📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀚𑀸𑀢𑀓-𑀅𑀝𑁆𑀞𑀓𑀣𑀸

(𑀢𑀢𑀺𑀬𑁄 𑀪𑀸𑀕𑁄)

𑁪. 𑀘𑀢𑀼𑀓𑁆𑀓𑀦𑀺𑀧𑀸𑀢𑁄

𑁧. 𑀓𑀸𑀮𑀺𑀗𑁆𑀕𑀯𑀕𑁆𑀕𑁄

[𑁩𑁦𑁧] 𑁧. 𑀘𑀽𑀴𑀓𑀸𑀮𑀺𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸

𑀯𑀺𑀯𑀭𑀣𑀺𑀫𑀸𑀲𑀁 ¶ ¶ ¶ 𑀤𑁆𑀯𑀸𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀢𑀼𑀦𑁆𑀦𑀁 𑀧𑀭𑀺𑀩𑁆𑀩𑀸𑀚𑀺𑀓𑀸𑀦𑀁 𑀧𑀩𑁆𑀩𑀚𑁆𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑁂𑀲𑀸𑀮𑀺𑀬𑀁 𑀓𑀺𑀭 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀁 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺 𑀲𑀢𑁆𑀢 𑀘 𑀮𑀺𑀘𑁆𑀙𑀯𑀻 𑀯𑀲𑀺𑀁𑀲𑀼. 𑀢𑁂 𑀲𑀩𑁆𑀩𑁂𑀧𑀺 𑀧𑀼𑀘𑁆𑀙𑀸𑀧𑀝𑀺𑀧𑀼𑀘𑁆𑀙𑀸𑀘𑀺𑀢𑁆𑀢𑀓𑀸 𑀅𑀳𑁂𑀲𑀼𑀁. 𑀅𑀣𑁂𑀓𑁄 𑀧𑀜𑁆𑀘𑀲𑀼 𑀯𑀸𑀤𑀲𑀢𑁂𑀲𑀼 𑀩𑁆𑀬𑀢𑁆𑀢𑁄 𑀦𑀺𑀕𑀡𑁆𑀞𑁄 𑀯𑁂𑀲𑀸𑀮𑀺𑀬𑀁 𑀲𑀫𑁆𑀧𑀸𑀧𑀼𑀡𑀺, 𑀢𑁂 𑀢𑀲𑁆𑀲 𑀲𑀗𑁆𑀕𑀳𑀁 𑀅𑀓𑀁𑀲𑀼. 𑀅𑀧𑀭𑀸𑀧𑀺 𑀏𑀯𑀭𑀽𑀧𑀸 𑀦𑀺𑀕𑀡𑁆𑀞𑀻 𑀲𑀫𑁆𑀧𑀸𑀧𑀼𑀡𑀺 ¶ . 𑀭𑀸𑀚𑀸𑀦𑁄 𑀤𑁆𑀯𑁂𑀧𑀺 𑀚𑀦𑁂 𑀯𑀸𑀤𑀁 𑀓𑀸𑀭𑁂𑀲𑀼𑀁, 𑀉𑀪𑁄𑀧𑀺 𑀲𑀤𑀺𑀲𑀸𑀯 𑀅𑀳𑁂𑀲𑀼𑀁. 𑀢𑀢𑁄 𑀮𑀺𑀘𑁆𑀙𑀯𑀻𑀦𑀁 𑀏𑀢𑀤𑀳𑁄𑀲𑀺 ‘‘𑀇𑀫𑁂 𑀤𑁆𑀯𑁂𑀧𑀺 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄 𑀧𑀼𑀢𑁆𑀢𑁄 𑀩𑁆𑀬𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂𑀲𑀁 𑀯𑀺𑀯𑀸𑀳𑀁 𑀓𑀸𑀭𑁂𑀢𑁆𑀯𑀸 𑀤𑁆𑀯𑁂𑀧𑀺 𑀏𑀓𑀢𑁄 𑀯𑀸𑀲𑁂𑀲𑀼𑀁. 𑀅𑀣 𑀦𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀝𑀺𑀧𑀸𑀝𑀺𑀬𑀸 𑀘𑀢𑀲𑁆𑀲𑁄 𑀤𑀸𑀭𑀺𑀓𑀸𑀬𑁄 𑀏𑀓𑁄 𑀘 𑀤𑀸𑀭𑀓𑁄 𑀚𑀸𑀬𑀺. 𑀤𑀸𑀭𑀺𑀓𑀸𑀦𑀁 ‘‘𑀲𑀘𑁆𑀘𑀸, 𑀮𑁄𑀮𑀸, 𑀅𑀯𑀥𑀸𑀭𑀺𑀓𑀸, 𑀧𑀝𑀺𑀘𑁆𑀙𑀸𑀤𑀸’’𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀤𑀸𑀭𑀓𑀲𑁆𑀲 ‘‘𑀲𑀘𑁆𑀘𑀓𑁄’’𑀢𑀺. 𑀢𑁂 ¶ 𑀧𑀜𑁆𑀘𑀧𑀺 𑀚𑀦𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸 𑀫𑀸𑀢𑀺𑀢𑁄 𑀧𑀜𑁆𑀘 𑀯𑀸𑀤𑀲𑀢𑀸𑀦𑀺, 𑀧𑀺𑀢𑀺𑀢𑁄 𑀧𑀜𑁆𑀘 𑀯𑀸𑀤𑀲𑀢𑀸𑀦𑀻𑀢𑀺 𑀯𑀸𑀤𑀲𑀳𑀲𑁆𑀲𑀁 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀫𑀸𑀢𑀸𑀧𑀺𑀢𑀭𑁄 𑀤𑀸𑀭𑀺𑀓𑀸𑀦𑀁 𑀏𑀯𑀁 𑀑𑀯𑀤𑀺𑀁𑀲𑀼 ‘‘𑀲𑀘𑁂 𑀓𑁄𑀘𑀺 𑀕𑀺𑀳𑀻 𑀢𑀼𑀫𑁆𑀳𑀸𑀓𑀁 𑀯𑀸𑀤𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀪𑀯𑁂𑀬𑁆𑀬𑀸𑀣. 𑀲𑀘𑁂 𑀧𑀩𑁆𑀩𑀚𑀺𑀢𑁄 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁂𑀬𑁆𑀬𑀸𑀣𑀸’’𑀢𑀺.

𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀢𑁂𑀲𑀼 𑀓𑀸𑀮𑀓𑀢𑁂𑀲𑀼 𑀲𑀘𑁆𑀘𑀓𑀦𑀺𑀕𑀡𑁆𑀞𑁄 𑀢𑀢𑁆𑀣𑁂𑀯 𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀻𑀦𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀯𑀲𑀺. 𑀪𑀕𑀺𑀦𑀺𑀬𑁄 𑀚𑀫𑁆𑀩𑀼𑀲𑀸𑀔𑀁 𑀕𑀳𑁂𑀢𑁆𑀯𑀸 𑀯𑀸𑀤𑀢𑁆𑀣𑀸𑀬 ¶ 𑀦𑀕𑀭𑀸 𑀦𑀕𑀭𑀁 𑀘𑀭𑀫𑀸𑀦𑀸 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀲𑀸𑀔𑀁 𑀦𑀺𑀔𑀡𑀺𑀢𑁆𑀯𑀸 ‘‘𑀬𑁄 𑀅𑀫𑁆𑀳𑀸𑀓𑀁 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀢𑀺 𑀕𑀺𑀳𑀻 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸, 𑀲𑁄 𑀏𑀢𑀁 𑀧𑀁𑀲𑀼𑀧𑀼𑀜𑁆𑀚𑀁 𑀧𑀸𑀤𑁂𑀳𑀺 𑀯𑀺𑀓𑀺𑀭𑀺𑀢𑁆𑀯𑀸 𑀧𑀸𑀤𑁂𑀳𑁂𑀯 𑀲𑀸𑀔𑀁 𑀫𑀤𑁆𑀤𑀢𑀽’’𑀢𑀺 𑀤𑀸𑀭𑀓𑀸𑀦𑀁 𑀯𑀢𑁆𑀯𑀸 𑀪𑀺𑀓𑁆𑀔𑀸𑀬 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀭𑀺𑀢𑁆𑀢𑀖𑀝𑁂𑀲𑀼 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀕𑀺𑀮𑀸𑀦𑁂 𑀘 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀤𑀺𑀯𑀸𑀢𑀭𑀁 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀢𑀁 𑀲𑀸𑀔𑀁 𑀤𑀺𑀲𑁆𑀯𑀸 𑀤𑀸𑀭𑀓𑁂 𑀧𑀼𑀘𑁆𑀙𑀺, 𑀤𑀸𑀭𑀓𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀣𑁂𑀭𑁄 𑀤𑀸𑀭𑀓𑁂𑀳𑁂𑀯 𑀧𑀸𑀢𑀸𑀧𑁂𑀢𑁆𑀯𑀸 𑀫𑀤𑁆𑀤𑀸𑀧𑁂𑀢𑁆𑀯𑀸 ‘‘𑀬𑁂𑀳𑀺 𑀅𑀬𑀁 𑀲𑀸𑀔𑀸 𑀞𑀧𑀺𑀢𑀸, 𑀢𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸𑀯 𑀆𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀫𑀁 𑀧𑀲𑁆𑀲𑀦𑁆𑀢𑀽’’𑀢𑀺 𑀤𑀸𑀭𑀓𑀸𑀦𑀁 𑀯𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺. 𑀢𑀸𑀧𑀺 𑀧𑀭𑀺𑀩𑁆𑀩𑀸𑀚𑀺𑀓𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀆𑀕𑀢𑀸 𑀲𑀸𑀔𑀁 𑀫𑀤𑁆𑀤𑀺𑀢𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀸𑀬𑀁 𑀫𑀤𑁆𑀤𑀺𑀢𑀸’’𑀢𑀺 𑀯𑀢𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦, 𑀲𑀘𑁂 𑀢𑀼𑀫𑁆𑀳𑁂 𑀯𑀸𑀤𑀢𑁆𑀣𑀺𑀓𑀸, 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀕𑀘𑁆𑀙𑀣𑀸’’𑀢𑀺 𑀤𑀸𑀭𑀓𑁂𑀳𑀺 𑀯𑀼𑀢𑁆𑀢𑀸 𑀧𑀼𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀅𑀜𑁆𑀜𑀁 𑀓𑀺𑀜𑁆𑀘𑀺 𑀚𑀸𑀦𑀸𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀦 𑀚𑀸𑀦𑀸𑀫, 𑀲𑀸𑀫𑀻’’𑀢𑀺. ‘‘𑀅𑀳𑀁 𑀧𑀦 𑀯𑁄 𑀓𑀺𑀜𑁆𑀘𑀺 𑀧𑀼𑀘𑁆𑀙𑀸𑀫𑀻’’𑀢𑀺. ‘‘𑀧𑀼𑀘𑁆𑀙, 𑀲𑀸𑀫𑀺, 𑀚𑀸𑀦𑀦𑁆𑀢𑀺𑀬𑁄 𑀓𑀣𑁂𑀲𑁆𑀲𑀸𑀫𑀸’’𑀢𑀺.

𑀣𑁂𑀭𑁄 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸 𑀦 𑀚𑀸𑀦𑀺𑀁𑀲𑀼. 𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀸 ‘‘𑀅𑀫𑁆𑀳𑀸𑀓𑀁, 𑀲𑀸𑀫𑀺, 𑀧𑀭𑀸𑀚𑀬𑁄, 𑀢𑀼𑀫𑁆𑀳𑀸𑀓𑀁 𑀚𑀬𑁄’’𑀢𑀺 𑀆𑀳𑀁𑀲𑀼. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀫𑀸𑀢𑀸𑀧𑀺𑀢𑀽𑀳𑀺 𑀅𑀬𑀁 𑀑𑀯𑀸𑀤𑁄 𑀤𑀺𑀦𑁆𑀦𑁄 ‘𑀲𑀘𑁂 𑀯𑁄 𑀕𑀺𑀳𑀻 𑀯𑀸𑀤𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀚𑀸𑀧𑀢𑀺𑀬𑁄 𑀪𑀯𑁂𑀬𑁆𑀬𑀸𑀣. 𑀲𑀘𑁂 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁂𑀬𑁆𑀬𑀸𑀣𑀸’𑀢𑀺, 𑀧𑀩𑁆𑀩𑀚𑁆𑀚𑀁 𑀦𑁄 𑀤𑁂𑀣𑀸’’𑀢𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀢𑀸 𑀲𑀩𑁆𑀩𑀸𑀧𑀺 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 ¶ 𑀧𑀸𑀧𑀼𑀡𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 ¶ 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘𑀢𑀼𑀦𑁆𑀦𑀁 𑀧𑀭𑀺𑀩𑁆𑀩𑀸𑀚𑀺𑀓𑀸𑀦𑀁 𑀅𑀯𑀲𑁆𑀲𑀬𑁄 𑀳𑀼𑀢𑁆𑀯𑀸 𑀲𑀩𑁆𑀩𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀏𑀢𑀸𑀲𑀁 𑀅𑀯𑀲𑁆𑀲𑀬𑁄 ¶ 𑀅𑀳𑁄𑀲𑀺, 𑀇𑀤𑀸𑀦𑀺 𑀧𑀦 𑀧𑀩𑁆𑀩𑀚𑁆𑀚𑀸𑀪𑀺𑀲𑁂𑀓𑀁 𑀤𑀸𑀧𑁂𑀲𑀺, 𑀧𑀼𑀩𑁆𑀩𑁂 𑀭𑀸𑀚𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀸𑀮𑀺𑀗𑁆𑀕𑀭𑀝𑁆𑀞𑁂 𑀤𑀦𑁆𑀢𑀧𑀼𑀭𑀦𑀕𑀭𑁂 𑀓𑀸𑀮𑀺𑀗𑁆𑀕𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀲𑁆𑀲𑀓𑀭𑀝𑁆𑀞𑁂 𑀧𑀸𑀝𑀮𑀺𑀦𑀕𑀭𑁂 𑀅𑀲𑁆𑀲𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀓𑀸𑀮𑀺𑀗𑁆𑀕𑁄 𑀲𑀫𑁆𑀧𑀦𑁆𑀦𑀩𑀮𑀯𑀸𑀳𑀦𑁄 𑀲𑀬𑀫𑁆𑀧𑀺 𑀦𑀸𑀕𑀩𑀮𑁄 𑀧𑀝𑀺𑀬𑁄𑀥𑀁 𑀦 𑀧𑀲𑁆𑀲𑀢𑀺. 𑀲𑁄 𑀬𑀼𑀚𑁆𑀛𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀆𑀭𑁄𑀘𑁂𑀲𑀺 ‘‘𑀅𑀳𑀁 𑀬𑀼𑀤𑁆𑀥𑀢𑁆𑀣𑀺𑀓𑁄, 𑀧𑀝𑀺𑀬𑁄𑀥𑀁 𑀧𑀦 𑀦 𑀧𑀲𑁆𑀲𑀸𑀫𑀺, 𑀓𑀺𑀁 𑀓𑀭𑁄𑀫𑀸’’𑀢𑀺. 𑀅𑀫𑀘𑁆𑀘𑀸 ‘‘𑀅𑀢𑁆𑀣𑁂𑀓𑁄, 𑀫𑀳𑀸𑀭𑀸𑀚, 𑀉𑀧𑀸𑀬𑁄, 𑀥𑀻𑀢𑀭𑁄 𑀢𑁂 𑀘𑀢𑀲𑁆𑀲𑁄 𑀉𑀢𑁆𑀢𑀫𑀭𑀽𑀧𑀥𑀭𑀸, 𑀢𑀸 𑀧𑀲𑀸𑀥𑁂𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀮𑀧𑀭𑀺𑀯𑀼𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘𑀭𑀸𑀧𑁂𑀣. 𑀬𑁄 𑀭𑀸𑀚𑀸 𑀢𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀓𑀸𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀢𑀸𑀳𑀺 𑀕𑀢𑀕𑀢𑀝𑁆𑀞𑀸𑀦𑁂 𑀭𑀸𑀚𑀸𑀦𑁄 𑀪𑀬𑁂𑀦 𑀢𑀸𑀲𑀁 𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀢𑁆𑀯𑀸 𑀩𑀳𑀺𑀦𑀕𑀭𑁂𑀬𑁂𑀯 𑀯𑀲𑀸𑀧𑁂𑀦𑁆𑀢𑀺. 𑀏𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀯𑀺𑀘𑀭𑀺𑀢𑁆𑀯𑀸 𑀅𑀲𑁆𑀲𑀓𑀭𑀝𑁆𑀞𑁂 𑀧𑀸𑀝𑀮𑀺𑀦𑀕𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀲𑁆𑀲𑀓𑁄𑀧𑀺 𑀦𑀕𑀭𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀸𑀧𑁂𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺. 𑀢𑀲𑁆𑀲 𑀦𑀦𑁆𑀤𑀺𑀲𑁂𑀦𑁄 𑀦𑀸𑀫 𑀅𑀫𑀘𑁆𑀘𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀉𑀧𑀸𑀬𑀓𑀼𑀲𑀮𑁄. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸 𑀓𑀺𑀭 𑀭𑀸𑀚𑀥𑀻𑀢𑀭𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀯𑀺𑀘𑀭𑀺𑀢𑁆𑀯𑀸 𑀧𑀝𑀺𑀬𑁄𑀥𑀁 𑀦 𑀮𑀪𑀺𑀁𑀲𑀼, 𑀏𑀯𑀁 𑀲𑀦𑁆𑀢𑁂 𑀚𑀫𑁆𑀩𑀼𑀤𑀻𑀧𑁄 𑀢𑀼𑀘𑁆𑀙𑁄 𑀦𑀸𑀫 𑀅𑀳𑁄𑀲𑀺, 𑀅𑀳𑀁 𑀓𑀸𑀮𑀺𑀗𑁆𑀕𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀕𑀭𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀤𑁄𑀯𑀸𑀭𑀺𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 𑀢𑀸𑀲𑀁 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑀼𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧.

‘‘𑀯𑀺𑀯𑀭𑀣𑀺𑀫𑀸𑀲𑀁 𑀤𑁆𑀯𑀸𑀭𑀁, 𑀦𑀕𑀭𑀁 𑀧𑀯𑀺𑀲𑀦𑁆𑀢𑀼 𑀅𑀭𑀼𑀡𑀭𑀸𑀚𑀲𑁆𑀲;

𑀲𑀻𑀳𑁂𑀦 𑀲𑀼𑀲𑀺𑀝𑁆𑀞𑁂𑀦, 𑀲𑀼𑀭𑀓𑁆𑀔𑀺𑀢𑀁 𑀦𑀦𑁆𑀤𑀺𑀲𑁂𑀦𑁂𑀦𑀸’’𑀢𑀺.

𑀢𑀢𑁆𑀣 𑀅𑀭𑀼𑀡𑀭𑀸𑀚𑀲𑁆𑀲𑀸𑀢𑀺 𑀲𑁄 𑀳𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 𑀭𑀝𑁆𑀞𑀦𑀸𑀫𑀯𑀲𑁂𑀦 𑀅𑀲𑁆𑀲𑀓𑁄 𑀦𑀸𑀫 𑀚𑀸𑀢𑁄, 𑀓𑀼𑀮𑀤𑀢𑁆𑀢𑀺𑀬𑀁 𑀧𑀦𑀲𑁆𑀲 𑀦𑀸𑀫𑀁 𑀅𑀭𑀼𑀡𑁄𑀢𑀺 ¶ ¶ . 𑀢𑁂𑀦𑀸𑀳 ‘‘𑀅𑀭𑀼𑀡𑀭𑀸𑀚𑀲𑁆𑀲𑀸’’𑀢𑀺. 𑀲𑀻𑀳𑁂𑀦𑀸𑀢𑀺 𑀧𑀼𑀭𑀺𑀲𑀲𑀻𑀳𑁂𑀦. 𑀲𑀼𑀲𑀺𑀝𑁆𑀞𑁂𑀦𑀸𑀢𑀺 𑀆𑀘𑀭𑀺𑀬𑁂𑀳𑀺 𑀲𑀼𑀝𑁆𑀞𑀼 𑀅𑀦𑀼𑀲𑀸𑀲𑀺𑀢𑁂𑀦. 𑀦𑀦𑁆𑀤𑀺𑀲𑁂𑀦𑁂𑀦𑀸𑀢𑀺 𑀫𑀬𑀸 𑀦𑀦𑁆𑀤𑀺𑀲𑁂𑀦𑁂𑀦 𑀦𑀸𑀫.

𑀲𑁄 𑀏𑀯𑀁 𑀯𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀢𑀸 𑀕𑀳𑁂𑀢𑁆𑀯𑀸 𑀅𑀲𑁆𑀲𑀓𑀭𑀜𑁆𑀜𑁄 𑀤𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣, 𑀬𑀼𑀤𑁆𑀥𑁂 𑀲𑀢𑀺 𑀅𑀳𑀁 𑀚𑀺𑀦𑀺𑀲𑁆𑀲𑀸𑀫𑀺, 𑀇𑀫𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀭𑀸𑀚𑀥𑀻𑀢𑀭𑁄 𑀫𑀳𑁂𑀲𑀺𑀬𑁄 𑀓𑀭𑁄𑀣𑀸’’𑀢𑀺 𑀢𑀸𑀲𑀁 𑀅𑀪𑀺𑀲𑁂𑀓𑀁 𑀤𑀸𑀧𑁂𑀢𑁆𑀯𑀸 𑀢𑀸𑀳𑀺 𑀲𑀤𑁆𑀥𑀺𑀁 𑀆𑀕𑀢𑁂 𑀧𑀼𑀭𑀺𑀲𑁂 ‘‘𑀕𑀘𑁆𑀙𑀣, 𑀢𑀼𑀫𑁆𑀳𑁂 𑀭𑀸𑀚𑀥𑀻𑀢𑀽𑀦𑀁 𑀅𑀲𑁆𑀲𑀓𑀭𑀸𑀚𑁂𑀦 𑀫𑀳𑁂𑀲𑀺𑀝𑁆𑀞𑀸𑀦𑁂 ¶ 𑀞𑀧𑀺𑀢𑀪𑀸𑀯𑀁 𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑁄 𑀆𑀘𑀺𑀓𑁆𑀔𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀼𑀁. 𑀓𑀸𑀮𑀺𑀗𑁆𑀕𑁄 ‘‘𑀦 𑀳𑀺 𑀦𑀽𑀦 𑀲𑁄 𑀫𑀬𑁆𑀳𑀁 𑀩𑀮𑀁 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀯𑀸 𑀢𑀸𑀯𑀤𑁂𑀯 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺. 𑀦𑀦𑁆𑀤𑀺𑀲𑁂𑀦𑁄 𑀢𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀓𑀺𑀭 𑀭𑀚𑁆𑀚𑀲𑀻𑀫𑀸𑀬𑀫𑁂𑀯 𑀳𑁄𑀢𑀼, 𑀫𑀸 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀭𑀚𑁆𑀚𑀲𑀻𑀫𑀁 𑀑𑀓𑁆𑀓𑀫𑀢𑀼, 𑀉𑀪𑀺𑀦𑁆𑀦𑀁 𑀭𑀚𑁆𑀚𑀸𑀦𑀁 𑀅𑀦𑁆𑀢𑀭𑁂 𑀬𑀼𑀤𑁆𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑁄 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀧𑀭𑀺𑀬𑀦𑁆𑀢𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀅𑀲𑁆𑀲𑀓𑁄𑀧𑀺 𑀅𑀢𑁆𑀢𑀦𑁄 𑀭𑀚𑁆𑀚𑀧𑀭𑀺𑀬𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀚𑁆𑀚𑀸𑀦𑀁 𑀅𑀦𑁆𑀢𑀭𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀢𑀺. 𑀓𑀸𑀮𑀺𑀗𑁆𑀕𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀫𑀡𑀸 𑀦𑀸𑀫 𑀓𑀺𑀜𑁆𑀘𑀺 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀺, 𑀓𑀲𑁆𑀲 𑀚𑀬𑁄 𑀯𑀸 𑀧𑀭𑀸𑀚𑀬𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀢𑀸𑀧𑀲𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀸𑀮𑀺𑀗𑁆𑀕𑁄 𑀘 𑀅𑀲𑁆𑀲𑀓𑁄 𑀘 𑀬𑀼𑀚𑁆𑀛𑀺𑀢𑀼𑀓𑀸𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀚𑁆𑀚𑀲𑀻𑀫𑀸𑀬𑀫𑁂𑀯 𑀞𑀺𑀢𑀸, 𑀏𑀢𑁂𑀲𑀼 𑀓𑀲𑁆𑀲 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀓𑀲𑁆𑀲 𑀧𑀭𑀸𑀚𑀬𑁄’’𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀧𑀼𑀜𑁆𑀜, 𑀅𑀳𑀁 ‘‘𑀅𑀲𑀼𑀓𑀲𑁆𑀲 𑀚𑀬𑁄, 𑀅𑀲𑀼𑀓𑀲𑁆𑀲 𑀧𑀭𑀸𑀚𑀬𑁄’’𑀢𑀺 𑀦 𑀚𑀸𑀦𑀸𑀫𑀺, 𑀲𑀓𑁆𑀓𑁄 𑀧𑀦 𑀤𑁂𑀯𑀭𑀸𑀚𑀸 𑀇𑀥𑀸𑀕𑀘𑁆𑀙𑀢𑀺, 𑀢𑀫𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀺, 𑀲𑁆𑀯𑁂 𑀆𑀕𑀘𑁆𑀙𑁂𑀬𑁆𑀬𑀸𑀲𑀻𑀢𑀺. 𑀲𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 ¶ 𑀦𑀺𑀲𑀻𑀤𑀺, 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀓𑀸𑀮𑀺𑀗𑁆𑀕𑁄 𑀚𑀺𑀦𑀺𑀲𑁆𑀲𑀢𑀺, 𑀅𑀲𑁆𑀲𑀓𑁄 𑀧𑀭𑀸𑀚𑀺𑀲𑁆𑀲𑀢𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺.

𑀓𑀸𑀮𑀺𑀗𑁆𑀕𑁄 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺, 𑀩𑁄𑀥𑀺𑀲𑀢𑁆𑀢𑁄𑀧𑀺𑀲𑁆𑀲 𑀆𑀘𑀺𑀓𑁆𑀔𑀺. 𑀲𑁄 ‘‘𑀓𑀺𑀁 𑀦𑀸𑀫 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 ‘‘𑀅𑀳𑀁 𑀓𑀺𑀭 𑀚𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀢𑀼𑀝𑁆𑀞𑀺𑀬𑀸 𑀧𑀓𑁆𑀓𑀸𑀫𑀺. 𑀲𑀸 𑀓𑀣𑀸 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀅𑀲𑁆𑀲𑀓𑁄 𑀦𑀦𑁆𑀤𑀺𑀲𑁂𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀸𑀮𑀺𑀗𑁆𑀕𑁄 𑀓𑀺𑀭 𑀚𑀺𑀦𑀺𑀲𑁆𑀲𑀢𑀺𑀁 ¶ , 𑀫𑀬𑀁 𑀧𑀭𑀸𑀚𑀺𑀲𑁆𑀲𑀸𑀫, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀆𑀳. 𑀲𑁄 ‘‘𑀓𑁄 𑀏𑀢𑀁 𑀚𑀸𑀦𑀸𑀢𑀺 𑀫𑀳𑀸𑀭𑀸𑀚, 𑀓𑀲𑁆𑀲 𑀚𑀬𑁄 𑀯𑀸 𑀧𑀭𑀸𑀚𑀬𑁄 𑀯𑀸, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀭𑀸𑀚𑀸𑀦𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀪𑀦𑁆𑀢𑁂, 𑀓𑁄 𑀚𑀺𑀦𑀺𑀲𑁆𑀲𑀢𑀺, 𑀓𑁄 𑀧𑀭𑀸𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀸𑀮𑀺𑀗𑁆𑀕𑁄 𑀚𑀺𑀦𑀺𑀲𑁆𑀲𑀢𑀺, 𑀅𑀲𑁆𑀲𑀓𑁄 𑀧𑀭𑀸𑀚𑀺𑀲𑁆𑀲𑀢𑀻’’𑀢𑀺? ‘‘𑀪𑀦𑁆𑀢𑁂, 𑀚𑀺𑀦𑀦𑁆𑀢𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀓𑀺𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀧𑀭𑀸𑀚𑀺𑀦𑀦𑁆𑀢𑀲𑁆𑀲𑀸’’𑀢𑀺? ‘‘𑀫𑀳𑀸𑀧𑀼𑀜𑁆𑀜, 𑀚𑀺𑀦𑀦𑁆𑀢𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸 𑀲𑀩𑁆𑀩𑀲𑁂𑀢𑁄 𑀉𑀲𑀪𑁄 𑀪𑀯𑀺𑀲𑁆𑀲𑀢𑀺, 𑀇𑀢𑀭𑀲𑁆𑀲 𑀲𑀩𑁆𑀩𑀓𑀸𑀴𑀓𑁄, 𑀉𑀪𑀺𑀦𑁆𑀦𑀫𑁆𑀧𑀺 𑀆𑀭𑀓𑁆𑀔𑀤𑁂𑀯𑀢𑀸 𑀬𑀼𑀚𑁆𑀛𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀦𑀦𑁆𑀤𑀺𑀲𑁂𑀦𑁄 𑀢𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀳𑀸𑀬𑁂 𑀲𑀳𑀲𑁆𑀲𑀫𑀢𑁆𑀢𑁂 𑀫𑀳𑀸𑀬𑁄𑀥𑁂 𑀕𑀳𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 ‘‘𑀅𑀫𑁆𑀪𑁄, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀇𑀫𑀲𑁆𑀫𑀺𑀁 𑀧𑀧𑀸𑀢𑁂 𑀧𑀢𑀣𑀸’’𑀢𑀺. 𑀢𑁂 𑀧𑀢𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀅𑀣 𑀦𑁂 𑀯𑀸𑀭𑁂𑀢𑁆𑀯𑀸 ‘‘𑀅𑀮𑀁 𑀏𑀢𑁆𑀣 𑀧𑀢𑀦𑁂𑀦, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀲𑀼𑀳𑀤𑀬𑀸 𑀅𑀦𑀺𑀯𑀢𑁆𑀢𑀺𑀦𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀣𑀸’’𑀢𑀺 𑀆𑀳. 𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼𑀁.

𑀅𑀣 ¶ 𑀲𑀗𑁆𑀕𑀸𑀫𑁂 𑀉𑀧𑀝𑁆𑀞𑀺𑀢𑁂 𑀓𑀸𑀮𑀺𑀗𑁆𑀕𑁄 ‘‘𑀅𑀳𑀁 𑀓𑀺𑀭 𑀚𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀯𑁄𑀲𑀸𑀦𑀁 𑀆𑀧𑀚𑁆𑀚𑀺, 𑀩𑀮𑀓𑀸𑀬𑀸𑀧𑀺𑀲𑁆𑀲 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀚𑀬𑁄’’𑀢𑀺 𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀦𑁆𑀦𑀸𑀳𑀁 𑀅𑀓𑀢𑁆𑀯𑀸 𑀯𑀕𑁆𑀕𑀯𑀕𑁆𑀕𑀸 ¶ 𑀳𑀼𑀢𑁆𑀯𑀸 𑀬𑀣𑀸𑀭𑀼𑀘𑀺 𑀧𑀓𑁆𑀓𑀫𑀺𑀁𑀲𑀼, 𑀯𑀻𑀭𑀺𑀬𑀓𑀭𑀡𑀓𑀸𑀮𑁂 𑀯𑀻𑀭𑀺𑀬𑀁 𑀦 𑀓𑀭𑀺𑀁𑀲𑀼. 𑀉𑀪𑁄𑀧𑀺 𑀭𑀸𑀚𑀸𑀦𑁄 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀉𑀪𑀺𑀦𑁆𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀆𑀭𑀓𑁆𑀔𑀤𑁂𑀯𑀢𑀸 𑀲𑀩𑁆𑀩𑀲𑁂𑀢𑁄 𑀉𑀲𑀪𑁄 𑀅𑀳𑁄𑀲𑀺, 𑀇𑀢𑀭𑀲𑁆𑀲 𑀲𑀩𑁆𑀩𑀓𑀸𑀴𑀓𑁄. 𑀢𑀸 𑀤𑁂𑀯𑀢𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀬𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂 𑀧𑀦 𑀉𑀲𑀪𑀸 𑀉𑀪𑀺𑀦𑁆𑀦𑀁 𑀭𑀸𑀚𑀽𑀦𑀁𑀬𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀁. 𑀦𑀦𑁆𑀤𑀺𑀲𑁂𑀦𑁄 𑀅𑀲𑁆𑀲𑀓𑀁 𑀧𑀼𑀘𑁆𑀙𑀺 ‘‘𑀧𑀜𑁆𑀜𑀸𑀬𑀢𑀺 𑀢𑁂, 𑀫𑀳𑀸𑀭𑀸𑀚, 𑀆𑀭𑀓𑁆𑀔𑀤𑁂𑀯𑀢𑀸’’𑀢𑀺. ‘‘𑀆𑀫, 𑀧𑀜𑁆𑀜𑀸𑀬𑀢𑀻’’𑀢𑀺. ‘‘𑀓𑁂𑀦𑀸𑀓𑀸𑀭𑁂𑀦𑀸’’𑀢𑀺. ‘‘𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀆𑀭𑀓𑁆𑀔𑀤𑁂𑀯𑀢𑀸 𑀲𑀩𑁆𑀩𑀲𑁂𑀢𑁄 𑀉𑀲𑀪𑁄 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀅𑀫𑁆𑀳𑀸𑀓𑀁 𑀆𑀭𑀓𑁆𑀔𑀤𑁂𑀯𑀢𑀸 𑀲𑀩𑁆𑀩𑀓𑀸𑀴𑀓𑁄 𑀓𑀺𑀮𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺. ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀫𑀸 𑀪𑀸𑀬𑀣, 𑀫𑀬𑀁 𑀚𑀺𑀦𑀺𑀲𑁆𑀲𑀸𑀫, 𑀓𑀸𑀮𑀺𑀗𑁆𑀕𑁄 𑀧𑀭𑀸𑀚𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀢𑀭𑀺𑀢𑁆𑀯𑀸 𑀇𑀫𑀁 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀲𑀼𑀲𑀺𑀓𑁆𑀔𑀺𑀢𑀲𑀺𑀦𑁆𑀥𑀯𑀁 𑀉𑀤𑀭𑀧𑀲𑁆𑀲𑁂 𑀯𑀸𑀫𑀳𑀢𑁆𑀣𑁂𑀦 𑀉𑀧𑁆𑀧𑀻𑀴𑁂𑀢𑁆𑀯𑀸 𑀇𑀫𑀺𑀦𑀸 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀆𑀭𑀓𑁆𑀔𑀤𑁂𑀯𑀢𑀁 𑀲𑀢𑁆𑀢𑀺𑀧𑁆𑀧𑀳𑀸𑀭𑁂𑀦 𑀧𑀸𑀢𑁂𑀣, 𑀢𑀢𑁄 𑀫𑀬𑀁 𑀲𑀳𑀲𑁆𑀲𑀫𑀢𑁆𑀢𑀸 𑀲𑀢𑁆𑀢𑀺𑀲𑀳𑀲𑁆𑀲𑁂𑀦 𑀧𑀳𑀭𑀺𑀲𑁆𑀲𑀸𑀫 ¶ , 𑀏𑀯𑀁 𑀓𑀸𑀮𑀺𑀗𑁆𑀕𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸 𑀦𑀲𑁆𑀲𑀺𑀲𑁆𑀲𑀢𑀺, 𑀢𑀢𑁄 𑀓𑀸𑀮𑀺𑀗𑁆𑀕𑁄 𑀧𑀭𑀸𑀚𑀺𑀲𑁆𑀲𑀢𑀺, 𑀫𑀬𑀁 𑀚𑀺𑀦𑀺𑀲𑁆𑀲𑀸𑀫𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀦𑀦𑁆𑀤𑀺𑀲𑁂𑀦𑁂𑀦 𑀤𑀺𑀦𑁆𑀦𑀲𑀜𑁆𑀜𑀸𑀬 𑀕𑀦𑁆𑀢𑁆𑀯𑀸 𑀲𑀢𑁆𑀢𑀺𑀬𑀸 𑀧𑀳𑀭𑀺, 𑀲𑀽𑀭𑀬𑁄𑀥𑀲𑀳𑀲𑁆𑀲𑀸𑀧𑀺 𑀅𑀫𑀘𑁆𑀘𑀸 𑀲𑀢𑁆𑀢𑀺𑀲𑀳𑀲𑁆𑀲𑁂𑀦 𑀧𑀳𑀭𑀺𑀁𑀲𑀼. 𑀆𑀭𑀓𑁆𑀔𑀤𑁂𑀯𑀢𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺, 𑀢𑀸𑀯𑀤𑁂𑀯 𑀓𑀸𑀮𑀺𑀗𑁆𑀕𑁄 𑀧𑀭𑀸𑀚𑀺𑀢𑁆𑀯𑀸 𑀧𑀮𑀸𑀬𑀺. 𑀢𑀁 𑀧𑀮𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀳𑀲𑁆𑀲𑀫𑀢𑁆𑀢𑀸 𑀅𑀫𑀘𑁆𑀘𑀸 ‘‘𑀓𑀸𑀮𑀺𑀗𑁆𑀕𑁄 𑀧𑀮𑀸𑀬𑀢𑀻’’𑀢𑀺 𑀉𑀦𑁆𑀦𑀤𑀺𑀁𑀲𑀼. 𑀓𑀸𑀮𑀺𑀗𑁆𑀕𑁄 𑀫𑀭𑀡𑀪𑀬𑀪𑀻𑀢𑁄 𑀧𑀮𑀸𑀬𑀫𑀸𑀦𑁄 𑀢𑀁 𑀢𑀸𑀧𑀲𑀁 𑀅𑀓𑁆𑀓𑁄𑀲𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨.

‘‘𑀚𑀬𑁄 𑀓𑀮𑀺𑀗𑁆𑀕𑀸𑀦𑀫𑀲𑀬𑁆𑀳𑀲𑀸𑀳𑀺𑀦𑀁, 𑀧𑀭𑀸𑀚𑀬𑁄 𑀅𑀦𑀬𑁄 𑀅𑀲𑁆𑀲𑀓𑀸𑀦𑀁;

𑀇𑀘𑁆𑀘𑁂𑀯 ¶ 𑀢𑁂 𑀪𑀸𑀲𑀺𑀢𑀁 𑀩𑁆𑀭𑀳𑁆𑀫𑀘𑀸𑀭𑀺, 𑀦 𑀉𑀚𑁆𑀚𑀼𑀪𑀽𑀢𑀸 𑀯𑀺𑀢𑀣𑀁 𑀪𑀡𑀦𑁆𑀢𑀻’’𑀢𑀺.

𑀢𑀢𑁆𑀣 𑀅𑀲𑀬𑁆𑀳𑀲𑀸𑀳𑀺𑀦𑀦𑁆𑀢𑀺 𑀅𑀲𑀬𑁆𑀳𑀁 𑀤𑀼𑀲𑁆𑀲𑀳𑀁 𑀲𑀳𑀺𑀢𑀼𑀁 𑀲𑀫𑀢𑁆𑀣𑀸𑀦𑀁. 𑀇𑀘𑁆𑀘𑁂𑀯 𑀢𑁂 𑀪𑀸𑀲𑀺𑀢𑀦𑁆𑀢𑀺 𑀏𑀯𑀁 𑀢𑀬𑀸 𑀓𑀽𑀝𑀢𑀸𑀧𑀲 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀧𑀭𑀸𑀚𑀺𑀦𑀓𑀭𑀸𑀚𑀸𑀦𑀁 𑀚𑀺𑀦𑀺𑀲𑁆𑀲𑀢𑀺, 𑀚𑀺𑀦𑀦𑀭𑀸𑀚𑀸𑀦𑀜𑁆𑀘 𑀧𑀭𑀸𑀚𑀺𑀲𑁆𑀲𑀢𑀻𑀢𑀺 𑀪𑀸𑀲𑀺𑀢𑀁. 𑀦 𑀉𑀚𑁆𑀚𑀼𑀪𑀽𑀢𑀸𑀢𑀺 𑀬𑁂 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀉𑀚𑀼𑀪𑀽𑀢𑀸, 𑀦 𑀢𑁂 𑀫𑀼𑀲𑀸 𑀪𑀡𑀦𑁆𑀢𑀻𑀢𑀺.

𑀏𑀯𑀁 𑀲𑁄 𑀢𑀸𑀧𑀲𑀁 𑀅𑀓𑁆𑀓𑁄𑀲𑀦𑁆𑀢𑁄 𑀧𑀮𑀸𑀬𑀦𑁆𑀢𑁄 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀕𑀢𑁄, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺. 𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀓𑁆𑀓𑁄 𑀢𑀸𑀧𑀲𑀲𑁆𑀲 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀸𑀧𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩.

‘‘𑀤𑁂𑀯𑀸 ¶ 𑀫𑀼𑀲𑀸𑀯𑀸𑀤𑀫𑀼𑀧𑀸𑀢𑀺𑀯𑀢𑁆𑀢𑀸, 𑀲𑀘𑁆𑀘𑀁 𑀥𑀦𑀁 𑀧𑀭𑀫𑀁 𑀢𑁂𑀲𑀼 𑀲𑀓𑁆𑀓;

𑀢𑀁 𑀢𑁂 𑀫𑀼𑀲𑀸 𑀪𑀸𑀲𑀺𑀢𑀁 𑀤𑁂𑀯𑀭𑀸𑀚, 𑀓𑀺𑀁 𑀯𑀸 𑀧𑀝𑀺𑀘𑁆𑀘 𑀫𑀖𑀯𑀸 𑀫𑀳𑀺𑀦𑁆𑀤𑀸’’𑀢𑀺.

𑀢𑀢𑁆𑀣 𑀢𑀁 𑀢𑁂 𑀫𑀼𑀲𑀸 𑀪𑀸𑀲𑀺𑀢𑀦𑁆𑀢𑀺 𑀬𑀁 𑀢𑀬𑀸 𑀫𑀬𑁆𑀳𑀁 𑀪𑀸𑀲𑀺𑀢𑀁, 𑀢𑀁 𑀅𑀢𑁆𑀣𑀪𑀜𑁆𑀚𑀦𑀓𑀫𑀼𑀲𑀸𑀯𑀸𑀤𑀁 𑀓𑀣𑁂𑀦𑁆𑀢𑁂𑀦 𑀢𑀬𑀸 𑀫𑀼𑀲𑀸 𑀪𑀸𑀲𑀺𑀢𑀁, 𑀢𑀬𑀸 𑀓𑀺𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀏𑀯𑀁 𑀪𑀸𑀲𑀺𑀢𑀦𑁆𑀢𑀺?

𑀢𑀁 ¶ 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪.

‘‘𑀦𑀦𑀼 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡 𑀪𑀜𑁆𑀜𑀫𑀸𑀦𑁂, 𑀤𑁂𑀯𑀸 𑀦 𑀇𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲;

𑀤𑀫𑁄 𑀲𑀫𑀸𑀥𑀺 𑀫𑀦𑀲𑁄 𑀅𑀪𑁂𑀚𑁆𑀚𑁄, 𑀅𑀩𑁆𑀬𑀕𑁆𑀕𑀢𑀸 𑀦𑀺𑀓𑁆𑀓𑀫𑀦𑀜𑁆𑀘 𑀓𑀸𑀮𑁂;

𑀤𑀴𑁆𑀳𑀜𑁆𑀘 𑀯𑀺𑀭𑀺𑀬𑀁 𑀧𑀼𑀭𑀺𑀲𑀧𑀭𑀓𑁆𑀓𑀫𑁄 𑀘, 𑀢𑁂𑀦𑁂𑀯 𑀆𑀲𑀺 𑀯𑀺𑀚𑀬𑁄 𑀅𑀲𑁆𑀲𑀓𑀸𑀦’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀺𑀁 𑀢𑀬𑀸, 𑀩𑁆𑀭𑀸𑀳𑁆𑀫𑀡, 𑀢𑀢𑁆𑀣 𑀢𑀢𑁆𑀣 𑀯𑀘𑀦𑁂 𑀪𑀜𑁆𑀜𑀫𑀸𑀦𑁂 𑀇𑀤𑀁 𑀦 𑀲𑀼𑀢𑀧𑀼𑀩𑁆𑀩𑀁, 𑀬𑀁 𑀤𑁂𑀯𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲 𑀦 𑀇𑀲𑁆𑀲𑀦𑁆𑀢𑀺 𑀦 𑀉𑀲𑀽𑀬𑀦𑁆𑀢𑀺, 𑀅𑀲𑁆𑀲𑀓𑀭𑀜𑁆𑀜𑁄 ¶ 𑀯𑀻𑀭𑀺𑀬𑀓𑀭𑀡𑀯𑀲𑁂𑀦 𑀅𑀢𑁆𑀢𑀤𑀫𑀦𑀲𑀗𑁆𑀔𑀸𑀢𑁄 𑀤𑀫𑁄, 𑀲𑀫𑀕𑁆𑀕𑀪𑀸𑀯𑁂𑀦 𑀫𑀦𑀲𑁄 𑀅𑀪𑁂𑀚𑁆𑀚𑁄, 𑀅𑀪𑁂𑀚𑁆𑀚𑀲𑀫𑀸𑀥𑀺, 𑀅𑀲𑁆𑀲𑀓𑀭𑀜𑁆𑀜𑁄 𑀲𑀳𑀸𑀬𑀸𑀦𑀁 𑀯𑀻𑀭𑀺𑀬𑀓𑀭𑀡𑀓𑀸𑀮𑁂 𑀅𑀩𑁆𑀬𑀕𑁆𑀕𑀢𑀸 𑀬𑀣𑀸 𑀓𑀸𑀮𑀺𑀗𑁆𑀕𑀲𑁆𑀲 𑀫𑀦𑀼𑀲𑁆𑀲𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀑𑀲𑀓𑁆𑀓𑀺𑀁𑀲𑀼, 𑀏𑀯𑀁 𑀅𑀦𑁄𑀲𑀓𑁆𑀓𑀦𑀁 𑀲𑀫𑀕𑁆𑀕𑀪𑀸𑀯𑁂𑀦 𑀅𑀪𑁂𑀚𑁆𑀚𑀘𑀺𑀢𑁆𑀢𑀸𑀦𑀁 𑀯𑀻𑀭𑀺𑀬𑀜𑁆𑀘 𑀧𑀼𑀭𑀺𑀲𑀧𑀭𑀓𑁆𑀓𑀫𑁄 𑀘 𑀣𑀺𑀭𑁄 𑀅𑀳𑁄𑀲𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀲𑁆𑀲𑀓𑀸𑀦𑀁 𑀚𑀬𑁄 𑀅𑀳𑁄𑀲𑀻𑀢𑀺.

𑀧𑀮𑀸𑀢𑁂 𑀘 𑀧𑀦 𑀓𑀸𑀮𑀺𑀗𑁆𑀕𑁂 𑀅𑀲𑁆𑀲𑀓𑀭𑀸𑀚𑀸 𑀯𑀺𑀮𑁄𑀧𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀢𑁄. 𑀦𑀦𑁆𑀤𑀺𑀲𑁂𑀦𑁄 𑀓𑀸𑀮𑀺𑀗𑁆𑀕𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺 ‘‘𑀇𑀫𑀸𑀲𑀁 𑀘𑀢𑀼𑀦𑁆𑀦𑀁 𑀭𑀸𑀚𑀓𑀜𑁆𑀜𑀸𑀦𑀁 𑀤𑀸𑀬𑀚𑁆𑀚𑀓𑁄𑀝𑁆𑀞𑀸𑀲𑀁 𑀧𑁂𑀲𑁂𑀢𑀼, 𑀲𑀘𑁂 𑀦 𑀧𑁂𑀲𑁂𑀢𑀺, 𑀓𑀸𑀢𑀩𑁆𑀩𑀫𑁂𑀢𑁆𑀣 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀢𑀸𑀳𑀺 𑀮𑀤𑁆𑀥𑀩𑁆𑀩𑀤𑀸𑀬𑀚𑁆𑀚𑀁 𑀧𑁂𑀲𑁂𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀥𑀻𑀢𑀭𑁄 𑀇𑀫𑀸 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀅𑀳𑁂𑀲𑀼𑀁, 𑀦𑀦𑁆𑀤𑀺𑀲𑁂𑀦𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀓𑀸𑀮𑀺𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁦𑁨] 𑁨. 𑀫𑀳𑀸𑀅𑀲𑁆𑀲𑀸𑀭𑁄𑀳𑀚𑀸𑀢𑀓𑀯𑀡𑁆𑀡𑀦𑀸

𑀅𑀤𑁂𑀬𑁆𑀬𑁂𑀲𑀼𑀁 ¶ ¶ 𑀤𑀤𑀁 𑀤𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯. 𑀲𑀢𑁆𑀣𑀸 ‘‘𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀉𑀧𑀓𑀸𑀭𑀯𑀲𑁂𑀦𑁂𑀯 𑀓𑀺𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀇𑀥𑀸𑀧𑀺 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺. 𑀲𑁄 ‘‘𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻’’𑀢𑀺 𑀩𑀮𑀯𑀸𑀳𑀦𑀧𑀭𑀺𑀯𑀼𑀢𑁄 𑀕𑀦𑁆𑀢𑁆𑀯𑀸 𑀧𑀭𑀸𑀚𑀺𑀢𑁄 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀮𑀸𑀬𑀫𑀸𑀦𑁄 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀢𑀺𑀁𑀲 𑀚𑀦𑀸 𑀭𑀸𑀚𑀲𑁂𑀯𑀓𑀸 𑀯𑀲𑀦𑁆𑀢𑀺. 𑀢𑁂 𑀧𑀸𑀢𑁄𑀯 𑀕𑀸𑀫𑀫𑀚𑁆𑀛𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀕𑀸𑀫𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀯𑀫𑁆𑀫𑀺𑀢𑀁 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀕𑀸𑀫𑀤𑁆𑀯𑀸𑀭𑁂𑀦 ¶ 𑀅𑀦𑁆𑀢𑁄𑀕𑀸𑀫𑀁 𑀧𑀸𑀯𑀺𑀲𑀺. 𑀢𑁂 ‘‘𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀪𑀻𑀢𑀸 𑀧𑀮𑀸𑀬𑀺𑀢𑁆𑀯𑀸 𑀲𑀓𑀲𑀓𑀕𑁂𑀳𑀸𑀦𑀺 𑀧𑀯𑀺𑀲𑀺𑀁𑀲𑀼. 𑀏𑀓𑁄 𑀧𑀦𑁂𑀢𑁆𑀣 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀧𑀘𑁆𑀘𑀦𑁆𑀢𑀁 𑀕𑀢𑁄’’𑀢𑀺 𑀲𑀼𑀬𑁆𑀬𑀢𑀺, 𑀓𑁄𑀲𑀺 𑀢𑁆𑀯𑀁 𑀭𑀸𑀚𑀧𑀼𑀭𑀺𑀲𑁄 𑀘𑁄𑀭𑀧𑀼𑀭𑀺𑀲𑁄𑀢𑀺? ‘‘𑀭𑀸𑀚𑀧𑀼𑀭𑀺𑀲𑁄, 𑀲𑀫𑁆𑀫𑀸’’𑀢𑀺. ‘‘𑀢𑁂𑀦 𑀳𑀺 𑀏𑀣𑀸’’𑀢𑀺 𑀭𑀸𑀚𑀸𑀦𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀻𑀞𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀏𑀳𑀺, 𑀪𑀤𑁆𑀤𑁂, 𑀲𑀳𑀸𑀬𑀓𑀲𑁆𑀲 𑀧𑀸𑀤𑁂 𑀥𑁄𑀯𑀸’’𑀢𑀺 𑀪𑀭𑀺𑀬𑀁 𑀢𑀲𑁆𑀲 𑀧𑀸𑀤𑁂 𑀥𑁄𑀯𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀆𑀳𑀸𑀭𑀁 𑀤𑀢𑁆𑀯𑀸 ‘‘𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀣𑀸’’𑀢𑀺 𑀲𑀬𑀦𑀁 𑀧𑀜𑁆𑀜𑀸𑀧𑁂𑀲𑀺, 𑀭𑀸𑀚𑀸 𑀦𑀺𑀧𑀚𑁆𑀚𑀺. 𑀇𑀢𑀭𑁄 𑀅𑀲𑁆𑀲𑀲𑁆𑀲 𑀲𑀦𑁆𑀦𑀸𑀳𑀁 𑀫𑁄𑀘𑁂𑀢𑁆𑀯𑀸 𑀘𑀗𑁆𑀓𑀫𑀸𑀧𑁂𑀢𑁆𑀯𑀸 𑀉𑀤𑀓𑀁 𑀧𑀸𑀬𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀢𑀺𑀡𑀁 𑀅𑀤𑀸𑀲𑀺. 𑀏𑀯𑀁 𑀢𑀬𑁄 𑀘𑀢𑁆𑀢𑀸𑀭𑁄 𑀤𑀺𑀯𑀲𑁂 𑀭𑀸𑀚𑀸𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 ‘‘𑀕𑀘𑁆𑀙𑀸𑀫𑀳𑀁, 𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀭𑀜𑁆𑀜𑁄 𑀘 𑀅𑀲𑁆𑀲𑀲𑁆𑀲 𑀘 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀩𑁆𑀩𑀫𑀓𑀸𑀲𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 ‘‘𑀅𑀳𑀁, 𑀲𑀫𑁆𑀫, 𑀫𑀳𑀸𑀅𑀲𑁆𑀲𑀸𑀭𑁄𑀳𑁄 𑀦𑀸𑀫, 𑀦𑀕𑀭𑀫𑀚𑁆𑀛𑁂 𑀅𑀫𑁆𑀳𑀸𑀓𑀁 𑀕𑁂𑀳𑀁, 𑀲𑀘𑁂 𑀓𑁂𑀦𑀘𑀺 𑀓𑀺𑀘𑁆𑀘𑁂𑀦 𑀦𑀕𑀭𑀁 𑀆𑀕𑀘𑁆𑀙𑀲𑀺, 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀞𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 ‘𑀫𑀳𑀸𑀅𑀲𑁆𑀲𑀸𑀭𑁄𑀳𑁄 𑀓𑀢𑀭𑀕𑁂𑀳𑁂 𑀯𑀲𑀢𑀻’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀩𑀮𑀓𑀸𑀬𑁄𑀧𑀺 𑀭𑀸𑀚𑀸𑀦𑀁 𑀅𑀤𑀺𑀲𑁆𑀯𑀸 𑀩𑀳𑀺𑀦𑀕𑀭𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑁂𑀲𑀺. 𑀭𑀸𑀚𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀤𑁆𑀯𑀸𑀭𑀦𑁆𑀢𑀭𑁂 𑀞𑀢𑁆𑀯𑀸 ¶ 𑀤𑁄𑀯𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀏𑀓𑁄 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀻 𑀫𑀁 𑀤𑀝𑁆𑀞𑀼𑀓𑀸𑀫𑁄 𑀆𑀕𑀦𑁆𑀢𑁆𑀯𑀸 ‘𑀫𑀳𑀸𑀅𑀲𑁆𑀲𑀸𑀭𑁄𑀳𑀲𑁆𑀲 𑀕𑁂𑀳𑀁 𑀓𑀳’𑀦𑁆𑀢𑀺 𑀢𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀢𑀁 𑀢𑁆𑀯𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀆𑀦𑁂𑀢𑁆𑀯𑀸 𑀫𑀁 𑀤𑀲𑁆𑀲𑁂𑀬𑁆𑀬𑀸𑀲𑀺, 𑀢𑀤𑀸 𑀢𑁆𑀯𑀁 𑀲𑀳𑀲𑁆𑀲𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 𑀦𑀸𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀦𑀸𑀕𑀘𑁆𑀙𑀦𑁆𑀢𑁂 𑀭𑀸𑀚𑀸 𑀢𑀲𑁆𑀲 𑀯𑀲𑀦𑀕𑀸𑀫𑁂 𑀩𑀮𑀺𑀁 𑀯𑀟𑁆𑀠𑀸𑀧𑁂𑀲𑀺, 𑀩𑀮𑀺𑀫𑁆𑀳𑀺 𑀯𑀟𑁆𑀠𑀺𑀢𑁂 𑀦𑀸𑀕𑀘𑁆𑀙𑀢𑀺. 𑀏𑀯𑀁 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 ¶ 𑀩𑀮𑀺𑀁 𑀯𑀟𑁆𑀠𑀸𑀧𑁂𑀲𑀺, 𑀦𑁂𑀯 𑀆𑀕𑀘𑁆𑀙𑀢𑀺. 𑀅𑀣 𑀦𑀁 𑀕𑀸𑀫𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀳𑀁𑀲𑀼 ‘‘𑀅𑀬𑁆𑀬, 𑀢𑀯 𑀲𑀳𑀸𑀬𑀲𑁆𑀲 𑀫𑀳𑀸𑀅𑀲𑁆𑀲𑀸𑀭𑁄𑀳𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ¶ 𑀫𑀬𑀁 𑀩𑀮𑀺𑀦𑀸 𑀧𑀻𑀴𑀺𑀬𑀫𑀸𑀦𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀫, 𑀕𑀘𑁆𑀙 𑀢𑀯 𑀲𑀳𑀸𑀬𑀲𑁆𑀲 𑀫𑀳𑀸𑀅𑀲𑁆𑀲𑀸𑀭𑁄𑀳𑀲𑁆𑀲 𑀯𑀢𑁆𑀯𑀸 𑀅𑀫𑁆𑀳𑀸𑀓𑀁 𑀩𑀮𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀳𑀻’’𑀢𑀺. 𑀲𑀸𑀥𑀼 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀦 𑀧𑀦 𑀲𑀓𑁆𑀓𑀸 𑀢𑀼𑀘𑁆𑀙𑀳𑀢𑁆𑀣𑁂𑀦 𑀕𑀦𑁆𑀢𑀼𑀁, 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀤𑁆𑀯𑁂 𑀤𑀸𑀭𑀓𑀸 𑀅𑀢𑁆𑀣𑀺, 𑀢𑁂𑀲𑀜𑁆𑀘 𑀪𑀭𑀺𑀬𑀸𑀬 𑀘𑀲𑁆𑀲 𑀲𑀳𑀸𑀬𑀓𑀲𑁆𑀲 𑀘 𑀫𑁂 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀧𑀺𑀴𑀦𑁆𑀥𑀦𑀸𑀤𑀻𑀦𑀺 𑀲𑀚𑁆𑀚𑁂𑀣𑀸𑀢𑀺. ‘‘𑀲𑀸𑀥𑀼 𑀲𑀚𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀲𑀩𑁆𑀩𑀁 𑀧𑀡𑁆𑀡𑀸𑀓𑀸𑀭𑀁 𑀲𑀚𑁆𑀚𑀬𑀺𑀁𑀲𑀼.

𑀲𑁄 𑀢𑀜𑁆𑀘 𑀅𑀢𑁆𑀢𑀦𑁄 𑀖𑀭𑁂 𑀧𑀓𑁆𑀓𑀧𑀽𑀯𑀜𑁆𑀘 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀧𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 𑀧𑀼𑀘𑁆𑀙𑀺 ‘‘𑀓𑀳𑀁, 𑀲𑀫𑁆𑀫, 𑀫𑀳𑀸𑀅𑀲𑁆𑀲𑀸𑀭𑁄𑀳𑀲𑁆𑀲 𑀕𑁂𑀳’’𑀦𑁆𑀢𑀺. 𑀲𑁄 ‘‘𑀏𑀳𑀺 𑀤𑀲𑁆𑀲𑁂𑀫𑀺 𑀢𑁂’’𑀢𑀺 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀤𑁄𑀯𑀸𑀭𑀺𑀓𑁄 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀧𑀝𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀆𑀲𑀦𑀸 𑀉𑀝𑁆𑀞𑀸𑀬 ‘‘𑀫𑀬𑁆𑀳𑀁 𑀲𑀳𑀸𑀬𑁄 𑀘 𑀢𑁂𑀦 𑀲𑀤𑁆𑀥𑀺𑀁 𑀆𑀕𑀢𑀸 𑀘 𑀧𑀯𑀺𑀲𑀦𑁆𑀢𑀽’’𑀢𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀤𑀺𑀲𑁆𑀯𑀸𑀯 𑀦𑀁 𑀧𑀭𑀺𑀲𑁆𑀲𑀚𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑀺𑀓𑀸 𑀘 𑀤𑀸𑀭𑀓𑀸 𑀘 𑀅𑀭𑁄𑀕𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀫𑀳𑀸𑀢𑀮𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀲𑀳𑀸𑀬𑀲𑁆𑀲 𑀫𑁂 𑀧𑀸𑀤𑁂 𑀥𑁄𑀯𑀸’’𑀢𑀺 𑀆𑀳. 𑀲𑀸 𑀢𑀲𑁆𑀲 𑀧𑀸𑀤𑁂 𑀥𑁄𑀯𑀺, 𑀭𑀸𑀚𑀸 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑁂𑀦 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀤𑁂𑀯𑀻𑀧𑀺 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀲𑀺. 𑀭𑀸𑀚𑀸 ‘‘𑀓𑀺𑀁, 𑀲𑀫𑁆𑀫, 𑀅𑀢𑁆𑀣𑀺, 𑀓𑀺𑀜𑁆𑀘𑀺 𑀅𑀫𑁆𑀳𑀸𑀓𑀁 𑀔𑀸𑀤𑀦𑀻𑀬’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀅𑀢𑁆𑀣𑀻’’𑀢𑀺 𑀧𑀲𑀺𑀩𑁆𑀩𑀓𑀢𑁄 𑀧𑀽𑀯𑁂 𑀦𑀻𑀳𑀭𑀸𑀧𑁂𑀲𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀢𑀝𑁆𑀝𑀓𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 ‘‘𑀫𑀫 𑀲𑀳𑀸𑀬𑁂𑀦 𑀆𑀦𑀻𑀢𑀁 𑀔𑀸𑀤𑀣𑀸’’𑀢𑀺 𑀤𑁂𑀯𑀺𑀬𑀸 𑀘 𑀅𑀫𑀘𑁆𑀘𑀸𑀦𑀜𑁆𑀘 𑀔𑀸𑀤𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀔𑀸𑀤𑀺. 𑀇𑀢𑀭𑁄 𑀇𑀢𑀭𑀫𑁆𑀧𑀺 𑀧𑀡𑁆𑀡𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀲𑀗𑁆𑀕𑀳𑀢𑁆𑀣𑀁 𑀓𑀸𑀲𑀺𑀓𑀯𑀢𑁆𑀣𑀸𑀦𑀺 𑀅𑀧𑀦𑁂𑀢𑁆𑀯𑀸 𑀢𑁂𑀦 𑀆𑀪𑀢𑀯𑀢𑁆𑀣𑀬𑀼𑀕𑀁 𑀦𑀺𑀯𑀸𑀲𑁂𑀲𑀺𑀁 ¶ . 𑀤𑁂𑀯𑀻𑀧𑀺 ¶ 𑀓𑀸𑀲𑀺𑀓𑀯𑀢𑁆𑀣𑀜𑁆𑀘𑁂𑀯 𑀆𑀪𑀭𑀡𑀸𑀦𑀺 𑀘 𑀅𑀧𑀦𑁂𑀢𑁆𑀯𑀸 𑀢𑁂𑀦 𑀆𑀪𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀆𑀪𑀭𑀡𑀸𑀦𑀺 𑀧𑀺𑀴𑀦𑁆𑀥𑀺.

𑀅𑀣 𑀦𑀁 𑀭𑀸𑀚𑀸 𑀭𑀸𑀚𑀸𑀭𑀳𑀁 𑀪𑁄𑀚𑀦𑀁 𑀪𑁄𑀚𑀸𑀧𑁂𑀢𑁆𑀯𑀸 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙 𑀇𑀫𑀲𑁆𑀲 𑀫𑀫 𑀓𑀭𑀡𑀦𑀺𑀬𑀸𑀫𑁂𑀦𑁂𑀯 𑀫𑀲𑁆𑀲𑀼𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀓𑀸𑀲𑀺𑀓𑀯𑀢𑁆𑀣𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀭𑀸𑀚𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀫𑀚𑁆𑀛𑁂 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀲𑀼𑀢𑁆𑀢𑀁 𑀧𑀸𑀢𑁂𑀢𑁆𑀯𑀸 𑀉𑀧𑀟𑁆𑀠𑀭𑀚𑁆𑀚𑀁 𑀅𑀤𑀸𑀲𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀺 𑀧𑀺𑀯𑀦𑁆𑀢𑀺 𑀲𑀬𑀦𑁆𑀢𑀺, 𑀯𑀺𑀲𑁆𑀲𑀸𑀲𑁄 𑀣𑀺𑀭𑁄 𑀅𑀳𑁄𑀲𑀺 𑀓𑁂𑀦𑀘𑀺 𑀅𑀪𑁂𑀚𑁆𑀚𑁄. 𑀅𑀣𑀲𑁆𑀲 𑀭𑀸𑀚𑀸 𑀧𑀼𑀢𑁆𑀢𑀤𑀸𑀭𑁂𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀦𑀺𑀯𑁂𑀲𑀦𑀁 𑀫𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀢𑁂 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺.

𑀅𑀣 ¶ 𑀅𑀫𑀘𑁆𑀘𑀸 𑀓𑀼𑀚𑁆𑀛𑀺𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀁 𑀆𑀳𑀁𑀲𑀼 ‘‘𑀓𑀼𑀫𑀸𑀭, 𑀭𑀸𑀚𑀸 𑀏𑀓𑀲𑁆𑀲 𑀕𑀳𑀧𑀢𑀺𑀓𑀲𑁆𑀲 𑀉𑀧𑀟𑁆𑀠𑀭𑀚𑁆𑀚𑀁 𑀤𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀢𑀺 𑀧𑀺𑀯𑀢𑀺 𑀲𑀬𑀢𑀺, 𑀤𑀸𑀭𑀓𑁂 𑀘 𑀯𑀦𑁆𑀤𑀸𑀧𑁂𑀢𑀺, 𑀇𑀫𑀺𑀦𑀸 𑀭𑀜𑁆𑀜𑀸 𑀓𑀢𑀓𑀫𑁆𑀫𑀁 𑀦 𑀚𑀸𑀦𑀸𑀫, 𑀓𑀺𑀁 𑀓𑀭𑁄𑀢𑀺 𑀭𑀸𑀚𑀸, 𑀫𑀬𑀁 𑀮𑀚𑁆𑀚𑀸𑀫, 𑀢𑁆𑀯𑀁 𑀭𑀜𑁆𑀜𑁄 𑀓𑀣𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀓𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 ‘‘𑀫𑀸 𑀏𑀯𑀁 𑀓𑀭𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. ‘‘𑀢𑀸𑀢, 𑀅𑀳𑀁 𑀬𑀼𑀤𑁆𑀥𑀧𑀭𑀸𑀚𑀺𑀢𑁄 𑀓𑀳𑀁 𑀯𑀲𑀺𑀁, 𑀅𑀧𑀺 𑀦𑀼 𑀚𑀸𑀦𑀸𑀣𑀸’’𑀢𑀺. ‘‘𑀦 𑀚𑀸𑀦𑀸𑀫, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀏𑀢𑀲𑁆𑀲 𑀖𑀭𑁂 𑀯𑀲𑀦𑁆𑀢𑁄 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺𑀁, 𑀏𑀯𑀁 𑀫𑀫 𑀉𑀧𑀓𑀸𑀭𑀺𑀦𑁄 𑀓𑀲𑁆𑀫𑀸 𑀲𑀫𑁆𑀧𑀢𑁆𑀢𑀺𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀸𑀢, 𑀬𑁄 𑀳𑀺 𑀅𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀤𑁂𑀢𑀺, 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀲𑁆𑀲 𑀦 𑀤𑁂𑀢𑀺, 𑀲𑁄 𑀆𑀧𑀤𑀁 𑀧𑀢𑁆𑀯𑀸 𑀓𑀺𑀜𑁆𑀘𑀺 𑀉𑀧𑀓𑀸𑀭𑀁 𑀦 𑀮𑀪𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁫.

‘‘𑀅𑀤𑁂𑀬𑁆𑀬𑁂𑀲𑀼 ¶ 𑀤𑀤𑀁 𑀤𑀸𑀦𑀁, 𑀤𑁂𑀬𑁆𑀬𑁂𑀲𑀼 𑀦𑀧𑁆𑀧𑀯𑁂𑀘𑁆𑀙𑀢𑀺;

𑀆𑀧𑀸𑀲𑀼 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀳𑀸𑀬𑀁 𑀦𑀸𑀥𑀺𑀕𑀘𑁆𑀙𑀢𑀺.

𑁬.

‘‘𑀦𑀸𑀤𑁂𑀬𑁆𑀬𑁂𑀲𑀼 𑀤𑀤𑀁 𑀤𑀸𑀦𑀁, 𑀤𑁂𑀬𑁆𑀬𑁂𑀲𑀼 𑀬𑁄 𑀧𑀯𑁂𑀘𑁆𑀙𑀢𑀺;

𑀆𑀧𑀸𑀲𑀼 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀳𑀸𑀬𑀫𑀥𑀺𑀕𑀘𑁆𑀙𑀢𑀺.

𑁭.

‘‘𑀲𑀜𑁆𑀜𑁄𑀕𑀲𑀫𑁆𑀪𑁄𑀕𑀯𑀺𑀲𑁂𑀲𑀤𑀲𑁆𑀲𑀦𑀁 ¶ , 𑀅𑀦𑀭𑀺𑀬𑀥𑀫𑁆𑀫𑁂𑀲𑀼 𑀲𑀞𑁂𑀲𑀼 𑀦𑀲𑁆𑀲𑀢𑀺;

𑀓𑀢𑀜𑁆𑀘 𑀅𑀭𑀺𑀬𑁂𑀲𑀼 𑀘 𑀅𑀚𑁆𑀚𑀯𑁂𑀲𑀼, 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀅𑀡𑀼𑀫𑁆𑀧𑀺 𑀢𑀸𑀤𑀺𑀲𑀼.

𑁮.

‘‘𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀅𑀓𑀸 𑀮𑁄𑀓𑁂 𑀲𑀼𑀤𑀼𑀓𑁆𑀓𑀭𑀁;

𑀧𑀘𑁆𑀙𑀸 𑀓𑀬𑀺𑀭𑀸 𑀦 𑀯𑀸 𑀓𑀬𑀺𑀭𑀸, 𑀅𑀘𑁆𑀘𑀦𑁆𑀢𑀁 𑀧𑀽𑀚𑀦𑀸𑀭𑀳𑁄’’𑀢𑀺.

𑀢𑀢𑁆𑀣 𑀅𑀤𑁂𑀬𑁆𑀬𑁂𑀲𑀽𑀢𑀺 𑀧𑀼𑀩𑁆𑀩𑁂 𑀅𑀓𑀢𑀽𑀧𑀓𑀸𑀭𑁂𑀲𑀼. 𑀤𑁂𑀬𑁆𑀬𑁂𑀲𑀽𑀢𑀺 𑀧𑀼𑀩𑁆𑀩𑁂 𑀓𑀢𑀽𑀧𑀓𑀸𑀭𑁂𑀲𑀼. 𑀦𑀧𑁆𑀧𑀯𑁂𑀘𑁆𑀙𑀢𑀻𑀢𑀺 𑀦 𑀧𑀯𑁂𑀲𑁂𑀢𑀺 𑀦 𑀤𑁂𑀢𑀺. 𑀆𑀧𑀸𑀲𑀽𑀢𑀺 𑀆𑀧𑀤𑀸𑀲𑀼. 𑀩𑁆𑀬𑀲𑀦𑀦𑁆𑀢𑀺 𑀤𑀼𑀓𑁆𑀔𑀁. 𑀲𑀜𑁆𑀜𑁄𑀕𑀲𑀫𑁆𑀪𑁄𑀕𑀯𑀺𑀲𑁂𑀲𑀤𑀲𑁆𑀲𑀦𑀦𑁆𑀢𑀺 𑀬𑁄 𑀫𑀺𑀢𑁆𑀢𑁂𑀦 𑀓𑀢𑁄 𑀲𑀜𑁆𑀜𑁄𑀕𑁄 𑀘𑁂𑀯 𑀲𑀫𑁆𑀪𑁄𑀕𑁄 𑀘, 𑀢𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀁 𑀕𑀼𑀡𑀤𑀲𑁆𑀲𑀦𑀁 𑀲𑀼𑀓𑀢𑀁 𑀫𑀬𑁆𑀳𑀁 𑀇𑀫𑀺𑀦𑀸𑀢𑀺 𑀏𑀢𑀁 𑀲𑀩𑁆𑀩𑀁 𑀅𑀲𑀼𑀤𑁆𑀥𑀥𑀫𑁆𑀫𑀢𑁆𑀢𑀸 𑀅𑀦𑀭𑀺𑀬𑀥𑀫𑁆𑀫𑁂𑀲𑀼 𑀓𑁂𑀭𑀸𑀝𑀺𑀓𑀢𑁆𑀢𑀸 𑀲𑀞𑁂𑀲𑀼 𑀦𑀲𑁆𑀲𑀢𑀺. 𑀅𑀭𑀺𑀬𑁂𑀲𑀽𑀢𑀺 𑀅𑀢𑁆𑀢𑀦𑁄 𑀓𑀢𑀕𑀼𑀡𑀚𑀸𑀦𑀦𑁂𑀦 𑀅𑀭𑀺𑀬𑁂𑀲𑀼 𑀧𑀭𑀺𑀲𑀼𑀤𑁆𑀥𑁂𑀲𑀼. 𑀅𑀚𑁆𑀚𑀯𑁂𑀲𑀽𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀉𑀚𑀼𑀓𑁂𑀲𑀼 𑀅𑀓𑀼𑀝𑀺𑀮𑁂𑀲𑀼. 𑀅𑀡𑀼𑀫𑁆𑀧𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀢𑀸𑀤𑀺𑀲𑀽𑀢𑀺 𑀬𑁂 𑀢𑀸𑀤𑀺𑀲𑀸 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑀅𑀭𑀺𑀬𑀸 𑀉𑀚𑀼𑀪𑀽𑀢𑀸, 𑀢𑁂𑀲𑀼 𑀅𑀧𑁆𑀧𑀫𑁆𑀧𑀺 𑀓𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀚𑀼𑀢𑀺𑀓𑀁 𑀫𑀳𑀸𑀯𑀺𑀧𑁆𑀨𑀸𑀭𑀁, 𑀲𑀼𑀔𑁂𑀢𑁆𑀢𑁂 𑀯𑀼𑀢𑁆𑀢𑀩𑀻𑀚𑀫𑀺𑀯 𑀦 𑀦𑀲𑁆𑀲𑀢𑀺 ¶ , 𑀇𑀢𑀭𑀲𑁆𑀫𑀺𑀁 𑀧𑀦 𑀧𑀸𑀧𑁂 𑀩𑀳𑀼𑀫𑁆𑀧𑀺 𑀓𑀢𑀁 𑀅𑀕𑁆𑀕𑀺𑀫𑁆𑀳𑀺 𑀔𑀺𑀢𑁆𑀢𑀩𑀻𑀚𑀫𑀺𑀯 𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀣𑀸𑀧𑀺 𑀩𑀻𑀚𑀫𑀕𑁆𑀕𑀺𑀫𑁆𑀳𑀺, 𑀟𑀬𑁆𑀳𑀢𑀺 𑀦 𑀯𑀺𑀭𑀽𑀳𑀢𑀺;

𑀏𑀯𑀁 𑀓𑀢𑀁 𑀅𑀲𑀧𑁆𑀧𑀼𑀭𑀺𑀲𑁂, 𑀦𑀲𑁆𑀲𑀢𑀺 𑀦 𑀯𑀺𑀭𑀽𑀳𑀢𑀺.

‘‘𑀓𑀢𑀜𑁆𑀜𑀼𑀫𑁆𑀳𑀺 𑀘 𑀧𑁄𑀲𑀫𑁆𑀳𑀺, 𑀲𑀻𑀮𑀯𑀦𑁆𑀢𑁂 𑀅𑀭𑀺𑀬𑀯𑀼𑀢𑁆𑀢𑀺𑀦𑁂;

𑀲𑀼𑀔𑁂𑀢𑁆𑀢𑁂 𑀯𑀺𑀬 𑀩𑀻𑀚𑀸𑀦𑀺, 𑀓𑀢𑀁 𑀢𑀫𑁆𑀳𑀺 𑀦 𑀦𑀲𑁆𑀲𑀢𑀻’’𑀢𑀺. (𑀚𑀸. 𑁧.𑁧𑁦.𑁭𑁭-𑁭𑁮);

𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄𑀢𑀺 𑀧𑀞𑀫𑀢𑀭𑀁 𑀉𑀧𑀓𑀸𑀭𑀁 𑀓𑀢𑁆𑀯𑀸 𑀞𑀺𑀢𑁄. 𑀅𑀓𑀸𑀢𑀺 𑀅𑀓𑀭𑀺, 𑀅𑀬𑀁 𑀮𑁄𑀓𑁂 𑀲𑀼𑀤𑀼𑀓𑁆𑀓𑀭𑀁 𑀦𑀸𑀫 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀸 𑀓𑀬𑀺𑀭𑀸𑀢𑀺 𑀲𑁄 𑀧𑀘𑁆𑀙𑀸 𑀅𑀜𑁆𑀜𑀁 ¶ 𑀓𑀺𑀜𑁆𑀘𑀺 𑀕𑀼𑀡𑀁 𑀓𑀭𑁄𑀢𑀼 𑀯𑀸 𑀫𑀸 𑀯𑀸, 𑀢𑁂𑀦𑁂𑀯 𑀧𑀞𑀫𑀓𑀢𑁂𑀦 𑀕𑀼𑀡𑁂𑀦 𑀅𑀘𑁆𑀘𑀦𑁆𑀢𑀁 𑀧𑀽𑀚𑀦𑀸𑀭𑀳𑁄 𑀳𑁄𑀢𑀺, 𑀲𑀩𑁆𑀩𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀭𑀳𑀢𑀻𑀢𑀺.

𑀇𑀤𑀁 𑀧𑀦 𑀲𑀼𑀢𑁆𑀯𑀸 𑀦𑁂𑀯 𑀅𑀫𑀘𑁆𑀘𑀸, 𑀦 𑀭𑀸𑀚𑀧𑀼𑀢𑁆𑀢𑁄 𑀧𑀼𑀦 𑀓𑀺𑀜𑁆𑀘𑀺 𑀓𑀣𑁂𑀲𑀻𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀻 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀅𑀲𑁆𑀲𑀸𑀭𑁄𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁦𑁩] 𑁩. 𑀏𑀓𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀅𑀦𑀼𑀢𑁆𑀢𑀭𑁂 𑀓𑀸𑀫𑀕𑀼𑀡𑁂 𑀲𑀫𑀺𑀤𑁆𑀥𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑁄𑀲𑀮𑀭𑀸𑀚𑀲𑁂𑀯𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀲𑁂𑀬𑁆𑀬𑀚𑀸𑀢𑀓𑁂 (𑀚𑀸. 𑁧.𑁩.𑁯𑁪 𑀆𑀤𑀬𑁄) 𑀓𑀣𑀺𑀢𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 ‘‘𑀦 𑀢𑁆𑀯𑀜𑁆𑀜𑁂𑀯 𑀅𑀦𑀢𑁆𑀣𑁂𑀦 𑀅𑀢𑁆𑀣𑀁 𑀆𑀳𑀭𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀢𑁆𑀢𑀦𑁄 𑀅𑀦𑀢𑁆𑀣𑁂𑀦 𑀅𑀢𑁆𑀣𑀁 𑀆𑀳𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀧𑀝𑁆𑀞𑀸𑀓𑁄 𑀅𑀫𑀘𑁆𑀘𑁄 𑀭𑀸𑀚𑀦𑁆𑀢𑁂𑀧𑀼𑀭𑁂 𑀤𑀼𑀩𑁆𑀪𑀺. 𑀭𑀸𑀚𑀸 𑀧𑀘𑁆𑀘𑀓𑁆𑀔𑀢𑁄𑀯 𑀢𑀲𑁆𑀲 ¶ 𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀤𑀼𑀩𑁆𑀪𑀺𑀲𑁂𑀦𑀁 𑀦𑀸𑀫 𑀓𑁄𑀲𑀮𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁄𑀢𑀺 𑀲𑀩𑁆𑀩𑀁 𑀫𑀳𑀸𑀲𑀻𑀮𑀯𑀚𑀸𑀢𑀓𑁂 (𑀚𑀸. 𑁧.𑁧.𑁫𑁧) 𑀓𑀣𑀺𑀢𑀫𑁂𑀯. 𑀇𑀥 𑀧𑀦 𑀤𑀼𑀩𑁆𑀪𑀺𑀲𑁂𑀦𑁄 𑀫𑀳𑀸𑀢𑀮𑁂 𑀅𑀫𑀘𑁆𑀘𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀁 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀼𑀫𑁆𑀫𑀸𑀭𑁂 𑀳𑁂𑀝𑁆𑀞𑀸𑀲𑀻𑀲𑀓𑀁 𑀑𑀮𑀫𑁆𑀩𑀸𑀧𑁂𑀲𑀺. 𑀭𑀸𑀚𑀸 𑀘𑁄𑀭𑀭𑀸𑀚𑀸𑀦𑀁 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀩𑀦𑁆𑀥𑀦𑀁 𑀙𑀺𑀚𑁆𑀚𑀺, 𑀢𑀢𑁄 𑀭𑀸𑀚𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀘𑁄𑀭𑀭𑀸𑀚𑀲𑁆𑀲 𑀲𑀭𑀻𑀭𑁂 𑀤𑀸𑀳𑁄 𑀉𑀧𑁆𑀧𑀚𑁆𑀚𑀺, ‘‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’’𑀢𑀺 𑀪𑀽𑀫𑀺𑀬𑀁 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀢𑀺. ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀏𑀯𑀭𑀽𑀧𑀁 𑀥𑀫𑁆𑀫𑀺𑀓𑀭𑀸𑀚𑀸𑀦𑀁 𑀦𑀺𑀭𑀧𑀭𑀸𑀥𑀁 𑀤𑁆𑀯𑀸𑀭𑀲𑁆𑀲 𑀉𑀢𑁆𑀢𑀭𑀼𑀫𑁆𑀫𑀸𑀭𑁂 𑀳𑁂𑀝𑁆𑀞𑀸𑀲𑀻𑀲𑀓𑀁 𑀑𑀮𑀫𑁆𑀩𑀸𑀧𑁂𑀣𑀸’’𑀢𑀺 𑀯𑀤𑀺𑀁𑀲𑀼. 𑀢𑁂𑀦 𑀳𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀫𑁄𑀘𑁂𑀣 𑀦𑀦𑁆𑀢𑀺. 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 ¶ 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀤𑀼𑀩𑁆𑀪𑀺𑀲𑁂𑀦𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑀼𑀁 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯.

‘‘𑀅𑀦𑀼𑀢𑁆𑀢𑀭𑁂 𑀓𑀸𑀫𑀕𑀼𑀡𑁂 𑀲𑀫𑀺𑀤𑁆𑀥𑁂, 𑀪𑀼𑀢𑁆𑀯𑀸𑀦 𑀧𑀼𑀩𑁆𑀩𑁂 𑀯𑀲𑀺 𑀏𑀓𑀭𑀸𑀚;

𑀲𑁄𑀤𑀸𑀦𑀺 𑀤𑀼𑀕𑁆𑀕𑁂 𑀦𑀭𑀓𑀫𑁆𑀳𑀺 𑀔𑀺𑀢𑁆𑀢𑁄, 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡’’𑀦𑁆𑀢𑀺.

𑀢𑀢𑁆𑀣 ¶ 𑀯𑀲𑀻𑀢𑀺 𑀯𑀼𑀢𑁆𑀣𑁄. 𑀏𑀓𑀭𑀸𑀚𑀸𑀢𑀺 𑀩𑁄𑀥𑀺𑀲𑀢𑁆𑀢𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀲𑁄𑀤𑀸𑀦𑀻𑀢𑀺 𑀲𑁄 𑀢𑁆𑀯𑀁 𑀇𑀤𑀸𑀦𑀺. 𑀤𑀼𑀕𑁆𑀕𑁂𑀢𑀺 𑀯𑀺𑀲𑀫𑁂. 𑀦𑀭𑀓𑀫𑁆𑀳𑀻𑀢𑀺 𑀆𑀯𑀸𑀝𑁂. 𑀑𑀮𑀫𑁆𑀩𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀦𑁆𑀢𑀺 𑀏𑀯𑀭𑀽𑀧𑁂 𑀯𑀺𑀲𑀫𑀝𑁆𑀞𑀸𑀦𑁂 𑀔𑀺𑀢𑁆𑀢𑁄𑀧𑀺 𑀧𑁄𑀭𑀸𑀡𑀓𑀯𑀡𑁆𑀡𑀜𑁆𑀘 𑀩𑀮𑀜𑁆𑀘 𑀦𑀧𑁆𑀧𑀚𑀳𑀲𑀻𑀢𑀺 𑀧𑀼𑀘𑁆𑀙𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀲𑁂𑀲𑀕𑀸𑀣𑀸 𑀅𑀯𑁄𑀘 𑁋

𑁧𑁦.

‘‘𑀧𑀼𑀩𑁆𑀩𑁂𑀯 𑀔𑀦𑁆𑀢𑀻 𑀘 𑀢𑀧𑁄 𑀘 𑀫𑀬𑁆𑀳𑀁, 𑀲𑀫𑁆𑀧𑀢𑁆𑀣𑀺𑀢𑀸 𑀤𑀼𑀩𑁆𑀪𑀺𑀲𑁂𑀦 𑀅𑀳𑁄𑀲𑀺;

𑀢𑀁𑀤𑀸𑀦𑀺 𑀮𑀤𑁆𑀥𑀸𑀦 𑀓𑀣𑀁 𑀦𑀼 𑀭𑀸𑀚, 𑀚𑀳𑁂 𑀅𑀳𑀁 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁.

𑁧𑁧.

‘‘𑀲𑀩𑁆𑀩𑀸 𑀓𑀺𑀭𑁂𑀯𑀁 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺, 𑀬𑀲𑀲𑁆𑀲𑀺𑀦𑀁 𑀧𑀜𑁆𑀜𑀯𑀦𑁆𑀢𑀁 𑀯𑀺𑀲𑀬𑁆𑀳;

𑀬𑀲𑁄 𑀘 𑀮𑀤𑁆𑀥𑀸 𑀧𑀼𑀭𑀺𑀫𑀁 𑀉𑀴𑀸𑀭𑀁, 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁.

𑁧𑁨.

‘‘𑀧𑀦𑀼𑀚𑁆𑀚 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀚𑀦𑀺𑀦𑁆𑀤, 𑀲𑀼𑀔𑁂𑀦 𑀯𑀸 𑀤𑀼𑀓𑁆𑀔𑀫𑀲𑀬𑁆𑀳𑀲𑀸𑀳𑀺;

𑀉𑀪𑀬𑀢𑁆𑀣 𑀲𑀦𑁆𑀢𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸, 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘 𑀪𑀯𑀦𑁆𑀢𑀺 𑀢𑀼𑀮𑁆𑀬𑀸’’𑀢𑀺.

𑀢𑀢𑁆𑀣 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀢𑀧𑁄𑀢𑀺 𑀢𑀧𑀘𑀭𑀡𑀁. 𑀲𑀫𑁆𑀧𑀢𑁆𑀣𑀺𑀢𑀸𑀢𑀺 𑀇𑀘𑁆𑀙𑀺𑀢𑀸 𑀅𑀪𑀺𑀓𑀗𑁆𑀔𑀺𑀢𑀸 ¶ . 𑀤𑀼𑀩𑁆𑀪𑀺𑀲𑁂𑀦𑀸𑀢𑀺 𑀢𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀢𑀁𑀤𑀸𑀦𑀺 𑀮𑀤𑁆𑀥𑀸𑀦𑀸𑀢𑀺 𑀢𑀁 𑀧𑀢𑁆𑀣𑀦𑀁 𑀇𑀤𑀸𑀦𑀸𑀳𑀁 𑀮𑀪𑀺𑀢𑁆𑀯𑀸. 𑀚𑀳𑁂𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀚𑀳𑁂𑀬𑁆𑀬𑀁. 𑀬𑀲𑁆𑀲 𑀳𑀺 𑀤𑀼𑀓𑁆𑀔𑀁 𑀯𑀸 𑀤𑁄𑀫𑀦𑀲𑁆𑀲𑀁 𑀯𑀸 𑀳𑁄𑀢𑀺, 𑀲𑁄 𑀢𑀁 𑀚𑀳𑁂𑀬𑁆𑀬𑀸𑀢𑀺 𑀤𑀻𑀧𑁂𑀢𑀺.

‘‘𑀲𑀩𑁆𑀩𑀸 𑀓𑀺𑀭𑁂𑀯𑀁 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀻’’𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ¶ . 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀩𑁆𑀩𑀸𑀦𑁂𑀯 𑀫𑀫 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀤𑀸𑀦𑀲𑀻𑀮𑀪𑀸𑀯𑀦𑀸𑀉𑀧𑁄𑀲𑀣𑀓𑀫𑁆𑀫𑀸𑀦𑀺 𑀧𑀼𑀩𑁆𑀩𑁂𑀯 𑀦𑀺𑀝𑁆𑀞𑀺𑀢𑀸𑀦𑀻𑀢𑀺. 𑀬𑀲𑀲𑁆𑀲𑀺𑀦𑀁 𑀧𑀜𑁆𑀜𑀯𑀦𑁆𑀢𑀁 𑀯𑀺𑀲𑀬𑁆𑀳𑀸𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀬𑀲𑀲𑁆𑀲𑀺, 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀧𑀜𑁆𑀜𑀯𑀦𑁆𑀢, 𑀅𑀲𑀬𑁆𑀳𑀲𑀸𑀳𑀺𑀢𑀸𑀬 𑀯𑀺𑀲𑀬𑁆𑀳. 𑀏𑀯𑀁 𑀢𑀻𑀡𑀺𑀧𑁂𑀢𑀸𑀦𑀺 𑀆𑀮𑀧𑀦𑀸𑀦𑁂𑀯. 𑀦𑀦𑁆𑀢𑀺 𑀧𑀦𑁂𑀢𑁆𑀣 𑀦𑀺𑀧𑀸𑀢𑁄 ¶ . 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑀦𑁆𑀢𑀓𑀸𑀭𑀲𑁆𑀲 𑀲𑀸𑀦𑀼𑀦𑀸𑀲𑀺𑀓𑀢𑀸 𑀓𑀢𑀸𑀢𑀺 𑀧𑀘𑁆𑀘𑁂𑀢𑀩𑁆𑀩𑀸. 𑀬𑀲𑁄 𑀘𑀸𑀢𑀺 𑀬𑀲𑀜𑁆𑀘, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀮𑀤𑁆𑀥𑀸 𑀧𑀼𑀭𑀺𑀫𑀦𑁆𑀢𑀺 𑀮𑀪𑀺𑀢𑁆𑀯𑀸 𑀧𑀼𑀭𑀺𑀫𑀁 𑀧𑀼𑀩𑁆𑀩𑁂 𑀅𑀮𑀤𑁆𑀥𑀧𑀼𑀩𑁆𑀩𑀁. 𑀉𑀴𑀸𑀭𑀦𑁆𑀢𑀺 𑀫𑀳𑀦𑁆𑀢𑀁. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀫𑁂𑀢𑁆𑀢𑀸𑀪𑀸𑀯𑀦𑀸𑀛𑀸𑀦𑀼𑀧𑁆𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀦𑀧𑁆𑀧𑀚𑁆𑀚𑀳𑁂𑀢𑀺 𑀏𑀯𑀭𑀽𑀧𑀁 𑀬𑀲𑀁 𑀮𑀤𑁆𑀥𑀸 𑀓𑀺𑀁𑀓𑀸𑀭𑀡𑀸 𑀧𑀼𑀭𑀸𑀡𑀯𑀡𑁆𑀡𑀩𑀮𑀁 𑀚𑀳𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀔𑁂𑀦𑀸𑀢𑀺 𑀢𑀬𑀸 𑀉𑀧𑁆𑀧𑀸𑀤𑀺𑀢𑁂𑀦 𑀦𑀭𑀓𑀫𑁆𑀳𑀺 𑀔𑀺𑀧𑀦𑀤𑀼𑀓𑁆𑀔𑁂𑀦 𑀫𑀫 𑀭𑀚𑁆𑀚𑀲𑀼𑀔𑀁 𑀧𑀦𑀼𑀤𑀺𑀢𑁆𑀯𑀸. 𑀲𑀼𑀔𑁂𑀦 𑀯𑀸 𑀤𑀼𑀓𑁆𑀔𑀦𑁆𑀢𑀺 𑀛𑀸𑀦𑀲𑀼𑀔𑁂𑀦 𑀯𑀸 𑀢𑀁 𑀤𑀼𑀓𑁆𑀔𑀁 𑀧𑀦𑀼𑀤𑀺𑀢𑁆𑀯𑀸. 𑀉𑀪𑀬𑀢𑁆𑀣 𑀲𑀦𑁆𑀢𑁄𑀢𑀺 𑀬𑁂 𑀲𑀦𑁆𑀢𑁄 𑀳𑁄𑀦𑁆𑀢𑀺 𑀫𑀸𑀤𑀺𑀲𑀸, 𑀢𑁂 𑀤𑁆𑀯𑀻𑀲𑀼𑀧𑀺 𑀏𑀢𑁂𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀅𑀪𑀺𑀦𑀺𑀩𑁆𑀩𑀼𑀢𑀲𑀪𑀸𑀯𑀸 𑀫𑀚𑁆𑀛𑀢𑁆𑀢𑀸 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘 𑀪𑀯𑀦𑁆𑀢𑀺 𑀢𑀼𑀮𑁆𑀬𑀸, 𑀏𑀓𑀲𑀤𑀺𑀲𑀸 𑀦𑀺𑀩𑁆𑀩𑀺𑀓𑀸𑀭𑀸𑀯 𑀳𑁄𑀦𑁆𑀢𑀻𑀢𑀺.

𑀇𑀤𑀁 𑀲𑀼𑀢𑁆𑀯𑀸 𑀤𑀼𑀩𑁆𑀪𑀺𑀲𑁂𑀦𑁄 𑀩𑁄𑀥𑀺𑀲𑀢𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀢𑀼𑀫𑁆𑀳𑁂𑀯 𑀓𑀸𑀭𑁂𑀣, 𑀅𑀳𑀁 𑀯𑁄 𑀘𑁄𑀭𑁂 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀤𑀼𑀝𑁆𑀞𑀸𑀫𑀘𑁆𑀘𑀲𑁆𑀲 𑀭𑀸𑀚𑀸𑀡𑀁 𑀓𑀸𑀭𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀚𑁆𑀚𑀁 𑀅𑀫𑀘𑁆𑀘𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀩𑁆𑀪𑀺𑀲𑁂𑀦𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀏𑀓𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁦𑁪] 𑁪. 𑀤𑀤𑁆𑀤𑀭𑀚𑀸𑀢𑀓𑀯𑀡𑁆𑀡𑀦𑀸

𑀇𑀫𑀸𑀦𑀺 𑀫𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑁄𑀥𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ¶ 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯. 𑀢𑀤𑀸 𑀳𑀺 𑀥𑀫𑁆𑀫𑀲𑀪𑀸𑀬𑀁 𑀢𑀲𑁆𑀲 𑀓𑁄𑀥𑀦𑀪𑀸𑀯𑀓𑀣𑀸𑀬 𑀲𑀫𑀼𑀝𑁆𑀞𑀺𑀢𑀸𑀬 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀓𑁄𑀥𑀦𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂 ¶ , 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑁄𑀥𑀦𑁄𑀬𑁂𑀯, 𑀓𑁄𑀥𑀦𑀪𑀸𑀯𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀭𑀺𑀲𑀼𑀤𑁆𑀥𑀸 𑀦𑀸𑀕𑀭𑀸𑀚𑀪𑀸𑀯𑁂 ¶ 𑀞𑀺𑀢𑀸𑀧𑀺 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀕𑀽𑀣𑀧𑀽𑀭𑀺𑀢𑀸𑀬 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀯𑀲𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀤𑀤𑁆𑀤𑀭𑀧𑀩𑁆𑀩𑀢𑀧𑀸𑀤𑁂 𑀤𑀤𑁆𑀤𑀭𑀦𑀸𑀕𑀪𑀯𑀦𑀁 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀲𑁆𑀲 𑀤𑀤𑁆𑀤𑀭𑀭𑀜𑁆𑀜𑁄 𑀧𑀼𑀢𑁆𑀢𑁄 𑀫𑀳𑀸𑀤𑀤𑁆𑀤𑀭𑁄 𑀦𑀸𑀫 𑀅𑀳𑁄𑀲𑀺, 𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀘𑀽𑀴𑀤𑀤𑁆𑀤𑀭𑁄 𑀦𑀸𑀫. 𑀲𑁄 𑀓𑁄𑀥𑀦𑁄 𑀨𑀭𑀼𑀲𑁄 𑀦𑀸𑀕𑀫𑀸𑀡𑀯𑀓𑁂 𑀅𑀓𑁆𑀓𑁄𑀲𑀦𑁆𑀢𑁄 𑀧𑀭𑀺𑀪𑀸𑀲𑀦𑁆𑀢𑁄 𑀧𑀳𑀭𑀦𑁆𑀢𑁄 𑀯𑀺𑀘𑀭𑀢𑀺. 𑀦𑀸𑀕𑀭𑀸𑀚𑀸 𑀢𑀲𑁆𑀲 𑀨𑀭𑀼𑀲𑀪𑀸𑀯𑀁 𑀜𑀢𑁆𑀯𑀸 𑀦𑀸𑀕𑀪𑀯𑀦𑀢𑁄 𑀢𑀁 𑀦𑀻𑀳𑀭𑀸𑀧𑁂𑀢𑀼𑀁 𑀆𑀡𑀸𑀧𑁂𑀲𑀺. 𑀫𑀳𑀸𑀤𑀤𑁆𑀤𑀭𑁄 𑀧𑀦 𑀧𑀺𑀢𑀭𑀁 𑀔𑀫𑀸𑀧𑁂𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀭𑀸𑀚𑀸 𑀢𑀲𑁆𑀲 𑀓𑀼𑀚𑁆𑀛𑀺, 𑀤𑀼𑀢𑀺𑀬𑀫𑁆𑀧𑀺 𑀔𑀫𑀸𑀧𑁂𑀲𑀺. 𑀢𑀢𑀺𑀬𑀯𑀸𑀭𑁂 𑀧𑀦 ‘‘𑀢𑁆𑀯𑀁 𑀫𑀁 𑀇𑀫𑀁 𑀅𑀦𑀸𑀘𑀸𑀭𑀁 𑀦𑀻𑀳𑀭𑀸𑀧𑁂𑀦𑁆𑀢𑀁 𑀦𑀺𑀯𑀸𑀭𑁂𑀲𑀺, 𑀕𑀘𑁆𑀙𑀣 𑀤𑁆𑀯𑁂𑀧𑀺 𑀚𑀦𑀸 𑀇𑀫𑀫𑁆𑀳𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀲𑀣𑀸’’𑀢𑀺 𑀦𑀸𑀕𑀪𑀯𑀦𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺. 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀲𑀺𑀁𑀲𑀼. 𑀅𑀣 𑀦𑁂 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀉𑀤𑀓𑀧𑀭𑀺𑀬𑀦𑁆𑀢𑁂 𑀕𑁄𑀘𑀭𑀁 𑀧𑀭𑀺𑀬𑁂𑀲𑀫𑀸𑀦𑁂 𑀕𑀸𑀫𑀤𑀸𑀭𑀓𑀸 𑀤𑀺𑀲𑁆𑀯𑀸 𑀧𑀳𑀭𑀦𑁆𑀢𑀸 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀬𑁄 𑀔𑀺𑀧𑀦𑁆𑀢𑀸 ‘‘𑀓𑁂 𑀇𑀫𑁂 𑀧𑀼𑀣𑀼𑀮𑀲𑀻𑀲𑀸 𑀲𑀽𑀘𑀺𑀦𑀗𑁆𑀕𑀼𑀝𑁆𑀞𑀸 𑀉𑀤𑀓𑀤𑁂𑀟𑁆𑀟𑀼𑀪𑀸 𑀫𑀡𑁆𑀟𑀽𑀓𑀪𑀓𑁆𑀔𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺.

𑀘𑀽𑀴𑀤𑀤𑁆𑀤𑀭𑁄 𑀘𑀡𑁆𑀟𑀨𑀭𑀼𑀲𑀢𑀸𑀬 𑀢𑁂𑀲𑀁 𑀢𑀁 𑀅𑀯𑀫𑀸𑀦𑀁 𑀅𑀲𑀳𑀦𑁆𑀢𑁄 ‘‘𑀪𑀸𑀢𑀺𑀓, 𑀇𑀫𑁂 𑀤𑀸𑀭𑀓𑀸 𑀅𑀫𑁆𑀳𑁂 𑀧𑀭𑀺𑀪𑀯𑀦𑁆𑀢𑀺, 𑀆𑀲𑀻𑀯𑀺𑀲𑀪𑀸𑀯𑀁 𑀦𑁄 𑀦 𑀚𑀸𑀦𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀯𑀫𑀸𑀦𑀁 𑀲𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀦𑀸𑀲𑀸𑀯𑀸𑀢𑁂𑀦 𑀢𑁂 𑀦𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀪𑀸𑀢𑀭𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩.

‘‘𑀇𑀫𑀸𑀦𑀺 𑀫𑀁 𑀤𑀤𑁆𑀤𑀭 𑀢𑀸𑀧𑀬𑀦𑁆𑀢𑀺, 𑀯𑀸𑀘𑀸𑀤𑀼𑀭𑀼𑀢𑁆𑀢𑀸𑀦𑀺 𑀫𑀦𑀼𑀲𑁆𑀲𑀮𑁄𑀓𑁂;

𑀫𑀡𑁆𑀟𑀽𑀓𑀪𑀓𑁆𑀔𑀸 𑀉𑀤𑀓𑀦𑁆𑀢𑀲𑁂𑀯𑀻, 𑀆𑀲𑀻𑀯𑀺𑀲𑀁 𑀫𑀁 𑀅𑀯𑀺𑀲𑀸 𑀲𑀧𑀦𑁆𑀢𑀻’’𑀢𑀺.

𑀢𑀢𑁆𑀣 ¶ 𑀢𑀸𑀧𑀬𑀦𑁆𑀢𑀻𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺. 𑀫𑀡𑁆𑀟𑀽𑀓𑀪𑀓𑁆𑀔𑀸 𑀉𑀤𑀓𑀦𑁆𑀢𑀲𑁂𑀯𑀻𑀢𑀺 ‘‘𑀫𑀡𑁆𑀟𑀽𑀓𑀪𑀓𑁆𑀔𑀸’’𑀢𑀺 𑀘 ‘‘𑀉𑀤𑀓𑀦𑁆𑀢𑀲𑁂𑀯𑀻’’𑀢𑀺 𑀘 𑀯𑀤𑀦𑁆𑀢𑀸 𑀏𑀢𑁂 𑀅𑀯𑀺𑀲𑀸 𑀕𑀸𑀫𑀤𑀸𑀭𑀓𑀸 𑀫𑀁 𑀆𑀲𑀻𑀯𑀺𑀲𑀁 𑀲𑀫𑀸𑀦𑀁 𑀲𑀧𑀦𑁆𑀢𑀺 𑀅𑀓𑁆𑀓𑁄𑀲𑀦𑁆𑀢𑀻𑀢𑀺.

𑀢𑀲𑁆𑀲 ¶ 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀳𑀸𑀤𑀤𑁆𑀤𑀭𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪.

‘‘𑀲𑀓𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄;

𑀫𑀳𑀦𑁆𑀢𑀁 𑀓𑁄𑀝𑁆𑀞𑀁 𑀓𑀬𑀺𑀭𑀸𑀣, 𑀤𑀼𑀭𑀼𑀢𑁆𑀢𑀸𑀦𑀁 𑀦𑀺𑀥𑁂𑀢𑀯𑁂.

𑁧𑁫.

‘‘𑀬𑀢𑁆𑀣 ¶ 𑀧𑁄𑀲𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;

𑀦 𑀢𑀢𑁆𑀣 𑀫𑀸𑀦𑀁 𑀓𑀬𑀺𑀭𑀸𑀣, 𑀯𑀲𑀫𑀜𑁆𑀜𑀸𑀢𑀓𑁂 𑀚𑀦𑁂.

𑁧𑁬.

‘‘𑀯𑀺𑀤𑁂𑀲𑀯𑀸𑀲𑀁 𑀯𑀲𑀢𑁄, 𑀚𑀸𑀢𑀯𑁂𑀤𑀲𑀫𑁂𑀦𑀧𑀺;

𑀔𑀫𑀺𑀢𑀩𑁆𑀩𑀁 𑀲𑀧𑀜𑁆𑀜𑁂𑀦, 𑀅𑀧𑀺 𑀤𑀸𑀲𑀲𑁆𑀲 𑀢𑀚𑁆𑀚𑀺𑀢’’𑀦𑁆𑀢𑀺.

𑀢𑀢𑁆𑀣 𑀤𑀼𑀭𑀼𑀢𑁆𑀢𑀸𑀦𑀁 𑀦𑀺𑀥𑁂𑀢𑀯𑁂𑀢𑀺 𑀬𑀣𑀸 𑀥𑀜𑁆𑀜𑀦𑀺𑀥𑀸𑀦𑀢𑁆𑀣𑀸𑀬 𑀫𑀳𑀦𑁆𑀢𑀁 𑀓𑁄𑀝𑁆𑀞𑀁 𑀓𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀥𑀜𑁆𑀜𑀁 𑀯𑀴𑀜𑁆𑀚𑁂𑀦𑁆𑀢𑀺, 𑀏𑀯𑀫𑁂𑀯𑀁 𑀯𑀺𑀤𑁂𑀲𑀁 𑀕𑀢𑁄 𑀅𑀦𑁆𑀢𑁄𑀳𑀤𑀬𑁂 𑀧𑀡𑁆𑀟𑀺𑀢𑁄 𑀧𑁄𑀲𑁄 𑀤𑀼𑀭𑀼𑀢𑁆𑀢𑀸𑀦𑀁 𑀦𑀺𑀥𑀸𑀦𑀢𑁆𑀣𑀸𑀬 𑀫𑀳𑀦𑁆𑀢𑀁 𑀓𑁄𑀝𑁆𑀞𑀁 𑀓𑀬𑀺𑀭𑀸𑀣. 𑀢𑀢𑁆𑀣 𑀢𑀸𑀦𑀺 𑀤𑀼𑀭𑀼𑀢𑁆𑀢𑀸𑀦𑀺 𑀦𑀺𑀤𑀳𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀧𑀳𑁄𑀦𑀓𑀓𑀸𑀮𑁂 𑀓𑀸𑀢𑀩𑁆𑀩𑀁 𑀓𑀭𑀺𑀲𑁆𑀲𑀢𑀺. 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸𑀢𑀺 ‘‘𑀅𑀬𑀁 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀸 ‘‘𑀲𑀻𑀮𑀯𑀸 𑀩𑀳𑀼𑀲𑁆𑀲𑀼𑀢𑁄 𑀕𑀼𑀡𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀸 𑀏𑀯𑀁 𑀬𑀢𑁆𑀣 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀦𑀦𑁆𑀢𑀺 𑀏𑀯𑀭𑀽𑀧𑀁 𑀫𑀁 𑀮𑀸𑀫𑀓𑀯𑁄𑀳𑀸𑀭𑁂𑀦 𑀯𑁄𑀳𑀭𑀦𑁆𑀢𑀺, 𑀦 𑀲𑀓𑁆𑀓𑀭𑁄𑀦𑁆𑀢𑀺 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺 𑀫𑀸𑀦𑀁 𑀦 𑀓𑀭𑁂𑀬𑁆𑀬. 𑀯𑀲𑀫𑀜𑁆𑀜𑀸𑀢𑀓𑁂 𑀚𑀦𑁂𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀦𑀺 𑀅𑀚𑀸𑀦𑀦𑁆𑀢𑀲𑁆𑀲 𑀚𑀦𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄. 𑀯𑀲𑀢𑁄𑀢𑀺 𑀯𑀲𑀢𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀏𑀯𑀁 𑀢𑁂 𑀢𑀢𑁆𑀣 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀲𑀺𑀁𑀲𑀼. 𑀅𑀣 𑀦𑁂 𑀧𑀺𑀢𑀸 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀳𑀢𑀫𑀸𑀦𑀸 𑀚𑀸𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁄𑀥𑀦𑁄 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀘𑀽𑀴𑀤𑀤𑁆𑀤𑀭𑁄 𑀓𑁄𑀥𑀦𑁄 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀫𑀳𑀸𑀤𑀤𑁆𑀤𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀤𑁆𑀤𑀭𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁦𑁫] 𑁫. 𑀲𑀻𑀮𑀯𑀻𑀫𑀁𑀲𑀦𑀚𑀸𑀢𑀓𑀯𑀡𑁆𑀡𑀦𑀸

𑀦𑀢𑁆𑀣𑀺 ¶ ¶ 𑀮𑁄𑀓𑁂 𑀭𑀳𑁄 𑀦𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀮𑁂𑀲𑀦𑀺𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀏𑀓𑀸𑀤𑀲𑀓𑀦𑀺𑀧𑀸𑀢𑁂 𑀧𑀸𑀦𑀻𑀬𑀚𑀸𑀢𑀓𑁂 (𑀚𑀸. 𑁧.𑁧𑁧.𑁫𑁯 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀚𑁂𑀢𑀯𑀦𑁂 𑀯𑀲𑀦𑁆𑀢𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑀬𑀺𑀁𑀲𑀼. 𑀲𑀢𑁆𑀣𑀸 ¶ 𑀙𑀲𑀼𑀧𑀺 𑀭𑀢𑁆𑀢𑀺𑀤𑀺𑀯𑀸𑀓𑁄𑀝𑁆𑀞𑀸𑀲𑁂𑀲𑀼 𑀬𑀣𑀸 𑀏𑀓𑀘𑀓𑁆𑀔𑀼𑀓𑁄 𑀘𑀓𑁆𑀔𑀼𑀁, 𑀏𑀓𑀧𑀼𑀢𑁆𑀢𑁄 𑀧𑀼𑀢𑁆𑀢𑀁, 𑀘𑀸𑀫𑀭𑀻 𑀯𑀸𑀮𑀁 𑀅𑀧𑁆𑀧𑀫𑀸𑀤𑁂𑀦 𑀭𑀓𑁆𑀔𑀢𑀺, 𑀏𑀯𑀁 𑀦𑀺𑀘𑁆𑀘𑀓𑀸𑀮𑀁 𑀪𑀺𑀓𑁆𑀔𑀽 𑀑𑀮𑁄𑀓𑁂𑀢𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀚𑁂𑀢𑀯𑀦𑀁 𑀑𑀮𑁄𑀓𑁂𑀦𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀉𑀧𑁆𑀧𑀦𑁆𑀦𑀘𑁄𑀭𑁂 𑀯𑀺𑀬 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀯𑀺𑀯𑀭𑀺𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀆𑀦𑀦𑁆𑀤, 𑀅𑀦𑁆𑀢𑁄𑀚𑁂𑀢𑀯𑀦𑁂 𑀓𑁄𑀝𑀺𑀲𑀦𑁆𑀣𑀸𑀭𑁂 𑀯𑀲𑀦𑀓𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀓𑀢𑁆𑀯𑀸 𑀲𑀢𑁆𑀣𑀼 𑀧𑀝𑀺𑀯𑁂𑀤𑁂𑀲𑀺. 𑀲𑀢𑁆𑀣𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 ‘𑀧𑀸𑀧𑀓𑀭𑀡𑁂 𑀭𑀳𑁄 𑀦𑀸𑀫 𑀦𑀢𑁆𑀣𑀻’𑀢𑀺 𑀧𑀸𑀧𑀁 𑀦 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀢𑁆𑀣𑁂𑀯 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀦𑁆𑀦𑀁 𑀫𑀸𑀡𑀯𑀓𑀲𑀢𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀆𑀘𑀭𑀺𑀬𑀲𑁆𑀲 𑀧𑀦 𑀯𑀬𑀧𑁆𑀧𑀢𑁆𑀢𑀸 𑀥𑀻𑀢𑀸 𑀅𑀢𑁆𑀣𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂𑀲𑀁 𑀫𑀸𑀡𑀯𑀓𑀸𑀦𑀁 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀸𑀡𑀯𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢𑀸, 𑀫𑀬𑁆𑀳𑀁 𑀥𑀻𑀢𑀸 𑀯𑀬𑀧𑁆𑀧𑀢𑁆𑀢𑀸, 𑀯𑀺𑀯𑀸𑀳𑀫𑀲𑁆𑀲𑀸 𑀓𑀸𑀭𑁂𑀲𑁆𑀲𑀸𑀫𑀺, 𑀯𑀢𑁆𑀣𑀸𑀮𑀗𑁆𑀓𑀸𑀭𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀣𑁂𑀦𑁂𑀢𑁆𑀯𑀸 𑀯𑀢𑁆𑀣𑀸𑀮𑀗𑁆𑀓𑀸𑀭𑁂 𑀆𑀳𑀭𑀣, 𑀓𑁂𑀦𑀘𑀺 𑀅𑀤𑀺𑀝𑁆𑀞𑀫𑁂𑀯 𑀕𑀡𑁆𑀳𑀸𑀫𑀺, 𑀤𑀲𑁆𑀲𑁂𑀢𑁆𑀯𑀸 𑀆𑀪𑀢𑀁 𑀦 𑀕𑀡𑁆𑀳𑀸𑀫𑀻’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀜𑀸𑀢𑀓𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀣𑁂𑀦𑁂𑀢𑁆𑀯𑀸 𑀯𑀢𑁆𑀣𑀧𑀺𑀴𑀦𑁆𑀥𑀦𑀸𑀤𑀻𑀦𑀺 𑀆𑀳𑀭𑀦𑁆𑀢𑀺. 𑀆𑀘𑀭𑀺𑀬𑁄 𑀆𑀪𑀢𑀸𑀪𑀢𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀦 𑀓𑀺𑀜𑁆𑀘𑀺 𑀆𑀳𑀭𑀺. 𑀅𑀣 𑀦𑀁 𑀆𑀘𑀭𑀺𑀬𑁄 𑀆𑀳 ‘‘𑀢𑁆𑀯𑀁 ¶ 𑀧𑀦, 𑀢𑀸𑀢, 𑀦 𑀓𑀺𑀜𑁆𑀘𑀺 𑀆𑀳𑀭𑀲𑀻’’𑀢𑀺. ‘‘𑀆𑀫, 𑀆𑀘𑀭𑀺𑀬𑀸’’𑀢𑀺. ‘‘𑀓𑀲𑁆𑀫𑀸, 𑀢𑀸𑀢𑀸’’𑀢𑀺. ‘‘𑀢𑀼𑀫𑁆𑀳𑁂 𑀦 𑀓𑀲𑁆𑀲𑀘𑀺 𑀧𑀲𑁆𑀲𑁆𑀲𑀦𑁆𑀢𑀲𑁆𑀲 𑀆𑀪𑀢𑀁 𑀕𑀡𑁆𑀳𑀣, 𑀅𑀳𑀁 𑀧𑀦 𑀧𑀸𑀧𑀓𑀭𑀡𑁂 𑀭𑀳𑁄 𑀦𑀸𑀫 𑀦 𑀧𑀲𑁆𑀲𑀸𑀫𑀻’’𑀢𑀺 𑀤𑀻𑀧𑁂𑀦𑁆𑀢𑁄 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀆𑀳 𑁋

𑁧𑁭.

‘‘𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄;

𑀧𑀲𑁆𑀲𑀦𑁆𑀢𑀺 𑀯𑀦𑀪𑀽𑀢𑀸𑀦𑀺, 𑀢𑀁 𑀩𑀸𑀮𑁄 𑀫𑀜𑁆𑀜𑀢𑀻 𑀭𑀳𑁄.

𑁧𑁮.

‘‘𑀅𑀳𑀁 ¶ 𑀭𑀳𑁄 𑀦 𑀧𑀲𑁆𑀲𑀸𑀫𑀺, 𑀲𑀼𑀜𑁆𑀜𑀁 𑀯𑀸𑀧𑀺 𑀦 𑀯𑀺𑀚𑁆𑀚𑀢𑀺;

𑀬𑀢𑁆𑀣 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀅𑀲𑀼𑀜𑁆𑀜𑀁 𑀳𑁄𑀢𑀺 𑀢𑀁 𑀫𑀬𑀸’’𑀢𑀺.

𑀢𑀢𑁆𑀣 ¶ 𑀭𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁. 𑀯𑀦𑀪𑀽𑀢𑀸𑀦𑀻𑀢𑀺 𑀯𑀦𑁂 𑀦𑀺𑀩𑁆𑀩𑀢𑁆𑀢𑀪𑀽𑀢𑀸𑀦𑀺. 𑀢𑀁 𑀩𑀸𑀮𑁄𑀢𑀺 𑀢𑀁 𑀧𑀸𑀧𑀓𑀫𑁆𑀫𑀁 𑀭𑀳𑁄 𑀫𑀬𑀸 𑀓𑀢𑀦𑁆𑀢𑀺 𑀩𑀸𑀮𑁄 𑀫𑀜𑁆𑀜𑀢𑀺. 𑀲𑀼𑀜𑁆𑀜𑀁 𑀯𑀸𑀧𑀻𑀢𑀺 𑀬𑀁 𑀯𑀸 𑀞𑀸𑀦𑀁 𑀲𑀢𑁆𑀢𑁂𑀳𑀺 𑀲𑀼𑀜𑁆𑀜𑀁 𑀢𑀼𑀘𑁆𑀙𑀁 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀦𑀢𑁆𑀣𑀻𑀢𑀺 𑀆𑀳.

𑀆𑀘𑀭𑀺𑀬𑁄 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 ‘‘𑀢𑀸𑀢, 𑀦 𑀫𑀬𑁆𑀳𑀁 𑀕𑁂𑀳𑁂 𑀥𑀦𑀁 𑀦𑀢𑁆𑀣𑀺, 𑀅𑀳𑀁 𑀧𑀦 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀥𑀻𑀢𑀭𑀁 𑀤𑀸𑀢𑀼𑀓𑀸𑀫𑁄 𑀇𑀫𑁂 𑀫𑀸𑀡𑀯𑀓𑁂 𑀯𑀻𑀫𑀁𑀲𑀦𑁆𑀢𑁄 𑀏𑀯𑀫𑀓𑀸𑀲𑀺𑀁, 𑀫𑀫 𑀥𑀻𑀢𑀸 𑀢𑀼𑀬𑁆𑀳𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀥𑀻𑀢𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀤𑀸𑀲𑀺. 𑀲𑁂𑀲𑀫𑀸𑀡𑀯𑀓𑁂 ‘‘𑀢𑀼𑀫𑁆𑀳𑁂𑀳𑀺 𑀆𑀪𑀢𑀸𑀪𑀢𑀁 𑀢𑀼𑀫𑁆𑀳𑀸𑀓𑀁 𑀕𑁂𑀳𑀫𑁂𑀯 𑀦𑁂𑀣𑀸’’𑀢𑀺 𑀆𑀳.

𑀲𑀢𑁆𑀣𑀸 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀤𑀼𑀲𑁆𑀲𑀻𑀮𑀫𑀸𑀡𑀯𑀓𑀸 𑀅𑀢𑁆𑀢𑀦𑁄 𑀤𑀼𑀲𑁆𑀲𑀻𑀮𑀢𑀸𑀬 𑀢𑀁 𑀇𑀢𑁆𑀣𑀺𑀁 𑀦 𑀮𑀪𑀺𑀁𑀲𑀼, 𑀇𑀢𑀭𑁄 𑀧𑀡𑁆𑀟𑀺𑀢𑀫𑀸𑀡𑀯𑁄 𑀲𑀻𑀮𑀲𑀫𑁆𑀧𑀦𑁆𑀦𑀢𑀸𑀬 𑀮𑀪𑀻’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁯.

‘‘𑀤𑀼𑀚𑁆𑀚𑀘𑁆𑀘𑁄 𑀘 𑀲𑀼𑀚𑀘𑁆𑀘𑁄 𑀘, 𑀦𑀦𑁆𑀤𑁄 𑀘 𑀲𑀼𑀔𑀯𑀟𑁆𑀠𑀺𑀢𑁄;

𑀯𑀚𑁆𑀚𑁄 𑀘 𑀅𑀤𑁆𑀥𑀼𑀯𑀲𑀻𑀮𑁄 𑀘, 𑀢𑁂 𑀥𑀫𑁆𑀫𑀁 𑀚𑀳𑀼𑀫𑀢𑁆𑀣𑀺𑀓𑀸.

𑁨𑁦.

‘‘𑀩𑁆𑀭𑀸𑀳𑁆𑀫𑀡𑁄 𑀘 𑀓𑀣𑀁 𑀚𑀳𑁂, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀬𑁄 𑀥𑀫𑁆𑀫𑀫𑀦𑀼𑀧𑀸𑀮𑁂𑀢𑀺, 𑀥𑀺𑀢𑀺𑀫𑀸 𑀲𑀘𑁆𑀘𑀦𑀺𑀓𑁆𑀓𑀫𑁄’’𑀢𑀺.

𑀢𑀢𑁆𑀣 𑀤𑀼𑀚𑁆𑀚𑀘𑁆𑀘𑁄𑀢𑀺𑀆𑀤𑀬𑁄 𑀙 𑀚𑁂𑀝𑁆𑀞𑀓𑀫𑀸𑀡𑀯𑀸, 𑀢𑁂𑀲𑀁 𑀦𑀸𑀫𑀁 𑀕𑀡𑁆𑀳𑀺, 𑀅𑀯𑀲𑁂𑀲𑀸𑀦𑀁 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑁂𑀯 ‘‘𑀢𑁂 𑀥𑀫𑁆𑀫𑀁 𑀚𑀳𑀼𑀫𑀢𑁆𑀣𑀺𑀓𑀸’’𑀢𑀺 𑀆𑀳. 𑀢𑀢𑁆𑀣 𑀢𑁂𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀫𑀸𑀡𑀯𑀸. 𑀥𑀫𑁆𑀫𑀦𑁆𑀢𑀺 𑀇𑀢𑁆𑀣𑀺𑀧𑀝𑀺𑀮𑀸𑀪𑀲𑀪𑀸𑀯𑀁 ¶ . 𑀚𑀳𑀼𑀫𑀢𑁆𑀣𑀺𑀓𑀸𑀢𑀺 𑀚𑀳𑀼𑀁 𑀅𑀢𑁆𑀣𑀺𑀓𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀫𑀓𑀸𑀭𑁄 𑀧𑀤𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀩𑁆𑀩𑁂𑀧𑀺 𑀢𑁂 𑀫𑀸𑀡𑀯𑀸 𑀢𑀸𑀬 𑀇𑀢𑁆𑀣𑀺𑀬𑀸 𑀅𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀤𑀼𑀲𑁆𑀲𑀻𑀮𑀢𑀸𑀬 𑀢𑀁 𑀇𑀢𑁆𑀣𑀺𑀧𑀝𑀺𑀮𑀸𑀪𑀲𑀪𑀸𑀯𑀁 𑀚𑀳𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑀘𑀸𑀢𑀺 𑀇𑀢𑀭𑁄 𑀧𑀦 𑀲𑀻𑀮𑀲𑀫𑁆𑀧𑀦𑁆𑀦𑁄 𑀩𑁆𑀭𑀸𑀳𑁆𑀫𑀡𑁄. 𑀓𑀣𑀁 𑀚𑀳𑁂𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀁 𑀇𑀢𑁆𑀣𑀺𑀧𑀝𑀺𑀮𑀸𑀪𑀲𑀪𑀸𑀯𑀁 𑀚𑀳𑀺𑀲𑁆𑀲𑀢𑀺. 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀮𑁄𑀓𑀺𑀬𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺, 𑀤𑀲 ¶ 𑀲𑀻𑀮𑀸𑀦𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀘, 𑀲𑀩𑁆𑀩𑀥𑀫𑁆𑀫𑀸 𑀦𑀸𑀫, 𑀢𑁂𑀲𑀁 𑀲𑁄 𑀧𑀸𑀭𑀁 𑀕𑀢𑁄𑀢𑀺 𑀧𑀸𑀭𑀕𑀽. 𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 ¶ 𑀥𑀫𑁆𑀫𑀁 𑀬𑁄 𑀅𑀦𑀼𑀧𑀸𑀮𑁂𑀢𑀺 𑀭𑀓𑁆𑀔𑀢𑀺. 𑀥𑀺𑀢𑀺𑀫𑀸𑀢𑀺 𑀲𑀻𑀮𑀭𑀓𑁆𑀔𑀦𑀥𑀺𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑀘𑁆𑀘𑀦𑀺𑀓𑁆𑀓𑀫𑁄𑀢𑀺 𑀲𑀘𑁆𑀘𑁂 𑀲𑀪𑀸𑀯𑀪𑀽𑀢𑁂 𑀬𑀣𑀸𑀯𑀼𑀢𑁆𑀢𑁂 𑀲𑀻𑀮𑀥𑀫𑁆𑀫𑁂 𑀦𑀺𑀓𑁆𑀓𑀫𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀤𑀸 𑀆𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀻𑀮𑀯𑀻𑀫𑀁𑀲𑀦𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁦𑁬] 𑁬. 𑀲𑀼𑀚𑀸𑀢𑀸𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀫𑀡𑁆𑀟𑀓𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀁 𑀓𑀺𑀭 𑀭𑀜𑁆𑀜𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀺𑀭𑀺𑀯𑀺𑀯𑀸𑀤𑁄 𑀅𑀳𑁄𑀲𑀺, ‘‘𑀲𑀬𑀦𑀓𑀮𑀳𑁄’’𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 𑀢𑀲𑁆𑀲𑀸 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀫𑀮𑁆𑀮𑀺𑀓𑀸 𑀤𑁂𑀯𑀻𑀧𑀺 ‘‘𑀲𑀢𑁆𑀣𑀸 𑀭𑀜𑁆𑀜𑁄 𑀫𑀬𑀺 𑀓𑀼𑀤𑁆𑀥𑀪𑀸𑀯𑀁 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸𑀧𑀺 𑀜𑀢𑁆𑀯𑀸 ‘‘𑀇𑀫𑁂𑀲𑀁 𑀲𑀫𑀕𑁆𑀕𑀪𑀸𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀆𑀳𑀭𑀺. 𑀲𑀢𑁆𑀣𑀸 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀧𑀺𑀤𑀳𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀓𑀳𑀁 𑀤𑁂𑀯𑀻’’𑀢𑀺 𑀆𑀳. ‘‘𑀓𑀺𑀁, 𑀪𑀦𑁆𑀢𑁂, 𑀢𑀸𑀬 𑀅𑀢𑁆𑀢𑀦𑁄 𑀬𑀲𑁂𑀦 𑀫𑀢𑁆𑀢𑀸𑀬𑀸’’𑀢𑀺? ‘‘𑀫𑀳𑀸𑀭𑀸𑀚, 𑀲𑀬𑀫𑁂𑀯 𑀬𑀲𑀁 𑀤𑀢𑁆𑀯𑀸 𑀫𑀸𑀢𑀼𑀕𑀸𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀬 𑀓𑀢𑀲𑁆𑀲 𑀅𑀧𑀭𑀸𑀥𑀲𑁆𑀲 𑀅𑀲𑀳𑀦𑀁 𑀦𑀸𑀫 𑀦 𑀬𑀼𑀢𑁆𑀢’’𑀦𑁆𑀢𑀺. 𑀭𑀸𑀚𑀸 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑀺, 𑀲𑀸 𑀲𑀢𑁆𑀣𑀸𑀭𑀁 ¶ 𑀧𑀭𑀺𑀯𑀺𑀲𑀺. 𑀲𑀢𑁆𑀣𑀸 ‘‘𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑁂𑀳𑀺 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀸𑀫𑀕𑁆𑀕𑀺𑀭𑀲𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀉𑀪𑁄 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀏𑀓𑀯𑀘𑀦𑁂𑀦𑁂𑀯 𑀉𑀪𑁄 𑀲𑀫𑀕𑁆𑀕𑁂 𑀅𑀓𑀸𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 ¶ 𑀏𑀢𑁂 𑀏𑀓𑀯𑀸𑀤𑁂𑀦𑁂𑀯 𑀲𑀫𑀕𑁆𑀕𑁂 𑀅𑀓𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀸 𑀧𑀡𑁆𑀡𑀺𑀓𑀥𑀻𑀢𑀸 𑀅𑀪𑀺𑀭𑀽𑀧𑀸 𑀧𑀞𑀫𑀯𑀬𑁂 𑀞𑀺𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀩𑀤𑀭𑀧𑀘𑁆𑀙𑀺𑀁 𑀲𑀻𑀲𑁂 𑀓𑀢𑁆𑀯𑀸 ‘‘𑀩𑀤𑀭𑀸𑀦𑀺 𑀕𑀡𑁆𑀳𑀣, 𑀩𑀤𑀭𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀯𑀤𑀫𑀸𑀦𑀸 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀢𑀺. 𑀭𑀸𑀚𑀸 𑀢𑀲𑁆𑀲𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺. 𑀲𑀸 𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀲𑀼𑀯𑀡𑁆𑀡𑀢𑀝𑁆𑀝𑀓𑁂 𑀩𑀤𑀭𑀸𑀦𑀺 𑀔𑀸𑀤𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀤𑀸 𑀲𑀼𑀚𑀸𑀢𑀸 𑀤𑁂𑀯𑀻 𑀭𑀸𑀚𑀸𑀦𑀁 𑀩𑀤𑀭𑀸𑀦𑀺 𑀔𑀸𑀤𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀭𑀸𑀚, 𑀓𑀺𑀁 𑀦𑀸𑀫 𑀢𑀼𑀫𑁆𑀳𑁂 𑀔𑀸𑀤𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁧.

‘‘𑀓𑀺𑀫𑀡𑁆𑀟𑀓𑀸 𑀇𑀫𑁂 𑀤𑁂𑀯, 𑀦𑀺𑀓𑁆𑀔𑀺𑀢𑁆𑀢𑀸 𑀓𑀁𑀲𑀫𑀮𑁆𑀮𑀓𑁂;

𑀉𑀧𑀮𑁄𑀳𑀺𑀢𑀓𑀸 𑀯𑀕𑁆𑀕𑀽, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 𑀓𑀺𑀫𑀡𑁆𑀟𑀓𑀸𑀢𑀺 𑀓𑀺𑀁𑀨𑀮𑀸𑀦𑀺 𑀦𑀸𑀫𑁂𑀢𑀸𑀦𑀺, 𑀧𑀭𑀺𑀫𑀡𑁆𑀟𑀮𑀯𑀲𑁂𑀦 𑀧𑀦 𑀅𑀡𑁆𑀟𑀓𑀸𑀢𑀺 𑀆𑀳. 𑀓𑀁𑀲𑀫𑀮𑁆𑀮𑀓𑁂𑀢𑀺 𑀲𑀼𑀯𑀡𑁆𑀡𑀢𑀝𑁆𑀝𑀓𑁂. 𑀉𑀧𑀮𑁄𑀳𑀺𑀢𑀓𑀸𑀢𑀺 𑀭𑀢𑁆𑀢𑀯𑀡𑁆𑀡𑀸. 𑀯𑀕𑁆𑀕𑀽𑀢𑀺 𑀘𑁄𑀓𑁆𑀔𑀸 𑀦𑀺𑀫𑁆𑀫𑀮𑀸.

𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀩𑀤𑀭𑀯𑀸𑀡𑀺𑀚𑀓𑁂 𑀧𑀡𑁆𑀡𑀺𑀓𑀕𑀳𑀧𑀢𑀺𑀓𑀲𑁆𑀲 𑀥𑀻𑀢𑁂 𑀅𑀢𑁆𑀢𑀦𑁄 𑀓𑀼𑀮𑀲𑀦𑁆𑀢𑀓𑀸𑀦𑀺 𑀩𑀤𑀭𑀸𑀦𑀺𑀧𑀺 𑀦 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨.

‘‘𑀬𑀸𑀦𑀺 ¶ 𑀧𑀼𑀭𑁂 𑀢𑀼𑀯𑀁 𑀤𑁂𑀯𑀺, 𑀪𑀡𑁆𑀟𑀼 𑀦𑀦𑁆𑀢𑀓𑀯𑀸𑀲𑀺𑀦𑀻;

𑀉𑀘𑁆𑀙𑀗𑁆𑀕𑀳𑀢𑁆𑀣𑀸 𑀧𑀘𑀺𑀦𑀸𑀲𑀺, 𑀢𑀲𑁆𑀲𑀸 𑀢𑁂 𑀓𑁄𑀮𑀺𑀬𑀁 𑀨𑀮𑀁.

𑁨𑁩.

‘‘𑀉𑀟𑁆𑀟𑀬𑁆𑀳𑀢𑁂 𑀦 𑀭𑀫𑀢𑀺, 𑀪𑁄𑀕𑀸 𑀯𑀺𑀧𑁆𑀧𑀚𑀳𑀦𑁆𑀢𑀺 𑀢𑀁;

𑀢𑀢𑁆𑀣𑁂𑀯𑀺𑀫𑀁 𑀧𑀝𑀺𑀦𑁂𑀣, 𑀬𑀢𑁆𑀣 𑀓𑁄𑀮𑀁 𑀧𑀘𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀪𑀡𑁆𑀟𑀽𑀢𑀺 𑀫𑀼𑀡𑁆𑀟𑀲𑀻𑀲𑀸 𑀳𑀼𑀢𑁆𑀯𑀸. 𑀦𑀦𑁆𑀢𑀓𑀯𑀸𑀲𑀺𑀦𑀻𑀢𑀺 𑀚𑀺𑀡𑁆𑀡𑀧𑀺𑀮𑁄𑀢𑀺𑀓𑀦𑀺𑀯𑀢𑁆𑀣𑀸. 𑀉𑀘𑁆𑀙𑀗𑁆𑀕𑀳𑀢𑁆𑀣𑀸 𑀧𑀘𑀺𑀦𑀸𑀲𑀻𑀢𑀺 𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀗𑁆𑀓𑀼𑀲𑀓𑁂𑀦 𑀲𑀸𑀔𑀁 𑀑𑀦𑀸𑀫𑁂𑀢𑁆𑀯𑀸 𑀑𑀘𑀺𑀢𑁄𑀘𑀺𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀧𑀓𑁆𑀔𑀺𑀧𑀦𑀯𑀲𑁂𑀦 𑀉𑀘𑁆𑀙𑀗𑁆𑀕𑀳𑀢𑁆𑀣𑀸 ¶ 𑀳𑀼𑀢𑁆𑀯𑀸 𑀧𑀘𑀺𑀦𑀸𑀲𑀺 𑀑𑀘𑀺𑀦𑀸𑀲𑀺. 𑀢𑀲𑁆𑀲𑀸 𑀢𑁂 𑀓𑁄𑀮𑀺𑀬𑀁 𑀨𑀮𑀦𑁆𑀢𑀺 𑀢𑀲𑁆𑀲𑀸 𑀢𑀯 𑀏𑀯𑀁 𑀧𑀘𑀺𑀦𑀦𑁆𑀢𑀺𑀬𑀸 𑀑𑀘𑀺𑀦𑀦𑁆𑀢𑀺𑀬𑀸 𑀬𑀫𑀳𑀁 𑀇𑀤𑀸𑀦𑀺 𑀔𑀸𑀤𑀸𑀫𑀺, 𑀇𑀤𑀁 𑀓𑁄𑀮𑀺𑀬𑀁 𑀓𑀼𑀮𑀤𑀢𑁆𑀢𑀺𑀬𑀁 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑀉𑀟𑁆𑀟𑀬𑁆𑀳𑀢𑁂 ¶ 𑀦 𑀭𑀫𑀢𑀻𑀢𑀺 𑀅𑀬𑀁 𑀚𑀫𑁆𑀫𑀻 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀯𑀲𑀫𑀸𑀦𑀸 𑀮𑁄𑀳𑀓𑀼𑀫𑁆𑀪𑀺𑀬𑀁 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀟𑀬𑁆𑀳𑀢𑀺 𑀦𑀸𑀪𑀺𑀭𑀫𑀢𑀺. 𑀪𑁄𑀕𑀸𑀢𑀺 𑀭𑀸𑀚𑀪𑁄𑀕𑀸 𑀇𑀫𑀁 𑀅𑀮𑀓𑁆𑀔𑀺𑀓𑀁 𑀯𑀺𑀧𑁆𑀧𑀚𑀳𑀦𑁆𑀢𑀺. 𑀬𑀢𑁆𑀣 𑀓𑁄𑀮𑀁 𑀧𑀘𑀺𑀲𑁆𑀲𑀢𑀻𑀢𑀺 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀦 𑀩𑀤𑀭𑀫𑁂𑀯 𑀧𑀘𑀺𑀦𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀻 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀢𑀺, 𑀢𑀢𑁆𑀣𑁂𑀯 𑀦𑀁 𑀦𑁂𑀣𑀸𑀢𑀺 𑀯𑀤𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀇𑀫𑁂 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀅𑀦𑀺𑀓𑁆𑀓𑀟𑁆𑀠𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁨𑁪.

‘‘𑀳𑁄𑀦𑁆𑀢𑀺 𑀳𑁂𑀢𑁂 𑀫𑀳𑀸𑀭𑀸𑀚, 𑀇𑀤𑁆𑀥𑀺𑀧𑁆𑀧𑀢𑁆𑀢𑀸𑀬 𑀦𑀸𑀭𑀺𑀬𑀸;

𑀔𑀫 𑀤𑁂𑀯 𑀲𑀼𑀚𑀸𑀢𑀸𑀬, 𑀫𑀸𑀲𑁆𑀲𑀸 𑀓𑀼𑀚𑁆𑀛 𑀭𑀣𑁂𑀲𑀪𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀏𑀢𑁂 𑀏𑀯𑀭𑀽𑀧𑀸 𑀧𑀫𑀸𑀤𑀤𑁄𑀲𑀸 𑀬𑀲𑀁 𑀧𑀢𑁆𑀢𑀸𑀬 𑀦𑀸𑀭𑀺𑀬𑀸 𑀳𑁄𑀦𑁆𑀢𑀺𑀬𑁂𑀯, 𑀏𑀢𑀁 𑀏𑀯𑀭𑀽𑀧𑁂 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀏𑀢𑁆𑀢𑀓𑀲𑁆𑀲 𑀅𑀧𑀭𑀸𑀥𑀲𑁆𑀲 𑀅𑀲𑀳𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀁 𑀢𑀼𑀫𑁆𑀳𑀸𑀓𑀁, 𑀢𑀲𑁆𑀫𑀸 𑀔𑀫, 𑀤𑁂𑀯, 𑀲𑀼𑀚𑀸𑀢𑀸𑀬, 𑀏𑀢𑀺𑀲𑁆𑀲𑀸 𑀫𑀸 𑀓𑀼𑀚𑁆𑀛 𑀭𑀣𑁂𑀲𑀪 𑀭𑀣𑀚𑁂𑀝𑁆𑀞𑀓𑀸𑀢𑀺.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑁂𑀦 𑀤𑁂𑀯𑀺𑀬𑀸 𑀢𑀁 𑀅𑀧𑀭𑀸𑀥𑀁 𑀲𑀳𑀺𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀦𑀁 𑀞𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀉𑀪𑁄 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀽𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀓𑁄𑀲𑀮𑀭𑀸𑀚𑀸 𑀅𑀳𑁄𑀲𑀺, 𑀲𑀼𑀚𑀸𑀢𑀸 𑀫𑀮𑁆𑀮𑀺𑀓𑀸, 𑀅𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀚𑀸𑀢𑀸𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁦𑁭] 𑁭. 𑀧𑀮𑀸𑀲𑀚𑀸𑀢𑀓𑀯𑀡𑁆𑀡𑀦𑀸

𑀅𑀘𑁂𑀢𑀦𑀁 ¶ 𑀩𑁆𑀭𑀸𑀳𑁆𑀫𑀡 𑀅𑀲𑁆𑀲𑀼𑀡𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄𑀳𑀸𑀬𑀲𑁆𑀫𑀸 ‘‘𑀅𑀚𑁆𑀚 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀅𑀳𑀜𑁆𑀘𑀫𑁆𑀳𑀺 𑀲𑁂𑀓𑁆𑀔𑁄 𑀲𑀓𑀭𑀡𑀻𑀬𑁄, 𑀲𑀢𑁆𑀣𑀼 𑀘 𑀫𑁂 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀲𑀢𑁆𑀣𑀼 𑀓𑀢𑀁 ¶ 𑀉𑀧𑀝𑁆𑀞𑀸𑀦𑀁 𑀦𑀺𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑁄𑀓𑀸𑀪𑀺𑀪𑀽𑀢𑁄 𑀉𑀬𑁆𑀬𑀸𑀦𑀑𑀯𑀭𑀓𑁂 𑀓𑀧𑀺𑀲𑀻𑀲𑀁 𑀆𑀮𑀫𑁆𑀩𑀺𑀢𑁆𑀯𑀸 𑀧𑀭𑁄𑀤𑀺. 𑀲𑀢𑁆𑀣𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ¶ 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄, 𑀫𑀸 𑀘𑀺𑀦𑁆𑀢𑀬𑀺, 𑀇𑀤𑀸𑀦𑀺 𑀢𑀬𑀸 𑀫𑀫 𑀓𑀢𑀁 𑀉𑀧𑀝𑁆𑀞𑀸𑀦𑀁 𑀓𑀺𑀁𑀓𑀸𑀭𑀡𑀸 𑀦𑀺𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀺, 𑀬𑀲𑁆𑀲 𑀢𑁂 𑀧𑀼𑀩𑁆𑀩𑁂 𑀲𑀭𑀸𑀕𑀸𑀤𑀺𑀓𑀸𑀮𑁂𑀧𑀺 𑀫𑀫 𑀓𑀢𑀁 𑀉𑀧𑀝𑁆𑀞𑀸𑀦𑀁 𑀦𑀺𑀧𑁆𑀨𑀮𑀁 𑀦𑀸𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀧𑀮𑀸𑀲𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀤𑁂𑀯𑀢𑀸𑀫𑀗𑁆𑀕𑀮𑀺𑀓𑀸 𑀅𑀳𑁂𑀲𑀼𑀁 𑀦𑀺𑀘𑁆𑀘𑀁 𑀩𑀮𑀺𑀓𑀭𑀡𑀸𑀤𑀻𑀲𑀼 𑀧𑀬𑀼𑀢𑁆𑀢𑀸. 𑀅𑀣𑁂𑀓𑁄 𑀤𑀼𑀕𑁆𑀕𑀢𑀩𑁆𑀭𑀸𑀳𑁆𑀫𑀡𑁄 ‘‘𑀅𑀳𑀫𑁆𑀧𑀺 𑀏𑀓𑀁 𑀤𑁂𑀯𑀢𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀞𑀺𑀢𑀲𑁆𑀲 𑀫𑀳𑀢𑁄 𑀧𑀮𑀸𑀲𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀲𑀫𑀁 𑀦𑀺𑀢𑁆𑀢𑀺𑀡𑀁 𑀓𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀺𑀢𑁆𑀯𑀸𑀯 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀭𑀼𑀓𑁆𑀔𑁂 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀸𑀦𑀺 𑀤𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀥𑀽𑀫𑁂𑀳𑀺 𑀧𑀽𑀚𑁂𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 ‘‘𑀲𑀼𑀔𑀁 𑀲𑀬𑀸’’𑀢𑀺 𑀯𑀢𑁆𑀯𑀸 𑀭𑀼𑀓𑁆𑀔𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀢𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀼𑀓𑁆𑀔𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀢𑀺𑀯𑀺𑀬 𑀫𑀁 𑀧𑀝𑀺𑀚𑀕𑁆𑀕𑀢𑀺, 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀯𑀻𑀫𑀁𑀲𑀺𑀢𑁆𑀯𑀸 𑀬𑁂𑀦 𑀓𑀸𑀭𑀡𑁂𑀦 𑀫𑀁 𑀧𑀝𑀺𑀚𑀕𑁆𑀕𑀢𑀺, 𑀢𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀲𑁆𑀫𑀺𑀁 𑀔𑀡𑁂 𑀩𑁆𑀭𑀸𑀳𑁆𑀫𑀡𑁂 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀲𑀫𑁆𑀫𑀚𑁆𑀚𑀦𑁆𑀢𑁂 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀲𑀫𑀻𑀧𑁂 𑀞𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁫.

‘‘𑀅𑀘𑁂𑀢𑀦𑀁 ¶ 𑀩𑁆𑀭𑀸𑀳𑁆𑀫𑀡 𑀅𑀲𑁆𑀲𑀼𑀡𑀦𑁆𑀢𑀁, 𑀚𑀸𑀦𑁄 𑀅𑀚𑀸𑀦𑀦𑁆𑀢𑀫𑀺𑀫𑀁 𑀧𑀮𑀸𑀲𑀁;

𑀆𑀭𑀤𑁆𑀥𑀯𑀺𑀭𑀺𑀬𑁄 𑀥𑀼𑀯𑀁 𑀅𑀧𑁆𑀧𑀫𑀢𑁆𑀢𑁄, 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀲𑀺 𑀓𑀺𑀲𑁆𑀲 𑀳𑁂𑀢𑀽’’𑀢𑀺.

𑀢𑀢𑁆𑀣 𑀅𑀲𑁆𑀲𑀼𑀡𑀦𑁆𑀢𑀦𑁆𑀢𑀺 𑀅𑀘𑁂𑀢𑀦𑀢𑁆𑀢𑀸𑀯 𑀅𑀲𑀼𑀡𑀦𑁆𑀢𑀁. 𑀚𑀸𑀦𑁄𑀢𑀺 𑀢𑀼𑀯𑀁 𑀚𑀸𑀦𑀫𑀸𑀦𑁄 𑀳𑀼𑀢𑁆𑀯𑀸 𑀥𑀼𑀯𑀁 𑀅𑀧𑁆𑀧𑀫𑀢𑁆𑀢𑁄𑀢𑀺 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑁄.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁬.

‘‘𑀤𑀽𑀭𑁂 𑀲𑀼𑀢𑁄 𑀘𑁂𑀯 𑀩𑁆𑀭𑀳𑀸 𑀘 𑀭𑀼𑀓𑁆𑀔𑁄, 𑀤𑁂𑀲𑁂 𑀞𑀺𑀢𑁄 𑀪𑀽𑀢𑀦𑀺𑀯𑀸𑀲𑀭𑀽𑀧𑁄;

𑀢𑀲𑁆𑀫𑀸 𑀦𑀫𑀲𑁆𑀲𑀸𑀫𑀺 𑀇𑀫𑀁 𑀧𑀮𑀸𑀲𑀁, 𑀬𑁂 𑀘𑁂𑀢𑁆𑀣 𑀪𑀽𑀢𑀸 𑀢𑁂 𑀥𑀦𑀲𑁆𑀲 𑀳𑁂𑀢𑀽’’𑀢𑀺.

𑀢𑀢𑁆𑀣 ¶ 𑀤𑀽𑀭𑁂 𑀲𑀼𑀢𑁄𑀢𑀺 𑀩𑁆𑀭𑀸𑀳𑁆𑀫𑀡 𑀅𑀬𑀁 𑀭𑀼𑀓𑁆𑀔𑁄 𑀤𑀽𑀭𑁂 𑀲𑀼𑀢𑁄 𑀯𑀺𑀲𑁆𑀲𑀼𑀢𑁄, 𑀦 𑀆𑀲𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀧𑀸𑀓𑀝𑁄. 𑀩𑁆𑀭𑀳𑀸 𑀘𑀸𑀢𑀺 𑀫𑀳𑀦𑁆𑀢𑁄 𑀘. 𑀤𑁂𑀲𑁂 𑀞𑀺𑀢𑁄𑀢𑀺 𑀉𑀦𑁆𑀦𑀢𑁂 𑀲𑀫𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀞𑀺𑀢𑁄. 𑀪𑀽𑀢𑀦𑀺𑀯𑀸𑀲𑀭𑀽𑀧𑁄𑀢𑀺 ¶ 𑀤𑁂𑀯𑀢𑀸𑀦𑀺𑀯𑀸𑀲𑀲𑀪𑀸𑀯𑁄, 𑀅𑀤𑁆𑀥𑀸 𑀏𑀢𑁆𑀣 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀦𑀺𑀯𑀼𑀢𑁆𑀣𑀸 𑀪𑀯𑀺𑀲𑁆𑀲𑀢𑀺. 𑀢𑁂 𑀥𑀦𑀲𑁆𑀲 𑀳𑁂𑀢𑀽𑀢𑀺 𑀇𑀫𑀜𑁆𑀘 𑀭𑀼𑀓𑁆𑀔𑀁 𑀬𑁂 𑀘𑁂𑀢𑁆𑀣 𑀦𑀺𑀯𑀼𑀢𑁆𑀣𑀸 𑀪𑀽𑀢𑀸, 𑀢𑁂 𑀥𑀦𑀲𑁆𑀲 𑀳𑁂𑀢𑀼 𑀦𑀫𑀲𑁆𑀲𑀸𑀫𑀺, 𑀦 𑀦𑀺𑀓𑁆𑀓𑀸𑀭𑀡𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀲𑀦𑁆𑀦𑀸 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸, 𑀫𑀸 𑀪𑀸𑀬𑀺, 𑀥𑀦𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀤𑁆𑀯𑀸𑀭𑁂 𑀫𑀳𑀦𑁆𑀢𑁂𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀞𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁭.

‘‘𑀲𑁄 𑀢𑁂 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀦𑀼𑀪𑀸𑀯𑀁, 𑀓𑀢𑀜𑁆𑀜𑀼𑀢𑀁 𑀩𑁆𑀭𑀸𑀳𑁆𑀫𑀡 𑀧𑁂𑀓𑁆𑀔𑀫𑀸𑀦𑁄;

𑀓𑀣𑀜𑁆𑀳𑀺 𑀆𑀕𑀫𑁆𑀫 𑀲𑀢𑀁 𑀲𑀓𑀸𑀲𑁂, 𑀫𑁄𑀖𑀸𑀦𑀺 𑀢𑁂 𑀅𑀲𑁆𑀲𑀼 𑀧𑀭𑀺𑀨𑀦𑁆𑀤𑀺𑀢𑀸𑀦𑀺.

𑁨𑁮.

‘‘𑀬𑁄 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑀲𑁆𑀲 𑀧𑀭𑁄 𑀧𑀺𑀮𑀓𑁆𑀔𑁄, 𑀧𑀭𑀺𑀯𑀸𑀭𑀺𑀢𑁄 𑀧𑀼𑀩𑁆𑀩𑀬𑀜𑁆𑀜𑁄 𑀉𑀴𑀸𑀭𑁄;

𑀢𑀲𑁆𑀲𑁂𑀲 𑀫𑀽𑀮𑀲𑁆𑀫𑀺𑀁 𑀦𑀺𑀥𑀺 𑀦𑀺𑀔𑀸𑀢𑁄, 𑀅𑀤𑀸𑀬𑀸𑀤𑁄 𑀕𑀘𑁆𑀙 𑀢𑀁 𑀉𑀤𑁆𑀥𑀭𑀸𑀳𑀻’’𑀢𑀺.

𑀢𑀢𑁆𑀣 ¶ 𑀬𑀣𑀸𑀦𑀼𑀪𑀸𑀯𑀦𑁆𑀢𑀺 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁. 𑀓𑀢𑀜𑁆𑀜𑀼𑀢𑀦𑁆𑀢𑀺 𑀢𑀬𑀸 𑀫𑀬𑁆𑀳𑀁 𑀓𑀢𑀕𑀼𑀡𑀁 𑀚𑀸𑀦𑀦𑁆𑀢𑁄 𑀢𑀁 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀁 𑀓𑀢𑀜𑁆𑀜𑀼𑀢𑀁 𑀧𑁂𑀓𑁆𑀔𑀫𑀸𑀦𑁄. 𑀆𑀕𑀫𑁆𑀫𑀸𑀢𑀺 𑀆𑀕𑀦𑁆𑀢𑁆𑀯𑀸. 𑀲𑀢𑀁 𑀲𑀓𑀸𑀲𑁂𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀦𑁆𑀢𑀺𑀓𑁂. 𑀫𑁄𑀖𑀸𑀦𑀺 𑀢𑁂 𑀅𑀲𑁆𑀲𑀼 𑀧𑀭𑀺𑀨𑀦𑁆𑀤𑀺𑀢𑀸𑀦𑀻𑀢𑀺 𑀲𑀼𑀔𑀲𑁂𑀬𑁆𑀬𑀧𑀼𑀘𑁆𑀙𑀦𑀯𑀲𑁂𑀦 𑀯𑀸𑀘𑀸𑀨𑀦𑁆𑀤𑀺𑀢𑀸𑀦𑀺 𑀲𑀫𑁆𑀫𑀚𑁆𑀚𑀦𑀸𑀤𑀺𑀓𑀭𑀡𑁂𑀦 𑀓𑀸𑀬𑀨𑀦𑁆𑀤𑀺𑀢𑀸𑀦𑀺 𑀘 𑀢𑀯 𑀓𑀣𑀁 𑀅𑀨𑀮𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺.

𑀬𑁄 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑀲𑁆𑀲 𑀧𑀭𑁄 𑀧𑀺𑀮𑀓𑁆𑀔𑁄𑀢𑀺 𑀬𑁄 𑀏𑀲 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑀲𑁆𑀲 𑀧𑀭𑀢𑁄 𑀧𑀺𑀮𑀓𑁆𑀔𑀭𑀼𑀓𑁆𑀔𑁄 𑀞𑀺𑀢𑁄𑀢𑀺 𑀯𑀺𑀫𑀸𑀦𑀤𑁆𑀯𑀸𑀭𑁂 𑀞𑀺𑀢𑀸𑀯 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀧𑀭𑀺𑀯𑀸𑀭𑀺𑀢𑁄𑀢𑀺𑀆𑀤𑀻𑀲𑀼 𑀢𑀲𑁆𑀲 𑀧𑀺𑀮𑀓𑁆𑀔𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀏𑀲 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀳𑀺𑀢𑀢𑀸𑀬 𑀧𑀭𑀺𑀯𑀸𑀭𑀺𑀢𑁄, 𑀧𑀼𑀩𑁆𑀩𑁂 𑀬𑀺𑀝𑁆𑀞𑀬𑀜𑁆𑀜𑀯𑀲𑁂𑀦 𑀧𑀼𑀭𑀺𑀫𑀲𑀸𑀫𑀺𑀓𑀸𑀦𑀁 𑀉𑀧𑁆𑀧𑀦𑁆𑀦𑀢𑀸𑀬 𑀧𑀼𑀩𑁆𑀩𑀬𑀜𑁆𑀜𑁄, 𑀅𑀦𑁂𑀓𑀦𑀺𑀥𑀺𑀓𑀼𑀫𑁆𑀪𑀺 𑀪𑀸𑀯𑁂𑀦 𑀫𑀳𑀦𑁆𑀢𑀢𑁆𑀢𑀸 ¶ 𑀉𑀴𑀸𑀭𑁄, 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀦𑀺𑀔𑀸𑀢𑁄, 𑀇𑀤𑀸𑀦𑀺 𑀤𑀸𑀬𑀸𑀤𑀸𑀦𑀁 𑀅𑀪𑀸𑀯𑀢𑁄 𑀅𑀤𑀸𑀬𑀸𑀤𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀲 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀻𑀯𑀸𑀬 𑀕𑀻𑀯𑀁 𑀧𑀳𑀭𑀦𑁆𑀢𑀻𑀦𑀁 𑀦𑀺𑀥𑀺𑀓𑀼𑀫𑁆𑀪𑀻𑀦𑀁 𑀯𑀲𑁂𑀦 𑀫𑀳𑀸𑀦𑀺𑀥𑀺 𑀦𑀺𑀔𑀸𑀢𑁄 𑀅𑀲𑀸𑀫𑀺𑀓𑁄, 𑀕𑀘𑁆𑀙 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀸 𑀤𑁂𑀯𑀢𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀏𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀓𑀺𑀮𑀫𑀺𑀲𑁆𑀲𑀲𑀺, 𑀕𑀘𑁆𑀙 𑀢𑁆𑀯𑀁, 𑀅𑀳𑀫𑁂𑀯 𑀢𑀁 𑀢𑀯 𑀖𑀭𑀁 𑀦𑁂𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀅𑀲𑀼𑀓𑀲𑁆𑀫𑀺𑀜𑁆𑀘 𑀞𑀸𑀦𑁂 𑀦𑀺𑀤𑀳𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀏𑀢𑀁 𑀥𑀦𑀁 𑀬𑀸𑀯𑀚𑀻𑀯𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔𑀸𑀳𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀢𑀁 𑀥𑀦𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀲 𑀖𑀭𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀮𑀸𑀲𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁦𑁮] 𑁮. 𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀅𑀓𑀢𑀜𑁆𑀜𑀼𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀅𑀓𑀢𑀜𑁆𑀜𑀽𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀭𑀼𑀓𑁆𑀔𑀓𑁄𑀝𑁆𑀝𑀓𑀲𑀓𑀼𑀡𑁄 𑀳𑀼𑀢𑁆𑀯𑀸 ¶ 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀲𑁆𑀲 𑀲𑀻𑀳𑀲𑁆𑀲 𑀫𑀁𑀲𑀁 𑀔𑀸𑀤𑀦𑁆𑀢𑀲𑁆𑀲 𑀅𑀝𑁆𑀞𑀺 𑀕𑀮𑁂 𑀮𑀕𑁆𑀕𑀺, 𑀕𑀮𑁄 𑀉𑀤𑁆𑀥𑀼𑀫𑀸𑀬𑀺, 𑀕𑁄𑀘𑀭𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀔𑀭𑀸 𑀯𑁂𑀤𑀦𑀸 𑀧𑀯𑀢𑁆𑀢𑀢𑀺. 𑀅𑀣 𑀦𑀁 𑀲𑁄 𑀲𑀓𑀼𑀡𑁄 𑀕𑁄𑀘𑀭𑀧𑁆𑀧𑀲𑀼𑀢𑁄 𑀤𑀺𑀲𑁆𑀯𑀸 𑀲𑀸𑀔𑀸𑀬 𑀦𑀺𑀮𑀻𑀦𑁄 ‘‘𑀓𑀺𑀁 𑀢𑁂, 𑀲𑀫𑁆𑀫, 𑀤𑀼𑀓𑁆𑀔’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺. ‘‘𑀅𑀳𑀁 𑀢𑁂, 𑀲𑀫𑁆𑀫, 𑀏𑀢𑀁 𑀅𑀝𑁆𑀞𑀺𑀁 𑀅𑀧𑀦𑁂𑀬𑁆𑀬𑀁, 𑀪𑀬𑁂𑀦 𑀧𑀦 𑀢𑁂 𑀫𑀼𑀔𑀁 𑀧𑀯𑀺𑀲𑀺𑀢𑀼𑀁 𑀦 𑀯𑀺𑀲𑀳𑀸𑀫𑀺, 𑀔𑀸𑀤𑁂𑀬𑁆𑀬𑀸𑀲𑀺𑀧𑀺 𑀫’’𑀦𑁆𑀢𑀺. ‘‘𑀫𑀸 𑀪𑀸𑀬𑀺, 𑀲𑀫𑁆𑀫, 𑀦𑀸𑀳𑀁 𑀢𑀁 𑀔𑀸𑀤𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀁 𑀯𑀸𑀫𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀫𑁆𑀧𑁂𑀲 𑀓𑀭𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸 𑀫𑀼𑀔𑀁 𑀧𑀺𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀢𑀲𑁆𑀲 𑀅𑀥𑀭𑁄𑀝𑁆𑀞𑁂 𑀘 ¶ 𑀉𑀢𑁆𑀢𑀭𑁄𑀝𑁆𑀞𑁂 𑀘 𑀤𑀡𑁆𑀟𑀓𑀁 𑀞𑀧𑁂𑀢𑁆𑀯𑀸 𑀫𑀼𑀔𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀺𑀓𑁄𑀝𑀺𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺, 𑀅𑀝𑁆𑀞𑀺 𑀧𑀢𑀺𑀢𑁆𑀯𑀸 𑀕𑀢𑀁. 𑀲𑁄 𑀅𑀝𑁆𑀞𑀺𑀁 𑀧𑀸𑀢𑁂𑀢𑁆𑀯𑀸 𑀲𑀻𑀳𑀲𑁆𑀲 𑀫𑀼𑀔𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀤𑀡𑁆𑀟𑀓𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀔𑀕𑁆𑀕𑁂 𑀦𑀺𑀮𑀻𑀬𑀺. 𑀲𑀻𑀳𑁄 𑀦𑀺𑀭𑁄𑀕𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀏𑀓𑀁 𑀯𑀦𑀫𑀳𑀺𑀁𑀲𑀁 𑀯𑀥𑀺𑀢𑁆𑀯𑀸 𑀔𑀸𑀤𑀢𑀺. 𑀲𑀓𑀼𑀡𑁄 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀲𑀸𑀔𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀁, 𑀬𑀁 𑀩𑀮𑀁 𑀅𑀳𑀼𑀯𑀫𑁆𑀳𑀲𑁂;

𑀫𑀺𑀕𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀅𑀧𑀺 𑀓𑀺𑀜𑁆𑀘𑀺 𑀮𑀪𑀸𑀫𑀲𑁂’’𑀢𑀺.

𑀢𑀢𑁆𑀣 𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀦𑁆𑀢𑀺 𑀪𑁄, 𑀲𑀻𑀳, 𑀫𑀬𑀫𑁆𑀧𑀺 𑀢𑀯 𑀏𑀓𑀁 𑀓𑀺𑀘𑁆𑀘𑀁 𑀅𑀓𑀭𑀺𑀫𑁆𑀳. 𑀬𑀁 𑀩𑀮𑀁 𑀅𑀳𑀼𑀯𑀫𑁆𑀳𑀲𑁂𑀢𑀺 𑀬𑀁 𑀅𑀫𑁆𑀳𑀸𑀓𑀁 𑀩𑀮𑀁 𑀅𑀳𑁄𑀲𑀺, 𑀢𑁂𑀦 𑀩𑀮𑁂𑀦 𑀢𑀢𑁄 𑀓𑀺𑀜𑁆𑀘𑀺 𑀅𑀳𑀸𑀧𑁂𑀢𑁆𑀯𑀸 𑀅𑀓𑀭𑀺𑀫𑁆𑀳𑀬𑁂𑀯.

𑀢𑀁 ¶ 𑀲𑀼𑀢𑁆𑀯𑀸 𑀲𑀻𑀳𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁦.

‘‘𑀫𑀫 𑀮𑁄𑀳𑀺𑀢𑀪𑀓𑁆𑀔𑀲𑁆𑀲, 𑀦𑀺𑀘𑁆𑀘𑀁 𑀮𑀼𑀤𑁆𑀤𑀸𑀦𑀺 𑀓𑀼𑀩𑁆𑀩𑀢𑁄;

𑀤𑀦𑁆𑀢𑀦𑁆𑀢𑀭𑀕𑀢𑁄 𑀲𑀦𑁆𑀢𑁄, 𑀢𑀁 𑀩𑀳𑀼𑀁 𑀬𑀫𑁆𑀧𑀺 𑀚𑀻𑀯𑀲𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀓𑀼𑀡𑁄 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁧.

‘‘𑀅𑀓𑀢𑀜𑁆𑀜𑀼𑀫𑀓𑀢𑁆𑀢𑀸𑀭𑀁, 𑀓𑀢𑀲𑁆𑀲 𑀅𑀧𑁆𑀧𑀝𑀺𑀓𑀸𑀭𑀓𑀁;

𑀬𑀲𑁆𑀫𑀺𑀁 𑀓𑀢𑀜𑁆𑀜𑀼𑀢𑀸 𑀦𑀢𑁆𑀣𑀺, 𑀦𑀺𑀭𑀢𑁆𑀣𑀸 𑀢𑀲𑁆𑀲 𑀲𑁂𑀯𑀦𑀸.

𑁩𑁨.

‘‘𑀬𑀲𑁆𑀲 ¶ 𑀲𑀫𑁆𑀫𑀼𑀔𑀘𑀺𑀡𑁆𑀡𑁂𑀦, 𑀫𑀺𑀢𑁆𑀢𑀥𑀫𑁆𑀫𑁄 𑀦 𑀮𑀩𑁆𑀪𑀢𑀺;

𑀅𑀦𑀼𑀲𑀽𑀬𑀫𑀦𑀓𑁆𑀓𑁄𑀲𑀁, 𑀲𑀡𑀺𑀓𑀁 𑀢𑀫𑁆𑀳𑀸 𑀅𑀧𑀓𑁆𑀓𑀫𑁂’’𑀦𑁆𑀢𑀺.

𑀢𑀢𑁆𑀣 𑀅𑀓𑀢𑀜𑁆𑀜𑀼𑀦𑁆𑀢𑀺 𑀓𑀢𑀕𑀼𑀡𑀁 𑀅𑀚𑀸𑀦𑀦𑁆𑀢𑀁. 𑀅𑀓𑀢𑁆𑀢𑀸𑀭𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀅𑀓𑀭𑁄𑀦𑁆𑀢𑀁. 𑀲𑀫𑁆𑀫𑀼𑀔𑀘𑀺𑀡𑁆𑀡𑁂𑀦𑀸𑀢𑀺 𑀲𑀫𑁆𑀫𑀼𑀔𑁂 𑀓𑀢𑁂𑀦 𑀕𑀼𑀡𑁂𑀦. 𑀅𑀦𑀼𑀲𑀽𑀬𑀫𑀦𑀓𑁆𑀓𑁄𑀲𑀦𑁆𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀦 𑀉𑀲𑀽𑀬𑀦𑁆𑀢𑁄 𑀦 𑀅𑀓𑁆𑀓𑁄𑀲𑀦𑁆𑀢𑁄 𑀲𑀡𑀺𑀓𑀁 𑀢𑀫𑁆𑀳𑀸 𑀧𑀸𑀧𑀧𑀼𑀕𑁆𑀕𑀮𑀸 𑀅𑀧𑀕𑀘𑁆𑀙𑁂𑀬𑁆𑀬𑀸𑀢𑀺. 𑀏𑀯𑀁 𑀯𑀢𑁆𑀯𑀸 𑀲𑁄 𑀲𑀓𑀼𑀡𑁄 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀻𑀳𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀓𑀼𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁦𑁯] 𑁯. 𑀙𑀯𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑀫𑀺𑀤𑀁 ¶ 𑀘𑀭𑀺𑀫𑀁 𑀓𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀯𑀺𑀦𑀬𑁂 (𑀧𑀸𑀘𑀺. 𑁬𑁪𑁬) 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀲𑀢𑁆𑀣𑀸 𑀙𑀩𑁆𑀩𑀕𑁆𑀕𑀺𑀬𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 ‘‘𑀅𑀬𑀼𑀢𑁆𑀢𑀁, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀫𑀫 𑀥𑀫𑁆𑀫𑁂 𑀅𑀕𑀸𑀭𑀯𑀓𑀭𑀡𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀳𑀺 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀸𑀳𑀺𑀭𑀓𑀫𑀦𑁆𑀢𑁂𑀧𑀺 𑀯𑀸𑀘𑁂𑀦𑁆𑀢𑁂 𑀕𑀭𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀘𑀡𑁆𑀟𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀅𑀫𑁆𑀩𑀤𑁄𑀳𑀴𑀺𑀦𑀻 𑀳𑀼𑀢𑁆𑀯𑀸 𑀢𑀁 𑀆𑀳 ‘‘𑀲𑀸𑀫𑀺, 𑀇𑀘𑁆𑀙𑀸𑀫𑀳𑀁 𑀅𑀫𑁆𑀩𑀁 𑀔𑀸𑀤𑀺𑀢𑀼’’𑀦𑁆𑀢𑀺. ‘‘𑀪𑀤𑁆𑀤𑁂, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀅𑀫𑁆𑀩𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀫𑁆𑀩𑀺𑀮𑀨𑀮𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀫𑀺, 𑀅𑀫𑁆𑀩𑀨𑀮𑀁 𑀮𑀪𑀫𑀸𑀦𑀸𑀯 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀫𑀸𑀦𑀸𑀬 𑀫𑁂 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺. 𑀲𑁄 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 ¶ ‘‘𑀓𑀳𑀁 𑀦𑀼 𑀔𑁄 𑀅𑀫𑁆𑀩𑀨𑀮𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀅𑀫𑁆𑀩𑁄 𑀥𑀼𑀯𑀨𑀮𑁄 𑀳𑁄𑀢𑀺. 𑀲𑁄 ‘‘𑀢𑀢𑁄 𑀅𑀫𑁆𑀩𑀧𑀓𑁆𑀓𑀁 𑀆𑀳𑀭𑀺𑀢𑁆𑀯𑀸 𑀇𑀫𑀺𑀲𑁆𑀲𑀸 𑀤𑁄𑀳𑀴𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀅𑀫𑁆𑀩𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀮𑀻𑀦𑁄 𑀲𑀸𑀔𑀸𑀬 𑀲𑀸𑀔𑀁 𑀅𑀫𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀘𑀭𑀺. 𑀢𑀲𑁆𑀲 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲𑁂𑀯 𑀭𑀢𑁆𑀢𑀺 𑀯𑀺𑀪𑀸𑀬𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀇𑀤𑀸𑀦𑀺 𑀑𑀢𑀭𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀤𑀺𑀲𑁆𑀯𑀸 𑀫𑀁 ‘𑀘𑁄𑀭𑁄’𑀢𑀺 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀪𑀸𑀕𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑁂𑀓𑀁 𑀯𑀺𑀝𑀧𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀮𑀻𑀦𑁄 𑀅𑀘𑁆𑀙𑀺.

𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 ‘‘𑀧𑀼𑀭𑁄𑀳𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀘𑀭𑀺𑀬𑀁 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀧𑀭𑀺 𑀦𑀺𑀮𑀻𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀸𑀯 𑀅𑀥𑀫𑁆𑀫𑀺𑀓𑁄 𑀅𑀬𑀁 𑀭𑀸𑀚𑀸, 𑀬𑁄 𑀉𑀘𑁆𑀘𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄𑀧𑀺 𑀅𑀥𑀫𑁆𑀫𑀺𑀓𑁄, 𑀬𑁄 𑀦𑀻𑀘𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑁂 𑀯𑀸𑀘𑁂𑀢𑀺. 𑀅𑀳𑀫𑁆𑀧𑀺 𑀅𑀥𑀫𑁆𑀫𑀺𑀓𑁄, 𑀬𑁄 𑀫𑀸𑀢𑀼𑀕𑀸𑀫𑀲𑁆𑀲 𑀯𑀲𑀁 𑀕𑀦𑁆𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁 𑀅𑀕𑀡𑁂𑀢𑁆𑀯𑀸 𑀅𑀫𑁆𑀩𑀁 𑀆𑀳𑀭𑀸𑀫𑀻’’𑀢𑀺. 𑀲𑁄 𑀭𑀼𑀓𑁆𑀔𑀢𑁄 𑀑𑀢𑀭𑀦𑁆𑀢𑁄 𑀏𑀓𑀁 ¶ 𑀑𑀮𑀫𑁆𑀩𑀦𑀲𑀸𑀔𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑁂 𑀧𑀢𑀺𑀝𑁆𑀞𑀸𑀬 ‘‘𑀫𑀳𑀸𑀭𑀸𑀚, 𑀅𑀳𑀁 𑀦𑀝𑁆𑀞𑁄, 𑀢𑁆𑀯𑀁 𑀫𑀽𑀴𑁆𑀳𑁄, 𑀧𑀼𑀭𑁄𑀳𑀺𑀢𑁄 𑀫𑀢𑁄’’𑀢𑀺 𑀆𑀳. 𑀲𑁄 𑀭𑀜𑁆𑀜𑀸 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀧𑀼𑀝𑁆𑀞𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁩.

‘‘𑀲𑀩𑁆𑀩𑀫𑀺𑀤𑀁 𑀘𑀭𑀺𑀫𑀁 𑀓𑀢𑀁, 𑀉𑀪𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀭𑁂;

𑀉𑀪𑁄 𑀧𑀓𑀢𑀺𑀬𑀸 𑀘𑀼𑀢𑀸, 𑀬𑁄 𑀘𑀸𑀬𑀁 𑀫𑀦𑁆𑀢𑁂𑀚𑁆𑀛𑀸𑀧𑁂𑀢𑀺;

𑀬𑁄 𑀘 𑀫𑀦𑁆𑀢𑀁 𑀅𑀥𑀻𑀬𑀢𑀻’’𑀢𑀺.

𑀢𑀢𑁆𑀣 𑀲𑀩𑁆𑀩𑀫𑀺𑀤𑀁 𑀘𑀭𑀺𑀫𑀁 𑀓𑀢𑀦𑁆𑀢𑀺 𑀬𑀁 𑀅𑀫𑁆𑀳𑁂𑀳𑀺 𑀢𑀻𑀳𑀺 𑀚𑀦𑁂𑀳𑀺 𑀓𑀢𑀁, 𑀲𑀩𑁆𑀩𑀁 𑀇𑀤𑀁 𑀓𑀺𑀘𑁆𑀘𑀁 𑀮𑀸𑀫𑀓𑀁 𑀦𑀺𑀫𑁆𑀫𑀭𑀺𑀬𑀸𑀤𑀁 𑀅𑀥𑀫𑁆𑀫𑀺𑀓𑀁. 𑀏𑀯𑀁 𑀅𑀢𑁆𑀢𑀦𑁄 𑀘𑁄𑀭𑀪𑀸𑀯𑀁 𑀢𑁂𑀲𑀜𑁆𑀘 𑀫𑀦𑁆𑀢𑁂𑀲𑀼 𑀅𑀕𑀸𑀭𑀯𑀁 𑀕𑀭𑀳𑀺𑀢𑁆𑀯𑀸 𑀧𑀼𑀦 𑀇𑀢𑀭𑁂 𑀤𑁆𑀯𑁂𑀬𑁂𑀯 𑀕𑀭𑀳𑀦𑁆𑀢𑁄 ‘‘𑀉𑀪𑁄 ¶ 𑀥𑀫𑁆𑀫𑀁 𑀦 𑀧𑀲𑁆𑀲𑀭𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀪𑁄𑀢𑀺 𑀇𑀫𑁂 𑀤𑁆𑀯𑁂𑀧𑀺 𑀚𑀦𑀸 𑀕𑀭𑀼𑀓𑀸𑀭𑀸𑀭𑀳𑀁 𑀧𑁄𑀭𑀸𑀡𑀓𑀥𑀫𑁆𑀫𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀢𑁄 𑀥𑀫𑁆𑀫𑀧𑀓𑀢𑀺𑀢𑁄 𑀘𑀼𑀢𑀸. 𑀥𑀫𑁆𑀫𑁄 𑀳𑀺 𑀧𑀞𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀓𑀢𑀺 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀥𑀫𑁆𑀫𑁄 ¶ 𑀳𑀯𑁂 𑀧𑀸𑀢𑀼𑀭𑀳𑁄𑀲𑀺 𑀧𑀼𑀩𑁆𑀩𑁂;

𑀧𑀘𑁆𑀙𑀸 𑀅𑀥𑀫𑁆𑀫𑁄 𑀉𑀤𑀧𑀸𑀤𑀺 𑀮𑁄𑀓𑁂’’𑀢𑀺. (𑀚𑀸. 𑁧.𑁧𑁧.𑁨𑁮);

𑀬𑁄 𑀘𑀸𑀬𑀦𑁆𑀢𑀺 𑀬𑁄 𑀘 𑀅𑀬𑀁 𑀦𑀻𑀘𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑁂 𑀅𑀚𑁆𑀛𑀸𑀧𑁂𑀢𑀺, 𑀬𑁄 𑀘 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀥𑀻𑀬𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁪.

‘‘𑀲𑀸𑀮𑀻𑀦𑀁 𑀑𑀤𑀦𑀁 𑀪𑀼𑀜𑁆𑀚𑁂, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁂𑀯𑀸𑀫𑀺, 𑀥𑀫𑁆𑀫𑀁 𑀇𑀲𑀻𑀳𑀺 𑀲𑁂𑀯𑀺𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀜𑁆𑀳𑀺 𑀪𑁄 𑀇𑀫𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀲𑀸𑀮𑀻𑀦𑀁 𑀑𑀤𑀦𑀁 𑀲𑀼𑀘𑀺𑀁 𑀧𑀡𑁆𑀟𑀭𑀁 𑀦𑀸𑀦𑀧𑁆𑀧𑀓𑀸𑀭𑀸𑀬 𑀫𑀁𑀲𑀯𑀺𑀓𑀢𑀺𑀬𑀸 𑀲𑀺𑀢𑁆𑀢𑀁 𑀫𑀁𑀲𑀽𑀧𑀲𑁂𑀘𑀦𑀁 𑀪𑀼𑀜𑁆𑀚𑀸𑀫𑀺, 𑀢𑀲𑁆𑀫𑀸 𑀉𑀤𑀭𑁂 𑀩𑀤𑁆𑀥𑁄 𑀳𑀼𑀢𑁆𑀯𑀸 𑀏𑀢𑀁 𑀏𑀲𑀺𑀢𑀕𑀼𑀡𑁂𑀳𑀺 𑀇𑀲𑀻𑀳𑀺 𑀲𑁂𑀯𑀺𑀢𑀁 𑀥𑀫𑁆𑀫𑀁 𑀦 𑀲𑁂𑀯𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁫.

‘‘𑀧𑀭𑀺𑀩𑁆𑀩𑀚 𑀫𑀳𑀸 𑀮𑁄𑀓𑁄, 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄;

𑀫𑀸 𑀢𑀁 𑀅𑀥𑀫𑁆𑀫𑁄 𑀆𑀘𑀭𑀺𑀢𑁄, 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸.

𑁩𑁬.

‘‘𑀥𑀺𑀭𑀢𑁆𑀣𑀼 ¶ 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸’’𑀢𑀺.

𑀢𑀢𑁆𑀣 𑀧𑀭𑀺𑀩𑁆𑀩𑀚𑀸𑀢𑀺 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙. 𑀫𑀳𑀸𑀢𑀺 𑀅𑀬𑀁 𑀮𑁄𑀓𑁄 𑀦𑀸𑀫 𑀫𑀳𑀸. 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄𑀢𑀺 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑁂𑀧𑀺 𑀧𑀸𑀡𑀺𑀦𑁄 𑀧𑀘𑀦𑁆𑀢𑀺, 𑀦𑀸𑀬𑀫𑁂𑀯𑁂𑀓𑁄 𑀭𑀸𑀚𑀸. 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸𑀢𑀺 𑀧𑀸𑀲𑀸𑀡𑁄 𑀖𑀝𑀁 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑁆𑀯𑀁 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥 𑀯𑀲𑀦𑁆𑀢𑁄 𑀅𑀥𑀫𑁆𑀫𑀁 𑀆𑀘𑀭𑀲𑀺, 𑀲𑁄 𑀅𑀥𑀫𑁆𑀫𑁄 𑀏𑀯𑀁 𑀆𑀘𑀭𑀺𑀢𑁄 𑀧𑀸𑀲𑀸𑀡𑁄 𑀖𑀝𑀁 𑀯𑀺𑀬 𑀫𑀸 𑀢𑀁 𑀪𑀺𑀦𑁆𑀤𑀺.

‘‘𑀥𑀺𑀭𑀢𑁆𑀣𑀽’’𑀢𑀺 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀩𑁆𑀭𑀸𑀳𑁆𑀫𑀡 𑀬𑁄 𑀏𑀲 𑀏𑀯𑀁 𑀢𑀯 𑀬𑀲𑀮𑀸𑀪𑁄 𑀘 𑀥𑀦𑀮𑀸𑀪𑁄 𑀘 𑀥𑀺𑀭𑀢𑁆𑀣𑀼, 𑀢𑀁 𑀕𑀭𑀳𑀸𑀫 𑀫𑀬𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀬𑀁 𑀢𑀬𑀸 ¶ 𑀮𑀤𑁆𑀥𑀮𑀸𑀪𑁄 𑀆𑀬𑀢𑀺𑀁 𑀅𑀧𑀸𑀬𑁂𑀲𑀼 ¶ 𑀯𑀺𑀦𑀺𑀧𑀸𑀢𑀦𑀳𑁂𑀢𑀼𑀦𑀸 𑀲𑀫𑁆𑀧𑀢𑀺 𑀘 𑀅𑀥𑀫𑁆𑀫𑀘𑀭𑀡𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺, 𑀬𑀸 𑀘𑁂𑀲𑀸 𑀯𑀼𑀢𑁆𑀢𑀺 𑀇𑀫𑀺𑀦𑀸 𑀆𑀬𑀢𑀺𑀁 𑀯𑀺𑀦𑀺𑀧𑀸𑀢𑁂𑀦 𑀇𑀥 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸 𑀦𑀺𑀧𑁆𑀧𑀚𑁆𑀚𑀢𑀺, 𑀓𑀺𑀁 𑀢𑀸𑀬, 𑀢𑁂𑀦 𑀢𑀁 𑀏𑀯𑀁 𑀯𑀤𑀸𑀫𑀻𑀢𑀺.

𑀅𑀣𑀲𑁆𑀲 𑀥𑀫𑁆𑀫𑀓𑀣𑀸𑀬 𑀭𑀸𑀚𑀸 𑀧𑀲𑀻𑀤𑀺𑀢𑁆𑀯𑀸 ‘‘𑀪𑁄, 𑀧𑀼𑀭𑀺𑀲, 𑀓𑀺𑀁𑀚𑀸𑀢𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀘𑀡𑁆𑀟𑀸𑀮𑁄 𑀅𑀳𑀁, 𑀤𑁂𑀯𑀸’’𑀢𑀺. 𑀪𑁄 ‘‘𑀲𑀘𑁂 𑀢𑁆𑀯𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀅𑀪𑀯𑀺𑀲𑁆𑀲, 𑀭𑀚𑁆𑀚𑀁 𑀢𑁂 𑀅𑀳𑀁 𑀅𑀤𑀲𑁆𑀲𑀁, 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀳𑀁 𑀤𑀺𑀯𑀸 𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀭𑀢𑁆𑀢𑀺𑀁 𑀭𑀸𑀚𑀸 𑀳𑁄𑀳𑀻’’𑀢𑀺 𑀅𑀢𑁆𑀢𑀦𑁄 𑀓𑀡𑁆𑀞𑁂 𑀧𑀺𑀴𑀦𑁆𑀥𑀦𑀁 𑀧𑀼𑀧𑁆𑀨𑀤𑀸𑀫𑀁 𑀢𑀲𑁆𑀲 𑀕𑀻𑀯𑀸𑀬𑀁 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀢𑀁 𑀦𑀕𑀭𑀕𑀼𑀢𑁆𑀢𑀺𑀓𑀁 𑀅𑀓𑀸𑀲𑀺. 𑀅𑀬𑀁 𑀦𑀕𑀭𑀕𑀼𑀢𑁆𑀢𑀺𑀓𑀸𑀦𑀁 𑀓𑀡𑁆𑀞𑁂 𑀭𑀢𑁆𑀢𑀧𑀼𑀧𑁆𑀨𑀤𑀸𑀫𑀧𑀺𑀴𑀦𑁆𑀥𑀦𑀯𑀁𑀲𑁄. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀭𑀸𑀚𑀸 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀆𑀘𑀭𑀺𑀬𑁂 𑀕𑀸𑀭𑀯𑀁 𑀓𑀭𑀺𑀢𑁆𑀯𑀸 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀦𑁆𑀢𑁂 𑀉𑀕𑁆𑀕𑀡𑁆𑀳𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀙𑀯𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁧𑁦] 𑁧𑁦. 𑀲𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸

𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀪𑀺𑀭𑀽𑀧𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁄 𑀲𑀸𑀲𑀦𑁂 𑀦𑀸𑀪𑀺𑀭𑀫𑀺. 𑀅𑀣 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀪𑀕𑀯𑀢𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀓𑁄 𑀢𑀁 𑀉𑀓𑁆𑀓𑀡𑁆𑀞𑀸𑀧𑁂𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀓𑀲𑁆𑀫𑀸 𑀢𑁆𑀯𑀁 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀺, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀪𑀦𑁆𑀢𑀸𑀧𑀺 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑁄𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 ¶ 𑀭𑀜𑁆𑀜𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑁂 𑀯𑀺𑀚𑀸𑀬𑀺. 𑀭𑀸𑀚𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀫𑁂 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑁂 𑀚𑀸𑀢𑁄’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄’’𑀢𑀺. 𑀭𑀸𑀚𑀸 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄𑀯 𑀧𑀝𑀺𑀚𑀕𑁆𑀕𑀸𑀧𑁂𑀲𑀺. 𑀉𑀪𑀺𑀦𑁆𑀦𑀁 𑀆𑀪𑀭𑀡𑀸𑀦𑀺 𑀘𑁂𑀯 𑀧𑀸𑀦𑀪𑁄𑀚𑀦𑀸𑀤𑀻𑀦𑀺 𑀘 𑀏𑀓𑀲𑀤𑀺𑀲𑀸𑀦𑁂𑀯 𑀅𑀳𑁂𑀲𑀼𑀁. 𑀢𑁂 𑀯𑀬𑀧𑁆𑀧𑀢𑁆𑀢𑀸 ¶ 𑀏𑀓𑀢𑁄𑀯 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀫𑀁𑀲𑀼. 𑀭𑀸𑀚𑀸 𑀧𑀼𑀢𑁆𑀢𑀲𑁆𑀲 𑀑𑀧𑀭𑀚𑁆𑀚𑀁 𑀅𑀤𑀸𑀲𑀺, 𑀫𑀳𑀸𑀬𑀲𑁄 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄𑀯 𑀔𑀸𑀤𑀢𑀺 𑀧𑀺𑀯𑀢𑀺 𑀲𑀬𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀸𑀲𑁄 𑀣𑀺𑀭𑁄 𑀅𑀳𑁄𑀲𑀺.

𑀅𑀧𑀭𑀪𑀸𑀕𑁂 𑀭𑀸𑀚𑀧𑀼𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺. 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀲𑀳𑀸𑀬𑁄 𑀭𑀚𑁆𑀚𑀫𑀦𑀼𑀲𑀸𑀲𑀢𑀺, 𑀲𑀮𑁆𑀮𑀓𑁆𑀔𑀺𑀢𑀓𑁆𑀔𑀡𑁂𑀬𑁂𑀯 𑀔𑁄 𑀧𑀦 𑀫𑀬𑁆𑀳𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑁂𑀲𑁆𑀲𑀸𑀫𑀻’’𑀢𑀺? 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀙𑀟𑁆𑀟𑁂𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑁄𑀭𑀫𑁂 𑀪𑀽𑀫𑀺𑀪𑀸𑀕𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀺𑀳𑀸𑀲𑀺. 𑀢𑀤𑀸 𑀭𑀸𑀚𑀸 𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀲𑁄’’𑀢𑀺 𑀧𑀼𑀘𑁆𑀙𑀺. 𑀅𑀫𑀘𑁆𑀘𑀸 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀭𑀫𑀡𑀻𑀬𑁂 𑀓𑀺𑀭 𑀯𑀦𑀲𑀡𑁆𑀟𑁂 𑀯𑀲𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀯𑀲𑀦𑁄𑀓𑀸𑀲𑀁 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀲𑁂𑀬𑁆𑀬𑀁 𑀦𑀸𑀫 𑀅𑀫𑀘𑁆𑀘𑀁 ‘‘𑀕𑀘𑁆𑀙 𑀲𑀳𑀸𑀬𑀁 𑀫𑁂 𑀕𑀳𑁂𑀢𑁆𑀯𑀸 𑀏𑀳𑀺, 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀢𑁆𑀯𑀸 𑀢𑀢𑁆𑀣 𑀔𑀦𑁆𑀥𑀸𑀯𑀸𑀭𑀁 𑀞𑀧𑁂𑀢𑁆𑀯𑀸 𑀯𑀦𑀘𑀭𑀓𑁂𑀳𑀺 𑀲𑀤𑁆𑀥𑀺𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑀦𑁄𑀓𑀸𑀲𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀲𑀼𑀯𑀡𑁆𑀡𑀧𑀝𑀺𑀫𑀁 𑀯𑀺𑀬 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀪𑀦𑁆𑀢𑁂, 𑀭𑀸𑀚𑀸 𑀢𑀼𑀬𑁆𑀳𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀤𑀸𑀢𑀼𑀓𑀸𑀫𑁄, 𑀆𑀕𑀫𑀦𑀁 ¶ 𑀢𑁂 𑀇𑀘𑁆𑀙𑀢𑀻’’𑀢𑀺 𑀆𑀳.

𑀩𑁄𑀥𑀺𑀲𑀢𑁆𑀢𑁄 ‘‘𑀢𑀺𑀝𑁆𑀞𑀢𑀼 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁, 𑀅𑀳𑀁 𑀲𑀓𑀮𑀁 𑀓𑀸𑀲𑀺𑀓𑁄𑀲𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀫𑁂𑀯 𑀯𑀸 𑀮𑀪𑀦𑁆𑀢𑁄𑀧𑀺 𑀦 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀦 𑀳𑀺 𑀧𑀡𑁆𑀟𑀺𑀢𑀸 𑀲𑀓𑀺𑀁 𑀚𑀳𑀺𑀢𑀓𑀺𑀮𑁂𑀲𑁂 𑀧𑀼𑀦 𑀕𑀡𑁆𑀳𑀦𑁆𑀢𑀺, 𑀲𑀓𑀺𑀁 𑀚𑀳𑀺𑀢𑀜𑁆𑀳𑀺 𑀦𑀺𑀝𑁆𑀞𑀼𑀪𑀔𑁂𑀴𑀲𑀤𑀺𑀲𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁭.

‘‘𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀦 𑀇𑀘𑁆𑀙𑁂 𑀲𑀳 𑀦𑀺𑀦𑁆𑀤𑀸𑀬, 𑀏𑀯𑀁 𑀲𑁂𑀬𑁆𑀬 𑀯𑀺𑀚𑀸𑀦𑀳𑀺.

𑁩𑁮.

‘‘𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸.

𑁩𑁯.

‘‘𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀲𑀸𑀬𑁂𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄, 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸.

𑁪𑁦.

‘‘𑀅𑀧𑀺 ¶ 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀅𑀜𑁆𑀜𑀁 𑀅𑀳𑀺𑀁𑀲𑀬𑀁 𑀮𑁄𑀓𑁂, 𑀅𑀧𑀺 𑀭𑀚𑁆𑀚𑁂𑀦 𑀢𑀁 𑀯𑀭’’𑀦𑁆𑀢𑀺.

𑀢𑀢𑁆𑀣 𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀦𑁆𑀢𑀺 𑀧𑀭𑀺𑀬𑀸𑀬𑁄 𑀯𑀼𑀘𑁆𑀘𑀢𑀺 𑀧𑀭𑀺𑀯𑀸𑀭𑁄, 𑀲𑀫𑀼𑀤𑁆𑀤𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀦 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦 𑀲𑀤𑁆𑀥𑀺𑀁, 𑀲𑀫𑀼𑀤𑁆𑀤𑀲𑀗𑁆𑀔𑀸𑀢𑁂𑀦 𑀯𑀸 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀕𑀭𑀓𑀼𑀡𑁆𑀟𑀮𑀦𑁆𑀢𑀺 𑀲𑀸𑀕𑀭𑀫𑀚𑁆𑀛𑁂 𑀤𑀻𑀧𑀯𑀲𑁂𑀦 𑀞𑀺𑀢𑀢𑁆𑀢𑀸 𑀢𑀲𑁆𑀲 𑀓𑀼𑀡𑁆𑀟𑀮𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀦𑁆𑀤𑀸𑀬𑀸𑀢𑀺 𑀛𑀸𑀦𑀲𑀼𑀔𑀲𑀫𑁆𑀧𑀦𑁆𑀦𑀁 𑀧𑀩𑁆𑀩𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀇𑀲𑁆𑀲𑀭𑀺𑀬𑀁 𑀕𑀡𑁆𑀳𑀻𑀢𑀺 𑀇𑀫𑀸𑀬 𑀦𑀺𑀦𑁆𑀤𑀸𑀬. 𑀲𑁂𑀬𑁆𑀬𑀸𑀢𑀺 𑀢𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀯𑀺𑀚𑀸𑀦𑀳𑀻𑀢𑀺 𑀥𑀫𑁆𑀫𑀁 𑀯𑀺𑀚𑀸𑀦𑀸𑀳𑀺. 𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦𑀸𑀢𑀺 𑀬𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀯𑀲𑁂𑀦 𑀮𑀤𑁆𑀥𑀸 𑀬𑀲𑀮𑀸𑀪𑀥𑀦𑀮𑀸𑀪𑀯𑀼𑀢𑁆𑀢𑀺 𑀛𑀸𑀦𑀲𑀼𑀔𑀢𑁄 𑀅𑀢𑁆𑀢𑀯𑀺𑀦𑀺𑀧𑀸𑀢𑀦𑀲𑀗𑁆𑀔𑀸𑀢𑁂𑀦 𑀯𑀺𑀦𑀺𑀧𑀸𑀢𑁂𑀦 𑀇𑀢𑁄 𑀕𑀦𑁆𑀢𑁆𑀯𑀸 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑀲𑁆𑀲 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸 𑀳𑁄𑀢𑀺, 𑀢𑀁 𑀯𑀼𑀢𑁆𑀢𑀺𑀁 𑀥𑀺𑀭𑀢𑁆𑀣𑀼.

𑀧𑀢𑁆𑀢𑀫𑀸𑀤𑀸𑀬𑀸𑀢𑀺 ¶ 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸. 𑀅𑀦𑀕𑀸𑀭𑁄𑀢𑀺 𑀅𑀧𑀺 𑀅𑀳𑀁 𑀅𑀕𑀸𑀭𑀯𑀺𑀭𑀳𑀺𑀢𑁄 𑀧𑀭𑀓𑀼𑀮𑁂𑀲𑀼 𑀘𑀭𑁂𑀬𑁆𑀬𑀁. 𑀲𑀸𑀬𑁂𑀯 𑀚𑀻𑀯𑀺𑀓𑀸𑀢𑀺 𑀲𑀸 𑀏𑀯 𑀫𑁂 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄 𑀯𑀭𑀢𑀭𑀸. 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸𑀢𑀺 𑀬𑀸 𑀘 𑀅𑀥𑀫𑁆𑀫𑁂𑀦 𑀏𑀲𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀅𑀥𑀫𑁆𑀫𑁂𑀦 𑀏𑀲𑀦𑀸, 𑀢𑀢𑁄 𑀏𑀲𑀸𑀯 𑀚𑀻𑀯𑀺𑀓𑀸 𑀲𑀼𑀦𑁆𑀤𑀭𑀢𑀭𑀸𑀢𑀺. 𑀅𑀳𑀺𑀁𑀲𑀬𑀦𑁆𑀢𑀺 𑀅𑀯𑀺𑀳𑁂𑀞𑁂𑀦𑁆𑀢𑁄. 𑀅𑀧𑀺 𑀭𑀚𑁆𑀚𑁂𑀦𑀸𑀢𑀺 𑀏𑀯𑀁 𑀧𑀭𑀁 𑀅𑀯𑀺𑀳𑁂𑀞𑁂𑀦𑁆𑀢𑁄 𑀓𑀧𑀸𑀮𑀳𑀢𑁆𑀣𑀲𑁆𑀲 𑀫𑀫 𑀚𑀻𑀯𑀺𑀓𑀓𑀧𑁆𑀧𑀦𑀁 𑀭𑀚𑁆𑀚𑁂𑀦𑀸𑀧𑀺 𑀯𑀭𑀁 𑀉𑀢𑁆𑀢𑀫𑀦𑁆𑀢𑀺.

𑀇𑀢𑀺 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑁆𑀢𑀫𑁆𑀧𑀺 𑀢𑀁 𑀧𑀝𑀺𑀓𑁆𑀔𑀺𑀧𑀺. 𑀲𑁂𑀬𑁆𑀬𑁄𑀧𑀺 𑀢𑀲𑁆𑀲 𑀫𑀦𑀁 𑀅𑀮𑀪𑀺𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀦𑀸𑀕𑀫𑀦𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀧𑀭𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀲𑀘𑁆𑀙𑀺𑀓𑀭𑀺𑀁𑀲𑀼.

𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑁂𑀬𑁆𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀸𑀮𑀺𑀗𑁆𑀕𑀯𑀕𑁆𑀕𑁄 𑀧𑀞𑀫𑁄.

𑁨. 𑀧𑀼𑀘𑀺𑀫𑀦𑁆𑀤𑀯𑀕𑁆𑀕𑁄

[𑁩𑁧𑁧] 𑁧. 𑀧𑀼𑀘𑀺𑀫𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸

𑀉𑀝𑁆𑀞𑁂𑀳𑀺 ¶ 𑀘𑁄𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀣𑁂𑀭𑁂 𑀓𑀺𑀭 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑀓𑀼𑀝𑀺𑀓𑀸𑀬 𑀯𑀺𑀳𑀭𑀦𑁆𑀢𑁂 𑀏𑀓𑁄 𑀘𑁄𑀭𑁄 𑀦𑀕𑀭𑀤𑁆𑀯𑀸𑀭𑀕𑀸𑀫𑁂 𑀏𑀓𑀲𑁆𑀫𑀺𑀁 𑀕𑁂𑀳𑁂 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑀲𑀸𑀭𑀁 𑀆𑀤𑀸𑀬 𑀧𑀮𑀸𑀬𑀺𑀢𑁆𑀯𑀸 𑀣𑁂𑀭𑀲𑁆𑀲 𑀓𑀼𑀝𑀺𑀧𑀭𑀺𑀯𑁂𑀡𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀥 𑀫𑀬𑁆𑀳𑀁 𑀆𑀭𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀧𑀫𑀼𑀔𑁂 𑀦𑀺𑀧𑀚𑁆𑀚𑀺. 𑀣𑁂𑀭𑁄 𑀢𑀲𑁆𑀲 𑀧𑀫𑀼𑀔𑁂 𑀲𑀬𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀆𑀲𑀗𑁆𑀓𑀁 𑀓𑀢𑁆𑀯𑀸 ‘‘𑀘𑁄𑀭𑀲𑀁𑀲𑀕𑁆𑀕𑁄 𑀦𑀸𑀫 𑀦 𑀯𑀝𑁆𑀝𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀫𑀸 𑀇𑀥 𑀲𑀬𑀻’’𑀢𑀺 𑀦𑀻𑀳𑀭𑀺. 𑀲𑁄 𑀘𑁄𑀭𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀤𑀁 𑀫𑁄𑀳𑁂𑀢𑁆𑀯𑀸 ¶ 𑀧𑀮𑀸𑀬𑀺. 𑀫𑀦𑀼𑀲𑁆𑀲𑀸 𑀉𑀓𑁆𑀓𑀁 𑀆𑀤𑀸𑀬 𑀘𑁄𑀭𑀲𑁆𑀲 𑀧𑀤𑀸𑀦𑀼𑀲𑀸𑀭𑁂𑀦 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀕𑀢𑀝𑁆𑀞𑀸𑀦𑀞𑀺𑀢𑀝𑁆𑀞𑀸𑀦𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀲𑀬𑀺𑀢𑀝𑁆𑀞𑀸𑀦𑀸𑀤𑀻𑀦𑀺 𑀤𑀺𑀲𑁆𑀯𑀸 ‘‘𑀘𑁄𑀭𑁄 𑀇𑀢𑁄 𑀆𑀕𑀢𑁄, 𑀇𑀥 𑀞𑀺𑀢𑁄, 𑀇𑀥 𑀦𑀺𑀲𑀺𑀦𑁆𑀦𑁄, 𑀇𑀫𑀺𑀦𑀸 𑀞𑀸𑀦𑁂𑀦 𑀅𑀧𑀕𑀢𑁄, 𑀦 𑀤𑀺𑀝𑁆𑀞𑁄 𑀦𑁄’’𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀤𑀺𑀲𑁆𑀯𑀸𑀯 𑀧𑀝𑀺𑀕𑀢𑀸. 𑀧𑀼𑀦𑀤𑀺𑀯𑀲𑁂 𑀣𑁂𑀭𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁆𑀯𑀜𑁆𑀜𑁂𑀯 𑀆𑀲𑀗𑁆𑀓𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀆𑀲𑀗𑁆𑀓𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀆𑀲𑀗𑁆𑀓𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀦𑀕𑀭𑀲𑁆𑀲 𑀲𑀼𑀲𑀸𑀦𑀯𑀦𑁂 𑀦𑀺𑀫𑁆𑀩𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀦𑀕𑀭𑀤𑁆𑀯𑀸𑀭𑀕𑀸𑀫𑁂 𑀓𑀢𑀓𑀫𑁆𑀫𑀘𑁄𑀭𑁄 𑀢𑀁 𑀲𑀼𑀲𑀸𑀦𑀯𑀦𑀁 𑀧𑀸𑀯𑀺𑀲𑀺. 𑀢𑀤𑀸 𑀘 𑀧𑀦 𑀢𑀢𑁆𑀣 𑀦𑀺𑀫𑁆𑀩𑁄 𑀘 𑀅𑀲𑁆𑀲𑀢𑁆𑀣𑁄 𑀘𑀸𑀢𑀺 𑀤𑁆𑀯𑁂 𑀚𑁂𑀝𑁆𑀞𑀓𑀭𑀼𑀓𑁆𑀔𑀸. 𑀘𑁄𑀭𑁄 𑀦𑀺𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀪𑀡𑁆𑀟𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀦𑀺𑀫𑁆𑀩𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑀺. 𑀅𑀣 𑀲𑀸 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀇𑀫𑀁 𑀘𑁄𑀭𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀲𑁂𑀯 𑀦𑀺𑀫𑁆𑀩𑀭𑀼𑀓𑁆𑀔𑀲𑁆𑀲 𑀲𑀸𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀽𑀮𑀁 𑀓𑀢𑁆𑀯𑀸 𑀏𑀢𑀁 𑀉𑀢𑁆𑀢𑀸𑀲𑁂𑀲𑁆𑀲𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀭𑀼𑀓𑁆𑀔𑁄 𑀦𑀲𑁆𑀲𑀺𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀇𑀢𑁄 𑀦𑀻𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁧.

‘‘𑀉𑀝𑁆𑀞𑁂𑀳𑀺 𑀘𑁄𑀭 𑀓𑀺𑀁 𑀲𑁂𑀲𑀺, 𑀓𑁄 𑀅𑀢𑁆𑀣𑁄 𑀲𑀼𑀧𑀦𑁂𑀦 𑀢𑁂;

𑀫𑀸 𑀢𑀁 𑀕𑀳𑁂𑀲𑀼𑀁 𑀭𑀸𑀚𑀸𑀦𑁄, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓’’𑀦𑁆𑀢𑀺.

𑀢𑀢𑁆𑀣 ¶ 𑀭𑀸𑀚𑀸𑀦𑁄𑀢𑀺 𑀭𑀸𑀚𑀧𑀼𑀭𑀺𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀩𑁆𑀩𑀺𑀲𑀓𑀸𑀭𑀓𑀦𑁆𑀢𑀺 𑀤𑀸𑀭𑀼𑀡𑀲𑀸𑀳𑀲𑀺𑀓𑀘𑁄𑀭𑀓𑀫𑁆𑀫𑀓𑀸𑀭𑀓𑀁.

𑀇𑀢𑀺 𑀦𑀁 𑀯𑀢𑁆𑀯𑀸 ‘‘𑀬𑀸𑀯 𑀢𑀁 𑀭𑀸𑀚𑀧𑀼𑀭𑀺𑀲𑀸 𑀦 𑀕𑀡𑁆𑀳𑀦𑁆𑀢𑀺, 𑀢𑀸𑀯 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸’’𑀢𑀺 𑀪𑀸𑀬𑀸𑀧𑁂𑀢𑁆𑀯𑀸 𑀧𑀮𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀮𑀸𑀢𑁂 𑀅𑀲𑁆𑀲𑀢𑁆𑀣𑀤𑁂𑀯𑀢𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁨.

‘‘𑀬𑀁 𑀦𑀼 𑀘𑁄𑀭𑀁 𑀕𑀳𑁂𑀲𑁆𑀲𑀦𑁆𑀢𑀺, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓𑀁;

𑀓𑀺𑀁 𑀢𑀢𑁆𑀣 𑀧𑀼𑀘𑀺𑀫𑀦𑁆𑀤𑀲𑁆𑀲, 𑀯𑀦𑁂 𑀚𑀸𑀢𑀲𑁆𑀲 𑀢𑀺𑀝𑁆𑀞𑀢𑁄’’𑀢𑀺.

𑀢𑀢𑁆𑀣 ¶ 𑀯𑀦𑁂 𑀚𑀸𑀢𑀲𑁆𑀲 𑀢𑀺𑀝𑁆𑀞𑀢𑁄𑀢𑀺 𑀦𑀺𑀫𑁆𑀩𑁄 𑀯𑀦𑁂 𑀚𑀸𑀢𑁄 𑀘𑁂𑀯 𑀞𑀺𑀢𑁄 𑀘. 𑀤𑁂𑀯𑀢𑀸 𑀧𑀦 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀭𑀼𑀓𑁆𑀔𑀲𑀫𑀼𑀤𑀸𑀘𑀸𑀭𑁂𑀦𑁂𑀯 𑀲𑀫𑀼𑀤𑀸𑀘𑀭𑀺.

𑀢𑀁 𑀲𑀼𑀢𑁆𑀯𑀸 𑀦𑀺𑀫𑁆𑀩𑀤𑁂𑀯𑀢𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁩.

‘‘𑀦 𑀢𑁆𑀯𑀁 𑀅𑀲𑁆𑀲𑀢𑁆𑀣 𑀚𑀸𑀦𑀸𑀲𑀺, 𑀫𑀫 𑀘𑁄𑀭𑀲𑁆𑀲 𑀘𑀦𑁆𑀢𑀭𑀁;

𑀘𑁄𑀭𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑁄, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓𑀁;

𑀅𑀧𑁆𑀧𑁂𑀦𑁆𑀢𑀺 𑀦𑀺𑀫𑁆𑀩𑀲𑀽𑀮𑀲𑁆𑀫𑀺𑀁, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄’’𑀢𑀺.

𑀢𑀢𑁆𑀣 ¶ 𑀅𑀲𑁆𑀲𑀢𑁆𑀣𑀸𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀁 𑀲𑀫𑀼𑀤𑀸𑀘𑀭𑀢𑀺. 𑀫𑀫 𑀘𑁄𑀭𑀲𑁆𑀲 𑀘𑀦𑁆𑀢𑀭𑀦𑁆𑀢𑀺 𑀫𑀫 𑀘 𑀘𑁄𑀭𑀲𑁆𑀲 𑀘 𑀏𑀓𑀢𑁄 𑀅𑀯𑀲𑀦𑀓𑀸𑀭𑀡𑀁. 𑀅𑀧𑁆𑀧𑁂𑀦𑁆𑀢𑀺 𑀦𑀺𑀫𑁆𑀩𑀲𑀽𑀮𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀸𑀦𑁄 𑀘𑁄𑀭𑀁 𑀦𑀺𑀫𑁆𑀩𑀲𑀽𑀮𑁂 𑀆𑀯𑀼𑀡𑀦𑁆𑀢𑀺. 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄𑀢𑀺 𑀢𑀲𑁆𑀫𑀺𑀁 𑀓𑀸𑀭𑀡𑁂 𑀫𑀫 𑀘𑀺𑀢𑁆𑀢𑀁 𑀲𑀗𑁆𑀓𑀢𑀺. 𑀲𑀘𑁂 𑀳𑀺 𑀇𑀫𑀁 𑀲𑀽𑀮𑁂 𑀆𑀯𑀼𑀡𑀺𑀲𑁆𑀲𑀦𑁆𑀢𑀺, 𑀯𑀺𑀫𑀸𑀦𑀁 𑀫𑁂 𑀦𑀲𑁆𑀲𑀺𑀲𑁆𑀲𑀢𑀺, 𑀅𑀣 𑀲𑀸𑀔𑀸𑀬 𑀑𑀮𑀫𑁆𑀩𑁂𑀲𑁆𑀲𑀦𑁆𑀢𑀺, 𑀯𑀺𑀫𑀸𑀦𑁂 𑀫𑁂 𑀓𑀼𑀡𑀧𑀕𑀦𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦𑀸𑀳𑀁 𑀏𑀢𑀁 𑀧𑀮𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀮𑁆𑀮𑀧𑀦𑁆𑀢𑀸𑀦𑀜𑁆𑀜𑁂𑀯 𑀪𑀡𑁆𑀟𑀲𑀸𑀫𑀺𑀓𑀸 𑀉𑀓𑁆𑀓𑀸𑀳𑀢𑁆𑀣𑀸 𑀧𑀤𑀸𑀦𑀼𑀲𑀸𑀭𑁂𑀦 𑀆𑀕𑀦𑁆𑀢𑁆𑀯𑀸 𑀘𑁄𑀭𑀲𑁆𑀲 𑀲𑀬𑀺𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄 𑀇𑀤𑀸𑀦𑁂𑀯 𑀘𑁄𑀭𑁄 𑀉𑀝𑁆𑀞𑀸𑀬 𑀧𑀮𑀸𑀢𑁄, 𑀦 𑀮𑀤𑁆𑀥𑁄 𑀦𑁄 𑀘𑁄𑀭𑁄, 𑀲𑀘𑁂 𑀮𑀪𑀺𑀲𑁆𑀲𑀸𑀫, 𑀇𑀫𑀲𑁆𑀲𑁂𑀯 𑀦𑀁 𑀦𑀺𑀫𑁆𑀩𑀲𑁆𑀲 𑀲𑀽𑀮𑁂 𑀯𑀸 𑀆𑀯𑀼𑀡𑀺𑀢𑁆𑀯𑀸 𑀲𑀸𑀔𑀸𑀬 𑀯𑀸 𑀑𑀮𑀫𑁆𑀩𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀘𑁄𑀭𑀁 𑀅𑀤𑀺𑀲𑁆𑀯𑀸𑀯 𑀕𑀢𑀸.

𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀲𑁆𑀲𑀢𑁆𑀣𑀤𑁂𑀯𑀢𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁪.

‘‘𑀲𑀗𑁆𑀓𑁂𑀬𑁆𑀬 ¶ 𑀲𑀗𑁆𑀓𑀺𑀢𑀩𑁆𑀩𑀸𑀦𑀺, 𑀭𑀓𑁆𑀔𑁂𑀬𑁆𑀬𑀸𑀦𑀸𑀕𑀢𑀁 𑀪𑀬𑀁;

𑀅𑀦𑀸𑀕𑀢𑀪𑀬𑀸 𑀥𑀻𑀭𑁄, 𑀉𑀪𑁄 𑀮𑁄𑀓𑁂 𑀅𑀯𑁂𑀓𑁆𑀔𑀢𑀻’’𑀢𑀺.

𑀢𑀢𑁆𑀣 𑀭𑀓𑁆𑀔𑁂𑀬𑁆𑀬𑀸𑀦𑀸𑀕𑀢𑀁 𑀪𑀬𑀦𑁆𑀢𑀺 𑀤𑁆𑀯𑁂 𑀅𑀦𑀸𑀕𑀢𑀪𑀬𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸𑀢𑀺. 𑀢𑁂𑀲𑀼 𑀧𑀸𑀧𑀫𑀺𑀢𑁆𑀢𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀭𑀓𑁆𑀔𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑀁 𑀭𑀓𑁆𑀔𑀢𑀺. 𑀅𑀦𑀸𑀕𑀢𑀪𑀬𑀸𑀢𑀺 𑀅𑀦𑀸𑀕𑀢𑀪𑀬𑀳𑁂𑀢𑀼𑀢𑀁 𑀪𑀬𑀁 𑀪𑀸𑀬𑀫𑀸𑀦𑁄 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑀁 𑀦 𑀓𑀭𑁄𑀢𑀺, 𑀢𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀤𑀼𑀘𑁆𑀘𑀭𑀺𑀢𑀁 𑀦 𑀘𑀭𑀢𑀺. 𑀉𑀪𑁄 𑀮𑁄𑀓𑁂𑀢𑀺 ¶ 𑀏𑀯𑀁 𑀪𑀸𑀬𑀦𑁆𑀢𑁄 𑀳𑁂𑀲 𑀇𑀥𑀮𑁄𑀓𑀧𑀭𑀮𑁄𑀓𑀲𑀗𑁆𑀔𑀸𑀢𑁂 𑀉𑀪𑁄 𑀮𑁄𑀓𑁂 𑀅𑀯𑁂𑀓𑁆𑀔𑀢𑀺 𑀑𑀮𑁄𑀓𑁂𑀢𑀺, 𑀑𑀮𑁄𑀓𑀬𑀫𑀸𑀦𑁄 𑀇𑀥𑀮𑁄𑀓𑀪𑀬𑁂𑀦 𑀧𑀸𑀧𑀫𑀺𑀢𑁆𑀢𑁂 𑀯𑀺𑀯𑀚𑁆𑀚𑁂𑀢𑀺, 𑀧𑀭𑀮𑁄𑀓𑀪𑀬𑁂𑀦 𑀧𑀸𑀧𑀁 𑀦 𑀓𑀭𑁄𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀲𑁆𑀲𑀢𑁆𑀣𑀤𑁂𑀯𑀢𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀦𑀺𑀫𑁆𑀩𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀼𑀘𑀺𑀫𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁧𑁨] 𑁨. 𑀓𑀲𑁆𑀲𑀧𑀫𑀦𑁆𑀤𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 ¶ 𑀓𑀲𑁆𑀲𑀧 𑀫𑀦𑁆𑀤𑀺𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀳𑀮𑁆𑀮𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀓𑀼𑀮𑀧𑀼𑀢𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀅𑀦𑀼𑀬𑀼𑀢𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀅𑀧𑀭𑀪𑀸𑀕𑁂 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀫𑀸𑀢𑀼 𑀅𑀘𑁆𑀘𑀬𑁂𑀦 𑀧𑀺𑀢𑀭𑀜𑁆𑀘 𑀓𑀦𑀺𑀝𑁆𑀞𑀪𑀸𑀢𑀭𑀜𑁆𑀘 𑀧𑀩𑁆𑀩𑀸𑀚𑁂𑀢𑁆𑀯𑀸 𑀚𑁂𑀢𑀯𑀦𑁂 𑀯𑀲𑀺𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀘𑀻𑀯𑀭𑀧𑀘𑁆𑀘𑀬𑀲𑁆𑀲 𑀲𑀼𑀮𑀪𑀢𑀁 𑀲𑀼𑀢𑁆𑀯𑀸 𑀏𑀓𑀁 𑀕𑀸𑀫𑀓𑀸𑀯𑀸𑀲𑀁 𑀕𑀦𑁆𑀢𑁆𑀯𑀸 𑀢𑀬𑁄𑀧𑀺 𑀢𑀢𑁆𑀣𑁂𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀸 𑀚𑁂𑀢𑀯𑀦𑀫𑁂𑀯 𑀆𑀕𑀫𑀁𑀲𑀼. 𑀤𑀳𑀭𑀪𑀺𑀓𑁆𑀔𑀼 𑀚𑁂𑀢𑀯𑀦𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 ‘‘𑀲𑀸𑀫𑀡𑁂𑀭 𑀢𑁆𑀯𑀁 𑀣𑁂𑀭𑀁 𑀯𑀺𑀲𑁆𑀲𑀸𑀫𑁂𑀢𑁆𑀯𑀸 𑀆𑀦𑁂𑀬𑁆𑀬𑀸𑀲𑀺, 𑀅𑀳𑀁 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀧𑀭𑀺𑀯𑁂𑀡𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀚𑁂𑀢𑀯𑀦𑀁 𑀧𑀸𑀯𑀺𑀲𑀺. 𑀫𑀳𑀮𑁆𑀮𑀓𑀢𑁆𑀣𑁂𑀭𑁄 𑀲𑀡𑀺𑀓𑀁 𑀆𑀕𑀘𑁆𑀙𑀢𑀺. 𑀲𑀸𑀫𑀡𑁂𑀭𑁄 𑀧𑀼𑀦𑀧𑁆𑀧𑀼𑀦𑀁 𑀲𑀻𑀲𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 ‘‘𑀕𑀘𑁆𑀙, 𑀪𑀦𑁆𑀢𑁂, 𑀕𑀘𑁆𑀙, 𑀪𑀦𑁆𑀢𑁂’’𑀢𑀺 𑀢𑀁 𑀩𑀮𑀓𑁆𑀓𑀸𑀭𑁂𑀦 𑀦𑁂𑀢𑀺. 𑀣𑁂𑀭𑁄 ‘‘𑀢𑁆𑀯𑀁 𑀫𑀁 𑀅𑀢𑁆𑀢𑀦𑁄 𑀯𑀲𑀁 𑀆𑀦𑁂𑀲𑀻’’𑀢𑀺 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀆𑀕𑀘𑁆𑀙𑀢𑀺. 𑀢𑁂𑀲𑀁 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸𑀦𑀜𑁆𑀜𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄, 𑀅𑀦𑁆𑀥𑀓𑀸𑀭𑁄 𑀚𑀸𑀢𑁄.

