𑀯𑀲𑀺𑀓𑁄 𑀳𑀼𑀢𑁆𑀯𑀸 𑀆𑀯𑀺𑀮𑀘𑀺𑀢𑁆𑀢𑁄 𑀅𑀳𑁄𑀲𑀺, 𑀫𑀦𑁆𑀢𑁂 𑀧𑀝𑀺𑀧𑀸𑀝𑀺𑀬𑀸 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀢𑁄 𑀘𑀺𑀢𑁄 𑀘 𑀫𑀦𑁆𑀢𑀸 𑀦 𑀧𑀝𑀺𑀪𑀁𑀲𑀼. 𑀲𑁄 𑀏𑀓𑀤𑀺𑀯𑀲𑀁 𑀩𑀳𑀼𑀁 𑀕𑀦𑁆𑀥𑀫𑀸𑀮𑀸𑀤𑀺𑀁 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 ¶ . 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁, 𑀫𑀸𑀡𑀯, 𑀫𑀦𑁆𑀢𑁂 𑀯𑀸𑀘𑁂𑀲𑀺, 𑀧𑀕𑀼𑀡𑀸 𑀢𑁂 𑀫𑀦𑁆𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀫𑀦𑁆𑀢𑀸 𑀧𑀕𑀼𑀡𑀸 𑀅𑀳𑁂𑀲𑀼𑀁, 𑀖𑀭𑀸𑀯𑀸𑀲𑀲𑁆𑀲 𑀧𑀦 𑀕𑀳𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀁 𑀫𑁂 𑀆𑀯𑀺𑀮𑀁 𑀚𑀸𑀢𑀁, 𑀢𑁂𑀦 𑀫𑁂 𑀫𑀦𑁆𑀢𑀸 𑀦 𑀧𑀕𑀼𑀡𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀔𑁄, 𑀫𑀸𑀡𑀯, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑁂 𑀘𑀺𑀢𑁆𑀢𑀲𑁆𑀲 𑀅𑀦𑀸𑀯𑀺𑀮𑀓𑀸𑀮𑁂 𑀢𑀯 𑀫𑀦𑁆𑀢𑀸 𑀧𑀕𑀼𑀡𑀸 𑀅𑀳𑁂𑀲𑀼𑀁, 𑀭𑀸𑀕𑀸𑀤𑀻𑀳𑀺 𑀧𑀦 𑀆𑀯𑀺𑀮𑀓𑀸𑀮𑁂 𑀢𑀯 𑀫𑀦𑁆𑀢𑀸 𑀦 𑀧𑀝𑀺𑀪𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀩𑀳𑀽 𑀔𑀢𑁆𑀢𑀺𑀬𑀓𑀼𑀫𑀸𑀭𑁂 𑀘 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂 𑀘 𑀫𑀦𑁆𑀢𑁂 𑀯𑀸𑀘𑁂𑀲𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀏𑀓𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀢𑀬𑁄 𑀯𑁂𑀤𑁂 𑀧𑀕𑀼𑀡𑁂 𑀅𑀓𑀸𑀲𑀺, 𑀏𑀓𑀧𑀤𑁂𑀧𑀺 𑀦𑀺𑀓𑁆𑀓𑀗𑁆𑀔𑁄 𑀧𑀺𑀝𑁆𑀞𑀺𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀫𑀦𑁆𑀢𑁂 𑀯𑀸𑀘𑁂𑀲𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀖𑀭𑀸𑀯𑀸𑀲𑀁 𑀕𑀳𑁂𑀢𑁆𑀯𑀸 𑀖𑀭𑀸𑀯𑀸𑀲𑀘𑀺𑀦𑁆𑀢𑀸𑀬 𑀆𑀯𑀺𑀮𑀘𑀺𑀢𑁆𑀢𑁄 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀆𑀘𑀭𑀺𑀬𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 ‘‘𑀓𑀺𑀁, 𑀫𑀸𑀡𑀯, 𑀧𑀕𑀼𑀡𑀸 𑀢𑁂 𑀫𑀦𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀖𑀭𑀸𑀯𑀸𑀲𑀕𑀳𑀺𑀢𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀫𑁂 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀚𑀸𑀢𑀁, 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀸𑀢, 𑀆𑀯𑀺𑀮𑁂 𑀘𑀺𑀢𑁆𑀢𑀫𑁆𑀳𑀺 𑀧𑀕𑀼𑀡𑀸𑀧𑀺 𑀫𑀦𑁆𑀢𑀸 𑀦 𑀧𑀝𑀺𑀪𑀦𑁆𑀢𑀺, 𑀅𑀦𑀸𑀯𑀺𑀮𑁂 𑀧𑀦 𑀘𑀺𑀢𑁆𑀢𑁂 𑀅𑀧𑁆𑀧𑀝𑀺𑀪𑀸𑀡𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁬𑁯.

‘‘𑀬𑀣𑁄𑀤𑀓𑁂 𑀆𑀯𑀺𑀮𑁂 𑀅𑀧𑁆𑀧𑀲𑀦𑁆𑀦𑁂, 𑀦 𑀧𑀲𑁆𑀲𑀢𑀺 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀜𑁆𑀘;

𑀲𑀓𑁆𑀔𑀭𑀁 𑀯𑀸𑀮𑀼𑀓𑀁 𑀫𑀘𑁆𑀙𑀕𑀼𑀫𑁆𑀩𑀁, 𑀏𑀯𑀁 𑀆𑀯𑀺𑀮𑀫𑁆𑀳𑀺 𑀘𑀺𑀢𑁆𑀢𑁂;

𑀦 𑀲𑁄 𑀧𑀲𑁆𑀲𑀢𑀺 𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑀁.

𑁭𑁦.

‘‘𑀬𑀣𑁄𑀤𑀓𑁂 ¶ 𑀅𑀘𑁆𑀙𑁂 𑀯𑀺𑀧𑁆𑀧𑀲𑀦𑁆𑀦𑁂, 𑀲𑁄 𑀧𑀲𑁆𑀲𑀢𑀺 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀜𑁆𑀘;

𑀲𑀓𑁆𑀔𑀭𑀁 𑀯𑀸𑀮𑀼𑀓𑀁 𑀫𑀘𑁆𑀙𑀕𑀼𑀫𑁆𑀩𑀁, 𑀏𑀯𑀁 ¶ 𑀅𑀦𑀸𑀯𑀺𑀮𑀫𑁆𑀳𑀺 𑀘𑀺𑀢𑁆𑀢𑁂;

𑀲𑁄 𑀧𑀲𑁆𑀲𑀢𑀺 𑀅𑀢𑁆𑀣𑀤𑀢𑁆𑀣𑀁 𑀧𑀭𑀢𑁆𑀣’’𑀦𑁆𑀢𑀺.

𑀢𑀢𑁆𑀣 𑀆𑀯𑀺𑀮𑁂𑀢𑀺 𑀓𑀤𑁆𑀤𑀫𑀸𑀮𑀼𑀴𑀺𑀢𑁂. 𑀅𑀧𑁆𑀧𑀲𑀦𑁆𑀦𑁂𑀢𑀺 𑀢𑀸𑀬𑁂𑀯 𑀆𑀯𑀺𑀮𑀢𑀸𑀬 𑀅𑀯𑀺𑀧𑁆𑀧𑀲𑀦𑁆𑀦𑁂. 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀜𑁆𑀘𑀸𑀢𑀺 𑀲𑀺𑀧𑁆𑀧𑀺𑀓𑀜𑁆𑀘 𑀲𑀫𑁆𑀩𑀼𑀓𑀜𑁆𑀘. 𑀫𑀘𑁆𑀙𑀕𑀼𑀫𑁆𑀩𑀦𑁆𑀢𑀺 𑀫𑀘𑁆𑀙𑀖𑀝𑀁. 𑀏𑀯𑀁 𑀆𑀯𑀺𑀮𑀫𑁆𑀳𑀻𑀢𑀺 𑀏𑀯𑀫𑁂𑀯 𑀭𑀸𑀕𑀸𑀤𑀻𑀳𑀺 𑀆𑀯𑀺𑀮𑁂 𑀘𑀺𑀢𑁆𑀢𑁂. 𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑀦𑁆𑀢𑀺 𑀦𑁂𑀯 𑀅𑀢𑁆𑀢𑀤𑀢𑁆𑀣𑀁 𑀦 𑀧𑀭𑀢𑁆𑀣𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀲𑁆𑀲𑀢𑀻𑀢𑀺 𑀏𑀯𑀫𑁂𑀯 𑀅𑀦𑀸𑀯𑀺𑀮𑁂 𑀘𑀺𑀢𑁆𑀢𑁂 𑀲𑁄 𑀧𑀼𑀭𑀺𑀲𑁄 𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑀜𑁆𑀘 𑀧𑀲𑁆𑀲𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀫𑀸𑀡𑀯𑁄 𑀅𑀬𑀫𑁂𑀯 𑀫𑀸𑀡𑀯𑁄 𑀅𑀳𑁄𑀲𑀺, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀦𑀪𑀺𑀭𑀢𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁮𑁬] 𑁬. 𑀤𑀥𑀺𑀯𑀸𑀳𑀦𑀚𑀸𑀢𑀓𑀯𑀡𑁆𑀡𑀦𑀸

𑀯𑀡𑁆𑀡𑀕𑀦𑁆𑀥𑀭𑀲𑀽𑀧𑁂𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀧𑀓𑁆𑀔𑀲𑁂𑀯𑀺𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯. 𑀲𑀢𑁆𑀣𑀸 𑀧𑀦 ‘‘𑀪𑀺𑀓𑁆𑀔𑀯𑁂, 𑀅𑀲𑀸𑀥𑀼𑀲𑀦𑁆𑀦𑀺𑀯𑀸𑀲𑁄 𑀦𑀸𑀫 𑀧𑀸𑀧𑁄 𑀅𑀦𑀢𑁆𑀣𑀓𑀭𑁄, 𑀢𑀢𑁆𑀣 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀢𑀸𑀯 𑀧𑀸𑀧𑀲𑀦𑁆𑀦𑀺𑀯𑀸𑀲𑀲𑁆𑀲 𑀅𑀦𑀢𑁆𑀣𑀓𑀭𑀢𑀸𑀬 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀧𑀼𑀩𑁆𑀩𑁂 𑀧𑀦 𑀅𑀲𑀸𑀢𑁂𑀦 𑀅𑀫𑀥𑀼𑀭𑁂𑀦 𑀦𑀺𑀫𑁆𑀩𑀭𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀲𑀦𑁆𑀦𑀺𑀯𑀸𑀲𑀫𑀸𑀕𑀫𑁆𑀫 𑀫𑀥𑀼𑀭𑀭𑀲𑁄 𑀤𑀺𑀩𑁆𑀩𑀭𑀲𑀧𑀝𑀺𑀪𑀸𑀕𑁄 𑀅𑀘𑁂𑀢𑀦𑁄 𑀅𑀫𑁆𑀩𑀭𑀼𑀓𑁆𑀔𑁄𑀧𑀺 𑀅𑀫𑀥𑀼𑀭𑁄 𑀢𑀺𑀢𑁆𑀢𑀓𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀓𑀸𑀲𑀺𑀭𑀝𑁆𑀞𑁂 𑀘𑀢𑁆𑀢𑀸𑀭𑁄 𑀪𑀸𑀢𑀭𑁄 𑀩𑁆𑀭𑀸𑀳𑁆𑀫𑀡𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀧𑀝𑀺𑀧𑀸𑀝𑀺𑀬𑀸 𑀧𑀡𑁆𑀡𑀲𑀸𑀮𑀸 𑀓𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑁂𑀲𑀁 𑀚𑁂𑀝𑁆𑀞𑀓𑀪𑀸𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀓𑁆𑀓𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀲𑀢𑁆𑀢𑀝𑁆𑀞𑀤𑀺𑀯𑀲𑀘𑁆𑀘𑀬𑁂𑀦 𑀢𑁂𑀲𑀁 ¶ 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀏𑀓𑀤𑀺𑀯𑀲𑀁 𑀚𑁂𑀝𑁆𑀞𑀓𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ¶ 𑁋 ‘‘𑀪𑀦𑁆𑀢𑁂, 𑀓𑁂𑀦 𑀢𑁂 𑀅𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺. 𑀧𑀡𑁆𑀟𑀼𑀭𑁄𑀕𑁄 𑀢𑀸𑀧𑀲𑁄 ‘‘𑀅𑀕𑁆𑀕𑀺𑀦𑀸 𑀫𑁂 𑀅𑀢𑁆𑀣𑁄’’𑀢𑀺 𑀆𑀳. 𑀲𑁄 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀯𑀸𑀲𑀺𑀨𑀭𑀲𑀼𑀓𑀁 𑀅𑀤𑀸𑀲𑀺. 𑀯𑀸𑀲𑀺𑀨𑀭𑀲𑀼𑀓𑁄 𑀦𑀸𑀫 𑀤𑀡𑁆𑀟𑁂 𑀧𑀯𑁂𑀲𑀦𑀯𑀲𑁂𑀦 𑀯𑀸𑀲𑀺𑀧𑀺 𑀳𑁄𑀢𑀺 𑀨𑀭𑀲𑀼𑀧𑀺. 𑀢𑀸𑀧𑀲𑁄 ‘‘𑀓𑁄 𑀫𑁂 𑀇𑀫𑀁 𑀆𑀤𑀸𑀬 𑀤𑀸𑀭𑀽𑀦𑀺 𑀆𑀳𑀭𑀺𑀲𑁆𑀲𑀢𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀓𑁆𑀓𑁄 𑀏𑀯𑀫𑀸𑀳 𑁋 ‘‘𑀬𑀤𑀸 𑀢𑁂, 𑀪𑀦𑁆𑀢𑁂, 𑀤𑀸𑀭𑀽𑀳𑀺 𑀅𑀢𑁆𑀣𑁄, 𑀇𑀫𑀁 𑀨𑀭𑀲𑀼𑀁 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 ‘𑀤𑀸𑀭𑀽𑀦𑀺 𑀫𑁂 𑀆𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑁄𑀳𑀻’𑀢𑀺 𑀯𑀤𑁂𑀬𑁆𑀬𑀸𑀲𑀺, 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀤𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀯𑀸𑀲𑀺𑀨𑀭𑀲𑀼𑀓𑀁 𑀤𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑁂𑀦 𑀢𑁂 𑀅𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺. 𑀢𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀳𑀢𑁆𑀣𑀺𑀫𑀕𑁆𑀕𑁄 𑀳𑁄𑀢𑀺, 𑀲𑁄 𑀳𑀢𑁆𑀣𑀻𑀳𑀺 𑀉𑀧𑀤𑁆𑀤𑀼𑀢𑁄 ‘‘𑀳𑀢𑁆𑀣𑀻𑀦𑀁 𑀫𑁂 𑀯𑀲𑁂𑀦 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂 𑀧𑀮𑀸𑀧𑁂𑀳𑀻’’𑀢𑀺 𑀆𑀳. 𑀲𑀓𑁆𑀓𑁄 𑀢𑀲𑁆𑀲 𑀏𑀓𑀁 𑀪𑁂𑀭𑀺𑀁 𑀉𑀧𑀦𑀸𑀫𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀢𑀮𑁂 𑀧𑀳𑀝𑁂 𑀢𑀼𑀫𑁆𑀳𑀸𑀓𑀁 𑀧𑀘𑁆𑀘𑀸𑀫𑀺𑀢𑁆𑀢𑀸 𑀧𑀮𑀸𑀬𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀢𑀮𑁂 𑀧𑀳𑀝𑁂 𑀫𑁂𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀪𑁂𑀭𑀺𑀁 𑀤𑀢𑁆𑀯𑀸 𑀓𑀦𑀺𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑁂𑀦 𑀢𑁂 𑀅𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺. 𑀲𑁄𑀧𑀺 𑀧𑀡𑁆𑀟𑀼𑀭𑁄𑀕𑀥𑀸𑀢𑀼𑀓𑁄𑀯, 𑀢𑀲𑁆𑀫𑀸 ‘‘𑀤𑀥𑀺𑀦𑀸 𑀫𑁂 𑀅𑀢𑁆𑀣𑁄’’𑀢𑀺 𑀆𑀳. 𑀲𑀓𑁆𑀓𑁄 𑀢𑀲𑁆𑀲 𑀏𑀓𑀁 𑀤𑀥𑀺𑀖𑀝𑀁 𑀤𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀇𑀘𑁆𑀙𑀫𑀸𑀦𑀸 𑀇𑀫𑀁 𑀆𑀲𑀺𑀜𑁆𑀘𑁂𑀬𑁆𑀬𑀸𑀣, 𑀫𑀳𑀸𑀦𑀤𑀻 𑀳𑀼𑀢𑁆𑀯𑀸 𑀫𑀳𑁄𑀖𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀲𑀫𑀢𑁆𑀣𑁄𑀧𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀯𑀸𑀲𑀺𑀨𑀭𑀲𑀼𑀓𑁄 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀅𑀕𑁆𑀕𑀺𑀁 𑀓𑀭𑁄𑀢𑀺, 𑀇𑀢𑀭𑁂𑀦 𑀪𑁂𑀭𑀺𑀢𑀮𑁂 𑀧𑀳𑀝𑁂 𑀳𑀢𑁆𑀣𑀻 𑀧𑀮𑀸𑀬𑀦𑁆𑀢𑀺, 𑀓𑀦𑀺𑀝𑁆𑀞𑁄 𑀤𑀥𑀺𑀁 𑀧𑀭𑀺𑀪𑀼𑀜𑁆𑀚𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀲𑀽𑀓𑀭𑁄 𑀏𑀓𑀲𑁆𑀫𑀺𑀁 𑀧𑀼𑀭𑀸𑀡𑀕𑀸𑀫𑀝𑁆𑀞𑀸𑀦𑁂 𑀘𑀭𑀦𑁆𑀢𑁄 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀁 𑀏𑀓𑀁 𑀫𑀡𑀺𑀓𑁆𑀔𑀦𑁆𑀥𑀁 𑀅𑀤𑁆𑀤𑀲. 𑀲𑁄 𑀢𑀁 𑀫𑀡𑀺𑀓𑁆𑀔𑀦𑁆𑀥𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀲𑀫𑀼𑀤𑁆𑀤𑀲𑁆𑀲 𑀫𑀚𑁆𑀛𑁂 𑀏𑀓𑀁 𑀤𑀻𑀧𑀓𑀁 𑀕𑀦𑁆𑀢𑁆𑀯𑀸 ‘‘𑀏𑀢𑁆𑀣 𑀤𑀸𑀦𑀺 𑀫𑀬𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀢𑀭𑀺𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀏𑀓𑀲𑁆𑀲 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 ¶ 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀫𑀡𑀺𑀓𑁆𑀔𑀦𑁆𑀥𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀅𑀣𑁂𑀓𑁄 𑀓𑀸𑀲𑀺𑀭𑀝𑁆𑀞𑀯𑀸𑀲𑀻 𑀫𑀦𑀼𑀲𑁆𑀲𑁄 ‘‘𑀦𑀺𑀭𑀼𑀧𑀓𑀸𑀭𑁄 𑀏𑀲 𑀅𑀫𑁆𑀳𑀸𑀓’’𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀺𑀢𑁄 𑀏𑀓𑀁 𑀧𑀝𑁆𑀝𑀦𑀕𑀸𑀫𑀁 𑀕𑀦𑁆𑀢𑁆𑀯𑀸 𑀦𑀸𑀯𑀺𑀓𑀸𑀦𑀁 𑀓𑀫𑁆𑀫𑀓𑀸𑀭𑁄 𑀳𑀼𑀢𑁆𑀯𑀸 𑀦𑀸𑀯𑀁 𑀆𑀭𑀼𑀬𑁆𑀳 ¶ 𑀲𑀫𑀼𑀤𑁆𑀤𑀫𑀚𑁆𑀛𑁂 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀨𑀮𑀓𑁂 𑀦𑀺𑀧𑀦𑁆𑀦𑁄 𑀢𑀁 𑀤𑀻𑀧𑀓𑀁 𑀧𑀢𑁆𑀯𑀸 𑀨𑀮𑀸𑀨𑀮𑀸𑀦𑀺 𑀧𑀭𑀺𑀬𑁂𑀲𑀦𑁆𑀢𑁄 𑀢𑀁 𑀲𑀽𑀓𑀭𑀁 𑀦𑀺𑀤𑁆𑀤𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀲𑀡𑀺𑀓𑀁 𑀕𑀦𑁆𑀢𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀁 𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀽𑀓𑀭𑁄 ¶ 𑀇𑀫𑀲𑁆𑀲 𑀫𑀡𑀺𑀓𑁆𑀔𑀦𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦 𑀆𑀓𑀸𑀲𑀘𑀸𑀭𑀺𑀓𑁄 𑀳𑀼𑀢𑁆𑀯𑀸 𑀇𑀥 𑀯𑀲𑀢𑀺 𑀫𑀜𑁆𑀜𑁂, 𑀫𑀬𑀸 𑀧𑀞𑀫𑀫𑁂𑀯 𑀇𑀫𑀁 𑀲𑀽𑀓𑀭𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀧𑀘𑁆𑀙𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀏𑀓𑀁 𑀤𑀡𑁆𑀟𑀓𑀁 𑀪𑀜𑁆𑀚𑀺𑀢𑁆𑀯𑀸 𑀢𑀲𑁆𑀲 𑀲𑀻𑀲𑁂 𑀧𑀸𑀢𑁂𑀢𑀺. 𑀲𑀽𑀓𑀭𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀫𑀡𑀺𑀁 𑀅𑀧𑀲𑁆𑀲𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀓𑀫𑁆𑀧𑀫𑀸𑀦𑁄 𑀯𑀺𑀥𑀸𑀯𑀢𑀺, 𑀭𑀼𑀓𑁆𑀔𑁂 𑀦𑀺𑀲𑀺𑀦𑁆𑀦𑀧𑀼𑀭𑀺𑀲𑁄 𑀳𑀲𑀺. 𑀲𑀽𑀓𑀭𑁄 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀲𑀻𑀲𑁂𑀦 𑀧𑀳𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀫𑀢𑁄.

𑀲𑁄 𑀧𑀼𑀭𑀺𑀲𑁄 𑀑𑀢𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀢𑀲𑁆𑀲 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑀢𑁆𑀣𑀓𑁂𑀦 𑀕𑀘𑁆𑀙𑀦𑁆𑀢𑁄 𑀅𑀲𑁆𑀲𑀫𑀧𑀤𑀁 𑀤𑀺𑀲𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀢𑀸𑀧𑀲𑀲𑁆𑀲 𑀅𑀲𑁆𑀲𑀫𑁂 𑀑𑀢𑀭𑀺𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀅𑀓𑀸𑀲𑀺, 𑀯𑀸𑀲𑀺𑀨𑀭𑀲𑀼𑀓𑀲𑁆𑀲 𑀆𑀦𑀼𑀪𑀸𑀯𑀜𑁆𑀘 𑀧𑀲𑁆𑀲𑀺. 𑀲𑁄 ‘‘𑀇𑀫𑀁 𑀫𑀬𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀡𑀺𑀓𑁆𑀔𑀦𑁆𑀥𑀲𑁆𑀲 𑀆𑀦𑀼𑀪𑀸𑀯𑀁 𑀢𑀸𑀧𑀲𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀓𑀁 𑀤𑁂𑀣𑀸’’𑀢𑀺 𑀆𑀳. 𑀢𑀸𑀧𑀲𑁄 𑀆𑀓𑀸𑀲𑁂𑀦 𑀘𑀭𑀺𑀢𑀼𑀓𑀸𑀫𑁄 𑀢𑀁 𑀕𑀳𑁂𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀓𑀁 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀓𑀁 𑀧𑀳𑀭𑀺𑀢𑁆𑀯𑀸 ‘‘𑀯𑀸𑀲𑀺𑀨𑀭𑀲𑀼𑀓 𑀢𑀸𑀧𑀲𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀁 𑀫𑁂 𑀆𑀳𑀭𑀸’’𑀢𑀺 𑀆𑀳. 𑀲𑁄 𑀕𑀦𑁆𑀢𑁆𑀯𑀸 𑀢𑀸𑀧𑀲𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀁 𑀆𑀳𑀭𑀺. 𑀲𑁄 𑀯𑀸𑀲𑀺𑀨𑀭𑀲𑀼𑀓𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀚𑁆𑀛𑀺𑀫𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 ¶ 𑀕𑀦𑁆𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀪𑁂𑀭𑀺𑀬𑀸 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀁 𑀤𑀢𑁆𑀯𑀸 𑀪𑁂𑀭𑀺𑀁 𑀕𑀡𑁆𑀳𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀲𑁆𑀲𑀧𑀺 𑀲𑀻𑀲𑀁 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀦𑀺𑀝𑁆𑀞𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀥𑀺𑀖𑀝𑀲𑁆𑀲 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀁 𑀤𑀢𑁆𑀯𑀸 𑀤𑀥𑀺𑀖𑀝𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀫𑀡𑀺𑀓𑁆𑀔𑀦𑁆𑀥𑀜𑁆𑀘 𑀯𑀸𑀲𑀺𑀨𑀭𑀲𑀼𑀓𑀜𑁆𑀘 𑀪𑁂𑀭𑀺𑀜𑁆𑀘 𑀤𑀥𑀺𑀖𑀝𑀜𑁆𑀘 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 ‘‘𑀬𑀼𑀤𑁆𑀥𑀁 𑀯𑀸 𑀫𑁂 𑀤𑁂𑀢𑀼 𑀭𑀚𑁆𑀚𑀁 𑀯𑀸’’𑀢𑀺 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀧𑀡𑁆𑀡𑀁 𑀧𑀸𑀳𑁂𑀲𑀺.

𑀭𑀸𑀚𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸𑀯 ‘‘𑀘𑁄𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺. 𑀲𑁄 𑀏𑀓𑀁 𑀪𑁂𑀭𑀺𑀢𑀮𑀁 𑀧𑀳𑀭𑀺, 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 𑀧𑀭𑀺𑀯𑀸𑀭𑁂𑀲𑀺. 𑀭𑀜𑁆𑀜𑁄 𑀅𑀯𑀢𑁆𑀣𑀭𑀡𑀪𑀸𑀯𑀁 𑀜𑀢𑁆𑀯𑀸 𑀤𑀥𑀺𑀖𑀝𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀫𑀳𑀸𑀦𑀤𑀻 𑀧𑀯𑀢𑁆𑀢𑀺. 𑀫𑀳𑀸𑀚𑀦𑁄 𑀤𑀥𑀺𑀫𑁆𑀳𑀺 𑀑𑀲𑀻𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀯𑀸𑀲𑀺𑀨𑀭𑀲𑀼𑀓𑀁 𑀧𑀳𑀭𑀺𑀢𑁆𑀯𑀸 ‘‘𑀭𑀜𑁆𑀜𑁄 𑀲𑀻𑀲𑀁 𑀆𑀳𑀭𑀸’’𑀢𑀺 ¶ 𑀆𑀳, 𑀯𑀸𑀲𑀺𑀨𑀭𑀲𑀼𑀓𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀻𑀲𑀁 𑀆𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀧𑀺. 𑀏𑀓𑁄𑀧𑀺 𑀆𑀯𑀼𑀥𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀫𑀳𑀦𑁆𑀢𑁂𑀦 𑀩𑀮𑁂𑀦 𑀧𑀭𑀺𑀯𑀼𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀪𑀺𑀲𑁂𑀓𑀁 𑀓𑀸𑀭𑁂𑀢𑁆𑀯𑀸 𑀤𑀥𑀺𑀯𑀸𑀳𑀦𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺.

𑀢𑀲𑁆𑀲𑁂𑀓𑀤𑀺𑀯𑀲𑀁 𑀫𑀳𑀸𑀦𑀤𑀺𑀬𑀁 𑀚𑀸𑀮𑀓𑀭𑀡𑁆𑀟𑀓𑁂 𑀓𑀻𑀴𑀦𑁆𑀢𑀲𑁆𑀲 𑀓𑀡𑁆𑀡𑀫𑀼𑀡𑁆𑀟𑀤𑀳𑀢𑁄 𑀤𑁂𑀯𑀧𑀭𑀺𑀪𑁄𑀕𑀁 𑀏𑀓𑀁 𑀅𑀫𑁆𑀩𑀧𑀓𑁆𑀓𑀁 𑀆𑀕𑀦𑁆𑀢𑁆𑀯𑀸 𑀚𑀸𑀮𑁂 𑀮𑀕𑁆𑀕𑀺, 𑀚𑀸𑀮𑀁 𑀉𑀓𑁆𑀔𑀺𑀧𑀦𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀅𑀤𑀁𑀲𑀼. 𑀢𑀁 𑀫𑀳𑀦𑁆𑀢𑀁 𑀖𑀝𑀧𑁆𑀧𑀫𑀸𑀡𑀁 ¶ 𑀧𑀭𑀺𑀫𑀡𑁆𑀟𑀮𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀅𑀳𑁄𑀲𑀺. 𑀭𑀸𑀚𑀸 ‘‘𑀓𑀺𑀲𑁆𑀲 𑀨𑀮𑀁 𑀦𑀸𑀫𑁂𑀢’’𑀦𑁆𑀢𑀺 𑀯𑀦𑀘𑀭𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀫𑁆𑀩𑀨𑀮’’𑀦𑁆𑀢𑀺 𑀲𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀲 𑀅𑀝𑁆𑀞𑀺𑀁 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀭𑁄𑀧𑀸𑀧𑁂𑀢𑁆𑀯𑀸 𑀔𑀻𑀭𑁄𑀤𑀓𑁂𑀦 𑀲𑀺𑀜𑁆𑀘𑀸𑀧𑁂𑀲𑀺. 𑀭𑀼𑀓𑁆𑀔𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑀺𑀬𑁂 𑀲𑀁𑀯𑀘𑁆𑀙𑀭𑁂 𑀨𑀮𑀁 𑀅𑀤𑀸𑀲𑀺. 𑀅𑀫𑁆𑀩𑀲𑁆𑀲 𑀲𑀓𑁆𑀓𑀸𑀭𑁄 𑀫𑀳𑀸 𑀅𑀳𑁄𑀲𑀺, 𑀔𑀻𑀭𑁄𑀤𑀓𑁂𑀦 𑀲𑀺𑀜𑁆𑀘𑀦𑁆𑀢𑀺, 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑁂𑀦𑁆𑀢𑀺, 𑀫𑀸𑀮𑀸𑀤𑀸𑀫𑀸𑀦𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺, 𑀕𑀦𑁆𑀥𑀢𑁂𑀮𑁂𑀦 𑀤𑀻𑀧𑀁 𑀚𑀸𑀮𑁂𑀦𑁆𑀢𑀺, 𑀧𑀭𑀺𑀓𑁆𑀔𑁂𑀧𑁄 𑀧𑀦𑀲𑁆𑀲 𑀧𑀝𑀲𑀸𑀡𑀺𑀬𑀸 𑀅𑀳𑁄𑀲𑀺. 𑀨𑀮𑀸𑀦𑀺 𑀫𑀥𑀼𑀭𑀸𑀦𑀺 𑀲𑀼𑀯𑀡𑁆𑀡𑀯𑀡𑁆𑀡𑀸𑀦𑀺 𑀅𑀳𑁂𑀲𑀼𑀁. 𑀤𑀥𑀺𑀯𑀸𑀳𑀦𑀭𑀸𑀚𑀸 𑀅𑀜𑁆𑀜𑁂𑀲𑀁 𑀭𑀸𑀚𑀽𑀦𑀁 𑀅𑀫𑁆𑀩𑀨𑀮𑀁 𑀧𑁂𑀲𑁂𑀦𑁆𑀢𑁄 𑀅𑀝𑁆𑀞𑀺𑀢𑁄 𑀭𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀦𑀪𑀬𑁂𑀦 ¶ 𑀅𑀗𑁆𑀓𑀼𑀭𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑀸𑀦𑀁 𑀫𑀡𑁆𑀟𑀽𑀓𑀓𑀡𑁆𑀝𑀓𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑁂𑀲𑁂𑀲𑀺. 𑀢𑁂𑀲𑀁 𑀅𑀫𑁆𑀩𑀁 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀺 𑀭𑁄𑀧𑀺𑀢𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀢𑁂 ‘‘𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀸 𑀢𑀁 𑀓𑀸𑀭𑀡𑀁 𑀚𑀸𑀦𑀺𑀁𑀲𑀼.

𑀅𑀣𑁂𑀓𑁄 𑀭𑀸𑀚𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀤𑀥𑀺𑀯𑀸𑀳𑀦𑀲𑁆𑀲 𑀅𑀫𑁆𑀩𑀨𑀮𑀸𑀦𑀁 𑀭𑀲𑀁 𑀦𑀸𑀲𑁂𑀢𑁆𑀯𑀸 𑀢𑀺𑀢𑁆𑀢𑀓𑀪𑀸𑀯𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑁂𑀲𑁂𑀲𑀺. 𑀲𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 ‘‘𑀏𑀓𑁄 𑀉𑀬𑁆𑀬𑀸𑀦𑀧𑀸𑀮𑁄 𑀆𑀕𑀢𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀢𑁆𑀯𑀸 𑀢𑁂𑀦 𑀧𑀓𑁆𑀓𑁄𑀲𑀸𑀧𑀺𑀢𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀢𑁆𑀯𑀁 𑀉𑀬𑁆𑀬𑀸𑀦𑀧𑀸𑀮𑁄’’𑀢𑀺 𑀧𑀼𑀝𑁆𑀞𑁄 ‘‘𑀆𑀫, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀯𑀡𑁆𑀡𑁂𑀲𑀺. 𑀭𑀸𑀚𑀸 ‘‘𑀕𑀘𑁆𑀙 𑀅𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑁂 𑀳𑁄𑀳𑀻’’𑀢𑀺 𑀆𑀳. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀚𑀦𑀸 𑀉𑀬𑁆𑀬𑀸𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑀺. 𑀅𑀥𑀼𑀦𑀸𑀕𑀢𑁄 𑀉𑀬𑁆𑀬𑀸𑀦𑀧𑀸𑀮𑁄 𑀅𑀓𑀸𑀮𑀧𑀼𑀧𑁆𑀨𑀸𑀦𑀺 𑀲𑀼𑀝𑁆𑀞𑀼 𑀧𑀼𑀧𑁆𑀨𑀸𑀧𑁂𑀦𑁆𑀢𑁄 𑀅𑀓𑀸𑀮𑀨𑀮𑀸𑀦𑀺 𑀕𑀡𑁆𑀳𑀸𑀧𑁂𑀦𑁆𑀢𑁄 𑀉𑀬𑁆𑀬𑀸𑀦𑀁 𑀭𑀫𑀡𑀻𑀬𑀁 𑀅𑀓𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀧𑁄𑀭𑀸𑀡𑀓𑀉𑀬𑁆𑀬𑀸𑀦𑀧𑀸𑀮𑀁 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲𑁂𑀯 𑀉𑀬𑁆𑀬𑀸𑀦𑀁 𑀅𑀤𑀸𑀲𑀺. 𑀲𑁄 𑀉𑀬𑁆𑀬𑀸𑀦𑀲𑁆𑀲 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀪𑀸𑀯𑀁 𑀜𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀫𑁆𑀩𑁂 𑀘 𑀨𑀕𑁆𑀕𑀯𑀯𑀮𑁆𑀮𑀺𑀬𑁄 𑀘 𑀭𑁄𑀧𑁂𑀲𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀫𑁆𑀩𑀸 𑀯𑀟𑁆𑀠𑀺𑀁𑀲𑀼, 𑀫𑀽𑀮𑁂𑀳𑀺 𑀫𑀽𑀮𑀸𑀦𑀺, 𑀲𑀸𑀔𑀸𑀳𑀺 𑀘 𑀲𑀸𑀔𑀸 𑀲𑀁𑀲𑀝𑁆𑀞𑀸 𑀑𑀦𑀤𑁆𑀥𑀯𑀺𑀦𑀤𑁆𑀥𑀸 𑀅𑀳𑁂𑀲𑀼𑀁. 𑀢𑁂𑀦 𑀅𑀲𑀸𑀢𑀅𑀫𑀥𑀼𑀭𑀲𑀁𑀲𑀕𑁆𑀕𑁂𑀦 𑀢𑀸𑀯𑀫𑀥𑀼𑀭𑀨𑀮𑁄 ¶ 𑀅𑀫𑁆𑀩𑁄 𑀢𑀺𑀢𑁆𑀢𑀓𑁄 𑀚𑀸𑀢𑁄 𑀦𑀺𑀫𑁆𑀩𑀧𑀡𑁆𑀡𑀲𑀤𑀺𑀲𑀭𑀲𑁄, 𑀅𑀫𑁆𑀩𑀨𑀮𑀸𑀦𑀁 𑀢𑀺𑀢𑁆𑀢𑀓𑀪𑀸𑀯𑀁 𑀜𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑁄 𑀧𑀮𑀸𑀬𑀺.

𑀤𑀥𑀺𑀯𑀸𑀳𑀦𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀅𑀫𑁆𑀩𑀨𑀮𑀁 𑀔𑀸𑀤𑀦𑁆𑀢𑁄 𑀫𑀼𑀔𑁂 𑀧𑀯𑀺𑀝𑁆𑀞𑀁 𑀅𑀫𑁆𑀩𑀭𑀲𑀁 𑀦𑀺𑀫𑁆𑀩𑀓𑀲𑀝𑀁 𑀯𑀺𑀬 𑀅𑀚𑁆𑀛𑁄𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀓𑁆𑀓𑀸𑀭𑁂𑀢𑁆𑀯𑀸 𑀦𑀺𑀝𑁆𑀞𑀼𑀪𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢, 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑁄𑀭𑀸𑀡𑀓𑀧𑀭𑀺𑀳𑀸𑀭𑀢𑁄 𑀧𑀭𑀺𑀳𑀻𑀦𑀁 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺𑀲𑁆𑀲 𑀨𑀮𑀁 𑀢𑀺𑀢𑁆𑀢𑀓𑀁 𑀚𑀸𑀢𑀁, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁧.

‘‘𑀯𑀡𑁆𑀡𑀕𑀦𑁆𑀥𑀭𑀲𑀽𑀧𑁂𑀢𑁄 ¶ ¶ , 𑀅𑀫𑁆𑀩𑁄𑀬𑀁 𑀅𑀳𑀼𑀯𑀸 𑀧𑀼𑀭𑁂;

𑀢𑀫𑁂𑀯 𑀧𑀽𑀚𑀁 𑀮𑀪𑀫𑀸𑀦𑁄, 𑀓𑁂𑀦𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄’’𑀢𑀺.

𑀅𑀣𑀲𑁆𑀲 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁨.

‘‘𑀧𑀼𑀘𑀺𑀫𑀦𑁆𑀤𑀧𑀭𑀺𑀯𑀸𑀭𑁄, 𑀅𑀫𑁆𑀩𑁄 𑀢𑁂 𑀤𑀥𑀺𑀯𑀸𑀳𑀦;

𑀫𑀽𑀮𑀁 𑀫𑀽𑀮𑁂𑀦 𑀲𑀁𑀲𑀝𑁆𑀞𑀁, 𑀲𑀸𑀔𑀸 𑀲𑀸𑀔𑀸 𑀦𑀺𑀲𑁂𑀯𑀭𑁂;

𑀅𑀲𑀸𑀢𑀲𑀦𑁆𑀦𑀺𑀯𑀸𑀲𑁂𑀦, 𑀢𑁂𑀦𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄’’𑀢𑀺.

𑀢𑀢𑁆𑀣 𑀧𑀼𑀘𑀺𑀫𑀦𑁆𑀤𑀧𑀭𑀺𑀯𑀸𑀭𑁄𑀢𑀺 𑀦𑀺𑀫𑁆𑀩𑀭𑀼𑀓𑁆𑀔𑀧𑀭𑀺𑀯𑀸𑀭𑁄. 𑀲𑀸𑀔𑀸 𑀲𑀸𑀔𑀸 𑀦𑀺𑀲𑁂𑀯𑀭𑁂𑀢𑀺 𑀧𑀼𑀘𑀺𑀫𑀦𑁆𑀤𑀲𑁆𑀲 𑀲𑀸𑀔𑀸𑀬𑁄 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀬𑁄 𑀦𑀺𑀲𑁂𑀯𑀦𑁆𑀢𑀺. 𑀅𑀲𑀸𑀢𑀲𑀦𑁆𑀦𑀺𑀯𑀸𑀲𑁂𑀦𑀸𑀢𑀺 𑀅𑀫𑀥𑀼𑀭𑁂𑀳𑀺 𑀧𑀼𑀘𑀺𑀫𑀦𑁆𑀤𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀦𑀺𑀯𑀸𑀲𑁂𑀦. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀅𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄 𑀅𑀲𑀸𑀢𑀨𑀮𑁄 𑀢𑀺𑀢𑁆𑀢𑀓𑀨𑀮𑁄 𑀚𑀸𑀢𑁄𑀢𑀺.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀧𑀼𑀘𑀺𑀫𑀦𑁆𑀤𑁂 𑀘 𑀨𑀕𑁆𑀕𑀯𑀯𑀮𑁆𑀮𑀺𑀬𑁄 𑀘 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀫𑀽𑀮𑀸𑀦𑀺 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀸 𑀅𑀫𑀥𑀼𑀭𑀧𑀁𑀲𑀼𑀁 𑀳𑀭𑀸𑀧𑁂𑀢𑁆𑀯𑀸 𑀫𑀥𑀼𑀭𑀧𑀁𑀲𑀼𑀁 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀔𑀻𑀭𑁄𑀤𑀓𑀲𑀓𑁆𑀔𑀭𑁄𑀤𑀓𑀕𑀦𑁆𑀥𑁄𑀤𑀓𑁂𑀳𑀺 𑀅𑀫𑁆𑀩𑀁 𑀧𑀝𑀺𑀚𑀕𑁆𑀕𑀸𑀧𑁂𑀲𑀺. 𑀲𑁄 𑀫𑀥𑀼𑀭𑀲𑀁𑀲𑀕𑁆𑀕𑁂𑀦 𑀧𑀼𑀦 𑀫𑀥𑀼𑀭𑁄𑀯 𑀅𑀳𑁄𑀲𑀺. 𑀭𑀸𑀚𑀸 𑀧𑀓𑀢𑀺𑀉𑀬𑁆𑀬𑀸𑀦𑀧𑀸𑀮𑀲𑁆𑀲𑁂𑀯 𑀉𑀬𑁆𑀬𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀳𑀫𑁂𑀯 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀅𑀳𑁄𑀲𑀺’’𑀦𑁆𑀢𑀺.

𑀤𑀥𑀺𑀯𑀸𑀳𑀦𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁮𑁭] 𑁭. 𑀘𑀢𑀼𑀫𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸

𑀉𑀘𑁆𑀘𑁂 ¶ 𑀯𑀺𑀝𑀪𑀺𑀫𑀸𑀭𑀼𑀬𑁆𑀳𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀳𑀮𑁆𑀮𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀁 𑀓𑀺𑀭 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀓𑀣𑀸𑀬 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑁄 𑀫𑀳𑀮𑁆𑀮𑀓𑁄 𑀪𑀺𑀓𑁆𑀔𑀼 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀢𑀺𑀬𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ¶ ‘‘𑀪𑀦𑁆𑀢𑁂, 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂𑀧𑀺 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀅𑀫𑁆𑀳𑁂 𑀧𑀼𑀘𑁆𑀙𑀣𑀸’’𑀢𑀺 ¶ 𑀆𑀳. 𑀣𑁂𑀭𑀸 𑀢𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀓𑁆𑀓𑀫𑀺𑀁𑀲𑀼. 𑀣𑁂𑀭𑀸𑀦𑀁 𑀥𑀫𑁆𑀫𑀁 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀧𑀭𑀺𑀲𑀸 𑀲𑀫𑀸𑀕𑀫𑀲𑁆𑀲 𑀪𑀺𑀦𑁆𑀦𑀓𑀸𑀮𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀅𑀓𑀸𑀮𑁂 𑀆𑀕𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀓𑀸𑀭𑀡𑀁 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀏𑀢𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀅𑀓𑀣𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀓𑁆𑀓𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀅𑀣 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀸𑀧𑀺 𑀢𑀲𑁆𑀫𑀺𑀁𑀬𑁂𑀯 𑀯𑀺𑀲𑁆𑀲𑀫𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀁 𑀕𑀘𑁆𑀙𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑁂𑀲𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺. 𑀕𑀘𑁆𑀙𑀦𑁆𑀢𑀸 𑀘 𑀆𑀕𑀘𑁆𑀙𑀦𑁆𑀢𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀢𑁂𑀲𑀼 𑀭𑀼𑀓𑁆𑀔𑀕𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀲𑀼 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀞𑀢𑁆𑀯𑀸 𑀢𑁂𑀳𑀺 𑀳𑀁𑀲𑀧𑁄𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁩.

‘‘𑀉𑀘𑁆𑀘𑁂 𑀯𑀺𑀝𑀪𑀺𑀫𑀸𑀭𑀼𑀬𑁆𑀳, 𑀫𑀦𑁆𑀢𑀬𑀯𑁆𑀳𑁄 𑀭𑀳𑁄𑀕𑀢𑀸;

𑀦𑀻𑀘𑁂 𑀑𑀭𑀼𑀬𑁆𑀳 𑀫𑀦𑁆𑀢𑀯𑁆𑀳𑁄, 𑀫𑀺𑀕𑀭𑀸𑀚𑀸𑀧𑀺 𑀲𑁄𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀉𑀘𑁆𑀘𑁂 𑀯𑀺𑀝𑀪𑀺𑀫𑀸𑀭𑀼𑀬𑁆𑀳𑀸𑀢𑀺 𑀧𑀓𑀢𑀺𑀬𑀸 𑀘 𑀉𑀘𑁆𑀘𑁂 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀉𑀘𑁆𑀘𑀢𑀭𑀁 𑀏𑀓𑀁 𑀯𑀺𑀝𑀧𑀁 𑀅𑀪𑀺𑀭𑀼𑀳𑀺𑀢𑁆𑀯𑀸. 𑀫𑀦𑁆𑀢𑀬𑀯𑁆𑀳𑁄𑀢𑀺 𑀫𑀦𑁆𑀢𑁂𑀣 𑀓𑀣𑁂𑀣. 𑀦𑀻𑀘𑁂 𑀑𑀭𑀼𑀬𑁆𑀳𑀸𑀢𑀺 𑀑𑀢𑀭𑀺𑀢𑁆𑀯𑀸 𑀦𑀻𑀘𑁂 𑀞𑀸𑀦𑁂 𑀞𑀢𑁆𑀯𑀸 𑀫𑀦𑁆𑀢𑁂𑀣. 𑀫𑀺𑀕𑀭𑀸𑀚𑀸𑀧𑀺 𑀲𑁄𑀲𑁆𑀲𑀢𑀻𑀢𑀺 𑀅𑀢𑁆𑀢𑀸𑀦𑀁 𑀫𑀺𑀕𑀭𑀸𑀚𑀸𑀦𑀁 𑀓𑀢𑁆𑀯𑀸 𑀆𑀳. 𑀳𑀁𑀲𑀧𑁄𑀢𑀓𑀸 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀉𑀝𑁆𑀞𑀸𑀬 𑀘𑀺𑀢𑁆𑀢𑀓𑀽𑀝𑀫𑁂𑀯 𑀕𑀢𑀸.

𑀢𑁂𑀲𑀁 𑀕𑀢𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀲𑀺𑀗𑁆𑀕𑀸𑀮𑀲𑁆𑀲 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁪.

‘‘𑀬𑀁 𑀲𑀼𑀯𑀡𑁆𑀡𑁄 𑀲𑀼𑀯𑀡𑁆𑀡𑁂𑀦, 𑀤𑁂𑀯𑁄 𑀤𑁂𑀯𑁂𑀦 𑀫𑀦𑁆𑀢𑀬𑁂;

𑀓𑀺𑀁 𑀢𑁂𑀢𑁆𑀣 𑀘𑀢𑀼𑀫𑀝𑁆𑀞𑀲𑁆𑀲, 𑀩𑀺𑀮𑀁 𑀧𑀯𑀺𑀲 𑀚𑀫𑁆𑀩𑀼𑀓𑀸’’𑀢𑀺.

𑀢𑀢𑁆𑀣 ¶ 𑀲𑀼𑀯𑀡𑁆𑀡𑁄𑀢𑀺 𑀲𑀼𑀦𑁆𑀤𑀭𑀯𑀡𑁆𑀡𑁄. 𑀲𑀼𑀯𑀡𑁆𑀡𑁂𑀦𑀸𑀢𑀺 𑀤𑀼𑀢𑀺𑀬𑁂𑀦 𑀳𑀁𑀲𑀧𑁄𑀢𑀓𑁂𑀦. 𑀤𑁂𑀯𑁄 𑀤𑁂𑀯𑁂𑀦𑀸𑀢𑀺 𑀢𑁂𑀬𑁂𑀯 𑀤𑁆𑀯𑁂 𑀤𑁂𑀯𑁂 𑀓𑀢𑁆𑀯𑀸 𑀓𑀣𑁂𑀢𑀺. 𑀘𑀢𑀼𑀫𑀝𑁆𑀞𑀲𑁆𑀲𑀸𑀢𑀺 𑀲𑀭𑀻𑀭𑁂𑀦 ¶ 𑀚𑀸𑀢𑀺𑀬𑀸 𑀲𑀭𑁂𑀦 𑀕𑀼𑀡𑁂𑀦𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀫𑀝𑁆𑀞𑀲𑁆𑀲 𑀲𑀼𑀤𑁆𑀥𑀲𑁆𑀲𑀸𑀢𑀺 𑀅𑀓𑁆𑀔𑀭𑀢𑁆𑀣𑁄. 𑀅𑀲𑀼𑀤𑁆𑀥𑀁𑀬𑁂𑀯 𑀧𑀦 𑀢𑀁 𑀧𑀲𑀁𑀲𑀸𑀯𑀘𑀦𑁂𑀦 𑀦𑀺𑀦𑁆𑀤𑀦𑁆𑀢𑁄 𑀏𑀯𑀫𑀸𑀳, 𑀘𑀢𑀽𑀳𑀺 ¶ 𑀮𑀸𑀫𑀓𑀲𑁆𑀲 𑀓𑀺𑀁 𑀢𑁂 𑀏𑀢𑁆𑀣 𑀲𑀺𑀗𑁆𑀕𑀸𑀮𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. ‘‘𑀩𑀺𑀮𑀁 𑀧𑀯𑀺𑀲𑀸’’𑀢𑀺 𑀇𑀤𑀁 𑀩𑁄𑀥𑀺𑀲𑀢𑁆𑀢𑁄 𑀪𑁂𑀭𑀯𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀮𑀸𑀧𑁂𑀦𑁆𑀢𑁄 𑀆𑀳.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺, 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀢𑀼𑀫𑀝𑁆𑀞𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁮𑁮] 𑁮. 𑀲𑀻𑀳𑀓𑁄𑀢𑁆𑀣𑀼𑀚𑀸𑀢𑀓𑀯𑀡𑁆𑀡𑀦𑀸

𑀲𑀻𑀳𑀗𑁆𑀕𑀼𑀮𑀻 𑀲𑀻𑀳𑀦𑀔𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀁 𑀓𑀺𑀭 𑀓𑁄𑀓𑀸𑀮𑀺𑀓𑁄 𑀅𑀜𑁆𑀜𑁂𑀲𑀼 𑀩𑀳𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀲𑀼 𑀲𑀬𑀫𑁆𑀧𑀺 𑀓𑀣𑁂𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀁 𑀧𑀦 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀓𑀸𑀮𑀺𑀓𑁄 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀲𑀤𑁆𑀤𑁂𑀦 𑀧𑀸𑀓𑀝𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀸𑀓𑀝𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀲𑀻𑀳𑁄 𑀳𑀼𑀢𑁆𑀯𑀸 𑀏𑀓𑀸𑀬 𑀲𑀺𑀗𑁆𑀕𑀸𑀮𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺. 𑀲𑁄 𑀅𑀗𑁆𑀕𑀼𑀮𑀻𑀳𑀺 𑀦𑀔𑁂𑀳𑀺 𑀓𑁂𑀲𑀭𑁂𑀦 𑀯𑀡𑁆𑀡𑁂𑀦 𑀲𑀡𑁆𑀞𑀸𑀦𑁂𑀦𑀸𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀧𑀺𑀢𑀼𑀲𑀤𑀺𑀲𑁄 𑀅𑀳𑁄𑀲𑀺, 𑀲𑀤𑁆𑀤𑁂𑀦 𑀫𑀸𑀢𑀼𑀲𑀤𑀺𑀲𑁄. 𑀅𑀣𑁂𑀓𑀤𑀺𑀯𑀲𑀁 𑀤𑁂𑀯𑁂 𑀯𑀲𑁆𑀲𑀺𑀢𑁆𑀯𑀸 𑀯𑀺𑀕𑀢𑁂 𑀲𑀻𑀳𑁂𑀲𑀼 𑀦𑀤𑀺𑀢𑁆𑀯𑀸 𑀲𑀻𑀳𑀓𑀻𑀴𑀁 𑀓𑀻𑀴𑀦𑁆𑀢𑁂𑀲𑀼 𑀲𑁄𑀧𑀺 𑀢𑁂𑀲𑀁 𑀅𑀦𑁆𑀢𑀭𑁂 𑀦𑀤𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑀺𑀓𑀁 𑀦𑀸𑀤𑀁 𑀦𑀤𑀺. 𑀅𑀣𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀻𑀳𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀧𑀭𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀚𑀸𑀢𑀺𑀧𑀼𑀢𑁆𑀢𑁄 ‘‘𑀢𑀸𑀢, 𑀅𑀬𑀁 𑀲𑀻𑀳𑁄 𑀯𑀡𑁆𑀡𑀸𑀤𑀻𑀳𑀺 𑀅𑀫𑁆𑀳𑁂𑀳𑀺 ¶ 𑀲𑀫𑀸𑀦𑁄, 𑀲𑀤𑁆𑀤𑁄 𑀧𑀦𑀲𑁆𑀲 𑀅𑀜𑁆𑀜𑀸𑀤𑀺𑀲𑁄, 𑀓𑁄 𑀦𑀸𑀫𑁂𑀲𑁄’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁫.

‘‘𑀲𑀻𑀳𑀗𑁆𑀕𑀼𑀮𑀻 𑀲𑀻𑀳𑀦𑀔𑁄, 𑀲𑀻𑀳𑀧𑀸𑀤𑀧𑀢𑀺𑀝𑁆𑀞𑀺𑀢𑁄;

𑀲𑁄 𑀲𑀻𑀳𑁄 𑀲𑀻𑀳𑀲𑀗𑁆𑀖𑀫𑁆𑀳𑀺, 𑀏𑀓𑁄 𑀦𑀤𑀢𑀺 𑀅𑀜𑁆𑀜𑀣𑀸’’𑀢𑀺.

𑀢𑀢𑁆𑀣 ¶ 𑀲𑀻𑀳𑀧𑀸𑀤𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀻𑀳𑀧𑀸𑀤𑁂𑀳𑁂𑀯 𑀧𑀢𑀺𑀝𑁆𑀞𑀺𑀢𑁄. 𑀏𑀓𑁄 𑀦𑀤𑀢𑀺 𑀅𑀜𑁆𑀜𑀣𑀸𑀢𑀺 𑀏𑀓𑁄𑀯 𑀅𑀯𑀲𑁂𑀲𑀲𑀻𑀳𑁂𑀳𑀺 𑀅𑀲𑀤𑀺𑀲𑁂𑀦 𑀲𑀺𑀗𑁆𑀕𑀸𑀮𑀲𑀤𑁆𑀤𑁂𑀦 𑀦𑀤𑀦𑁆𑀢𑁄 𑀅𑀜𑁆𑀜𑀣𑀸 𑀦𑀤𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀸𑀢, 𑀏𑀲 𑀢𑀯 𑀪𑀸𑀢𑀸 𑀲𑀺𑀗𑁆𑀕𑀸𑀮𑀺𑀬𑀸 𑀧𑀼𑀢𑁆𑀢𑁄, 𑀭𑀽𑀧𑁂𑀦 𑀫𑀬𑀸 𑀲𑀤𑀺𑀲𑁄, 𑀲𑀤𑁆𑀤𑁂𑀦 𑀫𑀸𑀢𑀭𑀸 𑀲𑀤𑀺𑀲𑁄’’𑀢𑀺 𑀯𑀢𑁆𑀯𑀸 𑀲𑀺𑀗𑁆𑀕𑀸𑀮𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀇𑀥 𑀯𑀲𑀦𑁆𑀢𑁄 𑀅𑀧𑁆𑀧𑀲𑀤𑁆𑀤𑁄 𑀯𑀲, 𑀲𑀘𑁂 𑀧𑀼𑀦 𑀦𑀤𑀺𑀲𑁆𑀲𑀲𑀺, 𑀲𑀺𑀗𑁆𑀕𑀸𑀮𑀪𑀸𑀯𑀁 𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀑𑀯𑀤𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁬.

‘‘𑀫𑀸 𑀢𑁆𑀯𑀁 𑀦𑀤𑀺 𑀭𑀸𑀚𑀧𑀼𑀢𑁆𑀢, 𑀅𑀧𑁆𑀧𑀲𑀤𑁆𑀤𑁄 𑀯𑀦𑁂 𑀯𑀲;

𑀲𑀭𑁂𑀦 𑀔𑁄 𑀢𑀁 𑀚𑀸𑀦𑁂𑀬𑁆𑀬𑀼𑀁, 𑀦 𑀳𑀺 𑀢𑁂 𑀧𑁂𑀢𑁆𑀢𑀺𑀓𑁄 𑀲𑀭𑁄’’𑀢𑀺.

𑀢𑀢𑁆𑀣 𑀭𑀸𑀚𑀧𑀼𑀢𑁆𑀢𑀸𑀢𑀺 𑀲𑀻𑀳𑀲𑁆𑀲 𑀫𑀺𑀕𑀭𑀜𑁆𑀜𑁄 𑀧𑀼𑀢𑁆𑀢. 𑀇𑀫𑀜𑁆𑀘 𑀧𑀦 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀧𑀼𑀦 𑀲𑁄 𑀦𑀤𑀺𑀢𑀼𑀁 𑀦𑀸𑀫 𑀦 𑀉𑀲𑁆𑀲𑀳𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀲𑀚𑀸𑀢𑀺𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀫𑀺𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀳𑀓𑁄𑀢𑁆𑀣𑀼𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁮𑁯] 𑁯. 𑀲𑀻𑀳𑀘𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀦𑁂𑀢𑀁 𑀲𑀻𑀳𑀲𑁆𑀲 𑀦𑀤𑀺𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀜𑁆𑀜𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀲𑀭𑀪𑀜𑁆𑀜𑀁 𑀪𑀡𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀲𑁆𑀲𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀲𑀺𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀯𑀸𑀡𑀺𑀚𑁄 𑀕𑀤𑁆𑀭𑀪𑀪𑀸𑀭𑀓𑁂𑀦 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀕𑀢𑀕𑀢𑀝𑁆𑀞𑀸𑀦𑁂 𑀕𑀤𑁆𑀭𑀪𑀲𑁆𑀲 𑀧𑀺𑀝𑁆𑀞𑀺𑀢𑁄 𑀪𑀡𑁆𑀟𑀺𑀓𑀁 𑀑𑀢𑀸𑀭𑁂𑀢𑁆𑀯𑀸 𑀕𑀤𑁆𑀭𑀪𑀁 𑀲𑀻𑀳𑀘𑀫𑁆𑀫𑁂𑀦 𑀧𑀸𑀭𑀼𑀧𑀺𑀢𑁆𑀯𑀸 𑀲𑀸𑀮𑀺𑀬𑀯𑀔𑁂𑀢𑁆𑀢𑁂𑀲𑀼 ¶ 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀔𑁂𑀢𑁆𑀢𑀭𑀓𑁆𑀔𑀓𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀻𑀳𑁄’’𑀢𑀺 𑀲𑀜𑁆𑀜𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀯𑀸𑀡𑀺𑀚𑁄 𑀏𑀓𑀲𑁆𑀫𑀺𑀁 𑀕𑀸𑀫𑀤𑁆𑀯𑀸𑀭𑁂 𑀦𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀧𑀸𑀢𑀭𑀸𑀲𑀁 𑀧𑀘𑀸𑀧𑁂𑀦𑁆𑀢𑁄 𑀢𑀢𑁄 𑀕𑀤𑁆𑀭𑀪𑀁 𑀲𑀻𑀳𑀘𑀫𑁆𑀫𑀁 𑀧𑀸𑀭𑀼𑀧𑀺𑀢𑁆𑀯𑀸 𑀬𑀯𑀔𑁂𑀢𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀔𑁂𑀢𑁆𑀢𑀭𑀓𑁆𑀔𑀓𑀸 ‘‘𑀲𑀻𑀳𑁄’’𑀢𑀺 𑀲𑀜𑁆𑀜𑀸𑀬 𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀼𑀁. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀆𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀲𑀗𑁆𑀔𑁂 𑀥𑀫𑁂𑀦𑁆𑀢𑀸 𑀪𑁂𑀭𑀺𑀬𑁄 𑀯𑀸𑀤𑁂𑀦𑁆𑀢𑀸 𑀔𑁂𑀢𑁆𑀢𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀉𑀦𑁆𑀦𑀤𑀺𑀁𑀲𑀼, 𑀕𑀤𑁆𑀭𑀪𑁄 𑀫𑀭𑀡𑀪𑀬𑀪𑀻𑀢𑁄 𑀕𑀤𑁆𑀭𑀪𑀭𑀯𑀁 𑀭𑀯𑀺. 𑀅𑀣𑀲𑁆𑀲 𑀕𑀤𑁆𑀭𑀪𑀪𑀸𑀯𑀁 𑀜𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁭.

‘‘𑀦𑁂𑀢𑀁 ¶ 𑀲𑀻𑀳𑀲𑁆𑀲 𑀦𑀤𑀺𑀢𑀁, 𑀦 𑀩𑁆𑀬𑀕𑁆𑀖𑀲𑁆𑀲 𑀦 𑀤𑀻𑀧𑀺𑀦𑁄;

𑀧𑀸𑀭𑀼𑀢𑁄 𑀲𑀻𑀳𑀘𑀫𑁆𑀫𑁂𑀦, 𑀚𑀫𑁆𑀫𑁄 𑀦𑀤𑀢𑀺 𑀕𑀤𑁆𑀭𑀪𑁄’’𑀢𑀺.

𑀢𑀢𑁆𑀣 𑀚𑀫𑁆𑀫𑁄𑀢𑀺 𑀮𑀸𑀫𑀓𑁄. 𑀕𑀸𑀫𑀯𑀸𑀲𑀺𑀦𑁄𑀧𑀺 𑀢𑀲𑁆𑀲 𑀕𑀤𑁆𑀭𑀪𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀅𑀝𑁆𑀞𑀻𑀦𑀺 𑀪𑀜𑁆𑀚𑀦𑁆𑀢𑀸 𑀧𑁄𑀣𑁂𑀢𑁆𑀯𑀸 𑀲𑀻𑀳𑀘𑀫𑁆𑀫𑀁 𑀆𑀤𑀸𑀬 𑀅𑀕𑀫𑀁𑀲𑀼.

𑀅𑀣 𑀲𑁄 𑀯𑀸𑀡𑀺𑀚𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀩𑁆𑀬𑀲𑀦𑀪𑀸𑀯𑀧𑁆𑀧𑀢𑁆𑀢𑀁 𑀕𑀤𑁆𑀭𑀪𑀁 𑀤𑀺𑀲𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁮.

‘‘𑀘𑀺𑀭𑀫𑁆𑀧𑀺 𑀔𑁄 𑀢𑀁 𑀔𑀸𑀤𑁂𑀬𑁆𑀬, 𑀕𑀤𑁆𑀭𑀪𑁄 𑀳𑀭𑀺𑀢𑀁 𑀬𑀯𑀁;

𑀧𑀸𑀭𑀼𑀢𑁄 𑀲𑀻𑀳𑀘𑀫𑁆𑀫𑁂𑀦, 𑀭𑀯𑀫𑀸𑀦𑁄𑀯 𑀤𑀽𑀲𑀬𑀻’’𑀢𑀺.

𑀢𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀬𑀁 𑀕𑀤𑁆𑀭𑀪𑁄 𑀅𑀢𑁆𑀢𑀦𑁄 𑀕𑀤𑁆𑀭𑀪𑀪𑀸𑀯𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀲𑀻𑀳𑀘𑀫𑁆𑀫𑁂𑀦 𑀧𑀸𑀭𑀼𑀢𑁄 𑀘𑀺𑀭𑀫𑁆𑀧𑀺 𑀓𑀸𑀮𑀁 𑀳𑀭𑀺𑀢𑀁 𑀬𑀯𑀁 𑀔𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀭𑀯𑀫𑀸𑀦𑁄𑀯 𑀤𑀽𑀲𑀬𑀻𑀢𑀺 𑀅𑀢𑁆𑀢𑀦𑁄 𑀧𑀦 𑀕𑀤𑁆𑀭𑀪𑀭𑀯𑀁 𑀭𑀯𑀫𑀸𑀦𑁄𑀯𑁂𑀲 𑀅𑀢𑁆𑀢𑀸𑀦𑀁 𑀤𑀽𑀲𑀬𑀺, 𑀦𑀢𑁆𑀣𑁂𑀢𑁆𑀣 𑀲𑀻𑀳𑀘𑀫𑁆𑀫𑀲𑁆𑀲 𑀤𑁄𑀲𑁄𑀢𑀺. 𑀢𑀲𑁆𑀫𑀺𑀁 𑀏𑀯𑀁 𑀓𑀣𑁂𑀦𑁆𑀢𑁂𑀬𑁂𑀯 𑀕𑀤𑁆𑀭𑀪𑁄 𑀢𑀢𑁆𑀣𑁂𑀯 𑀦𑀺𑀧𑀦𑁆𑀦𑁄 𑀫𑀭𑀺, 𑀯𑀸𑀡𑀺𑀚𑁄𑀧𑀺 𑀢𑀁 𑀧𑀳𑀸𑀬 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀸𑀡𑀺𑀚𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀕𑀤𑁆𑀭𑀪𑁄 𑀓𑁄𑀓𑀸𑀮𑀺𑀓𑁄, 𑀧𑀡𑁆𑀟𑀺𑀢𑀓𑀲𑁆𑀲𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀳𑀘𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁯𑁦] 𑁧𑁦. 𑀲𑀻𑀮𑀸𑀦𑀺𑀲𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀧𑀲𑁆𑀲 ¶ ¶ 𑀲𑀤𑁆𑀥𑀸𑀬 𑀲𑀻𑀮𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀤𑁆𑀥𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀏𑀓𑀤𑀺𑀯𑀲𑀁 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑁄 𑀲𑀸𑀬𑀁 𑀅𑀘𑀺𑀭𑀯𑀢𑀺𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀸𑀯𑀺𑀓𑁂 𑀦𑀸𑀯𑀁 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀕𑀢𑁂 𑀢𑀺𑀢𑁆𑀣𑁂 𑀦𑀸𑀯𑀁 𑀅𑀤𑀺𑀲𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺, 𑀧𑀸𑀤𑀸 𑀉𑀤𑀓𑀫𑁆𑀳𑀺 𑀦 𑀑𑀲𑀻𑀤𑀺𑀁𑀲𑀼. 𑀲𑁄 𑀧𑀣𑀯𑀻𑀢𑀮𑁂 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀯𑁂𑀫𑀚𑁆𑀛𑀁 𑀕𑀢𑀓𑀸𑀮𑁂 𑀯𑀻𑀘𑀺𑀁 𑀧𑀲𑁆𑀲𑀺. 𑀅𑀣𑀲𑁆𑀲 𑀩𑀼𑀤𑁆𑀥𑀸𑀭𑀫𑁆𑀫𑀡𑀸 𑀧𑀻𑀢𑀺 𑀫𑀦𑁆𑀤𑀸 𑀚𑀸𑀢𑀸, 𑀧𑀸𑀤𑀸 𑀑𑀲𑀻𑀤𑀺𑀢𑀼𑀁 𑀆𑀭𑀪𑀺𑀁𑀲𑀼, 𑀲𑁄 𑀧𑀼𑀦 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂𑀦𑁂𑀯 𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ¶ ‘‘𑀉𑀧𑀸𑀲𑀓, 𑀓𑀘𑁆𑀘𑀺 𑀫𑀕𑁆𑀕𑀁 𑀆𑀕𑀘𑁆𑀙𑀦𑁆𑀢𑁄 𑀅𑀧𑁆𑀧𑀓𑀺𑀮𑀫𑀣𑁂𑀦 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀧𑀢𑀺𑀝𑁆𑀞𑀁 𑀮𑀪𑀺𑀢𑁆𑀯𑀸 𑀧𑀣𑀯𑀺𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄 𑀧𑀦, 𑀉𑀧𑀸𑀲𑀓, 𑀢𑁆𑀯𑀜𑁆𑀜𑁂𑀯 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀢𑀺𑀝𑁆𑀞𑀁 𑀮𑀤𑁆𑀥𑁄, 𑀧𑀼𑀩𑁆𑀩𑁂𑀧𑀺 𑀉𑀧𑀸𑀲𑀓𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀸 𑀧𑀢𑀺𑀝𑁆𑀞𑀁 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀏𑀓𑁂𑀦 𑀦𑁆𑀳𑀸𑀧𑀺𑀢𑀓𑀼𑀝𑀼𑀫𑁆𑀩𑀺𑀓𑁂𑀦 𑀲𑀤𑁆𑀥𑀺𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺, 𑀢𑀲𑁆𑀲 𑀦𑁆𑀳𑀸𑀧𑀺𑀢𑀲𑁆𑀲 𑀪𑀭𑀺𑀬𑀸 ‘‘𑀅𑀬𑁆𑀬, 𑀇𑀫𑀲𑁆𑀲 𑀲𑀼𑀔𑀤𑀼𑀓𑁆𑀔𑀁 𑀢𑀯 𑀪𑀸𑀭𑁄’’𑀢𑀺 𑀦𑁆𑀳𑀸𑀧𑀺𑀢𑀁 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀳𑀢𑁆𑀣𑁂 𑀦𑀺𑀓𑁆𑀔𑀺𑀧𑀺. 𑀅𑀣 𑀲𑀸 𑀦𑀸𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀼𑀤𑁆𑀤𑀫𑀚𑁆𑀛𑁂 𑀪𑀺𑀦𑁆𑀦𑀸, 𑀢𑁂𑀧𑀺 𑀤𑁆𑀯𑁂 𑀚𑀦𑀸 𑀏𑀓𑀲𑁆𑀫𑀺𑀁 𑀨𑀮𑀓𑁂 𑀦𑀺𑀧𑀦𑁆𑀦𑀸 𑀏𑀓𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀣 𑀲𑁄 𑀦𑁆𑀳𑀸𑀧𑀺𑀢𑁄 𑀲𑀓𑀼𑀡𑁂 𑀫𑀸𑀭𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 𑀉𑀧𑀸𑀲𑀓𑀲𑁆𑀲𑀧𑀺 𑀤𑁂𑀢𑀺. 𑀉𑀧𑀸𑀲𑀓𑁄 ‘‘𑀅𑀮𑀁 𑀫𑀬𑁆𑀳’’𑀦𑁆𑀢𑀺 𑀦 𑀔𑀸𑀤𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀫𑁆𑀳𑀸𑀓𑀁 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀲𑀭𑀡𑀸𑀦𑀺 𑀅𑀜𑁆𑀜𑀸 𑀧𑀢𑀺𑀝𑁆𑀞𑀸 𑀦𑀢𑁆𑀣𑀻’’𑀢𑀺. 𑀲𑁄 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺. 𑀅𑀣𑀲𑁆𑀲𑀸𑀦𑀼𑀲𑀭𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀤𑀻𑀧𑀓𑁂 𑀦𑀺𑀩𑁆𑀩𑀢𑁆𑀢𑁄 𑀦𑀸𑀕𑀭𑀸𑀚𑀸 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀫𑀳𑀸𑀦𑀸𑀯𑀁 𑀓𑀢𑁆𑀯𑀸 𑀫𑀸𑀧𑁂𑀲𑀺, 𑀲𑀫𑀼𑀤𑁆𑀤𑀤𑁂𑀯𑀢𑀸 ¶ 𑀦𑀺𑀬𑀸𑀫𑀓𑁄 𑀅𑀳𑁄𑀲𑀺, 𑀦𑀸𑀯𑀸 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀽𑀭𑀬𑀺𑀢𑁆𑀣, 𑀢𑀬𑁄 𑀓𑀽𑀧𑀓𑀸 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀸 𑀅𑀳𑁂𑀲𑀼𑀁, 𑀲𑀼𑀯𑀡𑁆𑀡𑀫𑀬𑁄 𑀮𑀗𑁆𑀓𑀸𑀭𑁄, 𑀭𑀚𑀢𑀫𑀬𑀸𑀦𑀺 𑀬𑁄𑀢𑁆𑀢𑀸𑀦𑀺, 𑀲𑀼𑀯𑀡𑁆𑀡𑀫𑀬𑀸𑀦𑀺 𑀬𑀝𑁆𑀞𑀺𑀨𑀺𑀬𑀸𑀦𑀺.

𑀲𑀫𑀼𑀤𑁆𑀤𑀤𑁂𑀯𑀢𑀸 ¶ 𑀦𑀸𑀯𑀸𑀬 𑀞𑀢𑁆𑀯𑀸 ‘‘𑀅𑀢𑁆𑀣𑀺 𑀚𑀫𑁆𑀩𑀼𑀤𑀻𑀧𑀕𑀫𑀺𑀓𑀸’’𑀢𑀺 𑀖𑁄𑀲𑁂𑀲𑀺. 𑀉𑀧𑀸𑀲𑀓𑁄 ‘‘𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀢𑁂𑀦 𑀳𑀺 𑀏𑀳𑀺, 𑀦𑀸𑀯𑀁 𑀅𑀪𑀺𑀭𑀼𑀳𑀸𑀢𑀺. 𑀲𑁄 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑁆𑀳𑀸𑀧𑀺𑀢𑀁 𑀧𑀓𑁆𑀓𑁄𑀲𑀺, 𑀲𑀫𑀼𑀤𑁆𑀤𑀤𑁂𑀯𑀢𑀸 𑁋 ‘‘𑀢𑀼𑀬𑁆𑀳𑀜𑁆𑀜𑁂𑀯 𑀮𑀩𑁆𑀪𑀢𑀺, 𑀦 𑀏𑀢𑀲𑁆𑀲𑀸’’𑀢𑀺 𑀆𑀳. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀏𑀢𑀲𑁆𑀲 𑀲𑀻𑀮𑀕𑀼𑀡𑀸𑀘𑀸𑀭𑁄 𑀦𑀢𑁆𑀣𑀺, 𑀢𑀁 𑀓𑀸𑀭𑀡𑀁. 𑀅𑀳𑀜𑁆𑀳𑀺 𑀢𑀼𑀬𑁆𑀳𑀁 𑀦𑀸𑀯𑀁 𑀆𑀳𑀭𑀺𑀁, 𑀦 𑀏𑀢𑀲𑁆𑀲𑀸’’𑀢𑀺. ‘‘𑀳𑁄𑀢𑀼, 𑀅𑀳𑀁 𑀅𑀢𑁆𑀢𑀦𑀸 𑀤𑀺𑀦𑁆𑀦𑀤𑀸𑀦𑁂𑀦 𑀭𑀓𑁆𑀔𑀺𑀢𑀲𑀻𑀮𑁂𑀦 𑀪𑀸𑀯𑀺𑀢𑀪𑀸𑀯𑀦𑀸𑀬 𑀏𑀢𑀲𑁆𑀲 𑀧𑀢𑁆𑀢𑀺𑀁 𑀤𑀫𑁆𑀫𑀻’’𑀢𑀺. 𑀦𑁆𑀳𑀸𑀧𑀺𑀢𑁄 ‘‘𑀅𑀦𑀼𑀫𑁄𑀤𑀸𑀫𑀺, 𑀲𑀸𑀫𑀻’’𑀢𑀺 𑀆𑀳. 𑀤𑁂𑀯𑀢𑀸 ‘‘𑀇𑀤𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀫𑁆𑀧𑀺 𑀆𑀭𑁄𑀧𑁂𑀢𑁆𑀯𑀸 𑀉𑀪𑁄𑀧𑀺 𑀚𑀦𑁂 𑀲𑀫𑀼𑀤𑁆𑀤𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀦𑀤𑀺𑀬𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀕𑁂𑀳𑁂 𑀥𑀦𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢𑁂𑀳𑁂𑀯 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀦𑀸𑀫 𑀓𑀸𑀢𑀩𑁆𑀩𑁄. 𑀲𑀘𑁂 𑀳𑀺 𑀇𑀫𑀲𑁆𑀲 𑀦𑁆𑀳𑀸𑀧𑀺𑀢𑀲𑁆𑀲 𑀇𑀫𑀺𑀦𑀸 𑀉𑀧𑀸𑀲𑀓𑁂𑀦 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀦𑀸𑀪𑀯𑀺𑀲𑁆𑀲, 𑀲𑀫𑀼𑀤𑁆𑀤𑀫𑀚𑁆𑀛𑁂𑀬𑁂𑀯 𑀦𑀲𑁆𑀲𑀺𑀲𑁆𑀲𑀸’’𑀢𑀺 𑀧𑀡𑁆𑀟𑀺𑀢𑀲𑀁𑀲𑀕𑁆𑀕𑀕𑀼𑀡𑀁 𑀓𑀣𑀬𑀫𑀸𑀦𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁭𑁯.

‘‘𑀧𑀲𑁆𑀲 𑀲𑀤𑁆𑀥𑀸𑀬 𑀲𑀻𑀮𑀲𑁆𑀲, 𑀘𑀸𑀕𑀲𑁆𑀲 𑀘 𑀅𑀬𑀁 𑀨𑀮𑀁;

𑀦𑀸𑀕𑁄 𑀦𑀸𑀯𑀸𑀬 𑀯𑀡𑁆𑀡𑁂𑀦, 𑀲𑀤𑁆𑀥𑀁 𑀯𑀳𑀢𑀼𑀧𑀸𑀲𑀓𑀁.

𑁮𑁦.

‘‘𑀲𑀩𑁆𑀪𑀺𑀭𑁂𑀯 ¶ 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀜𑁆𑀳𑀺 𑀲𑀦𑁆𑀦𑀺𑀯𑀸𑀲𑁂𑀦, 𑀲𑁄𑀢𑁆𑀣𑀺𑀁 𑀕𑀘𑁆𑀙𑀢𑀺 𑀦𑁆𑀳𑀸𑀧𑀺𑀢𑁄’’𑀢𑀺.

𑀢𑀢𑁆𑀣 𑀧𑀲𑁆𑀲𑀸𑀢𑀺 𑀓𑀜𑁆𑀘𑀺 𑀅𑀦𑀺𑀬𑀫𑁂𑀢𑁆𑀯𑀸 𑀧𑀲𑁆𑀲𑀣𑀸𑀢𑀺 𑀆𑀮𑀧𑀢𑀺. 𑀲𑀤𑁆𑀥𑀸𑀬𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀲𑀤𑁆𑀥𑀸𑀬. 𑀲𑀻𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀘𑀸𑀕𑀲𑁆𑀲𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀲𑁆𑀲 𑀘𑁂𑀯 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀲𑁆𑀲 𑀘. 𑀅𑀬𑀁 𑀨𑀮𑀦𑁆𑀢𑀺 𑀇𑀤𑀁 𑀨𑀮𑀁, 𑀕𑀼𑀡𑀁 𑀆𑀦𑀺𑀲𑀁𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑀸𑀕𑀲𑁆𑀲 𑀘 𑀨𑀮𑀁 𑀧𑀲𑁆𑀲, 𑀅𑀬𑀁 𑀦𑀸𑀕𑁄 𑀦𑀸𑀯𑀸𑀬 𑀯𑀡𑁆𑀡𑁂𑀦𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀯𑀸𑀬 𑀯𑀡𑁆𑀡𑁂𑀦𑀸𑀢𑀺 𑀦𑀸𑀯𑀸𑀬 𑀲𑀡𑁆𑀞𑀸𑀦𑁂𑀦. 𑀲𑀤𑁆𑀥𑀦𑁆𑀢𑀺 𑀢𑀻𑀲𑀼 𑀭𑀢𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑀁. 𑀲𑀩𑁆𑀪𑀺𑀭𑁂𑀯𑀸𑀢𑀺 𑀧𑀡𑁆𑀟𑀺𑀢𑁂𑀳𑀺𑀬𑁂𑀯 ¶ . 𑀲𑀫𑀸𑀲𑁂𑀣𑀸𑀢𑀺 𑀏𑀓𑀢𑁄 𑀆𑀯𑀲𑁂𑀬𑁆𑀬, 𑀉𑀧𑀯𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀩𑁆𑀩𑁂𑀣𑀸𑀢𑀺 𑀓𑀭𑁂𑀬𑁆𑀬. 𑀲𑀦𑁆𑀣𑀯𑀦𑁆𑀢𑀺 𑀫𑀺𑀢𑁆𑀢𑀲𑀦𑁆𑀣𑀯𑀁. 𑀢𑀡𑁆𑀳𑀸𑀲𑀦𑁆𑀣𑀯𑁄 𑀧𑀦 𑀓𑁂𑀦𑀘𑀺𑀧𑀺 𑀲𑀤𑁆𑀥𑀺𑀁 𑀦 𑀓𑀸𑀢𑀩𑁆𑀩𑁄. 𑀦𑁆𑀳𑀸𑀧𑀺𑀢𑁄𑀢𑀺 𑀦𑁆𑀳𑀸𑀧𑀺𑀢𑀓𑀼𑀝𑀼𑀫𑁆𑀩𑀺𑀓𑁄. ‘‘𑀦𑀳𑀸𑀧𑀺𑀢𑁄’’𑀢𑀺𑀧𑀺 𑀧𑀸𑀞𑁄.

𑀏𑀯𑀁 𑀲𑀫𑀼𑀤𑁆𑀤𑀤𑁂𑀯𑀢𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀑𑀯𑀤𑀺𑀢𑁆𑀯𑀸 𑀦𑀸𑀕𑀭𑀸𑀚𑀸𑀦𑀁 𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀲𑁄𑀢𑀸𑀧𑀦𑁆𑀦𑀉𑀧𑀸𑀲𑀓𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀦𑀸𑀕𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀫𑀼𑀤𑁆𑀤𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀮𑀸𑀦𑀺𑀲𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀅𑀲𑀤𑀺𑀲𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀲𑀤𑀺𑀲𑀜𑁆𑀘 𑀲𑀗𑁆𑀕𑀸𑀫𑀁, 𑀯𑀸𑀮𑁄𑀤𑀓𑀁 𑀕𑀺𑀭𑀺𑀤𑀢𑁆𑀢𑀁;

𑀦𑀪𑀺𑀭𑀢𑀺 𑀤𑀥𑀺𑀯𑀸𑀳𑀁, 𑀘𑀢𑀼𑀫𑀝𑁆𑀞𑀁 𑀲𑀻𑀳𑀓𑁄𑀝𑁆𑀞𑀁;

𑀲𑀻𑀳𑀘𑀫𑁆𑀫𑀁 𑀲𑀻𑀮𑀸𑀦𑀺𑀲𑀁𑀲𑀁.

𑁫. 𑀭𑀼𑀳𑀓𑀯𑀕𑁆𑀕𑁄

[𑁧𑁯𑁧] 𑁧. 𑀭𑀼𑀳𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 ¶ 𑀭𑀼𑀳𑀓 𑀙𑀺𑀦𑁆𑀦𑀸𑀧𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀅𑀝𑁆𑀞𑀓𑀦𑀺𑀧𑀸𑀢𑁂 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁮.𑁬𑁦 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀇𑀢𑁆𑀣𑀻 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁂 𑀏𑀲𑀸 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀮𑀚𑁆𑀚𑀸𑀧𑁂𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀔𑀫𑀦𑀸𑀓𑀸𑀭𑀁 𑀓𑀸𑀭𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀭𑀼𑀳𑀓𑁄 𑀦𑀸𑀫 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀧𑀼𑀭𑀸𑀡𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀪𑀭𑀺𑀬𑀸. 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑁆𑀲𑀪𑀡𑁆𑀟𑀓𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀲𑁆𑀲𑀁 𑀅𑀤𑀸𑀲𑀺. 𑀲𑁄 𑀢𑀁 𑀅𑀲𑁆𑀲𑀁 𑀆𑀭𑀼𑀬𑁆𑀳 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀅𑀮𑀗𑁆𑀓𑀢𑀅𑀲𑁆𑀲𑀲𑁆𑀲 𑀧𑀺𑀝𑁆𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀆𑀕𑀘𑁆𑀙𑀦𑁆𑀢𑀜𑁆𑀘 𑀤𑀺𑀲𑁆𑀯𑀸 𑀢𑀳𑀺𑀁 𑀢𑀳𑀺𑀁 𑀞𑀺𑀢𑀸 𑀫𑀦𑀼𑀲𑁆𑀲𑀸 ‘‘𑀅𑀳𑁄 ¶ 𑀅𑀲𑁆𑀲𑀲𑁆𑀲 𑀭𑀽𑀧𑀁, 𑀅𑀳𑁄 𑀅𑀲𑁆𑀲𑁄 𑀲𑁄𑀪𑀢𑀻’’𑀢𑀺 𑀅𑀲𑁆𑀲𑀫𑁂𑀯 𑀧𑀲𑀁𑀲𑀦𑁆𑀢𑀺. 𑀲𑁄 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀪𑀭𑀺𑀬𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀤𑁆𑀤𑁂 ¶ , 𑀅𑀫𑁆𑀳𑀸𑀓𑀁 𑀅𑀲𑁆𑀲𑁄 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀞𑀺𑀢𑀸 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀅𑀲𑁆𑀲𑀫𑁂𑀯 𑀯𑀡𑁆𑀡𑁂𑀦𑁆𑀢𑀻’’𑀢𑀺. 𑀲𑀸 𑀧𑀦 𑀩𑁆𑀭𑀸𑀳𑁆𑀫𑀡𑀻 𑀣𑁄𑀓𑀁 𑀙𑀺𑀦𑁆𑀦𑀺𑀓𑀸 𑀥𑀼𑀢𑁆𑀢𑀺𑀓𑀥𑀸𑀢𑀼𑀓𑀸, 𑀢𑁂𑀦 𑀦𑀁 𑀏𑀯𑀫𑀸𑀳 𑁋 ‘‘𑀅𑀬𑁆𑀬, 𑀢𑁆𑀯𑀁 𑀅𑀲𑁆𑀲𑀲𑁆𑀲 𑀲𑁄𑀪𑀦𑀓𑀸𑀭𑀡𑀁 𑀦 𑀚𑀸𑀦𑀸𑀲𑀺, 𑀅𑀬𑀁 𑀅𑀲𑁆𑀲𑁄 𑀅𑀢𑁆𑀢𑀦𑁄 𑀅𑀮𑀗𑁆𑀓𑀢𑀁 𑀅𑀲𑁆𑀲𑀪𑀡𑁆𑀟𑀓𑀁 𑀦𑀺𑀲𑁆𑀲𑀸𑀬 𑀲𑁄𑀪𑀢𑀺, 𑀲𑀘𑁂 𑀢𑁆𑀯𑀫𑁆𑀧𑀺 𑀅𑀲𑁆𑀲𑁄 𑀯𑀺𑀬 𑀲𑁄𑀪𑀺𑀢𑀼𑀓𑀸𑀫𑁄 𑀅𑀲𑁆𑀲𑀪𑀡𑁆𑀟𑀓𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀭𑀼𑀬𑁆𑀳 𑀅𑀲𑁆𑀲𑁄 𑀯𑀺𑀬 𑀧𑀸𑀤𑁂 𑀓𑁄𑀝𑁆𑀝𑀬𑀫𑀸𑀦𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲, 𑀭𑀸𑀚𑀸𑀧𑀺 𑀢𑀁 𑀯𑀡𑁆𑀡𑀬𑀺𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀢𑀜𑁆𑀜𑁂𑀯 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀻’’𑀢𑀺.

𑀲𑁄 𑀉𑀫𑁆𑀫𑀢𑁆𑀢𑀓𑀚𑀸𑀢𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀲𑀸 𑀫𑀁 𑀯𑀤𑀢𑀻’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀢𑀣𑀸𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀬𑁂 𑀬𑁂 𑀧𑀲𑁆𑀲𑀦𑁆𑀢𑀺, 𑀢𑁂 𑀢𑁂 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀸 ‘‘𑀲𑁄𑀪𑀢𑀺 𑀆𑀘𑀭𑀺𑀬𑁄’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀧𑀦 𑀦𑀁 ‘‘𑀓𑀺𑀁, 𑀆𑀘𑀭𑀺𑀬, 𑀧𑀺𑀢𑁆𑀢𑀁 𑀢𑁂 𑀓𑀼𑀧𑀺𑀢𑀁 ¶ , 𑀉𑀫𑁆𑀫𑀢𑁆𑀢𑀓𑁄𑀲𑀺 𑀚𑀸𑀢𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀮𑀚𑁆𑀚𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀼𑀢𑁆𑀢𑀁 𑀫𑀬𑀸 𑀓𑀢’’𑀦𑁆𑀢𑀺 𑀮𑀚𑁆𑀚𑀺𑀢𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀢𑀸𑀬𑀫𑁆𑀳𑀺 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀅𑀦𑁆𑀢𑀭𑁂 𑀮𑀚𑁆𑀚𑀸𑀧𑀺𑀢𑁄, 𑀧𑁄𑀣𑁂𑀢𑁆𑀯𑀸 𑀢𑀁 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀸𑀫𑀻’’𑀢𑀺 𑀕𑁂𑀳𑀁 𑀅𑀕𑀫𑀸𑀲𑀺. 𑀥𑀼𑀢𑁆𑀢𑀺𑀓𑀩𑁆𑀭𑀸𑀳𑁆𑀫𑀡𑀻 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀆𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀧𑀼𑀭𑁂𑀢𑀭𑀜𑁆𑀜𑁂𑀯 𑀘𑀽𑀴𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀘𑀢𑀽𑀳𑀧𑀜𑁆𑀘𑀸𑀳𑀁 𑀢𑀢𑁆𑀣𑁂𑀯 𑀅𑀳𑁄𑀲𑀺. 𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀫𑀸𑀢𑀼𑀕𑀸𑀫𑀲𑁆𑀲 𑀦𑀸𑀫 𑀤𑁄𑀲𑁄 𑀳𑁄𑀢𑀺𑀬𑁂𑀯, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀔𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀔𑀫𑀸𑀧𑀦𑀢𑁆𑀣𑀸𑀬 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁧.

‘‘𑀅𑀧𑀺 𑀭𑀼𑀳𑀓 𑀙𑀺𑀦𑁆𑀦𑀸𑀧𑀺, 𑀚𑀺𑀬𑀸 𑀲𑀦𑁆𑀥𑀻𑀬𑀢𑁂 𑀧𑀼𑀦;

𑀲𑀦𑁆𑀥𑀻𑀬𑀲𑁆𑀲𑀼 𑀧𑀼𑀭𑀸𑀡𑀺𑀬𑀸, 𑀫𑀸 𑀓𑁄𑀥𑀲𑁆𑀲 𑀯𑀲𑀁 𑀕𑀫𑀻’’𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑁄 𑀭𑀼𑀳𑀓, 𑀦𑀦𑀼 𑀙𑀺𑀦𑁆𑀦𑀸𑀧𑀺 𑀥𑀦𑀼𑀚𑀺𑀬𑀸 𑀧𑀼𑀦 𑀲𑀦𑁆𑀥𑀻𑀬𑀢𑀺 𑀖𑀝𑀻𑀬𑀢𑀺, 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀼𑀭𑀸𑀡𑀺𑀬𑀸 𑀲𑀤𑁆𑀥𑀺𑀁 𑀲𑀦𑁆𑀥𑀻𑀬𑀲𑁆𑀲𑀼, 𑀓𑁄𑀥𑀲𑁆𑀲 𑀯𑀲𑀁 𑀫𑀸 𑀕𑀫𑀻𑀢𑀺.

𑀢𑀁 ¶ ¶ 𑀲𑀼𑀢𑁆𑀯𑀸 𑀭𑀼𑀳𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁨.

‘‘𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀸𑀓𑁂𑀲𑀼, 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀸𑀭𑀺𑀲𑀼;

𑀅𑀜𑁆𑀜𑀁 𑀚𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀮𑀜𑁆𑀜𑁂𑀯 𑀧𑀼𑀭𑀸𑀡𑀺𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀥𑀦𑀼𑀓𑀸𑀭𑀫𑀼𑀤𑀼𑀯𑀸𑀓𑁂𑀲𑀼 𑀘 𑀚𑀺𑀬𑀓𑀸𑀭𑀓𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀜𑁆𑀜𑀁 𑀚𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀇𑀫𑀸𑀬 𑀙𑀺𑀦𑁆𑀦𑀸𑀬 𑀧𑀼𑀭𑀸𑀡𑀺𑀬𑀸 𑀚𑀺𑀬𑀸𑀬 𑀅𑀮𑀁, 𑀦𑀢𑁆𑀣𑀺 𑀫𑁂 𑀓𑁄𑀘𑀺 𑀅𑀢𑁆𑀣𑁄𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀁 𑀦𑀻𑀳𑀭𑀺𑀢𑁆𑀯𑀸 𑀅𑀜𑁆𑀜𑀁 𑀩𑁆𑀭𑀸𑀳𑁆𑀫𑀡𑀺𑀁 𑀆𑀦𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸, 𑀩𑁆𑀭𑀸𑀳𑁆𑀫𑀡𑀻, 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀭𑀼𑀳𑀓𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀼𑀳𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁯𑁨] 𑁨. 𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀯𑀡𑁆𑀡𑀦𑀸

𑀇𑀢𑁆𑀣𑀻 ¶ 𑀲𑀺𑀬𑀸 𑀭𑀽𑀧𑀯𑀢𑀻𑀢𑀺 𑀇𑀤𑀁 𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀁 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁯𑁩] 𑁩. 𑀘𑀽𑀴𑀧𑀤𑀼𑀫𑀚𑀸𑀢𑀓𑀯𑀡𑁆𑀡𑀦𑀸

𑀅𑀬𑀫𑁂𑀯 𑀲𑀸 𑀅𑀳𑀫𑀧𑀺 𑀲𑁄 𑀅𑀦𑀜𑁆𑀜𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑁂 (𑀚𑀸. 𑁨.𑁨𑁦.𑁫𑁭 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑁄 𑀧𑀦 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺 𑀯𑀢𑁆𑀯𑀸 ‘‘𑀓𑁂𑀦 𑀧𑀦 𑀢𑁆𑀯𑀁 𑀉𑀓𑁆𑀓𑀡𑁆𑀞𑀸𑀧𑀺𑀢𑁄’’𑀢𑀺 𑀯𑀼𑀢𑁆𑀢𑁂 ¶ ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀸𑀦𑀼𑀯𑀢𑁆𑀢𑀓𑁄 𑀳𑀼𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼, 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻 𑀩𑀳𑀼𑀫𑀸𑀬𑀸, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀤𑀓𑁆𑀔𑀺𑀡𑀚𑀸𑀡𑀼𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸 𑀬𑀸𑀯𑀚𑀻𑀯𑀺𑀢𑀤𑀸𑀦𑀫𑁆𑀧𑀺 𑀤𑀢𑁆𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀘𑀺𑀢𑁆𑀢𑀁 𑀦 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 ‘‘𑀧𑀤𑀼𑀫𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀅𑀧𑀭𑁂𑀦 𑀙 𑀓𑀦𑀺𑀝𑁆𑀞𑀪𑀸𑀢𑀺𑀓𑀸 𑀅𑀳𑁂𑀲𑀼𑀁. 𑀢𑁂 𑀲𑀢𑁆𑀢𑀧𑀺 𑀚𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸 𑀖𑀭𑀸𑀯𑀸𑀲𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀳𑀸𑀬𑀸 𑀯𑀺𑀬 𑀯𑀺𑀘𑀭𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑁄 𑀞𑀺𑀢𑁄 𑀢𑁂 𑀫𑀳𑀸𑀧𑀭𑀺𑀯𑀸𑀭𑁂𑀦 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀫𑀁 𑀯𑀥𑀺𑀢𑁆𑀯𑀸 𑀭𑀚𑁆𑀚𑀫𑁆𑀧𑀺 𑀕𑀡𑁆𑀳𑁂𑀬𑁆𑀬𑀼’’𑀦𑁆𑀢𑀺 𑀆𑀲𑀗𑁆𑀓𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀢𑀸𑀢𑀸, 𑀢𑀼𑀫𑁆𑀳𑁂 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀯𑀲𑀺𑀢𑀼𑀁 𑀦 𑀮𑀪𑀣, 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀫𑀫 𑀅𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀢𑁂 𑀧𑀺𑀢𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀚𑀸𑀧𑀢𑀺𑀬𑁄 𑀆𑀤𑀸𑀬 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀦𑁆𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀓𑀦𑁆𑀢𑀸𑀭𑀁 𑀧𑀢𑁆𑀯𑀸 𑀅𑀦𑁆𑀦𑀧𑀸𑀦𑀁 𑀅𑀮𑀪𑀫𑀸𑀦𑀸 𑀔𑀼𑀤𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀫𑀬𑀁 𑀚𑀻𑀯𑀫𑀸𑀦𑀸 𑀇𑀢𑁆𑀣𑀺𑀬𑁄 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀓𑀦𑀺𑀝𑁆𑀞𑀲𑁆𑀲 𑀪𑀭𑀺𑀬𑀁 𑀫𑀸𑀭𑁂𑀢𑁆𑀯𑀸 𑀢𑁂𑀭𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀘 𑀪𑀭𑀺𑀬𑀸𑀬 𑀘 𑀮𑀤𑁆𑀥𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀁 𑀞𑀧𑁂𑀢𑁆𑀯𑀸 𑀏𑀓𑀁 𑀤𑁆𑀯𑁂𑀧𑀺 𑀔𑀸𑀤𑀺𑀁𑀲𑀼. 𑀏𑀯𑀁 𑀙 𑀤𑀺𑀯𑀲𑁂 𑀙 𑀇𑀢𑁆𑀣𑀺𑀬𑁄 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 ¶ 𑀧𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑁂𑀓𑀁 𑀞𑀧𑁂𑀢𑁆𑀯𑀸 𑀙 𑀓𑁄𑀝𑁆𑀞𑀸𑀲𑁂 𑀞𑀧𑁂𑀲𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 ‘‘𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀭𑀺𑀬𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀙 𑀓𑁄𑀝𑁆𑀞𑀸𑀲𑁂 𑀢𑁂𑀲𑀁 𑀤𑀢𑁆𑀯𑀸 ‘‘𑀅𑀚𑁆𑀚 𑀢𑀸𑀯 𑀇𑀫𑁂 𑀙 𑀓𑁄𑀝𑁆𑀞𑀸𑀲𑁂 𑀔𑀸𑀤𑀣, 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑀓𑀸𑀮𑁂 𑀪𑀭𑀺𑀬𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺. 𑀲𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀔𑀦𑁆𑀥𑁂𑀦𑀸𑀤𑀸𑀬 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀓𑀦𑁆𑀢𑀸𑀭𑀸 𑀦𑀺𑀓𑁆𑀔𑀫𑀺. 𑀲𑀸 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂 ‘‘𑀧𑀺𑀧𑀸𑀲𑀺𑀢𑀸𑀫𑁆𑀳𑀺, 𑀲𑀸𑀫𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀉𑀤𑀓𑀁 𑀦𑀢𑁆𑀣𑀺, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀣𑀺𑀢𑁂 𑀔𑀕𑁆𑀕𑁂𑀦 ¶ 𑀤𑀓𑁆𑀔𑀺𑀡𑀚𑀸𑀡𑀼𑀓𑀁 𑀧𑀳𑀭𑀺𑀢𑁆𑀯𑀸 𑁋 ‘‘𑀪𑀤𑁆𑀤𑁂, 𑀧𑀸𑀦𑀻𑀬𑀁 𑀦𑀢𑁆𑀣𑀺, 𑀇𑀤𑀁 𑀧𑀦 𑀫𑁂 𑀤𑀓𑁆𑀔𑀺𑀡𑀚𑀸𑀡𑀼𑀮𑁄𑀳𑀺𑀢𑀁 𑀧𑀺𑀯𑀫𑀸𑀦𑀸 𑀦𑀺𑀲𑀻𑀤𑀸𑀳𑀻’’𑀢𑀺 𑀆𑀳. 𑀲𑀸 𑀢𑀣𑀸 𑀅𑀓𑀸𑀲𑀺. 𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀕𑀗𑁆𑀕𑀁 𑀧𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘 𑀦𑁆𑀳𑀢𑁆𑀯𑀸 𑀘 𑀨𑀮𑀸𑀨𑀮𑀁 𑀔𑀸𑀤𑀺𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀯𑀺𑀲𑁆𑀲𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

𑀅𑀣𑁂𑀓𑀤𑀺𑀯𑀲𑀁 𑀉𑀧𑀭𑀺𑀕𑀗𑁆𑀕𑀸𑀬 𑀭𑀸𑀚𑀸𑀧𑀭𑀸𑀥𑀺𑀓𑀁 𑀘𑁄𑀭𑀁 𑀳𑀢𑁆𑀣𑀧𑀸𑀤𑁂 𑀘 𑀓𑀡𑁆𑀡𑀦𑀸𑀲𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀫𑁆𑀩𑀡𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀳𑀸𑀕𑀗𑁆𑀕𑀸𑀬 𑀧𑀯𑀸𑀳𑁂𑀲𑀼𑀁. 𑀲𑁄 𑀫𑀳𑀦𑁆𑀢𑀁 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀓𑀭𑀼𑀡𑀁 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀲𑀢𑁆𑀢𑁄 𑀫𑀬𑀺 𑀞𑀺𑀢𑁂 𑀫𑀸 𑀦𑀲𑁆𑀲𑀻’’𑀢𑀺 𑀕𑀗𑁆𑀕𑀸𑀢𑀻𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀆𑀦𑁂𑀢𑁆𑀯𑀸 𑀓𑀸𑀲𑀸𑀯𑀥𑁄𑀯𑀦𑀮𑁂𑀧𑀦𑀸𑀤𑀻𑀳𑀺 𑀯𑀡𑀧𑀝𑀺𑀓𑀫𑁆𑀫𑀁 𑀅𑀓𑀸𑀲𑀺. 𑀪𑀭𑀺𑀬𑀸 𑀧𑀦𑀲𑁆𑀲 ‘‘𑀏𑀯𑀭𑀽𑀧𑀁 𑀦𑀸𑀫 𑀤𑀼𑀲𑁆𑀲𑀻𑀮𑀁 𑀓𑀼𑀡𑁆𑀞𑀁 𑀕𑀗𑁆𑀕𑀸𑀬 𑀆𑀯𑀸𑀳𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀓𑀼𑀡𑁆𑀞𑀁 𑀚𑀺𑀕𑀼𑀘𑁆𑀙𑀫𑀸𑀦𑀸 𑀦𑀺𑀝𑁆𑀞𑀼𑀪𑀦𑁆𑀢𑀻 𑀯𑀺𑀘𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀯𑀡𑁂𑀲𑀼 𑀲𑀁𑀯𑀺𑀭𑀼𑀴𑁆𑀳𑁂𑀲𑀼 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀢𑀁 𑀅𑀲𑁆𑀲𑀫𑀧𑀤𑁂𑀬𑁂𑀯 𑀞𑀧𑁂𑀢𑁆𑀯𑀸 𑀅𑀝𑀯𑀺𑀢𑁄 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀜𑁆𑀘 𑀪𑀭𑀺𑀬𑀜𑁆𑀘 𑀧𑁄𑀲𑁂𑀲𑀺. 𑀢𑁂𑀲𑀼 𑀏𑀯𑀁 𑀯𑀲𑀦𑁆𑀢𑁂𑀲𑀼 𑀲𑀸 𑀇𑀢𑁆𑀣𑀻 𑀏𑀢𑀲𑁆𑀫𑀺𑀁 𑀓𑀼𑀡𑁆𑀞𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀘𑀭𑀺𑀢𑁆𑀯𑀸 𑀏𑀓𑁂𑀦𑀼𑀧𑀸𑀬𑁂𑀦 𑀩𑁄𑀥𑀺𑀲𑀢𑁆𑀢𑀁 𑀫𑀸𑀭𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀸𑀫𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀁𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀦𑁆𑀢𑀸𑀭𑀸 𑀦𑀺𑀓𑁆𑀔𑀫𑀫𑀸𑀦𑀸 𑀏𑀓𑀁 𑀧𑀩𑁆𑀩𑀢𑀁 𑀑𑀮𑁄𑀓𑁂𑀢𑁆𑀯𑀸 𑀅𑀬𑁆𑀬𑁂 𑀧𑀩𑁆𑀩𑀢𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑁂 ‘𑀲𑀘𑁂 𑀅𑀳𑀁 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀅𑀭𑁄𑀕𑀸 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀩𑀮𑀺𑀓𑀫𑁆𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀬𑀸𑀘𑀺𑀁, 𑀲𑀸 𑀫𑀁 𑀇𑀤𑀸𑀦𑀺 𑀉𑀢𑁆𑀢𑀸𑀲𑁂𑀢𑀺, 𑀓𑀭𑁄𑀫𑀲𑁆𑀲𑀸 𑀩𑀮𑀺𑀓𑀫𑁆𑀫’’𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀫𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀲𑀚𑁆𑀚𑁂𑀢𑁆𑀯𑀸 𑀢𑀸𑀬 𑀩𑀮𑀺𑀪𑀸𑀚𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺. 𑀅𑀣 𑀦𑀁 ¶ 𑀲𑀸 𑀏𑀯𑀫𑀸𑀳 𑁋 ‘‘𑀲𑀸𑀫𑀺, 𑀤𑁂𑀯𑀢𑀸𑀬𑀧𑀺 𑀢𑁆𑀯𑀜𑁆𑀜𑁂𑀯 𑀉𑀢𑁆𑀢𑀫𑀤𑁂𑀯𑀢𑀸, 𑀧𑀞𑀫𑀁 𑀢𑀸𑀯 𑀢𑀁 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀩𑁄𑀥𑀺𑀲𑀢𑁆𑀢𑀁 𑀧𑀧𑀸𑀢𑀸𑀪𑀺𑀫𑀼𑀔𑀁 𑀞𑀧𑁂𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀯𑀺𑀬 𑀳𑀼𑀢𑁆𑀯𑀸 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 ‘‘𑀤𑀺𑀝𑁆𑀞𑀸 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀧𑀩𑁆𑀩𑀢𑀸 𑀑𑀭𑁄𑀳𑀺𑀢𑁆𑀯𑀸 𑀓𑀼𑀡𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 ¶ ¶ 𑀧𑀧𑀸𑀢𑀸𑀦𑀼𑀲𑀸𑀭𑁂𑀦 𑀧𑀩𑁆𑀩𑀢𑀸 𑀧𑀢𑀦𑁆𑀢𑁄 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀫𑀢𑁆𑀣𑀓𑁂 𑀏𑀓𑀲𑁆𑀫𑀺𑀁 𑀅𑀓𑀡𑁆𑀝𑀓𑁂 𑀧𑀢𑁆𑀢𑀲𑀜𑁆𑀙𑀦𑁆𑀦𑁂 𑀕𑀼𑀫𑁆𑀩𑁂 𑀮𑀕𑁆𑀕𑀺, 𑀳𑁂𑀝𑁆𑀞𑀸𑀧𑀩𑁆𑀩𑀢𑀁 𑀧𑀦 𑀑𑀭𑁄𑀳𑀺𑀢𑀼𑀁 𑀦 𑀲𑀓𑁆𑀓𑀸. 𑀲𑁄 𑀉𑀤𑀼𑀫𑁆𑀩𑀭𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺. 𑀅𑀣𑁂𑀓𑁄 𑀫𑀳𑀸𑀲𑀭𑀻𑀭𑁄 𑀕𑁄𑀥𑀭𑀸𑀚𑀸 𑀳𑁂𑀝𑁆𑀞𑀸𑀧𑀩𑁆𑀩𑀢𑀧𑀸𑀤𑀢𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀉𑀤𑀼𑀫𑁆𑀩𑀭𑀨𑀮𑀸𑀦𑀺 𑀔𑀸𑀤𑀢𑀺. 𑀲𑁄 𑀢𑀁 𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀧𑀮𑀸𑀬𑀺, 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀆𑀕𑀘𑁆𑀙𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀢𑁆𑀯𑀁 𑀇𑀫𑀁 𑀞𑀸𑀦𑀁 𑀓𑁂𑀦 𑀓𑀸𑀭𑀡𑁂𑀦 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀸 𑀪𑀸𑀬𑀻’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀅𑀭𑀜𑁆𑀜𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀭𑀜𑁆𑀜𑀫𑁂𑀯 𑀧𑀸𑀯𑀺𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀏𑀓𑀁 𑀕𑀸𑀫𑀓𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀧𑀺𑀢𑀼 𑀓𑀸𑀮𑀓𑀢𑀪𑀸𑀯𑀁 𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑁂 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀧𑀤𑀼𑀫𑀭𑀸𑀚𑀸 𑀦𑀸𑀫 𑀳𑀼𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙 𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺.

𑀲𑀸𑀧𑀺 𑀔𑁄 𑀇𑀢𑁆𑀣𑀻 𑀢𑀁 𑀓𑀼𑀡𑁆𑀞𑀁 𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀪𑀺𑀓𑁆𑀔𑀁 𑀘𑀭𑀫𑀸𑀦𑀸 𑀬𑀸𑀕𑀼𑀪𑀢𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 𑀢𑀁 𑀓𑀼𑀡𑁆𑀞𑀁 𑀧𑁄𑀲𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀅𑀬𑀁 𑀢𑁂 𑀓𑀺𑀁 𑀳𑁄𑀢𑀻’’𑀢𑀺 ¶ 𑀧𑀼𑀘𑁆𑀙𑀺𑀬𑀫𑀸𑀦𑀸 ‘‘𑀅𑀳𑀁 𑀏𑀢𑀲𑁆𑀲 𑀫𑀸𑀢𑀼𑀮𑀥𑀻𑀢𑀸, 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀫𑁂 𑀏𑀲𑁄, 𑀏𑀢𑀲𑁆𑀲𑁂𑀯 𑀫𑀁 𑀅𑀤𑀁𑀲𑀼, 𑀲𑀸𑀳𑀁 𑀯𑀚𑁆𑀛𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀻 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀧𑁄𑀲𑁂𑀫𑀻’’𑀢𑀺. 𑀫𑀦𑀼𑀲𑁆𑀲𑀸 ‘‘𑀅𑀬𑀁 𑀧𑀢𑀺𑀩𑁆𑀩𑀢𑀸’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀩𑀳𑀼𑀢𑀭𑀁 𑀬𑀸𑀕𑀼𑀪𑀢𑁆𑀢𑀁 𑀅𑀤𑀁𑀲𑀼. 𑀅𑀧𑀭𑁂 𑀧𑀦 𑀚𑀦𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀢𑁆𑀯𑀁 𑀫𑀸 𑀏𑀯𑀁 𑀯𑀺𑀘𑀭𑀺, 𑀧𑀤𑀼𑀫𑀭𑀸𑀚𑀸 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀲𑁄 𑀢𑀁 𑀤𑀺𑀲𑁆𑀯𑀸 𑀢𑀼𑀲𑁆𑀲𑀺𑀲𑁆𑀲𑀢𑀺, 𑀢𑀼𑀝𑁆𑀞𑁄 𑀢𑁂 𑀩𑀳𑀼𑀁 𑀥𑀦𑀁 𑀤𑀲𑁆𑀲𑀢𑀺, 𑀢𑀯 𑀲𑀸𑀫𑀺𑀓𑀁 𑀇𑀥𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀣𑀺𑀭𑀁 𑀓𑀢𑁆𑀯𑀸 𑀯𑁂𑀢𑁆𑀢𑀧𑀘𑁆𑀙𑀺𑀁 𑀅𑀤𑀁𑀲𑀼. 𑀲𑀸 𑀅𑀦𑀸𑀘𑀸𑀭𑀸 𑀢𑀁 𑀓𑀼𑀡𑁆𑀞𑀁 𑀯𑁂𑀢𑁆𑀢𑀧𑀘𑁆𑀙𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀤𑀸𑀦𑀲𑀸𑀮𑀸𑀲𑀼 𑀪𑀼𑀜𑁆𑀚𑀫𑀸𑀦𑀸 𑀯𑀺𑀘𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀤𑀸𑀦𑀕𑁆𑀕𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀯𑀸 𑀤𑀲𑀦𑁆𑀦𑀁 𑀯𑀸 𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 𑀕𑁂𑀳𑀁 𑀕𑀘𑁆𑀙𑀢𑀺 ¶ . 𑀲𑀸 𑀅𑀦𑀸𑀘𑀸𑀭𑀸 𑀢𑀁 𑀓𑀼𑀡𑁆𑀞𑀁 𑀧𑀘𑁆𑀙𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀕𑀫𑀦𑀫𑀕𑁆𑀕𑁂 𑀅𑀝𑁆𑀞𑀸𑀲𑀺.

𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀏𑀓𑀸, 𑀤𑁂𑀯, 𑀧𑀢𑀺𑀩𑁆𑀩𑀢𑀸’’𑀢𑀺. 𑀅𑀣 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀓𑀼𑀡𑁆𑀞𑀁 𑀧𑀘𑁆𑀙𑀺𑀬𑀸 𑀦𑀻𑀳𑀭𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀢𑁂 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺. 𑀲𑀸 ‘‘𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀫𑁂, 𑀤𑁂𑀯, 𑀓𑀼𑀮𑀤𑀢𑁆𑀢𑀺𑀓𑁄 𑀲𑀸𑀫𑀺𑀓𑁄’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀢𑀁 𑀅𑀦𑁆𑀢𑀭𑀁 𑀅𑀚𑀸𑀦𑀦𑁆𑀢𑀸 ¶ ‘‘𑀅𑀳𑁄 𑀧𑀢𑀺𑀩𑁆𑀩𑀢𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀁 𑀅𑀦𑀸𑀘𑀸𑀭𑀺𑀢𑁆𑀣𑀺𑀁 𑀯𑀡𑁆𑀡𑀬𑀺𑀁𑀲𑀼. 𑀧𑀼𑀦 𑀭𑀸𑀚𑀸 ‘‘𑀅𑀬𑀁 𑀢𑁂 𑀓𑀼𑀡𑁆𑀞𑁄 𑀓𑀼𑀮𑀤𑀢𑁆𑀢𑀺𑀓𑁄 𑀲𑀸𑀫𑀺𑀓𑁄’’𑀢𑀺 𑀧𑀼𑀘𑁆𑀙𑀺. 𑀲𑀸 𑀭𑀸𑀚𑀸𑀦𑀁 𑀅𑀲𑀜𑁆𑀚𑀸𑀦𑀦𑁆𑀢𑀻 ‘‘𑀆𑀫, 𑀤𑁂𑀯𑀸’’𑀢𑀺 𑀲𑀽𑀭𑀸 𑀳𑀼𑀢𑁆𑀯𑀸 𑀓𑀣𑁂𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀏𑀲 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀦𑀦𑀼 𑀢𑁆𑀯𑀁 𑀧𑀤𑀼𑀫𑀓𑀼𑀫𑀸𑀭𑀲𑁆𑀲 𑀪𑀭𑀺𑀬𑀸 𑀅𑀲𑀼𑀓𑀭𑀜𑁆𑀜𑁄 𑀥𑀻𑀢𑀸, 𑀅𑀲𑀼𑀓𑀸 𑀦𑀸𑀫 𑀫𑀫 𑀚𑀸𑀡𑀼𑀮𑁄𑀳𑀺𑀢𑀁 𑀧𑀺𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀼𑀡𑁆𑀞𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀫𑀁 𑀧𑀧𑀸𑀢𑁂 𑀧𑀸𑀢𑁂𑀲𑀺. 𑀲𑀸 𑀇𑀤𑀸𑀦𑀺 𑀢𑁆𑀯𑀁 𑀦𑀮𑀸𑀝𑁂𑀦 𑀫𑀘𑁆𑀘𑀼𑀁 𑀕𑀳𑁂𑀢𑁆𑀯𑀸 𑀫𑀁 ‘𑀫𑀢𑁄’𑀢𑀺 𑀫𑀜𑁆𑀜𑀫𑀸𑀦𑀸 𑀇𑀫𑀁 𑀞𑀸𑀦𑀁 𑀆𑀕𑀢𑀸, 𑀦𑀦𑀼 𑀅𑀳𑀁 𑀚𑀻𑀯𑀸𑀫𑀻’’𑀢𑀺 ¶ 𑀯𑀢𑁆𑀯𑀸 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑁄, 𑀅𑀫𑀘𑁆𑀘𑀸 𑀦𑀦𑀼 𑀘𑀸𑀳𑀁 𑀢𑀼𑀫𑁆𑀳𑁂𑀳𑀺 𑀧𑀼𑀝𑁆𑀞𑁄 𑀏𑀯𑀁 𑀓𑀣𑁂𑀲𑀺𑀁 ‘𑀫𑀫 𑀓𑀦𑀺𑀝𑁆𑀞𑀪𑀸𑀢𑀺𑀓𑀸 𑀙 𑀇𑀢𑁆𑀣𑀺𑀬𑁄 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀁𑀲𑀼, 𑀅𑀳𑀁 𑀧𑀦 𑀫𑀬𑁆𑀳𑀁 𑀪𑀭𑀺𑀬𑀁 𑀅𑀭𑁄𑀕𑀁 𑀓𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑀁 𑀦𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑁂 𑀯𑀲𑀦𑁆𑀢𑁄 𑀏𑀓𑀁 𑀯𑀚𑁆𑀛𑀧𑁆𑀧𑀢𑁆𑀢𑀁 𑀓𑀼𑀡𑁆𑀞𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀁. 𑀲𑀸 𑀇𑀢𑁆𑀣𑀻 𑀏𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀫𑀁 𑀧𑀩𑁆𑀩𑀢𑀧𑀸𑀤𑁂 𑀧𑀸𑀢𑁂𑀲𑀺. 𑀅𑀳𑀁 𑀅𑀢𑁆𑀢𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬 𑀚𑀻𑀯𑀺𑀢𑀁 𑀮𑀪𑀺’𑀦𑁆𑀢𑀺. 𑀬𑀸𑀬 𑀅𑀳𑀁 𑀧𑀩𑁆𑀩𑀢𑀸 𑀧𑀸𑀢𑀺𑀢𑁄, 𑀦 𑀲𑀸 𑀅𑀜𑁆𑀜𑀸, 𑀏𑀲𑀸 𑀤𑀼𑀲𑁆𑀲𑀻𑀮𑀸, 𑀲𑁄𑀧𑀺 𑀯𑀚𑁆𑀛𑀧𑁆𑀧𑀢𑁆𑀢𑁄 𑀓𑀼𑀡𑁆𑀞𑁄 𑀦 𑀅𑀜𑁆𑀜𑁄, 𑀅𑀬𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁮𑁫.

‘‘𑀅𑀬𑀫𑁂𑀯 𑀲𑀸 𑀅𑀳𑀫𑀧𑀺 𑀲𑁄 𑀅𑀦𑀜𑁆𑀜𑁄, 𑀅𑀬𑀫𑁂𑀯 𑀲𑁄 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀅𑀦𑀜𑁆𑀜𑁄;

𑀬𑀫𑀸𑀳 ‘𑀓𑁄𑀫𑀸𑀭𑀧𑀢𑀻 𑀫𑀫’𑀦𑁆𑀢𑀺, 𑀯𑀚𑁆𑀛𑀺𑀢𑁆𑀣𑀺𑀬𑁄 𑀦𑀢𑁆𑀣𑀺 𑀇𑀢𑁆𑀣𑀻𑀲𑀼 𑀲𑀘𑁆𑀘𑀁.

𑁮𑁬.

‘‘𑀇𑀫𑀜𑁆𑀘 𑀚𑀫𑁆𑀫𑀁 𑀫𑀼𑀲𑀮𑁂𑀦 𑀳𑀦𑁆𑀢𑁆𑀯𑀸, 𑀮𑀼𑀤𑁆𑀤𑀁 𑀙𑀯𑀁 𑀧𑀭𑀤𑀸𑀭𑀽𑀧𑀲𑁂𑀯𑀺𑀁;

𑀇𑀫𑀺𑀲𑁆𑀲𑀸 𑀘 𑀦𑀁 𑀧𑀸𑀧𑀧𑀢𑀺𑀩𑁆𑀩𑀢𑀸𑀬, 𑀚𑀻𑀯𑀦𑁆𑀢𑀺𑀬𑀸 𑀙𑀺𑀦𑁆𑀤𑀣 𑀓𑀡𑁆𑀡𑀦𑀸𑀲’’𑀦𑁆𑀢𑀺.

𑀢𑀢𑁆𑀣 𑀬𑀫𑀸𑀳 𑀓𑁄𑀫𑀸𑀭𑀧𑀢𑀻 𑀫𑀫𑀦𑁆𑀢𑀺 𑀬𑀁 𑀏𑀲𑀸 ‘‘𑀅𑀬𑀁 𑀫𑁂, 𑀓𑁄𑀫𑀸𑀭𑀧𑀢𑀺, 𑀓𑀼𑀮𑀤𑀢𑁆𑀢𑀺𑀓𑁄 𑀲𑀸𑀫𑀺𑀓𑁄’’𑀢𑀺 𑀆𑀳, 𑀅𑀬𑀫𑁂𑀯 𑀲𑁄, 𑀦 𑀅𑀜𑁆𑀜𑁄. ‘‘𑀬𑀫𑀸𑀳𑀼 ¶ , 𑀓𑁄𑀫𑀸𑀭𑀧𑀢𑀻’’𑀢𑀺𑀧𑀺 𑀧𑀸𑀞𑁄. 𑀅𑀬𑀫𑁂𑀯 𑀳𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑁄, 𑀢𑀲𑁆𑀲𑀸𑀧𑀺 𑀅𑀬𑀫𑁂𑀯𑀢𑁆𑀣𑁄, 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀧𑀦𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀬𑀜𑁆𑀳𑀺 𑀭𑀜𑁆𑀜𑀸 𑀯𑀼𑀢𑁆𑀢𑀁, 𑀢𑀤𑁂𑀯 𑀇𑀥 𑀆𑀕𑀢𑀁. 𑀯𑀚𑁆𑀛𑀺𑀢𑁆𑀣𑀺𑀬𑁄𑀢𑀺 𑀇𑀢𑁆𑀣𑀺𑀬𑁄 𑀦𑀸𑀫 𑀯𑀚𑁆𑀛𑀸 𑀯𑀥𑀺𑀢𑀩𑁆𑀩𑀸 𑀏𑀯. 𑀦𑀢𑁆𑀣𑀺 𑀇𑀢𑁆𑀣𑀻𑀲𑀼 𑀲𑀘𑁆𑀘𑀦𑁆𑀢𑀺 𑀏𑀢𑀸𑀲𑀼 𑀲𑀪𑀸𑀯𑁄 𑀦𑀸𑀫𑁂𑀓𑁄 𑀦𑀢𑁆𑀣𑀺. ‘‘𑀇𑀫𑀜𑁆𑀘 𑀚𑀫𑁆𑀫’’𑀦𑁆𑀢𑀺𑀆𑀤𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀤𑀡𑁆𑀟𑀸𑀡𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀫𑁆𑀫𑀦𑁆𑀢𑀺 𑀮𑀸𑀫𑀓𑀁. 𑀫𑀼𑀲𑀮𑁂𑀦 𑀳𑀦𑁆𑀢𑁆𑀯𑀸𑀢𑀺 𑀫𑀼𑀲𑀮𑁂𑀦 𑀳𑀦𑀺𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀅𑀝𑁆𑀞𑀻𑀦𑀺 𑀪𑀜𑁆𑀚𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁆𑀯𑀸. 𑀮𑀼𑀤𑁆𑀤𑀦𑁆𑀢𑀺 𑀤𑀸𑀭𑀼𑀡𑀁. 𑀙𑀯𑀦𑁆𑀢𑀺 𑀕𑀼𑀡𑀸𑀪𑀸𑀯𑁂𑀦 𑀦𑀺𑀚𑁆𑀚𑀻𑀯𑀁 𑀫𑀢𑀲𑀤𑀺𑀲𑀁. 𑀇𑀫𑀺𑀲𑁆𑀲𑀸 ¶ 𑀘 𑀦𑀦𑁆𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀫𑀺𑀲𑁆𑀲𑀸 𑀘 𑀧𑀸𑀧𑀧𑀢𑀺𑀩𑁆𑀩𑀢𑀸𑀬 𑀅𑀦𑀸𑀘𑀸𑀭𑀸𑀬 𑀤𑀼𑀲𑁆𑀲𑀻𑀮𑀸𑀬 𑀚𑀻𑀯𑀦𑁆𑀢𑀺𑀬𑀸𑀯 𑀓𑀡𑁆𑀡𑀦𑀸𑀲𑀁 𑀙𑀺𑀦𑁆𑀤𑀣𑀸𑀢𑀺 𑀅𑀢𑁆𑀣𑁄.

𑀩𑁄𑀥𑀺𑀲𑀢𑁆𑀢𑁄 𑀓𑁄𑀥𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀁 𑀢𑁂𑀲𑀁 𑀤𑀡𑁆𑀟𑀁 𑀆𑀡𑀸𑀧𑁂𑀢𑁆𑀯𑀸𑀧𑀺 𑀦 𑀢𑀣𑀸 𑀓𑀸𑀭𑁂𑀲𑀺 ¶ . 𑀓𑁄𑀧𑀁 𑀧𑀦 𑀫𑀦𑁆𑀤𑀁 𑀓𑀢𑁆𑀯𑀸 𑀬𑀣𑀸 𑀲𑀸 𑀧𑀘𑁆𑀙𑀺𑀁 𑀲𑀻𑀲𑀢𑁄 𑀑𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀕𑀸𑀴𑁆𑀳𑀢𑀭𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀓𑀼𑀡𑁆𑀞𑀁 𑀢𑀢𑁆𑀣 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑀸 𑀦𑀻𑀳𑀭𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀙 𑀪𑀸𑀢𑀭𑁄 𑀅𑀜𑁆𑀜𑀢𑀭𑀸 𑀣𑁂𑀭𑀸 𑀅𑀳𑁂𑀲𑀼𑀁, 𑀪𑀭𑀺𑀬𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸, 𑀓𑀼𑀡𑁆𑀞𑁄 𑀤𑁂𑀯𑀤𑀢𑁆𑀢𑁄, 𑀕𑁄𑀥𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀤𑀼𑀫𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀧𑀤𑀼𑀫𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁯𑁪] 𑁪. 𑀫𑀡𑀺𑀘𑁄𑀭𑀚𑀸𑀢𑀓𑀯𑀡𑁆𑀡𑀦𑀸

𑀦 𑀲𑀦𑁆𑀢𑀺 𑀤𑁂𑀯𑀸 𑀧𑀯𑀲𑀦𑁆𑀢𑀺 𑀦𑀽𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑁆𑀢𑀁 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺𑀬𑁂𑀯, 𑀧𑀭𑀺𑀲𑀓𑁆𑀓𑀦𑁆𑀢𑁄𑀧𑀺 𑀧𑀦 𑀫𑀁 𑀯𑀥𑀺𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀕𑀸𑀫𑀓𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 ¶ 𑀩𑀸𑀭𑀸𑀡𑀲𑀺𑀢𑁄 𑀓𑀼𑀮𑀥𑀻𑀢𑀭𑀁 𑀆𑀦𑁂𑀲𑀼𑀁, 𑀲𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀳𑁄𑀲𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀤𑁂𑀯𑀘𑁆𑀙𑀭𑀸 𑀯𑀺𑀬 𑀧𑀼𑀧𑁆𑀨𑀮𑀢𑀸 𑀯𑀺𑀬 𑀮𑀴𑀫𑀸𑀦𑀸 𑀫𑀢𑁆𑀢𑀓𑀺𑀦𑁆𑀦𑀭𑀻 𑀯𑀺𑀬 𑀘 𑀲𑀼𑀚𑀸𑀢𑀸𑀢𑀺 𑀦𑀸𑀫𑁂𑀦 𑀧𑀢𑀺𑀩𑁆𑀩𑀢𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑀸. 𑀦𑀺𑀘𑁆𑀘𑀓𑀸𑀮𑀫𑁆𑀧𑀺𑀲𑁆𑀲𑀸 𑀧𑀢𑀺𑀯𑀢𑁆𑀢𑀁 𑀲𑀲𑁆𑀲𑀼𑀯𑀢𑁆𑀢𑀁 𑀲𑀲𑀼𑀭𑀯𑀢𑁆𑀢𑀜𑁆𑀘 𑀓𑀢𑀫𑁂𑀯 𑀳𑁄𑀢𑀺, 𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸. 𑀇𑀢𑀺 𑀉𑀪𑁄𑀧𑀺 ¶ 𑀢𑁂 𑀲𑀫𑁆𑀫𑁄𑀤𑀫𑀸𑀦𑀸 𑀏𑀓𑀘𑀺𑀢𑁆𑀢𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀲𑀼𑀚𑀸𑀢𑀸 ‘‘𑀫𑀸𑀢𑀸𑀧𑀺𑀢𑀭𑁄 𑀤𑀝𑁆𑀞𑀼𑀓𑀸𑀫𑀸𑀫𑁆𑀳𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. ‘‘𑀲𑀸𑀥𑀼, 𑀪𑀤𑁆𑀤𑁂, 𑀫𑀕𑁆𑀕𑀧𑀸𑀣𑁂𑀬𑁆𑀬𑀁 𑀧𑀳𑁄𑀦𑀓𑀁 𑀧𑀝𑀺𑀬𑀸𑀤𑁂𑀳𑀻’’𑀢𑀺 𑀔𑀚𑁆𑀚𑀯𑀺𑀓𑀢𑀺𑀁 𑀧𑀘𑀸𑀧𑁂𑀢𑁆𑀯𑀸 𑀔𑀚𑁆𑀚𑀓𑀸𑀤𑀻𑀦𑀺 𑀬𑀸𑀦𑀓𑁂 𑀞𑀧𑁂𑀢𑁆𑀯𑀸 𑀬𑀸𑀦𑀓𑀁 𑀧𑀸𑀚𑁂𑀦𑁆𑀢𑁄 𑀬𑀸𑀦𑀓𑀲𑁆𑀲 𑀧𑀼𑀭𑀢𑁄 𑀅𑀳𑁄𑀲𑀺, 𑀇𑀢𑀭𑀸 𑀧𑀘𑁆𑀙𑀢𑁄. 𑀢𑁂 𑀦𑀕𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀬𑀸𑀦𑀓𑀁 𑀫𑁄𑀘𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀬𑀸𑀦𑀓𑀁 𑀬𑁄𑀚𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀻𑀤𑀺, 𑀲𑀼𑀚𑀸𑀢𑀸 𑀯𑀢𑁆𑀣𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀘𑁆𑀙𑀢𑁄 𑀦𑀺𑀲𑀻𑀤𑀺. 𑀬𑀸𑀦𑀓𑀲𑁆𑀲 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀓𑀸𑀮𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀲𑀼𑀚𑀸𑀢𑀸 𑀑𑀢𑀭𑀺𑀢𑁆𑀯𑀸 ¶ 𑀬𑀸𑀦𑀓𑀲𑁆𑀲 𑀧𑀘𑁆𑀙𑀢𑁄 𑀧𑀤𑀲𑀸 𑀧𑀸𑀬𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀆𑀓𑀟𑁆𑀠𑀺𑀬𑀫𑀸𑀦𑀮𑁄𑀘𑀦𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁 𑀏𑀢𑀺𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀪𑀸𑀯𑀁 𑀯𑀸 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀯𑀸 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀲𑁆𑀲𑀸𑀫𑀺𑀓𑀸 𑀓𑀺𑀭, 𑀤𑁂𑀯, 𑀬𑀸𑀦𑀓𑁂 𑀦𑀺𑀲𑀺𑀦𑁆𑀦𑁄 𑀧𑀼𑀭𑀺𑀲𑁄 𑀏𑀢𑀺𑀲𑁆𑀲𑀸 𑀲𑀸𑀫𑀺𑀓𑁄’’𑀢𑀺 𑀆𑀳.

𑀭𑀸𑀚𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀺𑀮𑁂𑀲𑀸𑀢𑀼𑀭𑁄 𑀳𑀼𑀢𑁆𑀯𑀸 ‘‘𑀏𑀓𑁂𑀦 𑀦𑀁 𑀉𑀧𑀸𑀬𑁂𑀦 𑀫𑀸𑀭𑀸𑀧𑁂𑀢𑁆𑀯𑀸 𑀇𑀢𑁆𑀣𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀪𑁄, 𑀇𑀫𑀁 𑀘𑀽𑀴𑀸𑀫𑀡𑀺𑀁 𑀯𑀻𑀣𑀺𑀁 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀏𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀬𑀸𑀦𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀳𑀻’’𑀢𑀺 𑀘𑀽𑀴𑀸𑀫𑀡𑀺𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀬𑀸𑀦𑀓𑁂 𑀞𑀧𑁂𑀢𑁆𑀯𑀸 ‘‘𑀞𑀧𑀺𑀢𑁄 𑀫𑁂, 𑀤𑁂𑀯𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀘𑀽𑀴𑀸𑀫𑀡𑀺 𑀫𑁂 𑀦𑀝𑁆𑀞𑁄’’𑀢𑀺 𑀆𑀳, 𑀫𑀦𑀼𑀲𑁆𑀲𑀸 𑀏𑀓𑀓𑁄𑀮𑀸𑀳𑀮𑀁 𑀅𑀓𑀁𑀲𑀼. 𑀭𑀸𑀚𑀸 ‘‘𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀲𑀜𑁆𑀘𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀘𑁄𑀭𑀁 𑀧𑀭𑀺𑀬𑁂𑀲𑀣𑀸’’𑀢𑀺 𑀆𑀳, 𑀭𑀸𑀚𑀧𑀼𑀭𑀺𑀲𑀸 𑀢𑀣𑀸 𑀅𑀓𑀁𑀲𑀼, 𑀦𑀕𑀭𑀁 𑀏𑀓𑀲𑀗𑁆𑀔𑁄𑀪𑀁 𑀅𑀳𑁄𑀲𑀺. 𑀇𑀢𑀭𑁄 𑀧𑀼𑀭𑀺𑀲𑁄 𑀫𑀦𑀼𑀲𑁆𑀲𑁂 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑁄, 𑀬𑀸𑀦𑀓𑀁 𑀞𑀧𑁂𑀳𑀺, 𑀭𑀜𑁆𑀜𑁄 𑀘𑀽𑀴𑀸𑀫𑀡𑀺 ¶ ¶ 𑀦𑀝𑁆𑀞𑁄, 𑀬𑀸𑀦𑀓𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀦𑀓𑀁 𑀲𑁄𑀥𑁂𑀦𑁆𑀢𑁄 𑀅𑀢𑁆𑀢𑀦𑀸 𑀞𑀧𑀺𑀢𑀫𑀡𑀺𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀫𑀡𑀺𑀘𑁄𑀭𑁄’’𑀢𑀺 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑁄𑀣𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀦𑁂𑀢𑁆𑀯𑀸 ‘‘𑀅𑀬𑀁 𑀫𑀡𑀺𑀘𑁄𑀭𑁄’’𑀢𑀺 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀭𑀸𑀚𑀸𑀧𑀺 ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀣𑀸’’𑀢𑀺 𑀆𑀡𑀸𑀧𑁂𑀲𑀺.

𑀅𑀣 𑀦𑀁 𑀭𑀸𑀚𑀧𑀼𑀭𑀺𑀲𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀓𑀲𑀸𑀳𑀺 𑀢𑀸𑀴𑁂𑀦𑁆𑀢𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀸𑀧𑁂𑀲𑀼𑀁. 𑀲𑀼𑀚𑀸𑀢𑀸𑀧𑀺 𑀬𑀸𑀦𑀓𑀁 𑀧𑀳𑀸𑀬 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀭𑀺𑀤𑁂𑀯𑀫𑀸𑀦𑀸 ‘‘𑀲𑀸𑀫𑀺, 𑀫𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀤𑀼𑀓𑁆𑀔𑀁 𑀧𑀢𑁆𑀢𑁄𑀲𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀕𑀫𑀸𑀲𑀺. 𑀭𑀸𑀚𑀧𑀼𑀭𑀺𑀲𑀸 ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀉𑀢𑁆𑀢𑀸𑀦𑀁 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀲𑀼𑀚𑀸𑀢𑀸 𑀅𑀢𑁆𑀢𑀦𑁄 𑀲𑀻𑀮𑀕𑀼𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀯𑀢 𑀫𑀜𑁆𑀜𑁂 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀯𑀦𑁆𑀢𑀸𑀦𑀁 𑀯𑀺𑀳𑁂𑀞𑀓𑁂 𑀧𑀸𑀧𑀲𑀸𑀳𑀲𑀺𑀓𑀫𑀦𑀼𑀲𑁆𑀲𑁂 𑀦𑀺𑀲𑁂𑀥𑁂𑀢𑀼𑀁 𑀲𑀫𑀢𑁆𑀣𑀸 𑀤𑁂𑀯𑀢𑀸 𑀦𑀸𑀫𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁭.

‘‘𑀦 𑀲𑀦𑁆𑀢𑀺 𑀤𑁂𑀯𑀸 𑀧𑀯𑀲𑀦𑁆𑀢𑀺 𑀦𑀽𑀦, 𑀦 𑀳𑀺 𑀦𑀽𑀦 𑀲𑀦𑁆𑀢𑀺 𑀇𑀥 𑀮𑁄𑀓𑀧𑀸𑀮𑀸;

𑀲𑀳𑀲𑀸 𑀓𑀭𑁄𑀦𑁆𑀢𑀸𑀦𑀫𑀲𑀜𑁆𑀜𑀢𑀸𑀦𑀁, 𑀦 𑀳𑀺 𑀦𑀽𑀦 𑀲𑀦𑁆𑀢𑀺 𑀧𑀝𑀺𑀲𑁂𑀥𑀺𑀢𑀸𑀭𑁄’’𑀢𑀺.

𑀢𑀢𑁆𑀣 𑀦 𑀲𑀦𑁆𑀢𑀺, 𑀤𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀯𑀦𑁆𑀢𑀸𑀦𑀁 𑀑𑀮𑁄𑀓𑀦𑀓𑀸 𑀧𑀸𑀧𑀸𑀦𑀜𑁆𑀘 𑀦𑀺𑀲𑁂𑀥𑀓𑀸 𑀦 𑀲𑀦𑁆𑀢𑀺 𑀦𑀽𑀦 𑀤𑁂𑀯𑀸. 𑀧𑀯𑀲𑀦𑁆𑀢𑀺 𑀦𑀽𑀦𑀸𑀢𑀺 𑀏𑀯𑀭𑀽𑀧𑁂𑀲𑀼 𑀯𑀸 𑀓𑀺𑀘𑁆𑀘𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀦𑀽𑀦 𑀧𑀯𑀲𑀦𑁆𑀢𑀺 𑀧𑀯𑀸𑀲𑀁 𑀕𑀘𑁆𑀙𑀦𑁆𑀢𑀺. 𑀇𑀥, 𑀮𑁄𑀓𑀧𑀸𑀮𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀮𑁄𑀓𑀧𑀸𑀮𑀲𑀫𑁆𑀫𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀧𑀺 𑀲𑀻𑀮𑀯𑀦𑁆𑀢𑀸𑀦𑀁 ¶ 𑀅𑀦𑀼𑀕𑁆𑀕𑀸𑀳𑀓𑀸 𑀦 𑀳𑀺 𑀦𑀽𑀦 𑀲𑀦𑁆𑀢𑀺. 𑀲𑀳𑀲𑀸 𑀓𑀭𑁄𑀦𑁆𑀢𑀸𑀦𑀫𑀲𑀜𑁆𑀜𑀢𑀸𑀦𑀦𑁆𑀢𑀺 𑀲𑀳𑀲𑀸 𑀅𑀯𑀻𑀫𑀁𑀲𑀺𑀢𑁆𑀯𑀸 𑀲𑀸𑀳𑀲𑀺𑀓𑀁 𑀤𑀸𑀭𑀼𑀡𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁. 𑀧𑀝𑀺𑀲𑁂𑀥𑀺𑀢𑀸𑀭𑁄𑀢𑀺 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀫𑀸 𑀓𑀭𑀺𑀢𑁆𑀣, 𑀦 𑀮𑀩𑁆𑀪𑀸 𑀏𑀢𑀁 𑀓𑀸𑀢𑀼𑀦𑁆𑀢𑀺 𑀧𑀝𑀺𑀲𑁂𑀥𑁂𑀦𑁆𑀢𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑀸𑀬 𑀲𑀻𑀮𑀲𑀫𑁆𑀧𑀦𑁆𑀦𑀸𑀬 𑀧𑀭𑀺𑀤𑁂𑀯𑀫𑀸𑀦𑀸𑀬 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑀺𑀲𑀺𑀦𑁆𑀦𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 ¶ 𑀲𑀓𑁆𑀓𑀢𑁆𑀢𑀢𑁄 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀢𑀺𑀨𑀭𑀼𑀲𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀻𑀮𑀲𑀫𑁆𑀧𑀦𑁆𑀦𑀁 𑀲𑀼𑀚𑀸𑀢𑀁 𑀓𑀺𑀮𑀫𑁂𑀢𑀺, 𑀕𑀦𑁆𑀢𑀼𑀁 𑀤𑀸𑀦𑀺 𑀫𑁂 𑀯𑀝𑁆𑀝𑀢𑀻’’𑀢𑀺 𑀤𑁂𑀯𑀮𑁄𑀓𑀸 𑀑𑀭𑀼𑀬𑁆𑀳 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑀢𑁆𑀣𑀺𑀧𑀺𑀝𑁆𑀞𑁂 ¶ 𑀦𑀺𑀲𑀺𑀦𑁆𑀦𑀁 𑀢𑀁 𑀧𑀸𑀧𑀭𑀸𑀚𑀸𑀦𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀢𑀸𑀭𑁂𑀢𑁆𑀯𑀸 𑀥𑀫𑁆𑀫𑀕𑀡𑁆𑀟𑀺𑀓𑀸𑀬 𑀉𑀢𑁆𑀢𑀸𑀦𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀸𑀚𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀨𑀭𑀲𑀼𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀸 𑀭𑀜𑁆𑀜𑁄 𑀲𑀻𑀲𑀁 𑀙𑀺𑀦𑁆𑀤𑀺𑀁𑀲𑀼, 𑀙𑀺𑀦𑁆𑀦𑀓𑀸𑀮𑁂𑀬𑁂𑀯 𑀘𑀲𑁆𑀲 𑀭𑀜𑁆𑀜𑁄 𑀲𑀻𑀲𑀪𑀸𑀯𑀁 𑀚𑀸𑀦𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀲𑁆𑀲𑀫𑀸𑀦𑀓𑀲𑀭𑀻𑀭𑁂𑀦𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀸𑀚𑀸𑀪𑀺𑀲𑁂𑀓𑀁 𑀓𑀢𑁆𑀯𑀸 𑀲𑀼𑀚𑀸𑀢𑀸𑀬 𑀘 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀤𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀘𑁂𑀯 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄 𑀘 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀥𑀫𑁆𑀫𑀺𑀓𑀭𑀸𑀚𑀸 𑀫𑀸𑀭𑀺𑀢𑁄, 𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀲𑀓𑁆𑀓𑀤𑀢𑁆𑀢𑀺𑀓𑁄 𑀥𑀫𑁆𑀫𑀺𑀓𑀭𑀸𑀚𑀸 𑀮𑀤𑁆𑀥𑁄’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁.

𑀲𑀓𑁆𑀓𑁄𑀧𑀺 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀅𑀬𑀁 𑀯𑁄 𑀲𑀓𑁆𑀓𑀤𑀢𑁆𑀢𑀺𑀓𑁄 𑀭𑀸𑀚𑀸, 𑀇𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺. 𑀲𑀘𑁂 𑀳𑀺 𑀭𑀸𑀚𑀸 𑀅𑀥𑀫𑁆𑀫𑀺𑀓𑁄 𑀳𑁄𑀢𑀺, 𑀤𑁂𑀯𑁄 𑀅𑀓𑀸𑀮𑁂 𑀯𑀲𑁆𑀲𑀢𑀺, 𑀓𑀸𑀮𑁂 𑀦 𑀯𑀲𑁆𑀲𑀢𑀺, 𑀙𑀸𑀢𑀪𑀬𑀁 𑀭𑁄𑀕𑀪𑀬𑀁 𑀲𑀢𑁆𑀣𑀪𑀬𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀪𑀬𑀸𑀦𑀺 𑀉𑀧𑀕𑀢𑀸𑀦𑁂𑀯 𑀳𑁄𑀦𑁆𑀢𑀻’’𑀢𑀺 𑀑𑀯𑀤𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁮.

‘‘𑀅𑀓𑀸𑀮𑁂 𑀯𑀲𑁆𑀲𑀢𑀻 𑀢𑀲𑁆𑀲, 𑀓𑀸𑀮𑁂 𑀢𑀲𑁆𑀲 𑀦 𑀯𑀲𑁆𑀲𑀢𑀺;

𑀲𑀕𑁆𑀕𑀸 𑀘 𑀘𑀯𑀢𑀺 𑀞𑀸𑀦𑀸, 𑀦𑀦𑀼 𑀲𑁄 𑀢𑀸𑀯𑀢𑀸 𑀳𑀢𑁄’’𑀢𑀺.

𑀢𑀢𑁆𑀣 𑀅𑀓𑀸𑀮𑁂𑀢𑀺 𑀅𑀥𑀫𑁆𑀫𑀺𑀓𑀭𑀜𑁆𑀜𑁄 𑀭𑀚𑁆𑀚𑁂 𑀅𑀬𑀼𑀢𑁆𑀢𑀓𑀸𑀮𑁂 𑀲𑀲𑁆𑀲𑀸𑀦𑀁 𑀧𑀓𑁆𑀓𑀓𑀸𑀮𑁂 𑀯𑀸 𑀮𑀸𑀬𑀦𑀫𑀤𑁆𑀤𑀦𑀸𑀤𑀺𑀓𑀸𑀮𑁂 𑀯𑀸 𑀤𑁂𑀯𑁄 𑀯𑀲𑁆𑀲𑀢𑀺. 𑀓𑀸𑀮𑁂𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑀓𑀸𑀮𑁂 𑀯𑀧𑀦𑀓𑀸𑀮𑁂 𑀢𑀭𑀼𑀡𑀲𑀲𑁆𑀲𑀓𑀸𑀮𑁂 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁂 𑀘 𑀦 𑀯𑀲𑁆𑀲𑀢𑀺. 𑀲𑀕𑁆𑀕𑀸 𑀘 𑀘𑀯𑀢𑀺 𑀞𑀸𑀦𑀸𑀢𑀺 𑀲𑀕𑁆𑀕𑀲𑀗𑁆𑀔𑀸𑀢𑀸 𑀞𑀸𑀦𑀸 𑀤𑁂𑀯𑀮𑁄𑀓𑀸 𑀘𑀯𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀫𑁆𑀫𑀺𑀓𑀭𑀸𑀚𑀸 𑀳𑀺 𑀅𑀧𑁆𑀧𑀝𑀺𑀮𑀸𑀪𑀯𑀲𑁂𑀦 𑀤𑁂𑀯𑀮𑁄𑀓𑀸 𑀘𑀯𑀢𑀺 𑀦𑀸𑀫, 𑀲𑀕𑁆𑀕𑁂𑀧𑀺 𑀯𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀅𑀥𑀫𑁆𑀫𑀺𑀓𑀭𑀸𑀚𑀸 𑀢𑀢𑁄 𑀘𑀯𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀦𑀦𑀼 𑀲𑁄 𑀢𑀸𑀯𑀢𑀸 𑀳𑀢𑁄𑀢𑀺 𑀦𑀦𑀼 𑀲𑁄 𑀅𑀥𑀫𑁆𑀫𑀺𑀓𑁄 𑀭𑀸𑀚𑀸 𑀏𑀢𑁆𑀢𑀓𑁂𑀦 𑀳𑀢𑁄 𑀳𑁄𑀢𑀺. 𑀅𑀣 ¶ 𑀯𑀸 𑀏𑀓𑀁𑀲𑀯𑀸𑀘𑀻 𑀏𑀢𑁆𑀣 𑀦𑀼-𑀓𑀸𑀭𑁄, 𑀦𑁂𑀲𑁄 𑀏𑀓𑀁𑀲𑁂𑀦 𑀏𑀢𑁆𑀢𑀸𑀯𑀢𑀸 ¶ 𑀳𑀢𑁄, 𑀅𑀝𑁆𑀞𑀲𑀼 𑀧𑀦 𑀫𑀳𑀸𑀦𑀺𑀭𑀬𑁂𑀲𑀼 𑀲𑁄𑀴𑀲𑀲𑀼 𑀘 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀤𑀻𑀖𑀭𑀢𑁆𑀢𑀁 𑀲𑁄 𑀳𑀜𑁆𑀜𑀺𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀏𑀯𑀁 ¶ 𑀲𑀓𑁆𑀓𑁄 𑀫𑀳𑀸𑀚𑀦𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀥𑀫𑁆𑀫𑀺𑀓𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀲𑀼𑀚𑀸𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀲𑀓𑁆𑀓𑀤𑀢𑁆𑀢𑀺𑀬𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀡𑀺𑀘𑁄𑀭𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁯𑁫] 𑁫. 𑀧𑀩𑁆𑀩𑀢𑀽𑀧𑀢𑁆𑀣𑀭𑀚𑀸𑀢𑀓𑀯𑀡𑁆𑀡𑀦𑀸

𑀧𑀩𑁆𑀩𑀢𑀽𑀧𑀢𑁆𑀣𑀭𑁂 𑀭𑀫𑁆𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄𑀲𑀮𑀭𑀜𑁆𑀜𑁄 𑀓𑀺𑀭 𑀏𑀓𑁄 𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀲𑁆𑀲𑀺. 𑀭𑀸𑀚𑀸𑀧𑀺 𑀧𑀭𑀺𑀯𑀻𑀫𑀁𑀲𑀫𑀸𑀦𑁄 𑀢𑀁 𑀢𑀣𑀢𑁄 𑀜𑀢𑁆𑀯𑀸 ‘‘𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀧𑀼𑀭𑁂 𑀏𑀓𑁄 𑀅𑀫𑀘𑁆𑀘𑁄 𑀧𑀤𑀼𑀲𑁆𑀲𑀺, 𑀢𑀲𑁆𑀲 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀉𑀧𑀓𑀸𑀭𑀓𑁄 𑀢𑁂, 𑀫𑀳𑀸𑀭𑀸𑀚, 𑀲𑁄 𑀘 𑀅𑀫𑀘𑁆𑀘𑁄 𑀲𑀸 𑀘 𑀇𑀢𑁆𑀣𑀻 𑀧𑀺𑀬𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂, 𑀅𑀢𑀺𑀯𑀺𑀬 𑀉𑀧𑀓𑀸𑀭𑀓𑁄 𑀲𑀓𑀮𑀁 𑀭𑀸𑀚𑀓𑀼𑀮𑀁 𑀲𑀦𑁆𑀥𑀸𑀭𑁂𑀢𑀺, 𑀲𑀸𑀧𑀺 𑀫𑁂 𑀇𑀢𑁆𑀣𑀻 𑀧𑀺𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚, ‘𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑁂𑀲𑀼 𑀲𑁂𑀯𑀓𑁂𑀲𑀼 𑀧𑀺𑀬𑀸𑀲𑀼 𑀘 𑀇𑀢𑁆𑀣𑀻𑀲𑀼 𑀤𑀼𑀩𑁆𑀪𑀺𑀢𑀼𑀁 𑀦 𑀲𑀓𑁆𑀓𑀸’𑀢𑀺 𑀧𑀼𑀩𑁆𑀩𑁂𑀧𑀺 𑀭𑀸𑀚𑀸𑀦𑁄 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀚𑁆𑀛𑀢𑁆𑀢𑀸𑀯 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀭𑀜𑁆𑀜𑁄 𑀏𑀓𑁄 𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀲𑁆𑀲𑀺. 𑀭𑀸𑀚𑀸 𑀦𑀁 𑀢𑀣𑀢𑁄 𑀜𑀢𑁆𑀯𑀸 ‘‘𑀅𑀫𑀘𑁆𑀘𑁄𑀧𑀺 𑀫𑁂 𑀩𑀳𑀽𑀧𑀓𑀸𑀭𑁄, 𑀅𑀬𑀁 𑀇𑀢𑁆𑀣𑀻𑀧𑀺 𑀫𑁂 𑀧𑀺𑀬𑀸, 𑀤𑁆𑀯𑁂𑀧𑀺 𑀇𑀫𑁂 𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑀸 ¶ , 𑀧𑀡𑁆𑀟𑀺𑀢𑀸𑀫𑀘𑁆𑀘𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀲𑀳𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀲𑀳𑀺𑀲𑁆𑀲𑀸𑀫𑀺, 𑀦𑁄 𑀘𑁂, 𑀦 𑀲𑀳𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀲𑀦𑀁 𑀤𑀢𑁆𑀯𑀸 ‘‘𑀧𑀡𑁆𑀟𑀺𑀢, 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀧𑀼𑀘𑁆𑀙𑀣, 𑀫𑀳𑀸𑀭𑀸𑀚, 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁯.

‘‘𑀧𑀩𑁆𑀩𑀢𑀽𑀧𑀢𑁆𑀣𑀭𑁂 ¶ ¶ 𑀭𑀫𑁆𑀫𑁂, 𑀚𑀸𑀢𑀸 𑀧𑁄𑀓𑁆𑀔𑀭𑀡𑀻 𑀲𑀺𑀯𑀸;

𑀢𑀁 𑀲𑀺𑀗𑁆𑀕𑀸𑀮𑁄 𑀅𑀧𑀸𑀧𑀸𑀬𑀺, 𑀚𑀸𑀦𑀁 𑀲𑀻𑀳𑁂𑀦 𑀭𑀓𑁆𑀔𑀺𑀢’’𑀦𑁆𑀢𑀺.

𑀢𑀢𑁆𑀣 𑀧𑀩𑁆𑀩𑀢𑀽𑀧𑀢𑁆𑀣𑀭𑁂 𑀭𑀫𑁆𑀫𑁂𑀢𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀧𑀸𑀤𑁂 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂 𑀅𑀗𑁆𑀕𑀡𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀚𑀸𑀢𑀸 𑀧𑁄𑀓𑁆𑀔𑀭𑀡𑀻 𑀲𑀺𑀯𑀸𑀢𑀺 𑀲𑀺𑀯𑀸 𑀲𑀻𑀢𑀮𑀸 𑀫𑀥𑀼𑀭𑁄𑀤𑀓𑀸 𑀧𑁄𑀓𑁆𑀔𑀭𑀡𑀻 𑀦𑀺𑀩𑁆𑀩𑀢𑁆𑀢𑀸, 𑀅𑀧𑀺𑀘 𑀔𑁄 𑀧𑁄𑀓𑁆𑀔𑀭𑀲𑀜𑁆𑀙𑀦𑁆𑀦𑀸 𑀦𑀤𑀻𑀧𑀺 𑀧𑁄𑀓𑁆𑀔𑀭𑀡𑀻𑀬𑁂𑀯. 𑀅𑀧𑀸𑀧𑀸𑀬𑀻𑀢𑀺 𑀅𑀧-𑀇𑀢𑀺 𑀉𑀧𑀲𑀕𑁆𑀕𑁄, 𑀅𑀧𑀸𑀬𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀁 𑀲𑀻𑀳𑁂𑀦 𑀭𑀓𑁆𑀔𑀺𑀢𑀦𑁆𑀢𑀺 𑀲𑀸 𑀧𑁄𑀓𑁆𑀔𑀭𑀡𑀻 𑀲𑀻𑀳𑀧𑀭𑀺𑀪𑁄𑀕𑀸 𑀲𑀻𑀳𑁂𑀦 𑀭𑀓𑁆𑀔𑀺𑀢𑀸, 𑀲𑁄𑀧𑀺 𑀦𑀁 𑀲𑀺𑀗𑁆𑀕𑀸𑀮𑁄 ‘‘𑀲𑀻𑀳𑁂𑀦 𑀭𑀓𑁆𑀔𑀺𑀢𑀸 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑁄𑀯 𑀅𑀧𑀸𑀬𑀺. 𑀢𑀁 𑀓𑀺𑀁 𑀫𑀜𑁆𑀜𑀢𑀺, 𑀩𑀸𑀮𑁄 𑀲𑀺𑀗𑁆𑀕𑀸𑀮𑁄 𑀲𑀻𑀳𑀲𑁆𑀲 𑀅𑀪𑀸𑀬𑀺𑀢𑁆𑀯𑀸 𑀧𑀺𑀯𑁂𑀬𑁆𑀬 𑀏𑀯𑀭𑀽𑀧𑀁 𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄.

𑀩𑁄𑀥𑀺𑀲𑀢𑁆𑀢𑁄 ‘‘𑀅𑀤𑁆𑀥𑀸 𑀏𑀢𑀲𑁆𑀲 𑀅𑀦𑁆𑀢𑁂𑀧𑀼𑀭𑁂 𑀏𑀓𑁄 𑀅𑀫𑀘𑁆𑀘𑁄 𑀧𑀤𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁦.

‘‘𑀧𑀺𑀯𑀦𑁆𑀢𑀺 𑀘𑁂 𑀫𑀳𑀸𑀭𑀸𑀚, 𑀲𑀸𑀧𑀤𑀸𑀦𑀺 𑀫𑀳𑀸𑀦𑀤𑀺𑀁;

𑀦 𑀢𑁂𑀦 𑀅𑀦𑀤𑀻 𑀳𑁄𑀢𑀺, 𑀔𑀫𑀲𑁆𑀲𑀼 𑀬𑀤𑀺 𑀢𑁂 𑀧𑀺𑀬𑀸’’𑀢𑀺.

𑀢𑀢𑁆𑀣 𑀲𑀸𑀧𑀤𑀸𑀦𑀻𑀢𑀺 𑀦 𑀓𑁂𑀯𑀮𑀁 𑀲𑀺𑀗𑁆𑀕𑀸𑀮𑁄𑀯, 𑀅𑀯𑀲𑁂𑀲𑀸𑀦𑀺 𑀲𑀼𑀦𑀔𑀧𑀲𑀤𑀩𑀺𑀴𑀸𑀭𑀫𑀺𑀕𑀸𑀤𑀻𑀦𑀺 𑀲𑀩𑁆𑀩𑀲𑀸𑀧𑀤𑀸𑀦𑀺 𑀢𑀁 𑀧𑁄𑀓𑁆𑀔𑀭𑀲𑀜𑁆𑀙𑀦𑁆𑀦𑀢𑁆𑀢𑀸 ‘‘𑀧𑁄𑀓𑁆𑀔𑀭𑀡𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀦𑀤𑀺𑀁 𑀧𑀺𑀯𑀦𑁆𑀢𑀺 𑀘𑁂. 𑀦 𑀢𑁂𑀦 𑀅𑀦𑀤𑀻 𑀳𑁄𑀢𑀻𑀢𑀺 𑀦𑀤𑀺𑀬𑀜𑁆𑀳𑀺 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀧𑀺 𑀅𑀳𑀺𑀫𑀘𑁆𑀙𑀸𑀧𑀺 𑀲𑀩𑁆𑀩𑁂 𑀧𑀺𑀧𑀸𑀲𑀺𑀢𑀸 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺, 𑀦 𑀲𑀸 𑀢𑁂𑀦 𑀓𑀸𑀭𑀡𑁂𑀦 𑀅𑀦𑀤𑀻 𑀦𑀸𑀫 𑀳𑁄𑀢𑀺, 𑀦𑀸𑀧𑀺 𑀉𑀘𑁆𑀙𑀺𑀝𑁆𑀞𑀦𑀤𑀻. 𑀓𑀲𑁆𑀫𑀸? 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀢𑁆𑀢𑀸. 𑀬𑀣𑀸 𑀦𑀤𑀻 𑀬𑁂𑀦 𑀓𑁂𑀦𑀘𑀺 𑀧𑀻𑀢𑀸 𑀦 𑀤𑀼𑀲𑁆𑀲𑀢𑀺, 𑀏𑀯𑀁 𑀇𑀢𑁆𑀣𑀻𑀧𑀺 𑀓𑀺𑀮𑁂𑀲𑀯𑀲𑁂𑀦 𑀲𑀸𑀫𑀺𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀕𑀢𑀸 𑀦𑁂𑀯 𑀅𑀦𑀺𑀢𑁆𑀣𑀻 𑀳𑁄𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀪𑀸𑀯𑁂𑀦. 𑀦𑀸𑀧𑀺 𑀉𑀘𑁆𑀙𑀺𑀝𑁆𑀞𑀺𑀢𑁆𑀣𑀻. 𑀓𑀲𑁆𑀫𑀸? 𑀑𑀤𑀓𑀦𑁆𑀢𑀺𑀓𑀢𑀸𑀬 𑀲𑀼𑀤𑁆𑀥𑀪𑀸𑀯𑁂𑀦. 𑀔𑀫𑀲𑁆𑀲𑀼 𑀬𑀤𑀺 𑀢𑁂 𑀧𑀺𑀬𑀸𑀢𑀺 𑀬𑀤𑀺 𑀧𑀦 𑀢𑁂 𑀲𑀸 𑀇𑀢𑁆𑀣𑀻 𑀧𑀺𑀬𑀸, 𑀲𑁄 𑀘 𑀅𑀫𑀘𑁆𑀘𑁄 𑀩𑀳𑀽𑀧𑀓𑀸𑀭𑁄, 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀔𑀫𑀲𑁆𑀲𑀼 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀢𑀺𑀝𑁆𑀞𑀸𑀳𑀻𑀢𑀺.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀑𑀯𑀸𑀤𑀁 𑀅𑀤𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 ‘‘𑀧𑀼𑀦 𑀏𑀯𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀔𑀫𑀺. 𑀢𑀢𑁄 𑀧𑀝𑁆𑀞𑀸𑀬 ¶ 𑀢𑁂 𑀑𑀭𑀫𑀺𑀁𑀲𑀼. 𑀭𑀸𑀚𑀸𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺. 𑀓𑁄𑀲𑀮𑀭𑀸𑀚𑀸𑀧𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀔𑀫𑀺𑀢𑁆𑀯𑀸 𑀫𑀚𑁆𑀛𑀢𑁆𑀢𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀩𑁆𑀩𑀢𑀽𑀧𑀢𑁆𑀣𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁯𑁬] 𑁬. 𑀯𑀮𑀸𑀳𑀓𑀲𑁆𑀲𑀚𑀸𑀢𑀓𑀯𑀡𑁆𑀡𑀦𑀸

𑀬𑁂 𑀦 𑀓𑀸𑀳𑀦𑁆𑀢𑀺 𑀑𑀯𑀸𑀤𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀓𑀁 𑀅𑀮𑀗𑁆𑀓𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀯𑀲𑁂𑀦𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀳𑀺 𑀘𑁂𑀯 𑀇𑀢𑁆𑀣𑀺𑀓𑀼𑀢𑁆𑀢𑀯𑀺𑀮𑀸𑀲𑁂𑀳𑀺 𑀘 𑀧𑀼𑀭𑀺𑀲𑁂 𑀧𑀮𑁄𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀯𑀲𑀁 𑀉𑀧𑀕𑀢𑀪𑀸𑀯𑀁 𑀜𑀢𑁆𑀯𑀸 𑀲𑀻𑀮𑀯𑀺𑀦𑀸𑀲𑀜𑁆𑀘𑁂𑀯 𑀥𑀦𑀯𑀺𑀦𑀸𑀲𑀜𑁆𑀘 𑀧𑀸𑀧𑀦𑀝𑁆𑀞𑁂𑀦 ‘𑀬𑀓𑁆𑀔𑀺𑀦𑀺𑀬𑁄’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀩𑁆𑀩𑁂𑀧𑀺 𑀳𑀺 𑀬𑀓𑁆𑀔𑀺𑀦𑀺𑀬𑁄 𑀇𑀢𑁆𑀣𑀺𑀓𑀼𑀢𑁆𑀢𑁂𑀦 𑀏𑀓𑀁 𑀧𑀼𑀭𑀺𑀲𑀲𑀢𑁆𑀣𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀸𑀡𑀺𑀚𑁂 𑀧𑀮𑁄𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂 𑀧𑀼𑀭𑀺𑀲𑁂 𑀤𑀺𑀲𑁆𑀯𑀸 𑀢𑁂 𑀲𑀩𑁆𑀩𑁂𑀧𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀉𑀪𑁄𑀳𑀺 𑀳𑀦𑀼𑀓𑀧𑀲𑁆𑀲𑁂𑀳𑀺 𑀮𑁄𑀳𑀺𑀢𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀫𑀼𑀔𑀁 𑀧𑀽𑀭𑀸𑀧𑁂𑀢𑁆𑀯𑀸 𑀔𑀸𑀤𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀺𑀭𑀻𑀲𑀯𑀢𑁆𑀣𑀼 𑀦𑀸𑀫 𑀬𑀓𑁆𑀔𑀦𑀕𑀭𑀁 𑀅𑀳𑁄𑀲𑀺, 𑀢𑀢𑁆𑀣 𑀬𑀓𑁆𑀔𑀺𑀦𑀺𑀬𑁄 𑀯𑀲𑀺𑀁𑀲𑀼. 𑀢𑀸 𑀪𑀺𑀦𑁆𑀦𑀦𑀸𑀯𑀸𑀦𑀁 𑀯𑀸𑀡𑀺𑀚𑀸𑀦𑀁 𑀆𑀕𑀢𑀓𑀸𑀮𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀲𑀺𑀕𑀡𑀧𑀭𑀺𑀯𑀼𑀢𑀸 𑀤𑀸𑀭𑀓𑁂 𑀅𑀗𑁆𑀓𑁂𑀦𑀸𑀤𑀸𑀬 𑀯𑀸𑀡𑀺𑀚𑁂 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑁂𑀲𑀁 ¶ ‘‘𑀫𑀦𑀼𑀲𑁆𑀲𑀸𑀯𑀸𑀲𑀁 𑀆𑀕𑀢𑀫𑁆𑀳𑀸’’𑀢𑀺 𑀲𑀜𑁆𑀚𑀸𑀦𑀦𑀢𑁆𑀣𑀁 𑀢𑀢𑁆𑀣 𑀢𑀢𑁆𑀣 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀫𑀦𑀼𑀲𑁆𑀲𑁂 𑀕𑁄𑀕𑀡𑁂 𑀲𑀼𑀦𑀔𑁂𑀢𑀺 𑀏𑀯𑀫𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑀺, 𑀯𑀸𑀡𑀺𑀚𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀁 𑀬𑀸𑀕𑀼𑀁 𑀧𑀺𑀯𑀣, 𑀪𑀢𑁆𑀢𑀁 𑀪𑀼𑀜𑁆𑀚𑀣, 𑀔𑀸𑀤𑀦𑀻𑀬𑀁 𑀔𑀸𑀤𑀣𑀸’’𑀢𑀺 𑀯𑀤𑀦𑁆𑀢𑀺. 𑀯𑀸𑀡𑀺𑀚𑀸 𑀅𑀚𑀸𑀦𑀦𑁆𑀢𑀸 𑀢𑀸𑀳𑀺 𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀣 𑀢𑁂𑀲𑀁 𑀔𑀸𑀤𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀯𑀺𑀲𑁆𑀲𑀫𑀺𑀢𑀓𑀸𑀮𑁂 ¶ 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀺, ‘‘𑀢𑀼𑀫𑁆𑀳𑁂 𑀓𑀢𑁆𑀣 𑀯𑀸𑀲𑀺𑀓𑀸, 𑀓𑀼𑀢𑁄 𑀆𑀕𑀢𑀸, 𑀓𑀳𑀁 𑀕𑀘𑁆𑀙𑀺𑀲𑁆𑀲𑀣, 𑀓𑁂𑀦 𑀓𑀫𑁆𑀫𑁂𑀦 𑀇𑀥𑀸𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺. ‘‘𑀪𑀺𑀦𑁆𑀦𑀦𑀸𑀯𑀸 𑀳𑀼𑀢𑁆𑀯𑀸 𑀇𑀥𑀸𑀕𑀢𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀅𑀬𑁆𑀬𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀸𑀫𑀺𑀓𑀸𑀦𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀕𑀢𑀸𑀦𑀁 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀢𑁂 𑀫𑀢𑀸 𑀪𑀯𑀺𑀲𑁆𑀲𑀦𑁆𑀢𑀺; 𑀢𑀼𑀫𑁆𑀳𑁂𑀧𑀺 𑀯𑀸𑀡𑀺𑀚𑀸𑀬𑁂𑀯, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂 𑀯𑀸𑀡𑀺𑀚𑁂 𑀇𑀢𑁆𑀣𑀺𑀓𑀼𑀢𑁆𑀢𑀳𑀸𑀯𑀪𑀸𑀯𑀯𑀺𑀮𑀸𑀲𑁂𑀳𑀺 𑀧𑀮𑁄𑀪𑁂𑀢𑁆𑀯𑀸 𑀬𑀓𑁆𑀔𑀦𑀕𑀭𑀁 𑀦𑁂𑀢𑁆𑀯𑀸 𑀲𑀘𑁂 𑀧𑀞𑀫𑀕𑀳𑀺𑀢𑀸 𑀫𑀦𑀼𑀲𑁆𑀲𑀸 𑀅𑀢𑁆𑀣𑀺, 𑀢𑁂 𑀤𑁂𑀯𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀓𑀸𑀭𑀡𑀖𑀭𑁂 𑀧𑀓𑁆𑀔𑀺𑀧𑀦𑁆𑀢𑀺 ¶ , 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀪𑀺𑀦𑁆𑀦𑀦𑀸𑀯𑁂 𑀫𑀦𑀼𑀲𑁆𑀲𑁂 𑀅𑀮𑀪𑀦𑁆𑀢𑀺𑀬𑁄 𑀧𑀦 𑀧𑀭𑀢𑁄 𑀓𑀮𑁆𑀬𑀸𑀡𑀺𑀁 𑀑𑀭𑀢𑁄 𑀦𑀸𑀕𑀤𑀻𑀧𑀦𑁆𑀢𑀺 𑀏𑀯𑀁 𑀲𑀫𑀼𑀤𑁆𑀤𑀢𑀻𑀭𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑀺. 𑀅𑀬𑀁 𑀢𑀸𑀲𑀁 𑀥𑀫𑁆𑀫𑀢𑀸.

𑀅𑀣𑁂𑀓𑀤𑀺𑀯𑀲𑀁 𑀧𑀜𑁆𑀘𑀲𑀢𑀸 𑀪𑀺𑀦𑁆𑀦𑀦𑀸𑀯𑀸 𑀯𑀸𑀡𑀺𑀚𑀸 𑀢𑀸𑀲𑀁 𑀦𑀕𑀭𑀲𑀫𑀻𑀧𑁂 𑀉𑀢𑁆𑀢𑀭𑀺𑀁𑀲𑀼. 𑀢𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀮𑁄𑀪𑁂𑀢𑁆𑀯𑀸 𑀬𑀓𑁆𑀔𑀦𑀕𑀭𑀁 𑀦𑁂𑀢𑁆𑀯𑀸 𑀧𑀞𑀫𑀁 𑀕𑀳𑀺𑀢𑁂 𑀫𑀦𑀼𑀲𑁆𑀲𑁂 𑀤𑁂𑀯𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀓𑀸𑀭𑀡𑀖𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀚𑁂𑀝𑁆𑀞𑀬𑀓𑁆𑀔𑀺𑀦𑀻 𑀚𑁂𑀝𑁆𑀞𑀓𑀯𑀸𑀡𑀺𑀚𑀁, 𑀲𑁂𑀲𑀸 𑀲𑁂𑀲𑁂𑀢𑀺 𑀢𑀸 𑀧𑀜𑁆𑀘𑀲𑀢𑀸 𑀬𑀓𑁆𑀔𑀺𑀦𑀺𑀬𑁄 𑀢𑁂 𑀧𑀜𑁆𑀘𑀲𑀢𑁂 𑀯𑀸𑀡𑀺𑀚𑁂 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀅𑀓𑀁𑀲𑀼. 𑀅𑀣 𑀲𑀸 𑀚𑁂𑀝𑁆𑀞𑀬𑀓𑁆𑀔𑀺𑀦𑀻 𑀭𑀢𑁆𑀢𑀺𑀪𑀸𑀕𑁂 𑀯𑀸𑀡𑀺𑀚𑁂 𑀦𑀺𑀤𑁆𑀤𑀁 𑀉𑀧𑀕𑀢𑁂 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀓𑀸𑀭𑀡𑀖𑀭𑁂 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀲𑁂𑀲𑀸𑀧𑀺 𑀢𑀣𑁂𑀯 𑀓𑀭𑁄𑀦𑁆𑀢𑀺. 𑀚𑁂𑀝𑁆𑀞𑀬𑀓𑁆𑀔𑀺𑀦𑀺𑀬𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀆𑀕𑀢𑀓𑀸𑀮𑁂 𑀲𑀭𑀻𑀭𑀁 𑀲𑀻𑀢𑀮𑀁 𑀳𑁄𑀢𑀺. 𑀚𑁂𑀝𑁆𑀞𑀯𑀸𑀡𑀺𑀚𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀲𑁆𑀲𑀸 𑀬𑀓𑁆𑀔𑀺𑀦𑀺𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀸 𑀧𑀜𑁆𑀘𑀲𑀢𑀸 𑀬𑀓𑁆𑀔𑀺𑀦𑀺𑀬𑁄 ¶ 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀫𑁆𑀳𑁂𑀳𑀺 𑀧𑀮𑀸𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀫𑀼𑀔𑀥𑁄𑀯𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀲𑁂𑀲𑀯𑀸𑀡𑀺𑀚𑀸𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀇𑀫𑀸 𑀬𑀓𑁆𑀔𑀺𑀦𑀺𑀬𑁄, 𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑁄, 𑀅𑀜𑁆𑀜𑁂𑀲𑀁 𑀪𑀺𑀦𑁆𑀦𑀦𑀸𑀯𑀸𑀦𑀁 𑀆𑀕𑀢𑀓𑀸𑀮𑁂 𑀢𑁂 𑀲𑀸𑀫𑀺𑀓𑁂 𑀓𑀢𑁆𑀯𑀸 𑀅𑀫𑁆𑀳𑁂𑀧𑀺 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀏𑀣 𑀇𑀢𑁄 𑀧𑀮𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀲𑀼 𑀧𑀜𑁆𑀘𑀲𑀢𑁂𑀲𑀼 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 ‘‘𑀦 𑀫𑀬𑀁 𑀏𑀢𑀸 𑀯𑀺𑀚𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀫𑀬𑀁 𑀦 𑀧𑀮𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀚𑁂𑀝𑁆𑀞𑀯𑀸𑀡𑀺𑀚𑁄 𑀅𑀢𑁆𑀢𑀦𑁄 𑀯𑀘𑀦𑀓𑀸𑀭𑁂 𑀅𑀟𑁆𑀠𑀢𑁂𑀬𑁆𑀬𑀲𑀢𑁂 𑀕𑀳𑁂𑀢𑁆𑀯𑀸 𑀢𑀸𑀲𑀁 𑀪𑀻𑀢𑁄 𑀧𑀮𑀸𑀬𑀺.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀯𑀮𑀸𑀳𑀓𑀲𑁆𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀲𑀩𑁆𑀩𑀲𑁂𑀢𑁄 𑀓𑀸𑀴𑀲𑀻𑀲𑁄 𑀫𑀼𑀜𑁆𑀚𑀓𑁂𑀲𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀅𑀳𑁄𑀲𑀺. 𑀲𑁄 ¶ 𑀳𑀺𑀫𑀯𑀦𑁆𑀢𑀢𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀫𑁆𑀩𑀧𑀡𑁆𑀡𑀺𑀲𑀭𑁂 𑀧𑀮𑁆𑀮𑀮𑁂 𑀲𑀬𑀁𑀚𑀸𑀢𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀘 ‘‘𑀚𑀦𑀧𑀤𑀁 𑀕𑀦𑁆𑀢𑀼𑀓𑀸𑀫𑀸 𑀅𑀢𑁆𑀣𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀓𑀭𑀼𑀡𑀸𑀧𑀭𑀺𑀪𑀸𑀯𑀺𑀢𑀁 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀪𑀸𑀲𑀢𑀺. 𑀢𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀲𑀸𑀫𑀺, 𑀫𑀬𑀁 𑀚𑀦𑀧𑀤𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺 𑀫𑀬𑁆𑀳𑀁 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀣𑀸𑀢𑀺. 𑀅𑀧𑁆𑀧𑁂𑀓𑀘𑁆𑀘𑁂 𑀅𑀪𑀺𑀭𑀼𑀳𑀺𑀁𑀲𑀼, 𑀢𑁂𑀲𑀼 𑀏𑀓𑀘𑁆𑀘𑁂 𑀯𑀸𑀮𑀥𑀺𑀁 𑀕𑀡𑁆𑀳𑀺𑀁𑀲𑀼, 𑀏𑀓𑀘𑁆𑀘𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼𑀬𑁂𑀯. 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑀫𑀲𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀅𑀟𑁆𑀠𑀢𑁂𑀬𑁆𑀬𑀲𑀢𑁂 𑀯𑀸𑀡𑀺𑀚𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀚𑀦𑀧𑀤𑀁 𑀦𑁂𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀫𑀸𑀲𑀺. 𑀢𑀸𑀧𑀺 𑀔𑁄 𑀬𑀓𑁆𑀔𑀺𑀦𑀺𑀬𑁄 𑀅𑀜𑁆𑀜𑁂𑀲𑀁 𑀆𑀕𑀢𑀓𑀸𑀮𑁂 𑀢𑀢𑁆𑀣 𑀑𑀳𑀻𑀦𑀓𑁂 𑀅𑀟𑁆𑀠𑀢𑁂𑀬𑁆𑀬𑀲𑀢𑁂 𑀫𑀦𑀼𑀲𑁆𑀲𑁂 𑀯𑀥𑀺𑀢𑁆𑀯𑀸 𑀔𑀸𑀤𑀺𑀁𑀲𑀼.

𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀬𑀣𑀸 𑀢𑁂 𑀬𑀓𑁆𑀔𑀺𑀦𑀻𑀦𑀁 𑀯𑀲𑀁 𑀕𑀢𑀸 𑀯𑀸𑀡𑀺𑀚𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸, 𑀯𑀮𑀸𑀳𑀓𑀲𑁆𑀲𑀭𑀸𑀚𑀲𑁆𑀲 𑀯𑀘𑀦𑀓𑀭𑀸 𑀯𑀸𑀡𑀺𑀚𑀸 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀸, 𑀏𑀯𑀫𑁂𑀯 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀁 𑀅𑀓𑀭𑁄𑀦𑁆𑀢𑀸 𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀉𑀧𑀸𑀲𑀓𑀸𑀧𑀺 𑀉𑀧𑀸𑀲𑀺𑀓𑀸𑀬𑁄𑀧𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 ¶ 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀸𑀤𑀻𑀲𑀼 ¶ 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺. 𑀑𑀯𑀸𑀤𑀓𑀭𑀸 𑀧𑀦 𑀢𑀺𑀲𑁆𑀲𑁄 𑀓𑀼𑀮𑀲𑀫𑁆𑀧𑀢𑁆𑀢𑀺𑀬𑁄 𑀘 𑀙 𑀓𑀸𑀫𑀲𑀕𑁆𑀕𑁂 𑀯𑀻𑀲𑀢𑀺 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀇𑀫𑀸𑀦𑀺 𑀘 𑀞𑀸𑀦𑀸𑀦𑀺 𑀧𑀢𑁆𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀫𑀳𑀦𑁆𑀢𑀁 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁯𑁧.

‘‘𑀬𑁂 𑀦 𑀓𑀸𑀳𑀦𑁆𑀢𑀺 𑀑𑀯𑀸𑀤𑀁, 𑀦𑀭𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀩𑁆𑀬𑀲𑀦𑀁 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀭𑀓𑁆𑀔𑀲𑀻𑀳𑀺𑀯 𑀯𑀸𑀡𑀺𑀚𑀸.

𑁯𑁨.

‘‘𑀬𑁂 𑀘 𑀓𑀸𑀳𑀦𑁆𑀢𑀺 𑀑𑀯𑀸𑀤𑀁, 𑀦𑀭𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀲𑁄𑀢𑁆𑀣𑀺𑀁 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀯𑀮𑀸𑀳𑁂𑀦𑁂𑀯 𑀯𑀸𑀡𑀺𑀚𑀸’’𑀢𑀺.

𑀢𑀢𑁆𑀣 𑀬𑁂 𑀦 𑀓𑀸𑀳𑀦𑁆𑀢𑀻𑀢𑀺 𑀬𑁂 𑀦 𑀓𑀭𑀺𑀲𑁆𑀲𑀦𑁆𑀢𑀺. 𑀩𑁆𑀬𑀲𑀦𑀁 𑀢𑁂 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀢𑁂 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀭𑀓𑁆𑀔𑀲𑀻𑀳𑀺𑀯 𑀯𑀸𑀡𑀺𑀚𑀸𑀢𑀺 𑀭𑀓𑁆𑀔𑀲𑀻𑀳𑀺 𑀧𑀮𑁄𑀪𑀺𑀢𑀯𑀸𑀡𑀺𑀚𑀸 𑀯𑀺𑀬. 𑀲𑁄𑀢𑁆𑀣𑀺𑀁 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀦𑁆𑀢𑀭𑀸𑀬𑁂𑀦 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀯𑀮𑀸𑀳𑁂𑀦𑁂𑀯 𑀯𑀸𑀡𑀺𑀚𑀸𑀢𑀺 𑀯𑀮𑀸𑀳𑁂𑀦𑁂𑀯 ‘‘𑀆𑀕𑀘𑁆𑀙𑀣𑀸’’𑀢𑀺 ¶ 𑀯𑀼𑀢𑁆𑀢𑀸 𑀢𑀲𑁆𑀲 𑀯𑀘𑀦𑀓𑀭𑀸 𑀯𑀸𑀡𑀺𑀚𑀸 𑀯𑀺𑀬. 𑀬𑀣𑀸 𑀳𑀺 𑀢𑁂 𑀲𑀫𑀼𑀤𑁆𑀤𑀧𑀸𑀭𑀁 𑀕𑀦𑁆𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀁 𑀅𑀕𑀫𑀁𑀲𑀼, 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀓𑀭𑀸 𑀲𑀁𑀲𑀸𑀭𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀓𑀤𑀸𑀕𑀸𑀫𑀺𑀨𑀮𑀅𑀦𑀸𑀕𑀸𑀫𑀺𑀨𑀮𑀅𑀭𑀳𑀢𑁆𑀢𑀨𑀮𑀸𑀦𑀺 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀯𑀮𑀸𑀳𑀓𑀲𑁆𑀲𑀭𑀸𑀚𑀲𑁆𑀲 𑀯𑀘𑀦𑀓𑀭𑀸 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 𑀯𑀸𑀡𑀺𑀚𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀯𑀮𑀸𑀳𑀓𑀲𑁆𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀮𑀸𑀳𑀓𑀲𑁆𑀲𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁯𑁭] 𑁭. 𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 ‘‘𑀫𑀬𑀸 𑀕𑀳𑀺𑀢𑁂 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑁄 𑀦 𑀓𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀉𑀧𑀚𑁆𑀛𑀸𑀬𑁂𑀦 𑀞𑀧𑀺𑀢𑀁 𑀯𑀺𑀲𑁆𑀲𑀸𑀲𑁂𑀦 𑀏𑀓𑀁 𑀯𑀢𑁆𑀣𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀉𑀧𑀚𑁆𑀛𑀸𑀬𑀁 𑀆𑀧𑀼𑀘𑁆𑀙𑀺. 𑀅𑀣 𑀢𑀁 𑀉𑀧𑀚𑁆𑀛𑀸𑀬𑁄 ¶ ‘‘𑀓𑀺𑀁𑀓𑀸𑀭𑀡𑀸 𑀕𑀡𑁆𑀳𑀻’’𑀢𑀺 ¶ 𑀯𑀢𑁆𑀯𑀸 ‘‘𑀫𑀬𑀸 𑀕𑀳𑀺𑀢𑁂 𑀦 𑀓𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀢𑀼𑀫𑁆𑀳𑀸𑀓𑀁 𑀯𑀺𑀲𑁆𑀲𑀸𑀲𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀢𑀼𑀬𑁆𑀳𑀁 𑀯𑀺𑀲𑁆𑀲𑀸𑀲𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀓𑀼𑀤𑁆𑀥𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀳𑀭𑀺. 𑀢𑀲𑁆𑀲 𑀲𑀸 𑀓𑀺𑀭𑀺𑀬𑀸 𑀪𑀺𑀓𑁆𑀔𑀽𑀲𑀼 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀤𑀳𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀯𑀢𑁆𑀣𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀁 𑀅𑀓𑀸𑀲𑀺. 𑀅𑀣 𑀦𑀁 𑀉𑀧𑀚𑁆𑀛𑀸𑀬𑁄 ‘𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀢𑀼𑀬𑁆𑀳𑀁 𑀯𑀺𑀲𑁆𑀲𑀸𑀲𑁄 𑀦𑀸𑀫𑀸’𑀢𑀺 𑀯𑀢𑁆𑀯𑀸 𑀓𑀼𑀤𑁆𑀥𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀳𑀭𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀲𑀤𑁆𑀥𑀺𑀁 𑀅𑀯𑀺𑀲𑁆𑀲𑀸𑀲𑀺𑀓𑁄, 𑀧𑀼𑀩𑁆𑀩𑁂𑀧𑀺 𑀅𑀯𑀺𑀲𑁆𑀲𑀸𑀲𑀺𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 ¶ 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀇𑀲𑀺𑀕𑀡𑁂 𑀏𑀓𑁄 𑀢𑀸𑀧𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀅𑀓𑀢𑁆𑀯𑀸 𑀏𑀓𑀁 𑀫𑀢𑀫𑀸𑀢𑀺𑀓𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑀝𑀺𑀚𑀕𑁆𑀕𑀺. 𑀅𑀣 𑀦𑀁 𑀲𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀸𑀭𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀇𑀲𑀺𑀕𑀡𑁄 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀓𑁂𑀦 𑀦𑀼 𑀓𑁄 𑀓𑀸𑀭𑀡𑁂𑀦 𑀫𑀺𑀢𑁆𑀢𑀪𑀸𑀯𑁄 𑀯𑀸 𑀅𑀫𑀺𑀢𑁆𑀢𑀪𑀸𑀯𑁄 𑀯𑀸 𑀲𑀓𑁆𑀓𑀸 𑀚𑀸𑀦𑀺𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸’’𑀢𑀺 𑀆𑀘𑀺𑀓𑁆𑀔𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁯𑁩.

‘‘𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸, 𑀦 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀺;

𑀘𑀓𑁆𑀔𑀽𑀦𑀺 𑀘𑀲𑁆𑀲 𑀦 𑀤𑀤𑀸𑀢𑀺, 𑀧𑀝𑀺𑀮𑁄𑀫𑀜𑁆𑀘 𑀯𑀢𑁆𑀢𑀢𑀺.

𑁯𑁪.

‘‘𑀏𑀢𑁂 𑀪𑀯𑀦𑁆𑀢𑀺 𑀆𑀓𑀸𑀭𑀸, 𑀅𑀫𑀺𑀢𑁆𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀬𑁂𑀳𑀺 𑀅𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸𑀢𑀺 𑀬𑁄 𑀳𑀺 𑀬𑀲𑁆𑀲 𑀅𑀫𑀺𑀢𑁆𑀢𑁄 𑀳𑁄𑀢𑀺, 𑀲𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀦 𑀉𑀫𑁆𑀳𑀬𑀢𑁂, 𑀳𑀲𑀺𑀢𑀁 𑀦 𑀓𑀭𑁄𑀢𑀺, 𑀧𑀳𑀝𑁆𑀞𑀸𑀓𑀸𑀭𑀁 𑀦 𑀤𑀲𑁆𑀲𑁂𑀢𑀺. 𑀦 ¶ 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀻𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀝𑀺𑀦𑀦𑁆𑀤𑀢𑀺, 𑀲𑀸𑀥𑀼 𑀲𑀼𑀪𑀸𑀲𑀺𑀢𑀦𑁆𑀢𑀺 𑀦 𑀘𑀸𑀦𑀼𑀫𑁄𑀤𑀢𑀺. 𑀘𑀓𑁆𑀔𑀽𑀦𑀺 𑀘𑀲𑁆𑀲 𑀦 𑀤𑀤𑀸𑀢𑀻𑀢𑀺 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀧𑀝𑀺𑀫𑀼𑀔𑁄 𑀳𑀼𑀢𑁆𑀯𑀸 𑀦 𑀑𑀮𑁄𑀓𑁂𑀢𑀺, 𑀅𑀜𑁆𑀜𑀢𑁄 𑀘𑀓𑁆𑀔𑀽𑀦𑀺 𑀳𑀭𑀢𑀺. 𑀧𑀝𑀺𑀮𑁄𑀫𑀜𑁆𑀘 𑀯𑀢𑁆𑀢𑀢𑀻𑀢𑀺 𑀢𑀲𑁆𑀲 𑀓𑀸𑀬𑀓𑀫𑁆𑀫𑀫𑁆𑀧𑀺 𑀯𑀘𑀻𑀓𑀫𑁆𑀫𑀫𑁆𑀧𑀺 𑀦 𑀭𑁄𑀘𑁂𑀢𑀺, 𑀧𑀝𑀺𑀮𑁄𑀫𑀕𑀸𑀳𑀁 𑀕𑀡𑁆𑀳𑀸𑀢𑀺 𑀧𑀘𑁆𑀘𑀦𑀻𑀓𑀕𑀸𑀳𑀁. 𑀆𑀓𑀸𑀭𑀸𑀢𑀺 𑀓𑀸𑀭𑀡𑀸𑀦𑀺. 𑀬𑁂𑀳𑀺 𑀅𑀫𑀺𑀢𑁆𑀢𑀦𑁆𑀢𑀺 𑀬𑁂𑀳𑀺 𑀓𑀸𑀭𑀡𑁂𑀳𑀺 ¶ 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄 𑀧𑀼𑀕𑁆𑀕𑀮𑁄 ‘‘𑀅𑀬𑀁 𑀫𑁂 𑀅𑀫𑀺𑀢𑁆𑀢𑁄’’𑀢𑀺 𑀚𑀸𑀦𑁂𑀬𑁆𑀬, 𑀢𑀢𑁄 𑀯𑀺𑀧𑀭𑀻𑀢𑁂𑀳𑀺 𑀧𑀦 𑀫𑀺𑀢𑁆𑀢𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀫𑀺𑀢𑁆𑀢𑀸𑀫𑀺𑀢𑁆𑀢𑀪𑀸𑀯𑀓𑀸𑀭𑀡𑀸𑀦𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀳𑀢𑁆𑀣𑀺𑀧𑁄𑀲𑀓𑀢𑀸𑀧𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀳𑀢𑁆𑀣𑀻 𑀉𑀧𑀚𑁆𑀛𑀸𑀬𑁄, 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁯𑁮] 𑁮. 𑀭𑀸𑀥𑀚𑀸𑀢𑀓𑀯𑀡𑁆𑀡𑀦𑀸

𑀧𑀯𑀸𑀲𑀸 ¶ 𑀆𑀕𑀢𑁄 𑀢𑀸𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀓𑀁 𑀅𑀮𑀗𑁆𑀓𑀢𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀯𑀲𑁂𑀦𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀪𑀺𑀓𑁆𑀔𑀼 𑀦 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀁, 𑀧𑀼𑀩𑁆𑀩𑁂𑀧𑀺 𑀤𑁄𑀯𑀸𑀭𑀺𑀓𑁂 𑀞𑀧𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, 𑀓𑀺𑀁 𑀢𑁂 𑀇𑀢𑁆𑀣𑀺𑀬𑀸, 𑀮𑀤𑁆𑀥𑀸𑀧𑀺 𑀲𑀸 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀼𑀯𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, ‘‘𑀭𑀸𑀥𑁄’’𑀢𑀺𑀲𑁆𑀲 𑀦𑀸𑀫𑀁, 𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀧𑁄𑀝𑁆𑀞𑀧𑀸𑀤𑁄 𑀦𑀸𑀫. 𑀢𑁂 𑀉𑀪𑁄𑀧𑀺 𑀢𑀭𑀼𑀡𑀓𑀸𑀮𑁂𑀬𑁂𑀯 𑀏𑀓𑁄 𑀮𑀼𑀤𑁆𑀤𑀓𑁄 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀧𑀦 𑀩𑁆𑀭𑀸𑀳𑁆𑀫𑀡𑀻 𑀅𑀭𑀓𑁆𑀔𑀺𑀢𑀸 𑀤𑀼𑀲𑁆𑀲𑀻𑀮𑀸. 𑀲𑁄 𑀯𑁄𑀳𑀸𑀭𑀓𑀭𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀢𑁂 𑀲𑀼𑀯𑀧𑁄𑀢𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢𑀸, 𑀅𑀳𑀁 𑀯𑁄𑀳𑀸𑀭𑀓𑀭𑀡𑀢𑁆𑀣𑀸𑀬 𑀕𑀘𑁆𑀙𑀸𑀫𑀺, 𑀓𑀸𑀮𑁂 𑀯𑀸 𑀯𑀺𑀓𑀸𑀮𑁂 𑀯𑀸 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼 𑀓𑀭𑀡𑀓𑀫𑁆𑀫𑀁 𑀑𑀮𑁄𑀓𑁂𑀬𑁆𑀬𑀸𑀣, 𑀅𑀜𑁆𑀜𑀲𑁆𑀲 𑀧𑀼𑀭𑀺𑀲𑀲𑁆𑀲 𑀕𑀫𑀦𑀪𑀸𑀯𑀁 𑀯𑀸 𑀅𑀕𑀫𑀦𑀪𑀸𑀯𑀁 𑀯𑀸 𑀚𑀸𑀦𑁂𑀬𑁆𑀬𑀸𑀣𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀺𑀁 𑀲𑀼𑀯𑀧𑁄𑀢𑀓𑀸𑀦𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸 𑀢𑀲𑁆𑀲 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑀸𑀘𑀸𑀭𑀁 𑀘𑀭𑀺, 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀧𑀫𑀸𑀡𑀁 𑀦𑀢𑁆𑀣𑀺.

𑀢𑀁 𑀤𑀺𑀲𑁆𑀯𑀸 𑀧𑁄𑀝𑁆𑀞𑀧𑀸𑀤𑁄 𑀭𑀸𑀥𑀁 𑀧𑀼𑀘𑁆𑀙𑀺 𑁋 ‘‘𑀩𑁆𑀭𑀸𑀳𑁆𑀫𑀡𑁄 𑀇𑀫𑀁 𑀩𑁆𑀭𑀸𑀳𑁆𑀫𑀡𑀺𑀁 𑀅𑀫𑁆𑀳𑀸𑀓𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀕𑀢𑁄, 𑀅𑀬𑀜𑁆𑀘 ¶ 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀤𑀸𑀫𑀺 𑀦’’𑀦𑁆𑀢𑀺. 𑀭𑀸𑀥𑁄 ‘‘𑀫𑀸 𑀯𑀤𑀸𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀅𑀫𑁆𑀫, 𑀓𑀺𑀁𑀓𑀸𑀭𑀡𑀸 𑀧𑀸𑀧𑀓𑀫𑁆𑀫𑀁 𑀓𑀭𑁄𑀲𑀻’’𑀢𑀺 𑀆𑀳. 𑀲𑀸 𑀢𑀁 𑀫𑀸𑀭𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀦𑀸𑀫 𑀫𑀬𑁆𑀳𑀁 𑀧𑀼𑀢𑁆𑀢𑁄, 𑀇𑀢𑁄 𑀧𑀝𑁆𑀞𑀸𑀬 𑀦 𑀓𑀭𑀺𑀲𑁆𑀲𑀸𑀫𑀺, 𑀏𑀳𑀺, 𑀢𑀸𑀢, 𑀢𑀸𑀯𑀸’’𑀢𑀺 𑀧𑀺𑀬𑀸𑀬𑀫𑀸𑀦𑀸 𑀯𑀺𑀬 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀕𑀢𑀁 𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 𑀫𑀁 𑀑𑀯𑀤𑀲𑀺, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀉𑀤𑁆𑀥𑀦𑀦𑁆𑀢𑀭𑁂𑀲𑀼 𑀧𑀓𑁆𑀔𑀺𑀧𑀺. 𑀩𑁆𑀭𑀸𑀳𑁆𑀫𑀡𑁄 𑀆𑀕𑀦𑁆𑀢𑁆𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 ‘‘𑀓𑀺𑀁, 𑀢𑀸𑀢 𑀭𑀸𑀥, 𑀫𑀸𑀢𑀸 𑀢𑁂 𑀅𑀦𑀸𑀘𑀸𑀭𑀁 𑀓𑀭𑁄𑀢𑀺, 𑀦 𑀓𑀭𑁄𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁫.

‘‘𑀧𑀯𑀸𑀲𑀸 ¶ 𑀆𑀕𑀢𑁄 𑀢𑀸𑀢, 𑀇𑀤𑀸𑀦𑀺 𑀦𑀘𑀺𑀭𑀸𑀕𑀢𑁄;

𑀓𑀘𑁆𑀘𑀺𑀦𑁆𑀦𑀼 𑀢𑀸𑀢 𑀢𑁂 𑀫𑀸𑀢𑀸, 𑀦 𑀅𑀜𑁆𑀜𑀫𑀼𑀧𑀲𑁂𑀯𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁, 𑀢𑀸𑀢 𑀭𑀸𑀥, 𑀧𑀯𑀸𑀲𑀸 𑀆𑀕𑀢𑁄, 𑀲𑁄 𑀘𑀫𑁆𑀳𑀺 𑀇𑀤𑀸𑀦𑁂𑀯 𑀆𑀕𑀢𑁄 𑀦𑀘𑀺𑀭𑀸𑀕𑀢𑁄, 𑀢𑁂𑀦 𑀧𑀯𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 𑀢𑀁 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺 𑀦𑀼 𑀢𑁂, 𑀢𑀸𑀢, 𑀫𑀸𑀢𑀸 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀦 𑀉𑀧𑀲𑁂𑀯𑀢𑀻’’𑀢𑀺.

𑀭𑀸𑀥𑁄 ‘‘𑀢𑀸𑀢, 𑀧𑀡𑁆𑀟𑀺𑀢𑀸 𑀦𑀸𑀫 𑀪𑀽𑀢𑀁 𑀯𑀸 𑀅𑀪𑀽𑀢𑀁 𑀯𑀸 𑀅𑀦𑀺𑀬𑁆𑀬𑀸𑀦𑀺𑀓𑀁 𑀦𑀸𑀫 𑀦 𑀓𑀣𑁂𑀲𑀼’’𑀦𑁆𑀢𑀺 𑀜𑀸𑀧𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁬.

‘‘𑀦 ¶ 𑀔𑁄 𑀧𑀦𑁂𑀢𑀁 𑀲𑀼𑀪𑀡𑀁, 𑀕𑀺𑀭𑀁 𑀲𑀘𑁆𑀘𑀼𑀧𑀲𑀁𑀳𑀺𑀢𑀁;

𑀲𑀬𑁂𑀣 𑀧𑁄𑀝𑁆𑀞𑀧𑀸𑀤𑁄𑀯, 𑀫𑀼𑀫𑁆𑀫𑀼𑀭𑁂 𑀉𑀧𑀓𑀽𑀣𑀺𑀢𑁄’’𑀢𑀺.

𑀢𑀢𑁆𑀣 𑀕𑀺𑀭𑀦𑁆𑀢𑀺 𑀯𑀘𑀦𑀁. 𑀢𑀜𑁆𑀳𑀺 𑀬𑀣𑀸 𑀇𑀤𑀸𑀦𑀺 𑀕𑀺𑀭𑀸, 𑀏𑀯𑀁 𑀢𑀤𑀸 ‘‘𑀕𑀺𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀲𑀼𑀯𑀧𑁄𑀢𑀓𑁄 𑀮𑀺𑀗𑁆𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀏𑀯𑀫𑀸𑀳. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀢𑀸𑀢, 𑀧𑀡𑁆𑀟𑀺𑀢𑁂𑀦 𑀦𑀸𑀫 𑀲𑀘𑁆𑀘𑀼𑀧𑀲𑀁𑀳𑀺𑀢𑀁 𑀬𑀣𑀸𑀪𑀽𑀢𑀁 𑀅𑀢𑁆𑀣𑀬𑀼𑀢𑁆𑀢𑀁 𑀲𑀪𑀸𑀯𑀯𑀘𑀦𑀫𑁆𑀧𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀦 𑀲𑀼𑀪𑀡𑀁. 𑀅𑀦𑀺𑀬𑁆𑀬𑀸𑀦𑀺𑀓𑀜𑁆𑀘 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀲𑀬𑁂𑀣 𑀧𑁄𑀝𑁆𑀞𑀧𑀸𑀤𑁄𑀯, 𑀫𑀼𑀫𑁆𑀫𑀼𑀭𑁂 𑀉𑀧𑀓𑀽𑀣𑀺𑀢𑁄, 𑀬𑀣𑀸 𑀧𑁄𑀝𑁆𑀞𑀧𑀸𑀤𑁄 𑀓𑀼𑀓𑁆𑀓𑀼𑀴𑁂 𑀛𑀸𑀫𑁄 𑀲𑀬𑀢𑀺, 𑀏𑀯𑀁 𑀲𑀬𑁂𑀬𑁆𑀬𑀸𑀢𑀺. ‘‘𑀉𑀧𑀓𑀽𑀥𑀺𑀢𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀫𑀬𑀸𑀧𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀭𑀜𑁆𑀜𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀧𑁄𑀝𑁆𑀞𑀧𑀸𑀤𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀥𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀸𑀥𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁯𑁯] 𑁯. 𑀕𑀳𑀧𑀢𑀺𑀚𑀸𑀢𑀓𑀯𑀡𑁆𑀡𑀦𑀸

𑀉𑀪𑀬𑀁 ¶ 𑀫𑁂 𑀦 𑀔𑀫𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀫𑁂𑀯 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀘 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀭𑀓𑁆𑀔𑀺𑀢𑁄, 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀲𑀸𑀫𑀺𑀓𑀁 𑀯𑀜𑁆𑀘𑁂𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀕𑀡𑁆𑀳𑀺. 𑀢𑀲𑁆𑀲 𑀪𑀭𑀺𑀬𑀸 𑀤𑀼𑀲𑁆𑀲𑀻𑀮𑀸 𑀕𑀸𑀫𑀪𑁄𑀚𑀓𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀘𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀜𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀘𑀭𑀢𑀺 ¶ . 𑀢𑀤𑀸 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀩𑀻𑀚𑁂𑀲𑀼 𑀦𑀻𑀳𑀝𑁂𑀲𑀼 𑀙𑀸𑀢𑀓𑀁 𑀅𑀳𑁄𑀲𑀺, 𑀲𑀲𑁆𑀲𑀸𑀦𑀁 𑀕𑀩𑁆𑀪𑀕𑀳𑀡𑀓𑀸𑀮𑁄 𑀚𑀸𑀢𑁄. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 ‘‘𑀇𑀢𑁄 𑀫𑀸𑀲𑀤𑁆𑀯𑀬𑁂𑀦 𑀲𑀲𑁆𑀲𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀯𑀻𑀳𑀺𑀁 𑀤𑀲𑁆𑀲𑀸𑀫𑀸’’𑀢𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀕𑀸𑀫𑀪𑁄𑀚𑀓𑀲𑁆𑀲 𑀳𑀢𑁆𑀣𑀢𑁄 𑀏𑀓𑀁 𑀚𑀭𑀕𑁄𑀡𑀁 𑀕𑀳𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀕𑀸𑀫𑀪𑀸𑀚𑀓𑁄 𑀔𑀡𑀁 𑀑𑀮𑁄𑀓𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑀳𑀺𑀕𑀢𑀯𑁂𑀮𑀸𑀬𑀁 𑀕𑁂𑀳𑀁 𑀧𑀸𑀯𑀺𑀲𑀺. 𑀢𑁂𑀲𑀁 𑀲𑀼𑀔𑀦𑀺𑀧𑀦𑁆𑀦𑀓𑁆𑀔𑀡𑁂𑀬𑁂𑀯 𑀩𑁄𑀥𑀺𑀲𑀢𑁆𑀢𑁄 𑀕𑀸𑀫𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀕𑁂𑀳𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀲𑀸 𑀇𑀢𑁆𑀣𑀻 𑀕𑀸𑀫𑀤𑁆𑀯𑀸𑀭𑀸𑀪𑀺𑀫𑀼𑀔𑀻 𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀉𑀫𑁆𑀫𑀸𑀭𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 ‘‘𑀲𑁄𑀬𑁂𑀯𑀸’’𑀢𑀺 𑀜𑀢𑁆𑀯𑀸 𑀕𑀸𑀫𑀪𑁄𑀚𑀓𑀲𑁆𑀲 𑀆𑀘𑀺𑀓𑁆𑀔𑀺, 𑀕𑀸𑀫𑀪𑁄𑀚𑀓𑁄 𑀪𑀻𑀢𑁄 𑀧𑀓𑀫𑁆𑀧𑀺. 𑀅𑀣 𑀦𑀁 𑀲𑀸 ‘‘𑀫𑀸 𑀪𑀸𑀬𑀺, 𑀅𑀢𑁆𑀣𑁂𑀓𑁄 𑀉𑀧𑀸𑀬𑁄, 𑀅𑀫𑁆𑀳𑁂𑀳𑀺 𑀢𑀯 𑀳𑀢𑁆𑀣𑀢𑁄 𑀕𑁄𑀡𑀫𑀁𑀲𑀁 𑀔𑀸𑀤𑀺𑀢𑀁, 𑀢𑁆𑀯𑀁 𑀫𑀁𑀲𑀫𑀽𑀮𑀁 𑀲𑁄𑀥𑁂𑀦𑁆𑀢𑁄 𑀯𑀺𑀬 𑀳𑁄𑀳𑀺, 𑀅𑀳𑀁 𑀓𑁄𑀝𑁆𑀞𑀁 𑀆𑀭𑀼𑀬𑁆𑀳 𑀓𑁄𑀝𑁆𑀞𑀤𑁆𑀯𑀸𑀭𑁂 𑀞𑀢𑁆𑀯𑀸 ‘𑀯𑀻𑀳𑀺 𑀦𑀢𑁆𑀣𑀻’𑀢𑀺 𑀯𑀓𑁆𑀔𑀸𑀫𑀺. 𑀢𑁆𑀯𑀁 𑀕𑁂𑀳𑀫𑀚𑁆𑀛𑁂 𑀞𑀢𑁆𑀯𑀸 ‘𑀅𑀫𑁆𑀳𑀸𑀓𑀁 𑀖𑀭𑁂 𑀤𑀸𑀭𑀓𑀸 𑀙𑀸𑀢𑀸, 𑀫𑀁𑀲𑀫𑀽𑀮𑀁 𑀫𑁂 𑀤𑁂𑀳𑀻’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑁄𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀓𑁄𑀝𑁆𑀞𑀁 𑀆𑀭𑀼𑀬𑁆𑀳 𑀓𑁄𑀝𑁆𑀞𑀤𑁆𑀯𑀸𑀭𑁂 𑀦𑀺𑀲𑀻𑀤𑀺. 𑀇𑀢𑀭𑁄 𑀕𑁂𑀳𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀫𑀁𑀲𑀫𑀽𑀮𑀁 𑀤𑁂𑀳𑀻’’𑀢𑀺 𑀯𑀤𑀢𑀺. 𑀲𑀸 𑀓𑁄𑀝𑁆𑀞𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑀸 ‘‘𑀓𑁄𑀝𑁆𑀞𑁂 𑀯𑀻𑀳𑀺 𑀦𑀢𑁆𑀣𑀺, 𑀲𑀲𑁆𑀲𑁂 𑀉𑀤𑁆𑀥𑀭𑀦𑁆𑀢𑁂 𑀤𑀲𑁆𑀲𑀸𑀫𑀺 𑀕𑀘𑁆𑀙𑀸𑀳𑀻’’𑀢𑀺 𑀆𑀳.

𑀩𑁄𑀥𑀺𑀲𑀢𑁆𑀢𑁄 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀲𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀧𑀸𑀧𑀸𑀬 𑀓𑀢𑀉𑀧𑀸𑀬𑁄 𑀏𑀲 𑀪𑀯𑀺𑀲𑁆𑀲𑀢𑀻’’𑀢𑀺 ¶ 𑀜𑀢𑁆𑀯𑀸 𑀕𑀸𑀫𑀪𑁄𑀚𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑁄 𑀕𑀸𑀫𑀪𑁄𑀚𑀓 𑀅𑀫𑁆𑀳𑁂 𑀢𑀯 𑀚𑀭𑀕𑁄𑀡𑀲𑁆𑀲 𑀫𑀁𑀲𑀁 𑀔𑀸𑀤𑀦𑁆𑀢𑀸 ‘𑀇𑀢𑁄 𑀫𑀸𑀲𑀤𑁆𑀯𑀬𑁂𑀦 𑀯𑀻𑀳𑀺𑀁 𑀤𑀲𑁆𑀲𑀸𑀫𑀸’𑀢𑀺 𑀔𑀸𑀤𑀺𑀫𑁆𑀳, 𑀢𑁆𑀯𑀁 𑀅𑀟𑁆𑀠𑀫𑀸𑀲𑀫𑁆𑀧𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀤𑀸𑀦𑁂𑀯 ¶ 𑀓𑀲𑁆𑀫𑀸 𑀆𑀳𑀭𑀸𑀧𑁂𑀲𑀺, 𑀦 𑀢𑁆𑀯𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀆𑀕𑀢𑁄, 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀆𑀕𑀢𑁄 𑀪𑀯𑀺𑀲𑁆𑀲𑀲𑀺, 𑀫𑀬𑁆𑀳𑀁 𑀢𑀯 𑀓𑀺𑀭𑀺𑀬𑀸 𑀦 𑀭𑀼𑀘𑁆𑀘𑀢𑀺, 𑀅𑀬𑀫𑁆𑀧𑀺 𑀅𑀦𑀸𑀘𑀸𑀭𑀸 𑀧𑀸𑀧𑀥𑀫𑁆𑀫𑀸 𑀓𑁄𑀝𑁆𑀞𑁂 𑀯𑀻𑀳𑀻𑀦𑀁 𑀅𑀪𑀸𑀯𑀁 𑀚𑀸𑀦𑀸𑀢𑀺, 𑀲𑀸 𑀤𑀸𑀦𑀺 𑀓𑁄𑀝𑁆𑀞𑀁 𑀆𑀭𑀼𑀬𑁆𑀳 ‘𑀯𑀻𑀳𑀺 𑀦𑀢𑁆𑀣𑀻’𑀢𑀺 ¶ 𑀯𑀤𑀢𑀺, 𑀢𑁆𑀯𑀫𑁆𑀧𑀺 ‘𑀤𑁂𑀳𑀻’𑀢𑀺 𑀯𑀤𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀯𑁄 𑀓𑀭𑀡𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻’’𑀢𑀺 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁯𑁭.

‘‘𑀉𑀪𑀬𑀁 𑀫𑁂 𑀦 𑀔𑀫𑀢𑀺, 𑀉𑀪𑀬𑀁 𑀫𑁂 𑀦 𑀭𑀼𑀘𑁆𑀘𑀢𑀺;

𑀬𑀸𑀘𑀸𑀬𑀁 𑀓𑁄𑀝𑁆𑀞𑀫𑁄𑀢𑀺𑀡𑁆𑀡𑀸, 𑀦𑀤𑀲𑁆𑀲𑀁 𑀇𑀢𑀺 𑀪𑀸𑀲𑀢𑀺.

𑁯𑁮.

‘‘𑀢𑀁 𑀢𑀁 𑀕𑀸𑀫𑀧𑀢𑀺 𑀩𑁆𑀭𑀽𑀫𑀺, 𑀓𑀤𑀭𑁂 𑀅𑀧𑁆𑀧𑀲𑁆𑀫𑀺 𑀚𑀻𑀯𑀺𑀢𑁂;

𑀤𑁆𑀯𑁂 𑀫𑀸𑀲𑁂 𑀲𑀗𑁆𑀕𑀭𑀁 𑀓𑀢𑁆𑀯𑀸, 𑀫𑀁𑀲𑀁 𑀚𑀭𑀕𑁆𑀕𑀯𑀁 𑀓𑀺𑀲𑀁;

𑀅𑀧𑁆𑀧𑀢𑁆𑀢𑀓𑀸𑀮𑁂 𑀘𑁄𑀤𑁂𑀲𑀺, 𑀢𑀫𑁆𑀧𑀺 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀢𑀁 𑀢𑀁 𑀕𑀸𑀫𑀧𑀢𑀺 𑀩𑁆𑀭𑀽𑀫𑀻𑀢𑀺, 𑀅𑀫𑁆𑀪𑁄 𑀕𑀸𑀫𑀚𑁂𑀝𑁆𑀞𑀓, 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀯𑀤𑀸𑀫𑀺. 𑀓𑀤𑀭𑁂 𑀅𑀧𑁆𑀧𑀲𑁆𑀫𑀺 𑀚𑀻𑀯𑀺𑀢𑁂𑀢𑀺 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀦𑀸𑀫 𑀓𑀤𑀭𑀜𑁆𑀘𑁂𑀯 𑀣𑀤𑁆𑀥𑀁 𑀮𑀽𑀔𑀁 𑀓𑀲𑀺𑀭𑀁 𑀅𑀧𑁆𑀧𑀜𑁆𑀘 𑀫𑀦𑁆𑀤𑀁 𑀧𑀭𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀦𑁄 𑀏𑀯𑀭𑀽𑀧𑁂 𑀚𑀻𑀯𑀺𑀢𑁂 𑀯𑀢𑁆𑀢𑀫𑀸𑀦𑁂. 𑀤𑁆𑀯𑁂 𑀫𑀸𑀲𑁂 𑀲𑀗𑁆𑀕𑀭𑀁 𑀓𑀢𑁆𑀯𑀸, 𑀫𑀁𑀲𑀁 𑀚𑀭𑀕𑁆𑀕𑀯𑀁 𑀓𑀺𑀲𑀦𑁆𑀢𑀺 𑀅𑀫𑁆𑀳𑀸𑀓𑀁 𑀫𑀁𑀲𑀁 𑀕𑀡𑁆𑀳𑀦𑁆𑀢𑀸𑀦𑀁 𑀚𑀭𑀕𑁆𑀕𑀯𑀁 𑀓𑀺𑀲𑀁 𑀤𑀼𑀩𑁆𑀩𑀮𑀁 𑀚𑀭𑀕𑁄𑀡𑀁 𑀤𑀤𑀫𑀸𑀦𑁄 𑀢𑁆𑀯𑀁 ‘‘𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀫𑀽𑀮𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀤𑁆𑀯𑁂 𑀫𑀸𑀲𑁂 𑀲𑀗𑁆𑀕𑀭𑀁 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀅𑀧𑁆𑀧𑀢𑁆𑀢𑀓𑀸𑀮𑁂 𑀘𑁄𑀤𑁂𑀲𑀻𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂 𑀅𑀦𑁆𑀢𑀭𑀸𑀯 𑀘𑁄𑀤𑁂𑀲𑀺. 𑀢𑀫𑁆𑀧𑀺 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻𑀢𑀺 𑀬𑀸 𑀘𑀸𑀬𑀁 𑀧𑀸𑀧𑀥𑀫𑁆𑀫𑀸 𑀤𑀼𑀲𑁆𑀲𑀻𑀮𑀸 𑀅𑀦𑁆𑀢𑁄𑀓𑁄𑀝𑁆𑀞𑁂 𑀯𑀻𑀳𑀻𑀦𑀁 𑀦𑀢𑁆𑀣𑀺𑀪𑀸𑀯𑀁 𑀚𑀸𑀦𑀫𑀸𑀦𑀸𑀯 𑀅𑀚𑀸𑀦𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸 𑀓𑁄𑀝𑁆𑀞𑀫𑁄𑀢𑀺𑀡𑁆𑀡𑀸 𑀓𑁄𑀝𑁆𑀞𑀤𑁆𑀯𑀸𑀭𑁂 𑀞𑀢𑁆𑀯𑀸 𑀦 𑀤𑀲𑁆𑀲𑀁 𑀇𑀢𑀺 𑀪𑀸𑀲𑀢𑀺, 𑀬𑀜𑁆𑀘 𑀢𑁆𑀯𑀁 𑀅𑀓𑀸𑀮𑁂 𑀘𑁄𑀤𑁂𑀲𑀺, 𑀢𑀫𑁆𑀧𑀻𑀢𑀺 𑀇𑀤𑀁 𑀉𑀪𑀬𑀫𑁆𑀧𑀺 𑀫𑀫 𑀦𑁂𑀯 𑀔𑀫𑀢𑀺 𑀦 𑀭𑀼𑀘𑁆𑀘𑀢𑀻𑀢𑀺.

𑀏𑀯𑀁 𑀲𑁄 𑀓𑀣𑁂𑀦𑁆𑀢𑁄𑀯 𑀕𑀸𑀫𑀪𑁄𑀚𑀓𑀁 𑀘𑀽𑀴𑀸𑀬 𑀕𑀳𑁂𑀢𑁆𑀯𑀸 𑀓𑀟𑁆𑀠𑀺𑀢𑁆𑀯𑀸 𑀕𑁂𑀳𑀫𑀚𑁆𑀛𑁂 𑀧𑀸𑀢𑁂𑀢𑁆𑀯𑀸 ‘‘𑀕𑀸𑀫𑀪𑁄𑀚𑀓𑁄𑀫𑁆𑀳𑀻𑀢𑀺 𑀧𑀭𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀪𑀡𑁆𑀟𑁂 𑀅𑀧𑀭𑀚𑁆𑀛𑀲𑀻’’𑀢𑀺𑀆𑀤𑀻𑀳𑀺 𑀧𑀭𑀺𑀪𑀸𑀲𑀺𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀢𑀫𑁆𑀧𑀺 𑀤𑀼𑀝𑁆𑀞𑀇𑀢𑁆𑀣𑀺𑀁 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀓𑁄𑀝𑁆𑀞𑀸 𑀑𑀢𑀸𑀭𑁂𑀢𑁆𑀯𑀸 𑀦𑀺𑀧𑁆𑀧𑁄𑀣𑁂𑀢𑁆𑀯𑀸 ‘‘𑀲𑀘𑁂 𑀧𑀼𑀦 𑀏𑀯𑀭𑀽𑀧𑀁 𑀓𑀭𑁄𑀲𑀺, 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀕𑀸𑀫𑀪𑁄𑀚𑀓𑁄 𑀢𑀁 𑀕𑁂𑀳𑀁 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀯𑀺𑀲𑀳𑀺, 𑀲𑀸𑀧𑀺 𑀧𑀸𑀧𑀸 𑀧𑀼𑀦 𑀫𑀦𑀲𑀸𑀧𑀺 𑀅𑀢𑀺𑀘𑀭𑀺𑀢𑀼𑀁 𑀦𑀸𑀲𑀓𑁆𑀔𑀺.

𑀲𑀢𑁆𑀣𑀸 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 ¶ 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀕𑀸𑀫𑀪𑁄𑀚𑀓𑁄 𑀤𑁂𑀯𑀤𑀢𑁆𑀢𑁄, 𑀦𑀺𑀕𑁆𑀕𑀳𑀓𑀸𑀭𑀓𑁄 𑀕𑀳𑀧𑀢𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀳𑀧𑀢𑀺𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁦𑁦] 𑁧𑁦. 𑀲𑀸𑀥𑀼𑀲𑀻𑀮𑀚𑀸𑀢𑀓𑀯𑀡𑁆𑀡𑀦𑀸

𑀲𑀭𑀻𑀭𑀤𑀩𑁆𑀬𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀓𑀺𑀭 𑀘𑀢𑀲𑁆𑀲𑁄 𑀥𑀻𑀢𑀭𑁄 𑀅𑀳𑁂𑀲𑀼𑀁. 𑀢𑀸 𑀘𑀢𑁆𑀢𑀸𑀭𑁄 𑀚𑀦𑀸 𑀧𑀢𑁆𑀣𑁂𑀦𑁆𑀢𑀺, 𑀢𑁂𑀲𑀼 𑀏𑀓𑁄 𑀅𑀪𑀺𑀭𑀽𑀧𑁄 𑀲𑀭𑀻𑀭𑀲𑀫𑁆𑀧𑀦𑁆𑀦𑁄, 𑀏𑀓𑁄 𑀯𑀬𑀧𑁆𑀧𑀢𑁆𑀢𑁄 𑀫𑀳𑀮𑁆𑀮𑀓𑁄, 𑀏𑀓𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄, 𑀏𑀓𑁄 𑀲𑀻𑀮𑀯𑀸. 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀥𑀻𑀢𑀭𑁄 𑀦𑀺𑀯𑁂𑀲𑁂𑀦𑁆𑀢𑁂𑀦 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀓𑀲𑁆𑀲 𑀦𑀼 𑀔𑁄 𑀤𑀸𑀢𑀩𑁆𑀩𑀸, 𑀓𑀺𑀁 𑀭𑀽𑀧𑀲𑀫𑁆𑀧𑀦𑁆𑀦𑀲𑁆𑀲, 𑀉𑀤𑀸𑀳𑀼 𑀯𑀬𑀧𑁆𑀧𑀢𑁆𑀢𑀲𑁆𑀲, 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑀻𑀮𑀯𑀦𑁆𑀢𑀸𑀦𑀁 𑀅𑀜𑁆𑀜𑀢𑀭𑀲𑁆𑀲𑀸’’𑀢𑀺. 𑀲𑁄 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀅𑀚𑀸𑀦𑀺𑀢𑁆𑀯𑀸 ‘‘𑀇𑀫𑀁 𑀓𑀸𑀭𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀚𑀸𑀦𑀺𑀲𑁆𑀲𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀏𑀢𑁂𑀲𑀁 𑀅𑀦𑁆𑀢𑀭𑁂 𑀅𑀦𑀼𑀘𑁆𑀙𑀯𑀺𑀓𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑁂𑀲𑀼 𑀘𑀢𑀽𑀲𑀼 𑀚𑀦𑁂𑀲𑀼 𑀓𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀏𑀢𑀁 𑀧𑀜𑁆𑀳𑀁 𑀓𑀣𑀬𑀺𑀁𑀲𑀼, 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀧𑀦 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑁄𑀲𑀺. 𑀅𑀣𑁂𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑀲𑁆𑀲𑁄 𑀥𑀻𑀢𑀭𑁄 𑀅𑀳𑁂𑀲𑀼𑀁, 𑀢𑀸 𑀏𑀯𑀫𑁂𑀯 𑀘𑀢𑁆𑀢𑀸𑀭𑁄 𑀚𑀦𑀸 𑀧𑀢𑁆𑀣𑀬𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀲𑁆𑀲 𑀦𑀼 𑀔𑁄 𑀤𑀸𑀢𑀩𑁆𑀩𑀸’’𑀢𑀺 𑀅𑀚𑀸𑀦𑀦𑁆𑀢𑁄 ‘‘𑀆𑀘𑀭𑀺𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁯.

‘‘𑀲𑀭𑀻𑀭𑀤𑀩𑁆𑀬𑀁 ¶ 𑀯𑀼𑀟𑁆𑀠𑀩𑁆𑀬𑀁, 𑀲𑁄𑀚𑀘𑁆𑀘𑀁 𑀲𑀸𑀥𑀼𑀲𑀻𑀮𑀺𑀬𑀁;

𑀩𑁆𑀭𑀸𑀳𑁆𑀫𑀡𑀁 𑀢𑁂𑀯 𑀧𑀼𑀘𑁆𑀙𑀸𑀫, 𑀓𑀦𑁆𑀦𑀼 𑀢𑁂𑀲𑀁 𑀯𑀦𑀺𑀫𑁆𑀳𑀲𑁂’’𑀢𑀺.

𑀢𑀢𑁆𑀣 ¶ ‘‘𑀲𑀭𑀻𑀭𑀤𑀩𑁆𑀬’’𑀦𑁆𑀢𑀺𑀆𑀤𑀻𑀳𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀯𑀺𑀚𑁆𑀚𑀫𑀸𑀦𑁂 𑀕𑀼𑀡𑁂 𑀧𑀓𑀸𑀲𑁂𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀥𑀻𑀢𑀭𑁄 𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀧𑀢𑁆𑀣𑁂𑀦𑁆𑀢𑀺, 𑀢𑁂𑀲𑀼 𑀏𑀓𑀲𑁆𑀲 𑀲𑀭𑀻𑀭𑀤𑀩𑁆𑀬𑀫𑀢𑁆𑀣𑀺, 𑀲𑀭𑀻𑀭𑀲𑀫𑁆𑀧𑀤𑀸 𑀅𑀪𑀺𑀭𑀽𑀧𑀪𑀸𑀯𑁄 𑀲𑀁𑀯𑀺𑀚𑁆𑀚𑀢𑀺. 𑀏𑀓𑀲𑁆𑀲 𑀯𑀼𑀟𑁆𑀠𑀩𑁆𑀬𑀁 𑀯𑀼𑀟𑁆𑀠𑀺𑀪𑀸𑀯𑁄 𑀫𑀳𑀮𑁆𑀮𑀓𑀢𑀸 𑀅𑀢𑁆𑀣𑀺. 𑀏𑀓𑀲𑁆𑀲 𑀲𑁄𑀚𑀘𑁆𑀘𑀁 𑀲𑀼𑀚𑀸𑀢𑀺𑀢𑀸 𑀚𑀸𑀢𑀺𑀲𑀫𑁆𑀧𑀤𑀸 𑀅𑀢𑁆𑀣𑀺. ‘‘𑀲𑀼𑀚𑀘𑁆𑀘’’𑀦𑁆𑀢𑀺𑀧𑀺 𑀧𑀸𑀞𑁄. 𑀏𑀓𑀲𑁆𑀲 𑀲𑀸𑀥𑀼𑀲𑀻𑀮𑀺𑀬𑀁 𑀲𑀼𑀦𑁆𑀤𑀭𑀲𑀻𑀮𑀪𑀸𑀯𑁄 ¶ 𑀲𑀻𑀮𑀲𑀫𑁆𑀧𑀤𑀸 𑀅𑀢𑁆𑀣𑀺. 𑀩𑁆𑀭𑀸𑀳𑁆𑀫𑀡𑀁 𑀢𑁂𑀯 𑀧𑀼𑀘𑁆𑀙𑀸𑀫𑀸𑀢𑀺 𑀢𑁂𑀲𑀼 𑀅𑀲𑀼𑀓𑀲𑁆𑀲 𑀦𑀸𑀫𑁂𑀢𑀸 𑀤𑀸𑀢𑀩𑁆𑀩𑀸𑀢𑀺 𑀅𑀚𑀸𑀦𑀦𑁆𑀢𑀸 𑀫𑀬𑀁 𑀪𑀯𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀜𑁆𑀜𑁂𑀯 𑀧𑀼𑀘𑁆𑀙𑀸𑀫. 𑀓𑀦𑁆𑀦𑀼 𑀢𑁂𑀲𑀁 𑀯𑀦𑀺𑀫𑁆𑀳𑀲𑁂𑀢𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀚𑀦𑀸𑀦𑀁 𑀓𑀁 𑀯𑀦𑀺𑀫𑁆𑀳𑀲𑁂, 𑀓𑀁 𑀇𑀘𑁆𑀙𑀸𑀫, 𑀓𑀲𑁆𑀲 𑀢𑀸 𑀓𑀼𑀫𑀸𑀭𑀺𑀓𑀸 𑀤𑀤𑀸𑀫𑀸𑀢𑀺 𑀧𑀼𑀘𑁆𑀙𑀢𑀺.

𑀢𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑁄 ‘‘𑀭𑀽𑀧𑀲𑀫𑁆𑀧𑀤𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀯𑀺𑀧𑀦𑁆𑀦𑀲𑀻𑀮𑁄 𑀕𑀸𑀭𑀬𑁆𑀳𑁄, 𑀢𑀲𑁆𑀫𑀸 𑀢𑀁 𑀦𑀧𑁆𑀧𑀫𑀸𑀡𑀁, 𑀅𑀫𑁆𑀳𑀸𑀓𑀁 𑀲𑀻𑀮𑀯𑀦𑁆𑀢𑀪𑀸𑀯𑁄 𑀭𑀼𑀘𑁆𑀘𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁦.

‘‘𑀅𑀢𑁆𑀣𑁄 𑀅𑀢𑁆𑀣𑀺 𑀲𑀭𑀻𑀭𑀲𑁆𑀫𑀺𑀁, 𑀯𑀼𑀟𑁆𑀠𑀩𑁆𑀬𑀲𑁆𑀲 𑀦𑀫𑁄 𑀓𑀭𑁂;

𑀅𑀢𑁆𑀣𑁄 𑀅𑀢𑁆𑀣𑀺 𑀲𑀼𑀚𑀸𑀢𑀲𑁆𑀫𑀺𑀁, 𑀲𑀻𑀮𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀅𑀢𑁆𑀣𑁄 𑀅𑀢𑁆𑀣𑀺 𑀲𑀭𑀻𑀭𑀲𑁆𑀫𑀺𑀦𑁆𑀢𑀺 𑀭𑀽𑀧𑀲𑀫𑁆𑀧𑀦𑁆𑀦𑁂 𑀲𑀭𑀻𑀭𑁂𑀧𑀺 𑀅𑀢𑁆𑀣𑁄 𑀯𑀺𑀲𑁂𑀲𑁄 𑀯𑀼𑀤𑁆𑀥𑀺 𑀅𑀢𑁆𑀣𑀺𑀬𑁂𑀯, ‘‘𑀦𑀢𑁆𑀣𑀻’’𑀢𑀺 𑀦 𑀯𑀤𑀸𑀫𑀺. 𑀯𑀼𑀟𑁆𑀠𑀩𑁆𑀬𑀲𑁆𑀲 𑀦𑀫𑁄 𑀓𑀭𑁂𑀢𑀺 𑀯𑀼𑀟𑁆𑀠𑀪𑀸𑀯𑀲𑁆𑀲 𑀧𑀦 𑀦𑀫𑀓𑁆𑀓𑀸𑀭𑀫𑁂𑀯 𑀓𑀭𑁄𑀫𑀺. 𑀯𑀼𑀟𑁆𑀠𑀪𑀸𑀯𑁄 𑀳𑀺 𑀯𑀦𑁆𑀤𑀦𑀫𑀸𑀦𑀦𑀁 𑀮𑀪𑀢𑀺. 𑀅𑀢𑁆𑀣𑁄 𑀅𑀢𑁆𑀣𑀺 𑀲𑀼𑀚𑀸𑀢𑀲𑁆𑀫𑀺𑀦𑁆𑀢𑀺 𑀲𑀼𑀚𑀸𑀢𑁂𑀧𑀺 𑀧𑀼𑀭𑀺𑀲𑁂 𑀯𑀼𑀟𑁆𑀠𑀺 𑀅𑀢𑁆𑀣𑀺, 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀬𑁂𑀯. 𑀲𑀻𑀮𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻𑀢𑀺 𑀅𑀫𑁆𑀳𑀸𑀓𑀁 𑀧𑀦 𑀲𑀻𑀮𑀫𑁂𑀯 𑀭𑀼𑀘𑁆𑀘𑀢𑀺. 𑀲𑀻𑀮𑀯𑀸 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀲𑀭𑀻𑀭𑀤𑀩𑁆𑀬𑀯𑀺𑀭𑀳𑀺𑀢𑁄𑀧𑀺 𑀧𑀼𑀚𑁆𑀚𑁄 𑀧𑀸𑀲𑀁𑀲𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀻𑀮𑀯𑀦𑁆𑀢𑀲𑁆𑀲𑁂𑀯 𑀥𑀻𑀢𑀭𑁄 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀅𑀬𑀫𑁂𑀯 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀥𑀼𑀲𑀻𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀭𑀼𑀳𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀭𑀼𑀳𑀓𑀁 ¶ 𑀲𑀺𑀭𑀺𑀓𑀸𑀴𑀓𑀁, 𑀧𑀤𑀼𑀫𑀁 𑀫𑀡𑀺𑀘𑁄𑀭𑀓𑀁;

𑀧𑀩𑁆𑀩𑀢𑀽𑀧𑀢𑁆𑀣𑀭𑀯𑀮𑀸𑀳𑀁, 𑀫𑀺𑀢𑁆𑀢𑀸𑀫𑀺𑀢𑁆𑀢𑀜𑁆𑀘 𑀭𑀸𑀥𑀜𑁆𑀘;

𑀕𑀳𑀧𑀢𑀺 𑀲𑀸𑀥𑀼𑀲𑀻𑀮𑀁.

𑁬. 𑀦𑀢𑀁𑀤𑀴𑁆𑀳𑀯𑀕𑁆𑀕𑁄

[𑁨𑁦𑁧] 𑁧. 𑀩𑀦𑁆𑀥𑀦𑀸𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀦 ¶ ¶ 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀩𑀳𑀽 𑀲𑀦𑁆𑀥𑀺𑀘𑁆𑀙𑁂𑀤𑀓𑀧𑀦𑁆𑀣𑀖𑀸𑀢𑀓𑀘𑁄𑀭𑁂 𑀆𑀦𑁂𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀢𑁂 𑀭𑀸𑀚𑀸 𑀅𑀤𑁆𑀤𑀼𑀩𑀦𑁆𑀥𑀦𑀭𑀚𑁆𑀚𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀸𑀧𑁂𑀲𑀺. 𑀢𑀺𑀁𑀲𑀫𑀢𑁆𑀢𑀸 𑀚𑀸𑀦𑀧𑀤𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀸 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀩𑀦𑁆𑀥𑀦𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀳𑀺 𑀩𑀦𑁆𑀥𑀦𑀸𑀕𑀸𑀭𑁂 𑀩𑀳𑀽 𑀘𑁄𑀭𑀸 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀤𑁆𑀥𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀤𑀺𑀝𑁆𑀞𑀸, 𑀢𑁂 𑀢𑀸𑀦𑀺 𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀣𑀺𑀭𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀩𑀦𑁆𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀩𑀦𑁆𑀥𑀦𑀸𑀦𑀺 𑀦𑀸𑀫𑁂𑀢𑀸𑀦𑀺, 𑀬𑀁 𑀧𑀦𑁂𑀢𑀁 𑀥𑀦𑀥𑀜𑁆𑀜𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀩𑀦𑁆𑀥𑀦𑀁, 𑀏𑀢𑀁 𑀏𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀣𑀺𑀭𑀢𑀭𑀁, 𑀏𑀯𑀁 𑀫𑀳𑀦𑁆𑀢𑀫𑁆𑀧𑀺 𑀧𑀦𑁂𑀢𑀁 𑀤𑀼𑀘𑁆𑀙𑀺𑀦𑁆𑀤𑀦𑀺𑀬𑀁 𑀩𑀦𑁆𑀥𑀦𑀁 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀙𑀺𑀦𑁆𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀤𑀼𑀕𑁆𑀕𑀢𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀪𑀢𑀺𑀁 𑀓𑀢𑁆𑀯𑀸 𑀫𑀸𑀢𑀭𑀁 𑀧𑁄𑀲𑁂𑀲𑀺, 𑀅𑀣𑀲𑁆𑀲 𑀫𑀸𑀢𑀸 𑀅𑀦𑀺𑀘𑁆𑀙𑀫𑀸𑀦𑀲𑁆𑀲𑁂𑀯 𑀏𑀓𑀁 𑀓𑀼𑀮𑀥𑀻𑀢𑀭𑀁 𑀕𑁂𑀳𑁂 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀫𑀓𑀸𑀲𑀺. 𑀪𑀭𑀺𑀬𑀸𑀬𑀧𑀺𑀲𑁆𑀲 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑁄 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀪𑀤𑁆𑀤𑁂, 𑀢𑁆𑀯𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀸𑀳𑀺, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳 ¶ . 𑀲𑀸𑀧𑀺 ‘‘𑀕𑀩𑁆𑀪𑁄 𑀫𑁂 𑀧𑀢𑀺𑀝𑁆𑀞𑀺𑀢𑁄, 𑀫𑀬𑀺 ¶ 𑀯𑀺𑀚𑀸𑀢𑀸𑀬 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑀸 𑀯𑀺𑀚𑀸𑀢𑀓𑀸𑀮𑁂 ‘‘𑀪𑀤𑁆𑀤𑁂, 𑀢𑁆𑀯𑀁 𑀲𑁄𑀢𑁆𑀣𑀺𑀦𑀸 𑀯𑀺𑀚𑀸𑀢𑀸, 𑀇𑀤𑀸𑀦𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀸 ‘‘𑀧𑀼𑀢𑁆𑀢𑀓𑀲𑁆𑀲 𑀢𑀸𑀯 𑀣𑀦𑀧𑀸𑀦𑀢𑁄 𑀅𑀧𑀕𑀫𑀦𑀓𑀸𑀮𑀁 𑀆𑀕𑀫𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀕𑀩𑁆𑀪𑀁 𑀕𑀡𑁆𑀳𑀺.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀇𑀫𑀺𑀲𑁆𑀲𑀸 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀲𑁆𑀲𑀸 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸 𑀭𑀢𑁆𑀣𑀺𑀪𑀸𑀕𑁂 𑀉𑀝𑁆𑀞𑀸𑀬 𑀧𑀮𑀸𑀬𑀺. 𑀅𑀣 𑀦𑀁 ¶ 𑀦𑀕𑀭𑀕𑀼𑀢𑁆𑀢𑀺𑀓𑀸 𑀅𑀕𑁆𑀕𑀳𑁂𑀲𑀼𑀁. 𑀲𑁄 ‘‘𑀅𑀳𑀁, 𑀲𑀸𑀫𑀺, 𑀫𑀸𑀢𑀼𑀧𑁄𑀲𑀓𑁄 𑀦𑀸𑀫, 𑀯𑀺𑀲𑁆𑀲𑀚𑁆𑀚𑁂𑀣 𑀫’’𑀦𑁆𑀢𑀺 𑀢𑁂𑀳𑀺 𑀅𑀢𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀺𑀳𑀸𑀲𑀺. 𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀫𑁂 𑀤𑀼𑀘𑁆𑀙𑀺𑀦𑁆𑀤𑀦𑀺𑀬𑀁 𑀧𑀼𑀢𑁆𑀢𑀤𑀸𑀭𑀩𑀦𑁆𑀥𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁦𑁧.

‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘;

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑁧𑁦𑁨.

‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀻𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀢𑀢𑁆𑀣 𑀥𑀻𑀭𑀸𑀢𑀺 𑀥𑀺𑀢𑀺𑀫𑀦𑁆𑀢𑀸, 𑀥𑀺𑀓𑁆𑀓𑀢𑀧𑀸𑀧𑀸𑀢𑀺 𑀥𑀻𑀭𑀸. 𑀅𑀣 𑀯𑀸 𑀥𑀻 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀥𑀻𑀭𑀸, 𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑀸𑀯𑀓𑀸 ¶ 𑀩𑁄𑀥𑀺𑀲𑀢𑁆𑀢𑀸 𑀘 𑀇𑀫𑁂 𑀥𑀻𑀭𑀸 𑀦𑀸𑀫. 𑀬𑀤𑀸𑀬𑀲𑀦𑁆𑀢𑀺𑀆𑀤𑀻𑀲𑀼 𑀬𑀁 𑀲𑀗𑁆𑀔𑀮𑀺𑀓𑀲𑀗𑁆𑀔𑀸𑀢𑀁 𑀅𑀬𑀲𑀸 𑀦𑀺𑀩𑁆𑀩𑀢𑁆𑀢𑀁 𑀆𑀬𑀲𑀁, 𑀬𑀁 𑀅𑀤𑁆𑀤𑀼𑀩𑀦𑁆𑀥𑀦𑀲𑀗𑁆𑀔𑀸𑀢𑀁 𑀤𑀸𑀭𑀼𑀚𑀁, 𑀬𑀜𑁆𑀘 𑀧𑀩𑁆𑀩𑀚𑀢𑀺𑀡𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀯𑀸𑀓𑀸𑀤𑀻𑀳𑀺 𑀭𑀚𑁆𑀚𑀼𑀁 𑀓𑀢𑁆𑀯𑀸 𑀓𑀢𑀭𑀚𑁆𑀚𑀼𑀩𑀦𑁆𑀥𑀦𑀁, 𑀢𑀁 𑀆𑀬𑀲𑀸𑀤𑀺𑀁 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀥𑀻𑀭𑀸 𑀤𑀴𑁆𑀳𑀁 𑀣𑀺𑀭𑀦𑁆𑀢𑀺 𑀦𑀸𑀳𑀼 𑀦 𑀓𑀣𑁂𑀦𑁆𑀢𑀺. 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀲𑀸𑀭𑀢𑁆𑀢𑀸 𑀳𑀼𑀢𑁆𑀯𑀸 𑀭𑀢𑁆𑀢𑀸, 𑀩𑀮𑀯𑀭𑀸𑀕𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀫𑀡𑀺𑀓𑀼𑀡𑁆𑀟𑀮𑁂𑀲𑀽𑀢𑀺 𑀫𑀡𑀻𑀲𑀼 𑀘 𑀓𑀼𑀡𑁆𑀟𑀮𑁂𑀲𑀼 𑀘, 𑀫𑀡𑀺𑀬𑀼𑀢𑁆𑀢𑁂𑀲𑀼 𑀯𑀸 𑀓𑀼𑀡𑁆𑀟𑀮𑁂𑀲𑀼.

𑀏𑀢𑀁 ¶ 𑀤𑀴𑁆𑀳𑀦𑁆𑀢𑀺 𑀬𑁂 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀲𑀸𑀭𑀢𑁆𑀢𑀭𑀢𑁆𑀢𑀸, 𑀢𑁂𑀲𑀁 𑀬𑁄 𑀘 𑀲𑀸𑀭𑀸𑀕𑁄, 𑀬𑀸 𑀘 𑀢𑁂𑀲𑀁 𑀧𑀼𑀢𑁆𑀢𑀤𑀸𑀭𑁂𑀲𑀼 𑀅𑀧𑁂𑀓𑁆𑀔𑀸 𑀢𑀡𑁆𑀳𑀸, 𑀏𑀢𑀁 𑀓𑀺𑀮𑁂𑀲𑀫𑀬𑀁 𑀩𑀦𑁆𑀥𑀦𑀁 𑀤𑀴𑁆𑀳𑀁 𑀣𑀺𑀭𑀦𑁆𑀢𑀺 𑀥𑀻𑀭𑀸 𑀆𑀳𑀼. 𑀑𑀳𑀸𑀭𑀺𑀦𑀦𑁆𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀸𑀢𑀦𑀢𑁄 𑀅𑀯𑀳𑀭𑀢𑀺 𑀳𑁂𑀝𑁆𑀞𑀸 𑀳𑀭𑀢𑀻𑀢𑀺 𑀑𑀳𑀸𑀭𑀺𑀦𑀁. 𑀲𑀺𑀣𑀺𑀮𑀦𑁆𑀢𑀺 𑀩𑀦𑁆𑀥𑀦𑀝𑁆𑀞𑀸𑀦𑁂 𑀙𑀯𑀺𑀘𑀫𑁆𑀫𑀫𑀁𑀲𑀸𑀦𑀺 𑀦 𑀙𑀺𑀦𑁆𑀤𑀢𑀺, 𑀮𑁄𑀳𑀺𑀢𑀁 𑀦 𑀦𑀻𑀳𑀭𑀢𑀺, 𑀩𑀦𑁆𑀥𑀦𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀧𑁂𑀢𑀺, 𑀣𑀮𑀧𑀣𑀚𑀮𑀧𑀣𑀸𑀤𑀻𑀲𑀼 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀤𑁂𑀢𑀻𑀢𑀺 𑀲𑀺𑀣𑀺𑀮𑀁. 𑀤𑀼𑀧𑁆𑀧𑀫𑀼𑀜𑁆𑀘𑀦𑁆𑀢𑀺 𑀢𑀡𑁆𑀳𑀸𑀮𑁄𑀪𑀯𑀲𑁂𑀦 𑀳𑀺 𑀏𑀓𑀯𑀸𑀭𑀫𑁆𑀧𑀺 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀤𑀝𑁆𑀞𑀝𑁆𑀞𑀸𑀦𑀢𑁄 𑀓𑀘𑁆𑀙𑀧𑁄 𑀯𑀺𑀬 𑀤𑀼𑀫𑁆𑀫𑁄𑀘𑀬𑀁 𑀳𑁄𑀢𑀻𑀢𑀺 𑀤𑀼𑀧𑁆𑀧𑀫𑀼𑀜𑁆𑀘𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦𑀸𑀢𑀺 𑀏𑀢𑀁 𑀏𑀯𑀁 𑀤𑀴𑁆𑀳𑀫𑁆𑀧𑀺 𑀓𑀺𑀮𑁂𑀲𑀩𑀦𑁆𑀥𑀦𑀁 𑀜𑀸𑀡𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀅𑀬𑀤𑀸𑀫𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀫𑀢𑁆𑀢𑀯𑀭𑀯𑀸𑀭𑀡𑀸 𑀯𑀺𑀬 𑀧𑀜𑁆𑀚𑀭𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀳𑀧𑁄𑀢𑀓𑀸 𑀯𑀺𑀬 𑀘 𑀥𑀻𑀭𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀉𑀓𑁆𑀓𑀸𑀭𑀪𑀽𑀫𑀺𑀁 𑀯𑀺𑀬 𑀚𑀺𑀕𑀼𑀘𑁆𑀙𑀫𑀸𑀦𑀸 𑀅𑀦𑀧𑁂𑀓𑁆𑀔𑀺𑀦𑁄 𑀳𑀼𑀢𑁆𑀯𑀸 𑀓𑀸𑀫𑀲𑀼𑀔𑀁 𑀧𑀳𑀸𑀬 𑀯𑀚𑀦𑁆𑀢𑀺 𑀧𑀓𑁆𑀓𑀫𑀦𑁆𑀢𑀺, 𑀧𑀓𑁆𑀓𑀫𑀺𑀢𑁆𑀯𑀸 𑀘 𑀧𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀻𑀢𑀺.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀫𑀸𑀢𑀸 𑀫𑀳𑀸𑀫𑀸𑀬𑀸 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸, 𑀪𑀭𑀺𑀬𑀸 𑀭𑀸𑀳𑀼𑀮𑀫𑀸𑀢𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀦𑁆𑀥𑀦𑀸𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁦𑁨] 𑁨. 𑀓𑁂𑀴𑀺𑀲𑀻𑀮𑀚𑀸𑀢𑀓𑀯𑀡𑁆𑀡𑀦𑀸

𑀳𑀁𑀲𑀸 ¶ 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀸𑀓𑀝𑁄 𑀅𑀳𑁄𑀲𑀺 𑀧𑀜𑁆𑀜𑀸𑀢𑁄 𑀫𑀥𑀼𑀭𑀲𑁆𑀲𑀭𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑀸𑀦𑀁 𑀅𑀦𑁆𑀢𑀭𑁄 ¶ 𑀧𑀫𑀸𑀡𑁂𑀦 𑀑𑀫𑀓𑁄 𑀮𑀓𑀼𑀡𑁆𑀟𑀓𑁄 𑀲𑀸𑀫𑀡𑁂𑀭𑁄 𑀯𑀺𑀬, 𑀔𑀼𑀤𑁆𑀤𑀓𑁄 𑀓𑀻𑀴𑀦𑀢𑁆𑀣𑀸𑀬 𑀓𑀢𑁄 𑀯𑀺𑀬. 𑀢𑀲𑁆𑀫𑀺𑀁 𑀏𑀓𑀤𑀺𑀯𑀲𑀁 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀚𑁂𑀢𑀯𑀦𑀓𑁄𑀝𑁆𑀞𑀓𑀁 𑀕𑀢𑁂 𑀚𑀦𑀧𑀤𑀸 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 ‘‘𑀤𑀲𑀩𑀮𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀚𑁂𑀢𑀯𑀦𑀁 𑀧𑀯𑀺𑀲𑀦𑁆𑀢𑀸 𑀯𑀺𑀳𑀸𑀭𑀓𑁄𑀝𑁆𑀞𑀓𑁂 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 𑀣𑁂𑀭𑀁 𑀘𑀻𑀯𑀭𑀓𑀡𑁆𑀡𑁂 𑀕𑀡𑁆𑀳𑀦𑁆𑀢𑀸 𑀳𑀢𑁆𑀣𑁂 𑀕𑀡𑁆𑀳𑀦𑁆𑀢𑀸 𑀲𑀻𑀲𑀁 𑀕𑀡𑁆𑀳𑀦𑁆𑀢𑀸 𑀦𑀸𑀲𑀸𑀬 𑀧𑀭𑀸𑀫𑀲𑀦𑁆𑀢𑀸 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑁂 𑀓𑀢𑁂 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫𑁂𑀓𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄 𑀅𑀢𑁆𑀣𑀺, 𑀓𑀳𑀁 𑀲𑁄 𑀇𑀤𑀸𑀦𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀺𑀓𑁆𑀔𑀯𑁂, 𑀤𑀝𑁆𑀞𑀼𑀓𑀸𑀫𑀢𑁆𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀬𑀁, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀤𑀺𑀲𑁆𑀯𑀸 𑀘𑀻𑀯𑀭𑀓𑀡𑁆𑀡𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀆𑀕𑀢𑀸, 𑀏𑀲 𑀲𑁄’’𑀢𑀺. ‘‘𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀧𑀢𑁆𑀣𑀺𑀢𑀧𑀢𑁆𑀣𑀦𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀲𑀸𑀯𑀓𑁄 𑀓𑀺𑀁𑀓𑀸𑀭𑀡𑀸 𑀅𑀧𑁆𑀧𑁂𑀲𑀓𑁆𑀔𑁄 𑀚𑀸𑀢𑁄’’𑀢𑀺? 𑀲𑀢𑁆𑀣𑀸 ‘‘𑀅𑀢𑁆𑀢𑀦𑀸 𑀓𑀢𑀧𑀸𑀧𑀓𑀫𑁆𑀫𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀚𑀺𑀡𑁆𑀡𑀁 𑀚𑀭𑀸𑀧𑁆𑀧𑀢𑁆𑀢𑀁 𑀳𑀢𑁆𑀣𑀺𑀁 𑀯𑀸 𑀅𑀲𑁆𑀲𑀁 𑀯𑀸 𑀕𑁄𑀡𑀁 𑀯𑀸 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀓𑁂𑀴𑀺𑀲𑀻𑀮𑁄 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑀁 𑀤𑀺𑀲𑁆𑀯𑀸𑀯 𑀅𑀦𑀼𑀩𑀦𑁆𑀥𑀸𑀧𑁂𑀢𑀺, 𑀚𑀺𑀡𑁆𑀡𑀲𑀓𑀝𑀫𑁆𑀧𑀺 𑀤𑀺𑀲𑁆𑀯𑀸 𑀪𑀺𑀦𑁆𑀤𑀸𑀧𑁂𑀢𑀺, 𑀚𑀺𑀡𑁆𑀡𑀫𑀸𑀢𑀼𑀕𑀸𑀫𑁂 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀉𑀤𑀭𑁂 𑀧𑀳𑀭𑀸𑀧𑁂𑀢𑁆𑀯𑀸 𑀧𑀸𑀢𑀸𑀧𑁂𑀢𑁆𑀯𑀸 𑀧𑀼𑀦 𑀉𑀝𑁆𑀞𑀸𑀧𑁂𑀢𑁆𑀯𑀸 𑀪𑀸𑀬𑀸𑀧𑁂𑀢𑀺 ¶ , 𑀚𑀺𑀡𑁆𑀡𑀧𑀼𑀭𑀺𑀲𑁂 𑀤𑀺𑀲𑁆𑀯𑀸 𑀮𑀗𑁆𑀖𑀓𑁂 𑀯𑀺𑀬 𑀪𑀽𑀫𑀺𑀬𑀁 𑀲𑀁𑀧𑀭𑀺𑀯𑀢𑁆𑀢𑀓𑀸𑀤𑀺𑀓𑀻𑀴𑀁 𑀓𑀻𑀴𑀸𑀧𑁂𑀢𑀺, 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑀖𑀭𑁂 𑀓𑀺𑀭 𑀫𑀳𑀮𑁆𑀮𑀓𑁄 𑀅𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸𑀧𑀺 ¶ 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀻𑀴𑀢𑀺. 𑀫𑀦𑀼𑀲𑁆𑀲𑀸 𑀮𑀚𑁆𑀚𑀦𑁆𑀢𑀸 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀭𑁄 𑀢𑀺𑀭𑁄𑀭𑀝𑁆𑀞𑀸𑀦𑀺 𑀧𑁂𑀲𑁂𑀦𑁆𑀢𑀺, 𑀫𑀸𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑁄 𑀧𑀺𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑁄 𑀧𑀘𑁆𑀙𑀺𑀚𑁆𑀚𑀺, 𑀭𑀸𑀚𑀲𑁂𑀯𑀓𑀸𑀧𑀺 𑀓𑁂𑀴𑀺𑀲𑀻𑀮𑀸𑀯 𑀅𑀳𑁂𑀲𑀼𑀁. 𑀫𑀢𑀫𑀢𑀸 𑀘𑀢𑁆𑀢𑀸𑀭𑁄 𑀅𑀧𑀸𑀬𑁂 𑀧𑀽𑀭𑁂𑀦𑁆𑀢𑀺, 𑀤𑁂𑀯𑀧𑀭𑀺𑀲𑀸 𑀧𑀭𑀺𑀳𑀸𑀬𑀢𑀺.