𑀇𑀢𑀭𑁄𑀧𑀺 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀉𑀤𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑁂𑀲𑀁 𑀆𑀕𑀫𑀦𑀁 𑀅𑀧𑀲𑁆𑀲𑀦𑁆𑀢𑁄 𑀉𑀓𑁆𑀓𑀁 𑀕𑀳𑁂𑀢𑁆𑀯𑀸 ¶ 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀘𑀺𑀭𑀸𑀬𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀫𑀳𑀮𑁆𑀮𑀓𑁄 𑀢𑀁 𑀓𑀸𑀭𑀡𑀁 𑀓𑀣𑁂𑀲𑀺. 𑀲𑁄 𑀢𑁂 𑀤𑁆𑀯𑁂𑀧𑀺 𑀯𑀺𑀲𑁆𑀲𑀸𑀫𑁂𑀢𑁆𑀯𑀸 𑀲𑀡𑀺𑀓𑀁 𑀆𑀦𑁂𑀲𑀺. 𑀢𑀁 𑀤𑀺𑀯𑀲𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀲𑁆𑀲 𑀑𑀓𑀸𑀲𑀁 𑀦 𑀮𑀪𑀺. 𑀅𑀣 𑀦𑀁 𑀤𑀼𑀢𑀺𑀬𑀤𑀺𑀯𑀲𑁂 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀢𑁆𑀣𑀸 ‘‘𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀳𑀺𑀬𑁆𑀬𑁄, 𑀪𑀦𑁆𑀢𑁂’’𑀢𑀺. ‘‘𑀳𑀺𑀬𑁆𑀬𑁄 𑀆𑀕𑀦𑁆𑀢𑁆𑀯𑀸 𑀅𑀚𑁆𑀚 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 ¶ 𑀓𑀭𑁄𑀲𑀻’’𑀢𑀺? 𑀲𑁄 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀺. 𑀲𑀢𑁆𑀣𑀸 𑀫𑀳𑀮𑁆𑀮𑀓𑀁 𑀕𑀭𑀳𑀺𑀢𑁆𑀯𑀸 ‘‘𑀦 𑀏𑀲 𑀇𑀤𑀸𑀦𑁂𑀯 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺. 𑀇𑀤𑀸𑀦𑀺 𑀧𑀦 𑀢𑁂𑀦 𑀢𑁆𑀯𑀁 𑀓𑀺𑀮𑀫𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑁂 𑀓𑀺𑀮𑀫𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀦𑀺𑀕𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 ¶ 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀫𑀸𑀢𑀼 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀸𑀲𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀖𑀭𑁂 𑀯𑀺𑀚𑁆𑀚𑀫𑀸𑀦𑀁 𑀥𑀦𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀺𑀢𑀭𑀜𑁆𑀘 𑀓𑀦𑀺𑀝𑁆𑀞𑀪𑀸𑀢𑀭𑀜𑁆𑀘 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀤𑁂𑀯𑀤𑀢𑁆𑀢𑀺𑀬𑀁 𑀯𑀓𑁆𑀓𑀮𑀁 𑀕𑀳𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀦𑁆𑀢𑁄 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀯𑀲𑀺. 𑀳𑀺𑀫𑀯𑀦𑁆𑀢𑁂 𑀧𑀦 𑀯𑀲𑁆𑀲𑀓𑀸𑀮𑁂 𑀅𑀘𑁆𑀙𑀺𑀦𑁆𑀦𑀥𑀸𑀭𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀦 𑀲𑀓𑁆𑀓𑀸 𑀳𑁄𑀢𑀺 𑀓𑀦𑁆𑀤𑀫𑀽𑀮𑀁 𑀔𑀡𑀺𑀢𑀼𑀁, 𑀨𑀮𑀸𑀦𑀺 𑀘 𑀧𑀡𑁆𑀡𑀸𑀦𑀺 𑀘 𑀧𑀢𑀦𑁆𑀢𑀺. 𑀢𑀸𑀧𑀲𑀸 𑀬𑁂𑀪𑀼𑀬𑁆𑀬𑁂𑀦 𑀳𑀺𑀫𑀯𑀦𑁆𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀲𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀭𑀜𑁆𑀘 𑀓𑀦𑀺𑀝𑁆𑀞𑀪𑀸𑀢𑀭𑀜𑁆𑀘 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀲𑀺𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑁂 𑀧𑀼𑀧𑁆𑀨𑀺𑀢𑀨𑀮𑀺𑀢𑁂 𑀢𑁂 𑀉𑀪𑁄𑀧𑀺 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀅𑀢𑁆𑀢𑀦𑁄 𑀅𑀲𑁆𑀲𑀫𑀧𑀤𑀁 𑀆𑀕𑀘𑁆𑀙𑀦𑁆𑀢𑁄 𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑁂 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 ‘‘𑀢𑀼𑀫𑁆𑀳𑁂 𑀲𑀡𑀺𑀓𑀁 𑀆𑀕𑀘𑁆𑀙𑁂𑀬𑁆𑀬𑀸𑀣, 𑀅𑀳𑀁 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀅𑀲𑁆𑀲𑀫𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂 𑀑𑀳𑀸𑀬 𑀕𑀢𑁄. 𑀔𑀼𑀤𑁆𑀤𑀓𑀢𑀸𑀧𑀲𑁄 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀡𑀺𑀓𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀓𑀝𑀺𑀧𑁆𑀧𑀤𑁂𑀲𑁂 𑀲𑀻𑀲𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 𑀕𑀘𑁆𑀙 𑀕𑀘𑁆𑀙𑀸𑀢𑀺 𑀢𑀁 𑀩𑀮𑀓𑁆𑀓𑀸𑀭𑁂𑀦 𑀦𑁂𑀢𑀺. 𑀫𑀳𑀮𑁆𑀮𑀓𑁄 ‘‘𑀢𑁆𑀯𑀁 𑀫𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀆𑀦𑁂𑀲𑀻’’𑀢𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀆𑀕𑀘𑁆𑀙𑀢𑀺. 𑀏𑀯𑀁 𑀢𑁂𑀲𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸𑀦𑀜𑁆𑀜𑁂𑀯 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀡𑁆𑀡𑀲𑀸𑀮𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀉𑀤𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀓𑁆𑀓𑀫𑀸𑀤𑀸𑀬 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀓𑀺𑀁 𑀓𑀭𑀺𑀢𑁆𑀣𑀸’’𑀢𑀺 𑀆𑀳. 𑀔𑀼𑀤𑁆𑀤𑀓𑀢𑀸𑀧𑀲𑁄 𑀧𑀺𑀢𑀭𑀸 𑀓𑀢𑀓𑀸𑀭𑀡𑀁 𑀓𑀣𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀪𑁄𑀧𑀺 𑀢𑁂 𑀲𑀡𑀺𑀓𑀁 𑀦𑁂𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀺𑀢𑀭𑀁 𑀦𑁆𑀳𑀸𑀧𑁂𑀢𑁆𑀯𑀸 𑀧𑀸𑀤𑀥𑁄𑀯𑀦𑀧𑀺𑀝𑁆𑀞𑀺𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀢𑁆𑀯𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑀫𑀣𑀁 𑀧𑀺𑀢𑀭𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀸𑀢, 𑀢𑀭𑀼𑀡𑀤𑀸𑀭𑀓𑀸 𑀦𑀸𑀫 𑀫𑀢𑁆𑀢𑀺𑀓𑀸𑀪𑀸𑀚𑀦𑀲𑀤𑀺𑀲𑀸 𑀫𑀼𑀳𑀼𑀢𑁆𑀢𑀦𑁂𑀯 𑀪𑀺𑀚𑁆𑀚𑀦𑁆𑀢𑀺 ¶ , 𑀲𑀓𑀺𑀁 𑀪𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀖𑀝𑁂𑀢𑀼𑀁, 𑀢𑁂 𑀅𑀓𑁆𑀓𑁄𑀲𑀦𑁆𑀢𑀸𑀧𑀺 𑀧𑀭𑀺𑀪𑀸𑀲𑀦𑁆𑀢𑀸𑀧𑀺 𑀫𑀳𑀮𑁆𑀮𑀓𑁂𑀳𑀺 𑀅𑀥𑀺𑀯𑀸𑀲𑁂𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀧𑀺𑀢𑀭𑀁 𑀑𑀯𑀤𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁫.

‘‘𑀅𑀧𑀺 ¶ ¶ 𑀓𑀲𑁆𑀲𑀧 𑀫𑀦𑁆𑀤𑀺𑀬𑀸, 𑀬𑀼𑀯𑀸 𑀲𑀧𑀢𑀺 𑀳𑀦𑁆𑀢𑀺 𑀯𑀸;

𑀲𑀩𑁆𑀩𑀁 𑀢𑀁 𑀔𑀫𑀢𑁂 𑀥𑀻𑀭𑁄, 𑀧𑀡𑁆𑀟𑀺𑀢𑁄 𑀢𑀁 𑀢𑀺𑀢𑀺𑀓𑁆𑀔𑀢𑀺.

𑁪𑁬.

‘‘𑀲𑀘𑁂𑀧𑀺 𑀲𑀦𑁆𑀢𑁄 𑀯𑀺𑀯𑀤𑀦𑁆𑀢𑀺, 𑀔𑀺𑀧𑁆𑀧𑀁 𑀲𑀦𑁆𑀢𑀻𑀬𑀭𑁂 𑀧𑀼𑀦;

𑀩𑀸𑀮𑀸 𑀧𑀢𑁆𑀢𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀢𑁂 𑀲𑀫𑀣𑀫𑀚𑁆𑀛𑀕𑀽.

𑁪𑁭.

‘‘𑀏𑀢𑁂 𑀪𑀺𑀬𑁆𑀬𑁄 𑀲𑀫𑀸𑀬𑀦𑁆𑀢𑀺, 𑀲𑀦𑁆𑀥𑀺 𑀢𑁂𑀲𑀁 𑀦 𑀚𑀻𑀭𑀢𑀺;

𑀬𑁄 𑀘𑀸𑀥𑀺𑀧𑀦𑁆𑀦𑀁 𑀚𑀸𑀦𑀸𑀢𑀺, 𑀬𑁄 𑀘 𑀚𑀸𑀦𑀸𑀢𑀺 𑀤𑁂𑀲𑀦𑀁.

𑁪𑁮.

‘‘𑀏𑀲𑁄 𑀳𑀺 𑀉𑀢𑁆𑀢𑀭𑀺𑀢𑀭𑁄, 𑀪𑀸𑀭𑀯𑀳𑁄 𑀥𑀼𑀭𑀤𑁆𑀥𑀭𑁄;

𑀬𑁄 𑀧𑀭𑁂𑀲𑀸𑀥𑀺𑀧𑀦𑁆𑀦𑀸𑀦𑀁, 𑀲𑀬𑀁 𑀲𑀦𑁆𑀥𑀸𑀢𑀼𑀫𑀭𑀳𑀢𑀻’’𑀢𑀺.

𑀢𑀢𑁆𑀣 𑀓𑀲𑁆𑀲𑀧𑀸𑀢𑀺 𑀧𑀺𑀢𑀭𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀫𑀦𑁆𑀤𑀺𑀬𑀸𑀢𑀺 𑀫𑀦𑁆𑀤𑀻𑀪𑀸𑀯𑁂𑀦 𑀢𑀭𑀼𑀡𑀢𑀸𑀬. 𑀬𑀼𑀯𑀸 𑀲𑀧𑀢𑀺 𑀳𑀦𑁆𑀢𑀺 𑀯𑀸𑀢𑀺 𑀢𑀭𑀼𑀡𑀤𑀸𑀭𑀓𑁄 𑀅𑀓𑁆𑀓𑁄𑀲𑀢𑀺𑀧𑀺 𑀧𑀳𑀭𑀢𑀺𑀧𑀺. 𑀥𑀻𑀭𑁄𑀢𑀺 𑀥𑀺𑀓𑁆𑀓𑀢𑀧𑀸𑀧𑁄, 𑀥𑀻 𑀯𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺𑀧𑀺 𑀅𑀢𑁆𑀣𑁄. 𑀇𑀢𑀭𑀁 𑀧𑀦 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀪𑀬𑁂𑀦𑀸𑀧𑀺 𑀲𑀩𑁆𑀩𑀁 𑀢𑀁 𑀩𑀸𑀮𑀤𑀸𑀭𑀓𑁂𑀳𑀺 𑀓𑀢𑀁 𑀅𑀧𑀭𑀸𑀥𑀁 𑀫𑀳𑀮𑁆𑀮𑀓𑁄 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀲𑀳𑀢𑀺 𑀢𑀺𑀢𑀺𑀓𑁆𑀔𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀲𑀦𑁆𑀥𑀻𑀬𑀭𑁂𑀢𑀺 𑀧𑀼𑀦 𑀫𑀺𑀢𑁆𑀢𑀪𑀸𑀯𑁂𑀦 𑀲𑀦𑁆𑀥𑀻𑀬𑀦𑁆𑀢𑀺 𑀖𑀝𑀻𑀬𑀦𑁆𑀢𑀺. 𑀩𑀸𑀮𑀸 𑀧𑀢𑁆𑀢𑀸𑀯𑀸𑀢𑀺 𑀩𑀸𑀮𑀓𑀸 𑀧𑀦 𑀫𑀢𑁆𑀢𑀺𑀓𑀸𑀧𑀢𑁆𑀢𑀸𑀯 𑀪𑀺𑀚𑁆𑀚𑀦𑁆𑀢𑀺. 𑀦 𑀢𑁂 𑀲𑀫𑀣𑀫𑀚𑁆𑀛𑀕𑀽𑀢𑀺 𑀢𑁂 𑀩𑀸𑀮𑀓𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑀺𑀯𑀸𑀤𑀁 𑀓𑀢𑁆𑀯𑀸 𑀯𑁂𑀭𑀽𑀧𑀲𑀫𑀦𑀁 𑀦 𑀯𑀺𑀦𑁆𑀤𑀦𑁆𑀢𑀺 𑀦𑀸𑀥𑀺𑀕𑀘𑁆𑀙𑀦𑁆𑀢𑀺. 𑀏𑀢𑁂 𑀪𑀺𑀬𑁆𑀬𑁄𑀢𑀺 𑀏𑀢𑁂 𑀤𑁆𑀯𑁂 𑀚𑀦𑀸 𑀪𑀺𑀦𑁆𑀦𑀸𑀧𑀺 𑀧𑀼𑀦 𑀲𑀫𑀸𑀕𑀘𑁆𑀙𑀦𑁆𑀢𑀺. 𑀲𑀦𑁆𑀥𑀻𑀢𑀺 𑀫𑀺𑀢𑁆𑀢𑀲𑀦𑁆𑀥𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀜𑁆𑀜𑁂𑀯 𑀤𑁆𑀯𑀺𑀦𑁆𑀦𑀁 𑀲𑀦𑁆𑀥𑀺 𑀦 𑀚𑀻𑀭𑀢𑀺. 𑀬𑁄 𑀘𑀸𑀥𑀺𑀧𑀦𑁆𑀦𑀦𑁆𑀢𑀺 𑀬𑁄 𑀘 𑀅𑀢𑁆𑀢𑀦𑀸 𑀅𑀥𑀺𑀧𑀦𑁆𑀦𑀁 𑀅𑀢𑀺𑀓𑁆𑀓𑀦𑁆𑀢𑀁 𑀅𑀜𑁆𑀜𑀲𑁆𑀫𑀺𑀁 𑀓𑀢𑀤𑁄𑀲𑀁 𑀚𑀸𑀦𑀸𑀢𑀺. 𑀤𑁂𑀲𑀦𑀦𑁆𑀢𑀺 𑀬𑁄 𑀘 𑀢𑁂𑀦 𑀅𑀢𑁆𑀢𑀦𑁄 𑀤𑁄𑀲𑀁 𑀚𑀸𑀦𑀦𑁆𑀢𑁂𑀦 𑀤𑁂𑀲𑀺𑀢𑀁 𑀅𑀘𑁆𑀘𑀬𑀤𑁂𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀚𑀸𑀦𑀸𑀢𑀺.

𑀬𑁄 𑀧𑀭𑁂𑀲𑀸𑀥𑀺𑀧𑀦𑁆𑀦𑀸𑀦𑀦𑁆𑀢𑀺 𑀬𑁄 𑀧𑀭𑁂𑀲𑀁 𑀅𑀥𑀺𑀧𑀦𑁆𑀦𑀸𑀦𑀁 𑀤𑁄𑀲𑁂𑀦 𑀅𑀪𑀺𑀪𑀽𑀢𑀸𑀦𑀁 𑀅𑀧𑀭𑀸𑀥𑀓𑀸𑀭𑀓𑀸𑀦𑀁. 𑀲𑀬𑀁 𑀲𑀦𑁆𑀥𑀸𑀢𑀼𑀫𑀭𑀳𑀢𑀻𑀢𑀺 𑀢𑁂𑀲𑀼 𑀅𑀔𑀫𑀸𑀧𑁂𑀦𑁆𑀢𑁂𑀲𑀼𑀧𑀺 ‘‘𑀏𑀳𑀺, 𑀪𑀤𑁆𑀭𑀫𑀼𑀔, 𑀉𑀤𑁆𑀤𑁂𑀲𑀁 𑀕𑀡𑁆𑀳, 𑀅𑀝𑁆𑀞𑀓𑀣𑀁 𑀲𑀼𑀡, 𑀪𑀸𑀯𑀦𑀫𑀦𑀼𑀬𑀼𑀜𑁆𑀚, 𑀓𑀲𑁆𑀫𑀸 𑀧𑀭𑀺𑀩𑀸𑀳𑀺𑀭𑁄 𑀳𑁄𑀲𑀻’’𑀢𑀺 𑀏𑀯𑀁 𑀲𑀬𑀁 𑀲𑀦𑁆𑀥𑀸𑀢𑀼𑀁 𑀅𑀭𑀳𑀢𑀺 𑀫𑀺𑀢𑁆𑀢𑀪𑀸𑀯𑀁 𑀖𑀝𑁂𑀢𑀺, 𑀏𑀲𑁄 𑀏𑀯𑀭𑀽𑀧𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀉𑀢𑁆𑀢𑀭𑀺𑀢𑀭𑁄 𑀫𑀺𑀢𑁆𑀢𑀪𑀸𑀭𑀲𑁆𑀲 𑀫𑀺𑀢𑁆𑀢𑀥𑀼𑀭𑀲𑁆𑀲 𑀘 𑀯𑀳𑀦𑀢𑁄 ‘‘𑀪𑀸𑀭𑀯𑀳𑁄’’𑀢𑀺 ‘‘𑀥𑀼𑀭𑀤𑁆𑀥𑀭𑁄’’𑀢𑀺 𑀘 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺.

𑀏𑀯𑀁 ¶ ¶ ¶ 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀼 𑀑𑀯𑀸𑀤𑀁 𑀅𑀤𑀸𑀲𑀺, 𑀲𑁄𑀧𑀺 𑀢𑀢𑁄 𑀧𑀪𑀼𑀢𑀺 𑀤𑀦𑁆𑀢𑁄 𑀅𑀳𑁄𑀲𑀺 𑀲𑀼𑀤𑀦𑁆𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀺𑀢𑀸 𑀢𑀸𑀧𑀲𑁄 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺, 𑀔𑀼𑀤𑁆𑀤𑀓𑀢𑀸𑀧𑀲𑁄 𑀲𑀸𑀫𑀡𑁂𑀭𑁄, 𑀧𑀺𑀢𑀼 𑀑𑀯𑀸𑀤𑀤𑀸𑀬𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀲𑁆𑀲𑀧𑀫𑀦𑁆𑀤𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁧𑁩] 𑁩. 𑀔𑀦𑁆𑀢𑀺𑀯𑀸𑀤𑀻𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀢𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑁄𑀥𑀦𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀓𑀲𑁆𑀫𑀸, 𑀢𑁆𑀯𑀁 𑀪𑀺𑀓𑁆𑀔𑀼, 𑀅𑀓𑁆𑀓𑁄𑀥𑀦𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑁄𑀥𑀁 𑀓𑀭𑁄𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀲𑀭𑀻𑀭𑁂 𑀧𑀳𑀸𑀭𑀲𑀳𑀲𑁆𑀲𑁂 𑀧𑀢𑀦𑁆𑀢𑁂 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀲𑀼 𑀙𑀺𑀚𑁆𑀚𑀫𑀸𑀦𑀸𑀲𑀼 𑀧𑀭𑀲𑁆𑀲 𑀓𑁄𑀥𑀁 𑀦 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀓𑀮𑀸𑀩𑀼 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀼𑀡𑁆𑀟𑀮𑀓𑀼𑀫𑀸𑀭𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀥𑀦𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀫𑀁 𑀥𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀫 𑀜𑀸𑀢𑀓𑀸 𑀅𑀕𑁆𑀕𑀳𑁂𑀢𑁆𑀯𑀸𑀯 𑀕𑀢𑀸, 𑀫𑀬𑀸 𑀧𑀦𑁂𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀩𑁆𑀩𑀁 𑀥𑀦𑀁 𑀯𑀺𑀘𑁂𑀬𑁆𑀬𑀤𑀸𑀦𑀯𑀲𑁂𑀦 𑀬𑁄 𑀬𑀁 𑀆𑀳𑀭𑀢𑀺, 𑀢𑀲𑁆𑀲 𑀢𑀁 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀨𑀮𑀸𑀨𑀮𑁂𑀦 𑀬𑀸𑀧𑁂𑀦𑁆𑀢𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀆𑀕𑀦𑁆𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑁂 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀲𑁂𑀦𑀸𑀧𑀢𑀺𑀲𑁆𑀲 𑀦𑀺𑀯𑀸𑀲𑀦𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀲𑁂𑀦𑀸𑀧𑀢𑀺 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂𑀲𑀼 𑀧𑀲𑀻𑀤𑀺𑀢𑁆𑀯𑀸 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀪𑁄𑀚𑀦𑀁 ¶ 𑀪𑁄𑀚𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀓𑀮𑀸𑀩𑀼𑀭𑀸𑀚𑀸 𑀲𑀼𑀭𑀸𑀫𑀤𑀫𑀢𑁆𑀢𑁄 𑀙𑁂𑀓𑀦𑀸𑀝𑀓𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀲𑀬𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀏𑀓𑀺𑀲𑁆𑀲𑀸 𑀧𑀺𑀬𑀫𑀦𑀸𑀧𑀸𑀬 𑀇𑀢𑁆𑀣𑀺𑀬𑀸 𑀅𑀗𑁆𑀓𑁂 𑀲𑀬𑀺. 𑀕𑀻𑀢𑀯𑀸𑀤𑀺𑀢𑀦𑀘𑁆𑀘𑁂𑀲𑀼 𑀙𑁂𑀓𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀕𑀻𑀢𑀸𑀤𑀻𑀦𑀺 𑀧𑀬𑁄𑀚𑁂𑀲𑀼𑀁, 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀯𑀺𑀬 𑀫𑀳𑀸𑀲𑀫𑁆𑀧𑀢𑁆𑀢𑀺 𑀅𑀳𑁄𑀲𑀺, 𑀭𑀸𑀚𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀅𑀣 𑀢𑀸 𑀇𑀢𑁆𑀣𑀺𑀬𑁄 ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀕𑀻𑀢𑀸𑀤𑀻𑀦𑀺 𑀧𑀬𑁄𑀚𑀬𑀸𑀫, 𑀲𑁄 𑀦𑀺𑀤𑁆𑀤𑀁 𑀉𑀧𑀕𑀢𑁄, 𑀓𑀺𑀁 𑀦𑁄 𑀕𑀻𑀢𑀸𑀤𑀻𑀳𑀻’’𑀢𑀺 𑀯𑀻𑀡𑀸𑀤𑀻𑀦𑀺 𑀢𑀽𑀭𑀺𑀬𑀸𑀦𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀙𑀟𑁆𑀟𑁂𑀢𑁆𑀯𑀸 ¶ 𑀉𑀬𑁆𑀬𑀸𑀦𑀁 𑀧𑀓𑁆𑀓𑀦𑁆𑀢𑀸 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑀸 𑀉𑀬𑁆𑀬𑀸𑀦𑁂 𑀅𑀪𑀺𑀭𑀫𑀺𑀁𑀲𑀼. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀫𑀽𑀮𑁂 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀫𑀢𑁆𑀢𑀯𑀭𑀯𑀸𑀭𑀡𑁄 𑀯𑀺𑀬 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀢𑀸 𑀇𑀢𑁆𑀣𑀺𑀬𑁄 𑀉𑀬𑁆𑀬𑀸𑀦𑁂 𑀘𑀭𑀫𑀸𑀦𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀣, 𑀅𑀬𑁆𑀬𑀸𑀬𑁄, 𑀏𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀧𑀩𑁆𑀩𑀚𑀺𑀢𑁄 𑀦𑀺𑀲𑀺𑀦𑁆𑀦𑁄, 𑀬𑀸𑀯 𑀭𑀸𑀚𑀸 𑀦 𑀧𑀩𑀼𑀚𑁆𑀛𑀢𑀺, 𑀢𑀸𑀯𑀲𑁆𑀲 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀲𑀼𑀡𑀫𑀸𑀦𑀸 𑀦𑀺𑀲𑀻𑀤𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ‘‘𑀅𑀫𑁆𑀳𑀸𑀓𑀁 𑀓𑀣𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀺𑀜𑁆𑀘𑀺 𑀓𑀣𑁂𑀣𑀸’’𑀢𑀺 𑀯𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑀸𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺. 𑀅𑀣 𑀲𑀸 𑀇𑀢𑁆𑀣𑀻 𑀅𑀗𑁆𑀓𑀁 𑀘𑀸𑀮𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁄𑀥𑁂𑀲𑀺. 𑀭𑀸𑀚𑀸 𑀧𑀩𑀼𑀤𑁆𑀥𑁄 𑀢𑀸 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀕𑀢𑀸 𑀯𑀲𑀮𑀺𑀬𑁄’’𑀢𑀺 𑀆𑀳. 𑀏𑀢𑀸, 𑀫𑀳𑀸𑀭𑀸𑀚, 𑀕𑀦𑁆𑀢𑁆𑀯𑀸 𑀏𑀓𑀁 𑀢𑀸𑀧𑀲𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀽𑀢𑀺. 𑀭𑀸𑀚𑀸 𑀓𑀼𑀧𑀺𑀢𑁄 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 ‘‘𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦𑀁 𑀓𑀽𑀝𑀚𑀝𑀺𑀮’’𑀦𑁆𑀢𑀺 𑀯𑁂𑀕𑁂𑀦 𑀅𑀕𑀫𑀸𑀲𑀺.

𑀅𑀣 𑀢𑀸 𑀇𑀢𑁆𑀣𑀺𑀬𑁄 𑀭𑀸𑀚𑀸𑀦𑀁 𑀓𑀼𑀤𑁆𑀥𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀸𑀲𑀼 𑀯𑀮𑁆𑀮𑀪𑀢𑀭𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀳𑀢𑁆𑀣𑀸 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀯𑀽𑀧𑀲𑀫𑁂𑀲𑀼𑀁. 𑀲𑁄 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 ‘‘𑀓𑀺𑀁𑀯𑀸𑀤𑀻 𑀢𑁆𑀯𑀁, 𑀲𑀫𑀡𑀸’’𑀢𑀺 𑀧𑀼𑀘𑁆𑀙𑀺. ‘‘𑀔𑀦𑁆𑀢𑀺𑀯𑀸𑀤𑀻, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀸 𑀏𑀲𑀸 𑀔𑀦𑁆𑀢𑀺 𑀦𑀸𑀫𑀸’’𑀢𑀺? ‘‘𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀧𑀭𑀺𑀪𑀸𑀲𑀦𑁆𑀢𑁂𑀲𑀼 𑀧𑀳𑀭𑀦𑁆𑀢𑁂𑀲𑀼 𑀅𑀓𑀼𑀚𑁆𑀛𑀦𑀪𑀸𑀯𑁄’’𑀢𑀺. 𑀭𑀸𑀚𑀸 ‘‘𑀧𑀲𑁆𑀲𑀺𑀲𑁆𑀲𑀸𑀫𑀺 𑀤𑀸𑀦𑀺 𑀢𑁂 𑀔𑀦𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯’’𑀦𑁆𑀢𑀺 ¶ 𑀘𑁄𑀭𑀖𑀸𑀢𑀓𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀅𑀢𑁆𑀢𑀦𑁄 𑀘𑀸𑀭𑀺𑀢𑁆𑀢𑁂𑀦 𑀨𑀭𑀲𑀼𑀜𑁆𑀘 𑀓𑀡𑁆𑀝𑀓𑀓𑀲𑀜𑁆𑀘 𑀆𑀤𑀸𑀬 𑀓𑀸𑀲𑀸𑀬𑀦𑀺𑀯𑀲𑀦𑁄 𑀭𑀢𑁆𑀢𑀫𑀸𑀮𑀸𑀥𑀭𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺 𑀆𑀳. 𑀇𑀫𑀁 𑀘𑁄𑀭𑀁 𑀤𑀼𑀝𑁆𑀞𑀢𑀸𑀧𑀲𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀓𑀡𑁆𑀝𑀓𑀓𑀲𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀘𑀸𑀢𑀺 𑀘𑀢𑀽𑀲𑀼𑀧𑀺 𑀧𑀲𑁆𑀲𑁂𑀲𑀼 𑀤𑁆𑀯𑁂𑀧𑀳𑀸𑀭𑀲𑀳𑀲𑁆𑀲𑀫𑀲𑁆𑀲 𑀤𑁂𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺 ¶ . 𑀩𑁄𑀥𑀺𑀲𑀢𑁆𑀢𑀲𑁆𑀲 𑀙𑀯𑀺 𑀪𑀺𑀚𑁆𑀚𑀺. 𑀘𑀫𑁆𑀫𑀁 𑀪𑀺𑀚𑁆𑀚𑀺, 𑀫𑀁𑀲𑀁 𑀙𑀺𑀚𑁆𑀚𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺.

𑀧𑀼𑀦 𑀭𑀸𑀚𑀸 ‘‘𑀓𑀺𑀁𑀯𑀸𑀤𑀻 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺 𑀆𑀳. ‘‘𑀔𑀦𑁆𑀢𑀺𑀯𑀸𑀤𑀻, 𑀫𑀳𑀸𑀭𑀸𑀚’’. ‘‘𑀢𑁆𑀯𑀁 𑀧𑀦 𑀫𑀬𑁆𑀳𑀁 𑀘𑀫𑁆𑀫𑀦𑁆𑀢𑀭𑁂 𑀔𑀦𑁆𑀢𑀻’’𑀢𑀺 𑀫𑀜𑁆𑀜𑀲𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀘𑀫𑁆𑀫𑀦𑁆𑀢𑀭𑁂 𑀔𑀦𑁆𑀢𑀺, 𑀢𑀬𑀸 𑀧𑀦 𑀤𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀳𑀤𑀬𑀩𑁆𑀪𑀦𑁆𑀢𑀭𑁂 𑀫𑀫 𑀔𑀦𑁆𑀢𑀺 𑀧𑀢𑀺𑀝𑁆𑀞𑀺𑀢𑀸. ‘‘𑀫𑀳𑀸𑀭𑀸𑀚𑀸’’𑀢𑀺. 𑀧𑀼𑀦 𑀘𑁄𑀭𑀖𑀸𑀢𑀓𑁄 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀇𑀫𑀲𑁆𑀲 𑀓𑀽𑀝𑀚𑀝𑀺𑀮𑀲𑁆𑀲 𑀉𑀪𑁄 𑀳𑀢𑁆𑀣𑁂 𑀙𑀺𑀦𑁆𑀤𑀸’’𑀢𑀺. 𑀲𑁄 𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀕𑀡𑁆𑀟𑀺𑀬𑀁 𑀞𑀧𑁂𑀢𑁆𑀯𑀸 𑀳𑀢𑁆𑀣𑁂 𑀙𑀺𑀦𑁆𑀤𑀺. 𑀅𑀣 𑀦𑀁 ‘‘𑀧𑀸𑀤𑁂 𑀙𑀺𑀦𑁆𑀤𑀸’’𑀢𑀺 𑀆𑀳, 𑀧𑀸𑀤𑁂𑀧𑀺 𑀙𑀺𑀦𑁆𑀤𑀺. 𑀳𑀢𑁆𑀣𑀧𑀸𑀤𑀓𑁄𑀝𑀻𑀳𑀺 𑀖𑀝𑀙𑀺𑀤𑁆𑀤𑁂𑀳𑀺 𑀮𑀸𑀔𑀸𑀭𑀲𑁄 𑀯𑀺𑀬 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺. 𑀧𑀼𑀦 𑀭𑀸𑀚𑀸 ‘‘𑀓𑀺𑀁𑀯𑀸𑀤𑀻𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀔𑀦𑁆𑀢𑀺𑀯𑀸𑀤𑀻, 𑀫𑀳𑀸𑀭𑀸𑀚’’. ‘‘𑀢𑁆𑀯𑀁 𑀧𑀦 𑀫𑀬𑁆𑀳𑀁 𑀳𑀢𑁆𑀣𑀧𑀸𑀤𑀓𑁄𑀝𑀻𑀲𑀼 ‘𑀔𑀦𑁆𑀢𑀺 𑀅𑀢𑁆𑀣𑀻’𑀢𑀺 𑀫𑀜𑁆𑀜𑀲𑀺, 𑀦𑀢𑁆𑀣𑁂𑀲𑀸 𑀏𑀢𑁆𑀣, 𑀫𑀬𑁆𑀳𑀁 𑀔𑀦𑁆𑀢𑀺 𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀲𑁄 ‘‘𑀓𑀡𑁆𑀡𑀦𑀸𑀲𑀫𑀲𑁆𑀲 𑀙𑀺𑀦𑁆𑀤𑀸’’𑀢𑀺 𑀆𑀳. 𑀇𑀢𑀭𑁄 𑀓𑀡𑁆𑀡𑀦𑀸𑀲𑀁 𑀙𑀺𑀦𑁆𑀤𑀺, 𑀲𑀓𑀮𑀲𑀭𑀻𑀭𑁂 𑀮𑁄𑀳𑀺𑀢𑀁 𑀅𑀳𑁄𑀲𑀺. 𑀧𑀼𑀦 𑀦𑀁 ‘‘𑀓𑀺𑀁𑀯𑀸𑀤𑀻 ¶ 𑀦𑀸𑀫 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀔𑀦𑁆𑀢𑀺𑀯𑀸𑀤𑀻 𑀦𑀸𑀫’’. ‘‘𑀫𑀸 𑀔𑁄 𑀧𑀦 𑀢𑁆𑀯𑀁 ‘𑀓𑀡𑁆𑀡𑀦𑀸𑀲𑀺𑀓𑀓𑁄𑀝𑀻𑀲𑀼 𑀧𑀢𑀺𑀝𑁆𑀞𑀺𑀢𑀸 𑀔𑀦𑁆𑀢𑀻’𑀢𑀺 𑀫𑀜𑁆𑀜𑀲𑀺, 𑀫𑀫 𑀔𑀦𑁆𑀢𑀺 𑀕𑀫𑁆𑀪𑀻𑀭𑁂 𑀳𑀤𑀬𑀩𑁆𑀪𑀦𑁆𑀢𑀭𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀭𑀸𑀚𑀸 ‘‘𑀓𑀽𑀝𑀚𑀝𑀺𑀮 𑀢𑀯 𑀔𑀦𑁆𑀢𑀺𑀁 𑀢𑁆𑀯𑀫𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀤𑀬𑀁 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀲𑁆𑀫𑀺𑀁 𑀕𑀢𑁂 𑀲𑁂𑀦𑀸𑀧𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑀢𑁄 𑀮𑁄𑀳𑀺𑀢𑀁 𑀧𑀼𑀜𑁆𑀙𑀺𑀢𑁆𑀯𑀸 ¶ 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀓𑁄𑀝𑀺𑀬𑁄 𑀲𑀸𑀝𑀓𑀓𑀡𑁆𑀡𑁂 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀲𑀡𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑀘𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀓𑀼𑀚𑁆𑀛𑀺𑀢𑀼𑀓𑀸𑀫𑀸, 𑀢𑀼𑀫𑁆𑀳𑁂𑀲𑀼 𑀓𑀢𑀸𑀧𑀭𑀸𑀥𑀲𑁆𑀲 𑀭𑀜𑁆𑀜𑁄𑀯 𑀓𑀼𑀚𑁆𑀛𑁂𑀬𑁆𑀬𑀸𑀣, 𑀫𑀸 𑀅𑀜𑁆𑀜𑁂𑀲’’𑀦𑁆𑀢𑀺 𑀬𑀸𑀘𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀬𑁄 𑀢𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀫𑀸 𑀭𑀝𑁆𑀞𑀁 𑀯𑀺𑀦𑀲𑀸 𑀇𑀤’’𑀦𑁆𑀢𑀺.

𑀢𑀢𑁆𑀣 𑀫𑀳𑀸𑀯𑀻𑀭𑀸𑀢𑀺 𑀫𑀳𑀸𑀯𑀻𑀭𑀺𑀬. 𑀫𑀸 𑀭𑀝𑁆𑀞𑀁 𑀯𑀺𑀦𑀲𑀸 𑀇𑀤𑀦𑁆𑀢𑀺 𑀇𑀤𑀁 𑀦𑀺𑀭𑀧𑀭𑀸𑀥𑀁 𑀓𑀸𑀲𑀺𑀭𑀝𑁆𑀞𑀁 𑀫𑀸 𑀯𑀺𑀦𑀸𑀲𑁂𑀳𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀬𑁄 𑀫𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀦 𑀳𑀺 𑀓𑀼𑀚𑁆𑀛𑀦𑁆𑀢𑀺 𑀫𑀸𑀤𑀺𑀲𑀸’’𑀢𑀺.

𑀢𑀢𑁆𑀣 ¶ 𑀫𑀸𑀤𑀺𑀲𑀸𑀢𑀺 𑀫𑀫 𑀲𑀤𑀺𑀲𑀸 𑀔𑀦𑁆𑀢𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀡𑁆𑀟𑀺𑀢𑀸 ‘‘𑀅𑀬𑀁 𑀫𑀁 𑀅𑀓𑁆𑀓𑁄𑀲𑀺 𑀧𑀭𑀺𑀪𑀸𑀲𑀺 𑀧𑀳𑀭𑀺, 𑀙𑀺𑀦𑁆𑀤𑀺 𑀪𑀺𑀦𑁆𑀤𑀻’’𑀢𑀺 𑀢𑀁 𑀦 𑀓𑀼𑀚𑁆𑀛𑀦𑁆𑀢𑀺.

𑀭𑀜𑁆𑀜𑁄 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀦𑀓𑀸𑀮𑁂𑀬𑁂𑀯 𑀅𑀬𑀁 𑀘𑀢𑀼𑀦𑀳𑀼𑀢𑀸𑀥𑀺𑀓𑀸 𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸 𑀫𑀳𑀸𑀧𑀣𑀯𑀻 𑀔𑀮𑀺𑀩𑀤𑁆𑀥𑀲𑀸𑀝𑀓𑁄 𑀯𑀺𑀬 𑀨𑀮𑀺𑀢𑀸, 𑀅𑀯𑀻𑀘𑀺𑀢𑁄 𑀚𑀸𑀮𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀓𑀼𑀮𑀤𑀢𑁆𑀢𑀺𑀬𑁂𑀦 𑀭𑀢𑁆𑀢𑀓𑀫𑁆𑀩𑀮𑁂𑀦 𑀧𑀸𑀭𑀼𑀧𑀦𑁆𑀢𑀻 𑀯𑀺𑀬 𑀕𑀡𑁆𑀳𑀺. 𑀲𑁄 𑀉𑀬𑁆𑀬𑀸𑀦𑀤𑁆𑀯𑀸𑀭𑁂𑀬𑁂𑀯 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀧𑀢𑀺𑀝𑁆𑀞𑀳𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀧𑀭𑀺𑀲𑀸 𑀘 𑀦𑀸𑀕𑀭𑀸 𑀘 𑀕𑀦𑁆𑀥𑀫𑀸𑀮𑀸𑀥𑀽𑀫𑀳𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀅𑀓𑀁𑀲𑀼. 𑀓𑁂𑀘𑀺 𑀧𑀦𑀸𑀳𑀼 ‘‘𑀩𑁄𑀥𑀺𑀲𑀢𑁆𑀢𑁄 𑀧𑀼𑀦 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄’’𑀢𑀺, 𑀢𑀁 𑀅𑀪𑀽𑀢𑀁.

𑁫𑁧.

‘‘𑀅𑀳𑀽 ¶ ¶ 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀲𑀫𑀡𑁄 𑀔𑀦𑁆𑀢𑀺𑀤𑀻𑀧𑀦𑁄;

𑀢𑀁 𑀔𑀦𑁆𑀢𑀺𑀬𑀸𑀬𑁂𑀯 𑀞𑀺𑀢𑀁, 𑀓𑀸𑀲𑀺𑀭𑀸𑀚𑀸 𑀅𑀙𑁂𑀤𑀬𑀺.

𑁫𑁨.

‘‘𑀢𑀲𑁆𑀲 𑀓𑀫𑁆𑀫𑀨𑀭𑀼𑀲𑀲𑁆𑀲, 𑀯𑀺𑀧𑀸𑀓𑁄 𑀓𑀝𑀼𑀓𑁄 𑀅𑀳𑀼;

𑀬𑀁 𑀓𑀸𑀲𑀺𑀭𑀸𑀚𑀸 𑀯𑁂𑀤𑁂𑀲𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑁄’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.

𑀢𑀢𑁆𑀣 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀅𑀢𑀻𑀢𑁂 𑀅𑀤𑁆𑀥𑀸𑀦𑁂. 𑀔𑀦𑁆𑀢𑀺𑀤𑀻𑀧𑀦𑁄𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀲𑀁𑀯𑀡𑁆𑀡𑀦𑁄. 𑀅𑀙𑁂𑀤𑀬𑀻𑀢𑀺 𑀫𑀸𑀭𑀸𑀧𑁂𑀲𑀺. 𑀏𑀓𑀘𑁆𑀘𑁂 𑀧𑀦 ‘‘𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀦 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸 𑀖𑀝𑀺𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀅𑀪𑀽𑀢𑀫𑁂𑀯. 𑀲𑀫𑀧𑁆𑀧𑀺𑀢𑁄𑀢𑀺 𑀧𑀢𑀺𑀝𑁆𑀞𑀺𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁄𑀥𑀦𑁄 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼.

𑀢𑀤𑀸 𑀓𑀮𑀸𑀩𑀼𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀔𑀦𑁆𑀢𑀺𑀯𑀸𑀤𑀻 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀔𑀦𑁆𑀢𑀺𑀯𑀸𑀤𑀻𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁧𑁪] 𑁪. 𑀮𑁄𑀳𑀓𑀼𑀫𑁆𑀪𑀺𑀚𑀸𑀢𑀓𑀯𑀡𑁆𑀡𑀦𑀸

𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳𑀸𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀓𑁄𑀲𑀮𑀭𑀸𑀚𑀸 𑀭𑀢𑁆𑀢𑀺𑀪𑀸𑀕𑁂 𑀘𑀢𑀼𑀦𑁆𑀦𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀡𑀺. 𑀏𑀓𑁄 𑀤𑀼-𑀓𑀸𑀭𑀫𑁂𑀯 𑀪𑀡𑀺, 𑀏𑀓𑁄 𑀲-𑀓𑀸𑀭𑀁, 𑀏𑀓𑁄 𑀦-𑀓𑀸𑀭𑀁, 𑀏𑀓𑁄 𑀲𑁄-𑀓𑀸𑀭𑀫𑁂𑀯𑀸𑀢𑀺. 𑀢𑁂 𑀓𑀺𑀭 𑀅𑀢𑀻𑀢𑀪𑀯𑁂 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀧𑀸𑀭𑀤𑀸𑀭𑀺𑀓𑀸 𑀭𑀸𑀚𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑀫𑀸𑀢𑀼𑀕𑀸𑀫𑁂𑀲𑀼 𑀅𑀧𑀭𑀚𑁆𑀛𑀺𑀢𑁆𑀯𑀸 𑀘𑀺𑀢𑁆𑀢𑀓𑁂𑀴𑀺𑀁 𑀓𑀻𑀴𑀦𑁆𑀢𑀸 𑀩𑀳𑀼𑀁 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀫𑀭𑀡𑀘𑀓𑁆𑀓𑁂𑀦 𑀙𑀺𑀦𑁆𑀦𑀸 𑀲𑀸𑀯𑀢𑁆𑀣𑀺𑀲𑀸𑀫𑀦𑁆𑀢𑁂 𑀘𑀢𑀽𑀲𑀼 𑀮𑁄𑀳𑀓𑀼𑀫𑁆𑀪𑀻𑀲𑀼 𑀦𑀺𑀩𑁆𑀩𑀢𑁆𑀢𑀸 𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀉𑀕𑁆𑀕𑀢𑀸 𑀮𑁄𑀳𑀓𑀼𑀫𑁆𑀪𑀺𑀫𑀼𑀔𑀯𑀝𑁆𑀝𑀺𑀁 𑀤𑀺𑀲𑁆𑀯𑀸 ‘‘𑀓𑀤𑀸 𑀦𑀼 𑀔𑁄 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀘𑀢𑁆𑀢𑀸𑀭𑁄𑀧𑀺 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀯𑀺𑀭𑀯𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀦𑀺𑀲𑀺𑀦𑁆𑀦𑀓𑁄𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀲𑀺.

𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 ¶ 𑀩𑁆𑀭𑀸𑀳𑁆𑀫𑀡𑀸 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀲𑀼𑀔𑀲𑀬𑀺𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀭𑀸𑀚𑀸 ‘‘𑀓𑀼𑀢𑁄 𑀫𑁂 𑀆𑀘𑀭𑀺𑀬𑀸 𑀲𑀼𑀔𑀲𑀬𑀺𑀢𑀁, 𑀅𑀚𑁆𑀚𑀸𑀳𑀁 𑀏𑀯𑀭𑀽𑀧𑁂 ¶ 𑀘𑀢𑁆𑀢𑀸𑀭𑁄 𑀪𑀺𑀁𑀲𑀦𑀓𑀲𑀤𑁆𑀤𑁂 𑀲𑀼𑀡𑀺’’𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀳𑀢𑁆𑀣𑁂 𑀯𑀺𑀥𑀼𑀦𑀺𑀁𑀲𑀼. ‘‘𑀓𑀺𑀁 𑀆𑀘𑀭𑀺𑀬𑀸’’𑀢𑀺? ‘‘𑀲𑀸𑀳𑀲𑀺𑀓𑀲𑀤𑁆𑀤𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀧𑀝𑀺𑀓𑀫𑁆𑀫𑀸 𑀅𑀧𑁆𑀧𑀝𑀺𑀓𑀫𑁆𑀫𑀸’’𑀢𑀺? ‘‘𑀓𑀸𑀫𑀁 𑀅𑀧𑁆𑀧𑀝𑀺𑀓𑀫𑁆𑀫𑀸, 𑀫𑀬𑀁 𑀧𑀦 𑀲𑀼𑀲𑀺𑀓𑁆𑀔𑀺𑀢𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀓𑀢𑁆𑀯𑀸 𑀧𑀝𑀺𑀩𑀸𑀳𑀺𑀲𑁆𑀲𑀣𑀸’’𑀢𑀺? ‘‘𑀫𑀳𑀸𑀭𑀸𑀚, 𑀧𑀝𑀺𑀓𑀫𑁆𑀫𑀁 𑀫𑀳𑀦𑁆𑀢𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀫𑀬𑀁 𑀧𑀦 𑀲𑀩𑁆𑀩𑀘𑀢𑀼𑀓𑁆𑀓𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀳𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀔𑀺𑀧𑁆𑀧𑀁 𑀘𑀢𑁆𑀢𑀸𑀭𑁄 𑀳𑀢𑁆𑀣𑀻 𑀘𑀢𑁆𑀢𑀸𑀭𑁄 𑀅𑀲𑁆𑀲𑁂 𑀘𑀢𑁆𑀢𑀸𑀭𑁄 𑀉𑀲𑀪𑁂 𑀘𑀢𑁆𑀢𑀸𑀭𑁄 𑀫𑀦𑀼𑀲𑁆𑀲𑁂𑀢𑀺 𑀮𑀝𑀼𑀓𑀺𑀓𑀲𑀓𑀼𑀡𑀺𑀓𑀸 𑀆𑀤𑀺𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀧𑀸𑀡𑁂 𑀕𑀳𑁂𑀢𑁆𑀯𑀸 𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀫𑀫 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑁄𑀣𑀸’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀬𑁂𑀦𑀢𑁆𑀣𑁄, 𑀢𑀁 𑀕𑀳𑁂𑀢𑁆𑀯𑀸 𑀬𑀜𑁆𑀜𑀸𑀯𑀸𑀝𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀲𑀼𑀁, 𑀩𑀳𑀼𑀧𑀸𑀡𑁂 𑀣𑀽𑀡𑀽𑀧𑀦𑀻𑀢𑁂 𑀓𑀢𑁆𑀯𑀸 𑀞𑀧𑁂𑀲𑀼𑀁. ‘‘𑀩𑀳𑀼𑀁 𑀫𑀘𑁆𑀙𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫, 𑀩𑀳𑀼𑀁 𑀥𑀦𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀇𑀤𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀤𑁂𑀯𑀸’’𑀢𑀺 𑀅𑀧𑀭𑀸𑀧𑀭𑀁 𑀘𑀭𑀦𑁆𑀢𑀺.

𑀫𑀮𑁆𑀮𑀺𑀓𑀸 𑀤𑁂𑀯𑀻 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑀸 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀬𑀦𑁆𑀢𑀸 𑀯𑀺𑀘𑀭𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯𑀺 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸, 𑀢𑁆𑀯𑀁 𑀅𑀢𑁆𑀢𑀦𑁄 𑀬𑀲𑁂𑀦𑁂𑀯 𑀫𑀢𑁆𑀢𑀸 𑀧𑀫𑀢𑁆𑀢𑀸, 𑀤𑀼𑀓𑁆𑀔𑀁 𑀧𑀦 𑀅𑀫𑁆𑀳𑀸𑀓𑀫𑁂𑀯 𑀦 𑀚𑀸𑀦𑀸𑀲𑀻’’𑀢𑀺? ‘‘𑀓𑀺𑀁 ¶ , 𑀫𑀳𑀸𑀭𑀸𑀚𑀸’’𑀢𑀺. ‘‘𑀤𑁂𑀯𑀺, 𑀅𑀳𑀁 𑀏𑀯𑀭𑀽𑀧𑀁 𑀦𑀸𑀫 𑀅𑀲𑁄𑀢𑀩𑁆𑀩𑀁 𑀲𑀼𑀡𑀺𑀁, 𑀢𑀢𑁄 𑀇𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀼𑀢𑀢𑁆𑀢𑀸 ‘‘𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀁, 𑀩𑁆𑀭𑀸𑀳𑁆𑀫𑀡𑀸 ‘‘𑀢𑀼𑀫𑁆𑀳𑀸𑀓𑀁 𑀫𑀳𑀸𑀭𑀸𑀚 𑀭𑀚𑁆𑀚𑀲𑁆𑀲 𑀯𑀸 𑀪𑁄𑀕𑀸𑀦𑀁 𑀯𑀸 𑀚𑀻𑀯𑀺𑀢𑀲𑁆𑀲 𑀯𑀸 𑀅𑀦𑁆𑀢𑀭𑀸𑀬𑁄 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀘𑀢𑀼𑀓𑁆𑀓𑁂𑀦 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼, 𑀢𑁂 𑀫𑀬𑁆𑀳𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀬𑀜𑁆𑀜𑀸𑀯𑀸𑀝𑀁 𑀓𑀢𑁆𑀯𑀸 𑀬𑁂𑀦 𑀬𑁂𑀦𑀢𑁆𑀣𑁄, 𑀢𑀲𑁆𑀲 𑀢𑀲𑁆𑀲 𑀓𑀸𑀭𑀡𑀸 𑀆𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦 𑀤𑁂𑀯, 𑀇𑀫𑁂𑀲𑀁 𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺𑀢𑁆𑀣𑀸’’𑀢𑀺? ‘‘𑀓𑁄 𑀏𑀲 𑀤𑁂𑀯𑀺, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑁄 𑀦𑀸𑀫𑀸’’𑀢𑀺? ‘‘𑀫𑀳𑀸𑀕𑁄𑀢𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. ‘‘𑀤𑁂𑀯𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑁂 𑀦 𑀧𑀼𑀘𑁆𑀙𑀺𑀢𑁄’’𑀢𑀺? ‘‘𑀢𑁂𑀦 𑀳𑀺 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀣𑀸’’𑀢𑀺.

𑀭𑀸𑀚𑀸 𑀢𑀲𑁆𑀲𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀭𑀣𑀯𑀭𑀫𑀸𑀭𑀼𑀬𑁆𑀳 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀅𑀳𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀪𑀸𑀕𑁂 𑀘𑀢𑁆𑀢𑀸𑀭𑁄 𑀲𑀤𑁆𑀤𑁂 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀁, 𑀢𑁂 ‘𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑀁 ¶ 𑀬𑀚𑀺𑀢𑁆𑀯𑀸 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀯𑀢𑁆𑀯𑀸 𑀬𑀜𑁆𑀜𑀸𑀯𑀸𑀝𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀲𑀤𑁆𑀤𑀸𑀦𑀁 𑀲𑀼𑀢𑀢𑁆𑀢𑀸 𑀫𑀬𑁆𑀳𑀁 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀦 𑀓𑀺𑀜𑁆𑀘𑀺, 𑀫𑀳𑀸𑀭𑀸𑀚, 𑀦𑁂𑀭𑀬𑀺𑀓𑀲𑀢𑁆𑀢𑀸 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑀸 𑀏𑀯𑀁 𑀯𑀺𑀭𑀯𑀺𑀁𑀲𑀼, 𑀦 𑀇𑀫𑁂 𑀲𑀤𑁆𑀤𑀸 𑀇𑀤𑀸𑀦𑀺 𑀢𑀬𑀸 𑀏𑀯 𑀲𑀼𑀢𑀸, 𑀧𑁄𑀭𑀸𑀡𑀓𑀭𑀸𑀚𑀽𑀳𑀺𑀧𑀺 𑀲𑀼𑀢𑀸𑀬𑁂𑀯, 𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑁆𑀯𑀸 𑀧𑀲𑀼𑀖𑀸𑀢𑀬𑀜𑁆𑀜𑀁 𑀓𑀢𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀦 𑀓𑀭𑀺𑀁𑀲𑀼, 𑀧𑀡𑁆𑀟𑀺𑀢𑀸 𑀢𑁂𑀲𑀁 𑀲𑀤𑁆𑀤𑀸𑀦𑀁 𑀅𑀦𑁆𑀢𑀭𑀁 𑀓𑀣𑁂𑀢𑁆𑀯𑀸 𑀫𑀳𑀸𑀚𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑁄𑀢𑁆𑀣𑀺𑀫𑀓𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀳𑀺𑀫𑀯𑀦𑁆𑀢𑁂 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀯𑀲𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀘𑀢𑀼𑀦𑁆𑀦𑀁 𑀦𑁂𑀭𑀬𑀺𑀓𑀸𑀦𑀁 𑀇𑀫𑁂𑀯 𑀘𑀢𑁆𑀢𑀸𑀭𑁄 𑀲𑀤𑁆𑀤𑁂 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 ‘‘𑀢𑀺𑀡𑁆𑀡𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑁄 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑁂𑀦 𑀢𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺. 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀬𑀜𑁆𑀜𑀸𑀯𑀸𑀝𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑀺, 𑀫𑀳𑀸𑀚𑀦𑁄 𑀣𑀽𑀡𑀽𑀧𑀦𑀻𑀢𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑁂𑀢𑁆𑀢𑀸𑀪𑀸𑀯𑀦𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚, 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀫𑀳𑀸𑀚𑀦𑀲𑁆𑀲 𑀲𑁄𑀢𑁆𑀣𑀺 ¶ 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀤𑁆𑀥𑀺𑀩𑀮𑁂𑀦 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀓𑀜𑁆𑀘𑀦𑀭𑀽𑀧𑀓𑀁 𑀯𑀺𑀬 𑀦𑀺𑀲𑀻𑀤𑀺. 𑀢𑀤𑀸 𑀧𑀼𑀭𑁄𑀳𑀺𑀢𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀦𑀦𑀼, 𑀆𑀘𑀭𑀺𑀬, 𑀅𑀫𑁆𑀳𑀸𑀓𑀁 𑀯𑁂𑀤𑁂𑀲𑀼 𑀧𑀭𑀁 𑀫𑀸𑀭𑁂𑀢𑁆𑀯𑀸 𑀲𑁄𑀢𑁆𑀣𑀺𑀓𑀭𑀡𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀧𑀼𑀭𑁄𑀳𑀺𑀢𑁄 ‘‘𑀢𑁆𑀯𑀁 𑀭𑀸𑀚𑀥𑀦𑀁 𑀭𑀓𑁆𑀔𑀲𑀺, 𑀩𑀳𑀼𑀁 𑀫𑀘𑁆𑀙𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫, 𑀥𑀦𑀁 𑀮𑀪𑀺𑀲𑁆𑀲𑀸𑀫, 𑀢𑀼𑀡𑁆𑀳𑀻 𑀳𑁄𑀳𑀻’’𑀢𑀺 𑀢𑀁 𑀧𑀝𑀺𑀩𑀸𑀳𑀺.

𑀲𑁄 ‘‘𑀦𑀸𑀳𑀁 ¶ 𑀏𑀢𑁆𑀣 𑀲𑀳𑀸𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀁, 𑀫𑀸𑀡𑀯, 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀭𑀢𑁆𑀢𑀺𑀪𑀸𑀕𑁂 𑀧𑀦 𑀘𑀢𑁆𑀢𑀸𑀭𑁄 𑀲𑀤𑁆𑀤𑁂 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 ‘𑀲𑀩𑁆𑀩𑀘𑀢𑀼𑀓𑁆𑀓𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀸𑀫𑀸’’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀧𑀲𑀼𑀖𑀸𑀢𑀓𑀫𑁆𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑁄𑀢𑁆𑀣𑀺𑀁 𑀓𑀸𑀢𑀼𑀓𑀸𑀫𑁄 𑀫𑀳𑀸𑀚𑀦𑁄 𑀣𑀽𑀡𑀽𑀧𑀦𑀻𑀢𑁄, ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀢𑁂𑀲𑀁 𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀯𑀢𑁆𑀯𑀸 𑀫𑀳𑀸𑀚𑀦𑀁 𑀫𑀭𑀡𑀫𑀼𑀔𑀸 𑀫𑁄𑀘𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀫𑀸𑀡𑀯, 𑀭𑀸𑀚𑀸 𑀅𑀫𑁆𑀳𑁂 𑀦 𑀚𑀸𑀦𑀸𑀢𑀺, 𑀫𑀬𑀫𑁆𑀧𑀺 𑀢𑀁 𑀦 𑀚𑀸𑀦𑀸𑀫, 𑀇𑀫𑁂𑀲𑀁 𑀧𑀦 𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀚𑀸𑀦𑀸𑀫, 𑀲𑀘𑁂 𑀭𑀸𑀚𑀸 𑀅𑀫𑁆𑀳𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬, 𑀭𑀸𑀚𑀸𑀦𑀁 𑀦𑀺𑀓𑁆𑀓𑀗𑁆𑀔𑀁 𑀓𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀼𑀳𑀼𑀢𑁆𑀢𑀁 𑀇𑀥𑁂𑀯 𑀳𑁄𑀣, 𑀅𑀳𑀁 𑀭𑀸𑀚𑀸𑀦𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀫𑀸𑀡𑀯𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀭𑀸𑀚𑀸𑀦𑀁 𑀆𑀦𑁂𑀲𑀺.

𑀅𑀣 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀼𑀘𑁆𑀙𑀺 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀫𑀬𑀸 𑀲𑀼𑀢𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀣𑁂𑀣, 𑀪𑀦𑁆𑀢𑁂’’𑀢𑀺. ‘‘𑀫𑀳𑀸𑀭𑀸𑀚, 𑀏𑀢𑁂 𑀧𑀼𑀭𑀺𑀫𑀪𑀯𑁂 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀼 𑀤𑀸𑀭𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑀸𑀫𑀦𑁆𑀢𑁂 𑀘𑀢𑀽𑀲𑀼 𑀮𑁄𑀳𑀓𑀼𑀫𑁆𑀪𑀻𑀲𑀼 𑀦𑀺𑀩𑁆𑀩𑀢𑁆𑀢𑀸 𑀧𑀓𑁆𑀓𑀼𑀣𑀺𑀢𑁂 𑀔𑀸𑀭𑀮𑁄𑀳𑁄𑀤𑀓𑁂 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑀸 𑀢𑀺𑀁𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀥𑁄 𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀺𑀢𑀮𑀁 𑀆𑀳𑀘𑁆𑀘 𑀉𑀤𑁆𑀥𑀁 𑀆𑀭𑁄𑀳𑀦𑁆𑀢𑀸 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑁂𑀦𑁂𑀯 𑀓𑀸𑀮𑁂𑀦 𑀓𑀼𑀫𑁆𑀪𑀺𑀫𑀼𑀔𑀁 𑀤𑀺𑀲𑁆𑀯𑀸 ¶ 𑀩𑀳𑀺 𑀑𑀮𑁄𑀓𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀚𑀦𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑀸𑀧𑀺 𑀢𑀣𑀸 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀫𑁂𑀯 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀼𑀦 𑀮𑁄𑀳𑀓𑀼𑀫𑁆𑀪𑀻𑀲𑀼𑀬𑁂𑀯 ¶ 𑀦𑀺𑀫𑀼𑀕𑁆𑀕𑀸. 𑀢𑁂𑀲𑀼 𑀤𑀼-𑀓𑀸𑀭𑀁 𑀯𑀢𑁆𑀯𑀸 𑀦𑀺𑀫𑀼𑀕𑁆𑀕𑀲𑀢𑁆𑀢𑁄 𑀏𑀯𑀁 𑀯𑀢𑁆𑀢𑀼𑀓𑀸𑀫𑁄 𑀅𑀳𑁄𑀲𑀺 𑁋

𑁫𑁩.

‘𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳 ¶ , 𑀬𑁂 𑀲𑀦𑁆𑀢𑁂 𑀦 𑀤𑀤𑀫𑁆𑀳𑀲𑁂;

𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑁄𑀕𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄’𑀢𑀺. 𑁋

𑀢𑀁 𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀢𑀁 𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑁂𑀲𑀼 𑀲-𑀓𑀸𑀭𑀁 𑀯𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑀲𑁆𑀲 𑀅𑀬𑀁 𑀕𑀸𑀣𑀸 𑁋

𑁫𑁪.

‘‘𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀦-𑀓𑀸𑀭𑀁 𑀯𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑀲𑁆𑀲 𑀅𑀬𑀁 𑀕𑀸𑀣𑀸 𑁋

𑁫𑁫.

‘‘𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀫𑀸𑀭𑀺𑀲𑀸’’𑀢𑀺.

𑀲𑁄-𑀓𑀸𑀭𑀁 𑀯𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑀲𑁆𑀲 𑀅𑀬𑀁 𑀕𑀸𑀣𑀸 𑁋

𑁫𑁬.

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺.

𑀢𑀢𑁆𑀣 𑀤𑀼𑀚𑁆𑀚𑀻𑀯𑀺𑀢𑀦𑁆𑀢𑀺 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘𑀭𑀦𑁆𑀢𑁄 𑀤𑀼𑀚𑁆𑀚𑀻𑀯𑀺𑀢𑀁 𑀮𑀸𑀫𑀓𑀚𑀻𑀯𑀺𑀢𑀁 𑀚𑀻𑀯𑀢𑀺 𑀦𑀸𑀫, 𑀲𑁄𑀧𑀺 𑀢𑀤𑁂𑀯 𑀲𑀦𑁆𑀥𑀸𑀬𑀸𑀳 ‘‘𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳𑀸’’𑀢𑀺. 𑀬𑁂 𑀲𑀦𑁆𑀢𑁂 𑀦 𑀤𑀤𑀫𑁆𑀳𑀲𑁂𑀢𑀺 𑀬𑁂 𑀫𑀬𑀁 𑀤𑁂𑀬𑁆𑀬𑀥𑀫𑁆𑀫𑁂 𑀘 𑀧𑀝𑀺𑀕𑁆𑀕𑀸𑀳𑀓𑁂 𑀘 𑀲𑀁𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀦 𑀤𑀸𑀦𑀁 𑀤𑀤𑀺𑀫𑁆𑀳. 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀦 𑀓𑀭𑀺𑀫𑁆𑀳. 𑀧𑀭𑀺𑀧𑀼𑀡𑁆𑀡𑀸𑀦𑀻𑀢𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀧𑀘𑁆𑀘𑀫𑀸𑀦𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁.

𑀦𑀢𑁆𑀣𑀺 ¶ 𑀅𑀦𑁆𑀢𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀅𑀲𑀼𑀓𑀓𑀸𑀮𑁂 𑀦𑀸𑀫 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀓𑀼𑀢𑁄 𑀅𑀦𑁆𑀢𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀺. 𑀦 𑀅𑀦𑁆𑀢𑁄𑀢𑀺 𑀅𑀦𑁆𑀢𑀁 𑀤𑀝𑁆𑀞𑀼𑀓𑀸𑀫𑀸𑀦𑀫𑁆𑀧𑀺 𑀦𑁄 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀦 𑀧𑀝𑀺𑀤𑀺𑀲𑁆𑀲𑀢𑀺. 𑀢𑀤𑀸 𑀳𑀺 𑀧𑀓𑀢𑀦𑁆𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀸𑀭𑀺𑀲𑀸 𑀫𑀫 𑀘 𑀢𑀼𑀬𑁆𑀳𑀜𑁆𑀘 𑀧𑀓𑀢𑀁 𑀧𑀸𑀧𑀁 𑀧𑀓𑀝𑁆𑀞𑀁 𑀓𑀢𑀁 𑀅𑀢𑀺𑀩𑀳𑀼𑀫𑁂𑀯 𑀓𑀢𑀁. ‘‘𑀢𑀣𑀸 𑀳𑀺 𑀧𑀓𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑁂𑀦 𑀓𑀸𑀭𑀡𑁂𑀦 𑀓𑀢𑀁, 𑀬𑁂𑀦𑀲𑁆𑀲 ¶ 𑀅𑀦𑁆𑀢𑁄 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀫𑀸𑀭𑀺𑀲𑀸𑀢𑀺 𑀫𑀬𑀸 𑀲𑀤𑀺𑀲𑀸, 𑀧𑀺𑀬𑀸𑀮𑀧𑀦𑀫𑁂𑀢𑀁 𑀏𑀢𑁂𑀲𑀁. 𑀦𑀽𑀦𑀸𑀢𑀺 ¶ 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄, 𑀲𑁄 𑀅𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸 𑀬𑁄𑀦𑀺𑀁 𑀫𑀸𑀦𑀼𑀲𑀺𑀁 𑀮𑀤𑁆𑀥𑀸𑀦 𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀏𑀓𑀁𑀲𑁂𑀦𑁂𑀯 𑀩𑀳𑀼𑀁 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀇𑀢𑀺 𑀩𑁄𑀥𑀺𑀲𑀢𑁆𑀢𑁄 𑀏𑀓𑀫𑁂𑀓𑀁 𑀕𑀸𑀣𑀁 𑀯𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀲𑁄 𑀦𑁂𑀭𑀬𑀺𑀓𑀲𑀢𑁆𑀢𑁄 𑀇𑀫𑀁 𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀧𑀸𑀧𑀲𑁆𑀲 𑀫𑀳𑀦𑁆𑀢𑀢𑀸𑀬 𑀢𑀣𑀸 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀢𑀺 𑀲𑁄 𑀅𑀢𑁆𑀢𑀦𑁄 𑀓𑀫𑁆𑀫𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑁄 𑀯𑀺𑀭𑀯𑀺. 𑀢𑀼𑀫𑁆𑀳𑀸𑀓𑀁 𑀏𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀯𑀦𑀧𑀘𑁆𑀘𑀬𑀸 𑀅𑀦𑁆𑀢𑀭𑀸𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣𑀸’’𑀢𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀲𑀺. 𑀭𑀸𑀚𑀸 𑀫𑀳𑀸𑀚𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀬𑀜𑁆𑀜𑀸𑀯𑀸𑀝𑀁 𑀯𑀺𑀤𑁆𑀥𑀁𑀲𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀚𑀦𑀲𑁆𑀲 𑀲𑁄𑀢𑁆𑀣𑀺𑀁 𑀓𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀼𑀭𑁄𑀳𑀺𑀢𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀫𑀸𑀡𑀯𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀮𑁄𑀳𑀓𑀼𑀫𑁆𑀪𑀺𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁧𑁫] 𑁫. 𑀲𑀩𑁆𑀩𑀫𑀁𑀲𑀮𑀸𑀪𑀚𑀸𑀢𑀓𑀯𑀡𑁆𑀡𑀦𑀸

𑀨𑀭𑀼𑀲𑀸 𑀯𑀢 𑀢𑁂 𑀯𑀸𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀧𑀻𑀢𑀯𑀺𑀭𑁂𑀘𑀦𑀸𑀦𑀁 𑀤𑀺𑀦𑁆𑀦𑀭𑀲𑀧𑀺𑀡𑁆𑀟𑀧𑀸𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀚𑁂𑀢𑀯𑀦𑁂 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑁆𑀦𑁂𑀳𑀯𑀺𑀭𑁂𑀘𑀦𑀁 𑀧𑀺𑀯𑀺𑀁𑀲𑀼. 𑀢𑁂𑀲𑀁 𑀭𑀲𑀧𑀺𑀡𑁆𑀟𑀧𑀸𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 ‘‘𑀭𑀲𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀑𑀤𑀦𑀺𑀓𑀖𑀭𑀯𑀻𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸𑀧𑀺 𑀭𑀲𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀣𑁂𑀭𑁄 𑀤𑀺𑀯𑀸𑀢𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀫𑀸𑀦𑁄 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀺𑀁, 𑀆𑀯𑀼𑀲𑁄, 𑀅𑀢𑀺𑀧𑀕𑁂𑀯 𑀦𑀺𑀯𑀢𑁆𑀢𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 ‘‘𑀢𑁂𑀦 𑀳𑀺 𑀏𑀣𑀸’’𑀢𑀺 𑀢𑁂 𑀕𑀳𑁂𑀢𑁆𑀯𑀸 ¶ 𑀢𑀫𑁂𑀯 𑀯𑀻𑀣𑀺𑀁 𑀅𑀕𑀫𑀸𑀲𑀺, 𑀫𑀦𑀼𑀲𑁆𑀲𑀸 𑀧𑀽𑀭𑁂𑀢𑁆𑀯𑀸 𑀭𑀲𑀪𑀢𑁆𑀢𑀁 𑀅𑀤𑀁𑀲𑀼. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀭𑀲𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀕𑀺𑀮𑀸𑀦𑀸𑀦𑀁 𑀅𑀤𑀁𑀲𑀼, 𑀢𑁂 𑀧𑀭𑀺𑀪𑀼𑀜𑁆𑀚𑀺𑀁𑀲𑀼 ¶ . 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀣𑁂𑀭𑁄 𑀓𑀺𑀭 𑀧𑀻𑀢𑀯𑀺𑀭𑁂𑀘𑀦𑀸𑀦𑀁 𑀉𑀧𑀝𑁆𑀞𑀸𑀓𑁂 𑀭𑀲𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁂 𑀕𑀳𑁂𑀢𑁆𑀯𑀸 𑀑𑀤𑀦𑀺𑀓𑀖𑀭𑀯𑀻𑀣𑀺𑀬𑀁 𑀘𑀭𑀺𑀢𑁆𑀯𑀸 𑀩𑀳𑀼𑀁 𑀭𑀲𑀧𑀺𑀡𑁆𑀟𑀧𑀸𑀢𑀁 𑀧𑁂𑀲𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ¶ ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑁄𑀯 𑀫𑀁𑀲𑀁 𑀮𑀪𑀺, 𑀧𑀼𑀩𑁆𑀩𑁂𑀧𑀺 𑀫𑀼𑀤𑀼𑀯𑀸𑀘𑀸 𑀧𑀺𑀬𑀯𑀘𑀦𑀸 𑀯𑀢𑁆𑀢𑀼𑀁 𑀙𑁂𑀓𑀸 𑀧𑀡𑁆𑀟𑀺𑀢𑀸 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 𑀩𑀳𑀼𑀁 𑀫𑀁𑀲𑀁 𑀮𑀪𑀺𑀢𑁆𑀯𑀸 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 ‘‘𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀁 𑀆𑀕𑀘𑁆𑀙𑀢𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀯𑀸𑀲𑀺𑀓𑀸 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀕𑁆𑀕𑀲𑀪𑀸𑀕𑀝𑁆𑀞𑀸𑀦𑁂 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀲𑀼𑀢𑀁 𑀲𑀮𑁆𑀮𑀧𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀏𑀢𑁂𑀲𑀼 𑀏𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀫𑀁𑀲𑀬𑀸𑀦𑀓𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀮𑀼𑀤𑁆𑀤𑀓𑀁 𑀫𑀁𑀲𑀔𑀡𑁆𑀟𑀁 𑀆𑀳𑀭𑀸𑀧𑁂𑀫𑀻’’𑀢𑀺 𑀆𑀳. ‘‘𑀕𑀘𑁆𑀙 𑀆𑀳𑀭𑀸𑀧𑁂𑀳𑀻’’𑀢𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀭𑁂, 𑀮𑀼𑀤𑁆𑀤𑀓, 𑀤𑁂𑀳𑀺 𑀫𑁂 𑀫𑀁𑀲𑀔𑀡𑁆𑀟’’𑀦𑁆𑀢𑀺 𑀆𑀳. 𑀮𑀼𑀤𑁆𑀤𑀓𑁄 ‘‘𑀫𑀸𑀭𑀺𑀲, 𑀧𑀭𑀁 𑀓𑀺𑀜𑁆𑀘𑀺 𑀬𑀸𑀘𑀦𑁆𑀢𑁂𑀦 𑀦𑀸𑀫 𑀧𑀺𑀬𑀯𑀘𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀬𑀸 𑀓𑀣𑀺𑀢𑀯𑀸𑀘𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀫𑀁𑀲𑀔𑀡𑁆𑀟𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁭.

‘‘𑀨𑀭𑀼𑀲𑀸 𑀯𑀢 𑀢𑁂 𑀯𑀸𑀘𑀸, 𑀫𑀁𑀲𑀁 𑀬𑀸𑀘𑀦𑀓𑁄 𑀅𑀲𑀺;

𑀓𑀺𑀮𑁄𑀫𑀲𑀤𑀺𑀲𑀻 𑀯𑀸𑀘𑀸, 𑀓𑀺𑀮𑁄𑀫𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂’’𑀢𑀺.

𑀢𑀢𑁆𑀣 𑀓𑀺𑀮𑁄𑀫𑀲𑀤𑀺𑀲𑀻𑀢𑀺 𑀨𑀭𑀼𑀲𑀢𑀸𑀬 𑀓𑀺𑀮𑁄𑀫𑀲𑀤𑀺𑀲𑀻. 𑀓𑀺𑀮𑁄𑀫𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂𑀢𑀺 𑀳𑀦𑁆𑀤 𑀕𑀡𑁆𑀳, 𑀇𑀤𑀁 𑀢𑁂 𑀯𑀸𑀘𑀸𑀬 𑀲𑀤𑀺𑀲𑀁 𑀓𑀺𑀮𑁄𑀫𑀁 𑀤𑀫𑁆𑀫𑀻𑀢𑀺 𑀦𑀺𑀭𑀲𑀁 𑀦𑀺𑀫𑀁𑀲𑀮𑁄𑀳𑀺𑀢𑀁 𑀓𑀺𑀮𑁄𑀫𑀓𑀔𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺.

𑀅𑀣 𑀦𑀁 𑀅𑀧𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀓𑀺𑀦𑁆𑀢𑀺 𑀯𑀢𑁆𑀯𑀸 𑀬𑀸𑀘𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀭𑁂’’𑀢𑀺 𑀯𑀢𑁆𑀯𑀸𑀢𑀺. 𑀲𑁄 ‘‘𑀅𑀳𑀫𑁆𑀧𑀺 𑀦𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 ¶ ‘‘𑀚𑁂𑀝𑁆𑀞𑀪𑀸𑀢𑀺𑀓, 𑀫𑀁𑀲𑀔𑀡𑁆𑀟𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀢𑀯 𑀯𑀘𑀦𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀫𑀁𑀲𑀔𑀡𑁆𑀟𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁮.

‘‘𑀅𑀗𑁆𑀕𑀫𑁂𑀢𑀁 𑀫𑀦𑀼𑀲𑁆𑀲𑀸𑀦𑀁, 𑀪𑀸𑀢𑀸 𑀮𑁄𑀓𑁂 𑀧𑀯𑀼𑀘𑁆𑀘𑀢𑀺;

𑀅𑀗𑁆𑀕𑀲𑁆𑀲 𑀲𑀤𑀺𑀲𑀻 𑀯𑀸𑀘𑀸, 𑀅𑀗𑁆𑀕𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀫𑀦𑀼𑀲𑁆𑀲𑀸𑀦𑀁 𑀅𑀗𑁆𑀕𑀲𑀤𑀺𑀲𑀢𑁆𑀢𑀸 𑀅𑀗𑁆𑀕𑀫𑁂𑀢𑀁 𑀬𑀤𑀺𑀤𑀁 𑀪𑀸𑀢𑀸 𑀪𑀕𑀺𑀦𑀻𑀢𑀺, 𑀢𑀲𑁆𑀫𑀸 𑀢𑀯𑁂𑀲𑀸 𑀅𑀗𑁆𑀕𑀲𑀤𑀺𑀲𑀻 𑀯𑀸𑀘𑀸𑀢𑀺 𑀏𑀢𑀺𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑀁 𑀅𑀗𑁆𑀕𑀫𑁂𑀯 𑀤𑀤𑀸𑀫𑀺 𑀢𑁂𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀗𑁆𑀕𑀫𑀁𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺.

𑀢𑀫𑁆𑀧𑀺 ¶ 𑀅𑀧𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀓𑀺𑀦𑁆𑀢𑀺 𑀯𑀢𑁆𑀯𑀸 𑀬𑀸𑀘𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀸𑀢𑀺𑀓𑀸’’𑀢𑀺 𑀯𑀢𑁆𑀯𑀸𑀢𑀺. 𑀲𑁄 ‘‘𑀅𑀳𑀫𑁆𑀧𑀺 𑀦𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 ‘‘𑀢𑀸𑀢, 𑀫𑀁𑀲𑀔𑀡𑁆𑀟𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀮𑀼𑀤𑁆𑀤𑀓𑁄 𑀢𑀯 𑀯𑀘𑀦𑀸𑀦𑀽𑀭𑀽𑀧𑀁 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁯.

‘‘𑀢𑀸𑀢𑀸𑀢𑀺 𑀧𑀼𑀢𑁆𑀢𑁄 𑀯𑀤𑀫𑀸𑀦𑁄, 𑀓𑀫𑁆𑀧𑁂𑀢𑀺 𑀳𑀤𑀬𑀁 𑀧𑀺𑀢𑀼;

𑀳𑀤𑀬𑀲𑁆𑀲 𑀲𑀤𑀺𑀲𑀻 𑀯𑀸𑀘𑀸, 𑀳𑀤𑀬𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂’’𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀳𑀤𑀬𑀫𑀁𑀲𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀫𑀁𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺.

𑀢𑀁 𑀘𑀢𑀼𑀢𑁆𑀣𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀓𑀺𑀦𑁆𑀢𑀺 𑀯𑀢𑁆𑀯𑀸 𑀬𑀸𑀘𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀢𑀸𑀢𑀸’’𑀢𑀺 𑀯𑀢𑁆𑀯𑀸𑀢𑀺. 𑀲𑁄 ‘‘𑀅𑀳𑀫𑁆𑀧𑀺 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 ‘‘𑀲𑀳𑀸𑀬 𑀫𑀁𑀲𑀔𑀡𑁆𑀟𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀮𑀼𑀤𑁆𑀤𑀓𑁄 ‘‘𑀢𑀯 𑀯𑀘𑀦𑀸𑀦𑀼𑀭𑀽𑀧𑀁 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁬𑁦.

‘‘𑀬𑀲𑁆𑀲 𑀕𑀸𑀫𑁂 𑀲𑀔𑀸 𑀦𑀢𑁆𑀣𑀺, 𑀬𑀣𑀸𑀭𑀜𑁆𑀜𑀁 𑀢𑀣𑁂𑀯 𑀢𑀁;

𑀲𑀩𑁆𑀩𑀲𑁆𑀲 𑀲𑀤𑀺𑀲𑀻 𑀯𑀸𑀘𑀸, 𑀲𑀩𑁆𑀩𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀧𑀼𑀭𑀺𑀲𑀲𑁆𑀲 𑀕𑀸𑀫𑁂 𑀲𑀼𑀔𑀤𑀼𑀓𑁆𑀔𑁂𑀲𑀼 𑀲𑀳 𑀅𑀬𑀦𑀢𑁄 𑀲𑀳𑀸𑀬𑀲𑀗𑁆𑀔𑀸𑀢𑁄 𑀲𑀔𑀸 𑀦𑀢𑁆𑀣𑀺, 𑀢𑀲𑁆𑀲 𑀢𑀁 𑀞𑀸𑀦𑀁 𑀬𑀣𑀸 𑀅𑀫𑀦𑀼𑀲𑁆𑀲𑀁 𑀅𑀭𑀜𑁆𑀜𑀁 𑀢𑀣𑁂𑀯 𑀳𑁄𑀢𑀺, 𑀇𑀢𑀺 𑀅𑀬𑀁 𑀢𑀯 𑀯𑀸𑀘𑀸 𑀲𑀩𑁆𑀩𑀲𑁆𑀲 𑀲𑀤𑀺𑀲𑀻, 𑀲𑀩𑁆𑀩𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀲𑀤𑀺𑀲𑀻, 𑀢𑀲𑁆𑀫𑀸 𑀲𑀩𑁆𑀩𑀫𑁂𑀯 𑀇𑀫𑀁 𑀫𑀫 𑀲𑀦𑁆𑀢𑀓𑀁 𑀫𑀁𑀲𑀬𑀸𑀦𑀓𑀁 𑀤𑀤𑀸𑀫𑀺 𑀢𑁂𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀏𑀳𑀺, 𑀲𑀫𑁆𑀫, 𑀲𑀩𑁆𑀩𑀫𑁂𑀯 𑀇𑀤𑀁 𑀫𑀁𑀲𑀬𑀸𑀦𑀓𑀁 𑀢𑀯 𑀕𑁂𑀳𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑁂𑀦 𑀬𑀸𑀦𑀓𑀁 ¶ 𑀧𑀸𑀚𑀸𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀫𑀁𑀲𑀁 𑀑𑀢𑀸𑀭𑀸𑀧𑁂𑀢𑁆𑀯𑀸 𑀮𑀼𑀤𑁆𑀤𑀓𑀲𑁆𑀲 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀫𑁆𑀧𑀺𑀲𑁆𑀲 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀮𑀼𑀤𑁆𑀤𑀓𑀫𑁆𑀫𑀢𑁄 𑀅𑀧𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀝𑀼𑀫𑁆𑀩𑀫𑀚𑁆𑀛𑁂 𑀯𑀲𑀸𑀧𑁂𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀅𑀪𑁂𑀚𑁆𑀚𑀲𑀳𑀸𑀬𑁄 𑀳𑀼𑀢𑁆𑀯𑀸 𑀬𑀸𑀯𑀚𑀻𑀯𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀩𑁆𑀩𑀫𑀁𑀲𑀮𑀸𑀪𑀻 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀩𑁆𑀩𑀫𑀁𑀲𑀮𑀸𑀪𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁧𑁬] 𑁬. 𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸

𑀲𑀢𑁆𑀢 ¶ 𑀫𑁂 𑀭𑁄𑀳𑀺𑀢𑀸 𑀫𑀘𑁆𑀙𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀖𑀭𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀼𑀲𑀚𑁆𑀚𑀺𑀢𑀫𑀡𑁆𑀟𑀧𑁂 𑀧𑀜𑁆𑀜𑀢𑁆𑀢𑀯𑀭𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀁 𑀧𑀡𑀻𑀢𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 𑀲𑁆𑀯𑀸𑀢𑀦𑀸𑀬𑀸𑀢𑀺 𑀲𑀢𑁆𑀢𑀸𑀳𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀅𑀤𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀉𑀧𑀸𑀲𑀓, 𑀢𑀬𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀜𑁆𑀳𑀺 𑀤𑀸𑀦𑀁 𑀦𑀸𑀫 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑁄, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀳𑀺 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀫𑀁𑀲𑀫𑁆𑀧𑀺 𑀅𑀤𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀺. 𑀢𑀲𑁆𑀲 𑀧𑀦 𑀅𑀭𑀜𑁆𑀜𑀲𑁆𑀲 𑀏𑀓𑀢𑁄 𑀧𑀩𑁆𑀩𑀢𑀧𑀸𑀤𑁄 𑀏𑀓𑀢𑁄 𑀦𑀤𑀻 𑀏𑀓𑀢𑁄 𑀧𑀘𑁆𑀘𑀦𑁆𑀢𑀕𑀸𑀫𑀓𑁄 𑀅𑀳𑁄𑀲𑀺. 𑀅𑀧𑀭𑁂𑀧𑀺𑀲𑁆𑀲 𑀢𑀬𑁄 𑀲𑀳𑀸𑀬𑀸 𑀅𑀳𑁂𑀲𑀼𑀁 𑀫𑀓𑁆𑀓𑀝𑁄 𑀘 𑀲𑀺𑀗𑁆𑀕𑀸𑀮𑁄 𑀘 𑀉𑀤𑁆𑀤𑁄 𑀘𑀸𑀢𑀺. 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀧𑀡𑁆𑀟𑀺𑀢𑀸 𑀏𑀓𑀢𑁄𑀯 𑀯𑀲𑀦𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 ¶ 𑀕𑁄𑀘𑀭𑀝𑁆𑀞𑀸𑀦𑁂 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀏𑀓𑀢𑁄 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀲𑀲𑀧𑀡𑁆𑀟𑀺𑀢𑁄 ‘‘𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀑𑀯𑀸𑀤𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑁂 𑀢𑀲𑁆𑀲 𑀑𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀯𑀲𑀦𑁆𑀢𑀺. 𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀏𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀆𑀓𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 𑀘𑀦𑁆𑀤𑀁 𑀤𑀺𑀲𑁆𑀯𑀸 ‘‘𑀲𑁆𑀯𑁂 𑀉𑀧𑁄𑀲𑀣𑀤𑀺𑀯𑀲𑁄’’𑀢𑀺 𑀜𑀢𑁆𑀯𑀸 𑀇𑀢𑀭𑁂 𑀢𑀬𑁄 𑀆𑀳 ‘‘𑀲𑁆𑀯𑁂 𑀉𑀧𑁄𑀲𑀣𑁄, 𑀢𑀼𑀫𑁆𑀳𑁂𑀧𑀺 𑀢𑀬𑁄 𑀚𑀦𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀳𑁄𑀣, 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑀸𑀘𑀓𑁂 𑀲𑀫𑁆𑀧𑀢𑁆𑀢𑁂 𑀢𑀼𑀫𑁆𑀳𑁂𑀳𑀺 𑀔𑀸𑀤𑀺𑀢𑀩𑁆𑀩𑀸𑀳𑀸𑀭𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀔𑀸𑀤𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀲𑀼 𑀯𑀲𑀺𑀁𑀲𑀼.

𑀧𑀼𑀦𑀤𑀺𑀯𑀲𑁂 𑀢𑁂𑀲𑀼 𑀉𑀤𑁆𑀤𑁄 𑀧𑀸𑀢𑁄𑀯 ‘‘𑀕𑁄𑀘𑀭𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑀁 𑀕𑀢𑁄. 𑀅𑀣𑁂𑀓𑁄 𑀩𑀸𑀮𑀺𑀲𑀺𑀓𑁄 𑀲𑀢𑁆𑀢 𑀭𑁄𑀳𑀺𑀢𑀫𑀘𑁆𑀙𑁂 𑀉𑀤𑁆𑀥𑀭𑀺𑀢𑁆𑀯𑀸 𑀯𑀮𑁆𑀮𑀺𑀬𑀸 𑀆𑀯𑀼𑀡𑀺𑀢𑁆𑀯𑀸 𑀦𑁂𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀯𑀸𑀮𑀼𑀓𑀁 ¶ 𑀯𑀺𑀬𑀽𑀳𑀺𑀢𑁆𑀯𑀸 𑀯𑀸𑀮𑀺𑀓𑀸𑀬 ¶ 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁄 𑀅𑀥𑁄𑀕𑀗𑁆𑀕𑀁 𑀕𑀘𑁆𑀙𑀺. 𑀉𑀤𑁆𑀤𑁄 𑀫𑀘𑁆𑀙𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀯𑀸𑀮𑀼𑀓𑀁 𑀯𑀺𑀬𑀽𑀳𑀺𑀢𑁆𑀯𑀸 𑀫𑀘𑁆𑀙𑁂 𑀤𑀺𑀲𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁂𑀲𑀁 𑀲𑀸𑀫𑀺𑀓𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀖𑁄𑀲𑁂𑀢𑁆𑀯𑀸 𑀲𑀸𑀫𑀺𑀓𑀁 𑀅𑀧𑀲𑁆𑀲𑀦𑁆𑀢𑁄 𑀯𑀮𑁆𑀮𑀺𑀓𑁄𑀝𑀺𑀁 𑀟𑀁𑀲𑀺𑀢𑁆𑀯𑀸 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 ‘‘𑀯𑁂𑀮𑀸𑀬𑀫𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀲𑀺𑀗𑁆𑀕𑀸𑀮𑁄𑀧𑀺 𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀏𑀓𑀲𑁆𑀲 𑀔𑁂𑀢𑁆𑀢𑀕𑁄𑀧𑀓𑀲𑁆𑀲 𑀓𑀼𑀝𑀺𑀬𑀁 𑀤𑁆𑀯𑁂 𑀫𑀁𑀲𑀲𑀽𑀮𑀸𑀦𑀺 𑀏𑀓𑀁 𑀕𑁄𑀥𑀁 𑀏𑀓𑀜𑁆𑀘 𑀤𑀥𑀺𑀯𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁂𑀲𑀁 𑀲𑀸𑀫𑀺𑀓𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀖𑁄𑀲𑁂𑀢𑁆𑀯𑀸 𑀲𑀸𑀫𑀺𑀓𑀁 𑀅𑀤𑀺𑀲𑁆𑀯𑀸 𑀤𑀥𑀺𑀯𑀸𑀭𑀓𑀲𑁆𑀲 𑀉𑀕𑁆𑀕𑀳𑀡𑀭𑀚𑁆𑀚𑀼𑀓𑀁 𑀕𑀻𑀯𑀸𑀬 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑁂 𑀫𑀁𑀲𑀲𑀽𑀮𑁂 𑀘 𑀕𑁄𑀥𑀜𑁆𑀘 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 ‘‘𑀯𑁂𑀮𑀸𑀬𑀫𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 ¶ 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀫𑀓𑁆𑀓𑀝𑁄𑀧𑀺 𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑁆𑀩𑀧𑀺𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂 𑀞𑀧𑁂𑀢𑁆𑀯𑀸 ‘‘𑀯𑁂𑀮𑀸𑀬𑀫𑁂𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀯𑁂𑀮𑀸𑀬𑀫𑁂𑀯 𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀩𑁆𑀩𑀢𑀺𑀡𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀕𑀼𑀫𑁆𑀩𑁂𑀬𑁂𑀯 𑀦𑀺𑀧𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀬𑀸𑀘𑀓𑀸𑀦𑀁 𑀢𑀺𑀡𑀸𑀦𑀺 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀺𑀮𑀢𑀡𑁆𑀟𑀼𑀮𑀸𑀤𑀬𑁄𑀧𑀺 𑀫𑀬𑁆𑀳𑀁 𑀦𑀢𑁆𑀣𑀺, 𑀲𑀘𑁂 𑀫𑁂 𑀲𑀦𑁆𑀢𑀺𑀓𑀁 𑀬𑀸𑀘𑀓𑁄 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀲𑀭𑀻𑀭𑀫𑀁𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑀫𑀸𑀦𑁄 𑀇𑀤𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 ‘‘𑀲𑀲𑀭𑀸𑀚𑀸𑀦𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀉𑀤𑁆𑀤𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀅𑀝𑁆𑀞𑀸𑀲𑀺. ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀫𑀢𑁆𑀣𑀁 𑀞𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀧𑀡𑁆𑀟𑀺𑀢 𑀲𑀘𑁂 𑀓𑀺𑀜𑁆𑀘𑀺 𑀆𑀳𑀸𑀭𑀁 𑀮𑀪𑁂𑀬𑁆𑀬𑀁, 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀲𑁂𑀬𑁆𑀬𑀦𑁆𑀢𑀺. 𑀲𑁄 ‘‘𑀲𑀸𑀥𑀼 𑀤𑀲𑁆𑀲𑀸𑀫𑀺 𑀢𑁂 𑀆𑀳𑀸𑀭’’𑀦𑁆𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁧.

‘‘𑀲𑀢𑁆𑀢 𑀫𑁂 𑀭𑁄𑀳𑀺𑀢𑀸 𑀫𑀘𑁆𑀙𑀸, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀸;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺.

𑀢𑀢𑁆𑀣 𑀣𑀮𑀫𑀼𑀩𑁆𑀪𑀢𑀸𑀢𑀺 𑀉𑀤𑀓𑀢𑁄 𑀣𑀮𑁂 𑀞𑀧𑀺𑀢𑀸, 𑀓𑁂𑀯𑀝𑁆𑀝𑁂𑀦 𑀯𑀸 𑀉𑀤𑁆𑀥𑀝𑀸. 𑀏𑀢𑀁 𑀪𑀼𑀢𑁆𑀯𑀸𑀢𑀺 𑀏𑀢𑀁 𑀫𑀫 𑀲𑀦𑁆𑀢𑀓𑀁 𑀫𑀘𑁆𑀙𑀸𑀳𑀸𑀭𑀁 𑀧𑀘𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 ¶ 𑀓𑀭𑁄𑀦𑁆𑀢𑁄 𑀭𑀫𑀡𑀻𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀇𑀫𑀲𑁆𑀫𑀺𑀁 𑀯𑀦𑁂 𑀯𑀲𑀸𑀢𑀺.

𑀩𑁆𑀭𑀸𑀳𑁆𑀫𑀡𑁄 ‘‘𑀧𑀕𑁂𑀯 𑀢𑀸𑀯 𑀳𑁄𑀢𑀼, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀗𑁆𑀕𑀸𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦𑀸𑀧𑀺 ¶ ‘‘𑀓𑀺𑀫𑀢𑁆𑀣𑀁 𑀞𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁄 𑀢𑀣𑁂𑀯𑀸𑀳. 𑀲𑀺𑀗𑁆𑀕𑀸𑀮𑁄 ‘‘𑀲𑀸𑀥𑀼 𑀤𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁨.

‘‘𑀤𑀼𑀲𑁆𑀲 ¶ 𑀫𑁂 𑀔𑁂𑀢𑁆𑀢𑀧𑀸𑀮𑀲𑁆𑀲, 𑀭𑀢𑁆𑀢𑀺𑀪𑀢𑁆𑀢𑀁 𑀅𑀧𑀸𑀪𑀢𑀁;

𑀫𑀁𑀲𑀲𑀽𑀮𑀸 𑀘 𑀤𑁆𑀯𑁂 𑀕𑁄𑀥𑀸, 𑀏𑀓𑀜𑁆𑀘 𑀤𑀥𑀺𑀯𑀸𑀭𑀓𑀁;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺.

𑀢𑀢𑁆𑀣 𑀤𑀼𑀲𑁆𑀲 𑀫𑁂𑀢𑀺 𑀬𑁄 𑀏𑀲 𑀫𑀫 𑀅𑀯𑀺𑀤𑀽𑀭𑁂 𑀔𑁂𑀢𑁆𑀢𑀧𑀸𑀮𑁄 𑀯𑀲𑀢𑀺, 𑀤𑀼𑀲𑁆𑀲 𑀅𑀫𑀼𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀸𑀪𑀢𑀦𑁆𑀢𑀺 𑀆𑀪𑀢𑀁 𑀆𑀦𑀻𑀢𑀁. 𑀫𑀁𑀲𑀲𑀽𑀮𑀸 𑀘 𑀤𑁆𑀯𑁂 𑀕𑁄𑀥𑀸𑀢𑀺 𑀅𑀗𑁆𑀕𑀸𑀭𑀧𑀓𑁆𑀓𑀸𑀦𑀺 𑀤𑁆𑀯𑁂 𑀫𑀁𑀲𑀲𑀽𑀮𑀸𑀦𑀺 𑀘 𑀏𑀓𑀸 𑀘 𑀕𑁄𑀥𑀸. 𑀤𑀥𑀺𑀯𑀸𑀭𑀓𑀦𑁆𑀢𑀺 𑀤𑀥𑀺𑀯𑀸𑀭𑀓𑁄. 𑀇𑀤𑀦𑁆𑀢𑀺 𑀇𑀤𑀁 𑀏𑀢𑁆𑀢𑀓𑀁 𑀫𑀫 𑀅𑀢𑁆𑀣𑀺, 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀬𑀣𑀸𑀪𑀺𑀭𑀼𑀘𑀺𑀢𑁂𑀦 𑀧𑀸𑀓𑁂𑀦 𑀧𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀭𑀫𑀡𑀻𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀲𑀸𑀢𑀺 𑀅𑀢𑁆𑀣𑁄.

𑀩𑁆𑀭𑀸𑀳𑁆𑀫𑀡𑁄 ‘‘𑀧𑀕𑁂𑀯 𑀢𑀸𑀯 𑀳𑁄𑀢𑀼, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀫𑀓𑁆𑀓𑀝𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦𑀸𑀧𑀺 ‘‘𑀓𑀺𑀫𑀢𑁆𑀣𑀁 𑀞𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁄 𑀢𑀣𑁂𑀯𑀸𑀳. 𑀫𑀓𑁆𑀓𑀝𑁄 ‘‘𑀲𑀸𑀥𑀼 𑀤𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁩.

‘‘𑀅𑀫𑁆𑀩𑀧𑀓𑁆𑀓𑀁 𑀤𑀓𑀁 𑀲𑀻𑀢𑀁, 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺.

𑀢𑀢𑁆𑀣 𑀅𑀫𑁆𑀩𑀧𑀓𑁆𑀓𑀦𑁆𑀢𑀺 𑀫𑀥𑀼𑀭𑀅𑀫𑁆𑀩𑀨𑀮𑀁. 𑀤𑀓𑀁 𑀲𑀻𑀢𑀦𑁆𑀢𑀺 𑀕𑀗𑁆𑀕𑀸𑀬 𑀉𑀤𑀓𑀁 𑀲𑀻𑀢𑀮𑀁. 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸𑀢𑀺 𑀩𑁆𑀭𑀸𑀳𑁆𑀫𑀡 𑀏𑀢𑀁 𑀅𑀫𑁆𑀩𑀧𑀓𑁆𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀻𑀢𑀮𑀁 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀬𑀣𑀸𑀪𑀺𑀭𑀼𑀘𑀺𑀢𑁂 𑀭𑀫𑀡𑀻𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀲𑀸𑀢𑀺.

𑀩𑁆𑀭𑀸𑀳𑁆𑀫𑀡𑁄 ‘‘𑀧𑀕𑁂𑀯 𑀢𑀸𑀯 𑀳𑁄𑀢𑀼, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀲𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦𑀸𑀧𑀺 ‘‘𑀓𑀺𑀫𑀢𑁆𑀣𑀁 𑀞𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁄 𑀢𑀣𑁂𑀯𑀸𑀳. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 ‘‘𑀩𑁆𑀭𑀸𑀳𑁆𑀫𑀡, 𑀲𑀼𑀝𑁆𑀞𑀼 𑀢𑁂 𑀓𑀢𑀁 𑀆𑀳𑀸𑀭𑀢𑁆𑀣𑀸𑀬 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁂𑀦, 𑀅𑀚𑁆𑀚𑀸𑀳𑀁 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀤𑀸𑀦𑀁 𑀤𑀲𑁆𑀲𑀸𑀫𑀺 ¶ . 𑀢𑁆𑀯𑀁 𑀧𑀦 𑀲𑀻𑀮𑀯𑀸 𑀧𑀸𑀡𑀸𑀢𑀺𑀧𑀸𑀢𑀁 𑀦 𑀓𑀭𑀺𑀲𑁆𑀲𑀲𑀺, 𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀦𑀸𑀦𑀸𑀤𑀸𑀭𑀽𑀦𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀅𑀗𑁆𑀕𑀸𑀭𑁂 𑀓𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀳𑀺, 𑀅𑀳𑀁 𑀅𑀢𑁆𑀢𑀸𑀦𑀁 ¶ 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀗𑁆𑀕𑀸𑀭𑀫𑀚𑁆𑀛𑁂 𑀧𑀢𑀺𑀲𑁆𑀲𑀸𑀫𑀺 ¶ . 𑀫𑀫 𑀲𑀭𑀻𑀭𑁂 𑀧𑀓𑁆𑀓𑁂 𑀢𑁆𑀯𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁬𑁪.

‘‘𑀦 𑀲𑀲𑀲𑁆𑀲 𑀢𑀺𑀮𑀸 𑀅𑀢𑁆𑀣𑀺, 𑀦 𑀫𑀼𑀕𑁆𑀕𑀸 𑀦𑀧𑀺 𑀢𑀡𑁆𑀟𑀼𑀮𑀸;

𑀇𑀫𑀺𑀦𑀸 𑀅𑀕𑁆𑀕𑀺𑀦𑀸 𑀧𑀓𑁆𑀓𑀁, 𑀫𑀫𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸’’𑀢𑀺.

𑀢𑀢𑁆𑀣 𑀫𑀫𑀁 𑀪𑀼𑀢𑁆𑀯𑀸𑀢𑀺 𑀬𑀁 𑀢𑀁 𑀅𑀳𑀁 𑀅𑀕𑁆𑀕𑀺𑀁 𑀓𑀭𑁄𑀳𑀻𑀢𑀺 𑀯𑀤𑀸𑀫𑀺, 𑀇𑀫𑀺𑀦𑀸 𑀅𑀕𑁆𑀕𑀺𑀦𑀸 𑀧𑀓𑁆𑀓𑀁 𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀯𑀦𑁂 𑀯𑀲, 𑀏𑀓𑀲𑁆𑀲 𑀲𑀲𑀲𑁆𑀲 𑀲𑀭𑀻𑀭𑀁 𑀦𑀸𑀫 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀬𑀸𑀧𑀦𑀫𑀢𑁆𑀢𑀁 𑀳𑁄𑀢𑀻𑀢𑀺.

𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀏𑀓𑀁 𑀅𑀗𑁆𑀕𑀸𑀭𑀭𑀸𑀲𑀺𑀁 𑀫𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀤𑀩𑁆𑀩𑀢𑀺𑀡𑀲𑀬𑀦𑀢𑁄 𑀉𑀝𑁆𑀞𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀲𑀘𑁂 𑀫𑁂 𑀮𑁄𑀫𑀦𑁆𑀢𑀭𑁂𑀲𑀼 𑀧𑀸𑀡𑀓𑀸 𑀅𑀢𑁆𑀣𑀺, 𑀢𑁂 𑀫𑀸 𑀫𑀭𑀺𑀁𑀲𑀽’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀭𑀻𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀤𑀸𑀦𑀫𑀼𑀔𑁂 𑀞𑀧𑁂𑀢𑁆𑀯𑀸 𑀮𑀗𑁆𑀖𑀺𑀢𑁆𑀯𑀸 𑀧𑀤𑀼𑀫𑀲𑀭𑁂 𑀭𑀸𑀚𑀳𑀁𑀲𑁄 𑀯𑀺𑀬 𑀧𑀫𑀼𑀤𑀺𑀢𑀘𑀺𑀢𑁆𑀢𑁄 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀧𑀢𑀺. 𑀲𑁄 𑀧𑀦 𑀅𑀕𑁆𑀕𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑁂 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀡𑁆𑀳𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀳𑀺𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀲𑀓𑁆𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀓𑀢𑁄 𑀅𑀕𑁆𑀕𑀺 𑀅𑀢𑀺𑀲𑀻𑀢𑀮𑁄, 𑀫𑀫 𑀲𑀭𑀻𑀭𑁂 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀡𑁆𑀳𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀆𑀳. ‘‘𑀲𑀲𑀧𑀡𑁆𑀟𑀺𑀢, 𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑁄, 𑀲𑀓𑁆𑀓𑁄𑀳𑀫𑀲𑁆𑀫𑀺, 𑀢𑀯 𑀯𑀻𑀫𑀁𑀲𑀦𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀲𑀓𑁆𑀓, 𑀢𑁆𑀯𑀁 𑀢𑀸𑀯 𑀢𑀺𑀝𑁆𑀞, 𑀲𑀓𑀮𑁄𑀧𑀺 𑀘𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀫𑀁 𑀤𑀸𑀦𑁂𑀦 𑀯𑀻𑀫𑀁𑀲𑁂𑀬𑁆𑀬, 𑀦𑁂𑀯 𑀫𑁂 𑀅𑀤𑀸𑀢𑀼𑀓𑀸𑀫𑀢𑀁 𑀧𑀲𑁆𑀲𑁂𑀬𑁆𑀬𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺. 𑀅𑀣 𑀦𑀁 𑀲𑀓𑁆𑀓𑁄 ‘‘𑀲𑀲𑀧𑀡𑁆𑀟𑀺𑀢, 𑀢𑀯 𑀕𑀼𑀡𑁄 𑀲𑀓𑀮𑀓𑀧𑁆𑀧𑀁 𑀧𑀸𑀓𑀝𑁄 𑀳𑁄𑀢𑀽’’𑀢𑀺 𑀧𑀩𑁆𑀩𑀢𑀁 𑀧𑀻𑀴𑁂𑀢𑁆𑀯𑀸 𑀧𑀩𑁆𑀩𑀢𑀭𑀲𑀁 𑀆𑀤𑀸𑀬 𑀘𑀦𑁆𑀤𑀫𑀡𑁆𑀟𑀮𑁂 𑀲𑀲𑀮𑀓𑁆𑀔𑀡𑀁 𑀮𑀺𑀔𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀢𑀲𑁆𑀫𑀺𑀁𑀬𑁂𑀯 𑀯𑀦𑀕𑀼𑀫𑁆𑀩𑁂 𑀢𑀭𑀼𑀡𑀤𑀩𑁆𑀩𑀢𑀺𑀡𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 ¶ 𑀕𑀢𑁄. 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀧𑀡𑁆𑀟𑀺𑀢𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀤𑀸𑀬𑀓𑁄 𑀕𑀳𑀧𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 ¶ 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀉𑀤𑁆𑀤𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀺𑀗𑁆𑀕𑀸𑀮𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀫𑀓𑁆𑀓𑀝𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀲𑀲𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁧𑁭] 𑁭. 𑀫𑀢𑀭𑁄𑀤𑀦𑀚𑀸𑀢𑀓𑀯𑀡𑁆𑀡𑀦𑀸

𑀫𑀢𑀁 ¶ 𑀫𑀢𑀁 𑀏𑀯 𑀭𑁄𑀤𑀣𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀲𑀸𑀯𑀢𑁆𑀣𑀺𑀯𑀸𑀲𑀺𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀓𑀺𑀭 𑀪𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬 𑀲𑁄𑀓𑀸𑀪𑀺𑀪𑀽𑀢𑁄 𑀦 𑀦𑁆𑀳𑀸𑀬𑀢𑀺 𑀦 𑀪𑀼𑀜𑁆𑀚𑀢𑀺 𑀦 𑀯𑀺𑀮𑀺𑀫𑁆𑀧𑀢𑀺, 𑀧𑀸𑀢𑁄𑀯 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀲𑁄𑀓𑀲𑀫𑀧𑁆𑀧𑀺𑀢𑁄 𑀭𑁄𑀤𑀢𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀅𑀢𑀻𑀢𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀲𑁄𑀓𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀤𑀸𑀢𑀼𑀁 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀓𑁄𑀘𑀺 𑀲𑀫𑀢𑁆𑀣𑁄 𑀦𑀢𑁆𑀣𑀺, 𑀇𑀫𑀲𑁆𑀲 𑀫𑀬𑀸 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀘𑁆𑀙𑀸𑀲𑀫𑀡𑀁 𑀆𑀤𑀸𑀬 𑀢𑀲𑁆𑀲 𑀖𑀭𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀧𑀯𑁂𑀲𑁂𑀣𑀸’’𑀢𑀺 𑀓𑀼𑀝𑀼𑀫𑁆𑀩𑀺𑀓𑁂𑀦 𑀯𑀼𑀢𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀓𑀼𑀝𑀼𑀫𑁆𑀩𑀺𑀓𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀓𑀼𑀝𑀼𑀫𑁆𑀩𑀺𑀓 𑀘𑀺𑀦𑁆𑀢𑁂𑀲𑀻’’𑀢𑀺 𑀆𑀳. ‘‘𑀆𑀫, 𑀪𑀦𑁆𑀢𑁂, 𑀫𑀫 𑀪𑀸𑀢𑀼 𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀺𑀦𑁆𑀢𑁂𑀫𑀻’’𑀢𑀺. ‘‘𑀆𑀯𑀼𑀲𑁄, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀪𑀺𑀚𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀪𑀺𑀚𑁆𑀚𑀢𑀺, 𑀦 𑀢𑀢𑁆𑀣 𑀘𑀺𑀦𑁆𑀢𑁂𑀢𑀩𑁆𑀩𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀪𑀸𑀢𑀭𑀺 𑀫𑀢𑁂𑀧𑀺 ‘𑀪𑀺𑀚𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀪𑀺𑀚𑁆𑀚𑀢𑀻’𑀢𑀺 𑀦 𑀘𑀺𑀦𑁆𑀢𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀢𑁂𑀲𑀼 𑀓𑀸𑀮𑀓𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀸𑀢𑀸 𑀓𑀼𑀝𑀼𑀫𑁆𑀩𑀁 𑀯𑀺𑀘𑀸𑀭𑁂𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀦𑀺𑀲𑁆𑀲𑀸𑀬 ¶ 𑀚𑀻𑀯𑀢𑀺. 𑀲𑁄 𑀅𑀧𑀭𑀪𑀸𑀕𑁂 𑀢𑀣𑀸𑀭𑀽𑀧𑁂𑀦 𑀩𑁆𑀬𑀸𑀥𑀺𑀦𑀸 𑀓𑀸𑀮𑀫𑀓𑀸𑀲𑀺. 𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺 𑀭𑁄𑀤𑀦𑁆𑀢𑀺, 𑀏𑀓𑁄𑀧𑀺 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀦𑁂𑀯 𑀓𑀦𑁆𑀤𑀢𑀺 𑀦 𑀭𑁄𑀤𑀢𑀺. 𑀫𑀦𑀼𑀲𑁆𑀲𑀸 ‘‘𑀧𑀲𑁆𑀲𑀣 𑀪𑁄, 𑀇𑀫𑀲𑁆𑀲 𑀪𑀸𑀢𑀭𑀺 ¶ 𑀫𑀢𑁂 𑀫𑀼𑀔𑀲𑀗𑁆𑀓𑁄𑀘𑀦𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀢𑀺𑀯𑀺𑀬 𑀣𑀤𑁆𑀥𑀳𑀤𑀬𑁄, ‘𑀤𑁆𑀯𑁂𑀧𑀺 𑀓𑁄𑀝𑁆𑀞𑀸𑀲𑁂 𑀅𑀳𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺 𑀪𑀸𑀢𑀼 𑀫𑀭𑀡𑀁 𑀇𑀘𑁆𑀙𑀢𑀺 𑀫𑀜𑁆𑀜𑁂’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀕𑀭𑀳𑀺𑀁𑀲𑀼. 𑀜𑀸𑀢𑀓𑀸𑀧𑀺 𑀦𑀁 ‘‘𑀢𑁆𑀯𑀁 𑀪𑀸𑀢𑀭𑀺 𑀫𑀢𑁂 𑀦 𑀭𑁄𑀤𑀲𑀻’’𑀢𑀺 𑀕𑀭𑀳𑀺𑀁𑀲𑀼𑀬𑁂𑀯. 𑀲𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀦𑁆𑀥𑀩𑀸𑀮𑀪𑀸𑀯𑁂𑀦 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀚𑀸𑀦𑀦𑁆𑀢𑀸 ‘𑀫𑀫 𑀪𑀸𑀢𑀸 𑀫𑀢𑁄’𑀢𑀺 𑀭𑁄𑀤𑀣, 𑀅𑀳𑀫𑁆𑀧𑀺 𑀫𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂𑀧𑀺 𑀫𑀭𑀺𑀲𑁆𑀲𑀣, 𑀅𑀢𑁆𑀢𑀸𑀦𑀫𑁆𑀧𑀺 ‘𑀫𑀬𑀫𑁆𑀧𑀺 𑀫𑀭𑀺𑀲𑁆𑀲𑀸𑀫𑀸’𑀢𑀺 𑀓𑀲𑁆𑀫𑀸 𑀦 𑀭𑁄𑀤𑀣. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀲𑀫𑀢𑁆𑀣𑁄 𑀏𑀓𑀲𑀗𑁆𑀔𑀸𑀭𑁄𑀧𑀺 𑀦𑀢𑁆𑀣𑀺. 𑀢𑀼𑀫𑁆𑀳𑁂 𑀅𑀦𑁆𑀥𑀩𑀸𑀮𑀸 𑀅𑀜𑁆𑀜𑀸𑀡𑀢𑀸𑀬 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀚𑀸𑀦𑀺𑀢𑁆𑀯𑀸 𑀭𑁄𑀤𑀣, 𑀅𑀳𑀁 𑀓𑀺𑀫𑀢𑁆𑀣𑀁 𑀭𑁄𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁫.

‘‘𑀫𑀢𑀁 ¶ 𑀫𑀢𑀁 𑀏𑀯 𑀭𑁄𑀤𑀣, 𑀦 𑀳𑀺 𑀢𑀁 𑀭𑁄𑀤𑀣 𑀬𑁄 𑀫𑀭𑀺𑀲𑁆𑀲𑀢𑀺;

𑀲𑀩𑁆𑀩𑁂𑀧𑀺 𑀲𑀭𑀻𑀭𑀥𑀸𑀭𑀺𑀦𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁.

𑁬𑁬.

‘‘𑀤𑁂𑀯𑀫𑀦𑀼𑀲𑁆𑀲𑀸 𑀘𑀢𑀼𑀧𑁆𑀧𑀤𑀸, 𑀧𑀓𑁆𑀔𑀺𑀕𑀡𑀸 𑀉𑀭𑀕𑀸 𑀘 𑀪𑁄𑀕𑀺𑀦𑁄;

𑀲𑀫𑁆𑀳𑀺 𑀲𑀭𑀻𑀭𑁂 𑀅𑀦𑀺𑀲𑁆𑀲𑀭𑀸, 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁.

𑁬𑁭.

‘‘𑀏𑀯𑀁 𑀘𑀮𑀺𑀢𑀁 𑀅𑀲𑀡𑁆𑀞𑀺𑀢𑀁, 𑀲𑀼𑀔𑀤𑀼𑀓𑁆𑀔𑀁 𑀫𑀦𑀼𑀚𑁂𑀲𑁆𑀯𑀧𑁂𑀓𑁆𑀔𑀺𑀬;

𑀓𑀦𑁆𑀤𑀺𑀢𑀭𑀼𑀤𑀺𑀢𑀁 𑀦𑀺𑀭𑀢𑁆𑀣𑀓𑀁, 𑀓𑀺𑀁 𑀯𑁄 𑀲𑁄𑀓𑀕𑀡𑀸𑀪𑀺𑀓𑀻𑀭𑀭𑁂.

𑁬𑁮.

‘‘𑀥𑀼𑀢𑁆𑀢𑀸 𑀘 𑀲𑁄𑀡𑁆𑀟𑀸 𑀅𑀓𑀢𑀸, 𑀩𑀸𑀮𑀸 𑀲𑀽𑀭𑀸 𑀅𑀬𑁄𑀕𑀺𑀦𑁄;

𑀥𑀻𑀭𑀁 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸’’𑀢𑀺.

𑀢𑀢𑁆𑀣 ¶ 𑀫𑀢𑀁 𑀫𑀢𑀁 𑀏𑀯𑀸𑀢𑀺 𑀫𑀢𑀁 𑀫𑀢𑀁𑀬𑁂𑀯. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀭𑀡𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀧𑀝𑀺𑀧𑀸𑀝𑀺𑀬𑀸 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁, 𑀦 𑀏𑀓𑀢𑁄𑀯 𑀲𑀩𑁆𑀩𑁂 𑀫𑀭𑀦𑁆𑀢𑀺, 𑀬𑀤𑀺 𑀏𑀯𑀁 𑀫𑀭𑁂𑀬𑁆𑀬𑀼𑀁, 𑀮𑁄𑀓𑀧𑁆𑀧𑀯𑀢𑁆𑀢𑀺 𑀉𑀘𑁆𑀙𑀺𑀚𑁆𑀚𑁂𑀬𑁆𑀬. 𑀪𑁄𑀕𑀺𑀦𑁄𑀢𑀺 𑀫𑀳𑀦𑁆𑀢𑁂𑀦 𑀲𑀭𑀻𑀭𑀪𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀭𑀫𑀫𑀸𑀦𑀸𑀯𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀲𑀩𑁆𑀩𑁂𑀧𑀺 𑀏𑀢𑁂 𑀤𑁂𑀯𑀸𑀤𑀬𑁄 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀪𑀺𑀭𑀫𑀫𑀸𑀦𑀸𑀯 𑀅𑀦𑀼𑀓𑁆𑀓𑀡𑁆𑀞𑀺𑀢𑀸𑀯 𑀚𑀻𑀯𑀺𑀢𑀁 𑀚𑀳𑀦𑁆𑀢𑀺. 𑀏𑀯𑀁 𑀘𑀮𑀺𑀢𑀦𑁆𑀢𑀺 𑀏𑀯𑀁 𑀢𑀻𑀲𑀼 𑀪𑀯𑁂𑀲𑀼 𑀦𑀺𑀘𑁆𑀘𑀮𑀪𑀸𑀯𑀲𑁆𑀲 𑀘 𑀲𑀡𑁆𑀞𑀺𑀢𑀪𑀸𑀯𑀲𑁆𑀲 𑀘 𑀅𑀪𑀸𑀯𑀸 𑀘𑀮𑀺𑀢𑀁 𑀅𑀲𑀡𑁆𑀞𑀺𑀢𑀁. 𑀓𑀺𑀁 𑀯𑁄 𑀲𑁄𑀓𑀕𑀡𑀸𑀪𑀺𑀓𑀻𑀭𑀭𑁂𑀢𑀺 𑀓𑀺𑀁𑀓𑀸𑀭𑀡𑀸 𑀢𑀼𑀫𑁆𑀳𑁂 𑀲𑁄𑀓𑀭𑀸𑀲𑀻 𑀅𑀪𑀺𑀓𑀺𑀭𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺.

𑀥𑀼𑀢𑁆𑀢𑀸 ¶ 𑀘 𑀲𑁄𑀡𑁆𑀟𑀸 𑀅𑀓𑀢𑀸𑀢𑀺 𑀇𑀢𑁆𑀣𑀺𑀥𑀼𑀢𑁆𑀢𑀸 𑀲𑀼𑀭𑀸𑀥𑀼𑀢𑁆𑀢𑀸 𑀅𑀓𑁆𑀔𑀥𑀼𑀢𑁆𑀢𑀸 𑀘 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀲𑁄𑀡𑁆𑀟𑀸 𑀘 𑀅𑀓𑀢𑀩𑀼𑀤𑁆𑀥𑀺𑀦𑁄 𑀅𑀲𑀺𑀓𑁆𑀔𑀺𑀢𑀓𑀸 𑀘. 𑀩𑀸𑀮𑀸𑀢𑀺 𑀩𑀸𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀯𑀺𑀤𑁆𑀤𑀲𑀼𑀦𑁄. 𑀲𑀽𑀭𑀸 𑀅𑀬𑁄𑀕𑀺𑀦𑁄𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀲𑀽𑀭𑀸, 𑀬𑁄𑀕𑁂𑀲𑀼 𑀅𑀬𑀼𑀢𑁆𑀢𑀢𑀸𑀬 𑀅𑀬𑁄𑀕𑀺𑀦𑁄. ‘‘𑀅𑀬𑁄𑀥𑀺𑀦𑁄’’𑀢𑀺𑀧𑀺 𑀧𑀸𑀞𑁄, 𑀓𑀺𑀮𑁂𑀲𑀫𑀸𑀭𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀥𑀻𑀭𑀁 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸𑀢𑀺 𑀬𑁂 𑀏𑀯𑀭𑀽𑀧𑀸 𑀥𑀼𑀢𑁆𑀢𑀸𑀤𑀬𑁄 𑀅𑀝𑁆𑀞𑀯𑀺𑀥𑀲𑁆𑀲 𑀮𑁄𑀓𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸, 𑀢𑁂 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀤𑀼𑀓𑁆𑀔𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑀸 𑀓𑀦𑁆𑀤𑀫𑀸𑀦𑀸 𑀭𑁄𑀤𑀫𑀸𑀦𑀸 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀓𑀣𑀢𑁄 𑀚𑀸𑀦𑀺𑀢𑁆𑀯𑀸 𑀜𑀸𑀢𑀺𑀫𑀭𑀡𑀸𑀤𑀻𑀲𑀼 𑀅𑀓𑀦𑁆𑀤𑀦𑁆𑀢𑀁 𑀅𑀭𑁄𑀤𑀦𑁆𑀢𑀁 𑀫𑀸𑀤𑀺𑀲𑀁 𑀥𑀻𑀭𑀁 𑀧𑀡𑁆𑀟𑀺𑀢𑀁 ‘‘𑀩𑀸𑀮𑁄 𑀅𑀬𑀁 𑀦 𑀭𑁄𑀤𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀦𑀺𑀲𑁆𑀲𑁄𑀓𑁂 𑀅𑀓𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀺𑀲𑁆𑀲𑁄𑀓𑀪𑀸𑀯𑀓𑀭𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀢𑀭𑁄𑀤𑀦𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁧𑁮] 𑁮. 𑀓𑀡𑀯𑁂𑀭𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 𑀢𑀁 𑀯𑀲𑀦𑁆𑀢 𑀲𑀫𑀬𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁮.𑁬𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀧𑀼𑀩𑁆𑀩𑁂 𑀢𑁆𑀯𑀁 𑀪𑀺𑀓𑁆𑀔𑀼 𑀏𑀢𑀁 𑀦𑀺𑀲𑁆𑀲𑀸𑀬 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀁 𑀧𑀝𑀺𑀮𑀪𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀕𑀸𑀫𑀓𑁂 𑀏𑀓𑀲𑁆𑀲 𑀕𑀳𑀧𑀢𑀺𑀓𑀲𑁆𑀲 𑀖𑀭𑁂 𑀘𑁄𑀭𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄 𑀯𑀬𑀧𑁆𑀧𑀢𑁆𑀢𑁄 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀮𑁄𑀓𑁂 𑀧𑀸𑀓𑀝𑁄 𑀅𑀳𑁄𑀲𑀺 𑀲𑀽𑀭𑁄 𑀦𑀸𑀕𑀩𑀮𑁄, 𑀓𑁄𑀘𑀺 𑀦𑀁 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀏𑀓𑀤𑀺𑀯𑀲𑀁 𑀏𑀓𑀲𑁆𑀫𑀺𑀁 𑀲𑁂𑀝𑁆𑀞𑀺𑀖𑀭𑁂 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀅𑀯𑀳𑀭𑀺. 𑀦𑀸𑀕𑀭𑀸 𑀭𑀸𑀚𑀸𑀦𑀁 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀏𑀓𑁄 𑀫𑀳𑀸𑀘𑁄𑀭𑁄 𑀦𑀕𑀭𑀁 𑀯𑀺𑀮𑀼𑀫𑁆𑀧𑀢𑀺, 𑀢𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀕𑀳𑀡𑀢𑁆𑀣𑀸𑀬 𑀦𑀕𑀭𑀕𑀼𑀢𑁆𑀢𑀺𑀓𑀁 𑀆𑀡𑀸𑀧𑁂𑀲𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀢𑀢𑁆𑀣 𑀢𑀢𑁆𑀣 𑀯𑀕𑁆𑀕𑀩𑀦𑁆𑀥𑀦𑁂𑀦 𑀫𑀦𑀼𑀲𑁆𑀲𑁂 𑀞𑀧𑁂𑀢𑁆𑀯𑀸 𑀢𑀁 𑀲𑀳𑁄𑀟𑁆𑀠𑀁 𑀕𑀸𑀳𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀸’’𑀢𑀺 𑀦𑀕𑀭𑀕𑀼𑀢𑁆𑀢𑀺𑀓𑀜𑁆𑀜𑁂𑀯 𑀆𑀡𑀸𑀧𑁂𑀲𑀺. 𑀦𑀕𑀭𑀕𑀼𑀢𑁆𑀢𑀺𑀓𑁄 𑀢𑀁 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀕𑀻𑀯𑀸𑀬𑀲𑁆𑀲 𑀭𑀢𑁆𑀢𑀓𑀡𑀯𑀻𑀭𑀫𑀸𑀮𑀁 𑀮𑀕𑁆𑀕𑁂𑀢𑁆𑀯𑀸 𑀲𑀻𑀲𑁂 𑀇𑀝𑁆𑀞𑀓𑀘𑀼𑀡𑁆𑀡𑀁 𑀑𑀓𑀺𑀭𑀺𑀢𑁆𑀯𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀓𑀲𑀸𑀳𑀺 𑀢𑀸𑀴𑀸𑀧𑁂𑀦𑁆𑀢𑁄 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀆𑀖𑀸𑀢𑀦𑀁 𑀦𑁂𑀢𑀺. ‘‘𑀇𑀫𑀲𑁆𑀫𑀺𑀁 𑀓𑀺𑀭 𑀦𑀕𑀭𑁂 𑀯𑀺𑀮𑁄𑀧𑀓𑀸𑀭𑀓𑁄 𑀘𑁄𑀭𑁄 𑀕𑀳𑀺𑀢𑁄’’𑀢𑀺 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺.

𑀢𑀤𑀸 𑀘 𑀩𑀸𑀭𑀸𑀡𑀲𑀺𑀬𑀁 𑀲𑀳𑀲𑁆𑀲𑀁 𑀕𑀡𑁆𑀳𑀦𑁆𑀢𑀻 𑀲𑀸𑀫𑀸 𑀦𑀸𑀫 𑀕𑀡𑀺𑀓𑀸 𑀳𑁄𑀢𑀺 𑀭𑀸𑀚𑀯𑀮𑁆𑀮𑀪𑀸 𑀧𑀜𑁆𑀘𑀲𑀢𑀯𑀡𑁆𑀡𑀤𑀸𑀲𑀻𑀧𑀭𑀺𑀯𑀸𑀭𑀸. 𑀲𑀸 𑀧𑀸𑀲𑀸𑀤𑀢𑀮𑁂 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀞𑀺𑀢𑀸 𑀢𑀁 𑀦𑀻𑀬𑀫𑀸𑀦𑀁 𑀧𑀲𑁆𑀲𑀺. 𑀲𑁄 𑀧𑀦 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄 𑀅𑀢𑀺𑀯𑀺𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀤𑁂𑀯𑀯𑀡𑁆𑀡𑁄 𑀲𑀩𑁆𑀩𑁂𑀲𑀁 𑀫𑀢𑁆𑀣𑀓𑀫𑀢𑁆𑀣𑀓𑁂𑀦 𑀧𑀜𑁆𑀜𑀸𑀬𑀢𑀺. 𑀲𑀸𑀫𑀸 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦𑀸𑀳𑀁 𑀇𑀫𑀁 𑀧𑀼𑀭𑀺𑀲𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑀬𑀦𑁆𑀢𑀻 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀘𑀭𑀺𑀓𑀸𑀬 𑀏𑀓𑀺𑀲𑁆𑀲𑀸 𑀳𑀢𑁆𑀣𑁂 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀲𑀳𑀲𑁆𑀲𑀁 𑀧𑁂𑀲𑁂𑀲𑀺 ‘‘𑀅𑀬𑀁 𑀘𑁄𑀭𑁄 𑀲𑀸𑀫𑀸𑀬 𑀪𑀸𑀢𑀸, 𑀅𑀜𑁆𑀜𑀢𑁆𑀭 𑀲𑀸𑀫𑀸𑀬 𑀅𑀜𑁆𑀜𑁄 ¶ 𑀏𑀢𑀲𑁆𑀲 𑀅𑀯𑀲𑁆𑀲𑀬𑁄 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀓𑀺𑀭 𑀇𑀤𑀁 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 ¶ . 𑀲𑀸 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀦𑀕𑀭𑀕𑀼𑀢𑁆𑀢𑀺𑀓𑁄 ‘‘𑀅𑀬𑀁 𑀘𑁄𑀭𑁄 𑀧𑀸𑀓𑀝𑁄, 𑀦 𑀲𑀓𑁆𑀓𑀸 𑀏𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀅𑀜𑁆𑀜𑀁 𑀧𑀦 𑀫𑀦𑀼𑀲𑁆𑀲𑀁 𑀮𑀪𑀺𑀢𑁆𑀯𑀸 𑀇𑀫𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑁂𑀲𑁂𑀢𑀼𑀁 𑀲𑀓𑁆𑀓𑀸’’𑀢𑀺 𑀆𑀳. 𑀲𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀲𑀺.

𑀢𑀤𑀸 𑀧𑀦𑁂𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀸𑀫𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀤𑁂𑀢𑀺. 𑀲𑁄 𑀢𑀁 𑀤𑀺𑀯𑀲𑀫𑁆𑀧𑀺 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀲𑀳𑀲𑁆𑀲𑀁 𑀕𑀡𑁆𑀳𑀺𑀢𑁆𑀯𑀸 𑀢𑀁 𑀖𑀭𑀁 𑀅𑀕𑀫𑀸𑀲𑀺. 𑀲𑀸𑀫𑀸𑀧𑀺 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀊𑀭𑀽𑀲𑀼 𑀞𑀧𑁂𑀢𑁆𑀯𑀸 𑀧𑀭𑁄𑀤𑀦𑁆𑀢𑀻 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺. ‘‘𑀓𑀺𑀁 𑀏𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀸 ‘‘𑀲𑀸𑀫𑀺, 𑀅𑀬𑀁 𑀘𑁄𑀭𑁄 𑀫𑀫 𑀪𑀸𑀢𑀸, ‘𑀅𑀳𑀁 𑀦𑀻𑀘𑀓𑀫𑁆𑀫𑀁 𑀓𑀭𑁄𑀫𑀻’𑀢𑀺 𑀫𑀬𑁆𑀳𑀁 𑀲𑀦𑁆𑀢𑀺𑀓𑀁 𑀦 𑀏𑀢𑀺, 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀧𑀳𑀺𑀢𑀁 ‘𑀲𑀳𑀲𑁆𑀲𑀁 𑀮𑀪𑀫𑀸𑀦𑁄 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺 𑀦’𑀦𑁆𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀇𑀤𑀸𑀦𑀺 𑀇𑀫𑀁 𑀲𑀳𑀲𑁆𑀲𑀁 𑀆𑀤𑀸𑀬 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀁 𑀦 𑀮𑀪𑀸𑀫𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 ‘‘𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀢𑀬𑀸 ¶ 𑀆𑀪𑀢𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀕𑁂𑀳𑀁 𑀕𑀜𑁆𑀙𑀺. 𑀲𑁄 𑀢𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀘𑁄𑀭𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀸𑀫𑀸𑀬 𑀧𑀳𑀺𑀡𑀺𑀢𑁆𑀯𑀸 ‘‘𑀅𑀬𑀁 𑀘𑁄𑀭𑁄 𑀭𑀝𑁆𑀞𑁂 𑀧𑀸𑀓𑀝𑁄, 𑀢𑀫𑀦𑁆𑀥𑀓𑀸𑀭𑀁 𑀢𑀸𑀯 𑀳𑁄𑀢𑀼, 𑀅𑀣 𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀮𑁆𑀮𑀻𑀦𑀯𑁂𑀮𑀸𑀬 𑀖𑀸𑀢𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀧𑀤𑁂𑀲𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀧𑀝𑀺𑀲𑀮𑁆𑀮𑀻𑀦𑁂𑀲𑀼 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀫𑀳𑀦𑁆𑀢𑁂𑀦𑀸𑀭𑀓𑁆𑀔𑁂𑀦 𑀆𑀖𑀸𑀢𑀦𑀁 𑀦𑁂𑀢𑁆𑀯𑀸 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀭𑀻𑀭𑀁 𑀲𑀽𑀮𑁂 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺.

𑀢𑀢𑁄 𑀧𑀝𑁆𑀞𑀸𑀬 𑀲𑀸𑀫𑀸 𑀅𑀜𑁆𑀜𑁂𑀲𑀁 𑀳𑀢𑁆𑀣𑀢𑁄 𑀓𑀺𑀜𑁆𑀘𑀺 𑀦 𑀕𑀡𑁆𑀳𑀸𑀢𑀺, 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀅𑀪𑀺𑀭𑀫𑀫𑀸𑀦𑀸 𑀯𑀺𑀘𑀭𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀅𑀬𑀁 𑀅𑀜𑁆𑀜𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀫𑀫𑁆𑀧𑀺 𑀫𑀸𑀭𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀲𑁆𑀲𑀢𑀺, 𑀅𑀘𑁆𑀘𑀦𑁆𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑀻 𑀏𑀲𑀸, 𑀫𑀬𑀸 𑀇𑀥 𑀅𑀯𑀲𑀺𑀢𑁆𑀯𑀸 𑀔𑀺𑀧𑁆𑀧𑀁 𑀧𑀮𑀸𑀬𑀺𑀢𑀼𑀁 𑀯𑀝𑁆𑀝𑀢𑀺, 𑀕𑀘𑁆𑀙𑀦𑁆𑀢𑁄 𑀘 𑀧𑀦 𑀢𑀼𑀘𑁆𑀙𑀳𑀢𑁆𑀣𑁄 ¶ 𑀅𑀕𑀦𑁆𑀢𑁆𑀯𑀸 𑀏𑀢𑀺𑀲𑁆𑀲𑀸 𑀆𑀪𑀭𑀡𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀢𑀁 𑀆𑀳 𑁋 ‘‘𑀪𑀤𑁆𑀤𑁂, 𑀫𑀬𑀁 𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑀓𑀼𑀓𑁆𑀓𑀼𑀝𑀸 𑀯𑀺𑀬 𑀦𑀺𑀘𑁆𑀘𑀁 𑀖𑀭𑁂𑀬𑁂𑀯 𑀳𑁄𑀫, 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀓𑀻𑀴𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀁 𑀲𑀩𑁆𑀩𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀲𑁄 𑀢𑀢𑁆𑀣 𑀢𑀸𑀬 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀧𑀮𑀸𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀸𑀬 𑀲𑀤𑁆𑀥𑀺𑀁 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀺𑀢𑀼𑀓𑀸𑀫𑁄 𑀯𑀺𑀬 𑀏𑀓𑀁 𑀓𑀡𑀯𑀻𑀭𑀕𑀘𑁆𑀙𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀆𑀮𑀺𑀗𑁆𑀕𑀦𑁆𑀢𑁄 𑀯𑀺𑀬 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀯𑀺𑀲𑀜𑁆𑀜𑀁 𑀓𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀩𑀦𑁆𑀥𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀔𑀦𑁆𑀥𑁂 𑀞𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀯𑀢𑀺𑀁 𑀮𑀗𑁆𑀖𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸𑀧𑀺 ¶ 𑀧𑀝𑀺𑀮𑀤𑁆𑀥𑀲𑀜𑁆𑀜𑀸 𑀉𑀝𑁆𑀞𑀸𑀬 𑀧𑀭𑀺𑀘𑀸𑀭𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀚𑀸𑀦𑀸𑀫, 𑀅𑀬𑁆𑀬𑁂’’𑀢𑀺. ‘‘𑀫𑀁 𑀫𑀢𑀸𑀢𑀺 𑀲𑀜𑁆𑀜𑀸𑀬 𑀪𑀸𑀬𑀺𑀢𑁆𑀯𑀸 𑀧𑀮𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀢𑀢𑁄𑀬𑁂𑀯 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀫𑀫 𑀧𑀺𑀬𑀲𑀸𑀫𑀺𑀓𑀲𑁆𑀲 𑀅𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬𑁂𑀯 𑀅𑀮𑀗𑁆𑀓𑀢𑀲𑀬𑀦𑁂 𑀦 𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀸𑀧𑀁 𑀲𑀸𑀝𑀓𑀁 𑀦 𑀦𑀺𑀯𑀸𑀲𑁂𑀢𑀺, 𑀤𑁆𑀯𑁂 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀢𑀺, 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀦 𑀧𑀝𑀺𑀲𑁂𑀯𑀢𑀺, ‘‘𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀅𑀬𑁆𑀬𑀧𑀼𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀦𑀝𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀳𑀲𑁆𑀲𑀁 𑀅𑀤𑀸𑀲𑀺. ‘‘𑀓𑀺𑀁 𑀓𑀭𑁄𑀫, 𑀅𑀬𑁆𑀬𑁂’’𑀢𑀺 𑀯𑀼𑀢𑁆𑀢𑁂 ¶ ‘‘𑀢𑀼𑀫𑁆𑀳𑀸𑀓𑀁 𑀅𑀕𑀫𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘𑀭𑀦𑁆𑀢𑀸 𑀲𑀫𑀚𑁆𑀚𑀁 𑀓𑀢𑁆𑀯𑀸 𑀲𑀫𑀚𑁆𑀚𑀫𑀡𑁆𑀟𑀮𑁂 𑀧𑀞𑀫𑀫𑁂𑀯 𑀇𑀫𑀁 𑀕𑀻𑀢𑀁 𑀕𑀸𑀬𑁂𑀬𑁆𑀬𑀸𑀣𑀸’’𑀢𑀺 𑀦𑀝𑁂 𑀲𑀺𑀓𑁆𑀔𑀸𑀧𑁂𑀦𑁆𑀢𑀻 𑀧𑀞𑀫𑀁 𑀕𑀸𑀣𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀇𑀫𑀲𑁆𑀫𑀺𑀁 𑀕𑀻𑀢𑀓𑁂 𑀕𑀻𑀢𑁂 𑀲𑀘𑁂 𑀅𑀬𑁆𑀬𑀧𑀼𑀢𑁆𑀢𑁄 𑀢𑀲𑁆𑀫𑀺𑀁 𑀧𑀭𑀺𑀲𑀦𑁆𑀢𑀭𑁂 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀢𑀺, 𑀅𑀣𑀲𑁆𑀲 ¶ 𑀫𑀫 𑀅𑀭𑁄𑀕𑀪𑀸𑀯𑀁 𑀓𑀣𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀆𑀕𑀘𑁆𑀙𑁂𑀬𑁆𑀬𑀸𑀣, 𑀦𑁄 𑀘𑁂 𑀆𑀕𑀘𑁆𑀙𑀢𑀺, 𑀲𑀸𑀲𑀦𑀁 𑀧𑁂𑀲𑁂𑀬𑁆𑀬𑀸𑀣𑀸’’𑀢𑀺 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀦𑀝𑁂 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀫𑀚𑁆𑀚𑀁 𑀓𑀭𑁄𑀦𑁆𑀢𑀸 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀓𑀁 𑀅𑀕𑀫𑀺𑀁𑀲𑀼. 𑀲𑁄𑀧𑀺 𑀘𑁄𑀭𑁄 𑀧𑀮𑀸𑀬𑀺𑀢𑁆𑀯𑀸 𑀢𑀢𑁆𑀣 𑀯𑀲𑀢𑀺. 𑀢𑁂 𑀢𑀢𑁆𑀣 𑀲𑀫𑀚𑁆𑀚𑀁 𑀓𑀭𑁄𑀦𑁆𑀢𑀸 𑀧𑀞𑀫𑀫𑁂𑀯 𑀇𑀫𑀁 𑀕𑀻𑀢𑀓𑀁 𑀕𑀸𑀬𑀺𑀁𑀲𑀼 𑁋

𑁬𑁯.

‘‘𑀬𑀁 𑀢𑀁 𑀯𑀲𑀦𑁆𑀢𑀲𑀫𑀬𑁂, 𑀓𑀡𑀯𑁂𑀭𑁂𑀲𑀼 𑀪𑀸𑀡𑀼𑀲𑀼;

𑀲𑀸𑀫𑀁 𑀩𑀸𑀳𑀸𑀬 𑀧𑀻𑀴𑁂𑀲𑀺, 𑀲𑀸 𑀢𑀁 𑀆𑀭𑁄𑀕𑁆𑀬𑀫𑀩𑁆𑀭𑀯𑀻’’𑀢𑀺.

𑀢𑀢𑁆𑀣 𑀓𑀡𑀯𑁂𑀭𑁂𑀲𑀽𑀢𑀺 𑀓𑀭𑀯𑀻𑀭𑁂𑀲𑀼. 𑀪𑀸𑀡𑀼𑀲𑀽𑀢𑀺 𑀭𑀢𑁆𑀢𑀯𑀡𑁆𑀡𑀸𑀦𑀁 𑀧𑀼𑀧𑁆𑀨𑀸𑀦𑀁 𑀧𑀪𑀸𑀬 𑀲𑀫𑁆𑀧𑀦𑁆𑀦𑁂𑀲𑀼. 𑀲𑀸𑀫𑀦𑁆𑀢𑀺 𑀏𑀯𑀁𑀦𑀸𑀫𑀺𑀓𑀁. 𑀧𑀻𑀴𑁂𑀲𑀻𑀢𑀺 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀺𑀢𑀼𑀓𑀸𑀫𑁄 𑀯𑀺𑀬 𑀆𑀮𑀺𑀗𑁆𑀕𑀦𑁆𑀢𑁄 𑀧𑀻𑀴𑁂𑀲𑀺. 𑀲𑀸 𑀢𑀦𑁆𑀢𑀺 𑀲𑀸 𑀲𑀸𑀫𑀸 𑀅𑀭𑁄𑀕𑀸, 𑀢𑁆𑀯𑀁 𑀧𑀦 ‘‘𑀲𑀸 𑀫𑀢𑀸’’𑀢𑀺 𑀲𑀜𑁆𑀜𑀸𑀬 𑀪𑀻𑀢𑁄 𑀧𑀮𑀸𑀬𑀲𑀺, 𑀲𑀸 𑀅𑀢𑁆𑀢𑀦𑁄 𑀆𑀭𑁄𑀕𑁆𑀬𑀁 𑀅𑀩𑁆𑀭𑀯𑀺 𑀓𑀣𑁂𑀲𑀺, 𑀆𑀭𑁄𑀘𑁂𑀲𑀻𑀢𑀺 𑀅𑀢𑁆𑀣𑁄.

𑀘𑁄𑀭𑁄 𑀢𑀁 𑀲𑀼𑀢𑁆𑀯𑀸 𑀦𑀝𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑁆𑀯𑀁 ‘𑀲𑀸𑀫𑀸 𑀚𑀻𑀯𑀢𑀻’𑀢𑀺 𑀯𑀤𑀲𑀺, 𑀅𑀳𑀁 𑀧𑀦 𑀦 𑀲𑀤𑁆𑀤𑀳𑀸𑀫𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁦.

‘‘𑀅𑀫𑁆𑀪𑁄 𑀦 𑀓𑀺𑀭 𑀲𑀤𑁆𑀥𑁂𑀬𑁆𑀬𑀁, 𑀬𑀁 𑀯𑀸𑀢𑁄 𑀧𑀩𑁆𑀩𑀢𑀁 𑀯𑀳𑁂;

𑀧𑀩𑁆𑀩𑀢𑀜𑁆𑀘𑁂 𑀯𑀳𑁂 𑀯𑀸𑀢𑁄, 𑀲𑀩𑁆𑀩𑀫𑁆𑀧𑀺 𑀧𑀣𑀯𑀺𑀁 𑀯𑀳𑁂;

𑀬𑀢𑁆𑀣 𑀲𑀸𑀫𑀸 𑀓𑀸𑀮𑀓𑀢𑀸, 𑀲𑀸 𑀫𑀁 𑀆𑀭𑁄𑀕𑁆𑀬𑀫𑀩𑁆𑀭𑀯𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀅𑀫𑁆𑀪𑁄 𑀦𑀝, 𑀇𑀤𑀁 𑀓𑀺𑀭 𑀦 𑀲𑀤𑁆𑀤𑀳𑁂𑀬𑁆𑀬𑀁 𑀦 𑀲𑀤𑁆𑀤𑀳𑀺𑀢𑀩𑁆𑀩𑀁. 𑀬𑀁 𑀯𑀸𑀢𑁄 𑀢𑀺𑀡𑀧𑀡𑁆𑀡𑀸𑀦𑀺 𑀯𑀺𑀬 𑀧𑀩𑁆𑀩𑀢𑀁 𑀯𑀳𑁂𑀬𑁆𑀬, 𑀲𑀘𑁂𑀧𑀺 𑀲𑁄 𑀧𑀩𑁆𑀩𑀢𑀁 𑀯𑀳𑁂𑀬𑁆𑀬, 𑀲𑀩𑁆𑀩𑀫𑁆𑀧𑀺 𑀧𑀣𑀯𑀺𑀁 𑀯𑀳𑁂𑀬𑁆𑀬, 𑀬𑀣𑀸 𑀘𑁂𑀢𑀁 𑀅𑀲𑀤𑁆𑀤𑀳𑁂𑀬𑁆𑀬𑀁, 𑀢𑀣𑀸 𑀇𑀤𑀦𑁆𑀢𑀺. 𑀬𑀢𑁆𑀣 𑀲𑀸𑀫𑀸 𑀓𑀸𑀮𑀓𑀢𑀸𑀢𑀺 𑀬𑀸 𑀦𑀸𑀫 𑀲𑀸𑀫𑀸 𑀓𑀸𑀮𑀓𑀢𑀸, 𑀲𑀸 𑀫𑀁 𑀆𑀭𑁄𑀕𑁆𑀬𑀁 𑀅𑀩𑁆𑀭𑀯𑀻𑀢𑀺 𑀓𑀺𑀁𑀓𑀸𑀭𑀡𑀸 𑀲𑀤𑁆𑀤𑀳𑁂𑀬𑁆𑀬𑀁. 𑀫𑀢𑀸 𑀦𑀸𑀫 𑀦 𑀓𑀲𑁆𑀲𑀘𑀺 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀻𑀢𑀺.

𑀢𑀲𑁆𑀲 ¶ ¶ 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀝𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁧.

‘‘𑀦 𑀘𑁂𑀯 𑀲𑀸 𑀓𑀸𑀮𑀓𑀢𑀸, 𑀦 𑀘 𑀲𑀸 𑀅𑀜𑁆𑀜𑀫𑀺𑀘𑁆𑀙𑀢𑀺;

𑀏𑀓𑀪𑀢𑁆𑀢𑀺𑀓𑀺𑀦𑀻 𑀲𑀸𑀫𑀸, 𑀢𑀫𑁂𑀯 𑀅𑀪𑀺𑀓𑀗𑁆𑀔𑀢𑀻’’𑀢𑀺.

𑀢𑀢𑁆𑀣 𑀢𑀫𑁂𑀯 𑀅𑀪𑀺𑀓𑀗𑁆𑀔𑀢𑀻𑀢𑀺 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀦 𑀇𑀘𑁆𑀙𑀢𑀺, 𑀢𑀜𑁆𑀜𑁂𑀯 𑀓𑀗𑁆𑀔𑀢𑀺 𑀇𑀘𑁆𑀙𑀢𑀺 𑀧𑀢𑁆𑀣𑁂𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀘𑁄𑀭𑁄 ‘‘𑀲𑀸 𑀚𑀻𑀯𑀢𑀼 𑀯𑀸 𑀫𑀸 𑀯𑀸, 𑀦 𑀢𑀸𑀬 𑀫𑀬𑁆𑀳𑀁 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁭𑁨.

‘‘𑀅𑀲𑀦𑁆𑀣𑀼𑀢𑀁 𑀫𑀁 𑀘𑀺𑀭𑀲𑀦𑁆𑀣𑀼𑀢𑁂𑀦, 𑀦𑀺𑀫𑀻𑀦𑀺 𑀲𑀸𑀫𑀸 𑀅𑀥𑀼𑀯𑀁 𑀥𑀼𑀯𑁂𑀦;

𑀫𑀬𑀸𑀧𑀺 𑀲𑀸𑀫𑀸 𑀦𑀺𑀫𑀺𑀦𑁂𑀬𑁆𑀬 𑀅𑀜𑁆𑀜𑀁, 𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀅𑀲𑀦𑁆𑀣𑀼𑀢𑀦𑁆𑀢𑀺 𑀅𑀓𑀢𑀲𑀁𑀲𑀕𑁆𑀕𑀁. 𑀘𑀺𑀭𑀲𑀦𑁆𑀣𑀼𑀢𑁂𑀦𑀸𑀢𑀺 𑀘𑀺𑀭𑀓𑀢𑀲𑀁𑀲𑀕𑁆𑀕𑁂𑀦. 𑀦𑀺𑀫𑀻𑀦𑀻𑀢𑀺 𑀧𑀭𑀺𑀯𑀢𑁆𑀢𑁂𑀲𑀺. 𑀅𑀥𑀼𑀯𑀁 𑀥𑀼𑀯𑁂𑀦𑀸𑀢𑀺 𑀫𑀁 𑀅𑀥𑀼𑀯𑀁 𑀢𑁂𑀦 𑀥𑀼𑀯𑀲𑀸𑀫𑀺𑀓𑁂𑀦 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀫𑀁 𑀕𑀡𑁆𑀳𑀻𑀢𑀺 𑀅𑀢𑁆𑀣𑁄. 𑀫𑀬𑀸𑀧𑀺 𑀲𑀸𑀫𑀸 𑀦𑀺𑀫𑀺𑀦𑁂𑀬𑁆𑀬 𑀅𑀜𑁆𑀜𑀦𑁆𑀢𑀺 𑀲𑀸𑀫𑀸 𑀫𑀬𑀸𑀧𑀺 𑀅𑀜𑁆𑀜𑀁 𑀲𑀸𑀫𑀺𑀓𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬. 𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲𑀦𑁆𑀢𑀺 𑀬𑀢𑁆𑀣 𑀦 𑀲𑀓𑁆𑀓𑀸 𑀢𑀲𑁆𑀲𑀸 𑀲𑀸𑀲𑀦𑀁 𑀯𑀸 𑀧𑀯𑀢𑁆𑀢𑀺𑀁 𑀯𑀸 𑀲𑁄𑀢𑀼𑀁, 𑀢𑀸𑀤𑀺𑀲𑀁 𑀤𑀽𑀭𑀢𑀭𑀁 𑀞𑀸𑀦𑀁 𑀕𑀫𑀺𑀲𑁆𑀲𑀁, 𑀢𑀲𑁆𑀫𑀸 𑀫𑀫 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀢𑀪𑀸𑀯𑀁 𑀢𑀲𑁆𑀲𑀸 𑀆𑀭𑁄𑀘𑁂𑀣𑀸𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀕𑀸𑀴𑁆𑀳𑀢𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑁂𑀕𑁂𑀦 𑀧𑀮𑀸𑀬𑀺.

𑀦𑀝𑀸 𑀕𑀦𑁆𑀢𑁆𑀯𑀸 𑀢𑁂𑀦 𑀓𑀢𑀓𑀺𑀭𑀺𑀬𑀁 𑀢𑀲𑁆𑀲𑀸 𑀓𑀣𑀬𑀺𑀁𑀲𑀼. 𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀏𑀯 𑀯𑀻𑀢𑀺𑀦𑀸𑀫𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑀸𑀫𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸, 𑀘𑁄𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀡𑀯𑁂𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁧𑁯] 𑁯. 𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀲𑀼𑀔𑀁 ¶ ¶ 𑀯𑀢 𑀚𑀻𑀯𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀬𑀁 𑀦𑀺𑀲𑁆𑀲𑀸𑀬 𑀩𑀤𑀭𑀺𑀓𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀭𑀸𑀳𑀼𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀢𑀺𑀧𑀮𑁆𑀮𑀢𑁆𑀣𑀚𑀸𑀢𑀓𑁂 (𑀚𑀸. 𑁧.𑁧.𑁧𑁬) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀭𑀸𑀳𑀼𑀮𑁄 𑀲𑀺𑀓𑁆𑀔𑀸𑀓𑀸𑀫𑁄 𑀓𑀼𑀓𑁆𑀓𑀼𑀘𑁆𑀘𑀓𑁄 𑀑𑀯𑀸𑀤𑀓𑁆𑀔𑀫𑁄’’𑀢𑀺. 𑀢𑀲𑁆𑀲𑀸𑀬𑀲𑁆𑀫𑀢𑁄 𑀕𑀼𑀡𑀓𑀣𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑀸𑀬 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀭𑀸𑀳𑀼𑀮𑁄 𑀲𑀺𑀓𑁆𑀔𑀸𑀓𑀸𑀫𑁄 𑀓𑀼𑀓𑁆𑀓𑀼𑀘𑁆𑀘𑀓𑁄 𑀑𑀯𑀸𑀤𑀓𑁆𑀔𑀫𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀕𑀸𑀫𑀓𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀯𑀸𑀲𑀸𑀧𑁂𑀲𑀼𑀁. 𑀢𑀤𑀸 𑀢𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑁄 𑀲𑀸𑀓𑀼𑀡𑀺𑀓𑁄 𑀏𑀓𑀁 𑀤𑀻𑀧𑀓𑀢𑀺𑀢𑁆𑀢𑀺𑀭𑀁 𑀕𑀳𑁂𑀢𑁆𑀯𑀸 𑀲𑀼𑀝𑁆𑀞𑀼 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀧𑀜𑁆𑀚𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑁄 𑀢𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀢𑀲𑁆𑀲 𑀲𑀤𑁆𑀤𑁂𑀦 𑀆𑀕𑀢𑀸𑀕𑀢𑁂 𑀢𑀺𑀢𑁆𑀢𑀺𑀭𑁂 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀺𑀢𑁆𑀢𑀺𑀭𑁄 ‘‘𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀫𑀫 𑀜𑀸𑀢𑀓𑀸 𑀦𑀲𑁆𑀲𑀦𑁆𑀢𑀺, 𑀫𑀬𑁆𑀳𑀫𑁂𑀢𑀁 𑀧𑀸𑀧’’𑀦𑁆𑀢𑀺 𑀦𑀺𑀲𑁆𑀲𑀤𑁆𑀤𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀦𑀺𑀲𑁆𑀲𑀤𑁆𑀤𑀪𑀸𑀯𑀁 𑀜𑀢𑁆𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀦𑀁 𑀲𑀻𑀲𑁂 𑀧𑀳𑀭𑀢𑀺. 𑀢𑀺𑀢𑁆𑀢𑀺𑀭𑁄 𑀤𑀼𑀓𑁆𑀔𑀸𑀢𑀼𑀭𑀢𑀸𑀬 𑀲𑀤𑁆𑀤𑀁 𑀓𑀭𑁄𑀢𑀺. 𑀏𑀯𑀁 𑀲𑁄 𑀲𑀸𑀓𑀼𑀡𑀺𑀓𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀺𑀢𑁆𑀢𑀺𑀭𑁂 𑀕𑀳𑁂𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺.

𑀅𑀣 𑀲𑁄 𑀢𑀺𑀢𑁆𑀢𑀺𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀫𑀭𑀦𑁆𑀢𑀽𑀢𑀺 𑀫𑀬𑁆𑀳𑀁 𑀘𑁂𑀢𑀦𑀸 𑀦𑀢𑁆𑀣𑀺, 𑀧𑀝𑀺𑀘𑁆𑀘𑀓𑀫𑁆𑀫𑀁 𑀧𑀦 𑀫𑀁 𑀨𑀼𑀲𑀢𑀺, 𑀫𑀬𑀺 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂 𑀏𑀢𑁂 𑀦𑀸𑀕𑀘𑁆𑀙𑀦𑁆𑀢𑀺, 𑀓𑀭𑁄𑀦𑁆𑀢𑁂𑀬𑁂𑀯 𑀆𑀕𑀘𑁆𑀙𑀦𑁆𑀢𑀺, 𑀆𑀕𑀢𑀸𑀕𑀢𑁂 𑀅𑀬𑀁 𑀕𑀳𑁂𑀢𑁆𑀯𑀸 ¶ 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀫𑀬𑁆𑀳𑀁 𑀧𑀸𑀧𑀁, 𑀦𑀢𑁆𑀣𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 ‘‘𑀓𑁄 𑀦𑀼 𑀔𑁄 𑀫𑁂 𑀇𑀫𑀁 𑀓𑀗𑁆𑀔𑀁 ¶ 𑀙𑀺𑀦𑁆𑀤𑁂𑀬𑁆𑀬𑀸’’𑀢𑀺 𑀢𑀣𑀸𑀭𑀽𑀧𑀁 𑀧𑀡𑁆𑀟𑀺𑀢𑀁 𑀉𑀧𑀥𑀸𑀭𑁂𑀦𑁆𑀢𑁄 𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀲𑀸𑀓𑀼𑀡𑀺𑀓𑁄 𑀩𑀳𑀽 𑀢𑀺𑀢𑁆𑀢𑀺𑀭𑁂 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀁 ¶ 𑀧𑀽𑀭𑁂𑀢𑁆𑀯𑀸 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀜𑁆𑀚𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀯𑀸𑀮𑀼𑀓𑀸𑀢𑀮𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀺𑀢𑁆𑀢𑀺𑀭𑁄 𑀢𑀲𑁆𑀲 𑀦𑀺𑀤𑁆𑀤𑁄𑀓𑁆𑀓𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀫 𑀓𑀗𑁆𑀔𑀁 𑀇𑀫𑀁 𑀢𑀸𑀧𑀲𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀚𑀸𑀦𑀦𑁆𑀢𑁄 𑀫𑁂 𑀓𑀣𑁂𑀲𑁆𑀲𑀢𑀻’’𑀢𑀺 𑀧𑀜𑁆𑀚𑀭𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁩.

‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫𑀺, 𑀮𑀪𑀸𑀫𑀺 𑀘𑁂𑀯 𑀪𑀼𑀜𑁆𑀚𑀺𑀢𑀼𑀁;

𑀧𑀭𑀺𑀧𑀦𑁆𑀣𑁂 𑀘 𑀢𑀺𑀝𑁆𑀞𑀸𑀫𑀺, 𑀓𑀸 𑀦𑀼 𑀪𑀦𑁆𑀢𑁂 𑀕𑀢𑀻 𑀫𑀫𑀸’’𑀢𑀺.

𑀢𑀢𑁆𑀣 𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫𑀻𑀢𑀺 𑀅𑀳𑀁, 𑀪𑀦𑁆𑀢𑁂, 𑀇𑀫𑀁 𑀲𑀸𑀓𑀼𑀡𑀺𑀓𑀁 𑀦𑀺𑀲𑁆𑀲𑀸𑀬 𑀲𑀼𑀝𑁆𑀞𑀼 𑀲𑀼𑀔𑀁 𑀚𑀻𑀯𑀸𑀫𑀺. 𑀮𑀪𑀸𑀫𑀻𑀢𑀺 𑀬𑀣𑀸𑀭𑀼𑀘𑀺𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀮𑀪𑀸𑀫𑀺. 𑀧𑀭𑀺𑀧𑀦𑁆𑀣𑁂 𑀘 𑀢𑀺𑀝𑁆𑀞𑀸𑀫𑀻𑀢𑀺 𑀅𑀧𑀺𑀘 𑀔𑁄 𑀬𑀢𑁆𑀣 𑀫𑀫 𑀜𑀸𑀢𑀓𑀸 𑀫𑀫 𑀲𑀤𑁆𑀤𑁂𑀦 𑀆𑀕𑀢𑀸𑀕𑀢𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀸𑀫𑀺. 𑀓𑀸 𑀦𑀼, 𑀪𑀦𑁆𑀢𑁂, 𑀕𑀢𑀻 𑀫𑀫𑀸𑀢𑀺 𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀫𑀫 𑀕𑀢𑀺, 𑀓𑀸 𑀦𑀺𑀧𑁆𑀨𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀺.

𑀢𑀲𑁆𑀲 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁪.

‘‘𑀫𑀦𑁄 𑀘𑁂 𑀢𑁂 𑀦𑀧𑁆𑀧𑀡𑀫𑀢𑀺, 𑀧𑀓𑁆𑀔𑀺 𑀧𑀸𑀧𑀲𑁆𑀲 𑀓𑀫𑁆𑀫𑀼𑀦𑁄;

𑀅𑀩𑁆𑀬𑀸𑀯𑀝𑀲𑁆𑀲 𑀪𑀤𑁆𑀭𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺.

𑀢𑀢𑁆𑀣 𑀧𑀸𑀧𑀲𑁆𑀲 𑀓𑀫𑁆𑀫𑀼𑀦𑁄𑀢𑀺 𑀬𑀤𑀺 𑀢𑀯 𑀫𑀦𑁄 𑀧𑀸𑀧𑀓𑀫𑁆𑀫𑀲𑁆𑀲𑀢𑁆𑀣𑀸𑀬 𑀦 𑀧𑀡𑀫𑀢𑀺, 𑀧𑀸𑀧𑀓𑀭𑀡𑁂 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀦 𑀳𑁄𑀢𑀺. 𑀅𑀩𑁆𑀬𑀸𑀯𑀝𑀲𑁆𑀲𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀧𑀸𑀧𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀅𑀩𑁆𑀬𑀸𑀯𑀝𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀅𑀦𑀸𑀧𑀦𑁆𑀦𑀲𑁆𑀲 𑀢𑀯 𑀪𑀤𑁆𑀭𑀲𑁆𑀲 𑀲𑀼𑀤𑁆𑀥𑀲𑁆𑀲𑁂𑀯 𑀲𑀢𑁄 𑀧𑀸𑀧𑀁 𑀦 𑀉𑀧𑀮𑀺𑀫𑁆𑀧𑀢𑀺 𑀦 𑀅𑀮𑁆𑀮𑀻𑀬𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀺𑀢𑁆𑀢𑀺𑀭𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁫.

‘‘𑀜𑀸𑀢𑀓𑁄 ¶ 𑀦𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀩𑀳𑀼 𑀆𑀕𑀘𑁆𑀙𑀢𑁂 𑀚𑀦𑁄;

𑀧𑀝𑀺𑀘𑁆𑀘𑀓𑀫𑁆𑀫𑀁 𑀨𑀼𑀲𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀦𑁆𑀢𑁂, 𑀲𑀘𑀸𑀳𑀁 𑀲𑀤𑁆𑀤𑀁 𑀦 𑀓𑀭𑁂𑀬𑁆𑀬𑀁, 𑀅𑀬𑀁 𑀢𑀺𑀢𑁆𑀢𑀺𑀭𑀚𑀦𑁄 𑀦 𑀆𑀕𑀘𑁆𑀙𑁂𑀬𑁆𑀬, 𑀫𑀬𑀺 𑀧𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑁂 ‘‘𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄’’𑀢𑀺 𑀅𑀬𑀁 𑀩𑀳𑀼 𑀚𑀦𑁄 𑀆𑀕𑀘𑁆𑀙𑀢𑀺 ¶ , 𑀢𑀁 𑀆𑀕𑀢𑀸𑀕𑀢𑀁 𑀮𑀼𑀤𑁆𑀤𑁄 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑁄 𑀫𑀁 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬 𑀏𑀢𑀁 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀨𑀼𑀲𑀢𑀺 𑀧𑀝𑀺𑀮𑀪𑀢𑀺 𑀯𑀺𑀦𑁆𑀤𑀢𑀺 ¶ , 𑀢𑀲𑁆𑀫𑀺𑀁 𑀫𑀁 𑀧𑀝𑀺𑀘𑁆𑀘 𑀓𑀢𑁂 𑀧𑀸𑀧𑁂 𑀫𑀫 𑀦𑀼 𑀔𑁄 𑀏𑀢𑀁 𑀧𑀸𑀧𑀦𑁆𑀢𑀺 𑀏𑀯𑀁 𑀫𑁂 𑀫𑀦𑁄 𑀲𑀗𑁆𑀓𑀢𑁂 𑀧𑀭𑀺𑀲𑀗𑁆𑀓𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀆𑀧𑀚𑁆𑀚𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁭𑁬.

‘‘𑀦 𑀧𑀝𑀺𑀘𑁆𑀘𑀓𑀫𑁆𑀫𑀁 𑀨𑀼𑀲𑀢𑀺, 𑀫𑀦𑁄 𑀘𑁂 𑀦𑀧𑁆𑀧𑀤𑀼𑀲𑁆𑀲𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀲𑁆𑀲 𑀪𑀤𑁆𑀭𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀢𑀯 𑀧𑀸𑀧𑀓𑀺𑀭𑀺𑀬𑀸𑀬 𑀫𑀦𑁄 𑀦 𑀧𑀤𑀼𑀲𑁆𑀲𑀢𑀺, 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀦𑁄 𑀢𑀧𑁆𑀧𑀩𑁆𑀪𑀸𑀭𑁄 𑀦 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀮𑀼𑀤𑁆𑀤𑁂𑀦 𑀆𑀬𑀲𑁆𑀫𑀦𑁆𑀢𑀁 𑀧𑀝𑀺𑀘𑁆𑀘 𑀓𑀢𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀢𑀁 𑀦 𑀨𑀼𑀲𑀢𑀺 𑀦 𑀅𑀮𑁆𑀮𑀻𑀬𑀢𑀺, 𑀧𑀸𑀧𑀓𑀺𑀭𑀺𑀬𑀸𑀬 𑀳𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀲𑁆𑀲 𑀦𑀺𑀭𑀸𑀮𑀬𑀲𑁆𑀲 𑀪𑀤𑁆𑀭𑀲𑁆𑀲 𑀧𑀭𑀺𑀲𑀼𑀤𑁆𑀥𑀲𑁆𑀲𑁂𑀯 𑀲𑀢𑁄 𑀢𑀯 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀬 𑀅𑀪𑀸𑀯𑀸 𑀢𑀁 𑀧𑀸𑀧𑀁 𑀦 𑀉𑀧𑀮𑀺𑀫𑁆𑀧𑀢𑀺, 𑀢𑀯 𑀘𑀺𑀢𑁆𑀢𑀁 𑀦 𑀅𑀮𑁆𑀮𑀻𑀬𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀢𑀺𑀢𑁆𑀢𑀺𑀭𑀁 𑀲𑀜𑁆𑀜𑀸𑀧𑁂𑀲𑀺, 𑀲𑁄𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑁄 𑀅𑀳𑁄𑀲𑀺. 𑀮𑀼𑀤𑁆𑀤𑁄 𑀧𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀚𑀭𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀢𑀺𑀢𑁆𑀢𑀺𑀭𑁄 𑀭𑀸𑀳𑀼𑀮𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁨𑁦] 𑁧𑁦. 𑀲𑀼𑀘𑁆𑀘𑀚𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀘𑁆𑀘𑀚𑀁 𑀯𑀢 𑀦𑀘𑁆𑀘𑀚𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 ¶ 𑀓𑀺𑀭 ‘‘𑀕𑀸𑀫𑀓𑁂 𑀉𑀤𑁆𑀥𑀸𑀭𑀁 𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀥𑁂𑀢𑁆𑀯𑀸 𑀥𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀧𑀘𑁆𑀙𑀸 𑀦𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀞𑀧𑁂𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀧𑀩𑁆𑀩𑀢𑀁 𑀅𑀤𑁆𑀤𑀲. 𑀅𑀣 𑀦𑀁 𑀪𑀭𑀺𑀬𑀸 𑀆𑀳 ‘‘𑀲𑀘𑁂, 𑀲𑀸𑀫𑀺, 𑀅𑀬𑀁 𑀧𑀩𑁆𑀩𑀢𑁄 𑀲𑀼𑀯𑀡𑁆𑀡𑀫𑀬𑁄 𑀪𑀯𑁂𑀬𑁆𑀬, 𑀤𑀤𑁂𑀬𑁆𑀬𑀸𑀲𑀺 𑀧𑀦 𑀫𑁂 𑀓𑀺𑀜𑁆𑀘𑀻’’𑀢𑀺. ‘‘𑀓𑀸𑀲𑀺 𑀢𑁆𑀯𑀁, 𑀦 𑀓𑀺𑀜𑁆𑀘𑀺 𑀤𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀬𑀸𑀯 𑀣𑀤𑁆𑀥𑀳𑀤𑀬𑁄 𑀯𑀢𑀸𑀬𑀁, 𑀧𑀩𑁆𑀩𑀢𑁂 𑀲𑀼𑀯𑀡𑁆𑀡𑀫𑀬𑁂 𑀚𑀸𑀢𑁂𑀧𑀺 ¶ 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀦 𑀤𑀲𑁆𑀲𑀢𑀻’’𑀢𑀺 𑀅𑀦𑀢𑁆𑀢𑀫𑀦𑀸 𑀅𑀳𑁄𑀲𑀺. 𑀢𑁂 𑀚𑁂𑀢𑀯𑀦𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀁𑀲𑀼. 𑀲𑀢𑁆𑀣𑀸𑀧𑀺 ¶ 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀢𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑁄 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀢𑁂𑀧𑀺 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀳𑀁 𑀕𑀢𑀸𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀫𑁆𑀳𑀸𑀓𑀁 𑀕𑀸𑀫𑀓𑁂 𑀉𑀤𑁆𑀥𑀸𑀭𑀁 𑀲𑀸𑀥𑀦𑀢𑁆𑀣𑀸𑀬, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁, 𑀉𑀧𑀸𑀲𑀺𑀓𑁂 𑀢𑀯 𑀲𑀸𑀫𑀺𑀓𑁄 𑀢𑀼𑀬𑁆𑀳𑀁 𑀳𑀺𑀢𑀁 𑀧𑀝𑀺𑀓𑀗𑁆𑀔𑀢𑀺, 𑀉𑀧𑀓𑀸𑀭𑀁 𑀢𑁂 𑀓𑀭𑁄𑀢𑀻’’𑀢𑀺. 𑀪𑀦𑁆𑀢𑁂, 𑀅𑀳𑀁 𑀇𑀫𑀲𑁆𑀫𑀺𑀁 𑀲𑀲𑀺𑀦𑁂𑀳𑀸, 𑀅𑀬𑀁 𑀧𑀦 𑀫𑀬𑀺 𑀦𑀺𑀲𑁆𑀲𑀺𑀦𑁂𑀳𑁄, 𑀅𑀚𑁆𑀚 𑀫𑀬𑀸 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀧𑀩𑁆𑀩𑀢𑁄 𑀲𑀼𑀯𑀡𑁆𑀡𑀫𑀬𑁄 𑀅𑀲𑁆𑀲, 𑀓𑀺𑀜𑁆𑀘𑀺 𑀫𑁂 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀓𑀸𑀲𑀺 𑀢𑁆𑀯𑀁, 𑀦 𑀓𑀺𑀜𑁆𑀘𑀺 𑀤𑀲𑁆𑀲𑀸𑀫𑀻’’𑀢𑀺 𑀆𑀳, 𑀏𑀯𑀁 𑀣𑀤𑁆𑀥𑀳𑀤𑀬𑁄 𑀅𑀬𑀦𑁆𑀢𑀺. ‘‘𑀉𑀧𑀸𑀲𑀺𑀓𑁂, 𑀏𑀯𑀁 𑀦𑀸𑀫𑁂𑀲 𑀯𑀤𑀢𑀺, 𑀬𑀤𑀸 𑀧𑀦 𑀢𑀯 𑀕𑀼𑀡𑀁 𑀲𑀭𑀢𑀺, 𑀢𑀤𑀸 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀢𑁂 𑀤𑁂𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑁂𑀣, 𑀪𑀦𑁆𑀢𑁂’’𑀢𑀺 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀼𑀢𑁆𑀢𑀁 𑀉𑀧𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀫 𑀅𑀦𑁆𑀢𑁂𑀧𑀼𑀭𑁂 𑀤𑀼𑀩𑁆𑀪𑁂𑀬𑁆𑀬𑀸’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀬𑀸𑀯𑀸𑀳𑀁 𑀚𑀻𑀯𑀸𑀫𑀺, 𑀢𑀸𑀯 𑀦𑀕𑀭𑁂 𑀯𑀲𑀺𑀢𑀼𑀁 𑀦 𑀮𑀘𑁆𑀙𑀲𑀺, 𑀅𑀜𑁆𑀜𑀢𑁆𑀣 𑀯𑀲𑀺𑀢𑁆𑀯𑀸 𑀫𑀫𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀚𑁂𑀝𑁆𑀞𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀦𑁆𑀢𑁄 𑀯𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀉𑀧𑀭𑀸𑀚𑀸 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀓𑀸𑀮𑀓𑀢𑀪𑀸𑀯𑀁 𑀜𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀧𑀩𑁆𑀩𑀢𑀁 𑀅𑀤𑁆𑀤𑀲. 𑀅𑀣 𑀦𑀁 𑀪𑀭𑀺𑀬𑀸 𑀆𑀳 ‘‘𑀲𑀘𑁂, 𑀤𑁂𑀯, 𑀅𑀬𑀁 𑀧𑀩𑁆𑀩𑀢𑁄 𑀲𑀼𑀯𑀡𑁆𑀡𑀫𑀬𑁄 𑀅𑀲𑁆𑀲, 𑀤𑀤𑁂𑀬𑁆𑀬𑀸𑀲𑀺 𑀫𑁂 𑀓𑀺𑀜𑁆𑀘𑀻’’𑀢𑀺. ‘‘𑀓𑀸𑀲𑀺 𑀢𑁆𑀯𑀁, 𑀦 𑀓𑀺𑀜𑁆𑀘𑀺 𑀤𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀅𑀳𑀁 𑀇𑀫𑀲𑁆𑀫𑀺𑀁 𑀲𑀺𑀦𑁂𑀳𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺𑀁, 𑀅𑀬𑀜𑁆𑀘 𑀏𑀯𑀁 𑀯𑀤𑀢𑀺, 𑀅𑀢𑀺𑀯𑀺𑀬 𑀣𑀤𑁆𑀥𑀳𑀤𑀬𑁄 ¶ , 𑀭𑀸𑀚𑀸 𑀳𑀼𑀢𑁆𑀯𑀸𑀧𑀺 𑀏𑀲 𑀫𑀬𑁆𑀳𑀁 𑀓𑀺𑀁 𑀓𑀮𑁆𑀬𑀸𑀡𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀦𑀢𑁆𑀢𑀫𑀦𑀸 𑀅𑀳𑁄𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄 𑀢𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺 ¶ , 𑀇𑀤𑀁 𑀬𑀲𑀫𑀢𑁆𑀢𑀓𑀫𑁂𑀯 𑀅𑀤𑀸𑀲𑀺. 𑀉𑀢𑁆𑀢𑀭𑀺 𑀧𑀦 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀦𑀢𑁆𑀣𑀺, 𑀢𑀲𑁆𑀲𑀸 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄 ¶ ‘‘𑀅𑀬𑀁 𑀤𑁂𑀯𑀻 𑀇𑀫𑀲𑁆𑀲 𑀭𑀜𑁆𑀜𑁄 𑀉𑀧𑀓𑀸𑀭𑀺𑀓𑀸 𑀤𑀼𑀓𑁆𑀔𑀁 𑀅𑀕𑀡𑁂𑀢𑁆𑀯𑀸 𑀅𑀭𑀜𑁆𑀜𑀯𑀸𑀲𑀁 𑀯𑀲𑀺. 𑀅𑀬𑀁 𑀧𑀦𑁂𑀢𑀁 𑀅𑀕𑀡𑁂𑀢𑁆𑀯𑀸 𑀅𑀜𑁆𑀜𑀸𑀳𑀺 𑀲𑀤𑁆𑀥𑀺𑀁 𑀅𑀪𑀺𑀭𑀫𑀦𑁆𑀢𑁄 𑀯𑀺𑀘𑀭𑀢𑀺, 𑀬𑀣𑀸 𑀏𑀲𑀸 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀮𑀪𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀤𑁂𑀯𑀺 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀧𑀺𑀡𑁆𑀟𑀧𑀸𑀢𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫, 𑀓𑀲𑁆𑀫𑀸 𑀅𑀫𑁆𑀳𑁂𑀲𑀼 𑀧𑀫𑀚𑁆𑀚𑀺𑀢𑁆𑀣, 𑀅𑀢𑀺𑀯𑀺𑀬 𑀣𑀤𑁆𑀥𑀳𑀤𑀬𑀸 𑀅𑀢𑁆𑀣𑀸’’𑀢𑀺 𑀆𑀳. ‘‘𑀢𑀸𑀢, 𑀲𑀘𑀸𑀳𑀁 𑀅𑀢𑁆𑀢𑀦𑀸 𑀮𑀪𑁂𑀬𑁆𑀬𑀁, 𑀢𑀼𑀬𑁆𑀳𑀫𑁆𑀧𑀺 𑀤𑀤𑁂𑀬𑁆𑀬𑀁, 𑀅𑀮𑀪𑀫𑀸𑀦𑀸 𑀧𑀦 𑀓𑀺𑀁 𑀤𑀲𑁆𑀲𑀸𑀫𑀺, 𑀭𑀸𑀚𑀸𑀧𑀺 𑀫𑀬𑁆𑀳𑀁 𑀇𑀤𑀸𑀦𑀺 𑀓𑀺𑀁 𑀦𑀸𑀫 𑀤𑀲𑁆𑀲𑀢𑀺, 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 ‘𑀇𑀫𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀼𑀯𑀡𑁆𑀡𑀫𑀬𑁂 𑀚𑀸𑀢𑁂 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀤𑀲𑁆𑀲𑀲𑀻’𑀢𑀺 𑀯𑀼𑀢𑁆𑀢𑁄 ‘𑀓𑀸𑀲𑀺 𑀢𑁆𑀯𑀁, 𑀦 𑀓𑀺𑀜𑁆𑀘𑀺 𑀤𑀲𑁆𑀲𑀸𑀫𑀻’𑀢𑀺 𑀆𑀳, 𑀲𑀼𑀧𑀭𑀺𑀘𑁆𑀘𑀚𑀫𑁆𑀧𑀺 𑀦 𑀧𑀭𑀺𑀘𑁆𑀘𑀚𑀻’’𑀢𑀺. ‘‘𑀓𑀺𑀁 𑀧𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀓𑀣𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀢𑁂𑀦 𑀳𑀺 𑀅𑀳𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀺𑀢𑁄 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀓𑀣𑁂𑀬𑁆𑀬𑀸𑀣𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀺𑀬𑀸 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑀓𑀸𑀮𑁂 𑀆𑀳 ‘‘𑀦𑀦𑀼, 𑀅𑀬𑁆𑀬𑁂, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀸’’𑀢𑀺? ‘‘𑀢𑀸𑀢, 𑀅𑀳𑀁 𑀮𑀪𑀫𑀸𑀦𑀸 𑀢𑀼𑀬𑁆𑀳𑀁 𑀤𑀤𑁂𑀬𑁆𑀬𑀁, 𑀅𑀳𑀫𑁂𑀯 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀺, 𑀅𑀮𑀪𑀫𑀸𑀦𑀸 𑀢𑀼𑀬𑁆𑀳𑀁 𑀓𑀺𑀁 𑀤𑀲𑁆𑀲𑀸𑀫𑀺, 𑀭𑀸𑀚𑀸𑀧𑀺 𑀇𑀤𑀸𑀦𑀺 𑀫𑀬𑁆𑀳𑀁 𑀓𑀺𑀁 𑀦𑀸𑀫 𑀤𑀲𑁆𑀲𑀢𑀺, 𑀲𑁄 𑀅𑀭𑀜𑁆𑀜𑀢𑁄 𑀆𑀕𑀫𑀦𑀓𑀸𑀮𑁂 𑀏𑀓𑀁 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 ‘𑀲𑀘𑀸𑀬𑀁 𑀧𑀩𑁆𑀩𑀢𑁄 𑀲𑀼𑀯𑀡𑁆𑀡𑀫𑀬𑁄 𑀅𑀲𑁆𑀲, 𑀓𑀺𑀜𑁆𑀘𑀺 𑀫𑁂 𑀤𑀤𑁂𑀬𑁆𑀬𑀸𑀲𑀻’𑀢𑀺 𑀯𑀼𑀢𑁆𑀢𑁄 ‘𑀓𑀸𑀲𑀺 𑀢𑁆𑀯𑀁, 𑀦 𑀓𑀺𑀜𑁆𑀘𑀺 𑀤𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀲𑀼𑀧𑀭𑀺𑀘𑁆𑀘𑀚𑀫𑁆𑀧𑀺 𑀦 𑀧𑀭𑀺𑀘𑁆𑀘𑀚𑀻’’𑀢𑀺 𑀏𑀢𑀫𑀢𑁆𑀣𑀁 ¶ 𑀤𑀻𑀧𑁂𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁭.

‘‘𑀲𑀼𑀘𑁆𑀘𑀚𑀁 𑀯𑀢 𑀦𑀘𑁆𑀘𑀚𑀺, 𑀯𑀸𑀘𑀸𑀬 𑀅𑀤𑀤𑀁 𑀕𑀺𑀭𑀺𑀁;

𑀓𑀺𑀜𑁆𑀳𑀺 𑀢𑀲𑁆𑀲𑀘𑀚𑀦𑁆𑀢𑀲𑁆𑀲, 𑀯𑀸𑀘𑀸𑀬 𑀅𑀤𑀤 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀲𑀼𑀘𑁆𑀘𑀚𑀁 𑀯𑀢𑀸𑀢𑀺 𑀲𑀼𑀔𑁂𑀦 𑀘𑀚𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀫𑁆𑀧𑀺 𑀦 𑀘𑀚𑀺. 𑀅𑀤𑀤𑀦𑁆𑀢𑀺 𑀯𑀘𑀦𑀫𑀢𑁆𑀢𑁂𑀦𑀸𑀧𑀺 𑀧𑀩𑁆𑀩𑀢𑀁 𑀅𑀤𑀤𑀫𑀸𑀦𑁄. 𑀓𑀺𑀜𑁆𑀳𑀺 𑀢𑀲𑁆𑀲𑀘𑀚𑀦𑁆𑀢𑀲𑁆𑀲𑀸𑀢𑀺 𑀢𑀲𑁆𑀲 𑀦𑀸𑀫𑁂𑀢𑀲𑁆𑀲 𑀫𑀬𑀸 𑀬𑀸𑀘𑀺𑀢𑀲𑁆𑀲 𑀦 𑀘𑀚𑀦𑁆𑀢𑀲𑁆𑀲 𑀓𑀺𑀜𑁆𑀳𑀺 𑀘𑀚𑁂𑀬𑁆𑀬. 𑀯𑀸𑀘𑀸𑀬 𑀅𑀤𑀤 𑀧𑀩𑁆𑀩𑀢𑀦𑁆𑀢𑀺 𑀲𑀘𑀸𑀬𑀁 𑀫𑀬𑀸 𑀬𑀸𑀘𑀺𑀢𑁄 𑀫𑀫 𑀯𑀘𑀦𑁂𑀦 𑀲𑀼𑀯𑀡𑁆𑀡𑀫𑀬𑀫𑁆𑀧𑀺 𑀳𑁄𑀦𑁆𑀢𑀁 𑀢𑀁 𑀧𑀩𑁆𑀩𑀢𑀁 𑀯𑀸𑀘𑀸𑀬 𑀅𑀤𑀤, 𑀯𑀘𑀦𑀫𑀢𑁆𑀢𑁂𑀦 𑀅𑀤𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁮.

‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑀤𑁂𑀯 𑀳𑀺 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀓𑀸𑀬𑁂𑀦 𑀓𑀭𑁂𑀬𑁆𑀬, 𑀢𑀁 𑀯𑀸𑀘𑀸𑀬 𑀯𑀤𑁂𑀬𑁆𑀬. 𑀬𑀁 𑀦 𑀓𑀬𑀺𑀭𑀸, 𑀦 𑀢𑀁 𑀯𑀤𑁂𑀬𑁆𑀬, 𑀤𑀸𑀢𑀼𑀓𑀸𑀫𑁄𑀯 𑀤𑀫𑁆𑀫𑀻𑀢𑀺 𑀯𑀤𑁂𑀬𑁆𑀬, 𑀦 𑀅𑀤𑀸𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁𑀓𑀸𑀭𑀡𑀸? 𑀬𑁄 𑀳𑀺 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸𑀧𑀺 𑀧𑀘𑁆𑀙𑀸 𑀦 𑀤𑀤𑀸𑀢𑀺, 𑀢𑀁 𑀅𑀓𑀭𑁄𑀦𑁆𑀢𑀁 𑀓𑁂𑀯𑀮𑀁 𑀫𑀼𑀲𑀸 𑀪𑀸𑀲𑀫𑀸𑀦𑀁 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀅𑀬𑀁 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀪𑀸𑀲𑀢𑀺, 𑀦 𑀧𑀦 𑀤𑁂𑀢𑀺, 𑀬𑀜𑁆𑀳𑀺 𑀔𑁄 𑀧𑀦 𑀅𑀤𑀺𑀦𑁆𑀦𑀫𑁆𑀧𑀺 𑀯𑀘𑀦𑀫𑀢𑁆𑀢𑁂𑀦𑁂𑀯 𑀤𑀺𑀦𑁆𑀦𑀁 𑀳𑁄𑀢𑀺, 𑀢𑀁 𑀧𑀼𑀭𑁂𑀢𑀭𑀫𑁂𑀯 𑀮𑀤𑁆𑀥𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀢𑀲𑁆𑀲 𑀫𑀼𑀲𑀸𑀯𑀸𑀤𑀺𑀪𑀸𑀯𑀁 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀩𑀸𑀮𑀸 𑀧𑀦 𑀯𑀘𑀦𑀫𑀢𑁆𑀢𑁂𑀦𑁂𑀯 𑀢𑀼𑀲𑁆𑀲𑀦𑁆𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀻 𑀭𑀜𑁆𑀜𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁯.

‘‘𑀭𑀸𑀚𑀧𑀼𑀢𑁆𑀢 𑀦𑀫𑁄 𑀢𑁆𑀬𑀢𑁆𑀣𑀼, 𑀲𑀘𑁆𑀘𑁂 𑀥𑀫𑁆𑀫𑁂 𑀞𑀺𑀢𑁄 𑀘𑀲𑀺;

𑀬𑀲𑁆𑀲 𑀢𑁂 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀘𑁆𑀘𑀲𑁆𑀫𑀺𑀁 𑀭𑀫𑀢𑁂 𑀫𑀦𑁄’’𑀢𑀺.

𑀢𑀢𑁆𑀣 ¶ 𑀲𑀘𑁆𑀘𑁂 𑀥𑀫𑁆𑀫𑁂𑀢𑀺 𑀯𑀘𑀻𑀲𑀘𑁆𑀘𑁂 𑀘 𑀲𑀪𑀸𑀯𑀥𑀫𑁆𑀫𑁂 𑀘. 𑀩𑁆𑀬𑀲𑀦𑀁 𑀧𑀢𑁆𑀢𑁄𑀢𑀺 𑀬𑀲𑁆𑀲 𑀢𑀯 𑀭𑀝𑁆𑀞𑀸 𑀧𑀩𑁆𑀩𑀸𑀚𑀦𑀻𑀬𑀲𑀗𑁆𑀔𑀸𑀢𑀁 𑀩𑁆𑀬𑀲𑀦𑀁 𑀧𑀢𑁆𑀢𑁄𑀧𑀺 𑀫𑀦𑁄 𑀲𑀘𑁆𑀘𑀲𑁆𑀫𑀺𑀁𑀬𑁂𑀯 𑀭𑀫𑀢𑀺.

𑀏𑀯𑀁 𑀭𑀜𑁆𑀜𑁄 𑀕𑀼𑀡𑀓𑀣𑀁 𑀓𑀣𑀬𑀫𑀸𑀦𑀸𑀬 𑀤𑁂𑀯𑀺𑀬𑀸 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁮𑁦.

‘‘𑀬𑀸 𑀤𑀮𑀺𑀤𑁆𑀤𑀻 𑀤𑀮𑀺𑀤𑁆𑀤𑀲𑁆𑀲, 𑀅𑀟𑁆𑀠𑀸 𑀅𑀟𑁆𑀠𑀲𑁆𑀲 𑀓𑀺𑀢𑁆𑀢𑀺𑀫;

𑀲𑀸 𑀳𑀺𑀲𑁆𑀲 𑀧𑀭𑀫𑀸 𑀪𑀭𑀺𑀬𑀸, 𑀲𑀳𑀺𑀭𑀜𑁆𑀜𑀲𑁆𑀲 𑀇𑀢𑁆𑀣𑀺𑀬𑁄’’𑀢𑀺.

𑀢𑀢𑁆𑀣 𑀓𑀺𑀢𑁆𑀢𑀺𑀫𑀸𑀢𑀺 𑀓𑀺𑀢𑁆𑀢𑀺𑀲𑀫𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀲𑀸 𑀳𑀺𑀲𑁆𑀲 𑀧𑀭𑀫𑀸𑀢𑀺 𑀬𑀸 𑀤𑀮𑀺𑀤𑁆𑀤𑀲𑁆𑀲 𑀲𑀸𑀫𑀺𑀓𑀲𑁆𑀲 𑀤𑀮𑀺𑀤𑁆𑀤𑀓𑀸𑀮𑁂 𑀲𑀬𑀫𑁆𑀧𑀺 𑀤𑀮𑀺𑀤𑁆𑀤𑀻 𑀳𑀼𑀢𑁆𑀯𑀸 𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺. 𑀅𑀟𑁆𑀠𑀲𑁆𑀲𑀸𑀢𑀺 𑀅𑀟𑁆𑀠𑀓𑀸𑀮𑁂 𑀅𑀟𑁆𑀠𑀸 𑀳𑀼𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀅𑀦𑀼𑀯𑀢𑁆𑀢𑀢𑀺, 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀸𑀯 𑀳𑁄𑀢𑀺, 𑀲𑀸 𑀳𑀺 𑀢𑀲𑁆𑀲 𑀧𑀭𑀫𑀸 𑀉𑀢𑁆𑀢𑀫𑀸 𑀪𑀭𑀺𑀬𑀸 𑀦𑀸𑀫. 𑀲𑀳𑀺𑀭𑀜𑁆𑀜𑀲𑁆𑀲 𑀧𑀦 𑀇𑀲𑁆𑀲𑀭𑀺𑀬𑁂 𑀞𑀺𑀢𑀲𑁆𑀲 𑀇𑀢𑁆𑀣𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺𑀬𑁂𑀯, 𑀅𑀦𑀘𑁆𑀙𑀭𑀺𑀬𑀫𑁂𑀯 𑀏𑀢𑀦𑁆𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀤𑀼𑀓𑁆𑀔𑀺𑀢𑀓𑀸𑀮𑁂 𑀅𑀭𑀜𑁆𑀜𑁂 𑀲𑀫𑀸𑀦𑀤𑀼𑀓𑁆𑀔𑀸 𑀳𑀼𑀢𑁆𑀯𑀸 𑀯𑀲𑀺, 𑀇𑀫𑀺𑀲𑁆𑀲𑀸 𑀲𑀫𑁆𑀫𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑁂𑀯𑀺𑀬𑀸 𑀕𑀼𑀡𑀁 𑀓𑀣𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑁂𑀦 𑀤𑁂𑀯𑀺𑀬𑀸 𑀕𑀼𑀡𑀁 𑀲𑀭𑀺𑀢𑁆𑀯𑀸 ‘‘𑀧𑀡𑁆𑀟𑀺𑀢, 𑀢𑀯 𑀓𑀣𑀸𑀬𑀸𑀳𑀁 𑀤𑁂𑀯𑀺𑀬𑀸 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺’’𑀦𑁆𑀢𑀺 𑀯𑀢𑁆𑀯𑀸 ¶ 𑀢𑀲𑁆𑀲𑀸 𑀲𑀩𑁆𑀩𑀺𑀲𑁆𑀲𑀭𑀺𑀬𑀫𑀤𑀸𑀲𑀺. ‘‘𑀢𑀬𑀸𑀳𑀁 𑀤𑁂𑀯𑀺𑀬𑀸 𑀕𑀼𑀡𑀁 𑀲𑀭𑀸𑀧𑀺𑀢𑁄’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀪𑁄 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀬𑀁 𑀓𑀼𑀝𑀼𑀫𑁆𑀩𑀺𑀓𑁄 𑀅𑀳𑁄𑀲𑀺, 𑀤𑁂𑀯𑀻 𑀅𑀬𑀁 𑀉𑀧𑀸𑀲𑀺𑀓𑀸, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀼𑀘𑁆𑀘𑀚𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀧𑀼𑀘𑀺𑀫𑀦𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀓𑀼𑀝𑀺𑀤𑀽𑀲𑀓𑀯𑀕𑁆𑀕𑁄

[𑁩𑁨𑁧] 𑁧. 𑀓𑀼𑀝𑀺𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀫𑀦𑀼𑀲𑁆𑀲𑀲𑁆𑀲𑁂𑀯 ¶ ¶ 𑀢𑁂 𑀲𑀻𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀧𑀡𑁆𑀡𑀲𑀸𑀮𑀛𑀸𑀧𑀓𑀁 𑀤𑀳𑀭𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁. 𑀢𑀤𑀸 𑀓𑀺𑀭 𑀣𑁂𑀭𑁄 𑀭𑀸𑀚𑀕𑀳𑀁 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑀓𑀼𑀝𑀺𑀬𑀁 𑀯𑀺𑀳𑀭𑀢𑀺, 𑀢𑀲𑁆𑀲 𑀤𑁆𑀯𑁂 𑀤𑀳𑀭𑀸 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀣𑁂𑀭𑀲𑁆𑀲 𑀉𑀧𑀓𑀸𑀭𑀓𑁄, 𑀏𑀓𑁄 𑀤𑀼𑀩𑁆𑀩𑀘𑁄 𑀇𑀢𑀭𑁂𑀦 𑀓𑀢𑀁 𑀅𑀢𑁆𑀢𑀦𑀸 𑀓𑀢𑀲𑀤𑀺𑀲𑀁 𑀓𑀭𑁄𑀢𑀺. 𑀢𑁂𑀦 𑀫𑀼𑀔𑁄𑀤𑀓𑀸𑀤𑀻𑀲𑀼 𑀉𑀧𑀝𑁆𑀞𑀸𑀧𑀺𑀢𑁂𑀲𑀼 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀉𑀤𑀓𑀁 𑀞𑀧𑀺𑀢𑀁, 𑀫𑀼𑀔𑀁 𑀥𑁄𑀯𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀢𑀺. 𑀢𑁂𑀦 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀣𑁂𑀭𑀲𑁆𑀲 𑀧𑀭𑀺𑀯𑁂𑀡𑁂 𑀲𑀫𑁆𑀫𑀝𑁆𑀞𑁂 𑀣𑁂𑀭𑀲𑁆𑀲 𑀦𑀺𑀓𑁆𑀔𑀫𑀦𑀯𑁂𑀮𑀸𑀬 𑀇𑀢𑁄 𑀘𑀺𑀢𑁄 𑀘 𑀧𑀳𑀭𑀦𑁆𑀢𑁄 𑀲𑀓𑀮𑀧𑀭𑀺𑀯𑁂𑀡𑀁 𑀅𑀢𑁆𑀢𑀦𑀸 𑀲𑀫𑁆𑀫𑀝𑁆𑀞𑀁 𑀯𑀺𑀬 𑀓𑀭𑁄𑀢𑀺. 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀤𑀼𑀩𑁆𑀩𑀘𑁄 𑀫𑀬𑀸 𑀓𑀢𑀁 𑀅𑀢𑁆𑀢𑀦𑀸 𑀓𑀢𑀲𑀤𑀺𑀲𑀁 𑀓𑀭𑁄𑀢𑀺, 𑀏𑀢𑀲𑁆𑀲 𑀲𑀞𑀓𑀫𑁆𑀫𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀢𑀲𑁆𑀫𑀺𑀁 ¶ 𑀅𑀦𑁆𑀢𑁄𑀕𑀸𑀫𑁂 𑀪𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀯 𑀦𑁆𑀳𑀸𑀦𑁄𑀤𑀓𑀁 𑀢𑀸𑀧𑁂𑀢𑁆𑀯𑀸 𑀧𑀺𑀝𑁆𑀞𑀺𑀓𑁄𑀝𑁆𑀞𑀓𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀅𑀟𑁆𑀠𑀦𑀸𑀴𑀺𑀫𑀢𑁆𑀢𑀁 𑀉𑀤𑀓𑀁 𑀉𑀤𑁆𑀥𑀦𑁂 𑀞𑀧𑁂𑀲𑀺. 𑀇𑀢𑀭𑁄 𑀧𑀩𑀼𑀚𑁆𑀛𑀺𑀢𑁆𑀯𑀸𑀯 𑀕𑀦𑁆𑀢𑁆𑀯𑀸 𑀉𑀲𑀼𑀫𑀁 𑀉𑀝𑁆𑀞𑀳𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀉𑀤𑀓𑀁 𑀢𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑀓𑁂 𑀞𑀧𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀦𑁆𑀳𑀸𑀦𑀓𑁄𑀝𑁆𑀞𑀓𑁂 𑀉𑀤𑀓𑀁 𑀞𑀧𑀺𑀢𑀁, 𑀦𑁆𑀳𑀸𑀬𑀣𑀸’’𑀢𑀺 𑀆𑀳. 𑀣𑁂𑀭𑁄 ‘𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀓𑁄𑀝𑁆𑀞𑀓𑁂 𑀉𑀤𑀓𑀁 𑀅𑀤𑀺𑀢𑁆𑀯𑀸 ‘‘𑀓𑀳𑀁 𑀉𑀤𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀯𑁂𑀕𑁂𑀦 𑀅𑀕𑁆𑀕𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀼𑀘𑁆𑀙𑀪𑀸𑀚𑀦𑁂 𑀉𑀴𑀼𑀗𑁆𑀓𑀁 𑀑𑀢𑀸𑀭𑁂𑀲𑀺, 𑀉𑀴𑀼𑀗𑁆𑀓𑁄 𑀢𑀼𑀘𑁆𑀙𑀪𑀸𑀚𑀦𑀲𑁆𑀲 𑀢𑀮𑁂 𑀧𑀝𑀺𑀳𑀢𑁄 ‘‘𑀢𑀢𑀸’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 ‘‘𑀉𑀴𑀼𑀗𑁆𑀓𑀲𑀤𑁆𑀤𑀓𑁄’’𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁.

𑀢𑀲𑁆𑀫𑀺𑀁 𑀔𑀡𑁂 𑀇𑀢𑀭𑁄 𑀧𑀺𑀝𑁆𑀞𑀺𑀓𑁄𑀝𑁆𑀞𑀓𑀢𑁄 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 ‘‘𑀦𑁆𑀳𑀸𑀬𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 𑀦𑁆𑀳𑀢𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀉𑀴𑀼𑀗𑁆𑀓𑀲𑀤𑁆𑀤𑀓𑀲𑁆𑀲 𑀤𑀼𑀩𑁆𑀩𑀘𑀪𑀸𑀯𑀁 ¶ 𑀜𑀢𑁆𑀯𑀸 𑀢𑀁 𑀲𑀸𑀬𑀁 𑀣𑁂𑀭𑀼𑀧𑀝𑁆𑀞𑀸𑀦𑀁 𑀆𑀕𑀢𑀁 𑀑𑀯𑀤𑀺 ‘‘𑀆𑀯𑀼𑀲𑁄, 𑀲𑀫𑀡𑁂𑀦 𑀦𑀸𑀫 𑀅𑀢𑁆𑀢𑀦𑀸 𑀓𑀢𑀫𑁂𑀯 ‘𑀓𑀢𑀁 𑀫𑁂’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀅𑀜𑁆𑀜𑀣𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀳𑁄𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀫𑀸 𑀅𑀓𑀸𑀲𑀻’’𑀢𑀺. 𑀲𑁄 𑀣𑁂𑀭𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀦 𑀧𑀸𑀯𑀺𑀲𑀺. 𑀣𑁂𑀭𑁄 𑀇𑀢𑀭𑁂𑀦𑁂𑀯 𑀲𑀤𑁆𑀥𑀺𑀁 𑀧𑀸𑀯𑀺𑀲𑀺. 𑀉𑀴𑀼𑀗𑁆𑀓𑀲𑀤𑁆𑀤𑀓𑁄𑀧𑀺 ¶ 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀣𑁂𑀭𑁄 𑀓𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀨𑀸𑀲𑀼𑀓𑁂𑀦 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀣𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀧𑀼𑀦𑀤𑀺𑀯𑀲𑁂 𑀣𑁂𑀭𑁄 𑀢𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀫𑀦𑀼𑀲𑁆𑀲𑁂𑀳𑀺 ‘‘𑀓𑀺𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀅𑀨𑀸𑀲𑀼𑀓𑀁, 𑀳𑀺𑀬𑁆𑀬𑁄 𑀓𑀺𑀭𑀢𑁆𑀣 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀺𑀦𑁆𑀦𑀸, 𑀅𑀲𑀼𑀓𑀤𑀳𑀭𑀲𑁆𑀲 𑀳𑀢𑁆𑀣𑁂 𑀆𑀳𑀸𑀭𑀁 𑀧𑁂𑀲𑀬𑀺𑀫𑁆𑀳, 𑀧𑀭𑀺𑀪𑀼𑀢𑁆𑀢𑁄 𑀅𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀣𑁂𑀭𑁄 𑀢𑀼𑀡𑁆𑀳𑀻𑀪𑀽𑀢𑁄𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀣𑁂𑀭𑀼𑀧𑀝𑁆𑀞𑀸𑀦𑀓𑀸𑀮𑁂 𑀆𑀕𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀆𑀯𑀼𑀲𑁄, 𑀅𑀲𑀼𑀓𑀕𑀸𑀫𑁂 𑀦𑀸𑀫 𑀅𑀲𑀼𑀓𑀓𑀼𑀮𑁂 ‘𑀣𑁂𑀭𑀲𑁆𑀲 𑀇𑀤𑀜𑁆𑀘𑀺𑀤𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’𑀢𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀓𑀺𑀭 𑀢𑁂 𑀪𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦 𑀯𑀝𑁆𑀝𑀢𑀺, 𑀫𑀸 𑀧𑀼𑀦 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀘𑀭𑀸’’𑀢𑀺 𑀆𑀳. 𑀲𑁄 𑀏𑀢𑁆𑀢𑀓𑁂𑀦 𑀣𑁂𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀬𑀁 𑀳𑀺𑀬𑁆𑀬𑁄𑀧𑀺 𑀉𑀤𑀓𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑀺, 𑀇𑀤𑀸𑀦𑀺 𑀧𑀦𑀲𑁆𑀲 𑀉𑀧𑀝𑁆𑀞𑀸𑀓𑀸𑀦𑀁 𑀕𑁂𑀳𑁂 𑀫𑀬𑀸 𑀪𑀢𑁆𑀢𑀫𑀼𑀝𑁆𑀞𑀺 𑀪𑀼𑀢𑁆𑀢𑀸𑀢𑀺 𑀅𑀲𑀳𑀦𑁆𑀢𑁄 𑀧𑀼𑀦 𑀓𑀮𑀳𑀁 𑀓𑀭𑁄𑀢𑀺, 𑀚𑀸𑀦𑀺𑀲𑁆𑀲𑀸𑀫𑀺𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 ¶ 𑀧𑀼𑀦𑀤𑀺𑀯𑀲𑁂 𑀣𑁂𑀭𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀪𑀸𑀚𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀧𑀮𑀸𑀬𑀺. 𑀲𑁄 𑀚𑀻𑀯𑀫𑀸𑀦𑁄𑀯 𑀫𑀦𑀼𑀲𑁆𑀲𑀧𑁂𑀢𑁄 𑀳𑀼𑀢𑁆𑀯𑀸 𑀲𑀼𑀲𑁆𑀲𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑁂𑀦 𑀓𑀢𑁄 𑀅𑀦𑀸𑀘𑀸𑀭𑁄 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀧𑀸𑀓𑀝𑁄 𑀚𑀸𑀢𑁄.

𑀅𑀣𑁂𑀓𑀘𑁆𑀘𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑁂 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀭𑀸𑀚𑀕𑀳𑀸, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀢𑀢𑁆𑀣 𑀑𑀯𑀸𑀤𑀤𑀸𑀬𑀓𑁄 𑀆𑀘𑀭𑀺𑀬𑁄’’𑀢𑀺. ‘‘𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀪𑀦𑁆𑀢𑁂’’𑀢𑀺. ‘‘𑀲𑀼𑀔𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑀲𑁆𑀲𑀸’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀣𑁂𑀭𑀲𑁆𑀲 𑀲𑀼𑀔𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀦𑀲𑁆𑀲 𑀑𑀯𑀸𑀤𑁂 𑀤𑀺𑀦𑁆𑀦𑁂 𑀓𑀼𑀚𑁆𑀛𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 ¶ 𑀧𑀮𑀸𑀬𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑀲𑁆𑀲 𑀏𑀯𑀭𑀽𑀧𑁂𑀦 𑀩𑀸𑀮𑁂𑀦 𑀲𑀤𑁆𑀥𑀺𑀁 𑀘𑀭𑀡𑀢𑁄 𑀏𑀓𑀘𑀭𑀺𑀬𑀸𑀯 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀥𑀫𑁆𑀫𑀧𑀤𑁂 𑀕𑀸𑀣𑀫𑀸𑀳 𑁋

‘‘𑀘𑀭𑀜𑁆𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀲𑁂𑀬𑁆𑀬𑀁 𑀲𑀤𑀺𑀲𑀫𑀢𑁆𑀢𑀦𑁄;

𑀏𑀓𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸’’𑀢𑀺. (𑀥. 𑀧. 𑁬𑁧);

𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀓𑀼𑀝𑀺𑀤𑀽𑀲𑀓𑁄, 𑀧𑀼𑀩𑁆𑀩𑁂𑀧𑀺 𑀓𑀼𑀝𑀺𑀤𑀽𑀲𑀓𑁄𑀬𑁂𑀯, 𑀦 𑀘 𑀇𑀤𑀸𑀦𑁂𑀯 𑀑𑀯𑀸𑀤𑀤𑀸𑀬𑀓𑀲𑁆𑀲 𑀓𑀼𑀚𑁆𑀛𑀢𑀺, 𑀧𑀼𑀩𑁆𑀩𑁂𑀧𑀺 𑀓𑀼𑀚𑁆𑀛𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀺𑀗𑁆𑀕𑀺𑀮𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀫𑀦𑀸𑀧𑀁 𑀅𑀦𑁄𑀯𑀲𑁆𑀲𑀓𑀁 𑀓𑀼𑀮𑀸𑀯𑀓𑀁 𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀢𑀺. 𑀅𑀣𑁂𑀓𑁄 𑀫𑀓𑁆𑀓𑀝𑁄 𑀯𑀲𑁆𑀲𑀓𑀸𑀮𑁂 𑀅𑀘𑁆𑀙𑀺𑀦𑁆𑀦𑀥𑀸𑀭𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀻𑀢𑀧𑀻𑀴𑀺𑀢𑁄 𑀤𑀦𑁆𑀢𑁂 𑀔𑀸𑀤𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀢𑀣𑀸 𑀓𑀺𑀮𑀫𑀦𑁆𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁧.

‘‘𑀫𑀦𑀼𑀲𑁆𑀲𑀲𑁆𑀲𑁂𑀯 𑀢𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀦𑀭;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀅𑀕𑀸𑀭𑀁 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 ¶ 𑀯𑀡𑁆𑀡𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀅𑀕𑀸𑀭𑀦𑁆𑀢𑀺 𑀢𑀯 𑀦𑀺𑀯𑀸𑀲𑀕𑁂𑀳𑀁 𑀓𑁂𑀦 𑀓𑀸𑀭𑀡𑁂𑀦 𑀦𑀢𑁆𑀣𑀻𑀢𑀺 𑀧𑀼𑀘𑁆𑀙𑀺.

𑀢𑀁 𑀲𑀼𑀢𑁆𑀯𑀸 𑀯𑀸𑀦𑀭𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁨.

‘‘𑀫𑀦𑀼𑀲𑁆𑀲𑀲𑁆𑀲𑁂𑀯 𑀫𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀲𑀺𑀗𑁆𑀕𑀺𑀮;

𑀬𑀸𑀳𑀼 𑀲𑁂𑀝𑁆𑀞𑀸 𑀫𑀦𑀼𑀲𑁆𑀲𑁂𑀲𑀼, 𑀲𑀸 𑀫𑁂 𑀧𑀜𑁆𑀜𑀸 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀲𑀺𑀗𑁆𑀕𑀺𑀮𑀸𑀢𑀺 𑀢𑀁 𑀲𑀓𑀼𑀡𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀬𑀸𑀳𑀼 𑀲𑁂𑀝𑁆𑀞𑀸 𑀫𑀦𑀼𑀲𑁆𑀲𑁂𑀲𑀽𑀢𑀺 𑀬𑀸 𑀫𑀦𑀼𑀲𑁆𑀲𑁂𑀲𑀼 𑀲𑁂𑀝𑁆𑀞𑀸𑀢𑀺 𑀓𑀣𑁂𑀦𑁆𑀢𑀺, 𑀲𑀸 𑀫𑀫 𑀯𑀺𑀘𑀸𑀭𑀡𑀧𑀜𑁆𑀜𑀸 𑀦𑀢𑁆𑀣𑀺. 𑀲𑀻𑀲𑀳𑀢𑁆𑀣𑀧𑀸𑀤𑀓𑀸𑀬𑀩𑀮𑀸𑀦𑀺 𑀳𑀺 𑀮𑁄𑀓𑁂 𑀅𑀧𑁆𑀧𑀫𑀸𑀡𑀁, 𑀯𑀺𑀘𑀸𑀭𑀡𑀧𑀜𑁆𑀜𑀸𑀯 𑀲𑁂𑀝𑁆𑀞𑀸, 𑀲𑀸 𑀫𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀫𑁂 𑀅𑀕𑀸𑀭𑀁 𑀦 𑀯𑀺𑀚𑁆𑀚𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀇𑀢𑀭𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁮𑁩.

‘‘𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀮𑀳𑀼𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀦𑁄;

𑀦𑀺𑀘𑁆𑀘𑀁 𑀅𑀤𑁆𑀥𑀼𑀯𑀲𑀻𑀮𑀲𑁆𑀲, 𑀲𑀼𑀔𑀪𑀸𑀯𑁄 𑀦 𑀯𑀺𑀚𑁆𑀚𑀢𑀺.

𑁮𑁪.

‘‘𑀲𑁄 ¶ 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀁, 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀁;

𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀁, 𑀓𑀭𑀲𑁆𑀲𑀼 𑀓𑀼𑀝𑀯𑀁 𑀓𑀧𑀻’’𑀢𑀺.

𑀢𑀢𑁆𑀣 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲. 𑀤𑀼𑀩𑁆𑀪𑀺𑀦𑁄𑀢𑀺 𑀫𑀺𑀢𑁆𑀢𑀤𑀼𑀩𑁆𑀪𑀺𑀲𑁆𑀲. 𑀅𑀤𑁆𑀥𑀼𑀯𑀲𑀻𑀮𑀲𑁆𑀲𑀸𑀢𑀺 𑀦 𑀲𑀩𑁆𑀩𑀓𑀸𑀮𑀁 𑀲𑀻𑀮𑀭𑀓𑁆𑀔𑀓𑀲𑁆𑀲. 𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀦𑁆𑀢𑀺 𑀲𑁄 𑀢𑁆𑀯𑀁 𑀲𑀫𑁆𑀫 𑀫𑀓𑁆𑀓𑀝 𑀧𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀢𑁆𑀣𑀁 𑀆𑀦𑀼𑀪𑀸𑀯𑀁 𑀩𑀮𑀁 𑀉𑀧𑀸𑀬𑀁 𑀓𑀭𑁄𑀳𑀺. 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀦𑁆𑀢𑀺 𑀅𑀢𑁆𑀢𑀦𑁄 𑀤𑀼𑀲𑁆𑀲𑀻𑀮𑀪𑀸𑀯𑀲𑀗𑁆𑀔𑀸𑀢𑀁 ¶ 𑀲𑀻𑀮𑀺𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀻𑀮𑀯𑀸 𑀳𑁄𑀢𑀺. 𑀓𑀼𑀝𑀯𑀁 𑀓𑀧𑀻𑀢𑀺 𑀲𑀻𑀢𑀯𑀸𑀢𑀲𑁆𑀲 𑀧𑀭𑀺𑀢𑁆𑀢𑀸𑀡𑀲𑀫𑀢𑁆𑀣𑀁 𑀅𑀢𑁆𑀢𑀦𑁄 𑀓𑀼𑀝𑀯𑀁 𑀓𑀼𑀮𑀸𑀯𑀓𑀁 𑀏𑀓𑀁 𑀯𑀲𑀦𑀸𑀕𑀸𑀭𑀓𑀁 𑀓𑀭𑁄𑀳𑀻𑀢𑀺.