𑀲𑀓𑁆𑀓𑁄 𑀅𑀪𑀺𑀦𑀯𑁂 𑀤𑁂𑀯𑀧𑀼𑀢𑁆𑀢𑁂 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀤𑀫𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀳𑀮𑁆𑀮𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀚𑀺𑀡𑁆𑀡𑀬𑀸𑀦𑀓𑁂 𑀤𑁆𑀯𑁂 𑀢𑀓𑁆𑀓𑀘𑀸𑀝𑀺𑀬𑁄 𑀆𑀭𑁄𑀧𑁂𑀢𑁆𑀯𑀸 𑀤𑁆𑀯𑁂 𑀚𑀭𑀕𑁄𑀡𑁂 ¶ 𑀬𑁄𑀚𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀅𑀮𑀗𑁆𑀓𑀢𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑁂 𑀅𑀮𑀗𑁆𑀓𑀢𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁂 𑀧𑀺𑀮𑁄𑀢𑀺𑀓𑀦𑀺𑀯𑀢𑁆𑀣𑁄 𑀢𑀁 𑀬𑀸𑀦𑀓𑀁 𑀧𑀸𑀚𑁂𑀦𑁆𑀢𑁄 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀭𑀸𑀚𑀸 𑀚𑀺𑀡𑁆𑀡𑀬𑀸𑀦𑀓𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀬𑀸𑀦𑀓𑀁 𑀅𑀧𑀦𑁂𑀣𑀸’’𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸 ‘‘𑀓𑀳𑀁, 𑀤𑁂𑀯, 𑀦 𑀧𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀭𑀜𑁆𑀜𑁄𑀬𑁂𑀯 𑀤𑀲𑁆𑀲𑁂𑀲𑀺. 𑀅𑀣 𑀦𑀁 𑀩𑀳𑀼𑀲𑀫𑁆𑀧𑀢𑁆𑀢𑁂 𑀢𑀲𑁆𑀫𑀺𑀁 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀧𑀸𑀚𑁂𑀦𑁆𑀢𑁄 𑀭𑀜𑁆𑀜𑁄 𑀫𑀢𑁆𑀣𑀓𑁂 𑀏𑀓𑀁 𑀘𑀸𑀝𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀸𑀧𑁂𑀦𑁆𑀢𑁄 𑀤𑀼𑀢𑀺𑀬𑀁 𑀪𑀺𑀦𑁆𑀤𑀺. 𑀅𑀣𑀲𑁆𑀲 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀇𑀢𑁄 𑀘𑀺𑀢𑁄 𑀘 𑀢𑀓𑁆𑀓𑀁 𑀧𑀕𑁆𑀖𑀭𑀢𑀺, 𑀲𑁄 𑀢𑁂𑀦 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀢𑀁 𑀉𑀧𑀤𑁆𑀤𑀼𑀢𑀪𑀸𑀯𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀬𑀸𑀦𑀓𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀲𑀓𑁆𑀓𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀯𑀚𑀺𑀭𑀳𑀢𑁆𑀣𑁄 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀧𑀸𑀧 𑀅𑀥𑀫𑁆𑀫𑀺𑀓𑀭𑀸𑀚, 𑀓𑀺𑀁 𑀢𑁆𑀯𑀁 𑀫𑀳𑀮𑁆𑀮𑀓𑁄 𑀦 𑀪𑀯𑀺𑀲𑁆𑀲𑀲𑀺, 𑀢𑀯 𑀲𑀭𑀻𑀭𑀁 𑀚𑀭𑀸 𑀦 𑀧𑀳𑀭𑀺𑀲𑁆𑀲𑀢𑀺, 𑀓𑁂𑀴𑀺𑀲𑀻𑀮𑁄 𑀳𑀼𑀢𑁆𑀯𑀸 𑀯𑀼𑀟𑁆𑀠𑁂 𑀯𑀺𑀳𑁂𑀞𑀦𑀓𑀫𑁆𑀫𑀁 𑀓𑀭𑁄𑀲𑀺, 𑀏𑀓𑀓𑀁 𑀢𑀁 𑀦𑀺𑀲𑁆𑀲𑀸𑀬 𑀏𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀫𑀢𑀫𑀢𑀸 𑀅𑀧𑀸𑀬𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀲𑀘𑁂 𑀇𑀫𑀫𑁆𑀳𑀸 𑀓𑀫𑁆𑀫𑀸 𑀦 𑀯𑀺𑀭𑀫𑀺𑀲𑁆𑀲𑀲𑀺, 𑀯𑀚𑀺𑀭𑁂𑀦 𑀢𑁂 𑀲𑀻𑀲𑀁 𑀧𑀤𑀸𑀮𑁂𑀲𑁆𑀲𑀸𑀫𑀺, 𑀫𑀸 𑀇𑀢𑁄 𑀧𑀝𑁆𑀞𑀸𑀬𑁂𑀢𑀁 𑀓𑀫𑁆𑀫𑀁 𑀅𑀓𑀢𑁆𑀣𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀯𑀼𑀟𑁆𑀠𑀸𑀧𑀘𑀸𑀬𑀺𑀓𑀓𑀫𑁆𑀫𑀲𑁆𑀲 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑁆𑀯𑀸 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸𑀭𑀽𑀧𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁦𑁩.

‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀳𑀢𑁆𑀣𑀬𑁄 𑀧𑀲𑀤𑀸 𑀫𑀺𑀕𑀸;

𑀲𑀩𑁆𑀩𑁂 𑀲𑀻𑀳𑀲𑁆𑀲 𑀪𑀸𑀬𑀦𑁆𑀢𑀺, 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺 𑀢𑀼𑀮𑁆𑀬𑀢𑀸.

𑁧𑁦𑁪.

‘‘𑀏𑀯𑀫𑁂𑀯 ¶ 𑀫𑀦𑀼𑀲𑁆𑀲𑁂𑀲𑀼, 𑀤𑀳𑀭𑁄 𑀘𑁂𑀧𑀺 𑀧𑀜𑁆𑀜𑀯𑀸;

𑀲𑁄 𑀳𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀺, 𑀦𑁂𑀯 𑀩𑀸𑀮𑁄 𑀲𑀭𑀻𑀭𑀯𑀸’’𑀢𑀺.

𑀢𑀢𑁆𑀣 𑀧𑀲𑀤𑀸 𑀫𑀺𑀕𑀸𑀢𑀺 𑀧𑀲𑀤𑀲𑀗𑁆𑀔𑀸𑀢𑀸 𑀫𑀺𑀕𑀸, 𑀧𑀲𑀤𑀸 𑀫𑀺𑀕𑀸 𑀘 𑀅𑀯𑀲𑁂𑀲𑀸 𑀫𑀺𑀕𑀸 𑀘𑀸𑀢𑀺𑀧𑀺 𑀅𑀢𑁆𑀣𑁄. ‘‘𑀧𑀲𑀤𑀫𑀺𑀕𑀸’’𑀢𑀺𑀧𑀺 𑀧𑀸𑀞𑁄, 𑀧𑀲𑀤𑀸 𑀫𑀺𑀕𑀸𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺 𑀢𑀼𑀮𑁆𑀬𑀢𑀸𑀢𑀺 𑀲𑀭𑀻𑀭𑁂 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬, 𑀫𑀳𑀸𑀲𑀭𑀻𑀭𑀸 𑀳𑀢𑁆𑀣𑀺𑀦𑁄 𑀘𑁂𑀯 𑀧𑀲𑀤𑀫𑀺𑀕𑀸 𑀘 𑀲𑀻𑀳𑀁 𑀫𑀸𑀭𑁂𑀬𑁆𑀬𑀼𑀁, 𑀲𑀻𑀳𑁄 𑀳𑀁𑀲𑀸𑀤𑀬𑁄 ¶ 𑀔𑀼𑀤𑁆𑀤𑀓𑀲𑀭𑀻𑀭𑁂𑀬𑁂𑀯 𑀫𑀸𑀭𑁂𑀬𑁆𑀬, 𑀔𑀼𑀤𑁆𑀤𑀓𑀸𑀬𑁂𑀯 𑀲𑀻𑀳𑀲𑁆𑀲 𑀪𑀸𑀬𑁂𑀬𑁆𑀬𑀼𑀁, 𑀦 𑀫𑀳𑀦𑁆𑀢𑀸. 𑀬𑀲𑁆𑀫𑀸 𑀧𑀦𑁂𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀢𑁂 𑀲𑀻𑀳𑀲𑁆𑀲 𑀪𑀸𑀬𑀦𑁆𑀢𑀺. 𑀲𑀭𑀻𑀭𑀯𑀸𑀢𑀺 𑀩𑀸𑀮𑁄 𑀫𑀳𑀸𑀲𑀭𑀻𑀭𑁄𑀧𑀺 𑀫𑀳𑀸 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀲𑀭𑀻𑀭𑁂𑀦 𑀔𑀼𑀤𑁆𑀤𑀓𑁄𑀧𑀺 𑀫𑀸 𑀢𑀁 𑀜𑀸𑀡𑁂𑀦𑀧𑀺 𑀔𑀼𑀤𑁆𑀤𑀓𑁄𑀢𑀺 𑀫𑀜𑁆𑀜𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀭𑀸𑀚𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀅𑀳𑁄𑀲𑀺, 𑀲𑁄 𑀢𑀸𑀬 𑀓𑁂𑀴𑀺𑀲𑀻𑀮𑀢𑀸𑀬 𑀧𑀭𑁂𑀲𑀁 𑀓𑁂𑀴𑀺𑀦𑀺𑀲𑁆𑀲𑀬𑁄 𑀚𑀸𑀢𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁂𑀴𑀺𑀲𑀻𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁦𑁩] 𑁩. 𑀔𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸

𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀓𑀺𑀭 𑀚𑀦𑁆𑀢𑀸𑀖𑀭𑀤𑁆𑀯𑀸𑀭𑁂 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑀁 𑀧𑀽𑀢𑀺𑀭𑀼𑀓𑁆𑀔𑀦𑁆𑀢𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑁄 𑀲𑀧𑁆𑀧𑁄 𑀧𑀸𑀤𑀗𑁆𑀕𑀼𑀮𑀺𑀬𑀁 𑀟𑀁𑀲𑀺, 𑀲𑁄 𑀢𑀢𑁆𑀣𑁂𑀯 𑀫𑀢𑁄. 𑀢𑀲𑁆𑀲 𑀫𑀢𑀪𑀸𑀯𑁄 𑀲𑀓𑀮𑀯𑀺𑀳𑀸𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀚𑀦𑁆𑀢𑀸𑀖𑀭𑀤𑁆𑀯𑀸𑀭𑁂 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑁄 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀢𑀢𑁆𑀣𑁂𑀯 𑀫𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 ¶ 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀘𑁂 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀅𑀪𑀸𑀯𑀬𑀺𑀲𑁆𑀲, 𑀦 𑀦𑀁 𑀲𑀧𑁆𑀧𑁄 𑀟𑀁𑀲𑁂𑀬𑁆𑀬. 𑀧𑁄𑀭𑀸𑀡𑀓𑀢𑀸𑀧𑀲𑀸𑀧𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀢𑀸𑀦𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀪𑀬𑀢𑁄 𑀫𑀼𑀘𑁆𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀯𑀺𑀳𑀸𑀲𑀺. 𑀢𑀤𑀸 𑀕𑀗𑁆𑀕𑀸𑀢𑀻𑀭𑁂 𑀦𑀸𑀦𑀧𑁆𑀧𑀓𑀸𑀭𑀸 𑀤𑀻𑀖𑀚𑀸𑀢𑀺𑀓𑀸 𑀇𑀲𑀻𑀦𑀁 𑀧𑀭𑀺𑀧𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀇𑀲𑀬𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺. 𑀢𑀸𑀧𑀲𑀸 𑀢𑀫𑀢𑁆𑀣𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑁂 𑀢𑀸𑀧𑀲𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬𑀸𑀣, 𑀦 𑀯𑁄 𑀲𑀧𑁆𑀧𑀸 𑀟𑀁𑀲𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀏𑀯𑀁 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁫.

‘‘𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀏𑀭𑀸𑀧𑀣𑁂𑀳𑀺 𑀫𑁂;

𑀙𑀩𑁆𑀬𑀸𑀧𑀼𑀢𑁆𑀢𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀓𑀡𑁆𑀳𑀸𑀕𑁄𑀢𑀫𑀓𑁂𑀳𑀺 𑀘𑀸’’𑀢𑀺.

𑀢𑀢𑁆𑀣 𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀦𑁆𑀢𑀺 𑀯𑀺𑀭𑀽𑀧𑀓𑁆𑀔𑀦𑀸𑀕𑀭𑀸𑀚𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀫𑁂𑀢𑁆𑀢𑀁. 𑀏𑀭𑀸𑀧𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑀸𑀦𑀺𑀧𑀺 𑀳𑀺 𑀏𑀭𑀸𑀧𑀣𑀦𑀸𑀕𑀭𑀸𑀚𑀓𑀼𑀮𑀁 𑀙𑀩𑁆𑀬𑀸𑀧𑀼𑀢𑁆𑀢𑀦𑀸𑀕𑀭𑀸𑀚𑀓𑀼𑀮𑀁 𑀓𑀡𑁆𑀳𑀸𑀕𑁄𑀢𑀫𑀓𑀦𑀸𑀕𑀭𑀸𑀚𑀓𑀼𑀮𑀦𑁆𑀢𑀺 𑀦𑀸𑀕𑀭𑀸𑀚𑀓𑀼𑀮𑀸𑀦𑁂𑀯.

𑀏𑀯𑀁 𑀘𑀢𑁆𑀢𑀸𑀭𑀺 𑀦𑀸𑀕𑀭𑀸𑀚𑀓𑀼𑀮𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀏𑀢𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀣, 𑀤𑀻𑀖𑀚𑀸𑀢𑀺𑀓𑀸 𑀯𑁄 𑀦 𑀟𑀁𑀲𑀺𑀲𑁆𑀲𑀦𑁆𑀢𑀺 𑀦 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

‘‘𑀅𑀧𑀸𑀤𑀓𑁂𑀳𑀺 ¶ 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀤𑁆𑀯𑀺𑀧𑀸𑀤𑀓𑁂𑀳𑀺 𑀫𑁂;

𑀘𑀢𑀼𑀧𑁆𑀧𑀤𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀩𑀳𑀼𑀧𑁆𑀧𑀤𑁂𑀳𑀺 𑀫𑁂’’𑀢𑀺.

𑀢𑀢𑁆𑀣 𑀧𑀞𑀫𑀧𑀤𑁂𑀦 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀼 𑀅𑀧𑀸𑀤𑀓𑁂𑀲𑀼 𑀤𑀻𑀖𑀚𑀸𑀢𑀺𑀓𑁂𑀲𑀼 𑀘𑁂𑀯 𑀫𑀘𑁆𑀙𑁂𑀲𑀼 𑀘 𑀫𑁂𑀢𑁆𑀢𑀸𑀪𑀸𑀯𑀦𑀸 𑀤𑀲𑁆𑀲𑀺𑀢𑀸, 𑀤𑀼𑀢𑀺𑀬𑀧𑀤𑁂𑀦 𑀫𑀦𑀼𑀲𑁆𑀲𑁂𑀲𑀼 𑀘𑁂𑀯 𑀧𑀓𑁆𑀔𑀺𑀚𑀸𑀢𑁂𑀲𑀼 𑀘, 𑀢𑀢𑀺𑀬𑀧𑀤𑁂𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀲𑀼 𑀲𑀩𑁆𑀩𑀘𑀢𑀼𑀧𑁆𑀧𑀤𑁂𑀲𑀼, 𑀘𑀢𑀼𑀢𑁆𑀣𑀧𑀤𑁂𑀦 𑀯𑀺𑀘𑁆𑀙𑀺𑀓𑀲𑀢𑀧𑀤𑀺𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀫𑀓𑁆𑀓𑀝𑀓𑀸𑀤𑀻𑀲𑀼.

𑀏𑀯𑀁 𑀲𑀭𑀽𑀧𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀬𑀸𑀘𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀸 𑀫𑀁 𑀅𑀧𑀸𑀤𑀓𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀤𑁆𑀯𑀺𑀧𑀸𑀤𑀓𑁄;

𑀫𑀸 𑀫𑀁 𑀘𑀢𑀼𑀧𑁆𑀧𑀤𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀩𑀳𑀼𑀧𑁆𑀧𑀤𑁄’’𑀢𑀺.

𑀢𑀢𑁆𑀣 ¶ ¶ 𑀫𑀸 𑀫𑀦𑁆𑀢𑀺 𑀏𑀢𑁂𑀲𑀼 𑀅𑀧𑀸𑀤𑀓𑀸𑀤𑀻𑀲𑀼 𑀓𑁄𑀘𑀺 𑀏𑀓𑁄𑀧𑀺 𑀫𑀸 𑀫𑀁 𑀳𑀺𑀁𑀲𑀢𑀼, 𑀫𑀸 𑀯𑀺𑀳𑁂𑀞𑁂𑀢𑀽𑀢𑀺 𑀏𑀯𑀁 𑀆𑀬𑀸𑀘𑀦𑁆𑀢𑀸 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀧𑀸𑀡𑀸, 𑀲𑀩𑁆𑀩𑁂 𑀪𑀽𑀢𑀸 𑀘 𑀓𑁂𑀯𑀮𑀸;

𑀲𑀩𑁆𑀩𑁂 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀼, 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸’’𑀢𑀺.

𑀢𑀢𑁆𑀣 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀝𑁆𑀝𑁂 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀆𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸𑀢𑀺 𑀲𑀢𑁆𑀢𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀧𑀸𑀡𑀦𑀯𑀲𑁂𑀦 𑀧𑀸𑀡𑀸, 𑀪𑀽𑀢𑀪𑀸𑀯𑀺𑀢𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀪𑀽𑀢𑀸𑀢𑀺 𑀏𑀯𑀁 𑀯𑀘𑀦𑀫𑀢𑁆𑀢𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀧𑀤𑀸𑀦𑀺 𑀲𑀩𑁆𑀩𑀲𑀢𑁆𑀢𑀲𑀗𑁆𑀕𑀸𑀳𑀓𑀸𑀦𑁂𑀯. 𑀓𑁂𑀯𑀮𑀸𑀢𑀺 𑀲𑀓𑀮𑀸. 𑀇𑀤𑀁 𑀲𑀩𑁆𑀩𑀲𑀤𑁆𑀤𑀲𑁆𑀲𑁂𑀯 𑀳𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀽𑀢𑀺 𑀲𑀩𑁆𑀩𑁂𑀧𑁂𑀢𑁂 𑀲𑀢𑁆𑀢𑀸 𑀪𑀤𑁆𑀭𑀸𑀦𑀺 𑀲𑀸𑀥𑀽𑀦𑀺 𑀓𑀮𑁆𑀬𑀸𑀡𑀸𑀦𑁂𑀯 𑀧𑀲𑁆𑀲𑀦𑁆𑀢𑀼. 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸𑀢𑀺 𑀏𑀢𑁂𑀲𑀼 𑀓𑀜𑁆𑀘𑀺 𑀏𑀓𑀁 𑀲𑀢𑁆𑀢𑀫𑁆𑀧𑀺 𑀧𑀸𑀧𑀁 𑀮𑀸𑀫𑀓𑀁 𑀤𑀼𑀓𑁆𑀔𑀁 𑀫𑀸 𑀆𑀕𑀫𑀸, 𑀫𑀸 𑀆𑀕𑀘𑁆𑀙𑀢𑀼 𑀫𑀸 𑀧𑀸𑀧𑀼𑀡𑀸𑀢𑀼, 𑀲𑀩𑁆𑀩𑁂 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸 𑀲𑀼𑀔𑀻 𑀦𑀺𑀤𑁆𑀤𑀼𑀓𑁆𑀔𑀸 𑀳𑁄𑀦𑁆𑀢𑀽𑀢𑀺.

𑀏𑀯𑀁 ¶ ‘‘𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀸𑀧𑁂𑀢𑀼𑀁 𑁋

𑁧𑁦𑁬.

‘‘𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄, 𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄;

𑀅𑀧𑁆𑀧𑀫𑀸𑀡𑁄 𑀲𑀗𑁆𑀖𑁄’’𑀢𑀺 𑀆𑀳.

𑀢𑀢𑁆𑀣 𑀧𑀫𑀸𑀡𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀕𑀼𑀡𑀸𑀦𑀜𑁆𑀘 𑀧𑀫𑀸𑀡𑀸𑀪𑀸𑀯𑁂𑀦 𑀩𑀼𑀤𑁆𑀥𑀭𑀢𑀦𑀁 𑀅𑀧𑁆𑀧𑀫𑀸𑀡𑀁. 𑀥𑀫𑁆𑀫𑁄𑀢𑀺 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄. 𑀢𑀲𑁆𑀲𑀧𑀺 𑀧𑀫𑀸𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀧𑁆𑀧𑀫𑀸𑀡𑁄. 𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀗𑁆𑀖𑁄𑀧𑀺 𑀅𑀧𑁆𑀧𑀫𑀸𑀡𑁄.

𑀇𑀢𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀯𑀢𑁆𑀯𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀅𑀧𑁆𑀧𑀫𑀸𑀡𑀕𑀼𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀧𑁆𑀧𑀫𑀸𑀡𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀼𑀁 𑁋

‘‘𑀧𑀫𑀸𑀡𑀯𑀦𑁆𑀢𑀸𑀦𑀺 ¶ ¶ 𑀲𑀭𑀻𑀲𑀧𑀸𑀦𑀺, 𑀅𑀳𑀺 𑀯𑀺𑀘𑁆𑀙𑀺𑀓 𑀲𑀢𑀧𑀤𑀻;

𑀉𑀡𑁆𑀡𑀦𑀸𑀪𑀺 𑀲𑀭𑀩𑀽 𑀫𑀽𑀲𑀺𑀓𑀸’’𑀢𑀺 𑀆𑀳.

𑀢𑀢𑁆𑀣 𑀲𑀭𑀻𑀲𑀧𑀸𑀦𑀻𑀢𑀺 𑀲𑀧𑁆𑀧𑀤𑀻𑀖𑀚𑀸𑀢𑀺𑀓𑀸𑀦𑀁 𑀦𑀸𑀫𑀁. 𑀢𑁂 𑀳𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀲𑀺𑀭𑁂𑀦 𑀯𑀸 𑀲𑀧𑀦𑁆𑀢𑀻𑀢𑀺 𑀲𑀭𑀻𑀲𑀧𑀸. ‘‘𑀅𑀳𑀻’’𑀢𑀺𑀆𑀤𑀺 𑀢𑁂𑀲𑀁 𑀲𑀭𑀽𑀧𑀢𑁄 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀉𑀡𑁆𑀡𑀦𑀸𑀪𑀻𑀢𑀺 𑀫𑀓𑁆𑀓𑀝𑀓𑁄. 𑀢𑀲𑁆𑀲 𑀳𑀺 𑀦𑀸𑀪𑀺𑀢𑁄 𑀉𑀡𑁆𑀡𑀸𑀲𑀤𑀺𑀲𑀁 𑀲𑀼𑀢𑁆𑀢𑀁 𑀦𑀺𑀓𑁆𑀔𑀫𑀢𑀺, 𑀢𑀲𑁆𑀫𑀸 ‘‘𑀉𑀡𑁆𑀡𑀦𑀸𑀪𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀩𑀽𑀢𑀺 𑀖𑀭𑀕𑁄𑀴𑀺𑀓𑀸.

𑀇𑀢𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀬𑀲𑁆𑀫𑀸 𑀏𑀢𑁂𑀲𑀁 𑀅𑀦𑁆𑀢𑁄𑀭𑀸𑀕𑀸𑀤𑀬𑁄 𑀧𑀫𑀸𑀡𑀓𑀭𑀸 𑀥𑀫𑁆𑀫𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀭𑀻𑀲𑀧𑀸𑀤𑀻𑀦𑀺 𑀧𑀫𑀸𑀡𑀯𑀦𑁆𑀢𑀸𑀦𑀻’’𑀢𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀸𑀡𑀸𑀦𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀆𑀦𑀼𑀪𑀸𑀯𑁂𑀦 𑀇𑀫𑁂 𑀧𑀫𑀸𑀡𑀯𑀦𑁆𑀢𑀸 𑀲𑀢𑁆𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀧𑀭𑀺𑀢𑁆𑀢𑀓𑀫𑁆𑀫𑀁 𑀓𑀭𑁄𑀦𑁆𑀢𑀽𑀢𑀺 𑀏𑀯𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀢𑀸 𑀫𑁂 𑀭𑀓𑁆𑀔𑀸 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸, 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀺;

𑀲𑁄𑀳𑀁 𑀦𑀫𑁄 𑀪𑀕𑀯𑀢𑁄, 𑀦𑀫𑁄 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦’’𑀦𑁆𑀢𑀺.

𑀢𑀢𑁆𑀣 ¶ 𑀓𑀢𑀸 𑀫𑁂 𑀭𑀓𑁆𑀔𑀸𑀢𑀺 𑀫𑀬𑀸 𑀭𑀢𑀦𑀢𑁆𑀢𑀬𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀅𑀢𑁆𑀢𑀦𑁄 𑀭𑀓𑁆𑀔𑀸 𑀕𑀼𑀢𑁆𑀢𑀺 𑀓𑀢𑀸. 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸𑀢𑀺 𑀧𑀭𑀺𑀢𑁆𑀢𑀸𑀡𑀫𑁆𑀧𑀺 𑀫𑁂 𑀅𑀢𑁆𑀢𑀦𑁄 𑀓𑀢𑀁. 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀻𑀢𑀺 𑀫𑀬𑀺 𑀅𑀳𑀺𑀢𑀚𑁆𑀛𑀸𑀲𑀬𑀸𑀦𑀺 𑀪𑀽𑀢𑀸𑀦𑀺 𑀧𑀝𑀺𑀓𑁆𑀓𑀫𑀦𑁆𑀢𑀼 𑀅𑀧𑀕𑀘𑁆𑀙𑀦𑁆𑀢𑀼. 𑀲𑁄𑀳𑀁 𑀦𑀫𑁄 𑀪𑀕𑀯𑀢𑁄𑀢𑀺 𑀲𑁄 𑀅𑀳𑀁 𑀏𑀯𑀁 𑀓𑀢𑀧𑀭𑀺𑀢𑁆𑀢𑁄 𑀅𑀢𑀻𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀫𑁄 𑀓𑀭𑁄𑀫𑀺. 𑀦𑀫𑁄 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀦𑁆𑀢𑀺 𑀯𑀺𑀲𑁂𑀲𑁂𑀦 𑀧𑀦 𑀅𑀢𑀻𑀢𑁂 𑀧𑀝𑀺𑀧𑀸𑀝𑀺𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀦𑀫𑁄 𑀓𑀭𑁄𑀫𑀻𑀢𑀺.

𑀏𑀯𑀁 ‘‘𑀦𑀫𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸𑀧𑀺 𑀲𑀢𑁆𑀢 𑀩𑀼𑀤𑁆𑀥𑁂 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀕𑀡𑀲𑁆𑀲 𑀇𑀫𑀁 𑀧𑀭𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀅𑀤𑀸𑀲𑀺. 𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀫𑁂𑀢𑁆𑀢𑀸𑀬 𑀤𑀻𑀧𑀺𑀢𑀢𑁆𑀢𑀸 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀯𑀸 𑀤𑁆𑀯𑀺𑀦𑁆𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀁 𑀤𑀻𑀧𑀺𑀢𑀢𑁆𑀢𑀸 𑀇𑀤𑀁 𑀧𑀭𑀺𑀢𑁆𑀢𑀁 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀜𑁆𑀜𑀁 𑀯𑀸 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀇𑀲𑀺𑀕𑀡𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀫𑁂𑀢𑁆𑀢𑀁 𑀪𑀸𑀯𑁂𑀲𑀺, 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀺. 𑀏𑀯𑀫𑁂𑀢𑁂𑀲𑀼 ¶ 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁂𑀲𑀼𑀬𑁂𑀯 𑀲𑀩𑁆𑀩𑁂 𑀤𑀻𑀖𑀚𑀸𑀢𑀺𑀓𑀸 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀔𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁦𑁪] 𑁪. 𑀯𑀻𑀭𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 𑀯𑀻𑀭𑀓 𑀧𑀲𑁆𑀲𑁂𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀕𑀢𑀸𑀮𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑀲𑁆𑀲 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂𑀲𑀼 𑀳𑀺 𑀣𑁂𑀭𑁂𑀲𑀼 𑀲𑀢𑁆𑀣𑀸 ‘‘𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀓𑀺𑀁 𑀅𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀼𑀕𑀢𑀸𑀮𑀬𑀁, 𑀪𑀦𑁆𑀢𑁂, 𑀤𑀲𑁆𑀲𑁂𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀫 𑀅𑀦𑀼𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀯𑀺𑀦𑀸𑀲𑀁 𑀧𑀸𑀧𑀼𑀡𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀉𑀤𑀓𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀲𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺, ‘‘𑀯𑀻𑀭𑀓𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀢𑀤𑀸 𑀓𑀸𑀲𑀺𑀭𑀝𑁆𑀞𑁂 𑀤𑀼𑀩𑁆𑀪𑀺𑀓𑁆𑀔𑀁 𑀅𑀳𑁄𑀲𑀺, 𑀫𑀦𑀼𑀲𑁆𑀲𑀸 𑀓𑀸𑀓𑀪𑀢𑁆𑀢𑀁 𑀯𑀸 𑀤𑀸𑀢𑀼𑀁 𑀬𑀓𑁆𑀔𑀦𑀸𑀕𑀩𑀮𑀺𑀓𑀫𑁆𑀫𑀁 𑀯𑀸 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀙𑀸𑀢𑀓𑀭𑀝𑁆𑀞𑀢𑁄 𑀓𑀸𑀓𑀸 𑀬𑁂𑀪𑀼𑀬𑁆𑀬𑁂𑀦 𑀅𑀭𑀜𑁆𑀜𑀁 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀲𑀯𑀺𑀝𑁆𑀞𑀓𑁄 𑀦𑀸𑀫 𑀓𑀸𑀓𑁄 𑀓𑀸𑀓𑀺𑀁 𑀆𑀤𑀸𑀬 𑀯𑀻𑀭𑀓𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀏𑀓𑀫𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀲𑀭𑁂 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑁄 𑀯𑀻𑀭𑀓𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑁂 𑀔𑀸𑀤𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀭𑀻𑀭𑀁 𑀲𑀼𑀓𑁆𑀔𑀸𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀉𑀤𑀓𑀓𑀸𑀓𑀁 𑀦𑀺𑀲𑁆𑀲𑀸𑀬 𑀲𑀓𑁆𑀓𑀸 𑀩𑀳𑀽 𑀫𑀘𑁆𑀙𑁂 𑀮𑀤𑁆𑀥𑀼𑀁, 𑀇𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀘𑁆𑀙𑀸𑀫𑀺 𑀢𑀁 𑀲𑀸𑀫𑀺 𑀉𑀧𑀝𑁆𑀞𑀳𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁄 𑀢𑀢𑁄 𑀧𑀝𑁆𑀞𑀸𑀬 𑀉𑀧𑀝𑁆𑀞𑀸𑀲𑀺. 𑀯𑀻𑀭𑀓𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀫𑀘𑁆𑀙𑁂 𑀉𑀤𑁆𑀥𑀭𑀺𑀢𑁆𑀯𑀸 𑀲𑀯𑀺𑀝𑁆𑀞𑀓𑀲𑁆𑀲 𑀤𑁂𑀢𑀺. 𑀲𑁄𑀧𑀺 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀲𑁂𑀲𑀁 𑀓𑀸𑀓𑀺𑀬𑀸 𑀤𑁂𑀢𑀺.

𑀢𑀲𑁆𑀲 ¶ 𑀅𑀧𑀭𑀪𑀸𑀕𑁂 𑀫𑀸𑀦𑁄 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀬𑀫𑁆𑀧𑀺 𑀉𑀤𑀓𑀓𑀸𑀓𑁄 𑀓𑀸𑀴𑀓𑁄, 𑀅𑀳𑀫𑁆𑀧𑀺 𑀓𑀸𑀴𑀓𑁄, 𑀅𑀓𑁆𑀔𑀺𑀢𑀼𑀡𑁆𑀟𑀧𑀸𑀤𑁂𑀳𑀺𑀧𑀺 𑀏𑀢𑀲𑁆𑀲 𑀘 𑀫𑀬𑁆𑀳𑀜𑁆𑀘 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺, 𑀇𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸 𑀕𑀳𑀺𑀢𑀫𑀘𑁆𑀙𑁂𑀳𑀺 𑀫𑀬𑁆𑀳𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀳𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀻𑀭𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫, 𑀇𑀢𑁄 𑀧𑀝𑁆𑀞𑀸𑀬 𑀅𑀳𑀫𑁂𑀯 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀦 𑀢𑁆𑀯𑀁, 𑀲𑀫𑁆𑀫, 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀦𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀫𑀸 𑀦𑀲𑁆𑀲𑀻’’𑀢𑀺 𑀢𑁂𑀦 𑀯𑀸𑀭𑀺𑀬𑀫𑀸𑀦𑁄𑀧𑀺 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 ¶ 𑀲𑀭𑀁 𑀑𑀭𑀼𑀬𑁆𑀳 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀉𑀫𑁆𑀫𑀼𑀚𑁆𑀚𑀫𑀸𑀦𑁄 𑀲𑁂𑀯𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀲𑁂𑀯𑀸𑀮𑀦𑁆𑀢𑀭𑁂 𑀮𑀕𑁆𑀕𑀺, 𑀅𑀕𑁆𑀕𑀢𑀼𑀡𑁆𑀟𑀫𑁂𑀯 𑀧𑀜𑁆𑀜𑀸𑀬𑀺. 𑀲𑁄 𑀦𑀺𑀭𑀲𑁆𑀲𑀸𑀲𑁄 𑀅𑀦𑁆𑀢𑁄𑀉𑀤𑀓𑁂𑀬𑁂𑀯 ¶ 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀆𑀕𑀫𑀦𑀁 𑀅𑀧𑀲𑁆𑀲𑀫𑀸𑀦𑀸 𑀢𑀁 𑀧𑀯𑀢𑁆𑀢𑀺𑀁 𑀚𑀸𑀦𑀦𑀢𑁆𑀣𑀁 𑀯𑀻𑀭𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀲𑀯𑀺𑀝𑁆𑀞𑀓𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀦𑀼 𑀔𑁄 𑀲𑁄’’𑀢𑀺 𑀧𑀼𑀘𑁆𑀙𑀫𑀸𑀦𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁭.

‘‘𑀅𑀧𑀺 𑀯𑀻𑀭𑀓 𑀧𑀲𑁆𑀲𑁂𑀲𑀺, 𑀲𑀓𑀼𑀡𑀁 𑀫𑀜𑁆𑀚𑀼𑀪𑀸𑀡𑀓𑀁;

𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲𑀁, 𑀧𑀢𑀺𑀁 𑀫𑀬𑁆𑀳𑀁 𑀲𑀯𑀺𑀝𑁆𑀞𑀓’’𑀦𑁆𑀢𑀺.

𑀢𑀢𑁆𑀣 𑀅𑀧𑀺, 𑀯𑀻𑀭𑀓, 𑀧𑀲𑁆𑀲𑁂𑀲𑀻𑀢𑀺, 𑀲𑀸𑀫𑀺 𑀯𑀻𑀭𑀓, 𑀅𑀧𑀺 𑀧𑀲𑁆𑀲𑀲𑀺. 𑀫𑀜𑁆𑀚𑀼𑀪𑀸𑀡𑀓𑀦𑁆𑀢𑀺 𑀫𑀜𑁆𑀚𑀼𑀪𑀸𑀡𑀺𑀦𑀁. 𑀲𑀸 𑀳𑀺 𑀭𑀸𑀕𑀯𑀲𑁂𑀦 ‘‘𑀫𑀥𑀼𑀭𑀲𑁆𑀲𑀭𑁄 𑀫𑁂 𑀧𑀢𑀻’’𑀢𑀺 𑀫𑀜𑁆𑀜𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲𑀦𑁆𑀢𑀺 𑀫𑁄𑀭𑀕𑀻𑀯𑀲𑀫𑀸𑀦𑀯𑀡𑁆𑀡𑀁.

𑀢𑀁 𑀲𑀼𑀢𑁆𑀯𑀸 𑀯𑀻𑀭𑀓𑁄 ‘‘𑀆𑀫, 𑀚𑀸𑀦𑀸𑀫𑀺 𑀢𑁂 𑀲𑀸𑀫𑀺𑀓𑀲𑁆𑀲 𑀕𑀢𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀉𑀤𑀓𑀣𑀮𑀘𑀭𑀲𑁆𑀲 𑀧𑀓𑁆𑀔𑀺𑀦𑁄, 𑀦𑀺𑀘𑁆𑀘𑀁 𑀆𑀫𑀓𑀫𑀘𑁆𑀙𑀪𑁄𑀚𑀺𑀦𑁄;

𑀢𑀲𑁆𑀲𑀸𑀦𑀼𑀓𑀭𑀁 𑀲𑀯𑀺𑀝𑁆𑀞𑀓𑁄, 𑀲𑁂𑀯𑀸𑀮𑁂 𑀧𑀮𑀺𑀕𑀼𑀡𑁆𑀞𑀺𑀢𑁄 𑀫𑀢𑁄’’𑀢𑀺.

𑀢𑀢𑁆𑀣 𑀉𑀤𑀓𑀣𑀮𑀘𑀭𑀲𑁆𑀲𑀸𑀢𑀺 𑀉𑀤𑀓𑁂 𑀘 𑀣𑀮𑁂 𑀘 𑀘𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲. 𑀧𑀓𑁆𑀔𑀺𑀦𑁄𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀲𑁆𑀲𑀸𑀦𑀼𑀓𑀭𑀦𑁆𑀢𑀺 𑀢𑀲𑁆𑀲 𑀅𑀦𑀼𑀓𑀭𑁄𑀦𑁆𑀢𑁄. 𑀲𑁂𑀯𑀸𑀮𑁂 𑀧𑀮𑀺𑀕𑀼𑀡𑁆𑀞𑀺𑀢𑁄 𑀫𑀢𑁄𑀢𑀺 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀲𑁂𑀯𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑁂𑀯𑀸𑀮𑀧𑀭𑀺𑀬𑁄𑀦𑀤𑁆𑀥𑁄 𑀅𑀦𑁆𑀢𑁄𑀉𑀤𑀓𑁂𑀬𑁂𑀯 𑀫𑀢𑁄, 𑀧𑀲𑁆𑀲, 𑀏𑀢𑀲𑁆𑀲 𑀢𑀼𑀡𑁆𑀟𑀁 𑀤𑀺𑀲𑁆𑀲𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀓𑀸𑀓𑀻 𑀧𑀭𑀺𑀤𑁂𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀯𑀺𑀝𑁆𑀞𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀯𑀻𑀭𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀻𑀭𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁦𑁫] 𑁫. 𑀕𑀗𑁆𑀕𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸

𑀲𑁄𑀪𑀢𑀺 ¶ ¶ 𑀫𑀘𑁆𑀙𑁄 𑀕𑀗𑁆𑀕𑁂𑀬𑁆𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀤𑀳𑀭𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀼𑀮𑀧𑀼𑀢𑁆𑀢𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀲𑀼𑀪𑀪𑀸𑀯𑀦𑀁 𑀅𑀦𑀼𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀭𑀽𑀧𑀧𑀲𑀁𑀲𑀓𑀸 𑀳𑀼𑀢𑁆𑀯𑀸 𑀭𑀽𑀧𑀁 𑀉𑀧𑀮𑀸𑀴𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑁂 𑀏𑀓𑀤𑀺𑀯𑀲𑀁 ‘‘𑀢𑁆𑀯𑀁 𑀦 𑀲𑁄𑀪𑀲𑀺, 𑀅𑀳𑀁 𑀲𑁄𑀪𑀸𑀫𑀻’’𑀢𑀺 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑀸 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀏𑀓𑀁 𑀫𑀳𑀮𑁆𑀮𑀓𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀏𑀲𑁄 𑀅𑀫𑁆𑀳𑀸𑀓𑀁 𑀲𑁄𑀪𑀦𑀪𑀸𑀯𑀁 𑀯𑀸 𑀅𑀲𑁄𑀪𑀦𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑁄 𑀅𑀫𑁆𑀳𑁂𑀲𑀼 𑀲𑁄𑀪𑀦𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂𑀳𑀺 𑀅𑀳𑀫𑁂𑀯 𑀲𑁄𑀪𑀦𑀢𑀭𑁄’’𑀢𑀺 𑀆𑀳. 𑀤𑀳𑀭𑀸 ‘‘𑀅𑀬𑀁 𑀫𑀳𑀮𑁆𑀮𑀓𑁄 𑀅𑀫𑁆𑀳𑁂𑀳𑀺 𑀧𑀼𑀘𑁆𑀙𑀺𑀢𑀁 𑀅𑀓𑀣𑁂𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀻’’𑀢𑀺 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑀸 𑀢𑁂𑀲𑀁 𑀓𑀺𑀭𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀫𑀳𑀮𑁆𑀮𑀓𑁄 𑀣𑁂𑀭𑁄 𑀓𑀺𑀭 𑀢𑁂 𑀭𑀽𑀧𑀦𑀺𑀲𑁆𑀲𑀺𑀢𑀓𑁂 𑀤𑀳𑀭𑁂 𑀮𑀚𑁆𑀚𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑁂 𑀤𑁆𑀯𑁂 𑀤𑀳𑀭𑀸 𑀇𑀤𑀸𑀦𑁂𑀯 𑀭𑀽𑀧𑀧𑀲𑀁𑀲𑀓𑀸, 𑀧𑀼𑀩𑁆𑀩𑁂𑀧𑁂𑀢𑁂 𑀭𑀽𑀧𑀫𑁂𑀯 𑀉𑀧𑀮𑀸𑀴𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀗𑁆𑀕𑀸𑀢𑀻𑀭𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀢𑀤𑀸 𑀕𑀗𑁆𑀕𑀸𑀬𑀫𑀼𑀦𑀸𑀦𑀁 𑀲𑀫𑀸𑀕𑀫𑀝𑁆𑀞𑀸𑀦𑁂 𑀕𑀗𑁆𑀕𑁂𑀬𑁆𑀬𑁄 𑀘 𑀬𑀸𑀫𑀼𑀦𑁂𑀬𑁆𑀬𑁄 𑀘 𑀤𑁆𑀯𑁂 𑀫𑀘𑁆𑀙𑀸 ‘‘𑀅𑀳𑀁 𑀲𑁄𑀪𑀸𑀫𑀺, 𑀢𑁆𑀯𑀁 𑀦 𑀲𑁄𑀪𑀲𑀻’’𑀢𑀺 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀯𑀺𑀯𑀤𑀫𑀸𑀦𑀸 𑀅𑀯𑀺𑀤𑀽𑀭𑁂 𑀕𑀗𑁆𑀕𑀸𑀢𑀻𑀭𑁂 𑀓𑀘𑁆𑀙𑀧𑀁 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀏𑀲𑁄 𑀅𑀫𑁆𑀳𑀸𑀓𑀁 𑀲𑁄𑀪𑀦𑀪𑀸𑀯𑀁 𑀯𑀸 𑀅𑀲𑁄𑀪𑀦𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀲𑀫𑁆𑀫 𑀓𑀘𑁆𑀙𑀧, 𑀕𑀗𑁆𑀕𑁂𑀬𑁆𑀬𑁄 𑀲𑁄𑀪𑀢𑀺, 𑀉𑀤𑀸𑀳𑀼 𑀬𑀸𑀫𑀼𑀦𑁂𑀬𑁆𑀬𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀓𑀘𑁆𑀙𑀧𑁄 ‘‘𑀕𑀗𑁆𑀕𑁂𑀬𑁆𑀬𑁄𑀧𑀺 𑀲𑁄𑀪𑀢𑀺 ¶ , 𑀬𑀸𑀫𑀼𑀦𑁂𑀬𑁆𑀬𑁄𑀧𑀺 𑀲𑁄𑀪𑀢𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀅𑀳𑀫𑁂𑀯 𑀅𑀢𑀺𑀭𑁂𑀓𑀢𑀭𑀁 𑀲𑁄𑀪𑀸𑀫𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁯.

‘‘𑀲𑁄𑀪𑀢𑀺 ¶ 𑀫𑀘𑁆𑀙𑁄 𑀕𑀗𑁆𑀕𑁂𑀬𑁆𑀬𑁄, 𑀅𑀣𑁄 𑀲𑁄𑀪𑀢𑀺 𑀬𑀸𑀫𑀼𑀦𑁄;

𑀘𑀢𑀼𑀧𑁆𑀧𑀤𑁄𑀬𑀁 𑀧𑀼𑀭𑀺𑀲𑁄, 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄;

𑀈𑀲𑀓𑀸𑀬𑀢𑀕𑀻𑀯𑁄 𑀘, 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀻’’𑀢𑀺.

𑀢𑀢𑁆𑀣 𑀘𑀢𑀼𑀧𑁆𑀧𑀤𑁄𑀬𑀦𑁆𑀢𑀺 𑀘𑀢𑀼𑀧𑁆𑀧𑀤𑁄 𑀅𑀬𑀁. 𑀧𑀼𑀭𑀺𑀲𑁄𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄𑀢𑀺 𑀲𑀼𑀚𑀸𑀢𑁄 𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄. 𑀈𑀲𑀓𑀸𑀬𑀢𑀕𑀻𑀯𑁄𑀢𑀺 𑀭𑀣𑀻𑀲𑀸 𑀯𑀺𑀬 𑀆𑀬𑀢𑀕𑀻𑀯𑁄 ¶ . 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀻𑀢𑀺 𑀏𑀯𑀁 𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀓𑀘𑁆𑀙𑀧𑁄 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀺, 𑀅𑀳𑀫𑁂𑀯 𑀲𑀩𑁆𑀩𑁂 𑀢𑀼𑀫𑁆𑀳𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑁄𑀪𑀸𑀫𑀻𑀢𑀺 𑀯𑀤𑀢𑀺.

𑀫𑀘𑁆𑀙𑀸 𑀢𑀲𑁆𑀲 𑀓𑀣𑀁 𑀳𑀼𑀢𑁆𑀯𑀸 ‘‘𑀅𑀫𑁆𑀪𑁄! 𑀧𑀸𑀧𑀓𑀘𑁆𑀙𑀧 𑀅𑀫𑁆𑀳𑁂𑀳𑀺 𑀧𑀼𑀘𑁆𑀙𑀺𑀢𑀁 𑀅𑀓𑀣𑁂𑀢𑁆𑀯𑀸 𑀅𑀜𑁆𑀜𑀫𑁂𑀯 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁦.

‘‘𑀬𑀁 𑀧𑀼𑀘𑁆𑀙𑀺𑀢𑁄 𑀦 𑀢𑀁 𑀅𑀓𑁆𑀔𑀸𑀲𑀺, 𑀅𑀜𑁆𑀜𑀁 𑀅𑀓𑁆𑀔𑀸𑀲𑀺 𑀧𑀼𑀘𑁆𑀙𑀺𑀢𑁄;

𑀅𑀢𑁆𑀣𑀧𑁆𑀧𑀲𑀁𑀲𑀓𑁄 𑀧𑁄𑀲𑁄, 𑀦𑀸𑀬𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀅𑀢𑁆𑀢𑀧𑁆𑀧𑀲𑀁𑀲𑀓𑁄𑀢𑀺 𑀅𑀢𑁆𑀢𑀸𑀦𑀁 𑀧𑀲𑀁𑀲𑀦𑀲𑀻𑀮𑁄 𑀅𑀢𑁆𑀢𑀼𑀓𑁆𑀓𑀁𑀲𑀓𑁄 𑀧𑁄𑀲𑁄. 𑀦𑀸𑀬𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀸𑀧𑀓𑀘𑁆𑀙𑀧𑁄 𑀅𑀫𑁆𑀳𑀸𑀓𑀁 𑀦 𑀭𑀼𑀘𑁆𑀘𑀢𑀺 𑀦 𑀔𑀫𑀢𑀻𑀢𑀺 𑀓𑀘𑁆𑀙𑀧𑀲𑁆𑀲 𑀉𑀧𑀭𑀺 𑀉𑀤𑀓𑀁 𑀔𑀺𑀧𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀫𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁆𑀯𑁂 𑀫𑀘𑁆𑀙𑀸 𑀤𑁆𑀯𑁂 𑀤𑀳𑀭𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀓𑀘𑁆𑀙𑀧𑁄 𑀫𑀳𑀮𑁆𑀮𑀓𑁄, 𑀇𑀫𑀲𑁆𑀲 𑀓𑀸𑀭𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀓𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀗𑁆𑀕𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁦𑁬] 𑁬. 𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀇𑀗𑁆𑀖 𑀯𑀝𑁆𑀝𑀫𑀬𑀁 𑀧𑀸𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀭𑀼𑀗𑁆𑀕𑀫𑀺𑀕𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀏𑀓𑀲𑁆𑀲 𑀲𑀭𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲𑁂𑀯 𑀲𑀭𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀕𑁆𑀕𑁂 𑀲𑀢𑀧𑀢𑁆𑀢𑁄, 𑀲𑀭𑀲𑁆𑀫𑀺𑀁 𑀧𑀦 𑀓𑀘𑁆𑀙𑀧𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀏𑀯𑀁 𑀢𑁂 𑀢𑀬𑁄𑀧𑀺 𑀲𑀳𑀸𑀬𑀓𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀁𑀯𑀸𑀲𑀁 𑀯𑀲𑀺𑀁𑀲𑀼. 𑀅𑀣𑁂𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 𑀅𑀭𑀜𑁆𑀜𑁂 𑀘𑀭𑀦𑁆𑀢𑁄 𑀧𑀸𑀦𑀻𑀬𑀢𑀺𑀢𑁆𑀣𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 𑀮𑁄𑀳𑀦𑀺𑀕𑀴𑀲𑀤𑀺𑀲𑀁 𑀯𑀝𑁆𑀝𑀫𑀬𑀁 𑀧𑀸𑀲𑀁 𑀑𑀟𑁆𑀟𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀸𑀦𑀻𑀬𑀁 𑀧𑀸𑀢𑀼𑀁 ¶ 𑀆𑀕𑀢𑁄 𑀧𑀞𑀫𑀬𑀸𑀫𑁂𑀬𑁂𑀯 𑀧𑀸𑀲𑁂 𑀩𑀚𑁆𑀛𑀺𑀢𑁆𑀯𑀸 𑀩𑀤𑁆𑀥𑀭𑀯𑀁 𑀭𑀯𑀺. 𑀢𑀲𑁆𑀲 𑀢𑁂𑀦 𑀲𑀤𑁆𑀤𑁂𑀦 𑀭𑀼𑀓𑁆𑀔𑀕𑁆𑀕𑀢𑁄 𑀲𑀢𑀧𑀢𑁆𑀢𑁄 𑀉𑀤𑀓𑀢𑁄 𑀘 𑀓𑀘𑁆𑀙𑀧𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀅𑀣 𑀲𑀢𑀧𑀢𑁆𑀢𑁄 𑀓𑀘𑁆𑀙𑀧𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑀯 𑀤𑀦𑁆𑀢𑀸 𑀅𑀢𑁆𑀣𑀺, 𑀢𑁆𑀯𑀁 𑀇𑀫𑀁 𑀧𑀸𑀲𑀁 𑀙𑀺𑀦𑁆𑀤, 𑀅𑀳𑀁 𑀕𑀦𑁆𑀢𑁆𑀯𑀸 𑀬𑀣𑀸 𑀲𑁄 𑀦𑀸𑀕𑀘𑁆𑀙𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀅𑀫𑁆𑀳𑁂𑀳𑀺 𑀤𑁆𑀯𑀻𑀳𑀺𑀧𑀺 𑀓𑀢𑀧𑀭𑀓𑁆𑀓𑀫𑁂𑀦 𑀲𑀳𑀸𑀬𑁄 𑀦𑁄 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁧.

‘‘𑀇𑀗𑁆𑀖 𑀯𑀝𑁆𑀝𑀫𑀬𑀁 𑀧𑀸𑀲𑀁, 𑀙𑀺𑀦𑁆𑀤 𑀤𑀦𑁆𑀢𑁂𑀳𑀺 𑀓𑀘𑁆𑀙𑀧;

𑀅𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀦𑁂𑀳𑀺𑀢𑀺 𑀮𑀼𑀤𑁆𑀤𑀓𑁄’’𑀢𑀺.

𑀅𑀣 𑀓𑀘𑁆𑀙𑀧𑁄 𑀘𑀫𑁆𑀫𑀯𑀭𑀢𑁆𑀢𑀁 𑀔𑀸𑀤𑀺𑀢𑀼𑀁 𑀆𑀭𑀪𑀺, 𑀲𑀢𑀧𑀢𑁆𑀢𑁄 𑀮𑀼𑀤𑁆𑀤𑀓𑀲𑁆𑀲 𑀯𑀲𑀦𑀕𑀸𑀫𑀁 𑀕𑀢𑁄 𑀅𑀯𑀺𑀤𑀽𑀭𑁂 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺. 𑀮𑀼𑀤𑁆𑀤𑀓𑁄 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀲𑀓𑀼𑀡𑁄 𑀢𑀲𑁆𑀲 𑀦𑀺𑀓𑁆𑀔𑀫𑀦𑀪𑀸𑀯𑀁 𑀜𑀢𑁆𑀯𑀸 𑀯𑀲𑁆𑀲𑀺𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀢𑀁 𑀧𑀼𑀭𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑀁 𑀫𑀼𑀔𑁂 𑀧𑀳𑀭𑀺. 𑀮𑀼𑀤𑁆𑀤𑁄 ‘‘𑀓𑀸𑀴𑀓𑀡𑁆𑀡𑀺𑀦𑀸 𑀲𑀓𑀼𑀡𑁂𑀦𑀫𑁆𑀳𑀺 𑀧𑀳𑀝𑁄’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀣𑁄𑀓𑀁 𑀲𑀬𑀺𑀢𑁆𑀯𑀸 𑀧𑀼𑀦 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀲𑀺. 𑀲𑀓𑀼𑀡𑁄 ‘‘𑀅𑀬𑀁 𑀧𑀞𑀫𑀁 𑀧𑀼𑀭𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄 𑀇𑀤𑀸𑀦𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀕𑁂𑀳𑁂 𑀦𑀺𑀲𑀻𑀤𑀺. 𑀮𑀼𑀤𑁆𑀤𑁄𑀧𑀺 ¶ ‘‘𑀧𑀼𑀭𑀺𑀫𑀤𑁆𑀯𑀸𑀭𑁂𑀦 𑀫𑁂 𑀦𑀺𑀓𑁆𑀔𑀦𑁆𑀢𑁂𑀦 𑀓𑀸𑀴𑀓𑀡𑁆𑀡𑀻 𑀲𑀓𑀼𑀡𑁄 𑀤𑀺𑀝𑁆𑀞𑁄, 𑀇𑀤𑀸𑀦𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺, 𑀲𑀓𑀼𑀡𑁄 𑀧𑀼𑀦 𑀯𑀲𑁆𑀲𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀫𑀼𑀔𑁂 𑀧𑀳𑀭𑀺. 𑀮𑀼𑀤𑁆𑀤𑁄 ‘‘𑀧𑀼𑀦𑀧𑀺 𑀓𑀸𑀴𑀓𑀡𑁆𑀡𑀻𑀲𑀓𑀼𑀡𑁂𑀦 𑀧𑀳𑀝𑁄, 𑀦 𑀤𑀸𑀦𑀺 𑀫𑁂 𑀏𑀲 𑀦𑀺𑀓𑁆𑀔𑀫𑀺𑀢𑀼𑀁 𑀤𑁂𑀢𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀲𑀓𑀼𑀡𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 ‘‘𑀮𑀼𑀤𑁆𑀤𑁄 𑀆𑀕𑀘𑁆𑀙𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑁂𑀲𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀓𑀘𑁆𑀙𑀧𑁂𑀦 𑀏𑀓𑀫𑁂𑀯 𑀘𑀫𑁆𑀫𑀯𑀤𑁆𑀥𑀁 𑀞𑀧𑁂𑀢𑁆𑀯𑀸 𑀲𑁂𑀲𑀯𑀭𑀢𑁆𑀢𑀸 𑀔𑀸𑀤𑀺𑀢𑀸 𑀳𑁄𑀦𑁆𑀢𑀺. 𑀤𑀦𑁆𑀢𑀸 𑀧𑀦𑀲𑁆𑀲 𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑀸 𑀚𑀸𑀢𑀸, 𑀫𑀼𑀔𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀮𑀼𑀤𑁆𑀤𑀧𑀼𑀢𑁆𑀢𑀁 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀅𑀲𑀦𑀺𑀯𑁂𑀕𑁂𑀦 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀯𑀤𑁆𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀦𑀁 𑀧𑀸𑀯𑀺𑀲𑀺, 𑀲𑀓𑀼𑀡𑁄 𑀭𑀼𑀓𑁆𑀔𑀕𑁆𑀕𑁂 𑀦𑀺𑀲𑀻𑀤𑀺, 𑀓𑀘𑁆𑀙𑀧𑁄 𑀧𑀦 𑀤𑀼𑀩𑁆𑀩𑀮𑀢𑁆𑀢𑀸 𑀢𑀢𑁆𑀣𑁂𑀯 𑀦𑀺𑀧𑀚𑁆𑀚𑀺. 𑀮𑀼𑀤𑁆𑀤𑁄 𑀓𑀘𑁆𑀙𑀧𑀁 𑀕𑀳𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑀸𑀡𑀼𑀓𑁂 𑀮𑀕𑁆𑀕𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀘𑁆𑀙𑀧𑀲𑁆𑀲 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀳𑀸𑀬𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀼𑀩𑁆𑀩𑀮𑁄 𑀯𑀺𑀬 𑀳𑀼𑀢𑁆𑀯𑀸 𑀮𑀼𑀤𑁆𑀤𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀤𑀼𑀩𑁆𑀩𑀮𑁄 𑀏𑀲 𑀪𑀯𑀺𑀲𑁆𑀲𑀢𑀺, 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀢𑁆𑀢𑀺𑀁 𑀆𑀤𑀸𑀬 𑀅𑀦𑀼𑀩𑀦𑁆𑀥𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀘𑁆𑀙𑀦𑁆𑀢𑁄 𑀢𑀁 𑀆𑀤𑀸𑀬 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺, 𑀤𑀽𑀭𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀧𑀤𑀁 𑀯𑀜𑁆𑀘𑁂𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀯𑀸𑀢𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀺𑀗𑁆𑀕𑁂𑀦 𑀧𑀲𑀺𑀩𑁆𑀩𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 ¶ 𑀨𑀸𑀮𑁂𑀢𑁆𑀯𑀸 𑀓𑀘𑁆𑀙𑀧𑀁 𑀦𑀻𑀳𑀭𑀺. 𑀲𑀢𑀧𑀢𑁆𑀢𑁄𑀧𑀺 𑀭𑀼𑀓𑁆𑀔𑀸 𑀑𑀢𑀭𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀑𑀯𑀸𑀤𑀁 𑀤𑀤𑀫𑀸𑀦𑁄 ‘‘𑀅𑀳𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀁, 𑀢𑀼𑀫𑁆𑀳𑁂𑀳𑀺 𑀲𑀳𑀸𑀬𑀓𑀲𑁆𑀲 𑀓𑀢𑁆𑀢𑀩𑁆𑀩𑀁 𑀫𑀬𑁆𑀳𑀁 𑀓𑀢𑀁, 𑀇𑀤𑀸𑀦𑀺 𑀮𑀼𑀤𑁆𑀤𑁄 𑀆𑀕𑀦𑁆𑀢𑁆𑀯𑀸 𑀢𑀼𑀫𑁆𑀳𑁂 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀫𑀸, 𑀲𑀫𑁆𑀫 𑀲𑀢𑀧𑀢𑁆𑀢, 𑀢𑁆𑀯𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀬𑀸𑀳𑀺, 𑀢𑁆𑀯𑀫𑁆𑀧𑀺, 𑀲𑀫𑁆𑀫 𑀓𑀘𑁆𑀙𑀧, 𑀉𑀤𑀓𑀁 𑀧𑀯𑀺𑀲𑀸𑀳𑀻’’𑀢𑀺 𑀆𑀳. 𑀢𑁂 𑀢𑀣𑀸 𑀅𑀓𑀁𑀲𑀼.

𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁨.

‘‘𑀓𑀘𑁆𑀙𑀧𑁄 ¶ 𑀧𑀸𑀯𑀺𑀲𑀻 𑀯𑀸𑀭𑀺𑀁, 𑀓𑀼𑀭𑀼𑀗𑁆𑀕𑁄 𑀧𑀸𑀯𑀺𑀲𑀻 𑀯𑀦𑀁;

𑀲𑀢𑀧𑀢𑁆𑀢𑁄 𑀤𑀼𑀫𑀕𑁆𑀕𑀫𑁆𑀳𑀸, 𑀤𑀽𑀭𑁂 𑀧𑀼𑀢𑁆𑀢𑁂 𑀅𑀧𑀸𑀦𑀬𑀻’’𑀢𑀺.

𑀢𑀢𑁆𑀣 𑀅𑀧𑀸𑀦𑀬𑀻𑀢𑀺 𑀆𑀦𑀬𑀺, 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄;

𑀮𑀼𑀤𑁆𑀤𑁄𑀧𑀺 𑀢𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀓𑀜𑁆𑀘𑀺 𑀅𑀧𑀲𑁆𑀲𑀺𑀢𑁆𑀯𑀸 𑀙𑀺𑀦𑁆𑀦𑀧𑀲𑀺𑀩𑁆𑀩𑀓𑀁 𑀕𑀳𑁂𑀢𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑁂 𑀢𑀬𑁄𑀧𑀺 𑀲𑀳𑀸𑀬𑀸 𑀬𑀸𑀯𑀚𑀻𑀯𑀁 𑀯𑀺𑀲𑁆𑀲𑀸𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀢𑀧𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀓𑀘𑁆𑀙𑀧𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀓𑀼𑀭𑀼𑀗𑁆𑀕𑀫𑀺𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁦𑁭] 𑁭. 𑀅𑀲𑁆𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀬𑀫𑀲𑁆𑀲𑀓𑀭𑀸𑀚𑁂𑀦𑀸𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀇𑀤𑀸𑀦𑁂𑀯 𑀢𑀲𑁆𑀲𑀸 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑀸 𑀢𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀤𑀼𑀓𑁆𑀔𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀧𑀸𑀝𑀮𑀺𑀦𑀕𑀭𑁂 𑀅𑀲𑁆𑀲𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀉𑀧𑀭𑀻 𑀦𑀸𑀫 ¶ 𑀅𑀕𑁆𑀕𑀫𑀳𑁂𑀲𑀻 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁, 𑀅𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁. 𑀲𑀸 𑀓𑀸𑀮𑀫𑀓𑀸𑀲𑀺, 𑀢𑀲𑁆𑀲𑀸 𑀓𑀸𑀮𑀓𑀺𑀭𑀺𑀬𑀸𑀬 𑀭𑀸𑀚𑀸 𑀲𑁄𑀓𑀸𑀪𑀺𑀪𑀽𑀢𑁄 𑀅𑀳𑁄𑀲𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄. 𑀲𑁄 𑀢𑀲𑁆𑀲𑀸 𑀲𑀭𑀻𑀭𑀁 𑀤𑁄𑀡𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑁂𑀮𑀓𑀮𑀮𑀁 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀫𑀜𑁆𑀘𑁂 𑀞𑀧𑀸𑀧𑁂𑀢𑁆𑀯𑀸 𑀦𑀺𑀭𑀸𑀳𑀸𑀭𑁄 𑀭𑁄𑀤𑀫𑀸𑀦𑁄 𑀧𑀭𑀺𑀤𑁂𑀯𑀫𑀸𑀦𑁄 𑀦𑀺𑀧𑀚𑁆𑀚𑀺. 𑀫𑀸𑀢𑀸𑀧𑀺𑀢𑀭𑁄 ¶ 𑀅𑀯𑀲𑁂𑀲𑀜𑀸𑀢𑀓𑀸 𑀫𑀺𑀢𑁆𑀢𑀸𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄𑀧𑀺 ‘‘𑀫𑀸 𑀲𑁄𑀘𑀺, 𑀫𑀳𑀸𑀭𑀸𑀚, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀲𑀜𑁆𑀜𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀲𑁆𑀲 𑀯𑀺𑀮𑀧𑀦𑁆𑀢𑀲𑁆𑀲𑁂𑀯 𑀲𑀢𑁆𑀢 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀸𑀪𑀺𑀜𑁆𑀜𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀚𑀫𑁆𑀩𑀼𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀭𑀸𑀚𑀸𑀦𑀁 𑀢𑀣𑀸 𑀧𑀭𑀺𑀤𑁂𑀯𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀲 𑀫𑀬𑀸 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀦𑀺𑀲𑀻𑀤𑀺.

𑀅𑀣𑁂𑀓𑁄 𑀧𑀸𑀝𑀮𑀺𑀦𑀕𑀭𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀉𑀬𑁆𑀬𑀸𑀦𑀁 𑀕𑀢𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁, 𑀫𑀸𑀡𑀯, 𑀭𑀸𑀚𑀸 𑀥𑀫𑁆𑀫𑀺𑀓𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂, 𑀥𑀫𑁆𑀫𑀺𑀓𑁄 𑀭𑀸𑀚𑀸, 𑀪𑀭𑀺𑀬𑀸 𑀧𑀦𑀲𑁆𑀲 𑀓𑀸𑀮𑀓𑀢𑀸, 𑀲𑁄 𑀢𑀲𑁆𑀲𑀸 𑀲𑀭𑀻𑀭𑀁 𑀤𑁄𑀡𑀺𑀬𑀁 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀯𑀺𑀮𑀧𑀫𑀸𑀦𑁄 𑀦𑀺𑀧𑀦𑁆𑀦𑁄, 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀭𑀸𑀚𑀸𑀦𑀁 𑀏𑀯𑀭𑀽𑀧𑀸 𑀤𑀼𑀓𑁆𑀔𑀸 𑀦 𑀫𑁄𑀘𑁂𑀣, 𑀬𑀼𑀢𑁆𑀢𑀁 𑀦𑀼 𑀔𑁄 𑀢𑀼𑀫𑁆𑀳𑀸𑀤𑀺𑀲𑁂𑀲𑀼 𑀲𑀻𑀮𑀯𑀦𑁆𑀢𑁂𑀲𑀼 𑀲𑀁𑀯𑀺𑀚𑁆𑀚𑀫𑀸𑀦𑁂𑀲𑀼 𑀭𑀜𑁆𑀜𑁄 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼’’𑀦𑁆𑀢𑀺. ‘‘𑀦 𑀔𑁄 𑀅𑀳𑀁 ¶ , 𑀫𑀸𑀡𑀯, 𑀭𑀸𑀚𑀸𑀦𑀁 𑀚𑀸𑀦𑀸𑀫𑀺, 𑀲𑀘𑁂 𑀧𑀦 𑀲𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀧𑀼𑀘𑁆𑀙𑁂𑀬𑁆𑀬, 𑀅𑀳𑀫𑁂𑀯𑀲𑁆𑀲 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂𑀬𑁂𑀯 𑀢𑀁 𑀓𑀣𑀸𑀧𑁂𑀬𑁆𑀬’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀬𑀸𑀯 𑀭𑀸𑀚𑀸𑀦𑀁 𑀆𑀦𑁂𑀫𑀺, 𑀢𑀸𑀯 𑀇𑀫𑁂𑀯 𑀦𑀺𑀲𑀻𑀤𑀣𑀸’’𑀢𑀺 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳.

𑀭𑀸𑀚𑀸 ‘‘𑀉𑀧𑀭𑀺𑀁 𑀓𑀺𑀭 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀤𑁂𑀯𑀺𑀬𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑁆𑀣 𑀦𑀺𑀩𑁆𑀩𑀢𑁆𑀢𑀸’’𑀢𑀺? ‘‘𑀲𑀸 𑀔𑁄, 𑀫𑀳𑀸𑀭𑀸𑀚, 𑀭𑀽𑀧𑀲𑁆𑀫𑀺𑀁𑀬𑁂𑀯 𑀫𑀢𑁆𑀢𑀸 𑀧𑀫𑀸𑀤𑀫𑀸𑀕𑀫𑁆𑀫 𑀓𑀮𑁆𑀬𑀸𑀡𑀓𑀫𑁆𑀫𑀁 𑀅𑀓𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀉𑀬𑁆𑀬𑀸𑀦𑁂 𑀕𑁄𑀫𑀬𑀧𑀸𑀡𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 ¶ . ‘‘𑀦𑀸𑀳𑀁 𑀲𑀤𑁆𑀤𑀳𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀢𑁂 𑀤𑀲𑁆𑀲𑁂𑀢𑁆𑀯𑀸 𑀓𑀣𑀸𑀧𑁂𑀫𑀻’’𑀢𑀺. ‘‘𑀲𑀸𑀥𑀼 𑀓𑀣𑀸𑀧𑁂𑀣𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 ‘‘𑀉𑀪𑁄𑀧𑀺 𑀕𑁄𑀫𑀬𑀧𑀺𑀡𑁆𑀟𑀁 𑀯𑀝𑁆𑀝𑀬𑀫𑀸𑀦𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀢𑁂𑀲𑀁 𑀆𑀕𑀫𑀦𑀁 𑀅𑀓𑀸𑀲𑀺. 𑀢𑁂 𑀢𑀣𑁂𑀯 𑀆𑀕𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀢𑁂 ¶ , 𑀫𑀳𑀸𑀭𑀸𑀚, 𑀉𑀧𑀭𑀺𑀤𑁂𑀯𑀻, 𑀢𑀁 𑀚𑀳𑀺𑀢𑁆𑀯𑀸 𑀕𑁄𑀫𑀬𑀧𑀸𑀡𑀓𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀢𑀺, 𑀧𑀲𑁆𑀲𑀣 𑀦’’𑀦𑁆𑀢𑀺 𑀆𑀳. 𑀪𑀦𑁆𑀢𑁂 ‘‘‘𑀉𑀧𑀭𑀻 𑀦𑀸𑀫 𑀕𑁄𑀫𑀬𑀧𑀸𑀡𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀦 𑀲𑀤𑁆𑀤𑀳𑀸𑀫𑀳’’𑀦𑁆𑀢𑀺. ‘‘𑀓𑀣𑀸𑀧𑁂𑀫𑀺 𑀦𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀣𑀸𑀧𑁂𑀣, 𑀪𑀦𑁆𑀢𑁂’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀓𑀣𑀸𑀧𑁂𑀦𑁆𑀢𑁄 ‘‘𑀉𑀧𑀭𑀻’’𑀢𑀺 𑀆𑀳. 𑀲𑀸 𑀫𑀦𑀼𑀲𑁆𑀲𑀪𑀸𑀲𑀸𑀬 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀢𑁆𑀯𑀁 𑀅𑀢𑀻𑀢𑀪𑀯𑁂 𑀓𑀸 𑀦𑀸𑀫 𑀅𑀳𑁄𑀲𑀻’’𑀢𑀺? ‘‘𑀪𑀦𑁆𑀢𑁂, 𑀅𑀲𑁆𑀲𑀓𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀉𑀧𑀭𑀻 𑀦𑀸𑀫 𑀅𑀳𑁄𑀲𑀺’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁂 𑀇𑀤𑀸𑀦𑀺 𑀅𑀲𑁆𑀲𑀓𑀭𑀸𑀚𑀸 𑀧𑀺𑀬𑁄, 𑀉𑀤𑀸𑀳𑀼 𑀕𑁄𑀫𑀬𑀧𑀸𑀡𑀓𑁄’’𑀢𑀺? ‘‘𑀪𑀦𑁆𑀢𑁂, 𑀲𑁄 𑀫𑀬𑁆𑀳𑀁 𑀧𑀼𑀭𑀺𑀫𑀚𑀸𑀢𑀺𑀬𑀸 𑀲𑀸𑀫𑀺𑀓𑁄, 𑀢𑀤𑀸 𑀅𑀳𑀁 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀢𑁂𑀦 𑀲𑀤𑁆𑀥𑀺𑀁 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂 𑀅𑀦𑀼𑀪𑀯𑀫𑀸𑀦𑀸 𑀯𑀺𑀘𑀭𑀺𑀁. 𑀇𑀤𑀸𑀦𑀺 𑀧𑀦 𑀫𑁂 𑀪𑀯𑀲𑀗𑁆𑀔𑁂𑀧𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄 𑀓𑀺𑀁 𑀳𑁄𑀢𑀺, 𑀅𑀳𑀜𑁆𑀳𑀺 𑀇𑀤𑀸𑀦𑀺 𑀅𑀲𑁆𑀲𑀓𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀕𑀮𑀮𑁄𑀳𑀺𑀢𑁂𑀦 𑀫𑀬𑁆𑀳𑀁 𑀲𑀸𑀫𑀺𑀓𑀲𑁆𑀲 𑀕𑁄𑀫𑀬𑀧𑀸𑀡𑀓𑀲𑁆𑀲 𑀧𑀸𑀤𑁂 𑀫𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀫𑀦𑀼𑀲𑁆𑀲𑀪𑀸𑀲𑀸𑀬 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁧𑁩.

‘‘𑀅𑀬𑀫𑀲𑁆𑀲𑀓𑀭𑀸𑀚𑁂𑀦 ¶ , 𑀤𑁂𑀲𑁄 𑀯𑀺𑀘𑀭𑀺𑀢𑁄 𑀫𑀬𑀸;

𑀅𑀦𑀼𑀓𑀸𑀫𑀬 𑀓𑀸𑀫𑁂𑀦, 𑀧𑀺𑀬𑁂𑀦 𑀧𑀢𑀺𑀦𑀸 𑀲𑀳.

𑁧𑁧𑁪.

‘‘𑀦𑀯𑁂𑀦 𑀲𑀼𑀔𑀤𑀼𑀓𑁆𑀔𑁂𑀦, 𑀧𑁄𑀭𑀸𑀡𑀁 𑀅𑀧𑀺𑀥𑀻𑀬𑀢𑀺;

𑀢𑀲𑁆𑀫𑀸 𑀅𑀲𑁆𑀲𑀓𑀭𑀜𑁆𑀜𑀸𑀯, 𑀓𑀻𑀝𑁄 𑀧𑀺𑀬𑀢𑀭𑁄 𑀫𑀫𑀸’’𑀢𑀺.

𑀢𑀢𑁆𑀣 𑀅𑀬𑀫𑀲𑁆𑀲𑀓𑀭𑀸𑀚𑁂𑀦, 𑀤𑁂𑀲𑁄 𑀯𑀺𑀘𑀭𑀺𑀢𑁄 𑀫𑀬𑀸𑀢𑀺 𑀅𑀬𑀁 𑀭𑀫𑀡𑀻𑀬𑁄 𑀉𑀬𑁆𑀬𑀸𑀦𑀧𑀤𑁂𑀲𑁄 𑀧𑀼𑀩𑁆𑀩𑁂 𑀫𑀬𑀸 𑀅𑀲𑁆𑀲𑀓𑀭𑀸𑀚𑁂𑀦 𑀲𑀤𑁆𑀥𑀺𑀁 𑀯𑀺𑀘𑀭𑀺𑀢𑁄. 𑀅𑀦𑀼𑀓𑀸𑀫𑀬 𑀓𑀸𑀫𑁂𑀦𑀸𑀢𑀺 𑀅𑀦𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀬𑀸 𑀢𑀁 𑀓𑀸𑀫𑀬𑀫𑀸𑀦𑀸𑀬 𑀢𑁂𑀦 𑀫𑀁 𑀓𑀸𑀫𑀬𑀫𑀸𑀦𑁂𑀦 ¶ 𑀲𑀳𑀸𑀢𑀺 𑀅𑀢𑁆𑀣𑁄. 𑀧𑀺𑀬𑁂𑀦𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀺𑀬𑁂𑀦. 𑀦𑀯𑁂𑀦 𑀲𑀼𑀔𑀤𑀼𑀓𑁆𑀔𑁂𑀦, 𑀧𑁄𑀭𑀸𑀡𑀁 𑀅𑀧𑀺𑀥𑀻𑀬𑀢𑀻𑀢𑀺, 𑀪𑀦𑁆𑀢𑁂, 𑀦𑀯𑁂𑀦 𑀳𑀺 𑀲𑀼𑀔𑁂𑀦 𑀧𑁄𑀭𑀸𑀡𑀁 𑀲𑀼𑀔𑀁, 𑀦𑀯𑁂𑀦 𑀘 𑀤𑀼𑀓𑁆𑀔𑁂𑀦 𑀧𑁄𑀭𑀸𑀡𑀁 𑀤𑀼𑀓𑁆𑀔𑀁 𑀧𑀺𑀥𑀻𑀬𑀢𑀺 𑀧𑀝𑀺𑀘𑁆𑀙𑀸𑀤𑀻𑀬𑀢𑀺, 𑀏𑀲𑀸 𑀮𑁄𑀓𑀲𑁆𑀲 𑀥𑀫𑁆𑀫𑀢𑀸𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀅𑀲𑁆𑀲𑀓𑀭𑀜𑁆𑀜𑀸𑀯, 𑀓𑀻𑀝𑁄 𑀧𑀺𑀬𑀢𑀭𑁄 𑀫𑀫𑀸𑀢𑀺 𑀬𑀲𑁆𑀫𑀸 𑀦𑀯𑁂𑀦 𑀧𑁄𑀭𑀸𑀡𑀁 𑀧𑀺𑀥𑀻𑀬𑀢𑀺, 𑀢𑀲𑁆𑀫𑀸 𑀫𑀫 𑀅𑀲𑁆𑀲𑀓𑀭𑀸𑀚𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀓𑀻𑀝𑁄𑀯 𑀧𑀺𑀬𑀢𑀭𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀲𑁆𑀲𑀓𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄𑀯 𑀓𑀼𑀡𑀧𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀉𑀧𑀭𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀅𑀲𑁆𑀲𑀓𑀭𑀸𑀚𑀸 𑀉𑀓𑁆𑀓𑀡𑁆𑀞𑀺𑀢𑁄 𑀪𑀺𑀓𑁆𑀔𑀼, 𑀫𑀸𑀡𑀯𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑁆𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁦𑁮] 𑁮. 𑀲𑀼𑀲𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀮𑀁 ¶ 𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀲𑀦𑁆𑀢𑀸𑀲𑀫𑀢𑁆𑀢𑀫𑁆𑀧𑀺 𑀧𑀦 𑀓𑀸𑀢𑀼𑀁 𑀦 𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀫𑀳𑀸𑀲𑀭𑀻𑀭𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀅𑀭𑀜𑁆𑀜𑀸𑀬𑀢𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀕𑀗𑁆𑀕𑀸𑀬 𑀏𑀓𑁄 𑀲𑀼𑀲𑀼𑀫𑀸𑀭𑁄 𑀯𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑀁 𑀤𑀺𑀲𑁆𑀯𑀸 ¶ 𑀢𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀲𑀼𑀫𑀸𑀭𑀁 𑀆𑀳 𑁋 ‘‘𑀅𑀳𑀁 𑀲𑀸𑀫𑀺, 𑀏𑀢𑀲𑁆𑀲 𑀓𑀧𑀺𑀭𑀸𑀚𑀲𑁆𑀲 𑀳𑀤𑀬𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑀸’’𑀢𑀺. ‘‘𑀪𑀤𑁆𑀤𑁂, 𑀫𑀬𑀁 𑀚𑀮𑀕𑁄𑀘𑀭𑀸, 𑀏𑀲𑁄 𑀣𑀮𑀕𑁄𑀘𑀭𑁄, 𑀓𑀺𑀦𑁆𑀢𑀺 𑀦𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀕𑀡𑁆𑀳, 𑀲𑀘𑁂 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀸 𑀲𑁄𑀘𑀺, 𑀅𑀢𑁆𑀣𑁂𑀓𑁄 𑀉𑀧𑀸𑀬𑁄, 𑀔𑀸𑀤𑀸𑀧𑁂𑀲𑁆𑀲𑀸𑀫𑀺 𑀢𑀁 𑀢𑀲𑁆𑀲 𑀳𑀤𑀬𑀫𑀁𑀲’’𑀦𑁆𑀢𑀺 𑀲𑀼𑀲𑀼𑀫𑀸𑀭𑀺𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀗𑁆𑀕𑀸𑀬 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀯𑀸𑀦𑀭𑀺𑀦𑁆𑀤, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀓𑀲𑀸𑀬𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 𑀓𑀺𑀁 𑀢𑁆𑀯𑀁 𑀦𑀺𑀯𑀺𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀘𑀭𑀲𑀺, 𑀧𑀸𑀭𑀕𑀗𑁆𑀕𑀸𑀬 𑀅𑀫𑁆𑀩𑀮𑀩𑀼𑀚𑀸𑀤𑀻𑀦𑀁 𑀫𑀥𑀼𑀭𑀨𑀮𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀓𑀺𑀁 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀨𑀮𑀸𑀨𑀮𑀁 𑀔𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀓𑀼𑀫𑁆𑀪𑀻𑀮𑀭𑀸𑀚, 𑀕𑀗𑁆𑀕𑀸 𑀫𑀳𑁄𑀤𑀓𑀸 𑀯𑀺𑀢𑁆𑀣𑀺𑀡𑁆𑀡𑀸, 𑀓𑀣𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺? ‘‘𑀲𑀘𑁂 𑀇𑀘𑁆𑀙𑀲𑀺, 𑀅𑀳𑀁 𑀢𑀁 𑀫𑀫 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. ‘‘𑀢𑁂𑀦 𑀳𑀺 𑀏𑀳𑀺 𑀧𑀺𑀝𑁆𑀞𑀺𑀁 𑀫𑁂 𑀅𑀪𑀺𑀭𑀽𑀳𑀸’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀅𑀪𑀺𑀭𑀼𑀳𑀺. 𑀲𑀼𑀲𑀼𑀫𑀸𑀭𑁄 𑀣𑁄𑀓𑀁 𑀦𑁂𑀢𑁆𑀯𑀸 𑀉𑀤𑀓𑁂 𑀑𑀲𑀻𑀤𑀸𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀲𑀫𑁆𑀫, 𑀉𑀤𑀓𑁂 𑀫𑀁 𑀑𑀲𑀻𑀤𑀸𑀧𑁂𑀲𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀳. ‘‘𑀦𑀸𑀳𑀁 𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫𑀺, 𑀪𑀭𑀺𑀬𑀸𑀬 𑀧𑀦 𑀫𑁂 𑀢𑀯 𑀳𑀤𑀬𑀫𑀁𑀲𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄, 𑀢𑀫𑀳𑀁 𑀢𑀯 ¶ 𑀳𑀤𑀬𑀁 𑀔𑀸𑀤𑀸𑀧𑁂𑀢𑀼𑀓𑀸𑀫𑁄’’𑀢𑀺. ‘‘𑀲𑀫𑁆𑀫, 𑀓𑀣𑁂𑀦𑁆𑀢𑁂𑀦 𑀢𑁂 𑀲𑀼𑀦𑁆𑀤𑀭𑀁 𑀓𑀢𑀁. 𑀲𑀘𑁂 𑀳𑀺 𑀅𑀫𑁆𑀳𑀸𑀓𑀁 𑀉𑀤𑀭𑁂 𑀳𑀤𑀬𑀁 𑀪𑀯𑁂𑀬𑁆𑀬, 𑀲𑀸𑀔𑀕𑁆𑀕𑁂𑀲𑀼 𑀘𑀭𑀦𑁆𑀢𑀸𑀦𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀪𑀯𑁂𑀬𑁆𑀬𑀸’’𑀢𑀺. ‘‘𑀓𑀳𑀁 𑀧𑀦 𑀢𑀼𑀫𑁆𑀳𑁂 𑀞𑀧𑁂𑀣𑀸’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ¶ 𑀅𑀯𑀺𑀤𑀽𑀭𑁂 𑀏𑀓𑀁 𑀉𑀤𑀼𑀫𑁆𑀩𑀭𑀁 𑀧𑀓𑁆𑀓𑀨𑀮𑀧𑀺𑀡𑁆𑀟𑀺𑀲𑀜𑁆𑀙𑀦𑁆𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀲𑁆𑀲𑁂𑀢𑀸𑀦𑀺 𑀅𑀫𑁆𑀳𑀸𑀓𑀁 𑀳𑀤𑀬𑀸𑀦𑀺 𑀏𑀢𑀲𑁆𑀫𑀺𑀁 𑀉𑀤𑀼𑀫𑁆𑀩𑀭𑁂 𑀑𑀮𑀫𑁆𑀩𑀦𑁆𑀢𑀻’’𑀢𑀺 𑀆𑀳. ‘‘𑀲𑀘𑁂 𑀫𑁂 𑀳𑀤𑀬𑀁 ¶ 𑀤𑀲𑁆𑀲𑀲𑀺, 𑀅𑀳𑀁 𑀢𑀁 𑀦 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀁 𑀏𑀢𑁆𑀣 𑀦𑁂𑀳𑀺, 𑀅𑀳𑀁 𑀢𑁂 𑀭𑀼𑀓𑁆𑀔𑁂 𑀑𑀮𑀫𑁆𑀩𑀦𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀆𑀤𑀸𑀬 𑀢𑀢𑁆𑀣 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑀫𑁆𑀫, 𑀩𑀸𑀮 𑀲𑀼𑀲𑀼𑀫𑀸𑀭, ‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀳𑀤𑀬𑀁 𑀦𑀸𑀫 𑀭𑀼𑀓𑁆𑀔𑀕𑁆𑀕𑁂 𑀳𑁄𑀢𑀻’𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺, 𑀩𑀸𑀮𑁄𑀲𑀺, 𑀅𑀳𑀁 𑀢𑀁 𑀯𑀜𑁆𑀘𑁂𑀲𑀺𑀁, 𑀢𑀯 𑀨𑀮𑀸𑀨𑀮𑀁 𑀢𑀯𑁂𑀯 𑀳𑁄𑀢𑀼, 𑀲𑀭𑀻𑀭𑀫𑁂𑀯 𑀧𑀦 𑀢𑁂 𑀫𑀳𑀦𑁆𑀢𑀁 𑀧𑀜𑁆𑀜𑀸 𑀧𑀦 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁧𑁫.

‘‘𑀅𑀮𑀁 𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘;

𑀬𑀸𑀦𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲, 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄.

𑁧𑁧𑁬.

‘‘𑀫𑀳𑀢𑀻 𑀯𑀢 𑀢𑁂 𑀩𑁄𑀦𑁆𑀤𑀺, 𑀦 𑀘 𑀧𑀜𑁆𑀜𑀸 𑀢𑀤𑀽𑀧𑀺𑀓𑀸;

𑀲𑀼𑀲𑀼𑀫𑀸𑀭 𑀯𑀜𑁆𑀘𑀺𑀢𑁄 𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀬𑀣𑀸𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀅𑀮𑀁 𑀫𑁂𑀢𑁂𑀳𑀻𑀢𑀺 𑀬𑀸𑀦𑀺 𑀢𑀬𑀸 𑀤𑀻𑀧𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀏𑀢𑁂𑀳𑀺 𑀫𑀬𑁆𑀳𑀁 𑀅𑀮𑀁. 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄𑀢𑀺 𑀫𑀬𑁆𑀳𑀁 𑀅𑀬𑀫𑁂𑀯 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁄 𑀯𑀭𑀁. 𑀩𑁄𑀦𑁆𑀤𑀻𑀢𑀺 𑀲𑀭𑀻𑀭𑀁. 𑀢𑀤𑀽𑀧𑀺𑀓𑀸𑀢𑀺 𑀧𑀜𑁆𑀜𑀸 𑀧𑀦 𑀢𑁂 𑀢𑀤𑀽𑀧𑀺𑀓𑀸 𑀢𑀲𑁆𑀲 𑀲𑀭𑀻𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀦𑀢𑁆𑀣𑀺. 𑀕𑀘𑁆𑀙 𑀤𑀸𑀦𑀺 𑀬𑀣𑀸𑀲𑀼𑀔𑀦𑁆𑀢𑀺 𑀇𑀤𑀸𑀦𑀺 𑀬𑀣𑀸𑀲𑀼𑀔𑀁 𑀕𑀘𑁆𑀙, 𑀦𑀢𑁆𑀣𑀺 𑀢𑁂 𑀳𑀤𑀬𑀫𑀁𑀲𑀕𑀳𑀡𑀽𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀲𑀼𑀲𑀼𑀫𑀸𑀭𑁄 𑀲𑀳𑀲𑁆𑀲𑀁 𑀧𑀭𑀸𑀚𑀺𑀢𑁄 𑀯𑀺𑀬 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀦𑁆𑀢𑁄𑀯 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀼𑀲𑀼𑀫𑀸𑀭𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀼𑀲𑀼𑀫𑀸𑀭𑀻 𑀘𑀺𑀜𑁆𑀘𑀫𑀸𑀡𑀯𑀺𑀓𑀸, 𑀓𑀧𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀲𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁦𑁯] 𑁯. 𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸

𑀤𑀺𑀝𑁆𑀞𑀸 ¶ ¶ 𑀫𑀬𑀸 𑀯𑀦𑁂 𑀭𑀼𑀓𑁆𑀔𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀤𑀳𑀭𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀕𑀼𑀢𑁆𑀢𑀺𑀓𑀫𑁆𑀫𑁂 𑀙𑁂𑀓𑁄 ¶ 𑀅𑀳𑁄𑀲𑀺. ‘‘𑀲𑀭𑀻𑀭𑀲𑁆𑀲 𑀫𑁂 𑀦 𑀲𑀼𑀔𑀁 𑀪𑀯𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀅𑀢𑀺𑀲𑀻𑀢𑀁 𑀅𑀘𑁆𑀘𑀼𑀡𑁆𑀳𑀁 𑀧𑀭𑀺𑀪𑁄𑀕𑀁 𑀦 𑀓𑀭𑁄𑀢𑀺, ‘‘𑀲𑀻𑀢𑀼𑀡𑁆𑀳𑁂𑀳𑀺 𑀲𑀭𑀻𑀭𑀁 𑀓𑀺𑀮𑀫𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀩𑀳𑀺 𑀦 𑀦𑀺𑀓𑁆𑀔𑀫𑀢𑀺, 𑀅𑀢𑀺𑀓𑀺𑀮𑀺𑀦𑁆𑀦𑀉𑀢𑁆𑀢𑀡𑁆𑀟𑀼𑀮𑀸𑀤𑀻𑀦𑀺 𑀦 𑀪𑀼𑀜𑁆𑀚𑀢𑀺. 𑀢𑀲𑁆𑀲 𑀲𑀸 𑀲𑀭𑀻𑀭𑀕𑀼𑀢𑁆𑀢𑀺𑀓𑀼𑀲𑀮𑀢𑀸 𑀲𑀗𑁆𑀖𑀫𑀚𑁆𑀛𑁂 𑀧𑀸𑀓𑀝𑀸 𑀚𑀸𑀢𑀸. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀤𑀳𑀭𑁄 𑀓𑀺𑀭 𑀪𑀺𑀓𑁆𑀔𑀼 𑀲𑀭𑀻𑀭𑀕𑀼𑀢𑁆𑀢𑀺𑀓𑀫𑁆𑀫𑁂 𑀙𑁂𑀓𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀁 𑀤𑀳𑀭𑁄 𑀇𑀤𑀸𑀦𑁂𑀯 𑀲𑀭𑀻𑀭𑀕𑀼𑀢𑁆𑀢𑀺𑀓𑀫𑁆𑀫𑁂 𑀙𑁂𑀓𑁄, 𑀧𑀼𑀩𑁆𑀩𑁂𑀧𑀺 𑀙𑁂𑀓𑁄𑀯 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀅𑀣𑁂𑀓𑁄 𑀲𑀓𑀼𑀡𑀮𑀼𑀤𑁆𑀤𑀓𑁄 𑀏𑀓𑀁 𑀤𑀻𑀧𑀓𑀓𑀼𑀓𑁆𑀓𑀼𑀝𑀫𑀸𑀤𑀸𑀬 𑀯𑀸𑀮𑀭𑀚𑁆𑀚𑀼𑀜𑁆𑀘 𑀬𑀝𑁆𑀞𑀺𑀜𑁆𑀘 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀓𑀼𑀓𑁆𑀓𑀼𑀝𑁂 𑀩𑀦𑁆𑀥𑀦𑁆𑀢𑁄 𑀏𑀓𑀁 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀁 𑀧𑁄𑀭𑀸𑀡𑀓𑀼𑀓𑁆𑀓𑀼𑀝𑀁 𑀩𑀦𑁆𑀥𑀺𑀢𑀼𑀁 𑀆𑀭𑀪𑀺. 𑀲𑁄 𑀯𑀸𑀮𑀧𑀸𑀲𑁂 𑀓𑀼𑀲𑀮𑀢𑀸𑀬 𑀅𑀢𑁆𑀢𑀸𑀦𑀁 𑀩𑀦𑁆𑀥𑀺𑀢𑀼𑀁 𑀦 𑀤𑁂𑀢𑀺, 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀮𑀻𑀬𑀢𑀺. 𑀮𑀼𑀤𑁆𑀤𑀓𑁄 𑀅𑀢𑁆𑀢𑀸𑀦𑀁 𑀲𑀸𑀔𑀸𑀧𑀮𑁆𑀮𑀯𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀝𑁆𑀞𑀺𑀜𑁆𑀘 𑀧𑀸𑀲𑀜𑁆𑀘 𑀑𑀟𑁆𑀟𑁂𑀢𑀺. 𑀓𑀼𑀓𑁆𑀓𑀼𑀝𑁄 𑀢𑀁 𑀮𑀚𑁆𑀚𑀸𑀧𑁂𑀢𑀼𑀓𑀸𑀫𑁄 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁭.

‘‘𑀤𑀺𑀝𑁆𑀞𑀸 𑀫𑀬𑀸 𑀯𑀦𑁂 𑀭𑀼𑀓𑁆𑀔𑀸, 𑀅𑀲𑁆𑀲𑀓𑀡𑁆𑀡𑀸 𑀯𑀺𑀪𑀻𑀝𑀓𑀸;

𑀦 𑀢𑀸𑀦𑀺 𑀏𑀯𑀁 𑀲𑀓𑁆𑀓𑀦𑁆𑀢𑀺, 𑀬𑀣𑀸 𑀢𑁆𑀯𑀁 𑀭𑀼𑀓𑁆𑀔 𑀲𑀓𑁆𑀓𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀫𑁆𑀫 𑀮𑀼𑀤𑁆𑀤𑀓, 𑀫𑀬𑀸 𑀇𑀫𑀲𑁆𑀫𑀺𑀁 𑀯𑀦𑁂 𑀚𑀸𑀢𑀸 𑀩𑀳𑀽 𑀅𑀲𑁆𑀲𑀓𑀡𑁆𑀡𑀸 𑀘 𑀯𑀺𑀪𑀻𑀝𑀓𑀸 𑀘 𑀭𑀼𑀓𑁆𑀔𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀢𑀸𑀦𑀺 𑀧𑀦 𑀭𑀼𑀓𑁆𑀔𑀸𑀦𑀺 𑀬𑀣𑀸 𑀢𑁆𑀯𑀁 𑀲𑀓𑁆𑀓𑀲𑀺 𑀲𑀗𑁆𑀓𑀫𑀲𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀲𑀺, 𑀏𑀯𑀁 𑀦 𑀲𑀓𑁆𑀓𑀦𑁆𑀢𑀺 𑀦 𑀲𑀗𑁆𑀓𑀫𑀦𑁆𑀢𑀺 𑀦 𑀯𑀺𑀘𑀭𑀦𑁆𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀲𑁄 𑀓𑀼𑀓𑁆𑀓𑀼𑀝𑁄 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺. 𑀢𑀲𑁆𑀲 𑀧𑀮𑀸𑀬𑀺𑀢𑁆𑀯𑀸 𑀕𑀢𑀓𑀸𑀮𑁂 𑀮𑀼𑀤𑁆𑀤𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁮.

‘‘𑀧𑁄𑀭𑀸𑀡𑀓𑀼𑀓𑁆𑀓𑀼𑀝𑁄 ¶ ¶ ¶ 𑀅𑀬𑀁, 𑀪𑁂𑀢𑁆𑀯𑀸 𑀧𑀜𑁆𑀚𑀭𑀫𑀸𑀕𑀢𑁄;

𑀓𑀼𑀲𑀮𑁄 𑀯𑀸𑀮𑀧𑀸𑀲𑀸𑀦𑀁, 𑀅𑀧𑀓𑁆𑀓𑀫𑀢𑀺 𑀪𑀸𑀲𑀢𑀻’’𑀢𑀺.

𑀢𑀢𑁆𑀣 𑀓𑀼𑀲𑀮𑁄 𑀯𑀸𑀮𑀧𑀸𑀲𑀸𑀦𑀦𑁆𑀢𑀺 𑀯𑀸𑀮𑀫𑀬𑁂𑀲𑀼 𑀧𑀸𑀲𑁂𑀲𑀼 𑀓𑀼𑀲𑀮𑁄 𑀅𑀢𑁆𑀢𑀸𑀦𑀁 𑀩𑀦𑁆𑀥𑀺𑀢𑀼𑀁 𑀅𑀤𑀢𑁆𑀯𑀸 𑀅𑀧𑀓𑁆𑀓𑀫𑀢𑀺 𑀘𑁂𑀯 𑀪𑀸𑀲𑀢𑀺 𑀘, 𑀪𑀸𑀲𑀺𑀢𑁆𑀯𑀸 𑀘 𑀧𑀦 𑀧𑀮𑀸𑀢𑁄𑀢𑀺 𑀏𑀯𑀁 𑀯𑀢𑁆𑀯𑀸 𑀮𑀼𑀤𑁆𑀤𑀓𑁄 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀬𑀣𑀸𑀮𑀤𑁆𑀥𑀫𑀸𑀤𑀸𑀬 𑀕𑁂𑀳𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑁄 𑀓𑀸𑀬𑀕𑀼𑀢𑁆𑀢𑀺𑀓𑀼𑀲𑀮𑁄 𑀤𑀳𑀭𑀪𑀺𑀓𑁆𑀔𑀼, 𑀢𑀲𑁆𑀲 𑀧𑀦 𑀓𑀸𑀭𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀓𑀸 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁧𑁦] 𑁧𑁦. 𑀓𑀦𑁆𑀤𑀕𑀮𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀫𑁆𑀪𑁄 𑀓𑁄 𑀦𑀸𑀫𑀬𑀁 𑀭𑀼𑀓𑁆𑀔𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀕𑀢𑀸𑀮𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀲𑀼𑀕𑀢𑀸𑀮𑀬𑀁 𑀅𑀓𑀸𑀲𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀅𑀦𑀼𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀸𑀧𑀼𑀡𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀭𑀼𑀓𑁆𑀔𑀓𑁄𑀝𑁆𑀝𑀓𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, ‘‘𑀔𑀤𑀺𑀭𑀯𑀦𑀺𑀬𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀔𑀤𑀺𑀭𑀯𑀦𑁂𑀬𑁂𑀯 𑀕𑁄𑀘𑀭𑀁 𑀕𑀡𑁆𑀳𑀺, 𑀢𑀲𑁆𑀲𑁂𑀓𑁄 𑀓𑀦𑁆𑀤𑀕𑀮𑀓𑁄 𑀦𑀸𑀫 𑀲𑀳𑀸𑀬𑁄 𑀅𑀳𑁄𑀲𑀺, 𑀲𑁄 𑀲𑀺𑀫𑁆𑀩𑀮𑀺𑀧𑀸𑀮𑀺𑀪𑀤𑁆𑀤𑀓𑀯𑀦𑁂 𑀕𑁄𑀘𑀭𑀁 𑀕𑀡𑁆𑀳𑀸𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀔𑀤𑀺𑀭𑀯𑀦𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀔𑀤𑀺𑀭𑀯𑀦𑀺𑀬𑁄 ‘‘𑀲𑀳𑀸𑀬𑁄 𑀫𑁂 𑀆𑀕𑀢𑁄’’𑀢𑀺 𑀓𑀦𑁆𑀤𑀕𑀮𑀓𑀁 𑀕𑀳𑁂𑀢𑁆𑀯𑀸 𑀔𑀤𑀺𑀭𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀔𑀤𑀺𑀭𑀔𑀦𑁆𑀥𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀭𑀼𑀓𑁆𑀔𑀢𑁄 𑀧𑀸𑀡𑀓𑁂 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀓𑀦𑁆𑀤𑀕𑀮𑀓𑁄 𑀤𑀺𑀦𑁆𑀦𑁂 𑀤𑀺𑀦𑁆𑀦𑁂 𑀫𑀥𑀼𑀭𑀧𑀽𑀯𑁂 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺. 𑀢𑀲𑁆𑀲 𑀔𑀸𑀤𑀦𑁆𑀢𑀲𑁆𑀲𑁂𑀯 𑀫𑀸𑀦𑁄 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀬𑀫𑁆𑀧𑀺 ¶ 𑀭𑀼𑀓𑁆𑀔𑀓𑁄𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄, 𑀅𑀳𑀫𑁆𑀧𑀺, 𑀓𑀺𑀁 𑀫𑁂 𑀏𑀢𑁂𑀦 𑀤𑀺𑀦𑁆𑀦𑀕𑁄𑀘𑀭𑁂𑀦, 𑀲𑀬𑀫𑁂𑀯 𑀔𑀤𑀺𑀭𑀯𑀦𑁂 𑀕𑁄𑀘𑀭𑀁 ¶ 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀔𑀤𑀺𑀭𑀯𑀦𑀺𑀬𑀁 𑀆𑀳 𑁋 ‘‘𑀲𑀫𑁆𑀫, 𑀫𑀸 𑀢𑁆𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺, 𑀅𑀳𑀫𑁂𑀯 𑀔𑀤𑀺𑀭𑀯𑀦𑁂 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺.

𑀅𑀣 ¶ 𑀦𑀁 𑀲𑁄 ‘‘𑀳𑀦𑁆𑀤 𑀢𑁆𑀯𑀁 𑀲𑀫𑁆𑀫, 𑀲𑀺𑀫𑁆𑀩𑀮𑀺𑀧𑀸𑀮𑀺𑀪𑀤𑁆𑀤𑀓𑀸𑀤𑀺𑀯𑀦𑁂 𑀦𑀺𑀲𑁆𑀲𑀸𑀭𑁂 𑀕𑁄𑀘𑀭𑀕𑁆𑀕𑀳𑀡𑀓𑀼𑀮𑁂 𑀚𑀸𑀢𑁄, 𑀔𑀤𑀺𑀭𑀸 𑀦𑀸𑀫 𑀚𑀸𑀢𑀲𑀸𑀭𑀸 𑀣𑀤𑁆𑀥𑀸, 𑀫𑀸 𑀢𑁂 𑀏𑀢𑀁 𑀭𑀼𑀘𑁆𑀘𑀻’’𑀢𑀺 𑀆𑀳. 𑀓𑀦𑁆𑀤𑀕𑀮𑀓𑁄 ‘‘𑀓𑀺𑀁 𑀤𑀸𑀦𑀸𑀳𑀁 𑀦 𑀭𑀼𑀓𑁆𑀔𑀓𑁄𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀔𑀤𑀺𑀭𑀭𑀼𑀓𑁆𑀔𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺. 𑀢𑀸𑀯𑀤𑁂𑀯𑀲𑁆𑀲 𑀢𑀼𑀡𑁆𑀟𑀁 𑀪𑀺𑀚𑁆𑀚𑀺, 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀚𑀸𑀢𑀸𑀦𑀺, 𑀲𑀻𑀲𑀁 𑀨𑀮𑀺𑀢𑀁. 𑀲𑁄 𑀔𑀦𑁆𑀥𑁂 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁯.

‘‘𑀅𑀫𑁆𑀪𑁄 𑀓𑁄 𑀦𑀸𑀫𑀬𑀁 𑀭𑀼𑀓𑁆𑀔𑁄, 𑀲𑀺𑀦𑁆𑀦𑀧𑀢𑁆𑀢𑁄 𑀲𑀓𑀡𑁆𑀝𑀓𑁄;

𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢’’𑀦𑁆𑀢𑀺.

𑀢𑀢𑁆𑀣 𑀅𑀫𑁆𑀪𑁄 𑀓𑁄 𑀦𑀸𑀫𑀬𑀁 𑀭𑀼𑀓𑁆𑀔𑁄𑀢𑀺, 𑀪𑁄 𑀔𑀤𑀺𑀭𑀯𑀦𑀺𑀬, 𑀓𑁄 𑀦𑀸𑀫 𑀅𑀬𑀁 𑀭𑀼𑀓𑁆𑀔𑁄. ‘‘𑀓𑁄 𑀦𑀸𑀫 𑀲𑁄’’𑀢𑀺𑀧𑀺 𑀧𑀸𑀞𑁄. 𑀲𑀺𑀦𑁆𑀦𑀧𑀢𑁆𑀢𑁄𑀢𑀺 𑀲𑀼𑀔𑀼𑀫𑀧𑀢𑁆𑀢𑁄. 𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀬𑀲𑁆𑀫𑀺𑀁 𑀭𑀼𑀓𑁆𑀔𑁂 𑀏𑀓𑁂𑀦𑁂𑀯 𑀧𑀳𑀸𑀭𑁂𑀦. 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢𑀦𑁆𑀢𑀺 𑀲𑀻𑀲𑀁 𑀪𑀺𑀦𑁆𑀦𑀁, 𑀦 𑀓𑁂𑀯𑀮𑀜𑁆𑀘 𑀲𑀻𑀲𑀁, 𑀢𑀼𑀡𑁆𑀟𑀫𑁆𑀧𑀺 𑀪𑀺𑀦𑁆𑀦𑀁. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑀢𑀸𑀬 𑀔𑀤𑀺𑀭𑀭𑀼𑀓𑁆𑀔𑀁 ‘‘𑀓𑀺𑀁 𑀭𑀼𑀓𑁆𑀔𑁄 𑀦𑀸𑀫𑁂𑀲𑁄’’𑀢𑀺 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀯𑀺𑀧𑁆𑀧𑀮𑀧𑀺.

𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀔𑀤𑀺𑀭𑀯𑀦𑀺𑀬𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁦.

‘‘𑀅𑀘𑀸𑀭𑀺 𑀯𑀢𑀸𑀬𑀁 𑀯𑀺𑀢𑀼𑀤𑀁 𑀯𑀦𑀸𑀦𑀺, 𑀓𑀝𑁆𑀞𑀗𑁆𑀕𑀭𑀼𑀓𑁆𑀔𑁂𑀲𑀼 𑀅𑀲𑀸𑀭𑀓𑁂𑀲𑀼;

𑀅𑀣𑀸𑀲𑀤𑀸 𑀔𑀤𑀺𑀭𑀁 𑀚𑀸𑀢𑀲𑀸𑀭𑀁, 𑀬𑀢𑁆𑀣𑀩𑁆𑀪𑀺𑀤𑀸 𑀕𑀭𑀼𑀴𑁄 𑀉𑀢𑁆𑀢𑀫𑀗𑁆𑀕’’𑀦𑁆𑀢𑀺.

𑀢𑀢𑁆𑀣 ¶ 𑀅𑀘𑀸𑀭𑀺 𑀯𑀢𑀸𑀬𑀦𑁆𑀢𑀺 𑀅𑀘𑀭𑀺 𑀯𑀢 𑀅𑀬𑀁. 𑀯𑀺𑀢𑀼𑀤𑀁 𑀯𑀦𑀸𑀦𑀻𑀢𑀺 𑀦𑀺𑀲𑁆𑀲𑀸𑀭𑀲𑀺𑀫𑁆𑀩𑀮𑀺𑀧𑀸𑀮𑀺𑀪𑀤𑁆𑀤𑀓𑀯𑀦𑀸𑀦𑀺 𑀯𑀺𑀢𑀼𑀤𑀦𑁆𑀢𑁄 𑀯𑀺𑀚𑁆𑀛𑀦𑁆𑀢𑁄. 𑀓𑀝𑁆𑀞𑀗𑁆𑀕𑀭𑀼𑀓𑁆𑀔𑁂𑀲𑀽𑀢𑀺 𑀯𑀦𑀓𑀝𑁆𑀞𑀓𑁄𑀝𑁆𑀞𑀸𑀲𑁂𑀲𑀼 𑀭𑀼𑀓𑁆𑀔𑁂𑀲𑀼. 𑀅𑀲𑀸𑀭𑀓𑁂𑀲𑀽𑀢𑀺 𑀦𑀺𑀲𑁆𑀲𑀸𑀭𑁂𑀲𑀼 𑀧𑀸𑀮𑀺𑀪𑀤𑁆𑀤𑀓𑀲𑀺𑀫𑁆𑀩𑀮𑀺𑀆𑀤𑀻𑀲𑀼. 𑀅𑀣𑀸𑀲𑀤𑀸 𑀔𑀤𑀺𑀭𑀁 𑀚𑀸𑀢𑀲𑀸𑀭𑀦𑁆𑀢𑀺 𑀅𑀣 𑀧𑁄𑀢𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑀲𑀸𑀭𑀁 𑀔𑀤𑀺𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀬𑀢𑁆𑀣𑀩𑁆𑀪𑀺𑀤𑀸 𑀕𑀭𑀼𑀴𑁄 𑀉𑀢𑁆𑀢𑀫𑀗𑁆𑀕𑀦𑁆𑀢𑀺 𑀬𑀢𑁆𑀣𑀩𑁆𑀪𑀺𑀤𑀸𑀢𑀺 𑀬𑀲𑁆𑀫𑀺𑀁 𑀔𑀤𑀺𑀭𑁂 𑀅𑀪𑀺𑀦𑁆𑀤𑀺 𑀧𑀤𑀸𑀮𑀬𑀺. 𑀕𑀭𑀼𑀴𑁄𑀢𑀺 𑀲𑀓𑀼𑀡𑁄. 𑀲𑀩𑁆𑀩𑀲𑀓𑀼𑀡𑀸𑀦𑀜𑁆𑀳𑁂𑀢𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲 𑀯𑀘𑀦𑀁.

𑀇𑀢𑀺 ¶ 𑀦𑀁 𑀔𑀤𑀺𑀭𑀯𑀦𑀺𑀬𑁄 𑀯𑀢𑁆𑀯𑀸 ‘‘𑀪𑁄 𑀓𑀦𑁆𑀤𑀕𑀮𑀓, 𑀬𑀢𑁆𑀣 𑀢𑁆𑀯𑀁 𑀉𑀢𑁆𑀢𑀫𑀗𑁆𑀕𑀁 𑀅𑀪𑀺𑀦𑁆𑀤𑀺, 𑀔𑀤𑀺𑀭𑁄 𑀦𑀸𑀫𑁂𑀲𑁄 𑀲𑀸𑀭𑀭𑀼𑀓𑁆𑀔𑁄’’𑀢𑀺 𑀆𑀳. 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀦𑁆𑀤𑀕𑀮𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀔𑀤𑀺𑀭𑀯𑀦𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀦𑁆𑀤𑀕𑀮𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀦𑀢𑀁𑀤𑀴𑁆𑀳𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑀦𑁆𑀥𑀦𑀸𑀕𑀸𑀭𑀁 𑀓𑁂𑀴𑀺𑀲𑀻𑀮𑀁, 𑀔𑀡𑁆𑀟𑀁 𑀯𑀻𑀭𑀓𑀕𑀗𑁆𑀕𑁂𑀬𑁆𑀬𑀁;

𑀓𑀼𑀭𑀼𑀗𑁆𑀕𑀫𑀲𑁆𑀲𑀓𑀜𑁆𑀘𑁂𑀯, 𑀲𑀼𑀲𑀼𑀫𑀸𑀭𑀜𑁆𑀘 𑀓𑀼𑀓𑁆𑀓𑀼𑀝𑀁;

𑀓𑀦𑁆𑀤𑀕𑀮𑀓𑀦𑁆𑀢𑀺 𑀢𑁂 𑀤𑀲.

𑁭. 𑀩𑀻𑀭𑀡𑀣𑀫𑁆𑀪𑀯𑀕𑁆𑀕𑁄

[𑁨𑁧𑁧] 𑁧. 𑀲𑁄𑀫𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑀸𑀲𑀺 ¶ 𑀬𑁄𑀕𑁆𑀕𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀅𑀦𑁆𑀢𑀭𑁂 𑀏𑀓𑀯𑀘𑀦𑀫𑁆𑀧𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀲𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀸𑀭𑀚𑁆𑀚𑀩𑀳𑀼𑀮𑁄 ‘‘𑀅𑀜𑁆𑀜𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀫𑁂𑀯 𑀓𑀣𑁂𑀲𑀺. 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣 ¶ , 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀮𑀸𑀴𑀼𑀤𑀸𑀬𑀻 𑀇𑀤𑀸𑀦𑁂𑀯 𑀲𑀸𑀭𑀚𑁆𑀚𑀩𑀳𑀼𑀮𑁄, 𑀧𑀼𑀩𑁆𑀩𑁂𑀧𑀺 𑀲𑀸𑀭𑀚𑁆𑀚𑀩𑀳𑀼𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀤𑀼𑀕𑁆𑀕𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀧𑀭𑀺𑀳𑀻𑀦𑀓𑀼𑀮𑀢𑁄 𑀲𑁂𑀝𑁆𑀞𑀺𑀓𑀼𑀮𑀁 𑀧𑀢𑀺𑀝𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 ¶ 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀭𑀜𑁆𑀜𑀸 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀅𑀣𑀲𑁆𑀲 𑀧𑀺𑀢𑀼𑀦𑁄 ‘‘𑀤𑁆𑀯𑀻𑀳𑀺𑀬𑁂𑀯 𑀕𑁄𑀡𑁂𑀳𑀺 𑀓𑀲𑀺𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲 𑀏𑀓𑁄 𑀕𑁄𑀡𑁄 𑀫𑀢𑁄. 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀸𑀢, 𑀏𑀓𑁄 𑀕𑁄𑀡𑁄 𑀫𑀢𑁄, 𑀓𑀲𑀺𑀓𑀫𑁆𑀫𑀁 𑀦 𑀧𑀯𑀢𑁆𑀢𑀢𑀺, 𑀭𑀸𑀚𑀸𑀦𑀁 𑀏𑀓𑀁 𑀕𑁄𑀡𑀁 𑀬𑀸𑀘𑀸𑀳𑀻’’𑀢𑀺 𑀆𑀳. ‘‘𑀢𑀸𑀢, 𑀦𑀘𑀺𑀭𑀲𑁆𑀲𑁂𑀯 𑀫𑁂 𑀭𑀸𑀚𑀸 𑀤𑀺𑀝𑁆𑀞𑁄, 𑀇𑀤𑀸𑀦𑁂𑀯 𑀕𑁄𑀡𑀁 𑀬𑀸𑀘𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀢𑀼𑀫𑁆𑀳𑁂 𑀬𑀸𑀘𑀣𑀸’’𑀢𑀺. ‘‘𑀢𑀸𑀢, 𑀢𑁆𑀯𑀁 𑀫𑀬𑁆𑀳𑀁 𑀲𑀸𑀭𑀚𑁆𑀚𑀩𑀳𑀼𑀮𑀪𑀸𑀯𑀁 𑀦 𑀚𑀸𑀦𑀸𑀲𑀺, 𑀅𑀳𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑁂 𑀓𑀣𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀲𑀘𑁂 𑀅𑀳𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑁄𑀡𑀁 𑀬𑀸𑀘𑀺𑀢𑀼𑀁 𑀕𑀫𑀺𑀲𑁆𑀲𑀸𑀫𑀺, 𑀇𑀫𑀫𑁆𑀧𑀺 𑀤𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀬𑀁 𑀳𑁄𑀢𑀺, 𑀢𑀁 𑀳𑁄𑀢𑀼, 𑀦 𑀲𑀓𑁆𑀓𑀸 𑀫𑀬𑀸 𑀭𑀸𑀚𑀸𑀦𑀁 𑀬𑀸𑀘𑀺𑀢𑀼𑀁, 𑀅𑀧𑀺𑀘 𑀔𑁄 𑀧𑀦𑀸𑀳𑀁 𑀢𑀼𑀫𑁆𑀳𑁂 𑀬𑁄𑀕𑁆𑀕𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀲𑀸𑀥𑀼 𑀫𑀁 𑀬𑁄𑀕𑁆𑀕𑀁 𑀓𑀸𑀭𑁂𑀳𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀭𑀁 𑀆𑀤𑀸𑀬 𑀩𑀻𑀭𑀡𑀢𑁆𑀣𑀫𑁆𑀪𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀢𑀺𑀡𑀓𑀮𑀸𑀧𑁂 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀬𑀁 𑀭𑀸𑀚𑀸, 𑀅𑀬𑀁 𑀉𑀧𑀭𑀸𑀚𑀸, 𑀅𑀬𑀁 𑀲𑁂𑀦𑀸𑀧𑀢𑀻’’𑀢𑀺 𑀦𑀸𑀫𑀸𑀦𑀺 𑀓𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀧𑀺𑀢𑀼 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘𑀚𑀬𑀢𑀼, 𑀫𑀳𑀸𑀭𑀸𑀚𑀸’𑀢𑀺 𑀏𑀯𑀁 𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀕𑁄𑀡𑀁 𑀬𑀸𑀘𑁂𑀬𑁆𑀬𑀸𑀲𑀻’’𑀢𑀺 𑀕𑀸𑀣𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺 𑁋

‘‘𑀤𑁆𑀯𑁂 ¶ 𑀫𑁂 𑀕𑁄𑀡𑀸 𑀫𑀳𑀸𑀭𑀸𑀚, 𑀬𑁂𑀳𑀺 𑀔𑁂𑀢𑁆𑀢𑀁 𑀓𑀲𑀸𑀫𑀲𑁂;

𑀢𑁂𑀲𑀼 𑀏𑀓𑁄 𑀫𑀢𑁄 𑀤𑁂𑀯, 𑀤𑀼𑀢𑀺𑀬𑀁 𑀤𑁂𑀳𑀺 𑀔𑀢𑁆𑀢𑀺𑀬𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑁄 ¶ 𑀏𑀓𑁂𑀦 𑀲𑀁𑀯𑀘𑁆𑀙𑀭𑁂𑀦 𑀇𑀫𑀁 𑀕𑀸𑀣𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀲𑁄𑀫𑀤𑀢𑁆𑀢, 𑀕𑀸𑀣𑀸 𑀫𑁂 𑀧𑀕𑀼𑀡𑀸 𑀚𑀸𑀢𑀸, 𑀇𑀤𑀸𑀦𑀺 𑀅𑀳𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀯𑀢𑁆𑀢𑀼𑀁 𑀲𑀓𑁆𑀓𑁄𑀫𑀺, 𑀫𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀣𑀸𑀭𑀽𑀧𑀁 𑀧𑀡𑁆𑀡𑀸𑀓𑀸𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀺𑀢𑀭𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀚𑀬𑀢𑀼, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀅𑀤𑀸𑀲𑀺. 𑀭𑀸𑀚𑀸 ‘‘𑀅𑀬𑀁 𑀢𑁂 𑀲𑁄𑀫𑀤𑀢𑁆𑀢 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀳𑁄𑀢𑀻’’𑀢𑀺 𑀆𑀳. ‘‘𑀧𑀺𑀢𑀸 𑀫𑁂, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁂𑀦𑀝𑁆𑀞𑁂𑀦𑀸𑀕𑀢𑁄’’𑀢𑀺? 𑀢𑀲𑁆𑀫𑀺𑀁 𑀔𑀡𑁂 𑀩𑁆𑀭𑀸𑀳𑁆𑀫𑀡𑁄 𑀕𑁄𑀡𑀬𑀸𑀘𑀦𑀢𑁆𑀣𑀸𑀬 𑀕𑀸𑀣𑀁 𑀯𑀤𑀦𑁆𑀢𑁄 𑁋

‘‘𑀤𑁆𑀯𑁂 𑀫𑁂 𑀕𑁄𑀡𑀸 𑀫𑀳𑀸𑀭𑀸𑀚, 𑀬𑁂𑀳𑀺 𑀔𑁂𑀢𑁆𑀢𑀁 𑀓𑀲𑀸𑀫𑀲𑁂;

𑀢𑁂𑀲𑀼 𑀏𑀓𑁄 𑀫𑀢𑁄 𑀤𑁂𑀯, 𑀤𑀼𑀢𑀺𑀬𑀁 𑀕𑀡𑁆𑀳 𑀔𑀢𑁆𑀢𑀺𑀬𑀸’’𑀢𑀺. 𑁋 𑀆𑀳;

𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀣𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀺𑀢𑀁 𑀓𑀢𑁆𑀯𑀸 ‘‘𑀲𑁄𑀫𑀤𑀢𑁆𑀢, 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀩𑀳𑀽 𑀫𑀜𑁆𑀜𑁂 𑀕𑁄𑀡𑀸’’𑀢𑀺 𑀆𑀳. ‘‘𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦𑀸 ¶ 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑁄𑀴𑀲 𑀕𑁄𑀡𑁂 𑀅𑀮𑀗𑁆𑀓𑀸𑀭𑀪𑀡𑁆𑀟𑀓𑁂 𑀦𑀺𑀯𑀸𑀲𑀦𑀕𑀸𑀫𑀜𑁆𑀘𑀲𑁆𑀲 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀩𑁆𑀭𑀸𑀳𑁆𑀫𑀡𑀁 𑀉𑀬𑁆𑀬𑁄𑀚𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑀲𑁂𑀢𑀲𑀺𑀦𑁆𑀥𑀯𑀬𑀼𑀢𑁆𑀢𑀁 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀸𑀫𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀭𑀣𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 ‘‘𑀢𑀸𑀢, 𑀅𑀳𑀁 𑀢𑀼𑀫𑁆𑀳𑁂 𑀲𑀓𑀮𑀲𑀁𑀯𑀘𑁆𑀙𑀭𑀁 𑀬𑁄𑀕𑁆𑀕𑀁 𑀓𑀸𑀭𑁂𑀲𑀺𑀁, 𑀲𑀦𑁆𑀦𑀺𑀝𑁆𑀞𑀸𑀦𑀓𑀸𑀮𑁂 𑀧𑀦 𑀢𑀼𑀫𑁆𑀳𑀸𑀓𑀁 𑀕𑁄𑀡𑀁 𑀭𑀜𑁆𑀜𑁄 𑀅𑀤𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁧.

‘‘𑀅𑀓𑀸𑀲𑀺 𑀬𑁄𑀕𑁆𑀕𑀁 𑀥𑀼𑀯𑀫𑀧𑁆𑀧𑀫𑀢𑁆𑀢𑁄, 𑀲𑀁𑀯𑀘𑁆𑀙𑀭𑀁 𑀩𑀻𑀭𑀡𑀣𑀫𑁆𑀪𑀓𑀲𑁆𑀫𑀺𑀁;

𑀩𑁆𑀬𑀸𑀓𑀸𑀲𑀺 𑀲𑀜𑁆𑀜𑀁 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀦 𑀦𑀺𑀬𑁆𑀬𑀫𑁄 𑀢𑀸𑀬𑀢𑀺 𑀅𑀧𑁆𑀧𑀧𑀜𑁆𑀜’’𑀦𑁆𑀢𑀺.

𑀢𑀢𑁆𑀣 𑀅𑀓𑀸𑀲𑀺 𑀬𑁄𑀕𑁆𑀕𑀁 𑀥𑀼𑀯𑀫𑀧𑁆𑀧𑀫𑀢𑁆𑀢𑁄, 𑀲𑀁𑀯𑀘𑁆𑀙𑀭𑀁 𑀩𑀻𑀭𑀡𑀣𑀫𑁆𑀪𑀓𑀲𑁆𑀫𑀺𑀦𑁆𑀢𑀺, 𑀢𑀸𑀢, 𑀢𑁆𑀯𑀁 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑁄 𑀩𑀻𑀭𑀡𑀢𑁆𑀣𑀫𑁆𑀪𑀫𑀬𑁂 𑀲𑀼𑀲𑀸𑀦𑁂 𑀬𑁄𑀕𑁆𑀕𑀁 𑀅𑀓𑀸𑀲𑀺 ¶ . 𑀩𑁆𑀬𑀸𑀓𑀸𑀲𑀺 𑀲𑀜𑁆𑀜𑀁 𑀧𑀭𑀺𑀲𑀁 𑀯𑀺𑀕𑀬𑁆𑀳𑀸𑀢𑀺 𑀅𑀣 𑀘 𑀧𑀦 𑀧𑀭𑀺𑀲𑀁 𑀯𑀺𑀕𑀸𑀳𑀺𑀢𑁆𑀯𑀸 𑀢𑀁 𑀲𑀜𑁆𑀜𑀁 𑀯𑀺𑀅𑀓𑀸𑀲𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀲𑀺, 𑀧𑀭𑀺𑀯𑀢𑁆𑀢𑁂𑀲𑀻𑀢𑀺 𑀅𑀢𑁆𑀣𑁄. 𑀦 𑀦𑀺𑀬𑁆𑀬𑀫𑁄 𑀢𑀸𑀬𑀢𑀺 𑀅𑀧𑁆𑀧𑀧𑀜𑁆𑀜𑀦𑁆𑀢𑀺 𑀅𑀧𑁆𑀧𑀳𑀜𑁆𑀜𑀁 𑀦𑀸𑀫 𑀧𑀼𑀕𑁆𑀕𑀮𑀁 𑀦𑀺𑀬𑁆𑀬𑀫𑁄 𑀬𑁄𑀕𑁆𑀕𑀸𑀘𑀺𑀡𑁆𑀡𑀁 𑀘𑀭𑀡𑀁 𑀦 𑀢𑀸𑀬𑀢𑀺 𑀦 𑀭𑀓𑁆𑀔𑀢𑀻𑀢𑀺.

𑀅𑀣𑀲𑁆𑀲 ¶ 𑀯𑀘𑀦𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁨.

‘‘𑀤𑁆𑀯𑀬𑀁 𑀬𑀸𑀘𑀦𑀓𑁄 𑀢𑀸𑀢, 𑀲𑁄𑀫𑀤𑀢𑁆𑀢 𑀦𑀺𑀕𑀘𑁆𑀙𑀢𑀺;

𑀅𑀮𑀸𑀪𑀁 𑀥𑀦𑀮𑀸𑀪𑀁 𑀯𑀸, 𑀏𑀯𑀁𑀥𑀫𑁆𑀫𑀸 𑀳𑀺 𑀬𑀸𑀘𑀦𑀸’’𑀢𑀺.

𑀢𑀢𑁆𑀣 𑀏𑀯𑀁𑀥𑀫𑁆𑀫𑀸 𑀳𑀺 𑀬𑀸𑀘𑀦𑀸𑀢𑀺 𑀬𑀸𑀘𑀦𑀸 𑀳𑀺 𑀏𑀯𑀁𑀲𑀪𑀸𑀯𑀸𑀢𑀺.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀮𑀸𑀴𑀼𑀤𑀸𑀬𑀻 𑀇𑀤𑀸𑀦𑁂𑀯 𑀲𑀸𑀭𑀚𑁆𑀚𑀩𑀳𑀼𑀮𑁄, 𑀧𑀼𑀩𑁆𑀩𑁂𑀧𑀺 𑀲𑀸𑀭𑀚𑁆𑀚𑀩𑀳𑀼𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄, 𑀲𑁄𑀫𑀤𑀢𑁆𑀢𑀲𑁆𑀲 𑀧𑀺𑀢𑀸 𑀮𑀸𑀴𑀼𑀤𑀸𑀬𑀻 𑀅𑀳𑁄𑀲𑀺, 𑀲𑁄𑀫𑀤𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑁄𑀫𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁧𑁨] 𑁨. 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀅𑀜𑁆𑀜𑁄 ¶ 𑀉𑀧𑀭𑀺𑀫𑁄 𑀯𑀡𑁆𑀡𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑁄 𑀢𑀁 𑀉𑀓𑁆𑀓𑀡𑁆𑀞𑀸𑀧𑁂𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀅𑀬𑀁 𑀢𑁂 𑀇𑀢𑁆𑀣𑀻 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀚𑀸𑀭𑀲𑁆𑀲 𑀉𑀘𑁆𑀙𑀺𑀝𑁆𑀞𑀓𑀁 𑀪𑁄𑀚𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀓𑀧𑁆𑀧𑀓𑁂 𑀓𑀧𑀡𑁂 𑀦𑀝𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀤𑀼𑀕𑁆𑀕𑀢𑁄 𑀤𑀼𑀭𑀽𑀧𑀓𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀅𑀢𑀺𑀘𑀸𑀭𑀁 𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 ¶ 𑀩𑀳𑀺 𑀕𑀢𑁂 𑀢𑀲𑁆𑀲𑀸 𑀚𑀸𑀭𑁄 𑀢𑀁 𑀔𑀡𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀕𑁂𑀳𑀁 𑀧𑀸𑀯𑀺𑀲𑀺. 𑀲𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀢𑀺𑀘𑀭𑀺𑀢𑁆𑀯𑀸 ‘‘𑀫𑀼𑀳𑀼𑀢𑁆𑀢𑀁 𑀅𑀘𑁆𑀙, 𑀪𑀼𑀜𑁆𑀚𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀲𑀻’’𑀢𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀽𑀧𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀉𑀡𑁆𑀳𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀢𑁆𑀯𑀁 𑀪𑀼𑀜𑁆𑀚𑀸’’𑀢𑀺 𑀢𑀲𑁆𑀲 𑀤𑀢𑁆𑀯𑀸 𑀲𑀬𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀚𑀸𑀭𑀲𑁆𑀲 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀧𑀺𑀡𑁆𑀟𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀩𑁆𑀭𑀸𑀳𑁆𑀫𑀡𑁄 𑀕𑁂𑀳𑀸𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀧𑀯𑀺𑀲𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀩𑁆𑀭𑀸𑀳𑁆𑀫𑀡𑁄 𑀆𑀕𑀘𑁆𑀙𑀢𑀻’’𑀢𑀺 𑀚𑀸𑀭𑀁 𑀓𑁄𑀝𑁆𑀞𑁂 𑀑𑀢𑀸𑀭𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀨𑀮𑀓𑀁 𑀉𑀧𑀦𑁂𑀢𑁆𑀯𑀸 𑀳𑀢𑁆𑀣𑀥𑁄𑀯𑀦𑀁 𑀤𑀢𑁆𑀯𑀸 𑀇𑀢𑀭𑁂𑀦 𑀪𑀼𑀢𑁆𑀢𑀸𑀯𑀲𑀺𑀝𑁆𑀞𑀲𑁆𑀲 𑀲𑀻𑀢𑀪𑀢𑁆𑀢𑀲𑁆𑀲 𑀉𑀧𑀭𑀺 𑀉𑀡𑁆𑀳𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀺. 𑀲𑁄 𑀪𑀢𑁆𑀢𑁂 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀉𑀧𑀭𑀺 𑀉𑀡𑁆𑀳𑀁 𑀳𑁂𑀝𑁆𑀞𑀸 𑀘 𑀪𑀢𑁆𑀢𑀁 𑀲𑀻𑀢𑀮𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀦𑀸 𑀅𑀜𑁆𑀜𑀲𑁆𑀲 𑀪𑀼𑀢𑁆𑀢𑀸𑀥𑀺𑀓𑁂𑀦 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀺𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁩.

‘‘𑀅𑀜𑁆𑀜𑁄 𑀉𑀧𑀭𑀺𑀫𑁄 𑀯𑀡𑁆𑀡𑁄, 𑀅𑀜𑁆𑀜𑁄 𑀯𑀡𑁆𑀡𑁄 𑀘 𑀳𑁂𑀝𑁆𑀞𑀺𑀫𑁄;

𑀩𑁆𑀭𑀸𑀳𑁆𑀫𑀡𑀻 𑀢𑁆𑀯𑁂𑀯 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀳𑁂𑀝𑁆𑀞𑀸 𑀓𑀺𑀜𑁆𑀘 𑀉𑀧𑁆𑀧𑀭𑀻’’𑀢𑀺.

𑀢𑀢𑁆𑀣 𑀯𑀡𑁆𑀡𑁄𑀢𑀺 𑀆𑀓𑀸𑀭𑁄. 𑀅𑀬𑀜𑁆𑀳𑀺 𑀉𑀧𑀭𑀺𑀫𑀲𑁆𑀲 𑀉𑀡𑁆𑀳𑀪𑀸𑀯𑀁 𑀳𑁂𑀝𑁆𑀞𑀺𑀫𑀲𑁆𑀲 𑀘 𑀲𑀻𑀢𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀓𑀺𑀁 𑀳𑁂𑀝𑁆𑀞𑀸 𑀓𑀺𑀜𑁆𑀘 𑀉𑀧𑁆𑀧𑀭𑀻𑀢𑀺 𑀯𑀼𑀟𑁆𑀠𑀺𑀢𑀪𑀢𑁆𑀢𑁂𑀦 ¶ 𑀦𑀸𑀫 𑀉𑀧𑀭𑀺 𑀲𑀻𑀢𑀮𑁂𑀦, 𑀳𑁂𑀝𑁆𑀞𑀸 𑀉𑀡𑁆𑀳𑁂𑀦 𑀪𑀯𑀺𑀢𑀩𑁆𑀩𑀁, 𑀇𑀤𑀜𑁆𑀘 𑀧𑀦 𑀦 𑀢𑀸𑀤𑀺𑀲𑀁, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑁂𑀦 𑀓𑀸𑀭𑀡𑁂𑀦 𑀉𑀧𑀭𑀺 𑀪𑀢𑁆𑀢𑀁 𑀉𑀡𑁆𑀳𑀁, 𑀳𑁂𑀝𑁆𑀞𑀺𑀫𑀁 𑀲𑀻𑀢𑀮’’𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑀻 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀉𑀢𑁆𑀢𑀸𑀦𑀪𑀸𑀯𑀪𑀬𑁂𑀦 𑀩𑁆𑀭𑀸𑀳𑁆𑀫𑀡𑁂 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂𑀧𑀺 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀦𑀝𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑁄𑀝𑁆𑀞𑁂 𑀦𑀺𑀲𑀻𑀤𑀸𑀧𑀺𑀢𑀧𑀸𑀧𑀧𑀼𑀭𑀺𑀲𑁂𑀦 𑀚𑀸𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀇𑀫𑀺𑀦𑀸 𑀕𑁂𑀳𑀲𑁆𑀲𑀸𑀫𑀺𑀓𑁂𑀦, 𑀩𑁆𑀭𑀸𑀳𑁆𑀫𑀡𑀻 𑀧𑀦 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀧𑀸𑀓𑀝𑀪𑀸𑀯𑀪𑀬𑁂𑀦 𑀓𑀺𑀜𑁆𑀘𑀺 𑀦 𑀓𑀣𑁂𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀺𑀲𑁆𑀲𑀸 𑀓𑀢𑀓𑀫𑁆𑀫𑀁 𑀧𑀓𑀸𑀲𑁂𑀢𑁆𑀯𑀸 𑀚𑀸𑀭𑀲𑁆𑀲 𑀓𑁄𑀝𑁆𑀞𑀓𑁂 𑀦𑀺𑀲𑀻𑀤𑀸𑀧𑀺𑀢𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀣𑁂𑀫𑀻’’𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀇𑀢𑀭𑀲𑁆𑀲 𑀕𑁂𑀳𑀧𑀯𑁂𑀲𑀦𑀁 𑀅𑀢𑀺𑀘𑀭𑀡𑀁 𑀅𑀕𑁆𑀕𑀪𑀢𑁆𑀢𑀪𑀼𑀜𑁆𑀚𑀦𑀁 𑀩𑁆𑀭𑀸𑀳𑁆𑀫𑀡𑀺𑀬𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑀦𑀁 𑀇𑀢𑀭𑀲𑁆𑀲 𑀓𑁄𑀝𑁆𑀞𑁂 𑀑𑀢𑀸𑀭𑀺𑀢𑀪𑀸𑀯𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁪.

‘‘𑀅𑀳𑀁 𑀦𑀝𑁄𑀲𑁆𑀫𑀺 𑀪𑀤𑁆𑀤𑀦𑁆𑀢𑁂, 𑀪𑀺𑀓𑁆𑀔𑀓𑁄𑀲𑁆𑀫𑀺 𑀇𑀥𑀸𑀕𑀢𑁄;

𑀅𑀬𑀜𑁆𑀳𑀺 𑀓𑁄𑀝𑁆𑀞𑀫𑁄𑀢𑀺𑀡𑁆𑀡𑁄, 𑀅𑀬𑀁 𑀲𑁄 𑀬𑀁 𑀕𑀯𑁂𑀲𑀲𑀻’’𑀢𑀺.

𑀢𑀢𑁆𑀣 𑀅𑀳𑀁 𑀦𑀝𑁄𑀲𑁆𑀫𑀺, 𑀪𑀤𑁆𑀤𑀦𑁆𑀢𑁂𑀢𑀺, 𑀲𑀸𑀫𑀺, 𑀅𑀳𑀁 𑀦𑀝𑀚𑀸𑀢𑀺𑀓𑁄. 𑀪𑀺𑀓𑁆𑀔𑀓𑁄𑀲𑁆𑀫𑀺 𑀇𑀥𑀸𑀕𑀢𑁄𑀢𑀺 𑀲𑁆𑀯𑀸𑀳𑀁 𑀇𑀫𑀁 𑀞𑀸𑀦𑀁 𑀪𑀺𑀓𑁆𑀔𑀓𑁄 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀫𑀸𑀦𑁄 𑀆𑀕𑀢𑁄𑀲𑁆𑀫𑀺. 𑀅𑀬𑀜𑁆𑀳𑀺 𑀓𑁄𑀝𑁆𑀞𑀫𑁄𑀢𑀺𑀡𑁆𑀡𑁄𑀢𑀺 𑀅𑀬𑀁 𑀧𑀦 𑀏𑀢𑀺𑀲𑁆𑀲𑀸 𑀚𑀸𑀭𑁄 𑀇𑀫𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀢𑀯 𑀪𑀬𑁂𑀦 𑀓𑁄𑀝𑁆𑀞𑀁 𑀑𑀢𑀺𑀡𑁆𑀡𑁄. 𑀅𑀬𑀁 𑀲𑁄 𑀬𑀁 𑀕𑀯𑁂𑀲𑀲𑀻𑀢𑀺 𑀬𑀁 𑀢𑁆𑀯𑀁 𑀓𑀲𑁆𑀲 𑀦𑀼 𑀔𑁄 𑀇𑀫𑀺𑀦𑀸 𑀉𑀘𑁆𑀙𑀺𑀝𑁆𑀞𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀕𑀯𑁂𑀲𑀲𑀺, 𑀅𑀬𑀁 𑀲𑁄. 𑀘𑀽𑀴𑀸𑀬 ¶ 𑀦𑀁 𑀕𑀳𑁂𑀢𑁆𑀯𑀸 𑀓𑁄𑀝𑁆𑀞𑀸 𑀦𑀻𑀳𑀭𑀺𑀢𑁆𑀯𑀸 𑀬𑀣𑀸 𑀦 𑀧𑀼𑀦𑁂𑀯𑀭𑀽𑀧𑀁 𑀧𑀸𑀧𑀁 𑀓𑀭𑁄𑀢𑀺, 𑀢𑀣𑀸 𑀅𑀲𑁆𑀲 𑀲𑀢𑀺𑀁 𑀚𑀦𑁂𑀳𑀻𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀉𑀪𑁄𑀧𑀺 𑀢𑁂 𑀬𑀣𑀸 𑀦𑀁 𑀦 𑀧𑀼𑀦𑁂𑀯𑀭𑀽𑀧𑀁 𑀧𑀸𑀧𑀁 𑀓𑀭𑁄𑀦𑁆𑀢𑀺, 𑀢𑀚𑁆𑀚𑀦𑀧𑁄𑀣𑀦𑁂𑀳𑀺 𑀢𑀣𑀸 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀉𑀓𑁆𑀓𑀡𑁆𑀞𑀺𑀢𑁄 𑀪𑀺𑀓𑁆𑀔𑀼, 𑀦𑀝𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁧𑁩] 𑁩. 𑀪𑀭𑀼𑀚𑀸𑀢𑀓𑀯𑀡𑁆𑀡𑀦𑀸

𑀇𑀲𑀻𑀦𑀫𑀦𑁆𑀢𑀭𑀁 ¶ 𑀓𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀕𑀯𑀢𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑀸 𑀅𑀳𑁄𑀲𑀺. 𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀲𑀓𑁆𑀓𑀢𑁄 𑀳𑁄𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀉𑀤𑀸. 𑁧𑁪).

𑀢𑁂 𑀏𑀯𑀁 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀅𑀳𑁄𑀭𑀢𑁆𑀢𑀁 𑀕𑀼𑀴𑁆𑀳𑀲𑀦𑁆𑀦𑀺𑀧𑀸𑀢𑀁 𑀓𑀢𑁆𑀯𑀸 𑀫𑀦𑁆𑀢𑀬𑀦𑁆𑀢𑀺 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀚𑀸𑀢𑀸 ¶ , 𑀲𑀫𑀡𑁄 𑀕𑁄𑀢𑀫𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀚𑀸𑀢𑁄, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦𑀲𑁆𑀲 𑀏𑀲𑀸 𑀲𑀫𑁆𑀧𑀢𑁆𑀢𑀻’’𑀢𑀺. 𑀢𑀢𑁆𑀭𑁂𑀓𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀲𑁆𑀲 𑀉𑀢𑁆𑀢𑀫𑀝𑁆𑀞𑀸𑀦𑁂 𑀪𑀽𑀫𑀺𑀲𑀻𑀲𑁂 𑀯𑀲𑀢𑀺. 𑀢𑁂𑀦𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺, 𑀲𑁂𑀲𑀸 ‘‘𑀅𑀢𑁆𑀣𑁂𑀢𑀁 𑀓𑀸𑀭𑀡𑀁, 𑀫𑀬𑀫𑁆𑀧𑀺 𑀚𑁂𑀢𑀯𑀦𑀧𑀺𑀝𑁆𑀞𑁂 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀓𑀸𑀭𑁂𑀫𑀼, 𑀏𑀯𑀁 𑀮𑀸𑀪𑀺𑀦𑁄 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑁂 𑀲𑀩𑁆𑀩𑁂𑀧𑀺 ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 ‘‘𑀲𑀘𑁂𑀧𑀺 𑀫𑀬𑀁 𑀭𑀜𑁆𑀜𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀆𑀭𑀸𑀫𑀁 𑀓𑀸𑀭𑁂𑀲𑁆𑀲𑀸𑀫, 𑀪𑀺𑀓𑁆𑀔𑀽 𑀯𑀸𑀭𑁂𑀲𑁆𑀲𑀦𑁆𑀢𑀺, 𑀮𑀜𑁆𑀚𑀁 𑀮𑀪𑀺𑀢𑁆𑀯𑀸 𑀅𑀪𑀺𑀚𑁆𑀚𑀦𑀓𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀜𑁆𑀜𑁄 𑀮𑀜𑁆𑀚𑀁 𑀤𑀢𑁆𑀯𑀸 𑀆𑀭𑀸𑀫𑀝𑁆𑀞𑀸𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀬𑀸𑀘𑀺𑀢𑁆𑀯𑀸 𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀬𑀁 𑀚𑁂𑀢𑀯𑀦𑀧𑀺𑀝𑁆𑀞𑀺𑀬𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀓𑀭𑀺𑀲𑁆𑀲𑀸𑀫, 𑀲𑀘𑁂 ¶ 𑀪𑀺𑀓𑁆𑀔𑀽 ‘𑀓𑀸𑀢𑀼𑀁 𑀦 𑀤𑀲𑁆𑀲𑀸𑀫𑀸’𑀢𑀺 𑀢𑀼𑀫𑁆𑀳𑀸𑀓𑀁 𑀆𑀭𑁄𑀘𑁂𑀦𑁆𑀢𑀺, 𑀦𑁂𑀲𑀁 𑀧𑀝𑀺𑀯𑀘𑀦𑀁 𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀮𑀜𑁆𑀚𑀮𑁄𑀪𑁂𑀦 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀢𑀺𑀢𑁆𑀣𑀺𑀬𑀸 𑀭𑀸𑀚𑀸𑀦𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀼𑀁, 𑀫𑀳𑀸𑀲𑀤𑁆𑀤𑁄 𑀅𑀳𑁄𑀲𑀺. 𑀲𑀢𑁆𑀣𑀸 ‘‘𑀓𑁂 𑀧𑀦𑁂𑀢𑁂, 𑀆𑀦𑀦𑁆𑀤, 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸, 𑀪𑀦𑁆𑀢𑁂, 𑀚𑁂𑀢𑀯𑀦𑀧𑀺𑀝𑁆𑀞𑀺𑀬𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀓𑀸𑀭𑁂𑀦𑁆𑀢𑀺, 𑀢𑀢𑁆𑀣𑁂𑀲𑁄 𑀲𑀤𑁆𑀤𑁄’’𑀢𑀺. ‘‘𑀆𑀦𑀦𑁆𑀤, 𑀦𑁂𑀢𑀁 𑀞𑀸𑀦𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀺𑀢𑁆𑀣𑀺𑀬𑀸 𑀉𑀘𑁆𑀘𑀸𑀲𑀤𑁆𑀤𑀓𑀸𑀫𑀸, 𑀦 𑀲𑀓𑁆𑀓𑀸 𑀢𑁂𑀳𑀺 𑀲𑀤𑁆𑀥𑀺𑀁 ¶ 𑀯𑀲𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀺𑀢𑁆𑀣𑀺𑀬𑀸𑀭𑀸𑀫𑀓𑀭𑀡𑀁 𑀦𑀺𑀯𑀸𑀭𑁂𑀣𑀸’’𑀢𑀺 𑀆𑀳. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀲𑀗𑁆𑀖𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸𑀧𑀺 ‘‘𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀦𑀺𑀲𑁆𑀲𑀸𑀬 𑀆𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀮𑀜𑁆𑀚𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀸 𑀕𑁂𑀳𑁂 𑀦𑀢𑁆𑀣𑀻’’𑀢𑀺 𑀯𑀤𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀮𑀜𑁆𑀚𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀓𑀭𑁄𑀢𑀻’’𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀧𑁂𑀲𑁂𑀲𑀺. 𑀭𑀸𑀚𑀸 𑀢𑁂𑀲𑀫𑁆𑀧𑀺 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀢𑀣𑁂𑀯 𑀯𑀤𑀸𑀧𑁂𑀲𑀺. 𑀢𑁂𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑀸𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦 𑀇𑀤𑀸𑀦𑀺, 𑀲𑀸𑀭𑀺𑀧𑀼𑀢𑁆𑀢, 𑀭𑀸𑀚𑀸 𑀕𑁂𑀳𑁂 𑀦𑀺𑀲𑀻𑀤𑀺𑀢𑀼𑀁 𑀮𑀪𑀺𑀲𑁆𑀲𑀢𑀺, 𑀩𑀳𑀺 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀲𑀼𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀭𑀜𑁆𑀜𑁄 𑀏𑀓𑀁 𑀧𑀭𑀺𑀬𑀸𑀬𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 ‘‘𑀫𑀳𑀸𑀭𑀸𑀚, 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀲𑀻𑀮𑀯𑀦𑁆𑀢𑁂 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀝𑁆𑀞𑀲𑁆𑀲 𑀅𑀲𑁆𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀪𑀭𑀼𑀭𑀝𑁆𑀞𑁂 𑀪𑀭𑀼𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀸𑀪𑀺𑀜𑁆𑀜𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀕𑀡𑀲𑀢𑁆𑀣𑀸 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀧𑀜𑁆𑀘𑀲𑀢𑀢𑀸𑀧𑀲𑀧𑀭𑀺𑀯𑀼𑀢𑁄 𑀳𑀺𑀫𑀯𑀦𑁆𑀢𑀸 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀪𑀭𑀼𑀦𑀕𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀝𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀭𑀼𑀓𑁆𑀔𑀫𑀽𑀮𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀏𑀯𑀁 𑀢𑀲𑁆𑀫𑀺𑀁 𑀇𑀲𑀺𑀕𑀡𑁂 𑀢𑀢𑁆𑀣 𑀯𑀲𑀦𑁆𑀢𑁂 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀅𑀜𑁆𑀜𑁄 𑀕𑀡𑀲𑀢𑁆𑀣𑀸 𑀧𑀜𑁆𑀘𑀲𑀢𑀧𑀭𑀺𑀯𑀸𑀭𑁄 𑀆𑀕𑀦𑁆𑀢𑁆𑀯𑀸 𑀦𑀕𑀭𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀢𑀸𑀤𑀺𑀲𑀲𑁆𑀲𑁂𑀯 𑀯𑀝𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀢𑁆𑀣 𑀭𑀼𑀓𑁆𑀔𑀫𑀽𑀮𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀇𑀢𑀺 𑀢𑁂 𑀤𑁆𑀯𑁂𑀧𑀺 𑀇𑀲𑀺𑀕𑀡𑀸 𑀢𑀢𑁆𑀣 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀅𑀕𑀫𑀁𑀲𑀼.

𑀢𑁂𑀲𑀁 ¶ 𑀕𑀢𑀓𑀸𑀮𑁂 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀯𑀝𑀭𑀼𑀓𑁆𑀔𑁄 𑀲𑀼𑀓𑁆𑀔𑁄. 𑀧𑀼𑀦𑀯𑀸𑀭𑁂 𑀢𑁂𑀲𑀼 𑀆𑀕𑀘𑁆𑀙𑀦𑁆𑀢𑁂𑀲𑀼 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀯𑀝𑀭𑀼𑀓𑁆𑀔𑀯𑀸𑀲𑀺𑀦𑁄 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀝𑀭𑀼𑀓𑁆𑀔𑀲𑁆𑀲 ¶ 𑀲𑀼𑀓𑁆𑀔𑀪𑀸𑀯𑀁 𑀜𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀯𑀝𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀇𑀢𑀭𑁂 𑀧𑀦 𑀇𑀲𑀬𑁄 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀦𑀕𑀭𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀓𑁆𑀔𑀫𑀽𑀮𑀫𑁂𑀯 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑁂 ‘‘𑀦 𑀲𑁄 𑀢𑀼𑀫𑁆𑀳𑀸𑀓𑀁 𑀭𑀼𑀓𑁆𑀔𑁄, 𑀅𑀫𑁆𑀳𑀸𑀓𑀁 𑀭𑀼𑀓𑁆𑀔𑁄’’𑀢𑀺 𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑀺𑀁𑀲𑀼, 𑀓𑀮𑀳𑁄 𑀫𑀳𑀸 𑀅𑀳𑁄𑀲𑀺. 𑀏𑀓𑁂 ‘‘𑀅𑀫𑁆𑀳𑀸𑀓𑀁 𑀧𑀞𑀫𑀁 𑀯𑀲𑀺𑀢𑀝𑁆𑀞𑀸𑀦𑀁 𑀢𑀼𑀫𑁆𑀳𑁂 𑀦 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑁂 ‘‘𑀫𑀬𑀁 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀧𑀞𑀫𑀢𑀭𑀁 𑀇𑀥𑀸𑀕𑀢𑀸, 𑀢𑀼𑀫𑁆𑀳𑁂 𑀦 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀢𑁂 ‘‘𑀫𑀬𑀁 𑀲𑀸𑀫𑀺𑀦𑁄, 𑀫𑀬𑀁 𑀲𑀸𑀫𑀺𑀦𑁄’’𑀢𑀺 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀲𑁆𑀲𑀢𑁆𑀣𑀸𑀬 𑀭𑀸𑀚𑀓𑀼𑀮𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀧𑀞𑀫𑀁 𑀯𑀼𑀢𑁆𑀣𑀇𑀲𑀺𑀕𑀡𑀜𑁆𑀜𑁂𑀯 𑀲𑀸𑀫𑀺𑀓𑀁 𑀅𑀓𑀸𑀲𑀺 ¶ . 𑀇𑀢𑀭𑁂 ‘‘𑀦 𑀤𑀸𑀦𑀺 𑀫𑀬𑀁 𑀇𑀫𑁂𑀳𑀺 𑀧𑀭𑀸𑀚𑀺𑀢𑀸𑀢𑀺 𑀅𑀢𑁆𑀢𑀸𑀦𑀁 𑀯𑀤𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀏𑀓𑀁 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀪𑁄𑀕𑀁 𑀭𑀣𑀧𑀜𑁆𑀚𑀭𑀁 𑀤𑀺𑀲𑁆𑀯𑀸 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀧𑀺 𑀲𑀸𑀫𑀺𑀓𑁂 𑀓𑀭𑁄𑀳𑀻’’𑀢𑀺 𑀆𑀳𑀁𑀲𑀼.

𑀭𑀸𑀚𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑁂𑀧𑀺 𑀕𑀡𑀸 𑀯𑀲𑀦𑁆𑀢𑀽’’𑀢𑀺 𑀤𑁆𑀯𑁂𑀧𑀺 𑀲𑀸𑀫𑀺𑀓𑁂 𑀅𑀓𑀸𑀲𑀺. 𑀇𑀢𑀭𑁂 𑀇𑀲𑀬𑁄 𑀢𑀲𑁆𑀲 𑀭𑀣𑀧𑀜𑁆𑀚𑀭𑀲𑁆𑀲 𑀭𑀣𑀘𑀓𑁆𑀓𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀬𑁂𑀯 𑀲𑀸𑀫𑀺𑀓𑁂 𑀓𑀭𑁄𑀳𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀇𑀲𑀺𑀕𑀡𑀸 ‘‘𑀅𑀫𑁆𑀳𑁂𑀳𑀺 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘 𑀧𑀳𑀸𑀬 𑀧𑀩𑁆𑀩𑀚𑀺𑀢𑁂𑀳𑀺 𑀭𑀼𑀓𑁆𑀔𑀫𑀽𑀮𑀲𑁆𑀲 𑀓𑀸𑀭𑀡𑀸 𑀓𑀮𑀳𑀁 𑀓𑀭𑁄𑀦𑁆𑀢𑁂𑀳𑀺 𑀮𑀜𑁆𑀚𑀁 𑀤𑀤𑀦𑁆𑀢𑁂𑀳𑀺 𑀅𑀬𑀼𑀢𑁆𑀢𑀁 𑀓𑀢’’𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑀼𑀢𑁆𑀯𑀸 𑀯𑁂𑀕𑁂𑀦 𑀧𑀮𑀸𑀬𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀅𑀕𑀫𑀁𑀲𑀼. 𑀲𑀓𑀮𑀪𑀭𑀼𑀭𑀝𑁆𑀞𑀯𑀸𑀲𑀺𑀦𑁄 𑀤𑁂𑀯𑀢𑀸 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀲𑀻𑀮𑀯𑀦𑁆𑀢𑁂 𑀓𑀮𑀳𑀁 𑀓𑀭𑁄𑀦𑁆𑀢𑁂𑀦 𑀭𑀜𑁆𑀜𑀸 𑀅𑀬𑀼𑀢𑁆𑀢𑀁 𑀓𑀢’’𑀦𑁆𑀢𑀺 𑀪𑀭𑀼𑀭𑀜𑁆𑀜𑁄 𑀓𑀼𑀚𑁆𑀛𑀺𑀢𑁆𑀯𑀸 𑀢𑀺𑀬𑁄𑀚𑀦𑀲𑀢𑀺𑀓𑀁 𑀪𑀭𑀼𑀭𑀝𑁆𑀞𑀁 𑀲𑀫𑀼𑀤𑁆𑀤𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀝𑁆𑀞𑀫𑀓𑀁𑀲𑀼. 𑀇𑀢𑀺 𑀏𑀓𑀁 𑀪𑀭𑀼𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀯𑀺𑀦𑀸𑀲𑀁 𑀧𑀢𑁆𑀢𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁨𑁫.

‘‘𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸, 𑀪𑀭𑀼𑀭𑀸𑀚𑀸𑀢𑀺 𑀫𑁂 𑀲𑀼𑀢𑀁;

𑀉𑀘𑁆𑀙𑀺𑀦𑁆𑀦𑁄 𑀲𑀳 𑀭𑀝𑁆𑀞𑁂𑀳𑀺, 𑀲 𑀭𑀸𑀚𑀸 𑀯𑀺𑀪𑀯𑀗𑁆𑀕𑀢𑁄.

𑁧𑁨𑁬.

‘‘𑀢𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀁, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀕𑀺𑀭𑀁 𑀲𑀘𑁆𑀘𑀼𑀧𑀲𑀁𑀳𑀺𑀢’’𑀦𑁆𑀢𑀺.

𑀢𑀢𑁆𑀣 ¶ ¶ 𑀅𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀙𑀦𑁆𑀤𑀸𑀕𑀢𑀺𑀯𑀲𑁂𑀦 𑀯𑀺𑀯𑀭𑀁 𑀓𑀢𑁆𑀯𑀸. 𑀪𑀭𑀼𑀭𑀸𑀚𑀸𑀢𑀺 𑀪𑀭𑀼𑀭𑀝𑁆𑀞𑁂 𑀭𑀸𑀚𑀸. 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀇𑀢𑀺 𑀫𑀬𑀸 𑀧𑀼𑀩𑁆𑀩𑁂 𑀏𑀢𑀁 𑀲𑀼𑀢𑀁. 𑀢𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀦𑁆𑀢𑀺 𑀬𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀁 𑀕𑀦𑁆𑀢𑁆𑀯𑀸 𑀪𑀭𑀼𑀭𑀸𑀚𑀸 𑀲𑀳 𑀭𑀝𑁆𑀞𑁂𑀦 𑀉𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀙𑀦𑁆𑀤𑀸𑀕𑀫𑀦𑀁 𑀧𑀡𑁆𑀟𑀺𑀢𑀸 𑀦𑀧𑁆𑀧𑀲𑀁𑀲𑀦𑁆𑀢𑀺. 𑀅𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀅𑀤𑀽𑀲𑀺𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸. 𑀪𑀸𑀲𑁂𑀬𑁆𑀬 𑀕𑀺𑀭𑀁 𑀲𑀘𑁆𑀘𑀼𑀧𑀲𑀁𑀳𑀺𑀢𑀦𑁆𑀢𑀺 𑀲𑀪𑀸𑀯𑀦𑀺𑀲𑁆𑀲𑀺𑀢𑀁 ¶ 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀓𑀸𑀭𑀡𑀦𑀺𑀲𑁆𑀲𑀺𑀢𑀫𑁂𑀯 𑀕𑀺𑀭𑀁 𑀪𑀸𑀲𑁂𑀬𑁆𑀬. 𑀬𑁂 𑀳𑀺 𑀢𑀢𑁆𑀣 𑀪𑀭𑀼𑀭𑀜𑁆𑀜𑁄 𑀮𑀜𑁆𑀚𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀬𑀼𑀢𑁆𑀢𑀁 𑀏𑀢𑀦𑁆𑀢𑀺 𑀧𑀝𑀺𑀓𑁆𑀓𑁄𑀲𑀦𑁆𑀢𑀸 𑀲𑀘𑁆𑀘𑀼𑀧𑀲𑀁𑀳𑀺𑀢𑀁 𑀕𑀺𑀭𑀁 𑀪𑀸𑀲𑀺𑀁𑀲𑀼, 𑀢𑁂𑀲𑀁 𑀞𑀺𑀢𑀝𑁆𑀞𑀸𑀦𑀁 𑀦𑀸𑀴𑀺𑀓𑁂𑀭𑀤𑀻𑀧𑁂 𑀅𑀚𑁆𑀚𑀸𑀧𑀺 𑀤𑀻𑀧𑀓𑀲𑀳𑀲𑁆𑀲𑀁 𑀧𑀜𑁆𑀜𑀸𑀬𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀙𑀦𑁆𑀤𑀯𑀲𑀺𑀓𑁂𑀦 𑀦𑀸𑀫 𑀦 𑀪𑀯𑀺𑀢𑀩𑁆𑀩𑀁, 𑀤𑁆𑀯𑁂 𑀧𑀩𑁆𑀩𑀚𑀺𑀢𑀕𑀡𑁂 𑀓𑀮𑀳𑀁 𑀓𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀚𑁂𑀝𑁆𑀞𑀓𑀇𑀲𑀺 𑀅𑀳𑁄𑀲𑀺’’𑀦𑁆𑀢𑀺, 𑀭𑀸𑀚𑀸 𑀢𑀣𑀸𑀕𑀢𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀢𑀓𑀸𑀮𑁂 𑀫𑀦𑀼𑀲𑁆𑀲𑁂 𑀧𑁂𑀲𑁂𑀢𑁆𑀯𑀸 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀯𑀺𑀤𑁆𑀥𑀁𑀲𑀸𑀧𑁂𑀲𑀺, 𑀢𑀺𑀢𑁆𑀣𑀺𑀬𑀸 𑀅𑀧𑁆𑀧𑀢𑀺𑀝𑁆𑀞𑀸 𑀅𑀳𑁂𑀲𑀼𑀁.

𑀪𑀭𑀼𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁧𑁪] 𑁪. 𑀧𑀼𑀡𑁆𑀡𑀦𑀤𑀻𑀚𑀸𑀢𑀓𑀯𑀡𑁆𑀡𑀦𑀸

𑀧𑀼𑀡𑁆𑀡𑀁 𑀦𑀤𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀧𑀜𑁆𑀜𑀁 𑀆𑀭𑀩𑁆𑀪 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀕𑀫𑁆𑀪𑀻𑀭𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀉𑀧𑀸𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸 𑀉𑀧𑀸𑀬𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑁄𑀳𑀺𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 ¶ 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀸 𑀧𑀭𑀺𑀪𑁂𑀤𑀓𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀼𑀤𑁆𑀥𑁄 ‘‘𑀫𑀸 𑀫𑀫 𑀲𑀦𑁆𑀢𑀺𑀓𑁂 𑀯𑀲𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀩𑀸𑀭𑀸𑀡𑀲𑀺𑀢𑁄 𑀧𑀩𑁆𑀩𑀸𑀚𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀤𑀸𑀭𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀸𑀲𑀺𑀓𑀕𑀸𑀫𑀓𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀸 𑀢𑀲𑁆𑀲 𑀕𑀼𑀡𑀁 𑀲𑀭𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀜𑁆𑀘𑀺 𑀧𑁂𑀲𑁂𑀢𑁆𑀯𑀸 𑀆𑀘𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀏𑀓𑀁 𑀧𑀦 𑀕𑀸𑀣𑀁 𑀩𑀦𑁆𑀥𑀺𑀢𑁆𑀯𑀸 𑀧𑀡𑁆𑀡𑀁 ¶ ¶ 𑀮𑀺𑀔𑀺𑀢𑁆𑀯𑀸 𑀓𑀸𑀓𑀫𑀁𑀲𑀁 𑀧𑀘𑀸𑀧𑁂𑀢𑁆𑀯𑀸 𑀧𑀡𑁆𑀡𑀜𑁆𑀘 𑀫𑀁𑀲𑀜𑁆𑀘 𑀲𑁂𑀢𑀯𑀢𑁆𑀣𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 𑀧𑁂𑀲𑁂𑀲𑁆𑀲𑀸𑀫𑀺. 𑀬𑀤𑀺 𑀧𑀡𑁆𑀟𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀓𑀸𑀓𑀫𑀁𑀲𑀪𑀸𑀯𑀁 𑀜𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀺, 𑀦𑁄 𑀘𑁂, 𑀦𑀸𑀕𑀫𑀺𑀲𑁆𑀲𑀢𑀻’’𑀢𑀺 ‘‘𑀧𑀼𑀡𑁆𑀡𑀁 𑀦𑀤𑀺’’𑀦𑁆𑀢𑀺 𑀇𑀫𑀁 𑀕𑀸𑀣𑀁 𑀧𑀡𑁆𑀡𑁂 𑀮𑀺𑀔𑀺 𑁋

𑁧𑁨𑁭.

‘‘𑀧𑀼𑀡𑁆𑀡𑀁 𑀦𑀤𑀺𑀁 𑀬𑁂𑀦 𑀘 𑀧𑁂𑀬𑁆𑀬𑀫𑀸𑀳𑀼, 𑀚𑀸𑀢𑀁 𑀬𑀯𑀁 𑀬𑁂𑀦 𑀘 𑀕𑀼𑀬𑁆𑀳𑀫𑀸𑀳𑀼;

𑀤𑀽𑀭𑀁 𑀕𑀢𑀁 𑀬𑁂𑀦 𑀘 𑀅𑀯𑁆𑀳𑀬𑀦𑁆𑀢𑀺, 𑀲𑁄 𑀢𑁆𑀬𑀸𑀕𑀢𑁄 𑀳𑀦𑁆𑀤 𑀘 𑀪𑀼𑀜𑁆𑀚 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀧𑀼𑀡𑁆𑀡𑀁 𑀦𑀤𑀺𑀁 𑀬𑁂𑀦 𑀘 𑀧𑁂𑀬𑁆𑀬𑀫𑀸𑀳𑀽𑀢𑀺 𑀓𑀸𑀓𑀧𑁂𑀬𑁆𑀬𑀸 𑀦𑀤𑀻𑀳𑀺 𑀯𑀤𑀦𑁆𑀢𑀸 𑀬𑁂𑀦 𑀧𑀼𑀡𑁆𑀡𑀁 𑀦𑀤𑀺𑀁 𑀓𑀸𑀓𑀧𑁂𑀬𑁆𑀬𑀫𑀸𑀳𑀼, 𑀦 𑀳𑀺 𑀅𑀧𑀼𑀡𑁆𑀡𑀸 𑀦𑀤𑀻 ‘‘𑀓𑀸𑀓𑀧𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀸𑀧𑀺 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀓𑀸𑀓𑁂𑀦 𑀧𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑀤𑀸 𑀦𑀁 ‘‘𑀓𑀸𑀓𑀧𑁂𑀬𑁆𑀬𑀸’’𑀢𑀺 𑀯𑀤𑀦𑁆𑀢𑀺. 𑀚𑀸𑀢𑀁 𑀬𑀯𑀁 𑀬𑁂𑀦 𑀘 𑀕𑀼𑀬𑁆𑀳𑀫𑀸𑀳𑀽𑀢𑀺 𑀬𑀯𑀦𑁆𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁, 𑀇𑀥 𑀧𑀦 𑀲𑀩𑁆𑀩𑀫𑁆𑀧𑀺 𑀚𑀸𑀢𑀁 𑀉𑀕𑁆𑀕𑀢𑀁 𑀲𑀫𑁆𑀧𑀦𑁆𑀦𑀢𑀭𑀼𑀡𑀲𑀲𑁆𑀲𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀬𑀤𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑀓𑀸𑀓𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀤𑀸 𑀕𑀼𑀬𑁆𑀳𑀢𑀻𑀢𑀺 𑀕𑀼𑀬𑁆𑀳𑀁. 𑀓𑀺𑀁 𑀕𑀼𑀬𑁆𑀳𑀢𑀺? 𑀓𑀸𑀓𑀁. 𑀇𑀢𑀺 𑀓𑀸𑀓𑀲𑁆𑀲 𑀕𑀼𑀬𑁆𑀳𑀁 𑀓𑀸𑀓𑀕𑀼𑀬𑁆𑀳𑀦𑁆𑀢𑀺 𑀢𑀁 𑀯𑀤𑀫𑀸𑀦𑀸 𑀓𑀸𑀓𑁂𑀦 𑀕𑀼𑀬𑁆𑀳𑀯𑀘𑀦𑀲𑁆𑀲 𑀓𑀸𑀭𑀡𑀪𑀽𑀢𑁂𑀦 ‘‘𑀕𑀼𑀬𑁆𑀳’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀦 𑀘 𑀕𑀼𑀬𑁆𑀳𑀫𑀸𑀳𑀽’’𑀢𑀺. 𑀤𑀽𑀭𑀁 𑀕𑀢𑀁 𑀬𑁂𑀦 𑀘 𑀅𑀯𑁆𑀳𑀬𑀦𑁆𑀢𑀻𑀢𑀺 𑀤𑀽𑀭𑀁 𑀕𑀢𑀁 𑀯𑀺𑀧𑁆𑀧𑀯𑀼𑀢𑁆𑀣𑀁 𑀧𑀺𑀬𑀧𑀼𑀕𑁆𑀕𑀮𑀁 𑀬𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀲𑀘𑁂 𑀇𑀢𑁆𑀣𑀦𑁆𑀦𑀸𑀫𑁄 𑀆𑀕𑀘𑁆𑀙𑀢𑀺, 𑀯𑀲𑁆𑀲 𑀓𑀸𑀓𑀸𑀢𑀺 𑀯𑀸 𑀯𑀲𑁆𑀲𑀦𑁆𑀢𑀜𑁆𑀜𑁂𑀯 𑀯𑀸 𑀲𑀼𑀢𑁆𑀯𑀸 ‘‘𑀬𑀣𑀸 𑀓𑀸𑀓𑁄 𑀯𑀲𑁆𑀲𑀢𑀺, 𑀇𑀢𑁆𑀣𑀦𑁆𑀦𑀸𑀫𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀤𑀦𑁆𑀢𑀸 𑀬𑁂𑀦 𑀘 𑀅𑀯𑁆𑀳𑀬𑀦𑁆𑀢𑀺 𑀓𑀣𑁂𑀦𑁆𑀢𑀺 𑀫𑀦𑁆𑀢𑁂𑀦𑁆𑀢𑀺, 𑀉𑀤𑀸𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀢𑁆𑀬𑀸𑀕𑀢𑁄𑀢𑀺 𑀲𑁄 𑀢𑁂 𑀆𑀦𑀻𑀢𑁄. 𑀳𑀦𑁆𑀤 𑀘 𑀪𑀼𑀜𑁆𑀚, 𑀩𑁆𑀭𑀸𑀳𑁆𑀫𑀡𑀸𑀢𑀺 𑀕𑀡𑁆𑀳, 𑀩𑁆𑀭𑀸𑀳𑁆𑀫𑀡, 𑀪𑀼𑀜𑁆𑀚𑀲𑁆𑀲𑀼 𑀦𑀁, 𑀔𑀸𑀤 𑀇𑀤𑀁 𑀓𑀸𑀓𑀫𑀁𑀲𑀦𑁆𑀢𑀺 𑀅𑀢𑁆𑀣𑁄.

𑀇𑀢𑀺 ¶ 𑀭𑀸𑀚𑀸 𑀇𑀫𑀁 𑀕𑀸𑀣𑀁 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑁂𑀲𑁂𑀲𑀺. 𑀲𑁄 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 ‘‘𑀭𑀸𑀚𑀸 𑀫𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁮.

‘‘𑀬𑀢𑁄 ¶ 𑀫𑀁 𑀲𑀭𑀢𑀻 𑀭𑀸𑀚𑀸, 𑀯𑀸𑀬𑀲𑀫𑁆𑀧𑀺 𑀧𑀳𑁂𑀢𑀯𑁂;

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀅𑀲𑀢𑀻𑀬𑁂𑀯 𑀧𑀸𑀧𑀺𑀬𑀸’’𑀢𑀺.

𑀢𑀢𑁆𑀣 𑀬𑀢𑁄 𑀫𑀁 𑀲𑀭𑀢𑀻 𑀭𑀸𑀚𑀸, 𑀯𑀸𑀬𑀲𑀫𑁆𑀧𑀺 𑀧𑀳𑁂𑀢𑀯𑁂𑀢𑀺 𑀬𑀤𑀸 𑀭𑀸𑀚𑀸 𑀯𑀸𑀬𑀲𑀫𑀁𑀲𑀁 𑀮𑀪𑀺𑀢𑁆𑀯𑀸 𑀢𑀫𑁆𑀧𑀺 𑀧𑀳𑁂𑀢𑀼𑀁 𑀫𑀁 𑀲𑀭𑀢𑀺. 𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘𑀸𑀢𑀺 𑀬𑀤𑀸 𑀧𑀦𑀲𑁆𑀲 𑀏𑀢𑁂 𑀳𑀁𑀲𑀸𑀤𑀬𑁄 𑀉𑀧𑀦𑀻𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀓𑀸𑀦𑀺 𑀳𑀁𑀲𑀫𑀁𑀲𑀸𑀤𑀻𑀦𑀺 𑀮𑀘𑁆𑀙𑀢𑀺, 𑀢𑀤𑀸 𑀫𑀁 𑀓𑀲𑁆𑀫𑀸 𑀦 𑀲𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄? 𑀅𑀝𑁆𑀞𑀓𑀣𑀸𑀬𑀁 ¶ 𑀧𑀦 ‘‘𑀳𑀁𑀲𑀓𑁄𑀜𑁆𑀘𑀫𑀬𑀽𑀭𑀸𑀦’’𑀦𑁆𑀢𑀺 𑀧𑀸𑀞𑁄. 𑀲𑁄 𑀲𑀼𑀦𑁆𑀤𑀭𑀢𑀭𑀸, 𑀇𑀫𑁂𑀲𑀁 𑀳𑀁𑀲𑀸𑀤𑀻𑀦𑀁 𑀫𑀁𑀲𑀁 𑀮𑀪𑀺𑀢𑁆𑀯𑀸 𑀓𑀲𑁆𑀫𑀸 𑀫𑀁 𑀦 𑀲𑀭𑀺𑀲𑁆𑀲𑀢𑀺, 𑀲𑀭𑀺𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀲𑀢𑀻𑀬𑁂𑀯 𑀧𑀸𑀧𑀺𑀬𑀸𑀢𑀺 𑀬𑀁 𑀯𑀸 𑀢𑀁 𑀯𑀸 𑀮𑀪𑀺𑀢𑁆𑀯𑀸 𑀲𑀭𑀡𑀁 𑀦𑀸𑀫 𑀲𑀼𑀦𑁆𑀤𑀭𑀁, 𑀮𑁄𑀓𑀲𑁆𑀫𑀺𑀁 𑀧𑀦 𑀅𑀲𑀢𑀺𑀬𑁂𑀯 𑀧𑀸𑀧𑀺𑀬𑀸, 𑀅𑀲𑀢𑀺𑀓𑀭𑀡𑀁𑀬𑁂𑀯 𑀳𑀻𑀦𑀁 𑀮𑀸𑀫𑀓𑀁, 𑀢𑀜𑁆𑀘 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀦𑀢𑁆𑀣𑀺. 𑀲𑀭𑀢𑀺 𑀫𑀁 𑀭𑀸𑀚𑀸, 𑀆𑀕𑀫𑀦𑀁 𑀫𑁂 𑀧𑀘𑁆𑀘𑀸𑀲𑀻𑀲𑀢𑀺, 𑀢𑀲𑁆𑀫𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀬𑀸𑀦𑀁 𑀬𑁄𑀚𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺, 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀼𑀡𑁆𑀡𑀦𑀤𑀻𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁧𑁫] 𑁫. 𑀓𑀘𑁆𑀙𑀧𑀚𑀸𑀢𑀓𑀯𑀡𑁆𑀡𑀦𑀸

𑀅𑀯𑀥𑀻 𑀯𑀢 𑀅𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀳𑀸𑀢𑀓𑁆𑀓𑀸𑀭𑀺𑀚𑀸𑀢𑀓𑁂 (𑀚𑀸. 𑁧.𑁧𑁩.𑁧𑁦𑁪 𑀆𑀤𑀬𑁄) 𑀆𑀯𑀺-𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀓𑀸𑀮𑀺𑀓𑁄 𑀇𑀤𑀸𑀦𑁂𑀯 𑀯𑀸𑀘𑀸𑀬 𑀳𑀢𑁄, 𑀧𑀼𑀩𑁆𑀩𑁂𑀧𑀺 𑀯𑀸𑀘𑀸𑀬 𑀳𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺. 𑀲𑁄 𑀧𑀦 𑀭𑀸𑀚𑀸 𑀩𑀳𑀼𑀪𑀸𑀡𑀻 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂 𑀅𑀜𑁆𑀜𑁂𑀲𑀁 ¶ 𑀯𑀘𑀦𑀲𑁆𑀲 𑀑𑀓𑀸𑀲𑁄 𑀦𑀸𑀫 𑀦𑀢𑁆𑀣𑀺. 𑀩𑁄𑀥𑀺𑀲𑀢𑁆𑀢𑁄 ¶ 𑀢𑀲𑁆𑀲 𑀢𑀁 𑀩𑀳𑀼𑀪𑀸𑀡𑀺𑀢𑀁 𑀯𑀸𑀭𑁂𑀢𑀼𑀓𑀸𑀫𑁄 𑀏𑀓𑀁 𑀉𑀧𑀸𑀬𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀓𑀘𑁆𑀙𑀧𑁄 𑀯𑀲𑀢𑀺, 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀕𑁄𑀘𑀭𑀸𑀬 𑀘𑀭𑀦𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀅𑀓𑀁𑀲𑀼. 𑀢𑁂 𑀤𑀴𑁆𑀳𑀯𑀺𑀲𑁆𑀲𑀸𑀲𑀺𑀓𑀸 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀓𑀘𑁆𑀙𑀧𑀁 𑀆𑀳𑀁𑀲𑀼 𑁋 ‘‘𑀲𑀫𑁆𑀫 𑀓𑀘𑁆𑀙𑀧, 𑀅𑀫𑁆𑀳𑀸𑀓𑀁 𑀳𑀺𑀫𑀯𑀦𑁆𑀢𑁂 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀢𑀮𑁂 𑀓𑀜𑁆𑀘𑀦𑀕𑀼𑀳𑀸𑀬𑀁 𑀯𑀲𑀦𑀝𑁆𑀞𑀸𑀦𑀁 𑀭𑀫𑀡𑀻𑀬𑁄 𑀧𑀤𑁂𑀲𑁄, 𑀕𑀘𑁆𑀙𑀲𑀺 𑀅𑀫𑁆𑀳𑀸𑀓𑀁 𑀲𑀤𑁆𑀥𑀺’’𑀦𑁆𑀢𑀺. ‘‘𑀅𑀳𑀁 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺? ‘‘𑀫𑀬𑀁 𑀢𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫, 𑀲𑀘𑁂 𑀢𑁆𑀯𑀁 𑀫𑀼𑀔𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀓𑀣𑁂𑀲𑁆𑀲𑀲𑀻’’𑀢𑀺. ‘‘𑀭𑀓𑁆𑀔𑀺𑀲𑁆𑀲𑀸𑀫𑀺, 𑀲𑀸𑀫𑀺, 𑀕𑀳𑁂𑀢𑁆𑀯𑀸 𑀫𑀁 𑀕𑀘𑁆𑀙𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀏𑀓𑀁 𑀤𑀡𑁆𑀟𑀓𑀁 𑀓𑀘𑁆𑀙𑀧𑁂𑀦 𑀟𑀁𑀲𑀸𑀧𑁂𑀢𑁆𑀯𑀸 𑀲𑀬𑀁 ¶ 𑀢𑀲𑁆𑀲 𑀉𑀪𑁄 𑀓𑁄𑀝𑀺𑀬𑁄 𑀟𑀁𑀲𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀢𑀁 𑀢𑀣𑀸 𑀳𑀁𑀲𑁂𑀳𑀺 𑀦𑀻𑀬𑀫𑀸𑀦𑀁 𑀕𑀸𑀫𑀤𑀸𑀭𑀓𑀸 𑀤𑀺𑀲𑁆𑀯𑀸 ‘‘𑀤𑁆𑀯𑁂 𑀳𑀁𑀲𑀸 𑀓𑀘𑁆𑀙𑀧𑀁 𑀤𑀡𑁆𑀟𑀓𑁂𑀦 𑀳𑀭𑀦𑁆𑀢𑀻’’𑀢𑀺 𑀆𑀳𑀁𑀲𑀼.

𑀓𑀘𑁆𑀙𑀧𑁄 ‘‘𑀬𑀤𑀺 𑀫𑀁 𑀲𑀳𑀸𑀬𑀓𑀸 𑀦𑁂𑀦𑁆𑀢𑀺, 𑀢𑀼𑀫𑁆𑀳𑀸𑀓𑀁 𑀏𑀢𑁆𑀣 𑀓𑀺𑀁 𑀤𑀼𑀝𑁆𑀞𑀘𑁂𑀝𑀓𑀸’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀳𑀁𑀲𑀸𑀦𑀁 𑀲𑀻𑀖𑀯𑁂𑀕𑀢𑀸𑀬 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀸𑀚𑀦𑀺𑀯𑁂𑀲𑀦𑀲𑁆𑀲 𑀉𑀧𑀭𑀺𑀪𑀸𑀕𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀤𑀝𑁆𑀞𑀝𑁆𑀞𑀸𑀦𑀢𑁄 𑀤𑀡𑁆𑀟𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀓𑀸𑀲𑀗𑁆𑀕𑀡𑁂 𑀧𑀢𑀺𑀢𑁆𑀯𑀸 𑀤𑁆𑀯𑁂𑀪𑀸𑀕𑁄 𑀅𑀳𑁄𑀲𑀺, ‘‘𑀓𑀘𑁆𑀙𑀧𑁄 𑀆𑀓𑀸𑀲𑀢𑁄 𑀧𑀢𑀺𑀢𑁆𑀯𑀸 𑀤𑁆𑀯𑁂𑀥𑀸 𑀪𑀺𑀦𑁆𑀦𑁄’’𑀢𑀺 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀤𑀸𑀬 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀘𑁆𑀙𑀧𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀧𑀡𑁆𑀟𑀺𑀢, 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀏𑀲 𑀧𑀢𑀺𑀢𑁄’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ‘‘𑀘𑀺𑀭𑀧𑀝𑀺𑀓𑀗𑁆𑀔𑁄𑀳𑀁 𑀭𑀸𑀚𑀸𑀦𑀁 𑀑𑀯𑀤𑀺𑀢𑀼𑀓𑀸𑀫𑁄 𑀉𑀧𑀸𑀬𑀁 𑀉𑀧𑀥𑀸𑀭𑁂𑀦𑁆𑀢𑁄 𑀘𑀭𑀸𑀫𑀺, 𑀇𑀫𑀺𑀦𑀸 𑀓𑀘𑁆𑀙𑀧𑁂𑀦 𑀳𑀁𑀲𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀓𑀢𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀳𑀺 𑀇𑀫𑀁 ‘𑀳𑀺𑀫𑀯𑀦𑁆𑀢𑀁 𑀦𑁂𑀲𑁆𑀲𑀸𑀫𑀸'𑀢𑀺 𑀤𑀡𑁆𑀟𑀓𑀁 𑀟𑀁𑀲𑀸𑀧𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀅𑀣 𑀇𑀫𑀺𑀦𑀸 𑀓𑀲𑁆𑀲𑀘𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀭𑀓𑁆𑀔𑀺𑀢𑀫𑀼𑀔𑀢𑀸𑀬 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑁂𑀦 𑀤𑀡𑁆𑀟𑀓𑀸 𑀯𑀺𑀲𑁆𑀲𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁 ¶ 𑀆𑀓𑀸𑀲𑀢𑁄 𑀧𑀢𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀆𑀫 𑀫𑀳𑀸𑀭𑀸𑀚, 𑀅𑀢𑀺𑀫𑀼𑀔𑀭𑀸 𑀦𑀸𑀫 𑀅𑀧𑀭𑀺𑀬𑀦𑁆𑀢𑀯𑀘𑀦𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁨𑁯.

‘‘𑀅𑀯𑀥𑀻 𑀯𑀢 𑀅𑀢𑁆𑀢𑀸𑀦𑀁, 𑀓𑀘𑁆𑀙𑀧𑁄 𑀩𑁆𑀬𑀸𑀳𑀭𑀁 𑀕𑀺𑀭𑀁;

𑀲𑀼𑀕𑁆𑀕𑀳𑀻𑀢𑀲𑁆𑀫𑀺𑀁 𑀓𑀝𑁆𑀞𑀲𑁆𑀫𑀺𑀁, 𑀯𑀸𑀘𑀸𑀬 𑀲𑀓𑀺𑀬𑀸𑀯𑀥𑀺.

𑁧𑁩𑁦.

‘‘𑀏𑀢𑀫𑁆𑀧𑀺 ¶ 𑀤𑀺𑀲𑁆𑀯𑀸 𑀦𑀭𑀯𑀻𑀭𑀺𑀬𑀲𑁂𑀝𑁆𑀞, 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁;

𑀧𑀲𑁆𑀲𑀲𑀺 𑀩𑀳𑀼𑀪𑀸𑀡𑁂𑀦, 𑀓𑀘𑁆𑀙𑀧𑀁 𑀩𑁆𑀬𑀲𑀦𑀁 𑀕𑀢’’𑀦𑁆𑀢𑀺.

𑀢𑀢𑁆𑀣 𑀅𑀯𑀥𑀻 𑀯𑀢𑀸𑀢𑀺 𑀖𑀸𑀢𑁂𑀲𑀺 𑀯𑀢. 𑀩𑁆𑀬𑀸𑀳𑀭𑀦𑁆𑀢𑀺 𑀩𑁆𑀬𑀸𑀳𑀭𑀦𑁆𑀢𑁄. 𑀲𑀼𑀕𑁆𑀕𑀳𑀻𑀢𑀲𑁆𑀫𑀺𑀁 𑀓𑀝𑁆𑀞𑀲𑁆𑀫𑀺𑀦𑁆𑀢𑀺 𑀫𑀼𑀔𑁂𑀦 𑀲𑀼𑀝𑁆𑀞𑀼 𑀟𑀁𑀲𑀺𑀢𑁆𑀯𑀸 𑀕𑀳𑀺𑀢𑁂 𑀤𑀡𑁆𑀟𑀓𑁂. 𑀯𑀸𑀘𑀸𑀬 𑀲𑀓𑀺𑀬𑀸𑀯𑀥𑀻𑀢𑀺 𑀅𑀢𑀺𑀫𑀼𑀔𑀭𑀢𑀸𑀬 𑀅𑀓𑀸𑀮𑁂 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀤𑀝𑁆𑀞𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀸𑀬 𑀲𑀓𑀸𑀬 𑀯𑀸𑀘𑀸𑀬 𑀅𑀢𑁆𑀢𑀸𑀦𑀁 𑀅𑀯𑀥𑀺 𑀖𑀸𑀢𑁂𑀲𑀺. 𑀏𑀯𑀫𑁂𑀲 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀦 𑀅𑀜𑁆𑀜𑀣𑀸𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀫𑁆𑀧𑀺 𑀓𑀸𑀭𑀡𑀁 𑀤𑀺𑀲𑁆𑀯𑀸. 𑀦𑀭𑀯𑀻𑀭𑀺𑀬𑀲𑁂𑀝𑁆𑀞𑀸𑀢𑀺 𑀦𑀭𑁂𑀲𑀼 𑀯𑀻𑀭𑀺𑀬𑁂𑀦 𑀲𑁂𑀝𑁆𑀞 𑀉𑀢𑁆𑀢𑀫𑀯𑀻𑀭𑀺𑀬 𑀭𑀸𑀚𑀯𑀭. 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀦𑁆𑀢𑀺 𑀲𑀘𑁆𑀘𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀼𑀲𑀮𑀫𑁂𑀯 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀫𑀼𑀜𑁆𑀘𑁂𑀬𑁆𑀬 𑀦𑀺𑀘𑁆𑀙𑀸𑀭𑁂𑀬𑁆𑀬, 𑀢𑀫𑁆𑀧𑀺 𑀳𑀺𑀢𑀁 𑀓𑀸𑀮𑀬𑀼𑀢𑁆𑀢𑀁, 𑀦 𑀅𑀢𑀺𑀯𑁂𑀮𑀁, 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀅𑀧𑀭𑀺𑀬𑀦𑁆𑀢𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬. 𑀧𑀲𑁆𑀲𑀲𑀻𑀢𑀺 𑀦𑀦𑀼 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀲𑀺. 𑀩𑀳𑀼𑀪𑀸𑀡𑁂𑀦𑀸𑀢𑀺 𑀩𑀳𑀼𑀪𑀡𑀦𑁂𑀦. 𑀓𑀘𑁆𑀙𑀧𑀁 𑀩𑁆𑀬𑀲𑀦𑀁 𑀕𑀢𑀦𑁆𑀢𑀺 𑀏𑀢𑀁 𑀓𑀘𑁆𑀙𑀧𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀦𑁆𑀢𑀺.

𑀭𑀸𑀚𑀸 ¶ ‘‘𑀫𑀁 𑀲𑀦𑁆𑀥𑀸𑀬 𑀪𑀸𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀅𑀫𑁆𑀳𑁂 𑀲𑀦𑁆𑀥𑀸𑀬 𑀓𑀣𑁂𑀲𑀺, 𑀧𑀡𑁆𑀟𑀺𑀢𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀢𑁆𑀯𑀁 𑀯𑀸 𑀳𑁄𑀳𑀺 𑀅𑀜𑁆𑀜𑁄 𑀯𑀸, 𑀬𑁄 𑀓𑁄𑀘𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀪𑀸𑀲𑀦𑁆𑀢𑁄 𑀏𑀯𑀭𑀽𑀧𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀭𑀸𑀚𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀺𑀭𑀫𑀺𑀢𑁆𑀯𑀸 𑀫𑀦𑁆𑀤𑀪𑀸𑀡𑀻 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀘𑁆𑀙𑀧𑁄 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀤𑁆𑀯𑁂 𑀫𑀳𑀸𑀣𑁂𑀭𑀸, 𑀭𑀸𑀚𑀸 𑀆𑀦𑀦𑁆𑀤𑁄, 𑀅𑀫𑀘𑁆𑀘𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀘𑁆𑀙𑀧𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁧𑁬] 𑁬. 𑀫𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸

𑀦 𑀫𑀸𑀬𑀫𑀕𑁆𑀕𑀺 𑀢𑀧𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀇𑀢𑁆𑀣𑀻 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀲𑀽𑀮𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 ¶ 𑀅𑀗𑁆𑀕𑀸𑀭𑁂𑀲𑀼 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀢𑀁 𑀧𑀢𑁆𑀢𑁄 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀅𑀮𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀓𑁂𑀯𑀝𑁆𑀝𑀸 𑀚𑀸𑀮𑁂 𑀮𑀕𑁆𑀕𑀁 𑀫𑀘𑁆𑀙𑀁 𑀉𑀤𑁆𑀥𑀭𑀺𑀢𑁆𑀯𑀸 𑀉𑀡𑁆𑀳𑀯𑀸𑀮𑀼𑀓𑀸𑀧𑀺𑀝𑁆𑀞𑁂 𑀞𑀧𑁂𑀢𑁆𑀯𑀸 ‘‘𑀅𑀗𑁆𑀕𑀸𑀭𑁂𑀲𑀼 𑀦𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀲𑀽𑀮𑀁 𑀢𑀘𑁆𑀙𑀺𑀁𑀲𑀼. 𑀫𑀘𑁆𑀙𑁄 𑀫𑀘𑁆𑀙𑀺𑀁 𑀆𑀭𑀩𑁆𑀪 𑀧𑀭𑀺𑀤𑁂𑀯𑀫𑀸𑀦𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁩𑁧.

‘‘𑀦 𑀫𑀸𑀬𑀫𑀕𑁆𑀕𑀺 𑀢𑀧𑀢𑀺, 𑀦 𑀲𑀽𑀮𑁄 𑀲𑀸𑀥𑀼𑀢𑀘𑁆𑀙𑀺𑀢𑁄;

𑀬𑀜𑁆𑀘 𑀫𑀁 𑀫𑀜𑁆𑀜𑀢𑁂 𑀫𑀘𑁆𑀙𑀻, 𑀅𑀜𑁆𑀜𑀁 𑀲𑁄 𑀭𑀢𑀺𑀬𑀸 𑀕𑀢𑁄.

𑁧𑁩𑁨.

‘‘𑀲𑁄 𑀫𑀁 𑀤𑀳𑀢𑀺 𑀭𑀸𑀕𑀕𑁆𑀕𑀺, 𑀘𑀺𑀢𑁆𑀢𑀁 𑀘𑀽𑀧𑀢𑀧𑁂𑀢𑀺 𑀫𑀁;

𑀚𑀸𑀮𑀺𑀦𑁄 𑀫𑀼𑀜𑁆𑀘𑀣𑀸𑀬𑀺𑀭𑀸 𑀫𑀁, 𑀦 𑀓𑀸𑀫𑁂 𑀳𑀜𑁆𑀜𑀢𑁂 𑀓𑁆𑀯𑀘𑀻’’𑀢𑀺.

𑀢𑀢𑁆𑀣 ¶ 𑀦 𑀫𑀸𑀬𑀫𑀕𑁆𑀕𑀺 𑀢𑀧𑀢𑀻𑀢𑀺 𑀦 𑀫𑀁 𑀅𑀬𑀁 𑀅𑀕𑁆𑀕𑀺 𑀢𑀧𑀢𑀺, 𑀦 𑀢𑀸𑀧𑀁 𑀚𑀦𑁂𑀢𑀺, 𑀦 𑀲𑁄𑀘𑀬𑀢𑀻𑀢𑀺 𑀅𑀢𑁆𑀣𑁄. 𑀦 𑀲𑀽𑀮𑁄𑀢𑀺 𑀅𑀬𑀁 𑀲𑀽𑀮𑁄𑀧𑀺 𑀲𑀸𑀥𑀼𑀢𑀘𑁆𑀙𑀺𑀢𑁄 𑀫𑀁 𑀦 𑀢𑀧𑀢𑀺, 𑀦 𑀫𑁂 𑀲𑁄𑀓𑀁 𑀉𑀧𑁆𑀧𑀸𑀤𑁂𑀢𑀺. 𑀬𑀜𑁆𑀘 𑀫𑀁 𑀫𑀜𑁆𑀜𑀢𑁂𑀢𑀺 𑀬𑀁 𑀧𑀦 𑀫𑀁 𑀫𑀘𑁆𑀙𑀻 𑀏𑀯𑀁 𑀫𑀜𑁆𑀜𑀢𑀺 ‘‘𑀅𑀜𑁆𑀜𑀁 𑀫𑀘𑁆𑀙𑀺𑀁 𑀲𑁄 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺𑀬𑀸 𑀕𑀢𑁄’’𑀢𑀺, 𑀢𑀤𑁂𑀯 ¶ 𑀫𑀁 𑀢𑀧𑀢𑀺 𑀲𑁄𑀘𑀬𑀢𑀺. 𑀲𑁄 𑀫𑀁 𑀤𑀳𑀢𑀻𑀢𑀺 𑀬𑁄 𑀧𑀦𑁂𑀲 𑀭𑀸𑀕𑀕𑁆𑀕𑀺, 𑀲𑁄 𑀫𑀁 𑀤𑀳𑀢𑀺 𑀛𑀸𑀧𑁂𑀢𑀺. 𑀘𑀺𑀢𑁆𑀢𑀁 𑀘𑀽𑀧𑀢𑀧𑁂𑀢𑀺 𑀫𑀦𑁆𑀢𑀺 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀓𑀁 𑀫𑀫 𑀘𑀺𑀢𑁆𑀢𑀫𑁂𑀯 𑀘 𑀫𑀁 𑀉𑀧𑀢𑀸𑀧𑁂𑀢𑀺 𑀓𑀺𑀮𑀫𑁂𑀢𑀺 𑀯𑀺𑀳𑁂𑀞𑁂𑀢𑀺. 𑀚𑀸𑀮𑀺𑀦𑁄𑀢𑀺 𑀓𑁂𑀯𑀝𑁆𑀝𑁂 𑀆𑀮𑀧𑀢𑀺. 𑀢𑁂 𑀳𑀺 𑀚𑀸𑀮𑀲𑁆𑀲 𑀅𑀢𑁆𑀣𑀺𑀢𑀸𑀬 ‘‘𑀚𑀸𑀮𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀼𑀜𑁆𑀘𑀣𑀸𑀬𑀺𑀭𑀸 𑀫𑀦𑁆𑀢𑀺 𑀫𑀼𑀜𑁆𑀘𑀣 𑀫𑀁 𑀲𑀸𑀫𑀺𑀦𑁄𑀢𑀺 𑀬𑀸𑀘𑀢𑀺. 𑀦 𑀓𑀸𑀫𑁂 𑀳𑀜𑁆𑀜𑀢𑁂 𑀓𑁆𑀯𑀘𑀻𑀢𑀺 𑀓𑀸𑀫𑁂 𑀧𑀢𑀺𑀝𑁆𑀞𑀺𑀢𑁄 𑀓𑀸𑀫𑁂𑀦 𑀦𑀻𑀬𑀫𑀸𑀦𑁄 𑀲𑀢𑁆𑀢𑁄 𑀦 𑀓𑁆𑀯𑀘𑀺 𑀳𑀜𑁆𑀜𑀢𑀺. 𑀦 𑀳𑀺 𑀢𑀁 𑀢𑀼𑀫𑁆𑀳𑀸𑀤𑀺𑀲𑀸 𑀳𑀦𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸𑀢𑀺 𑀧𑀭𑀺𑀤𑁂𑀯𑀢𑀺. 𑀅𑀣 𑀯𑀸 𑀓𑀸𑀫𑁂𑀢𑀺 𑀳𑁂𑀢𑀼𑀯𑀘𑀦𑁂 𑀪𑀼𑀫𑁆𑀫𑀁, 𑀓𑀸𑀫𑀳𑁂𑀢𑀼 𑀫𑀘𑁆𑀙𑀺𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀦𑀸𑀫 𑀦 𑀓𑁆𑀯𑀘𑀺 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀳𑀜𑁆𑀜𑀢𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀦𑀤𑀻𑀢𑀻𑀭𑀁 𑀕𑀢𑁄 𑀢𑀲𑁆𑀲 𑀫𑀘𑁆𑀙𑀲𑁆𑀲 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑁂𑀯𑀝𑁆𑀝𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀫𑀘𑁆𑀙𑀁 𑀫𑁄𑀘𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺 ¶ . ‘‘𑀢𑀤𑀸 𑀫𑀘𑁆𑀙𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀫𑀘𑁆𑀙𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁧𑁭] 𑁭. 𑀲𑁂𑀕𑁆𑀕𑀼𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑁄 𑀮𑁄𑀓𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑀡𑁆𑀡𑀺𑀓𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀏𑀓𑀓𑀦𑀺𑀧𑀸𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥𑀸𑀧𑀺 𑀲𑀢𑁆𑀣𑀸 𑀢𑀁 ‘‘𑀓𑀺𑀁, 𑀉𑀧𑀸𑀲𑀓, 𑀘𑀺𑀭𑀲𑁆𑀲𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀧𑀡𑁆𑀡𑀺𑀓𑀉𑀧𑀸𑀲𑀓𑁄 ‘‘𑀥𑀻𑀢𑀸 𑀫𑁂, 𑀪𑀦𑁆𑀢𑁂, 𑀦𑀺𑀘𑁆𑀘𑀁 𑀧𑀳𑀁𑀲𑀺𑀢𑀫𑀼𑀔𑀻, 𑀢𑀫𑀳𑀁 𑀯𑀻𑀫𑀁𑀲𑀺𑀢𑁆𑀯𑀸 𑀏𑀓𑀲𑁆𑀲 𑀓𑀼𑀮𑀤𑀸𑀭𑀓𑀲𑁆𑀲 𑀅𑀤𑀸𑀲𑀺𑀁, 𑀢𑀢𑁆𑀣 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀆𑀕𑀦𑁆𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀺’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀔𑁄, 𑀉𑀧𑀸𑀲𑀓, 𑀇𑀤𑀸𑀦𑁂𑀯𑁂𑀲𑀸 𑀲𑀻𑀮𑀯𑀢𑀻, 𑀧𑀼𑀩𑁆𑀩𑁂𑀧𑀺 𑀲𑀻𑀮𑀯𑀢𑀻, 𑀢𑁆𑀯𑀜𑁆𑀘 𑀦 𑀇𑀤𑀸𑀦𑁂𑀯𑁂𑀢𑀁 𑀯𑀻𑀫𑀁𑀲𑀲𑀺, 𑀧𑀼𑀩𑁆𑀩𑁂𑀧𑀺 𑀯𑀻𑀫𑀁𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀢𑀤𑀸 𑀅𑀬𑀫𑁂𑀯 ¶ 𑀧𑀡𑁆𑀡𑀺𑀓𑀉𑀧𑀸𑀲𑀓𑁄 ‘‘𑀥𑀻𑀢𑀭𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀇𑀘𑁆𑀙𑀦𑁆𑀢𑁄 ¶ 𑀯𑀺𑀬 𑀳𑀢𑁆𑀣𑁂 𑀕𑀡𑁆𑀳𑀺. 𑀅𑀣 𑀦𑀁 𑀧𑀭𑀺𑀤𑁂𑀯𑀫𑀸𑀦𑀁 𑀧𑀞𑀫𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁧𑁩𑁩.

‘‘𑀲𑀩𑁆𑀩𑁄 𑀮𑁄𑀓𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺, 𑀅𑀓𑁄𑀯𑀺𑀤𑀸 𑀕𑀸𑀫𑀥𑀫𑁆𑀫𑀲𑁆𑀲 𑀲𑁂𑀕𑁆𑀕𑀼;

𑀓𑁄𑀫𑀸𑀭𑀺 𑀓𑁄 𑀦𑀸𑀫 𑀢𑀯𑀚𑁆𑀚 𑀥𑀫𑁆𑀫𑁄, 𑀬𑀁 𑀢𑁆𑀯𑀁 𑀕𑀳𑀺𑀢𑀸 𑀧𑀯𑀦𑁂 𑀧𑀭𑁄𑀤𑀲𑀻’’𑀢𑀺.

𑀢𑀢𑁆𑀣 𑀲𑀩𑁆𑀩𑁄 𑀮𑁄𑀓𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻𑀢𑀺, 𑀅𑀫𑁆𑀫, 𑀲𑀓𑀮𑁄𑀧𑀺 𑀲𑀢𑁆𑀢𑀮𑁄𑀓𑁄 𑀏𑀢𑀺𑀲𑁆𑀲𑀸 𑀓𑀸𑀫𑀲𑁂𑀯𑀦𑀸𑀬 𑀅𑀢𑁆𑀢𑀫𑀦𑁄 𑀚𑀸𑀢𑁄. 𑀅𑀓𑁄𑀯𑀺𑀤𑀸 𑀕𑀸𑀫𑀥𑀫𑁆𑀫𑀲𑁆𑀲 𑀲𑁂𑀕𑁆𑀕𑀽𑀢𑀺 𑀲𑁂𑀕𑁆𑀕𑀽𑀢𑀺 𑀢𑀲𑁆𑀲𑀸 𑀦𑀸𑀫𑀁. 𑀢𑁂𑀦 𑀢𑁆𑀯𑀁 𑀧𑀦, 𑀅𑀫𑁆𑀫, 𑀲𑁂𑀕𑁆𑀕𑀼 𑀅𑀓𑁄𑀯𑀺𑀤𑀸 𑀕𑀸𑀫𑀥𑀫𑁆𑀫𑀲𑁆𑀲, 𑀇𑀫𑀲𑁆𑀫𑀺𑀁 𑀕𑀸𑀫𑀥𑀫𑁆𑀫𑁂 𑀯𑀲𑀮𑀥𑀫𑁆𑀫𑁂 𑀅𑀓𑀼𑀲𑀮𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀫𑀸𑀭𑀺 𑀓𑁄 𑀦𑀸𑀫 𑀢𑀯𑀚𑁆𑀚 𑀥𑀫𑁆𑀫𑁄𑀢𑀺, 𑀅𑀫𑁆𑀫, 𑀓𑀼𑀫𑀸𑀭𑀺 𑀓𑁄 𑀦𑀸𑀫𑁂𑀲 𑀢𑀯 𑀅𑀚𑁆𑀚 𑀲𑀪𑀸𑀯𑁄. 𑀬𑀁 𑀢𑁆𑀯𑀁 𑀕𑀳𑀺𑀢𑀸 𑀧𑀯𑀦𑁂 𑀧𑀭𑁄𑀤𑀲𑀻𑀢𑀺 𑀢𑁆𑀯𑀁 𑀫𑀬𑀸 𑀇𑀫𑀲𑁆𑀫𑀺𑀁 𑀧𑀯𑀦𑁂 𑀲𑀦𑁆𑀣𑀯𑀯𑀲𑁂𑀦 𑀳𑀢𑁆𑀣𑁂 𑀕𑀳𑀺𑀢𑀸 𑀧𑀭𑁄𑀤𑀲𑀺 ¶ 𑀦 𑀲𑀫𑁆𑀧𑀝𑀺𑀘𑁆𑀙𑀲𑀺, 𑀓𑁄 𑀏𑀲 𑀢𑀯 𑀲𑀪𑀸𑀯𑁄, 𑀓𑀺𑀁 𑀓𑀼𑀫𑀸𑀭𑀺𑀓𑀸𑀬𑁂𑀯 𑀢𑁆𑀯𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑀺𑀓𑀸 ‘‘𑀆𑀫, 𑀢𑀸𑀢, 𑀓𑀼𑀫𑀸𑀭𑀺𑀓𑀸𑀬𑁂𑀯𑀸𑀳𑀁, 𑀦𑀸𑀳𑀁 𑀫𑁂𑀣𑀼𑀦𑀥𑀫𑁆𑀫𑀁 𑀦𑀸𑀫 𑀚𑀸𑀦𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁪.

‘‘𑀬𑁄 𑀤𑀼𑀓𑁆𑀔𑀨𑀼𑀝𑁆𑀞𑀸𑀬 𑀪𑀯𑁂𑀬𑁆𑀬 𑀢𑀸𑀡𑀁, 𑀲𑁄 𑀫𑁂 𑀧𑀺𑀢𑀸 𑀤𑀼𑀩𑁆𑀪𑀺 𑀯𑀦𑁂 𑀓𑀭𑁄𑀢𑀺;

𑀲𑀸 𑀓𑀲𑁆𑀲 𑀓𑀦𑁆𑀤𑀸𑀫𑀺 𑀯𑀦𑀲𑁆𑀲 𑀫𑀚𑁆𑀛𑁂, 𑀬𑁄 𑀢𑀸𑀬𑀺𑀢𑀸 𑀲𑁄 𑀲𑀳𑀲𑀁 𑀓𑀭𑁄𑀢𑀻’’𑀢𑀺.

𑀲𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀬𑁂𑀯. 𑀇𑀢𑀺 𑀲𑁄 𑀧𑀡𑁆𑀡𑀺𑀓𑁄 𑀢𑀤𑀸 𑀥𑀻𑀢𑀭𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑁂𑀳𑀁 𑀦𑁂𑀢𑁆𑀯𑀸 𑀓𑀼𑀮𑀤𑀸𑀭𑀓𑀲𑁆𑀲 𑀤𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀡𑁆𑀡𑀺𑀓𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀥𑀻𑀢𑀸 𑀥𑀻𑀢𑀸𑀬𑁂𑀯, 𑀧𑀺𑀢𑀸 𑀧𑀺𑀢𑀸𑀬𑁂𑀯 𑀅𑀳𑁄𑀲𑀺, 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀓𑀸 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑁂𑀕𑁆𑀕𑀼𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁧𑁮] 𑁮. 𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸

𑀲𑀞𑀲𑁆𑀲 ¶ ¶ 𑀲𑀸𑀞𑁂𑀬𑁆𑀬𑀫𑀺𑀤𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀽𑀝𑀯𑀸𑀡𑀺𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀳𑀺 𑀓𑀽𑀝𑀯𑀸𑀡𑀺𑀚𑁄 𑀘 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀘 𑀤𑁆𑀯𑁂 𑀯𑀸𑀡𑀺𑀚𑀸 𑀫𑀺𑀢𑁆𑀢𑀺𑀓𑀸 𑀳𑀼𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀪𑀡𑁆𑀟𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀧𑀼𑀩𑁆𑀩𑀦𑁆𑀢𑀢𑁄 𑀅𑀧𑀭𑀦𑁆𑀢𑀁 𑀯𑀺𑀘𑀭𑀫𑀸𑀦𑀸 𑀯𑁄𑀳𑀸𑀭𑀁 𑀓𑀢𑁆𑀯𑀸 𑀩𑀳𑀼𑀁 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀓𑀽𑀝𑀯𑀸𑀡𑀺𑀚𑀁 𑀆𑀳 𑁋 ‘‘𑀲𑀫𑁆𑀫, 𑀪𑀡𑁆𑀟𑀁 𑀪𑀸𑀚𑁂𑀫𑀸’’𑀢𑀺. 𑀓𑀽𑀝𑀯𑀸𑀡𑀺𑀚𑁄 ‘‘𑀅𑀬𑀁 𑀤𑀻𑀖𑀭𑀢𑁆𑀢𑀁 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀤𑀼𑀩𑁆𑀪𑁄𑀚𑀦𑁂𑀦 𑀓𑀺𑀮𑀦𑁆𑀢𑁄 𑀅𑀢𑁆𑀢𑀦𑁄 𑀖𑀭𑁂 𑀦𑀸𑀦𑀕𑁆𑀕𑀭𑀲𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀚𑀻𑀭𑀓𑁂𑀦 𑀫𑀭𑀺𑀲𑁆𑀲𑀢𑀺, 𑀅𑀣 𑀲𑀩𑁆𑀩𑀫𑁆𑀧𑁂𑀢𑀁 𑀪𑀡𑁆𑀟𑀁 𑀫𑀬𑁆𑀳𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀓𑁆𑀔𑀢𑁆𑀢𑀁 𑀦 𑀫𑀦𑀸𑀧𑀁, 𑀤𑀺𑀯𑀲𑁄 𑀦 𑀫𑀦𑀸𑀧𑁄, 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀺 ¶ , 𑀧𑀼𑀦𑀤𑀺𑀯𑀲𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑀁 𑀔𑁂𑀧𑁂𑀢𑀺. 𑀅𑀣 𑀦𑀁 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀪𑀸𑀚𑀸𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀟𑁆𑀠𑀫𑀸𑀲𑀫𑀢𑁆𑀢𑁄 𑀫𑁂, 𑀪𑀦𑁆𑀢𑁂, 𑀆𑀕𑀢𑀲𑁆𑀲𑀸’’𑀢𑀺 𑀯𑀢𑁆𑀯𑀸 ‘‘𑀅𑀣 𑀓𑀲𑁆𑀫𑀸 𑀏𑀯𑀁 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀉𑀧𑀸𑀲𑀓, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀽𑀝𑀯𑀸𑀡𑀺𑀚𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄 𑀅𑀳𑁄𑀲𑀺. 𑀢𑀤𑀸 𑀕𑀸𑀫𑀯𑀸𑀲𑀻 𑀘 𑀦𑀕𑀭𑀯𑀸𑀲𑀻 𑀘 𑀤𑁆𑀯𑁂 𑀯𑀸𑀡𑀺𑀚𑀸 𑀫𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀕𑀸𑀫𑀯𑀸𑀲𑀻 𑀦𑀕𑀭𑀯𑀸𑀲𑀺𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘 𑀨𑀸𑀮𑀲𑀢𑀸𑀦𑀺 𑀞𑀧𑁂𑀲𑀺. 𑀲𑁄 𑀢𑁂 𑀨𑀸𑀮𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀨𑀸𑀮𑀸𑀦𑀁 𑀞𑀧𑀺𑀢𑀝𑁆𑀞𑀸𑀦𑁂 𑀫𑀽𑀲𑀺𑀓𑀯𑀘𑁆𑀘𑀁 𑀆𑀓𑀺𑀭𑀺𑀢𑁆𑀯𑀸 𑀞𑀧𑁂𑀲𑀺. 𑀅𑀧𑀭𑀪𑀸𑀕𑁂 𑀕𑀸𑀫𑀯𑀸𑀲𑀻 𑀆𑀕𑀦𑁆𑀢𑁆𑀯𑀸 ‘‘𑀨𑀸𑀮𑁂 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀓𑀽𑀝𑀯𑀸𑀡𑀺𑀚𑁄 ‘‘𑀨𑀸𑀮𑀸 𑀢𑁂 𑀫𑀽𑀲𑀺𑀓𑀸𑀳𑀺 𑀔𑀸𑀤𑀺𑀢𑀸’’𑀢𑀺 𑀫𑀽𑀲𑀺𑀓𑀯𑀘𑁆𑀘𑀁 𑀤𑀲𑁆𑀲𑁂𑀲𑀺. 𑀇𑀢𑀭𑁄 ‘‘𑀔𑀸𑀤𑀺𑀢𑀸𑀯 𑀳𑁄𑀦𑁆𑀢𑀼, 𑀫𑀽𑀲𑀺𑀓𑀸𑀳𑀺 𑀔𑀸𑀤𑀺𑀢𑁂 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀦𑁆𑀳𑀸𑀦𑀢𑁆𑀣𑀸𑀬 𑀢𑀲𑁆𑀲 𑀧𑀼𑀢𑁆𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀲 𑀲𑀳𑀸𑀬𑀓𑀲𑁆𑀲 𑀕𑁂𑀳𑁂 ‘‘𑀇𑀫𑀲𑁆𑀲 𑀓𑀢𑁆𑀣𑀘𑀺 𑀕𑀦𑁆𑀢𑀼𑀁 𑀫𑀸 𑀅𑀤𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂 ¶ 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀓𑀽𑀝𑀯𑀸𑀡𑀺𑀚𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑁄 ‘‘𑀧𑀼𑀢𑁆𑀢𑁄 𑀫𑁂 𑀓𑀳’’𑀦𑁆𑀢𑀺 𑀆𑀳. ‘‘𑀲𑀫𑁆𑀫, 𑀢𑀯 𑀧𑀼𑀢𑁆𑀢𑀁 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀫𑀫 𑀉𑀤𑀓𑁂 𑀦𑀺𑀫𑀼𑀕𑁆𑀕𑀓𑀸𑀮𑁂 𑀏𑀓𑁄 𑀓𑀼𑀮𑀮𑁄 𑀆𑀕𑀦𑁆𑀢𑁆𑀯𑀸 𑀢𑀯 𑀧𑀼𑀢𑁆𑀢𑀁 𑀦𑀔𑀧𑀜𑁆𑀚𑀭𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀢𑁄, 𑀅𑀳𑀁 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀯𑀺𑀭𑀯𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄𑀧𑀺 𑀫𑁄𑀘𑁂𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺. ‘‘𑀢𑁆𑀯𑀁 𑀫𑀼𑀲𑀸 𑀪𑀡𑀲𑀺, 𑀓𑀼𑀮𑀮𑀸 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀻’’𑀢𑀺. ‘‘𑀲𑀫𑁆𑀫, 𑀳𑁄𑀢𑀼, 𑀅𑀬𑀼𑀢𑁆𑀢𑁂𑀧𑀺 𑀳𑁄𑀦𑁆𑀢𑁂 𑀅𑀳𑀁 𑀓𑀺𑀁 𑀓𑀭𑁄𑀫𑀺, 𑀓𑀼𑀮𑀮𑁂𑀦𑁂𑀯 𑀢𑁂 𑀧𑀼𑀢𑁆𑀢𑁄 𑀦𑀻𑀢𑁄’’𑀢𑀺. 𑀲𑁄 𑀢𑀁 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 ‘‘𑀅𑀭𑁂 𑀤𑀼𑀝𑁆𑀞𑀘𑁄𑀭 𑀫𑀦𑀼𑀲𑁆𑀲𑀫𑀸𑀭𑀓 ¶ , 𑀇𑀤𑀸𑀦𑀺 𑀢𑀁 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 𑀓𑀟𑁆𑀠𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺. 𑀲𑁄 ‘‘𑀫𑀫 𑀭𑀼𑀘𑁆𑀘𑀦𑀓𑀫𑁂𑀯 𑀓𑀭𑁄𑀲𑀻’’𑀢𑀺 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀓𑀽𑀝𑀯𑀸𑀡𑀺𑀚𑁄 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀅𑀬𑀁, 𑀲𑀸𑀫𑀺, 𑀫𑀫 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀕𑀢𑁄, ‘𑀓𑀳𑀁 𑀫𑁂 𑀧𑀼𑀢𑁆𑀢𑁄’𑀢𑀺 𑀯𑀼𑀢𑁆𑀢𑁂 ‘𑀓𑀼𑀮𑀮𑁂𑀦 𑀳𑀝𑁄’𑀢𑀺 𑀆𑀳, 𑀯𑀺𑀦𑀺𑀘𑁆𑀙𑀺𑀦𑀣 ¶ 𑀫𑁂 𑀅𑀟𑁆𑀟’’𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀘𑁆𑀘𑀁 𑀪𑀡𑁂’’𑀢𑀺 𑀇𑀢𑀭𑀁 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀆𑀫, 𑀲𑀸𑀫𑀺, 𑀅𑀳𑀁 𑀢𑀁 𑀆𑀤𑀸𑀬 𑀕𑀢𑁄, 𑀲𑁂𑀦𑁂𑀦 𑀧𑀳𑀝𑀪𑀸𑀯𑁄 𑀲𑀘𑁆𑀘𑀫𑁂𑀯, 𑀲𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀮𑁄𑀓𑁂 𑀓𑀼𑀮𑀮𑀸 𑀦𑀸𑀫 𑀤𑀸𑀭𑀓𑁂 𑀳𑀭𑀦𑁆𑀢𑀻’’𑀢𑀺? ‘‘𑀲𑀸𑀫𑀺, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀼𑀮𑀮𑀸 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀫𑀽𑀲𑀺𑀓𑀸 𑀧𑀦 𑀅𑀬𑀨𑀸𑀮𑁂 𑀔𑀸𑀤𑀦𑁆𑀢𑀻’’𑀢𑀺. ‘‘𑀇𑀤𑀁 𑀓𑀺𑀁 𑀦𑀸𑀫𑀸’’𑀢𑀺? ‘‘𑀲𑀸𑀫𑀺, 𑀫𑀬𑀸 𑀏𑀢𑀲𑁆𑀲 𑀖𑀭𑁂 𑀧𑀜𑁆𑀘 𑀨𑀸𑀮𑀲𑀢𑀸𑀦𑀺 𑀞𑀧𑀺𑀢𑀸𑀦𑀺, 𑀲𑁆𑀯𑀸𑀬𑀁 ‘𑀨𑀸𑀮𑀸 𑀢𑁂 𑀫𑀽𑀲𑀺𑀓𑀸𑀳𑀺 𑀔𑀸𑀤𑀺𑀢𑀸’𑀢𑀺 𑀯𑀢𑁆𑀯𑀸 ‘𑀇𑀤𑀁 𑀢𑁂 𑀨𑀸𑀮𑁂 𑀔𑀸𑀤𑀺𑀢𑀫𑀽𑀲𑀺𑀓𑀸𑀦𑀁 𑀯𑀘𑁆𑀘’𑀦𑁆𑀢𑀺 𑀯𑀘𑁆𑀘𑀁 𑀤𑀲𑁆𑀲𑁂𑀢𑀺, 𑀲𑀸𑀫𑀺, 𑀫𑀽𑀲𑀺𑀓𑀸 𑀘𑁂 𑀨𑀸𑀮𑁂 𑀔𑀸𑀤𑀦𑁆𑀢𑀺, 𑀓𑀼𑀮𑀮𑀸𑀧𑀺 𑀤𑀸𑀭𑀓𑁂 𑀳𑀭𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀦 𑀔𑀸𑀤𑀦𑁆𑀢𑀺, 𑀲𑁂𑀦𑀸𑀧𑀺 𑀢𑀁 𑀦 𑀳𑀭𑀺𑀲𑁆𑀲𑀦𑁆𑀢𑀺. 𑀏𑀲𑁄 𑀧𑀦 ‘𑀨𑀸𑀮𑀸 𑀢𑁂 𑀫𑀽𑀲𑀺𑀓𑀸𑀳𑀺 𑀔𑀸𑀤𑀺𑀢𑀸’𑀢𑀺 𑀯𑀤𑀢𑀺, 𑀢𑁂𑀲𑀁 𑀔𑀸𑀤𑀺𑀢𑀪𑀸𑀯𑀁 𑀯𑀸 𑀅𑀔𑀸𑀤𑀺𑀢𑀪𑀸𑀯𑀁 𑀯𑀸 𑀚𑀸𑀦𑀸𑀣, 𑀅𑀟𑁆𑀟𑀁 ¶ 𑀫𑁂 𑀯𑀺𑀦𑀺𑀘𑁆𑀙𑀺𑀦𑀣𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀞𑀲𑁆𑀲 𑀧𑀝𑀺𑀲𑀸𑀞𑁂𑀬𑁆𑀬𑀁 𑀓𑀢𑁆𑀯𑀸 𑀚𑀺𑀦𑀺𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀘𑀺𑀦𑁆𑀢𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀲𑀼𑀝𑁆𑀞𑀼 𑀢𑁂 𑀘𑀺𑀦𑁆𑀢𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁩𑁫.

‘‘𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀫𑀺𑀁𑀤 𑀲𑀼𑀘𑀺𑀦𑁆𑀢𑀺𑀢𑀁, 𑀧𑀘𑁆𑀘𑁄𑀟𑁆𑀟𑀺𑀢𑀁 𑀧𑀝𑀺𑀓𑀽𑀝𑀲𑁆𑀲 𑀓𑀽𑀝𑀁;

𑀨𑀸𑀮𑀁 𑀘𑁂 𑀔𑀸𑀤𑁂𑀬𑁆𑀬𑀼𑀁 𑀫𑀽𑀲𑀺𑀓𑀸, 𑀓𑀲𑁆𑀫𑀸 𑀓𑀼𑀫𑀸𑀭𑀁 𑀓𑀼𑀮𑀮𑀸 𑀦 𑀳𑀭𑁂𑀬𑁆𑀬𑀼𑀁.

𑁧𑁩𑁬.

‘‘𑀓𑀽𑀝𑀲𑁆𑀲 𑀳𑀺 𑀲𑀦𑁆𑀢𑀺 𑀓𑀽𑀝𑀓𑀽𑀝𑀸, 𑀪𑀯𑀢𑀺 𑀘𑀸𑀧𑀺 𑀦𑀺𑀓𑀢𑀺𑀦𑁄 𑀦𑀺𑀓𑀢𑁆𑀬𑀸;

𑀤𑁂𑀳𑀺 𑀧𑀼𑀢𑁆𑀢𑀦𑀝𑁆𑀞 𑀨𑀸𑀮𑀦𑀝𑁆𑀞𑀲𑁆𑀲 𑀨𑀸𑀮𑀁, 𑀫𑀸 𑀢𑁂 𑀧𑀼𑀢𑁆𑀢𑀫𑀳𑀸𑀲𑀺 𑀨𑀸𑀮𑀦𑀝𑁆𑀞𑁄’’𑀢𑀺.

𑀢𑀢𑁆𑀣 𑀲𑀞𑀲𑁆𑀲𑀸𑀢𑀺 𑀲𑀞𑀪𑀸𑀯𑁂𑀦 𑀓𑁂𑀭𑀸𑀝𑀺𑀓𑁂𑀦 ‘‘𑀏𑀓𑀁 𑀉𑀧𑀸𑀬𑀁 𑀓𑀢𑁆𑀯𑀸 𑀧𑀭𑀲𑀦𑁆𑀢𑀓𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀞𑀲𑁆𑀲. 𑀲𑀸𑀞𑁂𑀬𑁆𑀬𑀫𑀺𑀤𑀁 𑀲𑀼𑀘𑀺𑀦𑁆𑀢𑀺𑀢𑀦𑁆𑀢𑀺 𑀇𑀤𑀁 𑀧𑀝𑀺𑀲𑀸𑀞𑁂𑀬𑁆𑀬𑀁 𑀘𑀺𑀦𑁆𑀢𑁂𑀦𑁆𑀢𑁂𑀦 𑀢𑀬𑀸 𑀲𑀼𑀝𑁆𑀞𑀼 𑀘𑀺𑀦𑁆𑀢𑀺𑀢𑀁. 𑀧𑀘𑁆𑀘𑁄𑀟𑁆𑀟𑀺𑀢𑀁 𑀧𑀝𑀺𑀓𑀽𑀝𑀲𑁆𑀲 𑀓𑀽𑀝𑀦𑁆𑀢𑀺 𑀓𑀽𑀝𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀬𑀸 𑀧𑀝𑀺𑀓𑀽𑀝𑀁 𑀲𑀼𑀝𑁆𑀞𑀼 𑀧𑀘𑁆𑀘𑁄𑀟𑁆𑀟𑀺𑀢𑀁, 𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀑𑀟𑁆𑀟𑀺𑀢𑀲𑀤𑀺𑀲𑀫𑁂𑀯 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀨𑀸𑀮𑀁 𑀘𑁂 𑀔𑀸𑀤𑁂𑀬𑁆𑀬𑀼𑀁 𑀫𑀽𑀲𑀺𑀓𑀸𑀢𑀺 𑀬𑀤𑀺 𑀫𑀽𑀲𑀺𑀓𑀸 𑀨𑀸𑀮𑀁 𑀔𑀸𑀤𑁂𑀬𑁆𑀬𑀼𑀁. 𑀓𑀲𑁆𑀫𑀸 𑀓𑀼𑀫𑀸𑀭𑀁 𑀓𑀼𑀮𑀮𑀸 𑀦 𑀳𑀭𑁂𑀬𑁆𑀬𑀼𑀦𑁆𑀢𑀺 𑀫𑀽𑀲𑀺𑀓𑀸𑀲𑀼 𑀨𑀸𑀮𑁂 𑀔𑀸𑀤𑀦𑁆𑀢𑀻𑀲𑀼 𑀓𑀼𑀮𑀮𑀸 𑀓𑀺𑀁 𑀓𑀸𑀭𑀡𑀸 𑀓𑀼𑀫𑀸𑀭𑀁 𑀦𑁄 𑀳𑀭𑁂𑀬𑁆𑀬𑀼𑀁.

𑀓𑀽𑀝𑀲𑁆𑀲 ¶ ¶ 𑀳𑀺 𑀲𑀦𑁆𑀢𑀺 𑀓𑀽𑀝𑀓𑀽𑀝𑀸𑀢𑀺 𑀢𑁆𑀯𑀁 ‘‘𑀅𑀳𑀫𑁂𑀯 𑀫𑀽𑀲𑀺𑀓𑀸𑀳𑀺 𑀨𑀸𑀮𑁂 𑀔𑀸𑀤𑀸𑀧𑀺𑀢𑀧𑀼𑀭𑀺𑀲𑁄 𑀓𑀽𑀝𑁄’’𑀢𑀺 𑀫𑀜𑁆𑀜𑀲𑀺, 𑀢𑀸𑀤𑀺𑀲𑀲𑁆𑀲 𑀧𑀦 𑀓𑀽𑀝𑀲𑁆𑀲 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀩𑀳𑀽 𑀓𑀽𑀝𑀸 𑀲𑀦𑁆𑀢𑀺, 𑀓𑀽𑀝𑀲𑁆𑀲 𑀓𑀽𑀝𑀸𑀢𑀺 𑀓𑀽𑀝𑀧𑀝𑀺𑀓𑀽𑀝𑀸𑀦𑀁 𑀏𑀢𑀁 𑀦𑀸𑀫𑀁, 𑀓𑀽𑀝𑀲𑁆𑀲 𑀧𑀝𑀺𑀓𑀽𑀝𑀸 𑀦𑀸𑀫 𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀯𑀢𑀺 𑀘𑀸𑀧𑀺 𑀦𑀺𑀓𑀢𑀺𑀦𑁄 𑀦𑀺𑀓𑀢𑁆𑀬𑀸𑀢𑀺 𑀦𑀺𑀓𑀢𑀺𑀦𑁄 𑀦𑁂𑀓𑀢𑀺𑀓𑀲𑁆𑀲 𑀯𑀜𑁆𑀘𑀦𑀓𑀧𑀼𑀕𑁆𑀕𑀮𑀲𑁆𑀲 𑀦𑀺𑀓𑀢𑁆𑀬𑀸 𑀅𑀧𑀭𑁄 𑀦𑀺𑀓𑀢𑀺𑀓𑀸𑀭𑀓𑁄 𑀯𑀜𑁆𑀘𑀦𑀓𑀧𑀼𑀭𑀺𑀲𑁄 𑀪𑀯𑀢𑀺𑀬𑁂𑀯. 𑀤𑁂𑀳𑀺 𑀧𑀼𑀢𑁆𑀢𑀦𑀝𑁆𑀞 𑀨𑀸𑀮𑀦𑀝𑁆𑀞𑀲𑁆𑀲 𑀨𑀸𑀮𑀦𑁆𑀢𑀺 𑀅𑀫𑁆𑀪𑁄 𑀦𑀝𑁆𑀞𑀧𑀼𑀢𑁆𑀢 𑀧𑀼𑀭𑀺𑀲, 𑀏𑀢𑀲𑁆𑀲 𑀦𑀝𑁆𑀞𑀨𑀸𑀮𑀲𑁆𑀲 𑀨𑀸𑀮𑀁 𑀤𑁂𑀳𑀺. 𑀫𑀸 𑀢𑁂 𑀧𑀼𑀢𑁆𑀢𑀫𑀳𑀸𑀲𑀺 𑀨𑀸𑀮𑀦𑀝𑁆𑀞𑁄𑀢𑀺 𑀲𑀘𑁂 𑀳𑀺𑀲𑁆𑀲 𑀨𑀸𑀮𑀁 𑀦 𑀤𑀲𑁆𑀲𑀲𑀺, 𑀧𑀼𑀢𑁆𑀢𑀁 𑀢𑁂 𑀳𑀭𑀺𑀲𑁆𑀲𑀢𑀺, 𑀢𑀁 𑀢𑁂 𑀏𑀲 𑀫𑀸 𑀳𑀭𑀢𑀼, 𑀨𑀸𑀮𑀫𑀲𑁆𑀲 𑀤𑁂𑀳𑀻𑀢𑀺. ‘‘𑀤𑁂𑀫𑀺, 𑀲𑀸𑀫𑀺, 𑀲𑀘𑁂 𑀫𑁂 𑀧𑀼𑀢𑁆𑀢𑀁 𑀤𑁂𑀢𑀻’’𑀢𑀺. ‘‘𑀤𑁂𑀫𑀺, 𑀲𑀸𑀫𑀺, 𑀲𑀘𑁂 𑀫𑁂 𑀨𑀸𑀮𑁂 𑀤𑁂𑀢𑀻’’𑀢𑀺. 𑀏𑀯𑀁 ¶ 𑀦𑀝𑁆𑀞𑀧𑀼𑀢𑁆𑀢𑁄 𑀧𑀼𑀢𑁆𑀢𑀁, 𑀦𑀝𑁆𑀞𑀨𑀸𑀮𑁄 𑀘 𑀨𑀸𑀮𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀪𑁄𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀯𑀸𑀡𑀺𑀚𑁄 𑀇𑀤𑀸𑀦𑀺 𑀓𑀽𑀝𑀯𑀸𑀡𑀺𑀚𑁄𑀯, 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀧𑀡𑁆𑀟𑀺𑀢𑀯𑀸𑀡𑀺𑀚𑁄𑀬𑁂𑀯, 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁧𑁯] 𑁯. 𑀕𑀭𑀳𑀺𑀢𑀚𑀸𑀢𑀓𑀯𑀡𑁆𑀡𑀦𑀸

𑀳𑀺𑀭𑀜𑁆𑀜𑀁 𑀫𑁂 𑀲𑀼𑀯𑀡𑁆𑀡𑀁 𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀦𑀪𑀺𑀭𑀢𑀺𑀬𑀸 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀢𑀲𑁆𑀲 𑀳𑀺 𑀧𑀘𑁆𑀘𑁂𑀓𑀁 𑀕𑀳𑀺𑀢𑀁 𑀆𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺, 𑀅𑀦𑀪𑀺𑀭𑀢𑀺𑀯𑀸𑀲𑀁 𑀯𑀲𑀦𑁆𑀢𑀁 𑀧𑀦 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀦𑁂𑀲𑀼𑀁. 𑀲𑁄 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀮𑁂𑀲𑀯𑀲𑁂𑀦𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀬𑀁, 𑀪𑀺𑀓𑁆𑀔𑀼, 𑀓𑀺𑀮𑁂𑀲𑁄 𑀦𑀸𑀫 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑁂𑀳𑀺𑀧𑀺 𑀕𑀭𑀳𑀺𑀢𑁄, 𑀢𑁆𑀯𑀁 𑀏𑀯𑀭𑀽𑀧𑁂 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀓𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑁂𑀳𑀺𑀧𑀺 𑀕𑀭𑀳𑀺𑀢𑀓𑀺𑀮𑁂𑀲𑀯𑀲𑁂𑀦 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀫𑁂𑀦𑀁 𑀏𑀓𑁄 𑀯𑀦𑀘𑀭𑀓𑁄 𑀕𑀳𑁂𑀢𑁆𑀯𑀸 ¶ 𑀆𑀦𑁂𑀢𑁆𑀯𑀸 𑀭𑀜𑁆𑀜𑁄 𑀅𑀤𑀸𑀲𑀺. 𑀲𑁄 𑀘𑀺𑀭𑀁 𑀭𑀸𑀚𑀕𑁂𑀳𑁂 𑀯𑀲𑀫𑀸𑀦𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀯𑀢𑁆𑀢𑀫𑀸𑀦𑀁 𑀓𑀺𑀭𑀺𑀬𑀁 𑀬𑁂𑀪𑀼𑀬𑁆𑀬𑁂𑀦 𑀅𑀜𑁆𑀜𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀯𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀯𑀦𑀘𑀭𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀯𑀸𑀦𑀭𑀁 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀆𑀡𑀸𑀧𑁂𑀲𑀺 ¶ , 𑀲𑁄 𑀢𑀣𑀸 𑀅𑀓𑀸𑀲𑀺. 𑀯𑀸𑀦𑀭𑀕𑀡𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀫𑀳𑀦𑁆𑀢𑁂 𑀧𑀸𑀲𑀸𑀡𑀧𑀺𑀝𑁆𑀞𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀯𑀸 ‘‘𑀲𑀫𑁆𑀫, 𑀓𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀼𑀢𑁆𑀣𑁄𑀲𑀻’’𑀢𑀺 𑀆𑀳. ‘‘𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀦𑀺𑀯𑁂𑀲𑀦𑁂’’𑀢𑀺. ‘‘𑀅𑀣 𑀓𑀣𑀁 𑀫𑀼𑀢𑁆𑀢𑁄𑀲𑀻’’𑀢𑀺? ‘‘𑀭𑀸𑀚𑀸 𑀫𑀁 𑀓𑁂𑀴𑀺𑀫𑀓𑁆𑀓𑀝𑀁 𑀓𑀢𑁆𑀯𑀸 𑀫𑀫 𑀯𑀢𑁆𑀢𑁂 𑀧𑀲𑀦𑁆𑀦𑁄 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺.

𑀅𑀣 𑀦𑀁 𑀢𑁂 𑀯𑀸𑀦𑀭𑀸 ‘‘𑀫𑀦𑀼𑀲𑁆𑀲𑀮𑁄𑀓𑁂 𑀯𑀢𑁆𑀢𑀫𑀸𑀦𑀓𑀺𑀭𑀺𑀬𑀁 𑀦𑀸𑀫 𑀢𑀼𑀫𑁆𑀳𑁂 𑀚𑀸𑀦𑀺𑀲𑁆𑀲𑀣 ¶ , 𑀅𑀫𑁆𑀳𑀸𑀓𑀫𑁆𑀧𑀺 𑀢𑀸𑀯 𑀓𑀣𑁂𑀣, 𑀲𑁄𑀢𑀼𑀓𑀸𑀫𑀫𑁆𑀳𑀸’’𑀢𑀺 𑀆𑀳𑀁𑀲𑀼. ‘‘𑀫𑀸 𑀫𑀁 𑀫𑀦𑀼𑀲𑁆𑀲𑀸𑀦𑀁 𑀓𑀺𑀭𑀺𑀬𑀁 𑀧𑀼𑀘𑁆𑀙𑀣𑀸’’𑀢𑀺. ‘‘𑀓𑀣𑁂𑀣 𑀲𑁄𑀢𑀼𑀓𑀸𑀫𑀫𑁆𑀳𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀔𑀢𑁆𑀢𑀺𑀬𑀸𑀧𑀺 𑀩𑁆𑀭𑀸𑀳𑁆𑀫𑀡𑀸𑀧𑀺 ‘𑀫𑀬𑁆𑀳𑀁 𑀫𑀬𑁆𑀳’𑀦𑁆𑀢𑀺 𑀯𑀤𑀦𑁆𑀢𑀺, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀢𑀁 𑀦 𑀚𑀸𑀦𑀦𑁆𑀢𑀺, 𑀲𑀼𑀡𑀸𑀣 𑀤𑀸𑀦𑀺 𑀢𑁂𑀲𑀁 𑀅𑀦𑁆𑀥𑀩𑀸𑀮𑀸𑀦𑀁 𑀓𑀸𑀭𑀡’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁩𑁭.

‘‘𑀳𑀺𑀭𑀜𑁆𑀜𑀁 𑀫𑁂 𑀲𑀼𑀯𑀡𑁆𑀡𑀁 𑀫𑁂, 𑀏𑀲𑀸 𑀭𑀢𑁆𑀢𑀺𑀁 𑀤𑀺𑀯𑀸 𑀓𑀣𑀸;

𑀤𑀼𑀫𑁆𑀫𑁂𑀥𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀅𑀭𑀺𑀬𑀥𑀫𑁆𑀫𑀁 𑀅𑀧𑀲𑁆𑀲𑀢𑀁.

𑁧𑁩𑁮.

‘‘𑀤𑁆𑀯𑁂 𑀤𑁆𑀯𑁂 𑀕𑀳𑀧𑀢𑀬𑁄 𑀕𑁂𑀳𑁂, 𑀏𑀓𑁄 𑀢𑀢𑁆𑀣 𑀅𑀫𑀲𑁆𑀲𑀼𑀓𑁄;

𑀮𑀫𑁆𑀩𑀢𑁆𑀣𑀦𑁄 𑀯𑁂𑀡𑀺𑀓𑀢𑁄, 𑀅𑀣𑁄 𑀅𑀗𑁆𑀓𑀺𑀢𑀓𑀡𑁆𑀡𑀓𑁄;

𑀓𑀻𑀢𑁄 𑀥𑀦𑁂𑀦 𑀩𑀳𑀼𑀦𑀸, 𑀲𑁄 𑀢𑀁 𑀯𑀺𑀢𑀼𑀤𑀢𑁂 𑀚𑀦’’𑀦𑁆𑀢𑀺.

𑀢𑀢𑁆𑀣 𑀳𑀺𑀭𑀜𑁆𑀜𑀁 𑀫𑁂 𑀲𑀼𑀯𑀡𑁆𑀡𑀁 𑀫𑁂𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀫𑁂𑀢𑀁, 𑀇𑀫𑀺𑀦𑀸 𑀧𑀦 𑀧𑀤𑀤𑁆𑀯𑀬𑁂𑀦 𑀤𑀲𑀯𑀺𑀥𑀫𑁆𑀧𑀺 𑀭𑀢𑀦𑀁 𑀲𑀩𑁆𑀩𑀁, 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀁 𑀔𑁂𑀢𑁆𑀢𑀯𑀢𑁆𑀣𑀼𑀁 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀜𑁆𑀘 𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀫𑁂 𑀇𑀤𑀁 𑀫𑁂’’𑀢𑀺 𑀆𑀳. 𑀏𑀲𑀸 𑀭𑀢𑁆𑀢𑀺𑀁 𑀤𑀺𑀯𑀸 𑀓𑀣𑀸𑀢𑀺 𑀏𑀲𑀸 𑀫𑀦𑀼𑀲𑁆𑀲𑀸𑀦𑀁 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀦𑀺𑀘𑁆𑀘𑀓𑀸𑀮𑀁 𑀓𑀣𑀸. 𑀅𑀜𑁆𑀜𑀁 𑀧𑀦 𑀢𑁂 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀸 ‘‘𑀳𑀼𑀢𑁆𑀯𑀸 𑀦 𑀪𑀯𑀦𑁆𑀢𑀻’’𑀢𑀺 𑀯𑀸 𑀦 𑀚𑀸𑀦𑀦𑁆𑀢𑀺, 𑀏𑀯𑀫𑁂𑀯 𑀧𑀭𑀺𑀤𑁂𑀯𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀤𑀼𑀫𑁆𑀫𑁂𑀥𑀸𑀦𑀦𑁆𑀢𑀺 𑀅𑀧𑁆𑀧𑀧𑀜𑁆𑀜𑀸𑀦𑀁. 𑀅𑀭𑀺𑀬𑀥𑀫𑁆𑀫𑀁 𑀅𑀧𑀲𑁆𑀲𑀢𑀦𑁆𑀢𑀺 𑀅𑀭𑀺𑀬𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀥𑀫𑁆𑀫𑀁, 𑀅𑀭𑀺𑀬𑀁 𑀯𑀸 𑀦𑀺𑀤𑁆𑀤𑁄𑀲𑀁 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀏𑀲𑀸𑀯 𑀓𑀣𑀸. 𑀅𑀜𑁆𑀜𑀸 𑀧𑀦 ‘‘𑀅𑀦𑀺𑀘𑁆𑀘𑀁 𑀯𑀸 𑀤𑀼𑀓𑁆𑀔𑀁 𑀯𑀸’’𑀢𑀺 𑀢𑁂𑀲𑀁 𑀓𑀣𑀸 𑀦𑀸𑀫 𑀦𑀢𑁆𑀣𑀺.

𑀕𑀳𑀧𑀢𑀬𑁄𑀢𑀺 ¶ 𑀕𑁂𑀳𑁂 𑀅𑀥𑀺𑀧𑀢𑀺𑀪𑀽𑀢𑀸. 𑀏𑀓𑁄 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀖𑀭𑀲𑀸𑀫𑀺𑀓𑁂𑀲𑀼 ‘‘𑀏𑀓𑁄’’𑀢𑀺 𑀫𑀸𑀢𑀼𑀕𑀸𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀯𑁂𑀡𑀺𑀓𑀢𑁄𑀢𑀺 𑀓𑀢𑀯𑁂𑀡𑀻, 𑀦𑀸𑀦𑀧𑁆𑀧𑀓𑀸𑀭𑁂𑀦 𑀲𑀡𑁆𑀞𑀸𑀧𑀺𑀢𑀓𑁂𑀲𑀓𑀮𑀸𑀧𑁄𑀢𑀺 𑀅𑀢𑁆𑀣𑁄. 𑀅𑀣𑁄 𑀅𑀗𑁆𑀓𑀺𑀢𑀓𑀡𑁆𑀡𑀓𑁄𑀢𑀺 𑀅𑀣 𑀲𑁆𑀯𑁂𑀯 𑀯𑀺𑀤𑁆𑀥𑀓𑀡𑁆𑀡𑁄 𑀙𑀺𑀤𑁆𑀤𑀓𑀡𑁆𑀡𑁄𑀢𑀺 𑀮𑀫𑁆𑀩𑀓𑀡𑁆𑀡𑀢𑀁 𑀲𑀦𑁆𑀥𑀸𑀬𑀸𑀳. 𑀓𑀻𑀢𑁄 𑀥𑀦𑁂𑀦 𑀩𑀳𑀼𑀦𑀸𑀢𑀺 𑀲𑁄 𑀧𑀦𑁂𑀲 𑀅𑀫𑀲𑁆𑀲𑀼𑀓𑁄 𑀮𑀫𑁆𑀩𑀢𑁆𑀣𑀦𑁄 𑀯𑁂𑀡𑀺𑀓𑀢𑁄 𑀅𑀗𑁆𑀓𑀺𑀢𑀓𑀡𑁆𑀡𑁄 𑀫𑀸𑀢𑀸𑀧𑀺𑀢𑀽𑀦𑀁 𑀩𑀳𑀼𑀁 ¶ 𑀥𑀦𑀁 𑀤𑀢𑁆𑀯𑀸 𑀓𑀻𑀢𑁄, 𑀫𑀡𑁆𑀟𑁂𑀢𑁆𑀯𑀸 𑀧𑀲𑀸𑀥𑁂𑀢𑁆𑀯𑀸 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀖𑀭𑀁 𑀆𑀦𑀻𑀢𑁄. 𑀲𑁄 𑀢𑀁 𑀯𑀺𑀢𑀼𑀤𑀢𑁂 𑀚𑀦𑀦𑁆𑀢𑀺 𑀲𑁄 𑀕𑀳𑀧𑀢𑀺 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ¶ 𑀢𑀲𑁆𑀫𑀺𑀁 𑀕𑁂𑀳𑁂 𑀤𑀸𑀲𑀓𑀫𑁆𑀫𑀓𑀭𑀸𑀤𑀺𑀪𑁂𑀤𑀁 𑀚𑀦𑀁 ‘‘𑀅𑀭𑁂 𑀤𑀼𑀝𑁆𑀞𑀤𑀸𑀲 𑀤𑀼𑀝𑁆𑀞𑀤𑀸𑀲𑀺, 𑀇𑀫𑀁 𑀦 𑀓𑀭𑁄𑀲𑀻’’𑀢𑀺 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀢𑀺, 𑀲𑀸𑀫𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀫𑀳𑀸𑀚𑀦𑀁 𑀯𑀺𑀘𑀸𑀭𑁂𑀢𑀺. 𑀏𑀯𑀁 𑀢𑀸𑀯 ‘‘𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑀺𑀯𑀺𑀬 𑀅𑀬𑀼𑀢𑁆𑀢’’𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑀁 𑀕𑀭𑀳𑀺.

𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀯𑀸𑀦𑀭𑀸 ‘‘𑀫𑀸 𑀓𑀣𑁂𑀣, 𑀫𑀸 𑀓𑀣𑁂𑀣, 𑀅𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀲𑁆𑀲𑀼𑀫𑁆𑀳𑀸’’𑀢𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀓𑀡𑁆𑀡𑁂 𑀤𑀴𑁆𑀳𑀁 𑀧𑀺𑀤𑀳𑀺𑀁𑀲𑀼. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀫𑁆𑀳𑁂𑀳𑀺 𑀇𑀤𑀁 𑀅𑀬𑀼𑀢𑁆𑀢𑀁 𑀲𑀼𑀢’’𑀦𑁆𑀢𑀺 𑀢𑀁 𑀞𑀸𑀦𑀫𑁆𑀧𑀺 𑀕𑀭𑀳𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀁𑀲𑀼. 𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀕𑀭𑀳𑀺𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑁄𑀬𑁂𑀯 𑀓𑀺𑀭 𑀦𑀸𑀫 𑀚𑀸𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀯𑀸𑀦𑀭𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀯𑀸𑀦𑀭𑀺𑀦𑁆𑀤𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀭𑀳𑀺𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁨𑁦] 𑁧𑁦. 𑀥𑀫𑁆𑀫𑀥𑀚𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀔𑀁 𑀚𑀻𑀯𑀺𑀢𑀭𑀽𑀧𑁄𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀲𑀦𑁆𑀢𑀸𑀲𑀫𑀢𑁆𑀢𑀫𑁆𑀧𑀺 𑀧𑀦 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀬𑀲𑀧𑀸𑀡𑀺 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀓𑀸𑀴𑀓𑁄 𑀦𑀸𑀫𑀲𑁆𑀲 𑀲𑁂𑀦𑀸𑀧𑀢𑀺 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑁂𑀯 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺 𑀦𑀸𑀫𑁂𑀦 𑀥𑀫𑁆𑀫𑀥𑀚𑁄 𑀦𑀸𑀫, 𑀭𑀜𑁆𑀜𑁄 𑀧𑀦 𑀲𑀻𑀲𑀧𑁆𑀧𑀲𑀸𑀥𑀦𑀓𑀧𑁆𑀧𑀓𑁄 𑀙𑀢𑁆𑀢𑀧𑀸𑀡𑀺 𑀦𑀸𑀫. 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀲𑁂𑀦𑀸𑀧𑀢𑀺 𑀧𑀦𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑁄 𑀮𑀜𑁆𑀚𑀁 𑀔𑀸𑀤𑀢𑀺 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑁄, 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀭𑁄𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀯𑀺𑀦𑀺𑀘𑁆𑀙𑀬𑁂 𑀧𑀭𑀸𑀚𑀺𑀢𑁄 𑀫𑀦𑀼𑀲𑁆𑀲𑁄 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑁄 𑀯𑀺𑀦𑀺𑀘𑁆𑀙𑀬𑀸 𑀦𑀺𑀓𑁆𑀔𑀦𑁆𑀢𑁄 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀁 ¶ 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀤𑀺𑀲𑁂𑀲𑀼 𑀦𑀸𑀫, 𑀲𑀸𑀫𑀺, 𑀭𑀜𑁆𑀜𑁄 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀦𑁆𑀢𑁂𑀲𑀼 𑀓𑀸𑀴𑀓𑀲𑁂𑀦𑀸𑀧𑀢𑀺 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀭𑁄𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀭𑀸𑀚𑀺𑀢𑀪𑀸𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ¶ ‘‘𑀏𑀳𑀺 𑀪𑀡𑁂, 𑀅𑀟𑁆𑀟𑀁 𑀢𑁂 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀅𑀟𑁆𑀟𑀁 𑀧𑀝𑀺𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀸𑀫𑀺𑀓𑀜𑁆𑀜𑁂𑀯 𑀲𑀸𑀫𑀺𑀓𑀁 𑀅𑀓𑀸𑀲𑀺.

𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺, 𑀲𑁄 𑀲𑀤𑁆𑀤𑁄 𑀫𑀳𑀸 𑀅𑀳𑁄𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀲𑀤𑁆𑀤𑁄 𑀦𑀸𑀫𑁂𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀥𑀫𑁆𑀫𑀥𑀚𑀧𑀡𑁆𑀟𑀺𑀢𑁂𑀦 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑁄 𑀅𑀟𑁆𑀟𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄, 𑀢𑀢𑁆𑀭𑁂𑀲 𑀲𑀸𑀥𑀼𑀓𑀸𑀭𑀲𑀤𑁆𑀤𑁄’’𑀢𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀩𑁄𑀥𑀺𑀲𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀟𑁆𑀟𑁄 𑀓𑀺𑀭 𑀢𑁂 𑀆𑀘𑀭𑀺𑀬 𑀯𑀺𑀦𑀺𑀘𑁆𑀙𑀺𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚, 𑀓𑀸𑀴𑀓𑁂𑀦 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀁 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂𑀯 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀣, 𑀫𑀬𑁆𑀳𑀜𑁆𑀘 𑀓𑀡𑁆𑀡𑀲𑀼𑀔𑀁 𑀪𑀯𑀺𑀲𑁆𑀲𑀢𑀺 𑀮𑁄𑀓𑀲𑁆𑀲 𑀘 𑀯𑀼𑀟𑁆𑀠𑀻’’𑀢𑀺 𑀯𑀢𑁆𑀯𑀸 𑀅𑀦𑀺𑀘𑁆𑀙𑀦𑁆𑀢𑀫𑁆𑀧𑀺 𑀢𑀁 ‘‘𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁄 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀢𑀺, 𑀲𑀸𑀫𑀺𑀓𑁂𑀬𑁂𑀯 𑀲𑀸𑀫𑀺𑀓𑁂 𑀓𑀭𑁄𑀢𑀺.

𑀓𑀸𑀴𑀓𑁄 𑀢𑀢𑁄 𑀧𑀝𑁆𑀞𑀸𑀬 𑀮𑀜𑁆𑀚𑀁 𑀅𑀮𑀪𑀦𑁆𑀢𑁄 𑀮𑀸𑀪𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀥𑀫𑁆𑀫𑀥𑀚𑀧𑀡𑁆𑀟𑀺𑀢𑁄 𑀢𑀯 𑀭𑀚𑁆𑀚𑀁 𑀧𑀢𑁆𑀣𑁂𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀭𑀜𑁆𑀜𑁄 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀤𑀺. 𑀭𑀸𑀚𑀸 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀫𑀸 𑀏𑀯𑀁 𑀅𑀯𑀘𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀢𑁂𑀦 ‘‘𑀲𑀘𑁂 𑀫𑁂 𑀦 𑀲𑀤𑁆𑀤𑀳𑀣, 𑀢𑀲𑁆𑀲𑀸𑀕𑀫𑀦𑀓𑀸𑀮𑁂 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀣. 𑀅𑀣𑀸𑀦𑁂𑀦 𑀲𑀓𑀮𑀦𑀕𑀭𑀲𑁆𑀲 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀓𑀢𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀢𑀲𑁆𑀲 𑀅𑀟𑁆𑀟𑀓𑀸𑀭𑀓𑀧𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀲𑁂𑀯 𑀧𑀭𑀺𑀲𑀸’’𑀢𑀺 𑀲𑀜𑁆𑀜𑀸𑀬 𑀪𑀺𑀚𑁆𑀚𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫 ¶ 𑀲𑁂𑀦𑀸𑀧𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀏𑀢𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 ¶ . ‘‘𑀑𑀴𑀸𑀭𑀺𑀓𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑀸 𑀓𑀣𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺? ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺. ‘‘𑀓𑀢𑀭𑀽𑀧𑀸𑀬𑁄’’𑀢𑀺. ‘‘𑀅𑀲𑀬𑁆𑀳𑀫𑀲𑁆𑀲 𑀓𑀫𑁆𑀫𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀢𑀁 𑀢𑁂𑀦 𑀤𑁄𑀲𑁂𑀦 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀧𑀦 𑀅𑀲𑀬𑁆𑀳𑀓𑀫𑁆𑀫’’𑀦𑁆𑀢𑀺? ‘‘𑀫𑀳𑀸𑀭𑀸𑀚, 𑀉𑀬𑁆𑀬𑀸𑀦𑀁 𑀦𑀸𑀫 𑀲𑀸𑀭𑀪𑀽𑀫𑀺𑀬𑀁 𑀭𑁄𑀧𑀺𑀢𑀁 𑀧𑀝𑀺𑀚𑀕𑁆𑀕𑀺𑀬𑀫𑀸𑀦𑀁 𑀢𑀻𑀳𑀺 𑀘𑀢𑀽𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀨𑀮𑀁 𑀤𑁂𑀢𑀺. 𑀢𑀼𑀫𑁆𑀳𑁂 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀲𑁆𑀯𑁂 𑀉𑀬𑁆𑀬𑀸𑀦𑀁 𑀓𑀻𑀴𑀺𑀲𑁆𑀲𑀸𑀫, 𑀉𑀬𑁆𑀬𑀸𑀦𑀁 𑀫𑁂 𑀫𑀸𑀧𑁂𑀳𑀻’𑀢𑀺 𑀯𑀤𑀣, 𑀲𑁄 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺. 𑀅𑀣 𑀦𑀁 𑀢𑀲𑁆𑀫𑀺𑀁 𑀤𑁄𑀲𑁂 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢, 𑀫𑀬𑁆𑀳𑀁 𑀧𑀼𑀭𑀸𑀡𑀉𑀬𑁆𑀬𑀸𑀦𑁂 𑀘𑀺𑀭𑀁 𑀓𑀻𑀴𑀺𑀫𑁆𑀳, 𑀇𑀤𑀸𑀦𑀺 𑀦𑀯𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑀼𑀓𑀸𑀫𑀫𑁆𑀳, 𑀲𑁆𑀯𑁂 𑀓𑀻𑀴𑀺𑀲𑁆𑀲𑀸𑀫, 𑀉𑀬𑁆𑀬𑀸𑀦𑀁 𑀦𑁄 𑀫𑀸𑀧𑁂𑀳𑀺, 𑀲𑀘𑁂 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀸𑀴𑀓𑁂𑀦 𑀮𑀜𑁆𑀚𑀁 𑀅𑀮𑀪𑀫𑀸𑀦𑁂𑀦 𑀭𑀸𑀚𑀸 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀲𑀓𑁆𑀓𑁄𑀦𑁆𑀢𑁄 𑀚𑀸𑀦𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀘𑀺𑀦𑁆𑀢𑀬𑀫𑀸𑀦𑁄 𑀲𑀬𑀦𑁂 𑀦𑀺𑀧𑀚𑁆𑀚𑀺, 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ¶ 𑀆𑀯𑀚𑁆𑀚𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀓𑀺𑀁 𑀘𑀺𑀦𑁆𑀢𑁂𑀲𑀺 𑀧𑀡𑁆𑀟𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺. ‘‘𑀭𑀸𑀚𑀸 𑀫𑀁 ‘𑀉𑀬𑁆𑀬𑀸𑀦𑀁 𑀫𑀸𑀧𑁂𑀳𑀻’𑀢𑀺 𑀆𑀳, 𑀢𑀁 𑀘𑀺𑀦𑁆𑀢𑁂𑀫𑀻’’𑀢𑀺. ‘‘𑀧𑀡𑁆𑀟𑀺𑀢, 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑁂 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀲𑀤𑀺𑀲𑀁 𑀉𑀬𑁆𑀬𑀸𑀦𑀁 𑀫𑀸𑀧𑁂𑀲𑁆𑀲𑀸𑀫𑀺, 𑀓𑀢𑀭𑀲𑁆𑀫𑀺𑀁 𑀞𑀸𑀦𑁂 𑀫𑀸𑀧𑁂𑀫𑀻’’𑀢𑀺? ‘‘𑀅𑀲𑀼𑀓𑀝𑁆𑀞𑀸𑀦𑁂 𑀫𑀸𑀧𑁂𑀳𑀻’’𑀢𑀺. 𑀲𑀓𑁆𑀓𑁄 𑀫𑀸𑀧𑁂𑀢𑁆𑀯𑀸 𑀤𑁂𑀯𑀧𑀼𑀭𑀫𑁂𑀯 𑀕𑀢𑁄.

𑀧𑀼𑀦𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀦𑀺𑀝𑁆𑀞𑀺𑀢𑀁 𑀢𑁂, 𑀫𑀳𑀸𑀭𑀸𑀚, 𑀉𑀬𑁆𑀬𑀸𑀦𑀁, 𑀓𑀻𑀴𑀲𑁆𑀲𑀽’’𑀢𑀺. 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀫𑀦𑁄𑀲𑀺𑀮𑀸𑀯𑀡𑁆𑀡𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 𑀤𑁆𑀯𑀸𑀭𑀝𑁆𑀝𑀸𑀮𑀓𑀲𑀫𑁆𑀧𑀦𑁆𑀦𑀁 𑀧𑀼𑀧𑁆𑀨𑀨𑀮𑀪𑀸𑀭𑀪𑀭𑀺𑀢𑀦𑀸𑀦𑀸𑀭𑀼𑀓𑁆𑀔𑀧𑀝𑀺𑀫𑀡𑁆𑀟𑀺𑀢𑀁 ¶ 𑀉𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 𑀓𑀸𑀴𑀓𑀁 𑀧𑀼𑀘𑁆𑀙𑀺 𑁋 ‘‘𑀧𑀡𑁆𑀟𑀺𑀢𑁂𑀦 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀓𑀢𑀁, 𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺. ‘‘𑀫𑀳𑀸𑀭𑀸𑀚, 𑀏𑀓𑀭𑀢𑁆𑀢𑁂𑀦 𑀉𑀬𑁆𑀬𑀸𑀦𑀁 𑀫𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀭𑀚𑁆𑀚𑀁 𑀕𑀳𑁂𑀢𑀼𑀁 𑀓𑀺𑀁 𑀦 𑀲𑀓𑁆𑀓𑁄𑀢𑀻’’𑀢𑀺? ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀅𑀧𑀭𑀫𑁆𑀧𑀺 𑀦𑀁 𑀅𑀲𑀬𑁆𑀳𑀓𑀫𑁆𑀫𑀁 𑀓𑀸𑀭𑁂𑀫𑀸’’𑀢𑀺. ‘‘𑀓𑀺𑀁 𑀓𑀫𑁆𑀫𑀁 𑀦𑀸𑀫𑀸’’𑀢𑀺? ‘‘𑀲𑀢𑁆𑀢𑀭𑀢𑀦𑀫𑀬𑀁 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀫𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀉𑀬𑁆𑀬𑀸𑀦𑀁 𑀢𑀸𑀯 𑀢𑁂 𑀫𑀸𑀧𑀺𑀢𑀁 ¶ , 𑀏𑀢𑀲𑁆𑀲 𑀧𑀦 𑀅𑀦𑀼𑀘𑁆𑀙𑀯𑀺𑀓𑀁 𑀲𑀢𑁆𑀢𑀭𑀢𑀦𑀫𑀬𑀁 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀳𑀺. 𑀲𑀘𑁂 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀲𑀓𑁆𑀓𑁄𑀦𑁆𑀢𑁄 𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣𑀲𑁆𑀲 𑀲𑀓𑁆𑀓𑁄 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀲𑀺 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀲𑀢𑀢𑀺𑀢𑁆𑀣𑀁 𑀲𑀳𑀲𑁆𑀲𑀯𑀗𑁆𑀓𑀁 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀦𑀦𑁆𑀤𑀦𑀧𑁄𑀓𑁆𑀔𑀭𑀡𑀺𑀲𑀤𑀺𑀲𑀁.

𑀧𑀼𑀦𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀫𑀸𑀧𑀺𑀢𑀸, 𑀤𑁂𑀯, 𑀧𑁄𑀓𑁆𑀔𑀭𑀡𑀻’’𑀢𑀺. 𑀭𑀸𑀚𑀸 𑀢𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺 𑀓𑀸𑀴𑀓𑀁 𑀧𑀼𑀘𑁆𑀙𑀺. ‘‘𑀉𑀬𑁆𑀬𑀸𑀦𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀕𑁂𑀳𑀁 𑀫𑀸𑀧𑁂𑀢𑀼𑀁 𑀆𑀡𑀸𑀧𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀇𑀤𑀸𑀦𑀺, 𑀆𑀘𑀭𑀺𑀬, 𑀇𑀫𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀘𑁂𑀯 𑀧𑁄𑀓𑁆𑀔𑀭𑀡𑀺𑀬𑀸 𑀘 𑀅𑀦𑀼𑀘𑁆𑀙𑀯𑀺𑀓𑀁 𑀲𑀩𑁆𑀩𑀤𑀦𑁆𑀢𑀫𑀬𑀁 𑀕𑁂𑀳𑀁 𑀫𑀸𑀧𑁂𑀳𑀺, 𑀦𑁄 𑀘𑁂 𑀫𑀸𑀧𑁂𑀲𑁆𑀲𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺 𑀆𑀳. 𑀅𑀣𑀲𑁆𑀲 𑀲𑀓𑁆𑀓𑁄 𑀕𑁂𑀳𑀫𑁆𑀧𑀺 𑀫𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀦𑀤𑀺𑀯𑀲𑁂 𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺 𑀓𑀸𑀴𑀓𑀁 𑀧𑀼𑀘𑁆𑀙𑀺. ‘‘𑀕𑁂𑀳𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀫𑀡𑀺𑀁 𑀫𑀸𑀧𑁂𑀢𑀼𑀁 𑀆𑀡𑀸𑀧𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢, 𑀇𑀫𑀲𑁆𑀲 𑀤𑀦𑁆𑀢𑀫𑀬𑀕𑁂𑀳𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀫𑀡𑀺𑀁 𑀫𑀸𑀧𑁂𑀳𑀺, 𑀫𑀡𑀺𑀆𑀮𑁄𑀓𑁂𑀦 𑀯𑀺𑀘𑀭𑀺𑀲𑁆𑀲𑀸𑀫. 𑀲𑀘𑁂 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺 𑀆𑀳. 𑀅𑀣𑀲𑁆𑀲 𑀲𑀓𑁆𑀓𑁄 𑀫𑀡𑀺𑀫𑁆𑀧𑀺 𑀫𑀸𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀧𑀼𑀦𑀤𑀺𑀯𑀲𑁂 𑀢𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ¶ . 𑀭𑀸𑀚𑀸 𑀢𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀓𑀸𑀴𑀓𑀁 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀥𑀫𑁆𑀫𑀥𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀬𑀺𑀓𑀸 𑀤𑁂𑀯𑀢𑀸 𑀅𑀢𑁆𑀣𑀺 𑀫𑀜𑁆𑀜𑁂, 𑀇𑀤𑀸𑀦𑀺 𑀬𑀁 𑀤𑁂𑀯𑀢𑀸𑀧𑀺 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀁 𑀆𑀡𑀸𑀧𑁂𑀳𑀺. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀦𑀸𑀫 𑀫𑀦𑀼𑀲𑁆𑀲𑀁 𑀤𑁂𑀯𑀢𑀸𑀧𑀺 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 ‘𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀫𑁂 𑀉𑀬𑁆𑀬𑀸𑀦𑀧𑀸𑀮𑀁 𑀫𑀸𑀧𑁂𑀳𑀻’𑀢𑀺 𑀢𑀁 𑀯𑀤𑀸𑀳𑀻’’𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀢𑀬𑀸 𑀅𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑀁, 𑀧𑁄𑀓𑁆𑀔𑀭𑀡𑀻, 𑀤𑀦𑁆𑀢𑀫𑀬𑀧𑀸𑀲𑀸𑀤𑁄, 𑀢𑀲𑁆𑀲 𑀆𑀮𑁄𑀓𑀓𑀭𑀡𑀢𑁆𑀣𑀸𑀬 𑀫𑀡𑀺𑀭𑀢𑀦𑀜𑁆𑀘 𑀫𑀸𑀧𑀺𑀢𑀁, 𑀇𑀤𑀸𑀦𑀺 𑀫𑁂 𑀉𑀬𑁆𑀬𑀸𑀦𑀭𑀓𑁆𑀔𑀓𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀬𑁆𑀬𑀸𑀦𑀧𑀸𑀮𑀁 𑀫𑀸𑀧𑁂𑀳𑀺, 𑀦𑁄 𑀘𑁂 𑀫𑀸𑀧𑁂𑀲𑁆𑀲𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀳𑁄𑀢𑀼, 𑀮𑀪𑀫𑀸𑀦𑁄 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀧𑀘𑁆𑀘𑀽𑀲𑀓𑀸𑀮𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀬𑀦𑀧𑀻𑀞𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀬𑀁 𑀅𑀢𑁆𑀢𑀦𑀸 𑀲𑀓𑁆𑀓𑀸 𑀫𑀸𑀧𑁂𑀢𑀼𑀁, 𑀢𑀁 𑀫𑀸𑀧𑁂𑀲𑀺, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀧𑀦 𑀉𑀬𑁆𑀬𑀸𑀦𑀧𑀸𑀮𑀁 𑀦 𑀲𑀓𑁆𑀓𑀸 𑀫𑀸𑀧𑁂𑀢𑀼𑀁, 𑀏𑀯𑀁 𑀲𑀦𑁆𑀢𑁂 ¶ 𑀧𑀭𑁂𑀲𑀁 𑀳𑀢𑁆𑀣𑁂 𑀫𑀭𑀡𑀢𑁄 𑀅𑀭𑀜𑁆𑀜𑁂 𑀅𑀦𑀸𑀣𑀫𑀭𑀡𑀫𑁂𑀯 𑀯𑀭𑀢𑀭’’𑀦𑁆𑀢𑀺. 𑀲𑁄 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀢𑀁 𑀥𑀫𑁆𑀫𑀁 𑀆𑀯𑀚𑁆𑀚𑀫𑀸𑀦𑁄 𑀦𑀺𑀲𑀻𑀤𑀺.

𑀲𑀓𑁆𑀓𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀯𑀦𑀘𑀭𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀲𑀼𑀔𑀼𑀫𑀸𑀮𑁄, 𑀅𑀤𑀺𑀝𑁆𑀞𑀧𑀼𑀩𑁆𑀩𑀤𑀼𑀓𑁆𑀔𑀭𑀽𑀧𑁄 𑀯𑀺𑀬 𑀇𑀫𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀓𑀺𑀁 𑀓𑀭𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁬.

‘‘𑀲𑀼𑀔𑀁 𑀚𑀻𑀯𑀺𑀢𑀭𑀽𑀧𑁄𑀲𑀺, 𑀭𑀝𑁆𑀞𑀸 𑀯𑀺𑀯𑀦𑀫𑀸𑀕𑀢𑁄;

𑀲𑁄 𑀏𑀓𑀓𑁄 𑀭𑀼𑀓𑁆𑀔𑀫𑀽𑀮𑁂, 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀻’’𑀢𑀺.

𑀢𑀢𑁆𑀣 𑀲𑀼𑀔𑀁 𑀚𑀻𑀯𑀺𑀢𑀭𑀽𑀧𑁄𑀲𑀻𑀢𑀺 𑀢𑁆𑀯𑀁 𑀲𑀼𑀔𑁂𑀦 𑀚𑀻𑀯𑀺𑀢𑀲𑀤𑀺𑀲𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄 𑀯𑀺𑀬. 𑀭𑀝𑁆𑀞𑀸𑀢𑀺 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀝𑁆𑀞𑀸𑀦𑀸. 𑀯𑀺𑀯𑀦𑀫𑀸𑀕𑀢𑁄𑀢𑀺 𑀦𑀺𑀭𑀼𑀤𑀓𑀝𑁆𑀞𑀸𑀦𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄. 𑀭𑀼𑀓𑁆𑀔𑀫𑀽𑀮𑁂𑀢𑀺 𑀭𑀼𑀓𑁆𑀔𑀲𑀫𑀻𑀧𑁂. 𑀓𑀧𑀡𑁄 𑀯𑀺𑀬 ¶ 𑀛𑀸𑀬𑀲𑀻𑀢𑀺 𑀓𑀧𑀡𑁄 𑀯𑀺𑀬 𑀏𑀓𑀓𑁄 𑀦𑀺𑀲𑀺𑀦𑁆𑀦𑁄 𑀛𑀸𑀬𑀲𑀺 𑀧𑀚𑁆𑀛𑀸𑀬𑀲𑀺, 𑀓𑀺𑀁 𑀦𑀸𑀫𑁂𑀢𑀁 𑀘𑀺𑀦𑁆𑀢𑁂𑀲𑀻𑀢𑀺 𑀧𑀼𑀘𑁆𑀙𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁦.

‘‘𑀲𑀼𑀔𑀁 ¶ 𑀚𑀻𑀯𑀺𑀢𑀭𑀽𑀧𑁄𑀲𑁆𑀫𑀺, 𑀭𑀝𑁆𑀞𑀸 𑀯𑀺𑀯𑀦𑀫𑀸𑀕𑀢𑁄;

𑀲𑁄 𑀏𑀓𑀓𑁄 𑀭𑀼𑀓𑁆𑀔𑀫𑀽𑀮𑁂, 𑀓𑀧𑀡𑁄 𑀯𑀺𑀬 𑀛𑀸𑀬𑀸𑀫𑀺;

𑀲𑀢𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭’’𑀦𑁆𑀢𑀺.

𑀢𑀢𑁆𑀣 𑀲𑀢𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀲𑀫𑁆𑀫, 𑀲𑀘𑁆𑀘𑀫𑁂𑀢𑀁, 𑀅𑀳𑀁 𑀲𑀼𑀔𑀁 𑀚𑀻𑀯𑀺𑀢𑀭𑀽𑀧𑁄 𑀭𑀝𑁆𑀞𑀸 𑀘 𑀯𑀺𑀯𑀦𑀫𑀸𑀕𑀢𑁄, 𑀲𑁄𑀳𑀁 𑀏𑀓𑀓𑁄𑀯 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀧𑀡𑁄 𑀯𑀺𑀬 𑀛𑀸𑀬𑀸𑀫𑀺. 𑀬𑀁 𑀧𑀦 𑀯𑀤𑁂𑀲𑀺 ‘‘𑀓𑀺𑀁 𑀦𑀸𑀫𑁂𑀢𑀁 𑀘𑀺𑀦𑁆𑀢𑁂𑀲𑀻’’𑀢𑀺, 𑀢𑀁 𑀢𑁂 𑀧𑀯𑁂𑀤𑁂𑀫𑀺 ‘‘𑀲𑀢𑀁 𑀥𑀫𑁆𑀫’’𑀦𑁆𑀢𑀺. 𑀅𑀳𑀜𑁆𑀳𑀺 𑀲𑀢𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀇𑀥 𑀦𑀺𑀲𑀺𑀦𑁆𑀦𑁄. 𑀲𑀢𑀁 𑀥𑀫𑁆𑀫𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀢𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀥𑀫𑁆𑀫𑀁. 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀅𑀬𑀜𑁆𑀳𑀺 𑀅𑀝𑁆𑀞𑀯𑀺𑀥𑁄 𑀮𑁄𑀓𑀥𑀫𑁆𑀫𑁄. 𑀇𑀫𑀺𑀦𑀸 𑀧𑀦 𑀅𑀩𑁆𑀪𑀸𑀳𑀢𑀸 𑀲𑀦𑁆𑀢𑁄 𑀦 𑀓𑀫𑁆𑀧𑀦𑁆𑀢𑀺 𑀦 𑀧𑀯𑁂𑀥𑁂𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀅𑀓𑀫𑁆𑀧𑀦𑀲𑀗𑁆𑀔𑀸𑀢𑁄 𑀲𑀢𑀁 𑀥𑀫𑁆𑀫𑁄 𑀇𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀻𑀢𑀺 𑀤𑀻𑀧𑁂𑀢𑀺.

𑀅𑀣 ¶ 𑀦𑀁 𑀲𑀓𑁆𑀓𑁄 ‘‘𑀏𑀯𑀁 𑀲𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀲𑁆𑀫𑀸 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺. ‘‘𑀭𑀸𑀚𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀬𑁆𑀬𑀸𑀦𑀧𑀸𑀮𑀁 𑀆𑀳𑀭𑀸𑀧𑁂𑀢𑀺, 𑀢𑀸𑀤𑀺𑀲𑀁 𑀦 𑀲𑀓𑁆𑀓𑁄𑀫𑀺 𑀮𑀤𑁆𑀥𑀼𑀁, 𑀲𑁄𑀳𑀁 ‘𑀓𑀺𑀁 𑀫𑁂 𑀧𑀭𑀲𑁆𑀲 𑀳𑀢𑁆𑀣𑁂 𑀫𑀭𑀡𑁂𑀦, 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀸𑀣𑀫𑀭𑀡𑀁 𑀫𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀥𑀸𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀅𑀳𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀫𑀬𑀸 𑀢𑁂 𑀉𑀬𑁆𑀬𑀸𑀦𑀸𑀤𑀻𑀦𑀺 𑀫𑀸𑀧𑀺𑀢𑀸𑀦𑀺, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀬𑁆𑀬𑀸𑀦𑀧𑀸𑀮𑀁 𑀫𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑁄 𑀲𑀻𑀲𑀧𑁆𑀧𑀲𑀸𑀥𑀦𑀓𑀧𑁆𑀧𑀓𑁄 𑀙𑀢𑁆𑀢𑀧𑀸𑀡𑀺 𑀦𑀸𑀫, 𑀲𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀉𑀬𑁆𑀬𑀸𑀦𑀧𑀸𑀮𑁂𑀦 𑀅𑀢𑁆𑀣𑁂 𑀲𑀢𑀺 𑀏𑀢𑀁 𑀓𑀧𑁆𑀧𑀓𑀁 𑀉𑀬𑁆𑀬𑀸𑀦𑀧𑀸𑀮𑀁 𑀓𑀸𑀢𑀼𑀁 𑀯𑀤𑁂𑀳𑀻’’𑀢𑀺. 𑀇𑀢𑀺 𑀲𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 ‘‘𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀧𑀼𑀭𑀫𑁂𑀯 𑀕𑀢𑁄.

𑀩𑁄𑀥𑀺𑀲𑀢𑁆𑀢𑁄 𑀕𑁂𑀳𑀁 ¶ 𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀙𑀢𑁆𑀢𑀧𑀸𑀡𑀺𑀫𑁆𑀧𑀺 𑀢𑀢𑁆𑀣𑁂𑀯 𑀤𑀺𑀲𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭, 𑀲𑀫𑁆𑀫 𑀙𑀢𑁆𑀢𑀧𑀸𑀡𑀺, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑁄 𑀢𑁂 𑀫𑀬𑁆𑀳𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀪𑀸𑀯𑀁 𑀆𑀘𑀺𑀓𑁆𑀔𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀓𑁆𑀓𑁄, 𑀤𑁂𑀯𑀭𑀸𑀚𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀆𑀘𑀺𑀓𑁆𑀔𑀻’’𑀢𑀺 𑀧𑀼𑀝𑁆𑀞𑁄 ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀲𑁄 ‘‘𑀆𑀫, 𑀅𑀳𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀯 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀬𑀁, 𑀫𑀳𑀸𑀭𑀸𑀚, 𑀙𑀢𑁆𑀢𑀧𑀸𑀡𑀺, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀉𑀬𑁆𑀬𑀸𑀦𑀧𑀸𑀮𑁂𑀦 𑀅𑀢𑁆𑀣𑁂 𑀲𑀢𑀺 𑀇𑀫𑀁 𑀉𑀬𑁆𑀬𑀸𑀦𑀧𑀸𑀮𑀁 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀭𑀸𑀚𑀸 ‘‘𑀢𑁆𑀯𑀁 𑀓𑀺𑀭 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑀫𑁂𑀳𑀺 𑀘𑀢𑀼𑀭𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀲𑀻’’𑀢𑀺?

‘‘𑀅𑀦𑀼𑀲𑀽𑀬𑀓𑁄 ¶ 𑀅𑀳𑀁 𑀤𑁂𑀯, 𑀅𑀫𑀚𑁆𑀚𑀧𑀸𑀬𑀓𑁄 𑀅𑀳𑀁;

𑀦𑀺𑀲𑁆𑀦𑁂𑀳𑀓𑁄 𑀅𑀳𑀁 𑀤𑁂𑀯, 𑀅𑀓𑁆𑀓𑁄𑀥𑀦𑀁 𑀅𑀥𑀺𑀝𑁆𑀞𑀺𑀢𑁄’’𑀢𑀺.

‘‘𑀫𑀬𑁆𑀳𑀜𑁆𑀳𑀺, 𑀫𑀳𑀸𑀭𑀸𑀚, 𑀉𑀲𑀽𑀬𑀸 𑀦𑀸𑀫 𑀦𑀢𑁆𑀣𑀺, 𑀫𑀚𑁆𑀚𑀁 𑀫𑁂 𑀦 𑀧𑀺𑀯𑀺𑀢𑀧𑀼𑀩𑁆𑀩𑀁, 𑀧𑀭𑁂𑀲𑀼 𑀫𑁂 𑀲𑁆𑀦𑁂𑀳𑁄 𑀯𑀸 𑀓𑁄𑀥𑁄 𑀯𑀸 𑀦 𑀪𑀽𑀢𑀧𑀽𑀩𑁆𑀩𑁄. 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺.

𑀅𑀣 𑀦𑀁 𑀭𑀸𑀚𑀸, 𑀪𑁄 𑀙𑀢𑁆𑀢𑀧𑀸𑀡𑀺, ‘‘𑀅𑀦𑀼𑀲𑀽𑀬𑀓𑁄𑀲𑁆𑀫𑀻’’𑀢𑀺 𑀯𑀤𑀲𑀻𑀢𑀺. ‘‘𑀆𑀫, 𑀤𑁂𑀯, 𑀅𑀦𑀼𑀲𑀽𑀬𑀓𑁄𑀫𑁆𑀳𑀻’’𑀢𑀺. ‘‘𑀓𑀺𑀁 𑀆𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀅𑀦𑀼𑀲𑀽𑀬𑀓𑁄 𑀚𑀸𑀢𑁄𑀲𑀻’’𑀢𑀺? ‘‘𑀲𑀼𑀡𑀸𑀳𑀺 𑀤𑁂𑀯𑀸’’𑀢𑀺 𑀅𑀢𑁆𑀢𑀦𑁄 𑀅𑀦𑀼𑀲𑀽𑀬𑀓𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀇𑀢𑁆𑀣𑀺𑀬𑀸 ¶ 𑀓𑀸𑀭𑀡𑀸 𑀭𑀸𑀚, 𑀩𑀦𑁆𑀥𑀸𑀧𑁂𑀲𑀺𑀁 𑀧𑀼𑀭𑁄𑀳𑀺𑀢𑀁;

𑀲𑁄 𑀫𑀁 𑀅𑀢𑁆𑀣𑁂 𑀦𑀺𑀯𑁂𑀤𑁂𑀲𑀺, 𑀢𑀲𑁆𑀫𑀸𑀳𑀁 𑀅𑀦𑀼𑀲𑀽𑀬𑀓𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁, 𑀤𑁂𑀯, 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁𑀬𑁂𑀯 𑀩𑀸𑀭𑀸𑀡𑀲𑀺𑀦𑀕𑀭𑁂 𑀢𑀸𑀤𑀺𑀲𑁄𑀯 𑀭𑀸𑀚𑀸 𑀳𑀼𑀢𑁆𑀯𑀸 𑀇𑀢𑁆𑀣𑀺𑀬𑀸 𑀓𑀸𑀭𑀡𑀸 𑀧𑀼𑀭𑁄𑀳𑀺𑀢𑀁 𑀩𑀦𑁆𑀥𑀸𑀧𑁂𑀲𑀺𑀁.

‘‘𑀅𑀩𑀤𑁆𑀥𑀸 𑀢𑀢𑁆𑀣 𑀩𑀚𑁆𑀛𑀦𑁆𑀢𑀺, 𑀬𑀢𑁆𑀣 𑀩𑀸𑀮𑀸 𑀧𑀪𑀸𑀲𑀭𑁂;

𑀩𑀤𑁆𑀥𑀸𑀧𑀺 𑀢𑀢𑁆𑀣 𑀫𑀼𑀘𑁆𑀘𑀦𑁆𑀢𑀺, 𑀬𑀢𑁆𑀣 𑀥𑀻𑀭𑀸 𑀧𑀪𑀸𑀲𑀭𑁂’’𑀢𑀺. (𑀚𑀸. 𑁧.𑁧.𑁧𑁨𑁦) 𑁋

𑀇𑀫𑀲𑁆𑀫𑀺𑀜𑁆𑀳𑀺 ¶ 𑀚𑀸𑀢𑀓𑁂 𑀆𑀕𑀢𑀦𑀬𑁂𑀦𑁂𑀯 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀅𑀬𑀁 𑀙𑀢𑁆𑀢𑀧𑀸𑀡𑀺 𑀭𑀸𑀚𑀸 𑀳𑀼𑀢𑁆𑀯𑀸 𑀘𑀢𑀼𑀲𑀝𑁆𑀞𑀺𑀬𑀸 𑀧𑀸𑀤𑀫𑀽𑀮𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀤𑀼𑀲𑁆𑀲𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀢𑁆𑀢𑀦𑁄 𑀫𑀦𑁄𑀭𑀣𑀁 𑀅𑀧𑀽𑀭𑁂𑀦𑁆𑀢𑀁 𑀦𑀸𑀲𑁂𑀢𑀼𑀓𑀸𑀫𑀸𑀬 𑀤𑁂𑀯𑀺𑀬𑀸 𑀧𑀭𑀺𑀪𑀺𑀦𑁆𑀦𑁄 𑀩𑀦𑁆𑀥𑀸𑀧𑁂𑀲𑀺. 𑀢𑀤𑀸 𑀦𑀁 𑀩𑀦𑁆𑀥𑀺𑀢𑁆𑀯𑀸 𑀆𑀦𑀻𑀢𑁄 𑀩𑁄𑀥𑀺𑀲𑀢𑁆𑀢𑁄 𑀬𑀣𑀸𑀪𑀽𑀢𑀁 𑀤𑁂𑀯𑀺𑀬𑀸 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀲𑀬𑀁 𑀫𑀼𑀢𑁆𑀢𑁄 𑀭𑀜𑁆𑀜𑀸 𑀩𑀦𑁆𑀥𑀸𑀧𑀺𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀧𑀸𑀤𑀫𑀽𑀮𑀺𑀓𑁂 𑀫𑁄𑀘𑁂𑀢𑁆𑀯𑀸 ‘‘𑀏𑀢𑁂𑀲𑀜𑁆𑀘 𑀤𑁂𑀯𑀺𑀬𑀸 𑀘 𑀅𑀧𑀭𑀸𑀥𑀁 𑀔𑀫𑀣, 𑀫𑀳𑀸𑀭𑀸𑀚𑀸’’𑀢𑀺 𑀑𑀯𑀤𑀺. 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀲𑀦𑁆𑀥𑀸𑀬𑀸𑀳 𑁋

‘‘𑀇𑀢𑁆𑀣𑀺𑀬𑀸 𑀓𑀸𑀭𑀡𑀸 𑀭𑀸𑀚, 𑀩𑀦𑁆𑀥𑀸𑀧𑁂𑀲𑀺𑀁 𑀧𑀼𑀭𑁄𑀳𑀺𑀢𑀁;

𑀲𑁄 𑀫𑀁 𑀅𑀢𑁆𑀣𑁂 𑀦𑀺𑀯𑁂𑀤𑁂𑀲𑀺, 𑀢𑀲𑁆𑀫𑀸𑀳𑀁 𑀅𑀦𑀼𑀲𑀽𑀬𑀓𑁄’’𑀢𑀺.

𑀢𑀤𑀸 𑀧𑀦 𑀲𑁄𑀳𑀁 𑀘𑀺𑀦𑁆𑀢𑁂𑀲𑀺𑀁 𑁋 ‘‘𑀅𑀳𑀁 𑀲𑁄𑀴𑀲 𑀲𑀳𑀲𑁆𑀲𑀇𑀢𑁆𑀣𑀺𑀬𑁄 𑀧𑀳𑀸𑀬 𑀏𑀢𑀁 𑀏𑀓𑀫𑁂𑀯 𑀓𑀺𑀮𑁂𑀲𑀯𑀲𑁂𑀦 𑀲𑀗𑁆𑀕𑀡𑁆𑀳𑀦𑁆𑀢𑁄𑀧𑀺 𑀲𑀦𑁆𑀢𑀧𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀏𑀯𑀁 𑀤𑀼𑀧𑁆𑀧𑀽𑀭𑀡𑀻𑀬𑀸𑀦𑀁 𑀇𑀢𑁆𑀣𑀻𑀦𑀁 𑀓𑀼𑀚𑁆𑀛𑀦𑀁 𑀦𑀸𑀫 𑀦𑀺𑀯𑀢𑁆𑀣𑀯𑀢𑁆𑀣𑁂 ¶ 𑀓𑀺𑀮𑀺𑀲𑁆𑀲𑀦𑁆𑀢𑁂 ‘𑀓𑀲𑁆𑀫𑀸 𑀓𑀺𑀮𑀺𑀲𑁆𑀲𑀲𑀻’𑀢𑀺 𑀓𑀼𑀚𑁆𑀛𑀦𑀲𑀤𑀺𑀲𑀁 𑀳𑁄𑀢𑀺, 𑀪𑀼𑀢𑁆𑀢𑀪𑀢𑁆𑀢𑁂 𑀕𑀽𑀣𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑁂 ‘𑀓𑀲𑁆𑀫𑀸 𑀏𑀢𑀁 𑀲𑀪𑀸𑀯𑀁 𑀆𑀧𑀚𑁆𑀚𑀲𑀻’𑀢𑀺 𑀓𑀼𑀚𑁆𑀛𑀦𑀲𑀤𑀺𑀲𑀁 𑀳𑁄𑀢𑀺. ‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀸𑀫𑀺, 𑀢𑀸𑀯 𑀓𑀺𑀮𑁂𑀲𑀁 𑀦𑀺𑀲𑁆𑀲𑀸𑀬 𑀫𑀬𑀺 𑀉𑀲𑀽𑀬𑀸 𑀫𑀸 𑀉𑀧𑁆𑀧𑀚𑁆𑀚𑀢𑀽’’’𑀢𑀺 𑀅𑀥𑀺𑀝𑁆𑀞𑀳𑀺𑀁. 𑀢𑀢𑁄 𑀧𑀝𑁆𑀞𑀸𑀬 𑀅𑀦𑀼𑀲𑀽𑀬𑀓𑁄 𑀚𑀸𑀢𑁄. 𑀇𑀤𑀁 𑀲𑀦𑁆𑀥𑀸𑀬 𑁋 ‘‘𑀢𑀲𑁆𑀫𑀸𑀳𑀁 𑀅𑀦𑀼𑀲𑀽𑀬𑀓𑁄’’𑀢𑀺 𑀆𑀳.

𑀅𑀣 𑀦𑀁 𑀭𑀸𑀚𑀸 ‘‘𑀲𑀫𑁆𑀫 𑀙𑀢𑁆𑀢𑀧𑀸𑀡𑀺, 𑀓𑀺𑀁 𑀆𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀅𑀫𑀚𑁆𑀚𑀧𑁄 𑀚𑀸𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀢𑁆𑀢𑁄 ¶ 𑀅𑀳𑀁 𑀫𑀳𑀸𑀭𑀸𑀚, 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀬𑀺𑀁;

𑀢𑀲𑁆𑀲 𑀲𑁄𑀓𑁂𑀦𑀳𑀁 𑀨𑀼𑀝𑁆𑀞𑁄, 𑀫𑀚𑁆𑀚𑀧𑀸𑀦𑀁 𑀯𑀺𑀯𑀚𑁆𑀚𑀬𑀺’’𑀦𑁆𑀢𑀺.

𑀅𑀳𑀁, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀢𑀸𑀤𑀺𑀲𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀫𑀚𑁆𑀚𑁂𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀅𑀫𑀁𑀲𑀓𑀪𑀢𑁆𑀢𑀫𑁆𑀧𑀺 𑀪𑀼𑀜𑁆𑀚𑀺𑀢𑀼𑀁 𑀦𑀸𑀲𑀓𑁆𑀔𑀺𑀁. 𑀦𑀕𑀭𑁂 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀫𑀸𑀖𑀸𑀢𑁄 𑀳𑁄𑀢𑀺, 𑀪𑀢𑁆𑀢𑀓𑀸𑀭𑀓𑁄 𑀧𑀓𑁆𑀔𑀲𑁆𑀲 𑀢𑁂𑀭𑀲𑀺𑀬𑀜𑁆𑀜𑁂𑀯 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀞𑀧𑁂𑀲𑀺, 𑀢𑀁 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀲𑀼𑀦𑀔𑀸 𑀔𑀸𑀤𑀺𑀁𑀲𑀼. 𑀪𑀢𑁆𑀢𑀓𑀸𑀭𑀓𑁄 𑀉𑀧𑁄𑀲𑀣𑀤𑀺𑀯𑀲𑁂 𑀫𑀁𑀲𑀁 𑀅𑀮𑀪𑀺𑀢𑁆𑀯𑀸 𑀭𑀜𑁆𑀜𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀧𑀘𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀉𑀧𑀦𑀸𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑁂𑀯𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯𑀺, 𑀅𑀚𑁆𑀚 𑀫𑁂 𑀫𑀁𑀲𑀁 𑀦 𑀮𑀤𑁆𑀥𑀁, 𑀅𑀫𑀁𑀲𑀓𑀪𑁄𑀚𑀦𑀁 𑀦𑀸𑀫 𑀉𑀧𑀦𑀸𑀫𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀦𑁆𑀢𑀺 𑀓𑀭𑁄𑀫𑀻’’𑀢𑀺 𑀆𑀳. ‘‘𑀢𑀸𑀢, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀭𑀜𑁆𑀜𑀸 𑀧𑀺𑀬𑁄 𑀫𑀦𑀸𑀧𑁄, 𑀧𑀼𑀢𑁆𑀢𑀁 𑀫𑁂 𑀤𑀺𑀲𑁆𑀯𑀸 𑀭𑀸𑀚𑀸 𑀢𑀫𑁂𑀯 𑀘𑀼𑀫𑁆𑀩𑀦𑁆𑀢𑁄 𑀧𑀭𑀺𑀲𑁆𑀲𑀚𑀦𑁆𑀢𑁄 𑀅𑀢𑁆𑀢𑀦𑁄 ¶ 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀅𑀳𑀁 𑀧𑀼𑀢𑁆𑀢𑀁 𑀫𑀡𑁆𑀟𑁂𑀢𑁆𑀯𑀸 𑀭𑀜𑁆𑀜𑁄 𑀊𑀭𑀼𑀫𑁆𑀳𑀺 𑀦𑀺𑀲𑀻𑀤𑀸𑀧𑁂𑀬𑁆𑀬𑀁, 𑀭𑀜𑁆𑀜𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀻𑀴𑀦𑀓𑀸𑀮𑁂 𑀢𑁆𑀯𑀁 𑀪𑀢𑁆𑀢𑀁 𑀉𑀧𑀦𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀏𑀯𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀅𑀮𑀗𑁆𑀓𑀢𑀸𑀪𑀭𑀡𑀁 𑀫𑀡𑁆𑀟𑁂𑀢𑁆𑀯𑀸 𑀭𑀜𑁆𑀜𑁄 𑀊𑀭𑀼𑀫𑁆𑀳𑀺 𑀦𑀺𑀲𑀻𑀤𑀸𑀧𑁂𑀲𑀺. 𑀭𑀜𑁆𑀜𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀻𑀴𑀦𑀓𑀸𑀮𑁂 𑀪𑀢𑁆𑀢𑀓𑀸𑀭𑀓𑁄 𑀪𑀢𑁆𑀢𑀁 𑀉𑀧𑀦𑀸𑀫𑁂𑀲𑀺. 𑀭𑀸𑀚𑀸 𑀲𑀼𑀭𑀸𑀫𑀤𑀫𑀢𑁆𑀢𑁄 𑀧𑀸𑀢𑀺𑀬𑀁 𑀫𑀁𑀲𑀁 𑀅𑀤𑀺𑀲𑁆𑀯𑀸 ‘‘𑀫𑀁𑀲𑀁 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀚𑁆𑀚, 𑀤𑁂𑀯, 𑀉𑀧𑁄𑀲𑀣𑀤𑀺𑀯𑀲𑀁 𑀫𑀸𑀖𑀸𑀢𑀢𑀸𑀬 𑀫𑀁𑀲𑀁 𑀦 𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀫𑀁𑀲𑀁 𑀦𑀸𑀫 𑀤𑀼𑀮𑁆𑀮𑀪’’𑀦𑁆𑀢𑀺 𑀯𑀢𑁆𑀯𑀸 𑀊𑀭𑀼𑀫𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀧𑀺𑀬𑀧𑀼𑀢𑁆𑀢𑀲𑁆𑀲 𑀕𑀻𑀯𑀁 𑀯𑀝𑁆𑀝𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀪𑀢𑁆𑀢𑀓𑀸𑀭𑀓𑀲𑁆𑀲 𑀧𑀼𑀭𑀢𑁄 𑀔𑀺𑀧𑀺𑀢𑁆𑀯𑀸 ‘‘𑀯𑁂𑀕𑁂𑀦 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀳𑀭𑀸’’𑀢𑀺 𑀆𑀳. 𑀪𑀢𑁆𑀢𑀓𑀸𑀭𑀓𑁄 𑀢𑀣𑀸 𑀅𑀓𑀸𑀲𑀺, 𑀭𑀸𑀚𑀸 𑀧𑀼𑀢𑁆𑀢𑀫𑀁𑀲𑁂𑀦 𑀪𑀢𑁆𑀢𑀁 𑀪𑀼𑀜𑁆𑀚𑀺. 𑀭𑀜𑁆𑀜𑁄 𑀪𑀬𑁂𑀦 𑀏𑀓𑁄𑀧𑀺 𑀓𑀦𑁆𑀤𑀺𑀢𑀼𑀁 𑀯𑀸 𑀭𑁄𑀤𑀺𑀢𑀼𑀁 𑀯𑀸 𑀓𑀣𑁂𑀢𑀼𑀁 𑀯𑀸 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺.

𑀭𑀸𑀚𑀸 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀤𑁆𑀤𑀁 𑀉𑀧𑀕𑀦𑁆𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀯𑀺𑀕𑀢𑀫𑀤𑁄 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀣𑀸’’𑀢𑀺 𑀆𑀳. 𑀢𑀲𑁆𑀫𑀺𑀁 𑀓𑀸𑀮𑁂 𑀤𑁂𑀯𑀻 𑀓𑀦𑁆𑀤𑀫𑀸𑀦𑀸 𑀧𑀸𑀤𑀫𑀽𑀮𑁂 𑀧𑀢𑀺. ‘‘𑀓𑀺𑀁, 𑀪𑀤𑁆𑀤𑁂’’𑀢𑀺 𑀘 𑀯𑀼𑀢𑁆𑀢𑁂 ¶ , ‘‘𑀤𑁂𑀯, 𑀳𑀺𑀬𑁆𑀬𑁄 𑀢𑁂 𑀧𑀼𑀢𑁆𑀢𑀁 𑀫𑀸𑀭𑁂𑀢𑁆𑀯𑀸 𑀧𑀼𑀢𑁆𑀢𑀫𑀁𑀲𑁂𑀦 𑀪𑀢𑁆𑀢𑀁 𑀪𑀼𑀢𑁆𑀢’’𑀦𑁆𑀢𑀺 𑀆𑀳. 𑀭𑀸𑀚𑀸 𑀧𑀼𑀢𑁆𑀢𑀲𑁄𑀓𑁂𑀦 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 ‘‘𑀇𑀤𑀁 𑀫𑁂 𑀤𑀼𑀓𑁆𑀔𑀁 𑀲𑀼𑀭𑀸𑀧𑀸𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀭𑀸𑀧𑀸𑀦𑁂 𑀤𑁄𑀲𑀁 𑀤𑀺𑀲𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀸𑀫𑀺, 𑀢𑀸𑀯 𑀏𑀯𑀭𑀽𑀧𑀁 𑀯𑀺𑀦𑀸𑀲𑀓𑀸𑀭𑀓𑀁 ¶ 𑀲𑀼𑀭𑀁 𑀦𑀸𑀫 𑀦 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸 𑀫𑀼𑀔𑀁 𑀧𑀼𑀜𑁆𑀙𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀚𑁆𑀚𑀁 𑀦𑀸𑀫 𑀦 𑀧𑀺𑀯𑀺𑀁. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑁋 ‘‘𑀫𑀢𑁆𑀢𑁄 𑀅𑀳𑀁, 𑀫𑀳𑀸𑀭𑀸𑀚𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀧𑀦, 𑀲𑀫𑁆𑀫 𑀙𑀢𑁆𑀢𑀧𑀸𑀡𑀺, 𑀆𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀦𑀺𑀲𑁆𑀦𑁂𑀳𑁄 𑀚𑀸𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀺𑀢𑀯𑀸𑀲𑁄 𑀦𑀸𑀫𑀳𑀁 𑀭𑀸𑀚, 𑀧𑀼𑀢𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺 𑀫𑁂;

𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀯𑀺𑀢𑁄, 𑀦𑀺𑀲𑁆𑀦𑁂𑀳𑁄 𑀢𑀲𑁆𑀲 𑀓𑀸𑀭𑀡𑀸’’𑀢𑀺.

𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀅𑀳𑀁 𑀩𑀸𑀭𑀸𑀡𑀲𑀺𑀬𑀁𑀬𑁂𑀯 𑀓𑀺𑀢𑀯𑀸𑀲𑁄 𑀦𑀸𑀫 𑀭𑀸𑀚𑀸. 𑀢𑀲𑁆𑀲 𑀫𑁂 𑀧𑀼𑀢𑁆𑀢𑁄 𑀯𑀺𑀚𑀸𑀬𑀺. 𑀮𑀓𑁆𑀔𑀡𑀧𑀸𑀞𑀓𑀸 𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀬𑀁 𑀓𑀼𑀫𑀸𑀭𑁄 𑀧𑀸𑀦𑀻𑀬𑀁 𑀅𑀮𑀪𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. ‘‘𑀤𑀼𑀝𑁆𑀞𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀑𑀧𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀭𑀸𑀚𑀸 𑀓𑀼𑀫𑀸𑀭𑀁 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀓𑀢𑁆𑀯𑀸 𑀯𑀺𑀘𑀭𑀺, 𑀧𑀸𑀦𑀻𑀬𑀁 𑀅𑀮𑀪𑀺𑀢𑁆𑀯𑀸 𑀫𑀭𑀡𑀪𑀬𑁂𑀦 𑀘𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀦𑁆𑀢𑁄𑀦𑀕𑀭𑁂𑀲𑀼 𑀘 𑀢𑀢𑁆𑀣 𑀢𑀢𑁆𑀣 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑁂𑀲𑀺, 𑀘𑀢𑀼𑀓𑁆𑀓𑀸𑀤𑀻𑀲𑀼 𑀫𑀡𑁆𑀟𑀧𑁂 𑀓𑀸𑀭𑁂𑀢𑁆𑀯𑀸 𑀧𑀸𑀦𑀻𑀬𑀘𑀸𑀝𑀺𑀬𑁄 𑀞𑀧𑀸𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀧𑀸𑀢𑁄𑀯 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀲𑁆𑀲𑀺. 𑀫𑀳𑀸𑀚𑀦𑁄𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀢𑀫𑁂𑀯 𑀯𑀦𑁆𑀤𑀢𑀺 ¶ 𑀧𑀲𑀁𑀲𑀢𑀺, 𑀅𑀜𑁆𑀚𑀮𑀺𑀜𑁆𑀘𑀲𑁆𑀲 𑀧𑀕𑁆𑀕𑀡𑁆𑀳𑀸𑀢𑀺.

𑀓𑀼𑀫𑀸𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀸𑀤𑀺𑀲𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸 𑀇𑀫𑀁 𑀫𑀼𑀡𑁆𑀟𑀓𑀁 𑀯𑀦𑁆𑀤𑀦𑁆𑀢𑀺 𑀧𑀲𑀁𑀲𑀦𑁆𑀢𑀺, 𑀅𑀜𑁆𑀚𑀮𑀺𑀜𑁆𑀘𑀲𑁆𑀲 𑀧𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺. 𑀲𑁄 𑀓𑀼𑀧𑀺𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀮𑀤𑁆𑀥𑀁 𑀢𑁂, 𑀲𑀫𑀡, 𑀪𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀆𑀫, 𑀓𑀼𑀫𑀸𑀭𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀤𑁆𑀥𑀺𑀁 𑀪𑀢𑁆𑀢𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀸𑀤𑀧𑁆𑀧𑀳𑀸𑀭𑁂𑀦 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀦𑀝𑁆𑀞𑁄 𑀯𑀢𑀸𑀬𑀁 𑀲𑀢𑁆𑀢𑁄’’𑀢𑀺 𑀢𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀓𑀼𑀫𑀸𑀭𑁄 ‘‘𑀅𑀳𑀁, 𑀲𑀫𑀡, 𑀓𑀺𑀢𑀯𑀸𑀲𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀦𑀸𑀫𑁂𑀦 𑀤𑀼𑀝𑁆𑀞𑀓𑀼𑀫𑀸𑀭𑁄 𑀦𑀸𑀫, 𑀢𑁆𑀯𑀁 𑀫𑁂 𑀓𑀼𑀤𑁆𑀥𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳.

𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ¶ 𑀙𑀺𑀦𑁆𑀦𑀪𑀢𑁆𑀢𑁄 𑀳𑀼𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂 𑀦𑀦𑁆𑀤𑀦𑀫𑀽𑀮𑀧𑀩𑁆𑀪𑀸𑀭𑀫𑁂𑀯 𑀕𑀢𑁄. 𑀓𑀼𑀫𑀸𑀭𑀲𑁆𑀲𑀸𑀧𑀺 𑀢𑀗𑁆𑀔𑀡𑀜𑁆𑀜𑁂𑀯 𑀧𑀸𑀧𑀓𑀫𑁆𑀫𑀁 𑀧𑀭𑀺𑀧𑀘𑁆𑀘𑀺. 𑀲𑁄 ‘‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’’𑀢𑀺 𑀲𑀫𑀼𑀕𑁆𑀕𑀢𑀲𑀭𑀻𑀭𑀟𑀸𑀳𑁄 𑀢𑀢𑁆𑀣𑁂𑀯 𑀧𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀬𑀢𑁆𑀢𑀓𑀁 𑀧𑀸𑀦𑀻𑀬𑀁, 𑀢𑀢𑁆𑀢𑀓𑀁 𑀧𑀸𑀦𑀻𑀬𑀁 𑀲𑀩𑁆𑀩𑀁 𑀙𑀺𑀚𑁆𑀚𑀺, 𑀫𑀸𑀢𑀺𑀓𑀸 𑀲𑀼𑀲𑁆𑀲𑀺𑀁𑀲𑀼, 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 ¶ 𑀧𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀲𑁄𑀓𑁂𑀦 𑀅𑀪𑀺𑀪𑀽𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑁂 𑀲𑁄𑀓𑁄 𑀧𑀺𑀬𑀯𑀢𑁆𑀣𑀼𑀢𑁄 𑀉𑀧𑁆𑀧𑀚𑁆𑀚𑀺, 𑀲𑀘𑁂 𑀫𑁂 𑀲𑁆𑀦𑁂𑀳𑁄 𑀦𑀸𑀪𑀯𑀺𑀲𑁆𑀲, 𑀲𑁄𑀓𑁄 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲, 𑀇𑀢𑁄 𑀤𑀸𑀦𑀺 𑀫𑁂 𑀧𑀝𑁆𑀞𑀸𑀬 𑀲𑀯𑀺𑀜𑁆𑀜𑀸𑀡𑀓𑁂 𑀯𑀸 𑀅𑀯𑀺𑀜𑁆𑀜𑀸𑀡𑀓𑁂 𑀯𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀢𑁆𑀣𑀼𑀲𑁆𑀫𑀺𑀁 𑀲𑁆𑀦𑁂𑀳𑁄 𑀦𑀸𑀫 𑀫𑀸 𑀉𑀧𑁆𑀧𑀚𑁆𑀚𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑁆𑀦𑁂𑀳𑁄 𑀦𑀸𑀫 𑀦𑀢𑁆𑀣𑀺. 𑀢𑀁 𑀲𑀦𑁆𑀥𑀸𑀬 ‘‘𑀓𑀺𑀢𑀯𑀸𑀲𑁄 𑀦𑀸𑀫𑀸𑀳’’𑀦𑁆𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀧𑀼𑀢𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺 𑀫𑁂. 𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀯𑀺𑀢𑁄𑀢𑀺 𑀫𑀫 𑀧𑀼𑀢𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀧𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀯𑀺𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀦𑁂𑀳𑁄 𑀢𑀲𑁆𑀲 𑀓𑀸𑀭𑀡𑀸𑀢𑀺 𑀢𑀤𑀸 𑀉𑀧𑁆𑀧𑀦𑁆𑀦𑀲𑁆𑀦𑁂𑀳𑀯𑀢𑁆𑀣𑀼𑀲𑁆𑀲 𑀓𑀸𑀭𑀡𑀸 𑀅𑀳𑀁 𑀦𑀺𑀲𑁆𑀦𑁂𑀳𑁄 𑀚𑀸𑀢𑁄𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀧𑀦, 𑀲𑀫𑁆𑀫, 𑀆𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀦𑀺𑀓𑁆𑀓𑁄𑀥𑁄 𑀚𑀸𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀭𑀓𑁄 𑀳𑀼𑀢𑁆𑀯𑀸 𑀫𑁂𑀢𑁆𑀢𑀘𑀺𑀢𑁆𑀢𑀁, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀸𑀯𑀬𑀺𑀁;

𑀲𑀢𑁆𑀢 𑀓𑀧𑁆𑀧𑁂 𑀩𑁆𑀭𑀳𑁆𑀫𑀮𑁄𑀓𑁂, 𑀢𑀲𑁆𑀫𑀸 𑀅𑀓𑁆𑀓𑁄𑀥𑀦𑁄 𑀅𑀳’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁, 𑀫𑀳𑀸𑀭𑀸𑀚, 𑀅𑀭𑀓𑁄 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀩𑁆𑀭𑀳𑁆𑀫𑀮𑁄𑀓𑁂 𑀯𑀲𑀺𑀁, 𑀢𑀲𑁆𑀫𑀸 𑀅𑀳𑀁 𑀤𑀻𑀖𑀭𑀢𑁆𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀆𑀘𑀺𑀡𑁆𑀡𑀧𑀭𑀺𑀘𑀺𑀡𑁆𑀡𑀢𑁆𑀢𑀸 𑀅𑀓𑁆𑀓𑁄𑀥𑀦𑁄 𑀚𑀸𑀢𑁄𑀢𑀺.

𑀏𑀯𑀁 𑀙𑀢𑁆𑀢𑀧𑀸𑀡𑀺𑀦𑀸 𑀅𑀢𑁆𑀢𑀦𑁄 𑀘𑀢𑀽𑀲𑀼 𑀅𑀗𑁆𑀕𑁂𑀲𑀼 𑀓𑀣𑀺𑀢𑁂𑀲𑀼 𑀭𑀸𑀚𑀸 𑀧𑀭𑀺𑀲𑀸𑀬 𑀇𑀗𑁆𑀕𑀺𑀢𑀲𑀜𑁆𑀜𑀁 𑀅𑀤𑀸𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀅𑀫𑀘𑁆𑀘𑀸 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄 ¶ 𑀘 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀅𑀭𑁂 𑀮𑀜𑁆𑀚𑀔𑀸𑀤𑀓 𑀤𑀼𑀝𑁆𑀞𑀘𑁄𑀭, 𑀢𑁆𑀯𑀁 𑀮𑀜𑁆𑀚𑀁 𑀅𑀮𑀪𑀺𑀢𑁆𑀯𑀸 𑀧𑀡𑁆𑀟𑀺𑀢𑀁 𑀉𑀧𑀯𑀤𑀺𑀢𑁆𑀯𑀸 𑀫𑀸𑀭𑁂𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺 𑀓𑀸𑀴𑀓𑀁 𑀲𑁂𑀦𑀸𑀧𑀢𑀺𑀁 𑀳𑀢𑁆𑀣𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀑𑀢𑀸𑀭𑁂𑀢𑁆𑀯𑀸 𑀕𑀳𑀺𑀢𑀕𑀳𑀺𑀢𑁂𑀳𑁂𑀯 𑀧𑀸𑀲𑀸𑀡𑀫𑀼𑀕𑁆𑀕𑀭𑁂𑀳𑀺 𑀲𑀻𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀴𑀓𑀲𑁂𑀦𑀸𑀧𑀢𑀺 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀙𑀢𑁆𑀢𑀧𑀸𑀡𑀺𑀓𑀧𑁆𑀧𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀥𑀫𑁆𑀫𑀥𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀥𑀫𑁆𑀫𑀥𑀚𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀩𑀻𑀭𑀡𑀣𑀫𑁆𑀪𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑁄𑀫𑀤𑀢𑁆𑀢𑀜𑁆𑀘 𑀉𑀘𑁆𑀙𑀺𑀝𑁆𑀞𑀁, 𑀓𑀼𑀭𑀼 𑀧𑀼𑀡𑁆𑀡𑀦𑀤𑀻𑀧𑀺 𑀘;

𑀓𑀘𑁆𑀙𑀧𑀫𑀘𑁆𑀙𑀲𑁂𑀕𑁆𑀕𑀼 𑀘, 𑀓𑀽𑀝𑀯𑀸𑀡𑀺𑀚𑀕𑀭𑀳𑀺;

𑀥𑀫𑁆𑀫𑀥𑀚𑀦𑁆𑀢𑀺 𑀢𑁂 𑀤𑀲.

𑁮. 𑀓𑀸𑀲𑀸𑀯𑀯𑀕𑁆𑀕𑁄

[𑁨𑁨𑁧] 𑁧. 𑀓𑀸𑀲𑀸𑀯𑀚𑀸𑀢𑀓𑀯𑀡𑁆𑀡𑀦𑀸

𑀅𑀦𑀺𑀓𑁆𑀓𑀲𑀸𑀯𑁄 ¶ 𑀓𑀸𑀲𑀸𑀯𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁. 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀺. 𑀤𑁂𑀯𑀤𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬 𑀤𑀼𑀲𑁆𑀲𑀻𑀮𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀕𑀬𑀸𑀲𑀻𑀲𑁂 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀚𑀕𑀳𑀯𑀸𑀲𑀺𑀦𑁄 𑀙𑀦𑁆𑀤𑀓𑀁 𑀲𑀗𑁆𑀖𑀭𑀺𑀢𑁆𑀯𑀸 𑀤𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀅𑀣𑁂𑀓𑁄 𑀯𑁄𑀳𑀸𑀭𑀢𑁆𑀣𑀸𑀬 𑀆𑀕𑀢𑀯𑀸𑀡𑀺𑀚𑁄 𑀇𑀫𑀁 𑀲𑀸𑀝𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀫𑀫𑁆𑀧𑀺 𑀧𑀢𑁆𑀢𑀺𑀓𑀁 𑀓𑀭𑁄𑀣𑀸’’𑀢𑀺 𑀫𑀳𑀕𑁆𑀖𑀁 𑀕𑀦𑁆𑀥𑀓𑀸𑀲𑀸𑀯𑀁 𑀅𑀤𑀸𑀲𑀺. 𑀦𑀸𑀕𑀭𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼, 𑀲𑀩𑁆𑀩𑀁 𑀙𑀦𑁆𑀤𑀓𑁂𑀦 𑀲𑀗𑁆𑀓𑀟𑁆𑀠𑀺𑀢𑀁 𑀓𑀳𑀸𑀧𑀡𑁂𑀳𑁂𑀯 𑀦𑀺𑀝𑁆𑀞𑀸𑀲𑀺. 𑀲𑁄 𑀲𑀸𑀝𑀓𑁄 𑀅𑀢𑀺𑀭𑁂𑀓𑁄 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀬𑀁 𑀕𑀦𑁆𑀥𑀓𑀸𑀲𑀸𑀯𑀲𑀸𑀝𑀓𑁄 𑀅𑀢𑀺𑀭𑁂𑀓𑁄. 𑀓𑀲𑁆𑀲 𑀦𑀁 𑀤𑁂𑀫, 𑀓𑀺𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀉𑀤𑀸𑀳𑀼 𑀤𑁂𑀯𑀤𑀢𑁆𑀢𑀲𑁆𑀲𑀸’’𑀢𑀺 𑀫𑀦𑁆𑀢𑀬𑀺𑀁𑀲𑀼.

𑀢𑀢𑁆𑀣𑁂𑀓𑁂 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸’’𑀢𑀺 𑀆𑀳𑀁𑀲𑀼. 𑀅𑀧𑀭𑁂 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀧𑀓𑁆𑀓𑀫𑀺𑀲𑁆𑀲𑀢𑀺 ¶ , 𑀤𑁂𑀯𑀤𑀢𑁆𑀢𑀢𑁆𑀣𑁂𑀭𑁄 𑀧𑀦 𑀦𑀺𑀩𑀤𑁆𑀥𑀁 𑀅𑀫𑁆𑀳𑀸𑀓𑀁 𑀦𑀕𑀭𑀫𑁂𑀯 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀅𑀬𑀫𑁂𑀯 𑀅𑀫𑁆𑀳𑀸𑀓𑀁 ¶ 𑀅𑀯𑀲𑁆𑀲𑀬𑁄, 𑀤𑁂𑀯𑀤𑀢𑁆𑀢𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑀫𑁆𑀩𑀳𑀼𑀮𑀺𑀓𑀁 𑀓𑀭𑁄𑀦𑁆𑀢𑁂𑀲𑀼𑀧𑀺 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀸𑀭𑁄 𑀩𑀳𑀼𑀢𑀭𑀸 𑀅𑀳𑁂𑀲𑀼𑀁, 𑀅𑀣 𑀦𑀁 𑀤𑁂𑀯𑀤𑀢𑁆𑀢𑀲𑁆𑀲 𑀅𑀤𑀁𑀲𑀼. 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲 𑀤𑀲𑀸 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀑𑀯𑀝𑁆𑀝𑀺𑀓𑀁 𑀲𑀺𑀩𑁆𑀩𑀸𑀧𑁂𑀢𑁆𑀯𑀸 𑀭𑀚𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑀯𑀡𑁆𑀡𑀁 𑀓𑀢𑁆𑀯𑀸 𑀧𑀸𑀭𑀼𑀧𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀯𑀁, 𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀅𑀭𑀳𑀤𑁆𑀥𑀚𑀁 𑀧𑀸𑀭𑀼𑀧𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀅𑀦𑀦𑀼𑀭𑀽𑀧𑀁 𑀅𑀭𑀳𑀤𑁆𑀥𑀚𑀁 𑀧𑀭𑀺𑀤𑀳𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀤𑀳𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀳𑀢𑁆𑀣𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀯𑀸𑀭𑀡𑀧𑀭𑀺𑀯𑀸𑀭𑁄 𑀬𑀽𑀣𑀧𑀢𑀺 𑀳𑀼𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀯𑀲𑀢𑀺. 𑀅𑀣𑁂𑀓𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑁄 𑀤𑀦𑁆𑀢𑀓𑀸𑀭𑀯𑀻𑀣𑀺𑀬𑀁 𑀤𑀦𑁆𑀢𑀓𑀸𑀭𑁂 𑀤𑀦𑁆𑀢𑀯𑀮𑀬𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ¶ ‘‘𑀳𑀢𑁆𑀣𑀺𑀤𑀦𑁆𑀢𑁂 𑀮𑀪𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀆𑀫 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑁄 𑀆𑀯𑀼𑀥𑀁 𑀆𑀤𑀸𑀬 𑀓𑀸𑀲𑀸𑀯𑀯𑀢𑁆𑀣𑀯𑀲𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑁂𑀲𑀁 𑀕𑀡𑁆𑀳𑀺𑀢𑁆𑀯𑀸 𑀧𑀝𑀺𑀲𑀻𑀲𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑀺𑀯𑀻𑀣𑀺𑀬𑀁 𑀞𑀢𑁆𑀯𑀸 𑀆𑀯𑀼𑀥𑁂𑀦 𑀳𑀢𑁆𑀣𑀺𑀁 𑀫𑀸𑀭𑁂𑀢𑁆𑀯𑀸 𑀤𑀦𑁆𑀢𑁂 𑀆𑀤𑀸𑀬 𑀩𑀸𑀭𑀸𑀡𑀲𑀺𑀬𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑀳𑀢𑁆𑀣𑀻𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀁 𑀳𑀢𑁆𑀣𑀺𑀁 𑀫𑀸𑀭𑁂𑀢𑀼𑀁 𑀆𑀭𑀪𑀺. 𑀳𑀢𑁆𑀣𑀺𑀦𑁄 𑀤𑁂𑀯𑀲𑀺𑀓𑀁 𑀳𑀢𑁆𑀣𑀻𑀲𑀼 𑀧𑀭𑀺𑀳𑀸𑀬𑀦𑁆𑀢𑁂𑀲𑀼 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀳𑀢𑁆𑀣𑀺𑀦𑁄 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁.

𑀩𑁄𑀥𑀺𑀲𑀢𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀯𑀻𑀣𑀺𑀧𑀭𑀺𑀬𑀦𑁆𑀢𑁂 𑀏𑀓𑁄 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀲𑁄 𑀫𑀸𑀭𑁂𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀏𑀓𑀤𑀺𑀯𑀲𑀁 𑀳𑀢𑁆𑀣𑀻 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀬𑀁 ¶ 𑀧𑀘𑁆𑀙𑀢𑁄 𑀅𑀳𑁄𑀲𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀆𑀯𑀼𑀥𑀁 𑀆𑀤𑀸𑀬 𑀧𑀓𑁆𑀔𑀦𑁆𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 ‘‘𑀪𑀽𑀫𑀺𑀬𑀁 𑀧𑁄𑀣𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑁄𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀢𑁂𑀦 𑀧𑀭𑀺𑀤𑀳𑀺𑀢𑀸𑀦𑀺 𑀓𑀸𑀲𑀸𑀯𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀫𑀁 𑀅𑀭𑀳𑀤𑁆𑀥𑀚𑀁 𑀫𑀬𑀸 𑀕𑀭𑀼𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑁄𑀡𑁆𑀟𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀦𑀦𑀼 𑀏𑀲 𑀅𑀭𑀳𑀤𑁆𑀥𑀚𑁄 𑀅𑀦𑀦𑀼𑀘𑁆𑀙𑀯𑀺𑀓𑁄 𑀢𑀼𑀬𑁆𑀳𑀁, 𑀓𑀲𑁆𑀫𑀸 𑀏𑀢𑀁 𑀧𑀭𑀺𑀤𑀳𑀲𑀻’’𑀢𑀺 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁪𑁧.

‘‘𑀅𑀦𑀺𑀓𑁆𑀓𑀲𑀸𑀯𑁄 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺;

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁪𑁨.

‘‘𑀬𑁄 ¶ 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀻’’𑀢𑀺.

𑀢𑀢𑁆𑀣 𑀅𑀦𑀺𑀓𑁆𑀓𑀲𑀸𑀯𑁄𑀢𑀺 𑀓𑀲𑀸𑀯𑁄 𑀯𑀼𑀘𑁆𑀘𑀢𑀺 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑀁 𑀪𑀯𑀕𑀸𑀫𑀺𑀓𑀫𑁆𑀫𑀁 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁, 𑀏𑀲𑁄 𑀓𑀲𑀸𑀯𑁄 𑀦𑀸𑀫. 𑀲𑁄 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑁆𑀧𑀳𑀻𑀦𑁄 𑀲𑀦𑁆𑀢𑀸𑀦𑀢𑁄 𑀅𑀦𑀺𑀲𑁆𑀲𑀝𑁆𑀞𑁄 𑀅𑀦𑀺𑀓𑁆𑀔𑀦𑁆𑀢𑁄, 𑀲𑁄 𑀅𑀦𑀺𑀓𑁆𑀓𑀲𑀸𑀯𑁄 𑀦𑀸𑀫. 𑀓𑀸𑀲𑀸𑀯𑀦𑁆𑀢𑀺 𑀓𑀲𑀸𑀬𑀭𑀲𑀧𑀻𑀢𑀁 𑀅𑀭𑀳𑀤𑁆𑀥𑀚𑀪𑀽𑀢𑀁. 𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀻𑀢𑀺 𑀬𑁄 𑀏𑀯𑀭𑀽𑀧𑁄 𑀳𑀼𑀢𑁆𑀯𑀸 𑀏𑀯𑀭𑀽𑀧𑀁 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺 𑀦𑀺𑀯𑀸𑀲𑁂𑀢𑀺 𑀘𑁂𑀯 𑀧𑀸𑀭𑀼𑀧𑀢𑀺 𑀘. 𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀲𑀗𑁆𑀔𑀸𑀢𑁂𑀦 𑀤𑀫𑁂𑀦 𑀘 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂𑀦 𑀘 𑀧𑀭𑀫𑀢𑁆𑀣𑀲𑀘𑁆𑀘𑁂𑀦 𑀅𑀧𑁂𑀢𑁄 𑀧𑀭𑀺𑀯𑀚𑁆𑀚𑀺𑀢𑁄. 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁, 𑀏𑀢𑀲𑁆𑀫𑀸 𑀤𑀫𑀲𑀘𑁆𑀘𑀸 𑀅𑀧𑁂𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀘𑁆𑀘’’𑀦𑁆𑀢𑀺 𑀘𑁂𑀢𑁆𑀣 𑀯𑀘𑀻𑀲𑀘𑁆𑀘𑀁 ¶ 𑀘𑀢𑀼𑀲𑀘𑁆𑀘𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀻𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀺𑀓𑁆𑀓𑀲𑀸𑀯𑀢𑁆𑀢𑀸 𑀅𑀭𑀳𑀤𑁆𑀥𑀚𑀁 𑀓𑀸𑀲𑀸𑀯𑀁 𑀦 𑀅𑀭𑀳𑀢𑀺 𑀅𑀦𑀦𑀼𑀘𑁆𑀙𑀯𑀺𑀓𑁄 𑀏𑀢𑀲𑁆𑀲.

𑀬𑁄 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲𑀸𑀢𑀺 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯 𑀓𑀲𑀸𑀯𑀲𑁆𑀲 𑀯𑀦𑁆𑀢𑀢𑁆𑀢𑀸 𑀯𑀦𑁆𑀢𑀓𑀲𑀸𑀯𑁄 𑀅𑀲𑁆𑀲. 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄𑀢𑀺 𑀫𑀕𑁆𑀕𑀲𑀻𑀮𑁂𑀲𑀼 𑀘𑁂𑀯 𑀨𑀮𑀲𑀻𑀮𑁂𑀲𑀼 𑀘 𑀲𑀫𑁆𑀫𑀸 𑀆𑀳𑀺𑀢𑁄, 𑀆𑀦𑁂𑀢𑁆𑀯𑀸 𑀞𑀧𑀺𑀢𑁄 𑀯𑀺𑀬 𑀢𑁂𑀲𑀼 𑀧𑀢𑀺𑀝𑁆𑀞𑀺𑀢𑁄. 𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀧𑁂𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄. 𑀤𑀫𑀲𑀘𑁆𑀘𑁂𑀦𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀤𑀫𑁂𑀦 𑀘 𑀲𑀘𑁆𑀘𑁂𑀦 𑀘. 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀇𑀫𑀁 𑀅𑀭𑀳𑀤𑁆𑀥𑀚𑀁 𑀓𑀸𑀲𑀸𑀯𑀁 𑀅𑀭𑀳𑀢𑀺.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀇𑀫𑀁 𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀇𑀥 𑀆𑀕𑀫𑀺, 𑀆𑀕𑀘𑁆𑀙𑀲𑀺 𑀘𑁂, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑀮𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀳𑀢𑁆𑀣𑀺𑀫𑀸𑀭𑀓𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀬𑀽𑀣𑀧𑀢𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀲𑀸𑀯𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁨𑁨] 𑁨. 𑀘𑀽𑀴𑀦𑀦𑁆𑀤𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀇𑀤𑀁 ¶ 𑀢𑀤𑀸𑀘𑀭𑀺𑀬𑀯𑀘𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀦𑀸𑀫 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀪𑀺𑀫𑀸𑀭𑁂 𑀧𑀬𑁄𑀚𑁂𑀲𑀺, 𑀲𑀺𑀮𑀁 𑀧𑀯𑀺𑀚𑁆𑀛𑀺, 𑀦𑀸𑀴𑀸𑀕𑀺𑀭𑀺𑀁 𑀧𑀬𑁄𑀚𑁂𑀲𑀺, 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀫𑀢𑁆𑀢𑀫𑁆𑀧𑀺𑀲𑁆𑀲 𑀢𑀣𑀸𑀕𑀢𑁂 𑀦𑀢𑁆𑀣𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀦𑀺𑀓𑁆𑀓𑀸𑀭𑀼𑀡𑀺𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀦𑀦𑁆𑀤𑀺𑀬𑁄 𑀦𑀸𑀫 𑀯𑀸𑀦𑀭𑁄 𑀅𑀳𑁄𑀲𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑁄 𑀧𑀦𑀲𑁆𑀲 𑀘𑀽𑀴𑀦𑀦𑁆𑀤𑀺𑀬𑁄 𑀦𑀸𑀫. 𑀢𑁂 𑀉𑀪𑁄𑀧𑀺 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀧𑀭𑀺𑀯𑀸𑀭𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀦𑁆𑀥𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑀸 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑁂 𑀫𑀸𑀢𑀭𑀁 𑀲𑀬𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀫𑀸𑀢𑀼𑀬𑀸 𑀧𑁂𑀲𑁂𑀦𑁆𑀢𑀺. 𑀆𑀳𑀭𑀡𑀓𑀯𑀸𑀦𑀭𑀸 ¶ 𑀢𑀲𑁆𑀲𑀸 𑀦 𑀤𑁂𑀦𑁆𑀢𑀺, 𑀲𑀸 𑀔𑀼𑀤𑀸𑀧𑀻𑀴𑀺𑀢𑀸 𑀅𑀝𑁆𑀞𑀺𑀘𑀫𑁆𑀫𑀸𑀯𑀲𑁂𑀲𑀸 𑀓𑀺𑀲𑀸 𑀅𑀳𑁄𑀲𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋 ‘‘𑀫𑀬𑀁, 𑀅𑀫𑁆𑀫, 𑀢𑀼𑀫𑁆𑀳𑀸𑀓𑀁 𑀫𑀥𑀼𑀭𑀨𑀮𑀸𑀨𑀮𑀸𑀦𑀺 𑀧𑁂𑀲𑁂𑀫, 𑀢𑀼𑀫𑁆𑀳𑁂 𑀓𑀲𑁆𑀫𑀸 𑀫𑀺𑀮𑀸𑀬𑀣𑀸’’𑀢𑀺. ‘‘𑀢𑀸𑀢, 𑀦𑀸𑀳𑀁 𑀮𑀪𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ¶ 𑁋 ‘‘𑀫𑀬𑀺 𑀬𑀽𑀣𑀁 𑀧𑀭𑀺𑀳𑀭𑀦𑁆𑀢𑁂 𑀫𑀸𑀢𑀸 𑀫𑁂 𑀦𑀲𑁆𑀲𑀺𑀲𑁆𑀲𑀢𑀺, 𑀬𑀽𑀣𑀁 𑀧𑀳𑀸𑀬 𑀫𑀸𑀢𑀭𑀁𑀬𑁂𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀘𑀽𑀴𑀦𑀦𑁆𑀤𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀬𑀽𑀣𑀁 𑀧𑀭𑀺𑀳𑀭, 𑀅𑀳𑀁 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄𑀧𑀺 𑀦𑀁 ‘‘𑀪𑀸𑀢𑀺𑀓, 𑀫𑀬𑁆𑀳𑀁 𑀬𑀽𑀣𑀧𑀭𑀺𑀳𑀭𑀡𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀳𑀫𑁆𑀧𑀺 𑀫𑀸𑀢𑀭𑀫𑁂𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀇𑀢𑀺 𑀢𑁂 𑀉𑀪𑁄𑀧𑀺 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀬𑀽𑀣𑀁 𑀧𑀳𑀸𑀬 𑀫𑀸𑀢𑀭𑀁 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀸 𑀑𑀭𑀼𑀬𑁆𑀳 𑀧𑀘𑁆𑀘𑀦𑁆𑀢𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑀺𑀁𑀲𑀼.

𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺. 𑀆𑀘𑀭𑀺𑀬𑁄 𑀅𑀗𑁆𑀕𑀯𑀺𑀚𑁆𑀚𑀸𑀦𑀼𑀪𑀸𑀯𑁂𑀦 𑀢𑀲𑁆𑀲 𑀓𑀓𑁆𑀔𑀴𑀨𑀭𑀼𑀲𑀲𑀸𑀳𑀲𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀏𑀯𑀭𑀽𑀧𑀸𑀦𑀁 𑀦 𑀲𑀩𑁆𑀩𑀓𑀸𑀮𑀁 𑀏𑀓𑀲𑀤𑀺𑀲𑀫𑁂𑀯 𑀇𑀚𑁆𑀛𑀢𑀺, 𑀫𑀳𑀸𑀯𑀺𑀦𑀸𑀲𑀁 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀺𑀲𑁆𑀲𑀲𑀺, 𑀫𑀸 𑀢𑁆𑀯𑀁 𑀓𑀓𑁆𑀔𑀴𑁄 𑀳𑁄𑀳𑀺, 𑀧𑀘𑁆𑀙𑀸𑀦𑀼𑀢𑀸𑀧𑀦𑀓𑀸𑀭𑀡𑀁 𑀓𑀫𑁆𑀫𑀁 𑀫𑀸 𑀓𑀭𑀻’’𑀢𑀺 ¶ 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀖𑀭𑀸𑀯𑀸𑀲𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀲𑀺𑀧𑁆𑀧𑁂𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀥𑀦𑀼𑀓𑁄𑀝𑀺𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀺, 𑀮𑀼𑀤𑁆𑀤𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑀓𑁂 𑀯𑀲𑀦𑁆𑀢𑁄 𑀥𑀦𑀼𑀓𑀮𑀸𑀧𑀲𑀦𑁆𑀦𑀤𑁆𑀥𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀦𑀸𑀦𑀸𑀫𑀺𑀕𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀯𑀺𑀓𑁆𑀓𑀬𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀅𑀗𑁆𑀕𑀡𑀧𑀭𑀺𑀬𑀦𑁆𑀢𑁂 𑀞𑀺𑀢𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀅𑀧𑀺 𑀦𑀸𑀫𑁂𑀢𑁆𑀣 𑀓𑀺𑀜𑁆𑀘𑀺 𑀪𑀯𑁂𑀬𑁆𑀬𑀸’’𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀉𑀪𑁄𑀧𑀺 𑀢𑁂 𑀪𑀸𑀢𑀭𑁄 𑀫𑀸𑀢𑀭𑀁 𑀨𑀮𑀸𑀦𑀺 𑀔𑀸𑀤𑀸𑀧𑁂𑀢𑁆𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀯𑀺𑀝𑀧𑀩𑁆𑀪𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑁄 𑀫𑀸𑀢𑀭𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀲𑀸𑀔𑀦𑁆𑀢𑀭𑁂 𑀦𑀺𑀮𑀻𑀬𑀺𑀁𑀲𑀼. 𑀲𑁄𑀧𑀺 𑀔𑁄 𑀲𑀸𑀳𑀲𑀺𑀓𑀧𑀼𑀭𑀺𑀲𑁄 𑀭𑀼𑀓𑁆𑀔𑀫𑀽𑀮𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀢𑁂𑀲𑀁 𑀫𑀸𑀢𑀭𑀁 𑀚𑀭𑀸𑀤𑀼𑀩𑁆𑀩𑀮𑀁 𑀅𑀦𑁆𑀥𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑁂 𑀢𑀼𑀘𑁆𑀙𑀳𑀢𑁆𑀣𑀕𑀫𑀦𑁂𑀦 𑀇𑀫𑀁 𑀫𑀓𑁆𑀓𑀝𑀺𑀁 𑀯𑀺𑀚𑁆𑀛𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ¶ 𑀢𑀲𑁆𑀲𑀸 𑀯𑀺𑀚𑁆𑀛𑀦𑀢𑁆𑀣𑀸𑀬 𑀥𑀦𑀼𑀁 𑀕𑀡𑁆𑀳𑀺. 𑀢𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀸𑀢 𑀘𑀽𑀴𑀦𑀦𑁆𑀤𑀺𑀬, 𑀏𑀲𑁄 𑀫𑁂 𑀧𑀼𑀭𑀺𑀲𑁄 𑀫𑀸𑀢𑀭𑀁 𑀯𑀺𑀚𑁆𑀛𑀺𑀢𑀼𑀓𑀸𑀫𑁄, 𑀅𑀳𑀫𑀲𑁆𑀲𑀸 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀫𑀘𑁆𑀘𑀬𑁂𑀦 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀲𑀸𑀔𑀦𑁆𑀢𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀫𑀸 𑀫𑁂 𑀫𑀸𑀢𑀭𑀁 𑀯𑀺𑀚𑁆𑀛𑀺, 𑀏𑀲𑀸 𑀅𑀦𑁆𑀥𑀸 𑀚𑀭𑀸𑀤𑀼𑀩𑁆𑀩𑀮𑀸, 𑀅𑀳𑀫𑀲𑁆𑀲𑀸 𑀚𑀻𑀯𑀺𑀢𑀤𑀸𑀦𑀁 𑀤𑁂𑀫𑀺, 𑀢𑁆𑀯𑀁 𑀏𑀢𑀁 𑀅𑀫𑀸𑀭𑁂𑀢𑁆𑀯𑀸 𑀫𑀁 𑀫𑀸𑀭𑁂𑀳𑀻’’𑀢𑀺 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀲𑀭𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀲𑁄 𑀦𑀺𑀓𑁆𑀓𑀭𑀼𑀡𑁄 𑀩𑁄𑀥𑀺𑀲𑀢𑁆𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀫𑀸𑀢𑀭𑀫𑁆𑀧𑀺𑀲𑁆𑀲 𑀯𑀺𑀚𑁆𑀛𑀺𑀢𑀼𑀁 ¶ 𑀧𑀼𑀦 𑀥𑀦𑀼𑀁 𑀲𑀦𑁆𑀦𑀬𑁆𑀳𑀺. 𑀢𑀁 𑀤𑀺𑀲𑁆𑀯𑀸 𑀘𑀽𑀴𑀦𑀦𑁆𑀤𑀺𑀬𑁄 ‘‘𑀅𑀬𑀁 𑀫𑁂 𑀫𑀸𑀢𑀭𑀁 𑀯𑀺𑀚𑁆𑀛𑀺𑀢𑀼𑀓𑀸𑀫𑁄, 𑀏𑀓𑀤𑀺𑀯𑀲𑀫𑁆𑀧𑀺 𑀔𑁄 𑀫𑁂 𑀫𑀸𑀢𑀸 𑀚𑀻𑀯𑀫𑀸𑀦𑀸 𑀮𑀤𑁆𑀥𑀚𑀻𑀯𑀺𑀢𑀸𑀬𑁂𑀯 𑀦𑀸𑀫 𑀳𑁄𑀢𑀺, 𑀚𑀻𑀯𑀺𑀢𑀤𑀸𑀦𑀫𑀲𑁆𑀲𑀸 𑀤𑀲𑁆𑀲𑀸𑀫𑀻’’𑀢𑀺 𑀲𑀸𑀔𑀦𑁆𑀢𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀫𑀸 𑀫𑁂 𑀫𑀸𑀢𑀭𑀁 𑀯𑀺𑀚𑁆𑀛𑀺, 𑀅𑀳𑀫𑀲𑁆𑀲𑀸 𑀚𑀻𑀯𑀺𑀢𑀤𑀸𑀦𑀁 𑀤𑀫𑁆𑀫𑀺, 𑀢𑁆𑀯𑀁 𑀫𑀁 𑀯𑀺𑀚𑁆𑀛𑀺𑀢𑁆𑀯𑀸 𑀅𑀫𑁆𑀳𑁂 𑀤𑁆𑀯𑁂 𑀪𑀸𑀢𑀺𑀓𑁂 𑀕𑀳𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀫𑀸𑀢𑀼 𑀚𑀻𑀯𑀺𑀢𑀤𑀸𑀦𑀁 𑀤𑁂𑀳𑀻’’𑀢𑀺 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀲𑀭𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀲𑁄 𑀢𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 ‘‘𑀅𑀬𑀁 𑀫𑀓𑁆𑀓𑀝𑀻 𑀖𑀭𑁂 𑀤𑀸𑀭𑀓𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀸𑀢𑀭𑀫𑁆𑀧𑀺 𑀢𑁂𑀲𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀢𑀬𑁄𑀧𑀺 𑀓𑀸𑀚𑁂𑀦𑀸𑀤𑀸𑀬 𑀕𑁂𑀳𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀅𑀣𑀲𑁆𑀲 𑀧𑀸𑀧𑀧𑀼𑀭𑀺𑀲𑀲𑁆𑀲 𑀕𑁂𑀳𑁂 𑀅𑀲𑀦𑀺 𑀧𑀢𑀺𑀢𑁆𑀯𑀸 𑀪𑀭𑀺𑀬𑀜𑁆𑀘 𑀤𑁆𑀯𑁂 𑀤𑀸𑀭𑀓𑁂 𑀘 𑀕𑁂𑀳𑁂𑀦𑁂𑀯 𑀲𑀤𑁆𑀥𑀺𑀁 𑀛𑀸𑀧𑁂𑀲𑀺, 𑀧𑀺𑀝𑁆𑀞𑀺𑀯𑀁𑀲𑀣𑀽𑀡𑀫𑀢𑁆𑀢𑀁 𑀅𑀯𑀲𑀺𑀲𑁆𑀲𑀺. 𑀅𑀣𑀲𑁆𑀲 𑀦𑀁 𑀕𑀸𑀫𑀤𑁆𑀯𑀸𑀭𑁂𑀬𑁂𑀯 𑀏𑀓𑁄 𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑁄 𑀧𑀼𑀢𑁆𑀢𑀤𑀸𑀭𑀲𑁄𑀓𑁂𑀦 ¶ 𑀅𑀪𑀺𑀪𑀽𑀢𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀫𑀁𑀲𑀓𑀸𑀚𑀜𑁆𑀚 𑀥𑀦𑀼𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀯𑀢𑁆𑀣𑀁 𑀧𑀳𑀸𑀬 𑀦𑀕𑁆𑀕𑁄 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀭𑀺𑀤𑁂𑀯𑀫𑀸𑀦𑁄 𑀕𑀦𑁆𑀢𑁆𑀯𑀸 𑀖𑀭𑀁 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀲𑀸 𑀣𑀽𑀡𑀸 𑀪𑀺𑀚𑁆𑀚𑀺𑀢𑁆𑀯𑀸 𑀲𑀻𑀲𑁂 𑀧𑀢𑀺𑀢𑁆𑀯𑀸 𑀲𑀻𑀲𑀁 𑀪𑀺𑀦𑁆𑀤𑀺, 𑀧𑀣𑀯𑀻 𑀯𑀺𑀯𑀭𑀁 𑀅𑀤𑀸𑀲𑀺, 𑀅𑀯𑀻𑀘𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺. 𑀲𑁄 𑀧𑀣𑀯𑀺𑀬𑀸 𑀕𑀺𑀮𑀺𑀬𑀫𑀸𑀦𑁄 𑀆𑀘𑀭𑀺𑀬𑀲𑁆𑀲 𑀑𑀯𑀸𑀤𑀁 𑀲𑀭𑀺𑀢𑁆𑀯𑀸 ‘‘𑀇𑀫𑀁 𑀯𑀢 ¶ 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀧𑀸𑀭𑀸𑀲𑀭𑀺𑀬𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁 𑀑𑀯𑀸𑀤𑀫𑀤𑀸𑀲𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑁄 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁪𑁩.

‘‘𑀇𑀤𑀁 𑀢𑀤𑀸𑀘𑀭𑀺𑀬𑀯𑀘𑁄, 𑀧𑀸𑀭𑀸𑀲𑀭𑀺𑀬𑁄 𑀬𑀤𑀩𑁆𑀭𑀯𑀺;

𑀫𑀸𑀲𑀼 𑀢𑁆𑀯𑀁 𑀅𑀓𑀭𑀺 𑀧𑀸𑀧𑀁, 𑀬𑀁 𑀢𑁆𑀯𑀁 𑀧𑀘𑁆𑀙𑀸 𑀓𑀢𑀁 𑀢𑀧𑁂.

𑁧𑁪𑁪.

‘‘𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀧𑀸𑀭𑀸𑀲𑀭𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀯𑀺 𑁋 ‘‘𑀫𑀸𑀲𑀼 𑀢𑁆𑀯𑀁 𑀧𑀸𑀧𑀁 𑀅𑀓𑀭𑀻, 𑀬𑀁 𑀓𑀢𑀁 𑀧𑀘𑁆𑀙𑀸 𑀢𑁆𑀯𑀜𑁆𑀜𑁂𑀯 𑀢𑀧𑁂𑀬𑁆𑀬𑀸’’𑀢𑀺, 𑀇𑀤𑀁 𑀢𑀁 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁. 𑀬𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀺 𑀧𑀼𑀭𑀺𑀲𑁄 𑀓𑀭𑁄𑀢𑀺, 𑀢𑁂𑀲𑀁 𑀯𑀺𑀧𑀸𑀓𑀁 𑀧𑀝𑀺𑀮𑀪𑀦𑁆𑀢𑁄 𑀢𑀸𑀦𑀺𑀬𑁂𑀯 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺. 𑀓𑀮𑁆𑀬𑀸𑀡𑀓𑀫𑁆𑀫𑀓𑀸𑀭𑀻 𑀓𑀮𑁆𑀬𑀸𑀡𑀁 𑀨𑀮𑀫𑀦𑀼𑀪𑁄𑀢𑀺, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀫𑁂𑀯 𑀳𑀻𑀦𑀁 𑀮𑀸𑀫𑀓𑀁 𑀅𑀦𑀺𑀝𑁆𑀞𑀨𑀮𑀁 𑀅𑀦𑀼𑀪𑁄𑀢𑀺. 𑀮𑁄𑀓𑀲𑁆𑀫𑀺𑀫𑁆𑀧𑀺 𑀳𑀺 𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁, 𑀩𑀻𑀚𑀸𑀦𑀼𑀭𑀽𑀧𑀁 𑀩𑀻𑀚𑀸𑀦𑀼𑀘𑁆𑀙𑀯𑀺𑀓𑀫𑁂𑀯 𑀨𑀮𑀁 𑀳𑀭𑀢𑀺 𑀕𑀡𑁆𑀳𑀸𑀢𑀺 𑀅𑀦𑀼𑀪𑀯𑀢𑀻𑀢𑀺. 𑀇𑀢𑀺 𑀲𑁄 𑀧𑀭𑀺𑀤𑁂𑀯𑀦𑁆𑀢𑁄 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 ¶ ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀦𑀺𑀓𑁆𑀓𑀸𑀭𑀼𑀡𑀺𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀘𑀽𑀴𑀦𑀦𑁆𑀤𑀺𑀬𑁄 𑀆𑀦𑀦𑁆𑀤𑁄, 𑀫𑀸𑀢𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻, 𑀫𑀳𑀸𑀦𑀦𑁆𑀤𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀦𑀦𑁆𑀤𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁨𑁩] 𑁩. 𑀧𑀼𑀝𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦𑀫𑁂 ¶ 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻 𑀓𑀺𑀭𑁂𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀏𑀓𑁂𑀦 𑀚𑀦𑀧𑀤𑀓𑀼𑀝𑀼𑀫𑁆𑀩𑀺𑀓𑁂𑀦 𑀲𑀤𑁆𑀥𑀺𑀁 𑀯𑁄𑀳𑀸𑀭𑀁 𑀅𑀓𑀸𑀲𑀺. 𑀲𑁄 ¶ 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀆𑀤𑀸𑀬 𑀢𑀲𑁆𑀲 𑀥𑀸𑀭𑀡𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀥𑀸𑀭𑀡𑀓𑁄 ‘‘𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀦 𑀓𑀺𑀜𑁆𑀘𑀺 𑀅𑀤𑀸𑀲𑀺, 𑀇𑀢𑀭𑁄 𑀓𑀼𑀚𑁆𑀛𑀺𑀢𑁆𑀯𑀸 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀅𑀣 𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀙𑀸𑀢𑀚𑁆𑀛𑀢𑁆𑀢𑀁 𑀤𑀺𑀲𑁆𑀯𑀸 𑀫𑀕𑁆𑀕𑀧𑀝𑀺𑀧𑀦𑁆𑀦𑀸 𑀧𑀼𑀭𑀺𑀲𑀸 ‘‘𑀪𑀭𑀺𑀬𑀸𑀬𑀧𑀺 𑀤𑀢𑁆𑀯𑀸 𑀪𑀼𑀜𑁆𑀚𑀸𑀳𑀻’’𑀢𑀺 𑀪𑀢𑁆𑀢𑀧𑀼𑀝𑀁 𑀅𑀤𑀁𑀲𑀼. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀅𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀪𑀤𑁆𑀤𑁂, 𑀇𑀤𑀁 𑀘𑁄𑀭𑀸𑀦𑀁 𑀢𑀺𑀝𑁆𑀞𑀦𑀝𑁆𑀞𑀸𑀦𑀁, 𑀢𑁆𑀯𑀁 𑀧𑀼𑀭𑀢𑁄 𑀬𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀼𑀘𑁆𑀙𑀧𑀼𑀝𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀅𑀪𑀢𑁆𑀢𑀓𑀁 𑀢𑀼𑀘𑁆𑀙𑀧𑀼𑀝𑀫𑁂𑀯 𑀅𑀤𑀁𑀲𑀽’’𑀢𑀺 𑀆𑀳. 𑀲𑀸 𑀢𑁂𑀦 𑀏𑀓𑀓𑁂𑀦𑁂𑀯 𑀪𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀢𑁂 𑀉𑀪𑁄𑀧𑀺 𑀚𑁂𑀢𑀯𑀦𑀧𑀺𑀝𑁆𑀞𑀺𑀯𑀺𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑀸 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺 𑀚𑁂𑀢𑀯𑀦𑀁 𑀧𑀯𑀺𑀲𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀢𑁂𑀲𑀜𑁆𑀜𑁂𑀯 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀞𑀺𑀢𑀮𑀼𑀤𑁆𑀤𑀓𑁄 𑀯𑀺𑀬 𑀕𑀦𑁆𑀥𑀓𑀼𑀝𑀺𑀙𑀸𑀬𑀸𑀬 𑀦𑀺𑀲𑀻𑀤𑀺, 𑀢𑁂 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁, 𑀉𑀧𑀸𑀲𑀺𑀓𑁂, 𑀅𑀬𑀁 𑀢𑁂 𑀪𑀢𑁆𑀢𑀸 𑀳𑀺𑀢𑀓𑀸𑀫𑁄 𑀲𑀲𑁆𑀦𑁂𑀳𑁄’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀅𑀳𑀁 𑀏𑀢𑀲𑁆𑀲 𑀲𑀲𑁆𑀦𑁂𑀳𑀸, 𑀅𑀬𑀁 𑀧𑀦 𑀫𑀬𑁆𑀳𑀁 𑀦𑀺𑀲𑁆𑀦𑁂𑀳𑁄, 𑀢𑀺𑀝𑁆𑀞𑀦𑁆𑀢𑀼 𑀅𑀜𑁆𑀜𑁂𑀧𑀺 𑀤𑀺𑀯𑀲𑀸, 𑀅𑀚𑁆𑀚𑁂𑀯𑁂𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀼𑀝𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀫𑀬𑁆𑀳𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸𑀯 𑀪𑀼𑀜𑁆𑀚𑀻’’𑀢𑀺. ‘‘𑀉𑀧𑀸𑀲𑀺𑀓𑁂, 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀢𑁆𑀯𑀁 𑀏𑀢𑀲𑁆𑀲 𑀳𑀺𑀢𑀓𑀸𑀫𑀸 𑀲𑀲𑁆𑀦𑁂𑀳𑀸, 𑀅𑀬𑀁 𑀧𑀦 𑀦𑀺𑀲𑁆𑀦𑁂𑀳𑁄𑀯. 𑀬𑀤𑀸 𑀧𑀦 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀢𑀯 𑀕𑀼𑀡𑁂 𑀚𑀸𑀦𑀸𑀢𑀺, 𑀢𑀤𑀸 𑀢𑁂 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀦𑀺𑀬𑁆𑀬𑀸𑀤𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑀸𑀬 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 ¶ 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺. 𑀅𑀣 𑀭𑀸𑀚𑀸 ‘‘𑀧𑀤𑀼𑀩𑁆𑀪𑁂𑀬𑁆𑀬𑀸𑀧𑀺 𑀫𑁂 𑀅𑀬’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀆𑀲𑀗𑁆𑀓𑀦𑁆𑀢𑁄 𑀦𑀻𑀳𑀭𑀺. 𑀲𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀏𑀓𑀲𑁆𑀫𑀺𑀁 𑀓𑀸𑀲𑀺𑀓𑀕𑀸𑀫𑀓𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀓𑀸𑀮𑀓𑀢𑀪𑀸𑀯𑀁 ¶ 𑀲𑀼𑀢𑁆𑀯𑀸 ‘‘𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 ‘‘𑀪𑀭𑀺𑀬𑀸𑀬𑀧𑀺 𑀤𑀢𑁆𑀯𑀸 𑀪𑀼𑀜𑁆𑀚𑀸𑀳𑀻’’𑀢𑀺 𑀪𑀢𑁆𑀢𑀧𑀼𑀝𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲𑀸 𑀅𑀤𑀢𑁆𑀯𑀸 𑀲𑀬𑀫𑁂𑀯 𑀢𑀁 𑀪𑀼𑀜𑁆𑀚𑀺. 𑀲𑀸 ‘‘𑀓𑀓𑁆𑀔𑀴𑁄 ¶ 𑀯𑀢𑀸𑀬𑀁 𑀧𑀼𑀭𑀺𑀲𑁄’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀲𑁄 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀢𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 ‘‘𑀏𑀢𑁆𑀢𑀓𑀫𑁂𑀯 𑀏𑀢𑀺𑀲𑁆𑀲𑀸 𑀅𑀮’’𑀦𑁆𑀢𑀺 𑀦 𑀅𑀜𑁆𑀜𑀁 𑀲𑀓𑁆𑀓𑀸𑀭𑀁 𑀯𑀸 𑀲𑀫𑁆𑀫𑀸𑀦𑀁 𑀯𑀸 𑀓𑀭𑁄𑀢𑀺, ‘‘𑀓𑀣𑀁 𑀬𑀸𑀧𑁂𑀲𑀻’’𑀢𑀺𑀧𑀺 𑀦𑀁 𑀦 𑀧𑀼𑀘𑁆𑀙𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑁂𑀯𑀻 𑀭𑀜𑁆𑀜𑁄 𑀩𑀳𑀽𑀧𑀓𑀸𑀭𑀸 𑀲𑀲𑁆𑀦𑁂𑀳𑀸, 𑀭𑀸𑀚𑀸 𑀧𑀦𑁂𑀢𑀁 𑀓𑀺𑀲𑁆𑀫𑀺𑀜𑁆𑀘𑀺 𑀦 𑀫𑀜𑁆𑀜𑀢𑀺, 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀫𑀲𑁆𑀲𑀸 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑀘𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀫𑀬𑀁, 𑀤𑁂𑀯𑀺, 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀸𑀫, 𑀓𑀺𑀁 𑀦𑀸𑀫 𑀫𑀳𑀮𑁆𑀮𑀓𑀸𑀦𑀁 𑀧𑀺𑀢𑀽𑀦𑀁 𑀯𑀢𑁆𑀣𑀔𑀡𑁆𑀟𑀁 𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀯𑀸 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀢𑀸𑀢, 𑀅𑀳𑀁 𑀅𑀢𑁆𑀢𑀦𑀸𑀯 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀤𑀲𑁆𑀲𑀸𑀫𑀺, 𑀦𑀦𑀼 𑀮𑀪𑀦𑀓𑀸𑀮𑁂 𑀅𑀤𑀸𑀲𑀺𑀁, 𑀇𑀤𑀸𑀦𑀺 𑀧𑀦 𑀫𑁂 𑀭𑀸𑀚𑀸 𑀦 𑀓𑀺𑀜𑁆𑀘𑀺 𑀤𑁂𑀢𑀺. 𑀢𑀺𑀝𑁆𑀞𑀢𑀼 𑀅𑀜𑁆𑀜𑀁 𑀤𑀸𑀦𑀁, 𑀭𑀚𑁆𑀚𑀁 𑀕𑀡𑁆𑀳𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀢𑁆𑀢𑀧𑀼𑀝𑀁 𑀮𑀪𑀺𑀢𑁆𑀯𑀸 𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀫𑁂 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸𑀯 𑀪𑀼𑀜𑁆𑀚𑀻’’𑀢𑀺. ‘‘𑀓𑀺𑀁 𑀧𑀦, 𑀅𑀫𑁆𑀫, 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀏𑀯𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀢𑁂𑀦 𑀳𑀺 𑀅𑀚𑁆𑀚𑁂𑀯 𑀫𑀫 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀺𑀢𑀓𑀸𑀮𑁂 𑀫𑀬𑀺 𑀧𑀼𑀘𑁆𑀙𑀦𑁆𑀢𑁂 𑀏𑀯𑀁 𑀓𑀣𑁂𑀣 𑀅𑀚𑁆𑀚𑁂𑀯 𑀯𑁄 𑀕𑀼𑀡𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀲𑀸𑀧𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀫𑁆𑀫, 𑀢𑀼𑀫𑁆𑀳𑁂 𑀅𑀢𑀺𑀯𑀺𑀬 𑀓𑀓𑁆𑀔𑀴𑀸, 𑀓𑀺𑀁 𑀦𑀸𑀫 𑀧𑀺𑀢𑀽𑀦𑀁 𑀯𑀢𑁆𑀣𑀔𑀡𑁆𑀟𑀁 𑀯𑀸 𑀪𑀢𑁆𑀢𑀧𑀺𑀡𑁆𑀟𑀫𑀢𑁆𑀢𑀁 𑀯𑀸 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀢𑀸𑀢, 𑀅𑀳𑀫𑁂𑀯 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀤𑀲𑁆𑀲𑀸𑀫𑀻’’𑀢𑀺? ‘‘𑀦𑀦𑀼 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀢𑁂 𑀮𑀤𑁆𑀥’’𑀦𑁆𑀢𑀺? ‘‘𑀢𑀸𑀢, 𑀓𑀺𑀲𑁆𑀫𑀺𑀜𑁆𑀘𑀺 𑀲𑀫𑁆𑀫𑀸𑀦𑁂 𑀅𑀲𑀢𑀺 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀫𑁂 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀓𑀺𑀁 𑀤𑀲𑁆𑀲𑀢𑀺, 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀢𑁆𑀢𑀧𑀼𑀝𑀁 𑀮𑀪𑀺𑀢𑁆𑀯𑀸 𑀢𑀢𑁄 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 ¶ 𑀲𑀬𑀫𑁂𑀯 𑀪𑀼𑀜𑁆𑀚𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀏𑀯𑀁 𑀓𑀺𑀭, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀅𑀥𑀺𑀯𑀸𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 ‘‘𑀢𑁂𑀦 𑀳𑀺, 𑀅𑀫𑁆𑀫, 𑀭𑀜𑁆𑀜𑁄 𑀅𑀧𑁆𑀧𑀺𑀬𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀇𑀥 𑀯𑀸𑀲𑁂𑀦. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄 𑀘 𑀤𑀼𑀓𑁆𑀔𑁄, 𑀢𑀼𑀫𑁆𑀳𑀸𑀓𑀁 𑀇𑀥 𑀯𑀸𑀲𑁂 𑀲𑀢𑀺 𑀭𑀜𑁆𑀜𑁄 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄𑀯 ¶ 𑀤𑀼𑀓𑁆𑀔𑀁 ¶ 𑀪𑀯𑀺𑀲𑁆𑀲𑀢𑀺, 𑀇𑀫𑁂 𑀲𑀢𑁆𑀢𑀸 𑀦𑀸𑀫 𑀪𑀚𑀦𑁆𑀢𑁂 𑀪𑀚𑀦𑁆𑀢𑀺, 𑀅𑀪𑀚𑀦𑀪𑀸𑀯𑀁 𑀜𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀩𑁆𑀩𑀁, 𑀫𑀳𑀦𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁪𑁫.

‘‘𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀁, 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀁;

𑀦𑀸𑀦𑀢𑁆𑀣𑀓𑀸𑀫𑀲𑁆𑀲 𑀓𑀭𑁂𑀬𑁆𑀬 𑀅𑀢𑁆𑀣𑀁, 𑀅𑀲𑀫𑁆𑀪𑀚𑀦𑁆𑀢𑀫𑁆𑀧𑀺 𑀦 𑀲𑀫𑁆𑀪𑀚𑁂𑀬𑁆𑀬.

𑁧𑁪𑁬.

‘‘𑀘𑀚𑁂 𑀘𑀚𑀦𑁆𑀢𑀁 𑀯𑀦𑀣𑀁 𑀦 𑀓𑀬𑀺𑀭𑀸, 𑀅𑀧𑁂𑀢𑀘𑀺𑀢𑁆𑀢𑁂𑀦 𑀦 𑀲𑀫𑁆𑀪𑀚𑁂𑀬𑁆𑀬;

𑀤𑀺𑀚𑁄 𑀤𑀼𑀫𑀁 𑀔𑀻𑀡𑀨𑀮𑀦𑁆𑀢𑀺 𑀜𑀢𑁆𑀯𑀸, 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬 𑀫𑀳𑀸 𑀳𑀺 𑀮𑁄𑀓𑁄’’𑀢𑀺.

𑀢𑀢𑁆𑀣 𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀦𑁆𑀢𑀺 𑀬𑁄 𑀅𑀢𑁆𑀢𑀦𑁄 𑀦𑀫𑀢𑀺, 𑀢𑀲𑁆𑀲𑁂𑀯 𑀧𑀝𑀺𑀦𑀫𑁂𑀬𑁆𑀬. 𑀬𑁄 𑀘 𑀪𑀚𑀢𑀺, 𑀢𑀫𑁂𑀯 𑀪𑀚𑁂𑀬𑁆𑀬. 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀅𑀦𑀼𑀓𑀼𑀩𑁆𑀩𑀦𑁆𑀢𑀲𑁆𑀲𑁂𑀯 𑀢𑀲𑁆𑀲𑀧𑀺 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀧𑀝𑀺𑀓𑀭𑁂𑀬𑁆𑀬. 𑀘𑀚𑁂 𑀘𑀚𑀦𑁆𑀢𑀁 𑀯𑀦𑀣𑀁 𑀦 𑀓𑀬𑀺𑀭𑀸𑀢𑀺 𑀅𑀢𑁆𑀢𑀸𑀦𑀁 𑀚𑀳𑀦𑁆𑀢𑀁 𑀚𑀳𑁂𑀬𑁆𑀬𑁂𑀯, 𑀢𑀲𑁆𑀫𑀺𑀁 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀯𑀦𑀣𑀁 𑀦 𑀓𑀭𑁂𑀬𑁆𑀬. 𑀅𑀧𑁂𑀢𑀘𑀺𑀢𑁆𑀢𑁂𑀦𑀸𑀢𑀺 𑀯𑀺𑀕𑀢𑀘𑀺𑀢𑁆𑀢𑁂𑀦 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑁂𑀦. 𑀦 𑀲𑀫𑁆𑀪𑀚𑁂𑀬𑁆𑀬𑀸𑀢𑀺 𑀢𑀣𑀸𑀭𑀽𑀧𑁂𑀦 𑀲𑀤𑁆𑀥𑀺𑀁 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬. 𑀤𑀺𑀚𑁄 𑀤𑀼𑀫𑀦𑁆𑀢𑀺 𑀬𑀣𑀸 𑀲𑀓𑀼𑀡𑁄 𑀧𑀼𑀩𑁆𑀩𑁂 𑀨𑀮𑀺𑀢𑀫𑁆𑀧𑀺 𑀭𑀼𑀓𑁆𑀔𑀁 𑀨𑀮𑁂 𑀔𑀻𑀡𑁂 ‘‘𑀔𑀻𑀡𑀨𑀮𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀲𑀫𑁂𑀓𑁆𑀔𑀢𑀺 𑀧𑀭𑀺𑀬𑁂𑀲𑀢𑀺, 𑀏𑀯𑀁 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬. 𑀫𑀳𑀸 𑀳𑀺 𑀏𑀲 𑀮𑁄𑀓𑁄, 𑀅𑀣 𑀢𑀼𑀫𑁆𑀳𑁂 𑀲𑀲𑁆𑀦𑁂𑀳𑀁 𑀏𑀓𑀁 𑀧𑀼𑀭𑀺𑀲𑀁 𑀮𑀪𑀺𑀲𑁆𑀲𑀣𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑁂𑀯𑀺𑀬𑀸 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀯𑀲𑀺𑀁𑀲𑀼.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀤𑁆𑀯𑁂 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. ‘‘𑀢𑀤𑀸 𑀚𑀬𑀫𑁆𑀧𑀢𑀺𑀓𑀸 𑀇𑀫𑁂 𑀤𑁆𑀯𑁂 𑀚𑀬𑀫𑁆𑀧𑀢𑀺𑀓𑀸 𑀅𑀳𑁂𑀲𑀼𑀁, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀼𑀝𑀪𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁨𑁪] 𑁪. 𑀓𑀼𑀫𑁆𑀪𑀺𑀮𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁆𑀲𑁂𑀢𑁂 ¶ ¶ 𑀘𑀢𑀼𑀭𑁄 𑀥𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑁧𑁪𑁭.

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀺.

𑁧𑁪𑁮.

‘‘𑀬𑀲𑁆𑀲 𑀘𑁂𑀢𑁂 𑀦 𑀯𑀺𑀚𑁆𑀚𑀦𑁆𑀢𑀺, 𑀕𑀼𑀡𑀸 𑀧𑀭𑀫𑀪𑀤𑁆𑀤𑀓𑀸;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺.

𑀢𑀢𑁆𑀣 𑀕𑀼𑀡𑀸 𑀧𑀭𑀫𑀪𑀤𑁆𑀤𑀓𑀸𑀢𑀺 𑀬𑀲𑁆𑀲 𑀏𑀢𑁂 𑀧𑀭𑀫𑀪𑀤𑁆𑀤𑀓𑀸 𑀘𑀢𑁆𑀢𑀸𑀭𑁄 𑀭𑀸𑀲𑀝𑁆𑀞𑁂𑀦 𑀧𑀺𑀡𑁆𑀟𑀝𑁆𑀞𑁂𑀦 𑀕𑀼𑀡𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀲𑁄 𑀧𑀘𑁆𑀘𑀸𑀫𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀓𑀼𑀫𑁆𑀪𑀺𑀮𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑀫𑁂𑀯 𑀲𑀤𑁆𑀥𑀺𑀁 𑀲𑀫𑁄𑀥𑀸𑀦𑁂𑀦𑀸𑀢𑀺.

𑀓𑀼𑀫𑁆𑀪𑀺𑀮𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁨𑁫] 𑁫. 𑀔𑀦𑁆𑀢𑀺𑀯𑀡𑁆𑀡𑀚𑀸𑀢𑀓𑀯𑀡𑁆𑀡𑀦𑀸

𑀅𑀢𑁆𑀣𑀺 𑀫𑁂 𑀧𑀼𑀭𑀺𑀲𑁄, 𑀤𑁂𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀓𑀺𑀭𑁂𑀓𑁄 𑀩𑀳𑀽𑀧𑀓𑀸𑀭𑁄 𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀲𑁆𑀲𑀺. 𑀭𑀸𑀚𑀸 ‘‘𑀉𑀧𑀓𑀸𑀭𑀓𑁄 𑀫𑁂’’𑀢𑀺 𑀜𑀢𑁆𑀯𑀸𑀧𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀧𑁄𑀭𑀸𑀡𑀓𑀭𑀸𑀚𑀸𑀦𑁄𑀧𑀺, 𑀫𑀳𑀸𑀭𑀸𑀚, 𑀏𑀯𑀁 𑀅𑀥𑀺𑀯𑀸𑀲𑁂𑀲𑀼𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀅𑀫𑀘𑁆𑀘𑁄 𑀢𑀲𑁆𑀲 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀲𑁆𑀲𑀺, 𑀅𑀫𑀘𑁆𑀘𑀲𑁆𑀲𑀸𑀧𑀺 𑀲𑁂𑀯𑀓𑁄 𑀢𑀲𑁆𑀲 𑀕𑁂𑀳𑁂 𑀧𑀤𑀼𑀲𑁆𑀲𑀺. 𑀲𑁄 𑀢𑀲𑁆𑀲 𑀅𑀧𑀭𑀸𑀥𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀏𑀓𑁄 𑀫𑁂 𑀉𑀧𑀝𑁆𑀞𑀸𑀓𑁄 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀓𑁄 ¶ , 𑀲𑁄 𑀫𑀬𑁆𑀳𑀁 𑀕𑁂𑀳𑁂 𑀧𑀤𑀼𑀲𑁆𑀲𑀺, 𑀢𑀲𑁆𑀲 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁯.

‘‘𑀅𑀢𑁆𑀣𑀺 𑀫𑁂 𑀧𑀼𑀭𑀺𑀲𑁄 𑀤𑁂𑀯, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀩𑁆𑀬𑀸𑀯𑀝𑁄;

𑀢𑀲𑁆𑀲 𑀘𑁂𑀓𑁄𑀧𑀭𑀸𑀥𑀢𑁆𑀣𑀺, 𑀢𑀢𑁆𑀣 𑀢𑁆𑀯𑀁 𑀓𑀺𑀦𑁆𑀢𑀺 𑀫𑀜𑁆𑀜𑀲𑀻’’𑀢𑀺.

𑀢𑀢𑁆𑀣 ¶ ¶ 𑀢𑀲𑁆𑀲 𑀘𑁂𑀓𑁄𑀧𑀭𑀸𑀥𑀢𑁆𑀣𑀻𑀢𑀺 𑀢𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲 𑀏𑀓𑁄 𑀅𑀧𑀭𑀸𑀥𑁄 𑀅𑀢𑁆𑀣𑀺. 𑀢𑀢𑁆𑀣 𑀢𑁆𑀯𑀁 𑀓𑀺𑀦𑁆𑀢𑀺 𑀫𑀜𑁆𑀜𑀲𑀻𑀢𑀺 𑀢𑀢𑁆𑀣 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑀭𑀸𑀥𑁂 𑀢𑁆𑀯𑀁 ‘‘𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀫𑀜𑁆𑀜𑀲𑀺, 𑀬𑀣𑀸 𑀢𑁂 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀼𑀭𑀽𑀧𑀫𑀲𑁆𑀲 𑀤𑀡𑁆𑀟𑀁 𑀧𑀡𑁂𑀳𑀻𑀢𑀺 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫𑁦.

‘‘𑀅𑀫𑁆𑀳𑀸𑀓𑀫𑁆𑀧𑀢𑁆𑀣𑀺 𑀧𑀼𑀭𑀺𑀲𑁄, 𑀏𑀤𑀺𑀲𑁄 𑀇𑀥 𑀯𑀺𑀚𑁆𑀚𑀢𑀺;

𑀤𑀼𑀮𑁆𑀮𑀪𑁄 𑀅𑀗𑁆𑀕𑀲𑀫𑁆𑀧𑀦𑁆𑀦𑁄, 𑀔𑀦𑁆𑀢𑀺𑀭𑀲𑁆𑀫𑀸𑀓 𑀭𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀫𑁆𑀳𑀸𑀓𑀫𑁆𑀧𑀺 𑀭𑀸𑀚𑀽𑀦𑀁 𑀲𑀢𑀁 𑀏𑀤𑀺𑀲𑁄 𑀩𑀳𑀽𑀧𑀓𑀸𑀭𑁄 𑀅𑀕𑀸𑀭𑁂 𑀤𑀼𑀲𑁆𑀲𑀦𑀓𑀧𑀼𑀭𑀺𑀲𑁄 𑀅𑀢𑁆𑀣𑀺, 𑀲𑁄 𑀘 𑀔𑁄 𑀇𑀥 𑀯𑀺𑀚𑁆𑀚𑀢𑀺, 𑀇𑀤𑀸𑀦𑀺𑀧𑀺 𑀇𑀥𑁂𑀯 𑀲𑀁𑀯𑀺𑀚𑁆𑀚𑀢𑀺, 𑀫𑀬𑀁 𑀭𑀸𑀚𑀸𑀦𑁄𑀧𑀺 𑀲𑀫𑀸𑀦𑀸 𑀢𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀲𑀦𑁆𑀥𑀸𑀬 𑀅𑀥𑀺𑀯𑀸𑀲𑁂𑀫, 𑀢𑀼𑀬𑁆𑀳𑀁 𑀧𑀦 𑀅𑀭𑀜𑁆𑀜𑁄𑀧𑀺 𑀲𑀢𑁄 𑀅𑀥𑀺𑀯𑀸𑀲𑀦𑀪𑀸𑀭𑁄 𑀚𑀸𑀢𑁄. 𑀅𑀗𑁆𑀕𑀲𑀫𑁆𑀧𑀦𑁆𑀦𑁄 𑀳𑀺 𑀲𑀩𑁆𑀩𑁂𑀳𑀺 𑀕𑀼𑀡𑀓𑁄𑀝𑁆𑀞𑀸𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀦𑀸𑀫 𑀤𑀼𑀮𑁆𑀮𑀪𑁄, 𑀢𑁂𑀦 𑀓𑀸𑀭𑀡𑁂𑀦 𑀅𑀲𑁆𑀫𑀸𑀓𑀁 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑁂𑀯 𑀭𑀼𑀘𑁆𑀘𑀢𑀻𑀢𑀺.

𑀅𑀫𑀘𑁆𑀘𑁄 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀭𑀜𑁆𑀜𑁄 𑀯𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀲𑁆𑀲𑀺𑀢𑀼𑀁 𑀦 𑀯𑀺𑀲𑀳𑀺, 𑀲𑁄𑀧𑀺𑀲𑁆𑀲 𑀲𑁂𑀯𑀓𑁄 𑀭𑀜𑁆𑀜𑁄 𑀆𑀭𑁄𑀘𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀺𑀲𑀳𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀳𑀫𑁂𑀯 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑁄𑀲𑀺’’𑀦𑁆𑀢𑀺. 𑀲𑁄𑀧𑀺 𑀅𑀫𑀘𑁆𑀘𑁄 𑀭𑀜𑁆𑀜𑁄 𑀲𑀢𑁆𑀣𑀼 𑀓𑀣𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻𑀢𑀺.

𑀔𑀦𑁆𑀢𑀺𑀯𑀡𑁆𑀡𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁨𑁬] 𑁬. 𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀮𑁂 ¶ 𑀦𑀺𑀓𑁆𑀔𑀫𑀦𑀸 𑀲𑀸𑀥𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄𑀲𑀮𑀭𑀸𑀚𑀸 𑀧𑀘𑁆𑀘𑀦𑁆𑀢𑀯𑀽𑀧𑀲𑀫𑀦𑀢𑁆𑀣𑀸𑀬 𑀅𑀓𑀸𑀮𑁂 𑀦𑀺𑀓𑁆𑀔𑀫𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀢𑁆𑀣𑀸 ¶ 𑀧𑀦 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀆𑀳 𑁋 ‘‘𑀫𑀳𑀸𑀭𑀸𑀚, 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑀬𑀺. 𑀢𑀲𑁆𑀫𑀺𑀁 𑀓𑀸𑀮𑁂 ¶ 𑀏𑀓𑁄 𑀉𑀮𑀽𑀓𑀲𑀓𑀼𑀡𑁄 𑀯𑁂𑀴𑀼𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀬𑀺. 𑀓𑀸𑀓𑀲𑁂𑀦𑀸 𑀆𑀕𑀦𑁆𑀢𑁆𑀯𑀸 ‘𑀦𑀺𑀓𑁆𑀔𑀦𑁆𑀢𑀫𑁂𑀯 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’’𑀢𑀺 𑀧𑀭𑀺𑀯𑀸𑀭𑁂𑀲𑀺. 𑀲𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀓𑀸𑀮𑁂𑀬𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀓𑀸𑀓𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀼𑀡𑁆𑀟𑁂𑀳𑀺 𑀓𑁄𑀝𑁆𑀝𑁂𑀦𑁆𑀢𑀸 𑀧𑀭𑀺𑀧𑀸𑀢𑁂𑀲𑀼𑀁. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀧𑀡𑁆𑀟𑀺𑀢, 𑀇𑀫𑁂 𑀓𑀸𑀓𑀸 𑀓𑁄𑀲𑀺𑀬𑀁 𑀧𑀭𑀺𑀧𑀸𑀢𑁂𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀓𑀸𑀮𑁂, 𑀫𑀳𑀸𑀭𑀸𑀚, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑀸 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀧𑀝𑀺𑀮𑀪𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀅𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁫𑁧.

‘‘𑀓𑀸𑀮𑁂 𑀦𑀺𑀓𑁆𑀔𑀫𑀦𑀸 𑀲𑀸𑀥𑀼, 𑀦𑀸𑀓𑀸𑀮𑁂 𑀲𑀸𑀥𑀼 𑀦𑀺𑀓𑁆𑀔𑀫𑁄;

𑀅𑀓𑀸𑀮𑁂𑀦 𑀳𑀺 𑀦𑀺𑀓𑁆𑀔𑀫𑁆𑀫, 𑀏𑀓𑀓𑀫𑁆𑀧𑀺 𑀩𑀳𑀼𑀚𑁆𑀚𑀦𑁄;

𑀦 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀚𑁄𑀢𑁂𑀢𑀺, 𑀥𑀗𑁆𑀓𑀲𑁂𑀦𑀸𑀯 𑀓𑁄𑀲𑀺𑀬𑀁.

𑁧𑁫𑁨.

‘‘𑀥𑀻𑀭𑁄 𑀘 𑀯𑀺𑀥𑀺𑀯𑀺𑀥𑀸𑀦𑀜𑁆𑀜𑀽, 𑀧𑀭𑁂𑀲𑀁 𑀯𑀺𑀯𑀭𑀸𑀦𑀼𑀕𑀽;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀯𑀲𑀻𑀓𑀢𑁆𑀯𑀸, 𑀓𑁄𑀲𑀺𑀬𑁄𑀯 𑀲𑀼𑀔𑀻 𑀲𑀺𑀬𑀸’’𑀢𑀺.

𑀢𑀢𑁆𑀣 𑀓𑀸𑀮𑁂 𑀦𑀺𑀓𑁆𑀔𑀫𑀦𑀸 𑀲𑀸𑀥𑀽𑀢𑀺, 𑀫𑀳𑀸𑀭𑀸𑀚, 𑀦𑀺𑀓𑁆𑀔𑀫𑀦𑀸 𑀦𑀸𑀫 𑀦𑀺𑀓𑁆𑀔𑀫𑀦𑀁 𑀯𑀸 𑀧𑀭𑀓𑁆𑀓𑀫𑀦𑀁 𑀯𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀓𑀸𑀮𑁂 𑀲𑀸𑀥𑀼. 𑀦𑀸𑀓𑀸𑀮𑁂 𑀲𑀸𑀥𑀼 𑀦𑀺𑀓𑁆𑀔𑀫𑁄𑀢𑀺 𑀅𑀓𑀸𑀮𑁂 𑀧𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦𑀺𑀓𑁆𑀔𑀫𑁄 𑀦𑀸𑀫 𑀦𑀺𑀓𑁆𑀔𑀫𑀦𑀁 𑀯𑀸 𑀧𑀭𑀓𑁆𑀓𑀫𑀦𑀁 𑀯𑀸 𑀦 𑀲𑀸𑀥𑀼. ‘‘𑀅𑀓𑀸𑀮𑁂𑀦 𑀳𑀻’’𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀧𑀤𑁂𑀲𑀼 𑀧𑀞𑀫𑁂𑀦 𑀲𑀤𑁆𑀥𑀺𑀁 𑀢𑀢𑀺𑀬𑀁, 𑀤𑀼𑀢𑀺𑀬𑁂𑀦 𑀘𑀢𑀼𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀳𑀺 𑀓𑁄𑀘𑀺 𑀧𑀼𑀭𑀺𑀲𑁄 𑀅𑀓𑀸𑀮𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀸 𑀧𑀭𑀓𑁆𑀓𑀫𑀺𑀢𑁆𑀯𑀸 𑀯𑀸 𑀦 𑀓𑀺𑀜𑁆𑀘𑀺 ¶ 𑀅𑀢𑁆𑀣𑀁 𑀚𑁄𑀢𑁂𑀢𑀺, 𑀅𑀢𑁆𑀢𑀦𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑀼𑀟𑁆𑀠𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀏𑀓𑀓𑀫𑁆𑀧𑀺 𑀩𑀳𑀼𑀚𑁆𑀚𑀦𑁄 𑀩𑀳𑀼𑀧𑀺 𑀲𑁄 𑀧𑀘𑁆𑀘𑀢𑁆𑀣𑀺𑀓𑀚𑀦𑁄 𑀏𑀢𑀁 𑀅𑀓𑀸𑀮𑁂 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸 𑀧𑀭𑀓𑁆𑀓𑀫𑀦𑁆𑀢𑀁 𑀯𑀸 𑀏𑀓𑀓𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀢𑀺. 𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀥𑀗𑁆𑀓𑀲𑁂𑀦𑀸𑀯 𑀓𑁄𑀲𑀺𑀬𑀁, 𑀬𑀣𑀸 𑀅𑀬𑀁 𑀥𑀗𑁆𑀓𑀲𑁂𑀦𑀸 𑀇𑀫𑀁 𑀅𑀓𑀸𑀮𑁂 𑀦𑀺𑀓𑁆𑀔𑀫𑀦𑁆𑀢𑀜𑁆𑀘 𑀧𑀭𑀓𑁆𑀓𑀫𑀦𑁆𑀢𑀜𑁆𑀘 𑀓𑁄𑀲𑀺𑀬𑀁 𑀢𑀼𑀡𑁆𑀟𑁂𑀳𑀺 𑀯𑀺𑀢𑀼𑀤𑀦𑁆𑀢𑀺 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺, 𑀢𑀣𑀸 𑀢𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑁂 𑀆𑀤𑀺𑀁 𑀓𑀢𑁆𑀯𑀸 𑀓𑁂𑀦𑀘𑀺 𑀅𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀦 𑀦𑀺𑀓𑁆𑀔𑀫𑀺𑀢𑀩𑁆𑀩𑀁 𑀦 𑀧𑀭𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺.

𑀤𑀼𑀢𑀺𑀬𑀕𑀸𑀣𑀸𑀬 ¶ 𑀥𑀻𑀭𑁄𑀢𑀺 𑀧𑀡𑁆𑀟𑀺𑀢𑁄. 𑀯𑀺𑀥𑀻𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑁂𑀳𑀺 𑀞𑀧𑀺𑀢𑀧𑀯𑁂𑀡𑀻. 𑀯𑀺𑀥𑀸𑀦𑀦𑁆𑀢𑀺 𑀓𑁄𑀝𑁆𑀞𑀸𑀲𑁄 𑀯𑀸 𑀲𑀁𑀯𑀺𑀤𑀳𑀦𑀁 𑀯𑀸. 𑀯𑀺𑀯𑀭𑀸𑀦𑀼𑀕𑀽𑀢𑀺 𑀯𑀺𑀯𑀭𑀁 𑀅𑀦𑀼𑀕𑀘𑁆𑀙𑀦𑁆𑀢𑁄 𑀚𑀸𑀦𑀦𑁆𑀢𑁄. 𑀲𑀩𑁆𑀩𑀸𑀫𑀺𑀢𑁆𑀢𑁂𑀢𑀺 ¶ 𑀲𑀩𑁆𑀩𑁂 𑀅𑀫𑀺𑀢𑁆𑀢𑁂. 𑀯𑀲𑀻𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸. 𑀓𑁄𑀲𑀺𑀬𑁄𑀯𑀸𑀢𑀺 𑀇𑀫𑀫𑁆𑀳𑀸 𑀩𑀸𑀮𑀓𑁄𑀲𑀺𑀬𑀸 𑀅𑀜𑁆𑀜𑁄 𑀧𑀡𑁆𑀟𑀺𑀢𑀓𑁄𑀲𑀺𑀬𑁄 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀘 𑀔𑁄 𑀧𑀡𑁆𑀟𑀺𑀢𑁄 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑀩𑁆𑀩𑀁 𑀧𑀭𑀓𑁆𑀓𑀫𑀺𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀦 𑀦𑀺𑀓𑁆𑀔𑀫𑀺𑀢𑀩𑁆𑀩𑀁 𑀦 𑀧𑀭𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑁂𑀳𑀺 𑀞𑀧𑀺𑀢𑀲𑁆𑀲 𑀧𑀯𑁂𑀡𑀺𑀲𑀗𑁆𑀔𑀸𑀢𑀲𑁆𑀲 𑀯𑀺𑀥𑀺𑀦𑁄 𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀯𑀺𑀥𑀸𑀦𑀁 𑀯𑀸 𑀢𑀲𑁆𑀲 𑀯𑀸 𑀯𑀺𑀥𑀺𑀦𑁄 𑀯𑀺𑀥𑀸𑀦𑀁 𑀲𑀁𑀯𑀺𑀤𑀳𑀦𑀁 𑀅𑀦𑀼𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀲𑁄 𑀯𑀺𑀥𑀺𑀯𑀺𑀥𑀸𑀦𑀜𑁆𑀜𑀽 𑀧𑀭𑁂𑀲𑀁 𑀅𑀢𑁆𑀢𑀦𑁄 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀯𑀺𑀯𑀭𑀁 𑀜𑀢𑁆𑀯𑀸 𑀬𑀣𑀸 𑀦𑀸𑀫 𑀧𑀡𑁆𑀟𑀺𑀢𑁄 𑀓𑁄𑀲𑀺𑀬𑁄 𑀭𑀢𑁆𑀢𑀺𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑁄 𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀧𑀭𑀓𑁆𑀓𑀫𑀺𑀢𑁆𑀯𑀸 𑀘 𑀢𑀢𑁆𑀣 𑀢𑀢𑁆𑀣 𑀲𑀬𑀺𑀢𑀸𑀦𑀜𑁆𑀜𑁂𑀯 𑀓𑀸𑀓𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀫𑀸𑀦𑁄 𑀢𑁂 𑀲𑀩𑁆𑀩𑁂 𑀅𑀫𑀺𑀢𑁆𑀢𑁂 𑀯𑀲𑀻𑀓𑀢𑁆𑀯𑀸 𑀲𑀼𑀔𑀻 𑀲𑀺𑀬𑀸, 𑀏𑀯𑀁 𑀥𑀻𑀭𑁄𑀧𑀺 𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀭𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀸𑀫𑀺𑀢𑁆𑀢𑁂 𑀯𑀲𑀻𑀓𑀢𑁆𑀯𑀸 𑀲𑀼𑀔𑀻 𑀦𑀺𑀤𑁆𑀤𑀼𑀓𑁆𑀔𑁄 𑀪𑀯𑁂𑀬𑁆𑀬𑀸𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁨𑁭] 𑁭. 𑀕𑀽𑀣𑀧𑀸𑀡𑀚𑀸𑀢𑀓𑀯𑀡𑁆𑀡𑀦𑀸

𑀲𑀽𑀭𑁄 𑀲𑀽𑀭𑁂𑀦 𑀲𑀗𑁆𑀕𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀚𑁂𑀢𑀯𑀦𑀢𑁄 𑀢𑀺𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀏𑀓𑁄 𑀦𑀺𑀕𑀫𑀕𑀸𑀫𑁄, 𑀢𑀢𑁆𑀣 𑀩𑀳𑀽𑀦𑀺 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀬𑀪𑀢𑁆𑀢𑀸𑀦𑀺 𑀅𑀢𑁆𑀣𑀺. 𑀢𑀢𑁆𑀭𑁂𑀓𑁄 𑀧𑀜𑁆𑀳𑀧𑀼𑀘𑁆𑀙𑀓𑁄 𑀓𑁄𑀡𑁆𑀟𑁄 𑀯𑀲𑀢𑀺. 𑀲𑁄 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀬𑀪𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀆𑀕𑀢𑁂 𑀤𑀳𑀭𑁂 𑀘 ¶ 𑀲𑀸𑀫𑀡𑁂𑀭𑁂 𑀘 ‘‘𑀓𑁂 𑀔𑀸𑀤𑀦𑁆𑀢𑀺, 𑀓𑁂 𑀧𑀺𑀯𑀦𑁆𑀢𑀺, 𑀓𑁂 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀮𑀚𑁆𑀚𑀸𑀧𑁂𑀲𑀺. 𑀢𑁂 𑀢𑀲𑁆𑀲 𑀪𑀬𑁂𑀦 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀬𑀪𑀢𑁆𑀢𑀢𑁆𑀣𑀸𑀬 𑀢𑀁 𑀕𑀸𑀫𑀁 𑀦 𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀪𑀺𑀓𑁆𑀔𑀼 𑀲𑀮𑀸𑀓𑀕𑁆𑀕𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀲𑀼𑀓𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀧𑀓𑁆𑀔𑀺𑀬𑀪𑀢𑁆𑀢𑀁 𑀯𑀸 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ¶ ‘‘𑀅𑀢𑁆𑀣𑀸𑀯𑀼𑀲𑁄, 𑀢𑀢𑁆𑀣 𑀧𑀦𑁂𑀓𑁄 𑀓𑁄𑀡𑁆𑀟𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀁 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀢𑀲𑁆𑀲 𑀪𑀬𑁂𑀦 𑀓𑁄𑀘𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀢𑀢𑁆𑀣 𑀪𑀢𑁆𑀢𑀸𑀦𑀺 𑀫𑀬𑁆𑀳𑀁 𑀧𑀸𑀧𑁂𑀣, 𑀅𑀳𑀁 𑀢𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀧𑀮𑀸𑀬𑀦𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀪𑀺𑀓𑁆𑀔𑀽 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀢𑀢𑁆𑀣 𑀪𑀢𑁆𑀢𑀸𑀦𑀺 𑀧𑀸𑀧𑁂𑀲𑀼𑀁.

𑀲𑁄 ¶ 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀢𑀁 𑀤𑀺𑀲𑁆𑀯𑀸 𑀓𑁄𑀡𑁆𑀟𑁄 𑀘𑀡𑁆𑀟𑀫𑁂𑀡𑁆𑀟𑀓𑁄 𑀯𑀺𑀬 𑀯𑁂𑀕𑁂𑀦 𑀉𑀧𑀕𑀦𑁆𑀢𑁆𑀯𑀸 ‘‘𑀧𑀜𑁆𑀳𑀁 𑀫𑁂, 𑀲𑀫𑀡, 𑀓𑀣𑁂𑀳𑀻’’𑀢𑀺 𑀆𑀳. ‘‘𑀉𑀧𑀸𑀲𑀓, 𑀕𑀸𑀫𑁂 𑀘𑀭𑀺𑀢𑁆𑀯𑀸 𑀬𑀸𑀕𑀼𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀢𑀸𑀯 𑀫𑁂 𑀆𑀕𑀦𑁆𑀢𑀼𑀁 𑀤𑁂𑀳𑀻’’𑀢𑀺. 𑀲𑁄 𑀬𑀸𑀕𑀼𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀆𑀕𑀢𑁂𑀧𑀺 𑀢𑀲𑁆𑀫𑀺𑀁 𑀢𑀣𑁂𑀯 𑀆𑀳. 𑀲𑁄𑀧𑀺 𑀦𑀁 𑀪𑀺𑀓𑁆𑀔𑀼 ‘‘𑀬𑀸𑀕𑀼𑀁 𑀢𑀸𑀯 𑀫𑁂 𑀧𑀸𑀢𑀼𑀁 𑀤𑁂𑀳𑀺, 𑀆𑀲𑀦𑀲𑀸𑀮𑀁 𑀢𑀸𑀯 𑀲𑀫𑁆𑀫𑀚𑁆𑀚𑀺𑀢𑀼𑀁 𑀤𑁂𑀳𑀺, 𑀲𑀮𑀸𑀓𑀪𑀢𑁆𑀢𑀁 𑀢𑀸𑀯 𑀫𑁂 𑀆𑀳𑀭𑀺𑀢𑀼𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀲𑀮𑀸𑀓𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀢𑀫𑁂𑀯 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀏𑀳𑀺, 𑀧𑀜𑁆𑀳𑀁 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀩𑀳𑀺𑀕𑀸𑀫𑀁 𑀦𑁂𑀢𑁆𑀯𑀸 𑀘𑀻𑀯𑀭𑀁 𑀲𑀁𑀳𑀭𑀺𑀢𑁆𑀯𑀸 𑀅𑀁𑀲𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁆𑀭𑀸𑀧𑀺 𑀦𑀁 𑀲𑁄 ‘‘𑀲𑀫𑀡, 𑀧𑀜𑁆𑀳𑀁 𑀫𑁂 𑀓𑀣𑁂𑀳𑀻’’𑀢𑀺 𑀆𑀳. 𑀅𑀣 𑀦𑀁 ‘‘𑀓𑀣𑁂𑀫𑀺 𑀢𑁂 𑀧𑀜𑁆𑀳’’𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀸𑀢𑁂𑀢𑁆𑀯𑀸 𑀅𑀝𑁆𑀞𑀻𑀦𑀺 𑀲𑀁𑀘𑀼𑀡𑁆𑀡𑁂𑀦𑁆𑀢𑁄 𑀯𑀺𑀬 𑀧𑁄𑀣𑁂𑀢𑁆𑀯𑀸 𑀕𑀽𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀇𑀫𑀁 𑀕𑀸𑀫𑀁 𑀆𑀕𑀢𑀁 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸𑀯 𑀧𑀮𑀸𑀬𑀢𑀺. 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸 𑀓𑀺𑀭𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑀪𑀺𑀓𑁆𑀔𑀼 𑀓𑀺𑀭 𑀓𑁄𑀡𑁆𑀟𑀲𑁆𑀲 𑀫𑀼𑀔𑁂 𑀕𑀽𑀣𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑁄 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀢𑀁 𑀫𑀻𑀴𑁆𑀳𑁂𑀦 𑀆𑀲𑀸𑀤𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀆𑀲𑀸𑀤𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀅𑀗𑁆𑀕𑀫𑀕𑀥𑀯𑀸𑀲𑀺𑀦𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀭𑀝𑁆𑀞𑀁 𑀕𑀘𑁆𑀙𑀦𑁆𑀢𑀸 𑀏𑀓𑀤𑀺𑀯𑀲𑀁 𑀤𑁆𑀯𑀺𑀦𑁆𑀦𑀁 𑀭𑀝𑁆𑀞𑀸𑀦𑀁 𑀲𑀻𑀫𑀦𑁆𑀢𑀭𑁂 𑀏𑀓𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀯𑀲𑀺𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀫𑀘𑁆𑀙𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀧𑀸𑀢𑁄𑀯 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀲𑀁 𑀕𑀢𑀓𑀸𑀮𑁂 𑀏𑀓𑁄 𑀕𑀽𑀣𑀔𑀸𑀤𑀓𑁄 𑀧𑀸𑀡𑀓𑁄 𑀕𑀽𑀣𑀕𑀦𑁆𑀥𑁂𑀦 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀧𑀻𑀢𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀁 𑀲𑀼𑀭𑀁 𑀤𑀺𑀲𑁆𑀯𑀸 𑀧𑀺𑀧𑀸𑀲𑀸𑀬 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑁄 𑀳𑀼𑀢𑁆𑀯𑀸 𑀕𑀽𑀣𑀧𑀼𑀜𑁆𑀚𑀁 𑀅𑀪𑀺𑀭𑀼𑀳𑀺, 𑀅𑀮𑁆𑀮𑀕𑀽𑀣𑀁 ¶ 𑀢𑀲𑁆𑀫𑀺𑀁 𑀆𑀭𑀼𑀴𑁆𑀳𑁂 𑀣𑁄𑀓𑀁 𑀑𑀦𑀫𑀺. 𑀲𑁄 ‘‘𑀧𑀣𑀯𑀻 𑀫𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀺𑀭𑀯𑀺. 𑀢𑀲𑁆𑀫𑀺𑀜𑁆𑀜𑁂𑀯 𑀔𑀡𑁂 𑀏𑀓𑁄 𑀫𑀢𑁆𑀢𑀯𑀭𑀯𑀸𑀭𑀡𑁄 𑀢𑀁 𑀧𑀤𑁂𑀲𑀁 𑀧𑀢𑁆𑀯𑀸 𑀕𑀽𑀣𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀓𑀫𑀺. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀲 𑀫𑀫 𑀪𑀬𑁂𑀦 𑀧𑀮𑀸𑀬𑀢𑀻’’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀁 𑀅𑀯𑁆𑀳𑀬𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁩.

‘‘𑀲𑀽𑀭𑁄 𑀲𑀽𑀭𑁂𑀦 𑀲𑀗𑁆𑀕𑀫𑁆𑀫, 𑀯𑀺𑀓𑁆𑀓𑀦𑁆𑀢𑁂𑀦 𑀧𑀳𑀸𑀭𑀺𑀦𑀸;

𑀏𑀳𑀺 𑀦𑀸𑀕 𑀦𑀺𑀯𑀢𑁆𑀢𑀲𑁆𑀲𑀼, 𑀓𑀺𑀁 𑀦𑀼 𑀪𑀻𑀢𑁄 𑀧𑀮𑀸𑀬𑀲𑀺;

𑀧𑀲𑁆𑀲𑀦𑁆𑀢𑀼 𑀅𑀗𑁆𑀕𑀫𑀕𑀥𑀸, 𑀫𑀫 𑀢𑀼𑀬𑁆𑀳𑀜𑁆𑀘 𑀯𑀺𑀓𑁆𑀓𑀫’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀢𑁆𑀯𑀁 𑀲𑀽𑀭𑁄 𑀫𑀬𑀸 𑀲𑀽𑀭𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀦𑁆𑀢𑁆𑀯𑀸 𑀯𑀻𑀭𑀺𑀬𑀯𑀺𑀓𑁆𑀓𑀫𑁂𑀦 𑀯𑀺𑀓𑁆𑀓𑀦𑁆𑀢𑁂𑀦 𑀧𑀳𑀸𑀭𑀤𑀸𑀦𑀲𑀫𑀢𑁆𑀣𑀢𑀸𑀬 𑀧𑀳𑀸𑀭𑀺𑀦𑀸 𑀓𑀺𑀁𑀓𑀸𑀭𑀡𑀸 𑀅𑀲𑀗𑁆𑀕𑀸𑀫𑁂𑀢𑁆𑀯𑀸𑀯 𑀕𑀘𑁆𑀙𑀲𑀺, 𑀦𑀦𑀼 𑀦𑀸𑀫 𑀏𑀓𑀲𑀫𑁆𑀧𑀳𑀸𑀭𑁄𑀧𑀺 𑀤𑀸𑀢𑀩𑁆𑀩𑁄 𑀲𑀺𑀬𑀸, 𑀢𑀲𑁆𑀫𑀸 𑀏𑀳𑀺 𑀦𑀸𑀕 𑀦𑀺𑀯𑀢𑁆𑀢𑀲𑁆𑀲𑀼, 𑀏𑀢𑁆𑀢𑀓𑁂𑀦𑁂𑀯 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀓𑀺𑀁 𑀦𑀼 𑀪𑀻𑀢𑁄 𑀧𑀮𑀸𑀬𑀲𑀺, 𑀇𑀫𑁂 𑀇𑀫𑀁 𑀲𑀻𑀫𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀯𑀲𑀦𑁆𑀢𑀸 𑀧𑀲𑁆𑀲𑀦𑁆𑀢𑀼, 𑀅𑀗𑁆𑀕𑀫𑀕𑀥𑀸 𑀫𑀫 𑀢𑀼𑀬𑁆𑀳𑀜𑁆𑀘 𑀯𑀺𑀓𑁆𑀓𑀫𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀧𑀭𑀓𑁆𑀓𑀫𑀁 𑀧𑀲𑁆𑀲𑀦𑁆𑀢𑀽𑀢𑀺.

𑀲𑁄 𑀳𑀢𑁆𑀣𑀻 𑀓𑀡𑁆𑀡𑀁 𑀤𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀧𑀲𑀸𑀤𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫𑁪.

‘‘𑀦 𑀢𑀁 𑀧𑀸𑀤𑀸 𑀯𑀥𑀺𑀲𑁆𑀲𑀸𑀫𑀺, 𑀦 𑀤𑀦𑁆𑀢𑁂𑀳𑀺 𑀦 𑀲𑁄𑀡𑁆𑀟𑀺𑀬𑀸;

𑀫𑀻𑀴𑁆𑀳𑁂𑀦 𑀢𑀁 𑀯𑀥𑀺𑀲𑁆𑀲𑀸𑀫𑀺, 𑀧𑀽𑀢𑀺 𑀳𑀜𑁆𑀜𑀢𑀼 𑀧𑀽𑀢𑀺𑀦𑀸’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀦 𑀢𑀁 𑀧𑀸𑀤𑀸𑀤𑀻𑀳𑀺 𑀯𑀥𑀺𑀲𑁆𑀲𑀸𑀫𑀺, 𑀢𑀼𑀬𑁆𑀳𑀁 𑀧𑀦 𑀅𑀦𑀼𑀘𑁆𑀙𑀯𑀺𑀓𑁂𑀦 𑀫𑀻𑀴𑁆𑀳𑁂𑀦 𑀢𑀁 𑀯𑀥𑀺𑀲𑁆𑀲𑀸𑀫𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀧𑀽𑀢𑀺𑀕𑀽𑀣𑀧𑀸𑀡𑀓𑁄 𑀧𑀽𑀢𑀺𑀦𑀸𑀯 𑀳𑀜𑁆𑀜𑀢𑀽’’𑀢𑀺 𑀢𑀲𑁆𑀲 𑀫𑀢𑁆𑀣𑀓𑁂 𑀫𑀳𑀦𑁆𑀢𑀁 𑀮𑀡𑁆𑀟𑀁 𑀧𑀸𑀢𑁂𑀢𑁆𑀯𑀸 𑀉𑀤𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀢𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀦𑀤𑀦𑁆𑀢𑁄 𑀅𑀭𑀜𑁆𑀜𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀕𑀽𑀣𑀧𑀸𑀡𑀓𑁄 𑀓𑁄𑀡𑁆𑀟𑁄 𑀅𑀳𑁄𑀲𑀺, 𑀯𑀸𑀭𑀡𑁄 𑀲𑁄 𑀪𑀺𑀓𑁆𑀔𑀼, 𑀢𑀁 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀯𑀼𑀢𑁆𑀣𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀽𑀣𑀧𑀸𑀡𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁨𑁮] 𑁮. 𑀓𑀸𑀫𑀦𑀻𑀢𑀚𑀸𑀢𑀓𑀯𑀡𑁆𑀡𑀦𑀸

𑀢𑀬𑁄 ¶ 𑀕𑀺𑀭𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀫𑀦𑀻𑀢𑀩𑁆𑀭𑀸𑀳𑁆𑀫𑀡𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀅𑀢𑀻𑀢𑀜𑁆𑀘 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁂 𑀓𑀸𑀫𑀚𑀸𑀢𑀓𑁂 (𑀚𑀸. 𑁧.𑁧𑁨.𑁩𑁭 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀭𑀸𑀚𑀧𑀼𑀢𑁆𑀢𑁂𑀲𑀼 𑀚𑁂𑀝𑁆𑀞𑀓𑁄 𑀆𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀸 𑀅𑀳𑁄𑀲𑀺, 𑀓𑀦𑀺𑀝𑁆𑀞𑁄 ¶ 𑀉𑀧𑀭𑀸𑀚𑀸. 𑀢𑁂𑀲𑀼 𑀭𑀸𑀚𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀅𑀢𑀺𑀢𑁆𑀢𑁄 𑀥𑀦𑀮𑁄𑀮𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀤𑁆𑀯𑀻𑀲𑀼𑀧𑀺 𑀓𑀸𑀫𑁂𑀲𑀼 𑀅𑀢𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑀁 𑀭𑀸𑀚𑀸𑀦𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀮𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺, 𑀭𑀜𑁆𑀜𑀸 𑀘 ‘‘𑀓𑁂𑀦𑀢𑁆𑀣𑁂𑀦 𑀆𑀕𑀢𑁄𑀲𑀺 𑀫𑀸𑀡𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁, 𑀫𑀳𑀸𑀭𑀸𑀚, 𑀢𑀻𑀡𑀺 𑀦𑀕𑀭𑀸𑀦𑀺 𑀧𑀲𑁆𑀲𑀸𑀫𑀺 𑀔𑁂𑀫𑀸𑀦𑀺 𑀲𑀼𑀪𑀺𑀓𑁆𑀔𑀸𑀦𑀺 𑀧𑀳𑀽𑀢𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀻𑀦𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀪𑀭𑀺𑀢𑀸𑀦𑀺, 𑀲𑀓𑁆𑀓𑀸 𑀘 𑀧𑀦 𑀢𑀸𑀦𑀺 𑀅𑀧𑁆𑀧𑀓𑁂𑀦𑁂𑀯 𑀩𑀮𑁂𑀦 𑀕𑀡𑁆𑀳𑀺𑀢𑀼𑀁, 𑀅𑀳𑀁 𑀢𑁂 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀆𑀕𑀢𑁄’’𑀢𑀺 𑀆𑀳. ‘‘𑀓𑀤𑀸 𑀕𑀘𑁆𑀙𑀸𑀫, 𑀫𑀸𑀡𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑁆𑀯𑁂 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙, 𑀧𑀸𑀢𑁄𑀯 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀯𑁂𑀕𑁂𑀦 𑀩𑀮𑀁 𑀲𑀚𑁆𑀚𑁂𑀳𑀻’’𑀢𑀺 𑀯𑀢𑁆𑀯𑀸 𑀲𑀓𑁆𑀓𑁄 𑀲𑀓𑀝𑁆𑀞𑀸𑀦𑀫𑁂𑀯 ¶ 𑀕𑀢𑁄.

𑀭𑀸𑀚𑀸 𑀧𑀼𑀦𑀤𑀺𑀯𑀲𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀩𑀮𑀲𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀳𑀺𑀬𑁆𑀬𑁄 𑀏𑀓𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 ‘‘𑀉𑀢𑁆𑀢𑀭𑀧𑀜𑁆𑀘𑀸𑀮𑁂 𑀇𑀦𑁆𑀤𑀧𑀢𑁆𑀢𑁂 𑀓𑁂𑀓𑀓𑁂𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀆𑀳, 𑀢𑀁 𑀫𑀸𑀡𑀯𑀁 𑀆𑀤𑀸𑀬 𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫, 𑀯𑁂𑀕𑁂𑀦 𑀦𑀁 𑀧𑀓𑁆𑀓𑁄𑀲𑀣𑀸𑀢𑀺. ‘‘𑀓𑀢𑁆𑀣𑀲𑁆𑀲, 𑀤𑁂𑀯, 𑀦𑀺𑀯𑀸𑀲𑁄 𑀤𑀸𑀧𑀺𑀢𑁄’’𑀢𑀺? ‘‘𑀦 𑀫𑁂 𑀢𑀲𑁆𑀲 𑀦𑀺𑀯𑀸𑀲𑀕𑁂𑀳𑀁 𑀤𑀸𑀧𑀺𑀢’’𑀦𑁆𑀢𑀺. ‘‘𑀦𑀺𑀯𑀸𑀲𑀧𑀭𑀺𑀩𑁆𑀩𑀬𑁄 𑀧𑀦 𑀤𑀺𑀦𑁆𑀦𑁄’’𑀢𑀺? ‘‘𑀲𑁄𑀧𑀺 𑀦 𑀤𑀺𑀦𑁆𑀦𑁄’’𑀢𑀺. 𑀅𑀣 ‘‘𑀓𑀳𑀁 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺? ‘‘𑀦𑀕𑀭𑀯𑀻𑀣𑀻𑀲𑀼 𑀑𑀮𑁄𑀓𑁂𑀣𑀸’’𑀢𑀺. 𑀢𑁂 𑀑𑀮𑁄𑀓𑁂𑀦𑁆𑀢𑀸 𑀅𑀤𑀺𑀲𑁆𑀯𑀸 ‘‘𑀦 𑀧𑀲𑁆𑀲𑀸𑀫, 𑀫𑀳𑀸𑀭𑀸𑀚𑀸’’𑀢𑀺 𑀆𑀳𑀁𑀲𑀼. 𑀭𑀜𑁆𑀜𑁄 𑀫𑀸𑀡𑀯𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 ‘‘𑀏𑀯𑀁 𑀫𑀳𑀦𑁆𑀢𑀸 𑀦𑀸𑀫 𑀇𑀲𑁆𑀲𑀭𑀺𑀬𑀸 𑀧𑀭𑀺𑀳𑀻𑀦𑁄𑀫𑁆𑀳𑀻’’𑀢𑀺 𑀫𑀳𑀸𑀲𑁄𑀓𑁄 𑀉𑀤𑀧𑀸𑀤𑀺, 𑀳𑀤𑀬𑀯𑀢𑁆𑀣𑀼 𑀉𑀡𑁆𑀳𑀁 𑀅𑀳𑁄𑀲𑀺, 𑀯𑀢𑁆𑀣𑀼𑀮𑁄𑀳𑀺𑀢𑀁 𑀓𑀼𑀧𑁆𑀧𑀺, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀉𑀤𑀧𑀸𑀤𑀺, 𑀯𑁂𑀚𑁆𑀚𑀸 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀢𑀢𑁄 𑀢𑀻𑀳𑀘𑀢𑀽𑀳𑀘𑁆𑀘𑀬𑁂𑀦 𑀲𑀓𑁆𑀓𑁄 𑀆𑀯𑀚𑁆𑀚𑀫𑀸𑀦𑁄 𑀢𑀲𑁆𑀲 𑀢𑀁 𑀆𑀩𑀸𑀥𑀁 𑀜𑀢𑁆𑀯𑀸 ‘‘𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀯𑁂𑀚𑁆𑀚𑀩𑁆𑀭𑀸𑀳𑁆𑀫𑀡𑁄 ¶ 𑀢𑀼𑀫𑁆𑀳𑀸𑀓𑀁 𑀢𑀺𑀓𑀺𑀘𑁆𑀙𑀦𑀢𑁆𑀣𑀸𑀬 𑀆𑀕𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀫𑀳𑀦𑁆𑀢𑀫𑀳𑀦𑁆𑀢𑀸 𑀭𑀸𑀚𑀯𑁂𑀚𑁆𑀚𑀸 𑀫𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀧𑀭𑀺𑀩𑁆𑀩𑀬𑀫𑀲𑁆𑀲 𑀤𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀣𑀸’’𑀢𑀺 𑀆𑀳. 𑀲𑀓𑁆𑀓𑁄 𑀢𑀁 𑀲𑀼𑀢𑁆𑀯𑀸 ‘‘𑀫𑀬𑁆𑀳𑀁 𑀦𑁂𑀯 𑀦𑀺𑀯𑀸𑀲𑀧𑀭𑀺𑀩𑁆𑀩𑀬𑁂𑀦 𑀅𑀢𑁆𑀣𑁄, 𑀯𑁂𑀚𑁆𑀚𑀮𑀸𑀪𑀫𑁆𑀧𑀺 𑀦 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀺 𑀦𑀁, 𑀧𑀼𑀦 𑀭𑀸𑀚𑀸 𑀫𑀁 𑀧𑀲𑁆𑀲𑀢𑀽’’𑀢𑀺 𑀆𑀳. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀆𑀕𑀘𑁆𑀙𑀢𑀽’’𑀢𑀺 𑀆𑀳. 𑀲𑀓𑁆𑀓𑁄 𑀧𑀯𑀺𑀲𑀺𑀢𑁆𑀯𑀸 𑀚𑀬𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀭𑀸𑀚𑀸 ‘‘𑀢𑁆𑀯𑀁 𑀫𑀁 𑀢𑀺𑀓𑀺𑀘𑁆𑀙𑀲𑀻’’𑀢𑀺 𑀆𑀳. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀢𑀺𑀓𑀺𑀘𑁆𑀙𑀲𑁆𑀲𑀽’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀩𑁆𑀬𑀸𑀥𑀺𑀦𑁄 𑀫𑁂 𑀮𑀓𑁆𑀔𑀡𑀁 𑀓𑀣𑁂𑀣, 𑀓𑁂𑀦 𑀓𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑁄, 𑀓𑀺𑀁 𑀔𑀸𑀤𑀺𑀢𑀁 𑀯𑀸 𑀧𑀻𑀢𑀁 𑀯𑀸 𑀦𑀺𑀲𑁆𑀲𑀸𑀬, 𑀉𑀤𑀸𑀳𑀼 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’𑀢𑀺? ‘‘𑀢𑀸𑀢, 𑀫𑀬𑁆𑀳𑀁 𑀩𑁆𑀬𑀸𑀥𑀺 𑀲𑀼𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄’’𑀢𑀺. ‘‘𑀓𑀺𑀁 𑀢𑁂 𑀲𑀼𑀢’’𑀦𑁆𑀢𑀺. ‘‘𑀢𑀸𑀢 𑀏𑀓𑁄 𑀫𑀸𑀡𑀯𑁄 ¶ ¶ 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 ‘𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀡𑁆𑀳𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’𑀢𑀺 𑀆𑀳, 𑀅𑀳𑀁 𑀢𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑀸 𑀦𑀺𑀯𑀸𑀲𑀧𑀭𑀺𑀩𑁆𑀩𑀬𑀁 𑀯𑀸 𑀦 𑀤𑀸𑀧𑁂𑀲𑀺𑀁, 𑀲𑁄 𑀫𑀬𑁆𑀳𑀁 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑁄 𑀪𑀯𑀺𑀲𑁆𑀲𑀢𑀺. 𑀅𑀣 𑀫𑁂 ‘𑀏𑀯𑀁 𑀫𑀳𑀦𑁆𑀢𑀸 𑀦𑀸𑀫 𑀇𑀲𑁆𑀲𑀭𑀺𑀬𑀸 𑀧𑀭𑀺𑀳𑀻𑀦𑁄𑀫𑁆𑀳𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀅𑀬𑀁 𑀩𑁆𑀬𑀸𑀥𑀺 𑀉𑀧𑁆𑀧𑀦𑁆𑀦𑁄. 𑀲𑀘𑁂 𑀲𑀓𑁆𑀓𑁄𑀲𑀺 𑀢𑁆𑀯𑀁 𑀫𑁂 𑀓𑀸𑀫𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀥𑀺𑀁 𑀢𑀺𑀓𑀺𑀘𑁆𑀙𑀺𑀢𑀼𑀁, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁫.

‘‘𑀢𑀬𑁄 𑀕𑀺𑀭𑀺𑀁 𑀅𑀦𑁆𑀢𑀭𑀁 𑀓𑀸𑀫𑀬𑀸𑀫𑀺, 𑀧𑀜𑁆𑀘𑀸𑀮𑀸 𑀓𑀼𑀭𑀼𑀬𑁄 𑀓𑁂𑀓𑀓𑁂 𑀘;

𑀢𑀢𑀼𑀢𑁆𑀢𑀭𑀺𑀁 𑀩𑁆𑀭𑀸𑀳𑁆𑀫𑀡 𑀓𑀸𑀫𑀬𑀸𑀫𑀺, 𑀢𑀺𑀓𑀺𑀘𑁆𑀙 𑀫𑀁 𑀩𑁆𑀭𑀸𑀳𑁆𑀫𑀡 𑀓𑀸𑀫𑀦𑀻𑀢’’𑀦𑁆𑀢𑀺.

𑀢𑀢𑁆𑀣 𑀢𑀬𑁄 𑀕𑀺𑀭𑀺𑀦𑁆𑀢𑀺 𑀢𑀬𑁄 𑀕𑀺𑀭𑀻, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑀣𑀸 ‘‘𑀲𑀼𑀤𑀲𑁆𑀲𑀦𑀲𑁆𑀲 𑀕𑀺𑀭𑀺𑀦𑁄, 𑀤𑁆𑀯𑀸𑀭𑀜𑁆𑀳𑁂𑀢𑀁 𑀧𑀓𑀸𑀲𑀢𑀻’’𑀢𑀺 𑀏𑀢𑁆𑀣 𑀲𑀼𑀤𑀲𑁆𑀲𑀦𑀁 𑀤𑁂𑀯𑀦𑀕𑀭𑀁 𑀬𑀼𑀚𑁆𑀛𑀺𑀢𑁆𑀯𑀸 𑀤𑀼𑀕𑁆𑀕𑀡𑁆𑀳𑀢𑀸𑀬 𑀤𑀼𑀘𑁆𑀘𑀮𑀦𑀢𑀸𑀬 ‘‘𑀲𑀼𑀤𑀲𑁆𑀲𑀦𑀕𑀺𑀭𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀢𑀻𑀡𑀺 𑀦𑀕𑀭𑀸𑀦𑀺 ‘‘𑀢𑀬𑁄 𑀕𑀺𑀭𑀺’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀢𑀻𑀡𑀺 𑀘 𑀦𑀕𑀭𑀸𑀦𑀺 𑀢𑁂𑀲𑀜𑁆𑀘 𑀅𑀦𑁆𑀢𑀭𑀁 𑀢𑀺𑀯𑀺𑀥𑀫𑁆𑀧𑀺 𑀭𑀝𑁆𑀞𑀁 𑀓𑀸𑀫𑀬𑀸𑀫𑀺. ‘‘𑀧𑀜𑁆𑀘𑀸𑀮𑀸 𑀓𑀼𑀭𑀼𑀬𑁄 𑀓𑁂𑀓𑀓𑁂 𑀘𑀸’’𑀢𑀺 𑀇𑀫𑀸𑀦𑀺 𑀢𑁂𑀲𑀁 𑀭𑀝𑁆𑀞𑀸𑀦𑀁 𑀦𑀸𑀫𑀸𑀦𑀺. 𑀢𑁂𑀲𑀼 𑀧𑀜𑁆𑀘𑀸𑀮𑀸𑀢𑀺 𑀉𑀢𑁆𑀢𑀭𑀧𑀜𑁆𑀘𑀸𑀮𑀸, 𑀢𑀢𑁆𑀣 𑀓𑀧𑀺𑀮𑀁 𑀦𑀸𑀫 𑀦𑀕𑀭𑀁. 𑀓𑀼𑀭𑀼𑀬𑁄𑀢𑀺 𑀓𑀼𑀭𑀼𑀭𑀝𑁆𑀞𑀁, 𑀢𑀢𑁆𑀣 𑀇𑀦𑁆𑀤𑀧𑀢𑁆𑀢𑀁 𑀦𑀸𑀫 𑀦𑀕𑀭𑀁. 𑀓𑁂𑀓𑀓𑁂 𑀘𑀸𑀢𑀺 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦 𑀓𑁂𑀓𑀓𑀭𑀝𑁆𑀞𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑁂𑀓𑀓𑀭𑀸𑀚𑀥𑀸𑀦𑀻𑀬𑁂𑀯 𑀦𑀕𑀭𑀁. 𑀢𑀢𑀼𑀢𑁆𑀢𑀭𑀺𑀦𑁆𑀢𑀺 𑀢𑀁 ¶ 𑀅𑀳𑀁 𑀇𑀢𑁄 𑀧𑀝𑀺𑀮𑀤𑁆𑀥𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀸 𑀢𑀢𑀼𑀢𑁆𑀢𑀭𑀺𑀁 𑀢𑀺𑀯𑀺𑀥𑀁 𑀭𑀚𑁆𑀚𑀁 𑀓𑀸𑀫𑀬𑀸𑀫𑀺. 𑀢𑀺𑀓𑀺𑀘𑁆𑀙 𑀫𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀫𑀦𑀻𑀢𑀦𑁆𑀢𑀺 𑀇𑀫𑁂𑀳𑀺 𑀯𑀢𑁆𑀣𑀼𑀓𑀸𑀫𑁂𑀳𑀺 𑀘 𑀓𑀺𑀮𑁂𑀲𑀓𑀸𑀫𑁂𑀳𑀺 𑀘 𑀦𑀻𑀢𑀁 𑀳𑀢𑀁 𑀧𑀳𑀢𑀁 𑀲𑀘𑁂 𑀲𑀓𑁆𑀓𑁄𑀲𑀺, 𑀢𑀺𑀓𑀺𑀘𑁆𑀙 𑀫𑀁 𑀩𑁆𑀭𑀸𑀳𑁆𑀫𑀡𑀸𑀢𑀺.

𑀅𑀣 𑀦𑀁 𑀲𑀓𑁆𑀓𑁄 ‘‘𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀽𑀮𑁄𑀲𑀥𑀸𑀤𑀻𑀳𑀺 𑀅𑀢𑁂𑀓𑀺𑀘𑁆𑀙𑁄. 𑀜𑀸𑀡𑁄𑀲𑀥𑁂𑀦𑁂𑀯 𑀢𑀺𑀓𑀺𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫𑁬.

‘‘𑀓𑀡𑁆𑀳𑀸𑀳𑀺𑀤𑀝𑁆𑀞𑀲𑁆𑀲 ¶ 𑀓𑀭𑁄𑀦𑁆𑀢𑀺 𑀳𑁂𑀓𑁂, 𑀅𑀫𑀦𑀼𑀲𑁆𑀲𑀧𑀯𑀺𑀝𑁆𑀞𑀲𑁆𑀲 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀦 𑀓𑀸𑀫𑀦𑀻𑀢𑀲𑁆𑀲 𑀓𑀭𑁄𑀢𑀺 𑀓𑁄𑀘𑀺, 𑀑𑀓𑁆𑀓𑀦𑁆𑀢𑀲𑀼𑀓𑁆𑀓𑀲𑁆𑀲 𑀳𑀺 𑀓𑀸 𑀢𑀺𑀓𑀺𑀘𑁆𑀙𑀸’’𑀢𑀺.

𑀢𑀢𑁆𑀣 𑀓𑀡𑁆𑀳𑀸𑀳𑀺𑀤𑀝𑁆𑀞𑀲𑁆𑀲 𑀓𑀭𑁄𑀦𑁆𑀢𑀺 𑀳𑁂𑀓𑁂𑀢𑀺 𑀏𑀓𑀘𑁆𑀘𑁂 𑀳𑀺 𑀢𑀺𑀓𑀺𑀘𑁆𑀙𑀓𑀸 𑀖𑁄𑀭𑀯𑀺𑀲𑁂𑀦 𑀓𑀸𑀴𑀲𑀧𑁆𑀧𑁂𑀦 𑀤𑀝𑁆𑀞𑀲𑁆𑀲 𑀫𑀦𑁆𑀢𑁂𑀳𑀺 𑀘𑁂𑀯 𑀑𑀲𑀥𑁂𑀳𑀺 𑀘 𑀢𑀺𑀓𑀺𑀘𑁆𑀙𑀁 𑀓𑀭𑁄𑀦𑁆𑀢𑀺. 𑀅𑀫𑀦𑀼𑀲𑁆𑀲𑀧𑀯𑀺𑀝𑁆𑀞𑀲𑁆𑀲 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺 𑀅𑀧𑀭𑁂 𑀧𑀡𑁆𑀟𑀺𑀢𑀸 𑀪𑀽𑀢𑀯𑁂𑀚𑁆𑀚𑀸 𑀪𑀽𑀢𑀬𑀓𑁆𑀔𑀸𑀤𑀻𑀳𑀺 𑀅𑀫𑀦𑀼𑀲𑁆𑀲𑁂𑀳𑀺 𑀧𑀯𑀺𑀝𑁆𑀞𑀲𑁆𑀲 𑀅𑀪𑀺𑀪𑀽𑀢𑀲𑁆𑀲 𑀕𑀳𑀺𑀢𑀲𑁆𑀲 𑀩𑀮𑀺𑀓𑀫𑁆𑀫𑀧𑀭𑀺𑀢𑁆𑀢𑀓𑀭𑀡𑀑𑀲𑀥𑀧𑀭𑀺𑀪𑀸𑀯𑀺𑀢𑀸𑀤𑀻𑀳𑀺 𑀢𑀺𑀓𑀺𑀘𑁆𑀙𑀁 𑀓𑀭𑁄𑀦𑁆𑀢𑀺. 𑀦 𑀓𑀸𑀫𑀦𑀻𑀢𑀲𑁆𑀲 𑀓𑀭𑁄𑀢𑀺 𑀓𑁄𑀘𑀻𑀢𑀺 ¶ 𑀓𑀸𑀫𑁂𑀳𑀺 𑀧𑀦 𑀦𑀻𑀢𑀲𑁆𑀲 𑀓𑀸𑀫𑀯𑀲𑀺𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀢𑁆𑀭 𑀧𑀡𑁆𑀟𑀺𑀢𑁂𑀳𑀺 𑀅𑀜𑁆𑀜𑁄 𑀓𑁄𑀘𑀺 𑀢𑀺𑀓𑀺𑀘𑁆𑀙𑀁 𑀦 𑀓𑀭𑁄𑀢𑀺, 𑀓𑀭𑁄𑀦𑁆𑀢𑁄𑀧𑀺 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀓𑀺𑀁𑀓𑀸𑀭𑀡𑀸? 𑀑𑀓𑁆𑀓𑀦𑁆𑀢𑀲𑀼𑀓𑁆𑀓𑀲𑁆𑀲 𑀳𑀺 𑀓𑀸 𑀢𑀺𑀓𑀺𑀘𑁆𑀙𑀸𑀢𑀺, 𑀑𑀓𑁆𑀓𑀦𑁆𑀢𑀲𑀼𑀓𑁆𑀓𑀲𑁆𑀲 𑀅𑀯𑀓𑁆𑀓𑀦𑁆𑀢𑀲𑁆𑀲 𑀓𑀼𑀲𑀮𑀥𑀫𑁆𑀫𑀫𑀭𑀺𑀬𑀸𑀤𑀁 𑀅𑀢𑀺𑀓𑁆𑀓𑀦𑁆𑀢𑀲𑁆𑀲 𑀅𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀦𑁆𑀢𑁄𑀲𑀥𑀸𑀤𑀻𑀳𑀺 𑀓𑀸 𑀦𑀸𑀫 𑀢𑀺𑀓𑀺𑀘𑁆𑀙𑀸, 𑀦 𑀲𑀓𑁆𑀓𑀸 𑀑𑀲𑀥𑁂𑀳𑀺 𑀢𑀺𑀓𑀺𑀘𑁆𑀙𑀺𑀢𑀼𑀦𑁆𑀢𑀺.

𑀇𑀢𑀺𑀲𑁆𑀲 𑀫𑀳𑀸𑀲𑀢𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀉𑀢𑁆𑀢𑀭𑀺 𑀏𑀯𑀫𑀸𑀳 𑁋 ‘‘𑀫𑀳𑀸𑀭𑀸𑀚, 𑀲𑀘𑁂 𑀢𑁆𑀯𑀁 𑀢𑀸𑀦𑀺 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀮𑀘𑁆𑀙𑀲𑀺, 𑀅𑀧𑀺 𑀦𑀼 𑀔𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀢𑁆𑀢𑀸𑀭𑀺 𑀲𑀸𑀝𑀓𑀬𑀼𑀕𑀸𑀦𑀺 𑀧𑀭𑀺𑀤𑀳𑁂𑀬𑁆𑀬𑀸𑀲𑀺, 𑀘𑀢𑀽𑀲𑀼 𑀯𑀸 𑀲𑀼𑀯𑀡𑁆𑀡𑀧𑀸𑀢𑀻𑀲𑀼 𑀪𑀼𑀜𑁆𑀚𑁂𑀬𑁆𑀬𑀸𑀲𑀺, 𑀘𑀢𑀽𑀲𑀼 𑀯𑀸 𑀲𑀬𑀦𑁂𑀲𑀼 𑀲𑀬𑁂𑀬𑁆𑀬𑀸𑀲𑀺, 𑀫𑀳𑀸𑀭𑀸𑀚, 𑀢𑀡𑁆𑀳𑀸𑀯𑀲𑀺𑀓𑁂𑀦 𑀦𑀸𑀫 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀡𑁆𑀳𑀸 𑀳𑀺 𑀦𑀸𑀫𑁂𑀲𑀸 𑀯𑀺𑀧𑀢𑁆𑀢𑀺𑀫𑀽𑀮𑀸. 𑀲𑀸 𑀯𑀟𑁆𑀠𑀫𑀸𑀦𑀸 𑀬𑁄 𑀢𑀁 𑀯𑀟𑁆𑀠𑁂𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀲𑁄𑀴𑀲𑀲𑀼 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑁂𑀲𑀼 𑀘 𑀅𑀯𑀲𑁂𑀲𑁂𑀲𑀼 𑀅𑀧𑀸𑀬𑁂𑀲𑀼 𑀔𑀺𑀧𑀢𑀻’’𑀢𑀺. 𑀏𑀯𑀁 𑀭𑀸𑀚𑀸𑀦𑀁 𑀦𑀺𑀭𑀬𑀸𑀤𑀺𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀭𑀸𑀚𑀸𑀧𑀺𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀯𑀺𑀕𑀢𑀲𑁄𑀓𑁄 𑀳𑀼𑀢𑁆𑀯𑀸 𑀢𑀸𑀯𑀤𑁂𑀯 𑀦𑀺𑀩𑁆𑀬𑀸𑀥𑀺𑀢𑀁 𑀧𑀸𑀧𑀼𑀡𑀺 ¶ . 𑀲𑀓𑁆𑀓𑁄𑀧𑀺𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 ¶ 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀲𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀓𑀸𑀫𑀦𑀻𑀢𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀫𑀦𑀻𑀢𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁨𑁯] 𑁯. 𑀧𑀮𑀸𑀬𑀺𑀢𑀚𑀸𑀢𑀓𑀯𑀡𑁆𑀡𑀦𑀸

𑀕𑀚𑀕𑁆𑀕𑀫𑁂𑀖𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀮𑀸𑀬𑀺𑀢𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀯𑀸𑀤𑀢𑁆𑀣𑀸𑀬 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀯𑀺𑀘𑀭𑀺𑀢𑁆𑀯𑀸 𑀓𑀜𑁆𑀘𑀺 𑀧𑀝𑀺𑀯𑀸𑀤𑀺𑀁 𑀅𑀮𑀪𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀫𑀬𑀸 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺. 𑀫𑀦𑀼𑀲𑁆𑀲𑀸 ‘‘𑀢𑀸𑀤𑀺𑀲𑀸𑀦𑀁 𑀲𑀳𑀲𑁆𑀲𑁂𑀦𑀧𑀺 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀲𑀩𑁆𑀩𑀜𑁆𑀜𑀽 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄 𑀫𑀳𑀸𑀕𑁄𑀢𑀫𑁄 𑀥𑀫𑁆𑀫𑀺𑀲𑁆𑀲𑀭𑁄 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑁄, 𑀲𑀓𑀮𑁂𑀧𑀺 𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑁄 𑀧𑀭𑀧𑁆𑀧𑀯𑀸𑀤𑁄 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀯𑁂𑀮𑀦𑁆𑀢𑀁 𑀧𑀢𑁆𑀯𑀸 𑀲𑀫𑀼𑀤𑁆𑀤𑀊𑀫𑀺𑀬𑁄 𑀯𑀺𑀬 𑀳𑀺 𑀲𑀩𑁆𑀩𑀯𑀸𑀤𑀸 𑀢𑀲𑁆𑀲 𑀧𑀸𑀤𑀫𑀽𑀮𑀁 𑀧𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑁄𑀦𑁆𑀢𑀻’’𑀢𑀺 𑀩𑀼𑀤𑁆𑀥𑀕𑀼𑀡𑁂 𑀓𑀣𑁂𑀲𑀼𑀁. 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀓𑀳𑀁 ¶ 𑀧𑀦 𑀲𑁄 𑀏𑀢𑀭𑀳𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀚𑁂𑀢𑀯𑀦𑁂’’𑀢𑀺 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑁄 𑀚𑁂𑀢𑁂𑀦 𑀭𑀸𑀚𑀓𑀼𑀫𑀸𑀭𑁂𑀦 𑀦𑀯𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀭𑀺𑀢𑀁 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀲𑀦𑀧𑀸𑀲𑀸𑀤𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀅𑀬’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀢𑀸𑀯 𑀏𑀯𑀭𑀽𑀧𑁄, 𑀯𑀲𑀦𑀕𑁂𑀳𑀁 𑀓𑀻𑀤𑀺𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀕𑀦𑁆𑀥𑀓𑀼𑀝𑀺 𑀦𑀸𑀫 𑀅𑀧𑁆𑀧𑀫𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀭𑀽𑀧𑁂𑀦 𑀲𑀫𑀡𑁂𑀦 𑀲𑀤𑁆𑀥𑀺𑀁 𑀓𑁄 𑀯𑀸𑀤𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀢𑁄𑀯 𑀧𑀮𑀸𑀬𑀺. 𑀫𑀦𑀼𑀲𑁆𑀲𑀸 𑀉𑀦𑁆𑀦𑀸𑀤𑀺𑀦𑁄 𑀳𑀼𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 ‘‘𑀓𑀺𑀁 𑀅𑀓𑀸𑀮𑁂 𑀆𑀕𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 ‘‘𑀦 𑀔𑁄 𑀉𑀧𑀸𑀲𑀓𑀸 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀫 𑀯𑀲𑀦𑀝𑁆𑀞𑀸𑀦𑀲𑁆𑀲 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀤𑀺𑀲𑁆𑀯𑀸 𑀧𑀮𑀸𑀬𑀢𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀩𑁄𑀥𑀺𑀲𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄. 𑀲𑁄 ‘‘𑀢𑀓𑁆𑀓𑀲𑀺𑀮𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀩𑀮𑀓𑀸𑀬𑁂𑀦 𑀕𑀦𑁆𑀢𑁆𑀯𑀸 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀳𑀢𑁆𑀣𑀻 𑀧𑁂𑀲𑁂𑀣, 𑀇𑀫𑀺𑀦𑀸 𑀅𑀲𑁆𑀲𑁂, 𑀇𑀫𑀺𑀦𑀸 𑀭𑀣𑁂, 𑀇𑀫𑀺𑀦𑀸 𑀧𑀢𑁆𑀢𑀻, 𑀏𑀯𑀁 𑀥𑀸𑀯𑀺𑀢𑁆𑀯𑀸 𑀆𑀯𑀼𑀥𑁂𑀳𑀺 𑀧𑀳𑀭𑀣, 𑀏𑀯𑀁 𑀖𑀦𑀯𑀲𑁆𑀲𑀯𑀮𑀸𑀳𑀓𑀸 𑀯𑀺𑀬 𑀲𑀭𑀯𑀲𑁆𑀲𑀁 𑀯𑀲𑁆𑀲𑀣𑀸’’𑀢𑀺 𑀢𑁂𑀦𑀁 𑀯𑀺𑀘𑀸𑀭𑁂𑀦𑁆𑀢𑁄 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁫𑁭.

‘‘𑀕𑀚𑀕𑁆𑀕𑀫𑁂𑀖𑁂𑀳𑀺 𑀳𑀬𑀕𑁆𑀕𑀫𑀸𑀮𑀺𑀪𑀺, 𑀭𑀣𑀽𑀫𑀺𑀚𑀸𑀢𑁂𑀳𑀺 𑀲𑀭𑀸𑀪𑀺𑀯𑀲𑁆𑀲𑁂𑀪𑀺;

𑀣𑀭𑀼𑀕𑁆𑀕𑀳𑀸𑀯𑀝𑁆𑀝𑀤𑀴𑁆𑀳𑀧𑁆𑀧𑀳𑀸𑀭𑀺𑀪𑀺, 𑀧𑀭𑀺𑀯𑀸𑀭𑀺𑀢𑀸 𑀢𑀓𑁆𑀓𑀲𑀺𑀮𑀸 𑀲𑀫𑀦𑁆𑀢𑀢𑁄.

𑁧𑁫𑁮.

‘‘𑀅𑀪𑀺𑀥𑀸𑀯𑀣 𑀘𑀽𑀧𑀥𑀸𑀯𑀣 𑀘, 𑀯𑀺𑀯𑀺𑀥𑀸 𑀯𑀺𑀦𑀸𑀤𑀺𑀢𑀸 𑀯𑀤𑀦𑁆𑀢𑀺𑀪𑀺;

𑀯𑀢𑁆𑀢𑀢𑀚𑁆𑀚 𑀢𑀼𑀫𑀼𑀮𑁄 𑀖𑁄𑀲𑁄 𑀬𑀣𑀸, 𑀯𑀺𑀚𑁆𑀚𑀼𑀮𑀢𑀸 𑀚𑀮𑀥𑀭𑀲𑁆𑀲 𑀕𑀚𑁆𑀚𑀢𑁄’’𑀢𑀺.

𑀢𑀢𑁆𑀣 𑀕𑀚𑀕𑁆𑀕𑀫𑁂𑀖𑁂𑀳𑀻𑀢𑀺 𑀅𑀕𑁆𑀕𑀕𑀚𑀫𑁂𑀖𑁂𑀳𑀺, 𑀓𑁄𑀜𑁆𑀘𑀦𑀸𑀤𑀁 𑀕𑀚𑁆𑀚𑀦𑁆𑀢𑁂𑀳𑀺 𑀫𑀢𑁆𑀢𑀯𑀭𑀯𑀸𑀭𑀡𑀯𑀮𑀸𑀳𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀳𑀬𑀕𑁆𑀕𑀫𑀸𑀮𑀺𑀪𑀻𑀢𑀺 𑀅𑀕𑁆𑀕𑀳𑀬𑀫𑀸𑀮𑀻𑀳𑀺, 𑀯𑀭𑀲𑀺𑀦𑁆𑀥𑀯𑀯𑀮𑀸𑀳𑀓𑀓𑀼𑀮𑁂𑀳𑀺 𑀅𑀲𑁆𑀲𑀸𑀦𑀻𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀭𑀣𑀽𑀫𑀺𑀚𑀸𑀢𑁂𑀳𑀻𑀢𑀺 𑀲𑀜𑁆𑀚𑀸𑀢𑀊𑀫𑀺𑀯𑁂𑀕𑁂𑀳𑀺 𑀲𑀸𑀕𑀭𑀲𑀮𑀺𑀮𑁂𑀳𑀺 𑀯𑀺𑀬 𑀲𑀜𑁆𑀚𑀸𑀢𑀭𑀣𑀽𑀫𑀻𑀳𑀺, 𑀭𑀣𑀸𑀦𑀻𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀭𑀸𑀪𑀺𑀯𑀲𑁆𑀲𑁂𑀪𑀻𑀢𑀺 𑀢𑁂𑀳𑀺𑀬𑁂𑀯 𑀭𑀣𑀸𑀦𑀻𑀓𑁂𑀳𑀺 𑀖𑀦𑀯𑀲𑁆𑀲𑀫𑁂𑀖𑁄 𑀯𑀺𑀬 𑀲𑀭𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑁂𑀳𑀺 ¶ . 𑀣𑀭𑀼𑀕𑁆𑀕𑀳𑀸𑀯𑀝𑁆𑀝𑀤𑀴𑁆𑀳𑀧𑁆𑀧𑀳𑀸𑀭𑀺𑀪𑀻𑀢𑀺 𑀣𑀭𑀼𑀕𑁆𑀕𑀳𑁂𑀳𑀺 𑀆𑀯𑀝𑁆𑀝𑀤𑀴𑁆𑀳𑀧𑁆𑀧𑀳𑀸𑀭𑀻𑀳𑀺, 𑀇𑀢𑁄 𑀘𑀺𑀢𑁄 𑀘 𑀆𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀤𑀴𑁆𑀳𑀁 𑀧𑀳𑀭𑀦𑁆𑀢𑁂𑀳𑀺 𑀕𑀳𑀺𑀢𑀔𑀕𑁆𑀕𑀭𑀢𑀦𑀣𑀭𑀼𑀤𑀡𑁆𑀟𑁂𑀳𑀺 𑀧𑀢𑁆𑀢𑀺𑀬𑁄𑀥𑁂𑀳𑀺 𑀘𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀸𑀭𑀺𑀢𑀸 𑀢𑀓𑁆𑀓𑀲𑀺𑀮𑀸 𑀲𑀫𑀦𑁆𑀢𑀢𑁄𑀢𑀺 𑀬𑀣𑀸 𑀅𑀬𑀁 𑀢𑀓𑁆𑀓𑀲𑀺𑀮𑀸 𑀧𑀭𑀺𑀯𑀸𑀭𑀺𑀢𑀸 𑀳𑁄𑀢𑀺, 𑀲𑀻𑀖𑀁 𑀢𑀣𑀸 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄.

𑀅𑀪𑀺𑀥𑀸𑀯𑀣 ¶ 𑀘𑀽𑀧𑀥𑀸𑀯𑀣 𑀘𑀸𑀢𑀺 𑀯𑁂𑀕𑁂𑀦 𑀥𑀸𑀯𑀣 𑀘𑁂𑀯 𑀉𑀧𑀥𑀸𑀯𑀣 𑀘. 𑀯𑀺𑀯𑀺𑀥𑀸 𑀯𑀺𑀦𑀸𑀤𑀺𑀢𑀸 𑀯𑀤𑀦𑁆𑀢𑀺𑀪𑀻𑀢𑀺 𑀯𑀭𑀯𑀸𑀭𑀡𑁂𑀳𑀺 𑀲𑀤𑁆𑀥𑀺𑀁 𑀯𑀺𑀯𑀺𑀥𑀸 𑀯𑀺𑀦𑀤𑀺𑀢𑀸 𑀪𑀯𑀣, 𑀲𑁂𑀮𑀺𑀢𑀕𑀚𑁆𑀚𑀺𑀢𑀯𑀸𑀤𑀺𑀢𑁂𑀳𑀺 𑀦𑀸𑀦𑀸𑀯𑀺𑀭𑀯𑀸 𑀳𑁄𑀣𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀢𑀚𑁆𑀚 𑀢𑀼𑀫𑀼𑀮𑁄 𑀖𑁄𑀲𑁄𑀢𑀺 𑀯𑀢𑁆𑀢𑀢𑀼 𑀅𑀚𑁆𑀚 𑀢𑀼𑀫𑀼𑀮𑁄 𑀫𑀳𑀦𑁆𑀢𑁄 𑀅𑀲𑀦𑀺𑀲𑀤𑁆𑀤𑀲𑀤𑀺𑀲𑁄 𑀖𑁄𑀲𑁄. 𑀬𑀣𑀸 𑀯𑀺𑀚𑁆𑀚𑀼𑀮𑀢𑀸 𑀚𑀮𑀥𑀭𑀲𑁆𑀲 𑀕𑀚𑁆𑀚𑀢𑁄𑀢𑀺 𑀬𑀣𑀸 𑀕𑀚𑁆𑀚𑀦𑁆𑀢𑀲𑁆𑀲 ¶ 𑀚𑀮𑀥𑀭𑀲𑁆𑀲 𑀫𑀼𑀔𑀢𑁄 𑀦𑀺𑀕𑁆𑀕𑀢𑀸 𑀯𑀺𑀚𑁆𑀚𑀼𑀮𑀢𑀸 𑀘𑀭𑀦𑁆𑀢𑀺, 𑀏𑀯𑀁 𑀯𑀺𑀘𑀭𑀦𑁆𑀢𑀸 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀣𑀸𑀢𑀺 𑀯𑀤𑀢𑀺.

𑀇𑀢𑀺 𑀲𑁄 𑀭𑀸𑀚𑀸 𑀕𑀚𑁆𑀚𑀺𑀢𑁆𑀯𑀸 𑀲𑁂𑀦𑀁 𑀯𑀺𑀘𑀸𑀭𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀭𑀜𑁆𑀜𑁄 𑀯𑀲𑀦𑀕𑁂𑀳’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀬𑀁 𑀦𑀕𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑁄’’𑀢𑀺 𑀯𑀼𑀢𑁆𑀢𑁂 ‘‘𑀦𑀕𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀢𑀸𑀯 𑀏𑀯𑀭𑀽𑀧𑁄, 𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀓𑀻𑀤𑀺𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀲𑀤𑀺𑀲’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀏𑀯𑀁 𑀬𑀲𑀲𑀫𑁆𑀧𑀦𑁆𑀦𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀤𑀺𑀲𑁆𑀯𑀸𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀮𑀸𑀬𑀺𑀢𑀧𑀭𑀺𑀩𑁆𑀩𑀸𑀚𑀓𑁄 𑀅𑀳𑁄𑀲𑀺, 𑀢𑀓𑁆𑀓𑀲𑀺𑀮𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀮𑀸𑀬𑀺𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁩𑁦] 𑁧𑁦. 𑀤𑀼𑀢𑀺𑀬𑀧𑀮𑀸𑀬𑀺𑀢𑀚𑀸𑀢𑀓𑀯𑀡𑁆𑀡𑀦𑀸

𑀥𑀚𑀫𑀧𑀭𑀺𑀫𑀺𑀢𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑀮𑀸𑀬𑀺𑀢𑀧𑀭𑀺𑀩𑁆𑀩𑀸𑀚𑀓𑀫𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀚𑁂𑀢𑀯𑀦𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀦𑁄𑀲𑀺𑀮𑀸𑀢𑀮𑁂 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀲𑀻𑀳𑀧𑁄𑀢𑀓𑁄 𑀯𑀺𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀧𑀭𑀺𑀩𑁆𑀩𑀸𑀚𑀓𑁄 𑀤𑀲𑀩𑀮𑀲𑁆𑀲 𑀩𑁆𑀭𑀳𑁆𑀫𑀲𑀭𑀻𑀭𑀧𑀝𑀺𑀪𑀸𑀕𑀁 𑀭𑀽𑀧𑀁 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁 𑀲𑀼𑀯𑀡𑁆𑀡𑀧𑀝𑁆𑀝𑀲𑀤𑀺𑀲𑀁 𑀦𑀮𑀸𑀝𑀜𑁆𑀘 𑀤𑀺𑀲𑁆𑀯𑀸 ‘‘𑀓𑁄 𑀏𑀯𑀭𑀽𑀧𑀁 𑀧𑀼𑀭𑀺𑀲𑀼𑀢𑁆𑀢𑀫𑀁 𑀚𑀺𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀲𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀮𑀸𑀬𑀺. 𑀫𑀳𑀸𑀚𑀦𑁄 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀢𑁆𑀣𑀼𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀫𑀫 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀼𑀔𑀁 𑀤𑀺𑀲𑁆𑀯𑀸 𑀧𑀮𑀸𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀓𑁆𑀓𑀲𑀺𑀮𑀸𑀬𑀁 𑀏𑀓𑁄 𑀕𑀦𑁆𑀥𑀸𑀭𑀭𑀸𑀚𑀸. 𑀲𑁄 ‘‘𑀩𑀸𑀭𑀸𑀡𑀲𑀺𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀆𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀞𑀺𑀢𑁄 𑀅𑀢𑁆𑀢𑀦𑁄 ¶ 𑀩𑀮𑀯𑀸𑀳𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑁄 𑀏𑀢𑁆𑀢𑀓𑀁 𑀩𑀮𑀯𑀸𑀳𑀦𑀁 𑀚𑀺𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀦𑁄 𑀲𑁂𑀦𑀁 𑀲𑀁𑀯𑀡𑁆𑀡𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁯.

‘‘𑀥𑀚𑀫𑀧𑀭𑀺𑀫𑀺𑀢𑀁 ¶ 𑀅𑀦𑀦𑁆𑀢𑀧𑀸𑀭𑀁, 𑀤𑀼𑀧𑁆𑀧𑀲𑀳𑀁 𑀥𑀗𑁆𑀓𑁂𑀳𑀺 𑀲𑀸𑀕𑀭𑀁𑀯;

𑀕𑀺𑀭𑀺𑀫𑀺𑀯 𑀅𑀦𑀺𑀮𑁂𑀦 𑀤𑀼𑀧𑁆𑀧𑀲𑀬𑁆𑀳𑁄, 𑀤𑀼𑀧𑁆𑀧𑀲𑀳𑁄 𑀅𑀳𑀫𑀚𑁆𑀚 𑀢𑀸𑀤𑀺𑀲𑁂𑀦𑀸’’𑀢𑀺.

𑀢𑀢𑁆𑀣 𑀥𑀚𑀫𑀧𑀭𑀺𑀫𑀺𑀢𑀦𑁆𑀢𑀺 𑀇𑀤𑀁 𑀢𑀸𑀯 𑀫𑁂 𑀭𑀣𑁂𑀲𑀼 𑀫𑁄𑀭𑀙𑀤𑁂 𑀞𑀧𑁂𑀢𑁆𑀯𑀸 𑀉𑀲𑁆𑀲𑀸𑀧𑀺𑀢𑀥𑀚𑀫𑁂𑀯 𑀅𑀧𑀭𑀺𑀫𑀺𑀢𑀁 𑀩𑀳𑀼𑀁 𑀅𑀦𑁂𑀓𑀲𑀢𑀲𑀗𑁆𑀔𑁆𑀬𑀁. 𑀅𑀦𑀦𑁆𑀢𑀧𑀸𑀭𑀦𑁆𑀢𑀺 𑀩𑀮𑀯𑀸𑀳𑀦𑀫𑁆𑀧𑀺 𑀫𑁂 ‘‘𑀏𑀢𑁆𑀢𑀓𑀸 𑀳𑀢𑁆𑀣𑀻 𑀏𑀢𑁆𑀢𑀓𑀸 𑀅𑀲𑁆𑀲𑀸 𑀏𑀢𑁆𑀢𑀓𑀸 𑀭𑀣𑀸 𑀏𑀢𑁆𑀢𑀓𑀸 𑀧𑀢𑁆𑀢𑀻’’𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑀁 𑀅𑀦𑀦𑁆𑀢𑀧𑀸𑀭𑀁. 𑀤𑀼𑀧𑁆𑀧𑀲𑀳𑀦𑁆𑀢𑀺 𑀦 𑀲𑀓𑁆𑀓𑀸 𑀧𑀝𑀺𑀲𑀢𑁆𑀢𑀽𑀳𑀺 𑀲𑀳𑀺𑀢𑀼𑀁 𑀅𑀪𑀺𑀪𑀯𑀺𑀢𑀼𑀁 ¶ . 𑀬𑀣𑀸 𑀓𑀺𑀁? 𑀥𑀗𑁆𑀓𑁂𑀳𑀺 𑀲𑀸𑀕𑀭𑀁𑀯, 𑀬𑀣𑀸 𑀲𑀸𑀕𑀭𑁄 𑀩𑀳𑀽𑀳𑀺 𑀓𑀸𑀓𑁂𑀳𑀺 𑀯𑁂𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀸 𑀅𑀢𑀺𑀓𑁆𑀓𑀫𑀦𑀯𑀲𑁂𑀦 𑀯𑀸 𑀤𑀼𑀧𑁆𑀧𑀲𑀳𑁄, 𑀏𑀯𑀁 𑀤𑀼𑀧𑁆𑀧𑀲𑀳𑀁. 𑀕𑀺𑀭𑀺𑀫𑀺𑀯 𑀅𑀦𑀺𑀮𑁂𑀦 𑀤𑀼𑀧𑁆𑀧𑀲𑀬𑁆𑀳𑁄𑀢𑀺 𑀅𑀧𑀺𑀘 𑀫𑁂 𑀅𑀬𑀁 𑀩𑀮𑀓𑀸𑀬𑁄 𑀬𑀣𑀸 𑀧𑀩𑁆𑀩𑀢𑁄 𑀯𑀸𑀢𑁂𑀦 𑀅𑀓𑀫𑁆𑀧𑀦𑀻𑀬𑀢𑁄 𑀤𑀼𑀧𑁆𑀧𑀲𑀳𑁄, 𑀢𑀣𑀸 𑀅𑀜𑁆𑀜𑁂𑀦 𑀩𑀮𑀓𑀸𑀬𑁂𑀦 𑀤𑀼𑀧𑁆𑀧𑀲𑀳𑁄. 𑀤𑀼𑀧𑁆𑀧𑀲𑀳𑁄 𑀅𑀳𑀫𑀚𑁆𑀚 𑀢𑀸𑀤𑀺𑀲𑁂𑀦𑀸𑀢𑀺 𑀲𑁆𑀯𑀸𑀳𑀁 𑀇𑀫𑀺𑀦𑀸 𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀚 𑀢𑀸𑀤𑀺𑀲𑁂𑀦 𑀤𑀼𑀧𑁆𑀧𑀲𑀳𑁄𑀢𑀺 𑀅𑀝𑁆𑀝𑀸𑀮𑀓𑁂 𑀞𑀺𑀢𑀁 𑀩𑁄𑀥𑀺𑀲𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀣𑀲𑁆𑀲 𑀲𑁄 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀅𑀢𑁆𑀢𑀦𑁄 𑀫𑀼𑀔𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀩𑀸𑀮, 𑀫𑀸 𑀯𑀺𑀧𑁆𑀧𑀮𑀧𑀲𑀺, 𑀇𑀤𑀸𑀦𑀺 𑀢𑁂 𑀩𑀮𑀯𑀸𑀳𑀦𑀁 𑀫𑀢𑁆𑀢𑀯𑀸𑀭𑀡𑁄 𑀯𑀺𑀬 𑀦𑀴𑀯𑀦𑀁 𑀯𑀺𑀤𑁆𑀥𑀁𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁦.

‘‘𑀫𑀸 𑀩𑀸𑀮𑀺𑀬𑀁 𑀯𑀺𑀮𑀧𑀺 𑀦 𑀳𑀺𑀲𑁆𑀲 𑀢𑀸𑀤𑀺𑀲𑀁, 𑀯𑀺𑀟𑀬𑁆𑀳𑀲𑁂 𑀦 𑀳𑀺 𑀮𑀪𑀲𑁂 𑀦𑀺𑀲𑁂𑀥𑀓𑀁;

𑀆𑀲𑀚𑁆𑀚𑀲𑀺 𑀕𑀚𑀫𑀺𑀯 𑀏𑀓𑀘𑀸𑀭𑀺𑀦𑀁, 𑀬𑁄 𑀢𑀁 𑀧𑀤𑀸 𑀦𑀴𑀫𑀺𑀯 𑀧𑁄𑀣𑀬𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀫𑀸 𑀩𑀸𑀮𑀺𑀬𑀁 𑀯𑀺𑀮𑀧𑀻𑀢𑀺 𑀫𑀸 𑀅𑀢𑁆𑀢𑀦𑁄 𑀩𑀸𑀮𑀪𑀸𑀯𑀁 𑀯𑀺𑀧𑁆𑀧𑀮𑀧𑀲𑀺. 𑀦 𑀳𑀺𑀲𑁆𑀲 𑀢𑀸𑀤𑀺𑀲𑀦𑁆𑀢𑀺 𑀦 𑀳𑀺 𑀅𑀲𑁆𑀲 𑀢𑀸𑀤𑀺𑀲𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀸𑀤𑀺𑀲𑁄 ‘‘𑀅𑀦𑀦𑁆𑀢𑀧𑀸𑀭𑀁 𑀫𑁂 𑀩𑀮𑀯𑀸𑀳𑀦’’𑀦𑁆𑀢𑀺 𑀏𑀯𑀭𑀽𑀧𑀁 𑀢𑀓𑁆𑀓𑁂𑀦𑁆𑀢𑁄 𑀭𑀚𑁆𑀚𑀜𑁆𑀘 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦 𑀳𑀺 𑀅𑀲𑁆𑀲, 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀟𑀬𑁆𑀳𑀲𑁂𑀢𑀺 𑀢𑁆𑀯𑀁 𑀩𑀸𑀮, 𑀓𑁂𑀯𑀮𑀁 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀧𑀭𑀺𑀴𑀸𑀳𑁂𑀦 𑀯𑀺𑀟𑀬𑁆𑀳𑀲𑀺𑀬𑁂𑀯. 𑀦 𑀳𑀺 𑀮𑀪𑀲𑁂 𑀦𑀺𑀲𑁂𑀥𑀓𑀦𑁆𑀢𑀺 𑀫𑀸𑀤𑀺𑀲𑀁 𑀧𑀦 𑀧𑀲𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀦𑀺𑀲𑁂𑀥𑀓𑀁 𑀦 𑀢𑀸𑀯 𑀮𑀪𑀲𑀺, 𑀅𑀚𑁆𑀚 ¶ 𑀢𑀁 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀮𑀸𑀧𑁂𑀲𑁆𑀲𑀸𑀫𑀺. 𑀆𑀲𑀚𑁆𑀚𑀲𑀻𑀢𑀺 𑀉𑀧𑀕𑀘𑁆𑀙𑀲𑀺. 𑀕𑀚𑀫𑀺𑀯 𑀏𑀓𑀘𑀸𑀭𑀺𑀦𑀦𑁆𑀢𑀺 𑀏𑀓𑀘𑀸𑀭𑀺𑀦𑀁 𑀫𑀢𑁆𑀢𑀯𑀭𑀯𑀸𑀭𑀡𑀁 𑀯𑀺𑀬. 𑀬𑁄 𑀢𑀁 𑀧𑀤𑀸 𑀦𑀴𑀫𑀺𑀯 𑀧𑁄𑀣𑀬𑀺𑀲𑁆𑀲𑀢𑀻𑀢𑀺 𑀬𑁄 𑀢𑀁 𑀬𑀣𑀸 𑀦𑀸𑀫 𑀫𑀢𑁆𑀢𑀯𑀭𑀯𑀸𑀭𑀡𑁄 𑀧𑀸𑀤𑀸 𑀦𑀴𑀁 𑀧𑁄𑀣𑁂𑀢𑀺 𑀲𑀁𑀘𑀼𑀡𑁆𑀡𑁂𑀢𑀺, 𑀏𑀯𑀁 𑀧𑁄𑀣𑀬𑀺𑀲𑁆𑀲𑀢𑀺, 𑀢𑀁 𑀢𑁆𑀯𑀁 𑀆𑀲𑀚𑁆𑀚𑀲𑀻𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬𑀸𑀳.

𑀏𑀯𑀁 ¶ 𑀢𑀚𑁆𑀚𑁂𑀦𑁆𑀢𑀲𑁆𑀲 𑀧𑀦𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀥𑀸𑀭𑀭𑀸𑀚𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 ¶ 𑀓𑀜𑁆𑀘𑀦𑀧𑀝𑁆𑀝𑀲𑀤𑀺𑀲𑀁 𑀫𑀳𑀸𑀦𑀮𑀸𑀝𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀕𑀳𑀡𑀪𑀻𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑁄 𑀲𑀓𑀦𑀕𑀭𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀕𑀦𑁆𑀥𑀸𑀭𑀭𑀸𑀚𑀸 𑀧𑀮𑀸𑀬𑀺𑀢𑀧𑀭𑀺𑀩𑁆𑀩𑀸𑀚𑀓𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀢𑀺𑀬𑀧𑀮𑀸𑀬𑀺𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀸𑀲𑀸𑀯𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀸𑀲𑀸𑀯𑀁 𑀘𑀽𑀴𑀦𑀦𑁆𑀤𑀺𑀬𑀁, 𑀧𑀼𑀝𑀪𑀢𑁆𑀢𑀜𑁆𑀘 𑀓𑀼𑀫𑁆𑀪𑀺𑀮𑀁;

𑀔𑀦𑁆𑀢𑀺𑀯𑀡𑁆𑀡𑀁 𑀓𑁄𑀲𑀺𑀬𑀜𑁆𑀘, 𑀕𑀽𑀣𑀧𑀸𑀡𑀁 𑀓𑀸𑀫𑀦𑀻𑀢𑀁;

𑀧𑀮𑀸𑀬𑀺𑀢𑀤𑁆𑀯𑀬𑀫𑁆𑀧𑀺 𑀘.

𑁯. 𑀉𑀧𑀸𑀳𑀦𑀯𑀕𑁆𑀕𑁄

[𑁨𑁩𑁧] 𑁧. 𑀉𑀧𑀸𑀳𑀦𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀸𑀧𑀺 ¶ 𑀓𑀻𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀜𑁆𑀳𑀺 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀢𑀣𑀸𑀕𑀢𑀲𑁆𑀲 𑀧𑀝𑀺𑀧𑀓𑁆𑀔𑁄 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 ¶ 𑀇𑀤𑀸𑀦𑁂𑀯 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀫 𑀧𑀝𑀺𑀧𑀓𑁆𑀔𑁄 𑀳𑀼𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀸𑀘𑀭𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀳𑀢𑁆𑀣𑀺𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀅𑀣𑁂𑀓𑁄 𑀓𑀸𑀲𑀺𑀕𑀸𑀫𑀓𑁄 𑀫𑀸𑀡𑀯𑀓𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺. 𑀩𑁄𑀥𑀺𑀲𑀢𑁆𑀢𑀸 𑀦𑀸𑀫 𑀲𑀺𑀧𑁆𑀧𑀁 𑀯𑀸𑀘𑁂𑀦𑁆𑀢𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀦 𑀓𑀭𑁄𑀦𑁆𑀢𑀺, 𑀅𑀢𑁆𑀢𑀦𑁄 𑀚𑀸𑀦𑀦𑀦𑀺𑀬𑀸𑀫𑁂𑀦 𑀦𑀺𑀭𑀯𑀲𑁂𑀲𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀦𑀦𑀲𑀺𑀧𑁆𑀧𑀁 𑀦𑀺𑀭𑀯𑀲𑁂𑀲𑀫𑀼𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀆𑀘𑀭𑀺𑀬 ¶ , 𑀅𑀳𑀁 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀫𑀳𑀸𑀭𑀸𑀚, 𑀫𑀫 𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑀼𑀫𑁆𑀳𑁂 𑀉𑀧𑀝𑁆𑀞𑀸𑀢𑀼𑀁 𑀇𑀘𑁆𑀙𑀢𑀻’’𑀢𑀺. ‘‘𑀲𑀸𑀥𑀼, 𑀉𑀧𑀝𑁆𑀞𑀸𑀢𑀽’’𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀧𑀭𑀺𑀩𑁆𑀩𑀬𑀁 𑀚𑀸𑀦𑀸𑀣𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑀼𑀫𑁆𑀳𑁂𑀳𑀺 𑀲𑀫𑀓𑀁 𑀦 𑀮𑀘𑁆𑀙𑀢𑀺, 𑀢𑀼𑀫𑁆𑀳𑁂𑀲𑀼 𑀲𑀢𑀁 𑀮𑀪𑀦𑁆𑀢𑁂𑀲𑀼 𑀧𑀡𑁆𑀡𑀸𑀲𑀁 𑀮𑀘𑁆𑀙𑀢𑀺, 𑀤𑁆𑀯𑁂 𑀮𑀪𑀦𑁆𑀢𑁂𑀲𑀼 𑀏𑀓𑀁 𑀮𑀘𑁆𑀙𑀢𑀻’’𑀢𑀺. 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀅𑀦𑁆𑀢𑁂𑀯𑀸𑀲𑀺𑀓𑁄 ‘‘𑀅𑀳𑀁, 𑀆𑀘𑀭𑀺𑀬, 𑀢𑀼𑀫𑁆𑀳𑁂𑀳𑀺 𑀲𑀫𑀁 𑀲𑀺𑀧𑁆𑀧𑀁 𑀚𑀸𑀦𑀸𑀫𑀺. 𑀲𑀘𑁂 𑀲𑀫𑀓𑀜𑁆𑀜𑁂𑀯 𑀧𑀭𑀺𑀩𑁆𑀩𑀬𑀁 𑀮𑀪𑀺𑀲𑁆𑀲𑀸𑀫𑀺, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺. 𑀦𑁄 𑀘𑁂, 𑀦 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀘𑁂 𑀲𑁄 𑀢𑀼𑀫𑁆𑀳𑁂𑀳𑀺 𑀲𑀫𑀧𑁆𑀧𑀓𑀸𑀭𑁄, 𑀢𑀼𑀫𑁆𑀳𑁂𑀳𑀺 𑀲𑀫𑀓𑀜𑁆𑀜𑁂𑀯 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀲𑀫𑀓𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 ‘‘𑀲𑀸𑀥𑀼 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀢𑁂𑀦 𑀳𑀺 𑀲𑁆𑀯𑁂 𑀲𑀺𑀧𑁆𑀧𑀁 𑀤𑀲𑁆𑀲𑁂𑀣𑀸’’𑀢𑀺. ‘‘𑀲𑀸𑀥𑀼, 𑀤𑀲𑁆𑀲𑁂𑀲𑁆𑀲𑀸𑀫, 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺. 𑀭𑀸𑀚𑀸 ‘‘𑀲𑁆𑀯𑁂 𑀓𑀺𑀭 𑀆𑀘𑀭𑀺𑀬𑁄 𑀘 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘 𑀉𑀪𑁄 𑀳𑀢𑁆𑀣𑀺𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀝𑁆𑀞𑀼𑀓𑀸𑀫𑀸 𑀧𑀲𑁆𑀲𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺.

𑀆𑀘𑀭𑀺𑀬𑁄 ¶ ‘‘𑀦 𑀫𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀉𑀧𑀸𑀬𑀓𑁄𑀲𑀮𑁆𑀮𑀁 𑀚𑀸𑀦𑀸𑀢𑀻’’𑀢𑀺 𑀏𑀓𑀁 𑀳𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑁂𑀦𑁂𑀯 𑀯𑀺𑀮𑁄𑀫𑀁 𑀲𑀺𑀓𑁆𑀔𑀸𑀧𑁂𑀲𑀺. 𑀲𑁄 𑀢𑀁 ‘‘𑀕𑀘𑁆𑀙𑀸’’𑀢𑀺 𑀯𑀼𑀢𑁆𑀢𑁂 𑀑𑀲𑀓𑁆𑀓𑀺𑀢𑀼𑀁, ‘‘𑀑𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑁂 𑀕𑀦𑁆𑀢𑀼𑀁, ‘‘𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑁂 𑀦𑀺𑀧𑀚𑁆𑀚𑀺𑀢𑀼𑀁, ‘‘𑀦𑀺𑀧𑀚𑁆𑀚𑀸’’𑀢𑀺 𑀯𑀼𑀢𑁆𑀢𑁂 𑀞𑀸𑀢𑀼𑀁, ‘‘𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀞𑀧𑁂𑀢𑀼𑀁, ‘‘𑀞𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀕𑀡𑁆𑀳𑀺𑀢𑀼𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀁 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀅𑀕𑀫𑀸𑀲𑀺. 𑀅𑀦𑁆𑀢𑁂𑀯𑀸𑀲𑀺𑀓𑁄𑀧𑀺 𑀏𑀓𑀁 𑀫𑀦𑀸𑀧𑀁 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺. 𑀉𑀪𑁄𑀧𑀺 𑀲𑀫𑀓𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀼𑀁. 𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀳𑀢𑁆𑀣𑀺𑀁 ¶ 𑀯𑀺𑀮𑁄𑀫𑀁 𑀓𑀸𑀭𑁂𑀲𑀺, 𑀲𑁄 ‘‘𑀕𑀘𑁆𑀙𑀸’’𑀢𑀺 ¶ 𑀯𑀼𑀢𑁆𑀢𑁂 𑀑𑀲𑀓𑁆𑀓𑀺, ‘‘𑀑𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀭𑀢𑁄 𑀥𑀸𑀯𑀺, ‘‘𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑁂 𑀦𑀺𑀧𑀚𑁆𑀚𑀺, ‘‘𑀦𑀺𑀧𑀚𑁆𑀚𑀸’’𑀢𑀺 𑀯𑀼𑀢𑁆𑀢𑁂 𑀅𑀝𑁆𑀞𑀸𑀲𑀺, ‘‘𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀦𑀺𑀓𑁆𑀔𑀺𑀧𑀺, ‘‘𑀦𑀺𑀓𑁆𑀔𑀺𑀧𑀸’’𑀢𑀺 𑀯𑀼𑀢𑁆𑀢𑁂 𑀕𑀡𑁆𑀳𑀺. 𑀫𑀳𑀸𑀚𑀦𑁄 ‘‘𑀅𑀭𑁂 𑀤𑀼𑀝𑁆𑀞𑀅𑀦𑁆𑀢𑁂𑀯𑀸𑀲𑀺𑀓, 𑀢𑁆𑀯𑀁 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀸𑀭𑀫𑁆𑀪𑀁 𑀓𑀭𑁄𑀲𑀺, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀺, ‘𑀆𑀘𑀭𑀺𑀬𑁂𑀦 𑀲𑀫𑀓𑀁 𑀚𑀸𑀦𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀲𑀻’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀫𑁆𑀳𑀸 𑀑𑀭𑀼𑀬𑁆𑀳 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀲𑀺𑀧𑁆𑀧𑀁 𑀦𑀸𑀫 𑀅𑀢𑁆𑀢𑀦𑁄 𑀲𑀼𑀔𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀧𑀦 𑀕𑀳𑀺𑀢𑀲𑀺𑀧𑁆𑀧𑀁 𑀤𑀼𑀓𑁆𑀓𑀝𑀉𑀧𑀸𑀳𑀦𑀸 𑀯𑀺𑀬 𑀯𑀺𑀦𑀸𑀲𑀫𑁂𑀯 𑀆𑀯𑀳𑀢𑀻’’𑀢𑀺 𑀯𑀢𑁆𑀯𑀸 𑀇𑀤𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁬𑁧.

‘‘𑀬𑀣𑀸𑀧𑀺 𑀓𑀻𑀢𑀸 𑀧𑀼𑀭𑀺𑀲𑀲𑁆𑀲𑀼𑀧𑀸𑀳𑀦𑀸, 𑀲𑀼𑀔𑀲𑁆𑀲 𑀅𑀢𑁆𑀣𑀸𑀬 𑀤𑀼𑀔𑀁 𑀉𑀤𑀩𑁆𑀩𑀳𑁂;

𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀢𑀮𑀲𑀸 𑀧𑀧𑀻𑀴𑀺𑀢𑀸, 𑀢𑀲𑁆𑀲𑁂𑀯 𑀧𑀸𑀤𑁂 𑀧𑀼𑀭𑀺𑀲𑀲𑁆𑀲 𑀔𑀸𑀤𑀭𑁂.

𑁧𑁬𑁨.

‘‘𑀏𑀯𑀫𑁂𑀯 𑀬𑁄 𑀤𑀼𑀓𑁆𑀓𑀼𑀮𑀻𑀦𑁄 𑀅𑀦𑀭𑀺𑀬𑁄, 𑀢𑀫𑁆𑀫𑀸𑀓 𑀯𑀺𑀚𑁆𑀚𑀜𑁆𑀘 𑀲𑀼𑀢𑀜𑁆𑀘 𑀆𑀤𑀺𑀬;

𑀢𑀫𑁂𑀯 𑀲𑁄 𑀢𑀢𑁆𑀣 𑀲𑀼𑀢𑁂𑀦 𑀔𑀸𑀤𑀢𑀺, 𑀅𑀦𑀭𑀺𑀬𑁄 𑀯𑀼𑀘𑁆𑀘𑀢𑀺 𑀧𑀸𑀦𑀤𑀽𑀧𑀫𑁄’’𑀢𑀺.

𑀢𑀢𑁆𑀣 𑀉𑀤𑀩𑁆𑀩𑀳𑁂𑀢𑀺 𑀉𑀤𑀩𑁆𑀩𑀳𑁂𑀬𑁆𑀬. 𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀢𑀮𑀲𑀸 𑀧𑀧𑀻𑀴𑀺𑀢𑀸𑀢𑀺 𑀖𑀫𑁆𑀫𑁂𑀦 𑀅𑀪𑀺𑀢𑀢𑁆𑀢𑀸 𑀧𑀸𑀤𑀢𑀮𑁂𑀦 𑀘 𑀧𑀻𑀴𑀺𑀢𑀸. 𑀢𑀲𑁆𑀲𑁂𑀯𑀸𑀢𑀺 𑀬𑁂𑀦 𑀢𑀸 𑀲𑀼𑀔𑀢𑁆𑀣𑀸𑀬 𑀓𑀺𑀡𑀺𑀢𑁆𑀯𑀸 𑀧𑀸𑀤𑁂𑀲𑀼 𑀧𑀝𑀺𑀫𑀼𑀓𑁆𑀓𑀸 𑀤𑀼𑀓𑁆𑀓𑀝𑀽𑀧𑀸𑀳𑀦𑀸, 𑀢𑀲𑁆𑀲𑁂𑀯. 𑀔𑀸𑀤𑀭𑁂𑀢𑀺 𑀯𑀡𑀁 𑀓𑀭𑁄𑀦𑁆𑀢𑀸 𑀧𑀸𑀤𑁂 𑀔𑀸𑀤𑀦𑁆𑀢𑀺.

𑀤𑀼𑀓𑁆𑀓𑀼𑀮𑀻𑀦𑁄𑀢𑀺 𑀤𑀼𑀚𑁆𑀚𑀸𑀢𑀺𑀓𑁄 𑀅𑀓𑀼𑀮𑀧𑀼𑀢𑁆𑀢𑁄. 𑀅𑀦𑀭𑀺𑀬𑁄𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀯𑀚𑁆𑀚𑀺𑀢𑁄 𑀅𑀲𑀧𑁆𑀧𑀼𑀭𑀺𑀲𑁄. 𑀢𑀫𑁆𑀫𑀸𑀓 𑀯𑀺𑀚𑁆𑀚𑀜𑁆𑀘 𑀲𑀼𑀢𑀜𑁆𑀘 𑀆𑀤𑀺𑀬𑀸𑀢𑀺 𑀏𑀢𑁆𑀣 𑀢𑀁 𑀢𑀁 𑀫𑀦𑀢𑀻𑀢𑀺 ‘‘𑀢𑀫𑁆𑀫𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀫𑁆𑀫𑀸𑀓𑁄, 𑀢𑀁 𑀢𑀁 𑀲𑀺𑀧𑁆𑀧𑀁 𑀆𑀲𑁂𑀯𑀢𑀺 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄, 𑀆𑀘𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀢𑀫𑁆𑀫𑀸𑀓𑀸, 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ¶ 𑀧𑀦𑀲𑁆𑀲 𑀭𑀲𑁆𑀲𑀪𑀸𑀯𑁄 𑀓𑀢𑁄. 𑀯𑀺𑀚𑁆𑀚𑀦𑁆𑀢𑀺 𑀅𑀝𑁆𑀞𑀸𑀭𑀲𑀲𑀼 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 ¶ 𑀬𑀁𑀓𑀺𑀜𑁆𑀘𑀺. 𑀲𑀼𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀼𑀢𑀧𑀭𑀺𑀬𑀢𑁆𑀢𑀺. 𑀆𑀤𑀺𑀬𑀸𑀢𑀺𑀆𑀤𑀺𑀬𑀺𑀢𑁆𑀯𑀸. 𑀢𑀫𑁂𑀯 𑀲𑁄 𑀢𑀢𑁆𑀣 𑀲𑀼𑀢𑁂𑀦 𑀔𑀸𑀤𑀢𑀻𑀢𑀺 𑀢𑀫𑁂𑀯𑀸𑀢𑀺 ¶ 𑀅𑀢𑁆𑀢𑀸𑀦𑀫𑁂𑀯. 𑀲𑁄𑀢𑀺 𑀬𑁄 𑀤𑀼𑀓𑁆𑀓𑀼𑀮𑀻𑀦𑁄 𑀅𑀦𑀭𑀺𑀬𑁄 𑀆𑀘𑀭𑀺𑀬𑀫𑁆𑀳𑀸 𑀯𑀺𑀚𑁆𑀚𑀜𑁆𑀘 𑀲𑀼𑀢𑀜𑁆𑀘 𑀆𑀤𑀺𑀬𑀢𑀺, 𑀲𑁄. 𑀢𑀢𑁆𑀣 𑀲𑀼𑀢𑁂𑀦 𑀔𑀸𑀤𑀢𑀻𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀼𑀢𑁂𑀦 𑀲𑁄 𑀅𑀢𑁆𑀢𑀸𑀦𑀫𑁂𑀯 𑀔𑀸𑀤𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀢𑁂𑀦𑁂𑀯 𑀲𑁄 𑀢𑀢𑁆𑀣 𑀲𑀼𑀢𑁂𑀦 𑀔𑀸𑀤𑀢𑀻’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀸𑀧𑀺 𑀲𑁄 𑀢𑁂𑀦 𑀢𑀢𑁆𑀣 𑀲𑀼𑀢𑁂𑀦 𑀅𑀢𑁆𑀢𑀸𑀦𑀫𑁂𑀯 𑀔𑀸𑀤𑀢𑀻𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄. 𑀅𑀦𑀭𑀺𑀬𑁄 𑀯𑀼𑀘𑁆𑀘𑀢𑀺 𑀧𑀸𑀦𑀤𑀽𑀧𑀫𑁄𑀢𑀺 𑀇𑀢𑀺 𑀅𑀦𑀭𑀺𑀬𑁄 𑀤𑀼𑀧𑀸𑀳𑀦𑀽𑀧𑀫𑁄 𑀤𑀼𑀓𑁆𑀓𑀝𑀽𑀧𑀸𑀳𑀦𑀽𑀧𑀫𑁄 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀤𑀼𑀓𑁆𑀓𑀝𑀽𑀧𑀸𑀳𑀦𑀸 𑀧𑀼𑀭𑀺𑀲𑀁 𑀔𑀸𑀤𑀦𑁆𑀢𑀺, 𑀏𑀯𑀫𑁂𑀲 𑀲𑀼𑀢𑁂𑀦 𑀔𑀸𑀤𑀦𑁆𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀔𑀸𑀤𑀢𑀺. 𑀅𑀣 𑀯𑀸 𑀧𑀸𑀦𑀸𑀬 𑀤𑀼𑀢𑁄𑀢𑀺 𑀧𑀸𑀦𑀤𑀼, 𑀉𑀧𑀸𑀳𑀦𑀽𑀧𑀢𑀸𑀧𑀺𑀢𑀲𑁆𑀲 𑀉𑀧𑀸𑀳𑀦𑀸𑀬 𑀔𑀸𑀤𑀺𑀢𑀧𑀸𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀬𑁄 𑀲𑁄 𑀅𑀢𑁆𑀢𑀸𑀦𑀁 𑀲𑀼𑀢𑁂𑀦 𑀔𑀸𑀤𑀢𑀺, 𑀲𑁄 𑀢𑁂𑀦 𑀲𑀼𑀢𑁂𑀦 𑀔𑀸𑀤𑀺𑀢𑀢𑁆𑀢𑀸 ‘‘𑀅𑀦𑀭𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀺 𑀧𑀸𑀦𑀤𑀽𑀧𑀫𑁄, 𑀉𑀧𑀸𑀳𑀦𑀽𑀧𑀢𑀸𑀧𑀺𑀢𑀧𑀸𑀤𑀲𑀤𑀺𑀲𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀭𑀸𑀚𑀸 𑀢𑀼𑀝𑁆𑀞𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀦𑁆𑀢𑁂𑀯𑀸𑀲𑀺𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀧𑀸𑀳𑀦𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁩𑁨] 𑁨. 𑀯𑀻𑀡𑀸𑀣𑀽𑀡𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑀘𑀺𑀦𑁆𑀢𑀺𑀢𑁄𑀬𑀫𑀢𑁆𑀣𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀫𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭𑁂𑀓𑀸 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀥𑀻𑀢𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀉𑀲𑀪𑀭𑀸𑀚𑀲𑁆𑀲 𑀲𑀓𑁆𑀓𑀸𑀭𑀁 𑀓𑀬𑀺𑀭𑀫𑀸𑀦𑀁 𑀤𑀺𑀲𑁆𑀯𑀸 𑀥𑀸𑀢𑀺𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀓𑁄 𑀦𑀸𑀫𑁂𑀲 𑀏𑀯𑀁 𑀲𑀓𑁆𑀓𑀸𑀭𑀁 𑀮𑀪𑀢𑀻’’𑀢𑀺. ‘‘𑀉𑀲𑀪𑀭𑀸𑀚𑀸 𑀦𑀸𑀫, 𑀅𑀫𑁆𑀫𑀸’’𑀢𑀺. 𑀧𑀼𑀦 𑀲𑀸 𑀏𑀓𑀤𑀺𑀯𑀲𑀁 𑀧𑀸𑀲𑀸𑀤𑁂 𑀞𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀻 𑀏𑀓𑀁 𑀔𑀼𑀚𑁆𑀚𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀕𑀼𑀦𑁆𑀦𑀁 ¶ 𑀅𑀦𑁆𑀢𑀭𑁂 𑀚𑁂𑀝𑁆𑀞𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀓𑀓𑀼𑀥𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀚𑁂𑀝𑁆𑀞𑀓𑀲𑁆𑀲𑀧𑀺 𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀬𑀁 𑀫𑀦𑀼𑀲𑁆𑀲𑁂𑀲𑀼 𑀧𑀼𑀭𑀺𑀲𑀽𑀲𑀪𑁄 𑀪𑀯𑀺𑀲𑁆𑀲𑀢𑀺, 𑀏𑀢𑀲𑁆𑀲 𑀫𑀬𑀸 𑀧𑀸𑀤𑀧𑀭𑀺𑀘𑀸𑀭𑀺𑀓𑀸𑀬 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 𑀤𑀸𑀲𑀺𑀁 𑀧𑁂𑀲𑁂𑀢𑁆𑀯𑀸 ¶ ‘‘𑀲𑁂𑀝𑁆𑀞𑀺𑀥𑀻𑀢𑀸 𑀢𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀸, 𑀅𑀲𑀼𑀓𑀝𑁆𑀞𑀸𑀦𑀁 𑀓𑀺𑀭 𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀸’’𑀢𑀺 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀲𑀸𑀭𑀪𑀡𑁆𑀟𑀓𑀁 𑀆𑀤𑀸𑀬 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀮𑀸𑀬𑀺. 𑀅𑀧𑀭𑀪𑀸𑀕𑁂 𑀢𑀁 𑀓𑀫𑁆𑀫𑀁 𑀦𑀕𑀭𑁂 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀧𑀸𑀓𑀝𑀁 𑀚𑀸𑀢𑀁. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑀸 𑀓𑀺𑀭 𑀲𑁂𑀝𑁆𑀞𑀺𑀥𑀻𑀢𑀸 𑀔𑀼𑀚𑁆𑀚𑁂𑀦 𑀲𑀤𑁆𑀥𑀺𑀁 𑀧𑀮𑀸𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲𑀸 𑀔𑀼𑀚𑁆𑀚𑀁 𑀓𑀸𑀫𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀓𑀸𑀫𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀦𑀺𑀕𑀫𑀕𑀸𑀫𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀫𑀸𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀩𑀸𑀭𑀸𑀡𑀲𑀻𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀭𑀁 𑀯𑀸𑀭𑁂𑀢𑁆𑀯𑀸 𑀤𑀺𑀯𑀲𑀁 𑀞𑀧𑁂𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀉𑀲𑀪𑀲𑁆𑀲 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀸𑀫𑁂𑀲𑁄’’𑀢𑀺 𑀥𑀸𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀲𑀪𑁄’’𑀢𑀺 𑀲𑀼𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑀁 𑀏𑀓𑀁 𑀔𑀼𑀚𑁆𑀚𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑀽𑀲𑀪𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀭𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀮𑀸𑀬𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 ‘‘𑀲𑁂𑀝𑁆𑀞𑀺𑀥𑀻𑀢𑀭𑀁 𑀕𑁂𑀳𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑁄 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂 𑀉𑀪𑁄𑀧𑀺 𑀲𑀩𑁆𑀩𑀭𑀢𑁆𑀢𑀺𑀁 𑀫𑀕𑁆𑀕𑀁 𑀅𑀕𑀫𑀁𑀲𑀼. 𑀅𑀣 𑀔𑀼𑀚𑁆𑀚𑀲𑁆𑀲 𑀲𑀩𑁆𑀩𑀭𑀢𑁆𑀢𑀺𑀁 𑀲𑀻𑀢𑀸𑀲𑀺𑀳𑀢𑀲𑁆𑀲 𑀅𑀭𑀼𑀡𑁄𑀤𑀬𑁂 𑀲𑀭𑀻𑀭𑁂 𑀯𑀸𑀢𑁄 𑀓𑀼𑀧𑁆𑀧𑀺, 𑀫𑀳𑀦𑁆𑀢𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀻𑀡𑀸𑀤𑀡𑁆𑀟𑀓𑁄 𑀯𑀺𑀬 𑀲𑀁𑀓𑀼𑀝𑀺𑀢𑁄 𑀦𑀺𑀧𑀚𑁆𑀚𑀺, 𑀲𑁂𑀝𑁆𑀞𑀺𑀥𑀻𑀢𑀸𑀧𑀺𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀥𑀻𑀢𑀭𑀁 𑀔𑀼𑀚𑁆𑀚𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁩.

‘‘𑀏𑀓𑀘𑀺𑀦𑁆𑀢𑀺𑀢𑁄𑀬𑀫𑀢𑁆𑀣𑁄 ¶ , 𑀩𑀸𑀮𑁄 𑀅𑀧𑀭𑀺𑀡𑀸𑀬𑀓𑁄;

𑀦 𑀳𑀺 𑀔𑀼𑀚𑁆𑀚𑁂𑀦 𑀯𑀸𑀫𑁂𑀦, 𑀪𑁄𑀢𑀺 𑀲𑀗𑁆𑀕𑀦𑁆𑀢𑀼𑀫𑀭𑀳𑀲𑀻’’𑀢𑀺.

𑀢𑀢𑁆𑀣 𑀏𑀓𑀘𑀺𑀦𑁆𑀢𑀺𑀢𑁄𑀬𑀫𑀢𑁆𑀣𑁄𑀢𑀺 𑀅𑀫𑁆𑀫, 𑀬𑀁 𑀢𑁆𑀯𑀁 𑀅𑀢𑁆𑀣𑀁 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀺𑀦𑀸 𑀔𑀼𑀚𑁆𑀚𑁂𑀦 𑀲𑀤𑁆𑀥𑀺𑀁 𑀧𑀮𑀸𑀢𑀸, 𑀅𑀬𑀁 𑀢𑀬𑀸 𑀏𑀓𑀺𑀓𑀸𑀬 𑀏𑀯 𑀘𑀺𑀦𑁆𑀢𑀺𑀢𑁄 𑀪𑀯𑀺𑀲𑁆𑀲𑀢𑀺. 𑀩𑀸𑀮𑁄 𑀅𑀧𑀭𑀺𑀡𑀸𑀬𑀓𑁄𑀢𑀺 𑀅𑀬𑀁 𑀔𑀼𑀚𑁆𑀚𑁄 𑀩𑀸𑀮𑁄, 𑀤𑀼𑀧𑁆𑀧𑀜𑁆𑀜𑀪𑀸𑀯𑁂𑀦 𑀫𑀳𑀮𑁆𑀮𑀓𑁄𑀧𑀺 𑀩𑀸𑀮𑁄𑀯, 𑀅𑀜𑁆𑀜𑀲𑁆𑀫𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀅𑀲𑀢𑀺 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀧𑀭𑀺𑀡𑀸𑀬𑀓𑁄. 𑀦 𑀳𑀺 𑀔𑀼𑀚𑁆𑀚𑁂𑀦 𑀯𑀸𑀫𑁂𑀦, 𑀪𑁄𑀢𑀺 𑀲𑀗𑁆𑀕𑀦𑁆𑀢𑀼𑀫𑀭𑀳𑀲𑀻𑀢𑀺 ¶ 𑀇𑀫𑀺𑀦𑀸 𑀳𑀺 𑀔𑀼𑀚𑁆𑀚𑁂𑀦 𑀯𑀸𑀫𑀦𑀢𑁆𑀢𑀸 𑀯𑀸𑀫𑁂𑀦 𑀪𑁄𑀢𑀺 𑀢𑁆𑀯𑀁 𑀫𑀳𑀸𑀓𑀼𑀮𑁂 𑀚𑀸𑀢𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀲𑀗𑁆𑀕𑀦𑁆𑀢𑀼𑀁 𑀲𑀳 𑀕𑀦𑁆𑀢𑀼𑀁 𑀦𑀸𑀭𑀳𑀲𑀻𑀢𑀺.

𑀅𑀣𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁪.

‘‘𑀧𑀼𑀭𑀺𑀲𑀽𑀲𑀪𑀁 𑀫𑀜𑁆𑀜𑀫𑀸𑀦𑀸, 𑀅𑀳𑀁 𑀔𑀼𑀚𑁆𑀚𑀫𑀓𑀸𑀫𑀬𑀺𑀁;

𑀲𑁄𑀬𑀁 𑀲𑀁𑀓𑀼𑀝𑀺𑀢𑁄 𑀲𑁂𑀢𑀺, 𑀙𑀺𑀦𑁆𑀦𑀢𑀦𑁆𑀢𑀺 𑀬𑀣𑀸 𑀣𑀼𑀡𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁, 𑀅𑀬𑁆𑀬, 𑀏𑀓𑀁 𑀉𑀲𑀪𑀁 𑀤𑀺𑀲𑁆𑀯𑀸 ‘‘𑀕𑀼𑀦𑁆𑀦𑀁 𑀚𑁂𑀝𑁆𑀞𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀓𑀓𑀼𑀥𑀁 𑀳𑁄𑀢𑀺, 𑀇𑀫𑀲𑁆𑀲𑀧𑀺 𑀢𑀁 𑀅𑀢𑁆𑀣𑀺, 𑀇𑀫𑀺𑀦𑀸𑀧𑀺 𑀧𑀼𑀭𑀺𑀲𑀽𑀲𑀪𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀳𑀁 𑀔𑀼𑀚𑁆𑀚𑀁 𑀧𑀼𑀭𑀺𑀲𑀽𑀲𑀪𑀁 𑀫𑀜𑁆𑀜𑀫𑀸𑀦𑀸 𑀅𑀓𑀸𑀫𑀬𑀺𑀁. 𑀲𑁄𑀬𑀁 𑀬𑀣𑀸 𑀦𑀸𑀫 𑀙𑀺𑀦𑁆𑀦𑀢𑀦𑁆𑀢𑀺 𑀲𑀤𑁄𑀡𑀺𑀓𑁄 𑀯𑀻𑀡𑀸𑀤𑀡𑁆𑀟𑀓𑁄, 𑀏𑀯𑀁 𑀲𑀁𑀓𑀼𑀝𑀺𑀢𑁄 𑀲𑁂𑀢𑀻𑀢𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀢𑀲𑁆𑀲𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀦𑁆𑀢𑀪𑀸𑀯𑀫𑁂𑀯 𑀜𑀢𑁆𑀯𑀸 𑀢𑀁 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀕𑁂𑀳𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀬𑀫𑁂𑀯 𑀲𑁂𑀝𑁆𑀞𑀺𑀥𑀻𑀢𑀸 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀻𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀻𑀡𑀸𑀣𑀽𑀡𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁩𑁩] 𑁩. 𑀯𑀺𑀓𑀡𑁆𑀡𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀫𑀁 ¶ 𑀬𑀳𑀺𑀁 𑀇𑀘𑁆𑀙𑀲𑀺 𑀢𑁂𑀦 𑀕𑀘𑁆𑀙𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀥𑀫𑁆𑀫𑀲𑀪𑀁 𑀆𑀦𑀻𑀢𑁄 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀲𑀢𑁆𑀣𑀸𑀭𑀸 𑀧𑀼𑀝𑁆𑀞𑁄 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀸𑀫𑀕𑀼𑀡𑀓𑀸𑀭𑀡𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀸𑀫𑀕𑀼𑀡𑀸 𑀦𑀸𑀫𑁂𑀢𑁂 𑀪𑀺𑀓𑁆𑀔𑀼 𑀯𑀺𑀓𑀡𑁆𑀡𑀓𑀲𑀮𑁆𑀮𑀲𑀤𑀺𑀲𑀸, 𑀲𑀓𑀺𑀁 𑀳𑀤𑀬𑁂 𑀧𑀢𑀺𑀝𑁆𑀞𑀁 𑀮𑀪𑀫𑀸𑀦𑀸 𑀯𑀺𑀓𑀡𑁆𑀡𑀓𑀁 𑀯𑀺𑀬 𑀯𑀺𑀤𑁆𑀥𑀁 𑀲𑀼𑀁𑀲𑀼𑀫𑀸𑀭𑀁 𑀫𑀭𑀡𑀫𑁂𑀯 𑀧𑀸𑀧𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀢𑀻𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀦𑀘𑁆𑀘𑀕𑀻𑀢𑀸𑀲𑀼 𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀸𑀦𑀺 ¶ 𑀧𑀬𑁄𑀚𑁂𑀲𑀼𑀁, 𑀧𑁄𑀓𑁆𑀔𑀭𑀡𑀺𑀬𑀁 𑀫𑀘𑁆𑀙𑀓𑀘𑁆𑀙𑀧𑀸 𑀕𑀻𑀢𑀲𑀤𑁆𑀤𑀮𑁄𑀮𑀢𑀸𑀬 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀜𑁆𑀜𑀸𑀯 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀺. 𑀭𑀸𑀚𑀸 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀁 𑀫𑀘𑁆𑀙𑀖𑀝𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀇𑀫𑁂 𑀫𑀘𑁆𑀙𑀸 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀘𑀭𑀦𑁆𑀢𑀻’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀅𑀫𑀘𑁆𑀘𑀸 ‘‘𑀏𑀢𑁂, 𑀤𑁂𑀯, 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀏𑀢𑁂 𑀓𑀺𑀭 𑀫𑀁 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀢𑁂𑀲𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀤𑁂𑀯𑀲𑀺𑀓𑀁 𑀢𑀡𑁆𑀟𑀼𑀮𑀫𑁆𑀩𑀡𑀁 𑀧𑀸𑀘𑁂𑀲𑀺. 𑀫𑀘𑁆𑀙𑀸 𑀪𑀢𑁆𑀢𑀯𑁂𑀮𑀸𑀬 𑀏𑀓𑀘𑁆𑀘𑁂 𑀆𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀦𑀸𑀕𑀘𑁆𑀙𑀦𑁆𑀢𑀺, 𑀪𑀢𑁆𑀢𑀁 𑀦𑀲𑁆𑀲𑀢𑀺. 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀯𑁂𑀮𑀸𑀬 𑀪𑁂𑀭𑀺𑀁 𑀧𑀳𑀭𑀺𑀢𑁆𑀯𑀸 𑀪𑁂𑀭𑀺𑀲𑀜𑁆𑀜𑀸𑀬 𑀫𑀘𑁆𑀙𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀪𑀢𑁆𑀢𑀁 𑀤𑁂𑀣𑀸’’𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀪𑀢𑁆𑀢𑀓𑀫𑁆𑀫𑀺𑀓𑁄 𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀫𑀘𑁆𑀙𑀸𑀦𑀁 𑀪𑀢𑁆𑀢𑀁 𑀤𑁂𑀢𑀺. 𑀢𑁂𑀧𑀺 𑀪𑁂𑀭𑀺𑀲𑀜𑁆𑀜𑀸𑀬 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺.

𑀢𑁂𑀲𑀼 𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁂𑀲𑀼 𑀏𑀓𑁄 𑀲𑀼𑀁𑀲𑀼𑀫𑀸𑀭𑁄 𑀆𑀕𑀦𑁆𑀢𑁆𑀯𑀸 𑀫𑀘𑁆𑀙𑁂 𑀔𑀸𑀤𑀺. 𑀪𑀢𑁆𑀢𑀓𑀫𑁆𑀫𑀺𑀓𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀲𑀼𑀁𑀲𑀼𑀫𑀸𑀭𑀁 𑀫𑀘𑁆𑀙𑀸𑀦𑀁 𑀔𑀸𑀤𑀦𑀓𑀸𑀮𑁂 𑀯𑀺𑀓𑀡𑁆𑀡𑀓𑁂𑀦 ¶ 𑀯𑀺𑀚𑁆𑀛𑀺𑀢𑁆𑀯𑀸 𑀕𑀡𑁆𑀳𑀸’’𑀢𑀺 𑀆𑀳 ¶ . 𑀲𑁄 ‘‘𑀲𑀸𑀥𑀽’’𑀢𑀺 𑀕𑀦𑁆𑀢𑁆𑀯𑀸 𑀦𑀸𑀯𑀸𑀬 𑀞𑀢𑁆𑀯𑀸 𑀫𑀘𑁆𑀙𑁂 𑀔𑀸𑀤𑀺𑀢𑀼𑀁 𑀆𑀕𑀢𑀁 𑀲𑀼𑀁𑀲𑀼𑀫𑀸𑀭𑀁 𑀯𑀺𑀓𑀡𑁆𑀡𑀓𑁂𑀦 𑀧𑀳𑀭𑀺, 𑀢𑀁 𑀢𑀲𑁆𑀲 𑀅𑀦𑁆𑀢𑁄𑀧𑀺𑀝𑁆𑀞𑀺𑀁 𑀧𑀸𑀯𑀺𑀲𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸𑀯 𑀧𑀮𑀸𑀬𑀺. 𑀪𑀢𑁆𑀢𑀓𑀫𑁆𑀫𑀺𑀓𑁄 𑀢𑀲𑁆𑀲 𑀯𑀺𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁫.

‘‘𑀓𑀸𑀫𑀁 𑀬𑀳𑀺𑀁 𑀇𑀘𑁆𑀙𑀲𑀺 𑀢𑁂𑀦 𑀕𑀘𑁆𑀙, 𑀯𑀺𑀤𑁆𑀥𑁄𑀲𑀺 𑀫𑀫𑁆𑀫𑀫𑁆𑀳𑀺 𑀯𑀺𑀓𑀡𑁆𑀡𑀓𑁂𑀦;

𑀳𑀢𑁄𑀲𑀺 𑀪𑀢𑁆𑀢𑁂𑀦 𑀲𑀼𑀯𑀸𑀤𑀺𑀢𑁂𑀦, 𑀮𑁄𑀮𑁄 𑀘 𑀫𑀘𑁆𑀙𑁂 𑀅𑀦𑀼𑀩𑀦𑁆𑀥𑀫𑀸𑀦𑁄’’𑀢𑀺.

𑀢𑀢𑁆𑀣 𑀓𑀸𑀫𑀦𑁆𑀢𑀺 𑀏𑀓𑀁𑀲𑁂𑀦. 𑀬𑀳𑀺𑀁 𑀇𑀘𑁆𑀙𑀲𑀺 𑀢𑁂𑀦 𑀕𑀘𑁆𑀙𑀸𑀢𑀺 𑀬𑀲𑁆𑀫𑀺𑀁 𑀇𑀘𑁆𑀙𑀲𑀺, 𑀢𑀲𑁆𑀫𑀺𑀁 𑀕𑀘𑁆𑀙. 𑀫𑀫𑁆𑀫𑀫𑁆𑀳𑀻𑀢𑀺 𑀫𑀫𑁆𑀫𑀝𑁆𑀞𑀸𑀦𑁂. 𑀯𑀺𑀓𑀡𑁆𑀡𑀓𑁂𑀦𑀸𑀢𑀺 𑀯𑀺𑀓𑀡𑁆𑀡𑀓𑀲𑀮𑁆𑀮𑁂𑀦. 𑀳𑀢𑁄𑀲𑀺 𑀪𑀢𑁆𑀢𑁂𑀦 𑀲𑀼𑀯𑀸𑀤𑀺𑀢𑁂𑀦, 𑀮𑁄𑀮𑁄 𑀘 𑀫𑀘𑁆𑀙𑁂 𑀅𑀦𑀼𑀩𑀦𑁆𑀥𑀫𑀸𑀦𑁄𑀢𑀺 𑀢𑁆𑀯𑀁 𑀪𑁂𑀭𑀺𑀯𑀸𑀤𑀺𑀢𑀲𑀜𑁆𑀜𑀸𑀬 𑀪𑀢𑁆𑀢𑁂 𑀤𑀻𑀬𑀫𑀸𑀦𑁂 𑀮𑁄𑀮𑁄 𑀳𑀼𑀢𑁆𑀯𑀸 𑀔𑀸𑀤𑀦𑀢𑁆𑀣𑀸𑀬 𑀫𑀘𑁆𑀙𑁂 𑀅𑀦𑀼𑀩𑀦𑁆𑀥𑀫𑀸𑀦𑁄 𑀢𑁂𑀦 𑀲𑀯𑀸𑀤𑀺𑀢𑁂𑀦 𑀪𑀢𑁆𑀢𑁂𑀦 𑀳𑀢𑁄, 𑀕𑀢𑀝𑁆𑀞𑀸𑀦𑁂𑀧𑀺 𑀢𑁂 𑀚𑀻𑀯𑀺𑀢𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁬.

‘‘𑀏𑀯𑀫𑁆𑀧𑀺 𑀮𑁄𑀓𑀸𑀫𑀺𑀲𑀁 𑀑𑀧𑀢𑀦𑁆𑀢𑁄, 𑀯𑀺𑀳𑀜𑁆𑀜𑀢𑀻 𑀘𑀺𑀢𑁆𑀢𑀯𑀲𑀸𑀦𑀼𑀯𑀢𑁆𑀢𑀻;

𑀲𑁄 𑀳𑀜𑁆𑀜𑀢𑀻 𑀜𑀸𑀢𑀺𑀲𑀔𑀸𑀦 𑀫𑀚𑁆𑀛𑁂, 𑀫𑀘𑁆𑀙𑀸𑀦𑀼𑀕𑁄 𑀲𑁄𑀭𑀺𑀯 𑀲𑀼𑀁𑀲𑀼𑀫𑀸𑀭𑁄’’𑀢𑀺.

𑀢𑀢𑁆𑀣 𑀮𑁄𑀓𑀸𑀫𑀺𑀲𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀢𑁂 𑀳𑀺 𑀮𑁄𑀓𑁄 𑀇𑀝𑁆𑀞𑀢𑁄 𑀓𑀦𑁆𑀢𑀢𑁄 𑀫𑀦𑀸𑀧𑀢𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀮𑁄𑀓𑀸𑀫𑀺𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀑𑀧𑀢𑀦𑁆𑀢𑁄𑀢𑀺 𑀢𑀁 𑀮𑁄𑀓𑀸𑀫𑀺𑀲𑀁 𑀅𑀦𑀼𑀧𑀢𑀦𑁆𑀢𑁄 𑀓𑀺𑀮𑁂𑀲𑀯𑀲𑁂𑀦 𑀘𑀺𑀢𑁆𑀢𑀯𑀲𑀸𑀦𑀼𑀯𑀢𑁆𑀢𑀻 𑀧𑀼𑀕𑁆𑀕𑀮𑁄 𑀯𑀺𑀳𑀜𑁆𑀜𑀢𑀺 𑀓𑀺𑀮𑀫𑀢𑀺, 𑀲𑁄 𑀳𑀜𑁆𑀜𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀜𑀸𑀢𑀻𑀦𑀜𑁆𑀘 𑀲𑀔𑀸𑀦𑀜𑁆𑀘 𑀫𑀚𑁆𑀛𑁂 𑀲𑁄 𑀯𑀺𑀓𑀡𑁆𑀡𑀓𑁂𑀦 𑀯𑀺𑀤𑁆𑀥𑁄 𑀫𑀘𑁆𑀙𑀸𑀦𑀼𑀕𑁄 𑀲𑀼𑀁𑀲𑀼𑀫𑀸𑀭𑁄 𑀯𑀺𑀬 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀫𑀦𑀸𑀧𑀸𑀢𑀺 𑀕𑀳𑁂𑀢𑁆𑀯𑀸 𑀳𑀜𑁆𑀜𑀢𑀺 𑀓𑀺𑀮𑀫𑀢𑀺 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺𑀬𑁂𑀯𑀸𑀢𑀺.

𑀏𑀯𑀁 ¶ 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀲𑀼𑀁𑀲𑀼𑀫𑀸𑀭𑁄 𑀤𑁂𑀯𑀤𑀢𑁆𑀢𑁄, 𑀫𑀘𑁆𑀙𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀓𑀡𑁆𑀡𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁩𑁪] 𑁪. 𑀅𑀲𑀺𑀢𑀸𑀪𑀽𑀚𑀸𑀢𑀓𑀯𑀡𑁆𑀡𑀦𑀸

𑀢𑁆𑀯𑀫𑁂𑀯 ¶ 𑀤𑀸𑀦𑀺𑀫𑀓𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀫𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀲𑁆𑀫𑀺𑀁 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀉𑀧𑀝𑁆𑀞𑀸𑀓𑀓𑀼𑀮𑁂 𑀏𑀓𑀸 𑀓𑀼𑀫𑀸𑀭𑀺𑀓𑀸 𑀅𑀪𑀺𑀭𑀽𑀧𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸, 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀲𑀫𑀸𑀦𑀚𑀸𑀢𑀺𑀓𑀁 𑀓𑀼𑀮𑀁 𑀅𑀕𑀫𑀸𑀲𑀺. 𑀲𑀸𑀫𑀺𑀓𑁄 𑀢𑀁 𑀓𑀺𑀲𑁆𑀫𑀺𑀜𑁆𑀘𑀺 𑀅𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀢𑁆𑀣 𑀘𑀺𑀢𑁆𑀢𑀯𑀲𑁂𑀦 𑀘𑀭𑀢𑀺. 𑀲𑀸 𑀢𑀲𑁆𑀲 𑀢𑀁 𑀅𑀢𑁆𑀢𑀦𑀺 𑀅𑀦𑀸𑀤𑀭𑀢𑀁 𑀅𑀕𑀡𑁂𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀕𑁆𑀕𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑀬𑀫𑀸𑀦𑀸 ‘‘𑀲𑀸𑀫𑀺𑀓𑁄𑀧𑀺 𑀫𑀁 𑀦 𑀇𑀘𑁆𑀙𑀢𑀺, 𑀖𑀭𑀸𑀯𑀸𑀲𑁂𑀦 𑀫𑁂 𑀓𑀫𑁆𑀫𑀁 𑀦𑀢𑁆𑀣𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ¶ 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲𑀸 𑀲𑀸 𑀓𑀺𑀭𑀺𑀬𑀸 𑀪𑀺𑀓𑁆𑀔𑀽𑀲𑀼 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑀓𑀼𑀮𑀲𑁆𑀲 𑀥𑀻𑀢𑀸 𑀅𑀢𑁆𑀣𑀕𑀯𑁂𑀲𑀺𑀓𑀸 𑀲𑀸𑀫𑀺𑀓𑀲𑁆𑀲 𑀅𑀦𑀺𑀘𑁆𑀙𑀪𑀸𑀯𑀁 𑀜𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀧𑀼𑀦 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀏𑀯𑀁 𑀅𑀢𑁆𑀣𑀕𑀯𑁂𑀲𑀺𑀓𑀸, 𑀆𑀯𑀼𑀲𑁄 𑀲𑀸 𑀓𑀼𑀫𑀸𑀭𑀺𑀓𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲𑀸 𑀓𑀼𑀮𑀥𑀻𑀢𑀸 𑀅𑀢𑁆𑀣𑀕𑀯𑁂𑀲𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀅𑀢𑁆𑀣𑀕𑀯𑁂𑀲𑀺𑀓𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑀲𑁆𑀲 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀸𑀲𑀗𑁆𑀓𑁄 𑀧𑀼𑀢𑁆𑀢𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 ¶ 𑀅𑀲𑀺𑀢𑀸𑀪𑀼𑀁 𑀦𑀸𑀫 𑀅𑀢𑁆𑀢𑀦𑁄 𑀤𑁂𑀯𑀺𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀘𑁆𑀙𑀫𑀁𑀲𑀨𑀮𑀸𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 𑀧𑀡𑁆𑀡𑀲𑀸𑀮𑀸𑀬 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀁 𑀓𑀺𑀦𑁆𑀦𑀭𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 ‘‘𑀇𑀫𑀁 𑀧𑀚𑀸𑀧𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀺𑀢𑀸𑀪𑀼𑀁 𑀅𑀕𑀡𑁂𑀢𑁆𑀯𑀸 𑀢𑀲𑁆𑀲𑀸 𑀅𑀦𑀼𑀧𑀤𑀁 𑀅𑀕𑀫𑀸𑀲𑀺. 𑀲𑀸 𑀢𑀁 𑀓𑀺𑀦𑁆𑀦𑀭𑀺𑀁 𑀅𑀦𑀼𑀩𑀦𑁆𑀥𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀁 𑀅𑀕𑀡𑁂𑀢𑁆𑀯𑀸 𑀓𑀺𑀦𑁆𑀦𑀭𑀺𑀁 𑀅𑀦𑀼𑀩𑀦𑁆𑀥𑀢𑀺, 𑀓𑀺𑀁 𑀫𑁂 𑀇𑀫𑀺𑀦𑀸’’𑀢𑀺 𑀯𑀺𑀭𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀣𑀸𑀧𑁂𑀢𑁆𑀯𑀸 𑀓𑀲𑀺𑀡𑀁 𑀑𑀮𑁄𑀓𑁂𑀦𑁆𑀢𑀻 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀩𑁆𑀭𑀳𑁆𑀫𑀤𑀢𑁆𑀢𑁄𑀧𑀺 𑀓𑀺𑀦𑁆𑀦𑀭𑀺𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸 𑀢𑀲𑁆𑀲𑀸 𑀕𑀢𑀫𑀕𑁆𑀕𑀫𑁆𑀧𑀺 𑀅𑀤𑀺𑀲𑁆𑀯𑀸 𑀙𑀺𑀦𑁆𑀦𑀸𑀲𑁄 𑀳𑀼𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀪𑀺𑀫𑀼𑀔𑁄𑀯 𑀆𑀕𑀢𑁄. 𑀅𑀲𑀺𑀢𑀸𑀪𑀽 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀫𑀡𑀺𑀯𑀡𑁆𑀡𑁂 𑀕𑀕𑀦𑀢𑀮𑁂 𑀞𑀺𑀢𑀸 ‘‘𑀅𑀬𑁆𑀬𑀧𑀼𑀢𑁆𑀢, 𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀇𑀤𑀁 𑀛𑀸𑀦𑀲𑀼𑀔𑀁 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁭.

‘‘𑀢𑁆𑀯𑀫𑁂𑀯 ¶ 𑀤𑀸𑀦𑀺𑀫𑀓𑀭, 𑀬𑀁 𑀓𑀸𑀫𑁄 𑀩𑁆𑀬𑀕𑀫𑀸 𑀢𑀬𑀺;

𑀲𑁄𑀬𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄, 𑀔𑀭𑀙𑀺𑀦𑁆𑀦𑀁𑀯 𑀭𑁂𑀦𑀼𑀓’’𑀦𑁆𑀢𑀺.

𑀢𑀢𑁆𑀣 ¶ 𑀢𑁆𑀯𑀫𑁂𑀯 𑀤𑀸𑀦𑀺𑀫𑀓𑀭𑀸𑀢𑀺, 𑀅𑀬𑁆𑀬𑀧𑀼𑀢𑁆𑀢, 𑀫𑀁 𑀧𑀳𑀸𑀬 𑀓𑀺𑀦𑁆𑀦𑀭𑀺𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀢𑁆𑀯𑀜𑁆𑀜𑁂𑀯 𑀇𑀤𑀸𑀦𑀺 𑀇𑀤𑀁 𑀅𑀓𑀭. 𑀬𑀁 𑀓𑀸𑀫𑁄 𑀩𑁆𑀬𑀕𑀫𑀸 𑀢𑀬𑀻𑀢𑀺 𑀬𑀁 𑀫𑀫 𑀢𑀬𑀺 𑀓𑀸𑀫𑁄 𑀯𑀺𑀕𑀢𑁄 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑁄, 𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀳𑀁 𑀇𑀫𑀁 𑀯𑀺𑀲𑁂𑀲𑀁 𑀧𑀢𑁆𑀢𑀸𑀢𑀺 𑀤𑀻𑀧𑁂𑀢𑀺. 𑀲𑁄𑀬𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄𑀢𑀺 𑀲𑁄 𑀧𑀦 𑀓𑀸𑀫𑁄 𑀇𑀤𑀸𑀦𑀺 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄 𑀚𑀸𑀢𑁄, 𑀦 𑀲𑀓𑁆𑀓𑀸 𑀧𑀝𑀺𑀲𑀦𑁆𑀥𑀺𑀢𑀼𑀁. 𑀔𑀭𑀙𑀺𑀦𑁆𑀦𑀁𑀯 𑀭𑁂𑀦𑀼𑀓𑀦𑁆𑀢𑀺 𑀔𑀭𑁄 𑀯𑀼𑀘𑁆𑀘𑀢𑀺 𑀓𑀓𑀘𑁄, 𑀭𑁂𑀦𑀼𑀓𑀁 𑀯𑀼𑀘𑁆𑀘𑀢𑀺 𑀳𑀢𑁆𑀣𑀺𑀤𑀦𑁆𑀢𑁄. 𑀬𑀣𑀸 𑀓𑀓𑀘𑁂𑀦 𑀙𑀺𑀦𑁆𑀦𑁄 𑀳𑀢𑁆𑀣𑀺𑀤𑀦𑁆𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄 𑀳𑁄𑀢𑀺, 𑀦 𑀧𑀼𑀦 𑀧𑀼𑀭𑀺𑀫𑀦𑀬𑁂𑀦 𑀅𑀮𑁆𑀮𑀻𑀬𑀢𑀺, 𑀏𑀯𑀁 𑀧𑀼𑀦 𑀫𑀬𑁆𑀳𑀁 𑀢𑀬𑀸 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑁆𑀲 𑀖𑀝𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺.

𑀲𑁄 𑀢𑀲𑁆𑀲𑀸 𑀕𑀢𑀓𑀸𑀮𑁂 𑀧𑀭𑀺𑀤𑁂𑀯𑀫𑀸𑀦𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁮.

‘‘𑀅𑀢𑁆𑀭𑀺𑀘𑁆𑀙𑀁 𑀅𑀢𑀺𑀮𑁄𑀪𑁂𑀦 ¶ , 𑀅𑀢𑀺𑀮𑁄𑀪𑀫𑀤𑁂𑀦 𑀘;

𑀏𑀯𑀁 𑀳𑀸𑀬𑀢𑀺 𑀅𑀢𑁆𑀣𑀫𑁆𑀳𑀸, 𑀅𑀳𑀁𑀯 𑀅𑀲𑀺𑀢𑀸𑀪𑀼𑀬𑀸’’𑀢𑀺.

𑀢𑀢𑁆𑀣 𑀅𑀢𑁆𑀭𑀺𑀘𑁆𑀙𑀁 𑀅𑀢𑀺𑀮𑁄𑀪𑁂𑀦𑀸𑀢𑀺 𑀅𑀢𑁆𑀭𑀺𑀘𑁆𑀙𑀸 𑀯𑀼𑀘𑁆𑀘𑀢𑀺 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀸𑀲𑀗𑁆𑀔𑀸𑀢𑀸 𑀅𑀧𑀭𑀺𑀬𑀦𑁆𑀢𑀢𑀡𑁆𑀳𑀸, 𑀅𑀢𑀺𑀮𑁄𑀪𑁄 𑀯𑀼𑀘𑁆𑀘𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀮𑁄𑀪𑁄. 𑀅𑀢𑀺𑀮𑁄𑀪𑀫𑀤𑁂𑀦 𑀘𑀸𑀢𑀺 𑀧𑀼𑀭𑀺𑀲𑀫𑀤𑀁 𑀉𑀧𑁆𑀧𑀸𑀤𑀦𑀢𑁄 𑀅𑀢𑀺𑀮𑁄𑀪𑀫𑀤𑁄 𑀦𑀸𑀫 𑀚𑀸𑀬𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑁆𑀭𑀺𑀘𑁆𑀙𑀸𑀯𑀲𑁂𑀦 𑀅𑀢𑁆𑀭𑀺𑀘𑁆𑀙𑀫𑀸𑀦𑁄 𑀧𑀼𑀕𑁆𑀕𑀮𑁄 𑀅𑀢𑀺𑀮𑁄𑀪𑁂𑀦 𑀘 𑀅𑀢𑀺𑀮𑁄𑀪𑀫𑀤𑁂𑀦 𑀘 𑀬𑀣𑀸 𑀅𑀳𑀁 𑀅𑀲𑀺𑀢𑀸𑀪𑀼𑀬𑀸 𑀭𑀸𑀚𑀥𑀻𑀢𑀸𑀬 𑀧𑀭𑀺𑀳𑀻𑀦𑁄, 𑀏𑀯𑀁 𑀅𑀢𑁆𑀣𑀸 𑀳𑀸𑀬𑀢𑀻𑀢𑀺.