𑀫𑀓𑁆𑀓𑀝𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀢𑀸𑀯 𑀅𑀢𑁆𑀢𑀦𑁄 𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀪𑀸𑀯𑁂𑀦 𑀫𑀁 𑀧𑀭𑀺𑀪𑀸𑀲𑀢𑀺, 𑀦 𑀦𑀺𑀲𑀻𑀤𑀸𑀧𑁂𑀲𑁆𑀲𑀸𑀫𑀺 𑀦𑀁 𑀇𑀫𑀲𑁆𑀫𑀺𑀁 𑀓𑀼𑀮𑀸𑀯𑀓𑁂’’𑀢𑀺. 𑀢𑀢𑁄 𑀩𑁄𑀥𑀺𑀲𑀢𑁆𑀢𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀧𑀓𑁆𑀔𑀦𑁆𑀤𑀺, 𑀩𑁄𑀥𑀺𑀲𑀢𑁆𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑁄. 𑀫𑀓𑁆𑀓𑀝𑁄 𑀓𑀼𑀮𑀸𑀯𑀓𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀓𑁆𑀓𑀝𑁄 𑀓𑀼𑀝𑀺𑀛𑀸𑀧𑀓𑁄 𑀅𑀳𑁄𑀲𑀺, 𑀲𑀺𑀗𑁆𑀕𑀺𑀮𑀲𑀓𑀼𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀝𑀺𑀤𑀽𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁨𑁨] 𑁨. 𑀤𑀼𑀤𑁆𑀤𑀼𑀪𑀚𑀸𑀢𑀓𑀯𑀡𑁆𑀡𑀦𑀸

𑀤𑀼𑀤𑁆𑀤𑀼𑀪𑀸𑀬𑀢𑀺 𑀪𑀤𑁆𑀤𑀦𑁆𑀢𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀺𑀢𑁆𑀣𑀺𑀬𑀸 𑀓𑀺𑀭 𑀚𑁂𑀢𑀯𑀦𑀲𑁆𑀲 𑀲𑀫𑀻𑀧𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺, 𑀧𑀜𑁆𑀘𑀸𑀢𑀧𑀁 𑀢𑀧𑁂𑀦𑁆𑀢𑀺, 𑀦𑀸𑀦𑀧𑁆𑀧𑀓𑀸𑀭𑀁 𑀫𑀺𑀘𑁆𑀙𑀸𑀢𑀧𑀁 𑀘𑀭𑀦𑁆𑀢𑀺. 𑀅𑀣 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀁 𑀆𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑁂 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 ¶ 𑀯𑀢𑀲𑀫𑀸𑀤𑀸𑀦𑁂 𑀲𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀯𑀢𑀲𑀫𑀸𑀤𑀸𑀦𑁂 𑀲𑀸𑀭𑁄 𑀯𑀸 𑀯𑀺𑀲𑁂𑀲𑁄 𑀯𑀸 𑀅𑀢𑁆𑀣𑀺, 𑀢𑀜𑁆𑀳𑀺 𑀦𑀺𑀖𑀁𑀲𑀺𑀬𑀫𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀁 𑀉𑀓𑁆𑀓𑀸𑀭𑀪𑀽𑀫𑀺𑀫𑀕𑁆𑀕𑀲𑀤𑀺𑀲𑀁 𑀲𑀲𑀓𑀲𑁆𑀲 𑀤𑀼𑀤𑁆𑀤𑀼𑀪𑀲𑀤𑀺𑀲𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀤𑀼𑀤𑁆𑀤𑀼𑀪𑀲𑀤𑀺𑀲𑀪𑀸𑀯𑀫𑀲𑁆𑀲 𑀫𑀬𑀁 𑀦 𑀚𑀸𑀦𑀸𑀫, 𑀓𑀣𑁂𑀣 𑀦𑁄, 𑀪𑀦𑁆𑀢𑁂’’𑀢𑀺 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀭𑀜𑁆𑀜𑁂 𑀧𑀝𑀺𑀯𑀲𑀢𑀺. 𑀢𑀤𑀸 𑀧𑀦 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑀲𑀫𑀻𑀧𑁂 𑀩𑁂𑀮𑀼𑀯𑀫𑀺𑀲𑁆𑀲𑀓𑀢𑀸𑀮𑀯𑀦𑀁 𑀳𑁄𑀢𑀺. 𑀢𑀢𑁆𑀭𑁂𑀓𑁄 𑀲𑀲𑀓𑁄 𑀩𑁂𑀮𑀼𑀯𑀭𑀼𑀓𑁆𑀔𑀫𑀽𑀮𑁂 𑀏𑀓𑀲𑁆𑀲 𑀢𑀸𑀮𑀕𑀘𑁆𑀙𑀲𑁆𑀲 𑀳𑁂𑀝𑁆𑀞𑀸 𑀯𑀲𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀕𑁄𑀘𑀭𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀢𑀸𑀮𑀧𑀡𑁆𑀡𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀅𑀬𑀁 𑀧𑀣𑀯𑀻 𑀲𑀁𑀯𑀝𑁆𑀝𑁂𑀬𑁆𑀬, 𑀓𑀳𑀁 𑀦𑀼 𑀔𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀁 𑀩𑁂𑀮𑀼𑀯𑀧𑀓𑁆𑀓𑀁 𑀢𑀸𑀮𑀧𑀡𑁆𑀡𑀲𑁆𑀲 𑀉𑀧𑀭𑀺 𑀧𑀢𑀺. 𑀲𑁄 𑀢𑀲𑁆𑀲 𑀲𑀤𑁆𑀤𑁂𑀦 ‘‘𑀅𑀤𑁆𑀥𑀸 𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’’𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀧𑀘𑁆𑀙𑀢𑁄 𑀅𑀦𑁄𑀮𑁄𑀓𑁂𑀦𑁆𑀢𑁄𑀯 𑀧𑀮𑀸𑀬𑀺. 𑀢𑀁 𑀫𑀭𑀡𑀪𑀬𑀪𑀻𑀢𑀁 ¶ 𑀯𑁂𑀕𑁂𑀦 𑀧𑀮𑀸𑀬𑀦𑁆𑀢𑀁 𑀅𑀜𑁆𑀜𑁄 𑀲𑀲𑀓𑁄 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 ‘‘𑀓𑀺𑀁 𑀪𑁄, 𑀅𑀢𑀺𑀯𑀺𑀬 𑀪𑀻𑀢𑁄 𑀧𑀮𑀸𑀬𑀲𑀻’’𑀢𑀺. ‘‘𑀫𑀸 𑀧𑀼𑀘𑁆𑀙𑀺, 𑀪𑁄’’𑀢𑀺. 𑀲𑁄 ‘‘𑀓𑀺𑀁 𑀪𑁄, 𑀓𑀺𑀁 𑀪𑁄’’𑀢𑀺 𑀧𑀘𑁆𑀙𑀢𑁄 𑀥𑀸𑀯𑀢𑁂𑀯. 𑀇𑀢𑀭𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑁄𑀮𑁄𑀓𑁂𑀦𑁆𑀢𑁄𑀯 ‘‘𑀏𑀢𑁆𑀣 𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑁄𑀧𑀺 𑀢𑀲𑁆𑀲 𑀧𑀘𑁆𑀙𑀢𑁄 𑀧𑀮𑀸𑀬𑀺. 𑀏𑀯𑀁 𑀢𑀫𑀜𑁆𑀜𑁄 𑀅𑀤𑁆𑀤𑀲, 𑀢𑀫𑀜𑁆𑀜𑁄𑀢𑀺 ¶ 𑀏𑀯𑀁 𑀲𑀲𑀓𑀲𑀳𑀲𑁆𑀲𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀮𑀸𑀬𑀺. 𑀢𑁂 𑀏𑀓𑁄𑀧𑀺 𑀫𑀺𑀕𑁄 𑀤𑀺𑀲𑁆𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀮𑀸𑀬𑀺. 𑀏𑀓𑁄 𑀲𑀽𑀓𑀭𑁄, 𑀏𑀓𑁄 𑀕𑁄𑀓𑀡𑁆𑀡𑁄, 𑀏𑀓𑁄 𑀫𑀳𑀺𑀁𑀲𑁄, 𑀏𑀓𑁄 𑀕𑀯𑀬𑁄, 𑀏𑀓𑁄 𑀔𑀕𑁆𑀕𑁄, 𑀏𑀓𑁄 𑀩𑁆𑀬𑀕𑁆𑀖𑁄, 𑀏𑀓𑁄 𑀲𑀻𑀳𑁄, 𑀏𑀓𑁄 𑀳𑀢𑁆𑀣𑀻 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀢𑁆𑀣 𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 ¶ 𑀧𑀮𑀸𑀬𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀬𑁄𑀚𑀦𑀫𑀢𑁆𑀢𑀁 𑀢𑀺𑀭𑀘𑁆𑀙𑀸𑀦𑀩𑀮𑀁 𑀅𑀳𑁄𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀩𑀮𑀁 𑀧𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀢𑁆𑀣 𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’’𑀢𑀺 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀧𑀣𑀯𑀻𑀲𑀁𑀯𑀝𑁆𑀝𑀦𑀁 𑀦𑀸𑀫 𑀦 𑀓𑀤𑀸𑀘𑀺 𑀅𑀢𑁆𑀣𑀺, 𑀅𑀤𑁆𑀥𑀸 𑀏𑀢𑁂𑀲𑀁 𑀓𑀺𑀜𑁆𑀘𑀺 𑀤𑀼𑀲𑁆𑀲𑀼𑀢𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀺 𑀔𑁄 𑀧𑀦 𑀉𑀲𑁆𑀲𑀼𑀓𑁆𑀓𑀁 𑀅𑀦𑀸𑀧𑀚𑁆𑀚𑀦𑁆𑀢𑁂 𑀲𑀩𑁆𑀩𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀚𑀻𑀯𑀺𑀢𑀁 𑀦𑁂𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀯𑁂𑀕𑁂𑀦 𑀧𑀼𑀭𑀢𑁄 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀢𑁂 𑀲𑀻𑀳𑀪𑀬𑀢𑀚𑁆𑀚𑀺𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀺𑀡𑁆𑀟𑀺𑀢𑀸 𑀅𑀝𑁆𑀞𑀁𑀲𑀼. 𑀲𑀻𑀳𑁄 𑀢𑁂𑀲𑀁 𑀅𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀧𑀮𑀸𑀬𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’’𑀢𑀺. ‘‘𑀓𑁂𑀦 𑀲𑀁𑀯𑀝𑁆𑀝𑀫𑀸𑀦𑀸 𑀤𑀺𑀝𑁆𑀞𑀸’’𑀢𑀺? ‘‘𑀳𑀢𑁆𑀣𑀻 𑀚𑀸𑀦𑀦𑁆𑀢𑀻’’𑀢𑀺. 𑀳𑀢𑁆𑀣𑀻 𑀧𑀼𑀘𑁆𑀙𑀺. 𑀢𑁂 ‘‘𑀫𑀬𑀁 𑀦 𑀚𑀸𑀦𑀸𑀫, 𑀲𑀻𑀳𑀸 𑀚𑀸𑀦𑀦𑁆𑀢𑀻’’𑀢𑀺 𑀯𑀤𑀺𑀁𑀲𑀼, 𑀲𑀻𑀳𑀸𑀧𑀺 ‘‘𑀫𑀬𑀁 𑀦 𑀚𑀸𑀦𑀸𑀫, 𑀩𑁆𑀬𑀕𑁆𑀖𑀸 𑀚𑀸𑀦𑀦𑁆𑀢𑀻’’𑀢𑀺, 𑀩𑁆𑀬𑀕𑁆𑀖𑀸𑀧𑀺 ‘‘𑀫𑀬𑀁 𑀦 𑀚𑀸𑀦𑀸𑀫, 𑀔𑀕𑁆𑀕𑀸 𑀚𑀸𑀦𑀦𑁆𑀢𑀻’’𑀢𑀺, 𑀔𑀕𑁆𑀕𑀸𑀧𑀺 ‘‘𑀕𑀯𑀬𑀸 𑀚𑀸𑀦𑀦𑁆𑀢𑀻’’𑀢𑀺, 𑀕𑀯𑀬𑀸𑀧𑀺 ‘‘𑀫𑀳𑀺𑀁𑀲𑀸 𑀚𑀸𑀦𑀦𑁆𑀢𑀻’’𑀢𑀺, 𑀫𑀳𑀺𑀁𑀲𑀸𑀧𑀺 ‘‘𑀕𑁄𑀓𑀡𑁆𑀡𑀸 𑀚𑀸𑀦𑀦𑁆𑀢𑀻’’𑀢𑀺, 𑀕𑁄𑀓𑀡𑁆𑀡𑀸𑀧𑀺 ‘‘𑀲𑀽𑀓𑀭𑀸 𑀚𑀸𑀦𑀦𑁆𑀢𑀻’’𑀢𑀺, 𑀲𑀽𑀓𑀭𑀸𑀧𑀺 ‘‘𑀫𑀺𑀕𑀸 𑀚𑀸𑀦𑀦𑁆𑀢𑀻’’𑀢𑀺, 𑀫𑀺𑀕𑀸𑀧𑀺 ‘‘𑀫𑀬𑀁 𑀦 𑀚𑀸𑀦𑀸𑀫, 𑀲𑀲𑀓𑀸 𑀚𑀸𑀦𑀦𑁆𑀢𑀻’’𑀢𑀺, 𑀲𑀲𑀓𑁂𑀲𑀼 𑀧𑀼𑀘𑁆𑀙𑀺𑀬𑀫𑀸𑀦𑁂𑀲𑀼 ‘‘𑀅𑀬𑀁 𑀓𑀣𑁂𑀢𑀻’’𑀢𑀺 𑀢𑀁 𑀲𑀲𑀓𑀁 𑀤𑀲𑁆𑀲𑁂𑀲𑀼𑀁. 𑀅𑀣 𑀦𑀁 ‘‘𑀏𑀯𑀁 𑀓𑀺𑀭, 𑀲𑀫𑁆𑀫, 𑀧𑀲𑁆𑀲𑀲𑀺 𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀲𑀸𑀫𑀺 𑀫𑀬𑀸 𑀤𑀺𑀝𑁆𑀞𑀸’’𑀢𑀺. ‘‘𑀓𑀢𑁆𑀣 𑀯𑀲𑀦𑁆𑀢𑁄 𑀧𑀲𑁆𑀲𑀲𑀻’’𑀢𑀺? ‘‘𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑀲𑀫𑀻𑀧𑁂 𑀩𑁂𑀮𑀼𑀯𑀫𑀺𑀲𑁆𑀲𑀓𑀢𑀸𑀮𑀯𑀦𑁂 𑀯𑀲𑀸𑀫𑀺. 𑀅𑀳𑀜𑁆𑀳𑀺 𑀢𑀢𑁆𑀣 𑀩𑁂𑀮𑀼𑀯𑀭𑀼𑀓𑁆𑀔𑀫𑀽𑀮𑁂 𑀢𑀸𑀮𑀕𑀘𑁆𑀙𑁂 𑀢𑀸𑀮𑀧𑀡𑁆𑀡𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑁄 𑀘𑀺𑀦𑁆𑀢𑁂𑀲𑀺𑀁 ‘‘𑀲𑀘𑁂 𑀧𑀣𑀯𑀻 𑀲𑀁𑀯𑀝𑁆𑀝𑀢𑀺, 𑀓𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺, 𑀅𑀣 𑀢𑀗𑁆𑀔𑀡𑀜𑁆𑀜𑁂𑀯 𑀧𑀣𑀯𑀺𑀬𑀸 𑀲𑀁𑀯𑀝𑁆𑀝𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀮𑀸𑀢𑁄𑀫𑁆𑀳𑀻’’𑀢𑀺.

𑀲𑀻𑀳𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀤𑁆𑀥𑀸 𑀢𑀲𑁆𑀲 𑀢𑀸𑀮𑀧𑀡𑁆𑀡𑀲𑁆𑀲 𑀉𑀧𑀭𑀺 𑀩𑁂𑀮𑀼𑀯𑀧𑀓𑁆𑀓𑀁 𑀧𑀢𑀺𑀢𑁆𑀯𑀸 𑀤𑀼𑀤𑁆𑀤𑀼𑀪𑀸𑀬𑀦𑀲𑀤𑁆𑀤𑀫𑀓𑀸𑀲𑀺, 𑀲𑁆𑀯𑀸𑀬𑀁 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘𑀧𑀣𑀯𑀻 𑀲𑀁𑀯𑀝𑁆𑀝𑀢𑀻’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀮𑀸𑀬𑀺, 𑀢𑀣𑀢𑁄 ¶ 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀲𑀲𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀅𑀳𑀁 𑀇𑀫𑀺𑀦𑀸 𑀤𑀺𑀝𑁆𑀞𑀝𑁆𑀞𑀸𑀦𑁂 𑀧𑀣𑀯𑀺𑀬𑀸 𑀲𑀁𑀯𑀝𑁆𑀝𑀦𑀪𑀸𑀯𑀁 𑀯𑀸 𑀅𑀲𑀁𑀯𑀝𑁆𑀝𑀦𑀪𑀸𑀯𑀁 𑀯𑀸 𑀢𑀣𑀢𑁄 𑀚𑀸𑀦𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀺, 𑀬𑀸𑀯 ¶ ¶ 𑀫𑀫𑀸𑀕𑀫𑀦𑀸 𑀢𑀼𑀫𑁆𑀳𑁂 𑀏𑀢𑁆𑀣𑁂𑀯 𑀳𑁄𑀣𑀸’’𑀢𑀺 𑀲𑀲𑀓𑀁 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀲𑀻𑀳𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀢𑀸𑀮𑀯𑀦𑁂 𑀲𑀲𑀓𑀁 𑀑𑀢𑀸𑀭𑁂𑀢𑁆𑀯𑀸 ‘‘𑀏𑀳𑀺 𑀢𑀬𑀸 𑀤𑀺𑀝𑁆𑀞𑀝𑁆𑀞𑀸𑀦𑀁 𑀤𑀲𑁆𑀲𑁂𑀳𑀻’’𑀢𑀺 𑀆𑀳. ‘‘𑀦 𑀯𑀺𑀲𑀳𑀸𑀫𑀺 𑀲𑀸𑀫𑀻’’𑀢𑀺. ‘‘𑀏𑀳𑀺 𑀫𑀸 𑀪𑀸𑀬𑀻’’𑀢𑀺. 𑀲𑁄 𑀩𑁂𑀮𑀼𑀯𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘‘𑀇𑀤𑀁 𑀲𑀸𑀫𑀺 𑀤𑀼𑀤𑁆𑀤𑀼𑀪𑀸𑀬𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁫.

‘‘𑀤𑀼𑀤𑁆𑀤𑀼𑀪𑀸𑀬𑀢𑀺 𑀪𑀤𑁆𑀤𑀦𑁆𑀢𑁂, 𑀬𑀲𑁆𑀫𑀺𑀁 𑀤𑁂𑀲𑁂 𑀯𑀲𑀸𑀫𑀳𑀁;

𑀅𑀳𑀫𑁆𑀧𑁂𑀢𑀁 𑀦 𑀚𑀸𑀦𑀸𑀫𑀺, 𑀓𑀺𑀫𑁂𑀢𑀁 𑀤𑀼𑀤𑁆𑀤𑀼𑀪𑀸𑀬𑀢𑀻’’𑀢𑀺.

𑀢𑀢𑁆𑀣 𑀤𑀼𑀤𑁆𑀤𑀼𑀪𑀸𑀬𑀢𑀻𑀢𑀺 𑀤𑀼𑀤𑁆𑀤𑀼𑀪𑀲𑀤𑁆𑀤𑀁 𑀓𑀭𑁄𑀢𑀺. 𑀪𑀤𑁆𑀤𑀦𑁆𑀢𑁂𑀢𑀺 𑀪𑀤𑁆𑀤𑀁 𑀢𑀯 𑀅𑀢𑁆𑀣𑀼. 𑀓𑀺𑀫𑁂𑀢𑀦𑁆𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀅𑀳𑀁 𑀯𑀲𑀸𑀫𑀺, 𑀢𑀢𑁆𑀣 𑀤𑀼𑀤𑁆𑀤𑀼𑀪𑀸𑀬𑀢𑀺, 𑀅𑀳𑀫𑁆𑀧𑀺 𑀦 𑀚𑀸𑀦𑀸𑀫𑀺 ‘‘𑀓𑀺𑀁 𑀯𑀸 𑀏𑀢𑀁 𑀤𑀼𑀤𑁆𑀤𑀼𑀪𑀸𑀬𑀢𑀺, 𑀓𑁂𑀦 𑀯𑀸 𑀓𑀸𑀭𑀡𑁂𑀦 𑀤𑀼𑀤𑁆𑀤𑀼𑀪𑀸𑀬𑀢𑀺, 𑀓𑁂𑀯𑀮𑀁 𑀤𑀼𑀤𑁆𑀤𑀼𑀪𑀸𑀬𑀦𑀲𑀤𑁆𑀤𑀁 𑀅𑀲𑁆𑀲𑁄𑀲𑀺’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀲𑀻𑀳𑁄 𑀩𑁂𑀮𑀼𑀯𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀢𑀸𑀮𑀧𑀡𑁆𑀡𑀲𑁆𑀲 𑀳𑁂𑀝𑁆𑀞𑀸 𑀲𑀲𑀓𑁂𑀦 𑀦𑀺𑀧𑀦𑁆𑀦𑀝𑁆𑀞𑀸𑀦𑀜𑁆𑀘𑁂𑀯 𑀢𑀸𑀮𑀧𑀡𑁆𑀡𑀫𑀢𑁆𑀣𑀓𑁂 𑀧𑀢𑀺𑀢𑀁 𑀩𑁂𑀮𑀼𑀯𑀧𑀓𑁆𑀓𑀜𑁆𑀘 𑀤𑀺𑀲𑁆𑀯𑀸 𑀧𑀣𑀯𑀺𑀬𑀸 𑀅𑀲𑀁𑀯𑀝𑁆𑀝𑀦𑀪𑀸𑀯𑀁 𑀢𑀣𑀢𑁄 𑀚𑀸𑀦𑀺𑀢𑁆𑀯𑀸 𑀲𑀲𑀓𑀁 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀲𑀻𑀳𑀯𑁂𑀕𑁂𑀦 𑀔𑀺𑀧𑁆𑀧𑀁 𑀫𑀺𑀕𑀲𑀗𑁆𑀖𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀣𑀸’’𑀢𑀺 𑀫𑀺𑀕𑀕𑀡𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀘𑁂 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦 𑀪𑀯𑁂𑀬𑁆𑀬, 𑀲𑀩𑁆𑀩𑁂 𑀲𑀫𑀼𑀤𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀦𑀲𑁆𑀲𑁂𑀬𑁆𑀬𑀼𑀁. 𑀩𑁄𑀥𑀺𑀲𑀢𑁆𑀢𑀁 𑀧𑀦 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂 𑀚𑀻𑀯𑀺𑀢𑀁 𑀮𑀪𑀺𑀁𑀲𑀽𑀢𑀺.

𑁮𑁬.

‘‘𑀩𑁂𑀮𑀼𑀯𑀁 𑀧𑀢𑀺𑀢𑀁 𑀲𑀼𑀢𑁆𑀯𑀸, 𑀤𑀼𑀤𑁆𑀤𑀼𑀪𑀦𑁆𑀢𑀺 𑀲𑀲𑁄 𑀚𑀯𑀺;

𑀲𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀦𑁆𑀢𑀢𑁆𑀢𑀸 𑀫𑀺𑀕𑀯𑀸𑀳𑀺𑀦𑀻.

𑁮𑁭.

‘‘𑀅𑀧𑁆𑀧𑀢𑁆𑀯𑀸 𑀧𑀤𑀯𑀺𑀜𑁆𑀜𑀸𑀡𑀁, 𑀧𑀭𑀖𑁄𑀲𑀸𑀦𑀼𑀲𑀸𑀭𑀺𑀦𑁄;

𑀧𑀦𑀸𑀤𑀧𑀭𑀫𑀸 𑀩𑀸𑀮𑀸, 𑀢𑁂 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸.

𑁮𑁮.

‘‘𑀬𑁂 ¶ 𑀘 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀧𑀜𑁆𑀜𑀸𑀬𑀽𑀧𑀲𑀫𑁂 𑀭𑀢𑀸;

𑀆𑀭𑀓𑀸 𑀯𑀺𑀭𑀢𑀸 𑀥𑀻𑀭𑀸, 𑀦 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸’’𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.

𑀢𑀢𑁆𑀣 𑀩𑁂𑀮𑀼𑀯𑀦𑁆𑀢𑀺 𑀩𑁂𑀮𑀼𑀯𑀧𑀓𑁆𑀓𑀁. 𑀤𑀼𑀤𑁆𑀤𑀼𑀪𑀦𑁆𑀢𑀻𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀁. 𑀲𑀦𑁆𑀢𑀢𑁆𑀢𑀸𑀢𑀺 𑀉𑀢𑁆𑀭𑀲𑁆𑀢𑀸. 𑀫𑀺𑀕𑀯𑀸𑀳𑀺𑀦𑀻𑀢𑀺 ¶ 𑀅𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑀸 𑀫𑀺𑀕𑀲𑁂𑀦𑀸. 𑀧𑀤𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀧𑀤𑀁 ¶ , 𑀲𑁄𑀢𑀯𑀺𑀜𑁆𑀜𑀸𑀡𑀓𑁄𑀝𑁆𑀞𑀸𑀲𑀁 𑀅𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸𑀢𑀺 𑀢𑁂 𑀧𑀭𑀖𑁄𑀲𑀸𑀦𑀼𑀲𑀸𑀭𑀺𑀦𑁄 𑀢𑀫𑁂𑀯 𑀧𑀭𑀖𑁄𑀲𑀲𑀗𑁆𑀔𑀸𑀢𑀁 𑀧𑀦𑀸𑀤𑀁 ‘‘𑀧𑀭𑀫’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀩𑀸𑀮𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀯𑀺𑀜𑁆𑀜𑀸𑀡𑀧𑀤𑀲𑁆𑀲 𑀅𑀧𑁆𑀧𑀢𑁆𑀢𑀢𑀸𑀬 𑀧𑀭𑀧𑀢𑁆𑀢𑀺𑀬𑀸𑀯 𑀳𑁄𑀦𑁆𑀢𑀺, 𑀧𑀭𑁂𑀲𑀁 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀓𑀭𑁄𑀦𑁆𑀢𑀺.

𑀲𑀻𑀮𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀆𑀕𑀢𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀧𑀜𑁆𑀜𑀸𑀬𑀽𑀧𑀲𑀫𑁂 𑀭𑀢𑀸𑀢𑀺 𑀫𑀕𑁆𑀕𑁂𑀦𑁂𑀯 𑀆𑀕𑀢𑀧𑀜𑁆𑀜𑀸𑀬 𑀓𑀺𑀮𑁂𑀲𑀽𑀧𑀲𑀫𑁂 𑀭𑀢𑀸, 𑀬𑀣𑀸 𑀯𑀸 𑀲𑀻𑀮𑁂𑀦, 𑀏𑀯𑀁 𑀧𑀜𑁆𑀜𑀸𑀬𑀧𑀺 𑀲𑀫𑁆𑀧𑀦𑁆𑀦𑀸, 𑀓𑀺𑀮𑁂𑀲𑀽𑀧𑀲𑀫𑁂 𑀭𑀢𑀸𑀢𑀺𑀧𑀺 𑀅𑀢𑁆𑀣𑁄. 𑀆𑀭𑀓𑀸 𑀯𑀺𑀭𑀢𑀸 𑀥𑀻𑀭𑀸𑀢𑀺 𑀧𑀸𑀧𑀓𑀺𑀭𑀺𑀬𑀢𑁄 𑀆𑀭𑀓𑀸 𑀯𑀺𑀭𑀢𑀸 𑀧𑀡𑁆𑀟𑀺𑀢𑀸. 𑀦 𑀳𑁄𑀦𑁆𑀢𑀻𑀢𑀺 𑀢𑁂 𑀏𑀯𑀭𑀽𑀧𑀸 𑀲𑁄𑀢𑀸𑀧𑀦𑁆𑀦𑀸 𑀧𑀸𑀧𑀢𑁄 𑀑𑀭𑀢𑀪𑀸𑀯𑁂𑀦 𑀓𑀺𑀮𑁂𑀲𑀽𑀧𑀲𑀫𑁂 𑀅𑀪𑀺𑀭𑀢𑀪𑀸𑀯𑁂𑀦 𑀘 𑀏𑀓𑀯𑀸𑀭𑀁 𑀫𑀕𑁆𑀕𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀸 𑀅𑀜𑁆𑀜𑁂𑀲𑀁 𑀓𑀣𑁂𑀦𑁆𑀢𑀸𑀦𑀫𑁆𑀧𑀺 𑀦 𑀲𑀤𑁆𑀤𑀳𑀦𑁆𑀢𑀺 𑀦 𑀕𑀡𑁆𑀳𑀦𑁆𑀢𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀢𑁆𑀢𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀲𑁆𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘, 𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄, 𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺. (𑀥. 𑀧. 𑁯𑁭);

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀻𑀳𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀼𑀤𑁆𑀤𑀼𑀪𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁨𑁩] 𑁩. 𑀩𑁆𑀭𑀳𑁆𑀫𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀤𑁆𑀯𑀬𑀁 𑀬𑀸𑀘𑀦𑀓𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀆𑀴𑀯𑀺𑀁 𑀦𑀺𑀲𑁆𑀲𑀸𑀬 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁄 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀳𑁂𑀝𑁆𑀞𑀸 𑀫𑀡𑀺𑀓𑀡𑁆𑀞𑀚𑀸𑀢𑀓𑁂 (𑀚𑀸. 𑁧.𑁩.𑁭 𑀆𑀤𑀬𑁄) 𑀆𑀕𑀢𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀣𑀸’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀣𑀯𑀺𑀲𑁆𑀲𑀭𑁂𑀦 𑀭𑀜𑁆𑀜𑀸 𑀧𑀯𑀸𑀭𑀺𑀢𑀸𑀧𑀺 𑀧𑀡𑁆𑀡𑀘𑁆𑀙𑀢𑁆𑀢𑀜𑁆𑀘 𑀏𑀓𑀧𑀝𑀮𑀺𑀓𑀁 𑀉𑀧𑀸𑀳𑀦𑀬𑀼𑀕𑀜𑁆𑀘 𑀬𑀸𑀘𑀺𑀢𑀼𑀓𑀸𑀫𑀸 𑀳𑀺𑀭𑁄𑀢𑁆𑀢𑀧𑁆𑀧𑀪𑁂𑀤𑀦𑀪𑀬𑁂𑀦 𑀫𑀳𑀸𑀚𑀦𑀫𑀚𑁆𑀛𑁂 𑀅𑀓𑀣𑁂𑀢𑁆𑀯𑀸 𑀭𑀳𑁄 𑀓𑀣𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀓𑀧𑀺𑀮𑀭𑀝𑁆𑀞𑁂 𑀉𑀢𑁆𑀢𑀭𑀧𑀜𑁆𑀘𑀸𑀮𑀦𑀕𑀭𑁂 𑀉𑀢𑁆𑀢𑀭𑀧𑀜𑁆𑀘𑀸𑀮𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀦𑀺𑀕𑀫𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ¶ 𑀅𑀧𑀭𑀪𑀸𑀕𑁂 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀨𑀮𑁂𑀦 𑀬𑀸𑀧𑁂𑀦𑁆𑀢𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀯𑀺𑀘𑀭𑀦𑁆𑀢𑁄 𑀉𑀢𑁆𑀢𑀭𑀧𑀜𑁆𑀘𑀸𑀮𑀦𑀕𑀭𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀫𑀸𑀦𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀸 𑀢𑀲𑁆𑀲𑀸𑀘𑀸𑀭𑁂 𑀘 𑀯𑀺𑀳𑀸𑀭𑁂 𑀘 𑀧𑀲𑀻𑀤𑀺𑀢𑁆𑀯𑀸 𑀫𑀳𑀸𑀢𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀸𑀚𑀸𑀭𑀳𑀁 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀸𑀧𑁂𑀲𑀺. 𑀲𑁄 𑀦𑀺𑀩𑀤𑁆𑀥𑀁 𑀭𑀸𑀚𑀖𑀭𑁂𑀬𑁂𑀯 𑀪𑀼𑀜𑁆𑀚𑀦𑁆𑀢𑁄 𑀯𑀲𑁆𑀲𑀸𑀦𑀲𑁆𑀲 𑀅𑀘𑁆𑀘𑀬𑁂𑀦 𑀳𑀺𑀫𑀯𑀦𑁆𑀢𑀫𑁂𑀯 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀲𑁆𑀲 𑀏𑀓𑀧𑀝𑀮𑀺𑀓𑀸 𑀉𑀧𑀸𑀳𑀦𑀸 𑀘𑁂𑀯 𑀧𑀡𑁆𑀡𑀘𑁆𑀙𑀢𑁆𑀢𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀭𑀸𑀚𑀸𑀦𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀸𑀦𑀁 𑀉𑀬𑁆𑀬𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀉𑀧𑀸𑀳𑀦𑀜𑁆𑀘 𑀙𑀢𑁆𑀢𑀜𑁆𑀘 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀧𑀭𑀁 ‘𑀇𑀫𑀁 𑀦𑀸𑀫 𑀤𑁂𑀳𑀻’𑀢𑀺 𑀬𑀸𑀘𑀦𑁆𑀢𑁄 𑀭𑁄𑀤𑀢𑀺 𑀦𑀸𑀫, 𑀧𑀭𑁄𑀧𑀺 ‘𑀦𑀢𑁆𑀣𑀻’𑀢𑀺 𑀯𑀤𑀦𑁆𑀢𑁄 𑀧𑀝𑀺𑀭𑁄𑀤𑀢𑀺 𑀦𑀸𑀫, ‘𑀫𑀸 𑀔𑁄 𑀧𑀦 𑀫𑀁 𑀭𑁄𑀤𑀦𑁆𑀢𑀁 𑀫𑀳𑀸𑀚𑀦𑁄 𑀅𑀤𑁆𑀤𑀲, 𑀫𑀸 𑀭𑀸𑀚𑀸𑀦’’𑀦𑁆𑀢𑀺 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀉𑀪𑁄𑀧𑀺 𑀭𑁄𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀦𑀁 ‘‘𑀫𑀳𑀸𑀭𑀸𑀚, 𑀭𑀳𑁄 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑁂 𑀅𑀧𑀲𑀓𑁆𑀓𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀘𑁂 𑀫𑀬𑀺 𑀬𑀸𑀘𑀦𑁆𑀢𑁂 𑀭𑀸𑀚𑀸 𑀦 𑀤𑀲𑁆𑀲𑀢𑀺, 𑀫𑁂𑀢𑁆𑀢𑀺 𑀦𑁄 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀤𑀺𑀯𑀲𑀁 𑀦𑀸𑀫𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀕𑀘𑁆𑀙, 𑀢𑀸𑀯, 𑀫𑀳𑀸𑀭𑀸𑀚, 𑀧𑀼𑀦𑁂𑀓𑀤𑀺𑀯𑀲𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀧𑀼𑀦𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀉𑀬𑁆𑀬𑀸𑀦𑀁 𑀆𑀕𑀢𑀓𑀸𑀮𑁂 𑀢𑀣𑁂𑀯 𑀧𑀼𑀦 𑀢𑀣𑁂𑀯𑀸𑀢𑀺 𑀏𑀯𑀁 𑀬𑀸𑀘𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲𑁂𑀯 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 ¶ 𑀅𑀬𑁆𑀬𑁄 ‘𑀫𑀳𑀸𑀭𑀸𑀚, 𑀭𑀳𑁄 𑀧𑀘𑁆𑀘𑀸𑀲𑀻𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀧𑀭𑀺𑀲𑀸𑀬 𑀅𑀧𑀕𑀢𑀸𑀬 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀢𑀺, 𑀯𑀢𑁆𑀢𑀼𑀓𑀸𑀫𑀲𑁆𑀲𑁂𑀯𑀲𑁆𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀘𑀺𑀭𑀁 𑀔𑁄 𑀧𑀦𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀲𑁆𑀲 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀪𑁄𑀕𑁂 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀭𑀚𑁆𑀚𑀁 𑀧𑀘𑁆𑀘𑀸𑀲𑀻𑀲𑀢𑀺 𑀫𑀜𑁆𑀜𑁂, 𑀭𑀚𑁆𑀚𑀲𑁆𑀲 𑀧𑀦 𑀦𑀸𑀫𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀼𑀡𑁆𑀳𑀻 𑀳𑁄𑀢𑀺, 𑀅𑀚𑁆𑀚 𑀤𑀸𑀦𑀺𑀲𑁆𑀲𑀸𑀳𑀁 𑀭𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀁 𑀇𑀘𑁆𑀙𑀢𑀺, 𑀢𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀩𑁄𑀥𑀺𑀲𑀢𑁆𑀢𑁂𑀦 ‘‘𑀭𑀳𑁄 ¶ 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀭𑀺𑀲𑀸𑀬 𑀅𑀧𑀕𑀢𑀸𑀬 𑀢𑀁 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀆𑀳 ‘‘𑀢𑀼𑀫𑁆𑀳𑁂 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 ‘𑀭𑀳𑁄 𑀧𑀘𑁆𑀘𑀸𑀲𑀻𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀭𑀳𑁄 𑀮𑀤𑁆𑀥𑀸𑀧𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀣, 𑀅𑀳𑀁 𑀯𑁄 𑀭𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀧𑀯𑀸𑀭𑁂𑀫𑀺, 𑀦𑀺𑀩𑁆𑀪𑀬𑀸 𑀳𑀼𑀢𑁆𑀯𑀸 𑀬𑀁 𑀯𑁄 𑀭𑀼𑀘𑁆𑀘𑀢𑀺, 𑀢𑀁 𑀬𑀸𑀘𑀣𑀸’’𑀢𑀺. ‘‘𑀫𑀳𑀸𑀭𑀸𑀚, 𑀬𑀫𑀳𑀁 𑀬𑀸𑀘𑀸𑀫𑀺, 𑀢𑀁 𑀤𑀲𑁆𑀲𑀲𑀻’’𑀢𑀺? ‘‘𑀤𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀲𑁆𑀲 𑀏𑀓𑀧𑀝𑀮𑀺𑀓𑀸 𑀉𑀧𑀸𑀳𑀦𑀸 𑀘 𑀧𑀡𑁆𑀡𑀘𑁆𑀙𑀢𑁆𑀢𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀏𑀢𑁆𑀢𑀓𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀬𑀸𑀘𑀺𑀢𑀼𑀁 𑀦 𑀲𑀓𑁆𑀓𑁄𑀣𑀸’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸, 𑀪𑀦𑁆𑀢𑁂, 𑀏𑀯𑀫𑀓𑀢𑁆𑀣𑀸’’𑀢𑀺. ‘‘𑀫𑀳𑀸𑀭𑀸𑀚, ‘𑀇𑀫𑀁 𑀦𑀸𑀫 𑀫𑁂 𑀤𑁂𑀳𑀻’𑀢𑀺 𑀬𑀸𑀘𑀦𑁆𑀢𑁄 𑀭𑁄𑀤𑀢𑀺 𑀦𑀸𑀫, ‘𑀦𑀢𑁆𑀣𑀻’𑀢𑀺 𑀯𑀤𑀦𑁆𑀢𑁄 ¶ 𑀧𑀝𑀺𑀭𑁄𑀤𑀢𑀺 𑀦𑀸𑀫. ‘𑀲𑀘𑁂 𑀢𑁆𑀯𑀁 𑀫𑀬𑀸 𑀬𑀸𑀘𑀺𑀢𑁄 𑀦 𑀤𑀤𑁂𑀬𑁆𑀬𑀸𑀲𑀺, 𑀢𑀁 𑀦𑁄 𑀭𑁄𑀤𑀺𑀢𑀧𑀝𑀺𑀭𑁄𑀤𑀺𑀢𑀁 𑀦𑀸𑀫 𑀫𑀳𑀸𑀚𑀦𑁄 𑀫𑀸 𑀧𑀲𑁆𑀲𑀢𑀽’𑀢𑀺 𑀏𑀢𑀤𑀢𑁆𑀣𑀁 𑀭𑀳𑁄 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀤𑀺𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁯.

‘‘𑀤𑁆𑀯𑀬𑀁 𑀬𑀸𑀘𑀦𑀓𑁄 𑀭𑀸𑀚, 𑀩𑁆𑀭𑀳𑁆𑀫𑀤𑀢𑁆𑀢 𑀦𑀺𑀕𑀘𑁆𑀙𑀢𑀺;

𑀅𑀮𑀸𑀪𑀁 𑀥𑀦𑀮𑀸𑀪𑀁 𑀯𑀸, 𑀏𑀯𑀁𑀥𑀫𑁆𑀫𑀸 𑀳𑀺 𑀬𑀸𑀘𑀦𑀸.

𑁯𑁦.

‘‘𑀬𑀸𑀘𑀦𑀁 𑀭𑁄𑀤𑀦𑀁 𑀆𑀳𑀼, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪;

𑀬𑁄 𑀬𑀸𑀘𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀫𑀸𑀳𑀼 𑀧𑀝𑀺𑀭𑁄𑀤𑀦𑀁.

𑁯𑁧.

‘‘𑀫𑀸 𑀫𑀤𑁆𑀤𑀲𑀁𑀲𑀼 𑀭𑁄𑀤𑀦𑁆𑀢𑀁, 𑀧𑀜𑁆𑀘𑀸𑀮𑀸 𑀲𑀼𑀲𑀫𑀸𑀕𑀢𑀸;

𑀢𑀼𑀯𑀁 𑀯𑀸 𑀧𑀝𑀺𑀭𑁄𑀤𑀦𑁆𑀢𑀁, 𑀢𑀲𑁆𑀫𑀸 𑀇𑀘𑁆𑀙𑀸𑀫𑀳𑀁 𑀭𑀳𑁄’’𑀢𑀺.

𑀢𑀢𑁆𑀣 ¶ 𑀭𑀸𑀚 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀤𑁆𑀯𑀻𑀳𑀺𑀧𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀦𑀺𑀕𑀘𑁆𑀙𑀢𑀻𑀢𑀺 𑀮𑀪𑀢𑀺 𑀯𑀺𑀦𑁆𑀤𑀢𑀺. 𑀏𑀯𑀁𑀥𑀫𑁆𑀫𑀸𑀢𑀺 𑀏𑀯𑀁𑀲𑀪𑀸𑀯𑀸. 𑀆𑀳𑀽𑀢𑀺 𑀧𑀡𑁆𑀟𑀺𑀢𑀸 𑀓𑀣𑁂𑀦𑁆𑀢𑀺. 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑀸𑀢𑀺 𑀧𑀜𑁆𑀘𑀸𑀮𑀭𑀝𑁆𑀞𑀲𑁆𑀲 𑀇𑀲𑁆𑀲𑀭 𑀭𑀣𑀧𑀯𑀭. 𑀬𑁄 𑀬𑀸𑀘𑀦𑀁 𑀧𑀘𑁆𑀘𑀓𑁆𑀔𑀸𑀢𑀻𑀢𑀺 𑀬𑁄 𑀧𑀦 𑀬𑀁 𑀬𑀸𑀘𑀦𑀓𑀁 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀫𑀸𑀳𑀽𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀦𑀁 ‘‘𑀧𑀝𑀺𑀭𑁄𑀤𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀸 𑀫𑀤𑁆𑀤𑀲𑀁𑀲𑀽𑀢𑀺 𑀢𑀯 𑀭𑀝𑁆𑀞𑀯𑀸𑀲𑀺𑀦𑁄 𑀧𑀜𑁆𑀘𑀸𑀮𑀸 𑀲𑀼𑀲𑀫𑀸𑀕𑀢𑀸 𑀫𑀁 𑀭𑁄𑀤𑀦𑁆𑀢𑀁 𑀫𑀸 𑀅𑀤𑁆𑀤𑀲𑀁𑀲𑀽𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀸𑀭𑀯𑀮𑀓𑁆𑀔𑀡𑁂 𑀧𑀲𑀻𑀤𑀺𑀢𑁆𑀯𑀸 𑀯𑀭𑀁 𑀤𑀤𑀫𑀸𑀦𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁯𑁨.

‘‘𑀤𑀤𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀭𑁄𑀳𑀺𑀡𑀻𑀦𑀁, 𑀕𑀯𑀁 𑀲𑀳𑀲𑁆𑀲𑀁 𑀲𑀳 𑀧𑀼𑀗𑁆𑀕𑀯𑁂𑀦;

𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀣𑀁 𑀦 𑀤𑀚𑁆𑀚𑀸, 𑀲𑀼𑀢𑁆𑀯𑀸𑀦 𑀕𑀸𑀣𑀸 𑀢𑀯 𑀥𑀫𑁆𑀫𑀬𑀼𑀢𑁆𑀢𑀸’’𑀢𑀺.

𑀢𑀢𑁆𑀣 ¶ 𑀭𑁄𑀳𑀺𑀡𑀻𑀦𑀦𑁆𑀢𑀺 𑀭𑀢𑁆𑀢𑀯𑀡𑁆𑀡𑀸𑀦𑀁. 𑀅𑀭𑀺𑀬𑁄𑀢𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄. 𑀅𑀭𑀺𑀬𑀲𑁆𑀲𑀸𑀢𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀲𑁆𑀲. 𑀓𑀣𑀁 𑀦 𑀤𑀚𑁆𑀚𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀦 𑀤𑀤𑁂𑀬𑁆𑀬. 𑀥𑀫𑁆𑀫𑀬𑀼𑀢𑁆𑀢𑀸𑀢𑀺 𑀓𑀸𑀭𑀡𑀬𑀼𑀢𑁆𑀢𑀸.

𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀦𑀸𑀳𑀁, 𑀫𑀳𑀸𑀭𑀸𑀚, 𑀯𑀢𑁆𑀣𑀼𑀓𑀸𑀫𑁂𑀳𑀺 𑀅𑀢𑁆𑀣𑀺𑀓𑁄, 𑀬𑀁 𑀅𑀳𑀁 𑀬𑀸𑀘𑀸𑀫𑀺, 𑀢𑀤𑁂𑀯 𑀫𑁂 𑀤𑁂𑀳𑀻’’𑀢𑀺 𑀏𑀓𑀧𑀝𑀮𑀺𑀓𑀸 𑀉𑀧𑀸𑀳𑀦𑀸 𑀘 𑀧𑀡𑁆𑀡𑀘𑁆𑀙𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔𑀸𑀳𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀢𑀲𑁆𑀲 𑀬𑀸𑀘𑀦𑁆𑀢𑀲𑁆𑀲𑁂𑀯 𑀳𑀺𑀫𑀯𑀦𑁆𑀢𑀫𑁂𑀯 ¶ 𑀕𑀢𑁄. 𑀢𑀢𑁆𑀣 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑁆𑀭𑀳𑁆𑀫𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁨𑁪] 𑁪. 𑀘𑀫𑁆𑀫𑀲𑀸𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑀮𑁆𑀬𑀸𑀡𑀭𑀽𑀧𑁄 ¶ 𑀯𑀢𑀬𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀫𑁆𑀫𑀲𑀸𑀝𑀓𑀁 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀓𑀺𑀭 𑀘𑀫𑁆𑀫𑀫𑁂𑀯 𑀦𑀺𑀯𑀸𑀲𑀦𑀜𑁆𑀘 𑀧𑀸𑀭𑀼𑀧𑀦𑀜𑁆𑀘 𑀳𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀏𑀴𑀓𑀸𑀦𑀁 𑀬𑀼𑀚𑁆𑀛𑀦𑀝𑁆𑀞𑀸𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀏𑀴𑀓𑁄 𑀢𑀁 𑀤𑀺𑀲𑁆𑀯𑀸 𑀧𑀳𑀭𑀺𑀢𑀼𑀓𑀸𑀫𑁄 𑀑𑀲𑀓𑁆𑀓𑀺. 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀏𑀲 𑀫𑀬𑁆𑀳𑀁 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑀻’’𑀢𑀺 𑀦 𑀧𑀝𑀺𑀓𑁆𑀓𑀫𑀺. 𑀏𑀴𑀓𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀢𑀁 𑀊𑀭𑀼𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀢𑀲𑁆𑀲 𑀢𑀁 𑀅𑀲𑀦𑁆𑀢𑀧𑀕𑁆𑀕𑀳𑀡𑀓𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀁 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀘𑀫𑁆𑀫𑀲𑀸𑀝𑀓𑀧𑀭𑀺𑀩𑁆𑀩𑀸𑀚𑀓𑁄 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀯𑀡𑀺𑀚𑁆𑀚𑀁 𑀓𑀭𑁄𑀢𑀺. 𑀢𑀤𑀸 𑀏𑀓𑁄 ¶ 𑀘𑀫𑁆𑀫𑀲𑀸𑀝𑀓𑀧𑀭𑀺𑀩𑁆𑀩𑀸𑀚𑀓𑁄 𑀩𑀸𑀭𑀸𑀡𑀲𑀺𑀬𑀁 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀏𑀴𑀓𑀸𑀦𑀁 𑀬𑀼𑀚𑁆𑀛𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀏𑀴𑀓𑀁 𑀑𑀲𑀓𑁆𑀓𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀧𑀘𑀺𑀢𑀺𑀁 𑀫𑁂 𑀓𑀭𑁄𑀢𑀻’’𑀢𑀺 𑀲𑀜𑁆𑀜𑀸𑀬 𑀅𑀧𑀝𑀺𑀓𑁆𑀓𑀫𑀺𑀢𑁆𑀯𑀸 ‘‘𑀇𑀫𑁂𑀲𑀁 𑀏𑀢𑁆𑀢𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀅𑀬𑀁 𑀏𑀓𑁄 𑀏𑀴𑀓𑁄 𑀅𑀫𑁆𑀳𑀸𑀓𑀁 𑀕𑀼𑀡𑀁 𑀚𑀸𑀦𑀸𑀢𑀻’’𑀢𑀺 𑀢𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑁄𑀯 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁩.

‘‘𑀓𑀮𑁆𑀬𑀸𑀡𑀭𑀽𑀧𑁄 𑀯𑀢𑀬𑀁 𑀘𑀢𑀼𑀧𑁆𑀧𑀤𑁄, 𑀲𑀼𑀪𑀤𑁆𑀤𑀓𑁄 𑀘𑁂𑀯 𑀲𑀼𑀧𑁂𑀲𑀮𑁄 𑀘;

𑀬𑁄 𑀩𑁆𑀭𑀸𑀳𑁆𑀫𑀡𑀁 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀁, 𑀅𑀧𑀘𑀸𑀬𑀢𑀺 𑀫𑁂𑀡𑁆𑀟𑀯𑀭𑁄 𑀬𑀲𑀲𑁆𑀲𑀻’’𑀢𑀺.

𑀢𑀢𑁆𑀣 ¶ 𑀓𑀮𑁆𑀬𑀸𑀡𑀭𑀽𑀧𑁄𑀢𑀺 𑀓𑀮𑁆𑀬𑀸𑀡𑀚𑀸𑀢𑀺𑀓𑁄. 𑀲𑀼𑀧𑁂𑀲𑀮𑁄𑀢𑀺 𑀲𑀼𑀝𑁆𑀞𑀼 𑀧𑀺𑀬𑀲𑀻𑀮𑁄. 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀦𑁆𑀢𑀺 𑀚𑀸𑀢𑀺𑀬𑀸 𑀘 𑀫𑀦𑁆𑀢𑁂𑀳𑀺 𑀘 𑀲𑀫𑁆𑀧𑀦𑁆𑀦𑀁. 𑀬𑀲𑀲𑁆𑀲𑀻𑀢𑀺 𑀯𑀡𑁆𑀡𑀪𑀡𑀦𑀫𑁂𑀢𑀁.

𑀢𑀲𑁆𑀫𑀺𑀁 ¶ 𑀔𑀡𑁂 𑀆𑀧𑀡𑁂 𑀦𑀺𑀲𑀺𑀦𑁆𑀦𑁄 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀲𑁂𑀥𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁪.

‘‘𑀫𑀸 𑀩𑁆𑀭𑀸𑀳𑁆𑀫𑀡 𑀇𑀢𑁆𑀢𑀭𑀤𑀲𑁆𑀲𑀦𑁂𑀦, 𑀯𑀺𑀲𑁆𑀲𑀸𑀲𑀫𑀸𑀧𑀚𑁆𑀚𑀺 𑀘𑀢𑀼𑀧𑁆𑀧𑀤𑀲𑁆𑀲;

𑀤𑀴𑁆𑀳𑀧𑁆𑀧𑀳𑀸𑀭𑀁 𑀅𑀪𑀺𑀓𑀗𑁆𑀔𑀫𑀸𑀦𑁄, 𑀅𑀯𑀲𑀓𑁆𑀓𑀢𑀻 𑀤𑀲𑁆𑀲𑀢𑀺 𑀲𑀼𑀧𑁆𑀧𑀳𑀸𑀭’’𑀦𑁆𑀢𑀺.

𑀢𑀢𑁆𑀣 𑀇𑀢𑁆𑀢𑀭𑀤𑀲𑁆𑀲𑀦𑁂𑀦𑀸𑀢𑀺 𑀔𑀡𑀺𑀓𑀤𑀲𑁆𑀲𑀦𑁂𑀦.

𑀢𑀲𑁆𑀲 𑀧𑀡𑁆𑀟𑀺𑀢𑀯𑀸𑀡𑀺𑀚𑀲𑁆𑀲 𑀓𑀣𑁂𑀦𑁆𑀢𑀲𑁆𑀲𑁂𑀯 𑀲𑁄 𑀫𑁂𑀡𑁆𑀟𑀓𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀊𑀭𑀼𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀢𑀁 𑀢𑀢𑁆𑀣𑁂𑀯 𑀯𑁂𑀤𑀦𑀸𑀧𑁆𑀧𑀢𑁆𑀢𑀁 𑀓𑀢𑁆𑀯𑀸 𑀧𑀸𑀢𑁂𑀲𑀺. 𑀲𑁄 𑀧𑀭𑀺𑀤𑁂𑀯𑀫𑀸𑀦𑁄 𑀦𑀺𑀧𑀚𑁆𑀚𑀺. 𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀧𑀓𑀸𑀲𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁫.

‘‘𑀊𑀭𑀼𑀝𑁆𑀞𑀺 𑀪𑀕𑁆𑀕𑀁 𑀯𑀝𑁆𑀝𑀺𑀢𑁄 𑀔𑀸𑀭𑀺𑀪𑀸𑀭𑁄, 𑀲𑀩𑁆𑀩𑀜𑁆𑀘 𑀪𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀺𑀦𑁆𑀦𑀁;

𑀉𑀪𑁄𑀧𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀢𑀺, 𑀅𑀢𑀺𑀥𑀸𑀯𑀣 𑀳𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀊𑀭𑀼𑀝𑁆𑀞𑀺𑀓𑀁 𑀪𑀕𑁆𑀕𑀁, 𑀔𑀸𑀭𑀺𑀪𑀸𑀭𑁄 𑀯𑀝𑁆𑀝𑀺𑀢𑁄 𑀧𑀯𑀝𑁆𑀝𑀺𑀢𑁄, 𑀢𑀲𑁆𑀫𑀺𑀁 𑀧𑀯𑀝𑁆𑀝𑀫𑀸𑀦𑁂 𑀬𑀁 𑀢𑀢𑁆𑀣 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀧𑀓𑀭𑀡𑀪𑀡𑁆𑀟𑀁, 𑀢𑀫𑁆𑀧𑀺 𑀲𑀩𑁆𑀩𑀁 𑀪𑀺𑀦𑁆𑀦𑀁, 𑀲𑁄𑀧𑀺 𑀉𑀪𑁄 𑀩𑀸𑀳𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀧𑀭𑀺𑀲𑀁 𑀲𑀦𑁆𑀥𑀸𑀬 ‘‘𑀅𑀪𑀺𑀥𑀸𑀯𑀣, 𑀳𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀯𑀤𑀦𑁆𑀢𑁄 𑀓𑀦𑁆𑀤𑀢𑀺 𑀭𑁄𑀤𑀢𑀺 𑀧𑀭𑀺𑀤𑁂𑀯𑀢𑀻𑀢𑀺.

𑀧𑀭𑀺𑀩𑁆𑀩𑀸𑀚𑀓𑁄 𑀘𑀢𑀼𑀢𑁆𑀣𑀁 𑀕𑀸𑀣𑀁 𑀆𑀳 𑁋

𑁯𑁬.

‘‘𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀬𑁄 𑀅𑀧𑀽𑀚𑀁 𑀧𑀲𑀁𑀲𑀢𑀺;

𑀬𑀣𑀸𑀳𑀫𑀚𑁆𑀚 𑀧𑀳𑀢𑁄, 𑀳𑀢𑁄 𑀫𑁂𑀡𑁆𑀟𑁂𑀦 𑀤𑀼𑀫𑁆𑀫𑀢𑀻’’𑀢𑀺.

𑀢𑀢𑁆𑀣 𑀅𑀧𑀽𑀚𑀦𑁆𑀢𑀺 𑀅𑀧𑀽𑀚𑀦𑀻𑀬𑀁. 𑀬𑀣𑀸𑀳𑀫𑀚𑁆𑀚𑀸𑀢𑀺 𑀬𑀣𑀸 𑀅𑀳𑀁 𑀅𑀚𑁆𑀚 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀢𑁆𑀯𑀸 𑀞𑀺𑀢𑁄 𑀫𑁂𑀡𑁆𑀟𑁂𑀦 𑀤𑀴𑁆𑀳𑀧𑁆𑀧𑀳𑀸𑀭𑁂𑀦 𑀧𑀳𑀢𑁄 𑀏𑀢𑁆𑀣𑁂𑀯 𑀫𑀸𑀭𑀺𑀢𑁄 ¶ . 𑀤𑀼𑀫𑁆𑀫𑀢𑀻𑀢𑀺 𑀤𑀼𑀧𑁆𑀧𑀜𑁆𑀜𑁄. 𑀏𑀯𑀁 𑀬𑁄 𑀅𑀜𑁆𑀜𑁄𑀧𑀺 ¶ 𑀅𑀲𑀦𑁆𑀢𑀧𑀕𑁆𑀕𑀳𑀁 𑀓𑀭𑀺𑀲𑁆𑀲𑀢𑀺, 𑀲𑁄𑀧𑀺 𑀅𑀳𑀁 𑀯𑀺𑀬 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀢𑀻𑀢𑀺 𑀲𑁄 𑀧𑀭𑀺𑀤𑁂𑀯𑀦𑁆𑀢𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀘𑀫𑁆𑀫𑀲𑀸𑀝𑀓𑁄 𑀏𑀢𑀭𑀳𑀺 𑀘𑀫𑁆𑀫𑀲𑀸𑀝𑀓𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀯𑀸𑀡𑀺𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀫𑁆𑀫𑀲𑀸𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁨𑁫] 𑁫. 𑀕𑁄𑀥𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀲𑀫𑀡𑀁 𑀢𑀁 𑀫𑀜𑁆𑀜𑀫𑀸𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥𑀸𑀧𑀺 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀆𑀦𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀼𑀳𑀓𑁄’’𑀢𑀺 𑀲𑀢𑁆𑀣𑀼 𑀤𑀲𑁆𑀲𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑁄𑀥𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀬𑀩𑀮𑁂𑀦 𑀲𑀫𑁆𑀧𑀦𑁆𑀦𑁄 𑀅𑀭𑀜𑁆𑀜𑁂 𑀯𑀲𑀢𑀺 ¶ . 𑀏𑀓𑁄 𑀤𑀼𑀲𑀻𑀮𑀢𑀸𑀧𑀲𑁄𑀧𑀺 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀕𑁄𑀘𑀭𑀸𑀬 𑀘𑀭𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀲𑀻𑀮𑀯𑀦𑁆𑀢𑀢𑀸𑀧𑀲𑀲𑁆𑀲 𑀧𑀡𑁆𑀡𑀲𑀸𑀮𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀓𑀽𑀝𑀢𑀸𑀧𑀲𑁄 𑀉𑀧𑀝𑁆𑀞𑀸𑀓𑀓𑀼𑀮𑁂 𑀲𑀫𑁆𑀧𑀸𑀤𑀺𑀢𑀁 𑀫𑀥𑀼𑀭𑀫𑀁𑀲𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀫𑀁𑀲𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑁄𑀥𑀫𑀁𑀲’’𑀦𑁆𑀢𑀺 𑀲𑀼𑀢𑁆𑀯𑀸 𑀭𑀲𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄 ‘‘𑀫𑀬𑁆𑀳𑀁 𑀅𑀲𑁆𑀲𑀫𑀧𑀤𑀁 𑀦𑀺𑀩𑀤𑁆𑀥𑀁 𑀆𑀕𑀘𑁆𑀙𑀫𑀸𑀦𑀁 𑀕𑁄𑀥𑀁 𑀫𑀸𑀭𑁂𑀢𑁆𑀯𑀸 𑀬𑀣𑀸𑀭𑀼𑀘𑀺 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀧𑁆𑀧𑀺𑀤𑀥𑀺𑀓𑀝𑀼𑀓𑀪𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀓𑀸𑀲𑀸𑀯𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺.

𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀤𑀼𑀝𑁆𑀞𑀺𑀦𑁆𑀤𑁆𑀭𑀺𑀬𑀁 𑀤𑀺𑀲𑁆𑀯𑀸 ¶ ‘‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀲𑀚𑀸𑀢𑀺𑀓𑀫𑀁𑀲𑀁 𑀔𑀸𑀤𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀅𑀥𑁄𑀯𑀸𑀢𑁂 𑀞𑀢𑁆𑀯𑀸 𑀲𑀭𑀻𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀚𑀸𑀢𑀺𑀫𑀁𑀲𑀲𑁆𑀲 𑀔𑀸𑀤𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀸𑀧𑀲𑀁 𑀅𑀦𑀼𑀧𑀕𑀫𑁆𑀫 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀺. 𑀢𑀸𑀧𑀲𑁄𑀧𑀺 𑀢𑀲𑁆𑀲 𑀅𑀦𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀫𑀼𑀕𑁆𑀕𑀭𑀁 𑀔𑀺𑀧𑀺, 𑀫𑀼𑀕𑁆𑀕𑀭𑁄 𑀲𑀭𑀻𑀭𑁂 𑀅𑀧𑀢𑀺𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀓𑁄𑀝𑀺𑀁 𑀧𑀸𑀧𑀼𑀡𑀺. 𑀢𑀸𑀧𑀲𑁄 ‘‘𑀕𑀘𑁆𑀙 𑀯𑀺𑀭𑀤𑁆𑀥𑁄𑀲𑁆𑀫𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀁 𑀢𑀸𑀯 𑀯𑀺𑀭𑀤𑁆𑀥𑁄𑀲𑀺, 𑀘𑀢𑁆𑀢𑀸𑀭𑁄 𑀧𑀦 𑀅𑀧𑀸𑀬𑁂 𑀦 𑀯𑀺𑀭𑀤𑁆𑀥𑁄𑀲𑀻’’𑀢𑀺 ¶ 𑀯𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀺𑀢𑀁 𑀯𑀫𑁆𑀫𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀙𑀺𑀤𑁆𑀤𑁂𑀦 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁭.

‘‘𑀲𑀫𑀡𑀁 𑀢𑀁 𑀫𑀜𑁆𑀜𑀫𑀸𑀦𑁄, 𑀉𑀧𑀕𑀘𑁆𑀙𑀺𑀫𑀲𑀜𑁆𑀜𑀢𑀁;

𑀲𑁄 𑀫𑀁 𑀤𑀡𑁆𑀟𑁂𑀦 𑀧𑀸𑀳𑀸𑀲𑀺, 𑀬𑀣𑀸 𑀅𑀲𑁆𑀲𑀫𑀡𑁄 𑀢𑀣𑀸.

𑁯𑁮.

‘‘𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻’’𑀢𑀺.

𑀢𑀢𑁆𑀣 𑀅𑀲𑀜𑁆𑀜𑀢𑀦𑁆𑀢𑀺 𑀅𑀳𑀁 𑀓𑀸𑀬𑀸𑀤𑀻𑀳𑀺 𑀅𑀲𑀜𑁆𑀜𑀢𑀁 𑀅𑀲𑁆𑀲𑀫𑀡𑀫𑁂𑀯 𑀲𑀫𑀸𑀦𑀁 𑀢𑀁 ‘‘𑀲𑀫𑀡𑁄 𑀏𑀲𑁄’’𑀢𑀺 𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑀁 𑀫𑀜𑁆𑀜𑀫𑀸𑀦𑁄 𑀉𑀧𑀕𑀘𑁆𑀙𑀺𑀁. 𑀧𑀸𑀳𑀸𑀲𑀻𑀢𑀺 𑀧𑀳𑀭𑀺. 𑀅𑀚𑀺𑀦𑀲𑀸𑀝𑀺𑀬𑀸𑀢𑀺 𑀏𑀓𑀁𑀲𑀁 𑀓𑀢𑁆𑀯𑀸 𑀧𑀸𑀭𑀼𑀢𑁂𑀦 𑀅𑀚𑀺𑀦𑀘𑀫𑁆𑀫𑁂𑀦 𑀢𑀼𑀬𑁆𑀳𑀁 𑀓𑁄 𑀅𑀢𑁆𑀣𑁄. 𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀦𑁆𑀢𑀺 𑀢𑀯 𑀲𑀭𑀻𑀭𑀩𑁆𑀪𑀦𑁆𑀢𑀭𑀁 𑀯𑀺𑀲𑀧𑀽𑀭𑀸 𑀯𑀺𑀬 𑀅𑀮𑀸𑀩𑀼, 𑀕𑀽𑀣𑀧𑀽𑀭𑁄 𑀯𑀺𑀬 𑀆𑀯𑀸𑀝𑁄, 𑀆𑀲𑀻𑀯𑀺𑀲𑀧𑀽𑀭𑁄 𑀯𑀺𑀬 𑀯𑀫𑁆𑀫𑀺𑀓𑁄 𑀓𑀺𑀮𑁂𑀲𑀕𑀳𑀦𑀁. 𑀩𑀸𑀳𑀺𑀭𑀦𑁆𑀢𑀺 𑀓𑁂𑀯𑀮𑀁 𑀩𑀳𑀺𑀲𑀭𑀻𑀭𑀁 𑀧𑀭𑀺𑀫𑀚𑁆𑀚𑀲𑀺 ¶ , 𑀢𑀁 𑀅𑀦𑁆𑀢𑁄𑀨𑀭𑀼𑀲𑀢𑀸𑀬 𑀩𑀳𑀺𑀫𑀝𑁆𑀞𑀢𑀸𑀬 𑀳𑀢𑁆𑀣𑀺𑀮𑀡𑁆𑀟𑀁 𑀯𑀺𑀬 𑀅𑀲𑁆𑀲𑀮𑀡𑁆𑀟𑀁 𑀯𑀺𑀬 𑀘 𑀳𑁄𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁯.

‘‘𑀏𑀳𑀺 𑀕𑁄𑀥 𑀦𑀺𑀯𑀢𑁆𑀢𑀲𑁆𑀲𑀼, 𑀪𑀼𑀜𑁆𑀚 𑀲𑀸𑀮𑀻𑀦𑀫𑁄𑀤𑀦𑀁;

𑀢𑁂𑀮𑀁 𑀮𑁄𑀡𑀜𑁆𑀘 𑀫𑁂 𑀅𑀢𑁆𑀣𑀺, 𑀧𑀳𑀽𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀻’’𑀢𑀺.

𑀢𑀢𑁆𑀣 ¶ 𑀧𑀳𑀽𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀻𑀢𑀺 𑀦 𑀓𑁂𑀯𑀮𑀁 𑀲𑀸𑀮𑀻𑀦𑀫𑁄𑀤𑀦𑀁 𑀢𑁂𑀮𑀮𑁄𑀡𑀫𑁂𑀯, 𑀳𑀺𑀗𑁆𑀕𑀼𑀚𑀻𑀭𑀓𑀲𑀺𑀗𑁆𑀕𑀺𑀯𑁂𑀭𑀮𑀲𑀼𑀡𑀫𑀭𑀺𑀘𑀧𑀺𑀧𑁆𑀨𑀮𑀺𑀧𑁆𑀧𑀪𑁂𑀤𑀁 𑀓𑀝𑀼𑀓𑀪𑀡𑁆𑀟𑀫𑁆𑀧𑀺 𑀫𑀬𑁆𑀳𑀁 𑀩𑀳𑀼 𑀅𑀢𑁆𑀣𑀺, 𑀢𑁂𑀦𑀸𑀪𑀺𑀲𑀗𑁆𑀔𑀢𑀁 𑀲𑀸𑀮𑀻𑀦𑀫𑁄𑀤𑀦𑀁 𑀪𑀼𑀜𑁆𑀚𑀸𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁦𑁦.

‘‘𑀏𑀲 𑀪𑀺𑀬𑁆𑀬𑁄 𑀧𑀯𑁂𑀓𑁆𑀔𑀸𑀫𑀺, 𑀯𑀫𑁆𑀫𑀺𑀓𑀁 𑀲𑀢𑀧𑁄𑀭𑀺𑀲𑀁;

𑀢𑁂𑀮𑀁 𑀮𑁄𑀡𑀜𑁆𑀘 𑀓𑀺𑀢𑁆𑀢𑁂𑀲𑀺, 𑀅𑀳𑀺𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀻’’𑀢𑀺.

𑀢𑀢𑁆𑀣 ¶ 𑀧𑀯𑁂𑀓𑁆𑀔𑀸𑀫𑀻𑀢𑀺 𑀧𑀯𑀺𑀲𑀺𑀲𑁆𑀲𑀸𑀫𑀺. 𑀅𑀳𑀺𑀢𑀦𑁆𑀢𑀺 𑀬𑀁 𑀏𑀢𑀁 𑀢𑀯 𑀓𑀝𑀼𑀓𑀪𑀡𑁆𑀟𑀲𑀗𑁆𑀔𑀸𑀢𑀁 𑀧𑀺𑀧𑁆𑀨𑀮𑀺, 𑀏𑀢𑀁 𑀫𑀬𑁆𑀳𑀁 𑀅𑀳𑀺𑀢𑀁 𑀅𑀲𑀧𑁆𑀧𑀸𑀬𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀅𑀭𑁂, 𑀓𑀽𑀝𑀚𑀝𑀺𑀮, 𑀲𑀘𑁂 𑀇𑀥 𑀯𑀲𑀺𑀲𑁆𑀲𑀲𑀺, 𑀕𑁄𑀘𑀭𑀕𑀸𑀫𑁂 𑀫𑀦𑀼𑀲𑁆𑀲𑁂𑀳𑁂𑀯 𑀢𑀁 ‘𑀅𑀬𑀁 𑀘𑁄𑀭𑁄’𑀢𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀲𑁆𑀲𑀸𑀫𑀺, 𑀲𑀻𑀖𑀁 𑀧𑀮𑀸𑀬𑀲𑁆𑀲𑀽’’𑀢𑀺 𑀲𑀦𑁆𑀢𑀚𑁆𑀚𑁂𑀲𑀺. 𑀓𑀽𑀝𑀚𑀝𑀺𑀮𑁄 𑀢𑀢𑁄 𑀧𑀮𑀸𑀬𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀚𑀝𑀺𑀮𑁄 𑀅𑀬𑀁 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀕𑁄𑀥𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑁄𑀥𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁨𑁬] 𑁬. 𑀓𑀓𑁆𑀓𑀸𑀭𑀼𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀬𑁂𑀦 𑀬𑁄 𑀦𑀸𑀯𑀳𑀭𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀳𑀺 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀧𑀓𑁆𑀓𑀦𑁆𑀢𑀸𑀬 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀅𑀣 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀫𑀼𑀲𑀸𑀯𑀸𑀤𑀁 ¶ 𑀓𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀼𑀲𑀸𑀯𑀸𑀤𑀻𑀬𑁂𑀯, 𑀦 𑀘𑁂𑀲 𑀇𑀤𑀸𑀦𑁂𑀯 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀦𑀼𑀪𑁄𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀉𑀲𑁆𑀲𑀯𑁄 𑀅𑀳𑁄𑀲𑀺. 𑀩𑀳𑀽 𑀦𑀸𑀕𑀸 𑀘 𑀲𑀼𑀧𑀡𑁆𑀡𑀸 𑀘 𑀪𑀽𑀫𑀝𑁆𑀞𑀓𑀸 𑀘 𑀤𑁂𑀯𑀸 𑀆𑀕𑀦𑁆𑀢𑁆𑀯𑀸 𑀉𑀲𑁆𑀲𑀯𑀁 𑀑𑀮𑁄𑀓𑀬𑀺𑀁𑀲𑀼. 𑀢𑀸𑀯𑀢𑀺𑀁𑀲𑀪𑀯𑀦𑀢𑁄𑀧𑀺 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀓𑀓𑁆𑀓𑀸𑀭𑀽𑀦𑀺 𑀦𑀸𑀫 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀢𑁂𑀳𑀺 𑀓𑀢𑀘𑀼𑀫𑁆𑀩𑀝𑀓𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀉𑀲𑁆𑀲𑀯𑀤𑀲𑁆𑀲𑀦𑀁 𑀆𑀕𑀫𑀺𑀁𑀲𑀼. 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀦𑀕𑀭𑀁 𑀢𑁂𑀲𑀁 𑀧𑀼𑀧𑁆𑀨𑀸𑀦𑀁 𑀕𑀦𑁆𑀥𑁂𑀦 𑀏𑀓𑀕𑀦𑁆𑀥𑀁 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 ‘‘𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀓𑁂𑀦 𑀧𑀺𑀴𑀦𑁆𑀥𑀺𑀢𑀸𑀦𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑁂 𑀤𑁂𑀯𑀧𑀼𑀢𑁆𑀢𑀸 ‘‘𑀅𑀫𑁆𑀳𑁂 𑀏𑀢𑁂 𑀉𑀧𑀥𑀸𑀭𑁂𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀤𑁂𑀯𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀅𑀝𑁆𑀞𑀁𑀲𑀼. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺, 𑀭𑀸𑀚𑀸𑀧𑀺 𑀲𑀤𑁆𑀥𑀺𑀁 𑀉𑀧𑀭𑀸𑀚𑀸𑀤𑀻𑀳𑀺 𑀅𑀕𑀫𑀸𑀲𑀺. 𑀅𑀣 𑀦𑁂 ‘‘𑀓𑀢𑀭𑀤𑁂𑀯𑀮𑁄𑀓𑀢𑁄, 𑀲𑀸𑀫𑀺, 𑀆𑀕𑀘𑁆𑀙𑀣𑀸’’𑀢𑀺 ¶ 𑀧𑀼𑀘𑁆𑀙𑀺𑀁𑀲𑀼. ‘‘𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀢𑁄 𑀆𑀕𑀘𑁆𑀙𑀸𑀫𑀸’’𑀢𑀺. ‘‘𑀓𑁂𑀦 𑀓𑀫𑁆𑀫𑁂𑀦 𑀆𑀕𑀢𑀢𑁆𑀣𑀸’’𑀢𑀺. ‘‘𑀉𑀲𑁆𑀲𑀯𑀤𑀲𑁆𑀲𑀦𑀢𑁆𑀣𑀸𑀬𑀸’’𑀢𑀺. ‘‘𑀓𑀺𑀁𑀧𑀼𑀧𑁆𑀨𑀸𑀦𑀺 𑀦𑀸𑀫𑁂𑀢𑀸𑀦𑀻’’𑀢𑀺? ‘‘𑀤𑀺𑀩𑁆𑀩𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀸𑀦𑀺 𑀦𑀸𑀫𑀸’’𑀢𑀺. ‘‘𑀲𑀸𑀫𑀺, 𑀢𑀼𑀫𑁆𑀳𑁂 𑀤𑁂𑀯𑀮𑁄𑀓𑁂 𑀅𑀜𑁆𑀜𑀸𑀦𑀺 𑀧𑀺𑀴𑀦𑁆𑀥𑁂𑀬𑁆𑀬𑀸𑀣, 𑀇𑀫𑀸𑀦𑀺 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀤𑁂𑀯𑀧𑀼𑀢𑁆𑀢𑀸 ‘‘𑀤𑀺𑀩𑁆𑀩𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀸𑀦𑀺 𑀫𑀳𑀸𑀦𑀼𑀪𑀸𑀯𑀸𑀦𑀺 𑀤𑁂𑀯𑀸𑀦𑀜𑁆𑀜𑁂𑀯 𑀅𑀦𑀼𑀘𑁆𑀙𑀯𑀺𑀓𑀸𑀦𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀮𑀸𑀫𑀓𑀸𑀦𑀁 𑀤𑀼𑀧𑁆𑀧𑀜𑁆𑀜𑀸𑀦𑀁 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁 𑀦𑀸𑀦𑀼𑀘𑁆𑀙𑀯𑀺𑀓𑀸𑀦𑀺. 𑀬𑁂 𑀧𑀦 𑀫𑀦𑀼𑀲𑁆𑀲𑀸 𑀇𑀫𑁂𑀳𑀺 𑀘 𑀇𑀫𑁂𑀳𑀺 𑀘 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀢𑁂𑀲𑀁 𑀏𑀢𑀸𑀦𑀺 𑀅𑀦𑀼𑀘𑁆𑀙𑀯𑀺𑀓𑀸𑀦𑀻’’𑀢𑀺 𑀆𑀳𑀁𑀲𑀼.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂𑀲𑀼 𑀚𑁂𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁧.

‘‘𑀓𑀸𑀬𑁂𑀦 𑀬𑁄 𑀦𑀸𑀯𑀳𑀭𑁂, 𑀯𑀸𑀘𑀸𑀬 𑀦 𑀫𑀼𑀲𑀸 𑀪𑀡𑁂;

𑀬𑀲𑁄 𑀮𑀤𑁆𑀥𑀸 𑀦 𑀫𑀚𑁆𑀚𑁂𑀬𑁆𑀬, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑁄 𑀓𑀸𑀬𑁂𑀦 𑀧𑀭𑀲𑁆𑀲 𑀲𑀦𑁆𑀢𑀓𑀁 𑀢𑀺𑀡𑀲𑀮𑀸𑀓𑀫𑁆𑀧𑀺 𑀦𑀸𑀯𑀳𑀭𑀢𑀺, 𑀯𑀸𑀘𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀫𑀸𑀦𑁄𑀧𑀺 𑀫𑀼𑀲𑀸𑀯𑀸𑀤𑀁 𑀦 𑀪𑀡𑀢𑀺. 𑀤𑁂𑀲𑀦𑀸𑀲𑀻𑀲𑀫𑁂𑀯𑁂𑀢𑀁 ¶ , 𑀓𑀸𑀬𑀤𑁆𑀯𑀸𑀭𑀯𑀘𑀻𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀳𑀺 𑀧𑀦 𑀬𑁄 𑀤𑀲𑀧𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀦 𑀓𑀭𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁄 𑀮𑀤𑁆𑀥𑀸𑀢𑀺 𑀇𑀲𑁆𑀲𑀭𑀺𑀬𑀜𑁆𑀘 𑀮𑀪𑀺𑀢𑁆𑀯𑀸 𑀬𑁄 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑁄 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀲 𑀯𑁂 𑀏𑀯𑀭𑀽𑀧𑁄 𑀇𑀫𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀇𑀫𑀁 𑀤𑀺𑀩𑁆𑀩𑀧𑀼𑀧𑁆𑀨𑀁 𑀅𑀭𑀳𑀢𑀺. 𑀢𑀲𑁆𑀫𑀸 𑀬𑁄 𑀇𑀫𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀬𑀸𑀘𑀺𑀢𑀼𑀁 𑀅𑀭𑀳𑀢𑀺, 𑀢𑀲𑁆𑀲 𑀤𑀲𑁆𑀲𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀇𑀫𑁂𑀲𑀼 𑀕𑀼𑀡𑁂𑀲𑀼 𑀏𑀓𑁄𑀧𑀺 𑀦𑀢𑁆𑀣𑀺, 𑀫𑀼𑀲𑀸𑀯𑀸𑀤𑀁 𑀧𑀦 𑀯𑀢𑁆𑀯𑀸 𑀏𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀧𑀺𑀴𑀦𑁆𑀥𑀺𑀲𑁆𑀲𑀸𑀫𑀺, 𑀏𑀯𑀁 𑀫𑀁 𑀫𑀳𑀸𑀚𑀦𑁄 ‘𑀕𑀼𑀡𑀲𑀫𑁆𑀧𑀦𑁆𑀦𑁄 𑀅𑀬’𑀦𑁆𑀢𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀲𑁄 ‘‘𑀅𑀳𑀁 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀢𑁆𑀯𑀸 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀤𑀼𑀢𑀺𑀬𑀁 𑀤𑁂𑀯𑀧𑀼𑀢𑁆𑀢𑀁 𑀬𑀸𑀘𑀺. 𑀲𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁨.

‘‘𑀥𑀫𑁆𑀫𑁂𑀦 𑀯𑀺𑀢𑁆𑀢𑀫𑁂𑀲𑁂𑀬𑁆𑀬, 𑀦 𑀦𑀺𑀓𑀢𑁆𑀬𑀸 𑀥𑀦𑀁 𑀳𑀭𑁂;

𑀪𑁄𑀕𑁂 𑀮𑀤𑁆𑀥𑀸 𑀦 𑀫𑀚𑁆𑀚𑁂𑀬𑁆𑀬, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀥𑀫𑁆𑀫𑁂𑀦 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁂𑀦 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀢𑁆𑀢𑀁 𑀧𑀭𑀺𑀬𑁂𑀲𑁂𑀬𑁆𑀬. 𑀦 𑀦𑀺𑀓𑀢𑁆𑀬𑀸𑀢𑀺 𑀦 𑀯𑀜𑁆𑀘𑀦𑀸𑀬 𑀥𑀦𑀁 𑀳𑀭𑁂𑀬𑁆𑀬, 𑀯𑀢𑁆𑀣𑀸𑀪𑀭𑀡𑀸𑀤𑀺𑀓𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀧𑀫𑀸𑀤𑀁 𑀦𑀸𑀧𑀚𑁆𑀚𑁂𑀬𑁆𑀬, 𑀏𑀯𑀭𑀽𑀧𑁄 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀅𑀭𑀳𑀢𑀻𑀢𑀺.

𑀧𑀼𑀭𑁄𑀳𑀺𑀢𑁄 ¶ ‘‘𑀅𑀳𑀁 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀢𑁆𑀯𑀸 𑀢𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀢𑀢𑀺𑀬𑀁 𑀤𑁂𑀯𑀧𑀼𑀢𑁆𑀢𑀁 𑀬𑀸𑀘𑀺. 𑀲𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁩.

‘‘𑀬𑀲𑁆𑀲 𑀘𑀺𑀢𑁆𑀢𑀁 𑀅𑀳𑀸𑀮𑀺𑀤𑁆𑀤𑀁, 𑀲𑀤𑁆𑀥𑀸 𑀘 𑀅𑀯𑀺𑀭𑀸𑀕𑀺𑀦𑀻;

𑀏𑀓𑁄 𑀲𑀸𑀤𑀼𑀁 𑀦 𑀪𑀼𑀜𑁆𑀚𑁂𑀬𑁆𑀬, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀅𑀳𑀸𑀮𑀺𑀤𑁆𑀤𑀁 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬 𑀔𑀺𑀧𑁆𑀧𑀁 𑀦 𑀯𑀺𑀭𑀚𑁆𑀚𑀢𑀺, 𑀣𑀺𑀭𑀫𑁂𑀯 𑀳𑁄𑀢𑀺. 𑀲𑀤𑁆𑀥𑀸 𑀘 𑀅𑀯𑀺𑀭𑀸𑀕𑀺𑀦𑀻𑀢𑀺 𑀓𑀫𑁆𑀫𑀁 𑀯𑀸 𑀯𑀺𑀧𑀸𑀓𑀁 𑀯𑀸 𑀑𑀓𑀧𑁆𑀧𑀦𑀻𑀬𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀦 𑀯𑀺𑀭𑀚𑁆𑀚𑀢𑀺 𑀦 𑀪𑀺𑀚𑁆𑀚𑀢𑀺. 𑀬𑁄 𑀬𑀸𑀘𑀓𑁂 𑀯𑀸 𑀅𑀜𑁆𑀜𑁂 𑀯𑀸 𑀲𑀁𑀯𑀺𑀪𑀸𑀕𑀸𑀭𑀳𑁂 𑀧𑀼𑀕𑁆𑀕𑀮𑁂 𑀩𑀳𑀺 𑀓𑀢𑁆𑀯𑀸 ¶ 𑀏𑀓𑀓𑁄𑀯 𑀲𑀸𑀤𑀼𑀭𑀲𑀪𑁄𑀚𑀦𑀁 𑀦 𑀪𑀼𑀜𑁆𑀚𑀢𑀺, 𑀦𑁂𑀲𑀁 𑀲𑀁𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀲𑁄 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀅𑀭𑀳𑀢𑀻𑀢𑀺.

𑀧𑀼𑀭𑁄𑀳𑀺𑀢𑁄 ¶ ‘‘𑀅𑀳𑀁 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀢𑁆𑀯𑀸 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀁 𑀬𑀸𑀘𑀺. 𑀲𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁦𑁪.

‘‘𑀲𑀫𑁆𑀫𑀼𑀔𑀸 𑀯𑀸 𑀢𑀺𑀭𑁄𑀓𑁆𑀔𑀸 𑀯𑀸, 𑀬𑁄 𑀲𑀦𑁆𑀢𑁂 𑀦 𑀧𑀭𑀺𑀪𑀸𑀲𑀢𑀺;

𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀼𑀔𑀸 𑀯𑀸 𑀧𑀭𑀫𑁆𑀫𑀼𑀔𑀸 𑀯𑀸 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁂 𑀲𑀦𑁆𑀢𑁂 𑀉𑀢𑁆𑀢𑀫𑀧𑀡𑁆𑀟𑀺𑀢𑀧𑀼𑀭𑀺𑀲𑁂 𑀦 𑀅𑀓𑁆𑀓𑁄𑀲𑀢𑀺 𑀦 𑀧𑀭𑀺𑀪𑀸𑀲𑀢𑀺, 𑀬𑀁 𑀯𑀸𑀘𑀸𑀬 𑀯𑀤𑀢𑀺, 𑀢𑀤𑁂𑀯 𑀓𑀸𑀬𑁂𑀦 𑀓𑀭𑁄𑀢𑀺, 𑀲𑁄 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀅𑀭𑀳𑀢𑀻𑀢𑀺.

𑀧𑀼𑀭𑁄𑀳𑀺𑀢𑁄 ‘‘𑀅𑀳𑀁 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀢𑁆𑀯𑀸 𑀢𑀸𑀦𑀺𑀧𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀺. 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀘𑀢𑁆𑀢𑀸𑀭𑀺 𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀸𑀦𑀺 𑀧𑀼𑀭𑁄𑀳𑀺𑀢𑀲𑁆𑀲 𑀤𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑀸. 𑀢𑁂𑀲𑀁 𑀕𑀢𑀓𑀸𑀮𑁂 𑀧𑀼𑀭𑁄𑀳𑀺𑀢𑀲𑁆𑀲 𑀲𑀻𑀲𑁂 𑀫𑀳𑀢𑀻 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺, 𑀢𑀺𑀔𑀺𑀡𑀲𑀺𑀔𑀭𑁂𑀦 𑀦𑀺𑀫𑁆𑀫𑀣𑀺𑀢𑀁 𑀯𑀺𑀬 𑀘 𑀅𑀬𑀧𑀝𑁆𑀝𑁂𑀦 𑀧𑀻𑀴𑀺𑀢𑀁 𑀯𑀺𑀬 𑀘 𑀲𑀻𑀲𑀁 𑀅𑀳𑁄𑀲𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑁄 𑀫𑀳𑀸𑀲𑀤𑁆𑀤𑁂𑀦 𑀯𑀺𑀭𑀯𑀺, ‘‘𑀓𑀺𑀫𑁂𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁 𑀫𑀫𑀩𑁆𑀪𑀦𑁆𑀢𑀭𑁂 𑀅𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀕𑀼𑀡𑁂 ‘𑀅𑀢𑁆𑀣𑀻’𑀢𑀺 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀢𑁂 𑀤𑁂𑀯𑀧𑀼𑀢𑁆𑀢𑁂 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀬𑀸𑀘𑀺𑀁, 𑀳𑀭𑀣𑁂𑀢𑀸𑀦𑀺 𑀫𑀫 𑀲𑀻𑀲𑀢𑁄’’𑀢𑀺 𑀆𑀳. 𑀢𑀸𑀦𑀺 𑀳𑀭𑀦𑁆𑀢𑀸𑀧𑀺 𑀳𑀭𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀬𑀧𑀝𑁆𑀝𑁂𑀦 𑀩𑀤𑁆𑀥𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀅𑀣 𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑁂𑀳𑀁 𑀦𑀬𑀺𑀁𑀲𑀼. 𑀢𑀢𑁆𑀣 𑀢𑀲𑁆𑀲 𑀯𑀺𑀭𑀯𑀦𑁆𑀢𑀲𑁆𑀲 𑀲𑀢𑁆𑀢 𑀤𑀺𑀯𑀲𑀸 𑀯𑀻𑀢𑀺𑀯𑀢𑁆𑀢𑀸.

𑀭𑀸𑀚𑀸 ¶ 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀤𑀼𑀲𑁆𑀲𑀻𑀮𑀩𑁆𑀭𑀸𑀳𑁆𑀫𑀡𑁄 𑀫𑀭𑀺𑀲𑁆𑀲𑀢𑀺, 𑀓𑀺𑀁 𑀓𑀭𑁄𑀫𑀸’’𑀢𑀺 𑀆𑀳. ‘‘𑀤𑁂𑀯, 𑀧𑀼𑀦 𑀉𑀲𑁆𑀲𑀯𑀁 𑀓𑀸𑀭𑁂𑀫, 𑀤𑁂𑀯𑀧𑀼𑀢𑁆𑀢𑀸 𑀧𑀼𑀦 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺. 𑀭𑀸𑀚𑀸 𑀧𑀼𑀦 𑀉𑀲𑁆𑀲𑀯𑀁 ¶ 𑀓𑀸𑀭𑁂𑀲𑀺. 𑀤𑁂𑀯𑀧𑀼𑀢𑁆𑀢𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀲𑀓𑀮𑀦𑀕𑀭𑀁 𑀧𑀼𑀧𑁆𑀨𑀕𑀦𑁆𑀥𑁂𑀦 𑀏𑀓𑀕𑀦𑁆𑀥𑀁 𑀓𑀢𑁆𑀯𑀸 𑀢𑀣𑁂𑀯 𑀭𑀸𑀚𑀗𑁆𑀕𑀡𑁂 𑀅𑀝𑁆𑀞𑀁𑀲𑀼, 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑀩𑁆𑀭𑀸𑀳𑁆𑀫𑀡𑀁 𑀆𑀦𑁂𑀢𑁆𑀯𑀸 𑀢𑁂𑀲𑀁 𑀧𑀼𑀭𑀢𑁄 𑀉𑀢𑁆𑀢𑀸𑀦𑀁 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑁄 ‘‘𑀚𑀻𑀯𑀺𑀢𑀁 𑀫𑁂 𑀤𑁂𑀣, 𑀲𑀸𑀫𑀻’’𑀢𑀺 𑀤𑁂𑀯𑀧𑀼𑀢𑁆𑀢𑁂 𑀬𑀸𑀘𑀺. 𑀤𑁂𑀯𑀧𑀼𑀢𑁆𑀢𑀸 ‘‘𑀢𑀼𑀬𑁆𑀳𑀁 𑀤𑀼𑀲𑁆𑀲𑀻𑀮𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀸𑀦𑁂𑀯𑁂𑀢𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀢𑁆𑀯𑀁 𑀧𑀦 ‘𑀅𑀫𑁆𑀳𑁂 𑀯𑀜𑁆𑀘𑁂𑀲𑁆𑀲𑀸𑀫𑀻’𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺, 𑀅𑀢𑁆𑀢𑀦𑁄 𑀫𑀼𑀲𑀸𑀯𑀸𑀤𑀨𑀮𑀁 𑀮𑀤𑁆𑀥’’𑀦𑁆𑀢𑀺 𑀫𑀳𑀸𑀚𑀦𑀫𑀚𑁆𑀛𑁂 𑀤𑀼𑀲𑁆𑀲𑀻𑀮𑀩𑁆𑀭𑀸𑀳𑁆𑀫𑀡𑀁 𑀕𑀭𑀳𑀺𑀢𑁆𑀯𑀸 𑀲𑀻𑀲𑀢𑁄 𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀁 𑀅𑀧𑀦𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀢𑁂𑀲𑀼 𑀤𑁂𑀯𑀧𑀼𑀢𑁆𑀢𑁂𑀲𑀼 𑀏𑀓𑁄 𑀓𑀲𑁆𑀲𑀧𑁄, 𑀏𑀓𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀏𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀚𑁂𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀓𑁆𑀓𑀸𑀭𑀼𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁨𑁭] 𑁭. 𑀓𑀸𑀓𑀯𑀢𑀻𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀢𑀺 𑀘𑀸𑀬𑀁 𑀢𑀢𑁄 𑀕𑀦𑁆𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺. ‘‘𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺? ‘‘𑀓𑀺𑀮𑁂𑀲𑀯𑀲𑁂𑀦, 𑀪𑀦𑁆𑀢𑁂’’𑀢𑀺. ‘‘𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀭𑀓𑁆𑀔𑀺𑀬𑁄, 𑀦 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀦 𑀫𑀸𑀢𑀼𑀕𑀸𑀫𑀁 𑀫𑀳𑀸𑀲𑀫𑀼𑀤𑁆𑀤𑀫𑀚𑁆𑀛𑁂 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀯𑀺𑀫𑀸𑀦𑁂 𑀯𑀲𑀸𑀧𑁂𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀓𑀸𑀓𑀯𑀢𑀻 𑀦𑀸𑀫𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺 𑀅𑀪𑀺𑀭𑀽𑀧𑀸 𑀤𑁂𑀯𑀘𑁆𑀙𑀭𑀸 𑀯𑀺𑀬. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄 ¶ , 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀢𑀻𑀢𑀯𑀢𑁆𑀣𑀼 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦𑁂𑀓𑁄 𑀲𑀼𑀧𑀡𑁆𑀡𑀭𑀸𑀚𑀸 𑀫𑀦𑀼𑀲𑁆𑀲𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀲𑀳 𑀚𑀽𑀢𑀁 𑀓𑀻𑀴𑀦𑁆𑀢𑁄 𑀓𑀸𑀓𑀯𑀢𑀺𑀬𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀢𑀁 𑀆𑀤𑀸𑀬 𑀲𑀼𑀧𑀡𑁆𑀡𑀪𑀯𑀦𑀁 𑀦𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺. 𑀭𑀸𑀚𑀸 𑀤𑁂𑀯𑀺𑀁 𑀅𑀧𑀲𑁆𑀲𑀦𑁆𑀢𑁄 𑀦𑀝𑀓𑀼𑀯𑁂𑀭𑀁 𑀦𑀸𑀫 ¶ 𑀕𑀦𑁆𑀥𑀩𑁆𑀩𑀁 ‘‘𑀢𑁆𑀯𑀁 𑀯𑀺𑀘𑀺𑀦𑀸𑀳𑀺 𑀦’’𑀦𑁆𑀢𑀺 𑀆𑀳. 𑀲𑁄 𑀢𑀁 𑀲𑀼𑀧𑀡𑁆𑀡𑀭𑀸𑀚𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀭𑁂 𑀏𑀭𑀓𑀯𑀦𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀲𑀼𑀧𑀡𑁆𑀡𑀲𑁆𑀲 𑀕𑀫𑀦𑀓𑀸𑀮𑁂 𑀧𑀢𑁆𑀢𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀧𑀡𑁆𑀡𑀪𑀯𑀦𑀁 𑀧𑀢𑁆𑀯𑀸 𑀧𑀢𑁆𑀢𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀓𑀢𑁆𑀯𑀸 𑀧𑀼𑀦 𑀢𑀲𑁆𑀲𑁂𑀯 𑀧𑀢𑁆𑀢𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀆𑀕𑀦𑁆𑀢𑁆𑀯𑀸 𑀲𑀼𑀧𑀡𑁆𑀡𑀲𑁆𑀲 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀚𑀽𑀢𑀓𑀻𑀴𑀦𑀓𑀸𑀮𑁂 𑀅𑀢𑁆𑀢𑀦𑁄 𑀯𑀻𑀡𑀁 𑀕𑀳𑁂𑀢𑁆𑀯𑀸 𑀚𑀽𑀢𑀫𑀡𑁆𑀟𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀺𑀢𑁄 𑀕𑀻𑀢𑀯𑀲𑁂𑀦 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁫.

‘‘𑀯𑀸𑀢𑀺 ¶ 𑀘𑀸𑀬𑀁 𑀢𑀢𑁄 𑀕𑀦𑁆𑀥𑁄, 𑀬𑀢𑁆𑀣 𑀫𑁂 𑀯𑀲𑀢𑀻 𑀧𑀺𑀬𑀸;

𑀤𑀽𑀭𑁂 𑀇𑀢𑁄 𑀳𑀺 𑀓𑀸𑀓𑀯𑀢𑀻, 𑀬𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄’’𑀢𑀺.

𑀢𑀢𑁆𑀣 𑀕𑀦𑁆𑀥𑁄𑀢𑀺 𑀢𑀲𑁆𑀲𑀸 𑀤𑀺𑀩𑁆𑀩𑀕𑀦𑁆𑀥𑀯𑀺𑀮𑀺𑀢𑁆𑀢𑀸𑀬 𑀲𑀭𑀻𑀭𑀕𑀦𑁆𑀥𑁄. 𑀬𑀢𑁆𑀣 𑀫𑁂𑀢𑀺 𑀬𑀢𑁆𑀣 𑀲𑀼𑀧𑀡𑁆𑀡𑀪𑀯𑀦𑁂 𑀫𑀫 𑀧𑀺𑀬𑀸 𑀯𑀲𑀢𑀺, 𑀢𑀢𑁄 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀓𑀢𑀓𑀸𑀬𑀲𑀁𑀲𑀕𑁆𑀕𑀸𑀬 𑀢𑀲𑁆𑀲𑀸 𑀇𑀫𑀲𑁆𑀲 𑀓𑀸𑀬𑁂𑀦 𑀲𑀤𑁆𑀥𑀺𑀁 𑀆𑀕𑀢𑁄 𑀕𑀦𑁆𑀥𑁄 𑀯𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀽𑀭𑁂 𑀇𑀢𑁄𑀢𑀺 𑀇𑀫𑀫𑁆𑀳𑀸 𑀞𑀸𑀦𑀸 𑀤𑀽𑀭𑁂. 𑀳𑀺-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄. 𑀓𑀸𑀓𑀯𑀢𑀻𑀢𑀺 𑀓𑀸𑀓𑀯𑀢𑀻 𑀤𑁂𑀯𑀻. 𑀬𑀢𑁆𑀣 𑀫𑁂𑀢𑀺 𑀬𑀲𑁆𑀲𑀸 𑀉𑀧𑀭𑀺 𑀫𑀫 𑀫𑀦𑁄 𑀦𑀺𑀭𑀢𑁄.

𑀢𑀁 𑀲𑀼𑀢𑁆𑀯𑀸 𑀲𑀼𑀧𑀡𑁆𑀡𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁬.

‘‘𑀓𑀣𑀁 𑀲𑀫𑀼𑀤𑁆𑀤𑀫𑀢𑀭𑀻, 𑀓𑀣𑀁 𑀅𑀢𑀭𑀺 𑀓𑁂𑀧𑀼𑀓𑀁;

𑀓𑀣𑀁 𑀲𑀢𑁆𑀢 𑀲𑀫𑀼𑀤𑁆𑀤𑀸𑀦𑀺, 𑀓𑀣𑀁 𑀲𑀺𑀫𑁆𑀩𑀮𑀺𑀫𑀸𑀭𑀼𑀳𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁 𑀇𑀫𑀁 𑀚𑀫𑁆𑀩𑀼𑀤𑀻𑀧𑀲𑀫𑀼𑀤𑁆𑀤𑀁 𑀢𑀲𑁆𑀲 𑀧𑀭𑀢𑁄 𑀓𑁂𑀧𑀼𑀓𑀁 𑀦𑀸𑀫 𑀦𑀤𑀺𑀁 𑀧𑀩𑁆𑀩𑀢𑀦𑁆𑀢𑀭𑁂𑀲𑀼 𑀞𑀺𑀢𑀸𑀦𑀺 𑀲𑀢𑁆𑀢 𑀲𑀫𑀼𑀤𑁆𑀤𑀸𑀦𑀺 𑀘 𑀓𑀣𑀁 𑀅𑀢𑀭𑀺, 𑀓𑁂𑀦𑀼𑀧𑀸𑀬𑁂𑀦 𑀢𑀺𑀡𑁆𑀡𑁄 𑀲𑀢𑁆𑀢 𑀲𑀫𑀼𑀤𑁆𑀤𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀁 𑀅𑀫𑁆𑀳𑀸𑀓𑀁 𑀪𑀯𑀦𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀜𑁆𑀘 𑀓𑀣𑀁 𑀆𑀭𑀼𑀳𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀦𑀝𑀓𑀼𑀯𑁂𑀭𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁭.

‘‘𑀢𑀬𑀸 𑀲𑀫𑀼𑀤𑁆𑀤𑀫𑀢𑀭𑀺𑀁, 𑀢𑀬𑀸 𑀅𑀢𑀭𑀺 𑀓𑁂𑀧𑀼𑀓𑀁;

𑀢𑀬𑀸 𑀲𑀢𑁆𑀢 𑀲𑀫𑀼𑀤𑁆𑀤𑀸𑀦𑀺, 𑀢𑀬𑀸 𑀲𑀺𑀫𑁆𑀩𑀮𑀺𑀫𑀸𑀭𑀼𑀳𑀺’’𑀦𑁆𑀢𑀺.

𑀢𑀢𑁆𑀣 𑀢𑀬𑀸𑀢𑀺 𑀢𑀬𑀸 𑀓𑀭𑀡𑀪𑀽𑀢𑁂𑀦 𑀢𑀯 𑀧𑀢𑁆𑀢𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀅𑀳𑀁 𑀲𑀩𑁆𑀩𑀫𑁂𑀢𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁄 ¶ 𑀲𑀼𑀧𑀡𑁆𑀡𑀭𑀸𑀚𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀥𑀺𑀭𑀢𑁆𑀣𑀼 𑀫𑀁 𑀫𑀳𑀸𑀓𑀸𑀬𑀁, 𑀥𑀺𑀭𑀢𑁆𑀣𑀼 𑀫𑀁 𑀅𑀘𑁂𑀢𑀦𑀁;

𑀬𑀢𑁆𑀣 𑀚𑀸𑀬𑀸𑀬𑀳𑀁 𑀚𑀸𑀭𑀁, 𑀆𑀯𑀳𑀸𑀫𑀺 𑀯𑀳𑀸𑀫𑀺 𑀘𑀸’’𑀢𑀺.

𑀢𑀢𑁆𑀣 𑀥𑀺𑀭𑀢𑁆𑀣𑀼 𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀦𑁆𑀢𑁄 𑀆𑀳. 𑀅𑀘𑁂𑀢𑀦𑀦𑁆𑀢𑀺 𑀫𑀳𑀸𑀲𑀭𑀻𑀭𑀢𑀸𑀬 𑀮𑀳𑀼𑀪𑀸𑀯𑀕𑀭𑀼𑀪𑀸𑀯𑀲𑁆𑀲 𑀅𑀚𑀸𑀦𑀦𑀢𑀸𑀬 𑀅𑀘𑁂𑀢𑀦𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀳𑀁 𑀅𑀢𑁆𑀢𑀦𑁄 𑀚𑀸𑀬𑀸𑀬 𑀚𑀸𑀭𑀁 𑀇𑀫𑀁 𑀕𑀦𑁆𑀥𑀩𑁆𑀩𑀁 ¶ 𑀧𑀢𑁆𑀢𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀁 𑀆𑀦𑁂𑀦𑁆𑀢𑁄 𑀆𑀯𑀳𑀸𑀫𑀺 𑀦𑁂𑀦𑁆𑀢𑁄 𑀘 𑀯𑀳𑀸𑀫𑀺, 𑀢𑀲𑁆𑀫𑀸 𑀥𑀺𑀭𑀢𑁆𑀣𑀼 𑀫𑀦𑁆𑀢𑀺. 𑀲𑁄 𑀢𑀁 𑀆𑀦𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑀢𑁆𑀯𑀸 𑀧𑀼𑀦 𑀦𑀕𑀭𑀁 𑀦𑀸𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀦𑀝𑀓𑀼𑀯𑁂𑀭𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀸𑀓𑀯𑀢𑀻𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁨𑁮] 𑁮. 𑀅𑀦𑀦𑀼𑀲𑁄𑀘𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀽𑀦𑀁 𑀯𑀺𑀚𑁆𑀚𑀢𑀻 𑀪𑁄𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀢𑀪𑀭𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀭𑀺𑀬𑀸𑀬 𑀫𑀢𑀸𑀬 𑀦 𑀦𑁆𑀳𑀸𑀬𑀺 𑀦 𑀧𑀺𑀯𑀺 𑀦 𑀮𑀺𑀫𑁆𑀧𑀺 𑀦 𑀪𑀼𑀜𑁆𑀚𑀺, 𑀦 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀺, 𑀅𑀜𑁆𑀜𑀤𑀢𑁆𑀣𑀼 𑀲𑁄𑀓𑀸𑀪𑀺𑀪𑀽𑀢𑁄 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀯𑀺𑀘𑀭𑀺. 𑀅𑀩𑁆𑀪𑀦𑁆𑀢𑀭𑁂 𑀧𑀦𑀲𑁆𑀲 𑀓𑀼𑀝𑁂 𑀧𑀤𑀻𑀧𑁄 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀚𑀮𑀢𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀲𑁄𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀤𑀸𑀬𑀓𑁄 𑀦𑀢𑁆𑀣𑀺, 𑀪𑀯𑀺𑀲𑁆𑀲𑀸𑀫𑀺𑀲𑁆𑀲 𑀅𑀯𑀲𑁆𑀲𑀬𑁄’’𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀘𑁆𑀙𑀸𑀲𑀫𑀡𑀁 𑀆𑀤𑀸𑀬 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑁂𑀦 𑀲𑀼𑀢𑀸𑀕𑀫𑀦𑁄 ¶ 𑀓𑀢𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀲𑀓𑁆𑀓𑀸𑀭𑁄 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀓𑀼𑀝𑀼𑀫𑁆𑀩𑀺𑀓𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 ‘‘𑀓𑀺𑀁, 𑀉𑀧𑀸𑀲𑀓, 𑀘𑀺𑀦𑁆𑀢𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂, 𑀪𑀭𑀺𑀬𑀸 𑀫𑁂 𑀓𑀸𑀮𑀓𑀢𑀸, 𑀢𑀫𑀳𑀁 𑀅𑀦𑀼𑀲𑁄𑀘𑀦𑁆𑀢𑁄 𑀘𑀺𑀦𑁆𑀢𑁂𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀸𑀲𑀓, 𑀪𑀺𑀚𑁆𑀚𑀦𑀥𑀫𑁆𑀫𑀁 𑀦𑀸𑀫 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀪𑀺𑀦𑁆𑀦𑁂 𑀦 𑀬𑀼𑀢𑁆𑀢𑀁 𑀘𑀺𑀦𑁆𑀢𑁂𑀢𑀼𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀪𑀭𑀺𑀬𑀸𑀬 𑀫𑀢𑀸𑀬 ‘𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀚𑁆𑀚𑀢𑀻’𑀢𑀺 𑀦 𑀘𑀺𑀦𑁆𑀢𑀬𑀺𑀁𑀲𑀽’’𑀢𑀺 ¶ 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺. 𑀅𑀢𑀻𑀢𑀯𑀢𑁆𑀣𑀼 𑀤𑀲𑀓𑀦𑀺𑀧𑀸𑀢𑁂 𑀘𑀽𑀴𑀩𑁄𑀥𑀺𑀚𑀸𑀢𑀓𑁂 (𑀚𑀸. 𑁧.𑁧𑁦.𑁪𑁯 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 ¶ 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁄 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀢𑀯 𑀤𑀸𑀭𑀺𑀓𑀧𑀭𑀺𑀬𑁂𑀲𑀦𑀁 𑀓𑀭𑁄𑀫𑀸’’𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦𑀢𑁆𑀣𑁄, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁄 𑀏𑀓𑀁 𑀓𑀜𑁆𑀘𑀦𑀭𑀽𑀧𑀓𑀁 𑀓𑀸𑀭𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀓𑀼𑀫𑀸𑀭𑀺𑀓𑀁 𑀮𑀪𑀫𑀸𑀦𑁄 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀓𑀜𑁆𑀘𑀦𑀭𑀽𑀧𑀓𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀆𑀭𑁄𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀚𑀫𑁆𑀩𑀼𑀤𑀻𑀧𑀢𑀮𑀁 𑀯𑀺𑀘𑀭𑀦𑁆𑀢𑀸 𑀬𑀢𑁆𑀣 𑀏𑀯𑀭𑀽𑀧𑀁 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀺𑀓𑀁 𑀧𑀲𑁆𑀲𑀣, 𑀢𑀢𑁆𑀣 𑀇𑀫𑀁 𑀓𑀜𑁆𑀘𑀦𑀭𑀽𑀧𑀓𑀁 𑀤𑀢𑁆𑀯𑀸 𑀢𑀁 𑀆𑀦𑁂𑀣𑀸’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀼𑀁.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀏𑀓𑁄 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀓𑀸𑀲𑀺𑀭𑀝𑁆𑀞𑁂𑀬𑁂𑀯 𑀦𑀺𑀕𑀫𑀕𑀸𑀫𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀓𑀼𑀫𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, ‘‘𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀻’’𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀧𑀸𑀲𑀸𑀤𑀺𑀓𑀸 𑀤𑁂𑀯𑀘𑁆𑀙𑀭𑀧𑁆𑀧𑀝𑀺𑀪𑀸𑀕𑀸 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸. 𑀢𑀲𑁆𑀲𑀸𑀧𑀺 𑀓𑀺𑀮𑁂𑀲𑀯𑀲𑁂𑀦 𑀘𑀺𑀢𑁆𑀢𑀁 𑀦𑀸𑀫 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀺𑀦𑀻 𑀅𑀳𑁄𑀲𑀺. 𑀓𑀜𑁆𑀘𑀦𑀭𑀽𑀧𑀓𑀁 ¶ 𑀆𑀤𑀸𑀬 𑀯𑀺𑀘𑀭𑀦𑁆𑀢𑀸 𑀫𑀦𑀼𑀲𑁆𑀲𑀸 𑀢𑀁 𑀕𑀸𑀫𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀲𑀼𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀻 𑀓𑀺𑀁𑀓𑀸𑀭𑀡𑀸 𑀇𑀥 𑀞𑀺𑀢𑀸’’𑀢𑀺 𑀆𑀳𑀁𑀲𑀼. 𑀫𑀦𑀼𑀲𑁆𑀲𑀸 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀺𑀁 𑀯𑀸𑀭𑁂𑀲𑀼𑀁. 𑀲𑀸 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀫𑁂 𑀖𑀭𑀸𑀯𑀸𑀲𑁂𑀦𑀢𑁆𑀣𑁄’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀢𑁂 ‘‘𑀓𑀺𑀁 𑀓𑀭𑁄𑀲𑀺 𑀓𑀼𑀫𑀸𑀭𑀺𑀓𑁂’’𑀢𑀺 𑀯𑀢𑁆𑀯𑀸 𑀓𑀜𑁆𑀘𑀦𑀭𑀽𑀧𑀓𑀁 𑀕𑀳𑁂𑀢𑁆𑀯𑀸 𑀢𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑁂𑀲𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀺𑀬𑀸 𑀘 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑀸𑀦𑀜𑁆𑀜𑁂𑀯 𑀫𑀗𑁆𑀕𑀮𑀁 𑀓𑀭𑀺𑀁𑀲𑀼. 𑀢𑁂 𑀏𑀓𑀕𑀩𑁆𑀪𑁂 𑀯𑀲𑀫𑀸𑀦𑀸 𑀏𑀓𑀲𑁆𑀫𑀺𑀁 𑀲𑀬𑀦𑁂 𑀲𑀬𑀦𑁆𑀢𑀸𑀧𑀺 𑀦 𑀅𑀜𑁆𑀜𑀫𑀜𑁆𑀜𑀁 𑀓𑀺𑀮𑁂𑀲𑀯𑀲𑁂𑀦 𑀑𑀮𑁄𑀓𑀬𑀺𑀁𑀲𑀼, 𑀤𑁆𑀯𑁂 𑀪𑀺𑀓𑁆𑀔𑀽 𑀤𑁆𑀯𑁂 𑀩𑁆𑀭𑀸𑀳𑁆𑀫𑀸𑀦𑁄 𑀯𑀺𑀬 𑀘 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀁𑀲𑀼.

𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑁄 𑀢𑁂𑀲𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀫𑀫 𑀓𑀼𑀮𑀲𑀦𑁆𑀢𑀓𑀸 𑀅𑀲𑀻𑀢𑀺𑀓𑁄𑀝𑀺𑀬𑁄, 𑀢𑀯 𑀓𑀼𑀮𑀲𑀦𑁆𑀢𑀓𑀸 𑀅𑀲𑀻𑀢𑀺𑀓𑁄𑀝𑀺𑀬𑁄𑀢𑀺 𑀇𑀫𑀁 𑀏𑀢𑁆𑀢𑀓𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀓𑀼𑀝𑀼𑀫𑁆𑀩𑀁 𑀧𑀝𑀺𑀧𑀚𑁆𑀚𑀸𑀳𑀺, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀅𑀬𑁆𑀬𑀧𑀼𑀢𑁆𑀢, 𑀢𑀬𑀺 𑀧𑀩𑁆𑀩𑀚𑀦𑁆𑀢𑁂 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀲𑀓𑁆𑀓𑁄𑀫𑀺 𑀢𑀁 𑀚𑀳𑀺𑀢𑀼’’𑀦𑁆𑀢𑀺 ¶ . ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀲𑀩𑁆𑀩𑀁 𑀥𑀦𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 ¶ 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀉𑀪𑁄𑀧𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀸 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀁𑀲𑀼.

𑀢𑁂𑀲𑀁 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀲𑀼𑀔𑀼𑀫𑀸𑀮𑀸𑀬 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀦𑀺𑀭𑁄𑀚𑀁 𑀫𑀺𑀲𑁆𑀲𑀓𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀩𑀸𑀥𑁄 𑀉𑀧𑁆𑀧𑀚𑁆𑀚𑀺. 𑀲𑀸 𑀲𑀧𑁆𑀧𑀸𑀬𑀪𑁂𑀲𑀚𑁆𑀚𑀁 𑀅𑀮𑀪𑀫𑀸𑀦𑀸 𑀤𑀼𑀩𑁆𑀩𑀮𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀁 𑀦𑁂𑀢𑁆𑀯𑀸 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀨𑀮𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀬𑀁 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺. 𑀲𑀸 𑀢𑀲𑁆𑀫𑀺𑀁 𑀅𑀦𑀺𑀓𑁆𑀔𑀦𑁆𑀢𑁂𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀫𑀳𑀸𑀚𑀦𑁄 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 ¶ 𑀤𑀺𑀲𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑁄𑀤𑀢𑀺 𑀧𑀭𑀺𑀤𑁂𑀯𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀆𑀕𑀢𑁄 𑀢𑀲𑁆𑀲𑀸 𑀫𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀚𑁆𑀚𑀢𑀺, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀏𑀯𑀁𑀕𑀢𑀺𑀓𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀸𑀬 𑀦𑀺𑀧𑀦𑁆𑀦𑀨𑀮𑀓𑁂𑀬𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀫𑀺𑀲𑁆𑀲𑀓𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑀺. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀫𑀳𑀸𑀚𑀦𑁄 ‘‘𑀅𑀬𑀁 𑀢𑁂, 𑀪𑀦𑁆𑀢𑁂, 𑀧𑀭𑀺𑀩𑁆𑀩𑀸𑀚𑀺𑀓𑀸 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀕𑀺𑀳𑀺𑀓𑀸𑀮𑁂 𑀫𑁂 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀳𑁄𑀲𑀻’’𑀢𑀺. ‘‘𑀪𑀦𑁆𑀢𑁂, 𑀫𑀬𑀁 𑀢𑀸𑀯 𑀦 𑀲𑀡𑁆𑀞𑀸𑀫 𑀭𑁄𑀤𑀸𑀫 𑀧𑀭𑀺𑀤𑁂𑀯𑀸𑀫, 𑀢𑀼𑀫𑁆𑀳𑁂 𑀓𑀲𑁆𑀫𑀸 𑀦 𑀭𑁄𑀤𑀣𑀸’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ‘‘𑀚𑀻𑀯𑀫𑀸𑀦𑀸 𑀢𑀸𑀯 𑀏𑀲𑀸 𑀫𑀫 𑀓𑀺𑀜𑁆𑀘𑀺 𑀳𑁄𑀢𑀺, 𑀇𑀤𑀸𑀦𑀺 𑀧𑀭𑀮𑁄𑀓𑀲𑀫𑀗𑁆𑀕𑀺𑀢𑀸𑀬 𑀦 𑀓𑀺𑀜𑁆𑀘𑀺 𑀳𑁄𑀢𑀺, 𑀫𑀭𑀡𑀯𑀲𑀁 𑀕𑀢𑀸, 𑀅𑀳𑀁 𑀓𑀺𑀲𑁆𑀲 𑀭𑁄𑀤𑀸𑀫𑀻’’𑀢𑀺 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁯.

‘‘𑀩𑀳𑀽𑀦𑀁 𑀯𑀺𑀚𑁆𑀚𑀢𑀻 𑀪𑁄𑀢𑀻, 𑀢𑁂𑀳𑀺 𑀫𑁂 𑀓𑀺𑀁 𑀪𑀯𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀧𑀺𑀬𑀁 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀺𑀁.

𑁧𑁧𑁦.

‘‘𑀢𑀁 𑀢𑀁 𑀘𑁂 𑀅𑀦𑀼𑀲𑁄𑀘𑁂𑀬𑁆𑀬, 𑀬𑀁 𑀬𑀁 𑀢𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀅𑀢𑁆𑀢𑀸𑀦𑀫𑀦𑀼𑀲𑁄𑀘𑁂𑀬𑁆𑀬, 𑀲𑀤𑀸 𑀫𑀘𑁆𑀘𑀼𑀯𑀲𑀁 𑀧𑀢𑀁.

𑁧𑁧𑁧.

‘‘𑀦 𑀳𑁂𑀯 𑀞𑀺𑀢𑀁 𑀦𑀸𑀲𑀻𑀦𑀁, 𑀦 𑀲𑀬𑀸𑀦𑀁 𑀦 𑀧𑀤𑁆𑀥𑀕𑀼𑀁;

𑀬𑀸𑀯 𑀩𑁆𑀬𑀸𑀢𑀺 𑀦𑀺𑀫𑀺𑀲𑀢𑀺, 𑀢𑀢𑁆𑀭𑀸𑀧𑀺 𑀭𑀲𑀢𑀻 𑀯𑀬𑁄.

𑁧𑁧𑁨.

‘‘𑀢𑀢𑁆𑀣𑀢𑁆𑀢𑀦𑀺 𑀯𑀢𑀧𑁆𑀧𑀤𑁆𑀥𑁂, 𑀯𑀺𑀦𑀸𑀪𑀸𑀯𑁂 𑀅𑀲𑀁𑀲𑀬𑁂;

𑀪𑀽𑀢𑀁 𑀲𑁂𑀲𑀁 𑀤𑀬𑀺𑀢𑀩𑁆𑀩𑀁, 𑀯𑀻𑀢𑀁 𑀅𑀦𑀦𑀼𑀲𑁄𑀘𑀺𑀬’’𑀦𑁆𑀢𑀺.

𑀢𑀢𑁆𑀣 ¶ 𑀩𑀳𑀽𑀦𑀁 𑀯𑀺𑀚𑁆𑀚𑀢𑀻 𑀪𑁄𑀢𑀻𑀢𑀺 𑀅𑀬𑀁 𑀪𑁄𑀢𑀻 𑀅𑀫𑁆𑀳𑁂 𑀙𑀟𑁆𑀟𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑁂𑀲𑀁 𑀩𑀳𑀽𑀦𑀁 𑀫𑀢𑀓𑀲𑀢𑁆𑀢𑀸𑀦𑀁 ¶ 𑀅𑀦𑁆𑀢𑀭𑁂 𑀯𑀺𑀚𑁆𑀚𑀢𑀺 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀺. 𑀢𑁂𑀳𑀺 𑀫𑁂 𑀓𑀺𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑁂𑀳𑀺 𑀫𑀢𑀓𑀲𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀯𑀢𑁆𑀢𑀫𑀸𑀦𑀸 𑀇𑀤𑀸𑀦𑁂𑀯𑁂𑀲𑀸 𑀫𑀬𑁆𑀳𑀁 𑀓𑀺𑀁 𑀪𑀯𑀺𑀲𑁆𑀲𑀢𑀺 ¶ , 𑀢𑁂𑀳𑀺 𑀯𑀸 𑀫𑀢𑀓𑀲𑀢𑁆𑀢𑁂𑀳𑀺 𑀅𑀢𑀺𑀭𑁂𑀓𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀲𑀸 𑀫𑀬𑁆𑀳𑀁 𑀓𑀺𑀁 𑀪𑀯𑀺𑀲𑁆𑀲𑀢𑀺, 𑀓𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀪𑀭𑀺𑀬𑀸, 𑀉𑀤𑀸𑀳𑀼 𑀪𑀕𑀺𑀦𑀻𑀢𑀺? ‘‘𑀢𑁂𑀳𑀺 𑀫𑁂𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑁂𑀳𑀺 𑀫𑀢𑀓𑁂𑀳𑀺 𑀲𑀤𑁆𑀥𑀺𑀁 𑀇𑀤𑀫𑁆𑀧𑀺 𑀫𑁂 𑀓𑀴𑁂𑀯𑀭𑀁 𑀏𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀲𑀸 𑀫𑀢𑀓𑁂𑀲𑀼 𑀲𑀗𑁆𑀔𑀁 𑀕𑀢𑀸, 𑀫𑀬𑁆𑀳𑀁 𑀲𑀸 𑀦 𑀓𑀺𑀜𑁆𑀘𑀺 𑀳𑁄𑀢𑀺, 𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺.

𑀬𑀁 𑀬𑀁 𑀢𑀲𑁆𑀲𑀸𑀢𑀺 𑀬𑀁 𑀬𑀁 𑀢𑀲𑁆𑀲 𑀅𑀦𑀼𑀲𑁄𑀘𑀦𑀓𑀲𑁆𑀲 𑀲𑀢𑁆𑀢𑀲𑁆𑀲 𑀦 𑀯𑀺𑀚𑁆𑀚𑀢𑀺 𑀦𑀢𑁆𑀣𑀺, 𑀫𑀢𑀁 𑀦𑀺𑀭𑀼𑀤𑁆𑀥𑀁, 𑀢𑀁 𑀢𑀁 𑀲𑀘𑁂 𑀅𑀦𑀼𑀲𑁄𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀬𑀲𑁆𑀲𑀸’’𑀢𑀺𑀧𑀺 𑀧𑀸𑀞𑁄, 𑀬𑀁 𑀬𑀁 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺, 𑀢𑀁 𑀢𑀁 𑀲𑁄 𑀅𑀦𑀼𑀲𑁄𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀫𑀘𑁆𑀘𑀼𑀯𑀲𑀁 𑀧𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀦𑀺𑀘𑁆𑀘𑀁 𑀫𑀘𑁆𑀘𑀼𑀯𑀲𑀁 𑀧𑀢𑀦𑁆𑀢𑀁 𑀕𑀘𑁆𑀙𑀦𑁆𑀢𑀁 𑀅𑀢𑁆𑀢𑀸𑀦𑀫𑁂𑀯 𑀅𑀦𑀼𑀲𑁄𑀘𑁂𑀬𑁆𑀬, 𑀢𑁂𑀦𑀲𑁆𑀲 𑀅𑀲𑁄𑀘𑀦𑀓𑀸𑀮𑁄𑀬𑁂𑀯 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀕𑀸𑀣𑀸𑀬 𑀦 𑀳𑁂𑀯 𑀞𑀺𑀢𑀁 𑀦𑀸𑀲𑀻𑀦𑀁, 𑀦 𑀲𑀬𑀸𑀦𑀁 𑀦 𑀧𑀤𑁆𑀥𑀕𑀼𑀦𑁆𑀢𑀺 𑀓𑀜𑁆𑀘𑀺 𑀲𑀢𑁆𑀢𑀁 𑀆𑀬𑀼𑀲𑀗𑁆𑀔𑀸𑀭𑁄 𑀅𑀦𑀼𑀕𑀘𑁆𑀙𑀢𑀻𑀢𑀺 𑀧𑀸𑀞𑀲𑁂𑀲𑁄. 𑀢𑀢𑁆𑀣 𑀧𑀤𑁆𑀥𑀕𑀼𑀦𑁆𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑀭𑀫𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂 𑀲𑀢𑁆𑀢𑀸 𑀘𑀢𑀽𑀲𑀼𑀧𑀺 𑀇𑀭𑀺𑀬𑀸𑀧𑀣𑁂𑀲𑀼 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀆𑀬𑀼𑀲𑀗𑁆𑀔𑀸𑀭𑀸 𑀧𑀦 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀅𑀧𑁆𑀧𑀫𑀢𑁆𑀢𑀸 𑀅𑀢𑁆𑀢𑀦𑁄 𑀔𑀬𑀕𑀫𑀦𑀓𑀫𑁆𑀫𑀫𑁂𑀯 𑀓𑀭𑁄𑀦𑁆𑀢𑀻𑀢𑀺. 𑀬𑀸𑀯 𑀩𑁆𑀬𑀸𑀢𑀻𑀢𑀺 𑀬𑀸𑀯 𑀉𑀫𑁆𑀫𑀺𑀲𑀢𑀺. 𑀅𑀬𑀜𑁆𑀳𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀯𑁄𑀳𑀸𑀭𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯 𑀉𑀫𑁆𑀫𑀺𑀲𑀢𑀺 𑀘 𑀦𑀺𑀫𑀺𑀲𑀢𑀺 𑀘, 𑀢𑀢𑁆𑀭𑀸𑀧𑀺 𑀏𑀯𑀁 𑀅𑀧𑁆𑀧𑀫𑀢𑁆𑀢𑀓𑁂 𑀓𑀸𑀮𑁂 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀭𑀲𑀢𑀻 𑀯𑀬𑁄, 𑀢𑀻𑀲𑀼 𑀯𑀬𑁂𑀲𑀼 𑀲𑁄 𑀲𑁄 𑀯𑀬𑁄 𑀳𑀸𑀬𑀢𑁂𑀯 𑀦 𑀯𑀟𑁆𑀠𑀢𑀻𑀢𑀺.

𑀢𑀢𑁆𑀣𑀢𑁆𑀢𑀦𑀺 𑀯𑀢𑀧𑁆𑀧𑀤𑁆𑀥𑁂𑀢𑀺 𑀢𑀢𑁆𑀣 𑀯𑀢 𑀅𑀢𑁆𑀢𑀦𑀺 𑀧𑀤𑁆𑀥𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑀢𑀲𑁆𑀫𑀺𑀁 𑀯𑀢 𑀏𑀯𑀁 𑀭𑀲𑀫𑀸𑀦𑁂 𑀯𑀬𑁂 𑀅𑀬𑀁 ‘‘𑀅𑀢𑁆𑀢𑀸’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀅𑀢𑁆𑀢𑀪𑀸𑀯𑁄 𑀧𑀤𑁆𑀥𑁄 𑀳𑁄𑀢𑀺, 𑀯𑀬𑁂𑀦 𑀅𑀟𑁆𑀠𑁄 𑀉𑀧𑀟𑁆𑀠𑁄 𑀅𑀧𑀭𑀺𑀧𑀼𑀡𑁆𑀡𑁄𑀯 𑀳𑁄𑀢𑀺 ¶ . 𑀏𑀯𑀁 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀅𑀢𑁆𑀢𑀦𑀺 𑀧𑀤𑁆𑀥𑁂 𑀬𑁄 𑀘𑁂𑀲 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀦𑀸𑀪𑀸𑀯𑁄 𑀅𑀲𑀁𑀲𑀬𑁄, 𑀢𑀲𑁆𑀫𑀺𑀁 𑀯𑀺𑀦𑀸𑀪𑀸𑀯𑁂𑀧𑀺 𑀅𑀲𑀁𑀲𑀬𑁂 𑀦𑀺𑀲𑁆𑀲𑀁𑀲𑀬𑁂 𑀬𑀁 𑀪𑀽𑀢𑀁 𑀲𑁂𑀲𑀁 𑀅𑀫𑀢𑀁 𑀚𑀻𑀯𑀫𑀸𑀦𑀁, 𑀢𑀁 𑀚𑀻𑀯𑀫𑀸𑀦𑀫𑁂𑀯 𑀤𑀬𑀺𑀢𑀩𑁆𑀩𑀁 𑀧𑀺𑀬𑀸𑀬𑀺𑀢𑀩𑁆𑀩𑀁 𑀫𑁂𑀢𑁆𑀢𑀸𑀬𑀺𑀢𑀩𑁆𑀩𑀁, ‘‘𑀅𑀬𑀁 𑀲𑀢𑁆𑀢𑁄 𑀅𑀭𑁄𑀕𑁄 𑀳𑁄𑀢𑀼 𑀅𑀩𑁆𑀬𑀸𑀧𑀚𑁆𑀚𑁄’’𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀫𑁂𑀢𑁆𑀢𑀸𑀪𑀸𑀯𑀦𑀸 ¶ 𑀓𑀸𑀢𑀩𑁆𑀩𑀸. 𑀬𑀁 𑀧𑀦𑁂𑀢𑀁 𑀯𑀻𑀢𑀁 𑀯𑀺𑀕𑀢𑀁 𑀫𑀢𑀁, 𑀢𑀁 𑀅𑀦𑀦𑀼𑀲𑁄𑀘𑀺𑀬𑀁 𑀦 𑀅𑀦𑀼𑀲𑁄𑀘𑀺𑀢𑀩𑁆𑀩𑀦𑁆𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀅𑀦𑀺𑀘𑁆𑀘𑀸𑀓𑀸𑀭𑀁 𑀤𑀻𑀧𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑁄 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀲𑀭𑀻𑀭𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀻 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀅𑀦𑀦𑀼𑀲𑁄𑀘𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁨𑁯] 𑁯. 𑀓𑀸𑀴𑀩𑀸𑀳𑀼𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 𑀅𑀦𑁆𑀦𑀧𑀸𑀦𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀳𑀢𑀮𑀸𑀪𑀲𑀓𑁆𑀓𑀸𑀭𑀁 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁂𑀦 𑀳𑀺 𑀢𑀣𑀸𑀕𑀢𑁂 𑀅𑀝𑁆𑀞𑀸𑀦𑀓𑁄𑀧𑀁 𑀩𑀦𑁆𑀥𑀺𑀢𑁆𑀯𑀸 𑀥𑀦𑀼𑀕𑁆𑀕𑀳𑁂𑀲𑀼 𑀧𑀬𑁄𑀚𑀺𑀢𑁂𑀲𑀼 𑀦𑀸𑀴𑀸𑀕𑀺𑀭𑀺𑀯𑀺𑀲𑁆𑀲𑀚𑁆𑀚𑀦𑁂𑀦 𑀢𑀲𑁆𑀲 𑀤𑁄𑀲𑁄 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑀲𑁆𑀲 𑀧𑀝𑁆𑀞𑀧𑀺𑀢𑀸𑀦𑀺 𑀥𑀼𑀯𑀪𑀢𑁆𑀢𑀸𑀤𑀻𑀦𑀺 𑀫𑀦𑀼𑀲𑁆𑀲𑀸 𑀦 𑀓𑀭𑀺𑀁𑀲𑀼, 𑀭𑀸𑀚𑀸𑀧𑀺 𑀦𑀁 𑀦 𑀑𑀮𑁄𑀓𑁂𑀲𑀺. 𑀲𑁄 𑀳𑀢𑀮𑀸𑀪𑀲𑀓𑁆𑀓𑀸𑀭𑁄 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀯𑀺𑀘𑀭𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 ‘𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’𑀢𑀺 𑀉𑀧𑁆𑀧𑀦𑁆𑀦𑀫𑁆𑀧𑀺 𑀣𑀺𑀭𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀳𑀢𑀮𑀸𑀪𑀲𑀓𑁆𑀓𑀸𑀭𑁄 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀥𑀦𑀜𑁆𑀚𑀬𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀭𑀸𑀥𑁄 𑀦𑀸𑀫 𑀲𑀼𑀓𑁄 𑀅𑀳𑁄𑀲𑀺 𑀫𑀳𑀸𑀲𑀭𑀻𑀭𑁄 𑀧𑀭𑀺𑀧𑀼𑀡𑁆𑀡𑀕𑀢𑁆𑀢𑁄, 𑀓𑀦𑀺𑀝𑁆𑀞𑁄 𑀧𑀦𑀲𑁆𑀲 𑀧𑁄𑀝𑁆𑀞𑀧𑀸𑀤𑁄 𑀦𑀸𑀫. 𑀏𑀓𑁄 𑀮𑀼𑀤𑁆𑀤𑀓𑁄 𑀢𑁂 𑀤𑁆𑀯𑁂𑀧𑀺 𑀚𑀦𑁂 𑀩𑀦𑁆𑀥𑀺𑀢𑁆𑀯𑀸 𑀦𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀤𑀸𑀲𑀺. 𑀭𑀸𑀚𑀸 𑀉𑀪𑁄𑀧𑀺 𑀢𑁂 𑀲𑀼𑀯𑀡𑁆𑀡𑀧𑀜𑁆𑀚𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀯𑀡𑁆𑀡𑀢𑀝𑁆𑀝𑀓𑁂𑀦 𑀫𑀥𑀼𑀮𑀸𑀚𑁂 𑀔𑀸𑀤𑀸𑀧𑁂𑀦𑁆𑀢𑁄 ¶ 𑀲𑀓𑁆𑀔𑀭𑁄𑀤𑀓𑀁 𑀧𑀸𑀬𑁂𑀦𑁆𑀢𑁄 𑀧𑀝𑀺𑀚𑀕𑁆𑀕𑀺. 𑀲𑀓𑁆𑀓𑀸𑀭𑁄 𑀘 𑀫𑀳𑀸 𑀅𑀳𑁄𑀲𑀺, 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀅𑀣𑁂𑀓𑁄 𑀯𑀦𑀘𑀭𑀓𑁄 𑀓𑀸𑀴𑀩𑀸𑀳𑀼𑀁 𑀦𑀸𑀫𑁂𑀓𑀁 𑀫𑀳𑀸𑀓𑀸𑀴𑀫𑀓𑁆𑀓𑀝𑀁 𑀆𑀦𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀤𑀸𑀲𑀺. 𑀢𑀲𑁆𑀲 𑀧𑀘𑁆𑀙𑀸 𑀆𑀕𑀢𑀢𑁆𑀢𑀸 𑀫𑀳𑀦𑁆𑀢𑀢𑀭𑁄 𑀮𑀸𑀪𑀲𑀓𑁆𑀓𑀸𑀭𑁄 𑀅𑀳𑁄𑀲𑀺, 𑀲𑀼𑀓𑀸𑀦𑀁 𑀧𑀭𑀺𑀳𑀸𑀬𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀸𑀤𑀺𑀮𑀓𑁆𑀔𑀡𑀬𑁄𑀕𑀢𑁄 𑀦 𑀓𑀺𑀜𑁆𑀘𑀺 𑀆𑀳, 𑀓𑀦𑀺𑀝𑁆𑀞𑁄 𑀧𑀦𑀲𑁆𑀲 𑀢𑀸𑀤𑀺𑀮𑀓𑁆𑀔𑀡𑀸𑀪𑀸𑀯𑀸 𑀢𑀁 𑀫𑀓𑁆𑀓𑀝𑀲𑁆𑀲 𑀲𑀓𑁆𑀓𑀸𑀭𑀁 𑀅𑀲𑀳𑀦𑁆𑀢𑁄 ‘‘𑀪𑀸𑀢𑀺𑀓, 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀲𑀸𑀥𑀼𑀭𑀲𑀔𑀸𑀤𑀦𑀻𑀬𑀸𑀤𑀻𑀦𑀺 𑀅𑀫𑁆𑀳𑀸𑀓𑀫𑁂𑀯 𑀤𑁂𑀦𑁆𑀢𑀺, 𑀇𑀤𑀸𑀦𑀺 𑀧𑀦 𑀫𑀬𑀁 𑀦 𑀮𑀪𑀸𑀫, 𑀓𑀸𑀴𑀩𑀸𑀳𑀼𑀫𑀓𑁆𑀓𑀝𑀲𑁆𑀲𑁂𑀯 𑀤𑁂𑀦𑁆𑀢𑀺. 𑀫𑀬𑀁 𑀥𑀦𑀜𑁆𑀚𑀬𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀮𑀸𑀪𑀲𑀓𑁆𑀓𑀸𑀭𑀁 𑀅𑀮𑀪𑀦𑁆𑀢𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀏𑀳𑀺 𑀅𑀭𑀜𑁆𑀜𑀫𑁂𑀯 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁩.

‘‘𑀬𑀁 ¶ 𑀅𑀦𑁆𑀦𑀧𑀸𑀦𑀲𑁆𑀲 𑀧𑀼𑀭𑁂 𑀮𑀪𑀸𑀫, 𑀢𑀁 𑀤𑀸𑀦𑀺 𑀲𑀸𑀔𑀫𑀺𑀕𑀫𑁂𑀯 𑀕𑀘𑁆𑀙𑀢𑀺;

𑀕𑀘𑁆𑀙𑀸𑀫 𑀤𑀸𑀦𑀺 𑀯𑀦𑀫𑁂𑀯 𑀭𑀸𑀥, 𑀅𑀲𑀓𑁆𑀓𑀢𑀸 𑀘𑀲𑁆𑀫 𑀥𑀦𑀜𑁆𑀚𑀬𑀸𑀬𑀸’’𑀢𑀺.

𑀢𑀢𑁆𑀣 𑀬𑀁 𑀅𑀦𑁆𑀦𑀧𑀸𑀦𑀲𑁆𑀲𑀸𑀢𑀺 𑀬𑀁 𑀅𑀦𑁆𑀦𑀧𑀸𑀦𑀁 𑀅𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸. 𑀉𑀧𑀬𑁄𑀕𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀥𑀦𑀜𑁆𑀚𑀬𑀸𑀬𑀸𑀢𑀺 𑀓𑀭𑀡𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀥𑀦𑀜𑁆𑀚𑀬𑁂𑀦. 𑀅𑀲𑀓𑁆𑀓𑀢𑀸 𑀘𑀲𑁆𑀫𑀸𑀢𑀺 𑀅𑀦𑁆𑀦𑀧𑀸𑀦𑀁 𑀦 𑀮𑀪𑀸𑀫, 𑀇𑀫𑀺𑀦𑀸 𑀘 𑀦 𑀲𑀓𑁆𑀓𑀢𑀫𑁆𑀳𑀸𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀭𑀸𑀥𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁪.

‘‘𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀘, 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀘 𑀲𑀼𑀔𑀜𑁆𑀘 𑀤𑀼𑀓𑁆𑀔𑀁;

𑀏𑀢𑁂 𑀅𑀦𑀺𑀘𑁆𑀘𑀸 𑀫𑀦𑀼𑀚𑁂𑀲𑀼 𑀥𑀫𑁆𑀫𑀸, 𑀫𑀸 𑀲𑁄𑀘𑀺 𑀓𑀺𑀁 𑀲𑁄𑀘𑀲𑀺 𑀧𑁄𑀝𑁆𑀞𑀧𑀸𑀤𑀸’’𑀢𑀺.

𑀢𑀢𑁆𑀣 𑀬𑀲𑁄𑀢𑀺 𑀇𑀲𑁆𑀲𑀭𑀺𑀬𑀧𑀭𑀺𑀯𑀸𑀭𑁄. 𑀅𑀬𑀲𑁄𑀢𑀺 𑀢𑀲𑁆𑀲𑀸𑀪𑀸𑀯𑁄. 𑀏𑀢𑁂𑀢𑀺 𑀏𑀢𑁂 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀫𑀦𑀼𑀚𑁂𑀲𑀼 𑀅𑀦𑀺𑀘𑁆𑀘𑀸, 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸𑀧𑀺 ¶ 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀮𑀸𑀪𑀸 ¶ 𑀅𑀧𑁆𑀧𑀲𑀓𑁆𑀓𑀸𑀭𑀸 𑀳𑁄𑀦𑁆𑀢𑀺, 𑀦𑀺𑀘𑁆𑀘𑀮𑀸𑀪𑀺𑀦𑁄 𑀦𑀸𑀫 𑀦 𑀳𑁄𑀦𑁆𑀢𑀺. 𑀬𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀁 𑀲𑀼𑀢𑁆𑀯𑀸 𑀧𑁄𑀝𑁆𑀞𑀧𑀸𑀤𑁄 𑀫𑀓𑁆𑀓𑀝𑁂 𑀉𑀲𑀽𑀬𑀁 𑀅𑀧𑀦𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁫.

‘‘𑀅𑀤𑁆𑀥𑀸 𑀢𑀼𑀯𑀁 𑀧𑀡𑁆𑀟𑀺𑀢𑀓𑁄𑀲𑀺 𑀭𑀸𑀥, 𑀚𑀸𑀦𑀸𑀲𑀺 𑀅𑀢𑁆𑀣𑀸𑀦𑀺 𑀅𑀦𑀸𑀕𑀢𑀸𑀦𑀺;

𑀓𑀣𑀁 𑀦𑀼 𑀲𑀸𑀔𑀸𑀫𑀺𑀕𑀁 𑀤𑀓𑁆𑀔𑀺𑀲𑀸𑀫, 𑀦𑀺𑀤𑁆𑀥𑀸𑀯𑀺𑀢𑀁 𑀭𑀸𑀚𑀓𑀼𑀮𑀢𑁄𑀯 𑀚𑀫𑁆𑀫’’𑀦𑁆𑀢𑀺.

𑀢𑀢𑁆𑀣 𑀓𑀣𑀁 𑀦𑀽𑀢𑀺 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦. 𑀤𑀓𑁆𑀔𑀺𑀲𑀸𑀫𑀸𑀢𑀺 𑀤𑀓𑁆𑀔𑀺𑀲𑁆𑀲𑀸𑀫. 𑀦𑀺𑀤𑁆𑀥𑀸𑀯𑀺𑀢𑀦𑁆𑀢𑀺 𑀦𑀺𑀯𑀼𑀝𑁆𑀞𑀸𑀧𑀺𑀢𑀁 𑀦𑀺𑀓𑁆𑀓𑀟𑁆𑀠𑀸𑀧𑀺𑀢𑀁. 𑀚𑀫𑁆𑀫𑀦𑁆𑀢𑀺 𑀮𑀸𑀫𑀓𑀁.

𑀢𑀁 𑀲𑀼𑀢𑁆𑀯𑀸 𑀭𑀸𑀥𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁧𑁬.

‘‘𑀘𑀸𑀮𑁂𑀢𑀺 𑀓𑀡𑁆𑀡𑀁 𑀪𑀓𑀼𑀝𑀺𑀁 𑀓𑀭𑁄𑀢𑀺, 𑀫𑀼𑀳𑀼𑀁 𑀫𑀼𑀳𑀼𑀁 𑀪𑀸𑀬𑀬𑀢𑁂 𑀓𑀼𑀫𑀸𑀭𑁂;

𑀲𑀬𑀫𑁂𑀯 𑀢𑀁 𑀓𑀸𑀳𑀢𑀺 𑀓𑀸𑀴𑀩𑀸𑀳𑀼, 𑀬𑁂𑀦𑀸𑀭𑀓𑀸 𑀞𑀲𑁆𑀲𑀢𑀺 𑀅𑀦𑁆𑀦𑀧𑀸𑀦𑀸’’𑀢𑀺.

𑀢𑀢𑁆𑀣 𑀪𑀸𑀬𑀬𑀢𑁂 𑀓𑀼𑀫𑀸𑀭𑁂𑀢𑀺 𑀭𑀸𑀚𑀓𑀼𑀫𑀸𑀭𑁂 𑀉𑀢𑁆𑀭𑀸𑀲𑁂𑀢𑀺. 𑀬𑁂𑀦𑀸𑀭𑀓𑀸 𑀞𑀲𑁆𑀲𑀢𑀺 𑀅𑀦𑁆𑀦𑀧𑀸𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 ¶ 𑀇𑀫𑀫𑁆𑀳𑀸 𑀅𑀦𑁆𑀦𑀧𑀸𑀦𑀸 𑀤𑀽𑀭𑁂 𑀞𑀲𑁆𑀲𑀢𑀺, 𑀲𑀬𑀫𑁂𑀯 𑀢𑀁 𑀓𑀸𑀭𑀡𑀁 𑀓𑀭𑀺𑀲𑁆𑀲𑀢𑀺, 𑀫𑀸 𑀢𑁆𑀯𑀁 𑀏𑀢𑀲𑁆𑀲 𑀘𑀺𑀦𑁆𑀢𑀬𑀻𑀢𑀺 𑀅𑀢𑁆𑀣𑁄.

𑀓𑀸𑀴𑀩𑀸𑀳𑀼𑀧𑀺 𑀓𑀢𑀺𑀧𑀸𑀳𑁂𑀦𑁂𑀯 𑀭𑀸𑀚𑀓𑀼𑀫𑀸𑀭𑀸𑀦𑀁 𑀧𑀼𑀭𑀢𑁄 𑀞𑀢𑁆𑀯𑀸 𑀓𑀡𑁆𑀡𑀘𑀮𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀓𑀼𑀫𑀸𑀭𑁂 𑀪𑀸𑀬𑀸𑀧𑁂𑀲𑀺. 𑀢𑁂 𑀪𑀻𑀢𑀢𑀲𑀺𑀢𑀸 𑀯𑀺𑀲𑁆𑀲𑀭𑀫𑀓𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀺𑀓𑁆𑀓𑀟𑁆𑀠𑀣 𑀦’’𑀦𑁆𑀢𑀺 𑀫𑀓𑁆𑀓𑀝𑀁 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺. 𑀲𑀼𑀓𑀸𑀦𑀁 𑀮𑀸𑀪𑀲𑀓𑁆𑀓𑀸𑀭𑁄 𑀧𑀼𑀦 𑀧𑀸𑀓𑀢𑀺𑀓𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀴𑀩𑀸𑀳𑀼 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑁄𑀝𑁆𑀞𑀧𑀸𑀤𑁄 𑀆𑀦𑀦𑁆𑀤𑁄, 𑀭𑀸𑀥𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀴𑀩𑀸𑀳𑀼𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁩𑁦] 𑁧𑁦. 𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀲𑀻𑀮𑀁 ¶ 𑀓𑀺𑀭𑁂𑀯 𑀓𑀮𑁆𑀬𑀸𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀻𑀮𑀯𑀻𑀫𑀁𑀲𑀓𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑁂𑀯. 𑀇𑀥 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀦𑁆𑀢𑁄 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀳𑁂𑀭𑀜𑁆𑀜𑀺𑀓𑀨𑀮𑀓𑀢𑁄 𑀓𑀳𑀸𑀧𑀡𑀁 𑀕𑀡𑁆𑀳𑀺. 𑀢𑀁 ‘‘𑀘𑁄𑀭𑁄’’𑀢𑀺 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀺𑀢𑁄 𑁋

𑁧𑁧𑁭.

‘‘𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀧𑀲𑁆𑀲 𑀖𑁄𑀭𑀯𑀺𑀲𑁄 𑀦𑀸𑀕𑁄, 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀻’’𑀢𑀺. 𑁋

𑀇𑀫𑀸𑀬 𑀧𑀞𑀫𑀕𑀸𑀣𑀸𑀬 𑀲𑀻𑀮𑀁 𑀯𑀡𑁆𑀡𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀕𑀘𑁆𑀙𑀢𑀺.

𑀅𑀣𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀲𑀽𑀦𑀸𑀧𑀡𑀢𑁄 𑀲𑁂𑀦𑁄 𑀫𑀁𑀲𑀧𑁂𑀲𑀺𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑀫𑀜𑁆𑀜𑁂 𑀲𑀓𑀼𑀡𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀸𑀤𑀦𑀔𑀢𑀼𑀡𑁆𑀟𑀓𑀸𑀤𑀻𑀳𑀺 𑀧𑀳𑀭𑀦𑁆𑀢𑀺. 𑀲𑁄 𑀢𑀁 𑀤𑀼𑀓𑁆𑀔𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀁𑀲𑀧𑁂𑀲𑀺𑀁 𑀙𑀟𑁆𑀟𑁂𑀲𑀺, 𑀅𑀧𑀭𑁄 𑀕𑀡𑁆𑀳𑀺. 𑀲𑁄𑀧𑀺 𑀢𑀣𑁂𑀯 𑀯𑀺𑀳𑁂𑀞𑀺𑀬𑀫𑀸𑀦𑁄 𑀙𑀟𑁆𑀟𑁂𑀲𑀺, 𑀅𑀣𑀜𑁆𑀜𑁄 𑀕𑀡𑁆𑀳𑀺. 𑀏𑀯𑀁 𑀬𑁄 𑀬𑁄 𑀕𑀡𑁆𑀳𑀺, 𑀢𑀁 𑀢𑀁 𑀲𑀓𑀼𑀡𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀬𑁄 𑀬𑁄 𑀙𑀟𑁆𑀟𑁂𑀲𑀺, 𑀲𑁄 𑀲𑁄 𑀲𑀼𑀔𑀺𑀢𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀸𑀫𑀸 𑀦𑀸𑀫 𑀫𑀁𑀲𑀧𑁂𑀲𑀽𑀧𑀫𑀸, 𑀏𑀢𑁂 𑀕𑀡𑁆𑀳𑀦𑁆𑀢𑀸𑀦𑀁𑀬𑁂𑀯 𑀤𑀼𑀓𑁆𑀔𑀁, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸𑀦𑀁 𑀲𑀼𑀔’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁮.

‘‘𑀬𑀸𑀯𑀤𑁂𑀯𑀲𑁆𑀲𑀳𑀽 ¶ 𑀓𑀺𑀜𑁆𑀘𑀺, 𑀢𑀸𑀯𑀤𑁂𑀯 𑀅𑀔𑀸𑀤𑀺𑀲𑀼𑀁;

𑀲𑀗𑁆𑀕𑀫𑁆𑀫 𑀓𑀼𑀮𑀮𑀸 𑀮𑁄𑀓𑁂, 𑀦 𑀳𑀺𑀁𑀲𑀦𑁆𑀢𑀺 𑀅𑀓𑀺𑀜𑁆𑀘𑀦’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑀸𑀯𑀤𑁂𑀯 𑀅𑀲𑁆𑀲 𑀲𑁂𑀦𑀲𑁆𑀲 𑀅𑀳𑀼 𑀓𑀺𑀜𑁆𑀘𑀺 𑀫𑀼𑀔𑁂𑀦 𑀕𑀳𑀺𑀢𑀁 𑀫𑀁𑀲𑀔𑀡𑁆𑀟𑀁, 𑀢𑀸𑀯𑀤𑁂𑀯 𑀦𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀓𑀼𑀮𑀮𑀸 𑀲𑀫𑀸𑀕𑀦𑁆𑀢𑁆𑀯𑀸 𑀅𑀔𑀸𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀯𑀺𑀲𑁆𑀲𑀝𑁆𑀞𑁂 𑀢𑀫𑁂𑀦𑀁 𑀅𑀓𑀺𑀜𑁆𑀘𑀦𑀁 𑀦𑀺𑀧𑁆𑀧𑀮𑀺𑀩𑁄𑀥𑀁 𑀧𑀓𑁆𑀔𑀺𑀁 𑀲𑁂𑀲𑀧𑀓𑁆𑀔𑀺𑀦𑁄 𑀦 𑀳𑀺𑀁𑀲𑀦𑁆𑀢𑀻𑀢𑀺.

𑀲𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀲𑀸𑀬𑀁 𑀏𑀓𑀲𑁆𑀲 𑀕𑁂𑀳𑁂 𑀦𑀺𑀧𑀚𑁆𑀚𑀺. 𑀢𑀢𑁆𑀣 𑀧𑀦 𑀧𑀺𑀗𑁆𑀕𑀮𑀸 𑀦𑀸𑀫 𑀤𑀸𑀲𑀻 ‘‘𑀅𑀲𑀼𑀓𑀯𑁂𑀮𑀸𑀬 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀗𑁆𑀓𑁂𑀢𑀫𑀓𑀸𑀲𑀺. 𑀲𑀸 𑀲𑀸𑀫𑀺𑀓𑀸𑀦𑀁 𑀧𑀸𑀤𑁂 ¶ 𑀥𑁄𑀯𑀺𑀢𑁆𑀯𑀸 𑀢𑁂𑀲𑀼 𑀦𑀺𑀧𑀦𑁆𑀦𑁂𑀲𑀼 𑀢𑀲𑁆𑀲𑀸𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑀻 𑀉𑀫𑁆𑀫𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀞𑀫𑀬𑀸𑀫𑀫𑁆𑀧𑀺 𑀫𑀚𑁆𑀛𑀺𑀫𑀬𑀸𑀫𑀫𑁆𑀧𑀺 𑀯𑀻𑀢𑀺𑀦𑀸𑀫𑁂𑀲𑀺. 𑀧𑀘𑁆𑀘𑀽𑀲𑀲𑀫𑀬𑁂 𑀧𑀦 ‘‘𑀦 𑀲𑁄 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀙𑀺𑀦𑁆𑀦𑀸𑀲𑀸 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀇𑀤𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀤𑀸𑀲𑀻 ‘𑀲𑁄 𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀢𑀻’𑀢𑀺 𑀆𑀲𑀸𑀬 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀺𑀲𑀺𑀦𑁆𑀦𑀸, 𑀇𑀤𑀸𑀦𑀺𑀲𑁆𑀲 𑀅𑀦𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀙𑀺𑀦𑁆𑀦𑀸𑀲𑀸 𑀳𑀼𑀢𑁆𑀯𑀸 𑀲𑀼𑀔𑀁 𑀲𑀼𑀧𑀢𑀺. 𑀓𑀺𑀮𑁂𑀲𑁂𑀲𑀼 𑀳𑀺 𑀆𑀲𑀸 𑀦𑀸𑀫 𑀤𑀼𑀓𑁆𑀔𑀁, 𑀦𑀺𑀭𑀸𑀲𑀪𑀸𑀯𑁄𑀯 𑀲𑀼𑀔’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁯.

‘‘𑀲𑀼𑀔𑀁 𑀦𑀺𑀭𑀸𑀲𑀸 𑀲𑀼𑀧𑀢𑀺, 𑀆𑀲𑀸 𑀨𑀮𑀯𑀢𑀻 𑀲𑀼𑀔𑀸;

𑀆𑀲𑀁 𑀦𑀺𑀭𑀸𑀲𑀁 𑀓𑀢𑁆𑀯𑀸𑀦, 𑀲𑀼𑀔𑀁 𑀲𑀼𑀧𑀢𑀺 𑀧𑀺𑀗𑁆𑀕𑀮𑀸’’𑀢𑀺.

𑀢𑀢𑁆𑀣 𑀨𑀮𑀯𑀢𑀻𑀢𑀺 𑀬𑀲𑁆𑀲𑀸 𑀆𑀲𑀸𑀬 𑀨𑀮𑀁 𑀮𑀤𑁆𑀥𑀁 𑀳𑁄𑀢𑀺, 𑀲𑀸 𑀢𑀲𑁆𑀲 𑀨𑀮𑀲𑁆𑀲 𑀲𑀼𑀔𑀢𑀸𑀬 𑀲𑀼𑀔𑀸 𑀦𑀸𑀫. 𑀦𑀺𑀭𑀸𑀲𑀁 𑀓𑀢𑁆𑀯𑀸𑀦𑀸𑀢𑀺 𑀅𑀦𑀸𑀲𑀁 𑀓𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀺𑀗𑁆𑀕𑀮𑀸𑀢𑀺 𑀏𑀲𑀸 𑀧𑀺𑀗𑁆𑀕𑀮𑀤𑀸𑀲𑀻 𑀇𑀤𑀸𑀦𑀺 𑀲𑀼𑀔𑀁 𑀲𑀼𑀧𑀢𑀻𑀢𑀺.

𑀲𑁄 𑀧𑀼𑀦𑀤𑀺𑀯𑀲𑁂 𑀢𑀢𑁄 𑀕𑀸𑀫𑀸 𑀅𑀭𑀜𑁆𑀜𑀁 𑀧𑀯𑀺𑀲𑀦𑁆𑀢𑁄 𑀅𑀭𑀜𑁆𑀜𑁂 𑀏𑀓𑀁 𑀢𑀸𑀧𑀲𑀁 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀛𑀸𑀦𑀲𑀼𑀔𑀢𑁄 𑀉𑀢𑁆𑀢𑀭𑀺𑀢𑀭𑀁 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁨𑁦.

‘‘𑀦 𑀲𑀫𑀸𑀥𑀺𑀧𑀭𑁄 𑀅𑀢𑁆𑀣𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀦 𑀧𑀭𑀁 𑀦𑀸𑀧𑀺 𑀅𑀢𑁆𑀢𑀸𑀦𑀁, 𑀯𑀺𑀳𑀺𑀁𑀲𑀢𑀺 𑀲𑀫𑀸𑀳𑀺𑀢𑁄’’𑀢𑀺.

𑀢𑀢𑁆𑀣 ¶ ¶ 𑀦 𑀲𑀫𑀸𑀥𑀺𑀧𑀭𑁄𑀢𑀺 𑀲𑀫𑀸𑀥𑀺𑀢𑁄 𑀧𑀭𑁄 𑀅𑀜𑁆𑀜𑁄 𑀲𑀼𑀔𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀻𑀢𑀺.

𑀲𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀼𑀭𑁄𑀳𑀺𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀼𑀝𑀺𑀤𑀽𑀲𑀓𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀓𑁄𑀓𑀺𑀮𑀯𑀕𑁆𑀕𑁄

[𑁩𑁩𑁧] 𑁧. 𑀓𑁄𑀓𑀺𑀮𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 ¶ ¶ 𑀯𑁂 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀢𑀓𑁆𑀓𑀸𑀭𑀺𑀬𑀚𑀸𑀢𑀓𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀫𑀘𑁆𑀘𑁄 𑀑𑀯𑀸𑀤𑀓𑁄 𑀅𑀳𑁄𑀲𑀺, 𑀭𑀸𑀚𑀸 𑀩𑀳𑀼𑀪𑀸𑀡𑀻 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀲𑁆𑀲 𑀩𑀳𑀼𑀪𑀸𑀡𑀺𑀢𑀁 𑀦𑀺𑀲𑁂𑀥𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀉𑀧𑀫𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀢𑁄 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺, 𑀢𑀲𑁆𑀲𑀼𑀧𑀭𑀺 𑀅𑀫𑁆𑀩𑀭𑀼𑀓𑁆𑀔𑁄 𑀅𑀢𑁆𑀣𑀺. 𑀢𑀢𑁆𑀭𑁂𑀓𑀲𑁆𑀫𑀺𑀁 𑀓𑀸𑀓𑀓𑀼𑀮𑀸𑀯𑀓𑁂 𑀓𑀸𑀴𑀓𑁄𑀓𑀺𑀮𑀸 𑀅𑀢𑁆𑀢𑀦𑁄 𑀅𑀡𑁆𑀟𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀓𑀸𑀓𑀻 𑀢𑀁 𑀓𑁄𑀓𑀺𑀮𑀅𑀡𑁆𑀟𑀓𑀁 𑀧𑀝𑀺𑀚𑀕𑁆𑀕𑀺, 𑀅𑀧𑀭𑀪𑀸𑀕𑁂 𑀢𑀢𑁄 𑀓𑁄𑀓𑀺𑀮𑀧𑁄𑀢𑀓𑁄 𑀦𑀺𑀓𑁆𑀔𑀫𑀺. 𑀓𑀸𑀓𑀻 ‘‘𑀧𑀼𑀢𑁆𑀢𑁄 𑀫𑁂’’𑀢𑀺 𑀲𑀜𑁆𑀜𑀸𑀬 𑀫𑀼𑀔𑀢𑀼𑀡𑁆𑀟𑀓𑁂𑀦 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀢𑀁 𑀧𑀝𑀺𑀚𑀕𑁆𑀕𑀺. 𑀲𑁄 𑀅𑀯𑀺𑀭𑀽𑀴𑁆𑀳𑀧𑀓𑁆𑀔𑁄 𑀅𑀓𑀸𑀮𑁂𑀬𑁂𑀯 𑀓𑁄𑀓𑀺𑀮𑀭𑀯𑀁 𑀭𑀯𑀺. 𑀓𑀸𑀓𑀻 ‘‘𑀅𑀬𑀁 𑀇𑀤𑀸𑀦𑁂𑀯 𑀢𑀸𑀯 𑀅𑀜𑁆𑀜𑀁 𑀭𑀯𑀁 𑀭𑀯𑀢𑀺 ¶ , 𑀯𑀟𑁆𑀠𑀦𑁆𑀢𑁄 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀼𑀡𑁆𑀟𑀓𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀓𑀼𑀮𑀸𑀯𑀓𑀸 𑀧𑀸𑀢𑁂𑀲𑀺. 𑀲𑁄 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀧𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀓𑀺𑀫𑁂𑀢𑀁 𑀲𑀳𑀸𑀬𑀸’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀳𑀁 𑀭𑀸𑀚𑀸𑀦𑀁 𑀦𑀺𑀯𑀸𑀭𑁂𑀢𑀼𑀁 𑀏𑀓𑀁 𑀉𑀧𑀫𑀁 𑀧𑀭𑀺𑀬𑁂𑀲𑀸𑀫𑀺, 𑀮𑀤𑁆𑀥𑀸 𑀤𑀸𑀦𑀺 𑀫𑁂 𑀲𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀢𑀺𑀫𑀼𑀔𑀭𑀸 𑀅𑀓𑀸𑀮𑁂 𑀩𑀳𑀼𑀪𑀸𑀡𑀺𑀦𑁄 𑀏𑀯𑀭𑀽𑀧𑀁 𑀮𑀪𑀦𑁆𑀢𑀺. 𑀅𑀬𑀁 𑀫𑀳𑀸𑀭𑀸𑀚, 𑀓𑁄𑀓𑀺𑀮𑀧𑁄𑀢𑀓𑁄 𑀓𑀸𑀓𑀺𑀬𑀸 𑀧𑀼𑀝𑁆𑀞𑁄 𑀅𑀯𑀺𑀭𑀽𑀴𑁆𑀳𑀧𑀓𑁆𑀔𑁄 𑀅𑀓𑀸𑀮𑁂𑀬𑁂𑀯 𑀓𑁄𑀓𑀺𑀮𑀭𑀯𑀁 𑀭𑀯𑀺. 𑀅𑀣 𑀦𑀁 𑀓𑀸𑀓𑀻 ‘𑀦𑀸𑀬𑀁 𑀫𑀫 𑀧𑀼𑀢𑁆𑀢𑀓𑁄’𑀢𑀺 𑀜𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀓𑁄𑀝𑁆𑀝𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀓𑀼𑀮𑀸𑀯𑀓𑀸 𑀧𑀸𑀢𑁂𑀲𑀺. 𑀫𑀦𑀼𑀲𑁆𑀲𑀸 𑀯𑀸 𑀳𑁄𑀦𑁆𑀢𑀼 𑀢𑀺𑀭𑀘𑁆𑀙𑀸𑀦𑀸 𑀯𑀸, 𑀅𑀓𑀸𑀮𑁂 𑀩𑀳𑀼𑀪𑀸𑀡𑀺𑀦𑁄 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀮𑀪𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁧.

‘‘𑀬𑁄 𑀯𑁂 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂, 𑀅𑀢𑀺𑀯𑁂𑀮𑀁 𑀧𑀪𑀸𑀲𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀓𑁄𑀓𑀺𑀮𑀸𑀬𑀺𑀯 𑀅𑀢𑁆𑀭𑀚𑁄.

𑁧𑁨𑁨.

‘‘𑀦 ¶ ¶ 𑀳𑀺 𑀲𑀢𑁆𑀣𑀁 𑀲𑀼𑀦𑀺𑀲𑀺𑀢𑀁, 𑀯𑀺𑀲𑀁 𑀳𑀮𑀸𑀳𑀮𑀸𑀫𑀺𑀯;

𑀏𑀯𑀁 𑀦𑀺𑀓𑀝𑁆𑀞𑁂 𑀧𑀸𑀢𑁂𑀢𑀺, 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸 𑀬𑀣𑀸.

𑁧𑁨𑁩.

‘‘𑀢𑀲𑁆𑀫𑀸 𑀓𑀸𑀮𑁂 𑀅𑀓𑀸𑀮𑁂 𑀯𑀸, 𑀯𑀸𑀘𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀦𑀸𑀢𑀺𑀯𑁂𑀮𑀁 𑀧𑀪𑀸𑀲𑁂𑀬𑁆𑀬, 𑀅𑀧𑀺 𑀅𑀢𑁆𑀢𑀲𑀫𑀫𑁆𑀳𑀺 𑀯𑀸.

𑁧𑁨𑁪.

‘‘𑀬𑁄 𑀘 𑀓𑀸𑀮𑁂 𑀫𑀺𑀢𑀁 𑀪𑀸𑀲𑁂, 𑀫𑀢𑀺𑀧𑀼𑀩𑁆𑀩𑁄 𑀯𑀺𑀘𑀓𑁆𑀔𑀡𑁄;

𑀲𑀩𑁆𑀩𑁂 𑀅𑀫𑀺𑀢𑁆𑀢𑁂 𑀆𑀤𑁂𑀢𑀺, 𑀲𑀼𑀧𑀡𑁆𑀡𑁄 𑀉𑀭𑀕𑀸𑀫𑀺𑀯𑀸’’𑀢𑀺.

𑀢𑀢𑁆𑀣 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀯𑀘𑀦𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂. 𑀅𑀢𑀺𑀯𑁂𑀮𑀦𑁆𑀢𑀺 𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀁 𑀓𑀢𑁆𑀯𑀸 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁 𑀪𑀸𑀲𑀢𑀺. 𑀳𑀮𑀸𑀳𑀮𑀸𑀫𑀺𑀯𑀸𑀢𑀺 𑀳𑀮𑀸𑀳𑀮𑀁 𑀇𑀯. 𑀦𑀺𑀓𑀝𑁆𑀞𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀅𑀧𑁆𑀧𑀫𑀢𑁆𑀢𑀓𑁂 𑀓𑀸𑀮𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀼𑀦𑀺𑀲𑀺𑀢𑀲𑀢𑁆𑀣𑀳𑀮𑀸𑀳𑀮𑀯𑀺𑀲𑀢𑁄𑀧𑀺 𑀔𑀺𑀧𑁆𑀧𑀢𑀭𑀁 𑀤𑀼𑀩𑁆𑀪𑀸𑀲𑀺𑀢𑀯𑀘𑀦𑀫𑁂𑀯 ¶ 𑀧𑀸𑀢𑁂𑀲𑀺, 𑀢𑀲𑁆𑀫𑀸. 𑀓𑀸𑀮𑁂 𑀅𑀓𑀸𑀮𑁂 𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀘 𑀅𑀓𑀸𑀮𑁂 𑀘 𑀯𑀸𑀘𑀁 𑀭𑀓𑁆𑀔𑁂𑀬𑁆𑀬, 𑀅𑀢𑀺𑀯𑁂𑀮𑀁 𑀦 𑀪𑀸𑀲𑁂𑀬𑁆𑀬 𑀅𑀧𑀺 𑀅𑀢𑁆𑀢𑀦𑀸 𑀲𑀫𑁂 𑀦𑀺𑀦𑁆𑀦𑀸𑀦𑀸𑀓𑀭𑀡𑁂𑀧𑀺 𑀧𑀼𑀕𑁆𑀕𑀮𑁂𑀢𑀺 𑀅𑀢𑁆𑀣𑁄.

𑀫𑀢𑀺𑀧𑀼𑀩𑁆𑀩𑁄𑀢𑀺 𑀫𑀢𑀺𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀓𑀣𑀦𑁂𑀦 𑀫𑀢𑀺𑀧𑀼𑀩𑁆𑀩𑁄. 𑀯𑀺𑀘𑀓𑁆𑀔𑀡𑁄𑀢𑀺 𑀜𑀸𑀡𑁂𑀦 𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀣𑀯𑀺𑀦𑁆𑀤𑀦𑀧𑀼𑀕𑁆𑀕𑀮𑁄 𑀯𑀺𑀘𑀓𑁆𑀔𑀡𑁄 𑀦𑀸𑀫. 𑀉𑀭𑀕𑀸𑀫𑀺𑀯𑀸𑀢𑀺 𑀉𑀭𑀕𑀁 𑀇𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀲𑀼𑀧𑀡𑁆𑀡𑁄 𑀲𑀫𑀼𑀤𑁆𑀤𑀁 𑀔𑁄𑀪𑁂𑀢𑁆𑀯𑀸 𑀫𑀳𑀸𑀪𑁄𑀕𑀁 𑀉𑀭𑀕𑀁 𑀆𑀤𑁂𑀢𑀺 𑀕𑀡𑁆𑀳𑀸𑀢𑀺, 𑀆𑀤𑀺𑀬𑀺𑀢𑁆𑀯𑀸 𑀘 𑀢𑀗𑁆𑀔𑀡𑀜𑁆𑀜𑁂𑀯 𑀦𑀁 𑀲𑀺𑀫𑁆𑀩𑀮𑀺𑀁 𑀆𑀭𑁄𑀧𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀢𑀺, 𑀏𑀯𑀫𑁂𑀯 𑀬𑁄 𑀫𑀢𑀺𑀧𑀼𑀩𑁆𑀩𑀗𑁆𑀕𑀫𑁄 𑀯𑀺𑀘𑀓𑁆𑀔𑀡𑁄 𑀯𑀢𑁆𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀫𑀺𑀢𑀁 𑀪𑀸𑀲𑀢𑀺, 𑀲𑁄 𑀲𑀩𑁆𑀩𑁂 𑀅𑀫𑀺𑀢𑁆𑀢𑁂 𑀆𑀤𑁂𑀢𑀺 𑀕𑀡𑁆𑀳𑀸𑀢𑀺, 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀺𑀢𑀪𑀸𑀡𑀻 𑀅𑀳𑁄𑀲𑀺, 𑀬𑀲𑀜𑁆𑀘𑀲𑁆𑀲 𑀯𑀟𑁆𑀠𑁂𑀢𑁆𑀯𑀸 𑀫𑀳𑀦𑁆𑀢𑀢𑀭𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑁄𑀓𑀺𑀮𑀧𑁄𑀢𑀓𑁄 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁄𑀓𑀺𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁩𑁨] 𑁨. 𑀭𑀣𑀮𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 ¶ ¶ 𑀳𑀦𑁆𑀢𑁆𑀯𑀸 𑀳𑀢𑁄 𑀩𑁆𑀭𑀽𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀭𑀣𑁂𑀦 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀲𑀫𑁆𑀩𑀸𑀥𑁂 𑀫𑀕𑁆𑀕𑁂 𑀭𑀣𑀁 𑀧𑀸𑀚𑁂𑀦𑁆𑀢𑁄 𑀏𑀓𑀁 𑀲𑀓𑀝𑀲𑀢𑁆𑀣𑀁 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀓𑀝𑀁 𑀅𑀧𑀦𑁂𑀣𑀸’’𑀢𑀺 𑀕𑀘𑁆𑀙𑀦𑁆𑀢𑁄 𑀲𑀓𑀝𑁂 𑀅𑀦𑀧𑀦𑀻𑀬𑀫𑀸𑀦𑁂 𑀓𑀼𑀚𑁆𑀛𑀺𑀢𑁆𑀯𑀸 𑀧𑀢𑁄𑀤𑀮𑀝𑁆𑀞𑀺𑀬𑀸 𑀧𑀼𑀭𑀺𑀫𑀲𑀓𑀝𑁂 𑀲𑀸𑀓𑀝𑀺𑀓𑀲𑁆𑀲 𑀭𑀣𑀥𑀼𑀭𑁂 𑀧𑀳𑀭𑀺. 𑀲𑀸 𑀭𑀣𑀥𑀼𑀭𑁂 𑀧𑀝𑀺𑀳𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀦𑀮𑀸𑀝𑀁 𑀧𑀳𑀭𑀺. 𑀢𑀸𑀯𑀤𑁂𑀯𑀲𑁆𑀲 𑀦𑀮𑀸𑀝𑁂 𑀕𑀡𑁆𑀟𑁄 𑀉𑀝𑁆𑀞𑀳𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀲𑀸𑀓𑀝𑀺𑀓𑁂𑀳𑀺 𑀧𑀳𑀝𑁄𑀫𑁆𑀳𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀲𑀸𑀓𑀝𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀸 𑀢𑀲𑁆𑀲𑁂𑀯 𑀤𑁄𑀲𑀁 𑀅𑀤𑁆𑀤𑀲𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀭𑀜𑁆𑀜𑁄 𑀓𑀺𑀭 ¶ 𑀧𑀼𑀭𑁄𑀳𑀺𑀢𑁄 ‘𑀲𑀸𑀓𑀝𑀺𑀓𑁂𑀳𑀺 𑀧𑀳𑀝𑁄𑀫𑁆𑀳𑀻’𑀢𑀺 𑀅𑀟𑁆𑀟𑀁 𑀓𑀭𑁄𑀦𑁆𑀢𑁄 𑀲𑀬𑀫𑁂𑀯 𑀧𑀭𑀚𑁆𑀚𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀏𑀯𑀭𑀽𑀧𑀁 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑁂𑀯 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄 𑀅𑀳𑁄𑀲𑀺. 𑀅𑀣 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀭𑀣𑁂𑀦 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀁 𑀕𑀘𑁆𑀙𑀦𑁆𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀢𑁂𑀦 𑀭𑀜𑁆𑀜𑁄 𑀆𑀭𑁄𑀘𑀺𑀢𑁂 𑀭𑀸𑀚𑀸 𑀲𑀬𑀁 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀓𑀝𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸𑀯 ‘‘𑀢𑀼𑀫𑁆𑀳𑁂𑀳𑀺 𑀫𑀫 𑀧𑀼𑀭𑁄𑀳𑀺𑀢𑀁 𑀓𑁄𑀝𑁆𑀝𑁂𑀢𑁆𑀯𑀸 𑀦𑀮𑀸𑀝𑁂 𑀕𑀡𑁆𑀟𑁄 𑀉𑀝𑁆𑀞𑀸𑀧𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀲𑀩𑁆𑀩𑀲𑁆𑀲𑀳𑀭𑀡𑀁 𑀢𑁂𑀲𑀁 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀢𑀼𑀫𑁆𑀳𑁂, 𑀫𑀳𑀸𑀭𑀸𑀚, 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸𑀯 𑀏𑀢𑁂𑀲𑀁 𑀲𑀩𑁆𑀩𑀲𑁆𑀲𑀁 𑀳𑀭𑀸𑀧𑁂𑀣, 𑀏𑀓𑀘𑁆𑀘𑁂 𑀧𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀳𑀭𑀺𑀢𑁆𑀯𑀸𑀧𑀺 ‘𑀧𑀭𑁂𑀦 𑀧𑀳𑀝𑀫𑁆𑀳𑀸’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀅𑀯𑀺𑀘𑀺𑀦𑀺𑀢𑁆𑀯𑀸 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂𑀦 𑀦𑀸𑀫 𑀦𑀺𑀲𑀸𑀫𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑁧𑁨𑁫.

‘‘𑀅𑀧𑀺 𑀳𑀦𑁆𑀢𑁆𑀯𑀸 𑀳𑀢𑁄 𑀩𑁆𑀭𑀽𑀢𑀺, 𑀚𑁂𑀢𑁆𑀯𑀸 𑀚𑀺𑀢𑁄𑀢𑀺 𑀪𑀸𑀲𑀢𑀺;

𑀧𑀼𑀩𑁆𑀩𑀫𑀓𑁆𑀔𑀸𑀬𑀺𑀦𑁄 𑀭𑀸𑀚, 𑀅𑀜𑁆𑀜𑀤𑀢𑁆𑀣𑀼 𑀦 𑀲𑀤𑁆𑀤𑀳𑁂.

𑁧𑁨𑁬.

‘‘𑀢𑀲𑁆𑀫𑀸 𑀧𑀡𑁆𑀟𑀺𑀢𑀚𑀸𑀢𑀺𑀬𑁄, 𑀲𑀼𑀡𑁂𑀬𑁆𑀬 𑀇𑀢𑀭𑀲𑁆𑀲𑀧𑀺;

𑀉𑀪𑀺𑀦𑁆𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀓𑀭𑁂.

𑁧𑁨𑁭.

‘‘𑀅𑀮𑀲𑁄 ¶ 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁧𑁨𑁮.

‘‘𑀦𑀺𑀲𑀫𑁆𑀫 ¶ ¶ 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚, 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 𑀅𑀧𑀺 𑀳𑀦𑁆𑀢𑁆𑀯𑀸𑀢𑀺 𑀅𑀧𑀺 𑀏𑀓𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀳𑀦𑁆𑀢𑁆𑀯𑀸 ‘‘𑀧𑀭𑁂𑀦 𑀧𑀳𑀝𑁄𑀫𑁆𑀳𑀻’’𑀢𑀺 𑀩𑁆𑀭𑀽𑀢𑀺 𑀓𑀣𑁂𑀢𑀺. 𑀚𑁂𑀢𑁆𑀯𑀸 𑀚𑀺𑀢𑁄𑀢𑀺 𑀲𑀬𑀁 𑀯𑀸 𑀧𑀦 𑀧𑀭𑀁 𑀚𑀺𑀢𑁆𑀯𑀸 ‘‘𑀅𑀳𑀁 𑀚𑀺𑀢𑁄𑀫𑁆𑀳𑀻’’𑀢𑀺 𑀪𑀸𑀲𑀢𑀺. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀫𑀳𑀸𑀭𑀸𑀚, 𑀧𑀼𑀩𑁆𑀩𑀫𑁂𑀯 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀅𑀓𑁆𑀔𑀸𑀬𑀦𑁆𑀢𑀲𑁆𑀲 𑀧𑀼𑀩𑁆𑀩𑀫𑀓𑁆𑀔𑀸𑀬𑀺𑀦𑁄 𑀅𑀜𑁆𑀜𑀤𑀢𑁆𑀣𑀼 𑀦 𑀲𑀤𑁆𑀤𑀳𑁂, 𑀏𑀓𑀁𑀲𑁂𑀦 𑀯𑀘𑀦𑀁 𑀦 𑀲𑀤𑁆𑀤𑀳𑁂𑀬𑁆𑀬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲 𑀏𑀓𑀁𑀲𑁂𑀦 𑀯𑀘𑀦𑀁 𑀦 𑀲𑀤𑁆𑀤𑀳𑀸𑀢𑀩𑁆𑀩𑀁, 𑀢𑀲𑁆𑀫𑀸. 𑀬𑀣𑀸 𑀥𑀫𑁆𑀫𑁄𑀢𑀺 𑀬𑀣𑀸 𑀯𑀺𑀦𑀺𑀘𑁆𑀙𑀬𑀲𑀪𑀸𑀯𑁄 𑀞𑀺𑀢𑁄, 𑀢𑀣𑀸 𑀓𑀭𑁂𑀬𑁆𑀬.

𑀅𑀲𑀜𑁆𑀜𑀢𑁄𑀢𑀺 𑀓𑀸𑀬𑀸𑀤𑀻𑀳𑀺 𑀅𑀲𑀜𑁆𑀜𑀢𑁄 𑀤𑀼𑀲𑁆𑀲𑀻𑀮𑁄. 𑀢𑀁 𑀦 𑀲𑀸𑀥𑀽𑀢𑀺 𑀬𑀁 𑀢𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀜𑀸𑀡𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀆𑀥𑀸𑀦𑀕𑁆𑀕𑀸𑀳𑀺𑀯𑀲𑁂𑀦 𑀤𑀴𑁆𑀳𑀓𑁄𑀧𑀲𑀗𑁆𑀔𑀸𑀢𑀁 𑀓𑁄𑀥𑀦𑀁, 𑀢𑀁 𑀦 𑀲𑀸𑀥𑀼. 𑀦𑀸𑀦𑀺𑀲𑀫𑁆𑀫𑀸𑀢𑀺 𑀦 𑀅𑀦𑀺𑀲𑀸𑀫𑁂𑀢𑁆𑀯𑀸. 𑀤𑀺𑀲𑀫𑁆𑀧𑀢𑀻𑀢𑀺 𑀤𑀺𑀲𑀸𑀦𑀁 𑀧𑀢𑀺, 𑀫𑀳𑀸𑀭𑀸𑀚. 𑀬𑀲𑁄 𑀓𑀺𑀢𑁆𑀢𑀺 𑀘𑀸𑀢𑀺 𑀇𑀲𑁆𑀲𑀭𑀺𑀬𑀧𑀭𑀺𑀯𑀸𑀭𑁄 𑀘𑁂𑀯 𑀓𑀺𑀢𑁆𑀢𑀺𑀲𑀤𑁆𑀤𑁄 𑀘 𑀯𑀟𑁆𑀠𑀢𑀻𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀺𑀦𑀺, 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀤𑁄𑀲𑁄 𑀚𑀸𑀢𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑁄𑀯 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀣𑀮𑀝𑁆𑀞𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁩𑁩] 𑁩. 𑀧𑀓𑁆𑀓𑀕𑁄𑀥𑀚𑀸𑀢𑀓𑀯𑀡𑁆𑀡𑀦𑀸

𑀢𑀤𑁂𑀯 ¶ 𑀫𑁂 𑀢𑁆𑀯𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥 𑀧𑀦 𑀢𑁂𑀲𑀁 𑀉𑀤𑁆𑀥𑀸𑀭𑀁 𑀲𑀸𑀥𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀮𑀼𑀤𑁆𑀤𑀓𑁄 ‘‘𑀉𑀪𑁄𑀧𑀺 𑀔𑀸𑀤𑀣𑀸’’𑀢𑀺 𑀏𑀓𑀁 𑀧𑀓𑁆𑀓𑀕𑁄𑀥𑀁 𑀅𑀤𑀸𑀲𑀺. 𑀲𑁄 𑀧𑀼𑀭𑀺𑀲𑁄 𑀪𑀭𑀺𑀬𑀁 𑀧𑀸𑀦𑀻𑀬𑀢𑁆𑀣𑀸𑀬 𑀧𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀕𑁄𑀥𑀁 𑀔𑀸𑀤𑀺𑀢𑁆𑀯𑀸 𑀢𑀲𑁆𑀲𑀸 𑀆𑀕𑀢𑀓𑀸𑀮𑁂 ‘‘𑀪𑀤𑁆𑀤𑁂, 𑀕𑁄𑀥𑀸 𑀧𑀮𑀸𑀢𑀸’’𑀢𑀺 𑀆𑀳. ‘‘𑀲𑀸𑀥𑀼, 𑀲𑀸𑀫𑀺, 𑀧𑀓𑁆𑀓𑀕𑁄𑀥𑀸𑀬 𑀧𑀮𑀸𑀬𑀦𑁆𑀢𑀺𑀬𑀸 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺? 𑀲𑀸 𑀚𑁂𑀢𑀯𑀦𑁂 𑀧𑀸𑀦𑀻𑀬𑀁 ¶ 𑀧𑀺𑀯𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 ¶ 𑀦𑀺𑀲𑀺𑀦𑁆𑀦𑀸 𑀲𑀢𑁆𑀣𑀸𑀭𑀸 ‘‘𑀓𑀺𑀁 𑀉𑀧𑀸𑀲𑀺𑀓𑁂, 𑀅𑀬𑀁 𑀢𑁂 𑀳𑀺𑀢𑀓𑀸𑀫𑁄 𑀲𑀲𑀺𑀦𑁂𑀳𑁄 𑀉𑀧𑀓𑀸𑀭𑀓𑁄’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀪𑀦𑁆𑀢𑁂, 𑀅𑀳𑀁 𑀏𑀢𑀲𑁆𑀲 𑀳𑀺𑀢𑀓𑀸𑀫𑀸 𑀲𑀲𑀺𑀦𑁂𑀳𑀸, 𑀅𑀬𑀁 𑀧𑀦 𑀫𑀬𑀺 𑀦𑀺𑀲𑁆𑀲𑀺𑀦𑁂𑀳𑁄’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀳𑁄𑀢𑀼 𑀫𑀸 𑀘𑀺𑀦𑁆𑀢𑀬𑀺, 𑀏𑀯𑀁 𑀦𑀸𑀫𑁂𑀲 𑀓𑀭𑁄𑀢𑀺. 𑀬𑀤𑀸 𑀧𑀦 𑀢𑁂 𑀕𑀼𑀡𑀁 𑀲𑀭𑀢𑀺, 𑀢𑀤𑀸 𑀢𑀼𑀬𑁆𑀳𑀫𑁂𑀯 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀤𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀢𑁂𑀲𑀁 𑀦𑀺𑀯𑀢𑁆𑀢𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀮𑀼𑀤𑁆𑀤𑀓𑁄 𑀓𑀺𑀮𑀦𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀤𑁆𑀯𑁂𑀧𑀺 𑀚𑀦𑀸 𑀔𑀸𑀤𑀣𑀸’’𑀢𑀺 𑀏𑀓𑀁 𑀧𑀓𑁆𑀓𑀕𑁄𑀥𑀁 𑀅𑀤𑀸𑀲𑀺. 𑀭𑀸𑀚𑀥𑀻𑀢𑀸 𑀢𑀁 𑀯𑀮𑁆𑀮𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂 𑀏𑀓𑀁 𑀲𑀭𑀁 𑀤𑀺𑀲𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀲𑁆𑀲𑀢𑁆𑀣𑀫𑀽𑀮𑁂 𑀦𑀺𑀲𑀻𑀤𑀺𑀁𑀲𑀼. 𑀭𑀸𑀚𑀧𑀼𑀢𑁆𑀢𑁄 ‘‘𑀕𑀘𑁆𑀙 𑀪𑀤𑁆𑀤𑁂, 𑀲𑀭𑀢𑁄 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀦 𑀉𑀤𑀓𑀁 𑀆𑀳𑀭, 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀲𑀸 𑀕𑁄𑀥𑀁 𑀲𑀸𑀔𑀸𑀬 𑀮𑀕𑁆𑀕𑁂𑀢𑁆𑀯𑀸 𑀧𑀸𑀦𑀻𑀬𑀢𑁆𑀣𑀸𑀬 𑀕𑀢𑀸. 𑀇𑀢𑀭𑁄 𑀲𑀩𑁆𑀩𑀁 𑀕𑁄𑀥𑀁 𑀔𑀸𑀤𑀺𑀢𑁆𑀯𑀸 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀁 𑀕𑀳𑁂𑀢𑁆𑀯𑀸 𑀧𑀭𑀫𑁆𑀫𑀼𑀔𑁄 𑀦𑀺𑀲𑀻𑀤𑀺. 𑀲𑁄 𑀢𑀸𑀬 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀬 ‘‘𑀪𑀤𑁆𑀤𑁂, 𑀕𑁄𑀥𑀸 𑀲𑀸𑀔𑀸𑀬 𑀑𑀢𑀭𑀺𑀢𑁆𑀯𑀸 𑀯𑀫𑁆𑀫𑀺𑀓𑀁 𑀧𑀸𑀯𑀺𑀲𑀺, 𑀅𑀳𑀁 𑀥𑀸𑀯𑀺𑀢𑁆𑀯𑀸 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀁 𑀅𑀕𑁆𑀕𑀳𑁂𑀲𑀺𑀁, 𑀕𑀳𑀺𑀢𑀝𑁆𑀞𑀸𑀦𑀁 𑀳𑀢𑁆𑀣𑁂𑀬𑁂𑀯 𑀓𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀩𑀺𑀮𑀁 𑀧𑀯𑀺𑀝𑁆𑀞𑀸’’𑀢𑀺 𑀆𑀳. ‘‘𑀳𑁄𑀢𑀼, 𑀤𑁂𑀯, 𑀧𑀓𑁆𑀓𑀕𑁄𑀥𑀸𑀬 𑀧𑀮𑀸𑀬𑀦𑁆𑀢𑀺𑀬𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺. 𑀢𑁂 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀅𑀕𑀫𑀁𑀲𑀼.

𑀭𑀸𑀚𑀧𑀼𑀢𑁆𑀢𑁄 𑀭𑀚𑁆𑀚𑀁 𑀧𑀢𑁆𑀯𑀸 𑀢𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀫𑀢𑁆𑀢𑁂 𑀞𑀧𑁂𑀲𑀺, 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀧𑀦𑀲𑁆𑀲𑀸 𑀦𑀢𑁆𑀣𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑀼𑀓𑀸𑀫𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 ‘‘𑀦𑀦𑀼 𑀫𑀬𑀁 𑀅𑀬𑁆𑀬𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀦 𑀮𑀪𑀸𑀫, 𑀓𑀺𑀁 𑀦𑁄 𑀦 𑀑𑀮𑁄𑀓𑁂𑀣𑀸’’𑀢𑀺 𑀆𑀳. ‘‘𑀢𑀸𑀢, 𑀅𑀳𑀫𑁂𑀯 𑀭𑀜𑁆𑀜𑁄 ¶ 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀺, 𑀢𑀼𑀬𑁆𑀳𑀁 𑀓𑀺𑀁 𑀤𑀲𑁆𑀲𑀸𑀫𑀺, 𑀭𑀸𑀚𑀸𑀧𑀺 𑀫𑀬𑁆𑀳𑀁 𑀇𑀤𑀸𑀦𑀺 𑀓𑀺𑀁 𑀤𑀲𑁆𑀲𑀢𑀺, 𑀲𑁄 𑀅𑀭𑀜𑁆𑀜𑀢𑁄 𑀆𑀕𑀫𑀦𑀓𑀸𑀮𑁂 𑀧𑀓𑁆𑀓𑀕𑁄𑀥𑀁 𑀏𑀓𑀓𑁄𑀯 𑀔𑀸𑀤𑀻’’𑀢𑀺 ¶ . ‘‘𑀅𑀬𑁆𑀬𑁂, 𑀦 𑀤𑁂𑀯𑁄 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀢𑀺, 𑀫𑀸 𑀏𑀯𑀁 𑀅𑀯𑀘𑀼𑀢𑁆𑀣𑀸’’𑀢𑀺. 𑀅𑀣 𑀦𑀁 𑀤𑁂𑀯𑀻 ‘‘𑀢𑀼𑀬𑁆𑀳𑀁 𑀢𑀁, 𑀢𑀸𑀢, 𑀦 𑀧𑀸𑀓𑀝𑀁, 𑀭𑀜𑁆𑀜𑁄𑀬𑁂𑀯 𑀫𑀬𑁆𑀳𑀜𑁆𑀘 𑀧𑀸𑀓𑀝’’𑀦𑁆𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁯.

‘‘𑀢𑀤𑁂𑀯 𑀫𑁂 𑀢𑁆𑀯𑀁 𑀯𑀺𑀤𑀺𑀢𑁄, 𑀯𑀦𑀫𑀚𑁆𑀛𑁂 𑀭𑀣𑁂𑀲𑀪;

𑀬𑀲𑁆𑀲 𑀢𑁂 𑀔𑀕𑁆𑀕𑀩𑀤𑁆𑀥𑀲𑁆𑀲, 𑀲𑀦𑁆𑀦𑀤𑁆𑀥𑀲𑁆𑀲 𑀢𑀺𑀭𑀻𑀝𑀺𑀦𑁄;

𑀅𑀲𑁆𑀲𑀢𑁆𑀣𑀤𑀼𑀫𑀲𑀸𑀔𑀸𑀬, 𑀧𑀓𑁆𑀓𑀕𑁄𑀥𑀸 𑀧𑀮𑀸𑀬𑀣𑀸’’𑀢𑀺.

𑀢𑀢𑁆𑀣 𑀢𑀤𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 ‘‘𑀅𑀬𑀁 𑀫𑀬𑁆𑀳𑀁 𑀅𑀤𑀸𑀬𑀓𑁄’’𑀢𑀺 𑀏𑀯𑀁 𑀢𑁆𑀯𑀁 𑀯𑀺𑀤𑀺𑀢𑁄. 𑀅𑀜𑁆𑀜𑁂 𑀧𑀦 𑀢𑀯 𑀲𑀪𑀸𑀯𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀕𑁆𑀕𑀩𑀤𑁆𑀥𑀲𑁆𑀲𑀸𑀢𑀺 𑀩𑀤𑁆𑀥𑀔𑀕𑁆𑀕𑀲𑁆𑀲. 𑀢𑀺𑀭𑀻𑀝𑀺𑀦𑁄𑀢𑀺 𑀢𑀺𑀭𑀻𑀝𑀯𑀢𑁆𑀣𑀦𑀺𑀯𑀢𑁆𑀣𑀲𑁆𑀲 𑀫𑀕𑁆𑀕𑀸𑀕𑀫𑀦𑀓𑀸𑀮𑁂. 𑀧𑀓𑁆𑀓𑀕𑁄𑀥𑀸𑀢𑀺 𑀅𑀗𑁆𑀕𑀸𑀭𑀧𑀓𑁆𑀓𑀸 𑀕𑁄𑀥𑀸 𑀧𑀮𑀸𑀬𑀣𑀸𑀢𑀺.

𑀏𑀯𑀁 ¶ 𑀭𑀜𑁆𑀜𑀸 𑀓𑀢𑀤𑁄𑀲𑀁 𑀧𑀭𑀺𑀲𑀫𑀚𑁆𑀛𑁂 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑁆𑀬𑁂, 𑀤𑁂𑀯𑀲𑁆𑀲 𑀅𑀧𑁆𑀧𑀺𑀬𑀓𑀸𑀮𑀢𑁄 𑀧𑀪𑀼𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀅𑀨𑀸𑀲𑀼𑀓𑀁 𑀓𑀢𑁆𑀯𑀸 𑀓𑀲𑁆𑀫𑀸 𑀇𑀥 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁦.

‘‘𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀁, 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀁;

𑀦𑀸𑀦𑀢𑁆𑀣𑀓𑀸𑀫𑀲𑁆𑀲 𑀓𑀭𑁂𑀬𑁆𑀬 𑀅𑀢𑁆𑀣𑀁, 𑀅𑀲𑀫𑁆𑀪𑀚𑀦𑁆𑀢𑀫𑁆𑀧𑀺 𑀦 𑀲𑀫𑁆𑀪𑀚𑁂𑀬𑁆𑀬.

𑁧𑁩𑁧.

‘‘𑀘𑀚𑁂 𑀘𑀚𑀦𑁆𑀢𑀁 𑀯𑀦𑀣𑀁 𑀦 𑀓𑀬𑀺𑀭𑀸, 𑀅𑀧𑁂𑀢𑀘𑀺𑀢𑁆𑀢𑁂𑀦 𑀦 𑀲𑀫𑁆𑀪𑀚𑁂𑀬𑁆𑀬;

𑀤𑀺𑀚𑁄 𑀤𑀼𑀫𑀁 𑀔𑀻𑀡𑀨𑀮𑀦𑁆𑀢𑀺 𑀜𑀢𑁆𑀯𑀸, 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬 𑀫𑀳𑀸 𑀳𑀺 𑀮𑁄𑀓𑁄’’𑀢𑀺.

𑀢𑀢𑁆𑀣 𑀦𑀫𑁂 𑀦𑀫𑀦𑁆𑀢𑀲𑁆𑀲𑀸𑀢𑀺 𑀬𑁄 𑀅𑀢𑁆𑀢𑀦𑀺 𑀫𑀼𑀤𑀼𑀘𑀺𑀢𑁆𑀢𑁂𑀦 𑀦𑀫𑀢𑀺, 𑀢𑀲𑁆𑀲𑁂𑀯 𑀧𑀝𑀺𑀦𑀫𑁂𑀬𑁆𑀬. 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀁 𑀓𑀺𑀘𑁆𑀘𑀁 𑀅𑀦𑀼𑀓𑀼𑀩𑁆𑀩𑀦𑁆𑀢𑀲𑁆𑀲𑁂𑀯. 𑀅𑀦𑀢𑁆𑀣𑀓𑀸𑀫𑀲𑁆𑀲𑀸𑀢𑀺 𑀅𑀯𑀟𑁆𑀠𑀺𑀓𑀸𑀫𑀲𑁆𑀲. 𑀯𑀦𑀣𑀁 𑀦 𑀓𑀬𑀺𑀭𑀸𑀢𑀺 ¶ 𑀢𑀲𑁆𑀫𑀺𑀁 𑀘𑀚𑀦𑁆𑀢𑁂 𑀢𑀡𑁆𑀳𑀸𑀲𑁆𑀦𑁂𑀳𑀁 𑀦 𑀓𑀭𑁂𑀬𑁆𑀬. 𑀅𑀧𑁂𑀢𑀘𑀺𑀢𑁆𑀢𑁂𑀦𑀸𑀢𑀺 𑀅𑀧𑀕𑀢𑀘𑀺𑀢𑁆𑀢𑁂𑀦 𑀯𑀺𑀭𑀢𑁆𑀢𑀘𑀺𑀢𑁆𑀢𑁂𑀦. 𑀦 𑀲𑀫𑁆𑀪𑀚𑁂𑀬𑁆𑀬𑀸𑀢𑀺 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬. 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 ¶ 𑀑𑀮𑁄𑀓𑁂𑀬𑁆𑀬, 𑀬𑀣𑀸 𑀤𑀺𑀚𑁄 𑀔𑀻𑀡𑀨𑀮𑀁 𑀤𑀼𑀫𑀁 𑀭𑀼𑀓𑁆𑀔𑀁 𑀜𑀢𑁆𑀯𑀸 𑀅𑀜𑁆𑀜𑀁 𑀨𑀮𑀪𑀭𑀺𑀢𑀁 𑀭𑀼𑀓𑁆𑀔𑀁 𑀕𑀘𑁆𑀙𑀢𑀺, 𑀢𑀣𑀸 𑀔𑀻𑀡𑀭𑀸𑀕𑀁 𑀧𑀼𑀭𑀺𑀲𑀁 𑀜𑀢𑁆𑀯𑀸 𑀅𑀜𑁆𑀜𑀁 𑀲𑀲𑀺𑀦𑁂𑀳𑀁 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁂 𑀓𑀣𑁂𑀦𑁆𑀢𑁂 𑀏𑀯 𑀢𑀲𑁆𑀲𑀸 𑀕𑀼𑀡𑀁 𑀲𑀭𑀺𑀢𑁆𑀯𑀸 ‘‘𑀪𑀤𑁆𑀤𑁂, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀯 𑀕𑀼𑀡𑀁 𑀦 𑀲𑀮𑁆𑀮𑀓𑁆𑀔𑁂𑀲𑀺𑀁, 𑀧𑀡𑁆𑀟𑀺𑀢𑀲𑁆𑀲𑀬𑁂𑀯 𑀓𑀣𑀸𑀬 𑀲𑀮𑁆𑀮𑀓𑁆𑀔𑁂𑀲𑀺𑀁, 𑀫𑀫 𑀅𑀧𑀭𑀸𑀥𑀁 𑀲𑀳𑀦𑁆𑀢𑀺𑀬𑀸 𑀇𑀤𑀁 𑀲𑀓𑀮𑀭𑀚𑁆𑀚𑀁 𑀢𑀼𑀬𑁆𑀳𑀫𑁂𑀯 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁩𑁨.

‘‘𑀲𑁄 𑀢𑁂 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀦𑀼𑀪𑀸𑀯𑀁, 𑀓𑀢𑀜𑁆𑀜𑀼𑀢𑀁 𑀔𑀢𑁆𑀢𑀺𑀬𑁂 𑀧𑁂𑀓𑁆𑀔𑀫𑀸𑀦𑁄;

𑀲𑀩𑁆𑀩𑀜𑁆𑀘 𑀢𑁂 𑀇𑀲𑁆𑀲𑀭𑀺𑀬𑀁 𑀤𑀤𑀸𑀫𑀺, 𑀬𑀲𑁆𑀲𑀺𑀘𑁆𑀙𑀲𑀻 𑀢𑀲𑁆𑀲 𑀢𑀼𑀯𑀁 𑀤𑀤𑀸𑀫𑀻’’𑀢𑀺.

𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀳𑀁. 𑀬𑀣𑀸𑀦𑀼𑀪𑀸𑀯𑀦𑁆𑀢𑀺 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁. 𑀬𑀲𑁆𑀲𑀺𑀘𑁆𑀙𑀲𑀻𑀢𑀺 𑀬𑀲𑁆𑀲 𑀇𑀘𑁆𑀙𑀲𑀺, 𑀢𑀲𑁆𑀲 𑀇𑀤𑀁 𑀭𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀁 𑀢𑁆𑀯𑀁 𑀇𑀘𑁆𑀙𑀲𑀺, 𑀢𑀁 𑀤𑀤𑀸𑀫𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀭𑀸𑀚𑀸 𑀤𑁂𑀯𑀺𑀬𑀸 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀅𑀤𑀸𑀲𑀺, ‘‘𑀇𑀫𑀺𑀦𑀸𑀳𑀁 𑀏𑀢𑀺𑀲𑁆𑀲𑀸 𑀕𑀼𑀡𑀁 𑀲𑀭𑀸𑀧𑀺𑀢𑁄’’𑀢𑀺 𑀧𑀡𑁆𑀟𑀺𑀢𑀲𑁆𑀲𑀧𑀺 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀅𑀤𑀸𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀪𑁄 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀤𑀸 𑀚𑀬𑀫𑁆𑀧𑀢𑀺𑀓𑀸 𑀏𑀢𑀭𑀳𑀺 𑀚𑀬𑀫𑁆𑀧𑀢𑀺𑀓𑀸𑀯 𑀅𑀳𑁂𑀲𑀼𑀁, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀓𑁆𑀓𑀕𑁄𑀥𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁩𑁪] 𑁪. 𑀭𑀸𑀚𑁄𑀯𑀸𑀤𑀚𑀸𑀢𑀓𑀯𑀡𑁆𑀡𑀦𑀸

𑀕𑀯𑀁 ¶ 𑀘𑁂 𑀢𑀭𑀫𑀸𑀦𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑁄𑀯𑀸𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀢𑁂𑀲𑀓𑀼𑀡𑀚𑀸𑀢𑀓𑁂 (𑀚𑀸. 𑁨.𑁧𑁭.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀥 𑀧𑀦 𑀲𑀢𑁆𑀣𑀸 ‘‘𑀫𑀳𑀸𑀭𑀸𑀚, 𑀧𑁄𑀭𑀸𑀡𑀓𑀭𑀸𑀚𑀸𑀦𑁄𑀧𑀺 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑀬𑀫𑀸𑀦𑀸 𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑀸 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀺𑀓𑁆𑀔𑀺𑀢𑀲𑀩𑁆𑀩𑀲𑀺𑀧𑁆𑀧𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀭𑀫𑀡𑀻𑀬𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀯𑀺𑀳𑀸𑀲𑀺. 𑀅𑀣 𑀭𑀸𑀚𑀸 𑀅𑀕𑀼𑀡𑀧𑀭𑀺𑀬𑁂𑀲𑀓𑁄 𑀳𑀼𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀓𑁄𑀘𑀺 𑀅𑀕𑀼𑀡𑀁 𑀓𑀣𑁂𑀦𑁆𑀢𑁄’’𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀅𑀦𑁆𑀢𑁄𑀚𑀦𑁂 𑀘 𑀩𑀳𑀺𑀚𑀦𑁂 𑀘 𑀅𑀦𑁆𑀢𑁄𑀦𑀕𑀭𑁂 𑀘 𑀩𑀳𑀺𑀦𑀕𑀭𑁂 𑀘 𑀓𑀜𑁆𑀘𑀺 𑀅𑀢𑁆𑀢𑀦𑁄 𑀅𑀯𑀡𑁆𑀡𑀯𑀸𑀤𑀺𑀁 𑀅𑀤𑀺𑀲𑁆𑀯𑀸 ‘‘𑀚𑀦𑀧𑀤𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀚𑀦𑀧𑀤𑀁 𑀘𑀭𑀺. 𑀢𑀢𑁆𑀭𑀸𑀧𑀺 𑀅𑀯𑀡𑁆𑀡𑀯𑀸𑀤𑀺𑀁 𑀅𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀕𑀼𑀡𑀓𑀣𑀫𑁂𑀯 𑀲𑀼𑀢𑁆𑀯𑀸 ‘‘𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀲𑁆𑀲𑀫𑀁 𑀧𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀢𑁄 𑀧𑀭𑀺𑀧𑀓𑁆𑀓𑀸𑀦𑀺 𑀦𑀺𑀕𑁆𑀭𑁄𑀥𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺, 𑀢𑀸𑀦𑀺 𑀳𑁄𑀦𑁆𑀢𑀺 𑀫𑀥𑀼𑀭𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀲𑀓𑁆𑀔𑀭𑀘𑀼𑀡𑁆𑀡𑀲𑀫𑀭𑀲𑀸𑀦𑀺. 𑀲𑁄 𑀭𑀸𑀚𑀸𑀦𑀫𑁆𑀧𑀺 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀇𑀫𑀁 𑀫𑀳𑀸𑀧𑀼𑀜𑁆𑀜, 𑀦𑀺𑀕𑁆𑀭𑁄𑀥𑀧𑀓𑁆𑀓𑀨𑀮𑀁 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀸’’𑀢𑀺 𑀆𑀳. 𑀭𑀸𑀚𑀸 𑀢𑀣𑀸 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑀁 𑀦𑀺𑀕𑁆𑀭𑁄𑀥𑀧𑀓𑁆𑀓𑀁 𑀅𑀢𑀺 𑀯𑀺𑀬 𑀫𑀥𑀼𑀭’’𑀦𑁆𑀢𑀺? ‘‘𑀫𑀳𑀸𑀧𑀼𑀜𑁆𑀜, 𑀦𑀽𑀦 𑀭𑀸𑀚𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑁂𑀦𑁂𑀢𑀁 𑀫𑀥𑀼𑀭𑀦𑁆𑀢𑀺. 𑀭𑀜𑁆𑀜𑁄 𑀅𑀥𑀫𑁆𑀫𑀺𑀓𑀓𑀸𑀮𑁂 ¶ 𑀅𑀫𑀥𑀼𑀭𑀁 𑀦𑀼 𑀔𑁄, 𑀪𑀦𑁆𑀢𑁂, 𑀳𑁄𑀢𑀻’’𑀢𑀺. ‘‘𑀆𑀫, 𑀫𑀳𑀸𑀧𑀼𑀜𑁆𑀜, 𑀭𑀸𑀚𑀽𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺𑀧𑀺 𑀯𑀦𑀫𑀽𑀮𑀨𑀮𑀸𑀦𑀺𑀧𑀺 𑀅𑀫𑀥𑀼𑀭𑀸𑀦𑀺 𑀳𑁄𑀦𑁆𑀢𑀺 𑀦𑀺𑀭𑁄𑀚𑀸𑀦𑀺, 𑀦 𑀓𑁂𑀯𑀮𑀁 𑀏𑀢𑀸𑀦𑀺, 𑀲𑀓𑀮𑀫𑁆𑀧𑀺 𑀭𑀝𑁆𑀞𑀁 𑀦𑀺𑀭𑁄𑀚𑀁 𑀓𑀲𑀝𑀁 ¶ 𑀳𑁄𑀢𑀺. 𑀢𑁂𑀲𑀼 𑀧𑀦 𑀥𑀫𑁆𑀫𑀺𑀓𑁂𑀲𑀼 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀫𑀥𑀼𑀭𑀸𑀦𑀺 𑀳𑁄𑀦𑁆𑀢𑀺 𑀑𑀚𑀯𑀦𑁆𑀢𑀸𑀦𑀺, 𑀲𑀓𑀮𑀫𑁆𑀧𑀺 𑀭𑀝𑁆𑀞𑀁 𑀑𑀚𑀯𑀦𑁆𑀢𑀫𑁂𑀯 𑀳𑁄𑀢𑀻’’𑀢𑀺. 𑀭𑀸𑀚𑀸 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀪𑀦𑁆𑀢𑁂’’𑀢𑀺 𑀅𑀢𑁆𑀢𑀦𑁄 𑀭𑀸𑀚𑀪𑀸𑀯𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀧𑀲𑀲𑁆𑀲 𑀯𑀘𑀦𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀓𑀺𑀜𑁆𑀘𑀺 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺𑀲𑁆𑀲 𑀢𑀣𑁂𑀯 𑀯𑀢𑁆𑀯𑀸 𑀦𑀺𑀕𑁆𑀭𑁄𑀥𑀧𑀓𑁆𑀓𑀁 𑀅𑀤𑀸𑀲𑀺, 𑀢𑀁 𑀢𑀲𑁆𑀲 𑀢𑀺𑀢𑁆𑀢𑀓𑀭𑀲𑀁 𑀅𑀳𑁄𑀲𑀺. 𑀭𑀸𑀚𑀸 ‘‘𑀅𑀫𑀥𑀼𑀭𑀁 𑀦𑀺𑀭𑀲’’𑀦𑁆𑀢𑀺 𑀲𑀳 𑀔𑁂𑀴𑁂𑀦 𑀙𑀟𑁆𑀟𑁂𑀢𑁆𑀯𑀸 ‘‘𑀢𑀺𑀢𑁆𑀢𑀓𑀁, 𑀪𑀦𑁆𑀢𑁂’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀧𑀼𑀜𑁆𑀜, 𑀦𑀽𑀦 𑀭𑀸𑀚𑀸 𑀅𑀥𑀫𑁆𑀫𑀺𑀓𑁄 𑀪𑀯𑀺𑀲𑁆𑀲𑀢𑀺. 𑀭𑀸𑀚𑀽𑀦𑀜𑁆𑀳𑀺 𑀅𑀥𑀫𑁆𑀫𑀺𑀓𑀓𑀸𑀮𑁂 𑀅𑀭𑀜𑁆𑀜𑁂 𑀨𑀮𑀸𑀨𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀅𑀫𑀥𑀼𑀭𑀁 𑀦𑀺𑀭𑁄𑀚𑀁 𑀚𑀸𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁩.

‘‘𑀕𑀯𑁂 ¶ 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.

𑁧𑁩𑁪.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.

𑁧𑁩𑁫.

‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

𑁧𑁩𑁬.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄’’𑀢𑀺.

𑀢𑀢𑁆𑀣 ¶ 𑀕𑀯𑀦𑁆𑀢𑀺 𑀕𑀼𑀦𑁆𑀦𑀁. 𑀢𑀭𑀫𑀸𑀦𑀸𑀦𑀦𑁆𑀢𑀺 𑀦𑀤𑀺𑀁 𑀑𑀢𑀭𑀦𑁆𑀢𑀸𑀦𑀁. 𑀚𑀺𑀫𑁆𑀳𑀦𑁆𑀢𑀺 𑀓𑀼𑀝𑀺𑀮𑀁 𑀯𑀗𑁆𑀓𑀁. 𑀦𑁂𑀢𑁆𑀢𑁂𑀢𑀺 𑀦𑀸𑀬𑀓𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀕𑀯𑀚𑁂𑀝𑁆𑀞𑀓𑁂 𑀉𑀲𑀪𑁂 𑀧𑀼𑀗𑁆𑀕𑀯𑁂. 𑀧𑀕𑁂𑀯 𑀇𑀢𑀭𑀸 𑀧𑀚𑀸𑀢𑀺 𑀇𑀢𑀭𑁂 𑀲𑀢𑁆𑀢𑀸 𑀧𑀼𑀭𑁂𑀢𑀭𑀫𑁂𑀯 𑀅𑀥𑀫𑁆𑀫𑀁 𑀘𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀔𑀁 𑀲𑁂𑀢𑀻𑀢𑀺 𑀦 𑀓𑁂𑀯𑀮𑀁 𑀲𑁂𑀢𑀺, 𑀘𑀢𑀽𑀲𑀼𑀧𑀺 𑀇𑀭𑀺𑀬𑀸𑀧𑀣𑁂𑀲𑀼 𑀤𑀼𑀓𑁆𑀔𑀫𑁂𑀯 𑀯𑀺𑀦𑁆𑀤𑀢𑀺. 𑀅𑀥𑀫𑁆𑀫𑀺𑀓𑁄𑀢𑀺 𑀬𑀤𑀺 𑀭𑀸𑀚𑀸 𑀙𑀦𑁆𑀤𑀸𑀤𑀺𑀅𑀕𑀢𑀺𑀕𑀫𑀦𑀯𑀲𑁂𑀦 𑀅𑀥𑀫𑁆𑀫𑀺𑀓𑁄 𑀳𑁄𑀢𑀺. 𑀲𑀼𑀔𑀁 𑀲𑁂𑀢𑀻𑀢𑀺 𑀲𑀘𑁂 ¶ 𑀭𑀸𑀚𑀸 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀥𑀫𑁆𑀫𑀺𑀓𑁄 𑀳𑁄𑀢𑀺, 𑀲𑀩𑁆𑀩𑀁 𑀭𑀝𑁆𑀞𑀁 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀧𑁆𑀧𑀢𑁆𑀢𑀫𑁂𑀯 𑀳𑁄𑀢𑀻𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀭𑀸𑀚𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀦𑀺𑀕𑁆𑀭𑁄𑀥𑀧𑀓𑁆𑀓𑀁 𑀅𑀳𑀫𑁂𑀯 𑀫𑀥𑀼𑀭𑀁 𑀓𑀢𑁆𑀯𑀸 𑀢𑀺𑀢𑁆𑀢𑀓𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀧𑀼𑀦 𑀫𑀥𑀼𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀲𑀩𑁆𑀩𑀁 𑀧𑀝𑀺𑀧𑀸𑀓𑀢𑀺𑀓𑀁 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀸𑀚𑁄𑀯𑀸𑀤𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁩𑁫] 𑁫. 𑀚𑀫𑁆𑀩𑀼𑀓𑀚𑀸𑀢𑀓𑀯𑀡𑁆𑀡𑀦𑀸

𑀩𑁆𑀭𑀳𑀸 ¶ 𑀧𑀯𑀟𑁆𑀠𑀓𑀸𑀬𑁄 𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀲𑀼𑀕𑀢𑀸𑀮𑀬𑀓𑀭𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯, 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀲𑀢𑁆𑀣𑀸𑀭𑀸 ‘‘𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀓𑀺𑀁 𑀅𑀓𑀸𑀲𑀻’’𑀢𑀺 𑀯𑀼𑀢𑁆𑀢𑁄 𑀣𑁂𑀭𑁄 𑀆𑀳 ‘‘𑀪𑀦𑁆𑀢𑁂, 𑀲𑁄 𑀢𑀼𑀫𑁆𑀳𑀸𑀓𑀁 𑀅𑀦𑀼𑀓𑀭𑁄𑀦𑁆𑀢𑁄 𑀫𑀫 𑀳𑀢𑁆𑀣𑁂 𑀩𑀻𑀚𑀦𑀺𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀓𑁄𑀓𑀸𑀮𑀺𑀓𑁄 𑀉𑀭𑁂 𑀚𑀡𑁆𑀡𑀼𑀦𑀸 𑀧𑀳𑀭𑀺, 𑀇𑀢𑀺 𑀲𑁄 𑀢𑀼𑀫𑁆𑀳𑀸𑀓𑀁 𑀅𑀦𑀼𑀓𑀭𑁄𑀦𑁆𑀢𑁄 𑀤𑀼𑀓𑁆𑀔𑀁 𑀅𑀦𑀼𑀪𑀯𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀫 𑀅𑀦𑀼𑀓𑀭𑁄𑀦𑁆𑀢𑁄 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀧𑀼𑀩𑁆𑀩𑁂𑀧𑁂𑀲 𑀅𑀦𑀼𑀪𑁄𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀕𑀼𑀳𑀸𑀬𑀁 𑀯𑀲𑀦𑁆𑀢𑁄 ¶ 𑀏𑀓𑀤𑀺𑀯𑀲𑀁 𑀫𑀳𑀺𑀁𑀲𑀁 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀼𑀳𑀁 𑀆𑀕𑀘𑁆𑀙𑀢𑀺. 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀢𑀁 𑀤𑀺𑀲𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀭𑁂𑀦 𑀦𑀺𑀧𑀚𑁆𑀚𑀺, ‘‘𑀓𑀺𑀁 𑀚𑀫𑁆𑀩𑀼𑀓𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀢𑀁, 𑀪𑀤𑁆𑀤𑀦𑁆𑀢𑁂’’𑀢𑀺 𑀆𑀳. 𑀲𑀻𑀳𑁄 ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀢𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀧𑁄𑀲𑁂𑀲𑀺. 𑀢𑀲𑁆𑀲 𑀲𑀻𑀳𑀯𑀺𑀖𑀸𑀲𑁂𑀦 𑀣𑀽𑀮𑀲𑀭𑀻𑀭𑀢𑀁 𑀧𑀢𑁆𑀢𑀲𑁆𑀲 𑀏𑀓𑀤𑀺𑀯𑀲𑀁 𑀫𑀸𑀦𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀲𑀻𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ‘‘𑀅𑀳𑀁, 𑀲𑀸𑀫𑀺, 𑀦𑀺𑀘𑁆𑀘𑀓𑀸𑀮𑀁 𑀢𑀼𑀫𑁆𑀳𑀸𑀓𑀁 𑀧𑀮𑀺𑀩𑁄𑀥𑁄, 𑀢𑀼𑀫𑁆𑀳𑁂 𑀦𑀺𑀘𑁆𑀘𑀁 𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀫𑀁 𑀧𑁄𑀲𑁂𑀣, 𑀅𑀚𑁆𑀚 𑀢𑀼𑀫𑁆𑀳𑁂 𑀇𑀥𑁂𑀯 𑀳𑁄𑀣, 𑀅𑀳𑀁 𑀏𑀓𑀁 𑀯𑀸𑀭𑀡𑀁 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀫𑁆𑀧𑀺 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀻𑀳𑁄 ‘‘𑀫𑀸 𑀢𑁂 ¶ , 𑀚𑀫𑁆𑀩𑀼𑀓, 𑀏𑀢𑀁 𑀭𑀼𑀘𑁆𑀘𑀺, 𑀦 𑀢𑁆𑀯𑀁 𑀯𑀸𑀭𑀡𑀁 𑀯𑀥𑀺𑀢𑁆𑀯𑀸 𑀫𑀁𑀲𑀔𑀸𑀤𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄, 𑀅𑀳𑀁 𑀢𑁂 𑀯𑀸𑀭𑀡𑀁 𑀯𑀥𑀺𑀢𑁆𑀯𑀸 𑀤𑀲𑁆𑀲𑀸𑀫𑀺, 𑀯𑀸𑀭𑀡𑁄 𑀦𑀸𑀫 𑀫𑀳𑀸𑀓𑀸𑀬𑁄 𑀧𑀯𑀟𑁆𑀠𑀓𑀸𑀬𑁄, 𑀫𑀸 𑀯𑀸𑀭𑀡𑀁 𑀕𑀡𑁆𑀳𑀺, 𑀫𑀫 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳.