𑀇𑀢𑀺 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀧𑀭𑀺𑀤𑁂𑀯𑀺𑀢𑁆𑀯𑀸 𑀅𑀭𑀜𑁆𑀜𑁂 𑀏𑀓𑀓𑁄𑀯 𑀯𑀲𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀧𑀼𑀢𑁆𑀢𑁄 𑀘 𑀭𑀸𑀚𑀥𑀻𑀢𑀸 𑀘 𑀇𑀫𑁂 𑀤𑁆𑀯𑁂 𑀚𑀦𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑀺𑀢𑀸𑀪𑀽𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁩𑁫] 𑁫. 𑀯𑀘𑁆𑀙𑀦𑀔𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀔𑀸 ¶ ¶ 𑀖𑀭𑀸 𑀯𑀘𑁆𑀙𑀦𑀔𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑁄𑀚𑀫𑀮𑁆𑀮𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑀸𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀕𑀺𑀳𑀺𑀲𑀳𑀸𑀬𑁄. 𑀲𑁄 𑀏𑀓𑀤𑀺𑀯𑀲𑀁 𑀆𑀕𑀫𑀦𑀢𑁆𑀣𑀸𑀬 𑀣𑁂𑀭𑀲𑁆𑀲 𑀲𑀸𑀲𑀦𑀁 𑀧𑀸𑀳𑁂𑀲𑀺, 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀲𑁄 𑀣𑁂𑀭𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀣𑁂𑀭𑀁 𑀕𑀺𑀳𑀺𑀪𑁄𑀕𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀦𑀺𑀫𑀦𑁆𑀢𑁂𑀦𑁆𑀢𑁄 ‘‘𑀪𑀦𑁆𑀢𑁂 𑀆𑀦𑀦𑁆𑀤, 𑀫𑀫 𑀕𑁂𑀳𑁂 𑀧𑀳𑀽𑀢𑀁 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀭𑀢𑀦𑀁, 𑀇𑀤𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀢𑀼𑀬𑁆𑀳𑀁 𑀤𑀫𑁆𑀫𑀺, 𑀏𑀳𑀺 𑀉𑀪𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀸𑀫𑀸’’𑀢𑀺. 𑀣𑁂𑀭𑁄 𑀢𑀲𑁆𑀲 𑀓𑀸𑀫𑀕𑀼𑀡𑁂𑀲𑀼 𑀆𑀤𑀻𑀦𑀯𑀁 𑀓𑀣𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀢𑁂, 𑀆𑀦𑀦𑁆𑀤, 𑀭𑁄𑀚𑁄’’𑀢𑀺 𑀲𑀢𑁆𑀣𑀸𑀭𑀸 𑀧𑀼𑀘𑁆𑀙𑀺𑀢𑁄 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀓𑀺𑀫𑀲𑁆𑀲 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀫𑀁 𑀭𑁄𑀚𑁄 𑀖𑀭𑀸𑀯𑀸𑀲𑁂𑀦 𑀦𑀺𑀫𑀦𑁆𑀢𑁂𑀲𑀺, 𑀅𑀣𑀲𑁆𑀲𑀸𑀳𑀁 𑀖𑀭𑀸𑀯𑀸𑀲𑁂 𑀘𑁂𑀯 𑀓𑀸𑀫𑀕𑀼𑀡𑁂𑀲𑀼 𑀘 𑀆𑀤𑀻𑀦𑀯𑀁 𑀓𑀣𑁂𑀲𑀺’’𑀦𑁆𑀢𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀆𑀦𑀦𑁆𑀤, 𑀭𑁄𑀚𑁄 𑀫𑀮𑁆𑀮𑁄 𑀇𑀤𑀸𑀦𑁂𑀯 𑀧𑀩𑁆𑀩𑀚𑀺𑀢𑁂 𑀖𑀭𑀸𑀯𑀸𑀲𑁂𑀦 𑀦𑀺𑀫𑀦𑁆𑀢𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀦𑀺𑀫𑀦𑁆𑀢𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑀫𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀁 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀆𑀘𑀸𑀭𑀯𑀺𑀳𑀸𑀭𑁂 𑀧𑀲𑀻𑀤𑀺𑀢𑁆𑀯𑀸 𑀕𑁂𑀳𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀉𑀬𑁆𑀬𑀸𑀦𑁂 𑀯𑀲𑀸𑀧𑁂𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑀸 𑀅𑀳𑁂𑀲𑀼𑀁.

𑀅𑀣𑁂𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀩𑁄𑀥𑀺𑀲𑀢𑁆𑀢𑁂 𑀧𑁂𑀫𑀯𑀺𑀲𑁆𑀲𑀸𑀲𑀯𑀲𑁂𑀦 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀩𑁆𑀩𑀚𑁆𑀚𑀸 𑀦𑀸𑀫 𑀤𑀼𑀓𑁆𑀔𑀸, 𑀫𑀫 𑀲𑀳𑀸𑀬𑀁 𑀯𑀘𑁆𑀙𑀦𑀔𑀧𑀭𑀺𑀩𑁆𑀩𑀸𑀚𑀓𑀁 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀩𑁆𑀩𑀁 𑀯𑀺𑀪𑀯𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀤𑀢𑁆𑀯𑀸 𑀤𑁆𑀯𑁂𑀧𑀺 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀪𑀦𑁆𑀢𑁂 𑀯𑀘𑁆𑀙𑀦𑀔, 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀤𑀼𑀓𑁆𑀔𑀸, 𑀲𑀼𑀔𑁄 𑀖𑀭𑀸𑀯𑀸𑀲𑁄, 𑀏𑀳𑀺 𑀉𑀪𑁄 𑀲𑀫𑀕𑁆𑀕𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀯𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁯.

‘‘𑀲𑀼𑀔𑀸 ¶ 𑀖𑀭𑀸 𑀯𑀘𑁆𑀙𑀦𑀔, 𑀲𑀳𑀺𑀭𑀜𑁆𑀜𑀸 𑀲𑀪𑁄𑀚𑀦𑀸;

𑀬𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀲𑀬𑁂𑀬𑁆𑀬𑀸𑀣 𑀅𑀦𑀼𑀲𑁆𑀲𑀼𑀓𑁄’’𑀢𑀺.

𑀢𑀢𑁆𑀣 ¶ 𑀲𑀳𑀺𑀭𑀜𑁆𑀜𑀸𑀢𑀺 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸. 𑀲𑀪𑁄𑀚𑀦𑀸𑀢𑀺 𑀩𑀳𑀼𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸. 𑀬𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘𑀸𑀢𑀺 𑀬𑁂𑀲𑀼 𑀲𑀳𑀺𑀭𑀜𑁆𑀜𑀪𑁄𑀚𑀦𑁂𑀲𑀼 𑀖𑀭𑁂𑀲𑀼 𑀦𑀸𑀦𑀕𑁆𑀕𑀭𑀲𑀸𑀦𑀺 𑀪𑁄𑀚𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀦𑀸𑀦𑀸𑀧𑀸𑀦𑀸𑀦𑀺 𑀘 𑀧𑀺𑀯𑀺𑀢𑁆𑀯𑀸. 𑀲𑀬𑁂𑀬𑁆𑀬𑀸𑀣 𑀅𑀦𑀼𑀲𑁆𑀲𑀼𑀓𑁄𑀢𑀺 𑀬𑁂𑀲𑀼 𑀅𑀮𑀗𑁆𑀓𑀢𑀲𑀺𑀭𑀺𑀲𑀬𑀦𑀧𑀺𑀝𑁆𑀞𑁂 𑀅𑀦𑀼𑀲𑁆𑀲𑀼𑀓𑁄 𑀳𑀼𑀢𑁆𑀯𑀸 𑀲𑀬𑁂𑀬𑁆𑀬𑀸𑀲𑀺, 𑀢𑁂 𑀖𑀭𑀸 𑀦𑀸𑀫 𑀅𑀢𑀺𑀯𑀺𑀬 𑀲𑀼𑀔𑀸𑀢𑀺.

𑀅𑀣𑀲𑁆𑀲 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀲𑁂𑀝𑁆𑀞𑀺, 𑀢𑁆𑀯𑀁 𑀅𑀜𑁆𑀜𑀸𑀡𑀢𑀸𑀬 𑀓𑀸𑀫𑀕𑀺𑀤𑁆𑀥𑁄 𑀳𑀼𑀢𑁆𑀯𑀸 𑀖𑀭𑀸𑀯𑀸𑀲𑀲𑁆𑀲 𑀕𑀼𑀡𑀁, 𑀧𑀩𑁆𑀩𑀚𑁆𑀚𑀸𑀬 𑀘 𑀅𑀕𑀼𑀡𑀁 𑀓𑀣𑁂𑀲𑀺, 𑀖𑀭𑀸𑀯𑀸𑀲𑀲𑁆𑀲 𑀢𑁂 𑀅𑀕𑀼𑀡𑀁 𑀓𑀣𑁂𑀲𑁆𑀲𑀸𑀫𑀺, 𑀲𑀼𑀡𑀸𑀳𑀺 𑀤𑀸𑀦𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁦.

‘‘𑀖𑀭𑀸 ¶ 𑀦𑀸𑀦𑀻𑀳𑀫𑀸𑀦𑀲𑁆𑀲, 𑀖𑀭𑀸 𑀦𑀸𑀪𑀡𑀢𑁄 𑀫𑀼𑀲𑀸;

𑀖𑀭𑀸 𑀦𑀸𑀤𑀺𑀦𑁆𑀦𑀤𑀡𑁆𑀟𑀲𑁆𑀲, 𑀧𑀭𑁂𑀲𑀁 𑀅𑀦𑀺𑀓𑀼𑀩𑁆𑀩𑀢𑁄;

𑀏𑀯𑀁 𑀙𑀺𑀤𑁆𑀤𑀁 𑀤𑀼𑀭𑀪𑀺𑀲𑀫𑁆𑀪𑀯𑀁, 𑀓𑁄 𑀖𑀭𑀁 𑀧𑀝𑀺𑀧𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀖𑀭𑀸 𑀦𑀸𑀦𑀻𑀳𑀫𑀸𑀦𑀲𑁆𑀲𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀭𑀡𑁂𑀦 𑀅𑀦𑀻𑀳𑀫𑀸𑀦𑀲𑁆𑀲 𑀅𑀯𑀸𑀬𑀫𑀦𑁆𑀢𑀲𑁆𑀲 𑀖𑀭𑀸 𑀦𑀸𑀫 𑀦𑀢𑁆𑀣𑀺, 𑀖𑀭𑀸𑀯𑀸𑀲𑁄 𑀦 𑀧𑀢𑀺𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀖𑀭𑀸 𑀦𑀸𑀪𑀡𑀢𑁄 𑀫𑀼𑀲𑀸𑀢𑀺 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀫𑀼𑀲𑀸𑀪𑀡𑀢𑁄𑀧𑀺 𑀖𑀭𑀸 𑀦𑀸𑀫 𑀦𑀢𑁆𑀣𑀺. 𑀖𑀭𑀸 𑀦𑀸𑀤𑀺𑀦𑁆𑀦𑀤𑀡𑁆𑀟𑀲𑁆𑀲, 𑀧𑀭𑁂𑀲𑀁 𑀅𑀦𑀺𑀓𑀼𑀩𑁆𑀩𑀢𑁄𑀢𑀺 𑀦𑀸𑀤𑀺𑀦𑁆𑀦𑀤𑀡𑁆𑀟𑀲𑁆𑀲𑀸𑀢𑀺 𑀅𑀕𑁆𑀕𑀳𑀺𑀢𑀤𑀡𑁆𑀟𑀲𑁆𑀲, 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑀲𑁆𑀲 𑀧𑀭𑁂𑀲𑀁 𑀅𑀦𑀺𑀓𑀼𑀩𑁆𑀩𑀢𑁄 𑀖𑀭𑀸 𑀦𑀸𑀫 𑀦𑀢𑁆𑀣𑀺. 𑀬𑁄 𑀧𑀦 𑀆𑀤𑀺𑀦𑁆𑀦𑀤𑀡𑁆𑀟𑁄 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀤𑀸𑀲𑀓𑀫𑁆𑀫𑀓𑀭𑀸𑀤𑀻𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀧𑀭𑀸𑀥𑁂 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀯𑀥𑀩𑀦𑁆𑀥𑀦𑀙𑁂𑀤𑀦𑀢𑀸𑀴𑀦𑀸𑀤𑀺𑀯𑀲𑁂𑀦 𑀓𑀭𑁄𑀢𑀺, 𑀢𑀲𑁆𑀲𑁂𑀯 𑀖𑀭𑀸𑀯𑀸𑀲𑁄 𑀲𑀡𑁆𑀞𑀳𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀙𑀺𑀤𑁆𑀤𑀁 𑀤𑀼𑀭𑀪𑀺𑀲𑀫𑁆𑀪𑀯𑀁, 𑀓𑁄 𑀖𑀭𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀁 𑀤𑀸𑀦𑀺 𑀏𑀯𑀁 𑀏𑀢𑁂𑀲𑀁 𑀈𑀳𑀦𑀸𑀤𑀻𑀦𑀁 𑀅𑀓𑀭𑀡𑁂 𑀲𑀢𑀺 𑀢𑀸𑀬 𑀢𑀸𑀬 𑀧𑀭𑀺𑀳𑀸𑀦𑀺𑀬𑀸 𑀙𑀺𑀤𑁆𑀤𑀁 𑀓𑀭𑀡𑁂𑀧𑀺 𑀲𑀢𑀺 𑀦𑀺𑀘𑁆𑀘𑀫𑁂𑀯 𑀓𑀸𑀢𑀩𑁆𑀩𑀢𑁄 𑀤𑀼𑀭𑀪𑀺𑀲𑀫𑁆𑀪𑀯𑀁 𑀤𑀼𑀭𑀸𑀭𑀸𑀥𑀦𑀻𑀬𑀁, 𑀦𑀺𑀘𑁆𑀘𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀫𑁂𑀯 𑀤𑀼𑀧𑁆𑀧𑀽𑀭𑀁 𑀖𑀭𑀸𑀯𑀸𑀲𑀁 ‘‘𑀅𑀳𑀁 𑀦𑀺𑀧𑁆𑀧𑀭𑀺𑀢𑀲𑁆𑀲𑁄 𑀳𑀼𑀢𑁆𑀯𑀸 𑀅𑀚𑁆𑀛𑀸𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀓𑁄 𑀧𑀝𑀺𑀧𑀚𑁆𑀚𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀖𑀭𑀸𑀯𑀸𑀲𑀲𑁆𑀲 𑀤𑁄𑀲𑀁 𑀓𑀣𑁂𑀢𑁆𑀯𑀸 𑀉𑀬𑁆𑀬𑀸𑀦𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀭𑁄𑀚𑁄 𑀫𑀮𑁆𑀮𑁄 𑀅𑀳𑁄𑀲𑀺, 𑀯𑀘𑁆𑀙𑀦𑀔𑀧𑀭𑀺𑀩𑁆𑀩𑀸𑀚𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀘𑁆𑀙𑀦𑀔𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁩𑁬] 𑁬. 𑀩𑀓𑀚𑀸𑀢𑀓𑀯𑀡𑁆𑀡𑀦𑀸

𑀪𑀤𑁆𑀤𑀓𑁄 ¶ 𑀯𑀢𑀬𑀁 𑀧𑀓𑁆𑀔𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀤𑀺𑀲𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀫𑀘𑁆𑀙𑁄 𑀳𑀼𑀢𑁆𑀯𑀸 𑀫𑀳𑀸𑀧𑀭𑀺𑀯𑀸𑀭𑁄 𑀯𑀲𑀺. 𑀅𑀣𑁂𑀓𑁄 𑀩𑀓𑁄 ‘‘𑀫𑀘𑁆𑀙𑁂 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀭𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀲𑀻𑀲𑀁 𑀧𑀸𑀢𑁂𑀢𑁆𑀯𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀫𑀦𑁆𑀤𑀫𑀦𑁆𑀤𑁄 𑀫𑀘𑁆𑀙𑁂 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺 𑀢𑁂𑀲𑀁 𑀧𑀫𑀸𑀤𑀁 𑀆𑀕𑀫𑀬𑀫𑀸𑀦𑁄. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀫𑀘𑁆𑀙𑀕𑀡𑀧𑀭𑀺𑀯𑀼𑀢𑁄 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀫𑀘𑁆𑀙𑀕𑀡𑁄 𑀢𑀁 𑀩𑀓𑀁 𑀧𑀲𑁆𑀲𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁧.

‘‘𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀓𑀼𑀫𑀼𑀤𑀲𑀦𑁆𑀦𑀺𑀪𑁄;

𑀯𑀽𑀧𑀲𑀦𑁆𑀢𑁂𑀳𑀺 𑀧𑀓𑁆𑀔𑁂𑀳𑀺, 𑀫𑀦𑁆𑀤𑀫𑀦𑁆𑀤𑁄𑀯 𑀛𑀸𑀬𑀢𑀻’’𑀢𑀺.

𑀢𑀢𑁆𑀣 𑀫𑀦𑁆𑀤𑀫𑀦𑁆𑀤𑁄𑀯 𑀛𑀸𑀬𑀢𑀻𑀢𑀺 𑀅𑀩𑀮𑀩𑀮𑁄 𑀯𑀺𑀬 𑀳𑀼𑀢𑁆𑀯𑀸 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀏𑀓𑀓𑁄𑀯 𑀛𑀸𑀬𑀢𑀻𑀢𑀺.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀑𑀮𑁄𑀓𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁨.

‘‘𑀦𑀸𑀲𑁆𑀲 𑀲𑀻𑀮𑀁 𑀯𑀺𑀚𑀸𑀦𑀸𑀣, 𑀅𑀦𑀜𑁆𑀜𑀸𑀬 𑀧𑀲𑀁𑀲𑀣;

𑀅𑀫𑁆𑀳𑁂 𑀤𑀺𑀚𑁄 𑀦 𑀧𑀸𑀮𑁂𑀢𑀺, 𑀢𑁂𑀦 𑀧𑀓𑁆𑀔𑀻 𑀦 𑀨𑀦𑁆𑀤𑀢𑀻’’𑀢𑀺.

𑀢𑀢𑁆𑀣 𑀅𑀦𑀜𑁆𑀜𑀸𑀬𑀸𑀢𑀺 𑀅𑀚𑀸𑀦𑀺𑀢𑁆𑀯𑀸. 𑀅𑀫𑁆𑀳𑁂 𑀤𑀺𑀚𑁄 𑀦 𑀧𑀸𑀮𑁂𑀢𑀻𑀢𑀺 𑀏𑀲 𑀤𑀺𑀚𑁄 𑀅𑀫𑁆𑀳𑁂 𑀦 𑀭𑀓𑁆𑀔𑀢𑀺 𑀦 𑀕𑁄𑀧𑀸𑀬𑀢𑀺, ‘‘𑀓𑀢𑀭𑀁 𑀦𑀼 𑀔𑁄 𑀏𑀢𑁂𑀲𑀼 𑀓𑀩𑀴𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀥𑀸𑀭𑁂𑀢𑀺. 𑀢𑁂𑀦 𑀧𑀓𑁆𑀔𑀻 𑀦 𑀨𑀦𑁆𑀤𑀢𑀻𑀢𑀺 𑀢𑁂𑀦𑀸𑀬𑀁 𑀲𑀓𑀼𑀡𑁄 𑀦 𑀨𑀦𑁆𑀤𑀢𑀺 ¶ 𑀦 𑀘𑀮𑀢𑀻𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀫𑀘𑁆𑀙𑀕𑀡𑁄 𑀉𑀤𑀓𑀁 𑀔𑁄𑀪𑁂𑀢𑁆𑀯𑀸 𑀩𑀓𑀁 𑀧𑀮𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀓𑁄 𑀓𑀼𑀳𑀓𑁄 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀫𑀘𑁆𑀙𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁩𑁭] 𑁭. 𑀲𑀸𑀓𑁂𑀢𑀚𑀸𑀢𑀓𑀯𑀡𑁆𑀡𑀦𑀸

𑀓𑁄 ¶ 𑀦𑀼 𑀔𑁄 𑀪𑀕𑀯𑀸 𑀳𑁂𑀢𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀓𑁂𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀲𑀸𑀓𑁂𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦𑁂𑀢𑁆𑀣 𑀅𑀢𑀻𑀢𑀫𑁆𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀳𑁂𑀝𑁆𑀞𑀸 𑀏𑀓𑀓𑀦𑀺𑀧𑀸𑀢𑁂 (𑀚𑀸. 𑀅𑀝𑁆𑀞. 𑁧.𑁧.𑀲𑀸𑀓𑁂𑀢𑀚𑀸𑀢𑀓𑀯𑀡𑁆𑀡𑀦𑀸) 𑀓𑀣𑀺𑀢𑀫𑁂𑀯. 𑀢𑀣𑀸𑀕𑀢𑀲𑁆𑀲 ¶ 𑀧𑀦 𑀯𑀺𑀳𑀸𑀭𑀁 𑀕𑀢𑀓𑀸𑀮𑁂 𑀪𑀺𑀓𑁆𑀔𑀽 ‘‘𑀲𑀺𑀦𑁂𑀳𑁄 𑀦𑀸𑀫𑁂𑀲, 𑀪𑀦𑁆𑀢𑁂, 𑀓𑀣𑀁 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁭𑁩.

‘‘𑀓𑁄 𑀦𑀼 𑀔𑁄 𑀪𑀕𑀯𑀸 𑀳𑁂𑀢𑀼, 𑀏𑀓𑀘𑁆𑀘𑁂 𑀇𑀥 𑀧𑀼𑀕𑁆𑀕𑀮𑁂;

𑀅𑀢𑀻𑀯 𑀳𑀤𑀬𑀁 𑀦𑀺𑀩𑁆𑀩𑀸𑀢𑀺, 𑀘𑀺𑀢𑁆𑀢𑀜𑁆𑀘𑀸𑀧𑀺 𑀧𑀲𑀻𑀤𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑁄 𑀦𑀼 𑀔𑁄 𑀳𑁂𑀢𑀼, 𑀬𑁂𑀦 𑀇𑀥𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑁂 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀳𑀤𑀬𑀁 𑀅𑀢𑀺𑀯𑀺𑀬 𑀦𑀺𑀩𑁆𑀩𑀸𑀢𑀺, 𑀲𑀼𑀯𑀸𑀲𑀺𑀢𑀲𑁆𑀲 𑀲𑀻𑀢𑀲𑁆𑀲 𑀉𑀤𑀓𑀲𑁆𑀲 𑀖𑀝𑀲𑀳𑀲𑁆𑀲𑁂𑀦 𑀧𑀭𑀺𑀲𑀺𑀢𑁆𑀢𑀁 𑀯𑀺𑀬 𑀲𑀻𑀢𑀮𑀁 𑀳𑁄𑀢𑀺, 𑀏𑀓𑀘𑁆𑀘𑁂 𑀦 𑀦𑀺𑀩𑁆𑀩𑀸𑀢𑀺. 𑀏𑀓𑀘𑁆𑀘𑁂 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀫𑀼𑀤𑀼 𑀳𑁄𑀢𑀺, 𑀧𑁂𑀫𑀯𑀲𑁂𑀦 𑀅𑀮𑁆𑀮𑀻𑀬𑀢𑀺, 𑀏𑀓𑀘𑁆𑀘𑁂 𑀦 𑀅𑀮𑁆𑀮𑀻𑀬𑀢𑀻𑀢𑀺.

𑀅𑀣 𑀦𑁂𑀲𑀁 𑀲𑀢𑁆𑀣𑀸 𑀧𑁂𑀫𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁪.

‘‘𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀧𑁂𑀫𑀁 𑀦𑀸𑀫𑁂𑀢𑀁 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀚𑀸𑀬𑀢𑀺, 𑀧𑀼𑀭𑀺𑀫𑀪𑀯𑁂 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀢𑀺 𑀯𑀸 𑀪𑀭𑀺𑀬𑀸 𑀯𑀸 𑀲𑀳𑀸𑀬𑁄 𑀯𑀸 𑀫𑀺𑀢𑁆𑀢𑁄 𑀯𑀸 𑀳𑀼𑀢𑁆𑀯𑀸 𑀬𑁄 𑀬𑁂𑀦 𑀲𑀤𑁆𑀥𑀺𑀁 ¶ 𑀏𑀓𑀝𑁆𑀞𑀸𑀦𑁂 𑀯𑀼𑀢𑁆𑀣𑀧𑀼𑀩𑁆𑀩𑁄, 𑀢𑀲𑁆𑀲 𑀇𑀫𑀺𑀦𑀸 𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦 𑀪𑀯𑀦𑁆𑀢𑀭𑁂𑀧𑀺 𑀅𑀦𑀼𑀩𑀦𑁆𑀥𑀦𑁆𑀢𑁄 𑀲𑁄 𑀲𑀺𑀦𑁂𑀳𑁄 𑀦 𑀯𑀺𑀚𑀳𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸 𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀫𑀁 𑀦𑀸𑀫 𑀚𑀸𑀬𑀢𑀺. 𑀬𑀣𑀸 𑀓𑀺𑀁? 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂𑀢𑀺. 𑀯𑀸-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑀁. 𑀲𑀫𑀼𑀘𑁆𑀘𑀬𑀢𑁆𑀣𑁂 𑀘𑁂𑀲 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀉𑀧𑁆𑀧𑀮𑀜𑁆𑀘 𑀲𑁂𑀲𑀁 𑀚𑀮𑀚𑀧𑀼𑀧𑁆𑀨𑀜𑁆𑀘 𑀬𑀣𑀸 𑀉𑀤𑀓𑁂 𑀚𑀸𑀬𑀫𑀸𑀦𑀁 𑀤𑁆𑀯𑁂 𑀓𑀸𑀭𑀡𑀸𑀦𑀺 𑀦𑀺𑀲𑁆𑀲𑀸𑀬 𑀚𑀸𑀬𑀢𑀺 𑀉𑀤𑀓𑀜𑁆𑀘𑁂𑀯 𑀓𑀮𑀮𑀜𑁆𑀘, 𑀢𑀣𑀸 𑀏𑀢𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀫𑀁 𑀚𑀸𑀬𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑀻 𑀘 𑀇𑀫𑁂 𑀤𑁆𑀯𑁂 𑀚𑀦𑀸 𑀅𑀳𑁂𑀲𑀼𑀁, 𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀓𑁂𑀢𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁩𑁮] 𑁮. 𑀏𑀓𑀧𑀤𑀚𑀸𑀢𑀓𑀯𑀡𑁆𑀡𑀦𑀸

𑀇𑀗𑁆𑀖 ¶ 𑀏𑀓𑀧𑀤𑀁, 𑀢𑀸𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀺𑀭𑁂𑀲 𑀓𑀼𑀝𑀼𑀫𑁆𑀩𑀺𑀓𑁄, 𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀧𑀼𑀢𑁆𑀢𑁄 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀁 𑀦𑀸𑀫 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑁄 ‘‘𑀩𑀼𑀤𑁆𑀥𑀯𑀺𑀲𑀬𑁄 𑀏𑀲 𑀧𑀜𑁆𑀳𑁄, 𑀦 𑀢𑀁 𑀅𑀜𑁆𑀜𑁄 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀬𑀁 𑀫𑁂 𑀤𑀸𑀭𑀓𑁄 𑀊𑀭𑀼𑀫𑁆𑀳𑀺 𑀦𑀺𑀲𑀺𑀦𑁆𑀦𑁄 𑀅𑀢𑁆𑀣𑀲𑁆𑀲 𑀤𑁆𑀯𑀸𑀭𑀁 𑀦𑀸𑀫 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀅𑀳𑀁 𑀢𑀁 𑀅𑀚𑀸𑀦𑀦𑁆𑀢𑁄 𑀇𑀥𑀸𑀕𑀢𑁄, 𑀓𑀣𑁂𑀣, 𑀪𑀦𑁆𑀢𑁂, 𑀇𑀫𑀁 𑀧𑀜𑁆𑀳’’𑀦𑁆𑀢𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀉𑀧𑀸𑀲𑀓, 𑀅𑀬𑀁 𑀤𑀸𑀭𑀓𑁄 𑀇𑀤𑀸𑀦𑁂𑀯 𑀅𑀢𑁆𑀣𑀕𑀯𑁂𑀲𑀓𑁄, 𑀧𑀼𑀩𑁆𑀩𑁂𑀧𑀺 𑀅𑀢𑁆𑀣𑀕𑀯𑁂𑀲𑀓𑁄𑀯 𑀳𑀼𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀡𑁆𑀟𑀺𑀢𑁂 𑀧𑀼𑀘𑁆𑀙𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺𑀲𑁆𑀲 𑀓𑀣𑁂𑀲𑀼𑀁, 𑀪𑀯𑀲𑀗𑁆𑀔𑁂𑀧𑀕𑀢𑀢𑁆𑀢𑀸 𑀧𑀦 𑀦 𑀲𑀮𑁆𑀮𑀓𑁆𑀔𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀤𑀳𑀭𑁄 𑀓𑀼𑀫𑀸𑀭𑁄 𑀊𑀭𑀼𑀫𑁆𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀸𑀢, 𑀫𑀬𑁆𑀳𑀁 𑀏𑀓𑀧𑀤𑀁 𑀅𑀦𑁂𑀓𑀢𑁆𑀣𑀦𑀺𑀲𑁆𑀲𑀺𑀢𑀁 𑀏𑀓𑀁 𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁫.

‘‘𑀇𑀗𑁆𑀖 ¶ 𑀏𑀓𑀧𑀤𑀁 𑀢𑀸𑀢, 𑀅𑀦𑁂𑀓𑀢𑁆𑀣𑀧𑀤𑀲𑁆𑀲𑀺𑀢𑀁;

𑀓𑀺𑀜𑁆𑀘𑀺 𑀲𑀗𑁆𑀕𑀸𑀳𑀺𑀓𑀁 𑀩𑁆𑀭𑀽𑀲𑀺, 𑀬𑁂𑀦𑀢𑁆𑀣𑁂 𑀲𑀸𑀥𑀬𑁂𑀫𑀲𑁂’’𑀢𑀺.

𑀢𑀢𑁆𑀣 𑀇𑀗𑁆𑀖𑀸𑀢𑀺 𑀬𑀸𑀘𑀦𑀢𑁆𑀣𑁂 𑀘𑁄𑀤𑀦𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀏𑀓𑀧𑀤𑀦𑁆𑀢𑀺 𑀏𑀓𑀁 𑀓𑀸𑀭𑀡𑀧𑀤𑀁, 𑀏𑀓𑀁 𑀓𑀸𑀭𑀡𑀽𑀧𑀲𑀜𑁆𑀳𑀺𑀢𑀁 𑀯𑀸 𑀩𑁆𑀬𑀜𑁆𑀚𑀦𑀧𑀤𑀁. 𑀅𑀦𑁂𑀓𑀢𑁆𑀣𑀧𑀤𑀲𑁆𑀲𑀺𑀢𑀦𑁆𑀢𑀺 𑀅𑀦𑁂𑀓𑀸𑀦𑀺 𑀅𑀢𑁆𑀣𑀧𑀤𑀸𑀦𑀺 𑀓𑀸𑀭𑀡𑀧𑀤𑀸𑀦𑀺 𑀦𑀺𑀲𑁆𑀲𑀺𑀢𑀁. 𑀓𑀺𑀜𑁆𑀘𑀺 𑀲𑀗𑁆𑀕𑀸𑀳𑀺𑀓𑀁 𑀩𑁆𑀭𑀽𑀲𑀻𑀢𑀺 𑀓𑀺𑀜𑁆𑀘𑀺 𑀏𑀓𑀧𑀤𑀁 𑀩𑀳𑀽𑀦𑀁 𑀧𑀤𑀸𑀦𑀁 𑀲𑀗𑁆𑀕𑀸𑀳𑀺𑀓𑀁 𑀩𑁆𑀭𑀽𑀳𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑁂𑀦𑀢𑁆𑀣𑁂 𑀲𑀸𑀥𑀬𑁂𑀫𑀲𑁂𑀢𑀺 𑀬𑁂𑀦 𑀏𑀓𑁂𑀦 𑀧𑀤𑁂𑀦 𑀅𑀦𑁂𑀓𑀢𑁆𑀣𑀦𑀺𑀲𑁆𑀲𑀺𑀢𑁂𑀦 𑀫𑀬𑀁 𑀅𑀢𑁆𑀢𑀦𑁄 𑀯𑀼𑀟𑁆𑀠𑀺𑀁 𑀲𑀸𑀥𑁂𑀬𑁆𑀬𑀸𑀫, 𑀢𑀁 𑀫𑁂 𑀓𑀣𑁂𑀳𑀻𑀢𑀺 𑀧𑀼𑀘𑁆𑀙𑀺.

𑀅𑀣𑀲𑁆𑀲 𑀧𑀺𑀢𑀸 𑀓𑀣𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁬.

‘‘𑀤𑀓𑁆𑀔𑁂𑀬𑁆𑀬𑁂𑀓𑀧𑀤𑀁 ¶ 𑀢𑀸𑀢, 𑀅𑀦𑁂𑀓𑀢𑁆𑀣𑀧𑀤𑀲𑁆𑀲𑀺𑀢𑀁;

𑀢𑀜𑁆𑀘 𑀲𑀻𑀮𑁂𑀦 𑀲𑀜𑁆𑀜𑀼𑀢𑁆𑀢𑀁, 𑀔𑀦𑁆𑀢𑀺𑀬𑀸 𑀉𑀧𑀧𑀸𑀤𑀺𑀢𑀁;

𑀅𑀮𑀁 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑀸𑀦𑀁 𑀤𑀼𑀔𑀸𑀬 𑀘𑀸’’𑀢𑀺.

𑀢𑀢𑁆𑀣 ¶ 𑀤𑀓𑁆𑀔𑁂𑀬𑁆𑀬𑁂𑀓𑀧𑀤𑀦𑁆𑀢𑀺 𑀤𑀓𑁆𑀔𑁂𑀬𑁆𑀬𑀁 𑀏𑀓𑀧𑀤𑀁. 𑀤𑀓𑁆𑀔𑁂𑀬𑁆𑀬𑀁 𑀦𑀸𑀫 𑀮𑀸𑀪𑀼𑀧𑁆𑀧𑀸𑀤𑀓𑀲𑁆𑀲 𑀙𑁂𑀓𑀲𑁆𑀲 𑀓𑀼𑀲𑀮𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁. 𑀅𑀦𑁂𑀓𑀢𑁆𑀣𑀧𑀤𑀲𑁆𑀲𑀺𑀢𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀻𑀭𑀺𑀬𑀁 𑀅𑀦𑁂𑀓𑁂𑀳𑀺 𑀅𑀢𑁆𑀣𑀧𑀤𑁂𑀳𑀺 𑀦𑀺𑀲𑁆𑀲𑀺𑀢𑀁. 𑀓𑀢𑀭𑁂𑀳𑀻𑀢𑀺? 𑀲𑀻𑀮𑀸𑀤𑀻𑀳𑀺. 𑀢𑁂𑀦𑁂𑀯 ‘‘𑀢𑀜𑁆𑀘 𑀲𑀻𑀮𑁂𑀦 𑀲𑀜𑁆𑀜𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀜𑁆𑀘 𑀧𑀦𑁂𑀢𑀁 𑀯𑀻𑀭𑀺𑀬𑀁 𑀆𑀘𑀸𑀭𑀲𑀻𑀮𑀲𑀫𑁆𑀧𑀬𑀼𑀢𑁆𑀢𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀉𑀧𑁂𑀢𑀁 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁 𑀅𑀫𑀺𑀢𑁆𑀢𑀸𑀦𑀜𑁆𑀘 𑀤𑀼𑀓𑁆𑀔𑀸𑀬 𑀅𑀮𑀁 𑀲𑀫𑀢𑁆𑀣𑀁. 𑀓𑁄 𑀳𑀺 𑀦𑀸𑀫 𑀮𑀸𑀪𑀼𑀧𑁆𑀧𑀸𑀤𑀓𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀯𑀻𑀭𑀺𑀬𑀲𑀫𑀦𑁆𑀦𑀸𑀕𑀢𑁄 𑀆𑀘𑀸𑀭𑀔𑀦𑁆𑀢𑀺𑀲𑀫𑁆𑀧𑀦𑁆𑀦𑁄 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑁂 𑀯𑀸 𑀤𑀼𑀓𑁆𑀔𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀧𑀜𑁆𑀳𑀁 𑀓𑀣𑁂𑀲𑀺. 𑀲𑁄𑀧𑀺 𑀧𑀺𑀢𑀼 𑀓𑀣𑀺𑀢𑀦𑀬𑁂𑀦𑁂𑀯 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀲𑀸𑀥𑁂𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀺𑀢𑀸𑀧𑀼𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸. ‘‘𑀢𑀤𑀸 𑀧𑀼𑀢𑁆𑀢𑁄 𑀅𑀬𑀫𑁂𑀯 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀏𑀓𑀧𑀤𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁩𑁯] 𑁯. 𑀳𑀭𑀺𑀢𑀫𑀡𑁆𑀟𑀽𑀓𑀚𑀸𑀢𑀓𑀯𑀡𑁆𑀡𑀦𑀸

𑀆𑀲𑀻𑀯𑀺𑀲𑀫𑁆𑀧𑀺 ¶ 𑀫𑀁 𑀲𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄𑀲𑀮𑀭𑀸𑀚𑀲𑁆𑀲 𑀳𑀺 𑀧𑀺𑀢𑀸 𑀫𑀳𑀸𑀓𑁄𑀲𑀮𑁄 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀥𑀻𑀢𑀭𑀁 𑀤𑀤𑀫𑀸𑀦𑁄 𑀥𑀻𑀢𑀼 𑀦𑁆𑀳𑀸𑀦𑀫𑀽𑀮𑀁 𑀓𑀸𑀲𑀺𑀕𑀸𑀫𑀓𑀁 𑀦𑀸𑀫 𑀅𑀤𑀸𑀲𑀺. 𑀲𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀧𑀺𑀢𑀼𑀖𑀸𑀢𑀓𑀓𑀫𑁆𑀫𑁂 𑀓𑀢𑁂 𑀭𑀜𑁆𑀜𑁄 𑀲𑀺𑀦𑁂𑀳𑁂𑀦 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀫𑀓𑀸𑀲𑀺. 𑀅𑀚𑀸𑀢𑀲𑀢𑁆𑀢𑀼 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬𑀧𑀺 𑀢𑀁 𑀕𑀸𑀫𑀁 𑀪𑀼𑀜𑁆𑀚𑀢𑁂𑀯. 𑀓𑁄𑀲𑀮𑀭𑀸𑀚𑀸 ‘‘𑀧𑀺𑀢𑀼𑀖𑀸𑀢𑀓𑀲𑁆𑀲 𑀘𑁄𑀭𑀲𑁆𑀲 𑀫𑀫 𑀓𑀼𑀮𑀲𑀦𑁆𑀢𑀓𑀁 𑀕𑀸𑀫𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀢𑀺. 𑀓𑀤𑀸𑀘𑀺 𑀫𑀸𑀢𑀼𑀮𑀲𑁆𑀲 𑀚𑀬𑁄 𑀳𑁄𑀢𑀺, 𑀓𑀤𑀸𑀘𑀺 𑀪𑀸𑀕𑀺𑀦𑁂𑀬𑁆𑀬𑀲𑁆𑀲. 𑀬𑀤𑀸 𑀧𑀦 ¶ 𑀅𑀚𑀸𑀢𑀲𑀢𑁆𑀢𑀼 𑀚𑀺𑀦𑀸𑀢𑀺, 𑀢𑀤𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀭𑀣𑁂 𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀕𑀭𑀁 𑀧𑀯𑀺𑀲𑀢𑀺. 𑀬𑀤𑀸 𑀧𑀦 𑀧𑀭𑀸𑀚𑀬𑀢𑀺, 𑀢𑀤𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀧𑀯𑀺𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀚𑀸𑀢𑀲𑀢𑁆𑀢𑀼 𑀫𑀸𑀢𑀼𑀮𑀁 𑀚𑀺𑀦𑀺𑀢𑁆𑀯𑀸 𑀢𑀼𑀲𑁆𑀲𑀢𑀺, 𑀧𑀭𑀸𑀚𑀺𑀢𑁄 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 ¶ 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀚𑀺𑀦𑀺𑀢𑁆𑀯𑀸 𑀢𑀼𑀲𑁆𑀲𑀢𑀺, 𑀧𑀭𑀸𑀚𑀺𑀢𑁄 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀦𑀻𑀮𑀫𑀡𑁆𑀟𑀽𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀫𑀦𑀼𑀲𑁆𑀲𑀸 𑀦𑀤𑀻𑀓𑀦𑁆𑀤𑀭𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀫𑀘𑁆𑀙𑁂 𑀕𑀳𑀡𑀢𑁆𑀣𑀸𑀬 𑀓𑀼𑀫𑀻𑀦𑀸𑀦𑀺 𑀑𑀟𑁆𑀟𑁂𑀲𑀼𑀁. 𑀏𑀓𑀲𑁆𑀫𑀺𑀁 𑀓𑀼𑀫𑀻𑀦𑁂 𑀩𑀳𑀽 𑀫𑀘𑁆𑀙𑀸 𑀧𑀯𑀺𑀲𑀺𑀁𑀲𑀼. 𑀅𑀣𑁂𑀓𑁄 𑀉𑀤𑀓𑀸𑀲𑀻𑀯𑀺𑀲𑁄 𑀫𑀘𑁆𑀙𑁂 𑀔𑀸𑀤𑀦𑁆𑀢𑁄 𑀢𑀁 𑀓𑀼𑀫𑀻𑀦𑀁 𑀧𑀸𑀯𑀺𑀲𑀺, 𑀩𑀳𑀽 𑀫𑀘𑁆𑀙𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀢𑀁 𑀔𑀸𑀤𑀦𑁆𑀢𑀸 𑀏𑀓𑀮𑁄𑀳𑀺𑀢𑀁 𑀅𑀓𑀁𑀲𑀼. 𑀲𑁄 𑀧𑀝𑀺𑀲𑀭𑀡𑀁 𑀅𑀧𑀲𑁆𑀲𑀦𑁆𑀢𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀓𑀼𑀫𑀻𑀦𑀫𑀼𑀔𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀉𑀤𑀓𑀧𑀭𑀺𑀬𑀦𑁆𑀢𑁂 𑀦𑀺𑀧𑀚𑁆𑀚𑀺. 𑀦𑀻𑀮𑀫𑀡𑁆𑀟𑀽𑀓𑁄𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀢𑀺𑀢𑁆𑀯𑀸 𑀓𑀼𑀫𑀻𑀦𑀲𑀽𑀮𑀫𑀢𑁆𑀣𑀓𑁂 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀆𑀲𑀻𑀯𑀺𑀲𑁄 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁄 𑀢𑀢𑁆𑀣 𑀦𑀺𑀧𑀦𑁆𑀦𑀁 𑀢𑀁 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀦𑀻𑀮𑀫𑀡𑁆𑀟𑀽𑀓, 𑀇𑀫𑁂𑀲𑀁 𑀫𑀘𑁆𑀙𑀸𑀦𑀁 𑀓𑀺𑀭𑀺𑀬𑀸 𑀭𑀼𑀘𑁆𑀘𑀢𑀺 𑀢𑀼𑀬𑁆𑀳’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁭.

‘‘𑀆𑀲𑀻𑀯𑀺𑀲𑀫𑁆𑀧𑀺 𑀫𑀁 𑀲𑀦𑁆𑀢𑀁, 𑀧𑀯𑀺𑀝𑁆𑀞𑀁 𑀓𑀼𑀫𑀺𑀦𑀸𑀫𑀼𑀔𑀁;

𑀭𑀼𑀘𑁆𑀘𑀢𑁂 𑀳𑀭𑀺𑀢𑀸𑀫𑀸𑀢𑀸, 𑀬𑀁 𑀫𑀁 𑀔𑀸𑀤𑀦𑁆𑀢𑀺 𑀫𑀘𑁆𑀙𑀓𑀸’’𑀢𑀺.

𑀢𑀢𑁆𑀣 ¶ 𑀆𑀲𑀻𑀯𑀺𑀲𑀫𑁆𑀧𑀺 𑀫𑀁 𑀲𑀦𑁆𑀢𑀦𑁆𑀢𑀺 𑀫𑀁 𑀆𑀕𑀢𑀯𑀺𑀲𑀁 𑀲𑀫𑀸𑀦𑀁. 𑀭𑀼𑀘𑁆𑀘𑀢𑁂 𑀳𑀭𑀺𑀢𑀸𑀫𑀸𑀢𑀸, 𑀬𑀁 𑀫𑀁 𑀔𑀸𑀤𑀦𑁆𑀢𑀺 𑀫𑀘𑁆𑀙𑀓𑀸𑀢𑀺 𑀏𑀢𑀁 𑀢𑀯 𑀭𑀼𑀘𑁆𑀘𑀢𑀺 𑀳𑀭𑀺𑀢𑀫𑀡𑁆𑀟𑀽𑀓𑀧𑀼𑀢𑁆𑀢𑀸𑀢𑀺 𑀯𑀤𑀢𑀺.

𑀅𑀣 𑀦𑀁 𑀳𑀭𑀺𑀢𑀫𑀡𑁆𑀟𑀽𑀓𑁄 ‘‘𑀆𑀫, 𑀲𑀫𑁆𑀫, 𑀭𑀼𑀘𑁆𑀘𑀢𑀻’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀲𑀘𑁂 𑀢𑁆𑀯𑀫𑁆𑀧𑀺 𑀢𑀯 𑀧𑀤𑁂𑀲𑀁 𑀆𑀕𑀢𑁂 𑀫𑀘𑁆𑀙𑁂 𑀔𑀸𑀤𑀲𑀺, 𑀫𑀘𑁆𑀙𑀸𑀧𑀺 𑀅𑀢𑁆𑀢𑀦𑁄 ¶ 𑀧𑀤𑁂𑀲𑀁 𑀆𑀕𑀢𑀁 𑀢𑀁 𑀔𑀸𑀤𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀤𑁂𑀲𑁂 𑀕𑁄𑀘𑀭𑀪𑀽𑀫𑀺𑀬𑀁 𑀅𑀩𑀮𑀯𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁮.

‘‘𑀯𑀺𑀮𑀼𑀫𑁆𑀧𑀢𑁂𑀯 𑀧𑀼𑀭𑀺𑀲𑁄, 𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀺;

𑀬𑀤𑀸 𑀘𑀜𑁆𑀜𑁂 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀫𑁆𑀧𑀢𑀻’’𑀢𑀺.

𑀢𑀢𑁆𑀣 𑀯𑀺𑀮𑀼𑀫𑁆𑀧𑀢𑁂𑀯 𑀧𑀼𑀭𑀺𑀲𑁄, 𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀻𑀢𑀺 𑀬𑀸𑀯 𑀅𑀲𑁆𑀲 𑀧𑀼𑀭𑀺𑀲𑀲𑁆𑀲 𑀇𑀲𑁆𑀲𑀭𑀺𑀬𑀁 𑀉𑀧𑀓𑀧𑁆𑀧𑀢𑀺 𑀇𑀚𑁆𑀛𑀢𑀺 𑀧𑀯𑀢𑁆𑀢𑀢𑀺, 𑀢𑀸𑀯 𑀲𑁄 𑀅𑀜𑁆𑀜𑀁 𑀯𑀺𑀮𑀼𑀫𑁆𑀧𑀢𑀺𑀬𑁂𑀯. ‘‘𑀬𑀸𑀯 𑀲𑁄 𑀉𑀧𑀓𑀧𑁆𑀧𑀢𑀻’’𑀢𑀺𑀧𑀺 𑀧𑀸𑀞𑁄 ¶ , 𑀬𑀢𑁆𑀢𑀓𑀁 𑀓𑀸𑀮𑀁 𑀲𑁄 𑀧𑀼𑀭𑀺𑀲𑁄 𑀲𑀓𑁆𑀓𑁄𑀢𑀺 𑀯𑀺𑀮𑀼𑀫𑁆𑀧𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀸 𑀘𑀜𑁆𑀜𑁂 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺 𑀬𑀤𑀸 𑀘 𑀅𑀜𑁆𑀜𑁂 𑀇𑀲𑁆𑀲𑀭𑀸 𑀳𑀼𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑁆𑀢𑀺. 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀫𑁆𑀧𑀢𑀻𑀢𑀺 𑀅𑀣 𑀲𑁄 𑀯𑀺𑀮𑀼𑀫𑁆𑀧𑀓𑁄 𑀅𑀜𑁆𑀜𑁂𑀳𑀺 𑀯𑀺𑀮𑀼𑀫𑁆𑀧𑀢𑀺. ‘‘𑀯𑀺𑀮𑀼𑀫𑁆𑀧𑀢𑁂’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. ‘‘𑀯𑀺𑀮𑀼𑀫𑁆𑀧𑀦’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀲𑁆𑀲𑀢𑁆𑀣𑁄 𑀦 𑀲𑀫𑁂𑀢𑀺. 𑀏𑀯𑀁 ‘‘𑀯𑀺𑀮𑀼𑀫𑁆𑀧𑀓𑁄 𑀧𑀼𑀦 𑀯𑀺𑀮𑀼𑀫𑁆𑀧𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀅𑀟𑁆𑀟𑁂 𑀯𑀺𑀦𑀺𑀘𑁆𑀙𑀺𑀢𑁂 𑀉𑀤𑀓𑀸𑀲𑀻𑀯𑀺𑀲𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀁 𑀜𑀢𑁆𑀯𑀸 ‘‘𑀧𑀘𑁆𑀘𑀸𑀫𑀺𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀫𑀘𑁆𑀙𑀕𑀡𑀸 𑀓𑀼𑀫𑀻𑀦𑀫𑀼𑀔𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀉𑀤𑀓𑀸𑀲𑀻𑀯𑀺𑀲𑁄 𑀅𑀚𑀸𑀢𑀲𑀢𑁆𑀢𑀼 𑀅𑀳𑁄𑀲𑀺, 𑀦𑀻𑀮𑀫𑀡𑁆𑀟𑀽𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀳𑀭𑀺𑀢𑀫𑀡𑁆𑀟𑀽𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁪𑁦] 𑁧𑁦. 𑀫𑀳𑀸𑀧𑀺𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑁄 𑀚𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁂 𑀲𑀢𑁆𑀣𑀭𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀦𑀯𑀫𑀸𑀲𑀘𑁆𑀘𑀬𑁂𑀦 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀧𑀣𑀯𑀺𑀬𑀁 𑀦𑀺𑀫𑀼𑀕𑁆𑀕𑁂 𑀚𑁂𑀢𑀯𑀦𑀯𑀸𑀲𑀺𑀦𑁄 𑀘 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀘 ‘‘𑀩𑀼𑀤𑁆𑀥𑀧𑀝𑀺𑀓𑀡𑁆𑀝𑀓𑁄 𑀤𑁂𑀯𑀤𑀢𑁆𑀢𑁄 𑀧𑀣𑀯𑀺𑀬𑀸 𑀕𑀺𑀮𑀺𑀢𑁄, 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑁄 𑀤𑀸𑀦𑀺 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀚𑀸𑀢𑁄’’𑀢𑀺 𑀢𑀼𑀝𑁆𑀞𑀳𑀝𑁆𑀞𑀸 ¶ 𑀅𑀳𑁂𑀲𑀼𑀁. 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀭𑀫𑁆𑀧𑀭𑀖𑁄𑀲𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀬𑀓𑁆𑀔𑀪𑀽𑀢𑀤𑁂𑀯𑀕𑀡𑀸 𑀘 𑀢𑀼𑀝𑁆𑀞𑀳𑀝𑁆𑀞𑀸 𑀏𑀯 𑀅𑀳𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁂 𑀧𑀣𑀯𑀺𑀬𑀁 𑀦𑀺𑀫𑀼𑀕𑁆𑀕𑁂 ‘𑀩𑀼𑀤𑁆𑀥𑀧𑀝𑀺𑀓𑀡𑁆𑀝𑀓𑁄 𑀤𑁂𑀯𑀤𑀢𑁆𑀢𑁄 𑀧𑀣𑀯𑀺𑀬𑀸 𑀕𑀺𑀮𑀺𑀢𑁄’𑀢𑀺 𑀫𑀳𑀸𑀚𑀦𑁄 𑀅𑀢𑁆𑀢𑀫𑀦𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁂 𑀫𑀢𑁂 𑀫𑀳𑀸𑀚𑀦𑁄 𑀢𑀼𑀲𑁆𑀲𑀢𑀺 𑀘𑁂𑀯 𑀳𑀲𑀢𑀺 𑀘, 𑀧𑀼𑀩𑁆𑀩𑁂𑀧𑀺 𑀢𑀼𑀲𑁆𑀲𑀺 𑀘𑁂𑀯 𑀳𑀲𑀺 𑀘𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀧𑀺𑀗𑁆𑀕𑀮𑁄 𑀦𑀸𑀫 𑀭𑀸𑀚𑀸 𑀅𑀥𑀫𑁆𑀫𑁂𑀦 𑀯𑀺𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀙𑀦𑁆𑀤𑀸𑀤𑀺𑀯𑀲𑁂𑀦 𑀧𑀸𑀧𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀤𑀡𑁆𑀟𑀩𑀮𑀺𑀚𑀗𑁆𑀖𑀓𑀳𑀸𑀧𑀡𑀸𑀤𑀺𑀕𑁆𑀕𑀳𑀡𑁂𑀦 𑀉𑀘𑁆𑀙𑀼𑀬𑀦𑁆𑀢𑁂 𑀉𑀘𑁆𑀙𑀼𑀁 𑀯𑀺𑀬 𑀫𑀳𑀸𑀚𑀦𑀁 𑀧𑀻𑀴𑁂𑀲𑀺 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀧𑀭𑁂𑀲𑀼 𑀅𑀦𑀼𑀤𑁆𑀤𑀬𑀸𑀫𑀢𑁆𑀢𑀫𑁆𑀧𑀺 𑀦𑀸𑀫𑀲𑁆𑀲 𑀦𑀢𑁆𑀣𑀺, 𑀕𑁂𑀳𑁂 𑀇𑀢𑁆𑀣𑀻𑀦𑀫𑁆𑀧𑀺 𑀧𑀼𑀢𑁆𑀢𑀥𑀻𑀢𑀸𑀦𑀫𑁆𑀧𑀺 𑀅𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀻𑀦𑀫𑁆𑀧𑀺 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄, 𑀅𑀓𑁆𑀔𑀺𑀫𑁆𑀳𑀺 𑀧𑀢𑀺𑀢𑀭𑀚𑀁 𑀯𑀺𑀬, 𑀪𑀢𑁆𑀢𑀧𑀺𑀡𑁆𑀟𑁂 𑀲𑀓𑁆𑀔𑀭𑀸 𑀯𑀺𑀬, 𑀧𑀡𑁆𑀳𑀺𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀺𑀝𑁆𑀞𑀓𑀡𑁆𑀝𑀓𑁄 𑀯𑀺𑀬 𑀘 𑀅𑀳𑁄𑀲𑀺 ¶ . 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀧𑀺𑀗𑁆𑀕𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀫𑀳𑀸𑀧𑀺𑀗𑁆𑀕𑀮𑁄 𑀤𑀻𑀖𑀭𑀢𑁆𑀢𑀁 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀲𑀓𑀮𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀳𑀝𑁆𑀞𑀢𑀼𑀝𑁆𑀞𑀸 𑀫𑀳𑀸𑀳𑀲𑀺𑀢𑀁 𑀳𑀲𑀺𑀢𑁆𑀯𑀸 𑀤𑀸𑀭𑀽𑀦𑀁 𑀲𑀓𑀝𑀲𑀳𑀲𑁆𑀲𑁂𑀦 𑀫𑀳𑀸𑀧𑀺𑀗𑁆𑀕𑀮𑀁 𑀛𑀸𑀧𑁂𑀢𑁆𑀯𑀸 𑀅𑀦𑁂𑀓𑁂𑀳𑀺 𑀖𑀝𑀲𑀳𑀲𑁆𑀲𑁂𑀳𑀺 𑀆𑀴𑀸𑀳𑀦𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 ‘‘𑀥𑀫𑁆𑀫𑀺𑀓𑁄 𑀦𑁄 𑀭𑀸𑀚𑀸 𑀮𑀤𑁆𑀥𑁄’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀦𑀕𑀭𑁂 𑀉𑀲𑁆𑀲𑀯𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀫𑀼𑀲𑁆𑀲𑀺𑀢𑀥𑀚𑀧𑀝𑀸𑀓𑀁 𑀦𑀕𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑁆𑀯𑀸𑀭𑁂 𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀮𑀸𑀚𑀓𑀼𑀲𑀼𑀫𑀫𑀡𑁆𑀟𑀺𑀢𑀢𑀮𑁂𑀲𑀼 𑀅𑀮𑀗𑁆𑀓𑀢𑀫𑀡𑁆𑀟𑀧𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀺𑀁𑀲𑀼 𑀘𑁂𑀯 𑀧𑀺𑀯𑀺𑀁𑀲𑀼 𑀘.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀮𑀗𑁆𑀓𑀢𑁂 𑀫𑀳𑀸𑀢𑀮𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀧𑀮𑁆𑀮𑀗𑁆𑀓𑀯𑀭𑀲𑁆𑀲 ¶ 𑀫𑀚𑁆𑀛𑁂 𑀫𑀳𑀸𑀬𑀲𑀁 𑀅𑀦𑀼𑀪𑀯𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀫𑀘𑁆𑀘𑀸 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀭𑀝𑁆𑀞𑀺𑀓𑀤𑁄𑀯𑀸𑀭𑀺𑀓𑀸𑀤𑀬𑁄 𑀘 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀣𑁂𑀓𑁄 𑀤𑁄𑀯𑀸𑀭𑀺𑀓𑁄 𑀦𑀸𑀢𑀺𑀤𑀽𑀭𑁂 𑀞𑀢𑁆𑀯𑀸 𑀅𑀲𑁆𑀲𑀲𑀦𑁆𑀢𑁄 𑀧𑀲𑁆𑀲𑀲𑀦𑁆𑀢𑁄 𑀧𑀭𑁄𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀤𑁄𑀯𑀸𑀭𑀺𑀓, 𑀫𑀫 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀲𑀩𑁆𑀩𑁂 𑀢𑀼𑀝𑁆𑀞𑀧𑀳𑀝𑁆𑀞𑀸 𑀉𑀲𑁆𑀲𑀯𑀁 𑀓𑀻𑀴𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀢𑁆𑀯𑀁 𑀧𑀦 𑀭𑁄𑀤𑀫𑀸𑀦𑁄 𑀞𑀺𑀢𑁄 ¶ , 𑀓𑀺𑀁 𑀦𑀼 𑀔𑁄 𑀫𑀫 𑀧𑀺𑀢𑀸 𑀢𑀯𑁂𑀯 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁯.

‘‘𑀲𑀩𑁆𑀩𑁄 𑀚𑀦𑁄 𑀳𑀺𑀁𑀲𑀺𑀢𑁄 𑀧𑀺𑀗𑁆𑀕𑀮𑁂𑀦, 𑀢𑀲𑁆𑀫𑀺𑀁 𑀫𑀢𑁂 𑀧𑀘𑁆𑀘𑀬𑀸 𑀯𑁂𑀤𑀬𑀦𑁆𑀢𑀺;

𑀧𑀺𑀬𑁄 𑀦𑀼 𑀢𑁂 𑀆𑀲𑀺 𑀅𑀓𑀡𑁆𑀳𑀦𑁂𑀢𑁆𑀢𑁄, 𑀓𑀲𑁆𑀫𑀸 𑀦𑀼 𑀢𑁆𑀯𑀁 𑀭𑁄𑀤𑀲𑀺 𑀤𑁆𑀯𑀸𑀭𑀧𑀸𑀮𑀸’’𑀢𑀺.

𑀢𑀢𑁆𑀣 𑀳𑀺𑀁𑀲𑀺𑀢𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀤𑀡𑁆𑀟𑀩𑀮𑀺𑀆𑀤𑀻𑀳𑀺 𑀧𑀻𑀴𑀺𑀢𑁄. 𑀧𑀺𑀗𑁆𑀕𑀮𑁂𑀦𑀸𑀢𑀺 𑀧𑀺𑀗𑁆𑀕𑀮𑀓𑁆𑀔𑁂𑀦. 𑀢𑀲𑁆𑀲 𑀓𑀺𑀭 𑀤𑁆𑀯𑁂𑀧𑀺 𑀅𑀓𑁆𑀔𑀻𑀦𑀺 𑀦𑀺𑀩𑁆𑀩𑀺𑀤𑁆𑀥𑀧𑀺𑀗𑁆𑀕𑀮𑀸𑀦𑀺 𑀩𑀺𑀴𑀸𑀭𑀓𑁆𑀔𑀺𑀯𑀡𑁆𑀡𑀸𑀦𑀺 𑀅𑀳𑁂𑀲𑀼𑀁, 𑀢𑁂𑀦𑁂𑀯𑀲𑁆𑀲 ‘‘𑀧𑀺𑀗𑁆𑀕𑀮𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀧𑀘𑁆𑀘𑀬𑀸 𑀯𑁂𑀤𑀬𑀦𑁆𑀢𑀻𑀢𑀺 𑀧𑀻𑀢𑀺𑀬𑁄 𑀧𑀯𑁂𑀤𑀬𑀦𑁆𑀢𑀺. 𑀅𑀓𑀡𑁆𑀳𑀦𑁂𑀢𑁆𑀢𑁄𑀢𑀺 𑀧𑀺𑀗𑁆𑀕𑀮𑀦𑁂𑀢𑁆𑀢𑁄. 𑀓𑀲𑁆𑀫𑀸 𑀦𑀼 𑀢𑁆𑀯𑀦𑁆𑀢𑀺 𑀓𑁂𑀦 𑀦𑀼 𑀓𑀸𑀭𑀡𑁂𑀦 𑀢𑁆𑀯𑀁 𑀭𑁄𑀤𑀲𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀲𑁆𑀫𑀸 𑀢𑀼𑀯’’𑀦𑁆𑀢𑀺 𑀧𑀸𑀞𑁄.

𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦𑀸𑀳𑀁, 𑀫𑀳𑀸𑀭𑀸𑀚, ‘𑀫𑀳𑀸𑀧𑀺𑀗𑁆𑀕𑀮𑁄 𑀫𑀢𑁄’𑀢𑀺 𑀲𑁄𑀓𑁂𑀦 𑀭𑁄𑀤𑀸𑀫𑀺, 𑀲𑀻𑀲𑀲𑁆𑀲 𑀫𑁂 𑀲𑀼𑀔𑀁 𑀚𑀸𑀢𑀁. 𑀧𑀺𑀗𑁆𑀕𑀮𑀭𑀸𑀚𑀸 𑀳𑀺 𑀧𑀸𑀲𑀸𑀤𑀸 𑀑𑀢𑀭𑀦𑁆𑀢𑁄 𑀘 𑀆𑀭𑁄𑀳𑀦𑁆𑀢𑁄 𑀘 𑀓𑀫𑁆𑀫𑀸𑀭𑀫𑀼𑀝𑁆𑀞𑀺𑀓𑀸𑀬 𑀧𑀳𑀭𑀦𑁆𑀢𑁄 𑀯𑀺𑀬 𑀫𑀬𑁆𑀳𑀁 𑀲𑀻𑀲𑁂 𑀅𑀝𑁆𑀞𑀝𑁆𑀞 𑀔𑀝𑀓𑁂 𑀤𑁂𑀢𑀺, 𑀲𑁄 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸𑀧𑀺 𑀫𑀫 𑀲𑀻𑀲𑁂 𑀤𑀤𑀫𑀸𑀦𑁄 𑀯𑀺𑀬 𑀦𑀺𑀭𑀬𑀧𑀸𑀮𑀸𑀦𑀫𑁆𑀧𑀺 𑀬𑀫𑀲𑁆𑀲𑀧𑀺 𑀲𑀻𑀮𑁂 𑀔𑀝𑀓𑁂 𑀤𑀲𑁆𑀲𑀢𑀺, 𑀅𑀣 𑀦𑀁 𑀢𑁂 ‘𑀅𑀢𑀺𑀯𑀺𑀬 𑀅𑀬𑀁 𑀅𑀫𑁆𑀳𑁂 𑀩𑀸𑀥𑀢𑀻’𑀢𑀺 𑀧𑀼𑀦 𑀇𑀥𑁂𑀯 𑀆𑀦𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀼𑀁, 𑀅𑀣 𑀫𑁂 𑀲𑁄 𑀧𑀼𑀦𑀧𑀺 𑀲𑀻𑀲𑁂 𑀔𑀝𑀓𑁂 𑀤𑀤𑁂𑀬𑁆𑀬𑀸𑀢𑀺 𑀪𑀬𑁂𑀦𑀸𑀳𑀁 𑀭𑁄𑀤𑀸𑀫𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁮𑁦.

‘‘𑀦 ¶ ¶ 𑀫𑁂 𑀧𑀺𑀬𑁄 𑀆𑀲𑀺 𑀅𑀓𑀡𑁆𑀳𑀦𑁂𑀢𑁆𑀢𑁄, 𑀪𑀸𑀬𑀸𑀫𑀺 𑀧𑀘𑁆𑀘𑀸𑀕𑀫𑀦𑀸𑀬 𑀢𑀲𑁆𑀲;

𑀇𑀢𑁄 𑀕𑀢𑁄 𑀳𑀺𑀁𑀲𑁂𑀬𑁆𑀬 𑀫𑀘𑁆𑀘𑀼𑀭𑀸𑀚𑀁, 𑀲𑁄 𑀳𑀺𑀁𑀲𑀺𑀢𑁄 𑀆𑀦𑁂𑀬𑁆𑀬 𑀧𑀼𑀦 𑀇𑀥𑀸’’𑀢𑀺.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀲𑁄 𑀭𑀸𑀚𑀸 𑀤𑀸𑀭𑀽𑀦𑀁 𑀯𑀸𑀳𑀲𑀳𑀲𑁆𑀲𑁂𑀦 𑀤𑀟𑁆𑀠𑁄 𑀉𑀤𑀓𑀖𑀝𑀲𑀢𑁂𑀳𑀺 𑀲𑀺𑀢𑁆𑀢𑁄, 𑀲𑀸𑀧𑀺𑀲𑁆𑀲 𑀆𑀴𑀸𑀳𑀦𑀪𑀽𑀫𑀺 𑀲𑀫𑀦𑁆𑀢𑀢𑁄 𑀔𑀢𑀸, 𑀧𑀓𑀢𑀺𑀬𑀸𑀧𑀺 𑀘 𑀧𑀭𑀮𑁄𑀓𑀁 𑀕𑀢𑀸 𑀦𑀸𑀫 𑀅𑀜𑁆𑀜𑀢𑁆𑀣 𑀕𑀢𑀺𑀯𑀲𑀸 𑀧𑀼𑀦 𑀢𑁂𑀦𑁂𑀯 𑀲𑀭𑀻𑀭𑁂𑀦 𑀦𑀸𑀕𑀘𑁆𑀙𑀦𑁆𑀢𑀺, 𑀫𑀸 𑀢𑁆𑀯𑀁 𑀪𑀸𑀬𑀻’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁮𑁧.

‘‘𑀤𑀟𑁆𑀠𑁄 ¶ 𑀯𑀸𑀳𑀲𑀳𑀲𑁆𑀲𑁂𑀳𑀺, 𑀲𑀺𑀢𑁆𑀢𑁄 𑀖𑀝𑀲𑀢𑁂𑀳𑀺 𑀲𑁄;

𑀧𑀭𑀺𑀓𑁆𑀔𑀢𑀸 𑀘 𑀲𑀸 𑀪𑀽𑀫𑀺, 𑀫𑀸 𑀪𑀸𑀬𑀺 𑀦𑀸𑀕𑀫𑀺𑀲𑁆𑀲𑀢𑀻’’𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀤𑁄𑀯𑀸𑀭𑀺𑀓𑁄 𑀅𑀲𑁆𑀲𑀸𑀲𑀁 𑀧𑀝𑀺𑀮𑀪𑀺. 𑀩𑁄𑀥𑀺𑀲𑀢𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀳𑀸𑀧𑀺𑀗𑁆𑀕𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀧𑀺𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀉𑀧𑀸𑀳𑀦𑀯𑀕𑁆𑀕𑁄 𑀦𑀯𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀧𑀸𑀳𑀦𑀁 𑀯𑀻𑀡𑀸𑀣𑀽𑀡𑀁, 𑀯𑀺𑀓𑀡𑁆𑀡𑀓𑀁 𑀅𑀲𑀺𑀢𑀸𑀪𑀼;

𑀯𑀘𑁆𑀙𑀦𑀔𑀁 𑀩𑀓𑀜𑁆𑀘𑁂𑀯, 𑀲𑀸𑀓𑁂𑀢𑀜𑁆𑀘 𑀏𑀓𑀧𑀤𑀁;

𑀳𑀭𑀺𑀢𑀫𑀸𑀢𑀼 𑀧𑀺𑀗𑁆𑀕𑀮𑀁.

𑁧𑁦. 𑀲𑀺𑀗𑁆𑀕𑀸𑀮𑀯𑀕𑁆𑀕𑁄

[𑁨𑁪𑁧] 𑁧. 𑀲𑀩𑁆𑀩𑀤𑀸𑀞𑀚𑀸𑀢𑀓𑀯𑀡𑁆𑀡𑀦𑀸

𑀲𑀺𑀗𑁆𑀕𑀸𑀮𑁄 ¶ 𑀫𑀸𑀦𑀢𑁆𑀣𑀤𑁆𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀁 𑀧𑀲𑀸𑀤𑁂𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀦𑀸𑀴𑀸𑀕𑀺𑀭𑀺𑀧𑀬𑁄𑀚𑀦𑁂 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀲𑁄 𑀮𑀸𑀪𑀲𑀓𑁆𑀓𑀸𑀭𑁄 ¶ 𑀅𑀦𑁆𑀢𑀭𑀥𑀸𑀬𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀁 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀦𑁆𑀢𑀭𑀥𑀸𑀧𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀜𑁆𑀘 𑀲𑀺𑀧𑁆𑀧𑀸𑀦𑀁 𑀧𑀸𑀭𑀁 𑀕𑀢𑁄. 𑀲𑁄 𑀧𑀣𑀯𑀻𑀚𑀬𑀫𑀦𑁆𑀢𑀁 𑀦𑀸𑀫 𑀚𑀸𑀦𑀸𑀢𑀺. 𑀧𑀣𑀯𑀻𑀚𑀬𑀫𑀦𑁆𑀢𑁄𑀢𑀺 𑀆𑀯𑀝𑁆𑀝𑀦𑀫𑀦𑁆𑀢𑁄 𑀯𑀼𑀘𑁆𑀘𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀁 𑀫𑀦𑁆𑀢𑀁 𑀲𑀚𑁆𑀛𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀅𑀗𑁆𑀕𑀡𑀝𑁆𑀞𑀸𑀦𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀚𑁆𑀛𑀸𑀬𑀫𑀓𑀸𑀲𑀺. 𑀢𑀁 𑀓𑀺𑀭 𑀫𑀦𑁆𑀢𑀁 𑀅𑀜𑁆𑀜𑀯𑀺𑀳𑀺𑀢𑀁 𑀥𑀺𑀢𑀺𑀯𑀺𑀭𑀳𑀺𑀢𑀁 𑀲𑀸𑀯𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀦𑀁 𑀲𑁄 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀲𑀚𑁆𑀛𑀸𑀬𑀢𑀺. 𑀅𑀣𑀲𑁆𑀲 𑀲𑀚𑁆𑀛𑀸𑀬𑀦𑀓𑀸𑀮𑁂 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀏𑀓𑀲𑁆𑀫𑀺𑀁 𑀩𑀺𑀮𑁂 𑀦𑀺𑀧𑀦𑁆𑀦𑁄 𑀢𑀁 𑀫𑀦𑁆𑀢𑀁 𑀲𑀼𑀢𑁆𑀯𑀸𑀯 𑀧𑀕𑀼𑀡𑀫𑀓𑀸𑀲𑀺. 𑀲𑁄 𑀓𑀺𑀭 𑀅𑀦𑀦𑁆𑀢𑀭𑀸𑀢𑀻𑀢𑁂 𑀅𑀢𑁆𑀢𑀪𑀸𑀯𑁂 𑀧𑀕𑀼𑀡𑀧𑀣𑀯𑀻𑀚𑀬𑀫𑀦𑁆𑀢𑁄 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬 ‘‘𑀧𑀕𑀼𑀡𑁄 𑀯𑀢 𑀫𑁂 𑀅𑀬𑀁 𑀫𑀦𑁆𑀢𑁄’’𑀢𑀺 𑀆𑀳. 𑀲𑀺𑀗𑁆𑀕𑀸𑀮𑁄 𑀩𑀺𑀮𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀅𑀫𑁆𑀪𑁄 𑀩𑁆𑀭𑀸𑀳𑁆𑀫𑀡, 𑀅𑀬𑀁 𑀫𑀦𑁆𑀢𑁄 𑀢𑀬𑀸𑀧𑀺 𑀫𑀫𑁂𑀯 𑀧𑀕𑀼𑀡𑀢𑀭𑁄’’𑀢𑀺 𑀯𑀢𑁆𑀯𑀸 𑀧𑀮𑀸𑀬𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁 𑀲𑀺𑀗𑁆𑀕𑀸𑀮𑁄 𑀫𑀳𑀦𑁆𑀢𑀁 𑀅𑀓𑀼𑀲𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺 ‘‘𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀣𑁄𑀓𑀁 𑀅𑀦𑀼𑀩𑀦𑁆𑀥𑀺. 𑀲𑀺𑀗𑁆𑀕𑀸𑀮𑁄 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺.

𑀲𑁄 𑀕𑀦𑁆𑀢𑁆𑀯𑀸 𑀏𑀓𑀁 𑀲𑀺𑀗𑁆𑀕𑀸𑀮𑀺𑀁 𑀣𑁄𑀓𑀁 𑀲𑀭𑀻𑀭𑁂 𑀟𑀁𑀲𑀺, ‘‘𑀓𑀺𑀁, 𑀲𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀚𑀸𑀦𑀸𑀲𑀺 𑀦 𑀚𑀸𑀦𑀸𑀲𑀻’’𑀢𑀺 𑀆𑀳. 𑀲𑀸 ‘‘𑀆𑀫, 𑀚𑀸𑀦𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀧𑀣𑀯𑀻𑀚𑀬𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ¶ 𑀅𑀦𑁂𑀓𑀸𑀦𑀺 𑀲𑀺𑀗𑁆𑀕𑀸𑀮𑀲𑀢𑀸𑀦𑀺 𑀆𑀡𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀳𑀢𑁆𑀣𑀺𑀅𑀲𑁆𑀲𑀲𑀻𑀳𑀩𑁆𑀬𑀕𑁆𑀖𑀲𑀽𑀓𑀭𑀫𑀺𑀕𑀸𑀤𑀬𑁄 𑀘𑀢𑀼𑀧𑁆𑀧𑀤𑁂 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 ¶ 𑀅𑀓𑀸𑀲𑀺. 𑀓𑀢𑁆𑀯𑀸 𑀘 𑀧𑀦 𑀲𑀩𑁆𑀩𑀤𑀸𑀞𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀏𑀓𑀁 𑀲𑀺𑀗𑁆𑀕𑀸𑀮𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀤𑁆𑀯𑀺𑀦𑁆𑀦𑀁 𑀳𑀢𑁆𑀣𑀻𑀦𑀁 𑀧𑀺𑀝𑁆𑀞𑁂 𑀲𑀻𑀳𑁄 𑀢𑀺𑀝𑁆𑀞𑀢𑀺, 𑀲𑀻𑀳𑀧𑀺𑀝𑁆𑀞𑁂 𑀲𑀩𑁆𑀩𑀤𑀸𑀞𑁄 𑀲𑀺𑀗𑁆𑀕𑀸𑀮𑁄 𑀭𑀸𑀚𑀸 𑀲𑀺𑀗𑁆𑀕𑀸𑀮𑀺𑀬𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀤𑁆𑀥𑀺𑀁 𑀦𑀺𑀲𑀻𑀤𑀢𑀺, 𑀫𑀳𑀦𑁆𑀢𑁄 𑀬𑀲𑁄 𑀅𑀳𑁄𑀲𑀺. 𑀲𑁄 𑀬𑀲𑀫𑀳𑀦𑁆𑀢𑁂𑀦 𑀧𑀫𑀚𑁆𑀚𑀺𑀢𑁆𑀯𑀸 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀧𑀭𑀺𑀯𑀼𑀢𑁄 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑀝𑁆𑀞𑀸𑀦𑀁 𑀲𑀫𑁆𑀧𑀸𑀧𑀼𑀡𑀺, 𑀧𑀭𑀺𑀲𑀸 𑀤𑁆𑀯𑀸𑀤𑀲𑀬𑁄𑀚𑀦𑀸 𑀅𑀳𑁄𑀲𑀺. 𑀲𑁄 𑀅𑀯𑀺𑀤𑀽𑀭𑁂 𑀞𑀺𑀢𑁄𑀬𑁂𑀯 ‘‘𑀭𑀚𑁆𑀚𑀁 𑀯𑀸 𑀤𑁂𑀢𑀼, 𑀬𑀼𑀤𑁆𑀥𑀁 𑀯𑀸’’𑀢𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀪𑀻𑀢𑀢𑀲𑀺𑀢𑀸 𑀦𑀕𑀭𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑀤𑀸𑀞𑀲𑀺𑀗𑁆𑀕𑀸𑀮𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀫𑀫 𑀪𑀸𑀭𑁄, 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀁 ¶ 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀭𑀸𑀚𑀸𑀦𑀜𑁆𑀘 𑀦𑀸𑀕𑀭𑁂 𑀘 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸 𑀦𑀼 𑀔𑁄 𑀲𑀩𑁆𑀩𑀤𑀸𑀞𑁄 𑀭𑀚𑁆𑀚𑀁 𑀕𑀳𑁂𑀲𑁆𑀲𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀤𑁆𑀯𑀸𑀭𑀝𑁆𑀝𑀸𑀮𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀲𑀫𑁆𑀫 𑀲𑀩𑁆𑀩𑀤𑀸𑀞, 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀇𑀫𑀁 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀤𑁆𑀤𑁂𑀦 𑀲𑀦𑁆𑀢𑀸𑀲𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀢𑁆𑀣𑁂𑀢’’𑀦𑁆𑀢𑀺 𑀜𑀢𑁆𑀯𑀸 𑀅𑀝𑁆𑀝𑀸𑀮𑀓𑀸 𑀑𑀭𑀼𑀬𑁆𑀳 ‘‘𑀲𑀓𑀮𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀩𑀸𑀭𑀸𑀡𑀲𑀺𑀦𑀕𑀭𑀯𑀸𑀲𑀺𑀦𑁄 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀦𑀺 𑀫𑀸𑀲𑀧𑀺𑀝𑁆𑀞𑁂𑀦 𑀮𑀜𑁆𑀚𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀫𑀳𑀸𑀚𑀦𑁄 𑀪𑁂𑀭𑀺𑀬𑀸 𑀆𑀡𑀁 𑀲𑀼𑀢𑁆𑀯𑀸 𑀅𑀦𑁆𑀢𑀫𑀲𑁄 𑀩𑀺𑀴𑀸𑀮𑁂 𑀉𑀧𑀸𑀤𑀸𑀬 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀜𑁆𑀘𑁂𑀯 𑀅𑀢𑁆𑀢𑀦𑁄 𑀘 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀦𑀺 𑀬𑀣𑀸 𑀧𑀭𑀲𑁆𑀲 𑀲𑀤𑁆𑀤𑀁 𑀲𑁄𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀫𑀸𑀲𑀧𑀺𑀝𑁆𑀞𑁂𑀦 𑀮𑀜𑁆𑀚𑀺.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀧𑀼𑀦 𑀅𑀝𑁆𑀝𑀸𑀮𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀲𑀩𑁆𑀩𑀤𑀸𑀞𑀸’’𑀢𑀺 𑀆𑀳. ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺? ‘‘𑀇𑀫𑀁 𑀭𑀚𑁆𑀚𑀁 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺? ‘‘𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀢𑀸𑀲𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺. 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀳𑀺 𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑀸 𑀓𑁂𑀲𑀭𑀲𑀻𑀳𑀭𑀸𑀚𑀸𑀦𑁄 𑀢𑀸𑀤𑀺𑀲𑀲𑁆𑀲 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀆𑀡𑀁 𑀦 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀺𑀗𑁆𑀕𑀸𑀮𑁄 𑀫𑀸𑀦𑀢𑁆𑀣𑀤𑁆𑀥𑁄 𑀳𑀼𑀢𑁆𑀯𑀸 ¶ ‘‘𑀅𑀜𑁆𑀜𑁂 𑀢𑀸𑀯 𑀲𑀻𑀳𑀸 𑀢𑀺𑀝𑁆𑀞𑀦𑁆𑀢𑀼, 𑀬𑀲𑁆𑀲𑀸𑀳𑀁 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄, 𑀢𑀜𑁆𑀜𑁂𑀯 𑀦𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀦𑀤𑀸𑀧𑁂𑀳𑀺, 𑀬𑀤𑀺 𑀲𑀓𑁆𑀓𑁄𑀲𑀻’’𑀢𑀺. 𑀲𑁄 𑀬𑀲𑁆𑀫𑀺𑀁 𑀲𑀻𑀳𑁂 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀲 ‘‘𑀦𑀤𑀸𑀳𑀻’’𑀢𑀺 𑀧𑀸𑀤𑁂𑀦 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑀻𑀳𑁄 𑀳𑀢𑁆𑀣𑀺𑀓𑀼𑀫𑁆𑀪𑁂 𑀫𑀼𑀔𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀳𑀢𑁆𑀣𑀻 𑀲𑀦𑁆𑀢𑀸𑀲𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑀁 𑀧𑀸𑀤𑀫𑀽𑀮𑁂 𑀧𑀸𑀢𑁂𑀢𑁆𑀯𑀸 𑀧𑀸𑀤𑁂𑀦𑀲𑁆𑀲 𑀲𑀻𑀲𑀁 𑀅𑀓𑁆𑀓𑀫𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀅𑀓𑀁𑀲𑀼, 𑀲𑀩𑁆𑀩𑀤𑀸𑀞𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄. 𑀢𑁂𑀧𑀺 𑀳𑀢𑁆𑀣𑀻 𑀲𑀻𑀳𑀦𑀸𑀤𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀅𑀜𑁆𑀜𑀫𑀜𑁆𑀜𑀁 𑀑𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀼, 𑀞𑀧𑁂𑀢𑁆𑀯𑀸 𑀲𑀻𑀳𑁂 𑀲𑁂𑀲𑀸𑀧𑀺 𑀫𑀺𑀕𑀲𑀽𑀓𑀭𑀸𑀤𑀬𑁄 𑀲𑀲𑀩𑀺𑀴𑀸𑀭𑀧𑀭𑀺𑀬𑁄𑀲𑀸𑀦𑀸 𑀲𑀩𑁆𑀩𑁂 ¶ 𑀘𑀢𑀼𑀧𑁆𑀧𑀸𑀤𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀻𑀳𑀸 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀁𑀲𑀼, 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀫𑀁𑀲𑀭𑀸𑀲𑀺 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀝𑁆𑀝𑀸𑀮𑀓𑀸 𑀑𑀢𑀭𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀲𑀩𑁆𑀩𑁂 𑀅𑀢𑁆𑀢𑀦𑁄 𑀓𑀡𑁆𑀡𑁂𑀲𑀼 𑀫𑀸𑀲𑀧𑀺𑀝𑁆𑀞𑀁 𑀅𑀧𑀦𑁂𑀢𑁆𑀯𑀸 𑀫𑀁𑀲𑀢𑁆𑀣𑀺𑀓𑀸 𑀫𑀁𑀲𑀁 𑀆𑀳𑀭𑀦𑁆𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀅𑀮𑁆𑀮𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀲𑁂𑀲𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀯𑀮𑁆𑀮𑀽𑀭𑀫𑀓𑀁𑀲𑀼. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀯𑀮𑁆𑀮𑀽𑀭𑀓𑀭𑀡𑀁 𑀉𑀤𑀧𑀸𑀤𑀻𑀢𑀺 𑀯𑀤𑀦𑁆𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀇𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋

𑁧𑁮𑁨.

‘‘𑀲𑀺𑀗𑁆𑀕𑀸𑀮𑁄 𑀫𑀸𑀦𑀢𑁆𑀣𑀤𑁆𑀥𑁄 𑀘, 𑀧𑀭𑀺𑀯𑀸𑀭𑁂𑀦 𑀅𑀢𑁆𑀣𑀺𑀓𑁄;

𑀧𑀸𑀧𑀼𑀡𑀺 𑀫𑀳𑀢𑀺𑀁 𑀪𑀽𑀫𑀺𑀁, 𑀭𑀸𑀚𑀸𑀲𑀺 𑀲𑀩𑁆𑀩𑀤𑀸𑀞𑀺𑀦𑀁.

𑁧𑁮𑁩.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀧𑀭𑀺𑀯𑀸𑀭𑀯𑀸;

𑀲𑁄 𑀳𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀺, 𑀲𑀺𑀗𑁆𑀕𑀸𑀮𑁄 𑀯𑀺𑀬 𑀤𑀸𑀞𑀺𑀦’’𑀦𑁆𑀢𑀺.

𑀢𑀢𑁆𑀣 𑀫𑀸𑀦𑀢𑁆𑀣𑀤𑁆𑀥𑁄𑀢𑀺 𑀧𑀭𑀺𑀯𑀸𑀭𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀫𑀸𑀦𑁂𑀦 𑀣𑀤𑁆𑀥𑁄. 𑀧𑀭𑀺𑀯𑀸𑀭𑁂𑀦 𑀅𑀢𑁆𑀣𑀺𑀓𑁄𑀢𑀺 𑀉𑀢𑁆𑀢𑀭𑀺𑀫𑁆𑀧𑀺 𑀧𑀭𑀺𑀯𑀸𑀭𑁂𑀦 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸. 𑀫𑀳𑀢𑀺𑀁 𑀪𑀽𑀫𑀺𑀦𑁆𑀢𑀺 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁. 𑀭𑀸𑀚𑀸𑀲𑀺 𑀲𑀩𑁆𑀩𑀤𑀸𑀞𑀺𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀤𑀸𑀞𑀻𑀦𑀁 ¶ 𑀭𑀸𑀚𑀸 𑀆𑀲𑀺. 𑀲𑁄 𑀳𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀻𑀢𑀺 𑀲𑁄 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀧𑀼𑀭𑀺𑀲𑁄 𑀢𑁂𑀲𑀼 𑀧𑀭𑀺𑀯𑀸𑀭𑁂𑀲𑀼 𑀫𑀳𑀸 𑀦𑀸𑀫 𑀳𑁄𑀢𑀺. 𑀲𑀺𑀗𑁆𑀕𑀸𑀮𑁄 𑀯𑀺𑀬 𑀤𑀸𑀞𑀺𑀦𑀦𑁆𑀢𑀺 𑀬𑀣𑀸 𑀲𑀺𑀗𑁆𑀕𑀸𑀮𑁄 𑀤𑀸𑀞𑀻𑀦𑀁 𑀫𑀳𑀸 𑀅𑀳𑁄𑀲𑀺, 𑀏𑀯𑀁 𑀫𑀳𑀸 𑀳𑁄𑀢𑀺, 𑀅𑀣 𑀲𑁄 𑀲𑀺𑀗𑁆𑀕𑀸𑀮𑁄 𑀯𑀺𑀬 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑀁 𑀦𑀺𑀲𑁆𑀲𑀸𑀬 𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀻𑀢𑀺.

‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀩𑁆𑀩𑀤𑀸𑀞𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁪𑁨] 𑁨. 𑀲𑀼𑀦𑀔𑀚𑀸𑀢𑀓𑀯𑀡𑁆𑀡𑀦𑀸

𑀩𑀸𑀮𑁄 𑀯𑀢𑀸𑀬𑀁 𑀲𑀼𑀦𑀔𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀫𑁆𑀩𑀡𑀓𑁄𑀝𑁆𑀞𑀓𑁂 𑀆𑀲𑀦𑀲𑀸𑀮𑀸𑀬 𑀪𑀢𑁆𑀢𑀪𑀼𑀜𑁆𑀚𑀦𑀲𑀼𑀦𑀔𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀓𑀺𑀭 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀸𑀦𑀻𑀬𑀳𑀸𑀭𑀓𑀸 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑁄𑀲𑁂𑀲𑀼𑀁. 𑀲𑁄 𑀅𑀧𑀭𑀪𑀸𑀕𑁂 𑀢𑀢𑁆𑀣 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀣𑀽𑀮𑀲𑀭𑀻𑀭𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀕𑀸𑀫𑀯𑀸𑀲𑀻 ¶ 𑀧𑀼𑀭𑀺𑀲𑁄 𑀢𑀁 𑀞𑀸𑀦𑀁 𑀧𑀢𑁆𑀢𑁄 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀧𑀸𑀦𑀻𑀬𑀳𑀸𑀭𑀓𑀸𑀦𑀁 𑀉𑀢𑁆𑀢𑀭𑀺𑀲𑀸𑀝𑀓𑀜𑁆𑀘 𑀓𑀳𑀸𑀧𑀡𑀜𑁆𑀘 𑀤𑀢𑁆𑀯𑀸 𑀕𑀤𑁆𑀤𑀽𑀮𑁂𑀦 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀲𑁄 𑀕𑀳𑁂𑀢𑁆𑀯𑀸 𑀦𑀻𑀬𑀫𑀸𑀦𑁄 𑀦 𑀯𑀲𑁆𑀲𑀺, 𑀤𑀺𑀦𑁆𑀦𑀁 𑀤𑀺𑀦𑁆𑀦𑀁 𑀔𑀸𑀤𑀦𑁆𑀢𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀕𑀫𑀸𑀲𑀺. 𑀅𑀣 𑀲𑁄 𑀧𑀼𑀭𑀺𑀲𑁄 ‘‘𑀅𑀬𑀁 𑀇𑀤𑀸𑀦𑀺 𑀫𑀁 𑀧𑀺𑀬𑀸𑀬𑀢𑀻’’𑀢𑀺 𑀕𑀤𑁆𑀤𑀽𑀮𑀁 𑀫𑁄𑀘𑁂𑀲𑀺, 𑀲𑁄 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁄 𑀏𑀓𑀯𑁂𑀕𑁂𑀦 ¶ 𑀆𑀲𑀦𑀲𑀸𑀮𑀫𑁂𑀯 𑀕𑀢𑁄. 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀕𑀢𑀓𑀸𑀭𑀡𑀁 𑀚𑀸𑀦𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀆𑀲𑀦𑀲𑀸𑀮𑀸𑀬 𑀲𑀼𑀦𑀔𑁄 𑀩𑀦𑁆𑀥𑀦𑀫𑁄𑀓𑁆𑀔𑀓𑀼𑀲𑀮𑁄 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁄𑀯 𑀧𑀼𑀦 𑀆𑀕𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑁄 𑀲𑀼𑀦𑀔𑁄 𑀇𑀤𑀸𑀦𑁂𑀯 𑀩𑀦𑁆𑀥𑀦𑀫𑁄𑀓𑁆𑀔𑀓𑀼𑀲𑀮𑁄, 𑀧𑀼𑀩𑁆𑀩𑁂𑀧𑀺 𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀅𑀕𑁆𑀕𑀳𑁂𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀏𑀓𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀲𑀼𑀦𑀔𑁄 𑀅𑀳𑁄𑀲𑀺, 𑀲𑁄 𑀧𑀺𑀡𑁆𑀟𑀺𑀪𑀢𑁆𑀢𑀁 𑀮𑀪𑀦𑁆𑀢𑁄 𑀣𑀽𑀮𑀲𑀭𑀻𑀭𑁄 ¶ 𑀚𑀸𑀢𑁄. 𑀅𑀣𑁂𑀓𑁄 𑀕𑀸𑀫𑀯𑀸𑀲𑀻 𑀩𑀸𑀭𑀸𑀡𑀲𑀺𑀁 𑀆𑀕𑀢𑁄 𑀢𑀁 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀉𑀢𑁆𑀢𑀭𑀺𑀲𑀸𑀝𑀓𑀜𑁆𑀘 𑀓𑀳𑀸𑀧𑀡𑀜𑁆𑀘 𑀤𑀢𑁆𑀯𑀸 𑀲𑀼𑀦𑀔𑀁 𑀕𑀳𑁂𑀢𑁆𑀯𑀸 𑀘𑀫𑁆𑀫𑀬𑁄𑀢𑁆𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀬𑁄𑀢𑁆𑀢𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀝𑀯𑀺𑀫𑀼𑀔𑁂 𑀏𑀓𑀁 𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀦𑀔𑀁 𑀩𑀦𑁆𑀥𑀺𑀢𑁆𑀯𑀸 𑀨𑀮𑀓𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀝𑀯𑀺𑀁 𑀧𑀝𑀺𑀧𑀦𑁆𑀦𑁄 𑀢𑀁 𑀲𑀼𑀦𑀔𑀁 𑀬𑁄𑀢𑁆𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀁 𑀤𑀺𑀲𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁮𑁪.

‘‘𑀩𑀸𑀮𑁄 𑀯𑀢𑀸𑀬𑀁 𑀲𑀼𑀦𑀔𑁄, 𑀬𑁄 𑀯𑀭𑀢𑁆𑀢𑀁 𑀦 𑀔𑀸𑀤𑀢𑀺;

𑀩𑀦𑁆𑀥𑀦𑀸 𑀘 𑀧𑀫𑀼𑀜𑁆𑀘𑁂𑀬𑁆𑀬, 𑀅𑀲𑀺𑀢𑁄 𑀘 𑀖𑀭𑀁 𑀯𑀚𑁂’’𑀢𑀺.

𑀢𑀢𑁆𑀣 𑀧𑀫𑀼𑀜𑁆𑀘𑁂𑀬𑁆𑀬𑀸𑀢𑀺 𑀧𑀫𑁄𑀘𑁂𑀬𑁆𑀬, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀲𑀺𑀢𑁄 𑀘 𑀖𑀭𑀁 𑀯𑀚𑁂𑀢𑀺 𑀅𑀲𑀺𑀢𑁄 𑀲𑀼𑀳𑀺𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑁂𑀬𑁆𑀬.

𑀢𑀁 𑀲𑀼𑀢𑁆𑀯𑀸 𑀲𑀼𑀦𑀔𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁮𑁫.

‘‘𑀅𑀝𑁆𑀞𑀺𑀢𑀁 𑀫𑁂 𑀫𑀦𑀲𑁆𑀫𑀺𑀁 𑀫𑁂, 𑀅𑀣𑁄 𑀫𑁂 𑀳𑀤𑀬𑁂 𑀓𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀬𑀸𑀯 𑀧𑀲𑁆𑀲𑀼𑀧𑀢𑀽 𑀚𑀦𑁄’’𑀢𑀺.

𑀢𑀢𑁆𑀣 𑀅𑀝𑁆𑀞𑀺𑀢𑀁 𑀫𑁂 𑀫𑀦𑀲𑁆𑀫𑀺𑀁 𑀫𑁂𑀢𑀺 𑀬𑀁 𑀢𑀼𑀫𑁆𑀳𑁂 𑀓𑀣𑁂𑀣, 𑀢𑀁 𑀫𑀬𑀸 𑀅𑀥𑀺𑀝𑁆𑀞𑀺𑀢𑀫𑁂𑀯, 𑀫𑀦𑀲𑁆𑀫𑀺𑀁𑀬𑁂𑀯 𑀫𑁂 𑀏𑀢𑀁. 𑀅𑀣𑁄 𑀫𑁂 𑀳𑀤𑀬𑁂 𑀓𑀢𑀦𑁆𑀢𑀺 𑀅𑀣 𑀘 𑀧𑀦 𑀫𑁂 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀳𑀤𑀬𑁂 𑀓𑀢𑀫𑁂𑀯. 𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀻𑀢𑀺 ¶ 𑀓𑀸𑀮𑀁 𑀧𑀝𑀺𑀫𑀸𑀦𑁂𑀫𑀺. 𑀬𑀸𑀯 𑀧𑀲𑁆𑀲𑀼𑀧𑀢𑀽 𑀚𑀦𑁄𑀢𑀺 𑀬𑀸𑀯𑀸𑀬𑀁 𑀫𑀳𑀸𑀚𑀦𑁄 𑀧𑀲𑀼𑀧𑀢𑀼 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀼, 𑀢𑀸𑀯𑀸𑀳𑀁 𑀓𑀸𑀮𑀁 𑀧𑀝𑀺𑀫𑀸𑀦𑁂𑀫𑀺 ¶ . 𑀇𑀢𑀭𑀣𑀸 𑀳𑀺 ‘‘𑀅𑀬𑀁 𑀲𑀼𑀦𑀔𑁄 𑀧𑀮𑀸𑀬𑀢𑀻’’𑀢𑀺 𑀭𑀯𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀭𑀢𑁆𑀢𑀺𑀪𑀸𑀕𑁂 𑀲𑀩𑁆𑀩𑁂𑀲𑀁 𑀲𑀼𑀢𑁆𑀢𑀓𑀸𑀮𑁂 𑀘𑀫𑁆𑀫𑀬𑁄𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀫𑀳𑀸𑀚𑀦𑁂 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁂 𑀬𑁄𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀲𑀼𑀳𑀺𑀢𑁄 𑀳𑀼𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀸𑀦𑀁 𑀖𑀭𑀫𑁂𑀯 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀼𑀦𑀔𑁄𑀯 𑀏𑀢𑀭𑀳𑀺 𑀲𑀼𑀦𑀔𑁄, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀦𑀔𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁪𑁩] 𑁩. 𑀕𑀼𑀢𑁆𑀢𑀺𑀮𑀚𑀸𑀢𑀓𑀯𑀡𑁆𑀡𑀦𑀸

𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀪𑀺𑀓𑁆𑀔𑀽 𑀤𑁂𑀯𑀤𑀢𑁆𑀢𑀁 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀼𑀬𑁆𑀳𑀁 𑀆𑀘𑀭𑀺𑀬𑁄, 𑀢𑁆𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀦𑀺𑀲𑁆𑀲𑀸𑀬 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀡𑁆𑀳𑀺, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀲𑀺, 𑀆𑀘𑀭𑀺𑀬𑀲𑁆𑀲 𑀦𑀸𑀫 𑀧𑀝𑀺𑀲𑀢𑁆𑀢𑀼𑀦𑀸 𑀪𑀯𑀺𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺. 𑀤𑁂𑀯𑀤𑀢𑁆𑀢𑁄 ‘‘𑀓𑀺𑀁 𑀧𑀦 𑀫𑁂, 𑀆𑀯𑀼𑀲𑁄, 𑀲𑀫𑀡𑁄 𑀕𑁄𑀢𑀫𑁄 𑀆𑀘𑀭𑀺𑀬𑁄, 𑀦𑀦𑀼 𑀫𑀬𑀸 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑀺𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑀺𑀢𑀸𑀦𑀻’’𑀢𑀺 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀫 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀥𑀩𑁆𑀩𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀕𑀼𑀢𑁆𑀢𑀺𑀮𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀕𑀦𑁆𑀥𑀩𑁆𑀩𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀕𑀼𑀢𑁆𑀢𑀺𑀮𑀕𑀦𑁆𑀥𑀩𑁆𑀩𑁄 𑀦𑀸𑀫 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀕𑀦𑁆𑀥𑀩𑁆𑀩𑁄 𑀅𑀳𑁄𑀲𑀺. 𑀲𑁄 𑀤𑀸𑀭𑀸𑀪𑀭𑀡𑀁 𑀅𑀓𑀢𑁆𑀯𑀸 𑀅𑀦𑁆𑀥𑁂 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀯𑀡𑀺𑀚𑁆𑀚𑀸𑀬 𑀉𑀚𑁆𑀚𑁂𑀦𑀺𑀦𑀕𑀭𑀁 𑀕𑀦𑁆𑀢𑁆𑀯𑀸 ¶ 𑀉𑀲𑁆𑀲𑀯𑁂 𑀖𑀼𑀝𑁆𑀞𑁂 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘 𑀔𑀚𑁆𑀚𑀪𑁄𑀚𑁆𑀚𑀸𑀤𑀻𑀦𑀺 𑀘 𑀆𑀤𑀸𑀬 𑀓𑀻𑀴𑀦𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀯𑁂𑀢𑀦𑀁 𑀤𑀢𑁆𑀯𑀸 𑀏𑀓𑀁 𑀕𑀦𑁆𑀥𑀩𑁆𑀩𑀁 𑀆𑀦𑁂𑀣𑀸’’𑀢𑀺 𑀆𑀳𑀁𑀲𑀼. 𑀢𑁂𑀦 𑀘 𑀲𑀫𑀬𑁂𑀦 ¶ 𑀉𑀚𑁆𑀚𑁂𑀦𑀺𑀬𑀁 𑀫𑀽𑀲𑀺𑀮𑁄 𑀦𑀸𑀫 𑀚𑁂𑀝𑁆𑀞𑀕𑀦𑁆𑀥𑀩𑁆𑀩𑁄 ¶ 𑀳𑁄𑀢𑀺, 𑀢𑁂 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀦𑁆𑀥𑀩𑁆𑀩𑀁 𑀓𑀸𑀭𑁂𑀲𑀼𑀁.

𑀫𑀽𑀲𑀺𑀮𑁄 𑀯𑀻𑀡𑀁 𑀯𑀸𑀤𑀦𑁆𑀢𑁄 𑀯𑀻𑀡𑀁 𑀉𑀢𑁆𑀢𑀫𑀫𑀼𑀘𑁆𑀙𑀦𑀸𑀬 𑀫𑀼𑀘𑁆𑀙𑀺𑀢𑁆𑀯𑀸 𑀯𑀸𑀤𑁂𑀲𑀺. 𑀢𑁂𑀲𑀁 𑀕𑀼𑀢𑁆𑀢𑀺𑀮𑀕𑀦𑁆𑀥𑀩𑁆𑀩𑀲𑁆𑀲 𑀕𑀦𑁆𑀥𑀩𑁆𑀩𑁂 𑀚𑀸𑀢𑀧𑀭𑀺𑀘𑀬𑀸𑀦𑀁 𑀢𑀲𑁆𑀲 𑀕𑀦𑁆𑀥𑀩𑁆𑀩𑀁 𑀓𑀺𑀮𑀜𑁆𑀚𑀓𑀡𑁆𑀟𑀽𑀯𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺, 𑀏𑀓𑁄𑀧𑀺 𑀧𑀳𑀝𑁆𑀞𑀸𑀓𑀸𑀭𑀁 𑀦 𑀤𑀲𑁆𑀲𑁂𑀲𑀺. 𑀫𑀽𑀲𑀺𑀮𑁄 𑀢𑁂𑀲𑀼 𑀢𑀼𑀝𑁆𑀞𑀸𑀓𑀸𑀭𑀁 𑀅𑀤𑀲𑁆𑀲𑁂𑀦𑁆𑀢𑁂𑀲𑀼 ‘‘𑀅𑀢𑀺𑀔𑀭𑀁 𑀓𑀢𑁆𑀯𑀸 𑀯𑀸𑀤𑁂𑀫𑀺 𑀫𑀜𑁆𑀜𑁂’’𑀢𑀺 𑀫𑀚𑁆𑀛𑀺𑀫𑀫𑀼𑀘𑁆𑀙𑀦𑀸𑀬 𑀫𑀼𑀘𑁆𑀙𑀺𑀢𑁆𑀯𑀸 𑀫𑀚𑁆𑀛𑀺𑀫𑀲𑀭𑁂𑀦 𑀯𑀸𑀤𑁂𑀲𑀺, 𑀢𑁂 𑀢𑀢𑁆𑀣𑀧𑀺 𑀫𑀚𑁆𑀛𑀢𑁆𑀢𑀸𑀯 𑀅𑀳𑁂𑀲𑀼𑀁. 𑀅𑀣 𑀲𑁄 ‘‘𑀇𑀫𑁂 𑀦 𑀓𑀺𑀜𑁆𑀘𑀺 𑀚𑀸𑀦𑀦𑁆𑀢𑀺 𑀫𑀜𑁆𑀜𑁂’’𑀢𑀺 𑀲𑀬𑀫𑁆𑀧𑀺 𑀅𑀚𑀸𑀦𑀦𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀦𑁆𑀢𑀺𑀬𑁄 𑀲𑀺𑀣𑀺𑀮𑁂 𑀯𑀸𑀤𑁂𑀲𑀺, 𑀢𑁂 𑀢𑀢𑁆𑀣𑀧𑀺 𑀦 𑀓𑀺𑀜𑁆𑀘𑀺 𑀆𑀳𑀁𑀲𑀼. 𑀅𑀣 𑀦𑁂 𑀫𑀽𑀲𑀺𑀮𑁄 ‘‘𑀅𑀫𑁆𑀪𑁄 𑀯𑀸𑀡𑀺𑀚𑀸, 𑀓𑀺𑀁 𑀦𑀼 𑀔𑁄 𑀫𑀬𑀺 𑀯𑀻𑀡𑀁 𑀯𑀸𑀤𑁂𑀦𑁆𑀢𑁂 𑀢𑀼𑀫𑁆𑀳𑁂 𑀦 𑀢𑀼𑀲𑁆𑀲𑀣𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀯𑀻𑀡𑀁 𑀯𑀸𑀤𑁂𑀲𑀺, 𑀫𑀬𑀜𑁆𑀳𑀺 ‘𑀅𑀬𑀁 𑀯𑀻𑀡𑀁 𑀫𑀼𑀘𑁆𑀙𑁂𑀢𑀻’𑀢𑀺 𑀲𑀜𑁆𑀜𑀁 𑀅𑀓𑀭𑀺𑀫𑁆𑀳𑀸’’𑀢𑀺. ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂 𑀫𑀬𑀸 𑀉𑀢𑁆𑀢𑀭𑀺𑀢𑀭𑀁 𑀆𑀘𑀭𑀺𑀬𑀁 𑀚𑀸𑀦𑀸𑀣, 𑀉𑀤𑀸𑀳𑀼 𑀅𑀢𑁆𑀢𑀦𑁄 𑀅𑀚𑀸𑀦𑀦𑀪𑀸𑀯𑁂𑀦 𑀦 𑀢𑀼𑀲𑁆𑀲𑀣𑀸’’𑀢𑀺. 𑀯𑀸𑀡𑀺𑀚𑀸 ‘‘𑀩𑀸𑀭𑀸𑀡𑀲𑀺𑀬𑀁 𑀕𑀼𑀢𑁆𑀢𑀺𑀮𑀕𑀦𑁆𑀥𑀩𑁆𑀩𑀲𑁆𑀲 𑀯𑀻𑀡𑀸𑀲𑀤𑁆𑀤𑀁 𑀲𑀼𑀢𑀧𑀼𑀩𑁆𑀩𑀸𑀦𑀁 𑀢𑀯 𑀯𑀻𑀡𑀸𑀲𑀤𑁆𑀤𑁄 𑀇𑀢𑁆𑀣𑀻𑀦𑀁 𑀤𑀸𑀭𑀓𑁂 𑀢𑁄𑀲𑀸𑀧𑀦𑀲𑀤𑁆𑀤𑁄 𑀯𑀺𑀬 𑀳𑁄𑀢𑀻’’𑀢𑀺 𑀆𑀳𑀁𑀲𑀼. ‘‘𑀢𑁂𑀦 𑀳𑀺, 𑀳𑀦𑁆𑀤, 𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦𑀧𑀭𑀺𑀩𑁆𑀩𑀬𑀁 𑀧𑀝𑀺𑀕𑁆𑀕𑀡𑁆𑀳𑀣, 𑀦 𑀫𑀬𑁆𑀳𑀁 𑀏𑀢𑁂𑀦𑀢𑁆𑀣𑁄, 𑀅𑀧𑀺𑀘 𑀔𑁄 𑀧𑀦 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑀸 𑀫𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀢𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 ‘‘𑀏𑀢𑀁 𑀕𑀼𑀢𑁆𑀢𑀺𑀮𑀲𑁆𑀲 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑀓𑀲𑀓𑀦𑀺𑀯𑁂𑀲𑀦𑀁 𑀅𑀕𑀫𑀺𑀁𑀲𑀼.

𑀫𑀽𑀲𑀺𑀮𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀺𑀯𑀻𑀡𑀁 𑀤𑀺𑀲𑁆𑀯𑀸 𑀕𑀳𑁂𑀢𑁆𑀯𑀸 𑀯𑀸𑀤𑁂𑀲𑀺, 𑀅𑀣 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀦𑁆𑀥𑀪𑀸𑀯𑁂𑀦 𑀢𑀁 𑀅𑀧𑀲𑁆𑀲𑀦𑁆𑀢𑀸 ¶ ‘‘𑀫𑀽𑀲𑀺𑀓𑀸 𑀫𑀜𑁆𑀜𑁂 𑀯𑀻𑀡𑀁 𑀔𑀸𑀤𑀦𑁆𑀢𑀻’’𑀢𑀺 𑀲𑀜𑁆𑀜𑀸𑀬 ‘‘𑀲𑀼𑀲𑀽’’𑀢𑀺 𑀆𑀳𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀽𑀲𑀺𑀮𑁄 𑀯𑀻𑀡𑀁 𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑀼𑀁 𑀉𑀚𑁆𑀚𑁂𑀦𑀺𑀢𑁄 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀼𑀢𑁆𑀢𑁂 ‘‘𑀓𑀳𑀁 𑀆𑀘𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀺𑀧𑁆𑀧𑀯𑀼𑀢𑁆𑀣𑁄, 𑀢𑀸𑀢, 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀕𑀢𑀁 𑀤𑀺𑀲𑁆𑀯𑀸 ¶ 𑀢𑁂𑀦 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀅𑀢𑁆𑀢𑀦𑁄 𑀆𑀕𑀢𑀓𑀸𑀭𑀡𑀁 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑁄, 𑀲𑁄 𑀢𑀲𑁆𑀲 𑀅𑀲𑀧𑁆𑀧𑀼𑀭𑀺𑀲𑀪𑀸𑀯𑀁 𑀜𑀢𑁆𑀯𑀸 ‘‘𑀕𑀘𑁆𑀙 𑀢𑀸𑀢, 𑀦𑀢𑁆𑀣𑀺 𑀢𑀯 𑀲𑀺𑀧𑁆𑀧’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑁄 𑀢𑁂 𑀆𑀭𑀸𑀥𑁂𑀢𑁆𑀯𑀸 ‘‘𑀲𑀺𑀧𑁆𑀧𑀁 𑀫𑁂 𑀤𑀸𑀧𑁂𑀣𑀸’’𑀢𑀺 𑀬𑀸𑀘𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀢𑁂 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀺𑀧𑁆𑀧𑀁 𑀅𑀤𑀸𑀲𑀺. 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦𑁂𑀯 𑀲𑀤𑁆𑀥𑀺𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀘𑁆𑀙𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲, 𑀆𑀘𑀭𑀺𑀬𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑁆𑀳𑀁 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 ¶ 𑀭𑀜𑁆𑀜𑁄 𑀯𑀺𑀲𑁆𑀲𑀸𑀲𑀺𑀓𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀚𑀸𑀦𑀦𑀦𑀺𑀬𑀸𑀫𑁂𑀦 𑀲𑀩𑁆𑀩𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 ‘‘𑀦𑀺𑀝𑁆𑀞𑀺𑀢𑀁 𑀢𑁂, 𑀢𑀸𑀢, 𑀲𑀺𑀧𑁆𑀧’’𑀦𑁆𑀢𑀺 𑀆𑀳.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀲𑀺𑀧𑁆𑀧𑀁 𑀧𑀕𑀼𑀡𑀁, 𑀇𑀤𑀜𑁆𑀘 𑀩𑀸𑀭𑀸𑀡𑀲𑀺𑀦𑀕𑀭𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀦𑀕𑀭𑀁, 𑀆𑀘𑀭𑀺𑀬𑁄𑀧𑀺 𑀫𑀳𑀮𑁆𑀮𑀓𑁄, 𑀇𑀥𑁂𑀯 𑀫𑀬𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀆𑀘𑀭𑀺𑀬𑀁 𑀆𑀳 𑁋 ‘‘𑀆𑀘𑀭𑀺𑀬 𑀅𑀳𑀁 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀆𑀘𑀭𑀺𑀬𑁄 ‘‘𑀲𑀸𑀥𑀼, 𑀢𑀸𑀢, 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 𑀤𑁂𑀯𑀁 𑀉𑀧𑀝𑁆𑀞𑀸𑀢𑀼𑀁 𑀇𑀘𑁆𑀙𑀢𑀺, 𑀤𑁂𑀬𑁆𑀬𑀥𑀫𑁆𑀫𑀫𑀲𑁆𑀲 𑀚𑀸𑀦𑀸𑀣𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀭𑀜𑁆𑀜𑀸 ‘‘𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑀢𑁄 𑀉𑀧𑀟𑁆𑀠𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀫𑀽𑀲𑀺𑀮𑀲𑁆𑀲 𑀆𑀭𑁄𑀘𑁂𑀲𑀺. 𑀫𑀽𑀲𑀺𑀮𑁄 ‘‘𑀅𑀳𑀁 𑀢𑀼𑀫𑁆𑀳𑁂𑀳𑀺 𑀲𑀫𑀓𑀜𑁆𑀜𑁂𑀯 𑀮𑀪𑀦𑁆𑀢𑁄 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀦 𑀅𑀮𑀪𑀦𑁆𑀢𑁄’’𑀢𑀺 𑀆𑀳 ¶ . ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀦𑀦𑀼 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀚𑀸𑀦𑀦𑀲𑀺𑀧𑁆𑀧𑀁 𑀲𑀩𑁆𑀩𑀁 𑀚𑀸𑀦𑀸𑀫𑀻’’𑀢𑀺? ‘‘𑀆𑀫, 𑀚𑀸𑀦𑀸𑀲𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀫𑀬𑁆𑀳𑀁 𑀉𑀧𑀟𑁆𑀠𑀁 𑀤𑁂𑀢𑀻’’𑀢𑀺? 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀬𑀤𑀺 𑀏𑀯𑀁 𑀢𑀼𑀫𑁆𑀳𑁂𑀳𑀺 𑀲𑀫𑀓𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀲𑀫𑀓𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀯𑀘𑀦𑀁 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 ‘‘𑀲𑀸𑀥𑀼 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀭𑀜𑁆𑀜𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑀸𑀥𑀼 𑀤𑀲𑁆𑀲𑁂𑀢𑀼, 𑀓𑀢𑀭𑀤𑀺𑀯𑀲𑀁 𑀲𑀸𑀓𑀘𑁆𑀙𑀸 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑁄𑀢𑀼, 𑀫𑀳𑀸𑀭𑀸𑀚𑀸’’𑀢𑀺 𑀆𑀳.

𑀭𑀸𑀚𑀸 𑀫𑀽𑀲𑀺𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀯𑀺𑀕𑁆𑀕𑀳𑁄 𑀦𑀸𑀫 𑀦 𑀯𑀝𑁆𑀝𑀢𑀺, 𑀫𑀸 𑀓𑀭𑀻’’𑀢𑀺 𑀯𑀸𑀭𑀺𑀬𑀫𑀸𑀦𑁄𑀧𑀺 ‘‘𑀅𑀮𑀁, 𑀫𑀳𑀸𑀭𑀸𑀚, 𑀳𑁄𑀢𑀼𑀬𑁂𑀯 𑀫𑁂 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀓𑀘𑁆𑀙𑀸, 𑀓𑀢𑀭𑀲𑁆𑀲 ¶ 𑀚𑀸𑀦𑀺𑀪𑀸𑀯𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀇𑀢𑁄 𑀓𑀺𑀭 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀘𑀭𑀺𑀬𑀕𑀼𑀢𑁆𑀢𑀺𑀮𑁄 𑀘 𑀅𑀦𑁆𑀢𑁂𑀯𑀸𑀲𑀺𑀓𑀫𑀽𑀲𑀺𑀮𑁄 𑀘 𑀭𑀸𑀚𑀤𑁆𑀯𑀸𑀭𑁂 𑀅𑀜𑁆𑀜𑀫𑀜𑁆𑀜𑀁 𑀲𑀸𑀓𑀘𑁆𑀙𑀁 𑀓𑀢𑁆𑀯𑀸 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀦𑀸𑀕𑀭𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀺𑀧𑁆𑀧𑀁 𑀧𑀲𑁆𑀲𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀽𑀲𑀺𑀮𑁄 𑀤𑀳𑀭𑁄 𑀢𑀭𑀼𑀡𑁄, 𑀅𑀳𑀁 𑀫𑀳𑀮𑁆𑀮𑀓𑁄 𑀧𑀭𑀺𑀳𑀻𑀦𑀣𑀸𑀫𑁄, 𑀫𑀳𑀮𑁆𑀮𑀓𑀲𑁆𑀲 𑀓𑀺𑀭𑀺𑀬𑀸 𑀦𑀸𑀫 𑀦 𑀲𑀫𑁆𑀧𑀚𑁆𑀚𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑁂 𑀦𑀸𑀫 𑀧𑀭𑀸𑀚𑀺𑀢𑁂𑀧𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀦 𑀚𑀬𑁂 𑀲𑀢𑀺 𑀧𑀢𑁆𑀢𑀩𑁆𑀩𑀮𑀚𑁆𑀚𑀢𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀭𑀡𑀁 𑀯𑀭𑀢𑀭’’𑀦𑁆𑀢𑀺. 𑀲𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀭𑀡𑀪𑀬𑁂𑀦 𑀦𑀺𑀯𑀢𑁆𑀢𑀢𑀺, 𑀮𑀚𑁆𑀚𑀸𑀪𑀬𑁂𑀦 𑀕𑀘𑁆𑀙𑀢𑀺. 𑀏𑀯𑀫𑀲𑁆𑀲 𑀕𑀫𑀦𑀸𑀕𑀫𑀦𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀙 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀢𑀺𑀡𑀸𑀦𑀺 𑀫𑀢𑀸𑀦𑀺, 𑀚𑀗𑁆𑀖𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀆𑀯𑀚𑁆𑀚𑀫𑀸𑀦𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀕𑀼𑀢𑁆𑀢𑀺𑀮𑀕𑀦𑁆𑀥𑀩𑁆𑀩𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 ¶ 𑀪𑀬𑁂𑀦 𑀅𑀭𑀜𑁆𑀜𑁂 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺 ¶ , 𑀏𑀢𑀲𑁆𑀲 𑀫𑀬𑀸 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 ‘‘𑀆𑀘𑀭𑀺𑀬, 𑀓𑀲𑁆𑀫𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀳𑀁 𑀔𑁄, 𑀤𑁂𑀯𑀭𑀸𑀚, 𑀅𑀦𑁆𑀢𑁂𑀯𑀸𑀲𑀺𑀓𑀢𑁄 𑀧𑀭𑀸𑀚𑀬𑀪𑀬𑁂𑀦 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁮𑁬.

‘‘𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀁, 𑀭𑀸𑀫𑀡𑁂𑀬𑁆𑀬𑀁 𑀅𑀯𑀸𑀘𑀬𑀺𑀁;

𑀲𑁄 𑀫𑀁 𑀭𑀗𑁆𑀕𑀫𑁆𑀳𑀺 𑀅𑀯𑁆𑀳𑁂𑀢𑀺, 𑀲𑀭𑀡𑀁 𑀫𑁂 𑀳𑁄𑀢𑀺 𑀓𑁄𑀲𑀺𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁, 𑀤𑁂𑀯𑀭𑀸𑀚, 𑀫𑀽𑀲𑀺𑀮𑀁 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑀁 𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀁 𑀭𑀸𑀫𑀡𑁂𑀬𑁆𑀬𑀁 𑀯𑀻𑀡𑀁 𑀅𑀢𑁆𑀢𑀦𑁄 𑀚𑀸𑀦𑀦𑀦𑀺𑀬𑀸𑀫𑁂𑀦 𑀲𑀺𑀓𑁆𑀔𑀸𑀧𑁂𑀲𑀺𑀁, 𑀲𑁄 𑀫𑀁 𑀇𑀤𑀸𑀦𑀺 𑀭𑀗𑁆𑀕𑀫𑀡𑁆𑀟𑀮𑁂 𑀧𑀓𑁆𑀓𑁄𑀲𑀢𑀺, 𑀢𑀲𑁆𑀲 𑀫𑁂 𑀢𑁆𑀯𑀁, 𑀓𑁄𑀲𑀺𑀬𑀕𑁄𑀢𑁆𑀢, 𑀲𑀭𑀡𑀁 𑀳𑁄𑀳𑀻𑀢𑀺.

𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀅𑀳𑀁 𑀢𑁂 𑀢𑀸𑀡𑀜𑁆𑀘 𑀮𑁂𑀡𑀜𑁆𑀘𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁮𑁭.

‘‘𑀅𑀳𑀁 𑀢𑀁 𑀲𑀭𑀡𑀁 𑀲𑀫𑁆𑀫, 𑀅𑀳𑀫𑀸𑀘𑀭𑀺𑀬𑀧𑀽𑀚𑀓𑁄;

𑀦 𑀢𑀁 𑀚𑀬𑀺𑀲𑁆𑀲𑀢𑀺 𑀲𑀺𑀲𑁆𑀲𑁄, 𑀲𑀺𑀲𑁆𑀲𑀫𑀸𑀘𑀭𑀺𑀬 𑀚𑁂𑀲𑁆𑀲𑀲𑀻’’𑀢𑀺.

𑀢𑀢𑁆𑀣 ¶ 𑀅𑀳𑀁 𑀢𑀁 𑀲𑀭𑀡𑀦𑁆𑀢𑀺 𑀅𑀳𑀁 𑀲𑀭𑀡𑀁 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀢𑀁 𑀢𑀸𑀬𑀺𑀲𑁆𑀲𑀸𑀫𑀺. 𑀲𑀫𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀲𑀺𑀲𑁆𑀲𑀫𑀸𑀘𑀭𑀺𑀬, 𑀚𑁂𑀲𑁆𑀲𑀲𑀻𑀢𑀺, 𑀆𑀘𑀭𑀺𑀬, 𑀢𑁆𑀯𑀁 𑀯𑀻𑀡𑀁 𑀯𑀸𑀤𑀬𑀫𑀸𑀦𑁄 𑀲𑀺𑀲𑁆𑀲𑀁 𑀚𑀺𑀦𑀺𑀲𑁆𑀲𑀲𑀺. 𑀅𑀧𑀺𑀘 𑀢𑁆𑀯𑀁 𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀏𑀓𑀁 𑀢𑀦𑁆𑀢𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀙 𑀯𑀸𑀤𑁂𑀬𑁆𑀬𑀸𑀲𑀺, 𑀯𑀻𑀡𑀸𑀬 𑀢𑁂 𑀧𑀓𑀢𑀺𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀺. 𑀫𑀽𑀲𑀺𑀮𑁄𑀧𑀺 𑀢𑀦𑁆𑀢𑀺𑀁 𑀙𑀺𑀦𑁆𑀤𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀯𑀻𑀡𑀸𑀬 𑀲𑀤𑁆𑀤𑁄 𑀦 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀧𑀭𑀸𑀚𑀬𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀅𑀣𑀲𑁆𑀲 𑀧𑀭𑀸𑀚𑀬𑀪𑀸𑀯𑀁 𑀜𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀘𑀢𑀼𑀢𑁆𑀣𑀫𑁆𑀧𑀺 𑀧𑀜𑁆𑀘𑀫𑀫𑁆𑀧𑀺 𑀲𑀢𑁆𑀢𑀫𑀫𑁆𑀧𑀺 𑀢𑀦𑁆𑀢𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀤𑁆𑀥𑀤𑀡𑁆𑀟𑀓𑀫𑁂𑀯 𑀯𑀸𑀤𑁂𑀬𑁆𑀬𑀸𑀲𑀺, 𑀙𑀺𑀦𑁆𑀦𑀢𑀦𑁆𑀢𑀺𑀓𑁄𑀝𑀻𑀳𑀺 𑀲𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀮𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀦𑀕𑀭𑀁 ¶ 𑀙𑀸𑀤𑁂𑀢𑁆𑀯𑀸 𑀞𑀲𑁆𑀲𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀲𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀺𑀲𑁆𑀲𑁄 𑀧𑀸𑀲𑀓𑀖𑀝𑀺𑀓𑀸 𑀤𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀯𑀻𑀡𑀸𑀲𑀤𑁆𑀤𑁂𑀦𑁂𑀯 𑀧𑀦 𑀲𑀓𑀮𑀦𑀕𑀭𑁂 𑀙𑀸𑀤𑀺𑀢𑁂 𑀇𑀢𑁄 𑀏𑀓𑀁 𑀧𑀸𑀲𑀓𑀖𑀝𑀺𑀓𑀁 𑀆𑀓𑀸𑀲𑁂 𑀔𑀺𑀧𑁂𑀬𑁆𑀬𑀸𑀲𑀺, 𑀅𑀣 𑀢𑁂 𑀧𑀼𑀭𑀢𑁄 𑀑𑀢𑀭𑀺𑀢𑁆𑀯𑀸 𑀢𑀻𑀡𑀺 𑀅𑀘𑁆𑀙𑀭𑀸𑀲𑀢𑀸𑀦𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺. 𑀢𑀸𑀲𑀁 𑀦𑀘𑁆𑀘𑀦𑀓𑀸𑀮𑁂 𑀘 𑀤𑀼𑀢𑀺𑀬𑀁 𑀔𑀺𑀧𑁂𑀬𑁆𑀬𑀸𑀲𑀺, 𑀅𑀣𑀸𑀧𑀭𑀸𑀦𑀺𑀧𑀺 𑀢𑀻𑀡𑀺 𑀲𑀢𑀸𑀦𑀺 𑀑𑀢𑀭𑀺𑀢𑁆𑀯𑀸 𑀢𑀯 𑀯𑀻𑀡𑀸𑀥𑀼𑀭𑁂 𑀦𑀘𑁆𑀘𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀢𑀢𑀺𑀬𑀁 𑀔𑀺𑀧𑁂𑀬𑁆𑀬𑀸𑀲𑀺, 𑀅𑀣𑀸𑀧𑀭𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀑𑀢𑀭𑀺𑀢𑁆𑀯𑀸 𑀭𑀗𑁆𑀕𑀫𑀡𑁆𑀟𑀮𑁂 𑀦𑀘𑁆𑀘𑀺𑀲𑁆𑀲𑀦𑁆𑀢𑀺. 𑀅𑀳𑀫𑁆𑀧𑀺 𑀢𑁂 𑀲𑀦𑁆𑀢𑀺𑀓𑀁 ¶ 𑀆𑀕𑀫𑀺𑀲𑁆𑀲𑀸𑀫𑀺, 𑀕𑀘𑁆𑀙 𑀫𑀸 𑀪𑀸𑀬𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀅𑀲𑁆𑀲𑀸𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀕𑁂𑀳𑀁 𑀅𑀕𑀫𑀸𑀲𑀺. 𑀦𑀸𑀕𑀭𑀸 𑀭𑀸𑀚𑀤𑁆𑀯𑀸𑀭𑀲𑀫𑀻𑀧𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀼𑀁. 𑀭𑀸𑀚𑀸 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑁂 𑀧𑀮𑁆𑀮𑀗𑁆𑀓𑀫𑀚𑁆𑀛𑁂 𑀦𑀺𑀲𑀻𑀤𑀺, 𑀤𑁆𑀯𑀸𑀤𑀲𑀲𑀳𑀲𑁆𑀲𑀸 𑀅𑀮𑀗𑁆𑀓𑀢𑀺𑀢𑁆𑀣𑀺𑀬𑁄 𑀅𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄 𑀘 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑀬𑀺𑀁𑀲𑀼, 𑀲𑀩𑁆𑀩𑁂 𑀦𑀸𑀕𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀭𑀸𑀚𑀗𑁆𑀕𑀡𑁂 𑀘𑀓𑁆𑀓𑀸𑀢𑀺𑀘𑀓𑁆𑀓𑁂 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀩𑀦𑁆𑀥𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀡𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀓𑁆𑀓𑁄 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁂𑀦 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺, 𑀩𑁄𑀥𑀺𑀲𑀢𑁆𑀢𑁄𑀬𑁂𑀯 𑀦𑀁 𑀧𑀲𑁆𑀲𑀢𑀺. 𑀫𑀽𑀲𑀺𑀮𑁄𑀧𑀺 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀲𑀦𑁂 𑀦𑀺𑀲𑀻𑀤𑀺. 𑀫𑀳𑀸𑀚𑀦𑁄 𑀧𑀭𑀺𑀯𑀸𑀭𑁂𑀲𑀺, 𑀆𑀤𑀺𑀢𑁄𑀯 𑀤𑁆𑀯𑁂𑀧𑀺 𑀲𑀫𑀲𑀫𑀁 𑀯𑀸𑀤𑀬𑀺𑀁𑀲𑀼. 𑀫𑀳𑀸𑀚𑀦𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸𑀤𑀺𑀢𑁂𑀦 𑀢𑀼𑀝𑁆𑀞𑁄 𑀉𑀓𑁆𑀓𑀼𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀲𑀓𑁆𑀓𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀜𑁆𑀜𑁂𑀯 𑀲𑀸𑀯𑁂𑀦𑁆𑀢𑁄 ‘‘𑀏𑀓𑀁 𑀢𑀦𑁆𑀢𑀺𑀁 𑀙𑀺𑀦𑁆𑀤𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀦𑁆𑀢𑀺𑀁 𑀙𑀺𑀦𑁆𑀤𑀺, 𑀲𑀸 𑀙𑀺𑀦𑁆𑀦𑀸𑀧𑀺 𑀙𑀺𑀦𑁆𑀦𑀓𑁄𑀝𑀺𑀬𑀸 𑀲𑀭𑀁 𑀫𑀼𑀜𑁆𑀘𑀢𑁂𑀯, 𑀤𑁂𑀯𑀕𑀦𑁆𑀥𑀩𑁆𑀩𑀁 𑀯𑀺𑀬 𑀯𑀢𑁆𑀢𑀢𑀺. 𑀫𑀽𑀲𑀺𑀮𑁄𑀧𑀺 𑀢𑀦𑁆𑀢𑀺𑀁 𑀙𑀺𑀦𑁆𑀤𑀺, 𑀢𑀢𑁄 𑀲𑀤𑁆𑀤𑁄 𑀦 𑀦𑀺𑀓𑁆𑀔𑀫𑀺. 𑀆𑀘𑀭𑀺𑀬𑁄 𑀤𑀼𑀢𑀺𑀬𑀫𑁆𑀧𑀺 𑀙𑀺𑀦𑁆𑀤𑀺 ¶ …𑀧𑁂… 𑀲𑀢𑁆𑀢𑀫𑀫𑁆𑀧𑀺 𑀙𑀺𑀦𑁆𑀤𑀺. 𑀲𑀼𑀤𑁆𑀥𑀤𑀡𑁆𑀟𑀓𑀁 𑀯𑀸𑀤𑁂𑀦𑁆𑀢𑀲𑁆𑀲 𑀲𑀤𑁆𑀤𑁄 𑀦𑀕𑀭𑀁 𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀘𑁂𑀯 𑀉𑀓𑁆𑀓𑀼𑀝𑁆𑀞𑀺𑀲𑀳𑀲𑁆𑀲𑀸𑀦𑀺 ¶ 𑀘 𑀧𑀯𑀢𑁆𑀢𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀏𑀓𑀁 𑀧𑀸𑀲𑀓𑀁 𑀆𑀓𑀸𑀲𑁂 𑀔𑀺𑀧𑀺, 𑀢𑀻𑀡𑀺 𑀅𑀘𑁆𑀙𑀭𑀸𑀲𑀢𑀸𑀦𑀺 𑀑𑀢𑀭𑀺𑀢𑁆𑀯𑀸 𑀦𑀘𑁆𑀘𑀺𑀁𑀲𑀼. 𑀏𑀯𑀁 𑀤𑀼𑀢𑀺𑀬𑁂 𑀘 𑀢𑀢𑀺𑀬𑁂 𑀘 𑀔𑀺𑀢𑁆𑀢𑁂 𑀢𑀻𑀡𑀺 𑀢𑀻𑀡𑀺 𑀅𑀘𑁆𑀙𑀭𑀸𑀲𑀢𑀸𑀦𑀺 𑀑𑀢𑀭𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀘𑁆𑀘𑀺𑀁𑀲𑀼.

𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀫𑀳𑀸𑀚𑀦𑀲𑁆𑀲 𑀇𑀗𑁆𑀕𑀺𑀢𑀲𑀜𑁆𑀜𑀁 𑀅𑀤𑀸𑀲𑀺, 𑀫𑀳𑀸𑀚𑀦𑁄 𑀉𑀝𑁆𑀞𑀸𑀬 ‘‘𑀢𑁆𑀯𑀁 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 ‘𑀲𑀫𑀓𑀸𑀭𑀁 𑀓𑀭𑁄𑀫𑀻’𑀢𑀺 𑀯𑀸𑀬𑀫𑀲𑀺, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺 𑀫𑀽𑀲𑀺𑀮𑀁 𑀢𑀚𑁆𑀚𑁂𑀢𑁆𑀯𑀸 𑀕𑀳𑀺𑀢𑀕𑀳𑀺𑀢𑁂𑀳𑁂𑀯 𑀧𑀸𑀲𑀸𑀡𑀤𑀡𑁆𑀟𑀸𑀤𑀻𑀳𑀺 𑀲𑀁𑀘𑀼𑀡𑁆𑀡𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀖𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀦𑁆𑀢𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀅𑀤𑀸𑀲𑀺, 𑀢𑀣𑀸 𑀦𑀸𑀕𑀭𑀸. 𑀲𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀅𑀳𑀁 𑀢𑁂, 𑀧𑀡𑁆𑀟𑀺𑀢, 𑀲𑀳𑀲𑁆𑀲𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀫𑀸𑀢𑀮𑀺𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀲𑀳𑀲𑁆𑀲𑀬𑀼𑀢𑁆𑀢𑀁 𑀯𑁂𑀚𑀬𑀦𑁆𑀢𑀭𑀣𑀯𑀭𑀁 𑀅𑀪𑀺𑀭𑀼𑀬𑁆𑀳 𑀤𑁂𑀯𑀮𑁄𑀓𑀁 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑀁 ‘‘𑀓𑀳𑀁 𑀕𑀢𑀸𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺 𑀤𑁂𑀯𑀥𑀻𑀢𑀭𑁄 𑀧𑀼𑀘𑁆𑀙𑀺𑀁𑀲𑀼. 𑀲𑀓𑁆𑀓𑁄 𑀢𑀸𑀲𑀁 𑀢𑀁 𑀓𑀸𑀭𑀡𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀮𑀜𑁆𑀘 𑀕𑀼𑀡𑀜𑁆𑀘 𑀯𑀡𑁆𑀡𑁂𑀲𑀺. 𑀤𑁂𑀯𑀥𑀻𑀢𑀭𑁄 ‘‘𑀫𑀳𑀸𑀭𑀸𑀚, 𑀫𑀬𑀫𑁆𑀧𑀺 𑀆𑀘𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑀸, 𑀇𑀥 𑀦𑀁 𑀆𑀦𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑀓𑁆𑀓𑁄 𑀫𑀸𑀢𑀮𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀤𑁂𑀯𑀘𑁆𑀙𑀭𑀸 𑀕𑀼𑀢𑁆𑀢𑀺𑀮𑀕𑀦𑁆𑀥𑀩𑁆𑀩𑀁 𑀤𑀝𑁆𑀞𑀼𑀓𑀸𑀫𑀸, 𑀕𑀘𑁆𑀙 𑀦𑀁 𑀯𑁂𑀚𑀬𑀦𑁆𑀢𑀭𑀣𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ¶ 𑀆𑀦𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀦𑁂𑀲𑀺. 𑀲𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 ‘‘𑀤𑁂𑀯𑀓𑀜𑁆𑀜𑀸 𑀓𑀺𑀭 𑀢𑁂, 𑀆𑀘𑀭𑀺𑀬, 𑀕𑀦𑁆𑀥𑀩𑁆𑀩𑀁 𑀲𑁄𑀢𑀼𑀓𑀸𑀫𑀸’’𑀢𑀺 𑀆𑀳. ‘‘𑀫𑀬𑀁 𑀫𑀳𑀸𑀭𑀸𑀚, 𑀕𑀦𑁆𑀥𑀩𑁆𑀩𑀸 𑀦𑀸𑀫 𑀲𑀺𑀧𑁆𑀧𑀁 𑀦𑀺𑀲𑁆𑀲𑀸𑀬 𑀚𑀻𑀯𑀸𑀫, 𑀫𑀽𑀮𑀁 𑀮𑀪𑀦𑁆𑀢𑀸 𑀯𑀸𑀤𑁂𑀬𑁆𑀬𑀸𑀫𑀸’’𑀢𑀺. ‘‘𑀯𑀸𑀤𑁂𑀳𑀺, 𑀅𑀳𑀁 𑀢𑁂 𑀫𑀽𑀮𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀦 𑀫𑀬𑁆𑀳𑀁 𑀅𑀜𑁆𑀜𑁂𑀦 𑀫𑀽𑀮𑁂𑀦𑀢𑁆𑀣𑁄, 𑀇𑀫𑀸 𑀧𑀦 𑀤𑁂𑀯𑀥𑀻𑀢𑀭𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀣𑁂𑀦𑁆𑀢𑀼, 𑀏𑀯𑀸𑀳𑀁 𑀯𑀸𑀤𑁂𑀲𑁆𑀲𑀸𑀫𑀻’’𑀢𑀺 ¶ . 𑀅𑀣 𑀦𑀁 𑀤𑁂𑀯𑀥𑀻𑀢𑀭𑁄 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑁂𑀳𑀺 𑀓𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀧𑀘𑁆𑀙𑀸 𑀢𑀼𑀫𑁆𑀳𑀸𑀓𑀁 𑀓𑀣𑁂𑀲𑁆𑀲𑀸𑀫, 𑀕𑀦𑁆𑀥𑀩𑁆𑀩𑀁 𑀓𑀭𑁄𑀳𑀺 𑀆𑀘𑀭𑀺𑀬𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀢𑀸𑀳𑀁 𑀤𑁂𑀯𑀢𑀸𑀦𑀁 𑀕𑀦𑁆𑀥𑀩𑁆𑀩𑀁 𑀅𑀓𑀸𑀲𑀺, 𑀢𑀁 𑀤𑀺𑀩𑁆𑀩𑀕𑀦𑁆𑀥𑀩𑁆𑀩𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁂𑀯𑀥𑀻𑀢𑀸𑀦𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀏𑀓𑀁 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀫𑀯𑀢𑁆𑀣𑀁 ¶ 𑀤𑀢𑁆𑀯𑀸 𑀲𑀓𑁆𑀓𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀁 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀉𑀢𑁆𑀢𑀫𑀯𑀢𑁆𑀣𑀤𑁂𑀯𑀓𑀜𑁆𑀜𑀁 ‘‘𑀢𑁆𑀯𑀁 𑀧𑀼𑀭𑀺𑀫𑀪𑀯𑁂 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺. 𑀢𑀲𑁆𑀲 𑀧𑀼𑀘𑁆𑀙𑀦𑀸𑀓𑀸𑀭𑁄 𑀘 𑀯𑀺𑀲𑁆𑀲𑀚𑁆𑀚𑀦𑀸 𑀘 𑀯𑀺𑀫𑀸𑀦𑀯𑀢𑁆𑀣𑀼𑀫𑁆𑀳𑀺 𑀆𑀕𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

‘‘𑀯𑀢𑁆𑀣𑀼𑀢𑁆𑀢𑀫𑀤𑀸𑀬𑀺𑀓𑀸 𑀦𑀸𑀭𑀻, 𑀧𑀯𑀭𑀸 𑀳𑁄𑀢𑀺 𑀦𑀭𑁂𑀲𑀼 𑀦𑀸𑀭𑀻𑀲𑀼;

𑀏𑀯𑀁 𑀧𑀺𑀬𑀭𑀽𑀧𑀤𑀸𑀬𑀺𑀓𑀸 𑀫𑀦𑀸𑀧𑀁, 𑀤𑀺𑀩𑁆𑀩𑀁 𑀲𑀸 𑀮𑀪𑀢𑁂 𑀉𑀧𑁂𑀘𑁆𑀘 𑀞𑀸𑀦𑀁.

‘‘𑀢𑀲𑁆𑀲𑀸 𑀫𑁂 𑀧𑀲𑁆𑀲 𑀯𑀺𑀫𑀸𑀦𑀁, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻𑀳𑀫𑀲𑁆𑀫𑀺;

𑀅𑀘𑁆𑀙𑀭𑀸𑀲𑀳𑀲𑁆𑀲𑀲𑁆𑀲𑀸𑀳𑀁, 𑀧𑀯𑀭𑀸 𑀧𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀁.

‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

‘‘𑀢𑁂𑀦𑀫𑁆𑀳𑀺 ¶ 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸;

𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. (𑀯𑀺. 𑀯. 𑁩𑁨𑁯-𑁩𑁩𑁧, 𑁩𑁩𑁩-𑁩𑁩𑁬);

𑀅𑀧𑀭𑀸 ¶ 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀽𑀚𑀦𑀢𑁆𑀣𑀸𑀬 𑀧𑀼𑀧𑁆𑀨𑀸𑀦𑀺 𑀅𑀤𑀸𑀲𑀺, 𑀅𑀧𑀭𑀸 ‘‘𑀘𑁂𑀢𑀺𑀬𑁂 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑁂𑀣𑀸’’𑀢𑀺 𑀕𑀦𑁆𑀥𑁂 𑀅𑀤𑀸𑀲𑀺, 𑀅𑀧𑀭𑀸 𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀅𑀤𑀸𑀲𑀺, 𑀅𑀧𑀭𑀸 𑀉𑀘𑁆𑀙𑀼𑀭𑀲𑀁 𑀅𑀤𑀸𑀲𑀺, 𑀅𑀧𑀭𑀸 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀘𑁂𑀢𑀺𑀬𑁂 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀅𑀤𑀸𑀲𑀺, 𑀅𑀧𑀭𑀸 𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀓𑀼𑀮𑀕𑁂𑀳𑁂 𑀯𑀸𑀲𑀁 𑀉𑀧𑀕𑀢𑀸𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺, 𑀅𑀧𑀭𑀸 𑀦𑀸𑀯𑀸𑀬 𑀉𑀧𑀓𑀝𑁆𑀞𑀸𑀬 𑀯𑁂𑀮𑀸𑀬 𑀪𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑀓𑁂 𑀞𑀢𑁆𑀯𑀸 𑀉𑀤𑀓𑀁 𑀅𑀤𑀸𑀲𑀺, 𑀅𑀧𑀭𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀫𑀸𑀦𑀸 𑀅𑀓𑁆𑀓𑁄𑀥𑀦𑀸 𑀳𑀼𑀢𑁆𑀯𑀸 𑀲𑀲𑁆𑀲𑀼𑀲𑀲𑀼𑀭𑀯𑀢𑁆𑀢𑀁 𑀅𑀓𑀸𑀲𑀺, 𑀅𑀧𑀭𑀸 𑀅𑀢𑁆𑀢𑀦𑁄 𑀮𑀤𑁆𑀥𑀓𑁄𑀝𑁆𑀞𑀸𑀲𑀢𑁄𑀧𑀺 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸𑀯 ¶ 𑀧𑀭𑀺𑀪𑀼𑀜𑁆𑀚𑀺, 𑀲𑀻𑀮𑀯𑀢𑀻 𑀘 𑀅𑀳𑁄𑀲𑀺, 𑀅𑀧𑀭𑀸 𑀧𑀭𑀕𑁂𑀳𑁂 𑀤𑀸𑀲𑀻 𑀳𑀼𑀢𑁆𑀯𑀸 𑀦𑀺𑀓𑁆𑀓𑁄𑀥𑀦𑀸 𑀦𑀺𑀫𑁆𑀫𑀸𑀦𑀸 𑀅𑀢𑁆𑀢𑀦𑁄 𑀮𑀤𑁆𑀥𑀓𑁄𑀝𑁆𑀞𑀸𑀲𑀢𑁄 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 (𑀯𑀺. 𑀯. 𑀅𑀝𑁆𑀞. 𑁩𑁨𑁮-𑁩𑁩𑁬). 𑀏𑀯𑀁 𑀲𑀩𑁆𑀩𑀸𑀧𑀺 𑀕𑀼𑀢𑁆𑀢𑀺𑀮𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀆𑀕𑀢𑀸 𑀙𑀢𑁆𑀢𑀺𑀁𑀲 𑀤𑁂𑀯𑀥𑀻𑀢𑀸 𑀬𑀁 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸, 𑀲𑀩𑁆𑀩𑀁 𑀩𑁄𑀥𑀺𑀲𑀢𑁆𑀢𑁄 𑀧𑀼𑀘𑁆𑀙𑀺. 𑀢𑀸𑀧𑀺𑀲𑁆𑀲 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀁 𑀕𑀸𑀣𑀸𑀳𑀺𑀬𑁂𑀯 𑀓𑀣𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀲𑁆𑀯𑀸𑀳𑀁 𑀇𑀥𑀸𑀕𑀦𑁆𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀓𑀫𑁆𑀫𑁂𑀦 𑀧𑀝𑀺𑀮𑀤𑁆𑀥𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀲𑁆𑀲𑁄𑀲𑀺𑀁. 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀅𑀚𑁆𑀚, 𑀲𑀼𑀧𑁆𑀧𑀪𑀸𑀢𑀁 𑀲𑀼𑀳𑀼𑀝𑁆𑀞𑀺𑀢𑀁;

𑀬𑀁 𑀅𑀤𑁆𑀤𑀲𑀸𑀫𑀺 𑀤𑁂𑀯𑀢𑀸𑀬𑁄, 𑀅𑀘𑁆𑀙𑀭𑀸𑀓𑀸𑀫𑀯𑀡𑁆𑀡𑀺𑀬𑁄.

‘‘𑀇𑀫𑀸𑀲𑀸𑀳𑀁 ¶ 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀲𑁆𑀯𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺. (𑀯𑀺. 𑀯. 𑁬𑁧𑁭-𑁬𑁧𑁮);

𑀅𑀣 𑀦𑀁 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀤𑁂𑀯𑀭𑀸𑀚𑀸 𑀫𑀸𑀢𑀮𑀺𑀲𑀗𑁆𑀕𑀸𑀳𑀓𑀁 𑀆𑀡𑀸𑀧𑁂𑀢𑁆𑀯𑀸 𑀭𑀣𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀧𑁂𑀲𑁂𑀲𑀺. 𑀲𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀤𑁂𑀯𑀮𑁄𑀓𑁂 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀫𑀦𑀼𑀲𑁆𑀲𑀸𑀦𑀁 𑀆𑀘𑀺𑀓𑁆𑀔𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀲𑀉𑀲𑁆𑀲𑀸𑀳𑀸 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁 𑀫𑀜𑁆𑀜𑀺𑀁𑀲𑀼.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀽𑀲𑀺𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀕𑀼𑀢𑁆𑀢𑀺𑀮𑀕𑀦𑁆𑀥𑀩𑁆𑀩𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀼𑀢𑁆𑀢𑀺𑀮𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁪𑁪] 𑁪. 𑀯𑀺𑀕𑀢𑀺𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 ¶ 𑀧𑀲𑁆𑀲𑀢𑀺 𑀦 𑀢𑀁 𑀇𑀘𑁆𑀙𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑀮𑀸𑀬𑀺𑀓𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀝𑀺𑀯𑀸𑀤𑀁 𑀅𑀮𑀪𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 ‘‘𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀲𑀼𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀲𑁄 𑀢𑀁 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀝𑁆𑀞𑀸𑀬 𑀧𑀮𑀸𑀬𑀺. 𑀦𑀺𑀲𑀺𑀦𑁆𑀦𑀧𑀭𑀺𑀲𑀸 ‘‘𑀏𑀓𑀧𑀤𑁂𑀦𑁂𑀯 𑀯𑁄, 𑀪𑀦𑁆𑀢𑁂, 𑀧𑀭𑀺𑀩𑁆𑀩𑀸𑀚𑀓𑁄 𑀦𑀺𑀕𑁆𑀕𑀳𑀺𑀢𑁄’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 ‘‘𑀦𑀸𑀳𑀁, 𑀉𑀧𑀸𑀲𑀓𑀸, 𑀇𑀤𑀸𑀦𑁂𑀯𑁂𑀢𑀁 𑀏𑀓𑀧𑀤𑁂𑀦𑁂𑀯 𑀦𑀺𑀕𑁆𑀕𑀡𑁆𑀳𑀸𑀫𑀺, 𑀧𑀼𑀩𑁆𑀩𑁂𑀧𑀺 𑀦𑀺𑀕𑁆𑀕𑀡𑁆𑀳𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀳𑀺𑀫𑀯𑀦𑁆𑀢𑁂 ¶ 𑀯𑀲𑀺. 𑀲𑁄 𑀧𑀩𑁆𑀩𑀢𑀸 𑀑𑀭𑀼𑀬𑁆𑀳 𑀏𑀓𑀁 𑀦𑀺𑀕𑀫𑀕𑀸𑀫𑀁 𑀦𑀺𑀲𑁆𑀲𑀸𑀬 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀝𑀺𑀯𑀸𑀤𑀁 𑀅𑀮𑀪𑀺𑀢𑁆𑀯𑀸 𑀢𑀁 𑀦𑀺𑀕𑀫𑀁 𑀧𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀫𑀬𑀸 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀯𑀡𑁆𑀡𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑀁 𑀕𑀗𑁆𑀕𑀸𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀧𑀭𑀺𑀩𑁆𑀩𑀸𑀚𑀓𑁄 𑀯𑀸𑀤𑁂𑀦 𑀑𑀢𑁆𑀣𑀭𑀦𑁆𑀢𑁄 ‘‘𑀓𑀸 𑀕𑀗𑁆𑀕𑀸, 𑀯𑀸𑀮𑀼𑀓𑀸 𑀕𑀗𑁆𑀕𑀸, 𑀉𑀤𑀓𑀁 𑀕𑀗𑁆𑀕𑀸, 𑀑𑀭𑀺𑀫𑀢𑀻𑀭𑀁 𑀕𑀗𑁆𑀕𑀸, 𑀧𑀸𑀭𑀺𑀫𑀢𑀻𑀭𑀁 𑀕𑀗𑁆𑀕𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑁆𑀯𑀁 𑀧𑀦, 𑀧𑀭𑀺𑀩𑁆𑀩𑀸𑀚𑀓, 𑀞𑀧𑁂𑀢𑁆𑀯𑀸 𑀉𑀤𑀓𑀁 𑀯𑀸𑀮𑀼𑀓𑀁 𑀑𑀭𑀺𑀫𑀢𑀻𑀭𑀁 𑀧𑀸𑀭𑀺𑀫𑀢𑀻𑀭𑀜𑁆𑀘 𑀓𑀳𑀁 𑀕𑀗𑁆𑀕𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀧𑀭𑀺𑀩𑁆𑀩𑀸𑀚𑀓𑁄 𑀅𑀧𑁆𑀧𑀝𑀺𑀪𑀸𑀦𑁄 𑀳𑀼𑀢𑁆𑀯𑀸 𑀉𑀝𑁆𑀞𑀸𑀬 𑀧𑀮𑀸𑀬𑀺. 𑀢𑀲𑁆𑀫𑀺𑀁 𑀧𑀮𑀸𑀢𑁂 𑀩𑁄𑀥𑀺𑀲𑀢𑁆𑀢𑁄 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁮𑁮.

‘‘𑀬𑀁 𑀧𑀲𑁆𑀲𑀢𑀺 𑀦 𑀢𑀁 𑀇𑀘𑁆𑀙𑀢𑀺, 𑀬𑀜𑁆𑀘 𑀦 𑀧𑀲𑁆𑀲𑀢𑀺 𑀢𑀁 𑀓𑀺𑀭𑀺𑀘𑁆𑀙𑀢𑀺;

𑀫𑀜𑁆𑀜𑀸𑀫𑀺 𑀘𑀺𑀭𑀁 𑀘𑀭𑀺𑀲𑁆𑀲𑀢𑀺, 𑀦 𑀳𑀺 𑀢𑀁 𑀮𑀘𑁆𑀙𑀢𑀺 𑀬𑀁 𑀲 𑀇𑀘𑁆𑀙𑀢𑀺.

𑁧𑁮𑁯.

‘‘𑀬𑀁 ¶ 𑀮𑀪𑀢𑀺 𑀦 𑀢𑁂𑀦 𑀢𑀼𑀲𑁆𑀲𑀢𑀺, 𑀬𑀜𑁆𑀘 𑀧𑀢𑁆𑀣𑁂𑀢𑀺 𑀮𑀤𑁆𑀥𑀁 𑀳𑀻𑀴𑁂𑀢𑀺;

𑀇𑀘𑁆𑀙𑀸 𑀳𑀺 𑀅𑀦𑀦𑁆𑀢𑀕𑁄𑀘𑀭𑀸, 𑀯𑀺𑀕𑀢𑀺𑀘𑁆𑀙𑀸𑀦 𑀦𑀫𑁄 𑀓𑀭𑁄𑀫𑀲𑁂’’𑀢𑀺.

𑀢𑀢𑁆𑀣 ¶ 𑀬𑀁 𑀧𑀲𑁆𑀲𑀢𑀻𑀢𑀺 𑀬𑀁 𑀉𑀤𑀓𑀸𑀤𑀺𑀁 𑀧𑀲𑁆𑀲𑀢𑀺, 𑀢𑀁 𑀕𑀗𑁆𑀕𑀸𑀢𑀺 𑀦 𑀇𑀘𑁆𑀙𑀢𑀺. 𑀬𑀜𑁆𑀘 𑀦 𑀧𑀲𑁆𑀲𑀢𑀻𑀢𑀺 𑀬𑀜𑁆𑀘 𑀉𑀤𑀓𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀕𑀗𑁆𑀕𑀁 𑀦 𑀧𑀲𑁆𑀲𑀢𑀺, 𑀢𑀁 𑀓𑀺𑀭𑀺𑀘𑁆𑀙𑀢𑀺. 𑀫𑀜𑁆𑀜𑀸𑀫𑀺 𑀘𑀺𑀭𑀁 𑀘𑀭𑀺𑀲𑁆𑀲𑀢𑀻𑀢𑀺 𑀅𑀳𑀁 𑀏𑀯𑀁 𑀫𑀜𑁆𑀜𑀸𑀫𑀺 𑁋 𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀏𑀯𑀭𑀽𑀧𑀁 𑀕𑀗𑁆𑀕𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀺𑀭𑀁 𑀘𑀭𑀺𑀲𑁆𑀲𑀢𑀺. 𑀬𑀣𑀸 𑀯𑀸 𑀉𑀤𑀓𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀕𑀗𑁆𑀕𑀁, 𑀏𑀯𑀁 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀺𑀬𑁂𑀲𑀦𑁆𑀢𑁄 𑀲𑀁𑀲𑀸𑀭𑁂 𑀘𑀺𑀭𑀁 ¶ 𑀘𑀭𑀺𑀲𑁆𑀲𑀢𑀺. 𑀦 𑀳𑀺 𑀢𑀁 𑀮𑀘𑁆𑀙𑀢𑀻𑀢𑀺 𑀘𑀺𑀭𑀁 𑀘𑀭𑀦𑁆𑀢𑁄𑀧𑀺 𑀬𑀁 𑀢𑀁 𑀏𑀯𑀭𑀽𑀧𑀁 𑀕𑀗𑁆𑀕𑀁 𑀯𑀸 𑀅𑀢𑁆𑀢𑀸𑀦𑀁 𑀯𑀸 𑀇𑀘𑁆𑀙𑀢𑀺, 𑀢𑀁 𑀦 𑀮𑀘𑁆𑀙𑀢𑀺. 𑀬𑀁 𑀮𑀪𑀢𑀻𑀢𑀺 𑀬𑀁 𑀉𑀤𑀓𑀁 𑀯𑀸 𑀭𑀽𑀧𑀸𑀤𑀺𑀁 𑀯𑀸 𑀮𑀪𑀢𑀺, 𑀢𑁂𑀦 𑀦 𑀢𑀼𑀲𑁆𑀲𑀢𑀺. 𑀬𑀜𑁆𑀘 𑀧𑀢𑁆𑀣𑁂𑀢𑀺 𑀮𑀤𑁆𑀥𑀁 𑀳𑀻𑀴𑁂𑀢𑀻𑀢𑀺 𑀏𑀯𑀁 𑀮𑀤𑁆𑀥𑁂𑀦 𑀅𑀢𑀼𑀲𑁆𑀲𑀦𑁆𑀢𑁄 𑀬𑀁 𑀬𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑀺, 𑀢𑀁 𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀏𑀢𑀸𑀬𑀸’’𑀢𑀺 𑀳𑀻𑀴𑁂𑀢𑀺 𑀅𑀯𑀫𑀜𑁆𑀜𑀢𑀺. 𑀇𑀘𑁆𑀙𑀸 𑀳𑀺 𑀅𑀦𑀦𑁆𑀢𑀕𑁄𑀘𑀭𑀸𑀢𑀺 𑀮𑀤𑁆𑀥𑀁 𑀳𑀻𑀴𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀭𑀫𑁆𑀫𑀡𑀁 𑀇𑀘𑁆𑀙𑀦𑀢𑁄 𑀅𑀬𑀁 𑀇𑀘𑁆𑀙𑀸 𑀦𑀸𑀫 𑀢𑀡𑁆𑀳𑀸 𑀅𑀦𑀦𑁆𑀢𑀕𑁄𑀘𑀭𑀸. 𑀯𑀺𑀕𑀢𑀺𑀘𑁆𑀙𑀸𑀦 𑀦𑀫𑁄 𑀓𑀭𑁄𑀫𑀲𑁂𑀢𑀺 𑀢𑀲𑁆𑀫𑀸 𑀬𑁂 𑀯𑀺𑀕𑀢𑀺𑀘𑁆𑀙𑀸 𑀩𑀼𑀤𑁆𑀥𑀸𑀤𑀬𑁄, 𑀢𑁂𑀲𑀁 𑀫𑀬𑀁 𑀦𑀫𑀓𑁆𑀓𑀸𑀭𑀁 𑀓𑀭𑁄𑀫𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀭𑀺𑀩𑁆𑀩𑀸𑀚𑀓𑁄 𑀏𑀢𑀭𑀳𑀺 𑀧𑀭𑀺𑀩𑁆𑀩𑀸𑀚𑀓𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀕𑀢𑀺𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁪𑁫] 𑁫. 𑀫𑀽𑀮𑀧𑀭𑀺𑀬𑀸𑀬𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀉𑀓𑁆𑀓𑀝𑁆𑀞𑀁 𑀦𑀺𑀲𑁆𑀲𑀸𑀬 𑀲𑀼𑀪𑀕𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀦𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀧𑀜𑁆𑀘𑀲𑀢𑀸 𑀩𑁆𑀭𑀸𑀳𑁆𑀫𑀡𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀸𑀦𑀫𑀤𑀫𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀢𑀻𑀡𑁂𑀯 𑀧𑀺𑀝𑀓𑀸𑀦𑀺 𑀚𑀸𑀦𑀸𑀢𑀺, 𑀫𑀬𑀫𑁆𑀧𑀺 𑀢𑀸𑀦𑀺 𑀚𑀸𑀦𑀸𑀫, 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀢𑀲𑁆𑀲 𑀅𑀫𑁆𑀳𑁂𑀳𑀺 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀧𑀝𑀺𑀧𑀓𑁆𑀔𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀢𑁂𑀲𑀼 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁂𑀲𑀼 𑀅𑀝𑁆𑀞𑀳𑀺 𑀪𑀽𑀫𑀻𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺, 𑀢𑁂 𑀦 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀲𑀼𑀁. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 ¶ 𑀅𑀫𑁆𑀳𑁂𑀳𑀺 𑀲𑀤𑀺𑀲𑀸 𑀧𑀡𑁆𑀟𑀺𑀢𑀸 𑀦𑀢𑁆𑀣𑀻’𑀢𑀺 ¶ 𑀫𑀸𑀦𑀁 𑀓𑀭𑁄𑀫, 𑀇𑀤𑀸𑀦𑀺 𑀧𑀦 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀫, 𑀩𑀼𑀤𑁆𑀥𑁂𑀳𑀺 𑀲𑀤𑀺𑀲𑁄 𑀧𑀡𑁆𑀟𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑁄 𑀩𑀼𑀤𑁆𑀥𑀕𑀼𑀡𑀸 𑀦𑀸𑀫𑀸’’𑀢𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀳𑀢𑀫𑀸𑀦𑀸 𑀳𑀼𑀢𑁆𑀯𑀸 𑀉𑀤𑁆𑀥𑀝𑀤𑀸𑀞𑀸 𑀯𑀺𑀬 𑀲𑀧𑁆𑀧𑀸 𑀦𑀺𑀩𑁆𑀩𑀺𑀲𑁂𑀯𑀦𑀸 𑀚𑀸𑀢𑀸. 𑀲𑀢𑁆𑀣𑀸 𑀉𑀓𑁆𑀓𑀝𑁆𑀞𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀕𑀦𑁆𑀢𑁆𑀯𑀸 𑀕𑁄𑀢𑀫𑀓𑀘𑁂𑀢𑀺𑀬𑁂 𑀕𑁄𑀢𑀫𑀓𑀲𑀼𑀢𑁆𑀢𑀦𑁆𑀢𑀁 𑀦𑀸𑀫 𑀓𑀣𑁂𑀲𑀺, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺, 𑀢𑀁 𑀲𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑀢𑁆𑀣𑀭𑀺 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀦𑁆𑀢𑁂𑀬𑁂𑀯 𑀪𑀺𑀓𑁆𑀔𑀽 ¶ 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀢𑁂 𑀦𑀸𑀫 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀢𑀣𑀸 𑀫𑀸𑀦𑀫𑀤𑀫𑀢𑁆𑀢𑀸 𑀪𑀕𑀯𑀢𑀸 𑀫𑀽𑀮𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀦𑀺𑀳𑀢𑀫𑀸𑀦𑀸 𑀓𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀇𑀫𑁂 𑀏𑀯𑀁 𑀫𑀸𑀦𑀧𑀕𑁆𑀕𑀳𑀺𑀢𑀲𑀺𑀭𑁂 𑀯𑀺𑀘𑀭𑀦𑁆𑀢𑁂 𑀦𑀺𑀳𑀢𑀫𑀸𑀦𑁂 𑀅𑀓𑀸𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀲𑀺. 𑀢𑁂 𑀧𑀜𑁆𑀘𑀲𑀢𑀸𑀧𑀺 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑀸 𑀲𑀺𑀧𑁆𑀧𑁂 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 ‘‘𑀬𑀢𑁆𑀢𑀓𑀁 𑀫𑀬𑀁 𑀚𑀸𑀦𑀸𑀫, 𑀆𑀘𑀭𑀺𑀬𑁄𑀧𑀺 𑀢𑀢𑁆𑀢𑀓𑀫𑁂𑀯, 𑀯𑀺𑀲𑁂𑀲𑁄 𑀦𑀢𑁆𑀣𑀻’’𑀢𑀺 𑀫𑀸𑀦𑀢𑁆𑀣𑀤𑁆𑀥𑀸 𑀳𑀼𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀘𑁆𑀙𑀦𑁆𑀢𑀺, 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀦 𑀓𑀭𑁄𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀆𑀘𑀭𑀺𑀬𑁂 𑀩𑀤𑀭𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁂 𑀢𑀁 𑀯𑀫𑁆𑀪𑁂𑀢𑀼𑀓𑀸𑀫𑀸 𑀩𑀤𑀭𑀺𑀭𑀼𑀓𑁆𑀔𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 ‘‘𑀦𑀺𑀲𑁆𑀲𑀸𑀭𑁄𑀯𑀸𑀬𑀁 𑀭𑀼𑀓𑁆𑀔𑁄’’𑀢𑀺 𑀆𑀳𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀯𑀫𑁆𑀪𑀦𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 ‘‘𑀏𑀓𑀁 𑀯𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑁂 𑀳𑀝𑁆𑀞𑀢𑀼𑀝𑁆𑀞𑀸 ‘‘𑀯𑀤𑁂𑀣, 𑀓𑀣𑁂𑀲𑁆𑀲𑀸𑀫𑀸’’𑀢𑀺. 𑀆𑀘𑀭𑀺𑀬𑁄 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯𑁦.

‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸;

𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄, 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀻’’𑀢𑀺.

𑀢𑀢𑁆𑀣 𑀓𑀸𑀮𑁄𑀢𑀺 𑀧𑀼𑀭𑁂𑀪𑀢𑁆𑀢𑀓𑀸𑀮𑁄𑀧𑀺 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑁄𑀧𑀻𑀢𑀺 𑀏𑀯𑀫𑀸𑀤𑀺. 𑀪𑀽𑀢𑀸𑀦𑀻𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀫𑁂𑀢𑀁, 𑀦 𑀓𑀸𑀮𑁄 𑀪𑀽𑀢𑀸𑀦𑀁 𑀘𑀫𑁆𑀫𑀫𑀁𑀲𑀸𑀤𑀻𑀦𑀺 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑀢𑀺, 𑀅𑀧𑀺𑀘 𑀔𑁄 𑀦𑁂𑀲𑀁 𑀆𑀬𑀼𑀯𑀡𑁆𑀡𑀩𑀮𑀸𑀦𑀺 𑀔𑁂𑀧𑁂𑀦𑁆𑀢𑁄 𑀬𑁄𑀩𑁆𑀩𑀜𑁆𑀜𑀁 ¶ 𑀫𑀤𑁆𑀤𑀦𑁆𑀢𑁄 𑀆𑀭𑁄𑀕𑁆𑀬𑀁 𑀯𑀺𑀦𑀸𑀲𑁂𑀦𑁆𑀢𑁄 𑀖𑀲𑀢𑀺 𑀔𑀸𑀤𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀖𑀲𑀦𑁆𑀢𑁄 𑀘 𑀦 𑀓𑀺𑀜𑁆𑀘𑀺 𑀯𑀚𑁆𑀚𑁂𑀢𑀺, 𑀲𑀩𑁆𑀩𑀸𑀦𑁂𑀯 𑀖𑀲𑀢𑀺. 𑀦 𑀓𑁂𑀯𑀮𑀜𑁆𑀘 𑀪𑀽𑀢𑀸𑀦𑁂𑀯, 𑀅𑀧𑀺𑀘 𑀔𑁄 𑀲𑀳𑀢𑁆𑀢𑀦𑀸 𑀅𑀢𑁆𑀢𑀸𑀦𑀫𑁆𑀧𑀺 𑀖𑀲𑀢𑀺, 𑀧𑀼𑀭𑁂𑀪𑀢𑁆𑀢𑀓𑀸𑀮𑁄 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑀁 𑀦 𑀧𑀸𑀧𑀼𑀡𑀸𑀢𑀺. 𑀏𑀲 𑀦𑀬𑁄 𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑀸𑀤𑀻𑀲𑀼. 𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄𑀢𑀺 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 ¶ . 𑀲𑁄 𑀳𑀺 𑀅𑀭𑀺𑀬𑀫𑀕𑁆𑀕𑁂𑀦 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 𑀯𑀼𑀘𑁆𑀘𑀢𑀺 ¶ . 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀻𑀢𑀺 𑀲𑁄 𑀬𑀸𑀬𑀁 𑀢𑀡𑁆𑀳𑀸 𑀅𑀧𑀸𑀬𑁂𑀲𑀼 𑀪𑀽𑀢𑁂 𑀧𑀘𑀢𑀺, 𑀢𑀁 𑀜𑀸𑀡𑀕𑁆𑀕𑀺𑀦𑀸 𑀧𑀘𑀺 𑀤𑀳𑀺 𑀪𑀲𑁆𑀫𑀫𑀓𑀸𑀲𑀺, 𑀢𑁂𑀦 ‘‘𑀪𑀽𑀢𑀧𑀘𑀦𑀺𑀁 𑀧𑀘𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀚𑀦𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀚𑀦𑀺𑀓𑀁 𑀦𑀺𑀩𑁆𑀩𑀢𑁆𑀢𑀓𑀺𑀦𑁆𑀢𑀺 𑀅𑀢𑁆𑀣𑁄.

𑀇𑀫𑀁 𑀧𑀜𑁆𑀳𑀁 𑀲𑀼𑀢𑁆𑀯𑀸 𑀫𑀸𑀡𑀯𑁂𑀲𑀼 𑀏𑀓𑁄𑀧𑀺 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀅𑀣 𑀦𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀔𑁄 𑀢𑀼𑀫𑁆𑀳𑁂 ‘𑀅𑀬𑀁 𑀧𑀜𑁆𑀳𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀅𑀢𑁆𑀣𑀻’𑀢𑀺 𑀲𑀜𑁆𑀜𑀁 𑀅𑀓𑀢𑁆𑀣, 𑀢𑀼𑀫𑁆𑀳𑁂 ‘𑀬𑀫𑀳𑀁 𑀚𑀸𑀦𑀸𑀫𑀺, 𑀢𑀁 𑀲𑀩𑁆𑀩𑀁 𑀚𑀸𑀦𑀸𑀫𑀸’𑀢𑀺 𑀫𑀜𑁆𑀜𑀫𑀸𑀦𑀸 𑀫𑀁 𑀩𑀤𑀭𑀺𑀭𑀼𑀓𑁆𑀔𑀲𑀤𑀺𑀲𑀁 𑀓𑀭𑁄𑀣, 𑀫𑀫 𑀢𑀼𑀫𑁆𑀳𑁂𑀳𑀺 𑀅𑀜𑁆𑀜𑀸𑀢𑀲𑁆𑀲 𑀩𑀳𑀼𑀦𑁄 𑀚𑀸𑀦𑀦𑀪𑀸𑀯𑀁 𑀦 𑀚𑀸𑀦𑀸𑀣, 𑀕𑀘𑁆𑀙𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀤𑀫𑁆𑀫𑀺, 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀇𑀫𑀁 𑀧𑀜𑁆𑀳𑀁 𑀘𑀺𑀦𑁆𑀢𑁂𑀣𑀸’’𑀢𑀺. 𑀢𑁂 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀁 𑀘𑀺𑀦𑁆𑀢𑁂𑀢𑁆𑀯𑀸𑀧𑀺 𑀧𑀜𑁆𑀳𑀲𑁆𑀲 𑀦𑁂𑀯 𑀅𑀦𑁆𑀢𑀁, 𑀦 𑀓𑁄𑀝𑀺𑀁 𑀧𑀲𑁆𑀲𑀺𑀁𑀲𑀼. 𑀢𑁂 𑀲𑀢𑁆𑀢𑀫𑀤𑀺𑀯𑀲𑁂 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀤𑁆𑀭𑀫𑀼𑀔𑀸, 𑀚𑀸𑀦𑀺𑀢𑁆𑀣 𑀧𑀜𑁆𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀚𑀸𑀦𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀕𑀭𑀳𑀫𑀸𑀦𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁯𑁧.

‘‘𑀩𑀳𑀽𑀦𑀺 𑀦𑀭𑀲𑀻𑀲𑀸𑀦𑀺, 𑀮𑁄𑀫𑀲𑀸𑀦𑀺 𑀩𑁆𑀭𑀳𑀸𑀦𑀺 𑀘;

𑀕𑀻𑀯𑀸𑀲𑀼 𑀧𑀝𑀺𑀫𑀼𑀓𑁆𑀓𑀸𑀦𑀺, 𑀓𑁄𑀘𑀺𑀤𑁂𑀯𑁂𑀢𑁆𑀣 𑀓𑀡𑁆𑀡𑀯𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀩𑀳𑀽𑀦𑀺 𑀦𑀭𑀸𑀦𑀁 𑀲𑀻𑀲𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀘 𑀢𑀸𑀦𑀺 𑀮𑁄𑀫𑀲𑀸𑀦𑀺, 𑀲𑀩𑁆𑀩𑀸𑀦𑀺 𑀫𑀳𑀦𑁆𑀢𑀸𑀦𑀺 𑀕𑀻𑀯𑀸𑀲𑀼𑀬𑁂𑀯 𑀞𑀧𑀺𑀢𑀸𑀦𑀺, 𑀦 𑀢𑀸𑀮𑀨𑀮𑀁 𑀯𑀺𑀬 𑀳𑀢𑁆𑀣𑁂𑀦 𑀕𑀳𑀺𑀢𑀸𑀦𑀺, 𑀦𑀢𑁆𑀣𑀺 𑀢𑁂𑀲𑀁 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀦𑀸𑀦𑀸𑀓𑀭𑀡𑀁. 𑀏𑀢𑁆𑀣 𑀧𑀦 𑀓𑁄𑀘𑀺𑀤𑁂𑀯 𑀓𑀡𑁆𑀡𑀯𑀸𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀓𑀡𑁆𑀡𑀯𑀸𑀢𑀺 𑀧𑀜𑁆𑀜𑀯𑀸, 𑀓𑀡𑁆𑀡𑀙𑀺𑀤𑁆𑀤𑀁 𑀧𑀦 𑀦 𑀓𑀲𑁆𑀲𑀘𑀺 𑀦𑀢𑁆𑀣𑀺. 𑀇𑀢𑀺 𑀢𑁂 𑀫𑀸𑀡𑀯𑀓𑁂 ‘‘𑀓𑀡𑁆𑀡𑀙𑀺𑀤𑁆𑀤𑀫𑀢𑁆𑀢𑀫𑁂𑀯 𑀢𑀼𑀫𑁆𑀳𑀸𑀓𑀁 𑀩𑀸𑀮𑀸𑀦𑀁 𑀅𑀢𑁆𑀣𑀺, 𑀦 𑀧𑀜𑁆𑀜𑀸’’𑀢𑀺 𑀕𑀭𑀳𑀺𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀲𑀼𑀢𑁆𑀯𑀸 ¶ 𑁋 ‘‘𑀅𑀳𑁄 ¶ 𑀆𑀘𑀭𑀺𑀬𑀸 𑀦𑀸𑀫 𑀫𑀳𑀦𑁆𑀢𑀸’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀦𑀺𑀳𑀢𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀜𑁆𑀘𑀲𑀢𑀸 𑀫𑀸𑀡𑀯𑀓𑀸 𑀇𑀫𑁂 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀽𑀮𑀧𑀭𑀺𑀬𑀸𑀬𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁪𑁬] 𑁬. 𑀩𑀸𑀮𑁄𑀯𑀸𑀤𑀚𑀸𑀢𑀓𑀯𑀡𑁆𑀡𑀦𑀸

𑀳𑀦𑁆𑀢𑁆𑀯𑀸 ¶ 𑀙𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀲𑀻𑀳𑀲𑁂𑀦𑀸𑀧𑀢𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀫𑀁𑀲𑀓𑀪𑀢𑁆𑀢𑀁 𑀅𑀤𑀸𑀲𑀺. 𑀦𑀺𑀕𑀡𑁆𑀞𑀸 𑀢𑀁 𑀲𑀼𑀢𑁆𑀯𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀢𑀣𑀸𑀕𑀢𑀁 𑀯𑀺𑀳𑁂𑀞𑁂𑀢𑀼𑀓𑀸𑀫𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 𑀫𑀁𑀲𑀁 𑀪𑀼𑀜𑁆𑀚𑀢𑀻’’𑀢𑀺 𑀅𑀓𑁆𑀓𑁄𑀲𑀺𑀁𑀲𑀼. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 ‘𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 𑀫𑀁𑀲𑀁 𑀪𑀼𑀜𑁆𑀚𑀢𑀻’𑀢𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀅𑀓𑁆𑀓𑁄𑀲𑀦𑁆𑀢𑁄 𑀆𑀳𑀺𑀡𑁆𑀟𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀇𑀤𑀸𑀦𑁂𑀯 𑀫𑀁 𑀉𑀤𑁆𑀤𑀺𑀲𑁆𑀲𑀓𑀢𑀫𑀁𑀲𑀔𑀸𑀤𑀦𑁂𑀦 𑀕𑀭𑀳𑀢𑀺, 𑀧𑀼𑀩𑁆𑀩𑁂𑀧𑀺 𑀕𑀭𑀳𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀢𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺. 𑀅𑀣𑁂𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀢𑀸𑀧𑀲𑀁 𑀯𑀺𑀳𑁂𑀞𑁂𑀲𑁆𑀲𑀸𑀫𑀻’’𑀢𑀺 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀘𑁆𑀙𑀫𑀁𑀲𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀫𑀁 𑀫𑀁𑀲𑀁 𑀢𑀼𑀫𑁆𑀳𑁂𑀬𑁂𑀯 𑀉𑀤𑁆𑀤𑀺𑀲𑁆𑀲 𑀧𑀸𑀡𑁂 𑀫𑀸𑀭𑁂𑀢𑁆𑀯𑀸 𑀓𑀢𑀁, 𑀇𑀤𑀁 𑀅𑀓𑀼𑀲𑀮𑀁 𑀫𑀸 𑀅𑀫𑁆𑀳𑀸𑀓𑀫𑁂𑀯, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯𑁨.

‘‘𑀳𑀦𑁆𑀢𑁆𑀯𑀸 𑀙𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀘, 𑀤𑁂𑀢𑀺 𑀤𑀸𑀦𑀁 𑀅𑀲𑀜𑁆𑀜𑀢𑁄;

𑀏𑀤𑀺𑀲𑀁 𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄, 𑀲 𑀧𑀸𑀧𑁂𑀦 𑀉𑀧𑀮𑀺𑀧𑁆𑀧𑀢𑀻’’𑀢𑀺.

𑀢𑀢𑁆𑀣 ¶ ¶ 𑀳𑀦𑁆𑀢𑁆𑀯𑀸𑀢𑀺 𑀧𑀳𑀭𑀺𑀢𑁆𑀯𑀸. 𑀙𑁂𑀢𑁆𑀯𑀸𑀢𑀺 𑀓𑀺𑀮𑀫𑁂𑀢𑁆𑀯𑀸. 𑀯𑀥𑀺𑀢𑁆𑀯𑀸𑀢𑀺 𑀫𑀸𑀭𑁂𑀢𑁆𑀯𑀸. 𑀤𑁂𑀢𑀺 𑀤𑀸𑀦𑀁 𑀅𑀲𑀜𑁆𑀜𑀢𑁄𑀢𑀺 𑀅𑀲𑀜𑁆𑀜𑀢𑁄 𑀤𑀼𑀲𑁆𑀲𑀻𑀮𑁄 𑀏𑀯𑀁 𑀓𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺. 𑀏𑀤𑀺𑀲𑀁 𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄, 𑀲 𑀧𑀸𑀧𑁂𑀦 𑀉𑀧𑀮𑀺𑀧𑁆𑀧𑀢𑀻𑀢𑀺 𑀏𑀤𑀺𑀲𑀁 𑀉𑀤𑁆𑀤𑀺𑀲𑁆𑀲𑀓𑀢𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄 𑀲𑁄 𑀲𑀫𑀡𑁄𑀧𑀺 𑀧𑀸𑀧𑁂𑀦 𑀉𑀧𑀮𑀺𑀧𑁆𑀧𑀢𑀺 𑀲𑀁𑀬𑀼𑀚𑁆𑀚𑀢𑀺𑀬𑁂𑀯𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁯𑁩.

‘‘𑀧𑀼𑀢𑁆𑀢𑀤𑀸𑀭𑀫𑁆𑀧𑀺 𑀘𑁂 𑀳𑀦𑁆𑀢𑁆𑀯𑀸, 𑀤𑁂𑀢𑀺 𑀤𑀸𑀦𑀁 𑀅𑀲𑀜𑁆𑀜𑀢𑁄;

𑀪𑀼𑀜𑁆𑀚𑀫𑀸𑀦𑁄𑀧𑀺 𑀲𑀧𑁆𑀧𑀜𑁆𑀜𑁄, 𑀦 𑀧𑀸𑀧𑁂𑀦 𑀉𑀧𑀮𑀺𑀧𑁆𑀧𑀢𑀻’’𑀢𑀺.

𑀢𑀢𑁆𑀣 ¶ 𑀪𑀼𑀜𑁆𑀚𑀫𑀸𑀦𑁄𑀧𑀺 𑀲𑀧𑁆𑀧𑀜𑁆𑀜𑁄𑀢𑀺 𑀢𑀺𑀝𑁆𑀞𑀢𑀼 𑀅𑀜𑁆𑀜𑀁 𑀫𑀁𑀲𑀁, 𑀧𑀼𑀢𑁆𑀢𑀤𑀸𑀭𑀁 𑀯𑀥𑀺𑀢𑁆𑀯𑀸𑀧𑀺 𑀤𑀼𑀲𑁆𑀲𑀻𑀮𑁂𑀦 𑀤𑀺𑀦𑁆𑀦𑀁 𑀲𑀧𑁆𑀧𑀜𑁆𑀜𑁄 𑀔𑀦𑁆𑀢𑀺𑀫𑁂𑀢𑁆𑀢𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀧𑀸𑀧𑁂𑀦 𑀦 𑀉𑀧𑀮𑀺𑀧𑁆𑀧𑀢𑀻𑀢𑀺. 𑀏𑀯𑀫𑀲𑁆𑀲 𑀩𑁄𑀥𑀺𑀲𑀢𑁆𑀢𑁄 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀼𑀝𑀼𑀫𑁆𑀩𑀺𑀓𑁄 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀸𑀮𑁄𑀯𑀸𑀤𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁪𑁭] 𑁭. 𑀧𑀸𑀤𑀜𑁆𑀚𑀮𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀤𑁆𑀥𑀸 𑀧𑀸𑀤𑀜𑁆𑀚𑀮𑀻 𑀲𑀩𑁆𑀩𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀴𑀼𑀤𑀸𑀬𑀻𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀜𑁆𑀳𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀜𑁆𑀳𑀁 𑀲𑀼𑀡𑀦𑁆𑀢𑀸 𑀣𑁂𑀭𑁂 𑀧𑀲𑀁𑀲𑀦𑁆𑀢𑀺. 𑀮𑀸𑀴𑀼𑀤𑀸𑀬𑀻𑀣𑁂𑀭𑁄 𑀧𑀦 𑀧𑀭𑀺𑀲𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 ‘‘𑀏𑀢𑁂 𑀅𑀫𑁆𑀳𑁂𑀳𑀺 𑀲𑀫𑀁 𑀓𑀺𑀁 𑀚𑀸𑀦𑀦𑁆𑀢𑀻’’𑀢𑀺 𑀑𑀝𑁆𑀞𑀁 𑀪𑀜𑁆𑀚𑀺. 𑀢𑀁 𑀤𑀺𑀲𑁆𑀯𑀸 𑀣𑁂𑀭𑀸 𑀉𑀝𑁆𑀞𑀸𑀬 𑀧𑀓𑁆𑀓𑀫𑀺𑀁𑀲𑀼, 𑀧𑀭𑀺𑀲𑀸 𑀪𑀺𑀚𑁆𑀚𑀺. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄 𑀮𑀸𑀴𑀼𑀤𑀸𑀬𑀻, 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀕𑀭𑀳𑀺𑀢𑁆𑀯𑀸 𑀑𑀝𑁆𑀞𑀁 𑀪𑀜𑁆𑀚𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀮𑀸𑀴𑀼𑀤𑀸𑀬𑀻 𑀞𑀧𑁂𑀢𑁆𑀯𑀸 𑀑𑀝𑁆𑀞𑀪𑀜𑁆𑀚𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀭𑀜𑁆𑀜𑁄 𑀧𑀸𑀤𑀜𑁆𑀚𑀮𑀻 𑀦𑀸𑀫 𑀧𑀼𑀢𑁆𑀢𑁄 𑀮𑀸𑀮𑁄 𑀤𑀦𑁆𑀥𑀧𑀭𑀺𑀲𑀓𑁆𑀓𑀦𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀫𑀢𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 ‘‘𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑀬𑀫𑀸𑀦𑀸 𑀭𑀸𑀚𑀧𑀼𑀢𑁆𑀢𑀁 𑀧𑀸𑀤𑀜𑁆𑀚𑀮𑀺𑀁 𑀆𑀳𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀅𑀬𑀁 𑀓𑀼𑀫𑀸𑀭𑁄 𑀮𑀸𑀮𑁄 𑀤𑀦𑁆𑀥𑀧𑀭𑀺𑀲𑀓𑁆𑀓𑀦𑁄, 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑀁 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 𑀯𑀺𑀦𑀺𑀘𑁆𑀙𑀬𑀁 𑀲𑀚𑁆𑀚𑁂𑀢𑁆𑀯𑀸 𑀓𑀼𑀫𑀸𑀭𑀁 𑀲𑀫𑀻𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀸 𑀦 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀦𑀺𑀁𑀲𑀼. 𑀢𑁂 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀓𑀼𑀫𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀻𑀤𑀺𑀲𑀁, 𑀓𑀼𑀫𑀸𑀭, 𑀲𑀼𑀝𑁆𑀞𑀼 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀫𑁆𑀳𑀸’’𑀢𑀺. 𑀲𑁄 𑀑𑀝𑁆𑀞𑀁 𑀪𑀜𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀡𑁆𑀟𑀺𑀢𑁄 𑀯𑀢 𑀫𑀜𑁆𑀜𑁂 𑀓𑀼𑀫𑀸𑀭𑁄, 𑀅𑀲𑀫𑁆𑀫𑀸𑀯𑀺𑀦𑀺𑀘𑁆𑀙𑀺𑀢𑀪𑀸𑀯𑁄 𑀢𑁂𑀦 𑀜𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯𑁪.

‘‘𑀅𑀤𑁆𑀥𑀸 ¶ 𑀧𑀸𑀤𑀜𑁆𑀚𑀮𑀻 𑀲𑀩𑁆𑀩𑁂, 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀢𑀺;

𑀢𑀣𑀸 𑀳𑀺 𑀑𑀝𑁆𑀞𑀁 𑀪𑀜𑁆𑀚𑀢𑀺, 𑀉𑀢𑁆𑀢𑀭𑀺𑀁 𑀦𑀽𑀦 𑀧𑀲𑁆𑀲𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀏𑀓𑀁𑀲𑁂𑀦 𑀧𑀸𑀤𑀜𑁆𑀚𑀮𑀺𑀓𑀼𑀫𑀸𑀭𑁄 𑀲𑀩𑁆𑀩𑁂 𑀅𑀫𑁆𑀳𑁂 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀢𑀺. 𑀢𑀣𑀸 𑀳𑀺 𑀑𑀝𑁆𑀞𑀁 𑀪𑀜𑁆𑀚𑀢𑀺, 𑀦𑀽𑀦 𑀉𑀢𑁆𑀢𑀭𑀺𑀁 𑀅𑀜𑁆𑀜𑀁 𑀓𑀸𑀭𑀡𑀁 𑀧𑀲𑁆𑀲𑀢𑀻𑀢𑀺.

𑀢𑁂 𑀅𑀧𑀭𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀯𑀺𑀦𑀺𑀘𑁆𑀙𑀬𑀁 𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀁 𑀅𑀟𑁆𑀟𑀁 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 ‘‘𑀓𑀻𑀤𑀺𑀲𑀁, 𑀤𑁂𑀯, 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀦𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀧𑀼𑀦𑀧𑀺 𑀑𑀝𑁆𑀞𑀫𑁂𑀯 𑀪𑀜𑁆𑀚𑀺. 𑀅𑀣𑀲𑁆𑀲 𑀅𑀦𑁆𑀥𑀩𑀸𑀮𑀪𑀸𑀯𑀁 𑀜𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁯𑁫.

‘‘𑀦𑀸𑀬𑀁 𑀥𑀫𑁆𑀫𑀁 𑀅𑀥𑀫𑁆𑀫𑀁 𑀯𑀸, 𑀅𑀢𑁆𑀣𑀸𑀦𑀢𑁆𑀣𑀜𑁆𑀘 𑀩𑀼𑀚𑁆𑀛𑀢𑀺;

𑀅𑀜𑁆𑀜𑀢𑁆𑀭 𑀑𑀝𑁆𑀞𑀦𑀺𑀩𑁆𑀪𑁄𑀕𑀸, 𑀦𑀸𑀬𑀁 𑀚𑀸𑀦𑀸𑀢𑀺 𑀓𑀺𑀜𑁆𑀘𑀦’’𑀦𑁆𑀢𑀺.

𑀅𑀫𑀘𑁆𑀘𑀸 𑀧𑀸𑀤𑀜𑁆𑀚𑀮𑀺𑀓𑀼𑀫𑀸𑀭𑀲𑁆𑀲 𑀮𑀸𑀮𑀪𑀸𑀯𑀁 𑀜𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀸𑀤𑀜𑁆𑀚𑀮𑀻 𑀮𑀸𑀴𑀼𑀤𑀸𑀬𑀻 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀸𑀤𑀜𑁆𑀚𑀮𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁪𑁮] 𑁮. 𑀓𑀺𑀁𑀲𑀼𑀓𑁄𑀧𑀫𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑁂𑀳𑀺 ¶ ¶ 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀦𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀘𑀢𑁆𑀢𑀸𑀭𑁄 𑀳𑀺 𑀪𑀺𑀓𑁆𑀔𑀽 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀺𑀁𑀲𑀼, 𑀲𑀢𑁆𑀣𑀸 𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀅𑀕𑀫𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀙 𑀨𑀲𑁆𑀲𑀸𑀬𑀢𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀏𑀓𑁄 𑀧𑀜𑁆𑀘𑀓𑁆𑀔𑀦𑁆𑀥𑁂, 𑀏𑀓𑁄 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑁂, 𑀏𑀓𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀥𑀺𑀕𑀢𑀯𑀺𑀲𑁂𑀲𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀅𑀣𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀇𑀫𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀦𑀸𑀦𑀸, 𑀦𑀺𑀩𑁆𑀩𑀸𑀦𑀁 𑀏𑀓𑀁, 𑀓𑀣𑀁 𑀲𑀩𑁆𑀩𑁂𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢’’𑀦𑁆𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀓𑀺𑀁 𑀢𑁂, 𑀪𑀺𑀓𑁆𑀔𑀼, 𑀓𑀺𑀁𑀲𑀼𑀓𑀤𑀺𑀝𑁆𑀞𑀪𑀸𑀢𑀺𑀓𑁂𑀳𑀺 𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀇𑀤𑀁 𑀦𑁄, 𑀪𑀦𑁆𑀢𑁂, 𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀏𑀓𑀤𑀺𑀯𑀲𑀁 𑀲𑀸𑀭𑀣𑀺𑀁 𑀧𑀓𑁆𑀓𑁄𑀲𑁂𑀢𑁆𑀯𑀸 ‘‘𑀫𑀬𑀁, 𑀲𑀫𑁆𑀫, 𑀓𑀺𑀁𑀲𑀼𑀓𑀁 𑀤𑀝𑁆𑀞𑀼𑀓𑀸𑀫𑀸, 𑀓𑀺𑀁𑀲𑀼𑀓𑀭𑀼𑀓𑁆𑀔𑀁 𑀦𑁄 𑀤𑀲𑁆𑀲𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑀸𑀭𑀣𑀺 ‘‘𑀲𑀸𑀥𑀼, 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀏𑀓𑀢𑁄 𑀅𑀤𑀲𑁆𑀲𑁂𑀢𑁆𑀯𑀸 𑀚𑁂𑀝𑁆𑀞𑀭𑀸𑀚𑀧𑀼𑀢𑁆𑀢𑀁 𑀢𑀸𑀯 𑀭𑀣𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀓𑀺𑀁𑀲𑀼𑀓𑁄’’𑀢𑀺 𑀔𑀸𑀡𑀼𑀓𑀓𑀸𑀮𑁂 𑀓𑀺𑀁𑀲𑀼𑀓𑀁 𑀤𑀲𑁆𑀲𑁂𑀲𑀺. 𑀅𑀧𑀭𑀲𑁆𑀲 𑀩𑀳𑀮𑀧𑀮𑀸𑀲𑀓𑀸𑀮𑁂, 𑀅𑀧𑀭𑀲𑁆𑀲 𑀧𑀼𑀧𑁆𑀨𑀺𑀢𑀓𑀸𑀮𑁂, 𑀅𑀧𑀭𑀲𑁆𑀲 𑀨𑀮𑀺𑀢𑀓𑀸𑀮𑁂. 𑀅𑀧𑀭𑀪𑀸𑀕𑁂 𑀘𑀢𑁆𑀢𑀸𑀭𑁄𑀧𑀺 𑀪𑀸𑀢𑀭𑁄 𑀏𑀓𑀢𑁄 𑀦𑀺𑀲𑀺𑀦𑁆𑀦𑀸 ‘‘𑀓𑀺𑀁𑀲𑀼𑀓𑁄 𑀦𑀸𑀫 𑀓𑀻𑀤𑀺𑀲𑁄’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀢𑀢𑁄 𑀏𑀓𑁄 ‘‘𑀲𑁂𑀬𑁆𑀬𑀸𑀣𑀸𑀧𑀺 𑀛𑀸𑀫𑀣𑀽𑀡𑁄’’𑀢𑀺 𑀆𑀳. 𑀤𑀼𑀢𑀺𑀬𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄’’𑀢𑀺, 𑀢𑀢𑀺𑀬𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀫𑀁𑀲𑀧𑁂𑀲𑀻’’𑀢𑀺, 𑀘𑀢𑀼𑀢𑁆𑀣𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀲𑀺𑀭𑀻𑀲𑁄’’𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀓𑀣𑀸𑀬 𑀅𑀧𑀭𑀺𑀢𑀼𑀝𑁆𑀞𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀓𑀺𑀁𑀲𑀼𑀓𑁄 𑀦𑀸𑀫 𑀓𑀻𑀤𑀺𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀓𑀺𑀁 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑀸 𑀓𑀣𑀺𑀢𑀦𑀻𑀳𑀸𑀭𑀁 𑀭𑀜𑁆𑀜𑁄 𑀓𑀣𑁂𑀲𑀼𑀁. 𑀭𑀸𑀚𑀸 ‘‘𑀘𑀢𑀽𑀳𑀺𑀧𑀺 𑀢𑀼𑀫𑁆𑀳𑁂𑀳𑀺 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑁄, 𑀓𑁂𑀯𑀮𑀁 𑀯𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀲𑀸𑀭𑀣𑀺 ‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀺𑀁𑀲𑀼𑀓𑁄 𑀓𑀻𑀤𑀺𑀲𑁄 ¶ , 𑀇𑀫𑀲𑁆𑀫𑀺𑀁 𑀓𑀻𑀤𑀺𑀲𑁄’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀦 𑀧𑀼𑀘𑁆𑀙𑀺𑀢𑁄, 𑀢𑁂𑀦 𑀯𑁄 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯𑁬.

‘‘𑀲𑀩𑁆𑀩𑁂𑀳𑀺 ¶ 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑁄, 𑀓𑀺𑀁 𑀦𑁆𑀯𑁂𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀣;

𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀲𑀸𑀭𑀣𑀻 𑀧𑀭𑀺𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀲𑀸𑀭𑀣𑀻 𑀧𑀭𑀺𑀧𑀼𑀘𑁆𑀙𑀺𑀢𑁄𑀢𑀺 𑀲𑀩𑁆𑀩𑁂𑀳𑀺 𑀯𑁄 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑁄, 𑀓𑀺𑀁 𑀦𑀼 𑀢𑀼𑀫𑁆𑀳𑁂 𑀏𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀣, 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀓𑀺𑀁𑀲𑀼𑀓𑁄𑀯𑁂𑀲𑁄, 𑀢𑀼𑀫𑁆𑀳𑁂𑀳𑀺 𑀧𑀦 𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀲𑀸𑀭𑀣𑀺 𑀧𑀭𑀺𑀧𑀼𑀘𑁆𑀙𑀺𑀢𑁄, 𑀢𑁂𑀦 𑀯𑁄 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀣𑀸, 𑀪𑀺𑀓𑁆𑀔𑀼, 𑀢𑁂 𑀘𑀢𑁆𑀢𑀸𑀭𑁄 𑀪𑀸𑀢𑀺𑀓𑀸 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀢𑁆𑀢𑀸 𑀓𑀺𑀁𑀲𑀼𑀓𑁂 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀲𑀼𑀁, 𑀏𑀯𑀁 𑀢𑁆𑀯𑀫𑁆𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁯𑁭.

‘‘𑀏𑀯𑀁 𑀲𑀩𑁆𑀩𑁂𑀳𑀺 𑀜𑀸𑀡𑁂𑀳𑀺, 𑀬𑁂𑀲𑀁 𑀥𑀫𑁆𑀫𑀸 𑀅𑀚𑀸𑀦𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂𑀲𑀼 𑀓𑀗𑁆𑀔𑀦𑁆𑀢𑀺, 𑀓𑀺𑀁𑀲𑀼𑀓𑀲𑁆𑀫𑀺𑀁𑀯 𑀪𑀸𑀢𑀭𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀢𑁂 𑀪𑀸𑀢𑀭𑁄 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀓𑀺𑀁𑀲𑀼𑀓𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀓𑀗𑁆𑀔𑀺𑀁𑀲𑀼, 𑀏𑀯𑀁 𑀲𑀩𑁆𑀩𑁂𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀳𑀺 𑀬𑁂𑀲𑀁 𑀲𑀩𑁆𑀩𑁂 𑀙𑀨𑀲𑁆𑀲𑀸𑀬𑀢𑀦𑀔𑀦𑁆𑀥𑀪𑀽𑀢𑀥𑀸𑀢𑀼𑀪𑁂𑀤𑀸 𑀥𑀫𑁆𑀫𑀸 𑀅𑀚𑀸𑀦𑀺𑀢𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 ¶ 𑀅𑀦𑀥𑀺𑀕𑀢𑀢𑁆𑀢𑀸 𑀅𑀧𑁆𑀧𑀝𑀺𑀯𑀺𑀤𑁆𑀥𑀸, 𑀢𑁂 𑀯𑁂 𑀢𑁂𑀲𑀼 𑀨𑀲𑁆𑀲𑀸𑀬𑀢𑀦𑀸𑀤𑀺𑀥𑀫𑁆𑀫𑁂𑀲𑀼 𑀓𑀗𑁆𑀔𑀦𑁆𑀢𑀺 𑀬𑀣𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀺𑀁𑀲𑀼𑀓𑀲𑁆𑀫𑀺𑀁 𑀘𑀢𑁆𑀢𑀸𑀭𑁄 𑀪𑀸𑀢𑀭𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀺𑀁𑀲𑀼𑀓𑁄𑀧𑀫𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁪𑁯] 𑁯. 𑀲𑀸𑀮𑀓𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑀧𑀼𑀢𑁆𑀢𑀓𑁄 𑀪𑀯𑀺𑀲𑁆𑀲𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀳𑀸𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑁂𑀓𑀁 𑀓𑀼𑀫𑀸𑀭𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀻𑀴𑁂𑀦𑁆𑀢𑁄 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀸𑀫𑀡𑁂𑀭𑁄 𑀧𑀻𑀴𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀧𑁆𑀧𑀩𑁆𑀩𑀚𑀺. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀢𑀁 𑀉𑀧𑀮𑀸𑀧𑁂𑀢𑀺 ‘‘𑀓𑀼𑀫𑀸𑀭, 𑀢𑀯 𑀘𑀻𑀯𑀭𑀁 ¶ 𑀢𑀯𑁂𑀯 𑀪𑀯𑀺𑀲𑁆𑀲𑀢𑀺 𑀧𑀢𑁆𑀢𑁄𑀧𑀺, 𑀫𑀫 𑀲𑀦𑁆𑀢𑀓𑀁 𑀧𑀢𑁆𑀢𑀘𑀻𑀯𑀭𑀫𑁆𑀧𑀺 𑀢𑀯𑁂𑀯 𑀪𑀯𑀺𑀲𑁆𑀲𑀢𑀺, 𑀏𑀳𑀺 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑁄 ‘‘𑀦𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀧𑀩𑁆𑀩𑀚𑀺 ¶ . 𑀅𑀣 𑀦𑀁 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀣𑁂𑀭𑁄 𑀯𑀺𑀳𑁂𑀞𑁂𑀲𑀺. 𑀲𑁄 𑀧𑀻𑀴𑀁 𑀅𑀲𑀳𑀦𑁆𑀢𑁄 𑀧𑀼𑀦 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑁂𑀓𑀯𑀸𑀭𑀁 𑀬𑀸𑀘𑀦𑁆𑀢𑁂𑀧𑀺 𑀢𑀲𑁆𑀫𑀺𑀁 ‘‘𑀢𑁆𑀯𑀁 𑀦𑁂𑀯 𑀫𑀁 𑀲𑀳𑀲𑀺, 𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀲𑀺, 𑀕𑀘𑁆𑀙 𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀦 𑀧𑀩𑁆𑀩𑀚𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀲𑀼𑀳𑀤𑀬𑁄 𑀯𑀢 𑀲𑁄 𑀤𑀸𑀭𑀓𑁄 𑀫𑀳𑀸𑀣𑁂𑀭𑀲𑁆𑀲 𑀆𑀲𑀬𑀁 𑀜𑀢𑁆𑀯𑀸 𑀦 𑀧𑀩𑁆𑀩𑀚𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲 𑀲𑀼𑀳𑀤𑀬𑁄, 𑀧𑀼𑀩𑁆𑀩𑁂𑀧𑀺 𑀲𑀼𑀳𑀤𑀬𑁄𑀯, 𑀏𑀓𑀯𑀸𑀭𑀁 𑀏𑀢𑀲𑁆𑀲 𑀤𑁄𑀲𑀁 𑀤𑀺𑀲𑁆𑀯𑀸 𑀦 𑀧𑀼𑀦 𑀉𑀧𑀕𑀘𑁆𑀙𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀥𑀜𑁆𑀜𑀯𑀺𑀓𑁆𑀓𑀬𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀅𑀜𑁆𑀜𑀢𑀭𑁄𑀧𑀺 𑀅𑀳𑀺𑀢𑀼𑀡𑁆𑀟𑀺𑀓𑁄 𑀏𑀓𑀁 𑀫𑀓𑁆𑀓𑀝𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀑𑀲𑀥𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑁂𑀦 𑀲𑀧𑁆𑀧𑀁 𑀓𑀻𑀴𑀸𑀧𑁂𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀩𑀸𑀭𑀸𑀡𑀲𑀺𑀬𑀁 𑀉𑀲𑁆𑀲𑀯𑁂 𑀖𑀼𑀝𑁆𑀞𑁂 𑀉𑀲𑁆𑀲𑀯𑀁 𑀓𑀻𑀴𑀺𑀢𑀼𑀓𑀸𑀫𑁄 ‘‘𑀇𑀫𑀁 𑀫𑀸 𑀧𑀫𑀚𑁆𑀚𑀻’’𑀢𑀺 𑀢𑀁 𑀫𑀓𑁆𑀓𑀝𑀁 𑀢𑀲𑁆𑀲 𑀥𑀜𑁆𑀜𑀯𑀸𑀡𑀺𑀚𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀉𑀲𑁆𑀲𑀯𑀁 𑀓𑀻𑀴𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀫𑀓𑁆𑀓𑀝𑁄’’𑀢𑀺 𑀧𑀼𑀘𑁆𑀙𑀺. 𑀫𑀓𑁆𑀓𑀝𑁄 𑀲𑀸𑀫𑀺𑀓𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀥𑀜𑁆𑀜𑀸𑀧𑀡𑀢𑁄 𑀯𑁂𑀕𑁂𑀦 𑀦𑀺𑀓𑁆𑀔𑀫𑀺. 𑀅𑀣 𑀦𑀁 𑀲𑁄 𑀯𑁂𑀴𑀼𑀧𑁂𑀲𑀺𑀓𑀸𑀬 𑀧𑀺𑀝𑁆𑀞𑀺𑀬𑀁 𑀧𑁄𑀣𑁂𑀢𑁆𑀯𑀸 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀫𑀓𑁆𑀓𑀝𑁄 𑀢𑀲𑁆𑀲 𑀦𑀺𑀤𑁆𑀤𑀸𑀬𑀦𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀅𑀫𑁆𑀩𑀧𑀓𑁆𑀓𑀁 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀺𑀁 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀲𑀭𑀻𑀭𑁂 𑀧𑀸𑀢𑁂𑀲𑀺. 𑀲𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ¶ ‘‘𑀫𑀥𑀼𑀭𑀯𑀘𑀦𑁂𑀦 𑀦𑀁 𑀯𑀜𑁆𑀘𑁂𑀢𑁆𑀯𑀸 𑀭𑀼𑀓𑁆𑀔𑀸 𑀑𑀢𑀸𑀭𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀮𑀸𑀧𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯𑁮.

‘‘𑀏𑀓𑀧𑀼𑀢𑁆𑀢𑀓𑁄 𑀪𑀯𑀺𑀲𑁆𑀲𑀲𑀺, 𑀢𑁆𑀯𑀜𑁆𑀘 𑀦𑁄 𑀳𑁂𑀲𑁆𑀲𑀲𑀺 𑀇𑀲𑁆𑀲𑀭𑁄 𑀓𑀼𑀮𑁂;

𑀑𑀭𑁄𑀳 ¶ 𑀤𑀼𑀫𑀲𑁆𑀫𑀸 𑀲𑀸𑀮𑀓, 𑀏𑀳𑀺 𑀤𑀸𑀦𑀺 𑀖𑀭𑀓𑀁 𑀯𑀚𑁂𑀫𑀲𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁 𑀫𑀬𑁆𑀳𑀁 𑀏𑀓𑀧𑀼𑀢𑁆𑀢𑀓𑁄 𑀪𑀯𑀺𑀲𑁆𑀲𑀲𑀺, 𑀓𑀼𑀮𑁂 𑀘 𑀫𑁂 𑀪𑁄𑀕𑀸𑀦𑀁 𑀇𑀲𑁆𑀲𑀭𑁄, 𑀏𑀢𑀫𑁆𑀳𑀸 𑀭𑀼𑀓𑁆𑀔𑀸 𑀑𑀢𑀭, 𑀏𑀳𑀺 𑀅𑀫𑁆𑀳𑀸𑀓𑀁 𑀖𑀭𑀁 𑀕𑀫𑀺𑀲𑁆𑀲𑀸𑀫. 𑀲𑀸𑀮𑀓𑀸𑀢𑀺 𑀦𑀸𑀫𑁂𑀦 𑀆𑀮𑀧𑀦𑁆𑀢𑁄 𑀆𑀳.

𑀢𑀁 ¶ 𑀲𑀼𑀢𑁆𑀯𑀸 𑀫𑀓𑁆𑀓𑀝𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁯𑁯.

‘‘𑀦𑀦𑀼 𑀫𑀁 𑀲𑀼𑀳𑀤𑀬𑁄𑀢𑀺 𑀫𑀜𑁆𑀜𑀲𑀺, 𑀬𑀜𑁆𑀘 𑀫𑀁 𑀳𑀦𑀲𑀺 𑀯𑁂𑀴𑀼𑀬𑀝𑁆𑀞𑀺𑀬𑀸;

𑀧𑀓𑁆𑀓𑀫𑁆𑀩𑀯𑀦𑁂 𑀭𑀫𑀸𑀫𑀲𑁂, 𑀕𑀘𑁆𑀙 𑀢𑁆𑀯𑀁 𑀖𑀭𑀓𑀁 𑀬𑀣𑀸𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀦𑀦𑀼 𑀫𑀁 𑀲𑀼𑀳𑀤𑀬𑁄𑀢𑀺 𑀫𑀜𑁆𑀜𑀲𑀻𑀢𑀺 𑀦𑀦𑀼 𑀢𑁆𑀯𑀁 𑀫𑀁 ‘‘𑀲𑀼𑀳𑀤𑀬𑁄’’𑀢𑀺 𑀫𑀜𑁆𑀜𑀲𑀺, ‘‘𑀲𑀼𑀳𑀤𑀬𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀲𑀻𑀢𑀺 𑀅𑀢𑁆𑀣𑁄. 𑀬𑀜𑁆𑀘 𑀫𑀁 𑀳𑀦𑀲𑀺 𑀯𑁂𑀴𑀼𑀬𑀝𑁆𑀞𑀺𑀬𑀸𑀢𑀺 𑀬𑀁 𑀫𑀁 𑀏𑀯𑀁 𑀅𑀢𑀺𑀫𑀜𑁆𑀜𑀲𑀺, 𑀬𑀜𑁆𑀘 𑀯𑁂𑀴𑀼𑀧𑁂𑀲𑀺𑀓𑀸𑀬 𑀳𑀦𑀲𑀺, 𑀢𑁂𑀦𑀸𑀳𑀁 𑀦𑀸𑀕𑀘𑁆𑀙𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀅𑀣 𑀦𑀁 ‘‘𑀫𑀬𑀁 𑀇𑀫𑀲𑁆𑀫𑀺𑀁 𑀧𑀓𑁆𑀓𑀫𑁆𑀩𑀯𑀦𑁂 𑀭𑀫𑀸𑀫𑀲𑁂, 𑀕𑀘𑁆𑀙 𑀢𑁆𑀯𑀁 𑀖𑀭𑀓𑀁 𑀬𑀣𑀸𑀲𑀼𑀔’’𑀦𑁆𑀢𑀺 𑀯𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀯𑀦𑀁 𑀧𑀸𑀯𑀺𑀲𑀺. 𑀅𑀳𑀺𑀢𑀼𑀡𑁆𑀟𑀺𑀓𑁄𑀧𑀺 𑀅𑀦𑀢𑁆𑀢𑀫𑀦𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀓𑁆𑀓𑀝𑁄 𑀲𑀸𑀫𑀡𑁂𑀭𑁄 𑀅𑀳𑁄𑀲𑀺, 𑀅𑀳𑀺𑀢𑀼𑀡𑁆𑀟𑀺𑀓𑁄 𑀫𑀳𑀸𑀣𑁂𑀭𑁄, 𑀥𑀜𑁆𑀜𑀯𑀸𑀡𑀺𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀮𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁫𑁦] 𑁧𑁦. 𑀓𑀧𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀬𑀁 𑀇𑀲𑀻 𑀉𑀧𑀲𑀫𑀲𑀁𑀬𑀫𑁂 𑀭𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀳𑀺 𑀓𑀼𑀳𑀓𑀪𑀸𑀯𑁄 𑀪𑀺𑀓𑁆𑀔𑀽𑀲𑀼 𑀧𑀸𑀓𑀝𑁄 𑀚𑀸𑀢𑁄. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀦𑀺𑀬𑁆𑀬𑀸𑀦𑀺𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀳𑀓𑀯𑀢𑁆𑀢𑀁 𑀧𑀽𑀭𑁂𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ¶ ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂 ¶ , 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀓𑀼𑀳𑀓𑁄𑀬𑁂𑀯, 𑀅𑀕𑁆𑀕𑀺𑀫𑀢𑁆𑀢𑀲𑁆𑀲 𑀓𑀸𑀭𑀡𑀸 𑀫𑀓𑁆𑀓𑀝𑁄 𑀳𑀼𑀢𑁆𑀯𑀸 𑀓𑁄𑀳𑀜𑁆𑀜𑀫𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀺𑀬𑀸 𑀫𑀢𑀸𑀬 𑀧𑀼𑀢𑁆𑀢𑀁 𑀅𑀗𑁆𑀓𑁂𑀦𑀸𑀤𑀸𑀬 𑀳𑀺𑀫𑀯𑀦𑁆𑀢𑀁 ¶ 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀫𑁆𑀧𑀺 𑀧𑀼𑀢𑁆𑀢𑀁 𑀢𑀸𑀧𑀲𑀓𑀼𑀫𑀸𑀭𑀓𑀁 𑀓𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀅𑀘𑁆𑀙𑀺𑀦𑁆𑀦𑀥𑀸𑀭𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀏𑀓𑁄 𑀫𑀓𑁆𑀓𑀝𑁄 𑀲𑀻𑀢𑀧𑀻𑀴𑀺𑀢𑁄 𑀤𑀦𑁆𑀢𑁂 𑀔𑀸𑀤𑀦𑁆𑀢𑁄 𑀓𑀫𑁆𑀧𑀦𑁆𑀢𑁄 𑀯𑀺𑀘𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀳𑀦𑁆𑀢𑁂 𑀤𑀸𑀭𑀼𑀓𑁆𑀔𑀦𑁆𑀥𑁂 𑀆𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺, 𑀧𑀼𑀢𑁆𑀢𑀓𑁄𑀧𑀺𑀲𑁆𑀲 𑀧𑀸𑀤𑁂 𑀧𑀭𑀺𑀫𑀚𑁆𑀚𑀫𑀸𑀦𑁄 𑀦𑀺𑀲𑀻𑀤𑀺. 𑀲𑁄 𑀫𑀓𑁆𑀓𑀝𑁄 𑀏𑀓𑀲𑁆𑀲 𑀫𑀢𑀢𑀸𑀧𑀲𑀲𑁆𑀲 𑀲𑀦𑁆𑀢𑀓𑀸𑀦𑀺 𑀯𑀓𑁆𑀓𑀮𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀅𑀚𑀺𑀦𑀘𑀫𑁆𑀫𑀁 𑀅𑀁𑀲𑁂 𑀓𑀢𑁆𑀯𑀸 𑀓𑀸𑀚𑀓𑀫𑀡𑁆𑀟𑀮𑀼𑀁 𑀆𑀤𑀸𑀬 𑀇𑀲𑀺𑀯𑁂𑀲𑁂𑀦𑀸𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀅𑀕𑁆𑀕𑀺𑀲𑁆𑀲 𑀓𑀸𑀭𑀡𑀸 𑀓𑀼𑀳𑀓𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀸𑀧𑀲𑀓𑀼𑀫𑀸𑀭𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀢𑀸𑀧𑀲𑁄 𑀏𑀓𑁄 𑀲𑀻𑀢𑀧𑀻𑀴𑀺𑀢𑁄 𑀓𑀫𑁆𑀧𑀫𑀸𑀦𑁄 𑀢𑀺𑀝𑁆𑀞𑀢𑀺, 𑀇𑀥 𑀦𑀁 𑀧𑀓𑁆𑀓𑁄𑀲𑀣, 𑀯𑀺𑀲𑀺𑀩𑁆𑀩𑁂𑀲𑁆𑀲𑀢𑀻’’𑀢𑀺 𑀧𑀺𑀢𑀭𑀁 𑀆𑀬𑀸𑀘𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁦𑁦.

‘‘𑀅𑀬𑀁 𑀇𑀲𑀻 𑀉𑀧𑀲𑀫𑀲𑀁𑀬𑀫𑁂 𑀭𑀢𑁄, 𑀲 𑀢𑀺𑀝𑁆𑀞𑀢𑀺 𑀲𑀺𑀲𑀺𑀭𑀪𑀬𑁂𑀦 𑀅𑀝𑁆𑀝𑀺𑀢𑁄;

𑀳𑀦𑁆𑀤 𑀅𑀬𑀁 𑀧𑀯𑀺𑀲𑀢𑀼𑀫𑀁 𑀅𑀕𑀸𑀭𑀓𑀁, 𑀯𑀺𑀦𑁂𑀢𑀼 𑀲𑀻𑀢𑀁 𑀤𑀭𑀣𑀜𑁆𑀘 𑀓𑁂𑀯𑀮’’𑀦𑁆𑀢𑀺.

𑀢𑀢𑁆𑀣 𑀉𑀧𑀲𑀫𑀲𑀁𑀬𑀫𑁂 𑀭𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀉𑀧𑀲𑀫𑁂 𑀘 𑀲𑀻𑀮𑀲𑀁𑀬𑀫𑁂 𑀘 𑀭𑀢𑁄. 𑀲 𑀢𑀺𑀝𑁆𑀞𑀢𑀻𑀢𑀺 𑀲𑁄 𑀢𑀺𑀝𑁆𑀞𑀢𑀺. 𑀲𑀺𑀲𑀺𑀭𑀪𑀬𑁂𑀦𑀸𑀢𑀺 𑀯𑀸𑀢𑀯𑀼𑀝𑁆𑀞𑀺𑀚𑀦𑀺𑀢𑀲𑁆𑀲 𑀲𑀺𑀲𑀺𑀭𑀲𑁆𑀲 𑀪𑀬𑁂𑀦. 𑀅𑀝𑁆𑀝𑀺𑀢𑁄𑀢𑀺 𑀧𑀻𑀴𑀺𑀢𑁄. 𑀧𑀯𑀺𑀲𑀢𑀼𑀫𑀦𑁆𑀢𑀺 𑀧𑀯𑀺𑀲𑀢𑀼 𑀇𑀫𑀁. 𑀓𑁂𑀯𑀮𑀦𑁆𑀢𑀺 𑀲𑀓𑀮𑀁 𑀅𑀦𑀯𑀲𑁂𑀲𑀁.

𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬 𑀑𑀮𑁄𑀓𑁂𑀦𑁆𑀢𑁄 𑀫𑀓𑁆𑀓𑀝𑀪𑀸𑀯𑀁 𑀜𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁦𑁧.

‘‘𑀦𑀸𑀬𑀁 ¶ 𑀇𑀲𑀻 𑀉𑀧𑀲𑀫𑀲𑀁𑀬𑀫𑁂 𑀭𑀢𑁄, 𑀓𑀧𑀻 𑀅𑀬𑀁 𑀤𑀼𑀫𑀯𑀭𑀲𑀸𑀔𑀕𑁄𑀘𑀭𑁄;

𑀲𑁄 𑀤𑀽𑀲𑀓𑁄 𑀭𑁄𑀲𑀓𑁄 𑀘𑀸𑀧𑀺 𑀚𑀫𑁆𑀫𑁄, 𑀲𑀘𑁂 𑀯𑀚𑁂𑀫𑀫𑁆𑀧𑀺 𑀤𑀽𑀲𑁂𑀬𑁆𑀬𑀕𑀸𑀭’’𑀦𑁆𑀢𑀺.

𑀢𑀢𑁆𑀣 𑀤𑀼𑀫𑀯𑀭𑀲𑀸𑀔𑀕𑁄𑀘𑀭𑁄𑀢𑀺 𑀤𑀼𑀫𑀯𑀭𑀸𑀦𑀁 𑀲𑀸𑀔𑀕𑁄𑀘𑀭𑁄. 𑀲𑁄 𑀤𑀽𑀲𑀓𑁄 𑀭𑁄𑀲𑀓𑁄 𑀘𑀸𑀧𑀺 𑀚𑀫𑁆𑀫𑁄𑀢𑀺 𑀲𑁄 𑀏𑀯𑀁 𑀕𑀢𑀕𑀢𑀝𑁆𑀞𑀸𑀦𑀲𑁆𑀲 𑀤𑀽𑀲𑀦𑀢𑁄 𑀤𑀽𑀲𑀓𑁄, 𑀖𑀝𑁆𑀝𑀦𑀢𑀸𑀬 𑀭𑁄𑀲𑀓𑁄, 𑀮𑀸𑀫𑀓𑀪𑀸𑀯𑁂𑀦 𑀚𑀫𑁆𑀫𑁄. 𑀲𑀘𑁂 𑀯𑀚𑁂𑀢𑀺 ¶ 𑀬𑀤𑀺 𑀇𑀫𑀁 𑀧𑀡𑁆𑀡𑀲𑀸𑀮𑀁 𑀯𑀚𑁂 𑀧𑀯𑀺𑀲𑁂𑀬𑁆𑀬, 𑀲𑀩𑁆𑀩𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀭𑀡𑁂𑀦 𑀘 𑀅𑀕𑁆𑀕𑀺𑀤𑀸𑀦𑁂𑀦 𑀘 𑀤𑀽𑀲𑁂𑀬𑁆𑀬𑀸𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀢𑀁 𑀲𑀦𑁆𑀢𑀸𑀲𑁂𑀢𑁆𑀯𑀸 𑀧𑀮𑀸𑀧𑁂𑀲𑀺. 𑀲𑁄 𑀉𑀧𑁆𑀧𑀢𑀺𑀢𑁆𑀯𑀸 𑀯𑀦𑀁 𑀧𑀓𑁆𑀔𑀦𑁆𑀢𑁄 𑀢𑀣𑀸 𑀧𑀓𑁆𑀔𑀦𑁆𑀢𑁄𑀯 𑀅𑀳𑁄𑀲𑀺, 𑀦 𑀧𑀼𑀦 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀸𑀧𑀲𑀓𑀼𑀫𑀸𑀭𑀲𑁆𑀲 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺, 𑀲𑁄𑀧𑀺 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀲𑀺. 𑀢𑁂 𑀉𑀪𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑁄𑀭𑀸𑀡𑀢𑁄 𑀧𑀝𑁆𑀞𑀸𑀬𑀧𑁂𑀲 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀫𑀓𑁆𑀓𑀝𑁄 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀧𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀲𑀺𑀗𑁆𑀕𑀸𑀮𑀯𑀕𑁆𑀕𑁄 𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀩𑁆𑀩𑀤𑀸𑀞𑀻 𑀘 𑀲𑀼𑀦𑀔𑁄, 𑀕𑀼𑀢𑁆𑀢𑀺𑀮𑁄 𑀯𑀺𑀕𑀢𑀺𑀘𑁆𑀙𑀸 𑀘;

𑀫𑀽𑀮𑀧𑀭𑀺𑀬𑀸𑀬𑀁 𑀩𑀸𑀮𑁄𑀯𑀸𑀤𑀁, 𑀧𑀸𑀤𑀜𑁆𑀚𑀮𑀺 𑀓𑀺𑀁 𑀲𑀼𑀓𑁄𑀧𑀫𑀁;

𑀲𑀸𑀮𑀓𑀁 𑀓𑀧𑀺 𑀢𑁂 𑀤𑀲.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀤𑀴𑁆𑀳𑀯𑀕𑁆𑀕𑁄 𑀘 𑀲𑀦𑁆𑀣𑀯𑁄, 𑀓𑀮𑁆𑀬𑀸𑀡𑀥𑀫𑁆𑀫𑀸𑀲𑀤𑀺𑀲𑁄;

𑀭𑀽𑀳𑀓𑁄 𑀤𑀴𑁆𑀳𑀯𑀕𑁆𑀕𑁄 𑀘, 𑀩𑀻𑀭𑀡𑀣𑀫𑁆𑀪𑀓𑀸𑀲𑀸𑀯𑁄;

𑀉𑀧𑀸𑀳𑀦𑁄 𑀲𑀺𑀗𑁆𑀕𑀸𑀮𑁄 𑀘, 𑀤𑀲𑀯𑀕𑁆𑀕𑀸 𑀤𑀼𑀓𑁂 𑀲𑀺𑀬𑀼𑀁.

𑀤𑀼𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀧𑀸𑀢𑁄

𑁧. 𑀲𑀗𑁆𑀓𑀧𑁆𑀧𑀯𑀕𑁆𑀕𑁄

[𑁨𑁫𑁧] 𑁧. 𑀲𑀗𑁆𑀓𑀧𑁆𑀧𑀭𑀸𑀕𑀚𑀸𑀢𑀓𑀯𑀡𑁆𑀡𑀦𑀸

𑀲𑀗𑁆𑀓𑀧𑁆𑀧𑀭𑀸𑀕𑀥𑁄𑀢𑁂𑀦𑀸𑀢𑀺 ¶ ¶ ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻 𑀓𑀺𑀭𑁂𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀓𑀸𑀫𑀭𑀸𑀕𑁄 𑀅𑀦𑀪𑀺𑀭𑀢𑁄 𑀯𑀺𑀘𑀭𑀺. 𑀢𑀫𑁂𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀬𑁄 𑀤𑀺𑀲𑁆𑀯𑀸 𑀅𑀦𑀪𑀺𑀭𑀢𑀺𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀪𑀸𑀯𑀫𑀲𑁆𑀲 𑀜𑀢𑁆𑀯𑀸 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀦𑀸𑀫 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀧𑀻𑀴𑀺𑀢𑀸𑀦𑀁 𑀓𑀺𑀮𑁂𑀲𑁂 𑀳𑀸𑀭𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀤𑁂𑀢𑀺, 𑀏𑀳𑀺 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀲𑁆𑀲𑀸𑀫𑀸’’𑀢𑀺 𑀆𑀤𑀸𑀬 𑀅𑀕𑀫𑀁𑀲𑀼. 𑀲𑀢𑁆𑀣𑀸𑀭𑀸 𑀘 ‘‘𑀓𑀺𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀙𑀫𑀸𑀦𑀓𑀜𑁆𑀜𑁂𑀯 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀆𑀕𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸, 𑀪𑀺𑀓𑁆𑀔𑀼, 𑀧𑀼𑀩𑁆𑀩𑁂 𑀛𑀸𑀦𑀩𑀮𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸𑀦𑀁 𑀯𑀺𑀲𑀼𑀤𑁆𑀥𑀲𑀢𑁆𑀢𑀸𑀦𑀫𑁆𑀧𑀺 𑀲𑀁𑀓𑀺𑀮𑁂𑀲𑀁 𑀉𑀧𑁆𑀧𑀸𑀤𑁂𑀲𑀼𑀁, 𑀢𑀸𑀤𑀺𑀲𑀁 𑀢𑀼𑀘𑁆𑀙𑀧𑀼𑀕𑁆𑀕𑀮𑀁 𑀓𑀺𑀁𑀓𑀸𑀭𑀡𑀸 𑀦 𑀲𑀁𑀓𑀺𑀮𑁂𑀲𑀺𑀲𑁆𑀲𑀦𑁆𑀢𑀺, 𑀯𑀺𑀲𑀼𑀤𑁆𑀥𑀸𑀧𑀺 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀫𑀬𑀲𑀲𑀫𑀗𑁆𑀕𑀺𑀦𑁄𑀧𑀺 𑀆𑀬𑀲𑀓𑁆𑀬𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀕𑁂𑀯 𑀅𑀧𑀭𑀺𑀲𑀼𑀤𑁆𑀥𑀸. 𑀲𑀺𑀦𑁂𑀭𑀼𑀓𑀫𑁆𑀧𑀦𑀓𑀯𑀸𑀢𑁄 𑀧𑀼𑀭𑀸𑀡𑀧𑀡𑁆𑀡𑀓𑀲𑀝𑀁 𑀓𑀺𑀁 ¶ 𑀦 𑀓𑀫𑁆𑀧𑁂𑀲𑁆𑀲𑀢𑀺, 𑀩𑁄𑀥𑀺𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑀲𑀢𑁆𑀢𑀁 𑀅𑀬𑀁 𑀓𑀺𑀮𑁂𑀲𑁄 𑀆𑀮𑁄𑀴𑁂𑀲𑀺, 𑀢𑀸𑀤𑀺𑀲𑀁 𑀓𑀺𑀁 𑀦 𑀆𑀮𑁄𑀴𑁂𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀓𑀢𑀤𑀸𑀭𑀧𑀭𑀺𑀕𑁆𑀕𑀳𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀢𑁂𑀲𑀁 𑀫𑀢𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀳𑀺𑀭𑀜𑁆𑀜𑁄𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀇𑀤𑀁 𑀥𑀦𑀁 𑀧𑀜𑁆𑀜𑀸𑀬𑀢𑀺, 𑀬𑁂𑀳𑀺 𑀧𑀦𑁂𑀢𑀁 𑀲𑀫𑁆𑀪𑀢𑀁, 𑀢𑁂 ¶ 𑀦 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 ¶ 𑀆𑀯𑀚𑁆𑀚𑁂𑀦𑁆𑀢𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀲𑀭𑀻𑀭𑀸 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀲𑁄 𑀖𑀭𑀸𑀯𑀸𑀲𑁂 𑀘𑀺𑀭𑀁 𑀯𑀲𑀦𑁆𑀢𑁄 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀲𑀗𑁆𑀖𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀤𑀻𑀳𑀺 𑀬𑀸𑀧𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀁 𑀉𑀧𑀲𑁂𑀯𑀺𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀲𑀭𑀻𑀭𑀜𑁆𑀘𑁂𑀯 𑀣𑀺𑀭𑀁 𑀪𑀯𑀺𑀲𑁆𑀲𑀢𑀺, 𑀚𑀗𑁆𑀖𑀯𑀺𑀳𑀸𑀭𑁄 𑀘 𑀓𑀢𑁄 𑀪𑀯𑀺𑀲𑁆𑀲𑀢𑀺, 𑀬𑁂 𑀘 𑀫𑀸𑀤𑀺𑀲𑀲𑁆𑀲 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀁 𑀯𑀸 𑀤𑀲𑁆𑀲𑀦𑁆𑀢𑀺, 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀢𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑀲𑁄 𑀳𑀺𑀫𑀯𑀦𑁆𑀢𑀸 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀭𑀸𑀚𑀼𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀁, 𑀏𑀢𑁆𑀣 𑀯𑀲𑀺𑀲𑁆𑀲𑀸𑀫𑁂’’𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀛𑀸𑀦𑀲𑀼𑀔𑁂𑀦 𑀭𑀢𑁆𑀢𑀺𑀁 𑀔𑁂𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀚𑀝𑀸𑀚𑀺𑀦𑀯𑀓𑁆𑀓𑀮𑀸𑀦𑀺 𑀲𑀡𑁆𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀆𑀤𑀸𑀬 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀬𑀼𑀕𑀫𑀢𑁆𑀢𑀤𑀲𑁆𑀲𑀦𑁄 𑀳𑀼𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸𑀬 𑀅𑀢𑁆𑀢𑀦𑁄 𑀭𑀽𑀧𑀲𑀺𑀭𑀺𑀬𑀸 𑀮𑁄𑀓𑀲𑁆𑀲 ¶ 𑀮𑁄𑀘𑀦𑀸𑀦𑀺 𑀆𑀓𑀟𑁆𑀠𑁂𑀦𑁆𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀭𑀸𑀚𑀸 𑀫𑀳𑀸𑀢𑀮𑁂 𑀘𑀗𑁆𑀓𑀫𑀦𑁆𑀢𑁄 𑀯𑀸𑀢𑀧𑀸𑀦𑀦𑁆𑀢𑀭𑁂𑀦 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑀲𑁆𑀫𑀺𑀜𑁆𑀜𑁂𑀯 𑀧𑀲𑀻𑀤𑀺𑀢𑁆𑀯𑀸 ‘‘𑀲𑀘𑁂 𑀲𑀦𑁆𑀢𑀥𑀫𑁆𑀫𑁄 𑀦𑀸𑀫 𑀅𑀢𑁆𑀣𑀺, 𑀇𑀫𑀲𑁆𑀲 𑀢𑁂𑀦 𑀅𑀩𑁆𑀪𑀦𑁆𑀢𑀭𑁂 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑀁 𑀢𑀸𑀧𑀲𑀁 𑀆𑀦𑁂𑀳𑀻’’𑀢𑀺 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 ‘‘𑀭𑀸𑀚𑀸, 𑀪𑀦𑁆𑀢𑁂, 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀧𑀼𑀜𑁆𑀜, 𑀅𑀫𑁆𑀳𑁂 𑀭𑀸𑀚𑀸 𑀦 𑀚𑀸𑀦𑀸𑀢𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑀸𑀧𑀲𑁄 𑀦𑀢𑁆𑀣𑀺, 𑀕𑀘𑁆𑀙, 𑀦𑀁 𑀆𑀦𑁂𑀳𑀻’’𑀢𑀺 𑀲𑀬𑀫𑁆𑀧𑀺 𑀯𑀸𑀢𑀧𑀸𑀦𑁂𑀦 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑁄 ‘‘𑀇𑀢𑁄 𑀏𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀲𑁆𑀲 𑀳𑀢𑁆𑀣𑁂 𑀪𑀺𑀓𑁆𑀔𑀸𑀪𑀸𑀚𑀦𑀁 𑀤𑀢𑁆𑀯𑀸 𑀫𑀳𑀸𑀢𑀮𑀁 𑀅𑀪𑀺𑀭𑀼𑀳𑀺.

𑀅𑀣 𑀦𑀁 𑀭𑀸𑀚𑀸 𑀯𑀦𑁆𑀤𑀺𑀢𑁆𑀯𑀸 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀺𑀢𑁂𑀳𑀺 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑁂𑀳𑀺 𑀧𑀭𑀺𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀻𑀤𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀓𑀢𑁆𑀣𑀯𑀸𑀲𑀺𑀓𑀸 ¶ , 𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀳𑀺𑀫𑀯𑀦𑁆𑀢𑀯𑀸𑀲𑀺𑀓𑀸 𑀫𑀬𑀁, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀢𑁄 𑀆𑀕𑀢𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀦 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀲𑁆𑀲𑀸𑀭𑀢𑁆𑀢𑀓𑀸𑀮𑁂, 𑀫𑀳𑀸𑀭𑀸𑀚, 𑀦𑀺𑀩𑀤𑁆𑀥𑀯𑀸𑀲𑁄 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀣, 𑀢𑀼𑀫𑁆𑀳𑁂 𑀘 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀣, 𑀅𑀳𑀜𑁆𑀘 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁 𑀧𑀼𑀜𑁆𑀜𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 ¶ 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀲𑁂𑀲𑀸𑀦𑀺𑀧𑀺 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀧𑀝𑀺𑀬𑀸𑀤𑁂𑀢𑁆𑀯𑀸 ‘‘𑀲𑀼𑀔𑁂𑀦 𑀯𑀲𑀣, 𑀪𑀦𑁆𑀢𑁂’’𑀢𑀺 𑀉𑀬𑁆𑀬𑀸𑀦𑀧𑀸𑀮𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀤𑀲 ¶ 𑀲𑀁𑀯𑀘𑁆𑀙𑀭𑀸𑀦𑀺 𑀢𑀢𑁆𑀣𑁂𑀯 𑀯𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑁄 𑀢𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀸𑀬 𑀕𑀦𑁆𑀢𑀼𑀓𑀸𑀫𑁄 𑀤𑁂𑀯𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑀬𑀸 𑀦𑀕𑀭𑁂 𑀑𑀳𑀻𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀓𑀺𑀁 𑀦𑀺𑀲𑁆𑀲𑀸𑀬 𑀓𑀣𑁂𑀣, 𑀤𑁂𑀯𑀸’’𑀢𑀺. ‘‘𑀲𑀻𑀮𑀯𑀦𑁆𑀢𑀁 𑀢𑀸𑀧𑀲𑀁, 𑀪𑀤𑁆𑀤𑁂’’𑀢𑀺. ‘‘𑀤𑁂𑀯, 𑀦𑀸𑀳𑀁 𑀢𑀲𑁆𑀫𑀺𑀁 𑀧𑀫𑀚𑁆𑀚𑀺𑀲𑁆𑀲𑀸𑀫𑀺, 𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀧𑀝𑀺𑀚𑀕𑁆𑀕𑀦𑀁 𑀫𑀫 𑀪𑀸𑀭𑁄, 𑀢𑀼𑀫𑁆𑀳𑁂 𑀦𑀺𑀭𑀸𑀲𑀗𑁆𑀓𑀸 𑀕𑀘𑁆𑀙𑀣𑀸’’𑀢𑀺. 𑀭𑀸𑀚𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄, 𑀤𑁂𑀯𑀻𑀧𑀺 𑀩𑁄𑀥𑀺𑀲𑀢𑁆𑀢𑀁 𑀢𑀣𑁂𑀯 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀭𑀜𑁆𑀜𑁄 𑀕𑀢𑀓𑀸𑀮𑁂 𑀦𑀺𑀩𑀤𑁆𑀥𑀯𑁂𑀮𑀸𑀬𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀢𑀸𑀬 𑀯𑁂𑀮𑀸𑀬 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁂 𑀅𑀢𑀺𑀘𑀺𑀭𑀸𑀬𑀦𑁆𑀢𑁂 𑀤𑁂𑀯𑀻 𑀲𑀩𑁆𑀩𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀦𑀻𑀘𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀫𑀝𑁆𑀞𑀲𑀸𑀝𑀓𑀁 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀆𑀤𑀸𑀬 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀯𑀸𑀢𑀧𑀸𑀦𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀯𑀓𑁆𑀓𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀳𑀲𑀸 𑀉𑀝𑁆𑀞𑀳𑀫𑀸𑀦𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑀸 𑀫𑀝𑁆𑀞𑀲𑀸𑀝𑀓𑁄 𑀪𑀲𑁆𑀲𑀺𑀢𑁆𑀣, 𑀩𑁄𑀥𑀺𑀲𑀢𑁆𑀢𑁄 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀪𑀯𑀲𑁂𑀦 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀛𑀸𑀦𑀩𑀮𑁂𑀦 𑀲𑀦𑁆𑀦𑀺𑀲𑀺𑀦𑁆𑀦𑁄𑀧𑀺 𑀓𑀺𑀮𑁂𑀲𑁄 𑀓𑀭𑀡𑁆𑀟𑀓𑁂 𑀧𑀓𑁆𑀔𑀺𑀢𑁆𑀢𑀆𑀲𑀻𑀯𑀺𑀲𑁄 𑀯𑀺𑀬 𑀨𑀡𑀁 𑀓𑀢𑁆𑀯𑀸 𑀉𑀝𑁆𑀞𑀳𑀺, 𑀔𑀻𑀭𑀭𑀼𑀓𑁆𑀔𑀲𑁆𑀲 𑀯𑀸𑀲𑀺𑀬𑀸 𑀆𑀓𑁄𑀝𑀺𑀢𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀓𑀺𑀮𑁂𑀲𑀼𑀧𑁆𑀧𑀸𑀤𑀦𑁂𑀦 𑀲𑀳𑁂𑀯 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀳𑀸𑀬𑀺𑀁𑀲𑀼, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑀭𑀺𑀧𑀼𑀡𑁆𑀡𑀸𑀦𑀺 𑀅𑀳𑁂𑀲𑀼𑀁, 𑀲𑀬𑀁 𑀧𑀓𑁆𑀔𑀘𑁆𑀙𑀺𑀦𑁆𑀦𑀓𑀸𑀓𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀧𑀼𑀩𑁆𑀩𑁂 𑀯𑀺𑀬 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺 ¶ , 𑀦𑀺𑀲𑀻𑀤𑀸𑀧𑀺𑀬𑀫𑀸𑀦𑁄𑀧𑀺 𑀦 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀤𑁂𑀯𑀻 𑀲𑀩𑁆𑀩𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀪𑀺𑀓𑁆𑀔𑀸𑀪𑀸𑀚𑀦𑁂𑀬𑁂𑀯 ¶ 𑀧𑀓𑁆𑀔𑀺𑀧𑀺. 𑀬𑀣𑀸 𑀘 𑀧𑀼𑀩𑁆𑀩𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀕𑀘𑁆𑀙𑀢𑀺, 𑀏𑀯𑀁 𑀢𑀁 𑀤𑀺𑀯𑀲𑀁 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀪𑀢𑁆𑀢𑀁 𑀧𑀦 𑀕𑀳𑁂𑀢𑁆𑀯𑀸 𑀫𑀳𑀸𑀦𑀺𑀲𑁆𑀲𑁂𑀡𑀺𑀬𑀸 𑀑𑀢𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀤𑁂𑀯𑀻𑀧𑀺 𑀅𑀲𑁆𑀲 𑀅𑀢𑁆𑀢𑀦𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀁 𑀅𑀜𑁆𑀜𑀸𑀲𑀺. 𑀲𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 𑀳𑁂𑀝𑁆𑀞𑀸𑀫𑀜𑁆𑀘𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀤𑁂𑀯𑀺𑀬𑀸 𑀏𑀯𑀭𑀽𑀧𑀸 𑀳𑀢𑁆𑀣𑀲𑁄𑀪𑀸 𑀧𑀸𑀤𑀲𑁄𑀪𑀸, 𑀏𑀯𑀭𑀽𑀧𑀁 𑀓𑀝𑀺𑀧𑀭𑀺𑀬𑁄𑀲𑀸𑀦𑀁, 𑀏𑀯𑀭𑀽𑀧𑀁 𑀊𑀭𑀼𑀮𑀓𑁆𑀔𑀡’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀧𑁆𑀧𑀮𑀧𑀦𑁆𑀢𑁄 𑀲𑀢𑁆𑀢𑀸𑀳𑀁 𑀦𑀺𑀧𑀚𑁆𑀚𑀺, 𑀪𑀢𑁆𑀢𑀁 𑀧𑀽𑀢𑀺𑀓𑀁 𑀅𑀳𑁄𑀲𑀺 𑀦𑀻𑀮𑀫𑀓𑁆𑀔𑀺𑀓𑀸𑀧𑀭𑀺𑀧𑀼𑀡𑁆𑀡𑀁.

𑀅𑀣 𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀧𑀘𑁆𑀘𑀸𑀕𑀢𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀅𑀕𑀦𑁆𑀢𑁆𑀯𑀸𑀯 ‘‘𑀩𑁄𑀥𑀺𑀲𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀉𑀓𑁆𑀮𑀸𑀧𑀁 𑀅𑀲𑁆𑀲𑀫𑀧𑀤𑀁 𑀤𑀺𑀲𑁆𑀯𑀸 ¶ ‘‘𑀧𑀓𑁆𑀓𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀧𑀯𑀺𑀝𑁆𑀞𑁄 𑀢𑀁 𑀦𑀺𑀧𑀦𑁆𑀦𑀓𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀘𑀺 𑀅𑀨𑀸𑀲𑀼𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀽𑀢𑀺𑀪𑀢𑁆𑀢𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀯𑀺𑀤𑁆𑀥𑁄𑀲𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 ‘‘𑀫𑀫 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀫𑀬𑀺 𑀑𑀓𑀸𑀲𑀁 𑀅𑀮𑀪𑀦𑁆𑀢𑁂𑀳𑀺 ‘𑀫𑀫𑀸𑀬𑀦𑀝𑁆𑀞𑀸𑀦𑀫𑀲𑁆𑀲 𑀤𑀼𑀩𑁆𑀩𑀮𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀆𑀕𑀦𑁆𑀢𑁆𑀯𑀸 𑀏𑀲 𑀯𑀺𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀲𑀭𑀻𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀤𑁆𑀥𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀤𑁆𑀥𑀝𑁆𑀞𑀸𑀦𑀁 𑀅𑀤𑀺𑀲𑁆𑀯𑀸 ‘‘𑀓𑀢𑁆𑀣 𑀯𑀺𑀤𑁆𑀥𑁄𑀲𑀺, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦𑀸𑀳𑀁, 𑀫𑀳𑀸𑀭𑀸𑀚, 𑀅𑀜𑁆𑀜𑁂𑀦 𑀯𑀺𑀤𑁆𑀥𑁄, 𑀅𑀳𑀁 𑀧𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀳𑀤𑀬𑁂 𑀯𑀺𑀚𑁆𑀛𑀺’’𑀦𑁆𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧.

‘‘𑀲𑀗𑁆𑀓𑀧𑁆𑀧𑀭𑀸𑀕𑀥𑁄𑀢𑁂𑀦, 𑀯𑀺𑀢𑀓𑁆𑀓𑀦𑀺𑀲𑀺𑀢𑁂𑀦 𑀘;

𑀦𑀸𑀮𑀗𑁆𑀓𑀢𑁂𑀦 𑀪𑀤𑁆𑀭𑁂𑀦, 𑀉𑀲𑀼𑀓𑀸𑀭𑀸𑀓𑀢𑁂𑀦 𑀘.

𑁨.

‘‘𑀦 𑀓𑀡𑁆𑀡𑀸𑀬𑀢𑀫𑀼𑀢𑁆𑀢𑁂𑀦, 𑀦𑀸𑀧𑀺 𑀫𑁄𑀭𑀽𑀧𑀲𑁂𑀯𑀺𑀦𑀸;

𑀢𑁂𑀦𑀫𑁆𑀳𑀺 𑀳𑀤𑀬𑁂 𑀯𑀺𑀤𑁆𑀥𑁄, 𑀲𑀩𑁆𑀩𑀗𑁆𑀕𑀧𑀭𑀺𑀤𑀸𑀳𑀺𑀦𑀸.

𑁩.

‘‘𑀆𑀯𑁂𑀥𑀜𑁆𑀘 ¶ 𑀦 𑀧𑀲𑁆𑀲𑀸𑀫𑀺, 𑀬𑀢𑁄 𑀭𑀼𑀳𑀺𑀭𑀫𑀲𑁆𑀲𑀯𑁂;

𑀬𑀸𑀯 𑀅𑀬𑁄𑀦𑀺𑀲𑁄 𑀘𑀺𑀢𑁆𑀢𑀁, 𑀲𑀬𑀁 𑀫𑁂 𑀤𑀼𑀓𑁆𑀔𑀫𑀸𑀪𑀢’’𑀦𑁆𑀢𑀺.

𑀢𑀢𑁆𑀣 ¶ 𑀲𑀗𑁆𑀓𑀧𑁆𑀧𑀭𑀸𑀕𑀥𑁄𑀢𑁂𑀦𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀥𑁄𑀢𑁂𑀦. 𑀯𑀺𑀢𑀓𑁆𑀓𑀦𑀺𑀲𑀺𑀢𑁂𑀦 𑀘𑀸𑀢𑀺 𑀢𑁂𑀦𑁂𑀯 𑀭𑀸𑀕𑁄𑀤𑀓𑁂𑀦 𑀯𑀺𑀢𑀓𑁆𑀓𑀧𑀸𑀲𑀸𑀡𑁂 𑀦𑀺𑀲𑀺𑀢𑁂𑀦. 𑀦𑀸𑀮𑀗𑁆𑀓𑀢𑁂𑀦 𑀪𑀤𑁆𑀭𑁂𑀦𑀸𑀢𑀺 𑀦𑁂𑀯 𑀅𑀮𑀗𑁆𑀓𑀢𑁂𑀦 𑀪𑀤𑁆𑀭𑁂𑀦, 𑀅𑀦𑀮𑀗𑁆𑀓𑀢𑁂𑀦 𑀩𑀻𑀪𑀘𑁆𑀙𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀲𑀼𑀓𑀸𑀭𑀸𑀓𑀢𑁂𑀦 𑀘𑀸𑀢𑀺 𑀉𑀲𑀼𑀓𑀸𑀭𑁂𑀳𑀺𑀧𑀺 𑀅𑀓𑀢𑁂𑀦. 𑀦 𑀓𑀡𑁆𑀡𑀸𑀬𑀢𑀫𑀼𑀢𑁆𑀢𑁂𑀦𑀸𑀢𑀺 𑀬𑀸𑀯 𑀤𑀓𑁆𑀔𑀺𑀡𑀓𑀡𑁆𑀡𑀘𑀽𑀴𑀓𑀁 𑀆𑀓𑀟𑁆𑀠𑀺𑀢𑁆𑀯𑀸 𑀅𑀫𑀼𑀢𑁆𑀢𑀓𑁂𑀦. 𑀦𑀸𑀧𑀺 𑀫𑁄𑀭𑀽𑀧𑀲𑁂𑀯𑀺𑀦𑀸𑀢𑀺 𑀫𑁄𑀭𑀧𑀢𑁆𑀢𑀕𑀺𑀚𑁆𑀛𑀧𑀢𑁆𑀢𑀸𑀤𑀻𑀳𑀺 𑀅𑀓𑀢𑀽𑀧𑀲𑁂𑀯𑀦𑁂𑀦. 𑀢𑁂𑀦𑀫𑁆𑀳𑀺 𑀳𑀤𑀬𑁂 𑀯𑀺𑀤𑁆𑀥𑁄𑀢𑀺 𑀢𑁂𑀦 𑀓𑀺𑀮𑁂𑀲𑀓𑀡𑁆𑀟𑁂𑀦𑀸𑀳𑀁 𑀳𑀤𑀬𑁂 𑀯𑀺𑀤𑁆𑀥𑁄 𑀅𑀫𑁆𑀳𑀺. 𑀲𑀩𑁆𑀩𑀗𑁆𑀕𑀧𑀭𑀺𑀤𑀸𑀳𑀺𑀦𑀸𑀢𑀺 𑀲𑀩𑁆𑀩𑀸𑀦𑀺 𑀅𑀗𑁆𑀕𑀸𑀦𑀺 𑀧𑀭𑀺𑀤𑀳𑀦𑀲𑀫𑀢𑁆𑀣𑁂𑀦. 𑀫𑀳𑀸𑀭𑀸𑀚, 𑀢𑁂𑀦 𑀳𑀺 𑀓𑀺𑀮𑁂𑀲𑀓𑀡𑁆𑀟𑁂𑀦 𑀳𑀤𑀬𑁂 𑀯𑀺𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀫 𑀅𑀕𑁆𑀕𑀺 𑀧𑀤𑀺𑀢𑁆𑀢𑀸𑀦𑀺𑀯 𑀲𑀩𑁆𑀩𑀸𑀦𑀺 𑀅𑀗𑁆𑀕𑀸𑀦𑀺 𑀟𑀬𑁆𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀆𑀯𑁂𑀥𑀜𑁆𑀘 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀺𑀤𑁆𑀥𑀝𑁆𑀞𑀸𑀦𑁂 𑀯𑀡𑀜𑁆𑀘 𑀦 𑀧𑀲𑁆𑀲𑀸𑀫𑀺. 𑀬𑀢𑁄 𑀭𑀼𑀳𑀺𑀭𑀫𑀲𑁆𑀲𑀯𑁂𑀢𑀺 𑀬𑀢𑁄 𑀫𑁂 𑀆𑀯𑁂𑀥𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑁂𑀬𑁆𑀬, 𑀢𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀸𑀯 𑀅𑀬𑁄𑀦𑀺𑀲𑁄 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀬𑀸𑀯𑀸𑀢𑀺 𑀤𑀴𑁆𑀳𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀢𑀺𑀯𑀺𑀬 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀬𑁄𑀦𑀺𑀲𑁄 𑀘𑀺𑀢𑁆𑀢𑀁 𑀯𑀟𑁆𑀠𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀬𑀁 𑀫𑁂 𑀤𑀼𑀓𑁆𑀔𑀫𑀸𑀪𑀢𑀦𑁆𑀢𑀺 𑀅𑀢𑁆𑀢𑀦𑀸𑀯 𑀫𑀬𑀸 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀆𑀦𑀻𑀢𑀦𑁆𑀢𑀺.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀡𑁆𑀡𑀲𑀸𑀮𑀢𑁄 𑀩𑀳𑀺 𑀓𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀝𑁆𑀞𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀳𑀁 𑀳𑀺𑀫𑀯𑀦𑁆𑀢𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂, 𑀕𑀦𑁆𑀢𑀼’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀫𑀳𑀸𑀭𑀸𑀚, 𑀫𑀬𑀸 𑀇𑀥 𑀯𑀲𑀦𑁆𑀢𑁂𑀦 𑀏𑀯𑀭𑀽𑀧𑁄 𑀯𑀺𑀧𑁆𑀧𑀓𑀸𑀭𑁄 𑀧𑀢𑁆𑀢𑁄, 𑀇𑀤𑀸𑀦𑀺 𑀦 𑀲𑀓𑁆𑀓𑀸 𑀇𑀥 𑀯𑀲𑀺𑀢𑀼’’𑀦𑁆𑀢𑀺 𑀭𑀜𑁆𑀜𑁄 𑀬𑀸𑀘𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺. 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀗𑁆𑀓𑀧𑁆𑀧𑀭𑀸𑀕𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁫𑁨] 𑁨. 𑀢𑀺𑀮𑀫𑀼𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀚𑁆𑀚𑀸𑀧𑀺 ¶ 𑀫𑁂 𑀢𑀁 𑀫𑀦𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑁄𑀥𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀜𑁆𑀜𑀢𑀭𑁄 𑀓𑀺𑀭, 𑀪𑀺𑀓𑁆𑀔𑀼, 𑀓𑁄𑀥𑀦𑁄 𑀅𑀳𑁄𑀲𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀓𑀼𑀧𑁆𑀧𑀺 𑀅𑀪𑀺𑀲𑀚𑁆𑀚𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑁆𑀯𑀸𑀓𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀉𑀧𑀸𑀬𑀸𑀲𑀩𑀳𑀼𑀮𑁄 𑀉𑀤𑁆𑀥𑀦𑁂 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀯𑀺𑀬 𑀢𑀝𑀢𑀝𑀸𑀬𑀦𑁆𑀢𑁄 𑀯𑀺𑀘𑀭𑀢𑀺, 𑀏𑀯𑀭𑀽𑀧𑁂 𑀦𑀺𑀓𑁆𑀓𑁄𑀥𑀦𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑁄𑀥𑀫𑀢𑁆𑀢𑀫𑁆𑀧𑀺 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑁄𑀥𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀅𑀬𑀁 𑀓𑁄𑀥𑀦𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀧𑀼𑀢𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺. 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀘 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 ‘‘𑀏𑀯𑀁 𑀏𑀢𑁂 𑀦𑀺𑀳𑀢𑀫𑀸𑀦𑀤𑀧𑁆𑀧𑀸 𑀲𑀻𑀢𑀼𑀡𑁆𑀳𑀓𑁆𑀔𑀫𑀸 𑀮𑁄𑀓𑀘𑀸𑀭𑀺𑀢𑁆𑀢𑀜𑁆𑀜𑀽 𑀘 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀦𑀕𑀭𑁂 𑀤𑀺𑀲𑀸𑀧𑀸𑀫𑁄𑀓𑁆𑀔𑀆𑀘𑀭𑀺𑀬𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀤𑀽𑀭𑁂 𑀢𑀺𑀭𑁄𑀭𑀝𑁆𑀞𑀁 𑀧𑁂𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁄𑀧𑀺 𑀭𑀸𑀚𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀓𑀧𑀝𑀮𑀺𑀓𑀉𑀧𑀸𑀳𑀦𑀸 ¶ 𑀘 𑀧𑀡𑁆𑀡𑀘𑁆𑀙𑀢𑁆𑀢𑀜𑁆𑀘 𑀓𑀳𑀸𑀧𑀡𑀲𑀳𑀲𑁆𑀲𑀜𑁆𑀘 𑀤𑀢𑁆𑀯𑀸 ‘‘𑀢𑀸𑀢, 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸’’𑀢𑀺 ¶ 𑀧𑁂𑀲𑁂𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀓𑁆𑀓𑀲𑀺𑀮𑀁 𑀧𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀕𑁂𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀘𑀭𑀺𑀬𑁂 𑀫𑀸𑀡𑀯𑀓𑀸𑀦𑀁 𑀲𑀺𑀧𑁆𑀧𑀁 𑀯𑀸𑀘𑁂𑀢𑁆𑀯𑀸 𑀉𑀝𑁆𑀞𑀸𑀬 𑀖𑀭𑀤𑁆𑀯𑀸𑀭𑁂 𑀘𑀗𑁆𑀓𑀫𑀦𑁆𑀢𑁂 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁄 𑀆𑀘𑀭𑀺𑀬𑀁 𑀅𑀤𑁆𑀤𑀲, 𑀢𑀢𑁆𑀣𑁂𑀯 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀙𑀢𑁆𑀢𑀜𑁆𑀘 𑀅𑀧𑀦𑁂𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲 𑀓𑀺𑀮𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀁 𑀓𑀸𑀭𑁂𑀲𑀺. 𑀓𑀼𑀫𑀸𑀭𑁄 𑀪𑀼𑀢𑁆𑀢𑀪𑁄𑀚𑀦𑁄 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, ‘‘𑀓𑀼𑀢𑁄 𑀆𑀕𑀢𑁄𑀲𑀺, 𑀢𑀸𑀢𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀩𑀸𑀭𑀸𑀡𑀲𑀺𑀢𑁄’’𑀢𑀺 𑀆𑀳. ‘‘𑀓𑀲𑁆𑀲 𑀧𑀼𑀢𑁆𑀢𑁄𑀲𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄’’𑀢𑀺. ‘‘𑀓𑁂𑀦𑀢𑁆𑀣𑁂𑀦𑀸𑀕𑀢𑁄𑀲𑀻’’𑀢𑀺? ‘‘𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀢𑁆𑀣𑀸𑀬𑀸’’𑀢𑀺. ‘‘𑀓𑀺𑀁 𑀢𑁂 𑀆𑀘𑀭𑀺𑀬𑀪𑀸𑀕𑁄 𑀆𑀪𑀢𑁄, 𑀉𑀤𑀸𑀳𑀼 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀳𑁄𑀢𑀼𑀓𑀸𑀫𑁄𑀲𑀻’’𑀢𑀺? 𑀲𑁄 ‘‘𑀆𑀘𑀭𑀺𑀬𑀪𑀸𑀕𑁄 𑀫𑁂 ¶ 𑀆𑀪𑀢𑁄’’𑀢𑀺 𑀯𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀸𑀤𑀫𑀽𑀮𑁂 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺.

𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀸 𑀤𑀺𑀯𑀸 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀆𑀘𑀭𑀺𑀬𑀪𑀸𑀕𑀤𑀸𑀬𑀓𑀸 𑀕𑁂𑀳𑁂 𑀚𑁂𑀝𑁆𑀞𑀧𑀼𑀢𑁆𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀆𑀘𑀭𑀺𑀬𑁄 𑀲𑀮𑁆𑀮𑀳𑀼𑀓𑁂𑀦 𑀲𑀼𑀪𑀦𑀓𑁆𑀔𑀢𑁆𑀢𑁂𑀦 𑀓𑀼𑀫𑀸𑀭𑀲𑁆𑀲 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀲𑀺. 𑀓𑀼𑀫𑀸𑀭𑁄𑀧𑀺 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑀤𑀺𑀯𑀲𑀁 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀦𑁆𑀳𑀸𑀬𑀺𑀢𑀼𑀁 𑀅𑀕𑀫𑀸𑀲𑀺. 𑀅𑀣𑁂𑀓𑀸 𑀫𑀳𑀮𑁆𑀮𑀺𑀓𑀸 𑀇𑀢𑁆𑀣𑀻 𑀢𑀺𑀮𑀸𑀦𑀺 𑀲𑁂𑀢𑁂 𑀓𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸 𑀭𑀓𑁆𑀔𑀫𑀸𑀦𑀸 𑀦𑀺𑀲𑀻𑀤𑀺. 𑀓𑀼𑀫𑀸𑀭𑁄 𑀲𑁂𑀢𑀢𑀺𑀮𑁂 𑀤𑀺𑀲𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀏𑀓𑀁 𑀢𑀺𑀮𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺, 𑀫𑀳𑀮𑁆𑀮𑀺𑀓𑀸 ‘‘𑀢𑀡𑁆𑀳𑀸𑀮𑀼𑀓𑁄 𑀏𑀲𑁄’’𑀢𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀧𑀼𑀦𑀤𑀺𑀯𑀲𑁂𑀧𑀺 𑀢𑀸𑀬 𑀯𑁂𑀮𑀸𑀬 𑀢𑀣𑁂𑀯 𑀅𑀓𑀸𑀲𑀺, 𑀲𑀸𑀧𑀺 𑀦𑀁 𑀦 𑀓𑀺𑀜𑁆𑀘𑀺 𑀆𑀳. 𑀇𑀢𑀭𑁄 𑀢𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯𑀸𑀓𑀸𑀲𑀺, 𑀢𑀤𑀸 𑀫𑀳𑀮𑁆𑀮𑀺𑀓𑀸 ‘‘𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀫𑀁 𑀯𑀺𑀮𑀼𑀫𑁆𑀧𑀸𑀧𑁂𑀢𑀻’’𑀢𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀺. 𑀆𑀘𑀭𑀺𑀬𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀓𑀺𑀁 𑀏𑀢𑀁 ¶ , 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑁂 𑀫𑀬𑀸 𑀓𑀢𑀸𑀦𑀁 𑀲𑁂𑀢𑀢𑀺𑀮𑀸𑀦𑀁 𑀅𑀚𑁆𑀚𑁂𑀓𑀁 𑀫𑀼𑀝𑁆𑀞𑀺𑀁 𑀔𑀸𑀤𑀺, 𑀳𑀺𑀬𑁆𑀬𑁄 𑀏𑀓𑀁, 𑀧𑀭𑁂 𑀏𑀓𑀁, 𑀦𑀦𑀼 𑀏𑀯𑀁 𑀔𑀸𑀤𑀦𑁆𑀢𑁄 𑀫𑀫 𑀲𑀦𑁆𑀢𑀓𑀁 𑀲𑀩𑁆𑀩𑀁 𑀦𑀸𑀲𑁂𑀲𑁆𑀲𑀢𑀻’’𑀢𑀺. ‘‘𑀅𑀫𑁆𑀫, 𑀫𑀸 𑀭𑁄𑀤𑀺, 𑀫𑀽𑀮𑀁 𑀢𑁂 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀦 𑀫𑁂, 𑀲𑀸𑀫𑀺, 𑀫𑀽𑀮𑁂𑀦𑀢𑁆𑀣𑁄, 𑀬𑀣𑀸 𑀧𑀦𑁂𑀲 𑀓𑀼𑀫𑀸𑀭𑁄 𑀧𑀼𑀦 𑀏𑀯𑀁 𑀦 𑀓𑀭𑁄𑀢𑀺, 𑀢𑀣𑀸 𑀢𑀁 𑀲𑀺𑀓𑁆𑀔𑀸𑀧𑁂𑀳𑀻’’𑀢𑀺. 𑀆𑀘𑀭𑀺𑀬𑁄 ‘‘𑀢𑁂𑀦 𑀳𑀺 𑀧𑀲𑁆𑀲, 𑀅𑀫𑁆𑀫𑀸’’𑀢𑀺 𑀤𑁆𑀯𑀻𑀳𑀺 𑀫𑀸𑀡𑀯𑁂𑀳𑀺 𑀢𑀁 𑀓𑀼𑀫𑀸𑀭𑀁 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑁂𑀲𑀺𑀓𑀁 𑀕𑀳𑁂𑀢𑁆𑀯𑀸 ‘‘𑀧𑀼𑀦 𑀏𑀯𑀭𑀽𑀧𑀁 𑀫𑀸 𑀅𑀓𑀸𑀲𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺. 𑀓𑀼𑀫𑀸𑀭𑁄 𑀆𑀘𑀭𑀺𑀬𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀭𑀢𑁆𑀢𑀸𑀦𑀺 𑀅𑀓𑁆𑀔𑀻𑀦𑀺 𑀓𑀢𑁆𑀯𑀸 𑀧𑀸𑀤𑀧𑀺𑀝𑁆𑀞𑀺𑀢𑁄 𑀬𑀸𑀯 𑀓𑁂𑀲𑀫𑀢𑁆𑀣𑀓𑀸 𑀑𑀮𑁄𑀓𑁂𑀲𑀺. 𑀲𑁄𑀧𑀺𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀓𑀼𑀫𑀸𑀭𑁄 𑀲𑀺𑀧𑁆𑀧𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀫𑀸𑀭𑀸𑀧𑁂𑀢𑀩𑁆𑀩𑁄 𑀏𑀲 𑀫𑀬𑀸’’𑀢𑀺 𑀢𑁂𑀦 𑀓𑀢𑀤𑁄𑀲𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀤𑀸𑀳𑀁, 𑀆𑀘𑀭𑀺𑀬, 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀧𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀢𑀤𑀸 𑀢𑀼𑀫𑁆𑀳𑁂 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀲𑀲𑀺𑀦𑁂𑀳𑁄 𑀯𑀺𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 ¶ 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 ‘‘𑀚𑀻𑀯𑀫𑀸𑀦𑁂𑀦 𑀫𑁂 𑀧𑀼𑀢𑁆𑀢𑁄 𑀤𑀺𑀝𑁆𑀞𑁄, 𑀚𑀻𑀯𑀫𑀸𑀦𑁄𑀯𑀲𑁆𑀲 𑀭𑀚𑁆𑀚𑀲𑀺𑀭𑀺𑀁 𑀧𑀲𑁆𑀲𑀸𑀫𑀻’’𑀢𑀺 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀫𑀸𑀦𑁄 𑀆𑀘𑀭𑀺𑀬𑁂𑀦 𑀓𑀢𑀤𑁄𑀲𑀁 ¶ 𑀲𑀭𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀓𑁄𑀥𑁄 ‘‘𑀫𑀸𑀭𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀧𑀓𑁆𑀓𑁄𑀲𑀦𑀢𑁆𑀣𑀸𑀬 𑀆𑀘𑀭𑀺𑀬𑀲𑁆𑀲 𑀤𑀽𑀢𑀁 𑀧𑀸𑀳𑁂𑀲𑀺. 𑀆𑀘𑀭𑀺𑀬𑁄 ‘‘𑀢𑀭𑀼𑀡𑀓𑀸𑀮𑁂 𑀦𑀁 𑀲𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀫𑀚𑁆𑀛𑀺𑀫𑀯𑀬𑀓𑀸𑀮𑁂 ‘‘𑀇𑀤𑀸𑀦𑀺 𑀦𑀁 𑀲𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀢𑀓𑁆𑀓𑀲𑀺𑀮𑀸𑀘𑀭𑀺𑀬𑁄 𑀆𑀕𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸𑀯 𑀓𑁄𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀭𑀢𑁆𑀢𑀸𑀦𑀺 𑀅𑀓𑁆𑀔𑀻𑀦𑀺 𑀓𑀢𑁆𑀯𑀸 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑁄, 𑀅𑀚𑁆𑀚𑀸𑀧𑀺 𑀫𑁂 𑀆𑀘𑀭𑀺𑀬𑁂𑀦 𑀧𑀳𑀝𑀝𑁆𑀞𑀸𑀦𑀁 𑀭𑀼𑀚𑁆𑀚𑀢𑀺, 𑀆𑀘𑀭𑀺𑀬𑁄 𑀦𑀮𑀸𑀝𑁂𑀦 𑀫𑀘𑁆𑀘𑀼𑀁 𑀆𑀤𑀸𑀬 ‘𑀫𑀭𑀺𑀲𑁆𑀲𑀸𑀫𑀻’𑀢𑀺 ¶ 𑀆𑀕𑀢𑁄, 𑀅𑀚𑁆𑀚𑀲𑁆𑀲 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁪.

‘‘𑀅𑀚𑁆𑀚𑀸𑀧𑀺 𑀫𑁂 𑀢𑀁 𑀫𑀦𑀲𑀺, 𑀬𑀁 𑀫𑀁 𑀢𑁆𑀯𑀁 𑀢𑀺𑀮𑀫𑀼𑀝𑁆𑀞𑀺𑀬𑀸;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀮𑀝𑁆𑀞𑀺𑀬𑀸 𑀅𑀦𑀼𑀢𑀸𑀴𑀬𑀺.

𑁫.

‘‘𑀦𑀦𑀼 𑀚𑀻𑀯𑀺𑀢𑁂 𑀦 𑀭𑀫𑀲𑀺, 𑀬𑁂𑀦𑀸𑀲𑀺 𑀩𑁆𑀭𑀸𑀳𑁆𑀫𑀡𑀸𑀕𑀢𑁄;

𑀬𑀁 𑀫𑀁 𑀩𑀸𑀳𑀸 𑀕𑀳𑁂𑀢𑁆𑀯𑀸𑀦, 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀢𑀸𑀴𑀬𑀻’’𑀢𑀺.

𑀢𑀢𑁆𑀣 𑀬𑀁 𑀫𑀁 𑀩𑀸𑀳𑀸𑀬 𑀫𑀦𑁆𑀢𑀺 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀉𑀧𑀬𑁄𑀕𑀯𑀘𑀦𑀁 𑀅𑀦𑀼𑀢𑀸𑀴𑀦𑀕𑀳𑀡𑀸𑀧𑁂𑀓𑁆𑀔𑀁. 𑀬𑀁 𑀫𑀁 𑀢𑁆𑀯𑀁 𑀢𑀺𑀮𑀫𑀼𑀝𑁆𑀞𑀺𑀬𑀸 𑀓𑀸𑀭𑀡𑀸 𑀅𑀦𑀼𑀢𑀸𑀴𑀬𑀺, 𑀅𑀦𑀼𑀢𑀸𑀴𑁂𑀦𑁆𑀢𑁄 𑀘 𑀫𑀁 𑀩𑀸𑀳𑀸𑀬 𑀕𑀳𑁂𑀢𑁆𑀯𑀸 𑀅𑀦𑀼𑀢𑀸𑀴𑀬𑀺, 𑀢𑀁 𑀅𑀦𑀼𑀢𑀸𑀴𑀦𑀁 𑀅𑀚𑁆𑀚𑀸𑀧𑀺 𑀫𑁂 𑀫𑀦𑀲𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀦𑀦𑀼 𑀚𑀻𑀯𑀺𑀢𑁂 𑀦 𑀭𑀫𑀲𑀻𑀢𑀺 𑀫𑀜𑁆𑀜𑁂 𑀢𑁆𑀯𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀳𑀺 𑀦𑀸𑀪𑀺𑀭𑀫𑀲𑀺. 𑀬𑁂𑀦𑀸𑀲𑀺 𑀩𑁆𑀭𑀸𑀳𑁆𑀫𑀡𑀸𑀕𑀢𑁄𑀢𑀺 𑀬𑀲𑁆𑀫𑀸 𑀩𑁆𑀭𑀸𑀳𑁆𑀫𑀡 𑀇𑀥 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀺. 𑀬𑀁 𑀫𑀁 𑀩𑀸𑀳𑀸 𑀕𑀳𑁂𑀢𑁆𑀯𑀸𑀦𑀸𑀢𑀺 𑀬𑀁 𑀫𑀫 𑀩𑀸𑀳𑀸 𑀕𑀳𑁂𑀢𑁆𑀯𑀸, 𑀬𑀁 𑀫𑀁 𑀩𑀸𑀳𑀸𑀬 𑀕𑀳𑁂𑀢𑁆𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀢𑀸𑀴𑀬𑀻𑀢𑀺 𑀢𑀬𑁄 𑀯𑀸𑀭𑁂 𑀯𑁂𑀴𑀼𑀮𑀝𑁆𑀞𑀺𑀬𑀸 𑀢𑀸𑀴𑁂𑀲𑀺, 𑀅𑀚𑁆𑀚 𑀤𑀸𑀦𑀺 𑀢𑀲𑁆𑀲 𑀨𑀮𑀁 𑀯𑀺𑀦𑁆𑀤𑀸𑀳𑀻𑀢𑀺 𑀦𑀁 𑀫𑀭𑀡𑁂𑀦 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 𑀏𑀯𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬.

‘‘𑀅𑀭𑀺𑀬𑁄 𑀅𑀦𑀭𑀺𑀬𑀁 𑀓𑀼𑀩𑁆𑀩𑀦𑁆𑀢𑀁, 𑀬𑁄 𑀤𑀡𑁆𑀟𑁂𑀦 𑀦𑀺𑀲𑁂𑀥𑀢𑀺;

𑀲𑀸𑀲𑀦𑀁 𑀢𑀁 𑀦 𑀢𑀁 𑀯𑁂𑀭𑀁, 𑀇𑀢𑀺 𑀦𑀁 𑀧𑀡𑁆𑀟𑀺𑀢𑀸 𑀯𑀺𑀤𑀽’’𑀢𑀺.

𑀢𑀢𑁆𑀣 ¶ ¶ 𑀅𑀭𑀺𑀬𑁄𑀢𑀺 𑀲𑀼𑀦𑁆𑀤𑀭𑀸𑀥𑀺𑀯𑀘𑀦𑀫𑁂𑀢𑀁. 𑀲𑁄 𑀧𑀦 𑀅𑀭𑀺𑀬𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑀆𑀘𑀸𑀭𑀅𑀭𑀺𑀬𑁄 𑀤𑀲𑁆𑀲𑀦𑀅𑀭𑀺𑀬𑁄 𑀮𑀺𑀗𑁆𑀕𑀅𑀭𑀺𑀬𑁄 𑀧𑀝𑀺𑀯𑁂𑀥𑀅𑀭𑀺𑀬𑁄𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑁄 𑀯𑀸 𑀳𑁄𑀢𑀼 𑀢𑀺𑀭𑀘𑁆𑀙𑀸𑀦𑁄 𑀯𑀸, 𑀅𑀭𑀺𑀬𑀸𑀘𑀸𑀭𑁂 𑀞𑀺𑀢𑁄 𑀆𑀘𑀸𑀭𑀅𑀭𑀺𑀬𑁄 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀭𑀺𑀬𑀯𑀢𑁆𑀢𑀲𑀺 𑀯𑀓𑁆𑀓𑀗𑁆𑀕, 𑀬𑁄 𑀧𑀺𑀡𑁆𑀟𑀫𑀧𑀘𑀸𑀬𑀢𑀺;

𑀘𑀚𑀸𑀫𑀺 𑀢𑁂 𑀢𑀁 𑀪𑀢𑁆𑀢𑀸𑀭𑀁, 𑀕𑀘𑁆𑀙𑀣𑀽𑀪𑁄 𑀬𑀣𑀸𑀲𑀼𑀔’’𑀦𑁆𑀢𑀺. (𑀚𑀸. 𑁨.𑁨𑁧.𑁧𑁦𑁬);

𑀭𑀽𑀧𑁂𑀦 𑀧𑀦 𑀇𑀭𑀺𑀬𑀸𑀧𑀣𑁂𑀦 𑀘 𑀧𑀸𑀲𑀸𑀤𑀺𑀓𑁂𑀦 𑀤𑀲𑁆𑀲𑀦𑀻𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀤𑀲𑁆𑀲𑀦𑀅𑀭𑀺𑀬𑁄 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀭𑀺𑀬𑀸𑀯𑀓𑀸𑀲𑁄𑀲𑀺 ¶ 𑀧𑀲𑀦𑁆𑀦𑀦𑁂𑀢𑁆𑀢𑁄, 𑀫𑀜𑁆𑀜𑁂 𑀪𑀯𑀁 𑀧𑀩𑁆𑀩𑀚𑀺𑀢𑁄 𑀓𑀼𑀮𑀫𑁆𑀳𑀸;

𑀓𑀣𑀁 𑀦𑀼 𑀘𑀺𑀢𑁆𑀢𑀸𑀦𑀺 𑀧𑀳𑀸𑀬 𑀪𑁄𑀕𑁂, 𑀧𑀩𑁆𑀩𑀚𑀺 𑀦𑀺𑀓𑁆𑀔𑀫𑁆𑀫 𑀖𑀭𑀸 𑀲𑀧𑀜𑁆𑀜𑀸’’𑀢𑀺. (𑀚𑀸. 𑁨.𑁧𑁭.𑁧𑁪𑁩);

𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀮𑀺𑀗𑁆𑀕𑀕𑁆𑀕𑀳𑀡𑁂𑀦 𑀧𑀦 𑀲𑀫𑀡𑀲𑀤𑀺𑀲𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀤𑀼𑀲𑁆𑀲𑀻𑀮𑁄𑀧𑀺 𑀮𑀺𑀗𑁆𑀕𑀅𑀭𑀺𑀬𑁄 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀙𑀤𑀦𑀁 𑀓𑀢𑁆𑀯𑀸𑀦 𑀲𑀼𑀩𑁆𑀩𑀢𑀸𑀦𑀁, 𑀧𑀓𑁆𑀔𑀦𑁆𑀤𑀻 𑀓𑀼𑀮𑀤𑀽𑀲𑀓𑁄 𑀧𑀕𑀩𑁆𑀪𑁄;

𑀫𑀸𑀬𑀸𑀯𑀻 𑀅𑀲𑀜𑁆𑀜𑀢𑁄 𑀧𑀮𑀸𑀧𑁄, 𑀧𑀢𑀺𑀭𑀽𑀧𑁂𑀦 𑀘𑀭𑀁 𑀲 𑀫𑀕𑁆𑀕𑀤𑀽𑀲𑀻’’𑀢𑀺.

𑀩𑀼𑀤𑁆𑀥𑀸𑀤𑀬𑁄 𑀧𑀦 𑀧𑀝𑀺𑀯𑁂𑀥𑀅𑀭𑀺𑀬𑀸 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘𑀸’’𑀢𑀺. 𑀢𑁂𑀲𑀼 𑀇𑀥 𑀆𑀘𑀸𑀭𑀅𑀭𑀺𑀬𑁄𑀯 𑀅𑀥𑀺𑀧𑁆𑀧𑁂𑀢𑁄.

𑀅𑀦𑀭𑀺𑀬𑀦𑁆𑀢𑀺 𑀤𑀼𑀲𑁆𑀲𑀻𑀮𑀁 𑀧𑀸𑀧𑀥𑀫𑁆𑀫𑀁. 𑀓𑀼𑀩𑁆𑀩𑀦𑁆𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀁 𑀧𑀜𑁆𑀘𑀯𑀺𑀥𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀁, 𑀏𑀓𑀫𑁂𑀯 𑀯𑀸 𑀏𑀢𑀁 𑀅𑀢𑁆𑀣𑀧𑀤𑀁, 𑀅𑀦𑀭𑀺𑀬𑀁 𑀳𑀻𑀦𑀁 𑀮𑀸𑀫𑀓𑀁 𑀧𑀜𑁆𑀘𑀯𑁂𑀭𑀪𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀧𑀼𑀕𑁆𑀕𑀮𑀁. 𑀬𑁄𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀤𑀡𑁆𑀟𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀳𑀭𑀡𑀓𑁂𑀦. 𑀦𑀺𑀲𑁂𑀥𑀢𑀻𑀢𑀺 ‘‘𑀫𑀸 𑀧𑀼𑀦 𑀏𑀯𑀭𑀽𑀧𑀁 𑀓𑀭𑀻’’𑀢𑀺 𑀧𑀳𑀭𑀦𑁆𑀢𑁄 𑀦𑀺𑀯𑀸𑀭𑁂𑀢𑀺. 𑀲𑀸𑀲𑀦𑀁 𑀢𑀁 𑀦 𑀢𑀁 𑀯𑁂𑀭𑀦𑁆𑀢𑀺 𑀢𑀁, 𑀫𑀳𑀸𑀭𑀸𑀚, 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑁂 𑀧𑀼𑀢𑁆𑀢𑀥𑀻𑀢𑀭𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀯𑀸 𑀏𑀯𑀁 𑀧𑀳𑀭𑀺𑀢𑁆𑀯𑀸 𑀦𑀺𑀲𑁂𑀥𑀦𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀺 𑀑𑀯𑀸𑀤𑁄, 𑀦 𑀯𑁂𑀭𑀁. 𑀇𑀢𑀺 𑀦𑀁 𑀧𑀡𑁆𑀟𑀺𑀢𑀸 ¶ 𑀯𑀺𑀤𑀽𑀢𑀺 𑀏𑀯𑀫𑁂𑀢𑀁 𑀧𑀡𑁆𑀟𑀺𑀢𑀸 𑀚𑀸𑀦𑀦𑁆𑀢𑀺. 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀢𑁆𑀯𑀫𑁆𑀧𑀺 𑀏𑀯𑀁 𑀚𑀸𑀦, 𑀦 𑀏𑀯𑀭𑀽𑀧𑁂 𑀞𑀸𑀦𑁂 𑀯𑁂𑀭𑀁 𑀓𑀸𑀢𑀼𑀁 𑀅𑀭𑀳𑀲𑀺. 𑀲𑀘𑁂 𑀳𑀺 ¶ 𑀢𑁆𑀯𑀁, 𑀫𑀳𑀸𑀭𑀸𑀚, 𑀫𑀬𑀸 𑀏𑀯𑀁 𑀲𑀺𑀓𑁆𑀔𑀸𑀧𑀺𑀢𑁄 𑀦𑀸𑀪𑀯𑀺𑀲𑁆𑀲, 𑀅𑀣 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀽𑀯𑀲𑀓𑁆𑀔𑀮𑀺𑀆𑀤𑀻𑀦𑀺 𑀘𑁂𑀯 𑀨𑀮𑀸𑀨𑀮𑀸𑀤𑀻𑀦𑀺 𑀘 𑀳𑀭𑀦𑁆𑀢𑁄 𑀘𑁄𑀭𑀓𑀫𑁆𑀫𑁂𑀲𑀼 𑀧𑀮𑀼𑀤𑁆𑀥𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀦𑁆𑀥𑀺𑀘𑁆𑀙𑁂𑀤𑀦𑀧𑀦𑁆𑀣𑀤𑀽𑀳𑀦𑀕𑀸𑀫𑀖𑀸𑀢𑀓𑀸𑀤𑀻𑀦𑀺 𑀓𑀢𑁆𑀯𑀸 ‘‘𑀭𑀸𑀚𑀸𑀧𑀭𑀸𑀥𑀺𑀓𑁄 𑀘𑁄𑀭𑁄’’𑀢𑀺 𑀲𑀳𑁄𑀟𑁆𑀠𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑀺𑀢𑁄 ‘‘𑀕𑀘𑁆𑀙𑀣𑀲𑁆𑀲 𑀤𑁄𑀲𑀸𑀦𑀼𑀭𑀽𑀧𑀁 𑀤𑀡𑁆𑀟𑀁 𑀉𑀧𑀦𑁂𑀣𑀸’’𑀢𑀺 𑀤𑀡𑁆𑀟𑀪𑀬𑀁 𑀧𑀸𑀧𑀼𑀡𑀺𑀲𑁆𑀲, 𑀓𑀼𑀢𑁄 𑀢𑁂 𑀏𑀯𑀭𑀽𑀧𑀸 𑀲𑀫𑁆𑀧𑀢𑁆𑀢𑀺 𑀅𑀪𑀯𑀺𑀲𑁆𑀲, 𑀦𑀦𑀼 𑀫𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀇𑀲𑁆𑀲𑀭𑀺𑀬𑀁 𑀢𑀬𑀸 𑀮𑀤𑁆𑀥𑀦𑁆𑀢𑀺 𑀏𑀯𑀁 𑀆𑀘𑀭𑀺𑀬𑁄 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀲𑀺 ¶ . 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀅𑀫𑀘𑁆𑀘𑀸𑀧𑀺𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀲𑀘𑁆𑀘𑀁, 𑀤𑁂𑀯, 𑀇𑀤𑀁 𑀇𑀲𑁆𑀲𑀭𑀺𑀬𑀁 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲𑁂𑀯 𑀲𑀦𑁆𑀢𑀓’’𑀦𑁆𑀢𑀺 𑀆𑀳𑀁𑀲𑀼.

𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀆𑀘𑀭𑀺𑀬𑀲𑁆𑀲 𑀕𑀼𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀢𑁂, 𑀆𑀘𑀭𑀺𑀬, 𑀤𑀫𑁆𑀫𑀺, 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸’’𑀢𑀺 𑀆𑀳. 𑀆𑀘𑀭𑀺𑀬𑁄 ‘‘𑀦 𑀫𑁂, 𑀫𑀳𑀸𑀭𑀸𑀚, 𑀭𑀚𑁆𑀚𑁂𑀦𑀢𑁆𑀣𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀭𑀸𑀚𑀸 𑀢𑀓𑁆𑀓𑀲𑀺𑀮𑀁 𑀧𑁂𑀲𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀼𑀢𑁆𑀢𑀤𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀢𑁆𑀯𑀸 𑀢𑀫𑁂𑀯 𑀧𑀼𑀭𑁄𑀳𑀺𑀢𑀁 𑀓𑀢𑁆𑀯𑀸 𑀧𑀺𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑁂 𑀞𑀺𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁄𑀥𑀦𑁄 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀩𑀳𑀽 𑀚𑀦𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀭𑀸𑀚𑀸 𑀓𑁄𑀥𑀦𑁄 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀮𑀫𑀼𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁫𑁩] 𑁩. 𑀫𑀡𑀺𑀓𑀡𑁆𑀞𑀚𑀸𑀢𑀓𑀯𑀡𑁆𑀡𑀦𑀸

𑀫𑀫𑀦𑁆𑀦𑀧𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀆𑀴𑀯𑀺𑀁 𑀦𑀺𑀲𑁆𑀲𑀸𑀬 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁄 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 (𑀧𑀸𑀭𑀸. 𑁩𑁪𑁨) 𑀆𑀭𑀩𑁆𑀪 𑀓𑀣𑁂𑀲𑀺. 𑀆𑀴𑀯𑀓𑀸 𑀳𑀺 𑀪𑀺𑀓𑁆𑀔𑀽 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀬𑁄 𑀓𑀸𑀭𑀬𑀫𑀸𑀦𑀸 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀺𑀁𑀲𑀼 ‘‘𑀧𑀼𑀭𑀺𑀲𑀁 𑀤𑁂𑀣, 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸. 𑀫𑀦𑀼𑀲𑁆𑀲𑀸 ¶ 𑀉𑀧𑀤𑁆𑀤𑀼𑀢𑀸 𑀬𑀸𑀘𑀦𑀸𑀬 𑀉𑀧𑀤𑁆𑀤𑀼𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀩𑁆𑀩𑀺𑀚𑁆𑀚𑀺𑀁𑀲𑀼𑀧𑀺 𑀉𑀢𑁆𑀢𑀲𑀺𑀁𑀲𑀼𑀧𑀺 𑀧𑀮𑀸𑀬𑀺𑀁𑀲𑀼𑀧𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀴𑀯𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺, 𑀫𑀦𑀼𑀲𑁆𑀲𑀸 𑀣𑁂𑀭𑀫𑁆𑀧𑀺 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀼𑀩𑁆𑀩𑀸𑀬𑀁, 𑀆𑀯𑀼𑀲𑁄, 𑀆𑀴𑀯𑀻 𑀲𑀼𑀮𑀪𑀧𑀺𑀡𑁆𑀟𑀸, 𑀇𑀤𑀸𑀦𑀺 𑀓𑀲𑁆𑀫𑀸 ¶ 𑀤𑀼𑀮𑁆𑀮𑀪𑀧𑀺𑀡𑁆𑀟𑀸 𑀚𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀆𑀴𑀯𑀺𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀕𑀸𑀴𑀯𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀏𑀢𑀲𑁆𑀫𑀺𑀁 𑀓𑀸𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀴𑀯𑀓𑁂 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 ¶ 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀬𑁄 𑀓𑀸𑀭𑁂𑀣𑀸’’𑀢𑀺. ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀬𑀸𑀘𑀦𑀸 𑀦𑀸𑀫𑁂𑀲𑀸 𑀲𑀢𑁆𑀢𑀭𑀢𑀦𑀧𑀭𑀺𑀧𑀼𑀡𑁆𑀡𑁂 𑀦𑀸𑀕𑀪𑀯𑀦𑁂 𑀯𑀲𑀦𑁆𑀢𑀸𑀦𑀁 𑀦𑀸𑀕𑀸𑀦𑀫𑁆𑀧𑀺 𑀅𑀫𑀦𑀸𑀧𑀸, 𑀧𑀕𑁂𑀯 𑀫𑀦𑀼𑀲𑁆𑀲𑀸𑀦𑀁, 𑀬𑁂𑀲𑀁 𑀏𑀓𑀁 𑀓𑀳𑀸𑀧𑀡𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀸𑀦𑀁 𑀧𑀸𑀲𑀸𑀡𑀢𑁄 𑀫𑀁𑀲𑀁 𑀉𑀧𑁆𑀧𑀸𑀝𑀦𑀓𑀸𑀮𑁄 𑀯𑀺𑀬 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀯𑀺𑀪𑀯𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀅𑀜𑁆𑀜𑁄𑀧𑀺 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀢𑀲𑁆𑀲 𑀫𑀸𑀢𑀼 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀢𑁂 𑀉𑀪𑁄𑀧𑀺 𑀪𑀸𑀢𑀭𑁄 𑀯𑀬𑀧𑁆𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀮𑀓𑀺𑀭𑀺𑀬𑀸𑀬 𑀲𑀁𑀯𑀺𑀕𑁆𑀕𑀳𑀤𑀬𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀲𑀺𑀁𑀲𑀼. 𑀢𑁂𑀲𑀼 𑀚𑁂𑀝𑁆𑀞𑀲𑁆𑀲 𑀉𑀧𑀭𑀺𑀕𑀗𑁆𑀕𑀸𑀬 𑀧𑀡𑁆𑀡𑀲𑀸𑀮𑀸 𑀅𑀳𑁄𑀲𑀺, 𑀓𑀦𑀺𑀝𑁆𑀞𑀲𑁆𑀲 𑀅𑀥𑁄𑀕𑀗𑁆𑀕𑀸𑀬. 𑀅𑀣𑁂𑀓𑀤𑀺𑀯𑀲𑀁 𑀫𑀡𑀺𑀓𑀡𑁆𑀞𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀫𑀸𑀡𑀯𑀓𑀯𑁂𑀲𑁂𑀦 𑀯𑀺𑀘𑀭𑀦𑁆𑀢𑁄 𑀓𑀦𑀺𑀝𑁆𑀞𑀲𑁆𑀲 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀫𑁄𑀤𑀦𑀻𑀬𑀓𑀣𑀁 𑀓𑀣𑁂𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑀸 𑀅𑀳𑁂𑀲𑀼𑀁, 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀫𑀡𑀺𑀓𑀡𑁆𑀞𑁄 𑀅𑀪𑀺𑀡𑁆𑀳𑀁 𑀓𑀦𑀺𑀝𑁆𑀞𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀓𑀣𑀸𑀲𑀮𑁆𑀮𑀸𑀧𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀢𑀸𑀧𑀲𑁂 𑀲𑀺𑀦𑁂𑀳𑁂𑀦 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀪𑁄𑀕𑁂𑀳𑀺 𑀢𑀸𑀧𑀲𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀧𑀭𑀺𑀲𑁆𑀲𑀚𑀺𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀥𑀸𑀭𑁂𑀢𑁆𑀯𑀸 𑀣𑁄𑀓𑀁 𑀯𑀲𑀺𑀢𑁆𑀯𑀸 𑀢𑀁 𑀲𑀺𑀦𑁂𑀳𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀭𑀻𑀭𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀢𑀸𑀧𑀲𑁄 𑀢𑀲𑁆𑀲 𑀪𑀬𑁂𑀦 𑀓𑀺𑀲𑁄 𑀅𑀳𑁄𑀲𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄.

𑀲𑁄 ¶ 𑀏𑀓𑀤𑀺𑀯𑀲𑀁 𑀪𑀸𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑁄 𑀧𑀼𑀘𑁆𑀙𑀺 𑁋 ‘‘𑀓𑀺𑀲𑁆𑀲, 𑀢𑁆𑀯𑀁 𑀪𑁄, 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺. 𑀲𑁄 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀺𑀁 𑀧𑀦, 𑀢𑁆𑀯𑀁 𑀪𑁄, 𑀢𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀆𑀕𑀫𑀦𑀁 ¶ 𑀇𑀘𑁆𑀙𑀲𑀺, 𑀦 𑀇𑀘𑁆𑀙𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀦 𑀇𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀲𑁄 𑀧𑀦 𑀦𑀸𑀕𑀭𑀸𑀚𑀸 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀓𑀺𑀁 𑀧𑀺𑀴𑀦𑁆𑀥𑀦𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀆𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀡𑀺𑀭𑀢𑀦’’𑀦𑁆𑀢𑀺 𑀆𑀳. 𑀢𑁂𑀦 𑀳𑀺 𑀢𑁆𑀯𑀁 𑀢𑀲𑁆𑀫𑀺𑀁 𑀦𑀸𑀕𑀭𑀸𑀚𑁂 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀅𑀦𑀺𑀲𑀺𑀦𑁆𑀦𑁂𑀬𑁂𑀯 ‘‘𑀫𑀡𑀺𑀁 𑀫𑁂 𑀤𑁂𑀳𑀻’’𑀢𑀺 𑀬𑀸𑀘, 𑀏𑀯𑀁 𑀲𑁄 𑀦𑀸𑀕𑁄 𑀢𑀁 𑀪𑁄𑀕𑁂𑀳𑀺 𑀅𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀢𑀺. 𑀧𑀼𑀦𑀤𑀺𑀯𑀲𑁂 𑀅𑀲𑁆𑀲𑀫𑀧𑀤𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀫𑁂𑀯 𑀦𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀢𑀢𑀺𑀬𑀤𑀺𑀯𑀲𑁂 𑀕𑀗𑁆𑀕𑀸𑀢𑀻𑀭𑁂 𑀞𑀢𑁆𑀯𑀸 𑀉𑀤𑀓𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀫𑁂𑀯 𑀦𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀏𑀯𑀁 𑀲𑁄 𑀢𑀯 𑀲𑀦𑁆𑀢𑀺𑀓𑀁 𑀧𑀼𑀦 𑀦 𑀆𑀕𑀫𑀺𑀲𑁆𑀲𑀢𑀻𑀢𑀺.

𑀢𑀸𑀧𑀲𑁄 ¶ ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀸𑀕𑀭𑀸𑀚𑀸𑀦𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑀫𑀢𑁆𑀢𑀫𑁂𑀯 ‘‘𑀏𑀢𑀁 𑀅𑀢𑁆𑀢𑀦𑁄 𑀧𑀺𑀴𑀦𑁆𑀥𑀦𑀫𑀡𑀺𑀁 𑀫𑁂 𑀤𑁂𑀳𑀻’’𑀢𑀺 𑀬𑀸𑀘𑀺, 𑀲𑁄 𑀅𑀦𑀺𑀲𑀻𑀤𑀺𑀢𑁆𑀯𑀸𑀯 𑀧𑀮𑀸𑀬𑀺. 𑀅𑀣 𑀦𑀁 𑀤𑀼𑀢𑀺𑀬𑀤𑀺𑀯𑀲𑁂 𑀅𑀲𑁆𑀲𑀫𑀧𑀤𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀫𑁂𑀯 ‘‘𑀳𑀺𑀬𑁆𑀬𑁄 𑀫𑁂 𑀫𑀡𑀺𑀭𑀢𑀦𑀁 𑀦𑀸𑀤𑀸𑀲𑀺, 𑀅𑀚𑁆𑀚 𑀤𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀦𑀸𑀕𑁄 𑀅𑀲𑁆𑀲𑀫𑀧𑀤𑀁 𑀅𑀧𑀯𑀺𑀲𑀺𑀢𑁆𑀯𑀸𑀯 𑀧𑀮𑀸𑀬𑀺. 𑀢𑀢𑀺𑀬𑀤𑀺𑀯𑀲𑁂 𑀉𑀤𑀓𑀢𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀫𑁂𑀯 𑀦𑀁 ‘‘𑀅𑀚𑁆𑀚 𑀫𑁂 𑀢𑀢𑀺𑀬𑁄 𑀤𑀺𑀯𑀲𑁄 𑀬𑀸𑀘𑀦𑁆𑀢𑀲𑁆𑀲, 𑀤𑁂𑀳𑀺 𑀤𑀸𑀦𑀺 𑀫𑁂 𑀏𑀢𑀁 𑀫𑀡𑀺𑀭𑀢𑀦’’𑀦𑁆𑀢𑀺 𑀆𑀳. 𑀦𑀸𑀕𑀭𑀸𑀚𑀸 𑀉𑀤𑀓𑁂 𑀞𑀢𑁆𑀯𑀸𑀯 𑀢𑀸𑀧𑀲𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀆𑀳 𑁋

𑁭.

‘‘𑀫𑀫𑀦𑁆𑀦𑀧𑀸𑀦𑀁 𑀯𑀺𑀧𑀼𑀮𑀁 𑀉𑀴𑀸𑀭𑀁, 𑀉𑀧𑁆𑀧𑀚𑁆𑀚𑀢𑀻𑀫𑀲𑁆𑀲 𑀫𑀡𑀺𑀲𑁆𑀲 𑀳𑁂𑀢𑀼;

𑀢𑀁 𑀢𑁂 𑀦 𑀤𑀲𑁆𑀲𑀁 𑀅𑀢𑀺𑀬𑀸𑀘𑀓𑁄𑀲𑀺, 𑀦 𑀘𑀸𑀧𑀺 𑀢𑁂 𑀅𑀲𑁆𑀲𑀫𑀫𑀸𑀕𑀫𑀺𑀲𑁆𑀲𑀁.

𑁮.

‘‘𑀲𑀼𑀲𑀽 𑀬𑀣𑀸 𑀲𑀓𑁆𑀔𑀭𑀥𑁄𑀢𑀧𑀸𑀡𑀻, 𑀢𑀸𑀲𑁂𑀲𑀺𑀫𑀁 𑀲𑁂𑀮𑀁 𑀬𑀸𑀘𑀫𑀸𑀦𑁄;

𑀢𑀁 𑀢𑁂 𑀦 𑀤𑀲𑁆𑀲𑀁 𑀅𑀢𑀺𑀬𑀸𑀘𑀓𑁄𑀲𑀺, 𑀦 𑀘𑀸𑀧𑀺 𑀢𑁂 𑀅𑀲𑁆𑀲𑀫𑀫𑀸𑀕𑀫𑀺𑀲𑁆𑀲’’𑀦𑁆𑀢𑀺.

𑀢𑀢𑁆𑀣 ¶ 𑀫𑀫𑀦𑁆𑀦𑀧𑀸𑀦𑀦𑁆𑀢𑀺 𑀫𑀫 𑀬𑀸𑀕𑀼𑀪𑀢𑁆𑀢𑀸𑀤𑀺𑀤𑀺𑀩𑁆𑀩𑀪𑁄𑀚𑀦𑀁 𑀅𑀝𑁆𑀞𑀧𑀸𑀦𑀓𑀪𑁂𑀤𑀜𑁆𑀘 𑀤𑀺𑀩𑁆𑀩𑀧𑀸𑀦𑀁. 𑀯𑀺𑀧𑀼𑀮𑀦𑁆𑀢𑀺 𑀩𑀳𑀼. 𑀉𑀴𑀸𑀭𑀦𑁆𑀢𑀺 𑀲𑁂𑀝𑁆𑀞𑀁 𑀧𑀡𑀻𑀢𑀁. 𑀢𑀁 𑀢𑁂𑀢𑀺 𑀢𑀁 𑀫𑀡𑀺𑀁 𑀢𑀼𑀬𑁆𑀳𑀁. 𑀅𑀢𑀺𑀬𑀸𑀘𑀓𑁄𑀲𑀻𑀢𑀺 ¶ 𑀓𑀸𑀮𑀜𑁆𑀘 𑀧𑀫𑀸𑀡𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀚𑁆𑀚 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀫𑀬𑁆𑀳𑀁 𑀧𑀺𑀬𑀁 𑀫𑀦𑀸𑀧𑀁 𑀫𑀡𑀺𑀭𑀢𑀦𑀁 𑀬𑀸𑀘𑀫𑀸𑀦𑁄 𑀅𑀢𑀺𑀓𑁆𑀓𑀫𑁆𑀫 𑀬𑀸𑀘𑀓𑁄𑀲𑀺. 𑀦 𑀘𑀸𑀧𑀺 𑀢𑁂𑀢𑀺 𑀦 𑀓𑁂𑀯𑀮𑀁 𑀦 𑀤𑀲𑁆𑀲𑀁, 𑀅𑀲𑁆𑀲𑀫𑀫𑁆𑀧𑀺 𑀢𑁂 𑀦𑀸𑀕𑀫𑀺𑀲𑁆𑀲𑀁. 𑀲𑀼𑀲𑀽 𑀬𑀣𑀸𑀢𑀺 𑀬𑀣𑀸 𑀦𑀸𑀫 𑀬𑀼𑀯𑀸 𑀢𑀭𑀼𑀡𑀫𑀦𑀼𑀲𑁆𑀲𑁄. 𑀲𑀓𑁆𑀔𑀭𑀥𑁄𑀢𑀧𑀸𑀡𑀻𑀢𑀺 𑀲𑀓𑁆𑀔𑀭𑀸𑀬 𑀥𑁄𑀢𑀧𑀸𑀡𑀺, 𑀢𑁂𑀮𑁂𑀦 𑀧𑀸𑀲𑀸𑀡𑁂 𑀥𑁄𑀢𑀅𑀲𑀺𑀳𑀢𑁆𑀣𑁄. 𑀢𑀸𑀲𑁂𑀲𑀺𑀫𑀁 𑀲𑁂𑀮𑀁 𑀬𑀸𑀘𑀫𑀸𑀦𑁄𑀢𑀺 𑀇𑀫𑀁 𑀫𑀡𑀺𑀁 𑀬𑀸𑀘𑀦𑁆𑀢𑁄 𑀢𑁆𑀯𑀁 𑀓𑀜𑁆𑀘𑀦𑀣𑀭𑀼𑀔𑀕𑁆𑀕𑀁 𑀅𑀩𑁆𑀩𑀸𑀳𑀺𑀢𑁆𑀯𑀸 ‘‘𑀲𑀻𑀲𑀁 𑀢𑁂 𑀙𑀺𑀦𑁆𑀤𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀢𑀭𑀼𑀡𑀧𑀼𑀭𑀺𑀲𑁄 𑀯𑀺𑀬 𑀫𑀁 𑀢𑀸𑀲𑁂𑀲𑀺.

𑀏𑀯𑀁 𑀯𑀢𑁆𑀯𑀸 𑀲𑁄 𑀦𑀸𑀕𑀭𑀸𑀚𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀫𑁂𑀯 𑀕𑀦𑁆𑀢𑁆𑀯𑀸 𑀦 𑀧𑀘𑁆𑀘𑀸𑀕𑀜𑁆𑀙𑀺. 𑀅𑀣 𑀲𑁄 𑀢𑀸𑀧𑀲𑁄 𑀢𑀲𑁆𑀲 𑀤𑀲𑁆𑀲𑀦𑀻𑀬𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀅𑀤𑀲𑁆𑀲𑀦𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑁄 𑀅𑀳𑁄𑀲𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀅𑀣 𑀚𑁂𑀝𑁆𑀞𑀢𑀸𑀧𑀲𑁄 ‘‘𑀓𑀦𑀺𑀝𑁆𑀞𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀡𑁆𑀟𑀼𑀭𑁄𑀕𑀺𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀪𑁄, 𑀢𑁆𑀯𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀡𑁆𑀟𑀼𑀭𑁄𑀕𑀻 𑀚𑀸𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀲𑁆𑀲 𑀤𑀲𑁆𑀲𑀦𑀻𑀬𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀅𑀤𑀲𑁆𑀲𑀦𑁂𑀦𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀬𑀁 𑀢𑀸𑀧𑀲𑁄 𑀦𑀸𑀕𑀭𑀸𑀚𑀸𑀦𑀁 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯.

‘‘𑀦 ¶ 𑀢𑀁 𑀬𑀸𑀘𑁂 𑀬𑀲𑁆𑀲 𑀧𑀺𑀬𑀁 𑀚𑀺𑀕𑀻𑀲𑁂, 𑀤𑁂𑀲𑁆𑀲𑁄 𑀳𑁄𑀢𑀺 𑀅𑀢𑀺𑀬𑀸𑀘𑀦𑀸𑀬;

𑀦𑀸𑀕𑁄 𑀫𑀡𑀺𑀁 𑀬𑀸𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀅𑀤𑀲𑁆𑀲𑀦𑀁𑀬𑁂𑀯 𑀢𑀤𑀚𑁆𑀛𑀕𑀫𑀸’’𑀢𑀺.

𑀢𑀢𑁆𑀣 𑀦 𑀢𑀁 𑀬𑀸𑀘𑁂𑀢𑀺 𑀢𑀁 𑀪𑀡𑁆𑀟𑀁 𑀦 𑀬𑀸𑀘𑁂𑀬𑁆𑀬. 𑀬𑀲𑁆𑀲 𑀧𑀺𑀬𑀁 𑀚𑀺𑀕𑀻𑀲𑁂𑀢𑀺 𑀬𑀁 𑀪𑀡𑁆𑀟𑀁 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀺𑀬𑀦𑁆𑀢𑀺 𑀚𑀸𑀦𑁂𑀬𑁆𑀬. 𑀤𑁂𑀲𑁆𑀲𑁄 𑀳𑁄𑀢𑀻𑀢𑀺 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀅𑀢𑀺𑀬𑀸𑀘𑀦𑀸𑀬𑀸𑀢𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀭𑀪𑀡𑁆𑀟𑀁 𑀬𑀸𑀘𑀦𑁆𑀢𑁄 𑀢𑀸𑀬 𑀅𑀢𑀺𑀬𑀸𑀘𑀦𑀸𑀬. 𑀅𑀤𑀲𑁆𑀲𑀦𑀁𑀬𑁂𑀯 𑀢𑀤𑀚𑁆𑀛𑀕𑀫𑀸𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀤𑀲𑁆𑀲𑀦𑀫𑁂𑀯 𑀕𑀢𑁄𑀢𑀺.

𑀏𑀯𑀁 𑀧𑀦 𑀢𑀁 𑀯𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀫𑀸 𑀲𑁄𑀘𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀸 𑀅𑀢𑁆𑀢𑀦𑁄 𑀅𑀲𑁆𑀲𑀫𑀫𑁂𑀯 𑀕𑀢𑁄. 𑀅𑀣𑀸𑀧𑀭𑀪𑀸𑀕𑁂 𑀢𑁂 ¶ 𑀤𑁆𑀯𑁂𑀧𑀺 𑀪𑀸𑀢𑀭𑁄 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 ¶ ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀭𑀢𑀦𑀧𑀭𑀺𑀧𑀼𑀡𑁆𑀡𑁂 𑀦𑀸𑀕𑀪𑀯𑀦𑁂 𑀯𑀲𑀦𑁆𑀢𑀸𑀦𑀁 𑀦𑀸𑀕𑀸𑀦𑀫𑁆𑀧𑀺 𑀬𑀸𑀘𑀦𑀸 𑀦𑀸𑀫 𑀅𑀫𑀦𑀸𑀧𑀸, 𑀓𑀺𑀫𑀗𑁆𑀕𑀁 𑀧𑀦 𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀦𑀺𑀝𑁆𑀞𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀚𑁂𑀝𑁆𑀞𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀡𑀺𑀓𑀡𑁆𑀞𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁫𑁪] 𑁪. 𑀓𑀼𑀡𑁆𑀟𑀓𑀓𑀼𑀘𑁆𑀙𑀺𑀲𑀺𑀦𑁆𑀥𑀯𑀚𑀸𑀢𑀓𑀯𑀡𑁆𑀡𑀦𑀸

𑀪𑀼𑀢𑁆𑀯𑀸 𑀢𑀺𑀡𑀧𑀭𑀺𑀖𑀸𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀢𑁂 𑀫𑀦𑀼𑀲𑁆𑀲𑀸 ‘‘𑀆𑀕𑀦𑁆𑀢𑀼𑀓𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀤𑀦𑁆𑀢𑀺. 𑀯𑀺𑀳𑀸𑀭𑁂 𑀏𑀓𑀁 𑀥𑀫𑁆𑀫𑀖𑁄𑀲𑀓𑀪𑀺𑀓𑁆𑀔𑀼𑀁 𑀞𑀧𑁂𑀲𑀼𑀁, 𑀲𑁄 𑀬𑁂 𑀬𑁂 𑀆𑀕𑀦𑁆𑀢𑁆𑀯𑀸 𑀬𑀢𑁆𑀢𑀓𑁂 𑀪𑀺𑀓𑁆𑀔𑀽 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽 𑀯𑀺𑀘𑀸𑀭𑁂𑀢𑁆𑀯𑀸 𑀤𑁂𑀢𑀺.

𑀅𑀣𑁂𑀓𑀸 𑀤𑀼𑀕𑁆𑀕𑀢𑀫𑀳𑀮𑁆𑀮𑀺𑀓𑀸 𑀇𑀢𑁆𑀣𑀻 𑀏𑀓𑀫𑁂𑀯 𑀧𑀝𑀺𑀯𑀻𑀲𑀁 𑀲𑀚𑁆𑀚𑁂𑀢𑁆𑀯𑀸 𑀢𑁂𑀲𑀁 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀲𑀼 𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀦𑁆𑀦𑁂𑀲𑀼 𑀉𑀲𑁆𑀲𑀽𑀭𑁂 𑀥𑀫𑁆𑀫𑀖𑁄𑀲𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸’’𑀢𑀺 𑀆𑀳. 𑀲𑁄 ‘‘𑀫𑀬𑀸 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀦𑁆𑀦𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀦 𑀯𑀺𑀳𑀸𑀭𑁂𑀬𑁂𑀯, 𑀢𑁆𑀯𑀁 𑀢𑀲𑁆𑀲 𑀪𑀺𑀓𑁆𑀔𑀁 𑀤𑁂𑀳𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀆𑀕𑀢𑀓𑀸𑀮𑁂 ¶ 𑀯𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺. ‘‘𑀏𑀓𑀸𑀬 𑀓𑀺𑀭 𑀫𑀳𑀮𑁆𑀮𑀺𑀓𑀸𑀬 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀢𑁆𑀢𑀦𑁄 𑀖𑀭𑁂 𑀦𑀺𑀲𑀻𑀤𑀸𑀧𑀺𑀢𑁄’’𑀢𑀺 𑀩𑀳𑀽𑀦𑀺 𑀲𑀤𑁆𑀥𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑁄𑀲𑀼𑀁. 𑀢𑁂𑀲𑀼 𑀭𑀸𑀚𑀸 𑀧𑀲𑁆𑀲𑁂𑀦𑀤𑀻 𑀓𑁄𑀲𑀮𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀲𑀸𑀝𑀓𑁂𑀦 𑀘𑁂𑀯 𑀲𑀳𑀲𑁆𑀲𑀢𑁆𑀣𑀯𑀺𑀓𑀸𑀬 𑀘 𑀲𑀤𑁆𑀥𑀺𑀁 𑀪𑀢𑁆𑀢𑀪𑀸𑀚𑀦𑀸𑀦𑀺 𑀧𑀳𑀺𑀡𑀺 ‘‘𑀫𑀬𑁆𑀳𑀁 𑀅𑀬𑁆𑀬𑀁 𑀧𑀭𑀺𑀯𑀺𑀲𑀫𑀸𑀦𑀸 𑀇𑀫𑀁 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀇𑀫𑁂 𑀓𑀳𑀸𑀧𑀡𑁂 𑀯𑀴𑀜𑁆𑀚𑁂𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀺𑀲𑀢𑀽’’𑀢𑀺. 𑀬𑀣𑀸 𑀘 𑀭𑀸𑀚𑀸, 𑀏𑀯𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ¶ 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀲𑀸𑀔𑀸 𑀘 𑀫𑀳𑀸𑀉𑀧𑀸𑀲𑀺𑀓𑀸 𑀧𑀳𑀺𑀡𑀺. 𑀅𑀜𑁆𑀜𑀸𑀦𑀺𑀧𑀺 𑀧𑀦 𑀓𑀼𑀮𑀸𑀦𑀺 𑀏𑀓𑀲𑀢𑀤𑁆𑀯𑀺𑀲𑀢𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀓𑀳𑀸𑀧𑀡𑁂 𑀧𑀳𑀺𑀡𑀺𑀁𑀲𑀼. 𑀏𑀯𑀁 𑀏𑀓𑀸𑀳𑁂𑀦𑁂𑀯 𑀲𑀸 𑀫𑀳𑀮𑁆𑀮𑀺𑀓𑀸 𑀲𑀢𑀲𑀳𑀲𑁆𑀲𑀫𑀢𑁆𑀢𑀁 𑀮𑀪𑀺. 𑀣𑁂𑀭𑁄 𑀧𑀦 𑀢𑀸𑀬 𑀤𑀺𑀦𑁆𑀦𑀬𑀸𑀕𑀼𑀫𑁂𑀯 𑀧𑀺𑀯𑀺𑀢𑁆𑀯𑀸 ¶ 𑀢𑀸𑀬 𑀓𑀢𑀔𑀚𑁆𑀚𑀓𑀫𑁂𑀯 𑀧𑀓𑁆𑀓𑀪𑀢𑁆𑀢𑀫𑁂𑀯 𑀘 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀢𑀁 𑀫𑀳𑀮𑁆𑀮𑀺𑀓𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺.

𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀫𑀳𑀮𑁆𑀮𑀺𑀓𑀕𑀳𑀧𑀢𑀸𑀦𑀺𑀁 𑀤𑀼𑀕𑁆𑀕𑀢𑀪𑀸𑀯𑀢𑁄 𑀫𑁄𑀘𑁂𑀲𑀺, 𑀧𑀢𑀺𑀝𑁆𑀞𑀸 𑀅𑀳𑁄𑀲𑀺. 𑀢𑀸𑀬 𑀤𑀺𑀦𑁆𑀦𑀫𑀸𑀳𑀸𑀭𑀁 𑀅𑀚𑀺𑀕𑀼𑀘𑁆𑀙𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀇𑀤𑀸𑀦𑁂𑀯 𑀏𑀢𑀺𑀲𑁆𑀲𑀸 𑀫𑀳𑀮𑁆𑀮𑀺𑀓𑀸𑀬 𑀅𑀯𑀲𑁆𑀲𑀬𑁄 𑀚𑀸𑀢𑁄, 𑀦 𑀘 𑀇𑀤𑀸𑀦𑁂𑀯 𑀢𑀸𑀬 𑀤𑀺𑀦𑁆𑀦𑀁 𑀆𑀳𑀸𑀭𑀁 𑀅𑀚𑀺𑀕𑀼𑀘𑁆𑀙𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀪𑀼𑀜𑁆𑀚𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑀸𑀧𑀣𑁂 𑀅𑀲𑁆𑀲𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀉𑀢𑁆𑀢𑀭𑀸𑀧𑀣𑀚𑀦𑀧𑀤𑀢𑁄 𑀧𑀜𑁆𑀘𑀲𑀢𑀸 𑀅𑀲𑁆𑀲𑀯𑀸𑀡𑀺𑀚𑀸 𑀅𑀲𑁆𑀲𑁂 𑀩𑀸𑀭𑀸𑀡𑀲𑀺𑀁 𑀆𑀦𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀅𑀜𑁆𑀜𑀢𑀭𑁄𑀧𑀺 𑀅𑀲𑁆𑀲𑀯𑀸𑀡𑀺𑀚𑁄 𑀧𑀜𑁆𑀘𑀅𑀲𑁆𑀲𑀲𑀢𑀸𑀦𑀺 𑀆𑀤𑀸𑀬 𑀩𑀸𑀭𑀸𑀡𑀲𑀺𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀦𑀺𑀕𑀫𑀕𑀸𑀫𑁄 𑀅𑀢𑁆𑀣𑀺, 𑀢𑀢𑁆𑀣 𑀧𑀼𑀩𑁆𑀩𑁂 𑀫𑀳𑀸𑀯𑀺𑀪𑀯𑁄 𑀲𑁂𑀝𑁆𑀞𑀺 𑀅𑀳𑁄𑀲𑀺. 𑀢𑀲𑁆𑀲 𑀫𑀳𑀦𑁆𑀢𑀁 𑀦𑀺𑀯𑁂𑀲𑀦𑀁, 𑀢𑀁 𑀧𑀦 𑀓𑀼𑀮𑀁 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀕𑀢𑀁, 𑀏𑀓𑀸𑀯 𑀫𑀳𑀮𑁆𑀮𑀺𑀓𑀸 𑀅𑀯𑀲𑀺𑀝𑁆𑀞𑀸, 𑀲𑀸 𑀢𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀯𑀲𑀢𑀺. 𑀅𑀣 𑀲𑁄 𑀅𑀲𑁆𑀲𑀯𑀸𑀡𑀺𑀚𑁄 𑀢𑀁 𑀦𑀺𑀕𑀫𑀕𑀸𑀫𑀁 𑀧𑀢𑁆𑀯𑀸 ‘‘𑀯𑁂𑀢𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲𑀸 𑀦𑀺𑀯𑁂𑀲𑀦𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺𑀢𑁆𑀯𑀸 𑀅𑀲𑁆𑀲𑁂 𑀏𑀓𑀫𑀦𑁆𑀢𑁂 𑀞𑀧𑁂𑀲𑀺. 𑀢𑀁𑀤𑀺𑀯𑀲𑀫𑁂𑀯𑀲𑁆𑀲 𑀏𑀓𑀺𑀲𑁆𑀲𑀸 𑀆𑀚𑀸𑀦𑀻𑀬𑀸𑀯𑀴𑀯𑀸𑀬 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑁄 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀯𑀲𑀺𑀢𑁆𑀯𑀸 𑀅𑀲𑁆𑀲𑁂 𑀩𑀮𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀲𑁆𑀲𑁂 𑀆𑀤𑀸𑀬 𑀧𑀸𑀬𑀸𑀲𑀺. 𑀅𑀣 𑀦𑀁 𑀫𑀳𑀮𑁆𑀮𑀺𑀓𑀸 ‘‘𑀕𑁂𑀳𑀯𑁂𑀢𑀦𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀼, 𑀅𑀫𑁆𑀫, 𑀤𑁂𑀫𑀻’’𑀢𑀺 ¶ 𑀯𑀼𑀢𑁆𑀢𑁂 ‘‘𑀢𑀸𑀢, 𑀯𑁂𑀢𑀦𑀁 𑀫𑁂 𑀤𑀤𑀫𑀸𑀦𑁄 𑀇𑀫𑀫𑁆𑀧𑀺 𑀅𑀲𑁆𑀲𑀧𑁄𑀢𑀓𑀁 𑀯𑁂𑀢𑀦𑀢𑁄 𑀔𑀡𑁆𑀟𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀳. 𑀯𑀸𑀡𑀺𑀚𑁄 𑀢𑀣𑀸 𑀓𑀢𑁆𑀯𑀸 ¶ 𑀧𑀓𑁆𑀓𑀸𑀫𑀺. 𑀲𑀸 𑀢𑀲𑁆𑀫𑀺𑀁 𑀅𑀲𑁆𑀲𑀧𑁄𑀢𑀓𑁂 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀅𑀯𑀲𑁆𑀲𑀸𑀯𑀦𑀛𑀸𑀫𑀓𑀪𑀢𑁆𑀢𑀯𑀺𑀖𑀸𑀲𑀢𑀺𑀡𑀸𑀦𑀺 𑀤𑀢𑁆𑀯𑀸 𑀢𑀁 𑀧𑀝𑀺𑀚𑀕𑁆𑀕𑀺.

𑀅𑀣𑀸𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑁄 𑀢𑀲𑁆𑀫𑀺𑀁 𑀕𑁂𑀳𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀓𑀼𑀡𑁆𑀟𑀓𑀔𑀸𑀤𑀓𑀲𑁆𑀲 𑀲𑀺𑀦𑁆𑀥𑀯𑀧𑁄𑀢𑀓𑀲𑁆𑀲 𑀞𑀺𑀢𑀝𑁆𑀞𑀸𑀦𑀢𑁄 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀏𑀓𑀅𑀲𑁆𑀲𑁄𑀧𑀺 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀳𑀮𑁆𑀮𑀺𑀓𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀓𑀘𑁆𑀘𑀺 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀅𑀲𑁆𑀲𑁄 𑀅𑀢𑁆𑀣𑀻’’𑀢𑀺 ¶ . ‘‘𑀢𑀸𑀢, 𑀅𑀜𑁆𑀜𑁄 𑀅𑀲𑁆𑀲𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑀁 𑀧𑀦 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀏𑀓𑀁 𑀅𑀲𑁆𑀲𑀧𑁄𑀢𑀓𑀁 𑀧𑀝𑀺𑀚𑀕𑁆𑀕𑀸𑀫𑀺, 𑀲𑁄 𑀏𑀢𑁆𑀣 𑀅𑀢𑁆𑀣𑀻’’𑀢𑀺. ‘‘𑀓𑀳𑀁 𑀲𑁄, 𑀅𑀫𑁆𑀫𑀸’’𑀢𑀺? ‘‘𑀘𑀭𑀺𑀢𑀼𑀁 𑀕𑀢𑁄, 𑀢𑀸𑀢𑀸’’𑀢𑀺. ‘‘𑀓𑀸𑀬 𑀯𑁂𑀮𑀸𑀬 𑀆𑀕𑀫𑀺𑀲𑁆𑀲𑀢𑀺, 𑀅𑀫𑁆𑀫𑀸’’𑀢𑀺? ‘‘𑀲𑀸𑀬𑀦𑁆𑀳𑁂, 𑀢𑀸𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀆𑀕𑀫𑀦𑀁 𑀧𑀝𑀺𑀫𑀸𑀦𑁂𑀦𑁆𑀢𑁄 𑀅𑀲𑁆𑀲𑁂 𑀩𑀳𑀺 𑀞𑀧𑁂𑀢𑁆𑀯𑀸𑀯 𑀦𑀺𑀲𑀻𑀤𑀺. 𑀲𑀺𑀦𑁆𑀥𑀯𑀧𑁄𑀢𑀓𑁄𑀧𑀺 𑀯𑀺𑀘𑀭𑀺𑀢𑁆𑀯𑀸 𑀓𑀸𑀮𑁂𑀬𑁂𑀯 𑀆𑀕𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀼𑀡𑁆𑀟𑀓𑀓𑀼𑀘𑁆𑀙𑀺𑀲𑀺𑀦𑁆𑀥𑀯𑀧𑁄𑀢𑀓𑀁 𑀤𑀺𑀲𑁆𑀯𑀸 𑀮𑀓𑁆𑀔𑀡𑀸𑀦𑀺 𑀲𑀫𑀸𑀦𑁂𑀢𑁆𑀯𑀸 ‘‘𑀅𑀬𑀁 𑀲𑀺𑀦𑁆𑀥𑀯𑁄 𑀅𑀦𑀕𑁆𑀖𑁄, 𑀫𑀳𑀮𑁆𑀮𑀺𑀓𑀸𑀬 𑀫𑀽𑀮𑀁 𑀤𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀺𑀦𑁆𑀥𑀯𑀧𑁄𑀢𑀓𑁄𑀧𑀺 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀞𑀺𑀢𑁄. 𑀢𑀲𑁆𑀫𑀺𑀁 𑀔𑀡𑁂 𑀢𑁂 𑀅𑀲𑁆𑀲𑀸 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀲𑀓𑁆𑀔𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀅𑀲𑁆𑀲𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 ‘‘𑀅𑀫𑁆𑀫, 𑀇𑀫𑀁 𑀅𑀲𑁆𑀲𑀧𑁄𑀢𑀓𑀁 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀆𑀳. ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢, 𑀧𑀼𑀢𑁆𑀢𑀁 𑀯𑀺𑀓𑁆𑀓𑀺𑀡𑀦𑁆𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀏𑀢𑀁 𑀓𑀺𑀁 𑀔𑀸𑀤𑀸𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀲𑀻’’𑀢𑀺? ‘‘𑀑𑀤𑀦𑀓𑀜𑁆𑀚𑀺𑀓𑀜𑁆𑀘 𑀛𑀸𑀫𑀓𑀪𑀢𑁆𑀢𑀜𑁆𑀘 𑀯𑀺𑀖𑀸𑀲𑀢𑀺𑀡𑀜𑁆𑀘 𑀔𑀸𑀤𑀸𑀧𑁂𑀢𑁆𑀯𑀸 𑀓𑀼𑀡𑁆𑀟𑀓𑀬𑀸𑀕𑀼𑀜𑁆𑀘 𑀧𑀸𑀬𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀸𑀫𑀺, 𑀢𑀸𑀢𑀸’’𑀢𑀺. ‘‘𑀅𑀫𑁆𑀫, 𑀅𑀳𑀁 𑀏𑀢𑀁 𑀮𑀪𑀺𑀢𑁆𑀯𑀸 𑀧𑀺𑀡𑁆𑀟𑀭𑀲𑀪𑁄𑀚𑀦𑀁 𑀪𑁄𑀚𑁂𑀲𑁆𑀲𑀸𑀫𑀺, 𑀞𑀺𑀢𑀝𑁆𑀞𑀸𑀦𑁂 ¶ 𑀘𑁂𑀮𑀯𑀺𑀢𑀸𑀦𑀁 𑀧𑀲𑀸𑀭𑁂𑀢𑁆𑀯𑀸 𑀅𑀢𑁆𑀣𑀭𑀡𑀧𑀺𑀝𑁆𑀞𑁂 𑀞𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀏𑀯𑀁 𑀲𑀦𑁆𑀢𑁂 𑀫𑀫 𑀧𑀼𑀢𑁆𑀢𑁄 𑀘 𑀲𑀼𑀔𑀁 𑀅𑀦𑀼𑀪𑀯𑀢𑀼, 𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀦𑀗𑁆𑀕𑀼𑀝𑁆𑀞𑀲𑁆𑀲 𑀫𑀼𑀔𑀲𑁆𑀲 𑀘 𑀫𑀽𑀮𑀁 𑀏𑀓𑁂𑀓𑀁 𑀓𑀢𑁆𑀯𑀸 𑀙 𑀲𑀳𑀲𑁆𑀲𑀢𑁆𑀣𑀯𑀺𑀓𑀸𑀬𑁄 𑀞𑀧𑁂𑀢𑁆𑀯𑀸 𑀫𑀳𑀮𑁆𑀮𑀺𑀓𑀁 𑀦𑀯𑀯𑀢𑁆𑀣𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀲𑀺𑀦𑁆𑀥𑀯𑀧𑁄𑀢𑀓𑀲𑁆𑀲 𑀧𑀼𑀭𑀢𑁄 𑀞𑀧𑁂𑀲𑀺. 𑀲𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀸𑀢𑀭𑀁 𑀑𑀮𑁄𑀓𑁂𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀲𑀺. 𑀲𑀸𑀧𑀺 𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀆𑀳 𑁋 ‘‘𑀫𑀬𑀸 𑀧𑀼𑀢𑁆𑀢𑀧𑁄𑀲𑀸𑀯𑀦𑀺𑀓𑀁 𑀮𑀤𑁆𑀥𑀁, 𑀢𑁆𑀯𑀁, 𑀢𑀸𑀢, 𑀕𑀘𑁆𑀙𑀸𑀳𑀻’’𑀢𑀺, 𑀢𑀤𑀸 𑀲𑁄 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀼𑀦𑀤𑀺𑀯𑀲𑁂 𑀅𑀲𑁆𑀲𑀧𑁄𑀢𑀓𑀲𑁆𑀲 𑀧𑀺𑀡𑁆𑀟𑀭𑀲𑀪𑁄𑀚𑀦𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀦𑀁, 𑀚𑀸𑀦𑀸𑀢𑀺 𑀦𑀼 𑀔𑁄 𑀅𑀢𑁆𑀢𑀦𑁄 𑀩𑀮𑀁, 𑀉𑀤𑀸𑀳𑀼 𑀦 𑀚𑀸𑀦𑀸𑀢𑀻’’𑀢𑀺 𑀤𑁄𑀡𑀺𑀬𑀁 𑀓𑀼𑀡𑁆𑀟𑀓𑀬𑀸𑀕𑀼𑀁 𑀆𑀓𑀺𑀭𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀲𑁄 ‘‘𑀦𑀸𑀳𑀁 𑀇𑀫𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀬𑀸𑀕𑀼𑀁 𑀧𑀸𑀬𑀺𑀢𑀼𑀁 𑀦 𑀇𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀯𑀻𑀫𑀁𑀲𑀦𑀯𑀲𑁂𑀦 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦.

‘‘𑀪𑀼𑀢𑁆𑀯𑀸 ¶ 𑀢𑀺𑀡𑀧𑀭𑀺𑀖𑀸𑀲𑀁, 𑀪𑀼𑀢𑁆𑀯𑀸 𑀆𑀘𑀸𑀫𑀓𑀼𑀡𑁆𑀟𑀓𑀁;

𑀏𑀢𑀁 𑀢𑁂 𑀪𑁄𑀚𑀦𑀁 𑀆𑀲𑀺, 𑀓𑀲𑁆𑀫𑀸 𑀤𑀸𑀦𑀺 𑀦 𑀪𑀼𑀜𑁆𑀚𑀲𑀻’’𑀢𑀺.

𑀢𑀢𑁆𑀣 ¶ 𑀪𑀼𑀢𑁆𑀯𑀸 𑀢𑀺𑀡𑀧𑀭𑀺𑀖𑀸𑀲𑀦𑁆𑀢𑀺 𑀢𑁆𑀯𑀁 𑀧𑀼𑀩𑁆𑀩𑁂 𑀫𑀳𑀮𑁆𑀮𑀺𑀓𑀸𑀬 𑀤𑀺𑀦𑁆𑀦𑀁 𑀢𑁂𑀲𑀁 𑀢𑁂𑀲𑀁 𑀔𑀸𑀤𑀺𑀢𑀸𑀯𑀲𑁂𑀲𑀁 𑀯𑀺𑀖𑀸𑀲𑀢𑀺𑀡𑀲𑀗𑁆𑀔𑀸𑀢𑀁 𑀧𑀭𑀺𑀖𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀟𑁆𑀠𑀺𑀢𑁄. 𑀪𑀼𑀢𑁆𑀯𑀸 𑀆𑀘𑀸𑀫𑀓𑀼𑀡𑁆𑀟𑀓𑀦𑁆𑀢𑀺 𑀏𑀢𑁆𑀣 𑀆𑀘𑀸𑀫𑁄 𑀯𑀼𑀘𑁆𑀘𑀢𑀺 𑀑𑀤𑀦𑀸𑀯𑀲𑁂𑀲𑀁. 𑀓𑀼𑀡𑁆𑀟𑀓𑀦𑁆𑀢𑀺 𑀓𑀼𑀡𑁆𑀟𑀓𑀫𑁂𑀯. 𑀏𑀢𑀜𑁆𑀘 𑀪𑀼𑀜𑁆𑀚𑀺𑀢𑁆𑀯𑀸 𑀯𑀟𑁆𑀠𑀺𑀢𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀏𑀢𑀁 𑀢𑁂𑀢𑀺 𑀏𑀢𑀁 𑀢𑀯 𑀧𑀼𑀩𑁆𑀩𑁂 𑀪𑁄𑀚𑀦𑀁 𑀆𑀲𑀺. 𑀓𑀲𑁆𑀫𑀸 𑀤𑀸𑀦𑀺 𑀦 𑀪𑀼𑀜𑁆𑀚𑀲𑀻𑀢𑀺 𑀫𑀬𑀸𑀧𑀺 𑀢𑁂 𑀢𑀫𑁂𑀯 𑀤𑀺𑀦𑁆𑀦𑀁, 𑀢𑁆𑀯𑀁 𑀢𑀁 𑀓𑀲𑁆𑀫𑀸 𑀇𑀤𑀸𑀦𑀺 𑀦 𑀪𑀼𑀜𑁆𑀚𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀺𑀦𑁆𑀥𑀯𑀧𑁄𑀢𑀓𑁄 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁧𑁧.

‘‘𑀬𑀢𑁆𑀣 𑀧𑁄𑀲𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;

𑀩𑀳𑀼 𑀢𑀢𑁆𑀣 𑀫𑀳𑀸𑀩𑁆𑀭𑀳𑁆𑀫𑁂, 𑀅𑀧𑀺 𑀆𑀘𑀸𑀫𑀓𑀼𑀡𑁆𑀟𑀓𑀁.

𑁧𑁨.

‘‘𑀢𑁆𑀯𑀜𑁆𑀘 𑀔𑁄𑀫𑀁 𑀧𑀚𑀸𑀦𑀸𑀲𑀺, 𑀬𑀸𑀤𑀺𑀲𑀸𑀬𑀁 𑀳𑀬𑀼𑀢𑁆𑀢𑀫𑁄;

𑀚𑀸𑀦𑀦𑁆𑀢𑁄 𑀚𑀸𑀦𑀫𑀸𑀕𑀫𑁆𑀫, 𑀦 𑀢𑁂 𑀪𑀓𑁆𑀔𑀸𑀫𑀺 𑀓𑀼𑀡𑁆𑀟𑀓’’𑀦𑁆𑀢𑀺.

𑀢𑀢𑁆𑀣 ¶ 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀧𑁄𑀲𑀦𑁆𑀢𑀺 𑀲𑀢𑁆𑀢𑀁. 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸𑀢𑀺 ‘‘𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀯𑀸 𑀏𑀲𑁄, 𑀦 𑀯𑀸, 𑀆𑀘𑀸𑀭𑀬𑀼𑀢𑁆𑀢𑁄 𑀯𑀸, 𑀦 𑀯𑀸’’𑀢𑀺 𑀏𑀯𑀁 𑀦 𑀚𑀸𑀦𑀦𑁆𑀢𑀺. 𑀫𑀳𑀸𑀩𑁆𑀭𑀳𑁆𑀫𑁂𑀢𑀺 𑀕𑀭𑀼𑀓𑀸𑀮𑀧𑀦𑁂𑀦 𑀆𑀮𑀧𑀦𑁆𑀢𑁄 𑀆𑀳. 𑀬𑀸𑀤𑀺𑀲𑀸𑀬𑀦𑁆𑀢𑀺 𑀬𑀸𑀤𑀺𑀲𑁄 𑀅𑀬𑀁, 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀚𑀸𑀦𑀦𑁆𑀢𑁄 𑀚𑀸𑀦𑀫𑀸𑀕𑀫𑁆𑀫𑀸𑀢𑀺 𑀅𑀳𑀁 𑀅𑀢𑁆𑀢𑀦𑁄 𑀩𑀮𑀁 𑀚𑀸𑀦𑀦𑁆𑀢𑁄 𑀚𑀸𑀦𑀦𑁆𑀢𑀫𑁂𑀯 𑀢𑀁 𑀆𑀕𑀫𑁆𑀫 𑀧𑀝𑀺𑀘𑁆𑀘 𑀢𑀯 𑀲𑀦𑁆𑀢𑀺𑀓𑁂 𑀓𑀼𑀡𑁆𑀟𑀓𑀁 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺. 𑀦 𑀳𑀺 𑀢𑁆𑀯𑀁 𑀓𑀼𑀡𑁆𑀟𑀓𑀁 𑀪𑁄𑀚𑀸𑀧𑁂𑀢𑀼𑀓𑀸𑀫𑀢𑀸𑀬 𑀙 𑀲𑀳𑀲𑁆𑀲𑀸𑀦𑀺 𑀤𑀢𑁆𑀯𑀸 𑀫𑀁 𑀕𑀡𑁆𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀁 𑀯𑀻𑀫𑀁𑀲𑀦𑀢𑁆𑀣𑀸𑀬 𑀢𑀁 𑀫𑀬𑀸 𑀓𑀢𑀁, 𑀫𑀸 𑀓𑀼𑀚𑁆𑀛𑀻’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀆𑀤𑀸𑀬 𑀭𑀸𑀚𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀯𑀺𑀘𑀺𑀢𑁆𑀢𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀢𑁆𑀣𑀭𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀺𑀦𑁆𑀥𑀯𑀧𑁄𑀢𑀓𑀁 𑀞𑀧𑁂𑀲𑀺.

𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀅𑀲𑁆𑀲𑁂 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀬𑀁 𑀅𑀲𑁆𑀲𑁄 𑀓𑀲𑁆𑀫𑀸 𑀯𑀺𑀲𑀼𑀁 𑀞𑀧𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚 ¶ , 𑀅𑀬𑀁 𑀲𑀺𑀦𑁆𑀥𑀯𑁄 𑀇𑀫𑁂 𑀅𑀲𑁆𑀲𑁂 𑀯𑀺𑀲𑀼𑀁 𑀅𑀓𑀢𑁄 𑀫𑁄𑀘𑁂𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀲𑁄𑀪𑀦𑁄, 𑀪𑁄, 𑀲𑀺𑀦𑁆𑀥𑀯𑁄’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺𑀲𑁆𑀲 𑀚𑀯𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 ¶ 𑀯𑀼𑀢𑁆𑀢𑁂 𑀢𑀁 𑀅𑀲𑁆𑀲𑀁 𑀓𑀧𑁆𑀧𑁂𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀧𑀲𑁆𑀲, 𑀫𑀳𑀸𑀭𑀸𑀚𑀸’’𑀢𑀺 𑀫𑀦𑀼𑀲𑁆𑀲𑁂 𑀉𑀲𑁆𑀲𑀸𑀭𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀅𑀲𑁆𑀲𑀁 𑀧𑀸𑀳𑁂𑀲𑀺. 𑀲𑀩𑁆𑀩𑀁 𑀭𑀸𑀚𑀗𑁆𑀕𑀡𑀁 𑀦𑀺𑀭𑀦𑁆𑀢𑀭𑀁 𑀅𑀲𑁆𑀲𑀧𑀦𑁆𑀢𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀫𑀺𑀯𑀸𑀳𑁄𑀲𑀺. 𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀲𑁆𑀲, 𑀫𑀳𑀸𑀭𑀸𑀚, 𑀲𑀺𑀦𑁆𑀥𑀯𑀧𑁄𑀢𑀓𑀲𑁆𑀲 𑀯𑁂𑀕’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀏𑀓𑀧𑀼𑀭𑀺𑀲𑁄𑀧𑀺 𑀦𑀁 𑀦 𑀅𑀤𑁆𑀤𑀲. 𑀧𑀼𑀦 𑀭𑀢𑁆𑀣𑀧𑀝𑀁 𑀉𑀤𑀭𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀭𑀢𑁆𑀢𑀧𑀝𑀫𑁂𑀯 𑀧𑀲𑁆𑀲𑀺𑀁𑀲𑀼. 𑀅𑀣 𑀦𑀁 𑀅𑀦𑁆𑀢𑁄𑀦𑀕𑀭𑁂 𑀏𑀓𑀺𑀲𑁆𑀲𑀸 𑀉𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀺𑀬𑀸 𑀉𑀤𑀓𑀧𑀺𑀝𑁆𑀞𑁂 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀢𑁆𑀣𑀲𑁆𑀲 𑀉𑀤𑀓𑀧𑀺𑀝𑁆𑀞𑁂 𑀥𑀸𑀯𑀢𑁄 𑀔𑀼𑀭𑀕𑁆𑀕𑀸𑀦𑀺𑀧𑀺 𑀦 𑀢𑁂𑀫𑀺𑀁𑀲𑀼. 𑀧𑀼𑀦𑀯𑀸𑀭𑀁 𑀧𑀤𑀼𑀫𑀺𑀦𑀺𑀧𑀢𑁆𑀢𑀸𑀦𑀁 𑀉𑀧𑀭𑀺 ¶ 𑀥𑀸𑀯𑀦𑁆𑀢𑁄 𑀏𑀓𑀧𑀡𑁆𑀡𑀫𑁆𑀧𑀺 𑀦 𑀉𑀤𑀓𑁂 𑀑𑀲𑀻𑀤𑀸𑀧𑁂𑀲𑀺. 𑀏𑀯𑀫𑀲𑁆𑀲 𑀚𑀯𑀲𑀫𑁆𑀧𑀦𑁆𑀦𑀁 𑀤𑀲𑁆𑀲𑁂𑀢𑁆𑀯𑀸 𑀑𑀭𑀼𑀬𑁆𑀳 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑀁 𑀉𑀧𑀦𑀸𑀫𑁂𑀲𑀺, 𑀅𑀲𑁆𑀲𑁄 𑀉𑀧𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀏𑀓𑀢𑁄 𑀓𑀢𑁆𑀯𑀸 𑀳𑀢𑁆𑀣𑀢𑀮𑁂 𑀅𑀝𑁆𑀞𑀸𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀇𑀫𑀲𑁆𑀲 𑀅𑀲𑁆𑀲𑀧𑁄𑀢𑀓𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀯𑁂𑀕𑁂 𑀤𑀲𑁆𑀲𑀺𑀬𑀫𑀸𑀦𑁂 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑁄 𑀦𑀧𑁆𑀧𑀳𑁄𑀢𑀻’’𑀢𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀉𑀧𑀟𑁆𑀠𑀭𑀚𑁆𑀚𑀁 𑀅𑀤𑀸𑀲𑀺. 𑀲𑀺𑀦𑁆𑀥𑀯𑀧𑁄𑀢𑀓𑀫𑁆𑀧𑀺 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀫𑀗𑁆𑀕𑀮𑀅𑀲𑁆𑀲𑀁 𑀅𑀓𑀸𑀲𑀺.

𑀲𑁄 𑀭𑀜𑁆𑀜𑁄 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄, 𑀲𑀓𑁆𑀓𑀸𑀭𑁄𑀧𑀺𑀲𑁆𑀲 𑀫𑀳𑀸 𑀅𑀳𑁄𑀲𑀺. 𑀢𑀲𑁆𑀲 𑀳𑀺 𑀯𑀲𑀦𑀝𑁆𑀞𑀸𑀦𑀁 𑀭𑀜𑁆𑀜𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀯𑀸𑀲𑀖𑀭𑀕𑀩𑁆𑀪𑁄 𑀯𑀺𑀬 𑀅𑀳𑁄𑀲𑀺, 𑀘𑀢𑀼𑀚𑀸𑀢𑀺𑀕𑀦𑁆𑀥𑁂𑀳𑀺 𑀪𑀽𑀫𑀺𑀮𑁂𑀧𑀦𑀁 𑀅𑀓𑀁𑀲𑀼, 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀦𑀺 𑀑𑀲𑀸𑀭𑀬𑀺𑀁𑀲𑀼, 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀁 𑀘𑁂𑀮𑀯𑀺𑀢𑀸𑀦𑀁 𑀅𑀳𑁄𑀲𑀺, 𑀲𑀫𑀦𑁆𑀢𑀢𑁄 𑀘𑀺𑀢𑁆𑀭𑀲𑀸𑀡𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺, 𑀦𑀺𑀘𑁆𑀘𑀁 𑀕𑀦𑁆𑀥𑀢𑁂𑀮𑀧𑀤𑀻𑀧𑀸 𑀛𑀸𑀬𑀺𑀁𑀲𑀼, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀝𑁆𑀞𑀸𑀦𑁂𑀧𑀺𑀲𑁆𑀲 𑀲𑀼𑀯𑀡𑁆𑀡𑀓𑀝𑀸𑀳𑀁 𑀞𑀧𑀬𑀺𑀁𑀲𑀼, 𑀦𑀺𑀘𑁆𑀘𑀁 𑀭𑀸𑀚𑀸𑀭𑀳𑀪𑁄𑀚𑀦𑀫𑁂𑀯 𑀪𑀼𑀜𑁆𑀚𑀺. 𑀢𑀲𑁆𑀲 𑀧𑀦 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀳𑀢𑁆𑀣𑀕𑀢𑀫𑁂𑀯 𑀅𑀳𑁄𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸 𑀲𑀓𑀤𑀸𑀕𑀸𑀫𑀺𑀦𑁄 𑀅𑀦𑀸𑀕𑀸𑀫𑀺𑀦𑁄 𑀅𑀭𑀳𑀦𑁆𑀢𑁄 𑀘 𑀅𑀳𑁂𑀲𑀼𑀁. ‘‘𑀢𑀤𑀸 𑀫𑀳𑀮𑁆𑀮𑀺𑀓𑀸 𑀅𑀬𑀫𑁂𑀯 𑀫𑀳𑀮𑁆𑀮𑀺𑀓𑀸 𑀅𑀳𑁄𑀲𑀺, 𑀲𑀺𑀦𑁆𑀥𑀯𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀅𑀲𑁆𑀲𑀯𑀸𑀡𑀺𑀚𑁆𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀡𑁆𑀟𑀓𑀓𑀼𑀘𑁆𑀙𑀺𑀲𑀺𑀦𑁆𑀥𑀯𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁫𑁫] 𑁫. 𑀲𑀼𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑀸𑀯 ¶ ¶ 𑀲𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀢𑀺𑀩𑀳𑀼𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀚𑀻𑀭𑀡𑁂𑀦 𑀓𑀸𑀮𑀓𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 ¶ 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀏𑀯𑀁 𑀓𑀸𑀮𑀓𑀢𑁂 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀢𑀲𑁆𑀲 𑀅𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀧𑁆𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀅𑀢𑀺𑀩𑀳𑀼𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀮𑀓𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀅𑀢𑀺𑀪𑁄𑀚𑀦𑀧𑀘𑁆𑀘𑀬𑁂𑀦𑁂𑀯 𑀫𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑁂𑀓𑀸𑀦𑀁 𑀲𑀼𑀓𑀲𑀳𑀲𑁆𑀲𑀸𑀦𑀁 𑀲𑀫𑀼𑀤𑁆𑀤𑀸𑀦𑀼𑀕𑀢𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀦𑁆𑀢𑀸𑀦𑀁 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲𑁂𑀓𑁄 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀩𑀮𑀧𑁆𑀧𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀤𑀼𑀩𑁆𑀩𑀮𑀘𑀓𑁆𑀔𑀼𑀓𑁄 𑀅𑀳𑁄𑀲𑀺. 𑀲𑀼𑀓𑀸𑀦𑀁 𑀓𑀺𑀭 𑀲𑀻𑀖𑁄 𑀯𑁂𑀕𑁄 𑀳𑁄𑀢𑀺, 𑀢𑁂𑀦 𑀢𑁂𑀲𑀁 𑀫𑀳𑀮𑁆𑀮𑀓𑀓𑀸𑀮𑁂 𑀧𑀞𑀫𑀁 𑀘𑀓𑁆𑀔𑀼𑀫𑁂𑀯 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀓𑀼𑀮𑀸𑀯𑀓𑁂 𑀞𑀧𑁂𑀢𑁆𑀯𑀸 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀧𑁄𑀲𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀕𑁄𑀘𑀭𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑁄 𑀲𑀫𑀼𑀤𑁆𑀤𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀤𑀻𑀧𑀓𑀁 𑀧𑀲𑁆𑀲𑀺. 𑀢𑀲𑁆𑀫𑀺𑀁 𑀧𑀦 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀥𑀼𑀭𑀨𑀮𑀁 𑀅𑀫𑁆𑀩𑀯𑀦𑀁 𑀅𑀢𑁆𑀣𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀕𑁄𑀘𑀭𑀯𑁂𑀮𑀸𑀬 𑀉𑀧𑁆𑀧𑀢𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀑𑀢𑀭𑀺𑀢𑁆𑀯𑀸 𑀅𑀫𑁆𑀩𑀭𑀲𑀁 𑀧𑀺𑀯𑀺𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀔𑀸𑀤𑀦𑁆𑀢𑁄 𑀭𑀲𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀢𑀸𑀢, 𑀦𑀦𑀼 𑀇𑀫𑀁 𑀅𑀲𑀼𑀓𑀤𑀻𑀧𑀓𑁂 𑀅𑀫𑁆𑀩𑀧𑀓𑁆𑀓’’𑀦𑁆𑀢𑀺 𑀯𑀢𑁆𑀯𑀸 ‘‘𑀆𑀫, 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑀸𑀢, 𑀏𑀢𑀁 𑀤𑀻𑀧𑀓𑀁 𑀕𑀘𑁆𑀙𑀦𑁆𑀢𑀸 𑀦𑀸𑀫 𑀲𑀼𑀓𑀸 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀫𑀸 𑀔𑁄 𑀢𑁆𑀯𑀁 𑀧𑀼𑀦 𑀢𑀁 𑀤𑀻𑀧𑀓𑀁 𑀅𑀕𑀫𑀸𑀲𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺𑀬𑁂𑀯.

𑀅𑀣𑁂𑀓𑀤𑀺𑀯𑀲𑀁 𑀩𑀳𑀼𑀁 𑀅𑀫𑁆𑀩𑀭𑀲𑀁 𑀧𑀺𑀯𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀸𑀬 𑀅𑀫𑁆𑀩𑀧𑀓𑁆𑀓𑀁 𑀆𑀤𑀸𑀬 𑀲𑀫𑀼𑀤𑁆𑀤𑀫𑀢𑁆𑀣𑀓𑁂𑀦𑀸𑀕𑀘𑁆𑀙𑀦𑁆𑀢𑁄 ¶ 𑀅𑀢𑀺𑀥𑀸𑀢𑀢𑀸𑀬 𑀓𑀺𑀮𑀦𑁆𑀢𑀓𑀸𑀬𑁄 𑀦𑀺𑀤𑁆𑀤𑀸𑀬𑀸𑀪𑀺𑀪𑀽𑀢𑁄, 𑀲𑁄 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀆𑀕𑀘𑁆𑀙𑀢𑁂𑀯, 𑀢𑀼𑀡𑁆𑀟𑁂𑀦 𑀧𑀦𑀲𑁆𑀲 𑀕𑀳𑀺𑀢𑀁 𑀅𑀫𑁆𑀩𑀧𑀓𑁆𑀓𑀁 𑀧𑀢𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀆𑀕𑀫𑀦𑀯𑀻𑀣𑀺𑀁 𑀚𑀳𑀺𑀢𑁆𑀯𑀸 𑀑𑀲𑀻𑀤𑀦𑁆𑀢𑁄 𑀉𑀤𑀓𑀧𑀺𑀝𑁆𑀞𑁂𑀦𑁂𑀯 𑀆𑀕𑀘𑁆𑀙𑀦𑁆𑀢𑁄 𑀉𑀤𑀓𑁂 𑀧𑀢𑀺. 𑀅𑀣 𑀦𑀁 𑀏𑀓𑁄 𑀫𑀘𑁆𑀙𑁄 𑀕𑀳𑁂𑀢𑁆𑀯𑀸 ¶ 𑀔𑀸𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀆𑀕𑀫𑀦𑀯𑁂𑀮𑀸𑀬 𑀅𑀦𑀸𑀕𑀘𑁆𑀙𑀦𑁆𑀢𑁂𑀬𑁂𑀯 ‘‘𑀲𑀫𑀼𑀤𑁆𑀤𑁂 𑀧𑀢𑀺𑀢𑁆𑀯𑀸 𑀫𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄𑀧𑀺 𑀆𑀳𑀸𑀭𑀁 𑀅𑀮𑀪𑀫𑀸𑀦𑀸 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀁𑀲𑀼.

𑀲𑀢𑁆𑀣𑀸 ¶ 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁩.

‘‘𑀬𑀸𑀯 𑀲𑁄 𑀫𑀢𑁆𑀢𑀫𑀜𑁆𑀜𑀸𑀲𑀺, 𑀪𑁄𑀚𑀦𑀲𑁆𑀫𑀺𑀁 𑀯𑀺𑀳𑀗𑁆𑀕𑀫𑁄;

𑀢𑀸𑀯 𑀅𑀤𑁆𑀥𑀸𑀦𑀫𑀸𑀧𑀸𑀤𑀺, 𑀫𑀸𑀢𑀭𑀜𑁆𑀘 𑀅𑀧𑁄𑀲𑀬𑀺.

𑁧𑁪.

‘‘𑀬𑀢𑁄 𑀘 𑀔𑁄 𑀩𑀳𑀼𑀢𑀭𑀁, 𑀪𑁄𑀚𑀦𑀁 𑀅𑀚𑁆𑀛𑀯𑀸𑀳𑀭𑀺;

𑀢𑀢𑁄 𑀢𑀢𑁆𑀣𑁂𑀯 𑀲𑀁𑀲𑀻𑀤𑀺, 𑀅𑀫𑀢𑁆𑀢𑀜𑁆𑀜𑀽 𑀳𑀺 𑀲𑁄 𑀅𑀳𑀼.

𑁧𑁫.

‘‘𑀢𑀲𑁆𑀫𑀸 𑀫𑀢𑁆𑀢𑀜𑁆𑀜𑀼𑀢𑀸 𑀲𑀸𑀥𑀼, 𑀪𑁄𑀚𑀦𑀲𑁆𑀫𑀺𑀁 𑀅𑀕𑀺𑀤𑁆𑀥𑀢𑀸;

𑀅𑀫𑀢𑁆𑀢𑀜𑁆𑀜𑀽 𑀳𑀺 𑀲𑀻𑀤𑀦𑁆𑀢𑀺, 𑀫𑀢𑁆𑀢𑀜𑁆𑀜𑀽 𑀘 𑀦 𑀲𑀻𑀤𑀭𑁂’’𑀢𑀺.

𑀢𑀢𑁆𑀣 𑀬𑀸𑀯 𑀲𑁄𑀢𑀺 𑀬𑀸𑀯 𑀲𑁄 𑀯𑀺𑀳𑀗𑁆𑀕𑀫𑁄 𑀪𑁄𑀚𑀦𑁂 𑀫𑀢𑁆𑀢𑀫𑀜𑁆𑀜𑀸𑀲𑀺. 𑀢𑀸𑀯 𑀅𑀤𑁆𑀥𑀸𑀦𑀫𑀸𑀧𑀸𑀤𑀻𑀢𑀺 𑀢𑀢𑁆𑀣𑀓𑀁 𑀓𑀸𑀮𑀁 𑀚𑀻𑀯𑀺𑀢𑀅𑀤𑁆𑀥𑀸𑀦𑀁 𑀆𑀧𑀸𑀤𑀺, 𑀆𑀬𑀼𑀁 𑀯𑀺𑀦𑁆𑀤𑀺. 𑀫𑀸𑀢𑀭𑀜𑁆𑀘𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀫𑀸𑀢𑀸𑀧𑀺𑀢𑀭𑁄 𑀘 𑀅𑀧𑁄𑀲𑀬𑀻𑀢𑀺 𑀅𑀢𑁆𑀣𑁄. 𑀬𑀢𑁄 𑀘 𑀔𑁄𑀢𑀺 𑀬𑀲𑁆𑀫𑀺𑀜𑁆𑀘 𑀔𑁄 𑀓𑀸𑀮𑁂. 𑀪𑁄𑀚𑀦𑀁 𑀅𑀚𑁆𑀛𑀯𑀸𑀳𑀭𑀻𑀢𑀺 𑀅𑀫𑁆𑀩𑀭𑀲𑀁 𑀅𑀚𑁆𑀛𑁄𑀳𑀭𑀺. 𑀢𑀢𑁄𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑀢𑁆𑀣𑁂𑀯 𑀲𑀁𑀲𑀻𑀤𑀻𑀢𑀺 𑀢𑀲𑁆𑀫𑀺𑀁 𑀲𑀫𑀼𑀤𑁆𑀤𑁂𑀬𑁂𑀯 𑀑𑀲𑀻𑀤𑀺 𑀦𑀺𑀫𑀼𑀚𑁆𑀚𑀺, 𑀫𑀘𑁆𑀙𑀪𑁄𑀚𑀦𑀢𑀁 𑀆𑀧𑀚𑁆𑀚𑀺.

𑀢𑀲𑁆𑀫𑀸 𑀫𑀢𑁆𑀢𑀜𑁆𑀜𑀼𑀢𑀸 𑀲𑀸𑀥𑀽𑀢𑀺 𑀬𑀲𑁆𑀫𑀸 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽 𑀲𑀼𑀓𑁄 𑀲𑀫𑀼𑀤𑁆𑀤𑁂 𑀑𑀲𑀻𑀤𑀺𑀢𑁆𑀯𑀸 𑀫𑀢𑁄, 𑀢𑀲𑁆𑀫𑀸 𑀪𑁄𑀚𑀦𑀲𑁆𑀫𑀺𑀁 𑀅𑀕𑀺𑀤𑁆𑀥𑀺𑀢𑀸𑀲𑀗𑁆𑀔𑀸𑀢𑁄 𑀫𑀢𑁆𑀢𑀜𑁆𑀜𑀼𑀪𑀸𑀯𑁄 𑀲𑀸𑀥𑀼, 𑀧𑀫𑀸𑀡𑀚𑀸𑀦𑀦𑀁 𑀲𑀼𑀦𑁆𑀤𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬…𑀧𑁂… 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺.

‘‘𑀅𑀮𑁆𑀮𑀁 𑀲𑀼𑀓𑁆𑀔𑀜𑁆𑀘 𑀪𑀼𑀜𑁆𑀚𑀦𑁆𑀢𑁄, 𑀦 𑀩𑀸𑀴𑁆𑀳𑀁 𑀲𑀼𑀳𑀺𑀢𑁄 𑀲𑀺𑀬𑀸;

𑀊𑀦𑀼𑀤𑀭𑁄 𑀫𑀺𑀢𑀸𑀳𑀸𑀭𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

‘‘𑀘𑀢𑁆𑀢𑀸𑀭𑁄 ¶ 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. (𑀣𑁂𑀭𑀕𑀸. 𑁯𑁮𑁨-𑁯𑁮𑁩);

‘‘𑀫𑀦𑀼𑀚𑀲𑁆𑀲 ¶ ¶ 𑀲𑀤𑀸 𑀲𑀢𑀻𑀫𑀢𑁄, 𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀽 𑀢𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸, 𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀁 𑀧𑀸𑀮𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁨𑁪) 𑁋

𑀏𑀯𑀁 𑀯𑀡𑁆𑀡𑀺𑀢𑀸 𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀲𑀸𑀥𑀼.

‘‘𑀓𑀦𑁆𑀢𑀸𑀭𑁂 𑀧𑀼𑀢𑁆𑀢𑀫𑀁𑀲𑀁𑀯, 𑀅𑀓𑁆𑀔𑀲𑁆𑀲𑀩𑁆𑀪𑀜𑁆𑀚𑀦𑀁 𑀬𑀣𑀸;

𑀏𑀯𑀁 𑀆𑀳𑀭𑀺 𑀆𑀳𑀭𑀁, 𑀬𑀸𑀧𑀦𑀢𑁆𑀣𑀫𑀫𑀼𑀘𑁆𑀙𑀺𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁯) 𑁋

𑀏𑀯𑀁 𑀯𑀡𑁆𑀡𑀺𑀢𑀸 𑀅𑀕𑀺𑀤𑁆𑀥𑀺𑀢𑀸𑀧𑀺 𑀲𑀸𑀥𑀼. 𑀧𑀸𑀴𑀺𑀬𑀁 𑀧𑀦 ‘‘𑀅𑀕𑀺𑀤𑁆𑀥𑀺𑀫𑀸’’𑀢𑀺 𑀮𑀺𑀔𑀺𑀢𑀁, 𑀢𑀢𑁄 𑀅𑀬𑀁 𑀅𑀝𑁆𑀞𑀓𑀣𑀸𑀧𑀸𑀞𑁄𑀯 𑀲𑀼𑀦𑁆𑀤𑀭𑀢𑀭𑁄. 𑀅𑀫𑀢𑁆𑀢𑀜𑁆𑀜𑀽 𑀳𑀺 𑀲𑀻𑀤𑀦𑁆𑀢𑀻𑀢𑀺 𑀪𑁄𑀚𑀦𑁂 𑀧𑀫𑀸𑀡𑀁 𑀅𑀚𑀸𑀦𑀦𑁆𑀢𑀸 𑀳𑀺 𑀭𑀲𑀢𑀡𑁆𑀳𑀸𑀯𑀲𑁂𑀦 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀻𑀤𑀦𑁆𑀢𑀺. 𑀫𑀢𑁆𑀢𑀜𑁆𑀜𑀽 𑀘 𑀦 𑀲𑀻𑀤𑀭𑁂𑀢𑀺 𑀬𑁂 𑀧𑀦 𑀪𑁄𑀚𑀦𑁂 𑀧𑀫𑀸𑀡𑀁 𑀚𑀸𑀦𑀦𑁆𑀢𑀺, 𑀢𑁂 𑀤𑀺𑀝𑁆𑀞𑀥𑀫𑁆𑀫𑁂𑀧𑀺 𑀲𑀫𑁆𑀧𑀭𑀸𑀬𑁂𑀧𑀺 𑀦 𑀲𑀻𑀤𑀦𑁆𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀅𑀭𑀳𑀦𑁆𑀢𑁄𑀧𑀺 𑀅𑀳𑁂𑀲𑀼𑀁. ‘‘𑀢𑀤𑀸 𑀲𑀼𑀓𑀭𑀸𑀚𑀧𑀼𑀢𑁆𑀢𑁄 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑀼𑀓𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁫𑁬] 𑁬. 𑀚𑀭𑀽𑀤𑀧𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀚𑀭𑀽𑀤𑀧𑀸𑀦𑀁 𑀔𑀡𑀫𑀸𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀸𑀡𑀺𑀚𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀲𑀓𑀝𑀸𑀦𑀺 𑀧𑀽𑀭𑁂𑀢𑁆𑀯𑀸 𑀯𑁄𑀳𑀸𑀭𑀢𑁆𑀣𑀸𑀬 𑀕𑀫𑀦𑀓𑀸𑀮𑁂 𑀢𑀣𑀸𑀕𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀬𑀁, 𑀪𑀦𑁆𑀢𑁂, 𑀯𑁄𑀳𑀸𑀭𑀢𑁆𑀣𑀸𑀬 𑀤𑀻𑀖𑀫𑀕𑁆𑀕𑀁 𑀕𑀫𑀺𑀲𑁆𑀲𑀸𑀫, 𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀸 𑀲𑁄𑀢𑁆𑀣𑀺𑀦𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀦 𑀢𑀼𑀫𑁆𑀳𑁂 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂 𑀓𑀦𑁆𑀢𑀸𑀭𑀫𑀕𑁆𑀕𑁂 𑀧𑀼𑀭𑀸𑀡𑀉𑀤𑀧𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀉𑀤𑀧𑀸𑀦𑁂 𑀧𑀸𑀦𑀻𑀬𑀁 𑀦𑀢𑁆𑀣𑀺, 𑀫𑀬𑀜𑁆𑀘 𑀧𑀺𑀧𑀸𑀲𑀺𑀢𑀸, 𑀔𑀡𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀔𑀡𑀦𑁆𑀢𑀸 𑀧𑀝𑀺𑀧𑀸𑀝𑀺𑀬𑀸 𑀩𑀳𑀼𑀁 ¶ 𑀅𑀬𑀁…𑀧𑁂… 𑀯𑁂𑀴𑀼𑀭𑀺𑀬𑀁 𑀮𑀪𑀺𑀁𑀲𑀼. 𑀢𑁂 𑀢𑁂𑀦𑁂𑀯 𑀲𑀦𑁆𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 𑀢𑁂𑀲𑀁 𑀭𑀢𑀦𑀸𑀦𑀁 𑀲𑀓𑀝𑀸𑀦𑀺 ¶ 𑀧𑀽𑀭𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 ¶ 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀢𑁂 𑀆𑀪𑀢𑀁 𑀥𑀦𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀫𑀬𑀁 ‘‘𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑀸 𑀪𑀢𑁆𑀢𑀁 𑀤𑀲𑁆𑀲𑀸𑀫𑀸’’𑀢𑀺 𑀢𑀣𑀸𑀕𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀅𑀢𑁆𑀢𑀦𑁄 𑀥𑀦𑀲𑁆𑀲 𑀮𑀤𑁆𑀥𑀸𑀓𑀸𑀭𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑀼𑀫𑁆𑀳𑁂 𑀔𑁄 𑀉𑀧𑀸𑀲𑀓𑀸 𑀢𑁂𑀦 𑀥𑀦𑁂𑀦 𑀲𑀦𑁆𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 𑀧𑀫𑀸𑀡𑀜𑁆𑀜𑀼𑀢𑀸𑀬 𑀥𑀦𑀜𑁆𑀘 𑀚𑀻𑀯𑀺𑀢𑀜𑁆𑀘 𑀅𑀮𑀪𑀺𑀢𑁆𑀣, 𑀧𑁄𑀭𑀸𑀡𑀓𑀸 𑀧𑀦 𑀅𑀲𑀦𑁆𑀢𑀼𑀝𑁆𑀞𑀸 𑀅𑀫𑀢𑁆𑀢𑀜𑁆𑀜𑀼𑀦𑁄 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀚𑀻𑀯𑀺𑀓𑁆𑀔𑀬𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀯𑀸𑀳𑀚𑁂𑀝𑁆𑀞𑀓𑁄 𑀅𑀳𑁄𑀲𑀺. 𑀲𑁄 𑀩𑀸𑀭𑀸𑀡𑀲𑀺𑀬𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀲𑀓𑀝𑀸𑀦𑀺 𑀧𑀽𑀭𑁂𑀢𑁆𑀯𑀸 𑀩𑀳𑀽 𑀯𑀸𑀡𑀺𑀚𑁂 𑀆𑀤𑀸𑀬 𑀢𑀫𑁂𑀯 𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑁄 𑀢𑀫𑁂𑀯 𑀉𑀤𑀧𑀸𑀦𑀁 𑀅𑀤𑁆𑀤𑀲. 𑀢𑀢𑁆𑀣 𑀢𑁂 𑀯𑀸𑀡𑀺𑀚𑀸 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀉𑀤𑀧𑀸𑀦𑀁 𑀔𑀡𑀦𑁆𑀢𑀸 𑀧𑀝𑀺𑀧𑀸𑀝𑀺𑀬𑀸 𑀩𑀳𑀽𑀦𑀺 𑀅𑀬𑀸𑀤𑀻𑀦𑀺 𑀮𑀪𑀺𑀁𑀲𑀼. 𑀢𑁂 𑀩𑀳𑀼𑀫𑁆𑀧𑀺 𑀭𑀢𑀦𑀁 𑀮𑀪𑀺𑀢𑁆𑀯𑀸 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑀸 ‘‘𑀅𑀜𑁆𑀜𑀫𑁆𑀧𑀺 𑀏𑀢𑁆𑀣 𑀇𑀢𑁄 𑀲𑀼𑀦𑁆𑀤𑀭𑀢𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀢𑀁 𑀔𑀡𑀺𑀁𑀲𑀼𑀬𑁂𑀯. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀆𑀳 𑁋 ‘‘𑀪𑁄 𑀯𑀸𑀡𑀺𑀚𑀸, 𑀮𑁄𑀪𑁄 𑀦𑀸𑀫𑁂𑀲 𑀯𑀺𑀦𑀸𑀲𑀫𑀽𑀮𑀁, 𑀅𑀫𑁆𑀳𑁂𑀳𑀺 𑀩𑀳𑀼 𑀥𑀦𑀁 𑀮𑀤𑁆𑀥𑀁, 𑀏𑀢𑁆𑀢𑀓𑁂𑀦𑁂𑀯 𑀲𑀦𑁆𑀢𑀼𑀝𑁆𑀞𑀸 𑀳𑁄𑀣, 𑀫𑀸 𑀅𑀢𑀺𑀔𑀡𑀣𑀸’’𑀢𑀺. 𑀢𑁂 𑀢𑁂𑀦 𑀦𑀺𑀯𑀸𑀭𑀺𑀬𑀫𑀸𑀦𑀸𑀧𑀺 𑀔𑀡𑀺𑀁𑀲𑀼𑀬𑁂𑀯. 𑀲𑁄 𑀘 𑀉𑀤𑀧𑀸𑀦𑁄 𑀦𑀸𑀕𑀧𑀭𑀺𑀕𑁆𑀕𑀳𑀺𑀢𑁄, 𑀅𑀣𑀲𑁆𑀲 𑀳𑁂𑀝𑁆𑀞𑀸 𑀯𑀲𑀦𑀓𑀦𑀸𑀕𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑁂 𑀪𑀺𑀚𑁆𑀚𑀦𑁆𑀢𑁂 𑀮𑁂𑀟𑁆𑀟𑀽𑀲𑀽 𑀘 𑀧𑀁𑀲𑀽𑀲𑀼 𑀘 𑀧𑀢𑀫𑀸𑀦𑁂𑀲𑀼 𑀓𑀼𑀤𑁆𑀥𑁄 𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀯𑀲𑁂𑀲𑁂 𑀲𑀩𑁆𑀩𑁂𑀧𑀺 𑀦𑀸𑀲𑀺𑀓𑀯𑀸𑀢𑁂𑀦 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 ¶ 𑀧𑀸𑀧𑁂𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑁆𑀫 𑀲𑀓𑀝𑀸𑀦𑀺 𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀭𑀢𑀦𑀸𑀦𑀁 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀕𑀫𑀸𑀡𑀯𑀓𑁂𑀳𑀺 𑀲𑀤𑁆𑀥𑀺𑀁 𑀲𑀓𑀝𑀸𑀦𑀺 𑀬𑁄𑀚𑀸𑀧𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀩𑀸𑀭𑀸𑀡𑀲𑀺𑀁 𑀦𑁂𑀢𑁆𑀯𑀸 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀢𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁬.

‘‘𑀚𑀭𑀽𑀤𑀧𑀸𑀦𑀁 ¶ 𑀔𑀡𑀫𑀸𑀦𑀸, 𑀯𑀸𑀡𑀺𑀚𑀸 𑀉𑀤𑀓𑀢𑁆𑀣𑀺𑀓𑀸;

𑀅𑀚𑁆𑀛𑀕𑀫𑀼𑀁 𑀅𑀬𑀲𑀁 𑀮𑁄𑀳𑀁, 𑀢𑀺𑀧𑀼𑀲𑀻𑀲𑀜𑁆𑀘 𑀯𑀸𑀡𑀺𑀚𑀸;

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.

𑁧𑁭.

‘‘𑀢𑁂 𑀘 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑀸, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀔𑀸𑀡𑀺𑀲𑀼𑀁;

𑀢𑁂 𑀢𑀢𑁆𑀣𑀸𑀲𑀻𑀯𑀺𑀲𑁄 𑀖𑁄𑀭𑁄, 𑀢𑁂𑀚𑀲𑁆𑀲𑀻 𑀢𑁂𑀚𑀲𑀸 𑀳𑀦𑀺.

𑁧𑁮.

‘‘𑀢𑀲𑁆𑀫𑀸 ¶ 𑀔𑀡𑁂 𑀦𑀸𑀢𑀺𑀔𑀡𑁂, 𑀅𑀢𑀺𑀔𑀸𑀢𑀜𑁆𑀳𑀺 𑀧𑀸𑀧𑀓𑀁;

𑀔𑀸𑀢𑁂𑀦 𑀘 𑀥𑀦𑀁 𑀮𑀤𑁆𑀥𑀁, 𑀅𑀢𑀺𑀔𑀸𑀢𑁂𑀦 𑀦𑀸𑀲𑀺𑀢’’𑀦𑁆𑀢𑀺.

𑀢𑀢𑁆𑀣 𑀅𑀬𑀲𑀦𑁆𑀢𑀺 𑀓𑀸𑀴𑀮𑁄𑀳𑀁. 𑀮𑁄𑀳𑀦𑁆𑀢𑀺 𑀢𑀫𑁆𑀩𑀮𑁄𑀳𑀁. 𑀫𑀼𑀢𑁆𑀢𑀸𑀢𑀺 𑀫𑀼𑀢𑁆𑀢𑀸𑀬𑁄. 𑀢𑁂 𑀘 𑀢𑁂𑀦 𑀅𑀲𑀦𑁆𑀢𑀼𑀝𑁆𑀞𑀸𑀢𑀺 𑀢𑁂 𑀘 𑀯𑀸𑀡𑀺𑀚𑀸 𑀢𑁂𑀦 𑀥𑀦𑁂𑀦 𑀅𑀲𑀦𑁆𑀢𑀼𑀝𑁆𑀞𑀸. 𑀢𑁂 𑀢𑀢𑁆𑀣𑀸𑀢𑀺 𑀢𑁂 𑀯𑀸𑀡𑀺𑀚𑀸 𑀢𑀲𑁆𑀫𑀺𑀁 𑀉𑀤𑀧𑀸𑀦𑁂. 𑀢𑁂𑀚𑀲𑁆𑀲𑀻𑀢𑀺 𑀯𑀺𑀲𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀚𑀲𑀸 𑀳𑀦𑀻𑀢𑀺 𑀯𑀺𑀲𑀢𑁂𑀚𑁂𑀦 𑀖𑀸𑀢𑁂𑀲𑀺. 𑀅𑀢𑀺𑀔𑀸𑀢𑁂𑀦 𑀦𑀸𑀲𑀺𑀢𑀦𑁆𑀢𑀺 𑀅𑀢𑀺𑀔𑀡𑁂𑀦 𑀢𑀜𑁆𑀘 𑀥𑀦𑀁 𑀚𑀻𑀯𑀺𑀢𑀜𑁆𑀘 𑀦𑀸𑀲𑀺𑀢𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀦𑀸𑀕𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀢𑁆𑀣𑀯𑀸𑀳𑀚𑁂𑀝𑁆𑀞𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀭𑀽𑀤𑀧𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁫𑁭] 𑁭. 𑀕𑀸𑀫𑀡𑀺𑀘𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀬𑀁 ¶ 𑀖𑀭𑀸𑀦𑀁 𑀓𑀼𑀲𑀮𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀲𑀁𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀜𑁆𑀳𑀺 𑀪𑀺𑀓𑁆𑀔𑀽 𑀤𑀲𑀩𑀮𑀲𑁆𑀲 𑀧𑀜𑁆𑀜𑀁 𑀧𑀲𑀁𑀲𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀲𑀤𑁂𑀯𑀓𑀁 𑀮𑁄𑀓𑀁 𑀧𑀜𑁆𑀜𑀸𑀬 𑀅𑀢𑀺𑀓𑁆𑀓𑀫𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀚𑀦𑀲𑀦𑁆𑀥𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀫𑀼𑀔𑀁 𑀲𑀼𑀧𑀭𑀺𑀫𑀚𑁆𑀚𑀺𑀢𑀓𑀜𑁆𑀘𑀦𑀸𑀤𑀸𑀲𑀢𑀮𑀁 ¶ 𑀯𑀺𑀬 𑀧𑀭𑀺𑀲𑀼𑀤𑁆𑀥𑀁 𑀅𑀳𑁄𑀲𑀺 𑀅𑀢𑀺𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁, 𑀢𑁂𑀦𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀆𑀤𑀸𑀲𑀫𑀼𑀔𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀲𑀢𑁆𑀢𑀯𑀲𑁆𑀲𑀩𑁆𑀪𑀦𑁆𑀢𑀭𑁂𑀬𑁂𑀯 𑀧𑀦 𑀧𑀺𑀢𑀸 𑀢𑀬𑁄 𑀯𑁂𑀤𑁂 𑀘 𑀲𑀩𑁆𑀩𑀜𑁆𑀘 𑀮𑁄𑀓𑁂 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀓𑀸𑀮𑀫𑀓𑀸𑀲𑀺. 𑀅𑀫𑀘𑁆𑀘𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀢𑀓𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑀼𑀫𑀸𑀭𑁄 𑀅𑀢𑀺𑀤𑀳𑀭𑁄, 𑀦 𑀲𑀓𑁆𑀓𑀸 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑀼𑀁, 𑀯𑀻𑀫𑀁𑀲𑀺𑀢𑁆𑀯𑀸 𑀦𑀁 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀤𑀺𑀯𑀲𑀁 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 ¶ 𑀲𑀚𑁆𑀚𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁, 𑀤𑁂𑀯, 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀓𑀼𑀫𑀸𑀭𑁄 ‘‘𑀲𑀸𑀥𑀽’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀦𑁆𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺.

𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁂 𑀅𑀫𑀘𑁆𑀘𑀸 𑀏𑀓𑀁 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀯𑀺𑀘𑀭𑀡𑀫𑀓𑁆𑀓𑀝𑀁 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 ‘‘𑀤𑁂𑀯, 𑀅𑀬𑀁 𑀧𑀼𑀭𑀺𑀲𑁄 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀓𑀸𑀮𑁂 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀧𑀕𑀼𑀡𑀯𑀺𑀚𑁆𑀚𑁄 𑀅𑀦𑁆𑀢𑁄𑀪𑀽𑀫𑀺𑀬𑀁 𑀲𑀢𑁆𑀢𑀭𑀢𑀦𑀝𑁆𑀞𑀸𑀦𑁂 ¶ 𑀕𑀼𑀡𑀤𑁄𑀲𑀁 𑀧𑀲𑁆𑀲𑀢𑀺, 𑀏𑀢𑁂𑀦𑁂𑀯 𑀕𑀳𑀺𑀢𑀁 𑀭𑀸𑀚𑀓𑀼𑀮𑀸𑀦𑀁 𑀕𑁂𑀳𑀝𑁆𑀞𑀸𑀦𑀁 𑀳𑁄𑀢𑀺, 𑀇𑀫𑀁 𑀤𑁂𑀯𑁄 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀽’’𑀢𑀺 𑀆𑀳𑀁𑀲𑀼. 𑀓𑀼𑀫𑀸𑀭𑁄 𑀢𑀁 𑀳𑁂𑀝𑁆𑀞𑀸 𑀘 𑀉𑀧𑀭𑀺𑀘 𑀑𑀮𑁄𑀓𑁂𑀢𑁆𑀯𑀸 ‘‘𑀦𑀸𑀬𑀁 𑀫𑀦𑀼𑀲𑁆𑀲𑁄, 𑀫𑀓𑁆𑀓𑀝𑁄 𑀏𑀲𑁄’’𑀢𑀺 𑀜𑀢𑁆𑀯𑀸 ‘‘𑀫𑀓𑁆𑀓𑀝𑀸 𑀦𑀸𑀫 𑀓𑀢𑀁 𑀓𑀢𑀁 𑀯𑀺𑀤𑁆𑀥𑀁𑀲𑁂𑀢𑀼𑀁 𑀚𑀸𑀦𑀦𑁆𑀢𑀺, 𑀅𑀓𑀢𑀁 𑀧𑀦 𑀓𑀸𑀢𑀼𑀁 𑀯𑀸 𑀯𑀺𑀘𑀸𑀭𑁂𑀢𑀼𑀁 𑀯𑀸 𑀦 𑀚𑀸𑀦𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯.

‘‘𑀦𑀸𑀬𑀁 𑀖𑀭𑀸𑀦𑀁 𑀓𑀼𑀲𑀮𑁄, 𑀮𑁄𑀮𑁄 𑀅𑀬𑀁 𑀯𑀮𑀻𑀫𑀼𑀔𑁄;

𑀓𑀢𑀁 𑀓𑀢𑀁 𑀔𑁄 𑀤𑀽𑀲𑁂𑀬𑁆𑀬, 𑀏𑀯𑀁 𑀥𑀫𑁆𑀫𑀫𑀺𑀤𑀁 𑀓𑀼𑀮’’𑀦𑁆𑀢𑀺.

𑀢𑀢𑁆𑀣 𑀦𑀸𑀬𑀁 𑀖𑀭𑀸𑀦𑀁 𑀓𑀼𑀲𑀮𑁄𑀢𑀺 𑀅𑀬𑀁 𑀲𑀢𑁆𑀢𑁄 𑀦 𑀖𑀭𑀸𑀦𑀁 𑀓𑀼𑀲𑀮𑁄, 𑀖𑀭𑀸𑀦𑀺 𑀯𑀺𑀘𑀸𑀭𑁂𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀙𑁂𑀓𑁄 𑀦 𑀳𑁄𑀢𑀺. 𑀮𑁄𑀮𑁄𑀢𑀺 𑀮𑁄𑀮𑀚𑀸𑀢𑀺𑀓𑁄. 𑀯𑀮𑀻𑀫𑀼𑀔𑁄𑀢𑀺 𑀯𑀮𑀺𑀬𑁄 𑀫𑀼𑀔𑁂 𑀅𑀲𑁆𑀲𑀸𑀢𑀺 𑀯𑀮𑀻𑀫𑀼𑀔𑁄. 𑀏𑀯𑀁 𑀥𑀫𑁆𑀫𑀫𑀺𑀤𑀁𑀓𑀼𑀮𑀦𑁆𑀢𑀺 𑀇𑀤𑀁 𑀫𑀓𑁆𑀓𑀝𑀓𑀼𑀮𑀁 𑀦𑀸𑀫 𑀓𑀢𑀁 𑀓𑀢𑀁 𑀤𑀽𑀲𑁂𑀢𑀩𑁆𑀩𑀁 𑀯𑀺𑀦𑀸𑀲𑁂𑀢𑀩𑁆𑀩𑀦𑁆𑀢𑀺 𑀏𑀯𑀁 𑀲𑀪𑀸𑀯𑀦𑁆𑀢𑀺.

𑀅𑀣𑀸𑀫𑀘𑁆𑀘𑀸 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀸’’𑀢𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀏𑀓𑀸𑀳𑀤𑁆𑀯𑀻𑀳𑀘𑁆𑀘𑀬𑁂𑀦 𑀧𑀼𑀦 𑀢𑀫𑁂𑀯 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀆𑀦𑁂𑀢𑁆𑀯𑀸 ‘‘𑀅𑀬𑀁, 𑀤𑁂𑀯, 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀓𑀸𑀮𑁂 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄, 𑀯𑀺𑀦𑀺𑀘𑁆𑀙𑀬𑀲𑀼𑀢𑁆𑀢𑀫𑀲𑁆𑀲 𑀲𑀼𑀧𑀯𑀢𑁆𑀢𑀺𑀢𑀁, 𑀇𑀫𑀁 ¶ 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀓𑀫𑁆𑀫𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀓𑀼𑀫𑀸𑀭𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀘𑀺𑀢𑁆𑀢𑀯𑀢𑁄 𑀫𑀦𑀼𑀲𑁆𑀲𑀲𑁆𑀲 𑀮𑁄𑀫𑀁 𑀦𑀸𑀫 𑀏𑀯𑀭𑀽𑀧𑀁 𑀦 𑀳𑁄𑀢𑀺, 𑀅𑀬𑀁 𑀦𑀺𑀘𑀺𑀢𑁆𑀢𑀓𑁄 𑀯𑀸𑀦𑀭𑁄 𑀯𑀺𑀦𑀺𑀘𑁆𑀙𑀬𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁦.

‘‘𑀦𑀬𑀺𑀤𑀁 𑀘𑀺𑀢𑁆𑀢𑀯𑀢𑁄 𑀮𑁄𑀫𑀁, 𑀦𑀸𑀬𑀁 𑀅𑀲𑁆𑀲𑀸𑀲𑀺𑀓𑁄 𑀫𑀺𑀕𑁄;

𑀲𑀺𑀝𑁆𑀞𑀁 𑀫𑁂 𑀚𑀦𑀲𑀦𑁆𑀥𑁂𑀦, 𑀦𑀸𑀬𑀁 𑀓𑀺𑀜𑁆𑀘𑀺 𑀯𑀺𑀚𑀸𑀦𑀢𑀻’’𑀢𑀺.

𑀢𑀢𑁆𑀣 𑀦𑀬𑀺𑀤𑀁 𑀘𑀺𑀢𑁆𑀢𑀯𑀢𑁄 𑀮𑁄𑀫𑀦𑁆𑀢𑀺 𑀬𑀁 𑀇𑀤𑀁 𑀏𑀢𑀲𑁆𑀲 𑀲𑀭𑀻𑀭𑁂 𑀨𑀭𑀼𑀲𑀮𑁄𑀫𑀁, 𑀇𑀤𑀁 𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀯𑀢𑁄 𑀦 𑀳𑁄𑀢𑀺. 𑀧𑀸𑀓𑀢𑀺𑀓𑀘𑀺𑀢𑁆𑀢𑁂𑀦 𑀧𑀦 𑀅𑀘𑀺𑀢𑁆𑀢𑀓𑁄 𑀦𑀸𑀫 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀢𑁆𑀣𑀺. 𑀦𑀸𑀬𑀁 ¶ 𑀅𑀲𑁆𑀲𑀸𑀲𑀺𑀓𑁄𑀢𑀺 𑀅𑀬𑀁 𑀅𑀯𑀲𑁆𑀲𑀬𑁄 𑀯𑀸 𑀳𑀼𑀢𑁆𑀯𑀸 𑀅𑀦𑀼𑀲𑀸𑀲𑀦𑀺𑀁 𑀯𑀸 𑀤𑀢𑁆𑀯𑀸 𑀅𑀜𑁆𑀜𑀁 𑀅𑀲𑁆𑀲𑀸𑀲𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀅𑀲𑁆𑀲𑀸𑀲𑀺𑀓𑁄. 𑀫𑀺𑀕𑁄𑀢𑀺 ¶ 𑀫𑀓𑁆𑀓𑀝𑀁 𑀆𑀳. 𑀲𑀺𑀝𑁆𑀞𑀁 𑀫𑁂 𑀚𑀦𑀲𑀦𑁆𑀥𑁂𑀦𑀸𑀢𑀺 𑀫𑀬𑁆𑀳𑀁 𑀧𑀺𑀢𑀭𑀸 𑀚𑀦𑀲𑀦𑁆𑀥𑁂𑀦 𑀏𑀢𑀁 𑀲𑀺𑀝𑁆𑀞𑀁 𑀓𑀣𑀺𑀢𑀁, ‘‘𑀫𑀓𑁆𑀓𑀝𑁄 𑀦𑀸𑀫 𑀓𑀸𑀭𑀡𑀸𑀓𑀸𑀭𑀡𑀁 𑀦 𑀚𑀸𑀦𑀸𑀢𑀻’’𑀢𑀺 𑀏𑀯𑀁 𑀅𑀦𑀼𑀲𑀸𑀲𑀦𑀻 𑀤𑀺𑀦𑁆𑀦𑀸𑀢𑀺 𑀤𑀻𑀧𑁂𑀢𑀺. 𑀦𑀸𑀬𑀁 𑀓𑀺𑀜𑁆𑀘𑀺 𑀯𑀺𑀚𑀸𑀦𑀢𑀻𑀢𑀺 𑀢𑀲𑁆𑀫𑀸 𑀅𑀬𑀁 𑀯𑀸𑀦𑀭𑁄 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 ‘‘𑀦𑀸𑀬𑀁 𑀓𑀺𑀜𑁆𑀘𑀺 𑀦 𑀤𑀽𑀲𑀬𑁂’’𑀢𑀺 𑀮𑀺𑀔𑀺𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺.

𑀅𑀫𑀘𑁆𑀘𑀸 𑀇𑀫𑀫𑁆𑀧𑀺 𑀕𑀸𑀣𑀁 𑀲𑀼𑀢𑁆𑀯𑀸 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀸’’𑀢𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀧𑀼𑀦𑀧𑀺 𑀏𑀓𑀤𑀺𑀯𑀲𑀁 𑀢𑀫𑁂𑀯 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀆𑀦𑁂𑀢𑁆𑀯𑀸 ‘‘𑀅𑀬𑀁, 𑀤𑁂𑀯, 𑀧𑀼𑀭𑀺𑀲𑁄 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀓𑀸𑀮𑁂 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀓𑀸𑀭𑀓𑁄, 𑀓𑀼𑀮𑁂𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀓𑀸𑀭𑀓𑁄, 𑀇𑀫𑀁 𑀲𑀗𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀓𑀼𑀫𑀸𑀭𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀓𑁆𑀓𑀝𑀸 𑀦𑀸𑀫 𑀘𑀮𑀘𑀺𑀢𑁆𑀢𑀸, 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀫𑀢𑁆𑀣𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁧.

‘‘𑀦 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀪𑀸𑀢𑀭𑀁 𑀪𑀕𑀺𑀦𑀺𑀁 𑀲𑀓𑀁;

𑀪𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑁄𑀲𑁄, 𑀲𑀺𑀝𑁆𑀞𑀁 𑀤𑀲𑀭𑀣𑁂𑀦 𑀫𑁂’’𑀢𑀺.

𑀢𑀢𑁆𑀣 𑀪𑀸𑀢𑀭𑀁 𑀪𑀕𑀺𑀦𑀺𑀁 𑀲𑀓𑀦𑁆𑀢𑀺 𑀅𑀢𑁆𑀢𑀦𑁄 𑀪𑀸𑀢𑀭𑀁 𑀯𑀸 𑀪𑀕𑀺𑀦𑀺𑀁 𑀯𑀸. 𑀧𑀸𑀴𑀺𑀬𑀁 𑀧𑀦 ‘‘𑀲𑀔’’𑀦𑁆𑀢𑀺 𑀮𑀺𑀔𑀺𑀢𑀁, 𑀢𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀓𑀦𑁆𑀢𑀺 𑀯𑀼𑀢𑁆𑀢𑁂 𑀲𑀓𑀪𑀸𑀢𑀺𑀓𑀪𑀕𑀺𑀦𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀲𑀔𑀦𑁆𑀢𑀺 𑀯𑀼𑀢𑁆𑀢𑁂 𑀲𑀳𑀸𑀬𑀓𑁄 𑀮𑀩𑁆𑀪𑀢𑀻’’𑀢𑀺 𑀯𑀺𑀘𑀸𑀭𑀺𑀢𑀫𑁂𑀯. 𑀪𑀭𑁂𑀬𑁆𑀬𑀸𑀢𑀺 𑀧𑁄𑀲𑁂𑀬𑁆𑀬. 𑀢𑀸𑀤𑀺𑀲𑁄 𑀧𑁄𑀲𑁄𑀢𑀺 𑀬𑀸𑀤𑀺𑀲𑁄 𑀏𑀲 𑀤𑀺𑀲𑁆𑀲𑀢𑀺, 𑀢𑀸𑀤𑀺𑀲𑁄 𑀫𑀓𑁆𑀓𑀝𑀚𑀸𑀢𑀺𑀓𑁄 𑀲𑀢𑁆𑀢𑁄 𑀦 𑀪𑀭𑁂𑀬𑁆𑀬. 𑀲𑀺𑀝𑁆𑀞𑀁 𑀤𑀲𑀭𑀣𑁂𑀦 𑀫𑁂𑀢𑀺 ¶ 𑀏𑀯𑀁 𑀫𑁂 𑀧𑀺𑀢𑀭𑀸 𑀅𑀦𑀼𑀲𑀺𑀝𑁆𑀞𑀁. 𑀧𑀺𑀢𑀸 𑀳𑀺𑀲𑁆𑀲 𑀚𑀦𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀦𑁆𑀤𑀳𑀦𑀢𑁄 ‘‘𑀚𑀦𑀲𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺, 𑀤𑀲𑀳𑀺 𑀭𑀣𑁂𑀳𑀺 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀅𑀢𑁆𑀢𑀦𑁄 𑀏𑀓𑁂𑀦𑁂𑀯 𑀭𑀣𑁂𑀦 𑀓𑀭𑀡𑀢𑁄 ‘‘𑀤𑀲𑀭𑀣𑁄’’𑀢𑀺. 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀏𑀯𑀭𑀽𑀧𑀲𑁆𑀲 𑀑𑀯𑀸𑀤𑀲𑁆𑀲 𑀲𑀼𑀢𑀢𑁆𑀢𑀸 𑀏𑀯𑀫𑀸𑀳.

𑀅𑀫𑀘𑁆𑀘𑀸 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀸’’𑀢𑀺 𑀫𑀓𑁆𑀓𑀝𑀁 𑀅𑀧𑀦𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢𑁄 𑀓𑀼𑀫𑀸𑀭𑁄, 𑀲𑀓𑁆𑀔𑀺𑀲𑁆𑀲𑀢𑀺 𑀭𑀚𑁆𑀚𑀁 𑀓𑀸𑀭𑁂𑀢𑀼’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂 ¶ 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 ‘‘𑀆𑀤𑀸𑀲𑀫𑀼𑀔𑀭𑀜𑁆𑀜𑁄 𑀆𑀡𑀸’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀧𑀡𑁆𑀟𑀺𑀢𑀪𑀸𑀯𑁄𑀧𑀺𑀲𑁆𑀲 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀢𑁆𑀣𑀭𑀺𑀢𑁆𑀯𑀸 𑀕𑀢𑁄.

𑀧𑀡𑁆𑀟𑀺𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀦𑀲𑁆𑀲 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀯𑀢𑁆𑀣𑀽𑀦𑀺 𑀆𑀪𑀢𑀸𑀦𑀺 𑁋

‘‘𑀕𑁄𑀡𑁄 ¶ 𑀧𑀼𑀢𑁆𑀢𑁄 𑀳𑀬𑁄 𑀘𑁂𑀯, 𑀦𑀴𑀓𑀸𑀭𑁄 𑀕𑀸𑀫𑀪𑁄𑀚𑀓𑁄;

𑀕𑀡𑀺𑀓𑀸 𑀢𑀭𑀼𑀡𑀻 𑀲𑀧𑁆𑀧𑁄, 𑀫𑀺𑀕𑁄 𑀢𑀺𑀢𑁆𑀢𑀺𑀭𑀤𑁂𑀯𑀢𑀸;

𑀦𑀸𑀕𑁄 𑀢𑀧𑀲𑁆𑀲𑀺𑀦𑁄 𑀘𑁂𑀯, 𑀅𑀣𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄’’𑀢𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻𑀓𑀣𑀸 𑁋 𑀩𑁄𑀥𑀺𑀲𑀢𑁆𑀢𑀲𑁆𑀫𑀺𑀜𑁆𑀳𑀺 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁂 𑀏𑀓𑁄 𑀚𑀦𑀲𑀦𑁆𑀥𑀭𑀜𑁆𑀜𑁄 𑀧𑀸𑀤𑀫𑀽𑀮𑀺𑀓𑁄 𑀦𑀸𑀫𑁂𑀦 𑀕𑀸𑀫𑀡𑀺𑀘𑀦𑁆𑀤𑁄 𑀦𑀸𑀫 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀭𑀚𑁆𑀚𑀁 𑀦𑀸𑀫 𑀲𑀫𑀸𑀦𑀯𑀬𑁂𑀳𑀺 𑀲𑀤𑁆𑀥𑀺𑀁 𑀲𑁄𑀪𑀢𑀺, 𑀅𑀳𑀜𑁆𑀘 𑀫𑀳𑀮𑁆𑀮𑀓𑁄, 𑀤𑀳𑀭𑀁 𑀓𑀼𑀫𑀸𑀭𑀁 𑀉𑀧𑀝𑁆𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀚𑀦𑀧𑀤𑁂 𑀓𑀲𑀺𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺, 𑀲𑁄 𑀦𑀕𑀭𑀢𑁄 𑀢𑀺𑀬𑁄𑀚𑀦𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀓𑀲𑀺𑀓𑀫𑁆𑀫𑀢𑁆𑀣𑀸𑀬 𑀧𑀦𑀲𑁆𑀲 𑀕𑁄𑀡𑀸𑀧𑀺 𑀦𑀢𑁆𑀣𑀺, 𑀲𑁄 𑀤𑁂𑀯𑁂 𑀯𑀼𑀝𑁆𑀞𑁂 𑀏𑀓𑀁 𑀲𑀳𑀸𑀬𑀓𑀁 𑀤𑁆𑀯𑁂 𑀕𑁄𑀡𑁂 𑀬𑀸𑀘𑀺𑀢𑁆𑀯𑀸 𑀲𑀩𑁆𑀩𑀤𑀺𑀯𑀲𑀁 𑀓𑀲𑀺𑀢𑁆𑀯𑀸 𑀢𑀺𑀡𑀁 𑀔𑀸𑀤𑀸𑀧𑁂𑀢𑁆𑀯𑀸 𑀕𑁄𑀡𑁂 𑀲𑀸𑀫𑀺𑀓𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑀼𑀁 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀕𑁂𑀳𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺. 𑀕𑁄𑀡𑀸𑀧𑀺 𑀧𑀭𑀺𑀘𑀬𑁂𑀦 𑀕𑁂𑀳𑀁 𑀧𑀯𑀺𑀲𑀺𑀁𑀲𑀼, 𑀢𑁂𑀲𑀼 𑀧𑀯𑀺𑀲𑀦𑁆𑀢𑁂𑀲𑀼 𑀲𑀸𑀫𑀺𑀓𑁄 𑀣𑀸𑀮𑀓𑀁 𑀉𑀓𑁆𑀔𑀺𑀧𑀺, 𑀪𑀭𑀺𑀬𑀸 𑀣𑀸𑀮𑀓𑀁 𑀅𑀧𑀦𑁂𑀲𑀺. 𑀕𑀸𑀫𑀡𑀺𑀘𑀦𑁆𑀤𑁄 ‘‘𑀪𑀢𑁆𑀢𑁂𑀦 𑀫𑀁 𑀦𑀺𑀫𑀦𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀕𑁄𑀡𑁂 𑀅𑀦𑀺𑀬𑁆𑀬𑀸𑀤𑁂𑀢𑁆𑀯𑀸𑀯 𑀕𑀢𑁄. 𑀘𑁄𑀭𑀸 𑀭𑀢𑁆𑀢𑀺𑀁 𑀯𑀚𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑁂𑀬𑁂𑀯 𑀕𑁄𑀡𑁂 𑀳𑀭𑀺𑀁𑀲𑀼. 𑀕𑁄𑀡𑀲𑀸𑀫𑀺𑀓𑁄 𑀧𑀸𑀢𑁄𑀯 𑀯𑀚𑀁 𑀧𑀯𑀺𑀝𑁆𑀞𑁄 𑀢𑁂 𑀕𑁄𑀡𑁂 𑀅𑀤𑀺𑀲𑁆𑀯𑀸 𑀘𑁄𑀭𑁂𑀳𑀺 𑀳𑀝𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 ‘‘𑀕𑀸𑀫𑀡𑀺𑀘𑀦𑁆𑀤𑀲𑁆𑀲 𑀕𑀻𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ ‘‘𑀪𑁄 𑀕𑁄𑀡𑁂, 𑀫𑁂 𑀤𑁂𑀳𑀻’’𑀢𑀺 𑀆𑀳. ‘‘𑀦𑀦𑀼 𑀕𑁄𑀡𑀸 𑀕𑁂𑀳𑀁 𑀧𑀯𑀺𑀝𑁆𑀞𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀫𑀬𑁆𑀳𑀁 𑀦𑀺𑀬𑁆𑀬𑀸𑀤𑀺𑀢𑀸’’𑀢𑀺? ‘‘𑀦 𑀦𑀺𑀬𑁆𑀬𑀸𑀤𑀺𑀢𑀸’’𑀢𑀺. ‘‘𑀢𑁂𑀦 𑀳𑀺 𑀅𑀬𑀁 𑀢𑁂 𑀭𑀸𑀚𑀤𑀽𑀢𑁄, 𑀏𑀳𑀻’’𑀢𑀺 ¶ 𑀆𑀳. 𑀢𑁂𑀲𑀼 𑀳𑀺 𑀚𑀦𑀧𑀤𑁂𑀲𑀼 𑀬𑀁𑀓𑀺𑀜𑁆𑀘𑀺 𑀲𑀓𑁆𑀔𑀭𑀁 𑀯𑀸 𑀓𑀧𑀸𑀮𑀔𑀡𑁆𑀟𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀬𑀁 𑀢𑁂 𑀭𑀸𑀚𑀤𑀽𑀢𑁄, 𑀏𑀳𑀻’’𑀢𑀺 𑀯𑀼𑀢𑁆𑀢𑁂 𑀬𑁄 𑀦 𑀕𑀘𑁆𑀙𑀢𑀺, 𑀢𑀲𑁆𑀲 𑀭𑀸𑀚𑀸𑀡𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀲𑁄 ‘‘𑀭𑀸𑀚𑀤𑀽𑀢𑁄’’𑀢𑀺 𑀲𑀼𑀢𑁆𑀯𑀸𑀯 𑀦𑀺𑀓𑁆𑀔𑀫𑀺.

𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀭𑀸𑀚𑀓𑀼𑀮𑀁 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀲𑀳𑀸𑀬𑀓𑀲𑁆𑀲 𑀯𑀲𑀦𑀕𑀸𑀫𑀁 𑀧𑀢𑁆𑀯𑀸 ‘‘𑀪𑁄, 𑀅𑀢𑀺𑀙𑀸𑀢𑁄𑀫𑁆𑀳𑀺, 𑀬𑀸𑀯 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀆𑀳𑀸𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀲𑀳𑀸𑀬𑀕𑁂𑀳𑀁 𑀧𑀸𑀯𑀺𑀲𑀺. 𑀲𑀳𑀸𑀬𑁄 𑀧𑀦𑀲𑁆𑀲 𑀕𑁂𑀳𑁂 𑀦𑀢𑁆𑀣𑀺, 𑀲𑀳𑀸𑀬𑀺𑀓𑀸 𑀤𑀺𑀲𑁆𑀯𑀸 ‘‘𑀲𑀸𑀫𑀺, 𑀧𑀓𑁆𑀓𑀸𑀳𑀸𑀭𑁄 𑀦𑀢𑁆𑀣𑀺, 𑀫𑀼𑀳𑀼𑀢𑁆𑀢𑀁 𑀅𑀥𑀺𑀯𑀸𑀲𑁂𑀳𑀺, 𑀇𑀤𑀸𑀦𑁂𑀯 𑀧𑀘𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀦𑀺𑀲𑁆𑀲𑁂𑀡𑀺𑀬𑀸 𑀯𑁂𑀕𑁂𑀦 𑀢𑀡𑁆𑀟𑀼𑀮𑀓𑁄𑀝𑁆𑀞𑀓𑀁 𑀅𑀪𑀺𑀭𑀼𑀳𑀦𑁆𑀢𑀻 𑀪𑀽𑀫𑀺𑀬𑀁 𑀧𑀢𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀢𑀲𑁆𑀲𑀸 𑀲𑀢𑁆𑀢𑀫𑀸𑀲𑀺𑀓𑁄 𑀕𑀩𑁆𑀪𑁄 𑀧𑀢𑀺𑀢𑁄. 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀫𑁂 𑀪𑀭𑀺𑀬𑀁 𑀧𑀳𑀭𑀺𑀢𑁆𑀯𑀸 𑀕𑀩𑁆𑀪𑀁 𑀧𑀸𑀢𑁂𑀲𑀺, 𑀅𑀬𑀁 𑀢𑁂 𑀭𑀸𑀚𑀤𑀽𑀢𑁄, 𑀏𑀳𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀚𑀦𑀸 𑀕𑀸𑀫𑀡𑀺𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀅𑀣𑁂𑀓𑀲𑁆𑀫𑀺𑀁 𑀕𑀸𑀫𑀤𑁆𑀯𑀸𑀭𑁂 𑀏𑀓𑁄 𑀅𑀲𑁆𑀲𑀕𑁄𑀧𑀓𑁄 𑀅𑀲𑁆𑀲𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀲𑁆𑀲𑁄𑀧𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂𑀦 ¶ 𑀕𑀘𑁆𑀙𑀢𑀺. 𑀅𑀲𑁆𑀲𑀕𑁄𑀧𑀓𑁄 𑀕𑀸𑀫𑀡𑀺𑀘𑀦𑁆𑀤𑀁 𑀤𑀺𑀲𑁆𑀯𑀸 ‘‘𑀫𑀸𑀢𑀼𑀮 𑀕𑀸𑀫𑀡𑀺𑀘𑀦𑁆𑀤, 𑀏𑀢𑀁 𑀢𑀸𑀯 𑀅𑀲𑁆𑀲𑀁 𑀓𑁂𑀦𑀘𑀺𑀤𑁂𑀯 𑀧𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀳𑀻’’𑀢𑀺 𑀆𑀳. 𑀲𑁄 𑀏𑀓𑀁 𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸 𑀔𑀺𑀧𑀺, 𑀧𑀸𑀲𑀸𑀡𑁄 𑀅𑀲𑁆𑀲𑀲𑁆𑀲 𑀧𑀸𑀤𑁂 𑀧𑀳𑀭𑀺𑀢𑁆𑀯𑀸 𑀏𑀭𑀡𑁆𑀟𑀤𑀡𑁆𑀟𑀓𑀁 𑀯𑀺𑀬 𑀪𑀺𑀦𑁆𑀤𑀺. 𑀅𑀣 𑀦𑀁 𑀅𑀲𑁆𑀲𑀕𑁄𑀧𑀓𑁄 ‘‘𑀢𑀬𑀸 𑀫𑁂 𑀅𑀲𑁆𑀲𑀲𑁆𑀲 𑀧𑀸𑀤𑁄 𑀪𑀺𑀦𑁆𑀦𑁄, 𑀅𑀬𑀁 𑀢𑁂 𑀭𑀸𑀚𑀤𑀽𑀢𑁄’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀺.

𑀲𑁄 𑀢𑀻𑀳𑀺 𑀚𑀦𑁂𑀳𑀺 𑀦𑀻𑀬𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀅𑀳𑀁 𑀕𑁄𑀡𑀫𑀽𑀮𑀫𑁆𑀧𑀺 ¶ 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀧𑀕𑁂𑀯 𑀕𑀩𑁆𑀪𑀧𑀸𑀢𑀦𑀤𑀡𑁆𑀟𑀁, 𑀅𑀲𑁆𑀲𑀫𑀽𑀮𑀁 𑀧𑀦 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀺, 𑀫𑀢𑀁 𑀫𑁂 𑀲𑁂𑀬𑁆𑀬𑁄’’𑀢𑀺. 𑀲𑁄 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀝𑀯𑀺𑀬𑀁 𑀫𑀕𑁆𑀕𑀲𑀫𑀻𑀧𑁂𑀬𑁂𑀯 𑀏𑀓𑀁 𑀏𑀓𑀢𑁄 𑀧𑀧𑀸𑀢𑀁 𑀧𑀩𑁆𑀩𑀢𑀁 𑀅𑀤𑁆𑀤𑀲, 𑀢𑀲𑁆𑀲 𑀙𑀸𑀬𑀸𑀬 𑀤𑁆𑀯𑁂 𑀧𑀺𑀢𑀸𑀧𑀼𑀢𑁆𑀢𑀸 𑀦𑀴𑀓𑀸𑀭𑀸 𑀏𑀓𑀢𑁄 𑀓𑀺𑀮𑀜𑁆𑀚𑀁 𑀘𑀺𑀦𑀦𑁆𑀢𑀺. 𑀕𑀸𑀫𑀡𑀺𑀘𑀦𑁆𑀤𑁄 ‘‘𑀪𑁄, 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑁄𑀫𑁆𑀳𑀺, 𑀣𑁄𑀓𑀁 𑀇𑀥𑁂𑀯 𑀳𑁄𑀣, 𑀬𑀸𑀯 𑀆𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀧𑀸𑀢𑀧𑀲𑁆𑀲𑁂 𑀧𑀢𑀫𑀸𑀦𑁄 𑀧𑀺𑀢𑀼𑀦𑀴𑀓𑀸𑀭𑀲𑁆𑀲 𑀧𑀺𑀝𑁆𑀞𑀺𑀬𑀁 𑀧𑀢𑀺, 𑀦𑀴𑀓𑀸𑀭𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀕𑀸𑀫𑀡𑀺 𑀉𑀝𑁆𑀞𑀸𑀬 𑀅𑀝𑁆𑀞𑀸𑀲𑀺. 𑀦𑀴𑀓𑀸𑀭𑀧𑀼𑀢𑁆𑀢𑁄 ‘‘𑀢𑁆𑀯𑀁 𑀫𑁂 𑀧𑀺𑀢𑀼𑀖𑀸𑀢𑀓𑀘𑁄𑀭𑁄, 𑀅𑀬𑀁 𑀢𑁂 𑀭𑀸𑀚𑀤𑀽𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀕𑀼𑀫𑁆𑀩𑀢𑁄 𑀦𑀺𑀓𑁆𑀔𑀫𑀺 ¶ , ‘‘𑀓𑀺𑀁 𑀏𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀧𑀺𑀢𑀼𑀖𑀸𑀢𑀓𑀘𑁄𑀭𑁄 𑀫𑁂’’𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀕𑀸𑀫𑀡𑀺𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀚𑀦𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀬𑀺𑀁𑀲𑀼.

𑀅𑀣𑀸𑀧𑀭𑀲𑁆𑀫𑀺𑀁 𑀕𑀸𑀫𑀤𑁆𑀯𑀸𑀭𑁂 𑀏𑀓𑁄 𑀕𑀸𑀫𑀪𑁄𑀚𑀓𑁄 𑀕𑀸𑀫𑀡𑀺𑀘𑀦𑁆𑀤𑀁 𑀤𑀺𑀲𑁆𑀯𑀸 ‘‘𑀫𑀸𑀢𑀼𑀮 𑀕𑀸𑀫𑀡𑀺𑀘𑀦𑁆𑀤, 𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀤𑁆𑀥𑀸 𑀢𑁆𑀯𑀁 𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀲𑀺, 𑀅𑀳𑀁 𑀭𑀜𑁆𑀜𑁄 𑀲𑀸𑀲𑀦𑀁 𑀤𑀸𑀢𑀼𑀓𑀸𑀫𑁄, 𑀳𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀆𑀫, 𑀳𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑀁 𑀧𑀓𑀢𑀺𑀬𑀸 𑀅𑀪𑀺𑀭𑀽𑀧𑁄 𑀥𑀦𑀯𑀸 𑀬𑀲𑀲𑀫𑁆𑀧𑀦𑁆𑀦𑁄 𑀅𑀭𑁄𑀕𑁄, 𑀇𑀤𑀸𑀦𑀺 𑀧𑀦𑀫𑁆𑀳𑀺 𑀤𑀼𑀕𑁆𑀕𑀢𑁄 𑀘𑁂𑀯 𑀧𑀡𑁆𑀟𑀼𑀭𑁄𑀕𑀻 𑀘, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙, 𑀭𑀸𑀚𑀸 𑀓𑀺𑀭 𑀧𑀡𑁆𑀟𑀺𑀢𑁄, 𑀲𑁄 𑀢𑁂 𑀓𑀣𑁂𑀲𑁆𑀲𑀢𑀺, 𑀢𑀲𑁆𑀲 𑀲𑀸𑀲𑀦𑀁 𑀧𑀼𑀦 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀅𑀣 𑀦𑀁 𑀧𑀼𑀭𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀤𑁆𑀯𑀸𑀭𑁂 𑀏𑀓𑀸 𑀕𑀡𑀺𑀓𑀸 𑀤𑀺𑀲𑁆𑀯𑀸 ‘‘𑀫𑀸𑀢𑀼𑀮 𑀕𑀸𑀫𑀡𑀺𑀘𑀦𑁆𑀤, 𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀸 𑀓𑀺𑀭 𑀧𑀡𑁆𑀟𑀺𑀢𑁄, 𑀫𑀫 𑀲𑀸𑀲𑀦𑀁 𑀳𑀭𑀸’’𑀢𑀺 ¶ 𑀯𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀧𑀼𑀩𑁆𑀩𑁂 𑀅𑀳𑀁 𑀩𑀳𑀼𑀁 𑀪𑀢𑀺𑀁 𑀮𑀪𑀸𑀫𑀺, 𑀇𑀤𑀸𑀦𑀺 𑀧𑀦 𑀢𑀫𑁆𑀩𑀼𑀮𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀺, 𑀓𑁄𑀘𑀺 𑀫𑁂 𑀲𑀦𑁆𑀢𑀺𑀓𑀁 𑀆𑀕𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺.

𑀅𑀣 𑀦𑀁 𑀧𑀼𑀭𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀤𑁆𑀯𑀸𑀭𑁂 𑀏𑀓𑀸 𑀢𑀭𑀼𑀡𑀺𑀢𑁆𑀣𑀻 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀦𑁂𑀯 ¶ 𑀲𑀸𑀫𑀺𑀓𑀲𑁆𑀲 𑀕𑁂𑀳𑁂 𑀯𑀲𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀦 𑀓𑀼𑀮𑀕𑁂𑀳𑁂, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀅𑀣 𑀦𑀁 𑀢𑀢𑁄 𑀧𑀭𑀪𑀸𑀕𑁂 𑀫𑀳𑀸𑀫𑀕𑁆𑀕𑀲𑀫𑀻𑀧𑁂 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀯𑀲𑀦𑁆𑀢𑁄 𑀲𑀧𑁆𑀧𑁄 𑀤𑀺𑀲𑁆𑀯𑀸 ‘‘𑀕𑀸𑀫𑀡𑀺𑀘𑀦𑁆𑀤, 𑀓𑀳𑀁 𑀬𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀸 𑀓𑀺𑀭 𑀧𑀡𑁆𑀟𑀺𑀢𑁄, 𑀲𑀸𑀲𑀦𑀁 𑀫𑁂 𑀳𑀭𑀸’’𑀢𑀺 𑀯𑀢𑁆𑀯𑀸 ‘‘𑀅𑀳𑀁 𑀕𑁄𑀘𑀭𑀢𑁆𑀣𑀸𑀬 𑀕𑀫𑀦𑀓𑀸𑀮𑁂 𑀙𑀸𑀢𑀚𑁆𑀛𑀢𑁆𑀢𑁄 𑀫𑀺𑀮𑀸𑀢𑀲𑀭𑀻𑀭𑁄 𑀯𑀫𑁆𑀫𑀺𑀓𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀲𑀭𑀻𑀭𑁂𑀦 𑀩𑀺𑀮𑀁 𑀧𑀽𑀭𑁂𑀢𑁆𑀯𑀸 𑀲𑀭𑀻𑀭𑀁 𑀓𑀟𑁆𑀠𑁂𑀦𑁆𑀢𑁄 𑀓𑀺𑀘𑁆𑀙𑁂𑀦 𑀦𑀺𑀓𑁆𑀔𑀫𑀸𑀫𑀺, 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸 𑀆𑀕𑀢𑁄 𑀧𑀦 𑀲𑀼𑀳𑀺𑀢𑁄 𑀣𑀽𑀮𑀲𑀭𑀻𑀭𑁄 𑀳𑀼𑀢𑁆𑀯𑀸 𑀧𑀯𑀺𑀲𑀦𑁆𑀢𑁄 𑀩𑀺𑀮𑀧𑀲𑁆𑀲𑀸𑀦𑀺 𑀅𑀨𑀼𑀲𑀦𑁆𑀢𑁄 𑀲𑀳𑀲𑀸𑀯 𑀧𑀯𑀺𑀲𑀸𑀫𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀅𑀣 ¶ 𑀦𑀁 𑀧𑀼𑀭𑀢𑁄 𑀏𑀓𑁄 𑀫𑀺𑀕𑁄 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀅𑀜𑁆𑀜𑀢𑁆𑀣 𑀢𑀺𑀡𑀁 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀭𑀼𑀓𑁆𑀔𑀫𑀽𑀮𑁂 𑀲𑀓𑁆𑀓𑁄𑀫𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀅𑀣 𑀦𑀁 𑀢𑀢𑁄 𑀧𑀭𑀪𑀸𑀕𑁂 𑀏𑀓𑁄 𑀢𑀺𑀢𑁆𑀢𑀺𑀭𑁄 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀯𑀫𑁆𑀫𑀺𑀓𑀧𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀲𑁆𑀲𑀦𑁆𑀢𑁄 𑀫𑀦𑀸𑀧𑀁 𑀓𑀭𑀺𑀢𑁆𑀯𑀸 𑀯𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀲𑁂𑀲𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑁄 𑀦 𑀲𑀓𑁆𑀓𑁄𑀫𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀅𑀣 𑀦𑀁 𑀧𑀼𑀭𑀢𑁄 𑀏𑀓𑀸 ¶ 𑀭𑀼𑀓𑁆𑀔𑀤𑁂𑀯𑀢𑀸 𑀤𑀺𑀲𑁆𑀯𑀸 ‘‘𑀘𑀦𑁆𑀤, 𑀓𑀳𑀁 𑀬𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀜𑁆𑀜𑁄 𑀲𑀦𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀸 𑀓𑀺𑀭 𑀧𑀡𑁆𑀟𑀺𑀢𑁄, 𑀅𑀳𑀁 𑀧𑀼𑀩𑁆𑀩𑁂 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄 𑀅𑀳𑁄𑀲𑀺𑀁, 𑀇𑀤𑀸𑀦𑀺 𑀧𑀦 𑀧𑀮𑁆𑀮𑀯𑀫𑀼𑀝𑁆𑀞𑀺𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀢𑀢𑁄 𑀅𑀧𑀭𑀪𑀸𑀕𑁂 𑀏𑀓𑁄 𑀦𑀸𑀕𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀧𑀡𑁆𑀟𑀺𑀢𑁄, 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀲𑀭𑁂 𑀉𑀤𑀓𑀁 𑀧𑀲𑀦𑁆𑀦𑀁 𑀫𑀡𑀺𑀯𑀡𑁆𑀡𑀁, 𑀇𑀤𑀸𑀦𑀺 𑀆𑀯𑀺𑀮𑀁 𑀧𑀡𑁆𑀡𑀓𑀲𑁂𑀯𑀸𑀮𑀧𑀭𑀺𑀬𑁄𑀦𑀤𑁆𑀥𑀁, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳.

𑀅𑀣 𑀦𑀁 𑀧𑀼𑀭𑀢𑁄 𑀦𑀕𑀭𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀏𑀓𑀲𑁆𑀫𑀺𑀁 𑀆𑀭𑀸𑀫𑁂 𑀯𑀲𑀦𑁆𑀢𑀸 𑀢𑀸𑀧𑀲𑀸 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀧𑀡𑁆𑀟𑀺𑀢𑁄, 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀆𑀭𑀸𑀫𑁂 𑀨𑀮𑀸𑀨𑀮𑀸𑀦𑀺 𑀫𑀥𑀼𑀭𑀸𑀦𑀺 𑀅𑀳𑁂𑀲𑀼𑀁, 𑀇𑀤𑀸𑀦𑀺 𑀦𑀺𑀭𑁄𑀚𑀸𑀦𑀺 𑀓𑀲𑀝𑀸𑀦𑀺 𑀚𑀸𑀢𑀸𑀦𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳𑀁𑀲𑀼.

𑀢𑀢𑁄 ¶ 𑀦𑀁 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑁂 𑀏𑀓𑀺𑀲𑁆𑀲𑀁 𑀲𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀓𑀸 𑀤𑀺𑀲𑁆𑀯𑀸 ‘‘𑀓𑀳𑀁, 𑀪𑁄 𑀘𑀦𑁆𑀤, 𑀕𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 ‘‘𑀭𑀜𑁆𑀜𑁄 𑀲𑀦𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀦𑁄 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙, 𑀅𑀫𑁆𑀳𑀸𑀓𑀜𑁆𑀳𑀺 𑀧𑀼𑀩𑁆𑀩𑁂 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀸𑀓𑀝𑀁 𑀅𑀳𑁄𑀲𑀺, 𑀇𑀤𑀸𑀦𑀺 𑀧𑀦 𑀙𑀺𑀤𑁆𑀤𑀖𑀝𑁂 𑀉𑀤𑀓𑀁 𑀯𑀺𑀬 𑀦 𑀲𑀡𑁆𑀞𑀸𑀢𑀺 𑀦 𑀧𑀜𑁆𑀜𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀯𑀺𑀬 𑀳𑁄𑀢𑀺, 𑀢𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳𑀁𑀲𑀼.

𑀕𑀸𑀫𑀡𑀺𑀘𑀦𑁆𑀤𑁄 𑀇𑀫𑀸𑀦𑀺 𑀤𑀲 𑀲𑀸𑀲𑀦𑀸𑀦𑀺 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀅𑀳𑁄𑀲𑀺. 𑀕𑁄𑀡𑀲𑀸𑀫𑀺𑀓𑁄 𑀕𑀸𑀫𑀡𑀺𑀘𑀦𑁆𑀤𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺. 𑀭𑀸𑀚𑀸 𑀕𑀸𑀫𑀡𑀺𑀘𑀦𑁆𑀤𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 ¶ ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀧𑀺𑀢𑀼 𑀉𑀧𑀝𑁆𑀞𑀸𑀓𑁄, 𑀅𑀫𑁆𑀳𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺, 𑀓𑀳𑀁 𑀦𑀼 𑀔𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀲𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀕𑀸𑀫𑀡𑀺𑀘𑀦𑁆𑀤, 𑀓𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀲𑀲𑀺, 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀧𑀜𑁆𑀜𑀸𑀬𑀲𑀺, 𑀓𑁂𑀦𑀢𑁆𑀣𑁂𑀦 𑀆𑀕𑀢𑁄𑀲𑀻’’𑀢𑀺 𑀆𑀳. ‘‘𑀆𑀫, 𑀤𑁂𑀯, 𑀅𑀫𑁆𑀳𑀸𑀓𑀁 𑀤𑁂𑀯𑀲𑁆𑀲 𑀲𑀕𑁆𑀕𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑀲𑀺𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀸𑀫𑀺, 𑀢𑀢𑁄 𑀫𑀁 𑀅𑀬𑀁 𑀧𑀼𑀭𑀺𑀲𑁄 𑀕𑁄𑀡𑀅𑀟𑁆𑀟𑀓𑀸𑀭𑀡𑀸 𑀭𑀸𑀚𑀤𑀽𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀓𑀟𑁆𑀠𑀻’’𑀢𑀺. ‘‘𑀅𑀦𑀸𑀓𑀟𑁆𑀠𑀺𑀬𑀫𑀸𑀦𑁄 𑀦𑀸𑀕𑀘𑁆𑀙𑁂𑀬𑁆𑀬𑀸𑀲𑀺’’, ‘‘𑀆𑀓𑀟𑁆𑀠𑀺𑀢𑀪𑀸𑀯𑁄𑀬𑁂𑀯 𑀲𑁄𑀪𑀦𑁄, 𑀇𑀤𑀸𑀦𑀺 𑀢𑀁 𑀤𑀝𑁆𑀞𑀼𑀁 𑀮𑀪𑀸𑀫𑀺, 𑀓𑀳𑀁 𑀲𑁄 𑀧𑀼𑀭𑀺𑀲𑁄’’𑀢𑀺? ‘‘𑀅𑀬𑀁, 𑀤𑁂𑀯𑀸’’𑀢𑀺. ‘‘𑀲𑀘𑁆𑀘𑀁 𑀓𑀺𑀭, 𑀪𑁄, 𑀅𑀫𑁆𑀳𑀸𑀓𑀁 𑀘𑀦𑁆𑀤𑀲𑁆𑀲 𑀤𑀽𑀢𑀁 𑀤𑀲𑁆𑀲𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀅𑀬𑀁 𑀫𑁂 𑀤𑁂𑀯 𑀤𑁆𑀯𑁂 𑀕𑁄𑀡𑁂 𑀦 𑀤𑁂𑀢𑀻’’𑀢𑀺. ‘‘𑀲𑀘𑁆𑀘𑀁 𑀓𑀺𑀭, 𑀘𑀦𑁆𑀤𑀸’’𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀫𑀬𑁆𑀳𑀫𑁆𑀧𑀺 𑀯𑀘𑀦𑀁 𑀲𑀼𑀡𑀸𑀣𑀸’’𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀕𑁄𑀡𑀲𑀸𑀫𑀺𑀓𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀪𑁄, 𑀢𑀯 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂 𑀕𑁄𑀡𑁂 𑀅𑀤𑁆𑀤𑀲𑀸’’𑀢𑀺. ‘‘𑀦𑀸𑀤𑁆𑀤𑀲𑀁, 𑀤𑁂𑀯𑀸’’𑀢𑀺. ‘‘𑀓𑀺𑀁, 𑀪𑁄, 𑀫𑀁 ‘𑀆𑀤𑀸𑀲𑀫𑀼𑀔𑀭𑀸𑀚𑀸 𑀦𑀸𑀫𑀸’𑀢𑀺 𑀓𑀣𑁂𑀦𑁆𑀢𑀸𑀦𑀁 𑀦 𑀲𑀼𑀢𑀧𑀼𑀩𑁆𑀩𑀁 𑀢𑀬𑀸, 𑀯𑀺𑀲𑁆𑀲𑀢𑁆𑀣𑁄 𑀓𑀣𑁂𑀳𑀻’’𑀢𑀺? ‘‘𑀅𑀤𑁆𑀤𑀲𑀁, 𑀤𑁂𑀯𑀸’’𑀢𑀺. ‘‘𑀪𑁄 𑀘𑀦𑁆𑀤, 𑀕𑁄𑀡𑀸𑀦𑀁 𑀅𑀦𑀺𑀬𑁆𑀬𑀸𑀤𑀺𑀢𑀢𑁆𑀢𑀸 𑀕𑁄𑀡𑀸 𑀢𑀯 𑀕𑀻𑀯𑀸, 𑀅𑀬𑀁 𑀧𑀦 𑀧𑀼𑀭𑀺𑀲𑁄 𑀤𑀺𑀲𑁆𑀯𑀸𑀯 ‘𑀦 𑀧𑀲𑁆𑀲𑀸𑀫𑀻’𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀪𑀡𑀺, 𑀢𑀲𑁆𑀫𑀸 𑀢𑁆𑀯𑀜𑁆𑀜𑁂𑀯 𑀓𑀫𑁆𑀫𑀺𑀓𑁄 𑀳𑀼𑀢𑁆𑀯𑀸 𑀇𑀫𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲 𑀧𑀚𑀸𑀧𑀢𑀺𑀬𑀸𑀬 𑀘𑀲𑁆𑀲 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀲𑀬𑀁 𑀕𑁄𑀡𑀫𑀽𑀮𑀁 𑀘𑀢𑀼𑀯𑀻𑀲𑀢𑀺 𑀓𑀳𑀸𑀧𑀡𑁂 𑀤𑁂𑀳𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀕𑁄𑀡𑀲𑀸𑀫𑀺𑀓𑀁 𑀩𑀳𑀺 𑀓𑀭𑀺𑀁𑀲𑀼. 𑀲𑁄 ‘‘𑀅𑀓𑁆𑀔𑀻𑀲𑀼 𑀉𑀧𑁆𑀧𑀸𑀝𑀺𑀢𑁂𑀲𑀼 𑀘𑀢𑀼𑀯𑀻𑀲𑀢𑀺𑀓𑀳𑀸𑀧𑀡𑁂𑀳𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀸𑀫𑀡𑀺𑀘𑀦𑁆𑀤𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀲𑀸𑀫𑀺 𑀘𑀦𑁆𑀤, 𑀕𑁄𑀡𑀫𑀽𑀮𑀓𑀳𑀸𑀧𑀡𑀸 𑀢𑀼𑀬𑁆𑀳𑁂𑀯 𑀳𑁄𑀦𑁆𑀢𑀼, 𑀇𑀫𑁂 𑀘 𑀕𑀡𑁆𑀳𑀸𑀳𑀻’’𑀢𑀺 𑀅𑀜𑁆𑀜𑁂𑀧𑀺 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀮𑀸𑀬𑀺.

𑀢𑀢𑁄 𑀤𑀼𑀢𑀺𑀬𑁄 𑀆𑀳 𑁋 ‘‘𑀅𑀬𑀁, 𑀤𑁂𑀯, 𑀫𑀫 𑀧𑀚𑀸𑀧𑀢𑀺𑀁 𑀧𑀳𑀭𑀺𑀢𑁆𑀯𑀸 ¶ 𑀕𑀩𑁆𑀪𑀁 𑀧𑀸𑀢𑁂𑀲𑀻’’𑀢𑀺. ‘‘𑀲𑀘𑁆𑀘𑀁 𑀘𑀦𑁆𑀤𑀸’’𑀢𑀺? ‘‘𑀲𑀼𑀡𑁄𑀳𑀺 𑀫𑀳𑀸𑀭𑀸𑀚𑀸’’𑀢𑀺 𑀘𑀦𑁆𑀤𑁄 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀧𑀦 𑀢𑁆𑀯𑀁 𑀏𑀢𑀲𑁆𑀲 𑀧𑀚𑀸𑀧𑀢𑀺𑀁 𑀧𑀳𑀭𑀺𑀢𑁆𑀯𑀸 𑀕𑀩𑁆𑀪𑀁 𑀧𑀸𑀢𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀧𑀸𑀢𑁂𑀫𑀺, 𑀤𑁂𑀯𑀸’’𑀢𑀺 ¶ . ‘‘𑀅𑀫𑁆𑀪𑁄 𑀲𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁 𑀇𑀫𑀺𑀦𑀸 𑀕𑀩𑁆𑀪𑀲𑁆𑀲 𑀧𑀸𑀢𑀺𑀢𑀪𑀸𑀯𑀁 𑀲𑀸𑀥𑁂𑀢𑀼’’𑀦𑁆𑀢𑀺? ‘‘𑀦 𑀲𑀓𑁆𑀓𑁄𑀫𑀺, 𑀤𑁂𑀯𑀸’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀤𑁂𑀯, 𑀧𑀼𑀢𑁆𑀢𑀁 𑀫𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀅𑀫𑁆𑀪𑁄 𑀘𑀦𑁆𑀤, 𑀢𑁆𑀯𑀁 𑀏𑀢𑀲𑁆𑀲 𑀧𑀚𑀸𑀧𑀢𑀺𑀁 𑀢𑀯 𑀕𑁂𑀳𑁂 𑀓𑀭𑀺𑀢𑁆𑀯𑀸 𑀬𑀤𑀸 𑀧𑀼𑀢𑁆𑀢𑀯𑀺𑀚𑀸𑀢𑀸 ¶ 𑀳𑁄𑀢𑀺, 𑀢𑀤𑀸 𑀦𑀁 𑀦𑁂𑀢𑁆𑀯𑀸 𑀏𑀢𑀲𑁆𑀲𑁂𑀯 𑀤𑁂𑀳𑀻’’𑀢𑀺. 𑀲𑁄𑀧𑀺 𑀕𑀸𑀫𑀡𑀺𑀘𑀦𑁆𑀤𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀫𑀸 𑀫𑁂, 𑀲𑀸𑀫𑀺, 𑀕𑁂𑀳𑀁, 𑀪𑀺𑀦𑁆𑀤𑀻’’𑀢𑀺 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀮𑀸𑀬𑀺.

𑀅𑀣 𑀢𑀢𑀺𑀬𑁄 𑀆𑀕𑀦𑁆𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂, 𑀤𑁂𑀯, 𑀧𑀳𑀭𑀺𑀢𑁆𑀯𑀸 𑀅𑀲𑁆𑀲𑀲𑁆𑀲 𑀧𑀸𑀤𑁄 𑀪𑀺𑀦𑁆𑀦𑁄’’𑀢𑀺 𑀆𑀳. ‘‘𑀲𑀘𑁆𑀘𑀁 𑀘𑀦𑁆𑀤𑀸’’𑀢𑀺. ‘‘𑀲𑀼𑀡𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀘𑀦𑁆𑀤𑁄 𑀢𑀁 𑀧𑀯𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀲𑁆𑀲𑀕𑁄𑀧𑀓𑀁 𑀆𑀳 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 ‘𑀅𑀲𑁆𑀲𑀁 𑀧𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀳𑀻’𑀢𑀺 𑀓𑀣𑁂𑀲𑀻’’𑀢𑀺. ‘‘𑀦 𑀓𑀣𑁂𑀫𑀺, 𑀤𑁂𑀯𑀸’’𑀢𑀺. 𑀲𑁄 𑀧𑀼𑀦𑀯𑀸𑀭𑁂 𑀧𑀼𑀘𑁆𑀙𑀺𑀢𑁄 ‘‘𑀆𑀫, 𑀓𑀣𑁂𑀫𑀻’’𑀢𑀺 𑀆𑀳. 𑀭𑀸𑀚𑀸 𑀘𑀦𑁆𑀤𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀘𑀦𑁆𑀤, 𑀅𑀬𑀁 𑀓𑀣𑁂𑀢𑁆𑀯𑀸𑀯 ‘𑀦 𑀓𑀣𑁂𑀫𑀻’𑀢𑀺 𑀫𑀼𑀲𑀸𑀯𑀸𑀤𑀁 𑀯𑀤𑀢𑀺, 𑀢𑁆𑀯𑀁 𑀏𑀢𑀲𑁆𑀲 𑀚𑀺𑀯𑁆𑀳𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀲𑁆𑀲𑀫𑀽𑀮𑀁 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀕𑀳𑁂𑀢𑁆𑀯𑀸 𑀲𑀳𑀲𑁆𑀲𑀁 𑀤𑁂𑀳𑀻’’𑀢𑀺 𑀆𑀳. 𑀅𑀲𑁆𑀲𑀕𑁄𑀧𑀓𑁄 𑀅𑀧𑀭𑁂𑀧𑀺 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀮𑀸𑀬𑀺.

𑀢𑀢𑁄 𑀦𑀴𑀓𑀸𑀭𑀧𑀼𑀢𑁆𑀢𑁄 ‘‘𑀅𑀬𑀁 𑀫𑁂, 𑀤𑁂𑀯, 𑀧𑀺𑀢𑀼𑀖𑀸𑀢𑀓𑀘𑁄𑀭𑁄’’𑀢𑀺 𑀆𑀳. ‘‘𑀲𑀘𑁆𑀘𑀁 𑀓𑀺𑀭, 𑀘𑀦𑁆𑀤𑀸’’𑀢𑀺. ‘‘𑀲𑀼𑀡𑁄𑀳𑀺, 𑀤𑁂𑀯𑀸’’𑀢𑀺 𑀘𑀦𑁆𑀤𑁄 𑀢𑀫𑁆𑀧𑀺 𑀓𑀸𑀭𑀡𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀣 𑀭𑀸𑀚𑀸 𑀦𑀴𑀓𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯 ¶ 𑀫𑁂 𑀧𑀺𑀢𑀭𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀅𑀫𑁆𑀪𑁄 𑀘𑀦𑁆𑀤, 𑀇𑀫𑀲𑁆𑀲 𑀓𑀺𑀭 𑀧𑀺𑀢𑀭𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀫𑀢𑀓𑀁 𑀧𑀦 𑀦 𑀲𑀓𑁆𑀓𑀸 𑀧𑀼𑀦 𑀆𑀦𑁂𑀢𑀼𑀁, 𑀢𑁆𑀯𑀁 𑀇𑀫𑀲𑁆𑀲 𑀫𑀸𑀢𑀭𑀁 𑀆𑀦𑁂𑀢𑁆𑀯𑀸 𑀢𑀯 𑀕𑁂𑀳𑁂 𑀓𑀢𑁆𑀯𑀸 𑀏𑀢𑀲𑁆𑀲 𑀧𑀺𑀢𑀸 𑀳𑁄𑀳𑀻’’𑀢𑀺. 𑀦𑀴𑀓𑀸𑀭𑀧𑀼𑀢𑁆𑀢𑁄 ‘‘𑀫𑀸 𑀫𑁂, 𑀲𑀸𑀫𑀺, 𑀫𑀢𑀲𑁆𑀲 𑀧𑀺𑀢𑀼 𑀕𑁂𑀳𑀁 𑀪𑀺𑀦𑁆𑀤𑀻’’𑀢𑀺 𑀕𑀸𑀫𑀡𑀺𑀘𑀦𑁆𑀤𑀲𑁆𑀲 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀮𑀸𑀬𑀺.

𑀕𑀸𑀫𑀡𑀺𑀘𑀦𑁆𑀤𑁄 𑀅𑀟𑁆𑀟𑁂 𑀚𑀬𑀁 𑀧𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀅𑀢𑁆𑀣𑀺, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀓𑁂𑀳𑀺𑀘𑀺 𑀲𑀸𑀲𑀦𑀁 𑀧𑀳𑀺𑀢𑀁, 𑀢𑀁 𑀯𑁄 𑀓𑀣𑁂𑀫𑀻’’𑀢𑀺. ‘‘𑀓𑀣𑁂𑀳𑀺, 𑀘𑀦𑁆𑀤𑀸’’𑀢𑀺. 𑀘𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀓𑀸𑀦𑀁 𑀲𑀸𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀏𑀓𑁂𑀓𑀁 𑀓𑀣𑀁 𑀓𑀣𑁂𑀲𑀺. 𑀭𑀸𑀚𑀸 𑀧𑀝𑀺𑀧𑀸𑀝𑀺𑀬𑀸 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀓𑀣𑀁? 𑀧𑀞𑀫𑀁 𑀢𑀸𑀯 𑀲𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀧𑀼𑀩𑁆𑀩𑁂 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑁂 𑀯𑁂𑀮𑀁 𑀚𑀸𑀦𑀺𑀢𑁆𑀯𑀸 𑀯𑀲𑁆𑀲𑀦𑀓𑀼𑀓𑁆𑀓𑀼𑀝𑁄 𑀅𑀳𑁄𑀲𑀺, 𑀢𑁂𑀲𑀁 𑀢𑁂𑀦 𑀲𑀤𑁆𑀤𑁂𑀦 𑀉𑀝𑁆𑀞𑀸𑀬 𑀫𑀦𑁆𑀢𑁂 𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀸𑀦𑀜𑁆𑀜𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀢𑁂𑀦 𑀢𑁂𑀲𑀁 𑀕𑀳𑀺𑀢𑀕𑀳𑀺𑀢𑀁 𑀦 𑀦𑀲𑁆𑀲𑀢𑀺. 𑀇𑀤𑀸𑀦𑀺 𑀧𑀦 𑀦𑁂𑀲𑀁 𑀯𑀲𑀦𑀝𑁆𑀞𑀸𑀦𑁂 𑀅𑀯𑁂𑀮𑀸𑀬 𑀯𑀲𑁆𑀲𑀦𑀓𑀓𑀼𑀓𑁆𑀓𑀼𑀝𑁄 𑀅𑀢𑁆𑀣𑀺, 𑀲𑁄 𑀅𑀢𑀺𑀭𑀢𑁆𑀢𑀺𑀁 𑀯𑀸 𑀯𑀲𑁆𑀲𑀢𑀺 𑀅𑀢𑀺𑀧𑀪𑀸𑀢𑁂 𑀯𑀸, 𑀅𑀢𑀺𑀭𑀢𑁆𑀢𑀺𑀁 𑀯𑀲𑁆𑀲𑀦𑁆𑀢𑀲𑁆𑀲 𑀢𑀲𑁆𑀲 𑀲𑀤𑁆𑀤𑁂𑀦 𑀉𑀝𑁆𑀞𑀸𑀬 𑀫𑀦𑁆𑀢𑁂 𑀕𑀳𑁂𑀢𑁆𑀯𑀸 𑀦𑀺𑀤𑁆𑀤𑀸𑀪𑀺𑀪𑀽𑀢𑀸 ¶ 𑀲𑀚𑁆𑀛𑀸𑀬𑀁 𑀅𑀓𑀢𑁆𑀯𑀸𑀯 𑀧𑀼𑀦 𑀲𑀬𑀦𑁆𑀢𑀺 ¶ , 𑀅𑀢𑀺𑀧𑀪𑀸𑀢𑁂 𑀯𑀲𑁆𑀲𑀦𑁆𑀢𑀲𑁆𑀲 𑀲𑀤𑁆𑀤𑁂𑀦 𑀉𑀝𑁆𑀞𑀸𑀬 𑀲𑀚𑁆𑀛𑀸𑀬𑀺𑀢𑀼𑀁 𑀦 𑀮𑀪𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀕𑀳𑀺𑀢𑀕𑀳𑀺𑀢𑀁 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳.

𑀤𑀼𑀢𑀺𑀬𑀁 𑀲𑀼𑀢𑁆𑀯𑀸 ‘‘𑀢𑁂 𑀧𑀼𑀩𑁆𑀩𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀇𑀤𑀸𑀦𑀺 𑀧𑀦 𑀲𑀫𑀡𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀓𑀢𑁆𑀢𑀩𑁆𑀩𑁂𑀲𑀼 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀆𑀭𑀸𑀫𑁂 𑀉𑀧𑁆𑀧𑀦𑁆𑀦𑀸𑀦𑀺 𑀨𑀮𑀸𑀨𑀮𑀸𑀦𑀺 𑀉𑀧𑀝𑁆𑀞𑀸𑀓𑀸𑀦𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀢𑁂𑀦 𑀦𑁂𑀲𑀁 𑀨𑀮𑀸𑀨𑀮𑀸𑀦𑀺 𑀦 𑀫𑀥𑀼𑀭𑀸𑀦𑀺 ¶ 𑀚𑀸𑀢𑀸𑀦𑀺. 𑀲𑀘𑁂 𑀧𑀦 𑀢𑁂 𑀧𑀼𑀩𑁆𑀩𑁂 𑀯𑀺𑀬 𑀧𑀼𑀦 𑀲𑀫𑀡𑀥𑀫𑁆𑀫𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀧𑀼𑀦 𑀢𑁂𑀲𑀁 𑀨𑀮𑀸𑀨𑀮𑀸𑀦𑀺 𑀫𑀥𑀼𑀭𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁂 𑀢𑀸𑀧𑀲𑀸 𑀭𑀸𑀚𑀓𑀼𑀮𑀸𑀦𑀁 𑀧𑀡𑁆𑀟𑀺𑀢𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺, 𑀲𑀫𑀡𑀥𑀫𑁆𑀫𑀁 𑀢𑁂𑀲𑀁 𑀓𑀸𑀢𑀼𑀁 𑀯𑀤𑁂𑀳𑀻’’𑀢𑀺 𑀆𑀳.

𑀢𑀢𑀺𑀬𑀁 𑀲𑀼𑀢𑁆𑀯𑀸 ‘‘𑀢𑁂 𑀦𑀸𑀕𑀭𑀸𑀚𑀸𑀦𑁄 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀢𑁂𑀦 𑀢𑀁 𑀉𑀤𑀓𑀁 𑀆𑀯𑀺𑀮𑀁 𑀚𑀸𑀢𑀁. 𑀲𑀘𑁂 𑀢𑁂 𑀧𑀼𑀩𑁆𑀩𑁂 𑀯𑀺𑀬 𑀲𑀫𑀕𑁆𑀕𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀧𑀼𑀦 𑀧𑀲𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳.

𑀘𑀢𑀼𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀲𑀸 𑀭𑀼𑀓𑁆𑀔𑀤𑁂𑀯𑀢𑀸 𑀧𑀼𑀩𑁆𑀩𑁂 𑀅𑀝𑀯𑀺𑀬𑀁 𑀧𑀝𑀺𑀧𑀦𑁆𑀦𑁂 𑀫𑀦𑀼𑀲𑁆𑀲𑁂 𑀭𑀓𑁆𑀔𑀢𑀺, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀓𑀸𑀭𑀁 𑀩𑀮𑀺𑀓𑀫𑁆𑀫𑀁 𑀮𑀪𑀢𑀺. 𑀇𑀤𑀸𑀦𑀺 𑀧𑀦 𑀆𑀭𑀓𑁆𑀔𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀩𑀮𑀺𑀓𑀫𑁆𑀫𑀁 𑀦 𑀮𑀪𑀢𑀺. 𑀲𑀘𑁂 𑀧𑀼𑀩𑁆𑀩𑁂 𑀯𑀺𑀬 𑀆𑀭𑀓𑁆𑀔𑀁 𑀓𑀭𑀺𑀲𑁆𑀲𑀢𑀺, 𑀧𑀼𑀦 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀺. 𑀲𑀸 𑀭𑀸𑀚𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀝𑀯𑀺𑀆𑀭𑀼𑀴𑁆𑀳𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀁 𑀓𑀸𑀢𑀼𑀁 𑀯𑀤𑁂𑀳𑀻’’𑀢𑀺 𑀆𑀳.

𑀧𑀜𑁆𑀘𑀫𑀁 𑀲𑀼𑀢𑁆𑀯𑀸 ‘‘𑀬𑀲𑁆𑀫𑀺𑀁 𑀯𑀫𑁆𑀫𑀺𑀓𑀧𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄 𑀢𑀺𑀢𑁆𑀢𑀺𑀭𑁄 𑀫𑀦𑀸𑀧𑀁 𑀯𑀲𑁆𑀲𑀢𑀺, 𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀦𑁆𑀢𑀻 𑀦𑀺𑀥𑀺𑀓𑀼𑀫𑁆𑀪𑀺 𑀅𑀢𑁆𑀣𑀺, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳.

𑀙𑀝𑁆𑀞𑀁 𑀲𑀼𑀢𑁆𑀯𑀸 ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀲𑁄 𑀫𑀺𑀕𑁄 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀉𑀧𑀭𑀺 𑀫𑀳𑀦𑁆𑀢𑀁 𑀪𑀫𑀭𑀫𑀥𑀼 𑀅𑀢𑁆𑀣𑀺, 𑀲𑁄 𑀫𑀥𑀼𑀫𑀓𑁆𑀔𑀺𑀢𑁂𑀲𑀼 𑀢𑀺𑀡𑁂𑀲𑀼 𑀧𑀮𑀼𑀤𑁆𑀥𑁄 𑀅𑀜𑁆𑀜𑀸𑀦𑀺 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁆𑀯𑀁 𑀢𑀁 𑀫𑀥𑀼𑀧𑀝𑀮𑀁 𑀳𑀭𑀺𑀢𑁆𑀯𑀸 𑀅𑀕𑁆𑀕𑀫𑀥𑀼𑀁 𑀅𑀫𑁆𑀳𑀸𑀓𑀁 𑀧𑀳𑀺𑀡, 𑀲𑁂𑀲𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀸’’𑀢𑀺 𑀆𑀳.

𑀲𑀢𑁆𑀢𑀫𑀁 𑀲𑀼𑀢𑁆𑀯𑀸 ‘‘𑀬𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀲𑁄 𑀲𑀧𑁆𑀧𑁄 𑀯𑀲𑀢𑀺, 𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀦𑁆𑀢𑀻 𑀦𑀺𑀥𑀺𑀓𑀼𑀫𑁆𑀪𑀺 𑀅𑀢𑁆𑀣𑀺, 𑀲𑁄 𑀢𑀁 𑀭𑀓𑁆𑀔𑀫𑀸𑀦𑁄 𑀯𑀲𑀦𑁆𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀥𑀦𑀮𑁄𑀪𑁂𑀦 𑀲𑀭𑀻𑀭𑀁 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀮𑀕𑁆𑀕𑀦𑁆𑀢𑁄 𑀦𑀺𑀓𑁆𑀔𑀫𑀢𑀺, 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 ¶ 𑀥𑀦𑀲𑀺𑀦𑁂𑀳𑁂𑀦 𑀅𑀮𑀕𑁆𑀕𑀦𑁆𑀢𑁄 𑀯𑁂𑀕𑁂𑀦 𑀲𑀳𑀲𑀸 𑀧𑀯𑀺𑀲𑀢𑀺. 𑀢𑀁 𑀦𑀺𑀥𑀺𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳.

𑀅𑀝𑁆𑀞𑀫𑀁 ¶ 𑀲𑀼𑀢𑁆𑀯𑀸 ‘‘𑀢𑀲𑁆𑀲𑀸 𑀢𑀭𑀼𑀡𑀺𑀢𑁆𑀣𑀺𑀬𑀸 𑀲𑀸𑀫𑀺𑀓𑀲𑁆𑀲 𑀘 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀯𑀲𑀦𑀕𑀸𑀫𑀸𑀦𑀁 ¶ 𑀅𑀦𑁆𑀢𑀭𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀚𑀸𑀭𑁄 𑀅𑀢𑁆𑀣𑀺. 𑀲𑀸 𑀢𑀁 𑀲𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀦𑁂𑀳𑁂𑀦 𑀲𑀸𑀫𑀺𑀓𑀲𑁆𑀲 𑀕𑁂𑀳𑁂 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀲𑁆𑀲𑀸𑀫𑀻’𑀢𑀺 𑀚𑀸𑀭𑀲𑁆𑀲 𑀕𑁂𑀳𑁂 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀕𑁂𑀳𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀚𑀸𑀭𑀁 𑀲𑀭𑀺𑀢𑁆𑀯𑀸 ‘𑀲𑀸𑀫𑀺𑀓𑀲𑁆𑀲 𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀧𑀼𑀦 𑀚𑀸𑀭𑀲𑁆𑀲𑁂𑀯 𑀕𑁂𑀳𑀁 𑀕𑀘𑁆𑀙𑀢𑀺. 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀭𑀸𑀚𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘𑀲𑀸𑀫𑀺𑀓𑀲𑁆𑀲𑁂𑀯 𑀓𑀺𑀭 𑀕𑁂𑀳𑁂 𑀯𑀲𑀢𑀼. 𑀲𑀘𑁂 𑀢𑀁 𑀭𑀸𑀚𑀸 𑀕𑀡𑁆𑀳𑀸𑀧𑁂𑀢𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀺, 𑀅𑀧𑁆𑀧𑀫𑀸𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀢𑀲𑁆𑀲𑀸 𑀓𑀣𑁂𑀳𑀻’’𑀢𑀺 𑀆𑀳.

𑀦𑀯𑀫𑀁 𑀲𑀼𑀢𑁆𑀯𑀸 ‘‘𑀲𑀸 𑀕𑀡𑀺𑀓𑀸 𑀧𑀼𑀩𑁆𑀩𑁂 𑀏𑀓𑀲𑁆𑀲 𑀳𑀢𑁆𑀣𑀢𑁄 𑀪𑀢𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀅𑀚𑀻𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀳𑀢𑁆𑀣𑀢𑁄 𑀦 𑀕𑀡𑁆𑀳𑀸𑀢𑀺, 𑀢𑁂𑀦𑀲𑁆𑀲𑀸 𑀧𑀼𑀩𑁆𑀩𑁂 𑀩𑀳𑀼𑀁 𑀉𑀧𑁆𑀧𑀚𑁆𑀚𑀺. 𑀇𑀤𑀸𑀦𑀺 𑀧𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀲𑁆𑀲 𑀳𑀢𑁆𑀣𑀢𑁄 𑀕𑀳𑀺𑀢𑀁 𑀅𑀚𑀻𑀭𑀸𑀧𑁂𑀢𑁆𑀯𑀸𑀯 𑀅𑀜𑁆𑀜𑀲𑁆𑀲 𑀳𑀢𑁆𑀣𑀢𑁄 𑀕𑀡𑁆𑀳𑀸𑀢𑀺, 𑀧𑀼𑀭𑀺𑀫𑀲𑁆𑀲 𑀑𑀓𑀸𑀲𑀁 𑀅𑀓𑀢𑁆𑀯𑀸 𑀧𑀘𑁆𑀙𑀺𑀫𑀲𑁆𑀲 𑀓𑀭𑁄𑀢𑀺, 𑀢𑁂𑀦𑀲𑁆𑀲𑀸 𑀪𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀓𑁂𑀘𑀺 𑀦𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑀘𑁂 𑀅𑀢𑁆𑀢𑀦𑁄 𑀥𑀫𑁆𑀫𑁂 𑀞𑀲𑁆𑀲𑀢𑀺, 𑀧𑀼𑀩𑁆𑀩𑀲𑀤𑀺𑀲𑀸𑀯 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀢𑀦𑁄 𑀥𑀫𑁆𑀫𑁂 𑀞𑀸𑀢𑀼𑀫𑀲𑁆𑀲𑀸 𑀓𑀣𑁂𑀳𑀻’’𑀢𑀺 𑀆𑀳.

𑀤𑀲𑀫𑀁 𑀲𑀼𑀢𑁆𑀯𑀸 ‘‘𑀲𑁄 𑀕𑀸𑀫𑀪𑁄𑀚𑀓𑁄 𑀧𑀼𑀩𑁆𑀩𑁂 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺, 𑀢𑁂𑀦 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄, 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀘𑀲𑁆𑀲 𑀫𑀦𑀼𑀲𑁆𑀲𑀸 𑀩𑀳𑀼𑀧𑀡𑁆𑀡𑀸𑀓𑀸𑀭𑀁 𑀆𑀳𑀭𑀺𑀁𑀲𑀼, 𑀢𑁂𑀦 𑀅𑀪𑀺𑀭𑀽𑀧𑁄 𑀥𑀦𑀯𑀸 𑀬𑀲𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀇𑀤𑀸𑀦𑀺 𑀧𑀦 𑀮𑀜𑁆𑀚𑀯𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀅𑀥𑀫𑁆𑀫𑁂𑀦 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀢𑀺, 𑀢𑁂𑀦 𑀤𑀼𑀕𑁆𑀕𑀢𑁄 𑀓𑀧𑀡𑁄 𑀳𑀼𑀢𑁆𑀯𑀸 𑀧𑀡𑁆𑀟𑀼𑀭𑁄𑀕𑁂𑀦 𑀅𑀪𑀺𑀪𑀽𑀢𑁄. 𑀲𑀘𑁂 𑀧𑀼𑀩𑁆𑀩𑁂 𑀯𑀺𑀬 𑀥𑀫𑁆𑀫𑁂𑀦 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀢𑀺, 𑀧𑀼𑀦 𑀧𑀼𑀩𑁆𑀩𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀺. 𑀲𑁄 𑀭𑀜𑁆𑀜𑁄 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀥𑀫𑁆𑀫𑁂𑀦 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀫𑀲𑁆𑀲 𑀓𑀣𑁂𑀳𑀻’’𑀢𑀺 𑀆𑀳.

𑀇𑀢𑀺 𑀲𑁄 𑀕𑀸𑀫𑀡𑀺𑀘𑀦𑁆𑀤𑁄 𑀇𑀫𑀸𑀦𑀺 𑀏𑀢𑁆𑀢𑀓𑀸𑀦𑀺 𑀲𑀸𑀲𑀦𑀸𑀦𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺, 𑀭𑀸𑀚𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 ¶ 𑀯𑀺𑀬 𑀩𑁆𑀬𑀸𑀓𑀭𑀺𑀢𑁆𑀯𑀸 𑀕𑀸𑀫𑀡𑀺𑀘𑀦𑁆𑀤𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 𑀢𑀲𑁆𑀲 𑀯𑀲𑀦𑀕𑀸𑀫𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀤𑀺𑀦𑁆𑀦𑀲𑀸𑀲𑀦𑀁 ¶ 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀓𑀸𑀦𑀜𑁆𑀘 𑀢𑀸𑀧𑀲𑀸𑀦𑀜𑁆𑀘 𑀦𑀸𑀕𑀭𑀸𑀚𑀲𑁆𑀲 𑀘 𑀭𑀼𑀓𑁆𑀔𑀤𑁂𑀯𑀢𑀸𑀬 𑀘 𑀆𑀭𑁄𑀘𑁂𑀢𑁆𑀯𑀸 𑀢𑀺𑀢𑁆𑀢𑀺𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀥𑀺𑀁 𑀕𑀳𑁂𑀢𑁆𑀯𑀸 𑀫𑀺𑀕𑀲𑁆𑀲 𑀢𑀺𑀡𑀔𑀸𑀤𑀦𑀝𑁆𑀞𑀸𑀦𑁂 𑀭𑀼𑀓𑁆𑀔𑀢𑁄 𑀪𑀫𑀭𑀫𑀥𑀼𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀫𑀥𑀼𑀁 𑀧𑁂𑀲𑁂𑀢𑁆𑀯𑀸 𑀲𑀧𑁆𑀧𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀯𑀫𑁆𑀫𑀺𑀓𑀁 𑀔𑀡𑀺𑀢𑁆𑀯𑀸 𑀦𑀺𑀥𑀺𑀁 𑀕𑀳𑁂𑀢𑁆𑀯𑀸 𑀢𑀭𑀼𑀡𑀺𑀢𑁆𑀣𑀺𑀬𑀸 𑀘 𑀕𑀡𑀺𑀓𑀸𑀬 𑀘 𑀕𑀸𑀫𑀪𑁄𑀚𑀓𑀲𑁆𑀲 𑀘 𑀭𑀜𑁆𑀜𑁄 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀸𑀲𑀦𑀁 𑀆𑀭𑁄𑀘𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 ¶ 𑀅𑀢𑁆𑀢𑀦𑁄 𑀕𑀸𑀫𑀓𑀁 𑀕𑀦𑁆𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄. 𑀆𑀤𑀸𑀲𑀫𑀼𑀔𑀭𑀸𑀚𑀸𑀧𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀦𑁆𑀢𑁄 𑀕𑀢𑁄.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀫𑀳𑀸𑀧𑀜𑁆𑀜𑁄, 𑀧𑀼𑀩𑁆𑀩𑁂𑀧𑀺 𑀫𑀳𑀸𑀧𑀜𑁆𑀜𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀕𑀸𑀫𑀡𑀺𑀘𑀦𑁆𑀤𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀆𑀤𑀸𑀲𑀫𑀼𑀔𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀸𑀫𑀡𑀺𑀘𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁫𑁮] 𑁮. 𑀫𑀦𑁆𑀥𑀸𑀢𑀼𑀚𑀸𑀢𑀓𑀯𑀡𑁆𑀡𑀦𑀸

𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀓𑁆𑀓𑀡𑁆𑀞𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀁 𑀆𑀦𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀲𑀢𑁆𑀣𑀼 𑀤𑀲𑁆𑀲𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀤𑀸 𑀢𑁆𑀯𑀁 ¶ , 𑀪𑀺𑀓𑁆𑀔𑀼, 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑁄 𑀢𑀡𑁆𑀳𑀁 𑀧𑀽𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀓𑀸𑀫𑀢𑀡𑁆𑀳𑀸 𑀳𑀺 𑀦𑀸𑀫𑁂𑀲𑀸 𑀲𑀫𑀼𑀤𑁆𑀤𑁄 𑀯𑀺𑀬 𑀤𑀼𑀧𑁆𑀧𑀽𑀭𑀸, 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀫𑀦𑀼𑀲𑁆𑀲𑀧𑀭𑀺𑀳𑀸𑀭𑁂𑀦𑁂𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀙𑀢𑁆𑀢𑀺𑀁𑀲𑀸𑀬 𑀲𑀓𑁆𑀓𑀸𑀦𑀜𑁆𑀘 𑀯𑀲𑀦𑀝𑁆𑀞𑀸𑀦𑁂 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀓𑀸𑀫𑀢𑀡𑁆𑀳𑀁 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀯 𑀓𑀸𑀮𑀫𑀓𑀁𑀲𑀼, 𑀢𑁆𑀯𑀁 𑀧𑀦𑁂𑀢𑀁 𑀢𑀡𑁆𑀳𑀁 𑀓𑀤𑀸 𑀧𑀽𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀫𑀳𑀸𑀲𑀫𑁆𑀫𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀭𑁄𑀚𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀯𑀭𑀭𑁄𑀚𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀓𑀮𑁆𑀬𑀸𑀡𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 ¶ 𑀯𑀭𑀓𑀮𑁆𑀬𑀸𑀡𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀉𑀧𑁄𑀲𑀣𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀦𑁆𑀥𑀸𑀢𑀼 𑀦𑀸𑀫 𑀅𑀳𑁄𑀲𑀺. 𑀲𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀯𑀸𑀫𑀳𑀢𑁆𑀣𑀁 𑀲𑀫𑀜𑁆𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀅𑀧𑁆𑀨𑁄𑀝𑀺𑀢𑀓𑀸𑀮𑁂 𑀆𑀓𑀸𑀲𑀸 𑀤𑀺𑀩𑁆𑀩𑀫𑁂𑀖𑁄 𑀯𑀺𑀬 𑀚𑀸𑀡𑀼𑀧𑁆𑀧𑀫𑀸𑀡𑀁 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀢𑀺, 𑀏𑀯𑀭𑀽𑀧𑁄 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄 𑀅𑀳𑁄𑀲𑀺. 𑀲𑁄 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 ¶ 𑀑𑀧𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀆𑀬𑀼𑀧𑁆𑀧𑀫𑀸𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀳𑁄𑀲𑀺.

𑀲𑁄 𑀏𑀓𑀤𑀺𑀯𑀲𑀁 𑀓𑀸𑀫𑀢𑀡𑁆𑀳𑀁 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀅𑀣𑀸𑀫𑀘𑁆𑀘𑀸 ‘‘𑀓𑀺𑀁 𑀦𑀼 𑀔𑁄, 𑀤𑁂𑀯, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀫𑀬𑁆𑀳𑀁 𑀧𑀼𑀜𑁆𑀜𑀩𑀮𑁂 𑀑𑀮𑁄𑀓𑀺𑀬𑀫𑀸𑀦𑁂 𑀇𑀤𑀁 𑀭𑀚𑁆𑀚𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀢𑀭𑀁 𑀦𑀼 𑀔𑁄 𑀞𑀸𑀦𑀁 𑀭𑀫𑀡𑀻𑀬’’𑀦𑁆𑀢𑀺? ‘‘𑀤𑁂𑀯𑀮𑁄𑀓𑁄, 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀁 ¶ 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀤𑀺𑀩𑁆𑀩𑀫𑀸𑀮𑀸𑀕𑀦𑁆𑀥𑀳𑀢𑁆𑀣𑀸 𑀤𑁂𑀯𑀕𑀡𑀧𑀭𑀺𑀯𑀼𑀢𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀁 𑀆𑀤𑀸𑀬 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑁂𑀯𑀭𑀚𑁆𑀚𑀁 𑀅𑀤𑀁𑀲𑀼. 𑀢𑀲𑁆𑀲 𑀲𑀓𑀧𑀭𑀺𑀲𑀸𑀬 𑀧𑀭𑀺𑀯𑀸𑀭𑀺𑀢𑀲𑁆𑀲𑁂𑀯 𑀢𑀲𑁆𑀫𑀺𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀲𑁆𑀲 𑀤𑀻𑀖𑁄 𑀅𑀤𑁆𑀥𑀸 𑀯𑀻𑀢𑀺𑀯𑀢𑁆𑀢𑁄.

𑀲𑁄 𑀢𑀢𑁆𑀣𑀸𑀧𑀺 𑀢𑀡𑁆𑀳𑀁 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 ‘‘𑀓𑀺𑀁 𑀦𑀼 𑀔𑁄, 𑀤𑁂𑀯, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀇𑀫𑀫𑁆𑀳𑀸 𑀤𑁂𑀯𑀮𑁄𑀓𑀸 𑀓𑀢𑀭𑀁 𑀞𑀸𑀦𑀁 𑀭𑀫𑀡𑀻𑀬’’𑀦𑁆𑀢𑀺. ‘‘𑀫𑀬𑀁, 𑀤𑁂𑀯, 𑀧𑀭𑁂𑀲𑀁 𑀉𑀧𑀝𑁆𑀞𑀸𑀓𑀧𑀭𑀺𑀲𑀸, 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁄 𑀭𑀫𑀡𑀻𑀬𑁄’’𑀢𑀺. 𑀫𑀦𑁆𑀥𑀸𑀢𑀸 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀢𑀸𑀯𑀢𑀺𑀁𑀲𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀫𑀸𑀮𑀸𑀕𑀦𑁆𑀥𑀳𑀢𑁆𑀣𑁄 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀏𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀭𑀜𑁆𑀜𑁄 𑀤𑁂𑀯𑀕𑀡𑀧𑀭𑀺𑀯𑀼𑀢𑀲𑁆𑀲 𑀕𑀫𑀦𑀓𑀸𑀮𑁂 𑀧𑀭𑀺𑀡𑀸𑀬𑀓𑀭𑀢𑀦𑀁 𑀘𑀓𑁆𑀓𑀭𑀢𑀦𑀁 𑀆𑀤𑀸𑀬 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀫𑀦𑀼𑀲𑁆𑀲𑀧𑀣𑀁 𑀑𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀧𑀸𑀯𑀺𑀲𑀺. 𑀲𑀓𑁆𑀓𑁄 𑀫𑀦𑁆𑀥𑀸𑀢𑀼𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀤𑁂𑀯𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀭𑀚𑁆𑀚𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀭𑀸𑀚𑀸𑀦𑁄 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁. 𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀲𑀓𑁆𑀓𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀆𑀬𑀼𑀁 𑀔𑁂𑀧𑁂𑀢𑁆𑀯𑀸 𑀘𑀯𑀺, 𑀅𑀜𑁆𑀜𑁄 𑀲𑀓𑁆𑀓𑁄 𑀦𑀺𑀩𑁆𑀩𑀢𑁆𑀢𑀺. 𑀲𑁄𑀧𑀺 𑀤𑁂𑀯𑀭𑀚𑁆𑀚𑀁 ¶ 𑀓𑀸𑀭𑁂𑀢𑁆𑀯𑀸 𑀆𑀬𑀼𑀓𑁆𑀔𑀬𑁂𑀦 𑀘𑀯𑀺. 𑀏𑀢𑁂𑀦𑀽𑀧𑀸𑀬𑁂𑀦 𑀙𑀢𑁆𑀢𑀺𑀁𑀲 𑀲𑀓𑁆𑀓𑀸 𑀘𑀯𑀺𑀁𑀲𑀼, 𑀫𑀦𑁆𑀥𑀸𑀢𑀸 𑀧𑀦 𑀫𑀦𑀼𑀲𑁆𑀲𑀧𑀭𑀺𑀳𑀸𑀭𑁂𑀦 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀲𑀺𑀬𑁂𑀯.

𑀢𑀲𑁆𑀲 𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀸𑀫𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀺, 𑀲𑁄 ‘‘𑀓𑀺𑀁 𑀫𑁂 𑀉𑀧𑀟𑁆𑀠𑀭𑀚𑁆𑀚𑁂𑀦, 𑀲𑀓𑁆𑀓𑀁 𑀫𑀸𑀭𑁂𑀢𑁆𑀯𑀸 𑀏𑀓𑀭𑀚𑁆𑀚𑀫𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀓𑁆𑀓𑀁 𑀫𑀸𑀭𑁂𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀢𑀡𑁆𑀳𑀸 𑀦𑀸𑀫𑁂𑀲𑀸 𑀯𑀺𑀧𑀢𑁆𑀢𑀺𑀫𑀽𑀮𑀸, 𑀢𑁂𑀦𑀲𑁆𑀲 𑀆𑀬𑀼𑀲𑀗𑁆𑀔𑀸𑀭𑁄 𑀧𑀭𑀺𑀳𑀸𑀬𑀺, 𑀚𑀭𑀸 𑀲𑀭𑀻𑀭𑀁 𑀧𑀳𑀭𑀺. 𑀫𑀦𑀼𑀲𑁆𑀲𑀲𑀭𑀻𑀭𑀜𑁆𑀘 ¶ 𑀦𑀸𑀫 𑀤𑁂𑀯𑀮𑁄𑀓𑁂 𑀦 𑀪𑀺𑀚𑁆𑀚𑀢𑀺, 𑀅𑀣 𑀲𑁄 𑀤𑁂𑀯𑀮𑁄𑀓𑀸 𑀪𑀲𑁆𑀲𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀑𑀢𑀭𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀭𑀸𑀚𑀓𑀼𑀮𑁂 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀓𑀼𑀮𑀁 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂𑀬𑁂𑀯 𑀲𑀬𑀦𑀁 𑀧𑀜𑁆𑀜𑀧𑁂𑀲𑀺. 𑀭𑀸𑀚𑀸 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀚𑁆𑀚𑀺. 𑀅𑀫𑀘𑁆𑀘𑀸 ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀧𑀭𑀢𑁄 ¶ 𑀓𑀺𑀦𑁆𑀢𑀺 𑀓𑀣𑁂𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀫𑀫 𑀧𑀭𑀢𑁄 𑀢𑀼𑀫𑁆𑀳𑁂 𑀇𑀫𑀁 𑀲𑀸𑀲𑀦𑀁 𑀫𑀳𑀸𑀚𑀦𑀲𑁆𑀲 𑀓𑀣𑁂𑀬𑁆𑀬𑀸𑀣 𑁋 ‘𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀙𑀢𑁆𑀢𑀺𑀁𑀲𑀸𑀬 𑀲𑀓𑁆𑀓𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑁂𑀦 𑀤𑁂𑀯𑀮𑁄𑀓𑁂 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀢𑀡𑁆𑀳𑀁 𑀅𑀧𑀽𑀭𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀻’’’𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁨𑁨.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀲𑀩𑁆𑀩𑁂𑀯 𑀤𑀸𑀲𑀸 𑀫𑀦𑁆𑀥𑀸𑀢𑀼, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸.

𑁨𑁩.

‘‘𑀦 𑀓𑀳𑀸𑀧𑀡𑀯𑀲𑁆𑀲𑁂𑀦, 𑀢𑀺𑀢𑁆𑀢𑀺 𑀓𑀸𑀫𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄.

𑁨𑁪.

‘‘𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀺;

𑀢𑀡𑁆𑀳𑀓𑁆𑀔𑀬𑀭𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀬𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀧𑀭𑀺𑀳𑀭𑀦𑁆𑀢𑀻𑀢𑀺 𑀬𑀢𑁆𑀢𑀓𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀲𑀺𑀦𑁂𑀭𑀼𑀁 𑀧𑀭𑀺𑀳𑀭𑀦𑁆𑀢𑀺. 𑀤𑀺𑀲𑀸 𑀪𑀦𑁆𑀢𑀻𑀢𑀺 𑀤𑀲𑀲𑀼 𑀤𑀺𑀲𑀸𑀲𑀼 𑀪𑀸𑀲𑀦𑁆𑀢𑀺 𑀧𑀪𑀸𑀲𑀦𑁆𑀢𑀺. 𑀯𑀺𑀭𑁄𑀘𑀦𑀸𑀢𑀺 𑀆𑀮𑁄𑀓𑀓𑀭𑀡𑀢𑀸𑀬 𑀯𑀺𑀭𑁄𑀘𑀦𑀲𑀪𑀸𑀯𑀸. 𑀲𑀩𑁆𑀩𑁂𑀯 𑀤𑀸𑀲𑀸 𑀫𑀦𑁆𑀥𑀸𑀢𑀼, 𑀬𑁂 𑀧𑀸𑀡𑀸 𑀧𑀣𑀯𑀺𑀲𑁆𑀲𑀺𑀢𑀸𑀢𑀺 𑀏𑀢𑁆𑀢𑀓𑁂 𑀧𑀤𑁂𑀲𑁂 𑀬𑁂 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 ¶ 𑀧𑀸𑀡𑀸 𑀚𑀦𑀧𑀤𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸, 𑀲𑀩𑁆𑀩𑁂𑀯 𑀢𑁂 ‘‘𑀤𑀸𑀲𑀸 𑀫𑀬𑀁 𑀭𑀜𑁆𑀜𑁄 𑀫𑀦𑁆𑀥𑀸𑀢𑀼𑀲𑁆𑀲, 𑀅𑀬𑁆𑀬𑀓𑁄 𑀦𑁄 𑀭𑀸𑀚𑀸 𑀫𑀦𑁆𑀥𑀸𑀢𑀸’’𑀢𑀺 𑀏𑀯𑀁 𑀉𑀧𑀕𑀢𑀢𑁆𑀢𑀸 𑀪𑀼𑀚𑀺𑀲𑁆𑀲𑀸𑀧𑀺 𑀲𑀫𑀸𑀦𑀸 𑀤𑀸𑀲𑀸𑀬𑁂𑀯.

𑀦 𑀓𑀳𑀸𑀧𑀡𑀯𑀲𑁆𑀲𑁂𑀦𑀸𑀢𑀺 𑀢𑁂𑀲𑀁 𑀤𑀸𑀲𑀪𑀽𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀕𑁆𑀕𑀳𑀸𑀬 𑀬𑀁 𑀫𑀦𑁆𑀥𑀸𑀢𑀸 𑀅𑀧𑁆𑀨𑁄𑀝𑁂𑀢𑁆𑀯𑀸 ¶ 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀺, 𑀢𑀁 𑀇𑀥 ‘‘𑀓𑀳𑀸𑀧𑀡𑀯𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀺𑀢𑁆𑀢𑀺 𑀓𑀸𑀫𑁂𑀲𑀽𑀢𑀺 𑀢𑁂𑀦𑀸𑀧𑀺 𑀓𑀳𑀸𑀧𑀡𑀯𑀲𑁆𑀲𑁂𑀦 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀏𑀯𑀁 𑀤𑀼𑀧𑁆𑀧𑀽𑀭𑀸 𑀏𑀲𑀸 𑀢𑀡𑁆𑀳𑀸. 𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸𑀢𑀺 𑀲𑀼𑀧𑀺𑀦𑀓𑀽𑀧𑀫𑀢𑁆𑀢𑀸 𑀓𑀸𑀫𑀸 𑀦𑀸𑀫 𑀅𑀧𑁆𑀧𑀲𑁆𑀲𑀸𑀤𑀸 𑀧𑀭𑀺𑀢𑁆𑀢𑀲𑀼𑀔𑀸, 𑀤𑀼𑀓𑁆𑀔𑀫𑁂𑀯 𑀧𑀦𑁂𑀢𑁆𑀣 𑀩𑀳𑀼𑀢𑀭𑀁. 𑀢𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀇𑀢𑀺 𑀯𑀺𑀜𑁆𑀜𑀸𑀬𑀸𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸.

𑀤𑀺𑀩𑁆𑀩𑁂𑀲𑀽𑀢𑀺 𑀤𑁂𑀯𑀢𑀸𑀦𑀁 𑀧𑀭𑀺𑀪𑁄𑀕𑁂𑀲𑀼 𑀭𑀽𑀧𑀸𑀤𑀻𑀲𑀼. 𑀭𑀢𑀺𑀁 𑀲𑁄𑀢𑀺 𑀲𑁄 𑀯𑀺𑀧𑀲𑁆𑀲𑀓𑁄 𑀪𑀺𑀓𑁆𑀔𑀼 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 ¶ 𑀦𑀺𑀫𑀦𑁆𑀢𑀺𑀬𑀫𑀸𑀦𑁄𑀧𑀺 𑀢𑁂𑀲𑀼 𑀭𑀢𑀺𑀁 𑀦𑀸𑀥𑀺𑀕𑀘𑁆𑀙𑀢𑀺 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀯𑀺𑀬. 𑀢𑀡𑁆𑀳𑀓𑁆𑀔𑀬𑀭𑀢𑁄𑀢𑀺 𑀦𑀺𑀩𑁆𑀩𑀸𑀦𑀭𑀢𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀢𑀡𑁆𑀳𑀸 𑀔𑀻𑀬𑀢𑀺, 𑀢𑀲𑁆𑀫𑀸 𑀢𑀁 ‘‘𑀢𑀡𑁆𑀳𑀓𑁆𑀔𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀭𑀢𑁄 𑀳𑁄𑀢𑀺 𑀅𑀪𑀺𑀭𑀢𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄𑀢𑀺 𑀩𑀼𑀤𑁆𑀥𑀲𑁆𑀲 𑀲𑀯𑀦𑀦𑁆𑀢𑁂 𑀚𑀸𑀢𑁄 𑀩𑀳𑀼𑀲𑁆𑀲𑀼𑀢𑁄 𑀬𑁄𑀕𑀸𑀯𑀘𑀭𑀧𑀼𑀕𑁆𑀕𑀮𑁄.

𑀏𑀯𑀁 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂 𑀧𑀦 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀫𑀦𑁆𑀥𑀸𑀢𑀼𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀦𑁆𑀥𑀸𑀢𑀼𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁫𑁯] 𑁯. 𑀢𑀺𑀭𑀻𑀝𑀯𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸

𑀦𑀬𑀺𑀫𑀲𑁆𑀲 𑀯𑀺𑀚𑁆𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀸𑀢𑀼𑀕𑀸𑀫𑀸𑀦𑀁 𑀳𑀢𑁆𑀣𑀢𑁄 𑀧𑀜𑁆𑀘𑀲𑀢𑀸𑀦𑀺, 𑀭𑀜𑁆𑀜𑁄 𑀳𑀢𑁆𑀣𑀢𑁄 𑀧𑀜𑁆𑀘𑀲𑀢𑀸𑀦𑀻𑀢𑀺 𑀤𑀼𑀲𑁆𑀲𑀲𑀳𑀲𑁆𑀲𑀧𑀝𑀺𑀮𑀸𑀪𑀯𑀢𑁆𑀣𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀤𑀼𑀓𑀦𑀺𑀧𑀸𑀢𑁂 𑀕𑀼𑀡𑀚𑀸𑀢𑀓𑁂 (𑀚𑀸. 𑀅𑀝𑁆𑀞. 𑁨.𑁨.𑀕𑀼𑀡𑀚𑀸𑀢𑀓𑀯𑀡𑁆𑀡𑀦𑀸) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀢𑀺𑀭𑀻𑀝𑀯𑀘𑁆𑀙𑀓𑀼𑀫𑀸𑀭𑁄𑀢𑀺 𑀓𑀢𑀦𑀸𑀫𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀮𑀓𑀺𑀭𑀺𑀬𑀸𑀬 𑀲𑀁𑀯𑀺𑀕𑁆𑀕𑀳𑀤𑀬𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀳𑀼𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀫𑀺𑀁 𑀢𑀢𑁆𑀣 𑀯𑀲𑀦𑁆𑀢𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺, 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀬𑀼𑀤𑁆𑀥𑁂 𑀧𑀭𑀸𑀚𑀺𑀢𑁄 𑀫𑀭𑀡𑀪𑀬𑀪𑀻𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀏𑀓𑁂𑀦 𑀧𑀲𑁆𑀲𑁂𑀦 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀺𑀭𑀻𑀝𑀯𑀘𑁆𑀙𑀲𑁆𑀲 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑀓𑀸𑀮𑁂 𑀢𑀲𑁆𑀲 𑀅𑀲𑁆𑀲𑀫𑀧𑀤𑀁 𑀧𑀸𑀯𑀺𑀲𑀺. 𑀲𑁄 ‘‘𑀢𑀸𑀧𑀲𑀸𑀦𑀁 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀳𑀢𑁆𑀣𑀺𑀢𑁄 𑀑𑀢𑀭𑀺𑀢𑁆𑀯𑀸 𑀯𑀸𑀢𑀸𑀢𑀧𑁂𑀦 𑀓𑀺𑀮𑀦𑁆𑀢𑁄 𑀧𑀺𑀧𑀸𑀲𑀺𑀢𑁄 𑀧𑀸𑀦𑀻𑀬𑀖𑀝𑀁 𑀑𑀮𑁄𑀓𑁂𑀦𑁆𑀢𑁄 𑀓𑀢𑁆𑀣𑀘𑀺 𑀅𑀤𑀺𑀲𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀉𑀤𑀧𑀸𑀦𑀁 𑀅𑀤𑁆𑀤𑀲. 𑀉𑀤𑀓𑀉𑀲𑁆𑀲𑀺𑀜𑁆𑀘𑀦𑀢𑁆𑀣𑀸𑀬 𑀧𑀦 𑀭𑀚𑁆𑀚𑀼𑀖𑀝𑀁 𑀅𑀤𑀺𑀲𑁆𑀯𑀸 𑀧𑀺𑀧𑀸𑀲𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀢𑁆𑀣𑀺𑀲𑁆𑀲 𑀓𑀼𑀘𑁆𑀙𑀺𑀬𑀁 𑀩𑀤𑁆𑀥𑀬𑁄𑀢𑁆𑀢𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀁 𑀉𑀤𑀧𑀸𑀦𑀢𑀝𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂 𑀬𑁄𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀬𑁄𑀢𑁆𑀢𑁂𑀦 𑀉𑀤𑀧𑀸𑀦𑀁 𑀑𑀢𑀭𑀺𑀢𑁆𑀯𑀸 𑀬𑁄𑀢𑁆𑀢𑁂 𑀅𑀧𑀸𑀧𑀼𑀡𑀦𑁆𑀢𑁂 𑀉𑀢𑁆𑀢𑀭𑀺𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑀁 𑀬𑁄𑀢𑁆𑀢𑀓𑁄𑀝𑀺𑀬𑀸 𑀲𑀗𑁆𑀖𑀸𑀝𑁂𑀢𑁆𑀯𑀸 𑀧𑀼𑀦 𑀑𑀢𑀭𑀺, 𑀢𑀣𑀸𑀧𑀺 𑀦𑀧𑁆𑀧𑀳𑁄𑀲𑀺𑀬𑁂𑀯. 𑀲𑁄 𑀅𑀕𑁆𑀕𑀧𑀸𑀤𑁂𑀳𑀺 ¶ 𑀉𑀤𑀓𑀁 𑀨𑀼𑀲𑀺𑀢𑁆𑀯𑀸 𑀅𑀢𑀺𑀧𑀺𑀧𑀸𑀲𑀺𑀢𑁄 ‘‘𑀧𑀺𑀧𑀸𑀲𑀁 𑀯𑀺𑀦𑁄𑀤𑁂𑀢𑁆𑀯𑀸 𑀫𑀭𑀡𑀫𑁆𑀧𑀺 𑀲𑀼𑀫𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀤𑀧𑀸𑀦𑁂 𑀧𑀢𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀧𑀺𑀯𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀳𑀢𑁆𑀣𑀻𑀧𑀺 𑀲𑀼𑀲𑀺𑀓𑁆𑀔𑀺𑀢𑀢𑁆𑀢𑀸 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑁂 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 ‘‘𑀭𑀸𑀚𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀯𑀫𑁆𑀫𑀺𑀢𑀳𑀢𑁆𑀣𑀻𑀬𑁂𑀯 𑀧𑀦 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀲𑁄 𑀳𑀢𑁆𑀣𑀺𑀲𑀫𑀻𑀧𑀁 𑀉𑀧𑀲𑀗𑁆𑀓𑀫𑀺. 𑀳𑀢𑁆𑀣𑀻𑀧𑀺 𑀢𑀲𑁆𑀲 𑀉𑀧𑀲𑀗𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀤𑀧𑀸𑀦𑀢𑀝𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚𑀸’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀭𑀸𑀚𑀸𑀦𑀁 𑀉𑀢𑁆𑀢𑀸𑀭𑁂𑀢𑁆𑀯𑀸 𑀓𑀸𑀬𑀫𑀲𑁆𑀲 𑀲𑀫𑁆𑀩𑀸𑀳𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀨𑀮𑀸𑀨𑀮𑀸𑀦𑀺 𑀔𑀸𑀤𑀸𑀧𑁂𑀢𑁆𑀯𑀸 ¶ 𑀳𑀢𑁆𑀣𑀺𑀲𑁆𑀲 𑀲𑀦𑁆𑀦𑀸𑀳𑀁 𑀫𑁄𑀘𑁂𑀲𑀺. 𑀭𑀸𑀚𑀸 𑀤𑁆𑀯𑀻𑀳𑀢𑀻𑀳𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀫𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀭𑀸𑀚𑀩𑀮𑀓𑀸𑀬𑁄 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑁄. 𑀭𑀸𑀚𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀭𑀺𑀯𑀸𑀭𑁂𑀲𑀺, 𑀭𑀸𑀚𑀸 𑀦𑀕𑀭𑀁 𑀧𑀸𑀯𑀺𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 ¶ 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀁 𑀘𑀭𑀫𑀸𑀦𑁄 𑀭𑀸𑀚𑀤𑁆𑀯𑀸𑀭𑀁 𑀕𑀢𑁄. 𑀭𑀸𑀚𑀸 𑀫𑀳𑀸𑀯𑀸𑀢𑀧𑀸𑀦𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑀬𑀫𑀸𑀦𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀢𑀮𑀁 𑀆𑀭𑁄𑀧𑁂𑀢𑁆𑀯𑀸 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀁 𑀆𑀳𑀸𑀭𑀁 𑀪𑁄𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀢𑀢𑁆𑀣𑀲𑁆𑀲 𑀘𑀗𑁆𑀓𑀫𑀦𑀸𑀤𑀺𑀧𑀭𑀺𑀯𑀸𑀭𑀁 𑀯𑀲𑀦𑀝𑁆𑀞𑀸𑀦𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑁂 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑁂𑀬𑁂𑀯 𑀧𑀭𑀺𑀪𑀼𑀜𑁆𑀚𑀺, 𑀫𑀳𑀸𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀅𑀳𑁄𑀲𑀺.

𑀢𑀁 𑀅𑀲𑀳𑀫𑀸𑀦𑀸 𑀅𑀫𑀘𑁆𑀘𑀸 ‘‘𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀏𑀓𑁄𑀧𑀺 𑀬𑁄𑀥𑁄 𑀮𑀪𑀫𑀸𑀦𑁄 𑀓𑀺𑀁 𑀦𑀸𑀫 𑀦 𑀓𑀭𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀉𑀧𑀭𑀸𑀚𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀏𑀓𑀁 𑀢𑀸𑀧𑀲𑀁 𑀅𑀢𑀺𑀯𑀺𑀬 𑀫𑀫𑀸𑀬𑀢𑀺, 𑀓𑀺𑀁 𑀦𑀸𑀫 𑀢𑁂𑀦 𑀢𑀲𑁆𑀫𑀺𑀁 𑀤𑀺𑀝𑁆𑀞𑀁, 𑀢𑀼𑀫𑁆𑀳𑁂𑀧𑀺 𑀢𑀸𑀯 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀣𑀸’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁫.

‘‘𑀦𑀬𑀺𑀫𑀲𑁆𑀲 𑀯𑀺𑀚𑁆𑀚𑀸𑀫𑀬𑀫𑀢𑁆𑀣𑀺 𑀓𑀺𑀜𑁆𑀘𑀺, 𑀦 𑀩𑀦𑁆𑀥𑀯𑁄 𑀦𑁄 𑀧𑀦 𑀢𑁂 𑀲𑀳𑀸𑀬𑁄;

𑀅𑀣 𑀓𑁂𑀦 𑀯𑀡𑁆𑀡𑁂𑀦 𑀢𑀺𑀭𑀻𑀝𑀯𑀘𑁆𑀙𑁄, 𑀢𑁂𑀤𑀡𑁆𑀟𑀺𑀓𑁄 𑀪𑀼𑀜𑁆𑀚𑀢𑀺 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺.

𑀢𑀢𑁆𑀣 𑀦𑀬𑀺𑀫𑀲𑁆𑀲 𑀯𑀺𑀚𑁆𑀚𑀸𑀫𑀬𑀫𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀇𑀫𑀲𑁆𑀲 𑀢𑀸𑀧𑀲𑀲𑁆𑀲 𑀯𑀺𑀚𑁆𑀚𑀸𑀫𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀦𑀢𑁆𑀣𑀺. 𑀦 𑀩𑀦𑁆𑀥𑀯𑁄 𑀢𑀺𑀧𑀼𑀢𑁆𑀢𑀩𑀦𑁆𑀥𑀯𑀲𑀺𑀧𑁆𑀧𑀩𑀦𑁆𑀥𑀯𑀕𑁄𑀢𑁆𑀢𑀩𑀦𑁆𑀥𑀯𑀜𑀸𑀢𑀺𑀩𑀦𑁆𑀥𑀯𑁂𑀲𑀼 ¶ 𑀅𑀜𑁆𑀜𑀢𑀭𑁄𑀧𑀺 𑀦 𑀳𑁄𑀢𑀺 ¶ . 𑀦𑁄 𑀧𑀦 𑀢𑁂 𑀲𑀳𑀸𑀬𑁄𑀢𑀺 𑀲𑀳𑀧𑀁𑀲𑀼𑀓𑀻𑀴𑀺𑀓𑁄 𑀲𑀳𑀸𑀬𑀓𑁄𑀧𑀺 𑀢𑁂 𑀦 𑀳𑁄𑀢𑀺. 𑀓𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀢𑀺𑀭𑀻𑀝𑀯𑀘𑁆𑀙𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀢𑁂𑀤𑀡𑁆𑀟𑀺𑀓𑁄𑀢𑀺 𑀓𑀼𑀡𑁆𑀟𑀺𑀓𑀞𑀧𑀦𑀢𑁆𑀣𑀸𑀬 𑀢𑀺𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑁄. 𑀅𑀕𑁆𑀕𑀧𑀺𑀡𑁆𑀟𑀦𑁆𑀢𑀺 𑀭𑀲𑀲𑀫𑁆𑀧𑀦𑁆𑀦𑀁 𑀭𑀸𑀚𑀸𑀭𑀳𑀁 𑀅𑀕𑁆𑀕𑀪𑁄𑀚𑀦𑀁.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀫𑀫 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀬𑀼𑀤𑁆𑀥𑀧𑀭𑀸𑀚𑀺𑀢𑀲𑁆𑀲 𑀤𑁆𑀯𑀻𑀳𑀢𑀻𑀳𑀁 𑀅𑀦𑀸𑀕𑀢𑀪𑀸𑀯𑀁 𑀲𑀭𑀲𑀻’’𑀢𑀺 𑀯𑀢𑁆𑀯𑀸 ‘‘𑀲𑀭𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀤𑀸 𑀫𑀬𑀸 𑀇𑀫𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑀸𑀢 ¶ , 𑀫𑀬𑁆𑀳𑀁 𑀚𑀻𑀯𑀺𑀢𑀤𑀸𑀬𑀓𑁂 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁂 𑀭𑀚𑁆𑀚𑀁 𑀤𑀤𑀦𑁆𑀢𑁄𑀧𑀺 𑀅𑀳𑀁 𑀦𑁂𑀯 𑀏𑀢𑁂𑀦 𑀓𑀢𑀕𑀼𑀡𑀸𑀦𑀼𑀭𑀽𑀧𑀁 𑀓𑀸𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀯𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁨𑁬.

‘‘𑀆𑀧𑀸𑀲𑀼 𑀫𑁂 𑀬𑀼𑀤𑁆𑀥𑀧𑀭𑀸𑀚𑀺𑀢𑀲𑁆𑀲, 𑀏𑀓𑀲𑁆𑀲 𑀓𑀢𑁆𑀯𑀸 𑀯𑀺𑀯𑀦𑀲𑁆𑀫𑀺 𑀖𑁄𑀭𑁂;

𑀧𑀲𑀸𑀭𑀬𑀻 𑀓𑀺𑀘𑁆𑀙𑀕𑀢𑀲𑁆𑀲 𑀧𑀸𑀡𑀺𑀁, 𑀢𑁂𑀦𑀽𑀤𑀢𑀸𑀭𑀺𑀁 𑀤𑀼𑀔𑀲𑀫𑁆𑀧𑀭𑁂𑀢𑁄.

𑁨𑁭.

‘‘𑀏𑀢𑀲𑁆𑀲 𑀓𑀺𑀘𑁆𑀘𑁂𑀦 𑀇𑀥𑀸𑀦𑀼𑀧𑀢𑁆𑀢𑁄, 𑀯𑁂𑀲𑀸𑀬𑀺𑀦𑁄 𑀯𑀺𑀲𑀬𑀸 𑀚𑀻𑀯𑀮𑁄𑀓𑁂;

𑀮𑀸𑀪𑀸𑀭𑀳𑁄 𑀢𑀸𑀢 𑀢𑀺𑀭𑀻𑀝𑀯𑀘𑁆𑀙𑁄, 𑀤𑁂𑀣𑀲𑁆𑀲 𑀪𑁄𑀕𑀁 𑀬𑀚𑀣𑀜𑁆𑀘 𑀬𑀜𑁆𑀜’’𑀦𑁆𑀢𑀺.

𑀢𑀢𑁆𑀣 𑀆𑀧𑀸𑀲𑀽𑀢𑀺 𑀆𑀧𑀤𑀸𑀲𑀼. 𑀏𑀓𑀲𑁆𑀲𑀸𑀢𑀺 𑀅𑀤𑀼𑀢𑀺𑀬𑀲𑁆𑀲. 𑀓𑀢𑁆𑀯𑀸𑀢𑀺 𑀅𑀦𑀼𑀓𑀫𑁆𑀧𑀁 𑀓𑀭𑀺𑀢𑁆𑀯𑀸 𑀧𑁂𑀫𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀯𑀺𑀯𑀦𑀲𑁆𑀫𑀺𑀦𑁆𑀢𑀺 𑀧𑀸𑀦𑀻𑀬𑀭𑀳𑀺𑀢𑁂 𑀅𑀭𑀜𑁆𑀜𑁂. 𑀖𑁄𑀭𑁂𑀢𑀺 𑀤𑀸𑀭𑀼𑀡𑁂. 𑀧𑀲𑀸𑀭𑀬𑀻 𑀓𑀺𑀘𑁆𑀙𑀕𑀢𑀲𑁆𑀲 𑀧𑀸𑀡𑀺𑀦𑁆𑀢𑀺 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀓𑀽𑀧𑀁 𑀑𑀢𑀸𑀭𑁂𑀢𑁆𑀯𑀸 𑀤𑀼𑀓𑁆𑀔𑀕𑀢𑀲𑁆𑀲 𑀫𑀬𑁆𑀳𑀁 𑀉𑀢𑁆𑀢𑀸𑀭𑀡𑀢𑁆𑀣𑀸𑀬 𑀯𑀻𑀭𑀺𑀬𑀧𑀝𑀺𑀲𑀁𑀬𑀼𑀢𑁆𑀢𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂𑀦𑀽𑀤𑀢𑀸𑀭𑀺𑀁 𑀤𑀼𑀔𑀲𑀫𑁆𑀧𑀭𑁂𑀢𑁄𑀢𑀺 𑀢𑁂𑀦 𑀓𑀸𑀭𑀡𑁂𑀦𑀫𑁆𑀳𑀺 𑀤𑀼𑀓𑁆𑀔𑀧𑀭𑀺𑀯𑀸𑀭𑀺𑀢𑁄𑀧𑀺 𑀢𑀫𑁆𑀳𑀸 𑀓𑀽𑀧𑀸 𑀉𑀢𑁆𑀢𑀺𑀡𑁆𑀡𑁄.

𑀏𑀢𑀲𑁆𑀲 𑀓𑀺𑀘𑁆𑀘𑁂𑀦 𑀇𑀥𑀸𑀦𑀼𑀧𑀢𑁆𑀢𑁄𑀢𑀺 𑀅𑀳𑀁 𑀏𑀢𑀲𑁆𑀲 𑀢𑀸𑀧𑀲𑀲𑁆𑀲 𑀓𑀺𑀘𑁆𑀘𑁂𑀦, 𑀏𑀢𑁂𑀦 𑀓𑀢𑀲𑁆𑀲 𑀓𑀺𑀘𑁆𑀘𑀲𑁆𑀲𑀸𑀦𑀼𑀪𑀸𑀯𑁂𑀦 𑀇𑀥𑀸𑀦𑀼𑀧𑁆𑀧𑀢𑁆𑀢𑁄 ¶ . 𑀯𑁂𑀲𑀸𑀬𑀺𑀦𑁄 𑀯𑀺𑀲𑀬𑀸𑀢𑀺 𑀯𑁂𑀲𑀸𑀬𑀻 𑀯𑀼𑀘𑁆𑀘𑀢𑀺 𑀬𑀫𑁄, 𑀢𑀲𑁆𑀲 𑀯𑀺𑀲𑀬𑀸. 𑀚𑀻𑀯𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂. 𑀅𑀳𑀜𑁆𑀳𑀺 𑀇𑀫𑀲𑁆𑀫𑀺𑀁 𑀚𑀻𑀯𑀮𑁄𑀓𑁂 𑀞𑀺𑀢𑁄 𑀬𑀫𑀯𑀺𑀲𑀬𑀁 𑀫𑀘𑁆𑀘𑀼𑀯𑀺𑀲𑀬𑀁 𑀧𑀭𑀮𑁄𑀓𑀁 𑀕𑀢𑁄 𑀦𑀸𑀫 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀲𑁆𑀲 𑀓𑀸𑀭𑀡𑀸 𑀢𑀢𑁄 𑀧𑀼𑀦 𑀇𑀥𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀸𑀪𑀸𑀭𑀳𑁄𑀢𑀺 𑀮𑀸𑀪𑀁 𑀅𑀭𑀳𑁄 𑀘𑀢𑀼𑀧𑀘𑁆𑀘𑀬𑀮𑀸𑀪𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄. 𑀤𑁂𑀣𑀲𑁆𑀲 𑀪𑁄𑀕𑀦𑁆𑀢𑀺 𑀏𑀢𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀘𑀢𑀼𑀧𑀘𑁆𑀘𑀬𑀲𑀫𑀡𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑀁 𑀪𑁄𑀕𑀁 𑀏𑀢𑀲𑁆𑀲 𑀤𑁂𑀣. 𑀬𑀚𑀣𑀜𑁆𑀘 𑀬𑀜𑁆𑀜𑀦𑁆𑀢𑀺 𑀢𑁆𑀯𑀜𑁆𑀘 𑀅𑀫𑀘𑁆𑀘𑀸 𑀘 𑀦𑀸𑀕𑀭𑀸 𑀘𑀸𑀢𑀺 𑀲𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀏𑀢𑀲𑁆𑀲 𑀪𑁄𑀕𑀜𑁆𑀘 𑀤𑁂𑀣, 𑀬𑀜𑁆𑀜𑀜𑁆𑀘 𑀬𑀚𑀣. 𑀢𑀲𑁆𑀲 𑀳𑀺 𑀤𑀻𑀬𑀫𑀸𑀦𑁄 𑀤𑁂𑀬𑁆𑀬𑀥𑀫𑁆𑀫𑁄 ¶ 𑀢𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀢𑁆𑀢𑀸 𑀪𑁄𑀕𑁄 𑀳𑁄𑀢𑀺, 𑀇𑀢𑀭𑁂𑀲𑀁 𑀤𑀸𑀦𑀬𑀜𑁆𑀜𑀢𑁆𑀢𑀸 𑀬𑀜𑁆𑀜𑁄. 𑀢𑁂𑀦𑀸𑀳 ‘‘𑀤𑁂𑀣𑀲𑁆𑀲 𑀪𑁄𑀕𑀁 𑀬𑀚𑀣𑀜𑁆𑀘 𑀬𑀜𑁆𑀜’’𑀦𑁆𑀢𑀺.

𑀏𑀯𑀁 ¶ 𑀭𑀜𑁆𑀜𑀸 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁂𑀦 𑀯𑀺𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀧𑀓𑀸𑀲𑀺𑀢𑁂 𑀢𑀲𑁆𑀲 𑀕𑀼𑀡𑁄 𑀲𑀩𑁆𑀩𑀢𑁆𑀣𑀫𑁂𑀯 𑀧𑀸𑀓𑀝𑁄 𑀚𑀸𑀢𑁄, 𑀅𑀢𑀺𑀭𑁂𑀓𑀢𑀭𑁄 𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀺. 𑀢𑀢𑁄 𑀧𑀝𑁆𑀞𑀸𑀬 𑀉𑀧𑀭𑀸𑀚𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀓𑀺𑀜𑁆𑀘𑀺 𑀭𑀸𑀚𑀸𑀦𑀁 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ‘‘𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀉𑀧𑀓𑀸𑀭𑀯𑀲𑁂𑀦 𑀓𑀭𑀺𑀁𑀲𑀽’’𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀭𑀻𑀝𑀯𑀘𑁆𑀙𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁬𑁦] 𑁧𑁦. 𑀤𑀽𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁆𑀲𑀢𑁆𑀣𑀸 𑀤𑀽𑀭𑀫𑀸𑀬𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀦𑀯𑀓𑀦𑀺𑀧𑀸𑀢𑁂 𑀘𑀓𑁆𑀓𑀯𑀸𑀓𑀚𑀸𑀢𑀓𑁂 (𑀚𑀸. 𑁧.𑁯.𑁬𑁯 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀢𑁆𑀯𑀸 ¶ ‘‘𑀦 𑀔𑁄, 𑀪𑀺𑀓𑁆𑀔𑀼, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀮𑁄𑀮𑁄, 𑀮𑁄𑀮𑁆𑀬𑀓𑀸𑀭𑀡𑁂𑀦𑁂𑀯 𑀧𑀦 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀦𑀁 𑀮𑀪𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀪𑁄𑀚𑀦𑀲𑀼𑀤𑁆𑀥𑀺𑀓𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀪𑁄𑀚𑀦𑀲𑀼𑀤𑁆𑀥𑀺𑀓𑀭𑀸𑀚𑀸𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀲𑁄 𑀓𑀺𑀭 𑀢𑀣𑀸𑀭𑀽𑀧𑁂𑀦 𑀯𑀺𑀥𑀸𑀦𑁂𑀦 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀬𑀣𑀸𑀲𑁆𑀲 𑀏𑀓𑀺𑀲𑁆𑀲𑀸 𑀪𑀢𑁆𑀢𑀧𑀸𑀢𑀺𑀬𑀸 𑀲𑀢𑀲𑀳𑀲𑁆𑀲𑀁 𑀯𑀬𑀁 𑀕𑀘𑁆𑀙𑀢𑀺. 𑀪𑀼𑀜𑁆𑀚𑀦𑁆𑀢𑁄 𑀧𑀦 𑀅𑀦𑁆𑀢𑁄𑀕𑁂𑀳𑁂 𑀦 𑀪𑀼𑀜𑁆𑀚𑀢𑀺, 𑀅𑀢𑁆𑀢𑀦𑁄 𑀪𑁄𑀚𑀦𑀯𑀺𑀥𑀸𑀦𑀁 𑀑𑀮𑁄𑀓𑁂𑀦𑁆𑀢𑀁 𑀫𑀳𑀸𑀚𑀦𑀁 𑀧𑀼𑀜𑁆𑀜𑀁 𑀓𑀸𑀭𑁂𑀢𑀼𑀓𑀸𑀫𑀢𑀸𑀬 𑀭𑀸𑀚𑀤𑁆𑀯𑀸𑀭𑁂 𑀭𑀢𑀦𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀪𑁄𑀚𑀦𑀯𑁂𑀮𑀸𑀬 𑀢𑀁 𑀅𑀮𑀗𑁆𑀓𑀭𑀸𑀧𑁂𑀢𑁆𑀯𑀸 𑀓𑀜𑁆𑀘𑀦𑀫𑀬𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀢𑁆𑀢𑀺𑀬𑀓𑀜𑁆𑀜𑀸𑀳𑀺 𑀧𑀭𑀺𑀯𑀼𑀢𑁄 ¶ 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀲𑀩𑁆𑀩𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀢𑀺. 𑀅𑀣𑁂𑀓𑁄 𑀮𑁄𑀮𑀧𑀼𑀭𑀺𑀲𑁄 𑀢𑀲𑁆𑀲 𑀪𑁄𑀚𑀦𑀯𑀺𑀥𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 ¶ 𑀳𑀼𑀢𑁆𑀯𑀸 𑀧𑀺𑀧𑀸𑀲𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀕𑀸𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀪𑁄, 𑀅𑀳𑀁 𑀤𑀽𑀢𑁄, 𑀤𑀽𑀢𑁄’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀚𑀦𑀧𑀤𑁂 ‘‘𑀤𑀽𑀢𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀁 𑀦 𑀯𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀫𑀳𑀸𑀚𑀦𑁄 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀯𑀸 𑀑𑀓𑀸𑀲𑀁 𑀅𑀤𑀸𑀲𑀺. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀸𑀢𑀺𑀬𑀸 𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺, 𑀅𑀣𑀲𑁆𑀲 ‘‘𑀲𑀻𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀺𑀕𑀸𑀳𑁄 𑀅𑀲𑀺𑀁 𑀅𑀩𑁆𑀩𑀸𑀳𑁂𑀲𑀺, 𑀭𑀸𑀚𑀸 ‘‘𑀫𑀸 𑀧𑀳𑀭𑀻’’𑀢𑀺 𑀦𑀺𑀯𑀸𑀭𑁂𑀲𑀺, ‘‘𑀫𑀸 𑀪𑀸𑀬𑀺, 𑀪𑀼𑀜𑁆𑀚𑀲𑁆𑀲𑀽’’𑀢𑀺 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 ¶ 𑀘𑀲𑁆𑀲 𑀅𑀢𑁆𑀢𑀦𑁄 𑀧𑀺𑀯𑀦𑀧𑀸𑀦𑀻𑀬𑀜𑁆𑀘𑁂𑀯 𑀢𑀫𑁆𑀩𑀽𑀮𑀜𑁆𑀘 𑀤𑀸𑀧𑁂𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀢𑁆𑀯𑀁 ‘𑀤𑀽𑀢𑁄𑀫𑁆𑀳𑀻’𑀢𑀺 𑀯𑀤𑀲𑀺, 𑀓𑀲𑁆𑀲 𑀤𑀽𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚 𑀅𑀳𑀁 𑀢𑀡𑁆𑀳𑀸𑀤𑀽𑀢𑁄, 𑀉𑀤𑀭𑀤𑀽𑀢𑁄, 𑀢𑀡𑁆𑀳𑀸 𑀫𑀁 𑀆𑀡𑀸𑀧𑁂𑀢𑁆𑀯𑀸 ‘𑀢𑁆𑀯𑀁 𑀕𑀘𑁆𑀙𑀸𑀳𑀻’𑀢𑀺 𑀤𑀽𑀢𑀁 𑀓𑀢𑁆𑀯𑀸 𑀧𑁂𑀲𑁂𑀲𑀻’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁨𑁮.

‘‘𑀬𑀲𑁆𑀲𑀢𑁆𑀣𑀸 𑀤𑀽𑀭𑀫𑀸𑀬𑀦𑁆𑀢𑀺, 𑀅𑀫𑀺𑀢𑁆𑀢𑀫𑀧𑀺 𑀬𑀸𑀘𑀺𑀢𑀼𑀁;

𑀢𑀲𑁆𑀲𑀽𑀤𑀭𑀲𑁆𑀲𑀳𑀁 𑀤𑀽𑀢𑁄, 𑀫𑀸 𑀫𑁂 𑀓𑀼𑀚𑁆𑀛 𑀭𑀣𑁂𑀲𑀪.

𑁨𑁯.

‘‘𑀬𑀲𑁆𑀲 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀯𑀲𑀫𑀸𑀬𑀦𑁆𑀢𑀺 𑀫𑀸𑀡𑀯𑀸;

𑀢𑀲𑁆𑀲𑀽𑀤𑀭𑀲𑁆𑀲𑀳𑀁 𑀤𑀽𑀢𑁄, 𑀫𑀸 𑀫𑁂 𑀓𑀼𑀚𑁆𑀛 𑀭𑀣𑁂𑀲𑀪𑀸’’𑀢𑀺.

𑀢𑀢𑁆𑀣 𑀬𑀲𑁆𑀲𑀢𑁆𑀣𑀸 𑀤𑀽𑀭𑀫𑀸𑀬𑀦𑁆𑀢𑀻𑀢𑀺 𑀬𑀲𑁆𑀲 𑀅𑀢𑁆𑀣𑀸𑀬 𑀇𑀫𑁂 𑀲𑀢𑁆𑀢𑀸 𑀢𑀡𑁆𑀳𑀸𑀯𑀲𑀺𑀓𑀸 𑀳𑀼𑀢𑁆𑀯𑀸 𑀤𑀽𑀭𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀭𑀣𑁂𑀲𑀪𑀸𑀢𑀺 𑀭𑀣𑀬𑁄𑀥𑀚𑁂𑀝𑁆𑀞𑀓.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀘𑁆𑀘𑀫𑁂𑀢𑀁, 𑀇𑀫𑁂 𑀲𑀢𑁆𑀢𑀸 𑀉𑀤𑀭𑀤𑀽𑀢𑀸 𑀢𑀡𑁆𑀳𑀸𑀯𑀲𑁂𑀦 𑀯𑀺𑀘𑀭𑀦𑁆𑀢𑀺, 𑀢𑀡𑁆𑀳𑀸𑀯 𑀇𑀫𑁂 𑀲𑀢𑁆𑀢𑁂 𑀯𑀺𑀘𑀸𑀭𑁂𑀢𑀺, 𑀬𑀸𑀯 𑀫𑀦𑀸𑀧𑀁 𑀯𑀢 𑀇𑀫𑀺𑀦𑀸 𑀓𑀣𑀺𑀢’’𑀦𑁆𑀢𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁦.

‘‘𑀤𑀤𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀭𑁄𑀳𑀺𑀡𑀻𑀦𑀁, 𑀕𑀯𑀁 𑀲𑀳𑀲𑁆𑀲𑀁 𑀲𑀳 𑀧𑀼𑀗𑁆𑀕𑀯𑁂𑀦;

𑀤𑀽𑀢𑁄 𑀳𑀺 𑀤𑀽𑀢𑀲𑁆𑀲 𑀓𑀣𑀁 𑀦 𑀤𑀚𑁆𑀚𑀁, 𑀫𑀬𑀫𑁆𑀧𑀺 𑀢𑀲𑁆𑀲𑁂𑀯 𑀪𑀯𑀸𑀫 𑀤𑀽𑀢𑀸’’𑀢𑀺.

𑀢𑀢𑁆𑀣 ¶ 𑀩𑁆𑀭𑀸𑀳𑁆𑀫𑀡𑀸𑀢𑀺 𑀆𑀮𑀧𑀦𑀫𑀢𑁆𑀢𑀫𑁂𑀢𑀁. 𑀭𑁄𑀳𑀺𑀡𑀻𑀦𑀦𑁆𑀢𑀺 𑀭𑀢𑁆𑀢𑀯𑀡𑁆𑀡𑀸𑀦𑀁. 𑀲𑀳 𑀧𑀼𑀗𑁆𑀕𑀯𑁂𑀦𑀸𑀢𑀺 𑀬𑀽𑀣𑀧𑀭𑀺𑀡𑀸𑀬𑀓𑁂𑀦 𑀉𑀧𑀤𑁆𑀤𑀯𑀭𑀓𑁆𑀔𑀓𑁂𑀦 𑀉𑀲𑀪𑁂𑀦 𑀲𑀤𑁆𑀥𑀺𑀁. 𑀫𑀬𑀫𑁆𑀧𑀻𑀢𑀺 𑀅𑀳𑀜𑁆𑀘 𑀅𑀯𑀲𑁂𑀲𑀸 𑀘 𑀲𑀩𑁆𑀩𑁂 𑀲𑀢𑁆𑀢𑀸 𑀢𑀲𑁆𑀲𑁂𑀯 𑀉𑀤𑀭𑀲𑁆𑀲 𑀤𑀽𑀢𑀸 𑀪𑀯𑀸𑀫, 𑀢𑀲𑁆𑀫𑀸 𑀅𑀳𑀁 𑀉𑀤𑀭𑀤𑀽𑀢𑁄 𑀲𑀫𑀸𑀦𑁄 𑀉𑀤𑀭𑀤𑀽𑀢𑀲𑁆𑀲 𑀢𑀼𑀬𑁆𑀳𑀁 𑀓𑀲𑁆𑀫𑀸 𑀦 ¶ 𑀤𑀚𑁆𑀚𑀦𑁆𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀇𑀫𑀺𑀦𑀸 𑀯𑀢 𑀧𑀼𑀭𑀺𑀲𑁂𑀦 𑀅𑀲𑁆𑀲𑀼𑀢𑀧𑀼𑀩𑁆𑀩𑀁 𑀓𑀸𑀭𑀡𑀁 𑀓𑀣𑀺𑀢’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀮𑁄𑀮𑀪𑀺𑀓𑁆𑀔𑀼 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀮𑁄𑀮𑀧𑀼𑀭𑀺𑀲𑁄 𑀏𑀢𑀭𑀳𑀺 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀪𑁄𑀚𑀦𑀲𑀼𑀤𑁆𑀥𑀺𑀓𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀽𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀲𑀗𑁆𑀓𑀧𑁆𑀧𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀗𑁆𑀓𑀧𑁆𑀧 𑀢𑀺𑀮𑀫𑀼𑀝𑁆𑀞𑀺 𑀘, 𑀫𑀡𑀺 𑀘 𑀲𑀺𑀦𑁆𑀥𑀯𑀸𑀲𑀼𑀓𑀁;

𑀚𑀭𑀽𑀤𑀧𑀸𑀦𑀁 𑀕𑀸𑀫𑀡𑀺, 𑀫𑀦𑁆𑀥𑀸𑀢𑀸 𑀢𑀺𑀭𑀻𑀝𑀤𑀽𑀢𑀦𑁆𑀢𑀺.

𑁨. 𑀧𑀤𑀼𑀫𑀯𑀕𑁆𑀕𑁄

[𑁨𑁬𑁧] 𑁧. 𑀧𑀤𑀼𑀫𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀸 ¶ 𑀓𑁂𑀲𑀸 𑀘 𑀫𑀲𑁆𑀲𑀽 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀩𑁄𑀥𑀺𑀫𑁆𑀳𑀺 𑀫𑀸𑀮𑀸𑀧𑀽𑀚𑀓𑀸𑀭𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀓𑀸𑀮𑀺𑀗𑁆𑀕𑀩𑁄𑀥𑀺𑀚𑀸𑀢𑀓𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑁄 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀭𑁄𑀧𑀺𑀢𑀢𑁆𑀢𑀸 ‘‘𑀆𑀦𑀦𑁆𑀤𑀩𑁄𑀥𑀻’’𑀢𑀺 𑀚𑀸𑀢𑁄. 𑀣𑁂𑀭𑁂𑀦 𑀳𑀺 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀩𑁄𑀥𑀺𑀲𑁆𑀲 𑀭𑁄𑀧𑀺𑀢𑀪𑀸𑀯𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀢𑁆𑀣𑀭𑀺. 𑀅𑀣𑁂𑀓𑀘𑁆𑀘𑁂 𑀚𑀦𑀧𑀤𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 ‘‘𑀆𑀦𑀦𑁆𑀤𑀩𑁄𑀥𑀺𑀫𑁆𑀳𑀺 𑀫𑀸𑀮𑀸𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀚𑁂𑀢𑀯𑀦𑀁 ¶ 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑁆𑀧𑀮𑀯𑀻𑀣𑀺𑀁 𑀕𑀦𑁆𑀢𑁆𑀯𑀸 𑀫𑀸𑀮𑀁 𑀅𑀮𑀪𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀫𑀬𑀁 ‘𑀩𑁄𑀥𑀺𑀫𑁆𑀳𑀺 𑀫𑀸𑀮𑀸𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀉𑀧𑁆𑀧𑀮𑀯𑀻𑀣𑀺𑀁 𑀕𑀦𑁆𑀢𑁆𑀯𑀸 𑀏𑀓𑀫𑀸𑀮𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸’’𑀢𑀺. 𑀣𑁂𑀭𑁄 ‘‘𑀅𑀳𑀁 𑀯𑁄, 𑀆𑀯𑀼𑀲𑁄, 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀮𑀯𑀻𑀣𑀺𑀁 𑀕𑀦𑁆𑀢𑁆𑀯𑀸 𑀩𑀳𑀽 𑀦𑀻𑀮𑀼𑀧𑁆𑀧𑀮𑀓𑀮𑀸𑀧𑁂 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀆𑀕𑀫𑁆𑀫 𑀢𑁂𑀲𑀁 𑀤𑀸𑀧𑁂𑀲𑀺, 𑀢𑁂 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑁆𑀲 𑀧𑀽𑀚𑀁 𑀓𑀭𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀚𑀸𑀦𑀧𑀤𑀸 𑀪𑀺𑀓𑁆𑀔𑀽 𑀅𑀧𑁆𑀧𑀧𑀼𑀜𑁆𑀜𑀸 𑀉𑀧𑁆𑀧𑀮𑀯𑀻𑀣𑀺𑀁 𑀕𑀦𑁆𑀢𑁆𑀯𑀸 𑀫𑀸𑀮𑀁 𑀦 𑀮𑀪𑀺𑀁𑀲𑀼, 𑀣𑁂𑀭𑁄 𑀧𑀦 𑀕𑀦𑁆𑀢𑁆𑀯𑀸𑀯 𑀆𑀳𑀭𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 ¶ 𑀯𑀢𑁆𑀢𑀼𑀙𑁂𑀓𑀸 𑀓𑀣𑀸𑀓𑀼𑀲𑀮𑀸 𑀫𑀸𑀮𑀁 𑀮𑀪𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 𑀮𑀪𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀦𑁆𑀢𑁄𑀦𑀕𑀭𑁂 𑀘 𑀏𑀓𑀲𑁆𑀫𑀺𑀁 𑀲𑀭𑁂 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀦𑁆𑀢𑀺. 𑀏𑀓𑁄 𑀙𑀺𑀦𑁆𑀦𑀦𑀸𑀲𑁄 𑀧𑀼𑀭𑀺𑀲𑁄 𑀢𑀁 𑀲𑀭𑀁 𑀭𑀓𑁆𑀔𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀬𑀁 𑀉𑀲𑁆𑀲𑀯𑁂 𑀖𑀼𑀝𑁆𑀞𑁂 𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀉𑀲𑁆𑀲𑀯𑀁 𑀓𑀻𑀴𑀺𑀢𑀼𑀓𑀸𑀫𑀸 𑀢𑀬𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 ‘‘𑀦𑀸𑀲𑀘𑁆𑀙𑀺𑀦𑁆𑀦𑀲𑁆𑀲 𑀅𑀪𑀽𑀢𑁂𑀦 𑀯𑀡𑁆𑀡𑀁 𑀯𑀢𑁆𑀯𑀸 𑀫𑀸𑀮𑀁 𑀬𑀸𑀘𑀺𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀲 𑀧𑀤𑀼𑀫𑀸𑀦𑀺 𑀪𑀜𑁆𑀚𑀦𑀓𑀸𑀮𑁂 𑀲𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼.