𑁧𑁩𑁭.

‘‘𑀩𑁆𑀭𑀳𑀸 𑀧𑀯𑀟𑁆𑀠𑀓𑀸𑀬𑁄 𑀲𑁄, 𑀤𑀻𑀖𑀤𑀸𑀞𑁄 𑀘 𑀚𑀫𑁆𑀩𑀼𑀓;

𑀦 𑀢𑁆𑀯𑀁 𑀢𑀢𑁆𑀣 𑀓𑀼𑀮𑁂 𑀚𑀸𑀢𑁄, 𑀬𑀢𑁆𑀣 𑀕𑀡𑁆𑀳𑀦𑁆𑀢𑀺 𑀓𑀼𑀜𑁆𑀚𑀭’’𑀦𑁆𑀢𑀺.

𑀢𑀢𑁆𑀣 𑀩𑁆𑀭𑀳𑀸𑀢𑀺 𑀫𑀳𑀦𑁆𑀢𑁄. 𑀧𑀯𑀟𑁆𑀠𑀓𑀸𑀬𑁄𑀢𑀺 𑀉𑀤𑁆𑀥𑀁 𑀉𑀕𑁆𑀕𑀢𑀓𑀸𑀬𑁄. 𑀤𑀻𑀖𑀤𑀸𑀞𑁄𑀢𑀺 𑀤𑀻𑀖𑀤𑀦𑁆𑀢𑁄 𑀢𑁂𑀳𑀺 𑀤𑀦𑁆𑀢𑁂𑀳𑀺 𑀢𑀼𑀫𑁆𑀳𑀸𑀤𑀺𑀲𑁂 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑁂 ¶ 𑀧𑀸𑀧𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀲𑀻𑀳𑀓𑀼𑀮𑁂 𑀚𑀸𑀢𑀸 𑀫𑀢𑁆𑀢𑀯𑀸𑀭𑀡𑀁 𑀕𑀡𑁆𑀳𑀦𑁆𑀢𑀺, 𑀢𑁆𑀯𑀁 𑀦 𑀢𑀢𑁆𑀣 𑀚𑀸𑀢𑁄, 𑀲𑀺𑀗𑁆𑀕𑀸𑀮𑀓𑀼𑀮𑁂 𑀧𑀦 𑀚𑀸𑀢𑁄𑀲𑀻𑀢𑀺 𑀅𑀢𑁆𑀣𑁄.

𑀲𑀺𑀗𑁆𑀕𑀸𑀮𑁄 𑀲𑀻𑀳𑁂𑀦 𑀯𑀸𑀭𑀺𑀢𑁄𑀬𑁂𑀯 𑀕𑀼𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 ‘‘𑀩𑀼𑀓𑁆𑀓 𑀩𑀼𑀓𑁆𑀓𑀸’’𑀢𑀺 𑀲𑀺𑀗𑁆𑀕𑀸𑀮𑀺𑀓𑀁 𑀦𑀤𑀁 𑀦𑀤𑀺𑀢𑁆𑀯𑀸 𑀧𑀩𑁆𑀩𑀢𑀓𑀽𑀝𑁂 𑀞𑀺𑀢𑁄 𑀧𑀩𑁆𑀩𑀢𑀧𑀸𑀤𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀓𑀸𑀴𑀯𑀸𑀭𑀡𑀁 𑀧𑀩𑁆𑀩𑀢𑀧𑀸𑀤𑁂𑀦 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 ‘‘𑀢𑀲𑁆𑀲 𑀓𑀼𑀫𑁆𑀪𑁂 𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀧𑀢𑀺. 𑀯𑀸𑀭𑀡𑁄 𑀧𑀼𑀭𑀺𑀫𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀲𑀻𑀲𑀁 𑀪𑀺𑀚𑁆𑀚𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀚𑀸𑀢𑀁 ¶ . 𑀲𑁄 𑀢𑀢𑁆𑀣𑁂𑀯 𑀅𑀦𑀼𑀢𑁆𑀣𑀼𑀦𑀦𑁆𑀢𑁄 𑀲𑀬𑀺, 𑀯𑀸𑀭𑀡𑁄 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑁄 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑁄 𑀢𑀁 𑀯𑀺𑀦𑀸𑀲𑀧𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀢𑁆𑀢𑀦𑁄 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀦𑀝𑁆𑀞𑁄 𑀲𑀺𑀗𑁆𑀕𑀸𑀮𑁄’’𑀢𑀺 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁮.

‘‘𑀅𑀲𑀻𑀳𑁄 𑀲𑀻𑀳𑀫𑀸𑀦𑁂𑀦, 𑀬𑁄 𑀅𑀢𑁆𑀢𑀸𑀦𑀁 𑀯𑀺𑀓𑀼𑀩𑁆𑀩𑀢𑀺;

𑀓𑁄𑀢𑁆𑀣𑀽𑀯 𑀕𑀚𑀫𑀸𑀲𑀚𑁆𑀚, 𑀲𑁂𑀢𑀺 𑀪𑀽𑀫𑁆𑀬𑀸 𑀅𑀦𑀼𑀢𑁆𑀣𑀼𑀦𑀁.

𑁧𑁩𑁯.

‘‘𑀬𑀲𑀲𑁆𑀲𑀺𑀦𑁄 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲, 𑀲𑀜𑁆𑀚𑀸𑀢𑀔𑀦𑁆𑀥𑀲𑁆𑀲 𑀫𑀳𑀩𑁆𑀩𑀮𑀲𑁆𑀲;

𑀅𑀲𑀫𑁂𑀓𑁆𑀔𑀺𑀬 𑀣𑀸𑀫𑀩𑀮𑀽𑀧𑀧𑀢𑁆𑀢𑀺𑀁, 𑀲 𑀲𑁂𑀢𑀺 𑀦𑀸𑀕𑁂𑀦 𑀳𑀢𑁄𑀬𑀁 𑀚𑀫𑁆𑀩𑀼𑀓𑁄.

𑁧𑁪𑁦.

‘‘𑀬𑁄 𑀘𑀻𑀥 𑀓𑀫𑁆𑀫𑀁 𑀓𑀼𑀭𑀼𑀢𑁂 𑀧𑀫𑀸𑀬, 𑀣𑀸𑀫𑀩𑁆𑀩𑀮𑀁 𑀅𑀢𑁆𑀢𑀦𑀺 𑀲𑀁𑀯𑀺𑀤𑀺𑀢𑁆𑀯𑀸;

𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦, 𑀧𑀭𑀺𑀓𑁆𑀔𑀯𑀸 𑀲𑁄 𑀯𑀺𑀧𑀼𑀮𑀁 𑀚𑀺𑀦𑀸𑀢𑀻’’𑀢𑀺.

𑀢𑀢𑁆𑀣 𑀯𑀺𑀓𑀼𑀩𑁆𑀩𑀢𑀻𑀢𑀺 𑀧𑀭𑀺𑀯𑀢𑁆𑀢𑁂𑀢𑀺. 𑀓𑁄𑀢𑁆𑀣𑀽𑀯𑀸𑀢𑀺 𑀲𑀺𑀗𑁆𑀕𑀸𑀮𑁄 𑀯𑀺𑀬. 𑀅𑀦𑀼𑀢𑁆𑀣𑀼𑀦𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀦𑁆𑀢𑁄. 𑀇𑀤𑀁 ¶ 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀬𑀁 𑀓𑁄𑀢𑁆𑀣𑀼 𑀫𑀳𑀦𑁆𑀢𑀁 𑀕𑀚𑀁 𑀧𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀦𑁆𑀢𑁄 𑀪𑀽𑀫𑀺𑀬𑀁 𑀲𑁂𑀢𑀺, 𑀏𑀯𑀁 𑀬𑁄 𑀅𑀜𑁆𑀜𑁄 𑀤𑀼𑀩𑁆𑀩𑀮𑁄 𑀩𑀮𑀯𑀢𑀸 𑀯𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀲𑁄𑀧𑀺 𑀏𑀯𑀭𑀽𑀧𑁄𑀯 𑀳𑁄𑀢𑀻𑀢𑀺.

𑀬𑀲𑀲𑁆𑀲𑀺𑀦𑁄𑀢𑀺 𑀇𑀲𑁆𑀲𑀭𑀺𑀬𑀯𑀢𑁄. 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀓𑀸𑀬𑀩𑀮𑁂𑀦 𑀘 𑀜𑀸𑀡𑀩𑀮𑁂𑀦 𑀘 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲. 𑀲𑀜𑁆𑀚𑀸𑀢𑀔𑀦𑁆𑀥𑀲𑁆𑀲𑀸𑀢𑀺 𑀲𑀼𑀲𑀡𑁆𑀞𑀺𑀢𑀫𑀳𑀸𑀔𑀦𑁆𑀥𑀲𑁆𑀲. 𑀫𑀳𑀩𑁆𑀩𑀮𑀲𑁆𑀲𑀸𑀢𑀺 ¶ 𑀫𑀳𑀸𑀣𑀸𑀫𑀲𑁆𑀲. 𑀣𑀸𑀫𑀩𑀮𑀽𑀧𑀧𑀢𑁆𑀢𑀺𑀦𑁆𑀢𑀺 𑀏𑀯𑀭𑀽𑀧𑀲𑁆𑀲 𑀲𑀻𑀳𑀲𑁆𑀲 𑀣𑀸𑀫𑀲𑀗𑁆𑀔𑀸𑀢𑀁 𑀩𑀮𑀜𑁆𑀘𑁂𑀯 𑀲𑀻𑀳𑀚𑀸𑀢𑀺𑀲𑀗𑁆𑀔𑀸𑀢𑀁 𑀉𑀧𑀧𑀢𑁆𑀢𑀺𑀜𑁆𑀘 𑀅𑀚𑀸𑀦𑀺𑀢𑁆𑀯𑀸, 𑀓𑀸𑀬𑀣𑀸𑀫𑀜𑁆𑀘 𑀜𑀸𑀡𑀩𑀮𑀜𑁆𑀘 𑀲𑀻𑀳𑀉𑀧𑀧𑀢𑁆𑀢𑀺𑀜𑁆𑀘 𑀅𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲 𑀲𑁂𑀢𑀻𑀢𑀺 𑀅𑀢𑁆𑀢𑀸𑀦𑀫𑁆𑀧𑀺 𑀲𑀻𑀳𑁂𑀦 𑀲𑀤𑀺𑀲𑀁 𑀫𑀜𑁆𑀜𑀫𑀸𑀦𑁄, 𑀲𑁄 𑀅𑀬𑀁 𑀚𑀫𑁆𑀩𑀼𑀓𑁄 𑀦𑀸𑀕𑁂𑀦 𑀳𑀢𑁄 𑀫𑀢𑀲𑀬𑀦𑀁 𑀲𑁂𑀢𑀺.

𑀧𑀫𑀸𑀬𑀸𑀢𑀺 𑀧𑀫𑀺𑀦𑀺𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. ‘‘𑀧𑀫𑀸𑀡𑀸’’𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀬𑁄 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦 𑀓𑀫𑁆𑀫𑀁 𑀓𑀼𑀭𑀼𑀢𑁂𑀢𑀺 𑀅𑀢𑁆𑀣𑁄. 𑀣𑀸𑀫𑀩𑁆𑀩𑀮𑀦𑁆𑀢𑀺 𑀣𑀸𑀫𑀲𑀗𑁆𑀔𑀸𑀢𑀁 𑀩𑀮𑀁, 𑀓𑀸𑀬𑀣𑀸𑀫𑀜𑁆𑀘 𑀜𑀸𑀡𑀩𑀮𑀜𑁆𑀘𑀸𑀢𑀺𑀧𑀺 𑀅𑀢𑁆𑀣𑁄. 𑀚𑀧𑁆𑀧𑁂𑀦𑀸𑀢𑀺 𑀚𑀧𑁂𑀦, 𑀅𑀚𑁆𑀛𑁂𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀦𑁆𑀢𑁂𑀦𑀸𑀢𑀺 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀓𑀭𑀡𑁂𑀦. 𑀲𑀼𑀪𑀸𑀲𑀺𑀢𑁂𑀦𑀸𑀢𑀺 𑀲𑀘𑁆𑀘𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀦 𑀅𑀦𑀯𑀚𑁆𑀚𑀯𑀘𑀦𑁂𑀦. 𑀧𑀭𑀺𑀓𑁆𑀔𑀯𑀸𑀢𑀺 ¶ 𑀧𑀭𑀺𑀓𑁆𑀔𑀸𑀲𑀫𑁆𑀧𑀦𑁆𑀦𑁄. 𑀲𑁄 𑀯𑀺𑀧𑀼𑀮𑀁 𑀚𑀺𑀦𑀸𑀢𑀻𑀢𑀺 𑀬𑁄 𑀏𑀯𑀭𑀽𑀧𑁄 𑀳𑁄𑀢𑀺, 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑁄 𑀅𑀢𑁆𑀢𑀦𑁄 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀜𑀢𑁆𑀯𑀸 𑀚𑀧𑁆𑀧𑀫𑀦𑁆𑀢𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀪𑀸𑀲𑀺𑀢𑀁 𑀪𑀸𑀲𑀦𑁆𑀢𑁄 𑀓𑀭𑁄𑀢𑀺, 𑀲𑁄 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀚𑀺𑀦𑀸𑀢𑀺 𑀦 𑀧𑀭𑀺𑀳𑀸𑀬𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀫𑁆𑀫𑀁 𑀓𑀣𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀻𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀫𑁆𑀩𑀼𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁩𑁬] 𑁬. 𑀩𑁆𑀭𑀳𑀸𑀙𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀢𑀺𑀡𑀁 𑀢𑀺𑀡𑀦𑁆𑀢𑀺 𑀮𑀧𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀓𑀣𑀺𑀢𑀫𑁂𑀯.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 ¶ 𑀅𑀳𑁄𑀲𑀺. 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀓𑁄𑀲𑀮𑀭𑀸𑀚𑀸𑀦𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀬𑀼𑀤𑁆𑀥𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀕𑀡𑁆𑀳𑀺. 𑀓𑁄𑀲𑀮𑀭𑀜𑁆𑀜𑁄 𑀧𑀦 𑀧𑀼𑀢𑁆𑀢𑁄 𑀙𑀢𑁆𑀢𑁄 𑀦𑀸𑀫 ¶ 𑀓𑀼𑀫𑀸𑀭𑁄 𑀅𑀢𑁆𑀣𑀺. 𑀲𑁄 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀢𑀬𑁄 𑀯𑁂𑀤𑁂 𑀘 𑀅𑀝𑁆𑀞𑀸𑀭𑀲 𑀲𑀺𑀧𑁆𑀧𑀸𑀦𑀺 𑀘 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀢𑁄 𑀦𑀺𑀓𑁆𑀔𑀫𑁆𑀫 𑀲𑀩𑁆𑀩𑀲𑀫𑀬𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀦𑁆𑀢𑁄 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀸𑀧𑀼𑀡𑀺. 𑀢𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘𑀲𑀢𑀢𑀸𑀧𑀲𑀸 𑀅𑀭𑀜𑁆𑀜𑁂 𑀧𑀡𑁆𑀡𑀲𑀸𑀮𑀸𑀲𑀼 𑀯𑀲𑀦𑁆𑀢𑀺. 𑀓𑀼𑀫𑀸𑀭𑁄 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑁂𑀲𑀫𑁆𑀧𑀺 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀬𑀁 𑀢𑁂 𑀚𑀸𑀦𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀉𑀕𑁆𑀕𑀡𑁆𑀳𑀺. 𑀲𑁄 𑀅𑀧𑀭𑀪𑀸𑀕𑁂 𑀕𑀡𑀲𑀢𑁆𑀣𑀸 𑀚𑀸𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀇𑀲𑀺𑀕𑀡𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀸𑀭𑀺𑀲𑀸, 𑀓𑀲𑁆𑀫𑀸 𑀫𑀚𑁆𑀛𑀺𑀫𑀤𑁂𑀲𑀁 𑀦 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀸𑀭𑀺𑀲, 𑀫𑀚𑁆𑀛𑀺𑀫𑀤𑁂𑀲𑁂 𑀫𑀦𑀼𑀲𑁆𑀲𑀸 𑀦𑀸𑀫 ¶ 𑀧𑀡𑁆𑀟𑀺𑀢𑀸, 𑀢𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀦𑀼𑀫𑁄𑀤𑀦𑀁 𑀓𑀸𑀭𑀸𑀧𑁂𑀦𑁆𑀢𑀺, 𑀫𑀗𑁆𑀕𑀮𑀁 𑀪𑀡𑀸𑀧𑁂𑀦𑁆𑀢𑀺, 𑀅𑀲𑀓𑁆𑀓𑁄𑀦𑁆𑀢𑁂 𑀕𑀭𑀳𑀦𑁆𑀢𑀺, 𑀫𑀬𑀁 𑀢𑁂𑀦 𑀪𑀬𑁂𑀦 𑀦 𑀕𑀘𑁆𑀙𑀸𑀫𑀸’’𑀢𑀺. ‘‘𑀫𑀸 𑀢𑀼𑀫𑁆𑀳𑁂 𑀪𑀸𑀬𑀣, 𑀅𑀳𑀫𑁂𑀢𑀁 𑀲𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀔𑀸𑀭𑀺𑀯𑀺𑀯𑀺𑀥𑀫𑀸𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀢𑀸. 𑀩𑀸𑀭𑀸𑀡𑀲𑀺𑀭𑀸𑀚𑀸𑀧𑀺 𑀓𑁄𑀲𑀮𑀭𑀚𑁆𑀚𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀭𑀸𑀚𑀬𑀼𑀢𑁆𑀢𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀮𑁄𑀳𑀘𑀸𑀝𑀺𑀬𑁄 𑀧𑀽𑀭𑀸𑀧𑁂𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀸𑀭𑀸𑀡𑀲𑀺𑀬𑀫𑁂𑀯 𑀯𑀲𑀢𑀺. 𑀅𑀣 𑀢𑁂 𑀇𑀲𑀬𑁄 𑀭𑀸𑀚𑀼𑀬𑁆𑀬𑀸𑀦𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀪𑀺𑀓𑁆𑀔𑀸𑀬 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀇𑀭𑀺𑀬𑀸𑀧𑀣𑁂𑀲𑁆𑀲𑀼 𑀧𑀲𑀻𑀤𑀺𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀢𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀬𑀸𑀯 𑀪𑀢𑁆𑀢𑀓𑀸𑀮𑀸 𑀢𑀁 𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀙𑀢𑁆𑀢𑁄 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑁄 𑀲𑀩𑁆𑀩𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀯𑀺𑀘𑀺𑀢𑁆𑀭𑀁 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀭𑀸𑀚𑀸 𑀲𑀼𑀝𑁆𑀞𑀼𑀢𑀭𑀁 𑀧𑀲𑀦𑁆𑀦𑁄 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀉𑀬𑁆𑀬𑀸𑀦𑁂 𑀯𑀸𑀲𑀸𑀧𑁂𑀲𑀺.

𑀙𑀢𑁆𑀢𑁄 𑀦𑀺𑀥𑀺𑀉𑀤𑁆𑀥𑀭𑀡𑀫𑀦𑁆𑀢𑀁 𑀚𑀸𑀦𑀸𑀢𑀺. 𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄 ‘‘𑀓𑀳𑀁 𑀦𑀼 𑀔𑁄 𑀇𑀫𑀺𑀦𑀸 𑀫𑀫 𑀧𑀺𑀢𑀼 𑀲𑀦𑁆𑀢𑀓𑀁 𑀥𑀦𑀁 𑀦𑀺𑀤𑀳𑀺𑀢’’𑀦𑁆𑀢𑀺 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀉𑀬𑁆𑀬𑀸𑀦𑁂 𑀦𑀺𑀤𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀤𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀫𑀫 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀧𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀸𑀭𑀺𑀲𑀸, 𑀅𑀳𑀁 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀩𑀸𑀭𑀸𑀡𑀲𑀺𑀭𑀜𑁆𑀜𑀸 𑀅𑀫𑁆𑀳𑀸𑀓𑀁 𑀭𑀚𑁆𑀚𑁂 𑀕𑀳𑀺𑀢𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀅𑀦𑀼𑀭𑀓𑁆𑀔𑀺𑀁, 𑀇𑀤𑀸𑀦𑀺 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁 𑀮𑀤𑁆𑀥𑀁, 𑀅𑀳𑀁 𑀏𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀆𑀳. ‘‘𑀫𑀬𑀫𑁆𑀧𑀺 𑀢𑀬𑀸𑀯 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 ¶ . 𑀲𑁄 ‘‘𑀲𑀸𑀥𑀽’’𑀢𑀺 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀘𑀫𑁆𑀫𑀧𑀲𑀺𑀩𑁆𑀩𑀓𑁂 𑀓𑀸𑀭𑁂𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀥𑀦𑀘𑀸𑀝𑀺𑀬𑁄 𑀉𑀤𑁆𑀥𑀭𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑁂𑀲𑀼 ¶ 𑀥𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀸𑀝𑀺𑀬𑁄 𑀢𑀺𑀡𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀧𑀜𑁆𑀘 𑀘 𑀇𑀲𑀺𑀲𑀢𑀸𑀦𑀺 𑀅𑀜𑁆𑀜𑁂 𑀘 𑀫𑀦𑀼𑀲𑁆𑀲𑁂 𑀥𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂 𑀭𑀸𑀚𑀬𑀼𑀢𑁆𑀢𑁂 ¶ 𑀕𑀸𑀳𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀧𑀸𑀓𑀸𑀭𑀅𑀝𑁆𑀝𑀸𑀮𑀓𑀸𑀤𑀺𑀧𑀝𑀺𑀲𑀗𑁆𑀔𑀭𑀡𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀦 𑀲𑀧𑀢𑁆𑀢𑀭𑀜𑁆𑀜𑀸 𑀬𑀼𑀤𑁆𑀥𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀁 𑀓𑀢𑁆𑀯𑀸 𑀦𑀕𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄𑀧𑀺 ‘‘𑀢𑀸𑀧𑀲𑀸 𑀉𑀬𑁆𑀬𑀸𑀦𑀢𑁄 𑀥𑀦𑀁 𑀕𑀳𑁂𑀢𑁆𑀯𑀸 𑀧𑀮𑀸𑀢𑀸’’𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀲𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀘𑀸𑀝𑀺𑀬𑁄 𑀯𑀺𑀯𑀭𑀸𑀧𑁂𑀢𑁆𑀯𑀸 𑀢𑀺𑀡𑀫𑁂𑀯 𑀧𑀲𑁆𑀲𑀺, 𑀢𑀲𑁆𑀲 𑀥𑀦𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑁄 𑀲𑁄𑀓𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀦𑀕𑀭𑀁 𑀕𑀦𑁆𑀢𑁆𑀯𑀸 ‘‘𑀢𑀺𑀡𑀁 𑀢𑀺𑀡’’𑀦𑁆𑀢𑀺 𑀯𑀺𑀧𑁆𑀧𑀮𑀧𑀦𑁆𑀢𑁄 𑀘𑀭𑀢𑀺, 𑀦𑀸𑀲𑁆𑀲 𑀓𑁄𑀘𑀺 𑀲𑁄𑀓𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀭𑀜𑁆𑀜𑁄 𑀫𑀳𑀦𑁆𑀢𑁄 𑀲𑁄𑀓𑁄, 𑀯𑀺𑀧𑁆𑀧𑀮𑀧𑀦𑁆𑀢𑁄 𑀘𑀭𑀢𑀺, 𑀞𑀧𑁂𑀢𑁆𑀯𑀸 𑀔𑁄 𑀧𑀦 𑀫𑀁 𑀦𑀸𑀲𑁆𑀲 𑀅𑀜𑁆𑀜𑁄 𑀓𑁄𑀘𑀺 𑀲𑁄𑀓𑀁 𑀯𑀺𑀦𑁄𑀤𑁂𑀢𑀼𑀁 𑀲𑀫𑀢𑁆𑀣𑁄, 𑀦𑀺𑀲𑁆𑀲𑁄𑀓𑀁 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑁂𑀦 𑀲𑀤𑁆𑀥𑀺𑀁 𑀲𑀼𑀔𑀦𑀺𑀲𑀺𑀦𑁆𑀦𑁄 𑀢𑀲𑁆𑀲 𑀯𑀺𑀧𑁆𑀧𑀮𑀧𑀦𑀓𑀸𑀮𑁂 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁧.

‘‘𑀢𑀺𑀡𑀁 𑀢𑀺𑀡𑀦𑁆𑀢𑀺 𑀮𑀧𑀲𑀺, 𑀓𑁄 𑀦𑀼 𑀢𑁂 𑀢𑀺𑀡𑀫𑀸𑀳𑀭𑀺;

𑀓𑀺𑀁 𑀦𑀼 𑀢𑁂 𑀢𑀺𑀡𑀓𑀺𑀘𑁆𑀘𑀢𑁆𑀣𑀺, 𑀢𑀺𑀡𑀫𑁂𑀯 𑀧𑀪𑀸𑀲𑀲𑀻’’𑀢𑀺.

𑀢𑀢𑁆𑀣 𑀓𑀺𑀁 𑀦𑀼 𑀢𑁂 𑀢𑀺𑀡𑀓𑀺𑀘𑁆𑀘𑀢𑁆𑀣𑀻𑀢𑀺 𑀓𑀺𑀁 𑀦𑀼 𑀢𑀯 𑀢𑀺𑀡𑁂𑀦 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁 𑀅𑀢𑁆𑀣𑀺. 𑀢𑀺𑀡𑀫𑁂𑀯 𑀧𑀪𑀸𑀲𑀲𑀻𑀢𑀺 𑀢𑁆𑀯𑀜𑁆𑀳𑀺 𑀓𑁂𑀯𑀮𑀁 ‘‘𑀢𑀺𑀡𑀁 𑀢𑀺𑀡’’𑀦𑁆𑀢𑀺 𑀢𑀺𑀡𑀫𑁂𑀯 𑀧𑀪𑀸𑀲𑀲𑀺, ‘‘𑀅𑀲𑀼𑀓𑀢𑀺𑀡𑀁 𑀦𑀸𑀫𑀸’’𑀢𑀺 𑀦 𑀓𑀣𑁂𑀲𑀺, 𑀢𑀺𑀡𑀦𑀸𑀫𑀁 𑀢𑀸𑀯𑀲𑁆𑀲 𑀓𑀣𑁂𑀳𑀺 ‘‘𑀅𑀲𑀼𑀓𑀢𑀺𑀡𑀁 𑀦𑀸𑀫𑀸’’𑀢𑀺, 𑀫𑀬𑀁 𑀢𑁂 𑀆𑀳𑀭𑀺𑀲𑁆𑀲𑀸𑀫, 𑀅𑀣 𑀧𑀦 𑀢𑁂 𑀢𑀺𑀡𑁂𑀦𑀢𑁆𑀣𑁄 𑀦𑀢𑁆𑀣𑀺, 𑀦𑀺𑀓𑁆𑀓𑀸𑀭𑀡𑀸 𑀫𑀸 𑀯𑀺𑀧𑁆𑀧𑀮𑀧𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁨.

‘‘𑀇𑀥𑀸𑀕𑀫𑀸 𑀩𑁆𑀭𑀳𑁆𑀫𑀘𑀸𑀭𑀻, 𑀩𑁆𑀭𑀳𑀸 𑀙𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄;

𑀲𑁄 𑀫𑁂 𑀲𑀩𑁆𑀩𑀁 𑀲𑀫𑀸𑀤𑀸𑀬, 𑀢𑀺𑀡𑀁 𑀦𑀺𑀓𑁆𑀔𑀺𑀧𑁆𑀧 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀩𑁆𑀭𑀳𑀸𑀢𑀺 𑀤𑀻𑀖𑁄. 𑀙𑀢𑁆𑀢𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀲𑀩𑁆𑀩𑀁 𑀲𑀫𑀸𑀤𑀸𑀬𑀸𑀢𑀺 𑀲𑀩𑁆𑀩𑀁 𑀥𑀦𑀁 𑀕𑀳𑁂𑀢𑁆𑀯𑀸. 𑀢𑀺𑀡𑀁 𑀦𑀺𑀓𑁆𑀔𑀺𑀧𑁆𑀧 𑀕𑀘𑁆𑀙𑀢𑀻𑀢𑀺 𑀘𑀸𑀝𑀻𑀲𑀼 𑀢𑀺𑀡𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀢𑀁 ¶ ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁩.

‘‘𑀏𑀯𑁂𑀢𑀁 𑀳𑁄𑀢𑀺 𑀓𑀢𑁆𑀢𑀩𑁆𑀩𑀁, 𑀅𑀧𑁆𑀧𑁂𑀦 𑀩𑀳𑀼𑀫𑀺𑀘𑁆𑀙𑀢𑀸;

𑀲𑀩𑁆𑀩𑀁 𑀲𑀓𑀲𑁆𑀲 𑀆𑀤𑀸𑀦𑀁, 𑀅𑀦𑀸𑀤𑀸𑀦𑀁 𑀢𑀺𑀡𑀲𑁆𑀲 𑀘𑀸’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀅𑀧𑁆𑀧𑁂𑀦 𑀢𑀺𑀡𑁂𑀦 𑀩𑀳𑀼𑀥𑀦𑀁 𑀇𑀘𑁆𑀙𑀢𑀸 𑀏𑀯𑀁 𑀏𑀢𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀬𑀤𑀺𑀤𑀁 𑀧𑀺𑀢𑀼 𑀲𑀦𑁆𑀢𑀓𑀢𑁆𑀢𑀸 𑀲𑀓𑀲𑁆𑀲 𑀥𑀦𑀲𑁆𑀲 𑀲𑀩𑁆𑀩𑀁 𑀆𑀤𑀸𑀦𑀁 𑀅𑀕𑀬𑁆𑀳𑀽𑀧𑀕𑀲𑁆𑀲 𑀢𑀺𑀡𑀲𑁆𑀲 𑀘 𑀅𑀦𑀸𑀤𑀸𑀦𑀁. 𑀇𑀢𑀺, 𑀫𑀳𑀸𑀭𑀸𑀚, 𑀲𑁄 𑀩𑁆𑀭𑀳𑀸 𑀙𑀢𑁆𑀢𑁄 𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀢𑁆𑀢𑀦𑁄 𑀧𑀺𑀢𑀼 𑀲𑀦𑁆𑀢𑀓𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀢𑀺𑀡𑀁 𑀘𑀸𑀝𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑁄, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁪𑁪.

‘‘𑀲𑀻𑀮𑀯𑀦𑁆𑀢𑁄 𑀦 𑀓𑀼𑀩𑁆𑀩𑀦𑁆𑀢𑀺, 𑀩𑀸𑀮𑁄 𑀲𑀻𑀮𑀸𑀦𑀺 𑀓𑀼𑀩𑁆𑀩𑀢𑀺;

𑀅𑀦𑀺𑀘𑁆𑀘𑀲𑀻𑀮𑀁 𑀤𑀼𑀲𑁆𑀲𑀻𑀮𑁆𑀬𑀁, 𑀓𑀺𑀁 𑀧𑀡𑁆𑀟𑀺𑀘𑁆𑀘𑀁 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀲𑀻𑀮𑀯𑀦𑁆𑀢𑁄𑀢𑀺 𑀬𑁂 𑀲𑀻𑀮𑀲𑀫𑁆𑀧𑀦𑁆𑀦𑀸 𑀩𑁆𑀭𑀳𑁆𑀫𑀘𑀸𑀭𑀬𑁄, 𑀢𑁂 𑀏𑀯𑀭𑀽𑀧𑀁 𑀦 𑀓𑀼𑀩𑁆𑀩𑀦𑁆𑀢𑀺. 𑀩𑀸𑀮𑁄 𑀲𑀻𑀮𑀸𑀦𑀺 𑀓𑀼𑀩𑁆𑀩𑀢𑀻𑀢𑀺 𑀩𑀸𑀮𑁄 𑀧𑀦 𑀤𑀼𑀭𑀸𑀘𑀸𑀭𑁄 𑀏𑀯𑀭𑀽𑀧𑀸𑀦𑀺 𑀅𑀢𑁆𑀢𑀦𑁄 𑀅𑀦𑀸𑀘𑀸𑀭𑀲𑀗𑁆𑀔𑀸𑀢𑀸𑀦𑀺 𑀲𑀻𑀮𑀸𑀦𑀺 𑀓𑀭𑁄𑀢𑀺. 𑀅𑀦𑀺𑀘𑁆𑀘𑀲𑀻𑀮𑀦𑁆𑀢𑀺 𑀅𑀤𑁆𑀥𑀼𑀯𑁂𑀦 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀤𑀼𑀲𑁆𑀲𑀻𑀮𑀁. 𑀓𑀺𑀁 𑀧𑀡𑁆𑀟𑀺𑀘𑁆𑀘𑀁 𑀓𑀭𑀺𑀲𑁆𑀲𑀢𑀻𑀢𑀺 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀩𑀸𑀳𑀼𑀲𑀘𑁆𑀘𑀧𑀭𑀺𑀪𑀸𑀯𑀺𑀢𑀁 𑀧𑀡𑁆𑀟𑀺𑀘𑁆𑀘𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀓𑀺𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀺, 𑀯𑀺𑀧𑀢𑁆𑀢𑀺𑀫𑁂𑀯𑀲𑁆𑀲 𑀓𑀭𑀺𑀲𑁆𑀲𑀢𑀻𑀢𑀺. 𑀢𑀁 𑀕𑀭𑀳𑀦𑁆𑀢𑁄 𑀯𑀢𑁆𑀯𑀸 𑀲𑁄 𑀢𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑀸𑀬 𑀦𑀺𑀲𑁆𑀲𑁄𑀓𑁄 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀳𑀸𑀙𑀢𑁆𑀢𑁄 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑁆𑀭𑀳𑀸𑀙𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁩𑁭] 𑁭. 𑀧𑀻𑀞𑀚𑀸𑀢𑀓𑀯𑀡𑁆𑀡𑀦𑀸

𑀦 ¶ 𑀢𑁂 𑀧𑀻𑀞𑀫𑀤𑀸𑀬𑀺𑀫𑁆𑀳𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀚𑀦𑀧𑀤𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀸𑀫𑀡𑁂𑀭𑀤𑀳𑀭𑁂 𑀧𑀼𑀘𑁆𑀙𑀺 ‘‘𑀆𑀯𑀼𑀲𑁄, 𑀲𑀸𑀯𑀢𑁆𑀣𑀺𑀬𑀁 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀓𑁂 𑀉𑀧𑀓𑀸𑀭𑀓𑀸’’𑀢𑀺 ¶ . ‘‘𑀆𑀯𑀼𑀲𑁄, 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀦𑀸𑀫 𑀫𑀳𑀸𑀲𑁂𑀝𑁆𑀞𑀺, 𑀯𑀺𑀲𑀸𑀔𑀸 𑀦𑀸𑀫 𑀫𑀳𑀸𑀉𑀧𑀸𑀲𑀺𑀓𑀸 𑀏𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑀓𑀸𑀭𑀓𑀸 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑀺𑀬𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀅𑀧𑀯𑀺𑀝𑁆𑀞𑀓𑀸𑀮𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀢𑀁 𑀅𑀯𑁂𑀮𑀸𑀬 𑀕𑀢𑀢𑁆𑀢𑀸 𑀓𑁄𑀘𑀺 𑀦 𑀑𑀮𑁄𑀓𑁂𑀲𑀺 ¶ . 𑀲𑁄 𑀢𑀢𑁄 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀯𑀺𑀲𑀸𑀔𑀸𑀬 𑀖𑀭𑀤𑁆𑀯𑀸𑀭𑀁 𑀕𑀢𑁄. 𑀢𑀢𑁆𑀭𑀸𑀧𑀺 𑀅𑀢𑀺𑀧𑀸𑀢𑁄𑀯 𑀕𑀢𑀢𑁆𑀢𑀸 𑀓𑀺𑀜𑁆𑀘𑀺 𑀦 𑀮𑀪𑀺. 𑀲𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀧𑀼𑀦𑀸𑀕𑀘𑁆𑀙𑀦𑁆𑀢𑁄 𑀬𑀸𑀕𑀼𑀬𑀸 𑀦𑀺𑀝𑁆𑀞𑀺𑀢𑀸𑀬 𑀕𑀢𑁄, 𑀧𑀼𑀦𑀧𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀪𑀢𑁆𑀢𑁂 𑀦𑀺𑀝𑁆𑀞𑀺𑀢𑁂 𑀕𑀢𑁄. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀤𑁆𑀯𑁂𑀧𑀺 𑀓𑀼𑀮𑀸𑀦𑀺 𑀅𑀲𑁆𑀲𑀤𑁆𑀥𑀸𑀦𑀺 𑀅𑀧𑁆𑀧𑀲𑀦𑁆𑀦𑀸𑀦𑀺 𑀏𑀯, 𑀇𑀫𑁂 𑀪𑀺𑀓𑁆𑀔𑀽 𑀧𑀦 ‘𑀲𑀤𑁆𑀥𑀸𑀦𑀺 𑀧𑀲𑀦𑁆𑀦𑀸𑀦𑀻’𑀢𑀺 𑀓𑀣𑁂𑀦𑁆𑀢𑀻’’𑀢𑀺 𑀢𑀸𑀦𑀺 𑀓𑀼𑀮𑀸𑀦𑀺 𑀧𑀭𑀺𑀪𑀯𑀦𑁆𑀢𑁄 𑀘𑀭𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀚𑀸𑀦𑀧𑀤𑁄 𑀪𑀺𑀓𑁆𑀔𑀼 𑀅𑀢𑀺𑀓𑀸𑀮𑀲𑁆𑀲𑁂𑀯 𑀓𑀼𑀮𑀤𑁆𑀯𑀸𑀭𑀁 𑀕𑀢𑁄 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀓𑀼𑀮𑀸𑀦𑀺 𑀧𑀭𑀺𑀪𑀯𑀦𑁆𑀢𑁄 𑀘𑀭𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀢𑁆𑀯𑀁 𑀪𑀺𑀓𑁆𑀔𑀼 𑀓𑀼𑀚𑁆𑀛𑀲𑀺, 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀸𑀧𑀲𑀸𑀧𑀺 𑀢𑀸𑀯 𑀓𑀼𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀦 𑀓𑀼𑀚𑁆𑀛𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀲𑀤𑁆𑀥𑁄 𑀳𑁄𑀢𑀺 𑀧𑀲𑀦𑁆𑀦𑁄. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀢𑀭𑀁 𑀓𑀼𑀮𑀖𑀭𑀁 𑀲𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁂𑀝𑁆𑀞𑀺𑀖𑀭’’𑀦𑁆𑀢𑀺 𑀲𑀼𑀢𑁆𑀯𑀸 ¶ 𑀲𑁂𑀝𑁆𑀞𑀺𑀦𑁄 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀢𑁄, 𑀫𑀦𑀼𑀲𑁆𑀲𑀸𑀧𑀺 𑀦𑀁 𑀦 𑀧𑀲𑁆𑀲𑀺𑀁𑀲𑀼, 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀭𑀸𑀚𑀓𑀼𑀮𑀢𑁄 𑀦𑀺𑀯𑀢𑁆𑀢𑀦𑁆𑀢𑁄 ¶ 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑀥𑁄𑀯𑀦𑀢𑁂𑀮𑀫𑀓𑁆𑀔𑀦𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀅𑀦𑁆𑀢𑀭𑀸𑀪𑀢𑁆𑀢𑁂 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑀁 𑀆𑀕𑀢𑀸 𑀦𑀸𑀫 𑀬𑀸𑀘𑀓𑀸 𑀯𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀮𑀪𑀺𑀢𑁆𑀯𑀸 𑀕𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀧𑀦 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂𑀳𑀺 𑀅𑀤𑀺𑀝𑁆𑀞𑀢𑁆𑀢𑀸 𑀆𑀲𑀦𑀁 𑀯𑀸 𑀧𑀸𑀦𑀻𑀬𑀁 𑀯𑀸 𑀧𑀸𑀤𑀥𑁄𑀯𑀦𑀁 𑀯𑀸 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀅𑀮𑀪𑀺𑀢𑁆𑀯𑀸𑀯 𑀕𑀢𑀸, 𑀅𑀬𑀁 𑀅𑀫𑁆𑀳𑀸𑀓𑀁 𑀤𑁄𑀲𑁄, 𑀢𑀁 𑀦𑁄 𑀔𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁫.

‘‘𑀦 𑀢𑁂 𑀧𑀻𑀞𑀫𑀤𑀸𑀬𑀺𑀫𑁆𑀳𑀸, 𑀦 𑀧𑀸𑀦𑀁 𑀦𑀧𑀺 𑀪𑁄𑀚𑀦𑀁;

𑀩𑁆𑀭𑀳𑁆𑀫𑀘𑀸𑀭𑀺 𑀔𑀫𑀲𑁆𑀲𑀼 𑀫𑁂, 𑀏𑀢𑀁 𑀧𑀲𑁆𑀲𑀸𑀫𑀺 𑀅𑀘𑁆𑀘𑀬’’𑀦𑁆𑀢𑀺.

𑀢𑀢𑁆𑀣 𑀦 𑀢𑁂 𑀧𑀻𑀞𑀫𑀤𑀸𑀬𑀺𑀫𑁆𑀳𑀸𑀢𑀺 𑀧𑀻𑀞𑀫𑁆𑀧𑀺 𑀢𑁂 𑀦 𑀤𑀸𑀧𑀬𑀺𑀫𑁆𑀳.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁬.

‘‘𑀦𑁂𑀯𑀸𑀪𑀺𑀲𑀚𑁆𑀚𑀸𑀫𑀺 𑀦 𑀘𑀸𑀧𑀺 𑀓𑀼𑀧𑁆𑀧𑁂, 𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀫𑀸𑀲𑀺 𑀓𑀺𑀜𑁆𑀘𑀺;

𑀅𑀣𑁄𑀧𑀺 𑀫𑁂 𑀆𑀲𑀺 𑀫𑀦𑁄𑀯𑀺𑀢𑀓𑁆𑀓𑁄, 𑀏𑀢𑀸𑀤𑀺𑀲𑁄 𑀦𑀽𑀦 𑀓𑀼𑀮𑀲𑁆𑀲 𑀥𑀫𑁆𑀫𑁄’’𑀢𑀺.

𑀢𑀢𑁆𑀣 𑀦𑁂𑀯𑀸𑀪𑀺𑀲𑀚𑁆𑀚𑀸𑀫𑀻𑀢𑀺 𑀦𑁂𑀯 𑀮𑀕𑁆𑀕𑀸𑀫𑀺. 𑀏𑀢𑀸𑀤𑀺𑀲𑁄𑀢𑀺 ‘‘𑀇𑀫𑀲𑁆𑀲 𑀓𑀼𑀮𑀲𑁆𑀲 𑀏𑀢𑀸𑀤𑀺𑀲𑁄 𑀦𑀽𑀦 𑀲𑀪𑀸𑀯𑁄, 𑀅𑀤𑀸𑀬𑀓𑀯𑀁𑀲𑁄 𑀏𑀲 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀫𑁂 𑀫𑀦𑁄𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄.

𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁭.

‘‘𑀏𑀲𑀲𑁆𑀫𑀸𑀓𑀁 𑀓𑀼𑀮𑁂 𑀥𑀫𑁆𑀫𑁄, 𑀧𑀺𑀢𑀼𑀧𑀺𑀢𑀸𑀫𑀳𑁄 𑀲𑀤𑀸;

𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀲𑀩𑁆𑀩𑁂𑀢𑀁 𑀦𑀺𑀧𑀤𑀸𑀫𑀲𑁂.

𑁧𑁪𑁮.

‘‘𑀏𑀲𑀲𑁆𑀫𑀸𑀓𑀁 𑀓𑀼𑀮𑁂 𑀥𑀫𑁆𑀫𑁄, 𑀧𑀺𑀢𑀼𑀧𑀺𑀢𑀸𑀫𑀳𑁄 𑀲𑀤𑀸;

𑀲𑀓𑁆𑀓𑀘𑁆𑀘𑀁 𑀉𑀧𑀢𑀺𑀝𑁆𑀞𑀸𑀫, 𑀉𑀢𑁆𑀢𑀫𑀁 𑀯𑀺𑀬 𑀜𑀸𑀢𑀓’’𑀦𑁆𑀢𑀺.

𑀢𑀢𑁆𑀣 ¶ ¶ 𑀥𑀫𑁆𑀫𑁄𑀢𑀺 𑀲𑀪𑀸𑀯𑁄. 𑀧𑀺𑀢𑀼𑀧𑀺𑀢𑀸𑀫𑀳𑁄𑀢𑀺 𑀧𑀺𑀢𑀽𑀦𑀜𑁆𑀘 𑀧𑀺𑀢𑀸𑀫𑀳𑀸𑀦𑀜𑁆𑀘 𑀲𑀦𑁆𑀢𑀓𑁄. 𑀉𑀤𑀓𑀦𑁆𑀢𑀺 𑀧𑀸𑀤𑀥𑁄𑀯𑀦𑀉𑀤𑀓𑀁. 𑀧𑀚𑁆𑀚𑀦𑁆𑀢𑀺 𑀧𑀸𑀤𑀫𑀓𑁆𑀔𑀦𑀢𑁂𑀮𑀁. 𑀲𑀩𑁆𑀩𑁂𑀢𑀦𑁆𑀢𑀺 𑀲𑀩𑁆𑀩𑀁 𑀏𑀢𑀁. 𑀦𑀺𑀧𑀤𑀸𑀫𑀲𑁂𑀢𑀺 𑀦𑀺𑀓𑀸𑀭𑀧𑀓𑀸𑀭𑀸 𑀉𑀧𑀲𑀕𑁆𑀕𑀸, 𑀤𑀸𑀫𑀲𑁂𑀢𑀺 𑀅𑀢𑁆𑀣𑁄, 𑀤𑀤𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀤𑀸𑀬𑀓𑀯𑀁𑀲𑁄 𑀅𑀫𑁆𑀳𑀸𑀓𑀁 𑀯𑀁𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀫𑀁 𑀯𑀺𑀬 𑀜𑀸𑀢𑀓𑀦𑁆𑀢𑀺 𑀫𑀸𑀢𑀭𑀁 𑀯𑀺𑀬 𑀧𑀺𑀢𑀭𑀁 𑀯𑀺𑀬 𑀘 𑀫𑀬𑀁 𑀥𑀫𑁆𑀫𑀺𑀓𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀤𑀺𑀲𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀳𑀢𑁆𑀣𑁂𑀦 𑀉𑀧𑀝𑁆𑀞𑀳𑀸𑀫𑀸𑀢𑀺 𑀅𑀢𑁆𑀣𑁄.

𑀩𑁄𑀥𑀺𑀲𑀢𑁆𑀢𑁄 𑀧𑀦 𑀓𑀢𑀺𑀧𑀸𑀳𑀁 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑀫𑁂𑀯 𑀕𑀦𑁆𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀻𑀞𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁩𑁮] 𑁮. 𑀣𑀼𑀲𑀚𑀸𑀢𑀓𑀯𑀡𑁆𑀡𑀦𑀸

𑀯𑀺𑀤𑀺𑀢𑀁 ¶ 𑀣𑀼𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁂 𑀢𑀲𑁆𑀲 𑀫𑀸𑀢𑀼 𑀓𑁄𑀲𑀮𑀭𑀸𑀚𑀥𑀻𑀢𑀸𑀬 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀤𑀓𑁆𑀔𑀺𑀡𑀚𑀸𑀡𑀼𑀮𑁄𑀳𑀺𑀢𑀧𑀺𑀯𑀦𑀤𑁄𑀳𑀴𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀡𑁆𑀟𑀼 𑀅𑀳𑁄𑀲𑀺. 𑀲𑀸 𑀧𑀭𑀺𑀘𑀸𑀭𑀺𑀓𑀸𑀳𑀺 𑀧𑀼𑀘𑁆𑀙𑀺𑀢𑀸 𑀢𑀸𑀲𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸𑀧𑀺 𑀲𑀼𑀢𑁆𑀯𑀸 𑀦𑁂𑀫𑀺𑀢𑁆𑀢𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀤𑁂𑀯𑀺𑀬𑀸 𑀓𑀺𑀭 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀓𑀸 𑀦𑀺𑀧𑁆𑀨𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀦𑁂𑀫𑀺𑀢𑁆𑀢𑀓𑀸 ‘‘𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀓𑀲𑀢𑁆𑀢𑁄 𑀢𑀼𑀫𑁆𑀳𑁂 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀲𑀘𑁂 𑀫𑀫 𑀧𑀼𑀢𑁆𑀢𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀓𑁄 𑀏𑀢𑁆𑀣 𑀤𑁄𑀲𑁄’’𑀢𑀺 𑀤𑀓𑁆𑀔𑀺𑀡𑀚𑀸𑀡𑀼𑀁 𑀲𑀢𑁆𑀣𑁂𑀦 𑀨𑀸𑀮𑀸𑀧𑁂𑀢𑁆𑀯𑀸 𑀮𑁄𑀳𑀺𑀢𑀁 𑀲𑀼𑀯𑀡𑁆𑀡𑀢𑀝𑁆𑀝𑀓𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀧𑀸𑀬𑁂𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀫𑀫 𑀓𑀼𑀘𑁆𑀙𑀺𑀬𑀁 ¶ 𑀦𑀺𑀩𑁆𑀩𑀢𑁆𑀢𑁄 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀫𑀸𑀭𑁂𑀲𑁆𑀲𑀢𑀺, 𑀓𑀺𑀁 𑀫𑁂 𑀢𑁂𑀦𑀸’’𑀢𑀺. 𑀲𑀸 𑀕𑀩𑁆𑀪𑀧𑀸𑀢𑀦𑀢𑁆𑀣𑀁 𑀓𑀼𑀘𑁆𑀙𑀺𑀁 𑀫𑀤𑁆𑀤𑀸𑀧𑁂𑀲𑀺 ¶ .

𑀭𑀸𑀚𑀸 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂 𑀫𑀬𑁆𑀳𑀁 𑀓𑀺𑀭 𑀧𑀼𑀢𑁆𑀢𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀦 𑀔𑁄 𑀧𑀦𑀸𑀳𑀁 𑀅𑀚𑀭𑁄 𑀅𑀫𑀭𑁄, 𑀧𑀼𑀢𑁆𑀢𑀫𑀼𑀔𑀁 𑀧𑀲𑁆𑀲𑀺𑀢𑀼𑀁 𑀫𑁂 𑀤𑁂𑀳𑀺, 𑀫𑀸 𑀇𑀢𑁄 𑀧𑀪𑀼𑀢𑀺 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀆𑀳. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀓𑀼𑀘𑁆𑀙𑀺𑀁 𑀫𑀤𑁆𑀤𑀸𑀧𑁂𑀲𑀺. 𑀭𑀸𑀚𑀸 𑀜𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀉𑀬𑁆𑀬𑀸𑀦𑀕𑀫𑀦𑀁 𑀦𑀺𑀯𑀸𑀭𑁂𑀲𑀺. 𑀲𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 𑀅𑀚𑀸𑀢𑀲𑁆𑀲𑁂𑀯 𑀧𑀺𑀢𑀼 𑀲𑀢𑁆𑀢𑀼𑀪𑀸𑀯𑀢𑁄 ‘‘𑀅𑀚𑀸𑀢𑀲𑀢𑁆𑀢𑀼’’𑀢𑁆𑀯𑁂𑀯 𑀦𑀸𑀫𑀫𑀓𑀁𑀲𑀼. 𑀢𑀲𑁆𑀫𑀺𑀁 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀦𑁆𑀢𑁂 𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑁄 𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀼𑀫𑀸𑀭𑀁 𑀫𑀡𑁆𑀟𑁂𑀢𑁆𑀯𑀸 𑀭𑀜𑁆𑀜𑁄 𑀅𑀤𑀁𑀲𑀼. 𑀭𑀸𑀚𑀸 𑀩𑀮𑀯𑀲𑀺𑀦𑁂𑀳𑁂𑀦 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀊𑀭𑀼𑀫𑁆𑀳𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀕𑀢𑁂𑀦 𑀧𑁂𑀫𑁂𑀦 𑀧𑀼𑀢𑁆𑀢𑀫𑁂𑀯 𑀫𑀫𑀸𑀬𑀦𑁆𑀢𑁄 𑀦 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀧𑀫𑀸𑀤𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀭𑀸𑀚𑀸𑀦𑁄 𑀧𑀼𑀢𑁆𑀢𑁂 𑀆𑀲𑀗𑁆𑀓𑀫𑀸𑀦𑀸 𑀧𑀝𑀺𑀘𑁆𑀙𑀦𑁆𑀦𑁂 𑀓𑀸𑀭𑁂𑀢𑁆𑀯𑀸 ‘𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀦𑀻𑀳𑀭𑀺𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸𑀣𑀸’𑀢𑀺 𑀆𑀡𑀸𑀧𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀩𑀳𑀽 𑀭𑀸𑀚𑀓𑀼𑀫𑀸𑀭𑁂 𑀘 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂 𑀘 𑀲𑀺𑀧𑁆𑀧𑀁 𑀯𑀸𑀘𑁂𑀲𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄𑀧𑀺 𑀧𑀼𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀬𑁄 𑀯𑁂𑀤𑁂 𑀘 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀘 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺. 𑀆𑀘𑀭𑀺𑀬𑁄 𑀅𑀗𑁆𑀕𑀯𑀺𑀚𑁆𑀚𑀸𑀯𑀲𑁂𑀦 𑀢𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀇𑀫𑀲𑁆𑀲 𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑀭𑀸𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀫𑀳𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑀭𑀺𑀲𑁆𑀲𑀸𑀫𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀩𑀦𑁆𑀥𑀺𑀢𑁆𑀯𑀸 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀤𑀸𑀲𑀺, 𑀏𑀯𑀜𑁆𑀘 𑀧𑀦 𑀢𑀁 𑀯𑀤𑁂𑀲𑀺 ‘‘𑀢𑀸𑀢, 𑀧𑀞𑀫𑀁 𑀕𑀸𑀣𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀢𑀯 𑀧𑀼𑀢𑁆𑀢𑀲𑁆𑀲 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀯𑀤𑁂𑀬𑁆𑀬𑀸𑀲𑀺, 𑀤𑀼𑀢𑀺𑀬𑀁 𑀫𑀳𑀸𑀉𑀧𑀝𑁆𑀞𑀸𑀦𑀓𑀸𑀮𑁂, 𑀢𑀢𑀺𑀬𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀫𑀸𑀦𑁄 𑀲𑁄𑀧𑀸𑀦𑀲𑀻𑀲𑁂 𑀞𑀢𑁆𑀯𑀸, 𑀘𑀢𑀼𑀢𑁆𑀣𑀁 𑀲𑀬𑀦𑀲𑀺𑀭𑀺𑀕𑀩𑁆𑀪𑀁 ¶ 𑀧𑀯𑀺𑀲𑀦𑁆𑀢𑁄 𑀉𑀫𑁆𑀫𑀸𑀭𑁂 𑀞𑀢𑁆𑀯𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ¶ 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀕𑀢𑁄 𑀑𑀧𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀭𑀜𑁆𑀜𑁄 𑀉𑀬𑁆𑀬𑀸𑀦𑀓𑀻𑀴𑀸𑀤𑀻𑀦𑀁 𑀅𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀲𑀺𑀭𑀺𑀯𑀺𑀪𑀯𑀁 𑀤𑀺𑀲𑁆𑀯𑀸 𑀧𑀺𑀢𑀭𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀁 𑀓𑀣𑁂𑀲𑀺. 𑀢𑁂 ‘‘𑀲𑀸𑀥𑀼 𑀤𑁂𑀯, 𑀫𑀳𑀮𑁆𑀮𑀓𑀓𑀸𑀮𑁂 𑀮𑀤𑁆𑀥𑁂𑀦 𑀇𑀲𑁆𑀲𑀭𑀺𑀬𑁂𑀦 𑀓𑁄 𑀅𑀢𑁆𑀣𑁄, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀺𑀁𑀲𑀼. 𑀓𑀼𑀫𑀸𑀭𑁄 ‘‘𑀯𑀺𑀲𑀁 𑀔𑀸𑀤𑀸𑀧𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀦𑁆𑀢𑁄 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀪𑀢𑁆𑀢𑀧𑀸𑀢𑀺𑀬𑀁 𑀪𑀢𑁆𑀢𑁂 𑀅𑀘𑁆𑀙𑀼𑀧𑀦𑁆𑀢𑁂𑀬𑁂𑀯 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁯.

‘‘𑀯𑀺𑀤𑀺𑀢𑀁 𑀣𑀼𑀲𑀁 𑀉𑀦𑁆𑀤𑀼𑀭𑀸𑀦𑀁, 𑀯𑀺𑀤𑀺𑀢𑀁 𑀧𑀦 𑀢𑀡𑁆𑀟𑀼𑀮𑀁;

𑀣𑀼𑀲𑀁 𑀣𑀼𑀲𑀁 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀢𑀡𑁆𑀟𑀼𑀮𑀁 𑀧𑀦 𑀔𑀸𑀤𑀭𑁂’’𑀢𑀺.

𑀢𑀢𑁆𑀣 𑀯𑀺𑀤𑀺𑀢𑀦𑁆𑀢𑀺 𑀓𑀸𑀴𑀯𑀤𑁆𑀤𑀮𑁂𑀧𑀺 𑀅𑀦𑁆𑀥𑀓𑀸𑀭𑁂 𑀉𑀦𑁆𑀤𑀼𑀭𑀸𑀦𑀁 𑀣𑀼𑀲𑁄 𑀣𑀼𑀲𑀪𑀸𑀯𑁂𑀦 𑀢𑀡𑁆𑀟𑀼𑀮𑁄 𑀘 𑀢𑀡𑁆𑀟𑀼𑀮𑀪𑀸𑀯𑁂𑀦 𑀯𑀺𑀤𑀺𑀢𑁄 𑀧𑀸𑀓𑀝𑁄𑀬𑁂𑀯. 𑀇𑀥 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 ‘‘𑀣𑀼𑀲𑀁 𑀢𑀡𑁆𑀟𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀔𑀸𑀤𑀭𑁂𑀢𑀺 𑀣𑀼𑀲𑀁 𑀣𑀼𑀲𑀁 𑀯𑀚𑁆𑀚𑁂𑀢𑁆𑀯𑀸 𑀢𑀡𑁆𑀟𑀼𑀮𑀫𑁂𑀯 𑀔𑀸𑀤𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢 𑀓𑀼𑀫𑀸𑀭, 𑀬𑀣𑀸 𑀉𑀦𑁆𑀤𑀼𑀭𑀸𑀦𑀁 𑀅𑀦𑁆𑀥𑀓𑀸𑀭𑁂𑀧𑀺 𑀣𑀼𑀲𑁄 𑀣𑀼𑀲𑀪𑀸𑀯𑁂𑀦 𑀢𑀡𑁆𑀟𑀼𑀮𑁄 𑀘 𑀢𑀡𑁆𑀟𑀼𑀮𑀪𑀸𑀯𑁂𑀦 𑀧𑀸𑀓𑀝𑁄, 𑀢𑁂 𑀣𑀼𑀲𑀁 𑀯𑀚𑁆𑀚𑁂𑀢𑁆𑀯𑀸 𑀢𑀡𑁆𑀟𑀼𑀮𑀫𑁂𑀯 𑀔𑀸𑀤𑀦𑁆𑀢𑀺, 𑀏𑀯𑀫𑁂𑀯 𑀫𑀫𑀧𑀺 𑀢𑀯 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀸𑀯𑁄 𑀧𑀸𑀓𑀝𑁄𑀢𑀺.

𑀓𑀼𑀫𑀸𑀭𑁄 ‘‘𑀜𑀸𑀢𑁄𑀫𑁆𑀳𑀻’’𑀢𑀺 𑀪𑀻𑀢𑁄 𑀪𑀢𑁆𑀢𑀧𑀸𑀢𑀺𑀬𑀁 𑀯𑀺𑀲𑀁 𑀧𑀸𑀢𑁂𑀢𑀼𑀁 𑀅𑀯𑀺𑀲𑀳𑀺𑀢𑁆𑀯𑀸 𑀉𑀝𑁆𑀞𑀸𑀬 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀕𑀢𑁄. 𑀲𑁄 𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀚𑁆𑀚 𑀢𑀸𑀯𑀫𑁆𑀳𑀺 𑀜𑀸𑀢𑁄, 𑀇𑀤𑀸𑀦𑀺 𑀓𑀣𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀉𑀬𑁆𑀬𑀸𑀦𑁂 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀦𑀺𑀓𑀡𑁆𑀡𑀺𑀓𑀯𑀲𑁂𑀦 𑀫𑀦𑁆𑀢𑀬𑀫𑀸𑀦𑀸 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄, 𑀔𑀕𑁆𑀕𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀳𑀸𑀉𑀧𑀝𑁆𑀞𑀸𑀦𑀁 𑀕𑀢𑀓𑀸𑀮𑁂 𑀅𑀫𑀘𑁆𑀘𑀸𑀦𑀁 𑀅𑀦𑁆𑀢𑀭𑁂 𑀞𑀢𑁆𑀯𑀸 𑀭𑀜𑁆𑀜𑁄 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀔𑀕𑁆𑀕𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀯𑀢𑁆𑀣𑀧𑁂𑀲𑀼𑀁. 𑀓𑀼𑀫𑀸𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀳𑀸𑀉𑀧𑀝𑁆𑀞𑀸𑀦𑀓𑀸𑀮𑁂 𑀲𑀦𑁆𑀦𑀤𑁆𑀥𑀔𑀕𑁆𑀕𑁄 ¶ 𑀳𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀭𑀜𑁆𑀜𑁄 𑀧𑀳𑀭𑀡𑁄𑀓𑀸𑀲𑀁 𑀉𑀧𑀥𑀸𑀭𑁂𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫𑁦.

‘‘𑀬𑀸 ¶ 𑀫𑀦𑁆𑀢𑀦𑀸 𑀅𑀭𑀜𑁆𑀜𑀲𑁆𑀫𑀺𑀁, 𑀬𑀸 𑀘 𑀕𑀸𑀫𑁂 𑀦𑀺𑀓𑀡𑁆𑀡𑀺𑀓𑀸;

𑀬𑀜𑁆𑀘𑁂𑀢𑀁 𑀇𑀢𑀺 𑀘𑀻𑀢𑀺 𑀘, 𑀏𑀢𑀫𑁆𑀧𑀺 𑀯𑀺𑀤𑀺𑀢𑀁 𑀫𑀬𑀸’’𑀢𑀺.

𑀢𑀢𑁆𑀣 ¶ 𑀅𑀭𑀜𑁆𑀜𑀲𑁆𑀫𑀺𑀦𑁆𑀢𑀺 𑀉𑀬𑁆𑀬𑀸𑀦𑁂. 𑀦𑀺𑀓𑀡𑁆𑀡𑀺𑀓𑀸𑀢𑀺 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑀦𑀸. 𑀬𑀜𑁆𑀘𑁂𑀢𑀁 𑀇𑀢𑀺 𑀘𑀻𑀢𑀺 𑀘𑀸𑀢𑀺 𑀬𑀜𑁆𑀘 𑀏𑀢𑀁 𑀇𑀤𑀸𑀦𑀺 𑀫𑀫 𑀧𑀳𑀭𑀡𑁄𑀓𑀸𑀲𑀧𑀭𑀺𑀬𑁂𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢 𑀓𑀼𑀫𑀸𑀭, 𑀬𑀸 𑀏𑀲𑀸 𑀢𑀯 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑁂 𑀘 𑀕𑀸𑀫𑁂 𑀘 𑀦𑀺𑀓𑀡𑁆𑀡𑀺𑀓𑀸 𑀫𑀦𑁆𑀢𑀦𑀸, 𑀬𑀜𑁆𑀘𑁂𑀢𑀁 𑀇𑀤𑀸𑀦𑀺 𑀫𑀫 𑀫𑀸𑀭𑀡𑀢𑁆𑀣𑀸𑀬 𑀇𑀢𑀺 𑀘𑀻𑀢𑀺 𑀘 𑀓𑀭𑀡𑀁, 𑀏𑀢𑀫𑁆𑀧𑀺 𑀲𑀩𑁆𑀩𑀁 𑀫𑀬𑀸 𑀜𑀸𑀢𑀦𑁆𑀢𑀺.

𑀓𑀼𑀫𑀸𑀭𑁄 ‘‘𑀚𑀸𑀦𑀸𑀢𑀺 𑀫𑁂 𑀯𑁂𑀭𑀺𑀪𑀸𑀯𑀁 𑀧𑀺𑀢𑀸’’𑀢𑀺 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀲𑀢𑁆𑀢𑀝𑁆𑀞 𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀓𑀼𑀫𑀸𑀭, 𑀦 𑀢𑁂 𑀧𑀺𑀢𑀸, 𑀯𑁂𑀭𑀺𑀪𑀸𑀯𑀁 𑀚𑀸𑀦𑀸𑀢𑀺, 𑀢𑀓𑁆𑀓𑀫𑀢𑁆𑀢𑁂𑀦 𑀢𑁆𑀯𑀁 𑀏𑀯𑀁𑀲𑀜𑁆𑀜𑀻 𑀅𑀳𑁄𑀲𑀺, 𑀫𑀸𑀭𑁂𑀳𑀺 𑀦’’𑀦𑁆𑀢𑀺 𑀯𑀤𑀺𑀁𑀲𑀼. 𑀲𑁄 𑀏𑀓𑀤𑀺𑀯𑀲𑀁 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀲𑁄𑀧𑀸𑀦𑀫𑀢𑁆𑀣𑀓𑁂 𑀕𑀩𑁆𑀪𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀲𑁄𑀧𑀸𑀦𑀫𑀢𑁆𑀣𑀓𑁂 𑀞𑀺𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫𑁧.

‘‘𑀥𑀫𑁆𑀫𑁂𑀦 𑀓𑀺𑀭 𑀚𑀸𑀢𑀲𑁆𑀲, 𑀧𑀺𑀢𑀸 𑀧𑀼𑀢𑁆𑀢𑀲𑁆𑀲 𑀫𑀓𑁆𑀓𑀝𑁄;

𑀤𑀳𑀭𑀲𑁆𑀲𑁂𑀯 𑀲𑀦𑁆𑀢𑀲𑁆𑀲, 𑀤𑀦𑁆𑀢𑁂𑀳𑀺 𑀨𑀮𑀫𑀘𑁆𑀙𑀺𑀤𑀸’’𑀢𑀺.

𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀲𑀪𑀸𑀯𑁂𑀦. 𑀧𑀺𑀢𑀸 𑀧𑀼𑀢𑁆𑀢𑀲𑁆𑀲 𑀫𑀓𑁆𑀓𑀝𑁄𑀢𑀺 𑀧𑀺𑀢𑀸 𑀫𑀓𑁆𑀓𑀝𑁄 𑀧𑀼𑀢𑁆𑀢𑀲𑁆𑀲 𑀫𑀓𑁆𑀓𑀝𑀧𑁄𑀢𑀓𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀭𑀜𑁆𑀜𑁂 𑀚𑀸𑀢𑁄 𑀫𑀓𑁆𑀓𑀝𑁄 𑀅𑀢𑁆𑀢𑀦𑁄 𑀬𑀽𑀣𑀧𑀭𑀺𑀳𑀭𑀡𑀁 𑀆𑀲𑀗𑁆𑀓𑀦𑁆𑀢𑁄 𑀢𑀭𑀼𑀡𑀲𑁆𑀲 𑀫𑀓𑁆𑀓𑀝𑀧𑁄𑀢𑀓𑀲𑁆𑀲 𑀤𑀦𑁆𑀢𑁂𑀳𑀺 𑀨𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀭𑀺𑀲𑀪𑀸𑀯𑀁 𑀦𑀸𑀲𑁂𑀢𑀺, 𑀢𑀣𑀸 𑀢𑀯 𑀅𑀢𑀺𑀭𑀚𑁆𑀚𑀓𑀸𑀫𑀲𑁆𑀲 𑀨𑀮𑀸𑀦𑀺 𑀉𑀧𑁆𑀧𑀸𑀝𑀸𑀧𑁂𑀢𑁆𑀯𑀸 𑀧𑀼𑀭𑀺𑀲𑀪𑀸𑀯𑀁 𑀦𑀸𑀲𑁂𑀲𑁆𑀲𑀸𑀫𑀻𑀢𑀺.

𑀓𑀼𑀫𑀸𑀭𑁄 ‘‘𑀕𑀡𑁆𑀳𑀸𑀧𑁂𑀢𑀼𑀓𑀸𑀫𑁄 𑀫𑀁 𑀧𑀺𑀢𑀸’’𑀢𑀺 𑀪𑀻𑀢𑁄 𑀧𑀮𑀸𑀬𑀺𑀢𑁆𑀯𑀸 ‘‘𑀧𑀺𑀢𑀭𑀸𑀫𑁆𑀳𑀺 𑀲𑀦𑁆𑀢𑀚𑁆𑀚𑀺𑀢𑁄’’𑀢𑀺 𑀉𑀧𑀝𑁆𑀞𑀸𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀅𑀟𑁆𑀠𑀫𑀸𑀲𑀫𑀢𑁆𑀢𑁂 𑀯𑀻𑀢𑀺𑀯𑀢𑁆𑀢𑁂 ‘‘𑀓𑀼𑀫𑀸𑀭, 𑀲𑀘𑁂 𑀭𑀸𑀚𑀸 𑀚𑀸𑀦𑁂𑀬𑁆𑀬, 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀸𑀥𑀺𑀯𑀸𑀲𑁂𑀬𑁆𑀬, 𑀢𑀓𑁆𑀓𑀫𑀢𑁆𑀢𑁂𑀦 𑀢𑀬𑀸 𑀓𑀣𑀺𑀢𑀁, 𑀫𑀸𑀭𑁂𑀳𑀺 ¶ 𑀦’’𑀦𑁆𑀢𑀺 𑀯𑀤𑀺𑀁𑀲𑀼. 𑀲𑁄 𑀏𑀓𑀤𑀺𑀯𑀲𑀁 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑁂 𑀲𑀺𑀭𑀺𑀲𑀬𑀦𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀆𑀕𑀘𑁆𑀙𑀦𑁆𑀢𑀫𑁂𑀯 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀳𑁂𑀝𑁆𑀞𑀸𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀭𑀸𑀚𑀸 𑀪𑀼𑀢𑁆𑀢𑀲𑀸𑀬𑀫𑀸𑀲𑁄 𑀧𑀭𑀺𑀚𑀦𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 ‘‘𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀦𑁆𑀢𑁄 𑀉𑀫𑁆𑀫𑀸𑀭𑁂 𑀞𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁫𑁨.

‘‘𑀬𑀫𑁂𑀢𑀁 ¶ 𑀧𑀭𑀺𑀲𑀧𑁆𑀧𑀲𑀺, 𑀅𑀚𑀓𑀸𑀡𑁄𑀯 𑀲𑀸𑀲𑀧𑁂;

𑀬𑁄𑀧𑀸𑀬𑀁 𑀳𑁂𑀝𑁆𑀞𑀢𑁄 𑀲𑁂𑀢𑀺, 𑀏𑀢𑀫𑁆𑀧𑀺 𑀯𑀺𑀤𑀺𑀢𑀁 𑀫𑀬𑀸’’𑀢𑀺.

𑀢𑀢𑁆𑀣 𑀧𑀭𑀺𑀲𑀧𑁆𑀧𑀲𑀻𑀢𑀺 𑀪𑀬𑁂𑀦 𑀇𑀢𑁄 𑀘𑀺𑀢𑁄 𑀘 𑀲𑀧𑁆𑀧𑀲𑀺. 𑀲𑀸𑀲𑀧𑁂𑀢𑀺 𑀲𑀸𑀲𑀧𑀔𑁂𑀢𑁆𑀢𑁂. 𑀬𑁄𑀧𑀸𑀬𑀦𑁆𑀢𑀺 𑀬𑁄𑀧𑀺 𑀅𑀬𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀫𑁆𑀧𑀺 𑀏𑀢𑀁 𑀢𑁆𑀯𑀁 𑀲𑀸𑀲𑀧𑀯𑀦𑀁 𑀧𑀯𑀺𑀝𑁆𑀞𑀓𑀸𑀡𑀏𑀴𑀓𑁄 𑀯𑀺𑀬 𑀪𑀬𑁂𑀦 𑀇𑀢𑁄 ¶ 𑀘𑀺𑀢𑁄 𑀘 𑀲𑀁𑀲𑀧𑁆𑀧𑀲𑀺, 𑀧𑀞𑀫𑀁 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀺, 𑀤𑀼𑀢𑀺𑀬𑀁 𑀔𑀕𑁆𑀕𑁂𑀦 𑀧𑀳𑀭𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀆𑀕𑀢𑁄𑀲𑀺, 𑀢𑀢𑀺𑀬𑀁 𑀔𑀕𑁆𑀕𑀁 𑀆𑀤𑀸𑀬 𑀲𑁄𑀧𑀸𑀦𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺, 𑀇𑀤𑀸𑀦𑀺 𑀫𑀁 ‘‘𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀳𑁂𑀝𑁆𑀞𑀸𑀲𑀬𑀦𑁂 𑀦𑀺𑀧𑀦𑁆𑀦𑁄𑀲𑀺, 𑀲𑀩𑁆𑀩𑀫𑁂𑀢𑀁 𑀚𑀸𑀦𑀸𑀫𑀺, 𑀦 𑀢𑀁 𑀇𑀤𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀫𑀺, 𑀕𑀳𑁂𑀢𑁆𑀯𑀸 𑀭𑀸𑀚𑀸𑀡𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀲𑀸 𑀲𑀸 𑀕𑀸𑀣𑀸 𑀢𑀁 𑀢𑀁 𑀅𑀢𑁆𑀣𑀁 𑀤𑀻𑀧𑁂𑀢𑀺.

𑀓𑀼𑀫𑀸𑀭𑁄 ‘‘𑀜𑀸𑀢𑁄𑀫𑁆𑀳𑀺 𑀧𑀺𑀢𑀭𑀸, 𑀇𑀤𑀸𑀦𑀺 𑀫𑀁 𑀦𑀸𑀲𑁆𑀲𑁂𑀲𑁆𑀲𑀢𑀻’’𑀢𑀺 𑀪𑀬𑀧𑁆𑀧𑀢𑁆𑀢𑁄 𑀳𑁂𑀝𑁆𑀞𑀸𑀲𑀬𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑀕𑁆𑀕𑀁 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀙𑀟𑁆𑀟𑁂𑀢𑁆𑀯𑀸 ‘‘𑀔𑀫𑀸𑀳𑀺 𑀫𑁂, 𑀤𑁂𑀯𑀸’’𑀢𑀺 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀭𑀸𑀚𑀸 ‘‘𑀦 𑀫𑀬𑁆𑀳𑀁 𑀓𑁄𑀘𑀺 𑀓𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀢𑁆𑀯𑀁 𑀘𑀺𑀦𑁆𑀢𑁂𑀲𑀻’’𑀢𑀺 𑀢𑀁 𑀢𑀚𑁆𑀚𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀢𑀤𑀸 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀲𑀮𑁆𑀮𑀓𑁆𑀔𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀫𑀓𑀸𑀲𑀺, 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀓𑀼𑀫𑀸𑀭𑀁 𑀩𑀦𑁆𑀥𑀦𑀸𑀕𑀸𑀭𑀸 𑀦𑀻𑀳𑀭𑀺𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀣𑀼𑀲𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁩𑁯] 𑁯. 𑀩𑀸𑀯𑁂𑀭𑀼𑀚𑀸𑀢𑀓𑀯𑀡𑁆𑀡𑀦𑀸

𑀅𑀤𑀲𑁆𑀲𑀦𑁂𑀦 𑀫𑁄𑀭𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀳𑀢𑀮𑀸𑀪𑀲𑀓𑁆𑀓𑀸𑀭𑁂 𑀢𑀺𑀢𑁆𑀣𑀺𑀬𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀺𑀢𑁆𑀣𑀺𑀬𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀮𑀸𑀪𑀺𑀦𑁄 𑀅𑀳𑁂𑀲𑀼𑀁, 𑀉𑀧𑁆𑀧𑀦𑁆𑀦𑁂 𑀧𑀦 𑀩𑀼𑀤𑁆𑀥𑁂 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀚𑀸𑀢𑀸. 𑀢𑁂𑀲𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑀩𑁆𑀪 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 ¶ 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀬𑀸𑀯 𑀕𑀼𑀡𑀯𑀦𑁆𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀦𑀺𑀕𑁆𑀕𑀼𑀡𑀸 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁, 𑀕𑀼𑀡𑀯𑀦𑁆𑀢𑁂𑀲𑀼 𑀧𑀦 𑀉𑀧𑁆𑀧𑀦𑁆𑀦𑁂𑀲𑀼 𑀦𑀺𑀕𑁆𑀕𑀼𑀡𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀚𑀸𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑁄𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀅𑀭𑀜𑁆𑀜𑁂 𑀯𑀺𑀘𑀭𑀺. 𑀢𑀤𑀸 𑀏𑀓𑀘𑁆𑀘𑁂 𑀯𑀸𑀡𑀺𑀚𑀸 𑀤𑀺𑀲𑀸𑀓𑀸𑀓𑀁 𑀕𑀳𑁂𑀢𑁆𑀯𑀸 𑀦𑀸𑀯𑀸𑀬 𑀩𑀸𑀯𑁂𑀭𑀼𑀭𑀝𑁆𑀞𑀁 𑀅𑀕𑀫𑀁𑀲𑀼. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀩𑀸𑀯𑁂𑀭𑀼𑀭𑀝𑁆𑀞𑁂 𑀲𑀓𑀼𑀡𑀸 𑀦𑀸𑀫 𑀦𑀢𑁆𑀣𑀺. 𑀆𑀕𑀢𑀸𑀕𑀢𑀸 𑀭𑀝𑁆𑀞𑀯𑀸𑀲𑀺𑀦𑁄 ¶ 𑀢𑀁 𑀧𑀜𑁆𑀚𑀭𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀧𑀲𑁆𑀲𑀣𑀺𑀫𑀲𑁆𑀲 𑀙𑀯𑀺𑀯𑀡𑁆𑀡𑀁 𑀕𑀮𑀧𑀭𑀺𑀬𑁄𑀲𑀸𑀦𑀁 𑀫𑀼𑀔𑀢𑀼𑀡𑁆𑀟𑀓𑀁 𑀫𑀡𑀺𑀕𑀼𑀴𑀲𑀤𑀺𑀲𑀸𑀦𑀺 𑀅𑀓𑁆𑀔𑀻𑀦𑀻’’𑀢𑀺 𑀓𑀸𑀓𑀫𑁂𑀯 𑀧𑀲𑀁𑀲𑀺𑀢𑁆𑀯𑀸 𑀢𑁂 𑀯𑀸𑀡𑀺𑀚𑀓𑁂 𑀆𑀳𑀁𑀲𑀼 ‘‘𑀇𑀫𑀁, 𑀅𑀬𑁆𑀬𑀸, 𑀲𑀓𑀼𑀡𑀁 𑀅𑀫𑁆𑀳𑀸𑀓𑀁 𑀤𑁂𑀣, 𑀅𑀫𑁆𑀳𑀸𑀓𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀭𑀝𑁆𑀞𑁂 𑀅𑀜𑁆𑀜𑀁 𑀮𑀪𑀺𑀲𑁆𑀲𑀣𑀸’’𑀢𑀺. ‘‘𑀢𑁂𑀦 𑀳𑀺 𑀫𑀽𑀮𑁂𑀦 𑀕𑀡𑁆𑀳𑀣𑀸’’𑀢𑀺. ‘‘𑀓𑀳𑀸𑀧𑀡𑁂𑀦 𑀦𑁄 𑀤𑁂𑀣𑀸’’𑀢𑀺. ‘‘𑀦 𑀤𑁂𑀫𑀸’’𑀢𑀺 ¶ . 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀺𑀢𑁆𑀯𑀸 ‘‘𑀲𑀢𑁂𑀦 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀫𑁆𑀳𑀸𑀓𑀁 𑀏𑀲 𑀩𑀳𑀽𑀧𑀓𑀸𑀭𑁄, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺 𑀳𑁄𑀢𑀽’’𑀢𑀺 𑀓𑀳𑀸𑀧𑀡𑀲𑀢𑀁 𑀕𑀳𑁂𑀢𑁆𑀯𑀸 𑀅𑀤𑀁𑀲𑀼. 𑀢𑁂 𑀢𑀁 𑀦𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀜𑁆𑀚𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀫𑀘𑁆𑀙𑀫𑀁𑀲𑁂𑀦 𑀘𑁂𑀯 𑀨𑀮𑀸𑀨𑀮𑁂𑀦 𑀘 𑀧𑀝𑀺𑀚𑀕𑁆𑀕𑀺𑀁𑀲𑀼. 𑀅𑀜𑁆𑀜𑁂𑀲𑀁 𑀲𑀓𑀼𑀡𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑁂 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀸𑀓𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺.

𑀧𑀼𑀦𑀯𑀸𑀭𑁂 𑀢𑁂 𑀯𑀸𑀡𑀺𑀚𑀸 𑀏𑀓𑀁 𑀫𑁄𑀭𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀅𑀘𑁆𑀙𑀭𑀲𑀤𑁆𑀤𑁂𑀦 𑀯𑀲𑁆𑀲𑀢𑀺, 𑀧𑀸𑀡𑀺𑀧𑁆𑀧𑀳𑀭𑀡𑀲𑀤𑁆𑀤𑁂𑀦 𑀦𑀘𑁆𑀘𑀢𑀺, 𑀏𑀯𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀩𑀸𑀯𑁂𑀭𑀼𑀭𑀝𑁆𑀞𑀁 𑀅𑀕𑀫𑀁𑀲𑀼. 𑀲𑁄 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀢𑀺𑀢𑁂 𑀦𑀸𑀯𑀸𑀬 𑀥𑀼𑀭𑁂 𑀞𑀢𑁆𑀯𑀸 𑀧𑀓𑁆𑀔𑁂 𑀯𑀺𑀥𑀼𑀦𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀦𑀘𑁆𑀘𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀏𑀢𑀁, 𑀅𑀬𑁆𑀬𑀸, 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀲𑀼𑀲𑀺𑀓𑁆𑀔𑀺𑀢𑀁 𑀲𑀓𑀼𑀡𑀭𑀸𑀚𑀸𑀦𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺 𑀆𑀳𑀁𑀲𑀼. 𑀅𑀫𑁆𑀳𑁂𑀳𑀺 𑀧𑀞𑀫𑀁 𑀓𑀸𑀓𑁄 𑀆𑀦𑀻𑀢𑁄, 𑀢𑀁 𑀕𑀡𑁆𑀳𑀺𑀢𑁆𑀣, 𑀇𑀤𑀸𑀦𑀺 𑀏𑀓𑀁 𑀫𑁄𑀭𑀭𑀸𑀚𑀸𑀦𑀁 𑀆𑀦𑀬𑀺𑀫𑁆𑀳𑀸, 𑀏𑀢𑀫𑁆𑀧𑀺 𑀬𑀸𑀘𑀣, 𑀢𑀼𑀫𑁆𑀳𑀸𑀓𑀁 𑀭𑀝𑁆𑀞𑁂 𑀲𑀓𑀼𑀡𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺. ‘‘𑀳𑁄𑀢𑀼, 𑀅𑀬𑁆𑀬𑀸, 𑀅𑀢𑁆𑀢𑀦𑁄 𑀭𑀝𑁆𑀞𑁂 𑀅𑀜𑁆𑀜𑀁 𑀮𑀪𑀺𑀲𑁆𑀲𑀣, 𑀇𑀫𑀁 𑀦𑁄 𑀤𑁂𑀣𑀸’’𑀢𑀺 𑀫𑀽𑀮𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳𑀲𑁆𑀲𑁂𑀦 𑀕𑀡𑁆𑀳𑀺𑀁𑀲𑀼. 𑀅𑀣 𑀦𑀁 𑀲𑀢𑁆𑀢𑀭𑀢𑀦𑀯𑀺𑀘𑀺𑀢𑁆𑀢𑁂 𑀧𑀜𑁆𑀚𑀭𑁂 𑀞𑀧𑁂𑀢𑁆𑀯𑀸 𑀫𑀘𑁆𑀙𑀫𑀁𑀲𑀨𑀮𑀸𑀨𑀮𑁂𑀳𑀺 𑀘𑁂𑀯 𑀫𑀥𑀼𑀮𑀸𑀚𑀲𑀓𑁆𑀓𑀭𑀧𑀸𑀦𑀓𑀸𑀤𑀻𑀳𑀺 𑀘 𑀧𑀝𑀺𑀚𑀕𑁆𑀕𑀺𑀁𑀲𑀼, 𑀫𑀬𑀽𑀭𑀭𑀸𑀚𑀸 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀲𑀸𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀸𑀓𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺, 𑀓𑁄𑀘𑀺 ¶ 𑀦𑀁 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀺. 𑀓𑀸𑀓𑁄 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀅𑀮𑀪𑀫𑀸𑀦𑁄 ‘‘𑀓𑀸𑀓𑀸’’𑀢𑀺 𑀯𑀲𑁆𑀲𑀦𑁆𑀢𑁄 𑀕𑀦𑁆𑀢𑁆𑀯𑀸 𑀉𑀓𑁆𑀓𑀸𑀭𑀪𑀽𑀫𑀺𑀬𑀁 𑀑𑀢𑀭𑀺𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀺.

𑀲𑀢𑁆𑀣𑀸 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀖𑀝𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁫𑁩.

‘‘𑀅𑀤𑀲𑁆𑀲𑀦𑁂𑀦 ¶ 𑀫𑁄𑀭𑀲𑁆𑀲, 𑀲𑀺𑀔𑀺𑀦𑁄 𑀫𑀜𑁆𑀚𑀼𑀪𑀸𑀡𑀺𑀦𑁄;

𑀓𑀸𑀓𑀁 𑀢𑀢𑁆𑀣 𑀅𑀧𑀽𑀚𑁂𑀲𑀼𑀁, 𑀫𑀁𑀲𑁂𑀦 𑀘 𑀨𑀮𑁂𑀦 𑀘.

𑁧𑁫𑁪.

‘‘𑀬𑀤𑀸 𑀘 𑀲𑀭𑀲𑀫𑁆𑀧𑀦𑁆𑀦𑁄, 𑀫𑁄𑀭𑁄 𑀩𑀸𑀯𑁂𑀭𑀼𑀫𑀸𑀕𑀫𑀸;

𑀅𑀣 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄, 𑀯𑀸𑀬𑀲𑀲𑁆𑀲 𑀅𑀳𑀸𑀬𑀣.

𑁧𑁫𑁫.

‘‘𑀬𑀸𑀯 ¶ 𑀦𑀼𑀧𑁆𑀧𑀚𑁆𑀚𑀢𑀻 𑀩𑀼𑀤𑁆𑀥𑁄, 𑀥𑀫𑁆𑀫𑀭𑀸𑀚𑀸 𑀧𑀪𑀗𑁆𑀓𑀭𑁄;

𑀢𑀸𑀯 𑀅𑀜𑁆𑀜𑁂 𑀅𑀧𑀽𑀚𑁂𑀲𑀼𑀁, 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂.

𑁧𑁫𑁬.

‘‘𑀬𑀤𑀸 𑀘 𑀲𑀭𑀲𑀫𑁆𑀧𑀦𑁆𑀦𑁄, 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀅𑀤𑁂𑀲𑀬𑀺;

𑀅𑀣 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀳𑀸𑀬𑀣𑀸’’𑀢𑀺.

𑀢𑀢𑁆𑀣 𑀲𑀺𑀔𑀺𑀦𑁄𑀢𑀺 𑀲𑀺𑀔𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀫𑀜𑁆𑀚𑀼𑀪𑀸𑀡𑀺𑀦𑁄𑀢𑀺 𑀫𑀥𑀼𑀭𑀲𑁆𑀲𑀭𑀲𑁆𑀲. 𑀅𑀧𑀽𑀚𑁂𑀲𑀼𑀦𑁆𑀢𑀺 𑀅𑀧𑀽𑀚𑀬𑀺𑀁𑀲𑀼. 𑀫𑀁𑀲𑁂𑀦 𑀘 𑀨𑀮𑁂𑀦 𑀘𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀫𑀁𑀲𑁂𑀦 𑀨𑀮𑀸𑀨𑀮𑁂𑀦 𑀘. 𑀩𑀸𑀯𑁂𑀭𑀼𑀫𑀸𑀕𑀫𑀸𑀢𑀺 𑀩𑀸𑀯𑁂𑀭𑀼𑀭𑀝𑁆𑀞𑀁 𑀆𑀕𑀢𑁄. ‘‘𑀪𑀸𑀯𑁂𑀭𑀽’’𑀢𑀺𑀧𑀺 𑀧𑀸𑀞𑁄. 𑀅𑀳𑀸𑀬𑀣𑀸𑀢𑀺 𑀧𑀭𑀺𑀳𑀻𑀦𑁄. 𑀥𑀫𑁆𑀫𑀭𑀸𑀚𑀸𑀢𑀺 𑀦𑀯𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀧𑀭𑀺𑀲𑀁 𑀭𑀜𑁆𑀚𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀧𑀪𑀗𑁆𑀓𑀭𑁄𑀢𑀺 𑀲𑀢𑁆𑀢𑀮𑁄𑀓𑀑𑀓𑀸𑀲𑀮𑁄𑀓𑀲𑀗𑁆𑀔𑀸𑀭𑀮𑁄𑀓𑁂𑀲𑀼 𑀆𑀮𑁄𑀓𑀲𑁆𑀲 𑀓𑀢𑀢𑁆𑀢𑀸 𑀧𑀪𑀗𑁆𑀓𑀭𑁄. 𑀲𑀭𑀲𑀫𑁆𑀧𑀦𑁆𑀦𑁄𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀫𑁆𑀫𑀁 𑀅𑀤𑁂𑀲𑀬𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀓𑀸𑀲𑁂𑀲𑀻𑀢𑀺.

𑀇𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀪𑀸𑀲𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀸𑀓𑁄 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀫𑁄𑀭𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀸𑀯𑁂𑀭𑀼𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁪𑁦] 𑁧𑁦. 𑀯𑀺𑀲𑀬𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀅𑀤𑀸𑀲𑀺 ¶ 𑀤𑀸𑀦𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑁂 (𑀚𑀸. 𑁧.𑁧.𑁪𑁦) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁. 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀕𑀳𑀧𑀢𑀺 ‘𑀤𑀸𑀦𑀁 𑀫𑀸 𑀤𑀤𑀸𑀲𑀻’𑀢𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀯𑀸𑀭𑁂𑀦𑁆𑀢𑀁 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀯𑀺𑀲𑀬𑁆𑀳𑁄 𑀦𑀸𑀫 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 ¶ 𑀧𑀜𑁆𑀘𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀤𑀸𑀦𑀚𑁆𑀛𑀸𑀲𑀬𑁄 𑀤𑀸𑀦𑀸𑀪𑀺𑀭𑀢𑁄 𑀅𑀳𑁄𑀲𑀺. 𑀲𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼, 𑀦𑀕𑀭𑀫𑀚𑁆𑀛𑁂, 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂𑀢𑀺 𑀙𑀲𑀼 𑀞𑀸𑀦𑁂𑀲𑀼 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀤𑀺𑀯𑀲𑁂 𑀤𑀺𑀯𑀲𑁂 𑀙 𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀜𑁆𑀘 𑀏𑀓𑀲𑀤𑀺𑀲𑀫𑁂𑀯 𑀪𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀤𑀸𑀦𑀁 𑀤𑀤𑀢𑁄 ¶ 𑀤𑀸𑀦𑀸𑀦𑀼𑀪𑀸𑀯𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺, 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀫𑀳𑀸𑀲𑁂𑀝𑁆𑀞𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀯𑀺𑀲𑀬𑁆𑀳𑁄 𑀅𑀢𑀺𑀯𑀺𑀬 𑀧𑀢𑁆𑀣𑀭𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀭𑁄𑀦𑁆𑀢𑁄 𑀤𑀸𑀦𑀁 𑀤𑁂𑀢𑀺, 𑀇𑀫𑀺𑀦𑀸 𑀤𑀸𑀦𑁂𑀦 𑀫𑀁 𑀘𑀸𑀯𑁂𑀢𑁆𑀯𑀸 𑀲𑀬𑀁 𑀲𑀓𑁆𑀓𑁄 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂, 𑀥𑀦𑀫𑀲𑁆𑀲 𑀦𑀸𑀲𑁂𑀢𑁆𑀯𑀸 𑀏𑀢𑀁 𑀤𑀮𑀺𑀤𑁆𑀤𑀁 𑀓𑀢𑁆𑀯𑀸 𑀬𑀣𑀸 𑀤𑀸𑀦𑀁 𑀦 𑀤𑁂𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀁 𑀥𑀦𑀥𑀜𑁆𑀜𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀲𑀓𑁆𑀓𑀭𑀸𑀤𑀻𑀦𑀺 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀫𑁆𑀧𑀺 𑀅𑀦𑁆𑀢𑀭𑀥𑀸𑀧𑁂𑀲𑀺.

𑀢𑀤𑀸 𑀤𑀸𑀦𑀩𑁆𑀬𑀸𑀯𑀝𑀸 𑀆𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺 𑀤𑀸𑀦𑀕𑁆𑀕𑀁 𑀧𑀘𑁆𑀙𑀺𑀦𑁆𑀦𑀁, 𑀞𑀧𑀺𑀢𑀞𑀧𑀺𑀢𑀝𑁆𑀞𑀸𑀦𑁂 𑀦 𑀓𑀺𑀜𑁆𑀘𑀺 𑀧𑀲𑁆𑀲𑀸𑀫𑀸’’𑀢𑀺 𑀆𑀭𑁄𑀘𑀬𑀺𑀁𑀲𑀼. ‘‘𑀇𑀢𑁄 𑀧𑀭𑀺𑀩𑁆𑀩𑀬𑀁 𑀳𑀭𑀣, 𑀫𑀸 𑀤𑀸𑀦𑀁 𑀧𑀘𑁆𑀙𑀺𑀦𑁆𑀤𑀣𑀸’’𑀢𑀺 𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀤𑀸𑀦𑀁 𑀧𑀯𑀢𑁆𑀢𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀲𑀓𑀮𑀕𑁂𑀳𑀁 𑀯𑀺𑀘𑀺𑀦𑀺𑀢𑁆𑀯𑀸 𑀅𑀟𑁆𑀠𑀫𑀸𑀲𑀓𑀫𑀢𑁆𑀢𑀫𑁆𑀧𑀺 𑀅𑀤𑀺𑀲𑁆𑀯𑀸 ‘‘𑀅𑀬𑁆𑀬, 𑀅𑀫𑁆𑀳𑀸𑀓𑀁 𑀦𑀺𑀯𑀢𑁆𑀣𑀯𑀢𑁆𑀣𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀸𑀫𑀺, 𑀲𑀓𑀮𑀕𑁂𑀳𑀁 𑀢𑀼𑀘𑁆𑀙’’𑀦𑁆𑀢𑀺 𑀆𑀳. 𑀲𑀢𑁆𑀢𑀭𑀢𑀦𑀕𑀩𑁆𑀪𑁂𑀲𑀼 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀅𑀤𑁆𑀤𑀲, 𑀲𑁂𑀝𑁆𑀞𑀺𑀜𑁆𑀘 𑀪𑀭𑀺𑀬𑀜𑁆𑀘 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀤𑀸𑀲𑀓𑀫𑁆𑀫𑀓𑀭𑀸𑀧𑀺 𑀦 𑀧𑀜𑁆𑀜𑀸𑀬𑀺𑀁𑀲𑀼. 𑀧𑀼𑀦 𑀫𑀳𑀸𑀲𑀢𑁆𑀢𑁄. 𑀪𑀭𑀺𑀬𑀁 ¶ 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀦 𑀲𑀓𑁆𑀓𑀸 𑀤𑀸𑀦𑀁 𑀧𑀘𑁆𑀙𑀺𑀦𑁆𑀤𑀺𑀢𑀼𑀁, 𑀲𑀓𑀮𑀦𑀺𑀯𑁂𑀲𑀦𑀁 𑀯𑀺𑀘𑀺𑀦𑀺𑀢𑁆𑀯𑀸 𑀓𑀺𑀜𑁆𑀘𑀺 𑀉𑀧𑀥𑀸𑀭𑁂𑀳𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀢𑀺𑀡𑀳𑀸𑀭𑀓𑁄 𑀅𑀲𑀺𑀢𑀜𑁆𑀘 𑀓𑀸𑀚𑀜𑁆𑀘 𑀢𑀺𑀡𑀩𑀦𑁆𑀥𑀦𑀭𑀚𑁆𑀚𑀼𑀜𑁆𑀘 𑀤𑁆𑀯𑀸𑀭𑀦𑁆𑀢𑀭𑁂 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀺, 𑀇𑀤𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀻’’𑀢𑀺 ¶ 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀫𑀳𑀸𑀲𑀢𑁆𑀢𑁄 ‘‘𑀪𑀤𑁆𑀤𑁂, 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀺𑀡𑀁 𑀦𑀸𑀫 𑀦 𑀮𑀸𑀬𑀺𑀢𑀧𑀼𑀩𑁆𑀩𑀁, 𑀅𑀚𑁆𑀚 𑀧𑀦 𑀢𑀺𑀡𑀁 𑀮𑀸𑀬𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀬𑀣𑀸𑀦𑀼𑀘𑁆𑀙𑀯𑀺𑀓𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀦𑀼𑀧𑀘𑁆𑀙𑁂𑀤𑀪𑀬𑁂𑀦 𑀅𑀲𑀺𑀢𑀜𑁆𑀘𑁂𑀯 𑀓𑀸𑀚𑀜𑁆𑀘 𑀭𑀚𑁆𑀚𑀼𑀜𑁆𑀘 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀡𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀢𑀺𑀡𑀁 𑀮𑀸𑀬𑀺𑀢𑁆𑀯𑀸 ‘‘𑀏𑀓𑁄 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀺, 𑀏𑀓𑁂𑀦 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑁆𑀯𑁂 𑀢𑀺𑀡𑀓𑀮𑀸𑀧𑁂 𑀩𑀦𑁆𑀥𑀺𑀢𑁆𑀯𑀸 𑀓𑀸𑀚𑁂 𑀮𑀕𑁆𑀕𑁂𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀫𑀸𑀲𑀓𑁂 𑀕𑀳𑁂𑀢𑁆𑀯𑀸 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀬𑀸𑀘𑀓𑀸𑀦𑀁 𑀅𑀤𑀸𑀲𑀺. 𑀬𑀸𑀘𑀓𑀸 𑀩𑀳𑀽, 𑀢𑁂𑀲𑀁 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀳𑀺, 𑀫𑀬𑁆𑀳𑀫𑁆𑀧𑀺 𑀤𑁂𑀳𑀻’’𑀢𑀺 𑀯𑀤𑀦𑁆𑀢𑀸𑀦𑀁 𑀇𑀢𑀭𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀤𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀅𑀦𑀸𑀳𑀸𑀭𑁄 𑀯𑀻𑀢𑀺𑀦𑀸𑀫𑁂𑀲𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀙 𑀤𑀺𑀯𑀲𑀸 𑀯𑀻𑀢𑀺𑀯𑀢𑁆𑀢𑀸.

𑀅𑀣𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀺𑀡𑀁 𑀆𑀳𑀭𑀫𑀸𑀦𑀲𑁆𑀲 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀲𑁆𑀲 𑀅𑀢𑀺𑀲𑀼𑀔𑀼𑀫𑀸𑀮𑀲𑁆𑀲 𑀦𑀮𑀸𑀝𑁂 𑀲𑀽𑀭𑀺𑀬𑀸𑀢𑀧𑁂𑀦 𑀧𑀳𑀝𑀫𑀢𑁆𑀢𑁂 𑀅𑀓𑁆𑀔𑀻𑀦𑀺 𑀪𑀫𑀺𑀁𑀲𑀼. 𑀲𑁄 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀡𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀧𑀢𑀺. 𑀲𑀓𑁆𑀓𑁄 𑀢𑀲𑁆𑀲 𑀓𑀺𑀭𑀺𑀬𑀁 𑀉𑀧𑀥𑀸𑀭𑀬𑀫𑀸𑀦𑁄 𑀯𑀺𑀘𑀭𑀢𑀺. 𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁭.

‘‘𑀅𑀤𑀸𑀲𑀺 ¶ 𑀤𑀸𑀦𑀸𑀦𑀺 𑀧𑀼𑀭𑁂 𑀯𑀺𑀲𑀬𑁆𑀳, 𑀤𑀤𑀢𑁄 𑀘 𑀢𑁂 𑀔𑀬𑀥𑀫𑁆𑀫𑁄 𑀅𑀳𑁄𑀲𑀺;

𑀇𑀢𑁄 𑀧𑀭𑀁 𑀘𑁂 𑀦 𑀤𑀤𑁂𑀬𑁆𑀬 𑀤𑀸𑀦𑀁, 𑀢𑀺𑀝𑁆𑀞𑁂𑀬𑁆𑀬𑀼𑀁 𑀢𑁂 𑀲𑀁𑀬𑀫𑀦𑁆𑀢𑀲𑁆𑀲 𑀪𑁄𑀕𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀫𑁆𑀪𑁄 𑀯𑀺𑀲𑀬𑁆𑀳 𑀢𑁆𑀯𑀁 𑀇𑀢𑁄 𑀧𑀼𑀩𑁆𑀩𑁂 𑀢𑀯 𑀕𑁂𑀳𑁂 𑀥𑀦𑁂 𑀯𑀺𑀚𑁆𑀚𑀫𑀸𑀦𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀭𑀺𑀢𑁆𑀯𑀸 𑀤𑀸𑀦𑀸𑀦𑀺 𑀅𑀤𑀸𑀲𑀺. 𑀢𑀲𑁆𑀲 𑀘 𑀢𑁂 𑀏𑀯𑀁 𑀤𑀤𑀢𑁄 𑀪𑁄𑀕𑀸𑀦𑀁 𑀔𑀬𑀥𑀫𑁆𑀫𑁄 𑀔𑀬𑀲𑀪𑀸𑀯𑁄 𑀅𑀳𑁄𑀲𑀺, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀔𑀻𑀡𑀁, 𑀇𑀢𑁄 𑀧𑀭𑀁 𑀘𑁂𑀧𑀺 𑀢𑁆𑀯𑀁 𑀤𑀸𑀦𑀁 𑀦 𑀤𑀤𑁂𑀬𑁆𑀬, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑀤𑁂𑀬𑁆𑀬𑀸𑀲𑀺, 𑀢𑀯 𑀲𑀁𑀬𑀫𑀦𑁆𑀢𑀲𑁆𑀲 𑀅𑀤𑀤𑀦𑁆𑀢𑀲𑁆𑀲 𑀪𑁄𑀕𑀸 𑀢𑀣𑁂𑀯 ¶ 𑀢𑀺𑀝𑁆𑀞𑁂𑀬𑁆𑀬𑀼𑀁, ‘‘𑀇𑀢𑁄 𑀧𑀝𑁆𑀞𑀸𑀬 𑀦 𑀤𑀲𑁆𑀲𑀸𑀫𑀻’’𑀢𑀺 𑀢𑁆𑀯𑀁 𑀫𑀬𑁆𑀳𑀁 𑀧𑀝𑀺𑀜𑁆𑀜𑀁 𑀤𑁂𑀳𑀺, 𑀅𑀳𑀁 𑀢𑁂 𑀪𑁄𑀕𑁂 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺.

𑀫𑀳𑀸𑀲𑀢𑁆𑀢𑁄 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀆𑀳. ‘‘𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀓𑁆𑀓𑁄 𑀦𑀸𑀫 𑀲𑀬𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀲𑀢𑁆𑀢 𑀯𑀢𑁆𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀓𑁆𑀓𑀢𑁆𑀢𑀁 𑀧𑀢𑁆𑀢𑁄, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀓𑀸𑀭𑀡𑀁 𑀤𑀸𑀦𑀁 𑀯𑀸𑀭𑁂𑀲𑀺, 𑀅𑀦𑀭𑀺𑀬𑀁 𑀯𑀢 𑀓𑀭𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁫𑁮.

‘‘𑀅𑀦𑀭𑀺𑀬𑀫𑀭𑀺𑀬𑁂𑀦 𑀲𑀳𑀲𑁆𑀲𑀦𑁂𑀢𑁆𑀢, 𑀲𑀼𑀤𑀼𑀕𑁆𑀕𑀢𑁂𑀦𑀸𑀧𑀺 𑀅𑀓𑀺𑀘𑁆𑀘𑀫𑀸𑀳𑀼;

𑀫𑀸 𑀯𑁄 𑀥𑀦𑀁 𑀢𑀁 𑀅𑀳𑀼 𑀤𑁂𑀯𑀭𑀸𑀚, 𑀬𑀁 𑀪𑁄𑀕𑀳𑁂𑀢𑀼 𑀯𑀺𑀚𑀳𑁂𑀫𑀼 𑀲𑀤𑁆𑀥𑀁.

𑁧𑁫𑁯.

‘‘𑀬𑁂𑀦 𑀏𑀓𑁄 𑀭𑀣𑁄 𑀬𑀸𑀢𑀺, 𑀬𑀸𑀢𑀺 𑀢𑁂𑀦𑀧𑀭𑁄 𑀭𑀣𑁄;

𑀧𑁄𑀭𑀸𑀡𑀁 𑀦𑀺𑀳𑀺𑀢𑀁 𑀯𑀢𑁆𑀢𑀁, 𑀯𑀢𑁆𑀢𑀢𑀜𑁆𑀜𑁂𑀯 𑀯𑀸𑀲𑀯.

𑁧𑁬𑁦.

‘‘𑀬𑀤𑀺 𑀳𑁂𑀲𑁆𑀲𑀢𑀺 𑀤𑀲𑁆𑀲𑀸𑀫, 𑀅𑀲𑀦𑁆𑀢𑁂 𑀓𑀺𑀁 𑀤𑀤𑀸𑀫𑀲𑁂;

𑀏𑀯𑀁𑀪𑀽𑀢𑀸𑀧𑀺 𑀤𑀲𑁆𑀲𑀸𑀫, 𑀫𑀸 𑀤𑀸𑀦𑀁 𑀧𑀫𑀤𑀫𑁆𑀳𑀲𑁂’’𑀢𑀺.

𑀢𑀢𑁆𑀣 𑀅𑀦𑀭𑀺𑀬𑀦𑁆𑀢𑀺 𑀮𑀸𑀫𑀓𑀁 𑀧𑀸𑀧𑀓𑀫𑁆𑀫𑀁. 𑀅𑀭𑀺𑀬𑁂𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀘𑀸𑀭𑁂𑀦 𑀅𑀭𑀺𑀬𑁂𑀦. 𑀲𑀼𑀤𑀼𑀕𑁆𑀕𑀢𑁂𑀦𑀸𑀧𑀻𑀢𑀺 𑀲𑀼𑀤𑀮𑀺𑀤𑁆𑀤𑁂𑀦𑀸𑀧𑀺. 𑀅𑀓𑀺𑀘𑁆𑀘𑀫𑀸𑀳𑀽𑀢𑀺 𑀅𑀓𑀢𑁆𑀢𑀩𑁆𑀩𑀦𑁆𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀯𑀤𑀦𑁆𑀢𑀺, 𑀢𑁆𑀯𑀁 𑀧𑀦 𑀫𑀁 𑀅𑀦𑀭𑀺𑀬𑀁 𑀫𑀕𑁆𑀕𑀁 𑀆𑀭𑁄𑀘𑁂𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀁 𑀪𑁄𑀕𑀳𑁂𑀢𑀽𑀢𑀺 𑀬𑀲𑁆𑀲 𑀥𑀦𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀳𑁂𑀢𑀼 𑀫𑀬𑀁 𑀤𑀸𑀦𑀲𑀤𑁆𑀥𑀁 𑀯𑀺𑀚𑀳𑁂𑀫𑀼 𑀧𑀭𑀺𑀘𑁆𑀘𑀚𑁂𑀬𑁆𑀬𑀸𑀫, 𑀢𑀁 𑀥𑀦𑀫𑁂𑀯 𑀫𑀸 𑀅𑀳𑀼, 𑀦 𑀦𑁄 𑀢𑁂𑀦 𑀥𑀦𑁂𑀦 𑀅𑀢𑁆𑀣𑁄𑀢𑀺 𑀤𑀻𑀧𑁂𑀢𑀺.

𑀭𑀣𑁄𑀢𑀺 𑀬𑀁𑀓𑀺𑀜𑁆𑀘𑀺 𑀬𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀫𑀕𑁆𑀕𑁂𑀦 𑀏𑀓𑁄 𑀭𑀣𑁄 𑀬𑀸𑀢𑀺, 𑀅𑀜𑁆𑀜𑁄𑀧𑀺 𑀭𑀣𑁄 ¶ ‘‘𑀭𑀣𑀲𑁆𑀲 𑀕𑀢𑀫𑀕𑁆𑀕𑁄 𑀏𑀲𑁄’’𑀢𑀺 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀬𑀸𑀢𑀺. 𑀧𑁄𑀭𑀸𑀡𑀁 𑀦𑀺𑀳𑀺𑀢𑀁 𑀯𑀢𑁆𑀢𑀦𑁆𑀢𑀺 𑀬𑀁 𑀫𑀬𑀸 𑀧𑀼𑀩𑁆𑀩𑁂 𑀦𑀺𑀳𑀺𑀢𑀁 𑀯𑀢𑁆𑀢𑀁, 𑀢𑀁 𑀫𑀬𑀺 𑀥𑀭𑀦𑁆𑀢𑁂 𑀯𑀢𑁆𑀢𑀢𑀼𑀬𑁂𑀯, 𑀫𑀸 𑀢𑀺𑀝𑁆𑀞𑀢𑀽𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑀸𑀢𑀺 𑀏𑀯𑀁 𑀢𑀺𑀡𑀳𑀸𑀭𑀓𑀪𑀽𑀢𑀸𑀧𑀺 𑀫𑀬𑀁 𑀬𑀸𑀯 ¶ 𑀚𑀻𑀯𑀸𑀫, 𑀢𑀸𑀯 𑀤𑀲𑁆𑀲𑀸𑀫𑀬𑁂𑀯. 𑀓𑀺𑀁𑀓𑀸𑀭𑀡𑀸? 𑀫𑀸 𑀤𑀸𑀦𑀁 𑀧𑀫𑀤𑀫𑁆𑀳𑀲𑁂𑀢𑀺. 𑀅𑀤𑀤𑀦𑁆𑀢𑁄 𑀳𑀺 𑀤𑀸𑀦𑀁 𑀧𑀫𑀚𑁆𑀚𑀢𑀺 𑀦𑀸𑀫 𑀦 𑀲𑀭𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀅𑀳𑀁 𑀧𑀦 𑀚𑀻𑀯𑀫𑀸𑀦𑁄 𑀤𑀸𑀦𑀁 𑀧𑀫𑀼𑀲𑁆𑀲𑀺𑀢𑀼𑀁 𑀦 𑀇𑀘𑁆𑀙𑀸𑀫𑀺, 𑀢𑀲𑁆𑀫𑀸 𑀤𑀸𑀦𑀁 𑀤𑀲𑁆𑀲𑀸𑀫𑀺𑀬𑁂𑀯𑀸𑀢𑀺 𑀤𑀻𑀧𑁂𑀢𑀺.

𑀲𑀓𑁆𑀓𑁄 𑀢𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀫𑀢𑁆𑀣𑀸𑀬 𑀤𑀸𑀦𑀁 𑀤𑀤𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦𑁂𑀯 𑀲𑀓𑁆𑀓𑀢𑁆𑀢𑀁, 𑀦 𑀩𑁆𑀭𑀳𑁆𑀫𑀢𑁆𑀢𑀁 𑀧𑀢𑁆𑀣𑀬𑀫𑀸𑀦𑁄, 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑁂𑀦𑁆𑀢𑁄 ¶ 𑀧𑀦𑀸𑀳𑀁 𑀤𑀤𑀸𑀫𑀻’’𑀢𑀺 𑀆𑀳. 𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀳𑀢𑁆𑀣𑁂𑀦 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀗𑁆𑀔𑀡𑀜𑁆𑀜𑁂𑀯 𑀧𑀭𑀺𑀫𑀚𑁆𑀚𑀺𑀢𑀫𑀢𑁆𑀢𑀲𑁆𑀲𑁂𑀯 𑀲𑀓𑀮𑀲𑀭𑀻𑀭𑀁 𑀧𑀭𑀺𑀧𑀽𑀭𑀺. 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 𑀘𑀲𑁆𑀲 𑀲𑀩𑁆𑀩𑁄 𑀯𑀺𑀪𑀯𑀧𑀭𑀺𑀘𑁆𑀙𑁂𑀤𑁄 𑀧𑀝𑀺𑀧𑀸𑀓𑀢𑀺𑀓𑁄𑀯 𑀅𑀳𑁄𑀲𑀺. 𑀲𑀓𑁆𑀓𑁄 ‘‘𑀫𑀳𑀸𑀲𑁂𑀝𑁆𑀞𑀺, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀤𑀸𑀦𑀁 𑀤𑀤𑀸𑀳𑀻’’𑀢𑀺 𑀢𑀲𑁆𑀲 𑀕𑁂𑀳𑁂 𑀅𑀧𑀭𑀺𑀫𑀸𑀡𑀁 𑀥𑀦𑀁 𑀓𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑁂𑀝𑁆𑀞𑀺𑀪𑀭𑀺𑀬𑀸 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀯𑀺𑀲𑀬𑁆𑀳𑁄 𑀧𑀦 𑀲𑁂𑀝𑁆𑀞𑀺 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀲𑀬𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑁄𑀓𑀺𑀮𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀘𑀽𑀴𑀓𑀼𑀡𑀸𑀮𑀯𑀕𑁆𑀕𑁄

[𑁩𑁪𑁧] 𑁧. 𑀓𑀡𑁆𑀟𑀭𑀻𑀚𑀸𑀢𑀓𑀯𑀡𑁆𑀡𑀦𑀸

𑀦𑀭𑀸𑀦𑀫𑀸𑀭𑀸𑀫𑀓𑀭𑀸𑀲𑀽𑀢𑀺 ¶ 𑀇𑀫𑀲𑁆𑀲 𑀚𑀸𑀢𑀓𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑀡𑁆𑀟𑀭𑀻𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁪𑁨] 𑁨. 𑀯𑀸𑀦𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑀓𑁆𑀔𑀺𑀁 ¶ 𑀯𑀢 𑀅𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 (𑀚𑀸. 𑀅𑀝𑁆𑀞. 𑁨.𑁨.𑀲𑀼𑀲𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸) 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀕𑀗𑁆𑀕𑀸𑀢𑀻𑀭𑁂 𑀯𑀲𑀺. 𑀅𑀣𑁂𑀓𑀸 𑀅𑀦𑁆𑀢𑁄𑀕𑀗𑁆𑀕𑀸𑀬𑀁 𑀲𑀁𑀲𑀼𑀫𑀸𑀭𑀻 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ¶ 𑀲𑀁𑀲𑀼𑀫𑀸𑀭𑀲𑁆𑀲 𑀓𑀣𑁂𑀲𑀺. 𑀲𑁄 ‘‘𑀢𑀁 𑀓𑀧𑀺𑀁 𑀉𑀤𑀓𑁂 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀕𑀳𑁂𑀢𑁆𑀯𑀸 𑀲𑀁𑀲𑀼𑀫𑀸𑀭𑀺𑀬𑀸 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀆𑀳 𑁋 ‘‘𑀏𑀳𑀺, 𑀲𑀫𑁆𑀫, 𑀅𑀦𑁆𑀢𑀭𑀤𑀻𑀧𑀓𑁂 𑀨𑀮𑀸𑀨𑀮𑁂 𑀔𑀸𑀤𑀺𑀢𑀼𑀁 𑀕𑀘𑁆𑀙𑀸𑀫𑀸’’𑀢𑀺. ‘‘𑀓𑀣𑀁, 𑀲𑀫𑁆𑀫, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑀁 𑀢𑀁 𑀫𑀫 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀮𑀗𑁆𑀖𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺. 𑀲𑀁𑀲𑀼𑀫𑀸𑀭𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀫𑀼𑀚𑁆𑀚𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀯𑀸𑀦𑀭𑁄 ‘‘𑀓𑀺𑀁𑀓𑀸𑀭𑀡𑀸, 𑀪𑁄, 𑀫𑀁 𑀉𑀤𑀓𑁂 𑀦𑀺𑀫𑀼𑀚𑁆𑀚𑀸𑀧𑁂𑀲𑀻’’𑀢𑀺 𑀆𑀳. ‘‘𑀅𑀳𑀁 𑀢𑀁 𑀫𑀸𑀭𑁂𑀢𑁆𑀯𑀸 𑀢𑀯 𑀳𑀤𑀬𑀫𑀁𑀲𑀁 𑀫𑀫 𑀪𑀭𑀺𑀬𑀸𑀬 𑀤𑀲𑁆𑀲𑀸𑀫𑀻’’𑀢𑀺. ‘‘𑀤𑀦𑁆𑀥 𑀢𑁆𑀯𑀁 𑀫𑀫 𑀳𑀤𑀬𑀫𑀁𑀲𑀁 𑀉𑀭𑁂 𑀅𑀢𑁆𑀣𑀻𑀢𑀺 𑀫𑀜𑁆𑀜𑀲𑀻’’𑀢𑀺? ‘‘𑀅𑀣 𑀓𑀳𑀁 𑀢𑁂 𑀞𑀧𑀺𑀢’’𑀦𑁆𑀢𑀺? ‘‘𑀏𑀢𑀁 𑀉𑀤𑀼𑀫𑁆𑀩𑀭𑁂 𑀑𑀮𑀫𑁆𑀩𑀦𑁆𑀢𑀁 𑀦 𑀧𑀲𑁆𑀲𑀲𑀻’’𑀢𑀺? ‘‘𑀧𑀲𑁆𑀲𑀸𑀫𑀺, 𑀤𑀲𑁆𑀲𑀲𑀺 𑀧𑀦 𑀫𑁂’’𑀢𑀺. ‘‘𑀆𑀫, 𑀤𑀲𑁆𑀲𑀸𑀫𑀻’’𑀢𑀺. 𑀲𑀁𑀲𑀼𑀫𑀸𑀭𑁄 𑀤𑀦𑁆𑀥𑀢𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀉𑀤𑀼𑀫𑁆𑀩𑀭𑀫𑀽𑀮𑀁 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀮𑀗𑁆𑀖𑀺𑀢𑁆𑀯𑀸 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀦𑀺𑀲𑀺𑀦𑁆𑀦𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬𑁧.

‘‘𑀅𑀲𑀓𑁆𑀔𑀺𑀁 ¶ 𑀯𑀢 𑀅𑀢𑁆𑀢𑀸𑀦𑀁, 𑀉𑀤𑁆𑀥𑀸𑀢𑀼𑀁 𑀉𑀤𑀓𑀸 𑀣𑀮𑀁;

𑀦 𑀤𑀸𑀦𑀸𑀳𑀁 𑀧𑀼𑀦 𑀢𑀼𑀬𑁆𑀳𑀁, 𑀯𑀲𑀁 𑀕𑀘𑁆𑀙𑀸𑀫𑀺 𑀯𑀸𑀭𑀺𑀚.

𑁧𑁬𑁨.

‘‘𑀅𑀮𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘;

𑀬𑀸𑀦𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲, 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄.

𑁧𑁬𑁩.

‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀅𑀫𑀺𑀢𑁆𑀢𑀯𑀲𑀫𑀦𑁆𑀯𑁂𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺.

𑁧𑁬𑁪.

‘‘𑀬𑁄 ¶ 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀅𑀲𑀓𑁆𑀔𑀺𑀁 𑀯𑀢𑀸𑀢𑀺 𑀲𑀫𑀢𑁆𑀣𑁄 𑀯𑀢 𑀅𑀳𑁄𑀲𑀺𑀁. 𑀉𑀤𑁆𑀥𑀸𑀢𑀼𑀦𑁆𑀢𑀺 𑀉𑀤𑁆𑀥𑀭𑀺𑀢𑀼𑀁. 𑀯𑀸𑀭𑀺𑀚𑀸𑀢𑀺 𑀲𑀁𑀲𑀼𑀫𑀸𑀭𑀁 𑀆𑀮𑀧𑀢𑀺. 𑀬𑀸𑀦𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀸𑀢𑀺 𑀕𑀗𑁆𑀕𑀁 𑀲𑀫𑀼𑀤𑁆𑀤𑀦𑀸𑀫𑁂𑀦𑀸𑀮𑀧𑀦𑁆𑀢𑁄 ‘‘𑀬𑀸𑀦𑀺 𑀲𑀫𑀼𑀤𑁆𑀤𑀲𑁆𑀲 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺, 𑀅𑀮𑀁 𑀢𑁂𑀳𑀻’’𑀢𑀺 𑀯𑀤𑀢𑀺. 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀻𑀢𑀺 𑀉𑀧𑁆𑀧𑀦𑁆𑀦𑀁 𑀅𑀢𑁆𑀣𑀁 𑀔𑀺𑀧𑁆𑀧𑀁 𑀅𑀚𑀸𑀦𑀦𑁆𑀢𑁄 𑀅𑀫𑀺𑀢𑁆𑀢𑀯𑀲𑀁 𑀕𑀘𑁆𑀙𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺.

𑀇𑀢𑀺 𑀲𑁄 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀮𑁄𑀓𑀺𑀬𑀓𑀺𑀘𑁆𑀘𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀯𑀦𑀲𑀡𑁆𑀟𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀁𑀲𑀼𑀫𑀸𑀭𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀯𑀸𑀦𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀸𑀦𑀭𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁪𑁩] 𑁩. 𑀓𑀼𑀦𑁆𑀢𑀺𑀦𑀻𑀚𑀸𑀢𑀓𑀯𑀡𑁆𑀡𑀦𑀸

𑀅𑀯𑀲𑀺𑀫𑁆𑀳 𑀢𑀯𑀸𑀕𑀸𑀭𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀕𑁂𑀳𑁂 𑀦𑀺𑀯𑀼𑀢𑁆𑀣𑀁 𑀓𑀼𑀦𑁆𑀢𑀺𑀦𑀻𑀲𑀓𑀼𑀡𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭 𑀭𑀜𑁆𑀜𑁄 𑀤𑀽𑀢𑁂𑀬𑁆𑀬𑀳𑀸𑀭𑀺𑀓𑀸 𑀅𑀳𑁄𑀲𑀺. 𑀤𑁆𑀯𑁂 𑀧𑁄𑀢𑀓𑀸𑀧𑀺𑀲𑁆𑀲𑀸 𑀅𑀢𑁆𑀣𑀺, 𑀭𑀸𑀚𑀸 𑀢𑀁 𑀲𑀓𑀼𑀡𑀺𑀓𑀁 𑀏𑀓𑀲𑁆𑀲 𑀭𑀜𑁆𑀜𑁄 𑀧𑀡𑁆𑀡𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑁂𑀲𑁂𑀲𑀺. 𑀢𑀲𑁆𑀲𑀸 𑀕𑀢𑀓𑀸𑀮𑁂 ¶ 𑀭𑀸𑀚𑀓𑀼𑀮𑁂 𑀤𑀸𑀭𑀓𑀸 𑀢𑁂 𑀲𑀓𑀼𑀡𑀧𑁄𑀢𑀓𑁂 𑀳𑀢𑁆𑀣𑁂𑀳𑀺 𑀧𑀭𑀺𑀫𑀤𑁆𑀤𑀦𑁆𑀢𑀸 𑀫𑀸𑀭𑁂𑀲𑀼𑀁. 𑀲𑀸 𑀆𑀕𑀦𑁆𑀢𑁆𑀯𑀸 𑀢𑁂 𑀧𑁄𑀢𑀓𑁂 𑀫𑀢𑁂 𑀧𑀲𑁆𑀲𑀦𑁆𑀢𑀻 ‘‘𑀓𑁂𑀦 𑀫𑁂 𑀧𑀼𑀢𑁆𑀢𑀓𑀸 𑀫𑀸𑀭𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘𑀸’’𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀭𑀸𑀚𑀓𑀼𑀮𑁂 𑀧𑁄𑀲𑀸𑀯𑀦𑀺𑀓𑀩𑁆𑀬𑀕𑁆𑀖𑁄 𑀅𑀢𑁆𑀣𑀺 𑀓𑀓𑁆𑀔𑀴𑁄 𑀨𑀭𑀼𑀲𑁄, 𑀩𑀦𑁆𑀥𑀦𑀩𑀮𑁂𑀦 𑀢𑀺𑀝𑁆𑀞𑀢𑀺. 𑀅𑀣 𑀢𑁂 𑀤𑀸𑀭𑀓𑀸 𑀢𑀁 𑀩𑁆𑀬𑀕𑁆𑀖𑀁 𑀤𑀲𑁆𑀲𑀦𑀸𑀬 𑀅𑀕𑀫𑀁𑀲𑀼. 𑀲𑀸𑀧𑀺 𑀲𑀓𑀼𑀡𑀺𑀓𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 ‘‘𑀬𑀣𑀸 𑀇𑀫𑁂𑀳𑀺 𑀫𑀫 𑀧𑀼𑀢𑁆𑀢𑀓𑀸 𑀫𑀸𑀭𑀺𑀢𑀸, 𑀢𑀣𑁂𑀯 𑀦𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑁂 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀩𑁆𑀬𑀕𑁆𑀖𑀲𑁆𑀲 𑀧𑀸𑀤𑀫𑀽𑀮𑁂 𑀔𑀺𑀧𑀺, 𑀩𑁆𑀬𑀕𑁆𑀖𑁄 𑀫𑀼𑀭𑀸𑀫𑀼𑀭𑀸𑀧𑁂𑀢𑁆𑀯𑀸 𑀔𑀸𑀤𑀺. 𑀲𑀸 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑁄 𑀧𑀭𑀺𑀧𑀼𑀡𑁆𑀡𑁄’’𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑀸. 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀭𑀸𑀚𑀓𑀼𑀮𑁂 𑀓𑀺𑀭 𑀅𑀲𑀼𑀓𑀸 𑀦𑀸𑀫 𑀓𑀼𑀦𑁆𑀢𑀺𑀦𑀻 ¶ 𑀲𑀓𑀼𑀡𑀺𑀓𑀸 𑀬𑁂 𑀳𑀺𑀲𑁆𑀲𑀸 𑀧𑁄𑀢𑀓𑀸 𑀫𑀸𑀭𑀺𑀢𑀸, 𑀢𑁂 𑀤𑀸𑀭𑀓𑁂 𑀩𑁆𑀬𑀕𑁆𑀖𑀲𑁆𑀲 𑀧𑀸𑀤𑀫𑀽𑀮𑁂 𑀔𑀺𑀧𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲𑀸 𑀅𑀢𑁆𑀢𑀦𑁄 𑀧𑁄𑀢𑀓𑀖𑀸𑀢𑀓𑁂 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀩𑁆𑀬𑀕𑁆𑀖𑀲𑁆𑀲 𑀧𑀸𑀤𑀫𑀽𑀮𑁂 𑀔𑀺𑀧𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁄𑀥𑀺𑀲𑀢𑁆𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀦𑀺𑀯𑁂𑀲𑀦𑁂 𑀏𑀓𑀸 𑀓𑀼𑀦𑁆𑀢𑀺𑀦𑀻 𑀲𑀓𑀼𑀡𑀺𑀓𑀸 𑀤𑀽𑀢𑁂𑀬𑁆𑀬𑀳𑀸𑀭𑀺𑀓𑀸𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀅𑀬𑀁 𑀓𑀼𑀦𑁆𑀢𑀺𑀦𑀻 𑀩𑁆𑀬𑀕𑁆𑀖𑁂𑀦 𑀤𑀸𑀭𑀓𑁂 𑀫𑀸𑀭𑀸𑀧𑁂𑀢𑁆𑀯𑀸 ¶ 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀦 𑀲𑀓𑁆𑀓𑀸 𑀫𑀬𑀸 𑀇𑀥 𑀯𑀲𑀺𑀢𑀼𑀁, 𑀕𑀫𑀺𑀲𑁆𑀲𑀸𑀫𑀺, 𑀕𑀘𑁆𑀙𑀦𑁆𑀢𑀻 𑀘 𑀧𑀦 𑀭𑀜𑁆𑀜𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀸𑀫𑀺, 𑀆𑀭𑁄𑀘𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀧𑀫𑀸𑀤𑁂𑀦 𑀫𑀫 𑀧𑀼𑀢𑁆𑀢𑀓𑁂 𑀤𑀸𑀭𑀓𑀸 𑀫𑀸𑀭𑁂𑀲𑀼𑀁, 𑀅𑀳𑀁 𑀓𑁄𑀥𑀯𑀲𑀺𑀓𑀸 𑀳𑀼𑀢𑁆𑀯𑀸 𑀢𑁂 𑀤𑀸𑀭𑀓𑁂 𑀧𑀝𑀺𑀫𑀸𑀭𑁂𑀲𑀺𑀁, 𑀇𑀤𑀸𑀦𑀺 𑀫𑀬𑀸 𑀇𑀥 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁫.

‘‘𑀅𑀯𑀲𑀺𑀫𑁆𑀳 𑀢𑀯𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸,

𑀢𑁆𑀯𑀫𑁂𑀯 𑀤𑀸𑀦𑀺𑀫𑀓𑀭𑀺, 𑀳𑀦𑁆𑀤 𑀭𑀸𑀚 𑀯𑀚𑀸𑀫𑀳’’𑀦𑁆𑀢𑀺.

𑀢𑀢𑁆𑀣 𑀢𑁆𑀯𑀫𑁂𑀯 𑀤𑀸𑀦𑀺𑀫𑀓𑀭𑀻𑀢𑀺 𑀫𑀁 𑀧𑀡𑁆𑀡𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀫𑀸𑀤𑁂𑀦 𑀫𑀫 𑀧𑀺𑀬𑀧𑀼𑀢𑁆𑀢𑀓𑁂 𑀅𑀭𑀓𑁆𑀔𑀦𑁆𑀢𑁄 𑀢𑁆𑀯𑀜𑁆𑀜𑁂𑀯 𑀇𑀤𑀸𑀦𑀺 𑀏𑀢𑀁 𑀫𑀫 𑀤𑁄𑀫𑀦𑀲𑁆𑀲𑀓𑀸𑀭𑀡𑀁 𑀅𑀓𑀭𑀺. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀭𑀸𑀚𑀸𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀮𑀧𑀢𑀺. 𑀯𑀚𑀸𑀫𑀳𑀦𑁆𑀢𑀺 𑀅𑀳𑀁 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁬.

‘‘𑀬𑁄 ¶ 𑀯𑁂 𑀓𑀢𑁂 𑀧𑀝𑀺𑀓𑀢𑁂, 𑀓𑀺𑀩𑁆𑀩𑀺𑀲𑁂 𑀧𑀝𑀺𑀓𑀺𑀩𑁆𑀩𑀺𑀲𑁂;

𑀏𑀯𑀁 𑀢𑀁 𑀲𑀫𑁆𑀫𑀢𑀻 𑀯𑁂𑀭𑀁, 𑀯𑀲 𑀓𑀼𑀦𑁆𑀢𑀺𑀦𑀺 𑀫𑀸𑀕𑀫𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀧𑀭𑁂𑀦 𑀓𑀢𑁂 𑀓𑀺𑀩𑁆𑀩𑀺𑀲𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀫𑀸𑀭𑀡𑀸𑀤𑀺𑀓𑁂 𑀤𑀸𑀭𑀼𑀡𑁂 𑀓𑀫𑁆𑀫𑁂 𑀓𑀢𑁂 𑀧𑀼𑀦 𑀅𑀢𑁆𑀢𑀦𑁄 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀓𑀢𑁂 𑀧𑀝𑀺𑀓𑀺𑀩𑁆𑀩𑀺𑀲𑁂 ‘‘𑀧𑀝𑀺𑀓𑀢𑀁 ¶ 𑀫𑀬𑀸 𑀢𑀲𑁆𑀲𑀸’’𑀢𑀺 𑀚𑀸𑀦𑀸𑀢𑀺. 𑀏𑀯𑀁 𑀢𑀁 𑀲𑀫𑁆𑀫𑀢𑀻 𑀯𑁂𑀭𑀦𑁆𑀢𑀺 𑀏𑀢𑁆𑀢𑀓𑁂𑀦 𑀢𑀁 𑀯𑁂𑀭𑀁 𑀲𑀫𑁆𑀫𑀢𑀺 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀲 𑀓𑀼𑀦𑁆𑀢𑀺𑀦𑀺 𑀫𑀸𑀕𑀫𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀼𑀦𑁆𑀢𑀺𑀦𑀻 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁭.

‘‘𑀦 𑀓𑀢𑀲𑁆𑀲 𑀘 𑀓𑀢𑁆𑀢𑀸 𑀘, 𑀫𑁂𑀢𑁆𑀢𑀺 𑀲𑀦𑁆𑀥𑀻𑀬𑀢𑁂 𑀧𑀼𑀦;

𑀳𑀤𑀬𑀁 𑀦𑀸𑀦𑀼𑀚𑀸𑀦𑀸𑀢𑀺, 𑀕𑀘𑁆𑀙𑀜𑁆𑀜𑁂𑀯 𑀭𑀣𑁂𑀲𑀪𑀸’’𑀢𑀺.

𑀢𑀢𑁆𑀣 𑀦 𑀓𑀢𑀲𑁆𑀲 𑀘 𑀓𑀢𑁆𑀢𑀸 𑀘𑀸𑀢𑀺 𑀓𑀢𑀲𑁆𑀲 𑀘 𑀅𑀪𑀺𑀪𑀽𑀢𑀲𑁆𑀲 𑀉𑀧𑀧𑀻𑀴𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀇𑀤𑀸𑀦𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀬𑁄 𑀓𑀢𑁆𑀢𑀸 𑀢𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀧𑀼𑀦 𑀫𑀺𑀢𑁆𑀢𑀪𑀸𑀯𑁄 𑀦𑀸𑀫 𑀦 𑀲𑀦𑁆𑀥𑀻𑀬𑀢𑀺 𑀦 𑀖𑀝𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀳𑀤𑀬𑀁 𑀦𑀸𑀦𑀼𑀚𑀸𑀦𑀸𑀢𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀫 𑀳𑀤𑀬𑀁 ¶ 𑀇𑀥 𑀯𑀸𑀲𑀁 𑀦𑀸𑀦𑀼𑀚𑀸𑀦𑀸𑀢𑀺. 𑀕𑀘𑁆𑀙𑀜𑁆𑀜𑁂𑀯 𑀭𑀣𑁂𑀲𑀪𑀸𑀢𑀺 𑀢𑀲𑁆𑀫𑀸 𑀅𑀳𑀁 𑀫𑀳𑀸𑀭𑀸𑀚 𑀕𑀫𑀺𑀲𑁆𑀲𑀸𑀫𑀺𑀬𑁂𑀯𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁬𑁮.

‘‘𑀓𑀢𑀲𑁆𑀲 𑀘𑁂𑀯 𑀓𑀢𑁆𑀢𑀸 𑀘, 𑀫𑁂𑀢𑁆𑀢𑀺 𑀲𑀦𑁆𑀥𑀻𑀬𑀢𑁂 𑀧𑀼𑀦;

𑀥𑀻𑀭𑀸𑀦𑀁 𑀦𑁄 𑀘 𑀩𑀸𑀮𑀸𑀦𑀁, 𑀯𑀲 𑀓𑀼𑀦𑁆𑀢𑀺𑀦𑀺 𑀫𑀸𑀕𑀫𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀢𑀲𑁆𑀲 𑀘𑁂𑀯 𑀧𑀼𑀕𑁆𑀕𑀮𑀲𑁆𑀲, 𑀬𑁄 𑀘 𑀓𑀢𑁆𑀢𑀸 𑀢𑀲𑁆𑀲 𑀫𑁂𑀢𑁆𑀢𑀺 𑀲𑀦𑁆𑀥𑀻𑀬𑀢𑁂 𑀧𑀼𑀦, 𑀲𑀸 𑀧𑀦 𑀥𑀻𑀭𑀸𑀦𑀁, 𑀦𑁄 𑀘 𑀩𑀸𑀮𑀸𑀦𑀁. 𑀥𑀻𑀭𑀸𑀦𑀜𑁆𑀳𑀺 𑀫𑁂𑀢𑁆𑀢𑀺 𑀪𑀺𑀦𑁆𑀦𑀸𑀧𑀺 𑀧𑀼𑀦 𑀖𑀝𑀻𑀬𑀢𑀺, 𑀩𑀸𑀮𑀸𑀦𑀁 𑀧𑀦 𑀲𑀓𑀺𑀁 𑀪𑀺𑀦𑁆𑀦𑀸 𑀪𑀺𑀦𑁆𑀦𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀲 𑀓𑀼𑀦𑁆𑀢𑀺𑀦𑀺 𑀫𑀸𑀕𑀫𑀸𑀢𑀺.

𑀲𑀓𑀼𑀡𑀺𑀓𑀸 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀦 𑀲𑀓𑁆𑀓𑀸 𑀫𑀬𑀸 𑀇𑀥 𑀯𑀲𑀺𑀢𑀼𑀁 𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑀸.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀼𑀦𑁆𑀢𑀺𑀦𑀻𑀬𑁂𑀯 𑀏𑀢𑀭𑀳𑀺 𑀓𑀼𑀦𑁆𑀢𑀺𑀦𑀻 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀦𑁆𑀢𑀺𑀦𑀻𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁪𑁪] 𑁪. 𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 ¶ 𑀦𑀻𑀮𑀺𑀬𑀁 𑀫𑀡𑁆𑀟𑀬𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀫𑁆𑀩𑀕𑁄𑀧𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀚𑁂𑀢𑀯𑀦𑀧𑀘𑁆𑀘𑀦𑁆𑀢𑁂 𑀅𑀫𑁆𑀩𑀯𑀦𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀅𑀫𑁆𑀩𑁂 𑀭𑀓𑁆𑀔𑀦𑁆𑀢𑁄 𑀧𑀢𑀺𑀢𑀸𑀦𑀺 𑀅𑀫𑁆𑀩𑀧𑀓𑁆𑀓𑀸𑀦𑀺 𑀔𑀸𑀤𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀢𑁆𑀢𑀦𑁄 𑀲𑀫𑁆𑀩𑀦𑁆𑀥𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀤𑁂𑀢𑀺. 𑀢𑀲𑁆𑀫𑀺𑀁 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀝𑁆𑀞𑁂 𑀅𑀫𑁆𑀩𑀘𑁄𑀭𑀓𑀸 𑀅𑀫𑁆𑀩𑀸𑀦𑀺 𑀧𑀸𑀢𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀘 𑀕𑀳𑁂𑀢𑁆𑀯𑀸 𑀘 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑀢𑀲𑁆𑀲𑁄 𑀲𑁂𑀝𑁆𑀞𑀺𑀥𑀻𑀢𑀭𑁄 𑀅𑀘𑀺𑀭𑀯𑀢𑀺𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺𑀬𑁄 𑀢𑀁 𑀅𑀫𑁆𑀩𑀯𑀦𑀁 𑀧𑀯𑀺𑀲𑀺𑀁𑀲𑀼. 𑀫𑀳𑀮𑁆𑀮𑀓𑁄 𑀆𑀕𑀦𑁆𑀢𑁆𑀯𑀸 𑀢𑀸 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀫𑁂 𑀅𑀫𑁆𑀩𑀸𑀦𑀺 𑀔𑀸𑀤𑀺𑀢𑀸𑀦𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀫𑀬𑀁 𑀇𑀤𑀸𑀦𑁂𑀯 𑀆𑀕𑀢𑀸, 𑀦 𑀢𑀼𑀫𑁆𑀳𑀸𑀓𑀁 𑀅𑀫𑁆𑀩𑀸𑀦𑀺 𑀔𑀸𑀤𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀲𑀧𑀣𑀁 𑀓𑀭𑁄𑀣𑀸’’𑀢𑀺? ‘‘𑀓𑀭𑁄𑀫, 𑀪𑀦𑁆𑀢𑁂’’𑀢𑀺 𑀲𑀧𑀣𑀁 𑀓𑀭𑀺𑀁𑀲𑀼. 𑀫𑀳𑀮𑁆𑀮𑀓𑁄 𑀢𑀸 𑀲𑀧𑀣𑀁 𑀓𑀸𑀭𑁂𑀢𑁆𑀯𑀸 𑀮𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 ¶ 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀫𑀳𑀮𑁆𑀮𑀓𑁄 𑀅𑀢𑁆𑀢𑀦𑁄 𑀯𑀲𑀦𑀓𑀁 𑀅𑀫𑁆𑀩𑀯𑀦𑀁 𑀧𑀯𑀺𑀝𑁆𑀞𑀸 𑀲𑁂𑀝𑁆𑀞𑀺𑀥𑀻𑀢𑀭𑁄 𑀲𑀧𑀣𑀁 𑀓𑀸𑀭𑁂𑀢𑁆𑀯𑀸 𑀮𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀅𑀫𑁆𑀩𑀕𑁄𑀧𑀓𑁄 𑀳𑀼𑀢𑁆𑀯𑀸 𑀘𑀢𑀲𑁆𑀲𑁄 𑀲𑁂𑀝𑁆𑀞𑀺𑀥𑀻𑀢𑀭𑁄 𑀲𑀧𑀣𑀁 𑀓𑀸𑀭𑁂𑀢𑁆𑀯𑀸 𑀮𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑀢𑁆𑀢𑀁 𑀓𑀸𑀭𑁂𑀲𑀺. 𑀢𑀤𑀸 𑀏𑀓𑁄 𑀓𑀽𑀝𑀚𑀝𑀺𑀮𑁄 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀦𑀤𑀻𑀢𑀻𑀭𑁂 𑀅𑀫𑁆𑀩𑀯𑀦𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀅𑀫𑁆𑀩𑁂 𑀭𑀓𑁆𑀔𑀦𑁆𑀢𑁄 𑀧𑀢𑀺𑀢𑀸𑀦𑀺 𑀅𑀫𑁆𑀩𑀧𑀓𑁆𑀓𑀸𑀦𑀺 𑀔𑀸𑀤𑀦𑁆𑀢𑁄 𑀲𑀫𑁆𑀩𑀦𑁆𑀥𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀤𑁂𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀓𑁂 𑀦𑀼 𑀔𑁄 𑀮𑁄𑀓𑁂 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀬𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀤𑀸𑀦𑀁 𑀤𑁂𑀦𑁆𑀢𑀺, 𑀲𑀻𑀮𑀁 𑀭𑀓𑁆𑀔𑀦𑁆𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀓𑁂 𑀧𑀩𑁆𑀩𑀚𑀺𑀢𑀸 𑀲𑀫𑀡𑀥𑀫𑁆𑀫𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀓𑁂 𑀅𑀦𑀸𑀘𑀸𑀭𑀁 𑀘𑀭𑀦𑁆𑀢𑀻’’𑀢𑀺 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑀁 𑀅𑀫𑁆𑀩𑀕𑁄𑀧𑀓𑀁 ¶ 𑀅𑀦𑀸𑀘𑀸𑀭𑀁 𑀓𑀽𑀝𑀚𑀝𑀺𑀮𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀽𑀝𑀚𑀝𑀺𑀮𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀺𑀁 𑀅𑀢𑁆𑀢𑀦𑁄 𑀲𑀫𑀡𑀥𑀫𑁆𑀫𑀁 𑀧𑀳𑀸𑀬 𑀅𑀫𑁆𑀩𑀯𑀦𑀁 ¶ 𑀭𑀓𑁆𑀔𑀦𑁆𑀢𑁄 𑀯𑀺𑀘𑀭𑀢𑀺, 𑀲𑀁𑀯𑁂𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀲𑁆𑀲 𑀕𑀸𑀫𑀁 𑀪𑀺𑀓𑁆𑀔𑀸𑀬 𑀧𑀯𑀺𑀝𑁆𑀞𑀓𑀸𑀮𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀫𑁆𑀩𑁂 𑀧𑀸𑀢𑁂𑀢𑁆𑀯𑀸 𑀘𑁄𑀭𑁂𑀳𑀺 𑀯𑀺𑀮𑀼𑀫𑁆𑀩𑀺𑀢𑁂 𑀯𑀺𑀬 𑀅𑀓𑀸𑀲𑀺.

𑀢𑀤𑀸 𑀩𑀸𑀭𑀸𑀡𑀲𑀺𑀢𑁄 𑀘𑀢𑀲𑁆𑀲𑁄 𑀲𑁂𑀝𑁆𑀞𑀺𑀥𑀻𑀢𑀭𑁄 𑀢𑀁 𑀅𑀫𑁆𑀩𑀯𑀦𑀁 𑀧𑀯𑀺𑀲𑀺𑀁𑀲𑀼. 𑀓𑀽𑀝𑀚𑀝𑀺𑀮𑁄 𑀢𑀸 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀫𑁂 𑀅𑀫𑁆𑀩𑀸𑀦𑀺 𑀔𑀸𑀤𑀺𑀢𑀸𑀦𑀻’’𑀢𑀺 𑀧𑀮𑀺𑀩𑀼𑀤𑁆𑀥𑀺. ‘‘𑀪𑀦𑁆𑀢𑁂, 𑀫𑀬𑀁 𑀇𑀤𑀸𑀦𑁂𑀯 𑀆𑀕𑀢𑀸, 𑀦 𑀢𑁂 𑀅𑀫𑁆𑀩𑀸𑀦𑀺 𑀔𑀸𑀤𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀲𑀧𑀣𑀁 𑀓𑀭𑁄𑀣𑀸’’𑀢𑀺? ‘‘𑀓𑀢𑁆𑀯𑀸 𑀘 𑀧𑀦 𑀕𑀦𑁆𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺? ‘‘𑀆𑀫, 𑀮𑀪𑀺𑀲𑁆𑀲𑀣𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀸𑀲𑀼 𑀚𑁂𑀝𑁆𑀞𑀺𑀓𑀸 𑀲𑀧𑀣𑀁 𑀓𑀭𑁄𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁯.

‘‘𑀬𑁄 𑀦𑀻𑀮𑀺𑀬𑀁 𑀫𑀡𑁆𑀟𑀬𑀢𑀺, 𑀲𑀡𑁆𑀟𑀸𑀲𑁂𑀦 𑀯𑀺𑀳𑀜𑁆𑀜𑀢𑀺;

𑀢𑀲𑁆𑀲 𑀲𑀸 𑀯𑀲𑀫𑀦𑁆𑀯𑁂𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀭𑀺𑀲𑁄 𑀧𑀮𑀺𑀢𑀸𑀦𑀁 𑀓𑀸𑀴𑀯𑀡𑁆𑀡𑀓𑀭𑀡𑀢𑁆𑀣𑀸𑀬 𑀦𑀻𑀮𑀨𑀮𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀓𑀢𑀁 𑀦𑀻𑀮𑀺𑀬𑀁 𑀫𑀡𑁆𑀟𑀬𑀢𑀺, 𑀦𑀻𑀮𑀓𑁂𑀲𑀦𑁆𑀢𑀭𑁂 𑀘 𑀉𑀝𑁆𑀞𑀺𑀢𑀁 ¶ 𑀧𑀮𑀺𑀢𑀁 𑀉𑀤𑁆𑀥𑀭𑀦𑁆𑀢𑁄 𑀲𑀡𑁆𑀟𑀸𑀲𑁂𑀦 𑀯𑀺𑀳𑀜𑁆𑀜𑀢𑀺 𑀓𑀺𑀮𑀫𑀢𑀺, 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀫𑀳𑀮𑁆𑀮𑀓𑀲𑁆𑀲 𑀲𑀸 𑀯𑀲𑀁 𑀅𑀦𑁆𑀯𑁂𑀢𑀼, 𑀢𑀣𑀸𑀭𑀽𑀧𑀁 𑀧𑀢𑀺𑀁 𑀮𑀪𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻𑀢𑀺.

𑀢𑀸𑀧𑀲𑁄 ‘‘𑀢𑁆𑀯𑀁 𑀏𑀓𑀫𑀦𑁆𑀢𑀁 𑀢𑀺𑀝𑁆𑀞𑀸𑀳𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀲𑁂𑀝𑁆𑀞𑀺𑀥𑀻𑀢𑀭𑀁 𑀲𑀧𑀣𑀁 𑀓𑀸𑀭𑁂𑀲𑀺. 𑀲𑀸 𑀲𑀧𑀣𑀁 𑀓𑀭𑁄𑀦𑁆𑀢𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁦.

‘‘𑀯𑀻𑀲𑀁 𑀯𑀸 𑀧𑀜𑁆𑀘𑀯𑀻𑀲𑀁 𑀯𑀸, 𑀊𑀦𑀢𑀺𑀁𑀲𑀁𑀯 𑀚𑀸𑀢𑀺𑀬𑀸;

𑀢𑀸𑀤𑀺𑀲𑀸 𑀧𑀢𑀺 𑀫𑀸 𑀮𑀤𑁆𑀥𑀸, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀦𑀸𑀭𑀺𑀬𑁄 𑀦𑀸𑀫 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀧𑀼𑀭𑀺𑀲𑀸𑀦𑀁 𑀧𑀺𑀬𑀸 𑀳𑁄𑀦𑁆𑀢𑀺. 𑀬𑀸 𑀧𑀦 𑀢𑀯 𑀅𑀫𑁆𑀩𑀸𑀦𑀺 𑀅𑀯𑀸𑀳𑀭𑀺, 𑀲𑀸 𑀏𑀯𑀭𑀽𑀧𑁂 𑀬𑁄𑀩𑁆𑀩𑀦𑁂 𑀧𑀢𑀺𑀁 𑀅𑀮𑀪𑀺𑀢𑁆𑀯𑀸 𑀚𑀸𑀢𑀺𑀬𑀸 𑀯𑀻𑀲𑀁 𑀯𑀸 𑀧𑀜𑁆𑀘𑀯𑀻𑀲𑀁 𑀯𑀸 𑀏𑀓𑁂𑀦 𑀤𑁆𑀯𑀻𑀳𑀺 𑀊𑀦𑀢𑀸𑀬 𑀊𑀦𑀢𑀺𑀁𑀲𑀁 𑀯𑀸 𑀯𑀲𑁆𑀲𑀸𑀦𑀺 𑀧𑀢𑁆𑀯𑀸 𑀢𑀸𑀤𑀺𑀲𑀸 𑀧𑀭𑀺𑀧𑀓𑁆𑀓𑀯𑀬𑀸 𑀳𑀼𑀢𑁆𑀯𑀸𑀧𑀺 𑀧𑀢𑀺𑀁 𑀫𑀸 𑀮𑀤𑁆𑀥𑀸𑀢𑀺.

𑀢𑀸𑀬𑀧𑀺 𑀲𑀧𑀣𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸𑀬 𑀢𑀢𑀺𑀬𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁧.

‘‘𑀤𑀻𑀖𑀁 ¶ ¶ 𑀕𑀘𑁆𑀙𑀢𑀼 𑀅𑀤𑁆𑀥𑀸𑀦𑀁, 𑀏𑀓𑀺𑀓𑀸 𑀅𑀪𑀺𑀲𑀸𑀭𑀺𑀓𑀸;

𑀲𑀗𑁆𑀓𑁂𑀢𑁂 𑀧𑀢𑀺 𑀫𑀸 𑀅𑀤𑁆𑀤, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺, 𑀲𑀸 𑀧𑀢𑀺𑀁 𑀧𑀢𑁆𑀣𑀬𑀫𑀸𑀦𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀪𑀺𑀲𑀭𑀡𑀢𑀸𑀬 𑀅𑀪𑀺𑀲𑀸𑀭𑀺𑀓𑀸 𑀦𑀸𑀫 𑀳𑀼𑀢𑁆𑀯𑀸 𑀏𑀓𑀺𑀓𑀸 𑀅𑀤𑀼𑀢𑀺𑀬𑀸 𑀕𑀸𑀯𑀼𑀢𑀤𑁆𑀯𑀺𑀕𑀸𑀯𑀼𑀢𑀫𑀢𑁆𑀢𑀁 𑀤𑀻𑀖𑀁 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑀼, 𑀕𑀦𑁆𑀢𑁆𑀯𑀸𑀧𑀺 𑀘 𑀢𑀲𑁆𑀫𑀺𑀁 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀆𑀕𑀘𑁆𑀙𑁂𑀬𑁆𑀬𑀸𑀲𑀻𑀢𑀺 𑀓𑀢𑁂 𑀲𑀗𑁆𑀓𑁂𑀢𑁂 𑀢𑀁 𑀧𑀢𑀺𑀁 𑀫𑀸 𑀅𑀤𑁆𑀤𑀲𑀸𑀢𑀺.

𑀢𑀸𑀬𑀧𑀺 𑀲𑀧𑀣𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸𑀬 𑀘𑀢𑀼𑀢𑁆𑀣𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁭𑁨.

‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀏𑀓𑀺𑀓𑀸 𑀲𑀬𑀦𑁂 𑀲𑁂𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻’’𑀢𑀺. 𑁋 𑀲𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯;

𑀢𑀸𑀧𑀲𑁄 ‘‘𑀢𑀼𑀫𑁆𑀳𑁂𑀳𑀺 𑀅𑀢𑀺𑀪𑀸𑀭𑀺𑀬𑀸 𑀲𑀧𑀣𑀸 𑀓𑀢𑀸, 𑀅𑀜𑁆𑀜𑁂𑀳𑀺 𑀅𑀫𑁆𑀩𑀸𑀦𑀺 𑀔𑀸𑀤𑀺𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀕𑀘𑁆𑀙𑀣 𑀤𑀸𑀦𑀺 𑀢𑀼𑀫𑁆𑀳𑁂’’𑀢𑀺 𑀢𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀓𑁆𑀓𑁄 𑀪𑁂𑀭𑀯𑀭𑀽𑀧𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀓𑀽𑀝𑀢𑀸𑀧𑀲𑀁 𑀢𑀢𑁄 𑀧𑀮𑀸𑀧𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀽𑀝𑀚𑀝𑀺𑀮𑁄 𑀅𑀬𑀁 𑀅𑀫𑁆𑀩𑀕𑁄𑀧𑀓𑁄 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺, 𑀘𑀢𑀲𑁆𑀲𑁄 𑀲𑁂𑀝𑁆𑀞𑀺𑀥𑀻𑀢𑀭𑁄 𑀏𑀢𑀸𑀬𑁂𑀯, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁪𑁫] 𑁫. 𑀭𑀸𑀚𑀓𑀼𑀫𑁆𑀪𑀚𑀸𑀢𑀓𑀯𑀡𑁆𑀡𑀦𑀸

𑀯𑀦𑀁 𑀬𑀤𑀕𑁆𑀕𑀺 𑀤𑀳𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀮𑀲𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀅𑀮𑀲𑁄 𑀅𑀳𑁄𑀲𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀢𑁆𑀢𑀧𑀝𑀺𑀯𑀢𑁆𑀢𑀸𑀤𑀻𑀳𑀺 𑀧𑀭𑀺𑀩𑀸𑀳𑀺𑀭𑁄 𑀦𑀻𑀯𑀭𑀡𑀸𑀪𑀺𑀪𑀽𑀢𑁄. 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀢𑀣𑀸 𑀏𑀯 𑀳𑁄𑀢𑀺. 𑀢𑀲𑁆𑀲 𑀢𑀁 𑀆𑀮𑀲𑀺𑀬𑀪𑀸𑀯𑀁 𑀆𑀭𑀩𑁆𑀪 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 ¶ 𑀆𑀮𑀲𑀺𑀬𑁄 𑀓𑀼𑀲𑀻𑀢𑁄 𑀦𑀻𑀯𑀭𑀡𑀸𑀪𑀺𑀪𑀽𑀢𑁄 𑀯𑀺𑀳𑀭𑀢𑀻’’𑀢𑀺 ¶ . 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀆𑀮𑀲𑀺𑀬𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀫𑀘𑁆𑀘𑀭𑀢𑀦𑀁 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀆𑀮𑀲𑀺𑀬𑀚𑀸𑀢𑀺𑀓𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀭𑀸𑀚𑀸𑀦𑀁 𑀧𑀩𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀉𑀧𑀫𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀏𑀓𑀁 𑀭𑀸𑀚𑀓𑀼𑀫𑁆𑀪𑀁 𑀦𑀸𑀫 𑀆𑀮𑀲𑀺𑀬𑀁 𑀧𑀲𑁆𑀲𑀺. 𑀢𑀣𑀸𑀭𑀽𑀧𑀸 𑀓𑀺𑀭 𑀆𑀮𑀲𑀺𑀬𑀸 𑀲𑀓𑀮𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑀸𑀧𑀺 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀯𑀬𑀲𑁆𑀲 𑀓𑁄 𑀦𑀸𑀫 𑀲𑁄’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺. 𑀫𑀳𑀸𑀲𑀢𑁆𑀢𑁄 ‘‘𑀭𑀸𑀚𑀓𑀼𑀫𑁆𑀪𑁄 𑀦𑀸𑀫𑁂𑀲, 𑀫𑀳𑀸𑀭𑀸𑀚, 𑀆𑀮𑀲𑀺𑀬𑁄. 𑀏𑀯𑀭𑀽𑀧𑁄 𑀳𑀺 𑀲𑀓𑀮𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑁄𑀧𑀺 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁂𑀯 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 ‘‘𑀅𑀫𑁆𑀪𑁄, 𑀭𑀸𑀚𑀓𑀼𑀫𑁆𑀪, 𑀢𑀼𑀫𑁆𑀳𑀸𑀓𑀁 𑀤𑀦𑁆𑀥𑀕𑀫𑀦𑀁 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀤𑀸𑀯𑀕𑁆𑀕𑀺𑀫𑁆𑀳𑀺 𑀉𑀝𑁆𑀞𑀺𑀢𑁂 𑀓𑀺𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁩.

‘‘𑀯𑀦𑀁 ¶ 𑀬𑀤𑀕𑁆𑀕𑀺 𑀤𑀳𑀢𑀺, 𑀧𑀸𑀯𑀓𑁄 𑀓𑀡𑁆𑀳𑀯𑀢𑁆𑀢𑀦𑀻;

𑀓𑀣𑀁 𑀓𑀭𑁄𑀲𑀺 𑀧𑀘𑀮𑀓, 𑀏𑀯𑀁 𑀤𑀦𑁆𑀥𑀧𑀭𑀓𑁆𑀓𑀫𑁄’’𑀢𑀺.

𑀢𑀢𑁆𑀣 𑀬𑀤𑀕𑁆𑀕𑀻𑀢𑀺 𑀬𑀤𑀸 𑀅𑀕𑁆𑀕𑀺. 𑀧𑀸𑀯𑀓𑁄 𑀓𑀡𑁆𑀳𑀯𑀢𑁆𑀢𑀦𑀻𑀢𑀺 𑀅𑀕𑁆𑀕𑀺𑀦𑁄 𑀯𑁂𑀯𑀘𑀦𑀁. 𑀧𑀘𑀮𑀓𑀸𑀢𑀺 𑀢𑀁 𑀆𑀮𑀧𑀢𑀺. 𑀲𑁄 𑀳𑀺 𑀘𑀮𑀦𑁆𑀢𑁄 𑀘𑀮𑀦𑁆𑀢𑁄 𑀕𑀘𑁆𑀙𑀢𑀺, 𑀦𑀺𑀘𑁆𑀘𑀁 𑀯𑀸 𑀧𑀘𑀮𑀸𑀬𑀢𑀺, 𑀢𑀲𑁆𑀫𑀸 ‘‘𑀧𑀘𑀮𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀤𑀦𑁆𑀥𑀧𑀭𑀓𑁆𑀓𑀫𑁄𑀢𑀺 𑀕𑀭𑀼𑀯𑀻𑀭𑀺𑀬𑁄.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀓𑀼𑀫𑁆𑀪𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁪.

‘‘𑀩𑀳𑀽𑀦𑀺 𑀭𑀼𑀓𑁆𑀔𑀙𑀺𑀤𑁆𑀤𑀸𑀦𑀺, 𑀧𑀣𑀩𑁆𑀬𑀸 𑀯𑀺𑀯𑀭𑀸𑀦𑀺 𑀘;

𑀢𑀸𑀦𑀺 𑀘𑁂 𑀦𑀸𑀪𑀺𑀲𑀫𑁆𑀪𑁄𑀫, 𑀳𑁄𑀢𑀺 𑀦𑁄 𑀓𑀸𑀮𑀧𑀭𑀺𑀬𑀸𑀬𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀧𑀡𑁆𑀟𑀺𑀢, 𑀅𑀫𑁆𑀳𑀸𑀓𑀁 𑀇𑀢𑁄 𑀉𑀢𑁆𑀢𑀭𑀺𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀭𑀜𑁆𑀜𑁂 𑀭𑀼𑀓𑁆𑀔𑀙𑀺𑀤𑁆𑀤𑀸𑀦𑀺 𑀧𑀣𑀯𑀺𑀬𑀁 𑀯𑀺𑀯𑀭𑀸𑀦𑀺 𑀘 𑀩𑀳𑀽𑀦𑀺. 𑀬𑀤𑀺 𑀢𑀸𑀦𑀺 𑀦 𑀧𑀸𑀧𑀼𑀡𑀸𑀫, 𑀳𑁄𑀢𑀺 𑀦𑁄 𑀓𑀸𑀮𑀧𑀭𑀺𑀬𑀸𑀬𑁄𑀢𑀺 𑀫𑀭𑀡𑀫𑁂𑀯 𑀦𑁄 𑀳𑁄𑀢𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁭𑁫.

‘‘𑀬𑁄 ¶ 𑀤𑀦𑁆𑀥𑀓𑀸𑀮𑁂 𑀢𑀭𑀢𑀺, 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀢𑀺;

𑀲𑀼𑀓𑁆𑀔𑀧𑀡𑁆𑀡𑀁𑀯 𑀅𑀓𑁆𑀓𑀫𑁆𑀫, 𑀅𑀢𑁆𑀣𑀁 𑀪𑀜𑁆𑀚𑀢𑀺 𑀅𑀢𑁆𑀢𑀦𑁄.

𑁧𑁭𑁬.

‘‘𑀬𑁄 𑀤𑀦𑁆𑀥𑀓𑀸𑀮𑁂 𑀤𑀦𑁆𑀥𑁂𑀢𑀺, 𑀢𑀭𑀡𑀻𑀬𑁂 𑀘 𑀢𑀸𑀭𑀬𑀺;

𑀲𑀲𑀻𑀯 𑀭𑀢𑁆𑀢𑀺𑀁 𑀯𑀺𑀪𑀚𑀁, 𑀢𑀲𑁆𑀲𑀢𑁆𑀣𑁄 𑀧𑀭𑀺𑀧𑀽𑀭𑀢𑀻’’𑀢𑀺.

𑀢𑀢𑁆𑀣 𑀤𑀦𑁆𑀥𑀓𑀸𑀮𑁂𑀢𑀺 𑀢𑁂𑀲𑀁 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀲𑀡𑀺𑀓𑀁 𑀓𑀢𑁆𑀢𑀩𑁆𑀩𑀓𑀸𑀮𑁂. 𑀢𑀭𑀢𑀻𑀢𑀺 𑀢𑀼𑀭𑀺𑀢𑀢𑀼𑀭𑀺𑀢𑁄 𑀯𑁂𑀕𑁂𑀦 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺. 𑀲𑀼𑀓𑁆𑀔𑀧𑀡𑁆𑀡𑀁𑀯𑀸𑀢𑀺 𑀬𑀣𑀸 𑀯𑀸𑀢𑀸𑀢𑀧𑀲𑀼𑀓𑁆𑀔𑀁 𑀢𑀸𑀮𑀧𑀡𑁆𑀡𑀁 𑀩𑀮𑀯𑀸 𑀧𑀼𑀭𑀺𑀲𑁄 𑀅𑀓𑁆𑀓𑀫𑀺𑀢𑁆𑀯𑀸 𑀪𑀜𑁆𑀚𑁂𑀬𑁆𑀬, 𑀢𑀢𑁆𑀣𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑁄 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀼𑀤𑁆𑀥𑀺𑀁 𑀪𑀜𑁆𑀚𑀢𑀺. 𑀤𑀦𑁆𑀥𑁂𑀢𑀻𑀢𑀺 𑀤𑀦𑁆𑀥𑀬𑀢𑀺 𑀤𑀦𑁆𑀥𑀓𑀸𑀢𑀩𑁆𑀩𑀸𑀦𑀺 𑀓𑀫𑁆𑀫𑀸𑀦𑀺 𑀤𑀦𑁆𑀥𑀫𑁂𑀯 𑀓𑀭𑁄𑀢𑀺. 𑀢𑀸𑀭𑀬𑀻𑀢𑀺 𑀢𑀼𑀭𑀺𑀢𑀓𑀸𑀢𑀩𑁆𑀩𑀸𑀦𑀺 𑀓𑀫𑁆𑀫𑀸𑀦𑀺 𑀢𑀼𑀭𑀺𑀢𑁄𑀯 𑀓𑀭𑁄𑀢𑀺. 𑀲𑀲𑀻𑀯 𑀭𑀢𑁆𑀢𑀺𑀁 𑀯𑀺𑀪𑀚𑀦𑁆𑀢𑀺 𑀬𑀣𑀸 𑀘𑀦𑁆𑀤𑁄 𑀚𑀼𑀡𑁆𑀳𑀧𑀓𑁆𑀔𑀁 𑀭𑀢𑁆𑀢𑀺𑀁 𑀚𑁄𑀢𑀬𑀫𑀸𑀦𑁄 𑀓𑀸𑀴𑀧𑀓𑁆𑀔𑀭𑀢𑁆𑀢𑀺𑀢𑁄 𑀭𑀢𑁆𑀢𑀺𑀁 𑀯𑀺𑀪𑀚𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀧𑀽𑀭𑀢𑀺, 𑀏𑀯𑀁 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀢𑁆𑀣𑁄 𑀧𑀭𑀺𑀧𑀽𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀭𑀸𑀚𑀸 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀦𑀮𑀲𑁄 𑀚𑀸𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀓𑀼𑀫𑁆𑀪𑁄 𑀆𑀮𑀲𑀺𑀬𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀸𑀚𑀓𑀼𑀫𑁆𑀪𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁪𑁬] 𑁬. 𑀓𑁂𑀲𑀯𑀚𑀸𑀢𑀓𑀯𑀡𑁆𑀡𑀦𑀸

𑀫𑀦𑀼𑀲𑁆𑀲𑀺𑀦𑁆𑀤𑀁 𑀚𑀳𑀺𑀢𑁆𑀯𑀸𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑁆𑀲𑀸𑀲𑀪𑁄𑀚𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀕𑁂𑀳𑁂 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑀺𑀩𑀤𑁆𑀥𑀪𑀢𑁆𑀢𑀁 𑀳𑁄𑀢𑀺, 𑀕𑁂𑀳𑀁 𑀦𑀺𑀘𑁆𑀘𑀓𑀸𑀮𑀁 ¶ 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀧𑀸𑀦𑀪𑀽𑀢𑀁 𑀓𑀸𑀲𑀸𑀯𑀧𑀚𑁆𑀚𑁄𑀢𑀁 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀁. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀲𑁂𑀝𑁆𑀞𑀺𑀦𑁄 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁆𑀧𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀦𑀺𑀯𑁂𑀲𑀦𑁂 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀸 𑀤𑀺𑀬𑁆𑀬𑀢𑀺, 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀧𑀡𑀻𑀢𑀁. 𑀯𑀺𑀲𑁆𑀲𑀸𑀲𑁂𑀦𑀧𑀺 𑀲𑀺𑀦𑁂𑀳𑁂𑀦𑀧𑀺 𑀲𑀳𑀢𑁆𑀣𑀸 𑀤𑀸𑀬𑀓𑀸 𑀦𑀢𑁆𑀣𑀺, 𑀭𑀸𑀚𑀬𑀼𑀢𑁆𑀢𑁂 𑀤𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀪𑀼𑀜𑁆𑀚𑀺𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀦𑀸𑀦𑀕𑁆𑀕𑀭𑀲𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑀁 𑀪𑀢𑁆𑀢𑀁 𑀢𑁂𑀲𑀁 𑀤𑀢𑁆𑀯𑀸 𑀢𑁂𑀳𑀺 𑀤𑀺𑀦𑁆𑀦𑀁 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀪𑀼𑀜𑁆𑀚𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀩𑀳𑀼𑀁 𑀨𑀮𑀸𑀨𑀮𑀁 𑀆𑀳𑀭𑀺𑀁𑀲𑀼. 𑀭𑀸𑀚𑀸 ‘‘𑀲𑀗𑁆𑀖𑀲𑁆𑀲 𑀤𑁂𑀣𑀸’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁆𑀕𑀁 𑀕𑀦𑁆𑀢𑁆𑀯𑀸 𑀏𑀓𑀪𑀺𑀓𑁆𑀔𑀼𑀫𑁆𑀧𑀺 𑀅𑀤𑀺𑀲𑁆𑀯𑀸 ‘‘𑀏𑀓𑁄 𑀪𑀺𑀓𑁆𑀔𑀼𑀧𑀺 𑀦𑀢𑁆𑀣𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. ‘‘𑀦𑀦𑀼 𑀯𑁂𑀮𑀸𑀬𑁂𑀯 𑀢𑀸𑀯𑀸’’𑀢𑀺? ‘‘𑀆𑀫, 𑀯𑁂𑀮𑀸, 𑀪𑀺𑀓𑁆𑀔𑀽 𑀧𑀦 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀉𑀧𑀝𑁆𑀞𑀸𑀓𑀸𑀦𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀢𑁂𑀳𑀺 𑀤𑀺𑀦𑁆𑀦𑀁 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺. 𑀭𑀸𑀚𑀸 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀧𑀡𑀻𑀢𑀁, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀪𑀼𑀢𑁆𑀯𑀸 𑀅𑀜𑁆𑀜𑀁 𑀪𑀼𑀜𑁆𑀚𑀦𑁆𑀢𑀺, 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀦𑀸𑀫 𑀯𑀺𑀲𑁆𑀲𑀸𑀲𑀧𑀭𑀫𑀁, 𑀢𑀼𑀫𑁆𑀳𑀸𑀓𑀁 ¶ 𑀕𑁂𑀳𑁂 𑀯𑀺𑀲𑁆𑀲𑀸𑀲𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀺𑀦𑁂𑀳𑁂𑀦 𑀤𑀸𑀬𑀓𑀸𑀦𑀁 𑀅𑀪𑀸𑀯𑀸 𑀪𑀺𑀓𑁆𑀔𑀽 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀫𑀳𑀸𑀭𑀸𑀚, 𑀯𑀺𑀲𑁆𑀲𑀸𑀲𑀲𑀤𑀺𑀲𑁄 𑀅𑀜𑁆𑀜𑁄 𑀭𑀲𑁄 𑀦𑀸𑀫 𑀦𑀢𑁆𑀣𑀺, 𑀅𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀁 𑀘𑀢𑀼𑀫𑀥𑀼𑀭𑀫𑁆𑀧𑀺 𑀳𑀺 𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀁 𑀲𑀸𑀫𑀸𑀓𑀪𑀢𑁆𑀢𑀁 𑀦 𑀅𑀕𑁆𑀖𑀢𑀺. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀭𑀜𑁆𑀜𑀸 𑀧𑀜𑁆𑀘 𑀯𑁂𑀚𑁆𑀚𑀓𑀼𑀮𑀸𑀦𑀺 𑀕𑀳𑁂𑀢𑁆𑀯𑀸 𑀪𑁂𑀲𑀚𑁆𑀚𑁂 𑀓𑀸𑀭𑀺𑀢𑁂𑀧𑀺 𑀭𑁄𑀕𑁂 𑀅𑀯𑀽𑀧𑀲𑀦𑁆𑀢𑁂 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀮𑁄𑀡𑀓𑀁 𑀲𑀸𑀫𑀸𑀓𑀦𑀻𑀯𑀸𑀭𑀬𑀸𑀕𑀼𑀜𑁆𑀘𑁂𑀯 𑀉𑀤𑀓𑀫𑀢𑁆𑀢𑀲𑀺𑀢𑁆𑀢𑀁 𑀅𑀮𑁄𑀡𑀓𑀧𑀡𑁆𑀡𑀜𑁆𑀘 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀭𑁄𑀕𑀸 𑀚𑀸𑀢𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀫𑁆𑀳𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀓𑀧𑁆𑀧𑀓𑀼𑀫𑀸𑀭𑁄’’𑀢𑀺𑀲𑁆𑀲 ¶ 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀤𑀸 𑀓𑁂𑀲𑀯𑁄 𑀦𑀸𑀫 𑀢𑀸𑀧𑀲𑁄 𑀧𑀜𑁆𑀘𑀳𑀺 𑀢𑀸𑀧𑀲𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑀸𑀦𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀳𑀸𑀲𑀺, 𑀓𑁂𑀲𑀯𑀢𑀸𑀧𑀲𑀲𑁆𑀲 𑀳𑀺𑀢𑀚𑁆𑀛𑀸𑀲𑀬𑁄 𑀲𑀲𑀺𑀦𑁂𑀳𑁄 𑀅𑀳𑁄𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀢𑀺𑀯𑀺𑀬 𑀯𑀺𑀲𑁆𑀲𑀸𑀲𑀺𑀓𑀸 𑀅𑀳𑁂𑀲𑀼𑀁. 𑀅𑀧𑀭𑀪𑀸𑀕𑁂 𑀓𑁂𑀲𑀯𑁄 𑀢𑁂 𑀢𑀸𑀧𑀲𑁂 𑀆𑀤𑀸𑀬 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀪𑀺𑀓𑁆𑀔𑀸𑀬 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀇𑀲𑀺𑀕𑀡𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀪𑁄𑀚𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀸𑀧𑁂𑀲𑀺. 𑀅𑀣 𑀯𑀲𑁆𑀲𑀸𑀭𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀓𑁂𑀲𑀯𑁄 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺. 𑀭𑀸𑀚𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀳𑀮𑁆𑀮𑀓𑀸, 𑀅𑀫𑁆𑀳𑁂 𑀢𑀸𑀯 𑀉𑀧𑀦𑀺𑀲𑁆𑀲𑀸𑀬 𑀯𑀲𑀣, 𑀤𑀳𑀭𑀢𑀸𑀧𑀲𑁂 𑀳𑀺𑀫𑀯𑀦𑁆𑀢𑀁 𑀧𑁂𑀲𑁂𑀣𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁂𑀦 𑀲𑀤𑁆𑀥𑀺𑀁 𑀢𑁂 𑀳𑀺𑀫𑀯𑀦𑁆𑀢𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀏𑀓𑀓𑁄𑀯 𑀑𑀳𑀺𑀬𑀺. 𑀓𑀧𑁆𑀧𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑁂𑀳𑀺 𑀲𑀤𑁆𑀥𑀺𑀁 𑀯𑀲𑀺.

𑀓𑁂𑀲𑀯𑁄 ¶ 𑀓𑀧𑁆𑀧𑁂𑀦 𑀯𑀺𑀦𑀸 𑀯𑀲𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀦𑀺𑀤𑁆𑀤𑀁 𑀦 𑀮𑀪𑀢𑀺, 𑀢𑀲𑁆𑀲 𑀦𑀺𑀤𑁆𑀤𑀁 𑀅𑀮𑀪𑀦𑁆𑀢𑀲𑁆𑀲 𑀲𑀫𑁆𑀫𑀸 𑀆𑀳𑀸𑀭𑁄 𑀦 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀅𑀳𑁄𑀲𑀺, 𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀭𑀸𑀚𑀸 𑀧𑀜𑁆𑀘 𑀯𑁂𑀚𑁆𑀚𑀓𑀼𑀮𑀸𑀦𑀺 𑀕𑀳𑁂𑀢𑁆𑀯𑀸 𑀢𑀸𑀧𑀲𑀁 𑀧𑀝𑀺𑀚𑀕𑁆𑀕𑀺, 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺. 𑀓𑁂𑀲𑀯𑁄 𑀭𑀸𑀚𑀸𑀦𑀁 𑀆𑀳 ‘‘𑀫𑀳𑀸𑀭𑀸𑀚, 𑀓𑀺𑀁 𑀫𑀬𑁆𑀳𑀁 𑀫𑀭𑀡𑀁 𑀇𑀘𑁆𑀙𑀣, 𑀉𑀤𑀸𑀳𑀼 𑀅𑀭𑁄𑀕𑀪𑀸𑀯’’𑀦𑁆𑀢𑀺 ¶ ? ‘‘𑀅𑀭𑁄𑀕𑀪𑀸𑀯𑀁, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀫𑀁 𑀳𑀺𑀫𑀯𑀦𑁆𑀢𑀁 𑀧𑁂𑀲𑁂𑀣𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀦𑀸𑀭𑀤𑀁 𑀦𑀸𑀫 𑀅𑀫𑀘𑁆𑀘𑀁 𑀧𑀓𑁆𑀓𑀸𑀲𑀸𑀧𑁂𑀢𑁆𑀯𑀸 ‘‘𑀦𑀸𑀭𑀤, 𑀅𑀫𑁆𑀳𑀸𑀓𑀁 𑀪𑀤𑀦𑁆𑀢𑀁 𑀕𑀳𑁂𑀢𑁆𑀯𑀸 𑀯𑀦𑀘𑀭𑀓𑁂𑀳𑀺 𑀲𑀤𑁆𑀥𑀺𑀁 𑀳𑀺𑀫𑀯𑀦𑁆𑀢𑀁 𑀬𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀦𑀸𑀭𑀤𑁄 𑀢𑀁 𑀢𑀢𑁆𑀣 𑀦𑁂𑀢𑁆𑀯𑀸 𑀧𑀘𑁆𑀘𑀸𑀕𑀫𑀸𑀲𑀺. 𑀓𑁂𑀲𑀯𑀲𑁆𑀲𑀧𑀺 𑀓𑀧𑁆𑀧𑁂 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀘𑁂𑀢𑀲𑀺𑀓𑀭𑁄𑀕𑁄 𑀯𑀽𑀧𑀲𑀦𑁆𑀢𑁄, 𑀉𑀓𑁆𑀓𑀡𑁆𑀞𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀅𑀣𑀲𑁆𑀲 𑀓𑀧𑁆𑀧𑁄 𑀅𑀮𑁄𑀡𑀓𑁂𑀦 𑀅𑀥𑀽𑀧𑀦𑁂𑀦 ¶ 𑀉𑀤𑀓𑀫𑀢𑁆𑀢𑀲𑀺𑀢𑁆𑀢𑀧𑀡𑁆𑀡𑁂𑀦 𑀲𑀤𑁆𑀥𑀺𑀁 𑀲𑀸𑀫𑀸𑀓𑀦𑀻𑀯𑀸𑀭𑀬𑀸𑀕𑀼𑀁 𑀅𑀤𑀸𑀲𑀺, 𑀢𑀲𑁆𑀲 𑀢𑀗𑁆𑀔𑀡𑀜𑁆𑀜𑁂𑀯 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺.

𑀧𑀼𑀦 𑀭𑀸𑀚𑀸 𑀦𑀸𑀭𑀤𑀁 𑀧𑁂𑀲𑁂𑀲𑀺 ‘‘𑀕𑀘𑁆𑀙 𑀓𑁂𑀲𑀯𑀲𑁆𑀲 𑀢𑀸𑀧𑀲𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀅𑀭𑁄𑀕𑀁 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀜𑁆𑀘 𑀯𑁂𑀚𑁆𑀚𑀓𑀼𑀮𑀸𑀦𑀺 𑀕𑀳𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑁄 𑀢𑀼𑀫𑁆𑀳𑁂 𑀅𑀭𑁄𑀕𑁂 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀓𑀣𑀁 𑀢𑁂 𑀓𑀧𑁆𑀧𑁄 𑀧𑀝𑀺𑀚𑀕𑁆𑀕𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁭.

‘‘𑀫𑀦𑀼𑀲𑁆𑀲𑀺𑀦𑁆𑀤𑀁 𑀚𑀳𑀺𑀢𑁆𑀯𑀸𑀦, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀓𑀣𑀁 𑀦𑀼 𑀪𑀕𑀯𑀸 𑀓𑁂𑀲𑀻, 𑀓𑀧𑁆𑀧𑀲𑁆𑀲 𑀭𑀫𑀢𑀺 𑀅𑀲𑁆𑀲𑀫𑁂’’𑀢𑀺.

𑀢𑀢𑁆𑀣 𑀫𑀦𑀼𑀲𑁆𑀲𑀺𑀦𑁆𑀤𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀇𑀦𑁆𑀤𑀁 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁. 𑀓𑀣𑀁 𑀦𑀼 𑀪𑀕𑀯𑀸 𑀓𑁂𑀲𑀻𑀢𑀺 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀅𑀬𑀁 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀓𑁂𑀲𑀯𑀢𑀸𑀧𑀲𑁄 𑀓𑀧𑁆𑀧𑀲𑁆𑀲 𑀅𑀲𑁆𑀲𑀫𑁂 𑀭𑀫𑀢𑀻𑀢𑀺.

𑀏𑀯𑀁 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀯𑀺𑀬 𑀓𑁂𑀲𑀯𑀲𑁆𑀲 𑀅𑀪𑀺𑀭𑀢𑀺𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀢𑀁 𑀲𑀼𑀢𑁆𑀯𑀸 𑀓𑁂𑀲𑀯𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁮.

‘‘𑀲𑀸𑀤𑀽𑀦𑀺 𑀭𑀫𑀡𑀻𑀬𑀸𑀦𑀺, 𑀲𑀦𑁆𑀢𑀺 𑀯𑀓𑁆𑀔𑀸 𑀫𑀦𑁄𑀭𑀫𑀸;

𑀲𑀼𑀪𑀸𑀲𑀺𑀢𑀸𑀦𑀺 𑀓𑀧𑁆𑀧𑀲𑁆𑀲, 𑀦𑀸𑀭𑀤 𑀭𑀫𑀬𑀦𑁆𑀢𑀺 𑀫’’𑀦𑁆𑀢𑀺.

𑀢𑀢𑁆𑀣 𑀯𑀓𑁆𑀔𑀸𑀢𑀺 𑀭𑀼𑀓𑁆𑀔𑀸. 𑀧𑀸𑀴𑀺𑀬𑀁 𑀧𑀦 ‘‘𑀭𑀼𑀓𑁆𑀔𑀸’’𑀢𑁆𑀯𑁂𑀯 𑀮𑀺𑀔𑀺𑀢𑀁. 𑀲𑀼𑀪𑀸𑀲𑀺𑀢𑀸𑀦𑀻𑀢𑀺 𑀓𑀧𑁆𑀧𑁂𑀦 𑀓𑀣𑀺𑀢𑀸𑀦𑀺 𑀲𑀼𑀪𑀸𑀲𑀺𑀢𑀸𑀦𑀺 𑀫𑀁 𑀭𑀫𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 ‘‘𑀏𑀯𑀁 𑀫𑀁 𑀅𑀪𑀺𑀭𑀫𑀸𑀧𑁂𑀦𑁆𑀢𑁄 𑀓𑀧𑁆𑀧𑁄 𑀅𑀮𑁄𑀡𑀓𑀁 𑀅𑀥𑀽𑀧𑀦𑀁 𑀉𑀤𑀓𑀲𑀺𑀢𑁆𑀢𑀧𑀡𑁆𑀡𑀫𑀺𑀲𑁆𑀲𑀁 𑀲𑀸𑀫𑀸𑀓𑀦𑀻𑀯𑀸𑀭𑀬𑀸𑀕𑀼𑀁 𑀧𑀸𑀬𑁂𑀲𑀺, 𑀢𑀸𑀬 𑀫𑁂 𑀲𑀭𑀻𑀭𑁂 𑀩𑁆𑀬𑀸𑀥𑀺 𑀯𑀽𑀧𑀲𑀫𑀺𑀢𑁄, 𑀅𑀭𑁄𑀕𑁄 𑀚𑀸𑀢𑁄𑀫𑁆𑀳𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀦𑀸𑀭𑀤𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁭𑁯.

‘‘𑀲𑀸𑀮𑀻𑀦𑀁 ¶ 𑀑𑀤𑀦𑀁 𑀪𑀼𑀜𑁆𑀚𑁂, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀓𑀣𑀁 𑀲𑀸𑀫𑀸𑀓𑀦𑀻𑀯𑀸𑀭𑀁, 𑀅𑀮𑁄𑀡𑀁 𑀙𑀸𑀤𑀬𑀦𑁆𑀢𑀺 𑀢’’𑀦𑁆𑀢𑀺.

𑀢𑀢𑁆𑀣 ¶ 𑀪𑀼𑀜𑁆𑀚𑁂𑀢𑀺 𑀪𑀼𑀜𑁆𑀚𑀲𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀙𑀸𑀤𑀬𑀦𑁆𑀢𑀻𑀢𑀺 𑀙𑀸𑀤𑀬𑀢𑀺 𑀧𑀻𑀡𑁂𑀢𑀺 𑀢𑁄𑀲𑁂𑀢𑀺. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀅𑀦𑀼𑀦𑀸𑀲𑀺𑀓𑁄 𑀓𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀢𑁆𑀯𑀁 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁 𑀭𑀸𑀚𑀓𑀼𑀮𑁂 𑀭𑀸𑀚𑀸𑀭𑀳𑀁 𑀲𑀸𑀮𑀺𑀪𑀢𑁆𑀢𑀁 𑀪𑀼𑀜𑁆𑀚𑀲𑀺, 𑀢𑀁 𑀓𑀣𑀫𑀺𑀤𑀁 𑀲𑀸𑀫𑀸𑀓𑀦𑀻𑀯𑀸𑀭𑀁 𑀅𑀮𑁄𑀡𑀁 𑀧𑀻𑀡𑁂𑀢𑀺 𑀢𑁄𑀲𑁂𑀢𑀺, 𑀓𑀣𑀁 𑀢𑁂 𑀏𑀢𑀁 𑀭𑀼𑀘𑁆𑀘𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑁂𑀲𑀯𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁮𑁦.

‘‘𑀲𑀸𑀤𑀼𑀁 𑀯𑀸 𑀬𑀤𑀺 𑀯𑀸𑀲𑀸𑀤𑀼𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀯𑀺𑀲𑁆𑀲𑀢𑁆𑀣𑁄 𑀬𑀢𑁆𑀣 𑀪𑀼𑀜𑁆𑀚𑁂𑀬𑁆𑀬, 𑀯𑀺𑀲𑁆𑀲𑀸𑀲𑀧𑀭𑀫𑀸 𑀭𑀲𑀸’’𑀢𑀺.

𑀢𑀢𑁆𑀣 𑀬𑀤𑀺 𑀯𑀸𑀲𑀸𑀤𑀼𑀦𑁆𑀢𑀺 𑀬𑀤𑀺 𑀯𑀸 𑀅𑀲𑀸𑀤𑀼𑀁. 𑀯𑀺𑀲𑁆𑀲𑀢𑁆𑀣𑁄𑀢𑀺 𑀦𑀺𑀭𑀸𑀲𑀗𑁆𑀓𑁄 𑀯𑀺𑀲𑁆𑀲𑀸𑀲𑀧𑀢𑁆𑀢𑁄 𑀳𑀼𑀢𑁆𑀯𑀸. 𑀬𑀢𑁆𑀣 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀬𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀏𑀯𑀁 𑀪𑀼𑀜𑁆𑀚𑁂𑀬𑁆𑀬, 𑀢𑀢𑁆𑀣 𑀏𑀯𑀁 𑀪𑀼𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀪𑁄𑀚𑀦𑀁 𑀲𑀸𑀤𑀼𑀫𑁂𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀲𑁆𑀲𑀸𑀲𑀧𑀭𑀫𑀸 𑀭𑀲𑀸, 𑀯𑀺𑀲𑁆𑀲𑀸𑀲𑁄 𑀧𑀭𑀫𑁄 𑀉𑀢𑁆𑀢𑀫𑁄 𑀏𑀢𑁂𑀲𑀦𑁆𑀢𑀺 𑀯𑀺𑀲𑁆𑀲𑀸𑀲𑀧𑀭𑀫𑀸 𑀭𑀲𑀸. 𑀯𑀺𑀲𑁆𑀲𑀸𑀲𑀲𑀤𑀺𑀲𑁄 𑀳𑀺 𑀅𑀜𑁆𑀜𑁄 𑀭𑀲𑁄 𑀦𑀸𑀫 𑀦𑀢𑁆𑀣𑀺. 𑀅𑀯𑀺𑀲𑁆𑀲𑀸𑀲𑀺𑀓𑁂𑀦 𑀳𑀺 𑀤𑀺𑀦𑁆𑀦𑀁 𑀘𑀢𑀼𑀫𑀥𑀼𑀭𑀫𑁆𑀧𑀺 𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀁 𑀅𑀫𑁆𑀩𑀺𑀮𑀓𑀜𑁆𑀚𑀺𑀬𑀁 𑀦 𑀅𑀕𑁆𑀖𑀢𑀻𑀢𑀺.

𑀦𑀸𑀭𑀤𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑁂𑀲𑀯𑁄 𑀇𑀤𑀁 𑀦𑀸𑀫 𑀓𑀣𑁂𑀲𑀻’’𑀢𑀺 𑀆𑀘𑀺𑀓𑁆𑀔𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀦𑀸𑀭𑀤𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀓𑁂𑀲𑀯𑁄 𑀩𑀓𑀩𑁆𑀭𑀳𑁆𑀫𑀸, 𑀓𑀧𑁆𑀧𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁂𑀲𑀯𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁪𑁭] 𑁭. 𑀅𑀬𑀓𑀽𑀝𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑀸𑀬𑀲𑀦𑁆𑀢𑀺 ¶ ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑁄𑀓𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀳𑀸𑀓𑀡𑁆𑀳𑀚𑀸𑀢𑀓𑁂 (𑀚𑀸. 𑁧.𑁧𑁨.𑁬𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀉𑀕𑁆𑀕𑀳𑀺𑀢𑀲𑀩𑁆𑀩𑀲𑀺𑀧𑁆𑀧𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀫𑀦𑀼𑀲𑁆𑀲𑀸 𑀤𑁂𑀯𑀫𑀗𑁆𑀕𑀮𑀺𑀓𑀸 𑀳𑀼𑀢𑁆𑀯𑀸 𑀩𑀳𑀽 𑀅𑀚𑁂𑀴𑀓𑀸𑀤𑀬𑁄 ¶ 𑀫𑀸𑀭𑁂𑀢𑁆𑀯𑀸 𑀤𑁂𑀯𑀢𑀸𑀦𑀁 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀬𑀓𑁆𑀔𑀸 𑀩𑀮𑀺𑀓𑀫𑁆𑀫𑀁 𑀅𑀮𑀪𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀬𑀓𑁆𑀔𑀲𑀫𑀸𑀕𑀫𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀭𑀡𑀢𑁆𑀣𑀸𑀬 𑀏𑀓𑀁 𑀓𑀓𑁆𑀔𑀴𑀁 𑀬𑀓𑁆𑀔𑀁 𑀧𑁂𑀲𑁂𑀲𑀼𑀁. 𑀲𑁄 𑀓𑀡𑁆𑀡𑀺𑀓𑀫𑀢𑁆𑀢𑀁 𑀫𑀳𑀦𑁆𑀢𑀁 𑀆𑀤𑀺𑀢𑁆𑀢𑀁 𑀅𑀬𑀓𑀽𑀝𑀁 𑀕𑀳𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀁 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀬𑀦𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑀫𑀸𑀦𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀇𑀦𑁆𑀤𑀯𑀚𑀺𑀭𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀬𑀓𑁆𑀔𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀬𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀲 𑀫𑀁 𑀭𑀓𑁆𑀔𑀫𑀸𑀦𑁄 𑀞𑀺𑀢𑁄, 𑀉𑀤𑀸𑀳𑀼 𑀫𑀸𑀭𑁂𑀢𑀼𑀓𑀸𑀫𑁄’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁮𑁧.

‘‘𑀲𑀩𑁆𑀩𑀸𑀬𑀲𑀁 𑀓𑀽𑀝𑀫𑀢𑀺𑀧𑁆𑀧𑀫𑀸𑀡𑀁, 𑀧𑀕𑁆𑀕𑀬𑁆𑀳 𑀬𑁄 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂;

𑀭𑀓𑁆𑀔𑀸𑀬 𑀫𑁂 𑀢𑁆𑀯𑀁 𑀯𑀺𑀳𑀺𑀢𑁄 𑀦𑀼𑀲𑀚𑁆𑀚, 𑀉𑀤𑀸𑀳𑀼 𑀫𑁂 𑀘𑁂𑀢𑀬𑀲𑁂 𑀯𑀥𑀸𑀬𑀸’’𑀢𑀺.

𑀢𑀢𑁆𑀣 𑀯𑀺𑀳𑀺𑀢𑁄 𑀦𑀼𑀲𑀚𑁆𑀚𑀸𑀢𑀺 𑀯𑀺𑀳𑀺𑀢𑁄 𑀦𑀼 𑀅𑀲𑀺 𑀅𑀚𑁆𑀚.

𑀩𑁄𑀥𑀺𑀲𑀢𑁆𑀢𑁄 𑀧𑀦 𑀬𑀓𑁆𑀔𑀫𑁂𑀯 𑀧𑀲𑁆𑀲𑀢𑀺, 𑀦 𑀲𑀓𑁆𑀓𑀁. 𑀬𑀓𑁆𑀔𑁄 𑀲𑀓𑁆𑀓𑀲𑁆𑀲 𑀪𑀬𑁂𑀦 𑀩𑁄𑀥𑀺𑀲𑀢𑁆𑀢𑀁 𑀧𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀦𑀸𑀳𑀁 𑀢𑀯 𑀭𑀓𑁆𑀔𑀡𑀢𑁆𑀣𑀸𑀬 𑀞𑀺𑀢𑁄, 𑀇𑀫𑀺𑀦𑀸 𑀧𑀦 𑀚𑀮𑀺𑀢𑁂𑀦 𑀅𑀬𑀓𑀽𑀝𑁂𑀦 𑀧𑀳𑀭𑀺𑀢𑁆𑀯𑀸 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀺, 𑀲𑀓𑁆𑀓𑀲𑁆𑀲 𑀪𑀬𑁂𑀦 𑀢𑀁 𑀧𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁮𑁨.

‘‘𑀤𑀽𑀢𑁄 ¶ 𑀅𑀳𑀁 𑀭𑀸𑀚𑀺𑀥 𑀭𑀓𑁆𑀔𑀲𑀸𑀦𑀁, 𑀯𑀥𑀸𑀬 𑀢𑀼𑀬𑁆𑀳𑀁 𑀧𑀳𑀺𑀢𑁄𑀳𑀫𑀲𑁆𑀫𑀺;

𑀇𑀦𑁆𑀤𑁄 𑀘 𑀢𑀁 𑀭𑀓𑁆𑀔𑀢𑀺 𑀤𑁂𑀯𑀭𑀸𑀚𑀸, 𑀢𑁂𑀦𑀼𑀢𑁆𑀢𑀫𑀗𑁆𑀕𑀁 𑀦 𑀢𑁂 𑀨𑀸𑀮𑀬𑀸𑀫𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀇𑀢𑀭𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮𑁩.

‘‘𑀲𑀘𑁂 ¶ 𑀘 𑀫𑀁 𑀭𑀓𑁆𑀔𑀢𑀺 𑀤𑁂𑀯𑀭𑀸𑀚𑀸, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀖𑀯𑀸 𑀲𑀼𑀚𑀫𑁆𑀧𑀢𑀺;

𑀓𑀸𑀫𑀁 ¶ 𑀧𑀺𑀲𑀸𑀘𑀸 𑀯𑀺𑀦𑀤𑀦𑁆𑀢𑀼 𑀲𑀩𑁆𑀩𑁂, 𑀦 𑀲𑀦𑁆𑀢𑀲𑁂 𑀭𑀓𑁆𑀔𑀲𑀺𑀬𑀸 𑀧𑀚𑀸𑀬.

𑁧𑁮𑁪.

‘‘𑀓𑀸𑀫𑀁 𑀓𑀦𑁆𑀤𑀦𑁆𑀢𑀼 𑀓𑀼𑀫𑁆𑀪𑀡𑁆𑀟𑀸, 𑀲𑀩𑁆𑀩𑁂 𑀧𑀁𑀲𑀼𑀧𑀺𑀲𑀸𑀘𑀓𑀸;

𑀦𑀸𑀮𑀁 𑀧𑀺𑀲𑀸𑀘𑀸 𑀬𑀼𑀤𑁆𑀥𑀸𑀬, 𑀫𑀳𑀢𑀻 𑀲𑀸 𑀯𑀺𑀪𑀺𑀁𑀲𑀺𑀓𑀸’’𑀢𑀺.

𑀢𑀢𑁆𑀣 𑀭𑀓𑁆𑀔𑀲𑀺𑀬𑀸 𑀧𑀚𑀸𑀬𑀸𑀢𑀺 𑀭𑀓𑁆𑀔𑀲𑀺𑀲𑀗𑁆𑀔𑀸𑀢𑀸𑀬 𑀧𑀚𑀸𑀬, 𑀭𑀓𑁆𑀔𑀲𑀲𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀫𑁆𑀪𑀡𑁆𑀟𑀸𑀢𑀺 𑀓𑀼𑀫𑁆𑀪𑀫𑀢𑁆𑀢𑀭𑀳𑀲𑁆𑀲𑀗𑁆𑀕𑀸 𑀫𑀳𑁄𑀤𑀭𑀸 𑀬𑀓𑁆𑀔𑀸. 𑀧𑀁𑀲𑀼𑀧𑀺𑀲𑀸𑀘𑀓𑀸𑀢𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀺𑀲𑀸𑀘𑀸. 𑀦𑀸𑀮𑀦𑁆𑀢𑀺 𑀧𑀺𑀲𑀸𑀘𑀸 𑀦𑀸𑀫 𑀫𑀬𑀸 𑀲𑀤𑁆𑀥𑀺𑀁 𑀬𑀼𑀤𑁆𑀥𑀸𑀬 𑀦 𑀲𑀫𑀢𑁆𑀣𑀸. 𑀫𑀳𑀢𑀻 𑀲𑀸 𑀯𑀺𑀪𑀺𑀁𑀲𑀺𑀓𑀸𑀢𑀺 𑀬𑀁 𑀧𑀦𑁂𑀢𑁂 𑀬𑀓𑁆𑀔𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀯𑀺𑀪𑀺𑀁𑀲𑀺𑀓𑀁 𑀤𑀲𑁆𑀲𑁂𑀦𑁆𑀢𑀺, 𑀲𑀸 𑀫𑀳𑀢𑀻 𑀯𑀺𑀪𑀺𑀁𑀲𑀺𑀓𑀸 𑀪𑀬𑀓𑀸𑀭𑀡𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀫𑀬𑁆𑀳𑀁, 𑀦 𑀧𑀦𑀸𑀳𑀁 𑀪𑀸𑀬𑀸𑀫𑀻𑀢𑀺 𑀅𑀢𑁆𑀣𑁄.

𑀲𑀓𑁆𑀓𑁄 𑀬𑀓𑁆𑀔𑀁 𑀧𑀮𑀸𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀑𑀯𑀤𑀺𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀇𑀢𑁄 𑀧𑀝𑁆𑀞𑀸𑀬 𑀢𑀯 𑀭𑀓𑁆𑀔𑀸 𑀫𑀫𑀸𑀬𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀬𑀓𑀽𑀝𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁪𑁮] 𑁮. 𑀅𑀭𑀜𑁆𑀜𑀚𑀸𑀢𑀓𑀯𑀡𑁆𑀡𑀦𑀸

𑀅𑀭𑀜𑁆𑀜𑀸 ¶ 𑀕𑀸𑀫𑀫𑀸𑀕𑀫𑁆𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀘𑀽𑀴𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑁂 (𑀚𑀸. 𑁧.𑁧𑁩.𑁪𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀪𑀭𑀺𑀬𑀸𑀬 𑀓𑀸𑀮𑀓𑀢𑀸𑀬 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄 𑀧𑀼𑀢𑁆𑀢𑀁 𑀅𑀲𑁆𑀲𑀫𑀧𑀤𑁂 𑀞𑀧𑁂𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀘𑁆𑀙𑀢𑀺. 𑀢𑀤𑀸 𑀘𑁄𑀭𑁂𑀲𑀼 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀓𑀭𑀫𑀭𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀲𑀼 𑀏𑀓𑀸 𑀓𑀼𑀫𑀸𑀭𑀺𑀓𑀸 𑀧𑀮𑀸𑀬𑀺𑀢𑁆𑀯𑀸 𑀢𑀁 𑀅𑀲𑁆𑀲𑀫𑀧𑀤𑀁 𑀧𑀢𑁆𑀯𑀸 𑀢𑀸𑀧𑀲𑀓𑀼𑀫𑀸𑀭𑀁 ¶ 𑀧𑀮𑁄𑀪𑁂𑀢𑁆𑀯𑀸 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀢𑁆𑀯𑀸 ‘‘𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀆𑀳. ‘‘𑀧𑀺𑀢𑀸 𑀢𑀸𑀯 ¶ 𑀫𑁂 𑀆𑀕𑀘𑁆𑀙𑀢𑀼, 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀤𑀺𑀲𑁆𑀯𑀸 𑀆𑀕𑀘𑁆𑀙𑀸’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀺𑀲𑀻𑀤𑀺. 𑀢𑀸𑀧𑀲𑀓𑀼𑀫𑀸𑀭𑁄 𑀧𑀺𑀢𑀭𑀺 𑀆𑀕𑀢𑁂 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁮𑁫.

‘‘𑀅𑀭𑀜𑁆𑀜𑀸 𑀕𑀸𑀫𑀫𑀸𑀕𑀫𑁆𑀫, 𑀓𑀺𑀁𑀲𑀻𑀮𑀁 𑀓𑀺𑀁𑀯𑀢𑀁 𑀅𑀳𑀁;

𑀧𑀼𑀭𑀺𑀲𑀁 𑀢𑀸𑀢 𑀲𑁂𑀯𑁂𑀬𑁆𑀬𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 𑀅𑀭𑀜𑁆𑀜𑀸 𑀕𑀸𑀫𑀫𑀸𑀕𑀫𑁆𑀫𑀸𑀢𑀺 𑀢𑀸𑀢 𑀅𑀳𑀁 𑀇𑀢𑁄 𑀅𑀭𑀜𑁆𑀜𑀢𑁄 𑀫𑀦𑀼𑀲𑁆𑀲𑀧𑀣𑀁 𑀯𑀲𑀦𑀢𑁆𑀣𑀸𑀬 𑀕𑀢𑁄 𑀯𑀲𑀦𑀕𑀸𑀫𑀁 𑀧𑀢𑁆𑀯𑀸 𑀓𑀺𑀁 𑀓𑀭𑁄𑀫𑀻𑀢𑀺.

𑀅𑀣𑀲𑁆𑀲 𑀧𑀺𑀢𑀸 𑀑𑀯𑀸𑀤𑀁 𑀤𑀤𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮𑁬.

‘‘𑀬𑁄 𑀢𑀁 𑀯𑀺𑀲𑁆𑀲𑀸𑀲𑀬𑁂 𑀢𑀸𑀢, 𑀯𑀺𑀲𑁆𑀲𑀸𑀲𑀜𑁆𑀘 𑀔𑀫𑁂𑀬𑁆𑀬 𑀢𑁂;

𑀲𑀼𑀲𑁆𑀲𑀽𑀲𑀻 𑀘 𑀢𑀺𑀢𑀺𑀓𑁆𑀔𑀻 𑀘, 𑀢𑀁 𑀪𑀚𑁂𑀳𑀺 𑀇𑀢𑁄 𑀕𑀢𑁄.

𑁧𑁮𑁭.

‘‘𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁;

𑀉𑀭𑀲𑀻𑀯 𑀧𑀢𑀺𑀝𑁆𑀞𑀸𑀬, 𑀢𑀁 𑀪𑀚𑁂𑀳𑀺 𑀇𑀢𑁄 𑀕𑀢𑁄.

𑁧𑁮𑁮.

‘‘𑀳𑀮𑀺𑀤𑁆𑀤𑀺𑀭𑀸𑀕𑀁 𑀓𑀧𑀺𑀘𑀺𑀢𑁆𑀢𑀁, 𑀧𑀼𑀭𑀺𑀲𑀁 𑀭𑀸𑀕𑀯𑀺𑀭𑀸𑀕𑀺𑀦𑀁;

𑀢𑀸𑀤𑀺𑀲𑀁 𑀢𑀸𑀢 𑀫𑀸 𑀲𑁂𑀯𑀺, 𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀧𑀺 𑀘𑁂 𑀲𑀺𑀬𑀸’’𑀢𑀺.

𑀢𑀢𑁆𑀣 ¶ 𑀬𑁄 𑀢𑀁 𑀯𑀺𑀲𑁆𑀲𑀸𑀲𑀬𑁂𑀢𑀺 𑀬𑁄 𑀧𑀼𑀭𑀺𑀲𑁄 𑀢𑀁 𑀯𑀺𑀲𑁆𑀲𑀸𑀲𑁂𑀬𑁆𑀬 𑀦 𑀧𑀭𑀺𑀲𑀗𑁆𑀓𑁂𑀬𑁆𑀬. 𑀯𑀺𑀲𑁆𑀲𑀸𑀲𑀜𑁆𑀘 𑀔𑀫𑁂𑀬𑁆𑀬 𑀢𑁂𑀢𑀺 𑀬𑁄 𑀘 𑀅𑀢𑁆𑀢𑀦𑀺 𑀓𑀬𑀺𑀭𑀫𑀸𑀦𑀁 𑀢𑀯 𑀯𑀺𑀲𑁆𑀲𑀸𑀲𑀁 𑀧𑀢𑁆𑀢𑁄 𑀦𑀺𑀭𑀸𑀲𑀗𑁆𑀓𑁄 𑀢𑀁 𑀔𑀫𑁂𑀬𑁆𑀬. 𑀲𑀼𑀲𑁆𑀲𑀽𑀲𑀻𑀢𑀺 𑀬𑁄 𑀘 𑀢𑀯 𑀯𑀺𑀲𑁆𑀲𑀸𑀲𑀯𑀘𑀦𑀁 𑀲𑁄𑀢𑀼𑀫𑀺𑀘𑁆𑀙𑀢𑀺. 𑀢𑀺𑀢𑀺𑀓𑁆𑀔𑀻𑀢𑀺 𑀬𑁄 𑀘 𑀢𑀬𑀸 𑀓𑀢𑀁 𑀅𑀧𑀭𑀸𑀥𑀁 𑀔𑀫𑀢𑀺. 𑀢𑀁 𑀪𑀚𑁂𑀳𑀻𑀢𑀺 𑀢𑀁 𑀧𑀼𑀭𑀺𑀲𑀁 𑀪𑀚𑁂𑀬𑁆𑀬𑀸𑀲𑀺 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀲𑀺. 𑀉𑀭𑀲𑀻𑀯 𑀧𑀢𑀺𑀝𑁆𑀞𑀸𑀬𑀸𑀢𑀺 𑀬𑀣𑀸 𑀢𑀲𑁆𑀲 𑀉𑀭𑀲𑀺 𑀧𑀢𑀺𑀝𑁆𑀞𑀸𑀬 𑀯𑀟𑁆𑀠𑀺𑀢𑁄 𑀑𑀭𑀲𑀧𑀼𑀢𑁆𑀢𑁄 𑀢𑁆𑀯𑀫𑁆𑀧𑀺 𑀢𑀸𑀤𑀺𑀲𑁄 𑀉𑀭𑀲𑀺 𑀧𑀢𑀺𑀝𑁆𑀞𑀺𑀢𑀧𑀼𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀏𑀯𑀭𑀽𑀧𑀁 𑀧𑀼𑀭𑀺𑀲𑀁 𑀪𑀚𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀳𑀮𑀺𑀤𑁆𑀤𑀺𑀭𑀸𑀕𑀦𑁆𑀢𑀺 𑀳𑀮𑀺𑀤𑁆𑀤𑀺𑀭𑀸𑀕𑀲𑀤𑀺𑀲𑀁 𑀅𑀣𑀺𑀭𑀘𑀺𑀢𑁆𑀢𑀁. 𑀓𑀧𑀺𑀘𑀺𑀢𑁆𑀢𑀦𑁆𑀢𑀺 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀫𑀓𑁆𑀓𑀝𑀘𑀺𑀢𑁆𑀢𑀁. 𑀭𑀸𑀕𑀯𑀺𑀭𑀸𑀕𑀺𑀦𑀦𑁆𑀢𑀺 𑀫𑀼𑀳𑀼𑀢𑁆𑀢𑁂𑀦𑁂𑀯 𑀭𑀚𑁆𑀚𑀦𑀯𑀺𑀭𑀚𑁆𑀚𑀦𑀲𑀪𑀸𑀯𑀁. 𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀧𑀺 𑀘𑁂 𑀲𑀺𑀬𑀸𑀢𑀺 𑀲𑀘𑁂𑀧𑀺 𑀲𑀓𑀮𑀁 𑀚𑀫𑁆𑀩𑀼𑀤𑀻𑀧𑀢𑀮𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀭𑀳𑀺𑀢𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀅𑀪𑀸𑀯𑁂𑀦 𑀦𑀺𑀫𑁆𑀫𑀦𑀼𑀲𑁆𑀲𑀁 𑀲𑀺𑀬𑀸 ¶ , 𑀢𑀣𑀸𑀧𑀺, 𑀢𑀸𑀢, 𑀢𑀸𑀤𑀺𑀲𑀁 𑀮𑀳𑀼𑀘𑀺𑀢𑁆𑀢𑀁 𑀫𑀸 𑀲𑁂𑀯𑀺, 𑀲𑀩𑁆𑀩𑀫𑁆𑀧𑀺 𑀫𑀦𑀼𑀲𑁆𑀲𑀧𑀣𑀁 𑀯𑀺𑀘𑀺𑀦𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀼𑀡𑀲𑀫𑁆𑀧𑀦𑁆𑀦𑀫𑁂𑀯 𑀪𑀚𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀢𑀁 ¶ 𑀲𑀼𑀢𑁆𑀯𑀸 𑀢𑀸𑀧𑀲𑀓𑀼𑀫𑀸𑀭𑁄 ‘‘𑀅𑀳𑀁, 𑀢𑀸𑀢, 𑀇𑀫𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀁 𑀓𑀢𑁆𑀣 𑀮𑀪𑀺𑀲𑁆𑀲𑀸𑀫𑀺, 𑀦 𑀕𑀘𑁆𑀙𑀸𑀫𑀺, 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀲𑀦𑁆𑀢𑀺𑀓𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀅𑀣𑀲𑁆𑀲 𑀧𑀺𑀢𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀉𑀪𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀼𑀢𑁆𑀢𑁄 𑀘 𑀓𑀼𑀫𑀸𑀭𑀺𑀓𑀸 𑀘 𑀏𑀢𑁂𑀬𑁂𑀯 𑀅𑀳𑁂𑀲𑀼𑀁, 𑀧𑀺𑀢𑀸 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀭𑀜𑁆𑀜𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁪𑁯] 𑁯. 𑀲𑀦𑁆𑀥𑀺𑀪𑁂𑀤𑀚𑀸𑀢𑀓𑀯𑀡𑁆𑀡𑀦𑀸

𑀦𑁂𑀯 𑀇𑀢𑁆𑀣𑀻𑀲𑀼 𑀲𑀸𑀫𑀜𑁆𑀜𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀲𑀢𑁆𑀣𑀸 ‘‘𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀣, 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 ¶ 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀧𑀺𑀲𑀼𑀡𑀸 𑀯𑀸𑀘𑀸 𑀦𑀸𑀫 𑀢𑀺𑀔𑀺𑀡𑀲𑀢𑁆𑀢𑀺𑀧𑀳𑀸𑀭𑀲𑀤𑀺𑀲𑀸, 𑀤𑀴𑁆𑀳𑁄 𑀯𑀺𑀲𑁆𑀲𑀸𑀲𑁄𑀧𑀺 𑀢𑀸𑀬 𑀔𑀺𑀧𑁆𑀧𑀁 𑀪𑀺𑀚𑁆𑀚𑀢𑀺, 𑀢𑀜𑁆𑀘 𑀧𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑁂𑀢𑁆𑀢𑀺𑀪𑀺𑀦𑁆𑀤𑀦𑀓𑀚𑀦𑁄 𑀲𑀻𑀳𑀉𑀲𑀪𑀲𑀤𑀺𑀲𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀏𑀓𑁄 𑀕𑁄𑀧𑀸𑀮𑀓𑁄 𑀅𑀭𑀜𑁆𑀜𑁂 𑀕𑁄𑀓𑀼𑀮𑁂𑀲𑀼 𑀕𑀸𑀯𑁄 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀕𑀩𑁆𑀪𑀺𑀦𑀺𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀳𑀸𑀬 𑀆𑀕𑀢𑁄. 𑀢𑀲𑁆𑀲𑀸 𑀏𑀓𑀸𑀬 𑀲𑀻𑀳𑀺𑀬𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀉𑀧𑁆𑀧𑀚𑁆𑀚𑀺. 𑀢𑀸 𑀉𑀪𑁄𑀧𑀺 𑀤𑀴𑁆𑀳𑀫𑀺𑀢𑁆𑀢𑀸 𑀳𑀼𑀢𑁆𑀯𑀸 𑀏𑀓𑀢𑁄 𑀯𑀺𑀘𑀭𑀦𑁆𑀢𑀺. 𑀅𑀧𑀭𑀪𑀸𑀕𑁂 𑀕𑀸𑀯𑀻 𑀯𑀘𑁆𑀙𑀓𑀁, 𑀲𑀻𑀳𑀻 𑀲𑀻𑀳𑀧𑁄𑀢𑀓𑀁 𑀯𑀺𑀚𑀸𑀬𑀺. 𑀢𑁂 𑀉𑀪𑁄𑀧𑀺 𑀚𑀦𑀸 𑀓𑀼𑀮𑁂𑀦 𑀆𑀕𑀢𑀫𑁂𑀢𑁆𑀢𑀺𑀬𑀸 𑀤𑀴𑁆𑀳𑀫𑀺𑀢𑁆𑀢𑀸 𑀳𑀼𑀢𑁆𑀯𑀸 𑀏𑀓𑀢𑁄 𑀯𑀺𑀘𑀭𑀦𑁆𑀢𑀺 ¶ . 𑀅𑀣𑁂𑀓𑁄 𑀯𑀦𑀘𑀭𑀓𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀲𑀁 𑀯𑀺𑀲𑁆𑀲𑀸𑀲𑀁 𑀤𑀺𑀲𑁆𑀯𑀸 𑀅𑀭𑀜𑁆𑀜𑁂 𑀉𑀧𑁆𑀧𑀚𑁆𑀚𑀦𑀓𑀪𑀡𑁆𑀟𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀤𑀢𑁆𑀯𑀸 ¶ ‘‘𑀅𑀧𑀺 𑀢𑁂, 𑀲𑀫𑁆𑀫, 𑀓𑀺𑀜𑁆𑀘𑀺 𑀅𑀭𑀜𑁆𑀜𑁂 𑀅𑀘𑁆𑀙𑀭𑀺𑀬𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀭𑀜𑁆𑀜𑀸 𑀧𑀼𑀝𑁆𑀞𑁄 ‘‘𑀤𑁂𑀯, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀸𑀫𑀺, 𑀏𑀓𑀁 𑀧𑀦 𑀲𑀻𑀳𑀜𑁆𑀘 𑀉𑀲𑀪𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀸𑀲𑀺𑀓𑁂 𑀏𑀓𑀢𑁄 𑀯𑀺𑀘𑀭𑀦𑁆𑀢𑁂 𑀅𑀤𑁆𑀤𑀲’’𑀦𑁆𑀢𑀺 𑀆𑀳. ‘‘𑀏𑀢𑁂𑀲𑀁 𑀢𑀢𑀺𑀬𑁂 𑀉𑀧𑁆𑀧𑀦𑁆𑀦𑁂 𑀪𑀬𑀁 𑀪𑀯𑀺𑀲𑁆𑀲𑀢𑀺, 𑀬𑀤𑀸 𑀢𑁂𑀲𑀁 𑀢𑀢𑀺𑀬𑀁 𑀧𑀲𑁆𑀲𑀢𑀺, 𑀅𑀣 𑀫𑁂 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯𑀸’’𑀢𑀺.

𑀯𑀦𑀘𑀭𑀓𑁂 𑀧𑀦 𑀩𑀸𑀭𑀸𑀡𑀲𑀺𑀁 𑀕𑀢𑁂 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀲𑀻𑀳𑀜𑁆𑀘 𑀉𑀲𑀪𑀜𑁆𑀘 𑀉𑀧𑀝𑁆𑀞𑀳𑀺. 𑀯𑀦𑀘𑀭𑀓𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 ‘‘𑀢𑀢𑀺𑀬𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀭𑀜𑁆𑀜𑁄 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀁 𑀕𑀢𑁄. 𑀲𑀺𑀗𑁆𑀕𑀸𑀮𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀞𑀧𑁂𑀢𑁆𑀯𑀸 𑀲𑀻𑀳𑀫𑀁𑀲𑀜𑁆𑀘 𑀉𑀲𑀪𑀫𑀁𑀲𑀜𑁆𑀘 𑀅𑀜𑁆𑀜𑀁 𑀅𑀔𑀸𑀤𑀺𑀢𑀧𑀼𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀇𑀫𑁂 𑀪𑀺𑀦𑁆𑀤𑀺𑀢𑁆𑀯𑀸 𑀇𑀫𑁂𑀲𑀁 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀅𑀬𑀁 𑀢𑀁 𑀏𑀯𑀁 𑀯𑀤𑀢𑀺, 𑀅𑀬𑀁 𑀢𑀁 𑀏𑀯𑀁 𑀯𑀤𑀢𑀻’’𑀢𑀺 𑀉𑀪𑁄𑀧𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀓𑀮𑀳𑀁 𑀓𑀸𑀭𑁂𑀢𑁆𑀯𑀸 𑀫𑀭𑀡𑀸𑀓𑀸𑀭𑀧𑁆𑀧𑀢𑁆𑀢𑁂 𑀅𑀓𑀸𑀲𑀺. 𑀯𑀦𑀘𑀭𑀓𑁄𑀧𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 ‘‘𑀢𑁂𑀲𑀁, 𑀤𑁂𑀯, 𑀢𑀢𑀺𑀬𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀳. ‘‘𑀓𑁄 𑀲𑁄’’𑀢𑀺? ‘‘𑀲𑀺𑀗𑁆𑀕𑀸𑀮𑁄, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀲𑁄 𑀉𑀪𑁄 𑀫𑀺𑀢𑁆𑀢𑁂 𑀪𑀺𑀦𑁆𑀤𑀺𑀢𑁆𑀯𑀸 𑀫𑀸𑀭𑀸𑀧𑁂𑀲𑁆𑀲𑀢𑀺, 𑀫𑀬𑀁 𑀢𑁂𑀲𑀁 𑀫𑀢𑀓𑀸𑀮𑁂 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀯𑀦𑀘𑀭𑀓𑁂𑀦 𑀫𑀕𑁆𑀕𑀤𑁂𑀲𑀓𑁂𑀦 𑀕𑀘𑁆𑀙𑀦𑁆𑀢𑁄 𑀢𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁂𑀲𑀼 𑀲𑀫𑁆𑀧𑀸𑀧𑀼𑀡𑀺. 𑀲𑀺𑀗𑁆𑀕𑀸𑀮𑁄 𑀧𑀦 𑀳𑀝𑁆𑀞𑀢𑀼𑀝𑁆𑀞𑁄 𑀏𑀓𑀯𑀸𑀭𑀁 ¶ 𑀲𑀻𑀳𑀲𑁆𑀲 𑀫𑀁𑀲𑀁 𑀔𑀸𑀤𑀢𑀺, 𑀏𑀓𑀯𑀸𑀭𑀁 𑀉𑀲𑀪𑀲𑁆𑀲 𑀫𑀁𑀲𑀁 𑀔𑀸𑀤𑀢𑀺. 𑀭𑀸𑀚𑀸 𑀢𑁂 𑀉𑀪𑁄𑀧𑀺 𑀚𑀻𑀯𑀺𑀢𑀓𑁆𑀔𑀬𑀧𑁆𑀧𑀢𑁆𑀢𑁂 𑀤𑀺𑀲𑁆𑀯𑀸 𑀭𑀣𑁂 𑀞𑀺𑀢𑁄𑀯 𑀲𑀸𑀭𑀣𑀺𑀦𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮𑁯.

‘‘𑀦𑁂𑀯 ¶ 𑀇𑀢𑁆𑀣𑀻𑀲𑀼 𑀲𑀸𑀫𑀜𑁆𑀜𑀁, 𑀦𑀸𑀧𑀺 𑀪𑀓𑁆𑀔𑁂𑀲𑀼 𑀲𑀸𑀭𑀣𑀺;

𑀅𑀣𑀲𑁆𑀲 𑀲𑀦𑁆𑀥𑀺𑀪𑁂𑀤𑀲𑁆𑀲, 𑀧𑀲𑁆𑀲 𑀬𑀸𑀯 𑀲𑀼𑀘𑀺𑀦𑁆𑀢𑀺𑀢𑀁.

𑁧𑁯𑁦.

‘‘𑀅𑀲𑀺 𑀢𑀺𑀓𑁆𑀔𑁄𑀯 𑀫𑀁𑀲𑀫𑁆𑀳𑀺, 𑀧𑁂𑀲𑀼𑀜𑁆𑀜𑀁 𑀧𑀭𑀺𑀯𑀢𑁆𑀢𑀢𑀺;

𑀬𑀢𑁆𑀣𑀽𑀲𑀪𑀜𑁆𑀘 𑀲𑀻𑀳𑀜𑁆𑀘, 𑀪𑀓𑁆𑀔𑀬𑀦𑁆𑀢𑀺 𑀫𑀺𑀕𑀸𑀥𑀫𑀸.

𑁧𑁯𑁧.

‘‘𑀇𑀫𑀁 𑀲𑁄 𑀲𑀬𑀦𑀁 𑀲𑁂𑀢𑀺, 𑀬𑀫𑀺𑀫𑀁 𑀧𑀲𑁆𑀲𑀲𑀺 𑀲𑀸𑀭𑀣𑀺;

𑀬𑁄 𑀯𑀸𑀘𑀁 𑀲𑀦𑁆𑀥𑀺𑀪𑁂𑀤𑀲𑁆𑀲, 𑀧𑀺𑀲𑀼𑀡𑀲𑁆𑀲 𑀦𑀺𑀩𑁄𑀥𑀢𑀺.

𑁧𑁯𑁨.

‘‘𑀢𑁂 𑀚𑀦𑀸 𑀲𑀼𑀔𑀫𑁂𑀥𑀦𑁆𑀢𑀺, 𑀦𑀭𑀸 𑀲𑀕𑁆𑀕𑀕𑀢𑀸𑀭𑀺𑀯;

𑀬𑁂 𑀯𑀸𑀘𑀁 𑀲𑀦𑁆𑀥𑀺𑀪𑁂𑀤𑀲𑁆𑀲, 𑀦𑀸𑀯𑀩𑁄𑀥𑀦𑁆𑀢𑀺 𑀲𑀸𑀭𑀣𑀻’’𑀢𑀺.

𑀢𑀢𑁆𑀣 𑀦𑁂𑀯 𑀇𑀢𑁆𑀣𑀻𑀲𑀽𑀢𑀺 𑀲𑀫𑁆𑀫 𑀲𑀸𑀭𑀣𑀺, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀦𑁂𑀯 𑀇𑀢𑁆𑀣𑀻𑀲𑀼 𑀲𑀸𑀫𑀜𑁆𑀜𑀁 𑀅𑀢𑁆𑀣𑀺 𑀦 ¶ , 𑀪𑀓𑁆𑀔𑁂𑀲𑀼𑀧𑀺. 𑀅𑀜𑁆𑀜𑀫𑁂𑀯 𑀳𑀺 𑀇𑀢𑁆𑀣𑀺𑀁 𑀲𑀻𑀳𑁄 𑀲𑁂𑀯𑀢𑀺, 𑀅𑀜𑁆𑀜𑀁 𑀉𑀲𑀪𑁄, 𑀅𑀜𑁆𑀜𑀁 𑀪𑀓𑁆𑀔𑀁 𑀲𑀻𑀳𑁄 𑀔𑀸𑀤𑀢𑀺, 𑀅𑀜𑁆𑀜𑀁 𑀉𑀲𑀪𑁄𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲𑀸𑀢𑀺 𑀏𑀯𑀁 𑀓𑀮𑀳𑀓𑀸𑀭𑀡𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀣 𑀇𑀫𑀲𑁆𑀲 𑀫𑀺𑀢𑁆𑀢𑀲𑀦𑁆𑀥𑀺𑀪𑁂𑀤𑀓𑀲𑁆𑀲 𑀤𑀼𑀝𑁆𑀞𑀲𑀺𑀗𑁆𑀕𑀸𑀮𑀲𑁆𑀲 ‘‘𑀉𑀪𑀺𑀦𑁆𑀦𑀁 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑁂 𑀫𑀸𑀭𑁂𑀦𑁆𑀢𑀲𑁆𑀲 𑀧𑀲𑁆𑀲 𑀬𑀸𑀯 𑀲𑀼𑀘𑀺𑀦𑁆𑀢𑀺𑀢𑀁, 𑀲𑀼𑀘𑀺𑀦𑁆𑀢𑀺𑀢𑀁 𑀚𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑁂𑀲𑀼𑀜𑁆𑀜𑁂 𑀧𑀭𑀺𑀯𑀢𑁆𑀢𑀫𑀸𑀦𑁂. 𑀉𑀲𑀪𑀜𑁆𑀘 𑀲𑀻𑀳𑀜𑁆𑀘 𑀫𑀺𑀕𑀸𑀥𑀫𑀸 𑀲𑀺𑀗𑁆𑀕𑀸𑀮𑀸 𑀔𑀸𑀤𑀦𑁆𑀢𑀺, 𑀢𑀁 𑀧𑁂𑀲𑀼𑀜𑁆𑀜𑀁 𑀫𑀁𑀲𑀫𑁆𑀳𑀺 𑀢𑀺𑀔𑀺𑀡𑁄 𑀅𑀲𑀺 𑀯𑀺𑀬 𑀫𑀺𑀢𑁆𑀢𑀪𑀸𑀯𑀁 𑀙𑀺𑀦𑁆𑀤𑀦𑁆𑀢𑀫𑁂𑀯 𑀧𑀭𑀺𑀯𑀢𑁆𑀢𑀢𑀻𑀢𑀺 𑀤𑀻𑀧𑁂𑀢𑀺.

𑀬𑀫𑀺𑀫𑀁 𑀧𑀲𑁆𑀲𑀲𑀻𑀢𑀺 𑀲𑀫𑁆𑀫 𑀲𑀸𑀭𑀣𑀺, 𑀬𑀁 𑀇𑀫𑀁 𑀧𑀲𑁆𑀲𑀲𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀢𑀲𑀬𑀦𑀁, 𑀅𑀜𑁆𑀜𑁄𑀧𑀺 𑀬𑁄 𑀧𑀼𑀕𑁆𑀕𑀮𑁄 𑀲𑀦𑁆𑀥𑀺𑀪𑁂𑀤𑀲𑁆𑀲 𑀧𑀺𑀲𑀼𑀡𑀲𑁆𑀲 𑀧𑀺𑀲𑀼𑀡𑀯𑀸𑀘𑀁 𑀦𑀺𑀩𑁄𑀥𑀢𑀺 𑀕𑀡𑁆𑀳𑀸𑀢𑀺, 𑀲𑁄 𑀇𑀫𑀁 𑀲𑀬𑀦𑀁 𑀲𑁂𑀢𑀺, 𑀏𑀯𑀫𑁂𑀯𑀁 𑀫𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔𑀫𑁂𑀥𑀦𑁆𑀢𑀻𑀢𑀺 𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀺 𑀮𑀪𑀦𑁆𑀢𑀺. 𑀦𑀭𑀸 𑀲𑀕𑁆𑀕𑀕𑀢𑀸𑀭𑀺𑀯𑀸𑀢𑀺 𑀲𑀕𑁆𑀕𑀕𑀢𑀸 𑀤𑀺𑀩𑁆𑀩𑀪𑁄𑀕𑀲𑀫𑀗𑁆𑀕𑀺𑀦𑁄 𑀦𑀭𑀸 𑀯𑀺𑀬 𑀢𑁂 𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀺. 𑀦𑀸𑀯𑀩𑁄𑀥𑀦𑁆𑀢𑀻𑀢𑀺 ¶ 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀦𑁆𑀢𑀺, 𑀢𑀸𑀤𑀺𑀲𑀁 𑀧𑀦 𑀯𑀘𑀦𑀁 𑀲𑀼𑀢𑁆𑀯𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀫𑁂𑀢𑁆𑀢𑀺𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀓𑀢𑀺𑀓𑀸𑀯 𑀳𑁄𑀦𑁆𑀢𑀻𑀢𑀺.

𑀭𑀸𑀚𑀸 ¶ 𑀇𑀫𑀸 𑀕𑀸𑀣𑀸 𑀪𑀸𑀲𑀺𑀢𑁆𑀯𑀸 𑀲𑀻𑀳𑀲𑁆𑀲 𑀓𑁂𑀲𑀭𑀘𑀫𑁆𑀫𑀦𑀔𑀤𑀸𑀞𑀸 𑀕𑀸𑀳𑀸𑀧𑁂𑀢𑁆𑀯𑀸 𑀦𑀕𑀭𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀦𑁆𑀥𑀺𑀪𑁂𑀤𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁫𑁦] 𑁧𑁦. 𑀤𑁂𑀯𑀢𑀸𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀳𑀦𑁆𑀢𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀻𑀢𑀺 𑀅𑀬𑀁 𑀤𑁂𑀯𑀢𑀸𑀧𑀼𑀘𑁆𑀙𑀸 𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀤𑁂𑀯𑀢𑀸𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀘𑀽𑀴𑀓𑀼𑀡𑀸𑀮𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀚𑀸𑀢𑀓𑀼𑀤𑁆𑀤𑀸𑀦𑀁 ¶ 𑁋

𑀓𑀸𑀮𑀺𑀗𑁆𑀕𑁄 𑀅𑀲𑁆𑀲𑀸𑀭𑁄𑀳𑁄 𑀘, 𑀏𑀓𑀭𑀸𑀚𑀸 𑀘 𑀤𑀤𑁆𑀤𑀭𑁄;

𑀲𑀻𑀮𑀯𑀻𑀫𑀁𑀲𑀲𑀼𑀚𑀸𑀢𑀸, 𑀧𑀮𑀸𑀲𑁄 𑀲𑀓𑀼𑀡𑁄 𑀙𑀯𑁄;

𑀲𑁂𑀬𑁆𑀬𑁄𑀢𑀺 𑀤𑀲 𑀚𑀸𑀢𑀓𑀸.

𑀧𑀼𑀘𑀺𑀫𑀦𑁆𑀤𑁄 𑀓𑀲𑁆𑀲𑀧𑁄 𑀘, 𑀔𑀦𑁆𑀢𑀺𑀯𑀸𑀤𑀻 𑀮𑁄𑀳𑀓𑀼𑀫𑁆𑀪𑀻;

𑀲𑀩𑁆𑀩𑀫𑀁𑀲𑀮𑀸𑀪𑀻 𑀲𑀲𑁄, 𑀫𑀢𑀸𑀭𑁄𑀤𑀓𑀡𑀯𑁂𑀭𑀸;

𑀢𑀺𑀢𑁆𑀢𑀺𑀭𑁄 𑀲𑀼𑀘𑁆𑀘𑀚𑁄 𑀤𑀲.

𑀓𑀼𑀝𑀺𑀤𑀽𑀲𑁄 𑀤𑀼𑀤𑁆𑀤𑀪𑀸𑀬𑁄, 𑀩𑁆𑀭𑀳𑁆𑀫𑀤𑀢𑁆𑀢𑀘𑀫𑁆𑀫𑀲𑀸𑀝𑀓𑁄;

𑀕𑁄𑀥𑀭𑀸𑀚𑀸 𑀘 𑀓𑀓𑁆𑀓𑀸𑀭𑀼, 𑀓𑀸𑀓𑀯𑀢𑀻 𑀦𑀦𑀼 𑀲𑁄𑀘𑀺𑀬𑁄;

𑀓𑀸𑀴𑀩𑀸𑀳𑀼 𑀲𑀻𑀮𑀯𑀻𑀫𑀁𑀲𑁄 𑀤𑀲.

𑀓𑁄𑀓𑀸𑀮𑀺𑀓𑁄 ¶ 𑀭𑀣𑀮𑀝𑁆𑀞𑀺, 𑀧𑀓𑁆𑀓𑀕𑁄𑀥𑀭𑀸𑀚𑁄𑀯𑀸𑀤𑀸;

𑀚𑀫𑁆𑀩𑀼𑀓𑀩𑁆𑀭𑀳𑀸𑀙𑀢𑁆𑀢𑁄 𑀘, 𑀧𑀻𑀞𑀣𑀼𑀲𑀸 𑀘 𑀩𑀸𑀯𑁂𑀭𑀼;

𑀯𑀺𑀲𑀬𑁆𑀳𑀲𑁂𑀝𑁆𑀞𑀺 𑀤𑀲𑀥𑀸.

𑀓𑀺𑀦𑁆𑀦𑀭𑀻𑀯𑀸𑀦𑀭𑀓𑀼𑀦𑁆𑀢𑀺𑀦𑀻, 𑀅𑀫𑁆𑀩𑀳𑀸𑀭𑀻 𑀕𑀚𑀓𑀼𑀫𑁆𑀪𑁄;

𑀓𑁂𑀲𑀯𑀸𑀬𑀓𑀽𑀝𑀸𑀭𑀜𑁆𑀜𑀁, 𑀲𑀦𑁆𑀥𑀺𑀪𑁂𑀤𑁄 𑀤𑁂𑀯𑀢𑀸𑀧𑀜𑁆𑀳𑀸.

𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀓𑀸𑀮𑀺𑀗𑁆𑀕𑁄 𑀧𑀼𑀘𑀺𑀫𑀦𑁆𑀤𑁄 𑀘, 𑀓𑀼𑀝𑀺𑀤𑀽𑀲𑀓𑀓𑁄𑀓𑀺𑀮𑀸;

𑀘𑀽𑀴𑀓𑀼𑀡𑀸𑀮𑀯𑀕𑁆𑀕𑁄𑀢𑀺, 𑀧𑀜𑁆𑀘𑀯𑀕𑁆𑀕𑀸 𑀘𑀢𑀼𑀓𑁆𑀓𑀫𑁆𑀳𑀺;

𑀳𑁄𑀦𑁆𑀢𑀺 𑀧𑀜𑁆𑀜𑀸𑀲 𑀚𑀸𑀢𑀓𑀸.

𑀘𑀢𑀼𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀧𑀸𑀢𑁄

𑁧. 𑀫𑀡𑀺𑀓𑀼𑀡𑁆𑀟𑀮𑀯𑀕𑁆𑀕𑁄

[𑁩𑁫𑁧] 𑁧. 𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀯𑀡𑁆𑀡𑀦𑀸

𑀚𑀻𑀦𑁄 ¶ ¶ ¶ 𑀭𑀣𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑁂 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀲𑀩𑁆𑀩𑀢𑁆𑀣𑀲𑀸𑀥𑀓𑀁 𑀧𑀤𑀼𑀝𑁆𑀞𑀸𑀫𑀘𑁆𑀘𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀳𑁄𑀲𑀺. 𑀧𑀤𑀼𑀝𑁆𑀞𑀸𑀫𑀘𑁆𑀘𑁄 𑀓𑁄𑀲𑀮𑀭𑀸𑀚𑀸𑀦𑀁 𑀆𑀦𑁂𑀢𑁆𑀯𑀸 𑀓𑀸𑀲𑀺𑀭𑀚𑁆𑀚𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀭𑀸𑀚𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺, 𑀘𑁄𑀭𑀭𑀜𑁆𑀜𑁄 𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧.

‘‘𑀚𑀻𑀦𑁄 𑀭𑀣𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑁂 𑀘, 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘 𑀢𑀣𑁂𑀯 𑀚𑀻𑀦𑁄;

𑀲𑀩𑁆𑀩𑁂𑀲𑀼 𑀪𑁄𑀕𑁂𑀲𑀼 𑀅𑀲𑁂𑀲𑀓𑁂𑀲𑀼, 𑀓𑀲𑁆𑀫𑀸 𑀦 𑀲𑀦𑁆𑀢𑀧𑁆𑀧𑀲𑀺 𑀲𑁄𑀓𑀓𑀸𑀮𑁂’’𑀢𑀺.

𑀢𑀢𑁆𑀣 𑀚𑀻𑀦𑁄 𑀭𑀣𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑁂 𑀘𑀸𑀢𑀺 𑀫𑀳𑀸𑀭𑀸𑀚, 𑀢𑁆𑀯𑀁 𑀭𑀣𑀜𑁆𑀘 𑀅𑀲𑁆𑀲𑀜𑁆𑀘 𑀫𑀡𑀺𑀓𑀼𑀡𑁆𑀟𑀮𑀸𑀦𑀺 𑀘 𑀚𑀻𑀦𑁄, ‘‘𑀚𑀻𑀦𑁄 𑀭𑀣𑀲𑁆𑀲𑁂 𑀘 𑀫𑀡𑀺𑀓𑀼𑀡𑁆𑀟𑀮𑁂 𑀘𑀸’’𑀢𑀺𑀧𑀺 𑀧𑀸𑀞𑁄. 𑀅𑀲𑁂𑀲𑀓𑁂𑀲𑀽𑀢𑀺 𑀦𑀺𑀲𑁆𑀲𑁂𑀲𑀓𑁂𑀲𑀼.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨.

‘‘𑀧𑀼𑀩𑁆𑀩𑁂𑀯 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄 𑀯𑀸 𑀢𑁂 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀺;

𑀅𑀲𑀲𑁆𑀲𑀢𑀸 𑀪𑁄𑀕𑀺𑀦𑁄 𑀓𑀸𑀫𑀓𑀸𑀫𑀺, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

𑁩.

‘‘𑀉𑀤𑁂𑀢𑀺 ¶ ¶ 𑀆𑀧𑀽𑀭𑀢𑀺 𑀯𑁂𑀢𑀺 𑀘𑀦𑁆𑀤𑁄, 𑀅𑀢𑁆𑀣𑀁 𑀢𑀧𑁂𑀢𑁆𑀯𑀸𑀦 𑀧𑀮𑁂𑀢𑀺 𑀲𑀽𑀭𑀺𑀬𑁄;

𑀯𑀺𑀤𑀺𑀢𑀸 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂’’𑀢𑀺.

𑀢𑀢𑁆𑀣 𑀧𑀼𑀩𑁆𑀩𑁂𑀯 𑀫𑀘𑁆𑀘𑀦𑁆𑀢𑀺 𑀫𑀘𑁆𑀘𑀁 𑀯𑀸 𑀪𑁄𑀕𑀸 𑀧𑀼𑀩𑁆𑀩𑁂𑀯 𑀧𑀞𑀫𑀢𑀭𑀜𑁆𑀜𑁂𑀯 𑀯𑀺𑀚𑀳𑀦𑁆𑀢𑀺, 𑀫𑀘𑁆𑀘𑁄 𑀯𑀸 𑀢𑁂 𑀪𑁄𑀕𑁂 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀺. 𑀓𑀸𑀫𑀓𑀸𑀫𑀻𑀢𑀺 𑀘𑁄𑀭𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀅𑀫𑁆𑀪𑁄, 𑀓𑀸𑀫𑁂 𑀓𑀸𑀫𑀬𑀫𑀸𑀦 𑀓𑀸𑀫𑀓𑀸𑀫𑀺 𑀪𑁄𑀕𑀺𑀦𑁄 𑀦𑀸𑀫 𑀮𑁄𑀓𑁂 𑀅𑀲𑀲𑁆𑀲𑀢𑀸, 𑀪𑁄𑀕𑁂𑀲𑀼 𑀯𑀸 𑀦𑀝𑁆𑀞𑁂𑀲𑀼 𑀚𑀻𑀯𑀫𑀸𑀦𑀸𑀯 𑀅𑀪𑁄𑀕𑀺𑀦𑁄 𑀳𑁄𑀦𑁆𑀢𑀺, 𑀪𑁄𑀕𑁂 𑀯𑀸 𑀧𑀳𑀸𑀬 𑀲𑀬𑀁 𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀳𑀁 𑀫𑀳𑀸𑀚𑀦𑀲𑁆𑀲 𑀲𑁄𑀓𑀓𑀸𑀮𑁂𑀧𑀺 𑀦 𑀲𑁄𑀘𑀸𑀫𑀻𑀢𑀺 𑀅𑀢𑁆𑀣𑁄. 𑀯𑀺𑀤𑀺𑀢𑀸 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸𑀢𑀺 𑀘𑁄𑀭𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀅𑀫𑁆𑀪𑁄, 𑀲𑀢𑁆𑀢𑀼𑀓, 𑀫𑀬𑀸 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄𑀢𑀺𑀆𑀤𑀬𑁄 𑀮𑁄𑀓𑀥𑀫𑁆𑀫𑀸 𑀯𑀺𑀤𑀺𑀢𑀸. 𑀬𑀣𑁂𑀯 𑀳𑀺 𑀘𑀦𑁆𑀤𑁄 𑀉𑀤𑁂𑀢𑀺 𑀘 𑀧𑀽𑀭𑀢𑀺 𑀘 𑀧𑀼𑀦 𑀘 𑀔𑀻𑀬𑀢𑀺, 𑀬𑀣𑀸 𑀘 𑀲𑀽𑀭𑀺𑀬𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑁄 𑀫𑀳𑀦𑁆𑀢𑀁 𑀆𑀮𑁄𑀓𑀁 𑀢𑀧𑁂𑀢𑁆𑀯𑀸𑀦 𑀧𑀼𑀦 𑀲𑀸𑀬𑀁 𑀅𑀢𑁆𑀣𑀁 𑀧𑀮𑁂𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀦 𑀤𑀺𑀲𑁆𑀲𑀢𑀺, 𑀏𑀯𑀫𑁂𑀯 𑀪𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀦𑀲𑁆𑀲𑀦𑁆𑀢𑀺 𑀘, 𑀢𑀢𑁆𑀣 𑀓𑀺𑀁 𑀲𑁄𑀓𑁂𑀦, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀘𑁄𑀭𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀘𑁄𑀭𑀁 𑀕𑀭𑀳𑀦𑁆𑀢𑁄 𑀆𑀳 𑁋

𑁪.

‘‘𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁫.

‘‘𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚, 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀻’’𑀢𑀺.

𑀇𑀫𑀸 ¶ 𑀧𑀦 𑀤𑁆𑀯𑁂 𑀕𑀸𑀣𑀸 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀬𑁂𑀯. 𑀘𑁄𑀭𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀚𑀦𑀧𑀤𑀫𑁂𑀯 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑁄𑀲𑀮𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁫𑁨] 𑁨. 𑀲𑀼𑀚𑀸𑀢𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀁 ¶ 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀢𑀧𑀺𑀢𑀺𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀧𑀺𑀢𑀭𑀺 𑀫𑀢𑁂 𑀧𑀭𑀺𑀤𑁂𑀯𑀫𑀸𑀦𑁄 𑀯𑀺𑀘𑀭𑀢𑀺, 𑀲𑁄𑀓𑀁 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀲𑀫𑀡𑀁 𑀆𑀤𑀸𑀬 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 ‘‘𑀓𑀺𑀁, 𑀉𑀧𑀸𑀲𑀓, 𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀆𑀯𑀼𑀲𑁄, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀦 𑀲𑁄𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀲𑀼𑀚𑀸𑀢𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀧𑀺𑀢𑀸𑀫𑀳𑁄 𑀓𑀸𑀮𑀫𑀓𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀧𑀺𑀢𑀼 𑀓𑀸𑀮𑀓𑀺𑀭𑀺𑀬𑀢𑁄 𑀧𑀝𑁆𑀞𑀸𑀬 𑀲𑁄𑀓𑀲𑀫𑀧𑁆𑀧𑀺𑀢𑁄 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀢𑁄 𑀅𑀝𑁆𑀞𑀻𑀦𑀺 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀭𑀸𑀫𑁂 𑀫𑀢𑁆𑀢𑀺𑀓𑀸𑀣𑀽𑀧𑀁 𑀓𑀢𑁆𑀯𑀸 𑀢𑀸𑀦𑀺 𑀢𑀢𑁆𑀣 𑀦𑀺𑀤𑀳𑀺𑀢𑁆𑀯𑀸 𑀕𑀢𑀕𑀢𑀯𑁂𑀮𑀸𑀬 𑀣𑀽𑀧𑀁 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀘𑁂𑀢𑀺𑀬𑀁 𑀆𑀯𑀺𑀚𑁆𑀛𑀦𑁆𑀢𑁄 𑀧𑀭𑀺𑀤𑁂𑀯𑀢𑀺, 𑀦𑁂𑀯 𑀦𑁆𑀳𑀸𑀬𑀢𑀺 𑀦 𑀮𑀺𑀫𑁆𑀧𑀢𑀺 𑀦 𑀪𑀼𑀜𑁆𑀚𑀢𑀺 𑀦 𑀓𑀫𑁆𑀫𑀦𑁆𑀢𑁂 𑀯𑀺𑀘𑀸𑀭𑁂𑀢𑀺. 𑀢𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀧𑀺𑀢𑀸 𑀫𑁂 𑀅𑀬𑁆𑀬𑀓𑀲𑁆𑀲 𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄𑀓𑀸𑀪𑀺𑀪𑀽𑀢𑁄 𑀘𑀭𑀢𑀺, 𑀞𑀧𑁂𑀢𑁆𑀯𑀸 𑀧𑀦 𑀫𑀁 𑀅𑀜𑁆𑀜𑁄 𑀏𑀢𑀁 𑀲𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀓𑁂𑀦 𑀦𑀁 𑀉𑀧𑀸𑀬𑁂𑀦 𑀦𑀺𑀲𑁆𑀲𑁄𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀺𑀕𑀸𑀫𑁂 ¶ 𑀏𑀓𑀁 𑀫𑀢𑀕𑁄𑀡𑀁 𑀤𑀺𑀲𑁆𑀯𑀸 𑀢𑀺𑀡𑀜𑁆𑀘 𑀧𑀸𑀦𑀻𑀬𑀜𑁆𑀘 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 ‘‘𑀔𑀸𑀤, 𑀔𑀸𑀤, 𑀧𑀺𑀯, 𑀧𑀺𑀯𑀸’’𑀢𑀺 𑀆𑀳. 𑀆𑀕𑀢𑀸𑀕𑀢𑀸 𑀦𑀁 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀲𑀼𑀚𑀸𑀢, 𑀓𑀺𑀁 𑀉𑀫𑁆𑀫𑀢𑁆𑀢𑀓𑁄𑀲𑀺, 𑀫𑀢𑀕𑁄𑀡𑀲𑁆𑀲 𑀢𑀺𑀡𑁄𑀤𑀓𑀁 𑀤𑁂𑀲𑀻’’𑀢𑀺 𑀯𑀤𑀦𑁆𑀢𑀺. 𑀲𑁄 𑀦 𑀓𑀺𑀜𑁆𑀘𑀺 𑀧𑀝𑀺𑀯𑀤𑀢𑀺. 𑀅𑀣𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄, 𑀫𑀢𑀕𑁄𑀡𑀲𑁆𑀲 𑀢𑀺𑀡𑁄𑀤𑀓𑀁 𑀤𑁂𑀢𑀻’’𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 ¶ 𑀧𑀺𑀢𑀼𑀲𑁄𑀓𑁄 𑀅𑀧𑀕𑀢𑁄, 𑀧𑀼𑀢𑁆𑀢𑀲𑁄𑀓𑁄 𑀧𑀢𑀺𑀝𑁆𑀞𑀺𑀢𑁄. 𑀲𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 ‘‘𑀦𑀦𑀼 𑀢𑁆𑀯𑀁, 𑀢𑀸𑀢 𑀲𑀼𑀚𑀸𑀢, 𑀧𑀡𑁆𑀟𑀺𑀢𑁄𑀲𑀺, 𑀓𑀺𑀁𑀓𑀸𑀭𑀡𑀸 𑀫𑀢𑀕𑁄𑀡𑀲𑁆𑀲 𑀢𑀺𑀡𑁄𑀤𑀓𑀁 𑀤𑁂𑀲𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁬.

‘‘𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀮𑀸𑀬𑀺𑀢𑁆𑀯𑀸 𑀳𑀭𑀺𑀢𑀁 𑀢𑀺𑀡𑀁;

𑀔𑀸𑀤 𑀔𑀸𑀤𑀸𑀢𑀺 𑀮𑀧𑀲𑀺, 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯𑀁.

𑁭.

‘‘𑀦 𑀳𑀺 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀫𑀢𑁄 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂;

𑀢𑁆𑀯𑀜𑁆𑀘 𑀢𑀼𑀘𑁆𑀙𑀁 𑀯𑀺𑀮𑀧𑀲𑀺, 𑀬𑀣𑀸 𑀢𑀁 𑀤𑀼𑀫𑁆𑀫𑀢𑀻 𑀢𑀣𑀸’’𑀢𑀺.

𑀢𑀢𑁆𑀣 ¶ 𑀲𑀦𑁆𑀢𑀭𑀫𑀸𑀦𑁄𑀯𑀸𑀢𑀺 𑀢𑀼𑀭𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸. 𑀮𑀸𑀬𑀺𑀢𑁆𑀯𑀸𑀢𑀺 𑀮𑀼𑀦𑀺𑀢𑁆𑀯𑀸. 𑀮𑀧𑀲𑀻𑀢𑀺 𑀯𑀺𑀮𑀧𑀲𑀺. 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯𑀦𑁆𑀢𑀺 𑀯𑀺𑀕𑀢𑀚𑀻𑀯𑀺𑀢𑀁 𑀚𑀺𑀡𑁆𑀡𑀕𑁄𑀡𑀁. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀤𑀼𑀫𑁆𑀫𑀢𑀺 𑀅𑀧𑁆𑀧𑀧𑀜𑁆𑀜𑁄 𑀯𑀺𑀮𑀧𑁂𑀬𑁆𑀬, 𑀢𑀣𑀸 𑀢𑁆𑀯𑀁 𑀢𑀼𑀘𑁆𑀙𑀁 𑀯𑀺𑀮𑀧𑀲𑀻𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮.

‘‘𑀢𑀣𑁂𑀯 𑀢𑀺𑀝𑁆𑀞𑀢𑀺 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀮𑀥𑀺;

𑀲𑁄𑀢𑀸 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀫𑀜𑁆𑀜𑁂 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂.

𑁯.

‘‘𑀦𑁂𑀯𑀬𑁆𑀬𑀓𑀲𑁆𑀲 𑀲𑀻𑀲𑀜𑁆𑀘, 𑀳𑀢𑁆𑀣𑀧𑀸𑀤𑀸 𑀘 𑀤𑀺𑀲𑁆𑀲𑀭𑁂;

𑀭𑀼𑀤𑀁 𑀫𑀢𑁆𑀢𑀺𑀓𑀣𑀽𑀧𑀲𑁆𑀫𑀺𑀁, 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀻’’𑀢𑀺.

𑀢𑀢𑁆𑀣 𑀢𑀣𑁂𑀯𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀞𑀺𑀢𑀁, 𑀢𑀣𑁂𑀯 𑀢𑀺𑀝𑁆𑀞𑀢𑀺. 𑀫𑀜𑁆𑀜𑁂𑀢𑀺 𑀏𑀢𑁂𑀲𑀁 𑀲𑀻𑀲𑀸𑀤𑀻𑀦𑀁 𑀢𑀣𑁂𑀯 𑀞𑀺𑀢𑀢𑁆𑀢𑀸 𑀅𑀬𑀁 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂𑀬𑁆𑀬𑀸𑀢𑀺 𑀫𑀜𑁆𑀜𑀸𑀫𑀺. 𑀦𑁂𑀯𑀬𑁆𑀬𑀓𑀲𑁆𑀲 𑀲𑀻𑀲𑀜𑁆𑀘𑀸𑀢𑀺 𑀅𑀬𑁆𑀬𑀓𑀲𑁆𑀲 𑀧𑀦 𑀲𑀻𑀲𑀜𑁆𑀘 𑀳𑀢𑁆𑀣𑀧𑀸𑀤𑀸 𑀘 𑀦 𑀤𑀺𑀲𑁆𑀲𑀦𑁆𑀢𑀺. ‘‘𑀧𑀺𑀝𑁆𑀞𑀺𑀧𑀸𑀤𑀸 𑀦 𑀤𑀺𑀲𑁆𑀲𑀭𑁂’’𑀢𑀺𑀧𑀺 𑀧𑀸𑀞𑁄. 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀻𑀢𑀺 𑀅𑀳𑀁 𑀢𑀸𑀯 𑀲𑀻𑀲𑀸𑀤𑀻𑀦𑀺 𑀧𑀲𑁆𑀲𑀦𑁆𑀢𑁄 𑀏𑀯𑀁 𑀓𑀭𑁄𑀫𑀺, 𑀢𑁆𑀯𑀁 𑀧𑀦 𑀦 𑀓𑀺𑀜𑁆𑀘𑀺 𑀧𑀲𑁆𑀲𑀲𑀺, 𑀛𑀸𑀧𑀺𑀢𑀝𑁆𑀞𑀸𑀦𑀢𑁄 𑀅𑀝𑁆𑀞𑀻𑀦𑀺 𑀆𑀳𑀭𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀣𑀽𑀧𑀁 𑀓𑀢𑁆𑀯𑀸 𑀧𑀭𑀺𑀤𑁂𑀯𑀲𑀺. 𑀇𑀢𑀺 𑀫𑀁 𑀧𑀝𑀺𑀘𑁆𑀘 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀺. 𑀪𑀺𑀚𑁆𑀚𑀦𑀥𑀫𑁆𑀫𑀸 𑀦𑀸𑀫 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀸 ‘‘𑀫𑀫 𑀧𑀼𑀢𑁆𑀢𑁄 𑀧𑀡𑁆𑀟𑀺𑀢𑁄 𑀇𑀥𑀮𑁄𑀓𑀧𑀭𑀮𑁄𑀓𑀓𑀺𑀘𑁆𑀘𑀁 𑀚𑀸𑀦𑀸𑀢𑀺, 𑀫𑀫 𑀲𑀜𑁆𑀜𑀸𑀧𑀦𑀢𑁆𑀣𑀸𑀬 𑀏𑀢𑀁 𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢 𑀲𑀼𑀚𑀸𑀢𑀧𑀡𑁆𑀟𑀺𑀢, ‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’𑀢𑀺 𑀫𑁂 𑀜𑀸𑀢𑀸, 𑀇𑀢𑁄 ¶ 𑀧𑀝𑁆𑀞𑀸𑀬 𑀦 𑀲𑁄𑀘𑀺𑀲𑁆𑀲𑀸𑀫𑀺, 𑀧𑀺𑀢𑀼𑀲𑁄𑀓𑀳𑀭𑀡𑀓𑀧𑀼𑀢𑁆𑀢𑁂𑀦 𑀦𑀸𑀫 𑀢𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀆𑀳 𑁋

𑁧𑁦.

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁧.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀺𑀢𑀼𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨.

‘‘𑀲𑁄𑀳𑀁 ¶ 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯.

𑁧𑁩.

‘‘𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸’’𑀢𑀺.

𑀢𑀢𑁆𑀣 𑀦𑀺𑀩𑁆𑀩𑀸𑀧𑀬𑁂𑀢𑀺 𑀦𑀺𑀩𑁆𑀩𑀸𑀧𑀬𑀺. 𑀤𑀭𑀦𑁆𑀢𑀺 𑀲𑁄𑀓𑀤𑀭𑀣𑀁. 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸𑀢𑀺 𑀬𑀣𑀸 𑀫𑀫 𑀧𑀼𑀢𑁆𑀢𑁄 𑀲𑀼𑀚𑀸𑀢𑁄 𑀫𑀁 𑀧𑀺𑀢𑀭𑀁 𑀲𑀫𑀸𑀦𑀁 𑀅𑀢𑁆𑀢𑀦𑁄 𑀲𑀧𑁆𑀧𑀜𑁆𑀜𑀢𑀸𑀬 𑀲𑁄𑀓𑀫𑁆𑀳𑀸 𑀯𑀺𑀦𑀺𑀯𑀢𑁆𑀢𑀬𑀺, 𑀏𑀯𑀁 𑀅𑀜𑁆𑀜𑁂𑀧𑀺 𑀲𑀧𑁆𑀧𑀜𑁆𑀜𑀸 𑀲𑁄𑀓𑀫𑁆𑀳𑀸 𑀯𑀺𑀦𑀺𑀯𑀢𑁆𑀢𑀬𑀦𑁆𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀲𑀼𑀚𑀸𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀼𑀚𑀸𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁫𑁩] 𑁩. 𑀯𑁂𑀦𑀲𑀸𑀔𑀚𑀸𑀢𑀓𑀯𑀡𑁆𑀡𑀦𑀸

𑀦𑀬𑀺𑀤𑀁 𑀦𑀺𑀘𑁆𑀘𑀁 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀪𑀕𑁆𑀕𑁂𑀲𑀼 𑀲𑀁𑀲𑀼𑀫𑀸𑀭𑀕𑀺𑀭𑀁 𑀦𑀺𑀲𑁆𑀲𑀸𑀬 𑀪𑁂𑀲𑀓𑀴𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄 𑀦𑀸𑀫 𑀉𑀤𑁂𑀦𑀲𑁆𑀲 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀁𑀲𑀼𑀫𑀸𑀭𑀕𑀺𑀭𑁂 𑀯𑀲𑀦𑁆𑀢𑁄 𑀏𑀓𑀁 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑀁 𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀭𑀸𑀚𑀽𑀳𑀺 𑀅𑀲𑀤𑀺𑀲𑀁 𑀓𑀢𑁆𑀯𑀸 𑀓𑁄𑀓𑀦𑀤𑀁 𑀦𑀸𑀫 𑀧𑀸𑀲𑀸𑀤𑀁 ¶ 𑀓𑀸𑀭𑀸𑀧𑁂𑀲𑀺. 𑀓𑀸𑀭𑀸𑀧𑁂𑀢𑁆𑀯𑀸 ¶ 𑀘 𑀧𑀦 ‘‘𑀅𑀬𑀁 𑀯𑀟𑁆𑀠𑀓𑀻 𑀅𑀜𑁆𑀜𑀲𑁆𑀲𑀧𑀺 𑀭𑀜𑁆𑀜𑁄 𑀏𑀯𑀭𑀽𑀧𑀁 𑀧𑀸𑀲𑀸𑀤𑀁 𑀓𑀭𑁂𑀬𑁆𑀬𑀸’’𑀢𑀺 𑀫𑀘𑁆𑀙𑀭𑀸𑀬𑀦𑁆𑀢𑁄 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑀸𑀧𑁂𑀲𑀺. 𑀢𑁂𑀦𑀲𑁆𑀲 𑀅𑀓𑁆𑀔𑀻𑀦𑀁 𑀉𑀧𑁆𑀧𑀸𑀝𑀺𑀢𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀚𑀸𑀢𑁄. 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄 𑀓𑀺𑀭 𑀢𑀣𑀸𑀭𑀽𑀧𑀲𑁆𑀲 𑀯𑀟𑁆𑀠𑀓𑀺𑀦𑁄 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑀸𑀧𑁂𑀲𑀺, 𑀅𑀳𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄𑀯. 𑀦 𑀓𑁂𑀯𑀮𑀜𑁆𑀘 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀁 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑀸𑀧𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀢𑁂𑀲𑀁 𑀫𑀁𑀲𑁂𑀦 𑀩𑀮𑀺𑀓𑀫𑁆𑀫𑀁 𑀓𑀸𑀭𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 ¶ 𑀅𑀳𑁄𑀲𑀺. 𑀚𑀫𑁆𑀩𑀼𑀤𑀻𑀧𑀢𑀮𑁂 𑀔𑀢𑁆𑀢𑀺𑀬𑀫𑀸𑀡𑀯𑀸 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀸 𑀘 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺. 𑀲𑁄 𑀧𑀦 𑀧𑀓𑀢𑀺𑀬𑀸𑀧𑀺 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀗𑁆𑀕𑀯𑀺𑀚𑁆𑀚𑀸𑀯𑀲𑁂𑀦 𑀢𑀲𑁆𑀲 𑀓𑀓𑁆𑀔𑀴𑀨𑀭𑀼𑀲𑀲𑀸𑀳𑀲𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀨𑀭𑀼𑀲𑁂𑀦 𑀦𑀸𑀫 𑀮𑀤𑁆𑀥𑀁 𑀇𑀲𑁆𑀲𑀭𑀺𑀬𑀁 𑀅𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺, 𑀲𑁄 𑀇𑀲𑁆𑀲𑀭𑀺𑀬𑁂 𑀯𑀺𑀦𑀝𑁆𑀞𑁂 𑀪𑀺𑀦𑁆𑀦𑀦𑀸𑀯𑁄 𑀯𑀺𑀬 𑀲𑀫𑀼𑀤𑁆𑀤𑁂 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀺, 𑀢𑀲𑁆𑀫𑀸 𑀫𑀸 𑀏𑀯𑀭𑀽𑀧𑁄 𑀅𑀳𑁄𑀲𑀻’’𑀢𑀺 𑀢𑀁 𑀑𑀯𑀤𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪.

‘‘𑀦𑀬𑀺𑀤𑀁 𑀦𑀺𑀘𑁆𑀘𑀁 𑀪𑀯𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀤𑀢𑁆𑀢, 𑀔𑁂𑀫𑀁 𑀲𑀼𑀪𑀺𑀓𑁆𑀔𑀁 𑀲𑀼𑀔𑀢𑀸 𑀘 𑀓𑀸𑀬𑁂;

𑀅𑀢𑁆𑀣𑀘𑁆𑀘𑀬𑁂 𑀫𑀸 𑀅𑀳𑀼 𑀲𑀫𑁆𑀧𑀫𑀽𑀴𑁆𑀳𑁄, 𑀪𑀺𑀦𑁆𑀦𑀧𑁆𑀮𑀯𑁄 𑀲𑀸𑀕𑀭𑀲𑁆𑀲𑁂𑀯 𑀫𑀚𑁆𑀛𑁂.

𑁧𑁫.

‘‘𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮’’𑀦𑁆𑀢𑀺.

𑀢𑀢𑁆𑀣 ¶ 𑀲𑀼𑀔𑀢𑀸 𑀘 𑀓𑀸𑀬𑁂𑀢𑀺 𑀢𑀸𑀢 𑀩𑁆𑀭𑀳𑁆𑀫𑀤𑀢𑁆𑀢, 𑀬𑀤𑁂𑀢𑀁 𑀔𑁂𑀫𑀁 𑀯𑀸 𑀲𑀼𑀪𑀺𑀓𑁆𑀔𑀁 𑀯𑀸 𑀬𑀸 𑀯𑀸 𑀏𑀲𑀸 𑀲𑀼𑀔𑀢𑀸 𑀓𑀸𑀬𑁂, 𑀇𑀤𑀁 𑀲𑀩𑁆𑀩𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀦𑀺𑀘𑁆𑀘𑀁 𑀲𑀩𑁆𑀩𑀓𑀸𑀮𑀫𑁂𑀯 𑀦 𑀪𑀯𑀢𑀺, 𑀇𑀤𑀁 𑀧𑀦 𑀅𑀦𑀺𑀘𑁆𑀘𑀁 𑀳𑀼𑀢𑁆𑀯𑀸 𑀅𑀪𑀸𑀯𑀥𑀫𑁆𑀫𑀁. 𑀅𑀢𑁆𑀣𑀘𑁆𑀘𑀬𑁂𑀢𑀺 𑀲𑁄 ¶ 𑀢𑁆𑀯𑀁 𑀅𑀦𑀺𑀘𑁆𑀘𑀢𑀸𑀯𑀲𑁂𑀦 𑀇𑀲𑁆𑀲𑀭𑀺𑀬𑁂 𑀯𑀺𑀕𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀲𑁆𑀲 𑀅𑀘𑁆𑀘𑀬𑁂 𑀬𑀣𑀸 𑀦𑀸𑀫 𑀪𑀺𑀦𑁆𑀦𑀧𑁆𑀮𑀯𑁄 𑀪𑀺𑀦𑁆𑀦𑀦𑀸𑀯𑁄 𑀫𑀦𑀼𑀲𑁆𑀲𑁄 𑀲𑀸𑀕𑀭𑀫𑀚𑁆𑀛𑁂 𑀧𑀢𑀺𑀝𑁆𑀞𑀁 𑀅𑀮𑀪𑀦𑁆𑀢𑁄 𑀲𑀫𑁆𑀧𑀫𑀽𑀴𑁆𑀳𑁄 𑀳𑁄𑀢𑀺, 𑀏𑀯𑀁 𑀫𑀸 𑀅𑀳𑀼 𑀲𑀫𑁆𑀧𑀫𑀽𑀴𑁆𑀳𑁄. 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀻𑀢𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀯𑀺𑀦𑁆𑀤𑀦𑁆𑀢𑁄 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺 𑀦𑀸𑀫.

𑀲𑁄 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀺𑀢𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀑𑀧𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀺𑀗𑁆𑀕𑀺𑀬𑁄 𑀦𑀸𑀫 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄. 𑀲𑁄 𑀬𑀲𑀮𑁄𑀪𑁂𑀦 𑀘𑀺𑀦𑁆𑀢𑁂𑀲𑀺 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀺𑀦𑀸 𑀭𑀜𑁆𑀜𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀕𑀸𑀳𑀸𑀧𑁂𑀬𑁆𑀬𑀁, 𑀏𑀯𑀫𑁂𑀲 𑀏𑀓𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀏𑀓𑀧𑀼𑀭𑁄𑀳𑀺𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀲𑀺. 𑀭𑀸𑀚𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀲𑁆𑀲 𑀭𑀜𑁆𑀜𑁄 𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀕𑀡𑁆𑀳𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀭𑀸𑀚𑀲𑀳𑀲𑁆𑀲𑀧𑀭𑀺𑀯𑀼𑀢𑁄 ‘‘𑀢𑀓𑁆𑀓𑀲𑀺𑀮𑀸𑀬𑀁 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀕𑀭𑀁 𑀧𑀝𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀭𑁂𑀳𑀺 𑀅𑀧𑁆𑀧𑀥𑀁𑀲𑀺𑀬𑀁 𑀅𑀓𑀸𑀲𑀺.

𑀩𑀸𑀭𑀸𑀡𑀲𑀺𑀭𑀸𑀚𑀸 ¶ 𑀕𑀗𑁆𑀕𑀸𑀦𑀤𑀻𑀢𑀻𑀭𑁂 𑀫𑀳𑀢𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀬𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀲𑁄 𑀚𑀫𑁆𑀩𑀼𑀤𑀻𑀧𑀢𑀮𑁂 𑀲𑀳𑀲𑁆𑀲𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀬𑀼𑀚𑁆𑀛𑀫𑀸𑀦𑁄𑀧𑀺 𑀢𑀓𑁆𑀓𑀲𑀺𑀮𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀭𑁄𑀳𑀺𑀢𑀁 𑀧𑀼𑀘𑁆𑀙𑀺 ‘‘𑀆𑀘𑀭𑀺𑀬, 𑀫𑀬𑀁 𑀏𑀢𑁆𑀢𑀓𑁂𑀳𑀺 𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸𑀧𑀺 𑀢𑀓𑁆𑀓𑀲𑀺𑀮𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀫, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺. ‘‘𑀫𑀳𑀸𑀭𑀸𑀚, 𑀲𑀳𑀲𑁆𑀲𑀭𑀸𑀚𑀽𑀦𑀁 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 ¶ 𑀨𑀸𑀮𑁂𑀢𑁆𑀯𑀸 𑀧𑀜𑁆𑀘𑀫𑀥𑀼𑀭𑀫𑀁𑀲𑀁 𑀆𑀤𑀸𑀬 𑀇𑀫𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀦𑁆𑀢𑀯𑀝𑁆𑀝𑀻𑀳𑀺 𑀭𑀼𑀓𑁆𑀔𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀳𑀺𑀢𑀧𑀜𑁆𑀘𑀗𑁆𑀕𑀼𑀮𑀺𑀓𑀸𑀦𑀺 𑀓𑀭𑁄𑀫, 𑀏𑀯𑀁 𑀦𑁄 𑀔𑀺𑀧𑁆𑀧𑀫𑁂𑀯 𑀚𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀫𑀳𑀸𑀩𑀮𑁂 𑀫𑀮𑁆𑀮𑁂 𑀞𑀧𑁂𑀢𑁆𑀯𑀸 𑀏𑀓𑀫𑁂𑀓𑀁 𑀭𑀸𑀚𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀧𑁆𑀧𑀻𑀴𑀦𑁂𑀦 𑀯𑀺𑀲𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀓𑀴𑁂𑀯𑀭𑀸𑀦𑀺 𑀕𑀗𑁆𑀕𑀸𑀬𑀁 𑀧𑀯𑀸𑀳𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀩𑀮𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀩𑀮𑀺𑀪𑁂𑀭𑀺𑀁 𑀆𑀓𑁄𑀝𑀸𑀧𑁂𑀢𑁆𑀯𑀸 𑀬𑀼𑀤𑁆𑀥𑀸𑀬 𑀕𑀢𑁄.

𑀅𑀣𑀲𑁆𑀲 ¶ 𑀅𑀝𑁆𑀝𑀸𑀮𑀓𑀢𑁄 𑀏𑀓𑁄 𑀬𑀓𑁆𑀔𑁄 𑀆𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀅𑀕𑀫𑀸𑀲𑀺, 𑀅𑀣𑀲𑁆𑀲 𑀫𑀳𑀢𑀻 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀉𑀢𑁆𑀢𑀸𑀦𑀓𑁄 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀕𑀺𑀚𑁆𑀛𑁄 𑀏𑀓𑀁 𑀢𑀺𑀔𑀺𑀡𑀓𑁄𑀝𑀺𑀓𑀁 𑀅𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀕𑁆𑀕𑁂 𑀦𑀺𑀲𑀺𑀦𑁆𑀦𑁄 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀅𑀝𑁆𑀞𑀺𑀓𑁄𑀝𑀺 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀯𑀸𑀫𑀓𑁆𑀔𑀺𑀫𑁆𑀳𑀺 𑀅𑀬𑀲𑀽𑀮𑀁 𑀯𑀺𑀬 𑀧𑀢𑀺𑀢𑁆𑀯𑀸 𑀅𑀓𑁆𑀔𑀺𑀁 𑀪𑀺𑀦𑁆𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀮𑁆𑀮𑀓𑁆𑀔𑁂𑀲𑀺. 𑀲𑁄 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 ‘𑀇𑀫𑁂 𑀲𑀢𑁆𑀢𑀸 𑀩𑀻𑀚𑀸𑀦𑀼𑀭𑀽𑀧𑀁 𑀨𑀮𑀁 𑀯𑀺𑀬 𑀓𑀫𑁆𑀫𑀸𑀦𑀼𑀭𑀽𑀧𑀁 𑀯𑀺𑀧𑀸𑀓𑀁 𑀅𑀦𑀼𑀪𑁄𑀦𑁆𑀢𑀻’𑀢𑀺 𑀓𑀣𑁂𑀦𑁆𑀢𑁄 𑀇𑀤𑀁 𑀤𑀺𑀲𑁆𑀯𑀸 𑀓𑀣𑁂𑀲𑀺 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀯𑀺𑀮𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬.

‘‘𑀇𑀤𑀁 𑀢𑀤𑀸𑀘𑀭𑀺𑀬𑀯𑀘𑁄, 𑀧𑀸𑀭𑀸𑀲𑀭𑀺𑀬𑁄 𑀬𑀤𑀩𑁆𑀭𑀯𑀺;

‘𑀫𑀸 𑀲𑀼 𑀢𑁆𑀯𑀁 𑀅𑀓𑀭𑀺 𑀧𑀸𑀧𑀁, 𑀬𑀁 𑀢𑁆𑀯𑀁 𑀧𑀘𑁆𑀙𑀸 𑀓𑀢𑀁 𑀢𑀧𑁂’.

𑁧𑁭.

‘‘𑀅𑀬𑀫𑁂𑀯 𑀲𑁄 𑀧𑀺𑀗𑁆𑀕𑀺𑀬 𑀯𑁂𑀦𑀲𑀸𑀔𑁄, 𑀬𑀫𑁆𑀳𑀺 𑀖𑀸𑀢𑀬𑀺𑀁 𑀔𑀢𑁆𑀢𑀺𑀬𑀸𑀦𑀁 𑀲𑀳𑀲𑁆𑀲𑀁;

𑀅𑀮𑀗𑁆𑀓𑀢𑁂 𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑁂, 𑀢𑀫𑁂𑀯 𑀤𑀼𑀓𑁆𑀔𑀁 𑀧𑀘𑁆𑀘𑀸𑀕𑀢𑀁 𑀫𑀫’’𑀦𑁆𑀢𑀺.

𑀢𑀢𑁆𑀣 ¶ 𑀇𑀤𑀁 𑀢𑀤𑀸𑀘𑀭𑀺𑀬𑀯𑀘𑁄𑀢𑀺 𑀇𑀤𑀁 𑀢𑀁 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁. 𑀧𑀸𑀭𑀸𑀲𑀭𑀺𑀬𑁄𑀢𑀺 𑀢𑀁 𑀕𑁄𑀢𑁆𑀢𑁂𑀦 𑀓𑀺𑀢𑁆𑀢𑁂𑀢𑀺. 𑀧𑀘𑁆𑀙𑀸 𑀓𑀢𑀦𑁆𑀢𑀺 𑀬𑀁 𑀧𑀸𑀧𑀁 𑀢𑀬𑀸 𑀓𑀢𑀁, 𑀧𑀘𑁆𑀙𑀸 𑀢𑀁 𑀢𑀧𑁂𑀬𑁆𑀬 𑀓𑀺𑀮𑀫𑁂𑀬𑁆𑀬, 𑀢𑀁 𑀫𑀸 𑀓𑀭𑀻𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺, 𑀅𑀳𑀁 𑀧𑀦𑀲𑁆𑀲 𑀯𑀘𑀦𑀁 𑀦 𑀓𑀭𑀺𑀦𑁆𑀢𑀺. 𑀅𑀬𑀫𑁂𑀯𑀸𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀮𑀧𑀢𑀺. 𑀯𑁂𑀦𑀲𑀸𑀔𑁄𑀢𑀺 𑀧𑀢𑁆𑀣𑀝𑀲𑀸𑀔𑁄. 𑀬𑀫𑁆𑀳𑀺 𑀖𑀸𑀢𑀬𑀺𑀦𑁆𑀢𑀺 𑀬𑀫𑁆𑀳𑀺 𑀭𑀼𑀓𑁆𑀔𑁂 𑀔𑀢𑁆𑀢𑀺𑀬𑀲𑀳𑀲𑁆𑀲𑀁 𑀫𑀸𑀭𑁂𑀲𑀺𑀁. 𑀅𑀮𑀗𑁆𑀓𑀢𑁂 𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑁂𑀢𑀺 𑀭𑀸𑀚𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑁂 𑀮𑁄𑀳𑀺𑀢𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑁂 𑀢𑁂 𑀔𑀢𑁆𑀢𑀺𑀬𑁂 𑀬𑀢𑁆𑀣𑀸𑀳𑀁 𑀖𑀸𑀢𑁂𑀲𑀺𑀁 ¶ , 𑀅𑀬𑀫𑁂𑀯 𑀲𑁄 𑀭𑀼𑀓𑁆𑀔𑁄 𑀇𑀤𑀸𑀦𑀺 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀧𑀭𑀺𑀢𑁆𑀢𑀸𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀫𑁂𑀯 𑀤𑀼𑀓𑁆𑀔𑀦𑁆𑀢𑀺 𑀬𑀁 𑀫𑀬𑀸 𑀧𑀭𑁂𑀲𑀁 𑀅𑀓𑁆𑀔𑀺𑀉𑀧𑁆𑀧𑀸𑀝𑀦𑀤𑀼𑀓𑁆𑀔𑀁 𑀓𑀢𑀁, 𑀇𑀤𑀁 𑀫𑁂 𑀢𑀣𑁂𑀯 𑀧𑀝𑀺𑀆𑀕𑀢𑀁, 𑀇𑀤𑀸𑀦𑀺 𑀦𑁄 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁 𑀫𑀢𑁆𑀣𑀓𑀁 𑀧𑀢𑁆𑀢𑀦𑁆𑀢𑀺 𑀧𑀭𑀺𑀤𑁂𑀯𑀢𑀺.

𑀲𑁄 ¶ 𑀏𑀯𑀁 𑀧𑀭𑀺𑀤𑁂𑀯𑀫𑀸𑀦𑁄 𑀅𑀕𑁆𑀕𑀫𑀳𑁂𑀲𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑁋

𑁧𑁮.

‘‘𑀲𑀸𑀫𑀸 𑀘 𑀔𑁄 𑀘𑀦𑁆𑀤𑀦𑀮𑀺𑀢𑁆𑀢𑀕𑀢𑁆𑀢𑀸, 𑀮𑀝𑁆𑀞𑀻𑀯 𑀲𑁄𑀪𑀜𑁆𑀚𑀦𑀓𑀲𑁆𑀲 𑀉𑀕𑁆𑀕𑀢𑀸;

𑀅𑀤𑀺𑀲𑁆𑀯𑀸 𑀓𑀸𑀮𑀁 𑀓𑀭𑀺𑀲𑁆𑀲𑀸𑀫𑀺 𑀉𑀩𑁆𑀩𑀭𑀺𑀁, 𑀢𑀁 𑀫𑁂 𑀇𑀢𑁄 𑀤𑀼𑀓𑁆𑀔𑀢𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑁋

𑀕𑀸𑀣𑀫𑀸𑀳 𑁋

𑀢𑀲𑁆𑀲𑀢𑁆𑀣𑁄 𑁋 𑀫𑀫 𑀪𑀭𑀺𑀬𑀸 𑀲𑀼𑀯𑀡𑁆𑀡𑀲𑀸𑀫𑀸 𑀉𑀩𑁆𑀩𑀭𑀻 𑀬𑀣𑀸 𑀦𑀸𑀫 𑀲𑀺𑀕𑁆𑀕𑀼𑀭𑀼𑀓𑁆𑀔𑀲𑁆𑀲 𑀉𑀚𑀼 𑀉𑀕𑁆𑀕𑀢𑀸 𑀲𑀸𑀔𑀸 𑀫𑀦𑁆𑀤𑀫𑀸𑀮𑀼𑀢𑁂𑀭𑀺𑀢𑀸 𑀓𑀫𑁆𑀧𑀫𑀸𑀦𑀸 𑀲𑁄𑀪𑀢𑀺, 𑀏𑀯𑀁 𑀇𑀢𑁆𑀣𑀺𑀯𑀺𑀮𑀸𑀲𑀁 𑀓𑀼𑀭𑀼𑀫𑀸𑀦𑀸 𑀲𑁄𑀪𑀢𑀺, 𑀢𑀫𑀳𑀁 𑀇𑀤𑀸𑀦𑀺 𑀅𑀓𑁆𑀔𑀻𑀦𑀁 𑀪𑀺𑀦𑁆𑀦𑀢𑁆𑀢𑀸 𑀉𑀩𑁆𑀩𑀭𑀺𑀁 𑀅𑀤𑀺𑀲𑁆𑀯𑀸𑀯 𑀓𑀸𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀫𑁂 𑀢𑀲𑁆𑀲𑀸 𑀅𑀤𑀲𑁆𑀲𑀦𑀁 𑀇𑀢𑁄 𑀫𑀭𑀡𑀤𑀼𑀓𑁆𑀔𑀢𑁄𑀧𑀺 𑀤𑀼𑀓𑁆𑀔𑀢𑀭𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀲𑁄 𑀏𑀯𑀁 𑀯𑀺𑀮𑀧𑀦𑁆𑀢𑁄𑀯 𑀫𑀭𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀦 𑀦𑀁 𑀇𑀲𑁆𑀲𑀭𑀺𑀬𑀮𑀼𑀤𑁆𑀥𑁄 𑀧𑀼𑀭𑁄𑀳𑀺𑀢𑁄 𑀧𑀭𑀺𑀢𑁆𑀢𑀸𑀡𑀁 𑀓𑀸𑀢𑀼𑀁 𑀲𑀓𑁆𑀔𑀺, 𑀦 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀁. 𑀢𑀲𑁆𑀫𑀺𑀁 𑀫𑀢𑀫𑀢𑁆𑀢𑁂𑀬𑁂𑀯 𑀩𑀮𑀓𑀸𑀬𑁄 𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀧𑀺𑀗𑁆𑀕𑀺𑀬𑁄 𑀤𑁂𑀯𑀤𑀢𑁆𑀢𑁄, 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑁂𑀦𑀲𑀸𑀔𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁫𑁪] 𑁪. 𑀉𑀭𑀕𑀚𑀸𑀢𑀓𑀯𑀡𑁆𑀡𑀦𑀸

𑀉𑀭𑀕𑁄𑀯 ¶ 𑀢𑀘𑀁 𑀚𑀺𑀡𑁆𑀡𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀢𑀧𑀼𑀢𑁆𑀢𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀫𑀢𑀪𑀭𑀺𑀬𑀫𑀢𑀧𑀺𑀢𑀺𑀓𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀢𑀣𑁂𑀯 𑀲𑀢𑁆𑀣𑀸 𑀢𑀲𑁆𑀲 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 ‘‘𑀓𑀺𑀁, 𑀆𑀯𑀼𑀲𑁄, 𑀲𑁄𑀘𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂 ¶ , 𑀧𑀼𑀢𑁆𑀢𑀲𑁆𑀲 𑀫𑁂 𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄𑀘𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀯𑀼𑀲𑁄, 𑀪𑀺𑀚𑁆𑀚𑀦𑀥𑀫𑁆𑀫𑀁 𑀦𑀸𑀫 𑀪𑀺𑀚𑁆𑀚𑀢𑀺, 𑀦𑀲𑁆𑀲𑀦𑀥𑀫𑁆𑀫𑀁 𑀦𑀸𑀫 𑀦𑀲𑁆𑀲𑀢𑀺, 𑀢𑀜𑁆𑀘 𑀔𑁄 𑀦 𑀏𑀓𑀲𑁆𑀫𑀺𑀁𑀬𑁂𑀯 𑀓𑀼𑀮𑁂, 𑀦𑀸𑀧𑀺 𑀏𑀓𑀲𑁆𑀫𑀺𑀜𑁆𑀜𑁂𑀯 𑀕𑀸𑀫𑁂, 𑀅𑀣 𑀔𑁄 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀢𑀻𑀲𑀼 𑀪𑀯𑁂𑀲𑀼 𑀅𑀫𑀭𑀡𑀥𑀫𑁆𑀫𑁄 ¶ 𑀦𑀸𑀫 𑀦𑀢𑁆𑀣𑀺, 𑀢𑀩𑁆𑀪𑀸𑀯𑁂𑀦𑁂𑀯 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀏𑀓𑀲𑀗𑁆𑀔𑀸𑀭𑁄𑀧𑀺 𑀲𑀲𑁆𑀲𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑀥𑀫𑁆𑀫𑀸, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀧𑀼𑀢𑁆𑀢𑁂 𑀫𑀢𑁂 ‘𑀫𑀭𑀡𑀥𑀫𑁆𑀫𑀁 𑀫𑀢𑀁, 𑀦𑀲𑁆𑀲𑀦𑀥𑀫𑁆𑀫𑀁 𑀦𑀝𑁆𑀞’𑀦𑁆𑀢𑀺 𑀦 𑀲𑁄𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀤𑁆𑀯𑀸𑀭𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀓𑀲𑀺𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘𑀸𑀢𑀺 𑀤𑁆𑀯𑁂 𑀤𑀸𑀭𑀓𑀸 𑀅𑀳𑁂𑀲𑀼𑀁. 𑀲𑁄 𑀧𑀼𑀢𑁆𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀲𑀫𑀸𑀦𑀓𑀼𑀮𑀢𑁄 𑀓𑀼𑀫𑀸𑀭𑀺𑀓𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀇𑀢𑀺 𑀢𑁂 𑀤𑀸𑀲𑀺𑀬𑀸 𑀲𑀤𑁆𑀥𑀺𑀁 𑀙 𑀚𑀦𑀸 𑀅𑀳𑁂𑀲𑀼𑀁 𑁋 𑀩𑁄𑀥𑀺𑀲𑀢𑁆𑀢𑁄, 𑀪𑀭𑀺𑀬𑀸, 𑀧𑀼𑀢𑁆𑀢𑁄, 𑀥𑀻𑀢𑀸, 𑀲𑀼𑀡𑀺𑀲𑀸, 𑀤𑀸𑀲𑀻𑀢𑀺. 𑀢𑁂 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀺𑀬𑀲𑀁𑀯𑀸𑀲𑀸 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀲𑁂𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀏𑀯𑀁 𑀑𑀯𑀸𑀤𑀁 𑀤𑁂𑀢𑀺 ‘‘𑀢𑀼𑀫𑁆𑀳𑁂 𑀬𑀣𑀸𑀮𑀤𑁆𑀥𑀦𑀺𑀬𑀸𑀫𑁂𑀦𑁂𑀯 𑀤𑀸𑀦𑀁 𑀤𑁂𑀣, 𑀲𑀻𑀮𑀁 𑀭𑀓𑁆𑀔𑀣, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀣, 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀣, 𑀢𑀼𑀫𑁆𑀳𑀸𑀓𑀁 𑀫𑀭𑀡𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀣, 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀫𑀭𑀡𑀁 𑀥𑀼𑀯𑀁, 𑀚𑀻𑀯𑀺𑀢𑀁 𑀅𑀤𑁆𑀥𑀼𑀯𑀁, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀔𑀬𑀯𑀬𑀥𑀫𑁆𑀫𑀺𑀦𑁄𑀯, 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀑𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀔𑁂𑀢𑁆𑀢𑀁 ¶ 𑀕𑀦𑁆𑀢𑁆𑀯𑀸 𑀓𑀲𑀢𑀺. 𑀧𑀼𑀢𑁆𑀢𑁄 𑀓𑀘𑀯𑀭𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀛𑀸𑀧𑁂𑀢𑀺. 𑀢𑀲𑁆𑀲𑀸𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀆𑀲𑀻𑀯𑀺𑀲𑁄 𑀅𑀢𑁆𑀣𑀺. 𑀥𑀽𑀫𑁄 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀧𑀳𑀭𑀺. 𑀲𑁄 𑀓𑀼𑀤𑁆𑀥𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀇𑀫𑀁 𑀦𑀺𑀲𑁆𑀲𑀸𑀬 𑀫𑀬𑁆𑀳𑀁 𑀪𑀬’’𑀦𑁆𑀢𑀺 𑀘𑀢𑀲𑁆𑀲𑁄 𑀤𑀸𑀞𑀸 𑀦𑀺𑀫𑀼𑀚𑁆𑀚𑀸𑀧𑁂𑀦𑁆𑀢𑁄 𑀢𑀁 𑀟𑀁𑀲𑀺, 𑀲𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀧𑀢𑀺𑀢𑀁 𑀤𑀺𑀲𑁆𑀯𑀸 𑀕𑁄𑀡𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀢𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀦𑁂𑀯 𑀭𑁄𑀤𑀺 𑀦 𑀧𑀭𑀺𑀤𑁂𑀯𑀺 𑁋 ‘‘𑀪𑀺𑀚𑁆𑀚𑀦𑀥𑀫𑁆𑀫𑀁 𑀧𑀦 𑀪𑀺𑀦𑁆𑀦𑀁, 𑀫𑀭𑀡𑀥𑀫𑁆𑀫𑀁 𑀫𑀢𑀁, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀫𑀭𑀡𑀦𑀺𑀧𑁆𑀨𑀢𑁆𑀢𑀺𑀓𑀸’’𑀢𑀺 𑀅𑀦𑀺𑀘𑁆𑀘𑀪𑀸𑀯𑀫𑁂𑀯 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀲𑀺. 𑀲𑁄 𑀔𑁂𑀢𑁆𑀢𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑀁 𑀏𑀓𑀁 𑀧𑀝𑀺𑀯𑀺𑀲𑁆𑀲𑀓𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀕𑁂𑀳𑀁 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀳𑀺 𑀅𑀫𑁆𑀳𑀸𑀓𑀫𑁆𑀧𑀺 𑀖𑀭𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀯𑀤𑁂𑀬𑁆𑀬𑀸𑀲𑀺 ‘‘𑀅𑀚𑁆𑀚 𑀓𑀺𑀭 𑀧𑀼𑀩𑁆𑀩𑁂 𑀯𑀺𑀬 𑀤𑁆𑀯𑀺𑀦𑁆𑀦𑀁 𑀪𑀢𑁆𑀢𑀁 𑀅𑀦𑀸𑀳𑀭𑀺𑀢𑁆𑀯𑀸 𑀏𑀓𑀲𑁆𑀲𑁂𑀯𑀸𑀳𑀸𑀭𑀁 𑀆𑀳𑀭𑁂𑀬𑁆𑀬𑀸𑀣, 𑀧𑀼𑀩𑁆𑀩𑁂 𑀘 𑀏𑀓𑀺𑀓𑀸𑀯 𑀤𑀸𑀲𑀻 𑀆𑀳𑀸𑀭𑀁 𑀆𑀳𑀭𑀢𑀺, 𑀅𑀚𑁆𑀚 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 𑀕𑀦𑁆𑀥𑀧𑀼𑀧𑁆𑀨𑀳𑀢𑁆𑀣𑀸 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀣𑁂𑀯 𑀓𑀣𑁂𑀲𑀺. 𑀓𑁂𑀦 𑀢𑁂, 𑀢𑀸𑀢, 𑀇𑀫𑀁 𑀲𑀸𑀲𑀦𑀁 𑀤𑀺𑀦𑁆𑀦𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁂𑀦 ¶ , 𑀅𑀬𑁆𑀬𑁂𑀢𑀺. 𑀲𑀸 ‘‘𑀧𑀼𑀢𑁆𑀢𑁄 𑀫𑁂 𑀫𑀢𑁄’’𑀢𑀺 𑀅𑀜𑁆𑀜𑀸𑀲𑀺, 𑀓𑀫𑁆𑀧𑀦𑀫𑀢𑁆𑀢𑀫𑁆𑀧𑀺𑀲𑁆𑀲𑀸 𑀦𑀸𑀳𑁄𑀲𑀺. 𑀏𑀯𑀁 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 ¶ 𑀕𑀦𑁆𑀥𑀧𑀼𑀧𑁆𑀨𑀳𑀢𑁆𑀣𑀸 𑀤𑀸𑀲𑀺𑀁 𑀧𑀦 𑀆𑀳𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀔𑁂𑀢𑁆𑀢𑀁 𑀅𑀕𑀫𑀸𑀲𑀺. 𑀏𑀓𑀲𑁆𑀲𑀧𑀺 𑀭𑁄𑀤𑀺𑀢𑀁 𑀯𑀸 𑀧𑀭𑀺𑀤𑁂𑀯𑀺𑀢𑀁 𑀯𑀸 𑀦𑀸𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀦𑀺𑀧𑀦𑁆𑀦𑀙𑀸𑀬𑀸𑀬𑀫𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀺. 𑀪𑀼𑀢𑁆𑀢𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀤𑀸𑀭𑀽𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀢𑀁 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀛𑀸𑀧𑁂𑀲𑀼𑀁. 𑀏𑀓𑀲𑁆𑀲 𑀘 𑀏𑀓𑀩𑀺𑀦𑁆𑀤𑀼𑀧𑀺 𑀅𑀲𑁆𑀲𑀼 𑀦𑀸𑀳𑁄𑀲𑀺, 𑀲𑀩𑁆𑀩𑁂𑀧𑀺 𑀲𑀼𑀪𑀸𑀯𑀺𑀢𑀫𑀭𑀡𑀲𑁆𑀲𑀢𑀺𑀦𑁄 𑀳𑁄𑀦𑁆𑀢𑀺. 𑀢𑁂𑀲𑀁 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑁄 𑀦𑀼 𑀔𑁄 𑀫𑀁 𑀞𑀸𑀦𑀸 ¶ 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑁂𑀲𑀁 𑀕𑀼𑀡𑀢𑁂𑀚𑁂𑀦 𑀉𑀡𑁆𑀳𑀪𑀸𑀯𑀁 𑀜𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀫𑀬𑀸 𑀏𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀲𑀻𑀳𑀦𑀸𑀤𑀧𑀭𑀺𑀬𑁄𑀲𑀸𑀦𑁂 𑀏𑀢𑁂𑀲𑀁 𑀦𑀺𑀯𑁂𑀲𑀦𑀁 𑀲𑀢𑁆𑀢𑀭𑀢𑀦𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑁂𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀴𑀸𑀳𑀦𑀧𑀲𑁆𑀲𑁂 𑀞𑀺𑀢𑁄 ‘‘𑀢𑀸𑀢, 𑀓𑀺𑀁 𑀓𑀭𑁄𑀣𑀸’’𑀢𑀺 𑀆𑀳. ‘‘𑀏𑀓𑀁 𑀫𑀦𑀼𑀲𑁆𑀲𑀁 𑀛𑀸𑀧𑁂𑀫, 𑀲𑀸𑀫𑀻’’𑀢𑀺. ‘‘𑀦 𑀢𑀼𑀫𑁆𑀳𑁂 𑀫𑀦𑀼𑀲𑁆𑀲𑀁 𑀛𑀸𑀧𑁂𑀲𑁆𑀲𑀣, 𑀏𑀓𑀁 𑀧𑀦 𑀫𑀺𑀕𑀁 𑀫𑀸𑀭𑁂𑀢𑁆𑀯𑀸 𑀧𑀘𑀣 𑀫𑀜𑁆𑀜𑁂’’𑀢𑀺. ‘‘𑀦𑀢𑁆𑀣𑁂𑀢𑀁 𑀲𑀸𑀫𑀺, 𑀫𑀦𑀼𑀲𑁆𑀲𑀫𑁂𑀯 𑀛𑀸𑀧𑁂𑀫𑀸’’𑀢𑀺. ‘‘𑀢𑁂𑀦 𑀳𑀺 𑀯𑁂𑀭𑀺𑀫𑀦𑀼𑀲𑁆𑀲𑁄 𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀑𑀭𑀲𑀧𑀼𑀢𑁆𑀢𑁄 𑀦𑁄 𑀲𑀸𑀫𑀺, 𑀦 𑀯𑁂𑀭𑀺𑀓𑁄’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀯𑁄 𑀅𑀧𑁆𑀧𑀺𑀬𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀅𑀢𑀺𑀯𑀺𑀬 𑀧𑀺𑀬𑀧𑀼𑀢𑁆𑀢𑁄, 𑀲𑀸𑀫𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀲𑁄 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁯.

‘‘𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀁 𑀢𑀦𑀼𑀁;

𑀏𑀯𑀁 𑀲𑀭𑀻𑀭𑁂 𑀦𑀺𑀩𑁆𑀪𑁄𑀕𑁂, 𑀧𑁂𑀢𑁂 𑀓𑀸𑀮𑀓𑀢𑁂 𑀲𑀢𑀺.

𑁨𑁦.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺.

𑀢𑀢𑁆𑀣 𑀲𑀁 𑀢𑀦𑀼𑀦𑁆𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀁. 𑀦𑀺𑀩𑁆𑀪𑁄𑀕𑁂𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀪𑀸𑀯𑁂𑀦 𑀪𑁄𑀕𑀭𑀳𑀺𑀢𑁂. 𑀧𑁂𑀢𑁂𑀢𑀺 𑀧𑀭𑀮𑁄𑀓𑀁 𑀧𑀝𑀺𑀕𑀢𑁂. 𑀓𑀸𑀮𑀓𑀢𑁂𑀢𑀺 𑀓𑀢𑀓𑀸𑀮𑁂, 𑀫𑀢𑁂𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀸𑀫𑀺, 𑀫𑀫 𑀧𑀼𑀢𑁆𑀢𑁄 𑀬𑀣𑀸 𑀦𑀸𑀫 𑀉𑀭𑀕𑁄 𑀚𑀺𑀡𑁆𑀡𑀢𑀘𑀁 𑀦𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑁂𑀢𑁆𑀯𑀸 ¶ 𑀕𑀘𑁆𑀙𑁂𑀬𑁆𑀬, 𑀏𑀯𑀁 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀭𑀳𑀺𑀢𑁂 𑀲𑀭𑀻𑀭𑁂 𑀏𑀯𑀁 𑀦𑀺𑀩𑁆𑀪𑁄𑀕𑁂 𑀢𑀲𑁆𑀫𑀺𑀜𑁆𑀘 𑀫𑁂 𑀧𑀼𑀢𑁆𑀢𑁂 𑀧𑁂𑀢𑁂 𑀧𑀼𑀦 𑀧𑀝𑀺𑀕𑀢𑁂 𑀫𑀭𑀡𑀓𑀸𑀮𑀁 𑀓𑀢𑁆𑀯𑀸 𑀞𑀺𑀢𑁂 𑀲𑀢𑀺 𑀓𑁄 𑀓𑀸𑀭𑀼𑀜𑁆𑀜𑁂𑀦 𑀯𑀸 𑀧𑀭𑀺𑀤𑁂𑀯𑁂𑀦 𑀯𑀸 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀬𑀣𑀸 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀟𑀬𑁆𑀳𑀫𑀸𑀦𑁄 𑀲𑀼𑀔𑀤𑀼𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀢𑁂𑀦 𑀓𑀸𑀭𑀡𑁂𑀦𑀸𑀳𑀁 𑀏𑀢𑀁 𑀦 𑀲𑁄𑀘𑀸𑀫𑀺. 𑀬𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀕𑀢𑀺, 𑀢𑀁 𑀲𑁄 𑀕𑀢𑁄𑀢𑀺.

𑀲𑀓𑁆𑀓𑁄 ¶ ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀣𑀜𑁆𑀜𑀁 𑀧𑀸𑀬𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀲𑀡𑁆𑀞𑀧𑁂𑀢𑁆𑀯𑀸 𑀯𑀟𑁆𑀠𑀺𑀢𑀧𑀼𑀢𑁆𑀢𑁄 𑀫𑁂, 𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀧𑀺𑀢𑀸 𑀢𑀸𑀯 𑀧𑀼𑀭𑀺𑀲𑀪𑀸𑀯𑁂𑀦 𑀫𑀸 𑀭𑁄𑀤𑀢𑀼, 𑀫𑀸𑀢𑀼 𑀳𑀤𑀬𑀁 𑀧𑀦 𑀫𑀼𑀤𑀼𑀓𑀁 𑀳𑁄𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀲𑀸 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

𑁨𑁧.

‘‘𑀅𑀦𑀯𑁆𑀳𑀺𑀢𑁄 𑀢𑀢𑁄 𑀆𑀕𑀸, 𑀅𑀦𑀦𑀼𑀜𑁆𑀜𑀸𑀢𑁄 𑀇𑀢𑁄 𑀕𑀢𑁄;

𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

𑁨𑁨.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑀢𑀢𑁆𑀣 𑀅𑀦𑀯𑁆𑀳𑀺𑀢𑁄𑀢𑀺 𑀅𑀬𑀁 𑀢𑀸𑀢 𑀫𑀬𑀸 𑀧𑀭𑀮𑁄𑀓𑀢𑁄 𑀅𑀦𑀯𑁆𑀳𑀺𑀢𑁄 𑀅𑀬𑀸𑀘𑀺𑀢𑁄. 𑀆𑀕𑀸𑀢𑀺 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀆𑀕𑀢𑁄. 𑀇𑀢𑁄𑀢𑀺 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀕𑀘𑁆𑀙𑀦𑁆𑀢𑁄𑀧𑀺 𑀫𑀬𑀸 𑀅𑀦𑀦𑀼𑀜𑁆𑀜𑀸𑀢𑁄𑀯 𑀕𑀢𑁄. 𑀬𑀣𑀸𑀕𑀢𑁄𑀢𑀺 𑀆𑀕𑀘𑁆𑀙𑀦𑁆𑀢𑁄𑀧𑀺 𑀬𑀣𑀸 𑀅𑀢𑁆𑀢𑀦𑁄𑀯 𑀭𑀼𑀘𑀺𑀬𑀸 𑀆𑀕𑀢𑁄, 𑀕𑀘𑁆𑀙𑀦𑁆𑀢𑁄𑀧𑀺 𑀢𑀣𑁂𑀯 𑀕𑀢𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀲 𑀇𑀢𑁄 𑀕𑀫𑀦𑁂 𑀓𑀸 𑀧𑀭𑀺𑀤𑁂𑀯𑀦𑀸. 𑀟𑀬𑁆𑀳𑀫𑀸𑀦𑁄𑀢𑀺 𑀕𑀸𑀣𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑀓𑁆𑀓𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀪𑀕𑀺𑀦𑀺𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀪𑀸𑀢𑀸 𑀫𑁂, 𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀪𑀕𑀺𑀦𑀺𑀬𑁄 𑀦𑀸𑀫 𑀪𑀸𑀢𑀽𑀲𑀼 𑀲𑀺𑀦𑁂𑀳𑀸 𑀳𑁄𑀦𑁆𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀲𑀸 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

𑁨𑁩.

‘‘𑀲𑀘𑁂 𑀭𑁄𑀤𑁂 𑀓𑀺𑀲𑀸 𑀅𑀲𑁆𑀲𑀁, 𑀢𑀲𑁆𑀲𑀸 𑀫𑁂 𑀓𑀺𑀁 𑀨𑀮𑀁 𑀲𑀺𑀬𑀸;

𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁, 𑀪𑀺𑀬𑁆𑀬𑁄 𑀦𑁄 𑀅𑀭𑀢𑀻 𑀲𑀺𑀬𑀸.

𑁨𑁪.

𑀟𑀬𑁆𑀳𑀫𑀸𑀦𑁄 ¶ ¶ 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑀢𑀢𑁆𑀣 𑀲𑀘𑁂𑀢𑀺 𑀬𑀤𑀺 𑀅𑀳𑀁 𑀪𑀸𑀢𑀭𑀺 𑀫𑀢𑁂 𑀭𑁄𑀤𑁂𑀬𑁆𑀬𑀁, 𑀓𑀺𑀲𑀲𑀭𑀻𑀭𑀸 𑀅𑀲𑁆𑀲𑀁. 𑀪𑀸𑀢𑀼 𑀧𑀦 𑀫𑁂 𑀢𑀧𑁆𑀧𑀘𑁆𑀘𑀬𑀸 𑀯𑀼𑀟𑁆𑀠𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀫𑁂𑀢𑀺 𑀢𑀲𑁆𑀲𑀸 𑀫𑀬𑁆𑀳𑀁 𑀭𑁄𑀤𑀦𑁆𑀢𑀺𑀬𑀸 𑀓𑀺𑀁 𑀨𑀮𑀁 𑀓𑁄 𑀆𑀦𑀺𑀲𑀁𑀲𑁄 𑀪𑀯𑁂𑀬𑁆𑀬. 𑀫𑀬𑁆𑀳𑀁 𑀅𑀯𑀼𑀤𑁆𑀥𑀺 𑀧𑀦 𑀧𑀜𑁆𑀜𑀸𑀬𑀢𑀻𑀢𑀺 𑀤𑀻𑀧𑁂𑀢𑀺. 𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀦𑁆𑀢𑀺 𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀤𑀸𑀦𑀁 ¶ . 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀪𑀺𑀬𑁆𑀬𑁄 𑀦𑁄𑀢𑀺 𑀬𑁂 𑀅𑀫𑁆𑀳𑀸𑀓𑀁 𑀜𑀸𑀢𑀻 𑀘 𑀫𑀺𑀢𑁆𑀢𑀸 𑀘 𑀲𑀼𑀳𑀤𑀬𑀸 𑀘, 𑀢𑁂𑀲𑀁 𑀅𑀥𑀺𑀓𑀢𑀭𑀸 𑀅𑀭𑀢𑀺 𑀲𑀺𑀬𑀸.

𑀲𑀓𑁆𑀓𑁄 𑀪𑀕𑀺𑀦𑀺𑀬𑀸 𑀓𑀣𑀁 𑀲𑀼𑀢𑁆𑀯𑀸 𑀪𑀭𑀺𑀬𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀧𑀢𑀺 𑀫𑁂, 𑀲𑀸𑀫𑀻’’𑀢𑀺. ‘‘𑀇𑀢𑁆𑀣𑀺𑀬𑁄 𑀦𑀸𑀫 𑀧𑀢𑀺𑀫𑁆𑀳𑀺 𑀫𑀢𑁂 𑀯𑀺𑀥𑀯𑀸 𑀳𑁄𑀦𑁆𑀢𑀺 𑀅𑀦𑀸𑀣𑀸, 𑀢𑁆𑀯𑀁 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺. 𑀲𑀸𑀧𑀺𑀲𑁆𑀲 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

𑁨𑁫.

‘‘𑀬𑀣𑀸𑀧𑀺 𑀤𑀸𑀭𑀓𑁄 𑀘𑀦𑁆𑀤𑀁, 𑀕𑀘𑁆𑀙𑀦𑁆𑀢𑀫𑀦𑀼𑀭𑁄𑀤𑀢𑀺;

𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

𑁨𑁬.

‘‘𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀬𑀢𑁆𑀣 𑀓𑀢𑁆𑀣𑀘𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀮𑀩𑁆𑀪𑀦𑀻𑀬𑀸𑀮𑀩𑁆𑀪𑀦𑀻𑀬𑀁 𑀅𑀚𑀸𑀦𑀦𑁆𑀢𑁄 𑀩𑀸𑀮𑀤𑀸𑀭𑀓𑁄 𑀫𑀸𑀢𑀼 𑀉𑀘𑁆𑀙𑀗𑁆𑀕𑁂 𑀦𑀺𑀲𑀺𑀦𑁆𑀦𑁄 𑀧𑀼𑀡𑁆𑀡𑀫𑀸𑀲𑀺𑀬𑀁 𑀧𑀼𑀡𑁆𑀡𑀁 𑀘𑀦𑁆𑀤𑀁 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀫, 𑀘𑀦𑁆𑀤𑀁 𑀫𑁂 𑀤𑁂𑀳𑀺, 𑀅𑀫𑁆𑀫, 𑀘𑀦𑁆𑀤𑀁 𑀫𑁂 𑀤𑁂𑀳𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀭𑁄𑀤𑀢𑀺, 𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀁, 𑀏𑀯𑀁𑀦𑀺𑀧𑁆𑀨𑀢𑁆𑀢𑀺𑀓𑀫𑁂𑀯 𑀏𑀢𑀁 𑀢𑀲𑁆𑀲 𑀭𑀼𑀡𑁆𑀡𑀁 𑀳𑁄𑀢𑀺, 𑀬𑁄 𑀧𑁂𑀢𑀁 𑀓𑀸𑀮𑀓𑀢𑀁 𑀅𑀦𑀼𑀲𑁄𑀘𑀢𑀺. 𑀇𑀢𑁄𑀧𑀺 𑀘 𑀩𑀸𑀮𑀢𑀭𑀁. 𑀓𑀺𑀁𑀓𑀸𑀭𑀡𑀸? 𑀲𑁄 𑀳𑀺 𑀯𑀺𑀚𑁆𑀚𑀫𑀸𑀦𑀘𑀦𑁆𑀤𑀁 𑀅𑀦𑀼𑀭𑁄𑀤𑀢𑀺, 𑀫𑀬𑁆𑀳𑀁 𑀧𑀦 𑀧𑀢𑀺 𑀫𑀢𑁄 𑀏𑀢𑀭𑀳𑀺 𑀅𑀯𑀺𑀚𑁆𑀚𑀫𑀸𑀦𑁄 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀟𑀬𑁆𑀳𑀫𑀸𑀦𑁄𑀧𑀺 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻𑀢𑀺.

𑀲𑀓𑁆𑀓𑁄 ¶ 𑀪𑀭𑀺𑀬𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀸𑀲𑀺𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀢𑀼𑀬𑁆𑀳𑀁 𑀲𑁄 𑀓𑀺𑀁 𑀳𑁄𑀢𑀻’’𑀢𑀺? ‘‘𑀅𑀬𑁆𑀬𑁄 𑀫𑁂, 𑀲𑀸𑀫𑀻’’𑀢𑀺. ‘‘𑀦𑀦𑀼 𑀢𑁆𑀯𑀁 𑀇𑀫𑀺𑀦𑀸 𑀧𑀻𑀴𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀸 ¶ 𑀪𑀯𑀺𑀲𑁆𑀲𑀲𑀺, 𑀢𑀲𑁆𑀫𑀸 ‘‘𑀲𑀼𑀫𑀼𑀢𑁆𑀢𑀸 𑀅𑀳’’𑀦𑁆𑀢𑀺 𑀦 𑀭𑁄𑀤𑀲𑀻’’𑀢𑀺. ‘𑀲𑀸𑀫𑀺, 𑀫𑀸 𑀏𑀯𑀁 𑀅𑀯𑀘, 𑀦 𑀏𑀢𑀁 𑀏𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁, 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁄 𑀫𑁂 𑀅𑀬𑁆𑀬𑀧𑀼𑀢𑁆𑀢𑁄, 𑀉𑀭𑁂 𑀲𑀁𑀯𑀟𑁆𑀠𑀺𑀢𑀧𑀼𑀢𑁆𑀢𑁄 𑀯𑀺𑀬 𑀅𑀳𑁄𑀲𑀻’𑀢𑀺. ‘‘𑀅𑀣 𑀓𑀲𑁆𑀫𑀸 𑀦 𑀭𑁄𑀤𑀲𑀻’’𑀢𑀺? 𑀲𑀸𑀧𑀺𑀲𑁆𑀲 𑀅𑀭𑁄𑀤𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑁋

𑁨𑁭.

‘‘𑀬𑀣𑀸𑀧𑀺 𑀉𑀤𑀓𑀓𑀼𑀫𑁆𑀪𑁄, 𑀪𑀺𑀦𑁆𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑁄;

𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

𑁨𑁮.

‘‘𑀟𑀬𑁆𑀳𑀫𑀸𑀦𑁄 ¶ 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻’’𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀉𑀤𑀓𑀓𑀼𑀫𑁆𑀪𑁄 𑀉𑀓𑁆𑀔𑀺𑀧𑀺𑀬𑀫𑀸𑀦𑁄 𑀧𑀢𑀺𑀢𑁆𑀯𑀸 𑀲𑀢𑁆𑀢𑀥𑀸 𑀪𑀺𑀦𑁆𑀦𑁄 𑀧𑀼𑀦 𑀢𑀸𑀦𑀺 𑀓𑀧𑀸𑀮𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺, 𑀢𑀲𑁆𑀲𑀧𑀺 𑀏𑀢𑀫𑀦𑀼𑀲𑁄𑀘𑀦𑀁 𑀏𑀯𑀁𑀦𑀺𑀧𑁆𑀨𑀢𑁆𑀢𑀺𑀓𑀫𑁂𑀯 𑀳𑁄𑀢𑀺, 𑀫𑀢𑀲𑁆𑀲 𑀧𑀼𑀦 𑀚𑀻𑀯𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀇𑀤𑁆𑀥𑀺𑀫𑀢𑁄 𑀯𑀸 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀪𑀺𑀦𑁆𑀦𑀁 𑀓𑀼𑀫𑁆𑀪𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀓𑀸𑀮𑀓𑀢𑁄 𑀧𑀦 𑀇𑀤𑁆𑀥𑀺𑀩𑀮𑁂𑀦𑀸𑀧𑀺 𑀦 𑀲𑀓𑁆𑀓𑀸 𑀧𑀝𑀺𑀧𑀸𑀓𑀢𑀺𑀢𑀁 𑀓𑀸𑀢𑀼𑀦𑁆𑀢𑀺. 𑀇𑀢𑀭𑀸 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯.

𑀲𑀓𑁆𑀓𑁄 𑀲𑀩𑁆𑀩𑁂𑀲𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀅𑀧𑁆𑀧𑀫𑀢𑁆𑀢𑁂𑀳𑀺 𑀫𑀭𑀡𑀲𑁆𑀲𑀢𑀺 𑀪𑀸𑀯𑀺𑀢𑀸, 𑀢𑀼𑀫𑁆𑀳𑁂 𑀇𑀢𑁄 𑀧𑀝𑁆𑀞𑀸𑀬 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀫𑀸 𑀓𑀭𑀺𑀢𑁆𑀣, 𑀅𑀳𑀁, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀅𑀳𑀁 𑀯𑁄 𑀕𑁂𑀳𑁂 𑀲𑀢𑁆𑀢 𑀭𑀢𑀦𑀸𑀦𑀺 𑀅𑀧𑀭𑀺𑀫𑀸𑀡𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀤𑀸𑀦𑀁 𑀤𑁂𑀣 ¶ , 𑀲𑀻𑀮𑀁 𑀭𑀓𑁆𑀔𑀣, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀣, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀢𑁂𑀲𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀕𑁂𑀳𑀁 𑀅𑀧𑀭𑀺𑀫𑀺𑀢𑀥𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀤𑀸𑀲𑀻 𑀔𑀼𑀚𑁆𑀚𑀼𑀢𑁆𑀢𑀭𑀸 𑀅𑀳𑁄𑀲𑀺, 𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀫𑀸𑀢𑀸 𑀔𑁂𑀫𑀸, 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀉𑀭𑀕𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁫𑁫] 𑁫. 𑀖𑀝𑀚𑀸𑀢𑀓𑀯𑀡𑁆𑀡𑀦𑀸

𑀅𑀜𑁆𑀜𑁂 ¶ 𑀲𑁄𑀘𑀦𑁆𑀢𑀺 𑀭𑁄𑀤𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀏𑀓𑀁 𑀅𑀫𑀘𑁆𑀘𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀭𑀸𑀚𑀸 𑀅𑀢𑁆𑀢𑀦𑁄 𑀉𑀧𑀓𑀸𑀭𑀲𑁆𑀲 𑀅𑀫𑀘𑁆𑀘𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀧𑀭𑀺𑀪𑁂𑀤𑀓𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀢𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀧𑀯𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀕𑀼𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑁄𑀘𑀸𑀧𑁂𑀲𑀺. 𑀲𑁄 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀦𑀢𑁆𑀣𑁄 𑀓𑀺𑀭 𑀢𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂, 𑀅𑀦𑀢𑁆𑀣𑁂𑀦 𑀧𑀦 𑀫𑁂 𑀅𑀢𑁆𑀣𑁄 𑀆𑀕𑀢𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄, 𑀉𑀧𑀸𑀲𑀓, 𑀢𑁆𑀯𑀜𑁆𑀜𑁂𑀯 𑀅𑀦𑀢𑁆𑀣𑁂𑀦 𑀅𑀢𑁆𑀣𑀁 𑀆𑀳𑀭𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀆𑀳𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, ‘‘𑀖𑀝𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀅𑀦𑁆𑀢𑁂𑀧𑀼𑀭𑁂 𑀏𑀓𑁄 𑀅𑀫𑀘𑁆𑀘𑁄 𑀤𑀼𑀩𑁆𑀪𑀺. 𑀲𑁄 𑀢𑀁 𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀤𑀸 𑀲𑀸𑀯𑀢𑁆𑀣𑀺𑀬𑀁 𑀥𑀗𑁆𑀓𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀡𑁆𑀳𑀸𑀧𑁂𑀲𑀺. 𑀲𑁄𑀧𑀺 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀲𑀗𑁆𑀔𑀮𑀺𑀓𑀸𑀳𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ¶ 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺, 𑀥𑀗𑁆𑀓𑀲𑁆𑀲 𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀼𑀯𑀡𑁆𑀡𑀸𑀤𑀸𑀲𑀨𑀼𑀮𑁆𑀮𑀧𑀤𑀼𑀫𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀅𑀜𑁆𑀜𑁂 𑀲𑁄𑀘𑀦𑁆𑀢𑀺 𑀭𑁄𑀤𑀦𑁆𑀢𑀺, 𑀅𑀜𑁆𑀜𑁂 𑀅𑀲𑁆𑀲𑀼𑀫𑀼𑀔𑀸 𑀚𑀦𑀸;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄𑀲𑀺, 𑀓𑀲𑁆𑀫𑀸 𑀖𑀝 𑀦 𑀲𑁄𑀘𑀲𑀻’’𑀢𑀺.

𑀢𑀢𑁆𑀣 𑀅𑀜𑁆𑀜𑁂𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀫𑀦𑀼𑀲𑁆𑀲𑀸.

𑀅𑀣𑀲𑁆𑀲 𑀩𑁄𑀥𑀺𑀲𑀢𑁆𑀢𑁄 𑀅𑀲𑁄𑀘𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁦.

‘‘𑀦𑀸𑀩𑁆𑀪𑀢𑀻𑀢𑀳𑀭𑁄 ¶ 𑀲𑁄𑀓𑁄, 𑀦𑀸𑀦𑀸𑀕𑀢𑀲𑀼𑀔𑀸𑀯𑀳𑁄;

𑀢𑀲𑁆𑀫𑀸 𑀥𑀗𑁆𑀓 𑀦 𑀲𑁄𑀘𑀸𑀫𑀺, 𑀦𑀢𑁆𑀣𑀺 𑀲𑁄𑀓𑁂 𑀤𑀼𑀢𑀻𑀬𑀢𑀸.

𑁩𑁧.

‘‘𑀲𑁄𑀘𑀁 𑀧𑀡𑁆𑀟𑀼 𑀓𑀺𑀲𑁄 𑀳𑁄𑀢𑀺, 𑀪𑀢𑁆𑀢𑀜𑁆𑀘𑀲𑁆𑀲 𑀦 𑀭𑀼𑀘𑁆𑀘𑀢𑀺;

𑀅𑀫𑀺𑀢𑁆𑀢𑀸 𑀲𑀼𑀫𑀦𑀸 𑀳𑁄𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑀲𑁆𑀲 𑀭𑀼𑀧𑁆𑀧𑀢𑁄.

𑁩𑁨.

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀞𑀺𑀢𑀁 𑀫𑀁 𑀦𑀸𑀕𑀫𑀺𑀲𑁆𑀲𑀢𑀺, 𑀏𑀯𑀁 𑀤𑀺𑀝𑁆𑀞𑀧𑀤𑁄 𑀅𑀳𑀁.

𑁩𑁩.

‘‘𑀬𑀲𑁆𑀲𑀢𑁆𑀢𑀸 𑀦𑀸𑀮𑀫𑁂𑀓𑁄𑀯, 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑁄;

𑀲𑀩𑁆𑀩𑀸𑀧𑀺 𑀧𑀣𑀯𑀻 𑀢𑀲𑁆𑀲, 𑀦 𑀲𑀼𑀔𑀁 𑀆𑀯𑀳𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀦𑀸𑀩𑁆𑀪𑀢𑀻𑀢𑀳𑀭𑁄𑀢𑀺 𑀦𑀸𑀩𑁆𑀪𑀢𑀻𑀢𑀸𑀳𑀸𑀭𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑁄𑀓𑁄 𑀦𑀸𑀫 𑀅𑀩𑁆𑀪𑀢𑀻𑀢𑀁 𑀅𑀢𑀺𑀓𑁆𑀓𑀦𑁆𑀢𑀁 𑀦𑀺𑀭𑀼𑀤𑁆𑀥𑀁 𑀅𑀢𑁆𑀣𑀗𑁆𑀕𑀢𑀁 𑀧𑀼𑀦 𑀦𑀸𑀳𑀭𑀢𑀺. 𑀤𑀼𑀢𑀻𑀬𑀢𑀸𑀢𑀺 𑀲𑀳𑀸𑀬𑀢𑀸. 𑀅𑀢𑀻𑀢𑀸𑀳𑀭𑀡𑁂𑀦 𑀯𑀸 𑀅𑀦𑀸𑀕𑀢𑀸𑀳𑀭𑀡𑁂𑀦 ¶ 𑀯𑀸 𑀲𑁄𑀓𑁄 𑀦𑀸𑀫 𑀓𑀲𑁆𑀲𑀘𑀺 𑀲𑀳𑀸𑀬𑁄 𑀦 𑀳𑁄𑀢𑀺, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦𑀸𑀳𑀁 𑀦 𑀲𑁄𑀘𑀸𑀫𑀻𑀢𑀺 𑀯𑀤𑀢𑀺. 𑀲𑁄𑀘𑀦𑁆𑀢𑀺 𑀲𑁄𑀘𑀦𑁆𑀢𑁄. 𑀲𑀮𑁆𑀮𑀯𑀺𑀤𑁆𑀥𑀲𑁆𑀲 𑀭𑀼𑀧𑁆𑀧𑀢𑁄𑀢𑀺 𑀲𑁄𑀓𑀲𑀮𑁆𑀮𑁂𑀦 𑀯𑀺𑀤𑁆𑀥𑀲𑁆𑀲 𑀢𑁂𑀦𑁂𑀯 𑀖𑀝𑁆𑀝𑀺𑀬𑀫𑀸𑀦𑀲𑁆𑀲 ‘‘𑀤𑀺𑀝𑁆𑀞𑀸 𑀯𑀢 𑀦𑁄 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀻’’𑀢𑀺 𑀅𑀫𑀺𑀢𑁆𑀢𑀸 𑀲𑀼𑀫𑀦𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀞𑀺𑀢𑀁 𑀫𑀁 𑀦𑀸𑀕𑀫𑀺𑀲𑁆𑀲𑀢𑀻𑀢𑀺 𑀲𑀫𑁆𑀫 𑀥𑀗𑁆𑀓𑀭𑀸𑀚, 𑀏𑀢𑁂𑀲𑀼 𑀕𑀸𑀫𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀫𑀁 𑀧𑀡𑁆𑀟𑀼𑀓𑀺𑀲𑀪𑀸𑀯𑀸𑀤𑀺𑀓𑀁 𑀲𑁄𑀓𑀫𑀽𑀮𑀓𑀁 𑀩𑁆𑀬𑀲𑀦𑀁 𑀦 𑀆𑀕𑀫𑀺𑀲𑁆𑀲𑀢𑀺. 𑀏𑀯𑀁 𑀤𑀺𑀝𑁆𑀞𑀧𑀤𑁄𑀢𑀺 𑀬𑀣𑀸 𑀢𑀁 𑀩𑁆𑀬𑀲𑀦𑀁 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀫𑀬𑀸 𑀛𑀸𑀦𑀧𑀤𑀁 𑀤𑀺𑀝𑁆𑀞𑀁. ‘‘𑀅𑀝𑁆𑀞𑀮𑁄𑀓𑀥𑀫𑁆𑀫𑀧𑀤’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯 ¶ . 𑀧𑀸𑀴𑀺𑀬𑀁 𑀧𑀦 ‘‘𑀦 𑀫𑀢𑁆𑀢𑀁 𑀦𑀸𑀕𑀫𑀺𑀲𑁆𑀲𑀢𑀻’’𑀢𑀺 𑀮𑀺𑀔𑀺𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺. 𑀧𑀭𑀺𑀬𑁄𑀲𑀸𑀦𑀕𑀸𑀣𑀸𑀬 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀢𑁆𑀣𑁂𑀦 𑀛𑀸𑀦𑀲𑀼𑀔𑀲𑀗𑁆𑀔𑀸𑀢𑀁 𑀲𑀩𑁆𑀩𑀓𑀸𑀫𑀭𑀲𑀁 𑀆𑀳𑀭𑀢𑀻𑀢𑀺 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀲 𑀭𑀜𑁆𑀜𑁄 𑀧𑀳𑀸𑀬 𑀅𑀜𑁆𑀜𑀲𑀳𑀸𑀬𑁂 𑀅𑀢𑁆𑀢𑀸𑀯 𑀏𑀓𑁄 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑁄 𑀦𑀸𑀮𑀁, 𑀲𑀩𑁆𑀩𑀁 𑀛𑀸𑀦𑀲𑀼𑀔𑀲𑀗𑁆𑀔𑀸𑀢𑀁 𑀓𑀸𑀫𑀭𑀲𑀁 𑀆𑀳𑀭𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀢𑀲𑁆𑀲 𑀭𑀜𑁆𑀜𑁄 𑀲𑀩𑁆𑀩𑀸𑀧𑀺 𑀧𑀣𑀯𑀻 𑀦 𑀲𑀼𑀔𑀁 𑀆𑀯𑀳𑀺𑀲𑁆𑀲𑀢𑀺. 𑀓𑀸𑀫𑀸𑀢𑀼𑀭𑀲𑁆𑀲 𑀳𑀺 𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺, 𑀬𑁄 𑀧𑀦 𑀓𑀺𑀮𑁂𑀲𑀤𑀭𑀣𑀭𑀳𑀺𑀢𑀁 𑀛𑀸𑀦𑀲𑀼𑀔𑀁 𑀆𑀳𑀭𑀺𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀭𑀸𑀚𑀸 𑀲𑀼𑀔𑀻 𑀳𑁄𑀢𑀻𑀢𑀺. 𑀬𑁄 𑀧𑀦𑁂𑀢𑀸𑀬 𑀕𑀸𑀣𑀸𑀬 ‘‘𑀬𑀲𑁆𑀲𑀢𑁆𑀣𑀸 𑀦𑀸𑀮𑀫𑁂𑀓𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑀦 𑀤𑀺𑀲𑁆𑀲𑀢𑀺.

𑀇𑀢𑀺 ¶ 𑀥𑀗𑁆𑀓𑁄 𑀇𑀫𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀔𑀫𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀚𑁆𑀚𑀁 𑀅𑀫𑀘𑁆𑀘𑀸𑀦𑀁 𑀧𑀝𑀺𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀥𑀗𑁆𑀓𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀖𑀝𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀖𑀝𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁫𑁬] 𑁬. 𑀓𑁄𑀭𑀡𑁆𑀟𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑁄 𑀅𑀭𑀜𑁆𑀜𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀣𑁂𑀭𑁄 𑀓𑀺𑀭 𑀆𑀕𑀢𑀸𑀕𑀢𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁 𑀫𑀺𑀕𑀮𑀼𑀤𑁆𑀤𑀓𑀫𑀘𑁆𑀙𑀩𑀦𑁆𑀥𑀸𑀤𑀻𑀦𑀁 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀜𑁆𑀜𑁂𑀯 ‘‘𑀲𑀻𑀮𑀁 𑀕𑀡𑁆𑀳𑀣, 𑀲𑀻𑀮𑀁 𑀕𑀡𑁆𑀳𑀣𑀸’’𑀢𑀺 𑀲𑀻𑀮𑀁 𑀤𑁂𑀢𑀺. 𑀢𑁂 𑀣𑁂𑀭𑁂 𑀕𑀭𑀼𑀪𑀸𑀯𑁂𑀦 𑀢𑀲𑁆𑀲 𑀓𑀣𑀁 𑀪𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀻𑀮𑀁 𑀕𑀡𑁆𑀳𑀦𑁆𑀢𑀺, 𑀕𑀳𑁂𑀢𑁆𑀯𑀸 𑀘 𑀧𑀦 𑀦 𑀭𑀓𑁆𑀔𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀫𑁆𑀫𑀫𑁂𑀯 𑀓𑀭𑁄𑀦𑁆𑀢𑀺. 𑀣𑁂𑀭𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ¶ ‘‘𑀆𑀯𑀼𑀲𑁄, 𑀇𑀫𑁂 𑀫𑀦𑀼𑀲𑁆𑀲𑀸 𑀫𑀫 𑀲𑀦𑁆𑀢𑀺𑀓𑁂 𑀲𑀻𑀮𑀁 𑀕𑀡𑁆𑀳𑀺𑀁𑀲𑀼, 𑀕𑀡𑁆𑀳𑀺𑀢𑁆𑀯𑀸 𑀘 𑀧𑀦 𑀦 𑀭𑀓𑁆𑀔𑀦𑁆𑀢𑀻’’𑀢𑀺 ¶ 𑀆𑀳. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀏𑀢𑁂𑀲𑀁 𑀅𑀭𑀼𑀘𑀺𑀬𑀸 𑀲𑀻𑀮𑀁 𑀤𑁂𑀣, 𑀏𑀢𑁂 𑀢𑀼𑀫𑁆𑀳𑀸𑀓𑀁 𑀓𑀣𑀁 𑀪𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀕𑀡𑁆𑀳𑀦𑁆𑀢𑀺, 𑀢𑀼𑀫𑁆𑀳𑁂 𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀸𑀦𑀁 𑀲𑀻𑀮𑀁 𑀫𑀸 𑀅𑀤𑀢𑁆𑀣𑀸’’𑀢𑀺. 𑀣𑁂𑀭𑁄 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀜𑁆𑀜𑁂𑀯 𑀲𑀻𑀮𑀁 𑀤𑁂𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 𑀅𑀬𑀸𑀘𑀦𑁆𑀢𑀸𑀦𑀜𑁆𑀜𑁂𑀯 𑀲𑀻𑀮𑀁 𑀤𑁂𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀓𑁄𑀭𑀡𑁆𑀟𑀺𑀬𑁄 𑀦𑀸𑀫 𑀅𑀳𑁄𑀲𑀺. 𑀢𑀤𑀸 𑀲𑁄 𑀆𑀘𑀭𑀺𑀬𑁄 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 𑀓𑁂𑀯𑀝𑁆𑀝𑀸𑀤𑀻𑀦𑀁 𑀅𑀬𑀸𑀘𑀦𑁆𑀢𑀸𑀦𑀜𑁆𑀜𑁂𑀯 ‘‘𑀲𑀻𑀮𑀁 𑀕𑀡𑁆𑀳𑀣, 𑀲𑀻𑀮𑀁 𑀕𑀡𑁆𑀳𑀣𑀸’’𑀢𑀺 𑀲𑀻𑀮𑀁 𑀤𑁂𑀢𑀺. 𑀢𑁂 𑀕𑀳𑁂𑀢𑁆𑀯𑀸𑀧𑀺 𑀦 𑀭𑀓𑁆𑀔𑀦𑁆𑀢𑀺 ¶ 𑀆𑀘𑀭𑀺𑀬𑁄 𑀢𑀫𑀢𑁆𑀣𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀅𑀦𑁆𑀢𑁂𑀯𑀸𑀲𑀺𑀓𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀏𑀢𑁂𑀲𑀁 𑀅𑀭𑀼𑀘𑀺𑀬𑀸 𑀲𑀻𑀮𑀁 𑀤𑁂𑀣, 𑀢𑀲𑁆𑀫𑀸 𑀪𑀺𑀦𑁆𑀤𑀦𑁆𑀢𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀬𑀸𑀘𑀦𑁆𑀢𑀸𑀦𑀜𑁆𑀜𑁂𑀯 𑀤𑀤𑁂𑀬𑁆𑀬𑀸𑀣, 𑀫𑀸 𑀅𑀬𑀸𑀘𑀦𑁆𑀢𑀸𑀦’’𑀦𑁆𑀢𑀺 𑀯𑀤𑀺𑀁𑀲𑀼. 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 𑀲𑀻𑀮𑀁 𑀤𑁂𑀢𑀺𑀬𑁂𑀯.

𑀅𑀣𑁂𑀓𑀤𑀺𑀯𑀲𑀁 𑀏𑀓𑀲𑁆𑀫𑀸 𑀕𑀸𑀫𑀸 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀢𑁆𑀣𑀸𑀬 𑀆𑀘𑀭𑀺𑀬𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀲𑁄 𑀓𑁄𑀭𑀡𑁆𑀟𑀺𑀬𑀫𑀸𑀡𑀯𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀢𑀸𑀢, 𑀅𑀳𑀁 𑀦 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀇𑀫𑁂 𑀧𑀜𑁆𑀘𑀲𑀢𑁂 𑀫𑀸𑀡𑀯𑁂 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀸𑀘𑀦𑀓𑀸𑀦𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑀺𑀦𑁆𑀦𑀓𑁄𑀝𑁆𑀞𑀸𑀲𑀁 𑀆𑀳𑀭𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀓𑀦𑁆𑀤𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 𑀅𑀬𑀸𑀘𑀦𑁆𑀢𑀸𑀦𑀜𑁆𑀜𑁂𑀯 𑀲𑀻𑀮𑀁 𑀤𑁂𑀢𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀬𑀣𑀸 𑀬𑀸𑀘𑀦𑁆𑀢𑀸𑀦𑀜𑁆𑀜𑁂𑀯 𑀤𑁂𑀢𑀺, 𑀢𑀣𑀸 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀲𑀼 𑀫𑀸𑀡𑀯𑁂𑀲𑀼 ¶ 𑀲𑀼𑀔𑀦𑀺𑀲𑀺𑀦𑁆𑀦𑁂𑀲𑀼 𑀉𑀝𑁆𑀞𑀸𑀬 𑀫𑀳𑀦𑁆𑀢𑀁 𑀫𑀳𑀦𑁆𑀢𑀁 𑀲𑁂𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀦𑁆𑀤𑀭𑀸𑀬𑀁 𑀔𑀺𑀧𑀺, 𑀧𑀼𑀦𑀧𑁆𑀧𑀼𑀦𑀁 𑀔𑀺𑀧𑀺𑀬𑁂𑀯. 𑀅𑀣 𑀦𑀁 𑀢𑁂 𑀫𑀸𑀡𑀯𑀸 𑀉𑀝𑁆𑀞𑀸𑀬 ‘‘𑀆𑀘𑀭𑀺𑀬, 𑀓𑀺𑀁 𑀓𑀭𑁄𑀲𑀻’’𑀢𑀺 𑀆𑀳𑀁𑀲𑀼. 𑀲𑁄 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺, 𑀢𑁂 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀆𑀘𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁪.

‘‘𑀏𑀓𑁄 𑀅𑀭𑀜𑁆𑀜𑁂 𑀕𑀺𑀭𑀺𑀓𑀦𑁆𑀤𑀭𑀸𑀬𑀁, 𑀧𑀕𑁆𑀕𑀬𑁆𑀳 𑀧𑀕𑁆𑀕𑀬𑁆𑀳 𑀲𑀺𑀮𑀁 𑀧𑀯𑁂𑀘𑁆𑀙𑀲𑀺;

𑀧𑀼𑀦𑀧𑁆𑀧𑀼𑀦𑀁 𑀲𑀦𑁆𑀢𑀭𑀫𑀸𑀦𑀭𑀽𑀧𑁄, 𑀓𑁄𑀭𑀡𑁆𑀟𑀺𑀬 𑀓𑁄 𑀦𑀼 𑀢𑀯 𑀬𑀺𑀥𑀢𑁆𑀣𑁄’’𑀢𑀺.

𑀢𑀢𑁆𑀣 𑀓𑁄 𑀦𑀼 𑀢𑀯 𑀬𑀺𑀥𑀢𑁆𑀣𑁄𑀢𑀺 𑀓𑁄 𑀦𑀼 𑀢𑀯 𑀇𑀥 𑀓𑀦𑁆𑀤𑀭𑀸𑀬𑀁 𑀲𑀺𑀮𑀸𑀔𑀺𑀧𑀦𑁂𑀦 𑀅𑀢𑁆𑀣𑁄.

𑀲𑁄 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑀁 𑀧𑀩𑁄𑀥𑁂𑀢𑀼𑀓𑀸𑀫𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁫.

‘‘𑀅𑀳𑀜𑁆𑀳𑀺𑀫𑀁 𑀲𑀸𑀕𑀭𑀲𑁂𑀯𑀺𑀢𑀦𑁆𑀢𑀁, 𑀲𑀫𑀁 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀧𑀺 𑀧𑀸𑀡𑀺;

𑀯𑀺𑀓𑀺𑀭𑀺𑀬 𑀲𑀸𑀦𑀽𑀦𑀺 𑀘 𑀧𑀩𑁆𑀩𑀢𑀸𑀦𑀺 𑀘, 𑀢𑀲𑁆𑀫𑀸 𑀲𑀺𑀮𑀁 𑀤𑀭𑀺𑀬𑀸 𑀧𑀓𑁆𑀔𑀺𑀧𑀸𑀫𑀻’’𑀢𑀺.

𑀢𑀢𑁆𑀣 ¶ 𑀅𑀳𑀜𑁆𑀳𑀺𑀫𑀦𑁆𑀢𑀺 𑀅𑀳𑀜𑁆𑀳𑀺 𑀇𑀫𑀁 𑀫𑀳𑀸𑀧𑀣𑀯𑀺𑀁. 𑀲𑀸𑀕𑀭𑀲𑁂𑀯𑀺𑀢𑀦𑁆𑀢𑀦𑁆𑀢𑀺 𑀲𑀸𑀕𑀭𑁂𑀳𑀺 𑀲𑁂𑀯𑀺𑀢𑀁 𑀘𑀸𑀢𑀼𑀭𑀦𑁆𑀢𑀁. 𑀬𑀣𑀸𑀧𑀺 𑀧𑀸𑀡𑀻𑀢𑀺 𑀳𑀢𑁆𑀣𑀢𑀮𑀁 𑀯𑀺𑀬 𑀲𑀫𑀁 𑀓𑀭𑀺𑀲𑁆𑀲𑀸𑀫𑀺. 𑀯𑀺𑀓𑀺𑀭𑀺𑀬𑀸𑀢𑀺 𑀯𑀺𑀓𑀺𑀭𑀺𑀢𑁆𑀯𑀸. 𑀲𑀸𑀦𑀽𑀦𑀺 𑀘 𑀧𑀩𑁆𑀩𑀢𑀸𑀦𑀺 𑀘𑀸𑀢𑀺 𑀧𑀁𑀲𑀼𑀧𑀩𑁆𑀩𑀢𑁂 𑀘 𑀲𑀺𑀮𑀸𑀧𑀩𑁆𑀩𑀢𑁂 𑀘.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁬.

‘‘𑀦𑀬𑀺𑀫𑀁 𑀫𑀳𑀺𑀁 𑀅𑀭𑀳𑀢𑀺 𑀧𑀸𑀡𑀺𑀓𑀧𑁆𑀧𑀁, 𑀲𑀫𑀁 𑀫𑀦𑀼𑀲𑁆𑀲𑁄 𑀓𑀭𑀡𑀸𑀬 𑀫𑁂𑀓𑁄;

𑀫𑀜𑁆𑀜𑀸𑀫𑀺𑀫𑀜𑁆𑀜𑁂𑀯 𑀤𑀭𑀺𑀁 𑀚𑀺𑀕𑀻𑀲𑀁, 𑀓𑁄𑀭𑀡𑁆𑀟𑀺𑀬 𑀳𑀸𑀳𑀲𑀺 𑀚𑀻𑀯𑀮𑁄𑀓’’𑀦𑁆𑀢𑀺.

𑀢𑀢𑁆𑀣 ¶ 𑀓𑀭𑀡𑀸𑀬 𑀫𑁂𑀓𑁄𑀢𑀺 𑀓𑀭𑀡𑀸𑀬 𑀏𑀓𑁄 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀫𑀜𑁆𑀜𑀸𑀫𑀺𑀫𑀜𑁆𑀜𑁂𑀯 𑀤𑀭𑀺𑀁 𑀚𑀺𑀕𑀻𑀲𑀦𑁆𑀢𑀺 𑀅𑀳𑀁 𑀫𑀜𑁆𑀜𑀸𑀫𑀺 𑀢𑀺𑀝𑁆𑀞𑀢𑀼 𑀧𑀣𑀯𑀻, 𑀇𑀫𑀜𑁆𑀜𑁂𑀯 𑀏𑀓𑀁 𑀤𑀭𑀺𑀁 𑀚𑀺𑀕𑀻𑀲𑀁 𑀧𑀽𑀭𑀡𑀢𑁆𑀣𑀸𑀬 𑀯𑀸𑀬𑀫𑀦𑁆𑀢𑁄 𑀲𑀺𑀮𑀸 𑀧𑀭𑀺𑀬𑁂𑀲𑀦𑁆𑀢𑁄 𑀉𑀧𑀸𑀬𑀁 𑀯𑀺𑀘𑀺𑀦𑀦𑁆𑀢𑁄𑀯 𑀢𑁆𑀯𑀁 𑀇𑀫𑀁 𑀚𑀻𑀯𑀮𑁄𑀓𑀁 𑀳𑀸𑀳𑀲𑀺 𑀚𑀳𑀺𑀲𑁆𑀲𑀲𑀺, 𑀫𑀭𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁩𑁭.

‘‘𑀲𑀘𑁂 𑀅𑀬𑀁 𑀪𑀽𑀢𑀥𑀭𑀁 𑀦 𑀲𑀓𑁆𑀓𑀸, 𑀲𑀫𑀁 𑀫𑀦𑀼𑀲𑁆𑀲𑁄 𑀓𑀭𑀡𑀸𑀬 𑀫𑁂𑀓𑁄;

𑀏𑀯𑀫𑁂𑀯 𑀢𑁆𑀯𑀁 𑀩𑁆𑀭𑀳𑁆𑀫𑁂 𑀇𑀫𑁂 𑀫𑀦𑀼𑀲𑁆𑀲𑁂, 𑀦𑀸𑀦𑀸𑀤𑀺𑀝𑁆𑀞𑀺𑀓𑁂 𑀦𑀸𑀦𑀬𑀺𑀲𑁆𑀲𑀲𑀺 𑀢𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀅𑀬𑀁 𑀏𑀓𑁄 𑀫𑀦𑀼𑀲𑁆𑀲𑁄 𑀇𑀫𑀁 𑀪𑀽𑀢𑀥𑀭𑀁 𑀧𑀣𑀯𑀺𑀁 𑀲𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀦 𑀲𑀫𑀢𑁆𑀣𑁄, 𑀏𑀯𑀫𑁂𑀯 𑀢𑁆𑀯𑀁 𑀇𑀫𑁂 𑀤𑀼𑀲𑁆𑀲𑀻𑀮𑀫𑀦𑀼𑀲𑁆𑀲𑁂 𑀦𑀸𑀦𑀸𑀤𑀺𑀝𑁆𑀞𑀺𑀓𑁂 𑀦𑀸𑀦𑀬𑀺𑀲𑁆𑀲𑀲𑀺, 𑀢𑁂 𑀏𑀯𑀁 ‘‘𑀲𑀻𑀮𑀁 𑀕𑀡𑁆𑀳𑀣, 𑀲𑀻𑀮𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑀁 𑀦 𑀆𑀦𑀬𑀺𑀲𑁆𑀲𑀲𑀺, 𑀧𑀡𑁆𑀟𑀺𑀢𑀧𑀼𑀭𑀺𑀲𑀸𑀬𑁂𑀯 𑀳𑀺 𑀧𑀸𑀡𑀸𑀢𑀺𑀧𑀸𑀢𑀁 ‘‘𑀅𑀓𑀼𑀲𑀮’’𑀦𑁆𑀢𑀺 𑀕𑀭𑀳𑀦𑁆𑀢𑀺. 𑀲𑀁𑀲𑀸𑀭𑀫𑁄𑀘𑀓𑀸𑀤𑀬𑁄 𑀧𑀦𑁂𑀢𑁆𑀣 𑀓𑀼𑀲𑀮𑀲𑀜𑁆𑀜𑀺𑀦𑁄, 𑀢𑁂 𑀢𑁆𑀯𑀁 𑀓𑀣𑀁 𑀆𑀦𑀬𑀺𑀲𑁆𑀲𑀲𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 𑀲𑀻𑀮𑀁 𑀅𑀤𑀢𑁆𑀯𑀸 𑀬𑀸𑀘𑀦𑁆𑀢𑀸𑀦𑀜𑁆𑀜𑁂𑀯 𑀤𑁂𑀳𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀆𑀘𑀭𑀺𑀬𑁄 ‘‘𑀬𑀼𑀢𑁆𑀢𑀁 𑀯𑀤𑀢𑀺 𑀓𑁄𑀭𑀡𑁆𑀟𑀺𑀬𑁄, 𑀇𑀤𑀸𑀦𑀺 𑀦 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀺𑀭𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁩𑁮.

‘‘𑀲𑀁𑀔𑀺𑀢𑁆𑀢𑀭𑀽𑀧𑁂𑀦 ¶ 𑀪𑀯𑀁 𑀫𑀫𑀢𑁆𑀣𑀁, 𑀅𑀓𑁆𑀔𑀸𑀲𑀺 𑀓𑁄𑀭𑀡𑁆𑀟𑀺𑀬 𑀏𑀯𑀫𑁂𑀢𑀁;

𑀬𑀣𑀸 𑀦 𑀲𑀓𑁆𑀓𑀸 𑀧𑀣𑀯𑀻 𑀲𑀫𑀸𑀬𑀁, 𑀓𑀢𑁆𑀢𑀼𑀁 𑀫𑀦𑀼𑀲𑁆𑀲𑁂𑀦 𑀢𑀣𑀸 𑀫𑀦𑀼𑀲𑁆𑀲𑀸’’𑀢𑀺.

𑀢𑀢𑁆𑀣 𑀲𑀫𑀸𑀬𑀦𑁆𑀢𑀺 𑀲𑀫𑀁 𑀅𑀬𑀁. 𑀏𑀯𑀁 𑀆𑀘𑀭𑀺𑀬𑁄 𑀫𑀸𑀡𑀯𑀲𑁆𑀲 𑀣𑀼𑀢𑀺𑀁 𑀅𑀓𑀸𑀲𑀺, 𑀲𑁄𑀧𑀺 𑀦𑀁 𑀩𑁄𑀥𑁂𑀢𑁆𑀯𑀸 𑀲𑀬𑀁 𑀖𑀭𑀁 𑀦𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀓𑁄𑀭𑀡𑁆𑀟𑀺𑀬𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁄𑀭𑀡𑁆𑀟𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁫𑁭] 𑁭. 𑀮𑀝𑀼𑀓𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭 𑀲𑀝𑁆𑀞𑀺𑀳𑀸𑀬𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸𑀫𑀢𑁆𑀢𑀫𑁆𑀧𑀺𑀲𑁆𑀲 𑀦𑀢𑁆𑀣𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀦𑀺𑀓𑁆𑀓𑀭𑀼𑀡𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀓𑀸𑀬𑁄 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀭𑀡𑀧𑀭𑀺𑀯𑀸𑀭𑁄 𑀬𑀽𑀣𑀧𑀢𑀺 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀺𑀳𑀸𑀲𑀺. 𑀢𑀤𑀸 𑀏𑀓𑀸 𑀮𑀝𑀼𑀓𑀺𑀓𑀸 𑀲𑀓𑀼𑀡𑀺𑀓𑀸 𑀳𑀢𑁆𑀣𑀻𑀦𑀁 𑀯𑀺𑀘𑀭𑀡𑀝𑁆𑀞𑀸𑀦𑁂 𑀅𑀡𑁆𑀟𑀸𑀦𑀺 𑀦𑀺𑀓𑁆𑀔𑀺𑀧𑀺, 𑀢𑀸𑀦𑀺 𑀧𑀭𑀺𑀡𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀲𑀓𑀼𑀡𑀧𑁄𑀢𑀓𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑁂𑀲𑀼 𑀅𑀯𑀺𑀭𑀼𑀴𑁆𑀳𑀧𑀓𑁆𑀔𑁂𑀲𑀼 𑀉𑀧𑁆𑀧𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀲𑀼𑀬𑁂𑀯 𑀫𑀳𑀸𑀲𑀢𑁆𑀢𑁄 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀭𑀡𑀧𑀭𑀺𑀯𑀼𑀢𑁄 𑀕𑁄𑀘𑀭𑀸𑀬 𑀘𑀭𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀧𑀢𑁆𑀢𑁄. 𑀢𑀁 𑀤𑀺𑀲𑁆𑀯𑀸 𑀮𑀝𑀼𑀓𑀺𑀓𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀳𑀢𑁆𑀣𑀺𑀭𑀸𑀚𑀸 𑀫𑀫 𑀧𑁄𑀢𑀓𑁂 𑀫𑀤𑁆𑀤𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀧𑀼𑀢𑁆𑀢𑀓𑀸𑀦𑀁 𑀧𑀭𑀺𑀢𑁆𑀢𑀸𑀡𑀢𑁆𑀣𑀸𑀬 𑀥𑀫𑁆𑀫𑀺𑀓𑀸𑀭𑀓𑁆𑀔𑀁 𑀬𑀸𑀘𑀸𑀫𑀻’’𑀢𑀺. 𑀲𑀸 ¶ 𑀉𑀪𑁄 𑀧𑀓𑁆𑀔𑁂 𑀏𑀓𑀢𑁄 𑀓𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁯.

‘‘𑀯𑀦𑁆𑀤𑀸𑀫𑀺 ¶ 𑀢𑀁 𑀓𑀼𑀜𑁆𑀚𑀭 𑀲𑀝𑁆𑀞𑀺𑀳𑀸𑀬𑀦𑀁, 𑀆𑀭𑀜𑁆𑀜𑀓𑀁 𑀬𑀽𑀣𑀧𑀢𑀺𑀁 𑀬𑀲𑀲𑁆𑀲𑀺𑀁;

𑀧𑀓𑁆𑀔𑁂𑀳𑀺 𑀢𑀁 𑀧𑀜𑁆𑀚𑀮𑀺𑀓𑀁 𑀓𑀭𑁄𑀫𑀺, 𑀫𑀸 𑀫𑁂 𑀯𑀥𑀻 𑀧𑀼𑀢𑁆𑀢𑀓𑁂 𑀤𑀼𑀩𑁆𑀩𑀮𑀸𑀬𑀸’’𑀢𑀺.

𑀢𑀢𑁆𑀣 ¶ 𑀲𑀝𑁆𑀞𑀺𑀳𑀸𑀬𑀦𑀦𑁆𑀢𑀺 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂 𑀳𑀸𑀬𑀦𑀩𑀮𑀁. 𑀬𑀲𑀲𑁆𑀲𑀺𑀦𑁆𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀁. 𑀧𑀓𑁆𑀔𑁂𑀳𑀺 𑀢𑀁 𑀧𑀜𑁆𑀘𑀮𑀺𑀓𑀁 𑀓𑀭𑁄𑀫𑀻𑀢𑀺 𑀅𑀳𑀁 𑀧𑀓𑁆𑀔𑁂𑀳𑀺 𑀢𑀁 𑀅𑀜𑁆𑀚𑀮𑀺𑀓𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄.

𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀘𑀺𑀦𑁆𑀢𑀬𑀺 𑀮𑀝𑀼𑀓𑀺𑀓𑁂, 𑀅𑀳𑀁 𑀢𑁂 𑀧𑀼𑀢𑁆𑀢𑀓𑁂 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀲𑀓𑀼𑀡𑀧𑁄𑀢𑀓𑀸𑀦𑀁 𑀉𑀧𑀭𑀺 𑀞𑀢𑁆𑀯𑀸 𑀅𑀲𑀻𑀢𑀺𑀬𑀸 𑀳𑀢𑁆𑀣𑀺𑀲𑀳𑀲𑁆𑀲𑁂𑀲𑀼 𑀕𑀢𑁂𑀲𑀼 𑀮𑀝𑀼𑀓𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀮𑀝𑀼𑀓𑀺𑀓𑁂 𑀅𑀫𑁆𑀳𑀸𑀓𑀁 𑀧𑀘𑁆𑀙𑀢𑁄 𑀏𑀓𑁄 𑀏𑀓𑀘𑀸𑀭𑀺𑀓𑁄 𑀳𑀢𑁆𑀣𑀻 𑀆𑀕𑀘𑁆𑀙𑀢𑀺, 𑀲𑁄 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀆𑀕𑀢𑁂 𑀢𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀧𑀼𑀢𑁆𑀢𑀓𑀸𑀦𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸𑀧𑀺 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀉𑀪𑁄𑀳𑀺 𑀧𑀓𑁆𑀔𑁂𑀳𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁦.

‘‘𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭 𑀏𑀓𑀘𑀸𑀭𑀺𑀁, 𑀆𑀭𑀜𑁆𑀜𑀓𑀁 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑀁;

𑀧𑀓𑁆𑀔𑁂𑀳𑀺 𑀢𑀁 𑀧𑀜𑁆𑀚𑀮𑀺𑀓𑀁 𑀓𑀭𑁄𑀫𑀺, 𑀫𑀸 𑀫𑁂 𑀯𑀥𑀻 𑀧𑀼𑀢𑁆𑀢𑀓𑁂 𑀤𑀼𑀩𑁆𑀩𑀮𑀸𑀬𑀸’’𑀢𑀺.

𑀢𑀢𑁆𑀣 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑀦𑁆𑀢𑀺 𑀖𑀦𑀲𑁂𑀮𑀧𑀩𑁆𑀩𑀢𑁂𑀲𑀼 𑀘 𑀧𑀁𑀲𑀼𑀧𑀩𑁆𑀩𑀢𑁂𑀲𑀼 𑀘 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀁.

𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁧.

‘‘𑀯𑀥𑀺𑀲𑁆𑀲𑀸𑀫𑀺 𑀢𑁂 𑀮𑀝𑀼𑀓𑀺𑀓𑁂 𑀧𑀼𑀢𑁆𑀢𑀓𑀸𑀦𑀺, 𑀓𑀺𑀁 𑀫𑁂 𑀢𑀼𑀯𑀁 𑀓𑀸𑀳𑀲𑀺 𑀤𑀼𑀩𑁆𑀩𑀮𑀸𑀲𑀺;

𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀢𑀸𑀤𑀺𑀲𑀻𑀦𑀁, 𑀯𑀸𑀫𑁂𑀦 𑀧𑀸𑀤𑁂𑀦 𑀧𑀧𑁄𑀣𑀬𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 ¶ 𑀯𑀥𑀺𑀲𑁆𑀲𑀸𑀫𑀺 𑀢𑁂𑀢𑀺 𑀢𑁆𑀯𑀁 𑀓𑀲𑁆𑀫𑀸 𑀫𑀫 𑀯𑀺𑀘𑀭𑀡𑀫𑀕𑁆𑀕𑁂 𑀧𑀼𑀢𑁆𑀢𑀓𑀸𑀦𑀺 𑀞𑀧𑁂𑀲𑀺, 𑀬𑀲𑁆𑀫𑀸 𑀞𑀧𑁂𑀲𑀺, 𑀢𑀲𑁆𑀫𑀸 𑀯𑀥𑀺𑀲𑁆𑀲𑀸𑀫𑀺 𑀢𑁂 𑀧𑀼𑀢𑁆𑀢𑀓𑀸𑀦𑀻𑀢𑀺 𑀯𑀤𑀢𑀺. 𑀓𑀺𑀁 𑀫𑁂 𑀢𑀼𑀯𑀁 𑀓𑀸𑀳𑀲𑀻𑀢𑀺 𑀫𑀬𑁆𑀳𑀁 𑀫𑀳𑀸𑀣𑀸𑀫𑀲𑁆𑀲 𑀢𑁆𑀯𑀁 𑀤𑀼𑀩𑁆𑀩𑀮𑀸 𑀓𑀺𑀁 𑀓𑀭𑀺𑀲𑁆𑀲𑀲𑀺. 𑀧𑀧𑁄𑀣𑀬𑁂𑀬𑁆𑀬𑀦𑁆𑀢𑀺 𑀅𑀳𑀁 𑀢𑀸𑀤𑀺𑀲𑀸𑀦𑀁 𑀮𑀝𑀼𑀓𑀺𑀓𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀯𑀸𑀫𑁂𑀦 𑀧𑀸𑀤𑁂𑀦 𑀲𑀜𑁆𑀘𑀼𑀡𑁆𑀡𑁂𑀬𑁆𑀬𑀁, 𑀤𑀓𑁆𑀔𑀺𑀡𑀧𑀸𑀤𑁂𑀦 𑀧𑀦 𑀓𑀣𑀸𑀯 𑀦𑀢𑁆𑀣𑀻𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀲𑁄 𑀢𑀲𑁆𑀲𑀸 𑀧𑀼𑀢𑁆𑀢𑀓𑁂 𑀧𑀸𑀤𑁂𑀦 𑀲𑀜𑁆𑀘𑀼𑀡𑁆𑀡𑁂𑀢𑁆𑀯𑀸 𑀫𑀼𑀢𑁆𑀢𑁂𑀦 𑀧𑀯𑀸𑀳𑁂𑀢𑁆𑀯𑀸 𑀦𑀤𑀦𑁆𑀢𑁄𑀯 𑀧𑀓𑁆𑀓𑀸𑀫𑀺. 𑀮𑀝𑀼𑀓𑀺𑀓𑀸 𑀭𑀼𑀓𑁆𑀔𑀲𑀸𑀔𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀸𑀯 𑀯𑀸𑀭𑀡 𑀦𑀤𑀦𑁆𑀢𑁄 𑀕𑀘𑁆𑀙𑀲𑀺, 𑀓𑀢𑀺𑀧𑀸𑀳𑁂𑀦𑁂𑀯 ¶ 𑀫𑁂 𑀓𑀺𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀲𑀺, 𑀓𑀸𑀬𑀩𑀮𑀢𑁄 𑀜𑀸𑀡𑀩𑀮𑀲𑁆𑀲 𑀫𑀳𑀦𑁆𑀢𑀪𑀸𑀯𑀁 𑀦 𑀚𑀸𑀦𑀸𑀲𑀺, 𑀳𑁄𑀢𑀼, 𑀚𑀸𑀦𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀁 𑀲𑀦𑁆𑀢𑀚𑁆𑀚𑀬𑀫𑀸𑀦𑀸𑀯 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁨.

‘‘𑀦 𑀳𑁂𑀯 𑀲𑀩𑁆𑀩𑀢𑁆𑀣 𑀩𑀮𑁂𑀦 𑀓𑀺𑀘𑁆𑀘𑀁, 𑀩𑀮𑀜𑁆𑀳𑀺 𑀩𑀸𑀮𑀲𑁆𑀲 𑀯𑀥𑀸𑀬 𑀳𑁄𑀢𑀺;

𑀓𑀭𑀺𑀲𑁆𑀲𑀸𑀫𑀺 𑀢𑁂 𑀦𑀸𑀕𑀭𑀸𑀚𑀸 𑀅𑀦𑀢𑁆𑀣𑀁, 𑀬𑁄 𑀫𑁂 𑀯𑀥𑀻 𑀧𑀼𑀢𑁆𑀢𑀓𑁂 𑀤𑀼𑀩𑁆𑀩𑀮𑀸𑀬𑀸’’𑀢𑀺.

𑀢𑀢𑁆𑀣 𑀩𑀮𑁂𑀦𑀸𑀢𑀺 𑀓𑀸𑀬𑀩𑀮𑁂𑀦. 𑀅𑀦𑀢𑁆𑀣𑀦𑁆𑀢𑀺 𑀅𑀯𑀼𑀟𑁆𑀠𑀺𑀁. 𑀬𑁄 𑀫𑁂𑀢𑀺 𑀬𑁄 𑀢𑁆𑀯𑀁 𑀫𑀫 𑀤𑀼𑀩𑁆𑀩𑀮𑀸𑀬 𑀧𑀼𑀢𑁆𑀢𑀓𑁂 𑀯𑀥𑀻 𑀖𑀸𑀢𑁂𑀲𑀺.

𑀲𑀸 𑀏𑀯𑀁 𑀯𑀢𑁆𑀯𑀸 𑀓𑀢𑀺𑀧𑀸𑀳𑀁 𑀏𑀓𑀁 𑀓𑀸𑀓𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀦 𑀢𑀼𑀝𑁆𑀞𑁂𑀦 ‘‘𑀓𑀺𑀁 𑀢𑁂 𑀓𑀭𑁄𑀫𑀻’’𑀢𑀺 𑀯𑀼𑀢𑁆𑀢𑀸 ‘‘𑀲𑀸𑀫𑀺, 𑀅𑀜𑁆𑀜𑀁 𑀫𑁂 𑀓𑀸𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀓𑀲𑁆𑀲 𑀧𑀦 𑀏𑀓𑀘𑀸𑀭𑀺𑀓𑀯𑀸𑀭𑀡𑀲𑁆𑀲 𑀢𑀼𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀢𑀼𑀫𑁆𑀳𑁂𑀳𑀺 𑀅𑀓𑁆𑀔𑀻𑀦𑀺 𑀪𑀺𑀦𑁆𑀦𑀸𑀦𑀺 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀆𑀳. 𑀲𑀸 𑀢𑁂𑀦 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 𑀏𑀓𑀁 𑀦𑀻𑀮𑀫𑀓𑁆𑀔𑀺𑀓𑀁 𑀉𑀧𑀝𑁆𑀞𑀳𑀺. 𑀢𑀸𑀬𑀧𑀺 ‘‘𑀓𑀺𑀁 𑀢𑁂, 𑀓𑀭𑁄𑀫𑀻’’𑀢𑀺 𑀯𑀼𑀢𑁆𑀢𑀸 ‘‘𑀇𑀫𑀺𑀦𑀸 𑀓𑀸𑀓𑁂𑀦 𑀏𑀓𑀘𑀸𑀭𑀺𑀓𑀯𑀸𑀭𑀡𑀲𑁆𑀲 𑀅𑀓𑁆𑀔𑀻𑀲𑀼 𑀪𑀺𑀦𑁆𑀦𑁂𑀲𑀼 𑀢𑀼𑀫𑁆𑀳𑁂𑀳𑀺 𑀢𑀢𑁆𑀣 𑀆𑀲𑀸𑀝𑀺𑀓𑀁 𑀧𑀸𑀢𑁂𑀢𑀼𑀁 𑀇𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀸𑀬𑀧𑀺 ‘‘𑀲𑀸𑀥𑀽’’𑀢𑀺 𑀯𑀼𑀢𑁆𑀢𑁂 𑀏𑀓𑀁 𑀫𑀡𑁆𑀟𑀽𑀓𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀦 ‘‘𑀓𑀺𑀁 𑀢𑁂, 𑀓𑀭𑁄𑀫𑀻’’𑀢𑀺 𑀯𑀼𑀢𑁆𑀢𑀸 ‘‘𑀬𑀤𑀸 𑀏𑀓𑀘𑀸𑀭𑀺𑀓𑀯𑀸𑀭𑀡𑁄 𑀅𑀦𑁆𑀥𑁄 𑀳𑀼𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀬𑁂𑀲𑀢𑀺, 𑀢𑀤𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑁄 𑀲𑀤𑁆𑀤𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀦𑁆𑀢𑁂 𑀑𑀢𑀭𑀺𑀢𑁆𑀯𑀸 𑀧𑀧𑀸𑀢𑁂 𑀲𑀤𑁆𑀤𑀁 𑀓𑀭𑁂𑀬𑁆𑀬𑀸𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀏𑀢𑁆𑀢𑀓𑀁 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀆𑀳. 𑀲𑁄𑀧𑀺 𑀢𑀲𑁆𑀲𑀸 𑀯𑀘𑀦𑀁 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀓𑀸𑀓𑁄 𑀯𑀸𑀭𑀡𑀲𑁆𑀲 𑀤𑁆𑀯𑁂𑀧𑀺 ¶ 𑀅𑀓𑁆𑀔𑀻𑀦𑀺 𑀢𑀼𑀡𑁆𑀟𑁂𑀦 𑀪𑀺𑀦𑁆𑀤𑀺, 𑀦𑀻𑀮𑀫𑀓𑁆𑀔𑀺𑀓𑀸 𑀆𑀲𑀸𑀝𑀺𑀓𑀁 𑀧𑀸𑀢𑁂𑀲𑀺. 𑀲𑁄 𑀧𑀼𑀴𑀯𑁂𑀳𑀺 𑀔𑀚𑁆𑀚𑀦𑁆𑀢𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀧𑀸𑀦𑀻𑀬𑀁 𑀧𑀭𑀺𑀬𑁂𑀲𑀫𑀸𑀦𑁄 𑀯𑀺𑀘𑀭𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀡𑁆𑀟𑀽𑀓𑁄 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀲𑀤𑁆𑀤𑀫𑀓𑀸𑀲𑀺. 𑀯𑀸𑀭𑀡𑁄 ‘‘𑀏𑀢𑁆𑀣 𑀧𑀸𑀦𑀻𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺. 𑀅𑀣 𑀫𑀡𑁆𑀟𑀽𑀓𑁄 𑀑𑀢𑀭𑀺𑀢𑁆𑀯𑀸 𑀧𑀧𑀸𑀢𑁂 𑀞𑀢𑁆𑀯𑀸 𑀲𑀤𑁆𑀤𑀫𑀓𑀸𑀲𑀺. 𑀯𑀸𑀭𑀡𑁄 ‘‘𑀏𑀢𑁆𑀣 𑀧𑀸𑀦𑀻𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀧𑀸𑀢𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁄 𑀧𑀭𑀺𑀕𑀴𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀧𑀢𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀮𑀝𑀼𑀓𑀺𑀓𑀸 𑀢𑀲𑁆𑀲 𑀫𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀤𑀺𑀝𑁆𑀞𑀸 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀻’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀢𑀲𑁆𑀲 𑀔𑀦𑁆𑀥𑁂 𑀘𑀗𑁆𑀓𑀫𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀯𑁂𑀭𑀁 𑀦𑀸𑀫 𑀓𑀸𑀢𑀩𑁆𑀩𑀁, 𑀏𑀯𑀁 𑀩𑀮𑀲𑀫𑁆𑀧𑀦𑁆𑀦𑀫𑁆𑀧𑀺 𑀯𑀸𑀭𑀡𑀁 𑀇𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀯𑀸𑀭𑀡𑀲𑁆𑀲 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀼’’𑀦𑁆𑀢𑀺 𑁋

𑁪𑁩.

‘‘𑀓𑀸𑀓𑀜𑁆𑀘 ¶ 𑀧𑀲𑁆𑀲 𑀮𑀝𑀼𑀓𑀺𑀓𑀁, 𑀫𑀡𑁆𑀟𑀽𑀓𑀁 𑀦𑀻𑀮𑀫𑀓𑁆𑀔𑀺𑀓𑀁;

𑀏𑀢𑁂 𑀦𑀸𑀕𑀁 𑀅𑀖𑀸𑀢𑁂𑀲𑀼𑀁, 𑀧𑀲𑁆𑀲 𑀯𑁂𑀭𑀲𑁆𑀲 𑀯𑁂𑀭𑀺𑀦𑀁;

𑀢𑀲𑁆𑀫𑀸 𑀳𑀺 𑀯𑁂𑀭𑀁 𑀦 𑀓𑀬𑀺𑀭𑀸𑀣, 𑀅𑀧𑁆𑀧𑀺𑀬𑁂𑀦𑀧𑀺 𑀓𑁂𑀦𑀘𑀻’’𑀢𑀺. 𑁋

𑀇𑀫𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀁 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺.

𑀢𑀢𑁆𑀣 𑀧𑀲𑁆𑀲𑀸𑀢𑀺 𑀅𑀦𑀺𑀬𑀸𑀫𑀺𑀢𑀸𑀮𑀧𑀦𑀫𑁂𑀢𑀁, 𑀪𑀺𑀓𑁆𑀔𑀽 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀧𑀲𑁆𑀲𑀣 𑀪𑀺𑀓𑁆𑀔𑀯𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄 𑀏𑀓𑀢𑁄 𑀳𑀼𑀢𑁆𑀯𑀸. 𑀅𑀖𑀸𑀢𑁂𑀲𑀼𑀦𑁆𑀢𑀺 𑀢𑀁 𑀯𑀥𑀺𑀁𑀲𑀼. 𑀧𑀲𑁆𑀲 𑀯𑁂𑀭𑀲𑁆𑀲 𑀯𑁂𑀭𑀺𑀦𑀦𑁆𑀢𑀺 𑀧𑀲𑁆𑀲𑀣 𑀯𑁂𑀭𑀺𑀓𑀸𑀦𑀁 𑀯𑁂𑀭𑀲𑁆𑀲 𑀕𑀢𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀤𑀸 𑀏𑀓𑀘𑀸𑀭𑀺𑀓𑀳𑀢𑁆𑀣𑀻 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀬𑀽𑀣𑀧𑀢𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀮𑀝𑀼𑀓𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁫𑁮] 𑁮. 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀫𑁂𑀯 ¶ 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀅𑀜𑁆𑀜𑁂𑀲𑀼 𑀚𑀸𑀢𑀓𑁂𑀲𑀼 𑀤𑁂𑀯𑀤𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀸𑀲𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀫𑀲𑁆𑀫𑀺𑀁 ¶ 𑀧𑀦 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁆𑀢𑀫𑀸𑀲𑀺𑀓𑀓𑀸𑀮𑁂 𑀳𑀢𑁆𑀣𑀧𑀸𑀤𑁂 𑀘 𑀲𑀻𑀲𑀜𑁆𑀘 𑀙𑁂𑀤𑀸𑀧𑁂𑀢𑁆𑀯𑀸 𑀅𑀲𑀺𑀫𑀸𑀮𑀓𑀁 𑀦𑀸𑀫 𑀓𑀸𑀭𑁂𑀲𑀺. 𑀤𑀤𑁆𑀤𑀭𑀚𑀸𑀢𑀓𑁂 (𑀚𑀸. 𑁧.𑁨.𑁪𑁩-𑁪𑁪) 𑀕𑀻𑀯𑀁 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀉𑀤𑁆𑀥𑀦𑁂 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺. 𑀔𑀦𑁆𑀢𑀻𑀯𑀸𑀤𑀻𑀚𑀸𑀢𑀓𑁂 (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀤𑁆𑀯𑀻𑀳𑀺𑀧𑀺 𑀓𑀲𑀸𑀳𑀺 𑀧𑀳𑀸𑀭𑀲𑀳𑀲𑁆𑀲𑁂𑀳𑀺 𑀢𑀸𑀴𑀸𑀧𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀘 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀸𑀧𑁂𑀢𑁆𑀯𑀸 𑀚𑀝𑀸𑀲𑀼 𑀕𑀳𑁂𑀢𑁆𑀯𑀸 𑀓𑀟𑁆𑀠𑀸𑀧𑁂𑀢𑁆𑀯𑀸 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀉𑀭𑁂 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀯𑀲𑀁𑀬𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀘𑀽𑀴𑀦𑀦𑁆𑀤𑀺𑀬𑀚𑀸𑀢𑀓𑁂𑀧𑀺 (𑀚𑀸. 𑁧.𑁨.𑁧𑁪𑁩-𑁧𑁪𑁪) 𑀫𑀳𑀸𑀓𑀧𑀺𑀚𑀸𑀢𑀓𑁂𑀧𑀺 (𑀚𑀸. 𑁧.𑁭.𑁮𑁩 𑀆𑀤𑀬𑁄) 𑀫𑀸𑀭𑁂𑀲𑀺𑀬𑁂𑀯. 𑀏𑀯𑀫𑁂𑀯 𑀲𑁄 𑀤𑀻𑀖𑀭𑀢𑁆𑀢𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑁆𑀢𑁄 𑀩𑀼𑀤𑁆𑀥𑀓𑀸𑀮𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀩𑀼𑀤𑁆𑀥𑀸𑀦𑀁 𑀫𑀸𑀭𑀡𑀢𑁆𑀣𑀫𑁂𑀯 𑀉𑀧𑀸𑀬𑀁 𑀓𑀭𑁄𑀢𑀺, ‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀫𑀸𑀭𑀸𑀧𑁂𑀲𑁆𑀲𑀸𑀫𑀻’𑀢𑀺 𑀥𑀦𑀼𑀕𑁆𑀕𑀳𑁂 𑀧𑀬𑁄𑀚𑁂𑀲𑀺, 𑀲𑀺𑀮𑀁 𑀧𑀯𑀺𑀚𑁆𑀛𑀺, 𑀦𑀸𑀴𑀸𑀕𑀺𑀭𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀇𑀤𑀸𑀦𑀺 𑀧𑀦 𑀢𑀸𑀲𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 ¶ , 𑀧𑀼𑀩𑁆𑀩𑁂 𑀫𑀁 𑀘𑀽𑀴𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀲𑀫𑀸𑀦𑀁 𑀚𑀻𑀯𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀅𑀲𑀺𑀫𑀸𑀮𑀓𑀁 𑀓𑀸𑀭𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀧𑀢𑀸𑀧𑁂 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀘𑀦𑁆𑀤𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, ‘‘𑀥𑀫𑁆𑀫𑀧𑀸𑀮𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀫𑁂𑀦𑀁 𑀲𑀢𑁆𑀢𑀫𑀸𑀲𑀺𑀓𑀓𑀸𑀮𑁂 𑀫𑀸𑀢𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀻𑀴𑀸𑀧𑀬𑀫𑀸𑀦𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑀸 𑀧𑀼𑀢𑁆𑀢𑀁 𑀓𑀻𑀴𑀸𑀧𑀬𑀫𑀸𑀦𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀲𑀫𑀧𑁆𑀧𑀺𑀢𑀸 𑀳𑀼𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑁆𑀯𑀸𑀧𑀺 𑀦 𑀉𑀝𑁆𑀞𑀳𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀇𑀤𑀸𑀦𑁂𑀯 𑀢𑀸𑀯 𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀢𑀺, 𑀫𑀁 𑀓𑀺𑀲𑁆𑀫𑀺𑀜𑁆𑀘𑀺 𑀦 𑀫𑀜𑁆𑀜𑀢𑀺, 𑀧𑀼𑀢𑁆𑀢𑁂 𑀧𑀦 𑀯𑀟𑁆𑀠𑀦𑁆𑀢𑁂 𑀫𑀬𑀺 ‘𑀫𑀦𑀼𑀲𑁆𑀲𑁄’𑀢𑀺𑀧𑀺 𑀲𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀦𑀁 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀺𑀥𑀸𑀦𑁂𑀦 ¶ 𑀆𑀕𑀘𑁆𑀙𑀢𑀽’’𑀢𑀺 𑀘𑁄𑀭𑀖𑀸𑀢𑀓𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑁄 ¶ 𑀭𑀢𑁆𑀢𑀫𑀸𑀮𑀸𑀥𑀭𑁄 𑀨𑀭𑀲𑀼𑀁 𑀅𑀁𑀲𑁂 𑀞𑀧𑁂𑀢𑁆𑀯𑀸 𑀉𑀧𑀥𑀸𑀦𑀖𑀝𑀺𑀓𑀁 𑀳𑀢𑁆𑀣𑀧𑀸𑀤𑀞𑀧𑀦𑀤𑀡𑁆𑀟𑀓𑀜𑁆𑀘 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺 𑀅𑀝𑁆𑀞𑀸𑀲𑀺. 𑀤𑁂𑀯𑀺𑀬𑀸 𑀲𑀺𑀭𑀺𑀕𑀩𑁆𑀪𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀧𑀸𑀮𑀁 𑀆𑀦𑁂𑀳𑀻𑀢𑀺. 𑀤𑁂𑀯𑀻𑀧𑀺 𑀭𑀜𑁆𑀜𑁄 𑀓𑀼𑀚𑁆𑀛𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀭𑁄𑀤𑀫𑀸𑀦𑀸 𑀦𑀺𑀲𑀻𑀤𑀺. 𑀘𑁄𑀭𑀖𑀸𑀢𑀓𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀺𑀝𑁆𑀞𑀺𑀬𑀁 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑁄 𑀓𑀼𑀫𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺 𑀆𑀳. 𑀭𑀸𑀚𑀸 𑀏𑀓𑀁 𑀨𑀮𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ‘‘𑀇𑀥 𑀦𑀁 𑀦𑀺𑀧𑀚𑁆𑀚𑀸𑀧𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺.

𑀘𑀦𑁆𑀤𑀸𑀤𑁂𑀯𑀻 𑀧𑀼𑀢𑁆𑀢𑀲𑁆𑀲 𑀧𑀘𑁆𑀙𑀢𑁄𑀯 𑀧𑀭𑀺𑀤𑁂𑀯𑀫𑀸𑀦𑀸 𑀆𑀕𑀘𑁆𑀙𑀺. 𑀧𑀼𑀦 𑀘𑁄𑀭𑀖𑀸𑀢𑀓𑁄 ‘‘𑀓𑀺𑀁 𑀓𑀭𑁄𑀫𑀻, 𑀤𑁂𑀯𑀸’’𑀢𑀺 𑀆𑀳. 𑀥𑀫𑁆𑀫𑀧𑀸𑀮𑀲𑁆𑀲 𑀳𑀢𑁆𑀣𑁂 𑀙𑀺𑀦𑁆𑀤𑀸𑀢𑀺. 𑀘𑀦𑁆𑀤𑀸𑀤𑁂𑀯𑀻 ‘‘𑀫𑀳𑀸𑀭𑀸𑀚, 𑀫𑀫 𑀧𑀼𑀢𑁆𑀢𑁄 𑀲𑀢𑁆𑀢𑀫𑀸𑀲𑀺𑀓𑁄 𑀩𑀸𑀮𑀓𑁄 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀺, 𑀦𑀢𑁆𑀣𑁂𑀢𑀲𑁆𑀲 𑀤𑁄𑀲𑁄, 𑀤𑁄𑀲𑁄 𑀧𑀦 𑀳𑁄𑀦𑁆𑀢𑁄 𑀫𑀬𑀺 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀫𑀬𑁆𑀳𑀁 𑀳𑀢𑁆𑀣𑁂 𑀙𑁂𑀤𑀸𑀧𑁂𑀳𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁪.

‘‘𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲;

𑀏𑀢𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀳𑀢𑁆𑀣𑁂 𑀫𑁂 𑀤𑁂𑀯 𑀙𑁂𑀤𑁂𑀳𑀻’’𑀢𑀺.

𑀢𑀢𑁆𑀣 𑀤𑀽𑀲𑀺𑀬𑀸𑀢𑀺 𑀤𑀽𑀲𑀺𑀓𑀸, 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀅𑀦𑀼𑀝𑁆𑀞𑀳𑀫𑀸𑀦𑀸 𑀤𑁄𑀲𑀓𑀸𑀭𑀺𑀓𑀸𑀢𑀺 𑀅𑀢𑁆𑀣𑁄. ‘‘𑀤𑀽𑀲𑀺𑀓𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀪𑀽𑀦𑀳𑀢𑀸𑀢𑀺 𑀳𑀢𑀪𑀽𑀦𑀸, 𑀳𑀢𑀯𑀼𑀟𑁆𑀠𑀻𑀢𑀺 𑀅𑀢𑁆𑀣𑁄. 𑀭𑀜𑁆𑀜𑁄𑀢𑀺 𑀇𑀤𑀁 ‘‘𑀤𑀽𑀲𑀺𑀬𑀸’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀳𑀁 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲 𑀅𑀧𑀭𑀸𑀥𑀓𑀸𑀭𑀺𑀓𑀸, 𑀦𑀸𑀬𑀁 𑀓𑀼𑀫𑀸𑀭𑁄, 𑀢𑀲𑁆𑀫𑀸 ¶ 𑀦𑀺𑀭𑀧𑀭𑀸𑀥𑀁 𑀏𑀢𑀁 𑀩𑀸𑀮𑀓𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀲𑀘𑁂𑀧𑀺 𑀳𑀢𑁆𑀣𑁂 𑀙𑁂𑀤𑀸𑀧𑁂𑀢𑀼𑀓𑀸𑀫𑁄, 𑀤𑁄𑀲𑀓𑀸𑀭𑀺𑀓𑀸𑀬 𑀳𑀢𑁆𑀣𑁂 𑀫𑁂, 𑀤𑁂𑀯, 𑀙𑁂𑀤𑁂𑀳𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀭𑀸𑀚𑀸 𑀘𑁄𑀭𑀖𑀸𑀢𑀓𑀁 𑀑𑀮𑁄𑀓𑁂𑀲𑀺. ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺? ‘‘𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀳𑀢𑁆𑀣𑁂 𑀙𑁂𑀤𑀸’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑁄𑀭𑀖𑀸𑀢𑀓𑁄 𑀢𑀺𑀔𑀺𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀢𑀭𑀼𑀡𑀯𑀁𑀲𑀓𑀴𑀻𑀭𑁂 𑀯𑀺𑀬 ¶ 𑀤𑁆𑀯𑁂 𑀳𑀢𑁆𑀣𑁂 𑀙𑀺𑀦𑁆𑀤𑀺. 𑀲𑁄 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀙𑀺𑀚𑁆𑀚𑀫𑀸𑀦𑁂𑀲𑀼 𑀦𑁂𑀯 𑀭𑁄𑀤𑀺 𑀦 𑀧𑀭𑀺𑀤𑁂𑀯𑀺, 𑀔𑀦𑁆𑀢𑀺𑀜𑁆𑀘 𑀫𑁂𑀢𑁆𑀢𑀜𑁆𑀘 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀘𑀦𑁆𑀤𑀸 𑀧𑀦 𑀤𑁂𑀯𑀻 𑀙𑀺𑀦𑁆𑀦𑀳𑀢𑁆𑀣𑀓𑁄𑀝𑀺𑀁 𑀕𑀳𑁂𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 ¶ 𑀮𑁄𑀳𑀺𑀢𑀮𑀺𑀢𑁆𑀢𑀸 𑀧𑀭𑀺𑀤𑁂𑀯𑀫𑀸𑀦𑀸 𑀯𑀺𑀘𑀭𑀺. 𑀧𑀼𑀦 𑀘𑁄𑀭𑀖𑀸𑀢𑀓𑁄 ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁆𑀯𑁂𑀧𑀺 𑀧𑀸𑀤𑁂 𑀙𑀺𑀦𑁆𑀤𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀘𑀦𑁆𑀤𑀸𑀤𑁂𑀯𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁫.

‘‘𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲;

𑀏𑀢𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀧𑀸𑀤𑁂 𑀫𑁂 𑀤𑁂𑀯 𑀙𑁂𑀤𑁂𑀳𑀻’’𑀢𑀺.

𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀭𑀸𑀚𑀸𑀧𑀺 𑀧𑀼𑀦 𑀘𑁄𑀭𑀖𑀸𑀢𑀓𑀁 𑀆𑀡𑀸𑀧𑁂𑀲𑀺. 𑀲𑁄 𑀉𑀪𑁄𑀧𑀺 𑀧𑀸𑀤𑁂 𑀙𑀺𑀦𑁆𑀤𑀺. 𑀘𑀦𑁆𑀤𑀸𑀤𑁂𑀯𑀻 𑀧𑀸𑀤𑀓𑁄𑀝𑀺𑀫𑁆𑀧𑀺 𑀕𑀳𑁂𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀮𑁄𑀳𑀺𑀢𑀮𑀺𑀢𑁆𑀢𑀸 𑀧𑀭𑀺𑀤𑁂𑀯𑀫𑀸𑀦𑀸 ‘‘𑀲𑀸𑀫𑀺 𑀫𑀳𑀸𑀧𑀢𑀸𑀧, 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑀸 𑀦𑀸𑀫 𑀤𑀸𑀭𑀓𑀸 𑀫𑀸𑀢𑀭𑀸 𑀧𑁄𑀲𑁂𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀅𑀳𑀁 𑀪𑀢𑀺𑀁 𑀓𑀢𑁆𑀯𑀸 𑀫𑀫 𑀧𑀼𑀢𑁆𑀢𑀓𑀁 𑀧𑁄𑀲𑁂𑀲𑁆𑀲𑀸𑀫𑀺, 𑀤𑁂𑀳𑀺 𑀫𑁂 𑀏𑀢’’𑀦𑁆𑀢𑀺 𑀆𑀳. 𑀘𑁄𑀭𑀖𑀸𑀢𑀓𑁄 ‘‘𑀓𑀺𑀁 𑀤𑁂𑀯 𑀓𑀢𑀸 𑀭𑀸𑀚𑀸𑀡𑀸, 𑀦𑀺𑀝𑁆𑀞𑀺𑀢𑀁 𑀫𑀫 𑀓𑀺𑀘𑁆𑀘’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀢𑀸𑀯 𑀦𑀺𑀝𑁆𑀞𑀺𑀢’’𑀦𑁆𑀢𑀺. ‘‘𑀅𑀣 𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺? ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀘𑀦𑁆𑀤𑀸𑀤𑁂𑀯𑀻 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲;

𑀏𑀢𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀲𑀻𑀲𑀁 𑀫𑁂 𑀤𑁂𑀯 𑀙𑁂𑀤𑁂𑀳𑀻’’𑀢𑀺.

𑀯𑀢𑁆𑀯𑀸 𑀘 𑀧𑀦 𑀅𑀢𑁆𑀢𑀦𑁄 𑀲𑀻𑀲𑀁 𑀉𑀧𑀦𑁂𑀲𑀺.

𑀧𑀼𑀦 𑀘𑁄𑀭𑀖𑀸𑀢𑀓𑁄 ‘‘𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀸’’𑀢𑀺. 𑀲𑁄 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 ‘‘𑀓𑀢𑀸, 𑀤𑁂𑀯, 𑀭𑀸𑀚𑀸𑀡𑀸’’𑀢𑀺 𑀧𑀼𑀘𑁆𑀙𑀺. ‘‘𑀦 𑀢𑀸𑀯 𑀓𑀢𑀸’’𑀢𑀺. ‘‘𑀅𑀣 𑀓𑀺𑀁 𑀓𑀭𑁄𑀫𑀺, 𑀤𑁂𑀯𑀸’’𑀢𑀺? ‘‘𑀅𑀲𑀺𑀢𑀼𑀡𑁆𑀟𑁂𑀦 𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀲𑀺𑀫𑀸𑀮𑀓𑀁 𑀦𑀸𑀫 𑀓𑀭𑁄𑀳𑀻’’𑀢𑀺. 𑀲𑁄 𑀢𑀲𑁆𑀲 𑀓𑀴𑁂𑀯𑀭𑀁 ¶ 𑀆𑀓𑀸𑀲𑁂 𑀔𑀺𑀧𑀺𑀢𑁆𑀯𑀸 𑀅𑀲𑀺𑀢𑀼𑀡𑁆𑀟𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀲𑀺𑀫𑀸𑀮𑀓𑀁 𑀦𑀸𑀫 𑀓𑀢𑁆𑀯𑀸 𑀫𑀳𑀸𑀢𑀮𑁂 𑀯𑀺𑀧𑁆𑀧𑀓𑀺𑀭𑀺. 𑀘𑀦𑁆𑀤𑀸𑀤𑁂𑀯𑀻 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀁𑀲𑁂 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀫𑀳𑀸𑀢𑀮𑁂 𑀭𑁄𑀤𑀫𑀸𑀦𑀸 𑀧𑀭𑀺𑀤𑁂𑀯𑀫𑀸𑀦𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁭.

‘‘𑀦 ¶ 𑀳𑀺 𑀦𑀽𑀦𑀺𑀫𑀲𑁆𑀲 𑀭𑀜𑁆𑀜𑁄, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸;

𑀬𑁂 𑀦 𑀯𑀤𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀑𑀭𑀲𑀁 𑀧𑀼𑀢𑁆𑀢𑀁.

𑁪𑁮.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀭𑀜𑁆𑀜𑁄, 𑀜𑀸𑀢𑀻 𑀫𑀺𑀢𑁆𑀢𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸;

𑀬𑁂 𑀦 𑀯𑀤𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀅𑀢𑁆𑀭𑀚𑀁 𑀧𑀼𑀢𑁆𑀢’’𑀦𑁆𑀢𑀺.

𑀢𑀢𑁆𑀣 ¶ 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸𑀢𑀺 𑀦𑀽𑀦 𑀇𑀫𑀲𑁆𑀲 𑀭𑀜𑁆𑀜𑁄 𑀤𑀴𑁆𑀳𑀫𑀺𑀢𑁆𑀢𑀸 𑀯𑀸 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀲𑀳𑀪𑀸𑀯𑀺𑀦𑁄 𑀅𑀫𑀘𑁆𑀘𑀸 𑀯𑀸 𑀫𑀼𑀤𑀼𑀳𑀤𑀬𑀢𑀸𑀬 𑀲𑀼𑀳𑀤𑀸 𑀯𑀸 𑀓𑁂𑀘𑀺 𑀦 𑀯𑀺𑀚𑁆𑀚𑀦𑁆𑀢𑀺. 𑀬𑁂 𑀦 𑀯𑀤𑀦𑁆𑀢𑀻𑀢𑀺 𑀬𑁂 𑀅𑀥𑀼𑀦𑀸 𑀆𑀕𑀦𑁆𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀁 𑀫𑀸 𑀖𑀸𑀢𑀬𑀻’’𑀢𑀺 𑀦 𑀯𑀤𑀦𑁆𑀢𑀺, 𑀇𑀫𑀁 𑀭𑀸𑀚𑀸𑀦𑀁 𑀧𑀝𑀺𑀲𑁂𑀥𑁂𑀦𑁆𑀢𑀺, 𑀢𑁂 𑀦𑀢𑁆𑀣𑀺𑀬𑁂𑀯𑀸𑀢𑀺 𑀫𑀜𑁆𑀜𑁂. 𑀤𑀼𑀢𑀺𑀬𑀕𑀸𑀣𑀸𑀬𑀁 𑀜𑀸𑀢𑀻𑀢𑀺 𑀜𑀸𑀢𑀓𑀸.

𑀇𑀫𑀸 𑀧𑀦 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀯𑀸 𑀘𑀦𑁆𑀤𑀸𑀤𑁂𑀯𑀻 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀳𑀤𑀬𑀫𑀁𑀲𑀁 𑀥𑀸𑀭𑀬𑀫𑀸𑀦𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑀸, 𑀩𑀸𑀳𑀸 𑀙𑀺𑀚𑁆𑀚𑀦𑁆𑀢𑀺 𑀥𑀫𑁆𑀫𑀧𑀸𑀮𑀲𑁆𑀲;

𑀤𑀸𑀬𑀸𑀤𑀲𑁆𑀲 𑀧𑀣𑀩𑁆𑀬𑀸, 𑀧𑀸𑀡𑀸 𑀫𑁂 𑀤𑁂𑀯 𑀭𑀼𑀚𑁆𑀛𑀦𑁆𑀢𑀻’’𑀢𑀺.

𑀢𑀢𑁆𑀣 𑀤𑀸𑀬𑀸𑀤𑀲𑁆𑀲 𑀧𑀣𑀩𑁆𑀬𑀸𑀢𑀺 𑀧𑀺𑀢𑀼𑀲𑀦𑁆𑀢𑀓𑀸𑀬 𑀘𑀸𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸 𑀤𑀸𑀬𑀸𑀤𑀲𑁆𑀲 𑀮𑁄𑀳𑀺𑀢𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑀸 𑀳𑀢𑁆𑀣𑀸 𑀙𑀺𑀚𑁆𑀚𑀦𑁆𑀢𑀺, 𑀧𑀸𑀤𑀸 𑀙𑀺𑀚𑁆𑀚𑀦𑁆𑀢𑀺, 𑀲𑀻𑀲𑀜𑁆𑀘 𑀙𑀺𑀚𑁆𑀚𑀢𑀺, 𑀅𑀲𑀺𑀫𑀸𑀮𑀓𑁄𑀧𑀺 𑀓𑀢𑁄, 𑀢𑀯 𑀯𑀁𑀲𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀢𑁄𑀲𑀺 𑀤𑀸𑀦𑀻𑀢𑀺 𑀏𑀯𑀫𑀸𑀤𑀻𑀦𑀺 𑀯𑀺𑀮𑀧𑀦𑁆𑀢𑀺 𑀏𑀯𑀫𑀸𑀳. 𑀧𑀸𑀡𑀸 𑀫𑁂 𑀤𑁂𑀯 𑀭𑀼𑀚𑁆𑀛𑀦𑁆𑀢𑀻𑀢𑀺 𑀤𑁂𑀯, 𑀫𑀬𑁆𑀳𑀫𑁆𑀧𑀺 𑀇𑀫𑀁 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑀸 𑀚𑀻𑀯𑀺𑀢𑀁 𑀭𑀼𑀚𑁆𑀛𑀢𑀻𑀢𑀺.

𑀢𑀲𑁆𑀲𑀸 𑀏𑀯𑀁 𑀧𑀭𑀺𑀤𑁂𑀯𑀫𑀸𑀦𑀸𑀬 𑀏𑀯 𑀟𑀬𑁆𑀳𑀫𑀸𑀦𑁂 𑀯𑁂𑀴𑀼𑀯𑀦𑁂 𑀯𑁂𑀴𑀼 𑀯𑀺𑀬 𑀳𑀤𑀬𑀁 𑀨𑀮𑀺, 𑀲𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸. 𑀭𑀸𑀚𑀸𑀧𑀺 𑀧𑀮𑁆𑀮𑀗𑁆𑀓𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀸𑀢𑀮𑁂 𑀧𑀢𑀺, 𑀧𑀤𑀭𑀢𑀮𑀁 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺, 𑀲𑁄 𑀢𑀢𑁄𑀧𑀺 𑀪𑀽𑀫𑀺𑀬𑀁 𑀧𑀢𑀺. 𑀢𑀢𑁄 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸𑀧𑀺 𑀖𑀦𑀧𑀣𑀯𑀻 𑀢𑀲𑁆𑀲 ¶ 𑀅𑀕𑀼𑀡𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀯𑀭𑀫𑀤𑀸𑀲𑀺, 𑀅𑀯𑀻𑀘𑀺𑀢𑁄 𑀚𑀸𑀮𑀸 𑀉𑀝𑁆𑀞𑀸𑀬 𑀓𑀼𑀮𑀤𑀢𑁆𑀢𑀺𑀓𑁂𑀦 𑀓𑀫𑁆𑀩𑀮𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑀻 𑀯𑀺𑀬 ¶ 𑀢𑀁 𑀕𑀳𑁂𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀔𑀺𑀧𑀺. 𑀘𑀦𑁆𑀤𑀸𑀬 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀅𑀫𑀘𑁆𑀘𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀘𑀦𑁆𑀤𑀸𑀤𑁂𑀯𑀻 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻, 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁫𑁯] 𑁯. 𑀲𑀼𑀯𑀡𑁆𑀡𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀯𑀺𑀓𑁆𑀓𑀫 ¶ 𑀭𑁂 𑀳𑀭𑀺𑀧𑀸𑀤𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀏𑀓𑀁 𑀓𑀼𑀮𑀥𑀻𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀉𑀧𑀝𑁆𑀞𑀸𑀓𑀓𑀼𑀮𑀲𑁆𑀲 𑀥𑀻𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀧𑀡𑁆𑀟𑀺𑀢𑀸 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑀸. 𑀢𑀁 𑀅𑀜𑁆𑀜𑀁 𑀲𑀸𑀯𑀢𑁆𑀣𑀺𑀬𑀫𑁂𑀯 𑀲𑀫𑀸𑀦𑀚𑀸𑀢𑀺𑀓𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀓𑀼𑀮𑀁 𑀯𑀸𑀭𑁂𑀲𑀺. 𑀅𑀣𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀫𑁆𑀳𑀸𑀓𑀁 𑀥𑀻𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀫𑀫𑀸𑀬𑀢𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑀸, 𑀢𑀼𑀫𑁆𑀳𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀇𑀫𑀺𑀲𑁆𑀲𑀸𑀧𑀺 𑀬𑀣𑀸𑀭𑀼𑀘𑀺𑀬𑀸 𑀤𑀸𑀦𑀁 𑀯𑀸 𑀤𑀸𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀯𑀺𑀳𑀸𑀭𑀁 𑀯𑀸 𑀕𑀦𑁆𑀢𑀼𑀁 𑀲𑀻𑀮𑀁 𑀯𑀸 𑀭𑀓𑁆𑀔𑀺𑀢𑀼𑀁 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸 𑀓𑀸𑀢𑀼𑀁 𑀦 𑀤𑀲𑁆𑀲𑀣, 𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑁂𑀫, 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀓𑀼𑀮𑀸𑀯 𑀓𑀼𑀫𑀸𑀭𑀺𑀓𑀁 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 ‘‘𑀢𑀼𑀫𑁆𑀳𑀸𑀓𑀁 𑀥𑀻𑀢𑀸 𑀅𑀫𑁆𑀳𑀸𑀓𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑀸𑀬𑁂𑀦 𑀲𑀩𑁆𑀩𑀫𑁂𑀢𑀁 𑀓𑀭𑁄𑀢𑀼, 𑀫𑀬𑀁 𑀦 𑀯𑀸𑀭𑁂𑀲𑁆𑀲𑀸𑀫, 𑀤𑁂𑀣 𑀦𑁄 𑀏𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀪𑀤𑁆𑀤𑀓𑁂𑀦 𑀦𑀓𑁆𑀔𑀢𑁆𑀢𑁂𑀦 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀖𑀭𑀁 𑀦𑀬𑀺𑀁𑀲𑀼. 𑀲𑀸 𑀯𑀢𑁆𑀢𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀧𑀢𑀺𑀤𑁂𑀯𑀢𑀸 𑀅𑀳𑁄𑀲𑀺, 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀯𑀢𑁆𑀢𑀸𑀦𑀺 𑀓𑀢𑀸𑀦𑁂𑀯 𑀳𑁄𑀦𑁆𑀢𑀺.

𑀲𑀸 𑀏𑀓𑀤𑀺𑀯𑀲𑀁 𑀲𑀸𑀫𑀺𑀓𑀁 𑀆𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀅𑀬𑁆𑀬𑀧𑀼𑀢𑁆𑀢, 𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑁆𑀣𑁂𑀭𑀸𑀦𑀁 𑀤𑀸𑀦𑀁 𑀤𑀸𑀢𑀼’’𑀦𑁆𑀢𑀺. 𑀲𑀸𑀥𑀼, 𑀪𑀤𑁆𑀤𑁂, 𑀬𑀣𑀸𑀚𑁆𑀛𑀸𑀲𑀬𑁂𑀦 𑀤𑀸𑀦𑀁 𑀤𑁂𑀳𑀻𑀢𑀺. 𑀲𑀸 𑀣𑁂𑀭𑁂 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀓𑀼𑀮𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀁 𑀅𑀲𑁆𑀲𑀤𑁆𑀥𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀲𑀸𑀥𑀼, 𑀅𑀬𑁆𑀬𑀸, 𑀬𑀸𑀯 𑀇𑀫𑀁 𑀓𑀼𑀮𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀚𑀸𑀦𑀸𑀢𑀺, 𑀢𑀸𑀯 𑀇𑀥𑁂𑀯 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀣𑁂𑀭𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀢𑁆𑀣 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀺. 𑀧𑀼𑀦 𑀲𑀸𑀫𑀺𑀓𑀁 𑀆𑀳 ‘‘𑀅𑀬𑁆𑀬𑀧𑀼𑀢𑁆𑀢, 𑀣𑁂𑀭𑀸 ¶ 𑀇𑀥 𑀦𑀺𑀩𑀤𑁆𑀥𑀁 𑀆𑀕𑀘𑁆𑀙𑀦𑁆𑀢𑀺, 𑀓𑀺𑀁𑀓𑀸𑀭𑀡𑀸 𑀢𑀼𑀫𑁆𑀳𑁂 𑀦 𑀧𑀲𑁆𑀲𑀣𑀸’’𑀢𑀺. ‘‘𑀲𑀸𑀥𑀼, 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀣𑁂𑀭𑀸𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀲 𑀆𑀭𑁄𑀘𑁂𑀲𑀺 ¶ . 𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑁄 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀸𑀬 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀘 𑀧𑀲𑀻𑀤𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀭𑀸𑀦𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑀺, 𑀅𑀦𑁆𑀢𑀭𑀸𑀪𑀢𑁆𑀢𑁂 𑀥𑀫𑁆𑀫𑀓𑀣𑀁 𑀲𑀼𑀡𑀸𑀢𑀺, 𑀢𑀲𑁆𑀲 𑀅𑀧𑀭𑀪𑀸𑀕𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀪𑀺𑀚𑁆𑀚𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀣𑁂𑀭𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀸𑀧𑀺 𑀲𑀩𑁆𑀩𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀫𑀸𑀫𑀓𑀸𑀬𑁂𑀯 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀤𑀸𑀭𑀺𑀓𑀸 𑀲𑀸𑀫𑀺𑀓𑀁 𑀆𑀳 𑁋 ‘‘𑀅𑀬𑁆𑀬𑀧𑀼𑀢𑁆𑀢, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀇𑀘𑁆𑀙𑀸𑀫𑀳𑀁 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺. 𑀲𑁄 ‘‘𑀲𑀸𑀥𑀼 𑀪𑀤𑁆𑀤𑁂, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀲𑀢𑁆𑀣𑀸 𑀧𑀩𑁆𑀩𑀸𑀚𑁂𑀲𑀺. 𑀉𑀪𑁄𑀧𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑀸 𑀦𑀸𑀫 𑀤𑀳𑀭𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀘𑁂𑀯 𑀧𑀘𑁆𑀘𑀬𑀸 𑀚𑀸𑀢𑀸 𑀲𑀸𑀫𑀺𑀓𑀲𑁆𑀲 𑀘, 𑀅𑀢𑁆𑀢𑀦𑀸𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀫𑁆𑀧𑀺 𑀧𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑀸𑀯 𑀏𑀲𑀸 𑀲𑀸𑀫𑀺𑀓𑀁 𑀭𑀸𑀕𑀧𑀸𑀲𑀸 𑀫𑁄𑀘𑁂𑀲𑀺, 𑀧𑀼𑀩𑁆𑀩𑁂𑀧𑁂𑀲𑀸 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑁂 𑀧𑀦 𑀫𑀭𑀡𑀧𑀸𑀲𑀸 𑀫𑁄𑀘𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀧𑀸𑀲𑀸𑀤𑀺𑀓𑁄 𑀤𑀲𑁆𑀲𑀦𑀻𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑁂𑀳𑀺 ¶ 𑀯𑀺𑀬 𑀳𑀢𑁆𑀣𑀧𑀸𑀤𑁂𑀳𑀺 𑀭𑀚𑀢𑀤𑀸𑀫𑀲𑀤𑀺𑀲𑁂𑀳𑀺 𑀯𑀺𑀲𑀸𑀡𑁂𑀳𑀺 𑀫𑀡𑀺𑀕𑀼𑀴𑀺𑀓𑀧𑀝𑀺𑀪𑀸𑀕𑁂𑀳𑀺 𑀅𑀓𑁆𑀔𑀻𑀳𑀺 𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀲𑀤𑀺𑀲𑁂𑀦 𑀫𑀼𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑀭𑀺𑀬𑀸𑀧𑀺𑀲𑁆𑀲 𑀢𑀭𑀼𑀡𑀫𑀺𑀕𑀻 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑀸. 𑀢𑁂 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼, 𑀅𑀲𑀻𑀢𑀺𑀲𑀳𑀲𑁆𑀲𑀘𑀺𑀢𑁆𑀭𑀫𑀺𑀕𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀮𑀼𑀤𑁆𑀤𑀓𑀸 𑀫𑀺𑀕𑀯𑀻𑀣𑀻𑀲𑀼 𑀧𑀸𑀲𑁂 𑀑𑀟𑁆𑀟𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀸𑀦𑀁 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀧𑀸𑀤𑁂 𑀧𑀸𑀲𑁂𑀦 𑀩𑀚𑁆𑀛𑀺𑀢𑁆𑀯𑀸 ‘‘𑀙𑀺𑀦𑁆𑀤𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀓𑀟𑁆𑀠𑀺, 𑀘𑀫𑁆𑀫𑀁 𑀙𑀺𑀚𑁆𑀚𑀺, 𑀧𑀼𑀦 𑀆𑀓𑀟𑁆𑀠𑀦𑁆𑀢𑀲𑁆𑀲 𑀫𑀁𑀲𑀁 𑀙𑀺𑀚𑁆𑀚𑀺, 𑀧𑀼𑀦 𑀦𑁆𑀳𑀸𑀭𑀼 𑀙𑀺𑀚𑁆𑀚𑀺, 𑀧𑀸𑀲𑁄 𑀅𑀝𑁆𑀞𑀺𑀫𑀸𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀲𑁄 𑀧𑀸𑀲𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀩𑀤𑁆𑀥𑀭𑀯𑀁 𑀭𑀯𑀺. 𑀢𑀁 𑀲𑀼𑀢𑁆𑀯𑀸 𑀪𑀻𑀢𑁄 𑀫𑀺𑀕𑀕𑀡𑁄 𑀧𑀮𑀸𑀬𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀧𑀮𑀸𑀬𑀺𑀢𑁆𑀯𑀸 𑀫𑀺𑀕𑀸𑀦𑀁 𑀅𑀦𑁆𑀢𑀭𑁂 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀅𑀤𑀺𑀲𑁆𑀯𑀸 ‘‘𑀇𑀤𑀁 𑀪𑀬𑀁 𑀫𑀬𑁆𑀳𑀁 𑀧𑀺𑀬𑀲𑀸𑀫𑀺𑀓𑀲𑁆𑀲 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑁂𑀕𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑀻 𑀭𑁄𑀤𑀫𑀸𑀦𑀸 ‘‘𑀲𑀸𑀫𑀺 ¶ , 𑀢𑁆𑀯𑀁 𑀫𑀳𑀩𑁆𑀩𑀮𑁄, 𑀓𑀺𑀁 ¶ 𑀏𑀢𑀁 𑀧𑀸𑀲𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀙𑀺𑀦𑁆𑀤𑀸𑀳𑀺 𑀦’’𑀦𑁆𑀢𑀺 𑀢𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀯𑀺𑀓𑁆𑀓𑀫 𑀭𑁂 𑀳𑀭𑀺𑀧𑀸𑀤, 𑀯𑀺𑀓𑁆𑀓𑀫 𑀭𑁂 𑀫𑀳𑀸𑀫𑀺𑀕;

𑀙𑀺𑀦𑁆𑀤 𑀯𑀸𑀭𑀢𑁆𑀢𑀺𑀓𑀁 𑀧𑀸𑀲𑀁, 𑀦𑀸𑀳𑀁 𑀏𑀓𑀸 𑀯𑀦𑁂 𑀭𑀫𑁂’’𑀢𑀺.

𑀢𑀢𑁆𑀣 𑀯𑀺𑀓𑁆𑀓𑀫𑀸𑀢𑀺 𑀧𑀭𑀓𑁆𑀓𑀫, 𑀆𑀓𑀟𑁆𑀠𑀸𑀢𑀺 𑀅𑀢𑁆𑀣𑁄. 𑀭𑁂𑀢𑀺 𑀆𑀫𑀦𑁆𑀢𑀦𑁂 𑀦𑀺𑀧𑀸𑀢𑁄. 𑀳𑀭𑀺𑀧𑀸𑀤𑀸𑀢𑀺 𑀲𑀼𑀯𑀡𑁆𑀡𑀧𑀸𑀤. 𑀲𑀓𑀮𑀲𑀭𑀻𑀭𑀫𑁆𑀧𑀺 𑀢𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁, 𑀅𑀬𑀁 𑀧𑀦 𑀕𑀸𑀭𑀯𑁂𑀦𑁂𑀯𑀫𑀸𑀳. 𑀦𑀸𑀳𑀁 𑀏𑀓𑀸𑀢𑀺 𑀅𑀳𑀁 𑀢𑀬𑀸 𑀯𑀺𑀦𑀸 𑀏𑀓𑀺𑀓𑀸 𑀯𑀦𑁂 𑀦 𑀭𑀫𑀺𑀲𑁆𑀲𑀸𑀫𑀺, 𑀢𑀺𑀡𑁄𑀤𑀓𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀫𑀺𑀕𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁧.

‘‘𑀯𑀺𑀓𑁆𑀓𑀫𑀸𑀫𑀺 𑀦 𑀧𑀸𑀭𑁂𑀫𑀺, 𑀪𑀽𑀫𑀺𑀁 𑀲𑀼𑀫𑁆𑀪𑀸𑀫𑀺 𑀯𑁂𑀕𑀲𑀸;

𑀤𑀴𑁆𑀳𑁄 𑀯𑀸𑀭𑀢𑁆𑀢𑀺𑀓𑁄 𑀧𑀸𑀲𑁄, 𑀧𑀸𑀤𑀁 𑀫𑁂 𑀧𑀭𑀺𑀓𑀦𑁆𑀢𑀢𑀻’’𑀢𑀺.

𑀢𑀢𑁆𑀣 𑀯𑀺𑀓𑁆𑀓𑀫𑀸𑀫𑀻𑀢𑀺 𑀪𑀤𑁆𑀤𑁂, 𑀅𑀳𑀁 𑀯𑀻𑀭𑀺𑀬𑀁 𑀓𑀭𑁄𑀫𑀺. 𑀦 𑀧𑀸𑀭𑁂𑀫𑀻𑀢𑀺 𑀧𑀸𑀲𑀁 𑀙𑀺𑀦𑁆𑀤𑀺𑀢𑀼𑀁 𑀧𑀦 𑀦 𑀲𑀓𑁆𑀓𑁄𑀫𑀻𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀁 𑀲𑀼𑀫𑁆𑀪𑀸𑀫𑀻𑀢𑀺 𑀅𑀧𑀺 𑀦𑀸𑀫 𑀙𑀺𑀚𑁆𑀚𑁂𑀬𑁆𑀬𑀸𑀢𑀺 𑀧𑀸𑀤𑁂𑀦𑀸𑀧𑀺 𑀪𑀽𑀫𑀺𑀁 𑀧𑀳𑀭𑀸𑀫𑀺. 𑀯𑁂𑀕𑀲𑀸𑀢𑀺 𑀯𑁂𑀕𑁂𑀦. 𑀧𑀭𑀺𑀓𑀦𑁆𑀢𑀢𑀻𑀢𑀺 𑀘𑀫𑁆𑀫𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑁄 𑀲𑀫𑀦𑁆𑀢𑀸 𑀓𑀦𑁆𑀢𑀢𑀻𑀢𑀺.

𑀅𑀣 𑀦𑀁 𑀫𑀺𑀕𑀻 ‘‘𑀫𑀸 𑀪𑀸𑀬𑀺, 𑀲𑀸𑀫𑀺, 𑀅𑀳𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀮𑀼𑀤𑁆𑀤𑀓𑀁 𑀬𑀸𑀘𑀺𑀢𑁆𑀯𑀸 𑀢𑀯 𑀚𑀻𑀯𑀺𑀢𑀁 𑀆𑀳𑀭𑀺𑀲𑁆𑀲𑀸𑀫𑀺. 𑀲𑀘𑁂 𑀬𑀸𑀘𑀦𑀸𑀬 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀫𑀫 𑀚𑀻𑀯𑀺𑀢𑀫𑁆𑀧𑀺 𑀤𑀢𑁆𑀯𑀸 𑀢𑀯 𑀚𑀻𑀯𑀺𑀢𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀲𑀢𑁆𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀮𑁄𑀳𑀺𑀢𑀮𑀺𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀮𑀼𑀤𑁆𑀤𑀓𑁄𑀧𑀺 𑀅𑀲𑀺𑀜𑁆𑀘 𑀲𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺 𑀯𑀺𑀬 𑀆𑀕𑀘𑁆𑀙𑀢𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀺, 𑀮𑀼𑀤𑁆𑀤𑀓𑁄 𑀆𑀕𑀘𑁆𑀙𑀢𑀺, 𑀅𑀳𑀁 𑀅𑀢𑁆𑀢𑀦𑁄 𑀩𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀸 𑀪𑀸𑀬𑀻’’𑀢𑀺 𑀫𑀺𑀕𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀮𑀼𑀤𑁆𑀤𑀓𑀲𑁆𑀲 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀸𑀫𑀺, 𑀫𑀫 𑀲𑀸𑀫𑀺𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄, 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀁 𑀫𑀺𑀕𑀸𑀦𑀁 𑀭𑀸𑀚𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀫𑀺𑀕𑀭𑀸𑀚𑁂 𑀞𑀺𑀢𑁂𑀬𑁂𑀯 𑀅𑀢𑁆𑀢𑀦𑁄 𑀯𑀥𑀁 𑀬𑀸𑀘𑀦𑁆𑀢𑀻 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁨.

‘‘𑀅𑀢𑁆𑀣𑀭𑀲𑁆𑀲𑀼 ¶ 𑀧𑀮𑀸𑀲𑀸𑀦𑀺, 𑀅𑀲𑀺𑀁 𑀦𑀺𑀩𑁆𑀩𑀸𑀳 𑀮𑀼𑀤𑁆𑀤𑀓;

𑀧𑀞𑀫𑀁 𑀫𑀁 𑀯𑀥𑀺𑀢𑁆𑀯𑀸𑀦, 𑀳𑀦 𑀧𑀘𑁆𑀙𑀸 𑀫𑀳𑀸𑀫𑀺𑀕’’𑀦𑁆𑀢𑀺.

𑀢𑀢𑁆𑀣 ¶ 𑀧𑀮𑀸𑀲𑀸𑀦𑀻𑀢𑀺 𑀫𑀁𑀲𑀝𑁆𑀞𑀧𑀦𑀢𑁆𑀣𑀁 𑀧𑀮𑀸𑀲𑀧𑀡𑁆𑀡𑀸𑀦𑀺 𑀅𑀢𑁆𑀣𑀭𑀲𑁆𑀲𑀼. 𑀅𑀲𑀺𑀁 𑀦𑀺𑀩𑁆𑀩𑀸𑀳𑀸𑀢𑀺 𑀅𑀲𑀺𑀁 𑀓𑁄𑀲𑀢𑁄 𑀦𑀻𑀳𑀭.

𑀢𑀁 𑀲𑀼𑀢𑁆𑀯𑀸 𑀮𑀼𑀤𑁆𑀤𑀓𑁄 ‘‘𑀫𑀦𑀼𑀲𑁆𑀲𑀪𑀽𑀢𑀸 𑀢𑀸𑀯 𑀲𑀸𑀫𑀺𑀓𑀲𑁆𑀲 𑀅𑀢𑁆𑀣𑀸𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀅𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀢𑀺, 𑀫𑀦𑀼𑀲𑁆𑀲𑀪𑀸𑀲𑀸𑀬 𑀘 𑀫𑀥𑀼𑀭𑁂𑀦 𑀲𑀭𑁂𑀦 ¶ 𑀓𑀣𑁂𑀢𑀺, 𑀅𑀚𑁆𑀚 𑀇𑀫𑀺𑀲𑁆𑀲𑀸 𑀘 𑀧𑀢𑀺𑀦𑁄 𑀘𑀲𑁆𑀲𑀸 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁫𑁩.

‘‘𑀦 𑀫𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀪𑀸𑀲𑀦𑁆𑀢𑀺𑀁 𑀫𑀸𑀦𑀼𑀲𑀺𑀁 𑀫𑀺𑀕𑀺𑀁;

𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀔𑀻 𑀳𑁄𑀳𑀺, 𑀏𑀲𑁄 𑀘𑀸𑀧𑀺 𑀫𑀳𑀸𑀫𑀺𑀕𑁄’’𑀢𑀺.

𑀢𑀢𑁆𑀣 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸𑀢𑀺 𑀫𑀬𑀸 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀦𑀢𑁆𑀣𑀺. 𑀪𑀸𑀲𑀦𑁆𑀢𑀺𑀁 𑀫𑀸𑀦𑀼𑀲𑀺𑀁 𑀫𑀺𑀕𑀺𑀦𑁆𑀢𑀺 𑀅𑀳𑀜𑁆𑀳𑀺 𑀇𑀢𑁄 𑀧𑀼𑀩𑁆𑀩𑁂 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀪𑀸𑀲𑀦𑁆𑀢𑀺𑀁 𑀫𑀺𑀕𑀺𑀁 𑀦𑁂𑀯 𑀅𑀤𑁆𑀤𑀲𑀁 𑀦 𑀅𑀲𑁆𑀲𑁄𑀲𑀺𑀁. 𑀬𑁂𑀲𑀁 𑀧𑀦 ‘‘𑀦 𑀫𑁂 𑀲𑀼𑀢𑀸 𑀯𑀸 𑀤𑀺𑀝𑁆𑀞𑀸 𑀯𑀸, 𑀪𑀸𑀲𑀦𑁆𑀢𑀻 𑀫𑀸𑀦𑀼𑀲𑀻 𑀫𑀺𑀕𑀻’’𑀢𑀺 𑀧𑀸𑀴𑀺, 𑀢𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀅𑀢𑁆𑀣𑁄 𑀤𑀺𑀲𑁆𑀲𑀢𑀺. 𑀪𑀤𑁆𑀤𑁂𑀢𑀺 𑀪𑀤𑁆𑀤𑀓𑁂 𑀧𑀡𑁆𑀟𑀺𑀓𑁂 𑀉𑀧𑀸𑀬𑀓𑀼𑀲𑀮𑁂. 𑀇𑀢𑀺 𑀢𑀁 𑀆𑀮𑀧𑀺𑀢𑁆𑀯𑀸 𑀧𑀼𑀦 ‘‘𑀢𑁆𑀯𑀜𑁆𑀘 𑀏𑀲𑁄 𑀘𑀸𑀧𑀺 𑀫𑀳𑀸𑀫𑀺𑀕𑁄𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀲𑀼𑀔𑀻 𑀦𑀺𑀤𑁆𑀤𑀼𑀓𑁆𑀔𑀸 𑀳𑁄𑀣𑀸’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀮𑀼𑀤𑁆𑀤𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀸𑀲𑀺𑀬𑀸 𑀘𑀫𑁆𑀫𑀧𑀸𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑁂 𑀮𑀕𑁆𑀕𑀧𑀸𑀲𑀓𑀁 𑀲𑀡𑀺𑀓𑀁 𑀦𑀻𑀳𑀭𑀺𑀢𑁆𑀯𑀸 𑀦𑁆𑀳𑀸𑀭𑀼𑀦𑀸 𑀦𑁆𑀳𑀸𑀭𑀼𑀁, 𑀫𑀁𑀲𑁂𑀦 𑀫𑀁𑀲𑀁, 𑀘𑀫𑁆𑀫𑁂𑀦 𑀘𑀫𑁆𑀫𑀁 𑀧𑀝𑀺𑀧𑀸𑀝𑁂𑀢𑁆𑀯𑀸 𑀧𑀸𑀤𑀁 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀫𑀳𑀸𑀲𑀢𑁆𑀢𑀲𑁆𑀲 𑀧𑀽𑀭𑀺𑀢𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦 𑀮𑀼𑀤𑁆𑀤𑀓𑀲𑁆𑀲 𑀘 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀫𑀺𑀕𑀺𑀬𑀸 𑀘 𑀫𑁂𑀢𑁆𑀢𑀥𑀫𑁆𑀫𑀸𑀦𑀼𑀪𑀸𑀯𑁂𑀦 𑀦𑁆𑀳𑀸𑀭𑀼𑀫𑀁𑀲𑀘𑀫𑁆𑀫𑀸𑀦𑀺 𑀦𑁆𑀳𑀸𑀭𑀼𑀫𑀁𑀲𑀘𑀫𑁆𑀫𑁂𑀳𑀺 𑀖𑀝𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀲𑀼𑀔𑀻 𑀦𑀺𑀤𑁆𑀤𑀼𑀓𑁆𑀔𑁄 𑀅𑀝𑁆𑀞𑀸𑀲𑀺.

𑀫𑀺𑀕𑀻 𑀩𑁄𑀥𑀺𑀲𑀢𑁆𑀢𑀁 𑀲𑀼𑀔𑀺𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀮𑀼𑀤𑁆𑀤𑀓𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀻 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁫𑁪.

‘‘𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀫𑀺𑀕’’𑀦𑁆𑀢𑀺.

𑀢𑀢𑁆𑀣 ¶ 𑀮𑀼𑀤𑁆𑀤𑀓𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀓𑀺𑀭𑀺𑀬𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 𑀆𑀮𑀧𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁 𑀮𑀼𑀤𑁆𑀤𑁄 𑀫𑀬𑁆𑀳𑀁 𑀅𑀯𑀲𑁆𑀲𑀬𑁄 𑀚𑀸𑀢𑁄, 𑀫𑀬𑀸𑀧𑀺𑀲𑁆𑀲 𑀅𑀯𑀲𑁆𑀲𑀬𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑀢𑀻’’𑀢𑀺 ¶ 𑀕𑁄𑀘𑀭𑀪𑀽𑀫𑀺𑀬𑀁 𑀤𑀺𑀝𑁆𑀞𑀁 𑀏𑀓𑀁 𑀫𑀡𑀺𑀓𑁆𑀔𑀦𑁆𑀥𑀁 𑀢𑀲𑁆𑀲 𑀤𑀢𑁆𑀯𑀸 ¶ ‘‘𑀲𑀫𑁆𑀫, 𑀇𑀢𑁄 𑀧𑀝𑁆𑀞𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀫𑀸 𑀓𑀭𑀺, 𑀇𑀫𑀺𑀦𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀤𑀸𑀭𑀓𑁂 𑀧𑁄𑀲𑁂𑀦𑁆𑀢𑁄 𑀤𑀸𑀦𑀲𑀻𑀮𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀳𑀻’’𑀢𑀺 𑀢𑀲𑁆𑀲𑁄𑀯𑀸𑀤𑀁 𑀤𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑁄 𑀙𑀦𑁆𑀦𑁄 𑀅𑀳𑁄𑀲𑀺, 𑀫𑀺𑀕𑀻 𑀤𑀳𑀭𑀪𑀺𑀓𑁆𑀔𑀼𑀦𑀻, 𑀫𑀺𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀯𑀡𑁆𑀡𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁬𑁦] 𑁧𑁦. 𑀲𑀼𑀬𑁄𑀦𑀦𑁆𑀤𑀻𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀢𑀺 𑀕𑀦𑁆𑀥𑁄 𑀢𑀺𑀫𑀺𑀭𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀤𑀺𑀲𑁆𑀯𑀸’’𑀢𑀺 𑀯𑀢𑁆𑀯𑀸 ‘‘𑀅𑀮𑀗𑁆𑀓𑀢𑀫𑀸𑀢𑀼𑀕𑀸𑀫’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫𑁂𑀲 𑀪𑀺𑀓𑁆𑀔𑀼 𑀦 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀁, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀲𑀼𑀧𑀡𑁆𑀡𑀪𑀯𑀦𑁂 𑀓𑀢𑁆𑀯𑀸 𑀭𑀓𑁆𑀔𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀢𑀫𑁆𑀩𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀲𑀼𑀬𑁄𑀦𑀦𑁆𑀤𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺 𑀉𑀢𑁆𑀢𑀫𑀭𑀽𑀧𑀥𑀭𑀸. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀦𑀸𑀕𑀤𑀻𑀧𑁄 𑀲𑁂𑀤𑀼𑀫𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀤𑀻𑀧𑁂 𑀲𑀼𑀧𑀡𑁆𑀡𑀪𑀯𑀦𑁂 𑀯𑀲𑀢𑀺. 𑀲𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀢𑀫𑁆𑀩𑀭𑀸𑀚𑁂𑀦 𑀲𑀤𑁆𑀥𑀺𑀁 𑀫𑀸𑀡𑀯𑀓𑀯𑁂𑀲𑁂𑀦 𑀚𑀽𑀢𑀁 𑀓𑀻𑀴𑀢𑀺. 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀭𑀺𑀘𑀸𑀭𑀺𑀓𑀸 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀏𑀯𑀭𑀽𑀧𑁄 𑀦𑀸𑀫 𑀫𑀸𑀡𑀯𑀓𑁄 𑀚𑀽𑀢𑀁 𑀓𑀻𑀴𑀢𑀻’’𑀢𑀺 𑀲𑀼𑀬𑁄𑀦𑀦𑁆𑀤𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀼𑀢𑁆𑀯𑀸 𑀢𑀁 𑀤𑀝𑁆𑀞𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀚𑀽𑀢𑀫𑀡𑁆𑀟𑀮𑀁 𑀆𑀕𑀦𑁆𑀢𑁆𑀯𑀸 𑀧𑀭𑀺𑀘𑀸𑀭𑀺𑀓𑀸𑀦𑀁 ¶ 𑀅𑀦𑁆𑀢𑀭𑁂 𑀞𑀺𑀢𑀸 𑀦𑀁 𑀑𑀮𑁄𑀓𑁂𑀲𑀺. 𑀲𑁄𑀧𑀺 𑀤𑁂𑀯𑀺𑀁 𑀑𑀮𑁄𑀓𑁂𑀲𑀺. 𑀤𑁆𑀯𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀲𑀼𑀧𑀡𑁆𑀡𑀭𑀸𑀚𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀕𑀭𑁂 𑀯𑀸𑀢𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀕𑁂𑀳𑀧𑀢𑀦𑀪𑀬𑁂𑀦 𑀭𑀸𑀚𑀦𑀺𑀯𑁂𑀲𑀦𑀸 𑀫𑀦𑀼𑀲𑁆𑀲𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀤𑁂𑀯𑀺𑀁 ¶ 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀦𑀸𑀕𑀤𑀻𑀧𑁂 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀸𑀯𑀺𑀲𑀺 ¶ 𑀲𑀼𑀬𑁄𑀦𑀦𑁆𑀤𑀺𑀬𑀸 𑀕𑀢𑀝𑁆𑀞𑀸𑀦𑀁 𑀚𑀸𑀦𑀦𑁆𑀢𑀸 𑀦𑀸𑀫 𑀦𑀸𑀳𑁂𑀲𑀼𑀁. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀫𑀸𑀦𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀚𑀽𑀢𑀁 𑀓𑀻𑀴𑀢𑀺.

𑀭𑀜𑁆𑀜𑁄 𑀧𑀦 𑀲𑀕𑁆𑀕𑁄 𑀦𑀸𑀫 𑀕𑀦𑁆𑀥𑀩𑁆𑀩𑁄 𑀅𑀢𑁆𑀣𑀺, 𑀲𑁄 𑀤𑁂𑀯𑀺𑀬𑀸 𑀕𑀢𑀝𑁆𑀞𑀸𑀦𑀁 𑀅𑀚𑀸𑀦𑀦𑁆𑀢𑁄 𑀢𑀁 𑀕𑀦𑁆𑀥𑀩𑁆𑀩𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑀸𑀢, 𑀕𑀦𑁆𑀥𑀩𑁆𑀩 𑀲𑀩𑁆𑀩𑀁 𑀣𑀮𑀚𑀮𑀧𑀣𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀤𑁂𑀯𑀺𑀬𑀸 𑀕𑀢𑀝𑁆𑀞𑀸𑀦𑀁 𑀧𑀲𑁆𑀲𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀧𑀭𑀺𑀩𑁆𑀩𑀬𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀭𑀕𑀸𑀫𑀢𑁄 𑀧𑀝𑁆𑀞𑀸𑀬 𑀯𑀺𑀘𑀺𑀦𑀦𑁆𑀢𑁄 𑀓𑀼𑀭𑀼𑀓𑀘𑁆𑀙𑀁 𑀧𑀸𑀧𑀼𑀡𑀺. 𑀢𑀤𑀸 𑀓𑀼𑀭𑀼𑀓𑀘𑁆𑀙𑀯𑀸𑀡𑀺𑀚𑀸 𑀦𑀸𑀯𑀸𑀬 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁 𑀕𑀦𑁆𑀥𑀩𑁆𑀩𑁄 𑀦𑀸𑀯𑀸𑀬 𑀯𑁂𑀢𑀦𑀁 𑀔𑀡𑁆𑀟𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀕𑀦𑁆𑀥𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀺, 𑀫𑀫𑁆𑀧𑀺 𑀦𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀢𑀫𑁆𑀧𑀺 𑀆𑀭𑁄𑀧𑁂𑀢𑁆𑀯𑀸 𑀦𑀸𑀯𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑁂 𑀲𑀼𑀔𑀧𑀬𑀸𑀢𑀸𑀬 𑀦𑀸𑀯𑀸𑀬 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀕𑀦𑁆𑀥𑀩𑁆𑀩𑀁 𑀦𑁄 𑀓𑀭𑁄𑀳𑀻’’𑀢𑀺 𑀆𑀳𑀁𑀲𑀼. ‘‘𑀅𑀳𑀁 𑀘𑁂 𑀕𑀦𑁆𑀥𑀩𑁆𑀩𑀁 𑀓𑀭𑁂𑀬𑁆𑀬𑀁, 𑀫𑀬𑀺 𑀧𑀦 𑀕𑀦𑁆𑀥𑀩𑁆𑀩𑀁 𑀓𑀭𑁄𑀦𑁆𑀢𑁂 𑀫𑀘𑁆𑀙𑀸 𑀘𑀮𑀺𑀲𑁆𑀲𑀦𑁆𑀢𑀺, 𑀅𑀣 𑀯𑁄 𑀦𑀸𑀯𑁄 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺. ‘‘𑀫𑀦𑀼𑀲𑁆𑀲𑀫𑀢𑁆𑀢𑁂 𑀕𑀦𑁆𑀥𑀩𑁆𑀩𑀁 𑀓𑀭𑁄𑀦𑁆𑀢𑁂 𑀫𑀘𑁆𑀙𑀸𑀦𑀁 𑀘𑀮𑀦𑀁 𑀦𑀸𑀫 𑀦𑀢𑁆𑀣𑀺, 𑀓𑀭𑁄𑀳𑀻’’𑀢𑀺. ‘‘𑀢𑁂𑀦 𑀳𑀺 𑀫𑀸 𑀫𑀬𑁆𑀳𑀁 𑀓𑀼𑀚𑁆𑀛𑀺𑀢𑁆𑀣𑀸’’𑀢𑀺 𑀯𑀻𑀡𑀁 𑀫𑀼𑀘𑁆𑀙𑀺𑀢𑁆𑀯𑀸 𑀢𑀦𑁆𑀢𑀺𑀲𑁆𑀲𑀭𑁂𑀦 𑀕𑀻𑀢𑀲𑁆𑀲𑀭𑀁, 𑀕𑀻𑀢𑀲𑁆𑀲𑀭𑁂𑀦 𑀢𑀦𑁆𑀢𑀺𑀲𑁆𑀲𑀭𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀦𑁆𑀥𑀩𑁆𑀩𑀁 𑀅𑀓𑀸𑀲𑀺. 𑀢𑁂𑀦 𑀲𑀤𑁆𑀤𑁂𑀦 𑀲𑀫𑁆𑀫𑀢𑁆𑀢𑀸 𑀳𑀼𑀢𑁆𑀯𑀸 𑀫𑀘𑁆𑀙𑀸 𑀘𑀮𑀺𑀁𑀲𑀼.