𑀢𑁂𑀲𑀼 𑀏𑀓𑁄 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁧.

‘‘𑀬𑀣𑀸 ¶ 𑀓𑁂𑀲𑀸 𑀘 𑀫𑀲𑁆𑀲𑀽 𑀘, 𑀙𑀺𑀦𑁆𑀦𑀁 𑀙𑀺𑀦𑁆𑀦𑀁 𑀯𑀺𑀭𑀽𑀳𑀢𑀺;

𑀏𑀯𑀁 𑀭𑀼𑀳𑀢𑀼 𑀢𑁂 𑀦𑀸𑀲𑀸, 𑀧𑀤𑀼𑀫𑀁 𑀤𑁂𑀳𑀺 𑀬𑀸𑀘𑀺𑀢𑁄’’𑀢𑀺.

𑀲𑁄 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀧𑀤𑀼𑀫𑀁 𑀦 𑀅𑀤𑀸𑀲𑀺.

𑀅𑀣𑀲𑁆𑀲 𑀤𑀼𑀢𑀺𑀬𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁨.

‘‘𑀬𑀣𑀸 𑀲𑀸𑀭𑀤𑀺𑀓𑀁 𑀩𑀻𑀚𑀁, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀏𑀯𑀁 𑀭𑀼𑀳𑀢𑀼 𑀢𑁂 𑀦𑀸𑀲𑀸, 𑀧𑀤𑀼𑀫𑀁 𑀤𑁂𑀳𑀺 𑀬𑀸𑀘𑀺𑀢𑁄’’𑀢𑀺.

𑀢𑀢𑁆𑀣 𑀲𑀸𑀭𑀤𑀺𑀓𑀦𑁆𑀢𑀺 𑀲𑀭𑀤𑀲𑀫𑀬𑁂 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀭𑀲𑀫𑁆𑀧𑀦𑁆𑀦𑀁 𑀩𑀻𑀚𑀁. 𑀲𑁄 𑀢𑀲𑁆𑀲𑀧𑀺 𑀓𑀼𑀚𑁆𑀛𑀺𑀢𑁆𑀯𑀸 𑀧𑀤𑀼𑀫𑀁 𑀦 𑀅𑀤𑀸𑀲𑀺.

𑀅𑀣𑀲𑁆𑀲 𑀢𑀢𑀺𑀬𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁩.

‘‘𑀉𑀪𑁄𑀧𑀺 ¶ 𑀧𑀮𑀧𑀦𑁆𑀢𑁂𑀢𑁂, 𑀅𑀧𑀺 𑀧𑀤𑁆𑀫𑀸𑀦𑀺 𑀤𑀲𑁆𑀲𑀢𑀺;

𑀯𑀚𑁆𑀚𑀼𑀁 𑀯𑀸 𑀢𑁂 𑀦 𑀯𑀸 𑀯𑀚𑁆𑀚𑀼𑀁, 𑀦𑀢𑁆𑀣𑀺 𑀦𑀸𑀲𑀸𑀬 𑀭𑀽𑀳𑀦𑀸;

𑀤𑁂𑀳𑀺 𑀲𑀫𑁆𑀫 𑀧𑀤𑀼𑀫𑀸𑀦𑀺, 𑀅𑀳𑀁 𑀬𑀸𑀘𑀸𑀫𑀺 𑀬𑀸𑀘𑀺𑀢𑁄’’𑀢𑀺.

𑀢𑀢𑁆𑀣 𑀉𑀪𑁄𑀧𑀺 𑀧𑀮𑀧𑀦𑁆𑀢𑁂𑀢𑁂𑀢𑀺 𑀏𑀢𑁂 𑀤𑁆𑀯𑁂𑀧𑀺 𑀫𑀼𑀲𑀸 𑀯𑀤𑀦𑁆𑀢𑀺. 𑀅𑀧𑀺 𑀧𑀤𑁆𑀫𑀸𑀦𑀻𑀢𑀺 ‘‘𑀅𑀧𑀺 𑀦𑀸𑀫 𑀦𑁄 𑀧𑀤𑀼𑀫𑀸𑀦𑀺 𑀤𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺. 𑀯𑀚𑁆𑀚𑀼𑀁 𑀯𑀸 ¶ 𑀢𑁂 𑀦 𑀯𑀸 𑀯𑀚𑁆𑀚𑀼𑀦𑁆𑀢𑀺 ‘‘𑀢𑀯 𑀦𑀸𑀲𑀸 𑀭𑀼𑀳𑀢𑀽’’𑀢𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 𑀯𑀸 𑀦 𑀯𑀸 𑀯𑀤𑁂𑀬𑁆𑀬𑀼𑀁, 𑀏𑀢𑁂𑀲𑀁 𑀯𑀘𑀦𑀁 𑀅𑀧𑁆𑀧𑀫𑀸𑀡𑀁, 𑀲𑀩𑁆𑀩𑀢𑁆𑀣𑀸𑀧𑀺 𑀦𑀢𑁆𑀣𑀺 𑀦𑀸𑀲𑀸𑀬 𑀭𑀼𑀳𑀦𑀸, 𑀅𑀳𑀁 𑀧𑀦 𑀢𑁂 𑀦𑀸𑀲𑀁 𑀧𑀝𑀺𑀘𑁆𑀘 𑀦 𑀓𑀺𑀜𑁆𑀘𑀺 𑀯𑀤𑀸𑀫𑀺, 𑀓𑁂𑀯𑀮𑀁 𑀬𑀸𑀘𑀸𑀫𑀺, 𑀢𑀲𑁆𑀲 𑀫𑁂 𑀤𑁂𑀳𑀺, 𑀲𑀫𑁆𑀫, 𑀧𑀤𑀼𑀫𑀸𑀦𑀺 𑀬𑀸𑀘𑀺𑀢𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀤𑀼𑀫𑀲𑀭𑀕𑁄𑀧𑀓𑁄 ‘‘𑀇𑀫𑁂𑀳𑀺 𑀤𑁆𑀯𑀻𑀳𑀺 𑀫𑀼𑀲𑀸𑀯𑀸𑀤𑁄 𑀓𑀣𑀺𑀢𑁄, 𑀢𑀼𑀫𑁆𑀳𑁂𑀳𑀺 𑀲𑀪𑀸𑀯𑁄 𑀓𑀣𑀺𑀢𑁄, 𑀢𑀼𑀫𑁆𑀳𑀸𑀓𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀧𑀤𑀼𑀫𑀸𑀦𑀻’’𑀢𑀺 𑀫𑀳𑀦𑁆𑀢𑀁 𑀧𑀤𑀼𑀫𑀓𑀮𑀸𑀧𑀁 𑀆𑀤𑀸𑀬 𑀢𑀲𑁆𑀲 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀤𑀼𑀫𑀲𑀭𑀫𑁂𑀯 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀤𑀼𑀫𑀮𑀸𑀪𑀻 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀤𑀼𑀫𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁬𑁨] 𑁨. 𑀫𑀼𑀤𑀼𑀧𑀸𑀡𑀺𑀚𑀸𑀢𑀓𑀯𑀡𑁆𑀡𑀦𑀸

𑀧𑀸𑀡𑀺 𑀘𑁂 𑀫𑀼𑀤𑀼𑀓𑁄 𑀘𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀆𑀦𑀻𑀢𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼, 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀓𑀺𑀮𑁂𑀲𑀯𑀲𑁂𑀦 𑀕𑀫𑀦𑀢𑁄 𑀅𑀭𑀓𑁆𑀔𑀺𑀬𑀸, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀧𑀺𑀢𑀭𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀞𑀺𑀢𑀸𑀯 𑀧𑀺𑀢𑀭𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀧𑀮𑀸𑀬𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 ¶ 𑀥𑀻𑀢𑀭𑀜𑁆𑀘 𑀪𑀸𑀕𑀺𑀦𑁂𑀬𑁆𑀬𑀜𑁆𑀘 𑀤𑁆𑀯𑁂𑀧𑀺 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀧𑁄𑀲𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 ‘‘𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑁄 𑀭𑀸𑀚𑀸 ¶ 𑀪𑀯𑀺𑀲𑁆𑀲𑀢𑀺, 𑀥𑀻𑀢𑀸𑀧𑀺 𑀫𑁂 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀧𑀭𑀪𑀸𑀕𑁂 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀼𑀦 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 ‘‘𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀥𑀻𑀢𑀭𑀁 𑀆𑀦𑁂𑀲𑁆𑀲𑀸𑀫, 𑀫𑀬𑁆𑀳𑀁 𑀥𑀻𑀢𑀭𑀫𑁆𑀧𑀺 𑀅𑀜𑁆𑀜𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀤𑀲𑁆𑀲𑀸𑀫, 𑀏𑀯𑀁 𑀦𑁄 𑀜𑀸𑀢𑀓𑀸 𑀩𑀳𑀼𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀅𑀫𑀘𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑀅𑀣 𑀭𑀸𑀚𑀸 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀩𑀳𑀺𑀕𑁂𑀳𑀁 𑀤𑀸𑀧𑁂𑀲𑀺, 𑀅𑀦𑁆𑀢𑁄 𑀧𑀯𑁂𑀲𑀦𑀁 𑀦𑀺𑀯𑀸𑀭𑁂𑀲𑀺. 𑀢𑁂 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀓𑀼𑀫𑀸𑀭𑁄 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀭𑀸𑀚𑀥𑀻𑀢𑀭𑀁 𑀩𑀳𑀺 𑀦𑀻𑀳𑀭𑀸𑀧𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀉𑀧𑀸𑀬𑁄’’𑀢𑀺 𑀥𑀸𑀢𑀺𑀬𑀸 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀓𑀺𑀁, 𑀅𑀬𑁆𑀬𑀧𑀼𑀢𑁆𑀢, 𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀫𑁆𑀫, 𑀓𑀣𑀁 𑀦𑀼 𑀔𑁄 𑀭𑀸𑀚𑀥𑀻𑀢𑀭𑀁 𑀩𑀳𑀺 𑀓𑀸𑀢𑀼𑀁 𑀑𑀓𑀸𑀲𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀆𑀳. ‘‘𑀭𑀸𑀚𑀥𑀻𑀢𑀸𑀬 𑀲𑀤𑁆𑀥𑀺𑀁 𑀓𑀣𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀅𑀫𑁆𑀫𑀸’’𑀢𑀺. 𑀲𑀸 𑀕𑀦𑁆𑀢𑁆𑀯𑀸 ‘‘𑀏𑀳𑀺, 𑀅𑀫𑁆𑀫, 𑀲𑀻𑀲𑁂 𑀢𑁂 𑀊𑀓𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀦𑀻𑀘𑀧𑀻𑀞𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀁 𑀉𑀘𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸 𑀲𑀻𑀲𑀁 𑀅𑀢𑁆𑀢𑀦𑁄 𑀊𑀭𑀽𑀲𑀼 𑀞𑀧𑁂𑀢𑁆𑀯𑀸 𑀊𑀓𑀸 𑀕𑀡𑁆𑀳𑀬𑀫𑀸𑀦𑀸 𑀭𑀸𑀚𑀥𑀻𑀢𑀸𑀬 𑀲𑀻𑀲𑀁 𑀦𑀔𑁂𑀳𑀺 𑀯𑀺𑀚𑁆𑀛𑀺 ¶ . 𑀭𑀸𑀚𑀥𑀻𑀢𑀸 ‘‘𑀦𑀸𑀬𑀁 𑀅𑀢𑁆𑀢𑀦𑁄 𑀦𑀔𑁂𑀳𑀺 𑀯𑀺𑀚𑁆𑀛𑀢𑀺, 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑀲𑁆𑀲 𑀫𑁂 𑀓𑀼𑀫𑀸𑀭𑀲𑁆𑀲 𑀦𑀔𑁂𑀳𑀺 𑀯𑀺𑀚𑁆𑀛𑀢𑀻’’𑀢𑀺 𑀜𑀢𑁆𑀯𑀸 ‘‘𑀅𑀫𑁆𑀫, 𑀢𑁆𑀯𑀁 𑀓𑀼𑀫𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀫𑁆𑀫𑀸’’𑀢𑀺. ‘‘𑀓𑀺𑀁 𑀢𑁂𑀦 𑀲𑀸𑀲𑀦𑀁 𑀓𑀣𑀺𑀢’’𑀦𑁆𑀢𑀺? ‘‘𑀢𑀯 𑀩𑀳𑀺𑀓𑀭𑀡𑀽𑀧𑀸𑀬𑀁 𑀧𑀼𑀘𑁆𑀙𑀢𑀺, 𑀅𑀫𑁆𑀫𑀸’’𑀢𑀺. 𑀭𑀸𑀚𑀥𑀻𑀢𑀸 ‘‘𑀧𑀡𑁆𑀟𑀺𑀢𑁄 𑀳𑁄𑀦𑁆𑀢𑁄 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀧𑀞𑀫𑀁 𑀕𑀸𑀣𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀫𑁆𑀫, 𑀇𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀓𑀣𑁂𑀳𑀻’’𑀢𑀺 𑀆𑀳.

𑁩𑁪.

‘‘𑀧𑀸𑀡𑀺 𑀘𑁂 𑀫𑀼𑀤𑀼𑀓𑁄 𑀘𑀲𑁆𑀲, 𑀦𑀸𑀕𑁄 𑀘𑀲𑁆𑀲 𑀲𑀼𑀓𑀸𑀭𑀺𑀢𑁄;

𑀅𑀦𑁆𑀥𑀓𑀸𑀭𑁄 𑀘 𑀯𑀲𑁆𑀲𑁂𑀬𑁆𑀬, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸’’𑀢𑀺.

𑀲𑀸 𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀫, 𑀭𑀸𑀚𑀥𑀻𑀢𑀸 𑀓𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑁆𑀬𑀧𑀼𑀢𑁆𑀢, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀇𑀫𑀁 𑀕𑀸𑀣𑀁 ¶ 𑀧𑀳𑀺𑀡𑀻’’𑀢𑀺 𑀢𑀁 𑀕𑀸𑀣𑀁 𑀉𑀤𑀸𑀳𑀸𑀲𑀺. 𑀓𑀼𑀫𑀸𑀭𑁄 𑀘 𑀢𑀲𑁆𑀲𑀢𑁆𑀣𑀁 𑀜𑀢𑁆𑀯𑀸 ‘‘𑀕𑀘𑁆𑀙, 𑀅𑀫𑁆𑀫𑀸’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺.

𑀕𑀸𑀣𑀸𑀬𑀢𑁆𑀣𑁄 𑁋 𑀲𑀘𑁂 𑀢𑁂 𑀏𑀓𑀺𑀲𑁆𑀲𑀸 𑀘𑀽𑀴𑀼𑀧𑀝𑁆𑀞𑀸𑀓𑀸𑀬 𑀫𑀫 𑀳𑀢𑁆𑀣𑁄 𑀯𑀺𑀬 𑀳𑀢𑁆𑀣𑁄 𑀫𑀼𑀤𑀼 𑀅𑀲𑁆𑀲, 𑀬𑀤𑀺 𑀘 𑀢𑁂 𑀆𑀦𑁂𑀜𑁆𑀚𑀓𑀸𑀭𑀡𑀁 𑀲𑀼𑀓𑀸𑀭𑀺𑀢𑁄 𑀏𑀓𑁄 𑀳𑀢𑁆𑀣𑀻 𑀅𑀲𑁆𑀲, 𑀬𑀤𑀺 𑀘 𑀢𑀁 𑀤𑀺𑀯𑀲𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀢𑀺𑀯𑀺𑀬 𑀩𑀳𑀮𑁄 𑀅𑀦𑁆𑀥𑀓𑀸𑀭𑁄 𑀅𑀲𑁆𑀲, 𑀤𑁂𑀯𑁄 𑀘 𑀯𑀲𑁆𑀲𑁂𑀬𑁆𑀬. 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸𑀢𑀺 ¶ 𑀢𑀸𑀤𑀺𑀲𑁂 𑀓𑀸𑀮𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀆𑀕𑀫𑁆𑀫 𑀏𑀓𑀁𑀲𑁂𑀦 𑀢𑁂 𑀫𑀦𑁄𑀭𑀣𑀲𑁆𑀲 𑀫𑀢𑁆𑀣𑀓𑀕𑀫𑀦𑀁 𑀲𑀺𑀬𑀸𑀢𑀺.

𑀓𑀼𑀫𑀸𑀭𑁄 𑀏𑀢𑀫𑀢𑁆𑀣𑀁 𑀢𑀣𑀢𑁄 𑀜𑀢𑁆𑀯𑀸 𑀏𑀓𑀁 𑀅𑀪𑀺𑀭𑀽𑀧𑀁 𑀫𑀼𑀤𑀼𑀳𑀢𑁆𑀣𑀁 𑀘𑀽𑀴𑀼𑀧𑀝𑁆𑀞𑀸𑀓𑀁 𑀲𑀚𑁆𑀚𑀁 𑀓𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀕𑁄𑀧𑀓𑀲𑁆𑀲 𑀮𑀜𑁆𑀚𑀁 𑀤𑀢𑁆𑀯𑀸 𑀳𑀢𑁆𑀣𑀺𑀁 𑀆𑀦𑁂𑀜𑁆𑀚𑀓𑀸𑀭𑀡𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀁 𑀆𑀕𑀫𑁂𑀦𑁆𑀢𑁄 𑀅𑀘𑁆𑀙𑀺.

𑀅𑀣𑁂𑀓𑀲𑁆𑀫𑀺𑀁 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑀤𑀺𑀯𑀲𑁂 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀖𑀦𑀓𑀸𑀴𑀫𑁂𑀖𑁄 𑀯𑀲𑁆𑀲𑀺. 𑀲𑁄 ‘‘𑀅𑀬𑀁 𑀤𑀸𑀦𑀺 𑀭𑀸𑀚𑀥𑀻𑀢𑀸𑀬 𑀯𑀼𑀢𑁆𑀢𑀤𑀺𑀯𑀲𑁄’’𑀢𑀺 𑀯𑀸𑀭𑀡𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀼𑀤𑀼𑀳𑀢𑁆𑀣𑀓𑀁 𑀘𑀽𑀴𑀼𑀧𑀝𑁆𑀞𑀸𑀓𑀁 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀲𑁆𑀲 𑀆𑀓𑀸𑀲𑀗𑁆𑀕𑀡𑀸𑀪𑀺𑀫𑀼𑀔𑁂 𑀞𑀸𑀦𑁂 𑀳𑀢𑁆𑀣𑀺𑀁 𑀫𑀳𑀸𑀪𑀺𑀢𑁆𑀢𑀺𑀬𑀁 𑀅𑀮𑁆𑀮𑀻𑀬𑀸𑀧𑁂𑀢𑁆𑀯𑀸 𑀯𑀸𑀢𑀧𑀸𑀦𑀲𑀫𑀻𑀧𑁂 𑀢𑁂𑀫𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸𑀧𑀺 𑀥𑀻𑀢𑀭𑀁 𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀢𑁆𑀣 𑀲𑀬𑀺𑀢𑀼𑀁 𑀦 𑀤𑁂𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀘𑀽𑀴𑀲𑀬𑀦𑁂 𑀲𑀬𑀸𑀧𑁂𑀢𑀺. 𑀲𑀸𑀧𑀺 ‘‘𑀅𑀚𑁆𑀚 𑀓𑀼𑀫𑀸𑀭𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀯 𑀦𑀺𑀧𑀦𑁆𑀦𑀸 ‘‘𑀢𑀸𑀢 𑀦𑁆𑀳𑀸𑀬𑀺𑀢𑀼𑀓𑀸𑀫𑀸𑀫𑁆𑀳𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀏𑀳𑀺, 𑀅𑀫𑁆𑀫𑀸’’𑀢𑀺 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀯𑀸𑀢𑀧𑀸𑀦𑀲𑀫𑀻𑀧𑀁 𑀦𑁂𑀢𑁆𑀯𑀸 ‘‘𑀦𑁆𑀳𑀸𑀬𑀸𑀳𑀺, 𑀅𑀫𑁆𑀫𑀸’’𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀢𑀧𑀸𑀦𑀲𑁆𑀲 𑀩𑀳𑀺𑀧𑀲𑁆𑀲𑁂 𑀧𑀫𑀼𑀔𑁂 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀦𑁆𑀳𑀸𑀬𑀫𑀸𑀦𑀸𑀯 𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺, 𑀲𑁄 𑀢𑀲𑁆𑀲𑀸 𑀳𑀢𑁆𑀣𑀢𑁄 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀬 𑀳𑀢𑁆𑀣𑁂 𑀧𑀺𑀴𑀦𑁆𑀥𑀺𑀢𑁆𑀯𑀸 ¶ 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀦𑀺𑀲𑁆𑀲𑀸𑀬 𑀧𑀫𑀼𑀔𑁂 𑀞𑀧𑁂𑀲𑀺 ¶ . 𑀲𑀸 𑀢𑀲𑁆𑀲𑀸 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼 𑀳𑀢𑁆𑀣𑁂 𑀞𑀧𑁂𑀲𑀺, 𑀲𑁄 𑀢𑀲𑁆𑀲𑀸 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸 𑀥𑀻𑀢𑀼 𑀳𑀢𑁆𑀣𑀁 𑀫𑀼𑀜𑁆𑀘𑀺, 𑀲𑀸 𑀇𑀢𑀭𑀲𑁆𑀫𑀸𑀧𑀺 𑀳𑀢𑁆𑀣𑀸 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀢𑀲𑁆𑀲𑀸 𑀤𑀼𑀢𑀺𑀬𑀳𑀢𑁆𑀣𑁂 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀺𑀢𑀼 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀭𑀸𑀚𑀸 ‘‘𑀥𑀻𑀢𑀸𑀬𑁂𑀯 𑀫𑁂’’𑀢𑀺 𑀲𑀜𑁆𑀜𑀸𑀬 𑀢𑀁 𑀤𑀸𑀭𑀺𑀓𑀁 𑀦𑁆𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀲𑀺𑀭𑀺𑀕𑀩𑁆𑀪𑁂 𑀲𑀬𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀮𑀜𑁆𑀙𑁂𑀢𑁆𑀯𑀸 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀲𑀬𑀦𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀲𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀤𑀸𑀭𑀺𑀓𑀁 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀲𑁆𑀲𑀸 𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀕𑀢𑀪𑀸𑀯𑀁 𑀓𑀣𑁂𑀲𑀺. 𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑁂𑀦𑀧𑀺 𑀫𑀸𑀢𑀼𑀕𑀸𑀫𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀅𑀭𑀓𑁆𑀔𑀺𑀬𑀸 𑀦𑀸𑀫𑀺𑀢𑁆𑀣𑀺𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁩𑁫.

‘‘𑀅𑀦𑀮𑀸 𑀫𑀼𑀤𑀼𑀲𑀫𑁆𑀪𑀸𑀲𑀸, 𑀤𑀼𑀧𑁆𑀧𑀽𑀭𑀸 𑀢𑀸 𑀦𑀤𑀻𑀲𑀫𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁩𑁬.

‘‘𑀬𑀁 ¶ 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸;

𑀚𑀸𑀢𑀯𑁂𑀤𑁄𑀯 𑀲𑀁 𑀞𑀸𑀦𑀁, 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀦’’𑀦𑁆𑀢𑀺.

𑀢𑀢𑁆𑀣 𑀅𑀦𑀮𑀸 𑀫𑀼𑀤𑀼𑀲𑀫𑁆𑀪𑀸𑀲𑀸𑀢𑀺 𑀫𑀼𑀤𑀼𑀯𑀘𑀦𑁂𑀦𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀸, 𑀦𑁂𑀯 𑀲𑀓𑁆𑀓𑀸 𑀲𑀡𑁆𑀳𑀯𑀸𑀘𑀸𑀬 𑀲𑀗𑁆𑀕𑀡𑁆𑀳𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀲𑁂𑀳𑀺 𑀯𑀸 𑀏𑀢𑀸𑀲𑀁 𑀦 𑀅𑀮𑀦𑁆𑀢𑀺 𑀅𑀦𑀮𑀸. 𑀫𑀼𑀤𑀼𑀲𑀫𑁆𑀪𑀸𑀲𑀸𑀢𑀺 𑀳𑀤𑀬𑁂 𑀣𑀤𑁆𑀥𑁂𑀧𑀺 𑀲𑀫𑁆𑀪𑀸𑀲𑀸𑀯 𑀫𑀼𑀤𑀼 𑀏𑀢𑀸𑀲𑀦𑁆𑀢𑀺 𑀫𑀼𑀤𑀼𑀲𑀫𑁆𑀪𑀸𑀲𑀸. 𑀤𑀼𑀧𑁆𑀧𑀽𑀭𑀸 𑀢𑀸 𑀦𑀤𑀻𑀲𑀫𑀸𑀢𑀺 𑀬𑀣𑀸 𑀦𑀤𑀻 𑀆𑀕𑀢𑀸𑀕𑀢𑀲𑁆𑀲 𑀉𑀤𑀓𑀲𑁆𑀲 𑀲𑀦𑁆𑀤𑀦𑀢𑁄 𑀉𑀤𑀓𑁂𑀦 𑀤𑀼𑀧𑁆𑀧𑀽𑀭𑀸, 𑀏𑀯𑀁 𑀅𑀦𑀼𑀪𑀽𑀢𑀸𑀦𑀼𑀪𑀽𑀢𑁂𑀳𑀺 𑀫𑁂𑀣𑀼𑀦𑀸𑀤𑀻𑀳𑀺 𑀅𑀧𑀭𑀺𑀢𑀼𑀲𑁆𑀲𑀦𑀢𑁄 𑀤𑀼𑀧𑁆𑀧𑀽𑀭𑀸. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀅𑀢𑀺𑀢𑁆𑀢𑁄 𑀅𑀧𑁆𑀧𑀝𑀺𑀯𑀸𑀦𑁄 𑀫𑀸𑀢𑀼𑀕𑀸𑀫𑁄 𑀓𑀸𑀮𑀁 𑀓𑀭𑁄𑀢𑀺. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁? 𑀫𑁂𑀣𑀼𑀦𑀲𑀫𑀸𑀧𑀢𑁆𑀢𑀺𑀬𑀸 𑀘 𑀯𑀺𑀚𑀸𑀬𑀦𑀲𑁆𑀲 𑀘 𑀅𑀮𑀗𑁆𑀓𑀸𑀭𑀲𑁆𑀲 𑀘. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀢𑀺𑀢𑁆𑀢𑁄 𑀅𑀧𑁆𑀧𑀝𑀺𑀯𑀸𑀦𑁄 𑀫𑀸𑀢𑀼𑀕𑀸𑀫𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺.

𑀲𑀻𑀤𑀦𑁆𑀢𑀻𑀢𑀺 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀲𑁄𑀴𑀲𑀲𑀼 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀦𑀺𑀫𑀼𑀚𑁆𑀚𑀦𑁆𑀢𑀺. 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 ¶ . 𑀯𑀺𑀤𑀺𑀢𑁆𑀯𑀸𑀦𑀸𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸. 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂𑀢𑀺 ‘‘𑀏𑀢𑀸 𑀇𑀢𑁆𑀣𑀺𑀬𑁄 𑀦𑀸𑀫 𑀫𑁂𑀣𑀼𑀦𑀥𑀫𑁆𑀫𑀸𑀤𑀻𑀳𑀺 𑀅𑀢𑀺𑀢𑁆𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀏𑀢𑁂𑀲𑀼 𑀦𑀺𑀭𑀬𑁂𑀲𑀼 𑀲𑀻𑀤𑀦𑁆𑀢𑀺, 𑀏𑀢𑀸 𑀏𑀯𑀁 𑀅𑀢𑁆𑀢𑀦𑀸 𑀲𑀻𑀤𑀫𑀸𑀦𑀸 𑀓𑀲𑁆𑀲𑀜𑁆𑀜𑀲𑁆𑀲 ¶ 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀜𑀢𑁆𑀯𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀤𑀽𑀭𑀢𑁄𑀯 𑀢𑀸 𑀧𑀭𑀺𑀯𑀚𑁆𑀚𑀬𑁂𑀢𑀺 𑀤𑀻𑀧𑁂𑀢𑀺. 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀙𑀦𑁆𑀤𑁂𑀦 𑀭𑀼𑀘𑀺𑀬𑀸 𑀧𑁂𑀫𑁂𑀦, 𑀪𑀢𑀺𑀯𑀲𑁂𑀦 𑀮𑀤𑁆𑀥𑀥𑀦𑁂𑀦 𑀯𑀸 𑀬𑀁 𑀧𑀼𑀭𑀺𑀲𑀁 𑀏𑀢𑀸 𑀇𑀢𑁆𑀣𑀺𑀬𑁄 𑀉𑀧𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺. 𑀚𑀸𑀢𑀯𑁂𑀤𑁄𑀢𑀺 𑀅𑀕𑁆𑀕𑀺. 𑀲𑁄 𑀳𑀺 𑀚𑀸𑀢𑀫𑀢𑁆𑀢𑁄𑀯 𑀯𑁂𑀤𑀺𑀬𑀢𑀺, 𑀯𑀺𑀤𑀺𑀢𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀚𑀸𑀢𑀯𑁂𑀤𑁄. 𑀲𑁄 𑀬𑀣𑀸 𑀅𑀢𑁆𑀢𑀦𑁄 𑀞𑀸𑀦𑀁 𑀓𑀸𑀭𑀡𑀁 𑀑𑀓𑀸𑀲𑀁 𑀅𑀦𑀼𑀤𑀳𑀢𑀺, 𑀏𑀯𑀫𑁂𑀢𑀸𑀧𑀺 𑀬𑀁 𑀉𑀧𑀲𑁂𑀯𑀦𑁆𑀢𑀺, 𑀢𑀁 𑀧𑀼𑀭𑀺𑀲𑀁 𑀥𑀦𑀬𑀲𑀲𑀻𑀮𑀧𑀜𑁆𑀜𑀸𑀲𑀫𑀦𑁆𑀦𑀸𑀕𑀢𑀫𑁆𑀧𑀺 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀥𑀦𑀸𑀤𑀻𑀦𑀁 𑀯𑀺𑀦𑀸𑀲𑀦𑀢𑁄 𑀧𑀼𑀦 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀓𑀼𑀭𑀼𑀫𑀸𑀦𑀸 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀛𑀸𑀧𑁂𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀩𑀮𑀯𑀦𑁆𑀢𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀣𑀸𑀫𑀯𑀦𑁆𑀢𑁄𑀧𑀺 𑀳𑀸𑀬𑀭𑁂;

𑀘𑀓𑁆𑀔𑀼𑀫𑀸 𑀅𑀦𑁆𑀥𑀓𑀸 𑀳𑁄𑀦𑁆𑀢𑀺, 𑀫𑀸𑀢𑀼𑀕𑀸𑀫𑀯𑀲𑀁 𑀕𑀢𑀸.

‘‘𑀕𑀼𑀡𑀯𑀦𑁆𑀢𑁄 ¶ 𑀦𑀺𑀕𑁆𑀕𑀼𑀡𑀸 𑀳𑁄𑀦𑁆𑀢𑀺, 𑀧𑀜𑁆𑀜𑀯𑀦𑁆𑀢𑁄𑀧𑀺 𑀳𑀸𑀬𑀭𑁂;

𑀧𑀫𑀢𑁆𑀢𑀸 𑀩𑀦𑁆𑀥𑀦𑁂 𑀲𑁂𑀦𑁆𑀢𑀺, 𑀫𑀸𑀢𑀼𑀕𑀸𑀫𑀯𑀲𑀁 𑀕𑀢𑀸.

‘‘𑀅𑀚𑁆𑀛𑁂𑀦𑀜𑁆𑀘 𑀢𑀧𑀁 𑀲𑀻𑀮𑀁, 𑀲𑀘𑁆𑀘𑀁 𑀘𑀸𑀕𑀁 𑀲𑀢𑀺𑀁 𑀫𑀢𑀺𑀁;

𑀅𑀘𑁆𑀙𑀺𑀦𑁆𑀤𑀦𑁆𑀢𑀺 𑀧𑀫𑀢𑁆𑀢𑀲𑁆𑀲, 𑀧𑀦𑁆𑀣𑀤𑀽𑀪𑀻𑀯 𑀢𑀓𑁆𑀓𑀭𑀸.

‘‘𑀬𑀲𑀁 𑀓𑀺𑀢𑁆𑀢𑀺𑀁 𑀥𑀺𑀢𑀺𑀁 𑀲𑀽𑀭𑀁, 𑀩𑀸𑀳𑀼𑀲𑀘𑁆𑀘𑀁 𑀧𑀚𑀸𑀦𑀦𑀁;

𑀔𑁂𑀧𑀬𑀦𑁆𑀢𑀺 𑀧𑀫𑀢𑁆𑀢𑀲𑁆𑀲, 𑀓𑀝𑁆𑀞𑀧𑀼𑀜𑁆𑀚𑀁𑀯 𑀧𑀸𑀯𑀓𑁄’’𑀢𑀺.

𑀏𑀯𑀁 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀪𑀸𑀕𑀺𑀦𑁂𑀬𑁆𑀬𑁄𑀧𑀺 𑀫𑀬𑀸𑀯 𑀧𑁄𑀲𑁂𑀢𑀩𑁆𑀩𑁄’’𑀢𑀺 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀥𑀻𑀢𑀭𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀢𑀁 𑀑𑀧𑀭𑀚𑁆𑀚𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀲𑁄𑀧𑀺 𑀫𑀸𑀢𑀼𑀮𑀲𑁆𑀲 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀳𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑁂𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀼𑀤𑀼𑀧𑀸𑀡𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁬𑁩] 𑁩. 𑀘𑀽𑀴𑀧𑀮𑁄𑀪𑀦𑀚𑀸𑀢𑀓𑀯𑀡𑁆𑀡𑀦𑀸

𑀅𑀪𑀺𑀚𑁆𑀚𑀫𑀸𑀦𑁂 ¶ ¶ 𑀯𑀸𑀭𑀺𑀲𑁆𑀫𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀫𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀆𑀦𑀻𑀢𑀁 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼, 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀧𑁄𑀭𑀸𑀡𑀓𑁂 𑀲𑀼𑀤𑁆𑀥𑀲𑀢𑁆𑀢𑁂𑀧𑀺 𑀲𑀁𑀓𑀺𑀮𑁂𑀲𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀭𑀸𑀚𑀸 𑀅𑀧𑀼𑀢𑁆𑀢𑀓𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀇𑀢𑁆𑀣𑀺𑀬𑁄 ‘‘𑀧𑀼𑀢𑁆𑀢𑀧𑀢𑁆𑀣𑀦𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑀸 𑀧𑀼𑀢𑁆𑀢𑁂 𑀧𑀢𑁆𑀣𑁂𑀦𑁆𑀢𑀺. 𑀏𑀯𑀁 𑀅𑀤𑁆𑀥𑀸𑀦𑁂 𑀕𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀚𑀸𑀢𑀫𑀢𑁆𑀢𑀁 𑀦𑁆𑀳𑀸𑀧𑁂𑀢𑁆𑀯𑀸 𑀣𑀜𑁆𑀜𑀧𑀸𑀬𑀦𑀢𑁆𑀣𑀸𑀬 𑀥𑀸𑀢𑀺𑀬𑀸 𑀅𑀤𑀁𑀲𑀼. 𑀲𑁄 𑀧𑀸𑀬𑀫𑀸𑀦𑁄 𑀭𑁄𑀤𑀢𑀺, 𑀅𑀣 𑀦𑀁 𑀅𑀜𑁆𑀜𑀺𑀲𑁆𑀲𑀸 𑀅𑀤𑀁𑀲𑀼. 𑀫𑀸𑀢𑀼𑀕𑀸𑀫𑀳𑀢𑁆𑀣𑀕𑀢𑁄 𑀦𑁂𑀯 𑀢𑀼𑀡𑁆𑀳𑀻 𑀳𑁄𑀢𑀺. 𑀅𑀣 𑀦𑀁 𑀏𑀓𑀲𑁆𑀲 𑀧𑀸𑀤𑀫𑀽𑀮𑀺𑀓𑀲𑁆𑀲 𑀅𑀤𑀁𑀲𑀼, 𑀢𑁂𑀦 𑀕𑀳𑀺𑀢𑀫𑀢𑁆𑀢𑁄𑀬𑁂𑀯 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀲𑀸𑀯 ¶ 𑀢𑀁 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑀺. 𑀣𑀜𑁆𑀜𑀁 𑀧𑀸𑀬𑁂𑀦𑁆𑀢𑀸 𑀤𑀼𑀳𑀺𑀢𑁆𑀯𑀸 𑀯𑀸 𑀧𑀸𑀬𑁂𑀦𑁆𑀢𑀺, 𑀲𑀸𑀡𑀺𑀅𑀦𑁆𑀢𑀭𑁂𑀦 𑀯𑀸 𑀣𑀦𑀁 𑀫𑀼𑀔𑁂 𑀞𑀧𑁂𑀦𑁆𑀢𑀺. 𑀢𑁂𑀦𑀲𑁆𑀲 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀅𑀧𑀭𑀸𑀧𑀭𑀁 𑀯𑀤𑁆𑀥𑀫𑀸𑀦𑀲𑁆𑀲𑀧𑀺 𑀫𑀸𑀢𑀼𑀕𑀸𑀫𑀁 𑀦𑀸𑀫 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸. 𑀢𑁂𑀦𑀲𑁆𑀲 𑀭𑀸𑀚𑀸 𑀯𑀺𑀲𑀼𑀁𑀬𑁂𑀯 𑀦𑀺𑀲𑀚𑁆𑀚𑀸𑀤𑀺𑀝𑁆𑀞𑀸𑀦𑀸𑀦𑀺 𑀛𑀸𑀦𑀸𑀕𑀸𑀭𑀜𑁆𑀘 𑀓𑀸𑀭𑁂𑀲𑀺.

𑀲𑁄 𑀢𑀲𑁆𑀲 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀅𑀜𑁆𑀜𑁄 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀬𑀁 𑀧𑀦 𑀓𑀼𑀫𑀸𑀭𑁄 𑀓𑀸𑀫𑁂 𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀭𑀚𑁆𑀚𑀫𑁆𑀧𑀺 𑀦 𑀇𑀘𑁆𑀙𑀺𑀲𑁆𑀲𑀢𑀺, 𑀤𑀼𑀮𑁆𑀮𑀤𑁆𑀥𑁄 𑀯𑀢 𑀫𑁂 𑀧𑀼𑀢𑁆𑀢𑁄’’𑀢𑀺. 𑀅𑀣 𑀦𑀁 𑀏𑀓𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀓𑀼𑀲𑀮𑀸 𑀧𑀼𑀭𑀺𑀲𑁂 𑀧𑀭𑀺𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀸𑀢𑀼𑀁 𑀧𑀝𑀺𑀩𑀮𑀸 𑀢𑀭𑀼𑀡𑀦𑀸𑀝𑀓𑀺𑀢𑁆𑀣𑀻 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀓𑀺𑀁 𑀦𑀼 𑀘𑀺𑀦𑁆𑀢𑁂𑀲𑀻’’𑀢𑀺 𑀆𑀳, 𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀺. ‘‘𑀳𑁄𑀢𑀼, 𑀤𑁂𑀯 ¶ , 𑀅𑀳𑀁 𑀢𑀁 𑀧𑀮𑁄𑀪𑁂𑀢𑁆𑀯𑀸 𑀓𑀸𑀫𑀭𑀲𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀫𑁂 𑀧𑀼𑀢𑁆𑀢𑀁 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑀁 𑀧𑀮𑁄𑀪𑁂𑀢𑀼𑀁 𑀲𑀓𑁆𑀓𑀺𑀲𑁆𑀲𑀲𑀺, 𑀲𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀅𑀕𑁆𑀕𑀫𑀳𑁂𑀲𑀻’’𑀢𑀺. 𑀲𑀸 ‘‘𑀫𑀫𑁂𑀲𑁄 𑀪𑀸𑀭𑁄, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀆𑀭𑀓𑁆𑀔𑀫𑀦𑀼𑀲𑁆𑀲𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀅𑀳𑀁 𑀧𑀘𑁆𑀘𑀽𑀲𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀅𑀬𑁆𑀬𑀧𑀼𑀢𑁆𑀢𑀲𑁆𑀲 𑀲𑀬𑀦𑀝𑁆𑀞𑀸𑀦𑁂 𑀩𑀳𑀺𑀛𑀸𑀦𑀸𑀕𑀸𑀭𑁂 𑀞𑀢𑁆𑀯𑀸 𑀕𑀸𑀬𑀺𑀲𑁆𑀲𑀸𑀫𑀺. 𑀲𑀘𑁂 𑀲𑁄 𑀓𑀼𑀚𑁆𑀛𑀢𑀺, 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀣, 𑀅𑀳𑀁 𑀅𑀧𑀕𑀘𑁆𑀙𑀺𑀲𑁆𑀲𑀸𑀫𑀺. 𑀲𑀘𑁂 𑀲𑀼𑀡𑀸𑀢𑀺, 𑀯𑀡𑁆𑀡𑀁 𑀫𑁂 𑀓𑀣𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑀲𑀸𑀧𑀺 𑀧𑀘𑁆𑀘𑀽𑀲𑀓𑀸𑀮𑁂 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀞𑀢𑁆𑀯𑀸 𑀢𑀦𑁆𑀢𑀺𑀲𑁆𑀲𑀭𑁂𑀦 𑀕𑀻𑀢𑀲𑁆𑀲𑀭𑀁, 𑀕𑀻𑀢𑀲𑁆𑀲𑀭𑁂𑀦 𑀢𑀦𑁆𑀢𑀺𑀲𑁆𑀲𑀭𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀥𑀼𑀭𑁂𑀦 𑀲𑀤𑁆𑀤𑁂𑀦 𑀕𑀸𑀬𑀺, 𑀓𑀼𑀫𑀸𑀭𑁄 𑀲𑀼𑀡𑀦𑁆𑀢𑁄𑀯 𑀦𑀺𑀧𑀚𑁆𑀚𑀺, 𑀧𑀼𑀦𑀤𑀺𑀯𑀲𑁂 𑀘 𑀆𑀲𑀦𑁆𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 ¶ 𑀕𑀸𑀬𑀺𑀢𑀼𑀁 𑀆𑀡𑀸𑀧𑁂𑀲𑀺, 𑀧𑀼𑀦𑀤𑀺𑀯𑀲𑁂 𑀛𑀸𑀦𑀸𑀕𑀸𑀭𑁂 𑀞𑀢𑁆𑀯𑀸 𑀕𑀸𑀬𑀺𑀢𑀼𑀁 𑀆𑀡𑀸𑀧𑁂𑀲𑀺, 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀞𑀢𑁆𑀯𑀸𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦𑁂𑀯 𑀢𑀡𑁆𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑁄𑀓𑀥𑀫𑁆𑀫𑀁 𑀲𑁂𑀯𑀺𑀢𑁆𑀯𑀸 𑀓𑀸𑀫𑀭𑀲𑀁 𑀜𑀢𑁆𑀯𑀸 ‘‘𑀫𑀸𑀢𑀼𑀕𑀸𑀫𑀁 𑀦𑀸𑀫 𑀅𑀜𑁆𑀜𑁂𑀲𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀧𑀼𑀭𑀺𑀲𑁂 𑀅𑀦𑀼𑀩𑀦𑁆𑀥𑀦𑁆𑀢𑁄 𑀯𑀺𑀘𑀭𑀺. 𑀅𑀣 𑀦𑀁 𑀭𑀸𑀚𑀸 𑀕𑀸𑀳𑀸𑀧𑁂𑀢𑁆𑀯𑀸 𑀢𑀸𑀬 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀦𑀕𑀭𑀸 𑀦𑀻𑀳𑀭𑀸𑀧𑁂𑀲𑀺. 𑀉𑀪𑁄𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀥𑁄𑀕𑀗𑁆𑀕𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀕𑀗𑁆𑀕𑀁, 𑀏𑀓𑀲𑁆𑀫𑀺𑀁 𑀲𑀫𑀼𑀤𑁆𑀤𑀁 𑀓𑀢𑁆𑀯𑀸 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑀬𑀺𑀁𑀲𑀼. 𑀓𑀼𑀫𑀸𑀭𑀺𑀓𑀸 𑀧𑀡𑁆𑀡𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀦𑁆𑀤𑀫𑀽𑀮𑀸𑀤𑀻𑀦𑀺 𑀧𑀘𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁 𑀆𑀳𑀭𑀢𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀢𑀲𑁆𑀫𑀺𑀁 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂 𑀲𑀫𑀼𑀤𑁆𑀤𑀤𑀻𑀧𑀓𑀸 𑀏𑀓𑁄 𑀢𑀸𑀧𑀲𑁄 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀥𑀽𑀫𑀁 𑀤𑀺𑀲𑁆𑀯𑀸 𑀅𑀲𑁆𑀲𑀫𑀧𑀤𑁂 𑀑𑀢𑀭𑀺. 𑀅𑀣 𑀦𑀁 𑀲𑀸 ‘‘𑀦𑀺𑀲𑀻𑀤, 𑀬𑀸𑀯 𑀧𑀘𑁆𑀘𑀢𑀻’’𑀢𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀇𑀢𑁆𑀣𑀺𑀓𑀼𑀢𑁆𑀢𑁂𑀦 𑀧𑀮𑁄𑀪𑁂𑀢𑁆𑀯𑀸 𑀛𑀸𑀦𑀸 𑀘𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀫𑀲𑁆𑀲 𑀅𑀦𑁆𑀢𑀭𑀥𑀸𑀧𑁂𑀲𑀺. 𑀲𑁄 𑀧𑀓𑁆𑀔𑀘𑁆𑀙𑀺𑀦𑁆𑀦𑀓𑀸𑀓𑁄 𑀯𑀺𑀬 𑀳𑀼𑀢𑁆𑀯𑀸 ¶ 𑀢𑀁 𑀚𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀩𑁆𑀩𑀤𑀺𑀯𑀲𑀁 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑁄 𑀧𑀮𑀸𑀬𑀺. 𑀅𑀣 𑀦𑀁 𑀲𑁄 ‘‘𑀧𑀘𑁆𑀘𑀸𑀫𑀺𑀢𑁆𑀢𑁄 𑀫𑁂 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀺. 𑀢𑀸𑀧𑀲𑁄 𑀆𑀓𑀸𑀲𑁂 𑀉𑀧𑁆𑀧𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀲𑀫𑀼𑀤𑁆𑀤𑁂 𑀧𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀏𑀲 𑀢𑀸𑀧𑀲𑁄 𑀆𑀓𑀸𑀲𑁂𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀛𑀸𑀦𑀲𑁆𑀲 𑀧𑀭𑀺𑀳𑀻𑀦𑀢𑁆𑀢𑀸 𑀲𑀫𑀼𑀤𑁆𑀤𑁂 𑀧𑀢𑀺𑀢𑁄, 𑀫𑀬𑀸 𑀤𑀸𑀦𑀺𑀲𑁆𑀲 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑁂𑀮𑀦𑁆𑀢𑁂 𑀞𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁩𑁭.

‘‘𑀅𑀪𑀺𑀚𑁆𑀚𑀫𑀸𑀦𑁂 𑀯𑀸𑀭𑀺𑀲𑁆𑀫𑀺𑀁, 𑀲𑀬𑀁 𑀆𑀕𑀫𑁆𑀫 𑀇𑀤𑁆𑀥𑀺𑀬𑀸;

𑀫𑀺𑀲𑁆𑀲𑀻𑀪𑀸𑀯𑀺𑀢𑁆𑀣𑀺𑀬𑀸 𑀕𑀦𑁆𑀢𑁆𑀯𑀸, 𑀲𑀁𑀲𑀻𑀤𑀲𑀺 𑀫𑀳𑀡𑁆𑀡𑀯𑁂.

𑁩𑁮.

‘‘𑀆𑀯𑀝𑁆𑀝𑀦𑀻 𑀫𑀳𑀸𑀫𑀸𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁩𑁯.

‘‘𑀬𑀁 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸;

𑀚𑀸𑀢𑀯𑁂𑀤𑁄𑀯 𑀲𑀁 𑀞𑀸𑀦𑀁, 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀦’’𑀦𑁆𑀢𑀺.

𑀢𑀢𑁆𑀣 𑀅𑀪𑀺𑀚𑁆𑀚𑀫𑀸𑀦𑁂 𑀯𑀸𑀭𑀺𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀉𑀤𑀓𑁂 𑀅𑀘𑀮𑀫𑀸𑀦𑁂 𑀅𑀓𑀫𑁆𑀧𑀫𑀸𑀦𑁂 𑀉𑀤𑀓𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀬𑀁 𑀆𑀓𑀸𑀲𑁂𑀦𑁂𑀯 𑀇𑀤𑁆𑀥𑀺𑀬𑀸 𑀆𑀕𑀦𑁆𑀢𑁆𑀯𑀸. 𑀫𑀺𑀲𑁆𑀲𑀻𑀪𑀸𑀯𑀺𑀢𑁆𑀣𑀺𑀬𑀸𑀢𑀺 𑀮𑁄𑀓𑀥𑀫𑁆𑀫𑀯𑀲𑁂𑀦 𑀇𑀢𑁆𑀣𑀺𑀬𑀸 ¶ 𑀲𑀤𑁆𑀥𑀺𑀁 𑀫𑀺𑀲𑁆𑀲𑀻𑀪𑀸𑀯𑀁. 𑀆𑀯𑀝𑁆𑀝𑀦𑀻 𑀫𑀳𑀸𑀫𑀸𑀬𑀸𑀢𑀺 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀓𑀸𑀫𑀸𑀯𑀝𑁆𑀝𑁂𑀦 𑀆𑀯𑀝𑁆𑀝𑀦𑀢𑁄 𑀆𑀯𑀝𑁆𑀝𑀦𑀻, 𑀅𑀦𑀦𑁆𑀢𑀸𑀳𑀺 𑀇𑀢𑁆𑀣𑀺𑀫𑀸𑀬𑀸𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀫𑀸𑀬𑀸 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀫𑀸𑀬𑀸 𑀘𑁂𑀢𑀸 𑀫𑀭𑀻𑀘𑀻 𑀘, 𑀲𑁄𑀓𑁄 𑀭𑁄𑀕𑁄 𑀘𑀼𑀧𑀤𑁆𑀤𑀯𑁄;

𑀔𑀭𑀸 𑀘 𑀩𑀦𑁆𑀥𑀦𑀸 𑀘𑁂𑀢𑀸, 𑀫𑀘𑁆𑀘𑀼𑀧𑀸𑀲𑁄 𑀕𑀼𑀳𑀸𑀲𑀬𑁄;

𑀢𑀸𑀲𑀼 𑀬𑁄 𑀯𑀺𑀲𑁆𑀲𑀲𑁂 𑀧𑁄𑀲𑁄, 𑀲𑁄 𑀦𑀭𑁂𑀲𑀼 𑀦𑀭𑀸𑀥𑀫𑁄’’𑀢𑀺. (𑀚𑀸. 𑁨.𑁨𑁧.𑁧𑁧𑁮);

𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑀸𑀢𑀺 ¶ 𑀲𑁂𑀝𑁆𑀞𑀘𑀭𑀺𑀬𑀲𑁆𑀲 𑀫𑁂𑀣𑀼𑀦𑀯𑀺𑀭𑀢𑀺𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀺𑀓𑁄𑀧𑀦𑀸. 𑀲𑀻𑀤𑀦𑁆𑀢𑀻𑀢𑀺 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀇𑀲𑀻𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑁂𑀦 𑀅𑀧𑀸𑀬𑁂𑀲𑀼 𑀲𑀻𑀤𑀦𑁆𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀏𑀢𑀁 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀲𑀫𑀼𑀤𑁆𑀤𑀫𑀚𑁆𑀛𑁂 𑀞𑀺𑀢𑁄𑀬𑁂𑀯 𑀦𑀝𑁆𑀞𑀚𑁆𑀛𑀸𑀦𑀁 𑀧𑀼𑀦 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀓𑀸𑀲𑁂𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀢𑀸𑀧𑀲𑁄 𑀏𑀯𑀁 𑀪𑀸𑀭𑀺𑀓𑁄 𑀲𑀫𑀸𑀦𑁄 𑀲𑀺𑀫𑁆𑀩𑀮𑀺𑀢𑀽𑀮𑀁 𑀯𑀺𑀬 𑀆𑀓𑀸𑀲𑁂𑀦 𑀕𑀢𑁄, 𑀫𑀬𑀸𑀧𑀺 𑀇𑀫𑀺𑀦𑀸 ¶ 𑀯𑀺𑀬 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀓𑀸𑀲𑁂𑀦 𑀘𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀫𑀦𑀼𑀲𑁆𑀲𑀧𑀣𑀁 𑀦𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑁆𑀯’’𑀦𑁆𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀜𑁆𑀜𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀅𑀦𑀺𑀢𑁆𑀣𑀺𑀕𑀦𑁆𑀥𑀓𑀼𑀫𑀸𑀭𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀧𑀮𑁄𑀪𑀦𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁬𑁪] 𑁪. 𑀫𑀳𑀸𑀧𑀦𑀸𑀤𑀚𑀸𑀢𑀓𑀯𑀡𑁆𑀡𑀦𑀸

𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀪𑀤𑁆𑀤𑀚𑀺𑀢𑁆𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 ‘‘𑀪𑀤𑁆𑀤𑀚𑀺𑀓𑀼𑀫𑀸𑀭𑀲𑁆𑀲 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀪𑀤𑁆𑀤𑀺𑀬𑀦𑀕𑀭𑀁 𑀧𑀢𑁆𑀯𑀸 𑀚𑀸𑀢𑀺𑀬𑀸𑀯𑀦𑁂 𑀢𑀬𑁄 𑀫𑀸𑀲𑁂 ¶ 𑀯𑀲𑀺 𑀓𑀼𑀫𑀸𑀭𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄. 𑀪𑀤𑁆𑀤𑀚𑀺𑀓𑀼𑀫𑀸𑀭𑁄 𑀫𑀳𑀸𑀬𑀲𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀪𑀤𑁆𑀤𑀺𑀬𑀲𑁂𑀝𑁆𑀞𑀺𑀦𑁄 𑀏𑀓𑀧𑀼𑀢𑁆𑀢𑀓𑁄. 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀏𑀓𑁂𑀓𑀲𑁆𑀫𑀺𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀢𑀺. 𑀏𑀓𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀦𑀸𑀝𑀓𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀅𑀜𑁆𑀜𑀁 𑀧𑀸𑀲𑀸𑀤𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀔𑀡𑁂 ‘‘𑀓𑀼𑀫𑀸𑀭𑀲𑁆𑀲 𑀬𑀲𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺, 𑀧𑀸𑀲𑀸𑀤𑀦𑁆𑀢𑀭𑁂 𑀘𑀓𑁆𑀓𑀸𑀢𑀺𑀘𑀓𑁆𑀓𑀸𑀦𑀺 𑀫𑀜𑁆𑀘𑀸𑀢𑀺𑀫𑀜𑁆𑀘𑀸𑀦𑀺 𑀩𑀦𑁆𑀥𑀦𑁆𑀢𑀺.

𑀲𑀢𑁆𑀣𑀸 ¶ 𑀢𑀬𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸 ‘‘𑀫𑀬𑀁 𑀕𑀘𑁆𑀙𑀸𑀫𑀸’’𑀢𑀺 𑀦𑀕𑀭𑀯𑀸𑀲𑀻𑀦𑀁 𑀆𑀭𑁄𑀘𑁂𑀲𑀺. 𑀦𑀸𑀕𑀭𑀸 ‘‘𑀪𑀦𑁆𑀢𑁂, 𑀲𑁆𑀯𑁂 𑀕𑀫𑀺𑀲𑁆𑀲𑀣𑀸’’𑀢𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺, 𑀫𑀦𑀼𑀲𑁆𑀲𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀲𑀢𑁆𑀣𑀸 𑀦𑀺𑀝𑁆𑀞𑀺𑀢𑀪𑀢𑁆𑀢𑀓𑀺𑀘𑁆𑀘𑁄 𑀫𑀥𑀼𑀭𑀲𑁆𑀲𑀭𑁂𑀦 𑀅𑀦𑀼𑀫𑁄𑀤𑀦𑀁 𑀆𑀭𑀪𑀺. 𑀢𑀲𑁆𑀫𑀺𑀁 𑀔𑀡𑁂 𑀪𑀤𑁆𑀤𑀚𑀺𑀓𑀼𑀫𑀸𑀭𑁄𑀧𑀺 𑀧𑀸𑀲𑀸𑀤𑀢𑁄 𑀧𑀸𑀲𑀸𑀤𑀁 𑀕𑀘𑁆𑀙𑀢𑀺 ¶ , 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀸𑀬 𑀢𑀁 𑀤𑀺𑀯𑀲𑀁 𑀦 𑀓𑁄𑀘𑀺 𑀅𑀕𑀫𑀸𑀲𑀺, 𑀅𑀢𑁆𑀢𑀦𑁄 𑀫𑀦𑀼𑀲𑁆𑀲𑀸𑀯 𑀧𑀭𑀺𑀯𑀸𑀭𑁂𑀲𑀼𑀁. 𑀲𑁄 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀫𑀬𑀺 𑀧𑀸𑀲𑀸𑀤𑀢𑁄 𑀧𑀸𑀲𑀸𑀤𑀁 𑀕𑀘𑁆𑀙𑀦𑁆𑀢𑁂 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀢𑀺, 𑀘𑀓𑁆𑀓𑀸𑀢𑀺𑀘𑀓𑁆𑀓𑀸𑀦𑀺 𑀫𑀜𑁆𑀘𑀸𑀢𑀺𑀫𑀜𑁆𑀘𑀸𑀦𑀺 𑀩𑀦𑁆𑀥𑀦𑁆𑀢𑀺, 𑀅𑀚𑁆𑀚 𑀧𑀦 𑀞𑀧𑁂𑀢𑁆𑀯𑀸 𑀫𑀬𑁆𑀳𑀁 𑀫𑀦𑀼𑀲𑁆𑀲𑁂 𑀅𑀜𑁆𑀜𑁄 𑀓𑁄𑀘𑀺 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺. ‘‘𑀲𑀸𑀫𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀫𑀁 𑀪𑀤𑁆𑀤𑀺𑀬𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀢𑀬𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀅𑀚𑁆𑀚𑁂𑀯 𑀕𑀫𑀺𑀲𑁆𑀲𑀢𑀺, 𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑀮𑀦𑀕𑀭𑀯𑀸𑀲𑀺𑀦𑁄𑀧𑀺 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻’’𑀢𑀺. 𑀲𑁄 ‘‘𑀢𑁂𑀦 𑀳𑀺 𑀏𑀣, 𑀫𑀬𑀫𑁆𑀧𑀺 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄𑀯 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀞𑀺𑀢𑁄𑀯 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 𑀪𑀤𑁆𑀤𑀺𑀬𑀲𑁂𑀝𑁆𑀞𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀲𑁂𑀝𑁆𑀞𑀺, 𑀧𑀼𑀢𑁆𑀢𑁄 𑀢𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄𑀯 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄, 𑀢𑁂𑀦𑀲𑁆𑀲 𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀁 𑀯𑀸’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀩𑁆𑀩𑀸𑀚𑁂𑀣 𑀦𑀁, 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘 𑀧𑀦 𑀦𑀁 𑀕𑀳𑁂𑀢𑁆𑀯𑀸 𑀲𑁆𑀯𑁂 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀉𑀧𑀲𑀗𑁆𑀓𑀫𑀣𑀸’’𑀢𑀺. 𑀪𑀕𑀯𑀸 𑀦𑀺𑀫𑀦𑁆𑀢𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀤𑀸𑀧𑁂𑀲𑀺. 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀢𑁆𑀢𑀸𑀳𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀲𑀢𑁆𑀣𑀸 𑀲𑀢𑁆𑀢𑀸𑀳𑀁 𑀯𑀲𑀺𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀫𑀸𑀤𑀸𑀬 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀓𑁄𑀝𑀺𑀕𑀸𑀫𑀁 𑀧𑀸𑀧𑀼𑀡𑀺. 𑀓𑁄𑀝𑀺𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀆𑀭𑀪𑀺. 𑀓𑀼𑀮𑀧𑀼𑀢𑁆𑀢𑁄 𑀅𑀦𑀼𑀫𑁄𑀤𑀦𑀓𑀭𑀡𑀓𑀸𑀮𑁂 𑀩𑀳𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀲𑀢𑁆𑀣𑀼 𑀆𑀕𑀢𑀓𑀸𑀮𑁂𑀬𑁂𑀯 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀗𑁆𑀕𑀸𑀢𑀺𑀢𑁆𑀣𑀲𑀫𑀻𑀧𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺 ¶ . 𑀫𑀳𑀮𑁆𑀮𑀓𑀢𑁆𑀣𑁂𑀭𑁂𑀲𑀼 𑀆𑀕𑀘𑁆𑀙𑀦𑁆𑀢𑁂𑀲𑀼𑀧𑀺 𑀅𑀦𑀼𑀝𑁆𑀞𑀳𑀺𑀢𑁆𑀯𑀸 𑀲𑀢𑁆𑀣𑀼 𑀆𑀕𑀢𑀓𑀸𑀮𑁂𑀬𑁂𑀯 𑀉𑀝𑁆𑀞𑀳𑀺. 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 ‘‘𑀅𑀬𑀁 𑀧𑀼𑀭𑁂 𑀯𑀺𑀬 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀣𑁂𑀭𑁂 𑀆𑀕𑀘𑁆𑀙𑀦𑁆𑀢𑁂𑀧𑀺 𑀤𑀺𑀲𑁆𑀯𑀸 𑀦 𑀉𑀝𑁆𑀞𑀳𑀢𑀻’’𑀢𑀺 𑀓𑀼𑀚𑁆𑀛𑀺𑀁𑀲𑀼.

𑀓𑁄𑀝𑀺𑀕𑀸𑀫𑀯𑀸𑀲𑀺𑀦𑁄 ¶ 𑀫𑀦𑀼𑀲𑁆𑀲𑀸 𑀦𑀸𑀯𑀸𑀲𑀗𑁆𑀖𑀸𑀢𑁂 𑀩𑀦𑁆𑀥𑀺𑀁𑀲𑀼. 𑀲𑀢𑁆𑀣𑀸 𑀦𑀸𑀯𑀸𑀲𑀗𑁆𑀖𑀸𑀢𑁂 𑀞𑀢𑁆𑀯𑀸 ‘‘𑀓𑀳𑀁 ¶ , 𑀪𑀤𑁆𑀤𑀚𑀻’’𑀢𑀺 𑀧𑀼𑀘𑁆𑀙𑀺. ‘‘𑀏𑀲, 𑀪𑀦𑁆𑀢𑁂, 𑀇𑀥𑁂𑀯𑀸’’𑀢𑀺. ‘‘𑀏𑀳𑀺, 𑀪𑀤𑁆𑀤𑀚𑀺, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀦𑀸𑀯𑀁 𑀅𑀪𑀺𑀭𑀼𑀳𑀸’’𑀢𑀺. 𑀣𑁂𑀭𑁄𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀏𑀓𑀦𑀸𑀯𑀸𑀬 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀕𑀗𑁆𑀕𑀸𑀬 𑀫𑀚𑁆𑀛𑀁 𑀕𑀢𑀓𑀸𑀮𑁂 𑀲𑀢𑁆𑀣𑀸 𑀆𑀳 𑁋 ‘‘𑀪𑀤𑁆𑀤𑀚𑀺, 𑀢𑀬𑀸 𑀫𑀳𑀸𑀧𑀦𑀸𑀤𑀭𑀸𑀚𑀓𑀸𑀮𑁂 𑀅𑀚𑁆𑀛𑀸𑀯𑀼𑀢𑁆𑀣𑀧𑀸𑀲𑀸𑀤𑁄 𑀓𑀳’’𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀫𑀼𑀕𑁆𑀕𑁄, 𑀪𑀦𑁆𑀢𑁂𑀢𑀺. 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 ‘‘𑀪𑀤𑁆𑀤𑀚𑀺𑀢𑁆𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 ‘‘𑀢𑁂𑀦 𑀳𑀺, 𑀪𑀤𑁆𑀤𑀚𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀓𑀗𑁆𑀔𑀁 𑀙𑀺𑀦𑁆𑀤𑀸’’𑀢𑀺 𑀆𑀳. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀇𑀤𑁆𑀥𑀺𑀩𑀮𑁂𑀦 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀣𑀽𑀧𑀺𑀓𑀁 𑀧𑀸𑀤𑀗𑁆𑀕𑀼𑀮𑀺𑀬𑀸 𑀕𑀳𑁂𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀁 𑀧𑀸𑀲𑀸𑀤𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺. 𑀉𑀧𑁆𑀧𑀢𑀺𑀢𑁄 𑀘 𑀧𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀞𑀺𑀢𑀸𑀦𑀁 𑀧𑀸𑀲𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀸𑀬𑀺. 𑀲𑁄 𑀏𑀓𑀬𑁄𑀚𑀦𑀁 𑀤𑁆𑀯𑀺𑀬𑁄𑀚𑀦𑀁 𑀢𑀺𑀬𑁄𑀚𑀦𑀦𑁆𑀢𑀺 𑀬𑀸𑀯 𑀯𑀻𑀲𑀢𑀺𑀬𑁄𑀚𑀦𑀸 𑀉𑀤𑀓𑀢𑁄 𑀧𑀸𑀲𑀸𑀤𑀁 𑀉𑀓𑁆𑀔𑀺𑀧𑀺. 𑀅𑀣𑀲𑁆𑀲 𑀧𑀼𑀭𑀺𑀫𑀪𑀯𑁂 𑀜𑀸𑀢𑀓𑀸 𑀧𑀸𑀲𑀸𑀤𑀮𑁄𑀪𑁂𑀦 𑀫𑀘𑁆𑀙𑀓𑀘𑁆𑀙𑀧𑀦𑀸𑀕𑀫𑀡𑁆𑀟𑀽𑀓𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀸𑀲𑀸𑀤𑁂 𑀦𑀺𑀩𑁆𑀩𑀢𑁆𑀢𑀸 𑀧𑀸𑀲𑀸𑀤𑁂 𑀉𑀝𑁆𑀞𑀳𑀦𑁆𑀢𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀉𑀤𑀓𑁂𑀬𑁂𑀯 𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀢𑁂 𑀧𑀢𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀜𑀸𑀢𑀓𑀸 𑀢𑁂, 𑀪𑀤𑁆𑀤𑀚𑀺, 𑀓𑀺𑀮𑀫𑀦𑁆𑀢𑀻’’𑀢𑀺 𑀆𑀳. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀸𑀲𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀧𑀸𑀲𑀸𑀤𑁄 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀳𑀺, 𑀲𑀢𑁆𑀣𑀸 𑀧𑀸𑀭𑀕𑀗𑁆𑀕𑀁 𑀕𑀢𑁄. 𑀅𑀣𑀲𑁆𑀲 𑀕𑀗𑁆𑀕𑀸𑀢𑀻𑀭𑁂𑀬𑁂𑀯 𑀆𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼, 𑀲𑁄 𑀧𑀜𑁆𑀜𑀢𑁆𑀢𑁂 𑀯𑀭𑀩𑀼𑀤𑁆𑀥𑀸𑀲𑀦𑁂 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀓𑀲𑁆𑀫𑀺𑀁 𑀓𑀸𑀮𑁂, 𑀪𑀦𑁆𑀢𑁂, 𑀅𑀬𑀁 𑀧𑀸𑀲𑀸𑀤𑁄 𑀪𑀤𑁆𑀤𑀚𑀺𑀢𑁆𑀣𑁂𑀭𑁂𑀦 𑀅𑀚𑁆𑀛𑀸𑀯𑀼𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀫𑀳𑀸𑀧𑀦𑀸𑀤𑀭𑀸𑀚𑀓𑀸𑀮𑁂’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀸𑀬𑀁 𑀲𑀼𑀭𑀼𑀘𑀺 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀧𑀼𑀢𑁆𑀢𑁄𑀧𑀺 𑀢𑀲𑁆𑀲 𑀲𑀼𑀭𑀼𑀘𑀺𑀬𑁂𑀯, 𑀢𑀲𑁆𑀲 𑀧𑀦 𑀧𑀼𑀢𑁆𑀢𑁄 𑀫𑀳𑀸𑀧𑀦𑀸𑀤𑁄 𑀦𑀸𑀫 𑀅𑀳𑁄𑀲𑀺, 𑀢𑁂 𑀇𑀫𑀁 𑀧𑀸𑀲𑀸𑀤𑀁 𑀧𑀝𑀺𑀮𑀪𑀺𑀁𑀲𑀼. 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀦𑀲𑁆𑀲 𑀇𑀤𑀁 𑀧𑀼𑀩𑁆𑀩𑀓𑀫𑁆𑀫𑀁 𑁋 𑀤𑁆𑀯𑁂 𑀧𑀺𑀢𑀸𑀧𑀼𑀢𑁆𑀢𑀸 𑀦𑀴𑁂𑀳𑀺 𑀘 𑀉𑀤𑀼𑀫𑁆𑀩𑀭𑀤𑀸𑀭𑀽𑀳𑀺 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀲𑀦𑀧𑀡𑁆𑀡𑀲𑀸𑀮𑀁 𑀓𑀭𑀺𑀁𑀲𑀼. 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 𑀲𑀩𑁆𑀩𑀁 𑀅𑀢𑀻𑀢𑀯𑀢𑁆𑀣𑀼 𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑁂 𑀲𑀼𑀭𑀼𑀘𑀺𑀚𑀸𑀢𑀓𑁂 (𑀚𑀸. 𑁧.𑁧𑁪.𑁧𑁦𑁨 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁪𑁦.

‘‘𑀧𑀦𑀸𑀤𑁄 ¶ 𑀦𑀸𑀫 𑀲𑁄 𑀭𑀸𑀚𑀸, 𑀬𑀲𑁆𑀲 𑀬𑀽𑀧𑁄 𑀲𑀼𑀯𑀡𑁆𑀡𑀬𑁄;

𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄, 𑀉𑀤𑁆𑀥𑀫𑀸𑀳𑀼 𑀲𑀳𑀲𑁆𑀲𑀥𑀸.

𑁪𑁧.

‘‘𑀲𑀳𑀲𑁆𑀲𑀓𑀡𑁆𑀟𑁄 ¶ 𑀲𑀢𑀕𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑁄;

𑀅𑀦𑀘𑁆𑀘𑀼𑀁 𑀢𑀢𑁆𑀣 𑀕𑀦𑁆𑀥𑀩𑁆𑀩𑀸, 𑀙 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸.

𑁪𑁨.

‘‘𑀏𑀯𑀫𑁂𑀢𑀁 𑀢𑀤𑀸 𑀆𑀲𑀺, 𑀬𑀣𑀸 𑀪𑀸𑀲𑀲𑀺 𑀪𑀤𑁆𑀤𑀚𑀺;

𑀲𑀓𑁆𑀓𑁄 𑀅𑀳𑀁 𑀢𑀤𑀸 𑀆𑀲𑀺𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀢𑀯𑀸’’𑀢𑀺.

𑀢𑀢𑁆𑀣 𑀬𑀽𑀧𑁄𑀢𑀺 𑀧𑀸𑀲𑀸𑀤𑁄. 𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄𑀢𑀺 𑀯𑀺𑀢𑁆𑀣𑀸𑀭𑀢𑁄 𑀲𑁄𑀴𑀲𑀓𑀡𑁆𑀟𑀧𑀸𑀢𑀯𑀺𑀢𑁆𑀣𑀸𑀭𑁄 𑀅𑀳𑁄𑀲𑀺. 𑀉𑀤𑁆𑀥𑀫𑀸𑀳𑀼 𑀲𑀳𑀲𑁆𑀲𑀥𑀸𑀢𑀺 𑀉𑀩𑁆𑀩𑁂𑀥𑁂𑀦 𑀲𑀳𑀲𑁆𑀲𑀓𑀡𑁆𑀟𑀕𑀫𑀦𑀫𑀢𑁆𑀢𑀁 𑀉𑀘𑁆𑀘𑁄 𑀅𑀳𑀼, 𑀲𑀳𑀲𑁆𑀲𑀓𑀡𑁆𑀟𑀕𑀫𑀦𑀕𑀡𑀦𑀸𑀬 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦𑀲𑁆𑀲 𑀅𑀝𑁆𑀞𑀬𑁄𑀚𑀦𑀫𑀢𑁆𑀢𑁄.

𑀲𑀳𑀲𑁆𑀲𑀓𑀡𑁆𑀟𑁄 𑀲𑀢𑀕𑁂𑀡𑁆𑀟𑀽𑀢𑀺 𑀲𑁄 𑀧𑀦𑁂𑀲 𑀲𑀳𑀲𑁆𑀲𑀓𑀡𑁆𑀟𑀼𑀩𑁆𑀩𑁂𑀥𑁄 𑀧𑀸𑀲𑀸𑀤𑁄 𑀲𑀢𑀪𑀽𑀫𑀺𑀓𑁄 𑀅𑀳𑁄𑀲𑀺. 𑀥𑀚𑀸𑀮𑀽𑀢𑀺 𑀥𑀚𑀲𑀫𑁆𑀧𑀦𑁆𑀦𑁄. 𑀳𑀭𑀺𑀢𑀸𑀫𑀬𑁄𑀢𑀺 𑀳𑀭𑀺𑀢𑀫𑀡𑀺𑀧𑀭𑀺𑀓𑁆𑀔𑀺𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀫𑀸𑀮𑀼𑀳𑀭𑀺𑀢𑀸𑀫𑀬𑁄’’𑀢𑀺 𑀧𑀸𑀞𑁄, 𑀳𑀭𑀺𑀢𑀫𑀡𑀺𑀫𑀬𑁂𑀳𑀺 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀸𑀮𑀽𑀢𑀺 𑀓𑀺𑀭 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀸𑀦𑀁 𑀦𑀸𑀫𑀁. 𑀕𑀦𑁆𑀥𑀩𑁆𑀩𑀸𑀢𑀺 𑀦𑀝𑀸, 𑀙 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸𑀢𑀺 𑀙 𑀕𑀦𑁆𑀥𑀩𑁆𑀩𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀭𑀜𑁆𑀜𑁄 𑀭𑀢𑀺𑀚𑀦𑀦𑀢𑁆𑀣𑀸𑀬 𑀦𑀘𑁆𑀘𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂 𑀏𑀯𑀁 𑀦𑀘𑁆𑀘𑀦𑁆𑀢𑀸𑀧𑀺 𑀭𑀸𑀚𑀸𑀦𑀁 𑀳𑀸𑀲𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀦𑀝𑀁 𑀧𑁂𑀲𑁂𑀢𑁆𑀯𑀸 𑀲𑀫𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀤𑀸 𑀫𑀳𑀸𑀧𑀦𑀸𑀤𑁄 𑀳𑀲𑀺.

𑀬𑀣𑀸 𑀪𑀸𑀲𑀲𑀺, 𑀪𑀤𑁆𑀤𑀚𑀻𑀢𑀺 𑀪𑀤𑁆𑀤𑀚𑀺𑀢𑁆𑀣𑁂𑀭𑁂𑀦 𑀳𑀺 ‘‘𑀪𑀤𑁆𑀤𑀚𑀺, 𑀢𑀬𑀸 𑀫𑀳𑀸𑀧𑀦𑀸𑀤𑀭𑀸𑀚𑀓𑀸𑀮𑁂 𑀅𑀚𑁆𑀛𑀸𑀯𑀼𑀢𑁆𑀣𑀧𑀸𑀲𑀸𑀤𑁄 𑀓𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀫𑀼𑀕𑁆𑀕𑁄, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑁂𑀦 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀦𑀺𑀩𑁆𑀩𑀢𑁆𑀢𑀪𑀸𑀯𑁄 𑀘 𑀫𑀳𑀸𑀧𑀦𑀸𑀤𑀭𑀸𑀚𑀪𑀸𑀯𑁄 𑀘 𑀪𑀸𑀲𑀺𑀢𑁄 𑀳𑁄𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸 ‘‘𑀬𑀣𑀸 𑀢𑁆𑀯𑀁, 𑀪𑀤𑁆𑀤𑀚𑀺, 𑀪𑀸𑀲𑀲𑀺, 𑀢𑀤𑀸 𑀏𑀢𑀁 𑀢𑀣𑁂𑀯 𑀅𑀳𑁄𑀲𑀺, 𑀅𑀳𑀁 𑀢𑀤𑀸 𑀢𑀯 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀳𑁄𑀲𑀺’’𑀦𑁆𑀢𑀺 𑀆𑀳. 𑀢𑀲𑁆𑀫𑀺𑀁 ¶ 𑀔𑀡𑁂 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀦𑀺𑀓𑁆𑀓𑀗𑁆𑀔𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀳𑀸𑀧𑀦𑀸𑀤𑁄 𑀭𑀸𑀚𑀸 𑀪𑀤𑁆𑀤𑀚𑀺 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀧𑀦𑀸𑀤𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁬𑁫] 𑁫. 𑀔𑀼𑀭𑀧𑁆𑀧𑀚𑀸𑀢𑀓𑀯𑀡𑁆𑀡𑀦𑀸

𑀤𑀺𑀲𑁆𑀯𑀸 ¶ 𑀔𑀼𑀭𑀧𑁆𑀧𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼, 𑀓𑀲𑁆𑀫𑀸 𑀏𑀯𑀁 𑀢𑁆𑀯𑀁 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀺𑀬𑁆𑀬𑀸𑀦𑀺𑀓𑀝𑁆𑀞𑀸𑀦𑁂𑀧𑀺 𑀯𑀻𑀭𑀺𑀬𑀁 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀅𑀝𑀯𑀺𑀆𑀭𑀓𑁆𑀔𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀜𑁆𑀘𑀧𑀼𑀭𑀺𑀲𑀲𑀢𑀧𑀭𑀺𑀯𑀸𑀭𑁄 𑀅𑀝𑀯𑀺𑀆𑀭𑀓𑁆𑀔𑀓𑁂𑀲𑀼 𑀲𑀩𑁆𑀩𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀅𑀝𑀯𑀺𑀫𑀼𑀔𑁂 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀪𑀢𑀺𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀅𑀝𑀯𑀺𑀁 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀢𑀁 𑀕𑀸𑀫𑀁 𑀧𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫, 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀫𑀁 𑀅𑀝𑀯𑀺𑀁 𑀅𑀢𑀺𑀓𑁆𑀓𑀸𑀫𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀳𑀲𑁆𑀲𑀁 𑀕𑀡𑁆𑀳𑀺, 𑀪𑀢𑀺𑀁 𑀕𑀡𑁆𑀳𑀦𑁆𑀢𑁄𑀬𑁂𑀯 𑀢𑀲𑁆𑀲 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺. 𑀲𑁄 𑀢𑀁 𑀆𑀤𑀸𑀬 𑀅𑀝𑀯𑀺𑀁 𑀧𑀸𑀯𑀺𑀲𑀺, 𑀅𑀝𑀯𑀺𑀫𑀚𑁆𑀛𑁂 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀉𑀝𑁆𑀞𑀳𑀺𑀁𑀲𑀼, 𑀘𑁄𑀭𑁂 𑀤𑀺𑀲𑁆𑀯𑀸𑀯 𑀲𑁂𑀲𑀧𑀼𑀭𑀺𑀲𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺𑀁𑀲𑀼, 𑀆𑀭𑀓𑁆𑀔𑀓𑀚𑁂𑀝𑁆𑀞𑀓𑁄 𑀏𑀓𑁄𑀯 𑀦𑀤𑀦𑁆𑀢𑁄 𑀯𑀕𑁆𑀕𑀦𑁆𑀢𑁄 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘𑀲𑀢𑁂𑀧𑀺 𑀘𑁄𑀭𑁂 𑀧𑀮𑀸𑀧𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀁 𑀲𑁄𑀢𑁆𑀣𑀺𑀦𑀸 𑀓𑀦𑁆𑀢𑀸𑀭𑀁 𑀢𑀸𑀭𑁂𑀲𑀺.

𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀧𑀭𑀓𑀦𑁆𑀢𑀸𑀭𑁂 𑀲𑀢𑁆𑀣𑀁 𑀦𑀺𑀯𑁂𑀲𑁂𑀢𑁆𑀯𑀸 ¶ 𑀆𑀭𑀓𑁆𑀔𑀓𑀚𑁂𑀝𑁆𑀞𑀓𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀼𑀔𑀦𑀺𑀲𑀺𑀦𑁆𑀦𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 ‘‘𑀲𑀫𑁆𑀫, 𑀢𑀣𑀸𑀤𑀸𑀭𑀼𑀡𑀸𑀦𑀁 𑀘𑁄𑀭𑀸𑀦𑀁 𑀆𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀅𑀯𑀢𑁆𑀣𑀭𑀡𑀓𑀸𑀮𑁂 𑀓𑁂𑀦 𑀦𑀼 𑀔𑁄 𑀢𑁂 𑀓𑀸𑀭𑀡𑁂𑀦 𑀘𑀺𑀢𑁆𑀢𑀼𑀢𑁆𑀭𑀸𑀲𑀫𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁩.

‘‘𑀤𑀺𑀲𑁆𑀯𑀸 ¶ 𑀔𑀼𑀭𑀧𑁆𑀧𑁂 𑀥𑀦𑀼𑀯𑁂𑀕𑀦𑀼𑀦𑁆𑀦𑁂, 𑀔𑀕𑁆𑀕𑁂 𑀕𑀳𑀻𑀢𑁂 𑀢𑀺𑀔𑀺𑀡𑁂 𑀢𑁂𑀮𑀥𑁄𑀢𑁂;

𑀢𑀲𑁆𑀫𑀺𑀁 𑀪𑀬𑀲𑁆𑀫𑀺𑀁 𑀫𑀭𑀡𑁂 𑀯𑀺𑀬𑀽𑀴𑁆𑀳𑁂, 𑀓𑀲𑁆𑀫𑀸 𑀦𑀼 𑀢𑁂 𑀦𑀸𑀳𑀼 𑀙𑀫𑁆𑀪𑀺𑀢𑀢𑁆𑀢’’𑀦𑁆𑀢𑀺.

𑀢𑀢𑁆𑀣 𑀥𑀦𑀼𑀯𑁂𑀕𑀦𑀼𑀦𑁆𑀦𑁂𑀢𑀺 𑀥𑀦𑀼𑀯𑁂𑀕𑁂𑀦 𑀯𑀺𑀲𑁆𑀲𑀝𑁆𑀞𑁂. 𑀔𑀕𑁆𑀕𑁂 𑀕𑀳𑀻𑀢𑁂𑀢𑀺 𑀣𑀭𑀼𑀤𑀡𑁆𑀟𑁂𑀳𑀺 𑀲𑀼𑀕𑀳𑀺𑀢𑁂 𑀔𑀕𑁆𑀕𑁂. 𑀫𑀭𑀡𑁂 𑀯𑀺𑀬𑀽𑀴𑁆𑀳𑁂𑀢𑀺 𑀫𑀭𑀡𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂. 𑀓𑀲𑁆𑀫𑀸 𑀦𑀼 𑀢𑁂 𑀦𑀸𑀳𑀽𑀢𑀺 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀦𑀸𑀳𑁄𑀲𑀺. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀲𑀭𑀻𑀭𑀘𑀮𑀦𑀁.

𑀢𑀁 𑀲𑀼𑀢𑁆𑀯𑀸 𑀆𑀭𑀓𑁆𑀔𑀓𑀚𑁂𑀝𑁆𑀞𑀓𑁄 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁪.

‘‘𑀤𑀺𑀲𑁆𑀯𑀸 ¶ 𑀔𑀼𑀭𑀧𑁆𑀧𑁂 𑀥𑀦𑀼𑀯𑁂𑀕𑀦𑀼𑀦𑁆𑀦𑁂, 𑀔𑀕𑁆𑀕𑁂 𑀕𑀳𑀻𑀢𑁂 𑀢𑀺𑀔𑀺𑀡𑁂 𑀢𑁂𑀮𑀥𑁄𑀢𑁂;

𑀢𑀲𑁆𑀫𑀺𑀁 𑀪𑀬𑀲𑁆𑀫𑀺𑀁 𑀫𑀭𑀡𑁂 𑀯𑀺𑀬𑀽𑀴𑁆𑀳𑁂, 𑀯𑁂𑀤𑀁 𑀅𑀮𑀢𑁆𑀣𑀁 𑀯𑀺𑀧𑀼𑀮𑀁 𑀉𑀴𑀸𑀭𑀁.

𑁪𑁫.

‘‘𑀲𑁄 𑀯𑁂𑀤𑀚𑀸𑀢𑁄 𑀅𑀚𑁆𑀛𑀪𑀯𑀺𑀁 𑀅𑀫𑀺𑀢𑁆𑀢𑁂, 𑀧𑀼𑀩𑁆𑀩𑁂𑀯 𑀫𑁂 𑀚𑀻𑀯𑀺𑀢𑀫𑀸𑀲𑀺 𑀘𑀢𑁆𑀢𑀁;

𑀦 𑀳𑀺 𑀚𑀻𑀯𑀺𑀢𑁂 𑀆𑀮𑀬𑀁 𑀓𑀼𑀩𑁆𑀩𑀫𑀸𑀦𑁄, 𑀲𑀽𑀭𑁄 𑀓𑀬𑀺𑀭𑀸 𑀲𑀽𑀭𑀓𑀺𑀘𑁆𑀘𑀁 𑀓𑀤𑀸𑀘𑀻’’𑀢𑀺.

𑀢𑀢𑁆𑀣 𑀯𑁂𑀤𑀁 𑀅𑀮𑀢𑁆𑀣𑀦𑁆𑀢𑀺 𑀢𑀼𑀝𑁆𑀞𑀺𑀜𑁆𑀘𑁂𑀯 𑀲𑁄𑀫𑀦𑀲𑁆𑀲𑀜𑁆𑀘 𑀧𑀝𑀺𑀮𑀪𑀺𑀁. 𑀯𑀺𑀧𑀼𑀮𑀦𑁆𑀢𑀺 𑀩𑀳𑀼𑀁. 𑀉𑀴𑀸𑀭𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀚𑁆𑀛𑀪𑀯𑀺𑀦𑁆𑀢𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀪𑀺𑀪𑀯𑀺𑀁. 𑀧𑀼𑀩𑁆𑀩𑁂𑀯 𑀫𑁂 𑀚𑀻𑀯𑀺𑀢𑀫𑀸𑀲𑀺 𑀘𑀢𑁆𑀢𑀦𑁆𑀢𑀺 𑀫𑀬𑀸 𑀧𑀼𑀩𑁆𑀩𑁂𑀯 𑀢𑀯 𑀳𑀢𑁆𑀣𑀢𑁄 𑀪𑀢𑀺𑀁 𑀕𑀡𑁆𑀳𑀦𑁆𑀢𑁂𑀦𑁂𑀯 𑀚𑀻𑀯𑀺𑀢𑀁 𑀘𑀢𑁆𑀢𑀫𑀸𑀲𑀺. 𑀦 𑀳𑀺 𑀚𑀻𑀯𑀺𑀢𑁂 𑀆𑀮𑀬𑀁 𑀓𑀼𑀩𑁆𑀩𑀫𑀸𑀦𑁄𑀢𑀺 𑀚𑀻𑀯𑀺𑀢𑀲𑁆𑀫𑀺𑀜𑁆𑀳𑀺 𑀦𑀺𑀓𑀦𑁆𑀢𑀺𑀁 𑀓𑀼𑀭𑀼𑀫𑀸𑀦𑁄 𑀧𑀼𑀭𑀺𑀲𑀓𑀺𑀘𑁆𑀘𑀁 𑀓𑀤𑀸𑀘𑀺𑀧𑀺 𑀦 𑀓𑀭𑁄𑀢𑀺.

𑀏𑀯𑀁 ¶ 𑀲𑁄 𑀲𑀭𑀯𑀲𑁆𑀲𑁂 𑀯𑀲𑁆𑀲𑀦𑁆𑀢𑁂 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀅𑀢𑁆𑀢𑀦𑀸 𑀲𑀽𑀭𑀓𑀺𑀘𑁆𑀘𑀲𑁆𑀲 𑀓𑀢𑀪𑀸𑀯𑀁 𑀜𑀸𑀧𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀓𑀕𑀸𑀫𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀆𑀭𑀓𑁆𑀔𑀓𑀚𑁂𑀝𑁆𑀞𑀓𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀔𑀼𑀭𑀧𑁆𑀧𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁬𑁬] 𑁬. 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑀚𑀸𑀢𑀓𑀯𑀡𑁆𑀡𑀦𑀸

𑀬𑁂𑀦𑀸𑀲𑀺 ¶ 𑀓𑀺𑀲𑀺𑀬𑀸 𑀧𑀡𑁆𑀟𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀸 𑀅𑀪𑀺𑀭𑀽𑀧𑀸 𑀇𑀢𑁆𑀣𑀻 𑀏𑀓𑀁 𑀅𑀪𑀺𑀭𑀽𑀧𑀁 𑀓𑀼𑀝𑀼𑀫𑁆𑀩𑀺𑀓𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁄𑀲𑀺, 𑀲𑀓𑀮𑀲𑀭𑀻𑀭𑀁 𑀛𑀸𑀬𑀫𑀸𑀦𑁄 𑀯𑀺𑀬𑀲𑁆𑀲𑀸 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑀕𑁆𑀕𑀺 𑀉𑀧𑁆𑀧𑀚𑁆𑀚𑀺. 𑀲𑀸 𑀦𑁂𑀯 𑀓𑀸𑀬𑀲𑁆𑀲𑀸𑀤𑀁 𑀮𑀪𑀺, 𑀦 𑀘𑀺𑀢𑁆𑀢𑀲𑁆𑀲𑀸𑀤𑀁, 𑀪𑀢𑁆𑀢𑀫𑁆𑀧𑀺𑀲𑁆𑀲𑀸 𑀦 𑀭𑀼𑀘𑁆𑀘𑀺, 𑀓𑁂𑀯𑀮𑀁 𑀫𑀜𑁆𑀘𑀓𑀅𑀝𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀉𑀧𑀝𑁆𑀞𑀸𑀬𑀺𑀓𑀸 𑀘 𑀲𑀳𑀸𑀬𑀺𑀓𑀸 𑀘 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁 𑀓𑀫𑁆𑀧𑀫𑀸𑀦𑀘𑀺𑀢𑁆𑀢𑀸 𑀅𑀝𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀧𑀦𑁆𑀦𑀸, 𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺. 𑀲𑀸 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀅𑀓𑀣𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀢𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀺, 𑀫𑀬𑀁 𑀢𑀁 ¶ 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀼𑀁, 𑀲𑁄 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀅𑀥𑀺𑀯𑀸𑀲𑁂𑀲𑀺. 𑀢𑀸 ‘‘𑀅𑀲𑀼𑀓𑀤𑀺𑀯𑀲𑁂 𑀅𑀲𑀼𑀓𑀯𑁂𑀮𑀸𑀬𑀁 𑀆𑀕𑀘𑁆𑀙𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀅𑀢𑁆𑀢𑀦𑁄 𑀲𑀬𑀦𑀕𑀩𑁆𑀪𑀁 𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀸 𑀢𑀲𑁆𑀫𑀺𑀁 𑀆𑀕𑀦𑁆𑀢𑁆𑀯𑀸 𑀲𑀬𑀦𑁂𑀓𑀤𑁂𑀲𑁂 𑀦𑀺𑀲𑀺𑀦𑁆𑀦𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀫𑀲𑁆𑀲 ¶ 𑀕𑀭𑀼𑀓𑀁 𑀅𑀓𑀢𑁆𑀯𑀸 𑀇𑀤𑀸𑀦𑁂𑀯 𑀑𑀓𑀸𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀇𑀲𑁆𑀲𑀭𑀺𑀬𑀁 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀆𑀕𑀢𑀤𑀺𑀯𑀲𑁂𑀬𑁂𑀯 𑀑𑀓𑀸𑀲𑀓𑀭𑀡𑀁 𑀦𑀸𑀫 𑀅𑀓𑀸𑀭𑀡𑀁, 𑀅𑀚𑁆𑀚 𑀦 𑀫𑀗𑁆𑀓𑀼𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀑𑀓𑀸𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀳𑀢𑁆𑀣𑀕𑀳𑀡𑀸𑀤𑀺𑀯𑀲𑁂𑀦 𑀓𑁂𑀴𑀺𑀁 𑀓𑀸𑀢𑀼𑀁 𑀆𑀭𑀤𑁆𑀥𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀅𑀧𑁂𑀳𑀺 𑀅𑀧𑁂𑀳𑀺, 𑀦 𑀫𑁂 𑀢𑀬𑀸 𑀅𑀢𑁆𑀣𑁄’’𑀢𑀺 𑀦𑀺𑀩𑁆𑀪𑀘𑁆𑀙𑁂𑀲𑀺. 𑀲𑁄 𑀑𑀲𑀓𑁆𑀓𑀺𑀢𑁆𑀯𑀸 𑀮𑀚𑁆𑀚𑀺𑀢𑁄 𑀉𑀝𑁆𑀞𑀸𑀬 𑀅𑀢𑁆𑀢𑀦𑁄 𑀕𑁂𑀳𑀫𑁂𑀯 𑀕𑀢𑁄.

𑀇𑀢𑀭𑀸 𑀇𑀢𑁆𑀣𑀺𑀬𑁄 𑀢𑀸𑀬 𑀢𑀣𑀸 𑀓𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑁂 𑀦𑀺𑀓𑁆𑀔𑀦𑁆𑀢𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀢𑁆𑀯𑀁 𑀏𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀆𑀳𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀅𑀣 𑀦𑀁 𑀫𑀬𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸 𑀆𑀦𑀬𑀺𑀫𑁆𑀳, 𑀢𑀲𑁆𑀲 𑀓𑀲𑁆𑀫𑀸 𑀑𑀓𑀸𑀲𑀁 𑀦 𑀅𑀓𑀸𑀲𑀻’’𑀢𑀺. 𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀇𑀢𑀭𑀸 ‘‘𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀓𑀼𑀝𑀼𑀫𑁆𑀩𑀺𑀓𑁄 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀺. 𑀲𑀸 𑀢𑀁 𑀅𑀮𑀪𑀫𑀸𑀦𑀸 𑀦𑀺𑀭𑀸𑀳𑀸𑀭𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀲𑁆𑀲𑀸 𑀫𑀢𑀪𑀸𑀯𑀁 𑀜𑀢𑁆𑀯𑀸 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀆𑀤𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀘 ‘‘𑀓𑀺𑀁 𑀦𑀼 𑀔𑁄, 𑀉𑀧𑀸𑀲𑀓, 𑀦 𑀧𑀜𑁆𑀜𑀸𑀬𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑁆𑀯𑀸𑀳𑀁, 𑀪𑀦𑁆𑀢𑁂, 𑀏𑀢𑁆𑀢𑀓𑀁 𑀓𑀸𑀮𑀁 𑀮𑀚𑁆𑀚𑀸𑀬 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀦𑀸𑀕𑀢𑁄’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀦 ¶ , 𑀉𑀧𑀸𑀲𑀓, 𑀇𑀤𑀸𑀦𑁂𑀯𑁂𑀲𑀸 𑀓𑀺𑀮𑁂𑀲𑀯𑀲𑁂𑀦 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀕𑀢𑀓𑀸𑀮𑁂 𑀢𑀁 𑀑𑀓𑀸𑀲𑀁 𑀅𑀓𑀢𑁆𑀯𑀸 𑀮𑀚𑁆𑀚𑀸𑀧𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀧𑀦 𑀧𑀡𑁆𑀟𑀺𑀢𑁂𑀲𑀼 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀕𑀢𑀓𑀸𑀮𑁂 𑀑𑀓𑀸𑀲𑀁 𑀅𑀓𑀢𑁆𑀯𑀸 𑀓𑀺𑀮𑀫𑁂𑀢𑁆𑀯𑀸𑀯 𑀉𑀬𑁆𑀬𑁄𑀚𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀺𑀦𑁆𑀥𑀯𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑁄 𑀦𑀸𑀫 𑀳𑀼𑀢𑁆𑀯𑀸 𑀢𑀲𑁆𑀲 𑀫𑀗𑁆𑀕𑀮𑀅𑀲𑁆𑀲𑁄 𑀅𑀳𑁄𑀲𑀺. 𑀅𑀲𑁆𑀲𑀕𑁄𑀧𑀓𑀸 𑀢𑀁 𑀦𑁂𑀢𑁆𑀯𑀸 𑀕𑀗𑁆𑀕𑀸𑀬𑀁 𑀦𑁆𑀳𑀸𑀧𑁂𑀦𑁆𑀢𑀺. 𑀅𑀣 𑀦𑀁 𑀪𑀤𑁆𑀤𑀮𑀻 𑀦𑀸𑀫 𑀕𑀤𑁆𑀭𑀪𑀻 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀓𑀫𑁆𑀧𑀫𑀸𑀦𑀸 𑀦𑁂𑀯 𑀢𑀺𑀡𑀁 𑀔𑀸𑀤𑀺 ¶ , 𑀦 𑀉𑀤𑀓𑀁 𑀧𑀺𑀯𑀺, 𑀧𑀭𑀺𑀲𑀼𑀲𑁆𑀲𑀺𑀢𑁆𑀯𑀸 𑀓𑀺𑀲𑀸 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑀸 𑀅𑀳𑁄𑀲𑀺. 𑀅𑀣 𑀦𑀁 𑀧𑀼𑀢𑁆𑀢𑁄 𑀕𑀤𑁆𑀭𑀪𑀧𑁄𑀢𑀓𑁄 𑀫𑀸𑀢𑀭𑀁 𑀧𑀭𑀺𑀲𑀼𑀲𑁆𑀲𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁, 𑀅𑀫𑁆𑀫, 𑀦𑁂𑀯 𑀢𑀺𑀡𑀁 𑀔𑀸𑀤𑀲𑀺, 𑀦 𑀉𑀤𑀓𑀁 𑀧𑀺𑀯𑀲𑀺, 𑀧𑀭𑀺𑀲𑀼𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀓𑀫𑁆𑀧𑀫𑀸𑀦𑀸 𑀦𑀺𑀧𑀚𑁆𑀚𑀲𑀺, 𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀅𑀓𑀣𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀸 𑀢𑀫𑀢𑁆𑀣𑀁 𑀓𑀣𑁂𑀲𑀺. 𑀅𑀣 𑀦𑀁 𑀧𑀼𑀢𑁆𑀢𑁄 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀅𑀫𑁆𑀫, 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑀲𑁆𑀲 𑀦𑁆𑀳𑀸𑀬𑀺𑀢𑀼𑀁 ¶ 𑀆𑀕𑀢𑀓𑀸𑀮𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀸𑀢, 𑀫𑀬𑁆𑀳𑀁 𑀫𑀸𑀢𑀸 𑀢𑀼𑀫𑁆𑀳𑁂𑀲𑀼 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀦𑀺𑀭𑀸𑀳𑀸𑀭𑀸 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀺, 𑀚𑀻𑀯𑀺𑀢𑀤𑀸𑀦𑀫𑀲𑁆𑀲𑀸 𑀤𑁂𑀣𑀸’’𑀢𑀺 𑀆𑀳. ‘‘𑀲𑀸𑀥𑀼, 𑀢𑀸𑀢, 𑀤𑀲𑁆𑀲𑀸𑀫𑀺, 𑀅𑀲𑁆𑀲𑀕𑁄𑀧𑀓𑀸 𑀫𑀁 𑀦𑁆𑀳𑀸𑀧𑁂𑀢𑁆𑀯𑀸 𑀣𑁄𑀓𑀁 𑀕𑀗𑁆𑀕𑀸𑀢𑀻𑀭𑁂 𑀯𑀺𑀘𑀭𑀡𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀢𑁆𑀯𑀁 𑀫𑀸𑀢𑀭𑀁 𑀕𑀳𑁂𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀏𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀆𑀦𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑁄 𑀅𑀝𑁆𑀞𑀸𑀲𑀺.

𑀅𑀲𑁆𑀲𑀕𑁄𑀧𑀓𑀸𑀧𑀺 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀢𑀁 𑀕𑀤𑁆𑀭𑀪𑀺𑀁 𑀑𑀮𑁄𑀓𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀅𑀣 𑀲𑀸 𑀕𑀤𑁆𑀭𑀪𑀻 𑀢𑀲𑁆𑀫𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀉𑀧𑀲𑀺𑀗𑁆𑀖𑀫𑀸𑀦𑁂 ‘‘𑀲𑀘𑀸𑀳𑀁 𑀕𑀭𑀼𑀁 𑀅𑀓𑀢𑁆𑀯𑀸 𑀆𑀕𑀢𑀓𑁆𑀔𑀡𑁂𑀬𑁂𑀯𑀲𑁆𑀲 𑀑𑀓𑀸𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀬𑀲𑁄 𑀘 𑀇𑀲𑁆𑀲𑀭𑀺𑀬𑀜𑁆𑀘 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀅𑀦𑀺𑀘𑁆𑀙𑀫𑀸𑀦𑀸 𑀯𑀺𑀬 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀺𑀦𑁆𑀥𑀯𑀲𑁆𑀲 𑀳𑁂𑀝𑁆𑀞𑀸𑀳𑀦𑀼𑀓𑁂 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀮𑀸𑀬𑀺, 𑀤𑀦𑁆𑀢𑀫𑀽𑀮𑀫𑀲𑁆𑀲 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑁄 ‘‘𑀓𑁄 𑀫𑁂 𑀏𑀢𑀸𑀬 𑀅𑀢𑁆𑀣𑁄’’𑀢𑀺 ¶ 𑀮𑀚𑁆𑀚𑀺𑀢𑁄 𑀢𑀢𑁄𑀯 𑀧𑀮𑀸𑀬𑀺. 𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀢𑁆𑀯𑀸 𑀲𑁄𑀘𑀫𑀸𑀦𑀸 𑀦𑀺𑀧𑀚𑁆𑀚𑀺.

𑀅𑀣 ¶ 𑀦𑀁 𑀧𑀼𑀢𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀬𑁂𑀦𑀸𑀲𑀺 𑀓𑀺𑀲𑀺𑀬𑀸 𑀧𑀡𑁆𑀟𑀼, 𑀬𑁂𑀦 𑀪𑀢𑁆𑀢𑀁 𑀦 𑀭𑀼𑀘𑁆𑀘𑀢𑀺;

𑀅𑀬𑀁 𑀲𑁄 𑀆𑀕𑀢𑁄 𑀪𑀢𑁆𑀢𑀸, 𑀓𑀲𑁆𑀫𑀸 𑀤𑀸𑀦𑀺 𑀧𑀮𑀸𑀬𑀲𑀻’’𑀢𑀺.

𑀢𑀢𑁆𑀣 𑀬𑁂𑀦𑀸𑀢𑀺 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀬𑁂𑀦 𑀓𑀸𑀭𑀡𑀪𑀽𑀢𑁂𑀦.

𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀤𑁆𑀭𑀪𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀲𑀘𑁂 𑀧𑀦𑀸𑀤𑀺𑀓𑁂𑀦𑁂𑀯, 𑀲𑀦𑁆𑀣𑀯𑁄 𑀦𑀸𑀫 𑀚𑀸𑀬𑀢𑀺;

𑀬𑀲𑁄 𑀳𑀸𑀬𑀢𑀺 𑀇𑀢𑁆𑀣𑀻𑀦𑀁, 𑀢𑀲𑁆𑀫𑀸 𑀢𑀸𑀢 𑀧𑀮𑀸𑀬𑀳’’𑀦𑁆𑀢𑀺.

𑀢𑀢𑁆𑀣 𑀆𑀤𑀺𑀓𑁂𑀦𑁂𑀯𑀸𑀢𑀺𑀆𑀤𑀺𑀢𑁄𑀯 𑀧𑀞𑀫𑀫𑁂𑀯. 𑀲𑀦𑁆𑀣𑀯𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀁𑀬𑁄𑀕𑀯𑀲𑁂𑀦 𑀫𑀺𑀢𑁆𑀢𑀲𑀦𑁆𑀣𑀯𑁄. 𑀬𑀲𑁄 𑀳𑀸𑀬𑀢𑀺 𑀇𑀢𑁆𑀣𑀻𑀦𑀦𑁆𑀢𑀺, 𑀢𑀸𑀢, 𑀇𑀢𑁆𑀣𑀻𑀦𑀜𑁆𑀳𑀺 𑀕𑀭𑀼𑀓𑀁 𑀅𑀓𑀢𑁆𑀯𑀸 𑀆𑀤𑀺𑀢𑁄𑀯 𑀲𑀦𑁆𑀣𑀯𑀁 𑀓𑀼𑀭𑀼𑀫𑀸𑀦𑀸𑀦𑀁 𑀬𑀲𑁄 𑀳𑀸𑀬𑀢𑀺, 𑀇𑀲𑁆𑀲𑀭𑀺𑀬𑀕𑀩𑁆𑀩𑀺𑀢𑀪𑀸𑀯𑁄 𑀧𑀭𑀺𑀳𑀸𑀬𑀢𑀻𑀢𑀺. 𑀏𑀯𑀁 𑀲𑀸 𑀇𑀢𑁆𑀣𑀻𑀦𑀁 𑀲𑀪𑀸𑀯𑀁 𑀧𑀼𑀢𑁆𑀢𑀲𑁆𑀲 𑀓𑀣𑁂𑀲𑀺.

𑀢𑀢𑀺𑀬𑀕𑀸𑀣𑀁 ¶ 𑀧𑀦 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀆𑀳 𑁋

𑁪𑁮.

‘‘𑀬𑀲𑀲𑁆𑀲𑀺𑀦𑀁 𑀓𑀼𑀮𑁂 𑀚𑀸𑀢𑀁, 𑀆𑀕𑀢𑀁 𑀬𑀸 𑀦 𑀇𑀘𑁆𑀙𑀢𑀺;

𑀲𑁄𑀘𑀢𑀺 𑀘𑀺𑀭𑀭𑀢𑁆𑀢𑀸𑀬, 𑀯𑀸𑀢𑀕𑁆𑀕𑀫𑀺𑀯 𑀪𑀤𑁆𑀤𑀮𑀻’’𑀢𑀺.

𑀢𑀢𑁆𑀣 𑀬𑀲𑀲𑁆𑀲𑀺𑀦𑀦𑁆𑀢𑀺 𑀬𑀲𑀲𑀫𑁆𑀧𑀦𑁆𑀦𑀁. 𑀬𑀸 𑀦 𑀇𑀘𑁆𑀙𑀢𑀻𑀢𑀺 𑀬𑀸 𑀇𑀢𑁆𑀣𑀻 𑀢𑀣𑀸𑀭𑀽𑀧𑀁 𑀧𑀼𑀭𑀺𑀲𑀁 𑀦 𑀇𑀘𑁆𑀙𑀢𑀺. 𑀘𑀺𑀭𑀭𑀢𑁆𑀢𑀸𑀬𑀸𑀢𑀺 𑀘𑀺𑀭𑀭𑀢𑁆𑀢𑀁, 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀕𑀤𑁆𑀭𑀪𑀻 𑀲𑀸 𑀇𑀢𑁆𑀣𑀻 𑀅𑀳𑁄𑀲𑀺, 𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀸𑀢𑀕𑁆𑀕𑀲𑀺𑀦𑁆𑀥𑀯𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁬𑁭] 𑁭. 𑀓𑀓𑁆𑀓𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀺𑀗𑁆𑀕𑀻 ¶ ¶ 𑀫𑀺𑀕𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀕𑀳𑁂𑀢𑁆𑀯𑀸 𑀉𑀤𑁆𑀥𑀸𑀭𑀲𑁄𑀥𑀦𑀢𑁆𑀣𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀉𑀤𑁆𑀥𑀸𑀭𑀁 𑀲𑁄𑀥𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑁂𑀳𑀺 𑀕𑀳𑀺𑀢𑁄. 𑀪𑀭𑀺𑀬𑀸 𑀧𑀦𑀲𑁆𑀲 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀤𑀲𑁆𑀲𑀦𑀻𑀬𑀸, 𑀘𑁄𑀭𑀚𑁂𑀝𑁆𑀞𑀓𑁄 𑀢𑀲𑁆𑀲𑀸 𑀲𑀺𑀦𑁂𑀳𑁂𑀦 𑀓𑀼𑀝𑀼𑀫𑁆𑀩𑀺𑀓𑀁 𑀫𑀸𑀭𑁂𑀢𑀼𑀁 𑀆𑀭𑀪𑀺. 𑀲𑀸 𑀧𑀦 𑀇𑀢𑁆𑀣𑀻 𑀲𑀻𑀮𑀯𑀢𑀻 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀧𑀢𑀺𑀤𑁂𑀯𑀢𑀸, 𑀲𑀸 𑀘𑁄𑀭𑀚𑁂𑀝𑁆𑀞𑀓𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀲𑀸𑀫𑀺, 𑀲𑀘𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀫𑀸 𑀫𑀬𑁆𑀳𑀁 𑀲𑀸𑀫𑀺𑀓𑀁 𑀫𑀸𑀭𑁂𑀳𑀺. 𑀲𑀘𑁂 𑀫𑀸𑀭𑁂𑀲𑀺, 𑀅𑀳𑀫𑁆𑀧𑀺 𑀯𑀺𑀲𑀁 𑀯𑀸 𑀔𑀸𑀤𑀺𑀢𑁆𑀯𑀸 𑀦𑀸𑀲𑀯𑀸𑀢𑀁 𑀯𑀸 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀺, 𑀢𑀬𑀸 𑀧𑀦 𑀲𑀤𑁆𑀥𑀺𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀸 𑀫𑁂 𑀅𑀓𑀸𑀭𑀡𑁂𑀦 𑀲𑀸𑀫𑀺𑀓𑀁 𑀫𑀸𑀭𑁂𑀳𑀻’’𑀢𑀺 𑀬𑀸𑀘𑀺𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀲𑁄𑀢𑁆𑀣𑀺𑀦𑀸 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀧𑀺𑀝𑁆𑀞𑀺𑀯𑀺𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑀸 ‘‘𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀲𑀢𑁆𑀣𑀸𑀭𑀸 ‘‘𑀓𑀳𑀁 𑀕𑀢𑀢𑁆𑀣, 𑀉𑀧𑀸𑀲𑀓𑀸’’𑀢𑀺 𑀧𑀼𑀝𑁆𑀞𑀸 ‘‘𑀉𑀤𑁆𑀥𑀸𑀭𑀲𑁄𑀥𑀦𑀢𑁆𑀣𑀸𑀬𑀸’’𑀢𑀺 𑀆𑀳𑀁𑀲𑀼. ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦 𑀆𑀭𑁄𑀕𑁆𑀬𑁂𑀦 𑀆𑀕𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑀼𑀝𑀼𑀫𑁆𑀩𑀺𑀓𑁄 𑀆𑀳 𑁋 ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑁄, 𑀪𑀦𑁆𑀢𑁂, 𑀘𑁄𑀭𑀸 𑀕𑀡𑁆𑀳𑀺𑀁𑀲𑀼, 𑀢𑀢𑁆𑀭𑁂𑀲𑀸 𑀫𑀁 𑀫𑀸𑀭𑀺𑀬𑀫𑀸𑀦𑀁 𑀘𑁄𑀭𑀚𑁂𑀝𑁆𑀞𑀓𑀁 𑀬𑀸𑀘𑀺𑀢𑁆𑀯𑀸 𑀫𑁄𑀘𑁂𑀲𑀺, 𑀇𑀫𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺. 𑀲𑀢𑁆𑀣𑀸 ‘‘𑀦, 𑀉𑀧𑀸𑀲𑀓, 𑀇𑀤𑀸𑀦𑁂𑀯𑁂𑀢𑀸𑀬 ¶ 𑀏𑀯𑀁 𑀢𑀼𑀬𑁆𑀳𑀁 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸𑀦𑀫𑁆𑀧𑀺 𑀚𑀻𑀯𑀺𑀢𑀁 𑀅𑀤𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀳𑀺𑀫𑀯𑀦𑁆𑀢𑁂 𑀫𑀳𑀸𑀉𑀤𑀓𑀭𑀳𑀤𑁄, 𑀢𑀢𑁆𑀣 𑀫𑀳𑀸𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀦𑀺𑀯𑀸𑀲𑀪𑀸𑀯𑁂𑀦 ‘‘𑀓𑀼𑀴𑀻𑀭𑀤𑀳𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀓𑀓𑁆𑀓𑀝𑀓𑁄 𑀫𑀳𑀸 𑀅𑀳𑁄𑀲𑀺 𑀔𑀮𑀫𑀡𑁆𑀟𑀮𑀧𑁆𑀧𑀫𑀸𑀡𑁄, 𑀳𑀢𑁆𑀣𑀻 𑀕𑀳𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀔𑀸𑀤𑀢𑀺. 𑀳𑀢𑁆𑀣𑀻 𑀢𑀲𑁆𑀲 𑀪𑀬𑁂𑀦 𑀢𑀢𑁆𑀣 𑀑𑀢𑀭𑀺𑀢𑁆𑀯𑀸 𑀕𑁄𑀘𑀭𑀁 ¶ 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀼𑀴𑀻𑀭𑀤𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑀁 𑀳𑀢𑁆𑀣𑀺𑀬𑀽𑀣𑀚𑁂𑀝𑁆𑀞𑀓𑀁 𑀧𑀝𑀺𑀘𑁆𑀘 𑀓𑀭𑁂𑀡𑀼𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀕𑀩𑁆𑀪𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀧𑀩𑁆𑀩𑀢𑀧𑁆𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀭𑀓𑁆𑀔𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 ¶ 𑀫𑀳𑀸𑀲𑀭𑀻𑀭𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀅𑀜𑁆𑀚𑀦𑀧𑀩𑁆𑀩𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀏𑀓𑀸𑀬 𑀓𑀭𑁂𑀡𑀼𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 ‘‘𑀓𑀓𑁆𑀓𑀝𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀜𑁆𑀘 𑀫𑀸𑀢𑀭𑀜𑁆𑀘 𑀆𑀤𑀸𑀬 𑀢𑀁 𑀳𑀢𑁆𑀣𑀺𑀬𑀽𑀣𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀢𑀭𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀢𑀸𑀢, 𑀅𑀳𑀁 𑀓𑀓𑁆𑀓𑀝𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀧𑀺𑀢𑀸 ‘‘𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀢𑀸𑀢𑀸’’𑀢𑀺 𑀯𑀸𑀭𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑀁 ‘‘𑀢𑁆𑀯𑀜𑁆𑀜𑁂𑀯 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀆𑀳.

𑀲𑁄 𑀓𑀼𑀴𑀻𑀭𑀤𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂 𑀲𑀩𑁆𑀩𑀯𑀸𑀭𑀡𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀲𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀤𑀳𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀲𑁄 𑀓𑀓𑁆𑀓𑀝𑀓𑁄 𑀑𑀢𑀭𑀡𑀓𑀸𑀮𑁂 𑀕𑀡𑁆𑀳𑀸𑀢𑀺, 𑀉𑀤𑀸𑀳𑀼 𑀕𑁄𑀘𑀭𑀁 𑀕𑀡𑁆𑀳𑀦𑀓𑀸𑀮𑁂, 𑀉𑀤𑀸𑀳𑀼 𑀉𑀢𑁆𑀢𑀭𑀡𑀓𑀸𑀮𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀢𑁆𑀢𑀭𑀡𑀓𑀸𑀮𑁂’’𑀢𑀺 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀓𑀼𑀴𑀻𑀭𑀤𑀳𑀁 𑀑𑀢𑀭𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀧𑀞𑀫𑀁 𑀉𑀢𑁆𑀢𑀭𑀣, 𑀅𑀳𑀁 𑀧𑀘𑁆𑀙𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀯𑀸𑀭𑀡𑀸 𑀢𑀣𑀸 𑀓𑀭𑀺𑀁𑀲𑀼. 𑀓𑀼𑀴𑀻𑀭𑁄 𑀧𑀘𑁆𑀙𑀢𑁄 𑀉𑀢𑁆𑀢𑀭𑀦𑁆𑀢𑀁 𑀩𑁄𑀥𑀺𑀲𑀢𑁆𑀢𑀁 𑀫𑀳𑀸𑀲𑀡𑁆𑀟𑀸𑀲𑁂𑀦 𑀓𑀫𑁆𑀫𑀸𑀭𑁄 𑀮𑁄𑀳𑀲𑀮𑀸𑀓𑀁 𑀯𑀺𑀬 𑀅𑀴𑀤𑁆𑀯𑀬𑁂𑀦 𑀧𑀸𑀤𑁂 𑀤𑀴𑁆𑀳𑀁 𑀕𑀡𑁆𑀳𑀺, 𑀓𑀭𑁂𑀡𑀼𑀓𑀸 𑀩𑁄𑀥𑀺𑀲𑀢𑁆𑀢𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀫𑀻𑀧𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀆𑀓𑀟𑁆𑀠𑀦𑁆𑀢𑁄 𑀓𑀼𑀴𑀻𑀭𑀁 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀓𑀼𑀴𑀻𑀭𑁄 𑀧𑀦 𑀢𑀁 𑀆𑀓𑀟𑁆𑀠𑀦𑁆𑀢𑁄 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀓𑀭𑁄𑀢𑀺. 𑀲𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀩𑀤𑁆𑀥𑀭𑀯𑀁 𑀭𑀯𑀺, 𑀲𑀩𑁆𑀩𑁂 𑀯𑀸𑀭𑀡𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀓𑁄𑀜𑁆𑀘𑀦𑀸𑀤𑀁 𑀓𑀢𑁆𑀯𑀸 𑀫𑀼𑀢𑁆𑀢𑀓𑀭𑀻𑀲𑀁 𑀘𑀚𑀫𑀸𑀦𑀸 𑀧𑀮𑀸𑀬𑀺𑀁𑀲𑀼, 𑀓𑀭𑁂𑀡𑀼𑀓𑀸𑀧𑀺𑀲𑁆𑀲 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺.

𑀅𑀣 𑀦𑀁 ¶ 𑀲𑁄 𑀅𑀢𑁆𑀢𑀦𑁄 𑀩𑀤𑁆𑀥𑀪𑀸𑀯𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀅𑀧𑀮𑀸𑀬𑀦𑀢𑁆𑀣𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁯. 𑀢𑀢𑁆𑀣 ¶ 𑀲𑀺𑀗𑁆𑀕𑀻 𑀫𑀺𑀕𑁄𑀢𑀺 𑀲𑀺𑀗𑁆𑀕𑀻 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑀺𑀕𑁄. 𑀤𑁆𑀯𑀻𑀳𑀺 𑀅𑀴𑁂𑀳𑀺 𑀲𑀺𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂𑀳𑀺 𑀬𑀼𑀢𑁆𑀢𑀢𑀸𑀬 𑀲𑀺𑀗𑁆𑀕𑀻𑀢𑀺 𑀅𑀢𑁆𑀣𑁄. 𑀫𑀺𑀕𑁄𑀢𑀺 𑀧𑀦 𑀲𑀩𑁆𑀩𑀧𑀸𑀡𑀲𑀗𑁆𑀕𑀸𑀳𑀓𑀯𑀲𑁂𑀦 𑀇𑀥 𑀓𑀼𑀴𑀻𑀭𑁄 𑀯𑀼𑀢𑁆𑀢𑁄. 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄𑀢𑀺 𑀏𑀢𑁆𑀣 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼, 𑀦𑀬𑀦𑀝𑁆𑀞𑁂𑀦 𑀦𑁂𑀢𑁆𑀢𑀁, 𑀆𑀬𑀢𑀸𑀦𑀺 𑀘𑀓𑁆𑀔𑀼𑀲𑀗𑁆𑀔𑀸𑀢𑀸𑀦𑀺 𑀦𑁂𑀢𑁆𑀢𑀸𑀦𑀺 ¶ 𑀅𑀲𑁆𑀲𑀸𑀢𑀺 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄, 𑀤𑀻𑀖𑀅𑀓𑁆𑀔𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀺𑀫𑁂𑀯𑀲𑁆𑀲 𑀢𑀘𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀅𑀝𑁆𑀞𑀺𑀢𑁆𑀢𑀘𑁄. 𑀢𑁂𑀦𑀸𑀪𑀺𑀪𑀽𑀢𑁄𑀢𑀺 𑀢𑁂𑀦 𑀫𑀺𑀕𑁂𑀦 𑀅𑀪𑀺𑀪𑀽𑀢𑁄 𑀅𑀚𑁆𑀛𑁄𑀢𑁆𑀣𑀢𑁄 𑀦𑀺𑀘𑁆𑀘𑀮𑀁 𑀕𑀳𑀺𑀢𑁄 𑀳𑀼𑀢𑁆𑀯𑀸. 𑀓𑀧𑀡𑀁 𑀭𑀼𑀤𑀸𑀫𑀻𑀢𑀺 𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀭𑀼𑀤𑀸𑀫𑀺 𑀯𑀺𑀭𑀯𑀸𑀫𑀺. 𑀫𑀸 𑀳𑁂𑀯 𑀫𑀦𑁆𑀢𑀺 𑀫𑀁 𑀏𑀯𑀭𑀽𑀧𑀁 𑀩𑁆𑀬𑀲𑀦𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀧𑀸𑀡𑀲𑀫𑀁 𑀧𑀺𑀬𑀲𑀸𑀫𑀺𑀓𑀁 𑀢𑁆𑀯𑀁 𑀫𑀸 𑀳𑁂𑀯 𑀚𑀳𑀻𑀢𑀺.

𑀅𑀣 𑀲𑀸 𑀓𑀭𑁂𑀡𑀼𑀓𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀲𑁆𑀲𑀸𑀲𑀬𑀫𑀸𑀦𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀅𑀬𑁆𑀬 𑀦 𑀢𑀁 𑀚𑀳𑀺𑀲𑁆𑀲𑀸𑀫𑀺, 𑀓𑀼𑀜𑁆𑀚𑀭𑀁 𑀲𑀝𑁆𑀞𑀺𑀳𑀸𑀬𑀦𑀁;

𑀧𑀣𑀩𑁆𑀬𑀸 𑀘𑀸𑀢𑀼𑀭𑀦𑁆𑀢𑀸𑀬, 𑀲𑀼𑀧𑁆𑀧𑀺𑀬𑁄 𑀳𑁄𑀲𑀺 𑀫𑁂 𑀢𑀼𑀯’’𑀦𑁆𑀢𑀺.

𑀢𑀢𑁆𑀣 𑀲𑀝𑁆𑀞𑀺𑀳𑀸𑀬𑀦𑀦𑁆𑀢𑀺 𑀚𑀸𑀢𑀺𑀬𑀸 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑀲𑁆𑀫𑀺𑀜𑁆𑀳𑀺 𑀓𑀼𑀜𑁆𑀚𑀭𑀸 𑀣𑀸𑀫𑁂𑀦 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀸 𑀅𑀳𑀁 𑀏𑀯𑀁 𑀣𑀸𑀫𑀳𑀻𑀦𑀁 𑀇𑀫𑀁 𑀩𑁆𑀬𑀲𑀦𑀁 𑀧𑀢𑁆𑀢𑀁 𑀢𑀁 𑀦 𑀚𑀳𑀺𑀲𑁆𑀲𑀸𑀫𑀺, 𑀫𑀸 𑀪𑀸𑀬𑀺, 𑀇𑀫𑀺𑀲𑁆𑀲𑀸 𑀳𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀞𑀺𑀢𑀸𑀬 𑀘𑀸𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸 𑀢𑁆𑀯𑀁 𑀫𑀬𑁆𑀳𑀁 𑀲𑀼𑀝𑁆𑀞𑀼 𑀧𑀺𑀬𑁄𑀢𑀺.

𑀅𑀣 𑀦𑀁 𑀲𑀦𑁆𑀣𑀫𑁆𑀪𑁂𑀢𑁆𑀯𑀸 ‘‘𑀅𑀬𑁆𑀬, 𑀇𑀤𑀸𑀦𑀺 𑀢𑀁 𑀓𑀼𑀴𑀻𑀭𑁂𑀦 𑀲𑀤𑁆𑀥𑀺𑀁 𑀣𑁄𑀓𑀁 𑀓𑀣𑀸𑀲𑀮𑁆𑀮𑀸𑀧𑀁 𑀮𑀪𑀫𑀸𑀦𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀓𑀼𑀴𑀻𑀭𑀁 𑀬𑀸𑀘𑀫𑀸𑀦𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁧.

‘‘𑀬𑁂 ¶ 𑀓𑀼𑀴𑀻𑀭𑀸 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀕𑀗𑁆𑀕𑀸𑀬 𑀬𑀫𑀼𑀦𑀸𑀬 𑀘;

𑀢𑁂𑀲𑀁 𑀢𑁆𑀯𑀁 𑀯𑀸𑀭𑀺𑀚𑁄 𑀲𑁂𑀝𑁆𑀞𑁄, 𑀫𑀼𑀜𑁆𑀘 𑀭𑁄𑀤𑀦𑁆𑀢𑀺𑀬𑀸 𑀧𑀢𑀺’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀲𑀫𑀼𑀤𑁆𑀤𑁂 𑀯𑀸 𑀕𑀗𑁆𑀕𑀸𑀬 𑀯𑀸 𑀬𑀫𑀼𑀦𑀸𑀬 𑀯𑀸 𑀓𑀼𑀴𑀻𑀭𑀸, 𑀲𑀩𑁆𑀩𑁂𑀲𑀁 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀫𑀳𑀦𑁆𑀢𑀢𑁆𑀢𑁂𑀦 𑀘 𑀢𑁆𑀯𑀫𑁂𑀯 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄. 𑀢𑁂𑀦 𑀢𑀁 𑀬𑀸𑀘𑀸𑀫𑀺, 𑀫𑀬𑁆𑀳𑀁 𑀭𑁄𑀤𑀫𑀸𑀦𑀸𑀬 𑀲𑀸𑀫𑀺𑀓𑀁 𑀫𑀼𑀜𑁆𑀘𑀸𑀢𑀺.

𑀓𑀼𑀴𑀻𑀭𑁄 𑀢𑀲𑁆𑀲𑀸 𑀓𑀣𑀬𑀫𑀸𑀦𑀸𑀬 𑀇𑀢𑁆𑀣𑀺𑀲𑀤𑁆𑀤𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀬𑀫𑀸𑀦𑀲𑁄 𑀳𑀼𑀢𑁆𑀯𑀸 𑀯𑀸𑀭𑀡𑀲𑁆𑀲 𑀧𑀸𑀤𑀢𑁄 𑀅𑀴𑁂 𑀯𑀺𑀦𑀺𑀯𑁂𑀞𑁂𑀦𑁆𑀢𑁄 ‘‘𑀅𑀬𑀁 𑀯𑀺𑀲𑁆𑀲𑀝𑁆𑀞𑁄 𑀇𑀤𑀁 𑀦𑀸𑀫 𑀓𑀭𑀺𑀲𑁆𑀲𑀢𑀻’’𑀢𑀺 𑀦 𑀓𑀺𑀜𑁆𑀘𑀺 𑀅𑀜𑁆𑀜𑀸𑀲𑀺. 𑀅𑀣 𑀦𑀁 𑀯𑀸𑀭𑀡𑁄 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀅𑀓𑁆𑀓𑀫𑀺, 𑀢𑀸𑀯𑀤𑁂𑀯 𑀅𑀝𑁆𑀞𑀻𑀦𑀺 𑀪𑀺𑀚𑁆𑀚𑀺𑀁𑀲𑀼. 𑀯𑀸𑀭𑀡𑁄 𑀢𑀼𑀝𑁆𑀞𑀭𑀯𑀁 ¶ 𑀭𑀯𑀺, 𑀲𑀩𑁆𑀩𑁂 𑀯𑀸𑀭𑀡𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀼𑀴𑀻𑀭𑀁 𑀦𑀻𑀳𑀭𑀺𑀢𑁆𑀯𑀸 𑀫𑀳𑀻𑀢𑀮𑁂 𑀞𑀧𑁂𑀢𑁆𑀯𑀸 𑀫𑀤𑁆𑀤𑀦𑁆𑀢𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀫𑀓𑀁𑀲𑀼. 𑀢𑀲𑁆𑀲 𑀤𑁆𑀯𑁂 𑀅𑀴𑀸 𑀲𑀭𑀻𑀭𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀢𑀺𑀁𑀲𑀼. 𑀲𑁄 𑀘 𑀓𑀼𑀴𑀻𑀭𑀤𑀳𑁄 𑀕𑀗𑁆𑀕𑀸𑀬 𑀏𑀓𑀸𑀩𑀤𑁆𑀥𑁄 ¶ , 𑀕𑀗𑁆𑀕𑀸𑀬 𑀧𑀽𑀭𑀡𑀓𑀸𑀮𑁂 𑀕𑀗𑁆𑀕𑁄𑀤𑀓𑁂𑀦 𑀧𑀽𑀭𑀢𑀺, 𑀉𑀤𑀓𑁂 𑀫𑀦𑁆𑀤𑀻𑀪𑀽𑀢𑁂 𑀤𑀳𑀢𑁄 𑀉𑀤𑀓𑀁 𑀕𑀗𑁆𑀕𑀁 𑀑𑀢𑀭𑀢𑀺. 𑀅𑀣 𑀤𑁆𑀯𑁂𑀧𑀺 𑀢𑁂 𑀅𑀴𑀸 𑀉𑀧𑁆𑀮𑀯𑀺𑀢𑁆𑀯𑀸 𑀕𑀗𑁆𑀕𑀸𑀬 𑀯𑀼𑀬𑁆𑀳𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀲𑀫𑀼𑀤𑁆𑀤𑀁 𑀧𑀸𑀯𑀺𑀲𑀺, 𑀏𑀓𑀁 𑀤𑀲𑀪𑀸𑀢𑀺𑀓𑀭𑀸𑀚𑀸𑀦𑁄 𑀉𑀤𑀓𑁂 𑀓𑀻𑀴𑀫𑀸𑀦𑀸 𑀮𑀪𑀺𑀢𑁆𑀯𑀸 𑀆𑀴𑀺𑀗𑁆𑀕𑀁 𑀦𑀸𑀫 𑀫𑀼𑀤𑀺𑀗𑁆𑀕𑀁 𑀅𑀓𑀁𑀲𑀼. 𑀲𑀫𑀼𑀤𑁆𑀤𑀁 𑀧𑀦 𑀧𑀯𑀺𑀝𑁆𑀞𑀁 𑀅𑀲𑀼𑀭𑀸 𑀕𑀳𑁂𑀢𑁆𑀯𑀸 𑀆𑀮𑀫𑁆𑀩𑀭𑀁 𑀦𑀸𑀫 𑀪𑁂𑀭𑀺𑀁 𑀓𑀸𑀭𑁂𑀲𑀼𑀁. 𑀢𑁂 𑀅𑀧𑀭𑀪𑀸𑀕𑁂 𑀲𑀓𑁆𑀓𑁂𑀦 𑀲𑀗𑁆𑀕𑀸𑀫𑁂 𑀧𑀭𑀸𑀚𑀺𑀢𑀸 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼, 𑀅𑀣 𑀦𑀁 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀡𑁆𑀳𑀸𑀧𑁂𑀲𑀺. ‘‘𑀆𑀮𑀫𑁆𑀩𑀭𑀫𑁂𑀖𑁄 𑀯𑀺𑀬 𑀣𑀦𑀢𑀻’’𑀢𑀺 𑀢𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀪𑁄 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼 ¶ . ‘‘𑀢𑀤𑀸 𑀓𑀭𑁂𑀡𑀼𑀓𑀸 𑀅𑀬𑀁 𑀉𑀧𑀸𑀲𑀺𑀓𑀸 𑀅𑀳𑁄𑀲𑀺, 𑀯𑀸𑀭𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀓𑁆𑀓𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁬𑁮] 𑁮. 𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀯𑁂 𑀲𑀩𑁆𑀩𑀲𑀫𑁂𑀢𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑁂 𑀅𑀜𑁆𑀜𑀢𑀭𑀁 𑀉𑀬𑁆𑀬𑀸𑀦𑀧𑀸𑀮𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀸 𑀓𑀺𑀭 𑀯𑀼𑀢𑁆𑀣𑀯𑀲𑁆𑀲𑁄 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑁂 𑀘𑀸𑀭𑀺𑀓𑀁 𑀘𑀭𑀺. 𑀅𑀣𑁂𑀓𑁄 𑀉𑀧𑀸𑀲𑀓𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 ‘‘𑀅𑀬𑁆𑀬𑀸, 𑀉𑀬𑁆𑀬𑀸𑀦𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑀸 𑀇𑀫𑀺𑀦𑀸 𑀉𑀬𑁆𑀬𑀸𑀦𑀧𑀸𑀮𑁂𑀦 𑀲𑀤𑁆𑀥𑀺𑀁 𑀘𑀭𑀦𑁆𑀢𑀽’’𑀢𑀺 𑀯𑀢𑁆𑀯𑀸 ‘‘𑀅𑀬𑁆𑀬𑀸𑀦𑀁 𑀨𑀮𑀸𑀨𑀮𑀸𑀦𑀺 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀉𑀬𑁆𑀬𑀸𑀦𑀧𑀸𑀮𑀁 𑀆𑀡𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀘𑀭𑀫𑀸𑀦𑀸 𑀏𑀓𑀁 𑀙𑀺𑀤𑁆𑀤𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀞𑀸𑀦𑀁 𑀙𑀺𑀤𑁆𑀤𑀁 𑀯𑀺𑀭𑀴𑀭𑀼𑀓𑁆𑀔𑀁, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀅𑀣 𑀦𑁂𑀲𑀁 𑀉𑀬𑁆𑀬𑀸𑀦𑀧𑀸𑀮𑁄 𑀆𑀘𑀺𑀓𑁆𑀔𑀺 𑁋 ‘‘𑀏𑀓𑁄 𑀓𑀺𑀭 𑀉𑀬𑁆𑀬𑀸𑀦𑀧𑀸𑀮𑀧𑀼𑀢𑁆𑀢𑁄 𑀉𑀧𑀭𑁄𑀧𑀓𑁂𑀲𑀼 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑁄 ‘𑀫𑀽𑀮𑀧𑁆𑀧𑀫𑀸𑀡𑁂𑀦 𑀆𑀲𑀺𑀜𑁆𑀘𑀺𑀲𑁆𑀲𑀸𑀫𑀻’𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀽𑀮𑀧𑁆𑀧𑀫𑀸𑀡𑁂𑀦 𑀉𑀤𑀓𑀁 𑀆𑀲𑀺𑀜𑁆𑀘𑀺, 𑀢𑁂𑀦 𑀢𑀁 𑀞𑀸𑀦𑀁 𑀙𑀺𑀤𑁆𑀤𑀁 𑀚𑀸𑀢’’𑀦𑁆𑀢𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀧𑀼𑀩𑁆𑀩𑁂𑀧𑀺 𑀲𑁄 𑀓𑀼𑀫𑀸𑀭𑀓𑁄 𑀆𑀭𑀸𑀫𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀯𑀺𑀲𑁆𑀲𑀲𑁂𑀦𑁂 𑀦𑀸𑀫 𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀉𑀲𑁆𑀲𑀯𑁂 𑀖𑀼𑀝𑁆𑀞𑁂 𑀉𑀬𑁆𑀬𑀸𑀦𑀧𑀸𑀮𑁄 ‘‘𑀉𑀲𑁆𑀲𑀯𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀯𑀸𑀲𑀺𑀦𑁄 𑀫𑀓𑁆𑀓𑀝𑁂 𑀆𑀳 𑁋 ‘‘𑀇𑀤𑀁 𑀉𑀬𑁆𑀬𑀸𑀦𑀁 𑀢𑀼𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑀁 ¶ , 𑀅𑀳𑀁 𑀲𑀢𑁆𑀢𑀸𑀳𑀁 𑀉𑀲𑁆𑀲𑀯𑀁 𑀓𑀻𑀴𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀲𑀢𑁆𑀢 𑀤𑀺𑀯𑀲𑁂 𑀉𑀧𑀭𑁄𑀧𑀓𑁂𑀲𑀼 𑀉𑀤𑀓𑀁 𑀆𑀲𑀺𑀜𑁆𑀘𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀘𑀫𑁆𑀫𑀖𑀝𑀓𑁂 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀫𑀓𑁆𑀓𑀝𑀸 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀸 𑀉𑀧𑀭𑁄𑀧𑀓𑁂𑀲𑀼 𑀆𑀲𑀺𑀜𑁆𑀘𑀺𑀁𑀲𑀼. 𑀅𑀣 𑀦𑁂 𑀫𑀓𑁆𑀓𑀝𑀚𑁂𑀝𑁆𑀞𑀓𑁄 𑀆𑀳 𑁋 ‘‘𑀆𑀕𑀫𑁂𑀣 𑀢𑀸𑀯, 𑀉𑀤𑀓𑀁 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀤𑀼𑀮𑁆𑀮𑀪𑀁, 𑀢𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀉𑀧𑀭𑁄𑀧𑀓𑁂 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀽𑀮𑀧𑁆𑀧𑀫𑀸𑀡𑀁 ¶ 𑀜𑀢𑁆𑀯𑀸 𑀤𑀻𑀖𑀫𑀽𑀮𑀓𑁂𑀲𑀼 𑀩𑀳𑀼𑀁, 𑀭𑀲𑁆𑀲𑀫𑀽𑀮𑀓𑁂𑀲𑀼 𑀅𑀧𑁆𑀧𑀁 𑀉𑀤𑀓𑀁 𑀲𑀺𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀏𑀓𑀘𑁆𑀘𑁂 𑀉𑀧𑀭𑁄𑀧𑀓𑁂 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀢𑁂 𑀭𑁄𑀧𑁂𑀢𑁆𑀯𑀸 𑀉𑀤𑀓𑀁 𑀲𑀺𑀜𑁆𑀘𑀦𑁆𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀏𑀓𑀲𑁆𑀲 𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂 𑀫𑀓𑁆𑀓𑀝𑁂 𑀢𑀣𑀸 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑁄 𑀢𑀼𑀫𑁆𑀳𑁂 𑀏𑀯𑀁 𑀓𑀸𑀭𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀸𑀦𑀭𑀚𑁂𑀝𑁆𑀞𑀓𑁄’’𑀢𑀺 𑀯𑀼𑀢𑁆𑀢𑁂 ‘‘𑀚𑁂𑀝𑁆𑀞𑀓𑀲𑁆𑀲 𑀢𑀸𑀯 𑀯𑁄 𑀅𑀬𑀁 𑀧𑀜𑁆𑀜𑀸, 𑀢𑀼𑀫𑁆𑀳𑀸𑀓𑀁 𑀧𑀦 𑀓𑀻𑀤𑀺𑀲𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁨.

‘‘𑀬𑁄 𑀯𑁂 𑀲𑀩𑁆𑀩𑀲𑀫𑁂𑀢𑀸𑀦𑀁, 𑀅𑀳𑀼𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀢𑀲𑁆𑀲𑀸𑀬𑀁 𑀏𑀤𑀺𑀲𑀻 𑀧𑀜𑁆𑀜𑀸, 𑀓𑀺𑀫𑁂𑀯 𑀇𑀢𑀭𑀸 𑀧𑀚𑀸’’𑀢𑀺.

𑀢𑀢𑁆𑀣 𑀲𑀩𑁆𑀩𑀲𑀫𑁂𑀢𑀸𑀦𑀦𑁆𑀢𑀺 𑀇𑀫𑁂𑀲𑀁 𑀲𑀩𑁆𑀩𑁂𑀲𑀁 𑀲𑀫𑀸𑀦𑀚𑀸𑀢𑀻𑀦𑀁. 𑀅𑀳𑀼𑀯𑀸𑀢𑀺 𑀅𑀳𑁄𑀲𑀺. 𑀓𑀺𑀫𑁂𑀯 𑀇𑀢𑀭𑀸 𑀧𑀚𑀸𑀢𑀺 𑀬𑀸 𑀇𑀢𑀭𑀸 𑀏𑀢𑁂𑀲𑀼 𑀮𑀸𑀫𑀺𑀓𑀸 𑀧𑀚𑀸, 𑀓𑀻𑀤𑀺𑀲𑀸 𑀦𑀼 𑀔𑁄 𑀢𑀲𑁆𑀲𑀸 𑀧𑀜𑁆𑀜𑀸𑀢𑀺.

𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀯𑀸𑀦𑀭𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁫𑁩.

‘‘𑀏𑀯𑀫𑁂𑀯 𑀢𑀼𑀯𑀁 𑀩𑁆𑀭𑀳𑁆𑀫𑁂, 𑀅𑀦𑀜𑁆𑀜𑀸𑀬 𑀯𑀺𑀦𑀺𑀦𑁆𑀤𑀲𑀺;

𑀓𑀣𑀁 𑀫𑀽𑀮𑀁 𑀅𑀤𑀺𑀲𑁆𑀯𑀸𑀦, 𑀭𑀼𑀓𑁆𑀔𑀁 𑀚𑀜𑁆𑀜𑀸 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺.

𑀢𑀢𑁆𑀣 𑀩𑁆𑀭𑀳𑁆𑀫𑁂𑀢𑀺 𑀆𑀮𑀧𑀦𑀫𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑁆𑀯𑀁, 𑀪𑁄 𑀧𑀼𑀭𑀺𑀲, 𑀓𑀸𑀭𑀡𑀸𑀓𑀸𑀭𑀡𑀁 𑀅𑀚𑀸𑀦𑀺𑀢𑁆𑀯𑀸 𑀏𑀯𑀫𑁂𑀯 𑀅𑀫𑁆𑀳𑁂 𑀯𑀺𑀦𑀺𑀦𑁆𑀤𑀲𑀺, 𑀭𑀼𑀓𑁆𑀔𑀁 𑀦𑀸𑀫 ‘‘𑀕𑀫𑁆𑀪𑀻𑀭𑁂 𑀧𑀢𑀺𑀝𑁆𑀞𑀺𑀢𑁄 𑀯𑀸 𑀏𑀲, 𑀦 𑀯𑀸’’𑀢𑀺 𑀫𑀽𑀮𑀁 𑀅𑀦𑀼𑀧𑁆𑀧𑀸𑀝𑁂𑀢𑁆𑀯𑀸 𑀓𑀣𑀁 𑀜𑀸𑀢𑀼𑀁 𑀲𑀓𑁆𑀓𑀸, 𑀢𑁂𑀦 𑀫𑀬𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀽𑀮𑀧𑁆𑀧𑀫𑀸𑀡𑁂𑀦 𑀉𑀤𑀓𑀁 𑀆𑀲𑀺𑀜𑁆𑀘𑀸𑀫𑀸𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁪.

‘‘𑀦𑀸𑀳𑀁 ¶ 𑀢𑀼𑀫𑁆𑀳𑁂 𑀯𑀺𑀦𑀺𑀦𑁆𑀤𑀸𑀫𑀺, 𑀬𑁂 𑀘𑀜𑁆𑀜𑁂 𑀯𑀸𑀦𑀭𑀸 𑀯𑀦𑁂;

𑀯𑀺𑀲𑁆𑀲𑀲𑁂𑀦𑁄𑀯 𑀕𑀸𑀭𑀬𑁆𑀳𑁄, 𑀬𑀲𑁆𑀲𑀢𑁆𑀣𑀸 𑀭𑀼𑀓𑁆𑀔𑀭𑁄𑀧𑀓𑀸’’𑀢𑀺.

𑀢𑀢𑁆𑀣 𑀯𑀺𑀲𑁆𑀲𑀲𑁂𑀦𑁄𑀯 𑀕𑀸𑀭𑀬𑁆𑀳𑁄𑀢𑀺 𑀩𑀸𑀭𑀸𑀡𑀲𑀺𑀭𑀸𑀚𑀸 𑀯𑀺𑀲𑁆𑀲𑀲𑁂𑀦𑁄𑀬𑁂𑀯 𑀏𑀢𑁆𑀣 𑀕𑀭𑀳𑀺𑀢𑀩𑁆𑀩𑁄. 𑀬𑀲𑁆𑀲𑀢𑁆𑀣𑀸 𑀭𑀼𑀓𑁆𑀔𑀭𑁄𑀧𑀓𑀸𑀢𑀺 𑀬𑀲𑁆𑀲𑀢𑁆𑀣𑀸𑀬 𑀢𑀼𑀫𑁆𑀳𑀸𑀤𑀺𑀲𑀸 𑀭𑀼𑀓𑁆𑀔𑀭𑁄𑀧𑀓𑀸 𑀚𑀸𑀢𑀸𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀸𑀦𑀭𑀚𑁂𑀝𑁆𑀞𑀓𑁄 𑀆𑀭𑀸𑀫𑀤𑀽𑀲𑀓𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀆𑀭𑀸𑀫𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁬𑁯] 𑁯. 𑀲𑀼𑀚𑀸𑀢𑀚𑀸𑀢𑀓𑀯𑀡𑁆𑀡𑀦𑀸

𑀦 𑀳𑀺 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀼𑀡𑀺𑀲𑀁 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀥𑀻𑀢𑀭𑀁 𑀯𑀺𑀲𑀸𑀔𑀸𑀬 𑀓𑀦𑀺𑀝𑁆𑀞𑀪𑀕𑀺𑀦𑀺𑀁 𑀲𑀼𑀚𑀸𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀖𑀭𑀁 𑀧𑀽𑀭𑀬𑀫𑀸𑀦𑀸 𑀧𑀸𑀯𑀺𑀲𑀺, ‘‘𑀫𑀳𑀸𑀓𑀼𑀮𑀲𑁆𑀲 𑀥𑀻𑀢𑀸 𑀅𑀳’’𑀦𑁆𑀢𑀺 𑀫𑀸𑀦𑀣𑀤𑁆𑀥𑀸 𑀅𑀳𑁄𑀲𑀺 𑀓𑁄𑀥𑀦𑀸 𑀘𑀡𑁆𑀟𑀻 𑀨𑀭𑀼𑀲𑀸, 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀯𑀢𑁆𑀢𑀸𑀦𑀺 𑀦 𑀓𑀭𑁄𑀢𑀺, 𑀕𑁂𑀳𑀚𑀦𑀁 𑀢𑀚𑁆𑀚𑁂𑀦𑁆𑀢𑀻 𑀧𑀳𑀭𑀦𑁆𑀢𑀻 𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀫𑀳𑀸𑀲𑁂𑀝𑁆𑀞𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄𑀯 𑀪𑀕𑀯𑀦𑁆𑀢𑀁 𑀉𑀧𑀦𑀺𑀲𑀻𑀤𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑀼𑀚𑀸𑀢𑀸 𑀤𑀸𑀲𑀓𑀫𑁆𑀫𑀓𑀭𑁂𑀳𑀺 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀢𑀺. 𑀲𑀢𑁆𑀣𑀸 𑀥𑀫𑁆𑀫𑀓𑀣𑀁 𑀞𑀧𑁂𑀢𑁆𑀯𑀸 ‘‘𑀓𑀺𑀁 𑀲𑀤𑁆𑀤𑁄 𑀏𑀲𑁄’’𑀢𑀺 𑀆𑀳. 𑀏𑀲𑀸, 𑀪𑀦𑁆𑀢𑁂, 𑀓𑀼𑀮𑀲𑀼𑀡𑁆𑀳𑀸 𑀅𑀕𑀸𑀭𑀯𑀸, 𑀦𑁂𑀯𑀲𑁆𑀲𑀸 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀯𑀢𑁆𑀢𑀁 𑀅𑀢𑁆𑀣𑀺, 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀅𑀳𑁄𑀭𑀢𑁆𑀢𑀁 𑀓𑀮𑀳𑀁 𑀓𑀼𑀭𑀼𑀫𑀸𑀦𑀸 𑀯𑀺𑀘𑀭𑀢𑀻𑀢𑀺. 𑀢𑁂𑀦 𑀳𑀺 𑀦𑀁 𑀧𑀓𑁆𑀓𑁄𑀲𑀣𑀸𑀢𑀺. 𑀲𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀲𑀢𑁆𑀢𑀺𑀫𑀸, 𑀲𑀼𑀚𑀸𑀢𑁂, 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸, 𑀢𑀸𑀲𑀁 𑀢𑁆𑀯𑀁 𑀓𑀢𑀭𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀦𑀸𑀳𑀁 𑀲𑀁𑀔𑀺𑀢𑁆𑀢𑁂𑀦 𑀓𑀣𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺, 𑀯𑀺𑀢𑁆𑀣𑀸𑀭𑁂𑀦 𑀫𑁂 𑀓𑀣𑁂𑀣𑀸’’𑀢𑀺. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀑𑀳𑀺𑀢𑀲𑁄𑀢𑀸 𑀲𑀼𑀡𑁄𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀧𑀤𑀼𑀝𑁆𑀞𑀘𑀺𑀢𑁆𑀢𑀸 ¶ ¶ 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀻, 𑀅𑀜𑁆𑀜𑁂𑀲𑀼 𑀭𑀢𑁆𑀢𑀸 𑀅𑀢𑀺𑀫𑀜𑁆𑀜𑀢𑁂 𑀧𑀢𑀺𑀁,

𑀥𑀦𑁂𑀦 𑀓𑀻𑀢𑀲𑁆𑀲 𑀯𑀥𑀸𑀬 𑀉𑀲𑁆𑀲𑀼𑀓𑀸; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀯𑀥𑀓𑀸 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺. [𑁧]

‘‘𑀬𑀁 𑀇𑀢𑁆𑀣𑀺𑀬𑀸 𑀯𑀺𑀦𑁆𑀤𑀢𑀺 𑀲𑀸𑀫𑀺𑀓𑁄 𑀥𑀦𑀁, 𑀲𑀺𑀧𑁆𑀧𑀁 𑀯𑀡𑀺𑀚𑁆𑀚𑀜𑁆𑀘 𑀓𑀲𑀺𑀁 𑀅𑀥𑀺𑀝𑁆𑀞𑀳𑀁,

𑀅𑀧𑁆𑀧𑀫𑁆𑀧𑀺 ¶ 𑀢𑀲𑁆𑀲 𑀅𑀧𑀳𑀸𑀢𑀼𑀫𑀺𑀘𑁆𑀙𑀢𑀺; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀘𑁄𑀭𑀻 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺. [𑁨]

‘‘𑀅𑀓𑀫𑁆𑀫𑀓𑀸𑀫𑀸 𑀅𑀮𑀲𑀸 𑀫𑀳𑀕𑁆𑀖𑀲𑀸, 𑀨𑀭𑀼𑀲𑀸 𑀘 𑀘𑀡𑁆𑀟𑀻 𑀘 𑀤𑀼𑀭𑀼𑀢𑁆𑀢𑀯𑀸𑀤𑀺𑀦𑀻,

𑀉𑀝𑁆𑀞𑀸𑀬𑀓𑀸𑀦𑀁 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀺; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀅𑀬𑁆𑀬𑀸 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺. [𑁩]

‘‘𑀬𑀸 𑀲𑀩𑁆𑀩𑀤𑀸 𑀳𑁄𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀻, 𑀫𑀸𑀢𑀸𑀯 𑀧𑀼𑀢𑁆𑀢𑀁 𑀅𑀦𑀼𑀭𑀓𑁆𑀔𑀢𑁂 𑀧𑀢𑀺𑀁,

𑀢𑀢𑁄 𑀥𑀦𑀁 𑀲𑀫𑁆𑀪𑀢𑀫𑀲𑁆𑀲 𑀭𑀓𑁆𑀔𑀢𑀺; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀫𑀸𑀢𑀸 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺. [𑁪]

‘‘𑀬𑀣𑀸𑀧𑀺 𑀚𑁂𑀝𑁆𑀞𑀸 𑀪𑀕𑀺𑀦𑀻 𑀓𑀦𑀺𑀝𑁆𑀞𑀓𑀸, 𑀲𑀕𑀸𑀭𑀯𑀸 𑀳𑁄𑀢𑀺 𑀲𑀓𑀫𑁆𑀳𑀺 𑀲𑀸𑀥𑀺𑀓𑁂,

𑀳𑀺𑀭𑀻𑀫𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀪𑀕𑀺𑀦𑀻 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺. [𑁫]

‘‘𑀬𑀸𑀘𑀻𑀥 𑀤𑀺𑀲𑁆𑀯𑀸𑀦 𑀧𑀢𑀺𑀁 𑀧𑀫𑁄𑀤𑀢𑀺, 𑀲𑀔𑀻 𑀲𑀔𑀸𑀭𑀁𑀯 𑀘𑀺𑀭𑀲𑁆𑀲𑀫𑀸𑀕𑀢𑀁,

𑀓𑁄𑀮𑁂𑀬𑁆𑀬𑀓𑀸 𑀲𑀻𑀮𑀯𑀢𑀻 𑀧𑀢𑀺𑀩𑁆𑀩𑀢𑀸; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀲𑀔𑀻 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺. [𑁬]

‘‘𑀅𑀓𑁆𑀓𑀼𑀤𑁆𑀥𑀲𑀦𑁆𑀢𑀸 ¶ 𑀯𑀥𑀤𑀡𑁆𑀟𑀢𑀚𑁆𑀚𑀺𑀢𑀸, 𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀧𑀢𑀺𑀦𑁄 𑀢𑀺𑀢𑀺𑀓𑁆𑀔𑀢𑀺,

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻; 𑀬𑀸 𑀏𑀯𑀭𑀽𑀧𑀸 𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸,

𑀤𑀸𑀲𑀻 𑀘 𑀪𑀭𑀺𑀬𑀸𑀢𑀺 𑀘 𑀲𑀸 𑀧𑀯𑀼𑀘𑁆𑀘𑀢𑀺’’. (𑀅. 𑀦𑀺. 𑁭.𑁬𑁩); [𑁭]

𑀇𑀫𑀸 ¶ 𑀔𑁄, 𑀲𑀼𑀚𑀸𑀢𑁂, 𑀧𑀼𑀭𑀺𑀲𑀲𑁆𑀲 𑀲𑀢𑁆𑀢 𑀪𑀭𑀺𑀬𑀸. 𑀢𑀸𑀲𑀼 𑀯𑀥𑀓𑀲𑀫𑀸 𑀘𑁄𑀭𑀻𑀲𑀫𑀸 𑀅𑀬𑁆𑀬𑀲𑀫𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀇𑀢𑀭𑀸 𑀘𑀢𑀲𑁆𑀲𑁄 𑀦𑀺𑀫𑁆𑀫𑀸𑀦𑀭𑀢𑀺𑀤𑁂𑀯𑀮𑁄𑀓𑁂.

‘‘𑀬𑀸𑀘𑀻𑀥 ¶ 𑀪𑀭𑀺𑀬𑀸 𑀯𑀥𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀘𑁄𑀭𑀻𑀢𑀺 𑀅𑀬𑁆𑀬𑀸𑀢𑀺 𑀘 𑀬𑀸 𑀧𑀯𑀼𑀘𑁆𑀘𑀢𑀺;

𑀤𑀼𑀲𑁆𑀲𑀻𑀮𑀭𑀽𑀧𑀸 𑀨𑀭𑀼𑀲𑀸 𑀅𑀦𑀸𑀤𑀭𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺 𑀢𑀸.

‘‘𑀬𑀸𑀘𑀻𑀥 𑀫𑀸𑀢𑀸 𑀪𑀕𑀺𑀦𑀻 𑀲𑀔𑀻𑀢𑀺 𑀘, 𑀤𑀸𑀲𑀻𑀢𑀺 𑀪𑀭𑀺𑀬𑀸𑀢𑀺 𑀘 𑀬𑀸 𑀧𑀯𑀼𑀘𑁆𑀘𑀢𑀺;

𑀲𑀻𑀮𑁂 𑀞𑀺𑀢𑀢𑁆𑀢𑀸 𑀘𑀺𑀭𑀭𑀢𑁆𑀢𑀲𑀁𑀯𑀼𑀢𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑀸’’𑀢𑀺. (𑀅. 𑀦𑀺. 𑁭.𑁬𑁩);

𑀏𑀯𑀁 𑀲𑀢𑁆𑀣𑀭𑀺 𑀇𑀫𑀸 𑀲𑀢𑁆𑀢 𑀪𑀭𑀺𑀬𑀸 𑀤𑀲𑁆𑀲𑁂𑀦𑁆𑀢𑁂𑀬𑁂𑀯 𑀲𑀼𑀚𑀸𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀲𑀼𑀚𑀸𑀢𑁂, 𑀢𑁆𑀯𑀁 𑀇𑀫𑀸𑀲𑀁 𑀲𑀢𑁆𑀢𑀦𑁆𑀦𑀁 𑀪𑀭𑀺𑀬𑀸𑀦𑀁 𑀓𑀢𑀭𑀸’’𑀢𑀺 𑀯𑀼𑀢𑁆𑀢𑁂 ‘‘𑀤𑀸𑀲𑀺𑀲𑀫𑀸 𑀅𑀳𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀲𑀺. 𑀇𑀢𑀺 𑀲𑀢𑁆𑀣𑀸 𑀲𑀼𑀚𑀸𑀢𑀁 𑀖𑀭𑀲𑀼𑀡𑁆𑀳𑀁 𑀏𑀓𑁄𑀯𑀸𑀤𑁂𑀦𑁂𑀯 𑀤𑀫𑁂𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀥𑀫𑁆𑀫𑀲𑀪𑀸𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀽, 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀏𑀓𑁄𑀯𑀸𑀤𑁂𑀦𑁂𑀯 𑀲𑀢𑁆𑀣𑀸 𑀲𑀼𑀚𑀸𑀢𑀁 𑀖𑀭𑀲𑀼𑀡𑁆𑀳𑀁 𑀤𑀫𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀫𑀬𑀸 𑀲𑀼𑀚𑀸𑀢𑀸 𑀏𑀓𑁄𑀯𑀸𑀤𑁂𑀦𑁂𑀯 𑀤𑀫𑀺𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 ¶ 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀫𑀸𑀢𑀸 𑀓𑁄𑀥𑀦𑀸 𑀅𑀳𑁄𑀲𑀺 𑀘𑀡𑁆𑀟𑀸 𑀨𑀭𑀼𑀲𑀸 𑀅𑀓𑁆𑀓𑁄𑀲𑀺𑀓𑀸 𑀧𑀭𑀺𑀪𑀸𑀲𑀺𑀓𑀸. 𑀲𑁄 𑀫𑀸𑀢𑀼 𑀑𑀯𑀸𑀤𑀁 𑀤𑀸𑀢𑀼𑀓𑀸𑀫𑁄𑀧𑀺 ‘‘𑀅𑀯𑀢𑁆𑀣𑀼𑀓𑀁 𑀓𑀣𑁂𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀢𑀲𑁆𑀲𑀸 𑀅𑀦𑀼𑀲𑀸𑀲𑀦𑀢𑁆𑀣𑀁 𑀏𑀓𑀁 𑀉𑀧𑀫𑀁 𑀑𑀮𑁄𑀓𑁂𑀦𑁆𑀢𑁄 𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺, 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺 ¶ . 𑀅𑀣 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀺𑀓𑀻 𑀲𑀓𑀼𑀡𑁄 𑀯𑀺𑀭𑀯𑀺, 𑀩𑁄𑀥𑀺𑀲𑀢𑁆𑀢𑀧𑀭𑀺𑀲𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀡𑁆𑀡𑁂 𑀧𑀺𑀤𑀳𑀺𑀢𑁆𑀯𑀸 ‘‘𑀅𑀫𑁆𑀪𑁄, 𑀘𑀡𑁆𑀟𑀯𑀸𑀘𑁂 𑀨𑀭𑀼𑀲𑀯𑀸𑀘𑁂 𑀫𑀸 𑀲𑀤𑁆𑀤𑀫𑀓𑀸𑀲𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁂 𑀧𑀦 𑀦𑀸𑀝𑀓𑀧𑀭𑀺𑀯𑀸𑀭𑀺𑀢𑁂 𑀫𑀸𑀢𑀭𑀸 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑁂 𑀏𑀓𑀲𑁆𑀫𑀺𑀁 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀭𑀼𑀓𑁆𑀔𑁂 𑀦𑀺𑀮𑀻𑀦𑀸 𑀏𑀓𑀸 𑀓𑁄𑀓𑀺𑀮𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀯𑀲𑁆𑀲𑀺. 𑀫𑀳𑀸𑀚𑀦𑁄 𑀢𑀲𑁆𑀲𑀸 𑀲𑀤𑁆𑀤𑁂𑀦 𑀲𑀫𑁆𑀫𑀢𑁆𑀢𑁄 𑀳𑀼𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀲𑀡𑁆𑀳𑀯𑀸𑀘𑁂 𑀲𑀔𑀺𑀮𑀯𑀸𑀘𑁂 𑀫𑀼𑀤𑀼𑀯𑀸𑀘𑁂 𑀯𑀲𑁆𑀲 𑀯𑀲𑁆𑀲𑀸’’𑀢𑀺 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀢𑀸𑀦𑀺 𑀤𑁆𑀯𑁂 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀫𑀸𑀢𑀭𑀁 𑀲𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀫, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀺𑀓𑀻𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 ‘𑀫𑀸 𑀲𑀤𑁆𑀤𑀫𑀓𑀸𑀲𑀺 ¶ , 𑀫𑀸 𑀲𑀤𑁆𑀤𑀫𑀓𑀸𑀲𑀻’𑀢𑀺 𑀓𑀡𑁆𑀡𑁂 𑀧𑀺𑀤𑀳𑀺, 𑀨𑀭𑀼𑀲𑀯𑀸𑀘𑀸 𑀦𑀸𑀫 𑀦 𑀓𑀲𑁆𑀲𑀘𑀺 𑀧𑀺𑀬𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁫𑁫.

‘‘𑀦 𑀳𑀺 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸, 𑀫𑀜𑁆𑀚𑀼𑀓𑀸 𑀧𑀺𑀬𑀤𑀲𑁆𑀲𑀦𑀸;

𑀔𑀭𑀯𑀸𑀘𑀸 𑀧𑀺𑀬𑀸 𑀳𑁄𑀦𑁆𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁫𑁬.

‘‘𑀦𑀦𑀼 𑀧𑀲𑁆𑀲𑀲𑀺𑀫𑀁 𑀓𑀸𑀴𑀺𑀁, 𑀤𑀼𑀩𑁆𑀩𑀡𑁆𑀡𑀁 𑀢𑀺𑀮𑀓𑀸𑀳𑀢𑀁;

𑀓𑁄𑀓𑀺𑀮𑀁 𑀲𑀡𑁆𑀳𑀪𑀸𑀡𑁂𑀦, 𑀩𑀳𑀽𑀦𑀁 𑀧𑀸𑀡𑀺𑀦𑀁 𑀧𑀺𑀬𑀁.

𑁫𑁭.

‘‘𑀢𑀲𑁆𑀫𑀸 𑀲𑀔𑀺𑀮𑀯𑀸𑀘𑀲𑁆𑀲, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑀻𑀧𑁂𑀢𑀺, 𑀫𑀥𑀼𑀭𑀁 𑀢𑀲𑁆𑀲 𑀪𑀸𑀲𑀺𑀢’’𑀦𑁆𑀢𑀺.

𑀢𑀸𑀲𑀁 𑀅𑀬𑀫𑀢𑁆𑀣𑁄 𑁋 𑀅𑀫𑁆𑀫, 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀗𑁆𑀕𑀼𑀲𑀸𑀫𑀸𑀤𑀺𑀦𑀸 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀓𑀣𑀸𑀦𑀺𑀕𑁆𑀖𑁄𑀲𑀲𑁆𑀲 𑀫𑀥𑀼𑀭𑀢𑀸𑀬 𑀫𑀜𑁆𑀚𑀼𑀓𑀸, 𑀅𑀪𑀺𑀭𑀽𑀧𑀢𑀸𑀬 𑀧𑀺𑀬𑀤𑀲𑁆𑀲𑀦𑀸 𑀲𑀫𑀸𑀦𑀸𑀧𑀺 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺𑀢𑀭𑁄𑀧𑀺 𑀅𑀓𑁆𑀓𑁄𑀲𑀧𑀭𑀺𑀪𑀸𑀲𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀬 𑀔𑀭𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀔𑀭𑀯𑀸𑀘𑀸 𑀇𑀫𑀲𑁆𑀫𑀺𑀜𑁆𑀘 𑀧𑀭𑀲𑁆𑀫𑀺𑀜𑁆𑀘 𑀮𑁄𑀓𑁂 𑀧𑀺𑀬𑀸 𑀦𑀸𑀫 𑀦 𑀳𑁄𑀦𑁆𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀔𑀭𑀯𑀸𑀘𑀸 𑀓𑀺𑀓𑀻 𑀯𑀺𑀬, 𑀲𑀡𑁆𑀳𑀪𑀸𑀡𑀺𑀦𑁄 ¶ 𑀧𑀦 𑀫𑀝𑁆𑀞𑀸𑀬 𑀫𑀥𑀼𑀭𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑀸 𑀯𑀺𑀭𑀽𑀧𑀸𑀧𑀺 𑀧𑀺𑀬𑀸 𑀳𑁄𑀦𑁆𑀢𑀺. 𑀢𑁂𑀦 𑀢𑀁 𑀯𑀤𑀸𑀫𑀺 𑁋 𑀦𑀦𑀼 𑀧𑀲𑁆𑀲𑀲𑀺 𑀢𑁆𑀯𑀁 𑀇𑀫𑀁 𑀓𑀸𑀴𑀺𑀁 𑀤𑀼𑀩𑁆𑀩𑀡𑁆𑀡𑀁 𑀲𑀭𑀻𑀭𑀯𑀡𑁆𑀡𑀢𑁄𑀧𑀺 𑀓𑀸𑀴𑀢𑀭𑁂𑀳𑀺 𑀢𑀺𑀮𑀓𑁂𑀳𑀺 ¶ 𑀆𑀳𑀢𑀁 𑀓𑁄𑀓𑀺𑀮𑀁, 𑀬𑀸 𑀏𑀯𑀁 𑀤𑀼𑀩𑁆𑀩𑀡𑁆𑀡𑀸 𑀲𑀫𑀸𑀦𑀸𑀧𑀺 𑀲𑀡𑁆𑀳𑀪𑀸𑀲𑀦𑁂𑀦 𑀩𑀳𑀽𑀦𑀁 𑀧𑀺𑀬𑀸 𑀚𑀸𑀢𑀸. 𑀇𑀢𑀺 𑀬𑀲𑁆𑀫𑀸 𑀔𑀭𑀯𑀸𑀘𑁄 𑀲𑀢𑁆𑀢𑁄 𑀮𑁄𑀓𑁂 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀅𑀧𑁆𑀧𑀺𑀬𑁄, 𑀢𑀲𑁆𑀫𑀸 𑀩𑀳𑀼𑀚𑀦𑀲𑁆𑀲 𑀧𑀺𑀬𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀧𑁄𑀲𑁄 𑀲𑀔𑀺𑀮𑀯𑀸𑀘𑁄 𑀲𑀡𑁆𑀳𑀫𑀝𑁆𑀞𑀫𑀼𑀤𑀼𑀯𑀸𑀘𑁄 𑀅𑀲𑁆𑀲. 𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀫𑀦𑁆𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀘𑀦𑀢𑁄 𑀫𑀦𑁆𑀢𑀪𑀸𑀡𑀻, 𑀯𑀺𑀦𑀸 𑀉𑀤𑁆𑀥𑀘𑁆𑀘𑁂𑀦 𑀧𑀫𑀸𑀡𑀬𑀼𑀢𑁆𑀢𑀲𑁆𑀲𑁂𑀯 𑀓𑀣𑀦𑀢𑁄 𑀅𑀦𑀼𑀤𑁆𑀥𑀢𑁄. 𑀬𑁄 𑀳𑀺 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀸𑀴𑀺𑀜𑁆𑀘 𑀅𑀢𑁆𑀣𑀜𑁆𑀘 𑀤𑀻𑀧𑁂𑀢𑀺, 𑀢𑀲𑁆𑀲 𑀪𑀸𑀲𑀺𑀢𑀁 𑀓𑀸𑀭𑀡𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀧𑀭𑀁 𑀅𑀦𑀓𑁆𑀓𑁄𑀲𑁂𑀢𑁆𑀯𑀸 𑀓𑀣𑀺𑀢𑀢𑀸𑀬 𑀫𑀥𑀼𑀭𑀦𑁆𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀫𑀸𑀢𑀼 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀸𑀢𑀭𑀁 𑀲𑀜𑁆𑀜𑀸𑀧𑁂𑀲𑀺, 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀸𑀢𑀭𑀁 𑀏𑀓𑁄𑀯𑀸𑀤𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀸𑀢𑀸 𑀲𑀼𑀚𑀸𑀢𑀸 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀚𑀸𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁭𑁦] 𑁧𑁦. 𑀉𑀮𑀽𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑁂𑀳𑀺 𑀓𑀺𑀭 𑀜𑀸𑀢𑀻𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀓𑁄𑀮𑀽𑀓𑀓𑀮𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀓𑀸𑀓𑀸 𑀤𑀺𑀯𑀸 𑀉𑀮𑀽𑀓𑁂 𑀔𑀸𑀤𑀦𑁆𑀢𑀺, 𑀉𑀮𑀽𑀓𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀢𑀢𑁆𑀣 𑀢𑀢𑁆𑀣 𑀲𑀬𑀺𑀢𑀸𑀦𑀁 𑀓𑀸𑀓𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀢𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀅𑀣𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀚𑁂𑀢𑀯𑀦𑀧𑀘𑁆𑀘𑀦𑁆𑀢𑁂 𑀏𑀓𑀲𑁆𑀫𑀺𑀁 𑀧𑀭𑀺𑀯𑁂𑀡𑁂 𑀯𑀲𑀦𑁆𑀢𑀲𑁆𑀲 𑀲𑀫𑁆𑀫𑀚𑁆𑀚𑀦𑀓𑀸𑀮𑁂 𑀭𑀼𑀓𑁆𑀔𑀢𑁄 𑀧𑀢𑀺𑀢𑀸𑀦𑀺 𑀲𑀢𑁆𑀢𑀝𑁆𑀞𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀺 𑀩𑀳𑀼𑀢𑀭𑀸𑀦𑀺𑀧𑀺 𑀓𑀸𑀓𑀲𑀻𑀲𑀸𑀦𑀺 𑀙𑀟𑁆𑀟𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀲𑁄 𑀢𑀫𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀫𑀼𑀓𑀲𑁆𑀲 𑀓𑀺𑀭 𑀪𑀺𑀓𑁆𑀔𑀼𑀦𑁄 𑀯𑀲𑀦𑀝𑁆𑀞𑀸𑀦𑁂 ¶ 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀢𑁆𑀢𑀓𑀸𑀦𑀺 ¶ 𑀦𑀸𑀫 𑀓𑀸𑀓𑀲𑀻𑀲𑀸𑀦𑀺 𑀙𑀟𑁆𑀟𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺, 𑀪𑀺𑀓𑁆𑀔𑀽 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀓𑀤𑀸 𑀧𑀝𑁆𑀞𑀸𑀬 𑀧𑀦, 𑀪𑀦𑁆𑀢𑁂, 𑀓𑀸𑀓𑀸𑀦𑀜𑁆𑀘 𑀉𑀮𑀽𑀓𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀯𑁂𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀲𑀢𑁆𑀣𑀸 ‘‘𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀧𑀞𑀫𑀓𑀧𑁆𑀧𑀺𑀓𑀸 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀁 𑀅𑀪𑀺𑀭𑀽𑀧𑀁 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀧𑀼𑀭𑀺𑀲𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀓𑀭𑀺𑀁𑀲𑀼, 𑀘𑀢𑀼𑀧𑁆𑀧𑀤𑀸𑀧𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀁 𑀲𑀻𑀳𑀁 𑀭𑀸𑀚𑀸𑀦𑀁 𑀅𑀓𑀁𑀲𑀼, 𑀫𑀳𑀸𑀲𑀫𑀼𑀤𑁆𑀤𑁂 𑀫𑀘𑁆𑀙𑀸 𑀆𑀦𑀦𑁆𑀤𑀁 𑀦𑀸𑀫 𑀫𑀘𑁆𑀙𑀁 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀢𑀢𑁄 𑀲𑀓𑀼𑀡𑀕𑀡𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀫𑀦𑀼𑀲𑁆𑀲𑁂𑀲𑀼 𑀭𑀸𑀚𑀸 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀘𑀢𑀼𑀧𑁆𑀧𑀤𑁂𑀲𑀼 𑀘𑁂𑀯 𑀫𑀘𑁆𑀙𑁂𑀲𑀼 𑀘. 𑀅𑀫𑁆𑀳𑀸𑀓𑀁 𑀧𑀦𑀦𑁆𑀢𑀭𑁂 𑀭𑀸𑀚𑀸 𑀦𑀸𑀫 𑀦𑀢𑁆𑀣𑀺, 𑀅𑀧𑁆𑀧𑀢𑀺𑀲𑁆𑀲𑀯𑀸𑀲𑁄 𑀦𑀸𑀫 𑀦 𑀯𑀝𑁆𑀝𑀢𑀺, 𑀅𑀫𑁆𑀳𑀸𑀓𑀫𑁆𑀧𑀺 𑀭𑀸𑀚𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀏𑀓𑀁 𑀭𑀸𑀚𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀦𑀸𑀣𑀸’’𑀢𑀺. 𑀢𑁂 𑀢𑀸𑀤𑀺𑀲𑀁 𑀲𑀓𑀼𑀡𑀁 𑀑𑀮𑁄𑀓𑀬𑀫𑀸𑀦𑀸 𑀏𑀓𑀁 𑀉𑀮𑀽𑀓𑀁 𑀭𑁄𑀘𑁂𑀢𑁆𑀯𑀸 ‘‘𑀅𑀬𑀁 𑀦𑁄 𑀭𑀼𑀘𑁆𑀘𑀢𑀻’’𑀢𑀺 𑀆𑀳𑀁𑀲𑀼. 𑀅𑀣𑁂𑀓𑁄 𑀲𑀓𑀼𑀡𑁄 𑀲𑀩𑁆𑀩𑁂𑀲𑀁 𑀅𑀚𑁆𑀛𑀸𑀲𑀬𑀕𑁆𑀕𑀳𑀡𑀢𑁆𑀣𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀲𑀺. 𑀢𑀲𑁆𑀲 𑀲𑀸𑀯𑁂𑀦𑁆𑀢𑀲𑁆𑀲 𑀤𑁆𑀯𑁂 𑀲𑀸𑀯𑀦𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀢𑀺𑀬𑀲𑀸𑀯𑀦𑀸𑀬 𑀏𑀓𑁄 𑀓𑀸𑀓𑁄 𑀉𑀝𑁆𑀞𑀸𑀬 ‘‘𑀢𑀺𑀝𑁆𑀞 𑀢𑀸𑀯𑁂𑀢𑀲𑁆𑀲 𑀇𑀫𑀲𑁆𑀫𑀺𑀁 𑀭𑀸𑀚𑀸𑀪𑀺𑀲𑁂𑀓𑀓𑀸𑀮𑁂 𑀏𑀯𑀭𑀽𑀧𑀁 𑀫𑀼𑀔𑀁 𑀪𑀯𑀢𑀺, 𑀓𑀼𑀤𑁆𑀥𑀲𑁆𑀲 𑀓𑀻𑀤𑀺𑀲𑀁 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀳𑀺 𑀓𑀼𑀤𑁆𑀥𑁂𑀦 𑀑𑀮𑁄𑀓𑀺𑀢𑀸 𑀫𑀬𑀁 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀺𑀲𑁆𑀲𑀸𑀫, 𑀇𑀫𑀁 𑀭𑀸𑀚𑀸𑀦𑀁 𑀓𑀸𑀢𑀼𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁮.

‘‘𑀲𑀩𑁆𑀩𑁂𑀳𑀺 ¶ ¶ 𑀓𑀺𑀭 𑀜𑀸𑀢𑀻𑀳𑀺, 𑀓𑁄𑀲𑀺𑀬𑁄 𑀇𑀲𑁆𑀲𑀭𑁄 𑀓𑀢𑁄;

𑀲𑀘𑁂 𑀜𑀸𑀢𑀻𑀳𑀦𑀼𑀜𑁆𑀜𑀸𑀢𑁄, 𑀪𑀡𑁂𑀬𑁆𑀬𑀸𑀳𑀁 𑀏𑀓𑀯𑀸𑀘𑀺𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀸 𑀏𑀲𑀸 𑀲𑀸𑀯𑀦𑀸 𑀯𑀢𑁆𑀢𑀢𑀺, 𑀢𑀁 𑀲𑀼𑀢𑁆𑀯𑀸 𑀯𑀤𑀸𑀫𑀺. 𑀲𑀩𑁆𑀩𑁂𑀳𑀺 𑀓𑀺𑀭 𑀇𑀫𑁂𑀳𑀺 𑀲𑀫𑀸𑀕𑀢𑁂𑀳𑀺 𑀜𑀸𑀢𑀻𑀳𑀺 𑀅𑀬𑀁 𑀓𑁄𑀲𑀺𑀬𑁄 𑀭𑀸𑀚𑀸 𑀓𑀢𑁄. 𑀲𑀘𑁂 𑀧𑀦𑀸𑀳𑀁 𑀜𑀸𑀢𑀻𑀳𑀺 𑀅𑀦𑀼𑀜𑁆𑀜𑀸𑀢𑁄 𑀪𑀯𑁂𑀬𑁆𑀬𑀁, 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁 𑀏𑀓𑀯𑀸𑀘𑀺𑀓𑀁 𑀓𑀺𑀜𑁆𑀘𑀺 𑀪𑀡𑁂𑀬𑁆𑀬𑀦𑁆𑀢𑀺.

𑀅𑀣 ¶ 𑀦𑀁 𑀅𑀦𑀼𑀚𑀸𑀦𑀦𑁆𑀢𑀸 𑀲𑀓𑀼𑀡𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁫𑁯.

‘‘𑀪𑀡 𑀲𑀫𑁆𑀫 𑀅𑀦𑀼𑀜𑁆𑀜𑀸𑀢𑁄, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀓𑁂𑀯𑀮𑀁;

𑀲𑀦𑁆𑀢𑀺 𑀳𑀺 𑀤𑀳𑀭𑀸 𑀧𑀓𑁆𑀔𑀻, 𑀧𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑀸’’𑀢𑀺.

𑀢𑀢𑁆𑀣 𑀪𑀡, 𑀲𑀫𑁆𑀫, 𑀅𑀦𑀼𑀜𑁆𑀜𑀸𑀢𑁄𑀢𑀺, 𑀲𑀫𑁆𑀫, 𑀯𑀸𑀬𑀲 𑀢𑁆𑀯𑀁 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑀺 𑀅𑀦𑀼𑀜𑁆𑀜𑀸𑀢𑁄, 𑀬𑀁 𑀢𑁂 𑀪𑀡𑀺𑀢𑀩𑁆𑀩𑀁, 𑀢𑀁 𑀪𑀡. 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀓𑁂𑀯𑀮𑀦𑁆𑀢𑀺 𑀪𑀡𑀦𑁆𑀢𑁄 𑀘 𑀓𑀸𑀭𑀡𑀜𑁆𑀘𑁂𑀯 𑀧𑀯𑁂𑀡𑀺𑀆𑀕𑀢𑀜𑁆𑀘 𑀯𑀘𑀦𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀪𑀡. 𑀧𑀜𑁆𑀜𑀯𑀦𑁆𑀢𑁄 𑀚𑀼𑀢𑀺𑀦𑁆𑀥𑀭𑀸𑀢𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑀘𑁂𑀯 𑀜𑀸𑀡𑁄𑀪𑀸𑀲𑀥𑀭𑀸 𑀘 𑀤𑀳𑀭𑀸𑀧𑀺 𑀧𑀓𑁆𑀔𑀺𑀦𑁄 𑀅𑀢𑁆𑀣𑀺𑀬𑁂𑀯.

𑀲𑁄 𑀏𑀯𑀁 𑀅𑀦𑀼𑀜𑁆𑀜𑀸𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁦.

‘‘𑀦 𑀫𑁂 𑀭𑀼𑀘𑁆𑀘𑀢𑀺 𑀪𑀤𑁆𑀤𑀁 𑀯𑁄, 𑀉𑀮𑀽𑀓𑀲𑁆𑀲𑀸𑀪𑀺𑀲𑁂𑀘𑀦𑀁;

𑀅𑀓𑁆𑀓𑀼𑀤𑁆𑀥𑀲𑁆𑀲 𑀫𑀼𑀔𑀁 𑀧𑀲𑁆𑀲, 𑀓𑀣𑀁 𑀓𑀼𑀤𑁆𑀥𑁄 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀤𑁆𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼, 𑀬𑀁 𑀧𑀦𑁂𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑀦𑀯𑀸𑀘𑀸𑀬 𑀉𑀮𑀽𑀓𑀲𑁆𑀲 𑀅𑀪𑀺𑀲𑁂𑀘𑀦𑀁 𑀓𑀭𑀻𑀬𑀢𑀺, 𑀏𑀢𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺. 𑀏𑀢𑀲𑁆𑀲 𑀳𑀺 𑀇𑀤𑀸𑀦𑀺 𑀢𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀅𑀓𑁆𑀓𑀼𑀤𑁆𑀥𑀲𑁆𑀲 𑀫𑀼𑀔𑀁 𑀧𑀲𑁆𑀲𑀣, 𑀓𑀼𑀤𑁆𑀥𑁄 𑀧𑀦𑀸𑀬𑀁 𑀓𑀣𑀁 𑀓𑀭𑀺𑀲𑁆𑀲𑀢𑀻𑀢𑀺 𑀦 𑀚𑀸𑀦𑀸𑀫𑀺, 𑀲𑀩𑁆𑀩𑀣𑀸𑀧𑀺 𑀏𑀢𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻𑀢𑀺.

𑀲𑁄 𑀏𑀯𑀁 𑀯𑀢𑁆𑀯𑀸 ‘‘𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺, 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻’’𑀢𑀺 𑀯𑀺𑀭𑀯𑀦𑁆𑀢𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺, 𑀉𑀮𑀽𑀓𑁄𑀧𑀺 𑀦𑀁 𑀉𑀝𑁆𑀞𑀸𑀬 𑀅𑀦𑀼𑀩𑀦𑁆𑀥𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀯𑁂𑀭𑀁 𑀩𑀦𑁆𑀥𑀺𑀁𑀲𑀼. 𑀲𑀓𑀼𑀡𑀸 𑀲𑀼𑀯𑀡𑁆𑀡𑀳𑀁𑀲𑀁 𑀭𑀸𑀚𑀸𑀦𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀲𑀢𑁆𑀣𑀸 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀭𑀚𑁆𑀚𑁂 𑀅𑀪𑀺𑀲𑀺𑀢𑁆𑀢𑀳𑀁𑀲𑀧𑁄𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀮𑀽𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀧𑀤𑀼𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀤𑀼𑀫𑀁 𑀫𑀼𑀤𑀼𑀧𑀸𑀡𑀻 𑀘, 𑀧𑀮𑁄𑀪𑀦𑀁 𑀧𑀦𑀸𑀤𑀓𑀁;

𑀔𑀼𑀭𑀧𑁆𑀧𑀁 𑀲𑀺𑀦𑁆𑀥𑀯𑀜𑁆𑀘𑁂𑀯, 𑀓𑀓𑁆𑀓𑀝𑀸, 𑀭𑀸𑀫𑀤𑀽𑀲𑀓𑀁;

𑀲𑀼𑀚𑀸𑀢𑀁 𑀉𑀮𑀽𑀓𑀁 𑀤𑀲.

𑁩. 𑀉𑀤𑀧𑀸𑀦𑀯𑀕𑁆𑀕𑁄

[𑁨𑁭𑁧] 𑁧. 𑀉𑀤𑀧𑀸𑀦𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀆𑀭𑀜𑁆𑀜𑀺𑀓𑀲𑁆𑀲 ¶ ¶ 𑀇𑀲𑀺𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀤𑀧𑀸𑀦𑀤𑀽𑀲𑀓𑀲𑀺𑀗𑁆𑀕𑀸𑀮𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀺𑀗𑁆𑀕𑀸𑀮𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀦𑀻𑀬𑀉𑀤𑀧𑀸𑀦𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀭𑀡𑁂𑀦 𑀤𑀽𑀲𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀉𑀤𑀧𑀸𑀦𑀲𑀫𑀻𑀧𑀁 𑀆𑀕𑀢𑀁 𑀲𑀸𑀫𑀡𑁂𑀭𑀸 𑀮𑁂𑀟𑁆𑀟𑀽𑀳𑀺 𑀧𑀳𑀭𑀺𑀢𑁆𑀯𑀸 𑀓𑀺𑀮𑀫𑁂𑀲𑀼𑀁, 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀞𑀸𑀦𑀁 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀺. 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀉𑀤𑀧𑀸𑀦𑀤𑀽𑀲𑀓𑀲𑀺𑀗𑁆𑀕𑀸𑀮𑁄 𑀓𑀺𑀭 𑀲𑀸𑀫𑀡𑁂𑀭𑁂𑀳𑀺 𑀓𑀺𑀮𑀫𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀲𑀺𑀗𑁆𑀕𑀸𑀮𑁄 𑀉𑀤𑀧𑀸𑀦𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀇𑀤𑀫𑁂𑀯 𑀇𑀲𑀺𑀧𑀢𑀦𑀁 𑀅𑀬𑀫𑁂𑀯 𑀉𑀤𑀧𑀸𑀦𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀇𑀲𑀺𑀧𑀢𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀇𑀤𑀫𑁂𑀯 𑀉𑀤𑀧𑀸𑀦𑀁 𑀤𑀽𑀲𑁂𑀢𑁆𑀯𑀸 𑀧𑀓𑁆𑀓𑀫𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀢𑀸𑀧𑀲𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀏𑀓𑁂𑀦𑀼𑀧𑀸𑀬𑁂𑀦 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀲𑀺𑀗𑁆𑀕𑀸𑀮𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁧.

‘‘𑀆𑀭𑀜𑁆𑀜𑀺𑀓𑀲𑁆𑀲 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀢𑀧𑀲𑁆𑀲𑀺𑀦𑁄;

𑀓𑀺𑀘𑁆𑀙𑀸𑀓𑀢𑀁 𑀉𑀤𑀧𑀸𑀦𑀁, 𑀓𑀣𑀁 𑀲𑀫𑁆𑀫 𑀅𑀯𑀸𑀳𑀬𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀅𑀭𑀜𑁆𑀜𑁂 𑀯𑀲𑀦𑀢𑀸𑀬 𑀆𑀭𑀜𑁆𑀜𑀺𑀓𑀲𑁆𑀲, 𑀏𑀲𑀺𑀢𑀕𑀼𑀡𑀢𑁆𑀢𑀸 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀁 𑀢𑀧𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀣𑀢𑁆𑀢𑀸 𑀘𑀺𑀭𑀭𑀢𑁆𑀢𑀢𑀧𑀲𑁆𑀲𑀺𑀦𑁄 𑀓𑀺𑀘𑁆𑀙𑀸𑀓𑀢𑀁 𑀓𑀺𑀘𑁆𑀙𑁂𑀦 𑀤𑀼𑀓𑁆𑀔𑁂𑀦 𑀦𑀺𑀧𑁆𑀨𑀸𑀤𑀺𑀢𑀁 𑀉𑀤𑀧𑀸𑀦𑀁 𑀓𑀣𑀁 𑀓𑀺𑀫𑀢𑁆𑀣𑀸𑀬 𑀲𑀫𑁆𑀫 𑀲𑀺𑀗𑁆𑀕𑀸𑀮, 𑀢𑁆𑀯𑀁 𑀅𑀯𑀸𑀳𑀬𑀺 𑀫𑀼𑀢𑁆𑀢𑀓𑀭𑀻𑀲𑁂𑀦 𑀅𑀚𑁆𑀛𑁄𑀢𑁆𑀣𑀭𑀺 𑀤𑀽𑀲𑁂𑀲𑀺, 𑀢𑀁 𑀯𑀸 𑀫𑀼𑀢𑁆𑀢𑀓𑀭𑀻𑀲𑀁 𑀏𑀢𑁆𑀣 𑀅𑀯𑀸𑀳𑀬𑀺 𑀧𑀸𑀢𑁂𑀲𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁨.

‘‘𑀏𑀲 𑀥𑀫𑁆𑀫𑁄 𑀲𑀺𑀗𑁆𑀕𑀸𑀮𑀸𑀦𑀁, 𑀬𑀁 𑀧𑀺𑀢𑁆𑀯𑀸 𑀑𑀳𑀤𑀸𑀫𑀲𑁂;

𑀧𑀺𑀢𑀼𑀧𑀺𑀢𑀸𑀫𑀳𑀁 𑀥𑀫𑁆𑀫𑁄, 𑀦 𑀢𑀁 𑀉𑀚𑁆𑀛𑀸𑀢𑀼𑀫𑀭𑀳𑀲𑀻’’𑀢𑀺.

𑀢𑀢𑁆𑀣 ¶ 𑀏𑀲 𑀥𑀫𑁆𑀫𑁄𑀢𑀺 𑀏𑀲 𑀲𑀪𑀸𑀯𑁄. 𑀬𑀁 𑀧𑀺𑀢𑁆𑀯𑀸 𑀑𑀳𑀤𑀸𑀫𑀲𑁂𑀢𑀺, 𑀲𑀫𑁆𑀫, 𑀬𑀁 𑀫𑀬𑀁 𑀬𑀢𑁆𑀣 𑀧𑀸𑀦𑀻𑀬𑀁 𑀧𑀺𑀯𑀸𑀫, 𑀢𑀫𑁂𑀯 𑀊𑀳𑀤𑀸𑀫𑀧𑀺 𑀑𑀫𑀼𑀢𑁆𑀢𑁂𑀫𑀧𑀺, 𑀏𑀲 𑀅𑀫𑁆𑀳𑀸𑀓𑀁 𑀲𑀺𑀗𑁆𑀕𑀸𑀮𑀸𑀦𑀁 𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀺𑀢𑀼𑀧𑀺𑀢𑀸𑀫𑀳𑀦𑁆𑀢𑀺 𑀧𑀺𑀢𑀽𑀦𑀜𑁆𑀘 𑀧𑀺𑀢𑀸𑀫𑀳𑀸𑀦𑀜𑁆𑀘 𑀦𑁄 𑀏𑀲 𑀥𑀫𑁆𑀫𑁄. 𑀦 𑀢𑀁 𑀉𑀚𑁆𑀛𑀸𑀢𑀼𑀫𑀭𑀳𑀲𑀻𑀢𑀺 𑀢𑀁 𑀅𑀫𑁆𑀳𑀸𑀓𑀁 𑀧𑀯𑁂𑀡𑀺𑀆𑀕𑀢𑀁 𑀥𑀫𑁆𑀫𑀁 𑀲𑀪𑀸𑀯𑀁 𑀢𑁆𑀯𑀁 𑀉𑀚𑁆𑀛𑀸𑀢𑀼𑀁 𑀦 𑀅𑀭𑀳𑀲𑀺, 𑀦 𑀬𑀼𑀢𑁆𑀢𑀁 𑀢𑁂 𑀏𑀢𑁆𑀣 𑀓𑀼𑀚𑁆𑀛𑀺𑀢𑀼𑀦𑁆𑀢𑀺.

𑀅𑀣𑀲𑁆𑀲 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁩.

‘‘𑀬𑁂𑀲𑀁 𑀯𑁄 𑀏𑀤𑀺𑀲𑁄 𑀥𑀫𑁆𑀫𑁄, 𑀅𑀥𑀫𑁆𑀫𑁄 𑀧𑀦 𑀓𑀻𑀤𑀺𑀲𑁄;

𑀫𑀸 𑀯𑁄 𑀥𑀫𑁆𑀫𑀁 𑀅𑀥𑀫𑁆𑀫𑀁 𑀯𑀸, 𑀅𑀤𑁆𑀤𑀲𑀸𑀫 𑀓𑀼𑀤𑀸𑀘𑀦’’𑀦𑁆𑀢𑀺.

𑀢𑀢𑁆𑀣 𑀫𑀸 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸 𑀦 𑀫𑀬𑀁 𑀓𑀤𑀸𑀘𑀺 𑀅𑀤𑁆𑀤𑀲𑀸𑀫𑀸𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 ‘‘𑀫𑀸 𑀧𑀼𑀦 𑀆𑀕𑀘𑁆𑀙𑀸’’𑀢𑀺 𑀆𑀳. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀉𑀤𑀧𑀸𑀦𑀤𑀽𑀲𑀓𑁄 𑀅𑀬𑀫𑁂𑀯 𑀲𑀺𑀗𑁆𑀕𑀸𑀮𑁄 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀤𑀧𑀸𑀦𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁭𑁨] 𑁨. 𑀩𑁆𑀬𑀕𑁆𑀖𑀚𑀸𑀢𑀓𑀯𑀡𑁆𑀡𑀦𑀸

𑀬𑁂𑀦 ¶ 𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑁄𑀓𑀸𑀮𑀺𑀓𑀯𑀢𑁆𑀣𑀼 𑀢𑁂𑀭𑀲𑀓𑀦𑀺𑀧𑀸𑀢𑁂 𑀢𑀓𑁆𑀓𑀸𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁧𑁩.𑁧𑁦𑁪 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀓𑁄𑀓𑀸𑀮𑀺𑀓𑁄 𑀧𑀦 ‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀓𑁄𑀓𑀸𑀮𑀺𑀓𑀭𑀝𑁆𑀞𑀢𑁄 ¶ 𑀚𑁂𑀢𑀯𑀦𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀓𑁄𑀓𑀸𑀮𑀺𑀓𑀭𑀝𑁆𑀞𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑁂 𑀧𑀓𑁆𑀓𑁄𑀲𑀦𑁆𑀢𑀺, 𑀏𑀣 𑀕𑀘𑁆𑀙𑀸𑀫𑀸’’𑀢𑀺 𑀆𑀳. ‘‘𑀕𑀘𑁆𑀙 𑀢𑁆𑀯𑀁, 𑀆𑀯𑀼𑀲𑁄, 𑀦 𑀫𑀬𑀁 𑀆𑀕𑀘𑁆𑀙𑀸𑀫𑀸’’𑀢𑀺. 𑀲𑁄 𑀣𑁂𑀭𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀲𑀬𑀫𑁂𑀯 𑀅𑀕𑀫𑀸𑀲𑀺. 𑀅𑀣 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀓𑁄𑀓𑀸𑀮𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀲𑀳𑀸𑀧𑀺 ¶ 𑀯𑀺𑀦𑀸𑀧𑀺 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀁𑀬𑁄𑀕𑀫𑁆𑀧𑀺 𑀦 𑀲𑀳𑀢𑀺, 𑀯𑀺𑀬𑁄𑀕𑀫𑁆𑀧𑀺 𑀦 𑀲𑀳𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀓𑁄𑀓𑀸𑀮𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀦𑁂𑀯 𑀲𑀳, 𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀺𑀫𑀸𑀦𑀢𑁄 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑁂 𑀅𑀜𑁆𑀜𑀸 𑀭𑀼𑀓𑁆𑀔𑀤𑁂𑀯𑀢𑀸 𑀯𑀲𑀢𑀺. 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀲𑀻𑀳𑁄 𑀘 𑀩𑁆𑀬𑀕𑁆𑀖𑁄 𑀘 𑀯𑀲𑀦𑁆𑀢𑀺. 𑀢𑁂𑀲𑀁 𑀪𑀬𑁂𑀦 𑀓𑁄𑀘𑀺 𑀢𑀢𑁆𑀣 𑀦 𑀔𑁂𑀢𑁆𑀢𑀁 𑀓𑀭𑁄𑀢𑀺, 𑀦 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂 𑀧𑀦 𑀲𑀻𑀳𑀩𑁆𑀬𑀕𑁆𑀖𑀸 𑀦𑀸𑀦𑀧𑁆𑀧𑀓𑀸𑀭𑁂 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀔𑀸𑀤𑀺𑀢𑀸𑀯𑀲𑁂𑀲𑀁 𑀢𑀢𑁆𑀣𑁂𑀯 𑀧𑀳𑀸𑀬 𑀕𑀘𑁆𑀙𑀦𑁆𑀢𑀺. 𑀢𑁂𑀦 𑀲𑁄 𑀯𑀦𑀲𑀡𑁆𑀟𑁄 𑀅𑀲𑀼𑀘𑀺𑀓𑀼𑀡𑀧𑀕𑀦𑁆𑀥𑁄 𑀳𑁄𑀢𑀺. 𑀅𑀣 𑀇𑀢𑀭𑀸 𑀭𑀼𑀓𑁆𑀔𑀤𑁂𑀯𑀢𑀸 𑀅𑀦𑁆𑀥𑀩𑀸𑀮𑀸 𑀓𑀸𑀭𑀡𑀸𑀓𑀸𑀭𑀡𑀁 𑀅𑀚𑀸𑀦𑀫𑀸𑀦𑀸 𑀏𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀲𑀫𑁆𑀫, 𑀏𑀢𑁂 𑀦𑁄 𑀲𑀻𑀳𑀩𑁆𑀬𑀕𑁆𑀖𑁂 𑀦𑀺𑀲𑁆𑀲𑀸𑀬 𑀯𑀦𑀲𑀡𑁆𑀟𑁄 𑀅𑀲𑀼𑀘𑀺𑀓𑀼𑀡𑀧𑀕𑀦𑁆𑀥𑁄 𑀚𑀸𑀢𑁄, 𑀅𑀳𑀁 𑀏𑀢𑁂 𑀧𑀮𑀸𑀧𑁂𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀫𑁆𑀫, 𑀇𑀫𑁂 𑀤𑁆𑀯𑁂 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀯𑀺𑀫𑀸𑀦𑀸𑀦𑀺 ¶ 𑀭𑀓𑁆𑀔𑀺𑀬𑀦𑁆𑀢𑀺, 𑀏𑀢𑁂𑀲𑀼 𑀧𑀮𑀸𑀬𑀦𑁆𑀢𑁂𑀲𑀼 𑀯𑀺𑀫𑀸𑀦𑀸𑀦𑀺 𑀦𑁄 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀻𑀳𑀩𑁆𑀬𑀕𑁆𑀖𑀸𑀦𑀁 𑀧𑀤𑀁 𑀅𑀧𑀲𑁆𑀲𑀦𑁆𑀢𑀸 𑀫𑀦𑀼𑀲𑁆𑀲𑀸 𑀲𑀩𑁆𑀩𑀁 𑀯𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀗𑁆𑀕𑀡𑀁 𑀓𑀢𑁆𑀯𑀸 𑀔𑁂𑀢𑁆𑀢𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀫𑀸 𑀢𑁂 𑀏𑀯𑀁 𑀭𑀼𑀘𑁆𑀘𑀻’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁬𑁪.

‘‘𑀬𑁂𑀦 𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸, 𑀬𑁄𑀕𑀓𑁆𑀔𑁂𑀫𑁄 𑀯𑀺𑀳𑀺𑀬𑁆𑀬𑀢𑀺;

𑀧𑀼𑀩𑁆𑀩𑁂𑀯𑀚𑁆𑀛𑀸𑀪𑀯𑀁 𑀢𑀲𑁆𑀲, 𑀭𑀓𑁆𑀔𑁂 𑀅𑀓𑁆𑀔𑀻𑀯 𑀧𑀡𑁆𑀟𑀺𑀢𑁄.

𑁬𑁫.

‘‘𑀬𑁂𑀦 𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸, 𑀬𑁄𑀕𑀓𑁆𑀔𑁂𑀫𑁄 𑀧𑀯𑀟𑁆𑀠𑀢𑀺;

𑀓𑀭𑁂𑀬𑁆𑀬𑀢𑁆𑀢𑀲𑀫𑀁 𑀯𑀼𑀢𑁆𑀢𑀺𑀁, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 𑀬𑁂𑀦 𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸𑀢𑀺 𑀬𑁂𑀦 𑀧𑀸𑀧𑀫𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀳𑁂𑀢𑀼 𑀲𑀁𑀲𑀕𑁆𑀕𑀓𑀸𑀭𑀡𑀸, 𑀬𑁂𑀦 𑀲𑀤𑁆𑀥𑀺𑀁 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀓𑀸𑀬𑀲𑀁𑀲𑀕𑁆𑀕𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀧𑀭𑀺𑀪𑁄𑀕𑀲𑀁𑀲𑀕𑁆𑀕𑁄𑀢𑀺 𑀇𑀫𑀲𑁆𑀲 𑀧𑀜𑁆𑀘𑀯𑀺𑀥𑀲𑁆𑀲 𑀲𑀁𑀲𑀕𑁆𑀕𑀲𑁆𑀲 𑀓𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑁄𑀕𑀓𑁆𑀔𑁂𑀫𑁄𑀢𑀺 𑀓𑀸𑀬𑀘𑀺𑀢𑁆𑀢𑀲𑀼𑀔𑀁. 𑀢𑀜𑁆𑀳𑀺 ¶ 𑀤𑀼𑀓𑁆𑀔𑀬𑁄𑀕𑀢𑁄 𑀔𑁂𑀫𑀢𑁆𑀢𑀸 ¶ 𑀇𑀥 𑀬𑁄𑀕𑀓𑁆𑀔𑁂𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀳𑀺𑀬𑁆𑀬𑀢𑀻𑀢𑀺 𑀧𑀭𑀺𑀳𑀸𑀬𑀢𑀺. 𑀧𑀼𑀩𑁆𑀩𑁂𑀯𑀚𑁆𑀛𑀸𑀪𑀯𑀁 𑀢𑀲𑁆𑀲, 𑀭𑀓𑁆𑀔𑁂 𑀅𑀓𑁆𑀔𑀻𑀯 𑀧𑀡𑁆𑀟𑀺𑀢𑁄𑀢𑀺 𑀢𑀲𑁆𑀲 𑀧𑀸𑀧𑀫𑀺𑀢𑁆𑀢𑀲𑁆𑀲 𑀅𑀚𑁆𑀛𑀸𑀪𑀯𑀁 𑀢𑁂𑀦 𑀅𑀪𑀺𑀪𑀯𑀺𑀢𑀩𑁆𑀩𑀁 𑀅𑀢𑁆𑀢𑀦𑁄 𑀮𑀸𑀪𑀬𑀲𑀚𑀻𑀯𑀺𑀢𑀁, 𑀬𑀣𑀸 𑀦𑀁 𑀲𑁄 𑀦 𑀅𑀚𑁆𑀛𑀸𑀪𑀯𑀢𑀺, 𑀢𑀣𑀸 𑀧𑀞𑀫𑀢𑀭𑀫𑁂𑀯 𑀅𑀢𑁆𑀢𑀦𑁄 𑀅𑀓𑁆𑀔𑀻 𑀯𑀺𑀬 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀭𑀓𑁆𑀔𑁂𑀬𑁆𑀬.

𑀤𑀼𑀢𑀺𑀬𑀕𑀸𑀣𑀸𑀬 𑀬𑁂𑀦𑀸𑀢𑀺 𑀬𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀲𑀳 𑀲𑀁𑀲𑀕𑁆𑀕𑀓𑀸𑀭𑀡𑀸. 𑀬𑁄𑀕𑀓𑁆𑀔𑁂𑀫𑁄 𑀧𑀯𑀟𑁆𑀠𑀢𑀻𑀢𑀺 𑀓𑀸𑀬𑀘𑀺𑀢𑁆𑀢𑀲𑀼𑀔𑀁 𑀯𑀟𑁆𑀠𑀢𑀺. 𑀓𑀭𑁂𑀬𑁆𑀬𑀢𑁆𑀢𑀲𑀫𑀁 𑀯𑀼𑀢𑁆𑀢𑀺𑀦𑁆𑀢𑀺 𑀢𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀬𑀣𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀯𑀼𑀢𑁆𑀢𑀺𑀜𑁆𑀘 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀼𑀢𑁆𑀢𑀺𑀜𑁆𑀘 𑀓𑀭𑁄𑀢𑀺, 𑀏𑀯𑀫𑁂𑀢𑀁 𑀲𑀩𑁆𑀩𑀁 𑀓𑀭𑁂𑀬𑁆𑀬, 𑀅𑀥𑀺𑀓𑀫𑁆𑀧𑀺 𑀓𑀭𑁂𑀬𑁆𑀬, 𑀳𑀻𑀦𑀁 𑀧𑀦 𑀦 𑀓𑀭𑁂𑀬𑁆𑀬𑀸𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦 𑀓𑀸𑀭𑀡𑁂 𑀓𑀣𑀺𑀢𑁂𑀧𑀺 𑀲𑀸 𑀩𑀸𑀮𑀤𑁂𑀯𑀢𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀪𑁂𑀭𑀯𑀭𑀽𑀧𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂 𑀲𑀻𑀳𑀩𑁆𑀬𑀕𑁆𑀖𑁂 𑀧𑀮𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀢𑁂𑀲𑀁 𑀧𑀤𑀯𑀮𑀜𑁆𑀚𑀁 𑀅𑀤𑀺𑀲𑁆𑀯𑀸 ‘‘𑀲𑀻𑀳𑀩𑁆𑀬𑀕𑁆𑀖𑀸 𑀅𑀜𑁆𑀜𑀁 𑀯𑀦𑀲𑀡𑁆𑀟𑀁 𑀕𑀢𑀸’’𑀢𑀺 𑀜𑀢𑁆𑀯𑀸 𑀯𑀦𑀲𑀡𑁆𑀟𑀲𑁆𑀲 𑀏𑀓𑀧𑀲𑁆𑀲𑀁 𑀙𑀺𑀦𑁆𑀤𑀺𑀁𑀲𑀼. 𑀤𑁂𑀯𑀢𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ ‘‘𑀅𑀳𑀁, 𑀲𑀫𑁆𑀫, 𑀢𑀯 𑀯𑀘𑀦𑀁 𑀅𑀓𑀢𑁆𑀯𑀸 𑀢𑁂 𑀧𑀮𑀸𑀧𑁂𑀲𑀺𑀁, 𑀇𑀤𑀸𑀦𑀺 𑀢𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀫𑀦𑀼𑀲𑁆𑀲𑀸 𑀯𑀦𑀲𑀡𑁆𑀟𑀁 𑀙𑀺𑀦𑁆𑀤𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀢𑁂 𑀅𑀲𑀼𑀓𑀯𑀦𑀲𑀡𑁆𑀟𑁂 𑀦𑀸𑀫 𑀯𑀲𑀦𑁆𑀢𑀺, 𑀕𑀦𑁆𑀢𑁆𑀯𑀸 𑀢𑁂 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀧𑀼𑀭𑀢𑁄 𑀞𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁬.

‘‘𑀏𑀣 𑀩𑁆𑀬𑀕𑁆𑀖𑀸 𑀦𑀺𑀯𑀢𑁆𑀢𑀯𑁆𑀳𑁄, 𑀧𑀘𑁆𑀘𑀼𑀧𑁂𑀣 𑀫𑀳𑀸𑀯𑀦𑀁;

𑀫𑀸 𑀯𑀦𑀁 𑀙𑀺𑀦𑁆𑀤𑀺 𑀦𑀺𑀩𑁆𑀬𑀕𑁆𑀖𑀁, 𑀩𑁆𑀬𑀕𑁆𑀖𑀸 𑀫𑀸𑀳𑁂𑀲𑀼 𑀦𑀺𑀩𑁆𑀩𑀦𑀸’’𑀢𑀺.

𑀢𑀢𑁆𑀣 𑀩𑁆𑀬𑀕𑁆𑀖𑀸𑀢𑀺 𑀉𑀪𑁄𑀧𑀺 𑀢𑁂 𑀩𑁆𑀬𑀕𑁆𑀖𑀦𑀸𑀫𑁂𑀦𑁂𑀯𑀸𑀮𑀧𑀦𑁆𑀢𑀻 𑀆𑀳. 𑀦𑀺𑀯𑀢𑁆𑀢𑀯𑁆𑀳𑁄𑀢𑀺 𑀦𑀺𑀯𑀢𑁆𑀢𑀣. 𑀧𑀘𑁆𑀘𑀼𑀧𑁂𑀣 𑀫𑀳𑀸𑀯𑀦𑀦𑁆𑀢𑀺 𑀢𑀁 𑀫𑀳𑀸𑀯𑀦𑀁 𑀧𑀘𑁆𑀘𑀼𑀧𑁂𑀣 𑀧𑀼𑀦 𑀉𑀧𑀕𑀘𑁆𑀙𑀣, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀫𑀸 𑀯𑀦𑀁 𑀙𑀺𑀦𑁆𑀤𑀺 𑀦𑀺𑀩𑁆𑀬𑀕𑁆𑀖𑀦𑁆𑀢𑀺 𑀅𑀫𑁆𑀳𑀸𑀓𑀁 𑀯𑀲𑀦𑀓𑀯𑀦𑀲𑀡𑁆𑀟𑀁 𑀇𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀅𑀪𑀸𑀯𑁂𑀦 𑀦𑀺𑀩𑁆𑀬𑀕𑁆𑀖𑀁 𑀫𑀦𑀼𑀲𑁆𑀲𑀸 𑀫𑀸 𑀙𑀺𑀦𑁆𑀤𑀺𑀁𑀲𑀼. 𑀩𑁆𑀬𑀕𑁆𑀖𑀸 𑀫𑀸𑀳𑁂𑀲𑀼 𑀦𑀺𑀩𑁆𑀩𑀦𑀸𑀢𑀺 𑀢𑀼𑀫𑁆𑀳𑀸𑀤𑀺𑀲𑀸 𑀘 𑀩𑁆𑀬𑀕𑁆𑀖𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀧𑀮𑀸𑀬𑀺𑀢𑀢𑁆𑀢𑀸 𑀦𑀺𑀩𑁆𑀩𑀦𑀸 𑀯𑀲𑀦𑀝𑁆𑀞𑀸𑀦𑀪𑀽𑀢𑁂𑀦 𑀯𑀦𑁂𑀦 𑀯𑀺𑀭𑀳𑀺𑀢𑀸 𑀫𑀸 𑀅𑀳𑁂𑀲𑀼𑀁. 𑀢𑁂 𑀏𑀯𑀁 𑀢𑀸𑀬 𑀤𑁂𑀯𑀢𑀸𑀬 𑀬𑀸𑀘𑀺𑀬𑀫𑀸𑀦𑀸𑀧𑀺 ‘‘𑀕𑀘𑁆𑀙 𑀢𑁆𑀯𑀁, 𑀦 𑀫𑀬𑀁 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼𑀬𑁂𑀯. 𑀤𑁂𑀯𑀢𑀸 𑀏𑀓𑀺𑀓𑀸𑀯 𑀯𑀦𑀲𑀡𑁆𑀟𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀫𑀦𑀼𑀲𑁆𑀲𑀸𑀧𑀺 𑀓𑀢𑀺𑀧𑀸𑀳𑁂𑀦𑁂𑀯 𑀲𑀩𑁆𑀩𑀁 𑀯𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀔𑁂𑀢𑁆𑀢𑀸𑀦𑀺 𑀓𑀭𑀺𑀢𑁆𑀯𑀸 𑀓𑀲𑀺𑀓𑀫𑁆𑀫𑀁 𑀓𑀭𑀺𑀁𑀲𑀼.

𑀲𑀢𑁆𑀣𑀸 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀧𑀡𑁆𑀟𑀺𑀢𑀸 𑀤𑁂𑀯𑀢𑀸 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀲𑀻𑀳𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀩𑁆𑀬𑀕𑁆𑀖𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀧𑀡𑁆𑀟𑀺𑀢𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑁆𑀬𑀕𑁆𑀖𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁭𑁩] 𑁩. 𑀓𑀘𑁆𑀙𑀧𑀚𑀸𑀢𑀓𑀯𑀡𑁆𑀡𑀦𑀸

𑀓𑁄 ¶ 𑀦𑀼 𑀉𑀤𑁆𑀥𑀺𑀢𑀪𑀢𑁆𑀢𑁄𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀲𑁆𑀲 𑀤𑁆𑀯𑀺𑀦𑁆𑀦𑀁 𑀫𑀳𑀸𑀫𑀢𑁆𑀢𑀸𑀦𑀁 𑀓𑀮𑀳𑀯𑀽𑀧𑀲𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀤𑀼𑀓𑀦𑀺𑀧𑀸𑀢𑁂 𑀓𑀣𑀺𑀢𑀫𑁂𑀯.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀕𑀗𑁆𑀕𑀸𑀢𑀻𑀭𑁂 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀇𑀫𑀲𑁆𑀫𑀺𑀁 𑀓𑀺𑀭 𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁄 𑀧𑀭𑀫𑀫𑀚𑁆𑀛𑀢𑁆𑀢𑁄 𑀅𑀳𑁄𑀲𑀺, 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀧𑀽𑀭𑁂𑀲𑀺. 𑀢𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀏𑀓𑁄 𑀧𑀕𑀩𑁆𑀪𑁄 𑀤𑀼𑀲𑁆𑀲𑀻𑀮𑁄 𑀫𑀓𑁆𑀓𑀝𑁄 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀲𑁄𑀢𑁂𑀲𑀼 𑀅𑀗𑁆𑀕𑀚𑀸𑀢𑁂𑀦 𑀲𑀮𑀸𑀓𑀧𑀯𑁂𑀲𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀅𑀯𑀸𑀭𑁂𑀢𑁆𑀯𑀸 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀢𑀺𑀬𑁂𑀯. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀓𑀘𑁆𑀙𑀧𑁄 𑀉𑀤𑀓𑀸 𑀉𑀢𑁆𑀢𑀭𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀆𑀢𑀧𑀁 𑀢𑀧𑁆𑀧𑀦𑁆𑀢𑁄 𑀦𑀺𑀤𑁆𑀤𑀸𑀬𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑁄 𑀮𑁄𑀮𑀯𑀸𑀦𑀭𑁄 𑀢𑀲𑁆𑀲 𑀫𑀼𑀔𑁂 𑀲𑀮𑀸𑀓𑀧𑀯𑁂𑀲𑀦𑀓𑀫𑁆𑀫𑀁 𑀅𑀓𑀸𑀲𑀺. 𑀅𑀣𑀲𑁆𑀲 𑀓𑀘𑁆𑀙𑀧𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀗𑁆𑀕𑀚𑀸𑀢𑀁 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀟𑀁𑀲𑀺, 𑀩𑀮𑀯𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑁄𑀘𑁂𑀬𑁆𑀬, 𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀜𑁆𑀜𑁄 𑀫𑀁 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑁄𑀘𑁂𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀢𑀸𑀧𑀲𑁂𑀦, 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀘𑁆𑀙𑀧𑀁 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀦 𑀤𑀼𑀲𑁆𑀲𑀻𑀮𑀫𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀤𑀯𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁭.

‘‘𑀓𑁄 ¶ ¶ 𑀦𑀼 𑀉𑀤𑁆𑀥𑀺𑀢𑀪𑀢𑁆𑀢𑁄𑀯, 𑀧𑀽𑀭𑀳𑀢𑁆𑀣𑁄𑀯 𑀩𑁆𑀭𑀸𑀳𑁆𑀫𑀡𑁄;

𑀓𑀳𑀁 𑀦𑀼 𑀪𑀺𑀓𑁆𑀔𑀁 𑀅𑀘𑀭𑀺, 𑀓𑀁 𑀲𑀤𑁆𑀥𑀁 𑀉𑀧𑀲𑀗𑁆𑀓𑀫𑀻’’𑀢𑀺.

𑀢𑀢𑁆𑀣 𑀓𑁄 𑀦𑀼 𑀉𑀤𑁆𑀥𑀺𑀢𑀪𑀢𑁆𑀢𑁄𑀯𑀸𑀢𑀺 𑀓𑁄 𑀦𑀼 𑀏𑀲 𑀯𑀟𑁆𑀠𑀺𑀢𑀪𑀢𑁆𑀢𑁄 𑀯𑀺𑀬, 𑀏𑀓𑀁 𑀯𑀟𑁆𑀠𑀺𑀢𑀪𑀢𑁆𑀢𑀁 𑀪𑀢𑁆𑀢𑀧𑀽𑀭𑀧𑀸𑀢𑀺𑀁 ¶ 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀯𑀺𑀬 𑀓𑁄 𑀦𑀼 𑀏𑀲𑁄 𑀆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀧𑀽𑀭𑀳𑀢𑁆𑀣𑁄𑀯 𑀩𑁆𑀭𑀸𑀳𑁆𑀫𑀡𑁄𑀢𑀺 𑀓𑀢𑁆𑀢𑀺𑀓𑀫𑀸𑀲𑁂 𑀯𑀸𑀘𑀦𑀓𑀁 𑀮𑀪𑀺𑀢𑁆𑀯𑀸 𑀧𑀽𑀭𑀳𑀢𑁆𑀣𑁄 𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀘 𑀓𑁄 𑀦𑀼 𑀔𑁄 𑀏𑀲𑁄𑀢𑀺 𑀯𑀸𑀦𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑀳𑀁 𑀦𑀼 𑀪𑀺𑀓𑁆𑀔𑀁 𑀅𑀘𑀭𑀻𑀢𑀺, 𑀪𑁄 𑀯𑀸𑀦𑀭, 𑀓𑀲𑁆𑀫𑀺𑀁 𑀧𑀤𑁂𑀲𑁂 𑀅𑀚𑁆𑀚 𑀢𑁆𑀯𑀁 𑀪𑀺𑀓𑁆𑀔𑀁 𑀅𑀘𑀭𑀺. 𑀓𑀁 𑀲𑀤𑁆𑀥𑀁 𑀉𑀧𑀲𑀗𑁆𑀓𑀫𑀻𑀢𑀺 𑀓𑀢𑀭𑀁 𑀦𑀸𑀫 𑀧𑀼𑀩𑁆𑀩𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀲𑀤𑁆𑀥𑀪𑀢𑁆𑀢𑀁, 𑀓𑀢𑀭𑀁 𑀯𑀸 𑀲𑀤𑁆𑀥𑀁 𑀧𑀼𑀕𑁆𑀕𑀮𑀁 𑀢𑁆𑀯𑀁 𑀉𑀧𑀲𑀗𑁆𑀓𑀫𑀺, 𑀓𑀼𑀢𑁄 𑀢𑁂 𑀅𑀬𑀁 𑀤𑁂𑀬𑁆𑀬𑀥𑀫𑁆𑀫𑁄 𑀮𑀤𑁆𑀥𑁄𑀢𑀺 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑀼𑀲𑁆𑀲𑀻𑀮𑀯𑀸𑀦𑀭𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁮.

‘‘𑀅𑀳𑀁 𑀓𑀧𑀺𑀲𑁆𑀫𑀺 𑀤𑀼𑀫𑁆𑀫𑁂𑀥𑁄, 𑀅𑀦𑀸𑀫𑀸𑀲𑀸𑀦𑀺 𑀆𑀫𑀲𑀺𑀁;

𑀢𑁆𑀯𑀁 𑀫𑀁 𑀫𑁄𑀘𑀬 𑀪𑀤𑁆𑀤𑀁 𑀢𑁂, 𑀫𑀼𑀢𑁆𑀢𑁄 𑀕𑀘𑁆𑀙𑁂𑀬𑁆𑀬 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀅𑀳𑀁 𑀓𑀧𑀺𑀲𑁆𑀫𑀺 𑀤𑀼𑀫𑁆𑀫𑁂𑀥𑁄𑀢𑀺 𑀪𑀤𑁆𑀤𑀁 𑀢𑁂 𑀅𑀳𑀁 𑀅𑀲𑁆𑀫𑀺 𑀤𑀼𑀫𑁆𑀫𑁂𑀥𑁄 𑀘𑀧𑀮𑀘𑀺𑀢𑁆𑀢𑁄 𑀫𑀓𑁆𑀓𑀝𑁄. 𑀅𑀦𑀸𑀫𑀸𑀲𑀸𑀦𑀺 𑀆𑀫𑀲𑀺𑀦𑁆𑀢𑀺 𑀅𑀦𑀸𑀫𑀲𑀺𑀢𑀩𑁆𑀩𑀝𑁆𑀞𑀸𑀦𑀸𑀦𑀺 𑀆𑀫𑀲𑀺𑀁. 𑀢𑁆𑀯𑀁 𑀫𑀁 𑀫𑁄𑀘𑀬 𑀪𑀤𑁆𑀤𑀁 𑀢𑁂𑀢𑀺 𑀢𑁆𑀯𑀁 𑀤𑀬𑀸𑀮𑀼 𑀅𑀦𑀼𑀓𑀫𑁆𑀧𑀓𑁄 𑀫𑀁 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑁄𑀘𑁂𑀳𑀺, 𑀪𑀤𑁆𑀤𑀁 𑀢𑁂 𑀳𑁄𑀢𑀼. 𑀫𑀼𑀢𑁆𑀢𑁄 𑀕𑀘𑁆𑀙𑁂𑀬𑁆𑀬 𑀧𑀩𑁆𑀩𑀢𑀦𑁆𑀢𑀺 𑀲𑁄𑀳𑀁 𑀢𑀯𑀸𑀦𑀼𑀪𑀸𑀯𑁂𑀦 𑀇𑀫𑀫𑁆𑀳𑀸 𑀩𑁆𑀬𑀲𑀦𑀸 𑀫𑀼𑀢𑁆𑀢𑁄 𑀧𑀩𑁆𑀩𑀢𑀫𑁂𑀯 𑀕𑀘𑁆𑀙𑁂𑀬𑁆𑀬𑀁, 𑀦 𑀢𑁂 𑀧𑀼𑀦 𑀘𑀓𑁆𑀔𑀼𑀧𑀣𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀬𑁆𑀬𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀓𑀸𑀭𑀼𑀜𑁆𑀜𑁂𑀦 𑀓𑀘𑁆𑀙𑀧𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁯.

‘‘𑀓𑀘𑁆𑀙𑀧𑀸 𑀓𑀲𑁆𑀲𑀧𑀸 𑀳𑁄𑀦𑁆𑀢𑀺, 𑀓𑁄𑀡𑁆𑀟𑀜𑁆𑀜𑀸 𑀳𑁄𑀦𑁆𑀢𑀺 𑀫𑀓𑁆𑀓𑀝𑀸;

𑀫𑀼𑀜𑁆𑀘 𑀓𑀲𑁆𑀲𑀧 𑀓𑁄𑀡𑁆𑀟𑀜𑁆𑀜𑀁, 𑀓𑀢𑀁 𑀫𑁂𑀣𑀼𑀦𑀓𑀁 𑀢𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀓𑀘𑁆𑀙𑀧𑀸 𑀦𑀸𑀫 𑀓𑀲𑁆𑀲𑀧𑀕𑁄𑀢𑁆𑀢𑀸 𑀳𑁄𑀦𑁆𑀢𑀺, 𑀫𑀓𑁆𑀓𑀝𑀸 𑀓𑁄𑀡𑁆𑀟𑀜𑁆𑀜𑀕𑁄𑀢𑁆𑀢𑀸, 𑀓𑀲𑁆𑀲𑀧𑀓𑁄𑀡𑁆𑀟𑀜𑁆𑀜𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑀺. 𑀅𑀤𑁆𑀥𑀸 𑀢𑀬𑀺𑀤𑀁 𑀮𑁄𑀮𑁂𑀦 𑀤𑀼𑀲𑁆𑀲𑀻𑀮𑀫𑀓𑁆𑀓𑀝𑁂𑀦 𑀢𑀬𑀸 𑀲𑀤𑁆𑀥𑀺𑀁, 𑀢𑀬𑀸 𑀘 𑀤𑀼𑀲𑁆𑀲𑀻𑀮𑁂𑀦 𑀇𑀫𑀺𑀦𑀸 𑀫𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀕𑁄𑀢𑁆𑀢𑀲𑀤𑀺𑀲𑀢𑀸𑀲𑀗𑁆𑀔𑀸𑀢𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 ¶ 𑀅𑀦𑀼𑀘𑁆𑀙𑀯𑀺𑀓𑀁 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀲𑀗𑁆𑀔𑀸𑀢𑀫𑁆𑀧𑀺 𑀫𑁂𑀣𑀼𑀦𑀓𑀁 𑀓𑀢𑀁, 𑀢𑀲𑁆𑀫𑀸 𑀫𑀼𑀜𑁆𑀘, 𑀓𑀲𑁆𑀲𑀧, 𑀓𑁄𑀡𑁆𑀟𑀜𑁆𑀜𑀦𑁆𑀢𑀺.

𑀓𑀘𑁆𑀙𑀧𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀸𑀭𑀡𑁂𑀦 𑀧𑀲𑀦𑁆𑀦𑁄 𑀯𑀸𑀦𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀜𑁆𑀘𑀺. 𑀫𑀓𑁆𑀓𑀝𑁄 𑀫𑀼𑀢𑁆𑀢𑀫𑀢𑁆𑀢𑁄𑀯 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀮𑀸𑀢𑁄, 𑀧𑀼𑀦 𑀢𑀁 𑀞𑀸𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀺. 𑀓𑀘𑁆𑀙𑀧𑁄𑀧𑀺 ¶ 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀘𑁆𑀙𑀧𑀯𑀸𑀦𑀭𑀸 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀘𑁆𑀙𑀧𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁭𑁪] 𑁪. 𑀮𑁄𑀮𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀬𑀁 𑀩𑀮𑀸𑀓𑀸 𑀲𑀺𑀔𑀺𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀥𑀫𑁆𑀫𑀲𑀪𑀁 𑀆𑀦𑀻𑀢𑀁 𑀲𑀢𑁆𑀣𑀸 ‘‘𑀦 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀮𑁄𑀮𑁄, 𑀧𑀼𑀩𑁆𑀩𑁂𑀧𑀺 𑀮𑁄𑀮𑁄𑀬𑁂𑀯, 𑀮𑁄𑀮𑀢𑀸𑀬𑁂𑀯 𑀘 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀢𑀁 𑀦𑀺𑀲𑁆𑀲𑀸𑀬 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀧𑀭𑀺𑀩𑀸𑀳𑀺𑀭𑀸 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀫𑀳𑀸𑀦𑀲𑁂 𑀪𑀢𑁆𑀢𑀓𑀸𑀭𑀓𑁄 𑀧𑀼𑀜𑁆𑀜𑀢𑁆𑀣𑀸𑀬 𑀦𑀻𑀴𑀧𑀘𑁆𑀙𑀺𑀁 𑀞𑀧𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑁄 𑀮𑁄𑀮𑀓𑀸𑀓𑁄 𑀫𑀳𑀸𑀦𑀲𑀫𑀢𑁆𑀣𑀓𑁂𑀦 𑀕𑀘𑁆𑀙𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀁 𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀁 𑀤𑀺𑀲𑁆𑀯𑀸 𑀧𑀺𑀧𑀸𑀲𑀸𑀪𑀺𑀪𑀽𑀢𑁄 ‘‘𑀓𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀲𑀓𑁆𑀓𑀸 𑀪𑀯𑁂𑀬𑁆𑀬𑀁 𑀑𑀓𑀸𑀲𑀁 ¶ 𑀮𑀤𑁆𑀥𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀦𑀺𑀲𑁆𑀲𑀸𑀬 𑀲𑀓𑁆𑀓𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀕𑁄𑀘𑀭𑀸𑀬 𑀅𑀭𑀜𑁆𑀜𑀕𑀫𑀦𑀓𑀸𑀮𑁂 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀬𑀁 𑀔𑁄, 𑀓𑀸𑀓, 𑀅𑀜𑁆𑀜𑀕𑁄𑀘𑀭𑀸, 𑀢𑁆𑀯𑀫𑁆𑀧𑀺 𑀅𑀜𑁆𑀜𑀕𑁄𑀘𑀭𑁄, 𑀓𑀺𑀁 𑀦𑀼 𑀔𑁄 𑀫𑀁 𑀅𑀦𑀼𑀩𑀦𑁆𑀥𑀲𑀻’’𑀢𑀺 𑀆𑀳. ‘‘𑀢𑀼𑀫𑁆𑀳𑀸𑀓𑀁, 𑀲𑀸𑀫𑀺, 𑀓𑀺𑀭𑀺𑀬𑀸 𑀫𑀬𑁆𑀳𑀁 𑀭𑀼𑀘𑁆𑀘𑀢𑀺, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑀫𑀸𑀦𑀕𑁄𑀘𑀭𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑁂 𑀉𑀧𑀝𑁆𑀞𑀸𑀢𑀼𑀁 ¶ 𑀇𑀘𑁆𑀙𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀕𑁄𑀘𑀭𑀪𑀽𑀫𑀺𑀬𑀁 𑀏𑀓𑀕𑁄𑀘𑀭𑀁 𑀘𑀭𑀦𑁆𑀢𑁄 𑀯𑀺𑀬 𑀑𑀲𑀓𑁆𑀓𑀺𑀢𑁆𑀯𑀸 𑀕𑁄𑀫𑀬𑀭𑀸𑀲𑀺𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀸𑀡𑀓𑁂 𑀔𑀸𑀤𑀺𑀢𑁆𑀯𑀸 𑀓𑀼𑀘𑁆𑀙𑀺𑀧𑀽𑀭𑀁 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀏𑀢𑁆𑀢𑀓𑀁 𑀓𑀸𑀮𑀁 𑀘𑀭𑀣𑁂𑀯, 𑀦𑀦𑀼 𑀪𑁄𑀚𑀦𑁂 𑀦𑀸𑀫 𑀧𑀫𑀸𑀡𑀁 𑀜𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀣 𑀦𑀸𑀢𑀺𑀲𑀸𑀬𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀪𑀢𑁆𑀢𑀓𑀸𑀭𑀓𑁄 ‘‘𑀅𑀫𑁆𑀳𑀸𑀓𑀁 𑀧𑀸𑀭𑀸𑀯𑀢𑁄 𑀲𑀳𑀸𑀬𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀓𑀸𑀓𑀲𑁆𑀲𑀸𑀧𑀺 𑀏𑀓𑀁 𑀣𑀼𑀲𑀧𑀘𑁆𑀙𑀺𑀁 𑀞𑀧𑁂𑀲𑀺. 𑀓𑀸𑀓𑁄𑀧𑀺 𑀘𑀢𑀽𑀳𑀧𑀜𑁆𑀘𑀸𑀳𑀁 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀯𑀲𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀲𑁂𑀝𑁆𑀞𑀺𑀦𑁄 𑀩𑀳𑀼𑀫𑀘𑁆𑀙𑀫𑀁𑀲𑀁 𑀆𑀳𑀭𑀺𑀬𑀺𑀢𑁆𑀣, 𑀓𑀸𑀓𑁄 𑀢𑀁 𑀤𑀺𑀲𑁆𑀯𑀸 𑀮𑁄𑀪𑀸𑀪𑀺𑀪𑀽𑀢𑁄 𑀧𑀘𑁆𑀘𑀽𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀢𑁆𑀣𑀼𑀦𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀧𑀼𑀦𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀏𑀳𑀺, 𑀲𑀫𑁆𑀫, 𑀕𑁄𑀘𑀭𑀸𑀬 𑀧𑀓𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀫𑀬𑁆𑀳𑀁 𑀅𑀚𑀺𑀡𑁆𑀡𑀸𑀲𑀗𑁆𑀓𑀸 𑀅𑀢𑁆𑀣𑀻’’𑀢𑀺. ‘‘𑀲𑀫𑁆𑀫, 𑀓𑀸𑀓𑀸𑀦𑀁 𑀅𑀚𑀻𑀭𑀓𑁄 𑀦𑀸𑀫 𑀦𑀢𑁆𑀣𑀺, 𑀤𑀻𑀧𑀯𑀝𑁆𑀝𑀺𑀫𑀢𑁆𑀢𑀫𑁂𑀯 𑀳𑀺 𑀢𑀼𑀫𑁆𑀳𑀸𑀓𑀁 𑀓𑀼𑀘𑁆𑀙𑀺𑀬𑀁 𑀣𑁄𑀓𑀁 𑀢𑀺𑀝𑁆𑀞𑀢𑀺, 𑀲𑁂𑀲𑀁 𑀅𑀚𑁆𑀛𑁄𑀳𑀝𑀫𑀢𑁆𑀢𑀫𑁂𑀯 𑀚𑀻𑀭𑀢𑀺, 𑀫𑀫 𑀯𑀘𑀦𑀁 𑀓𑀭𑁄𑀳𑀺, 𑀫𑀸 𑀏𑀢𑀁 ¶ 𑀫𑀘𑁆𑀙𑀫𑀁𑀲𑀁 𑀤𑀺𑀲𑁆𑀯𑀸 𑀏𑀯𑀫𑀓𑀸𑀲𑀻’’𑀢𑀺. ‘‘𑀲𑀸𑀫𑀺, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀣, 𑀅𑀚𑀺𑀡𑁆𑀡𑀸𑀲𑀗𑁆𑀓𑀸𑀯 𑀫𑀬𑁆𑀳’’𑀦𑁆𑀢𑀺. ‘‘𑀢𑁂𑀦 𑀳𑀺 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀧𑀓𑁆𑀓𑀸𑀫𑀺.

𑀪𑀢𑁆𑀢𑀓𑀸𑀭𑀓𑁄𑀧𑀺 𑀦𑀸𑀦𑀸𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀬𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀭𑀻𑀭𑀢𑁄 𑀲𑁂𑀤𑀁 𑀅𑀧𑀦𑁂𑀦𑁆𑀢𑁄 𑀫𑀳𑀸𑀦𑀲𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀓𑀸𑀓𑁄 ‘‘𑀅𑀬𑀁 𑀇𑀤𑀸𑀦𑀺 𑀓𑀸𑀮𑁄 𑀫𑀁𑀲𑀁 𑀔𑀸𑀤𑀺𑀢𑀼’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀭𑀲𑀓𑀭𑁄𑀝𑀺𑀫𑀢𑁆𑀣𑀓𑁂 𑀦𑀺𑀲𑀻𑀤𑀺. 𑀪𑀢𑁆𑀢𑀓𑀸𑀭𑀓𑁄 ‘‘𑀓𑀺𑀭𑀻’’𑀢𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀸𑀓𑀁 𑀤𑀺𑀲𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀮𑁄𑀫𑀁 𑀮𑀼𑀜𑁆𑀘𑀺𑀢𑁆𑀯𑀸 𑀫𑀢𑁆𑀣𑀓𑁂 𑀘𑀽𑀴𑀁 𑀞𑀧𑁂𑀢𑁆𑀯𑀸 𑀲𑀺𑀗𑁆𑀕𑀻𑀯𑁂𑀭𑀫𑀭𑀺𑀘𑀸𑀤𑀻𑀦𑀺 𑀧𑀺𑀲𑀺𑀢𑁆𑀯𑀸 𑀢𑀓𑁆𑀓𑁂𑀦 𑀆𑀮𑁄𑀴𑁂𑀢𑁆𑀯𑀸 ‘‘𑀢𑁆𑀯𑀁 𑀅𑀫𑁆𑀳𑀸𑀓𑀁 𑀲𑁂𑀝𑁆𑀞𑀺𑀦𑁄 𑀫𑀘𑁆𑀙𑀫𑀁𑀲𑀁 𑀉𑀘𑁆𑀙𑀺𑀝𑁆𑀞𑀓𑀁 𑀓𑀭𑁄𑀲𑀻’’𑀢𑀺 𑀲𑀓𑀮𑀲𑀭𑀻𑀭𑀫𑀲𑁆𑀲 𑀫𑀓𑁆𑀔𑁂𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀦𑀻𑀴𑀧𑀘𑁆𑀙𑀺𑀬𑀁 𑀧𑀸𑀢𑁂𑀲𑀺, 𑀩𑀮𑀯𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀕𑁄𑀘𑀭𑀪𑀽𑀫𑀺𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀦𑀺𑀢𑁆𑀣𑀼𑀦𑀦𑁆𑀢𑀁 𑀤𑀺𑀲𑁆𑀯𑀸 𑀤𑀯𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁦.

‘‘𑀓𑀸𑀬𑀁 𑀩𑀮𑀸𑀓𑀸 𑀲𑀺𑀔𑀺𑀦𑀻, 𑀘𑁄𑀭𑀻 𑀮𑀗𑁆𑀖𑀺𑀧𑀺𑀢𑀸𑀫𑀳𑀸;

𑀑𑀭𑀁 𑀩𑀮𑀸𑀓𑁂 𑀆𑀕𑀘𑁆𑀙, 𑀘𑀡𑁆𑀟𑁄 𑀫𑁂 𑀯𑀸𑀬𑀲𑁄 𑀲𑀔𑀸’’𑀢𑀺.

𑀢𑀢𑁆𑀣 ¶ 𑀓𑀸𑀬𑀁 𑀩𑀮𑀸𑀓𑀸 𑀲𑀺𑀔𑀺𑀦𑀻𑀢𑀺 𑀢𑀁 𑀓𑀸𑀓𑀁 𑀢𑀲𑁆𑀲 𑀩𑀳𑀮𑀢𑀓𑁆𑀓𑁂𑀦 𑀫𑀓𑁆𑀔𑀺𑀢𑀲𑀭𑀻𑀭𑀲𑁂𑀢𑀯𑀡𑁆𑀡𑀢𑁆𑀢𑀸 𑀫𑀢𑁆𑀣𑀓𑁂 𑀘 𑀲𑀺𑀔𑀸𑀬 𑀞𑀧𑀺𑀢𑀢𑁆𑀢𑀸 ‘‘𑀓𑀸 𑀏𑀲𑀸 𑀩𑀮𑀸𑀓𑀸 𑀲𑀺𑀔𑀺𑀦𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀆𑀮𑀧𑀢𑀺. 𑀘𑁄𑀭𑀻𑀢𑀺 𑀓𑀼𑀮𑀲𑁆𑀲 𑀅𑀦𑀦𑀼𑀜𑁆𑀜𑀸𑀬 𑀓𑀼𑀮𑀖𑀭𑀁, 𑀓𑀸𑀓𑀲𑁆𑀲 𑀯𑀸 𑀅𑀭𑀼𑀘𑀺𑀬𑀸 𑀧𑀘𑁆𑀙𑀺𑀁 𑀧𑀯𑀺𑀝𑁆𑀞𑀢𑁆𑀢𑀸 ‘‘𑀘𑁄𑀭𑀻’’𑀢𑀺 𑀯𑀤𑀢𑀺. 𑀮𑀗𑁆𑀖𑀺𑀧𑀺𑀢𑀸𑀫𑀳𑀸𑀢𑀺 𑀮𑀗𑁆𑀖𑀻 𑀯𑀼𑀘𑁆𑀘𑀢𑀺 𑀆𑀓𑀸𑀲𑁂 𑀮𑀗𑁆𑀖𑀦𑀢𑁄 𑀫𑁂𑀖𑁄, 𑀩𑀮𑀸𑀓𑀸 𑀘 𑀦𑀸𑀫 𑀫𑁂𑀖𑀲𑀤𑁆𑀤𑁂𑀦 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻𑀢𑀺 𑀫𑁂𑀖𑀲𑀤𑁆𑀤𑁄 𑀩𑀮𑀸𑀓𑀸𑀦𑀁 𑀧𑀺𑀢𑀸, 𑀫𑁂𑀖𑁄 𑀧𑀺𑀢𑀸𑀫𑀳𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀮𑀗𑁆𑀖𑀺𑀧𑀺𑀢𑀸𑀫𑀳𑀸’’𑀢𑀺. 𑀑𑀭𑀁 𑀩𑀮𑀸𑀓𑁂 𑀆𑀕𑀘𑁆𑀙𑀸𑀢𑀺, 𑀅𑀫𑁆𑀪𑁄 𑀩𑀮𑀸𑀓𑁂, 𑀇𑀢𑁄 𑀏𑀳𑀺. 𑀘𑀡𑁆𑀟𑁄 𑀫𑁂 𑀯𑀸 𑀬𑀲𑁄 𑀲𑀔𑀸𑀢𑀺 𑀫𑀬𑁆𑀳𑀁 𑀲𑀔𑀸 𑀧𑀘𑁆𑀙𑀺𑀲𑀸𑀫𑀺𑀓𑁄 𑀯𑀸𑀬𑀲𑁄 𑀘𑀡𑁆𑀟𑁄 𑀨𑀭𑀼𑀲𑁄 ¶ , 𑀲𑁄 𑀆𑀕𑀢𑁄 𑀢𑀁 𑀤𑀺𑀲𑁆𑀯𑀸 𑀓𑀡𑀬𑀲𑀤𑀺𑀲𑁂𑀦 𑀢𑀼𑀡𑁆𑀟𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀬𑁆𑀬, 𑀢𑀲𑁆𑀫𑀸 𑀬𑀸𑀯 𑀯𑀸𑀬𑀲𑁄 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀧𑀘𑁆𑀙𑀺𑀢𑁄 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀏𑀳𑀺, 𑀲𑀻𑀖𑀁 𑀧𑀮𑀸𑀬𑀲𑁆𑀲𑀽𑀢𑀺 𑀯𑀤𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀸𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁧.

‘‘𑀦𑀸𑀳𑀁 ¶ 𑀩𑀮𑀸𑀓𑀸 𑀲𑀺𑀔𑀺𑀦𑀻, 𑀅𑀳𑀁 𑀮𑁄𑀮𑁄𑀲𑁆𑀫𑀺 𑀯𑀸𑀬𑀲𑁄;

𑀅𑀓𑀢𑁆𑀯𑀸 𑀯𑀘𑀦𑀁 𑀢𑀼𑀬𑁆𑀳𑀁, 𑀧𑀲𑁆𑀲 𑀮𑀽𑀦𑁄𑀲𑁆𑀫𑀺 𑀆𑀕𑀢𑁄’’𑀢𑀺.

𑀢𑀢𑁆𑀣 𑀆𑀕𑀢𑁄𑀢𑀺 𑀢𑁆𑀯𑀁 𑀇𑀤𑀸𑀦𑀺 𑀕𑁄𑀘𑀭𑀪𑀽𑀫𑀺𑀢𑁄 𑀆𑀕𑀢𑁄, 𑀫𑀁 𑀮𑀽𑀦𑀁 𑀧𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁨.

‘‘𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫, 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁;

𑀦 𑀳𑀺 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀲𑀼𑀪𑀼𑀜𑁆𑀚𑀸 𑀳𑁄𑀦𑁆𑀢𑀺 𑀧𑀓𑁆𑀔𑀺𑀦𑀸’’𑀢𑀺.

𑀢𑀢𑁆𑀣 𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫𑀸𑀢𑀺 𑀲𑀫𑁆𑀫 𑀯𑀸𑀬𑀲, 𑀧𑀼𑀦𑀧𑀺 𑀢𑁆𑀯𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀧𑀝𑀺𑀮𑀪𑀺𑀲𑁆𑀲𑀲𑁂𑀯, 𑀦𑀢𑁆𑀣𑀺 𑀢𑁂 𑀏𑀢𑁆𑀢𑀓𑁂𑀦 𑀫𑁄𑀓𑁆𑀔𑁄. 𑀓𑀺𑀁𑀓𑀸𑀭𑀡𑀸? 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁 𑀧𑀸𑀧𑀓𑀁, 𑀬𑀲𑁆𑀫𑀸 𑀢𑀯 𑀆𑀘𑀸𑀭𑀲𑀻𑀮𑀁 𑀢𑀸𑀤𑀺𑀲𑀁 𑀤𑀼𑀓𑁆𑀔𑀸𑀥𑀺𑀕𑀫𑀲𑁆𑀲𑁂𑀯 𑀅𑀦𑀼𑀭𑀽𑀧𑀁. 𑀦 𑀳𑀺 𑀫𑀸𑀦𑀼𑀲𑀓𑀸𑀢𑀺 𑀫𑀦𑀼𑀲𑁆𑀲𑀸 𑀦𑀸𑀫 𑀫𑀳𑀸𑀧𑀼𑀜𑁆𑀜𑀸, 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀢𑀣𑀸𑀭𑀽𑀧𑀁 𑀧𑀼𑀜𑁆𑀜𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀫𑀸𑀦𑀼𑀲𑀓𑀸 𑀪𑁄𑀕𑀸 𑀢𑀺𑀭𑀘𑁆𑀙𑀸𑀦𑀕𑀢𑁂𑀦 𑀧𑀓𑁆𑀔𑀺𑀦𑀸 𑀦 𑀪𑀼𑀜𑁆𑀚𑀻𑀬𑀦𑁆𑀢𑀻𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀫𑀬𑀸 𑀏𑀢𑁆𑀣 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺. 𑀓𑀸𑀓𑁄𑀧𑀺 𑀦𑀺𑀢𑁆𑀣𑀼𑀦𑀦𑁆𑀢𑁄 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀮𑁄𑀮𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀮𑁄𑀮𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀸𑀭𑀸𑀯𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀮𑁄𑀮𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁭𑁫] 𑁫. 𑀭𑀼𑀘𑀺𑀭𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀬𑀁 ¶ 𑀩𑀮𑀸𑀓𑀸 𑀭𑀼𑀘𑀺𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀧𑀼𑀭𑀺𑀫𑀲𑀤𑀺𑀲𑀸𑀦𑁂𑀯 𑀕𑀸𑀣𑀸𑀧𑀺.

𑁭𑁩.

‘‘𑀓𑀸𑀬𑀁 ¶ 𑀩𑀮𑀸𑀓𑀸 𑀭𑀼𑀘𑀺𑀭𑀸, 𑀓𑀸𑀓𑀦𑀻𑀴𑀲𑁆𑀫𑀺𑀫𑀘𑁆𑀙𑀢𑀺;

𑀘𑀡𑁆𑀟𑁄 𑀓𑀸𑀓𑁄 𑀲𑀔𑀸 𑀫𑀬𑁆𑀳𑀁, 𑀬𑀲𑁆𑀲 𑀘𑁂𑀢𑀁 𑀓𑀼𑀮𑀸𑀯𑀓𑀁.

𑁭𑁪.

‘‘𑀦𑀦𑀼 𑀫𑀁 𑀲𑀫𑁆𑀫 𑀚𑀸𑀦𑀸𑀲𑀺, 𑀤𑀺𑀚 𑀲𑀸𑀫𑀸𑀓𑀪𑁄𑀚𑀦;

𑀅𑀓𑀢𑁆𑀯𑀸 𑀯𑀘𑀦𑀁 𑀢𑀼𑀬𑁆𑀳𑀁, 𑀧𑀲𑁆𑀲 𑀮𑀽𑀦𑁄𑀲𑁆𑀫𑀺 𑀆𑀕𑀢𑁄.

𑁭𑁫.

‘‘𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫, 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁;

𑀦 𑀳𑀺 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀲𑀼𑀪𑀼𑀜𑁆𑀚𑀸 𑀳𑁄𑀦𑁆𑀢𑀺 𑀧𑀓𑁆𑀔𑀺𑀦𑀸’’𑀢𑀺. 𑁋

𑀕𑀸𑀣𑀸 𑀳𑀺 𑀏𑀓𑀦𑁆𑀢𑀭𑀺𑀓𑀸𑀬𑁂𑀯.

𑀢𑀢𑁆𑀣 ‘‘𑀭𑀼𑀘𑀺𑀭𑀸’’𑀢𑀺 𑀢𑀓𑁆𑀓𑀫𑀓𑁆𑀔𑀺𑀢𑀲𑀭𑀻𑀭𑀢𑀸𑀬 𑀲𑁂𑀢𑀯𑀡𑁆𑀡𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀭𑀼𑀘𑀺𑀭𑀸 𑀧𑀺𑀬𑀤𑀲𑁆𑀲𑀦𑀸, 𑀧𑀡𑁆𑀟𑀭𑀸𑀢𑀺 𑀅𑀢𑁆𑀣𑁄. 𑀓𑀸𑀓𑀦𑀻𑀴𑀲𑁆𑀫𑀺𑀦𑁆𑀢𑀺 𑀓𑀸𑀓𑀓𑀼𑀮𑀸𑀯𑀓𑁂. ‘‘𑀓𑀸𑀓𑀦𑀺𑀟𑁆𑀠𑀲𑁆𑀫𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀤𑀺𑀚𑀸𑀢𑀺 𑀓𑀸𑀓𑁄 𑀧𑀸𑀭𑁂𑀯𑀢𑀁 𑀆𑀮𑀧𑀢𑀺. 𑀲𑀸𑀫𑀸𑀓𑀪𑁄𑀚𑀦𑀸𑀢𑀺 𑀢𑀺𑀡𑀩𑀻𑀚𑀪𑁄𑀚𑀦. 𑀲𑀸𑀫𑀸𑀓𑀕𑁆𑀕𑀳𑀡𑁂𑀦 𑀳𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀢𑀺𑀡𑀩𑀻𑀚𑀁 𑀕𑀳𑀺𑀢𑀁. 𑀇𑀥𑀸𑀧𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀇𑀤𑀸𑀦𑀺 𑀲𑀓𑁆𑀓𑀸 𑀇𑀢𑁄 𑀧𑀝𑁆𑀞𑀸𑀬 𑀫𑀬𑀸 𑀏𑀢𑁆𑀣 𑀯𑀲𑀺𑀢𑀼’’𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀮𑁄𑀮𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀮𑁄𑀮𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀸𑀭𑀸𑀯𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀼𑀘𑀺𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁭𑁬] 𑁬. 𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀢𑀯 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀳𑀁𑀲𑀖𑀸𑀢𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 ¶ 𑀤𑁆𑀯𑁂 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀬𑁂𑀪𑀼𑀬𑁆𑀬𑁂𑀦 𑀏𑀓𑀢𑁄 𑀯𑀺𑀘𑀭𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀯𑀸𑀮𑀼𑀓𑀧𑀼𑀮𑀺𑀦𑁂 𑀆𑀢𑀧𑀁 𑀢𑀧𑁆𑀧𑀫𑀸𑀦𑀸 𑀲𑀸𑀭𑀡𑀻𑀬𑀓𑀣𑀁 𑀓𑀣𑁂𑀦𑁆𑀢𑀸 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀺𑀁 𑀔𑀡𑁂 𑀤𑁆𑀯𑁂 𑀳𑀁𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑁄 𑀤𑀳𑀭𑀪𑀺𑀓𑁆𑀔𑀼 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀲𑁆𑀲 𑀳𑀁𑀲𑀧𑁄𑀢𑀓𑀲𑁆𑀲 𑀅𑀓𑁆𑀔𑀺𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳, 𑀇𑀢𑀭𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 ¶ 𑀆𑀳. ‘‘𑀢𑀺𑀝𑁆𑀞𑀢𑀼 𑀇𑀫𑀲𑁆𑀫𑀺𑀁 𑀧𑀲𑁆𑀲𑁂 𑀅𑀓𑁆𑀔𑀺, 𑀧𑀭𑀧𑀲𑁆𑀲𑁂 𑀅𑀓𑁆𑀔𑀺𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀇𑀤𑀫𑁆𑀧𑀺 𑀦 𑀲𑀓𑁆𑀔𑀺𑀲𑁆𑀲𑀲𑀺𑀬𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀉𑀧𑀥𑀸𑀭𑁂𑀳𑀻’’𑀢𑀺 𑀢𑀺𑀬𑀁𑀲𑀁 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀳𑀁𑀲𑀲𑁆𑀲 𑀧𑀘𑁆𑀙𑀸𑀪𑀸𑀕𑁂 𑀔𑀺𑀧𑀺. 𑀳𑀁𑀲𑁄 𑀲𑀓𑁆𑀔𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀅𑀣 𑀦𑀁 𑀇𑀢𑀭𑁄 𑀯𑀝𑁆𑀝𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀧𑀭𑀧𑀲𑁆𑀲𑁂 𑀅𑀓𑁆𑀔𑀺𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀑𑀭𑀺𑀫𑀓𑁆𑀔𑀺𑀦𑀸 𑀦𑀺𑀓𑁆𑀔𑀫𑀸𑀧𑁂𑀲𑀺. 𑀳𑀁𑀲𑁄 𑀯𑀺𑀭𑀯𑀦𑁆𑀢𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑁂𑀲𑀁 𑀧𑀸𑀤𑀫𑀽𑀮𑁂𑀬𑁂𑀯 𑀧𑀢𑀺. 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀆𑀯𑀼𑀲𑁄, 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑁄 𑀓𑀢𑀁 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑁂 𑀆𑀤𑀸𑀬 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁, 𑀓𑀺𑀭 𑀢𑀬𑀸 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑁄 𑀓𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼, 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀫𑀓𑀸𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀅𑀕𑀸𑀭𑀫𑀚𑁆𑀛𑁂 𑀲𑀁𑀓𑀺𑀮𑀺𑀝𑁆𑀞𑀯𑀸𑀲𑀁 𑀯𑀲𑀫𑀸𑀦𑀸 𑀅𑀧𑁆𑀧𑀫𑀢𑁆𑀢𑀓𑁂𑀲𑀼𑀧𑀺 𑀞𑀸𑀦𑁂𑀲𑀼 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑀺𑀁𑀲𑀼, 𑀢𑁆𑀯𑀁 𑀧𑀦 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺, 𑀦𑀦𑀼 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀥𑀦𑀜𑁆𑀘𑀬𑁂 𑀓𑁄𑀭𑀩𑁆𑀬𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀭𑀸 𑀑𑀧𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑀺𑀢𑁄 𑀅𑀧𑀭𑀪𑀸𑀕𑁂 ¶ 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀦𑁆𑀢𑁄 𑀓𑀼𑀭𑀼𑀥𑀫𑁆𑀫𑁂 𑀯𑀢𑁆𑀢𑀺𑀢𑁆𑀣. 𑀓𑀼𑀭𑀼𑀥𑀫𑁆𑀫𑁄 𑀦𑀸𑀫 𑀧𑀜𑁆𑀘 𑀲𑀻𑀮𑀸𑀦𑀺, 𑀢𑀸𑀦𑀺 𑀩𑁄𑀥𑀺𑀲𑀢𑁆𑀢𑁄 𑀧𑀭𑀺𑀲𑀼𑀤𑁆𑀥𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀺. 𑀬𑀣𑀸 𑀘 𑀩𑁄𑀥𑀺𑀲𑀢𑁆𑀢𑁄, 𑀏𑀯𑀫𑀲𑁆𑀲 𑀫𑀸𑀢𑀸 𑀅𑀕𑁆𑀕𑀫𑀳𑁂𑀲𑀻 𑀓𑀦𑀺𑀝𑁆𑀞𑀪𑀸𑀢𑀸 𑀉𑀧𑀭𑀸𑀚𑀸 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀚𑁆𑀚𑀼𑀕𑀸𑀳𑀓𑁄 𑀅𑀫𑀘𑁆𑀘𑁄 𑀲𑀸𑀭𑀣𑀺 𑀲𑁂𑀝𑁆𑀞𑀺 𑀤𑁄𑀡𑀫𑀸𑀧𑀓𑁄 𑀫𑀳𑀸𑀫𑀢𑁆𑀢𑁄 𑀤𑁄𑀯𑀸𑀭𑀺𑀓𑁄 𑀦𑀕𑀭𑀲𑁄𑀪𑀺𑀦𑀻 𑀯𑀡𑁆𑀡𑀤𑀸𑀲𑀻𑀢𑀺 𑀏𑀯𑀫𑁂𑀢𑁂.

‘‘𑀭𑀸𑀚𑀸 𑀫𑀸𑀢𑀸 𑀫𑀳𑁂𑀲𑀻 𑀘, 𑀉𑀧𑀭𑀸𑀚𑀸 𑀧𑀼𑀭𑁄𑀳𑀺𑀢𑁄;

𑀭𑀚𑁆𑀚𑀼𑀓𑁄 𑀲𑀸𑀭𑀣𑀺 𑀲𑁂𑀝𑁆𑀞𑀺, 𑀤𑁄𑀡𑁄 𑀤𑁄𑀯𑀸𑀭𑀺𑀓𑁄 𑀢𑀣𑀸;

𑀕𑀡𑀺𑀓𑁂𑀓𑀸𑀤𑀲 𑀚𑀦𑀸, 𑀓𑀼𑀭𑀼𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺.