𑀅𑀣𑁂𑀓𑁄 𑀫𑀓𑀭𑁄 𑀉𑀧𑁆𑀧𑀢𑀺𑀢𑁆𑀯𑀸 𑀦𑀸𑀯𑀸𑀬 𑀧𑀢𑀦𑁆𑀢𑁄 𑀦𑀸𑀯𑀁 𑀪𑀺𑀦𑁆𑀤𑀺. 𑀲𑀕𑁆𑀕𑁄 𑀨𑀮𑀓𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀬𑀣𑀸𑀯𑀸𑀢𑀁 𑀕𑀘𑁆𑀙𑀦𑁆𑀢𑁄 𑀦𑀸𑀕𑀤𑀻𑀧𑁂 𑀲𑀼𑀧𑀡𑁆𑀡𑀪𑀯𑀦𑀲𑁆𑀲 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀧𑀼𑀡𑀺. 𑀲𑀼𑀬𑁄𑀦𑀦𑁆𑀤𑀻𑀧𑀺 𑀤𑁂𑀯𑀻 𑀲𑀼𑀧𑀡𑁆𑀡𑀭𑀸𑀚𑀲𑁆𑀲 𑀚𑀽𑀢𑀁 𑀓𑀻𑀴𑀺𑀢𑀼𑀁 𑀕𑀢𑀓𑀸𑀮𑁂 𑀯𑀺𑀫𑀸𑀦𑀸 𑀑𑀢𑀭𑀺𑀢𑁆𑀯𑀸 ¶ 𑀯𑁂𑀮𑀦𑁆𑀢𑁂 𑀯𑀺𑀘𑀭𑀦𑁆𑀢𑀻 𑀲𑀕𑁆𑀕𑀁 𑀕𑀦𑁆𑀥𑀩𑁆𑀩𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀓𑀣𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀲𑀩𑁆𑀩𑀁 𑀓𑀣𑁂𑀲𑀺. ‘‘𑀢𑁂𑀦 𑀳𑀺 𑀫𑀸 𑀪𑀸𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀩𑀸𑀳𑀸𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀫𑀲𑁆𑀲𑀢𑁆𑀣𑀓𑀸𑀮𑁂 𑀤𑀺𑀩𑁆𑀩𑀪𑁄𑀚𑀦𑀁 𑀤𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀼𑀦 𑀤𑀺𑀩𑁆𑀩𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀏𑀯𑀁 𑀤𑀺𑀯𑀲𑀁 𑀧𑀭𑀺𑀕𑁆𑀕𑀳𑀫𑀸𑀦𑀸 𑀲𑀼𑀧𑀡𑁆𑀡𑀭𑀜𑁆𑀜𑁄 𑀆𑀕𑀫𑀦𑀯𑁂𑀮𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀢𑀓𑀸𑀮𑁂 𑀢𑁂𑀦 𑀲𑀤𑁆𑀥𑀺𑀁 𑀓𑀺𑀮𑁂𑀲𑀯𑀲𑁂𑀦 𑀅𑀪𑀺𑀭𑀫𑀺. 𑀢𑀢𑁄 𑀫𑀸𑀲𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀤𑀸𑀭𑀼𑀤𑀓𑀕𑀳𑀡𑀢𑁆𑀣𑀸𑀬 𑀢𑀲𑁆𑀫𑀺𑀁 𑀤𑀻𑀧𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑀁 𑀲𑀫𑁆𑀧𑀢𑁆𑀢𑀸. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀩𑀸𑀭𑀸𑀡𑀲𑀺𑀁 ¶ 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀯 𑀢𑀲𑁆𑀲 𑀚𑀽𑀢𑀓𑀻𑀴𑀦𑀯𑁂𑀮𑀸𑀬 𑀯𑀻𑀡𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀕𑀦𑁆𑀥𑀩𑁆𑀩𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁫.

‘‘𑀯𑀸𑀢𑀺 𑀕𑀦𑁆𑀥𑁄 𑀢𑀺𑀫𑀺𑀭𑀸𑀦𑀁, 𑀓𑀼𑀲𑀫𑀼𑀤𑁆𑀤𑁄 𑀘 𑀖𑁄𑀲𑀯𑀸;

𑀤𑀽𑀭𑁂 𑀇𑀢𑁄 𑀲𑀼𑀬𑁄𑀦𑀦𑁆𑀤𑀻, 𑀢𑀫𑁆𑀩 𑀓𑀸𑀫𑀸 𑀢𑀼𑀤𑀦𑁆𑀢𑀺 𑀫’’𑀦𑁆𑀢𑀺.

𑀢𑀢𑁆𑀣 ¶ 𑀢𑀺𑀫𑀺𑀭𑀸𑀦𑀦𑁆𑀢𑀺 𑀢𑀺𑀫𑀺𑀭𑀭𑀼𑀓𑁆𑀔𑀧𑀼𑀧𑁆𑀨𑀸𑀦𑀁. 𑀢𑀁 𑀓𑀺𑀭 𑀦𑀺𑀕𑁆𑀭𑁄𑀥𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀺𑀫𑀺𑀭𑀭𑀼𑀓𑁆𑀔𑀸 𑀅𑀢𑁆𑀣𑀺, 𑀢𑁂 𑀲𑀦𑁆𑀥𑀸𑀬𑁂𑀯𑀁 𑀯𑀤𑀢𑀺. 𑀓𑀼𑀲𑀫𑀼𑀤𑁆𑀤𑁄𑀢𑀺 𑀔𑀼𑀤𑁆𑀤𑀓𑀲𑀫𑀼𑀤𑁆𑀤𑁄. 𑀖𑁄𑀲𑀯𑀸𑀢𑀺 𑀫𑀳𑀸𑀭𑀯𑁄. 𑀢𑀲𑁆𑀲𑁂𑀯 𑀦𑀺𑀕𑁆𑀭𑁄𑀥𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀼𑀤𑁆𑀤𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀇𑀢𑁄𑀢𑀺 𑀇𑀫𑀫𑁆𑀳𑀸 𑀦𑀕𑀭𑀸. 𑀢𑀫𑁆𑀩𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀅𑀣 𑀯𑀸 𑀢𑀫𑁆𑀩𑀓𑀸𑀫𑀸𑀢𑀺 𑀢𑀫𑁆𑀩𑁂𑀦 𑀓𑀸𑀫𑀺𑀢𑀓𑀸𑀫𑀸 𑀢𑀫𑁆𑀩𑀓𑀸𑀫𑀸 𑀦𑀸𑀫. 𑀢𑁂 𑀫𑀁 𑀳𑀤𑀬𑁂 𑀯𑀺𑀚𑁆𑀛𑀦𑁆𑀢𑀻𑀢𑀺 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀼𑀧𑀡𑁆𑀡𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁬.

‘‘𑀓𑀣𑀁 𑀲𑀫𑀼𑀤𑁆𑀤𑀫𑀢𑀭𑀺, 𑀓𑀣𑀁 𑀅𑀤𑁆𑀤𑀓𑁆𑀔𑀺 𑀲𑁂𑀤𑀼𑀫𑀁;

𑀓𑀣𑀁 𑀢𑀲𑁆𑀲𑀸 𑀘 𑀢𑀼𑀬𑁆𑀳𑀜𑁆𑀘, 𑀅𑀳𑀼 𑀲𑀕𑁆𑀕 𑀲𑀫𑀸𑀕𑀫𑁄’’𑀢𑀺.

𑀢𑀢𑁆𑀣 𑀲𑁂𑀤𑀼𑀫𑀦𑁆𑀢𑀺 𑀲𑁂𑀤𑀼𑀫𑀤𑀻𑀧𑀁.

𑀢𑀢𑁄 ¶ 𑀲𑀕𑁆𑀕𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁭.

‘‘𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀫𑀓𑀭𑁂𑀳𑀺 𑀅𑀪𑀺𑀤𑀸 𑀦𑀸𑀯𑀸, 𑀨𑀮𑀓𑁂𑀦𑀸𑀳𑀫𑀧𑁆𑀮𑀯𑀺𑀁.

𑁫𑁮.

‘‘𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸, 𑀦𑀺𑀘𑁆𑀘𑀁 𑀘𑀦𑁆𑀤𑀦𑀕𑀦𑁆𑀥𑀺𑀦𑀻;

𑀅𑀗𑁆𑀕𑁂𑀦 𑀉𑀤𑁆𑀥𑀭𑀻 𑀪𑀤𑁆𑀤𑀸, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲𑀁.

𑁫𑁯.

‘‘𑀲𑀸 𑀫𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀅𑀢𑁆𑀢𑀦𑀸𑀧𑀺 𑀘 𑀫𑀦𑁆𑀤𑀓𑁆𑀔𑀻, 𑀏𑀯𑀁 𑀢𑀫𑁆𑀩 𑀯𑀺𑀚𑀸𑀦𑀳𑀻’’𑀢𑀺.

𑀢𑀢𑁆𑀣 𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸𑀢𑀺 𑀏𑀯𑀁 𑀨𑀮𑀓𑁂𑀦 𑀢𑀻𑀭𑀁 𑀉𑀢𑁆𑀢𑀺𑀡𑁆𑀡𑀁 𑀫𑀁 𑀲𑀫𑀼𑀤𑁆𑀤𑀢𑀻𑀭𑁂 𑀯𑀺𑀘𑀭𑀦𑁆𑀢𑀻 𑀲𑀸 𑀤𑀺𑀲𑁆𑀯𑀸 ‘‘𑀫𑀸 𑀪𑀸𑀬𑀻’’𑀢𑀺 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸 𑀯𑀘𑀦𑁂𑀦 𑀲𑀫𑀲𑁆𑀲𑀸𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀗𑁆𑀕𑁂𑀦𑀸𑀢𑀺 𑀩𑀸𑀳𑀼𑀬𑀼𑀕𑀴𑀁 𑀇𑀥 ‘‘𑀅𑀗𑁆𑀕𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀪𑀤𑁆𑀤𑀸𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀲𑀸 𑀫𑀁 𑀅𑀦𑁆𑀦𑁂𑀦𑀸𑀢𑀺 𑀲𑀸 𑀫𑀁 𑀏𑀢𑁂𑀦 𑀅𑀦𑁆𑀦𑀸𑀤𑀺𑀦𑀸 ¶ 𑀲𑀦𑁆𑀢𑀧𑁆𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑀸𑀧𑀺 𑀘𑀸𑀢𑀺 𑀦 𑀓𑁂𑀯𑀮𑀁 𑀅𑀦𑁆𑀦𑀸𑀤𑀻𑀳𑁂𑀯, 𑀅𑀢𑁆𑀢𑀦𑀸𑀧𑀺 𑀫𑀁 𑀅𑀪𑀺𑀭𑀫𑁂𑀦𑁆𑀢𑀻 𑀲𑀦𑁆𑀢𑀧𑁆𑀧𑁂𑀲𑀻𑀢𑀺 𑀤𑀻𑀧𑁂𑀢𑀺. 𑀫𑀦𑁆𑀤𑀓𑁆𑀔𑀻𑀢𑀺 𑀫𑀦𑁆𑀤𑀤𑀲𑁆𑀲𑀦𑀻, 𑀫𑀼𑀤𑀼𑀦𑀸 𑀆𑀓𑀸𑀭𑁂𑀦 𑀑𑀮𑁄𑀓𑀦𑀲𑀻𑀮𑀸𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀢𑁆𑀢𑀓𑁆𑀔𑀻’’𑀢𑀺𑀧𑀺 𑀧𑀸𑀞𑁄, 𑀫𑀤𑀫𑀢𑁆𑀢𑁂𑀳𑀺 𑀯𑀺𑀬 𑀅𑀓𑁆𑀔𑀻𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀫𑁆𑀩𑀸𑀢𑀺 𑀏𑀯𑀁 𑀢𑀫𑁆𑀩𑀭𑀸𑀚 𑀚𑀸𑀦𑀸𑀳𑀻𑀢𑀺.

𑀲𑀼𑀧𑀡𑁆𑀡𑁄 𑀕𑀦𑁆𑀥𑀩𑁆𑀩𑀲𑁆𑀲 𑀓𑀣𑁂𑀦𑁆𑀢𑀲𑁆𑀲𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀅𑀳𑀁 𑀲𑀼𑀧𑀡𑁆𑀡𑀪𑀯𑀦𑁂 𑀯𑀲𑀦𑁆𑀢𑁄𑀧𑀺 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀓𑀺𑀁 𑀫𑁂 𑀢𑀸𑀬 𑀤𑀼𑀲𑁆𑀲𑀻𑀮𑀸𑀬𑀸’’𑀢𑀺 𑀢𑀁 𑀆𑀦𑁂𑀢𑁆𑀯𑀸 𑀭𑀜𑁆𑀜𑁄 𑀧𑀝𑀺𑀤𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦𑀸𑀕𑀘𑁆𑀙𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀼𑀧𑀡𑁆𑀡𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀼𑀬𑁄𑀦𑀦𑁆𑀤𑀻𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀫𑀡𑀺𑀓𑀼𑀡𑁆𑀟𑀮𑀯𑀕𑁆𑀕𑁄 𑀧𑀞𑀫𑁄.

𑁨. 𑀯𑀡𑁆𑀡𑀸𑀭𑁄𑀳𑀯𑀕𑁆𑀕𑁄

[𑁩𑁬𑁧] 𑁧. 𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀯𑀡𑁆𑀡𑀦𑀸

𑀯𑀡𑁆𑀡𑀸𑀭𑁄𑀳𑁂𑀦𑀸𑀢𑀺 ¶ ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀉𑀪𑁄𑀧𑀺 𑀫𑀳𑀸𑀣𑁂𑀭𑀸 ‘‘𑀇𑀫𑀁 𑀅𑀦𑁆𑀢𑁄𑀯𑀲𑁆𑀲𑀁 𑀲𑀼𑀜𑁆𑀜𑀸𑀕𑀸𑀭𑀁 𑀅𑀦𑀼𑀩𑁆𑀭𑀽𑀳𑁂𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀡𑀁 𑀧𑀳𑀸𑀬 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑁂 𑀯𑀺𑀳𑀭𑀺𑀁𑀲𑀼. 𑀅𑀜𑁆𑀜𑀢𑀭𑁄𑀧𑀺 𑀯𑀺𑀖𑀸𑀲𑀸𑀤𑀧𑀼𑀭𑀺𑀲𑁄 𑀣𑁂𑀭𑀸𑀦𑀁 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣𑁂𑀯 𑀏𑀓𑀫𑀦𑁆𑀢𑁂 𑀯𑀲𑀺. 𑀲𑁄 𑀣𑁂𑀭𑀸𑀦𑀁 𑀲𑀫𑀕𑁆𑀕𑀯𑀸𑀲𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀢𑀺𑀯𑀺𑀬 𑀲𑀫𑀕𑁆𑀕𑀸 𑀯𑀲𑀦𑁆𑀢𑀺, 𑀲𑀓𑁆𑀓𑀸 𑀦𑀼 𑀔𑁄 𑀏𑀢𑁂 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀬𑁆𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀢𑀼𑀫𑁆𑀳𑀸𑀓𑀁 𑀓𑀺𑀜𑁆𑀘𑀺 𑀯𑁂𑀭𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀧𑀦𑀸𑀯𑀼𑀲𑁄’’𑀢𑀺. 𑀏𑀲, 𑀪𑀦𑁆𑀢𑁂, 𑀫𑀫 𑀆𑀕𑀢𑀓𑀸𑀮𑁂 ‘‘𑀲𑀸𑀭𑀺𑀧𑀼𑀢𑁆𑀢𑁄 ¶ 𑀦𑀸𑀫 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑁂𑀳𑀺 𑀯𑀸 𑀲𑀼𑀢𑀕𑀦𑁆𑀣𑀧𑀝𑀺𑀯𑁂𑀥𑀇𑀤𑁆𑀥𑀻𑀳𑀺 𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀓𑀺𑀁 𑀧𑀳𑁄𑀢𑀻’’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀕𑀼𑀡𑀫𑁂𑀯 𑀓𑀣𑁂𑀲𑀻𑀢𑀺. 𑀣𑁂𑀭𑁄 𑀲𑀺𑀢𑀁 𑀓𑀢𑁆𑀯𑀸 ‘‘𑀕𑀘𑁆𑀙 𑀢𑁆𑀯𑀁 𑀆𑀯𑀼𑀲𑁄’’𑀢𑀺 𑀆𑀳.

𑀲𑁄 𑀅𑀧𑀭𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀓𑀣𑁂𑀲𑀺. 𑀲𑁄𑀧𑀺 𑀦𑀁 𑀲𑀺𑀢𑀁 𑀓𑀢𑁆𑀯𑀸 ‘‘𑀕𑀘𑁆𑀙, 𑀢𑁆𑀯𑀁, 𑀆𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀏𑀲𑁄 𑀯𑀺𑀖𑀸𑀲𑀸𑀤𑁄 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀓𑀣𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫𑀸𑀯𑀼𑀲𑁄, 𑀫𑀬𑁆𑀳𑀫𑁆𑀧𑀺 𑀲𑀦𑁆𑀢𑀺𑀓𑁂 𑀓𑀣𑁂𑀲𑀺, 𑀇𑀫𑀁 𑀦𑀻𑀳𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀲𑀸𑀥𑀼, 𑀆𑀯𑀼𑀲𑁄, 𑀦𑀻𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀣𑁂𑀭𑁄 ‘‘𑀫𑀸 𑀇𑀥 𑀯𑀲𑀻’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀢𑀁 𑀦𑀻𑀳𑀭𑀺. 𑀢𑁂 𑀉𑀪𑁄𑀧𑀺 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀔𑁂𑀦 𑀯𑀲𑁆𑀲𑀁 𑀯𑀲𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀏𑀓𑁄 𑀯𑀺𑀖𑀸𑀲𑀸𑀤𑁄 𑀅𑀫𑁆𑀳𑁂 𑀪𑀺𑀦𑁆𑀤𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀪𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀮𑀸𑀬𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀢𑀼𑀫𑁆𑀳𑁂 ‘𑀪𑀺𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀪𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀮𑀸𑀬𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀢𑀤𑀸 𑀲𑀻𑀳𑁄 𑀘 𑀩𑁆𑀬𑀕𑁆𑀖𑁄 ¶ 𑀘 𑀅𑀭𑀜𑁆𑀜𑁂 𑀧𑀩𑁆𑀩𑀢𑀕𑀼𑀳𑀸𑀬𑀁 𑀯𑀲𑀦𑁆𑀢𑀺. 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀢𑁂 𑀉𑀧𑀝𑁆𑀞𑀳𑀦𑁆𑀢𑁄 𑀢𑁂𑀲𑀁 ¶ 𑀯𑀺𑀖𑀸𑀲𑀁 𑀔𑀸𑀤𑀺𑀢𑁆𑀯𑀸 𑀫𑀳𑀸𑀓𑀸𑀬𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀲𑀻𑀳𑀩𑁆𑀬𑀕𑁆𑀖𑀸𑀦𑀁 𑀫𑀁𑀲𑀁 𑀦 𑀔𑀸𑀤𑀺𑀢𑀧𑀼𑀩𑁆𑀩𑀁, 𑀫𑀬𑀸 𑀇𑀫𑁂 𑀤𑁆𑀯𑁂 𑀚𑀦𑁂 𑀪𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁄 𑀦𑁂𑀲𑀁 𑀓𑀮𑀳𑀁 𑀓𑀢𑁆𑀯𑀸 𑀫𑀢𑀸𑀦𑀁 𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀻𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀩𑁆𑀬𑀕𑁆𑀖𑁂𑀦 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀯𑁂𑀭𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀧𑀦, 𑀲𑀫𑁆𑀫𑀸’’𑀢𑀺? 𑀏𑀲, 𑀪𑀦𑁆𑀢𑁂, 𑀫𑀫𑀸𑀕𑀢𑀓𑀸𑀮𑁂 ‘‘𑀲𑀻𑀳𑁄 𑀦𑀸𑀫 𑀲𑀭𑀻𑀭𑀯𑀡𑁆𑀡𑁂𑀦 𑀯𑀸 𑀆𑀭𑁄𑀳𑀧𑀭𑀺𑀡𑀸𑀳𑁂𑀦 𑀯𑀸 𑀚𑀸𑀢𑀺𑀩𑀮𑀯𑀻𑀭𑀺𑀬𑁂𑀳𑀺 𑀯𑀸 𑀫𑀫 𑀓𑀮𑀪𑀸𑀕𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀕𑀼𑀡𑀫𑁂𑀯 𑀓𑀣𑁂𑀲𑀻𑀢𑀺. 𑀅𑀣 𑀦𑀁 𑀲𑀻𑀳𑁄 ‘‘𑀕𑀘𑁆𑀙 𑀢𑁆𑀯𑀁, 𑀦 𑀲𑁄 𑀏𑀯𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀆𑀳. 𑀩𑁆𑀬𑀕𑁆𑀖𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀩𑁆𑀬𑀕𑁆𑀖𑁄𑀧𑀺 𑀲𑀻𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀓𑀺𑀭 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑁂𑀲𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁦.

‘‘𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀩𑀸𑀳𑀼 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀤𑀸𑀞 𑀇𑀢𑀺 𑀪𑀸𑀲𑀲𑀻’’𑀢𑀺.

𑀢𑀢𑁆𑀣 ¶ 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘𑀸𑀢𑀺 𑀓𑀸𑀬𑀩𑀮𑁂𑀦 𑀘𑁂𑀯 𑀯𑀻𑀭𑀺𑀬𑀩𑀮𑁂𑀦 𑀘. 𑀲𑀼𑀩𑀸𑀳𑀼 𑀦 𑀫𑀬𑀸 𑀲𑁂𑀬𑁆𑀬𑁄𑀢𑀺 𑀅𑀬𑀁 𑀲𑀼𑀩𑀸𑀳𑀼 𑀦𑀸𑀫 𑀩𑁆𑀬𑀕𑁆𑀖𑁄 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀫𑀬𑀸 𑀦𑁂𑀯 𑀲𑀤𑀺𑀲𑁄 𑀦 𑀉𑀢𑁆𑀢𑀭𑀺𑀢𑀭𑁄𑀢𑀺 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀲𑁄𑀪𑀦𑀸𑀳𑀺 𑀤𑀸𑀞𑀸𑀳𑀺 𑀲𑀫𑀦𑁆𑀦𑀸𑀕𑀢 𑀲𑀼𑀤𑀸𑀞 𑀫𑀺𑀕𑀭𑀸𑀚, 𑀏𑀯𑀁 𑀯𑀤𑁂𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀼𑀤𑀸𑀞𑁄 𑀲𑁂𑀲𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁧.

‘‘𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀤𑀸𑀞𑁄 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀩𑀸𑀳𑀼 𑀇𑀢𑀺 𑀪𑀸𑀲𑀲𑀺.

𑁬𑁨.

‘‘𑀏𑀯𑀁 𑀘𑁂 𑀫𑀁 𑀯𑀺𑀳𑀭𑀦𑁆𑀢𑀁, 𑀲𑀼𑀩𑀸𑀳𑀼 𑀲𑀫𑁆𑀫 𑀤𑀼𑀩𑁆𑀪𑀲𑀺;

𑀦 𑀤𑀸𑀦𑀸𑀳𑀁 𑀢𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀫𑀪𑀺𑀭𑁄𑀘𑀬𑁂.

𑁬𑁩.

‘‘𑀬𑁄 𑀧𑀭𑁂𑀲𑀁 𑀯𑀘𑀦𑀸𑀦𑀺, 𑀲𑀤𑁆𑀤𑀳𑁂𑀬𑁆𑀬 𑀬𑀣𑀸𑀢𑀣𑀁;

𑀔𑀺𑀧𑁆𑀧𑀁 𑀪𑀺𑀚𑁆𑀚𑁂𑀣 𑀫𑀺𑀢𑁆𑀢𑀲𑁆𑀫𑀺𑀁, 𑀯𑁂𑀭𑀜𑁆𑀘 𑀧𑀲𑀯𑁂 𑀩𑀳𑀼𑀁.

𑁬𑁪.

‘‘𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻;

𑀬𑀲𑁆𑀫𑀺𑀜𑁆𑀘 ¶ 𑀲𑁂𑀢𑀻 𑀉𑀭𑀲𑀻𑀯 𑀧𑀼𑀢𑁆𑀢𑁄, 𑀲 𑀯𑁂 𑀫𑀺𑀢𑁆𑀢𑁄 𑀬𑁄 𑀅𑀪𑁂𑀚𑁆𑀚𑁄 𑀧𑀭𑁂𑀳𑀻’’𑀢𑀺.

𑀢𑀢𑁆𑀣 𑀲𑀫𑁆𑀫𑀸𑀢𑀺 ¶ 𑀯𑀬𑀲𑁆𑀲. 𑀤𑀼𑀩𑁆𑀪𑀲𑀻𑀢𑀺 𑀬𑀤𑀺 𑀏𑀯𑀁 𑀢𑀬𑀸 𑀲𑀤𑁆𑀥𑀺𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑀁 𑀫𑀁 𑀲𑀺𑀗𑁆𑀕𑀸𑀮𑀲𑁆𑀲 𑀓𑀣𑀁 𑀕𑀳𑁂𑀢𑁆𑀯𑀸 𑀢𑁆𑀯𑀁 𑀤𑀼𑀩𑁆𑀪𑀲𑀺 𑀳𑀦𑀺𑀢𑀼𑀁 𑀇𑀘𑁆𑀙𑀲𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀅𑀳𑀁 𑀢𑀬𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦 𑀅𑀪𑀺𑀭𑁄𑀘𑀬𑁂. 𑀬𑀣𑀸𑀢𑀣𑀦𑁆𑀢𑀺 𑀢𑀣𑀢𑁄 𑀬𑀣𑀸𑀢𑀣𑀁 𑀬𑀣𑀸𑀢𑀘𑁆𑀙𑀁 𑀅𑀯𑀺𑀲𑀁𑀯𑀸𑀤𑀓𑁂𑀦 𑀅𑀭𑀺𑀬𑁂𑀦 𑀯𑀼𑀢𑁆𑀢𑀯𑀘𑀦𑀁 𑀲𑀤𑁆𑀥𑀸𑀢𑀩𑁆𑀩𑀁. 𑀏𑀯𑀁 𑀬𑁄 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀧𑀭𑁂𑀲𑀁 𑀯𑀘𑀦𑀸𑀦𑀺 𑀲𑀤𑁆𑀤𑀳𑁂𑀣𑀸𑀢𑀺 𑀅𑀢𑁆𑀣𑁄. 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄𑀢𑀺 𑀬𑁄 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀫𑀺𑀢𑁆𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀦 𑀤𑁂𑀢𑀺, 𑀲𑁄 𑀫𑀺𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀪𑁂𑀤𑀸𑀲𑀗𑁆𑀓𑀻𑀢𑀺 ‘‘𑀅𑀚𑁆𑀚 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀲𑁆𑀯𑁂 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀫𑀺𑀢𑁆𑀢𑀲𑁆𑀲 𑀪𑁂𑀤𑀫𑁂𑀯 𑀆𑀲𑀗𑁆𑀓𑀢𑀺. 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻𑀢𑀺 𑀙𑀺𑀤𑁆𑀤𑀁 𑀯𑀺𑀯𑀭𑀫𑁂𑀯 𑀧𑀲𑁆𑀲𑀦𑁆𑀢𑁄. 𑀉𑀭𑀲𑀻𑀯 𑀧𑀼𑀢𑁆𑀢𑁄𑀢𑀺 𑀬𑀲𑁆𑀫𑀺𑀁 𑀫𑀺𑀢𑁆𑀢𑁂 𑀫𑀸𑀢𑀼 𑀳𑀤𑀬𑁂 𑀧𑀼𑀢𑁆𑀢𑁄 𑀯𑀺𑀬 𑀦𑀺𑀭𑀸𑀲𑀗𑁆𑀓𑁄 𑀦𑀺𑀩𑁆𑀪𑀬𑁄 𑀲𑁂𑀢𑀺.

𑀇𑀢𑀺 ¶ 𑀇𑀫𑀸𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀲𑀻𑀳𑁂𑀦 𑀫𑀺𑀢𑁆𑀢𑀕𑀼𑀡𑁂 𑀓𑀣𑀺𑀢𑁂 𑀩𑁆𑀬𑀕𑁆𑀖𑁄 ‘‘𑀫𑀬𑁆𑀳𑀁 𑀤𑁄𑀲𑁄’’𑀢𑀺 𑀲𑀻𑀳𑀁 𑀔𑀫𑀸𑀧𑁂𑀲𑀺. 𑀢𑁂 𑀢𑀢𑁆𑀣𑁂𑀯 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼. 𑀲𑀺𑀗𑁆𑀕𑀸𑀮𑁄 𑀧𑀦 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀯𑀺𑀖𑀸𑀲𑀸𑀤𑁄 𑀅𑀳𑁄𑀲𑀺, 𑀲𑀻𑀳𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀩𑁆𑀬𑀕𑁆𑀖𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀢𑀁 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀸 𑀢𑀲𑁆𑀫𑀺𑀁 𑀯𑀦𑁂 𑀦𑀺𑀯𑀼𑀢𑁆𑀣𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁬𑁨] 𑁨. 𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀲𑀻𑀮𑀁 𑀲𑁂𑀬𑁆𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀻𑀮𑀯𑀻𑀫𑀁𑀲𑀓𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀓𑀺𑀭 𑀭𑀸𑀚𑀸 ‘‘𑀏𑀲 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺 𑀅𑀜𑁆𑀜𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀢𑀺𑀭𑁂𑀓𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀦𑀼 𑀔𑁄 𑀫𑀁 𑀭𑀸𑀚𑀸 ‘𑀲𑀻𑀮𑀲𑀫𑁆𑀧𑀦𑁆𑀦𑁄’𑀢𑀺 𑀅𑀜𑁆𑀜𑁂𑀳𑀺 𑀅𑀢𑀺𑀭𑁂𑀓𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀉𑀤𑀸𑀳𑀼 ‘𑀲𑀼𑀢𑀥𑀭𑀬𑀼𑀢𑁆𑀢𑁄’𑀢𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀲𑀻𑀮𑀲𑁆𑀲 𑀯𑀸 𑀲𑀼𑀢𑀲𑁆𑀲 𑀯𑀸 𑀫𑀳𑀦𑁆𑀢𑀪𑀸𑀯’’𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀳𑁂𑀭𑀜𑁆𑀜𑀺𑀓𑀨𑀮𑀓𑀢𑁄 𑀓𑀳𑀸𑀧𑀡𑀁 𑀕𑀡𑁆𑀳𑀺. 𑀳𑁂𑀭𑀜𑁆𑀜𑀺𑀓𑁄 𑀕𑀭𑀼𑀪𑀸𑀯𑁂𑀦 𑀦 𑀓𑀺𑀜𑁆𑀘𑀺 𑀆𑀳, 𑀤𑀼𑀢𑀺𑀬𑀯𑀸𑀭𑁂𑀧𑀺 𑀦 𑀓𑀺𑀜𑁆𑀘𑀺 𑀆𑀳. 𑀢𑀢𑀺𑀬𑀯𑀸𑀭𑁂 𑀧𑀦 𑀢𑀁 ‘‘𑀯𑀺𑀮𑁄𑀧𑀔𑀸𑀤𑀓𑁄’’𑀢𑀺 𑀕𑀸𑀳𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀺𑀁 𑀇𑀫𑀺𑀦𑀸 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀼𑀝𑀼𑀫𑁆𑀩𑀁 𑀯𑀺𑀮𑀼𑀫𑁆𑀧𑀢𑀻’’𑀢𑀺 𑀆𑀳. ‘‘𑀲𑀘𑁆𑀘𑀁 𑀓𑀺𑀭 ¶ , 𑀩𑁆𑀭𑀸𑀳𑁆𑀫𑀡𑀸’’𑀢𑀺? ‘‘𑀦, 𑀫𑀳𑀸𑀭𑀸𑀚, 𑀓𑀼𑀝𑀼𑀫𑁆𑀩𑀁 𑀯𑀺𑀮𑀼𑀫𑁆𑀧𑀸𑀫𑀺, 𑀫𑀬𑁆𑀳𑀁 𑀧𑀦 ‘𑀲𑀻𑀮𑀁 𑀦𑀼 𑀔𑁄 𑀫𑀳𑀦𑁆𑀢𑀁, 𑀲𑀼𑀢𑀁 𑀦𑀼 𑀔𑁄’𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀲𑁆𑀯𑀸𑀳𑀁 ‘𑀏𑀢𑁂𑀲𑀼 𑀓𑀢𑀭𑀁 𑀦𑀼 𑀔𑁄 𑀫𑀳𑀦𑁆𑀢’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 𑀢𑀬𑁄 𑀯𑀸𑀭𑁂 𑀓𑀳𑀸𑀧𑀡𑀁 𑀕𑀡𑁆𑀳𑀺𑀁, 𑀢𑀁 𑀫𑀁 𑀏𑀲 𑀩𑀦𑁆𑀥𑀸𑀧𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀫𑁂 𑀲𑀼𑀢𑀢𑁄 ¶ 𑀲𑀻𑀮𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀜𑀸𑀢𑁄, 𑀦 𑀫𑁂 𑀖𑀭𑀸𑀯𑀸𑀲𑁂𑀦𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳’’𑀦𑁆𑀢𑀺 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀖𑀭𑀤𑁆𑀯𑀸𑀭𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀲𑁆𑀲 𑀲𑀢𑁆𑀣𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀤𑀸𑀧𑁂𑀲𑀺. 𑀲𑁄 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀯𑀺𑀧𑀲𑁆𑀲𑀦𑀁 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 ¶ 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺 𑀅𑀬𑀫𑁂𑀯, 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸𑀧𑀺 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺. 𑀭𑀸𑀚𑀸 𑀢𑀲𑁆𑀲 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺. 𑀭𑀸𑀚𑀸𑀧𑀺 𑀦𑀁 ‘‘𑀲𑀻𑀮𑀯𑀸’’𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀲𑁆𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀦𑀼 𑀔𑁄 𑀭𑀸𑀚𑀸 ‘𑀲𑀻𑀮𑀯𑀸’𑀢𑀺 𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺, 𑀉𑀤𑀸𑀳𑀼 ‘𑀲𑀼𑀢𑀥𑀭𑀬𑀼𑀢𑁆𑀢𑁄’’’𑀢𑀺. 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀸𑀦𑀺 𑀫𑁂 𑀲𑀼𑀢𑀢𑁄 𑀲𑀻𑀮𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀜𑀸𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁫.

‘‘𑀲𑀻𑀮𑀁 𑀲𑁂𑀬𑁆𑀬𑁄 𑀲𑀼𑀢𑀁 𑀲𑁂𑀬𑁆𑀬𑁄, 𑀇𑀢𑀺 𑀫𑁂 𑀲𑀁𑀲𑀬𑁄 𑀅𑀳𑀼;

𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄, 𑀇𑀢𑀺 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄.

𑁬𑁬.

‘‘𑀫𑁄𑀖𑀸 𑀚𑀸𑀢𑀺 𑀘 𑀯𑀡𑁆𑀡𑁄 𑀘, 𑀲𑀻𑀮𑀫𑁂𑀯 𑀓𑀺𑀭𑀼𑀢𑁆𑀢𑀫𑀁;

𑀲𑀻𑀮𑁂𑀦 𑀅𑀦𑀼𑀧𑁂𑀢𑀲𑁆𑀲, 𑀲𑀼𑀢𑁂𑀦𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺.

𑁬𑁭.

‘‘𑀔𑀢𑁆𑀢𑀺𑀬𑁄 𑀘 𑀅𑀥𑀫𑁆𑀫𑀝𑁆𑀞𑁄, 𑀯𑁂𑀲𑁆𑀲𑁄 𑀘𑀸𑀥𑀫𑁆𑀫𑀦𑀺𑀲𑁆𑀲𑀺𑀢𑁄;

𑀢𑁂 𑀧𑀭𑀺𑀘𑁆𑀘𑀚𑁆𑀚𑀼𑀪𑁄 𑀮𑁄𑀓𑁂, 𑀉𑀧𑀧𑀚𑁆𑀚𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁬𑁮.

‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀪𑀯𑀦𑁆𑀢𑀺 𑀢𑀺𑀤𑀺𑀯𑁂 𑀲𑀫𑀸.

𑁬𑁯.

‘‘𑀦 ¶ 𑀯𑁂𑀤𑀸 𑀲𑀫𑁆𑀧𑀭𑀸𑀬𑀸𑀬, 𑀦 𑀚𑀸𑀢𑀺 𑀦𑀸𑀧𑀺 𑀩𑀦𑁆𑀥𑀯𑀸;

𑀲𑀓𑀜𑁆𑀘 𑀲𑀻𑀮𑀁 𑀲𑀁𑀲𑀼𑀤𑁆𑀥𑀁, 𑀲𑀫𑁆𑀧𑀭𑀸𑀬𑀸𑀬 𑀲𑀼𑀔𑀸𑀬 𑀘𑀸’’𑀢𑀺.

𑀢𑀢𑁆𑀣 ¶ 𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄𑀢𑀺 𑀲𑀼𑀢𑀧𑀭𑀺𑀬𑀢𑁆𑀢𑀺𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀻𑀮𑀫𑁂𑀯 𑀉𑀢𑁆𑀢𑀭𑀺𑀢𑀭𑀦𑁆𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀻𑀮𑀁 𑀦𑀸𑀫𑁂𑀢𑀁 ¶ 𑀏𑀓𑀯𑀺𑀥𑀁 𑀲𑀁𑀯𑀭𑀯𑀲𑁂𑀦, 𑀤𑀼𑀯𑀺𑀥𑀁 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦, 𑀢𑀺𑀯𑀺𑀥𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀫𑀸𑀦𑀲𑀺𑀓𑀯𑀲𑁂𑀦, 𑀘𑀢𑀼𑀩𑁆𑀩𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦𑀸𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀲𑀻𑀮𑀲𑁆𑀲 𑀯𑀡𑁆𑀡𑀁 𑀅𑀪𑀸𑀲𑀺.

𑀫𑁄𑀖𑀸𑀢𑀺 𑀅𑀨𑀮𑀸 𑀢𑀼𑀘𑁆𑀙𑀸. 𑀚𑀸𑀢𑀻𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀯𑀡𑁆𑀡𑁄𑀢𑀺 𑀲𑀭𑀻𑀭𑀯𑀡𑁆𑀡𑁄 𑀅𑀪𑀺𑀭𑀽𑀧𑀪𑀸𑀯𑁄. 𑀬𑀸 𑀳𑀺 𑀬𑀲𑁆𑀫𑀸 𑀲𑀻𑀮𑀭𑀳𑀺𑀢𑀲𑁆𑀲 𑀚𑀸𑀢𑀺𑀲𑀫𑁆𑀧𑀤𑀸 𑀯𑀸 𑀯𑀡𑁆𑀡𑀲𑀫𑁆𑀧𑀤𑀸 𑀯𑀸 𑀲𑀕𑁆𑀕𑀲𑀼𑀔𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀉𑀪𑀬𑀫𑁆𑀧𑀺 𑀢𑀁 ‘‘𑀫𑁄𑀖’’𑀦𑁆𑀢𑀺 𑀆𑀳. 𑀲𑀻𑀮𑀫𑁂𑀯 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀯𑀤𑀢𑀺, 𑀦 𑀧𑀦 𑀲𑀬𑀁 𑀚𑀸𑀦𑀸𑀢𑀺. 𑀅𑀦𑀼𑀧𑁂𑀢𑀲𑁆𑀲𑀸𑀢𑀺 𑀅𑀦𑀼𑀧𑀕𑀢𑀲𑁆𑀲. 𑀲𑀼𑀢𑁂𑀦𑀢𑁆𑀣𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀲𑀻𑀮𑀭𑀳𑀺𑀢𑀲𑁆𑀲 𑀲𑀼𑀢𑀧𑀭𑀺𑀬𑀢𑁆𑀢𑀺𑀫𑀢𑁆𑀢𑁂𑀦 𑀇𑀥𑀮𑁄𑀓𑁂 𑀯𑀸 𑀧𑀭𑀮𑁄𑀓𑁂 𑀯𑀸 𑀓𑀸𑀘𑀺 𑀯𑀟𑁆𑀠𑀺 𑀦𑀸𑀫 𑀦𑀢𑁆𑀣𑀺.

𑀢𑀢𑁄 𑀧𑀭𑀸 𑀤𑁆𑀯𑁂 𑀕𑀸𑀣𑀸 𑀚𑀸𑀢𑀺𑀬𑀸 𑀫𑁄𑀖𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀢𑁂 𑀧𑀭𑀺𑀘𑁆𑀘𑀚𑁆𑀚𑀼𑀪𑁄 𑀮𑁄𑀓𑁂𑀢𑀺 𑀢𑁂 𑀤𑀼𑀲𑁆𑀲𑀻𑀮𑀸 𑀤𑁂𑀯𑀮𑁄𑀓𑀜𑁆𑀘 𑀫𑀦𑀼𑀲𑁆𑀲𑀮𑁄𑀓𑀜𑁆𑀘𑀸𑀢𑀺 𑀉𑀪𑁄𑀧𑀺 𑀮𑁄𑀓𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀼𑀕𑁆𑀕𑀢𑀺𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸𑀢𑀺 𑀙𑀯𑀙𑀟𑁆𑀟𑀓𑀘𑀡𑁆𑀟𑀸𑀮𑀸 𑀘 𑀧𑀼𑀧𑁆𑀨𑀙𑀟𑁆𑀟𑀓𑀧𑀼𑀓𑁆𑀓𑀼𑀲𑀸 𑀘. 𑀪𑀯𑀦𑁆𑀢𑀺 𑀢𑀺𑀤𑀺𑀯𑁂 𑀲𑀫𑀸𑀢𑀺 𑀏𑀢𑁂 𑀲𑀩𑁆𑀩𑁂𑀧𑀺 𑀲𑀻𑀮𑀸𑀦𑀼𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸 𑀲𑀫𑀸 𑀳𑁄𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀲𑀸, 𑀤𑁂𑀯𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺.

𑀧𑀜𑁆𑀘𑀫𑀕𑀸𑀣𑀸 𑀲𑀩𑁆𑀩𑁂𑀲𑀫𑁆𑀧𑀺 𑀲𑀼𑀢𑀸𑀤𑀻𑀦𑀁 𑀫𑁄𑀖𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀏𑀢𑁂 𑀯𑁂𑀤𑀸𑀤𑀬𑁄 𑀞𑀧𑁂𑀢𑁆𑀯𑀸 𑀇𑀥𑀮𑁄𑀓𑁂 𑀬𑀲𑀫𑀢𑁆𑀢𑀤𑀸𑀦𑀁 𑀲𑀫𑁆𑀧𑀭𑀸𑀬𑁂 𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀪𑀯𑁂 𑀬𑀲𑀁 𑀯𑀸 𑀲𑀼𑀔𑀁 𑀯𑀸 𑀤𑀸𑀢𑀼𑀁 𑀦𑀸𑀫 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀭𑀺𑀲𑀼𑀤𑁆𑀥𑀁 𑀧𑀦 𑀅𑀢𑁆𑀢𑀦𑁄 𑀲𑀻𑀮𑀫𑁂𑀯 𑀢𑀁 𑀤𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀲𑀻𑀮𑀕𑀼𑀡𑁂 𑀣𑁄𑀫𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀻𑀮𑀁 𑀯𑀻𑀫𑀁𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁬𑁩] 𑁩. 𑀳𑀺𑀭𑀺𑀚𑀸𑀢𑀓𑀯𑀡𑁆𑀡𑀦𑀸

𑀳𑀺𑀭𑀺𑀁 ¶ ¶ 𑀢𑀭𑀦𑁆𑀢𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀲𑀳𑀸𑀬𑀁 𑀧𑀘𑁆𑀘𑀦𑁆𑀢𑀯𑀸𑀲𑀺𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀏𑀓𑀓𑀦𑀺𑀧𑀸𑀢𑁂 𑀦𑀯𑀫𑀯𑀕𑁆𑀕𑀲𑁆𑀲 𑀧𑀭𑀺𑀬𑁄𑀲𑀸𑀦𑀚𑀸𑀢𑀓𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀇𑀥 𑀧𑀦 ‘‘𑀧𑀘𑁆𑀘𑀦𑁆𑀢𑀯𑀸𑀲𑀺𑀲𑁂𑀝𑁆𑀞𑀺𑀦𑁄 𑀫𑀦𑀼𑀲𑁆𑀲𑀸 𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀅𑀲𑁆𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀧𑀮𑀸𑀢𑀸’’𑀢𑀺 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑀺𑀢𑁂 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀓𑀢𑁆𑀢𑀩𑁆𑀩𑀁 𑀅𑀓𑀭𑁄𑀦𑁆𑀢𑀸 𑀦𑀸𑀫 𑀧𑀝𑀺𑀓𑀸𑀭𑀓𑁂 𑀦 𑀮𑀪𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁦.

‘‘𑀳𑀺𑀭𑀺𑀁 𑀢𑀭𑀦𑁆𑀢𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀁, 𑀢𑀯𑀸𑀳𑀫𑀲𑁆𑀫𑀻 𑀇𑀢𑀺 𑀪𑀸𑀲𑀫𑀸𑀦𑀁;

𑀲𑁂𑀬𑁆𑀬𑀸𑀦𑀺 𑀓𑀫𑁆𑀫𑀸𑀦𑀺 𑀅𑀦𑀸𑀤𑀺𑀬𑀦𑁆𑀢𑀁, 𑀦𑁂𑀲𑁄 𑀫𑀫𑀦𑁆𑀢𑀺 𑀇𑀢𑀺 𑀦𑀁 𑀯𑀺𑀚𑀜𑁆𑀜𑀸.

𑁭𑁧.

‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁭𑁨.

‘‘𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻;

𑀬𑀲𑁆𑀫𑀺𑀜𑁆𑀘 𑀲𑁂𑀢𑀻 𑀉𑀭𑀲𑀻𑀯 𑀧𑀼𑀢𑁆𑀢𑁄, 𑀲 𑀯𑁂 𑀫𑀺𑀢𑁆𑀢𑁄 𑀬𑁄 𑀅𑀪𑁂𑀚𑁆𑀚𑁄 𑀧𑀭𑁂𑀳𑀺.

𑁭𑁩.

‘‘𑀧𑀸𑀫𑁄𑀚𑁆𑀚𑀓𑀭𑀡𑀁 𑀞𑀸𑀦𑀁, 𑀧𑀲𑀁𑀲𑀸𑀯𑀳𑀦𑀁 𑀲𑀼𑀔𑀁;

𑀨𑀮𑀸𑀦𑀺𑀲𑀁𑀲𑁄 𑀪𑀸𑀯𑁂𑀢𑀺, 𑀯𑀳𑀦𑁆𑀢𑁄 𑀧𑁄𑀭𑀺𑀲𑀁 𑀥𑀼𑀭𑀁.

𑁭𑁪.

‘‘𑀧𑀯𑀺𑀯𑁂𑀓𑀭𑀲𑀁 𑀧𑀺𑀢𑁆𑀯𑀸, 𑀭𑀲𑀁 𑀉𑀧𑀲𑀫𑀲𑁆𑀲 𑀘;

𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄, 𑀥𑀫𑁆𑀫𑀧𑁆𑀧𑀻𑀢𑀺𑀭𑀲𑀁 𑀧𑀺𑀯’’𑀦𑁆𑀢𑀺.

𑀢𑀢𑁆𑀣 𑀳𑀺𑀭𑀺𑀁 𑀢𑀭𑀦𑁆𑀢𑀦𑁆𑀢𑀺 𑀮𑀚𑁆𑀚𑀁 𑀅𑀢𑀺𑀓𑁆𑀓𑀦𑁆𑀢𑀁. 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀦𑁆𑀢𑀺 𑀫𑀺𑀢𑁆𑀢𑀪𑀸𑀯𑁂𑀦 𑀚𑀺𑀕𑀼𑀘𑁆𑀙𑀬𑀫𑀸𑀦𑀁. 𑀢𑀯𑀸𑀳𑀫𑀲𑁆𑀫𑀻𑀢𑀺 ‘‘𑀢𑀯 𑀅𑀳𑀁 𑀫𑀺𑀢𑁆𑀢𑁄’’𑀢𑀺 𑀓𑁂𑀯𑀮𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀪𑀸𑀲𑀫𑀸𑀦𑀁. 𑀲𑁂𑀬𑁆𑀬𑀸𑀦𑀺 𑀓𑀫𑁆𑀫𑀸𑀦𑀺𑀢𑀺 ‘‘𑀤𑀲𑁆𑀲𑀸𑀫𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀲𑁆𑀲 𑀅𑀦𑀼𑀭𑀽𑀧𑀸𑀦𑀺 𑀉𑀢𑁆𑀢𑀫𑀓𑀫𑁆𑀫𑀸𑀦𑀺. 𑀅𑀦𑀸𑀤𑀺𑀬𑀦𑁆𑀢𑀦𑁆𑀢𑀺 𑀅𑀓𑀭𑁄𑀦𑁆𑀢𑀁. 𑀦𑁂𑀲𑁄 𑀫𑀫𑀦𑁆𑀢𑀺 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 ‘‘𑀦 𑀏𑀲𑁄 𑀫𑀫 𑀫𑀺𑀢𑁆𑀢𑁄’’𑀢𑀺 𑀯𑀺𑀚𑀜𑁆𑀜𑀸.

𑀧𑀸𑀫𑁄𑀚𑁆𑀚𑀓𑀭𑀡𑀁 ¶ ¶ ¶ 𑀞𑀸𑀦𑀦𑁆𑀢𑀺 𑀤𑀸𑀦𑀫𑁆𑀧𑀺 𑀲𑀻𑀮𑀫𑁆𑀧𑀺 𑀪𑀸𑀯𑀦𑀸𑀧𑀺 𑀧𑀡𑁆𑀟𑀺𑀢𑁂𑀳𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑁄𑀧𑀺. 𑀇𑀥 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀫𑀺𑀢𑁆𑀢𑀪𑀸𑀯𑀫𑁂𑀯 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀧𑀡𑁆𑀟𑀺𑀢𑁂𑀦 𑀳𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑁄 𑀧𑀸𑀫𑁄𑀚𑁆𑀚𑀫𑁆𑀧𑀺 𑀓𑀭𑁄𑀢𑀺, 𑀧𑀲𑀁𑀲𑀫𑁆𑀧𑀺 𑀯𑀳𑀢𑀺. 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀳𑁂𑀢𑀼𑀢𑁄 ‘‘𑀲𑀼𑀔’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀢𑀁 𑀨𑀮𑀜𑁆𑀘 𑀆𑀦𑀺𑀲𑀁𑀲𑀜𑁆𑀘 𑀲𑀫𑁆𑀧𑀲𑁆𑀲𑀫𑀸𑀦𑁄 𑀨𑀮𑀸𑀦𑀺𑀲𑀁𑀲𑁄 𑀓𑀼𑀮𑀧𑀼𑀢𑁆𑀢𑁄 𑀧𑀼𑀭𑀺𑀲𑁂𑀳𑀺 𑀯𑀳𑀺𑀢𑀩𑁆𑀩𑀁 𑀤𑀸𑀦𑀲𑀻𑀮𑀪𑀸𑀯𑀦𑀸𑀫𑀺𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀧𑁄𑀭𑀺𑀲𑀁 𑀥𑀼𑀭𑀁 𑀯𑀳𑀦𑁆𑀢𑁄 𑀏𑀢𑀁 𑀫𑀺𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀧𑀸𑀫𑁄𑀚𑁆𑀚𑀓𑀭𑀡𑀁 𑀞𑀸𑀦𑀁 𑀧𑀲𑀁𑀲𑀸𑀯𑀳𑀦𑀁 𑀲𑀼𑀔𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀺, 𑀦 𑀧𑀡𑁆𑀟𑀺𑀢𑁂𑀳𑀺 𑀫𑀺𑀢𑁆𑀢𑀪𑀸𑀯𑀁 𑀪𑀺𑀦𑁆𑀤𑀢𑀻𑀢𑀺 𑀤𑀻𑀧𑁂𑀢𑀺.

𑀧𑀯𑀺𑀯𑁂𑀓𑀭𑀲𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸𑀦𑀁 𑀭𑀲𑀁 𑀢𑁂 𑀯𑀺𑀯𑁂𑀓𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀲𑁄𑀫𑀦𑀲𑁆𑀲𑀭𑀲𑀁. 𑀉𑀧𑀲𑀫𑀲𑁆𑀲 𑀘𑀸𑀢𑀺 𑀓𑀺𑀮𑁂𑀲𑀽𑀧𑀲𑀫𑁂𑀦 𑀮𑀤𑁆𑀥𑀲𑁄𑀫𑀦𑀲𑁆𑀲𑀲𑁆𑀲. 𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀸𑀪𑀸𑀯𑁂𑀦 𑀦𑀺𑀤𑁆𑀤𑀭𑁄, 𑀓𑀺𑀮𑁂𑀲𑀸𑀪𑀸𑀯𑁂𑀦 𑀦𑀺𑀧𑁆𑀧𑀸𑀧𑁄 𑀳𑁄𑀢𑀺. 𑀥𑀫𑁆𑀫𑀧𑁆𑀧𑀻𑀢𑀺𑀭𑀲𑀦𑁆𑀢𑀺 𑀥𑀫𑁆𑀫𑀧𑀻𑀢𑀺𑀲𑀗𑁆𑀔𑀸𑀢𑀁 𑀭𑀲𑀁, 𑀯𑀺𑀫𑀼𑀢𑁆𑀢𑀺𑀧𑀻𑀢𑀺𑀁 𑀧𑀺𑀯𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑀢𑁄 𑀉𑀩𑁆𑀩𑀺𑀕𑁆𑀕𑁄 𑀧𑀯𑀺𑀯𑁂𑀓𑀭𑀲𑁂𑀦 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀘𑁆𑀘𑀦𑁆𑀢𑀯𑀸𑀲𑀻 𑀇𑀤𑀸𑀦𑀺 𑀧𑀘𑁆𑀘𑀦𑁆𑀢𑀯𑀸𑀲𑀻𑀬𑁂𑀯, 𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀳𑀺𑀭𑀺𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁬𑁪] 𑁪. 𑀔𑀚𑁆𑀚𑁄𑀧𑀦𑀓𑀚𑀸𑀢𑀓𑀯𑀡𑁆𑀡𑀦𑀸

𑁭𑁫-𑁭𑁯.

𑀓𑁄 𑀦𑀼 𑀲𑀦𑁆𑀢𑀫𑁆𑀳𑀺 𑀧𑀚𑁆𑀚𑁄𑀢𑁂𑀢𑀺 𑀅𑀬𑀁 𑀔𑀚𑁆𑀚𑁄𑀧𑀦𑀓𑀧𑀜𑁆𑀳𑁄 𑀫𑀳𑀸𑀉𑀫𑀗𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀔𑀚𑁆𑀚𑁄𑀧𑀦𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁬𑁫] 𑁫. 𑀅𑀳𑀺𑀢𑀼𑀡𑁆𑀟𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑀥𑀼𑀢𑁆𑀢𑁄𑀫𑁆𑀳𑀻𑀢𑀺 ¶ ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀳𑀮𑁆𑀮𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀲𑀸𑀮𑀽𑀓𑀚𑀸𑀢𑀓𑁂 (𑀚𑀸. 𑁧.𑁩.𑁧𑁦𑁬 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀁. 𑀇𑀥𑀸𑀧𑀺 𑀲𑁄 𑀫𑀳𑀮𑁆𑀮𑀓𑁄 𑀏𑀓𑀁 𑀕𑀸𑀫𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀓𑁆𑀓𑁄𑀲𑀢𑀺 𑀧𑀳𑀭𑀢𑀺. 𑀤𑀸𑀭𑀓𑁄 𑀧𑀮𑀸𑀬𑀺𑀢𑁆𑀯𑀸 𑀯𑀺𑀩𑁆𑀪𑀫𑀺. 𑀤𑀼𑀢𑀺𑀬𑀫𑁆𑀧𑀺 𑀦𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 ¶ 𑀢𑀣𑁂𑀯𑀸𑀓𑀸𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀬𑀸𑀘𑀺𑀬𑀫𑀸𑀦𑁄 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀫𑀳𑀮𑁆𑀮𑀓𑁄 𑀅𑀢𑁆𑀢𑀦𑁄 𑀲𑀸𑀫𑀡𑁂𑀭𑁂𑀦 𑀲𑀳𑀸𑀧𑀺 𑀯𑀺𑀦𑀸𑀧𑀺 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀢𑀭𑁄 𑀢𑀲𑁆𑀲 𑀤𑁄𑀲𑀁 𑀤𑀺𑀲𑁆𑀯𑀸 𑀧𑀼𑀦 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀺, 𑀲𑀼𑀳𑀤𑀬𑁄 𑀓𑀼𑀫𑀸𑀭𑀓𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀲𑀸𑀫𑀡𑁂𑀭𑁄 𑀲𑀼𑀳𑀤𑀬𑁄𑀯, 𑀲𑀓𑀺𑀁 𑀤𑁄𑀲𑀁 𑀤𑀺𑀲𑁆𑀯𑀸 𑀧𑀼𑀦 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀥𑀜𑁆𑀜𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀥𑀜𑁆𑀜𑀯𑀺𑀓𑁆𑀓𑀬𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀫𑀓𑁆𑀓𑀝𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀅𑀳𑀺𑀁 𑀓𑀻𑀴𑀸𑀧𑁂𑀦𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀉𑀲𑁆𑀲𑀯𑁂 𑀖𑀼𑀝𑁆𑀞𑁂 𑀢𑀁 𑀫𑀓𑁆𑀓𑀝𑀁 𑀥𑀜𑁆𑀜𑀯𑀸𑀡𑀺𑀚𑀓𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀅𑀳𑀺𑀁 𑀓𑀻𑀴𑀸𑀧𑁂𑀦𑁆𑀢𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀺𑀘𑀭𑀺. 𑀲𑁄𑀧𑀺 𑀯𑀸𑀡𑀺𑀚𑁄 𑀫𑀓𑁆𑀓𑀝𑀲𑁆𑀲 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀅𑀤𑀸𑀲𑀺. 𑀅𑀳𑀺𑀢𑀼𑀡𑁆𑀟𑀺𑀓𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀲𑁆𑀲𑀯𑀓𑀻𑀴𑀦𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀫𑀓𑁆𑀓𑀝𑀁 𑀯𑁂𑀴𑀼𑀧𑁂𑀲𑀺𑀓𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀧𑀳𑀭𑀺𑀢𑁆𑀯𑀸 𑀢𑀁 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀫𑀓𑁆𑀓𑀝𑁄 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀅𑀫𑁆𑀩𑀸𑀦𑀺 𑀔𑀸𑀤𑀦𑁆𑀢𑁄 𑀦𑀺𑀲𑀻𑀤𑀺. 𑀲𑁄 𑀧𑀩𑀼𑀤𑁆𑀥𑁄 𑀭𑀼𑀓𑁆𑀔𑁂 𑀫𑀓𑁆𑀓𑀝𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀬𑀸 𑀉𑀧𑀮𑀸𑀧𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁦.

‘‘𑀥𑀼𑀢𑁆𑀢𑁄𑀫𑁆𑀳𑀺 𑀲𑀫𑁆𑀫 𑀲𑀼𑀫𑀼𑀔, 𑀚𑀽𑀢𑁂 𑀅𑀓𑁆𑀔𑀧𑀭𑀸𑀚𑀺𑀢𑁄;

𑀳𑀭𑁂𑀳𑀺 𑀅𑀫𑁆𑀩𑀧𑀓𑁆𑀓𑀸𑀦𑀺, 𑀯𑀻𑀭𑀺𑀬𑀁 𑀢𑁂 𑀪𑀓𑁆𑀔𑀬𑀸𑀫𑀲𑁂’’𑀢𑀺.

𑀢𑀢𑁆𑀣 𑀅𑀓𑁆𑀔𑀧𑀭𑀸𑀚𑀺𑀢𑁄𑀢𑀺 𑀅𑀓𑁆𑀔𑁂𑀳𑀺 𑀧𑀭𑀸𑀚𑀺𑀢𑁄. 𑀳𑀭𑁂𑀳𑀻𑀢𑀺 𑀧𑀸𑀢𑁂𑀳𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀁 ¶ 𑀲𑀼𑀢𑁆𑀯𑀸 𑀫𑀓𑁆𑀓𑀝𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁧.

‘‘𑀅𑀮𑀺𑀓𑀁 ¶ 𑀯𑀢 𑀫𑀁 𑀲𑀫𑁆𑀫, 𑀅𑀪𑀽𑀢𑁂𑀦 𑀧𑀲𑀁𑀲𑀲𑀺;

𑀓𑁄 𑀢𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀲𑀼𑀫𑀼𑀔𑁄 𑀦𑀸𑀫 𑀫𑀓𑁆𑀓𑀝𑁄.

𑁮𑁨.

‘‘𑀅𑀚𑁆𑀚𑀸𑀧𑀺 ¶ 𑀫𑁂 𑀢𑀁 𑀫𑀦𑀲𑀺, 𑀬𑀁 𑀫𑀁 𑀢𑁆𑀯𑀁 𑀅𑀳𑀺𑀢𑀼𑀡𑁆𑀟𑀺𑀓;

𑀥𑀜𑁆𑀜𑀸𑀧𑀡𑀁 𑀧𑀯𑀺𑀲𑀺𑀢𑁆𑀯𑀸, 𑀫𑀢𑁆𑀢𑁄 𑀙𑀸𑀢𑀁 𑀳𑀦𑀸𑀲𑀺 𑀫𑀁.

𑁮𑁩.

‘‘𑀢𑀸𑀳𑀁 𑀲𑀭𑀁 𑀤𑀼𑀓𑁆𑀔𑀲𑁂𑀬𑁆𑀬𑀁, 𑀅𑀧𑀺 𑀭𑀚𑁆𑀚𑀫𑁆𑀧𑀺 𑀓𑀸𑀭𑀬𑁂;

𑀦𑁂𑀯𑀸𑀳𑀁 𑀬𑀸𑀘𑀺𑀢𑁄 𑀤𑀚𑁆𑀚𑀁, 𑀢𑀣𑀸 𑀳𑀺 𑀪𑀬𑀢𑀚𑁆𑀚𑀺𑀢𑁄.

𑁮𑁪.

‘‘𑀬𑀜𑁆𑀘 𑀚𑀜𑁆𑀜𑀸 𑀓𑀼𑀮𑁂 𑀚𑀸𑀢𑀁, 𑀕𑀩𑁆𑀪𑁂 𑀢𑀺𑀢𑁆𑀢𑀁 𑀅𑀫𑀘𑁆𑀙𑀭𑀺𑀁;

𑀢𑁂𑀦 𑀲𑀔𑀺𑀜𑁆𑀘 𑀫𑀺𑀢𑁆𑀢𑀜𑁆𑀘, 𑀥𑀻𑀭𑁄 𑀲𑀦𑁆𑀥𑀸𑀢𑀼𑀫𑀭𑀳𑀢𑀻’’𑀢𑀺.

𑀢𑀢𑁆𑀣 𑀅𑀮𑀺𑀓𑀁 𑀯𑀢𑀸𑀢𑀺 𑀫𑀼𑀲𑀸 𑀯𑀢. 𑀅𑀪𑀽𑀢𑁂𑀦𑀸𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦. 𑀓𑁄 𑀢𑁂𑀢𑀺 𑀓𑁆𑀯 𑀢𑀬𑀸. 𑀲𑀼𑀫𑀼𑀔𑁄𑀢𑀺 𑀲𑀼𑀦𑁆𑀤𑀭𑀫𑀼𑀔𑁄. 𑀅𑀳𑀺𑀢𑀼𑀡𑁆𑀟𑀺𑀓𑀸𑀢𑀺 𑀢𑀁 𑀆𑀮𑀧𑀢𑀺. ‘‘𑀅𑀳𑀺𑀓𑁄𑀡𑁆𑀟𑀺𑀓𑀸’’𑀢𑀺𑀧𑀺 𑀧𑀸𑀞𑁄. 𑀙𑀸𑀢𑀦𑁆𑀢𑀺 𑀚𑀺𑀖𑀘𑁆𑀙𑀸𑀪𑀺𑀪𑀽𑀢𑀁 𑀤𑀼𑀩𑁆𑀩𑀮𑀁 𑀓𑀧𑀡𑀁. 𑀳𑀦𑀸𑀲𑀻𑀢𑀺 𑀯𑁂𑀴𑀼𑀧𑁂𑀲𑀺𑀓𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀧𑀳𑀭𑀲𑀺. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀲𑀭𑀦𑁆𑀢𑀺 𑀲𑀭𑀦𑁆𑀢𑁄. 𑀤𑀼𑀓𑁆𑀔𑀲𑁂𑀬𑁆𑀬𑀦𑁆𑀢𑀺 𑀢𑀲𑁆𑀫𑀺𑀁 𑀆𑀧𑀡𑁂 𑀤𑀼𑀓𑁆𑀔𑀲𑀬𑀦𑀁. 𑀅𑀧𑀺 𑀭𑀚𑁆𑀚𑀫𑁆𑀧𑀺 𑀓𑀸𑀭𑀬𑁂𑀢𑀺 𑀲𑀘𑁂𑀧𑀺 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀤𑀢𑁆𑀯𑀸 𑀫𑀁 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀸𑀲𑀺, 𑀏𑀯𑀫𑁆𑀧𑀺 𑀢𑀁 𑀦𑁂𑀯𑀸𑀳𑀁 𑀬𑀸𑀘𑀺𑀢𑁄 𑀤𑀚𑁆𑀚𑀁, 𑀢𑀁 𑀏𑀓𑀫𑁆𑀧𑀺 𑀅𑀫𑁆𑀩𑀧𑀓𑁆𑀓𑀁 𑀅𑀳𑀁 𑀢𑀬𑀸 𑀬𑀸𑀘𑀺𑀢𑁄 𑀦 𑀤𑀤𑁂𑀬𑁆𑀬𑀁. 𑀓𑀺𑀁𑀓𑀸𑀭𑀡𑀸? 𑀢𑀣𑀸 𑀳𑀺 𑀪𑀬𑀢𑀚𑁆𑀚𑀺𑀢𑁄𑀢𑀺, 𑀢𑀣𑀸 𑀳𑀺 𑀅𑀳𑀁 𑀢𑀬𑀸 𑀪𑀬𑁂𑀦 𑀢𑀚𑁆𑀚𑀺𑀢𑁄𑀢𑀺 𑀅𑀢𑁆𑀣𑁄.

𑀕𑀩𑁆𑀪𑁂 𑀢𑀺𑀢𑁆𑀢𑀦𑁆𑀢𑀺 𑀲𑀼𑀪𑁄𑀚𑀦𑀭𑀲𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀬𑀁𑀬𑁂𑀯 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀲𑀬𑀦𑀕𑀩𑁆𑀪𑁂𑀬𑁂𑀯 𑀯𑀸 𑀢𑀺𑀢𑁆𑀢𑀁 𑀪𑁄𑀕𑀸𑀲𑀸𑀬 𑀅𑀓𑀧𑀡𑀁. 𑀲𑀔𑀺𑀜𑁆𑀘 𑀫𑀺𑀢𑁆𑀢𑀜𑁆𑀘𑀸𑀢𑀺 𑀲𑀔𑀺𑀪𑀸𑀯𑀜𑁆𑀘 𑀫𑀺𑀢𑁆𑀢𑀪𑀸𑀯𑀜𑁆𑀘 𑀢𑀣𑀸𑀭𑀽𑀧𑁂𑀦 𑀓𑀼𑀮𑀚𑀸𑀢𑁂𑀦 𑀢𑀺𑀢𑁆𑀢𑁂𑀦 𑀅𑀓𑀧𑀡𑁂𑀦 𑀅𑀫𑀘𑁆𑀙𑀭𑀺𑀦𑀸 𑀲𑀤𑁆𑀥𑀺𑀁 𑀧𑀡𑁆𑀟𑀺𑀢𑁄 𑀲𑀦𑁆𑀥𑀸𑀢𑀼𑀁 𑀧𑀼𑀦 𑀖𑀝𑁂𑀢𑀼𑀁 𑀅𑀭𑀳𑀢𑀺, 𑀢𑀬𑀸 𑀧𑀦 𑀓𑀧𑀡𑁂𑀦 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀲𑀤𑁆𑀥𑀺𑀁 𑀓𑁄 𑀫𑀺𑀢𑁆𑀢𑀪𑀸𑀯𑀁 𑀧𑀼𑀦 𑀖𑀝𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀯𑀸𑀦𑀭𑁄 𑀯𑀦𑀁 𑀲𑀳𑀲𑀸 𑀧𑀸𑀯𑀺𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀳𑀺𑀢𑀼𑀡𑁆𑀟𑀺𑀓𑁄 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺, 𑀫𑀓𑁆𑀓𑀝𑁄 𑀲𑀸𑀫𑀡𑁂𑀭𑁄, 𑀥𑀜𑁆𑀜𑀯𑀸𑀡𑀺𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀳𑀺𑀢𑀼𑀡𑁆𑀟𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁬𑁬] 𑁬. 𑀕𑀼𑀫𑁆𑀩𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀫𑀥𑀼𑀯𑀡𑁆𑀡𑀁 ¶ ¶ 𑀫𑀥𑀼𑀭𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀤𑀺𑀲𑁆𑀯𑀸’’𑀢𑀺 𑀯𑀢𑁆𑀯𑀸 ‘‘𑀅𑀮𑀗𑁆𑀓𑀢𑀫𑀸𑀢𑀼𑀕𑀸𑀫’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀦𑀸𑀫 𑀏𑀓𑁂𑀦 𑀕𑀼𑀫𑁆𑀩𑀺𑀬𑁂𑀦 𑀬𑀓𑁆𑀔𑁂𑀦 𑀳𑀮𑀸𑀳𑀮𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀕𑁆𑀕𑁂 𑀞𑀧𑀺𑀢𑀫𑀥𑀼𑀲𑀤𑀺𑀲𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀢𑁆𑀣𑀯𑀸𑀳𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀩𑀸𑀭𑀸𑀡𑀲𑀺𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀪𑀡𑁆𑀟𑀁 𑀆𑀤𑀸𑀬 𑀯𑁄𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀫𑀳𑀸𑀯𑀢𑁆𑀢𑀦𑀺𑀅𑀝𑀯𑀺𑀤𑁆𑀯𑀸𑀭𑀁 𑀧𑀢𑁆𑀯𑀸 𑀲𑀢𑁆𑀣𑀓𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀅𑀫𑁆𑀪𑁄, 𑀇𑀫𑀲𑁆𑀫𑀺𑀁 𑀫𑀕𑁆𑀕𑁂 𑀯𑀺𑀲𑀧𑀡𑁆𑀡𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀅𑀢𑁆𑀣𑀺, 𑀢𑀼𑀫𑁆𑀳𑁂 𑀓𑀺𑀜𑁆𑀘𑀺 𑀅𑀔𑀸𑀤𑀺𑀢𑀧𑀼𑀩𑁆𑀩𑀁 𑀔𑀸𑀤𑀦𑁆𑀢𑀸 𑀫𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀫𑀸 𑀔𑀸𑀤𑀺𑀢𑁆𑀣, 𑀅𑀫𑀦𑀼𑀲𑁆𑀲𑀸𑀧𑀺 𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀢𑁆𑀢𑀧𑀼𑀝𑀫𑀥𑀼𑀓𑀨𑀮𑀸𑀦𑀺 𑀫𑀕𑁆𑀕𑁂 𑀞𑀧𑁂𑀦𑁆𑀢𑀺, 𑀢𑀸𑀦𑀺𑀧𑀺 𑀫𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀫𑀸 𑀔𑀸𑀤𑀺𑀢𑁆𑀣𑀸’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀣𑁂𑀓𑁄 𑀕𑀼𑀫𑁆𑀩𑀺𑀬𑁄 𑀦𑀸𑀫 𑀬𑀓𑁆𑀔𑁄 𑀅𑀝𑀯𑀺𑀬𑀸 𑀫𑀚𑁆𑀛𑀝𑁆𑀞𑀸𑀦𑁂 𑀫𑀕𑁆𑀕𑁂 𑀧𑀡𑁆𑀡𑀸𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 𑀳𑀮𑀸𑀳𑀮𑀯𑀺𑀲𑀲𑀁𑀬𑀼𑀢𑁆𑀢𑀸𑀦𑀺 𑀫𑀥𑀼𑀧𑀺𑀡𑁆𑀟𑀸𑀦𑀺 𑀞𑀧𑁂𑀢𑁆𑀯𑀸 𑀲𑀬𑀁 𑀫𑀕𑁆𑀕𑀲𑀸𑀫𑀦𑁆𑀢𑁂 𑀫𑀥𑀼𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀭𑀼𑀓𑁆𑀔𑁂 𑀓𑁄𑀝𑁆𑀝𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀚𑀸𑀦𑀦𑁆𑀢𑀸 ‘‘𑀧𑀼𑀜𑁆𑀜𑀢𑁆𑀣𑀸𑀬 𑀞𑀧𑀺𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀔𑀸𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀢𑁂 𑀔𑀸𑀤𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁆𑀣𑀓𑀫𑀦𑀼𑀲𑁆𑀲𑀸𑀧𑀺 𑀢𑀸𑀦𑀺 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀮𑁄𑀮𑀚𑀸𑀢𑀺𑀓𑀸 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀔𑀸𑀤𑀺𑀁𑀲𑀼, 𑀧𑀡𑁆𑀟𑀺𑀢𑀚𑀸𑀢𑀺𑀓𑀸 ‘‘𑀧𑀼𑀘𑁆𑀙𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀳𑀢𑁆𑀣𑀕𑀢𑀸𑀦𑀺 𑀙𑀟𑁆𑀟𑀸𑀧𑁂𑀲𑀺, 𑀬𑁂𑀳𑀺 𑀧𑀞𑀫𑀢𑀭𑀁 𑀔𑀸𑀤𑀺𑀢𑀸𑀦𑀺, 𑀢𑁂 𑀫𑀭𑀺𑀁𑀲𑀼. 𑀬𑁂𑀳𑀺 𑀅𑀟𑁆𑀠𑀔𑀸𑀤𑀺𑀢𑀸𑀦𑀺, 𑀢𑁂𑀲𑀁 𑀯𑀫𑀦𑀯𑀺𑀭𑁂𑀘𑀦𑀁 𑀤𑀢𑁆𑀯𑀸 𑀯𑀦𑁆𑀢𑀓𑀸𑀮𑁂 𑀘𑀢𑀼𑀫𑀥𑀼𑀭𑀁 ¶ ¶ 𑀅𑀤𑀸𑀲𑀺. 𑀇𑀢𑀺 𑀢𑁂 𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀚𑀻𑀯𑀺𑀢𑀁 𑀧𑀝𑀺𑀮𑀪𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀲𑁄𑀢𑁆𑀣𑀺𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀫𑁂𑀯 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀓𑀣𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁫.

‘‘𑀫𑀥𑀼𑀯𑀡𑁆𑀡𑀁 𑀫𑀥𑀼𑀭𑀲𑀁, 𑀫𑀥𑀼𑀕𑀦𑁆𑀥𑀁 𑀯𑀺𑀲𑀁 𑀅𑀳𑀼;

𑀕𑀼𑀫𑁆𑀩𑀺𑀬𑁄 𑀖𑀸𑀲𑀫𑁂𑀲𑀸𑀦𑁄, 𑀅𑀭𑀜𑁆𑀜𑁂 𑀑𑀤𑀳𑀻 𑀯𑀺𑀲𑀁.

𑁮𑁬.

‘‘𑀫𑀥𑀼 𑀇𑀢𑀺 𑀫𑀜𑁆𑀜𑀫𑀸𑀦𑀸, 𑀬𑁂 𑀢𑀁 𑀯𑀺𑀲𑀫𑀔𑀸𑀤𑀺𑀲𑀼𑀁;

𑀢𑁂𑀲𑀁 𑀢𑀁 𑀓𑀝𑀼𑀓𑀁 𑀆𑀲𑀺, 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀼𑀁.

𑁮𑁭.

‘‘𑀬𑁂 ¶ 𑀘 𑀔𑁄 𑀧𑀝𑀺𑀲𑀗𑁆𑀔𑀸𑀬, 𑀯𑀺𑀲𑀁 𑀢𑀁 𑀧𑀭𑀺𑀯𑀚𑁆𑀚𑀬𑀼𑀁;

𑀢𑁂 𑀆𑀢𑀼𑀭𑁂𑀲𑀼 𑀲𑀼𑀔𑀺𑀢𑀸, 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀩𑁆𑀩𑀼𑀢𑀸.

𑁮𑁮.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀲𑀁 𑀓𑀸𑀫𑀸 𑀲𑀫𑁄𑀳𑀺𑀢𑀸;

𑀆𑀫𑀺𑀲𑀁 𑀩𑀦𑁆𑀥𑀦𑀜𑁆𑀘𑁂𑀢𑀁, 𑀫𑀘𑁆𑀘𑀼𑀯𑁂𑀲𑁄 𑀕𑀼𑀳𑀸𑀲𑀬𑁄.

𑁮𑁯.

‘‘𑀏𑀯𑀫𑁂𑀯 𑀇𑀫𑁂 𑀓𑀸𑀫𑁂, 𑀆𑀢𑀼𑀭𑀸 𑀧𑀭𑀺𑀘𑀸𑀭𑀺𑀓𑁂;

𑀬𑁂 𑀲𑀤𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀺, 𑀲𑀗𑁆𑀕𑀁 𑀮𑁄𑀓𑁂 𑀉𑀧𑀘𑁆𑀘𑀕𑀼’’𑀦𑁆𑀢𑀺.

𑀢𑀢𑁆𑀣 𑀕𑀼𑀫𑁆𑀩𑀺𑀬𑁄𑀢𑀺 𑀢𑀲𑁆𑀫𑀺𑀁 𑀯𑀦𑀕𑀼𑀫𑁆𑀩𑁂 𑀯𑀺𑀘𑀭𑀡𑁂𑀦 𑀏𑀯𑀁𑀮𑀤𑁆𑀥𑀦𑀸𑀫𑁄 𑀬𑀓𑁆𑀔𑁄. 𑀖𑀸𑀲𑀫𑁂𑀲𑀸𑀦𑁄𑀢𑀺 ‘‘𑀢𑀁 𑀯𑀺𑀲𑀁 𑀔𑀸𑀤𑀺𑀢𑁆𑀯𑀸 𑀫𑀢𑁂 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀖𑀸𑀲𑀁 𑀧𑀭𑀺𑀬𑁂𑀲𑀦𑁆𑀢𑁄. 𑀑𑀤𑀳𑀻𑀢𑀺 𑀢𑀁 𑀫𑀥𑀼𑀦𑀸 𑀲𑀫𑀸𑀦𑀯𑀡𑁆𑀡𑀕𑀦𑁆𑀥𑀭𑀲𑀁 𑀯𑀺𑀲𑀁 𑀦𑀺𑀓𑁆𑀔𑀺𑀧𑀺. 𑀓𑀝𑀼𑀓𑀁 𑀆𑀲𑀻𑀢𑀺 𑀢𑀺𑀔𑀺𑀡𑀁 𑀅𑀳𑁄𑀲𑀺. 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀼𑀦𑁆𑀢𑀺 𑀢𑁂𑀦 𑀯𑀺𑀲𑁂𑀦 𑀢𑁂 𑀲𑀢𑁆𑀢𑀸 𑀫𑀭𑀡𑀁 𑀉𑀧𑀕𑀢𑀸.

𑀆𑀢𑀼𑀭𑁂𑀲𑀽𑀢𑀺 𑀯𑀺𑀲𑀯𑁂𑀕𑁂𑀦 𑀆𑀲𑀦𑁆𑀦𑀫𑀭𑀡𑁂𑀲𑀼. 𑀟𑀬𑁆𑀳𑀫𑀸𑀦𑁂𑀲𑀽𑀢𑀺 𑀯𑀺𑀲𑀢𑁂𑀚𑁂𑀦𑁂𑀯 𑀟𑀬𑁆𑀳𑀫𑀸𑀦𑁂𑀲𑀼. 𑀯𑀺𑀲𑀁 𑀓𑀸𑀫𑀸 𑀲𑀫𑁄𑀳𑀺𑀢𑀸𑀢𑀺 𑀬𑀣𑀸 𑀢𑀲𑁆𑀫𑀺𑀁 𑀯𑀢𑁆𑀢𑀦𑀺𑀫𑀳𑀸𑀫𑀕𑁆𑀕𑁂 𑀯𑀺𑀲𑀁 𑀲𑀫𑁄𑀳𑀺𑀢𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀏𑀯𑀁 𑀫𑀦𑀼𑀲𑁆𑀲𑁂𑀲𑀼𑀧𑀺 𑀬𑁂 𑀏𑀢𑁂 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀯𑀢𑁆𑀣𑀼𑀓𑀸𑀫𑀸 𑀢𑀢𑁆𑀣 𑀢𑀢𑁆𑀣 𑀲𑀫𑁄𑀳𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀢𑁂 ‘‘𑀯𑀺𑀲’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀫𑀺𑀲𑀁 𑀩𑀦𑁆𑀥𑀦𑀜𑁆𑀘𑁂𑀢𑀦𑁆𑀢𑀺 𑀏𑀢𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀦𑀸𑀫 𑀏𑀯𑀁 𑀇𑀫𑀲𑁆𑀲 𑀫𑀘𑁆𑀙𑀪𑀽𑀢𑀲𑁆𑀲 𑀮𑁄𑀓𑀲𑁆𑀲 𑀫𑀸𑀭𑀩𑀸𑀮𑀺𑀲𑀺𑀓𑁂𑀦 𑀧𑀓𑁆𑀔𑀺𑀢𑁆𑀢𑀁 𑀆𑀫𑀺𑀲𑀜𑁆𑀘𑁂𑀯 ¶ , 𑀪𑀯𑀸𑀪𑀯𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀅𑀦𑁆𑀤𑀼𑀆𑀤𑀺𑀧𑁆𑀧𑀪𑁂𑀤𑀁 𑀦𑀸𑀦𑀧𑁆𑀧𑀓𑀸𑀭𑀁 𑀩𑀦𑁆𑀥𑀦𑀜𑁆𑀘. 𑀫𑀘𑁆𑀘𑀼𑀯𑁂𑀲𑁄 𑀕𑀼𑀳𑀸𑀲𑀬𑁄𑀢𑀺 ¶ 𑀲𑀭𑀻𑀭𑀕𑀼𑀳𑀸𑀬 𑀯𑀲𑀦𑀓𑁄 𑀫𑀭𑀡𑀫𑀘𑁆𑀘𑀼𑀯𑁂𑀲𑁄.

𑀏𑀯𑀫𑁂𑀯 𑀇𑀫𑁂 𑀓𑀸𑀫𑁂𑀢𑀺 𑀬𑀣𑀸 𑀯𑀢𑁆𑀢𑀦𑀺𑀫𑀳𑀸𑀫𑀕𑁆𑀕𑁂 𑀯𑀺𑀲𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑁂 𑀇𑀫𑁂 𑀓𑀸𑀫𑁂. 𑀆𑀢𑀼𑀭𑀸𑀢𑀺 𑀏𑀓𑀦𑁆𑀢𑀫𑀭𑀡𑀥𑀫𑁆𑀫𑀢𑀸𑀬 𑀆𑀢𑀼𑀭𑀸 𑀆𑀲𑀦𑁆𑀦𑀫𑀭𑀡𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸. 𑀧𑀭𑀺𑀘𑀸𑀭𑀺𑀓𑁂𑀢𑀺 𑀓𑀺𑀮𑁂𑀲𑀧𑀭𑀺𑀘𑀸𑀭𑀺𑀓𑁂 𑀓𑀺𑀮𑁂𑀲𑀩𑀦𑁆𑀥𑀓𑁂. 𑀬𑁂 𑀲𑀤𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀻𑀢𑀺 𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀦𑀺𑀘𑁆𑀘𑀁 𑀏𑀯𑀭𑀽𑀧𑁂 𑀓𑀸𑀫𑁂 𑀯𑀚𑁆𑀚𑁂𑀦𑁆𑀢𑀺. 𑀲𑀗𑁆𑀕𑀁 𑀮𑁄𑀓𑁂𑀢𑀺 𑀮𑁄𑀓𑁂 𑀲𑀗𑁆𑀕𑀦𑀝𑁆𑀞𑁂𑀦 ‘‘𑀲𑀗𑁆𑀕’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀭𑀸𑀕𑀸𑀤𑀺𑀪𑁂𑀤𑀁 𑀓𑀺𑀮𑁂𑀲𑀚𑀸𑀢𑀁. 𑀉𑀧𑀘𑁆𑀘𑀕𑀼𑀦𑁆𑀢𑀺 𑀅𑀢𑀻𑀢𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀯𑀸 𑀅𑀢𑁆𑀣𑁄.

𑀲𑀢𑁆𑀣𑀸 ¶ 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀲𑀢𑁆𑀣𑀯𑀸𑀳𑁄 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀕𑀼𑀫𑁆𑀩𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁬𑁭] 𑁭. 𑀲𑀸𑀴𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀬𑁆𑀯𑀸𑀬𑀁 𑀲𑀸𑀴𑀺𑀬𑀙𑀸𑀧𑁄𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀢𑀸𑀲𑀓𑀸𑀭𑀓𑁄𑀧𑀺 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀘𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀫 𑀢𑀸𑀲𑀓𑀸𑀭𑀓𑁄𑀧𑀺 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀸𑀫𑀓𑁂 𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀭𑀼𑀡𑀓𑀸𑀮𑁂 𑀧𑀁𑀲𑀼𑀓𑀻𑀴𑀓𑁂𑀳𑀺 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀓𑀻𑀴𑀢𑀺. 𑀢𑀤𑀸 𑀏𑀓𑁄 𑀤𑀼𑀩𑁆𑀩𑀮𑀯𑁂𑀚𑁆𑀚𑁄 𑀕𑀸𑀫𑁂 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀏𑀓𑀁 𑀲𑀧𑁆𑀧𑀁 𑀯𑀺𑀝𑀧𑀩𑁆𑀪𑀦𑁆𑀢𑀭𑁂𑀦 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀸 𑀕𑀸𑀫𑁂 𑀓𑀺𑀜𑁆𑀘𑀺 𑀦 𑀮𑀤𑁆𑀥𑀁, 𑀇𑀫𑁂 𑀤𑀸𑀭𑀓𑁂 𑀯𑀜𑁆𑀘𑁂𑀢𑁆𑀯𑀸 𑀲𑀧𑁆𑀧𑁂𑀦 𑀟𑀁𑀲𑀸𑀧𑁂𑀢𑁆𑀯𑀸 𑀢𑀺𑀓𑀺𑀘𑁆𑀙𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳 ‘‘𑀲𑀘𑁂 𑀲𑀸𑀴𑀺𑀬𑀙𑀸𑀧𑀁 𑀧𑀲𑁆𑀲𑁂𑀬𑁆𑀬𑀸𑀲𑀺, 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺. ‘‘𑀆𑀫, 𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 ¶ . ‘‘𑀧𑀲𑁆𑀲𑁂𑀲𑁄 𑀯𑀺𑀝𑀧𑀩𑁆𑀪𑀦𑁆𑀢𑀭𑁂 𑀲𑀬𑀺𑀢𑁄’’𑀢𑀺. 𑀲𑁄 ¶ 𑀢𑀲𑁆𑀲 𑀲𑀧𑁆𑀧𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀢𑀁 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 ‘‘𑀲𑀧𑁆𑀧𑁄’’𑀢𑀺 𑀜𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀲𑀼𑀕𑁆𑀕𑀳𑀺𑀢𑀁 𑀕𑀳𑁂𑀢𑁆𑀯𑀸 𑀯𑁂𑀕𑁂𑀦 𑀔𑀺𑀧𑀺. 𑀲𑁄 𑀕𑀦𑁆𑀢𑁆𑀯𑀸 𑀯𑁂𑀚𑁆𑀚𑀲𑁆𑀲 𑀕𑀻𑀯𑀸𑀬𑀁 𑀧𑀢𑀺𑀢𑁄 𑀕𑀻𑀯𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 ‘‘𑀓𑀭 𑀓𑀭𑀸’’𑀢𑀺 𑀟𑀁𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀁 𑀧𑀸𑀢𑁂𑀢𑁆𑀯𑀸 𑀧𑀮𑀸𑀬𑀺. 𑀫𑀦𑀼𑀲𑁆𑀲𑀸 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀫𑀳𑀸𑀲𑀢𑁆𑀢𑁄 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁦.

‘‘𑀬𑁆𑀯𑀸𑀬𑀁 𑀲𑀸𑀴𑀺𑀬𑀙𑀸𑀧𑁄𑀢𑀺, 𑀓𑀡𑁆𑀳𑀲𑀧𑁆𑀧𑀁 𑀅𑀕𑀸𑀳𑀬𑀺;

𑀢𑁂𑀦 𑀲𑀧𑁆𑀧𑁂𑀦𑀬𑀁 𑀤𑀝𑁆𑀞𑁄, 𑀳𑀢𑁄 𑀧𑀸𑀧𑀸𑀦𑀼𑀲𑀸𑀲𑀓𑁄.

𑁯𑁧.

‘‘𑀅𑀳𑀦𑁆𑀢𑀸𑀭𑀫𑀳𑀦𑁆𑀢𑀸𑀭𑀁, 𑀬𑁄 𑀦𑀭𑁄 𑀳𑀦𑁆𑀢𑀼𑀫𑀺𑀘𑁆𑀙𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀬𑀣𑀸𑀬𑀁 𑀧𑀼𑀭𑀺𑀲𑁄 𑀳𑀢𑁄.

𑁯𑁨.

‘‘𑀅𑀳𑀦𑁆𑀢𑀸𑀭𑀫𑀖𑀸𑀢𑁂𑀦𑁆𑀢𑀁 ¶ , 𑀬𑁄 𑀦𑀭𑁄 𑀳𑀦𑁆𑀢𑀼𑀫𑀺𑀘𑁆𑀙𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀬𑀣𑀸𑀬𑀁 𑀧𑀼𑀭𑀺𑀲𑁄 𑀳𑀢𑁄.

𑁯𑁩.

‘‘𑀬𑀣𑀸 𑀧𑀁𑀲𑀼𑀫𑀼𑀝𑁆𑀞𑀺𑀁 𑀧𑀼𑀭𑀺𑀲𑁄, 𑀧𑀝𑀺𑀯𑀸𑀢𑀁 𑀧𑀝𑀺𑀓𑁆𑀔𑀺𑀧𑁂;

𑀢𑀫𑁂𑀯 𑀲𑁄 𑀭𑀚𑁄 𑀳𑀦𑁆𑀢𑀺, 𑀢𑀣𑀸𑀬𑀁 𑀧𑀼𑀭𑀺𑀲𑁄 𑀳𑀢𑁄.

𑁯𑁪.

‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’𑀢𑀺.

𑀢𑀢𑁆𑀣 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀧𑁆𑀧𑁂𑀦𑀬𑀦𑁆𑀢𑀺 𑀲𑁄 𑀅𑀬𑀁 𑀢𑁂𑀦 𑀲𑀧𑁆𑀧𑁂𑀦 𑀤𑀝𑁆𑀞𑁄. 𑀧𑀸𑀧𑀸𑀦𑀼𑀲𑀸𑀲𑀓𑁄𑀢𑀺 𑀧𑀸𑀧𑀓𑀁 𑀅𑀦𑀼𑀲𑀸𑀲𑀓𑁄.

𑀅𑀳𑀦𑁆𑀢𑀸𑀭𑀦𑁆𑀢𑀺 𑀅𑀧𑀳𑀭𑀦𑁆𑀢𑀁. 𑀅𑀳𑀦𑁆𑀢𑀸𑀭𑀦𑁆𑀢𑀺 𑀅𑀫𑀸𑀭𑁂𑀦𑁆𑀢𑀁. 𑀲𑁂𑀢𑀻𑀢𑀺 𑀫𑀢𑀲𑀬𑀦𑀁 𑀲𑀬𑀢𑀺. 𑀅𑀖𑀸𑀢𑁂𑀦𑁆𑀢𑀦𑁆𑀢𑀺 𑀅𑀫𑀸𑀭𑁂𑀦𑁆𑀢𑀁. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀦𑀺𑀭𑀧𑀭𑀸𑀥𑀲𑁆𑀲. 𑀧𑁄𑀲𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀅𑀦𑀗𑁆𑀕𑀡𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀦𑀺𑀭𑀧𑀭𑀸𑀥𑀪𑀸𑀯𑀜𑁆𑀜𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀘𑁂𑀢𑀻𑀢𑀺 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀳𑀼𑀢𑁆𑀯𑀸 𑀧𑀢𑀺𑀏𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀩𑁆𑀩𑀮𑀯𑁂𑀚𑁆𑀚𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀤𑀸𑀭𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀸𑀴𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁬𑁮] 𑁮. 𑀢𑀘𑀲𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑀸𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸 𑀉𑀧𑀸𑀬𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀸𑀫𑀓𑁂 𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀚𑀸𑀢𑀓𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀢𑀩𑁆𑀩𑀁. 𑀇𑀥 𑀧𑀦 𑀯𑁂𑀚𑁆𑀚𑁂 𑀫𑀢𑁂 𑀕𑀸𑀫𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 ‘‘𑀫𑀦𑀼𑀲𑁆𑀲𑀫𑀸𑀭𑀓𑀸’’𑀢𑀺 𑀢𑁂 𑀤𑀸𑀭𑀓𑁂 𑀓𑀼𑀤𑀡𑁆𑀟𑀓𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 ‘‘𑀭𑀜𑁆𑀜𑁄 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀩𑀸𑀭𑀸𑀡𑀲𑀺𑀁 ¶ 𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀲𑁂𑀲𑀤𑀸𑀭𑀓𑀸𑀦𑀁 𑀑𑀯𑀸𑀤𑀁 𑀅𑀤𑀸𑀲𑀺 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀣, 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀧𑀺 𑀅𑀪𑀻𑀢𑀸 𑀢𑀼𑀝𑁆𑀞𑀺𑀦𑁆𑀤𑁆𑀭𑀺𑀬𑀸 𑀪𑀯𑁂𑀬𑁆𑀬𑀸𑀣, 𑀭𑀸𑀚𑀸 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀢𑀭𑀁 𑀓𑀣𑁂𑀲𑁆𑀲𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀓𑀭𑀺𑀁𑀲𑀼. 𑀭𑀸𑀚𑀸 𑀢𑁂 𑀅𑀪𑀻𑀢𑁂 𑀢𑀼𑀝𑁆𑀞𑀺𑀦𑁆𑀤𑁆𑀭𑀺𑀬𑁂 𑀤𑀺𑀲𑁆𑀯𑀸 ‘‘𑀇𑀫𑁂 ‘𑀫𑀦𑀼𑀲𑁆𑀲𑀫𑀸𑀭𑀓𑀸’𑀢𑀺 𑀓𑀼𑀤𑀡𑁆𑀟𑀓𑀩𑀤𑁆𑀥𑀸 𑀆𑀦𑀻𑀢𑀸, 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀧𑀢𑁆𑀢𑀸𑀧𑀺 𑀦 𑀪𑀸𑀬𑀦𑁆𑀢𑀺, 𑀢𑀼𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀬𑁂𑀯, 𑀓𑀺𑀁 𑀦𑀼 𑀔𑁄 𑀏𑀢𑁂𑀲𑀁 𑀅𑀲𑁄𑀘𑀦𑀓𑀸𑀭𑀡𑀁, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦𑁂’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁫.

‘‘𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑀸, 𑀢𑀘𑀲𑀸𑀭𑀲𑀫𑀧𑁆𑀧𑀺𑀢𑀸;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸𑀢𑁆𑀣, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀦 𑀲𑁄𑀘𑀣𑀸’’𑀢𑀺.

𑀢𑀢𑁆𑀣 𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑀸𑀢𑀺 𑀓𑀼𑀤𑀡𑁆𑀟𑀓𑁂𑀳𑀺 𑀕𑀻𑀯𑀸𑀬𑀁 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀦𑁆𑀢𑀸𑀦𑀁 𑀅𑀫𑀺𑀢𑁆𑀢𑀸𑀦𑀁 𑀳𑀢𑁆𑀣𑀕𑀢𑀸. 𑀢𑀘𑀲𑀸𑀭𑀲𑀫𑀧𑁆𑀧𑀺𑀢𑀸𑀢𑀺 𑀯𑁂𑀴𑀼𑀤𑀡𑁆𑀟𑀓𑁂𑀳𑀺 𑀩𑀤𑁆𑀥𑀢𑁆𑀢𑀸 𑀏𑀯𑀫𑀸𑀳. 𑀓𑀲𑁆𑀫𑀸𑀢𑀺 ‘‘𑀏𑀯𑀭𑀽𑀧𑀁 𑀩𑁆𑀬𑀲𑀦𑀁 𑀧𑀢𑁆𑀢𑀸𑀧𑀺 𑀢𑀼𑀫𑁆𑀳𑁂 𑀓𑀺𑀁𑀓𑀸𑀭𑀡𑀸 𑀦 𑀲𑁄𑀘𑀣𑀸’’𑀢𑀺 𑀧𑀼𑀘𑁆𑀙𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁬.

‘‘𑀦 𑀲𑁄𑀘𑀦𑀸𑀬 𑀧𑀭𑀺𑀤𑁂𑀯𑀦𑀸𑀬, 𑀅𑀢𑁆𑀣𑁄𑀯 𑀮𑀩𑁆𑀪𑁄 𑀅𑀧𑀺 𑀅𑀧𑁆𑀧𑀓𑁄𑀧𑀺;

𑀲𑁄𑀘𑀦𑁆𑀢𑀫𑁂𑀦𑀁 𑀤𑀼𑀔𑀺𑀢𑀁 𑀯𑀺𑀤𑀺𑀢𑁆𑀯𑀸, 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

𑁯𑁭.

‘‘𑀬𑀢𑁄 ¶ 𑀘 𑀔𑁄 𑀧𑀡𑁆𑀟𑀺𑀢𑁄 𑀆𑀧𑀤𑀸𑀲𑀼, 𑀦 𑀯𑁂𑀥𑀢𑀻 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀜𑁆𑀜𑀽;

𑀧𑀘𑁆𑀘𑀢𑁆𑀣𑀺𑀓𑀸𑀲𑁆𑀲 𑀤𑀼𑀔𑀺𑀢𑀸 𑀪𑀯𑀦𑁆𑀢𑀺, 𑀤𑀺𑀲𑁆𑀯𑀸 𑀫𑀼𑀔𑀁 𑀅𑀯𑀺𑀓𑀸𑀭𑀁 𑀧𑀼𑀭𑀸𑀡𑀁.

𑁯𑁮.

‘‘𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦, 𑀅𑀦𑀼𑀧𑁆𑀧𑀤𑀸𑀦𑁂𑀦 𑀧𑀯𑁂𑀡𑀺𑀬𑀸 𑀯𑀸;

𑀬𑀣𑀸 𑀬𑀣𑀸 𑀬𑀢𑁆𑀣 𑀮𑀪𑁂𑀣 𑀅𑀢𑁆𑀣𑀁, 𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬.

𑁯𑁯.

‘‘𑀬𑀢𑁄 𑀘 𑀚𑀸𑀦𑁂𑀬𑁆𑀬 𑀅𑀮𑀩𑁆𑀪𑀦𑁂𑀬𑁆𑀬𑁄, 𑀫𑀬𑀸𑀯 𑀅𑀜𑁆𑀜𑁂𑀦 𑀯𑀸 𑀏𑀲 𑀅𑀢𑁆𑀣𑁄;

𑀅𑀲𑁄𑀘𑀫𑀸𑀦𑁄 𑀅𑀥𑀺𑀯𑀸𑀲𑀬𑁂𑀬𑁆𑀬, 𑀓𑀫𑁆𑀫𑀁 𑀤𑀴𑁆𑀳𑀁 𑀓𑀺𑀦𑁆𑀢𑀺 𑀓𑀭𑁄𑀫𑀺 𑀤𑀸𑀦𑀻’’𑀢𑀺.

𑀢𑀢𑁆𑀣 𑀅𑀢𑁆𑀣𑁄𑀢𑀺 𑀯𑀼𑀟𑁆𑀠𑀺. 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀢𑀫𑀦𑀸𑀢𑀺 𑀏𑀢𑀁 𑀧𑀼𑀭𑀺𑀲𑀁 𑀲𑁄𑀘𑀦𑁆𑀢𑀁 𑀤𑀼𑀓𑁆𑀔𑀺𑀢𑀁 𑀯𑀺𑀤𑀺𑀢𑁆𑀯𑀸 𑀧𑀘𑁆𑀘𑀸𑀫𑀺𑀢𑁆𑀢𑀸 𑀢𑀼𑀝𑁆𑀞𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀢𑀼𑀲𑁆𑀲𑀦𑀓𑀸𑀭𑀡𑀁 𑀦𑀸𑀫 𑀧𑀡𑁆𑀟𑀺𑀢𑁂𑀦 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺 ¶ . 𑀬𑀢𑁄𑀢𑀺 𑀬𑀤𑀸. 𑀦 𑀯𑁂𑀥𑀢𑀻𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑁂𑀦 𑀦 𑀓𑀫𑁆𑀧𑀢𑀺. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀜𑁆𑀜𑀽𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄.

𑀚𑀧𑁆𑀧𑁂𑀦𑀸𑀢𑀺 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑁂𑀦. 𑀫𑀦𑁆𑀢𑁂𑀦𑀸𑀢𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀕𑁆𑀕𑀳𑀡𑁂𑀦. 𑀲𑀼𑀪𑀸𑀲𑀺𑀢𑁂𑀦𑀸𑀢𑀺 𑀧𑀺𑀬𑀯𑀘𑀦𑁂𑀦. 𑀅𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀮𑀜𑁆𑀚𑀤𑀸𑀦𑁂𑀦. 𑀧𑀯𑁂𑀡𑀺𑀬𑀸𑀢𑀺 𑀓𑀼𑀮𑀯𑀁𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑁂𑀦 𑀦𑀸𑀫 𑀆𑀧𑀤𑀸𑀲𑀼 𑀉𑀧𑁆𑀧𑀦𑁆𑀦𑀸𑀲𑀼 𑀦 𑀲𑁄𑀘𑀺𑀢𑀩𑁆𑀩𑀁 𑀦 𑀓𑀺𑀮𑀫𑀺𑀢𑀩𑁆𑀩𑀁, 𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀓𑀸𑀭𑀡𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑀸 𑀚𑀺𑀦𑀺𑀢𑀩𑁆𑀩𑀸. 𑀲𑀘𑁂 𑀳𑀺 𑀲𑀓𑁆𑀓𑁄𑀢𑀺, 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀫𑀼𑀔𑀩𑀦𑁆𑀥𑀦𑀁 𑀓𑀢𑁆𑀯𑀸𑀧𑀺 𑀢𑁂 𑀚𑀺𑀦𑀺𑀢𑀩𑁆𑀩𑀸, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀡𑁆𑀟𑀺𑀢𑁂𑀳𑀺 ¶ 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀏𑀓𑀁 𑀉𑀧𑀸𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀺𑀦𑀺𑀢𑀩𑁆𑀩𑀸, 𑀧𑀺𑀬𑀯𑀘𑀦𑀁 𑀯𑀢𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑁂𑀦 𑀧𑀺𑀬𑀁 𑀯𑀢𑁆𑀯𑀸𑀧𑀺 𑀢𑁂 𑀚𑀺𑀦𑀺𑀢𑀩𑁆𑀩𑀸, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑀸𑀦𑀁 𑀮𑀜𑁆𑀚𑀁 𑀤𑀢𑁆𑀯𑀸𑀧𑀺 𑀚𑀺𑀦𑀺𑀢𑀩𑁆𑀩𑀸, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀓𑀼𑀮𑀯𑀁𑀲𑀁 𑀓𑀣𑁂𑀢𑁆𑀯𑀸 ‘‘𑀫𑀬𑀁 𑀅𑀲𑀼𑀓𑀧𑀯𑁂𑀡𑀺𑀬𑀸 𑀆𑀕𑀢𑀸, 𑀢𑀼𑀫𑁆𑀳𑀸𑀓𑀜𑁆𑀘 𑀅𑀫𑁆𑀳𑀸𑀓𑀜𑁆𑀘 𑀏𑀓𑁄𑀯 𑀧𑀼𑀩𑁆𑀩𑀧𑀼𑀭𑀺𑀲𑁄’’𑀢𑀺 𑀏𑀯𑀁 𑀯𑀺𑀚𑁆𑀚𑀫𑀸𑀦𑀜𑀸𑀢𑀺𑀓𑁄𑀝𑀺𑀁 𑀖𑀝𑁂𑀢𑁆𑀯𑀸𑀧𑀺 𑀚𑀺𑀦𑀺𑀢𑀩𑁆𑀩𑀸 𑀏𑀯𑀸𑀢𑀺. 𑀬𑀣𑀸 𑀬𑀣𑀸𑀢𑀺 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀓𑀸𑀭𑀡𑁂𑀲𑀼 𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦 𑀬𑀢𑁆𑀣 𑀬𑀢𑁆𑀣 𑀅𑀢𑁆𑀢𑀦𑁄 𑀯𑀼𑀟𑁆𑀠𑀺𑀁 𑀮𑀪𑁂𑀬𑁆𑀬. 𑀢𑀣𑀸 𑀢𑀣𑀸𑀢𑀺 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬, 𑀧𑀭𑀓𑁆𑀓𑀫𑀁 𑀓𑀢𑁆𑀯𑀸 𑀧𑀘𑁆𑀘𑀢𑁆𑀣𑀺𑀓𑁂 𑀚𑀺𑀦𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀢𑁄 𑀘 𑀚𑀸𑀦𑁂𑀬𑁆𑀬𑀸𑀢𑀺 𑀬𑀤𑀸 𑀧𑀦 𑀚𑀸𑀦𑁂𑀬𑁆𑀬, 𑀫𑀬𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀏𑀲 𑀅𑀢𑁆𑀣𑁄 𑀅𑀮𑀩𑁆𑀪𑀦𑁂𑀬𑁆𑀬𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀯𑀸𑀬𑀫𑀺𑀢𑁆𑀯𑀸𑀧𑀺 ¶ 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀤𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀅𑀲𑁄𑀘𑀫𑀸𑀦𑁄 𑀅𑀓𑀺𑀮𑀫𑀫𑀸𑀦𑁄 ‘‘𑀫𑀬𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀤𑀴𑁆𑀳𑀁 𑀣𑀺𑀭𑀁 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁, 𑀇𑀤𑀸𑀦𑀺 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀅𑀥𑀺𑀯𑀸𑀲𑀬𑁂𑀬𑁆𑀬𑀸𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀓𑀫𑁆𑀫𑀁 𑀲𑁄𑀥𑁂𑀢𑁆𑀯𑀸 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 𑀓𑀼𑀤𑀡𑁆𑀟𑀓𑁂 𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀓𑀁 𑀅𑀫𑀘𑁆𑀘𑀭𑀢𑀦𑀁 𑀅𑀓𑀸𑀲𑀺, 𑀲𑁂𑀲𑀤𑀸𑀭𑀓𑀸𑀦𑀫𑁆𑀧𑀺 𑀬𑀲𑀁 𑀤𑀢𑁆𑀯𑀸 𑀞𑀸𑀦𑀦𑁆𑀢𑀭𑀸𑀦𑀺 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀤𑀸𑀭𑀓𑀸 𑀣𑁂𑀭𑀸𑀦𑀼𑀣𑁂𑀭𑀸, 𑀧𑀡𑁆𑀟𑀺𑀢𑀤𑀸𑀭𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀘𑀲𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁬𑁯] 𑁯. 𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑁆𑀬𑀸𑀳𑀁 ¶ 𑀤𑁂𑀯𑀸𑀦𑀫𑀓𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀳𑀸𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑁂 (𑀚𑀸. 𑁧.𑁫.𑁧𑁦𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀲𑀫𑀼𑀤𑁆𑀤𑁂 𑀔𑀺𑀢𑁆𑀢𑁄 𑀅𑀢𑁆𑀭𑀺𑀘𑁆𑀙𑁄 𑀳𑀼𑀢𑁆𑀯𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁 𑀧𑀘𑁆𑀘𑀦𑀝𑁆𑀞𑀸𑀦𑀁 𑀉𑀲𑁆𑀲𑀤𑀦𑀺𑀭𑀬𑀁 𑀤𑀺𑀲𑁆𑀯𑀸 ‘‘𑀏𑀓𑀁 𑀦𑀕𑀭’’𑀦𑁆𑀢𑀺 ¶ 𑀲𑀜𑁆𑀜𑀸𑀬 𑀧𑀯𑀺𑀲𑀺𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀅𑀲𑁆𑀲𑀸𑀤𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀉𑀲𑁆𑀲𑀤𑀦𑀺𑀭𑀬𑀘𑀸𑀭𑀺𑀓𑀁 𑀘𑀭𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁦.

‘‘𑀓𑁆𑀬𑀸𑀳𑀁 𑀤𑁂𑀯𑀸𑀦𑀫𑀓𑀭𑀁, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀬𑀁 𑀫𑁂 𑀲𑀺𑀭𑀲𑁆𑀫𑀺𑀁 𑀑𑀳𑀘𑁆𑀘, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺.

𑀢𑀢𑁆𑀣 𑀓𑁆𑀬𑀸𑀳𑀁 𑀤𑁂𑀯𑀸𑀦𑀫𑀓𑀭𑀦𑁆𑀢𑀺 𑀲𑀸𑀫𑀺 𑀤𑁂𑀯𑀧𑀼𑀢𑁆𑀢, 𑀓𑀺𑀁 𑀦𑀸𑀫 𑀅𑀳𑀁 𑀤𑁂𑀯𑀸𑀦𑀁 𑀅𑀓𑀭𑀺𑀁, 𑀓𑀺𑀁 𑀫𑀁 𑀤𑁂𑀯𑀸 𑀧𑁄𑀣𑁂𑀦𑁆𑀢𑀻𑀢𑀺. 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸𑀢𑀺 𑀤𑀼𑀓𑁆𑀔𑀫𑀳𑀦𑁆𑀢𑀢𑀸𑀬 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑀸 𑀓𑀢𑀁 𑀧𑀸𑀧𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀯𑀫𑀸𑀳. 𑀬𑀁 𑀫𑁂𑀢𑀺 𑀬𑁂𑀦 𑀧𑀸𑀧𑁂𑀦 𑀫𑀫 𑀲𑀺𑀭𑀲𑁆𑀫𑀺𑀁 𑀑𑀳𑀘𑁆𑀘 𑀑𑀳𑀦𑀺𑀢𑁆𑀯𑀸 𑀇𑀤𑀁 𑀔𑀼𑀭𑀘𑀓𑁆𑀓𑀁 𑀫𑀫 𑀫𑀢𑁆𑀣𑀓𑁂 𑀪𑀫𑀢𑀺, 𑀢𑀁 𑀓𑀺𑀁 𑀦𑀸𑀫𑀸𑀢𑀺?

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁧.

‘‘𑀅𑀢𑀺𑀓𑁆𑀓𑀫𑁆𑀫 𑀭𑀫𑀡𑀓𑀁, 𑀲𑀤𑀸𑀫𑀢𑁆𑀢𑀜𑁆𑀘 𑀤𑀽𑀪𑀓𑀁;

𑀩𑁆𑀭𑀳𑁆𑀫𑀢𑁆𑀢𑀭𑀜𑁆𑀘 𑀧𑀸𑀲𑀸𑀤𑀁, 𑀓𑁂𑀦𑀢𑁆𑀣𑁂𑀦 𑀇𑀥𑀸𑀕𑀢𑁄’’𑀢𑀺.

𑀢𑀢𑁆𑀣 𑀭𑀫𑀡𑀓𑀦𑁆𑀢𑀺 𑀨𑀮𑀺𑀓𑀧𑀸𑀲𑀸𑀤𑀁. 𑀲𑀤𑀸𑀫𑀢𑁆𑀢𑀦𑁆𑀢𑀺 𑀭𑀚𑀢𑀧𑀸𑀲𑀸𑀤𑀁. 𑀤𑀽𑀪𑀓𑀦𑁆𑀢𑀺 𑀫𑀡𑀺𑀧𑀸𑀲𑀸𑀤𑀁. 𑀩𑁆𑀭𑀳𑁆𑀫𑀢𑁆𑀢𑀭𑀜𑁆𑀘 𑀧𑀸𑀲𑀸𑀤𑀦𑁆𑀢𑀺 𑀲𑀼𑀯𑀡𑁆𑀡𑀧𑀸𑀲𑀸𑀤𑀜𑁆𑀘. 𑀓𑁂𑀦𑀢𑁆𑀣𑁂𑀦𑀸𑀢𑀺 𑀢𑁆𑀯𑀁 𑀏𑀢𑁂𑀲𑀼 𑀭𑀫𑀡𑀓𑀸𑀤𑀻𑀲𑀼 𑀘𑀢𑀲𑁆𑀲𑁄 𑀅𑀝𑁆𑀞 𑀲𑁄𑀴𑀲 𑀤𑁆𑀯𑀢𑁆𑀢𑀺𑀁𑀲𑀸𑀢𑀺 𑀏𑀢𑀸 𑀤𑁂𑀯𑀥𑀻𑀢𑀭𑁄 𑀧𑀳𑀸𑀬 𑀢𑁂 𑀧𑀸𑀲𑀸𑀤𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑁂𑀦 𑀓𑀸𑀭𑀡𑁂𑀦 𑀇𑀥 𑀆𑀕𑀢𑁄𑀢𑀺.

𑀢𑀢𑁄 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁨.

‘‘𑀇𑀢𑁄 ¶ 𑀩𑀳𑀼𑀢𑀭𑀸 𑀪𑁄𑀕𑀸, 𑀅𑀢𑁆𑀭 𑀫𑀜𑁆𑀜𑁂 𑀪𑀯𑀺𑀲𑁆𑀲𑀭𑁂;

𑀇𑀢𑀺 𑀏𑀢𑀸𑀬 𑀲𑀜𑁆𑀜𑀸𑀬, 𑀧𑀲𑁆𑀲 𑀫𑀁 𑀩𑁆𑀬𑀲𑀦𑀁 𑀕𑀢’’𑀦𑁆𑀢𑀺.

𑀢𑀢𑁆𑀣 𑀇𑀢𑁄 𑀩𑀳𑀼𑀢𑀭𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀸𑀲𑀸𑀤𑁂𑀲𑀼 𑀪𑁄𑀕𑁂𑀳𑀺 𑀅𑀢𑀺𑀭𑁂𑀓𑀢𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁩.

‘‘𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁧𑁦𑁪.

‘‘𑀉𑀧𑀭𑀺𑀯𑀺𑀲𑀸𑀮𑀸 ¶ 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻;

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄’’𑀢𑀺.

𑀢𑀢𑁆𑀣 𑀉𑀧𑀭𑀺𑀯𑀺𑀲𑀸𑀮𑀸𑀢𑀺 𑀫𑀺𑀢𑁆𑀢𑀯𑀺𑀦𑁆𑀤𑀓 𑀢𑀡𑁆𑀳𑀸 𑀦𑀸𑀫𑁂𑀲𑀸 𑀆𑀲𑁂𑀯𑀺𑀬𑀫𑀸𑀦𑀸 𑀉𑀧𑀭𑀺𑀯𑀺𑀲𑀸𑀮𑀸 𑀳𑁄𑀢𑀺 𑀧𑀢𑁆𑀣𑀝𑀸, 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀤𑀼𑀧𑁆𑀧𑀽𑀭𑀸, 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀇𑀘𑁆𑀙𑀫𑀸𑀦𑀸𑀬 𑀇𑀘𑁆𑀙𑀸𑀬 𑀧𑀢𑁆𑀣𑀝𑀸𑀬 𑀯𑀺𑀲𑀝𑀕𑀸𑀫𑀺𑀦𑀻, 𑀢𑀲𑁆𑀫𑀸 𑀬𑁂 𑀧𑀼𑀭𑀺𑀲𑀸 𑀢𑀁 𑀏𑀯𑀭𑀽𑀧𑀁 𑀢𑀡𑁆𑀳𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀕𑀺𑀤𑁆𑀥𑀸 𑀳𑀼𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄𑀢𑀺 𑀢𑁂 𑀏𑀢𑀁 𑀔𑀼𑀭𑀘𑀓𑁆𑀓𑀁 𑀥𑀸𑀭𑁂𑀦𑁆𑀢𑀻𑀢𑀺 𑀯𑀤𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀁 𑀧𑀦 𑀓𑀣𑁂𑀦𑁆𑀢𑀫𑁂𑀯 𑀦𑀺𑀧𑀺𑀲𑀫𑀸𑀦𑀁 𑀢𑀁 𑀔𑀼𑀭𑀘𑀓𑁆𑀓𑀁 𑀪𑀲𑁆𑀲𑀺, 𑀢𑁂𑀦 𑀲𑁄 𑀧𑀼𑀦 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀤𑁂𑀯𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁭𑁦] 𑁧𑁦. 𑀧𑀮𑀸𑀲𑀚𑀸𑀢𑀓𑀯𑀡𑁆𑀡𑀦𑀸

𑀳𑀁𑀲𑁄 𑀧𑀮𑀸𑀲𑀫𑀯𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀮𑁂𑀲𑀦𑀺𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀜𑁆𑀜𑀸𑀲𑀚𑀸𑀢𑀓𑁂 ¶ 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀥 𑀧𑀦 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀓𑀺𑀮𑁂𑀲𑁄 𑀦𑀸𑀫 𑀆𑀲𑀗𑁆𑀓𑀺𑀢𑀩𑁆𑀩𑁄𑀯, 𑀅𑀧𑁆𑀧𑀫𑀢𑁆𑀢𑀓𑁄 𑀲𑀫𑀸𑀦𑁄𑀧𑀺 𑀦𑀺𑀕𑁆𑀭𑁄𑀥𑀕𑀘𑁆𑀙𑁄 𑀯𑀺𑀬 𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀆𑀲𑀗𑁆𑀓𑀺𑀢𑀩𑁆𑀩𑀁 𑀆𑀲𑀗𑁆𑀓𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀼𑀯𑀡𑁆𑀡𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀲𑀼𑀯𑀡𑁆𑀡𑀕𑀼𑀳𑀸𑀬𑀁 𑀯𑀲𑀦𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀚𑀸𑀢𑀲𑁆𑀲𑀭𑁂 𑀲𑀬𑀁𑀚𑀸𑀢𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀲𑁆𑀲 𑀕𑀫𑀦𑀸𑀕𑀫𑀦𑀫𑀕𑁆𑀕𑁂 𑀫𑀳𑀸𑀧𑀮𑀸𑀲𑀭𑀼𑀓𑁆𑀔𑁄 𑀅𑀳𑁄𑀲𑀺. 𑀲𑁄 𑀕𑀘𑁆𑀙𑀦𑁆𑀢𑁄𑀧𑀺 𑀢𑀢𑁆𑀣 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀢𑁆𑀣 𑀯𑀺𑀲𑁆𑀲𑀫𑀺𑀢𑁆𑀯𑀸 𑀆𑀕𑀘𑁆𑀙𑀢𑀺 ¶ . 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸𑀬 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀏𑀓𑀸 𑀲𑀓𑀼𑀡𑀺𑀓𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀦𑀺𑀕𑁆𑀭𑁄𑀥𑀧𑀓𑁆𑀓𑀁 𑀔𑀸𑀤𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀧𑀮𑀸𑀲𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀝𑀧𑀦𑁆𑀢𑀭𑁂 𑀯𑀘𑁆𑀘𑀁 𑀧𑀸𑀢𑁂𑀲𑀺. 𑀢𑀢𑁆𑀣 𑀦𑀺𑀕𑁆𑀭𑁄𑀥𑀕𑀘𑁆𑀙𑁄 𑀚𑀸𑀢𑁄, 𑀲𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀓𑀸𑀮𑁂 𑀭𑀢𑁆𑀢𑀗𑁆𑀓𑀼𑀭𑀧𑀮𑀸𑀲𑀢𑀸𑀬 𑀲𑁄𑀪𑀢𑀺. 𑀳𑀁𑀲𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫 𑀧𑀮𑀸𑀲, 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀬𑀫𑁆𑀳𑀺 𑀭𑀼𑀓𑁆𑀔𑁂 𑀚𑀸𑀬𑀢𑀺, 𑀯𑀟𑁆𑀠𑀦𑁆𑀢𑁄 𑀢𑀁 𑀦𑀸𑀲𑁂𑀢𑀺, 𑀇𑀫𑀲𑁆𑀲 𑀯𑀟𑁆𑀠𑀺𑀢𑀼𑀁 𑀫𑀸 𑀤𑁂𑀢𑀺, 𑀯𑀺𑀫𑀸𑀦𑀁 𑀢𑁂 𑀦𑀸𑀲𑁂𑀲𑁆𑀲𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑁂𑀳𑀺, 𑀆𑀲𑀗𑁆𑀓𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀦𑀸𑀫 𑀆𑀲𑀗𑁆𑀓𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀮𑀸𑀲𑀤𑁂𑀯𑀢𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁫.

‘‘𑀳𑀁𑀲𑁄 ¶ 𑀧𑀮𑀸𑀲𑀫𑀯𑀘, 𑀦𑀺𑀕𑁆𑀭𑁄𑀥𑁄 𑀲𑀫𑁆𑀫 𑀚𑀸𑀬𑀢𑀺;

𑀅𑀗𑁆𑀓𑀲𑁆𑀫𑀺𑀁 𑀢𑁂 𑀦𑀺𑀲𑀺𑀦𑁆𑀦𑁄𑀯, 𑀲𑁄 𑀢𑁂 𑀫𑀫𑁆𑀫𑀸𑀦𑀺 𑀙𑁂𑀘𑁆𑀙𑀢𑀻’’𑀢𑀺.

𑀧𑀞𑀫𑀧𑀸𑀤𑁄 𑀧𑀦𑁂𑀢𑁆𑀣 𑀅𑀪𑀺𑀲𑀫𑁆𑀩𑀼𑀤𑁆𑀥𑁂𑀦 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑁄. 𑀧𑀮𑀸𑀲𑀦𑁆𑀢𑀺 𑀧𑀮𑀸𑀲𑀤𑁂𑀯𑀢𑀁. 𑀲𑀫𑁆𑀫𑀸𑀢𑀺 𑀯𑀬𑀲𑁆𑀲. 𑀅𑀗𑁆𑀓𑀲𑁆𑀫𑀺𑀦𑁆𑀢𑀺 𑀯𑀺𑀝𑀪𑀺𑀬𑀁. 𑀲𑁄 𑀢𑁂 𑀫𑀫𑁆𑀫𑀸𑀦𑀺 𑀙𑁂𑀘𑁆𑀙𑀢𑀻𑀢𑀺 𑀲𑁄 𑀢𑁂 𑀅𑀗𑁆𑀓𑁂 𑀲𑀁𑀯𑀟𑁆𑀠𑁄 𑀲𑀧𑀢𑁆𑀢𑁄 𑀯𑀺𑀬 𑀚𑀻𑀯𑀺𑀢𑀁 𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀲𑀗𑁆𑀔𑀸𑀭𑀸 𑀳𑀺 𑀇𑀥 ‘‘𑀫𑀫𑁆𑀫𑀸𑀦𑀻’’𑀢𑀺 𑀯𑀼𑀢𑁆𑀢𑀸.

𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑀻 𑀧𑀮𑀸𑀲𑀤𑁂𑀯𑀢𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁬.

‘‘𑀯𑀟𑁆𑀠𑀢𑀸𑀫𑁂𑀯 𑀦𑀺𑀕𑁆𑀭𑁄𑀥𑁄, 𑀧𑀢𑀺𑀝𑁆𑀞𑀲𑁆𑀲 𑀪𑀯𑀸𑀫𑀳𑀁;

𑀬𑀣𑀸 𑀧𑀺𑀢𑀸 𑀘 𑀫𑀸𑀢𑀸 𑀘, 𑀏𑀯𑀁 𑀫𑁂 𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀫𑁆𑀫, 𑀦 𑀢𑁆𑀯𑀁 𑀚𑀸𑀦𑀸𑀲𑀺 𑀯𑀟𑁆𑀠𑀢𑀫𑁂𑀯 𑀏𑀲, 𑀅𑀳𑀫𑀲𑁆𑀲 𑀬𑀣𑀸 𑀩𑀸𑀮𑀓𑀸𑀮𑁂 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 ¶ 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀢𑀣𑀸 𑀪𑀯𑀺𑀲𑁆𑀲𑀸𑀫𑀺, 𑀬𑀣𑀸 𑀧𑀦 𑀲𑀁𑀯𑀟𑁆𑀠𑀸 𑀧𑀼𑀢𑁆𑀢𑀸 𑀧𑀘𑁆𑀙𑀸 𑀫𑀳𑀮𑁆𑀮𑀓𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀦𑀁 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀫𑀬𑁆𑀳𑀫𑁆𑀧𑀺 𑀧𑀘𑁆𑀙𑀸 𑀫𑀳𑀮𑁆𑀮𑀓𑀓𑀸𑀮𑁂 𑀏𑀯𑀫𑁂𑀯 𑀲𑁄 𑀧𑀢𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀢𑀢𑁄 𑀳𑀁𑀲𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁭.

‘‘𑀬𑀁 𑀢𑁆𑀯𑀁 𑀅𑀗𑁆𑀓𑀲𑁆𑀫𑀺𑀁 𑀯𑀟𑁆𑀠𑁂𑀲𑀺, 𑀔𑀻𑀭𑀭𑀼𑀓𑁆𑀔𑀁 𑀪𑀬𑀸𑀦𑀓𑀁;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫, 𑀯𑀼𑀟𑁆𑀠𑀺 𑀫𑀲𑁆𑀲 𑀦 𑀭𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀬𑀁 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀏𑀢𑀜𑁆𑀘 𑀪𑀬𑀤𑀸𑀬𑀓𑀢𑁆𑀢𑁂𑀦 𑀪𑀬𑀸𑀦𑀓𑀁 𑀔𑀻𑀭𑀭𑀼𑀓𑁆𑀔𑀁 𑀲𑀧𑀢𑁆𑀢𑀁 𑀯𑀺𑀬 𑀅𑀗𑁆𑀓𑁂 𑀯𑀟𑁆𑀠𑁂𑀲𑀺. 𑀆𑀫𑀦𑁆𑀢 𑀔𑁄 𑀢𑀦𑁆𑀢𑀺 𑀢𑀲𑁆𑀫𑀸 𑀫𑀬𑀁 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ¶ 𑀚𑀸𑀦𑀸𑀧𑁂𑀢𑁆𑀯𑀸 𑀕𑀘𑁆𑀙𑀸𑀫. 𑀯𑀼𑀟𑁆𑀠𑀺 𑀫𑀲𑁆𑀲𑀸𑀢𑀺 𑀅𑀲𑁆𑀲 𑀯𑀼𑀟𑁆𑀠𑀺 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀳𑀁𑀲𑀭𑀸𑀚𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀫𑁂𑀯 𑀕𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦𑀸𑀕𑀘𑁆𑀙𑀺. 𑀅𑀧𑀭𑀪𑀸𑀕𑁂 𑀦𑀺𑀕𑁆𑀭𑁄𑀥𑁄 𑀯𑀟𑁆𑀠𑀺𑀁, 𑀢𑀲𑁆𑀫𑀺𑀁 𑀏𑀓𑀸 𑀭𑀼𑀓𑁆𑀔𑀤𑁂𑀯𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀯𑀟𑁆𑀠𑀦𑁆𑀢𑁄 𑀧𑀮𑀸𑀲𑀁 𑀪𑀜𑁆𑀚𑀺, 𑀲𑀸𑀔𑀸𑀳𑀺 𑀲𑀤𑁆𑀥𑀺𑀁𑀬𑁂𑀯 𑀤𑁂𑀯𑀢𑀸𑀬 𑀯𑀺𑀫𑀸𑀦𑀁 𑀧𑀢𑀺. 𑀲𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀳𑀁𑀲𑀭𑀜𑁆𑀜𑁄 𑀯𑀘𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀇𑀤𑀁 𑀅𑀦𑀸𑀕𑀢𑀪𑀬𑀁 𑀤𑀺𑀲𑁆𑀯𑀸 𑀳𑀁𑀲𑀭𑀸𑀚𑀸 𑀓𑀣𑁂𑀲𑀺 ¶ , 𑀅𑀳𑀁 𑀧𑀦𑀲𑁆𑀲 𑀯𑀘𑀦𑀁 𑀦𑀸𑀓𑀸𑀲𑀺’’𑀦𑁆𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀇𑀤𑀸𑀦𑀺 𑀔𑁄 𑀫𑀁 𑀪𑀸𑀬𑁂𑀢𑀺, 𑀫𑀳𑀸𑀦𑁂𑀭𑀼𑀦𑀺𑀤𑀲𑁆𑀲𑀦𑀁;

𑀳𑀁𑀲𑀲𑁆𑀲 𑀅𑀦𑀪𑀺𑀜𑁆𑀜𑀸𑀬, 𑀫𑀳𑀸 𑀫𑁂 𑀪𑀬𑀫𑀸𑀕𑀢’’𑀦𑁆𑀢𑀺.

𑀢𑀢𑁆𑀣 𑀇𑀤𑀸𑀦𑀺 𑀔𑁄 𑀫𑀁 𑀪𑀸𑀬𑁂𑀢𑀻𑀢𑀺 𑀅𑀬𑀁 𑀦𑀺𑀕𑁆𑀭𑁄𑀥𑁄 𑀢𑀭𑀼𑀡𑀓𑀸𑀮𑁂 𑀢𑁄𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀁 𑀪𑀸𑀬𑀸𑀧𑁂𑀢𑀺 𑀲𑀦𑁆𑀢𑀸𑀲𑁂𑀢𑀺. 𑀫𑀳𑀸𑀦𑁂𑀭𑀼𑀦𑀺𑀤𑀲𑁆𑀲𑀦𑀦𑁆𑀢𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀲𑀤𑀺𑀲𑀁 𑀫𑀳𑀦𑁆𑀢𑀁 𑀳𑀁𑀲𑀭𑀸𑀚𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀚𑀸𑀦𑀺𑀢𑁆𑀯𑀸 𑀢𑀭𑀼𑀡𑀓𑀸𑀮𑁂𑀬𑁂𑀯 𑀏𑀢𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀫𑀳𑀸 𑀫𑁂 𑀪𑀬𑀫𑀸𑀕𑀢𑀦𑁆𑀢𑀺 𑀇𑀤𑀸𑀦𑀺 𑀫𑀬𑁆𑀳𑀁 𑀫𑀳𑀦𑁆𑀢𑀁 𑀪𑀬𑀁 𑀆𑀕𑀢𑀦𑁆𑀢𑀺 𑀧𑀭𑀺𑀤𑁂𑀯𑀺.

𑀦𑀺𑀕𑁆𑀭𑁄𑀥𑁄𑀧𑀺 𑀯𑀟𑁆𑀠𑀦𑁆𑀢𑁄 𑀲𑀩𑁆𑀩𑀁 𑀧𑀮𑀸𑀲𑀁 𑀪𑀜𑁆𑀚𑀺𑀢𑁆𑀯𑀸 𑀔𑀸𑀡𑀼𑀓𑀫𑀢𑁆𑀢𑀫𑁂𑀯 𑀅𑀓𑀸𑀲𑀺. 𑀤𑁂𑀯𑀢𑀸𑀬 𑀯𑀺𑀫𑀸𑀦𑀁 𑀲𑀩𑁆𑀩𑀁 𑀅𑀦𑁆𑀢𑀭𑀥𑀸𑀬𑀺.

𑁧𑁦𑁯.

‘‘𑀦 ¶ 𑀢𑀲𑁆𑀲 𑀯𑀼𑀟𑁆𑀠𑀺 𑀓𑀼𑀲𑀮𑀧𑁆𑀧𑀲𑀢𑁆𑀣𑀸, 𑀬𑁄 𑀯𑀟𑁆𑀠𑀫𑀸𑀦𑁄 𑀖𑀲𑀢𑁂 𑀧𑀢𑀺𑀝𑁆𑀞𑀁;

𑀢𑀲𑁆𑀲𑀽𑀧𑀭𑁄𑀥𑀁 𑀧𑀭𑀺𑀲𑀗𑁆𑀓𑀫𑀸𑀦𑁄, 𑀧𑀢𑀸𑀭𑀬𑀻 𑀫𑀽𑀮𑀯𑀥𑀸𑀬 𑀥𑀻𑀭𑁄’’𑀢𑀺. 𑁋

𑀧𑀜𑁆𑀘𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.

𑀢𑀢𑁆𑀣 𑀓𑀼𑀲𑀮𑀧𑁆𑀧𑀲𑀢𑁆𑀣𑀸𑀢𑀺 𑀓𑀼𑀲𑀮𑁂𑀳𑀺 𑀧𑀲𑀢𑁆𑀣𑀸. 𑀖𑀲𑀢𑁂𑀢𑀺 𑀔𑀸𑀤𑀢𑀺, 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀢𑀸𑀭𑀬𑀻𑀢𑀺 𑀧𑀢𑀭𑀢𑀺 𑀯𑀸𑀬𑀫𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀺𑀓𑁆𑀔𑀯𑁂, 𑀬𑁄 𑀯𑀟𑁆𑀠𑀫𑀸𑀦𑁄 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀦𑀸𑀲𑁂𑀢𑀺, 𑀢𑀲𑁆𑀲 𑀯𑀼𑀟𑁆𑀠𑀺 𑀧𑀡𑁆𑀟𑀺𑀢𑁂𑀳𑀺 𑀦 𑀧𑀲𑀢𑁆𑀣𑀸, 𑀢𑀲𑁆𑀲 𑀧𑀦 𑀅𑀩𑁆𑀪𑀦𑁆𑀢𑀭𑀲𑁆𑀲 𑀯𑀸 𑀩𑀸𑀳𑀺𑀭𑀲𑁆𑀲 𑀯𑀸 𑀧𑀭𑀺𑀲𑁆𑀲𑀬𑀲𑁆𑀲 ‘‘𑀇𑀢𑁄 𑀫𑁂 𑀉𑀧𑀭𑁄𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀉𑀧𑀭𑁄𑀥𑀁 𑀯𑀺𑀦𑀸𑀲𑀁 𑀧𑀭𑀺𑀲𑀗𑁆𑀓𑀫𑀸𑀦𑁄 𑀯𑀻𑀭𑁄 𑀜𑀸𑀡𑀲𑀫𑁆𑀧𑀦𑁆𑀦𑁄 𑀫𑀽𑀮𑀯𑀥𑀸𑀬 𑀧𑀭𑀓𑁆𑀓𑀫𑀢𑀻𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀤𑀸 𑀲𑀼𑀯𑀡𑁆𑀡𑀳𑀁𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀮𑀸𑀲𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀯𑀡𑁆𑀡𑀸𑀭𑁄𑀳𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀅𑀟𑁆𑀠𑀯𑀕𑁆𑀕𑁄

[𑁩𑁭𑁧] 𑁧. 𑀤𑀻𑀖𑀻𑀢𑀺𑀓𑁄𑀲𑀮𑀚𑀸𑀢𑀓𑀯𑀡𑁆𑀡𑀦𑀸

𑀏𑀯𑀁𑀪𑀽𑀢𑀲𑁆𑀲 ¶ ¶ 𑀢𑁂 𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀫𑁆𑀩𑀓𑁂 𑀪𑀡𑁆𑀟𑀦𑀓𑀸𑀭𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂𑀲𑀜𑁆𑀳𑀺 𑀚𑁂𑀢𑀯𑀦𑀁 𑀆𑀕𑀦𑁆𑀢𑁆𑀯𑀸 𑀔𑀫𑀸𑀧𑀦𑀓𑀸𑀮𑁂 𑀲𑀢𑁆𑀣𑀸 𑀢𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀧𑀼𑀢𑁆𑀢𑀸 𑀦𑀸𑀫, 𑀧𑀼𑀢𑁆𑀢𑁂𑀳𑀺 𑀘 𑀧𑀺𑀢𑀭𑀸 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀪𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀼𑀫𑁆𑀳𑁂 𑀧𑀦 𑀫𑀫 𑀑𑀯𑀸𑀤𑀁 𑀦 𑀓𑀭𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀭𑁄 𑀖𑀸𑀢𑁂𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀞𑀺𑀢𑀘𑁄𑀭𑁂𑀧𑀺 𑀅𑀭𑀜𑁆𑀜𑁂 𑀳𑀢𑁆𑀣𑀧𑀣𑀁 𑀆𑀕𑀢𑁂 𑀫𑀸𑀢𑀸𑀧𑀺𑀢𑀽𑀳𑀺 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀸𑀢𑀺 𑀦 𑀫𑀸𑀭𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀇𑀫𑀲𑁆𑀫𑀺𑀁 𑀧𑀦 𑀚𑀸𑀢𑀓𑁂 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 𑀯𑀺𑀢𑁆𑀣𑀸𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀲𑁄 𑀧𑀦 𑀤𑀻𑀖𑀸𑀯𑀼𑀓𑀼𑀫𑀸𑀭𑁄 𑀅𑀭𑀜𑁆𑀜𑁂 𑀅𑀢𑁆𑀢𑀦𑁄 𑀅𑀗𑁆𑀓𑁂 𑀦𑀺𑀧𑀦𑁆𑀦𑀁 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀘𑀽𑀴𑀸𑀬 𑀕𑀳𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀼𑀖𑀸𑀢𑀓𑀁 𑀘𑁄𑀭𑀁 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀺𑀁 𑀉𑀓𑁆𑀔𑀺𑀧𑀦𑁆𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀫𑀸𑀢𑀸𑀧𑀺𑀢𑀽𑀳𑀺 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀲𑀭𑀺𑀢𑁆𑀯𑀸 ‘‘𑀚𑀻𑀯𑀺𑀢𑀁 𑀘𑀚𑀦𑁆𑀢𑁄𑀧𑀺 𑀢𑁂𑀲𑀁 𑀑𑀯𑀸𑀤𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀓𑁂𑀯𑀮𑀁 𑀇𑀫𑀁 𑀢𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁦.

‘‘𑀏𑀯𑀁𑀪𑀽𑀢𑀲𑁆𑀲 𑀢𑁂 𑀭𑀸𑀚, 𑀆𑀕𑀢𑀲𑁆𑀲 𑀯𑀲𑁂 𑀫𑀫;

𑀅𑀢𑁆𑀣𑀺 𑀦𑀼 𑀓𑁄𑀘𑀺 𑀧𑀭𑀺𑀬𑀸𑀬𑁄, 𑀬𑁄 𑀢𑀁 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂’’𑀢𑀺.

𑀢𑀢𑁆𑀣 ¶ 𑀯𑀲𑁂 𑀫𑀫𑀸𑀢𑀺 𑀫𑀫 𑀯𑀲𑀁 𑀆𑀕𑀢𑀲𑁆𑀲. 𑀧𑀭𑀺𑀬𑀸𑀬𑁄𑀢𑀺 𑀓𑀸𑀭𑀡𑀁.

𑀢𑀢𑁄 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁧.

‘‘𑀏𑀯𑀁𑀪𑀽𑀢𑀲𑁆𑀲 𑀫𑁂 𑀢𑀸𑀢, 𑀆𑀕𑀢𑀲𑁆𑀲 𑀯𑀲𑁂 𑀢𑀯;

𑀦𑀢𑁆𑀣𑀺 𑀦𑁄 𑀓𑁄𑀘𑀺 𑀧𑀭𑀺𑀬𑀸𑀬𑁄, 𑀬𑁄 𑀫𑀁 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂’’𑀢𑀺.

𑀢𑀢𑁆𑀣 ¶ ¶ 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀣𑀁, 𑀦𑀢𑁆𑀣𑀺 𑀓𑁄𑀘𑀺 𑀧𑀭𑀺𑀬𑀸𑀬𑁄, 𑀬𑁄 𑀫𑀁 𑀏𑀢𑀲𑁆𑀫𑀸 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂𑀢𑀺 𑀅𑀢𑁆𑀣𑁄.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀅𑀯𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧𑁨.

‘‘𑀦𑀸𑀜𑁆𑀜𑀁 𑀲𑀼𑀘𑀭𑀺𑀢𑀁 𑀭𑀸𑀚, 𑀦𑀸𑀜𑁆𑀜𑀁 𑀭𑀸𑀚 𑀲𑀼𑀪𑀸𑀲𑀺𑀢𑀁;

𑀢𑀸𑀬𑀢𑁂 𑀫𑀭𑀡𑀓𑀸𑀮𑁂, 𑀏𑀯𑀫𑁂𑀯𑀺𑀢𑀭𑀁 𑀥𑀦𑀁.

𑁧𑁧𑁩.

‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

𑁧𑁧𑁪.

‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

𑁧𑁧𑁫.

‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄’’𑀦𑁆𑀢𑀺.

𑀢𑀢𑁆𑀣 𑀦𑀸𑀜𑁆𑀜𑀁 𑀲𑀼𑀘𑀭𑀺𑀢𑀦𑁆𑀢𑀺 𑀦𑀸𑀜𑁆𑀜𑀁 𑀲𑀼𑀘𑀭𑀺𑀢𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀞𑀧𑁂𑀢𑁆𑀯𑀸 𑀲𑀼𑀘𑀭𑀺𑀢𑀁 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀥 ‘‘𑀲𑀼𑀘𑀭𑀺𑀢’’𑀦𑁆𑀢𑀺𑀧𑀺 ‘‘𑀲𑀼𑀪𑀸𑀲𑀺𑀢’’𑀦𑁆𑀢𑀺𑀧𑀺 𑀫𑀸𑀢𑀸𑀧𑀺𑀢𑀽𑀳𑀺 𑀤𑀺𑀦𑁆𑀦𑀁 𑀑𑀯𑀸𑀤𑀁𑀬𑁂𑀯 𑀲𑀦𑁆𑀥𑀸𑀬𑀸𑀳. 𑀏𑀯𑀫𑁂𑀯𑀸𑀢𑀺 𑀦𑀺𑀭𑀢𑁆𑀣𑀓𑀫𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀅𑀜𑁆𑀜𑀢𑁆𑀭 𑀑𑀯𑀸𑀤𑀸𑀦𑀼𑀲𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀲𑀼𑀘𑀭𑀺𑀢𑀲𑀼𑀪𑀸𑀲𑀺𑀢𑀸 𑀫𑀭𑀡𑀓𑀸𑀮𑁂 𑀢𑀸𑀬𑀺𑀢𑀼𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀺, 𑀬𑀁 𑀏𑀢𑀁 𑀇𑀢𑀭𑀁 𑀥𑀦𑀁, 𑀢𑀁 𑀏𑀯𑀫𑁂𑀯 𑀦𑀺𑀭𑀢𑁆𑀣𑀓𑀫𑁂𑀯 𑀳𑁄𑀢𑀺, 𑀢𑁆𑀯𑀜𑁆𑀳𑀺 𑀇𑀤𑀸𑀦𑀺 𑀫𑀬𑁆𑀳𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀢𑀫𑁆𑀧𑀺 𑀥𑀦𑀁 𑀤𑀤𑀦𑁆𑀢𑁄 𑀚𑀻𑀯𑀺𑀢𑀁 𑀦 𑀮𑀪𑁂𑀬𑁆𑀬𑀸𑀲𑀺, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀥𑀦𑀢𑁄 𑀲𑀼𑀘𑀭𑀺𑀢𑀲𑀼𑀪𑀸𑀲𑀺𑀢𑀫𑁂𑀯 𑀉𑀢𑁆𑀢𑀭𑀺𑀢𑀭’’𑀦𑁆𑀢𑀺.

𑀲𑁂𑀲𑀕𑀸𑀣𑀸𑀲𑀼𑀧𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀬𑁂 𑀧𑀼𑀭𑀺𑀲𑀸 ‘‘𑀅𑀬𑀁 𑀫𑀁 𑀅𑀓𑁆𑀓𑁄𑀲𑀺, 𑀅𑀬𑀁 𑀫𑀁 𑀧𑀳𑀭𑀺, 𑀅𑀬𑀁 𑀫𑀁 𑀅𑀚𑀺𑀦𑀺, 𑀅𑀬𑀁 𑀫𑀫 𑀲𑀦𑁆𑀢𑀓𑀁 𑀅𑀳𑀸𑀲𑀻’’𑀢𑀺 ¶ 𑀏𑀯𑀁 𑀯𑁂𑀭𑀁 𑀉𑀧𑀦𑀬𑁆𑀳𑀦𑁆𑀢𑀺 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀳𑀤𑀬𑁂 𑀞𑀧𑁂𑀦𑁆𑀢𑀺, 𑀢𑁂𑀲𑀁 𑀯𑁂𑀭𑀁 𑀦 𑀉𑀧𑀲𑀫𑁆𑀫𑀢𑀺. 𑀬𑁂 𑀘 𑀧𑀦𑁂𑀢𑀁 𑀦 𑀉𑀧𑀦𑀬𑁆𑀳𑀦𑁆𑀢𑀺 𑀳𑀤𑀬𑁂 𑀦 𑀞𑀧𑁂𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁆𑀫𑀢𑀺. 𑀯𑁂𑀭𑀸𑀦𑀺 𑀳𑀺 𑀦 𑀓𑀤𑀸𑀘𑀺 𑀯𑁂𑀭𑁂𑀦 𑀲𑀫𑁆𑀫𑀦𑁆𑀢𑀺, 𑀅𑀯𑁂𑀭𑁂𑀦𑁂𑀯 𑀧𑀦 𑀲𑀫𑁆𑀫𑀦𑁆𑀢𑀺. 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀏𑀲𑁄 𑀧𑁄𑀭𑀸𑀡𑀓𑁄 𑀥𑀫𑁆𑀫𑁄 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑁄 𑀲𑀪𑀸𑀯𑁄𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀢𑀬𑀺 𑀦 𑀤𑀼𑀩𑁆𑀪𑀸𑀫𑀺, 𑀢𑁆𑀯𑀁 𑀧𑀦 𑀫𑀁 𑀫𑀸𑀭𑁂𑀳𑀻’’𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀅𑀲𑀺𑀁 𑀞𑀧𑁂𑀲𑀺. 𑀭𑀸𑀚𑀸𑀧𑀺 ‘‘𑀦𑀸𑀳𑀁 𑀢𑀬𑀺 𑀤𑀼𑀩𑁆𑀪𑀸𑀫𑀻’’𑀢𑀺 𑀲𑀧𑀣𑀁 𑀓𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀫𑀘𑁆𑀘𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀁, 𑀪𑀡𑁂, 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼𑀓𑀼𑀫𑀸𑀭𑁄 𑀦𑀸𑀫, 𑀇𑀫𑀺𑀦𑀸 𑀫𑀬𑁆𑀳𑀁 𑀚𑀻𑀯𑀺𑀢𑀁 ¶ 𑀤𑀺𑀦𑁆𑀦𑀁, 𑀦 𑀮𑀩𑁆𑀪𑀸 𑀇𑀫𑀁 𑀓𑀺𑀜𑁆𑀘𑀺 𑀓𑀸𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀓𑁂 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀉𑀪𑁄𑀧𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀤𑀻𑀖𑀸𑀯𑀼𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀻𑀖𑀻𑀢𑀺𑀓𑁄𑀲𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁭𑁨] 𑁨. 𑀫𑀺𑀕𑀧𑁄𑀢𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀕𑀸𑀭𑀸 𑀧𑀘𑁆𑀘𑀼𑀧𑁂𑀢𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀳𑀮𑁆𑀮𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑁂𑀓𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀲𑀺. 𑀲𑀸𑀫𑀡𑁂𑀭𑁄 𑀢𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀨𑀸𑀲𑀼𑀓𑁂𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬 𑀫𑀳𑀮𑁆𑀮𑀓𑁄 𑀲𑁄𑀓𑀸𑀪𑀺𑀪𑀽𑀢𑁄 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀺. 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀫𑀳𑀮𑁆𑀮𑀓𑁄 𑀲𑀸𑀫𑀡𑁂𑀭𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀢𑀺, 𑀫𑀭𑀡𑀲𑁆𑀲𑀢𑀺𑀪𑀸𑀯𑀦𑀸𑀬 𑀧𑀭𑀺𑀩𑀸𑀳𑀺𑀭𑁄 𑀏𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀏𑀢𑀲𑁆𑀫𑀺𑀁 𑀫𑀢𑁂 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑀢𑁆𑀢𑀁 𑀓𑀸𑀭𑁂𑀲𑀺. 𑀢𑀤𑀸 𑀏𑀓𑁄 𑀓𑀸𑀲𑀺𑀭𑀝𑁆𑀞𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀏𑀓𑀁 𑀫𑀢𑀫𑀸𑀢𑀺𑀓𑀁 𑀫𑀺𑀕𑀧𑁄𑀢𑀓𑀁 𑀤𑀺𑀲𑁆𑀯𑀸 𑀅𑀲𑁆𑀲𑀫𑀁 𑀆𑀦𑁂𑀢𑁆𑀯𑀸 𑀕𑁄𑀘𑀭𑀁 𑀤𑀢𑁆𑀯𑀸 𑀧𑁄𑀲𑁂𑀲𑀺. 𑀫𑀺𑀕𑀧𑁄𑀢𑀓𑁄 𑀯𑀟𑁆𑀠𑀦𑁆𑀢𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄. 𑀢𑀸𑀧𑀲𑁄 𑀢𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀳𑀭𑀢𑀺. 𑀏𑀓𑀤𑀺𑀯𑀲𑀁 𑀫𑀺𑀕𑀧𑁄𑀢𑀓𑁄 𑀩𑀳𑀼𑀁 𑀢𑀺𑀡𑀁 𑀔𑀸𑀤𑀺𑀢𑁆𑀯𑀸 𑀅𑀚𑀻𑀭𑀓𑁂𑀦 𑀓𑀸𑀮𑀫𑀓𑀸𑀲𑀺. 𑀢𑀸𑀧𑀲𑁄 ‘‘𑀧𑀼𑀢𑁆𑀢𑁄 𑀫𑁂 𑀫𑀢𑁄’’𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀮𑁄𑀓𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 ¶ 𑀢𑀁 𑀢𑀸𑀧𑀲𑀁 𑀤𑀺𑀲𑁆𑀯𑀸 ‘‘𑀲𑀁𑀯𑁂𑀚𑁂𑀲𑁆𑀲𑀸𑀫𑀺 ¶ 𑀦’’𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁬.

‘‘𑀅𑀕𑀸𑀭𑀸 𑀧𑀘𑁆𑀘𑀼𑀧𑁂𑀢𑀲𑁆𑀲, 𑀅𑀦𑀕𑀸𑀭𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁭.

‘‘𑀲𑀁𑀯𑀸𑀲𑁂𑀦 𑀳𑀯𑁂 𑀲𑀓𑁆𑀓, 𑀫𑀦𑀼𑀲𑁆𑀲𑀲𑁆𑀲 𑀫𑀺𑀕𑀲𑁆𑀲 𑀯𑀸;

𑀳𑀤𑀬𑁂 𑀚𑀸𑀬𑀢𑁂 𑀧𑁂𑀫𑀁, 𑀦 𑀢𑀁 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼’’𑀦𑁆𑀢𑀺.

𑀢𑀢𑁆𑀣 𑀦 𑀢𑀁 𑀲𑀓𑁆𑀓𑀸𑀢𑀺 𑀢𑀁 𑀫𑀦𑀼𑀲𑁆𑀲𑀁 𑀯𑀸 𑀢𑀺𑀭𑀘𑁆𑀙𑀸𑀦𑀁 𑀯𑀸 𑀦 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼𑀁, 𑀲𑁄𑀘𑀸𑀫𑀺𑀬𑁂𑀯𑀸𑀳𑀦𑁆𑀢𑀺.

𑀢𑀢𑁄 𑀲𑀓𑁆𑀓𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧𑁮.

‘‘𑀫𑀢𑀁 𑀫𑀭𑀺𑀲𑁆𑀲𑀁 𑀭𑁄𑀤𑀦𑁆𑀢𑀺, 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘;

𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺, 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄.

𑁧𑁧𑁯.

‘‘𑀭𑁄𑀤𑀺𑀢𑁂𑀦 𑀳𑀯𑁂 𑀩𑁆𑀭𑀳𑁆𑀫𑁂, 𑀫𑀢𑁄 𑀧𑁂𑀢𑁄 𑀲𑀫𑀼𑀝𑁆𑀞𑀳𑁂;

𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀭𑁄𑀤𑀸𑀫, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂’’𑀢𑀺.

𑀢𑀢𑁆𑀣 𑀫𑀭𑀺𑀲𑁆𑀲𑀦𑁆𑀢𑀺 𑀬𑁄 𑀇𑀤𑀸𑀦𑀺 𑀫𑀭𑀺𑀲𑁆𑀲𑀢𑀺, 𑀢𑀁. 𑀮𑀧𑀦𑁆𑀢𑀺 𑀘𑀸𑀢𑀺 𑀯𑀺𑀮𑀧𑀦𑁆𑀢𑀺 𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀮𑁄𑀓𑁂 𑀫𑀢𑀜𑁆𑀘 𑀫𑀭𑀺𑀲𑁆𑀲𑀦𑁆𑀢𑀜𑁆𑀘 𑀭𑁄𑀤𑀦𑁆𑀢𑀺, 𑀢𑁂 𑀭𑀼𑀤𑀦𑁆𑀢𑀺 𑀘𑁂𑀯 𑀯𑀺𑀮𑀧𑀦𑁆𑀢𑀺 𑀘, 𑀢𑁂𑀲𑀁 𑀅𑀲𑁆𑀲𑀼𑀧𑀘𑁆𑀙𑀺𑀚𑁆𑀚𑀦𑀤𑀺𑀯𑀲𑁄 𑀦𑀸𑀫 𑀦𑀢𑁆𑀣𑀺. 𑀓𑀺𑀁𑀓𑀸𑀭𑀡𑀸? 𑀲𑀤𑀸𑀧𑀺 𑀫𑀢𑀸𑀦𑀜𑁆𑀘 𑀫𑀭𑀺𑀲𑁆𑀲𑀦𑁆𑀢𑀸𑀦𑀜𑁆𑀘 𑀅𑀢𑁆𑀣𑀺𑀢𑀸𑀬. 𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺. 𑀓𑀺𑀁𑀓𑀸𑀭𑀡𑀸 ¶ ? 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄𑀢𑀺, 𑀩𑀼𑀤𑁆𑀥𑀸𑀤𑀬𑁄 𑀧𑀦 𑀧𑀡𑁆𑀟𑀺𑀢𑀸 𑀭𑁄𑀤𑀺𑀢𑀁 ‘‘𑀫𑁄𑀖’’𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀢𑁄 𑀧𑁂𑀢𑁄𑀢𑀺 𑀬𑁄 𑀏𑀲 𑀫𑀢𑁄 𑀧𑁂𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀤𑀺 𑀲𑁄 𑀭𑁄𑀤𑀺𑀢𑁂𑀦 𑀲𑀫𑀼𑀝𑁆𑀞𑀳𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀦𑀺𑀓𑁆𑀓𑀫𑁆𑀫𑀸 𑀅𑀘𑁆𑀙𑀸𑀫, 𑀲𑀩𑁆𑀩𑁂𑀯 𑀲𑀫𑀸𑀕𑀫𑁆𑀫 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂 𑀭𑁄𑀤𑀸𑀫. 𑀬𑀲𑁆𑀫𑀸 𑀧𑀦 𑀢𑁂 𑀭𑁄𑀤𑀺𑀢𑀓𑀸𑀭𑀡𑀸 𑀦 𑀉𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀭𑁄𑀤𑀺𑀢𑀲𑁆𑀲 𑀫𑁄𑀖𑀪𑀸𑀯𑀁 𑀲𑀸𑀥𑁂𑀢𑀺.

𑀏𑀯𑀁 ¶ 𑀲𑀓𑁆𑀓𑀲𑁆𑀲 𑀓𑀣𑁂𑀦𑁆𑀢𑀲𑁆𑀲 𑀢𑀸𑀧𑀲𑁄 ‘‘𑀦𑀺𑀭𑀢𑁆𑀣𑀓𑀁 𑀭𑁄𑀤𑀺𑀢’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁦.

‘‘𑀆𑀤𑀺𑀢𑁆𑀢𑀁 ¶ 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁨𑁧.

‘‘𑀅𑀩𑁆𑀩𑀳𑀺 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨𑁨.

‘‘𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀯𑀸𑀲𑀯𑀸’’𑀢𑀺.

𑀢𑀢𑁆𑀣 𑀬𑀫𑀸𑀲𑀻𑀢𑀺 𑀬𑀁 𑀫𑁂 𑀆𑀲𑀺. 𑀳𑀤𑀬𑀲𑁆𑀲𑀺𑀢𑀦𑁆𑀢𑀺 𑀳𑀤𑀬𑁂 𑀦𑀺𑀲𑁆𑀲𑀺𑀢𑀁. 𑀅𑀧𑀸𑀦𑀼𑀤𑀻𑀢𑀺 𑀦𑀻𑀳𑀭𑀺. 𑀲𑀓𑁆𑀓𑁄 𑀢𑀸𑀧𑀲𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀥𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀢𑀸𑀧𑀲𑁄 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺, 𑀫𑀺𑀕𑁄 𑀲𑀸𑀫𑀡𑁂𑀭𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀕𑀧𑁄𑀢𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁭𑁩] 𑁩. 𑀫𑀽𑀲𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑀓𑀼𑀳𑀺𑀁 𑀕𑀢𑀸 𑀓𑀢𑁆𑀣 𑀕𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀣𑀼𑀲𑀚𑀸𑀢𑀓𑁂 (𑀚𑀸. 𑁧.𑁪.𑁧𑁪𑁯 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥𑀸𑀧𑀺 𑀲𑀢𑁆𑀣𑀸 𑀢𑀣𑁂𑀯 𑀭𑀸𑀚𑀸𑀦𑀁 𑀲𑀓𑀺𑀁 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀻𑀴𑀫𑀸𑀦𑀁 𑀲𑀓𑀺𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀢𑀁 𑀦𑀺𑀲𑁆𑀲𑀸𑀬 𑀭𑀜𑁆𑀜𑁄 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ¶ ‘‘𑀫𑀳𑀸𑀭𑀸𑀚, 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀆𑀲𑀗𑁆𑀓𑀺𑀢𑀩𑁆𑀩𑀁 𑀆𑀲𑀗𑁆𑀓𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 ‘𑀅𑀫𑁆𑀳𑀸𑀓𑀁 𑀥𑀽𑀫𑀓𑀸𑀮𑁂 𑀭𑀚𑁆𑀚𑀁 𑀓𑀸𑀭𑁂𑀢𑀽’𑀢𑀺 𑀏𑀓𑀫𑀦𑁆𑀢𑁂 𑀅𑀓𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀬𑀯𑀓𑀼𑀫𑀸𑀭𑁄 𑀦𑀸𑀫 ¶ 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀢𑀁 𑀆𑀧𑀼𑀘𑁆𑀙𑀺. 𑀆𑀘𑀭𑀺𑀬𑁄 ‘‘𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀗𑁆𑀕𑀯𑀺𑀚𑁆𑀚𑀸𑀯𑀲𑁂𑀦 𑀜𑀢𑁆𑀯𑀸 ‘‘𑀏𑀢𑀫𑀲𑁆𑀲 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀉𑀧𑀫𑀁 𑀉𑀧𑀥𑀸𑀭𑁂𑀢𑀼𑀁 𑀆𑀭𑀪𑀺. 𑀢𑀤𑀸 𑀧𑀦𑀲𑁆𑀲 𑀏𑀓𑁄 ¶ 𑀅𑀲𑁆𑀲𑁄 𑀅𑀳𑁄𑀲𑀺, 𑀢𑀲𑁆𑀲 𑀧𑀸𑀤𑁂 𑀯𑀡𑁄 𑀉𑀝𑁆𑀞𑀳𑀺, 𑀢𑀁 𑀯𑀡𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀕𑁂𑀳𑁂𑀬𑁂𑀯 𑀓𑀭𑀺𑀁𑀲𑀼. 𑀢𑀲𑁆𑀲𑀸𑀯𑀺𑀤𑀽𑀭𑁂 𑀏𑀓𑁄 𑀉𑀤𑀧𑀸𑀦𑁄 𑀅𑀢𑁆𑀣𑀺. 𑀅𑀣𑁂𑀓𑀸 𑀫𑀽𑀲𑀺𑀓𑀸 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀲𑁆𑀲𑀲𑁆𑀲 𑀧𑀸𑀤𑁂 𑀯𑀡𑀁 𑀔𑀸𑀤𑀢𑀺, 𑀅𑀲𑁆𑀲𑁄 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀽𑀲𑀺𑀓𑀁 𑀔𑀸𑀤𑀺𑀢𑀼𑀁 𑀆𑀕𑀢𑀁 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀉𑀤𑀧𑀸𑀦𑁂 𑀧𑀸𑀢𑁂𑀲𑀺. 𑀅𑀲𑁆𑀲𑀕𑁄𑀧𑀓𑀸 𑀫𑀽𑀲𑀺𑀓𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀫𑀽𑀲𑀺𑀓𑀸 𑀆𑀕𑀦𑁆𑀢𑁆𑀯𑀸 𑀯𑀡𑀁 𑀔𑀸𑀤𑀢𑀺, 𑀇𑀤𑀸𑀦𑀺 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀦𑀼 𑀔𑁄 𑀕𑀢𑀸’’𑀢𑀺 𑀯𑀤𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 ‘‘𑀅𑀜𑁆𑀜𑁂 𑀅𑀚𑀸𑀦𑀦𑁆𑀢𑀸 ‘𑀓𑀳𑀁 𑀫𑀽𑀲𑀺𑀓𑀸 𑀕𑀢𑀸’𑀢𑀺 𑀯𑀤𑀦𑁆𑀢𑀺, 𑀫𑀽𑀲𑀺𑀓𑀸𑀬 𑀧𑀦 𑀫𑀸𑀭𑁂𑀢𑁆𑀯𑀸 𑀉𑀤𑀧𑀸𑀦𑁂 𑀔𑀺𑀢𑁆𑀢𑀪𑀸𑀯𑀁 𑀅𑀳𑀫𑁂𑀯 𑀚𑀸𑀦𑀸𑀫𑀻’’𑀢𑀺 𑀇𑀤𑀫𑁂𑀯 𑀓𑀸𑀭𑀡𑀁 𑀉𑀧𑀫𑀁 𑀓𑀢𑁆𑀯𑀸 𑀧𑀞𑀫𑀁 𑀕𑀸𑀣𑀁 𑀩𑀦𑁆𑀥𑀺𑀢𑁆𑀯𑀸 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀤𑀸𑀲𑀺. 𑀲𑁄 𑀅𑀧𑀭𑀁 𑀉𑀧𑀫𑀁 𑀉𑀧𑀥𑀸𑀭𑁂𑀦𑁆𑀢𑁄 𑀢𑀫𑁂𑀯 𑀅𑀲𑁆𑀲𑀁 𑀧𑀭𑀼𑀴𑁆𑀳𑀯𑀡𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀬𑀯𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 ‘‘𑀬𑀯𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀢𑀺𑀘𑁆𑀙𑀺𑀤𑁆𑀤𑁂𑀦 𑀫𑀼𑀔𑀁 𑀧𑀯𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀫𑁂𑀯 𑀓𑀸𑀭𑀡𑀁 𑀉𑀧𑀫𑀁 𑀓𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀁 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀢𑀢𑀺𑀬𑀕𑀸𑀣𑀁 𑀧𑀦 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦𑁂𑀯 𑀩𑀦𑁆𑀥𑀺𑀢𑁆𑀯𑀸 𑀢𑀫𑁆𑀧𑀺 𑀢𑀲𑁆𑀲 𑀤𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀲𑀸𑀬𑀁 𑀦𑁆𑀳𑀸𑀦𑀧𑁄𑀓𑁆𑀔𑀭𑀡𑀺𑀁 𑀕𑀘𑁆𑀙𑀦𑁆𑀢𑁄 𑀬𑀸𑀯 𑀥𑀼𑀭𑀲𑁄𑀧𑀸𑀦𑀸 𑀧𑀞𑀫𑀁 𑀕𑀸𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀢𑀯 𑀦𑀺𑀯𑀲𑀦𑀧𑀸𑀲𑀸𑀤𑀁 𑀧𑀯𑀺𑀲𑀦𑁆𑀢𑁄 𑀬𑀸𑀯 𑀲𑁄𑀧𑀸𑀦𑀧𑀸𑀤𑀫𑀽𑀮𑀸 𑀤𑀼𑀢𑀺𑀬𑀁 𑀕𑀸𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀢𑀢𑁄 𑀬𑀸𑀯 𑀲𑁄𑀧𑀸𑀦𑀫𑀢𑁆𑀣𑀓𑀸 𑀢𑀢𑀺𑀬𑀁 𑀕𑀸𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀲𑀺.

𑀲𑁄 ¶ 𑀓𑀼𑀫𑀸𑀭𑁄 𑀕𑀦𑁆𑀢𑁆𑀯𑀸 𑀉𑀧𑀭𑀸𑀚𑀸 𑀳𑀼𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲𑁂𑀓𑁄 𑀧𑀼𑀢𑁆𑀢𑁄 𑀚𑀸𑀬𑀺. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀭𑀚𑁆𑀚𑀮𑁄𑀪𑁂𑀦 ‘‘𑀧𑀺𑀢𑀭𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀆𑀳 ‘‘𑀫𑀬𑁆𑀳𑀁 𑀧𑀺𑀢𑀸 𑀢𑀭𑀼𑀡𑁄, 𑀅𑀳𑀁 𑀏𑀢𑀲𑁆𑀲 𑀥𑀽𑀫𑀓𑀸𑀮𑀁 𑀑𑀮𑁄𑀓𑁂𑀦𑁆𑀢𑁄 𑀫𑀳𑀮𑁆𑀮𑀓𑁄 𑀪𑀯𑀺𑀲𑁆𑀲𑀸𑀫𑀺 𑀚𑀭𑀸𑀚𑀺𑀡𑁆𑀡𑁄, 𑀢𑀸𑀤𑀺𑀲𑁂 𑀓𑀸𑀮𑁂 𑀮𑀤𑁆𑀥𑁂𑀦𑀧𑀺 𑀭𑀚𑁆𑀚𑁂𑀦 𑀓𑁄 𑀅𑀢𑁆𑀣𑁄’’𑀢𑀺. 𑀢𑁂 𑀆𑀳𑀁𑀲𑀼 ‘‘𑀤𑁂𑀯, 𑀦 𑀲𑀓𑁆𑀓𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀘𑁄𑀭𑀢𑁆𑀢𑀁 𑀓𑀸𑀢𑀼𑀁, 𑀢𑀯 𑀧𑀺𑀢𑀭𑀁 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀸’’𑀢𑀺 ¶ . 𑀲𑁄 ‘‘𑀲𑀸𑀥𑀽’’𑀢𑀺 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀭𑀜𑁆𑀜𑁄 𑀲𑀸𑀬𑀁 𑀦𑁆𑀳𑀸𑀦𑀧𑁄𑀓𑁆𑀔𑀭𑀡𑀻𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀏𑀢𑁆𑀣 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀲𑀸𑀬𑀁 𑀫𑀽𑀲𑀺𑀓𑀁 𑀦𑀸𑀫 𑀤𑀸𑀲𑀺𑀁 ‘‘𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀧𑀺𑀝𑁆𑀞𑀺𑀁 𑀲𑁄𑀥𑁂𑀢𑁆𑀯𑀸 𑀏𑀳𑀺, 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀧𑁂𑀲𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀧𑀺𑀝𑁆𑀞𑀺𑀁 𑀲𑁄𑀥𑁂𑀦𑁆𑀢𑀻 𑀓𑀼𑀫𑀸𑀭𑀁 𑀧𑀲𑁆𑀲𑀺. 𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀓𑀫𑁆𑀫𑀲𑁆𑀲 𑀧𑀸𑀓𑀝𑀪𑀸𑀯𑀪𑀬𑁂𑀦 𑀢𑀁 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑀁 𑀧𑀸𑀢𑁂𑀲𑀺. 𑀭𑀸𑀚𑀸 𑀦𑁆𑀳𑀸𑀬𑀺𑀢𑀼𑀁 𑀅𑀕𑀫𑀸𑀲𑀺 ¶ . 𑀲𑁂𑀲𑀚𑀦𑁄 ‘‘𑀅𑀚𑁆𑀚𑀸𑀧𑀺 𑀫𑀽𑀲𑀺𑀓𑀸 𑀤𑀸𑀲𑀻 𑀦 𑀧𑀼𑀦𑀸𑀕𑀘𑁆𑀙𑀢𑀺, 𑀓𑀼𑀳𑀺𑀁 𑀕𑀢𑀸 𑀓𑀢𑁆𑀣 𑀕𑀢𑀸’’𑀢𑀺 𑀆𑀳. 𑀭𑀸𑀚𑀸 𑁋

𑁧𑁨𑁩.

‘‘𑀓𑀼𑀳𑀺𑀁 𑀕𑀢𑀸 𑀓𑀢𑁆𑀣 𑀕𑀢𑀸, 𑀇𑀢𑀺 𑀮𑀸𑀮𑀧𑁆𑀧𑀢𑀻 𑀚𑀦𑁄;

𑀅𑀳𑀫𑁂𑀯𑁂𑀓𑁄 𑀚𑀸𑀦𑀸𑀫𑀺, 𑀉𑀤𑀧𑀸𑀦𑁂 𑀫𑀽𑀲𑀺𑀓𑀸 𑀳𑀢𑀸’’𑀢𑀺. 𑁋

𑀧𑀞𑀫𑀁 𑀕𑀸𑀣𑀁 𑀪𑀡𑀦𑁆𑀢𑁄 𑀧𑁄𑀓𑁆𑀔𑀭𑀡𑀻𑀢𑀻𑀭𑀁 𑀅𑀕𑀫𑀸𑀲𑀺.

𑀢𑀢𑁆𑀣 𑀓𑀼𑀳𑀺𑀁 𑀕𑀢𑀸 𑀓𑀢𑁆𑀣 𑀕𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀇𑀢𑀺 𑀮𑀸𑀮𑀧𑁆𑀧𑀢𑀻𑀢𑀺 𑀏𑀯𑀁 𑀯𑀺𑀧𑁆𑀧𑀮𑀧𑀢𑀺. 𑀇𑀢𑀺 𑀅𑀬𑀁 𑀕𑀸𑀣𑀸 ‘‘𑀅𑀚𑀸𑀦𑀦𑁆𑀢𑁄 𑀚𑀦𑁄 𑀫𑀽𑀲𑀺𑀓𑀸 𑀤𑀸𑀲𑀻 𑀓𑀼𑀳𑀺𑀁 𑀕𑀢𑀸𑀢𑀺 𑀯𑀺𑀧𑁆𑀧𑀮𑀧𑀢𑀺, 𑀭𑀸𑀚𑀓𑀼𑀫𑀸𑀭𑁂𑀦 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀫𑀽𑀲𑀺𑀓𑀸𑀬 𑀧𑁄𑀓𑁆𑀔𑀭𑀡𑀺𑀬𑀁 𑀧𑀸𑀢𑀺𑀢𑀪𑀸𑀯𑀁 𑀅𑀳𑀫𑁂𑀯 𑀏𑀓𑁄 𑀚𑀸𑀦𑀸𑀫𑀻’’𑀢𑀺 𑀭𑀜𑁆𑀜𑁄 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀓𑀼𑀫𑀸𑀭𑁄 ‘‘𑀫𑀬𑀸 𑀓𑀢𑀓𑀫𑁆𑀫𑀁 𑀫𑀬𑁆𑀳𑀁 𑀧𑀺𑀢𑀭𑀸 𑀜𑀸𑀢’’𑀦𑁆𑀢𑀺 𑀪𑀻𑀢𑁄 𑀧𑀮𑀸𑀬𑀺𑀢𑁆𑀯𑀸 𑀢𑀫𑀢𑁆𑀣𑀁 𑀉𑀧𑀝𑁆𑀞𑀸𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀲𑀢𑁆𑀢𑀝𑁆𑀞𑀤𑀺𑀯𑀲𑀘𑁆𑀘𑀬𑁂𑀦 𑀧𑀼𑀦 𑀢𑀁 𑀆𑀳𑀁𑀲𑀼 ‘‘𑀤𑁂𑀯, 𑀲𑀘𑁂 𑀭𑀸𑀚𑀸 𑀚𑀸𑀦𑁂𑀬𑁆𑀬, 𑀦 𑀢𑀼𑀡𑁆𑀳𑀻 𑀪𑀯𑁂𑀬𑁆𑀬, 𑀢𑀓𑁆𑀓𑀕𑀸𑀳𑁂𑀦 𑀧𑀦 𑀢𑁂𑀦 𑀢𑀁 𑀯𑀼𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀫𑀸𑀭𑁂𑀳𑀺 𑀦’’𑀦𑁆𑀢𑀺. 𑀲𑁄 𑀧𑀼𑀦𑁂𑀓𑀤𑀺𑀯𑀲𑀁 𑀔𑀕𑁆𑀕𑀳𑀢𑁆𑀣𑁄 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀞𑀢𑁆𑀯𑀸 𑀭𑀜𑁆𑀜𑁄 𑀆𑀕𑀫𑀦𑀓𑀸𑀮𑁂 𑀇𑀢𑁄 𑀘𑀺𑀢𑁄 𑀘 𑀧𑀳𑀭𑀡𑁄𑀓𑀸𑀲𑀁 𑀑𑀮𑁄𑀓𑁂𑀲𑀺. 𑀭𑀸𑀚𑀸 𑁋

𑁧𑁨𑁪.

‘‘𑀬𑀜𑁆𑀘𑁂𑀢𑀁 𑀇𑀢𑀺 𑀘𑀻𑀢𑀺 𑀘, 𑀕𑀤𑁆𑀭𑀪𑁄𑀯 𑀦𑀺𑀯𑀢𑁆𑀢𑀲𑀺;

𑀉𑀤𑀧𑀸𑀦𑁂 𑀫𑀽𑀲𑀺𑀓𑀁 𑀳𑀦𑁆𑀢𑁆𑀯𑀸, 𑀬𑀯𑀁 𑀪𑀓𑁆𑀔𑁂𑀢𑀼𑀫𑀺𑀘𑁆𑀙𑀲𑀻’’𑀢𑀺. 𑁋

𑀤𑀼𑀢𑀺𑀬𑀁 ¶ 𑀕𑀸𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀅𑀕𑀫𑀸𑀲𑀺. 𑀅𑀬𑀫𑁆𑀧𑀺 ¶ 𑀕𑀸𑀣𑀸 ‘‘𑀬𑀲𑁆𑀫𑀸 𑀢𑁆𑀯𑀁 𑀇𑀢𑀺 𑀘𑀻𑀢𑀺 𑀘 𑀇𑀢𑁄 𑀘𑀺𑀢𑁄 𑀘 𑀧𑀳𑀭𑀡𑁄𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀕𑀤𑁆𑀭𑀪𑁄𑀯 𑀦𑀺𑀯𑀢𑁆𑀢𑀲𑀺, 𑀢𑀲𑁆𑀫𑀸 𑀢𑀁 𑀚𑀸𑀦𑀸𑀫𑀺 ‘𑀧𑀼𑀭𑀺𑀫𑀤𑀺𑀯𑀲𑁂 𑀧𑁄𑀓𑁆𑀔𑀭𑀡𑀺𑀬𑀁 𑀫𑀽𑀲𑀺𑀓𑀁 𑀤𑀸𑀲𑀺𑀁 𑀳𑀦𑁆𑀢𑁆𑀯𑀸 𑀅𑀚𑁆𑀚 𑀫𑀁 𑀬𑀯𑀭𑀸𑀚𑀸𑀦𑀁 𑀪𑀓𑁆𑀔𑁂𑀢𑀼𑀁 𑀫𑀸𑀭𑁂𑀢𑀼𑀁 𑀇𑀘𑁆𑀙𑀲𑀻’’’𑀢𑀺 𑀭𑀜𑁆𑀜𑁄 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀓𑀼𑀫𑀸𑀭𑁄 ‘‘𑀤𑀺𑀝𑁆𑀞𑁄𑀫𑁆𑀳𑀺 𑀧𑀺𑀢𑀭𑀸’’𑀢𑀺 𑀉𑀢𑁆𑀭𑀲𑁆𑀢𑁄 𑀧𑀮𑀸𑀬𑀺. 𑀲𑁄 𑀧𑀼𑀦 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀤𑀩𑁆𑀩𑀺𑀬𑀸 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀤𑀻𑀖𑀤𑀡𑁆𑀟𑀓𑀁 𑀤𑀩𑁆𑀩𑀺𑀧𑀳𑀭𑀡𑀁 𑀕𑀳𑁂𑀢𑁆𑀯𑀸 𑀑𑀮𑀼𑀫𑁆𑀩𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑁋

𑁧𑁨𑁫.

‘‘𑀤𑀳𑀭𑁄 ¶ 𑀘𑀸𑀲𑀺 𑀤𑀼𑀫𑁆𑀫𑁂𑀥, 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑁄 𑀲𑀼𑀲𑀼;

𑀤𑀻𑀖𑀜𑁆𑀘𑁂𑀢𑀁 𑀲𑀫𑀸𑀲𑀚𑁆𑀚, 𑀦 𑀢𑁂 𑀤𑀲𑁆𑀲𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺. 𑁋

𑀢𑀢𑀺𑀬𑀁 𑀕𑀸𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀲𑁄𑀧𑀸𑀦𑀧𑀸𑀤𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺.

𑀢𑀢𑁆𑀣 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀧𑀞𑀫𑀯𑀬𑁂𑀦 𑀉𑀧𑁆𑀧𑀢𑁆𑀢𑀺𑀢𑁄 𑀉𑀧𑁂𑀢𑁄, 𑀧𑀞𑀫𑀯𑀬𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀲𑀽𑀢𑀺 𑀢𑀭𑀼𑀡𑁄. 𑀤𑀻𑀖𑀦𑁆𑀢𑀺 𑀤𑀻𑀖𑀤𑀡𑁆𑀟𑀓𑀁 𑀤𑀩𑁆𑀩𑀺𑀧𑀳𑀭𑀡𑀁. 𑀲𑀫𑀸𑀲𑀚𑁆𑀚𑀸𑀢𑀺 𑀕𑀳𑁂𑀢𑁆𑀯𑀸, 𑀑𑀮𑀼𑀫𑁆𑀩𑀺𑀢𑁆𑀯𑀸 𑀞𑀺𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀅𑀬𑀫𑁆𑀧𑀺 𑀕𑀸𑀣𑀸 ‘‘𑀤𑀼𑀫𑁆𑀫𑁂𑀥, 𑀅𑀢𑁆𑀢𑀦𑁄 𑀯𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀺𑀲𑁆𑀲𑀲𑀺, 𑀦 𑀢𑁂 𑀤𑀸𑀦𑀺 𑀦𑀺𑀮𑁆𑀮𑀚𑁆𑀚𑀲𑁆𑀲 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀺, 𑀫𑀸𑀭𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀽𑀮𑁂𑀬𑁂𑀯 𑀆𑀯𑀼𑀡𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀓𑀼𑀫𑀸𑀭𑀁 𑀲𑀦𑁆𑀢𑀚𑁆𑀚𑀬𑀫𑀸𑀦𑀸 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀲𑁄 𑀢𑀁 𑀤𑀺𑀯𑀲𑀁 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀚𑀻𑀯𑀺𑀢𑀁 𑀫𑁂 𑀤𑁂𑀳𑀺, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀭𑀸𑀚𑀸 𑀢𑀁 𑀢𑀚𑁆𑀚𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀸𑀳𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀓𑀸𑀭𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀅𑀮𑀗𑁆𑀓𑀢𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀁 𑀫𑀬𑁆𑀳𑀁 𑀅𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀻’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁬.

‘‘𑀦𑀸𑀦𑁆𑀢𑀮𑀺𑀓𑁆𑀔𑀪𑀯𑀦𑁂𑀦, 𑀦𑀸𑀗𑁆𑀕𑀧𑀼𑀢𑁆𑀢𑀧𑀺𑀦𑁂𑀦 𑀯𑀸;

𑀧𑀼𑀢𑁆𑀢𑁂𑀦 𑀳𑀺 𑀧𑀢𑁆𑀣𑀬𑀺𑀢𑁄, 𑀲𑀺𑀮𑁄𑀓𑁂𑀳𑀺 𑀧𑀫𑁄𑀘𑀺𑀢𑁄.

𑁧𑁨𑁭.

‘‘𑀲𑀩𑁆𑀩𑀁 ¶ 𑀲𑀼𑀢𑀫𑀥𑀻𑀬𑁂𑀣, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁;

𑀲𑀩𑁆𑀩𑀲𑁆𑀲 𑀅𑀢𑁆𑀣𑀁 𑀚𑀸𑀦𑁂𑀬𑁆𑀬, 𑀦 𑀘 𑀲𑀩𑁆𑀩𑀁 𑀧𑀬𑁄𑀚𑀬𑁂;

𑀳𑁄𑀢𑀺 𑀢𑀸𑀤𑀺𑀲𑀓𑁄 𑀓𑀸𑀮𑁄, 𑀬𑀢𑁆𑀣 𑀅𑀢𑁆𑀣𑀸𑀯𑀳𑀁 𑀲𑀼𑀢’’𑀦𑁆𑀢𑀺.

𑀢𑀢𑁆𑀣 ¶ 𑀦𑀸𑀦𑁆𑀢𑀮𑀺𑀓𑁆𑀔𑀪𑀯𑀦𑁂𑀦𑀸𑀢𑀺 𑀅𑀦𑁆𑀢𑀮𑀺𑀓𑁆𑀔𑀪𑀯𑀦𑀁 𑀯𑀼𑀘𑁆𑀘𑀢𑀺 𑀤𑀺𑀩𑁆𑀩𑀯𑀺𑀫𑀸𑀦𑀁, 𑀅𑀳𑀁 𑀅𑀚𑁆𑀚 𑀅𑀦𑁆𑀢𑀮𑀺𑀓𑁆𑀔𑀪𑀯𑀦𑀫𑁆𑀧𑀺 𑀦 𑀆𑀭𑀼𑀴𑁆𑀳𑁄, 𑀢𑀲𑁆𑀫𑀸 𑀅𑀦𑁆𑀢𑀮𑀺𑀓𑁆𑀔𑀪𑀯𑀦𑁂𑀦𑀸𑀧𑀺 𑀅𑀚𑁆𑀚 𑀫𑀭𑀡𑀢𑁄 𑀦 𑀧𑀫𑁄𑀘𑀺𑀢𑁄𑀫𑁆𑀳𑀺. 𑀦𑀸𑀗𑁆𑀕𑀧𑀼𑀢𑁆𑀢𑀧𑀺𑀦𑁂𑀦 𑀯𑀸𑀢𑀺 𑀅𑀗𑁆𑀕𑀲𑀭𑀺𑀓𑁆𑀔𑀓𑁂𑀦 𑀯𑀸 𑀧𑀼𑀢𑁆𑀢𑀧𑀺𑀦𑁂𑀦𑀧𑀺 𑀦 𑀧𑀫𑁄𑀘𑀺𑀢𑁄. 𑀧𑀼𑀢𑁆𑀢𑁂𑀦 𑀳𑀺 𑀧𑀢𑁆𑀣𑀬𑀺𑀢𑁄𑀢𑀺 𑀅𑀳𑀁 𑀧𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀦𑁂𑀯 𑀅𑀚𑁆𑀚 𑀫𑀸𑀭𑁂𑀢𑀼𑀁 𑀧𑀢𑁆𑀣𑀺𑀢𑁄. 𑀲𑀺𑀮𑁄𑀓𑁂𑀳𑀺 𑀧𑀫𑁄𑀘𑀺𑀢𑁄𑀢𑀺 𑀲𑁄𑀳𑀁 𑀆𑀘𑀭𑀺𑀬𑁂𑀦 𑀩𑀦𑁆𑀥𑀺𑀢𑁆𑀯𑀸 𑀤𑀺𑀦𑁆𑀦𑀸𑀳𑀺 𑀕𑀸𑀣𑀸𑀳𑀺 𑀧𑀫𑁄𑀘𑀺𑀢𑁄.

𑀲𑀼𑀢𑀦𑁆𑀢𑀺 ¶ 𑀧𑀭𑀺𑀬𑀢𑁆𑀢𑀺𑀁. 𑀅𑀥𑀻𑀬𑁂𑀣𑀸𑀢𑀺 𑀕𑀡𑁆𑀳𑁂𑀬𑁆𑀬 𑀲𑀺𑀓𑁆𑀔𑁂𑀬𑁆𑀬. 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀦𑁆𑀢𑀺 𑀳𑀻𑀦𑀁 𑀯𑀸 𑀳𑁄𑀢𑀼 𑀉𑀢𑁆𑀢𑀫𑀁 𑀯𑀸 𑀫𑀚𑁆𑀛𑀺𑀫𑀁 𑀯𑀸, 𑀲𑀩𑁆𑀩𑀁 𑀅𑀥𑀻𑀬𑀺𑀢𑀩𑁆𑀩𑀫𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀦 𑀘 𑀲𑀩𑁆𑀩𑀁 𑀧𑀬𑁄𑀚𑀬𑁂𑀢𑀺 𑀳𑀻𑀦𑀁 𑀫𑀦𑁆𑀢𑀁 𑀯𑀸 𑀲𑀺𑀧𑁆𑀧𑀁 𑀯𑀸 𑀫𑀚𑁆𑀛𑀺𑀫𑀁 𑀯𑀸 𑀦 𑀧𑀬𑁄𑀚𑀬𑁂, 𑀉𑀢𑁆𑀢𑀫𑀫𑁂𑀯 𑀧𑀬𑁄𑀚𑀬𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀅𑀢𑁆𑀣𑀸𑀯𑀳𑀁 𑀲𑀼𑀢𑀦𑁆𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀫𑀳𑁄𑀲𑀥𑀧𑀡𑁆𑀟𑀺𑀢𑀲𑁆𑀲 𑀓𑀼𑀫𑁆𑀪𑀓𑀸𑀭𑀓𑀫𑁆𑀫𑀓𑀭𑀡𑀁 𑀯𑀺𑀬 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀁 𑀅𑀢𑁆𑀣𑀸𑀯𑀳𑀁 𑀳𑁄𑀢𑀺, 𑀢𑀸𑀤𑀺𑀲𑁄𑀧𑀺 𑀓𑀸𑀮𑁄 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀪𑀸𑀕𑁂 𑀭𑀜𑁆𑀜𑁄 𑀅𑀘𑁆𑀘𑀬𑁂𑀦 𑀓𑀼𑀫𑀸𑀭𑁄 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀽𑀲𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁭𑁪] 𑁪. 𑀘𑀽𑀴𑀥𑀦𑀼𑀕𑁆𑀕𑀳𑀚𑀸𑀢𑀓𑀯𑀡𑁆𑀡𑀦𑀸

𑀲𑀩𑁆𑀩𑀁 𑀪𑀡𑁆𑀟𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀫𑀁, 𑀪𑀦𑁆𑀢𑁂, 𑀉𑀓𑁆𑀓𑀡𑁆𑀞𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀸 ‘‘𑀏𑀲𑀸 𑀪𑀺𑀓𑁆𑀔𑀼, 𑀇𑀢𑁆𑀣𑀻 𑀦 𑀇𑀤𑀸𑀦𑁂𑀯 𑀢𑀼𑀬𑁆𑀳𑀁 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁂 𑀏𑀢𑀁 𑀦𑀺𑀲𑁆𑀲𑀸𑀬 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑀢𑁆𑀢𑀁 𑀓𑀸𑀭𑁂𑀲𑀺. 𑀢𑀤𑀸 𑀏𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀥𑀦𑀼𑀓𑀫𑁆𑀫𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀘𑀽𑀴𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑁄 𑀦𑀸𑀫 𑀅𑀳𑁄𑀲𑀺. 𑀅𑀣𑀲𑁆𑀲 𑀆𑀘𑀭𑀺𑀬𑁄 ‘‘𑀅𑀬𑀁 𑀫𑀬𑀸 𑀲𑀤𑀺𑀲𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀻’’𑀢𑀺 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑁄 𑀯𑀸𑀭𑀡𑁄 𑀏𑀓𑀁 𑀧𑀤𑁂𑀲𑀁 𑀲𑀼𑀜𑁆𑀜𑀫𑀓𑀸𑀲𑀺, 𑀢𑀁 𑀞𑀸𑀦𑀁 𑀅𑀪𑀺𑀭𑀼𑀳𑀺𑀢𑀼𑀁 𑀦 𑀓𑁄𑀘𑀺 𑀉𑀲𑁆𑀲𑀳𑀺. 𑀘𑀽𑀴𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑁄 𑀫𑀦𑀼𑀲𑁆𑀲𑀸𑀦𑀁 𑀯𑀸𑀭𑁂𑀦𑁆𑀢𑀸𑀦𑀜𑁆𑀜𑁂𑀯 ¶ 𑀪𑀭𑀺𑀬𑀁 𑀕𑀳𑁂𑀢𑁆𑀯𑀸 𑀅𑀝𑀯𑀺𑀫𑀼𑀔𑀁 𑀅𑀪𑀺𑀭𑀼𑀳𑀺. 𑀅𑀣𑀲𑁆𑀲 𑀅𑀝𑀯𑀺𑀫𑀚𑁆𑀛𑁂 𑀯𑀸𑀭𑀡𑁄 𑀉𑀝𑁆𑀞𑀳𑀺, 𑀲𑁄 𑀢𑀁 𑀓𑀼𑀫𑁆𑀪𑁂 𑀲𑀭𑁂𑀦 𑀯𑀺𑀚𑁆𑀛𑀺. 𑀲𑀭𑁄 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀙𑀸𑀪𑀸𑀕𑁂𑀦 𑀦𑀺𑀓𑁆𑀔𑀫𑀺. 𑀯𑀸𑀭𑀡𑁄 𑀢𑀢𑁆𑀣𑁂𑀯 𑀧𑀢𑀺, 𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑁄 𑀢𑀁 𑀞𑀸𑀦𑀁 𑀔𑁂𑀫𑀁 𑀓𑀢𑁆𑀯𑀸 𑀧𑀼𑀭𑀢𑁄 𑀅𑀜𑁆𑀜𑀁 𑀅𑀝𑀯𑀺𑀁 𑀧𑀸𑀧𑀼𑀡𑀺. 𑀢𑀢𑁆𑀣𑀸𑀧𑀺 𑀧𑀜𑁆𑀜𑀸𑀲 𑀘𑁄𑀭𑀸 𑀫𑀕𑁆𑀕𑀁 𑀳𑀦𑀦𑁆𑀢𑀺. 𑀢𑀫𑁆𑀧𑀺 𑀲𑁄 𑀫𑀦𑀼𑀲𑁆𑀲𑁂𑀳𑀺 𑀯𑀸𑀭𑀺𑀬𑀫𑀸𑀦𑁄 𑀅𑀪𑀺𑀭𑀼𑀬𑁆𑀳 𑀢𑁂𑀲𑀁 𑀘𑁄𑀭𑀸𑀦𑀁 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀫𑀕𑁆𑀕𑀲𑀫𑀻𑀧𑁂 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀦𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀁 𑀧𑀸𑀧𑀼𑀡𑀺.

𑀢𑀤𑀸 ¶ 𑀢𑀁 𑀘𑁄𑀭𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀬 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀉𑀲𑁆𑀲𑀸𑀳𑀁 𑀓𑀭𑀺𑀁𑀲𑀼. 𑀘𑁄𑀭𑀚𑁂𑀝𑁆𑀞𑀓𑁄 𑀧𑀼𑀭𑀺𑀲𑀮𑀓𑁆𑀔𑀡𑀓𑀼𑀲𑀮𑁄, 𑀲𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸𑀯 ‘‘𑀉𑀢𑁆𑀢𑀫𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀏𑀓𑀲𑁆𑀲𑀧𑀺 𑀉𑀝𑁆𑀞𑀳𑀺𑀢𑀼𑀁 𑀦𑀸𑀤𑀸𑀲𑀺. 𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑁄 ‘‘𑀕𑀘𑁆𑀙 ‘𑀅𑀫𑁆𑀳𑀸𑀓𑀫𑁆𑀧𑀺 𑀏𑀓𑀁 𑀫𑀁𑀲𑀲𑀽𑀮𑀁 𑀤𑁂𑀣𑀸’𑀢𑀺 𑀯𑀢𑁆𑀯𑀸 𑀫𑀁𑀲𑀁 𑀆𑀳𑀭𑀸’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀪𑀭𑀺𑀬𑀁 𑀧𑁂𑀲𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 ‘‘𑀏𑀓𑀁 𑀓𑀺𑀭 𑀫𑀁𑀲𑀲𑀽𑀮𑀁 𑀤𑁂𑀣𑀸’’𑀢𑀺 𑀆𑀳. 𑀘𑁄𑀭𑀚𑁂𑀝𑁆𑀞𑀓𑁄 ‘‘𑀅𑀦𑀕𑁆𑀖𑁄 𑀧𑀼𑀭𑀺𑀲𑁄’’𑀢𑀺 𑀫𑀁𑀲𑀲𑀽𑀮𑀁 𑀤𑀸𑀧𑁂𑀲𑀺. 𑀘𑁄𑀭𑀸 ‘‘𑀅𑀫𑁆𑀳𑁂𑀳𑀺 𑀓𑀺𑀭 𑀧𑀓𑁆𑀓𑀁 𑀔𑀸𑀤𑀺𑀢’’𑀦𑁆𑀢𑀺 𑀅𑀧𑀓𑁆𑀓𑀫𑀁𑀲𑀲𑀽𑀮𑀁 𑀅𑀤𑀁𑀲𑀼. 𑀥𑀦𑀼𑀕𑁆𑀕𑀳𑁄 𑀅𑀢𑁆𑀢𑀸𑀦𑀁 𑀲𑀫𑁆𑀪𑀸𑀯𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀅𑀧𑀓𑁆𑀓𑀫𑀁𑀲𑀲𑀽𑀮𑀁 𑀤𑀤𑀦𑁆𑀢𑀻’’𑀢𑀺 𑀘𑁄𑀭𑀸𑀦𑀁 𑀓𑀼𑀚𑁆𑀛𑀺. 𑀘𑁄𑀭𑀸 ‘‘𑀓𑀺𑀁 𑀅𑀬𑀫𑁂𑀯𑁂𑀓𑁄 𑀧𑀼𑀭𑀺𑀲𑁄, 𑀫𑀬𑀁 𑀇𑀢𑁆𑀣𑀺𑀬𑁄’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼. 𑀥𑀦𑀼𑀕𑁆𑀕𑀳𑁄 𑀏𑀓𑀽𑀦𑀧𑀜𑁆𑀜𑀸𑀲 𑀚𑀦𑁂 𑀏𑀓𑀽𑀦𑀧𑀜𑁆𑀜𑀸𑀲𑀓𑀡𑁆𑀟𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀘𑁄𑀭𑀚𑁂𑀝𑁆𑀞𑀓𑀁 𑀯𑀺𑀚𑁆𑀛𑀺𑀢𑀼𑀁 𑀓𑀡𑁆𑀟𑀁 𑀦𑀸𑀳𑁄𑀲𑀺. 𑀢𑀲𑁆𑀲 𑀓𑀺𑀭 𑀓𑀡𑁆𑀟𑀦𑀸𑀴𑀺𑀬𑀁 𑀲𑀫𑀧𑀡𑁆𑀡𑀸𑀲𑀬𑁂𑀯 𑀓𑀡𑁆𑀟𑀸𑀦𑀺. 𑀢𑁂𑀲𑀼 𑀏𑀓𑁂𑀦 𑀯𑀸𑀭𑀡𑀁 𑀯𑀺𑀚𑁆𑀛𑀺, 𑀏𑀓𑀽𑀦𑀧𑀜𑁆𑀜𑀸𑀲𑀓𑀡𑁆𑀟𑁂𑀳𑀺 𑀘𑁄𑀭𑁂 𑀯𑀺𑀚𑁆𑀛𑀺𑀢𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑀁 𑀧𑀸𑀢𑁂𑀢𑁆𑀯𑀸 𑀢𑀲𑁆𑀲 𑀉𑀭𑁂 𑀦𑀺𑀲𑀺𑀦𑁆𑀦𑁄 ‘‘𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀪𑀭𑀺𑀬𑀸𑀬 𑀳𑀢𑁆𑀣𑀢𑁄 𑀅𑀲𑀺𑀁 𑀆𑀳𑀭𑀸𑀧𑁂𑀲𑀺. 𑀲𑀸 𑀢𑀗𑁆𑀔𑀡𑀜𑁆𑀜𑁂𑀯 𑀘𑁄𑀭𑀚𑁂𑀝𑁆𑀞𑀓𑁂 𑀮𑁄𑀪𑀁 𑀓𑀢𑁆𑀯𑀸 𑀘𑁄𑀭𑀲𑁆𑀲 ¶ 𑀳𑀢𑁆𑀣𑁂 𑀣𑀭𑀼𑀁, 𑀲𑀸𑀫𑀺𑀓𑀲𑁆𑀲 𑀳𑀢𑁆𑀣𑁂 𑀥𑀸𑀭𑀁 ¶ 𑀞𑀧𑁂𑀲𑀺. 𑀘𑁄𑀭𑁄 𑀣𑀭𑀼𑀤𑀡𑁆𑀟𑀁 𑀧𑀭𑀸𑀫𑀲𑀺𑀢𑁆𑀯𑀸 𑀅𑀲𑀺𑀁 𑀦𑀻𑀳𑀭𑀺𑀢𑁆𑀯𑀸 𑀥𑀦𑀼𑀕𑁆𑀕𑀳𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺.

𑀲𑁄 𑀢𑀁 𑀖𑀸𑀢𑁂𑀢𑁆𑀯𑀸 𑀇𑀢𑁆𑀣𑀺𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀚𑀸𑀢𑀺𑀕𑁄𑀢𑁆𑀢𑀁 𑀧𑀼𑀘𑁆𑀙𑀺. 𑀲𑀸 ‘‘𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀥𑀻𑀢𑀸𑀫𑁆𑀳𑀻’’𑀢𑀺 𑀆𑀳. ‘‘𑀓𑀣𑀁 𑀢𑁆𑀯𑀁 𑀇𑀫𑀺𑀦𑀸 𑀮𑀤𑁆𑀥𑀸’’𑀢𑀺. 𑀫𑀬𑁆𑀳𑀁 𑀧𑀺𑀢𑀸 ‘‘𑀅𑀬𑀁 𑀫𑀬𑀸 𑀲𑀤𑀺𑀲𑀁 𑀓𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀻’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀇𑀫𑀲𑁆𑀲 𑀫𑀁 𑀅𑀤𑀸𑀲𑀺, 𑀲𑀸𑀳𑀁 𑀢𑀬𑀺 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀤𑀢𑁆𑀢𑀺𑀬𑀁 𑀲𑀸𑀫𑀺𑀓𑀁 𑀫𑀸𑀭𑀸𑀧𑁂𑀲𑀺𑀦𑁆𑀢𑀺. 𑀘𑁄𑀭𑀚𑁂𑀝𑁆𑀞𑀓𑁄 ‘‘𑀓𑀼𑀮𑀤𑀢𑁆𑀢𑀺𑀬𑀁 𑀢𑀸𑀯𑁂𑀲𑀸 𑀲𑀸𑀫𑀺𑀓𑀁 𑀫𑀸𑀭𑁂𑀲𑀺, 𑀅𑀜𑁆𑀜𑀁 𑀧𑀦𑁂𑀓𑀁 𑀤𑀺𑀲𑁆𑀯𑀸 𑀫𑀫𑁆𑀧𑀺 𑀏𑀯𑀫𑁂𑀯𑀁 𑀓𑀭𑀺𑀲𑁆𑀲𑀢𑀺, 𑀇𑀫𑀁 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀓𑀼𑀦𑁆𑀦𑀤𑀺𑀁 𑀉𑀢𑁆𑀢𑀸𑀦𑀢𑀮𑀁 𑀢𑀗𑁆𑀔𑀡𑁄𑀤𑀓𑀧𑀽𑀭𑀁 𑀤𑀺𑀲𑁆𑀯𑀸 ‘‘𑀪𑀤𑁆𑀤𑁂, 𑀇𑀫𑀺𑀲𑁆𑀲𑀁 𑀦𑀤𑀺𑀬𑀁 𑀲𑀼𑀲𑀼𑀫𑀸𑀭𑀸 𑀓𑀓𑁆𑀔𑀴𑀸, 𑀓𑀺𑀁 𑀓𑀭𑁄𑀫𑀸’’𑀢𑀺 𑀆𑀳. ‘‘𑀲𑀸𑀫𑀺, 𑀲𑀩𑁆𑀩𑀁 𑀆𑀪𑀭𑀡𑀪𑀡𑁆𑀟𑀁 𑀫𑀫 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀧𑀭𑀢𑀻𑀭𑀁 𑀦𑁂𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀩𑁆𑀩𑀁 𑀆𑀪𑀭𑀡𑀪𑀡𑁆𑀟𑀁 𑀆𑀤𑀸𑀬 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀢𑀭𑀦𑁆𑀢𑁄 𑀯𑀺𑀬 𑀧𑀭𑀢𑀻𑀭𑀁 𑀧𑀢𑁆𑀯𑀸 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀧𑀸𑀬𑀸𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀺, 𑀓𑀺𑀁 𑀫𑀁 𑀙𑀟𑁆𑀟𑁂𑀢𑁆𑀯𑀸 𑀯𑀺𑀬 𑀕𑀘𑁆𑀙𑀲𑀺, 𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺, 𑀏𑀳𑀺 𑀫𑀫𑁆𑀧𑀺 𑀆𑀤𑀸𑀬 𑀕𑀘𑁆𑀙𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁮.

‘‘𑀲𑀩𑁆𑀩𑀁 𑀪𑀡𑁆𑀟𑀁 𑀲𑀫𑀸𑀤𑀸𑀬, 𑀧𑀸𑀭𑀁 𑀢𑀺𑀡𑁆𑀡𑁄𑀲𑀺 𑀩𑁆𑀭𑀸𑀳𑁆𑀫𑀡;

𑀧𑀘𑁆𑀘𑀸𑀕𑀘𑁆𑀙 𑀮𑀳𑀼𑀁 𑀔𑀺𑀧𑁆𑀧𑀁, 𑀫𑀫𑁆𑀧𑀺 𑀢𑀸𑀭𑁂𑀳𑀺 𑀤𑀸𑀦𑀺𑀢𑁄’’𑀢𑀺.

𑀢𑀢𑁆𑀣 ¶ 𑀮𑀳𑀼𑀁 𑀔𑀺𑀧𑁆𑀧𑀦𑁆𑀢𑀺 𑀮𑀳𑀼𑀁 𑀧𑀘𑁆𑀘𑀸𑀕𑀘𑁆𑀙, 𑀔𑀺𑀧𑁆𑀧𑀁 𑀫𑀫𑁆𑀧𑀺 𑀢𑀸𑀭𑁂𑀳𑀺 𑀤𑀸𑀦𑀺 𑀇𑀢𑁄𑀢𑀺 𑀅𑀢𑁆𑀣𑁄.

𑀘𑁄𑀭𑁄 𑀢𑀁 𑀲𑀼𑀢𑁆𑀯𑀸 𑀧𑀭𑀢𑀻𑀭𑁂 𑀞𑀺𑀢𑁄𑀬𑁂𑀯 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁯.

‘‘𑀅𑀲𑀦𑁆𑀣𑀼𑀢𑀁 𑀫𑀁 𑀘𑀺𑀭𑀲𑀦𑁆𑀣𑀼𑀢𑁂𑀦, 𑀦𑀺𑀫𑀻𑀦𑀺 𑀪𑁄𑀢𑀻 𑀅𑀥𑀼𑀯𑀁 𑀥𑀼𑀯𑁂𑀦;

𑀫𑀬𑀸𑀧𑀺 ¶ 𑀪𑁄𑀢𑀻 𑀦𑀺𑀫𑀺𑀦𑁂𑀬𑁆𑀬 𑀅𑀜𑁆𑀜𑀁, 𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲’’𑀦𑁆𑀢𑀺.

𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯 𑁋

𑀘𑁄𑀭𑁄 𑀧𑀦 ‘‘𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲𑀁, 𑀢𑀺𑀝𑁆𑀞 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀯𑀺𑀭𑀯𑀦𑁆𑀢𑀺𑀬𑀸𑀯 𑀆𑀪𑀭𑀡𑀪𑀡𑁆𑀟𑀺𑀓𑀁 𑀆𑀤𑀸𑀬 𑀧𑀮𑀸𑀢𑁄. 𑀢𑀢𑁄 𑀲𑀸 ¶ 𑀩𑀸𑀮𑀸 𑀅𑀢𑁆𑀭𑀺𑀘𑁆𑀙𑀢𑀸𑀬 𑀏𑀯𑀭𑀽𑀧𑀁 𑀩𑁆𑀬𑀲𑀦𑀁 𑀧𑀢𑁆𑀢𑀸 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀅𑀯𑀺𑀤𑀽𑀭𑁂 𑀏𑀓𑀁 𑀏𑀴𑀕𑀮𑀸𑀕𑀼𑀫𑁆𑀩𑀁 𑀉𑀧𑀕𑀦𑁆𑀢𑁆𑀯𑀸 𑀭𑁄𑀤𑀫𑀸𑀦𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀅𑀢𑁆𑀭𑀺𑀘𑁆𑀙𑀢𑀸𑀳𑀢𑀁 𑀲𑀸𑀫𑀺𑀓𑀸 𑀘 𑀚𑀸𑀭𑀸 𑀘 𑀧𑀭𑀺𑀳𑀻𑀦𑀁 𑀭𑁄𑀤𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀮𑀚𑁆𑀚𑀸𑀧𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀮𑀺𑀜𑁆𑀘 𑀧𑀜𑁆𑀘𑀲𑀺𑀔𑀜𑁆𑀘 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 ‘‘𑀫𑀸𑀢𑀮𑀺, 𑀢𑁆𑀯𑀁 𑀫𑀘𑁆𑀙𑁄 𑀪𑀯, 𑀧𑀜𑁆𑀘𑀲𑀺𑀔 𑀢𑁆𑀯𑀁 𑀲𑀓𑀼𑀡𑁄 𑀪𑀯, 𑀅𑀳𑀁 𑀧𑀦 𑀲𑀺𑀗𑁆𑀕𑀸𑀮𑁄 𑀳𑀼𑀢𑁆𑀯𑀸 𑀫𑀼𑀔𑁂𑀦 𑀫𑀁𑀲𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀏𑀢𑀺𑀲𑁆𑀲𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀬𑀺 𑀢𑀢𑁆𑀣 𑀕𑀢𑁂 𑀉𑀤𑀓𑀢𑁄 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀫𑀫 𑀧𑀼𑀭𑀢𑁄 𑀧𑀢, 𑀅𑀣𑀸𑀳𑀁 𑀫𑀼𑀔𑁂𑀦 𑀕𑀳𑀺𑀢𑀫𑀁𑀲𑀧𑀺𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀫𑀘𑁆𑀙𑀁 𑀕𑀳𑁂𑀢𑀼𑀁 𑀧𑀓𑁆𑀔𑀦𑁆𑀤𑀺𑀲𑁆𑀲𑀸𑀫𑀺, 𑀢𑀲𑁆𑀫𑀺𑀁 𑀔𑀡𑁂 𑀢𑁆𑀯𑀁, 𑀧𑀜𑁆𑀘𑀲𑀺𑀔, 𑀢𑀁 𑀫𑀁𑀲𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢, 𑀢𑁆𑀯𑀁 𑀫𑀸𑀢𑀮𑀺, 𑀉𑀤𑀓𑁂 𑀧𑀢𑀸’’𑀢𑀺 𑀆𑀡𑀸𑀧𑁂𑀲𑀺. ‘‘𑀲𑀸𑀥𑀼, 𑀤𑁂𑀯𑀸’’𑀢𑀺, 𑀫𑀸𑀢𑀮𑀺, 𑀫𑀘𑁆𑀙𑁄 𑀅𑀳𑁄𑀲𑀺, 𑀧𑀜𑁆𑀘𑀲𑀺𑀔𑁄 𑀲𑀓𑀼𑀡𑁄 𑀅𑀳𑁄𑀲𑀺. 𑀲𑀓𑁆𑀓𑁄 𑀲𑀺𑀗𑁆𑀕𑀸𑀮𑁄 𑀳𑀼𑀢𑁆𑀯𑀸 𑀫𑀁𑀲𑀧𑀺𑀡𑁆𑀟𑀁 𑀫𑀼𑀔𑁂𑀦𑀸𑀤𑀸𑀬 𑀢𑀲𑁆𑀲𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀫𑀘𑁆𑀙𑁄 𑀉𑀤𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀺𑀗𑁆𑀕𑀸𑀮𑀲𑁆𑀲 𑀧𑀼𑀭𑀢𑁄 𑀧𑀢𑀺. 𑀲𑁄 𑀫𑀼𑀔𑁂𑀦 𑀕𑀳𑀺𑀢𑀫𑀁𑀲𑀧𑀺𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀫𑀘𑁆𑀙𑀲𑁆𑀲𑀢𑁆𑀣𑀸𑀬 𑀧𑀓𑁆𑀔𑀦𑁆𑀤𑀺. 𑀫𑀘𑁆𑀙𑁄 𑀉𑀧𑁆𑀧𑀢𑀺𑀢𑁆𑀯𑀸 𑀉𑀤𑀓𑁂 𑀧𑀢𑀺, 𑀲𑀓𑀼𑀡𑁄 𑀫𑀁𑀲𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺, 𑀲𑀺𑀗𑁆𑀕𑀸𑀮𑁄 𑀉𑀪𑁄𑀧𑀺 𑀅𑀮𑀪𑀺𑀢𑁆𑀯𑀸 𑀏𑀴𑀕𑀮𑀸𑀕𑀼𑀫𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀤𑀼𑀫𑁆𑀫𑀼𑀔𑁄 𑀦𑀺𑀲𑀻𑀤𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀢𑁆𑀭𑀺𑀘𑁆𑀙𑀢𑀸𑀳𑀢𑁄 𑀦𑁂𑀯 𑀫𑀁𑀲𑀁, 𑀦 𑀫𑀘𑁆𑀙𑀁 𑀮𑀪𑀻’’𑀢𑀺 𑀓𑀼𑀝𑀁 𑀪𑀺𑀦𑁆𑀤𑀦𑁆𑀢𑀻 ¶ 𑀯𑀺𑀬 𑀫𑀳𑀸𑀳𑀲𑀺𑀢𑀁 𑀳𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁦.

‘‘𑀓𑀸𑀬𑀁 𑀏𑀴𑀕𑀮𑀸𑀕𑀼𑀫𑁆𑀩𑁂, 𑀓𑀭𑁄𑀢𑀺 𑀅𑀳𑀼𑀳𑀸𑀲𑀺𑀬𑀁;

𑀦𑀬𑀻𑀥 𑀦𑀘𑁆𑀘𑀕𑀻𑀢𑀁 𑀯𑀸, 𑀢𑀸𑀴𑀁 𑀯𑀸 𑀲𑀼𑀲𑀫𑀸𑀳𑀺𑀢𑀁;

𑀅𑀦𑀫𑁆𑀳𑀺𑀓𑀸𑀮𑁂 𑀲𑀼𑀲𑁄𑀡𑀺, 𑀓𑀺𑀦𑁆𑀦𑀼 𑀚𑀕𑁆𑀖𑀲𑀺 𑀲𑁄𑀪𑀦𑁂’’𑀢𑀺.

𑀢𑀢𑁆𑀣 ¶ 𑀓𑀸𑀬𑀦𑁆𑀢𑀺 𑀓𑀸 𑀅𑀬𑀁. 𑀏𑀴𑀕𑀮𑀸𑀕𑀼𑀫𑁆𑀩𑁂𑀢𑀺 𑀓𑀫𑁆𑀩𑁄𑀚𑀺𑀕𑀼𑀫𑁆𑀩𑁂. 𑀅𑀳𑀼𑀳𑀸𑀲𑀺𑀬𑀦𑁆𑀢𑀺 𑀤𑀦𑁆𑀢𑀯𑀺𑀤𑀁𑀲𑀓𑀁 𑀫𑀳𑀸𑀳𑀲𑀺𑀢𑀁 𑀯𑀼𑀘𑁆𑀘𑀢𑀺, 𑀢𑀁 𑀓𑀸 𑀏𑀲𑀸 𑀏𑀢𑀲𑁆𑀫𑀺𑀁 𑀕𑀼𑀫𑁆𑀩𑁂 𑀓𑀭𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀦𑀬𑀻𑀥 𑀦𑀘𑁆𑀘𑀕𑀻𑀢𑀁 𑀯𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀲𑁆𑀲𑀘𑀺 𑀦𑀘𑁆𑀘𑀦𑁆𑀢𑀲𑁆𑀲 𑀦𑀘𑁆𑀘𑀁 𑀯𑀸 𑀕𑀸𑀬𑀦𑁆𑀢𑀲𑁆𑀲 𑀕𑀻𑀢𑀁 𑀯𑀸 𑀳𑀢𑁆𑀣𑁂 𑀲𑀼𑀲𑀫𑀸𑀳𑀺𑀢𑁂 𑀓𑀢𑁆𑀯𑀸 𑀯𑀸𑀤𑁂𑀦𑁆𑀢𑀲𑁆𑀲 𑀲𑀼𑀲𑀫𑀸𑀳𑀺𑀢𑀁 𑀳𑀢𑁆𑀣𑀢𑀸𑀴𑀁 𑀯𑀸 𑀦𑀢𑁆𑀣𑀺, 𑀓𑀁 𑀤𑀺𑀲𑁆𑀯𑀸 𑀢𑁆𑀯𑀁 𑀳𑀲𑁂𑀬𑁆𑀬𑀸𑀲𑀻𑀢𑀺 𑀤𑀻𑀧𑁂𑀢𑀺. 𑀅𑀦𑀫𑁆𑀳𑀺𑀓𑀸𑀮𑁂𑀢𑀺 𑀭𑁄𑀤𑀦𑀓𑀸𑀮𑁂. 𑀲𑀼𑀲𑁄𑀡𑀻𑀢𑀺 𑀲𑀼𑀦𑁆𑀤𑀭𑀲𑁄𑀡𑀺. 𑀓𑀺𑀁 𑀦𑀼 𑀚𑀕𑁆𑀖𑀲𑀻𑀢𑀺 ¶ 𑀓𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀭𑁄𑀤𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀅𑀭𑁄𑀤𑀫𑀸𑀦𑀸𑀯 𑀫𑀳𑀸𑀳𑀲𑀺𑀢𑀁 𑀳𑀲𑀲𑀺. 𑀲𑁄𑀪𑀦𑁂𑀢𑀺 𑀢𑀁 𑀧𑀲𑀁𑀲𑀦𑁆𑀢𑁄 𑀆𑀮𑀧𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁩𑁧.

‘‘𑀲𑀺𑀗𑁆𑀕𑀸𑀮 𑀩𑀸𑀮 𑀤𑀼𑀫𑁆𑀫𑁂𑀥, 𑀅𑀧𑁆𑀧𑀧𑀜𑁆𑀜𑁄𑀲𑀺 𑀚𑀫𑁆𑀩𑀼𑀓;

𑀚𑀻𑀦𑁄 𑀫𑀘𑁆𑀙𑀜𑁆𑀘 𑀧𑁂𑀲𑀺𑀜𑁆𑀘, 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀻’’𑀢𑀺.

𑀢𑀢𑁆𑀣 𑀚𑀻𑀦𑁄𑀢𑀺 𑀚𑀸𑀦𑀺𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸. 𑀧𑁂𑀲𑀺𑀦𑁆𑀢𑀺 𑀫𑀁𑀲𑀧𑁂𑀲𑀺𑀁. 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀻𑀢𑀺 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀧𑀭𑀸𑀚𑀺𑀢𑁄 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀺 𑀲𑁄𑀘𑀲𑀺 𑀘𑀺𑀦𑁆𑀢𑁂𑀲𑀺.

𑀢𑀢𑁄 𑀲𑀺𑀗𑁆𑀕𑀸𑀮𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁨.

‘‘𑀲𑀼𑀤𑀲𑁆𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁;

𑀚𑀻𑀦𑀸 𑀧𑀢𑀺𑀜𑁆𑀘 𑀚𑀸𑀭𑀜𑁆𑀘, 𑀫𑀜𑁆𑀜𑁂 𑀢𑁆𑀯𑀜𑁆𑀜𑁂𑀯 𑀛𑀸𑀬𑀲𑀻’’𑀢𑀺.

𑀢𑀢𑁆𑀣 𑀢𑁆𑀯𑀜𑁆𑀜𑁂𑀯 𑀛𑀸𑀬𑀲𑀻𑀢𑀺 𑀧𑀸𑀧𑀥𑀫𑁆𑀫𑁂 𑀤𑀼𑀲𑁆𑀲𑀻𑀮𑁂 𑀅𑀳𑀁 𑀢𑀸𑀯 𑀫𑀫 𑀕𑁄𑀘𑀭𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀧𑀦 𑀅𑀢𑁆𑀭𑀺𑀘𑁆𑀙𑀢𑀸𑀬 𑀳𑀢𑀸 𑀢𑀁𑀫𑀼𑀳𑀼𑀢𑁆𑀢𑀤𑀺𑀝𑁆𑀞𑀓𑁂 𑀘𑁄𑀭𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀢𑀜𑁆𑀘 𑀚𑀸𑀭𑀁 𑀓𑀼𑀮𑀤𑀢𑁆𑀢𑀺𑀬𑀜𑁆𑀘 𑀧𑀢𑀺𑀁 𑀚𑀻𑀦𑀸, 𑀫𑀁 𑀉𑀧𑀸𑀤𑀸𑀬 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀓𑀧𑀡𑀢𑀭𑀸 𑀳𑀼𑀢𑁆𑀯𑀸 𑀛𑀸𑀬𑀲𑀺 𑀭𑁄𑀤𑀲𑀺 𑀧𑀭𑀺𑀤𑁂𑀯𑀲𑀻𑀢𑀺 𑀮𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀏𑀯𑀫𑀸𑀳.

𑀲𑀸 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁩𑁩.

‘‘𑀏𑀯𑀫𑁂𑀢𑀁 𑀫𑀺𑀕𑀭𑀸𑀚, 𑀬𑀣𑀸 𑀪𑀸𑀲𑀲𑀺 𑀚𑀫𑁆𑀩𑀼𑀓;

𑀲𑀸 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀪𑀢𑁆𑀢𑀼 𑀳𑁂𑀲𑁆𑀲𑀁 𑀯𑀲𑀸𑀦𑀼𑀕𑀸’’𑀢𑀺.

𑀢𑀢𑁆𑀣 ¶ 𑀦𑀽𑀦𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀸 𑀅𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀅𑀜𑁆𑀜𑀁 𑀪𑀢𑁆𑀢𑀸𑀭𑀁 𑀮𑀪𑀺𑀢𑁆𑀯𑀸 𑀏𑀓𑀁𑀲𑁂𑀦𑁂𑀯 𑀢𑀲𑁆𑀲 𑀪𑀢𑁆𑀢𑀼 𑀯𑀲𑀸𑀦𑀼𑀕𑀸 𑀯𑀲𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲𑀸 𑀅𑀦𑀸𑀘𑀸𑀭𑀸𑀬 𑀤𑀼𑀲𑁆𑀲𑀻𑀮𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁩𑁪.

‘‘𑀬𑁄 𑀳𑀭𑁂 𑀫𑀢𑁆𑀢𑀺𑀓𑀁 𑀣𑀸𑀮𑀁, 𑀓𑀁𑀲𑀣𑀸𑀮𑀫𑁆𑀧𑀺 𑀲𑁄 𑀳𑀭𑁂;

𑀓𑀢𑀁𑀬𑁂𑀯 𑀢𑀬𑀸 𑀧𑀸𑀧𑀁, 𑀧𑀼𑀦𑀧𑁂𑀯𑀁 𑀓𑀭𑀺𑀲𑁆𑀲𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀅𑀦𑀸𑀘𑀸𑀭𑁂 𑀓𑀺𑀁 𑀓𑀣𑁂𑀲𑀺, 𑀬𑁄 𑀫𑀢𑁆𑀢𑀺𑀓𑀁 𑀣𑀸𑀮𑀁 𑀳𑀭𑀢𑀺, 𑀲𑀼𑀯𑀡𑁆𑀡𑀣𑀸𑀮𑀭𑀚𑀢𑀣𑀸𑀮𑀸𑀤𑀺𑀧𑁆𑀧𑀪𑁂𑀤𑀁 𑀓𑀁𑀲𑀣𑀸𑀮𑀫𑁆𑀧𑀺 𑀲𑁄 𑀳𑀭𑀢𑁂𑀯, 𑀇𑀤𑀜𑁆𑀘 𑀢𑀬𑀸 𑀧𑀸𑀧𑀁 𑀓𑀢𑀫𑁂𑀯, 𑀦 𑀲𑀓𑁆𑀓𑀸 𑀢𑀯 𑀲𑀤𑁆𑀥𑀸𑀢𑀼𑀁, 𑀲𑀸 𑀢𑁆𑀯𑀁 𑀧𑀼𑀦𑀧𑀺 𑀏𑀯𑀁 𑀓𑀭𑀺𑀲𑁆𑀲𑀲𑀺𑀬𑁂𑀯𑀸𑀢𑀺. 𑀏𑀯𑀁 𑀲𑁄 𑀢𑀁 𑀮𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀥𑀦𑀼𑀕𑁆𑀕𑀳𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑀸 𑀇𑀢𑁆𑀣𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀘𑀽𑀴𑀥𑀦𑀼𑀕𑁆𑀕𑀳𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁭𑁫] 𑁫. 𑀓𑀧𑁄𑀢𑀚𑀸𑀢𑀓𑀯𑀡𑁆𑀡𑀦𑀸

𑀇𑀤𑀸𑀦𑀺 𑀔𑁄𑀫𑁆𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀮𑁄𑀮𑀯𑀢𑁆𑀣𑀼 𑀅𑀦𑁂𑀓𑀲𑁄 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀢𑀁 𑀧𑀦 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼, 𑀮𑁄𑀮𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀮𑁄𑀮𑁄𑀲𑀺, 𑀮𑁄𑀮𑀢𑀸𑀬 𑀧𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀫𑀳𑀸𑀦𑀲𑁂 𑀦𑀻𑀴𑀧𑀘𑁆𑀙𑀺𑀬𑀁 𑀯𑀲𑀢𑀺. 𑀅𑀣𑁂𑀓𑁄 𑀓𑀸𑀓𑁄 𑀫𑀘𑁆𑀙𑀫𑀁𑀲𑀮𑀼𑀤𑁆𑀥𑁄 𑀢𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 ¶ 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀩𑀳𑀼𑀁 𑀫𑀘𑁆𑀙𑀫𑀁𑀲𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀢𑁆𑀣𑀼𑀦𑀦𑁆𑀢𑁄 𑀦𑀻𑀴𑀧𑀘𑁆𑀙𑀺𑀬𑀁𑀬𑁂𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀸𑀭𑀸𑀯𑀢𑁂𑀦 ‘‘𑀏𑀳𑀺, 𑀲𑀫𑁆𑀫, 𑀕𑁄𑀘𑀭𑀸𑀬 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀅𑀚𑀻𑀭𑀓𑁂𑀦 𑀦𑀺𑀧𑀦𑁆𑀦𑁄𑀫𑁆𑀳𑀺, 𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 ‘‘𑀕𑀢𑁄 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀓𑀡𑁆𑀝𑀓𑁄, 𑀇𑀤𑀸𑀦𑀺 𑀬𑀣𑀸𑀭𑀼𑀘𑀺 𑀫𑀘𑁆𑀙𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁫.

‘‘𑀇𑀤𑀸𑀦𑀺 ¶ 𑀔𑁄𑀫𑁆𑀳𑀺 𑀲𑀼𑀔𑀺𑀢𑁄 𑀅𑀭𑁄𑀕𑁄, 𑀦𑀺𑀓𑁆𑀓𑀡𑁆𑀝𑀓𑁄 𑀦𑀺𑀧𑁆𑀧𑀢𑀺𑀢𑁄 𑀓𑀧𑁄𑀢𑁄;

𑀓𑀸𑀳𑀸𑀫𑀺 𑀤𑀸𑀦𑀻 𑀳𑀤𑀬𑀲𑁆𑀲 𑀢𑀼𑀝𑁆𑀞𑀺𑀁, 𑀢𑀣𑀸 𑀳𑀺 𑀫𑀁 𑀫𑀁𑀲𑀲𑀸𑀓𑀁 𑀩𑀮𑁂𑀢𑀻’’𑀢𑀺.

𑀢𑀢𑁆𑀣 𑀦𑀺𑀧𑁆𑀧𑀢𑀺𑀢𑁄𑀢𑀺 𑀦𑀺𑀕𑁆𑀕𑀢𑁄. 𑀓𑀧𑁄𑀢𑁄𑀢𑀺 𑀧𑀸𑀭𑀸𑀯𑀢𑁄. 𑀓𑀸𑀳𑀸𑀫𑀺 𑀤𑀸𑀦𑀻𑀢𑀺 𑀓𑀭𑀺𑀲𑁆𑀲𑀸𑀫𑀺 𑀤𑀸𑀦𑀺. 𑀢𑀣𑀸 𑀳𑀺 𑀫𑀁 𑀫𑀁𑀲𑀲𑀸𑀓𑀁 𑀩𑀮𑁂𑀢𑀻𑀢𑀺 𑀢𑀣𑀸 𑀳𑀺 𑀫𑀁𑀲𑀜𑁆𑀘 𑀅𑀯𑀲𑁂𑀲𑀁 𑀲𑀸𑀓𑀜𑁆𑀘 𑀫𑀬𑁆𑀳𑀁 𑀩𑀮𑀁 𑀓𑀭𑁄𑀢𑀺, 𑀉𑀝𑁆𑀞𑁂𑀳𑀺 𑀔𑀸𑀤𑀸𑀢𑀺 𑀯𑀤𑀫𑀸𑀦𑀁 𑀯𑀺𑀬 𑀉𑀲𑁆𑀲𑀸𑀳𑀁 𑀫𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀲𑁄 𑀪𑀢𑁆𑀢𑀓𑀸𑀭𑀓𑁂 𑀫𑀘𑁆𑀙𑀫𑀁𑀲𑀁 𑀧𑀘𑀺𑀢𑁆𑀯𑀸 𑀫𑀳𑀸𑀦𑀲𑀸 𑀦𑀺𑀓𑁆𑀔𑀫𑁆𑀫 𑀲𑀭𑀻𑀭𑀢𑁄 𑀲𑁂𑀤𑀁 𑀧𑀯𑀸𑀳𑁂𑀦𑁆𑀢𑁂 𑀧𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀲𑀓𑀭𑁄𑀝𑀺𑀬𑀁 𑀦𑀺𑀮𑀻𑀬𑀺𑀢𑁆𑀯𑀸 ‘‘𑀓𑀺𑀭𑀺 𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀪𑀢𑁆𑀢𑀓𑀸𑀭𑀓𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀓𑀸𑀓𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀢𑁆𑀢𑀸𑀦𑀺 𑀮𑀼𑀜𑁆𑀚𑀺𑀢𑁆𑀯𑀸 𑀅𑀮𑁆𑀮𑀲𑀺𑀗𑁆𑀕𑀻𑀯𑁂𑀭𑀜𑁆𑀘 𑀲𑀺𑀤𑁆𑀥𑀢𑁆𑀣𑀓𑁂 𑀘 𑀧𑀺𑀲𑀺𑀢𑁆𑀯𑀸 𑀮𑀲𑀼𑀡𑀁 𑀧𑀽𑀢𑀺𑀢𑀓𑁆𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀫𑀓𑁆𑀔𑁂𑀢𑁆𑀯𑀸 𑀏𑀓𑀁 𑀓𑀞𑀮𑀁 𑀖𑀁𑀲𑀺𑀢𑁆𑀯𑀸 ¶ 𑀯𑀺𑀚𑁆𑀛𑀺𑀢𑁆𑀯𑀸 𑀲𑀼𑀢𑁆𑀢𑀓𑁂𑀦 𑀢𑀲𑁆𑀲 𑀕𑀻𑀯𑀸𑀬𑀁 𑀩𑀦𑁆𑀥𑀺𑀢𑁆𑀯𑀸 𑀦𑀻𑀴𑀧𑀘𑁆𑀙𑀺𑀬𑀁𑀬𑁂𑀯 𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀧𑀸𑀭𑀸𑀯𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑀸 𑀏𑀲𑀸 𑀩𑀮𑀸𑀓𑀸 𑀫𑀫 𑀲𑀳𑀸𑀬𑀲𑁆𑀲 𑀧𑀘𑁆𑀙𑀺𑀬𑀁 𑀦𑀺𑀧𑀦𑁆𑀦𑀸, 𑀘𑀡𑁆𑀟𑁄 𑀳𑀺 𑀲𑁄 𑀆𑀕𑀦𑁆𑀢𑁆𑀯𑀸 𑀖𑀸𑀢𑁂𑀬𑁆𑀬𑀸𑀧𑀺 𑀦’’𑀦𑁆𑀢𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁬.

‘‘𑀓𑀸𑀬𑀁 𑀩𑀮𑀸𑀓𑀸 𑀲𑀺𑀔𑀺𑀦𑀻, 𑀘𑁄𑀭𑀻 𑀮𑀗𑁆𑀖𑀺𑀧𑀺𑀢𑀸𑀫𑀳𑀸;

𑀑𑀭𑀁 𑀩𑀮𑀸𑀓𑁂 𑀆𑀕𑀘𑁆𑀙, 𑀘𑀡𑁆𑀟𑁄 𑀫𑁂 𑀯𑀸𑀬𑀲𑁄 𑀲𑀔𑀸’’𑀢𑀺.

𑀲𑀸 𑀳𑁂𑀝𑁆𑀞𑀸 (𑀚𑀸. 𑀅𑀝𑁆𑀞. 𑁨.𑁩.𑁭𑁦) 𑀯𑀼𑀢𑁆𑀢𑀢𑁆𑀣𑀸𑀬𑁂𑀯.

𑀢𑀁 𑀲𑀼𑀢𑁆𑀯𑀸 𑀓𑀸𑀓𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁭.

‘‘𑀅𑀮𑀜𑁆𑀳𑀺 𑀢𑁂 𑀚𑀕𑁆𑀖𑀺𑀢𑀸𑀬𑁂, 𑀫𑀫𑀁 𑀤𑀺𑀲𑁆𑀯𑀸𑀦 𑀏𑀤𑀺𑀲𑀁;

𑀯𑀺𑀮𑀽𑀦𑀁 𑀲𑀽𑀤𑀧𑀼𑀢𑁆𑀢𑁂𑀦, 𑀧𑀺𑀝𑁆𑀞𑀫𑀡𑁆𑀟𑁂𑀦 𑀫𑀓𑁆𑀔𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀅𑀮𑀦𑁆𑀢𑀺 𑀧𑀝𑀺𑀲𑁂𑀥𑀢𑁆𑀣𑁂 𑀦𑀺𑀧𑀸𑀢𑁄. 𑀚𑀕𑁆𑀖𑀺𑀢𑀸𑀬𑁂𑀢𑀺 𑀳𑀲𑀺𑀢𑀼𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀤𑀸𑀦𑀺 𑀫𑀁 𑀏𑀤𑀺𑀲𑀁 𑀏𑀯𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀢𑀯 𑀅𑀮𑀁 𑀳𑀲𑀺𑀢𑀼𑀁, 𑀫𑀸 𑀏𑀤𑀺𑀲𑁂 𑀓𑀸𑀮𑁂 𑀧𑀭𑀺𑀳𑀸𑀲𑀓𑁂𑀴𑀺𑀁 𑀓𑀭𑁄𑀳𑀻𑀢𑀺.

𑀲𑁄 ¶ 𑀧𑀭𑀺𑀳𑀸𑀲𑀓𑁂𑀴𑀺𑀁 𑀓𑀭𑁄𑀦𑁆𑀢𑁄𑀯 𑀧𑀼𑀦 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁩𑁮.

‘‘𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄𑀲𑀺, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀺𑀢𑁄;

𑀓𑀡𑁆𑀞𑁂 𑀘 𑀢𑁂 𑀯𑁂𑀴𑀼𑀭𑀺𑀬𑁄, 𑀅𑀕𑀫𑀸 𑀦𑀼 𑀓𑀚𑀗𑁆𑀕𑀮’’𑀦𑁆𑀢𑀺.

𑀢𑀢𑁆𑀣 𑀓𑀡𑁆𑀞𑁂 𑀘 𑀢𑁂 𑀯𑁂𑀴𑀼𑀭𑀺𑀬𑁄𑀢𑀺 𑀅𑀬𑀁 𑀢𑁂 𑀯𑁂𑀴𑀼𑀭𑀺𑀬𑀫𑀡𑀺𑀧𑀺 𑀓𑀡𑁆𑀞𑁂 𑀧𑀺𑀴𑀦𑁆𑀥𑁄, 𑀢𑁆𑀯𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑀸𑀓𑀁 𑀏𑀢𑀁 𑀦 𑀤𑀲𑁆𑀲𑁂𑀲𑀻𑀢𑀺 𑀓𑀧𑀸𑀮𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀓𑀚𑀗𑁆𑀕𑀮𑀦𑁆𑀢𑀺 𑀇𑀥 𑀩𑀸𑀭𑀸𑀡𑀲𑀻𑀬𑁂𑀯 ‘‘𑀓𑀚𑀗𑁆𑀕𑀮𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀘𑁆𑀘𑀺 𑀅𑀦𑁆𑀢𑁄𑀦𑀕𑀭𑀁 𑀕𑀢𑁄𑀲𑀻𑀢𑀺 𑀧𑀼𑀘𑁆𑀙𑀢𑀺.

𑀢𑀢𑁄 𑀓𑀸𑀓𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁯.

‘‘𑀫𑀸 𑀢𑁂 𑀫𑀺𑀢𑁆𑀢𑁄 𑀅𑀫𑀺𑀢𑁆𑀢𑁄 𑀯𑀸, 𑀅𑀕𑀫𑀸𑀲𑀺 𑀓𑀚𑀗𑁆𑀕𑀮𑀁;

𑀧𑀺𑀜𑁆𑀙𑀸𑀦𑀺 𑀢𑀢𑁆𑀣 𑀮𑀸𑀬𑀺𑀢𑁆𑀯𑀸, 𑀓𑀡𑁆𑀞𑁂 𑀩𑀦𑁆𑀥𑀦𑁆𑀢𑀺 𑀯𑀝𑁆𑀝𑀦’’𑀦𑁆𑀢𑀺.

𑀢𑀢𑁆𑀣 ¶ 𑀧𑀺𑀜𑁆𑀙𑀸𑀦𑀻𑀢𑀺 𑀧𑀢𑁆𑀢𑀸𑀦𑀺. 𑀢𑀢𑁆𑀣 𑀮𑀸𑀬𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀩𑀸𑀭𑀸𑀡𑀲𑀺𑀦𑀕𑀭𑁂 𑀮𑀼𑀜𑁆𑀘𑀺𑀢𑁆𑀯𑀸. 𑀯𑀝𑁆𑀝𑀦𑀦𑁆𑀢𑀺 𑀓𑀞𑀮𑀺𑀓𑀁.

𑀢𑀁 𑀲𑀼𑀢𑁆𑀯𑀸 𑀧𑀸𑀭𑀸𑀯𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁪𑁦.

‘‘𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫, 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁;

𑀦 𑀳𑀺 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀲𑀼𑀪𑀼𑀜𑁆𑀚𑀸 𑀳𑁄𑀦𑁆𑀢𑀺 𑀧𑀓𑁆𑀔𑀺𑀦𑀸’’𑀢𑀺.

𑀢𑀢𑁆𑀣 𑀧𑀼𑀦𑀧𑀸𑀧𑀚𑁆𑀚𑀲𑀻𑀢𑀺 𑀧𑀼𑀦𑀧𑀺 𑀏𑀯𑀭𑀽𑀧𑀁 𑀆𑀧𑀚𑁆𑀚𑀺𑀲𑁆𑀲𑀲𑀺. 𑀏𑀯𑀭𑀽𑀧𑀜𑁆𑀳𑀺 𑀢𑁂 𑀲𑀻𑀮𑀦𑁆𑀢𑀺.

𑀇𑀢𑀺 𑀦𑀁 𑀲𑁄 𑀑𑀯𑀤𑀺𑀢𑁆𑀯𑀸 𑀢𑀢𑁆𑀣 𑀅𑀯𑀲𑀺𑀢𑁆𑀯𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺. 𑀓𑀸𑀓𑁄𑀧𑀺 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀮𑁄𑀮𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀓𑀧𑁄𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀧𑁄𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

𑀅𑀟𑁆𑀠𑀯𑀕𑁆𑀕𑁄 𑀢𑀢𑀺𑀬𑁄.

𑀚𑀸𑀢𑀓𑀼𑀤𑁆𑀤𑀸𑀦𑀁 𑁋

𑀫𑀡𑀺𑀓𑀼𑀡𑁆𑀟𑀮 ¶ 𑀲𑀼𑀚𑀸𑀢𑀸, 𑀯𑁂𑀦𑀲𑀸𑀔𑀜𑁆𑀘 𑀑𑀭𑀕𑀁;

𑀖𑀝𑀁 𑀓𑁄𑀭𑀡𑁆𑀟𑀺 𑀮𑀝𑀼𑀓𑀺, 𑀥𑀫𑁆𑀫𑀧𑀸𑀮𑀁 𑀫𑀺𑀕𑀁 𑀢𑀣𑀸.

𑀲𑀼𑀬𑁄𑀦𑀦𑁆𑀤𑀻 𑀯𑀡𑁆𑀡𑀸𑀭𑁄𑀳, 𑀲𑀻𑀮𑀁 𑀳𑀺𑀭𑀻 𑀔𑀚𑁆𑀚𑁄𑀧𑀦𑀁;

𑀅𑀳𑀺 𑀕𑀼𑀫𑁆𑀩𑀺𑀬 𑀲𑀸𑀴𑀺𑀬𑀁, 𑀢𑀘𑀲𑀸𑀭𑀁 𑀫𑀺𑀢𑁆𑀢𑀯𑀺𑀦𑁆𑀤𑀁.

𑀧𑀮𑀸𑀲𑀜𑁆𑀘𑁂𑀯 𑀤𑀻𑀖𑀺𑀢𑀺, 𑀫𑀺𑀕𑀧𑁄𑀢𑀓 𑀫𑀽𑀲𑀺𑀓𑀁;

𑀥𑀦𑀼𑀕𑁆𑀕𑀳𑁄 𑀓𑀧𑁄𑀢𑀜𑁆𑀘, 𑀚𑀸𑀢𑀓𑀸 𑀧𑀜𑁆𑀘𑀯𑀻𑀲𑀢𑀺.

𑀧𑀜𑁆𑀘𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀧𑀸𑀢𑁄

𑁧. 𑀅𑀯𑀸𑀭𑀺𑀬𑀯𑀕𑁆𑀕𑁄

[𑁩𑁭𑁬] 𑁧. 𑀅𑀯𑀸𑀭𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀫𑀸𑀲𑀼 ¶ ¶ ¶ 𑀓𑀼𑀚𑁆𑀛 𑀪𑀽𑀫𑀺𑀧𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀢𑀺𑀢𑁆𑀣𑀦𑀸𑀯𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀩𑀸𑀮𑁄 𑀅𑀳𑁄𑀲𑀺 𑀅𑀜𑁆𑀜𑀸𑀡𑁄, 𑀦𑁂𑀯 𑀲𑁄 𑀩𑀼𑀤𑁆𑀥𑀸𑀤𑀻𑀦𑀁 𑀭𑀢𑀦𑀸𑀦𑀁, 𑀦 𑀅𑀜𑁆𑀜𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑀁 𑀚𑀸𑀦𑀸𑀢𑀺, 𑀘𑀡𑁆𑀟𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄. 𑀅𑀣𑁂𑀓𑁄 𑀚𑀸𑀦𑀧𑀤𑁄 𑀪𑀺𑀓𑁆𑀔𑀼 ‘‘𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀘𑁆𑀙𑀦𑁆𑀢𑁄 𑀲𑀸𑀬𑀁 𑀅𑀘𑀺𑀭𑀯𑀢𑀻𑀢𑀺𑀢𑁆𑀣𑀁 𑀧𑀢𑁆𑀯𑀸 𑀢𑀁 𑀏𑀯𑀫𑀸𑀳 ‘‘𑀉𑀧𑀸𑀲𑀓, 𑀧𑀭𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀺, 𑀦𑀸𑀯𑀁 𑀫𑁂 𑀤𑁂𑀳𑀻’’𑀢𑀺. ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀅𑀓𑀸𑀮𑁄, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀲𑁆𑀲𑀽’’𑀢𑀺. ‘‘𑀉𑀧𑀸𑀲𑀓, 𑀇𑀥 𑀓𑀼𑀳𑀺𑀁 𑀯𑀲𑀺𑀲𑁆𑀲𑀸𑀫𑀺, 𑀫𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀸’’𑀢𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀳𑀺 𑀭𑁂 𑀲𑀫𑀡, 𑀯𑀳𑀸𑀫𑀻’’𑀢𑀺 𑀣𑁂𑀭𑀁 𑀦𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀉𑀚𑀼𑀓𑀁 𑀅𑀕𑀦𑁆𑀢𑁆𑀯𑀸 𑀳𑁂𑀝𑁆𑀞𑀸 𑀦𑀸𑀯𑀁 𑀦𑁂𑀢𑁆𑀯𑀸 𑀉𑀮𑁆𑀮𑁄𑀴𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀢𑁂𑀫𑁂𑀢𑁆𑀯𑀸 𑀓𑀺𑀮𑀫𑁂𑀢𑁆𑀯𑀸 𑀢𑀻𑀭𑀁 𑀧𑀢𑁆𑀯𑀸 𑀅𑀦𑁆𑀥𑀓𑀸𑀭𑀯𑁂𑀮𑀸𑀬𑀁 𑀉𑀬𑁆𑀬𑁄𑀚𑁂𑀲𑀺. 𑀅𑀣 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀲𑁆𑀲 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀳𑀺𑀬𑁆𑀬𑁄, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀅𑀣 𑀓𑀲𑁆𑀫𑀸 𑀅𑀚𑁆𑀚 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦 𑀔𑁄 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀘𑀡𑁆𑀟𑁄 𑀨𑀭𑀼𑀲𑁄 𑀲𑀸𑀳𑀲𑀺𑀓𑁄, 𑀇𑀤𑀸𑀦𑀺 𑀧𑀦 𑀢𑁂𑀦 𑀢𑁆𑀯𑀁 𑀓𑀺𑀮𑀫𑀺𑀢𑁄, 𑀧𑀼𑀩𑁆𑀩𑁂𑀧𑁂𑀲 𑀧𑀡𑁆𑀟𑀺𑀢𑁂 𑀓𑀺𑀮𑀫𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 ¶ 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀤𑀻𑀖𑀫𑀤𑁆𑀥𑀸𑀦𑀁 𑀳𑀺𑀫𑀯𑀦𑁆𑀢𑁂 𑀨𑀮𑀸𑀨𑀮𑁂𑀦 𑀬𑀸𑀧𑁂𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺. 𑀅𑀣 𑀦𑀁 𑀭𑀸𑀚𑀗𑁆𑀕𑀡𑀧𑁆𑀧𑀢𑁆𑀢𑀁 𑀭𑀸𑀚𑀸 𑀤𑀺𑀲𑁆𑀯𑀸 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀁 𑀆𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 ¶ 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀧𑁂𑀲𑀺, 𑀤𑁂𑀯𑀲𑀺𑀓𑀁 𑀉𑀧𑀝𑁆𑀞𑀸𑀦𑀁 ¶ 𑀅𑀕𑀫𑀸𑀲𑀺. 𑀢𑀫𑁂𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀭𑀜𑁆𑀜𑀸 𑀦𑀸𑀫, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑁂𑀦 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀤𑁂𑀯𑀲𑀺𑀓𑀁 𑀑𑀯𑀤𑀦𑁆𑀢𑁄 𑁋

𑁧.

‘‘𑀫𑀸𑀲𑀼 𑀓𑀼𑀚𑁆𑀛 𑀪𑀽𑀫𑀺𑀧𑀢𑀺, 𑀫𑀸𑀲𑀼 𑀓𑀼𑀚𑁆𑀛 𑀭𑀣𑁂𑀲𑀪;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀭𑀸𑀚𑀸 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑁄.

𑁨.

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀲𑀩𑁆𑀩𑀢𑁆𑀣 𑀅𑀦𑀼𑀲𑀸𑀲𑀸𑀫𑀺, 𑀫𑀸𑀲𑀼 𑀓𑀼𑀚𑁆𑀛 𑀭𑀣𑁂𑀲𑀪𑀸’’𑀢𑀺. 𑁋 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺;

𑀢𑀢𑁆𑀣 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑁄𑀢𑀺 𑀏𑀯𑀭𑀽𑀧𑁄 𑀭𑀸𑀚𑀸 𑀭𑀝𑁆𑀞𑀲𑁆𑀲 𑀧𑀽𑀚𑀦𑀻𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀅𑀦𑀼𑀲𑀸𑀲𑀸𑀫𑀻𑀢𑀺 𑀏𑀢𑁂𑀲𑀼 𑀕𑀸𑀫𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀸𑀳𑀁 𑀫𑀳𑀸𑀭𑀸𑀚, 𑀇𑀫𑀸𑀬 𑀏𑀯 𑀅𑀦𑀼𑀲𑀺𑀝𑁆𑀞𑀺𑀬𑀸 𑀢𑀫𑀦𑀼𑀲𑀸𑀲𑀸𑀫𑀺, 𑀏𑀢𑁂𑀲𑀼 𑀯𑀸 𑀕𑀸𑀫𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑀲𑁆𑀫𑀺𑀫𑁆𑀧𑀺 𑀏𑀓𑀲𑀢𑁆𑀢𑁂𑀧𑀺 𑀅𑀦𑀼𑀲𑀸𑀲𑀸𑀫𑀺. 𑀫𑀸𑀲𑀼 𑀓𑀼𑀚𑁆𑀛 𑀭𑀣𑁂𑀲𑀪𑀸𑀢𑀺 𑀏𑀯𑀫𑁂𑀯𑀸𑀳𑀁 𑀢𑀁 𑀅𑀦𑀼𑀲𑀸𑀲𑀸𑀫𑀺, 𑀭𑀜𑁆𑀜𑀸 𑀦𑀸𑀫 𑀓𑀼𑀚𑁆𑀛𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀺𑀁𑀓𑀸𑀭𑀡𑀸? 𑀭𑀸𑀚𑀸𑀦𑁄 𑀦𑀸𑀫 𑀯𑀸𑀘𑀸𑀯𑀼𑀥𑀸, 𑀢𑁂𑀲𑀁 𑀓𑀼𑀤𑁆𑀥𑀸𑀦𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀩𑀳𑀽 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 𑀆𑀕𑀢𑀸𑀕𑀢𑀤𑀺𑀯𑀲𑁂 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀭𑀸𑀚𑀸 𑀅𑀦𑀼𑀲𑀺𑀝𑁆𑀞𑀺𑀬𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀫𑀳𑀸𑀲𑀢𑁆𑀢𑀲𑁆𑀲 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀏𑀓𑀁 𑀕𑀸𑀫𑀯𑀭𑀁 𑀅𑀤𑀸𑀲𑀺, 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀓𑁆𑀔𑀺𑀧𑀺. 𑀇𑀢𑀺 𑀲𑁄 𑀢𑀢𑁆𑀣𑁂𑀯 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀁 𑀯𑀲𑀺𑀢𑁆𑀯𑀸 ‘‘𑀅𑀢𑀺𑀘𑀺𑀭𑀁 𑀦𑀺𑀯𑀼𑀢𑁆𑀣𑁄𑀫𑁆𑀳𑀺, 𑀚𑀦𑀧𑀤𑀘𑀸𑀭𑀺𑀓𑀁 𑀢𑀸𑀯 𑀘𑀭𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀅𑀓𑀣𑁂𑀢𑁆𑀯𑀸𑀯 𑀉𑀬𑁆𑀬𑀸𑀦𑀧𑀸𑀮𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑁄𑀲𑁆𑀫𑀺, 𑀚𑀦𑀧𑀤𑀁 𑀘𑀭𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀭𑀜𑁆𑀜𑁄 𑀓𑀣𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 ¶ 𑀕𑀗𑁆𑀕𑀸𑀬 𑀦𑀸𑀯𑀸𑀢𑀺𑀢𑁆𑀣𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀅𑀯𑀸𑀭𑀺𑀬𑀧𑀺𑀢𑀸 𑀦𑀸𑀫 𑀦𑀸𑀯𑀺𑀓𑁄 𑀅𑀳𑁄𑀲𑀺. 𑀲𑁄 𑀩𑀸𑀮𑁄 𑀦𑁂𑀯 𑀕𑀼𑀡𑀯𑀦𑁆𑀢𑀸𑀦𑀁 𑀕𑀼𑀡𑀁 𑀚𑀸𑀦𑀸𑀢𑀺, 𑀦 𑀅𑀢𑁆𑀢𑀦𑁄 𑀆𑀬𑀸𑀧𑀸𑀬𑀁 𑀚𑀸𑀦𑀸𑀢𑀺, 𑀲𑁄 𑀕𑀗𑁆𑀕𑀁 𑀢𑀭𑀺𑀢𑀼𑀓𑀸𑀫𑀁 𑀚𑀦𑀁 𑀧𑀞𑀫𑀁 𑀢𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑁂𑀢𑀦𑀁 𑀬𑀸𑀘𑀢𑀺, 𑀯𑁂𑀢𑀦𑀁 𑀅𑀤𑁂𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀦𑁆𑀢𑁄 𑀅𑀓𑁆𑀓𑁄𑀲𑀧𑁆𑀧𑀳𑀸𑀭𑁂𑀬𑁂𑀯 𑀩𑀳𑀽 𑀮𑀪𑀢𑀺, 𑀅𑀧𑁆𑀧𑀁 𑀮𑀸𑀪𑀁, 𑀏𑀯𑀭𑀽𑀧𑁄 𑀅𑀦𑁆𑀥𑀩𑀸𑀮𑁄. 𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩.

‘‘𑀅𑀯𑀸𑀭𑀺𑀬𑀧𑀺𑀢𑀸 ¶ 𑀦𑀸𑀫, 𑀅𑀳𑀼 𑀕𑀗𑁆𑀕𑀸𑀬 𑀦𑀸𑀯𑀺𑀓𑁄;

𑀧𑀼𑀩𑁆𑀩𑁂 𑀚𑀦𑀁 𑀢𑀸𑀭𑁂𑀢𑁆𑀯𑀸𑀦, 𑀧𑀘𑁆𑀙𑀸 𑀬𑀸𑀘𑀢𑀺 𑀯𑁂𑀢𑀦𑀁;

𑀢𑁂𑀦𑀲𑁆𑀲 𑀪𑀡𑁆𑀟𑀦𑀁 𑀳𑁄𑀢𑀺, 𑀦 𑀘 𑀪𑁄𑀕𑁂𑀳𑀺 𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 ¶ 𑀅𑀯𑀸𑀭𑀺𑀬𑀧𑀺𑀢𑀸 𑀦𑀸𑀫𑀸𑀢𑀺 𑀅𑀯𑀸𑀭𑀺𑀬𑀸 𑀦𑀸𑀫 𑀢𑀲𑁆𑀲 𑀥𑀻𑀢𑀸, 𑀢𑀲𑁆𑀲𑀸 𑀯𑀲𑁂𑀦 𑀅𑀯𑀸𑀭𑀺𑀬𑀧𑀺𑀢𑀸 𑀦𑀸𑀫 𑀚𑀸𑀢𑁄. 𑀢𑁂𑀦𑀲𑁆𑀲 𑀪𑀡𑁆𑀟𑀦𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀢𑁂𑀦 𑀯𑀸 𑀧𑀘𑁆𑀙𑀸 𑀬𑀸𑀘𑀺𑀬𑀫𑀸𑀦𑁂𑀦 𑀚𑀦𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀪𑀡𑁆𑀟𑀦𑀁 𑀳𑁄𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀦𑀸𑀯𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀧𑀭𑀢𑀻𑀭𑀁 𑀫𑀁 𑀦𑁂𑀳𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑁄 𑀆𑀳 ‘‘𑀲𑀫𑀡, 𑀓𑀺𑀁 𑀫𑁂 𑀦𑀸𑀯𑀸𑀯𑁂𑀢𑀦𑀁 𑀤𑀲𑁆𑀲𑀲𑀻’’𑀢𑀺? ‘‘𑀆𑀯𑀼𑀲𑁄, 𑀅𑀳𑀁 𑀪𑁄𑀕𑀯𑀟𑁆𑀠𑀺𑀁 𑀅𑀢𑁆𑀣𑀯𑀟𑁆𑀠𑀺𑀁 𑀥𑀫𑁆𑀫𑀯𑀟𑁆𑀠𑀺𑀁 𑀦𑀸𑀫 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀦𑀸𑀯𑀺𑀓𑁄 ‘‘𑀥𑀼𑀯𑀁 𑀏𑀲 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀤𑀲𑁆𑀲𑀢𑀻’’𑀢𑀺 𑀢𑀁 𑀧𑀭𑀢𑀻𑀭𑀁 𑀦𑁂𑀢𑁆𑀯𑀸 ‘‘𑀤𑁂𑀳𑀺 𑀫𑁂 𑀦𑀸𑀯𑀸𑀬 𑀯𑁂𑀢𑀦’’𑀦𑁆𑀢𑀺 𑀆𑀳. 𑀲𑁄 𑀢𑀲𑁆𑀲 ‘‘𑀲𑀸𑀥𑀼, 𑀆𑀯𑀼𑀲𑁄’’𑀢𑀺 𑀧𑀞𑀫𑀁 𑀪𑁄𑀕𑀯𑀟𑁆𑀠𑀺𑀁 𑀓𑀣𑁂𑀦𑁆𑀢𑁄 𑁋

𑁪.

‘‘𑀅𑀢𑀺𑀡𑁆𑀡𑀁𑀬𑁂𑀯 𑀬𑀸𑀘𑀲𑁆𑀲𑀼, 𑀅𑀧𑀸𑀭𑀁 𑀢𑀸𑀢 𑀦𑀸𑀯𑀺𑀓;

𑀅𑀜𑁆𑀜𑁄 𑀳𑀺 𑀢𑀺𑀡𑁆𑀡𑀲𑁆𑀲 𑀫𑀦𑁄, 𑀅𑀜𑁆𑀜𑁄 𑀳𑁄𑀢𑀺 𑀧𑀸𑀭𑁂𑀲𑀺𑀦𑁄’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀅𑀧𑀸𑀭𑀦𑁆𑀢𑀺 𑀢𑀸𑀢, 𑀦𑀸𑀯𑀺𑀓 𑀧𑀭𑀢𑀻𑀭𑀁 𑀅𑀢𑀺𑀡𑁆𑀡𑀫𑁂𑀯 𑀚𑀦𑀁 𑀑𑀭𑀺𑀫𑀢𑀻𑀭𑁂 𑀞𑀺𑀢𑀜𑁆𑀜𑁂𑀯 𑀯𑁂𑀢𑀦𑀁 𑀬𑀸𑀘𑀲𑁆𑀲𑀼, 𑀢𑀢𑁄 𑀮𑀤𑁆𑀥𑀜𑁆𑀘 𑀕𑀳𑁂𑀢𑁆𑀯𑀸 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸 𑀫𑀦𑀼𑀲𑁆𑀲𑁂 𑀧𑀭𑀢𑀻𑀭𑀁 𑀦𑁂𑀬𑁆𑀬𑀸𑀲𑀺, 𑀏𑀯𑀁 𑀢𑁂 𑀪𑁄𑀕𑀯𑀟𑁆𑀠𑀺 𑀪𑀯𑀺𑀲𑁆𑀲𑀢𑀺. 𑀅𑀜𑁆𑀜𑁄 𑀳𑀺 𑀢𑀺𑀡𑁆𑀡𑀲𑁆𑀲 𑀫𑀦𑁄𑀢𑀺 𑀢𑀸𑀢 𑀦𑀸𑀯𑀺𑀓, 𑀧𑀭𑀢𑀻𑀭𑀁 𑀕𑀢𑀲𑁆𑀲 𑀅𑀜𑁆𑀜𑁄 𑀫𑀦𑁄 𑀪𑀯𑀢𑀺, 𑀅𑀤𑀢𑁆𑀯𑀸𑀯 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀬𑁄 𑀧𑀦𑁂𑀲 𑀧𑀸𑀭𑁂𑀲𑀻 𑀦𑀸𑀫 𑀧𑀭𑀢𑀻𑀭𑀁 𑀏𑀲𑀢𑀺, 𑀧𑀭𑀢𑀻𑀭𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀲𑁄 𑀅𑀢𑀺𑀭𑁂𑀓𑀫𑁆𑀧𑀺 𑀤𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀇𑀢𑀺 𑀧𑀸𑀭𑁂𑀲𑀺𑀦𑁄 𑀅𑀜𑁆𑀜𑁄 𑀫𑀦𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀅𑀢𑀺𑀡𑁆𑀡𑀫𑁂𑀯 𑀬𑀸𑀘𑁂𑀬𑁆𑀬𑀸𑀲𑀺, 𑀅𑀬𑀁 𑀢𑀸𑀯 𑀢𑁂 𑀪𑁄𑀕𑀸𑀦𑀁 𑀯𑀟𑁆𑀠𑀺 𑀦𑀸𑀫𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀦𑀸𑀯𑀺𑀓𑁄 ¶ 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀢𑀸𑀯 𑀫𑁂 𑀑𑀯𑀸𑀤𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀧𑀦𑁂𑀲 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁 𑀢𑀸𑀯 𑀢𑁂, 𑀆𑀯𑀼𑀲𑁄, 𑀪𑁄𑀕𑀯𑀟𑁆𑀠𑀺, 𑀇𑀤𑀸𑀦𑀺 𑀅𑀢𑁆𑀣𑀥𑀫𑁆𑀫𑀯𑀟𑁆𑀠𑀺𑀁 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀑𑀯𑀤𑀦𑁆𑀢𑁄 𑁋

𑁫.

‘‘𑀕𑀸𑀫𑁂 ¶ 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀲𑀩𑁆𑀩𑀢𑁆𑀣 𑀅𑀦𑀼𑀲𑀸𑀲𑀸𑀫𑀺, 𑀫𑀸𑀲𑀼 𑀓𑀼𑀚𑁆𑀛𑀺𑀢𑁆𑀣 𑀦𑀸𑀯𑀺𑀓𑀸’’𑀢𑀺. 𑁋 𑀕𑀸𑀣𑀫𑀸𑀳;

𑀇𑀢𑀺𑀲𑁆𑀲 𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀣𑀥𑀫𑁆𑀫𑀯𑀟𑁆𑀠𑀺𑀁 𑀓𑀣𑁂𑀢𑁆𑀯𑀸 ‘‘𑀅𑀬𑀁 𑀢𑁂 𑀅𑀢𑁆𑀣𑀯𑀟𑁆𑀠𑀺 𑀘 𑀥𑀫𑁆𑀫𑀯𑀟𑁆𑀠𑀺 𑀘𑀸’’𑀢𑀺 𑀆𑀳. 𑀲𑁄 𑀧𑀦 𑀤𑀦𑁆𑀥𑀧𑀼𑀭𑀺𑀲𑁄 𑀢𑀁 𑀑𑀯𑀸𑀤𑀁 𑀦 𑀓𑀺𑀜𑁆𑀘𑀺 𑀫𑀜𑁆𑀜𑀫𑀸𑀦𑁄 ‘‘𑀇𑀤𑀁, 𑀲𑀫𑀡, 𑀢𑀬𑀸 𑀫𑀬𑁆𑀳𑀁 𑀤𑀺𑀦𑁆𑀦𑀁 ¶ 𑀦𑀸𑀯𑀸𑀯𑁂𑀢𑀦’’𑀦𑁆𑀢𑀺 𑀆𑀳. ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀫𑀬𑁆𑀳𑀁 𑀇𑀫𑀺𑀦𑀸 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀫𑁂 𑀤𑁂𑀳𑀻’’𑀢𑀺. ‘‘𑀆𑀯𑀼𑀲𑁄, 𑀇𑀤𑀁 𑀞𑀧𑁂𑀢𑁆𑀯𑀸 𑀫𑀬𑁆𑀳𑀁 𑀅𑀜𑁆𑀜𑀁 𑀦𑀢𑁆𑀣𑀻’’𑀢𑀺. ‘‘𑀅𑀣 𑀢𑁆𑀯𑀁 𑀓𑀲𑁆𑀫𑀸 𑀫𑀫 𑀦𑀸𑀯𑀁 𑀆𑀭𑀼𑀴𑁆𑀳𑁄𑀲𑀻’’𑀢𑀺 𑀢𑀸𑀧𑀲𑀁 𑀕𑀗𑁆𑀕𑀸𑀢𑀻𑀭𑁂 𑀧𑀸𑀢𑁂𑀢𑁆𑀯𑀸 𑀉𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀼𑀔𑀫𑁂𑀯𑀲𑁆𑀲 𑀧𑁄𑀣𑁂𑀲𑀺.

𑀲𑀢𑁆𑀣𑀸 ‘‘𑀇𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀢𑀸𑀧𑀲𑁄 𑀬𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀕𑀸𑀫𑀯𑀭𑀁 𑀮𑀪𑀺, 𑀢𑀫𑁂𑀯 𑀑𑀯𑀸𑀤𑀁 𑀅𑀦𑁆𑀥𑀩𑀸𑀮𑀲𑁆𑀲 𑀦𑀸𑀯𑀺𑀓𑀲𑁆𑀲 𑀓𑀣𑁂𑀢𑁆𑀯𑀸 𑀫𑀼𑀔𑀧𑁄𑀣𑀦𑀁 𑀧𑀸𑀧𑀼𑀡𑀺, 𑀢𑀲𑁆𑀫𑀸 𑀑𑀯𑀸𑀤𑀁 𑀤𑁂𑀦𑁆𑀢𑁂𑀦 𑀬𑀼𑀢𑁆𑀢𑀚𑀦𑀲𑁆𑀲𑁂𑀯 𑀤𑀸𑀢𑀩𑁆𑀩𑁄, 𑀦 𑀅𑀬𑀼𑀢𑁆𑀢𑀚𑀦𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁬.

‘‘𑀬𑀸𑀬𑁂𑀯𑀸𑀦𑀼𑀲𑀸𑀲𑀦𑀺𑀬𑀸, 𑀭𑀸𑀚𑀸 𑀕𑀸𑀫𑀯𑀭𑀁 𑀅𑀤𑀸;

𑀢𑀸𑀬𑁂𑀯𑀸𑀦𑀼𑀲𑀸𑀲𑀦𑀺𑀬𑀸, 𑀦𑀸𑀯𑀺𑀓𑁄 𑀧𑀳𑀭𑀻 𑀫𑀼𑀔’’𑀦𑁆𑀢𑀺.

𑀢𑀲𑁆𑀲 𑀢𑀁 𑀧𑀳𑀭𑀦𑁆𑀢𑀲𑁆𑀲𑁂𑀯 𑀪𑀭𑀺𑀬𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀧𑀸𑀧𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀺, 𑀅𑀬𑀁 𑀢𑀸𑀧𑀲𑁄 𑀦𑀸𑀫 𑀭𑀸𑀚𑀓𑀼𑀮𑀽𑀧𑀓𑁄, 𑀫𑀸 𑀧𑀳𑀭𑀻’’𑀢𑀺 𑀆𑀳. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀢𑁆𑀯𑀁 𑀫𑁂 𑀇𑀫𑀁 𑀓𑀽𑀝𑀢𑀸𑀧𑀲𑀁 𑀧𑀳𑀭𑀺𑀢𑀼𑀁 𑀦 𑀤𑁂𑀲𑀻’’𑀢𑀺 𑀉𑀝𑁆𑀞𑀸𑀬 𑀢𑀁 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀅𑀣 𑀪𑀢𑁆𑀢𑀧𑀸𑀢𑀺 𑀧𑀢𑀺𑀢𑁆𑀯𑀸 𑀪𑀺𑀚𑁆𑀚𑀺, 𑀢𑀲𑁆𑀲𑀸 𑀘 𑀧𑀦 𑀕𑀭𑀼𑀕𑀩𑁆𑀪𑀸𑀬 𑀕𑀩𑁆𑀪𑁄 𑀪𑀽𑀫𑀺𑀬𑀁 𑀧𑀢𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀧𑀼𑀭𑀺𑀲𑀖𑀸𑀢𑀓𑀘𑁄𑀭𑁄’’𑀢𑀺 ¶ 𑀕𑀳𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀢𑀲𑁆𑀲 𑀭𑀸𑀚𑀸𑀡𑀁 𑀓𑀸𑀭𑁂𑀲𑀺. 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁭.

‘‘𑀪𑀢𑁆𑀢𑀁 𑀪𑀺𑀦𑁆𑀦𑀁 𑀳𑀢𑀸 𑀪𑀭𑀺𑀬𑀸, 𑀕𑀩𑁆𑀪𑁄 𑀘 𑀧𑀢𑀺𑀢𑁄 𑀙𑀫𑀸;

𑀫𑀺𑀕𑁄𑀯 𑀚𑀸𑀢𑀭𑀽𑀧𑁂𑀦, 𑀦 𑀢𑁂𑀦𑀢𑁆𑀣𑀁 𑀅𑀩𑀦𑁆𑀥𑀺 𑀲𑀽’’𑀢𑀺.

𑀢𑀢𑁆𑀣 ¶ 𑀪𑀢𑁆𑀢𑀁 𑀪𑀺𑀦𑁆𑀦𑀦𑁆𑀢𑀺 𑀪𑀢𑁆𑀢𑀧𑀸𑀢𑀺 𑀪𑀺𑀦𑁆𑀦𑀸. 𑀳𑀢𑀸𑀢𑀺 𑀧𑀳𑀢𑀸. 𑀙𑀫𑀸𑀢𑀺 𑀪𑀽𑀫𑀺𑀬𑀁. 𑀫𑀺𑀕𑁄𑀯 𑀚𑀸𑀢𑀭𑀽𑀧𑁂𑀦𑀸𑀢𑀺 𑀬𑀣𑀸 𑀫𑀺𑀕𑁄 𑀲𑀼𑀯𑀡𑁆𑀡𑀁 𑀯𑀸 𑀳𑀺𑀭𑀜𑁆𑀜𑀁 𑀯𑀸 𑀫𑀼𑀢𑁆𑀢𑀸𑀫𑀡𑀺𑀆𑀤𑀻𑀦𑀺 𑀯𑀸 𑀫𑀤𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑁄𑀧𑀺 𑀢𑁂𑀦 𑀚𑀸𑀢𑀭𑀽𑀧𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀟𑁆𑀠𑁂𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀲𑁄 𑀅𑀦𑁆𑀥𑀩𑀸𑀮𑁄 𑀧𑀡𑁆𑀟𑀺𑀢𑁂𑀳𑀺 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀟𑁆𑀠𑁂𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀩𑀦𑁆𑀥𑀺 𑀲𑀽𑀢𑀺 𑀏𑀢𑁆𑀣 𑀅𑀩𑀦𑁆𑀥𑀺 𑀲𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲-𑀑𑀇𑀢𑀺 𑀇𑀫𑁂𑀲𑀁 𑀧𑀤𑀸𑀦𑀜𑁆𑀳𑀺 𑀲𑀽𑀢𑀺 𑀲𑀦𑁆𑀥𑀺 𑀳𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 ¶ 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀦𑀸𑀯𑀺𑀓𑁄 𑀇𑀤𑀸𑀦𑀺 𑀦𑀸𑀯𑀺𑀓𑁄𑀯 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀅𑀯𑀸𑀭𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁭𑁭] 𑁨. 𑀲𑁂𑀢𑀓𑁂𑀢𑀼𑀚𑀸𑀢𑀓𑀯𑀡𑁆𑀡𑀦𑀸

𑀫𑀸 𑀢𑀸𑀢 𑀓𑀼𑀚𑁆𑀛𑀺 𑀦 𑀳𑀺 𑀲𑀸𑀥𑀼 𑀓𑁄𑀥𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀉𑀤𑁆𑀤𑀸𑀮𑀚𑀸𑀢𑀓𑁂 (𑀚𑀸. 𑁧.𑁧𑁪.𑁬𑁨 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘𑀲𑀢𑁂 𑀫𑀸𑀡𑀯𑁂 𑀫𑀦𑁆𑀢𑁂 𑀯𑀸𑀘𑁂𑀲𑀺. 𑀢𑁂𑀲𑀁 𑀚𑁂𑀝𑁆𑀞𑀓𑁄 𑀲𑁂𑀢𑀓𑁂𑀢𑀼 𑀦𑀸𑀫 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀫𑀸𑀡𑀯𑁄, 𑀢𑀲𑁆𑀲 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑁄 𑀫𑀸𑀦𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀜𑁆𑀜𑁂𑀳𑀺 𑀫𑀸𑀡𑀯𑁂𑀳𑀺 𑀲𑀤𑁆𑀥𑀺𑀁 𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑁄 𑀦𑀕𑀭𑀁 𑀧𑀯𑀺𑀲𑀦𑁆𑀢𑀁 𑀏𑀓𑀁 𑀘𑀡𑁆𑀟𑀸𑀮𑀁 ¶ 𑀤𑀺𑀲𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀡𑁆𑀟𑀸𑀮𑁄𑀳𑀫𑀲𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀲𑀭𑀻𑀭𑀁 𑀧𑀳𑀭𑀺𑀢𑁆𑀯𑀸 𑀆𑀕𑀢𑀯𑀸𑀢𑀲𑁆𑀲 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀨𑀼𑀲𑀦𑀪𑀬𑁂𑀦 ‘‘𑀦𑀲𑁆𑀲, 𑀘𑀡𑁆𑀟𑀸𑀮, 𑀓𑀸𑀴𑀓𑀡𑁆𑀡𑀻, 𑀅𑀥𑁄𑀯𑀸𑀢𑀁 𑀬𑀸𑀳𑀻’’𑀢𑀺 𑀯𑀢𑁆𑀯𑀸 𑀯𑁂𑀕𑁂𑀦 𑀢𑀲𑁆𑀲 𑀉𑀧𑀭𑀺𑀯𑀸𑀢𑀁 𑀅𑀕𑀫𑀸𑀲𑀺. 𑀘𑀡𑁆𑀟𑀸𑀮𑁄 𑀲𑀻𑀖𑀢𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺𑀯𑀸𑀢𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑁄 ‘‘𑀦𑀲𑁆𑀲 𑀓𑀸𑀴𑀓𑀡𑁆𑀡𑀻’’𑀢𑀺 𑀲𑀼𑀝𑁆𑀞𑀼𑀢𑀭𑀁 𑀅𑀓𑁆𑀓𑁄𑀲𑀺 𑀧𑀭𑀺𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀘𑀡𑁆𑀟𑀸𑀮𑁄 ‘‘𑀢𑁆𑀯𑀁 𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄𑀳𑀫𑀲𑁆𑀫𑀻’’𑀢𑀺 ¶ . ‘‘𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀼, 𑀫𑀬𑀸 𑀧𑀦 𑀧𑀼𑀝𑁆𑀞𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. ‘‘𑀆𑀫, 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀦 𑀲𑀓𑁆𑀓𑁄𑀲𑀺, 𑀧𑀸𑀤𑀦𑁆𑀢𑀭𑁂𑀦 𑀢𑀁 𑀕𑀫𑁂𑀫𑀻’’𑀢𑀺. 𑀲𑁄 𑀅𑀢𑁆𑀢𑀸𑀦𑀁 𑀢𑀓𑁆𑀓𑁂𑀢𑁆𑀯𑀸 ‘‘𑀕𑀫𑁂𑀳𑀻’’𑀢𑀺 𑀆𑀳.

𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀢𑀲𑁆𑀲 𑀓𑀣𑀁 𑀧𑀭𑀺𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀫𑀸𑀡𑀯, 𑀤𑀺𑀲𑀸 𑀦𑀸𑀫 𑀓𑀢𑀭𑀸’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺. ‘‘𑀤𑀺𑀲𑀸 𑀦𑀸𑀫 𑀧𑀼𑀭𑀢𑁆𑀣𑀺𑀫𑀸𑀤𑀬𑁄 𑀘𑀢𑀲𑁆𑀲𑁄 𑀤𑀺𑀲𑀸’’𑀢𑀺. 𑀘𑀡𑁆𑀟𑀸𑀮𑁄 ‘‘𑀦𑀸𑀳𑀁 𑀢𑀁 𑀏𑀢𑀁 𑀤𑀺𑀲𑀁 𑀧𑀼𑀘𑁆𑀙𑀸𑀫𑀺, 𑀢𑁆𑀯𑀁 𑀏𑀢𑁆𑀢𑀓𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀫𑀫 𑀲𑀭𑀻𑀭𑁂 𑀧𑀳𑀝𑀯𑀸𑀢𑀁 𑀚𑀺𑀕𑀼𑀘𑁆𑀙𑀲𑀻’’𑀢𑀺 𑀢𑀁 𑀔𑀦𑁆𑀥𑀝𑁆𑀞𑀺𑀓𑁂 𑀕𑀳𑁂𑀢𑁆𑀯𑀸 𑀑𑀦𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀦𑁆𑀢𑀭𑁂𑀦 𑀕𑀫𑁂𑀲𑀺. 𑀫𑀸𑀡𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀭𑀺𑀬𑀲𑁆𑀲 𑀆𑀘𑀺𑀓𑁆𑀔𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑁄 ‘‘𑀲𑀘𑁆𑀘𑀁 𑀓𑀺𑀭, 𑀢𑀸𑀢, 𑀲𑁂𑀢𑀓𑁂𑀢𑀼 𑀘𑀡𑁆𑀟𑀸𑀮𑁂𑀦𑀸𑀲𑀺 𑀧𑀸𑀤𑀦𑁆𑀢𑀭𑁂𑀦 𑀕𑀫𑀺𑀢𑁄’’𑀢𑀺? ‘‘𑀆𑀫, 𑀆𑀘𑀭𑀺𑀬, 𑀲𑁄 𑀫𑀁 𑀘𑀡𑁆𑀟𑀸𑀮𑀤𑀸𑀲𑀺𑀧𑀼𑀢𑁆𑀢𑁄 𑀤𑀺𑀲𑀸𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀲𑀻’’𑀢𑀺 𑀅𑀢𑁆𑀢𑀦𑁄 𑀧𑀸𑀤𑀦𑁆𑀢𑀭𑁂𑀦 𑀕𑀫𑁂𑀲𑀺, 𑀇𑀤𑀸𑀦𑀺 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀁 𑀅𑀲𑁆𑀲 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀓𑀼𑀤𑁆𑀥𑁄 𑀘𑀡𑁆𑀟𑀸𑀮𑀧𑀼𑀢𑁆𑀢𑀁 𑀅𑀓𑁆𑀓𑁄𑀲𑀺 𑀧𑀭𑀺𑀪𑀸𑀲𑀺. 𑀅𑀣 𑀦𑀁 𑀆𑀘𑀭𑀺𑀬𑁄 ‘𑀢𑀸𑀢, 𑀲𑁂𑀢𑀓𑁂𑀢𑀼 𑀫𑀸 𑀢𑀲𑁆𑀲 𑀓𑀼𑀚𑁆𑀛𑀺, 𑀧𑀡𑁆𑀟𑀺𑀢𑁄 𑀘𑀡𑁆𑀟𑀸𑀮𑀤𑀸𑀲𑀺𑀧𑀼𑀢𑁆𑀢𑁄 ¶ , 𑀦 𑀲𑁄 𑀢𑀁 𑀏𑀢𑀁 𑀤𑀺𑀲𑀁 𑀧𑀼𑀘𑁆𑀙𑀢𑀺, 𑀅𑀜𑁆𑀜𑀁 𑀤𑀺𑀲𑀁 𑀧𑀼𑀘𑁆𑀙𑀺, 𑀢𑀬𑀸 𑀧𑀦 𑀤𑀺𑀝𑁆𑀞𑀲𑀼𑀢𑀯𑀺𑀜𑁆𑀜𑀸𑀢𑀢𑁄 𑀅𑀤𑀺𑀝𑁆𑀞𑀸𑀲𑀼𑀢𑀸𑀯𑀺𑀜𑁆𑀜𑀸𑀢𑀫𑁂𑀯 𑀩𑀳𑀼𑀢𑀭’’𑀦𑁆𑀢𑀺 𑀑𑀯𑀤𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮.

‘‘𑀫𑀸 𑀢𑀸𑀢 𑀓𑀼𑀚𑁆𑀛𑀺 𑀦 𑀳𑀺 𑀲𑀸𑀥𑀼 𑀓𑁄𑀥𑁄, 𑀩𑀳𑀼𑀫𑁆𑀧𑀺 𑀢𑁂 𑀅𑀤𑀺𑀝𑁆𑀞𑀫𑀲𑁆𑀲𑀼𑀢𑀜𑁆𑀘;

𑀫𑀸𑀢𑀸 𑀧𑀺𑀢𑀸 ¶ 𑀤𑀺𑀲𑀢𑀸 𑀲𑁂𑀢𑀓𑁂𑀢𑀼, 𑀆𑀘𑀭𑀺𑀬𑀫𑀸𑀳𑀼 𑀤𑀺𑀲𑀢𑀁 𑀧𑀲𑀢𑁆𑀣𑀸.

𑁯.

‘‘𑀅𑀕𑀸𑀭𑀺𑀦𑁄 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀸, 𑀅𑀯𑁆𑀳𑀸𑀬𑀺𑀓𑀸 𑀢𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀺;

𑀏𑀲𑀸 𑀤𑀺𑀲𑀸 𑀧𑀭𑀫𑀸 𑀲𑁂𑀢𑀓𑁂𑀢𑀼, 𑀬𑀁 𑀧𑀢𑁆𑀯𑀸 𑀤𑀼𑀓𑁆𑀔𑀻 𑀲𑀼𑀔𑀺𑀦𑁄 𑀪𑀯𑀦𑁆𑀢𑀻’’𑀢𑀺.

𑀢𑀢𑁆𑀣 𑀦 𑀳𑀺 𑀲𑀸𑀥𑀼 𑀓𑁄𑀥𑁄𑀢𑀺 𑀓𑁄𑀥𑁄 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀅𑀢𑁆𑀣𑀸𑀦𑀢𑁆𑀣𑀁 𑀳𑀺𑀢𑀸𑀳𑀺𑀢𑀁 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀦 𑀲𑀸𑀥𑀼 𑀦 𑀮𑀤𑁆𑀥𑀓𑁄. 𑀩𑀳𑀼𑀫𑁆𑀧𑀺 𑀢𑁂 𑀅𑀤𑀺𑀝𑁆𑀞𑀦𑁆𑀢𑀺 𑀢𑀬𑀸 𑀘𑀓𑁆𑀔𑀼𑀦𑀸 𑀅𑀤𑀺𑀝𑁆𑀞𑀁 𑀲𑁄𑀢𑁂𑀦 𑀘 𑀅𑀲𑁆𑀲𑀼𑀢𑀫𑁂𑀯 𑀩𑀳𑀼𑀢𑀭𑀁. 𑀤𑀺𑀲𑀢𑀸𑀢𑀺 𑀤𑀺𑀲𑀸. 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀧𑀼𑀭𑀺𑀫𑀢𑀭𑀁 ¶ 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸 𑀦𑀸𑀫 𑀚𑀸𑀢𑀸𑀢𑀺 𑀯𑀤𑀢𑀺. 𑀆𑀘𑀭𑀺𑀬𑀫𑀸𑀳𑀼 𑀤𑀺𑀲𑀢𑀁 𑀧𑀲𑀢𑁆𑀣𑀸𑀢𑀺 𑀆𑀘𑀭𑀺𑀬𑀸 𑀧𑀦 𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀤𑀺𑀲𑀢𑀁 𑀧𑀲𑀢𑁆𑀣𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀳𑀼 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺.

𑀅𑀕𑀸𑀭𑀺𑀦𑁄𑀢𑀺 𑀕𑀳𑀝𑁆𑀞𑀸. 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀸𑀢𑀺 𑀅𑀦𑁆𑀦𑀤𑀸, 𑀧𑀸𑀦𑀤𑀸, 𑀯𑀢𑁆𑀣𑀤𑀸 𑀘. 𑀅𑀯𑁆𑀳𑀸𑀬𑀺𑀓𑀸𑀢𑀺 ‘‘𑀏𑀣 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀧𑀓𑁆𑀓𑁄𑀲𑀦𑀓𑀸. 𑀢𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀻𑀢𑀺 𑀢𑀫𑁆𑀧𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀏𑀓𑀁 𑀤𑀺𑀲𑀁 𑀯𑀤𑀦𑁆𑀢𑀺. 𑀇𑀫𑀺𑀦𑀸 𑀘𑀢𑀼𑀧𑀘𑁆𑀘𑀬𑀤𑀸𑀬𑀓𑀸 𑀕𑀳𑀝𑁆𑀞𑀸 𑀧𑀘𑁆𑀘𑀬𑁂 𑀅𑀧𑀤𑀺𑀲𑀺𑀢𑁆𑀯𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀉𑀧𑀕𑀦𑁆𑀢𑀩𑁆𑀩𑀢𑁆𑀢𑀸 𑀏𑀓𑀸 𑀤𑀺𑀲𑀸 𑀦𑀸𑀫𑀸𑀢𑀺 𑀤𑀻𑀧𑁂𑀢𑀺. 𑀅𑀧𑀭𑁄 𑀦𑀬𑁄 𑁋 𑀬𑁂 𑀏𑀢𑁂 𑀅𑀕𑀸𑀭𑀺𑀦𑁄 𑀅𑀦𑁆𑀦𑀧𑀸𑀦𑀯𑀢𑁆𑀣𑀤𑀸, 𑀢𑁂𑀲𑀁 𑀙𑀓𑀸𑀫𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀝𑁆𑀞𑁂𑀦 𑀉𑀧𑀭𑀽𑀧𑀭𑀺 𑀅𑀯𑁆𑀳𑀸𑀬𑀦𑀢𑁄 𑀬𑁂 𑀅𑀯𑁆𑀳𑀸𑀬𑀺𑀓𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀺, 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀉𑀧𑀭𑀺𑀫𑀤𑀺𑀲𑀁 𑀦𑀸𑀫 𑀯𑀤𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀫𑀸𑀢𑀸 𑀧𑀺𑀢𑀸 𑀤𑀺𑀲𑀸 𑀧𑀼𑀩𑁆𑀩𑀸, 𑀆𑀘𑀭𑀺𑀬𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸;

𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀉𑀢𑁆𑀢𑀭𑀸.

‘‘𑀤𑀸𑀲𑀓𑀫𑁆𑀫𑀓𑀭𑀸 𑀳𑁂𑀝𑁆𑀞𑀸, 𑀉𑀤𑁆𑀥𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀏𑀢𑀸 𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬, 𑀅𑀮𑀫𑀢𑁆𑀢𑁄 𑀓𑀼𑀮𑁂 𑀕𑀺𑀳𑀻’’𑀢𑀺. (𑀤𑀻. 𑀦𑀺. 𑁩.𑁨𑁭𑁩);

𑀏𑀲𑀸 𑀤𑀺𑀲𑀸𑀢𑀺 𑀇𑀤𑀁 𑀧𑀦 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀚𑀸𑀢𑀺𑀆𑀤𑀺𑀦𑀸 𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀤𑀼𑀓𑁆𑀔𑁂𑀦 ¶ 𑀤𑀼𑀓𑁆𑀔𑀺𑀢𑀸 𑀲𑀢𑁆𑀢𑀸 𑀬𑀁 𑀧𑀢𑁆𑀯𑀸 𑀦𑀺𑀤𑁆𑀤𑀼𑀓𑁆𑀔𑀸 𑀲𑀼𑀔𑀺𑀦𑁄 𑀪𑀯𑀦𑁆𑀢𑀺, 𑀏𑀲𑀸 𑀏𑀯 𑀘 𑀲𑀢𑁆𑀢𑁂𑀳𑀺 𑀅𑀕𑀢𑀧𑀼𑀩𑁆𑀩𑀸 𑀤𑀺𑀲𑀸 𑀦𑀸𑀫. 𑀢𑁂𑀦𑁂𑀯 𑀘 𑀦𑀺𑀩𑁆𑀩𑀸𑀦𑀁 ‘‘𑀧𑀭𑀫𑀸’’𑀢𑀺 𑀆𑀳. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀫𑀢𑀺𑀢𑁆𑀢𑀺𑀓𑀁 ¶ 𑀅𑀦𑀯𑀲𑁂𑀲𑀓𑀁, 𑀢𑁂𑀮𑀧𑀢𑁆𑀢𑀁 𑀬𑀣𑀸 𑀧𑀭𑀺𑀳𑀭𑁂𑀬𑁆𑀬;

𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂, 𑀧𑀢𑁆𑀣𑀬𑀸𑀦𑁄 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩’’𑀦𑁆𑀢𑀺. (𑀚𑀸. 𑁧.𑁧.𑁯𑁬);

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀸𑀡𑀯𑀲𑁆𑀲 𑀤𑀺𑀲𑀸 𑀓𑀣𑁂𑀲𑀺. 𑀲𑁄 𑀧𑀦 ‘‘𑀘𑀡𑁆𑀟𑀸𑀮𑁂𑀦𑀫𑁆𑀳𑀺 𑀧𑀸𑀤𑀦𑁆𑀢𑀭𑁂𑀦 𑀕𑀫𑀺𑀢𑁄’’𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀯𑀲𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 ¶ 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀘𑀭𑀺𑀬𑁂𑀦 𑀅𑀦𑀼𑀜𑁆𑀜𑀸𑀢𑁄 𑀢𑀓𑁆𑀓𑀲𑀺𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀲𑀫𑀬𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑁄 𑀯𑀺𑀘𑀭𑀺. 𑀲𑁄 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂 𑀧𑀜𑁆𑀘𑀲𑀢𑁂 𑀢𑀸𑀧𑀲𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑀁 𑀢𑁂 𑀚𑀸𑀦𑀦𑁆𑀢𑀺 𑀲𑀺𑀧𑁆𑀧𑀫𑀦𑁆𑀢𑀘𑀭𑀡𑀁, 𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀁 𑀘𑀭𑀦𑁆𑀢𑁄 𑀭𑀸𑀚𑀗𑁆𑀕𑀡𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀸𑀧𑀲𑀸𑀦𑀁 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀪𑁄𑀚𑁂𑀢𑁆𑀯𑀸 𑀢𑁂 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀯𑀲𑀸𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀸𑀧𑀲𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 ‘‘𑀅𑀚𑁆𑀚 𑀲𑀸𑀬𑀦𑁆𑀳𑁂 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀅𑀬𑁆𑀬𑁂 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀲𑁂𑀢𑀓𑁂𑀢𑀼 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀫𑀸𑀭𑀺𑀲𑀸, 𑀅𑀚𑁆𑀚 𑀭𑀸𑀚𑀸 𑀆𑀕𑀫𑀺𑀲𑁆𑀲𑀢𑀺, 𑀭𑀸𑀚𑀸𑀦𑁄 𑀘 𑀦𑀸𑀫 𑀲𑀓𑀺𑀁 𑀆𑀭𑀸𑀥𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀲𑀼𑀔𑀁 𑀚𑀻𑀯𑀺𑀢𑀼𑀁 𑀲𑀓𑁆𑀓𑀸, 𑀅𑀚𑁆𑀚 𑀏𑀓𑀘𑁆𑀘𑁂 𑀯𑀕𑁆𑀕𑀼𑀮𑀺𑀯𑀢𑀁 𑀘𑀭𑀣, 𑀏𑀓𑀘𑁆𑀘𑁂 𑀓𑀡𑁆𑀝𑀓𑀲𑁂𑀬𑁆𑀬𑀁 𑀓𑀧𑁆𑀧𑁂𑀣, 𑀏𑀓𑀘𑁆𑀘𑁂 𑀧𑀜𑁆𑀘𑀸𑀢𑀧𑀁 𑀢𑀧𑁆𑀧𑁂𑀣, 𑀏𑀓𑀘𑁆𑀘𑁂 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀣, 𑀏𑀓𑀘𑁆𑀘𑁂 𑀉𑀤𑀓𑁄𑀭𑁄𑀳𑀡𑀓𑀫𑁆𑀫𑀁 𑀓𑀭𑁄𑀣, 𑀏𑀓𑀘𑁆𑀘𑁂 𑀫𑀦𑁆𑀢𑁂 𑀲𑀚𑁆𑀛𑀸𑀬𑀣𑀸’’𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀲𑀬𑀁 𑀧𑀓𑁆𑀓𑀲𑀸𑀮𑀤𑁆𑀯𑀸𑀭𑁂 𑀅𑀧𑀲𑁆𑀲𑀬𑀧𑀻𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀭𑀗𑁆𑀕𑀲𑀫𑀼𑀚𑁆𑀚𑀮𑀯𑀸𑀲𑀦𑀁 𑀏𑀓𑀁 𑀧𑁄𑀢𑁆𑀣𑀓𑀁 𑀯𑀺𑀘𑀺𑀢𑁆𑀭𑀯𑀡𑁆𑀡𑁂 𑀆𑀥𑀸𑀭𑀓𑁂 𑀞𑀧𑁂𑀢𑁆𑀯𑀸 𑀲𑀼𑀲𑀺𑀓𑁆𑀔𑀺𑀢𑁂𑀳𑀺 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀫𑀸𑀡𑀯𑁂𑀳𑀺 𑀧𑀼𑀘𑁆𑀙𑀺𑀢𑁂 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 ¶ 𑀢𑁂 𑀫𑀺𑀘𑁆𑀙𑀸𑀢𑀧𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀲𑁂𑀢𑀓𑁂𑀢𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀼𑀭𑁄𑀳𑀺𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦.

‘‘𑀔𑀭𑀸𑀚𑀺𑀦𑀸 𑀚𑀝𑀺𑀮𑀸 𑀧𑀗𑁆𑀓𑀤𑀦𑁆𑀢𑀸, 𑀤𑀼𑀫𑁆𑀫𑀓𑁆𑀔𑀭𑀽𑀧𑀸 𑀬𑁂𑀫𑁂 𑀚𑀧𑁆𑀧𑀦𑁆𑀢𑀺 𑀫𑀦𑁆𑀢𑁂;

𑀓𑀘𑁆𑀘𑀺 𑀦𑀼 𑀢𑁂 𑀫𑀸𑀦𑀼𑀲𑀓𑁂 𑀧𑀬𑁄𑀕𑁂, 𑀇𑀤𑀁 𑀯𑀺𑀤𑀽 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀸’’𑀢𑀺.

𑀢𑀢𑁆𑀣 𑀔𑀭𑀸𑀚𑀺𑀦𑀸𑀢𑀺 𑀲𑀔𑀼𑀭𑁂𑀳𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀧𑀗𑁆𑀓𑀤𑀦𑁆𑀢𑀸𑀢𑀺 𑀤𑀦𑁆𑀢𑀓𑀝𑁆𑀞𑀲𑁆𑀲 𑀅𑀔𑀸𑀤𑀦𑁂𑀦 𑀫𑀮𑀕𑁆𑀕𑀳𑀺𑀢𑀤𑀦𑁆𑀢𑀸. 𑀤𑀼𑀫𑁆𑀫𑀓𑁆𑀔𑀭𑀽𑀧𑀸𑀢𑀺 𑀅𑀦𑀜𑁆𑀚𑀺𑀢𑀸𑀫𑀡𑁆𑀟𑀺𑀢𑀮𑀽𑀔𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀯𑀚𑁆𑀚𑀺𑀢𑀸 ¶ , 𑀓𑀺𑀮𑀺𑀝𑁆𑀞𑀭𑀽𑀧𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀫𑁂 𑀚𑀧𑁆𑀧𑀦𑁆𑀢𑀻𑀢𑀺 𑀬𑁂 𑀇𑀫𑁂 𑀫𑀦𑁆𑀢𑁂 𑀲𑀚𑁆𑀛𑀸𑀬𑀦𑁆𑀢𑀺. 𑀫𑀸𑀦𑀼𑀲𑀓𑁂 𑀧𑀬𑁄𑀕𑁂𑀢𑀺 𑀫𑀦𑀼𑀲𑁆𑀲𑁂𑀳𑀺 𑀓𑀢𑁆𑀢𑀩𑁆𑀩𑀧𑀬𑁄𑀕𑁂 𑀞𑀺𑀢𑀸. 𑀇𑀤𑀁 𑀯𑀺𑀤𑀽 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 ¶ 𑀧𑀬𑁄𑀕𑁂 𑀞𑀢𑁆𑀯𑀸 𑀇𑀫𑀁 𑀮𑁄𑀓𑀁 𑀯𑀺𑀤𑀺𑀢𑁆𑀯𑀸 𑀧𑀸𑀓𑀝𑀁 𑀓𑀢𑁆𑀯𑀸 ‘‘𑀓𑀘𑁆𑀘𑀺 𑀏𑀢𑁂 𑀇𑀲𑀬𑁄 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁧.

‘‘𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯 𑀭𑀸𑀚, 𑀩𑀳𑀼𑀲𑁆𑀲𑀼𑀢𑁄 𑀘𑁂 𑀦 𑀘𑀭𑁂𑀬𑁆𑀬 𑀥𑀫𑁆𑀫𑀁;

𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀜𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸’’𑀢𑀺.

𑀢𑀢𑁆𑀣 𑀓𑀭𑀺𑀢𑁆𑀯𑀸𑀢𑀺 𑀓𑀢𑁆𑀯𑀸. 𑀘𑀭𑀡𑀦𑁆𑀢𑀺 𑀲𑀳 𑀲𑀻𑀮𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀭𑀸𑀚, ‘‘𑀅𑀳𑀁 𑀩𑀳𑀼𑀲𑁆𑀲𑀼𑀢𑁄𑀫𑁆𑀳𑀻’’𑀢𑀺 𑀲𑀳𑀲𑁆𑀲𑀯𑁂𑀤𑁄𑀧𑀺 𑀘𑁂 𑀢𑀺𑀯𑀺𑀥𑀁 𑀲𑀼𑀘𑀭𑀺𑀢𑀥𑀫𑁆𑀫𑀁 𑀦 𑀘𑀭𑁂𑀬𑁆𑀬, 𑀧𑀸𑀧𑀸𑀦𑁂𑀯 𑀓𑀭𑁂𑀬𑁆𑀬, 𑀲𑁄 𑀢𑀸𑀦𑀺 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀢𑀁 𑀩𑀸𑀳𑀼𑀲𑀘𑁆𑀘𑀁 𑀧𑀝𑀺𑀘𑁆𑀘 𑀲𑀻𑀮𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀘𑀭𑀡𑀁 𑀅𑀧𑁆𑀧𑀢𑁆𑀯𑀸 𑀤𑀼𑀓𑁆𑀔𑀸 𑀦 𑀧𑀫𑀼𑀜𑁆𑀘𑁂, 𑀅𑀧𑀸𑀬𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑀢𑁂𑀯𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀸𑀧𑀲𑁂𑀲𑀼 𑀧𑀲𑀸𑀤𑀁 𑀳𑀭𑀺. 𑀢𑀢𑁄 𑀲𑁂𑀢𑀓𑁂𑀢𑀼 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀲 𑀭𑀜𑁆𑀜𑁄 𑀢𑀸𑀧𑀲𑁂𑀲𑀼 𑀧𑀲𑀸𑀤𑁄 𑀉𑀤𑀧𑀸𑀤𑀺, 𑀢𑀁 𑀧𑀦𑁂𑀲 𑀧𑀼𑀭𑁄𑀳𑀺𑀢𑁄 𑀯𑀸𑀲𑀺𑀬𑀸 𑀧𑀳𑀭𑀺𑀢𑁆𑀯𑀸 𑀯𑀺𑀬 𑀙𑀺𑀦𑁆𑀤𑀺, 𑀫𑀬𑀸 𑀏𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁨.

‘‘𑀲𑀳𑀲𑁆𑀲𑀯𑁂𑀤𑁄𑀧𑀺 ¶ 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀜𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸;

𑀫𑀜𑁆𑀜𑀸𑀫𑀺 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀫𑁂𑀯 𑀲𑀘𑁆𑀘’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ ¶ 𑁋 𑀲𑀘𑁂 𑀲𑀳𑀲𑁆𑀲𑀯𑁂𑀤𑁄𑀧𑀺 𑀢𑀁 𑀩𑀸𑀳𑀼𑀲𑀘𑁆𑀘𑀁 𑀧𑀝𑀺𑀘𑁆𑀘 𑀘𑀭𑀡𑀁 𑀅𑀧𑁆𑀧𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀼𑀓𑁆𑀔𑀸 𑀦 𑀧𑀫𑀼𑀜𑁆𑀘𑁂, 𑀏𑀯𑀁 𑀲𑀦𑁆𑀢𑁂 𑀅𑀳𑀁 𑀫𑀜𑁆𑀜𑀸𑀫𑀺 ‘‘𑀢𑀬𑁄 𑀯𑁂𑀤𑀸 𑀅𑀨𑀮𑀸 𑀳𑁄𑀦𑁆𑀢𑀺, 𑀲𑀲𑀻𑀮𑀁 𑀲𑀫𑀸𑀧𑀢𑁆𑀢𑀺𑀘𑀭𑀡𑀫𑁂𑀯 𑀲𑀘𑁆𑀘𑀁 𑀳𑁄𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁩.

‘‘𑀦 𑀳𑁂𑀯 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀫𑁂𑀯 𑀲𑀘𑁆𑀘𑀁;

𑀓𑀺𑀢𑁆𑀢𑀺𑀜𑁆𑀳𑀺 𑀧𑀧𑁆𑀧𑁄𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂, 𑀲𑀦𑁆𑀢𑀺𑀁 𑀧𑀼𑀡𑁂𑀢𑀺 𑀘𑀭𑀡𑁂𑀦 𑀤𑀦𑁆𑀢𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑀬𑁄 𑀯𑁂𑀤𑀸 𑀅𑀨𑀮𑀸 𑀦 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀫𑁂𑀯 𑀲𑀘𑁆𑀘𑀁 𑀲𑁂𑀬𑁆𑀬𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀦 𑀳𑁂𑀯 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀓𑀺𑀢𑁆𑀢𑀺𑀜𑁆𑀳𑀺 𑀧𑀧𑁆𑀧𑁄𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂𑀢𑀺 𑀢𑀬𑁄 𑀯𑁂𑀤𑁂 𑀅𑀥𑀺𑀘𑁆𑀘 𑀤𑀺𑀝𑁆𑀞𑀥𑀫𑁆𑀫𑁂 𑀓𑀺𑀢𑁆𑀢𑀺𑀫𑀢𑁆𑀢𑀁 𑀬𑀲𑀫𑀢𑁆𑀢𑀁 𑀮𑀸𑀪𑀫𑀢𑁆𑀢𑀁 𑀮𑀪𑀢𑀺, 𑀇𑀢𑁄 𑀧𑀭𑀁 𑀅𑀜𑁆𑀜𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑁂 𑀅𑀨𑀮𑀸. 𑀲𑀦𑁆𑀢𑀺𑀁 𑀧𑀼𑀡𑁂𑀢𑀺 𑀘𑀭𑀡𑁂𑀦 𑀤𑀦𑁆𑀢𑁄𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀘𑁆𑀘𑀦𑁆𑀢𑀁 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀢𑀁 𑀏𑀢𑀺 𑀧𑀸𑀧𑀼𑀡𑀸𑀢𑀺.

𑀇𑀢𑀺 𑀧𑀼𑀭𑁄𑀳𑀺𑀢𑁄 𑀲𑁂𑀢𑀓𑁂𑀢𑀼𑀦𑁄 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑁂 𑀲𑀩𑁆𑀩𑁂 𑀕𑀺𑀳𑀻 𑀓𑀸𑀭𑁂𑀢𑁆𑀯𑀸 𑀨𑀮𑀓𑀸𑀯𑀼𑀥𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀢𑀭𑀓𑁂 𑀓𑀢𑁆𑀯𑀸 𑀭𑀜𑁆𑀜𑁄 𑀉𑀧𑀝𑁆𑀞𑀸𑀓𑁂 𑀓𑀸𑀭𑁂𑀲𑀺. 𑀅𑀬𑀁 𑀓𑀺𑀭 𑀫𑀳𑀦𑁆𑀢𑀢𑀭𑀓𑀸𑀦𑀁 𑀯𑀁𑀲𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑁂𑀢𑀓𑁂𑀢𑀼 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀘𑀡𑁆𑀟𑀸𑀮𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑁂𑀢𑀓𑁂𑀢𑀼𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁭𑁮] 𑁩. 𑀤𑀭𑀻𑀫𑀼𑀔𑀚𑀸𑀢𑀓𑀯𑀡𑁆𑀡𑀦𑀸

𑀧𑀗𑁆𑀓𑁄 ¶ 𑀘 𑀓𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀓𑀣𑀺𑀢𑀫𑁂𑀯.

𑀅𑀢𑀻𑀢𑁂 𑀭𑀸𑀚𑀕𑀳𑀦𑀕𑀭𑁂 𑀫𑀕𑀥𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂𑀬𑁂𑀯 𑀧𑀼𑀭𑁄𑀳𑀺𑀢𑀲𑁆𑀲𑀧𑀺 𑀧𑀼𑀢𑁆𑀢𑁄 𑀚𑀸𑀬𑀺, 𑀢𑀲𑁆𑀲 𑀫𑀼𑀔𑀁 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀢𑁂𑀦𑀲𑁆𑀲 𑀤𑀭𑀻𑀫𑀼𑀔𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂 𑀉𑀪𑁄𑀧𑀺 𑀭𑀸𑀚𑀓𑀼𑀮𑁂𑀬𑁂𑀯 𑀲𑀁𑀯𑀟𑁆𑀠𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀳𑀸𑀬𑀸 𑀳𑀼𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀲𑀩𑁆𑀩𑀲𑀫𑀬𑀲𑀺𑀧𑁆𑀧𑀜𑁆𑀘 𑀲𑀺𑀓𑁆𑀔𑀺𑀲𑁆𑀲𑀸𑀫, 𑀤𑁂𑀲𑀘𑀸𑀭𑀺𑀢𑁆𑀢𑀜𑁆𑀘 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀘𑀭𑀦𑁆𑀢𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀤𑁂𑀯𑀓𑀼𑀮𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀁 𑀪𑀺𑀓𑁆𑀔𑀸𑀬 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀓𑀼𑀮𑁂 ‘‘𑀩𑁆𑀭𑀸𑀳𑁆𑀫𑀡𑁂 𑀪𑁄𑀚𑁂𑀢𑁆𑀯𑀸 ¶ 𑀯𑀸𑀘𑀦𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀧𑀸𑀬𑀸𑀲𑀁 𑀧𑀘𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀢𑁂 𑀉𑀪𑁄𑀧𑀺 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀆𑀕𑀢𑀸’’𑀢𑀺 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀲𑀦𑁂 𑀲𑀼𑀤𑁆𑀥𑀯𑀢𑁆𑀣𑀁 𑀧𑀜𑁆𑀜𑀸𑀧𑁂𑀲𑀼𑀁, 𑀤𑀭𑀻𑀫𑀼𑀔𑀲𑁆𑀲 𑀆𑀲𑀦𑁂 𑀭𑀢𑁆𑀢𑀓𑀫𑁆𑀩𑀮𑀁. 𑀤𑀭𑀻𑀫𑀼𑀔𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀲𑀳𑀸𑀬𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀲𑁂𑀦𑀸𑀧𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀢𑁂 𑀢𑀢𑁆𑀣 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸𑀘𑀦𑀓𑀁 𑀕𑀳𑁂𑀢𑁆𑀯𑀸 ¶ 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀢𑀁 𑀭𑀸𑀚𑀼𑀬𑁆𑀬𑀸𑀦𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀫𑀳𑀸𑀲𑀢𑁆𑀢𑁄 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀧𑀚𑁆𑀚𑀺, 𑀤𑀭𑀻𑀫𑀼𑀔𑁄 𑀧𑀦𑀲𑁆𑀲 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺.

𑀢𑀤𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀫𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺. 𑀧𑀼𑀭𑁄𑀳𑀺𑀢𑁄 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀧𑀼𑀢𑁆𑀢𑀓𑁂 𑀭𑀚𑁆𑀚𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀨𑀼𑀲𑁆𑀲𑀭𑀣𑀯𑀺𑀲𑁆𑀲𑀚𑁆𑀚𑀦𑀓𑀺𑀘𑁆𑀘𑀁 𑀫𑀳𑀸𑀚𑀦𑀓𑀚𑀸𑀢𑀓𑁂 (𑀚𑀸. 𑁨.𑁨𑁨.𑁧𑁨𑁩 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀨𑀼𑀲𑁆𑀲𑀭𑀣𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 ¶ 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀅𑀦𑁂𑀓𑀲𑀢𑁂𑀳𑀺 𑀢𑀽𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺 𑀉𑀬𑁆𑀬𑀸𑀦𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀤𑀭𑀻𑀫𑀼𑀔𑁄 𑀢𑀽𑀭𑀺𑀬𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀲𑀳𑀸𑀬𑀲𑁆𑀲 𑀫𑁂 𑀨𑀼𑀲𑁆𑀲𑀭𑀣𑁄 𑀆𑀕𑀘𑁆𑀙𑀢𑀺, 𑀅𑀚𑁆𑀚𑁂𑀯𑁂𑀲 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀬𑁆𑀳𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑀢𑀺, 𑀓𑁄 𑀫𑁂 𑀖𑀭𑀸𑀯𑀸𑀲𑁂𑀦𑀢𑁆𑀣𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸𑀯 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀅𑀝𑁆𑀞𑀸𑀲𑀺. 𑀧𑀼𑀭𑁄𑀳𑀺𑀢𑁄 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀭𑀣𑀁 𑀞𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁄 𑀩𑁄𑀥𑀺𑀲𑀢𑁆𑀢𑀁 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀧𑀸𑀤𑁂𑀲𑀼 𑀮𑀓𑁆𑀔𑀡𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀫𑀳𑀸𑀤𑀻𑀧𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀲𑀫𑀢𑁆𑀣𑁄, 𑀥𑀺𑀢𑀺 𑀧𑀦𑀲𑁆𑀲 𑀓𑀻𑀤𑀺𑀲𑀸’’𑀢𑀺 𑀲𑀩𑁆𑀩𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀫𑀼𑀔𑀢𑁄 𑀲𑀸𑀝𑀓𑀁 𑀅𑀧𑀦𑁂𑀢𑁆𑀯𑀸 𑀫𑀳𑀸𑀚𑀦𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀲𑀸𑀝𑀓𑁂𑀦 𑀫𑀼𑀔𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀣𑁄𑀓𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀲𑁆𑀲𑀤𑁆𑀥𑀤𑀭𑀣𑁄 𑀉𑀝𑁆𑀞𑀸𑀬 𑀲𑀺𑀮𑀸𑀧𑀝𑁆𑀝𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀧𑀼𑀭𑁄𑀳𑀺𑀢𑁄 𑀚𑀸𑀡𑀼𑀓𑁂𑀦 𑀧𑀢𑀺𑀝𑁆𑀞𑀸𑀬 ‘‘𑀤𑁂𑀯, 𑀭𑀚𑁆𑀚𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀳. ‘‘𑀅𑀧𑀼𑀢𑁆𑀢𑀓𑀁 𑀪𑀡𑁂 𑀭𑀚𑁆𑀚’’𑀦𑁆𑀢𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂 𑀢𑀲𑁆𑀲 𑀉𑀬𑁆𑀬𑀸𑀦𑁂𑀬𑁂𑀯 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼. 𑀲𑁄 𑀬𑀲𑀫𑀳𑀦𑁆𑀢𑀢𑀸𑀬 𑀤𑀭𑀻𑀫𑀼𑀔𑀁 𑀅𑀲𑀭𑀺𑀢𑁆𑀯𑀸𑀯 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀺𑀢𑁄𑀯 𑀅𑀫𑀘𑁆𑀘𑀸𑀦𑀁 𑀞𑀸𑀦𑀦𑁆𑀢𑀭𑀸𑀦𑀺 𑀯𑀺𑀘𑀸𑀭𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀤𑀭𑀻𑀫𑀼𑀔𑁄 ‘‘𑀲𑀼𑀜𑁆𑀜𑀁 𑀤𑀸𑀦𑀺 𑀉𑀬𑁆𑀬𑀸𑀦’’𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀬 𑀦𑀺𑀲𑀻𑀤𑀺, 𑀅𑀣𑀲𑁆𑀲 𑀧𑀼𑀭𑀢𑁄 𑀧𑀡𑁆𑀟𑀼𑀧𑀮𑀸𑀲𑀁 𑀧𑀢𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀧𑀡𑁆𑀟𑀼𑀧𑀮𑀸𑀲𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀺𑀮𑀓𑁆𑀔𑀡𑀁 𑀲𑀫𑁆𑀫𑀲𑀺𑀢𑁆𑀯𑀸 𑀧𑀣𑀯𑀺𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑀲𑁆𑀲 𑀢𑀗𑁆𑀔𑀡𑀜𑁆𑀜𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀲𑀭𑀻𑀭𑁂 𑀧𑀝𑀺𑀫𑀼𑀜𑁆𑀘𑀺. 𑀢𑀸𑀯𑀤𑁂𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑁄 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑁄 𑀯𑀺𑀬 𑀳𑀼𑀢𑁆𑀯𑀸 ¶ 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀬𑀲𑀫𑀳𑀦𑁆𑀢𑀢𑀸𑀬 𑀧𑀦 𑀬𑀲𑁂𑀦 𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀤𑀭𑀻𑀫𑀼𑀔𑀁 𑀦 𑀲𑀭𑀺, 𑀘𑀢𑁆𑀢𑀸𑀮𑀻𑀲𑁂 𑀧𑀦 𑀲𑀁𑀯𑀘𑁆𑀙𑀭𑁂 𑀅𑀢𑀻𑀢𑁂 𑀢𑀁 𑀲𑀭𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑁄 𑀤𑀭𑀻𑀫𑀼𑀔𑁄 𑀦𑀸𑀫 𑀅𑀢𑁆𑀣𑀺, 𑀓𑀳𑀁 𑀦𑀼 𑀔𑁄 𑀲𑁄’’𑀢𑀺 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀅𑀳𑁄𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁂𑀧𑀼𑀭𑁂𑀧𑀺 𑀧𑀭𑀺𑀲𑀫𑀚𑁆𑀛𑁂𑀧𑀺 ‘‘𑀓𑀳𑀁 𑀦𑀼 𑀔𑁄 𑀫𑀬𑁆𑀳𑀁 𑀲𑀳𑀸𑀬𑁄 𑀤𑀭𑀻𑀫𑀼𑀔𑁄 ¶ , 𑀬𑁄 𑀫𑁂 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀓𑀣𑁂𑀢𑀺, 𑀫𑀳𑀦𑁆𑀢𑀫𑀲𑁆𑀲 𑀬𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀏𑀯𑀁 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀲𑀭𑀦𑁆𑀢𑀲𑁆𑀲𑁂𑀯 𑀅𑀜𑁆𑀜𑀸𑀦𑀺 𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺.

𑀤𑀭𑀻𑀫𑀼𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀧𑀜𑁆𑀜𑀸𑀲𑀯𑀲𑁆𑀲𑀘𑁆𑀘𑀬𑁂𑀦 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀁 𑀔𑁄 𑀲𑀳𑀸𑀬𑁄 𑀲𑀭𑀢𑀻’’𑀢𑀺 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀲𑁄 𑀫𑀳𑀮𑁆𑀮𑀓𑁄 𑀧𑀼𑀢𑁆𑀢𑀥𑀻𑀢𑀸𑀤𑀻𑀳𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄, 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀼𑀢𑁄 𑀢𑀼𑀫𑁆𑀳𑁂 𑀏𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀢𑁄’’𑀢𑀺. ‘‘𑀓𑁂 𑀦𑀸𑀫 𑀢𑀼𑀫𑁆𑀳𑁂’’𑀢𑀺? ‘‘𑀤𑀭𑀻𑀫𑀼𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫𑀸𑀳𑀁, 𑀆𑀯𑀼𑀲𑁄’’𑀢𑀺. ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀭𑀸𑀚𑀸𑀦𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫 𑀚𑀸𑀦𑀸𑀫𑀺, 𑀕𑀺𑀳𑀺𑀓𑀸𑀮𑁂 𑀦𑁄 𑀲𑀳𑀸𑀬𑁄’’𑀢𑀺. ‘‘𑀪𑀦𑁆𑀢𑁂, 𑀭𑀸𑀚𑀸 𑀢𑀼𑀫𑁆𑀳𑁂 𑀤𑀝𑁆𑀞𑀼𑀓𑀸𑀫𑁄, 𑀓𑀣𑁂𑀲𑁆𑀲𑀸𑀫𑀺 𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀆𑀕𑀢𑀪𑀸𑀯’’𑀦𑁆𑀢𑀺. ‘‘𑀕𑀘𑁆𑀙 𑀓𑀣𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀼𑀭𑀺𑀢𑀢𑀼𑀭𑀺𑀢𑁄𑀯 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀭𑀜𑁆𑀜𑁄 𑀓𑀣𑁂𑀲𑀺. 𑀭𑀸𑀚𑀸 ‘‘𑀆𑀕𑀢𑁄 𑀓𑀺𑀭 𑀫𑁂 𑀲𑀳𑀸𑀬𑁄, 𑀧𑀲𑁆𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀭𑀣𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀓𑀺𑀁, 𑀩𑁆𑀭𑀳𑁆𑀫𑀤𑀢𑁆𑀢, 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀅𑀕𑀢𑀺𑀕𑀫𑀦𑀁 𑀦 𑀕𑀘𑁆𑀙𑀲𑀺, 𑀥𑀦𑀢𑁆𑀣𑀸𑀬 ¶ 𑀮𑁄𑀓𑀁 𑀦 𑀧𑀻𑀴𑁂𑀲𑀺, 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀲𑀻’’𑀢𑀺𑀆𑀤𑀻𑀦𑀺 ¶ 𑀯𑀤𑀦𑁆𑀢𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀩𑁆𑀭𑀳𑁆𑀫𑀤𑀢𑁆𑀢, 𑀫𑀳𑀮𑁆𑀮𑀓𑁄𑀲𑀺, 𑀏𑀢𑀭𑀳𑀺 𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀢𑁂 𑀲𑀫𑀬𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪.

‘‘𑀧𑀗𑁆𑀓𑁄 𑀘 𑀓𑀸𑀫𑀸 𑀧𑀮𑀺𑀧𑁄 𑀘 𑀓𑀸𑀫𑀸, 𑀪𑀬𑀜𑁆𑀘 𑀫𑁂𑀢𑀁 𑀢𑀺𑀫𑀽𑀮𑀁 𑀧𑀯𑀼𑀢𑁆𑀢𑀁;

𑀭𑀚𑁄 𑀘 𑀥𑀽𑀫𑁄 𑀘 𑀫𑀬𑀸 𑀧𑀓𑀸𑀲𑀺𑀢𑀸, 𑀳𑀺𑀢𑁆𑀯𑀸 𑀢𑀼𑀯𑀁 𑀧𑀩𑁆𑀩𑀚 𑀩𑁆𑀭𑀳𑁆𑀫𑀤𑀢𑁆𑀢𑀸’’𑀢𑀺.

𑀢𑀢𑁆𑀣 𑀧𑀗𑁆𑀓𑁄𑀢𑀺 𑀉𑀤𑀓𑁂 𑀚𑀸𑀢𑀸𑀦𑀺 𑀢𑀺𑀡𑀲𑁂𑀯𑀸𑀮𑀓𑀼𑀫𑀼𑀤𑀕𑀘𑁆𑀙𑀸𑀤𑀻𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀬𑀣𑀸 𑀳𑀺 𑀉𑀤𑀓𑀁 𑀢𑀭𑀦𑁆𑀢𑀁 𑀢𑀸𑀦𑀺 𑀮𑀕𑁆𑀕𑀸𑀧𑁂𑀦𑁆𑀢𑀺 𑀲𑀚𑁆𑀚𑀸𑀧𑁂𑀦𑁆𑀢𑀺, 𑀢𑀣𑀸 𑀲𑀁𑀲𑀸𑀭𑀲𑀸𑀕𑀭𑀁 𑀢𑀭𑀦𑁆𑀢𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀩𑁆𑀩𑁂 𑀯𑀸 𑀧𑀦 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸 𑀮𑀕𑁆𑀕𑀸𑀧𑀦𑀯𑀲𑁂𑀦 𑀧𑀗𑁆𑀓𑁄 𑀦𑀸𑀫. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀗𑁆𑀓𑁂 𑀆𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀢𑀺𑀭𑀘𑁆𑀙𑀸𑀦𑀸𑀧𑀺 𑀓𑀺𑀮𑀫𑀦𑁆𑀢𑀺 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀧𑀮𑀺𑀧𑁄 𑀘 𑀓𑀸𑀫𑀸𑀢𑀺 𑀧𑀮𑀺𑀧𑁄 𑀯𑀼𑀘𑁆𑀘𑀢𑀺 𑀫𑀳𑀸𑀓𑀤𑁆𑀤𑀫𑁄, 𑀬𑀫𑁆𑀳𑀺 𑀮𑀕𑁆𑀕𑀸 𑀲𑀽𑀓𑀭𑀫𑀺𑀕𑀸𑀤𑀬𑁄𑀧𑀺 𑀲𑀻𑀳𑀸𑀧𑀺 𑀯𑀸𑀭𑀡𑀸𑀧𑀺 𑀅𑀢𑁆𑀢𑀸𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸𑀧𑀺 𑀢𑀁𑀲𑀭𑀺𑀓𑁆𑀔𑀢𑀸𑀬 ‘‘𑀧𑀮𑀺𑀧𑀸’’𑀢𑀺 𑀯𑀼𑀢𑁆𑀢𑀸. 𑀧𑀜𑁆𑀜𑀯𑀦𑁆𑀢𑁄𑀧𑀺 𑀳𑀺 𑀲𑀢𑁆𑀢𑀸 𑀢𑁂𑀲𑀼 𑀓𑀸𑀫𑁂𑀲𑀼 𑀲𑀓𑀺𑀁 𑀮𑀕𑁆𑀕𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂 𑀓𑀸𑀫𑁂 𑀧𑀤𑀸𑀮𑁂𑀢𑁆𑀯𑀸 𑀲𑀻𑀖𑀁 𑀉𑀝𑁆𑀞𑀸𑀬 𑀅𑀓𑀺𑀜𑁆𑀘𑀦𑀁 𑀅𑀧𑀮𑀺𑀩𑁄𑀥𑀁 𑀭𑀫𑀡𑀻𑀬𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀪𑀬𑀜𑁆𑀘 𑀫𑁂𑀢𑀦𑁆𑀢𑀺 𑀪𑀬𑀜𑁆𑀘 𑀏𑀢𑀁, 𑀫-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀺𑀫𑀽𑀮𑀦𑁆𑀢𑀺 𑀢𑀻𑀳𑀺 𑀫𑀽𑀮𑁂𑀳𑀺 𑀧𑀢𑀺𑀝𑁆𑀞𑀺𑀢𑀁 𑀯𑀺𑀬 ¶ 𑀅𑀘𑀮𑀁. 𑀩𑀮𑀯𑀪𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀭𑀸𑀚, 𑀏𑀢𑁂 𑀓𑀸𑀫𑀸 𑀦𑀸𑀫 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀸𑀤𑀺𑀓𑀲𑁆𑀲 𑀘𑁂𑀯 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀭𑀡𑀙𑀦𑀯𑀼𑀢𑀺𑀭𑁄𑀕𑀯𑀲𑀧𑁆𑀧𑀯𑀢𑁆𑀢𑀲𑁆𑀲 𑀘 𑀪𑀬𑀲𑁆𑀲 𑀧𑀘𑁆𑀘𑀬𑀝𑁆𑀞𑁂𑀦 𑀩𑀮𑀯𑀪𑀬𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀘𑁂𑀯 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀳𑀺 𑀘 𑀧𑀯𑀼𑀢𑁆𑀢𑀁 𑀓𑀣𑀺𑀢𑀁, 𑀤𑀻𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀬𑀜𑁆𑀘 𑀫𑁂𑀢𑀦𑁆𑀢𑀺 𑀪𑀬𑀜𑁆𑀘 𑀫𑀬𑀸 𑀏𑀢𑀁 𑀢𑀺𑀫𑀽𑀮𑀁 𑀧𑀯𑀼𑀢𑁆𑀢𑀦𑁆𑀢𑀺 𑀏𑀯𑀜𑁆𑀘𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀬𑁂𑀯.

𑀭𑀚𑁄 𑀘 𑀥𑀽𑀫𑁄 𑀘𑀸𑀢𑀺 𑀭𑀚𑀥𑀽𑀫𑀲𑀤𑀺𑀲𑀢𑁆𑀢𑀸 ‘‘𑀭𑀚𑁄’’𑀢𑀺 𑀘 ‘‘𑀥𑀽𑀫𑁄’’𑀢𑀺 𑀘 𑀫𑀬𑀸 𑀧𑀓𑀸𑀲𑀺𑀢𑀸. 𑀬𑀣𑀸 𑀳𑀺 𑀲𑀼𑀦𑁆𑀳𑀸𑀢𑀲𑁆𑀲 𑀲𑀼𑀯𑀺𑀮𑀺𑀢𑁆𑀢𑀸𑀮𑀗𑁆𑀓𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑁂 𑀲𑀼𑀔𑀼𑀫𑀭𑀚𑀁 𑀧𑀢𑀺𑀢𑀁, 𑀢𑀁 𑀲𑀭𑀻𑀭𑀁 𑀤𑀼𑀩𑁆𑀩𑀡𑁆𑀡𑀁 𑀲𑁄𑀪𑀸𑀭𑀳𑀺𑀢𑀁 𑀓𑀺𑀮𑀺𑀝𑁆𑀞𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀇𑀤𑁆𑀥𑀺𑀩𑀮𑁂𑀦 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀘𑀦𑁆𑀤𑁄 𑀯𑀺𑀬 𑀘 𑀲𑀽𑀭𑀺𑀬𑁄 𑀯𑀺𑀬 ¶ 𑀘 𑀮𑁄𑀓𑁂 𑀧𑀜𑁆𑀜𑀸𑀢𑀸𑀧𑀺 𑀲𑀓𑀺𑀁 𑀓𑀸𑀫𑀭𑀚𑀲𑁆𑀲 𑀅𑀦𑁆𑀢𑁄 𑀧𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀼𑀡𑀯𑀡𑁆𑀡𑀕𑀼𑀡𑀲𑁄𑀪𑀸𑀕𑀼𑀡𑀲𑀼𑀤𑁆𑀥𑀻𑀦𑀁 𑀉𑀧𑀳𑀢𑀢𑁆𑀢𑀸 𑀤𑀼𑀩𑁆𑀩𑀡𑁆𑀡𑀸 𑀲𑁄𑀪𑀸𑀭𑀳𑀺𑀢𑀸 𑀓𑀺𑀮𑀺𑀝𑁆𑀞𑀸𑀬𑁂𑀯 𑀳𑁄𑀦𑁆𑀢𑀺. 𑀬𑀣𑀸 𑀘 𑀥𑀽𑀫𑁂𑀦 𑀧𑀳𑀝𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀼𑀧𑀭𑀺𑀲𑀼𑀤𑁆𑀥𑀸𑀧𑀺 𑀪𑀺𑀢𑁆𑀢𑀺 𑀓𑀸𑀴𑀯𑀡𑁆𑀡𑀸 𑀳𑁄𑀢𑀺, 𑀏𑀯𑀁 𑀅𑀢𑀺𑀧𑀭𑀺𑀲𑀼𑀤𑁆𑀥𑀜𑁆𑀜𑀸𑀡𑀸𑀧𑀺 ¶ 𑀓𑀸𑀫𑀥𑀽𑀫𑁂𑀦 𑀧𑀳𑀝𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀼𑀡𑀯𑀺𑀦𑀸𑀲𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀚𑀦𑀫𑀚𑁆𑀛𑁂 𑀓𑀸𑀴𑀓𑀸𑀯 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀇𑀢𑀺 𑀭𑀚𑀥𑀽𑀫𑀲𑀭𑀺𑀓𑁆𑀔𑀢𑀸𑀬 𑀏𑀢𑁂 𑀓𑀸𑀫𑀸 ‘‘𑀭𑀚𑁄 𑀘 𑀥𑀽𑀫𑁄 𑀘𑀸’’𑀢𑀺 𑀫𑀬𑀸 𑀢𑀼𑀬𑁆𑀳𑀁 𑀧𑀓𑀸𑀲𑀺𑀢𑀸, 𑀢𑀲𑁆𑀫𑀸 𑀇𑀫𑁂 𑀓𑀸𑀫𑁂 𑀳𑀺𑀢𑁆𑀯𑀸 𑀢𑀼𑀯𑀁 𑀧𑀩𑁆𑀩𑀚 𑀩𑁆𑀭𑀳𑁆𑀫𑀤𑀢𑁆𑀢𑀸𑀢𑀺 𑀭𑀸𑀚𑀸𑀦𑀁 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀓𑀺𑀮𑁂𑀲𑁂𑀳𑀺 𑀅𑀢𑁆𑀢𑀦𑁄 𑀩𑀤𑁆𑀥𑀪𑀸𑀯𑀁 𑀓𑀣𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫.

‘‘𑀕𑀥𑀺𑀢𑁄 𑀘 𑀭𑀢𑁆𑀢𑁄 𑀘 𑀅𑀥𑀺𑀫𑀼𑀘𑁆𑀙𑀺𑀢𑁄 𑀘, 𑀓𑀸𑀫𑁂𑀲𑁆𑀯𑀳𑀁 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀁;

𑀢𑀁 𑀦𑀼𑀲𑁆𑀲𑀳𑁂 𑀚𑀻𑀯𑀺𑀓𑀢𑁆𑀣𑁄 𑀧𑀳𑀸𑀢𑀼𑀁, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.

𑀢𑀢𑁆𑀣 𑀕𑀥𑀺𑀢𑁄𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀩𑀤𑁆𑀥𑁄. 𑀭𑀢𑁆𑀢𑁄𑀢𑀺 𑀧𑀓𑀢𑀺𑀚𑀳𑀸𑀧𑀦𑁂𑀦 𑀭𑀸𑀕𑁂𑀦 𑀭𑀢𑁆𑀢𑁄. 𑀅𑀥𑀺𑀫𑀼𑀘𑁆𑀙𑀺𑀢𑁄𑀢𑀺 𑀅𑀢𑀺𑀯𑀺𑀬 𑀫𑀼𑀘𑁆𑀙𑀺𑀢𑁄. 𑀓𑀸𑀫𑁂𑀲𑁆𑀯𑀳𑀦𑁆𑀢𑀺 𑀤𑀼𑀯𑀺𑀥𑁂𑀲𑀼𑀧𑀺 𑀓𑀸𑀫𑁂𑀲𑀼 𑀅𑀳𑀁. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀤𑀭𑀻𑀫𑀼𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀆𑀮𑀧𑀢𑀺. 𑀪𑀺𑀁𑀲𑀭𑀽𑀧𑀦𑁆𑀢𑀺 𑀩𑀮𑀯𑀭𑀽𑀧𑀁. 𑀢𑀁 𑀦𑀼𑀲𑁆𑀲𑀳𑁂𑀢𑀺 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀓𑀸𑀫𑀁 𑀦 𑀉𑀲𑁆𑀲𑀳𑀸𑀫𑀺 𑀦 𑀲𑀓𑁆𑀓𑁄𑀫𑀺. 𑀚𑀻𑀯𑀺𑀓𑀢𑁆𑀣𑁄 𑀧𑀳𑀸𑀢𑀼𑀦𑁆𑀢𑀺 𑀇𑀫𑀸𑀬 𑀚𑀻𑀯𑀺𑀓𑀸𑀬 𑀅𑀢𑁆𑀣𑀺𑀓𑁄 𑀅𑀳𑀁 𑀢𑀁 𑀓𑀸𑀫𑀁 𑀧𑀳𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀯𑀤𑀢𑀺. 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀻𑀢𑀺 𑀇𑀤𑀸𑀦𑀺 𑀤𑀸𑀦𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑀲𑀗𑁆𑀔𑀸𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺 𑀩𑀳𑀽𑀦𑀺 𑀓𑀭𑀺𑀲𑁆𑀲𑀸𑀫𑀻𑀢𑀺.

𑀏𑀯𑀁 𑀓𑀺𑀮𑁂𑀲𑀓𑀸𑀫𑁄 𑀦𑀸𑀫𑁂𑀲 𑀲𑀓𑀺𑀁 𑀅𑀮𑁆𑀮𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀧𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑁂𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 ¶ 𑀫𑀳𑀸𑀧𑀼𑀭𑀺𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑁂 𑀓𑀣𑀺𑀢𑁂𑀧𑀺 ‘‘𑀧𑀩𑁆𑀩𑀚𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. 𑀬𑁄𑀬𑀁 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀅𑀢𑁆𑀢𑀦𑀺 𑀲𑀫𑁆𑀪𑀯𑁂𑀦 𑀜𑀸𑀡𑁂𑀦 𑀩𑀼𑀤𑁆𑀥𑀓𑀭𑀥𑀫𑁆𑀫𑁂 𑀯𑀺𑀘𑀺𑀦𑀦𑁆𑀢𑁄 𑀢𑀢𑀺𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀤𑀺𑀲𑁆𑀯𑀸 𑁋

‘‘𑀇𑀫𑀁 ¶ 𑀢𑁆𑀯𑀁 𑀢𑀢𑀺𑀬𑀁 𑀢𑀸𑀯, 𑀤𑀴𑁆𑀳𑀁 𑀓𑀢𑁆𑀯𑀸 𑀲𑀫𑀸𑀤𑀺𑀬;

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀁 𑀕𑀘𑁆𑀙, 𑀬𑀤𑀺 𑀩𑁄𑀥𑀺𑀁 𑀧𑀢𑁆𑀢𑀼𑀫𑀺𑀘𑁆𑀙𑀲𑀺.

‘‘𑀬𑀣𑀸 𑀅𑀦𑁆𑀤𑀼𑀖𑀭𑁂 𑀧𑀼𑀭𑀺𑀲𑁄, 𑀘𑀺𑀭𑀯𑀼𑀢𑁆𑀣𑁄 𑀤𑀼𑀔𑀝𑁆𑀝𑀺𑀢𑁄;

𑀦 𑀢𑀢𑁆𑀣 𑀭𑀸𑀕𑀁 𑀚𑀦𑁂𑀢𑀺, 𑀫𑀼𑀢𑁆𑀢𑀺𑀁𑀬𑁂𑀯 𑀕𑀯𑁂𑀲𑀢𑀺.

‘‘𑀢𑀣𑁂𑀯 𑀢𑁆𑀯𑀁 𑀲𑀩𑁆𑀩𑀪𑀯𑁂, 𑀧𑀲𑁆𑀲 𑀅𑀦𑁆𑀤𑀼𑀖𑀭𑁂 𑀯𑀺𑀬;

𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸, 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. 𑁋

𑀏𑀯𑀁 𑀦𑁂𑀓𑁆𑀔𑀫𑁆𑀫𑁂 𑀕𑀼𑀡𑀁 𑀧𑀭𑀺𑀓𑀺𑀢𑁆𑀢𑁂𑀲𑀺, 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀧𑀩𑁆𑀩𑀚𑁆𑀚𑀸𑀬 𑀯𑀡𑁆𑀡𑀁 𑀯𑀢𑁆𑀯𑀸 ‘‘𑀓𑀺𑀮𑁂𑀲𑁂 𑀙𑀟𑁆𑀟𑁂𑀢𑁆𑀯𑀸 𑀲𑀫𑀡𑁄 𑀳𑁄𑀳𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦𑀸𑀳𑀁 𑀓𑀺𑀮𑁂𑀲𑁂 𑀙𑀟𑁆𑀟𑁂𑀢𑁆𑀯𑀸 𑀲𑀫𑀡𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀢𑀺.

𑀇𑀫𑀲𑁆𑀫𑀺𑀁 𑀓𑀺𑀭 𑀮𑁄𑀓𑁂 𑀅𑀝𑁆𑀞 𑀉𑀫𑁆𑀫𑀢𑁆𑀢𑀓𑀸 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀅𑀝𑁆𑀞 𑀧𑀼𑀕𑁆𑀕𑀮𑀸 𑀉𑀫𑁆𑀫𑀢𑁆𑀢𑀓𑀲𑀜𑁆𑀜𑀁 𑀧𑀝𑀺𑀮𑀪𑀦𑁆𑀢𑀺, 𑀓𑀸𑀫𑀼𑀫𑁆𑀫𑀢𑁆𑀢𑀓𑁄 𑀮𑁄𑀪𑀯𑀲𑀁 𑀕𑀢𑁄 ¶ , 𑀓𑁄𑀥𑀼𑀫𑁆𑀫𑀢𑁆𑀢𑀓𑁄 𑀤𑁄𑀲𑀯𑀲𑀁 𑀕𑀢𑁄, 𑀤𑀺𑀝𑁆𑀞𑀼𑀫𑁆𑀫𑀢𑁆𑀢𑀓𑁄 𑀯𑀺𑀧𑀮𑁆𑀮𑀸𑀲𑀯𑀲𑀁 𑀕𑀢𑁄, 𑀫𑁄𑀳𑀼𑀫𑁆𑀫𑀢𑁆𑀢𑀓𑁄 𑀅𑀜𑁆𑀜𑀸𑀡𑀯𑀲𑀁 𑀕𑀢𑁄, 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀬𑀓𑁆𑀔𑀯𑀲𑀁 𑀕𑀢𑁄, 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀧𑀺𑀢𑁆𑀢𑀯𑀲𑀁 𑀕𑀢𑁄, 𑀲𑀼𑀭𑀼𑀫𑁆𑀫𑀢𑁆𑀢𑀓𑁄 𑀧𑀸𑀦𑀯𑀲𑀁 𑀕𑀢𑁄, 𑀩𑁆𑀬𑀲𑀦𑀼𑀫𑁆𑀫𑀢𑁆𑀢𑀓𑁄 𑀲𑁄𑀓𑀯𑀲𑀁 𑀕𑀢𑁄’’𑀢𑀺. 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀉𑀫𑁆𑀫𑀢𑁆𑀢𑀓𑁂𑀲𑀼 𑀫𑀳𑀸𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 𑀓𑀸𑀫𑀼𑀫𑁆𑀫𑀢𑁆𑀢𑀓𑁄 𑀳𑀼𑀢𑁆𑀯𑀸 𑀮𑁄𑀪𑀯𑀲𑀁 𑀕𑀢𑁄 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀦 𑀅𑀜𑁆𑀜𑀸𑀲𑀺.

𑀏𑀯𑀁 𑀅𑀦𑀢𑁆𑀣𑀓𑀸𑀭𑀓𑀁 𑀧𑀦 𑀇𑀫𑀁 𑀕𑀼𑀡𑀧𑀭𑀺𑀥𑀁𑀲𑀓𑀁 𑀮𑁄𑀪𑀚𑀸𑀢𑀁 𑀓𑀲𑁆𑀫𑀸 𑀲𑀢𑁆𑀢𑀸 𑀧𑀭𑀺𑀫𑀼𑀜𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺? 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑁂𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀏𑀓𑀢𑁄 𑀩𑀦𑁆𑀥𑀺𑀢𑀪𑀸𑀯𑁂𑀦. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀧𑀡𑁆𑀟𑀺𑀢𑀸 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸’’𑀢𑀺𑀆𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀁 𑀯𑀲𑁂𑀦 𑀧𑀚𑀳𑀦𑁆𑀢𑀺. 𑀢𑁂𑀦𑁂𑀯 𑀤𑀭𑀻𑀫𑀼𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀳𑀸𑀲𑀢𑁆𑀢𑁂𑀦 ‘‘𑀧𑀩𑁆𑀩𑀚𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀑𑀯𑀤𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀆𑀳.

𑁧𑁬.

‘‘𑀬𑁄 ¶ 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀇𑀤𑀫𑁂𑀯 𑀲𑁂𑀬𑁆𑀬𑁄 𑀇𑀢𑀺 𑀫𑀜𑁆𑀜𑀫𑀸𑀦𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄.

𑁧𑁭.

‘‘𑀲𑁄 ¶ 𑀖𑁄𑀭𑀭𑀽𑀧𑀁 𑀦𑀺𑀭𑀬𑀁 𑀉𑀧𑁂𑀢𑀺, 𑀲𑀼𑀪𑀸𑀲𑀼𑀪𑀁 𑀫𑀼𑀢𑁆𑀢𑀓𑀭𑀻𑀲𑀧𑀽𑀭𑀁;

𑀲𑀢𑁆𑀢𑀸 𑀲𑀓𑀸𑀬𑁂 𑀦 𑀚𑀳𑀦𑁆𑀢𑀺 𑀕𑀺𑀤𑁆𑀥𑀸, 𑀬𑁂 𑀳𑁄𑀦𑁆𑀢𑀺 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑀸’’𑀢𑀺.

𑀢𑀢𑁆𑀣 𑀅𑀢𑁆𑀣𑀓𑀸𑀫𑀲𑁆𑀲𑀸𑀢𑀺 𑀯𑀼𑀟𑁆𑀠𑀺𑀓𑀸𑀫𑀲𑁆𑀲. 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄𑀢𑀺 𑀳𑀺𑀢𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦 𑀅𑀦𑀼𑀓𑀫𑁆𑀧𑀦𑁆𑀢𑀲𑁆𑀲. 𑀑𑀯𑀚𑁆𑀚𑀫𑀸𑀦𑁄𑀢𑀺 𑀑𑀯𑀤𑀺𑀬𑀫𑀸𑀦𑁄. 𑀇𑀤𑀫𑁂𑀯 𑀲𑁂𑀬𑁆𑀬𑁄𑀢𑀺 𑀬𑀁 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀅𑀲𑁂𑀬𑁆𑀬𑀁 𑀅𑀦𑀼𑀢𑁆𑀢𑀫𑀫𑁆𑀧𑀺 𑀲𑀫𑀸𑀦𑀁, 𑀢𑀁 𑀇𑀤𑀫𑁂𑀯 𑀲𑁂𑀬𑁆𑀬𑁄 𑀇𑀢𑀺 𑀫𑀜𑁆𑀜𑀫𑀸𑀦𑁄. 𑀫𑀦𑁆𑀤𑁄𑀢𑀺 𑀲𑁄 𑀅𑀜𑁆𑀜𑀸𑀡𑀧𑀼𑀕𑁆𑀕𑀮𑁄 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀸𑀲𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀁 𑀉𑀧𑁂𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀲𑁄 𑀖𑁄𑀭𑀭𑀽𑀧𑀦𑁆𑀢𑀺 𑀫𑀳𑀸𑀭𑀸𑀚, 𑀲𑁄 𑀫𑀦𑁆𑀤𑁄 𑀢𑀁 𑀫𑀸𑀢𑀼𑀓𑀼𑀘𑁆𑀙𑀺𑀁 𑀉𑀧𑁂𑀦𑁆𑀢𑁄 𑀖𑁄𑀭𑀭𑀽𑀧𑀁 𑀤𑀸𑀭𑀼𑀡𑀚𑀸𑀢𑀺𑀓𑀁 𑀦𑀺𑀭𑀬𑀁 𑀉𑀧𑁂𑀢𑀺 𑀦𑀸𑀫. 𑀫𑀸𑀢𑀼𑀓𑀼𑀘𑁆𑀙𑀺 𑀳𑀺 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀇𑀥 ‘‘𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑁄, ‘‘𑀘𑀢𑀼𑀓𑀼𑀝𑁆𑀝𑀺𑀓𑀦𑀺𑀭𑀬𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀘𑀢𑀼𑀓𑀼𑀝𑁆𑀝𑀺𑀓𑀦𑀺𑀭𑀬𑁄 𑀦𑀸𑀫 𑀓𑀢𑀭𑁄’’𑀢𑀺 𑀯𑀼𑀢𑁆𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀫𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲 𑀳𑀺 𑀅𑀧𑀭𑀸𑀧𑀭𑀁 𑀆𑀥𑀸𑀯𑀦𑀧𑀭𑀺𑀥𑀸𑀯𑀦𑀁 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀢𑀁 ‘‘𑀘𑀢𑀼𑀓𑀼𑀝𑁆𑀝𑀺𑀓𑀦𑀺𑀭𑀬𑁄’’𑀢𑀺 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀦 𑀦𑀯 ¶ 𑀯𑀸 𑀤𑀲 𑀯𑀸 𑀫𑀸𑀲𑁂 𑀘𑀢𑀽𑀳𑀺𑀧𑀺 𑀧𑀲𑁆𑀲𑁂𑀳𑀺 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀺𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀅𑀢𑀺𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀘𑀢𑀼𑀓𑁄𑀝𑁂𑀦 𑀘𑀢𑀼𑀲𑀗𑁆𑀓𑀼𑀝𑀺𑀢𑁂𑀦𑁂𑀯 𑀳𑀼𑀢𑁆𑀯𑀸 𑀅𑀘𑁆𑀙𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀏𑀲 ‘‘𑀘𑀢𑀼𑀓𑀼𑀝𑁆𑀝𑀺𑀓𑀦𑀺𑀭𑀬𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀪𑀸𑀲𑀼𑀪𑀦𑁆𑀢𑀺 𑀲𑀼𑀪𑀸𑀦𑀁 𑀅𑀲𑀼𑀪𑀁. 𑀲𑀼𑀪𑀸𑀦𑀜𑁆𑀳𑀺 𑀲𑀁𑀲𑀸𑀭𑀪𑀻𑀭𑀼𑀓𑀸𑀦𑀁 𑀬𑁄𑀕𑀸𑀯𑀘𑀭𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺 𑀏𑀓𑀦𑁆𑀢𑀁 𑀅𑀲𑀼𑀪𑀲𑀫𑁆𑀫𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀚𑀜𑁆𑀜𑀁 𑀚𑀜𑁆𑀜𑀲𑀗𑁆𑀔𑀸𑀢𑀁, 𑀅𑀲𑀼𑀘𑀺𑀁 𑀲𑀼𑀘𑀺𑀲𑀫𑁆𑀫𑀢𑀁;

𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑀁, 𑀚𑀜𑁆𑀜𑀭𑀽𑀧𑀁 𑀅𑀧𑀲𑁆𑀲𑀢𑁄.

‘‘𑀥𑀺𑀭𑀢𑁆𑀣𑀼𑀫𑀁 𑀆𑀢𑀼𑀭𑀁 𑀧𑀽𑀢𑀺𑀓𑀸𑀬𑀁, 𑀚𑁂𑀕𑀼𑀘𑁆𑀙𑀺𑀬𑀁 𑀅𑀲𑁆𑀲𑀼𑀘𑀺𑀁 𑀩𑁆𑀬𑀸𑀥𑀺𑀥𑀫𑁆𑀫𑀁;

𑀬𑀢𑁆𑀣𑀧𑁆𑀧𑀫𑀢𑁆𑀢𑀸 𑀅𑀥𑀺𑀫𑀼𑀘𑁆𑀙𑀺𑀢𑀸 𑀧𑀚𑀸, 𑀳𑀸𑀧𑁂𑀦𑁆𑀢𑀺 𑀫𑀕𑁆𑀕𑀁 𑀲𑀼𑀕𑀢𑀽𑀧𑀧𑀢𑁆𑀢𑀺𑀬𑀸’’𑀢𑀺. (𑀚𑀸. 𑁧.𑁩.𑁧𑁨𑁮-𑁧𑁨𑁯);

𑀲𑀢𑁆𑀢𑀸𑀢𑀺 𑀆𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀲𑀓𑀸𑀬𑁂 𑀦 𑀚𑀳𑀦𑁆𑀢𑀻𑀢𑀺 𑀢𑀁 𑀫𑀸𑀢𑀼𑀓𑀼𑀘𑁆𑀙𑀺𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺 ¶ . 𑀕𑀺𑀤𑁆𑀥𑀸𑀢𑀺 𑀕𑀥𑀺𑀢𑀸. 𑀬𑁂 𑀳𑁄𑀦𑁆𑀢𑀻𑀢𑀺 𑀬𑁂 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑀸 𑀳𑁄𑀦𑁆𑀢𑀺, 𑀢𑁂 𑀏𑀢𑀁 𑀕𑀩𑁆𑀪𑀯𑀸𑀲𑀁 𑀦 𑀚𑀳𑀦𑁆𑀢𑀻𑀢𑀺.

𑀏𑀯𑀁 ¶ 𑀤𑀭𑀻𑀫𑀼𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀩𑁆𑀪𑀑𑀓𑁆𑀓𑀦𑁆𑀢𑀺𑀫𑀽𑀮𑀓𑀜𑁆𑀘, 𑀧𑀭𑀺𑀳𑀸𑀭𑀫𑀽𑀮𑀓𑀜𑁆𑀘 𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑀁 𑀤𑀲𑁆𑀲𑁂𑀢𑀼𑀁 𑀤𑀺𑀬𑀟𑁆𑀠𑀕𑀸𑀣𑀫𑀸𑀳.

𑁧𑁮.

‘‘𑀫𑀻𑀴𑁆𑀳𑁂𑀦 𑀮𑀺𑀢𑁆𑀢𑀸 𑀭𑀼𑀳𑀺𑀭𑁂𑀦 𑀫𑀓𑁆𑀔𑀺𑀢𑀸, 𑀲𑁂𑀫𑁆𑀳𑁂𑀦 𑀮𑀺𑀢𑁆𑀢𑀸 𑀉𑀧𑀦𑀺𑀓𑁆𑀔𑀫𑀦𑁆𑀢𑀺;

𑀬𑀁 𑀬𑀜𑁆𑀳𑀺 𑀓𑀸𑀬𑁂𑀦 𑀨𑀼𑀲𑀦𑁆𑀢𑀺 𑀢𑀸𑀯𑀤𑁂, 𑀲𑀩𑁆𑀩𑀁 𑀅𑀲𑀸𑀢𑀁 𑀤𑀼𑀔𑀫𑁂𑀯 𑀓𑁂𑀯𑀮𑀁.

𑁧𑁯.

‘‘𑀤𑀺𑀲𑁆𑀯𑀸 𑀯𑀤𑀸𑀫𑀺 𑀦 𑀳𑀺 𑀅𑀜𑁆𑀜𑀢𑁄 𑀲𑀯𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀩𑀳𑀼𑀓𑀁 𑀲𑀭𑀸𑀫𑀻’’𑀢𑀺.

𑀢𑀢𑁆𑀣 𑀫𑀻𑀴𑁆𑀳𑁂𑀦 𑀮𑀺𑀢𑁆𑀢𑀸𑀢𑀺 𑀫𑀳𑀸𑀭𑀸𑀚, 𑀇𑀫𑁂 𑀲𑀢𑁆𑀢𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀦 𑀘𑀢𑀼𑀚𑁆𑀚𑀸𑀢𑀺𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀲𑀼𑀭𑀪𑀺𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀧𑀼𑀭𑀸𑀡𑀕𑀽𑀣𑁂𑀦 𑀧𑀦 𑀫𑀓𑁆𑀔𑀺𑀢𑀸 𑀧𑀮𑀺𑀩𑀼𑀤𑁆𑀥𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀭𑀼𑀳𑀺𑀭𑁂𑀦 𑀫𑀓𑁆𑀔𑀺𑀢𑀸𑀢𑀺 𑀭𑀢𑁆𑀢𑀮𑁄𑀳𑀺𑀢𑀘𑀦𑁆𑀤𑀦𑀸𑀦𑀼𑀮𑀺𑀢𑁆𑀢𑀸𑀧𑀺 𑀘 𑀳𑀼𑀢𑁆𑀯𑀸 𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀭𑀢𑁆𑀢𑀮𑁄𑀳𑀺𑀢𑀫𑀓𑁆𑀔𑀺𑀢𑀸 𑀧𑀦 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀲𑁂𑀫𑁆𑀳𑁂𑀦 𑀮𑀺𑀢𑁆𑀢𑀸𑀢𑀺 𑀦 𑀘𑀸𑀧𑀺 𑀲𑁂𑀢𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀩𑀳𑀮𑀧𑀺𑀘𑁆𑀙𑀺𑀮𑀲𑁂𑀫𑁆𑀳𑀮𑀺𑀢𑁆𑀢𑀸 𑀧𑀦 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀇𑀢𑁆𑀣𑀻𑀦𑀜𑁆𑀳𑀺 ¶ 𑀕𑀩𑁆𑀪𑀯𑀼𑀝𑁆𑀞𑀸𑀦𑀓𑀸𑀮𑁂 𑀏𑀢𑀸 𑀅𑀲𑀼𑀘𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀺. 𑀢𑀸𑀯𑀤𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀇𑀫𑁂 𑀲𑀢𑁆𑀢𑀸 𑀢𑀲𑁆𑀫𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀲𑀫𑀬𑁂 𑀏𑀯𑀁 𑀫𑀻𑀴𑁆𑀳𑀸𑀤𑀺𑀮𑀺𑀢𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀸 𑀬𑀁 𑀬𑀁 𑀦𑀺𑀓𑁆𑀔𑀫𑀦𑀫𑀕𑁆𑀕𑀧𑀤𑁂𑀲𑀁 𑀯𑀸 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀨𑀼𑀲𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀅𑀲𑀸𑀢𑀁 𑀅𑀫𑀥𑀼𑀭𑀁 𑀓𑁂𑀯𑀮𑀁 𑀅𑀲𑀫𑁆𑀫𑀺𑀲𑁆𑀲𑀁 𑀤𑀼𑀓𑁆𑀔𑀫𑁂𑀯 𑀨𑀼𑀲𑀦𑁆𑀢𑀺, 𑀲𑀼𑀔𑀁 𑀦𑀸𑀫 𑀢𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦𑀢𑁆𑀣𑀻𑀢𑀺.

𑀤𑀺𑀲𑁆𑀯𑀸 𑀯𑀤𑀸𑀫𑀺 𑀦 𑀳𑀺 𑀅𑀜𑁆𑀜𑀢𑁄 𑀲𑀯𑀦𑁆𑀢𑀺 𑀫𑀳𑀸𑀭𑀸𑀚, 𑀅𑀳𑀁 𑀇𑀫𑀁 𑀏𑀢𑁆𑀢𑀓𑀁 𑀯𑀤𑀦𑁆𑀢𑁄 𑀦 𑀅𑀜𑁆𑀜𑀢𑁄 𑀲𑀯𑀁, 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀢𑀁 𑀲𑀼𑀢𑁆𑀯𑀸 𑀦 𑀯𑀤𑀸𑀫𑀺, 𑀅𑀢𑁆𑀢𑀦𑁄 𑀧𑀦 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀤𑀺𑀲𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀩𑀳𑀼𑀓𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀝𑀺𑀧𑀸𑀝𑀺𑀲𑀗𑁆𑀔𑀸𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀩𑀳𑀼𑀓𑀁 𑀲𑀭𑀸𑀫𑀺, 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀭𑀸𑀫𑀻𑀢𑀺.

𑀇𑀤𑀸𑀦𑀺 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 ‘‘𑀏𑀯𑀁 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀭𑀸𑀚𑀸𑀦𑀁 𑀲𑀼𑀪𑀸𑀲𑀺𑀢𑀓𑀣𑀸𑀬 𑀲𑀗𑁆𑀕𑀡𑁆𑀳𑀻’’𑀢𑀺 𑀯𑀢𑁆𑀯𑀸 𑀑𑀲𑀸𑀦𑁂 𑀉𑀧𑀟𑁆𑀠𑀕𑀸𑀣𑀫𑀸𑀳 𑁋

‘‘𑀘𑀺𑀢𑁆𑀭𑀸𑀳𑀺 ¶ ¶ 𑀕𑀸𑀣𑀸𑀳𑀺 𑀲𑀼𑀪𑀸𑀲𑀺𑀢𑀸𑀳𑀺, 𑀤𑀭𑀻𑀫𑀼𑀔𑁄 𑀦𑀺𑀚𑁆𑀛𑀸𑀧𑀬𑀺 𑀲𑀼𑀫𑁂𑀥’’𑀦𑁆𑀢𑀺.

𑀢𑀢𑁆𑀣 𑀘𑀺𑀢𑁆𑀭𑀸𑀳𑀻𑀢𑀺 𑀅𑀦𑁂𑀓𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀸𑀳𑀺. 𑀲𑀼𑀪𑀸𑀲𑀺𑀢𑀸𑀳𑀻𑀢𑀺 𑀲𑀼𑀓𑀣𑀺𑀢𑀸𑀳𑀺. 𑀤𑀭𑀻𑀫𑀼𑀔𑁄 𑀦𑀺𑀚𑁆𑀛𑀸𑀧𑀬𑀺 𑀲𑀼𑀫𑁂𑀥𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀤𑀭𑀻𑀫𑀼𑀔𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀲𑀼𑀫𑁂𑀥𑀁 𑀲𑀼𑀦𑁆𑀤𑀭𑀧𑀜𑁆𑀜𑀁 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑀲𑀫𑀢𑁆𑀣𑀁 𑀭𑀸𑀚𑀸𑀦𑀁 𑀦𑀺𑀚𑁆𑀛𑀸𑀧𑁂𑀲𑀺 𑀲𑀜𑁆𑀜𑀸𑀧𑁂𑀲𑀺, 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀡𑁆𑀳𑀸𑀧𑁂𑀲𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀤𑀸𑀦𑀺 𑀧𑀩𑁆𑀩𑀚 𑀯𑀸 𑀫𑀸 𑀯𑀸, 𑀫𑀬𑀸 𑀧𑀦 𑀢𑀼𑀬𑁆𑀳𑀁 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄 𑀧𑀩𑁆𑀩𑀚𑁆𑀚𑀸𑀬 𑀘 𑀆𑀦𑀺𑀲𑀁𑀲𑁄 𑀓𑀣𑀺𑀢𑁄, 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁄 𑀯𑀺𑀬 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀯𑀮𑀸𑀳𑀓𑀕𑀩𑁆𑀪𑀁 𑀫𑀤𑁆𑀤𑀦𑁆𑀢𑁄 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 𑀕𑀢𑁄. 𑀫𑀳𑀸𑀲𑀢𑁆𑀢𑁄 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀢𑀲𑁆𑀫𑀺𑀁 𑀤𑀲𑁆𑀲𑀦𑀯𑀺𑀲𑀬𑁂 ¶ 𑀅𑀢𑀻𑀢𑁂 𑀚𑁂𑀝𑁆𑀞𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀭𑁄𑀤𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀢𑀤𑀸 𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀤𑀭𑀻𑀫𑀼𑀔𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁭𑁯] 𑁪. 𑀦𑁂𑀭𑀼𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀓𑁄𑀮𑀸 𑀓𑀸𑀓𑀲𑀗𑁆𑀖𑀸 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀢𑀁 𑀪𑁄𑀚𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁, 𑀅𑀢𑀺𑀯𑀺𑀬 𑀘𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀅𑀣𑁂𑀓𑁂 𑀲𑀲𑁆𑀲𑀢𑀯𑀸𑀤𑀸 𑀆𑀕𑀫𑀁𑀲𑀼. 𑀢𑁂 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀯𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀲𑁆𑀲𑀢𑀯𑀸𑀤𑀁 𑀕𑀳𑁂𑀢𑁆𑀯𑀸 𑀢𑁂𑀲𑀜𑁆𑀜𑁂𑀯 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀢𑀢𑁄 𑀉𑀘𑁆𑀙𑁂𑀤𑀯𑀸𑀤𑀸 𑀆𑀕𑀫𑀁𑀲𑀼 ¶ 𑀢𑁂 𑀲𑀲𑁆𑀲𑀢𑀯𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀘𑁆𑀙𑁂𑀤𑀯𑀸𑀤𑀫𑁂𑀯 𑀕𑀡𑁆𑀳𑀺𑀁𑀲𑀼. 𑀅𑀣𑀜𑁆𑀜𑁂 𑀅𑀘𑁂𑀮𑀓𑀸 𑀆𑀕𑀫𑀺𑀁𑀲𑀼. 𑀢𑁂 𑀉𑀘𑁆𑀙𑁂𑀤𑀯𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀘𑁂𑀮𑀓𑀯𑀸𑀤𑀁 𑀕𑀡𑁆𑀳𑀺𑀁𑀲𑀼. 𑀲𑁄 𑀢𑁂𑀲𑀁 𑀕𑀼𑀡𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑀸𑀦𑀁 ¶ 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑁂 𑀤𑀼𑀓𑁆𑀔𑁂𑀦 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀓𑀳𑀁 𑀯𑀲𑁆𑀲𑀁𑀯𑀼𑀢𑁆𑀣𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀘𑁆𑀘𑀦𑁆𑀢𑀁 𑀦𑀺𑀲𑁆𑀲𑀸𑀬, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀲𑀼𑀔𑀁 𑀯𑀼𑀢𑁆𑀣𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀪𑀦𑁆𑀢𑁂, 𑀕𑀼𑀡𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀤𑀼𑀓𑁆𑀔𑀁 𑀯𑀼𑀢𑁆𑀣𑁄𑀲𑁆𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑀺 𑀕𑀼𑀡𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀯𑀲𑀺𑀁𑀲𑀼, 𑀢𑁆𑀯𑀁 𑀅𑀢𑁆𑀢𑀦𑁄 𑀕𑀼𑀡𑀸𑀕𑀼𑀡𑀁 𑀅𑀚𑀸𑀦𑀦𑀝𑁆𑀞𑀸𑀦𑁂 𑀓𑀲𑁆𑀫𑀸 𑀯𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀼𑀯𑀡𑁆𑀡𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀓𑀦𑀺𑀝𑁆𑀞𑀪𑀸𑀢𑀸𑀧𑀺𑀲𑁆𑀲 ¶ 𑀅𑀢𑁆𑀣𑀺. 𑀢𑁂 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀯𑀲𑀦𑁆𑀢𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀲𑀬𑀁𑀚𑀸𑀢𑀲𑀸𑀮𑀺𑀁 𑀔𑀸𑀤𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀢𑀢𑁆𑀣 𑀘𑀭𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀁 𑀆𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀦𑁂𑀭𑀼𑀁 𑀦𑀸𑀫 𑀓𑀜𑁆𑀘𑀦𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀁𑀲𑀼. 𑀢𑀁 𑀧𑀦 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀸 𑀲𑀓𑀼𑀡𑀲𑀗𑁆𑀖𑀸 𑀘𑀢𑀼𑀧𑁆𑀧𑀤𑀸 𑀘 𑀕𑁄𑀘𑀭𑀪𑀽𑀫𑀺𑀬𑀁 𑀦𑀸𑀦𑀸𑀯𑀡𑁆𑀡𑀸 𑀳𑁄𑀦𑁆𑀢𑀺, 𑀧𑀩𑁆𑀩𑀢𑀁 𑀧𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂 𑀲𑀩𑁆𑀩𑁂 𑀢𑀲𑁆𑀲𑁄𑀪𑀸𑀲𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁄𑀦𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑁄 𑀢𑀁 𑀓𑀸𑀭𑀡𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀪𑀸𑀢𑀭𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁦.

‘‘𑀓𑀸𑀓𑁄𑀮𑀸 𑀓𑀸𑀓𑀲𑀗𑁆𑀖𑀸 𑀘, 𑀫𑀬𑀜𑁆𑀘 𑀧𑀢𑀢𑀁 𑀯𑀭𑀸;

𑀲𑀩𑁆𑀩𑁂𑀯 𑀲𑀤𑀺𑀲𑀸 𑀳𑁄𑀫, 𑀇𑀫𑀁 𑀆𑀕𑀫𑁆𑀫 𑀧𑀩𑁆𑀩𑀢𑀁.

𑁨𑁧.

‘‘𑀇𑀥 𑀲𑀻𑀳𑀸 𑀘 𑀩𑁆𑀬𑀕𑁆𑀖𑀸 𑀘, 𑀲𑀺𑀗𑁆𑀕𑀸𑀮𑀸 𑀘 𑀫𑀺𑀕𑀸𑀥𑀫𑀸;

𑀲𑀩𑁆𑀩𑁂𑀯 𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀅𑀬𑀁 𑀓𑁄 𑀦𑀸𑀫 𑀧𑀩𑁆𑀩𑀢𑁄’’𑀢𑀺.

𑀢𑀢𑁆𑀣 𑀓𑀸𑀓𑁄𑀮𑀸𑀢𑀺 𑀯𑀦𑀓𑀸𑀓𑀸. 𑀓𑀸𑀓𑀲𑀗𑁆𑀖𑀸𑀢𑀺 𑀧𑀓𑀢𑀺𑀓𑀸𑀓𑀲𑀗𑁆𑀖𑀸 𑀘. 𑀧𑀢𑀢𑀁 𑀯𑀭𑀸𑀢𑀺 𑀧𑀓𑁆𑀔𑀻𑀦𑀁 𑀲𑁂𑀝𑁆𑀞𑀸. 𑀲𑀤𑀺𑀲𑀸 𑀳𑁄𑀫𑀸𑀢𑀺 𑀲𑀤𑀺𑀲𑀯𑀡𑁆𑀡𑀸 𑀳𑁄𑀫.

𑀢𑀲𑁆𑀲 ¶ 𑀯𑀘𑀦𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁨.

‘‘𑀇𑀫𑀁 𑀦𑁂𑀭𑀽𑀢𑀺 𑀚𑀸𑀦𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀩𑁆𑀩𑀢𑀼𑀢𑁆𑀢𑀫𑀁;

𑀇𑀥 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸, 𑀯𑀲𑀦𑁆𑀢𑀺 𑀲𑀩𑁆𑀩𑀧𑀸𑀡𑀺𑀦𑁄’’𑀢𑀺.

𑀢𑀢𑁆𑀣 𑀇𑀥 𑀯𑀡𑁆𑀡𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀦𑁂𑀭𑀼𑀧𑀩𑁆𑀩𑀢𑁂 𑀑𑀪𑀸𑀲𑁂𑀦 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸.

𑀢𑀁 ¶ 𑀲𑀼𑀢𑁆𑀯𑀸 𑀓𑀦𑀺𑀝𑁆𑀞𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩.

‘‘𑀅𑀫𑀸𑀦𑀦𑀸 𑀬𑀢𑁆𑀣 𑀲𑀺𑀬𑀸, 𑀅𑀦𑁆𑀢𑀸𑀦𑀁 𑀯𑀸 𑀯𑀺𑀫𑀸𑀦𑀦𑀸;

𑀳𑀻𑀦𑀲𑀫𑁆𑀫𑀸𑀦𑀦𑀸 𑀯𑀸𑀧𑀺, 𑀦 𑀢𑀢𑁆𑀣 𑀯𑀺𑀲𑀢𑀺𑀁𑀯𑀲𑁂.

𑁨𑁪.

‘‘𑀬𑀢𑁆𑀣𑀸𑀮𑀲𑁄 𑀘 𑀤𑀓𑁆𑀔𑁄 𑀘, 𑀲𑀽𑀭𑁄 𑀪𑀻𑀭𑀼 𑀘 𑀧𑀽𑀚𑀺𑀬𑀸;

𑀦 𑀢𑀢𑁆𑀣 𑀲𑀦𑁆𑀢𑁄 𑀯𑀲𑀦𑁆𑀢𑀺, 𑀅𑀯𑀺𑀲𑁂𑀲𑀓𑀭𑁂 𑀦𑀭𑁂.

𑁨𑁫.

‘‘𑀦𑀸𑀬𑀁 ¶ 𑀦𑁂𑀭𑀼 𑀯𑀺𑀪𑀚𑀢𑀺, 𑀳𑀻𑀦𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀅𑀯𑀺𑀲𑁂𑀲𑀓𑀭𑁄 𑀦𑁂𑀭𑀼, 𑀳𑀦𑁆𑀤 𑀦𑁂𑀭𑀼𑀁 𑀚𑀳𑀸𑀫𑀲𑁂’’𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀬𑀢𑁆𑀣 𑀲𑀦𑁆𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀫𑀸𑀦𑀦𑀲𑁆𑀲 𑀅𑀪𑀸𑀯𑁂𑀦 𑀅𑀫𑀸𑀦𑀦𑀸 𑀅𑀯𑀫𑀜𑁆𑀜𑀦𑀸 𑀘 𑀅𑀯𑀫𑀸𑀦𑀯𑀲𑁂𑀦 𑀯𑀺𑀫𑀸𑀦𑀦𑀸 𑀯𑀸 𑀳𑀻𑀦𑀸𑀦𑀁 𑀯𑀸 𑀤𑀼𑀲𑁆𑀲𑀻𑀮𑀸𑀦𑀁 𑀲𑀫𑁆𑀫𑀸𑀦𑀦𑀸 𑀲𑀺𑀬𑀸, 𑀢𑀢𑁆𑀣 𑀦𑀺𑀯𑀸𑀲𑁂 𑀦 𑀯𑀲𑁂𑀬𑁆𑀬. 𑀧𑀽𑀚𑀺𑀬𑀸𑀢𑀺 𑀏𑀢𑁂 𑀏𑀢𑁆𑀣 𑀏𑀓𑀲𑀤𑀺𑀲𑀸𑀬 𑀧𑀽𑀚𑀸𑀬 𑀧𑀽𑀚𑀦𑀻𑀬𑀸 𑀳𑁄𑀦𑁆𑀢𑀺, 𑀲𑀫𑀓𑀁 𑀲𑀓𑁆𑀓𑀸𑀭𑀁 𑀮𑀪𑀦𑁆𑀢𑀺. 𑀳𑀻𑀦𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂𑀢𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑁆𑀧𑀤𑁂𑀲𑀲𑀻𑀮𑀸𑀘𑀸𑀭𑀜𑀸𑀡𑀸𑀤𑀻𑀳𑀺 𑀳𑀻𑀦𑁂 𑀘 𑀫𑀚𑁆𑀛𑀺𑀫𑁂 𑀘 𑀉𑀓𑁆𑀓𑀝𑁆𑀞𑁂 𑀘 𑀅𑀬𑀁 𑀦 𑀯𑀺𑀪𑀚𑀢𑀺. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀚𑀳𑀸𑀫𑀲𑁂𑀢𑀺 𑀧𑀭𑀺𑀘𑁆𑀘𑀚𑀸𑀫. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀳𑀁𑀲𑀸 𑀉𑀧𑁆𑀧𑀢𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀫𑁂𑀯 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀓𑀦𑀺𑀝𑁆𑀞𑀳𑀁𑀲𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀚𑁂𑀝𑁆𑀞𑀓𑀳𑀁𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀦𑁂𑀭𑀼𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁮𑁦] 𑁫. 𑀆𑀲𑀗𑁆𑀓𑀚𑀸𑀢𑀓𑀯𑀡𑁆𑀡𑀦𑀸

𑀆𑀲𑀸𑀯𑀢𑀻 ¶ 𑀦𑀸𑀫 𑀮𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁮.𑁬𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀥 𑀧𑀦 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 ¶ 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀏𑀲𑀸 𑀇𑀢𑁆𑀣𑀻 𑀢𑀼𑀬𑁆𑀳𑀁 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀲𑁂𑀦𑀁 𑀚𑀳𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 ¶ 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑁄 𑀲𑀢𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀢𑁄 𑀘𑀯𑀺𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀤𑀼𑀫𑀲𑀭𑁂 𑀏𑀓𑀲𑁆𑀫𑀺𑀁 𑀧𑀤𑀼𑀫𑀕𑀩𑁆𑀪𑁂 𑀤𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑁂𑀲𑀧𑀤𑀼𑀫𑁂𑀲𑀼 𑀧𑀼𑀭𑀸𑀡𑀪𑀸𑀯𑀁 𑀧𑀢𑁆𑀯𑀸 𑀧𑀢𑀦𑁆𑀢𑁂𑀲𑀼𑀧𑀺 𑀢𑀁 𑀫𑀳𑀸𑀓𑀼𑀘𑁆𑀙𑀺𑀓𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑁂𑀯. 𑀢𑀸𑀧𑀲𑁄 𑀦𑀳𑀸𑀬𑀺𑀢𑀼𑀁 𑀧𑀤𑀼𑀫𑀲𑀭𑀁 𑀕𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀜𑁆𑀜𑁂𑀲𑀼 𑀧𑀤𑀼𑀫𑁂𑀲𑀼 𑀧𑀢𑀦𑁆𑀢𑁂𑀲𑀼𑀧𑀺 𑀇𑀤𑀁 𑀫𑀳𑀸𑀓𑀼𑀘𑁆𑀙𑀺𑀓𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀤𑀓𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀑𑀢𑀭𑀦𑁆𑀢𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀤𑀼𑀫𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀤𑀸𑀭𑀺𑀓𑀁 𑀤𑀺𑀲𑁆𑀯𑀸 𑀥𑀻𑀢𑀼𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀆𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀲𑀸 𑀅𑀧𑀭𑀪𑀸𑀕𑁂 𑀲𑁄𑀴𑀲𑀯𑀲𑁆𑀲𑀺𑀓𑀸 𑀳𑀼𑀢𑁆𑀯𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀉𑀢𑁆𑀢𑀫𑀭𑀽𑀧𑀥𑀭𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀓𑀯𑀡𑁆𑀡𑀁, 𑀅𑀧𑀢𑁆𑀢𑀸 𑀤𑁂𑀯𑀯𑀡𑁆𑀡𑀁. 𑀢𑀤𑀸 𑀲𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀢𑀺, 𑀲𑁄 𑀢𑀁 𑀤𑀸𑀭𑀺𑀓𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀏𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀮𑀤𑁆𑀥𑀦𑀺𑀬𑀸𑀫𑀁 𑀲𑀼𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀪𑁄𑀚𑀦𑀯𑀺𑀥𑀸𑀦𑀁, 𑀫𑀸𑀭𑀺𑀲𑀸’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀲𑁆𑀲 𑀆𑀲𑀦𑁆𑀦𑁂 𑀨𑀮𑀺𑀓𑀧𑀸𑀲𑀸𑀤𑀁 𑀫𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀲𑀬𑀦𑀤𑀺𑀩𑁆𑀩𑀯𑀢𑁆𑀣𑀸𑀮𑀗𑁆𑀓𑀸𑀭𑀤𑀺𑀩𑁆𑀩𑀦𑁆𑀦𑀧𑀸𑀦𑀸𑀦𑀺 𑀫𑀸𑀧𑁂𑀲𑀺.

𑀲𑁄 𑀧𑀸𑀲𑀸𑀤𑁄 𑀢𑀲𑁆𑀲𑀸 𑀅𑀪𑀺𑀭𑀼𑀳𑀦𑀓𑀸𑀮𑁂 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀢𑀺, 𑀅𑀪𑀺𑀭𑀼𑀴𑁆𑀳𑀓𑀸𑀮𑁂 𑀮𑀗𑁆𑀖𑀺𑀢𑁆𑀯𑀸 𑀆𑀓𑀸𑀲𑁂 𑀢𑀺𑀝𑁆𑀞𑀢𑀺. 𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 ¶ 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑀸 𑀧𑀸𑀲𑀸𑀤𑁂 𑀯𑀲𑀢𑀺. 𑀢𑀫𑁂𑀓𑁄 𑀯𑀦𑀘𑀭𑀓𑁄 𑀤𑀺𑀲𑁆𑀯𑀸 ‘‘𑀅𑀬𑀁, 𑀯𑁄 𑀪𑀦𑁆𑀢𑁂, 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀻𑀢𑀸 𑀫𑁂’’𑀢𑀺 𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀫𑀬𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀯𑀭𑀽𑀧𑀸 𑀦𑀸𑀫 𑀏𑀓𑀲𑁆𑀲 𑀢𑀸𑀧𑀲𑀲𑁆𑀲 𑀥𑀻𑀢𑀸 𑀤𑀺𑀝𑁆𑀞𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑁄 𑀲𑀯𑀦𑀲𑀁𑀲𑀕𑁆𑀕𑁂𑀦 𑀩𑀚𑁆𑀛𑀺𑀢𑁆𑀯𑀸 𑀯𑀦𑀘𑀭𑀓𑀁 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀯𑀦𑀘𑀭𑀓𑀁 𑀆𑀤𑀸𑀬 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀅𑀲𑁆𑀲𑀫𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 ¶ 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀪𑀦𑁆𑀢𑁂, 𑀇𑀢𑁆𑀣𑀺𑀬𑁄 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀫𑀮𑀁, 𑀢𑀼𑀫𑁆𑀳𑀸𑀓𑀁 𑀥𑀻𑀢𑀭𑀁 𑀅𑀳𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀧𑀦 ‘‘𑀓𑀺𑀁 𑀦𑀼 𑀔𑁄 𑀏𑀢𑀲𑁆𑀫𑀺𑀁 𑀧𑀤𑀼𑀫𑁂’’𑀢𑀺 𑀆𑀲𑀗𑁆𑀓𑀁 𑀓𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀆𑀦𑀻𑀢𑀪𑀸𑀯𑁂𑀦 𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀆𑀲𑀗𑁆𑀓𑀸𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀢𑀁 𑀭𑀸𑀚𑀸𑀦𑀁 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀉𑀚𑀼𑀓𑀁 𑀅𑀯𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀫𑀸𑀬 𑀓𑀼𑀫𑀸𑀭𑀺𑀓𑀸𑀬 𑀦𑀸𑀫𑀁 𑀚𑀸𑀦𑀦𑁆𑀢𑁄 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀆𑀳. ‘‘𑀢𑀼𑀫𑁆𑀳𑁂𑀳𑀺 ¶ 𑀓𑀣𑀺𑀢𑁂 𑀜𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁 𑀢𑁂 𑀦 𑀓𑀣𑁂𑀫𑀺, 𑀢𑁆𑀯𑀁 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦 𑀦𑀸𑀫𑀁 𑀚𑀸𑀦𑀦𑁆𑀢𑁄𑀯 𑀕𑀳𑁂𑀢𑁆𑀯𑀸 𑀬𑀸𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 ‘‘𑀓𑀺𑀦𑁆𑀦𑀸𑀫𑀸 𑀦𑀼 𑀔𑁄 𑀏𑀲𑀸’’𑀢𑀺 𑀦𑀸𑀫𑀁 𑀉𑀧𑀥𑀸𑀭𑁂𑀢𑀺. 𑀲𑁄 𑀬𑀸𑀦𑀺 𑀤𑀼𑀚𑁆𑀚𑀸𑀦𑀸𑀦𑀺 𑀦𑀸𑀫𑀸𑀦𑀺, 𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 ‘‘𑀅𑀲𑀼𑀓𑀸 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀏𑀯𑀁𑀦𑀸𑀫𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀭𑀜𑁆𑀜𑁄 𑀘 𑀦𑀸𑀫𑀁 𑀉𑀧𑀥𑀸𑀭𑁂𑀦𑁆𑀢𑀲𑁆𑀲 𑀲𑀁𑀯𑀘𑁆𑀙𑀭𑁄 𑀅𑀢𑀻𑀢𑁄. 𑀢𑀤𑀸 𑀳𑀢𑁆𑀣𑀺𑀅𑀲𑁆𑀲𑀫𑀦𑀼𑀲𑁆𑀲𑁂 𑀲𑀻𑀳𑀸𑀤𑀬𑁄 𑀯𑀸𑀴𑀸 𑀕𑀡𑁆𑀳𑀦𑁆𑀢𑀺, 𑀤𑀻𑀖𑀚𑀸𑀢𑀺𑀓𑀧𑀭𑀺𑀧𑀦𑁆𑀣𑁄 𑀳𑁄𑀢𑀺, 𑀫𑀓𑁆𑀔𑀺𑀓𑀧𑀭𑀺𑀧𑀦𑁆𑀣𑁄 𑀳𑁄𑀢𑀺, 𑀲𑀻𑀢𑁂𑀦 𑀓𑀺𑀮𑀫𑀺𑀢𑁆𑀯𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀭𑀦𑁆𑀢𑀺. 𑀅𑀣 𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑀺𑀁 𑀫𑁂 𑀏𑀢𑀸𑀬𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑁂𑀢𑁆𑀯𑀸 𑀧𑀸𑀬𑀸𑀲𑀺. 𑀆𑀲𑀗𑁆𑀓𑀸 𑀓𑀼𑀫𑀸𑀭𑀺𑀓𑀸 𑀢𑀁 𑀤𑀺𑀯𑀲𑀁 𑀨𑀮𑀺𑀓𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀢𑀯 𑀦𑀸𑀫𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫, 𑀢𑁆𑀯𑀁 𑀳𑀺𑀫𑀯𑀦𑁆𑀢𑁂𑀬𑁂𑀯 𑀯𑀲, 𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀓𑀳𑀁, 𑀫𑀳𑀸𑀭𑀸𑀚, 𑀕𑀘𑁆𑀙𑀦𑁆𑀢𑁄 𑀫𑀸𑀤𑀺𑀲𑀁 𑀇𑀢𑁆𑀣𑀺𑀁 𑀮𑀪𑀺𑀲𑁆𑀲𑀲𑀺, 𑀫𑀫 𑀯𑀘𑀦𑀁 𑀲𑀼𑀡𑀸𑀳𑀺, 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀘𑀺𑀢𑁆𑀢𑀮𑀢𑀸𑀯𑀦𑁂 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸 𑀅𑀢𑁆𑀣𑀺, 𑀢𑀲𑁆𑀲𑀸 𑀨𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀤𑀺𑀩𑁆𑀩𑀧𑀸𑀦𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀁 𑀏𑀓𑀯𑀸𑀭𑀁 𑀧𑀺𑀯𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀤𑀺𑀩𑁆𑀩𑀲𑀬𑀦𑁂 𑀲𑀬𑀦𑁆𑀢𑀺, 𑀲𑀸 𑀧𑀦 𑀯𑀲𑁆𑀲𑀲𑀳𑀲𑁆𑀲𑁂𑀦 ¶ 𑀨𑀮𑀢𑀺, 𑀲𑀼𑀭𑀸𑀲𑁄𑀡𑁆𑀟𑀸 𑀤𑁂𑀯𑀧𑀼𑀢𑁆𑀢𑀸 ‘𑀇𑀢𑁄 𑀨𑀮𑀁 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀤𑀺𑀩𑁆𑀩𑀧𑀸𑀦𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀯𑀲𑁆𑀲𑀲𑀳𑀲𑁆𑀲𑀁 ¶ 𑀦𑀺𑀩𑀤𑁆𑀥𑀁 𑀕𑀦𑁆𑀢𑁆𑀯𑀸 𑀢𑀁 𑀮𑀢𑀁 ‘𑀅𑀭𑁄𑀕𑀸 𑀦𑀼 𑀔𑁄’𑀢𑀺 𑀑𑀮𑁄𑀓𑁂𑀦𑁆𑀢𑀺, 𑀢𑁆𑀯𑀁 𑀧𑀦 𑀏𑀓𑀲𑀁𑀯𑀘𑁆𑀙𑀭𑁂𑀦𑁂𑀯 𑀉𑀓𑁆𑀓𑀡𑁆𑀞𑀺𑀢𑁄, 𑀆𑀲𑀸𑀨𑀮𑀯𑀢𑀻 𑀦𑀸𑀫 𑀲𑀼𑀔𑀸, 𑀫𑀸 𑀉𑀓𑁆𑀓𑀡𑁆𑀞𑀻’’𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬.

‘‘𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸, 𑀚𑀸𑀢𑀸 𑀘𑀺𑀢𑁆𑀢𑀮𑀢𑀸𑀯𑀦𑁂;

𑀢𑀲𑁆𑀲𑀸 𑀯𑀲𑁆𑀲𑀲𑀳𑀲𑁆𑀲𑁂𑀦, 𑀏𑀓𑀁 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

𑁨𑁭.

‘‘𑀢𑀁 𑀤𑁂𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑀸𑀯 𑀤𑀽𑀭𑀨𑀮𑀁 𑀲𑀢𑀺𑀁;

𑀆𑀲𑀻𑀲𑁂𑀯 𑀢𑀼𑀯𑀁 𑀭𑀸𑀚, 𑀆𑀲𑀸 𑀨𑀮𑀯𑀢𑀻 𑀲𑀼𑀔𑀸.

𑁨𑁮.

‘‘𑀆𑀲𑀻𑀲𑀢𑁂𑀯 𑀲𑁄 𑀧𑀓𑁆𑀔𑀻, 𑀆𑀲𑀻𑀲𑀢𑁂𑀯 𑀲𑁄 𑀤𑀺𑀚𑁄;

𑀢𑀲𑁆𑀲 𑀘𑀸𑀲𑀸 𑀲𑀫𑀺𑀚𑁆𑀛𑀢𑀺, 𑀢𑀸𑀯 𑀤𑀽𑀭𑀕𑀢𑀸 𑀲𑀢𑀻;

𑀆𑀲𑀻𑀲𑁂𑀯 𑀢𑀼𑀯𑀁 𑀭𑀸𑀚, 𑀆𑀲𑀸 𑀨𑀮𑀯𑀢𑀻 𑀲𑀼𑀔𑀸’’𑀢𑀺.

𑀢𑀢𑁆𑀣 𑀆𑀲𑀸𑀯𑀢𑀻𑀢𑀺 𑀏𑀯𑀁𑀦𑀸𑀫𑀺𑀓𑀸. 𑀲𑀸 𑀳𑀺 𑀬𑀲𑁆𑀫𑀸 𑀢𑀲𑁆𑀲𑀸 𑀨𑀮𑁂 𑀆𑀲𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀢𑀁 ¶ 𑀦𑀸𑀫𑀁 𑀮𑀪𑀢𑀺. 𑀘𑀺𑀢𑁆𑀢𑀮𑀢𑀸𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀉𑀬𑁆𑀬𑀸𑀦𑁂. 𑀢𑀲𑁆𑀫𑀺𑀁 𑀓𑀺𑀭 𑀉𑀬𑁆𑀬𑀸𑀦𑁂 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀻𑀦𑀁 𑀧𑀪𑀸 𑀢𑀢𑁆𑀣 𑀧𑀯𑀺𑀝𑁆𑀞𑀧𑀯𑀺𑀝𑁆𑀞𑀸𑀦𑀁 𑀤𑁂𑀯𑀢𑀸𑀦𑀁 𑀲𑀭𑀻𑀭𑀯𑀡𑁆𑀡𑀁 𑀘𑀺𑀢𑁆𑀢𑀁 𑀓𑀭𑁄𑀢𑀺, 𑀢𑁂𑀦𑀲𑁆𑀲 ‘‘𑀘𑀺𑀢𑁆𑀢𑀮𑀢𑀸𑀯𑀦’’𑀦𑁆𑀢𑀺 𑀦𑀸𑀫𑀁 𑀚𑀸𑀢𑀁. 𑀧𑀬𑀺𑀭𑀼𑀧𑀸𑀲𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁂𑀦𑁆𑀢𑀺. 𑀆𑀲𑀻𑀲𑁂𑀯𑀸𑀢𑀺 𑀆𑀲𑀻𑀲𑀸𑀳𑀺𑀬𑁂𑀯 𑀧𑀢𑁆𑀣𑁂𑀳𑀺𑀬𑁂𑀯, 𑀫𑀸 𑀆𑀲𑀘𑁆𑀙𑁂𑀤𑀁 𑀓𑀭𑁄𑀳𑀻𑀢𑀺.

𑀭𑀸𑀚𑀸 𑀢𑀲𑁆𑀲𑀸 𑀓𑀣𑀸𑀬 𑀩𑀚𑁆𑀛𑀺𑀢𑁆𑀯𑀸 𑀧𑀼𑀦 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀤𑀲𑀦𑀸𑀫𑀓𑀁 𑀓𑀸𑀭𑁂𑀢𑁆𑀯𑀸 𑀦𑀸𑀫𑀁 𑀕𑀯𑁂𑀲𑀦𑁆𑀢𑁄 𑀅𑀧𑀭𑀫𑁆𑀧𑀺 𑀲𑀁𑀯𑀘𑁆𑀙𑀭𑀁 𑀯𑀲𑀺. 𑀢𑀲𑁆𑀲𑀸 𑀤𑀲𑀦𑀸𑀫𑀓𑀫𑁆𑀧𑀺 𑀦𑀸𑀫𑀁 𑀦𑀸𑀳𑁄𑀲𑀺, ‘‘𑀅𑀲𑀼𑀓𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀧𑀼𑀦 𑀭𑀸𑀚𑀸 ‘‘𑀓𑀺𑀁 𑀫𑁂 𑀇𑀫𑀸𑀬𑀸’’𑀢𑀺 𑀢𑀼𑀭𑀗𑁆𑀕𑀁 𑀆𑀭𑀼𑀬𑁆𑀳 𑀧𑀸𑀬𑀸𑀲𑀺. 𑀲𑀸𑀧𑀺 𑀧𑀼𑀦 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 ‘‘𑀢𑀺𑀝𑁆𑀞 𑀢𑁆𑀯𑀁, 𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 ¶ 𑀆𑀳. ‘‘𑀓𑀲𑁆𑀫𑀸 𑀬𑀸𑀲𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀢𑀯 𑀦𑀸𑀫𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀓𑀲𑁆𑀫𑀸 𑀦𑀸𑀫𑀁 𑀦 𑀚𑀸𑀦𑀺𑀲𑁆𑀲𑀲𑀺, 𑀆𑀲𑀸 𑀦𑀸𑀫 𑀅𑀲𑀫𑀺𑀚𑁆𑀛𑀦𑀓𑀸 𑀦𑀸𑀫 𑀦𑀢𑁆𑀣𑀺, 𑀏𑀓𑁄 𑀓𑀺𑀭 𑀩𑀓𑁄 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀺𑀢𑁄 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀁 𑀮𑀪𑀺, 𑀢𑁆𑀯𑀁 𑀓𑀲𑁆𑀫𑀸 𑀦 𑀮𑀪𑀺𑀲𑁆𑀲𑀲𑀺, 𑀅𑀥𑀺𑀯𑀸𑀲𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺. 𑀏𑀓𑁄 𑀓𑀺𑀭 𑀩𑀓𑁄 𑀏𑀓𑀲𑁆𑀫𑀺𑀁 𑀧𑀤𑀼𑀫𑀲𑀭𑁂 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀮𑀻𑀬𑀺. 𑀲𑁄 𑀢𑀁 𑀤𑀺𑀯𑀲𑀁 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀫𑀲𑁆𑀫𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀼𑀔𑀁 ¶ 𑀦𑀺𑀲𑀺𑀦𑁆𑀦𑁄, 𑀲𑀘𑁂 𑀇𑀢𑁄 𑀅𑀦𑁄𑀢𑀭𑀺𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀇𑀫𑀁 𑀤𑀺𑀯𑀲𑀁 𑀯𑀲𑁂𑀬𑁆𑀬𑀁, 𑀪𑀤𑁆𑀭𑀓𑀁 𑀯𑀢 𑀅𑀲𑁆𑀲𑀸’’𑀢𑀺. 𑀅𑀣 𑀢𑀁 𑀤𑀺𑀯𑀲𑀫𑁂𑀯 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀲𑀼𑀭𑀦𑀺𑀫𑁆𑀫𑀣𑀦𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁂𑀯𑀺𑀲𑁆𑀲𑀭𑀺𑀬𑀁 𑀮𑀤𑁆𑀥𑀸 𑀘𑀺𑀦𑁆𑀢𑁂𑀲𑀺 ‘𑀫𑀫 𑀢𑀸𑀯 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑁄 𑀓𑁄𑀘𑀺 𑀅𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑁄’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘𑀇𑀫𑀲𑁆𑀲 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’𑀢𑀺 𑀩𑀓𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀅𑀯𑀺𑀤𑀽𑀭𑁂 𑀏𑀓𑀸 𑀦𑀤𑀻 𑀅𑀢𑁆𑀣𑀺, 𑀢𑀁 𑀦𑀤𑀺𑀁 𑀑𑀖𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂𑀦 𑀧𑁂𑀲𑁂𑀲𑀺. 𑀲𑁄𑀧𑀺 𑀩𑀓𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀫𑀘𑁆𑀙𑁂 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀢𑀢𑁆𑀣𑁂𑀯 𑀯𑀲𑀺, 𑀉𑀤𑀓𑀫𑁆𑀧𑀺 𑀪𑀲𑁆𑀲𑀺𑀢𑁆𑀯𑀸 𑀕𑀢𑀁. ‘‘𑀏𑀯𑀁, 𑀫𑀳𑀸𑀭𑀸𑀚, 𑀩𑀓𑁄𑀧𑀺 𑀢𑀸𑀯 𑀅𑀢𑁆𑀢𑀦𑁄 𑀆𑀲𑀸𑀨𑀮𑀁 𑀮𑀪𑀺, 𑀓𑀺𑀁 𑀢𑁆𑀯𑀁 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀆𑀲𑀻𑀲𑀢𑁂𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀆𑀲𑀻𑀲𑀢𑁂𑀯𑀸𑀢𑀺 𑀆𑀲𑀻𑀲𑀢𑀺𑀬𑁂𑀯 𑀧𑀢𑁆𑀣𑁂𑀢𑀺𑀬𑁂𑀯. 𑀧𑀓𑁆𑀔𑀻𑀢𑀺 𑀧𑀓𑁆𑀔𑁂𑀳𑀺 𑀬𑀼𑀢𑁆𑀢𑀢𑀸𑀬 𑀧𑀓𑁆𑀔𑀻. 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑀢𑀸𑀬 𑀤𑀺𑀚𑁄. 𑀢𑀸𑀯 𑀤𑀽𑀭𑀕𑀢𑀸 𑀲𑀢𑀻𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑀢𑁄 𑀫𑀘𑁆𑀙𑀸𑀦𑀜𑁆𑀘 𑀉𑀤𑀓𑀲𑁆𑀲 𑀘 𑀤𑀽𑀭𑀪𑀸𑀯𑀁 𑀧𑀲𑁆𑀲, 𑀏𑀯𑀁 𑀤𑀽𑀭𑀕𑀢𑀸 𑀲𑀫𑀸𑀦𑀸 𑀲𑀓𑁆𑀓𑀲𑁆𑀲 𑀆𑀦𑀼𑀪𑀸𑀯𑁂𑀦 𑀩𑀓𑀲𑁆𑀲 𑀆𑀲𑀸 𑀧𑀽𑀭𑀺𑀬𑁂𑀯𑀸𑀢𑀺.

𑀅𑀣 𑀭𑀸𑀚𑀸 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀭𑀽𑀧𑁂 𑀩𑀚𑁆𑀛𑀺𑀢𑁆𑀯𑀸 𑀓𑀣𑀸𑀬 𑀅𑀮𑁆𑀮𑀻𑀦𑁄 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀲𑀢𑀦𑀸𑀫𑀁 𑀓𑀸𑀭𑁂𑀲𑀺, 𑀲𑀢𑀦𑀸𑀫𑀯𑀲𑁂𑀦 ¶ 𑀦𑀸𑀫𑀁 𑀕𑀯𑁂𑀲𑀢𑁄𑀧𑀺𑀲𑁆𑀲 𑀅𑀜𑁆𑀜𑀁 𑀲𑀁𑀯𑀘𑁆𑀙𑀭𑀁 𑀅𑀢𑀻𑀢𑀁 ¶ . 𑀲𑁄 𑀢𑀺𑀡𑁆𑀡𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑀦𑀸𑀫𑀯𑀲𑁂𑀦 ‘‘𑀅𑀲𑀼𑀓𑀸 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀚𑀸𑀦𑀸𑀲𑀺, 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 ‘‘𑀕𑀫𑀺𑀲𑁆𑀲𑀸𑀫 𑀤𑀸𑀦𑀺 𑀫𑀬’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀬𑀸𑀲𑀺. 𑀆𑀲𑀗𑁆𑀓𑀸 𑀓𑀼𑀫𑀸𑀭𑀺𑀓𑀸 𑀘 𑀧𑀼𑀦 𑀨𑀮𑀺𑀓𑀯𑀸𑀢𑀧𑀸𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀯. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀅𑀘𑁆𑀙, 𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀓𑀲𑁆𑀫𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁆𑀯𑀁 𑀫𑀁 𑀯𑀘𑀦𑁂𑀦𑁂𑀯 𑀲𑀦𑁆𑀢𑀧𑁆𑀧𑁂𑀲𑀺, 𑀦 𑀘 𑀓𑀸𑀫𑀭𑀢𑀺𑀬𑀸, 𑀢𑀯 𑀫𑀥𑀼𑀭𑀯𑀘𑀦𑁂𑀦 𑀩𑀚𑁆𑀛𑀺𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀫𑀫 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀇𑀤𑀸𑀦𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀸 𑀕𑀸𑀣𑀸 𑀆𑀳 𑁋

𑁨𑁯.

‘‘𑀲𑀫𑁆𑀧𑁂𑀲𑀺 𑀔𑁄 𑀫𑀁 𑀯𑀸𑀘𑀸𑀬, 𑀦 𑀘 𑀲𑀫𑁆𑀧𑁂𑀲𑀺 𑀓𑀫𑁆𑀫𑀼𑀦𑀸;

𑀫𑀸𑀮𑀸 𑀲𑁂𑀭𑁂𑀬𑁆𑀬𑀓𑀲𑁆𑀲𑁂𑀯, 𑀯𑀡𑁆𑀡𑀯𑀦𑁆𑀢𑀸 𑀅𑀕𑀦𑁆𑀥𑀺𑀓𑀸.

𑁩𑁦.

‘‘𑀅𑀨𑀮𑀁 ¶ 𑀫𑀥𑀼𑀭𑀁 𑀯𑀸𑀘𑀁, 𑀬𑁄 𑀫𑀺𑀢𑁆𑀢𑁂𑀲𑀼 𑀧𑀓𑀼𑀩𑁆𑀩𑀢𑀺;

𑀅𑀤𑀤𑀁 𑀅𑀯𑀺𑀲𑁆𑀲𑀚𑀁 𑀪𑁄𑀕𑀁, 𑀲𑀦𑁆𑀥𑀺 𑀢𑁂𑀦𑀲𑁆𑀲 𑀚𑀻𑀭𑀢𑀺.

𑁩𑁧.

‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁩𑁨.

‘‘𑀩𑀮𑀜𑁆𑀘 𑀯𑀢 𑀫𑁂 𑀔𑀻𑀡𑀁, 𑀧𑀸𑀣𑁂𑀬𑁆𑀬𑀜𑁆𑀘 𑀦 𑀯𑀺𑀚𑁆𑀚𑀢𑀺;

𑀲𑀗𑁆𑀓𑁂 𑀧𑀸𑀡𑀽𑀧𑀭𑁄𑀥𑀸𑀬, 𑀳𑀦𑁆𑀤 𑀤𑀸𑀦𑀺 𑀯𑀚𑀸𑀫𑀳’’𑀦𑁆𑀢𑀺.

𑀢𑀢𑁆𑀣 𑀲𑀫𑁆𑀧𑁂𑀲𑀻𑀢𑀺 𑀲𑀦𑁆𑀢𑀧𑁆𑀧𑁂𑀲𑀺 𑀧𑀻𑀡𑁂𑀲𑀺. 𑀲𑁂𑀭𑁂𑀬𑁆𑀬𑀓𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀓𑀼𑀭𑀡𑁆𑀟𑀓𑀲𑁆𑀲. 𑀤𑁂𑀲𑀦𑀸𑀲𑀻𑀲𑀫𑁂𑀯𑁂𑀢𑀁, 𑀬𑀁𑀓𑀺𑀜𑁆𑀘𑀺 𑀧𑀦 𑀲𑀼𑀯𑀡𑁆𑀡𑀓𑀼𑀭𑀡𑁆𑀟𑀓𑀚𑀬𑀲𑀼𑀫𑀦𑀸𑀤𑀺𑀓𑀁 𑀅𑀜𑁆𑀜𑀫𑁆𑀧𑀺 𑀧𑀼𑀧𑁆𑀨𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀅𑀕𑀦𑁆𑀥𑀓𑀁, 𑀲𑀩𑁆𑀩𑀁 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀯𑀡𑁆𑀡𑀯𑀦𑁆𑀢𑀸 𑀅𑀕𑀦𑁆𑀥𑀺𑀓𑀸𑀢𑀺 𑀬𑀣𑀸 𑀲𑁂𑀭𑁂𑀬𑁆𑀬𑀓𑀸𑀤𑀻𑀦𑀁 𑀫𑀸𑀮𑀸 𑀯𑀡𑁆𑀡𑀯𑀦𑁆𑀢𑀢𑀸𑀬 𑀤𑀲𑁆𑀲𑀦𑁂𑀦 𑀢𑀧𑁆𑀧𑁂𑀢𑀺, 𑀅𑀕𑀦𑁆𑀥𑀢𑀸𑀬 𑀕𑀦𑁆𑀥𑁂𑀦 𑀦 𑀢𑀧𑁆𑀧𑁂𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀤𑀲𑁆𑀲𑀦𑁂𑀦 𑀧𑀺𑀬𑀯𑀘𑀦𑁂𑀦 𑀘 𑀲𑀦𑁆𑀢𑀧𑁆𑀧𑁂𑀲𑀺, 𑀦 𑀓𑀫𑁆𑀫𑀼𑀦𑀸𑀢𑀺 𑀤𑀻𑀧𑁂𑀢𑀺. 𑀅𑀤𑀤𑀦𑁆𑀢𑀺 𑀪𑀤𑁆𑀤𑁂, 𑀬𑁄 ‘‘𑀇𑀫𑀁 𑀦𑀸𑀫 𑀯𑁄 𑀪𑁄𑀕𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀥𑀼𑀭𑀯𑀘𑀦𑁂𑀦 𑀯𑀢𑁆𑀯𑀸 𑀢𑀁 𑀪𑁄𑀕𑀁 𑀅𑀤𑀤𑀦𑁆𑀢𑁄 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑁂𑀯𑀮𑀁 𑀫𑀥𑀼𑀭𑀯𑀘𑀦𑀫𑁂𑀯 𑀓𑀭𑁄𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀅𑀲𑁆𑀲 𑀫𑀺𑀢𑁆𑀢𑀲𑁆𑀲 ¶ 𑀲𑀦𑁆𑀥𑀺 𑀚𑀻𑀭𑀢𑀺, 𑀫𑀺𑀢𑁆𑀢𑀲𑀦𑁆𑀣𑀯𑁄 𑀦 𑀖𑀝𑀻𑀬𑀢𑀺. 𑀧𑀸𑀣𑁂𑀬𑁆𑀬𑀜𑁆𑀘𑀸𑀢𑀺 𑀪𑀤𑁆𑀤𑁂, 𑀫𑀬𑁆𑀳𑀁 𑀢𑀯 𑀫𑀥𑀼𑀭𑀯𑀘𑀦𑁂𑀦 𑀩𑀚𑁆𑀛𑀺𑀢𑁆𑀯𑀸 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀲𑀦𑁆𑀢𑀲𑁆𑀲𑁂𑀯 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀩𑀮𑀜𑁆𑀘 𑀔𑀻𑀡𑀁, 𑀫𑀦𑀼𑀲𑁆𑀲𑀸𑀦𑀁 𑀪𑀢𑁆𑀢𑀯𑁂𑀢𑀦𑀲𑀗𑁆𑀔𑀸𑀢𑀁 𑀧𑀸𑀣𑁂𑀬𑁆𑀬𑀜𑁆𑀘 𑀦𑀢𑁆𑀣𑀺. 𑀲𑀗𑁆𑀓𑁂 𑀧𑀸𑀡𑀽𑀧𑀭𑁄𑀥𑀸𑀬𑀸𑀢𑀺 𑀲𑁆𑀯𑀸𑀳𑀁 𑀇𑀥𑁂𑀯 𑀅𑀢𑁆𑀢𑀦𑁄 𑀚𑀻𑀯𑀺𑀢𑀯𑀺𑀦𑀸𑀲𑀁 𑀆𑀲𑀗𑁆𑀓𑀸𑀫𑀺, 𑀳𑀦𑁆𑀤 𑀤𑀸𑀦𑀸𑀳𑀁 𑀕𑀘𑁆𑀙𑀸𑀫𑀻𑀢𑀺.

𑀆𑀲𑀗𑁆𑀓𑀸 ¶ 𑀓𑀼𑀫𑀸𑀭𑀺𑀓𑀸 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀬𑁆𑀳𑀁 𑀦𑀸𑀫𑀁 𑀚𑀸𑀦𑀸𑀲𑀺, 𑀢𑀬𑀸 𑀯𑀼𑀢𑁆𑀢𑀫𑁂𑀯 𑀫𑀫 𑀦𑀸𑀫𑀁, 𑀇𑀤𑀁 𑀫𑁂 𑀧𑀺𑀢𑀼 𑀓𑀣𑁂𑀢𑁆𑀯𑀸 𑀫𑀁 𑀕𑀡𑁆𑀳𑀺𑀢𑁆𑀯𑀸 𑀬𑀸𑀳𑀻’’𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀆𑀳 𑁋

𑁩𑁩.

‘‘𑀏𑀢𑀤𑁂𑀯 𑀳𑀺 𑀫𑁂 𑀦𑀸𑀫𑀁, 𑀬𑀁𑀦𑀸𑀫𑀲𑁆𑀫𑀺 𑀭𑀣𑁂𑀲𑀪;

𑀆𑀕𑀫𑁂𑀳𑀺 𑀫𑀳𑀸𑀭𑀸𑀚, 𑀧𑀺𑀢𑀭𑀁 𑀆𑀫𑀦𑁆𑀢𑀬𑀸𑀫𑀳’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀁𑀦𑀸𑀫𑀸 𑀅𑀳𑀁 𑀅𑀲𑁆𑀫𑀺, 𑀢𑀁 𑀏𑀢𑀁 𑀆𑀲𑀗𑁆𑀓𑀸𑀢𑁆𑀯𑁂𑀯 𑀫𑀫 𑀦𑀸𑀫𑀦𑁆𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀥𑀻𑀢𑀸 𑀆𑀲𑀗𑁆𑀓𑀸 𑀦𑀸𑀫𑀸’’𑀢𑀺 𑀆𑀳. ‘‘𑀦𑀸𑀫𑀁 𑀜𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙, 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀨𑀮𑀺𑀓𑀯𑀺𑀫𑀸𑀦𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀪𑀤𑁆𑀤𑁂, 𑀧𑀺𑀢𑀭𑀸𑀧𑀺 𑀢𑁂 𑀫𑀬𑁆𑀳𑀁 𑀤𑀺𑀦𑁆𑀦𑀸, 𑀏𑀳𑀺 𑀤𑀸𑀦𑀺 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀆𑀕𑀫𑁂𑀳𑀺, 𑀫𑀳𑀸𑀭𑀸𑀚, 𑀧𑀺𑀢𑀭𑀁 𑀆𑀫𑀦𑁆𑀢𑀬𑀸𑀫𑀳’’𑀦𑁆𑀢𑀺 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸. 𑀭𑀸𑀚𑀸 𑀢𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀦𑁆𑀢𑁄 𑀧𑀺𑀬𑀲𑀁𑀯𑀸𑀲𑀁 𑀯𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀆𑀲𑀗𑁆𑀓𑀸 𑀓𑀼𑀫𑀸𑀭𑀺𑀓𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀭𑀸𑀚𑀸 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀆𑀲𑀗𑁆𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁮𑁧] 𑁬. 𑀫𑀺𑀕𑀸𑀮𑁄𑀧𑀚𑀸𑀢𑀓𑀯𑀡𑁆𑀡𑀦𑀸

𑀦 ¶ 𑀫𑁂 𑀭𑀼𑀘𑁆𑀘𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀤𑀼𑀩𑁆𑀩𑀘𑁄𑀬𑁂𑀯, 𑀤𑀼𑀩𑁆𑀩𑀘𑀪𑀸𑀯𑀜𑁆𑀘 𑀧𑀦 𑀦𑀺𑀲𑁆𑀲𑀸𑀬 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀭𑁄𑀦𑁆𑀢𑁄 𑀯𑁂𑀭𑀫𑁆𑀪𑀯𑀸𑀢𑀫𑀼𑀔𑁂 𑀩𑁆𑀬𑀲𑀦𑀁 𑀕𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀺𑀚𑁆𑀛𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀦𑀦𑁆𑀤𑀕𑀺𑀚𑁆𑀛𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀕𑀺𑀚𑁆𑀛𑀕𑀡𑀧𑀭𑀺𑀯𑀼𑀢𑁄 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑁂 𑀯𑀲𑀺. 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀫𑀺𑀕𑀸𑀮𑁄𑀧𑁄 𑀦𑀸𑀫 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀲𑁄 𑀅𑀜𑁆𑀜𑁂𑀲𑀁 𑀕𑀺𑀚𑁆𑀛𑀸𑀦𑀁 𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑀺𑀉𑀘𑁆𑀘𑀁 𑀉𑀧𑁆𑀧𑀢𑀺. 𑀕𑀺𑀚𑁆𑀛𑀸 ‘‘𑀧𑀼𑀢𑁆𑀢𑁄 𑀢𑁂 𑀅𑀢𑀺𑀤𑀽𑀭𑀁 𑀉𑀧𑁆𑀧𑀢𑀢𑀻’’𑀢𑀺 𑀕𑀺𑀚𑁆𑀛𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀁𑀲𑀼. 𑀲𑁄 𑀢𑀁 𑀧𑀓𑁆𑀓𑁄𑀲𑁂𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭, 𑀢𑀸𑀢, 𑀅𑀢𑀺𑀉𑀘𑁆𑀘𑀁 ¶ 𑀕𑀘𑁆𑀙𑀲𑀺, 𑀅𑀢𑀺𑀉𑀘𑁆𑀘𑀁 𑀕𑀘𑁆𑀙𑀦𑁆𑀢𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁪.

‘‘𑀦 𑀫𑁂 𑀭𑀼𑀘𑁆𑀘𑀺 𑀫𑀺𑀕𑀸𑀮𑁄𑀧, 𑀬𑀲𑁆𑀲 𑀢𑁂 𑀢𑀸𑀤𑀺𑀲𑀻 𑀕𑀢𑀻;

𑀅𑀢𑀼𑀘𑁆𑀘𑀁 𑀢𑀸𑀢 𑀧𑀢𑀲𑀺, 𑀅𑀪𑀽𑀫𑀺𑀁 𑀢𑀸𑀢 𑀲𑁂𑀯𑀲𑀺.

𑁩𑁫.

‘‘𑀘𑀢𑀼𑀓𑁆𑀓𑀡𑁆𑀡𑀁𑀯 𑀓𑁂𑀤𑀸𑀭𑀁, 𑀬𑀤𑀸 𑀢𑁂 𑀧𑀣𑀯𑀻 𑀲𑀺𑀬𑀸;

𑀢𑀢𑁄 𑀢𑀸𑀢 𑀦𑀺𑀯𑀢𑁆𑀢𑀲𑁆𑀲𑀼, 𑀫𑀸𑀲𑁆𑀲𑀼 𑀏𑀢𑁆𑀢𑁄 𑀧𑀭𑀁 𑀕𑀫𑀺.

𑁩𑁬.

‘‘𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀲𑀓𑀼𑀡𑀸, 𑀧𑀢𑁆𑀢𑀬𑀸𑀦𑀸 𑀯𑀺𑀳𑀗𑁆𑀕𑀫𑀸;

𑀅𑀓𑁆𑀔𑀺𑀢𑁆𑀢𑀸 𑀯𑀸𑀢𑀯𑁂𑀕𑁂𑀦, 𑀦𑀝𑁆𑀞𑀸 𑀢𑁂 𑀲𑀲𑁆𑀲𑀢𑀻𑀲𑀫𑀸’’𑀢𑀺.

𑀢𑀢𑁆𑀣 𑀫𑀺𑀕𑀸𑀮𑁄𑀧𑀸𑀢𑀺 𑀧𑀼𑀢𑁆𑀢𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀅𑀢𑀼𑀘𑁆𑀘𑀁 𑀢𑀸𑀢 𑀧𑀢𑀲𑀻𑀢𑀺 𑀢𑀸𑀢, 𑀢𑁆𑀯𑀁 𑀅𑀜𑁆𑀜𑁂𑀲𑀁 𑀕𑀺𑀚𑁆𑀛𑀸𑀦𑀁 𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑀺𑀉𑀘𑁆𑀘𑀁 𑀕𑀘𑁆𑀙𑀲𑀺. 𑀘𑀢𑀼𑀓𑁆𑀓𑀡𑁆𑀡𑀁𑀯 𑀓𑁂𑀤𑀸𑀭𑀦𑁆𑀢𑀺 𑀇𑀫𑀺𑀦𑀸𑀲𑁆𑀲 𑀲𑀻𑀫𑀁 𑀆𑀘𑀺𑀓𑁆𑀔𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀬𑀤𑀸 𑀢𑁂 𑀅𑀬𑀁 𑀫𑀳𑀸𑀧𑀣𑀯𑀻 𑀘𑀢𑀼𑀓𑁆𑀓𑀡𑁆𑀡𑀁 𑀓𑁂𑀤𑀸𑀭𑀁 𑀯𑀺𑀬 𑀲𑀺𑀬𑀸, 𑀏𑀯𑀁 𑀔𑀼𑀤𑁆𑀤𑀺𑀓𑀸 ¶ 𑀯𑀺𑀬 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑁂𑀣, 𑀅𑀣 𑀢𑁆𑀯𑀁 𑀏𑀢𑁆𑀢𑀓𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀲𑀺, 𑀏𑀢𑁆𑀢𑁄 𑀧𑀭𑀁 𑀫𑀸 𑀕𑀫𑀻𑀢𑀺. 𑀲𑀦𑁆𑀢𑀺 𑀅𑀜𑁆𑀜𑁂𑀧𑀻𑀢𑀺 𑀦 𑀓𑁂𑀯𑀮𑀁 𑀢𑁆𑀯𑀫𑁂𑀯, 𑀅𑀜𑁆𑀜𑁂𑀧𑀺 𑀕𑀺𑀚𑁆𑀛𑀸 𑀏𑀯𑀁 𑀓𑀭𑀺𑀁𑀲𑀽𑀢𑀺 𑀤𑀻𑀧𑁂𑀢𑀺. 𑀅𑀓𑁆𑀔𑀺𑀢𑁆𑀢𑀸𑀢𑀺 𑀢𑁂𑀧𑀺 𑀕𑀺𑀚𑁆𑀛𑀸 𑀅𑀫𑁆𑀳𑀸𑀓𑀁 𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑀸 𑀯𑀸𑀢𑀯𑁂𑀕𑁂𑀦 𑀆𑀓𑀟𑁆𑀠𑀺𑀢𑀸 𑀦𑀲𑁆𑀲𑀺𑀁𑀲𑀼. 𑀲𑀲𑁆𑀲𑀢𑀻𑀲𑀫𑀸𑀢𑀺 𑀲𑀲𑁆𑀲𑀢𑀻𑀳𑀺 𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀳𑀺 𑀲𑀫𑀁 𑀅𑀢𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑀸 𑀅𑀢𑁆𑀢𑀦𑁄 𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀆𑀬𑀼𑀁 𑀅𑀧𑀽𑀭𑁂𑀢𑁆𑀯𑀸𑀧𑀺 𑀅𑀦𑁆𑀢𑀭𑀸 𑀦𑀝𑁆𑀞𑀸𑀢𑀺 𑀅𑀢𑁆𑀣𑁄.

𑀫𑀺𑀕𑀸𑀮𑁄𑀧𑁄 𑀅𑀦𑁄𑀯𑀸𑀤𑀓𑀢𑁆𑀢𑀸 𑀧𑀺𑀢𑀼 𑀯𑀘𑀦𑀁 𑀅𑀓𑀢𑁆𑀯𑀸 𑀮𑀗𑁆𑀖𑀦𑁆𑀢𑁄 𑀧𑀺𑀢𑀭𑀸 𑀅𑀓𑁆𑀔𑀸𑀢𑀁 𑀲𑀻𑀫𑀁 𑀤𑀺𑀲𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑁆𑀫 𑀓𑀸𑀮𑀯𑀸𑀢𑁂 𑀧𑀢𑁆𑀯𑀸 𑀢𑁂𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁄 𑀯𑁂𑀭𑀫𑁆𑀪𑀯𑀸𑀢𑀫𑀼𑀔𑀁 𑀧𑀓𑁆𑀔𑀦𑁆𑀤𑀺, 𑀅𑀣 𑀦𑀁 𑀯𑁂𑀭𑀫𑁆𑀪𑀯𑀸𑀢𑀸 𑀧𑀳𑀭𑀺𑀁𑀲𑀼. 𑀲𑁄 𑀢𑁂𑀳𑀺 𑀧𑀳𑀝𑀫𑀢𑁆𑀢𑁄𑀯 𑀔𑀡𑁆𑀟𑀸𑀔𑀡𑁆𑀟𑀁 𑀳𑀼𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀅𑀦𑁆𑀢𑀭𑀥𑀸𑀬𑀺.

𑁩𑁭.

‘‘𑀅𑀓𑀢𑁆𑀯𑀸 ¶ 𑀅𑀧𑀦𑀦𑁆𑀤𑀲𑁆𑀲, 𑀧𑀺𑀢𑀼 𑀯𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀓𑀸𑀮𑀯𑀸𑀢𑁂 𑀅𑀢𑀺𑀓𑁆𑀓𑀫𑁆𑀫, 𑀯𑁂𑀭𑀫𑁆𑀪𑀸𑀦𑀁 𑀯𑀲𑀁 𑀅𑀕𑀸.

𑁩𑁮.

‘‘𑀢𑀲𑁆𑀲 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀫𑀸𑀧𑀸𑀤𑀼𑀁, 𑀅𑀦𑁄𑀯𑀸𑀤𑀓𑀭𑁂 𑀤𑀺𑀚𑁂.

𑁩𑁯.

‘‘𑀏𑀯𑀫𑁆𑀧𑀺 ¶ 𑀇𑀥 𑀯𑀼𑀤𑁆𑀥𑀸𑀦𑀁, 𑀬𑁄 𑀯𑀸𑀓𑁆𑀬𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑀺𑀲𑀻𑀫𑀘𑀭𑁄 𑀤𑀺𑀢𑁆𑀢𑁄, 𑀕𑀺𑀚𑁆𑀛𑁄𑀯𑀸𑀢𑀻𑀢𑀲𑀸𑀲𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀁 𑀧𑀧𑁆𑀧𑁄𑀦𑁆𑀢𑀺, 𑀅𑀓𑀢𑁆𑀯𑀸 𑀯𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.

𑀢𑀢𑁆𑀣 𑀅𑀦𑀼𑀚𑀻𑀯𑀺𑀦𑁄𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑀓𑀸. 𑀅𑀦𑁄𑀯𑀸𑀤𑀓𑀭𑁂 𑀤𑀺𑀚𑁂𑀢𑀺 𑀢𑀲𑁆𑀫𑀺𑀁 𑀫𑀺𑀕𑀸𑀮𑁄𑀧𑁂 𑀕𑀺𑀚𑁆𑀛𑁂 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀅𑀢𑀺𑀲𑀻𑀫𑀁 𑀕𑀦𑁆𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀯𑀫𑁆𑀧𑀻𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸 𑀲𑁄 𑀕𑀺𑀚𑁆𑀛𑁄, 𑀏𑀯𑀁 𑀬𑁄 𑀅𑀜𑁆𑀜𑁄𑀧𑀺 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀳𑀺𑀢𑀸𑀦𑀼𑀓𑀫𑁆𑀧𑀓𑀸𑀦𑀁 𑀯𑀼𑀤𑁆𑀥𑀸𑀦𑀁 𑀯𑀘𑀦𑀁 𑀦 𑀕𑀡𑁆𑀳𑀸𑀢𑀺, 𑀲𑁄𑀧𑀺 𑀅𑀬𑀁 𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀦𑁆𑀢𑁄 𑀤𑀺𑀢𑁆𑀢𑁄 𑀕𑀩𑁆𑀩𑀺𑀢𑁄 𑀕𑀺𑀚𑁆𑀛𑁄𑀯 𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀕𑀸𑀮𑁄𑀧𑁄 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀅𑀧𑀦𑀦𑁆𑀤𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀕𑀸𑀮𑁄𑀧𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁮𑁨] 𑁭. 𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀯𑀡𑁆𑀡𑀦𑀸

𑀓𑀸 ¶ 𑀦𑀼 𑀓𑀸𑀴𑁂𑀦 𑀯𑀡𑁆𑀡𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀔𑀡𑁆𑀟𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺, 𑀪𑀭𑀺𑀬𑀸𑀧𑀺𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄𑀧𑀺 𑀤𑀸𑀲𑀸𑀧𑀺 𑀪𑀢𑀺𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀓𑀫𑁆𑀫𑀓𑀭𑀸𑀧𑀺 𑀲𑀩𑁆𑀩𑁂 𑀭𑀓𑁆𑀔𑀺𑀁𑀲𑀼𑀬𑁂𑀯. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑀼𑀘𑀺𑀬𑁂𑀯 𑀲𑀼𑀘𑀺𑀧𑀭𑀺𑀯𑀸𑀭𑁄 𑀳𑀼𑀢𑁆𑀯𑀸 𑀘𑀭𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 ¶ 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀲𑀼𑀘𑀻𑀬𑁂𑀯 𑀲𑀼𑀘𑀺𑀧𑀭𑀺𑀯𑀸𑀭𑀸 𑀅𑀳𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺, 𑀲𑀻𑀮𑀁 𑀭𑀓𑁆𑀔𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺, 𑀪𑀭𑀺𑀬𑀸𑀧𑀺𑀲𑁆𑀲 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺, 𑀧𑀼𑀢𑁆𑀢𑀥𑀻𑀢𑀭𑁄𑀧𑀺 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸𑀧𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼. 𑀲𑁄 𑀲𑀼𑀘𑀺𑀧𑀭𑀺𑀯𑀸𑀭𑀲𑁂𑀝𑁆𑀞𑀺𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀫𑀬𑀸 𑀲𑀼𑀘𑀺𑀧𑀭𑀺𑀯𑀸𑀭𑀲𑀻𑀮𑁄 𑀓𑁄𑀘𑀺 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲 𑀫𑀫 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑀁 𑀯𑀸 𑀦𑀺𑀧𑀚𑁆𑀚𑀦𑀲𑀬𑀦𑀁 𑀯𑀸 𑀤𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀅𑀦𑀼𑀘𑁆𑀙𑀺𑀝𑁆𑀞𑀁 𑀅𑀧𑀭𑀺𑀪𑀼𑀢𑁆𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀏𑀓𑀧𑀲𑁆𑀲𑁂 𑀅𑀧𑀭𑀺𑀪𑀼𑀢𑁆𑀢𑀧𑀮𑁆𑀮𑀗𑁆𑀓𑀜𑁆𑀘 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀢𑁄 𑀯𑀺𑀭𑀽𑀧𑀓𑁆𑀔𑀫𑀳𑀸𑀭𑀸𑀚𑀲𑁆𑀲 𑀥𑀻𑀢𑀸 𑀓𑀸𑀴𑀓𑀡𑁆𑀡𑀻 𑀘 𑀦𑀸𑀫 𑀥𑀢𑀭𑀝𑁆𑀞𑀫𑀳𑀸𑀭𑀸𑀚𑀲𑁆𑀲 𑀥𑀻𑀢𑀸 𑀲𑀺𑀭𑀻 𑀘 𑀦𑀸𑀫𑀸𑀢𑀺 𑀇𑀫𑀸 𑀤𑁆𑀯𑁂 𑀩𑀳𑀼𑀁 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 ‘‘𑀅𑀦𑁄𑀢𑀢𑁆𑀢𑁂 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀅𑀦𑁄𑀢𑀢𑁆𑀢𑀢𑀺𑀢𑁆𑀣𑀁 𑀆𑀕𑀘𑁆𑀙𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀤𑀳𑁂 𑀩𑀳𑀽𑀦𑀺 𑀢𑀺𑀢𑁆𑀣𑀸𑀦𑀺, 𑀢𑁂𑀲𑀼 𑀩𑀼𑀤𑁆𑀥𑀸𑀦𑀁 𑀢𑀺𑀢𑁆𑀣𑁂 𑀩𑀼𑀤𑁆𑀥𑀸𑀬𑁂𑀯 𑀦𑁆𑀳𑀸𑀬𑀦𑁆𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑀺𑀢𑁆𑀣𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀯 𑀦𑁆𑀳𑀸𑀬𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 ¶ 𑀢𑀺𑀢𑁆𑀣𑁂 𑀪𑀺𑀓𑁆𑀔𑀽𑀯 𑀦𑁆𑀳𑀸𑀬𑀦𑁆𑀢𑀺, 𑀢𑀸𑀧𑀲𑀸𑀦𑀁 𑀢𑀺𑀢𑁆𑀣𑁂 𑀢𑀸𑀧𑀲𑀸𑀯 𑀦𑁆𑀳𑀸𑀬𑀦𑁆𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀤𑁂𑀯𑀧𑀼𑀢𑁆𑀢𑀸𑀦𑀁 𑀢𑀺𑀢𑁆𑀣𑁂 𑀤𑁂𑀯𑀧𑀼𑀢𑁆𑀢𑀸𑀯 𑀦𑁆𑀳𑀸𑀬𑀦𑁆𑀢𑀺, 𑀤𑁂𑀯𑀥𑀻𑀢𑀸𑀦𑀁 𑀢𑀺𑀢𑁆𑀣𑁂 𑀤𑁂𑀯𑀥𑀻𑀢𑀸𑀯 𑀦𑁆𑀳𑀸𑀬𑀦𑁆𑀢𑀺.

𑀢𑀢𑁆𑀭𑀺𑀫𑀸 𑀤𑁆𑀯𑁂 𑀆𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀧𑀞𑀫𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀺, 𑀅𑀳𑀁 𑀧𑀞𑀫’’𑀦𑁆𑀢𑀺 𑀢𑀺𑀢𑁆𑀣𑀸𑀬 𑀓𑀮𑀳𑀁 𑀓𑀭𑀺𑀁𑀲𑀼. 𑀓𑀸𑀴𑀓𑀡𑁆𑀡𑀻 ‘‘𑀅𑀳𑀁 𑀮𑁄𑀓𑀁 𑀧𑀸𑀮𑁂𑀫𑀺 𑀯𑀺𑀘𑀸𑀭𑁂𑀫𑀺, 𑀢𑀲𑁆𑀫𑀸 𑀧𑀞𑀫𑀁 𑀦𑀸𑀬𑀺𑀢𑀼𑀁 𑀬𑀼𑀢𑁆𑀢𑀸𑀫𑁆𑀳𑀻’’𑀢𑀺 𑀯𑀤𑀢𑀺. 𑀲𑀺𑀭𑀻 ‘‘𑀅𑀳𑀁 𑀫𑀳𑀸𑀚𑀦𑀲𑁆𑀲 𑀇𑀲𑁆𑀲𑀭𑀺𑀬𑀤𑀸𑀬𑀺𑀓𑀸𑀬 𑀧𑀝𑀺𑀧𑀤𑀸𑀬 𑀞𑀺𑀢𑀸, 𑀢𑀲𑁆𑀫𑀸 𑀧𑀞𑀫𑀁 𑀦𑁆𑀳𑀸𑀬𑀺𑀢𑀼𑀁 𑀬𑀼𑀢𑁆𑀢𑀸𑀫𑁆𑀳𑀻’’𑀢𑀺 𑀯𑀤𑀢𑀺. 𑀢𑀸 ‘‘𑀅𑀫𑁆𑀳𑁂𑀲𑀼 𑀧𑀞𑀫𑀁 𑀦𑁆𑀳𑀸𑀬𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀯𑀸 𑀅𑀬𑀼𑀢𑁆𑀢𑀭𑀽𑀧𑀁 𑀯𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑁂𑀲𑀼 𑀓𑀸 𑀧𑀞𑀫𑀁 𑀅𑀦𑁄𑀢𑀢𑁆𑀢𑀤𑀳𑁂 𑀦𑁆𑀳𑀸𑀬𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀥𑀢𑀭𑀝𑁆𑀞𑀯𑀺𑀭𑀽𑀧𑀓𑁆𑀔𑀸 ‘‘𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀼’’𑀦𑁆𑀢𑀺 𑀯𑀺𑀭𑀽𑀴𑁆𑀳𑀓𑀯𑁂𑀲𑁆𑀲𑀯𑀡𑀸𑀦𑀁 𑀪𑀸𑀭𑀫𑀓𑀁𑀲𑀼. 𑀢𑁂 ‘‘𑀅𑀫𑁆𑀳𑁂𑀧𑀺 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀲𑀓𑁆𑀓𑀲𑁆𑀲 𑀧𑀸𑀤𑀫𑀽𑀮𑁂 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺 𑀢𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀼𑀁. 𑀲𑀓𑁆𑀓𑁄 𑀢𑀸𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸 𑀤𑁆𑀯𑁂𑀧𑀺 𑀫𑀫 𑀧𑀼𑀭𑀺𑀲𑀸𑀦𑀜𑁆𑀜𑁂𑀯 𑀥𑀻𑀢𑀭𑁄, 𑀦 𑀲𑀓𑁆𑀓𑀸 𑀫𑀬𑀸 𑀇𑀫𑀁 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼’’𑀦𑁆𑀢𑀺. 𑀅𑀣 𑀢𑀸 𑀲𑀓𑁆𑀓𑁄 𑀆𑀳 ‘‘𑀩𑀸𑀭𑀸𑀡𑀲𑀺𑀬𑀁 𑀲𑀼𑀘𑀺𑀧𑀭𑀺𑀯𑀸𑀭𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀢𑁆𑀣𑀺, 𑀢𑀲𑁆𑀲 𑀖𑀭𑁂 𑀅𑀦𑀼𑀘𑁆𑀙𑀺𑀝𑁆𑀞𑀲𑀬𑀦𑀜𑁆𑀘 𑀧𑀜𑁆𑀜𑀢𑁆𑀢𑀁, 𑀬𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀲𑀬𑀺𑀢𑀼𑀁 𑀯𑀸 𑀮𑀪𑀢𑀺, 𑀲𑀸 𑀧𑀞𑀫𑀁 𑀦𑁆𑀳𑀸𑀬𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀓𑀸𑀴𑀓𑀡𑁆𑀡𑀻 𑀢𑀲𑁆𑀫𑀺𑀁 𑀔𑀡𑁂𑀬𑁂𑀯 ¶ 𑀦𑀻𑀮𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑀻𑀮𑀯𑀺𑀮𑁂𑀧𑀦𑀁 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀦𑀻𑀮𑀫𑀡𑀺𑀧𑀺𑀴𑀦𑁆𑀥𑀦𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀬𑀦𑁆𑀢𑀧𑀸𑀲𑀸𑀡𑁄 𑀯𑀺𑀬 𑀤𑁂𑀯𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑁂𑀝𑁆𑀞𑀺𑀦𑁄 ¶ 𑀧𑀸𑀲𑀸𑀤𑀲𑁆𑀲 𑀉𑀧𑀝𑁆𑀞𑀸𑀦𑀤𑁆𑀯𑀸𑀭𑁂 𑀲𑀬𑀦𑀲𑁆𑀲 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀦𑀻𑀮𑀭𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀲𑁂𑀝𑁆𑀞𑀺 𑀑𑀮𑁄𑀓𑁂𑀢𑁆𑀯𑀸 ¶ 𑀢𑀁 𑀅𑀤𑁆𑀤𑀲, 𑀲𑀳𑀤𑀲𑁆𑀲𑀦𑁂𑀦𑁂𑀯𑀲𑁆𑀲 𑀲𑀸 𑀅𑀧𑁆𑀧𑀺𑀬𑀸 𑀅𑀳𑁄𑀲𑀺 𑀅𑀫𑀦𑀸𑀧𑀸. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁦.

‘‘𑀓𑀸 𑀦𑀼 𑀓𑀸𑀴𑁂𑀦 𑀯𑀡𑁆𑀡𑁂𑀦, 𑀦 𑀘𑀸𑀧𑀺 𑀧𑀺𑀬𑀤𑀲𑁆𑀲𑀦𑀸;

𑀓𑀸 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀥𑀻𑀢𑀸, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

𑀢𑀢𑁆𑀣 𑀓𑀸𑀴𑁂𑀦𑀸𑀢𑀺 𑀦𑀻𑀮𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀲𑀭𑀻𑀭𑀯𑀢𑁆𑀣𑀸𑀪𑀭𑀡𑀯𑀡𑁆𑀡𑁂𑀦. 𑀦 𑀘𑀸𑀧𑀺 𑀧𑀺𑀬𑀤𑀲𑁆𑀲𑀦𑀸𑀢𑀺 𑀥𑀸𑀢𑀼𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀅𑀬𑀜𑁆𑀘 𑀤𑁂𑀯𑀥𑀻𑀢𑀸 𑀅𑀦𑀸𑀘𑀸𑀭𑀸 𑀤𑀼𑀲𑁆𑀲𑀻𑀮𑀸, 𑀢𑀲𑁆𑀫𑀸 𑀲𑀸 𑀲𑀳𑀤𑀲𑁆𑀲𑀦𑁂𑀦𑁂𑀯𑀲𑁆𑀲 𑀅𑀧𑁆𑀧𑀺𑀬𑀸 𑀚𑀸𑀢𑀸, 𑀢𑁂𑀦𑁂𑀯𑀫𑀸𑀳. 𑀓𑀸 𑀯𑀸 𑀢𑁆𑀯𑀦𑁆𑀢𑀺 ‘‘𑀓𑀸 𑀘 𑀢𑁆𑀯𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀓𑀸𑀴𑀓𑀡𑁆𑀡𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁧.

‘‘𑀫𑀳𑀸𑀭𑀸𑀚𑀲𑁆𑀲𑀳𑀁 𑀥𑀻𑀢𑀸, 𑀯𑀺𑀭𑀽𑀧𑀓𑁆𑀔𑀲𑁆𑀲 𑀘𑀡𑁆𑀟𑀺𑀬𑀸;

𑀅𑀳𑀁 𑀓𑀸𑀴𑀻 𑀅𑀮𑀓𑁆𑀔𑀺𑀓𑀸, 𑀓𑀸𑀴𑀓𑀡𑁆𑀡𑀻𑀢𑀺 𑀫𑀁 𑀯𑀺𑀤𑀽;

𑀑𑀓𑀸𑀲𑀁 𑀬𑀸𑀘𑀺𑀢𑁄 𑀤𑁂𑀳𑀺, 𑀯𑀲𑁂𑀫𑀼 𑀢𑀯 𑀲𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀘𑀡𑁆𑀟𑀺𑀬𑀸𑀢𑀺 𑀓𑁄𑀥𑀦𑀸. 𑀓𑁄𑀥𑀪𑀸𑀯𑁂𑀦 𑀳𑀺 𑀫𑀬𑁆𑀳𑀁 𑀘𑀡𑁆𑀟𑀻𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀮𑀓𑁆𑀔𑀺𑀓𑀸𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀫𑀁 𑀯𑀺𑀤𑀽𑀢𑀺 𑀏𑀯𑀁 𑀫𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂 𑀚𑀸𑀦𑀦𑁆𑀢𑀺. 𑀯𑀲𑁂𑀫𑀽𑀢𑀺 𑀫𑀬𑀁 𑀅𑀚𑁆𑀚 𑀏𑀓𑀭𑀢𑁆𑀢𑀁 𑀢𑀯 𑀲𑀦𑁆𑀢𑀺𑀓𑁂 𑀯𑀲𑁂𑀬𑁆𑀬𑀸𑀫, 𑀏𑀢𑀲𑁆𑀫𑀺𑀁 𑀫𑁂 𑀅𑀦𑀼𑀘𑁆𑀙𑀺𑀝𑁆𑀞𑀸𑀲𑀦𑀲𑀬𑀦𑁂 𑀑𑀓𑀸𑀲𑀁 𑀤𑁂𑀳𑀻𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁨.

‘‘𑀓𑀺𑀁𑀲𑀻𑀮𑁂 𑀓𑀺𑀁𑀲𑀫𑀸𑀘𑀸𑀭𑁂, 𑀧𑀼𑀭𑀺𑀲𑁂 𑀦𑀺𑀯𑀺𑀲𑀲𑁂 𑀢𑀼𑀯𑀁;

𑀧𑀼𑀝𑁆𑀞𑀸 𑀫𑁂 𑀓𑀸𑀴𑀺 𑀅𑀓𑁆𑀔𑀸𑀳𑀺, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

𑀢𑀢𑁆𑀣 𑀦𑀺𑀯𑀺𑀲𑀲𑁂𑀢𑀺 𑀢𑀯 𑀘𑀺𑀢𑁆𑀢𑁂𑀦 𑀦𑀺𑀯𑀺𑀲𑀲𑀺 𑀧𑀢𑀺𑀝𑁆𑀞𑀳𑀲𑀻𑀢𑀺.

𑀢𑀢𑁄 ¶ 𑀲𑀸 𑀅𑀢𑁆𑀢𑀦𑁄 𑀕𑀼𑀡𑀁 𑀓𑀣𑁂𑀦𑁆𑀢𑀻 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁩.