𑀇𑀢𑀺 𑀇𑀫𑁂 𑀲𑀩𑁆𑀩𑁂𑀧𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀓𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼. 𑀭𑀸𑀚𑀸 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀘 𑀦𑀕𑀭𑀫𑀚𑁆𑀛𑁂 𑀘 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀘𑀸𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀲 𑀧𑀦 𑀤𑀸𑀦𑀚𑁆𑀛𑀸𑀲𑀬𑀢𑀸 𑀤𑀸𑀦𑀸𑀪𑀺𑀭𑀢𑀢𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀚𑁆𑀛𑁄𑀢𑁆𑀣𑀭𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀓𑀸𑀮𑀺𑀗𑁆𑀕𑀭𑀝𑁆𑀞𑁂 𑀤𑀦𑁆𑀢𑀧𑀼𑀭𑀦𑀕𑀭𑁂 𑀓𑀸𑀮𑀺𑀗𑁆𑀕𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀭𑀝𑁆𑀞𑁂 𑀤𑁂𑀯𑁄 𑀦 𑀯𑀲𑁆𑀲𑀺, 𑀢𑀲𑁆𑀫𑀺𑀁 𑀅𑀯𑀲𑁆𑀲𑀦𑁆𑀢𑁂 𑀲𑀓𑀮𑀭𑀝𑁆𑀞𑁂 ¶ 𑀙𑀸𑀢𑀓𑀁 𑀚𑀸𑀢𑀁, 𑀆𑀳𑀸𑀭𑀯𑀺𑀧𑀢𑁆𑀢𑀺𑀬𑀸 𑀘 𑀫𑀦𑀼𑀲𑁆𑀲𑀸𑀦𑀁 𑀭𑁄𑀕𑁄 𑀉𑀤𑀧𑀸𑀤𑀺, 𑀤𑀼𑀩𑁆𑀩𑀼𑀝𑁆𑀞𑀺𑀪𑀬𑀁 𑀙𑀸𑀢𑀓𑀪𑀬𑀁 𑀭𑁄𑀕𑀪𑀬𑀦𑁆𑀢𑀺 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀦𑀺𑀕𑁆𑀕𑀳𑀡𑀸 𑀤𑀸𑀭𑀓𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺.

𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀦𑁆𑀢𑀧𑀼𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀉𑀓𑁆𑀓𑀼𑀝𑁆𑀞𑀺𑀫𑀓𑀁𑀲𑀼. 𑀭𑀸𑀚𑀸 𑀯𑀸𑀢𑀧𑀸𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀸 𑀏𑀢𑁂 𑀯𑀺𑀭𑀯𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚 ¶ , 𑀲𑀓𑀮𑀭𑀝𑁆𑀞𑁂 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀤𑁂𑀯𑁄 𑀦 𑀯𑀲𑁆𑀲𑀢𑀺, 𑀲𑀲𑁆𑀲𑀸𑀦𑀺 𑀦 𑀯𑀺𑀧𑀦𑁆𑀦𑀸𑀦𑀺, 𑀙𑀸𑀢𑀓𑀁 𑀚𑀸𑀢𑀁. 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑁄𑀚𑀦𑀸 𑀭𑁄𑀕𑀸𑀪𑀺𑀪𑀽𑀢𑀸 𑀦𑀺𑀕𑁆𑀕𑀳𑀡𑀸 𑀧𑀼𑀢𑁆𑀢𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀤𑁂𑀯𑀁 𑀯𑀲𑁆𑀲𑀸𑀧𑁂𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀓𑀺𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀧𑁄𑀭𑀸𑀡𑀓𑀭𑀸𑀚𑀸𑀦𑁄, 𑀫𑀳𑀸𑀭𑀸𑀚, 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀤𑀸𑀦𑀁 𑀤𑀢𑁆𑀯𑀸 ¶ 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀲𑀫𑀸𑀤𑀺𑀦𑁆𑀦𑀲𑀻𑀮𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀦𑁆𑀣𑀭𑁂 𑀲𑀢𑁆𑀢𑀸𑀳𑀁 𑀦𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀤𑁂𑀯𑁄 𑀦 𑀯𑀲𑁆𑀲𑀺.

𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀅𑀳𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀓𑀸𑀲𑀺𑀁, 𑀤𑁂𑀯𑁄 𑀦 𑀯𑀲𑁆𑀲𑀢𑀺, 𑀓𑀺𑀦𑁆𑀢𑀺 𑀓𑀭𑁄𑀫𑀸’’𑀢𑀺? ‘‘𑀫𑀳𑀸𑀭𑀸𑀚, 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀥𑀦𑀜𑁆𑀘𑀬𑀲𑁆𑀲 𑀓𑁄𑀭𑀩𑁆𑀬𑀭𑀜𑁆𑀜𑁄 𑀅𑀜𑁆𑀚𑀦𑀯𑀡𑁆𑀡𑁄 𑀦𑀸𑀫 𑀫𑀗𑁆𑀕𑀮𑀳𑀢𑁆𑀣𑀻 𑀅𑀢𑁆𑀣𑀺, 𑀢𑀁 𑀆𑀦𑁂𑀲𑁆𑀲𑀸𑀫, 𑀏𑀯𑀁 𑀲𑀦𑁆𑀢𑁂 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺. ‘‘𑀲𑁄 𑀭𑀸𑀚𑀸 𑀩𑀮𑀯𑀸𑀳𑀦𑀲𑀫𑁆𑀧𑀦𑁆𑀦𑁄 𑀤𑀼𑀧𑁆𑀧𑀲𑀳𑁄, 𑀓𑀣𑀫𑀲𑁆𑀲 𑀳𑀢𑁆𑀣𑀺𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺? ‘‘𑀫𑀳𑀸𑀭𑀸𑀚, 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀤𑀸𑀦𑀚𑁆𑀛𑀸𑀲𑀬𑁄 𑀭𑀸𑀚𑀸 𑀤𑀸𑀦𑀸𑀪𑀺𑀭𑀢𑁄 𑀬𑀸𑀘𑀺𑀢𑁄 𑀲𑀫𑀸𑀦𑁄 𑀅𑀮𑀗𑁆𑀓𑀢𑀲𑀻𑀲𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀲𑀸𑀤𑀲𑀫𑁆𑀧𑀦𑁆𑀦𑀸𑀦𑀺 𑀅𑀓𑁆𑀔𑀻𑀦𑀺𑀧𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀲𑀓𑀮𑀭𑀚𑁆𑀚𑀫𑁆𑀧𑀺 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀤𑁂𑀬𑁆𑀬, 𑀳𑀢𑁆𑀣𑀺𑀫𑁆𑀳𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀅𑀯𑀲𑁆𑀲𑀁 𑀬𑀸𑀘𑀺𑀢𑁄 𑀤𑀲𑁆𑀲𑀢𑀻’’𑀢𑀺. ‘‘𑀓𑁂 𑀧𑀦 𑀢𑀁 𑀬𑀸𑀘𑀺𑀢𑀼𑀁 𑀲𑀫𑀢𑁆𑀣𑀸’’𑀢𑀺? ‘‘𑀩𑁆𑀭𑀸𑀳𑁆𑀫𑀡𑀸, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀕𑀸𑀫𑀢𑁄 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀳𑀢𑁆𑀣𑀺𑀁 𑀬𑀸𑀘𑀦𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀢𑁂 𑀧𑀭𑀺𑀩𑁆𑀩𑀬𑀁 𑀆𑀤𑀸𑀬 𑀅𑀤𑁆𑀥𑀺𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀢𑀼𑀭𑀺𑀢𑀕𑀫𑀦𑀁 𑀕𑀦𑁆𑀢𑁆𑀯𑀸 𑀓𑀢𑀺𑀧𑀸𑀳𑀁 𑀦𑀕𑀭𑀤𑁆𑀯𑀸𑀭𑁂 𑀤𑀸𑀦𑀲𑀸𑀮𑀸𑀲𑀼 𑀪𑀼𑀜𑁆𑀚𑀺𑀢𑁆𑀯𑀸 𑀲𑀭𑀻𑀭𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 ‘‘𑀓𑀤𑀸 𑀭𑀸𑀚𑀸 𑀤𑀸𑀦𑀕𑁆𑀕𑀁 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀦𑀼𑀲𑁆𑀲𑀸 ‘‘𑀧𑀓𑁆𑀔𑀲𑁆𑀲 𑀢𑀬𑁄 𑀤𑀺𑀯𑀲𑁂 ¶ 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀜𑁆𑀘 𑀆𑀕𑀘𑁆𑀙𑀢𑀺, 𑀲𑁆𑀯𑁂 𑀧𑀦 𑀧𑀼𑀡𑁆𑀡𑀫𑀻, 𑀢𑀲𑁆𑀫𑀸 𑀲𑁆𑀯𑁂 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀯𑀤𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀸𑀢𑁄𑀯 𑀦𑁆𑀳𑀢𑁆𑀯𑀸 𑀕𑀢𑁆𑀢𑀸𑀦𑀼𑀮𑀺𑀢𑁆𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀤𑀸𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀲𑀢𑁆𑀢𑀝𑁆𑀞𑀚𑀦𑀸𑀦𑀁 𑀲𑀳𑀢𑁆𑀣𑀸 𑀪𑀢𑁆𑀢𑀁 𑀤𑀢𑁆𑀯𑀸 ‘‘𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 ¶ 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀆𑀭𑀓𑁆𑀔𑀲𑁆𑀲 𑀩𑀮𑀯𑀢𑀸𑀬 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀫𑁂𑀯 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀑𑀮𑁄𑀓𑀬𑀫𑀸𑀦𑀸 𑀤𑁆𑀯𑀸𑀭𑀢𑁄 𑀦𑀸𑀢𑀺𑀤𑀽𑀭𑁂 𑀉𑀦𑁆𑀦𑀢𑀝𑁆𑀞𑀸𑀦𑁂 𑀞𑀺𑀢𑀸 𑀲𑀫𑁆𑀧𑀢𑁆𑀢𑀁 𑀭𑀸𑀚𑀸𑀦𑀁 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀚𑀬𑀢𑀼 𑀪𑀯𑀁, 𑀫𑀳𑀸𑀭𑀸𑀚𑀸’’𑀢𑀺 𑀚𑀬𑀸𑀧𑁂𑀲𑀼𑀁. 𑀭𑀸𑀚𑀸 𑀯𑀚𑀺𑀭𑀗𑁆𑀓𑀼𑀲𑁂𑀦 𑀯𑀸𑀭𑀡𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 ¶ 𑀕𑀦𑁆𑀢𑁆𑀯𑀸 ‘‘𑀪𑁄 𑀩𑁆𑀭𑀸𑀳𑁆𑀫𑀡𑀸, 𑀓𑀺𑀁 𑀇𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀯𑀡𑁆𑀡𑁂𑀦𑁆𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁭𑁬.

‘‘𑀢𑀯 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀯𑀺𑀤𑀺𑀢𑁆𑀯𑀸𑀦 𑀚𑀦𑀸𑀥𑀺𑀧;

𑀯𑀡𑁆𑀡𑀁 𑀅𑀜𑁆𑀚𑀦𑀯𑀡𑁆𑀡𑁂𑀦, 𑀓𑀸𑀮𑀺𑀗𑁆𑀕𑀲𑁆𑀫𑀺𑀁 𑀦𑀺𑀫𑀺𑀫𑁆𑀳𑀲𑁂’’𑀢𑀺.

𑀢𑀢𑁆𑀣 𑀲𑀤𑁆𑀥𑀦𑁆𑀢𑀺 𑀓𑀫𑁆𑀫𑀨𑀮𑀸𑀦𑀁 𑀲𑀤𑁆𑀤𑀳𑀦𑀯𑀲𑁂𑀦 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀁. 𑀲𑀻𑀮𑀦𑁆𑀢𑀺 𑀲𑀁𑀯𑀭𑀲𑀻𑀮𑀁 𑀅𑀯𑀻𑀢𑀺𑀓𑁆𑀓𑀫𑀲𑀻𑀮𑀁. 𑀯𑀡𑁆𑀡𑀦𑁆𑀢𑀺 𑀢𑀤𑀸 𑀢𑀲𑁆𑀫𑀺𑀁 𑀤𑁂𑀲𑁂 𑀲𑀼𑀯𑀡𑁆𑀡𑀁 𑀯𑀼𑀘𑁆𑀘𑀢𑀺, 𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢𑀁. 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀲𑀩𑁆𑀩𑀫𑁆𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀥𑀦𑀥𑀜𑁆𑀜𑀁 𑀲𑀗𑁆𑀕𑀳𑀺𑀢𑀁. 𑀅𑀜𑁆𑀚𑀦𑀯𑀡𑁆𑀡𑁂𑀦𑀸𑀢𑀺 𑀅𑀜𑁆𑀚𑀦𑀧𑀼𑀜𑁆𑀚𑀲𑀫𑀸𑀦𑀯𑀡𑁆𑀡𑁂𑀦 𑀇𑀫𑀺𑀦𑀸 𑀢𑀯 𑀦𑀸𑀕𑁂𑀦, 𑀓𑀸𑀮𑀺𑀗𑁆𑀕𑀲𑁆𑀫𑀺𑀦𑁆𑀢𑀺 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀲𑀦𑁆𑀢𑀺𑀓𑁂. 𑀦𑀺𑀫𑀺𑀫𑁆𑀳𑀲𑁂𑀢𑀺 𑀯𑀺𑀦𑀺𑀫𑀬𑀯𑀲𑁂𑀦 𑀕𑀡𑁆𑀳𑀺𑀫𑁆𑀳, 𑀧𑀭𑀺𑀪𑁄𑀕𑀯𑀲𑁂𑀦 𑀯𑀸 𑀉𑀤𑀭𑁂 𑀧𑀓𑁆𑀔𑀺𑀧𑀺𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀲𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀬𑀜𑁆𑀳𑀺, 𑀚𑀦𑀸𑀥𑀺𑀧, 𑀢𑀯 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘 𑀯𑀺𑀤𑀺𑀢𑁆𑀯𑀸𑀦 ‘‘𑀅𑀤𑁆𑀥𑀸 𑀦𑁄 𑀏𑀯𑀁 𑀲𑀤𑁆𑀥𑀸𑀲𑀻𑀮𑀲𑀫𑁆𑀧𑀦𑁆𑀦𑁄 ¶ 𑀭𑀸𑀚𑀸 𑀬𑀸𑀘𑀺𑀢𑁄 𑀅𑀜𑁆𑀚𑀦𑀯𑀡𑁆𑀡𑀁 𑀦𑀸𑀕𑀁 𑀤𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀬 𑀅𑀜𑁆𑀚𑀦𑀯𑀡𑁆𑀡𑁂𑀦 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀦𑀸𑀕𑀁 𑀯𑁄 𑀆𑀳𑀭𑀺𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀩𑀳𑀼𑀥𑀦𑀥𑀜𑁆𑀜𑀁 𑀦𑀺𑀫𑀺𑀫𑁆𑀳𑀲𑁂 𑀧𑀭𑀺𑀯𑀢𑁆𑀢𑀬𑀺𑀫𑁆𑀳 𑀘𑁂𑀯 𑀉𑀤𑀭𑁂 𑀘 𑀧𑀓𑁆𑀔𑀺𑀧𑀺𑀫𑁆𑀳. 𑀏𑀯𑀁 𑀢𑀁 𑀫𑀬𑀁 𑀥𑀸𑀭𑀬𑀫𑀸𑀦𑀸 𑀇𑀥𑀸𑀕𑀢𑀸. 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁 𑀤𑁂𑀯𑁄 𑀚𑀸𑀦𑀸𑀢𑀽𑀢𑀺.

𑀅𑀧𑀭𑁄 𑀦𑀬𑁄 𑁋 𑀢𑀯 𑀲𑀤𑁆𑀥𑀜𑁆𑀘 𑀲𑀻𑀮𑀕𑀼𑀡𑀲𑀗𑁆𑀔𑀸𑀢𑀁 𑀯𑀡𑁆𑀡𑀜𑁆𑀘 𑀲𑀼𑀢𑁆𑀯𑀸 ‘‘𑀉𑀴𑀸𑀭𑀕𑀼𑀡𑁄 𑀭𑀸𑀚𑀸 𑀚𑀻𑀯𑀺𑀢𑀫𑁆𑀧𑀺 𑀬𑀸𑀘𑀺𑀢𑁄 𑀤𑀤𑁂𑀬𑁆𑀬, 𑀧𑀕𑁂𑀯 𑀢𑀺𑀭𑀘𑁆𑀙𑀸𑀦𑀕𑀢𑀁 𑀦𑀸𑀕’’𑀦𑁆𑀢𑀺 𑀏𑀯𑀁 𑀓𑀸𑀮𑀺𑀗𑁆𑀕𑀲𑁆𑀲 𑀲𑀦𑁆𑀢𑀺𑀓𑁂 𑀇𑀫𑀺𑀦𑀸 𑀅𑀜𑁆𑀚𑀦𑀯𑀡𑁆𑀡𑁂𑀦 𑀢𑀯 𑀯𑀡𑁆𑀡𑀁 𑀦𑀺𑀫𑀺𑀫𑁆𑀳𑀲𑁂 𑀦𑀺𑀫𑀺𑀫𑁆𑀳 𑀢𑀼𑀮𑀬𑀺𑀫𑁆𑀳, 𑀢𑁂𑀦𑀫𑁆𑀳𑀸 𑀇𑀥𑀸𑀕𑀢𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀘𑁂, 𑀯𑁄 𑀩𑁆𑀭𑀸𑀳𑁆𑀫𑀡𑀸, 𑀇𑀫𑀁 𑀦𑀸𑀕𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀥𑀦𑀁 𑀔𑀸𑀤𑀺𑀢𑀁 𑀲𑀼𑀔𑀸𑀤𑀺𑀢𑀁 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀬𑀣𑀸𑀮𑀗𑁆𑀓𑀢𑀫𑁂𑀯 𑀯𑁄 𑀦𑀸𑀕𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁭𑁭.

‘‘𑀅𑀦𑁆𑀦𑀪𑀘𑁆𑀘𑀸 𑀘𑀪𑀘𑁆𑀘𑀸 𑀘, 𑀬𑁄𑀥 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀢𑀺;

𑀲𑀩𑁆𑀩𑁂 𑀢𑁂 𑀅𑀧𑁆𑀧𑀝𑀺𑀓𑁆𑀔𑀺𑀧𑁆𑀧𑀸, 𑀧𑀼𑀩𑁆𑀩𑀸𑀘𑀭𑀺𑀬𑀯𑀘𑁄 𑀇𑀤𑀁.

𑁭𑁮.

‘‘𑀤𑀤𑀸𑀫𑀺 ¶ ¶ 𑀯𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀕𑀫𑁂𑀢𑀁, 𑀭𑀸𑀚𑀸𑀭𑀳𑀁 𑀭𑀸𑀚𑀪𑁄𑀕𑁆𑀕𑀁 𑀬𑀲𑀲𑁆𑀲𑀺𑀦𑀁;

𑀅𑀮𑀗𑁆𑀓𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀁, 𑀲𑀲𑀸𑀭𑀣𑀺𑀁 𑀕𑀘𑁆𑀙𑀣 𑀬𑁂𑀦𑀓𑀸𑀫’’𑀦𑁆𑀢𑀺.

𑀢𑀢𑁆𑀣 𑀅𑀦𑁆𑀦𑀪𑀘𑁆𑀘𑀸 𑀘𑀪𑀘𑁆𑀘𑀸 𑀘𑀸𑀢𑀺 𑀧𑀼𑀭𑀺𑀲𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀫𑀸𑀦𑀸 𑀬𑀸𑀕𑀼𑀪𑀢𑁆𑀢𑀸𑀤𑀺𑀦𑀸 𑀅𑀦𑁆𑀦𑁂𑀦 𑀪𑀭𑀺𑀢𑀩𑁆𑀩𑀸𑀢𑀺 𑀅𑀦𑁆𑀦𑀪𑀘𑁆𑀘𑀸, 𑀇𑀢𑀭𑁂 𑀢𑀣𑀸 𑀅𑀪𑀭𑀺𑀢𑀩𑁆𑀩𑀢𑁆𑀢𑀸 𑀅𑀪𑀘𑁆𑀘𑀸. 𑀲𑀦𑁆𑀥𑀺𑀯𑀲𑁂𑀦 𑀧𑀦𑁂𑀢𑁆𑀣 𑀅𑀓𑀸𑀭𑀮𑁄𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀸𑀦𑀁 𑀉𑀧𑀦𑀺𑀲𑁆𑀲𑀸𑀬 𑀘 𑀅𑀦𑀼𑀧𑀦𑀺𑀲𑁆𑀲𑀸𑀬 𑀘 𑀚𑀻𑀯𑀫𑀸𑀦𑀯𑀲𑁂𑀦 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀬𑁄𑀥 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀢𑀻𑀢𑀺 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀇𑀥 𑀚𑀻𑀯𑀮𑁄𑀓𑁂 𑀬𑁄 𑀲𑀢𑁆𑀢𑁄 𑀬𑀁 𑀧𑀼𑀭𑀺𑀲𑀁 𑀓𑀸𑀬𑀘𑀺𑀤𑁂𑀯 𑀧𑀘𑁆𑀘𑀸𑀲𑀻𑀲𑀦𑀸𑀬 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀢𑀺. 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀝𑀺𑀓𑁆𑀔𑀺𑀧𑁆𑀧𑀸𑀢𑀺 𑀢𑀣𑀸 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑀸 𑀲𑀘𑁂𑀧𑀺 𑀩𑀳𑀽 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀢𑁂𑀦 𑀧𑀼𑀭𑀺𑀲𑁂𑀦 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀝𑀺𑀓𑁆𑀔𑀺𑀧𑁆𑀧𑀸, ‘‘𑀅𑀧𑁂𑀣, 𑀦 𑀯𑁄 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀘𑀭𑀺𑀬𑀯𑀘𑁄 𑀇𑀤𑀦𑁆𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀇𑀤𑀁 𑀢𑁂𑀲𑀁 𑀯𑀘𑀦𑀁. 𑀏𑀯𑀫𑀳𑀁 𑀫𑀸𑀢𑀸𑀧𑀺𑀢𑀽𑀳𑀺 𑀲𑀺𑀓𑁆𑀔𑀸𑀧𑀺𑀢𑁄𑀢𑀺 𑀤𑀻𑀧𑁂𑀢𑀺.

𑀤𑀤𑀸𑀫𑀺 𑀯𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀕𑀫𑁂𑀢𑀦𑁆𑀢𑀺 𑀬𑀲𑁆𑀫𑀸 ¶ 𑀇𑀤𑀁 𑀅𑀫𑁆𑀳𑀸𑀓𑀁 𑀧𑀼𑀩𑁆𑀩𑀸𑀘𑀭𑀺𑀬𑀯𑀘𑁄, 𑀢𑀲𑁆𑀫𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀢𑀼𑀫𑁆𑀳𑀸𑀓𑀁 𑀇𑀫𑀁 𑀦𑀸𑀕𑀁 𑀤𑀤𑀸𑀫𑀺. 𑀭𑀸𑀚𑀸𑀭𑀳𑀦𑁆𑀢𑀺 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑀁. 𑀭𑀸𑀚𑀪𑁄𑀕𑁆𑀕𑀦𑁆𑀢𑀺 𑀭𑀸𑀚𑀧𑀭𑀺𑀪𑁄𑀕𑀁. 𑀬𑀲𑀲𑁆𑀲𑀺𑀦𑀦𑁆𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀁, 𑀢𑀁 𑀓𑀺𑀭 𑀳𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀳𑀢𑁆𑀣𑀺𑀕𑁄𑀧𑀓𑀳𑀢𑁆𑀣𑀺𑀯𑁂𑀚𑁆𑀚𑀸𑀤𑀻𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀚𑀻𑀯𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀜𑁆𑀜𑁂𑀯 𑀯𑁄 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀮𑀗𑁆𑀓𑀢𑀦𑁆𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀳𑀢𑁆𑀣𑀺𑀅𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀁. 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀦𑁆𑀢𑀺 𑀲𑀼𑀯𑀡𑁆𑀡𑀚𑀸𑀮𑁂𑀦 𑀅𑀪𑀺𑀘𑁆𑀙𑀦𑁆𑀦𑀁. 𑀲𑀲𑀸𑀭𑀣𑀺𑀦𑁆𑀢𑀺 𑀬𑁄 𑀧𑀦𑀲𑁆𑀲 𑀲𑀸𑀭𑀣𑀺 𑀳𑀢𑁆𑀣𑀺𑀕𑁄𑀧𑀓𑁄 𑀆𑀘𑀭𑀺𑀬𑁄, 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀤𑀤𑀸𑀫𑀺, 𑀢𑀲𑁆𑀫𑀸 𑀲𑀲𑀸𑀭𑀣𑀺 𑀳𑀼𑀢𑁆𑀯𑀸 𑀢𑀼𑀫𑁆𑀳𑁂 𑀲𑀧𑀭𑀺𑀯𑀸𑀭𑀁 𑀇𑀫𑀁 𑀦𑀸𑀕𑀁 𑀕𑀳𑁂𑀢𑁆𑀯𑀸 𑀬𑁂𑀦𑀓𑀸𑀫𑀁 𑀕𑀘𑁆𑀙𑀣𑀸𑀢𑀺.

𑀏𑀯𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄𑀯 𑀫𑀳𑀸𑀲𑀢𑁆𑀢𑁄 𑀯𑀸𑀘𑀸𑀬 𑀤𑀢𑁆𑀯𑀸 𑀧𑀼𑀦 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀑𑀭𑀼𑀬𑁆𑀳 ‘‘𑀲𑀘𑁂 𑀅𑀦𑀮𑀗𑁆𑀓𑀢𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀉𑀧𑀥𑀸𑀭𑁂𑀢𑁆𑀯𑀸 𑀅𑀦𑀮𑀗𑁆𑀓𑀢𑀝𑁆𑀞𑀸𑀦𑀁 𑀅𑀤𑀺𑀲𑁆𑀯𑀸 𑀢𑀲𑁆𑀲 𑀲𑁄𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀳𑀢𑁆𑀣𑁂𑀲𑀼 𑀞𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑁂𑀦 𑀧𑀼𑀧𑁆𑀨𑀕𑀦𑁆𑀥𑀯𑀸𑀲𑀺𑀢𑀁 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀲𑀧𑀭𑀺𑀯𑀸𑀭𑀁 𑀦𑀸𑀕𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ¶ 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀸 𑀤𑀦𑁆𑀢𑀧𑀼𑀭𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀁 𑀭𑀜𑁆𑀜𑁄 𑀅𑀤𑀁𑀲𑀼, 𑀳𑀢𑁆𑀣𑀺𑀫𑁆𑀳𑀺 𑀆𑀕𑀢𑁂𑀧𑀺 𑀤𑁂𑀯𑁄 𑀦 𑀯𑀲𑁆𑀲𑀢𑁂𑀯. 𑀭𑀸𑀚𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀉𑀢𑁆𑀢𑀭𑀺𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀭𑀸𑀚𑀸 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀢𑀺, 𑀢𑁂𑀦𑀲𑁆𑀲 𑀭𑀝𑁆𑀞𑁂 𑀅𑀦𑁆𑀯𑀟𑁆𑀠𑀫𑀸𑀲𑀁 𑀅𑀦𑀼𑀤𑀲𑀸𑀳𑀁 𑀤𑁂𑀯𑁄 𑀯𑀲𑁆𑀲𑀢𑀺, 𑀭𑀜𑁆𑀜𑁄 𑀕𑀼𑀡𑀸𑀦𑀼𑀪𑀸𑀯𑁄 𑀘𑁂𑀲, 𑀇𑀫𑀲𑁆𑀲 𑀧𑀦 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀕𑀼𑀡𑀸 𑀳𑁄𑀦𑁆𑀢𑀸𑀧𑀺 𑀓𑀺𑀢𑁆𑀢𑀓𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀬𑀣𑀸𑀮𑀗𑁆𑀓𑀢𑀫𑁂𑀯 𑀲𑀧𑀭𑀺𑀯𑀸𑀭𑀁 𑀳𑀢𑁆𑀣𑀺𑀁 𑀧𑀢𑀺𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀢𑁆𑀯𑀸 𑀬𑀁 𑀲𑁄 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀢𑀺, 𑀢𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑁆𑀯𑀸 𑀆𑀦𑁂𑀣𑀸’’𑀢𑀺 ¶ 𑀩𑁆𑀭𑀸𑀳𑁆𑀫𑀡𑁂 𑀘 𑀅𑀫𑀘𑁆𑀘𑁂 𑀘 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀳𑀢𑁆𑀣𑀺𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 ‘‘𑀤𑁂𑀯, 𑀇𑀫𑀲𑁆𑀫𑀺𑀁 𑀳𑀢𑁆𑀣𑀺𑀫𑁆𑀳𑀺 𑀕𑀢𑁂𑀧𑀺 𑀅𑀫𑁆𑀳𑀸𑀓𑀁 𑀭𑀝𑁆𑀞𑁂 ¶ 𑀤𑁂𑀯𑁄 𑀦 𑀯𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀓𑀺𑀭 𑀓𑀼𑀭𑀼𑀥𑀫𑁆𑀫𑀁 𑀦𑀸𑀫 𑀭𑀓𑁆𑀔𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀭𑀸𑀚𑀸 𑀢𑀁 𑀭𑀓𑁆𑀔𑀺𑀢𑀼𑀓𑀸𑀫𑁄 𑀇𑀫𑀲𑁆𑀫𑀺𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑁆𑀯𑀸 𑀆𑀦𑁂𑀣𑀸’’𑀢𑀺 𑀧𑁂𑀲𑁂𑀲𑀺. ‘‘𑀤𑁂𑀣 𑀦𑁄 𑀓𑀼𑀭𑀼𑀥𑀫𑁆𑀫’’𑀦𑁆𑀢𑀺. ‘‘𑀢𑀸𑀢𑀸, 𑀲𑀘𑁆𑀘𑀸𑀳𑀁 𑀏𑀢𑀁 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀇𑀤𑀸𑀦𑀺 𑀧𑀦 𑀫𑁂 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀦 𑀫𑁂 𑀲𑁄 𑀓𑀼𑀭𑀼𑀥𑀫𑁆𑀫𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺.

𑀓𑀲𑁆𑀫𑀸 𑀧𑀦 𑀢𑀁 𑀲𑀻𑀮𑀁 𑀭𑀸𑀚𑀸𑀦𑀁 𑀦 𑀆𑀭𑀸𑀥𑁂𑀢𑀻𑀢𑀺? 𑀢𑀤𑀸 𑀓𑀺𑀭 𑀭𑀸𑀚𑀽𑀦𑀁 𑀢𑀢𑀺𑀬𑁂 𑀢𑀢𑀺𑀬𑁂 𑀲𑀁𑀯𑀘𑁆𑀙𑀭𑁂 𑀓𑀢𑁆𑀢𑀺𑀓𑀫𑀸𑀲𑁂 𑀧𑀯𑀢𑁆𑀢𑁄 𑀙𑀡𑁄 𑀦𑀸𑀫 𑀳𑁄𑀢𑀺, 𑀢𑀁 𑀙𑀡𑀁 𑀓𑀻𑀴𑀦𑁆𑀢𑀸 𑀭𑀸𑀚𑀸𑀦𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀤𑁂𑀯𑀯𑁂𑀲𑀁 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀭𑀸𑀚𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀧𑀼𑀧𑁆𑀨𑀧𑀝𑀺𑀫𑀡𑁆𑀟𑀺𑀢𑁂 𑀘𑀺𑀢𑁆𑀢𑀲𑀭𑁂 𑀔𑀺𑀧𑀦𑁆𑀢𑀺. 𑀅𑀬𑀫𑁆𑀧𑀺 𑀭𑀸𑀚𑀸 𑀢𑀁 𑀔𑀡𑀁 𑀓𑀻𑀴𑀦𑁆𑀢𑁄 𑀏𑀓𑀺𑀲𑁆𑀲𑀸 𑀢𑀴𑀸𑀓𑀧𑀸𑀴𑀺𑀬𑀸 𑀘𑀺𑀢𑁆𑀢𑀭𑀸𑀚𑀲𑁆𑀲 𑀬𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀘𑀺𑀢𑁆𑀢𑀲𑀭𑁂 𑀔𑀺𑀧𑀺𑀢𑁆𑀯𑀸 𑀢𑁂𑀲𑀼 𑀲𑁂𑀲𑀤𑀺𑀲𑀸𑀕𑀢𑁂 𑀢𑀬𑁄 𑀲𑀭𑁂 𑀤𑀺𑀲𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀔𑀺𑀢𑁆𑀢𑀲𑀭𑀁 𑀦 𑀅𑀤𑁆𑀤𑀲. 𑀭𑀜𑁆𑀜𑁄 ‘‘𑀓𑀘𑁆𑀘𑀺 𑀦𑀼 𑀔𑁄 𑀫𑀬𑀸 𑀔𑀺𑀢𑁆𑀢𑁄 𑀲𑀭𑁄 𑀫𑀘𑁆𑀙𑀲𑀭𑀻𑀭𑁂 𑀧𑀢𑀺𑀢𑁄’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑁂𑀦 𑀲𑀻𑀮𑀪𑁂𑀤𑀁 𑀆𑀭𑀩𑁆𑀪, 𑀢𑀲𑁆𑀫𑀸 𑀲𑀻𑀮𑀁 𑀦 𑀆𑀭𑀸𑀥𑁂𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀢𑀸𑀢𑀸, 𑀫𑀬𑁆𑀳𑀁 𑀓𑀼𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀫𑀸𑀢𑀸 𑀧𑀦 𑀫𑁂 𑀲𑀼𑀭𑀓𑁆𑀔𑀺𑀢𑀁 𑀭𑀓𑁆𑀔𑀢𑀺, 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺. ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 ‘𑀧𑀸𑀡𑀁 𑀯𑀥𑀺𑀲𑁆𑀲𑀸𑀫𑀻’𑀢𑀺 𑀘𑁂𑀢𑀦𑀸 𑀦𑀢𑁆𑀣𑀺, 𑀢𑀁 𑀯𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫 𑀦 𑀳𑁄𑀢𑀺, 𑀤𑁂𑀣 𑀦𑁄 𑀅𑀢𑁆𑀢𑀦𑀸 𑀭𑀓𑁆𑀔𑀺𑀢𑀁 𑀓𑀼𑀭𑀼𑀥𑀫𑁆𑀫’’𑀦𑁆𑀢𑀺. ‘‘𑀢𑁂𑀦 𑀳𑀺 𑀮𑀺𑀔𑀣𑀸’’𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀲𑀺 𑁋 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦𑀸𑀤𑀸𑀢𑀩𑁆𑀩𑀁 ¶ , 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀁, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀁 ¶ , 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀸𑀧𑁂𑀢𑁆𑀯𑀸 𑀘 𑀧𑀦 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀫𑀸𑀢𑀼 𑀫𑁂 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀆𑀳.

𑀤𑀽𑀢𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯𑀺, 𑀢𑀼𑀫𑁆𑀳𑁂 𑀓𑀺𑀭 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀣, 𑀢𑀁 𑀦𑁄 𑀤𑁂𑀣𑀸’’𑀢𑀺 𑀯𑀤𑀺𑀁𑀲𑀼. ‘‘𑀢𑀸𑀢𑀸, 𑀲𑀘𑁆𑀘𑀸𑀳𑀁 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀇𑀤𑀸𑀦𑀺 𑀧𑀦 𑀫𑁂 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁, 𑀦 𑀫𑁂 𑀲𑁄 𑀓𑀼𑀭𑀼𑀥𑀫𑁆𑀫𑁄 𑀆𑀭𑀸𑀥𑁂𑀢𑀺 𑀢𑁂𑀦 𑀯𑁄 𑀤𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺. 𑀢𑀲𑁆𑀲𑀸 𑀓𑀺𑀭 𑀤𑁆𑀯𑁂 𑀧𑀼𑀢𑁆𑀢𑀸 𑀚𑁂𑀝𑁆𑀞𑁄 𑀭𑀸𑀚𑀸, 𑀓𑀦𑀺𑀝𑁆𑀞𑁄 𑀉𑀧𑀭𑀸𑀚𑀸. 𑀅𑀣𑁂𑀓𑁄 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀘𑀦𑁆𑀤𑀦𑀲𑀸𑀭𑀁 𑀲𑀳𑀲𑁆𑀲𑀕𑁆𑀖𑀦𑀓𑀁 𑀓𑀜𑁆𑀘𑀦𑀫𑀸𑀮𑀁 𑀧𑁂𑀲𑁂𑀲𑀺. 𑀲𑁄 ‘‘𑀫𑀸𑀢𑀭𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀲𑀩𑁆𑀩𑀁 𑀫𑀸𑀢𑀼 𑀧𑁂𑀲𑁂𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀦𑁂𑀯 𑀘𑀦𑁆𑀤𑀦𑀁 𑀯𑀺𑀮𑀺𑀫𑁆𑀧𑀸𑀫𑀺, 𑀦 𑀫𑀸𑀮𑀁 𑀥𑀸𑀭𑁂𑀫𑀺, 𑀲𑀼𑀡𑀺𑀲𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀚𑁂𑀝𑁆𑀞𑀲𑀼𑀡𑀺𑀲𑀸 𑀫𑁂 𑀇𑀲𑁆𑀲𑀭𑀸, 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀲𑁆𑀲𑀸 𑀲𑀼𑀯𑀡𑁆𑀡𑀫𑀸𑀮𑀁 𑀤𑀲𑁆𑀲𑀸𑀫𑀺. 𑀓𑀦𑀺𑀝𑁆𑀞𑀲𑀼𑀡𑀺𑀲𑀸 𑀧𑀦 𑀤𑀼𑀕𑁆𑀕𑀢𑀸, 𑀢𑀲𑁆𑀲𑀸 𑀘𑀦𑁆𑀤𑀦𑀲𑀸𑀭𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑀸 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀲𑀼𑀯𑀡𑁆𑀡𑀫𑀸𑀮𑀁 𑀤𑀢𑁆𑀯𑀸 𑀉𑀧𑀭𑀸𑀚𑀪𑀭𑀺𑀬𑀸𑀬 𑀘𑀦𑁆𑀤𑀦𑀲𑀸𑀭𑀁 𑀅𑀤𑀸𑀲𑀺, 𑀤𑀢𑁆𑀯𑀸 𑀘 𑀧𑀦𑀲𑁆𑀲𑀸 ‘‘𑀅𑀳𑀁 ¶ 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀏𑀢𑀸𑀲𑀁 𑀤𑀼𑀕𑁆𑀕𑀢𑀸𑀤𑀼𑀕𑁆𑀕𑀢𑀪𑀸𑀯𑁄 𑀫𑀬𑁆𑀳𑀁 𑀅𑀧𑁆𑀧𑀫𑀸𑀡𑀁, 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀫𑁂𑀯 𑀧𑀦 𑀓𑀸𑀢𑀼𑀁 𑀫𑀬𑁆𑀳𑀁 𑀅𑀦𑀼𑀭𑀽𑀧𑀁, 𑀓𑀘𑁆𑀘𑀺 𑀦𑀼 𑀔𑁄 𑀫𑁂 𑀢𑀲𑁆𑀲 𑀅𑀓𑀢𑀢𑁆𑀢𑀸 𑀲𑀻𑀮𑀁 𑀪𑀺𑀦𑁆𑀦’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀣 𑀦𑀁 𑀤𑀽𑀢𑀸 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦𑀸𑀫 𑀬𑀣𑀸𑀭𑀼𑀘𑀺𑀬𑀸 𑀤𑀻𑀬𑀢𑀺, 𑀢𑀼𑀫𑁆𑀳𑁂 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀭𑀼𑀫𑀸𑀦𑀸 𑀓𑀺𑀁 𑀅𑀜𑁆𑀜𑀁 𑀧𑀸𑀧𑀁 𑀓𑀭𑀺𑀲𑁆𑀲𑀣, 𑀲𑀻𑀮𑀁 𑀦𑀸𑀫 𑀏𑀯𑀭𑀽𑀧𑁂𑀦 𑀦 ¶ 𑀪𑀺𑀚𑁆𑀚𑀢𑀺, 𑀤𑁂𑀣 𑀦𑁄 𑀓𑀼𑀭𑀼𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀢𑀸𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀲𑀼𑀡𑀺𑀲𑀸 𑀧𑀦 𑀫𑁂 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀅𑀕𑁆𑀕𑀫𑀳𑁂𑀲𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀼𑀭𑀼𑀥𑀫𑁆𑀫𑀁 𑀬𑀸𑀘𑀺𑀁𑀲𑀼. 𑀲𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀁 𑀲𑀻𑀮𑀁 𑀦𑀸𑀭𑀸𑀥𑁂𑀢𑀺, 𑀢𑁂𑀦 𑀯𑁄 𑀤𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀆𑀳. 𑀲𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑀸 𑀭𑀜𑁆𑀜𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀲𑁆𑀲 𑀧𑀘𑁆𑀙𑀢𑁄 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀁 𑀉𑀧𑀭𑀸𑀚𑀁 𑀤𑀺𑀲𑁆𑀯𑀸 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀭𑁂𑀬𑁆𑀬𑀁, 𑀪𑀸𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄 𑀫𑀁 𑀏𑀲 𑀲𑀗𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲𑀸 ‘‘𑀅𑀳𑀁 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀫𑀸𑀦𑀸 𑀲𑀲𑀸𑀫𑀺𑀓𑀸 𑀳𑀼𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀑𑀮𑁄𑀓𑁂𑀲𑀺𑀁, 𑀲𑀻𑀮𑁂𑀦 𑀫𑁂 𑀪𑀺𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 ¶ 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀣 𑀦𑀁 𑀤𑀽𑀢𑀸 ‘‘𑀅𑀢𑀺𑀘𑀸𑀭𑁄 𑀦𑀸𑀫 𑀅𑀬𑁆𑀬𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 ¶ 𑀦 𑀳𑁄𑀢𑀺, 𑀢𑀼𑀫𑁆𑀳𑁂 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀭𑀼𑀫𑀸𑀦𑀸 𑀯𑀻𑀢𑀺𑀓𑁆𑀓𑀫𑀁 𑀓𑀺𑀁𑀓𑀭𑀺𑀲𑁆𑀲𑀣, 𑀦 𑀏𑀢𑁆𑀢𑀓𑁂𑀦 𑀲𑀻𑀮𑀁 𑀪𑀺𑀚𑁆𑀚𑀢𑀺, 𑀤𑁂𑀣 𑀦𑁄 𑀓𑀼𑀭𑀼𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀢𑀸𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀉𑀧𑀭𑀸𑀚𑀸 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀉𑀧𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀼𑀭𑀼𑀥𑀫𑁆𑀫𑀁 𑀬𑀸𑀘𑀺𑀁𑀲𑀼. 𑀲𑁄 𑀧𑀦 𑀲𑀸𑀬𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀭𑀣𑁂𑀦𑁂𑀯 𑀭𑀸𑀚𑀗𑁆𑀕𑀡𑀁 𑀧𑀢𑁆𑀯𑀸 𑀲𑀘𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀭𑀲𑁆𑀫𑀺𑀬𑁄 𑀘 𑀧𑀢𑁄𑀤𑀜𑁆𑀘 𑀅𑀦𑁆𑀢𑁄𑀥𑀼𑀭𑁂 𑀙𑀟𑁆𑀟𑁂𑀢𑀺. 𑀢𑀸𑀬 𑀲𑀜𑁆𑀜𑀸𑀬 𑀚𑀦𑁄 𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀦𑀺𑀓𑁆𑀔𑀫𑀦𑀁 𑀑𑀮𑁄𑀓𑁂𑀦𑁆𑀢𑁄𑀯 𑀢𑀺𑀝𑁆𑀞𑀢𑀺. 𑀲𑀸𑀭𑀣𑀺𑀧𑀺 𑀭𑀣𑀁 𑀕𑁄𑀧𑀬𑀺𑀢𑁆𑀯𑀸 ¶ 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀢𑀁 𑀆𑀤𑀸𑀬 𑀭𑀸𑀚𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀺. 𑀲𑀘𑁂 𑀢𑀗𑁆𑀔𑀡𑀜𑁆𑀜𑁂𑀯 𑀦𑀺𑀓𑁆𑀔𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀭𑀲𑁆𑀫𑀺𑀬𑁄 𑀘 𑀧𑀢𑁄𑀤𑀜𑁆𑀘 𑀅𑀦𑁆𑀢𑁄𑀭𑀣𑁂𑀬𑁂𑀯 𑀞𑀧𑁂𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀫𑀳𑀸𑀚𑀦𑁄 𑀢𑀸𑀬 𑀲𑀜𑁆𑀜𑀸𑀬 ‘‘𑀇𑀤𑀸𑀦𑁂𑀯 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺 𑀭𑀸𑀚𑀤𑁆𑀯𑀸𑀭𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀏𑀯𑀁 𑀓𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺, 𑀧𑀯𑀺𑀝𑁆𑀞𑀫𑀢𑁆𑀢𑀲𑁆𑀲𑀬𑁂𑀯𑀲𑁆𑀲 𑀤𑁂𑀯𑁄 𑀧𑀸𑀯𑀲𑁆𑀲𑀺. 𑀭𑀸𑀚𑀸 ‘‘𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀦𑀺𑀓𑁆𑀔𑀦𑁆𑀢𑀼𑀁 𑀦𑀸𑀤𑀸𑀲𑀺, 𑀲𑁄 𑀢𑀢𑁆𑀣𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀺. 𑀫𑀳𑀸𑀚𑀦𑁄 ‘‘𑀇𑀤𑀸𑀦𑀺 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀢𑁂𑀫𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀉𑀧𑀭𑀸𑀚𑀸 𑀤𑀼𑀢𑀺𑀬𑀤𑀺𑀯𑀲𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀞𑀺𑀢𑀁 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀦𑁆𑀢𑁄 𑀏𑀢𑁆𑀢𑀓𑀁 𑀚𑀦𑀁 𑀓𑀺𑀮𑀫𑁂𑀲𑀺𑀁, 𑀲𑀻𑀮𑁂𑀦 𑀫𑁂 𑀪𑀺𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀢𑁂𑀦 𑀢𑁂𑀲𑀁 𑀤𑀽𑀢𑀸𑀦𑀁 ‘‘𑀲𑀘𑁆𑀘𑀸𑀳𑀁 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀇𑀤𑀸𑀦𑀺 𑀧𑀦 𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀢𑁂𑀦 𑀯𑁄 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀤𑀽𑀢𑀸 ‘‘𑀢𑀼𑀫𑁆𑀳𑀸𑀓𑀁, 𑀤𑁂𑀯, ‘𑀏𑀢𑁂 𑀓𑀺𑀮𑀫𑀦𑁆𑀢𑀽’𑀢𑀺 𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀅𑀘𑁂𑀢𑀦𑀓𑀁 𑀓𑀫𑁆𑀫𑀁 𑀦 𑀳𑁄𑀢𑀺, 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀓𑀣𑀁 𑀢𑀼𑀫𑁆𑀳𑀸𑀓𑀁 𑀯𑀻𑀢𑀺𑀓𑁆𑀓𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀧𑀼𑀭𑁄𑀳𑀺𑀢𑁄 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀧𑀼𑀭𑁄𑀳𑀺𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑁄𑀧𑀺 𑀏𑀓𑀤𑀺𑀯𑀲𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀏𑀓𑁂𑀦 𑀭𑀜𑁆𑀜𑀸 𑀢𑀲𑁆𑀲 𑀭𑀜𑁆𑀜𑁄 𑀧𑁂𑀲𑀺𑀢𑀁 𑀢𑀭𑀼𑀡𑀭𑀯𑀺𑀯𑀡𑁆𑀡𑀁 𑀭𑀣𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀲𑁆𑀯𑀸 ‘‘𑀓𑀲𑁆𑀲𑀸𑀬𑀁 𑀭𑀣𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀜𑁆𑀜𑁄 𑀆𑀪𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀅𑀳𑀁 ¶ 𑀫𑀳𑀮𑁆𑀮𑀓𑁄, 𑀲𑀘𑁂 𑀫𑁂 𑀭𑀸𑀚𑀸 𑀇𑀫𑀁 𑀭𑀣𑀁 𑀤𑀤𑁂𑀬𑁆𑀬, 𑀲𑀼𑀔𑀁 𑀇𑀫𑀁 𑀆𑀭𑀼𑀬𑁆𑀳 𑀯𑀺𑀘𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀢𑁄. 𑀢𑀲𑁆𑀲 𑀚𑀬𑀸𑀧𑁂𑀢𑁆𑀯𑀸 𑀞𑀺𑀢𑀓𑀸𑀮𑁂 𑀭𑀜𑁆𑀜𑁄 𑀭𑀣𑀁 ¶ 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀅𑀢𑀺 𑀯𑀺𑀬 𑀲𑀼𑀦𑁆𑀤𑀭𑁄 𑀅𑀬𑀁 𑀭𑀣𑁄, 𑀆𑀘𑀭𑀺𑀬𑀲𑁆𑀲 𑀦𑀁 𑀤𑁂𑀣𑀸’’𑀢𑀺 𑀆𑀳. 𑀧𑀼𑀭𑁄𑀳𑀺𑀢𑁄 𑀦 𑀇𑀘𑁆𑀙𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀦 𑀇𑀘𑁆𑀙𑀺𑀬𑁂𑀯. 𑀓𑀺𑀁𑀓𑀸𑀭𑀡𑀸? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀦𑁆𑀢𑁄𑀯 𑀧𑀭𑀲𑀦𑁆𑀢𑀓𑁂 𑀮𑁄𑀪𑀁 𑀅𑀓𑀸𑀲𑀺𑀁, 𑀪𑀺𑀦𑁆𑀦𑁂𑀦 𑀫𑁂 𑀲𑀻𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑀸𑀢𑀸, 𑀓𑀼𑀭𑀼𑀥𑀫𑁆𑀫𑁂 𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀦 𑀫𑀁 𑀲𑁄 𑀥𑀫𑁆𑀫𑁄 𑀆𑀭𑀸𑀥𑁂𑀢𑀺, 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀤𑀽𑀢𑀸 ‘‘𑀅𑀬𑁆𑀬, 𑀮𑁄𑀪𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀦 𑀲𑀻𑀮𑀁 𑀪𑀺𑀚𑁆𑀚𑀢𑀺, 𑀢𑀼𑀫𑁆𑀳𑁂 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀸 𑀓𑀺𑀁 𑀯𑀻𑀢𑀺𑀓𑁆𑀓𑀫𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀭𑀚𑁆𑀚𑀼𑀕𑀸𑀳𑀓𑁄 𑀅𑀫𑀘𑁆𑀘𑁄 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑁄𑀧𑀺 𑀏𑀓𑀤𑀺𑀯𑀲𑀁 𑀚𑀦𑀧𑀤𑁂 𑀔𑁂𑀢𑁆𑀢𑀁 𑀫𑀺𑀦𑀦𑁆𑀢𑁄 𑀭𑀚𑁆𑀚𑀼𑀁 𑀤𑀡𑁆𑀟𑀓𑁂 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀓𑁄𑀝𑀺𑀁 𑀔𑁂𑀢𑁆𑀢𑀲𑀸𑀫𑀺𑀓𑁂𑀦 𑀕𑀡𑁆𑀳𑀸𑀧𑁂𑀢𑁆𑀯𑀸 𑀏𑀓𑀁 𑀅𑀢𑁆𑀢𑀦𑀸 𑀅𑀕𑁆𑀕𑀳𑁂𑀲𑀺, 𑀢𑁂𑀦 𑀕𑀳𑀺𑀢𑀭𑀚𑁆𑀚𑀼𑀓𑁄𑀝𑀺𑀬𑀸 𑀩𑀤𑁆𑀥𑀤𑀡𑁆𑀟𑀓𑁄 𑀏𑀓𑀲𑁆𑀲 𑀓𑀓𑁆𑀓𑀝𑀓𑀲𑁆𑀲 𑀩𑀺𑀮𑀫𑀚𑁆𑀛𑀁 𑀧𑀸𑀧𑀼𑀡𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀤𑀡𑁆𑀟𑀓𑀁 𑀩𑀺𑀮𑁂 𑀑𑀢𑀸𑀭𑁂𑀲𑁆𑀲𑀸𑀫𑀺, 𑀅𑀦𑁆𑀢𑁄𑀩𑀺𑀮𑁂 𑀓𑀓𑁆𑀓𑀝𑀓𑁄 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀧𑀭𑀢𑁄 𑀓𑀭𑀺𑀲𑁆𑀲𑀸𑀫𑀺, 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀘𑁂 𑀑𑀭𑀢𑁄 𑀓𑀭𑀺𑀲𑁆𑀲𑀸𑀫𑀺, 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀲𑀦𑁆𑀢𑀓𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀩𑀺𑀮𑁂 𑀓𑀓𑁆𑀓𑀝𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀘𑁂 𑀪𑀯𑁂𑀬𑁆𑀬, 𑀧𑀜𑁆𑀜𑀸𑀬𑁂𑀬𑁆𑀬, 𑀏𑀢𑁆𑀣𑁂𑀯 𑀦𑀁 𑀑𑀢𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀩𑀺𑀮𑁂 𑀤𑀡𑁆𑀟𑀓𑀁 𑀑𑀢𑀸𑀭𑁂𑀲𑀺, 𑀓𑀓𑁆𑀓𑀝𑀓𑁄 ‘‘𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀤𑀡𑁆𑀟𑀓𑁄 𑀓𑀓𑁆𑀓𑀝𑀓𑀧𑀺𑀝𑁆𑀞𑁂 𑀑𑀢𑀺𑀡𑁆𑀡𑁄 𑀪𑀯𑀺𑀲𑁆𑀲𑀢𑀺, 𑀓𑀓𑁆𑀓𑀝𑀓𑁄 𑀫𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀢𑁂𑀦 𑀫𑁂 𑀲𑀻𑀮𑁂𑀦 𑀪𑀺𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 ¶ . 𑀲𑁄 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 ¶ 𑀓𑀸𑀭𑀡𑁂𑀦 𑀓𑀼𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀢𑁂𑀦 𑀯𑁄 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀤𑀽𑀢𑀸 ‘‘𑀢𑀼𑀫𑁆𑀳𑀸𑀓𑀁 ‘𑀓𑀓𑁆𑀓𑀝𑀓𑁄 𑀫𑀭𑀢𑀽’𑀢𑀺 𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀅𑀘𑁂𑀢𑀦𑀓𑀁 𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀢𑀼𑀫𑁆𑀳𑁂 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀸 𑀓𑀺𑀁 𑀯𑀻𑀢𑀺𑀓𑁆𑀓𑀫𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀏𑀯𑀁 ¶ 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀲𑀸𑀭𑀣𑀺 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀸𑀦𑀁 𑀭𑀣𑁂𑀦 𑀉𑀬𑁆𑀬𑀸𑀦𑀁 𑀦𑁂𑀲𑀺. 𑀭𑀸𑀚𑀸 𑀢𑀢𑁆𑀣 𑀤𑀺𑀯𑀸 𑀓𑀻𑀴𑀺𑀢𑁆𑀯𑀸 𑀲𑀸𑀬𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀳𑀺, 𑀢𑀲𑁆𑀲 𑀦𑀕𑀭𑀁 𑀅𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀫𑁂𑀖𑁄 𑀉𑀝𑁆𑀞𑀳𑀺. 𑀲𑀸𑀭𑀣𑀺 𑀭𑀜𑁆𑀜𑁄 𑀢𑁂𑀫𑀦𑀪𑀬𑁂𑀦 𑀲𑀺𑀦𑁆𑀥𑀯𑀸𑀦𑀁 𑀧𑀢𑁄𑀤𑀲𑀜𑁆𑀜𑀫𑀤𑀸𑀲𑀺. 𑀲𑀺𑀦𑁆𑀥𑀯𑀸 𑀚𑀯𑁂𑀦 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀢𑁂 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀸𑀧𑀺 𑀢𑀢𑁄 𑀆𑀕𑀘𑁆𑀙𑀦𑁆𑀢𑀸𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀚𑀯𑁂𑀦 𑀕𑀘𑁆𑀙𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀢𑁂𑀲𑀁 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑁆𑀲𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀦𑁄 𑀲𑀸𑀭𑀣𑀺 𑀢𑀤𑀸 𑀧𑀢𑁄𑀤𑀲𑀜𑁆𑀜𑀁 𑀅𑀤𑀸𑀲𑀻’’𑀢𑀺. 𑀲𑀸𑀭𑀣𑀺𑀲𑁆𑀲𑀧𑀺 𑀏𑀢𑀤𑀳𑁄𑀲𑀺 𑁋 ‘‘𑀭𑀜𑁆𑀜𑁄 𑀢𑁂𑀫𑀦𑁂 𑀯𑀸 𑀅𑀢𑁂𑀫𑀦𑁂 𑀯𑀸 𑀫𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀅𑀳𑀁 𑀧𑀦 𑀅𑀝𑁆𑀞𑀸𑀦𑁂 𑀲𑀼𑀲𑀺𑀓𑁆𑀔𑀺𑀢𑀲𑀺𑀦𑁆𑀥𑀯𑀸𑀦𑀁 𑀧𑀢𑁄𑀤𑀲𑀜𑁆𑀜𑀁 𑀅𑀤𑀸𑀲𑀺𑀁, 𑀢𑁂𑀦 𑀇𑀫𑁂 𑀇𑀤𑀸𑀦𑀺 𑀅𑀧𑀭𑀸𑀧𑀭𑀁 𑀚𑀯𑀦𑁆𑀢𑀸 𑀓𑀺𑀮𑀫𑀦𑁆𑀢𑀺, 𑀅𑀳𑀜𑁆𑀘 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀢𑁂𑀦 𑀫𑁂 𑀪𑀺𑀦𑁆𑀦𑁂𑀦 𑀲𑀻𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀓𑀼𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀢𑁂𑀦 𑀯𑁄 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀤𑀽𑀢𑀸 ‘‘𑀢𑀼𑀫𑁆𑀳𑀸𑀓𑀁 ‘𑀲𑀺𑀦𑁆𑀥𑀯𑀸 𑀓𑀺𑀮𑀫𑀦𑁆𑀢𑀽’𑀢𑀺 𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀅𑀘𑁂𑀢𑀦𑀓𑀁 𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺, 𑀏𑀢𑁆𑀢𑀓𑁂𑀦𑀧𑀺 𑀘 𑀢𑀼𑀫𑁆𑀳𑁂 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀸 𑀓𑀺𑀁 𑀯𑀻𑀢𑀺𑀓𑁆𑀓𑀫𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 ¶ 𑀮𑀺𑀔𑀺𑀁𑀲𑀼.

‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀲𑁂𑀝𑁆𑀞𑀺 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑁄𑀧𑀺 𑀏𑀓𑀤𑀺𑀯𑀲𑀁 𑀕𑀩𑁆𑀪𑀢𑁄 𑀦𑀺𑀓𑁆𑀔𑀦𑁆𑀢𑀲𑀸𑀮𑀺𑀲𑀻𑀲𑀁 𑀅𑀢𑁆𑀢𑀦𑁄 𑀲𑀸𑀮𑀺𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄 ‘‘𑀯𑀻𑀳𑀺𑀫𑀸𑀮𑀁 𑀩𑀦𑁆𑀥𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀲𑀸𑀮𑀺𑀲𑀻𑀲𑀫𑀼𑀝𑁆𑀞𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀣𑀽𑀡𑀸𑀬 𑀩𑀦𑁆𑀥𑀸𑀧𑁂𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀫𑁆𑀳𑀸 𑀓𑁂𑀤𑀸𑀭𑀸 𑀫𑀬𑀸 𑀭𑀜𑁆𑀜𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄, 𑀅𑀤𑀺𑀦𑁆𑀦𑀪𑀸𑀕𑀢𑁄𑀬𑁂𑀯 𑀫𑁂 𑀓𑁂𑀤𑀸𑀭𑀢𑁄 𑀲𑀸𑀮𑀺𑀲𑀻𑀲𑀫𑀼𑀝𑁆𑀞𑀺 𑀕𑀸𑀳𑀸𑀧𑀺𑀢𑁄, 𑀅𑀳𑀜𑁆𑀘 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀢𑁂𑀦 𑀫𑁂 𑀪𑀺𑀦𑁆𑀦𑁂𑀦 𑀲𑀻𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀓𑀸𑀭𑀡𑁂𑀦 𑀓𑀼𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀢𑁂𑀦 𑀯𑁄 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀤𑀽𑀢𑀸 ‘‘𑀢𑀼𑀫𑁆𑀳𑀸𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀢𑁂𑀦 𑀯𑀺𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁 𑀦𑀸𑀫 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀸 𑀢𑀼𑀫𑁆𑀳𑁂 𑀧𑀭𑀲𑀦𑁆𑀢𑀓𑀁 𑀦𑀸𑀫 ¶ 𑀓𑀺𑀁 𑀕𑀡𑁆𑀳𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀏𑀯𑀁 ¶ 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀤𑁄𑀡𑀫𑀸𑀧𑀓𑁄 𑀧𑀦 𑀫𑀳𑀸𑀫𑀢𑁆𑀢𑁄 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀓𑁄𑀝𑁆𑀞𑀸𑀕𑀸𑀭𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀭𑀸𑀚𑀪𑀸𑀕𑁂 𑀯𑀻𑀳𑀺𑀁 𑀫𑀺𑀦𑀸𑀧𑁂𑀦𑁆𑀢𑁄 𑀅𑀫𑀺𑀢𑀯𑀻𑀳𑀺𑀭𑀸𑀲𑀺𑀢𑁄 𑀯𑀻𑀳𑀺𑀁 𑀕𑀳𑁂𑀢𑁆𑀯𑀸 𑀮𑀓𑁆𑀔𑀁 𑀞𑀧𑁂𑀲𑀺, 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀯𑁄 𑀧𑀸𑀯𑀲𑁆𑀲𑀺. 𑀫𑀳𑀸𑀫𑀢𑁆𑀢𑁄 𑀮𑀓𑁆𑀔𑀸𑀦𑀺 𑀕𑀡𑁂𑀢𑁆𑀯𑀸 ‘‘𑀫𑀺𑀢𑀯𑀻𑀳𑀻 𑀏𑀢𑁆𑀢𑀓𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀮𑀓𑁆𑀔𑀯𑀻𑀳𑀺𑀁 𑀲𑀁𑀓𑀟𑁆𑀠𑀺𑀢𑁆𑀯𑀸 𑀫𑀺𑀢𑀭𑀸𑀲𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀫𑀬𑀸 𑀮𑀓𑁆𑀔𑀯𑀻𑀳𑀻 𑀫𑀺𑀢𑀯𑀻𑀳𑀺𑀭𑀸𑀲𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸, 𑀉𑀤𑀸𑀳𑀼 𑀅𑀫𑀺𑀢𑀭𑀸𑀲𑀺𑀫𑁆𑀳𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀫𑁂 ¶ 𑀫𑀺𑀢𑀯𑀻𑀳𑀺𑀭𑀸𑀲𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸 𑀅𑀓𑀸𑀭𑀡𑁂𑀦𑁂𑀯 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀯𑀟𑁆𑀠𑀺𑀢𑀁, 𑀕𑀳𑀧𑀢𑀺𑀓𑀸𑀦𑀁 𑀲𑀦𑁆𑀢𑀓𑀁 𑀦𑀸𑀲𑀺𑀢𑀁, 𑀅𑀳𑀜𑁆𑀘 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀢𑁂𑀦 𑀫𑁂 𑀪𑀺𑀦𑁆𑀦𑁂𑀦 𑀲𑀻𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀓𑀸𑀭𑀡𑁂𑀦 𑀓𑀼𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀢𑁆𑀣𑀺, 𑀢𑁂𑀦 𑀯𑁄 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀤𑀽𑀢𑀸 ‘‘𑀢𑀼𑀫𑁆𑀳𑀸𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀢𑁂𑀦 𑀯𑀺𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁 𑀦𑀸𑀫 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀢𑁆𑀢𑀓𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑀸 𑀓𑀺𑀁 𑀢𑀼𑀫𑁆𑀳𑁂 𑀧𑀭𑀲𑁆𑀲 𑀲𑀦𑁆𑀢𑀓𑀁 𑀕𑀡𑁆𑀳𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀤𑁄𑀯𑀸𑀭𑀺𑀓𑁄 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑁄𑀧𑀺 𑀏𑀓𑀤𑀺𑀯𑀲𑀁 𑀦𑀕𑀭𑀤𑁆𑀯𑀸𑀭𑀁 𑀧𑀺𑀥𑀸𑀦𑀯𑁂𑀮𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺. 𑀅𑀣𑁂𑀓𑁄 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑁄 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀤𑀸𑀭𑀼𑀧𑀡𑁆𑀡𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁄 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀕𑀺𑀦𑀺𑀁 𑀆𑀤𑀸𑀬 𑀯𑁂𑀕𑁂𑀦 𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀦𑀁 𑀤𑁄𑀯𑀸𑀭𑀺𑀓𑁄 ‘‘𑀢𑁆𑀯𑀁 𑀦𑀕𑀭𑁂 𑀭𑀜𑁆𑀜𑁄 𑀅𑀢𑁆𑀣𑀺𑀪𑀸𑀯𑀁 𑀓𑀺𑀁 𑀦 𑀚𑀸𑀦𑀸𑀲𑀺, ‘𑀲𑀓𑀮𑀲𑁆𑀲𑁂𑀯 𑀇𑀫𑀲𑁆𑀲 𑀦𑀕𑀭𑀲𑁆𑀲 𑀤𑁆𑀯𑀸𑀭𑀁 𑀧𑀺𑀥𑀻𑀬𑀢𑀻’𑀢𑀺 𑀦 𑀚𑀸𑀦𑀸𑀲𑀺, 𑀅𑀢𑁆𑀢𑀦𑁄 𑀫𑀸𑀢𑀼𑀕𑀸𑀫𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀓𑀸𑀫𑀭𑀢𑀺𑀓𑀻𑀴𑀁 𑀓𑀻𑀴𑀦𑁆𑀢𑁄 𑀤𑀺𑀯𑀲𑀁 𑀯𑀺𑀘𑀭𑀲𑀻’’𑀢𑀺 𑀆𑀳. 𑀅𑀣𑀲𑁆𑀲 𑀇𑀢𑀭𑁂𑀦 ‘‘𑀦 𑀫𑁂, 𑀲𑀸𑀫𑀺, 𑀪𑀭𑀺𑀬𑀸, 𑀪𑀕𑀺𑀦𑀻 𑀫𑁂 𑀏𑀲𑀸’’𑀢𑀺 𑀯𑀼𑀢𑁆𑀢𑁂 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀭𑀡𑀁 𑀯𑀢 𑀫𑁂 𑀓𑀢𑀁 𑀪𑀕𑀺𑀦𑀺𑀁 𑀪𑀭𑀺𑀬𑀸𑀢𑀺 𑀓𑀣𑁂𑀦𑁆𑀢𑁂𑀦, 𑀅𑀳𑀜𑁆𑀘 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀸𑀫𑀺, 𑀢𑁂𑀦 𑀫𑁂 𑀪𑀺𑀦𑁆𑀦𑁂𑀦 𑀲𑀻𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑁄 𑀏𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀓𑀸𑀭𑀡𑁂𑀦 𑀓𑀼𑀭𑀼𑀥𑀫𑁆𑀫𑁂 𑀓𑀼𑀓𑁆𑀓𑀼𑀘𑁆𑀘𑀁 ¶ 𑀅𑀢𑁆𑀣𑀺, 𑀢𑁂𑀦 𑀯𑁄 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀤𑀽𑀢𑀸 ‘‘𑀏𑀢𑀁 𑀢𑀼𑀫𑁆𑀳𑁂𑀳𑀺 𑀢𑀣𑀸𑀲𑀜𑁆𑀜𑀸𑀬 𑀓𑀣𑀺𑀢𑀁, 𑀏𑀢𑁆𑀣 ¶ 𑀯𑁄 𑀲𑀻𑀮𑀪𑁂𑀤𑁄 𑀦𑀢𑁆𑀣𑀺, 𑀏𑀢𑁆𑀢𑀓𑁂𑀦𑀧𑀺 𑀘 𑀢𑀼𑀫𑁆𑀳𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀓𑀼𑀭𑀼𑀥𑀫𑁆𑀫𑁂 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀦𑀸𑀫 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦𑁂𑀯 𑀫𑀁 𑀆𑀭𑀸𑀥𑁂𑀢𑀺, 𑀯𑀡𑁆𑀡𑀤𑀸𑀲𑀻 𑀧𑀦 𑀲𑀼𑀝𑁆𑀞𑀼 𑀭𑀓𑁆𑀔𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀘 𑀧𑀦 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀲𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀺. 𑀓𑀺𑀁𑀓𑀸𑀭𑀡𑀸 ¶ ? 𑀲𑀓𑁆𑀓𑁄 𑀓𑀺𑀭 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀢𑀲𑁆𑀲𑀸 𑀲𑀻𑀮𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀡𑀯𑀓𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀦𑁆𑀢𑁆𑀯𑀸 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀦𑀸𑀕𑀘𑁆𑀙𑀺. 𑀲𑀸 𑀅𑀢𑁆𑀢𑀦𑁄 𑀲𑀻𑀮𑀪𑁂𑀤𑀪𑀬𑁂𑀦 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀜𑁆𑀜𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀢𑁄 𑀢𑀫𑁆𑀩𑀽𑀮𑀫𑀢𑁆𑀢𑀫𑁆𑀧𑀺 𑀦 𑀕𑀡𑁆𑀳𑀺, 𑀲𑀸 𑀅𑀦𑀼𑀓𑁆𑀓𑀫𑁂𑀦 𑀤𑀼𑀕𑁆𑀕𑀢𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀕𑀢𑀧𑀼𑀭𑀺𑀲𑀲𑁆𑀲 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀦𑀸𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀕𑁆𑀕𑀢𑀸 𑀚𑀸𑀢𑀸, 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀖𑀝𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀫𑀬𑀸 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀕𑀢𑀧𑀼𑀭𑀺𑀲𑀲𑁆𑀲 𑀫𑁂 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺, 𑀫𑀢𑀪𑀸𑀯𑀫𑁆𑀧𑀺𑀲𑁆𑀲 𑀦 𑀚𑀸𑀦𑀸𑀫𑀺, 𑀚𑀻𑀯𑀺𑀢𑀁 𑀖𑀝𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀓𑀭𑁄𑀫𑀺, 𑀲𑀸𑀫𑀻’’𑀢𑀺 𑀆𑀳. 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀦𑀸𑀕𑀘𑁆𑀙𑀦𑁆𑀢𑁂 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀇𑀢𑁄 𑀧𑀝𑁆𑀞𑀸𑀬 𑀧𑀭𑀺𑀩𑁆𑀩𑀬𑀁 𑀕𑀡𑁆𑀳𑀸𑀢𑀺. 𑀢𑀲𑁆𑀲𑀸 𑀮𑀤𑁆𑀥𑀯𑀺𑀦𑀺𑀘𑁆𑀙𑀬𑀸𑀬 𑀯𑀺𑀦𑀺𑀘𑁆𑀙𑀬𑀢𑁄 𑀦𑀺𑀓𑁆𑀔𑀫𑀫𑀸𑀦𑀸𑀬 𑀏𑀯 𑀏𑀓𑁄 𑀧𑀼𑀭𑀺𑀲𑁄 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀉𑀧𑀦𑀸𑀫𑁂𑀲𑀺.

𑀢𑀲𑁆𑀲 𑀕𑀳𑀡𑀢𑁆𑀣𑀸𑀬 𑀳𑀢𑁆𑀣𑀁 𑀧𑀲𑀸𑀭𑀡𑀓𑀸𑀮𑁂 𑀲𑀓𑁆𑀓𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑀸 𑀤𑀺𑀲𑁆𑀯𑀸𑀯 ‘‘𑀫𑀬𑁆𑀳𑀁 𑀲𑀁𑀯𑀘𑁆𑀙𑀭𑀢𑁆𑀢𑀬𑀫𑀢𑁆𑀣𑀓𑁂 𑀲𑀳𑀲𑁆𑀲𑀤𑀸𑀬𑀓𑁄 𑀧𑀼𑀭𑀺𑀲𑁄 𑀆𑀕𑀢𑁄, 𑀢𑀸𑀢, 𑀦𑀢𑁆𑀣𑀺 𑀫𑁂 𑀢𑀯 𑀓𑀳𑀸𑀧𑀡𑁂𑀳𑀺 𑀅𑀢𑁆𑀣𑁄’’𑀢𑀺 𑀳𑀢𑁆𑀣𑀁 𑀲𑀫𑀺𑀜𑁆𑀚𑁂𑀲𑀺. 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀲𑀭𑀻𑀭𑀜𑁆𑀜𑁂𑀯 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀚𑀮𑀦𑁆𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺, 𑀲𑀓𑀮𑀦𑀕𑀭𑀁 𑀲𑀦𑁆𑀦𑀺𑀧𑀢𑀺. 𑀲𑀓𑁆𑀓𑁄 𑀫𑀳𑀸𑀚𑀦𑀫𑀚𑁆𑀛𑁂 ‘‘𑀅𑀳𑀁 ¶ 𑀏𑀢𑀺𑀲𑁆𑀲𑀸 𑀯𑀻𑀫𑀁𑀲𑀦𑀯𑀲𑁂𑀦 𑀲𑀁𑀯𑀘𑁆𑀙𑀭𑀢𑁆𑀢𑀬𑀫𑀢𑁆𑀣𑀓𑁂 𑀲𑀳𑀲𑁆𑀲𑀁 𑀅𑀤𑀸𑀲𑀺𑀁, 𑀲𑀻𑀮𑀁 𑀭𑀓𑁆𑀔𑀦𑁆𑀢𑀸 𑀦𑀸𑀫 𑀏𑀯𑀭𑀽𑀧𑀸 𑀳𑀼𑀢𑁆𑀯𑀸 𑀭𑀓𑁆𑀔𑀣𑀸’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀢𑀲𑁆𑀲𑀸 𑀦𑀺𑀯𑁂𑀲𑀦𑀁 𑀲𑀢𑁆𑀢𑀭𑀢𑀦𑁂𑀳𑀺 𑀧𑀽𑀭𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻’’𑀢𑀺 𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀸 ‘‘𑀅𑀳𑀁 𑀕𑀳𑀺𑀢𑀪𑀢𑀺𑀁 𑀅𑀚𑀻𑀭𑀸𑀧𑁂𑀢𑁆𑀯𑀸𑀯 𑀅𑀜𑁆𑀜𑁂𑀦 𑀤𑀻𑀬𑀫𑀸𑀦𑀸𑀬 𑀪𑀢𑀺𑀬𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺𑀁, 𑀇𑀫𑀺𑀦𑀸 𑀓𑀸𑀭𑀡𑁂𑀦 ¶ 𑀫𑀁 𑀲𑀻𑀮𑀁 𑀦𑀸𑀭𑀸𑀥𑁂𑀢𑀺, 𑀢𑁂𑀦 𑀯𑁄 𑀤𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀤𑀽𑀢𑀸 ‘‘𑀳𑀢𑁆𑀣𑀧𑁆𑀧𑀲𑀸𑀭𑀡𑀫𑀢𑁆𑀢𑁂𑀦 𑀲𑀻𑀮𑀪𑁂𑀤𑁄 𑀦𑀢𑁆𑀣𑀺, 𑀲𑀻𑀮𑀁 𑀦𑀸𑀫 𑀏𑀢𑀁 𑀧𑀭𑀫𑀯𑀺𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀁𑀲𑀼.

𑀇𑀢𑀺 𑀇𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀚𑀦𑀸𑀦𑀁 𑀭𑀓𑁆𑀔𑀡𑀲𑀻𑀮𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑁆𑀯𑀸 𑀤𑀦𑁆𑀢𑀧𑀼𑀭𑀁 𑀕𑀦𑁆𑀢𑁆𑀯𑀸 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀲𑀼𑀯𑀡𑁆𑀡𑀧𑀝𑁆𑀝𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀢𑀲𑁆𑀫𑀺𑀁 𑀓𑀼𑀭𑀼𑀥𑀫𑁆𑀫𑁂 𑀯𑀢𑁆𑀢𑀫𑀸𑀦𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀧𑀽𑀭𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑀮𑀓𑀸𑀮𑀺𑀗𑁆𑀕𑀭𑀝𑁆𑀞𑁂 𑀤𑁂𑀯𑁄 𑀯𑀲𑁆𑀲𑀺, 𑀢𑀻𑀡𑀺 𑀪𑀬𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺, 𑀭𑀝𑁆𑀞𑀁 𑀔𑁂𑀫𑀁 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. ‘‘𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 ¶ 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄’’𑀢𑀺. 𑀚𑀸𑀢𑀓𑀲𑀫𑁄𑀥𑀸𑀦𑁂 𑀧𑀦 𑁋

‘‘𑀕𑀡𑀺𑀓𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀧𑀼𑀡𑁆𑀡𑁄 𑀤𑁄𑀯𑀸𑀭𑀺𑀓𑁄 𑀢𑀤𑀸;

𑀭𑀚𑁆𑀚𑀼𑀕𑀸𑀳𑁄 𑀓𑀘𑁆𑀘𑀸𑀬𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁄𑀡𑀫𑀸𑀧𑀓𑁄.

‘‘𑀲𑀸𑀭𑀺𑀧𑀼𑀢𑁆𑀢𑁄 𑀢𑀤𑀸 𑀲𑁂𑀝𑁆𑀞𑀺, 𑀅𑀦𑀼𑀭𑀼𑀤𑁆𑀥𑁄 𑀘 𑀲𑀸𑀭𑀣𑀺;

𑀩𑁆𑀭𑀸𑀳𑁆𑀫𑀡𑁄 𑀓𑀲𑁆𑀲𑀧𑁄 𑀣𑁂𑀭𑁄, 𑀉𑀧𑀭𑀸𑀚𑀸 𑀦𑀦𑁆𑀤𑀧𑀡𑁆𑀟𑀺𑀢𑁄.

‘‘𑀫𑀳𑁂𑀲𑀻 𑀭𑀸𑀳𑀼𑀮𑀫𑀸𑀢𑀸, 𑀫𑀸𑀬𑀸𑀤𑁂𑀯𑀻 𑀚𑀦𑁂𑀢𑁆𑀢𑀺𑀬𑀸;

𑀓𑀼𑀭𑀼𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺.

𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁭𑁭] 𑁭. 𑀭𑁄𑀫𑀓𑀚𑀸𑀢𑀓𑀯𑀡𑁆𑀡𑀦𑀸

𑀯𑀲𑁆𑀲𑀸𑀦𑀺 ¶ 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀪𑀕𑀯𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀉𑀢𑁆𑀢𑀸𑀦𑀫𑁂𑀯.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑁄 𑀳𑀼𑀢𑁆𑀯𑀸 𑀩𑀳𑀼𑀧𑀸𑀭𑀸𑀯𑀢𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑁂 𑀧𑀩𑁆𑀩𑀢𑀕𑀼𑀳𑀸𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀜𑁆𑀜𑀢𑀭𑁄𑀧𑀺 𑀔𑁄 𑀢𑀸𑀧𑀲𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀢𑁂𑀲𑀁 𑀧𑀸𑀭𑀸𑀯𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 ¶ 𑀅𑀯𑀺𑀤𑀽𑀭𑁂 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀧𑀩𑁆𑀩𑀢𑀕𑀼𑀳𑀸𑀬𑀁 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀼𑀡𑀸𑀢𑀺. 𑀢𑀸𑀧𑀲𑁄 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀅𑀣𑀜𑁆𑀜𑁄 𑀓𑀽𑀝𑀚𑀝𑀺𑀮𑁄 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑀧𑀭𑀺𑀯𑀼𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀲𑁆𑀲𑀫𑀧𑀤𑁂 𑀯𑀺𑀘𑀭𑀺𑀢𑁆𑀯𑀸 𑀕𑀺𑀭𑀺𑀓𑀦𑁆𑀤𑀭𑀲𑀫𑀻𑀧𑁂 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀸𑀬𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀓𑀽𑀝𑀢𑀸𑀧𑀲𑁄 𑀢𑀢𑁆𑀣 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀯𑀲𑁆𑀲𑀸𑀦𑀺 𑀯𑀲𑀺.

𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀧𑀸𑀭𑀸𑀯𑀢𑀫𑀁𑀲𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀲𑁄 𑀢𑀢𑁆𑀣 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 ‘‘𑀓𑀺𑀁 𑀫𑀁𑀲𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀸𑀭𑀸𑀯𑀢𑀫𑀁𑀲’’𑀦𑁆𑀢𑀺 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ¶ 𑁋 ‘‘𑀫𑀬𑁆𑀳𑀁 𑀅𑀲𑁆𑀲𑀫𑀧𑀤𑀁 𑀩𑀳𑀽 𑀧𑀸𑀭𑀸𑀯𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀡𑁆𑀟𑀼𑀮𑀲𑀧𑁆𑀧𑀺𑀤𑀥𑀺𑀔𑀻𑀭𑀫𑀭𑀺𑀘𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀫𑀼𑀕𑁆𑀕𑀭𑀁 𑀘𑀻𑀯𑀭𑀓𑀡𑁆𑀡𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀸𑀭𑀸𑀯𑀢𑀸𑀦𑀁 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀽𑀝𑀚𑀝𑀺𑀮𑀲𑁆𑀲 𑀤𑀼𑀝𑁆𑀞𑀓𑀺𑀭𑀺𑀬𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀤𑀼𑀝𑁆𑀞𑀢𑀸𑀧𑀲𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑁄, 𑀓𑀘𑁆𑀘𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀲𑀫𑀸𑀦𑀚𑀸𑀢𑀻𑀦𑀁 𑀫𑀁𑀲𑀁 𑀔𑀸𑀤𑀺, 𑀧𑀭𑀺𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀅𑀦𑀼𑀯𑀸𑀢𑁂 𑀞𑀢𑁆𑀯𑀸 𑀢𑀲𑁆𑀲 𑀲𑀭𑀻𑀭𑀕𑀦𑁆𑀥𑀁 ¶ 𑀖𑀸𑀬𑀺𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄, 𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀸𑀭𑀸𑀯𑀢𑁂 𑀆𑀤𑀸𑀬 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀺. 𑀢𑀸𑀧𑀲𑁄 𑀢𑀁 𑀅𑀦𑀸𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀥𑀼𑀭𑀓𑀣𑀁 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀢𑁆𑀯𑀸 𑀯𑀺𑀲𑁆𑀲𑀸𑀲𑁂𑀦 𑀉𑀧𑀕𑀢𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁭𑁯.

‘‘𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺, 𑀯𑀲𑀺𑀫𑁆𑀳 𑀲𑁂𑀮𑀲𑁆𑀲 𑀕𑀼𑀳𑀸𑀬 𑀭𑁄𑀫𑀓;

𑀅𑀲𑀗𑁆𑀓𑀫𑀸𑀦𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸, 𑀳𑀢𑁆𑀣𑀢𑁆𑀢𑀫𑀸𑀬𑀦𑁆𑀢𑀺 𑀫𑀫𑀡𑁆𑀟𑀚𑀸 𑀧𑀼𑀭𑁂.

𑁮𑁦.

‘‘𑀢𑁂𑀤𑀸𑀦𑀺 𑀯𑀓𑁆𑀓𑀗𑁆𑀕 𑀓𑀺𑀫𑀢𑁆𑀣𑀫𑀼𑀲𑁆𑀲𑀼𑀓𑀸, 𑀪𑀚𑀦𑁆𑀢𑀺 𑀅𑀜𑁆𑀜𑀁 𑀕𑀺𑀭𑀺𑀓𑀦𑁆𑀤𑀭𑀁 𑀤𑀺𑀚𑀸;

𑀦 𑀦𑀽𑀦 𑀫𑀜𑁆𑀜𑀦𑁆𑀢𑀺 𑀫𑀫𑀁 𑀬𑀣𑀸 𑀧𑀼𑀭𑁂, 𑀘𑀺𑀭𑀧𑁆𑀧𑀯𑀼𑀢𑁆𑀣𑀸 𑀅𑀣 𑀯𑀸 𑀦 𑀢𑁂 𑀇𑀫𑁂’’𑀢𑀺.

𑀢𑀢𑁆𑀣 ¶ 𑀲𑀫𑀸𑀥𑀺𑀓𑀸𑀦𑀻𑀢𑀺 𑀲𑀫𑀅𑀥𑀺𑀓𑀸𑀦𑀺. 𑀭𑁄𑀫𑀓𑀸𑀢𑀺 𑀭𑀼𑀫𑀸𑀬 𑀉𑀧𑁆𑀧𑀦𑁆𑀦, 𑀲𑀼𑀥𑁄𑀢𑀧𑀯𑀸𑀴𑁂𑀦 𑀲𑀫𑀸𑀦𑀯𑀡𑁆𑀡𑀦𑁂𑀢𑁆𑀢𑀧𑀸𑀤𑀢𑀸𑀬 𑀩𑁄𑀥𑀺𑀲𑀢𑁆𑀢𑀁 𑀧𑀸𑀭𑀸𑀯𑀢𑀁 𑀆𑀮𑀧𑀢𑀺. 𑀅𑀲𑀗𑁆𑀓𑀫𑀸𑀦𑀸𑀢𑀺 𑀏𑀯𑀁 𑀅𑀢𑀺𑀭𑁂𑀓𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀇𑀫𑀺𑀲𑁆𑀲𑀸 𑀧𑀩𑁆𑀩𑀢𑀕𑀼𑀳𑀸𑀬 𑀯𑀲𑀦𑁆𑀢𑁂𑀲𑀼 𑀅𑀫𑁆𑀳𑁂𑀲𑀼 𑀏𑀢𑁂 𑀅𑀡𑁆𑀟𑀚𑀸 𑀏𑀓𑀤𑀺𑀯𑀲𑀫𑁆𑀧𑀺 𑀫𑀬𑀺 𑀆𑀲𑀗𑁆𑀓𑀁 𑀅𑀓𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀸𑀯 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂 𑀫𑀫 𑀳𑀢𑁆𑀣𑀢𑁆𑀢𑀁 𑀳𑀢𑁆𑀣𑀧𑁆𑀧𑀲𑀸𑀭𑀡𑁄𑀓𑀸𑀲𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀤𑀸𑀦𑀻𑀢𑀺 𑀢𑁂 𑀇𑀤𑀸𑀦𑀺. 𑀯𑀓𑁆𑀓𑀗𑁆𑀕𑀸𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀮𑀧𑀢𑀺, 𑀲𑀩𑁆𑀩𑁂𑀧𑀺 𑀧𑀦 𑀧𑀓𑁆𑀔𑀺𑀦𑁄 𑀉𑀧𑁆𑀧𑀢𑀦𑀓𑀸𑀮𑁂 𑀕𑀻𑀯𑀁 𑀯𑀓𑁆𑀓𑀁 𑀓𑀢𑁆𑀯𑀸 𑀉𑀧𑁆𑀧𑀢𑀦𑀢𑁄 ‘‘𑀯𑀓𑁆𑀓𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀫𑀢𑁆𑀣𑀦𑁆𑀢𑀺 𑀓𑀺𑀁𑀓𑀸𑀭𑀡𑀁 𑀲𑀫𑁆𑀧𑀲𑁆𑀲𑀫𑀸𑀦𑀸? 𑀉𑀲𑁆𑀲𑀼𑀓𑀸𑀢𑀺 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑀸 𑀳𑀼𑀢𑁆𑀯𑀸. 𑀕𑀺𑀭𑀺𑀓𑀦𑁆𑀤𑀭𑀦𑁆𑀢𑀺 𑀕𑀺𑀭𑀺𑀢𑁄 𑀅𑀜𑁆𑀜𑀁 𑀧𑀩𑁆𑀩𑀢𑀓𑀦𑁆𑀤𑀭𑀁. 𑀬𑀣𑀸 𑀧𑀼𑀭𑁂𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀏𑀢𑁂 𑀧𑀓𑁆𑀔𑀺𑀦𑁄 𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀺𑀬𑀁 𑀓𑀢𑁆𑀯𑀸 𑀫𑀜𑁆𑀜𑀦𑁆𑀢𑀺, 𑀢𑀣𑀸 𑀇𑀤𑀸𑀦𑀺 𑀦 𑀦𑀽𑀦 𑀫𑀜𑁆𑀜𑀦𑁆𑀢𑀺, 𑀧𑀼𑀩𑁆𑀩𑁂 𑀇𑀥 𑀦𑀺𑀯𑀼𑀢𑁆𑀣𑀢𑀸𑀧𑀲𑁄 𑀅𑀜𑁆𑀜𑁄, 𑀅𑀬𑀁 𑀅𑀜𑁆𑀜𑁄, 𑀏𑀯𑀁 𑀫𑀜𑁆𑀜𑁂 𑀏𑀢𑁂 𑀫𑀁 𑀫𑀜𑁆𑀜𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀘𑀺𑀭𑀧𑁆𑀧𑀯𑀼𑀢𑁆𑀣𑀸 𑀅𑀣 𑀯𑀸 𑀦 𑀢𑁂 𑀇𑀫𑁂𑀢𑀺 𑀓𑀺𑀁 𑀦𑀼 𑀔𑁄 𑀇𑀫𑁂 𑀘𑀺𑀭𑀁 𑀯𑀺𑀧𑁆𑀧𑀯𑀲𑀺𑀢𑁆𑀯𑀸 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀆𑀕𑀢𑀢𑁆𑀢𑀸 𑀫𑀁 ‘‘𑀲𑁄𑀬𑁂𑀯 ¶ 𑀅𑀬’’𑀦𑁆𑀢𑀺 𑀦 𑀲𑀜𑁆𑀚𑀸𑀦𑀦𑁆𑀢𑀺, 𑀉𑀤𑀸𑀳𑀼 𑀬𑁂 𑀅𑀫𑁆𑀳𑁂𑀲𑀼 𑀅𑀪𑀺𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀸, 𑀦 𑀢𑁂 𑀇𑀫𑁂, 𑀅𑀜𑁆𑀜𑁂𑀯 𑀆𑀕𑀦𑁆𑀢𑀼𑀓𑀧𑀓𑁆𑀔𑀺𑀦𑁄, 𑀇𑀫𑁂 𑀓𑁂𑀦 𑀫𑀁 𑀦 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀧𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀯 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁧.

‘‘𑀚𑀸𑀦𑀸𑀫 𑀢𑀁 𑀦 𑀫𑀬𑀁 𑀲𑀫𑁆𑀧𑀫𑀽𑀴𑁆𑀳𑀸, 𑀲𑁄𑀬𑁂𑀯 𑀢𑁆𑀯𑀁 𑀢𑁂 𑀫𑀬𑀫𑀲𑁆𑀫 𑀦𑀸𑀜𑁆𑀜𑁂;

𑀘𑀺𑀢𑁆𑀢𑀜𑁆𑀘 𑀢𑁂 𑀅𑀲𑁆𑀫𑀺𑀁 𑀚𑀦𑁂 𑀧𑀤𑀼𑀝𑁆𑀞𑀁, 𑀆𑀚𑀻𑀯𑀺𑀓𑀸 𑀢𑁂𑀦 𑀢𑀫𑀼𑀢𑁆𑀢𑀲𑀸𑀫𑀸’’𑀢𑀺.

𑀢𑀢𑁆𑀣 𑀦 𑀫𑀬𑀁 𑀲𑀫𑁆𑀧𑀫𑀽𑀴𑁆𑀳𑀸𑀢𑀺 𑀫𑀬𑀁 𑀫𑀽𑀴𑁆𑀳𑀸 𑀧𑀫𑀢𑁆𑀢𑀸 𑀦 𑀳𑁄𑀫. 𑀘𑀺𑀢𑁆𑀢𑀜𑁆𑀘 𑀢𑁂 𑀅𑀲𑁆𑀫𑀺𑀁 𑀚𑀦𑁂 𑀧𑀤𑀼𑀝𑁆𑀞𑀦𑁆𑀢𑀺 𑀢𑁆𑀯𑀁, 𑀲𑁄𑀬𑁂𑀯 𑀫𑀬𑀫𑁆𑀧𑀺 𑀢𑁂𑀬𑁂𑀯, 𑀦 𑀢𑀁 𑀲𑀜𑁆𑀚𑀸𑀦𑀸𑀫, 𑀅𑀧𑀺𑀘 𑀔𑁄 𑀧𑀦 𑀢𑀯 𑀘𑀺𑀢𑁆𑀢𑀁 𑀅𑀲𑁆𑀫𑀺𑀁 𑀚𑀦𑁂 𑀧𑀤𑀼𑀝𑁆𑀞𑀁 𑀅𑀫𑁆𑀳𑁂 𑀫𑀸𑀭𑁂𑀢𑀼𑀁 𑀉𑀧𑁆𑀧𑀦𑁆𑀦𑀁. 𑀆𑀚𑀻𑀯𑀺𑀓𑀸𑀢𑀺 𑀆𑀚𑀻𑀯𑀳𑁂𑀢𑀼 𑀧𑀩𑁆𑀩𑀚𑀺𑀢 𑀧𑀤𑀼𑀝𑁆𑀞𑀢𑀸𑀧𑀲. 𑀢𑁂𑀦 𑀢𑀫𑀼𑀢𑁆𑀢𑀲𑀸𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀉𑀢𑁆𑀢𑀲𑀸𑀫 𑀪𑀸𑀬𑀸𑀫 𑀦 𑀉𑀧𑀲𑀗𑁆𑀓𑀫𑀸𑀫.

𑀓𑀽𑀝𑀢𑀸𑀧𑀲𑁄 ¶ ‘‘𑀜𑀸𑀢𑁄 𑀅𑀳𑀁 𑀇𑀫𑁂𑀳𑀻’’𑀢𑀺 𑀫𑀼𑀕𑁆𑀕𑀭𑀁 𑀔𑀺𑀧𑀺𑀢𑁆𑀯𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀕𑀘𑁆𑀙 𑀢𑀸𑀯 𑀢𑁆𑀯𑀁 𑀯𑀺𑀭𑀤𑁆𑀥𑁄𑀫𑁆𑀳𑀻’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀁 𑀢𑀸𑀯 𑀯𑀺𑀭𑀤𑁆𑀥𑁄𑀲𑀺, 𑀘𑀢𑁆𑀢𑀸𑀭𑁄 𑀧𑀦 𑀅𑀧𑀸𑀬𑁂 𑀦 𑀯𑀺𑀭𑀚𑁆𑀛𑀲𑀺. 𑀲𑀘𑁂 𑀇𑀥 𑀯𑀲𑀺𑀲𑁆𑀲𑀲𑀺, 𑀕𑀸𑀫𑀯𑀸𑀲𑀻𑀦𑀁 ‘𑀘𑁄𑀭𑁄 𑀅𑀬’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀕𑀸𑀳𑀸𑀧𑁂𑀲𑁆𑀲𑀸𑀫𑀺 𑀲𑀻𑀖𑀁 𑀧𑀮𑀸𑀬𑀲𑁆𑀲𑀽’’𑀢𑀺 𑀢𑀁 𑀢𑀚𑁆𑀚𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀽𑀝𑀚𑀝𑀺𑀮𑁄 𑀢𑀢𑁆𑀣 𑀯𑀲𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀢𑀸𑀧𑀲𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀼𑀭𑀺𑀫𑁄 𑀲𑀻𑀮𑀯𑀦𑁆𑀢𑀢𑀸𑀧𑀲𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀸𑀭𑀸𑀯𑀢𑀚𑁂𑀝𑁆𑀞𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑁄𑀫𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁭𑁮] 𑁮. 𑀫𑀳𑀺𑀁𑀲𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀫𑀢𑁆𑀣𑀫𑀪𑀺𑀲𑀦𑁆𑀥𑀸𑀬𑀸𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀫𑀓𑁆𑀓𑀝𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀏𑀓𑁄 𑀧𑁄𑀲𑀸𑀯𑀦𑀺𑀬𑀮𑁄𑀮𑀫𑀓𑁆𑀓𑀝𑁄 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀲 𑀲𑀻𑀮𑀯𑀦𑁆𑀢𑀲𑁆𑀲 𑀳𑀢𑁆𑀣𑀺𑀲𑁆𑀲 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀢𑀺, 𑀧𑀺𑀝𑁆𑀞𑀺𑀬𑀁 𑀘𑀗𑁆𑀓𑀫𑀢𑀺. 𑀳𑀢𑁆𑀣𑀻 𑀅𑀢𑁆𑀢𑀦𑁄 𑀲𑀻𑀮𑀯𑀦𑁆𑀢𑀢𑀸𑀬 𑀔𑀦𑁆𑀢𑀺𑀲𑀫𑁆𑀧𑀤𑀸𑀬 𑀦 𑀓𑀺𑀜𑁆𑀘𑀺 𑀓𑀭𑁄𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲 𑀳𑀢𑁆𑀣𑀺𑀲𑁆𑀲 𑀞𑀸𑀦𑁂 𑀅𑀜𑁆𑀜𑁄 𑀤𑀼𑀝𑁆𑀞𑀳𑀢𑁆𑀣𑀺𑀧𑁄𑀢𑁄 𑀅𑀝𑁆𑀞𑀸𑀲𑀺. 𑀫𑀓𑁆𑀓𑀝𑁄 ‘‘𑀲𑁄𑀬𑁂𑀯 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀤𑀼𑀝𑁆𑀞𑀳𑀢𑁆𑀣𑀺𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺. 𑀅𑀣 𑀦𑀁 𑀲𑁄 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀲𑀜𑁆𑀘𑀼𑀡𑁆𑀡𑁂𑀲𑀺. 𑀲𑀸 ¶ 𑀧𑀯𑀢𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀮𑁄𑀮𑀫𑀓𑁆𑀓𑀝𑁄 𑀓𑀺𑀭 𑀲𑀻𑀮𑀯𑀦𑁆𑀢𑀳𑀢𑁆𑀣𑀺𑀲𑀜𑁆𑀜𑀸𑀬 𑀤𑀼𑀝𑁆𑀞𑀳𑀢𑁆𑀣𑀺𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺, 𑀅𑀣 𑀦𑀁 𑀲𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑁂𑀲, 𑀮𑁄𑀮𑀫𑀓𑁆𑀓𑀝𑁄 𑀏𑀯𑀁𑀲𑀻𑀮𑁄, 𑀧𑁄𑀭𑀸𑀡𑀢𑁄 𑀧𑀝𑁆𑀞𑀸𑀬 𑀏𑀯𑀁𑀲𑀻𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀺𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀫𑀳𑀸𑀲𑀭𑀻𑀭𑁄 ¶ 𑀧𑀩𑁆𑀩𑀢𑀧𑀸𑀤𑀧𑀩𑁆𑀪𑀸𑀭𑀕𑀺𑀭𑀺𑀤𑀼𑀕𑁆𑀕𑀯𑀦𑀖𑀝𑁂𑀲𑀼 𑀯𑀺𑀘𑀭𑀦𑁆𑀢𑁄 𑀏𑀓𑀁 𑀨𑀸𑀲𑀼𑀓𑀁 𑀭𑀼𑀓𑁆𑀔𑀫𑀽𑀮𑀁 𑀤𑀺𑀲𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀅𑀣𑁂𑀓𑁄 𑀮𑁄𑀮𑀫𑀓𑁆𑀓𑀝𑁄 𑀭𑀼𑀓𑁆𑀔𑀸 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀢𑁆𑀯𑀸 𑀲𑀺𑀗𑁆𑀕𑁂 𑀕𑀡𑁆𑀳𑀺𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑁄 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀤𑁄𑀮𑀸𑀬𑀦𑁆𑀢𑁄𑀯 𑀓𑀻𑀴𑀺. 𑀩𑁄𑀥𑀺𑀲𑀢𑁆𑀢𑁄 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀤𑀸𑀬 𑀢𑀁 𑀢𑀲𑁆𑀲 𑀅𑀦𑀸𑀘𑀸𑀭𑀁 𑀦 𑀫𑀦𑀲𑀸𑀓𑀸𑀲𑀺, 𑀫𑀓𑁆𑀓𑀝𑁄 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀓𑀭𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀭𑀼𑀓𑁆𑀔𑀓𑁆𑀔𑀦𑁆𑀥𑁂 𑀞𑀢𑁆𑀯𑀸 𑀦𑀁 ‘‘𑀫𑀳𑀺𑀁𑀲𑀭𑀸𑀚 ¶ 𑀓𑀲𑁆𑀫𑀸 𑀇𑀫𑀲𑁆𑀲 𑀤𑀼𑀝𑁆𑀞𑀫𑀓𑁆𑀓𑀝𑀲𑁆𑀲 𑀅𑀯𑀫𑀸𑀦𑀁 𑀲𑀳𑀲𑀺, 𑀦𑀺𑀲𑁂𑀥𑁂𑀳𑀺 𑀦’’𑀦𑁆𑀢𑀺 𑀯𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁮𑁨.

‘‘𑀓𑀺𑀫𑀢𑁆𑀣𑀫𑀪𑀺𑀲𑀦𑁆𑀥𑀸𑀬, 𑀮𑀳𑀼𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀦𑁄;

𑀲𑀩𑁆𑀩𑀓𑀸𑀫𑀤𑀤𑀲𑁆𑀲𑁂𑀯, 𑀇𑀫𑀁 𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀲𑀺.

𑁮𑁩.

‘‘𑀲𑀺𑀗𑁆𑀕𑁂𑀦 𑀦𑀺𑀳𑀦𑀸𑀳𑁂𑀢𑀁, 𑀧𑀤𑀲𑀸 𑀘 𑀅𑀥𑀺𑀝𑁆𑀞𑀳;

𑀪𑀺𑀬𑁆𑀬𑁄 𑀩𑀸𑀮𑀸 𑀧𑀓𑀼𑀚𑁆𑀛𑁂𑀬𑁆𑀬𑀼𑀁, 𑀦𑁄 𑀘𑀲𑁆𑀲 𑀧𑀝𑀺𑀲𑁂𑀥𑀓𑁄’’𑀢𑀺.

𑀢𑀢𑁆𑀣 𑀓𑀺𑀫𑀢𑁆𑀣𑀫𑀪𑀺𑀲𑀦𑁆𑀥𑀸𑀬𑀸𑀢𑀺 𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀓𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄. 𑀤𑀼𑀩𑁆𑀪𑀺𑀦𑁄𑀢𑀺 𑀫𑀺𑀢𑁆𑀢𑀤𑀼𑀩𑁆𑀪𑀺𑀲𑁆𑀲. 𑀲𑀩𑁆𑀩𑀓𑀸𑀫𑀤𑀤𑀲𑁆𑀲𑁂𑀯𑀸𑀢𑀺 𑀲𑀩𑁆𑀩𑀓𑀸𑀫𑀤𑀤𑀲𑁆𑀲 𑀲𑀸𑀫𑀺𑀓𑀲𑁆𑀲 𑀇𑀯. 𑀢𑀺𑀢𑀺𑀓𑁆𑀔𑀲𑀻𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀧𑀤𑀲𑀸 𑀘 𑀅𑀥𑀺𑀝𑁆𑀞𑀳𑀸𑀢𑀺 𑀧𑀸𑀤𑁂𑀦 𑀘 𑀦𑀁 𑀢𑀺𑀡𑁆𑀳𑀔𑀼𑀭𑀕𑁆𑀕𑁂𑀦 𑀬𑀣𑀸 𑀏𑀢𑁆𑀣𑁂𑀯 𑀫𑀭𑀢𑀺, 𑀏𑀯𑀁 𑀅𑀓𑁆𑀓𑀫. 𑀪𑀺𑀬𑁆𑀬𑁄 𑀩𑀸𑀮𑀸𑀢𑀺 𑀲𑀘𑁂 𑀳𑀺 𑀧𑀝𑀺𑀲𑁂𑀥𑀓𑁄 𑀦 𑀪𑀯𑁂𑀬𑁆𑀬, 𑀩𑀸𑀮𑀸 𑀅𑀜𑁆𑀜𑀸𑀡𑀲𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀚𑁆𑀛𑁂𑀬𑁆𑀬𑀼𑀁 𑀖𑀝𑁆𑀝𑁂𑀬𑁆𑀬𑀼𑀁 𑀯𑀺𑀳𑁂𑀞𑁂𑀬𑁆𑀬𑀼𑀁 𑀏𑀯𑀸𑀢𑀺 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀭𑀼𑀓𑁆𑀔𑀤𑁂𑀯𑀢𑁂, 𑀲𑀘𑀸𑀳𑀁 𑀇𑀫𑀺𑀦𑀸 𑀚𑀸𑀢𑀺𑀕𑁄𑀢𑁆𑀢𑀩𑀮𑀸𑀤𑀻𑀳𑀺 𑀅𑀥𑀺𑀓𑁄 𑀲𑀫𑀸𑀦𑁄 𑀇𑀫𑀲𑁆𑀲 𑀤𑁄𑀲𑀁 𑀦 𑀲𑀳𑀺𑀲𑁆𑀲𑀸𑀫𑀺, 𑀓𑀣𑀁 𑀫𑁂 𑀫𑀦𑁄𑀭𑀣𑁄 𑀦𑀺𑀧𑁆𑀨𑀢𑁆𑀢𑀺𑀁 𑀕𑀫𑀺𑀲𑁆𑀲𑀢𑀺. 𑀅𑀬𑀁 𑀧𑀦 𑀫𑀁 𑀯𑀺𑀬 𑀅𑀜𑁆𑀜𑀫𑁆𑀧𑀺 𑀫𑀜𑁆𑀜𑀫𑀸𑀦𑁄 𑀏𑀯𑀁 𑀅𑀦𑀸𑀘𑀸𑀭𑀁 𑀓𑀭𑀺𑀲𑁆𑀲𑀢𑀺, 𑀢𑀢𑁄 𑀬𑁂𑀲𑀁 𑀘𑀡𑁆𑀟𑀫𑀳𑀺𑀁𑀲𑀸𑀦𑀁 𑀏𑀲 𑀏𑀯𑀁 𑀓𑀭𑀺𑀲𑁆𑀲𑀢𑀺 ¶ , 𑀏𑀢𑁂𑀬𑁂𑀯 𑀏𑀢𑀁 𑀯𑀥𑀺𑀲𑁆𑀲𑀦𑁆𑀢𑀺. 𑀲𑀸 𑀢𑀲𑁆𑀲 𑀅𑀜𑁆𑀜𑁂𑀳𑀺 𑀫𑀸𑀭𑀡𑀸 𑀫𑀬𑁆𑀳𑀁 𑀤𑀼𑀓𑁆𑀔𑀢𑁄 𑀘 𑀧𑀸𑀡𑀸𑀢𑀺𑀧𑀸𑀢𑀢𑁄 𑀘 𑀯𑀺𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁪.

‘‘𑀫𑀫𑁂𑀯𑀸𑀬𑀁 𑀫𑀜𑁆𑀜𑀫𑀸𑀦𑁄, 𑀅𑀜𑁆𑀜𑁂𑀧𑁂𑀯𑀁 𑀓𑀭𑀺𑀲𑁆𑀲𑀢𑀺;

𑀢𑁂 𑀦𑀁 𑀢𑀢𑁆𑀣 𑀯𑀥𑀺𑀲𑁆𑀲𑀦𑁆𑀢𑀺, 𑀲𑀸 𑀫𑁂 𑀫𑀼𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀓𑀢𑀺𑀧𑀸𑀳𑀘𑁆𑀘𑀬𑁂𑀦 ¶ 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑁆𑀣 𑀕𑀢𑁄. 𑀅𑀜𑁆𑀜𑁄 𑀘𑀡𑁆𑀟𑀫𑀳𑀺𑀁𑀲𑁄 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀼𑀝𑁆𑀞𑀫𑀓𑁆𑀓𑀝𑁄 ‘‘𑀲𑁄𑀬𑁂𑀯 ¶ 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀣𑁂𑀯 𑀅𑀦𑀸𑀘𑀸𑀭𑀁 𑀘𑀭𑀺. 𑀅𑀣 𑀦𑀁 𑀲𑁄 𑀯𑀺𑀥𑀼𑀦𑀦𑁆𑀢𑁄 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀺𑀗𑁆𑀕𑁂𑀦 𑀳𑀤𑀬𑁂 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀤𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀲𑀜𑁆𑀘𑀼𑀡𑁆𑀡𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀝𑁆𑀞𑀫𑀳𑀺𑀁𑀲𑁄 𑀅𑀬𑀁 𑀤𑀼𑀝𑁆𑀞𑀳𑀢𑁆𑀣𑀻 𑀅𑀳𑁄𑀲𑀺, 𑀤𑀼𑀝𑁆𑀞𑀫𑀓𑁆𑀓𑀝𑁄 𑀏𑀢𑀭𑀳𑀺 𑀅𑀬𑀁 𑀫𑀓𑁆𑀓𑀝𑁄, 𑀲𑀻𑀮𑀯𑀸 𑀫𑀳𑀺𑀁𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀺𑀁𑀲𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁭𑁯] 𑁯. 𑀲𑀢𑀧𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀸 𑀫𑀸𑀡𑀯𑀓𑁄 𑀧𑀦𑁆𑀣𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀙𑀩𑁆𑀩𑀕𑁆𑀕𑀺𑀬𑀸𑀦𑀜𑁆𑀳𑀺 𑀤𑁆𑀯𑁂 𑀚𑀦𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀁𑀲𑀼, 𑀤𑁆𑀯𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀓𑀻𑀝𑀸𑀕𑀺𑀭𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀁𑀲𑀼, 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀇𑀫𑁂 𑀧𑀦 𑀤𑁆𑀯𑁂 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀺𑀁𑀲𑀼. 𑀢𑁂 𑀥𑀫𑁆𑀫𑁂𑀦 𑀦𑀻𑀳𑀝𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑀺. 𑀬𑁂𑀧𑀺 𑀢𑁂𑀲𑀁 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀉𑀧𑀢𑁆𑀣𑀫𑁆𑀪𑀸 𑀳𑀼𑀢𑁆𑀯𑀸 ‘‘𑀦, 𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀏𑀢𑁂𑀳𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀲𑀻𑀮𑁂𑀦 𑀯𑀸 𑀦𑀺𑀳𑀻𑀦𑀢𑀭𑀸. 𑀲𑀘𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀕𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀲𑀼𑀝𑁆𑀞𑀼𑀢𑀭𑀁 𑀯𑁄 𑀏𑀢𑁂 𑀅𑀥𑀺𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀕𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀤𑁂𑀦𑁆𑀢𑀺. 𑀢𑁂𑀦 𑀪𑀡𑁆𑀟𑀦𑀸𑀦𑀺 𑀘𑁂𑀯 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸 𑀘 𑀧𑀯𑀢𑁆𑀢𑀦𑁆𑀢𑀺. 𑀪𑀺𑀓𑁆𑀔𑀽 𑀏𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀅𑀣 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑀸𑀧𑀺 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀣, 𑀅𑀜𑁆𑀜𑁂𑀲𑀫𑁆𑀧𑀺 𑀕𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀁 𑀲𑀦𑁆𑀢𑁂, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀓𑀺𑀭𑀺𑀬𑀸 𑀲𑀢𑀧𑀢𑁆𑀢𑀫𑀸𑀡𑀯𑀲𑁆𑀲 𑀓𑀺𑀭𑀺𑀬𑀸 𑀯𑀺𑀬 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑀓𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀳𑀺 𑀚𑀻𑀯𑀺𑀓𑀁 𑀅𑀓𑀧𑁆𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑀫𑀢𑁆𑀢𑁂 ¶ 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀧𑀦𑁆𑀣𑀤𑀽𑀳𑀦𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀏𑀓𑀲𑁆𑀲 𑀚𑀸𑀦𑀧𑀤𑀲𑁆𑀲 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀦 𑀅𑀕𑁆𑀕𑀳𑁂𑀢𑁆𑀯𑀸𑀯 𑀓𑀸𑀮𑀫𑀓𑀸𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀅𑀧𑀭𑀪𑀸𑀕𑁂 𑀕𑀺𑀮𑀸𑀦𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀸 𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀧𑀺𑀢𑀸 𑀢𑁂 𑀏𑀓𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀦𑀸𑀳𑀭𑀸𑀧𑁂𑀢𑁆𑀯𑀸𑀯 𑀫𑀢𑁄, 𑀲𑀘𑁂 𑀅𑀳𑀫𑁆𑀧𑀺 𑀫𑀭𑀺𑀲𑁆𑀲𑀸𑀫𑀺, 𑀦 𑀲𑁄 𑀢𑀼𑀬𑁆𑀳𑀁 𑀤𑀲𑁆𑀲𑀢𑀺, 𑀕𑀘𑁆𑀙 𑀦𑀁 𑀫𑀬𑀺 𑀚𑀻𑀯𑀦𑁆𑀢𑀺𑀬𑀸 𑀆𑀳𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀳𑀸𑀧𑀡𑁂 𑀮𑀪𑀺. 𑀅𑀣𑀲𑁆𑀲 𑀫𑀸𑀢𑀸 𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑁂 𑀑𑀧𑀧𑀸𑀢𑀺𑀓𑀲𑀺𑀗𑁆𑀕𑀸𑀮𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑀺.

𑀢𑀤𑀸 𑀲𑁄 𑀘𑁄𑀭𑀚𑁂𑀝𑁆𑀞𑀓𑁄 𑀫𑀕𑁆𑀕𑀧𑀝𑀺𑀧𑀦𑁆𑀦𑁂 𑀯𑀺𑀮𑀼𑀫𑁆𑀧𑀫𑀸𑀦𑁄 𑀲𑀧𑀭𑀺𑀲𑁄 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀅𑀝𑁆𑀞𑀸𑀲𑀺. 𑀅𑀣 𑀲𑀸 𑀲𑀺𑀗𑁆𑀕𑀸𑀮𑀻 𑀧𑀼𑀢𑁆𑀢𑁂 𑀅𑀝𑀯𑀻𑀫𑀼𑀔𑀁 𑀲𑀫𑁆𑀧𑀢𑁆𑀢𑁂 ‘‘𑀢𑀸𑀢, 𑀫𑀸 𑀅𑀝𑀯𑀺𑀁 𑀅𑀪𑀺𑀭𑀼𑀳𑀺, 𑀘𑁄𑀭𑀸 𑀏𑀢𑁆𑀣 𑀞𑀺𑀢𑀸, 𑀢𑁂 𑀢𑀁 𑀫𑀸𑀭𑁂𑀢𑁆𑀯𑀸 𑀓𑀳𑀸𑀧𑀡𑁂 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀕𑁆𑀕𑀁 𑀑𑀘𑁆𑀙𑀺𑀦𑁆𑀤𑀫𑀸𑀦𑀸 𑀦𑀺𑀯𑀸𑀭𑁂𑀢𑀺. 𑀲𑁄 𑀢𑀁 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀬𑀁 𑀓𑀸𑀴𑀓𑀡𑁆𑀡𑀻 𑀲𑀺𑀗𑁆𑀕𑀸𑀮𑀻 𑀫𑀬𑁆𑀳𑀁 𑀫𑀕𑁆𑀕𑀁 𑀑𑀘𑁆𑀙𑀺𑀦𑁆𑀤𑀢𑀻’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀫𑀸𑀢𑀭𑀁 𑀧𑀮𑀸𑀧𑁂𑀢𑁆𑀯𑀸 𑀅𑀝𑀯𑀺𑀁 𑀧𑀝𑀺𑀧𑀚𑁆𑀚𑀺. 𑀅𑀣𑁂𑀓𑁄 𑀲𑀢𑀧𑀢𑁆𑀢𑀲𑀓𑀼𑀡𑁄 ‘‘𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀓𑀳𑀸𑀧𑀡𑀲𑀳𑀲𑁆𑀲𑀁 𑀅𑀢𑁆𑀣𑀺, 𑀇𑀫𑀁 𑀫𑀸𑀭𑁂𑀢𑁆𑀯𑀸 𑀢𑀁 𑀓𑀳𑀸𑀧𑀡𑀁 𑀕𑀡𑁆𑀳𑀣𑀸’’𑀢𑀺 𑀯𑀺𑀭𑀯𑀦𑁆𑀢𑁄 𑀘𑁄𑀭𑀸𑀪𑀺𑀫𑀼𑀔𑁄 𑀧𑀓𑁆𑀔𑀦𑁆𑀤𑀺. 𑀫𑀸𑀡𑀯𑁄 𑀢𑁂𑀦 𑀓𑀢𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀬𑀁 𑀫𑀗𑁆𑀕𑀮𑀲𑀓𑀼𑀡𑁄, 𑀇𑀤𑀸𑀦𑀺 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀯𑀲𑁆𑀲, 𑀲𑀸𑀫𑀺, 𑀯𑀲𑁆𑀲, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺.

𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀭𑀼𑀢𑀜𑁆𑀜𑀽 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 𑀇𑀫𑀸𑀬 𑀲𑀺𑀗𑁆𑀕𑀸𑀮𑀺𑀬𑀸 𑀏𑀢𑀲𑁆𑀲 𑀫𑀸𑀢𑀭𑀸 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀲𑀸 ‘‘𑀇𑀫𑀁 𑀫𑀸𑀭𑁂𑀢𑁆𑀯𑀸 𑀓𑀳𑀸𑀧𑀡𑁂 𑀕𑀡𑁆𑀳𑀦𑁆𑀢𑀻’’𑀢𑀺 𑀪𑀬𑁂𑀦 𑀯𑀸𑀭𑁂𑀢𑀺. 𑀇𑀫𑀺𑀦𑀸 𑀧𑀦 𑀲𑀢𑀧𑀢𑁆𑀢𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀲𑁄 ‘‘𑀇𑀫𑀁 𑀫𑀸𑀭𑁂𑀢𑁆𑀯𑀸 𑀓𑀳𑀸𑀧𑀡𑁂 𑀕𑀡𑁆𑀳𑀣𑀸’’𑀢𑀺 𑀅𑀫𑁆𑀳𑀸𑀓𑀁 𑀆𑀭𑁄𑀘𑁂𑀲𑀺. 𑀅𑀬𑀁 𑀧𑀦 𑀏𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀅𑀢𑁆𑀣𑀓𑀸𑀫𑀁 ¶ 𑀫𑀸𑀢𑀭𑀁 𑀢𑀚𑁆𑀚𑁂𑀢𑁆𑀯𑀸 𑀧𑀮𑀸𑀧𑁂𑀲𑀺, 𑀅𑀦𑀢𑁆𑀣𑀓𑀸𑀫𑀲𑁆𑀲 𑀲𑀢𑀧𑀢𑁆𑀢𑀲𑁆𑀲 ‘‘𑀅𑀢𑁆𑀣𑀓𑀸𑀫𑁄 𑀫𑁂’’𑀢𑀺 𑀲𑀜𑁆𑀜𑀸𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀅𑀳𑁄 𑀯𑀢𑀸𑀬𑀁 𑀩𑀸𑀮𑁄𑀢𑀺 ¶ . 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀏𑀯𑀁 𑀫𑀳𑀸𑀧𑀼𑀭𑀺𑀲𑀸𑀦𑀫𑁆𑀧𑀺 𑀲𑀢𑀁 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑀁 𑀯𑀺𑀲𑀫𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀳𑁄𑀢𑀺, ‘‘𑀦𑀓𑁆𑀔𑀢𑁆𑀢𑀤𑁄𑀲𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀫𑀸𑀡𑀯𑁄 𑀆𑀕𑀦𑁆𑀢𑁆𑀯𑀸 𑀘𑁄𑀭𑀸𑀦𑀁 𑀲𑀻𑀫𑀦𑁆𑀢𑀭𑀁 𑀧𑀸𑀧𑀼𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀓𑀢𑁆𑀣 𑀯𑀸𑀲𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀯𑀸𑀲𑀺𑀓𑁄𑀫𑁆𑀳𑀻’’𑀢𑀺. ‘‘𑀓𑀳𑀁 𑀅𑀕𑀫𑀸𑀲𑀻’’𑀢𑀺? ‘‘𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀲𑀳𑀲𑁆𑀲𑀁 𑀮𑀤𑁆𑀥𑀩𑁆𑀩𑀁 𑀅𑀢𑁆𑀣𑀺, 𑀢𑀢𑁆𑀣 𑀅𑀕𑀫𑀸𑀲𑀺’’𑀦𑁆𑀢𑀺. ‘‘𑀮𑀤𑁆𑀥𑀁 𑀧𑀦 𑀢𑁂’’𑀢𑀺? ‘‘𑀆𑀫, 𑀮𑀤𑁆𑀥’’𑀦𑁆𑀢𑀺 ¶ . ‘‘𑀓𑁂𑀦 𑀢𑁆𑀯𑀁 𑀧𑁂𑀲𑀺𑀢𑁄𑀲𑀻’’𑀢𑀺? ‘‘𑀲𑀸𑀫𑀺, 𑀧𑀺𑀢𑀸 𑀫𑁂 𑀫𑀢𑁄, 𑀫𑀸𑀢𑀸𑀧𑀺 𑀫𑁂 𑀕𑀺𑀮𑀸𑀦𑀸, 𑀲𑀸 ‘𑀫𑀬𑀺 𑀫𑀢𑀸𑀬 𑀏𑀲 𑀦 𑀮𑀪𑀺𑀲𑁆𑀲𑀢𑀻’𑀢𑀺 𑀫𑀜𑁆𑀜𑀫𑀸𑀦𑀸 𑀫𑀁 𑀧𑁂𑀲𑁂𑀲𑀻’’𑀢𑀺. ‘‘𑀇𑀤𑀸𑀦𑀺 𑀢𑀯 𑀫𑀸𑀢𑀼 𑀧𑀯𑀢𑁆𑀢𑀺𑀁 𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀲𑀸𑀫𑀻’’𑀢𑀺. ‘‘𑀫𑀸𑀢𑀸 𑀢𑁂 𑀢𑀬𑀺 𑀦𑀺𑀓𑁆𑀔𑀦𑁆𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀲𑀺𑀗𑁆𑀕𑀸𑀮𑀻 𑀳𑀼𑀢𑁆𑀯𑀸 𑀢𑀯 𑀫𑀭𑀡𑀪𑀬𑀪𑀻𑀢𑀸 𑀫𑀕𑁆𑀕𑀁 𑀢𑁂 𑀑𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀯𑀸𑀭𑁂𑀲𑀺, 𑀢𑀁 𑀢𑁆𑀯𑀁 𑀢𑀚𑁆𑀚𑁂𑀢𑁆𑀯𑀸 𑀧𑀮𑀸𑀧𑁂𑀲𑀺, 𑀲𑀢𑀧𑀢𑁆𑀢𑀲𑀓𑀼𑀡𑁄 𑀧𑀦 𑀢𑁂 𑀧𑀘𑁆𑀘𑀸𑀫𑀺𑀢𑁆𑀢𑁄. 𑀲𑁄 ‘𑀇𑀫𑀁 𑀫𑀸𑀭𑁂𑀢𑁆𑀯𑀸 𑀓𑀳𑀸𑀧𑀡𑁂 𑀕𑀡𑁆𑀳𑀣𑀸’𑀢𑀺 𑀅𑀫𑁆𑀳𑀸𑀓𑀁 𑀆𑀘𑀺𑀓𑁆𑀔𑀺, 𑀢𑁆𑀯𑀁 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀅𑀢𑁆𑀣𑀓𑀸𑀫𑀁 𑀫𑀸𑀢𑀭𑀁 ‘𑀅𑀦𑀢𑁆𑀣𑀓𑀸𑀫𑀸 𑀫𑁂’𑀢𑀺 𑀫𑀜𑁆𑀜𑀲𑀺, 𑀅𑀦𑀢𑁆𑀣𑀓𑀸𑀫𑀁 𑀲𑀢𑀧𑀢𑁆𑀢𑀁 ‘𑀅𑀢𑁆𑀣𑀓𑀸𑀫𑁄 𑀫𑁂’𑀢𑀺. 𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀓𑀢𑀕𑀼𑀡𑁄 𑀦𑀸𑀫 𑀦𑀢𑁆𑀣𑀺, 𑀫𑀸𑀢𑀸 𑀧𑀦 𑀢𑁂 𑀫𑀳𑀸𑀕𑀼𑀡𑀸, 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁮𑁫.

‘‘𑀬𑀣𑀸 𑀫𑀸𑀡𑀯𑀓𑁄 𑀧𑀦𑁆𑀣𑁂, 𑀲𑀺𑀗𑁆𑀕𑀸𑀮𑀺𑀁 𑀯𑀦𑀕𑁄𑀘𑀭𑀺𑀁;

𑀅𑀢𑁆𑀣𑀓𑀸𑀫𑀁 𑀧𑀯𑁂𑀤𑁂𑀦𑁆𑀢𑀺𑀁, 𑀅𑀦𑀢𑁆𑀣𑀓𑀸𑀫𑀸𑀢𑀺 𑀫𑀜𑁆𑀜𑀢𑀺;

𑀅𑀦𑀢𑁆𑀣𑀓𑀸𑀫𑀁 𑀲𑀢𑀧𑀢𑁆𑀢𑀁, 𑀅𑀢𑁆𑀣𑀓𑀸𑀫𑁄𑀢𑀺 𑀫𑀜𑁆𑀜𑀢𑀺.

𑁮𑁬.

‘‘𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄, 𑀧𑀼𑀕𑁆𑀕𑀮𑁄 𑀳𑁄𑀢𑀺 𑀢𑀸𑀤𑀺𑀲𑁄;

𑀳𑀺𑀢𑁂𑀳𑀺 𑀯𑀘𑀦𑀁 𑀯𑀼𑀢𑁆𑀢𑁄, 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀸𑀫𑀢𑁄.

𑁮𑁭.

‘‘𑀬𑁂 ¶ 𑀘 𑀔𑁄 𑀦𑀁 𑀧𑀲𑀁𑀲𑀦𑁆𑀢𑀺, 𑀪𑀬𑀸 𑀉𑀓𑁆𑀓𑀁𑀲𑀬𑀦𑁆𑀢𑀺 𑀯𑀸;

𑀢𑀜𑁆𑀳𑀺 𑀲𑁄 𑀫𑀜𑁆𑀜𑀢𑁂 𑀫𑀺𑀢𑁆𑀢𑀁, 𑀲𑀢𑀧𑀢𑁆𑀢𑀁𑀯 𑀫𑀸𑀡𑀯𑁄’’𑀢𑀺.

𑀢𑀢𑁆𑀣 𑀳𑀺𑀢𑁂𑀳𑀻𑀢𑀺 𑀳𑀺𑀢𑀁 𑀯𑀼𑀟𑁆𑀠𑀺𑀁 𑀇𑀘𑁆𑀙𑀫𑀸𑀦𑁂𑀳𑀺. 𑀯𑀘𑀦𑀁 𑀯𑀼𑀢𑁆𑀢𑁄𑀢𑀺 𑀳𑀺𑀢𑀲𑀼𑀔𑀸𑀯𑀳𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀁 𑀯𑀼𑀢𑁆𑀢𑁄. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀸𑀫𑀢𑁄𑀢𑀺 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀅𑀬𑀁 𑀫𑁂 𑀦 𑀅𑀢𑁆𑀣𑀸𑀯𑀳𑁄 𑀳𑁄𑀢𑀺, 𑀅𑀦𑀢𑁆𑀣𑀸𑀯𑀳𑁄 𑀫𑁂 𑀅𑀬’’𑀦𑁆𑀢𑀺 𑀕𑀡𑁆𑀳𑀦𑁆𑀢𑁄 𑀯𑀸𑀫𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦𑀸𑀫.

𑀬𑁂 ¶ 𑀘 𑀔𑁄 𑀦𑀦𑁆𑀢𑀺 𑀬𑁂 𑀘 𑀔𑁄 𑀢𑀁 𑀅𑀢𑁆𑀢𑀦𑁄 𑀕𑀸𑀳𑀁 𑀕𑀳𑁂𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀁 ‘‘𑀅𑀥𑀺𑀓𑀭𑀡𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀳𑀺 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀪𑀬𑀸 𑀉𑀓𑁆𑀓𑀁𑀲𑀬𑀦𑁆𑀢𑀺 𑀯𑀸𑀢𑀺 𑀇𑀫𑀲𑁆𑀲 𑀕𑀸𑀳𑀲𑁆𑀲 𑀯𑀺𑀲𑁆𑀲𑀝𑁆𑀞𑀧𑀘𑁆𑀘𑀬𑀸 𑀢𑀼𑀫𑁆𑀳𑀸𑀓𑀁 𑀇𑀤𑀜𑁆𑀘𑀺𑀤𑀜𑁆𑀘 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀫𑀸 𑀯𑀺𑀲𑁆𑀲𑀚𑁆𑀚𑀬𑀺𑀢𑁆𑀣, 𑀦 𑀏𑀢𑁂 𑀩𑀸𑀳𑀼𑀲𑀘𑁆𑀘𑀓𑀼𑀮𑀧𑀭𑀺𑀯𑀸𑀭𑀸𑀤𑀻𑀳𑀺 𑀢𑀼𑀫𑁆𑀳𑁂 𑀲𑀫𑁆𑀧𑀸𑀧𑀼𑀡𑀦𑁆𑀢𑀻𑀢𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑀺. 𑀢𑀜𑁆𑀳𑀺 𑀲𑁄 𑀫𑀜𑁆𑀜𑀢𑁂 𑀫𑀺𑀢𑁆𑀢𑀦𑁆𑀢𑀺 𑀬𑁂 𑀏𑀯𑀭𑀽𑀧𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀲𑁄 𑀏𑀓𑀘𑁆𑀘𑁄 𑀩𑀸𑀮𑀧𑀼𑀕𑁆𑀕𑀮𑁄 ¶ 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀫𑀺𑀢𑁆𑀢𑀁 𑀫𑀜𑁆𑀜𑀢𑀺, ‘‘𑀅𑀬𑀁 𑀫𑁂 𑀅𑀢𑁆𑀣𑀓𑀸𑀫𑁄 𑀫𑀺𑀢𑁆𑀢𑁄’’𑀢𑀺 𑀫𑀜𑁆𑀜𑀢𑀺. 𑀲𑀢𑀧𑀢𑁆𑀢𑀁𑀯 𑀫𑀸𑀡𑀯𑁄𑀢𑀺 𑀬𑀣𑀸 𑀅𑀦𑀢𑁆𑀣𑀓𑀸𑀫𑀜𑁆𑀜𑁂𑀯 𑀲𑀢𑀧𑀢𑁆𑀢𑀁 𑀲𑁄 𑀫𑀸𑀡𑀯𑁄 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 ‘‘𑀅𑀢𑁆𑀣𑀓𑀸𑀫𑁄 𑀫𑁂’’𑀢𑀺 𑀫𑀜𑁆𑀜𑀢𑀺, 𑀧𑀡𑁆𑀟𑀺𑀢𑁄 𑀧𑀦 𑀏𑀯𑀭𑀽𑀧𑀁 ‘‘𑀅𑀦𑀼𑀧𑁆𑀧𑀺𑀬𑀪𑀸𑀡𑀻 𑀫𑀺𑀢𑁆𑀢𑁄’’𑀢𑀺 𑀅𑀕𑀳𑁂𑀢𑁆𑀯𑀸 𑀤𑀽𑀭𑀢𑁄𑀯 𑀦𑀁 𑀯𑀺𑀯𑀚𑁆𑀚𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀫𑀺𑀢𑁆𑀢𑁄, 𑀬𑁄 𑀘 𑀫𑀺𑀢𑁆𑀢𑁄 𑀯𑀘𑀻𑀧𑀭𑁄;

𑀅𑀦𑀼𑀧𑁆𑀧𑀺𑀬𑀜𑁆𑀘 𑀬𑁄 𑀆𑀳, 𑀅𑀧𑀸𑀬𑁂𑀲𑀼 𑀘 𑀬𑁄 𑀲𑀔𑀸.

‘‘𑀏𑀢𑁂 𑀅𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑁄, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀤𑀻. 𑀦𑀺. 𑁩.𑁨𑁫𑁯);

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀘𑁄𑀭𑀚𑁂𑀝𑁆𑀞𑀓𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀢𑀧𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁮𑁦] 𑁧𑁦. 𑀧𑀼𑀝𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀤𑁆𑀥𑀸 𑀳𑀺 𑀦𑀽𑀦 𑀫𑀺𑀕𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑀼𑀝𑀤𑀽𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀅𑀫𑀘𑁆𑀘𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ¶ 𑀤𑀸𑀦𑀁 𑀤𑀤𑀫𑀸𑀦𑁄 ‘‘𑀅𑀦𑁆𑀢𑀭𑀸𑀪𑀢𑁆𑀢𑁂 𑀉𑀬𑁆𑀬𑀸𑀦𑁂 𑀘𑀭𑀺𑀢𑀼𑀓𑀸𑀫𑀸 𑀘𑀭𑀦𑁆𑀢𑀽’’𑀢𑀺 𑀆𑀳. 𑀪𑀺𑀓𑁆𑀔𑀽 𑀉𑀬𑁆𑀬𑀸𑀦𑀘𑀸𑀭𑀺𑀓𑀁 𑀘𑀭𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀉𑀬𑁆𑀬𑀸𑀦𑀧𑀸𑀮𑁄 𑀧𑀢𑁆𑀢𑀲𑀫𑁆𑀧𑀦𑁆𑀦𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀧𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀧𑀼𑀧𑁆𑀨𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀨𑀮𑀸𑀦’’𑀦𑁆𑀢𑀺 𑀧𑀼𑀝𑁂 𑀓𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀧𑀸𑀢𑁂𑀢𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀤𑀸𑀭𑀓𑁄 𑀧𑀸𑀢𑀺𑀢𑀧𑀸𑀢𑀺𑀢𑀁 𑀧𑀼𑀝𑀁 𑀯𑀺𑀤𑁆𑀥𑀁𑀲𑁂𑀢𑀺. 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ¶ ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀧𑀼𑀝𑀤𑀽𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑁄 𑀏𑀓𑀤𑀺𑀯𑀲𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀩𑀳𑀽 𑀯𑀸𑀦𑀭𑀸 𑀯𑀲𑀦𑁆𑀢𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀧𑀢𑁆𑀢𑀧𑀼𑀝𑁂 𑀧𑀸𑀢𑁂𑀢𑀺, 𑀚𑁂𑀝𑁆𑀞𑀯𑀸𑀦𑀭𑁄 𑀧𑀸𑀢𑀺𑀢𑀧𑀸𑀢𑀺𑀢𑁂 𑀯𑀺𑀤𑁆𑀥𑀁𑀲𑁂𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀉𑀬𑁆𑀬𑀸𑀦𑀧𑀸𑀮𑁂𑀦 𑀧𑀸𑀢𑀺𑀢𑀧𑀸𑀢𑀺𑀢𑀁 𑀧𑀼𑀝𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀫𑀦𑀸𑀧𑀢𑀭𑀁 𑀓𑀸𑀢𑀼𑀓𑀸𑀫𑁄 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁮.

‘‘𑀅𑀤𑁆𑀥𑀸 ¶ 𑀳𑀺 𑀦𑀽𑀦 𑀫𑀺𑀕𑀭𑀸𑀚𑀸, 𑀧𑀼𑀝𑀓𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀢𑀣𑀸 𑀳𑀺 𑀧𑀼𑀝𑀁 𑀤𑀽𑀲𑁂𑀢𑀺, 𑀅𑀜𑁆𑀜𑀁 𑀦𑀽𑀦 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀫𑀺𑀕𑀭𑀸𑀚𑀸𑀢𑀺 𑀫𑀓𑁆𑀓𑀝𑀁 𑀯𑀡𑁆𑀡𑁂𑀦𑁆𑀢𑁄 𑀯𑀤𑀢𑀺. 𑀧𑀼𑀝𑀓𑀫𑁆𑀫𑀲𑁆𑀲𑀸𑀢𑀺 𑀫𑀸𑀮𑀸𑀧𑀼𑀝𑀓𑀭𑀡𑀲𑁆𑀲. 𑀓𑁄𑀯𑀺𑀤𑁄𑀢𑀺 𑀙𑁂𑀓𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀬𑀁 𑀫𑀺𑀕𑀭𑀸𑀚𑀸 𑀏𑀓𑀁𑀲𑁂𑀦 𑀧𑀼𑀝𑀓𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀫𑀜𑁆𑀜𑁂, 𑀢𑀣𑀸 𑀳𑀺 𑀧𑀸𑀢𑀺𑀢𑀧𑀸𑀢𑀺𑀢𑀁 𑀧𑀼𑀝𑀁 𑀤𑀽𑀲𑁂𑀢𑀺, 𑀅𑀜𑁆𑀜𑀁 𑀦𑀽𑀦 𑀢𑀢𑁄 𑀫𑀦𑀸𑀧𑀢𑀭𑀁 𑀓𑀭𑀺𑀲𑁆𑀲𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀓𑁆𑀓𑀝𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁯.

‘‘𑀦 𑀫𑁂 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸, 𑀧𑀼𑀝𑀓𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀓𑀢𑀁 𑀓𑀢𑀁 𑀔𑁄 𑀤𑀽𑀲𑁂𑀫, 𑀏𑀯𑀁 𑀥𑀫𑁆𑀫𑀫𑀺𑀤𑀁 𑀓𑀼𑀮’’𑀦𑁆𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁦.

‘‘𑀬𑁂𑀲𑀁 𑀯𑁄 𑀏𑀤𑀺𑀲𑁄 𑀥𑀫𑁆𑀫𑁄, 𑀅𑀥𑀫𑁆𑀫𑁄 𑀧𑀦 𑀓𑀻𑀤𑀺𑀲𑁄;

𑀫𑀸 𑀯𑁄 𑀥𑀫𑁆𑀫𑀁 𑀅𑀥𑀫𑁆𑀫𑀁 𑀯𑀸, 𑀅𑀤𑁆𑀤𑀲𑀸𑀫 𑀓𑀼𑀤𑀸𑀘𑀦’’𑀦𑁆𑀢𑀺.

𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀯𑀸𑀦𑀭𑀕𑀡𑀁 𑀕𑀭𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑀸𑀦𑀭𑁄 𑀧𑀼𑀝𑀤𑀽𑀲𑀓𑀤𑀸𑀭𑀓𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀼𑀝𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀉𑀤𑀧𑀸𑀦𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀤𑀧𑀸𑀦𑀯𑀭𑀁 ¶ 𑀯𑀦𑀩𑁆𑀬𑀕𑁆𑀖 𑀓𑀧𑀺, 𑀲𑀺𑀔𑀺𑀦𑀻 𑀘 𑀩𑀮𑀸𑀓 𑀭𑀼𑀘𑀺𑀭𑀯𑀭𑁄;

𑀲𑀼𑀚𑀦𑀸𑀥𑀺𑀧 𑀭𑁄𑀫𑀓 𑀤𑀽𑀲 𑀧𑀼𑀦, 𑀲𑀢𑀧𑀢𑁆𑀢𑀯𑀭𑁄 𑀧𑀼𑀝𑀓𑀫𑁆𑀫 𑀤𑀲𑀸𑀢𑀺.

𑁪. 𑀅𑀩𑁆𑀪𑀦𑁆𑀢𑀭𑀯𑀕𑁆𑀕𑁄

[𑁨𑁮𑁧] 𑁧. 𑀅𑀩𑁆𑀪𑀦𑁆𑀢𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀩𑁆𑀪𑀦𑁆𑀢𑀭𑁄 ¶ 𑀦𑀸𑀫 𑀤𑀼𑀫𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀩𑀺𑀫𑁆𑀩𑀸𑀤𑁂𑀯𑀻𑀣𑁂𑀭𑀺𑀬𑀸 𑀅𑀫𑁆𑀩𑀭𑀲𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀳𑀺 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁂 𑀯𑁂𑀲𑀸𑀮𑀺𑀬𑀁 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁂 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀧𑀜𑁆𑀘 𑀲𑀸𑀓𑀺𑀬𑀲𑀢𑀸𑀦𑀺 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀜𑁆𑀘𑁂𑀯 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺. 𑀅𑀧𑀭𑀪𑀸𑀕𑁂 𑀢𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀦𑁆𑀤𑀓𑁄𑀯𑀸𑀤𑀁 (𑀫. 𑀦𑀺. 𑁩.𑁩𑁯𑁮 𑀆𑀤𑀬𑁄) 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀭𑀺 𑀧𑀦 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂 𑀭𑀸𑀳𑀼𑀮𑀫𑀸𑀢𑀸 𑀩𑀺𑀫𑁆𑀩𑀸𑀤𑁂𑀯𑀻 ‘‘𑀲𑀸𑀫𑀺𑀓𑁄 𑀫𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀧𑀼𑀢𑁆𑀢𑁄𑀧𑀺 𑀫𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀯𑀲𑀢𑀺, 𑀅𑀳𑀁 𑀅𑀕𑀸𑀭𑀫𑀚𑁆𑀛𑁂 𑀓𑀺𑀁𑀓𑀭𑀺𑀲𑁆𑀲𑀸𑀫𑀺, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘 𑀧𑀼𑀢𑁆𑀢𑀜𑁆𑀘 𑀦𑀺𑀩𑀤𑁆𑀥𑀁 𑀧𑀲𑁆𑀲𑀫𑀸𑀦𑀸 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀳𑀺 𑀲𑀤𑁆𑀥𑀺𑀁 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘 𑀧𑀺𑀬𑀧𑀼𑀢𑁆𑀢𑀜𑁆𑀘 𑀧𑀲𑁆𑀲𑀫𑀸𑀦𑀸 𑀏𑀓𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀭𑀸𑀳𑀼𑀮𑀲𑀸𑀫𑀡𑁂𑀭𑁄 𑀆𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀧𑀲𑁆𑀲𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀣𑁂𑀭𑀺𑀬𑀸 𑀉𑀤𑀭𑀯𑀸𑀢𑁄 ¶ 𑀓𑀼𑀧𑁆𑀧𑀺. 𑀲𑀸 𑀧𑀼𑀢𑁆𑀢𑁂 𑀤𑀝𑁆𑀞𑀼𑀁 𑀆𑀕𑀢𑁂 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀜𑁆𑀜𑀸𑀯 𑀆𑀕𑀦𑁆𑀢𑁆𑀯𑀸 𑀅𑀨𑀸𑀲𑀼𑀓𑀪𑀸𑀯𑀁 𑀓𑀣𑀬𑀺𑀁𑀲𑀼. 𑀲𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀢𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀢𑀸𑀢, 𑀅𑀕𑀸𑀭𑀫𑀚𑁆𑀛𑁂 𑀫𑁂 𑀲𑀓𑁆𑀔𑀭𑀬𑁄𑀚𑀺𑀢𑁂 𑀅𑀫𑁆𑀩𑀭𑀲𑁂 𑀧𑀻𑀢𑁂 𑀉𑀤𑀭𑀯𑀸𑀢𑁄 𑀯𑀽𑀧𑀲𑀫𑁆𑀫𑀢𑀺, 𑀇𑀤𑀸𑀦𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫, 𑀓𑀼𑀢𑁄 𑀢𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺. 𑀲𑀸𑀫𑀡𑁂𑀭𑁄 ‘‘𑀮𑀪𑀦𑁆𑀢𑁄 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑀲𑁆𑀲 ¶ 𑀧𑀦𑀸𑀬𑀲𑁆𑀫𑀢𑁄 𑀉𑀧𑀚𑁆𑀛𑀸𑀬𑁄 𑀥𑀫𑁆𑀫𑀲𑁂𑀦𑀸𑀧𑀢𑀺, 𑀆𑀘𑀭𑀺𑀬𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀘𑀽𑀴𑀧𑀺𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀧𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀫𑀳𑀸𑀲𑀫𑁆𑀧𑀢𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀤𑀼𑀫𑁆𑀫𑀼𑀔𑀸𑀓𑀸𑀭𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀣𑁂𑀭𑁄 ‘‘𑀓𑀺𑀁 𑀦𑀼 𑀔𑁄, 𑀭𑀸𑀳𑀼𑀮, 𑀤𑀼𑀫𑁆𑀫𑀼𑀔𑁄 𑀯𑀺𑀬𑀸𑀲𑀻’’𑀢𑀺 𑀆𑀳. ‘‘𑀫𑀸𑀢𑀼 𑀫𑁂, 𑀪𑀦𑁆𑀢𑁂, 𑀣𑁂𑀭𑀺𑀬𑀸 𑀉𑀤𑀭𑀯𑀸𑀢𑁄 𑀓𑀼𑀧𑀺𑀢𑁄’’𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀓𑁆𑀔𑀭𑀬𑁄𑀚𑀺𑀢𑁂𑀦 𑀓𑀺𑀭 𑀅𑀫𑁆𑀩𑀭𑀲𑁂𑀦 𑀨𑀸𑀲𑀼 𑀳𑁄𑀢𑀻’’𑀢𑀺. ‘‘𑀳𑁄𑀢𑀼 𑀮𑀪𑀺𑀲𑁆𑀲𑀸𑀫𑀺, 𑀫𑀸 𑀘𑀺𑀦𑁆𑀢𑀬𑀻’’𑀢𑀺.

𑀲𑁄 ¶ 𑀧𑀼𑀦𑀤𑀺𑀯𑀲𑁂 𑀢𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀫𑀡𑁂𑀭𑀁 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀓𑁄𑀲𑀮𑀭𑀸𑀚𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀉𑀬𑁆𑀬𑀸𑀦𑀧𑀸𑀮𑁄 𑀧𑀺𑀡𑁆𑀟𑀺𑀧𑀓𑁆𑀓𑀸𑀦𑀁 𑀫𑀥𑀼𑀭𑀅𑀫𑁆𑀩𑀸𑀦𑀁 𑀏𑀓𑀁 𑀧𑀼𑀝𑀁 𑀆𑀳𑀭𑀺. 𑀭𑀸𑀚𑀸 𑀅𑀫𑁆𑀩𑀸𑀦𑀁 𑀢𑀘𑀁 𑀅𑀧𑀦𑁂𑀢𑁆𑀯𑀸 𑀲𑀓𑁆𑀔𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁂𑀯 𑀫𑀤𑁆𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀭𑀸𑀚𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀅𑀤𑀸𑀲𑀺 ‘‘𑀳𑀭𑀺𑀢𑁆𑀯𑀸 𑀫𑀸𑀢𑀼 𑀢𑁂 𑀤𑁂𑀳𑀻’’𑀢𑀺. 𑀲𑁄 𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀣𑁂𑀭𑀺𑀬𑀸 𑀧𑀭𑀺𑀪𑀼𑀢𑁆𑀢𑀫𑀢𑁆𑀢𑁂𑀯 𑀉𑀤𑀭𑀯𑀸𑀢𑁄 𑀯𑀽𑀧𑀲𑀫𑀺. 𑀭𑀸𑀚𑀸𑀧𑀺 𑀫𑀦𑀼𑀲𑁆𑀲𑀁 𑀧𑁂𑀲𑁂𑀲𑀺 𑁋 ‘‘𑀣𑁂𑀭𑁄 𑀇𑀥 𑀦𑀺𑀲𑀻𑀤𑀺𑀢𑁆𑀯𑀸 𑀅𑀫𑁆𑀩𑀭𑀲𑀁 𑀦 𑀧𑀭𑀺𑀪𑀼𑀜𑁆𑀚𑀺, 𑀕𑀘𑁆𑀙 𑀓𑀲𑁆𑀲𑀘𑀺 𑀤𑀺𑀦𑁆𑀦𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 𑀣𑁂𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀓𑀣𑁂𑀲𑀺. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀲𑀢𑁆𑀣𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀅𑀪𑀯𑀺𑀲𑁆𑀲, 𑀭𑀸𑀳𑀼𑀮𑀲𑀸𑀫𑀡𑁂𑀭𑁄 𑀧𑀭𑀺𑀡𑀸𑀬𑀓𑀭𑀢𑀦𑀁, 𑀣𑁂𑀭𑀻 𑀇𑀢𑁆𑀣𑀺𑀭𑀢𑀦𑀁, 𑀲𑀓𑀮𑀘𑀓𑁆𑀓𑀯𑀸𑀴𑀭𑀚𑁆𑀚𑀁 𑀏𑀢𑁂𑀲𑀜𑁆𑀜𑁂𑀯 𑀅𑀪𑀯𑀺𑀲𑁆𑀲. 𑀅𑀫𑁆𑀳𑁂𑀳𑀺 𑀏𑀢𑁂 𑀉𑀧𑀝𑁆𑀞𑀳𑀦𑁆𑀢𑁂𑀳𑀺 𑀘𑀭𑀺𑀢𑀩𑁆𑀩𑀁 𑀅𑀲𑁆𑀲, 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀫𑁆𑀳𑁂 𑀉𑀧𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀲𑀼 𑀏𑀢𑁂𑀲𑀼 𑀦 𑀬𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀧𑀫𑀚𑁆𑀚𑀺𑀢𑀼’’𑀦𑁆𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀭𑀺𑀬𑀸 𑀦𑀺𑀩𑀤𑁆𑀥𑀁 𑀅𑀫𑁆𑀩𑀭𑀲𑀁 𑀤𑀸𑀧𑁂𑀲𑀺. 𑀣𑁂𑀭𑁂𑀦 𑀩𑀺𑀫𑁆𑀩𑀸𑀤𑁂𑀯𑀻𑀣𑁂𑀭𑀺𑀬𑀸 𑀅𑀫𑁆𑀩𑀭𑀲𑀲𑁆𑀲 𑀤𑀺𑀦𑁆𑀦𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 ¶ 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀩𑀺𑀫𑁆𑀩𑀸𑀤𑁂𑀯𑀻𑀣𑁂𑀭𑀺𑀁 𑀅𑀫𑁆𑀩𑀭𑀲𑁂𑀦 𑀲𑀦𑁆𑀢𑀧𑁆𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀭𑀸𑀳𑀼𑀮𑀫𑀸𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀅𑀫𑁆𑀩𑀭𑀲𑁂𑀦 𑀲𑀦𑁆𑀢𑀧𑁆𑀧𑀺𑀢𑀸, 𑀧𑀼𑀩𑁆𑀩𑁂𑀧𑁂𑀲 𑀏𑀢𑀁 𑀲𑀦𑁆𑀢𑀧𑁆𑀧𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀡𑁆𑀞𑀧𑀺𑀢𑀖𑀭𑀸𑀯𑀸𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀧𑀩𑁆𑀩𑀢𑀧𑀸𑀤𑀸 𑀑𑀢𑀭𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑀲𑁆𑀲 𑀇𑀲𑀺𑀕𑀡𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄 𑀆𑀯𑀚𑁆𑀚𑀫𑀸𑀦𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀇𑀫𑁂𑀲𑀁 𑀢𑀸𑀧𑀲𑀸𑀦𑀁 𑀅𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀺𑀲𑁆𑀲𑀸𑀫𑀺, 𑀅𑀣 𑀢𑁂 𑀪𑀺𑀦𑁆𑀦𑀸𑀯𑀸𑀲𑀸 𑀉𑀧𑀤𑁆𑀤𑀼𑀢𑀸 𑀘𑀭𑀫𑀸𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀦 𑀮𑀪𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀫𑁂 𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀉𑀧𑀸𑀬𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀇𑀫𑀁 𑀉𑀧𑀸𑀬𑀁 𑀅𑀤𑁆𑀤𑀲 𑁋 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀪𑀤𑁆𑀤𑁂, 𑀲𑀘𑁂 𑀢𑁆𑀯𑀁 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀧𑀓𑁆𑀓𑀁 𑀔𑀸𑀤𑁂𑀬𑁆𑀬𑀸𑀲𑀺, 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀲𑀺, 𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺. 𑀭𑀸𑀚𑀸 𑀤𑁂𑀯𑀺𑀬𑀸 𑀓𑀣𑀁 𑀲𑀼𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀢𑁆𑀣𑀸𑀬 𑀉𑀬𑁆𑀬𑀸𑀦𑀁 𑀧𑁂𑀲𑁂𑀲𑁆𑀲𑀢𑀺, 𑀅𑀣𑀸𑀳𑀁 𑀅𑀫𑁆𑀩𑀸𑀦𑀺 𑀅𑀦𑁆𑀢𑀭𑀥𑀸𑀧𑁂𑀲𑁆𑀲𑀸𑀫𑀺, 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀅𑀫𑁆𑀩𑀸𑀦𑀁 𑀅𑀪𑀸𑀯𑀁 𑀆𑀭𑁄𑀘𑁂𑀲𑁆𑀲𑀦𑁆𑀢𑀺 ¶ , ‘‘𑀓𑁂 𑀢𑁂 𑀔𑀸𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀸𑀧𑀲𑀸 𑀔𑀸𑀤𑀦𑁆𑀢𑀻’’𑀢𑀺 𑀯𑀓𑁆𑀔𑀦𑁆𑀢𑀺, 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀸𑀧𑀲𑁂 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑁆𑀲𑀢𑀺, 𑀏𑀯𑀁 𑀢𑁂 𑀉𑀧𑀤𑁆𑀤𑀼𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺.

𑀲𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀅𑀢𑁆𑀢𑀦𑁄 𑀤𑁂𑀯𑀭𑀸𑀚𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀯𑁄𑀘 𑁋

𑁯𑁧.

‘‘𑀅𑀩𑁆𑀪𑀦𑁆𑀢𑀭𑁄 ¶ 𑀦𑀸𑀫 𑀤𑀼𑀫𑁄, 𑀬𑀲𑁆𑀲 𑀤𑀺𑀩𑁆𑀬𑀫𑀺𑀤𑀁 𑀨𑀮𑀁;

𑀪𑀼𑀢𑁆𑀯𑀸 𑀤𑁄𑀳𑀴𑀺𑀦𑀻 𑀦𑀸𑀭𑀻, 𑀘𑀓𑁆𑀓𑀯𑀢𑁆𑀢𑀺𑀁 𑀯𑀺𑀚𑀸𑀬𑀢𑀺.

𑁯𑁨.

‘‘𑀢𑁆𑀯𑀫𑁆𑀧𑀺 𑀪𑀤𑁆𑀤𑁂 𑀫𑀳𑁂𑀲𑀻𑀲𑀺, 𑀲𑀸 𑀘𑀸𑀧𑀺 𑀧𑀢𑀺𑀦𑁄 𑀧𑀺𑀬𑀸;

𑀆𑀳𑀭𑀺𑀲𑁆𑀲𑀢𑀺 𑀢𑁂 𑀭𑀸𑀚𑀸, 𑀇𑀤𑀁 𑀅𑀩𑁆𑀪𑀦𑁆𑀢𑀭𑀁 𑀨𑀮’’𑀦𑁆𑀢𑀺.

𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑁄 𑀦𑀸𑀫 𑀤𑀼𑀫𑁄𑀢𑀺 𑀇𑀫𑀺𑀦𑀸 𑀢𑀸𑀯 𑀕𑀸𑀫𑀦𑀺𑀕𑀫𑀚𑀦𑀧𑀤𑀧𑀩𑁆𑀩𑀢𑀸𑀤𑀻𑀦𑀁 𑀅𑀲𑀼𑀓𑀲𑁆𑀲 𑀅𑀩𑁆𑀪𑀦𑁆𑀢𑀭𑁄𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀫𑁆𑀩𑀭𑀼𑀓𑁆𑀔𑀁 ¶ 𑀓𑀣𑁂𑀲𑀺. 𑀬𑀲𑁆𑀲 𑀤𑀺𑀩𑁆𑀬𑀫𑀺𑀤𑀁 𑀨𑀮𑀦𑁆𑀢𑀺 𑀬𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀤𑁂𑀯𑀢𑀸𑀦𑀁 𑀧𑀭𑀺𑀪𑁄𑀕𑀸𑀭𑀳𑀁 𑀤𑀺𑀩𑁆𑀬𑀁 𑀨𑀮𑀁. 𑀇𑀤𑀦𑁆𑀢𑀺 𑀧𑀦 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀤𑁄𑀳𑀴𑀺𑀦𑀻𑀢𑀺 𑀲𑀜𑁆𑀚𑀸𑀢𑀤𑁄𑀳𑀴𑀸. 𑀢𑁆𑀯𑀫𑁆𑀧𑀺, 𑀪𑀤𑁆𑀤𑁂, 𑀫𑀳𑁂𑀲𑀻𑀲𑀻𑀢𑀺 𑀢𑁆𑀯𑀁, 𑀲𑁄𑀪𑀦𑁂 𑀫𑀳𑁂𑀲𑀻, 𑀅𑀲𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀳𑁂𑀲𑀻 𑀘𑀸’’𑀢𑀺𑀧𑀺 𑀧𑀸𑀞𑁄. 𑀲𑀸 𑀘𑀸𑀧𑀺 𑀧𑀢𑀺𑀦𑁄 𑀧𑀺𑀬𑀸𑀢𑀺 𑀲𑁄𑀴𑀲𑀦𑁆𑀦𑀁 𑀤𑁂𑀯𑀻𑀲𑀳𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀅𑀕𑁆𑀕𑀫𑀳𑁂𑀲𑀻 𑀘𑀸𑀧𑀺 𑀧𑀢𑀺𑀦𑁄 𑀘𑀸𑀧𑀺 𑀧𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀳𑀭𑀺𑀲𑁆𑀲𑀢𑀺 𑀢𑁂 𑀭𑀸𑀚𑀸, 𑀇𑀤𑀁 𑀅𑀩𑁆𑀪𑀦𑁆𑀢𑀭𑀁 𑀨𑀮𑀦𑁆𑀢𑀺 𑀢𑀲𑁆𑀲𑀸 𑀢𑁂 𑀧𑀺𑀬𑀸𑀬 𑀅𑀕𑁆𑀕𑀫𑀳𑁂𑀲𑀺𑀬𑀸 𑀇𑀤𑀁 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀨𑀮𑀁 𑀭𑀸𑀚𑀸 𑀆𑀳𑀭𑀸𑀧𑁂𑀲𑁆𑀲𑀢𑀺, 𑀲𑀸 𑀢𑁆𑀯𑀁 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑀁 𑀮𑀪𑀺𑀲𑁆𑀲𑀲𑀻𑀢𑀺.

𑀏𑀯𑀁 𑀲𑀓𑁆𑀓𑁄 𑀤𑁂𑀯𑀺𑀬𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀯𑀸 ‘‘𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀺, 𑀫𑀸 𑀧𑀧𑀜𑁆𑀘𑀁 𑀅𑀓𑀸𑀲𑀺, 𑀲𑁆𑀯𑁂 𑀭𑀜𑁆𑀜𑁄 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀸 𑀧𑀼𑀦𑀤𑀺𑀯𑀲𑁂 𑀕𑀺𑀮𑀸𑀦𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀘𑀸𑀭𑀺𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀭𑀸𑀚𑀸 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀲𑀻𑀳𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀦𑀸𑀝𑀓𑀸𑀦𑀺 𑀧𑀲𑁆𑀲𑀦𑁆𑀢𑁄 𑀤𑁂𑀯𑀺𑀁 𑀅𑀤𑀺𑀲𑁆𑀯𑀸 ‘‘𑀓𑀳𑀁, 𑀤𑁂𑀯𑀻’’𑀢𑀺 𑀧𑀭𑀺𑀘𑀸𑀭𑀺𑀓𑁂 𑀧𑀼𑀘𑁆𑀙𑀺. ‘‘𑀕𑀺𑀮𑀸𑀦𑀸, 𑀤𑁂𑀯𑀸’’𑀢𑀺. 𑀲𑁄 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀬𑀦𑀧𑀲𑁆𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀓𑀺𑀁 𑀢𑁂, 𑀪𑀤𑁆𑀤𑁂, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚 𑀅𑀜𑁆𑀜𑀁 𑀅𑀨𑀸𑀲𑀼𑀓𑀁 𑀦𑀸𑀫 𑀦𑀢𑁆𑀣𑀺, 𑀤𑁄𑀳𑀴𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺. ‘‘𑀓𑀺𑀁 𑀇𑀘𑁆𑀙𑀲𑀺, 𑀪𑀤𑁆𑀤𑁂’’𑀢𑀺? ‘‘𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀨𑀮𑀁 𑀤𑁂𑀯𑀸’’𑀢𑀺. ‘‘𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁄 𑀦𑀸𑀫 𑀓𑀳𑀁 𑀅𑀢𑁆𑀣𑀻’’𑀢𑀺? ‘‘𑀦𑀸𑀳𑀁, 𑀤𑁂𑀯, 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀁 𑀚𑀸𑀦𑀸𑀫𑀺, 𑀢𑀲𑁆𑀲 𑀧𑀦 𑀫𑁂 𑀨𑀮𑀁 𑀮𑀪𑀫𑀸𑀦𑀸𑀬 𑀚𑀻𑀯𑀺𑀢𑀁 𑀅𑀢𑁆𑀣𑀺, 𑀅𑀮𑀪𑀫𑀸𑀦𑀸𑀬 𑀦𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺 𑀆𑀳𑀭𑀸𑀧𑁂𑀲𑁆𑀲𑀸𑀫𑀺 ¶ , 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀭𑀸𑀚𑀸 𑀤𑁂𑀯𑀺𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀤𑁂𑀯𑀺𑀬𑀸 ¶ 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁂 𑀦𑀸𑀫 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯 𑀤𑁆𑀯𑀺𑀦𑁆𑀦𑀁 𑀅𑀫𑁆𑀩𑀸𑀦𑀁 𑀅𑀦𑁆𑀢𑀭𑁂 𑀞𑀺𑀢𑁄 𑀅𑀫𑁆𑀩𑁄 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁄 𑀦𑀸𑀫, 𑀉𑀬𑁆𑀬𑀸𑀦𑀁 𑀧𑁂𑀲𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀅𑀫𑁆𑀩𑀢𑁄 𑀨𑀮𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀤𑀸𑀧𑁂𑀣𑀸’’𑀢𑀺.

𑀭𑀸𑀚𑀸 ‘‘𑀲𑀸𑀥𑀼, 𑀏𑀯𑀭𑀽𑀧𑀁 𑀅𑀫𑁆𑀩𑀁 𑀆𑀳𑀭𑀣𑀸’’𑀢𑀺 𑀉𑀬𑁆𑀬𑀸𑀦𑀁 𑀧𑁂𑀲𑁂𑀲𑀺. 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀉𑀬𑁆𑀬𑀸𑀦𑁂 𑀅𑀫𑁆𑀩𑀸𑀦𑀺 𑀔𑀸𑀤𑀺𑀢𑀲𑀤𑀺𑀲𑀸𑀦𑀺 𑀓𑀢𑁆𑀯𑀸 𑀅𑀦𑁆𑀢𑀭𑀥𑀸𑀧𑁂𑀲𑀺. 𑀅𑀫𑁆𑀩𑀢𑁆𑀣𑀸𑀬 𑀕𑀢𑀸 𑀫𑀦𑀼𑀲𑁆𑀲𑀸 𑀲𑀓𑀮𑀉𑀬𑁆𑀬𑀸𑀦𑀁 𑀯𑀺𑀘𑀭𑀦𑁆𑀢𑀸 𑀏𑀓𑀁 𑀅𑀫𑁆𑀩𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀅𑀫𑁆𑀩𑀸𑀦𑀁 𑀅𑀪𑀸𑀯𑀁 𑀭𑀜𑁆𑀜𑁄 𑀓𑀣𑀬𑀺𑀁𑀲𑀼. ‘‘𑀓𑁂 ¶ 𑀅𑀫𑁆𑀩𑀸𑀦𑀺 𑀔𑀸𑀤𑀦𑁆𑀢𑀻’’𑀢𑀺? ‘‘𑀢𑀸𑀧𑀲𑀸, 𑀤𑁂𑀯𑀸’’𑀢𑀺. ‘‘𑀢𑀸𑀧𑀲𑁂 𑀉𑀬𑁆𑀬𑀸𑀦𑀢𑁄 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀣𑀸’’𑀢𑀺. 𑀫𑀦𑀼𑀲𑁆𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦𑀻𑀳𑀭𑀺𑀁𑀲𑀼. 𑀲𑀓𑁆𑀓𑀲𑁆𑀲 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺. 𑀤𑁂𑀯𑀻 𑀅𑀫𑁆𑀩𑀨𑀮𑀢𑁆𑀣𑀸𑀬 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀬𑁂𑀯. 𑀭𑀸𑀚𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀧𑀲𑁆𑀲𑀦𑁆𑀢𑁄 𑀅𑀫𑀘𑁆𑀘𑁂 𑀘 𑀩𑁆𑀭𑀸𑀳𑁆𑀫𑀡𑁂 𑀘 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀆𑀳𑀁𑀲𑀼 𑁋 ‘‘𑀤𑁂𑀯, 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁄 𑀦𑀸𑀫 𑀤𑁂𑀯𑀢𑀸𑀦𑀁 𑀧𑀭𑀺𑀪𑁄𑀕𑁄, ‘𑀳𑀺𑀫𑀯𑀦𑁆𑀢𑁂 𑀓𑀜𑁆𑀘𑀦𑀕𑀼𑀳𑀸𑀬 𑀅𑀦𑁆𑀢𑁄 𑀅𑀢𑁆𑀣𑀻’𑀢𑀺 𑀅𑀬𑀁 𑀦𑁄 𑀧𑀭𑀫𑁆𑀧𑀭𑀸𑀕𑀢𑁄 𑀅𑀦𑀼𑀲𑁆𑀲𑀯𑁄’’𑀢𑀺. ‘‘𑀓𑁄 𑀧𑀦 𑀢𑀢𑁄 𑀅𑀫𑁆𑀩𑀁 𑀆𑀳𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺? ‘‘𑀦 𑀲𑀓𑁆𑀓𑀸 𑀢𑀢𑁆𑀣 𑀫𑀦𑀼𑀲𑁆𑀲𑀪𑀽𑀢𑁂𑀦 𑀕𑀦𑁆𑀢𑀼𑀁, 𑀏𑀓𑀁 𑀲𑀼𑀯𑀧𑁄𑀢𑀓𑀁 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀓𑀼𑀮𑁂 𑀏𑀓𑁄 𑀲𑀼𑀯𑀧𑁄𑀢𑀓𑁄 𑀫𑀳𑀸𑀲𑀭𑀻𑀭𑁄 𑀓𑀼𑀫𑀸𑀭𑀓𑀸𑀦𑀁 𑀬𑀸𑀦𑀓𑀘𑀓𑁆𑀓𑀦𑀸𑀪𑀺𑀫𑀢𑁆𑀢𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀯𑀸 𑀉𑀧𑀸𑀬𑀓𑀼𑀲𑀮𑁄. 𑀭𑀸𑀚𑀸 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀢𑀸𑀢 𑀲𑀼𑀯𑀧𑁄𑀢𑀓, 𑀅𑀳𑀁 𑀢𑀯 𑀩𑀳𑀽𑀧𑀓𑀸𑀭𑁄, 𑀓𑀜𑁆𑀘𑀦𑀧𑀜𑁆𑀚𑀭𑁂 𑀯𑀲𑀲𑀺, 𑀲𑀼𑀯𑀡𑁆𑀡𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂 𑀔𑀸𑀤𑀲𑀺, 𑀲𑀓𑁆𑀔𑀭𑀧𑀸𑀦𑀓𑀁 𑀧𑀺𑀯𑀲𑀺, 𑀢𑀬𑀸𑀧𑀺 𑀅𑀫𑁆𑀳𑀸𑀓𑀁 𑀏𑀓𑀁 𑀓𑀺𑀘𑁆𑀘𑀁 𑀦𑀺𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀓𑀺𑀁, 𑀤𑁂𑀯𑀸’’𑀢𑀺. ‘‘𑀢𑀸𑀢 𑀤𑁂𑀯𑀺𑀬𑀸 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀘 𑀅𑀫𑁆𑀩𑁄 𑀳𑀺𑀫𑀯𑀦𑁆𑀢𑁂 𑀓𑀜𑁆𑀘𑀦𑀧𑀩𑁆𑀩𑀢𑀦𑁆𑀢𑀭𑁂 𑀅𑀢𑁆𑀣𑀺 𑀤𑁂𑀯𑀢𑀸𑀦𑀁 𑀧𑀭𑀺𑀪𑁄𑀕𑁄, 𑀦 𑀲𑀓𑁆𑀓𑀸 ¶ 𑀫𑀦𑀼𑀲𑁆𑀲𑀪𑀽𑀢𑁂𑀦 𑀢𑀢𑁆𑀣 𑀕𑀦𑁆𑀢𑀼𑀁, 𑀢𑀬𑀸 𑀢𑀢𑁄 𑀅𑀫𑁆𑀩𑀨𑀮𑀁 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀭𑀸𑀚𑀸 𑀲𑀼𑀯𑀡𑁆𑀡𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂 𑀔𑀸𑀤𑀸𑀧𑁂𑀢𑁆𑀯𑀸 𑀲𑀓𑁆𑀔𑀭𑀧𑀸𑀦𑀓𑀁 𑀧𑀸𑀬𑁂𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀢𑀲𑁆𑀲 𑀧𑀓𑁆𑀔𑀦𑁆𑀢𑀭𑀸𑀦𑀺 𑀫𑀓𑁆𑀔𑁂𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑁂 𑀞𑀢𑁆𑀯𑀸 𑀆𑀓𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄𑀧𑀺 𑀭𑀜𑁆𑀜𑁄 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀦𑁆𑀢𑁄 𑀫𑀦𑀼𑀲𑁆𑀲𑀧𑀣𑀁 𑀅𑀢𑀺𑀓𑁆𑀓𑀫𑁆𑀫 𑀳𑀺𑀫𑀯𑀦𑁆𑀢𑁂 𑀧𑀞𑀫𑁂 𑀧𑀩𑁆𑀩𑀢𑀦𑁆𑀢𑀭𑁂 𑀯𑀲𑀦𑁆𑀢𑀸𑀦𑀁 𑀲𑀼𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁄 𑀦𑀸𑀫 𑀓𑀢𑁆𑀣 𑀅𑀢𑁆𑀣𑀺, 𑀓𑀣𑁂𑀣 𑀫𑁂 𑀢𑀁 𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀁 𑀦 𑀚𑀸𑀦𑀸𑀫, 𑀤𑀼𑀢𑀺𑀬𑁂 𑀧𑀩𑁆𑀩𑀢𑀦𑁆𑀢𑀭𑁂 𑀲𑀼𑀓𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺.

𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀤𑀼𑀢𑀺𑀬𑀁 𑀧𑀩𑁆𑀩𑀢𑀦𑁆𑀢𑀭𑀁 𑀅𑀕𑀫𑀸𑀲𑀺, 𑀢𑀣𑀸 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁 ¶ , 𑀧𑀜𑁆𑀘𑀫𑀁, 𑀙𑀝𑁆𑀞𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀦𑀁 𑀲𑀼𑀓𑀸 ‘‘𑀦 𑀫𑀬𑀁 𑀚𑀸𑀦𑀸𑀫, 𑀲𑀢𑁆𑀢𑀫𑀧𑀩𑁆𑀩𑀢𑀦𑁆𑀢𑀭𑁂 𑀲𑀼𑀓𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑀢𑁆𑀣𑀧𑀺 𑀕𑀦𑁆𑀢𑁆𑀯𑀸 ‘‘𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑁄 𑀦𑀸𑀫 𑀓𑀢𑁆𑀣 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀓𑀜𑁆𑀘𑀦𑀧𑀩𑁆𑀩𑀢𑀦𑁆𑀢𑀭𑁂’’𑀢𑀺 𑀆𑀳𑀁𑀲𑀼. ‘‘𑀅𑀳𑀁 𑀢𑀲𑁆𑀲 𑀨𑀮𑀢𑁆𑀣𑀸𑀬 𑀆𑀕𑀢𑁄, 𑀫𑀁 𑀢𑀢𑁆𑀣 𑀦𑁂𑀢𑁆𑀯𑀸 𑀢𑀢𑁄 𑀫𑁂 𑀨𑀮𑀁 𑀤𑀸𑀧𑁂𑀣𑀸’’𑀢𑀺. 𑀲𑀼𑀓𑀕𑀡𑀸 ¶ 𑀆𑀳𑀁𑀲𑀼 𑁋 ‘‘𑀲𑀫𑁆𑀫, 𑀲𑁄 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀪𑁄𑀕𑁄, 𑀦 𑀲𑀓𑁆𑀓𑀸 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀲𑀓𑀮𑀭𑀼𑀓𑁆𑀔𑁄 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀳𑀺 𑀮𑁄𑀳𑀚𑀸𑀮𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀲𑀳𑀲𑁆𑀲𑀓𑀼𑀫𑁆𑀪𑀡𑁆𑀟𑀭𑀓𑁆𑀔𑀲𑀸 𑀭𑀓𑁆𑀔𑀦𑁆𑀢𑀺, 𑀢𑁂𑀳𑀺 𑀤𑀺𑀝𑁆𑀞𑀲𑁆𑀲 𑀚𑀻𑀯𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑀤𑀺𑀲𑀝𑁆𑀞𑀸𑀦𑀁, 𑀫𑀸 𑀢𑀢𑁆𑀣 𑀧𑀢𑁆𑀣𑀦𑀁 𑀓𑀭𑀻’’𑀢𑀺. ‘‘𑀲𑀘𑁂 𑀢𑀼𑀫𑁆𑀳𑁂 𑀦 𑀕𑀘𑁆𑀙𑀣, 𑀫𑀬𑁆𑀳𑀁 𑀞𑀸𑀦𑀁 𑀆𑀘𑀺𑀓𑁆𑀔𑀣𑀸’’𑀢𑀺. ‘‘𑀢𑁂𑀦 𑀳𑀺 𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘 𑀞𑀸𑀦𑁂𑀦 𑀬𑀸𑀳𑀻’’𑀢𑀺. 𑀲𑁄 𑀢𑁂𑀳𑀺 𑀆𑀘𑀺𑀓𑁆𑀔𑀺𑀢𑀯𑀲𑁂𑀦𑁂𑀯 𑀲𑀼𑀝𑁆𑀞𑀼 𑀫𑀕𑁆𑀕𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀭𑀓𑁆𑀔𑀲𑀸𑀦𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀲𑀫𑀬𑁂 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑁂𑀦 𑀫𑀽𑀮𑀦𑁆𑀢𑀭𑁂𑀦 𑀲𑀡𑀺𑀓𑀁 𑀅𑀪𑀺𑀭𑀼𑀳𑀺𑀢𑀼𑀁 𑀆𑀭𑀪𑀺. 𑀮𑁄𑀳𑀚𑀸𑀮𑀁 ‘‘𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺 ¶ .

𑀭𑀓𑁆𑀔𑀲𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀼𑀓𑀧𑁄𑀢𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀩𑀘𑁄𑀭𑁄𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀫𑁆𑀫𑀓𑀭𑀡𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀏𑀓𑁄 ‘‘𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀺𑀮𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳, 𑀅𑀧𑀭𑁄 ‘‘𑀳𑀢𑁆𑀣𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀧𑀼𑀜𑁆𑀚𑀺𑀢𑁆𑀯𑀸 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺, 𑀅𑀧𑀭𑁄 ‘‘𑀤𑁆𑀯𑁂𑀥𑀸 𑀨𑀸𑀮𑁂𑀢𑁆𑀯𑀸 𑀅𑀗𑁆𑀕𑀸𑀭𑁂𑀲𑀼 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀲𑀁 𑀓𑀫𑁆𑀫𑀓𑀭𑀡𑀲𑀁𑀯𑀺𑀥𑀸𑀦𑀁 𑀲𑀼𑀢𑁆𑀯𑀸𑀧𑀺 𑀅𑀲𑀦𑁆𑀢𑀲𑀺𑀢𑁆𑀯𑀸𑀯 𑀢𑁂 𑀭𑀓𑁆𑀔𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀭𑀓𑁆𑀔𑀲𑀸, 𑀢𑀼𑀫𑁆𑀳𑁂 𑀓𑀲𑁆𑀲 𑀫𑀦𑀼𑀲𑁆𑀲𑀸’’𑀢𑀺 𑀆𑀳. ‘‘𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲𑀸’’𑀢𑀺. ‘‘𑀅𑀫𑁆𑀪𑁄, 𑀢𑀼𑀫𑁆𑀳𑁂𑀧𑀺 𑀏𑀓𑀲𑁆𑀲 𑀭𑀜𑁆𑀜𑁄𑀯 𑀫𑀦𑀼𑀲𑁆𑀲𑀸, 𑀅𑀳𑀫𑁆𑀧𑀺 𑀭𑀜𑁆𑀜𑁄𑀯 𑀫𑀦𑀼𑀲𑁆𑀲𑁄, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀁 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀨𑀮𑀢𑁆𑀣𑀸𑀬 𑀧𑁂𑀲𑁂𑀲𑀺, 𑀲𑁆𑀯𑀸𑀳𑀁 𑀢𑀢𑁆𑀣𑁂𑀯 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀢𑁆𑀯𑀸 𑀆𑀕𑀢𑁄. 𑀬𑁄 𑀳𑀺 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀽𑀦𑀜𑁆𑀘𑁂𑀯 𑀲𑀸𑀫𑀺𑀓𑀲𑁆𑀲 𑀘 𑀅𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀢𑀺, 𑀲𑁄 𑀤𑁂𑀯𑀮𑁄𑀓𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀇𑀫𑀫𑁆𑀳𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀘𑀯𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁩.

‘‘𑀪𑀢𑁆𑀢𑀼𑀭𑀢𑁆𑀣𑁂 𑀧𑀭𑀓𑁆𑀓𑀦𑁆𑀢𑁄, 𑀬𑀁 𑀞𑀸𑀦𑀫𑀥𑀺𑀕𑀘𑁆𑀙𑀢𑀺;

𑀲𑀽𑀭𑁄 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀻, 𑀮𑀪𑀫𑀸𑀦𑁄 𑀪𑀯𑀸𑀫𑀳’’𑀦𑁆𑀢𑀺.

𑀢𑀢𑁆𑀣 𑀪𑀢𑁆𑀢𑀼𑀭𑀢𑁆𑀣𑁂𑀢𑀺 𑀪𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀪𑀢𑁆𑀢𑀸𑀤𑀻𑀳𑀺 𑀪𑀭𑀡𑀧𑁄𑀲𑀓𑀸 𑀧𑀺𑀢𑀸 𑀫𑀸𑀢𑀸 𑀲𑀸𑀫𑀺𑀓𑁄 𑀘, 𑀇𑀢𑀺 𑀢𑀺𑀯𑀺𑀥𑀲𑁆𑀲𑀧𑁂𑀢𑀲𑁆𑀲 𑀪𑀢𑁆𑀢𑀼 𑀅𑀢𑁆𑀣𑀸𑀬. 𑀧𑀭𑀓𑁆𑀓𑀦𑁆𑀢𑁄𑀢𑀺 𑀧𑀭𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀯𑀸𑀬𑀫𑀦𑁆𑀢𑁄. 𑀬𑀁 𑀞𑀸𑀦𑀫𑀥𑀺𑀕𑀘𑁆𑀙𑀢𑀻𑀢𑀺 𑀬𑀁 𑀲𑀼𑀔𑀓𑀸𑀭𑀡𑀁 𑀬𑀲𑀁 𑀯𑀸 𑀮𑀸𑀪𑀁 𑀯𑀸 𑀲𑀕𑁆𑀕𑀁 𑀯𑀸 𑀅𑀥𑀺𑀕𑀘𑁆𑀙𑀢𑀺. 𑀲𑀽𑀭𑁄𑀢𑀺 𑀅𑀪𑀻𑀭𑀼 𑀯𑀺𑀓𑁆𑀓𑀫𑀲𑀫𑁆𑀧𑀦𑁆𑀦𑁄. 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀻𑀢𑀺 ¶ 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀢𑀺𑀯𑀺𑀥𑀲𑁆𑀲𑀧𑀺 𑀪𑀢𑁆𑀢𑀼 𑀅𑀢𑁆𑀣𑀸𑀬 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀦𑁆𑀢𑁄. 𑀮𑀪𑀫𑀸𑀦𑁄 𑀪𑀯𑀸𑀫𑀳𑀦𑁆𑀢𑀺 𑀬𑀁 𑀲𑁄 𑀏𑀯𑀭𑀽𑀧𑁄 𑀲𑀽𑀭𑁄 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀯𑀸 ¶ 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀯𑀸 𑀮𑀪𑀢𑀺, 𑀅𑀳𑀫𑁆𑀧𑀺 𑀢𑀁 𑀮𑀪𑀫𑀸𑀦𑁄 𑀪𑀯𑀸𑀫𑀺, 𑀢𑀲𑁆𑀫𑀸 𑀳𑀸𑀲𑁄𑀯 𑀫𑁂 𑀏𑀢𑁆𑀣, 𑀦 𑀢𑀸𑀲𑁄, 𑀓𑀺𑀁 𑀫𑀁 𑀢𑀼𑀫𑁆𑀳𑁂 𑀢𑀸𑀲𑁂𑀣𑀸𑀢𑀺.

𑀏𑀯𑀁 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 ‘‘𑀥𑀫𑁆𑀫𑀺𑀓𑁄 𑀏𑀲, 𑀦 𑀲𑀓𑁆𑀓𑀸 𑀫𑀸𑀭𑁂𑀢𑀼𑀁, 𑀯𑀺𑀲𑁆𑀲𑀚𑁆𑀚𑁂𑀫 𑀦’’𑀦𑁆𑀢𑀺 𑀯𑀢𑁆𑀯𑀸 𑀲𑀼𑀓𑀧𑁄𑀢𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘𑀅𑀫𑁆𑀪𑁄 𑀲𑀼𑀓𑀧𑁄𑀢𑀓, 𑀫𑀼𑀢𑁆𑀢𑁄𑀲𑀺, 𑀅𑀫𑁆𑀳𑀸𑀓𑀁 𑀳𑀢𑁆𑀣𑀢𑁄 𑀲𑁄𑀢𑁆𑀣𑀺𑀦𑀸 𑀕𑀘𑁆𑀙𑀸’’𑀢𑀺 ¶ 𑀆𑀳𑀁𑀲𑀼. ‘‘𑀫𑀬𑁆𑀳𑀁 𑀆𑀕𑀫𑀦𑀁 𑀫𑀸 𑀢𑀼𑀘𑁆𑀙𑀁 𑀓𑀭𑁄𑀣, 𑀤𑁂𑀣 𑀫𑁂 𑀏𑀓𑀁 𑀅𑀫𑁆𑀩𑀨𑀮’’𑀦𑁆𑀢𑀺. ‘‘𑀲𑀼𑀓𑀧𑁄𑀢𑀓, 𑀢𑀼𑀬𑁆𑀳𑀁 𑀏𑀓𑀁 𑀅𑀫𑁆𑀩𑀨𑀮𑀁 𑀤𑀸𑀢𑀼𑀁 𑀦𑀸𑀫 𑀦 𑀪𑀸𑀭𑁄, 𑀇𑀫𑀲𑁆𑀫𑀺𑀁 𑀧𑀦 𑀭𑀼𑀓𑁆𑀔𑁂 𑀅𑀫𑁆𑀩𑀸𑀦𑀺 𑀅𑀗𑁆𑀓𑁂𑀢𑁆𑀯𑀸 𑀕𑀳𑀺𑀢𑀸𑀦𑀺, 𑀏𑀓𑀲𑁆𑀫𑀺𑀁 𑀨𑀮𑁂 𑀅𑀲𑀫𑁂𑀦𑁆𑀢𑁂 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀦𑀢𑁆𑀣𑀺. 𑀯𑁂𑀲𑁆𑀲𑀯𑀡𑁂𑀦 𑀳𑀺 𑀓𑀼𑀚𑁆𑀛𑀺𑀢𑁆𑀯𑀸 𑀲𑀓𑀺𑀁 𑀑𑀮𑁄𑀓𑀺𑀢𑁂 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀸 𑀯𑀺𑀬 𑀓𑀼𑀫𑁆𑀪𑀡𑁆𑀟𑀲𑀳𑀲𑁆𑀲𑀁 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀧𑁆𑀧𑀓𑀺𑀭𑀻𑀬𑀢𑀺, 𑀢𑁂𑀦 𑀢𑁂 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫, 𑀮𑀪𑀦𑀝𑁆𑀞𑀸𑀦𑀁 𑀧𑀦 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑁄 𑀓𑁄𑀘𑀺 𑀤𑁂𑀢𑀼, 𑀨𑀮𑁂𑀦𑁂𑀯 𑀫𑁂 𑀅𑀢𑁆𑀣𑁄, 𑀮𑀪𑀦𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀣𑀸’’𑀢𑀺. ‘‘𑀏𑀢𑀲𑁆𑀲 𑀓𑀜𑁆𑀘𑀦𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑀭𑁂 𑀚𑁄𑀢𑀺𑀭𑀲𑁄 𑀦𑀸𑀫 𑀢𑀸𑀧𑀲𑁄 𑀅𑀕𑁆𑀕𑀺𑀁 𑀚𑀼𑀳𑀫𑀸𑀦𑁄 𑀓𑀜𑁆𑀘𑀦𑀧𑀢𑁆𑀢𑀺𑀬𑀸 𑀦𑀸𑀫 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀢𑀺 𑀯𑁂𑀲𑁆𑀲𑀯𑀡𑀲𑁆𑀲 𑀓𑀼𑀮𑀽𑀧𑀓𑁄, 𑀯𑁂𑀲𑁆𑀲𑀯𑀡𑁄 𑀢𑀲𑁆𑀲 𑀦𑀺𑀩𑀤𑁆𑀥𑀁 𑀘𑀢𑁆𑀢𑀸𑀭𑀺 𑀅𑀫𑁆𑀩𑀨𑀮𑀸𑀦𑀺 𑀧𑁂𑀲𑁂𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺.

𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀢𑀸𑀧𑀲𑁄 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀦𑁆𑀢𑀺𑀓𑀸’’𑀢𑀺. ‘‘𑀓𑀺𑀫𑀢𑁆𑀣𑀸𑀬 𑀆𑀕𑀢𑁄𑀲𑀻’’𑀢𑀺? ‘‘𑀲𑀸𑀫𑀺, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀅𑀩𑁆𑀪𑀦𑁆𑀢𑀭𑀅𑀫𑁆𑀩𑀧𑀓𑁆𑀓𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄, 𑀢𑀤𑀢𑁆𑀣𑀁 𑀆𑀕𑀢𑁄𑀫𑁆𑀳𑀺, 𑀭𑀓𑁆𑀔𑀲𑀸 𑀧𑀦 𑀫𑁂 𑀲𑀬𑀁 𑀅𑀫𑁆𑀩𑀧𑀓𑁆𑀓𑀁 𑀅𑀤𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀦𑀺𑀲𑀻𑀤, 𑀮𑀪𑀺𑀲𑁆𑀲𑀲𑀻’’𑀢𑀺. 𑀅𑀣𑀲𑁆𑀲 𑀯𑁂𑀲𑁆𑀲𑀯𑀡𑁄 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀧𑁂𑀲𑁂𑀲𑀺. 𑀢𑀸𑀧𑀲𑁄 𑀢𑀢𑁄 𑀤𑁆𑀯𑁂 𑀧𑀭𑀺𑀪𑀼𑀜𑁆𑀚𑀺, 𑀏𑀓𑀁 𑀲𑀼𑀯𑀧𑁄𑀢𑀓𑀲𑁆𑀲 𑀔𑀸𑀤𑀦𑀢𑁆𑀣𑀸𑀬 𑀅𑀤𑀸𑀲𑀺. 𑀢𑁂𑀦 𑀢𑀲𑁆𑀫𑀺𑀁 𑀔𑀸𑀤𑀺𑀢𑁂 𑀏𑀓𑀁 𑀨𑀮𑀁 𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀯𑀧𑁄𑀢𑀓𑀲𑁆𑀲 𑀕𑀻𑀯𑀸𑀬 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀕𑀘𑁆𑀙𑀸’’𑀢𑀺 𑀲𑀼𑀓𑀧𑁄𑀢𑀓𑀁 𑀯𑀺𑀲𑁆𑀲𑀚𑁆𑀚𑁂𑀲𑀺 ¶ . 𑀲𑁄 𑀢𑀁 𑀆𑀳𑀭𑀺𑀢𑁆𑀯𑀸 𑀤𑁂𑀯𑀺𑀬𑀸 𑀅𑀤𑀸𑀲𑀺. 𑀲𑀸 𑀢𑀁 𑀔𑀸𑀤𑀺𑀢𑁆𑀯𑀸 𑀤𑁄𑀳𑀴𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑀺, 𑀢𑀢𑁄𑀦𑀺𑀤𑀸𑀦𑀁 𑀧𑀦𑀲𑁆𑀲𑀸 𑀧𑀼𑀢𑁆𑀢𑁄 𑀦𑀸𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁂𑀯𑀻 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀲𑀼𑀓𑁄 𑀆𑀦𑀦𑁆𑀤𑁄, 𑀅𑀫𑁆𑀩𑀧𑀓𑁆𑀓𑀤𑀸𑀬𑀓𑁄 𑀢𑀸𑀧𑀲𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀉𑀬𑁆𑀬𑀸𑀦𑁂 𑀦𑀺𑀯𑀼𑀢𑁆𑀣𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀩𑁆𑀪𑀦𑁆𑀢𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁮𑁨] 𑁨. 𑀲𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸

𑀲𑁂𑀬𑁆𑀬𑀁𑀲𑁄 ¶ 𑀲𑁂𑀬𑁆𑀬𑀲𑁄 𑀳𑁄𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑁄𑀲𑀮𑀭𑀜𑁆𑀜𑁄 𑀅𑀫𑀘𑁆𑀘𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀭𑀜𑁆𑀜𑁄 𑀩𑀳𑀽𑀧𑀓𑀸𑀭𑁄 𑀲𑀩𑁆𑀩𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀓𑁄 𑀅𑀳𑁄𑀲𑀺. 𑀭𑀸𑀚𑀸 ‘‘𑀩𑀳𑀽𑀧𑀓𑀸𑀭𑁄 𑀫𑁂 𑀅𑀬’’𑀦𑁆𑀢𑀺 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺. 𑀢𑀁 𑀅𑀲𑀳𑀫𑀸𑀦𑀸 𑀅𑀜𑁆𑀜𑁂 𑀭𑀜𑁆𑀜𑁄 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀢𑀁 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑁄𑀲𑀁 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 𑀢𑀁 𑀲𑀻𑀮𑀯𑀦𑁆𑀢𑀁 𑀦𑀺𑀤𑁆𑀤𑁄𑀲𑀁 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀏𑀓𑀓𑁄 𑀯𑀲𑀦𑁆𑀢𑁄 𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀺𑀢𑁆𑀯𑀸 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀭𑀸𑀚𑀸 𑀅𑀧𑀭𑀪𑀸𑀕𑁂 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀧𑀼𑀭𑀺𑀫𑀬𑀲𑀢𑁄 𑀫𑀳𑀦𑁆𑀢𑀢𑀭𑀁 𑀬𑀲𑀁 𑀅𑀤𑀸𑀲𑀺. 𑀲𑁄 ‘‘𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀽𑀦𑀺 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀅𑀦𑀢𑁆𑀣𑁄 𑀓𑀺𑀭 𑀢𑁂 𑀉𑀧𑁆𑀧𑀦𑁆𑀦𑁄𑀢𑀺 𑀅𑀲𑁆𑀲𑀼𑀫𑁆𑀳𑀸’’𑀢𑀺 𑀆𑀳. ‘‘𑀆𑀫, 𑀪𑀦𑁆𑀢𑁂, 𑀉𑀧𑁆𑀧𑀦𑁆𑀦𑁄, 𑀅𑀳𑀁 𑀧𑀦 𑀢𑁂𑀦 𑀅𑀦𑀢𑁆𑀣𑁂𑀦 𑀅𑀢𑁆𑀣𑀁 𑀅𑀓𑀸𑀲𑀺𑀁, 𑀩𑀦𑁆𑀥𑀦𑀸𑀕𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀲𑀺’’𑀦𑁆𑀢𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀉𑀧𑀸𑀲𑀓, 𑀢𑁆𑀯𑀜𑁆𑀜𑁂𑀯 𑀅𑀦𑀢𑁆𑀣𑁂𑀦 𑀅𑀢𑁆𑀣𑀁 𑀆𑀳𑀭𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀅𑀦𑀢𑁆𑀣𑁂𑀦 𑀅𑀢𑁆𑀣𑀁 𑀆𑀳𑀭𑀺𑀁 𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 ¶ 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺 ¶ , 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀣𑀲𑁆𑀲𑁂𑀓𑁄 𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀲𑁆𑀲𑀺. 𑀧𑀸𑀤𑀫𑀽𑀮𑀺𑀓𑀸𑀤𑀬𑁄 𑀜𑀢𑁆𑀯𑀸 ‘‘𑀅𑀲𑀼𑀓𑀅𑀫𑀘𑁆𑀘𑁄 𑀅𑀦𑁆𑀢𑁂𑀧𑀼𑀭𑁂 𑀧𑀤𑀼𑀝𑁆𑀞𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀬𑀣𑀸𑀲𑀪𑀸𑀯𑀢𑁄 𑀜𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀸 𑀫𑀁 𑀇𑀢𑁄 𑀧𑀝𑁆𑀞𑀸𑀬 𑀉𑀧𑀝𑁆𑀞𑀸𑀳𑀻’’𑀢𑀺 𑀦𑀺𑀩𑁆𑀩𑀺𑀲𑀬𑀁 𑀅𑀓𑀸𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀁 𑀲𑀸𑀫𑀦𑁆𑀢𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀻𑀢𑀺 𑀲𑀩𑁆𑀩𑀁 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀫𑀳𑀸𑀲𑀻𑀮𑀯𑀚𑀸𑀢𑀓𑁂 (𑀚𑀸. 𑁧.𑁧.𑁫𑁧) 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀲𑁄 𑀭𑀸𑀚𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀻𑀫𑀁𑀲𑀺𑀢𑁆𑀯𑀸 𑀢𑀲𑁆𑀲 𑀅𑀫𑀘𑁆𑀘𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀭𑀚𑁆𑀚𑀲𑀻𑀫𑀁 𑀧𑀸𑀧𑀼𑀡𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀲𑀢𑁆𑀢𑀲𑀢𑀫𑀢𑁆𑀢𑀸 𑀫𑀳𑀸𑀬𑁄𑀥𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀤𑁂𑀯, 𑀅𑀲𑀼𑀓𑁄 𑀦𑀸𑀫 𑀓𑀺𑀭 𑀭𑀸𑀚𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀚𑀦𑀧𑀤𑀁 𑀪𑀺𑀦𑁆𑀤𑀦𑁆𑀢𑁄 𑀆𑀕𑀘𑁆𑀙𑀢𑀺, 𑀏𑀢𑁆𑀣𑁂𑀯 𑀦𑀁 𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀫𑀬𑁆𑀳𑀁 𑀧𑀭𑀯𑀺𑀳𑀺𑀁𑀲𑀸𑀬 𑀮𑀤𑁆𑀥𑁂𑀦 𑀭𑀚𑁆𑀚𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀸 𑀓𑀺𑀜𑁆𑀘𑀺 𑀓𑀭𑀺𑀢𑁆𑀣𑀸’’𑀢𑀺?

𑀘𑁄𑀭𑀭𑀸𑀚𑀸 ¶ 𑀆𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀭𑀺𑀓𑁆𑀔𑀺𑀧𑀺, 𑀧𑀼𑀦 𑀅𑀫𑀘𑁆𑀘𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀫𑀸 𑀏𑀯𑀁 𑀓𑀭𑀺𑀢𑁆𑀣, 𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀦 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁, 𑀦𑀕𑀭𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀣𑀸’’𑀢𑀺 𑀯𑀢𑁆𑀯𑀸 𑀲𑀬𑀁 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀫𑀳𑀸𑀢𑀮𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀘𑁄𑀭𑀭𑀸𑀚𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀫𑀦𑀼𑀲𑁆𑀲𑁂 𑀧𑁄𑀣𑁂𑀦𑁆𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀅𑀫𑀘𑁆𑀘𑀧𑀭𑀺𑀯𑀼𑀢𑀁 𑀭𑀸𑀚𑀸𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀸𑀳𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀭𑀸𑀚𑀸 𑀩𑀦𑁆𑀥𑀦𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄𑀯 𑀘𑁄𑀭𑀭𑀸𑀚𑀸𑀦𑀁 𑀫𑁂𑀢𑁆𑀢𑀸𑀬𑀦𑁆𑀢𑁄 𑀫𑁂𑀢𑁆𑀢𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀲 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀘𑁄𑀭𑀭𑀜𑁆𑀜𑁄 𑀓𑀸𑀬𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀲𑀓𑀮𑀲𑀭𑀻𑀭𑀁 𑀬𑀫𑀓𑀉𑀓𑁆𑀓𑀸𑀳𑀺 𑀛𑀸𑀧𑀺𑀬𑀫𑀸𑀦𑀁 𑀯𑀺𑀬 𑀚𑀸𑀢𑀁. 𑀲𑁄 𑀫𑀳𑀸𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀢𑀼𑀫𑁆𑀳𑁂 𑀲𑀻𑀮𑀯𑀦𑁆𑀢𑀁 𑀭𑀸𑀚𑀸𑀦𑀁 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑁂𑀣, 𑀢𑁂𑀦 𑀯𑁄 𑀇𑀤𑀁 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀢𑀼𑀫𑁆𑀳𑀸𑀓𑀫𑁂𑀯 𑀳𑁄𑀢𑀽’’𑀢𑀺 𑀭𑀚𑁆𑀚𑀁 𑀢𑀲𑁆𑀲𑁂𑀯 ¶ 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑀸𑀓𑀁 𑀧𑀘𑁆𑀘𑀢𑁆𑀣𑀺𑀓𑁄 𑀫𑁂 𑀪𑀸𑀭𑁄 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀧𑀤𑀼𑀝𑁆𑀞𑀸𑀫𑀘𑁆𑀘𑀲𑁆𑀲 𑀭𑀸𑀚𑀸𑀡𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀕𑀢𑁄.

𑀩𑁄𑀥𑀺𑀲𑀢𑁆𑀢𑁄 𑀅𑀮𑀗𑁆𑀓𑀢𑀫𑀳𑀸𑀢𑀮𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀼𑀭𑀺𑀫𑀸 𑀤𑁆𑀯𑁂𑀕𑀸𑀣𑀸 𑀅𑀯𑁄𑀘 𑁋

𑁯𑁪.

‘‘𑀲𑁂𑀬𑁆𑀬𑀁𑀲𑁄 ¶ 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀬𑁄 𑀲𑁂𑀬𑁆𑀬𑀫𑀼𑀧𑀲𑁂𑀯𑀢𑀺;

𑀏𑀓𑁂𑀦 𑀲𑀦𑁆𑀥𑀺𑀁 𑀓𑀢𑁆𑀯𑀸𑀦, 𑀲𑀢𑀁 𑀯𑀚𑁆𑀛𑁂 𑀅𑀫𑁄𑀘𑀬𑀺𑀁.

𑁯𑁫.

‘‘𑀢𑀲𑁆𑀫𑀸 𑀲𑀩𑁆𑀩𑁂𑀦 𑀮𑁄𑀓𑁂𑀦, 𑀲𑀦𑁆𑀥𑀺𑀁 𑀓𑀢𑁆𑀯𑀸𑀦 𑀏𑀓𑀢𑁄;

𑀧𑁂𑀘𑁆𑀘 𑀲𑀕𑁆𑀕𑀁 𑀦𑀺𑀕𑀘𑁆𑀙𑁂𑀬𑁆𑀬, 𑀇𑀤𑀁 𑀲𑀼𑀡𑀸𑀣 𑀓𑀸𑀲𑀺𑀬𑀸’’𑀢𑀺.

𑀢𑀢𑁆𑀣 𑀲𑁂𑀬𑁆𑀬𑀁𑀲𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀬𑁄 𑀲𑁂𑀬𑁆𑀬𑀫𑀼𑀧𑀲𑁂𑀯𑀢𑀻𑀢𑀺 𑀅𑀦𑀯𑀚𑁆𑀚𑀉𑀢𑁆𑀢𑀫𑀥𑀫𑁆𑀫𑀲𑀗𑁆𑀔𑀸𑀢𑁄 𑀲𑁂𑀬𑁆𑀬𑁄 𑀅𑀁𑀲𑁄 𑀓𑁄𑀝𑁆𑀞𑀸𑀲𑁄 𑀅𑀲𑁆𑀲𑀸𑀢𑀺 𑀲𑁂𑀬𑁆𑀬𑀁𑀲𑁄, 𑀓𑀼𑀲𑀮𑀥𑀫𑁆𑀫𑀦𑀺𑀲𑁆𑀲𑀺𑀢𑀧𑀼𑀕𑁆𑀕𑀮𑁄. 𑀬𑁄 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀲𑁂𑀬𑁆𑀬𑀁 𑀓𑀼𑀲𑀮𑀥𑀫𑁆𑀫𑀪𑀸𑀯𑀦𑀁 𑀓𑀼𑀲𑀮𑀸𑀪𑀺𑀭𑀢𑀁 𑀯𑀸 𑀉𑀢𑁆𑀢𑀫𑀧𑀼𑀕𑁆𑀕𑀮𑀫𑀼𑀧𑀲𑁂𑀯𑀢𑀺, 𑀲𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺 𑀧𑀸𑀲𑀁𑀲𑀢𑀭𑁄 𑀘𑁂𑀯 𑀉𑀢𑁆𑀢𑀭𑀺𑀢𑀭𑁄 𑀘 𑀳𑁄𑀢𑀺. 𑀏𑀓𑁂𑀦 𑀲𑀦𑁆𑀥𑀺𑀁 𑀓𑀢𑁆𑀯𑀸𑀦, 𑀲𑀢𑀁 𑀯𑀚𑁆𑀛𑁂 𑀅𑀫𑁄𑀘𑀬𑀺𑀦𑁆𑀢𑀺 𑀢𑀤𑀫𑀺𑀦𑀸𑀧𑀺 𑀘𑁂𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀳𑀜𑁆𑀳𑀺 𑀲𑁂𑀬𑁆𑀬𑀁 𑀫𑁂𑀢𑁆𑀢𑀸𑀪𑀸𑀯𑀦𑀁 𑀉𑀧𑀲𑁂𑀯𑀦𑁆𑀢𑁄 𑀢𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀏𑀓𑁂𑀦 𑀘𑁄𑀭𑀭𑀜𑁆𑀜𑀸 𑀲𑀦𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 𑀫𑁂𑀢𑁆𑀢𑀸𑀪𑀸𑀯𑀦𑀁 𑀪𑀸𑀯𑁂𑀢𑁆𑀯𑀸 𑀢𑀼𑀫𑁆𑀳𑁂 𑀲𑀢𑀚𑀦𑁂 𑀯𑀚𑁆𑀛𑁂 𑀅𑀫𑁄𑀘𑀬𑀺𑀁.

𑀤𑀼𑀢𑀺𑀬𑀕𑀸𑀣𑀸𑀬 𑀅𑀢𑁆𑀣𑁄 𑁋 𑀬𑀲𑁆𑀫𑀸 𑀅𑀳𑀁 𑀏𑀓𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀲𑀦𑁆𑀥𑀺𑀁 𑀓𑀢𑁆𑀯𑀸 𑀢𑀼𑀫𑁆𑀳𑁂 𑀯𑀚𑁆𑀛𑀧𑁆𑀧𑀢𑁆𑀢𑁂 𑀲𑀢𑀚𑀦𑁂 𑀫𑁄𑀘𑀬𑀺𑀁, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀯𑁂𑀢𑀁, 𑀢𑀲𑁆𑀫𑀸 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 ¶ 𑀲𑀦𑁆𑀥𑀺𑀁 𑀓𑀢𑁆𑀯𑀸 𑀏𑀓𑀢𑁄 𑀧𑀼𑀕𑁆𑀕𑀮𑁄 𑀧𑁂𑀘𑁆𑀘 𑀧𑀭𑀮𑁄𑀓𑁂 𑀲𑀕𑁆𑀕𑀁 𑀦𑀺𑀕𑀘𑁆𑀙𑁂𑀬𑁆𑀬. 𑀫𑁂𑀢𑁆𑀢𑀸𑀬 𑀳𑀺 𑀉𑀧𑀘𑀸𑀭𑀁 𑀓𑀸𑀫𑀸𑀯𑀘𑀭𑁂 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀅𑀧𑁆𑀧𑀦𑀸 𑀩𑁆𑀭𑀳𑁆𑀫𑀮𑁄𑀓𑁂. 𑀇𑀤𑀁 𑀫𑀫 𑀯𑀘𑀦𑀁 𑀲𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀓𑀸𑀲𑀺𑀭𑀝𑁆𑀞𑀯𑀸𑀲𑀺𑀦𑁄 𑀲𑀼𑀡𑀸𑀣𑀸𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀳𑀸𑀚𑀦𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀕𑀼𑀡𑀁 𑀯𑀡𑁆𑀡𑁂𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀲𑀢𑁆𑀣𑀸 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁬.

‘‘𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀓𑀁𑀲𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄;

𑀥𑀦𑀼𑀁 𑀓𑀡𑁆𑀟𑀜𑁆𑀘 𑀦𑀺𑀓𑁆𑀔𑀺𑀧𑁆𑀧, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺.

𑀢𑀢𑁆𑀣 𑀫𑀳𑀦𑁆𑀢𑁄 𑀭𑀸𑀚𑀸𑀢𑀺 𑀫𑀳𑀸𑀭𑀸𑀚𑀸. 𑀓𑀁𑀲𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀩𑀸𑀭𑀸𑀡𑀲𑀺𑀁 𑀕𑀳𑁂𑀢𑁆𑀯𑀸 𑀅𑀚𑁆𑀛𑀸𑀯𑀲𑀦𑀢𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄. 𑀲𑁄 𑀭𑀸𑀚𑀸 𑀇𑀤𑀁 𑀯𑀘𑀦𑀁 𑀯𑀢𑁆𑀯𑀸 𑀥𑀦𑀼𑀜𑁆𑀘 𑀲𑀭𑀲𑀗𑁆𑀔𑀸𑀢𑀁 𑀓𑀡𑁆𑀟𑀜𑁆𑀘 𑀦𑀺𑀓𑁆𑀔𑀺𑀧𑁆𑀧 𑀑𑀳𑀸𑀬 𑀙𑀟𑁆𑀟𑁂𑀢𑁆𑀯𑀸 𑀲𑀻𑀮𑀲𑀁𑀬𑀫𑀁 ¶ 𑀉𑀧𑀕𑀢𑁄 𑀧𑀩𑁆𑀩𑀚𑀺𑀢𑁄, 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀘𑁄𑀭𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁮𑁩] 𑁩. 𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸

𑀯𑀭𑀁 𑀯𑀭𑀁 𑀢𑁆𑀯𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀲𑁂𑀦𑀤𑀺𑀭𑀜𑁆𑀜𑁄 𑀧𑀺𑀢𑀸 𑀫𑀳𑀸𑀓𑁄𑀲𑀮𑁄 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀥𑀻𑀢𑀭𑀁 𑀯𑁂𑀤𑁂𑀳𑀺𑀁 𑀦𑀸𑀫 𑀓𑁄𑀲𑀮𑀤𑁂𑀯𑀺𑀁 𑀤𑀤𑀫𑀸𑀦𑁄 𑀢𑀲𑁆𑀲𑀸 𑀦𑁆𑀳𑀸𑀦𑀘𑀼𑀡𑁆𑀡𑀫𑀽𑀮𑀁 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀁 𑀓𑀸𑀲𑀺𑀕𑀸𑀫𑀁 𑀅𑀤𑀸𑀲𑀺. 𑀅𑀚𑀸𑀢𑀲𑀢𑁆𑀢𑀼𑀦𑀸 𑀧𑀦 𑀧𑀺𑀢𑀭𑀺 𑀫𑀸𑀭𑀺𑀢𑁂 𑀓𑁄𑀲𑀮𑀤𑁂𑀯𑀻𑀧𑀺 𑀲𑁄𑀓𑀸𑀪𑀺𑀪𑀽𑀢𑀸 𑀓𑀸𑀮𑀫𑀓𑀸𑀲𑀺. 𑀢𑀢𑁄 𑀧𑀲𑁂𑀦𑀤𑀺 𑀓𑁄𑀲𑀮𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀧𑀺𑀢𑀸 𑀫𑀸𑀭𑀺𑀢𑁄, 𑀪𑀕𑀺𑀦𑀻𑀧𑀺 𑀫𑁂 𑀲𑀸𑀫𑀺𑀓𑁂 𑀓𑀸𑀮𑀓𑀢𑁂 𑀢𑁂𑀦 𑀲𑁄𑀓𑁂𑀦 𑀓𑀸𑀮𑀓𑀢𑀸, 𑀧𑀺𑀢𑀼𑀖𑀸𑀢𑀓𑀲𑁆𑀲 𑀘𑁄𑀭𑀲𑁆𑀲 𑀓𑀸𑀲𑀺𑀕𑀸𑀫𑀁 𑀦 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀦 𑀅𑀤𑀸𑀲𑀺. 𑀢𑀁 𑀕𑀸𑀫𑀁 𑀦𑀺𑀲𑁆𑀲𑀸𑀬 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀬𑀼𑀤𑁆𑀥𑀁 𑀳𑁄𑀢𑀺, 𑀅𑀚𑀸𑀢𑀲𑀢𑁆𑀢𑀼 𑀢𑀭𑀼𑀡𑁄 𑀲𑀫𑀢𑁆𑀣𑁄, 𑀧𑀲𑁂𑀦𑀤𑀺 ¶ 𑀫𑀳𑀮𑁆𑀮𑀓𑁄𑀬𑁂𑀯. 𑀲𑁄 𑀅𑀪𑀺𑀓𑁆𑀔𑀡𑀁 𑀧𑀭𑀚𑁆𑀚𑀢𑀺, 𑀫𑀳𑀸𑀓𑁄𑀲𑀮𑀲𑁆𑀲𑀸𑀧𑀺 𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀧𑀭𑀸𑀚𑀺𑀢𑀸. 𑀅𑀣 𑀭𑀸𑀚𑀸 ‘‘𑀫𑀬𑀁 𑀅𑀪𑀺𑀡𑁆𑀳𑀁 𑀧𑀭𑀚𑁆𑀚𑀸𑀫, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. ‘‘𑀤𑁂𑀯, 𑀅𑀬𑁆𑀬𑀸 𑀦𑀸𑀫 𑀫𑀦𑁆𑀢𑀘𑁆𑀙𑁂𑀓𑀸 𑀳𑁄𑀦𑁆𑀢𑀺, 𑀚𑁂𑀢𑀯𑀦𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑁄𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀭𑀸𑀚𑀸 ‘‘𑀢𑁂𑀦 𑀳𑀺 𑀢𑀸𑀬𑀁 𑀯𑁂𑀮𑀸𑀬𑀁 𑀪𑀺𑀓𑁆𑀔𑀽𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀡𑀸𑀣𑀸’’𑀢𑀺 𑀘𑀭𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀅𑀓𑀁𑀲𑀼.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀤𑁆𑀯𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀦𑁆𑀢𑀺 𑀤𑀢𑁆𑀢𑀢𑁆𑀣𑁂𑀭𑁄 𑀘 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 ¶ 𑀘. 𑀢𑁂𑀲𑀼 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀞𑀫𑀬𑀸𑀫𑁂𑀧𑀺 𑀫𑀚𑁆𑀛𑀺𑀫𑀬𑀸𑀫𑁂𑀧𑀺 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀉𑀫𑁆𑀫𑀼𑀓𑁆𑀓𑀸𑀦𑀺 𑀲𑁄𑀥𑁂𑀢𑁆𑀯𑀸 ¶ 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑁄 𑀆𑀳 𑁋 ‘‘𑀪𑀦𑁆𑀢𑁂, 𑀤𑀢𑁆𑀢𑀢𑁆𑀣𑁂𑀭𑀸’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀢𑀺𑀲𑁆𑀲𑀢𑁆𑀣𑁂𑀭𑀸’’𑀢𑀺? ‘‘𑀓𑀺𑀁 𑀦𑀺𑀤𑁆𑀤𑀸𑀬𑀲𑀺 𑀦𑁄 𑀢𑁆𑀯’’𑀦𑁆𑀢𑀺. ‘‘𑀅𑀦𑀺𑀤𑁆𑀤𑀸𑀬𑀦𑁆𑀢𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? ‘‘𑀉𑀝𑁆𑀞𑀸𑀬 𑀢𑀸𑀯 𑀦𑀺𑀲𑀻𑀤𑀣𑀸’’𑀢𑀺. 𑀲𑁄 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑁄 𑀢𑀁 𑀤𑀢𑁆𑀢𑀢𑁆𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂 𑀤𑀢𑁆𑀢𑀢𑁆𑀣𑁂𑀭, 𑀅𑀬𑀁 𑀢𑁂 𑀮𑁄𑀮𑁄 𑀫𑀳𑁄𑀤𑀭𑀓𑁄𑀲𑀮𑁄 𑀘𑀸𑀝𑀺𑀫𑀢𑁆𑀢𑀁 𑀪𑀢𑁆𑀢𑀫𑁂𑀯 𑀧𑀽𑀢𑀺𑀁 𑀓𑀭𑁄𑀢𑀺, 𑀬𑀼𑀤𑁆𑀥𑀯𑀺𑀘𑀸𑀭𑀡𑀁 𑀧𑀦 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀧𑀭𑀸𑀚𑀺𑀢𑁄 𑀧𑀭𑀸𑀚𑀺𑀢𑁄𑀢𑁆𑀯𑁂𑀯 𑀯𑀤𑀸𑀧𑁂𑀢𑀻’’𑀢𑀺. ‘‘𑀓𑀺𑀁 𑀧𑀦 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? 𑀢𑀲𑁆𑀫𑀺𑀁 𑀔𑀡𑁂 𑀢𑁂 𑀘𑀭𑀧𑀼𑀭𑀺𑀲𑀸 𑀢𑁂𑀲𑀁 𑀓𑀣𑀁 𑀲𑀼𑀡𑀦𑁆𑀢𑀸 𑀅𑀝𑁆𑀞𑀁𑀲𑀼.

𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 𑀬𑀼𑀤𑁆𑀥𑀁 𑀯𑀺𑀘𑀸𑀭𑁂𑀲𑀺 𑁋 ‘‘𑀪𑀦𑁆𑀢𑁂, 𑀬𑀼𑀤𑁆𑀥𑁄 𑀦𑀸𑀫 𑀢𑀺𑀯𑀺𑀥𑁄 𑁋 𑀧𑀤𑀼𑀫𑀩𑁆𑀬𑀽𑀳𑁄, 𑀘𑀓𑁆𑀓𑀩𑁆𑀬𑀽𑀳𑁄, 𑀲𑀓𑀝𑀩𑁆𑀬𑀽𑀳𑁄𑀢𑀺. 𑀅𑀚𑀸𑀢𑀲𑀢𑁆𑀢𑀼𑀁 𑀕𑀡𑁆𑀳𑀺𑀢𑀼𑀓𑀸𑀫𑁂𑀦 𑀅𑀲𑀼𑀓𑁂 𑀦𑀸𑀫 𑀧𑀩𑁆𑀩𑀢𑀓𑀼𑀘𑁆𑀙𑀺𑀲𑁆𑀫𑀺𑀁 𑀤𑁆𑀯𑀻𑀲𑀼 𑀧𑀩𑁆𑀩𑀢𑀪𑀺𑀢𑁆𑀢𑀻𑀲𑀼 𑀫𑀦𑀼𑀲𑁆𑀲𑁂 𑀞𑀧𑁂𑀢𑁆𑀯𑀸 𑀧𑀼𑀭𑀢𑁄 𑀤𑀼𑀩𑁆𑀩𑀮𑀩𑀮𑀁 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑀭𑀁 𑀧𑀯𑀺𑀝𑁆𑀞𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀧𑀯𑀺𑀝𑁆𑀞𑀫𑀕𑁆𑀕𑀁 𑀑𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀉𑀪𑁄𑀲𑀼 𑀧𑀩𑁆𑀩𑀢𑀪𑀺𑀢𑁆𑀢𑀻𑀲𑀼 𑀯𑀕𑁆𑀕𑀺𑀢𑁆𑀯𑀸 𑀉𑀦𑁆𑀦𑀤𑀺𑀢𑁆𑀯𑀸 𑀔𑀺𑀧𑁂 𑀧𑀢𑀺𑀢𑀫𑀘𑁆𑀙𑀁 𑀯𑀺𑀬 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀯𑀝𑁆𑀝𑀧𑁄𑀢𑀓𑀁 𑀯𑀺𑀬 𑀘 𑀓𑀢𑁆𑀯𑀸 𑀲𑀓𑁆𑀓𑀸 𑀅𑀲𑁆𑀲 𑀢𑀁 𑀕𑀳𑁂𑀢𑀼’’𑀦𑁆𑀢𑀺. 𑀘𑀭𑀧𑀼𑀭𑀺𑀲𑀸 𑀢𑀁 𑀲𑀸𑀲𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀗𑁆𑀕𑀸𑀫𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀓𑀝𑀩𑁆𑀬𑀽𑀳𑀁 𑀓𑀢𑁆𑀯𑀸 𑀅𑀚𑀸𑀢𑀲𑀢𑁆𑀢𑀼𑀁 𑀚𑀻𑀯𑀕𑁆𑀕𑀸𑀳𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀯𑀚𑀺𑀭𑀓𑀼𑀫𑀸𑀭𑀺𑀁 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀢𑁆𑀯𑀸 𑀓𑀸𑀲𑀺𑀕𑀸𑀫𑀁 𑀢𑀲𑁆𑀲𑀸 𑀦𑁆𑀳𑀸𑀦𑀫𑀽𑀮𑀁 𑀓𑀢𑁆𑀯𑀸 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀸 𑀧𑀯𑀢𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀓𑁄𑀲𑀮𑀭𑀸𑀚𑀸 𑀓𑀺𑀭 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀘𑀸𑀭𑀡𑀸𑀬 𑀅𑀚𑀸𑀢𑀲𑀢𑁆𑀢𑀼𑀁 𑀚𑀺𑀦𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑁄 𑀬𑀼𑀤𑁆𑀥𑀯𑀺𑀘𑀸𑀭𑀡𑀸𑀬 𑀙𑁂𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 ¶ . 𑀢𑀤𑀸 𑀩𑀸𑀭𑀸𑀡𑀲𑀺𑀁 𑀦𑀺𑀲𑁆𑀲𑀸𑀬 𑀦𑀺𑀯𑀼𑀢𑁆𑀣𑀯𑀟𑁆𑀠𑀓𑀺𑀕𑀸𑀫𑀓𑀸 𑀏𑀓𑁄 𑀯𑀟𑁆𑀠𑀓𑀻 𑀣𑀫𑁆𑀪𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀆𑀯𑀸𑀝𑁂 𑀧𑀢𑀺𑀢𑀁 𑀲𑀽𑀓𑀭𑀧𑁄𑀢𑀓𑀁 𑀤𑀺𑀲𑁆𑀯𑀸 𑀢𑀁 𑀖𑀭𑀁 𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀲𑁄 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀫𑀳𑀸𑀲𑀭𑀻𑀭𑁄 𑀯𑀗𑁆𑀓𑀤𑀸𑀞𑁄 ¶ 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀯𑀟𑁆𑀠𑀓𑀺𑀦𑀸 𑀧𑁄𑀲𑀺𑀢𑀢𑁆𑀢𑀸 𑀧𑀦 ‘‘𑀯𑀟𑁆𑀠𑀓𑀻𑀲𑀽𑀓𑀭𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺. 𑀯𑀟𑁆𑀠𑀓𑀺𑀲𑁆𑀲 𑀭𑀼𑀓𑁆𑀔𑀢𑀘𑁆𑀙𑀦𑀓𑀸𑀮𑁂 𑀢𑀼𑀡𑁆𑀟𑁂𑀦 𑀭𑀼𑀓𑁆𑀔𑀁 𑀧𑀭𑀺𑀯𑀢𑁆𑀢𑁂𑀢𑀺, 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀦𑀺𑀔𑀸𑀤𑀦𑀫𑀼𑀕𑁆𑀕𑀭𑁂 𑀆𑀳𑀭𑀢𑀺, 𑀓𑀸𑀮𑀲𑀼𑀢𑁆𑀢𑀓𑁄𑀝𑀺𑀬𑀁 𑀕𑀡𑁆𑀳𑀸𑀢𑀺. 𑀅𑀣 𑀲𑁄 𑀯𑀟𑁆𑀠𑀓𑀻 ‘‘𑀓𑁄𑀘𑀺𑀤𑁂𑀯, 𑀦𑀁 𑀔𑀸𑀤𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀦𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀔𑁂𑀫𑀁 𑀨𑀸𑀲𑀼𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀧𑀩𑁆𑀩𑀢𑀦𑁆𑀢𑀭𑁂 𑀫𑀳𑀦𑁆𑀢𑀁 𑀕𑀺𑀭𑀺𑀓𑀦𑁆𑀤𑀭𑀁 𑀅𑀤𑁆𑀤𑀲 𑀲𑀫𑁆𑀧𑀦𑁆𑀦𑀓𑀦𑁆𑀤𑀫𑀽𑀮𑀨𑀮𑀁 𑀨𑀸𑀲𑀼𑀓𑀁 𑀯𑀲𑀦𑀝𑁆𑀞𑀸𑀦𑀁 𑀅𑀦𑁂𑀓𑀲𑀢𑀲𑀽𑀓𑀭𑀲𑀫𑀸𑀓𑀺𑀡𑁆𑀡𑀁. 𑀢𑁂 𑀲𑀽𑀓𑀭𑀸 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑀁𑀲𑀼. 𑀲𑁄𑀧𑀺 𑀢𑁂 𑀆𑀳 𑁋 ‘‘𑀅𑀳𑀁 𑀢𑀼𑀫𑁆𑀳𑁂𑀯 𑀑𑀮𑁄𑀓𑁂𑀦𑁆𑀢𑁄 𑀯𑀺𑀘𑀭𑀸𑀫𑀺, 𑀅𑀧𑀺𑀘 𑀯𑁄 𑀫𑀬𑀸 𑀤𑀺𑀝𑁆𑀞𑀸, 𑀇𑀤𑀜𑁆𑀘 𑀞𑀸𑀦𑀁 𑀭𑀫𑀡𑀻𑀬𑀁, 𑀅𑀳𑀫𑁆𑀧𑀺 𑀇𑀤𑀸𑀦𑀺 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁆𑀘𑀁 𑀇𑀤𑀁 𑀞𑀸𑀦𑀁 𑀭𑀫𑀡𑀻𑀬𑀁, 𑀧𑀭𑀺𑀲𑁆𑀲𑀬𑁄 𑀧𑀦𑁂𑀢𑁆𑀣 𑀅𑀢𑁆𑀣𑀻’’𑀢𑀺. ‘‘𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀏𑀢𑀁 𑀅𑀜𑁆𑀜𑀸𑀲𑀺𑀁, 𑀏𑀯𑀁 𑀕𑁄𑀘𑀭𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀯𑁄 𑀲𑀭𑀻𑀭𑁂𑀲𑀼 𑀫𑀁𑀲𑀮𑁄𑀳𑀺𑀢𑀁 𑀦𑀢𑁆𑀣𑀺, 𑀓𑀺𑀁 𑀧𑀦 𑀯𑁄 𑀏𑀢𑁆𑀣 𑀪𑀬’’𑀦𑁆𑀢𑀺? ‘‘𑀏𑀓𑁄 𑀩𑁆𑀬𑀕𑁆𑀖𑁄 𑀧𑀸𑀢𑁄𑀯 𑀆𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀤𑀺𑀝𑁆𑀞𑀁𑀬𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺. ‘‘𑀓𑀺𑀁 𑀧𑀦 𑀲𑁄 𑀦𑀺𑀩𑀤𑁆𑀥𑀁 𑀕𑀡𑁆𑀳𑀸𑀢𑀺, 𑀉𑀤𑀸𑀳𑀼 𑀅𑀦𑁆𑀢𑀭𑀦𑁆𑀢𑀭𑀸’’𑀢𑀺? ‘‘𑀦𑀺𑀩𑀤𑁆𑀥𑀁 𑀕𑀡𑁆𑀳𑀸𑀢𑀻’’𑀢𑀺. ‘‘𑀓𑀢𑀺 𑀧𑀦 𑀢𑁂 𑀩𑁆𑀬𑀕𑁆𑀖𑀸’’𑀢𑀺? ‘‘𑀏𑀓𑁄𑀬𑁂𑀯𑀸’’𑀢𑀺. ‘‘𑀏𑀢𑁆𑀢𑀓𑀸 𑀢𑀼𑀫𑁆𑀳𑁂 𑀏𑀓𑀲𑁆𑀲 𑀬𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀣𑀸’’𑀢𑀺? ‘‘𑀆𑀫, 𑀦 𑀲𑀓𑁆𑀓𑁄𑀫𑀸’’𑀢𑀺. ‘‘𑀅𑀳𑀁 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀫𑀫 𑀯𑀘𑀦𑀁 𑀓𑀭𑁄𑀣, 𑀲𑁄 𑀩𑁆𑀬𑀕𑁆𑀖𑁄 𑀓𑀳𑀁 𑀯𑀲𑀢𑀻’’𑀢𑀺? ‘‘𑀏𑀢𑀲𑁆𑀫𑀺𑀁 𑀧𑀩𑁆𑀩𑀢𑁂’’𑀢𑀺.

𑀲𑁄 𑀭𑀢𑁆𑀢𑀺𑀜𑁆𑀜𑁂𑀯 𑀲𑀽𑀓𑀭𑁂 𑀘𑀭𑀸𑀧𑁂𑀢𑁆𑀯𑀸 𑀬𑀼𑀤𑁆𑀥𑀁 𑀯𑀺𑀘𑀸𑀭𑁂𑀦𑁆𑀢𑁄 ‘‘𑀬𑀼𑀤𑁆𑀥𑀁 𑀦𑀸𑀫 ¶ 𑀧𑀤𑀼𑀫𑀩𑁆𑀬𑀽𑀳𑀘𑀓𑁆𑀓𑀩𑁆𑀬𑀽𑀳𑀲𑀓𑀝𑀩𑁆𑀬𑀽𑀳𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀧𑀤𑀼𑀫𑀩𑁆𑀬𑀽𑀳𑀯𑀲𑁂𑀦 𑀯𑀺𑀘𑀸𑀭𑁂𑀲𑀺. 𑀲𑁄 𑀳𑀺 𑀪𑀽𑀫𑀺𑀲𑀻𑀲𑀁 𑀚𑀸𑀦𑀸𑀢𑀺. 𑀢𑀲𑁆𑀫𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀬𑀼𑀤𑁆𑀥𑀁 𑀯𑀺𑀘𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀽𑀓𑀭𑀧𑀺𑀮𑁆𑀮𑀓𑁂 𑀫𑀸𑀢𑀭𑁄 𑀘 𑀢𑁂𑀲𑀁 𑀫𑀚𑁆𑀛𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀢𑀸 𑀆𑀯𑀺𑀚𑁆𑀛𑀺𑀢𑁆𑀯𑀸 𑀫𑀚𑁆𑀛𑀺𑀫𑀲𑀽𑀓𑀭𑀺𑀬𑁄, 𑀢𑀸 𑀆𑀯𑀺𑀚𑁆𑀛𑀺𑀢𑁆𑀯𑀸 𑀧𑁄𑀢𑀓𑀲𑀽𑀓𑀭𑁂, 𑀢𑁂 𑀆𑀯𑀺𑀚𑁆𑀛𑀺𑀢𑁆𑀯𑀸 𑀚𑀭𑀲𑀽𑀓𑀭𑁂, 𑀢𑁂 𑀆𑀯𑀺𑀚𑁆𑀛𑀺𑀢𑁆𑀯𑀸 𑀤𑀻𑀖𑀤𑀸𑀞𑀲𑀽𑀓𑀭𑁂, 𑀢𑁂 𑀆𑀯𑀺𑀚𑁆𑀛𑀺𑀢𑁆𑀯𑀸 𑀬𑀼𑀤𑁆𑀥𑀲𑀫𑀢𑁆𑀣𑁂 𑀩𑀮𑀯𑀢𑀭𑀲𑀽𑀓𑀭𑁂 𑀤𑀲 𑀯𑀻𑀲 𑀢𑀺𑀁𑀲 𑀚𑀦𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀩𑀮𑀕𑀼𑀫𑁆𑀩𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑀲𑁆𑀲 𑀧𑀼𑀭𑀢𑁄 𑀏𑀓𑀁 𑀧𑀭𑀺𑀫𑀡𑁆𑀟𑀮𑀁 𑀆𑀯𑀸𑀝𑀁 𑀔𑀡𑀸𑀧𑁂𑀲𑀺, 𑀧𑀘𑁆𑀙𑀢𑁄 𑀏𑀓𑀁 𑀲𑀼𑀧𑁆𑀧𑀲𑀡𑁆𑀞𑀸𑀦𑀁 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑀁 𑀧𑀩𑁆𑀪𑀸𑀭𑀲𑀤𑀺𑀲𑀁. 𑀢𑀲𑁆𑀲 𑀲𑀝𑁆𑀞𑀺𑀲𑀢𑁆𑀢𑀢𑀺𑀫𑀢𑁆𑀢𑁂 𑀬𑁄𑀥𑀲𑀽𑀓𑀭𑁂 𑀆𑀤𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 ‘‘𑀫𑀸 𑀪𑀸𑀬𑀺𑀢𑁆𑀣𑀸’’𑀢𑀺 𑀓𑀫𑁆𑀫𑀁 𑀯𑀺𑀘𑀸𑀭𑀢𑁄 𑀅𑀭𑀼𑀡𑀁 𑀉𑀝𑁆𑀞𑀳𑀺.

𑀩𑁆𑀬𑀕𑁆𑀖𑁄 ¶ 𑀉𑀝𑁆𑀞𑀸𑀬 ‘‘𑀓𑀸𑀮𑁄’’𑀢𑀺 𑀜𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀫𑁆𑀫𑀼𑀔𑀸 𑀞𑀺𑀢𑁂 𑀧𑀩𑁆𑀩𑀢𑀢𑀮𑁂 𑀞𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀲𑀽𑀓𑀭𑁂 𑀑𑀮𑁄𑀓𑁂𑀲𑀺. 𑀯𑀟𑁆𑀠𑀓𑀻𑀲𑀽𑀓𑀭𑁄 ‘‘𑀧𑀝𑀺𑀑𑀮𑁄𑀓𑁂𑀣 𑀦’’𑀦𑁆𑀢𑀺 𑀲𑀽𑀓𑀭𑀸𑀦𑀁 𑀲𑀜𑁆𑀜𑀁 ¶ 𑀅𑀤𑀸𑀲𑀺, 𑀢𑁂 𑀧𑀝𑀺𑀑𑀮𑁄𑀓𑁂𑀲𑀼𑀁. 𑀩𑁆𑀬𑀕𑁆𑀖𑁄 𑀫𑀼𑀔𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀅𑀲𑁆𑀲𑁄𑀲𑀺, 𑀲𑀽𑀓𑀭𑀸𑀧𑀺 𑀢𑀣𑀸 𑀓𑀭𑀺𑀁𑀲𑀼. 𑀩𑁆𑀬𑀕𑁆𑀖𑁄 𑀫𑀼𑀢𑁆𑀢𑀁 𑀙𑀟𑁆𑀟𑁂𑀲𑀺, 𑀲𑀽𑀓𑀭𑀸𑀧𑀺 𑀙𑀟𑁆𑀟𑀬𑀺𑀁𑀲𑀼. 𑀇𑀢𑀺 𑀬𑀁 𑀬𑀁 𑀲𑁄 𑀓𑀭𑁄𑀢𑀺, 𑀢𑀁 𑀢𑀁 𑀢𑁂 𑀧𑀝𑀺𑀓𑀭𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀩𑁆𑀩𑁂 𑀲𑀽𑀓𑀭𑀸 𑀫𑀬𑀸 𑀑𑀮𑁄𑀓𑀺𑀢𑀓𑀸𑀮𑁂 𑀧𑀮𑀸𑀬𑀦𑁆𑀢𑀸 𑀧𑀮𑀸𑀬𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀚𑁆𑀚 𑀅𑀧𑀮𑀸𑀬𑀺𑀢𑁆𑀯𑀸 𑀫𑀫 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀫𑀬𑀸 𑀓𑀢𑀫𑁂𑀯 𑀧𑀝𑀺𑀓𑀭𑁄𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀪𑀽𑀫𑀺𑀲𑀻𑀲𑁂 𑀞𑀺𑀢𑁄 𑀏𑀓𑁄 𑀢𑁂𑀲𑀁 𑀲𑀁𑀯𑀺𑀥𑀸𑀬𑀓𑁄𑀧𑀺 𑀅𑀢𑁆𑀣𑀺, 𑀅𑀚𑁆𑀚 𑀫𑀬𑁆𑀳𑀁 𑀕𑀢𑀲𑁆𑀲 𑀚𑀬𑁄 𑀦 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀦 𑀧𑀦 𑀕𑀳𑀺𑀢𑀫𑀁𑀲𑀔𑀸𑀤𑀓𑁄 𑀏𑀓𑁄 𑀓𑀽𑀝𑀚𑀝𑀺𑀮𑁄 𑀅𑀢𑁆𑀣𑀺, 𑀲𑁄 𑀢𑀁 𑀢𑀼𑀘𑁆𑀙𑀳𑀢𑁆𑀣𑀫𑁂𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁭.

‘‘𑀯𑀭𑀁 ¶ 𑀯𑀭𑀁 𑀢𑁆𑀯𑀁 𑀦𑀺𑀳𑀦𑀁 𑀧𑀼𑀭𑁂 𑀘𑀭𑀺,

𑀅𑀲𑁆𑀫𑀺𑀁 𑀧𑀤𑁂𑀲𑁂 𑀅𑀪𑀺𑀪𑀼𑀬𑁆𑀬 𑀲𑀽𑀓𑀭𑁂;

𑀲𑁄𑀤𑀸𑀦𑀺 𑀏𑀓𑁄 𑀩𑁆𑀬𑀧𑀕𑀫𑁆𑀫 𑀛𑀸𑀬𑀲𑀺,

𑀩𑀮𑀁 𑀦𑀼 𑀢𑁂 𑀩𑁆𑀬𑀕𑁆𑀖 𑀦 𑀘𑀚𑁆𑀚 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀯𑀭𑀁 𑀯𑀭𑀁 𑀢𑁆𑀯𑀁 𑀦𑀺𑀳𑀦𑀁 𑀧𑀼𑀭𑁂 𑀘𑀭𑀺, 𑀅𑀲𑁆𑀫𑀺𑀁 𑀧𑀤𑁂𑀲𑁂 𑀅𑀪𑀺𑀪𑀼𑀬𑁆𑀬 𑀲𑀽𑀓𑀭𑁂𑀢𑀺 𑀅𑀫𑁆𑀪𑁄 𑀩𑁆𑀬𑀕𑁆𑀖, 𑀢𑁆𑀯𑀁 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀲𑀩𑁆𑀩𑀲𑀽𑀓𑀭𑁂 𑀅𑀪𑀺𑀪𑀯𑀺𑀢𑁆𑀯𑀸 𑀇𑀫𑁂𑀲𑀼 𑀲𑀽𑀓𑀭𑁂𑀲𑀼 𑀯𑀭𑀁 𑀯𑀭𑀁 𑀢𑁆𑀯𑀁 𑀉𑀢𑁆𑀢𑀫𑀼𑀢𑁆𑀢𑀫𑀁 𑀲𑀽𑀓𑀭𑀁 𑀦𑀺𑀳𑀦𑀦𑁆𑀢𑁄 𑀯𑀺𑀘𑀭𑀺. 𑀲𑁄𑀤𑀸𑀦𑀺 𑀏𑀓𑁄 𑀩𑁆𑀬𑀧𑀕𑀫𑁆𑀫 𑀛𑀸𑀬𑀲𑀻𑀢𑀺 𑀲𑁄 𑀢𑁆𑀯𑀁 𑀇𑀤𑀸𑀦𑀺 𑀅𑀜𑁆𑀜𑀢𑀭𑀁 𑀲𑀽𑀓𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑀓𑁄𑀯 𑀅𑀧𑀕𑀦𑁆𑀢𑁆𑀯𑀸 𑀛𑀸𑀬𑀲𑀺 𑀧𑀚𑁆𑀛𑀸𑀬𑀲𑀺. 𑀩𑀮𑀁 𑀦𑀼 𑀢𑁂 𑀩𑁆𑀬𑀕𑁆𑀖 𑀦 𑀘𑀚𑁆𑀚 𑀯𑀺𑀚𑁆𑀚𑀢𑀻𑀢𑀺 𑀓𑀺𑀁 𑀦𑀼 𑀢𑁂, 𑀅𑀫𑁆𑀪𑁄 𑀩𑁆𑀬𑀕𑁆𑀖, 𑀅𑀚𑁆𑀚 𑀓𑀸𑀬𑀩𑀮𑀁 𑀦𑀢𑁆𑀣𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀬𑀕𑁆𑀖𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁮.

‘‘𑀇𑀫𑁂 𑀲𑀼𑀤𑀁 𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁 𑀧𑀼𑀭𑁂, 𑀪𑀬𑀝𑁆𑀝𑀺𑀢𑀸 𑀮𑁂𑀡𑀕𑀯𑁂𑀲𑀺𑀦𑁄 𑀧𑀼𑀣𑀽;

𑀢𑁂 𑀤𑀸𑀦𑀺 𑀲𑀗𑁆𑀕𑀫𑁆𑀫 𑀯𑀲𑀦𑁆𑀢𑀺 𑀏𑀓𑀢𑁄, 𑀬𑀢𑁆𑀣𑀝𑁆𑀞𑀺𑀢𑀸 𑀤𑀼𑀧𑁆𑀧𑀲𑀳𑀚𑁆𑀚𑀫𑁂 𑀫𑀬𑀸’’𑀢𑀺.

𑀢𑀢𑁆𑀣 ¶ 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀅𑀬𑀁 𑀧𑀦 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀫𑁂 𑀲𑀽𑀓𑀭𑀸 𑀧𑀼𑀩𑁆𑀩𑁂 𑀫𑀁 𑀤𑀺𑀲𑁆𑀯𑀸 𑀪𑀬𑁂𑀦 𑀅𑀝𑁆𑀝𑀺𑀢𑀸 𑀧𑀻𑀴𑀺𑀢𑀸 𑀅𑀢𑁆𑀢𑀦𑁄 𑀮𑁂𑀡𑀕𑀯𑁂𑀲𑀺𑀦𑁄 𑀧𑀼𑀣𑀽 𑀯𑀺𑀲𑀼𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀤𑀺𑀲𑁄𑀤𑀺𑀲𑀁 𑀬𑀦𑁆𑀢𑀺, 𑀢𑀁 𑀢𑀁 𑀤𑀺𑀲𑀁 𑀅𑀪𑀺𑀫𑀼𑀔𑀸 𑀧𑀮𑀸𑀬𑀦𑁆𑀢𑀺, 𑀢𑁂 𑀤𑀸𑀦𑀺 𑀲𑀩𑁆𑀩𑁂𑀧𑀺 𑀲𑀫𑀸𑀕𑀦𑁆𑀢𑁆𑀯𑀸 𑀏𑀓𑀢𑁄 𑀯𑀲𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀺, 𑀢𑀜𑁆𑀘 𑀪𑀽𑀫𑀺𑀲𑀻𑀲𑀁 𑀉𑀧𑀕𑀢𑀸, 𑀬𑀢𑁆𑀣 𑀞𑀺𑀢𑀸 𑀤𑀼𑀧𑁆𑀧𑀲𑀳𑀸 𑀤𑀼𑀫𑁆𑀫𑀤𑁆𑀤𑀬𑀸 𑀅𑀚𑁆𑀚 𑀇𑀫𑁂 𑀫𑀬𑀸𑀢𑀺.

𑀅𑀣𑀲𑁆𑀲 ¶ 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀓𑀽𑀝𑀚𑀝𑀺𑀮𑁄 ‘‘𑀫𑀸 𑀪𑀸𑀬𑀺, 𑀕𑀘𑁆𑀙 𑀢𑀬𑀺 𑀦𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀦𑁆𑀢𑁂 𑀲𑀩𑁆𑀩𑁂𑀧𑀺 𑀪𑀻𑀢𑀸 𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀩𑁆𑀬𑀕𑁆𑀖𑁄 𑀢𑀲𑁆𑀫𑀺𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁂 𑀲𑀽𑀭𑁄 𑀳𑀼𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀢𑀮𑁂 𑀅𑀝𑁆𑀞𑀸𑀲𑀺. 𑀯𑀟𑁆𑀠𑀓𑀻𑀲𑀽𑀓𑀭𑁄 𑀤𑁆𑀯𑀺𑀦𑁆𑀦𑀁 𑀆𑀯𑀸𑀝𑀸𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞𑀸𑀲𑀺. 𑀲𑀽𑀓𑀭𑀸 ‘‘𑀲𑀸𑀫𑀺, 𑀫𑀳𑀸𑀘𑁄𑀭𑁄 𑀧𑀼𑀦𑀸𑀕𑀢𑁄’’𑀢𑀺 𑀆𑀳𑀁𑀲𑀼. ‘‘𑀫𑀸 𑀪𑀸𑀬𑀺𑀢𑁆𑀣, 𑀇𑀤𑀸𑀦𑀺 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀩𑁆𑀬𑀕𑁆𑀖𑁄 𑀦𑀤𑀺𑀢𑁆𑀯𑀸 𑀯𑀟𑁆𑀠𑀓𑀻𑀲𑀽𑀓𑀭𑀲𑁆𑀲 𑀉𑀧𑀭𑀺 𑀧𑀢𑀢𑀺, 𑀲𑀽𑀓𑀭𑁄 𑀢𑀲𑁆𑀲 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀢𑀦𑀓𑀸𑀮𑁂 ¶ 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀯𑁂𑀕𑁂𑀦 𑀉𑀚𑀼𑀓𑀁 𑀔𑀢𑀆𑀯𑀸𑀝𑁂 𑀧𑀢𑀺. 𑀩𑁆𑀬𑀕𑁆𑀖𑁄 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀧𑀭𑀺𑀪𑀸𑀕𑁂𑀦 𑀕𑀦𑁆𑀢𑁆𑀯𑀸 𑀲𑀼𑀧𑁆𑀧𑀫𑀼𑀔𑀲𑁆𑀲 𑀢𑀺𑀭𑀺𑀬𑀁 𑀔𑀢𑀆𑀯𑀸𑀝𑀲𑁆𑀲 𑀅𑀢𑀺𑀲𑀫𑁆𑀩𑀸𑀥𑁂 𑀫𑀼𑀔𑀝𑁆𑀞𑀸𑀦𑁂 𑀧𑀢𑀺𑀢𑁆𑀯𑀸 𑀧𑀼𑀜𑁆𑀚𑀓𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑀽𑀓𑀭𑁄 𑀆𑀯𑀸𑀝𑀸 𑀉𑀢𑁆𑀢𑀭𑀺𑀢𑁆𑀯𑀸 𑀅𑀲𑀦𑀺𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀩𑁆𑀬𑀕𑁆𑀖𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀤𑀸𑀞𑀸𑀬 𑀧𑀳𑀭𑀺𑀢𑁆𑀯𑀸 𑀬𑀸𑀯 𑀯𑀓𑁆𑀓𑀧𑀤𑁂𑀲𑀸 𑀨𑀸𑀮𑁂𑀢𑁆𑀯𑀸 𑀧𑀜𑁆𑀘𑀫𑀥𑀼𑀭𑀫𑀁𑀲𑀁 𑀤𑀸𑀞𑀸𑀬 𑀧𑀮𑀺𑀯𑁂𑀞𑁂𑀢𑁆𑀯𑀸 𑀩𑁆𑀬𑀕𑁆𑀖𑀲𑁆𑀲 𑀫𑀢𑁆𑀣𑀓𑁂 𑀆𑀯𑀺𑀚𑁆𑀛𑀺𑀢𑁆𑀯𑀸 ‘‘𑀕𑀡𑁆𑀳𑀣 𑀢𑀼𑀫𑁆𑀳𑀸𑀓𑀁 𑀧𑀘𑁆𑀘𑀸𑀫𑀺𑀢𑁆𑀢’’𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑀳𑀺𑀆𑀯𑀸𑀝𑁂 𑀙𑀟𑁆𑀟𑁂𑀲𑀺. 𑀧𑀞𑀫𑀁 𑀆𑀕𑀢𑀸 𑀩𑁆𑀬𑀕𑁆𑀖𑀫𑀁𑀲𑀁 𑀮𑀪𑀺𑀁𑀲𑀼, 𑀧𑀘𑁆𑀙𑀸 𑀆𑀕𑀢𑀸 ‘‘𑀩𑁆𑀬𑀕𑁆𑀖𑀫𑀁𑀲𑀁 𑀓𑀻𑀤𑀺𑀲𑀁 𑀳𑁄𑀢𑀻’’𑀢𑀺 𑀢𑁂𑀲𑀁 𑀫𑀼𑀔𑀁 𑀉𑀧𑀲𑀺𑀗𑁆𑀖𑀦𑁆𑀢𑀸 𑀯𑀺𑀘𑀭𑀺𑀁𑀲𑀼.

𑀲𑀽𑀓𑀭𑀸 𑀦 𑀢𑀸𑀯 𑀢𑀼𑀲𑁆𑀲𑀦𑁆𑀢𑀺. 𑀯𑀟𑁆𑀠𑀓𑀻𑀲𑀽𑀓𑀭𑁄 𑀢𑁂𑀲𑀁 𑀇𑀗𑁆𑀖𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑀼𑀫𑁆𑀳𑁂 𑀦 𑀢𑀼𑀲𑁆𑀲𑀣𑀸’’𑀢𑀺 𑀆𑀳. ‘‘𑀲𑀸𑀫𑀺, 𑀓𑀺𑀁 𑀏𑀢𑁂𑀦 𑀩𑁆𑀬𑀕𑁆𑀖𑁂𑀦 𑀖𑀸𑀢𑀺𑀢𑁂𑀦, 𑀅𑀜𑁆𑀜𑁄 𑀧𑀦 𑀩𑁆𑀬𑀕𑁆𑀖𑀆𑀡𑀸𑀧𑀦𑀲𑀫𑀢𑁆𑀣𑁄 𑀓𑀽𑀝𑀚𑀝𑀺𑀮𑁄 𑀅𑀢𑁆𑀣𑀺𑀬𑁂𑀯𑀸’’𑀢𑀺. ‘‘𑀓𑁄 𑀦𑀸𑀫𑁂𑀲𑁄’’𑀢𑀺? ‘‘𑀏𑀓𑁄 𑀤𑀼𑀲𑁆𑀲𑀻𑀮𑀢𑀸𑀧𑀲𑁄’’𑀢𑀺. ‘‘𑀩𑁆𑀬𑀕𑁆𑀖𑁄𑀧𑀺 𑀫𑀬𑀸 𑀖𑀸𑀢𑀺𑀢𑁄, 𑀲𑁄 𑀫𑁂 𑀓𑀺𑀁 𑀧𑀳𑁄𑀢𑀺, 𑀏𑀣 𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀲𑀽𑀓𑀭𑀖𑀝𑀸𑀬 𑀲𑀤𑁆𑀥𑀺𑀁 𑀧𑀸𑀬𑀸𑀲𑀺. 𑀓𑀽𑀝𑀢𑀸𑀧𑀲𑁄𑀧𑀺 𑀩𑁆𑀬𑀕𑁆𑀖𑁂 𑀘𑀺𑀭𑀸𑀬𑀦𑁆𑀢𑁂 ‘‘𑀓𑀺𑀁 𑀦𑀼 𑀔𑁄 𑀲𑀽𑀓𑀭𑀸 𑀩𑁆𑀬𑀕𑁆𑀖𑀁 𑀕𑀡𑁆𑀳𑀺𑀁𑀲𑀽’’𑀢𑀺 𑀧𑀝𑀺𑀧𑀣𑀁 𑀕𑀘𑁆𑀙𑀦𑁆𑀢𑁄 𑀢𑁂 𑀲𑀽𑀓𑀭𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀆𑀤𑀸𑀬 𑀧𑀮𑀸𑀬𑀦𑁆𑀢𑁄 𑀢𑁂𑀳𑀺 𑀅𑀦𑀼𑀩𑀦𑁆𑀥𑀺𑀢𑁄 𑀧𑀭𑀺𑀓𑁆𑀔𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀯𑁂𑀕𑁂𑀦 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺. 𑀲𑀽𑀓𑀭𑀸 ‘‘𑀇𑀤𑀸𑀦𑀺𑀫𑁆𑀳, 𑀲𑀸𑀫𑀺, 𑀦𑀝𑁆𑀞𑀸, 𑀢𑀸𑀧𑀲𑁄 𑀧𑀮𑀸𑀬𑀺𑀢𑁆𑀯𑀸 ¶ 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀻’’𑀢𑀺 𑀆𑀳𑀁𑀲𑀼. ‘‘𑀓𑀺𑀁 𑀭𑀼𑀓𑁆𑀔𑀁 𑀦𑀸𑀫𑀸’’𑀢𑀺? ‘‘𑀉𑀤𑀼𑀫𑁆𑀩𑀭𑀭𑀼𑀓𑁆𑀔’’𑀦𑁆𑀢𑀺. 𑀲𑁄 ‘‘𑀲𑀽𑀓𑀭𑀺𑀬𑁄 𑀉𑀤𑀓𑀁 𑀆𑀳𑀭𑀦𑁆𑀢𑀼, 𑀲𑀽𑀓𑀭𑀧𑁄𑀢𑀓𑀸 𑀧𑀣𑀯𑀺𑀁 𑀔𑀡𑀦𑁆𑀢𑀼, 𑀤𑀻𑀖𑀤𑀸𑀞𑀸 𑀲𑀽𑀓𑀭𑀸 𑀫𑀽𑀮𑀸𑀦𑀺 𑀙𑀺𑀦𑁆𑀤𑀦𑁆𑀢𑀼, 𑀲𑁂𑀲𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀭𑀓𑁆𑀔𑀦𑁆𑀢𑀽’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀢𑁂𑀲𑀼 𑀢𑀣𑀸 𑀓𑀭𑁄𑀦𑁆𑀢𑁂𑀲𑀼 𑀲𑀬𑀁 𑀉𑀤𑀼𑀫𑁆𑀩𑀭𑀲𑁆𑀲 𑀉𑀚𑀼𑀓𑀁 𑀣𑀽𑀮𑀫𑀽𑀮𑀁 ¶ 𑀨𑀭𑀲𑀼𑀦𑀸 𑀧𑀳𑀭𑀦𑁆𑀢𑁄 𑀯𑀺𑀬 𑀏𑀓𑀧𑁆𑀧𑀳𑀸𑀭𑀫𑁂𑀯 𑀓𑀢𑁆𑀯𑀸 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀁 𑀧𑀸𑀢𑁂𑀲𑀺. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑀽𑀓𑀭𑀸 𑀓𑀽𑀝𑀚𑀝𑀺𑀮𑀁 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 𑀬𑀸𑀯 𑀅𑀝𑁆𑀞𑀺𑀢𑁄 𑀔𑀸𑀤𑀺𑀢𑁆𑀯𑀸 𑀯𑀟𑁆𑀠𑀓𑀻𑀲𑀽𑀓𑀭𑀁 𑀉𑀤𑀼𑀫𑁆𑀩𑀭𑀔𑀦𑁆𑀥𑁂𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀽𑀝𑀚𑀝𑀺𑀮𑀲𑁆𑀲 𑀧𑀭𑀺𑀪𑁄𑀕𑀲𑀗𑁆𑀔𑁂𑀦 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀓𑀭𑀺𑀁𑀲𑀼, 𑀏𑀓𑀜𑁆𑀘 𑀢𑀭𑀼𑀡𑀲𑀽𑀓𑀭𑀺𑀁 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀓𑀺𑀭 𑀬𑀸𑀯𑀚𑁆𑀚𑀢𑀦𑀸 𑀭𑀸𑀚𑀸𑀦𑁄 𑀉𑀤𑀼𑀫𑁆𑀩𑀭𑀪𑀤𑁆𑀤𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀅𑀪𑀺𑀲𑀺𑀜𑁆𑀘𑀦𑁆𑀢𑀺.

𑀢𑀲𑁆𑀫𑀺𑀁 ¶ 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀯𑀺𑀝𑀧𑀦𑁆𑀢𑀭𑁂 𑀲𑀽𑀓𑀭𑀸𑀦𑀁 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁯.

‘‘𑀦𑀫𑀢𑁆𑀣𑀼 𑀲𑀗𑁆𑀖𑀸𑀦 𑀲𑀫𑀸𑀕𑀢𑀸𑀦𑀁, 𑀤𑀺𑀲𑁆𑀯𑀸 𑀲𑀬𑀁 𑀲𑀔𑁆𑀬 𑀯𑀤𑀸𑀫𑀺 𑀅𑀩𑁆𑀪𑀼𑀢𑀁;

𑀩𑁆𑀬𑀕𑁆𑀖𑀁 𑀫𑀺𑀕𑀸 𑀬𑀢𑁆𑀣 𑀚𑀺𑀦𑀺𑀁𑀲𑀼 𑀤𑀸𑀞𑀺𑀦𑁄, 𑀲𑀸𑀫𑀕𑁆𑀕𑀺𑀬𑀸 𑀤𑀸𑀞𑀩𑀮𑁂𑀲𑀼 𑀫𑀼𑀘𑁆𑀘𑀭𑁂’’𑀢𑀺.

𑀢𑀢𑁆𑀣 𑀦𑀫𑀢𑁆𑀣𑀼 𑀲𑀗𑁆𑀖𑀸𑀦𑀦𑁆𑀢𑀺 𑀅𑀬𑀁 𑀫𑀫 𑀦𑀫𑀓𑁆𑀓𑀸𑀭𑁄 𑀲𑀫𑀸𑀕𑀢𑀸𑀦𑀁 𑀲𑀽𑀓𑀭𑀲𑀗𑁆𑀖𑀸𑀦𑀁 𑀅𑀢𑁆𑀣𑀼. 𑀤𑀺𑀲𑁆𑀯𑀸 𑀲𑀬𑀁 𑀲𑀔𑁆𑀬 𑀯𑀤𑀸𑀫𑀺 𑀅𑀩𑁆𑀪𑀼𑀢𑀦𑁆𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀅𑀪𑀽𑀢𑀧𑀼𑀩𑁆𑀩𑀁 𑀅𑀩𑁆𑀪𑀼𑀢𑀁 𑀲𑀔𑁆𑀬𑀁 𑀫𑀺𑀢𑁆𑀢𑀪𑀸𑀯𑀁 𑀲𑀬𑀁 𑀤𑀺𑀲𑁆𑀯𑀸 𑀯𑀤𑀸𑀫𑀺. 𑀩𑁆𑀬𑀕𑁆𑀖𑀁 𑀫𑀺𑀕𑀸 𑀬𑀢𑁆𑀣 𑀚𑀺𑀦𑀺𑀁𑀲𑀼 𑀤𑀸𑀞𑀺𑀦𑁄𑀢𑀺 𑀬𑀢𑁆𑀭 𑀳𑀺 𑀦𑀸𑀫 𑀤𑀸𑀞𑀺𑀦𑁄 𑀲𑀽𑀓𑀭𑀫𑀺𑀕𑀸 𑀩𑁆𑀬𑀕𑁆𑀖𑀁 𑀚𑀺𑀦𑀺𑀁𑀲𑀼, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀸𑀫𑀕𑁆𑀕𑀺𑀬𑀸 𑀤𑀸𑀞𑀩𑀮𑁂𑀲𑀼 𑀫𑀼𑀘𑁆𑀘𑀭𑁂𑀢𑀺 𑀬𑀸 𑀲𑀸 𑀤𑀸𑀞𑀩𑀮𑁂𑀲𑀼 𑀲𑀽𑀓𑀭𑁂𑀲𑀼 𑀲𑀸𑀫𑀕𑁆𑀕𑀻 𑀏𑀓𑀚𑁆𑀛𑀸𑀲𑀬𑀢𑀸, 𑀢𑀸𑀬 𑀢𑁂𑀲𑀼 𑀲𑀸𑀫𑀕𑁆𑀕𑀺𑀬𑀸 𑀢𑁂 𑀤𑀸𑀞𑀩𑀮𑀸 𑀧𑀘𑁆𑀘𑀸𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀚𑁆𑀚 𑀫𑀭𑀡𑀪𑀬𑀸 𑀫𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑁄 𑀯𑀟𑁆𑀠𑀓𑀻𑀲𑀽𑀓𑀭𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁮𑁪] 𑁪. 𑀲𑀺𑀭𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 ¶ 𑀉𑀲𑁆𑀲𑀼𑀓𑀸 𑀲𑀗𑁆𑀖𑀭𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀺𑀭𑀺𑀘𑁄𑀭𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑁂 (𑀚𑀸. 𑁧.𑁧.𑁪𑁦) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥𑀸𑀧𑀺 𑀧𑀦 𑀲𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀖𑀭𑁂 𑀘𑀢𑀼𑀢𑁆𑀣𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀯𑀲𑀦𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀤𑁂𑀯𑀢𑀸 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀘𑀢𑀼𑀧𑀜𑁆𑀜𑀸𑀲𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀆𑀳𑀭𑀺𑀢𑁆𑀯𑀸 𑀓𑁄𑀝𑁆𑀞𑁂 𑀧𑀽𑀭𑁂𑀢𑁆𑀯𑀸 𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀲𑀳𑀸𑀬𑀺𑀓𑀸 𑀅𑀳𑁄𑀲𑀺. 𑀅𑀣 𑀦𑀁 𑀲𑁄 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺𑀦𑁄 𑀬𑀲𑁄 𑀬𑀣𑀸𑀧𑁄𑀭𑀸𑀡𑁄𑀯 𑀚𑀸𑀢𑁄. 𑀅𑀣𑁂𑀓𑁄 𑀲𑀸𑀯𑀢𑁆𑀣𑀺𑀯𑀸𑀲𑀻 𑀲𑀺𑀭𑀺𑀮𑀓𑁆𑀔𑀡𑀜𑁆𑀜𑀽 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑀼𑀕𑁆𑀕𑀢𑁄 𑀳𑀼𑀢𑁆𑀯𑀸 𑀧𑀼𑀦 𑀇𑀲𑁆𑀲𑀭𑁄 𑀚𑀸𑀢𑁄, 𑀬𑀁𑀦𑀽𑀦𑀸𑀳𑀁 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀯𑀺𑀬 𑀕𑀢𑁆𑀯𑀸 𑀢𑀲𑁆𑀲 𑀖𑀭𑀢𑁄 𑀲𑀺𑀭𑀺𑀁 𑀣𑁂𑀦𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀓𑀢𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀲𑀸𑀭𑀡𑀻𑀬𑀓𑀣𑀸𑀬 𑀯𑀢𑁆𑀢𑀫𑀸𑀦𑀸𑀬 ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀢𑁆𑀣 𑀦𑀼 𑀔𑁄 𑀲𑀺𑀭𑀻 𑀧𑀢𑀺𑀝𑁆𑀞𑀺𑀢𑀸’’𑀢𑀺 𑀑𑀮𑁄𑀓𑁂𑀲𑀺. 𑀲𑁂𑀝𑁆𑀞𑀺𑀦𑁄 𑀘 𑀲𑀩𑁆𑀩𑀲𑁂𑀢𑁄 ¶ 𑀥𑁄𑀢𑀲𑀗𑁆𑀔𑀧𑀝𑀺𑀪𑀸𑀕𑁄 𑀓𑀼𑀓𑁆𑀓𑀼𑀝𑁄 𑀲𑀼𑀯𑀡𑁆𑀡𑀧𑀜𑁆𑀚𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀘𑀽𑀴𑀸𑀬 𑀲𑀺𑀭𑀻 𑀧𑀢𑀺𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀑𑀮𑁄𑀓𑀬𑀫𑀸𑀦𑁄 𑀲𑀺𑀭𑀺𑀬𑀸 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀅𑀳𑀁, 𑀫𑀳𑀸𑀲𑁂𑀝𑁆𑀞𑀺, 𑀧𑀜𑁆𑀘𑀲𑀢𑁂 𑀫𑀸𑀡𑀯𑁂 𑀫𑀦𑁆𑀢𑁂 𑀯𑀸𑀘𑁂𑀫𑀺, 𑀅𑀓𑀸𑀮𑀭𑀯𑀺𑀁 𑀏𑀓𑀁 𑀓𑀼𑀓𑁆𑀓𑀼𑀝𑀁 𑀦𑀺𑀲𑁆𑀲𑀸𑀬 𑀢𑁂 𑀘 𑀫𑀬𑀜𑁆𑀘 𑀓𑀺𑀮𑀫𑀸𑀫, 𑀅𑀬𑀜𑁆𑀘 𑀓𑀺𑀭 𑀓𑀼𑀓𑁆𑀓𑀼𑀝𑁄 𑀓𑀸𑀮𑀭𑀯𑀻, 𑀇𑀫𑀲𑁆𑀲𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀺, 𑀤𑁂𑀳𑀺 𑀫𑁂 𑀏𑀢𑀁 𑀓𑀼𑀓𑁆𑀓𑀼𑀝’’𑀦𑁆𑀢𑀺. ‘‘𑀕𑀡𑁆𑀳, 𑀩𑁆𑀭𑀸𑀳𑁆𑀫𑀡, 𑀤𑁂𑀫𑀺 𑀢𑁂 𑀓𑀼𑀓𑁆𑀓𑀼𑀝’’𑀦𑁆𑀢𑀺. ‘‘𑀤𑁂𑀫𑀻’’𑀢𑀺 𑀘 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀲𑀺𑀭𑀻 𑀢𑀲𑁆𑀲 𑀘𑀽𑀴𑀢𑁄 𑀅𑀧𑀕𑀦𑁆𑀢𑁆𑀯𑀸 𑀉𑀲𑁆𑀲𑀻𑀲𑀓𑁂 𑀞𑀧𑀺𑀢𑁂 𑀫𑀡𑀺𑀓𑁆𑀔𑀦𑁆𑀥𑁂 𑀧𑀢𑀺𑀝𑁆𑀞𑀸𑀲𑀺.

𑀩𑁆𑀭𑀸𑀳𑁆𑀫𑀡𑁄 𑀲𑀺𑀭𑀺𑀬𑀸 𑀫𑀡𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀫𑀡𑀺𑀫𑁆𑀧𑀺 𑀬𑀸𑀘𑀺. ‘‘𑀫𑀡𑀺𑀫𑁆𑀧𑀺 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀲𑀺𑀭𑀻 𑀫𑀡𑀺𑀢𑁄 𑀅𑀧𑀕𑀦𑁆𑀢𑁆𑀯𑀸 𑀉𑀲𑁆𑀲𑀻𑀲𑀓𑁂 𑀞𑀧𑀺𑀢𑀆𑀭𑀓𑁆𑀔𑀬𑀝𑁆𑀞𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀺𑀭𑀺𑀬𑀸 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀫𑁆𑀧𑀺 𑀬𑀸𑀘𑀺. ‘‘𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀲𑀺𑀭𑀻 𑀬𑀝𑁆𑀞𑀺𑀢𑁄 𑀅𑀧𑀕𑀦𑁆𑀢𑁆𑀯𑀸 𑀧𑀼𑀜𑁆𑀜𑀮𑀓𑁆𑀔𑀡𑀤𑁂𑀯𑀺𑀬𑀸 𑀦𑀸𑀫 𑀲𑁂𑀝𑁆𑀞𑀺𑀦𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀻𑀲𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀺𑀭𑀺𑀘𑁄𑀭𑀩𑁆𑀭𑀸𑀳𑁆𑀫𑀡𑁄 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀯𑀺𑀲𑁆𑀲𑀚𑁆𑀚𑀺𑀬𑀪𑀡𑁆𑀟𑀁 𑀏𑀢𑀁, 𑀬𑀸𑀘𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁂𑀝𑁆𑀞𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀲𑁂𑀝𑁆𑀞𑀺, 𑀅𑀳𑀁 ¶ 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 ‘𑀲𑀺𑀭𑀺𑀁 𑀣𑁂𑀦𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀆𑀕𑀘𑁆𑀙𑀺𑀁, 𑀲𑀺𑀭𑀻 𑀧𑀦 𑀢𑁂 𑀓𑀼𑀓𑁆𑀓𑀼𑀝𑀲𑁆𑀲 𑀘𑀽𑀴𑀸𑀬𑀁 𑀧𑀢𑀺𑀝𑁆𑀞𑀺𑀢𑀸 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀫𑀫 𑀤𑀺𑀦𑁆𑀦𑁂 𑀢𑀢𑁄 𑀅𑀧𑀕𑀦𑁆𑀢𑁆𑀯𑀸 𑀫𑀡𑀺𑀫𑁆𑀳𑀺 𑀧𑀢𑀺𑀝𑁆𑀞𑀳𑀺, 𑀫𑀡𑀺𑀫𑁆𑀳𑀺 𑀤𑀺𑀦𑁆𑀦𑁂 𑀆𑀭𑀓𑁆𑀔𑀬𑀝𑁆𑀞𑀺𑀬𑀁 𑀧𑀢𑀺𑀝𑁆𑀞𑀳𑀺, 𑀆𑀭𑀓𑁆𑀔𑀬𑀝𑁆𑀞𑀺𑀬𑀸 𑀤𑀺𑀦𑁆𑀦𑀸𑀬 𑀢𑀢𑁄 𑀅𑀧𑀕𑀦𑁆𑀢𑁆𑀯𑀸 𑀧𑀼𑀜𑁆𑀜𑀮𑀓𑁆𑀔𑀡𑀤𑁂𑀯𑀺𑀬𑀸 ¶ 𑀲𑀻𑀲𑁂 𑀧𑀢𑀺𑀝𑁆𑀞𑀳𑀺, ‘𑀇𑀤𑀁 𑀔𑁄 𑀧𑀦 𑀅𑀯𑀺𑀲𑁆𑀲𑀚𑁆𑀚𑀺𑀬𑀪𑀡𑁆𑀟’𑀦𑁆𑀢𑀺 𑀇𑀫𑀫𑁆𑀧𑀺 𑀫𑁂 𑀦 𑀕𑀳𑀺𑀢𑀁, 𑀦 𑀲𑀓𑁆𑀓𑀸 𑀢𑀯 𑀲𑀺𑀭𑀺𑀁 𑀣𑁂𑀦𑁂𑀢𑀼𑀁, 𑀢𑀯 𑀲𑀦𑁆𑀢𑀓𑀁 𑀢𑀯𑁂𑀯 𑀳𑁄𑀢𑀽’’𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀇𑀫𑀁 𑀓𑀸𑀭𑀡𑀁 𑀲𑀢𑁆𑀣𑀼 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀲𑀩𑁆𑀩𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀁 𑀲𑀼𑀢𑁆𑀯𑀸 ‘‘𑀦 𑀔𑁄, 𑀕𑀳𑀧𑀢𑀺, 𑀇𑀤𑀸𑀦𑁂𑀯 𑀅𑀜𑁆𑀜𑁂𑀲𑀁 𑀲𑀺𑀭𑀻 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀧𑁆𑀧𑀧𑀼𑀜𑁆𑀜𑁂𑀳𑀺 𑀉𑀧𑁆𑀧𑀸𑀤𑀺𑀢𑀲𑀺𑀭𑀻 𑀧𑀦 𑀧𑀼𑀜𑁆𑀜𑀯𑀦𑁆𑀢𑀸𑀦𑀁𑀬𑁂𑀯 𑀧𑀸𑀤𑀫𑀽𑀮𑀁 𑀕𑀢𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀮𑀓𑀺𑀭𑀺𑀬𑀸𑀬 𑀲𑀁𑀯𑀺𑀕𑁆𑀕𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀁 𑀘𑀭𑀫𑀸𑀦𑁄 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀢𑀲𑁆𑀲 𑀆𑀘𑀸𑀭𑀯𑀺𑀳𑀸𑀭𑁂 𑀧𑀲𑀦𑁆𑀦𑁄 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀸𑀧𑁂𑀢𑁆𑀯𑀸 𑀦𑀺𑀘𑁆𑀘𑀁 𑀧𑀝𑀺𑀚𑀕𑁆𑀕𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀓𑀝𑁆𑀞𑀳𑀸𑀭𑀓𑁄 𑀅𑀭𑀜𑁆𑀜𑀢𑁄 𑀤𑀸𑀭𑀽𑀦𑀺 𑀆𑀳𑀭𑀦𑁆𑀢𑁄 𑀯𑁂𑀮𑀸𑀬 𑀦𑀕𑀭𑀤𑁆𑀯𑀸𑀭𑀁 𑀧𑀸𑀧𑀼𑀡𑀺𑀢𑀼𑀁 ¶ 𑀦𑀸𑀲𑀓𑁆𑀔𑀺. 𑀲𑀸𑀬𑀁 𑀏𑀓𑀲𑁆𑀫𑀺𑀁 𑀤𑁂𑀯𑀓𑀼𑀮𑁂 𑀤𑀸𑀭𑀼𑀓𑀮𑀸𑀧𑀁 𑀉𑀲𑁆𑀲𑀻𑀲𑀓𑁂 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀤𑁂𑀯𑀓𑀼𑀮𑁂 𑀯𑀺𑀲𑁆𑀲𑀝𑁆𑀞𑀸 𑀩𑀳𑀽 𑀓𑀼𑀓𑁆𑀓𑀼𑀝𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀲𑀬𑀺𑀁𑀲𑀼. 𑀢𑁂𑀲𑀼 𑀉𑀧𑀭𑀺𑀲𑀬𑀺𑀢𑀓𑀼𑀓𑁆𑀓𑀼𑀝𑁄 𑀧𑀘𑁆𑀘𑀽𑀲𑀓𑀸𑀮𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑁄 𑀳𑁂𑀝𑁆𑀞𑀸𑀲𑀬𑀺𑀢𑀓𑀼𑀓𑁆𑀓𑀼𑀝𑀲𑁆𑀲 𑀲𑀭𑀻𑀭𑁂 𑀧𑀸𑀢𑁂𑀲𑀺. ‘‘𑀓𑁂𑀦 𑀫𑁂 𑀲𑀭𑀻𑀭𑁂 𑀯𑀘𑁆𑀘𑀁 𑀧𑀸𑀢𑀺𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀫𑀬𑀸’’𑀢𑀺 𑀆𑀳. ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀦𑀼𑀧𑀥𑀸𑀭𑁂𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑀺 𑀧𑀸𑀢𑁂𑀲𑀺. 𑀢𑀢𑁄 𑀉𑀪𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀓𑀼𑀤𑁆𑀥𑀸 ‘‘𑀓𑀺𑀁 𑀢𑁂 𑀩𑀮𑀁, 𑀓𑀺𑀁 𑀢𑁂 𑀩𑀮’’𑀦𑁆𑀢𑀺 𑀓𑀮𑀳𑀁 𑀓𑀭𑀺𑀁𑀲𑀼. 𑀅𑀣 𑀳𑁂𑀝𑁆𑀞𑀸𑀲𑀬𑀺𑀢𑀓𑀼𑀓𑁆𑀓𑀼𑀝𑁄 𑀆𑀳 𑁋 ‘‘𑀫𑀁 𑀫𑀸𑀭𑁂𑀢𑁆𑀯𑀸 𑀅𑀗𑁆𑀕𑀸𑀭𑁂 𑀧𑀓𑁆𑀓𑀫𑀁𑀲𑀁 𑀔𑀸𑀤𑀦𑁆𑀢𑁄 𑀧𑀸𑀢𑁄𑀯 𑀓𑀳𑀸𑀧𑀡𑀲𑀳𑀲𑁆𑀲𑀁 ¶ 𑀮𑀪𑀢𑀻’’𑀢𑀺. 𑀉𑀧𑀭𑀺𑀲𑀬𑀺𑀢𑀓𑀼𑀓𑁆𑀓𑀼𑀝𑁄 𑀆𑀳 𑁋 ‘‘𑀅𑀫𑁆𑀪𑁄, 𑀫𑀸 𑀢𑁆𑀯𑀁 𑀏𑀢𑁆𑀢𑀓𑁂𑀦 𑀕𑀚𑁆𑀚𑀺, 𑀫𑀫 𑀣𑀽𑀮𑀫𑀁𑀲𑀁 𑀔𑀸𑀤𑀦𑁆𑀢𑁄 𑀭𑀸𑀚𑀸 𑀳𑁄𑀢𑀺, 𑀩𑀳𑀺𑀫𑀁𑀲𑀁 ¶ 𑀔𑀸𑀤𑀦𑁆𑀢𑁄 𑀧𑀼𑀭𑀺𑀲𑁄 𑀘𑁂, 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁, 𑀇𑀢𑁆𑀣𑀻 𑀘𑁂, 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀮𑀪𑀢𑀺. 𑀅𑀝𑁆𑀞𑀺𑀫𑀁𑀲𑀁 𑀧𑀦 𑀫𑁂 𑀔𑀸𑀤𑀦𑁆𑀢𑁄 𑀕𑀺𑀳𑀻 𑀘𑁂, 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀁, 𑀧𑀩𑁆𑀩𑀚𑀺𑀢𑁄 𑀘𑁂, 𑀭𑀸𑀚𑀓𑀼𑀮𑀽𑀧𑀓𑀪𑀸𑀯𑀁 𑀮𑀪𑀢𑀻’’𑀢𑀺.

𑀓𑀝𑁆𑀞𑀳𑀸𑀭𑀓𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀭𑀚𑁆𑀚𑁂 𑀧𑀢𑁆𑀢𑁂 𑀲𑀳𑀲𑁆𑀲𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀲𑀡𑀺𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀧𑀭𑀺𑀲𑀬𑀺𑀢𑀓𑀼𑀓𑁆𑀓𑀼𑀝𑀁 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 ‘‘𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀯𑀺𑀯𑀝𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑀼𑀓𑁆𑀓𑀼𑀝𑀁 𑀦𑀺𑀢𑁆𑀢𑀘𑀁 𑀓𑀢𑁆𑀯𑀸 𑀉𑀤𑀭𑀁 𑀲𑁄𑀥𑁂𑀢𑁆𑀯𑀸 ‘‘𑀇𑀤𑀁 𑀓𑀼𑀓𑁆𑀓𑀼𑀝𑀫𑀁𑀲𑀁 𑀲𑀸𑀥𑀼𑀓𑀁 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀧𑀚𑀸𑀧𑀢𑀺𑀬𑀸 𑀅𑀤𑀸𑀲𑀺. 𑀲𑀸 𑀓𑀼𑀓𑁆𑀓𑀼𑀝𑀫𑀁𑀲𑀜𑁆𑀘 𑀪𑀢𑁆𑀢𑀜𑁆𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 ‘‘𑀪𑀼𑀜𑁆𑀚, 𑀲𑀸𑀫𑀻’’𑀢𑀺 𑀢𑀲𑁆𑀲 𑀉𑀧𑀦𑀸𑀫𑁂𑀲𑀺. ‘‘𑀪𑀤𑁆𑀤𑁂, 𑀏𑀢𑀁 𑀫𑀁𑀲𑀁 𑀫𑀳𑀸𑀦𑀼𑀪𑀸𑀯𑀁, 𑀏𑀢𑀁 𑀔𑀸𑀤𑀺𑀢𑁆𑀯𑀸 𑀅𑀳𑀁 𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀲𑀺, 𑀢𑀁 𑀪𑀢𑁆𑀢𑀜𑁆𑀘 𑀫𑀁𑀲𑀜𑁆𑀘 𑀆𑀤𑀸𑀬 𑀕𑀗𑁆𑀕𑀸𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀪𑀢𑁆𑀢𑀪𑀸𑀚𑀦𑀁 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑁆𑀳𑀸𑀦𑀢𑁆𑀣𑀸𑀬 𑀑𑀢𑀭𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀯𑀸𑀢𑁂𑀦 𑀔𑀼𑀪𑀺𑀢𑀁 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀪𑀢𑁆𑀢𑀪𑀸𑀚𑀦𑀁 𑀆𑀤𑀸𑀬 𑀅𑀕𑀫𑀸𑀲𑀺. 𑀢𑀁 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀳𑁂𑀝𑁆𑀞𑀸𑀦𑀤𑀺𑀬𑀁 𑀳𑀢𑁆𑀣𑀺𑀁 𑀦𑁆𑀳𑀸𑀧𑁂𑀦𑁆𑀢𑁄 𑀏𑀓𑁄 𑀳𑀢𑁆𑀣𑀸𑀘𑀭𑀺𑀬𑁄 𑀫𑀳𑀸𑀫𑀢𑁆𑀢𑁄 𑀤𑀺𑀲𑁆𑀯𑀸 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀓𑀺𑀫𑁂𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀢𑁆𑀢𑀜𑁆𑀘𑁂𑀯 𑀓𑀼𑀓𑁆𑀓𑀼𑀝𑀫𑀁𑀲𑀜𑁆𑀘 𑀲𑀸𑀫𑀻’’𑀢𑀺. 𑀲𑁄 𑀢𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀮𑀜𑁆𑀙𑀸𑀧𑁂𑀢𑁆𑀯𑀸 ‘‘𑀬𑀸𑀯 𑀫𑀬𑀁 𑀆𑀕𑀘𑁆𑀙𑀸𑀫, 𑀢𑀸𑀯𑀺𑀫𑀁 𑀪𑀢𑁆𑀢𑀁 𑀫𑀸 𑀯𑀺𑀯𑀭𑀸’’𑀢𑀺 𑀪𑀭𑀺𑀬𑀸𑀬 𑀧𑁂𑀲𑁂𑀲𑀺. 𑀲𑁄𑀧𑀺 𑀔𑁄 𑀓𑀝𑁆𑀞𑀳𑀸𑀭𑀓𑁄 𑀫𑀼𑀔𑀢𑁄 𑀧𑀯𑀺𑀝𑁆𑀞𑁂𑀦 𑀯𑀸𑀮𑀼𑀓𑁄𑀤𑀓𑁂𑀦 𑀉𑀤𑁆𑀥𑀼𑀫𑀸𑀢𑀉𑀤𑀭𑁄 𑀧𑀮𑀸𑀬𑀺.

𑀅𑀣𑁂𑀓𑁄 𑀢𑀲𑁆𑀲 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀓𑀼𑀮𑀽𑀧𑀓𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀢𑀸𑀧𑀲𑁄 ‘‘𑀫𑀬𑁆𑀳𑀁 𑀉𑀧𑀝𑁆𑀞𑀸𑀓𑁄 𑀳𑀢𑁆𑀣𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺, 𑀓𑀤𑀸 𑀦𑀼 𑀔𑁄 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀉𑀧𑀥𑀸𑀭𑁂𑀦𑁆𑀢𑁄 𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀺. 𑀳𑀢𑁆𑀣𑀸𑀘𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀢𑀁 𑀪𑀢𑁆𑀢𑀪𑀸𑀚𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀢𑀸𑀧𑀲𑀁 𑀫𑀁𑀲𑁄𑀤𑀦𑁂𑀦 𑀧𑀭𑀺𑀯𑀺𑀲𑀣𑀸’’𑀢𑀺 𑀆𑀳. 𑀢𑀸𑀧𑀲𑁄 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀁𑀲𑁂 𑀤𑀻𑀬𑀫𑀸𑀦𑁂 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀫𑀁𑀲𑀁 𑀅𑀳𑀁 𑀯𑀺𑀘𑀸𑀭𑁂𑀫𑀻’’𑀢𑀺 𑀯𑀢𑁆𑀯𑀸 ‘‘𑀯𑀺𑀘𑀸𑀭𑁂𑀣 ¶ , 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀣𑀽𑀮𑀫𑀁𑀲𑀸𑀤𑀻𑀦𑀺 𑀏𑀓𑁂𑀓𑀁 𑀓𑁄𑀝𑁆𑀞𑀸𑀲𑀁 𑀓𑀸𑀭𑁂𑀢𑁆𑀯𑀸 𑀣𑀽𑀮𑀫𑀁𑀲𑀁 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀤𑀸𑀧𑁂𑀲𑀺, 𑀩𑀳𑀺𑀫𑀁𑀲𑀁 𑀢𑀲𑁆𑀲 𑀪𑀭𑀺𑀬𑀸𑀬, 𑀅𑀝𑁆𑀞𑀺𑀫𑀁𑀲𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀕𑀘𑁆𑀙𑀦𑁆𑀢𑁄 ‘‘𑀢𑁆𑀯𑀁 𑀇𑀢𑁄 𑀢𑀢𑀺𑀬𑀤𑀺𑀯𑀲𑁂 𑀭𑀸𑀚𑀸 𑀪𑀯𑀺𑀲𑁆𑀲𑀲𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑀺𑀬𑀤𑀺𑀯𑀲𑁂 𑀏𑀓𑁄 𑀲𑀸𑀫𑀦𑁆𑀢𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀭𑀺𑀯𑀸𑀭𑁂𑀲𑀺. 𑀩𑀸𑀭𑀸𑀡𑀲𑀺𑀭𑀸𑀚𑀸 ¶ 𑀳𑀢𑁆𑀣𑀸𑀘𑀭𑀺𑀬𑀁 𑀭𑀸𑀚𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑀼𑀚𑁆𑀛𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀲𑁂𑀦𑀸𑀬 𑀯𑀺𑀘𑀸𑀭𑁂𑀦𑁆𑀢𑁄 𑀏𑀓𑁂𑀦 𑀫𑀳𑀸𑀯𑁂𑀕𑁂𑀦 𑀲𑀭𑁂𑀦 𑀯𑀺𑀤𑁆𑀥𑁄 𑀢𑀗𑁆𑀔𑀡𑀜𑁆𑀜𑁂𑀯 𑀫𑀭𑀺. 𑀢𑀲𑁆𑀲 𑀫𑀢𑀪𑀸𑀯𑀁 𑀜𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑁄 𑀩𑀳𑀽 𑀓𑀳𑀸𑀧𑀡𑁂 𑀦𑀻𑀳𑀭𑀸𑀧𑁂𑀢𑁆𑀯𑀸 ‘‘𑀥𑀦𑀢𑁆𑀣𑀺𑀓𑀸 𑀧𑀼𑀭𑀢𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀩𑀮𑀓𑀸𑀬𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀲𑀸𑀫𑀦𑁆𑀢𑀭𑀸𑀚𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 ‘‘𑀓𑀁 𑀭𑀸𑀚𑀸𑀦𑀁 𑀓𑀭𑁄𑀫𑀸’’𑀢𑀺 𑀫𑀦𑁆𑀢𑀬𑀫𑀸𑀦𑀸 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀚𑀻𑀯𑀫𑀸𑀦𑁄 𑀅𑀢𑁆𑀢𑀦𑁄 𑀯𑁂𑀲𑀁 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀅𑀤𑀸𑀲𑀺, 𑀅𑀬𑀫𑁂𑀯 𑀬𑀼𑀤𑁆𑀥𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺, 𑀏𑀢𑀲𑁆𑀲𑁂𑀯 𑀭𑀚𑁆𑀚𑀁 𑀤𑀲𑁆𑀲𑀸𑀫𑀸’’𑀢𑀺 𑀢𑀁 𑀭𑀚𑁆𑀚𑁂𑀦 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀪𑀭𑀺𑀬𑀫𑁆𑀧𑀺𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀓𑀼𑀮𑀽𑀧𑀓𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁦.

‘‘𑀬𑀁 𑀉𑀲𑁆𑀲𑀼𑀓𑀸 𑀲𑀗𑁆𑀖𑀭𑀦𑁆𑀢𑀺, 𑀅𑀮𑀓𑁆𑀔𑀺𑀓𑀸 𑀩𑀳𑀼𑀁 𑀥𑀦𑀁;

𑀲𑀺𑀧𑁆𑀧𑀯𑀦𑁆𑀢𑁄 𑀅𑀲𑀺𑀧𑁆𑀧𑀸 𑀘, 𑀮𑀓𑁆𑀔𑀺𑀯𑀸 𑀢𑀸𑀦𑀺 𑀪𑀼𑀜𑁆𑀚𑀢𑀺.

𑁧𑁦𑁧.

‘‘𑀲𑀩𑁆𑀩𑀢𑁆𑀣 𑀓𑀢𑀧𑀼𑀜𑁆𑀜𑀲𑁆𑀲, 𑀅𑀢𑀺𑀘𑁆𑀘𑀜𑁆𑀜𑁂𑀯 𑀧𑀸𑀡𑀺𑀦𑁄;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀳𑀽 𑀪𑁄𑀕𑀸, 𑀅𑀧𑁆𑀧𑀦𑀸𑀬𑀢𑀦𑁂𑀲𑀼𑀧𑀻’’𑀢𑀺.

𑀢𑀢𑁆𑀣 𑀬𑀁 𑀉𑀲𑁆𑀲𑀼𑀓𑀸𑀢𑀺 𑀬𑀁 𑀥𑀦𑀲𑀗𑁆𑀖𑀭𑀡𑁂 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸 𑀙𑀦𑁆𑀤𑀚𑀸𑀢𑀸 𑀓𑀺𑀘𑁆𑀙𑁂𑀦 𑀩𑀳𑀼𑀁 𑀥𑀦𑀁 𑀲𑀗𑁆𑀖𑀭𑀦𑁆𑀢𑀺.‘‘𑀬𑁂 𑀉𑀲𑁆𑀲𑀼𑀓𑀸’’𑀢𑀺𑀧𑀺 𑀧𑀸𑀞𑁄, 𑀬𑁂 𑀧𑀼𑀭𑀺𑀲𑀸 ¶ 𑀥𑀦𑀲𑀁𑀳𑀭𑀡𑁂 𑀉𑀲𑁆𑀲𑀼𑀓𑀸 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀺𑀯𑀲𑁂𑀦 𑀲𑀺𑀧𑁆𑀧𑀯𑀦𑁆𑀢𑁄 𑀅𑀲𑀺𑀧𑁆𑀧𑀸 𑀘 𑀅𑀦𑁆𑀢𑀫𑀲𑁄 𑀯𑁂𑀢𑀦𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀲𑀗𑁆𑀖𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀺𑀯𑀸 𑀢𑀸𑀦𑀺 𑀪𑀼𑀜𑁆𑀚𑀢𑀻𑀢𑀺 𑀢𑀸𑀦𑀺 ‘‘𑀩𑀳𑀼𑀁 𑀥𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺 𑀥𑀦𑀸𑀦𑀺 𑀧𑀼𑀜𑁆𑀜𑀯𑀸 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀓𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀢𑀺.

𑀅𑀢𑀺𑀘𑁆𑀘𑀜𑁆𑀜𑁂𑀯 𑀧𑀸𑀡𑀺𑀦𑁄𑀢𑀺 𑀅𑀢𑀺𑀘𑁆𑀘 𑀅𑀜𑁆𑀜𑁂 𑀏𑀯 𑀧𑀸𑀡𑀺𑀦𑁄. 𑀏𑀯-𑀓𑀸𑀭𑁄 𑀧𑀼𑀭𑀺𑀫𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄, 𑀲𑀩𑁆𑀩𑀢𑁆𑀣𑁂𑀯 𑀓𑀢𑀧𑀼𑀜𑁆𑀜𑀲𑁆𑀲 𑀅𑀜𑁆𑀜𑁂 𑀅𑀓𑀢𑀧𑀼𑀜𑁆𑀜𑁂 𑀲𑀢𑁆𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀬𑀢𑀦𑁂𑀲𑀼𑀧𑀻𑀢𑀺 𑀅𑀧𑀺 𑀅𑀦𑀸𑀬𑀢𑀦𑁂𑀲𑀼𑀧𑀺 𑀅𑀭𑀢𑀦𑀸𑀓𑀭𑁂𑀲𑀼 𑀭𑀢𑀦𑀸𑀦𑀺 𑀅𑀲𑀼𑀯𑀡𑁆𑀡𑀸𑀬𑀢𑀦𑀸𑀤𑀻𑀲𑀼 𑀲𑀼𑀯𑀡𑁆𑀡𑀸𑀤𑀻𑀦𑀺 𑀅𑀳𑀢𑁆𑀣𑀸𑀬𑀢𑀦𑀸𑀤𑀻𑀲𑀼 𑀳𑀢𑁆𑀣𑀺𑀆𑀤𑀬𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀸 𑀩𑀳𑀽 𑀪𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 ¶ . 𑀢𑀢𑁆𑀣 𑀫𑀼𑀢𑁆𑀢𑀸𑀫𑀡𑀺𑀆𑀤𑀻𑀦𑀁 𑀅𑀦𑀸𑀓𑀭𑁂 𑀉𑀧𑁆𑀧𑀢𑁆𑀢𑀺𑀬𑀁 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀫𑀳𑀸𑀭𑀸𑀚𑀲𑁆𑀲 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁.

𑀲𑀢𑁆𑀣𑀸 ¶ 𑀧𑀦 𑀇𑀫𑀸 𑀕𑀸𑀣𑀸 𑀯𑀢𑁆𑀯𑀸 ‘‘𑀕𑀳𑀧𑀢𑀺, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀲𑀤𑀺𑀲𑀁 𑀅𑀜𑁆𑀜𑀁 𑀆𑀬𑀢𑀦𑀁 𑀦𑀸𑀫 𑀦𑀢𑁆𑀣𑀺, 𑀧𑀼𑀜𑁆𑀜𑀯𑀦𑁆𑀢𑀸𑀦𑀜𑁆𑀳𑀺 𑀅𑀦𑀸𑀓𑀭𑁂𑀲𑀼 𑀭𑀢𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺.

‘‘𑀲𑀼𑀯𑀡𑁆𑀡𑀢𑀸 𑀲𑀼𑀲𑀭𑀢𑀸, 𑀲𑀼𑀲𑀡𑁆𑀞𑀸𑀦𑀸 𑀲𑀼𑀭𑀽𑀧𑀢𑀸;

𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑁄, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺.

‘‘𑀧𑀤𑁂𑀲𑀭𑀚𑁆𑀚𑀁 𑀇𑀲𑁆𑀲𑀭𑀺𑀬𑀁, 𑀘𑀓𑁆𑀓𑀯𑀢𑁆𑀢𑀺𑀲𑀼𑀔𑀁 𑀧𑀺𑀬𑀁;

𑀤𑁂𑀯𑀭𑀚𑁆𑀚𑀫𑁆𑀧𑀺 𑀤𑀺𑀩𑁆𑀩𑁂𑀲𑀼, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺.

‘‘𑀫𑀸𑀦𑀼𑀲𑁆𑀲𑀺𑀓𑀸 𑀘 𑀲𑀫𑁆𑀧𑀢𑁆𑀢𑀺, 𑀤𑁂𑀯𑀮𑁄𑀓𑁂 𑀘 𑀬𑀸 𑀭𑀢𑀺;

𑀬𑀸 𑀘 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺.

‘‘𑀫𑀺𑀢𑁆𑀢𑀲𑀫𑁆𑀧𑀤𑀫𑀸𑀕𑀫𑁆𑀫, 𑀬𑁄𑀦𑀺𑀲𑁄𑀯 𑀧𑀬𑀼𑀜𑁆𑀚𑀢𑁄;

𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀯𑀲𑀻𑀪𑀸𑀯𑁄, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀫𑁄𑀓𑁆𑀔𑀸 𑀘, 𑀬𑀸 𑀘 𑀲𑀸𑀯𑀓𑀧𑀸𑀭𑀫𑀻;

𑀧𑀘𑁆𑀘𑁂𑀓𑀩𑁄𑀥𑀺 𑀩𑀼𑀤𑁆𑀥𑀪𑀽𑀫𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺.

‘‘𑀏𑀯𑀁 𑀫𑀳𑀢𑁆𑀣𑀺𑀓𑀸 𑀏𑀲𑀸, 𑀬𑀤𑀺𑀤𑀁 𑀧𑀼𑀜𑁆𑀜𑀲𑀫𑁆𑀧𑀤𑀸;

𑀢𑀲𑁆𑀫𑀸 𑀥𑀻𑀭𑀸 𑀧𑀲𑀁𑀲𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀓𑀢𑀧𑀼𑀜𑁆𑀜𑀢’’𑀦𑁆𑀢𑀺. (𑀔𑀼. 𑀧𑀸. 𑁮.𑁧𑁦-𑁧𑁬);

𑀇𑀤𑀸𑀦𑀺 ¶ 𑀬𑁂𑀲𑀼 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀺𑀭𑀻 𑀧𑀢𑀺𑀝𑁆𑀞𑀺𑀢𑀸, 𑀢𑀸𑀦𑀺 𑀭𑀢𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀓𑁆𑀓𑀼𑀝𑁄’’𑀢𑀺𑀆𑀤𑀺𑀫𑀸𑀳.

𑁧𑁦𑁨.

‘‘𑀓𑀼𑀓𑁆𑀓𑀼𑀝𑁄 ¶ 𑀫𑀡𑀬𑁄 𑀤𑀡𑁆𑀟𑁄, 𑀣𑀺𑀬𑁄 𑀘 𑀧𑀼𑀜𑁆𑀜𑀮𑀓𑁆𑀔𑀡𑀸;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀧𑀸𑀧𑀲𑁆𑀲, 𑀓𑀢𑀧𑀼𑀜𑁆𑀜𑀲𑁆𑀲 𑀚𑀦𑁆𑀢𑀼𑀦𑁄’’𑀢𑀺.

𑀢𑀢𑁆𑀣 𑀤𑀡𑁆𑀟𑁄𑀢𑀺 𑀆𑀭𑀓𑁆𑀔𑀬𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀣𑀺𑀬𑁄𑀢𑀺 𑀲𑁂𑀝𑁆𑀞𑀺𑀪𑀭𑀺𑀬𑀁 𑀧𑀼𑀜𑁆𑀜𑀮𑀓𑁆𑀔𑀡𑀤𑁂𑀯𑀺𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀕𑀸𑀣𑀁 𑀯𑀢𑁆𑀯𑀸 𑀘 𑀧𑀦 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀼𑀮𑀽𑀧𑀓𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀳𑁄𑀲𑀺’’𑀦𑁆𑀢𑀺.

𑀲𑀺𑀭𑀺𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁮𑁫] 𑁫. 𑀫𑀡𑀺𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸

𑀤𑀭𑀺𑀬𑀸 ¶ 𑀲𑀢𑁆𑀢 𑀯𑀲𑁆𑀲𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀦𑁆𑀤𑀭𑀻𑀫𑀸𑀭𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄𑀢𑀺 𑀯𑀢𑁆𑀣𑀼 𑀉𑀤𑀸𑀦𑁂 (𑀉𑀤𑀸. 𑁩𑁮) 𑀆𑀕𑀢𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀪𑀕𑀯𑀢𑁄 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀜𑁆𑀘𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀫𑀳𑁄𑀖𑀲𑀤𑀺𑀲𑁂 𑀮𑀸𑀪𑀲𑀓𑁆𑀓𑀸𑀭𑁂 𑀉𑀧𑁆𑀧𑀦𑁆𑀦𑁂 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀦𑀺𑀧𑁆𑀧𑀪𑀸 𑀳𑀼𑀢𑁆𑀯𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀫𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀢𑀮𑀸𑀪𑀲𑀓𑁆𑀓𑀸𑀭𑀸, 𑀦 𑀓𑁄𑀘𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺, 𑀓𑁂𑀦 𑀦𑀼 𑀔𑁄 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀫𑀲𑁆𑀲 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀦𑁆𑀤𑀭𑀺𑀬𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀓𑁆𑀓𑀼𑀡𑀺𑀲𑁆𑀲𑀸𑀫𑀸’’𑀢𑀺.

𑀢𑁂 𑀏𑀓𑀤𑀺𑀯𑀲𑀁 𑀲𑀼𑀦𑁆𑀤𑀭𑀺𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀦𑀸𑀮𑀧𑀺𑀁𑀲𑀼. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀲𑀮𑁆𑀮𑀧𑀦𑁆𑀢𑀻𑀧𑀺 𑀧𑀝𑀺𑀯𑀘𑀦𑀁 𑀅𑀮𑀪𑀺𑀢𑁆𑀯𑀸 ‘‘𑀅𑀧𑀺 𑀦𑀼, 𑀅𑀬𑁆𑀬𑀸, 𑀢𑀼𑀫𑁆𑀳𑁂 𑀓𑁂𑀦𑀘𑀺 𑀯𑀺𑀳𑁂𑀞𑀺𑀢𑀸𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁, 𑀪𑀕𑀺𑀦𑀺, 𑀲𑀫𑀡𑀁 𑀕𑁄𑀢𑀫𑀁 𑀅𑀫𑁆𑀳𑁂 𑀯𑀺𑀳𑁂𑀞𑁂𑀢𑁆𑀯𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑁂 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀦 𑀧𑀲𑁆𑀲𑀲𑀻’’𑀢𑀺. 𑀲𑀸 𑀏𑀯𑀫𑀸𑀳 𑁋 ‘‘𑀫𑀬𑀸 𑀏𑀢𑁆𑀣 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? 𑀢𑁆𑀯𑀁 𑀔𑁄𑀲𑀺, 𑀪𑀕𑀺𑀦𑀺, 𑀅𑀪𑀺𑀭𑀽𑀧𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀬𑀲𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀢𑀯 𑀓𑀣𑀁 ¶ 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀁 𑀓𑀭𑁄𑀳𑀻’’𑀢𑀺? 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀸. 𑀢𑀢𑁄 𑀧𑀝𑁆𑀞𑀸𑀬 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀓𑀧𑁆𑀧𑀽𑀭𑀓𑀝𑀼𑀓𑀨𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀸𑀬𑀁 𑀫𑀳𑀸𑀚𑀦𑀲𑁆𑀲 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀦𑀓𑀸𑀮𑁂 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁, 𑀅𑀳𑀜𑁆𑀳𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 ¶ 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 𑀚𑁂𑀢𑀯𑀦𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀦𑀕𑀭𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. ‘‘𑀓𑀺𑀁, 𑀲𑀼𑀦𑁆𑀤𑀭𑀺, 𑀓𑀳𑀁 𑀕𑀢𑀸𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀢𑀁 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀸𑀧𑁂𑀢𑁆𑀯𑀸 𑀆𑀕𑀢𑀸𑀫𑁆𑀳𑀻’’𑀢𑀺 𑀯𑀤𑀢𑀺.

𑀅𑀣 𑀦𑀁 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀥𑀼𑀢𑁆𑀢𑀸𑀦𑀁 𑀓𑀳𑀸𑀧𑀡𑁂 𑀤𑀢𑁆𑀯𑀸 ‘‘𑀕𑀘𑁆𑀙𑀣 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀕𑀦𑁆𑀥𑀓𑀼𑀝𑀺𑀬𑀸 𑀲𑀫𑀻𑀧𑁂 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀏𑀣𑀸’’𑀢𑀺 𑀯𑀤𑀺𑀁𑀲𑀼, 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑀢𑁄 𑀢𑀺𑀢𑁆𑀣𑀺𑀬𑀸 ‘‘𑀲𑀼𑀦𑁆𑀤𑀭𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀳𑀁 𑀯𑁄 𑀆𑀲𑀗𑁆𑀓𑀸’’𑀢𑀺 𑀯𑀼𑀢𑁆𑀢𑀸 ‘‘𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀚𑁂𑀢𑀯𑀦𑁂 𑀯𑀲𑀢𑀺, 𑀢𑀢𑁆𑀭𑀲𑁆𑀲𑀸 𑀧𑀯𑀢𑁆𑀢𑀺𑀁 𑀦 𑀚𑀸𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀦𑀁 𑀯𑀺𑀘𑀺𑀦𑀣𑀸’’𑀢𑀺 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀤𑀺𑀲𑁆𑀯𑀸 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 ‘𑀲𑀢𑁆𑀣𑀸𑀭𑀸 𑀓𑀢𑀧𑀸𑀧𑀓𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀸𑀫𑀸’𑀢𑀺 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀁𑀲𑀽’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁, 𑀭𑀸𑀚𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀦𑀕𑀭𑀁 𑀆𑀳𑀺𑀡𑁆𑀟𑀣𑀸’’𑀢𑀺 𑀆𑀳. 𑀢𑁂 𑀦𑀕𑀭𑀯𑀻𑀣𑀻𑀲𑀼 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀺𑀭𑀯𑀺𑀢𑁆𑀯𑀸 𑀧𑀼𑀦 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀅𑀕𑀫𑀁𑀲𑀼.

𑀭𑀸𑀚𑀸 𑀲𑀼𑀦𑁆𑀤𑀭𑀺𑀬𑀸 𑀲𑀭𑀻𑀭𑀁 𑀆𑀫𑀓𑀲𑀼𑀲𑀸𑀦𑁂 𑀅𑀝𑁆𑀝𑀓𑀁 𑀆𑀭𑁄𑀧𑁂𑀢𑁆𑀯𑀸 𑀭𑀓𑁆𑀔𑀸𑀧𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑁂𑀲𑀸 𑀬𑁂𑀪𑀼𑀬𑁆𑀬𑁂𑀦 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀘 𑀩𑀳𑀺𑀦𑀕𑀭𑁂 𑀘 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀦𑁆𑀢𑀸 𑀧𑀭𑀺𑀪𑀸𑀲𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂𑀧𑀺 𑀢𑁂 𑀫𑀦𑀼𑀲𑁆𑀲𑁂 𑀏𑀯𑀁 𑀧𑀝𑀺𑀘𑁄𑀤𑁂𑀣𑀸’’𑀢𑀺 𑁋

‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀺, 𑀬𑁄 𑀯𑀸𑀧𑀺 𑀓𑀢𑁆𑀯𑀸 𑀦 𑀓𑀭𑁄𑀫𑀺 𑀘𑀸𑀳;

𑀉𑀪𑁄𑀧𑀺 ¶ 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺, 𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸’’𑀢𑀺. (𑀉𑀤𑀸. 𑁩𑁮) 𑁋

𑀇𑀫𑀁 𑀕𑀸𑀣𑀫𑀸𑀳.

𑀭𑀸𑀚𑀸 ‘‘𑀲𑀼𑀦𑁆𑀤𑀭𑀺𑀬𑀸 𑀅𑀜𑁆𑀜𑁂𑀳𑀺 𑀫𑀸𑀭𑀺𑀢𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀭𑀺𑀲𑁂 𑀧𑁂𑀲𑁂𑀲𑀺. 𑀢𑁂𑀧𑀺 𑀔𑁄 𑀥𑀼𑀢𑁆𑀢𑀸 𑀢𑁂𑀳𑀺 𑀓𑀳𑀸𑀧𑀡𑁂𑀳𑀺 𑀲𑀼𑀭𑀁 𑀧𑀺𑀯𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀢𑀢𑁆𑀣𑁂𑀓𑁄 𑀏𑀯𑀫𑀸𑀳 𑁋 ‘‘𑀢𑁆𑀯𑀁 𑀲𑀼𑀦𑁆𑀤𑀭𑀺𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀸𑀭𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁄 𑀮𑀤𑁆𑀥𑀓𑀳𑀸𑀧𑀡𑁂𑀳𑀺 𑀲𑀼𑀭𑀁 𑀧𑀺𑀯𑀲𑀺, 𑀳𑁄𑀢𑀼 𑀳𑁄𑀢𑀽’’𑀢𑀺. 𑀭𑀸𑀚𑀧𑀼𑀭𑀺𑀲𑀸 𑀢𑁂 𑀥𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀅𑀣 𑀢𑁂 𑀭𑀸𑀚𑀸 ‘‘𑀢𑀼𑀫𑁆𑀳𑁂𑀳𑀺 ¶ 𑀫𑀸𑀭𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑁂𑀳𑀺 𑀫𑀸𑀭𑀸𑀧𑀺𑀢𑀸’’𑀢𑀺? ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 ¶ 𑀢𑀺𑀢𑁆𑀣𑀺𑀬𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀼𑀦𑁆𑀤𑀭𑀺𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀏𑀯𑀁 𑀯𑀤𑀦𑁆𑀢𑀸 𑀦𑀕𑀭𑀁 𑀆𑀳𑀺𑀡𑁆𑀟𑀣 ‘𑀅𑀬𑀁 𑀲𑀼𑀦𑁆𑀤𑀭𑀻 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀆𑀭𑁄𑀧𑁂𑀢𑀼𑀓𑀸𑀫𑁂𑀳𑀺 𑀅𑀫𑁆𑀳𑁂𑀳𑀺 𑀫𑀸𑀭𑀸𑀧𑀺𑀢𑀸, 𑀦𑁂𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲, 𑀦 𑀕𑁄𑀢𑀫𑀲𑀸𑀯𑀓𑀸𑀦𑀁 𑀤𑁄𑀲𑁄 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀁𑀬𑁂𑀯 𑀤𑁄𑀲𑁄’’’𑀢𑀺 𑀆𑀡𑀸𑀧𑁂𑀲𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀩𑀸𑀮𑀫𑀳𑀸𑀚𑀦𑁄 𑀢𑀤𑀸 𑀲𑀤𑁆𑀤𑀳𑀺, 𑀢𑀺𑀢𑁆𑀣𑀺𑀬𑀸𑀧𑀺 𑀧𑀼𑀭𑀺𑀲𑀯𑀥𑀤𑀡𑁆𑀟𑁂𑀦 𑀧𑀮𑀺𑀩𑀼𑀤𑁆𑀥𑀸. 𑀢𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀸𑀦𑀁 𑀫𑀳𑀦𑁆𑀢𑀢𑀭𑁄 𑀮𑀸𑀪𑀲𑀓𑁆𑀓𑀸𑀭𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀢𑀺𑀢𑁆𑀣𑀺𑀬𑀸 ‘𑀩𑀼𑀤𑁆𑀥𑀸𑀦𑀁 𑀓𑀸𑀴𑀓𑀪𑀸𑀯𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀸’𑀢𑀺 𑀲𑀬𑀁 𑀓𑀸𑀴𑀓𑀸 𑀚𑀸𑀢𑀸, 𑀩𑀼𑀤𑁆𑀥𑀸𑀦𑀁 𑀧𑀦 𑀫𑀳𑀦𑁆𑀢𑀢𑀭𑁄 𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸 𑀩𑀼𑀤𑁆𑀥𑀸𑀦𑀁 𑀲𑀁𑀓𑀺𑀮𑁂𑀲𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀩𑀼𑀤𑁆𑀥𑀸𑀦𑀁 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑀓𑀭𑀡𑀁 𑀦𑀸𑀫 𑀚𑀸𑀢𑀺𑀫𑀡𑀺𑀦𑁄 𑀓𑀺𑀮𑀺𑀝𑁆𑀞𑀪𑀸𑀯𑀓𑀭𑀡𑀲𑀤𑀺𑀲𑀁, 𑀧𑀼𑀩𑁆𑀩𑁂 𑀚𑀸𑀢𑀺𑀫𑀡𑀺𑀁 ‘𑀓𑀺𑀮𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀯𑀸𑀬𑀫𑀦𑁆𑀢𑀸𑀧𑀺 𑀦𑀸𑀲𑀓𑁆𑀔𑀺𑀁𑀲𑀼 𑀓𑀺𑀮𑀺𑀝𑁆𑀞𑀁 𑀓𑀸𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀢𑀺𑀲𑁆𑀲𑁄 𑀧𑀩𑁆𑀩𑀢𑀭𑀸𑀚𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀺. 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀫𑀡𑀺𑀕𑀼𑀳𑀸 𑀅𑀳𑁄𑀲𑀺, 𑀢𑀢𑁆𑀣 𑀢𑀺𑀁𑀲𑀫𑀢𑁆𑀢𑀸 𑀲𑀽𑀓𑀭𑀸 𑀯𑀲𑀦𑁆𑀢𑀺, 𑀕𑀼𑀳𑀸𑀬 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀻𑀳𑁄 𑀘𑀭𑀢𑀺, 𑀢𑀲𑁆𑀲 𑀫𑀡𑀺𑀫𑁆𑀳𑀺 ¶ 𑀙𑀸𑀬𑀸 𑀧𑀜𑁆𑀜𑀸𑀬𑀢𑀺. 𑀲𑀽𑀓𑀭𑀸 𑀲𑀻𑀳𑀘𑁆𑀙𑀸𑀬𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀉𑀢𑁆𑀭𑀲𑁆𑀢𑀸 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀅𑀳𑁂𑀲𑀼𑀁. 𑀢𑁂 ‘‘𑀇𑀫𑀲𑁆𑀲 𑀫𑀡𑀺𑀦𑁄 𑀯𑀺𑀧𑁆𑀧𑀲𑀦𑁆𑀦𑀢𑁆𑀢𑀸 𑀅𑀬𑀁 𑀙𑀸𑀬𑀸 𑀧𑀜𑁆𑀜𑀸𑀬𑀢𑀺, 𑀇𑀫𑀁 𑀫𑀡𑀺𑀁 𑀲𑀁𑀓𑀺𑀮𑀺𑀝𑁆𑀞𑀁 𑀯𑀺𑀯𑀡𑁆𑀡𑀁 𑀓𑀭𑁄𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀏𑀓𑀁 𑀲𑀭𑀁 𑀕𑀦𑁆𑀢𑁆𑀯𑀸 𑀓𑀮𑀮𑁂 𑀧𑀯𑀝𑁆𑀝𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀫𑀡𑀺𑀁 𑀖𑀁𑀲𑀦𑁆𑀢𑀺. 𑀲𑁄 𑀲𑀽𑀓𑀭𑀮𑁄𑀫𑁂𑀳𑀺 𑀖𑀁𑀲𑀺𑀬𑀫𑀸𑀦𑁄 𑀯𑀺𑀧𑁆𑀧𑀲𑀦𑁆𑀦𑀢𑀭𑁄 𑀅𑀳𑁄𑀲𑀺. 𑀲𑀽𑀓𑀭𑀸 𑀉𑀧𑀸𑀬𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀇𑀫𑀲𑁆𑀲 𑀫𑀡𑀺𑀦𑁄 𑀯𑀺𑀯𑀡𑁆𑀡𑀓𑀭𑀡𑀽𑀧𑀸𑀬𑀁 𑀢𑀸𑀧𑀲𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀉𑀤𑀸𑀳𑀭𑀺𑀁𑀲𑀼 𑁋

𑁧𑁦𑁩.

‘‘𑀤𑀭𑀺𑀬𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺, 𑀢𑀺𑀁𑀲𑀫𑀢𑁆𑀢𑀸 𑀯𑀲𑀸𑀫𑀲𑁂;

𑀳𑀜𑁆𑀜𑀸𑀫 𑀫𑀡𑀺𑀦𑁄 𑀆𑀪𑀁, 𑀇𑀢𑀺 𑀦𑁄 𑀫𑀦𑁆𑀢𑀭𑀁 𑀅𑀳𑀼.

𑁧𑁦𑁪.

‘‘𑀬𑀸𑀯𑀢𑀸 ¶ ¶ 𑀫𑀡𑀺𑀁 𑀖𑀁𑀲𑀸𑀫, 𑀪𑀺𑀬𑁆𑀬𑁄 𑀯𑁄𑀤𑀸𑀬𑀢𑁂 𑀫𑀡𑀺;

𑀇𑀤𑀜𑁆𑀘𑀤𑀸𑀦𑀺 𑀧𑀼𑀘𑁆𑀙𑀸𑀫, 𑀓𑀺𑀁 𑀓𑀺𑀘𑁆𑀘𑀁 𑀇𑀥 𑀫𑀜𑁆𑀜𑀲𑀻’’𑀢𑀺.

𑀢𑀢𑁆𑀣 𑀤𑀭𑀺𑀬𑀸𑀢𑀺 𑀫𑀡𑀺𑀕𑀼𑀳𑀸𑀬𑀁. 𑀯𑀲𑀸𑀫𑀲𑁂𑀢𑀺 𑀯𑀲𑀸𑀫. 𑀳𑀜𑁆𑀜𑀸𑀫𑀸𑀢𑀺 𑀳𑀦𑀺𑀲𑁆𑀲𑀸𑀫, 𑀫𑀬𑀫𑁆𑀧𑀺 𑀯𑀺𑀯𑀡𑁆𑀡𑀁 𑀓𑀭𑀺𑀲𑁆𑀲𑀸𑀫. 𑀇𑀤𑀜𑁆𑀘𑀤𑀸𑀦𑀺 𑀧𑀼𑀘𑁆𑀙𑀸𑀫𑀸𑀢𑀺 𑀇𑀤𑀸𑀦𑀺 𑀫𑀬𑀁 ‘‘𑀓𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀫𑀡𑀺 𑀓𑀺𑀮𑀺𑀲𑁆𑀲𑀫𑀸𑀦𑁄 𑀯𑁄𑀤𑀸𑀬𑀢𑁂’’𑀢𑀺 𑀇𑀤𑀁 𑀢𑀁 𑀧𑀼𑀘𑁆𑀙𑀸𑀫. ‘‘𑀓𑀺𑀁 𑀓𑀺𑀘𑁆𑀘𑀁 ‘𑀇𑀥 𑀫𑀜𑁆𑀜𑀲𑀻’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀢𑁆𑀯𑀁 𑀇𑀫𑀁 𑀓𑀺𑀘𑁆𑀘𑀁 𑀓𑀺𑀦𑁆𑀢𑀺 𑀫𑀜𑁆𑀜𑀲𑀻’’𑀢𑀺.

𑀅𑀣 𑀦𑁂𑀲𑀁 𑀆𑀘𑀺𑀓𑁆𑀔𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁫.

‘‘𑀅𑀬𑀁 𑀫𑀡𑀺 𑀯𑁂𑀴𑀼𑀭𑀺𑀬𑁄, 𑀅𑀓𑀸𑀘𑁄 𑀯𑀺𑀫𑀮𑁄 𑀲𑀼𑀪𑁄;

𑀦𑀸𑀲𑁆𑀲 𑀲𑀓𑁆𑀓𑀸 𑀲𑀺𑀭𑀺𑀁 𑀳𑀦𑁆𑀢𑀼𑀁, 𑀅𑀧𑀓𑁆𑀓𑀫𑀣 𑀲𑀽𑀓𑀭𑀸’’𑀢𑀺.

𑀢𑀢𑁆𑀣 𑀅𑀓𑀸𑀘𑁄𑀢𑀺 𑀅𑀓𑀓𑁆𑀓𑀲𑁄. 𑀲𑀼𑀪𑁄𑀢𑀺 𑀲𑁄𑀪𑀦𑁄. 𑀲𑀺𑀭𑀺𑀦𑁆𑀢𑀺 𑀧𑀪𑀁. 𑀅𑀧𑀓𑁆𑀓𑀫𑀣𑀸𑀢𑀺 𑀇𑀫𑀲𑁆𑀲 𑀫𑀡𑀺𑀲𑁆𑀲 𑀧𑀪𑀸 𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀼𑀫𑁆𑀳𑁂 𑀧𑀦 𑀇𑀫𑀁 𑀫𑀡𑀺𑀕𑀼𑀳𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀘𑁆𑀙𑀣𑀸𑀢𑀺.

𑀢𑁂 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀢𑀸𑀧𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀡𑀺𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁮𑁬] 𑁬. 𑀲𑀸𑀮𑀽𑀓𑀚𑀸𑀢𑀓𑀯𑀡𑁆𑀡𑀦𑀸

𑀫𑀸 ¶ 𑀲𑀸𑀮𑀽𑀓𑀲𑁆𑀲 𑀧𑀺𑀳𑀬𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀘𑀽𑀴𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂 (𑀚𑀸. 𑁧.𑁧𑁩.𑁪𑁦 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀁 𑀧𑀦 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀢𑀁 𑀉𑀓𑁆𑀓𑀡𑁆𑀞𑀸𑀧𑁂𑀢𑀻’’𑀢𑀺? ‘‘𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 ‘‘𑀏𑀲𑀸 𑀢𑁂 𑀪𑀺𑀓𑁆𑀔𑀼 ¶ 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀺𑀲𑁆𑀲𑀸 𑀯𑀺𑀯𑀸𑀳𑀢𑁆𑀣𑀸𑀬 𑀆𑀕𑀢𑀧𑀭𑀺𑀲𑀸𑀬 𑀉𑀢𑁆𑀢𑀭𑀺𑀪𑀗𑁆𑀕𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀮𑁄𑀳𑀺𑀢𑀕𑁄𑀡𑁄 𑀦𑀸𑀫 𑀅𑀳𑁄𑀲𑀺, 𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀘𑀽𑀴𑀮𑁄𑀳𑀺𑀢𑁄 𑀦𑀸𑀫. 𑀉𑀪𑁄𑀧𑀺 𑀕𑁄𑀡𑀸 𑀕𑀸𑀫𑀓𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀲 𑀓𑀼𑀮𑀲𑁆𑀲 𑀏𑀓𑀸 𑀯𑀬𑀧𑁆𑀧𑀢𑁆𑀢𑀸 𑀓𑀼𑀫𑀸𑀭𑀺𑀓𑀸 𑀅𑀢𑁆𑀣𑀺, 𑀢𑀁 𑀅𑀜𑁆𑀜𑀓𑀼𑀮𑀁 𑀯𑀸𑀭𑁂𑀲𑀺. 𑀅𑀣 𑀦𑀁 𑀓𑀼𑀮𑀁 ‘‘𑀯𑀺𑀯𑀸𑀳𑀓𑀸𑀮𑁂 𑀉𑀢𑁆𑀢𑀭𑀺𑀪𑀗𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀮𑀽𑀓𑀁 𑀦𑀸𑀫 𑀲𑀽𑀓𑀭𑀁 𑀬𑀸𑀕𑀼𑀪𑀢𑁆𑀢𑁂𑀦 𑀧𑀝𑀺𑀚𑀕𑁆𑀕𑀺, 𑀲𑁄 𑀳𑁂𑀝𑁆𑀞𑀸𑀫𑀜𑁆𑀘𑁂 𑀲𑀬𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀘𑀽𑀴𑀮𑁄𑀳𑀺𑀢𑁄 𑀪𑀸𑀢𑀭𑀁 𑀆𑀳 𑁋 ‘‘𑀪𑀸𑀢𑀺𑀓, 𑀫𑀬𑀁 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀓𑀫𑁆𑀫𑀁 𑀓𑀭𑁄𑀫, 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀇𑀫𑀁 𑀓𑀼𑀮𑀁 𑀚𑀻𑀯𑀢𑀺, 𑀅𑀣 𑀘 𑀧𑀦𑀺𑀫𑁂 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀢𑀺𑀡𑀧𑀮𑀸𑀮𑀫𑀢𑁆𑀢𑀁 𑀤𑁂𑀦𑁆𑀢𑀺, 𑀇𑀫𑀁 𑀲𑀽𑀓𑀭𑀁 𑀬𑀸𑀕𑀼𑀪𑀢𑁆𑀢𑁂𑀦 𑀧𑁄𑀲𑁂𑀦𑁆𑀢𑀺, 𑀳𑁂𑀝𑁆𑀞𑀸𑀫𑀜𑁆𑀘𑁂 𑀲𑀬𑀸𑀧𑁂𑀦𑁆𑀢𑀺, 𑀓𑀺𑀁 𑀦𑀸𑀫𑁂𑀲 𑀏𑀢𑁂𑀲𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀫𑀳𑀸𑀮𑁄𑀳𑀺𑀢𑁄 ‘‘𑀢𑀸𑀢, 𑀫𑀸 𑀢𑁆𑀯𑀁 𑀏𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀁 𑀧𑀢𑁆𑀣𑀬, 𑀏𑀢𑀺𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀯𑀺𑀯𑀸𑀳𑀤𑀺𑀯𑀲𑁂 𑀏𑀢𑀁 𑀉𑀢𑁆𑀢𑀭𑀺𑀪𑀗𑁆𑀕𑀁 𑀓𑀸𑀢𑀼𑀓𑀸𑀫𑀸 𑀏𑀢𑁂 𑀫𑀁𑀲𑀲𑁆𑀲 𑀣𑀽𑀮𑀪𑀸𑀯𑀓𑀭𑀡𑀢𑁆𑀣𑀁 𑀧𑁄𑀲𑁂𑀦𑁆𑀢𑀺, 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀢𑀁 𑀧𑀲𑁆𑀲𑀺𑀲𑁆𑀲𑀲𑀺 𑀳𑁂𑀝𑁆𑀞𑀸𑀫𑀜𑁆𑀘𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀓𑀭𑀺𑀬𑀫𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀸𑀣𑀸 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋

𑁧𑁦𑁬.

‘‘𑀫𑀸 ¶ 𑀲𑀸𑀮𑀽𑀓𑀲𑁆𑀲 𑀧𑀺𑀳𑀬𑀺, 𑀆𑀢𑀼𑀭𑀦𑁆𑀦𑀸𑀦𑀺 𑀪𑀼𑀜𑁆𑀚𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀲𑀁 𑀔𑀸𑀤, 𑀏𑀢𑀁 𑀤𑀻𑀖𑀸𑀬𑀼𑀮𑀓𑁆𑀔𑀡𑀁.

𑁧𑁦𑁭.

‘‘𑀇𑀤𑀸𑀦𑀺 𑀲𑁄 𑀇𑀥𑀸𑀕𑀦𑁆𑀢𑁆𑀯𑀸, 𑀅𑀢𑀺𑀣𑀻 𑀬𑀼𑀢𑁆𑀢𑀲𑁂𑀯𑀓𑁄;

𑀅𑀣 𑀤𑀓𑁆𑀔𑀲𑀺 𑀲𑀸𑀮𑀽𑀓𑀁, 𑀲𑀬𑀦𑁆𑀢𑀁 𑀫𑀼𑀲𑀮𑀼𑀢𑁆𑀢𑀭’’𑀦𑁆𑀢𑀺.

𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀸𑀢, 𑀢𑁆𑀯𑀁 𑀫𑀸 𑀲𑀸𑀮𑀽𑀓𑀲𑀽𑀓𑀭𑀪𑀸𑀯𑀁 𑀧𑀢𑁆𑀣𑀬𑀺, 𑀅𑀬𑀜𑁆𑀳𑀺 𑀆𑀢𑀼𑀭𑀦𑁆𑀦𑀸𑀦𑀺 𑀫𑀭𑀡𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀢𑀺, 𑀬𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀫𑀭𑀡𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑁆𑀯𑀁 𑀧𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀭𑀸𑀮𑀬𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀇𑀫𑀁 𑀧𑀮𑀸𑀮𑀫𑀺𑀲𑁆𑀲𑀓𑀁 𑀪𑀼𑀲𑀁 𑀔𑀸𑀤, 𑀏𑀢𑀁 𑀤𑀻𑀖𑀸𑀬𑀼𑀪𑀸𑀯𑀲𑁆𑀲 𑀮𑀓𑁆𑀔𑀡𑀁 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀁. 𑀇𑀤𑀸𑀦𑀺 𑀓𑀢𑀺𑀧𑀸𑀳𑀲𑁆𑀲𑁂𑀯 𑀲𑁄 𑀯𑁂𑀯𑀸𑀳𑀺𑀓𑀧𑀼𑀭𑀺𑀲𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀬𑀼𑀢𑁆𑀢𑁄 𑀬𑀼𑀢𑁆𑀢𑀲𑁂𑀯𑀓𑁄 𑀇𑀥 𑀅𑀢𑀺𑀣𑀺 𑀳𑀼𑀢𑁆𑀯𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀣𑁂𑀢𑀁 𑀲𑀸𑀮𑀽𑀓𑀁 𑀫𑀼𑀲𑀮𑀲𑀤𑀺𑀲𑁂𑀦 𑀉𑀢𑁆𑀢𑀭𑁄𑀝𑁆𑀞𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀲𑀮𑀼𑀢𑁆𑀢𑀭𑀁 𑀫𑀸𑀭𑀺𑀢𑀁 𑀲𑀬𑀦𑁆𑀢𑀁 𑀤𑀓𑁆𑀔𑀲𑀻𑀢𑀺.

𑀢𑀢𑁄 𑀓𑀢𑀺𑀧𑀸𑀳𑀲𑁆𑀲𑁂𑀯 𑀯𑁂𑀯𑀸𑀳𑀺𑀓𑁂𑀲𑀼 𑀆𑀕𑀢𑁂𑀲𑀼 𑀲𑀸𑀮𑀽𑀓𑀁 𑀫𑀸𑀭𑁂𑀢𑁆𑀯𑀸 𑀉𑀢𑁆𑀢𑀭𑀺𑀪𑀗𑁆𑀕𑀫𑀓𑀁𑀲𑀼. 𑀉𑀪𑁄 𑀕𑁄𑀡𑀸 ¶ 𑀢𑀁 𑀢𑀲𑁆𑀲 𑀯𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 ¶ 𑀪𑀼𑀲𑀫𑁂𑀯 𑀯𑀭’’𑀦𑁆𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀤𑀢𑁆𑀣𑀚𑁄𑀢𑀺𑀓𑀁 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀯𑀺𑀓𑀦𑁆𑀢𑀁 𑀲𑀽𑀓𑀭𑀁 𑀤𑀺𑀲𑁆𑀯𑀸, 𑀲𑀬𑀦𑁆𑀢𑀁 𑀫𑀼𑀲𑀮𑀼𑀢𑁆𑀢𑀭𑀁;

𑀚𑀭𑀕𑁆𑀕𑀯𑀸 𑀯𑀺𑀘𑀺𑀦𑁆𑀢𑁂𑀲𑀼𑀁, 𑀯𑀭𑀫𑁆𑀳𑀸𑀓𑀁 𑀪𑀼𑀲𑀸𑀫𑀺𑀯𑀸’’𑀢𑀺.

𑀢𑀢𑁆𑀣 𑀪𑀼𑀲𑀸𑀫𑀺𑀯𑀸𑀢𑀺 𑀪𑀼𑀲𑀫𑁂𑀯 𑀅𑀫𑁆𑀳𑀸𑀓𑀁 𑀯𑀭𑀁 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀓𑀼𑀫𑀸𑀭𑀺𑀓𑀸 𑀏𑀢𑀭𑀳𑀺 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸 𑀅𑀳𑁄𑀲𑀺, 𑀲𑀸𑀮𑀽𑀓𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀘𑀽𑀴𑀮𑁄𑀳𑀺𑀢𑁄 𑀆𑀦𑀦𑁆𑀤𑁄, 𑀫𑀳𑀸𑀮𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀮𑀽𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁮𑁭] 𑁭. 𑀮𑀸𑀪𑀕𑀭𑀳𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀦𑀼𑀫𑁆𑀫𑀢𑁆𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀣𑁂𑀭𑀲𑁆𑀲 𑀓𑀺𑀭 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 ¶ 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀮𑀸𑀪𑀼𑀧𑁆𑀧𑀢𑁆𑀢𑀺𑀧𑀝𑀺𑀧𑀤𑀁 𑀫𑁂, 𑀪𑀦𑁆𑀢𑁂, 𑀓𑀣𑁂𑀣, 𑀓𑀺𑀁 𑀓𑀭𑁄𑀦𑁆𑀢𑁄 𑀘𑀻𑀯𑀭𑀸𑀤𑀻𑀦𑀁 𑀮𑀸𑀪𑀻 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀣𑁂𑀭𑁄 ‘‘𑀆𑀯𑀼𑀲𑁄, 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀸𑀫𑀜𑁆𑀜𑀁 𑀧𑀳𑀸𑀬 𑀅𑀦𑀼𑀫𑁆𑀫𑀢𑁆𑀢𑁂𑀦𑁂𑀯 𑀉𑀫𑁆𑀫𑀢𑁆𑀢𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀁, 𑀧𑀺𑀲𑀼𑀡𑀯𑀸𑀘𑀸 𑀯𑀢𑁆𑀢𑀩𑁆𑀩𑀸, 𑀦𑀝𑀲𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀯𑀺𑀓𑀺𑀡𑁆𑀡𑀯𑀸𑀘𑁂𑀦 𑀓𑀼𑀢𑀽𑀳𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀁 𑀮𑀸𑀪𑀼𑀧𑁆𑀧𑀢𑁆𑀢𑀺𑀧𑀝𑀺𑀧𑀤𑀁 𑀓𑀣𑁂𑀲𑀺. 𑀲𑁄 𑀢𑀁 𑀧𑀝𑀺𑀧𑀤𑀁 𑀕𑀭𑀳𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀓𑁆𑀓𑀦𑁆𑀢𑁄. 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑀢𑁆𑀣𑀸 ‘‘𑀦𑁂𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀮𑀸𑀪𑀁 𑀕𑀭𑀳𑀢𑀺, 𑀧𑀼𑀩𑁆𑀩𑁂𑀧𑁂𑀲 𑀕𑀭𑀳𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂𑀬𑁂𑀯 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀜𑁆𑀘 𑀲𑀺𑀧𑁆𑀧𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 ¶ 𑀳𑀼𑀢𑁆𑀯𑀸 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀲𑀺𑀧𑁆𑀧𑀁 𑀯𑀸𑀘𑁂𑀲𑀺. 𑀢𑀢𑁆𑀭𑁂𑀓𑁄 𑀫𑀸𑀡𑀯𑁄 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄 𑀏𑀓𑀤𑀺𑀯𑀲𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀣𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 ¶ 𑀮𑀸𑀪𑀼𑀧𑁆𑀧𑀢𑁆𑀢𑀺𑀧𑀝𑀺𑀧𑀤𑀁 𑀧𑀼𑀘𑁆𑀙𑀺. 𑀆𑀘𑀭𑀺𑀬𑁄 ‘‘𑀢𑀸𑀢, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁯.

‘‘𑀦𑀸𑀦𑀼𑀫𑁆𑀫𑀢𑁆𑀢𑁄 𑀦𑀸𑀧𑀺𑀲𑀼𑀡𑁄, 𑀦𑀸𑀦𑀝𑁄 𑀦𑀸𑀓𑀼𑀢𑀽𑀳𑀮𑁄;

𑀫𑀽𑀴𑁆𑀳𑁂𑀲𑀼 𑀮𑀪𑀢𑁂 𑀮𑀸𑀪𑀁, 𑀏𑀲𑀸 𑀢𑁂 𑀅𑀦𑀼𑀲𑀸𑀲𑀦𑀻’’𑀢𑀺.

𑀢𑀢𑁆𑀣 𑀦𑀸𑀦𑀼𑀫𑁆𑀫𑀢𑁆𑀢𑁄𑀢𑀺 𑀦 𑀅𑀦𑀼𑀫𑁆𑀫𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀉𑀫𑁆𑀫𑀢𑁆𑀢𑀓𑁄 𑀦𑀸𑀫 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀺𑀓𑀤𑀸𑀭𑀓𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀯𑀺𑀮𑀼𑀫𑁆𑀧𑀢𑀺, 𑀢𑀢𑁄 𑀢𑀢𑁄 𑀫𑀘𑁆𑀙𑀫𑀁𑀲𑀧𑀽𑀯𑀸𑀤𑀻𑀦𑀺 𑀩𑀮𑀓𑁆𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺, 𑀏𑀯𑀫𑁂𑀯 𑀬𑁄 𑀕𑀺𑀳𑀺𑀪𑀽𑀢𑁄 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀓𑀼𑀲𑀮𑀸𑀓𑀼𑀲𑀮𑀁 𑀅𑀕𑀡𑁂𑀢𑁆𑀯𑀸 𑀦𑀺𑀭𑀬𑀪𑀬𑀁 𑀅𑀪𑀸𑀬𑀦𑁆𑀢𑁄 𑀮𑁄𑀪𑀸𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀓𑀸𑀫𑁂𑀲𑀼 𑀧𑀫𑀢𑁆𑀢𑁄 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀲𑀸𑀳𑀲𑀺𑀓𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀧𑀩𑁆𑀩𑀚𑀺𑀢𑁄𑀧𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀓𑀼𑀲𑀮𑀸𑀓𑀼𑀲𑀮𑀁 𑀅𑀕𑀡𑁂𑀢𑁆𑀯𑀸 𑀦𑀺𑀭𑀬𑀪𑀬𑀁 𑀅𑀪𑀸𑀬𑀦𑁆𑀢𑁄 𑀲𑀢𑁆𑀣𑀸𑀭𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀫𑀤𑁆𑀤𑀦𑁆𑀢𑁄 𑀮𑁄𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀘𑀻𑀯𑀭𑀸𑀤𑀺𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀲𑀸𑀫𑀜𑁆𑀜𑀁 𑀯𑀺𑀚𑀳𑀺𑀢𑁆𑀯𑀸 𑀧𑀫𑀢𑁆𑀢𑁄 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀢𑀺, 𑀯𑁂𑀴𑀼𑀤𑀸𑀦𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀅𑀦𑀼𑀫𑁆𑀫𑀢𑁆𑀢𑁄𑀧𑀺 𑀉𑀫𑁆𑀫𑀢𑁆𑀢𑀲𑀤𑀺𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑁄 𑀦𑀸𑀫 ¶ , 𑀏𑀯𑀭𑀽𑀧𑀲𑁆𑀲 𑀔𑀺𑀧𑁆𑀧𑀁 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀏𑀯𑀁 𑀅𑀦𑀼𑀫𑁆𑀫𑀢𑁆𑀢𑁄 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄, 𑀏𑀲 𑀫𑀽𑀴𑁆𑀳𑁂𑀲𑀼 𑀅𑀧𑀡𑁆𑀟𑀺𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀮𑀸𑀪𑀁 𑀦 𑀮𑀪𑀢𑀺, 𑀢𑀲𑁆𑀫𑀸 𑀮𑀸𑀪𑀢𑁆𑀣𑀺𑀓𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀦𑀸𑀧𑀺𑀲𑀼𑀡𑁄𑀢𑀺 𑀏𑀢𑁆𑀣𑀸𑀧𑀺 𑀬𑁄 𑀧𑀺𑀲𑀼𑀡𑁄 𑀳𑁄𑀢𑀺, ‘‘𑀅𑀲𑀼𑀓𑁂𑀦 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀭𑀸𑀚𑀓𑀼𑀮𑁂 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀲𑁄 𑀅𑀜𑁆𑀜𑁂𑀲𑀁 𑀬𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀡𑁆𑀳𑀸𑀢𑀺. 𑀭𑀸𑀚𑀸𑀦𑁄𑀧𑀺 𑀦𑀁 ‘‘𑀅𑀬𑀁 𑀅𑀫𑁆𑀳𑁂𑀲𑀼 𑀲𑀲𑀲𑁆𑀦𑁂𑀳𑁄’’𑀢𑀺 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺, 𑀅𑀫𑀘𑁆𑀘𑀸𑀤𑀬𑁄𑀧𑀺𑀲𑁆𑀲 ‘‘𑀅𑀬𑀁 𑀦𑁄 𑀭𑀸𑀚𑀓𑀼𑀮𑁂 𑀧𑀭𑀺𑀪𑀺𑀦𑁆𑀤𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀏𑀯𑀁 𑀏𑀢𑀭𑀳𑀺 𑀧𑀺𑀲𑀼𑀡𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀅𑀧𑀺𑀲𑀼𑀡𑁄, 𑀲𑁄 𑀫𑀽𑀴𑁆𑀳𑁂𑀲𑀼 𑀮𑀸𑀪𑀁 𑀦 𑀮𑀪𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀸𑀦𑀝𑁄𑀢𑀺 𑀮𑀸𑀪𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀦𑀝𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀦𑀝𑁄 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂𑀳𑀺 𑀓𑀻𑀴𑀁 𑀓𑀢𑁆𑀯𑀸 𑀥𑀦𑀁 𑀲𑀁𑀳𑀭𑀢𑀺, 𑀏𑀯𑀫𑁂𑀯 𑀮𑀸𑀪𑀢𑁆𑀣𑀺𑀓𑁂𑀦 ¶ 𑀳𑀺𑀭𑁄𑀢𑁆𑀢𑀧𑁆𑀧𑀁 𑀪𑀺𑀦𑁆𑀤𑀺𑀢𑁆𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀺𑀓𑀤𑀸𑀭𑀓𑀸𑀦𑀁 𑀲𑁄𑀡𑁆𑀟𑀲𑀳𑀸𑀬𑁂𑀦 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑁂𑀦 𑀯𑀺𑀘𑀭𑀺𑀢𑀩𑁆𑀩𑀁. 𑀬𑁄 𑀏𑀯𑀁 𑀅𑀦𑀝𑁄, 𑀲𑁄 𑀫𑀽𑀴𑁆𑀳𑁂𑀲𑀼 𑀮𑀸𑀪𑀁 𑀦 𑀮𑀪𑀢𑀺.

𑀦𑀸𑀓𑀼𑀢𑀽𑀳𑀮𑁄𑀢𑀺 ¶ 𑀓𑀼𑀢𑀽𑀳𑀮𑁄 𑀦𑀸𑀫 𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀘𑁄. 𑀭𑀸𑀚𑀸𑀦𑁄 𑀳𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀓𑀺𑀭 ‘𑀫𑀦𑀼𑀲𑁆𑀲𑁄 𑀫𑀸𑀭𑀺𑀢𑁄, 𑀖𑀭𑀁 𑀯𑀺𑀮𑀼𑀢𑁆𑀢𑀁, 𑀧𑀭𑁂𑀲𑀁 𑀤𑀸𑀭𑀸 𑀧𑀥𑀁𑀲𑀺𑀢𑀸’𑀢𑀺 𑀲𑀼𑀬𑁆𑀬𑀢𑀺, 𑀓𑁂𑀲𑀁 𑀦𑀼 𑀔𑁄 𑀇𑀤𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀣 𑀲𑁂𑀲𑁂𑀲𑀼 𑀅𑀓𑀣𑁂𑀦𑁆𑀢𑁂𑀲𑀼𑀬𑁂𑀯 𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀦𑀸𑀫𑀸’’𑀢𑀺 𑀯𑀤𑀢𑀺, 𑀅𑀬𑀁 𑀓𑀼𑀢𑀽𑀳𑀮𑁄 𑀦𑀸𑀫. 𑀭𑀸𑀚𑀸𑀦𑁄 𑀢𑀲𑁆𑀲 𑀯𑀘𑀦𑁂𑀦 𑀢𑁂 𑀧𑀼𑀭𑀺𑀲𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑀺𑀲𑁂𑀥𑁂𑀢𑁆𑀯𑀸 ‘‘𑀇𑀫𑀁 𑀦𑀺𑀲𑁆𑀲𑀸𑀬 𑀦𑁄 𑀦𑀕𑀭𑀁 𑀦𑀺𑀘𑁆𑀘𑁄𑀭𑀁 𑀚𑀸𑀢’’𑀦𑁆𑀢𑀺 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑁂𑀦𑁆𑀢𑀺, 𑀲𑁂𑀲𑀸𑀧𑀺 𑀚𑀦𑀸 ‘‘𑀅𑀬𑀁 𑀦𑁄 𑀭𑀸𑀚𑀧𑀼𑀭𑀺𑀲𑁂𑀳𑀺 𑀧𑀼𑀝𑁆𑀞𑁄 𑀲𑀼𑀬𑀼𑀢𑁆𑀢𑀤𑀼𑀬𑀼𑀢𑁆𑀢𑀁 𑀓𑀣𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀢𑀲𑁆𑀲𑁂𑀯 𑀥𑀦𑀁 𑀤𑁂𑀦𑁆𑀢𑀺, 𑀏𑀯𑀁 𑀓𑀼𑀢𑀽𑀳𑀮𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀅𑀓𑀼𑀢𑀽𑀳𑀮𑁄, 𑀏𑀲 𑀦 𑀫𑀽𑀴𑁆𑀳𑁂𑀲𑀼 𑀮𑀪𑀢𑀺 𑀮𑀸𑀪𑀁. 𑀏𑀲𑀸 𑀢𑁂 𑀅𑀦𑀼𑀲𑀸𑀲𑀦𑀻𑀢𑀺 𑀏𑀲𑀸 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀢𑀼𑀬𑁆𑀳𑀁 𑀮𑀸𑀪𑀸𑀦𑀼𑀲𑀺𑀝𑁆𑀞𑀻𑀢𑀺.

𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀮𑀸𑀪𑀁 𑀕𑀭𑀳𑀦𑁆𑀢𑁄 𑁋

𑁧𑁧𑁦.

‘‘𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸.

𑁧𑁧𑁧.

‘‘𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀏𑀲𑀸𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄, 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳;

𑀢𑀢𑁆𑀣 𑀬𑀸 𑀯𑀼𑀢𑁆𑀢𑀻𑀢𑀺 𑀬𑀸 𑀚𑀻𑀯𑀺𑀢𑀯𑀼𑀢𑁆𑀢𑀺. 𑀯𑀺𑀦𑀺𑀧𑀸𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀺𑀦𑀺𑀧𑀸𑀢𑁂𑀦. 𑀅𑀥𑀫𑁆𑀫𑀘𑀭𑀡𑁂𑀦𑀸𑀢𑀺 𑀅𑀥𑀫𑁆𑀫𑀓𑀺𑀭𑀺𑀬𑀸𑀬 𑀯𑀺𑀲𑀫𑀓𑀺𑀭𑀺𑀬𑀸𑀬 𑀯𑀥𑀩𑀦𑁆𑀥𑀦𑀕𑀭𑀳𑀸𑀤𑀻𑀳𑀺 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀢𑁆𑀯𑀸 𑀅𑀥𑀫𑁆𑀫𑀁 𑀘𑀭𑀺𑀢𑁆𑀯𑀸 𑀬𑀸 𑀯𑀼𑀢𑁆𑀢𑀺, 𑀢𑀜𑁆𑀘 𑀬𑀲𑀥𑀦𑀮𑀸𑀪𑀜𑁆𑀘 ¶ 𑀲𑀩𑁆𑀩𑀁 𑀥𑀺𑀭𑀢𑁆𑀣𑀼 𑀦𑀺𑀦𑁆𑀤𑀸𑀫𑀺 𑀕𑀭𑀳𑀸𑀫𑀺, 𑀦 𑀫𑁂 𑀏𑀢𑁂𑀦𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀢𑁆𑀢𑀫𑀸𑀤𑀸𑀬𑀸𑀢𑀺 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸. 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂𑀢𑀺 𑀅𑀕𑁂𑀳𑁄 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸 𑀘𑀭𑁂𑀬𑁆𑀬, 𑀦 𑀘 𑀲𑀧𑁆𑀧𑀼𑀭𑀺𑀲𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀲𑁂𑀦 𑀅𑀥𑀫𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀏𑀲𑀸𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄. 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸𑀢𑀺, 𑀬𑀸 ¶ 𑀏𑀲𑀸 𑀅𑀥𑀫𑁆𑀫𑁂𑀦 𑀚𑀻𑀯𑀺𑀓𑀧𑀭𑀺𑀬𑁂𑀲𑀦𑀸, 𑀢𑀢𑁄 𑀏𑀲𑀸 𑀧𑀢𑁆𑀢𑀳𑀢𑁆𑀣𑀲𑁆𑀲 𑀧𑀭𑀓𑀼𑀮𑁂𑀲𑀼 𑀪𑀺𑀓𑁆𑀔𑀸𑀘𑀭𑀺𑀬𑀸𑀯 𑀲𑁂𑀬𑁆𑀬𑁄, 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀼𑀦𑁆𑀤𑀭𑀢𑀭𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀫𑀸𑀡𑀯𑁄 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀯𑀡𑁆𑀡𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀡𑀯𑁄 𑀮𑀸𑀪𑀕𑀭𑀳𑀻 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀮𑀸𑀪𑀕𑀭𑀳𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁮𑁮] 𑁮. 𑀫𑀘𑁆𑀙𑀼𑀤𑁆𑀤𑀸𑀦𑀚𑀸𑀢𑀓𑀯𑀡𑁆𑀡𑀦𑀸

𑀅𑀕𑁆𑀖𑀦𑁆𑀢𑀺 𑀫𑀘𑁆𑀙𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀽𑀝𑀯𑀸𑀡𑀺𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀲𑀺. 𑀓𑀦𑀺𑀝𑁆𑀞𑀪𑀸𑀢𑀸𑀧𑀺𑀲𑁆𑀲 𑀅𑀢𑁆𑀣𑀺, 𑀢𑁂𑀲𑀁 𑀅𑀧𑀭𑀪𑀸𑀕𑁂 𑀧𑀺𑀢𑀸 𑀓𑀸𑀮𑀓𑀢𑁄. 𑀢𑁂 𑀏𑀓𑀤𑀺𑀯𑀲𑀁 ‘‘𑀧𑀺𑀢𑀼 𑀲𑀦𑁆𑀢𑀓𑀁 𑀯𑁄𑀳𑀸𑀭𑀁 𑀲𑀸𑀥𑁂𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸 𑀦𑀤𑀻𑀢𑀺𑀢𑁆𑀣𑁂 𑀦𑀸𑀯𑀁 𑀧𑀝𑀺𑀫𑀸𑀦𑁂𑀦𑁆𑀢𑀸 𑀧𑀼𑀝𑀪𑀢𑁆𑀢𑀁 𑀪𑀼𑀜𑁆𑀚𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀢𑀺𑀭𑁂𑀓𑀪𑀢𑁆𑀢𑀁 𑀕𑀗𑁆𑀕𑀸𑀬 𑀫𑀘𑁆𑀙𑀸𑀦𑀁 𑀤𑀢𑁆𑀯𑀸 𑀦𑀤𑀻𑀤𑁂𑀯𑀢𑀸𑀬 𑀧𑀢𑁆𑀢𑀺𑀁 𑀅𑀤𑀸𑀲𑀺. 𑀤𑁂𑀯𑀢𑀸 𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀺𑀢𑁆𑀯𑀸𑀬𑁂𑀯 𑀤𑀺𑀩𑁆𑀩𑁂𑀦 𑀬𑀲𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀢𑁆𑀢𑀦𑁄 𑀬𑀲𑀯𑀼𑀟𑁆𑀠𑀺𑀁 𑀆𑀯𑀚𑁆𑀚𑀫𑀸𑀦𑀸 𑀢𑀁 𑀓𑀸𑀭𑀡𑀁 𑀅𑀜𑁆𑀜𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀯𑀸𑀮𑀺𑀓𑀸𑀬𑀁 ¶ 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺, 𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀣𑁄𑀓𑀁 𑀘𑁄𑀭𑀧𑀓𑀢𑀺𑀓𑁄. 𑀲𑁄 𑀢𑁂 𑀓𑀳𑀸𑀧𑀡𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀤𑀢𑁆𑀯𑀸 𑀲𑀬𑀫𑁂𑀯 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀓𑀳𑀸𑀧𑀡𑀪𑀡𑁆𑀟𑀺𑀓𑀲𑀤𑀺𑀲𑀁 𑀏𑀓𑀁 𑀲𑀓𑁆𑀔𑀭𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀤𑁆𑀯𑁂𑀧𑀺 𑀪𑀡𑁆𑀟𑀺𑀓𑀸 𑀏𑀓𑀢𑁄𑀯 𑀞𑀧𑁂𑀲𑀺. 𑀢𑁂𑀲𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀕𑀗𑁆𑀕𑀸𑀫𑀚𑁆𑀛𑀕𑀢𑀸𑀦𑀁 𑀓𑀦𑀺𑀝𑁆𑀞𑁄 𑀦𑀸𑀯𑀁 𑀔𑁄𑀪𑁂𑀢𑁆𑀯𑀸 ‘‘𑀲𑀓𑁆𑀔𑀭𑀪𑀡𑁆𑀟𑀺𑀓𑀁 𑀉𑀤𑀓𑁂 ¶ 𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀔𑀺𑀧𑀺𑀢𑁆𑀯𑀸 ‘‘𑀪𑀸𑀢𑀺𑀓, 𑀲𑀳𑀲𑁆𑀲𑀪𑀡𑁆𑀟𑀺𑀓𑀸 𑀉𑀤𑀓𑁂 𑀧𑀢𑀺𑀢𑀸, 𑀓𑀺𑀦𑁆𑀢𑀺 𑀓𑀭𑁄𑀫𑀸’’𑀢𑀺 𑀆𑀳. ‘‘𑀉𑀤𑀓𑁂 𑀧𑀢𑀺𑀢𑀸𑀬 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀫𑀸 𑀘𑀺𑀦𑁆𑀢𑀬𑀻’’𑀢𑀺. 𑀦𑀤𑀻𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑀺𑀦𑀸 𑀤𑀺𑀦𑁆𑀦𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀤𑀺𑀩𑁆𑀩𑀬𑀲𑁂𑀦 𑀯𑀟𑁆𑀠𑀺𑀢𑁆𑀯𑀸 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀪𑀡𑁆𑀟𑀺𑀓𑀁 𑀏𑀓𑀁 𑀫𑀳𑀸𑀫𑀘𑁆𑀙𑀁 𑀕𑀺𑀮𑀸𑀧𑁂𑀢𑁆𑀯𑀸 𑀲𑀬𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺. 𑀲𑁄𑀧𑀺 𑀘𑁄𑀭𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀪𑀸𑀢𑀸 𑀫𑁂 𑀯𑀜𑁆𑀘𑀺𑀢𑁄’’𑀢𑀺 𑀪𑀡𑁆𑀟𑀺𑀓𑀁 𑀫𑁄𑀘𑁂𑀦𑁆𑀢𑁄 𑀲𑀓𑁆𑀔𑀭𑀸 𑀧𑀲𑁆𑀲𑀺𑀢𑁆𑀯𑀸 𑀳𑀤𑀬𑁂𑀦 𑀲𑀼𑀲𑁆𑀲𑀦𑁆𑀢𑁂𑀦 𑀫𑀜𑁆𑀘𑀲𑁆𑀲 𑀅𑀝𑀦𑀺𑀁 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀢𑀤𑀸 𑀓𑁂𑀯𑀝𑁆𑀝𑀸 𑀫𑀘𑁆𑀙𑀕𑀳𑀡𑀢𑁆𑀣𑀸𑀬 𑀚𑀸𑀮𑀁 𑀔𑀺𑀧𑀺𑀁𑀲𑀼. 𑀲𑁄 𑀫𑀘𑁆𑀙𑁄 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀚𑀸𑀮𑀁 𑀧𑀸𑀯𑀺𑀲𑀺. 𑀓𑁂𑀯𑀝𑁆𑀝𑀸 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑀼𑀁 𑀦𑀕𑀭𑀁 𑀧𑀯𑀺𑀝𑁆𑀞𑀸. 𑀫𑀦𑀼𑀲𑁆𑀲𑀸 𑀫𑀳𑀸𑀫𑀘𑁆𑀙𑀁 𑀤𑀺𑀲𑁆𑀯𑀸 𑀫𑀽𑀮𑀁 𑀧𑀼𑀘𑁆𑀙𑀦𑁆𑀢𑀺. 𑀓𑁂𑀯𑀝𑁆𑀝𑀸 ‘‘𑀓𑀳𑀸𑀧𑀡𑀲𑀳𑀲𑁆𑀲𑀜𑁆𑀘 𑀲𑀢𑁆𑀢 𑀘 𑀫𑀸𑀲𑀓𑁂 𑀤𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼𑀲𑁆𑀲𑀸 ‘‘𑀲𑀳𑀲𑁆𑀲𑀕𑁆𑀖𑀦𑀓𑀫𑀘𑁆𑀙𑁄𑀧𑀺 ¶ 𑀦𑁄 𑀤𑀺𑀝𑁆𑀞𑁄’’𑀢𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀓𑁂𑀯𑀝𑁆𑀝𑀸 𑀫𑀘𑁆𑀙𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀖𑀭𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀁 𑀫𑀘𑁆𑀙𑀁 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. ‘‘𑀓𑀺𑀫𑀲𑁆𑀲 𑀫𑀽𑀮’’𑀦𑁆𑀢𑀺? ‘‘𑀲𑀢𑁆𑀢 𑀫𑀸𑀲𑀓𑁂 𑀤𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺. ‘‘𑀅𑀜𑁆𑀜𑁂𑀲𑀁 𑀤𑀤𑀫𑀸𑀦𑀸 𑀓𑀣𑀁 𑀤𑁂𑀣𑀸’’𑀢𑀺? ‘‘𑀅𑀜𑁆𑀜𑁂𑀲𑀁 𑀲𑀳𑀲𑁆𑀲𑁂𑀦 𑀘 𑀲𑀢𑁆𑀢𑀳𑀺 𑀘 𑀫𑀸𑀲𑀓𑁂𑀳𑀺 𑀤𑁂𑀫, 𑀢𑀼𑀫𑁆𑀳𑁂 𑀧𑀦 𑀲𑀢𑁆𑀢 𑀫𑀸𑀲𑀓𑁂 𑀤𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺. 𑀲𑁄 𑀢𑁂𑀲𑀁 𑀲𑀢𑁆𑀢 𑀫𑀸𑀲𑀓𑁂 𑀤𑀢𑁆𑀯𑀸 𑀫𑀘𑁆𑀙𑀁 𑀪𑀭𑀺𑀬𑀸𑀬 𑀧𑁂𑀲𑁂𑀲𑀺. 𑀲𑀸 𑀫𑀘𑁆𑀙𑀲𑁆𑀲 𑀓𑀼𑀘𑁆𑀙𑀺𑀁 𑀨𑀸𑀮𑀬𑀫𑀸𑀦𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 ¶ 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀮𑀜𑁆𑀙𑀁 𑀤𑀺𑀲𑁆𑀯𑀸 𑀲𑀓𑀲𑀦𑁆𑀢𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀇𑀫𑁂 𑀓𑁂𑀯𑀝𑁆𑀝𑀸 𑀇𑀫𑀁 𑀫𑀘𑁆𑀙𑀁 𑀅𑀜𑁆𑀜𑁂𑀲𑀁 𑀤𑀤𑀫𑀸𑀦𑀸 𑀲𑀳𑀲𑁆𑀲𑁂𑀦 𑀘𑁂𑀯 𑀲𑀢𑁆𑀢𑀳𑀺 𑀘 𑀫𑀸𑀲𑀓𑁂𑀳𑀺 𑀤𑁂𑀦𑁆𑀢𑀺, 𑀅𑀫𑁆𑀳𑁂 𑀧𑀦 𑀧𑀢𑁆𑀯𑀸 𑀲𑀳𑀲𑁆𑀲𑀲𑁆𑀲 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀢𑁆𑀢𑀸 𑀲𑀢𑁆𑀢𑁂𑀯 𑀫𑀸𑀲𑀓𑁂 𑀕𑀳𑁂𑀢𑁆𑀯𑀸 𑀅𑀤𑀁𑀲𑀼, 𑀇𑀤𑀁 𑀅𑀦𑁆𑀢𑀭𑀁 𑀅𑀚𑀸𑀦𑀦𑁆𑀢𑀁 𑀦 𑀲𑀓𑁆𑀓𑀸 𑀓𑀜𑁆𑀘𑀺 𑀲𑀤𑁆𑀤𑀳𑀸𑀧𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁨.

‘‘𑀅𑀕𑁆𑀖𑀦𑁆𑀢𑀺 𑀫𑀘𑁆𑀙𑀸 𑀅𑀥𑀺𑀓𑀁 𑀲𑀳𑀲𑁆𑀲𑀁, 𑀦 𑀲𑁄 𑀅𑀢𑁆𑀣𑀺 𑀬𑁄 𑀇𑀫𑀁 𑀲𑀤𑁆𑀤𑀳𑁂𑀬𑁆𑀬;

𑀫𑀬𑁆𑀳𑀜𑁆𑀘 𑀅𑀲𑁆𑀲𑀼 𑀇𑀥 𑀲𑀢𑁆𑀢 𑀫𑀸𑀲𑀸, 𑀅𑀳𑀫𑁆𑀧𑀺 𑀢𑀁 𑀫𑀘𑁆𑀙𑀼𑀤𑁆𑀤𑀸𑀦𑀁 𑀓𑀺𑀡𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 𑀅𑀥𑀺𑀓𑀦𑁆𑀢𑀺 𑀅𑀜𑁆𑀜𑁂𑀳𑀺 𑀧𑀼𑀘𑁆𑀙𑀺𑀢𑀸 𑀓𑁂𑀯𑀝𑁆𑀝𑀸 ‘‘𑀲𑀢𑁆𑀢𑀫𑀸𑀲𑀸𑀥𑀺𑀓𑀁 𑀲𑀳𑀲𑁆𑀲𑀁 𑀅𑀕𑁆𑀖𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀦 𑀲𑁄 𑀅𑀢𑁆𑀣𑀺 𑀬𑁄 𑀇𑀫𑀁 𑀲𑀤𑁆𑀤𑀳𑁂𑀬𑁆𑀬𑀸𑀢𑀺 𑀲𑁄 𑀧𑀼𑀭𑀺𑀲𑁄 𑀦 ¶ 𑀅𑀢𑁆𑀣𑀺, 𑀬𑁄 𑀇𑀫𑀁 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀢𑁄 𑀅𑀚𑀸𑀦𑀦𑁆𑀢𑁄 𑀫𑀫 𑀯𑀘𑀦𑁂𑀦 𑀲𑀤𑁆𑀤𑀳𑁂𑀬𑁆𑀬, 𑀏𑀢𑁆𑀢𑀓𑀁 𑀯𑀸 𑀫𑀘𑁆𑀙𑀸 𑀅𑀕𑁆𑀖𑀦𑁆𑀢𑀻𑀢𑀺 𑀬𑁄 𑀇𑀫𑀁 𑀲𑀤𑁆𑀤𑀳𑁂𑀬𑁆𑀬, 𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸𑀬𑁂𑀯 𑀢𑁂 𑀅𑀜𑁆𑀜𑁂𑀳𑀺 𑀦 𑀕𑀳𑀺𑀢𑀸𑀢𑀺𑀧𑀺 𑀅𑀢𑁆𑀣𑁄. 𑀫𑀬𑁆𑀳𑀜𑁆𑀘 𑀅𑀲𑁆𑀲𑀽𑀢𑀺 𑀫𑀬𑁆𑀳𑀁 𑀧𑀦 𑀲𑀢𑁆𑀢 𑀫𑀸𑀲𑀓𑀸 𑀅𑀳𑁂𑀲𑀼𑀁. 𑀫𑀘𑁆𑀙𑀼𑀤𑁆𑀤𑀸𑀦𑀦𑁆𑀢𑀺 𑀫𑀘𑁆𑀙𑀯𑀕𑁆𑀕𑀁. 𑀢𑁂𑀦 𑀳𑀺 𑀫𑀘𑁆𑀙𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀫𑀘𑁆𑀙𑀸 𑀏𑀓𑀢𑁄 𑀩𑀤𑁆𑀥𑀸 𑀢𑀁 𑀲𑀓𑀮𑀫𑁆𑀧𑀺 𑀫𑀘𑁆𑀙𑀼𑀤𑁆𑀤𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀡𑁂𑀬𑁆𑀬𑀦𑁆𑀢𑀺 𑀓𑀺𑀡𑀺𑀁, 𑀲𑀢𑁆𑀢𑁂𑀯 𑀫𑀸𑀲𑀓𑁂 𑀤𑀢𑁆𑀯𑀸 𑀏𑀢𑁆𑀢𑀓𑀁 𑀫𑀘𑁆𑀙𑀯𑀕𑁆𑀕𑀁 𑀕𑀡𑁆𑀳𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀤𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀫𑀬𑀸 𑀏𑀢𑁂 𑀓𑀳𑀸𑀧𑀡𑀸 𑀮𑀤𑁆𑀥𑀸’’𑀢𑀺? 𑀢𑀲𑁆𑀫𑀺𑀁 𑀔𑀡𑁂 𑀦𑀤𑀻𑀤𑁂𑀯𑀢𑀸 𑀆𑀓𑀸𑀲𑁂 𑀤𑀺𑀲𑁆𑀲𑀫𑀸𑀦𑀭𑀽𑀧𑁂𑀦 𑀞𑀢𑁆𑀯𑀸 ‘‘𑀅𑀳𑀁, 𑀕𑀗𑁆𑀕𑀸𑀤𑁂𑀯𑀢𑀸, 𑀢𑀬𑀸 𑀫𑀘𑁆𑀙𑀸𑀦𑀁 𑀅𑀢𑀺𑀭𑁂𑀓𑀪𑀢𑁆𑀢𑀁 𑀤𑀢𑁆𑀯𑀸 𑀫𑀬𑁆𑀳𑀁 𑀧𑀢𑁆𑀢𑀺 𑀤𑀺𑀦𑁆𑀦𑀸, 𑀢𑁂𑀦𑀸𑀳𑀁 𑀢𑀯 𑀲𑀦𑁆𑀢𑀓𑀁 𑀭𑀓𑁆𑀔𑀦𑁆𑀢𑀻 𑀆𑀕𑀢𑀸’’𑀢𑀺 𑀤𑀻𑀧𑀬𑀫𑀸𑀦𑀸 𑀕𑀸𑀣𑀫𑀸𑀳 𑁋

𑁧𑁧𑁩.

‘‘𑀫𑀘𑁆𑀙𑀸𑀦𑀁 𑀪𑁄𑀚𑀦𑀁 𑀤𑀢𑁆𑀯𑀸, 𑀫𑀫 𑀤𑀓𑁆𑀔𑀺𑀡𑀫𑀸𑀤𑀺𑀲𑀺;

𑀢𑀁 𑀤𑀓𑁆𑀔𑀺𑀡𑀁 𑀲𑀭𑀦𑁆𑀢𑀺𑀬𑀸, 𑀓𑀢𑀁 𑀅𑀧𑀘𑀺𑀢𑀺𑀁 𑀢𑀬𑀸’’𑀢𑀺.

𑀢𑀢𑁆𑀣 ¶ ¶ 𑀤𑀓𑁆𑀔𑀺𑀡𑀦𑁆𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀢𑁆𑀢𑀺𑀤𑀸𑀦𑀁 𑀤𑀓𑁆𑀔𑀺𑀡𑀸 𑀦𑀸𑀫. 𑀲𑀭𑀦𑁆𑀢𑀺𑀬𑀸 𑀓𑀢𑀁 𑀅𑀧𑀘𑀺𑀢𑀺𑀁 𑀢𑀬𑀸𑀢𑀺 𑀢𑀁 𑀢𑀬𑀸 𑀫𑀬𑁆𑀳𑀁 𑀓𑀢𑀁 𑀅𑀧𑀘𑀺𑀢𑀺𑀁 𑀲𑀭𑀦𑁆𑀢𑀺𑀬𑀸 𑀫𑀬𑀸 𑀇𑀤𑀁 𑀢𑀯 𑀥𑀦𑀁 𑀭𑀓𑁆𑀔𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀁 𑀯𑀢𑁆𑀯𑀸 𑀘 𑀧𑀦 𑀲𑀸 𑀤𑁂𑀯𑀢𑀸 𑀢𑀲𑁆𑀲 𑀓𑀦𑀺𑀝𑁆𑀞𑁂𑀦 𑀓𑀢𑀓𑀽𑀝𑀓𑀫𑁆𑀫𑀁 𑀲𑀩𑁆𑀩𑀁 𑀓𑀣𑁂𑀢𑁆𑀯𑀸 ‘‘𑀏𑀲𑁄 𑀇𑀤𑀸𑀦𑀺 𑀳𑀤𑀬𑁂𑀦 𑀲𑀼𑀲𑁆𑀲𑀦𑁆𑀢𑁂𑀦 𑀦𑀺𑀧𑀦𑁆𑀦𑁄, 𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀯𑀼𑀟𑁆𑀠𑀺 𑀦𑀸𑀫 𑀦𑀢𑁆𑀣𑀺, 𑀅𑀳𑀁 𑀧𑀦 ‘𑀢𑀯 𑀲𑀦𑁆𑀢𑀓𑀁 𑀫𑀸 𑀦𑀲𑁆𑀲𑀻’𑀢𑀺 𑀥𑀦𑀁 𑀢𑁂 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺𑀁, 𑀇𑀤𑀁 𑀓𑀦𑀺𑀝𑁆𑀞𑀘𑁄𑀭𑀲𑁆𑀲 𑀅𑀤𑀢𑁆𑀯𑀸 𑀲𑀩𑁆𑀩𑀁 𑀢𑁆𑀯𑀜𑁆𑀜𑁂𑀯 𑀕𑀡𑁆𑀳𑀸’’𑀢𑀺 𑀯𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁪.

‘‘𑀧𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀦 𑀨𑀸𑀢𑀺 𑀳𑁄𑀢𑀺, 𑀦 𑀘𑀸𑀧𑀺 𑀢𑀁 𑀤𑁂𑀯𑀢𑀸 𑀧𑀽𑀚𑀬𑀦𑁆𑀢𑀺;

𑀬𑁄 𑀪𑀸𑀢𑀭𑀁 𑀧𑁂𑀢𑁆𑀢𑀺𑀓𑀁 𑀲𑀸𑀧𑀢𑁂𑀬𑁆𑀬𑀁, 𑀅𑀯𑀜𑁆𑀘𑀬𑀻 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻’’𑀢𑀺.

𑀢𑀢𑁆𑀣 𑀦 𑀨𑀸𑀢𑀺 𑀳𑁄𑀢𑀻𑀢𑀺 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀥𑀮𑁄𑀓𑁂 𑀯𑀸 𑀧𑀭𑀮𑁄𑀓𑁂 𑀯𑀸 𑀯𑀼𑀟𑁆𑀠𑀺 𑀦𑀸𑀫 𑀦 𑀳𑁄𑀢𑀺. 𑀦 𑀘𑀸𑀧𑀺 𑀢𑀦𑁆𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀢𑀲𑁆𑀲 𑀲𑀦𑁆𑀢𑀓𑀁 𑀭𑀓𑁆𑀔𑀫𑀸𑀦𑀸 𑀤𑁂𑀯𑀢𑀸 𑀦 𑀧𑀽𑀚𑀬𑀦𑁆𑀢𑀺.

𑀇𑀢𑀺 ¶ 𑀤𑁂𑀯𑀢𑀸 𑀫𑀺𑀢𑁆𑀢𑀤𑀼𑀩𑁆𑀪𑀺𑀘𑁄𑀭𑀲𑁆𑀲 𑀓𑀳𑀸𑀧𑀡𑁂 𑀅𑀤𑀸𑀢𑀼𑀓𑀸𑀫𑀸 𑀏𑀯𑀫𑀸𑀳. 𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀦 𑀲𑀓𑁆𑀓𑀸 𑀏𑀯𑀁 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀲𑀧𑀺 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺 𑀧𑁂𑀲𑁂𑀲𑀺𑀬𑁂𑀯.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀯𑀸𑀡𑀺𑀚𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀓𑀦𑀺𑀝𑁆𑀞𑀪𑀸𑀢𑀸 𑀇𑀤𑀸𑀦𑀺 𑀓𑀽𑀝𑀯𑀸𑀡𑀺𑀚𑁄, 𑀚𑁂𑀝𑁆𑀞𑀪𑀸𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀘𑁆𑀙𑀼𑀤𑁆𑀤𑀸𑀦𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁮𑁯] 𑁯. 𑀦𑀸𑀦𑀸𑀙𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀦𑀸𑀙𑀦𑁆𑀤𑀸, 𑀫𑀳𑀸𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀝𑁆𑀞𑀯𑀭𑀮𑀸𑀪𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀏𑀓𑀸𑀤𑀲𑀓𑀦𑀺𑀧𑀸𑀢𑁂 𑀚𑀼𑀡𑁆𑀳𑀚𑀸𑀢𑀓𑁂 (𑀚𑀸. 𑁧.𑁧𑁧.𑁧𑁩 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 ¶ 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀞𑀸𑀦𑀢𑁄 𑀅𑀧𑀦𑀻𑀢𑁄 𑀧𑀺𑀢𑀼 𑀧𑀼𑀭𑁄𑀳𑀺𑀢𑁄 𑀅𑀢𑁆𑀣𑀺. 𑀲𑁄 𑀤𑀼𑀕𑁆𑀕𑀢𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀚𑀭𑀕𑁂𑀳𑁂 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀭𑀢𑁆𑀢𑀺𑀪𑀸𑀕𑁂 𑀦𑀕𑀭𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀫𑁂𑀦𑀁 𑀓𑀢𑀓𑀫𑁆𑀫𑀘𑁄𑀭𑀸 𑀏𑀓𑀲𑁆𑀫𑀺𑀁 𑀲𑀼𑀭𑀸𑀧𑀸𑀦𑁂 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀅𑀧𑀭𑀫𑁆𑀧𑀺 𑀖𑀝𑁂𑀦𑀸𑀤𑀸𑀬 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀭𑁂 𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 𑀧𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑀺𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀖𑀝𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑀸𑀲𑁂𑀦𑁆𑀢𑀸 𑀕𑀘𑁆𑀙𑀺𑀁𑀲𑀼. 𑀲𑁄𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀭𑀜𑁆𑀜𑁄 𑀅𑀫𑀺𑀢𑁆𑀢𑀸𑀦𑀁 𑀳𑀢𑁆𑀣𑀕𑀢𑀪𑀸𑀯𑀁 𑀜𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀫𑀦𑁆𑀢𑁂𑀲𑀺. 𑀲𑀸 ‘‘𑀓𑀺𑀁, 𑀅𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀯𑁂𑀕𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀸. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀪𑁄𑀢𑀺 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀅𑀫𑀺𑀢𑁆𑀢𑀸𑀦𑀁 𑀯𑀲𑀁 𑀕𑀢𑁄’’𑀢𑀺. ‘‘𑀅𑀬𑁆𑀬, 𑀓𑀺𑀁 𑀢𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀧𑀯𑀢𑁆𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺.

𑀭𑀸𑀚𑀸 ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀥𑀼𑀢𑁆𑀢𑁂 𑀆𑀳 𑁋 ‘‘𑀤𑀼𑀕𑁆𑀕𑀢𑁄𑀫𑁆𑀳𑀺, 𑀲𑀸𑀫𑀺, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣 𑀫’’𑀦𑁆𑀢𑀺. 𑀢𑁂 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀁 𑀓𑀸𑀭𑀼𑀜𑁆𑀜𑁂𑀦 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀢𑁂𑀲𑀁 𑀯𑀲𑀦𑀕𑁂𑀳𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀅𑀣 𑀧𑁄𑀭𑀸𑀡𑀓𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄𑀧𑀺 ‘‘𑀪𑁄𑀢𑀺, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀅𑀫𑀺𑀢𑁆𑀢𑀳𑀢𑁆𑀣𑀢𑁄 𑀫𑀼𑀢𑁆𑀢𑁄’’𑀢𑀺 𑀆𑀳. 𑀭𑀸𑀚𑀸 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀫𑁆𑀧𑀺 𑀕𑁂𑀳𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀲𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀆𑀘𑀭𑀺𑀬𑀸 𑀭𑀢𑁆𑀢𑀺𑀁 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑀬𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀲𑁄𑀪𑀦’’𑀦𑁆𑀢𑀺? ‘‘𑀲𑁄𑀪𑀦𑀁, 𑀤𑁂𑀯𑀸’’𑀢𑀺. ‘‘𑀓𑁄𑀘𑀺 𑀕𑀸𑀳𑁄 𑀦𑀢𑁆𑀣𑀻’’𑀢𑀺. ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀅𑀲𑀼𑀓𑀕𑁂𑀳𑀢𑁄 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀧𑁄𑀭𑀸𑀡𑀓𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁, 𑀆𑀘𑀭𑀺𑀬, 𑀭𑀢𑁆𑀢𑀺𑀁 𑀢𑁂 𑀦𑀓𑁆𑀔𑀢𑁆𑀢𑀁 ¶ 𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀅𑀢𑁆𑀣𑀺 𑀓𑁄𑀘𑀺 𑀕𑀸𑀳𑁄’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚, 𑀅𑀚𑁆𑀚 𑀭𑀢𑁆𑀢𑀺𑀁 𑀢𑀼𑀫𑁆𑀳𑁂 𑀅𑀫𑀺𑀢𑁆𑀢𑀯𑀲𑀁 𑀕𑀦𑁆𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀫𑀼𑀢𑁆𑀢𑀸’’𑀢𑀺. 𑀭𑀸𑀚𑀸 ‘‘𑀦𑀓𑁆𑀔𑀢𑁆𑀢𑀚𑀸𑀦𑀦𑀓𑁂𑀦 𑀦𑀸𑀫 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑁂𑀲𑀩𑁆𑀭𑀸𑀳𑁆𑀫𑀡𑁂 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀧𑀲𑀦𑁆𑀦𑁄𑀲𑁆𑀫𑀺 𑀢𑁂, 𑀯𑀭𑀁 𑀢𑁆𑀯𑀁 𑀕𑀡𑁆𑀳𑀸’’𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀧𑀼𑀢𑁆𑀢𑀤𑀸𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. ‘‘𑀕𑀘𑁆𑀙 𑀫𑀦𑁆𑀢𑁂𑀢𑁆𑀯𑀸 𑀏𑀳𑀻’’𑀢𑀺.

𑀲𑁄 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀜𑁆𑀘 𑀧𑀼𑀢𑁆𑀢𑀜𑁆𑀘 𑀲𑀼𑀡𑀺𑀲𑀜𑁆𑀘 𑀤𑀸𑀲𑀺𑀜𑁆𑀘 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀭𑀸𑀚𑀸 𑀫𑁂 𑀯𑀭𑀁 𑀤𑀤𑀸𑀢𑀺, 𑀓𑀺𑀁 𑀕𑀡𑁆𑀳𑀸𑀫𑀸’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀻 ‘‘𑀫𑀬𑁆𑀳𑀁 𑀥𑁂𑀦𑀼𑀲𑀢𑀁 𑀆𑀦𑁂𑀳𑀻’’𑀢𑀺 𑀆𑀳, 𑀧𑀼𑀢𑁆𑀢𑁄 𑀙𑀢𑁆𑀢𑀫𑀸𑀡𑀯𑁄 𑀦𑀸𑀫 ‘‘𑀫𑀬𑁆𑀳𑀁 𑀓𑀼𑀫𑀼𑀤𑀯𑀡𑁆𑀡𑁂𑀳𑀺 𑀘𑀢𑀽𑀳𑀺 𑀲𑀺𑀦𑁆𑀥𑀯𑁂𑀳𑀺 𑀬𑀼𑀢𑁆𑀢𑀁 𑀆𑀚𑀜𑁆𑀜𑀭𑀣’’𑀦𑁆𑀢𑀺, 𑀲𑀼𑀡𑀺𑀲𑀸 ‘‘𑀫𑀬𑁆𑀳𑀁 𑀫𑀡𑀺𑀓𑀼𑀡𑁆𑀟𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭’’𑀦𑁆𑀢𑀺, 𑀧𑀼𑀡𑁆𑀡𑀸 𑀦𑀸𑀫 𑀤𑀸𑀲𑀻 ‘‘𑀫𑀬𑁆𑀳𑀁 𑀉𑀤𑀼𑀓𑁆𑀔𑀮𑀫𑀼𑀲𑀮𑀜𑁆𑀘𑁂𑀯 𑀲𑀼𑀧𑁆𑀧𑀜𑁆𑀘𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀕𑀸𑀫𑀯𑀭𑀁 𑀕𑀳𑁂𑀢𑀼𑀓𑀸𑀫𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 ¶ , 𑀩𑁆𑀭𑀸𑀳𑁆𑀫𑀡, 𑀧𑀼𑀘𑁆𑀙𑀺𑀢𑁄 𑀢𑁂 𑀧𑀼𑀢𑁆𑀢𑀤𑀸𑀭𑁄’’𑀢𑀺 𑀧𑀼𑀝𑁆𑀞𑁄 ‘‘𑀆𑀫, 𑀤𑁂𑀯, 𑀧𑀼𑀘𑁆𑀙𑀺𑀢𑁄, 𑀅𑀦𑁂𑀓𑀘𑁆𑀙𑀦𑁆𑀤𑁄’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁧𑁫.

‘‘𑀦𑀸𑀦𑀸𑀙𑀦𑁆𑀤𑀸 𑀫𑀳𑀸𑀭𑀸𑀚, 𑀏𑀓𑀸𑀕𑀸𑀭𑁂 𑀯𑀲𑀸𑀫𑀲𑁂;

𑀅𑀳𑀁 𑀕𑀸𑀫𑀯𑀭𑀁 𑀇𑀘𑁆𑀙𑁂, 𑀩𑁆𑀭𑀸𑀳𑁆𑀫𑀡𑀻 𑀘 𑀕𑀯𑀁 𑀲𑀢𑀁.

𑁧𑁧𑁬.

‘‘𑀧𑀼𑀢𑁆𑀢𑁄 𑀘 𑀆𑀚𑀜𑁆𑀜𑀭𑀣𑀁, 𑀓𑀜𑁆𑀜𑀸 𑀘 𑀫𑀡𑀺𑀓𑀼𑀡𑁆𑀟𑀮𑀁;

𑀬𑀸 𑀘𑁂𑀲𑀸 𑀧𑀼𑀡𑁆𑀡𑀺𑀓𑀸 𑀚𑀫𑁆𑀫𑀻, 𑀉𑀤𑀼𑀓𑁆𑀔𑀮𑀁𑀪𑀺𑀓𑀗𑁆𑀔𑀢𑀻’’𑀢𑀺.

𑀢𑀢𑁆𑀣 ¶ 𑀇𑀘𑁆𑀙𑁂𑀢𑀺 𑀇𑀘𑁆𑀙𑀸𑀫𑀺. 𑀕𑀯𑀁 𑀲𑀢𑀦𑁆𑀢𑀺 𑀥𑁂𑀦𑀽𑀦𑀁 𑀕𑀼𑀦𑁆𑀦𑀁 𑀲𑀢𑀁. 𑀓𑀜𑁆𑀜𑀸𑀢𑀺 𑀲𑀼𑀡𑀺𑀲𑀸. 𑀬𑀸 𑀘𑁂𑀲𑀸𑀢𑀺 𑀬𑀸 𑀏𑀲𑀸 𑀅𑀫𑁆𑀳𑀸𑀓𑀁 𑀖𑀭𑁂 𑀧𑀼𑀡𑁆𑀡𑀺𑀓𑀸 𑀦𑀸𑀫 𑀤𑀸𑀲𑀻, 𑀲𑀸 𑀚𑀫𑁆𑀫𑀻 𑀮𑀸𑀫𑀺𑀓𑀸 𑀲𑀼𑀧𑁆𑀧𑀫𑀼𑀲𑀮𑁂𑀳𑀺 𑀲𑀤𑁆𑀥𑀺𑀁 𑀉𑀤𑀼𑀓𑁆𑀔𑀮𑀁 𑀅𑀪𑀺𑀓𑀗𑁆𑀔𑀢𑀺 𑀇𑀘𑁆𑀙𑀢𑀻𑀢𑀺.

𑀭𑀸𑀚𑀸 ‘‘𑀲𑀩𑁆𑀩𑁂𑀲𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀤𑁂𑀣𑀸’’𑀢𑀺 𑀆𑀡𑀸𑀧𑁂𑀦𑁆𑀢𑁄 𑁋

𑁧𑁧𑁭.

‘‘𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀕𑀸𑀫𑀯𑀭𑀁, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀕𑀯𑀁 𑀲𑀢𑀁;

𑀧𑀼𑀢𑁆𑀢𑀲𑁆𑀲 𑀆𑀚𑀜𑁆𑀜𑀭𑀣𑀁, 𑀓𑀜𑁆𑀜𑀸𑀬 𑀫𑀡𑀺𑀓𑀼𑀡𑁆𑀟𑀮𑀁;

𑀬𑀜𑁆𑀘𑁂𑀢𑀁 𑀧𑀼𑀡𑁆𑀡𑀺𑀓𑀁 𑀚𑀫𑁆𑀫𑀺𑀁, 𑀧𑀝𑀺𑀧𑀸𑀤𑁂𑀣𑀼𑀤𑀼𑀓𑁆𑀔𑀮’’𑀦𑁆𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀬𑀜𑁆𑀘𑁂𑀢𑀦𑁆𑀢𑀺 𑀬𑀜𑁆𑀘 𑀏𑀢𑀁 𑀧𑀼𑀡𑁆𑀡𑀺𑀓𑀦𑁆𑀢𑀺 𑀯𑀤𑀢𑀺, 𑀢𑀁 𑀚𑀫𑁆𑀫𑀺𑀁 𑀉𑀤𑀼𑀓𑁆𑀔𑀮𑀁 𑀧𑀝𑀺𑀧𑀸𑀤𑁂𑀣 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀣𑀸𑀢𑀺.

𑀇𑀢𑀺 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂𑀦 𑀧𑀢𑁆𑀣𑀺𑀢𑀜𑁆𑀘 𑀅𑀜𑁆𑀜𑀜𑁆𑀘 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀸’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀸𑀦𑀸𑀙𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁯𑁦] 𑁧𑁦. 𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀻𑀮𑀁 ¶ 𑀓𑀺𑀭𑁂𑀯 𑀓𑀮𑁆𑀬𑀸𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀻𑀮𑀯𑀻𑀫𑀁𑀲𑀓𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀅𑀢𑀻𑀢𑀫𑁆𑀧𑀺 𑀳𑁂𑀝𑁆𑀞𑀸 𑀏𑀓𑀓𑀦𑀺𑀧𑀸𑀢𑁂 𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑁂 (𑀚𑀸. 𑁧.𑁧.𑁮𑁬) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 ‘‘𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀳𑁂𑀭𑀜𑁆𑀜𑀺𑀓𑀨𑀮𑀓𑀢𑁄 𑀤𑁆𑀯𑁂 𑀤𑀺𑀯𑀲𑁂 𑀏𑀓𑁂𑀓𑀁 𑀓𑀳𑀸𑀧𑀡𑀁 𑀕𑀡𑁆𑀳𑀺. 𑀅𑀣 𑀦𑀁 𑀢𑀢𑀺𑀬𑀤𑀺𑀯𑀲𑁂 ‘‘𑀘𑁄𑀭𑁄’’𑀢𑀺 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀳𑀺𑀢𑀼𑀡𑁆𑀟𑀺𑀓𑁂 𑀲𑀧𑁆𑀧𑀁 𑀓𑀻𑀴𑀸𑀧𑁂𑀦𑁆𑀢𑁂 𑀅𑀤𑁆𑀤𑀲. 𑀅𑀣 𑀦𑀁 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀏𑀯𑀭𑀽𑀧𑀁 𑀅𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺 ¶ . 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑀢𑀸𑀬𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁧𑁮.

‘‘𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀧𑀲𑁆𑀲 𑀖𑁄𑀭𑀯𑀺𑀲𑁄 𑀦𑀸𑀕𑁄, 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀺.

𑁧𑁧𑁯.

‘‘𑀲𑁄𑀳𑀁 ¶ 𑀲𑀻𑀮𑀁 𑀲𑀫𑀸𑀤𑀺𑀲𑁆𑀲𑀁, 𑀮𑁄𑀓𑁂 𑀅𑀦𑀼𑀫𑀢𑀁 𑀲𑀺𑀯𑀁;

𑀅𑀭𑀺𑀬𑀯𑀼𑀢𑁆𑀢𑀺𑀲𑀫𑀸𑀘𑀸𑀭𑁄, 𑀬𑁂𑀦 𑀯𑀼𑀘𑁆𑀘𑀢𑀺 𑀲𑀻𑀮𑀯𑀸.

𑁧𑁨𑁦.

‘‘𑀜𑀸𑀢𑀻𑀦𑀜𑁆𑀘 𑀧𑀺𑀬𑁄 𑀳𑁄𑀢𑀺, 𑀫𑀺𑀢𑁆𑀢𑁂𑀲𑀼 𑀘 𑀯𑀺𑀭𑁄𑀘𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁, 𑀉𑀧𑀧𑀚𑁆𑀚𑀢𑀺 𑀲𑀻𑀮𑀯𑀸’’𑀢𑀺.

𑀢𑀢𑁆𑀣 𑀲𑀻𑀮𑀦𑁆𑀢𑀺 𑀆𑀘𑀸𑀭𑁄. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀮𑁆𑀬𑀸𑀡𑀦𑁆𑀢𑀺 𑀲𑁄𑀪𑀦𑀁, ‘‘𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡’’𑀦𑁆𑀢𑀺 𑀏𑀯𑀁 𑀧𑀡𑁆𑀟𑀺𑀢𑀸 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀫𑁂𑀯 𑀯𑀤𑀢𑀺. 𑀦 𑀳𑀜𑁆𑀜𑀢𑀻𑀢𑀺 𑀧𑀭𑀫𑁆𑀧𑀺 𑀦 𑀯𑀺𑀳𑁂𑀞𑁂𑀢𑀺, 𑀧𑀭𑁂𑀳𑀺𑀧𑀺 𑀦 𑀯𑀺𑀳𑁂𑀞𑀻𑀬𑀢𑀺. 𑀲𑀫𑀸𑀤𑀺𑀲𑁆𑀲𑀦𑁆𑀢𑀺 𑀲𑀫𑀸𑀤𑀺𑀬𑀺𑀲𑁆𑀲𑀸𑀫𑀺. 𑀅𑀦𑀼𑀫𑀢𑀁 𑀲𑀺𑀯𑀦𑁆𑀢𑀺 ‘‘𑀔𑁂𑀫𑀁 𑀦𑀺𑀩𑁆𑀪𑀬’’𑀦𑁆𑀢𑀺 𑀏𑀯𑀁 𑀧𑀡𑁆𑀟𑀺𑀢𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀁. 𑀬𑁂𑀦 𑀯𑀼𑀘𑁆𑀘𑀢𑀻𑀢𑀺 𑀬𑁂𑀦 𑀲𑀻𑀮𑁂𑀦 𑀲𑀻𑀮𑀯𑀸 𑀧𑀼𑀭𑀺𑀲𑁄 𑀅𑀭𑀺𑀬𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀧𑀝𑀺𑀧𑀢𑁆𑀢𑀺𑀁 𑀲𑀫𑀸𑀘𑀭𑀦𑁆𑀢𑁄 ‘‘𑀅𑀭𑀺𑀬𑀯𑀼𑀢𑁆𑀢𑀺𑀲𑀫𑀸𑀘𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀫𑀳𑀁 𑀲𑀫𑀸𑀤𑀺𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀯𑀺𑀭𑁄𑀘𑀢𑀻𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀯𑀺𑀭𑁄𑀘𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀻𑀳𑀺 𑀕𑀸𑀣𑀸𑀳𑀺 𑀲𑀻𑀮𑀲𑁆𑀲 𑀯𑀡𑁆𑀡𑀁 𑀧𑀓𑀸𑀲𑁂𑀦𑁆𑀢𑁄 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀫 𑀕𑁂𑀳𑁂 𑀧𑀺𑀢𑀼 𑀲𑀦𑁆𑀢𑀓𑀁 𑀫𑀸𑀢𑀼 𑀲𑀦𑁆𑀢𑀓𑀁 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀁 𑀢𑀬𑀸 𑀤𑀺𑀦𑁆𑀦𑀜𑁆𑀘 𑀩𑀳𑀼 𑀥𑀦𑀁 𑀅𑀢𑁆𑀣𑀺 ¶ , 𑀧𑀭𑀺𑀬𑀦𑁆𑀢𑁄 𑀦𑀸𑀫 𑀦 𑀧𑀜𑁆𑀜𑀸𑀬𑀢𑀺, 𑀅𑀳𑀁 𑀧𑀦 𑀲𑀻𑀮𑀁 𑀯𑀻𑀫𑀁𑀲𑀦𑁆𑀢𑁄 𑀳𑁂𑀭𑀜𑁆𑀜𑀺𑀓𑀨𑀮𑀓𑀢𑁄 𑀓𑀳𑀸𑀧𑀡𑁂 𑀕𑀡𑁆𑀳𑀺𑀁. 𑀇𑀤𑀸𑀦𑀺 𑀫𑀬𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀸𑀦𑀁 𑀮𑀸𑀫𑀓𑀪𑀸𑀯𑁄, 𑀲𑀻𑀮𑀲𑁆𑀲𑁂𑀯 𑀘 𑀚𑁂𑀝𑁆𑀞𑀓𑀪𑀸𑀯𑁄 𑀜𑀸𑀢𑁄, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦𑀸𑀳𑀻’’𑀢𑀺 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀭𑀜𑁆𑀜𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀦𑀺𑀓𑁆𑀔𑀫𑁆𑀫 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀻𑀮𑀯𑀻𑀫𑀁𑀲𑀓𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀮𑀯𑀻𑀫𑀁𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀅𑀩𑁆𑀪𑀦𑁆𑀢𑀭𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀼𑀫 𑀓𑀁𑀲𑀯𑀭𑀼𑀢𑁆𑀢𑀫𑀩𑁆𑀬𑀕𑁆𑀖𑀫𑀺𑀕𑀸, 𑀫𑀡𑀬𑁄 𑀫𑀡𑀺 𑀲𑀸𑀮𑀼𑀓𑀫𑀯𑁆𑀳𑀬𑀦𑁄;

𑀅𑀦𑀼𑀲𑀸𑀲𑀦𑀺𑀬𑁄𑀧𑀺 𑀘 𑀫𑀘𑁆𑀙𑀯𑀭𑁄, 𑀫𑀡𑀺𑀓𑀼𑀡𑁆𑀟𑀮𑀓𑁂𑀦 𑀓𑀺𑀭𑁂𑀦 𑀤𑀲𑀸𑀢𑀺.

𑁫. 𑀓𑀼𑀫𑁆𑀪𑀯𑀕𑁆𑀕𑁄

[𑁨𑁯𑁧] 𑁧. 𑀲𑀼𑀭𑀸𑀖𑀝𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑀓𑀸𑀫𑀤𑀤𑀁 ¶ ¶ 𑀓𑀼𑀫𑁆𑀪𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀸 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀧𑀸𑀦𑀩𑁆𑀬𑀲𑀦𑁂𑀦 𑀦𑀸𑀲𑁂𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄𑀧𑀺𑀲𑁆𑀲 ‘‘𑀯𑁄𑀳𑀸𑀭𑀁 𑀓𑀭𑁄𑀳𑀻’’𑀢𑀺 𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀢𑀫𑁆𑀧𑀺 𑀦𑀸𑀲𑁂𑀢𑁆𑀯𑀸 𑀧𑀼𑀦 𑀅𑀕𑀫𑀸𑀲𑀺. 𑀧𑀼𑀦𑀲𑁆𑀲 𑀧𑀜𑁆𑀘 𑀲𑀢𑀸𑀦𑀺 𑀤𑀸𑀧𑁂𑀲𑀺, 𑀢𑀸𑀦𑀺𑀧𑀺 𑀦𑀸𑀲𑁂𑀢𑁆𑀯𑀸 𑀧𑀼𑀦 𑀆𑀕𑀢𑀲𑁆𑀲 𑀤𑁆𑀯𑁂 𑀣𑀽𑀮𑀲𑀸𑀝𑀓𑁂 𑀤𑀸𑀧𑁂𑀲𑀺. 𑀢𑁂𑀧𑀺 𑀦𑀸𑀲𑁂𑀢𑁆𑀯𑀸 𑀧𑀼𑀦 𑀆𑀕𑀢𑀁 𑀕𑀻𑀯𑀸𑀬𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺. 𑀲𑁄 𑀅𑀦𑀸𑀣𑁄 𑀳𑀼𑀢𑁆𑀯𑀸 𑀧𑀭𑀓𑀼𑀝𑁆𑀝𑀁 𑀦𑀺𑀲𑁆𑀲𑀸𑀬 𑀓𑀸𑀮𑀫𑀓𑀸𑀲𑀺, 𑀢𑀫𑁂𑀦𑀁 𑀓𑀟𑁆𑀠𑀺𑀢𑁆𑀯𑀸 𑀩𑀳𑀺 𑀙𑀟𑁆𑀟𑁂𑀲𑀼𑀁. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀧𑀯𑀢𑁆𑀢𑀺𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑁆𑀯𑀁 𑀏𑀢𑀁 𑀓𑀣𑀁 𑀲𑀦𑁆𑀢𑀧𑁆𑀧𑁂𑀲𑁆𑀲𑀲𑀺, 𑀬𑀫𑀳𑀁 𑀧𑀼𑀩𑁆𑀩𑁂 𑀲𑀩𑁆𑀩𑀓𑀸𑀫𑀤𑀤𑀁 𑀓𑀼𑀫𑁆𑀪𑀁 𑀤𑀢𑁆𑀯𑀸𑀧𑀺 𑀲𑀦𑁆𑀢𑀧𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺. 𑀢𑀲𑁆𑀲 𑀕𑁂𑀳𑁂 𑀪𑀽𑀫𑀺𑀕𑀢𑀫𑁂𑀯 ¶ 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀏𑀓𑁄𑀬𑁂𑀯. 𑀩𑁄𑀥𑀺𑀲𑀢𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀓𑀸𑀮𑀓𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀯𑀻𑀣𑀺𑀁 𑀆𑀯𑀭𑀺𑀢𑁆𑀯𑀸 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀭𑀁 𑀧𑀸𑀢𑀼𑀁 𑀆𑀭𑀪𑀺. 𑀲𑁄 𑀮𑀗𑁆𑀖𑀦𑀥𑀸𑀯𑀦𑀦𑀘𑁆𑀘𑀕𑀻𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀁 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀤𑀤𑀫𑀸𑀦𑁄 𑀇𑀢𑁆𑀣𑀺𑀲𑁄𑀡𑁆𑀟𑀲𑀼𑀭𑀸𑀲𑁄𑀡𑁆𑀟𑀫𑀁𑀲𑀲𑁄𑀡𑁆𑀟𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀓𑁆𑀯 𑀕𑀻𑀢𑀁, 𑀓𑁆𑀯 𑀦𑀘𑁆𑀘𑀁, 𑀓𑁆𑀯 𑀯𑀸𑀤𑀺𑀢’’𑀦𑁆𑀢𑀺 𑀲𑀫𑀚𑁆𑀚𑀢𑁆𑀣𑀺𑀓𑁄 𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀆𑀳𑀺𑀡𑁆𑀟𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀽𑀧𑀓𑀭𑀡𑀸𑀦𑀺 ¶ 𑀘 𑀯𑀺𑀦𑀸𑀲𑁂𑀢𑁆𑀯𑀸 𑀤𑀼𑀕𑁆𑀕𑀢𑁄 𑀓𑀧𑀡𑁄 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀘𑀭𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀲𑁆𑀲 𑀤𑀼𑀕𑁆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀢𑁆𑀢𑀧𑁂𑀫𑁂𑀦 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀓𑀸𑀫𑀤𑀤𑀁 𑀓𑀼𑀫𑁆𑀪𑀁 𑀤𑀢𑁆𑀯𑀸 ‘‘𑀢𑀸𑀢, 𑀬𑀣𑀸 𑀅𑀬𑀁 𑀓𑀼𑀫𑁆𑀪𑁄 𑀦 𑀪𑀺𑀚𑁆𑀚𑀢𑀺, 𑀢𑀣𑀸 𑀦𑀁 𑀭𑀓𑁆𑀔, 𑀇𑀫𑀲𑁆𑀫𑀺𑀁 𑀢𑁂 𑀲𑀢𑀺 𑀥𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀯𑀺𑀘𑀭𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀢𑁆𑀢𑁄 𑀢𑀁 𑀓𑀼𑀫𑁆𑀪𑀁 𑀆𑀓𑀸𑀲𑁂 𑀔𑀺𑀧𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀏𑀓𑀯𑀸𑀭𑀁 𑀯𑀺𑀭𑀚𑁆𑀛𑀺 ¶ , 𑀓𑀼𑀫𑁆𑀪𑁄 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀪𑀺𑀚𑁆𑀚𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀤𑀮𑀺𑀤𑁆𑀤𑁄 𑀳𑀼𑀢𑁆𑀯𑀸 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀧𑀸𑀮𑀳𑀢𑁆𑀣𑁄 𑀪𑀺𑀓𑁆𑀔𑀁 𑀘𑀭𑀦𑁆𑀢𑁄 𑀧𑀭𑀓𑀼𑀝𑁆𑀝𑀁 𑀦𑀺𑀲𑁆𑀲𑀸𑀬 𑀓𑀸𑀮𑀫𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

𑁧𑁨𑁧.

‘‘𑀲𑀩𑁆𑀩𑀓𑀸𑀫𑀤𑀤𑀁 𑀓𑀼𑀫𑁆𑀪𑀁, 𑀓𑀼𑀝𑀁 𑀮𑀤𑁆𑀥𑀸𑀦 𑀥𑀼𑀢𑁆𑀢𑀓𑁄;

𑀬𑀸𑀯 𑀦𑀁 𑀅𑀦𑀼𑀧𑀸𑀮𑁂𑀢𑀺, 𑀢𑀸𑀯 𑀲𑁄 𑀲𑀼𑀔𑀫𑁂𑀥𑀢𑀺.

𑁧𑁨𑁨.

‘‘𑀬𑀤𑀸 𑀫𑀢𑁆𑀢𑁄 𑀘 𑀤𑀺𑀢𑁆𑀢𑁄 𑀘, 𑀧𑀫𑀸𑀤𑀸 𑀓𑀼𑀫𑁆𑀪𑀫𑀩𑁆𑀪𑀺𑀤𑀸;

𑀢𑀤𑀸 𑀦𑀕𑁆𑀕𑁄 𑀘 𑀧𑁄𑀢𑁆𑀣𑁄 𑀘, 𑀧𑀘𑁆𑀙𑀸 𑀩𑀸𑀮𑁄 𑀯𑀺𑀳𑀜𑁆𑀜𑀢𑀺.

𑁧𑁨𑁩.

‘‘𑀏𑀯𑀫𑁂𑀯 𑀬𑁄 𑀥𑀦𑀁 𑀮𑀤𑁆𑀥𑀸, 𑀧𑀫𑀢𑁆𑀢𑁄 𑀧𑀭𑀺𑀪𑀼𑀜𑁆𑀚𑀢𑀺;

𑀧𑀘𑁆𑀙𑀸 𑀢𑀧𑁆𑀧𑀢𑀺 𑀤𑀼𑀫𑁆𑀫𑁂𑀥𑁄, 𑀓𑀼𑀝𑀁 𑀪𑀺𑀢𑁆𑀯𑀸𑀯 𑀥𑀼𑀢𑁆𑀢𑀓𑁄’’𑀢𑀺. 𑁋

𑀇𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑀓𑀸𑀫𑀤𑀤𑀦𑁆𑀢𑀺 𑀲𑀩𑁆𑀩𑁂 𑀯𑀢𑁆𑀣𑀼𑀓𑀸𑀫𑁂 𑀤𑀸𑀢𑀼𑀁 𑀲𑀫𑀢𑁆𑀣𑀁 𑀓𑀼𑀫𑁆𑀪𑀁. 𑀓𑀼𑀝𑀦𑁆𑀢𑀺 𑀓𑀼𑀫𑁆𑀪𑀯𑁂𑀯𑀘𑀦𑀁. 𑀬𑀸𑀯𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁. 𑀅𑀦𑀼𑀧𑀸𑀮𑁂𑀢𑀻𑀢𑀺 𑀬𑁄 𑀓𑁄𑀘𑀺 𑀏𑀯𑀭𑀽𑀧𑀁 𑀮𑀪𑀺𑀢𑁆𑀯𑀸 𑀬𑀸𑀯 𑀭𑀓𑁆𑀔𑀢𑀺, 𑀢𑀸𑀯 𑀲𑁄 𑀲𑀼𑀔𑀫𑁂𑀥𑀢𑀻𑀢𑀺 𑀅𑀢𑁆𑀣𑁄. 𑀫𑀢𑁆𑀢𑁄 ¶ 𑀘 𑀤𑀺𑀢𑁆𑀢𑁄 𑀘𑀸𑀢𑀺 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀧𑁆𑀧𑁂𑀦 𑀤𑀺𑀢𑁆𑀢𑁄. 𑀧𑀫𑀸𑀤𑀸 𑀓𑀼𑀫𑁆𑀪𑀫𑀩𑁆𑀪𑀺𑀤𑀸𑀢𑀺 𑀧𑀫𑀸𑀤𑁂𑀦 𑀓𑀼𑀫𑁆𑀪𑀁 𑀪𑀺𑀦𑁆𑀤𑀺. 𑀦𑀕𑁆𑀕𑁄 𑀘 𑀧𑁄𑀢𑁆𑀣𑁄 𑀘𑀸𑀢𑀺 𑀓𑀤𑀸𑀘𑀺 𑀦𑀕𑁆𑀕𑁄, 𑀓𑀤𑀸𑀘𑀺 𑀧𑁄𑀢𑁆𑀣𑀓𑀧𑀺𑀮𑁄𑀢𑀺𑀓𑀸𑀬 𑀦𑀺𑀯𑀢𑁆𑀣𑀢𑁆𑀢𑀸 𑀧𑁄𑀢𑁆𑀣𑁄. 𑀏𑀯𑀫𑁂𑀯𑀸𑀢𑀺 𑀏𑀯𑀁 𑀏𑀯. 𑀧𑀫𑀢𑁆𑀢𑁄𑀢𑀺 𑀧𑀫𑀸𑀤𑁂𑀦. 𑀢𑀧𑁆𑀧𑀢𑀻𑀢𑀺 𑀲𑁄𑀘𑀢𑀺.

‘‘𑀢𑀤𑀸 𑀲𑀼𑀭𑀸𑀖𑀝𑀪𑁂𑀤𑀓𑁄 𑀥𑀼𑀢𑁆𑀢𑁄 𑀲𑁂𑀝𑁆𑀞𑀺𑀪𑀸𑀕𑀺𑀦𑁂𑀬𑁆𑀬𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀭𑀸𑀖𑀝𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁯𑁨] 𑁨. 𑀲𑀼𑀧𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀩𑀸𑀭𑀸𑀡𑀲𑁆𑀬𑀁 ¶ ¶ , 𑀫𑀳𑀸𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀺𑀫𑁆𑀩𑀸𑀤𑁂𑀯𑀺𑀬𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀤𑀺𑀦𑁆𑀦𑀁 𑀭𑁄𑀳𑀺𑀢𑀫𑀘𑁆𑀙𑀭𑀲𑀁 𑀦𑀯𑀲𑀧𑁆𑀧𑀺𑀫𑀺𑀲𑁆𑀲𑀓𑀁 𑀲𑀸𑀮𑀺𑀪𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀅𑀩𑁆𑀪𑀦𑁆𑀢𑀭𑀚𑀸𑀢𑀓𑁂 (𑀚𑀸. 𑁧.𑁩.𑁯𑁧-𑁯𑁩) 𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀢𑀤𑀸𑀧𑀺 𑀳𑀺 𑀣𑁂𑀭𑀺𑀬𑀸 𑀉𑀤𑀭𑀯𑀸𑀢𑁄 𑀓𑀼𑀧𑁆𑀧𑀺, 𑀭𑀸𑀳𑀼𑀮𑀪𑀤𑁆𑀤𑁄 𑀣𑁂𑀭𑀲𑁆𑀲 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀢𑀁 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀭𑁄𑀳𑀺𑀢𑀫𑀘𑁆𑀙𑀭𑀲𑀁 𑀦𑀯𑀲𑀧𑁆𑀧𑀺𑀫𑀺𑀲𑁆𑀲𑀓𑀁 𑀲𑀸𑀮𑀺𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀲𑁄 𑀆𑀳𑀭𑀺𑀢𑁆𑀯𑀸 𑀫𑀸𑀢𑀼 𑀣𑁂𑀭𑀺𑀬𑀸 𑀅𑀤𑀸𑀲𑀺, 𑀢𑀲𑁆𑀲𑀸 𑀪𑀼𑀢𑁆𑀢𑀫𑀢𑁆𑀢𑀸𑀬 𑀉𑀤𑀭𑀯𑀸𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀭𑀸𑀚𑀸 𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀭𑀺𑀬𑀸 𑀢𑀣𑀸𑀭𑀽𑀧𑀁 𑀪𑀢𑁆𑀢𑀁 𑀅𑀤𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄 𑀥𑀫𑁆𑀫𑀲𑁂𑀦𑀸𑀧𑀢𑀺, 𑀣𑁂𑀭𑀺𑀁 𑀏𑀯𑀭𑀽𑀧𑁂𑀦 𑀦𑀸𑀫 𑀪𑁄𑀚𑀦𑁂𑀦 𑀲𑀦𑁆𑀢𑀧𑁆𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑀸𑀭𑀺𑀧𑀼𑀢𑁆𑀢𑁄 𑀭𑀸𑀳𑀼𑀮𑀫𑀸𑀢𑀸𑀬 𑀧𑀢𑁆𑀣𑀺𑀢𑀁 𑀤𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀤𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀲𑀻𑀢𑀺𑀬𑀸 𑀓𑀸𑀓𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀓𑁄 𑀲𑀼𑀧𑀢𑁆𑀢𑁄 𑀦𑀸𑀫 𑀓𑀸𑀓𑀭𑀸𑀚𑀸 𑀅𑀳𑁄𑀲𑀺, 𑀅𑀕𑁆𑀕𑀫𑀳𑁂𑀲𑀻 𑀧𑀦𑀲𑁆𑀲 𑀲𑀼𑀨𑀲𑁆𑀲𑀸 𑀦𑀸𑀫 𑀓𑀸𑀓𑀻 𑀅𑀳𑁄𑀲𑀺, 𑀲𑁂𑀦𑀸𑀧𑀢𑀺 𑀲𑀼𑀫𑀼𑀔𑁄 𑀦𑀸𑀫. 𑀲𑁄 𑀅𑀲𑀻𑀢𑀺𑀬𑀸 𑀓𑀸𑀓𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺. 𑀲𑁄 ¶ 𑀏𑀓𑀤𑀺𑀯𑀲𑀁 𑀲𑀼𑀨𑀲𑁆𑀲𑀁 𑀆𑀤𑀸𑀬 𑀕𑁄𑀘𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀳𑀸𑀦𑀲𑀫𑀢𑁆𑀣𑀓𑁂𑀦 𑀅𑀕𑀫𑀸𑀲𑀺. 𑀲𑀽𑀤𑁄 𑀭𑀜𑁆𑀜𑁄 𑀦𑀸𑀦𑀸𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀧𑀭𑀺𑀯𑀸𑀭𑀁 𑀪𑁄𑀚𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀣𑁄𑀓𑀁 𑀪𑀸𑀚𑀦𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀉𑀲𑀼𑀫𑀁 𑀧𑀮𑀸𑀧𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀼𑀨𑀲𑁆𑀲𑀸 𑀫𑀘𑁆𑀙𑀫𑀁𑀲𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀭𑀸𑀚𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀅𑀓𑀣𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀏𑀳𑀺, 𑀪𑀤𑁆𑀤𑁂, 𑀕𑁄𑀘𑀭𑀸𑀬 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀸 ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀫𑀬𑁆𑀳𑀁 𑀏𑀓𑁄 𑀤𑁄𑀳𑀴𑁄 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀓𑀻𑀤𑀺𑀲𑁄 𑀤𑁄𑀳𑀴𑁄’’𑀢𑀺 𑀯𑀼𑀢𑁆𑀢𑁂 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸𑀫𑁆𑀳𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 ¶ 𑀫𑀬𑀸 𑀢𑀁 𑀮𑀤𑁆𑀥𑀼𑀁, 𑀢𑀲𑁆𑀫𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑀬𑀫𑀸𑀦𑁄 𑀦𑀺𑀲𑀻𑀤𑀺. 𑀲𑀼𑀫𑀼𑀔𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀦𑀢𑁆𑀢𑀫𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺, 𑀭𑀸𑀚𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑁂𑀦𑀸𑀧𑀢𑀺 ‘‘𑀫𑀸 𑀘𑀺𑀦𑁆𑀢𑀬𑀺, 𑀫𑀳𑀸𑀭𑀸𑀚𑀸’’𑀢𑀺 𑀢𑁂 𑀉𑀪𑁄𑀧𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀅𑀚𑁆𑀚 𑀢𑀼𑀫𑁆𑀳𑁂 𑀇𑀥𑁂𑀯 𑀳𑁄𑀣, 𑀫𑀬𑀁 𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀓𑀸𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 ‘‘𑀏𑀣 𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀓𑀸𑀓𑁂𑀳𑀺 𑀲𑀤𑁆𑀥𑀺𑀁 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀦𑀲𑀲𑁆𑀲 𑀅𑀯𑀺𑀤𑀽𑀭𑁂 𑀓𑀸𑀓𑁂 𑀯𑀕𑁆𑀕𑁂 𑀯𑀕𑁆𑀕𑁂 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 ¶ 𑀆𑀭𑀓𑁆𑀔𑀢𑁆𑀣𑀸𑀬 𑀞𑀧𑁂𑀢𑁆𑀯𑀸 𑀲𑀬𑀁 𑀅𑀝𑁆𑀞𑀳𑀺 𑀓𑀸𑀓𑀬𑁄𑀥𑁂𑀳𑀺 𑀲𑀤𑁆𑀥𑀺𑀁 𑀫𑀳𑀸𑀦𑀲𑀙𑀤𑀦𑁂 𑀦𑀺𑀲𑀻𑀤𑀺 𑀭𑀜𑁆𑀜𑁄 𑀪𑀢𑁆𑀢𑀳𑀭𑀡𑀓𑀸𑀮𑀁 𑀑𑀮𑁄𑀓𑀬𑀫𑀸𑀦𑁄. 𑀢𑁂 𑀘 𑀓𑀸𑀓𑁂 𑀆𑀳 𑁋 ‘‘𑀅𑀳𑀁 𑀭𑀜𑁆𑀜𑁄 𑀪𑀢𑁆𑀢𑁂 𑀳𑀭𑀺𑀬𑀫𑀸𑀦𑁂 𑀪𑀸𑀚𑀦𑀸𑀦𑀺 𑀧𑀸𑀢𑁂𑀲𑁆𑀲𑀸𑀫𑀺, 𑀪𑀸𑀚𑀦𑁂𑀲𑀼 𑀧𑀢𑀺𑀢𑁂𑀲𑀼 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀦𑀢𑁆𑀣𑀺, 𑀢𑀼𑀫𑁆𑀳𑁂𑀲𑀼 𑀘𑀢𑁆𑀢𑀸𑀭𑁄 𑀚𑀦𑀸 𑀫𑀼𑀔𑀧𑀽𑀭𑀁 𑀪𑀢𑁆𑀢𑀁, 𑀘𑀢𑁆𑀢𑀸𑀭𑁄 𑀫𑀘𑁆𑀙𑀫𑀁𑀲𑀁 𑀕𑀳𑁂𑀢𑁆𑀯𑀸 𑀦𑁂𑀢𑁆𑀯𑀸 𑀲𑀼𑀧𑀢𑁆𑀢𑀁 𑀲𑀧𑀚𑀸𑀧𑀢𑀺𑀓𑀁 𑀓𑀸𑀓𑀭𑀸𑀚𑀸𑀦𑀁 𑀪𑁄𑀚𑁂𑀣, ‘𑀓𑀳𑀁 𑀲𑁂𑀦𑀸𑀧𑀢𑀻’𑀢𑀺 𑀯𑀼𑀢𑁆𑀢𑁂 ‘𑀧𑀘𑁆𑀙𑀢𑁄 𑀏𑀳𑀺𑀢𑀻’𑀢𑀺 𑀯𑀤𑁂𑀬𑁆𑀬𑀸𑀣𑀸’’𑀢𑀺. 𑀅𑀣 𑀲𑀽𑀤𑁄 𑀭𑀜𑁆𑀜𑁄 𑀪𑁄𑀚𑀦𑀯𑀺𑀓𑀢𑀺𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀸𑀚𑁂𑀦 𑀕𑀳𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀧𑀸𑀬𑀸𑀲𑀺. 𑀢𑀲𑁆𑀲 𑀭𑀸𑀚𑀗𑁆𑀕𑀡𑀁 𑀕𑀢𑀓𑀸𑀮𑁂 𑀓𑀸𑀓𑀲𑁂𑀦𑀸𑀧𑀢𑀺 𑀓𑀸𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀲𑀬𑀁 𑀉𑀧𑁆𑀧𑀢𑀺𑀢𑁆𑀯𑀸 𑀪𑀢𑁆𑀢𑀳𑀸𑀭𑀓𑀲𑁆𑀲 𑀉𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀔𑀧𑀜𑁆𑀚𑀭𑁂𑀦 𑀧𑀳𑀭𑀺𑀢𑁆𑀯𑀸 𑀓𑀡𑀬𑀕𑁆𑀕𑀲𑀤𑀺𑀲𑁂𑀦 𑀢𑀼𑀡𑁆𑀟𑁂𑀦 𑀦𑀸𑀲𑀕𑁆𑀕𑀫𑀲𑁆𑀲 𑀅𑀪𑀺𑀳𑀦𑁆𑀢𑁆𑀯𑀸 𑀉𑀝𑁆𑀞𑀸𑀬 𑀤𑁆𑀯𑀻𑀳𑀺 𑀧𑀓𑁆𑀔𑁂𑀳𑀺 𑀫𑀼𑀔𑀫𑀲𑁆𑀲 𑀧𑀺𑀤𑀳𑀺. 𑀭𑀸𑀚𑀸 𑀫𑀳𑀸𑀢𑀮𑁂 𑀘𑀗𑁆𑀓𑀫𑀦𑁆𑀢𑁄 𑀫𑀳𑀸𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀓𑀸𑀓𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀪𑀢𑁆𑀢𑀳𑀸𑀭𑀓𑀲𑁆𑀲 𑀲𑀤𑁆𑀤𑀁 𑀤𑀢𑁆𑀯𑀸 ‘‘𑀪𑁄 𑀪𑀢𑁆𑀢𑀓𑀸𑀭𑀓, 𑀪𑀸𑀚𑀦𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀓𑀸𑀓𑀫𑁂𑀯 𑀕𑀡𑁆𑀳𑀸’’𑀢𑀺 𑀆𑀳. 𑀲𑁄 𑀪𑀸𑀚𑀦𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀓𑀸𑀓𑀁 𑀤𑀴𑁆𑀳𑀁 𑀕𑀡𑁆𑀳𑀺. 𑀭𑀸𑀚𑀸𑀧𑀺 𑀦𑀁 ‘‘𑀇𑀢𑁄 𑀏𑀳𑀻’’𑀢𑀺 𑀆𑀳.

𑀢𑀲𑁆𑀫𑀺𑀁 ¶ 𑀔𑀡𑁂 𑀓𑀸𑀓𑀸 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 ¶ 𑀲𑁂𑀲𑀁 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀕𑀳𑁂𑀢𑁆𑀯𑀸 𑀅𑀕𑀫𑀺𑀁𑀲𑀼. 𑀢𑀢𑁄 𑀲𑁂𑀲𑀸 𑀆𑀕𑀦𑁆𑀢𑁆𑀯𑀸 𑀲𑁂𑀲𑀁 𑀪𑀼𑀜𑁆𑀚𑀺𑀁𑀲𑀼. 𑀢𑁂𑀧𑀺 𑀅𑀝𑁆𑀞 𑀚𑀦𑀸 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀪𑁄𑀚𑁂𑀲𑀼𑀁, 𑀲𑀼𑀨𑀲𑁆𑀲𑀸𑀬 𑀤𑁄𑀳𑀴𑁄 𑀯𑀽𑀧𑀲𑀫𑀺. 𑀪𑀢𑁆𑀢𑀳𑀸𑀭𑀓𑁄 𑀓𑀸𑀓𑀁 𑀭𑀜𑁆𑀜𑁄 𑀉𑀧𑀦𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀪𑁄 𑀓𑀸𑀓, 𑀢𑁆𑀯𑀁 𑀫𑀫𑀜𑁆𑀘 𑀦 𑀮𑀚𑁆𑀚𑀺, 𑀪𑀢𑁆𑀢𑀳𑀸𑀭𑀓𑀲𑁆𑀲 𑀘 𑀦𑀸𑀲𑀁 𑀔𑀡𑁆𑀟𑁂𑀲𑀺, 𑀪𑀢𑁆𑀢𑀪𑀸𑀚𑀦𑀸𑀦𑀺 𑀘 𑀪𑀺𑀦𑁆𑀤𑀺, 𑀅𑀢𑁆𑀢𑀦𑁄 𑀘 𑀚𑀻𑀯𑀺𑀢𑀁 𑀦 𑀭𑀓𑁆𑀔𑀺, 𑀓𑀲𑁆𑀫𑀸 𑀏𑀯𑀭𑀽𑀧𑀁 𑀓𑀫𑁆𑀫𑀫𑀓𑀸𑀲𑀻’’𑀢𑀺? 𑀓𑀸𑀓𑁄 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀅𑀳𑀫𑀲𑁆𑀲 𑀲𑁂𑀦𑀸𑀧𑀢𑀺, 𑀢𑀲𑁆𑀲 𑀲𑀼𑀨𑀲𑁆𑀲𑀸 𑀦𑀸𑀫 𑀪𑀭𑀺𑀬𑀸 𑀤𑁄𑀳𑀴𑀺𑀦𑀻 𑀢𑀼𑀫𑁆𑀳𑀸𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸, 𑀭𑀸𑀚𑀸 𑀢𑀲𑁆𑀲𑀸 𑀤𑁄𑀳𑀴𑀁 𑀫𑀬𑁆𑀳𑀁 𑀆𑀘𑀺𑀓𑁆𑀔𑀺. 𑀅𑀳𑀁 𑀢𑀢𑁆𑀣𑁂𑀯 𑀫𑀫 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀆𑀕𑀢𑁄, 𑀇𑀤𑀸𑀦𑀺 𑀫𑁂 𑀢𑀲𑁆𑀲𑀸 𑀪𑁄𑀚𑀦𑀁 𑀧𑁂𑀲𑀺𑀢𑀁, 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀬𑀸 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳.

𑁧𑁨𑁪.

‘‘𑀩𑀸𑀭𑀸𑀡𑀲𑁆𑀬𑀁 𑀫𑀳𑀸𑀭𑀸𑀚, 𑀓𑀸𑀓𑀭𑀸𑀚𑀸 𑀦𑀺𑀯𑀸𑀲𑀓𑁄;

𑀅𑀲𑀻𑀢𑀺𑀬𑀸 𑀲𑀳𑀲𑁆𑀲𑁂𑀳𑀺, 𑀲𑀼𑀧𑀢𑁆𑀢𑁄 𑀧𑀭𑀺𑀯𑀸𑀭𑀺𑀢𑁄.

𑁧𑁨𑁫.

‘‘𑀢𑀲𑁆𑀲 𑀤𑁄𑀳𑀴𑀺𑀦𑀻 𑀪𑀭𑀺𑀬𑀸, 𑀲𑀼𑀨𑀲𑁆𑀲𑀸 𑀪𑀓𑁆𑀔𑀺𑀢𑀼𑀫𑀺𑀘𑁆𑀙𑀢𑀺;

𑀭𑀜𑁆𑀜𑁄 𑀫𑀳𑀸𑀦𑀲𑁂 𑀧𑀓𑁆𑀓𑀁, 𑀧𑀘𑁆𑀘𑀕𑁆𑀖𑀁 𑀭𑀸𑀚𑀪𑁄𑀚𑀦𑀁.

𑁧𑁨𑁬.

‘‘𑀢𑁂𑀲𑀸𑀳𑀁 ¶ 𑀧𑀳𑀺𑀢𑁄 𑀤𑀽𑀢𑁄, 𑀭𑀜𑁆𑀜𑁄 𑀘𑀫𑁆𑀳𑀺 𑀇𑀥𑀸𑀕𑀢𑁄;

𑀪𑀢𑁆𑀢𑀼 𑀅𑀧𑀘𑀺𑀢𑀺𑀁 𑀓𑀼𑀫𑁆𑀫𑀺, 𑀦𑀸𑀲𑀸𑀬𑀫𑀓𑀭𑀁 𑀯𑀡’’𑀦𑁆𑀢𑀺.

𑀢𑀢𑁆𑀣 𑀩𑀸𑀭𑀸𑀡𑀲𑁆𑀬𑀦𑁆𑀢𑀺 𑀩𑀸𑀭𑀸𑀡𑀲𑀺𑀬𑀁. 𑀦𑀺𑀯𑀸𑀲𑀓𑁄𑀢𑀺 𑀦𑀺𑀩𑀤𑁆𑀥𑀯𑀲𑀦𑀓𑁄. 𑀧𑀓𑁆𑀓𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀲𑀫𑁆𑀧𑀸𑀤𑀺𑀢𑀁. 𑀓𑁂𑀘𑀺 ‘‘𑀲𑀺𑀤𑁆𑀥’’𑀦𑁆𑀢𑀺 𑀲𑀚𑁆𑀛𑀸𑀬𑀦𑁆𑀢𑀺. 𑀧𑀘𑁆𑀘𑀕𑁆𑀖𑀦𑁆𑀢𑀺 𑀅𑀩𑁆𑀪𑀼𑀡𑁆𑀳𑀁 𑀅𑀧𑀸𑀭𑀺𑀯𑀸𑀲𑀺𑀓𑀁, 𑀫𑀘𑁆𑀙𑀫𑀁𑀲𑀯𑀺𑀓𑀢𑀻𑀲𑀼 𑀯𑀸 𑀧𑀘𑁆𑀘𑁂𑀓𑀁 𑀫𑀳𑀕𑁆𑀖𑀁 𑀏𑀢𑁆𑀣𑀸𑀢𑀺 𑀧𑀘𑁆𑀘𑀕𑁆𑀖𑀁. 𑀢𑁂𑀲𑀸𑀳𑀁 𑀧𑀳𑀺𑀢𑁄 𑀤𑀽𑀢𑁄, 𑀭𑀜𑁆𑀜𑁄 𑀘𑀫𑁆𑀳𑀺 𑀇𑀥𑀸𑀕𑀢𑁄𑀢𑀺 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀳𑀁 𑀤𑀽𑀢𑁄 𑀆𑀡𑀢𑁆𑀢𑀺𑀓𑀭𑁄 𑀭𑀜𑁆𑀜𑁄 𑀘 𑀅𑀫𑁆𑀳𑀺 𑀧𑀳𑀺𑀢𑁄, 𑀢𑀲𑁆𑀫𑀸 𑀇𑀥 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀪𑀢𑁆𑀢𑀼 𑀅𑀧𑀘𑀺𑀢𑀺𑀁 𑀓𑀼𑀫𑁆𑀫𑀻𑀢𑀺 𑀲𑁆𑀯𑀸𑀳𑀁 𑀏𑀯𑀁 𑀆𑀕𑀢𑁄 𑀅𑀢𑁆𑀢𑀦𑁄 𑀪𑀢𑁆𑀢𑀼 𑀅𑀧𑀘𑀺𑀢𑀺𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀫𑀺. 𑀦𑀸𑀲𑀸𑀬𑀫𑀓𑀭𑀁 𑀯𑀡𑀦𑁆𑀢𑀺, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀼𑀫𑁆𑀳𑁂 𑀘 𑀅𑀢𑁆𑀢𑀦𑁄 ¶ 𑀘 𑀚𑀻𑀯𑀺𑀢𑀁 𑀅𑀕𑀡𑁂𑀢𑁆𑀯𑀸 𑀪𑀢𑁆𑀢𑀪𑀸𑀚𑀦𑀁 𑀧𑀸𑀢𑀸𑀧𑁂𑀢𑀼𑀁 𑀪𑀢𑁆𑀢𑀳𑀸𑀭𑀓𑀲𑁆𑀲 𑀦𑀸𑀲𑀸𑀬 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀡𑀁 𑀅𑀓𑀸𑀲𑀺𑀁, 𑀫𑀬𑀸 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀅𑀧𑀘𑀺𑀢𑀺 𑀓𑀢𑀸, 𑀇𑀤𑀸𑀦𑀺 𑀢𑀼𑀫𑁆𑀳𑁂 𑀬𑀁 𑀇𑀘𑁆𑀙𑀣, 𑀢𑀁 𑀤𑀡𑁆𑀟𑀁 𑀓𑀭𑁄𑀣𑀸𑀢𑀺.

𑀭𑀸𑀚𑀸 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀬𑀁 𑀢𑀸𑀯 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀼𑀳𑀚𑁆𑀚𑁂 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫, 𑀕𑀸𑀫𑀸𑀤𑀻𑀦𑀺 𑀤𑀤𑀫𑀸𑀦𑀸𑀧𑀺 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀤𑀸𑀬𑀓𑀁 𑀦 𑀮𑀪𑀸𑀫, 𑀅𑀬𑀁 𑀓𑀸𑀓𑁄 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀭𑀜𑁆𑀜𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀢𑀺, 𑀅𑀢𑀺𑀯𑀺𑀬 𑀲𑀧𑁆𑀧𑀼𑀭𑀺𑀲𑁄 𑀫𑀥𑀼𑀭𑀲𑁆𑀲𑀭𑁄 𑀥𑀫𑁆𑀫𑀓𑀣𑀺𑀓𑁄’’𑀢𑀺 𑀕𑀼𑀡𑁂𑀲𑀼 𑀧𑀲𑀻𑀤𑀺𑀢𑁆𑀯𑀸 𑀢𑀁 𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑁂𑀲𑀺. 𑀲𑁄 𑀅𑀢𑁆𑀢𑀦𑀸 𑀮𑀤𑁆𑀥𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀭𑀸𑀚𑀸𑀦𑀫𑁂𑀯 𑀧𑀽𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀓𑀣𑁂𑀲𑀺. 𑀭𑀸𑀚𑀸 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀪𑁄𑀚𑀦𑀦𑀺𑀬𑀸𑀫𑁂𑀦 𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺, 𑀲𑁂𑀲𑀓𑀸𑀓𑀸𑀦𑀁 𑀤𑁂𑀯𑀲𑀺𑀓𑀁 𑀏𑀓𑀁 𑀢𑀡𑁆𑀟𑀼𑀮𑀫𑁆𑀩𑀡𑀁 𑀧𑀘𑀸𑀧𑁂𑀲𑀺, 𑀲𑀬𑀜𑁆𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺. 𑀲𑀼𑀧𑀢𑁆𑀢𑀓𑀸𑀓𑁄𑀯𑀸𑀤𑁄 𑀧𑀦 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀧𑀯𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀼𑀫𑀼𑀔𑁄 𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀼𑀨𑀲𑁆𑀲𑀸 𑀭𑀸𑀳𑀼𑀮𑀫𑀸𑀢𑀸, 𑀲𑀼𑀧𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀧𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁯𑁩] 𑁩. 𑀓𑀸𑀬𑀦𑀺𑀩𑁆𑀩𑀺𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀨𑀼𑀝𑁆𑀞𑀲𑁆𑀲 𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀧𑀼𑀭𑀺𑀲𑁄 𑀧𑀡𑁆𑀟𑀼𑀭𑁄𑀕𑁂𑀦 𑀅𑀝𑁆𑀝𑀺𑀢𑁄 𑀯𑁂𑀚𑁆𑀚𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀧𑀼𑀢𑁆𑀢𑀤𑀸𑀭𑁄𑀧𑀺𑀲𑁆𑀲 ‘‘𑀓𑁄 𑀇𑀫𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 ¶ 𑀲𑀓𑁆𑀓𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑀸𑀳𑀁 𑀇𑀫𑀫𑁆𑀳𑀸 𑀭𑁄𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦𑁂𑀯 𑀓𑀺𑀜𑁆𑀘𑀺 𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀧𑀡𑁆𑀟𑀼𑀭𑁄𑀕𑀻 ¶ ‘𑀇𑀫𑀫𑁆𑀳𑀸 𑀭𑁄𑀕𑀸 𑀯𑀼𑀝𑁆𑀞𑀺𑀢𑁄 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀘𑁂𑀯 𑀅𑀭𑀳𑀢𑁆𑀢𑀜𑁆𑀘 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 ¶ . 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀅𑀬𑀫𑁂𑀯; 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸𑀧𑀺 𑀏𑀯𑀁 𑀯𑀢𑁆𑀯𑀸 𑀭𑁄𑀕𑀸 𑀯𑀼𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀼𑀟𑁆𑀠𑀺𑀫𑀓𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑁄 𑀧𑀡𑁆𑀟𑀼𑀭𑁄𑀕𑀻 𑀅𑀳𑁄𑀲𑀺. 𑀯𑁂𑀚𑁆𑀚𑀸𑀧𑀺 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀧𑀼𑀢𑁆𑀢𑀤𑀸𑀭𑁄𑀧𑀺𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀲𑁄 ‘‘𑀇𑀫𑀫𑁆𑀳𑀸 𑀭𑁄𑀕𑀸 𑀯𑀼𑀝𑁆𑀞𑀺𑀢𑁄 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑁄 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀭𑀽𑀧𑀁 𑀲𑀼𑀔𑀁 𑀦𑀸𑀫 𑀦𑀸𑀮𑀢𑁆𑀣’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁧𑁨𑁭.

‘‘𑀨𑀼𑀝𑁆𑀞𑀲𑁆𑀲 𑀫𑁂 𑀅𑀜𑁆𑀜𑀢𑀭𑁂𑀦 𑀩𑁆𑀬𑀸𑀥𑀺𑀦𑀸, 𑀭𑁄𑀕𑁂𑀦 𑀩𑀸𑀴𑁆𑀳𑀁 𑀤𑀼𑀔𑀺𑀢𑀲𑁆𑀲 𑀭𑀼𑀧𑁆𑀧𑀢𑁄;

𑀧𑀭𑀺𑀲𑀼𑀲𑁆𑀲𑀢𑀺 𑀔𑀺𑀧𑁆𑀧𑀫𑀺𑀤𑀁 𑀓𑀴𑁂𑀯𑀭𑀁, 𑀧𑀼𑀧𑁆𑀨𑀁 𑀬𑀣𑀸 𑀧𑀁𑀲𑀼𑀦𑀺 𑀆𑀢𑀧𑁂 𑀓𑀢𑀁.

𑁧𑁨𑁮.

‘‘𑀅𑀚𑀜𑁆𑀜𑀁 𑀚𑀜𑁆𑀜𑀲𑀗𑁆𑀔𑀸𑀢𑀁, 𑀅𑀲𑀼𑀘𑀺𑀁 𑀲𑀼𑀘𑀺𑀲𑀫𑁆𑀫𑀢𑀁;

𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑀁, 𑀚𑀜𑁆𑀜𑀭𑀽𑀧𑀁 𑀅𑀧𑀲𑁆𑀲𑀢𑁄.

𑁧𑁨𑁯.

‘‘𑀥𑀺𑀭𑀢𑁆𑀣𑀼𑀫𑀁 𑀆𑀢𑀼𑀭𑀁 𑀧𑀽𑀢𑀺𑀓𑀸𑀬𑀁, 𑀚𑁂𑀕𑀼𑀘𑁆𑀙𑀺𑀬𑀁 𑀅𑀲𑁆𑀲𑀼𑀘𑀺𑀁 𑀩𑁆𑀬𑀸𑀥𑀺𑀥𑀫𑁆𑀫𑀁;

𑀬𑀢𑁆𑀣𑀧𑁆𑀧𑀫𑀢𑁆𑀢𑀸 𑀅𑀥𑀺𑀫𑀼𑀘𑁆𑀙𑀺𑀢𑀸 𑀧𑀚𑀸, 𑀳𑀸𑀧𑁂𑀦𑁆𑀢𑀺 𑀫𑀕𑁆𑀕𑀁 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑀸’’𑀢𑀺.

𑀢𑀢𑁆𑀣 𑀅𑀜𑁆𑀜𑀢𑀭𑁂𑀦𑀸𑀢𑀺 𑀅𑀝𑁆𑀞𑀦𑀯𑀼𑀢𑀺𑀬𑀸 𑀭𑁄𑀕𑁂𑀲𑀼 𑀏𑀓𑁂𑀦 𑀧𑀡𑁆𑀟𑀼𑀭𑁄𑀕𑀩𑁆𑀬𑀸𑀥𑀺𑀦𑀸. 𑀭𑁄𑀕𑁂𑀦𑀸𑀢𑀺 𑀭𑀼𑀚𑁆𑀚𑀦𑀲𑀪𑀸𑀯𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁂𑀦. 𑀭𑀼𑀧𑁆𑀧𑀢𑁄𑀢𑀺 𑀖𑀝𑁆𑀝𑀺𑀬𑀫𑀸𑀦𑀲𑁆𑀲 𑀧𑀻𑀴𑀺𑀬𑀫𑀸𑀦𑀲𑁆𑀲. 𑀧𑀁𑀲𑀼𑀦𑀺 𑀆𑀢𑀧𑁂 𑀓𑀢𑀦𑁆𑀢𑀺 𑀬𑀣𑀸 𑀆𑀢𑀧𑁂 𑀢𑀢𑁆𑀢𑀯𑀸𑀮𑀺𑀓𑀸𑀬 𑀞𑀧𑀺𑀢𑀁 𑀲𑀼𑀔𑀼𑀫𑀧𑀼𑀧𑁆𑀨𑀁 𑀧𑀭𑀺𑀲𑀼𑀲𑁆𑀲𑁂𑀬𑁆𑀬, 𑀏𑀯𑀁 𑀧𑀭𑀺𑀲𑀼𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀅𑀚𑀜𑁆𑀜𑀁 𑀚𑀜𑁆𑀜𑀲𑀗𑁆𑀔𑀸𑀢𑀦𑁆𑀢𑀺 𑀧𑀝𑀺𑀓𑀽𑀮𑀁 𑀅𑀫𑀦𑀸𑀧𑀫𑁂𑀯 𑀩𑀸𑀮𑀸𑀦𑀁 𑀫𑀦𑀸𑀧𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁. 𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑀦𑁆𑀢𑀺 ¶ 𑀓𑁂𑀲𑀸𑀤𑀻𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀓𑀼𑀡𑀧𑁂𑀳𑀺 𑀧𑀭𑀺𑀧𑀼𑀡𑁆𑀡𑀁 ¶ . 𑀚𑀜𑁆𑀜𑀭𑀽𑀧𑀁 𑀅𑀧𑀲𑁆𑀲𑀢𑁄𑀢𑀺 𑀅𑀧𑀲𑁆𑀲𑀦𑁆𑀢𑀲𑁆𑀲 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 ¶ 𑀫𑀦𑀸𑀧𑀁 𑀲𑀸𑀥𑀼𑀭𑀽𑀧𑀁 𑀧𑀭𑀺𑀪𑁄𑀕𑀲𑀪𑀸𑀯𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀓𑀸𑀲𑀺𑀢𑁄 𑀅𑀲𑀼𑀪𑀲𑀪𑀸𑀯𑁄 𑀩𑀸𑀮𑀸𑀦𑀁 𑀦 𑀉𑀧𑀝𑁆𑀞𑀸𑀢𑀺.

𑀆𑀢𑀼𑀭𑀦𑁆𑀢𑀺 𑀦𑀺𑀘𑁆𑀘𑀕𑀺𑀮𑀸𑀦𑀁. 𑀅𑀥𑀺𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀫𑀼𑀘𑁆𑀙𑀸𑀬 𑀅𑀢𑀺𑀯𑀺𑀬 𑀫𑀼𑀘𑁆𑀙𑀺𑀢𑀸. 𑀧𑀚𑀸𑀢𑀺 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸. 𑀳𑀸𑀧𑁂𑀦𑁆𑀢𑀺 𑀫𑀕𑁆𑀕𑀁 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑀸𑀢𑀺 𑀇𑀫𑀲𑁆𑀫𑀺𑀁 𑀧𑀽𑀢𑀺𑀓𑀸𑀬𑁂 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀅𑀧𑀸𑀬𑀫𑀕𑁆𑀕𑀁 𑀧𑀽𑀭𑁂𑀦𑁆𑀢𑀸 𑀤𑁂𑀯𑀫𑀦𑀼𑀲𑁆𑀲𑀪𑁂𑀤𑀸𑀬 𑀲𑀼𑀕𑀢𑀺𑀉𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀳𑀸𑀧𑁂𑀦𑁆𑀢𑀺.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀅𑀲𑀼𑀘𑀺𑀪𑀸𑀯𑀜𑁆𑀘 𑀦𑀺𑀘𑁆𑀘𑀸𑀢𑀼𑀭𑀪𑀸𑀯𑀜𑁆𑀘 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀓𑀸𑀬𑁂 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀼𑀚𑀦𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀢𑀸𑀧𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀬𑀦𑀺𑀩𑁆𑀩𑀺𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁯𑁪] 𑁪. 𑀚𑀫𑁆𑀩𑀼𑀔𑀸𑀤𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑁄𑀬𑀁 𑀩𑀺𑀦𑁆𑀤𑀼𑀲𑁆𑀲𑀭𑁄 𑀯𑀕𑁆𑀕𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀤𑁂𑀯𑀤𑀢𑁆𑀢𑁂 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑁂 𑀓𑁄𑀓𑀸𑀮𑀺𑀓𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀸 𑀑𑀓𑁆𑀓𑀸𑀓𑀭𑀸𑀚𑀯𑀁𑀲𑁂 𑀚𑀸𑀢𑁄 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀯𑀁𑀲𑁂 𑀯𑀟𑁆𑀠𑀺𑀢𑁄 𑀢𑀺𑀧𑀺𑀝𑀓𑀥𑀭𑁄 𑀛𑀸𑀦𑀮𑀸𑀪𑀻 𑀫𑀥𑀼𑀭𑀓𑀣𑁄 𑀥𑀫𑁆𑀫𑀓𑀣𑀺𑀓𑁄, 𑀤𑁂𑀣 𑀓𑀭𑁄𑀣 𑀣𑁂𑀭𑀲𑁆𑀲𑀸’’𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀤𑁂𑀯𑀤𑀢𑁆𑀢𑁄𑀧𑀺 ‘‘𑀓𑁄𑀓𑀸𑀮𑀺𑀓𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄, 𑀤𑁂𑀣 𑀓𑀭𑁄𑀣 𑀓𑁄𑀓𑀸𑀮𑀺𑀓𑀲𑁆𑀲𑀸’’𑀢𑀺 𑀓𑁄𑀓𑀸𑀮𑀺𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀢𑀺 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀓𑀼𑀮𑀖𑀭𑁂𑀲𑀼 𑀪𑀼𑀜𑁆𑀚𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 ¶ 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓𑀸, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀪𑀽𑀢𑀕𑀼𑀡𑀓𑀣𑀁 𑀓𑀣𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀸 𑀯𑀺𑀘𑀭𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀪𑀽𑀢𑀕𑀼𑀡𑀓𑀣𑀁 𑀓𑀣𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀧𑀼𑀩𑁆𑀩𑁂𑀧𑁂𑀯𑀁 𑀪𑀼𑀜𑁆𑀚𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀚𑀫𑁆𑀩𑀼𑀯𑀦𑀲𑀡𑁆𑀟𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 ¶ 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀭𑁂𑀓𑁄 𑀓𑀸𑀓𑁄 𑀚𑀫𑁆𑀩𑀼𑀲𑀸𑀔𑀸𑀬 𑀦𑀺𑀲𑀺𑀦𑁆𑀦𑁄 𑀚𑀫𑁆𑀩𑀼𑀧𑀓𑁆𑀓𑀸𑀦𑀺 𑀔𑀸𑀤𑀢𑀺. 𑀅𑀣𑁂𑀓𑁄 𑀲𑀺𑀗𑁆𑀕𑀸𑀮𑁄 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀓𑀸𑀓𑀁 𑀤𑀺𑀲𑁆𑀯𑀸 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀲𑁆𑀲 𑀅𑀪𑀽𑀢𑀕𑀼𑀡𑀓𑀣𑀁 𑀓𑀣𑁂𑀢𑁆𑀯𑀸 𑀚𑀫𑁆𑀩𑀽𑀦𑀺 𑀔𑀸𑀤𑁂𑀬𑁆𑀬’’𑀦𑁆𑀢𑀺 𑀢𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁦.

‘‘𑀓𑁄𑀬𑀁 𑀩𑀺𑀦𑁆𑀤𑀼𑀲𑁆𑀲𑀭𑁄 𑀯𑀕𑁆𑀕𑀼, 𑀲𑀭𑀯𑀦𑁆𑀢𑀸𑀦𑀫𑀼𑀢𑁆𑀢𑀫𑁄;

𑀅𑀘𑁆𑀘𑀼𑀢𑁄 𑀚𑀫𑁆𑀩𑀼𑀲𑀸𑀔𑀸𑀬, 𑀫𑁄𑀭𑀘𑁆𑀙𑀸𑀧𑁄𑀯 𑀓𑀽𑀚𑀢𑀻’’𑀢𑀺.

𑀢𑀢𑁆𑀣 𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀩𑀺𑀦𑁆𑀤𑀼𑀦𑀸 𑀅𑀯𑀺𑀲𑀸𑀭𑁂𑀦 𑀧𑀺𑀡𑁆𑀟𑀺𑀢𑁂𑀦 𑀲𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀯𑀕𑁆𑀕𑀽𑀢𑀺 𑀫𑀥𑀼𑀭𑀲𑀤𑁆𑀤𑁄. 𑀅𑀘𑁆𑀘𑀼𑀢𑁄𑀢𑀺 𑀦 𑀘𑀼𑀢𑁄 𑀲𑀦𑁆𑀦𑀺𑀲𑀺𑀦𑁆𑀦𑁄. 𑀫𑁄𑀭𑀘𑁆𑀙𑀸𑀧𑁄𑀯 𑀓𑀽𑀚𑀢𑀻𑀢𑀺 𑀢𑀭𑀼𑀡𑀫𑁄𑀭𑁄𑀯 𑀫𑀦𑀸𑀧𑁂𑀦 𑀲𑀤𑁆𑀤𑁂𑀦 ‘‘𑀓𑁄 𑀦𑀸𑀫𑁂𑀲𑁄 𑀓𑀽𑀚𑀢𑀻’’𑀢𑀺 𑀯𑀤𑀢𑀺.

𑀅𑀣 𑀦𑀁 𑀓𑀸𑀓𑁄 𑀧𑀝𑀺𑀧𑀲𑀁𑀲𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁧.

‘‘𑀓𑀼𑀮𑀧𑀼𑀢𑁆𑀢𑁄𑀯 𑀚𑀸𑀦𑀸𑀢𑀺, 𑀓𑀼𑀮𑀧𑀼𑀢𑁆𑀢𑀁 𑀧𑀲𑀁𑀲𑀺𑀢𑀼𑀁;

𑀩𑁆𑀬𑀕𑁆𑀖𑀘𑁆𑀙𑀸𑀧𑀲𑀭𑀻𑀯𑀡𑁆𑀡, 𑀪𑀼𑀜𑁆𑀚 𑀲𑀫𑁆𑀫 𑀤𑀤𑀸𑀫𑀺 𑀢𑁂’’𑀢𑀺.

𑀢𑀢𑁆𑀣 𑀩𑁆𑀬𑀕𑁆𑀖𑀘𑁆𑀙𑀸𑀧𑀲𑀭𑀻𑀯𑀡𑁆𑀡𑀸𑀢𑀺 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀩𑁆𑀬𑀕𑁆𑀖𑀧𑁄𑀢𑀓𑀲𑀫𑀸𑀦𑀯𑀡𑁆𑀡𑁄𑀯 𑀔𑀸𑀬𑀲𑀺, 𑀢𑁂𑀦 𑀢𑀁 𑀯𑀤𑀸𑀫𑀺 𑀅𑀫𑁆𑀪𑁄 𑀩𑁆𑀬𑀕𑁆𑀖𑀘𑁆𑀙𑀸𑀧𑀲𑀭𑀻𑀯𑀡𑁆𑀡. 𑀪𑀼𑀜𑁆𑀚, 𑀲𑀫𑁆𑀫, 𑀤𑀤𑀸𑀫𑀺 𑀢𑁂𑀢𑀺 𑀯𑀬𑀲𑁆𑀲 𑀬𑀸𑀯𑀤𑀢𑁆𑀣𑀁 𑀚𑀫𑁆𑀩𑀼𑀧𑀓𑁆𑀓𑀸𑀦𑀺 𑀔𑀸𑀤, 𑀅𑀳𑀁 𑀢𑁂 𑀤𑀤𑀸𑀫𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀚𑀫𑁆𑀩𑀼𑀲𑀸𑀔𑀁 𑀘𑀸𑀮𑁂𑀢𑁆𑀯𑀸 𑀨𑀮𑀸𑀦𑀺 𑀧𑀸𑀢𑁂𑀲𑀺. 𑀅𑀣 𑀢𑀲𑁆𑀫𑀺𑀁 𑀚𑀫𑁆𑀩𑀼𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑁂 𑀉𑀪𑁄𑀧𑀺 𑀅𑀪𑀽𑀢𑀕𑀼𑀡𑀓𑀣𑀁 𑀓𑀣𑁂𑀢𑁆𑀯𑀸 𑀚𑀫𑁆𑀩𑀽𑀦𑀺 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁨.

‘‘𑀘𑀺𑀭𑀲𑁆𑀲𑀁 ¶ 𑀯𑀢 𑀧𑀲𑁆𑀲𑀸𑀫𑀺, 𑀫𑀼𑀲𑀸𑀯𑀸𑀤𑀻 𑀲𑀫𑀸𑀕𑀢𑁂;

𑀯𑀦𑁆𑀢𑀸𑀤𑀁 𑀓𑀼𑀡𑀧𑀸𑀤𑀜𑁆𑀘, 𑀅𑀜𑁆𑀜𑀫𑀜𑁆𑀜𑀁 𑀧𑀲𑀁𑀲𑀓𑁂’’𑀢𑀺.

𑀢𑀢𑁆𑀣 𑀯𑀦𑁆𑀢𑀸𑀤𑀦𑁆𑀢𑀺 𑀧𑀭𑁂𑀲𑀁 𑀯𑀦𑁆𑀢𑀪𑀢𑁆𑀢𑀔𑀸𑀤𑀓𑀁 𑀓𑀸𑀓𑀁. 𑀓𑀼𑀡𑀧𑀸𑀤𑀜𑁆𑀘𑀸𑀢𑀺 𑀓𑀼𑀡𑀧𑀔𑀸𑀤𑀓𑀁 𑀲𑀺𑀗𑁆𑀕𑀸𑀮𑀜𑁆𑀘.

𑀇𑀫𑀜𑁆𑀘 𑀧𑀦 𑀕𑀸𑀣𑀁 𑀯𑀢𑁆𑀯𑀸 𑀲𑀸 𑀤𑁂𑀯𑀢𑀸 𑀪𑁂𑀭𑀯𑀭𑀽𑀧𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂 𑀢𑀢𑁄 𑀧𑀮𑀸𑀧𑁂𑀲𑀺.

𑀲𑀢𑁆𑀣𑀸 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀓𑀸𑀓𑁄 𑀓𑁄𑀓𑀸𑀮𑀺𑀓𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀫𑁆𑀩𑀼𑀔𑀸𑀤𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁯𑁫] 𑁫. 𑀅𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀉𑀲𑀪𑀲𑁆𑀲𑁂𑀯 𑀢𑁂 𑀔𑀦𑁆𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑁂𑀬𑁂𑀯 𑀤𑁆𑀯𑁂 𑀚𑀦𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀽𑀧𑀘𑀸𑀭𑁂 𑀏𑀭𑀡𑁆𑀟𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀫𑀢𑀁 𑀚𑀭𑀕𑁆𑀕𑀯𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀏𑀭𑀡𑁆𑀟𑀯𑀦𑁂 𑀙𑀟𑁆𑀟𑁂𑀲𑀼𑀁. 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀁𑀲𑀁 𑀔𑀸𑀤𑀺. 𑀏𑀓𑁄 𑀓𑀸𑀓𑁄 𑀆𑀕𑀦𑁆𑀢𑁆𑀯𑀸 𑀏𑀭𑀡𑁆𑀟𑁂 𑀦𑀺𑀮𑀻𑀦𑁄 𑀢𑀁 𑀤𑀺𑀲𑁆𑀯𑀸 ‘‘𑀬𑀁𑀦𑀽𑀦𑀸𑀳𑀁 𑀏𑀢𑀲𑁆𑀲 𑀅𑀪𑀽𑀢𑀕𑀼𑀡𑀓𑀣𑀁 𑀓𑀣𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁩.

‘‘𑀉𑀲𑀪𑀲𑁆𑀲𑁂𑀯 𑀢𑁂 𑀔𑀦𑁆𑀥𑁄, 𑀲𑀻𑀳𑀲𑁆𑀲𑁂𑀯 𑀯𑀺𑀚𑀫𑁆𑀪𑀺𑀢𑀁;

𑀫𑀺𑀕𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀅𑀧𑀺 𑀓𑀺𑀜𑁆𑀘𑀺 𑀮𑀪𑀸𑀫𑀲𑁂’’𑀢𑀺.

𑀢𑀢𑁆𑀣 𑀦𑀫𑁄 𑀢𑁆𑀬𑀢𑁆𑀣𑀽𑀢𑀺 𑀦𑀫𑁄 𑀢𑁂 𑀅𑀢𑁆𑀣𑀼.

𑀢𑀁 𑀲𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁪.

‘‘𑀓𑀼𑀮𑀧𑀼𑀢𑁆𑀢𑁄𑀯 𑀚𑀸𑀦𑀸𑀢𑀺, 𑀓𑀼𑀮𑀧𑀼𑀢𑁆𑀢𑀁 𑀧𑀲𑀁𑀲𑀺𑀢𑀼𑀁;

𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲, 𑀇𑀢𑁄 𑀧𑀭𑀺𑀬𑀸𑀳𑀺 𑀯𑀸𑀬𑀲𑀸’’𑀢𑀺.

𑀢𑀢𑁆𑀣 ¶ 𑀇𑀢𑁄 𑀧𑀭𑀺𑀬𑀸𑀳𑀻𑀢𑀺 𑀏𑀭𑀡𑁆𑀟𑀢𑁄 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀬𑁂𑀦𑀸𑀳𑀁, 𑀢𑁂𑀦𑀸𑀕𑀦𑁆𑀢𑁆𑀯𑀸 𑀫𑀁𑀲𑀁 𑀔𑀸𑀤𑀸𑀢𑀺 𑀯𑀤𑀢𑀺.

𑀢𑀁 𑀢𑁂𑀲𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁫.

‘‘𑀫𑀺𑀕𑀸𑀦𑀁 ¶ 𑀲𑀺𑀗𑁆𑀕𑀸𑀮𑁄 𑀅𑀦𑁆𑀢𑁄, 𑀧𑀓𑁆𑀔𑀻𑀦𑀁 𑀧𑀦 𑀯𑀸𑀬𑀲𑁄;

𑀏𑀭𑀡𑁆𑀟𑁄 𑀅𑀦𑁆𑀢𑁄 𑀭𑀼𑀓𑁆𑀔𑀸𑀦𑀁, 𑀢𑀬𑁄 𑀅𑀦𑁆𑀢𑀸 𑀲𑀫𑀸𑀕𑀢𑀸’’𑀢𑀺.

𑀢𑀢𑁆𑀣 𑀅𑀦𑁆𑀢𑁄𑀢𑀺 𑀳𑀻𑀦𑁄 𑀮𑀸𑀫𑀓𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀓𑀸𑀓𑁄 𑀓𑁄𑀓𑀸𑀮𑀺𑀓𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁯𑁬] 𑁬. 𑀲𑀫𑀼𑀤𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀓𑁄 𑀦𑀸𑀬𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀫𑀳𑀕𑁆𑀖𑀲𑁄 𑀫𑀳𑀸𑀢𑀡𑁆𑀳𑁄 𑀅𑀳𑁄𑀲𑀺, 𑀲𑀓𑀝𑀧𑀽𑀭𑁂𑀳𑀺 𑀧𑀘𑁆𑀘𑀬𑁂𑀳𑀺𑀧𑀺 𑀲𑀦𑁆𑀢𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁂 𑀤𑁆𑀯𑀻𑀲𑀼 𑀢𑀻𑀲𑀼 𑀯𑀺𑀳𑀸𑀭𑁂𑀲𑀼 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀧𑀸𑀳𑀦𑁂 𑀞𑀧𑁂𑀢𑀺, 𑀏𑀓𑀲𑁆𑀫𑀺𑀁 𑀓𑀢𑁆𑀢𑀭𑀬𑀝𑁆𑀞𑀺𑀁, 𑀏𑀓𑀲𑁆𑀫𑀺𑀁 𑀉𑀤𑀓𑀢𑀼𑀫𑁆𑀩𑀁. 𑀏𑀓𑀲𑁆𑀫𑀺𑀁 𑀲𑀬𑀁 𑀯𑀲𑀢𑀺, 𑀚𑀦𑀧𑀤𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀡𑀻𑀢𑀧𑀭𑀺𑀓𑁆𑀔𑀸𑀭𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀭𑀺𑀬𑀯𑀁𑀲𑀓𑀣𑀁 𑀓𑀣𑁂𑀢𑁆𑀯𑀸 𑀢𑁂𑀲𑀁 𑀧𑀁𑀲𑀼𑀓𑀽𑀮𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀢𑁂𑀲𑀁 𑀘𑀻𑀯𑀭𑀸𑀦𑀺 𑀕𑀡𑁆𑀳𑀸𑀢𑀺, 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀕𑀸𑀳𑀸𑀧𑁂𑀢𑁆𑀯𑀸 𑀫𑀦𑀸𑀧𑀫𑀦𑀸𑀧𑁂 𑀧𑀢𑁆𑀢𑁂 𑀣𑀸𑀮𑀓𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀚𑁂𑀢𑀯𑀦𑀁 𑀆𑀕𑀘𑁆𑀙𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀫𑀳𑀕𑁆𑀖𑀲𑁄 𑀫𑀳𑀺𑀘𑁆𑀙𑁄 𑀅𑀜𑁆𑀜𑁂𑀲𑀁 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀲𑀫𑀡𑀧𑀭𑀺𑀓𑁆𑀔𑀸𑀭𑁂𑀦 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀆𑀕𑀘𑁆𑀙𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀼𑀢𑁆𑀢𑀁, 𑀪𑀺𑀓𑁆𑀔𑀯𑁂, 𑀉𑀧𑀦𑀦𑁆𑀤𑁂𑀦 𑀓𑀢𑀁 𑀧𑀭𑁂𑀲𑀁 𑀅𑀭𑀺𑀬𑀯𑀁𑀲𑀓𑀣𑀁 𑀓𑀣𑁂𑀦𑁆𑀢𑁂𑀦, 𑀧𑀞𑀫𑀢𑀭𑀜𑁆𑀳𑀺 𑀅𑀢𑁆𑀢𑀦𑀸 𑀅𑀧𑁆𑀧𑀺𑀘𑁆𑀙𑁂𑀦 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀧𑀭𑁂𑀲𑀁 𑀅𑀭𑀺𑀬𑀯𑀁𑀲𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺.

‘‘𑀅𑀢𑁆𑀢𑀸𑀦𑀫𑁂𑀯 ¶ 𑀧𑀞𑀫𑀁, 𑀧𑀢𑀺𑀭𑀽𑀧𑁂 𑀦𑀺𑀯𑁂𑀲𑀬𑁂;

𑀅𑀣𑀜𑁆𑀜𑀫𑀦𑀼𑀲𑀸𑀲𑁂𑀬𑁆𑀬, 𑀦 𑀓𑀺𑀮𑀺𑀲𑁆𑀲𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺. (𑀥. 𑀧. 𑁧𑁫𑁮) 𑁋

𑀇𑀫𑀁 𑀥𑀫𑁆𑀫𑀧𑀤𑁂 𑀕𑀸𑀣𑀁 𑀤𑁂𑀲𑁂𑀢𑁆𑀯𑀸 𑀉𑀧𑀦𑀦𑁆𑀤𑀁 𑀕𑀭𑀳𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀉𑀧𑀦𑀦𑁆𑀤𑁄 𑀫𑀳𑀺𑀘𑁆𑀙𑁄, 𑀧𑀼𑀩𑁆𑀩𑁂 𑀫𑀳𑀸𑀲𑀫𑀼𑀤𑁆𑀤𑁂𑀧𑀺 𑀉𑀤𑀓𑀁 𑀭𑀓𑁆𑀔𑀺𑀢𑀩𑁆𑀩𑀁 𑀫𑀜𑁆𑀜𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀫𑀼𑀤𑁆𑀤𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑁄 𑀓𑀸𑀓𑁄 𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯𑀺𑀘𑀭𑀦𑁆𑀢𑁄 ‘‘𑀲𑀫𑀼𑀤𑁆𑀤𑁂 𑀉𑀤𑀓𑀁 𑀧𑀫𑀸𑀡𑁂𑀦 𑀧𑀺𑀯𑀣, 𑀭𑀓𑁆𑀔𑀦𑁆𑀢𑀸 𑀧𑀺𑀯𑀣𑀸’’𑀢𑀺 𑀫𑀘𑁆𑀙𑀲𑀗𑁆𑀖𑀲𑀓𑀼𑀡𑀲𑀗𑁆𑀖𑁂 ¶ 𑀯𑀸𑀭𑁂𑀦𑁆𑀢𑁄 𑀯𑀸𑀭𑁂𑀦𑁆𑀢𑁄 𑀘𑀭𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑀫𑀼𑀤𑁆𑀤𑀤𑁂𑀯𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁬.

‘‘𑀓𑁄 𑀦𑀸𑀬𑀁 𑀮𑁄𑀡𑀢𑁄𑀬𑀲𑁆𑀫𑀺𑀁, 𑀲𑀫𑀦𑁆𑀢𑀸 𑀧𑀭𑀺𑀥𑀸𑀯𑀢𑀺;

𑀫𑀘𑁆𑀙𑁂 𑀫𑀓𑀭𑁂 𑀘 𑀯𑀸𑀭𑁂𑀢𑀺, 𑀊𑀫𑀻𑀲𑀼 𑀘 𑀯𑀺𑀳𑀜𑁆𑀜𑀢𑀻’’𑀢𑀺.

𑀢𑀢𑁆𑀣 𑀓𑁄 𑀦𑀸𑀬𑀦𑁆𑀢𑀺 𑀓𑁄 𑀦𑀼 𑀅𑀬𑀁.

𑀢𑀁 𑀲𑀼𑀢𑁆𑀯𑀸 𑀲𑀫𑀼𑀤𑁆𑀤𑀓𑀸𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁭.

‘‘𑀅𑀦𑀦𑁆𑀢𑀧𑀸𑀬𑀻 𑀲𑀓𑀼𑀡𑁄, 𑀅𑀢𑀺𑀢𑁆𑀢𑁄𑀢𑀺 𑀤𑀺𑀲𑀸𑀲𑀼𑀢𑁄;

𑀲𑀫𑀼𑀤𑁆𑀤𑀁 𑀧𑀸𑀢𑀼𑀫𑀺𑀘𑁆𑀙𑀸𑀫𑀺, 𑀲𑀸𑀕𑀭𑀁 𑀲𑀭𑀺𑀢𑀁𑀧𑀢𑀺’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀅𑀦𑀦𑁆𑀢𑀲𑀸𑀕𑀭𑀁 𑀧𑀸𑀢𑀼𑀫𑀺𑀘𑁆𑀙𑀸𑀫𑀺, 𑀢𑁂𑀦𑀫𑁆𑀳𑀺 𑀅𑀦𑀦𑁆𑀢𑀧𑀸𑀬𑀻 𑀦𑀸𑀫 𑀲𑀓𑀼𑀡𑁄 𑀫𑀳𑀢𑀺𑀬𑀸𑀧𑀺 𑀅𑀧𑀽𑀭𑀡𑀺𑀬𑀸 𑀢𑀡𑁆𑀳𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀢𑀺𑀢𑁆𑀢𑁄𑀢𑀺𑀧𑀺 𑀅𑀳𑀁 𑀤𑀺𑀲𑀸𑀲𑀼 𑀲𑀼𑀢𑁄 𑀯𑀺𑀲𑁆𑀲𑀼𑀢𑁄 𑀧𑀸𑀓𑀝𑁄, 𑀲𑁆𑀯𑀸𑀳𑀁 𑀇𑀫𑀁 𑀲𑀓𑀮𑀲𑀫𑀼𑀤𑁆𑀤𑀁 𑀲𑀼𑀦𑁆𑀤𑀭𑀸𑀦𑀁 𑀭𑀢𑀦𑀸𑀦𑀁 𑀆𑀓𑀭𑀢𑁆𑀢𑀸 𑀲𑀸𑀕𑀭𑁂𑀦 𑀯𑀸 𑀔𑀢𑀢𑁆𑀢𑀸 𑀲𑀸𑀕𑀭𑀁 𑀲𑀭𑀺𑀢𑀸𑀦𑀁 𑀧𑀢𑀺𑀪𑀸𑀯𑁂𑀦 𑀲𑀭𑀺𑀢𑀁𑀧𑀢𑀺𑀁 𑀧𑀸𑀢𑀼𑀫𑀺𑀘𑁆𑀙𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀫𑀼𑀤𑁆𑀤𑀤𑁂𑀯𑀢𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁮.

‘‘𑀲𑁄 𑀅𑀬𑀁 𑀳𑀸𑀬𑀢𑀺 𑀘𑁂𑀯, 𑀧𑀽𑀭𑀢𑁂 𑀘 𑀫𑀳𑁄𑀤𑀥𑀺;

𑀦𑀸𑀲𑁆𑀲 𑀦𑀸𑀬𑀢𑀺 𑀧𑀻𑀢𑀦𑁆𑀢𑁄, 𑀅𑀧𑁂𑀬𑁆𑀬𑁄 𑀓𑀺𑀭 𑀲𑀸𑀕𑀭𑁄’’𑀢𑀺.

𑀢𑀢𑁆𑀣 ¶ 𑀲𑁄 𑀅𑀬𑀁 𑀳𑀸𑀬𑀢𑀺 𑀘𑁂𑀯𑀸𑀢𑀺 𑀉𑀤𑀓𑀲𑁆𑀲 𑀑𑀲𑀓𑁆𑀓𑀦𑀯𑁂𑀮𑀸𑀬 𑀳𑀸𑀬𑀢𑀺, 𑀦𑀺𑀓𑁆𑀔𑀫𑀦𑀯𑁂𑀮𑀸𑀬 𑀧𑀽𑀭𑀢𑀺. 𑀦𑀸𑀲𑁆𑀲 𑀦𑀸𑀬𑀢𑀻𑀢𑀺 𑀅𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀲𑀘𑁂𑀧𑀺 𑀦𑀁 𑀲𑀓𑀮𑀮𑁄𑀓𑁄 𑀧𑀺𑀯𑁂𑀬𑁆𑀬, 𑀢𑀣𑀸𑀧𑀺 ‘‘𑀇𑀢𑁄 𑀏𑀢𑁆𑀢𑀓𑀁 𑀦𑀸𑀫 𑀉𑀤𑀓𑀁 𑀧𑀻𑀢’’𑀦𑁆𑀢𑀺 𑀧𑀭𑀺𑀬𑀦𑁆𑀢𑁄 𑀦 𑀧𑀜𑁆𑀜𑀸𑀬𑀢𑀺. 𑀅𑀧𑁂𑀬𑁆𑀬𑁄 𑀓𑀺𑀭𑀸𑀢𑀺 𑀏𑀲𑁄 𑀓𑀺𑀭 𑀲𑀸𑀕𑀭𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀤𑀓𑀁 𑀔𑁂𑀧𑁂𑀢𑁆𑀯𑀸 𑀧𑀸𑀢𑀼𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀸 𑀪𑁂𑀭𑀯𑀭𑀽𑀧𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀲𑀫𑀼𑀤𑁆𑀤𑀓𑀸𑀓𑀁 𑀧𑀮𑀸𑀧𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀫𑀼𑀤𑁆𑀤𑀓𑀸𑀓𑁄 𑀉𑀧𑀦𑀦𑁆𑀤𑁄 𑀅𑀳𑁄𑀲𑀺, 𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑀼𑀤𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁯𑁭] 𑁭. 𑀓𑀸𑀫𑀯𑀺𑀮𑀸𑀧𑀚𑀸𑀢𑀓𑀯𑀡𑁆𑀡𑀦𑀸

𑀉𑀘𑁆𑀘𑁂 ¶ 𑀲𑀓𑀼𑀡 𑀟𑁂𑀫𑀸𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀧𑀼𑀧𑁆𑀨𑀭𑀢𑁆𑀢𑀚𑀸𑀢𑀓𑁂 (𑀚𑀸. 𑁧.𑁧.𑁧𑁪𑁭) 𑀓𑀣𑀺𑀢𑀁, 𑀅𑀢𑀻𑀢𑀯𑀢𑁆𑀣𑀼 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁮.𑁬𑁦 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑀁 𑀧𑀦 𑀧𑀼𑀭𑀺𑀲𑀁 𑀚𑀻𑀯𑀦𑁆𑀢𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀲𑀼𑀁. 𑀲𑁄 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀏𑀓𑀁 𑀓𑀸𑀓𑀁 𑀤𑀺𑀲𑁆𑀯𑀸 𑀢𑀸𑀯𑀔𑀭𑀫𑁆𑀧𑀺 𑀢𑀁 𑀯𑁂𑀤𑀦𑀁 𑀅𑀕𑀡𑁂𑀢𑁆𑀯𑀸 𑀧𑀺𑀬𑀪𑀭𑀺𑀬𑀸𑀬 𑀲𑀸𑀲𑀦𑀁 𑀧𑁂𑀲𑁂𑀢𑀼𑀁 𑀓𑀸𑀓𑀁 𑀆𑀫𑀦𑁆𑀢𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁧𑁩𑁯.

‘‘𑀉𑀘𑁆𑀘𑁂 𑀲𑀓𑀼𑀡 𑀟𑁂𑀫𑀸𑀦, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫;

𑀯𑀚𑁆𑀚𑀸𑀲𑀺 𑀔𑁄 𑀢𑁆𑀯𑀁 𑀯𑀸𑀫𑀽𑀭𑀼𑀁, 𑀘𑀺𑀭𑀁 𑀔𑁄 𑀲𑀸 𑀓𑀭𑀺𑀲𑁆𑀲𑀢𑀺.

𑁧𑁪𑁦.

‘‘𑀇𑀤𑀁 𑀔𑁄 𑀲𑀸 𑀦 𑀚𑀸𑀦𑀸𑀢𑀺, 𑀅𑀲𑀺𑀁 𑀲𑀢𑁆𑀢𑀺𑀜𑁆𑀘 𑀑𑀟𑁆𑀟𑀺𑀢𑀁;

𑀲𑀸 𑀘𑀡𑁆𑀟𑀻 𑀓𑀸𑀳𑀢𑀺 𑀓𑁄𑀥𑀁, 𑀢𑀁 𑀫𑁂 𑀢𑀧𑀢𑀺 𑀦𑁄 𑀇𑀤𑀁.

𑁧𑁪𑁧.

‘‘𑀏𑀲 𑀉𑀧𑁆𑀧𑀮𑀲𑀦𑁆𑀦𑀸𑀳𑁄, 𑀦𑀺𑀓𑁆𑀔𑀜𑁆𑀘𑀼𑀲𑁆𑀲𑀻𑀲𑀓𑁄𑀳𑀺𑀢𑀁;

𑀓𑀸𑀲𑀺𑀓𑀜𑁆𑀘 𑀫𑀼𑀤𑀼𑀁 𑀯𑀢𑁆𑀣𑀁, 𑀢𑀧𑁆𑀧𑁂𑀢𑀼 𑀥𑀦𑀺𑀓𑀸 𑀧𑀺𑀬𑀸’’𑀢𑀺.

𑀢𑀢𑁆𑀣 ¶ 𑀟𑁂𑀫𑀸𑀦𑀸𑀢𑀺 𑀕𑀘𑁆𑀙𑀫𑀸𑀦 𑀘𑀭𑀫𑀸𑀦. 𑀧𑀢𑁆𑀢𑀬𑀸𑀦𑀸𑀢𑀺 𑀢𑀫𑁂𑀯𑀸𑀮𑀧𑀢𑀺, 𑀢𑀣𑀸 𑀯𑀺𑀳𑀗𑁆𑀕𑀫𑀸𑀢𑀺. 𑀲𑁄 𑀳𑀺 𑀧𑀢𑁆𑀢𑁂𑀳𑀺 𑀬𑀸𑀦𑀁 𑀓𑀢𑁆𑀯𑀸 𑀕𑀫𑀦𑀢𑁄 𑀧𑀢𑁆𑀢𑀬𑀸𑀦𑁄, 𑀆𑀓𑀸𑀲𑁂 𑀕𑀫𑀦𑀢𑁄 𑀯𑀺𑀳𑀗𑁆𑀕𑀫𑁄. 𑀯𑀚𑁆𑀚𑀸𑀲𑀻𑀢𑀺 𑀯𑀤𑁂𑀬𑁆𑀬𑀸𑀲𑀺. 𑀯𑀸𑀫𑀽𑀭𑀼𑀦𑁆𑀢𑀺 𑀓𑀤𑀮𑀺𑀓𑁆𑀔𑀦𑁆𑀥𑀲𑀫𑀸𑀦𑀊𑀭𑀼𑀁, 𑀫𑀫 𑀲𑀽𑀮𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀯𑀤𑁂𑀬𑁆𑀬𑀸𑀲𑀺. 𑀘𑀺𑀭𑀁 𑀔𑁄 𑀲𑀸 𑀓𑀭𑀺𑀲𑁆𑀲𑀢𑀻𑀢𑀺 𑀲𑀸 𑀇𑀫𑀁 𑀧𑀯𑀢𑁆𑀢𑀺𑀁 𑀅𑀚𑀸𑀦𑀫𑀸𑀦𑀸 𑀫𑀫 𑀆𑀕𑀫𑀦𑀁 𑀘𑀺𑀭𑀁 𑀓𑀭𑀺𑀲𑁆𑀲𑀢𑀺, ‘‘𑀘𑀺𑀭𑀁 𑀫𑁂 𑀕𑀢𑀲𑁆𑀲 𑀧𑀺𑀬𑀲𑁆𑀲 𑀦 𑀘 𑀆𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀅𑀲𑀺𑀁 𑀲𑀢𑁆𑀢𑀺𑀜𑁆𑀘𑀸𑀢𑀺 𑀅𑀲𑀺𑀲𑀫𑀸𑀦𑀢𑀸𑀬 𑀲𑀢𑁆𑀢𑀺𑀲𑀫𑀸𑀦𑀢𑀸𑀬 𑀘 𑀲𑀽𑀮𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀜𑁆𑀳𑀺 ¶ 𑀢𑀲𑁆𑀲 𑀉𑀢𑁆𑀢𑀸𑀲𑀦𑀢𑁆𑀣𑀸𑀬 𑀑𑀟𑁆𑀟𑀺𑀢𑀁 𑀞𑀧𑀺𑀢𑀁. 𑀘𑀡𑁆𑀟𑀻𑀢𑀺 𑀓𑁄𑀥𑀦𑀸. 𑀓𑀸𑀳𑀢𑀺 𑀓𑁄𑀥𑀦𑁆𑀢𑀺 ‘‘𑀅𑀢𑀺𑀘𑀺𑀭𑀸𑀬𑀢𑀻’’𑀢𑀺 ¶ 𑀫𑀬𑀺 𑀓𑁄𑀥𑀁 𑀓𑀭𑀺𑀲𑁆𑀲𑀢𑀺. 𑀢𑀁 𑀫𑁂 𑀢𑀧𑀢𑀻𑀢𑀺 𑀢𑀁 𑀢𑀲𑁆𑀲𑀸 𑀓𑀼𑀚𑁆𑀛𑀦𑀁 𑀫𑀁 𑀢𑀧𑀢𑀺. 𑀦𑁄 𑀇𑀤𑀦𑁆𑀢𑀺 𑀇𑀥 𑀧𑀦 𑀇𑀤𑀁 𑀲𑀽𑀮𑀁 𑀫𑀁 𑀦 𑀢𑀧𑀢𑀻𑀢𑀺 𑀤𑀻𑀧𑁂𑀢𑀺.

‘‘𑀏𑀲 𑀉𑀧𑁆𑀧𑀮𑀲𑀦𑁆𑀦𑀸𑀳𑁄’’𑀢𑀺𑀆𑀤𑀻𑀳𑀺 𑀖𑀭𑁂 𑀉𑀲𑁆𑀲𑀻𑀲𑀓𑁂 𑀞𑀧𑀺𑀢𑀁 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀆𑀘𑀺𑀓𑁆𑀔𑀢𑀺. 𑀢𑀢𑁆𑀣 𑀉𑀧𑁆𑀧𑀮𑀲𑀦𑁆𑀦𑀸𑀳𑁄𑀢𑀺 𑀉𑀧𑁆𑀧𑀮𑁄 𑀘 𑀲𑀦𑁆𑀦𑀸𑀳𑁄 𑀘 𑀉𑀧𑁆𑀧𑀮𑀲𑀦𑁆𑀦𑀸𑀳𑁄, 𑀉𑀧𑁆𑀧𑀮𑀲𑀤𑀺𑀲𑁄 𑀓𑀡𑀬𑁄 𑀘 𑀲𑀦𑁆𑀦𑀸𑀳𑀓𑁄 𑀘𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀜𑁆𑀘𑀸𑀢𑀺 𑀧𑀜𑁆𑀘𑀳𑀺 𑀲𑀼𑀯𑀡𑁆𑀡𑁂𑀳𑀺 𑀓𑀢𑀁 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁. 𑀓𑀸𑀲𑀺𑀓𑀜𑁆𑀘 𑀫𑀼𑀤𑀼 𑀯𑀢𑁆𑀣𑀦𑁆𑀢𑀺 𑀫𑀼𑀤𑀼𑀁 𑀓𑀸𑀲𑀺𑀓𑀲𑀸𑀝𑀓𑀬𑀼𑀕𑀁 𑀲𑀦𑁆𑀥𑀸𑀬𑀸𑀳. 𑀏𑀢𑁆𑀢𑀓𑀁 𑀓𑀺𑀭 𑀢𑁂𑀦 𑀉𑀲𑁆𑀲𑀻𑀲𑀓𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀢𑀧𑁆𑀧𑁂𑀢𑀼 𑀥𑀦𑀺𑀓𑀸 𑀧𑀺𑀬𑀸𑀢𑀺 𑀏𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀲𑀸 𑀫𑀫 𑀧𑀺𑀬𑀸 𑀥𑀦𑀢𑁆𑀣𑀺𑀓𑀸 𑀇𑀫𑀺𑀦𑀸 𑀥𑀦𑁂𑀦 𑀢𑀧𑁆𑀧𑁂𑀢𑀼 𑀧𑀽𑀭𑁂𑀢𑀼, 𑀲𑀦𑁆𑀢𑀼𑀝𑁆𑀞𑀸 𑀳𑁄𑀢𑀽𑀢𑀺.

𑀏𑀯𑀁 𑀲𑁄 𑀧𑀭𑀺𑀤𑁂𑀯𑀫𑀸𑀦𑁄𑀯 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀪𑀭𑀺𑀬𑀸 𑀏𑀢𑀭𑀳𑀺 𑀪𑀭𑀺𑀬𑀸 𑀅𑀳𑁄𑀲𑀺, 𑀬𑁂𑀦 𑀧𑀦 𑀤𑁂𑀯𑀧𑀼𑀢𑁆𑀢𑁂𑀦 𑀢𑀁 𑀓𑀸𑀭𑀡𑀁 𑀤𑀺𑀝𑁆𑀞𑀁, 𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀫𑀯𑀺𑀮𑀸𑀧𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁯𑁮] 𑁮. 𑀉𑀤𑀼𑀫𑁆𑀩𑀭𑀚𑀸𑀢𑀓𑀯𑀡𑁆𑀡𑀦𑀸

𑀉𑀤𑀼𑀫𑁆𑀩𑀭𑀸 ¶ 𑀘𑀺𑀫𑁂 𑀧𑀓𑁆𑀓𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀕𑀸𑀫𑀓𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀲𑀢𑀺. 𑀭𑀫𑀡𑀻𑀬𑁄 𑀯𑀺𑀳𑀸𑀭𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀯𑀺𑀝𑁆𑀞𑁄, 𑀫𑀦𑁆𑀤𑀁 𑀲𑀫𑁆𑀫𑀚𑁆𑀚𑀦𑀝𑁆𑀞𑀸𑀦𑀁 𑀉𑀤𑀓𑀨𑀸𑀲𑀼𑀓𑀁, 𑀕𑁄𑀘𑀭𑀕𑀸𑀫𑁄 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂, 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀁 𑀤𑁂𑀦𑁆𑀢𑀺. 𑀅𑀣𑁂𑀓𑁄 𑀪𑀺𑀓𑁆𑀔𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀯𑀺𑀳𑀸𑀭𑀁 𑀧𑀸𑀧𑀼𑀡𑀺. 𑀦𑁂𑀯𑀸𑀲𑀺𑀓𑁄 𑀢𑀲𑁆𑀲 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀓𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀁 𑀆𑀤𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀧𑀡𑀻𑀢𑀁 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀆𑀕𑀦𑁆𑀢𑀼𑀓𑁄 𑀓𑀢𑀺𑀧𑀸𑀳𑀁 𑀪𑀼𑀜𑁆𑀚𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀓𑁂𑀦𑀼𑀧𑀸𑀬𑁂𑀦 𑀇𑀫𑀁 𑀪𑀺𑀓𑁆𑀔𑀼𑀁 𑀯𑀜𑁆𑀘𑁂𑀢𑁆𑀯𑀸 ¶ 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀇𑀫𑀁 𑀯𑀺𑀳𑀸𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀣𑁂𑀭𑀽𑀧𑀝𑁆𑀞𑀸𑀦𑀁 𑀆𑀕𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀆𑀯𑀼𑀲𑁄, 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀁 𑀦𑀸𑀓𑀸𑀲𑀻’’𑀢𑀺? ‘‘𑀪𑀦𑁆𑀢𑁂, 𑀇𑀫𑀁 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀦𑀢𑁆𑀣𑀺, 𑀢𑁂𑀦𑀫𑁆𑀳𑀺 𑀦 𑀕𑀢𑀧𑀼𑀩𑁆𑀩𑁄’’𑀢𑀺. ‘‘𑀬𑀸𑀯 𑀢𑁆𑀯𑀁 ¶ 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀕𑀘𑁆𑀙𑀲𑀺, 𑀢𑀸𑀯𑀸𑀳𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀦𑁂𑀯𑀸𑀲𑀺𑀓𑁄 ‘‘𑀬𑀸𑀯 𑀫𑀫𑀸𑀕𑀫𑀦𑀸 𑀣𑁂𑀭𑁂 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀢𑁄 𑀧𑀝𑁆𑀞𑀸𑀬 𑀆𑀕𑀦𑁆𑀢𑀼𑀓𑁄 ‘‘𑀢𑀲𑁆𑀲 𑀦𑁂𑀯𑀸𑀲𑀺𑀓𑀲𑁆𑀲 𑀅𑀬𑀜𑁆𑀘 𑀅𑀬𑀜𑁆𑀘 𑀤𑁄𑀲𑁄’’𑀢𑀺 𑀢𑁂 𑀫𑀦𑀼𑀲𑁆𑀲𑁂 𑀧𑀭𑀺𑀪𑀺𑀦𑁆𑀤𑀺. 𑀇𑀢𑀭𑁄𑀧𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀸𑀕𑀢𑁄, 𑀅𑀣𑀲𑁆𑀲 𑀲𑁄 𑀲𑁂𑀦𑀸𑀲𑀦𑀁 𑀦 𑀅𑀤𑀸𑀲𑀺. 𑀲𑁄 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺, 𑀫𑀦𑀼𑀲𑁆𑀲𑀸 𑀲𑀸𑀫𑀻𑀘𑀺𑀫𑀢𑁆𑀢𑀫𑁆𑀧𑀺 𑀦 𑀓𑀭𑀺𑀁𑀲𑀼. 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀧𑀼𑀦 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀅𑀲𑀼𑀓𑀁 𑀪𑀺𑀓𑁆𑀔𑀼𑀁 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀲𑀬𑀁 𑀢𑀢𑁆𑀣 𑀯𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀲𑁄 𑀇𑀫𑀁 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀓𑀟𑁆𑀠𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑁂 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀯𑀲𑁆𑀲𑀸𑀦𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀤𑁂𑀯𑁄 𑀯𑀲𑁆𑀲𑀺. 𑀅𑀣𑁂𑀓𑁄 𑀭𑀢𑁆𑀢𑀫𑀼𑀔𑀔𑀼𑀤𑁆𑀤𑀓𑀫𑀓𑁆𑀓𑀝𑁄 𑀏𑀓𑀺𑀲𑁆𑀲𑀸 𑀅𑀦𑁄𑀯𑀲𑁆𑀲𑀺𑀓𑀸𑀬 𑀧𑀸𑀲𑀸𑀡𑀤𑀭𑀺𑀬𑀸 𑀯𑀲𑀫𑀸𑀦𑁄 𑀏𑀓𑀤𑀺𑀯𑀲𑀁 𑀤𑀭𑀺𑀤𑁆𑀯𑀸𑀭𑁂 𑀅𑀢𑁂𑀫𑀦𑀝𑁆𑀞𑀸𑀦𑁂 𑀲𑀼𑀔𑁂𑀦 ¶ 𑀦𑀺𑀲𑀻𑀤𑀺. 𑀢𑀢𑁆𑀣 𑀏𑀓𑁄 𑀓𑀸𑀴𑀫𑀼𑀔𑀫𑀳𑀸𑀫𑀓𑁆𑀓𑀝𑁄 𑀢𑀺𑀦𑁆𑀢𑁄 𑀲𑀻𑀢𑁂𑀦 𑀧𑀻𑀴𑀺𑀬𑀫𑀸𑀦𑁄 𑀯𑀺𑀘𑀭𑀦𑁆𑀢𑁄 𑀢𑀁 𑀢𑀣𑀸𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀉𑀧𑀸𑀬𑁂𑀦 𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀢𑁆𑀣 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀑𑀮𑀫𑁆𑀩𑁂𑀢𑁆𑀯𑀸 𑀲𑀼𑀳𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁨.

‘‘𑀉𑀤𑀼𑀫𑁆𑀩𑀭𑀸 𑀘𑀺𑀫𑁂 𑀧𑀓𑁆𑀓𑀸, 𑀦𑀺𑀕𑁆𑀭𑁄𑀥𑀸 𑀘 𑀓𑀧𑀺𑀢𑁆𑀣𑀦𑀸;

𑀏𑀳𑀺 𑀦𑀺𑀓𑁆𑀔𑀫 𑀪𑀼𑀜𑁆𑀚𑀲𑁆𑀲𑀼, 𑀓𑀺𑀁 𑀚𑀺𑀖𑀘𑁆𑀙𑀸𑀬 𑀫𑀺𑀬𑁆𑀬𑀲𑀻’’𑀢𑀺.

𑀢𑀢𑁆𑀣 ¶ 𑀓𑀧𑀺𑀢𑁆𑀣𑀦𑀸𑀢𑀺 𑀧𑀺𑀮𑀓𑁆𑀔𑀸. 𑀏𑀳𑀺 𑀦𑀺𑀓𑁆𑀔𑀫𑀸𑀢𑀺 𑀏𑀢𑁂 𑀉𑀤𑀼𑀫𑁆𑀩𑀭𑀸𑀤𑀬𑁄 𑀨𑀮𑀪𑀸𑀭𑀦𑀫𑀺𑀢𑀸, 𑀅𑀳𑀫𑁆𑀧𑀺 𑀔𑀸𑀤𑀺𑀢𑁆𑀯𑀸 𑀲𑀼𑀳𑀺𑀢𑁄 𑀆𑀕𑀢𑁄𑀲𑁆𑀫𑀺, 𑀢𑁆𑀯𑀫𑁆𑀧𑀺 𑀕𑀘𑁆𑀙 𑀪𑀼𑀜𑁆𑀚𑀲𑁆𑀲𑀽𑀢𑀺.

𑀲𑁄𑀧𑀺 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀺𑀢𑁆𑀯𑀸 𑀨𑀮𑀸𑀦𑀺 𑀔𑀸𑀤𑀺𑀢𑀼𑀓𑀸𑀫𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀪𑀦𑁆𑀢𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀢𑀁 𑀅𑀦𑁆𑀢𑁄𑀧𑀸𑀲𑀸𑀡𑀤𑀭𑀺𑀬𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀯𑀜𑁆𑀘𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁩.

‘‘𑀏𑀯𑀁 ¶ 𑀲𑁄 𑀲𑀼𑀳𑀺𑀢𑁄 𑀳𑁄𑀢𑀺, 𑀬𑁄 𑀯𑀼𑀟𑁆𑀠𑀫𑀧𑀘𑀸𑀬𑀢𑀺;

𑀬𑀣𑀸𑀳𑀫𑀚𑁆𑀚 𑀲𑀼𑀳𑀺𑀢𑁄, 𑀤𑀼𑀫𑀧𑀓𑁆𑀓𑀸𑀦𑀺 𑀫𑀸𑀲𑀺𑀢𑁄’’𑀢𑀺.

𑀢𑀢𑁆𑀣 𑀤𑀼𑀫𑀧𑀓𑁆𑀓𑀸𑀦𑀺 𑀫𑀸𑀲𑀺𑀢𑁄𑀢𑀺 𑀉𑀤𑀼𑀫𑁆𑀩𑀭𑀸𑀤𑀻𑀦𑀺 𑀭𑀼𑀓𑁆𑀔𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀅𑀲𑀺𑀢𑁄 𑀥𑀸𑀢𑁄 𑀲𑀼𑀳𑀺𑀢𑁄.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀫𑀓𑁆𑀓𑀝𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁪.

‘‘𑀬𑀁 𑀯𑀦𑁂𑀚𑁄 𑀯𑀦𑁂𑀚𑀲𑁆𑀲, 𑀯𑀜𑁆𑀘𑁂𑀬𑁆𑀬 𑀓𑀧𑀺𑀦𑁄 𑀓𑀧𑀺;

𑀤𑀳𑀭𑁄 𑀓𑀧𑀺 𑀲𑀤𑁆𑀥𑁂𑀬𑁆𑀬, 𑀦 𑀳𑀺 𑀚𑀺𑀡𑁆𑀡𑁄 𑀚𑀭𑀸𑀓𑀧𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀯𑀦𑁂 𑀚𑀸𑀢𑁄 𑀓𑀧𑀺 𑀯𑀦𑁂 𑀚𑀸𑀢𑀲𑁆𑀲 𑀓𑀧𑀺𑀦𑁄 𑀯𑀜𑁆𑀘𑀦𑀁 𑀓𑀭𑁂𑀬𑁆𑀬, 𑀢𑀁 𑀢𑀬𑀸 𑀲𑀤𑀺𑀲𑁄 𑀤𑀳𑀭𑁄 𑀯𑀸𑀦𑀭𑁄 𑀲𑀤𑁆𑀤𑀳𑁂𑀬𑁆𑀬, 𑀫𑀸𑀤𑀺𑀲𑁄 𑀧𑀦 𑀚𑀺𑀡𑁆𑀡𑁄 𑀚𑀭𑀸𑀓𑀧𑀺 𑀫𑀳𑀮𑁆𑀮𑀓𑀫𑀓𑁆𑀓𑀝𑁄 𑀦 𑀳𑀺 𑀲𑀤𑁆𑀤𑀳𑁂𑀬𑁆𑀬, 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀪𑀡𑀦𑁆𑀢𑀲𑁆𑀲 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀦 𑀲𑀤𑁆𑀤𑀳𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀲𑀩𑁆𑀩𑀁 𑀨𑀮𑀸𑀨𑀮𑀁 ¶ 𑀯𑀲𑁆𑀲𑁂𑀦 𑀓𑀺𑀮𑀺𑀦𑁆𑀦𑀁 𑀧𑀢𑀺𑀢𑀁, 𑀧𑀼𑀦 𑀢𑀯 𑀇𑀤𑀁 𑀞𑀸𑀦𑀁 𑀦𑀢𑁆𑀣𑀺, 𑀕𑀘𑁆𑀙𑀸𑀢𑀺. 𑀲𑁄 𑀢𑀢𑁄𑀯 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀔𑀼𑀤𑁆𑀤𑀓𑀫𑀓𑁆𑀓𑀝𑁄 𑀦𑁂𑀯𑀸𑀲𑀺𑀓𑁄 𑀅𑀳𑁄𑀲𑀺, 𑀓𑀸𑀴𑀫𑀳𑀸𑀫𑀓𑁆𑀓𑀝𑁄 𑀆𑀕𑀦𑁆𑀢𑀼𑀓𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀤𑀼𑀫𑁆𑀩𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁯𑁯] 𑁯. 𑀓𑁄𑀫𑀸𑀭𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀧𑀼𑀭𑁂 ¶ 𑀢𑀼𑀯𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀓𑁂𑀴𑀺𑀲𑀻𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀲𑀢𑁆𑀣𑀭𑀺 𑀉𑀧𑀭𑀺𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀤𑀺𑀝𑁆𑀞𑀲𑀼𑀢𑀸𑀤𑀻𑀦𑀺 𑀓𑀣𑁂𑀦𑁆𑀢𑀸 𑀓𑀮𑀳𑀜𑁆𑀘 𑀧𑀭𑀺𑀪𑀸𑀲𑀜𑁆𑀘 𑀓𑀭𑁄𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀏𑀢𑁂 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀧𑀸𑀲𑀸𑀤𑀣𑀼𑀧𑀺𑀓𑀁 𑀧𑀳𑀭𑀺𑀢𑁆𑀯𑀸 𑀬𑀸𑀯 𑀉𑀤𑀓𑀧𑀭𑀺𑀬𑀦𑁆𑀢𑀸 𑀧𑀸𑀲𑀸𑀤𑀁 𑀓𑀫𑁆𑀧𑁂𑀲𑀺. 𑀢𑁂 𑀪𑀺𑀓𑁆𑀔𑀽 𑀫𑀭𑀡𑀪𑀬𑀪𑀻𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀁𑀲𑀽. 𑀢𑁂𑀲𑀁 𑀲𑁄 𑀓𑁂𑀴𑀺𑀲𑀻𑀮𑀪𑀸𑀯𑁄 𑀪𑀺𑀓𑁆𑀔𑀽𑀲𑀼 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ¶ 𑁋 ‘‘𑀆𑀯𑀼𑀲𑁄, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑁂𑀴𑀺𑀲𑀻𑀮𑀸 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀢𑁂 𑀓𑁂𑀴𑀺𑀲𑀻𑀮𑀓𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀓𑁄𑀫𑀸𑀭𑀧𑀼𑀢𑁆𑀢𑁄’’𑀢𑀺 𑀦𑀁 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 𑀅𑀧𑀭𑀪𑀸𑀕𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀺. 𑀅𑀣𑀜𑁆𑀜𑁂 𑀓𑁂𑀴𑀺𑀲𑀻𑀮𑀸 𑀢𑀸𑀧𑀲𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀯𑀲𑀺𑀁𑀲𑀼, 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑀢𑁆𑀢𑀫𑁆𑀧𑀺 𑀦𑁂𑀲𑀁 𑀦𑀢𑁆𑀣𑀺, 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀳𑀲𑀫𑀸𑀦𑀸 𑀦𑀸𑀦𑀧𑁆𑀧𑀓𑀸𑀭𑀸𑀬 𑀓𑁂𑀴𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀏𑀓𑁄 𑀫𑀓𑁆𑀓𑀝𑁄 𑀅𑀢𑁆𑀣𑀺, 𑀲𑁄𑀧𑀺 𑀓𑁂𑀴𑀺𑀲𑀻𑀮𑀓𑁄𑀯 ¶ 𑀫𑀼𑀔𑀯𑀺𑀓𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀢𑀸𑀧𑀲𑀸𑀦𑀁 𑀦𑀸𑀦𑀸𑀯𑀺𑀥𑀁 𑀓𑁂𑀴𑀺𑀁 𑀤𑀲𑁆𑀲𑁂𑀢𑀺. 𑀢𑀸𑀧𑀲𑀸 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀅𑀕𑀫𑀁𑀲𑀼. 𑀢𑁂𑀲𑀁 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀫𑀓𑁆𑀓𑀝𑁄 𑀢𑁂𑀲𑀁 𑀯𑀺𑀬 𑀢𑀲𑁆𑀲𑀧𑀺 𑀓𑁂𑀴𑀺𑀁 𑀤𑀲𑁆𑀲𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 ‘‘𑀲𑀼𑀲𑀺𑀓𑁆𑀔𑀺𑀢𑀧𑀩𑁆𑀩𑀚𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁂𑀦 𑀦𑀸𑀫 𑀆𑀘𑀸𑀭𑀲𑀫𑁆𑀧𑀦𑁆𑀦𑁂𑀦 ¶ 𑀓𑀸𑀬𑀸𑀤𑀻𑀳𑀺 𑀲𑀼𑀲𑀜𑁆𑀜𑀢𑁂𑀦 𑀛𑀸𑀦𑁂𑀲𑀼 𑀬𑀼𑀢𑁆𑀢𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀻𑀮𑀯𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀢𑁄 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺. 𑀅𑀣 𑀢𑁂 𑀢𑀸𑀧𑀲𑀸 𑀮𑁄𑀡𑀫𑁆𑀩𑀺𑀮𑀁 𑀲𑁂𑀯𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀅𑀕𑀫𑀁𑀲𑀼. 𑀫𑀓𑁆𑀓𑀝𑁄 𑀧𑀼𑀩𑁆𑀩𑁂 𑀯𑀺𑀬 𑀢𑁂𑀲𑀁 𑀓𑁂𑀴𑀺𑀁 𑀦 𑀤𑀲𑁆𑀲𑁂𑀲𑀺. 𑀅𑀣 𑀦𑀁 𑀢𑀸𑀧𑀲𑀸 ‘‘𑀧𑀼𑀩𑁆𑀩𑁂, 𑀢𑁆𑀯𑀁 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀧𑀼𑀭𑀢𑁄 𑀓𑁂𑀴𑀺𑀁 𑀅𑀓𑀸𑀲𑀺, 𑀇𑀤𑀸𑀦𑀺 𑀦 𑀓𑀭𑁄𑀲𑀺, 𑀓𑀺𑀁𑀓𑀸𑀭𑀡𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁪𑁫.

‘‘𑀧𑀼𑀭𑁂 𑀢𑀼𑀯𑀁 𑀲𑀻𑀮𑀯𑀢𑀁 𑀲𑀓𑀸𑀲𑁂, 𑀑𑀓𑁆𑀓𑀦𑁆𑀢𑀺𑀓𑀁 𑀓𑀻𑀴𑀲𑀺 𑀅𑀲𑁆𑀲𑀫𑀫𑁆𑀳𑀺;

𑀓𑀭𑁄𑀳𑀭𑁂 𑀫𑀓𑁆𑀓𑀝𑀺𑀬𑀸𑀦𑀺 𑀫𑀓𑁆𑀓𑀝, 𑀦 𑀢𑀁 𑀫𑀬𑀁 𑀲𑀻𑀮𑀯𑀢𑀁 𑀭𑀫𑀸𑀫𑀸’’𑀢𑀺.

𑀢𑀢𑁆𑀣 𑀲𑀻𑀮𑀯𑀢𑀁 𑀲𑀓𑀸𑀲𑁂𑀢𑀺 𑀓𑁂𑀴𑀺𑀲𑀻𑀮𑀸𑀦𑀁 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂. 𑀑𑀓𑁆𑀓𑀦𑁆𑀢𑀺𑀓𑀦𑁆𑀢𑀺 𑀫𑀺𑀕𑁄 𑀯𑀺𑀬 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀓𑀻𑀴𑀲𑀺. 𑀓𑀭𑁄𑀳𑀭𑁂𑀢𑀺 𑀏𑀢𑁆𑀣 𑀅𑀭𑁂𑀢𑀺 𑀆𑀮𑀧𑀦𑀁. 𑀫𑀓𑁆𑀓𑀝𑀺𑀬𑀸𑀦𑀻𑀢𑀺 𑀫𑀼𑀔𑀫𑀓𑁆𑀓𑀝𑀺𑀓𑀓𑀻𑀴𑀸𑀲𑀗𑁆𑀔𑀸𑀢𑀸𑀦𑀺 𑀫𑀼𑀔𑀯𑀺𑀓𑀸𑀭𑀸𑀦𑀺. 𑀦 𑀢𑀁 𑀫𑀬𑀁 𑀲𑀻𑀮𑀯𑀢𑀁 𑀭𑀫𑀸𑀫𑀸𑀢𑀺 𑀬𑀁 𑀧𑀼𑀩𑁆𑀩𑁂 𑀢𑀯 𑀓𑁂𑀴𑀺𑀲𑀻𑀮𑀁 𑀓𑁂𑀴𑀺𑀯𑀢𑀁, 𑀢𑀁 𑀫𑀬𑀁 𑀏𑀢𑀭𑀳𑀺 𑀦 𑀭𑀫𑀸𑀫, 𑀢𑁆𑀯𑀫𑁆𑀧𑀺 𑀦𑁄 𑀦 𑀭𑀫𑀸𑀧𑁂𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀦𑁆𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀫𑀓𑁆𑀓𑀝𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁬.

‘‘𑀲𑀼𑀢𑀸 𑀳𑀺 𑀫𑀬𑁆𑀳𑀁 𑀧𑀭𑀫𑀸 𑀯𑀺𑀲𑀼𑀤𑁆𑀥𑀺, 𑀓𑁄𑀫𑀸𑀭𑀧𑀼𑀢𑁆𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲;

𑀫𑀸 𑀤𑀸𑀦𑀺 𑀫𑀁 𑀫𑀜𑁆𑀜𑀺 𑀢𑀼𑀯𑀁 𑀬𑀣𑀸 𑀧𑀼𑀭𑁂, 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀸𑀫𑀺 𑀆𑀯𑀼𑀲𑁄’’𑀢𑀺.

𑀢𑀢𑁆𑀣 ¶ 𑀫𑀬𑁆𑀳𑀦𑁆𑀢𑀺 𑀓𑀭𑀡𑀢𑁆𑀣𑁂 𑀲𑀫𑁆𑀧𑀤𑀸𑀦𑀁. 𑀯𑀺𑀲𑀼𑀤𑁆𑀥𑀻𑀢𑀺 𑀛𑀸𑀦𑀯𑀺𑀲𑀼𑀤𑁆𑀥𑀺. 𑀩𑀳𑀼𑀲𑁆𑀲𑀼𑀢𑀲𑁆𑀲𑀸𑀢𑀺 𑀩𑀳𑀽𑀦𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀦𑀁 𑀅𑀝𑁆𑀞𑀦𑁆𑀦𑀜𑁆𑀘 𑀲𑀫𑀸𑀧𑀢𑁆𑀢𑀻𑀦𑀁 𑀲𑀼𑀢𑀢𑁆𑀢𑀸 𑀘𑁂𑀯 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀘 𑀩𑀳𑀼𑀲𑁆𑀲𑀼𑀢𑀲𑁆𑀲. 𑀢𑀼𑀯𑀦𑁆𑀢𑀺 𑀢𑁂𑀲𑀼 𑀏𑀓𑀁 𑀢𑀸𑀧𑀲𑀁 𑀆𑀮𑀧𑀦𑁆𑀢𑁄 𑀇𑀤𑀸𑀦𑀺 𑀫𑀸 𑀫𑀁 𑀢𑁆𑀯𑀁 𑀧𑀼𑀭𑁂 𑀯𑀺𑀬 𑀲𑀜𑁆𑀚𑀸𑀦𑀺, 𑀦𑀸𑀳𑀁 𑀧𑀼𑀭𑀺𑀫𑀲𑀤𑀺𑀲𑁄, 𑀆𑀘𑀭𑀺𑀬𑁄 𑀫𑁂 𑀮𑀤𑁆𑀥𑁄𑀢𑀺 𑀤𑀻𑀧𑁂𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀢𑀸𑀧𑀲𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁪𑁭.

‘‘𑀲𑀘𑁂𑀧𑀺 𑀲𑁂𑀮𑀲𑁆𑀫𑀺 𑀯𑀧𑁂𑀬𑁆𑀬 𑀩𑀻𑀚𑀁, 𑀤𑁂𑀯𑁄 𑀘 𑀯𑀲𑁆𑀲𑁂 𑀦 𑀳𑀺 𑀢𑀁 𑀯𑀺𑀭𑀽𑀴𑁆𑀳𑁂;

𑀲𑀼𑀢𑀸 𑀳𑀺 𑀢𑁂 𑀲𑀸 𑀧𑀭𑀫𑀸 𑀯𑀺𑀲𑀼𑀤𑁆𑀥𑀺, 𑀆𑀭𑀸 𑀢𑀼𑀯𑀁 𑀫𑀓𑁆𑀓𑀝 𑀛𑀸𑀦𑀪𑀽𑀫𑀺𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂𑀧𑀺 𑀧𑀸𑀲𑀸𑀡𑀧𑀺𑀝𑁆𑀞𑁂 𑀧𑀜𑁆𑀘𑀯𑀺𑀥𑀁 𑀩𑀻𑀚𑀁 𑀯𑀧𑁂𑀬𑁆𑀬, 𑀤𑁂𑀯𑁄 𑀘 𑀲𑀫𑁆𑀫𑀸 𑀯𑀲𑁆𑀲𑁂𑀬𑁆𑀬, 𑀅𑀔𑁂𑀢𑁆𑀢𑀢𑀸𑀬 𑀢𑀁 𑀦 𑀯𑀺𑀭𑀽𑀴𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑀬𑀸 𑀧𑀭𑀫𑀸 𑀛𑀸𑀦𑀯𑀺𑀲𑀼𑀤𑁆𑀥𑀺 𑀲𑀼𑀢𑀸, 𑀢𑁆𑀯𑀁 𑀧𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀢𑁆𑀢𑀸 𑀆𑀭𑀸 𑀛𑀸𑀦𑀪𑀽𑀫𑀺𑀬𑀸 𑀤𑀽𑀭𑁂 𑀞𑀺𑀢𑁄, 𑀦 𑀲𑀓𑁆𑀓𑀸 𑀢𑀬𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀦𑁆𑀢𑀺 𑀫𑀓𑁆𑀓𑀝𑀁 𑀕𑀭𑀳𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑁂𑀴𑀺𑀲𑀻𑀮𑀸 𑀢𑀸𑀧𑀲𑀸 𑀇𑀫𑁂 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀓𑁄𑀫𑀸𑀭𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁄𑀫𑀸𑀭𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁦𑁦] 𑁧𑁦. 𑀯𑀓𑀚𑀸𑀢𑀓𑀯𑀡𑁆𑀡𑀦𑀸

𑀧𑀭𑀧𑀸𑀡𑀭𑁄𑀥𑀸 𑀚𑀻𑀯𑀦𑁆𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀲𑀦𑁆𑀣𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀯𑀺𑀦𑀬𑁂 (𑀧𑀸𑀭𑀸. 𑁫𑁬𑁫 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀆𑀬𑀲𑁆𑀫𑀸 𑀉𑀧𑀲𑁂𑀦𑁄 𑀤𑀼𑀯𑀲𑁆𑀲𑀺𑀓𑁄 𑀏𑀓𑀯𑀲𑁆𑀲𑀺𑀓𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀕𑀭𑀳𑀺𑀢𑁄 ¶ 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀧𑀭𑀺𑀲𑀫𑁆𑀧𑀺 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑀁 𑀓𑀢𑁆𑀯𑀸 𑀪𑀕𑀯𑀢𑀺 𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀦𑁂 𑀲𑀧𑀭𑀺𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀲𑀁 𑀦𑀺𑀲𑁆𑀲𑀸𑀬 𑀧𑀞𑀫𑀁 𑀕𑀭𑀳𑀁 𑀮𑀪𑀺𑀢𑁆𑀯𑀸 𑀅𑀥𑀫𑁆𑀫𑀺𑀓𑀸𑀬 𑀓𑀢𑀺𑀓𑀸𑀬 𑀅𑀦𑀦𑀼𑀯𑀢𑁆𑀢𑀦𑁂 𑀤𑀼𑀢𑀺𑀬𑀁 𑀲𑀸𑀥𑀼𑀓𑀸𑀭𑀁 𑀮𑀪𑀺𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀥𑀼𑀢𑀗𑁆𑀕𑀥𑀭𑀸 𑀪𑀺𑀓𑁆𑀔𑀽 𑀬𑀣𑀸𑀲𑀼𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀧𑀲𑁆𑀲𑀦𑁆𑀢𑀽’’𑀢𑀺 𑀲𑀢𑁆𑀣𑀸𑀭𑀸 𑀓𑀢𑀸𑀦𑀼𑀕𑁆𑀕𑀳𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀢𑁄 𑀧𑀪𑀼𑀢𑀺 𑀪𑀺𑀓𑁆𑀔𑀽 𑀥𑀼𑀢𑀗𑁆𑀕𑀥𑀭𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 ¶ 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀭𑀺 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁂 𑀢𑀢𑁆𑀣 𑀢𑀢𑁆𑀣 𑀧𑀁𑀲𑀼𑀓𑀽𑀮𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀸𑀦𑁂𑀯 𑀕𑀡𑁆𑀳𑀺𑀁𑀲𑀼. 𑀲𑀢𑁆𑀣𑀸 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 ¶ 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀢𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀯𑀓𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀲𑀤𑀺𑀲𑀁 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺. 𑀅𑀣𑁂𑀓𑁄 𑀯𑀓𑁄 𑀕𑀗𑁆𑀕𑀸𑀢𑀻𑀭𑁂 𑀧𑀸𑀲𑀸𑀡𑀧𑀺𑀝𑁆𑀞𑁂 𑀯𑀲𑀢𑀺, 𑀅𑀣 𑀕𑀗𑁆𑀕𑀸𑀬 𑀫𑀳𑁄𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀸𑀲𑀸𑀡𑀁 𑀧𑀭𑀺𑀓𑁆𑀔𑀺𑀧𑀺. 𑀯𑀓𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀺, 𑀦𑁂𑀯𑀲𑁆𑀲 𑀕𑁄𑀘𑀭𑁄 𑀅𑀢𑁆𑀣𑀺, 𑀦 𑀕𑁄𑀘𑀭𑀸𑀬 𑀕𑀫𑀦𑀫𑀕𑁆𑀕𑁄, 𑀉𑀤𑀓𑀫𑁆𑀧𑀺 𑀯𑀟𑁆𑀠𑀢𑁂𑀯. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀦𑁂𑀯 𑀕𑁄𑀘𑀭𑁄 𑀅𑀢𑁆𑀣𑀺, 𑀦 𑀕𑁄𑀘𑀭𑀸𑀬 𑀕𑀫𑀦𑀫𑀕𑁆𑀕𑁄, 𑀦𑀺𑀓𑁆𑀓𑀫𑁆𑀫𑀲𑁆𑀲 𑀧𑀦 𑀦𑀺𑀧𑀚𑁆𑀚𑀦𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀯𑀭’’𑀦𑁆𑀢𑀺 𑀫𑀦𑀲𑀸𑀯 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀚𑁆𑀚𑀫𑀸𑀦𑁄 𑀢𑀲𑁆𑀲 𑀢𑀁 𑀤𑀼𑀩𑁆𑀩𑀮𑀲𑀫𑀸𑀤𑀸𑀦𑀁 𑀜𑀢𑁆𑀯𑀸 ‘‘𑀏𑀢𑀁 𑀯𑀓𑀁 𑀯𑀺𑀳𑁂𑀞𑁂𑀲𑁆𑀲𑀸𑀫𑀻’’𑀢𑀺 𑀏𑀴𑀓𑀭𑀽𑀧𑁂𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀯𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑁄𑀲𑀣𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀢𑀁 𑀕𑀡𑁆𑀳𑀺𑀢𑀼𑀁 𑀧𑀓𑁆𑀔𑀦𑁆𑀤𑀺. 𑀏𑀴𑀓𑁄𑀧𑀺 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀕𑀳𑁂𑀢𑀼𑀁 𑀦𑀸𑀤𑀸𑀲𑀺. 𑀯𑀓𑁄 𑀢𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀫𑁆𑀫 ‘‘𑀉𑀧𑁄𑀲𑀣𑀓𑀫𑁆𑀫𑀁 𑀢𑀸𑀯 𑀫𑁂 𑀦 𑀪𑀺𑀚𑁆𑀚𑀢𑀻’’𑀢𑀺 𑀢𑀢𑁆𑀣𑁂𑀯 𑀧𑀼𑀦 𑀦𑀺𑀧𑀚𑁆𑀚𑀺. 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀪𑀸𑀯𑁂𑀦𑁂𑀯 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀢𑀸𑀤𑀺𑀲𑀲𑁆𑀲 𑀤𑀼𑀩𑁆𑀩𑀮𑀚𑁆𑀛𑀸𑀲𑀬𑀲𑁆𑀲 𑀓𑀺𑀁 𑀉𑀧𑁄𑀲𑀣𑀓𑀫𑁆𑀫𑁂𑀦, 𑀢𑁆𑀯𑀁 𑀫𑀫 𑀲𑀓𑁆𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀏𑀴𑀓𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀅𑀳𑁄𑀲𑀻’’𑀢𑀺 𑀢𑀁 𑀯𑀺𑀳𑁂𑀞𑁂𑀢𑁆𑀯𑀸 𑀕𑀭𑀳𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄.

𑁧𑁪𑁮.

‘‘𑀧𑀭𑀧𑀸𑀡𑀭𑁄𑀥𑀸 𑀚𑀻𑀯𑀦𑁆𑀢𑁄, 𑀫𑀁𑀲𑀮𑁄𑀳𑀺𑀢𑀪𑁄𑀚𑀦𑁄;

𑀯𑀓𑁄 𑀯𑀢𑀁 𑀲𑀫𑀸𑀤𑀸𑀬, 𑀉𑀧𑀧𑀚𑁆𑀚𑀺 𑀉𑀧𑁄𑀲𑀣𑀁.

𑁧𑁪𑁯.

‘‘𑀢𑀲𑁆𑀲 ¶ 𑀲𑀓𑁆𑀓𑁄 𑀯𑀢𑀜𑁆𑀜𑀸𑀬, 𑀅𑀚𑀭𑀽𑀧𑁂𑀦𑀼𑀧𑀸𑀕𑀫𑀺;

𑀯𑀻𑀢𑀢𑀧𑁄 𑀅𑀚𑁆𑀛𑀧𑁆𑀧𑀢𑁆𑀢𑁄, 𑀪𑀜𑁆𑀚𑀺 𑀮𑁄𑀳𑀺𑀢𑀧𑁄 𑀢𑀧𑀁.

𑁧𑁫𑁦.

‘‘𑀏𑀯𑀫𑁂𑀯 ¶ ¶ 𑀇𑀥𑁂𑀓𑀘𑁆𑀘𑁂, 𑀲𑀫𑀸𑀤𑀸𑀦𑀫𑁆𑀳𑀺 𑀤𑀼𑀩𑁆𑀩𑀮𑀸;

𑀮𑀳𑀼𑀁 𑀓𑀭𑁄𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀯𑀓𑁄𑀯 𑀅𑀚𑀓𑀸𑀭𑀡𑀸’’𑀢𑀺. 𑁋

𑀢𑀺𑀲𑁆𑀲𑁄𑀧𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸𑀯.

𑀢𑀢𑁆𑀣 𑀉𑀧𑀧𑀚𑁆𑀚𑀺 𑀉𑀧𑁄𑀲𑀣𑀦𑁆𑀢𑀺 𑀉𑀧𑁄𑀲𑀣𑀯𑀸𑀲𑀁 𑀉𑀧𑀕𑀢𑁄. 𑀯𑀢𑀜𑁆𑀜𑀸𑀬𑀸𑀢𑀺 𑀢𑀲𑁆𑀲 𑀤𑀼𑀩𑁆𑀩𑀮𑀯𑀢𑀁 𑀅𑀜𑁆𑀜𑀸𑀬. 𑀯𑀻𑀢𑀢𑀧𑁄 𑀅𑀚𑁆𑀛𑀧𑁆𑀧𑀢𑁆𑀢𑁄𑀢𑀺 𑀯𑀺𑀕𑀢𑀢𑀧𑁄 𑀳𑀼𑀢𑁆𑀯𑀸 𑀉𑀧𑀕𑀢𑁄, 𑀢𑀁 𑀔𑀸𑀤𑀺𑀢𑀼𑀁 𑀧𑀓𑁆𑀔𑀦𑁆𑀤𑀻𑀢𑀺 𑀅𑀢𑁆𑀣𑁄. 𑀮𑁄𑀳𑀺𑀢𑀧𑁄𑀢𑀺 𑀮𑁄𑀳𑀺𑀢𑀧𑀸𑀬𑀻. 𑀢𑀧𑀦𑁆𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀫𑀸𑀤𑀸𑀦𑀢𑀧𑀁 𑀪𑀺𑀦𑁆𑀤𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀓𑁆𑀓𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀼𑀫𑁆𑀪𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀓𑀼𑀫𑁆𑀪 𑀲𑀼𑀧𑀢𑁆𑀢 𑀲𑀺𑀭𑀺𑀯𑁆𑀳𑀬𑀦𑁄, 𑀲𑀼𑀘𑀺𑀲𑀫𑁆𑀫𑀢 𑀩𑀺𑀦𑁆𑀤𑀼𑀲𑀭𑁄 𑀘𑀼𑀲𑀪𑁄;

𑀲𑀭𑀺𑀢𑀁𑀧𑀢𑀺 𑀘𑀡𑁆𑀟𑀺 𑀚𑀭𑀸𑀓𑀧𑀺𑀦𑀸, 𑀅𑀣 𑀫𑀓𑁆𑀓𑀝𑀺𑀬𑀸 𑀯𑀓𑀓𑁂𑀦 𑀤𑀲𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀲𑀗𑁆𑀓𑀧𑁆𑀧𑁄 𑀧𑀤𑀼𑀫𑁄 𑀘𑁂𑀯, 𑀉𑀤𑀧𑀸𑀦𑁂𑀦 𑀢𑀢𑀺𑀬𑀁;

𑀅𑀩𑁆𑀪𑀦𑁆𑀢𑀭𑀁 𑀖𑀝𑀪𑁂𑀤𑀁, 𑀢𑀺𑀓𑀦𑀺𑀧𑀸𑀢𑀫𑁆𑀳𑀺𑀮𑀗𑁆𑀓𑀢𑀦𑁆𑀢𑀺.

𑀢𑀺𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑀤𑀼𑀢𑀺𑀬𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.)