‘‘𑀫𑀓𑁆𑀔𑀻 ¶ 𑀧𑀴𑀸𑀲𑀻 𑀲𑀸𑀭𑀫𑁆𑀪𑀻, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑁄;

𑀲𑁄 𑀫𑀬𑁆𑀳𑀁 𑀧𑀼𑀭𑀺𑀲𑁄 𑀓𑀦𑁆𑀢𑁄, 𑀮𑀤𑁆𑀥𑀁 𑀬𑀲𑁆𑀲 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀓𑀢𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀕𑀼𑀡𑀫𑀓𑁆𑀔𑀻 𑀳𑁄𑀢𑀺, 𑀅𑀢𑁆𑀢𑀦𑁄 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀭𑀡𑁂 𑀓𑀣𑀺𑀢𑁂 ‘‘𑀓𑀺𑀁 𑀅𑀳𑀁 𑀏𑀢𑀁 𑀦 𑀚𑀸𑀦𑀸𑀫𑀻’’𑀢𑀺 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺 ¶ , 𑀅𑀜𑁆𑀜𑁂𑀳𑀺 𑀓𑀺𑀜𑁆𑀘𑀺 𑀓𑀢𑀁 𑀤𑀺𑀲𑁆𑀯𑀸 𑀲𑀸𑀭𑀫𑁆𑀪𑀯𑀲𑁂𑀦 𑀓𑀭𑀡𑀼𑀢𑁆𑀢𑀭𑀺𑀓𑀁 𑀓𑀭𑁄𑀢𑀺, 𑀧𑀭𑁂 𑀮𑀸𑀪𑀁 𑀮𑀪𑀦𑁆𑀢𑁂 𑀦 𑀢𑀼𑀲𑁆𑀲𑀢𑀺, ‘‘𑀫𑀬𑁆𑀳𑀁 𑀇𑀲𑁆𑀲𑀭𑀺𑀬𑀁 𑀧𑀭𑁂𑀲𑀁 𑀫𑀸 𑀳𑁄𑀢𑀼, 𑀫𑀬𑁆𑀳𑀫𑁂𑀯 𑀳𑁄𑀢𑀽’’𑀢𑀺 𑀲𑀓𑀲𑀫𑁆𑀧𑀢𑁆𑀢𑀺𑀁 𑀕𑁄𑀧𑁂𑀢𑁆𑀯𑀸 𑀧𑀭𑀲𑁆𑀲 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀦 𑀤𑁂𑀢𑀺, 𑀓𑁂𑀭𑀸𑀝𑀺𑀓𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀲𑁆𑀲 𑀅𑀤𑀢𑁆𑀯𑀸 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑀲𑀦𑁆𑀢𑀓𑀫𑁂𑀯 𑀔𑀸𑀤𑀢𑀺, 𑀬𑀲𑁆𑀲 𑀮𑀤𑁆𑀥𑀁 𑀥𑀜𑁆𑀜𑀁 𑀯𑀸 𑀥𑀦𑀁 𑀯𑀸 𑀯𑀺𑀦𑀲𑁆𑀲𑀢𑀺 𑀦 𑀢𑀺𑀝𑁆𑀞𑀢𑀺, 𑀲𑀼𑀭𑀸𑀥𑀼𑀢𑁆𑀢𑁄 𑀅𑀓𑁆𑀔𑀥𑀼𑀢𑁆𑀢𑁄 𑀇𑀢𑁆𑀣𑀺𑀥𑀼𑀢𑁆𑀢𑁄 𑀯𑀸 𑀳𑀼𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀸𑀲𑁂𑀢𑀺𑀬𑁂𑀯, 𑀅𑀬𑀁 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀭𑀺𑀲𑁄 𑀫𑀬𑁆𑀳𑀁 𑀓𑀦𑁆𑀢𑁄 𑀧𑀺𑀬𑁄 𑀫𑀦𑀸𑀧𑁄, 𑀏𑀯𑀭𑀽𑀧𑁂 𑀅𑀳𑀁 𑀘𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀳𑀸𑀫𑀻𑀢𑀺.

𑀲𑀸𑀬𑁂𑀯 𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁪.

‘‘𑀓𑁄𑀥𑀦𑁄 𑀉𑀧𑀦𑀸𑀳𑀻 𑀘, 𑀧𑀺𑀲𑀼𑀡𑁄 𑀘 𑀯𑀺𑀪𑁂𑀤𑀓𑁄;

𑀓𑀡𑁆𑀟𑀓𑀯𑀸𑀘𑁄 𑀨𑀭𑀼𑀲𑁄, 𑀲𑁄 𑀫𑁂 𑀓𑀦𑁆𑀢𑀢𑀭𑁄 𑀢𑀢𑁄.

𑁪𑁫.

‘‘𑀅𑀚𑁆𑀚 𑀲𑀼𑀯𑁂𑀢𑀺 𑀧𑀼𑀭𑀺𑀲𑁄, 𑀲𑀤𑀢𑁆𑀣𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀑𑀯𑀚𑁆𑀚𑀫𑀸𑀦𑁄 𑀓𑀼𑀧𑁆𑀧𑀢𑀺, 𑀲𑁂𑀬𑁆𑀬𑀁 𑀲𑁄 𑀅𑀢𑀺𑀫𑀜𑁆𑀜𑀢𑀺.

𑁪𑁬.

‘‘𑀤𑀯𑀧𑁆𑀧𑀮𑀼𑀤𑁆𑀥𑁄 𑀧𑀼𑀭𑀺𑀲𑁄, 𑀲𑀩𑁆𑀩𑀫𑀺𑀢𑁆𑀢𑁂𑀳𑀺 𑀥𑀁𑀲𑀢𑀺;

𑀲𑁄 𑀫𑀬𑁆𑀳𑀁 𑀧𑀼𑀭𑀺𑀲𑁄 𑀓𑀦𑁆𑀢𑁄, 𑀢𑀲𑁆𑀫𑀺𑀁 𑀳𑁄𑀫𑀺 𑀅𑀦𑀸𑀫𑀬𑀸’’𑀢𑀺.

𑀢𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸. 𑀲𑀗𑁆𑀔𑁂𑀧𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀓𑁄𑀥𑀦𑁄𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀦𑀸𑀧𑀺 𑀓𑀼𑀚𑁆𑀛𑀦𑀓𑁄. 𑀉𑀧𑀦𑀸𑀳𑀻𑀢𑀺 𑀧𑀭𑀲𑁆𑀲 𑀅𑀧𑀭𑀸𑀥𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀲𑀼𑀘𑀺𑀭𑁂𑀦𑀧𑀺 𑀢𑀲𑁆𑀲 𑀅𑀦𑀢𑁆𑀣𑀓𑀸𑀭𑀓𑁄. 𑀧𑀺𑀲𑀼𑀡𑁄𑀢𑀺 𑀧𑀺𑀲𑀼𑀡𑀯𑀸𑀘𑁄. 𑀯𑀺𑀪𑁂𑀤𑀓𑁄𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀫𑀺𑀢𑁆𑀢𑀪𑀺𑀦𑁆𑀤𑀦𑀓𑁄. 𑀓𑀡𑁆𑀟𑀓𑀯𑀸𑀘𑁄𑀢𑀺 𑀲𑀤𑁄𑀲𑀯𑀸𑀘𑁄. 𑀨𑀭𑀼𑀲𑁄𑀢𑀺 𑀣𑀤𑁆𑀥𑀯𑀸𑀘𑁄. 𑀓𑀦𑁆𑀢𑀢𑀭𑁄𑀢𑀺 𑀲𑁄 𑀧𑀼𑀭𑀺𑀲𑁄 𑀫𑀬𑁆𑀳𑀁 𑀧𑀼𑀭𑀺𑀫𑀸𑀧𑀺 𑀓𑀦𑁆𑀢𑀢𑀭𑁄 𑀧𑀺𑀬𑀢𑀭𑁄. 𑀅𑀚𑁆𑀚 𑀲𑀼𑀯𑁂𑀢𑀺 ‘‘𑀇𑀤𑀁 𑀓𑀫𑁆𑀫𑀁 𑀅𑀚𑁆𑀚 𑀓𑀸𑀢𑀩𑁆𑀩𑀁, 𑀇𑀤𑀁 𑀲𑁆𑀯𑁂 ¶ , 𑀇𑀤𑀁 𑀢𑀢𑀺𑀬𑀤𑀺𑀯𑀲𑀸𑀤𑀻𑀲𑀽’’𑀢𑀺 𑀏𑀯𑀁 𑀲𑁄 𑀲𑀤𑀢𑁆𑀣𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀦𑀸𑀯𑀩𑀼𑀚𑁆𑀛𑀢𑀺 𑀦 𑀚𑀸𑀦𑀸𑀢𑀺. 𑀑𑀯𑀚𑁆𑀚𑀫𑀸𑀦𑁄𑀢𑀺 𑀑𑀯𑀤𑀺𑀬𑀫𑀸𑀦𑁄. 𑀲𑁂𑀬𑁆𑀬𑀁 𑀲𑁄 𑀅𑀢𑀺𑀫𑀜𑁆𑀜𑀢𑀻𑀢𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑁆𑀧𑀤𑁂𑀲𑀲𑀻𑀮𑀸𑀘𑀸𑀭𑀕𑀼𑀡𑁂𑀳𑀺 𑀉𑀢𑁆𑀢𑀭𑀺𑀢𑀭𑀁 𑀉𑀢𑁆𑀢𑀫𑀧𑀼𑀕𑁆𑀕𑀮𑀁 ‘‘𑀢𑁆𑀯𑀁 𑀫𑀬𑁆𑀳𑀁 ¶ 𑀓𑀺𑀁 𑀧𑀳𑁄𑀲𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺. 𑀤𑀯𑀧𑁆𑀧𑀮𑀼𑀤𑁆𑀥𑁄𑀢𑀺 𑀭𑀽𑀧𑀸𑀤𑀻𑀲𑀼 𑀓𑀸𑀫𑀕𑀼𑀡𑁂𑀲𑀼 𑀦𑀺𑀭𑀦𑁆𑀢𑀭𑀤𑀯𑁂𑀦 𑀧𑀮𑀼𑀤𑁆𑀥𑁄 𑀅𑀪𑀺𑀪𑀽𑀢𑁄 𑀯𑀲𑀁 𑀕𑀢𑁄. 𑀥𑀁𑀲𑀢𑀻𑀢𑀺 ‘‘𑀢𑀬𑀸 𑀫𑀬𑁆𑀳𑀁 𑀓𑀺𑀁 𑀓𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀩𑁆𑀩𑁂𑀳𑁂𑀯 𑀫𑀺𑀢𑁆𑀢𑁂𑀳𑀺 𑀥𑀁𑀲𑀢𑀺 𑀧𑀭𑀺𑀳𑀸𑀬𑀢𑀺. 𑀅𑀦𑀸𑀫𑀬𑀸𑀢𑀺 𑀅𑀬𑀁 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀧𑀼𑀕𑁆𑀕𑀮𑁂 𑀦𑀺𑀤𑁆𑀤𑀼𑀓𑁆𑀔𑀸 𑀦𑀺𑀲𑁆𑀲𑁄𑀓𑀸 𑀳𑁄𑀫𑀺, 𑀢𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀸𑀮𑀬𑀸 𑀳𑀼𑀢𑁆𑀯𑀸 𑀯𑀲𑀸𑀫𑀻’’𑀢𑀺.

𑀅𑀣 ¶ 𑀦𑀁 𑀕𑀭𑀳𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀅𑀧𑁂𑀳𑀺 𑀏𑀢𑁆𑀢𑁄 𑀢𑁆𑀯𑀁 𑀓𑀸𑀴𑀺, 𑀦𑁂𑀢𑀁 𑀅𑀫𑁆𑀳𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀜𑁆𑀜𑀁 𑀚𑀦𑀧𑀤𑀁 𑀕𑀘𑁆𑀙, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄’’𑀢𑀺.

𑀢𑀢𑁆𑀣 𑀅𑀧𑁂𑀳𑀻𑀢𑀺 𑀅𑀧𑀕𑀘𑁆𑀙. 𑀦𑁂𑀢𑀁 𑀅𑀫𑁆𑀳𑁂𑀲𑀽𑀢𑀺 𑀏𑀢𑀁 𑀫𑀓𑁆𑀔𑀸𑀤𑀺𑀓𑀁 𑀢𑀯 𑀧𑀺𑀬𑀪𑀸𑀯𑀓𑀭𑀡𑀁 𑀅𑀫𑁆𑀳𑁂𑀲𑀼𑀧𑀺 𑀦 𑀯𑀺𑀚𑁆𑀚𑀢𑀺 𑀦𑀢𑁆𑀣𑀺. 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄𑀢𑀺 𑀅𑀜𑁆𑀜𑁂 𑀦𑀺𑀕𑀫𑁂𑀧𑀺 𑀅𑀜𑁆𑀜𑀸 𑀭𑀸𑀚𑀥𑀸𑀦𑀺𑀬𑁄𑀧𑀺 𑀕𑀘𑁆𑀙, 𑀬𑀢𑁆𑀣 𑀫𑀬𑀁 𑀢𑀁 𑀦 𑀧𑀲𑁆𑀲𑀸𑀫, 𑀢𑀢𑁆𑀣 𑀕𑀘𑁆𑀙𑀸𑀢𑀺 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀸𑀴𑀓𑀡𑁆𑀡𑀻 𑀅𑀤𑁆𑀤𑀺𑀢𑀸 𑀳𑀼𑀢𑁆𑀯𑀸 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁪𑁮.

‘‘𑀅𑀳𑀫𑁆𑀧𑀺 𑀔𑁄 𑀢𑀁 𑀚𑀸𑀦𑀸𑀫𑀺, 𑀦𑁂𑀢𑀁 𑀢𑀼𑀫𑁆𑀳𑁂𑀲𑀼 𑀯𑀺𑀚𑁆𑀚𑀢𑀺;

𑀲𑀦𑁆𑀢𑀺 𑀮𑁄𑀓𑁂 𑀅𑀮𑀓𑁆𑀔𑀺𑀓𑀸, 𑀲𑀗𑁆𑀖𑀭𑀦𑁆𑀢𑀺 𑀩𑀳𑀼𑀁 𑀥𑀦𑀁;

𑀅𑀳𑀁 𑀤𑁂𑀯𑁄 𑀘 𑀫𑁂 𑀪𑀸𑀢𑀸, 𑀉𑀪𑁄 𑀦𑀁 𑀯𑀺𑀥𑀫𑀸𑀫𑀲𑁂’’𑀢𑀺.

𑀢𑀢𑁆𑀣 𑀦𑁂𑀢𑀁 𑀢𑀼𑀫𑁆𑀳𑁂𑀲𑀽𑀢𑀺 𑀬𑀁 𑀫𑀫 𑀧𑀺𑀬𑀪𑀸𑀯𑀓𑀭𑀡𑀁 𑀫𑀓𑁆𑀔𑀸𑀤𑀺𑀓𑀁 𑀬𑁂𑀦 𑀅𑀳𑀁 𑀅𑀢𑁆𑀢𑀦𑀸𑀧𑀺 𑀲𑀫𑀦𑁆𑀦𑀸𑀕𑀢𑀸, 𑀢𑀁 𑀢𑀼𑀫𑁆𑀳𑁂𑀲𑀼 𑀦𑀢𑁆𑀣𑀻𑀢𑀺 𑀅𑀳𑀫𑁆𑀧𑀺 𑀏𑀢𑀁 𑀚𑀸𑀦𑀸𑀫𑀺. 𑀲𑀦𑁆𑀢𑀺 𑀮𑁄𑀓𑁂 𑀅𑀮𑀓𑁆𑀔𑀺𑀓𑀸𑀢𑀺 𑀅𑀜𑁆𑀜𑁂 𑀧𑀦 𑀮𑁄𑀓𑁂 𑀦𑀺𑀲𑁆𑀲𑀻𑀮𑀸 𑀦𑀺𑀧𑁆𑀧𑀜𑁆𑀜𑀸 𑀲𑀦𑁆𑀢𑀺. 𑀲𑀗𑁆𑀖𑀭𑀦𑁆𑀢𑀻𑀢𑀺 𑀢𑁂 𑀦𑀺𑀲𑁆𑀲𑀻𑀮𑀸 𑀦𑀺𑀧𑁆𑀧𑀜𑁆𑀜𑀸𑀧𑀺 𑀲𑀫𑀸𑀦𑀸 𑀏𑀢𑁂𑀳𑀺 𑀫𑀓𑁆𑀔𑀸𑀤𑀻𑀳𑀺 𑀩𑀳𑀼𑀁 𑀥𑀦𑀁 𑀲𑀗𑁆𑀖𑀭𑀦𑁆𑀢𑀺 𑀧𑀺𑀡𑁆𑀟𑀁 𑀓𑀭𑁄𑀦𑁆𑀢𑀺. 𑀉𑀪𑁄 𑀦𑀦𑁆𑀢𑀺 𑀢𑀁 𑀧𑀦 𑀏𑀢𑁂𑀳𑀺 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑀺𑀢𑀁 𑀥𑀦𑀁 𑀅𑀳𑀜𑁆𑀘 𑀫𑀬𑁆𑀳𑀫𑁂𑀯 𑀪𑀸𑀢𑀸 𑀤𑁂𑀯𑁄 𑀘 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄𑀢𑀺 𑀉𑀪𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀯𑀺𑀥𑀫𑀸𑀫𑀲𑁂 𑀦𑀸𑀲𑁂𑀫, 𑀅𑀫𑁆𑀳𑀸𑀓𑀁 𑀧𑀦 𑀤𑁂𑀯𑀮𑁄𑀓𑁂 𑀩𑀳𑀽 𑀤𑀺𑀩𑁆𑀩𑀧𑀭𑀺𑀪𑁄𑀕𑀸 ¶ 𑀅𑀢𑁆𑀣𑀺 𑀤𑀺𑀩𑁆𑀩𑀸𑀦𑀺 𑀲𑀬𑀦𑀸𑀦𑀺, 𑀢𑁆𑀯𑀁 𑀤𑀤𑁂𑀬𑁆𑀬𑀸𑀲𑀺 𑀯𑀸 𑀦𑁄 𑀯𑀸, 𑀓𑁄 𑀫𑁂 𑀢𑀬𑀸 𑀅𑀢𑁆𑀣𑁄𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀲𑁆𑀲𑀸 𑀧𑀓𑁆𑀓𑀦𑁆𑀢𑀓𑀸𑀮𑁂 𑀲𑀺𑀭𑀻 𑀤𑁂𑀯𑀥𑀻𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑁂𑀳𑀺 𑀯𑀢𑁆𑀣𑀯𑀺𑀮𑁂𑀧𑀦𑁂𑀳𑀺 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀦 𑀆𑀕𑀦𑁆𑀢𑁆𑀯𑀸 ¶ 𑀉𑀧𑀝𑁆𑀞𑀸𑀦𑀤𑁆𑀯𑀸𑀭𑁂 𑀧𑀻𑀢𑀭𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀲𑀫𑀁 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀕𑀸𑀭𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀓𑀸 𑀦𑀼 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦, 𑀧𑀣𑀩𑁆𑀬𑀸 𑀲𑀼𑀧𑀢𑀺𑀝𑁆𑀞𑀺𑀢𑀸;

𑀓𑀸 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀥𑀻𑀢𑀸, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

𑀢𑀢𑁆𑀣 ¶ 𑀤𑀺𑀩𑁆𑀩𑁂𑀦𑀸𑀢𑀺 𑀯𑀺𑀲𑀺𑀝𑁆𑀞𑁂𑀦 𑀉𑀢𑁆𑀢𑀫𑁂𑀦.

𑀢𑀁 𑀲𑀼𑀢𑁆𑀯𑀸 𑀲𑀺𑀭𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀫𑀳𑀸𑀭𑀸𑀚𑀲𑁆𑀲𑀳𑀁 𑀥𑀻𑀢𑀸, 𑀥𑀢𑀭𑀝𑁆𑀞𑀲𑁆𑀲 𑀲𑀺𑀭𑀻𑀫𑀢𑁄;

𑀅𑀳𑀁 𑀲𑀺𑀭𑀻 𑀘 𑀮𑀓𑁆𑀔𑀻 𑀘, 𑀪𑀽𑀭𑀺𑀧𑀜𑁆𑀜𑀸𑀢𑀺 𑀫𑀁 𑀯𑀺𑀤𑀽;

𑀑𑀓𑀸𑀲𑀁 𑀬𑀸𑀘𑀺𑀢𑁄 𑀤𑁂𑀳𑀺, 𑀯𑀲𑁂𑀫𑀼 𑀢𑀯 𑀲𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 𑀲𑀺𑀭𑀻 𑀘 𑀮𑀓𑁆𑀔𑀻 𑀘𑀸𑀢𑀺 𑀲𑀺𑀭𑀻𑀢𑀺 𑀘 𑀮𑀓𑁆𑀔𑀻𑀢𑀺 𑀘 𑀅𑀳𑀫𑁂𑀯𑀁𑀦𑀸𑀫𑀸, 𑀦 𑀅𑀜𑁆𑀜𑀸. 𑀪𑀽𑀭𑀺𑀧𑀜𑁆𑀜𑀸𑀢𑀺 𑀫𑀁 𑀯𑀺𑀤𑀽𑀢𑀺 𑀫𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂 𑀧𑀣𑀯𑀻𑀲𑀫𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀚𑀸𑀦𑀦𑁆𑀢𑀺. 𑀯𑀲𑁂𑀫𑀼 𑀢𑀯 𑀲𑀦𑁆𑀢𑀺𑀓𑁂𑀢𑀺 𑀢𑀯 𑀅𑀦𑀼𑀘𑁆𑀙𑀺𑀝𑁆𑀞𑀸𑀲𑀦𑁂 𑀘𑁂𑀯 𑀅𑀦𑀼𑀘𑁆𑀙𑀺𑀝𑁆𑀞𑀲𑀬𑀦𑁂 𑀘 𑀏𑀓𑀭𑀢𑁆𑀢𑀺𑀁 𑀯𑀲𑁂𑀬𑁆𑀬𑀸𑀫, 𑀑𑀓𑀸𑀲𑀁 𑀫𑁂 𑀤𑁂𑀳𑀻𑀢𑀺.

𑀢𑀢𑁄 𑀧𑀭𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁫𑁧.

‘‘𑀓𑀺𑀁𑀲𑀻𑀮𑁂 𑀓𑀺𑀁𑀲𑀫𑀸𑀘𑀸𑀭𑁂, 𑀧𑀼𑀭𑀺𑀲𑁂 𑀦𑀺𑀯𑀺𑀲𑀲𑁂 𑀢𑀼𑀯𑀁;

𑀧𑀼𑀝𑁆𑀞𑀸 𑀫𑁂 𑀮𑀓𑁆𑀔𑀺 𑀅𑀓𑁆𑀔𑀸𑀳𑀺, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁.

𑁫𑁨.

‘‘𑀬𑁄 𑀘𑀸𑀧𑀺 𑀲𑀻𑀢𑁂 𑀅𑀣 𑀯𑀸𑀧𑀺 𑀉𑀡𑁆𑀳𑁂, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘;

𑀔𑀼𑀥𑀁 𑀧𑀺𑀧𑀸𑀲𑀁 𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀁, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀬𑁄 𑀲𑀢𑀢𑀁 𑀦𑀺𑀬𑀼𑀢𑁆𑀢𑁄.

𑁫𑁩.

‘‘𑀓𑀸𑀮𑀸𑀕𑀢𑀜𑁆𑀘 ¶ 𑀦 𑀳𑀸𑀧𑁂𑀢𑀺 𑀅𑀢𑁆𑀣𑀁, 𑀲𑁄 𑀫𑁂 𑀫𑀦𑀸𑀧𑁄 𑀦𑀺𑀯𑀺𑀲𑁂 𑀘 𑀢𑀫𑁆𑀳𑀺;

𑀅𑀓𑁆𑀓𑁄𑀥𑀦𑁄 𑀫𑀺𑀢𑁆𑀢𑀯𑀸 𑀘𑀸𑀕𑀯𑀸 𑀘, 𑀲𑀻𑀮𑀽𑀧𑀧𑀦𑁆𑀦𑁄 𑀅𑀲𑀞𑁄𑀚𑀼𑀪𑀽𑀢𑁄.

𑁫𑁪.

‘‘𑀲𑀗𑁆𑀕𑀸𑀳𑀓𑁄 ¶ 𑀲𑀔𑀺𑀮𑁄 𑀲𑀡𑁆𑀳𑀯𑀸𑀘𑁄, 𑀫𑀳𑀢𑁆𑀢𑀧𑀢𑁆𑀢𑁄𑀧𑀺 𑀦𑀺𑀯𑀸𑀢𑀯𑀼𑀢𑁆𑀢𑀺;

𑀢𑀲𑁆𑀫𑀺𑀁𑀳𑀁 𑀧𑁄𑀲𑁂 𑀯𑀺𑀧𑀼𑀮𑀸 𑀪𑀯𑀸𑀫𑀺, 𑀊𑀫𑀺 𑀲𑀫𑀼𑀤𑁆𑀤𑀲𑁆𑀲 𑀬𑀣𑀸𑀧𑀺 𑀯𑀡𑁆𑀡𑀁.

𑁫𑁫.

‘‘𑀬𑁄 𑀘𑀸𑀧𑀺 𑀫𑀺𑀢𑁆𑀢𑁂 𑀅𑀣 𑀯𑀸 𑀅𑀫𑀺𑀢𑁆𑀢𑁂, 𑀲𑁂𑀝𑁆𑀞𑁂 𑀲𑀭𑀺𑀓𑁆𑀔𑁂 𑀅𑀣 𑀯𑀸𑀧𑀺 𑀳𑀻𑀦𑁂;

𑀅𑀢𑁆𑀣𑀁 𑀘𑀭𑀦𑁆𑀢𑀁 𑀅𑀣 𑀯𑀸 𑀅𑀦𑀢𑁆𑀣𑀁, 𑀆𑀯𑀻 𑀭𑀳𑁄 𑀲𑀗𑁆𑀕𑀳𑀫𑁂𑀯 𑀯𑀢𑁆𑀢𑁂.

𑁫𑁬.

‘‘𑀯𑀸𑀘𑀁 ¶ 𑀦 𑀯𑀚𑁆𑀚𑀸 𑀨𑀭𑀼𑀲𑀁 𑀓𑀤𑀸𑀘𑀺, 𑀫𑀢𑀲𑁆𑀲 𑀚𑀻𑀯𑀲𑁆𑀲 𑀘 𑀢𑀲𑁆𑀲 𑀳𑁄𑀫𑀺;

𑀏𑀢𑁂𑀲𑀁 𑀬𑁄 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸, 𑀓𑀦𑁆𑀢𑀸 𑀲𑀺𑀭𑀻 𑀫𑀚𑁆𑀚𑀢𑀺 𑀅𑀧𑁆𑀧𑀧𑀜𑁆𑀜𑁄;

𑀢𑀁 𑀤𑀺𑀢𑁆𑀢𑀭𑀽𑀧𑀁 𑀯𑀺𑀲𑀫𑀁 𑀘𑀭𑀦𑁆𑀢𑀁, 𑀓𑀭𑀻𑀲𑀞𑀸𑀦𑀁𑀯 𑀯𑀺𑀯𑀚𑁆𑀚𑀬𑀸𑀫𑀺.

𑁫𑁭.

‘‘𑀅𑀢𑁆𑀢𑀦𑀸 𑀓𑀼𑀭𑀼𑀢𑁂 𑀮𑀓𑁆𑀔𑀺𑀁, 𑀅𑀮𑀓𑁆𑀔𑀺𑀁 𑀓𑀼𑀭𑀼𑀢𑀢𑁆𑀢𑀦𑀸;

𑀦 𑀳𑀺 𑀮𑀓𑁆𑀔𑀺𑀁 𑀅𑀮𑀓𑁆𑀔𑀺𑀁 𑀯𑀸, 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄’’𑀢𑀺.

𑀲𑁂𑀝𑁆𑀞𑀺𑀲𑁆𑀲 𑀧𑀼𑀘𑁆𑀙𑀸 𑀳𑁄𑀢𑀺, 𑀲𑀺𑀭𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀸.

𑀢𑀢𑁆𑀣 𑀟𑀁𑀲𑀲𑀭𑀻𑀲𑀧𑁂 𑀘𑀸𑀢𑀺 𑀟𑀁𑀲𑀸 𑀯𑀼𑀘𑁆𑀘𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸, 𑀲𑀩𑁆𑀩𑀸𑀧𑀺 𑀯𑀸 𑀫𑀓𑁆𑀔𑀺𑀓𑀸𑀚𑀸𑀢𑀺𑀓𑀸 𑀇𑀥 ‘‘𑀟𑀁𑀲𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀭𑀻𑀲𑀧𑀸𑀢𑀺 𑀤𑀻𑀖𑀚𑀸𑀢𑀺𑀓𑀸. 𑀟𑀁𑀲𑀸 𑀘 𑀲𑀭𑀻𑀲𑀧𑀸 𑀘 𑀟𑀁𑀲𑀲𑀭𑀻𑀲𑀧𑀸, 𑀢𑀲𑁆𑀫𑀺𑀁 𑀟𑀁𑀲𑀲𑀭𑀻𑀲𑀧𑁂 𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀫𑀳𑀸𑀲𑁂𑀝𑁆𑀞𑀺 𑀲𑀻𑀢𑁂 𑀯𑀸 𑀉𑀡𑁆𑀳𑁂 𑀯𑀸 𑀯𑀸𑀢𑀸𑀢𑀧𑁂 𑀯𑀸 𑀟𑀁𑀲𑀲𑀭𑀻𑀲𑀧𑁂 𑀯𑀸 𑀲𑀢𑀺 𑀏𑀢𑁂𑀳𑀺 𑀲𑀻𑀢𑀸𑀤𑀻𑀳𑀺 𑀧𑀻𑀴𑀺𑀬𑀫𑀸𑀦𑁄𑀧𑀺 𑀏𑀢𑀸𑀦𑀺 𑀘𑁂𑀯 𑀲𑀻𑀢𑀸𑀤𑀻𑀦𑀺 𑀔𑀼𑀥𑀜𑁆𑀘 𑀧𑀺𑀧𑀸𑀲𑀜𑁆𑀘𑀸𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀧𑀭𑀺𑀲𑁆𑀲𑀬𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀡𑀁 𑀯𑀺𑀬 𑀅𑀕𑀡𑁂𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀲𑀼 𑀘𑁂𑀯 𑀤𑀸𑀦𑀲𑀻𑀮𑀸𑀤𑀻𑀲𑀼 𑀘 𑀲𑀢𑀢𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀲𑀼 𑀦𑀺𑀬𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀢𑀺.

𑀓𑀸𑀮𑀸𑀕𑀢𑀜𑁆𑀘𑀸𑀢𑀺 ¶ 𑀓𑀲𑀺𑀓𑀸𑀮𑀸𑀤𑀻𑀲𑀼 𑀓𑀲𑀺𑀆𑀤𑀻𑀦𑀺 𑀥𑀦𑀧𑀭𑀺𑀘𑁆𑀘𑀸𑀕𑀲𑀻𑀮𑀭𑀓𑁆𑀔𑀡𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀓𑀸𑀮𑁂𑀲𑀼 𑀘 𑀥𑀦𑀧𑀭𑀺𑀘𑁆𑀘𑀚𑀦𑀸𑀤𑀺𑀧𑁆𑀧𑀪𑁂𑀤𑀁 𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑁂 𑀲𑀼𑀔𑀸𑀯𑀳𑀁 𑀅𑀢𑁆𑀣𑀁 𑀦 𑀳𑀸𑀧𑁂𑀢𑀺, 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂 𑀓𑀭𑁄𑀢𑀺𑀬𑁂𑀯, 𑀲𑁄 𑀫𑀬𑁆𑀳𑀁 𑀫𑀦𑀸𑀧𑁄 𑀢𑀲𑁆𑀫𑀺𑀜𑁆𑀘 𑀧𑀼𑀭𑀺𑀲𑁂 𑀅𑀳𑀁 𑀦𑀺𑀯𑀺𑀲𑀸𑀫𑀻𑀢𑀺. 𑀅𑀓𑁆𑀓𑁄𑀥𑀦𑁄𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀫𑀺𑀢𑁆𑀢𑀯𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀘𑀸𑀕𑀯𑀸𑀢𑀺 𑀥𑀦𑀧𑀭𑀺𑀘𑁆𑀘𑀸𑀕𑀬𑀼𑀢𑁆𑀢𑁄.

𑀲𑀗𑁆𑀕𑀸𑀳𑀓𑁄𑀢𑀺 𑀫𑀺𑀢𑁆𑀢𑀲𑀗𑁆𑀕𑀳𑀆𑀫𑀺𑀲𑀲𑀗𑁆𑀕𑀳𑀥𑀫𑁆𑀫𑀲𑀗𑁆𑀕𑀳𑀸𑀦𑀁 𑀓𑀸𑀭𑀓𑁄. 𑀲𑀔𑀺𑀮𑁄𑀢𑀺 𑀫𑀼𑀤𑀼𑀯𑀸𑀘𑁄. 𑀲𑀡𑁆𑀳𑀯𑀸𑀘𑁄𑀢𑀺 ¶ 𑀫𑀥𑀼𑀭𑀯𑀘𑀦𑁄. 𑀫𑀳𑀢𑁆𑀢𑀧𑀢𑁆𑀢𑁄𑀧𑀺 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀫𑀳𑀦𑁆𑀢𑀁 𑀞𑀸𑀦𑀁 𑀯𑀺𑀧𑀼𑀮𑀁 𑀇𑀲𑁆𑀲𑀭𑀺𑀬𑀁 𑀧𑀢𑁆𑀢𑁄𑀧𑀺 𑀬𑀲𑁂𑀦 𑀅𑀦𑀼𑀤𑁆𑀥𑀢𑁄 𑀦𑀻𑀘𑀯𑀼𑀢𑁆𑀢𑀺 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀓𑀭𑁄 𑀳𑁄𑀢𑀺. 𑀢𑀲𑁆𑀫𑀺𑀁𑀳𑀁 𑀧𑁄𑀲𑁂𑀢𑀺 𑀢𑀲𑁆𑀫𑀺𑀁 𑀅𑀳𑀁 𑀧𑀼𑀭𑀺𑀲𑁂. 𑀯𑀺𑀧𑀼𑀮𑀸 𑀪𑀯𑀸𑀫𑀻𑀢𑀺 𑀅𑀔𑀼𑀤𑁆𑀤𑀓𑀸 𑀳𑁄𑀫𑀺. 𑀲𑁄 𑀳𑀺 𑀫𑀳𑀢𑀺𑀬𑀸 𑀲𑀺𑀭𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀊𑀫𑀺 𑀲𑀫𑀼𑀤𑁆𑀤𑀲𑁆𑀲 𑀬𑀣𑀸𑀧𑀺 𑀯𑀡𑁆𑀡𑀦𑁆𑀢𑀺 𑀬𑀣𑀸 𑀦𑀸𑀫 𑀲𑀫𑀼𑀤𑁆𑀤𑀲𑁆𑀲 𑀯𑀡𑁆𑀡𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀉𑀧𑀭𑀽𑀧𑀭𑀺 𑀆𑀕𑀘𑁆𑀙𑀫𑀸𑀦𑀸 𑀊𑀫𑀺 𑀯𑀺𑀧𑀼𑀮𑀸 𑀯𑀺𑀬 𑀔𑀸𑀬𑀢𑀺, 𑀏𑀯𑀫𑀳𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀯𑀺𑀧𑀼𑀮𑀸 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺.

𑀆𑀯𑀻 𑀭𑀳𑁄𑀢𑀺 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘. 𑀲𑀗𑁆𑀕𑀳𑀫𑁂𑀯 𑀯𑀢𑁆𑀢𑁂𑀢𑀺 𑀏𑀢𑀲𑁆𑀫𑀺𑀁 𑀫𑀺𑀢𑁆𑀢𑀸𑀤𑀺𑀪𑁂𑀤𑁂 𑀧𑀼𑀕𑁆𑀕𑀮𑁂 𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀕𑀳𑀫𑁂𑀯 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀺.

𑀦 𑀯𑀚𑁆𑀚𑀸𑀢𑀺 𑀬𑁄 𑀓𑀤𑀸𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀨𑀭𑀼𑀲𑀯𑀘𑀦𑀁 𑀦 𑀯𑀤𑁂𑀬𑁆𑀬, 𑀫𑀥𑀼𑀭𑀯𑀘𑀦𑁄𑀯 𑀳𑁄𑀢𑀺. 𑀫𑀢𑀲𑁆𑀲 𑀚𑀻𑀯𑀲𑁆𑀲 𑀘𑀸𑀢𑀺 ¶ 𑀢𑀲𑁆𑀲𑀸𑀳𑀁 𑀧𑀼𑀕𑁆𑀕𑀮𑀲𑁆𑀲 𑀫𑀢𑀲𑁆𑀲𑀧𑀺 𑀚𑀻𑀯𑀦𑁆𑀢𑀲𑁆𑀲𑀧𑀺 𑀪𑀢𑁆𑀢𑀺𑀓𑀸 𑀳𑁄𑀫𑀺, 𑀇𑀥𑀮𑁄𑀓𑁂𑀧𑀺 𑀧𑀭𑀮𑁄𑀓𑁂𑀧𑀺 𑀢𑀸𑀤𑀺𑀲𑀫𑁂𑀯 𑀪𑀚𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀲𑀁 𑀬𑁄𑀢𑀺 𑀏𑀢𑁂𑀲𑀁 𑀲𑀻𑀢𑀸𑀪𑀺𑀪𑀯𑀦𑀸𑀤𑀻𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀼𑀡𑀸𑀦𑀁 𑀬𑁄 𑀧𑀼𑀕𑁆𑀕𑀮𑁄 𑀏𑀓𑀫𑁆𑀧𑀺 𑀕𑀼𑀡𑀁 𑀮𑀪𑀺𑀢𑁆𑀯𑀸 𑀧𑀫𑀚𑁆𑀚𑀢𑀺 𑀧𑀫𑀼𑀲𑁆𑀲𑀢𑀺, 𑀧𑀼𑀦 𑀦𑀸𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀦𑁆𑀢𑀸 𑀲𑀺𑀭𑀻, 𑀓𑀦𑁆𑀢𑀲𑀺𑀭𑀺𑀁, 𑀓𑀦𑁆𑀢𑀁 𑀲𑀺𑀭𑀺𑀦𑁆𑀢𑀺 𑀢𑀬𑁄𑀧𑀺 𑀧𑀸𑀞𑀸, 𑀢𑁂𑀲𑀁 𑀯𑀲𑁂𑀦 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀬𑁄 𑀧𑀼𑀕𑁆𑀕𑀮𑁄 𑀲𑀺𑀭𑀺𑀁 𑀮𑀪𑀺𑀢𑁆𑀯𑀸 ‘‘𑀓𑀦𑁆𑀢𑀸 𑀫𑁂 𑀲𑀺𑀭𑀺 𑀬𑀣𑀸𑀞𑀸𑀦𑁂 𑀞𑀺𑀢𑀸’’𑀢𑀺 𑀏𑀢𑁂𑀲𑀁 𑀅𑀜𑁆𑀜𑀢𑀭𑀁 𑀕𑀼𑀡𑀁 𑀧𑀫𑀚𑁆𑀚𑀢𑀺, 𑀬𑁄 𑀯𑀸 𑀧𑀼𑀕𑁆𑀕𑀮𑁄 𑀓𑀦𑁆𑀢𑀲𑀺𑀭𑀺𑀁 𑀧𑀺𑀬𑀲𑀺𑀭𑀺𑀁 𑀇𑀘𑁆𑀙𑀦𑁆𑀢𑁄 𑀏𑀢𑁂𑀲𑀁 𑀕𑀼𑀡𑀸𑀦𑀁 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸 𑀧𑀫𑀚𑁆𑀚𑀢𑀺, 𑀬𑁄 𑀯𑀸 𑀧𑀼𑀕𑁆𑀕𑀮𑁄 𑀲𑀺𑀭𑀺𑀁 𑀮𑀪𑀺𑀢𑁆𑀯𑀸 𑀓𑀦𑁆𑀢𑀁 𑀫𑀦𑀸𑀧𑀁 𑀲𑀺𑀭𑀺𑀁 𑀏𑀢𑁂𑀲𑀁 𑀕𑀼𑀡𑀸𑀦𑀁 𑀅𑀜𑁆𑀜𑀢𑀭𑀁 𑀧𑀫𑀚𑁆𑀚𑀢𑀺. 𑀅𑀧𑁆𑀧𑀧𑀜𑁆𑀜𑁄𑀢𑀺 𑀦𑀺𑀧𑁆𑀧𑀜𑁆𑀜𑁄. 𑀢𑀁 𑀤𑀺𑀢𑁆𑀢𑀭𑀽𑀧𑀁 𑀯𑀺𑀲𑀫𑀁 𑀘𑀭𑀦𑁆𑀢𑀦𑁆𑀢𑀺 𑀢𑀁 𑀅𑀳𑀁 𑀤𑀺𑀢𑁆𑀢𑀲𑀪𑀸𑀯𑀁 𑀕𑀩𑁆𑀩𑀺𑀢𑀲𑀪𑀸𑀯𑀁 ¶ 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀪𑁂𑀤𑀁 𑀯𑀺𑀲𑀫𑀁 𑀘𑀭𑀦𑁆𑀢𑀁 𑀲𑀼𑀘𑀺𑀚𑀸𑀢𑀺𑀓𑁄 𑀫𑀦𑀼𑀲𑁆𑀲𑁄 𑀕𑀽𑀣𑀓𑀽𑀧𑀁 𑀯𑀺𑀬 𑀤𑀽𑀭𑀢𑁄 𑀯𑀺𑀯𑀚𑁆𑀚𑀬𑀸𑀫𑀻𑀢𑀺.

𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 𑀏𑀯𑀁 𑀲𑀦𑁆𑀢𑁂 𑀮𑀓𑁆𑀔𑀺𑀁 𑀯𑀸 𑀅𑀮𑀓𑁆𑀔𑀺𑀁 𑀯𑀸 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄 𑀦𑀸𑀫 𑀦𑀢𑁆𑀣𑀺, 𑀬𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄 𑀮𑀓𑁆𑀔𑀺𑀁 𑀯𑀸 𑀅𑀮𑀓𑁆𑀔𑀺𑀁 𑀯𑀸 𑀓𑀭𑁄𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀤𑁂𑀯𑀺𑀬𑀸 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 ‘‘𑀇𑀤𑀁 𑀅𑀦𑀼𑀘𑁆𑀙𑀺𑀝𑁆𑀞𑀁 𑀆𑀲𑀦𑀜𑁆𑀘 𑀲𑀬𑀦𑀜𑁆𑀘 𑀢𑀼𑀬𑁆𑀳𑀁𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀧𑀮𑁆𑀮𑀗𑁆𑀓𑁂 𑀘 𑀲𑀬𑀦𑁂 𑀘 𑀦𑀺𑀲𑀻𑀤 𑀘𑁂𑀯 𑀦𑀺𑀧𑀚𑁆𑀚 𑀘𑀸’’𑀢𑀺 𑀆𑀳. 𑀲𑀸 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀧𑀞𑀫𑀁 𑀦𑀳𑀸𑀬𑀺. 𑀢𑀫𑁆𑀧𑀺 𑀲𑀬𑀦𑀁 𑀲𑀺𑀭𑀺𑀤𑁂𑀯𑀢𑀸𑀬 𑀧𑀭𑀺𑀪𑀼𑀢𑁆𑀢𑀪𑀸𑀯𑀸 𑀲𑀺𑀭𑀺𑀲𑀬𑀦𑀁 𑀦𑀸𑀫 𑀚𑀸𑀢𑀁. 𑀲𑀺𑀭𑀺𑀲𑀬𑀦𑀲𑁆𑀲 𑀅𑀬𑀁 𑀯𑀁𑀲𑁄, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀬𑀸𑀯𑀚𑁆𑀚𑀢𑀦𑀸 ‘‘𑀲𑀺𑀭𑀺𑀲𑀬𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀭𑀺𑀤𑁂𑀯𑀻 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀲𑀼𑀘𑀺𑀧𑀭𑀺𑀯𑀸𑀭𑀲𑁂𑀝𑁆𑀞𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁮𑁩] 𑁮. 𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀘𑀺𑀢𑁆𑀢𑀧𑀢𑁆𑀢𑀙𑀤𑀦𑀸𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀯𑀲𑁂𑀦, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑁄 𑀦𑀸𑀫 𑀯𑀜𑁆𑀘𑁂𑀢𑁆𑀯𑀸 𑀉𑀧𑀮𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀁 𑀕𑀢𑀓𑀸𑀮𑁂 𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺, 𑀮𑁄𑀮𑀩𑀺𑀴𑀸𑀭𑀻 𑀯𑀺𑀬 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑁂 𑀓𑀼𑀓𑁆𑀓𑀼𑀝𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑁂𑀓𑀲𑀢𑀓𑀼𑀓𑁆𑀓𑀼𑀝𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑁂 ¶ 𑀯𑀲𑀢𑀺. 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀸 𑀩𑀺𑀴𑀸𑀭𑀺𑀓𑀸𑀧𑀺 𑀯𑀲𑀢𑀺. 𑀲𑀸 𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀅𑀯𑀲𑁂𑀲𑁂 𑀓𑀼𑀓𑁆𑀓𑀼𑀝𑁂 𑀉𑀧𑀸𑀬𑁂𑀦 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀕𑀳𑀡𑀁 𑀦 𑀕𑀘𑁆𑀙𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀓𑀼𑀓𑁆𑀓𑀼𑀝𑁄 𑀅𑀢𑀺𑀯𑀺𑀬 𑀲𑀞𑁄 𑀅𑀫𑁆𑀳𑀸𑀓𑀜𑁆𑀘 𑀲𑀞𑀪𑀸𑀯𑀁 𑀉𑀧𑀸𑀬𑀓𑀼𑀲𑀮𑀪𑀸𑀯𑀜𑁆𑀘 𑀦 𑀚𑀸𑀦𑀸𑀢𑀺, 𑀇𑀫𑀁 𑀫𑀬𑀸 ‘𑀅𑀳𑀁 𑀪𑀭𑀺𑀬𑀸 𑀢𑁂 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀉𑀧𑀮𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀁 𑀆𑀕𑀢𑀓𑀸𑀮𑁂 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 𑀢𑁂𑀦 𑀦𑀺𑀲𑀺𑀦𑁆𑀦𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀯𑀡𑁆𑀡𑀲𑀫𑁆𑀪𑀸𑀲𑀦𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀸𑀘𑀸𑀬 𑀢𑀁 𑀬𑀸𑀘𑀫𑀸𑀦𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁮.

‘‘𑀲𑀼𑀘𑀺𑀢𑁆𑀢𑀧𑀢𑁆𑀢𑀙𑀤𑀦, 𑀢𑀫𑁆𑀩𑀘𑀽𑀴 𑀯𑀺𑀳𑀗𑁆𑀕𑀫;

𑀑𑀭𑁄𑀳 𑀤𑀼𑀫𑀲𑀸𑀔𑀸𑀬, 𑀫𑀼𑀥𑀸 𑀪𑀭𑀺𑀬𑀸 𑀪𑀯𑀸𑀫𑀺 𑀢𑁂’’𑀢𑀺.

𑀢𑀢𑁆𑀣 𑀲𑀼𑀘𑀺𑀢𑁆𑀢𑀧𑀢𑁆𑀢𑀙𑀤𑀦𑀸𑀢𑀺 𑀲𑀼𑀘𑀺𑀢𑁆𑀢𑁂𑀳𑀺 𑀧𑀢𑁆𑀢𑁂𑀳𑀺 𑀓𑀢𑀘𑁆𑀙𑀤𑀦. 𑀫𑀼𑀥𑀸𑀢𑀺 𑀯𑀺𑀦𑀸 𑀫𑀽𑀮𑁂𑀦 𑀦 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀅𑀳𑀁 𑀪𑀭𑀺𑀬𑀸 𑀢𑁂 𑀪𑀯𑀸𑀫𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀸𑀬 𑀫𑀫 𑀲𑀩𑁆𑀩𑁂 𑀜𑀸𑀢𑀓𑀸 𑀔𑀸𑀤𑀺𑀢𑀸, 𑀇𑀤𑀸𑀦𑀺 𑀫𑀁 𑀉𑀧𑀮𑀸𑀧𑁂𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀅𑀳𑁄𑀲𑀺, 𑀉𑀬𑁆𑀬𑁄𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁯.

‘‘𑀘𑀢𑀼𑀧𑁆𑀧𑀤𑀻 ¶ 𑀢𑁆𑀯𑀁 𑀓𑀮𑁆𑀬𑀸𑀡𑀺, 𑀤𑁆𑀯𑀺𑀧𑀤𑀸𑀳𑀁 𑀫𑀦𑁄𑀭𑀫𑁂;

𑀫𑀺𑀕𑀻 𑀧𑀓𑁆𑀔𑀻 𑀅𑀲𑀜𑁆𑀜𑀼𑀢𑁆𑀢𑀸, 𑀅𑀜𑁆𑀜𑀁 𑀧𑀭𑀺𑀬𑁂𑀲 𑀲𑀸𑀫𑀺𑀓’’𑀦𑁆𑀢𑀺.

𑀢𑀢𑁆𑀣 ¶ 𑀫𑀺𑀕𑀻𑀢𑀺 𑀩𑀺𑀴𑀸𑀭𑀺𑀁 𑀲𑀦𑁆𑀥𑀸𑀬𑀸𑀳. 𑀅𑀲𑀜𑁆𑀜𑀼𑀢𑁆𑀢𑀸𑀢𑀺 𑀚𑀬𑀫𑁆𑀧𑀢𑀺𑀓𑀸 𑀪𑀯𑀺𑀢𑀼𑀁 𑀅𑀬𑀼𑀢𑁆𑀢𑀸 𑀅𑀲𑀫𑁆𑀩𑀦𑁆𑀥𑀸, 𑀦𑀢𑁆𑀣𑀺 𑀢𑁂𑀲𑀁 𑀈𑀤𑀺𑀲𑁄 𑀲𑀫𑁆𑀩𑀦𑁆𑀥𑁄𑀢𑀺 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀢𑁄 𑀲𑀸 ‘‘𑀅𑀬𑀁 𑀅𑀢𑀺𑀯𑀺𑀬 𑀲𑀞𑁄, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀯𑀜𑁆𑀘𑁂𑀢𑁆𑀯𑀸 𑀦𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁦.

‘‘𑀓𑁄𑀫𑀸𑀭𑀺𑀓𑀸 𑀢𑁂 𑀳𑁂𑀲𑁆𑀲𑀸𑀫𑀺, 𑀫𑀜𑁆𑀚𑀼𑀓𑀸 𑀧𑀺𑀬𑀪𑀸𑀡𑀺𑀦𑀻;

𑀯𑀺𑀦𑁆𑀤 𑀫𑀁 𑀅𑀭𑀺𑀬𑁂𑀦 𑀯𑁂𑀤𑁂𑀦, 𑀲𑀸𑀯𑀬 𑀫𑀁 𑀬𑀤𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀓𑁄𑀫𑀸𑀭𑀺𑀓𑀸𑀢𑀺 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀦 𑀚𑀸𑀦𑀸𑀫𑀺, 𑀢𑀯 𑀓𑁄𑀫𑀸𑀭𑀺𑀓𑀸 𑀪𑀭𑀺𑀬𑀸 𑀪𑀯𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺. 𑀫𑀜𑁆𑀚𑀼𑀓𑀸 𑀧𑀺𑀬𑀪𑀸𑀡𑀺𑀦𑀻𑀢𑀺 𑀢𑀯 𑀫𑀥𑀼𑀭𑀓𑀣𑀸 𑀧𑀺𑀬𑀪𑀸𑀡𑀺𑀦𑀻𑀬𑁂𑀯 𑀪𑀯𑀺𑀲𑁆𑀲𑀸𑀫𑀺. 𑀯𑀺𑀦𑁆𑀤 𑀫𑀦𑁆𑀢𑀺 𑀧𑀝𑀺𑀮𑀪 𑀫𑀁. 𑀅𑀭𑀺𑀬𑁂𑀦 𑀯𑁂𑀤𑁂𑀦𑀸𑀢𑀺 𑀲𑀼𑀦𑁆𑀤𑀭𑁂𑀦 𑀧𑀝𑀺𑀮𑀸𑀪𑁂𑀦. 𑀅𑀳𑀫𑁆𑀧𑀺 𑀳𑀺 𑀇𑀢𑁄 𑀧𑀼𑀩𑁆𑀩𑁂 𑀧𑀼𑀭𑀺𑀲𑀲𑀫𑁆𑀨𑀲𑁆𑀲𑀁 𑀦 𑀚𑀸𑀦𑀸𑀫𑀺, 𑀢𑁆𑀯𑀫𑁆𑀧𑀺 𑀇𑀢𑁆𑀣𑀺𑀲𑀫𑁆𑀨𑀲𑁆𑀲𑀁 𑀦 𑀚𑀸𑀦𑀸𑀲𑀺, 𑀇𑀢𑀺 𑀧𑀓𑀢𑀺𑀬𑀸 𑀩𑁆𑀭𑀳𑁆𑀫𑀘𑀸𑀭𑀻 ¶ 𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀁 𑀫𑀁 𑀦𑀺𑀤𑁆𑀤𑁄𑀲𑁂𑀦 𑀮𑀸𑀪𑁂𑀦 𑀮𑀪. 𑀬𑀤𑀺 𑀫𑀁 𑀇𑀘𑁆𑀙𑀲𑀺, 𑀅𑀣 𑀫𑁂 𑀯𑀘𑀦𑀁 𑀦 𑀲𑀤𑁆𑀤𑀳𑀲𑀺, 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀩𑀸𑀭𑀸𑀡𑀲𑀺𑀬𑀸 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀫𑁂 𑀤𑀸𑀲𑀻’’𑀢𑀺 𑀲𑀸𑀯𑀬, 𑀫𑀁 𑀅𑀢𑁆𑀢𑀦𑁄 𑀤𑀸𑀲𑀁 𑀓𑀢𑁆𑀯𑀸 𑀕𑀡𑁆𑀳𑀸𑀳𑀻𑀢𑀺 𑀯𑀤𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀁 𑀢𑀚𑁆𑀚𑁂𑀢𑁆𑀯𑀸 𑀧𑀮𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁬𑁧.

‘‘𑀓𑀼𑀡𑀧𑀸𑀤𑀺𑀦𑀺 𑀮𑁄𑀳𑀺𑀢𑀧𑁂, 𑀘𑁄𑀭𑀺 𑀓𑀼𑀓𑁆𑀓𑀼𑀝𑀧𑁄𑀣𑀺𑀦𑀺;

𑀦 𑀢𑁆𑀯𑀁 𑀅𑀭𑀺𑀬𑁂𑀦 𑀯𑁂𑀤𑁂𑀦, 𑀫𑀫𑀁 𑀪𑀢𑁆𑀢𑀸𑀭𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀦 𑀢𑁆𑀯𑀁 𑀅𑀭𑀺𑀬𑁂𑀦𑀸𑀢𑀺 𑀢𑁆𑀯𑀁 𑀅𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀮𑀸𑀪𑁂𑀦 𑀫𑀁 𑀪𑀢𑁆𑀢𑀸𑀭𑀁 𑀦 𑀇𑀘𑁆𑀙𑀲𑀺, 𑀯𑀜𑁆𑀘𑁂𑀢𑁆𑀯𑀸 𑀧𑀦 𑀫𑀁 𑀔𑀸𑀤𑀺𑀢𑀼𑀓𑀸𑀫𑀸𑀲𑀺, 𑀦𑀲𑁆𑀲 𑀧𑀸𑀧𑁂𑀢𑀺 𑀢𑀁 𑀧𑀮𑀸𑀧𑁂𑀲𑀺. 𑀲𑀸 𑀧𑀦 𑀧𑀮𑀸𑀬𑀺𑀢𑁆𑀯𑀸𑀯 𑀕𑀢𑀸, 𑀦 𑀧𑀼𑀦 𑀑𑀮𑁄𑀓𑁂𑀢𑀼𑀫𑁆𑀧𑀺 𑀯𑀺𑀲𑀳𑀺.

𑁬𑁨.

‘‘𑀏𑀯𑀫𑁆𑀧𑀺 ¶ 𑀘𑀢𑀼𑀭𑀸 𑀦𑀸𑀭𑀻, 𑀤𑀺𑀲𑁆𑀯𑀸𑀦 𑀲𑀥𑀦𑀁 𑀦𑀭𑀁;

𑀦𑁂𑀦𑁆𑀢𑀺 𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺, 𑀩𑀺𑀴𑀸𑀭𑀻 𑀯𑀺𑀬 𑀓𑀼𑀓𑁆𑀓𑀼𑀝𑀁.

𑁬𑁩.

‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀅𑀫𑀺𑀢𑁆𑀢𑀯𑀲𑀫𑀦𑁆𑀯𑁂𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺.

𑁬𑁪.

‘‘𑀬𑁄 ¶ 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀓𑀼𑀓𑁆𑀓𑀼𑀝𑁄𑀯 𑀩𑀺𑀴𑀸𑀭𑀺𑀬𑀸’’𑀢𑀺. 𑁋 𑀇𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸;

𑀢𑀢𑁆𑀣 𑀘𑀢𑀼𑀭𑀸𑀢𑀺 𑀘𑀸𑀢𑀼𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀦𑀸𑀭𑀻𑀢𑀺 𑀇𑀢𑁆𑀣𑀺𑀬𑁄. 𑀦𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀲𑀁 𑀉𑀧𑀦𑁂𑀦𑁆𑀢𑀺. 𑀩𑀺𑀴𑀸𑀭𑀻 𑀯𑀺𑀬𑀸𑀢𑀺 𑀬𑀣𑀸 𑀲𑀸 𑀩𑀺𑀴𑀸𑀭𑀻 𑀢𑀁 𑀓𑀼𑀓𑁆𑀓𑀼𑀝𑀁 𑀦𑁂𑀢𑀼𑀁 𑀯𑀸𑀬𑀫𑀢𑀺, 𑀏𑀯𑀁 𑀅𑀜𑁆𑀜𑀸𑀧𑀺 𑀦𑀸𑀭𑀺𑀬𑁄 𑀦𑁂𑀦𑁆𑀢𑀺𑀬𑁂𑀯. 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀦𑁆𑀢𑀺 𑀉𑀧𑁆𑀧𑀦𑁆𑀦𑀁 𑀓𑀺𑀜𑁆𑀘𑀺𑀤𑁂𑀯 𑀅𑀢𑁆𑀣𑀁. 𑀦 𑀅𑀦𑀼𑀩𑀼𑀚𑁆𑀛𑀢𑀻𑀢𑀺 𑀬𑀣𑀸𑀲𑀪𑀸𑀯𑁂𑀦 𑀦 𑀚𑀸𑀦𑀸𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺. 𑀓𑀼𑀓𑁆𑀓𑀼𑀝𑁄𑀯𑀸𑀢𑀺 𑀬𑀣𑀸 𑀲𑁄 𑀜𑀸𑀡𑀲𑀫𑁆𑀧𑀦𑁆𑀦𑁄 𑀓𑀼𑀓𑁆𑀓𑀼𑀝𑁄 𑀩𑀺𑀴𑀸𑀭𑀺𑀢𑁄 𑀫𑀼𑀢𑁆𑀢𑁄, 𑀏𑀯𑀁 𑀲𑀢𑁆𑀢𑀼𑀲𑀫𑁆𑀩𑀸𑀥𑀢𑁄 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀓𑀼𑀓𑁆𑀓𑀼𑀝𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁮𑁪] 𑁯. 𑀥𑀫𑁆𑀫𑀥𑀚𑀚𑀸𑀢𑀓𑀯𑀡𑁆𑀡𑀦𑀸

𑀥𑀫𑁆𑀫𑀁 𑀘𑀭𑀣 𑀜𑀸𑀢𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀁 𑀇𑀤𑀸𑀦𑁂𑀯 𑀓𑀼𑀳𑀓𑁄, 𑀧𑀼𑀩𑁆𑀩𑁂𑀧𑀺 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀓𑀼𑀡𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀫𑀼𑀤𑁆𑀤𑀫𑀚𑁆𑀛𑁂 𑀤𑀻𑀧𑀓𑁂 𑀯𑀲𑀺. 𑀅𑀣𑁂𑀓𑀘𑁆𑀘𑁂 𑀓𑀸𑀲𑀺𑀭𑀝𑁆𑀞𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀤𑀺𑀲𑀸𑀓𑀸𑀓𑀁 𑀕𑀳𑁂𑀢𑁆𑀯𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀁𑀲𑀼, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑀸𑀯𑀸 𑀪𑀺𑀚𑁆𑀚𑀺. 𑀲𑁄 𑀤𑀺𑀲𑀸𑀓𑀸𑀓𑁄 𑀢𑀁 𑀤𑀻𑀧𑀓𑀁 𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀫𑀳𑀸𑀲𑀓𑀼𑀡𑀲𑀗𑁆𑀖𑁄, 𑀫𑀬𑀸 𑀓𑀼𑀳𑀓𑀓𑀫𑁆𑀫𑀁 𑀓𑀢𑁆𑀯𑀸 𑀏𑀢𑁂𑀲𑀁 𑀅𑀡𑁆𑀟𑀓𑀸𑀦𑀺 ¶ 𑀘𑁂𑀯 𑀙𑀸𑀧𑀓𑁂 𑀘 𑀯𑀭𑀁 𑀯𑀭𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀑𑀢𑀭𑀺𑀢𑁆𑀯𑀸 𑀲𑀓𑀼𑀡𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀏𑀓𑁂𑀦 𑀧𑀸𑀤𑁂𑀦 𑀧𑀣𑀯𑀺𑀬𑀁 𑀅𑀝𑁆𑀞𑀸𑀲𑀺. ‘‘𑀓𑁄 𑀦𑀸𑀫 𑀢𑁆𑀯𑀁, 𑀲𑀸𑀫𑀻’’𑀢𑀺 𑀲𑀓𑀼𑀡𑁂𑀳𑀺 𑀧𑀼𑀝𑁆𑀞𑁄 ‘‘𑀅𑀳𑀁 𑀥𑀫𑁆𑀫𑀺𑀓𑁄 𑀦𑀸𑀫𑀸’’𑀢𑀺 𑀆𑀳. ‘‘𑀓𑀲𑁆𑀫𑀸 𑀧𑀦 𑀏𑀓𑁂𑀦 𑀧𑀸𑀤𑁂𑀦 𑀞𑀺𑀢𑁄𑀲𑀻’’𑀢𑀺? ‘‘𑀫𑀬𑀸 𑀤𑀼𑀢𑀺𑀬𑁂 𑀧𑀸𑀤𑁂 𑀦𑀺𑀓𑁆𑀔𑀺𑀢𑁆𑀢𑁂 ¶ 𑀧𑀣𑀯𑀻 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀲𑀻’’𑀢𑀺? ‘‘𑀅𑀳𑀁 𑀅𑀜𑁆𑀜𑀁 𑀆𑀳𑀸𑀭𑀁 𑀦 𑀔𑀸𑀤𑀸𑀫𑀺, 𑀯𑀸𑀢𑀫𑁂𑀯 𑀔𑀸𑀤𑀸𑀫𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂 𑀲𑀓𑀼𑀡𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀑𑀯𑀸𑀤𑀁 𑀯𑁄 𑀤𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣𑀸’’𑀢𑀺 𑀢𑁂𑀲𑀁 𑀑𑀯𑀸𑀤𑀯𑀲𑁂𑀦 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁫.

‘‘𑀥𑀫𑁆𑀫𑀁 𑀘𑀭𑀣 𑀜𑀸𑀢𑀬𑁄, 𑀥𑀫𑁆𑀫𑀁 𑀘𑀭𑀣 𑀪𑀤𑁆𑀤𑀁 𑀯𑁄;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘𑀸’’𑀢𑀺.

𑀢𑀢𑁆𑀣 𑀥𑀫𑁆𑀫𑀁 𑀘𑀭𑀣𑀸𑀢𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑀁 𑀥𑀫𑁆𑀫𑀁 𑀓𑀭𑁄𑀣. 𑀜𑀸𑀢𑀬𑁄𑀢𑀺 𑀢𑁂 𑀆𑀮𑀧𑀢𑀺. 𑀥𑀫𑁆𑀫𑀁 𑀘𑀭𑀣 𑀪𑀤𑁆𑀤𑀁 𑀯𑁄𑀢𑀺 𑀏𑀓𑀯𑀸𑀭𑀁 𑀘𑀭𑀺𑀢𑁆𑀯𑀸 𑀫𑀸 𑀑𑀲𑀓𑁆𑀓𑀣, 𑀧𑀼𑀦𑀧𑁆𑀧𑀼𑀦𑀁 𑀘𑀭𑀣, 𑀏𑀯𑀁 𑀪𑀤𑁆𑀤𑀁 𑀯𑁄 𑀪𑀯𑀺𑀲𑁆𑀲𑀢𑀺. 𑀲𑀼𑀔𑀁 𑀲𑁂𑀢𑀻𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀥𑀫𑁆𑀫𑀘𑀸𑀭𑀻 𑀧𑀦 𑀲𑀼𑀔𑀁 𑀢𑀺𑀝𑁆𑀞𑀢𑀺 𑀕𑀘𑁆𑀙𑀢𑀺 𑀦𑀺𑀲𑀻𑀤𑀢𑀺 𑀲𑁂𑀢𑀺, 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀺𑀢𑁄 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

𑀲𑀓𑀼𑀡𑀸 ¶ ‘‘𑀅𑀬𑀁 𑀓𑀸𑀓𑁄 𑀓𑁄𑀳𑀜𑁆𑀜𑁂𑀦 𑀅𑀡𑁆𑀟𑀓𑀸𑀦𑀺 𑀔𑀸𑀤𑀺𑀢𑀼𑀁 𑀏𑀯𑀁 𑀯𑀤𑀢𑀻’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀢𑀁 𑀤𑀼𑀲𑁆𑀲𑀻𑀮𑀁 𑀯𑀡𑁆𑀡𑁂𑀦𑁆𑀢𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁬𑁬.

‘‘𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀦𑁆𑀢𑁄, 𑀥𑀫𑁆𑀫𑀫𑁂𑀯𑀸𑀦𑀼𑀲𑀸𑀲𑀢𑀻’’𑀢𑀺.

𑀢𑀢𑁆𑀣 𑀥𑀫𑁆𑀫𑀫𑁂𑀯𑀸𑀢𑀺 𑀲𑀪𑀸𑀯𑀫𑁂𑀯. 𑀅𑀦𑀼𑀲𑀸𑀲𑀢𑀻𑀢𑀺 𑀓𑀣𑁂𑀲𑀺.

𑀲𑀓𑀼𑀡𑀸 𑀢𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭 𑀲𑀸𑀫𑀺 𑀅𑀜𑁆𑀜𑀁 𑀕𑁄𑀘𑀭𑀁 𑀦 𑀕𑀡𑁆𑀳𑀲𑀺, 𑀯𑀸𑀢𑀫𑁂𑀯 𑀪𑀓𑁆𑀔𑀲𑀺, 𑀢𑁂𑀦 𑀳𑀺 𑀅𑀫𑁆𑀳𑀸𑀓𑀁 𑀅𑀡𑁆𑀟𑀓𑀸𑀦𑀺 𑀘 𑀙𑀸𑀧𑀓𑁂 𑀘 𑀑𑀮𑁄𑀓𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀕𑁄𑀘𑀭𑀸𑀬 𑀕𑀘𑁆𑀙𑀦𑁆𑀢𑀺. 𑀲𑁄 𑀧𑀸𑀧𑁄 𑀢𑁂𑀲𑀁 𑀕𑀢𑀓𑀸𑀮𑁂 𑀅𑀡𑁆𑀟𑀓𑀸𑀦𑀺 𑀘 𑀙𑀸𑀧𑀓𑁂 𑀘 𑀓𑀼𑀘𑁆𑀙𑀺𑀧𑀽𑀭𑀁 𑀔𑀸𑀤𑀺𑀢𑁆𑀯𑀸 𑀢𑁂𑀲𑀁 𑀆𑀕𑀫𑀦𑀓𑀸𑀮𑁂 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀳𑀼𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀏𑀓𑁂𑀦 𑀧𑀸𑀤𑁂𑀦 𑀢𑀺𑀝𑁆𑀞𑀢𑀺. 𑀲𑀓𑀼𑀡𑀸 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀓𑁂 𑀅𑀧𑀲𑁆𑀲𑀦𑁆𑀢𑀸 ‘‘𑀓𑁄 𑀦𑀼 𑀔𑁄 𑀔𑀸𑀤𑀢𑀻’’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀯𑀺𑀭𑀯𑀦𑁆𑀢𑀺, ‘‘𑀅𑀬𑀁 𑀓𑀸𑀓𑁄 𑀥𑀫𑁆𑀫𑀺𑀓𑁄’’𑀢𑀺 𑀢𑀲𑁆𑀫𑀺𑀁 𑀆𑀲𑀗𑁆𑀓𑀸𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀥 𑀧𑀼𑀩𑁆𑀩𑁂 𑀓𑁄𑀘𑀺 ¶ 𑀧𑀭𑀺𑀧𑀦𑁆𑀣𑁄 𑀦𑀢𑁆𑀣𑀺, 𑀇𑀫𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑁄, 𑀇𑀫𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀓𑀼𑀡𑁂𑀳𑀺 𑀲𑀤𑁆𑀥𑀺𑀁 𑀕𑁄𑀘𑀭𑀸𑀬 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀓𑀸𑀓𑁄𑀧𑀺 ¶ ‘‘𑀕𑀢𑀸 𑀲𑀓𑀼𑀡𑀸’’𑀢𑀺 𑀦𑀺𑀭𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀅𑀡𑁆𑀟𑀓𑀸𑀦𑀺 𑀘 𑀙𑀸𑀧𑀓𑁂 𑀘 𑀔𑀸𑀤𑀺𑀢𑁆𑀯𑀸 𑀧𑀼𑀦𑀸𑀕𑀦𑁆𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀏𑀓𑁂𑀦 𑀧𑀸𑀤𑁂𑀦 𑀅𑀝𑁆𑀞𑀸𑀲𑀺.

𑀲𑀓𑀼𑀡𑀭𑀸𑀚𑀸 𑀲𑀓𑀼𑀡𑁂𑀲𑀼 𑀆𑀕𑀢𑁂𑀲𑀼 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀅𑀳𑀁 𑀯𑁄 𑀅𑀚𑁆𑀚 𑀧𑀼𑀢𑁆𑀢𑀓𑀸𑀦𑀁 𑀧𑀭𑀺𑀧𑀦𑁆𑀣𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀇𑀫𑀁 𑀧𑀸𑀧𑀓𑀸𑀓𑀁 𑀔𑀸𑀤𑀦𑁆𑀢𑀁 𑀅𑀤𑁆𑀤𑀲𑀁, 𑀏𑀣 𑀦𑀁 𑀕𑀡𑁆𑀳𑀸𑀫𑀸’’𑀢𑀺 𑀲𑀓𑀼𑀡𑀲𑀗𑁆𑀖𑀁 𑀆𑀫𑀦𑁆𑀢𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀲𑀘𑁂 𑀧𑀮𑀸𑀬𑀢𑀺, 𑀕𑀡𑁆𑀳𑁂𑀬𑁆𑀬𑀸𑀣 𑀦’’𑀦𑁆𑀢𑀺 𑀯𑀢𑁆𑀯𑀸 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁭.

‘‘𑀦𑀸𑀲𑁆𑀲 𑀲𑀻𑀮𑀁 𑀯𑀺𑀚𑀸𑀦𑀸𑀣, 𑀅𑀦𑀜𑁆𑀜𑀸𑀬 𑀧𑀲𑀁𑀲𑀣;

𑀪𑀼𑀢𑁆𑀯𑀸 𑀅𑀡𑁆𑀟𑀜𑁆𑀘 𑀧𑁄𑀢𑀜𑁆𑀘, 𑀥𑀫𑁆𑀫𑁄 𑀥𑀫𑁆𑀫𑁄𑀢𑀺 𑀪𑀸𑀲𑀢𑀺.

𑁬𑁮.

‘‘𑀅𑀜𑁆𑀜𑀁 𑀪𑀡𑀢𑀺 𑀯𑀸𑀘𑀸𑀬, 𑀅𑀜𑁆𑀜𑀁 𑀓𑀸𑀬𑁂𑀦 𑀓𑀼𑀩𑁆𑀩𑀢𑀺;

𑀯𑀸𑀘𑀸𑀬 𑀦𑁄 𑀘 𑀓𑀸𑀬𑁂𑀦, 𑀦 𑀢𑀁 𑀥𑀫𑁆𑀫𑀁 𑀅𑀥𑀺𑀝𑁆𑀞𑀺𑀢𑁄.

𑁬𑁯.

‘‘𑀯𑀸𑀘𑀸𑀬 ¶ 𑀲𑀔𑀺𑀮𑁄 𑀫𑀦𑁄𑀯𑀺𑀤𑀼𑀕𑁆𑀕𑁄, 𑀙𑀦𑁆𑀦𑁄 𑀓𑀽𑀧𑀲𑀬𑁄𑀯 𑀓𑀡𑁆𑀳𑀲𑀧𑁆𑀧𑁄;

𑀥𑀫𑁆𑀫𑀥𑀚𑁄 𑀕𑀸𑀫𑀦𑀺𑀕𑀫𑀸𑀲𑀼 𑀲𑀸𑀥𑀼, 𑀤𑀼𑀚𑁆𑀚𑀸𑀦𑁄 𑀧𑀼𑀭𑀺𑀲𑁂𑀦 𑀩𑀸𑀮𑀺𑀲𑁂𑀦.

𑁭𑁦.

‘‘𑀇𑀫𑀁 𑀢𑀼𑀡𑁆𑀟𑁂𑀳𑀺 𑀧𑀓𑁆𑀔𑁂𑀳𑀺, 𑀧𑀸𑀤𑀸 𑀘𑀺𑀫𑀁 𑀯𑀺𑀳𑁂𑀞𑀣;

𑀙𑀯𑀜𑁆𑀳𑀺𑀫𑀁 𑀯𑀺𑀦𑀸𑀲𑁂𑀣, 𑀦𑀸𑀬𑀁 𑀲𑀁𑀯𑀸𑀲𑀦𑀸𑀭𑀳𑁄’’𑀢𑀺.

𑀢𑀢𑁆𑀣 𑀦𑀸𑀲𑁆𑀲 𑀲𑀻𑀮𑀦𑁆𑀢𑀺 𑀦 𑀅𑀲𑁆𑀲 𑀲𑀻𑀮𑀁. 𑀅𑀦𑀜𑁆𑀜𑀸𑀬𑀸𑀢𑀺 𑀅𑀚𑀸𑀦𑀺𑀢𑁆𑀯𑀸. 𑀪𑀼𑀢𑁆𑀯𑀸𑀢𑀺 𑀔𑀸𑀤𑀺𑀢𑁆𑀯𑀸. 𑀯𑀸𑀘𑀸𑀬 𑀦𑁄 𑀘 𑀓𑀸𑀬𑁂𑀦𑀸𑀢𑀺 𑀅𑀬𑀜𑁆𑀳𑀺 𑀯𑀘𑀦𑁂𑀦𑁂𑀯 𑀥𑀫𑁆𑀫𑀁 𑀘𑀭𑀢𑀺, 𑀓𑀸𑀬𑁂𑀦 𑀧𑀦 𑀦 𑀓𑀭𑁄𑀢𑀺. 𑀦 𑀢𑀁 𑀥𑀫𑁆𑀫𑀁 𑀅𑀥𑀺𑀝𑁆𑀞𑀺𑀢𑁄𑀢𑀺 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑁄 𑀬𑀣𑀸𑀬𑀁 𑀥𑀫𑁆𑀫𑀁 𑀪𑀡𑀢𑀺, 𑀦 𑀢𑀁 𑀅𑀥𑀺𑀝𑁆𑀞𑀺𑀢𑁄, 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀦 𑀅𑀥𑀺𑀝𑁆𑀞𑀺𑀢𑁄. 𑀯𑀸𑀘𑀸𑀬 𑀲𑀔𑀺𑀮𑁄𑀢𑀺 𑀯𑀘𑀦𑁂𑀦 𑀫𑀼𑀤𑀼. 𑀫𑀦𑁄𑀯𑀺𑀤𑀼𑀕𑁆𑀕𑁄𑀢𑀺 𑀫𑀦𑀲𑀸 𑀯𑀺𑀤𑀼𑀕𑁆𑀕𑁄 𑀤𑀼𑀧𑁆𑀧𑀯𑁂𑀲𑁄 𑀯𑀺𑀲𑀫𑁄. 𑀙𑀦𑁆𑀦𑁄𑀢𑀺 𑀬𑀲𑁆𑀫𑀺𑀁 𑀩𑀺𑀮𑁂 𑀲𑀬𑀢𑀺, 𑀢𑁂𑀦 𑀙𑀦𑁆𑀦𑁄. 𑀓𑀽𑀧𑀲𑀬𑁄𑀢𑀺 𑀩𑀺𑀮𑀸𑀲𑀬𑁄. 𑀥𑀫𑁆𑀫𑀥𑀚𑁄𑀢𑀺 𑀲𑀼𑀘𑀭𑀺𑀢𑀥𑀫𑁆𑀫𑀁 𑀥𑀚𑀁 𑀓𑀢𑁆𑀯𑀸 𑀯𑀺𑀘𑀭𑀡𑁂𑀦 𑀥𑀫𑁆𑀫𑀤𑁆𑀥𑀚𑁄. 𑀕𑀸𑀫𑀦𑀺𑀕𑀫𑀸𑀲𑀼 𑀲𑀸𑀥𑀽𑀢𑀺 𑀕𑀸𑀫𑁂𑀲𑀼 𑀘 𑀦𑀺𑀕𑀫𑁂𑀲𑀼 𑀘 𑀲𑀸𑀥𑀼 𑀪𑀤𑁆𑀤𑀓𑁄 𑀲𑀫𑁆𑀪𑀸𑀯𑀺𑀢𑁄. 𑀤𑀼𑀚𑁆𑀚𑀸𑀦𑁄𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀤𑀼𑀲𑁆𑀲𑀻𑀮𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀩𑀸𑀮𑀺𑀲𑁂𑀦 𑀅𑀜𑁆𑀜𑀸𑀡𑁂𑀦 𑀧𑀼𑀭𑀺𑀲𑁂𑀦 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁. 𑀧𑀸𑀤𑀸 𑀘𑀺𑀫𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀘 𑀇𑀫𑀁. 𑀯𑀺𑀳𑁂𑀞𑀣𑀸𑀢𑀺 𑀧𑀳𑀭𑀣 𑀳𑀦𑀣. 𑀙𑀯𑀦𑁆𑀢𑀺 𑀮𑀸𑀫𑀓𑀁. 𑀦𑀸𑀬𑀦𑁆𑀢𑀺 𑀅𑀬𑀁 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀁𑀯𑀸𑀲𑀁 𑀦 𑀅𑀭𑀳𑀢𑀻𑀢𑀺.

𑀏𑀯𑀜𑁆𑀘 ¶ ¶ 𑀧𑀦 𑀯𑀢𑁆𑀯𑀸 𑀲𑀓𑀼𑀡𑀚𑁂𑀝𑁆𑀞𑀓𑁄 𑀲𑀬𑀫𑁂𑀯 𑀮𑀗𑁆𑀖𑀺𑀢𑁆𑀯𑀸 𑀢𑀲𑁆𑀲 𑀲𑀻𑀲𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺, 𑀅𑀯𑀲𑁂𑀲𑀸 𑀲𑀓𑀼𑀡𑀸 𑀢𑀼𑀡𑁆𑀟𑀦𑀔𑀧𑀸𑀤𑀧𑀓𑁆𑀔𑁂𑀳𑀺 𑀧𑀳𑀭𑀺𑀁𑀲𑀼. 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀼𑀳𑀓𑀓𑀸𑀓𑁄 𑀇𑀤𑀸𑀦𑀺 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑀓𑀼𑀡𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀥𑀫𑁆𑀫𑀥𑀚𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁮𑁫] 𑁧𑁦. 𑀦𑀦𑁆𑀤𑀺𑀬𑀫𑀺𑀕𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀲𑀘𑁂 ¶ 𑀩𑁆𑀭𑀸𑀳𑁆𑀫𑀡 𑀕𑀘𑁆𑀙𑁂𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀕𑀺𑀳𑀻 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀢𑁂 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀸𑀢𑀸𑀧𑀺𑀢𑀭𑁄 𑀫𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀸𑀥𑀼 𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑀁 𑀧𑀸𑀮𑁂𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀳𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀚𑀻𑀯𑀺𑀢𑀁 𑀅𑀤𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑁄𑀲𑀮𑀭𑀝𑁆𑀞𑁂 𑀲𑀸𑀓𑁂𑀢𑁂 𑀓𑁄𑀲𑀮𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀦𑀦𑁆𑀤𑀺𑀬𑀫𑀺𑀕𑁄 𑀦𑀸𑀫 𑀳𑀼𑀢𑁆𑀯𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺. 𑀢𑀤𑀸 𑀓𑁄𑀲𑀮𑀭𑀸𑀚𑀸 𑀫𑀺𑀕𑀯𑀺𑀢𑁆𑀢𑀓𑁄𑀯 𑀅𑀳𑁄𑀲𑀺. 𑀲𑁄 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀸𑀢𑀼𑀁 𑀅𑀤𑀢𑁆𑀯𑀸 𑀫𑀳𑀸𑀧𑀭𑀺𑀯𑀸𑀭𑁄 𑀤𑁂𑀯𑀲𑀺𑀓𑀁 𑀫𑀺𑀕𑀯𑀁 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀬𑁆𑀬𑀸, 𑀅𑀬𑀁 𑀭𑀸𑀚𑀸 𑀅𑀫𑁆𑀳𑀸𑀓𑀁 𑀓𑀫𑁆𑀫𑀘𑁆𑀙𑁂𑀤𑀁 𑀓𑀭𑁄𑀢𑀺, 𑀖𑀭𑀸𑀯𑀸𑀲𑁄𑀧𑀺 𑀦𑀲𑁆𑀲𑀢𑀺, 𑀬𑀁𑀦𑀽𑀦 𑀫𑀬𑀁 𑀅𑀚𑁆𑀚𑀼𑀦𑀯𑀦𑀁 𑀉𑀬𑁆𑀬𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀧𑁄𑀭𑀓𑁆𑀔𑀡𑀺𑀁 𑀔𑀡𑀺𑀢𑁆𑀯𑀸 𑀢𑀺𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀤𑀡𑁆𑀟𑀫𑀼𑀕𑁆𑀕𑀭𑀸𑀤𑀺𑀳𑀢𑁆𑀣𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀼𑀫𑁆𑀩𑁂 𑀧𑀳𑀭𑀦𑁆𑀢𑀸 𑀫𑀺𑀕𑁂 𑀦𑀻𑀳𑀭𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑁄𑀭𑀽𑀧𑀸𑀦𑀺 𑀯𑀺𑀬 𑀯𑀚𑀁 𑀉𑀬𑁆𑀬𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺 𑀫𑀦𑁆𑀢𑀬𑀺𑀁𑀲𑀼. ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀬𑁄𑀚𑀦𑀫𑀢𑁆𑀢𑀝𑁆𑀞𑀸𑀦𑀁 ¶ 𑀧𑀭𑀺𑀓𑁆𑀔𑀺𑀧𑀺𑀁𑀲𑀼.

𑀢𑀲𑁆𑀫𑀺𑀁 𑀔𑀡𑁂 𑀦𑀦𑁆𑀤𑀺𑀬𑁄 𑀏𑀓𑀲𑁆𑀫𑀺𑀁 𑀔𑀼𑀤𑁆𑀤𑀓𑀕𑀼𑀫𑁆𑀩𑁂 𑀫𑀸𑀢𑀸𑀧𑀺𑀢𑀭𑁄 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀦𑀸𑀦𑀸𑀨𑀮𑀓𑀸𑀯𑀼𑀥𑀳𑀢𑁆𑀣𑀸 𑀩𑀸𑀳𑀼𑀦𑀸 𑀩𑀸𑀳𑀼𑀁 𑀧𑀻𑀴𑁂𑀢𑁆𑀯𑀸 𑀢𑀁 𑀕𑀼𑀫𑁆𑀩𑀁 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀅𑀣𑁂𑀓𑀘𑁆𑀘𑁂 𑀫𑀺𑀕𑁂 𑀑𑀮𑁄𑀓𑁂𑀦𑁆𑀢𑀸 𑀢𑀁 𑀕𑀼𑀫𑁆𑀩𑀁 𑀧𑀯𑀺𑀲𑀺𑀁𑀲𑀼. 𑀦𑀦𑁆𑀤𑀺𑀬𑁄 𑀢𑁂 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 ¶ 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢, 𑀇𑀫𑁂 𑀫𑀦𑀼𑀲𑁆𑀲𑀸 𑀇𑀫𑀁 𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑁆𑀳𑁂 𑀢𑀬𑁄𑀧𑀺 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀏𑀓𑁂𑀦 𑀉𑀧𑀸𑀬𑁂𑀦 𑀚𑀻𑀯𑁂𑀬𑁆𑀬𑀸𑀣, 𑀚𑀻𑀯𑀺𑀢𑀁 𑀯𑁄 𑀲𑁂𑀬𑁆𑀬𑁄, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀚𑀻𑀯𑀺𑀢𑀤𑀸𑀦𑀁 𑀤𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀕𑀼𑀫𑁆𑀩𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 𑀕𑀼𑀫𑁆𑀩𑁂 𑀧𑀳𑀝𑀫𑀢𑁆𑀢𑁂𑀬𑁂𑀯 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀅𑀣 𑀢𑁂 ‘𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀕𑀼𑀫𑁆𑀩𑁂 𑀏𑀓𑁄𑀬𑁂𑀯 𑀫𑀺𑀕𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀫𑀜𑁆𑀜𑀫𑀸𑀦𑀸 𑀕𑀼𑀫𑁆𑀩𑀁 𑀦 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 ¶ 𑀫𑀸𑀢𑀸𑀧𑀺𑀢𑀭𑁄 𑀔𑀫𑀸𑀧𑁂𑀢𑁆𑀯𑀸 𑀕𑀫𑀦𑀲𑀚𑁆𑀚𑁄 𑀅𑀝𑁆𑀞𑀸𑀲𑀺. 𑀲𑁄 𑀫𑀦𑀼𑀲𑁆𑀲𑁂𑀳𑀺 𑀕𑀼𑀫𑁆𑀩𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 𑀉𑀦𑁆𑀦𑀸𑀤𑁂𑀢𑁆𑀯𑀸 𑀕𑀼𑀫𑁆𑀩𑁂 𑀧𑀳𑀝𑀫𑀢𑁆𑀢𑁂𑀬𑁂𑀯 𑀢𑀢𑁄 𑀦𑀺𑀓𑁆𑀔𑀫𑀺. 𑀢𑁂 ‘‘𑀏𑀓𑁄𑀯𑁂𑀢𑁆𑀣 𑀫𑀺𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀼𑀫𑁆𑀩𑀁 𑀦 𑀧𑀯𑀺𑀲𑀺𑀁𑀲𑀼. 𑀅𑀣 𑀦𑀦𑁆𑀤𑀺𑀬𑁄 𑀕𑀦𑁆𑀢𑁆𑀯𑀸 𑀫𑀺𑀕𑀸𑀦𑀁 𑀅𑀦𑁆𑀢𑀭𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀩𑁆𑀩𑁂 𑀫𑀺𑀕𑁂 𑀉𑀬𑁆𑀬𑀸𑀦𑀁 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀸𑀦𑀺 𑀅𑀕𑀫𑀁𑀲𑀼.

𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀺𑀕𑀁 𑀯𑀺𑀚𑁆𑀛𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀏𑀳𑀻𑀢𑀺 𑀏𑀓𑀁 𑀧𑁂𑀲𑁂𑀢𑁆𑀯𑀸 𑀆𑀳𑀭𑀸𑀧𑁂𑀲𑀺. 𑀫𑀺𑀕𑀸 𑀯𑀸𑀭𑀁 𑀞𑀧𑀬𑀺𑀁𑀲𑀼, 𑀧𑀢𑁆𑀢𑀯𑀸𑀭𑁄 𑀫𑀺𑀕𑁄 𑀏𑀓𑀫𑀦𑁆𑀢𑁂 𑀢𑀺𑀝𑁆𑀞𑀢𑀺, 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀦𑀦𑁆𑀤𑀺𑀬𑁄 𑀧𑁄𑀓𑁆𑀔𑀭𑀡𑀺𑀬𑀁 𑀧𑀸𑀦𑀻𑀬𑀁 𑀧𑀺𑀯𑀢𑀺, 𑀢𑀺𑀡𑀸𑀦𑀺 𑀔𑀸𑀤𑀢𑀺, 𑀯𑀸𑀭𑁄 𑀧𑀦𑀲𑁆𑀲 𑀦 𑀢𑀸𑀯 𑀧𑀸𑀧𑀼𑀡𑀸𑀢𑀺. 𑀅𑀣 𑀩𑀳𑀽𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀤𑀝𑁆𑀞𑀼𑀓𑀸𑀫𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀦𑀦𑁆𑀤𑀺𑀬𑀫𑀺𑀕𑀭𑀸𑀚𑀸 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄, 𑀲𑀘𑁂 𑀚𑀻𑀯𑀢𑀺, 𑀅𑀯𑀲𑁆𑀲𑀁 𑀯𑀢𑀺𑀁 𑀮𑀗𑁆𑀖𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀫𑀺𑀲𑁆𑀲𑀢𑀺, 𑀲𑀸𑀲𑀦𑀫𑀲𑁆𑀲 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀫𑀕𑁆𑀕𑀲𑀫𑀻𑀧𑁂 𑀞𑀢𑁆𑀯𑀸 𑀏𑀓𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀅𑀬𑁆𑀬, 𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀫𑀸𑀦𑀼𑀲𑀺𑀓𑀸𑀬 𑀯𑀸𑀘𑀸𑀬 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀸𑀓𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀦𑁆𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁭𑁧.

‘‘𑀲𑀘𑁂 𑀩𑁆𑀭𑀸𑀳𑁆𑀫𑀡 𑀕𑀘𑁆𑀙𑁂𑀲𑀺, 𑀲𑀸𑀓𑁂𑀢𑁂 𑀅𑀚𑁆𑀚𑀼𑀦𑀁 𑀯𑀦𑀁;

𑀯𑀚𑁆𑀚𑀸𑀲𑀺 𑀦𑀦𑁆𑀤𑀺𑀬𑀁 𑀦𑀸𑀫, 𑀧𑀼𑀢𑁆𑀢𑀁 𑀅𑀲𑁆𑀫𑀸𑀓𑀫𑁄𑀭𑀲𑀁;

𑀫𑀸𑀢𑀸 𑀧𑀺𑀢𑀸 𑀘 𑀢𑁂 𑀯𑀼𑀤𑁆𑀥𑀸, 𑀢𑁂 𑀢𑀁 𑀇𑀘𑁆𑀙𑀦𑁆𑀢𑀺 𑀧𑀲𑁆𑀲𑀺𑀢𑀼’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀲𑀸𑀓𑁂𑀢𑀁 𑀕𑀘𑁆𑀙𑀲𑀺, 𑀲𑀸𑀓𑁂𑀢𑁂 𑀅𑀚𑁆𑀚𑀼𑀦𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀦𑀦𑁆𑀤𑀺𑀬𑁄 𑀦𑀸𑀫 𑀫𑀺𑀕𑁄 𑀅𑀢𑁆𑀣𑀺, 𑀢𑀁 𑀯𑀤𑁂𑀬𑁆𑀬𑀸𑀲𑀺 ‘‘𑀫𑀸𑀢𑀸𑀧𑀺𑀢𑀭𑁄 𑀢𑁂 𑀯𑀼𑀟𑁆𑀠𑀸 𑀬𑀸𑀯 𑀦 𑀫𑀭𑀦𑁆𑀢𑀺, 𑀢𑀸𑀯 𑀢𑀁 𑀧𑀲𑁆𑀲𑀺𑀢𑀼𑀁 𑀇𑀘𑁆𑀙𑀦𑁆𑀢𑀻’’𑀢𑀺.

𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀸𑀓𑁂𑀢𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀦𑀦𑁆𑀤𑀺𑀬𑀫𑀺𑀕𑁄 𑀦𑀸𑀫 𑀓𑀢𑀭𑁄’’𑀢𑀺 𑀧𑀼𑀘𑁆𑀙𑀺. 𑀫𑀺𑀕𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀫𑀻𑀧𑁂 𑀞𑀢𑁆𑀯𑀸 ‘‘𑀅𑀳’’𑀦𑁆𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀦𑀦𑁆𑀤𑀺𑀬𑁄 𑀢𑀁 𑀲𑀼𑀢𑁆𑀯𑀸 ‘‘𑀕𑀘𑁆𑀙𑁂𑀬𑁆𑀬𑀸𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀢𑀺𑀁 𑀮𑀗𑁆𑀖𑀺𑀢𑁆𑀯𑀸 ¶ 𑀦𑁄 𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀬𑀸 𑀧𑀦 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀦𑀺𑀯𑀸𑀧𑀧𑀸𑀦𑀪𑁄𑀚𑀦𑀁 𑀪𑀼𑀢𑁆𑀢𑀁, 𑀢𑀁 𑀫𑁂 𑀇𑀡𑀝𑁆𑀞𑀸𑀦𑁂 𑀞𑀺𑀢𑀁, 𑀇𑀫𑁂𑀲𑀜𑁆𑀘 𑀫𑀺𑀕𑀸𑀦𑀁 𑀫𑀚𑁆𑀛𑁂 𑀘𑀺𑀭𑀯𑀼𑀢𑁆𑀣𑁄𑀲𑁆𑀫𑀺, 𑀢𑀲𑁆𑀲 𑀫𑁂 𑀭𑀜𑁆𑀜𑁄 𑀘𑁂𑀯 ¶ 𑀏𑀢𑁂𑀲𑀜𑁆𑀘 𑀲𑁄𑀢𑁆𑀣𑀺𑀪𑀸𑀯𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀁 𑀅𑀤𑀲𑁆𑀲𑁂𑀢𑁆𑀯𑀸 𑀕𑀫𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀯𑀸𑀭𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀅𑀳𑀁 𑀏𑀢𑁂𑀲𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀢𑁆𑀯𑀸 𑀲𑀼𑀔𑀺𑀢𑁄 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁨.

‘‘𑀪𑀼𑀢𑁆𑀢𑀸 𑀫𑀬𑀸 𑀦𑀺𑀯𑀸𑀧𑀸𑀦𑀺, 𑀭𑀸𑀚𑀺𑀦𑁄 𑀧𑀸𑀦𑀪𑁄𑀚𑀦𑀁;

𑀢𑀁 𑀭𑀸𑀚𑀧𑀺𑀡𑁆𑀟𑀁 𑀅𑀯𑀪𑁄𑀢𑁆𑀢𑀼𑀁, 𑀦𑀸𑀳𑀁 𑀩𑁆𑀭𑀸𑀳𑁆𑀫𑀡 𑀫𑀼𑀲𑁆𑀲𑀳𑁂.

𑁭𑁩.

‘‘𑀑𑀤𑀳𑀺𑀲𑁆𑀲𑀸𑀫𑀳𑀁 𑀧𑀲𑁆𑀲𑀁, 𑀔𑀼𑀭𑀧𑁆𑀧𑀸𑀦𑀺𑀲𑁆𑀲 𑀭𑀸𑀚𑀺𑀦𑁄;

𑀢𑀤𑀸𑀳𑀁 𑀲𑀼𑀔𑀺𑀢𑁄 𑀫𑀼𑀢𑁆𑀢𑁄, 𑀅𑀧𑀺 𑀧𑀲𑁆𑀲𑁂𑀬𑁆𑀬 𑀫𑀸𑀢𑀭’’𑀦𑁆𑀢𑀺.

𑀢𑀢𑁆𑀣 𑀦𑀺𑀯𑀸𑀧𑀸𑀦𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀦𑀺𑀯𑀼𑀢𑀸𑀦𑀺 𑀦𑀺𑀯𑀸𑀧𑀸𑀦𑀺. 𑀧𑀸𑀦𑀪𑁄𑀚𑀦𑀦𑁆𑀢𑀺 𑀧𑀸𑀦𑀻𑀬𑀜𑁆𑀘 𑀅𑀯𑀲𑁂𑀲𑀢𑀺𑀡𑀜𑁆𑀘. 𑀢𑀁 𑀭𑀸𑀚𑀧𑀺𑀡𑁆𑀟𑀦𑁆𑀢𑀺 𑀢𑀁 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀲𑀫𑁄𑀥𑀸𑀦𑀓𑀝𑁆𑀞𑁂𑀦 𑀧𑀺𑀡𑁆𑀟𑀁. 𑀅𑀯𑀪𑁄𑀢𑁆𑀢𑀼𑀦𑁆𑀢𑀺 𑀤𑀼𑀩𑁆𑀪𑀼𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 ¶ . 𑀭𑀜𑁆𑀜𑁄 𑀳𑀺 𑀓𑀺𑀘𑁆𑀘𑀁 𑀅𑀦𑀺𑀧𑁆𑀨𑀸𑀤𑁂𑀦𑁆𑀢𑁄 𑀢𑀁 𑀅𑀯𑀪𑀼𑀢𑁆𑀢𑀁 𑀪𑀼𑀜𑁆𑀚𑀢𑀺 𑀦𑀸𑀫, 𑀲𑁆𑀯𑀸𑀳𑀁 𑀏𑀯𑀁 𑀅𑀯𑀪𑁄𑀢𑁆𑀢𑀼𑀁 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀯𑀤𑀢𑀺. 𑀩𑁆𑀭𑀸𑀳𑁆𑀫𑀡 𑀫𑀼𑀲𑁆𑀲𑀳𑁂𑀢𑀺 𑀘𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀸𑀢𑀺 𑀆𑀮𑀧𑀦𑀁, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄.

𑀑𑀤𑀳𑀺𑀲𑁆𑀲𑀸𑀫𑀳𑀁 𑀧𑀲𑁆𑀲𑀁, 𑀔𑀼𑀭𑀧𑁆𑀧𑀸𑀦𑀺𑀲𑁆𑀲 𑀭𑀸𑀚𑀺𑀦𑁄𑀢𑀺 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀆𑀕𑀢𑀲𑁆𑀲 𑀭𑀜𑁆𑀜𑁄 𑀫𑀺𑀕𑀬𑀽𑀣𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀢𑁆𑀯𑀸 ‘‘𑀫𑀁 𑀯𑀺𑀚𑁆𑀛, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀫𑀳𑀸𑀨𑀸𑀲𑀼𑀓𑀧𑀲𑁆𑀲𑀁 𑀑𑀤𑀳𑀺𑀲𑁆𑀲𑀸𑀫𑀺 𑀑𑀟𑁆𑀟𑁂𑀲𑁆𑀲𑀸𑀫𑀺. 𑀲𑀼𑀔𑀺𑀢𑁄 𑀫𑀼𑀢𑁆𑀢𑁄𑀢𑀺 𑀢𑀤𑀸 𑀅𑀳𑀁 𑀫𑀭𑀡𑀪𑀬𑀸 𑀫𑀼𑀢𑁆𑀢𑁄 𑀲𑀼𑀔𑀺𑀢𑁄 𑀦𑀺𑀤𑁆𑀤𑀼𑀓𑁆𑀔𑁄 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑁄 𑀅𑀧𑀺 𑀦𑀸𑀫 𑀫𑀸𑀢𑀭𑀁 𑀧𑀲𑁆𑀲𑁂𑀬𑁆𑀬𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀧𑀓𑁆𑀓𑀸𑀫𑀺. 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀯𑀸𑀭𑀤𑀺𑀯𑀲𑁂 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀆𑀕𑀘𑁆𑀙𑀺. 𑀫𑀳𑀸𑀲𑀢𑁆𑀢𑁄 𑀏𑀓𑀫𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀫𑀺𑀕𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺. 𑀫𑀳𑀸𑀲𑀢𑁆𑀢𑁄 𑀬𑀣𑀸 𑀅𑀜𑁆𑀜𑁂 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀧𑀮𑀸𑀬𑀦𑁆𑀢𑀺, 𑀏𑀯𑀁 𑀅𑀧𑀮𑀸𑀬𑀺𑀢𑁆𑀯𑀸 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀫𑁂𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀫𑀳𑀸𑀨𑀸𑀲𑀼𑀓𑀧𑀲𑁆𑀲𑀁 𑀑𑀤𑀳𑀺𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀲𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀫𑀳𑀸𑀲𑀢𑁆𑀢𑁄 ‘‘𑀓𑀺𑀁, 𑀫𑀳𑀸𑀭𑀸𑀚, 𑀲𑀭𑀁 𑀦 𑀫𑀼𑀘𑁆𑀘𑁂𑀲𑀺, 𑀫𑀼𑀜𑁆𑀘𑀸𑀳𑀻’’𑀢𑀺 𑀆𑀳. ‘‘𑀦 𑀲𑀓𑁆𑀓𑁄𑀫𑀺, 𑀫𑀺𑀕𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀕𑀼𑀡𑀯𑀦𑁆𑀢𑀸𑀦𑀁 𑀕𑀼𑀡𑀁 𑀚𑀸𑀦, 𑀫𑀳𑀸𑀭𑀸𑀚𑀸’’𑀢𑀺. 𑀢𑀤𑀸 ¶ 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀥𑀦𑀼𑀁 𑀙𑀟𑁆𑀟𑁂𑀢𑁆𑀯𑀸 ‘‘𑀇𑀫𑀁 𑀅𑀘𑀺𑀢𑁆𑀢𑀓𑀁 𑀓𑀮𑀺𑀗𑁆𑀕𑀭𑀓𑀡𑁆𑀟𑀫𑁆𑀧𑀺 ¶ 𑀢𑀸𑀯 𑀢𑀯 𑀕𑀼𑀡𑀁 𑀚𑀸𑀦𑀸𑀢𑀺, 𑀅𑀳𑀁 𑀲𑀘𑀺𑀢𑁆𑀢𑀓𑁄 𑀫𑀦𑀼𑀲𑁆𑀲𑀪𑀽𑀢𑁄𑀧𑀺 𑀢𑀯 𑀕𑀼𑀡𑀁 𑀦 𑀚𑀸𑀦𑀸𑀫𑀺, 𑀫𑀺𑀕𑀭𑀸𑀚, 𑀫𑀬𑁆𑀳𑀁 𑀔𑀫, 𑀅𑀪𑀬𑀁 𑀢𑁂 𑀤𑀫𑁆𑀫𑀻’’𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀢𑀸𑀯 𑀅𑀪𑀬𑀁 𑀤𑁂𑀲𑀺, 𑀅𑀬𑀁 𑀧𑀦 𑀉𑀬𑁆𑀬𑀸𑀦𑁂 𑀫𑀺𑀕𑀕𑀡𑁄 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺? ‘‘𑀏𑀢𑀲𑁆𑀲𑀧𑀺 𑀅𑀪𑀬𑀁 𑀤𑀫𑁆𑀫𑀻’’𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀦𑀺𑀕𑁆𑀭𑁄𑀥𑀚𑀸𑀢𑀓𑁂 (𑀚𑀸. 𑁧.𑁧.𑁧𑁨) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑁂𑀲𑀁 𑀅𑀭𑀜𑁆𑀜𑁂 𑀫𑀺𑀕𑀸𑀦𑀁 𑀆𑀓𑀸𑀲𑀕𑀢𑀲𑀓𑀼𑀡𑀸𑀦𑀁 𑀚𑀮𑀘𑀭𑀫𑀘𑁆𑀙𑀸𑀦𑀜𑁆𑀘 𑀅𑀪𑀬𑀁 𑀤𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀦𑁆𑀢𑁂𑀦 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺.

‘‘𑀤𑀸𑀦𑀁 ¶ 𑀲𑀻𑀮𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;

𑀅𑀓𑁆𑀓𑁄𑀥𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀺𑀜𑁆𑀘 𑀅𑀯𑀺𑀭𑁄𑀥𑀦𑀁.

‘‘𑀇𑀘𑁆𑀘𑁂𑀢𑁂 𑀓𑀼𑀲𑀮𑁂 𑀥𑀫𑁆𑀫𑁂, 𑀞𑀺𑀢𑁂 𑀧𑀲𑁆𑀲𑀸𑀫𑀺 𑀅𑀢𑁆𑀢𑀦𑀺;

𑀢𑀢𑁄 𑀫𑁂 𑀚𑀸𑀬𑀢𑁂 𑀧𑀻𑀢𑀺, 𑀲𑁄𑀫𑀦𑀲𑁆𑀲𑀜𑁆𑀘𑀦𑀧𑁆𑀧𑀓’’𑀦𑁆𑀢𑀺. (𑀚𑀸. 𑁨.𑁨𑁧.𑁧𑁭𑁬-𑁧𑁭𑁭) 𑁋

𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀥𑀫𑁆𑀫𑁂 𑀕𑀸𑀣𑀸𑀩𑀦𑁆𑀥𑁂𑀦𑁂𑀯 𑀤𑁂𑀲𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀦𑀕𑀭𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑀧𑀓𑀸𑀲𑀦𑀢𑁆𑀣𑀁 𑀲𑀼𑀯𑀡𑁆𑀡𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀕𑀢𑁄.

𑁭𑁪.

‘‘𑀫𑀺𑀕𑀭𑀸𑀚𑀸 𑀧𑀼𑀭𑁂 𑀆𑀲𑀺𑀁, 𑀓𑁄𑀲𑀮𑀲𑁆𑀲 𑀦𑀺𑀓𑁂𑀢𑀦𑁂;

𑀦𑀦𑁆𑀤𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀅𑀪𑀺𑀭𑀽𑀧𑁄 𑀘𑀢𑀼𑀧𑁆𑀧𑀤𑁄.

𑁭𑁫.

‘‘𑀢𑀁 𑀫𑀁 𑀯𑀥𑀺𑀢𑀼𑀫𑀸𑀕𑀘𑁆𑀙𑀺, 𑀤𑀸𑀬𑀲𑁆𑀫𑀺𑀁 𑀅𑀚𑁆𑀚𑀼𑀦𑁂 𑀯𑀦𑁂;

𑀥𑀦𑀼𑀁 𑀆𑀭𑀚𑁆𑀚𑀁 𑀓𑀢𑁆𑀯𑀸𑀦, 𑀉𑀲𑀼𑀁 𑀲𑀦𑁆𑀦𑀬𑁆𑀳 𑀓𑁄𑀲𑀮𑁄.

𑁭𑁬.

‘‘𑀢𑀲𑁆𑀲𑀸𑀳𑀁 𑀑𑀤𑀳𑀺𑀁 𑀧𑀲𑁆𑀲𑀁, 𑀔𑀼𑀭𑀧𑁆𑀧𑀸𑀦𑀺𑀲𑁆𑀲 𑀭𑀸𑀚𑀺𑀦𑁄;

𑀢𑀤𑀸𑀳𑀁 𑀲𑀼𑀔𑀺𑀢𑁄 𑀫𑀼𑀢𑁆𑀢𑁄, 𑀫𑀸𑀢𑀭𑀁 𑀤𑀝𑁆𑀞𑀼𑀫𑀸𑀕𑀢𑁄’’𑀢𑀺. 𑁋

𑀇𑀫𑀸 𑀢𑀺𑀲𑁆𑀲𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀳𑁄𑀦𑁆𑀢𑀺.

𑀢𑀢𑁆𑀣 ¶ 𑀓𑁄𑀲𑀮𑀲𑁆𑀲 𑀦𑀺𑀓𑁂𑀢𑀦𑁂𑀢𑀺 𑀓𑁄𑀲𑀮𑀲𑁆𑀲 𑀭𑀜𑁆𑀜𑁄 𑀦𑀺𑀓𑁂𑀢𑀦𑁂 𑀯𑀲𑀦𑀝𑁆𑀞𑀸𑀦𑁂, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀭𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀸𑀬𑀲𑁆𑀫𑀺𑀦𑁆𑀢𑀺 𑀫𑀺𑀕𑀸𑀦𑀁 𑀯𑀲𑀦𑀢𑁆𑀣𑀸𑀬 𑀤𑀺𑀦𑁆𑀦𑀉𑀬𑁆𑀬𑀸𑀦𑁂. 𑀆𑀭𑀚𑁆𑀚𑀁 𑀓𑀢𑁆𑀯𑀸𑀦𑀸𑀢𑀺 𑀚𑀺𑀬𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀓𑀢𑁆𑀯𑀸 ¶ , 𑀆𑀭𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀬𑁆𑀳𑀸𑀢𑀺 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀬𑁄𑀚𑁂𑀢𑁆𑀯𑀸. 𑀑𑀤𑀳𑀺𑀦𑁆𑀢𑀺 𑀑𑀟𑁆𑀟𑁂𑀲𑀺𑀁. 𑀫𑀸𑀢𑀭𑀁 𑀤𑀝𑁆𑀞𑀼𑀫𑀸𑀕𑀢𑁄𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀢𑁆𑀣𑀸𑀬 𑀲𑀼𑀯𑀡𑁆𑀡𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀤𑀝𑁆𑀞𑀼𑀁 𑀆𑀕𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀭𑀸𑀚𑀸 𑀆𑀦𑀦𑁆𑀤𑁄, 𑀦𑀦𑁆𑀤𑀺𑀬𑀫𑀺𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀦𑀦𑁆𑀤𑀺𑀬𑀫𑀺𑀕𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀅𑀯𑀸𑀭𑀺𑀬𑀯𑀕𑁆𑀕𑁄 𑀧𑀞𑀫𑁄.

𑁨. 𑀔𑀭𑀧𑀼𑀢𑁆𑀢𑀯𑀕𑁆𑀕𑁄

[𑁩𑁮𑁬] 𑁧. 𑀔𑀭𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀲𑀘𑁆𑀘𑀁 ¶ ¶ 𑀓𑀺𑀭𑁂𑀯𑀫𑀸𑀳𑀁𑀲𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀅𑀬𑀁 𑀢𑁂 𑀇𑀢𑁆𑀣𑀻 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀇𑀫𑀁 𑀦𑀺𑀲𑁆𑀲𑀸𑀬 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑁆𑀯𑀸 𑀫𑀭𑀦𑁆𑀢𑁄 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀲𑁂𑀦𑀓𑁂 𑀦𑀸𑀫 𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑀢𑁆𑀢𑀁 𑀓𑀸𑀭𑁂𑀲𑀺. 𑀢𑀤𑀸 𑀲𑁂𑀦𑀓𑀲𑁆𑀲 𑀭𑀜𑁆𑀜𑁄 𑀏𑀓𑁂𑀦 𑀦𑀸𑀕𑀭𑀸𑀚𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑁄 𑀳𑁄𑀢𑀺. 𑀲𑁄 𑀓𑀺𑀭 𑀦𑀸𑀕𑀭𑀸𑀚𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑀮𑁂 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑁄 𑀘𑀭𑀢𑀺. 𑀅𑀣 𑀦𑀁 𑀕𑀸𑀫𑀤𑀸𑀭𑀓𑀸 𑀤𑀺𑀲𑁆𑀯𑀸 ‘‘𑀲𑀧𑁆𑀧𑁄 𑀅𑀬’’𑀦𑁆𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀺𑀁𑀲𑀼. 𑀅𑀣 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀓𑀻𑀴𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀓𑀺𑀁 𑀏𑀢𑁂 𑀤𑀸𑀭𑀓𑀸 𑀓𑀭𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀓𑀁 𑀲𑀧𑁆𑀧𑀁 𑀧𑀳𑀭𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀧𑀳𑀭𑀺𑀢𑀼𑀁 𑀫𑀸 𑀤𑁂𑀣, 𑀧𑀮𑀸𑀧𑁂𑀣 𑀦𑁂’’𑀢𑀺 𑀧𑀮𑀸𑀧𑁂𑀲𑀺. 𑀦𑀸𑀕𑀭𑀸𑀚𑀸 𑀚𑀻𑀯𑀺𑀢𑀁 ¶ 𑀮𑀪𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀩𑀳𑀽𑀦𑀺 𑀭𑀢𑀦𑀸𑀦𑀺 𑀆𑀤𑀸𑀬 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀭𑀜𑁆𑀜𑁄 𑀲𑀬𑀦𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀦𑀺 𑀭𑀢𑀦𑀸𑀦𑀺 𑀤𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀬𑀸 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀢𑀺. 𑀲𑁄 𑀅𑀢𑁆𑀢𑀦𑁄 𑀦𑀸𑀕𑀫𑀸𑀡𑀯𑀺𑀓𑀸𑀲𑀼 𑀏𑀓𑀁 𑀓𑀸𑀫𑁂𑀲𑀼 𑀅𑀢𑀺𑀢𑁆𑀢𑀁 𑀦𑀸𑀕𑀫𑀸𑀡𑀯𑀺𑀓𑀁 𑀭𑀓𑁆𑀔𑀡𑀢𑁆𑀣𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 ‘‘𑀬𑀤𑀸 𑀏𑀢𑀁 𑀦 𑀧𑀲𑁆𑀲𑀲𑀺, 𑀢𑀤𑀸 𑀇𑀫𑀁 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀬𑁆𑀬𑀸𑀲𑀻’’𑀢𑀺 𑀢𑀲𑁆𑀲 𑀏𑀓𑀁 𑀫𑀦𑁆𑀢𑀁 𑀅𑀤𑀸𑀲𑀺.

𑀲𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀦𑀸𑀕𑀫𑀸𑀡𑀯𑀺𑀓𑀸𑀬 𑀲𑀤𑁆𑀥𑀺𑀁 𑀧𑁄𑀓𑁆𑀔𑀭𑀡𑀺𑀬𑀁 𑀉𑀤𑀓𑀓𑀻𑀴𑀁 𑀓𑀻𑀴𑀺. 𑀦𑀸𑀕𑀫𑀸𑀡𑀯𑀺𑀓𑀸 𑀏𑀓𑀁 𑀉𑀤𑀓𑀲𑀧𑁆𑀧𑀁 𑀤𑀺𑀲𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀲𑀤𑁆𑀥𑀫𑁆𑀫𑀁 𑀧𑀝𑀺𑀲𑁂𑀯𑀺. 𑀭𑀸𑀚𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀦𑀼 ¶ 𑀔𑁄 𑀕𑀢𑀸’’𑀢𑀺 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀺𑀁 𑀤𑀺𑀲𑁆𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀧𑀳𑀭𑀺. 𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑀢𑀢𑁄 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀫𑀸 𑀆𑀕𑀢𑀸𑀲𑀻’’𑀢𑀺 𑀧𑀼𑀝𑁆𑀞𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑁄 𑀫𑀁 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑀺𑀁 𑀧𑀺𑀝𑁆𑀞𑀺𑀬𑀁 𑀧𑀳𑀭𑀻’’𑀢𑀺 𑀧𑀳𑀸𑀭𑀁 𑀤𑀲𑁆𑀲𑁂𑀲𑀺. 𑀦𑀸𑀕𑀭𑀸𑀚𑀸 𑀢𑀣𑀢𑁄 ¶ 𑀅𑀚𑀸𑀦𑀺𑀢𑁆𑀯𑀸𑀯 𑀘𑀢𑁆𑀢𑀸𑀭𑁄 𑀦𑀸𑀕𑀫𑀸𑀡𑀯𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀲𑁂𑀦𑀓𑀲𑁆𑀲 𑀲𑀬𑀦𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀸𑀲𑀯𑀸𑀢𑁂𑀦 𑀢𑀁 𑀪𑀼𑀲𑀁 𑀯𑀺𑀬 𑀯𑀺𑀤𑁆𑀥𑀁𑀲𑁂𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀓𑀸𑀮𑁂 𑀕𑀩𑁆𑀪𑀁 𑀧𑀯𑀺𑀲𑀺𑀁𑀲𑀼. 𑀢𑁂𑀲𑀁 𑀧𑀯𑀺𑀲𑀦𑀯𑁂𑀮𑀸𑀬𑀫𑁂𑀯 𑀭𑀸𑀚𑀸 𑀤𑁂𑀯𑀺𑀁 𑀆𑀳 𑁋 ‘‘𑀚𑀸𑀦𑀸𑀲𑀺 𑀦𑀼 𑀔𑁄 𑀪𑀤𑁆𑀤𑁂, 𑀦𑀸𑀕𑀫𑀸𑀡𑀯𑀺𑀓𑀸𑀬 𑀕𑀢𑀝𑁆𑀞𑀸𑀦’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀤𑁂𑀯𑀸’’𑀢𑀺. ‘‘𑀅𑀚𑁆𑀚 𑀲𑀸 𑀅𑀫𑁆𑀳𑀸𑀓𑀁 𑀧𑁄𑀓𑁆𑀔𑀭𑀡𑀺𑀬𑀁 𑀓𑀻𑀴𑀦𑀓𑀸𑀮𑁂 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀏𑀓𑁂𑀦 𑀉𑀤𑀓𑀲𑀧𑁆𑀧𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀅𑀓𑀸𑀲𑀺, 𑀅𑀣 𑀦𑀁 𑀅𑀳𑀁 ‘𑀏𑀯𑀁 𑀫𑀸 𑀓𑀭𑀻’𑀢𑀺 𑀲𑀺𑀓𑁆𑀔𑀸𑀧𑀦𑀢𑁆𑀣𑀸𑀬 𑀯𑁂𑀴𑀼𑀧𑁂𑀲𑀺𑀓𑀸𑀬 𑀧𑀳𑀭𑀺𑀁, 𑀲𑀸 ‘𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀲𑀳𑀸𑀬𑀲𑁆𑀲 𑀫𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀣𑁂𑀢𑁆𑀯𑀸 𑀫𑁂𑀢𑁆𑀢𑀺𑀁 𑀪𑀺𑀦𑁆𑀤𑁂𑀬𑁆𑀬𑀸’𑀢𑀺 𑀫𑁂 𑀪𑀬𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀦𑀸𑀕𑀫𑀸𑀡𑀯𑀓𑀸 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀦𑀸𑀕𑀭𑀸𑀚𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀭𑀜𑁆𑀜𑁄 𑀲𑀬𑀦𑀖𑀭𑀁 𑀆𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ‘‘𑀇𑀤𑀁 𑀫𑁂 𑀤𑀡𑁆𑀟𑀓𑀫𑁆𑀫’’𑀦𑁆𑀢𑀺 𑀲𑀩𑁆𑀩𑀭𑀼𑀢𑀚𑀸𑀦𑀦𑀁 𑀦𑀸𑀫 𑀫𑀦𑁆𑀢𑀁 𑀤𑀢𑁆𑀯𑀸 ‘‘𑀅𑀬𑀁, 𑀫𑀳𑀸𑀭𑀸𑀚, 𑀅𑀦𑀕𑁆𑀖𑁄 𑀫𑀦𑁆𑀢𑁄, 𑀲𑀘𑁂 𑀇𑀫𑀁 𑀫𑀦𑁆𑀢𑀁 𑀅𑀜𑁆𑀜𑀲𑁆𑀲 𑀤𑀤𑁂𑀬𑁆𑀬𑀸𑀲𑀺, 𑀤𑀢𑁆𑀯𑀸𑀯 𑀅𑀕𑁆𑀕𑀺𑀁 𑀧𑀯𑀺𑀲𑀺𑀢𑁆𑀯𑀸 𑀫𑀭𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀓𑀺𑀧𑀺𑀮𑁆𑀮𑀺𑀓𑀸𑀦𑀫𑁆𑀧𑀺 𑀲𑀤𑁆𑀤𑀁 𑀚𑀸𑀦𑀸𑀢𑀺.

𑀢𑀲𑁆𑀲𑁂𑀓𑀤𑀺𑀯𑀲𑀁 ¶ 𑀫𑀳𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀥𑀼𑀨𑀸𑀡𑀺𑀢𑁂𑀳𑀺 𑀔𑀸𑀤𑀦𑀻𑀬𑀁 𑀔𑀸𑀤𑀦𑁆𑀢𑀲𑁆𑀲 𑀏𑀓𑀁 𑀫𑀥𑀼𑀩𑀺𑀦𑁆𑀤𑀼 𑀘 𑀨𑀸𑀡𑀺𑀢𑀩𑀺𑀦𑁆𑀤𑀼 𑀘 𑀧𑀽𑀯𑀔𑀡𑁆𑀟𑀜𑁆𑀘 𑀪𑀽𑀫𑀺𑀬𑀁 𑀧𑀢𑀺. 𑀏𑀓𑀸 𑀓𑀺𑀧𑀺𑀮𑁆𑀮𑀺𑀓𑀸 𑀢𑀁 𑀤𑀺𑀲𑁆𑀯𑀸 ‘‘𑀭𑀜𑁆𑀜𑁄 𑀫𑀳𑀸𑀢𑀮𑁂 𑀫𑀥𑀼𑀘𑀸𑀝𑀺 𑀪𑀺𑀦𑁆𑀦𑀸, 𑀨𑀸𑀡𑀺𑀢𑀲𑀓𑀝𑀁 𑀧𑀽𑀯𑀲𑀓𑀝𑀁 ¶ 𑀦𑀺𑀓𑁆𑀓𑀼𑀚𑁆𑀚𑀺𑀢𑀁, 𑀫𑀥𑀼𑀨𑀸𑀡𑀺𑀢𑀜𑁆𑀘 𑀧𑀽𑀯𑀜𑁆𑀘 𑀔𑀸𑀤𑀣𑀸’’𑀢𑀺 𑀯𑀺𑀭𑀯𑀦𑁆𑀢𑀻 𑀯𑀺𑀘𑀭𑀢𑀺. 𑀅𑀣 𑀭𑀸𑀚𑀸 𑀢𑀲𑁆𑀲𑀸 𑀭𑀯𑀁 𑀲𑀼𑀢𑁆𑀯𑀸 𑀳𑀲𑀺. 𑀭𑀜𑁆𑀜𑁄 𑀲𑀫𑀻𑀧𑁂 𑀞𑀺𑀢𑀸 𑀤𑁂𑀯𑀻 ‘‘𑀓𑀺𑀁 𑀦𑀼 𑀔𑁄 𑀤𑀺𑀲𑁆𑀯𑀸 𑀭𑀸𑀚𑀸 𑀳𑀲𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀫𑀺𑀁 𑀔𑀸𑀤𑀦𑀻𑀬𑀁 𑀔𑀸𑀤𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁂 𑀏𑀓𑀁 𑀫𑀓𑁆𑀔𑀺𑀓𑀁 𑀲𑀸𑀫𑀺𑀓𑁄 ‘‘𑀏𑀳𑀺 𑀪𑀤𑁆𑀤𑁂, 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀸 ‘‘𑀅𑀥𑀺𑀯𑀸𑀲𑁂𑀳𑀺 𑀢𑀸𑀯 𑀲𑀸𑀫𑀺, 𑀇𑀤𑀸𑀦𑀺 𑀭𑀜𑁆𑀜𑁄 𑀕𑀦𑁆𑀥𑁂 𑀆𑀳𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀯𑀺𑀮𑀺𑀫𑁆𑀧𑀦𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀕𑀦𑁆𑀥𑀘𑀼𑀡𑁆𑀡𑀁 𑀧𑀢𑀺𑀲𑁆𑀲𑀢𑀺, 𑀅𑀳𑀁 𑀢𑀢𑁆𑀣 𑀯𑀝𑁆𑀝𑁂𑀢𑁆𑀯𑀸 𑀲𑀼𑀕𑀦𑁆𑀥𑀸 𑀪𑀯𑀺𑀲𑁆𑀲𑀸𑀫𑀺, 𑀢𑀢𑁄 𑀭𑀜𑁆𑀜𑁄 𑀧𑀺𑀝𑁆𑀞𑀺𑀬𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀭𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀭𑀸𑀚𑀸 𑀢𑀫𑁆𑀧𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀳𑀲𑀺. 𑀤𑁂𑀯𑀻𑀧𑀺 ‘‘𑀓𑀺𑀁 𑀦𑀼 𑀔𑁄 𑀤𑀺𑀲𑁆𑀯𑀸 𑀳𑀲𑀻’’𑀢𑀺 𑀧𑀼𑀦 𑀘𑀺𑀦𑁆𑀢𑁂𑀲𑀺. 𑀧𑀼𑀦 𑀭𑀜𑁆𑀜𑁄 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀏𑀓𑀁 𑀪𑀢𑁆𑀢𑀲𑀺𑀢𑁆𑀣𑀁 𑀪𑀽𑀫𑀺𑀬𑀁 𑀧𑀢𑀺. 𑀓𑀺𑀧𑀺𑀮𑁆𑀮𑀺𑀓𑀸 ‘‘𑀭𑀸𑀚𑀓𑀼𑀮𑁂 𑀪𑀢𑁆𑀢𑀲𑀓𑀝𑀁 𑀪𑀕𑁆𑀕𑀁, 𑀪𑀢𑁆𑀢𑀁 𑀪𑀼𑀜𑁆𑀚𑀣𑀸’’𑀢𑀺 𑀯𑀺𑀭𑀯𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀼𑀦𑀧𑀺 𑀳𑀲𑀺. 𑀤𑁂𑀯𑀻 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀭𑀺𑀯𑀺𑀲𑀦𑁆𑀢𑀻 ‘‘𑀫𑀁 𑀦𑀼 𑀔𑁄 𑀤𑀺𑀲𑁆𑀯𑀸 𑀭𑀸𑀚𑀸 𑀳𑀲𑀢𑀻’’𑀢𑀺 𑀯𑀺𑀢𑀓𑁆𑀓𑁂𑀲𑀺.

𑀲𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀬𑀦𑀁 𑀆𑀭𑀼𑀬𑁆𑀳 𑀦𑀺𑀧𑀚𑁆𑀚𑀦𑀓𑀸𑀮𑁂 ‘‘𑀓𑀺𑀁𑀓𑀸𑀭𑀡𑀸 𑀤𑁂𑀯, 𑀳𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀓𑀺𑀁 𑀢𑁂 𑀫𑀫 𑀳𑀲𑀺𑀢𑀓𑀸𑀭𑀡𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑀤𑁆𑀥𑁄 𑀓𑀣𑁂𑀲𑀺. 𑀅𑀣 𑀦𑀁 𑀲𑀸 ‘‘𑀢𑀼𑀫𑁆𑀳𑀸𑀓𑀁 𑀚𑀸𑀦𑀦𑀫𑀦𑁆𑀢𑀁 𑀫𑀬𑁆𑀳𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑀦𑁆𑀥𑀺 ¶ . 𑀭𑀸𑀚𑀸 ‘‘𑀲𑀘𑀸𑀳𑀁 𑀇𑀫𑀁 𑀫𑀦𑁆𑀢𑀁 𑀢𑀼𑀬𑁆𑀳𑀁 𑀤𑀲𑁆𑀲𑀸𑀫𑀺, 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀫𑀭𑀦𑁆𑀢𑁄𑀧𑀺 𑀫𑀬𑁆𑀳𑀁 𑀤𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀫𑀸𑀢𑀼𑀕𑀸𑀫𑀯𑀲𑀺𑀓𑁄 𑀳𑀼𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀫𑀦𑁆𑀢𑀁 𑀤𑀢𑁆𑀯𑀸 𑀅𑀕𑁆𑀕𑀺𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀭𑀣𑁂𑀦 𑀉𑀬𑁆𑀬𑀸𑀦𑀁 𑀧𑀸𑀬𑀸𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀩𑀸𑀮𑀭𑀸𑀚𑀸 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 ‘𑀅𑀕𑁆𑀕𑀺𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’𑀢𑀺 𑀕𑀘𑁆𑀙𑀢𑀺, 𑀚𑀻𑀯𑀺𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀲𑀼𑀚𑀁 𑀅𑀲𑀼𑀭𑀓𑀜𑁆𑀜𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀚𑀺𑀓𑀁 ¶ 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀅𑀚𑁄 𑀳𑀼𑀢𑁆𑀯𑀸 ‘‘𑀫𑀳𑀸𑀚𑀦𑁄 𑀫𑀸 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀭𑀜𑁆𑀜𑁄 𑀭𑀣𑀲𑁆𑀲 𑀧𑀼𑀭𑀢𑁄 𑀅𑀳𑁄𑀲𑀺. 𑀢𑀁 𑀭𑀸𑀚𑀸 𑀘𑁂𑀯 𑀭𑀣𑁂 𑀬𑀼𑀢𑁆𑀢𑀲𑀺𑀦𑁆𑀥𑀯𑀸 𑀘 𑀧𑀲𑁆𑀲𑀦𑁆𑀢𑀺, 𑀅𑀜𑁆𑀜𑁄 𑀓𑁄𑀘𑀺 𑀦 𑀧𑀲𑁆𑀲𑀢𑀺. 𑀅𑀚𑁄 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀭𑀣𑀧𑀼𑀭𑀢𑁄 𑀅𑀚𑀺𑀓𑀸𑀬 𑀲𑀤𑁆𑀥𑀺𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀯𑀺𑀬 ¶ 𑀅𑀳𑁄𑀲𑀺. 𑀢𑀫𑁂𑀓𑁄 𑀭𑀣𑁂 𑀬𑀼𑀢𑁆𑀢𑀲𑀺𑀦𑁆𑀥𑀯𑁄 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀅𑀚𑀭𑀸𑀚, 𑀫𑀬𑀁 𑀧𑀼𑀩𑁆𑀩𑁂 ‘𑀅𑀚𑀸 𑀓𑀺𑀭 𑀩𑀸𑀮𑀸 𑀅𑀳𑀺𑀭𑀺𑀓𑀸’𑀢𑀺 𑀅𑀲𑁆𑀲𑀼𑀫𑁆𑀳, 𑀦 𑀘 𑀢𑀁 𑀧𑀲𑁆𑀲𑀺𑀫𑁆𑀳, 𑀢𑁆𑀯𑀁 𑀧𑀦 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀓𑀢𑁆𑀢𑀩𑁆𑀩𑀁 𑀅𑀦𑀸𑀘𑀸𑀭𑀁 𑀅𑀫𑁆𑀳𑀸𑀓𑀁 𑀏𑀢𑁆𑀢𑀓𑀸𑀦𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀓𑀭𑁄𑀲𑀺, 𑀦 𑀮𑀚𑁆𑀚𑀲𑀺, 𑀢𑀁 𑀦𑁄 𑀧𑀼𑀩𑁆𑀩𑁂 𑀲𑀼𑀢𑀁 𑀇𑀫𑀺𑀦𑀸 𑀤𑀺𑀝𑁆𑀞𑁂𑀦 𑀲𑀫𑁂𑀢𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁭.

‘‘𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀼, 𑀯𑀲𑁆𑀢𑀁 𑀩𑀸𑀮𑁄𑀢𑀺 𑀧𑀡𑁆𑀟𑀺𑀢𑀸;

𑀧𑀲𑁆𑀲 𑀩𑀸𑀮𑁄 𑀭𑀳𑁄𑀓𑀫𑁆𑀫𑀁, 𑀆𑀯𑀺𑀓𑀼𑀩𑁆𑀩𑀁 𑀦 𑀩𑀼𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀯𑀲𑁆𑀢𑀦𑁆𑀢𑀺 𑀅𑀚𑀁. 𑀧𑀡𑁆𑀟𑀺𑀢𑀸𑀢𑀺 𑀜𑀸𑀡𑀲𑀫𑁆𑀧𑀦𑁆𑀦𑀸 𑀢𑀁 𑀩𑀸𑀮𑁄𑀢𑀺 𑀯𑀤𑀦𑁆𑀢𑀺, 𑀲𑀘𑁆𑀘𑀁 𑀓𑀺𑀭 𑀯𑀤𑀦𑁆𑀢𑀺. 𑀧𑀲𑁆𑀲𑀸𑀢𑀺 𑀆𑀮𑀧𑀦𑀁, 𑀧𑀲𑁆𑀲𑀣𑀸𑀳𑀺 𑀅𑀢𑁆𑀣𑁄. 𑀦 𑀩𑀼𑀚𑁆𑀛𑀢𑀻𑀢𑀺 𑀏𑀯𑀁 𑀓𑀸𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀦 𑀚𑀸𑀦𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀚𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁮.

‘‘𑀢𑁆𑀯𑀁 𑀔𑁄𑀧𑀺 𑀲𑀫𑁆𑀫 𑀩𑀸𑀮𑁄𑀲𑀺, 𑀔𑀭𑀧𑀼𑀢𑁆𑀢 𑀯𑀺𑀚𑀸𑀦𑀳𑀺;

𑀭𑀚𑁆𑀚𑀼𑀬𑀸 𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀯𑀗𑁆𑀓𑁄𑀝𑁆𑀞𑁄 𑀑𑀳𑀺𑀢𑁄𑀫𑀼𑀔𑁄.

𑁭𑁯.

‘‘𑀅𑀧𑀭𑀫𑁆𑀧𑀺 𑀲𑀫𑁆𑀫 𑀢𑁂 𑀩𑀸𑀮𑁆𑀬𑀁, 𑀬𑁄 𑀫𑀼𑀢𑁆𑀢𑁄 𑀦 𑀧𑀮𑀸𑀬𑀲𑀺;

𑀲𑁄 𑀘 𑀩𑀸𑀮𑀢𑀭𑁄 𑀲𑀫𑁆𑀫, 𑀬𑀁 𑀢𑁆𑀯𑀁 𑀯𑀳𑀢𑀺 𑀲𑁂𑀦𑀓’’𑀦𑁆𑀢𑀺.

𑀢𑀢𑁆𑀣 𑀢𑁆𑀯𑀁 𑀔𑁄𑀧𑀺 𑀲𑀫𑁆𑀫𑀸𑀢𑀺 𑀲𑀫𑁆𑀫 𑀲𑀺𑀦𑁆𑀥𑀯 𑀫𑀬𑀸𑀧𑀺 𑀔𑁄 𑀢𑁆𑀯𑀁 𑀩𑀸𑀮𑀢𑀭𑁄. 𑀔𑀭𑀧𑀼𑀢𑁆𑀢𑀸𑀢𑀺 𑀲𑁄 𑀓𑀺𑀭 𑀕𑀤𑁆𑀭𑀪𑀲𑁆𑀲 𑀚𑀸𑀢𑀓𑁄, 𑀢𑁂𑀦 𑀢𑀁 𑀏𑀯𑀫𑀸𑀳. 𑀯𑀺𑀚𑀸𑀦𑀳𑀻𑀢𑀺 𑀅𑀳𑀫𑁂𑀯 𑀩𑀸𑀮𑁄𑀢𑀺 𑀏𑀯𑀁 𑀚𑀸𑀦𑀸𑀳𑀺. 𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 ¶ 𑀬𑀼𑀕𑁂𑀦 𑀲𑀤𑁆𑀥𑀺𑀁 𑀕𑀻𑀯𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀯𑀗𑁆𑀓𑁄𑀝𑁆𑀞𑁄𑀢𑀺 𑀯𑀗𑁆𑀓𑀑𑀝𑁆𑀞𑁄. 𑀑𑀳𑀺𑀢𑁄𑀫𑀼𑀔𑁄𑀢𑀺 𑀫𑀼𑀔𑀩𑀦𑁆𑀥𑀦𑁂𑀦 𑀧𑀺𑀳𑀺𑀢𑀫𑀼𑀔𑁄. 𑀬𑁄 𑀫𑀼𑀢𑁆𑀢𑁄 𑀦 𑀧𑀮𑀸𑀬𑀲𑀻𑀢𑀺 𑀬𑁄 𑀢𑁆𑀯𑀁 𑀭𑀣𑀢𑁄 𑀫𑀼𑀢𑁆𑀢𑁄 𑀲𑀫𑀸𑀦𑁄 𑀫𑀼𑀢𑁆𑀢𑀓𑀸𑀮𑁂 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀦 𑀧𑀯𑀺𑀲𑀲𑀺, 𑀢𑀁 𑀢𑁂 𑀅𑀧𑀮𑀸𑀬𑀦𑀁 𑀅𑀧𑀭𑀫𑁆𑀧𑀺 𑀩𑀸𑀮𑁆𑀬𑀁 ¶ , 𑀲𑁄 𑀘 𑀩𑀸𑀮𑀢𑀭𑁄𑀢𑀺 𑀬𑀁 𑀢𑁆𑀯𑀁 𑀲𑁂𑀦𑀓𑀁 𑀯𑀳𑀲𑀺, 𑀲𑁄 𑀲𑁂𑀦𑀓𑁄 𑀢𑀬𑀸𑀧𑀺 𑀩𑀸𑀮𑀢𑀭𑁄.

𑀭𑀸𑀚𑀸 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀓𑀣𑀁 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀁 𑀲𑀼𑀡𑀦𑁆𑀢𑁄 𑀲𑀡𑀺𑀓𑀁 𑀭𑀣𑀁 𑀧𑁂𑀲𑁂𑀲𑀺. 𑀲𑀺𑀦𑁆𑀥𑀯𑁄𑀧𑀺 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀧𑀼𑀦 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁮𑁦.

‘‘𑀬𑀁 𑀦𑀼 𑀲𑀫𑁆𑀫 𑀅𑀳𑀁 𑀩𑀸𑀮𑁄, 𑀅𑀚𑀭𑀸𑀚 𑀯𑀺𑀚𑀸𑀦𑀳𑀺;

𑀅𑀣 𑀓𑁂𑀦 𑀲𑁂𑀦𑀓𑁄 𑀩𑀸𑀮𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 ¶ 𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀦𑀽𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀅𑀚𑀭𑀸𑀚, 𑀬𑁂𑀦 𑀢𑀸𑀯 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀩𑀸𑀮𑁄, 𑀢𑀁 𑀢𑁆𑀯𑀁 𑀓𑀸𑀭𑀡𑀁 𑀚𑀸𑀦𑀸𑀳𑀺, 𑀲𑀓𑁆𑀓𑀸 𑀏𑀢𑀁 𑀢𑀬𑀸 𑀜𑀸𑀢𑀼𑀁, 𑀅𑀳𑀜𑁆𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸𑀯 𑀩𑀸𑀮𑁄, 𑀢𑀲𑁆𑀫𑀸 𑀫𑀁 𑀔𑀭𑀧𑀼𑀢𑁆𑀢𑀸𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀲𑀼𑀝𑁆𑀞𑀼 𑀯𑀤𑀲𑀺, 𑀅𑀬𑀁 𑀧𑀦 𑀲𑁂𑀦𑀓𑁄 𑀭𑀸𑀚𑀸 𑀓𑁂𑀦 𑀓𑀸𑀭𑀡𑁂𑀦 𑀩𑀸𑀮𑁄, 𑀢𑀁 𑀫𑁂 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁄 𑀅𑀓𑁆𑀔𑀸𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀚𑁄 𑀆𑀘𑀺𑀓𑁆𑀔𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁮𑁧.

‘‘𑀉𑀢𑁆𑀢𑀫𑀢𑁆𑀣𑀁 𑀮𑀪𑀺𑀢𑁆𑀯𑀸𑀦, 𑀪𑀭𑀺𑀬𑀸𑀬 𑀬𑁄 𑀧𑀤𑀲𑁆𑀲𑀢𑀺;

𑀢𑁂𑀦 𑀚𑀳𑀺𑀲𑁆𑀲𑀢𑀢𑁆𑀢𑀸𑀦𑀁, 𑀲𑀸 𑀘𑁂𑀯𑀲𑁆𑀲 𑀦 𑀳𑁂𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀉𑀢𑁆𑀢𑀫𑀢𑁆𑀣𑀦𑁆𑀢𑀺 𑀲𑀩𑁆𑀩𑀭𑀼𑀢𑀚𑀸𑀦𑀦𑀫𑀦𑁆𑀢𑀁. 𑀢𑁂𑀦𑀸𑀢𑀺 𑀢𑀲𑁆𑀲𑀸 𑀫𑀦𑁆𑀢𑀧𑁆𑀧𑀤𑀸𑀦𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀤𑀢𑁆𑀯𑀸 𑀅𑀕𑁆𑀕𑀺𑀁 𑀧𑀯𑀺𑀲𑀦𑁆𑀢𑁄 𑀅𑀢𑁆𑀢𑀸𑀦𑀜𑁆𑀘 𑀚𑀳𑀺𑀲𑁆𑀲𑀢𑀺, 𑀲𑀸 𑀘𑀲𑁆𑀲 𑀪𑀭𑀺𑀬𑀸 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀏𑀲 𑀢𑀬𑀸𑀧𑀺 𑀩𑀸𑀮𑀢𑀭𑁄, 𑀬𑁄 𑀮𑀤𑁆𑀥𑀁 𑀬𑀲𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀚𑀭𑀸𑀚, 𑀅𑀫𑁆𑀳𑀸𑀓𑀁 𑀲𑁄𑀢𑁆𑀣𑀺𑀁 𑀓𑀭𑁄𑀦𑁆𑀢𑁄𑀧𑀺 𑀢𑁆𑀯𑀜𑁆𑀜𑁂𑀯 𑀓𑀭𑀺𑀲𑁆𑀲𑀲𑀺, 𑀓𑀣𑁂𑀳𑀺 𑀢𑀸𑀯 𑀦𑁄 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀅𑀚𑀭𑀸𑀚𑀸 ‘‘𑀫𑀳𑀸𑀭𑀸𑀚, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑀸 𑀅𑀜𑁆𑀜𑁄 𑀧𑀺𑀬𑀢𑀭𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀁 𑀧𑀺𑀬𑀪𑀡𑁆𑀟𑀁 𑀦𑀺𑀲𑁆𑀲𑀸𑀬 ¶ 𑀅𑀢𑁆𑀢𑀸𑀦𑀁 𑀦𑀸𑀲𑁂𑀢𑀼𑀁 𑀮𑀤𑁆𑀥𑀬𑀲𑀁 𑀧𑀳𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁮𑁨.

‘‘𑀦 ¶ 𑀯𑁂 𑀧𑀺𑀬𑀫𑁆𑀫𑁂𑀢𑀺 𑀚𑀦𑀺𑀦𑁆𑀤 𑀢𑀸𑀤𑀺𑀲𑁄, 𑀅𑀢𑁆𑀢𑀁 𑀦𑀺𑀭𑀁𑀓𑀢𑁆𑀯𑀸 𑀧𑀺𑀬𑀸𑀦𑀺 𑀲𑁂𑀯𑀢𑀺;

𑀅𑀢𑁆𑀢𑀸𑀯 𑀲𑁂𑀬𑁆𑀬𑁄 𑀧𑀭𑀫𑀸 𑀘 𑀲𑁂𑀬𑁆𑀬𑁄, 𑀮𑀩𑁆𑀪𑀸 𑀧𑀺𑀬𑀸 𑀑𑀘𑀺𑀢𑀢𑁆𑀣𑁂𑀦 𑀧𑀘𑁆𑀙𑀸’’𑀢𑀺.

𑀢𑀢𑁆𑀣 𑀧𑀺𑀬𑀫𑁆𑀫𑁂𑀢𑀺 𑀧𑀺𑀬𑀁 𑀫𑁂, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀚𑀦𑀺𑀦𑁆𑀤, 𑀢𑀸𑀤𑀺𑀲𑁄 𑀢𑀼𑀫𑁆𑀳𑀸𑀤𑀺𑀲𑁄 𑀬𑀲𑀫𑀳𑀢𑁆𑀢𑁂 𑀞𑀺𑀢𑁄 𑀧𑀼𑀕𑁆𑀕𑀮𑁄 𑀏𑀓𑀁 𑀧𑀺𑀬𑀪𑀡𑁆𑀟𑀁 𑀦𑀺𑀲𑁆𑀲𑀸𑀬 ‘‘𑀇𑀤𑀁 𑀧𑀺𑀬𑀁 𑀫𑁂’’𑀢𑀺 𑀅𑀢𑁆𑀢𑀁 𑀦𑀺𑀭𑀁𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀙𑀟𑁆𑀟𑁂𑀢𑁆𑀯𑀸 𑀢𑀸𑀦𑀺 𑀧𑀺𑀬𑀸𑀦𑀺 𑀦 𑀲𑁂𑀯𑀢𑁂𑀯. 𑀓𑀺𑀁𑀓𑀸𑀭𑀡𑀸? 𑀅𑀢𑁆𑀢𑀸𑀯 𑀲𑁂𑀬𑁆𑀬𑁄 𑀧𑀭𑀫𑀸 𑀘 𑀲𑁂𑀬𑁆𑀬𑁄𑀢𑀺, 𑀬𑀲𑁆𑀫𑀸 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀅𑀢𑁆𑀢𑀸𑀯 𑀲𑁂𑀬𑁆𑀬𑁄 𑀯𑀭𑁄 ¶ 𑀉𑀢𑁆𑀢𑀫𑁄, 𑀧𑀭𑀫𑀸 𑀘 𑀲𑁂𑀬𑁆𑀬𑁄, 𑀧𑀭𑀫𑀸 𑀉𑀢𑁆𑀢𑀫𑀸𑀧𑀺 𑀅𑀜𑁆𑀜𑀲𑁆𑀫𑀸 𑀧𑀺𑀬𑀪𑀡𑁆𑀟𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀘-𑀓𑀸𑀭𑁄 𑀧𑀺-𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀮𑀩𑁆𑀪𑀸 𑀧𑀺𑀬𑀸 𑀑𑀘𑀺𑀢𑀢𑁆𑀣𑁂𑀦 𑀧𑀘𑁆𑀙𑀸𑀢𑀺 𑀑𑀘𑀺𑀢𑀢𑁆𑀣𑁂𑀦 𑀯𑀟𑁆𑀠𑀺𑀢𑀢𑁆𑀣𑁂𑀦 𑀬𑀲𑀲𑀫𑁆𑀧𑀦𑁆𑀦𑁂𑀦 𑀧𑀼𑀭𑀺𑀲𑁂𑀦 𑀧𑀘𑁆𑀙𑀸 𑀧𑀺𑀬𑀸 𑀦𑀸𑀫 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀦 𑀢𑀲𑁆𑀲𑀸 𑀓𑀸𑀭𑀡𑀸 𑀅𑀢𑁆𑀢𑀸 𑀦𑀸𑀲𑁂𑀢𑀩𑁆𑀩𑁄𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀑𑀯𑀸𑀤𑀁 𑀅𑀤𑀸𑀲𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀅𑀚𑀭𑀸𑀚, 𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑀓𑁆𑀓𑁄 𑀅𑀳𑀁, 𑀫𑀳𑀸𑀭𑀸𑀚, 𑀢𑀯 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀫𑀭𑀡𑀸 𑀫𑁄𑀘𑁂𑀢𑀼𑀁 𑀆𑀕𑀢𑁄𑀫𑁆𑀳𑀻𑀢𑀺. 𑀤𑁂𑀯𑀭𑀸𑀚, 𑀅𑀳𑀁 𑀏𑀢𑀺𑀲𑁆𑀲𑀸 ‘‘𑀫𑀦𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀅𑀯𑀘𑀁, 𑀇𑀤𑀸𑀦𑀺 ‘‘𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀉𑀪𑀺𑀦𑁆𑀦𑀫𑁆𑀧𑀺 𑀯𑀺𑀦𑀸𑀲𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, ‘𑀲𑀺𑀧𑁆𑀧𑀲𑁆𑀲 𑀉𑀧𑀘𑀸𑀭𑁄’𑀢𑀺 𑀯𑀢𑁆𑀯𑀸 𑀏𑀢𑀁 𑀓𑀢𑀺𑀧𑀬𑁂 𑀧𑀳𑀸𑀭𑁂 𑀧𑀳𑀭𑀸𑀧𑁂𑀳𑀺, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀦 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀤𑁂𑀯𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 ‘‘𑀕𑀡𑁆𑀳𑀺𑀲𑁆𑀲𑀲𑀺 𑀪𑀤𑁆𑀤𑁂, 𑀫𑀦𑁆𑀢’’𑀦𑁆𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀉𑀧𑀘𑀸𑀭𑀁 𑀓𑀭𑁄𑀫𑀻’’𑀢𑀺. ‘‘𑀓𑁄 𑀉𑀧𑀘𑀸𑀭𑁄’’𑀢𑀺? ‘‘𑀧𑀺𑀝𑁆𑀞𑀺𑀬𑀁 𑀧𑀳𑀸𑀭𑀲𑀢𑁂 ¶ 𑀧𑀯𑀢𑁆𑀢𑀫𑀸𑀦𑁂 𑀲𑀤𑁆𑀤𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀲𑀸 𑀫𑀦𑁆𑀢𑀮𑁄𑀪𑁂𑀦 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀘𑁄𑀭𑀖𑀸𑀢𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀲𑀸 𑀕𑀸𑀳𑀸𑀧𑁂𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀳𑀭𑀸𑀧𑁂𑀲𑀺. 𑀲𑀸 𑀤𑁆𑀯𑁂 𑀢𑀬𑁄 𑀧𑀳𑀸𑀭𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 ‘‘𑀦 𑀫𑁂 𑀫𑀦𑁆𑀢𑁂𑀦 𑀅𑀢𑁆𑀣𑁄’’𑀢𑀺 𑀭𑀯𑀺. 𑀅𑀣 𑀦𑀁 𑀭𑀸𑀚𑀸 ‘‘𑀢𑁆𑀯𑀁 𑀫𑀁 𑀫𑀸𑀭𑁂𑀢𑁆𑀯𑀸 𑀫𑀦𑁆𑀢𑀁 𑀕𑀡𑁆𑀳𑀺𑀢𑀼𑀓𑀸𑀫𑀸𑀲𑀻’’𑀢𑀺 𑀧𑀺𑀝𑁆𑀞𑀺𑀬𑀁 𑀦𑀺𑀘𑁆𑀘𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑀸𑀚𑀸 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀤𑁂𑀯𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸, 𑀅𑀲𑁆𑀲𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀔𑀭𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁮𑁭] 𑁨. 𑀲𑀽𑀘𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑀓𑁆𑀓𑀲𑀁 ¶ ¶ 𑀅𑀨𑀭𑀼𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸 𑀉𑀧𑀸𑀬𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀓𑀫𑁆𑀫𑀸𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲 𑀤𑀮𑀺𑀤𑁆𑀤𑀸, 𑀢𑁂𑀲𑀁 𑀕𑀸𑀫𑀢𑁄 𑀅𑀯𑀺𑀤𑀽𑀭𑁂 𑀅𑀜𑁆𑀜𑁄 𑀲𑀳𑀲𑁆𑀲𑀓𑀼𑀝𑀺𑀓𑁄 𑀓𑀫𑁆𑀫𑀸𑀭𑀕𑀸𑀫𑁄. 𑀢𑀢𑁆𑀣 𑀓𑀫𑁆𑀫𑀸𑀭𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀓𑀫𑁆𑀫𑀸𑀭𑁄 𑀭𑀸𑀚𑀯𑀮𑁆𑀮𑀪𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄, 𑀢𑀲𑁆𑀲𑁂𑀓𑀸 𑀥𑀻𑀢𑀸 𑀅𑀳𑁄𑀲𑀺 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀸 𑀚𑀦𑀧𑀤𑀓𑀮𑁆𑀬𑀸𑀡𑀺𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀲𑀸𑀫𑀦𑁆𑀢𑀕𑀸𑀫𑁂𑀲𑀼 𑀫𑀦𑀼𑀲𑁆𑀲𑀸 𑀯𑀸𑀲𑀺𑀨𑀭𑀲𑀼𑀨𑀸𑀮𑀧𑀸𑀘𑀦𑀸𑀤𑀺𑀓𑀸𑀭𑀸𑀧𑀦𑀢𑁆𑀣𑀸𑀬 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀢𑀁 𑀓𑀼𑀫𑀸𑀭𑀺𑀓𑀁 𑀧𑀲𑁆𑀲𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 𑀢𑀲𑁆𑀲𑀸 𑀭𑀽𑀧𑀁 ¶ 𑀯𑀡𑁆𑀡𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀲𑀯𑀦𑀲𑀁𑀲𑀕𑁆𑀕𑁂𑀦 𑀩𑀚𑁆𑀛𑀺𑀢𑁆𑀯𑀸 ‘‘𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀢𑁆𑀢𑀫𑀚𑀸𑀢𑀺𑀓𑀁 𑀅𑀬𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀲𑀼𑀔𑀼𑀫𑀁 𑀖𑀦𑀁 𑀲𑀽𑀘𑀺𑀁 𑀓𑀢𑁆𑀯𑀸 𑀧𑀸𑀲𑁂 𑀯𑀺𑀚𑁆𑀛𑀺𑀢𑁆𑀯𑀸 𑀉𑀤𑀓𑁂 𑀉𑀧𑁆𑀧𑀺𑀮𑀸𑀧𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀢𑀣𑀸𑀭𑀽𑀧𑀫𑁂𑀯 𑀢𑀲𑁆𑀲𑀸 𑀓𑁄𑀲𑀓𑀁 𑀓𑀢𑁆𑀯𑀸 𑀧𑀸𑀲𑁂 𑀯𑀺𑀚𑁆𑀛𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀢𑀲𑁆𑀲𑀸 𑀲𑀢𑁆𑀢 𑀓𑁄𑀲𑀓𑁂 𑀅𑀓𑀸𑀲𑀺, ‘‘𑀓𑀣𑀁 𑀅𑀓𑀸𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀜𑀸𑀡𑀫𑀳𑀦𑁆𑀢𑀢𑀸𑀬 𑀓𑀭𑀡𑀁 𑀲𑀫𑀺𑀚𑁆𑀛𑀢𑀺𑀬𑁂𑀯. 𑀲𑁄 𑀢𑀁 𑀲𑀽𑀘𑀺𑀁 𑀦𑀸𑀴𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀑𑀯𑀝𑁆𑀝𑀺𑀓𑀸𑀬 𑀓𑀢𑁆𑀯𑀸 𑀢𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀲𑁆𑀲 𑀯𑀲𑀦𑀯𑀻𑀣𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀓𑁄 𑀫𑀫 𑀳𑀢𑁆𑀣𑀢𑁄 𑀏𑀯𑀭𑀽𑀧𑀁 𑀦𑀸𑀫 𑀲𑀽𑀘𑀺𑀁 𑀫𑀽𑀮𑁂𑀦 𑀓𑀺𑀡𑀺𑀢𑀼𑀁 𑀇𑀘𑁆𑀙𑀢𑀻’’𑀢𑀺 𑀲𑀽𑀘𑀺𑀁 𑀯𑀡𑁆𑀡𑁂𑀦𑁆𑀢𑁄 𑀚𑁂𑀝𑁆𑀞𑀓𑀓𑀫𑁆𑀫𑀸𑀭𑀲𑁆𑀲 𑀖𑀭𑀤𑁆𑀯𑀸𑀭𑀲𑀫𑀻𑀧𑁂 𑀞𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁩.

‘‘𑀅𑀓𑀓𑁆𑀓𑀲𑀁 𑀅𑀨𑀭𑀼𑀲𑀁, 𑀔𑀭𑀥𑁄𑀢𑀁 𑀲𑀼𑀧𑀸𑀲𑀺𑀬𑀁;

𑀲𑀼𑀔𑀼𑀫𑀁 𑀢𑀺𑀔𑀺𑀡𑀕𑁆𑀕𑀜𑁆𑀘, 𑀓𑁄 𑀲𑀽𑀘𑀺𑀁 𑀓𑁂𑀢𑀼𑀫𑀺𑀘𑁆𑀙𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀫 𑀧𑀝𑀮𑀲𑁆𑀲 𑀯𑀸 𑀢𑀺𑀮𑀓𑀲𑁆𑀲 𑀯𑀸 𑀑𑀥𑀺𑀦𑁄 𑀯𑀸 𑀅𑀪𑀸𑀯𑁂𑀦 𑀅𑀓𑀓𑁆𑀓𑀲𑀁, 𑀲𑀼𑀫𑀝𑁆𑀞𑀢𑀸𑀬 𑀅𑀨𑀭𑀼𑀲𑀁, 𑀔𑀭𑁂𑀦 𑀧𑀸𑀲𑀸𑀡𑁂𑀦 𑀥𑁄𑀢𑀢𑁆𑀢𑀸 𑀔𑀭𑀥𑁄𑀢𑀁, 𑀲𑀼𑀦𑁆𑀤𑀭𑁂𑀦 𑀲𑀼𑀯𑀺𑀤𑁆𑀥𑁂𑀦 𑀧𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀼𑀧𑀸𑀲𑀺𑀬𑀁 ¶ , 𑀲𑀡𑁆𑀳𑀢𑀸𑀬 𑀲𑀼𑀔𑀼𑀫𑀁, 𑀅𑀕𑁆𑀕𑀲𑁆𑀲 𑀢𑀺𑀔𑀺𑀡𑀢𑀸𑀬 𑀢𑀺𑀔𑀺𑀡𑀕𑁆𑀕𑀁 𑀲𑀽𑀘𑀺𑀁 𑀫𑀫 𑀳𑀢𑁆𑀣𑀢𑁄 𑀫𑀽𑀮𑀁 𑀤𑀢𑁆𑀯𑀸 𑀓𑁄 𑀓𑀺𑀡𑀺𑀢𑀼𑀁 𑀇𑀘𑁆𑀙𑀢𑀻𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀧𑀼𑀦𑀧𑀺 𑀢𑀁 𑀯𑀡𑁆𑀡𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁪.

‘‘𑀲𑀼𑀫𑀚𑁆𑀚𑀜𑁆𑀘 𑀲𑀼𑀧𑀸𑀲𑀜𑁆𑀘, 𑀅𑀦𑀼𑀧𑀼𑀩𑁆𑀩𑀁 𑀲𑀼𑀯𑀝𑁆𑀝𑀺𑀢𑀁;

𑀖𑀦𑀖𑀸𑀢𑀺𑀫𑀁 𑀧𑀝𑀺𑀣𑀤𑁆𑀥𑀁, 𑀓𑁄 𑀲𑀽𑀘𑀺𑀁 𑀓𑁂𑀢𑀼𑀫𑀺𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀲𑀼𑀫𑀚𑁆𑀚𑀜𑁆𑀘𑀸𑀢𑀺 𑀓𑀼𑀭𑀼𑀯𑀺𑀦𑁆𑀤𑀓𑀘𑀼𑀡𑁆𑀡𑁂𑀦 𑀲𑀼𑀝𑁆𑀞𑀼 𑀫𑀚𑁆𑀚𑀺𑀢𑀁. 𑀲𑀼𑀧𑀸𑀲𑀜𑁆𑀘𑀸𑀢𑀺 𑀲𑀡𑁆𑀳𑁂𑀦 𑀧𑀸𑀲𑀯𑁂𑀥𑀓𑁂𑀦 𑀯𑀺𑀤𑁆𑀥𑀢𑁆𑀢𑀸 𑀲𑀼𑀦𑁆𑀤𑀭𑀧𑀸𑀲𑀁. 𑀖𑀦𑀖𑀸𑀢𑀺𑀫𑀦𑁆𑀢𑀺 𑀬𑀸 𑀖𑀸𑀢𑀺𑀬𑀫𑀸𑀦𑀸 𑀅𑀥𑀺𑀓𑀭𑀡𑀺𑀁 𑀅𑀦𑀼𑀧𑀯𑀺𑀲𑀢𑀺, 𑀅𑀬𑀁 ‘‘𑀖𑀦𑀖𑀸𑀢𑀺𑀫𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀤𑀺𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀣𑀤𑁆𑀥𑀦𑁆𑀢𑀺 𑀣𑀤𑁆𑀥𑀁 𑀅𑀫𑀼𑀤𑀼𑀓𑀁.

𑀢𑀲𑁆𑀫𑀺𑀁 ¶ 𑀔𑀡𑁂 𑀲𑀸 𑀓𑀼𑀫𑀸𑀭𑀺𑀓𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀁 𑀧𑀺𑀢𑀭𑀁 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁆𑀣𑀁 𑀘𑀽𑀴𑀲𑀬𑀦𑁂 𑀦𑀺𑀧𑀦𑁆𑀦𑀁 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑀬𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀥𑀼𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀮𑁆𑀮𑀫𑀁𑀲𑀧𑀺𑀡𑁆𑀟𑁂𑀦 𑀳𑀤𑀬𑁂 𑀧𑀳𑀝𑀸 𑀯𑀺𑀬 𑀖𑀝𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀸𑀧𑀺𑀢𑀤𑀭𑀣𑀸 𑀯𑀺𑀬 𑀳𑀼𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀏𑀲 𑀅𑀢𑀺𑀫𑀥𑀼𑀭𑁂𑀦 𑀲𑀤𑁆𑀤𑁂𑀦 𑀓𑀫𑁆𑀫𑀸𑀭𑀸𑀦𑀁 𑀯𑀲𑀦𑀕𑀸𑀫𑁂 𑀲𑀽𑀘𑀺𑀁 𑀯𑀺𑀓𑁆𑀓𑀺𑀡𑀸𑀢𑀺, 𑀓𑁂𑀦 𑀦𑀼 𑀔𑁄 𑀓𑀫𑁆𑀫𑁂𑀦 𑀆𑀕𑀢𑁄, 𑀚𑀸𑀦𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀸𑀮𑀯𑀡𑁆𑀝𑀁 𑀞𑀧𑁂𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫 𑀩𑀳𑀺𑀆𑀴𑀺𑀦𑁆𑀤𑀓𑁂 𑀞𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀢𑁆𑀣𑀺𑀢𑀁 𑀦𑀸𑀫 𑀲𑀫𑀺𑀚𑁆𑀛𑀢𑀺, 𑀲𑁄 𑀳𑀺 𑀢𑀲𑁆𑀲𑀸𑀬𑁂𑀯𑀢𑁆𑀣𑀸𑀬 𑀢𑀁 𑀕𑀸𑀫𑀁 𑀆𑀕𑀢𑁄. 𑀲𑀸 𑀘 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀻 ‘‘𑀫𑀸𑀡𑀯, 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀲𑀽𑀘𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀇𑀫𑀁 𑀕𑀸𑀫𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁆𑀯𑀁 𑀩𑀸𑀮𑀢𑀸𑀬 𑀓𑀫𑁆𑀫𑀸𑀭𑀕𑀸𑀫𑁂 𑀲𑀽𑀘𑀺𑀁 𑀯𑀺𑀓𑁆𑀓𑀺𑀡𑀺𑀢𑀼𑀁 𑀇𑀘𑁆𑀙𑀲𑀺, 𑀲𑀘𑁂𑀧𑀺 𑀤𑀺𑀯𑀲𑀁 𑀲𑀽𑀘𑀺𑀬𑀸 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀲𑀺, 𑀦 𑀢𑁂 𑀓𑁄𑀘𑀺 𑀳𑀢𑁆𑀣𑀢𑁄 𑀲𑀽𑀘𑀺𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀲𑀘𑁂 𑀢𑁆𑀯𑀁 𑀫𑀽𑀮𑀁 𑀮𑀤𑁆𑀥𑀼𑀁 𑀇𑀘𑁆𑀙𑀲𑀺, 𑀅𑀜𑁆𑀜𑀁 𑀕𑀸𑀫𑀁 𑀬𑀸𑀳𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁪.

‘‘𑀇𑀢𑁄𑀤𑀸𑀦𑀺 𑀧𑀢𑀸𑀬𑀦𑁆𑀢𑀺, 𑀲𑀽𑀘𑀺𑀬𑁄 𑀩𑀴𑀺𑀲𑀸𑀦𑀺 𑀘;

𑀓𑁄𑀬𑀁 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁, 𑀲𑀽𑀘𑀺𑀁 𑀯𑀺𑀓𑁆𑀓𑁂𑀢𑀼𑀫𑀺𑀘𑁆𑀙𑀢𑀺.

𑁮𑁫.

‘‘𑀇𑀢𑁄 𑀲𑀢𑁆𑀣𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀓𑀫𑁆𑀫𑀦𑁆𑀢𑀸 𑀯𑀺𑀯𑀺𑀥𑀸 𑀧𑀼𑀣𑀽;

𑀓𑁄𑀬𑀁 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁, 𑀲𑀽𑀘𑀺𑀁 𑀯𑀺𑀓𑁆𑀓𑁂𑀢𑀼𑀫𑀺𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀇𑀢𑁄𑀤𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀭𑀝𑁆𑀞𑁂 𑀇𑀤𑀸𑀦𑀺 𑀲𑀽𑀘𑀺𑀬𑁄 𑀘 𑀩𑀴𑀺𑀲𑀸𑀦𑀺 𑀘 𑀅𑀜𑁆𑀜𑀸𑀦𑀺 𑀘 𑀉𑀧𑀓𑀭𑀡𑀸𑀦𑀺 𑀇𑀫𑀫𑁆𑀳𑀸 𑀓𑀫𑁆𑀫𑀸𑀭𑀕𑀸𑀫𑀸 𑀧𑀢𑀸𑀬𑀦𑁆𑀢𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀁 𑀢𑀁 𑀤𑀺𑀲𑀁 𑀧𑀢𑁆𑀣𑀭𑀦𑁆𑀢𑀸 𑀦𑀺𑀕𑁆𑀕𑀘𑁆𑀙𑀦𑁆𑀢𑀺. 𑀓𑁄𑀬𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀓𑁄 𑀅𑀬𑀁 𑀇𑀫𑀲𑁆𑀫𑀺𑀁 𑀓𑀫𑁆𑀫𑀸𑀭𑀕𑀸𑀫𑁂 ¶ 𑀲𑀽𑀘𑀺𑀁 𑀯𑀺𑀓𑁆𑀓𑀺𑀡𑀺𑀢𑀼𑀁 𑀇𑀘𑁆𑀙𑀢𑀺. 𑀲𑀢𑁆𑀣𑀸𑀦𑀻𑀢𑀺 𑀩𑀸𑀭𑀸𑀡𑀲𑀺𑀁 ¶ 𑀕𑀘𑁆𑀙𑀦𑁆𑀢𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀲𑀢𑁆𑀣𑀸𑀦𑀺 𑀇𑀢𑁄𑀯 𑀕𑀘𑁆𑀙𑀦𑁆𑀢𑀺. 𑀯𑀺𑀯𑀺𑀥𑀸 𑀧𑀼𑀣𑀽𑀢𑀺 𑀦𑀸𑀦𑀧𑁆𑀧𑀓𑀸𑀭𑀸 𑀩𑀳𑀽 𑀓𑀫𑁆𑀫𑀦𑁆𑀢𑀸𑀧𑀺 𑀲𑀓𑀮𑀭𑀝𑁆𑀞𑀯𑀸𑀲𑀻𑀦𑀁 𑀇𑀢𑁄 𑀕𑀳𑀺𑀢𑀉𑀧𑀓𑀭𑀡𑁂𑀳𑁂𑀯 𑀧𑀯𑀢𑁆𑀢𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑁆𑀯𑀁 𑀅𑀚𑀸𑀦𑀦𑁆𑀢𑀻 𑀅𑀜𑁆𑀜𑀸𑀡𑁂𑀦 𑀏𑀯𑀁 𑀯𑀤𑁂𑀲𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁬.

‘‘𑀲𑀽𑀘𑀺𑀁 ¶ 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁, 𑀯𑀺𑀓𑁆𑀓𑁂𑀢𑀩𑁆𑀩𑀸 𑀧𑀚𑀸𑀦𑀢𑀸;

𑀆𑀘𑀭𑀺𑀬𑀸𑀯 𑀚𑀸𑀦𑀦𑁆𑀢𑀺, 𑀓𑀫𑁆𑀫𑀁 𑀲𑀼𑀓𑀢𑀤𑀼𑀓𑁆𑀓𑀝𑀁.

𑁮𑁭.

‘‘𑀇𑀫𑀜𑁆𑀘𑁂 𑀢𑁂 𑀧𑀺𑀢𑀸 𑀪𑀤𑁆𑀤𑁂, 𑀲𑀽𑀘𑀺𑀁 𑀚𑀜𑁆𑀜𑀸 𑀫𑀬𑀸 𑀓𑀢𑀁;

𑀢𑀬𑀸 𑀘 𑀫𑀁 𑀦𑀺𑀫𑀦𑁆𑀢𑁂𑀬𑁆𑀬, 𑀬𑀜𑁆𑀘𑀢𑁆𑀣𑀜𑁆𑀜𑀁 𑀖𑀭𑁂 𑀥𑀦’’𑀦𑁆𑀢𑀺.

𑀢𑀢𑁆𑀣 𑀲𑀽𑀘𑀺𑀦𑁆𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀽𑀘𑀺 𑀦𑀸𑀫 𑀧𑀚𑀸𑀦𑀢𑀸 𑀧𑀡𑁆𑀟𑀺𑀢𑁂𑀦 𑀧𑀼𑀭𑀺𑀲𑁂𑀦 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁𑀬𑁂𑀯 𑀯𑀺𑀓𑁆𑀓𑁂𑀢𑀩𑁆𑀩𑀸. 𑀓𑀺𑀁𑀓𑀸𑀭𑀡𑀸? 𑀆𑀘𑀭𑀺𑀬𑀸𑀯 𑀚𑀸𑀦𑀦𑁆𑀢𑀺, 𑀓𑀫𑁆𑀫𑀁 𑀲𑀼𑀓𑀢𑀤𑀼𑀓𑁆𑀓𑀝𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀲𑀺𑀧𑁆𑀧𑀲𑁆𑀲 𑀆𑀘𑀭𑀺𑀬𑀸𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀧𑁆𑀧𑁂 𑀲𑀼𑀓𑀢𑀤𑀼𑀓𑁆𑀓𑀝𑀓𑀫𑁆𑀫𑀁 𑀚𑀸𑀦𑀦𑁆𑀢𑀺, 𑀲𑁆𑀯𑀸𑀳𑀁 𑀓𑀫𑁆𑀫𑀸𑀭𑀓𑀫𑁆𑀫𑀁 𑀅𑀚𑀸𑀦𑀦𑁆𑀢𑀸𑀦𑀁 𑀕𑀳𑀧𑀢𑀺𑀓𑀸𑀦𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀫𑀫 𑀲𑀽𑀘𑀺𑀬𑀸 𑀲𑀼𑀓𑀢𑀤𑀼𑀓𑁆𑀓𑀝𑀪𑀸𑀯𑀁 𑀓𑀣𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀧𑀦 𑀕𑀸𑀫𑁂 𑀫𑀫 𑀩𑀮𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀢𑀦𑁄 𑀩𑀮𑀁 𑀯𑀡𑁆𑀡𑁂𑀲𑀺.

𑀢𑀬𑀸 𑀘 𑀫𑀁 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀪𑀤𑁆𑀤𑁂 𑀲𑀘𑁂 𑀢𑀯 𑀧𑀺𑀢𑀸 𑀇𑀫𑀁 𑀫𑀬𑀸 𑀓𑀢𑀁 𑀲𑀽𑀘𑀺𑀁 ‘‘𑀈𑀤𑀺𑀲𑀸 𑀯𑀸 𑀏𑀲𑀸, 𑀏𑀯𑀁 𑀯𑀸 𑀓𑀢𑀸’’𑀢𑀺 𑀚𑀸𑀦𑁂𑀬𑁆𑀬, ‘‘𑀇𑀫𑀁 𑀫𑁂 𑀥𑀻𑀢𑀭𑀁 𑀢𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺 𑀏𑀯𑀁 𑀢𑀬𑀸 𑀘 𑀫𑀁 𑀦𑀺𑀫𑀦𑁆𑀢𑁂𑀬𑁆𑀬. 𑀬𑀜𑁆𑀘𑀢𑁆𑀣𑀜𑁆𑀜𑀁 𑀖𑀭𑁂 𑀥𑀦𑀦𑁆𑀢𑀺 𑀬𑀜𑁆𑀘 𑀅𑀜𑁆𑀜𑀁 𑀲𑀯𑀺𑀜𑁆𑀜𑀸𑀡𑀓𑀁 𑀯𑀸 𑀅𑀯𑀺𑀜𑁆𑀜𑀸𑀡𑀓𑀁 𑀯𑀸 𑀖𑀭𑁂 𑀥𑀦𑀁 𑀅𑀢𑁆𑀣𑀺, 𑀢𑁂𑀦 𑀫𑀁 𑀦𑀺𑀫𑀦𑁆𑀢𑁂𑀬𑁆𑀬. ‘‘𑀬𑀜𑁆𑀘𑀲𑁆𑀲𑀜𑁆𑀜’’𑀦𑁆𑀢𑀺𑀧𑀺 𑀧𑀸𑀞𑁄, 𑀬𑀜𑁆𑀘 𑀅𑀲𑁆𑀲 𑀖𑀭𑁂 𑀅𑀜𑁆𑀜𑀁 𑀥𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁄 𑀲𑀩𑁆𑀩𑀁 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀫𑀸’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀓𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑀸𑀢, 𑀏𑀓𑁄 𑀧𑀼𑀭𑀺𑀲𑁄 𑀲𑀽𑀘𑀺𑀁 𑀯𑀺𑀓𑁆𑀓𑀺𑀡𑀸𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑁂𑀫𑀻𑀢𑀺. ‘‘𑀢𑁂𑀦 𑀳𑀺 𑀧𑀓𑁆𑀓𑁄𑀲𑀸𑀳𑀺 𑀦’’𑀦𑁆𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀧𑀓𑁆𑀓𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑁄 ‘‘𑀓𑀢𑀭𑀕𑀸𑀫𑀯𑀸𑀲𑀺𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀅𑀲𑀼𑀓𑀕𑀸𑀫𑀯𑀸𑀲𑀺𑀓𑁄𑀫𑁆𑀳𑀺 𑀅𑀲𑀼𑀓𑀓𑀫𑁆𑀫𑀸𑀭𑀲𑁆𑀲 𑀧𑀼𑀢𑁆𑀢𑁄’’𑀢𑀺. ‘‘𑀓𑀲𑁆𑀫𑀸 𑀇𑀥𑀸𑀕𑀢𑁄𑀲𑀻’’𑀢𑀺. ‘‘𑀲𑀽𑀘𑀺𑀯𑀺𑀓𑁆𑀓𑀬𑀢𑁆𑀣𑀸𑀬𑀸’’𑀢𑀺 ¶ . ‘‘𑀆𑀳𑀭, 𑀲𑀽𑀘𑀺𑀁 𑀢𑁂 𑀧𑀲𑁆𑀲𑀸𑀫𑀸’’𑀢𑀺 ¶ . 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀕𑀼𑀡𑀁 𑀲𑀩𑁆𑀩𑁂𑀲𑀁 𑀫𑀚𑁆𑀛𑁂 𑀧𑀓𑀸𑀲𑁂𑀢𑀼𑀓𑀸𑀫𑁄 ‘‘𑀦𑀦𑀼 𑀏𑀓𑀓𑀸𑀦𑀁 𑀑𑀮𑁄𑀓𑀺𑀢𑀢𑁄 𑀲𑀩𑁆𑀩𑁂𑀲𑀁 𑀫𑀚𑁆𑀛𑁂 𑀑𑀮𑁄𑀓𑁂𑀢𑀼𑀁 𑀯𑀭𑀢𑀭’’𑀦𑁆𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀲𑀩𑁆𑀩𑁂 𑀓𑀫𑁆𑀫𑀸𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 ‘‘𑀆𑀳𑀭, 𑀢𑀸𑀢, 𑀫𑀬𑀁 𑀧𑀲𑁆𑀲𑀸𑀫 𑀢𑁂 𑀲𑀽𑀘𑀺’’𑀦𑁆𑀢𑀺 𑀆𑀳. ‘‘𑀆𑀘𑀭𑀺𑀬, 𑀏𑀓𑀁 𑀅𑀥𑀺𑀓𑀭𑀡𑀺𑀜𑁆𑀘 𑀉𑀤𑀓𑀧𑀽𑀭𑀜𑁆𑀘 𑀓𑀁𑀲𑀣𑀸𑀮𑀁 𑀆𑀳𑀭𑀸𑀧𑁂𑀣𑀸’’𑀢𑀺. 𑀲𑁄 𑀆𑀳𑀭𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀑𑀯𑀝𑁆𑀝𑀺𑀓𑀢𑁄 𑀲𑀽𑀘𑀺𑀦𑀸𑀴𑀺𑀓𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁄 𑀢𑀢𑁄 𑀲𑀽𑀘𑀺𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀢𑀸𑀢, 𑀅𑀬𑀁 𑀲𑀽𑀘𑀻’’𑀢𑀺 𑀧𑀼𑀘𑁆𑀙𑀺. ‘‘𑀦𑀸𑀬𑀁 𑀲𑀽𑀘𑀺, 𑀓𑁄𑀲𑀓𑁄 𑀏𑀲𑁄’’𑀢𑀺. 𑀲𑁄 𑀉𑀧𑀥𑀸𑀭𑁂𑀦𑁆𑀢𑁄 𑀦𑁂𑀯 𑀅𑀦𑁆𑀢𑀁, 𑀦 𑀓𑁄𑀝𑀺𑀁 𑀅𑀤𑁆𑀤𑀲. 𑀩𑁄𑀥𑀺𑀲𑀢𑁆𑀢𑁄 𑀆𑀳𑀭𑀸𑀧𑁂𑀢𑁆𑀯𑀸 𑀦𑀔𑁂𑀦 𑀓𑁄𑀲𑀓𑀁 𑀅𑀧𑀦𑁂𑀢𑁆𑀯𑀸 ‘‘𑀅𑀬𑀁 𑀲𑀽𑀘𑀺, 𑀅𑀬𑀁 𑀓𑁄𑀲𑀓𑁄’’𑀢𑀺 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀲𑀽𑀘𑀺𑀁 𑀆𑀘𑀭𑀺𑀬𑀲𑁆𑀲 𑀳𑀢𑁆𑀣𑁂, 𑀓𑁄𑀲𑀓𑀁 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺. 𑀧𑀼𑀦 𑀢𑁂𑀦 ‘‘𑀅𑀬𑀁 𑀫𑀜𑁆𑀜𑁂 𑀲𑀽𑀘𑀻’’𑀢𑀺 𑀯𑀼𑀢𑁆𑀢𑁄 ‘‘𑀅𑀬𑀫𑁆𑀧𑀺 𑀲𑀽𑀘𑀺𑀓𑁄𑀲𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀦𑀔𑁂𑀦 𑀧𑀳𑀭𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀙 𑀲𑀽𑀘𑀺𑀓𑁄𑀲𑀓𑁂 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀅𑀬𑀁 𑀲𑀽𑀘𑀻’’𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀓𑀫𑁆𑀫𑀸𑀭𑀲𑀳𑀲𑁆𑀲𑀸𑀦𑀺 𑀅𑀗𑁆𑀕𑀼𑀮𑀺𑀬𑁄 𑀨𑁄𑀝𑁂𑀲𑀼𑀁, 𑀘𑁂𑀮𑀼𑀓𑁆𑀔𑁂𑀧𑀸 𑀧𑀯𑀢𑁆𑀢𑀺𑀁𑀲𑀼.

𑀅𑀣 𑀦𑀁 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁄 ‘‘𑀢𑀸𑀢, 𑀇𑀫𑀸𑀬 𑀲𑀽𑀘𑀺𑀬𑀸 𑀓𑀺𑀁 𑀩𑀮’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀘𑀭𑀺𑀬 𑀩𑀮𑀯𑀢𑀸 𑀧𑀼𑀭𑀺𑀲𑁂𑀦 𑀅𑀥𑀺𑀓𑀭𑀡𑀺𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀥𑀺𑀓𑀭𑀡𑀺𑀬𑀸 𑀳𑁂𑀝𑁆𑀞𑀸 𑀉𑀤𑀓𑀧𑀸𑀢𑀺𑀁 𑀞𑀧𑀸𑀧𑁂𑀢𑁆𑀯𑀸 𑀅𑀥𑀺𑀓𑀭𑀡𑀺𑀬𑀸 𑀫𑀚𑁆𑀛𑁂 𑀇𑀫𑀁 𑀲𑀽𑀘𑀺𑀁 𑀧𑀳𑀭𑀣𑀸’’𑀢𑀺. 𑀲𑁄 𑀢𑀣𑀸 𑀓𑀸𑀭𑁂𑀢𑁆𑀯𑀸 𑀅𑀥𑀺𑀓𑀭𑀡𑀺𑀬𑀸 𑀫𑀚𑁆𑀛𑁂 𑀲𑀽𑀘𑀺𑀁 𑀅𑀕𑁆𑀕𑁂𑀦 𑀧𑀳𑀭𑀺. 𑀲𑀸 𑀅𑀥𑀺𑀓𑀭𑀡𑀺𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀅𑀳𑀼𑀢𑁆𑀯𑀸 𑀢𑀺𑀭𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀩𑁆𑀩𑁂 𑀓𑀫𑁆𑀫𑀸𑀭𑀸 ‘‘𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑀁 𑀓𑀸𑀮𑀁 ‘𑀓𑀫𑁆𑀫𑀸𑀭𑀸 𑀦𑀸𑀫 𑀏𑀤𑀺𑀲𑀸 𑀳𑁄𑀦𑁆𑀢𑀻’𑀢𑀺 𑀲𑀼𑀢𑀺𑀯𑀲𑁂𑀦𑀧𑀺 𑀦 𑀲𑀼𑀢𑀧𑀼𑀩𑁆𑀩’’𑀦𑁆𑀢𑀺 𑀅𑀗𑁆𑀕𑀼𑀮𑀺𑀬𑁄 𑀨𑁄𑀝𑁂𑀢𑁆𑀯𑀸 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀁 𑀧𑀯𑀢𑁆𑀢𑀬𑀺𑀁𑀲𑀼 ¶ . 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁄 𑀥𑀻𑀢𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀧𑀭𑀺𑀲𑀫𑀚𑁆𑀛𑁂 ‘‘𑀅𑀬𑀁 𑀓𑀼𑀫𑀸𑀭𑀺𑀓𑀸 𑀢𑀼𑀬𑁆𑀳𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀲𑁆𑀲 𑀅𑀘𑁆𑀘𑀬𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀲𑁆𑀲 𑀥𑀻𑀢𑀸 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀽𑀘𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁮𑁮] 𑁩. 𑀢𑀼𑀡𑁆𑀟𑀺𑀮𑀚𑀸𑀢𑀓𑀯𑀡𑁆𑀡𑀦𑀸

𑀦𑀯𑀙𑀦𑁆𑀦𑀓𑁂𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀭𑀡𑀪𑀻𑀭𑀼𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀭𑀡𑀪𑀻𑀭𑀼𑀓𑁄 𑀅𑀳𑁄𑀲𑀺, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑀸𑀔𑀸𑀘𑀮𑀦𑀁 𑀤𑀡𑁆𑀟𑀓𑀧𑀢𑀦𑀁 𑀲𑀓𑀼𑀡𑀘𑀢𑀼𑀧𑁆𑀧𑀤𑀲𑀤𑁆𑀤𑀁 𑀯𑀸 𑀅𑀜𑁆𑀜𑀁 𑀯𑀸 𑀢𑀣𑀸𑀭𑀽𑀧𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀓𑀼𑀘𑁆𑀙𑀺𑀬𑀁 𑀯𑀺𑀤𑁆𑀥𑀲𑀲𑁄 𑀯𑀺𑀬 𑀓𑀫𑁆𑀧𑀦𑁆𑀢𑁄 𑀯𑀺𑀘𑀭𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀫𑀭𑀡𑀪𑀻𑀭𑀼𑀓𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑀺𑀓𑀫𑁆𑀧𑀫𑀸𑀦𑁄 𑀧𑀮𑀸𑀬𑀢𑀺, 𑀇𑀫𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀫𑀭𑀡𑀫𑁂𑀯 𑀥𑀼𑀯𑀁, 𑀚𑀻𑀯𑀺𑀢𑀁 𑀅𑀤𑁆𑀥𑀼𑀯𑀁, 𑀦𑀦𑀼 𑀢𑀤𑁂𑀯 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀸𑀢𑀩𑁆𑀩’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀫𑀭𑀡𑀪𑀻𑀭𑀼𑀓𑁄’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀢𑁂𑀦 𑀧𑀝𑀺𑀜𑁆𑀜𑀸𑀢𑁄 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀭𑀡𑀪𑀻𑀭𑀼𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀽𑀓𑀭𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀽𑀓𑀭𑀻 𑀧𑀭𑀺𑀡𑀢𑀕𑀩𑁆𑀪𑀸 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺. 𑀲𑀸 𑀏𑀓𑀤𑀺𑀯𑀲𑀁 𑀢𑁂 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀆𑀯𑀸𑀝𑁂 𑀦𑀺𑀧𑀚𑁆𑀚𑀺. 𑀅𑀣𑁂𑀓𑀸 𑀩𑀸𑀭𑀸𑀡𑀲𑀺𑀤𑁆𑀯𑀸𑀭𑀕𑀸𑀫𑀯𑀸𑀲𑀺𑀦𑀻 𑀫𑀳𑀮𑁆𑀮𑀺𑀓𑀸 𑀓𑀧𑁆𑀧𑀸𑀲𑀔𑁂𑀢𑁆𑀢𑀢𑁄 𑀧𑀘𑁆𑀙𑀺𑀧𑀼𑀡𑁆𑀡𑀁 𑀓𑀧𑁆𑀧𑀸𑀲𑀁 𑀆𑀤𑀸𑀬 ¶ 𑀬𑀝𑁆𑀞𑀺𑀬𑀸 𑀪𑀽𑀫𑀺𑀁 𑀆𑀓𑁄𑀝𑁂𑀦𑁆𑀢𑀻 𑀆𑀕𑀘𑁆𑀙𑀺. 𑀲𑀽𑀓𑀭𑀻 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑁂𑀦 𑀧𑀼𑀢𑁆𑀢𑀓𑁂 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀫𑀳𑀮𑁆𑀮𑀺𑀓𑀸 𑀲𑀽𑀓𑀭𑀧𑁄𑀢𑀓𑁂 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀘𑁆𑀙𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀚𑁂𑀝𑁆𑀞𑀓𑀲𑁆𑀲 𑀫𑀳𑀸𑀢𑀼𑀡𑁆𑀟𑀺𑀮𑁄, 𑀓𑀦𑀺𑀝𑁆𑀞𑀲𑁆𑀲 𑀘𑀽𑀴𑀢𑀼𑀡𑁆𑀟𑀺𑀮𑁄𑀢𑀺 𑀦𑀸𑀫𑀁 𑀓𑀭𑀺𑀢𑁆𑀯𑀸 𑀢𑁂 𑀧𑀼𑀢𑁆𑀢𑀓𑁂 𑀯𑀺𑀬 𑀧𑁄𑀲𑁂𑀲𑀺. 𑀢𑁂 𑀅𑀧𑀭𑀪𑀸𑀕𑁂 𑀯𑀟𑁆𑀠𑀺𑀢𑁆𑀯𑀸 𑀣𑀽𑀮𑀲𑀭𑀻𑀭𑀸 ¶ 𑀅𑀳𑁂𑀲𑀼𑀁. 𑀫𑀳𑀮𑁆𑀮𑀺𑀓𑀸 ‘‘𑀇𑀫𑁂 𑀦𑁄 𑀫𑀽𑀮𑁂𑀦 𑀤𑁂𑀳𑀻’’𑀢𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 ‘‘𑀧𑀼𑀢𑁆𑀢𑀸 𑀫𑁂’’𑀢𑀺 𑀯𑀢𑁆𑀯𑀸 𑀓𑀲𑁆𑀲𑀘𑀺 𑀦 𑀤𑁂𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀙𑀡𑀓𑀸𑀮𑁂 𑀥𑀼𑀢𑁆𑀢𑀸 𑀲𑀼𑀭𑀁 𑀧𑀺𑀯𑀦𑁆𑀢𑀸 𑀫𑀁𑀲𑁂 𑀔𑀻𑀡𑁂 ‘‘𑀓𑀼𑀢𑁄 𑀦𑀼 𑀔𑁄 𑀫𑀁𑀲𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀯𑀻𑀫𑀁𑀲𑀦𑁆𑀢𑀸 𑀫𑀳𑀮𑁆𑀮𑀺𑀓𑀸𑀬 𑀕𑁂𑀳𑁂 𑀲𑀽𑀓𑀭𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀫, 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀦𑁄 𑀲𑀽𑀓𑀭𑀁 𑀤𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑀸 ‘‘𑀅𑀮𑀁, 𑀢𑀸𑀢𑀸, 𑀧𑀼𑀢𑁆𑀢𑀸 𑀫𑁂 𑀏𑀢𑁂, 𑀧𑀼𑀢𑁆𑀢𑀁 𑀦𑀸𑀫 𑀫𑀁𑀲𑀁 𑀔𑀸𑀤𑀦𑀢𑁆𑀣𑀸𑀬 𑀓𑀺𑀡𑀦𑁆𑀢𑀸𑀦𑀁 𑀤𑀤𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀥𑀼𑀢𑁆𑀢𑀸 ‘‘𑀅𑀫𑁆𑀫, 𑀫𑀦𑀼𑀲𑁆𑀲𑀸𑀦𑀁 𑀲𑀽𑀓𑀭𑀸 𑀦𑀸𑀫 𑀧𑀼𑀢𑁆𑀢𑀸 𑀦 𑀳𑁄𑀦𑁆𑀢𑀺, 𑀤𑁂𑀳𑀺 𑀦𑁄’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑁆𑀢𑀸𑀧𑀺 𑀅𑀮𑀪𑀺𑀢𑁆𑀯𑀸 𑀫𑀳𑀮𑁆𑀮𑀺𑀓𑀁 𑀲𑀼𑀭𑀁 𑀧𑀸𑀬𑁂𑀢𑁆𑀯𑀸 𑀫𑀢𑁆𑀢𑀓𑀸𑀮𑁂 ‘‘𑀅𑀫𑁆𑀫, 𑀲𑀽𑀓𑀭𑁂𑀳𑀺 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀓𑀭𑁄𑀳𑀻’’𑀢𑀺 𑀢𑀲𑁆𑀲𑀸 𑀳𑀢𑁆𑀣𑁂 𑀓𑀳𑀸𑀧𑀡𑁂 𑀞𑀧𑀬𑀺𑀁𑀲𑀼.

𑀲𑀸 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 ‘‘𑀢𑀸𑀢𑀸, 𑀫𑀳𑀸𑀢𑀼𑀡𑁆𑀟𑀺𑀮𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀘𑀽𑀴𑀢𑀼𑀡𑁆𑀟𑀺𑀮𑀁 𑀧𑀦 𑀕𑀡𑁆𑀳𑀣𑀸’’𑀢𑀺 ¶ 𑀆𑀳. ‘‘𑀓𑀳𑀁 𑀲𑁄’’𑀢𑀺? ‘‘𑀅𑀬𑀁 𑀏𑀢𑀲𑁆𑀫𑀺𑀁 𑀕𑀘𑁆𑀙𑁂𑀢𑀺, 𑀲𑀤𑁆𑀤𑀫𑀲𑁆𑀲 𑀤𑁂𑀳𑀻’’𑀢𑀺. ‘‘𑀆𑀳𑀸𑀭𑀁 𑀦 𑀧𑀲𑁆𑀲𑀸𑀫𑀻’’𑀢𑀺. 𑀥𑀼𑀢𑁆𑀢𑀸 𑀫𑀽𑀮𑁂𑀦 𑀏𑀓𑀁 𑀪𑀢𑁆𑀢𑀧𑀸𑀢𑀺𑀁 𑀆𑀳𑀭𑀸𑀧𑁂𑀲𑀼𑀁. 𑀫𑀳𑀮𑁆𑀮𑀺𑀓𑀸 𑀢𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀭𑁂 𑀞𑀧𑀺𑀢𑀁 𑀲𑀽𑀓𑀭𑀤𑁄𑀡𑀺𑀁 𑀧𑀽𑀭𑁂𑀢𑁆𑀯𑀸 𑀤𑁄𑀡𑀺𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀢𑀺𑀁𑀲𑀫𑀢𑁆𑀢𑀸𑀧𑀺 𑀥𑀼𑀢𑁆𑀢𑀸 𑀧𑀸𑀲𑀳𑀢𑁆𑀣𑀸 𑀢𑀢𑁆𑀣𑁂𑀯 𑀅𑀝𑁆𑀞𑀁𑀲𑀼. 𑀫𑀳𑀮𑁆𑀮𑀺𑀓𑀸 ‘‘𑀢𑀸𑀢, 𑀘𑀽𑀴𑀢𑀼𑀡𑁆𑀟𑀺𑀮, 𑀏𑀳𑀻’’𑀢𑀺 𑀢𑀲𑁆𑀲 𑀲𑀤𑁆𑀤𑀫𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 ¶ 𑀫𑀳𑀸𑀢𑀼𑀡𑁆𑀟𑀺𑀮𑁄 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀫𑀫 𑀫𑀸𑀢𑀭𑀸 𑀘𑀽𑀴𑀢𑀼𑀡𑁆𑀟𑀺𑀮𑀲𑁆𑀲 𑀲𑀤𑁆𑀤𑁄 𑀦 𑀤𑀺𑀦𑁆𑀦𑀧𑀼𑀩𑁆𑀩𑁄, 𑀫𑀁𑀬𑁂𑀯 𑀧𑀞𑀫𑀁 𑀲𑀤𑁆𑀤𑀸𑀬𑀢𑀺, 𑀅𑀯𑀲𑁆𑀲𑀁 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀪𑀬𑀁 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀲𑁄 𑀓𑀦𑀺𑀝𑁆𑀞𑀁 𑀆𑀫𑀦𑁆𑀢𑁂𑀲𑀺 ‘‘𑀢𑀸𑀢, 𑀫𑀫 𑀫𑀸𑀢𑀸 𑀢𑀁 𑀧𑀓𑁆𑀓𑁄𑀲𑀢𑀺, 𑀕𑀘𑁆𑀙 𑀢𑀸𑀯 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀘𑁆𑀙𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀢𑁆𑀢𑀤𑁄𑀡𑀺𑀲𑀫𑀻𑀧𑁂 𑀢𑁂𑀲𑀁 𑀞𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑁂 𑀫𑀭𑀡𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀫𑁆𑀧𑀫𑀸𑀦𑁄 𑀪𑀸𑀢𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀣𑀫𑁆𑀪𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀓𑀫𑁆𑀧𑀫𑀸𑀦𑁄 𑀧𑀭𑀺𑀩𑁆𑀪𑀫𑀺. 𑀫𑀳𑀸𑀢𑀼𑀡𑁆𑀟𑀺𑀮𑁄 𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀅𑀚𑁆𑀚 𑀧𑀦 𑀧𑀯𑁂𑀥𑀲𑀺 𑀧𑀭𑀺𑀩𑁆𑀪𑀫𑀲𑀺, 𑀧𑀯𑀺𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀲𑀺, 𑀓𑀺𑀁 𑀦𑀸𑀫𑁂𑀢𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁮.

‘‘𑀦𑀯𑀙𑀦𑁆𑀦𑀓𑁂𑀤𑀸𑀦𑀺 𑀤𑀺𑀬𑁆𑀬𑀢𑀺, 𑀧𑀼𑀡𑁆𑀡𑀸𑀬𑀁 𑀤𑁄𑀡𑀺 𑀲𑀼𑀯𑀸𑀫𑀺𑀦𑀻 𑀞𑀺𑀢𑀸;

𑀩𑀳𑀼𑀓𑁂 𑀚𑀦𑁂 𑀧𑀸𑀲𑀧𑀸𑀡𑀺𑀓𑁂, 𑀦𑁄 𑀘 𑀔𑁄 𑀫𑁂 𑀧𑀝𑀺𑀪𑀸𑀢𑀺 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺.

𑀢𑀢𑁆𑀣 ¶ 𑀦𑀯𑀙𑀦𑁆𑀦𑀓𑁂𑀤𑀸𑀦𑀺 𑀤𑀺𑀬𑁆𑀬𑀢𑀻𑀢𑀺 𑀪𑀸𑀢𑀺𑀓, 𑀧𑀼𑀩𑁆𑀩𑁂 𑀅𑀫𑁆𑀳𑀸𑀓𑀁 𑀓𑀼𑀡𑁆𑀟𑀓𑀬𑀸𑀕𑀼 𑀯𑀸 𑀛𑀸𑀫𑀪𑀢𑁆𑀢𑀁 𑀯𑀸 𑀤𑀺𑀬𑁆𑀬𑀢𑀺, 𑀅𑀚𑁆𑀚 𑀧𑀦 𑀦𑀯𑀙𑀦𑁆𑀦𑀓𑀁 𑀦𑀯𑀸𑀓𑀸𑀭𑀁 𑀤𑀸𑀦𑀁 𑀤𑀺𑀬𑁆𑀬𑀢𑀺. 𑀧𑀼𑀡𑁆𑀡𑀸𑀬𑀁 𑀤𑁄𑀡𑀻𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀪𑀢𑁆𑀢𑀤𑁄𑀡𑀺 𑀲𑀼𑀤𑁆𑀥𑀪𑀢𑁆𑀢𑀲𑁆𑀲 𑀧𑀼𑀡𑁆𑀡𑀸. 𑀲𑀼𑀯𑀸𑀫𑀺𑀦𑀻 𑀞𑀺𑀢𑀸𑀢𑀺 𑀅𑀬𑁆𑀬𑀸𑀧𑀺 𑀦𑁄 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀞𑀺𑀢𑀸. 𑀩𑀳𑀼𑀓𑁂 𑀚𑀦𑁂𑀢𑀺 𑀦 𑀓𑁂𑀯𑀮𑀜𑁆𑀘 𑀅𑀬𑁆𑀬𑀸𑀯, 𑀅𑀜𑁆𑀜𑁄𑀧𑀺 𑀩𑀳𑀼𑀓𑁄 𑀚𑀦𑁄 𑀧𑀸𑀲𑀧𑀸𑀡𑀺𑀓𑁄 𑀞𑀺𑀢𑁄. 𑀦𑁄 𑀘 𑀔𑁄 𑀫𑁂 𑀧𑀝𑀺𑀪𑀸𑀢𑀻𑀢𑀺 𑀅𑀬𑀁 𑀏𑀯𑀁 𑀏𑀢𑁂𑀲𑀁 𑀞𑀺𑀢𑀪𑀸𑀯𑁄𑀧𑀺 𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀫𑀬𑁆𑀳𑀁 𑀦 𑀧𑀝𑀺𑀪𑀸𑀢𑀺, 𑀦 𑀭𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀢𑀸𑀢 𑀘𑀽𑀴𑀢𑀼𑀡𑁆𑀟𑀺𑀮, 𑀫𑀫 𑀓𑀺𑀭 𑀫𑀸𑀢𑀸 𑀏𑀢𑁆𑀣𑁂𑀯 𑀲𑀽𑀓𑀭𑁂 𑀧𑁄𑀲𑁂𑀦𑁆𑀢𑀻 𑀦𑀸𑀫 𑀬𑀤𑀢𑁆𑀣𑀁 𑀧𑁄𑀲𑁂𑀢𑀺, 𑀲𑁆𑀯𑀸𑀲𑁆𑀲𑀸 𑀅𑀢𑁆𑀣𑁄 ¶ 𑀅𑀚𑁆𑀚 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀯𑀢𑁆𑀯𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁯.

‘‘𑀢𑀲𑀲𑀺 𑀪𑀫𑀲𑀺 𑀮𑁂𑀡𑀫𑀺𑀘𑁆𑀙𑀲𑀺, 𑀅𑀢𑁆𑀢𑀸𑀡𑁄𑀲𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀜𑁆𑀚 𑀢𑀼𑀡𑁆𑀟𑀺𑀮, 𑀫𑀁𑀲𑀢𑁆𑀣𑀸𑀬 𑀳𑀺 𑀧𑁄𑀲𑀺𑀢𑀸𑀫𑁆𑀳𑀲𑁂.

𑁯𑁦.

‘‘𑀑𑀕𑀳 ¶ 𑀭𑀳𑀤𑀁 𑀅𑀓𑀤𑁆𑀤𑀫𑀁, 𑀲𑀩𑁆𑀩𑀁 𑀲𑁂𑀤𑀫𑀮𑀁 𑀧𑀯𑀸𑀳𑀬;

𑀕𑀡𑁆𑀳𑀸𑀳𑀺 𑀦𑀯𑀁 𑀯𑀺𑀮𑁂𑀧𑀦𑀁, 𑀬𑀲𑁆𑀲 𑀕𑀦𑁆𑀥𑁄 𑀦 𑀓𑀤𑀸𑀘𑀺 𑀙𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀢𑀲𑀲𑀺 𑀪𑀫𑀲𑀻𑀢𑀺 𑀫𑀭𑀡𑀪𑀬𑁂𑀦 𑀉𑀢𑁆𑀢𑀲𑀲𑀺, 𑀢𑁂𑀦𑁂𑀯 𑀓𑀺𑀮𑀫𑀦𑁆𑀢𑁄 𑀪𑀫𑀲𑀺. 𑀮𑁂𑀡𑀫𑀺𑀘𑁆𑀙𑀲𑀻𑀢𑀺 𑀧𑀢𑀺𑀝𑁆𑀞𑀁 𑀑𑀮𑁄𑀓𑁂𑀲𑀺. 𑀅𑀢𑁆𑀢𑀸𑀡𑁄𑀲𑀻𑀢𑀺 𑀢𑀸𑀢, 𑀧𑀼𑀩𑁆𑀩𑁂 𑀅𑀫𑁆𑀳𑀸𑀓𑀁 𑀫𑀸𑀢𑀸 𑀧𑀝𑀺𑀲𑀭𑀡𑀁 𑀅𑀳𑁄𑀲𑀺, 𑀲𑀸 𑀅𑀚𑁆𑀚 𑀧𑀦 𑀦𑀺𑀭𑀧𑁂𑀓𑁆𑀔𑀸 𑀅𑀫𑁆𑀳𑁂 𑀙𑀟𑁆𑀟𑁂𑀲𑀺, 𑀇𑀤𑀸𑀦𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀺. 𑀑𑀕𑀳𑀸𑀢𑀺 𑀑𑀕𑀸𑀳, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀧𑀯𑀸𑀳𑀬𑀸𑀢𑀺 𑀧𑀯𑀸𑀳𑁂𑀳𑀺, 𑀳𑀸𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀦 𑀙𑀺𑀚𑁆𑀚𑀢𑀻𑀢𑀺 𑀦 𑀦𑀲𑁆𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀲𑀘𑁂 𑀫𑀭𑀡𑀢𑁄 𑀢𑀲𑀲𑀺, 𑀅𑀓𑀤𑁆𑀤𑀫𑀁 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀢𑀯 𑀲𑀭𑀻𑀭𑁂 𑀲𑀩𑁆𑀩𑀁 𑀲𑁂𑀤𑀜𑁆𑀘 𑀫𑀮𑀜𑁆𑀘 𑀧𑀯𑀸𑀳𑁂𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀯𑀺𑀮𑁂𑀧𑀦𑀁 𑀯𑀺𑀮𑀺𑀫𑁆𑀧𑀸𑀢𑀺.

𑀢𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀢𑁆𑀯𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀧𑀞𑀫𑀁 𑀧𑀤𑀁 𑀉𑀤𑀸𑀳𑀭𑀦𑁆𑀢𑀲𑁆𑀲𑁂𑀯 𑀲𑀤𑁆𑀤𑁄 𑀲𑀓𑀮𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀢𑁄. 𑀲𑀼𑀢𑀲𑀼𑀢𑀓𑁆𑀔𑀡𑁂𑀬𑁂𑀯 𑀭𑀸𑀚𑀉𑀧𑀭𑀸𑀚𑀸𑀤𑀬𑁄 𑀆𑀤𑀺𑀁 ¶ 𑀓𑀢𑁆𑀯𑀸 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀆𑀕𑀫𑀁𑀲𑀼. 𑀅𑀦𑀸𑀕𑀢𑀸𑀧𑀺 𑀕𑁂𑀳𑁂 𑀞𑀺𑀢𑀸𑀯 𑀲𑀼𑀡𑀺𑀁𑀲𑀼. 𑀭𑀸𑀚𑀧𑀼𑀭𑀺𑀲𑀸 𑀕𑀘𑁆𑀙𑁂 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀺𑀁𑀲𑀼. 𑀥𑀼𑀢𑁆𑀢𑀸𑀦𑀁 𑀲𑀼𑀭𑀸𑀫𑀤𑁄 𑀙𑀺𑀚𑁆𑀚𑀺. 𑀧𑀸𑀲𑁂 𑀙𑀟𑁆𑀟𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀫𑀳𑀮𑁆𑀮𑀺𑀓𑀸𑀬𑀧𑀺 𑀲𑀼𑀭𑀸𑀫𑀤𑁄 𑀙𑀺𑀚𑁆𑀚𑀺. 𑀫𑀳𑀸𑀲𑀢𑁆𑀢𑁄 𑀫𑀳𑀸𑀚𑀦𑀫𑀚𑁆𑀛𑁂 𑀘𑀽𑀴𑀢𑀼𑀡𑁆𑀟𑀺𑀮𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀁 ¶ 𑀲𑀼𑀢𑁆𑀯𑀸 𑀘𑀽𑀴𑀢𑀼𑀡𑁆𑀟𑀺𑀮𑁄 ‘‘𑀫𑀬𑁆𑀳𑀁 𑀪𑀸𑀢𑀸 𑀏𑀯𑀁 𑀯𑀤𑁂𑀢𑀺, 𑀅𑀫𑁆𑀳𑀸𑀓𑀜𑁆𑀘 𑀯𑀁𑀲𑁂 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀦𑀳𑀸𑀦𑀁, 𑀲𑀭𑀻𑀭𑀢𑁄 𑀲𑁂𑀤𑀫𑀮𑀧𑀯𑀸𑀳𑀦𑀁, 𑀧𑀼𑀭𑀸𑀡𑀯𑀺𑀮𑁂𑀧𑀦𑀁 𑀳𑀸𑀭𑁂𑀢𑁆𑀯𑀸 𑀦𑀯𑀯𑀺𑀮𑁂𑀧𑀦𑀕𑀳𑀡𑀜𑁆𑀘 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀲𑀦𑁆𑀥𑀸𑀬 𑀪𑀸𑀢𑀸 𑀫𑀁 𑀏𑀯 𑀫𑀸𑀳𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁯𑁧.

‘‘𑀓𑀢𑀫𑁄 𑀭𑀳𑀤𑁄 𑀅𑀓𑀤𑁆𑀤𑀫𑁄, 𑀓𑀺𑀁𑀲𑀼 𑀲𑁂𑀤𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀓𑀢𑀫𑀜𑁆𑀘 𑀦𑀯𑀁 𑀯𑀺𑀮𑁂𑀧𑀦𑀁, 𑀬𑀲𑁆𑀲 𑀕𑀦𑁆𑀥𑁄 𑀦 𑀓𑀤𑀸𑀘𑀺 𑀙𑀺𑀚𑁆𑀚𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀓𑀦𑀺𑀝𑁆𑀞 𑀑𑀳𑀺𑀢𑀲𑁄𑀢𑁄 𑀲𑀼𑀡𑀸𑀳𑀻’’𑀢𑀺 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁨.

‘‘𑀥𑀫𑁆𑀫𑁄 𑀭𑀳𑀤𑁄 𑀅𑀓𑀤𑁆𑀤𑀫𑁄, 𑀧𑀸𑀧𑀁 𑀲𑁂𑀤𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀲𑀻𑀮𑀜𑁆𑀘 𑀦𑀯𑀁 𑀯𑀺𑀮𑁂𑀧𑀦𑀁, 𑀢𑀲𑁆𑀲 𑀕𑀦𑁆𑀥𑁄 𑀦 𑀓𑀤𑀸𑀘𑀺 𑀙𑀺𑀚𑁆𑀚𑀢𑀺.

𑁯𑁩.

‘‘𑀦𑀦𑁆𑀤𑀦𑁆𑀢𑀺 ¶ 𑀲𑀭𑀻𑀭𑀖𑀸𑀢𑀺𑀦𑁄, 𑀦 𑀘 𑀦𑀦𑁆𑀤𑀦𑁆𑀢𑀺 𑀲𑀭𑀻𑀭𑀥𑀸𑀭𑀺𑀦𑁄;

𑀧𑀼𑀡𑁆𑀡𑀸𑀬 𑀘 𑀧𑀼𑀡𑁆𑀡𑀫𑀸𑀲𑀺𑀬𑀸, 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀥𑀫𑁆𑀫𑁄𑀢𑀺 𑀧𑀜𑁆𑀘𑀲𑀻𑀮𑀅𑀝𑁆𑀞𑀲𑀻𑀮𑀤𑀲𑀲𑀻𑀮𑀸𑀦𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀩𑁆𑀩𑁄𑀧𑁂𑀲 𑀥𑀫𑁆𑀫𑁄 𑀦𑀸𑀫. 𑀅𑀓𑀤𑁆𑀤𑀫𑁄𑀢𑀺 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀓𑀤𑁆𑀤𑀫𑀸𑀦𑀁 𑀅𑀪𑀸𑀯𑁂𑀦 𑀅𑀓𑀤𑁆𑀤𑀫𑁄. 𑀇𑀫𑀺𑀦𑀸 𑀲𑁂𑀲𑀥𑀫𑁆𑀫𑀢𑁄 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀫𑀤𑀦𑀺𑀫𑁆𑀫𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀯𑀝𑁆𑀝𑀼𑀧𑀘𑁆𑀙𑁂𑀤𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀳𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄, 𑀢𑀸𑀢 𑀘𑀽𑀴𑀢𑀼𑀡𑁆𑀟𑀺𑀮, 𑀅𑀳𑀁 𑀦𑀺𑀩𑁆𑀩𑀸𑀦𑀢𑀴𑀸𑀓𑀁 ‘‘𑀭𑀳𑀤𑁄’’𑀢𑀺 𑀓𑀣𑁂𑀫𑀺. 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀻𑀦𑀺 𑀳𑀺 𑀢𑀢𑁆𑀣 𑀦𑀢𑁆𑀣𑀺, 𑀲𑀘𑁂 𑀫𑀭𑀡𑀢𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀕𑀡𑁆𑀳𑀸𑀢𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀏𑀯𑀁 𑀓𑀣𑁂𑀲𑀺.

𑀧𑀸𑀧𑀁 ¶ 𑀲𑁂𑀤𑀫𑀮𑀦𑁆𑀢𑀺 ¶ 𑀢𑀸𑀢 𑀘𑀽𑀴𑀢𑀼𑀡𑁆𑀟𑀺𑀮, 𑀧𑀸𑀧𑀁 𑀲𑁂𑀤𑀫𑀮𑀲𑀤𑀺𑀲𑀢𑁆𑀢𑀸 ‘‘𑀲𑁂𑀤𑀫𑀮’’𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑁂𑀳𑀺 𑀓𑀣𑀺𑀢𑀁. 𑀢𑀁 𑀧𑀦𑁂𑀢𑀁 𑀏𑀓𑀯𑀺𑀥𑁂𑀦 𑀧𑀸𑀧𑀁 𑀬𑀤𑀺𑀤𑀁 𑀫𑀦𑁄𑀧𑀤𑁄𑀲𑁄, 𑀤𑀼𑀯𑀺𑀥𑁂𑀦 𑀧𑀸𑀧𑀁 𑀧𑀸𑀧𑀓𑀜𑁆𑀘 𑀲𑀻𑀮𑀁, 𑀧𑀸𑀧𑀺𑀓𑀸 𑀘 𑀤𑀺𑀝𑁆𑀞𑀺, 𑀢𑀺𑀯𑀺𑀥𑁂𑀦 𑀧𑀸𑀧𑀁 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀘𑀢𑀼𑀩𑁆𑀩𑀺𑀥𑁂𑀦 𑀧𑀸𑀧𑀁 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺, 𑀧𑀜𑁆𑀘𑀯𑀺𑀥𑁂𑀦 𑀧𑀸𑀧𑀁 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸, 𑀙𑀩𑁆𑀩𑀺𑀥𑁂𑀦 𑀧𑀸𑀧𑀁 𑀙 𑀅𑀕𑀸𑀭𑀯𑀸, 𑀲𑀢𑁆𑀢𑀯𑀺𑀥𑁂𑀦 𑀧𑀸𑀧𑀁 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸, 𑀅𑀝𑁆𑀞𑀯𑀺𑀥𑁂𑀦 𑀧𑀸𑀧𑀁 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸, 𑀦𑀯𑀯𑀺𑀥𑁂𑀦 𑀧𑀸𑀧𑀁 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺, 𑀤𑀲𑀯𑀺𑀥𑁂𑀦 𑀧𑀸𑀧𑀁 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀩𑀳𑀼𑀯𑀺𑀥𑁂𑀦 𑀧𑀸𑀧𑀁 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄𑀢𑀺 𑀏𑀓𑀓𑀤𑀼𑀓𑀢𑀺𑀓𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀇𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀧𑀸𑀧𑀁 ‘‘𑀲𑀭𑀻𑀭𑀦𑀺𑀲𑁆𑀲𑀺𑀢𑀲𑁂𑀤𑀫𑀮𑀲𑀤𑀺𑀲’’𑀦𑁆𑀢𑀺 𑀧𑀡𑁆𑀟𑀺𑀢𑁂𑀳𑀺 𑀓𑀣𑀺𑀢𑀁.

𑀲𑀻𑀮𑀦𑁆𑀢𑀺 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. ‘‘𑀇𑀤𑀁, 𑀢𑀸𑀢, 𑀲𑀻𑀮𑀁 𑀘𑀢𑀼𑀚𑁆𑀚𑀸𑀢𑀺𑀕𑀦𑁆𑀥𑀯𑀺𑀮𑁂𑀧𑀦𑀲𑀤𑀺𑀲’’𑀦𑁆𑀢𑀺 𑀯𑀤𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀺𑀮𑀲𑁆𑀲 𑀕𑀦𑁆𑀥𑁄 𑀢𑀻𑀲𑀼 𑀯𑀬𑁂𑀲𑀼 𑀓𑀤𑀸𑀘𑀺 𑀦 𑀙𑀺𑀚𑁆𑀚𑀢𑀺, 𑀲𑀓𑀮𑀮𑁄𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺.

‘‘𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺, 𑀦 𑀘𑀦𑁆𑀤𑀦𑀁 𑀢𑀕𑁆𑀕𑀭𑀫𑀮𑁆𑀮𑀺𑀓𑀸 𑀯𑀸;

𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺, 𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀺.

‘‘𑀘𑀦𑁆𑀤𑀦𑀁 ¶ 𑀢𑀕𑀭𑀁 𑀯𑀸𑀧𑀺, 𑀉𑀧𑁆𑀧𑀮𑀁 𑀅𑀣 𑀯𑀲𑁆𑀲𑀺𑀓𑀻;

𑀏𑀢𑁂𑀲𑀁 𑀕𑀦𑁆𑀥𑀚𑀸𑀢𑀸𑀦𑀁, 𑀲𑀻𑀮𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄.

‘‘𑀅𑀧𑁆𑀧𑀫𑀢𑁆𑀢𑁄 𑀅𑀬𑀁 𑀕𑀦𑁆𑀥𑁄, 𑀬𑁆𑀯𑀸𑀬𑀁 𑀢𑀕𑀭𑀘𑀦𑁆𑀤𑀦𑀁;

𑀬𑁄 𑀘 𑀲𑀻𑀮𑀯𑀢𑀁 𑀕𑀦𑁆𑀥𑁄, 𑀯𑀸𑀢𑀺 𑀤𑁂𑀯𑁂𑀲𑀼 𑀉𑀢𑁆𑀢𑀫𑁄’’𑀢𑀺. (𑀥. 𑀧. 𑁫𑁪-𑁫𑁬);

𑀦𑀦𑁆𑀤𑀦𑁆𑀢𑀺 𑀲𑀭𑀻𑀭𑀖𑀸𑀢𑀺𑀦𑁄𑀢𑀺 𑀢𑀸𑀢 𑀘𑀽𑀴𑀢𑀼𑀡𑁆𑀟𑀺𑀮, 𑀇𑀫𑁂 𑀅𑀜𑁆𑀜𑀸𑀡𑀫𑀦𑀼𑀲𑁆𑀲𑀸 ‘‘𑀫𑀥𑀼𑀭𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫, 𑀧𑀼𑀢𑁆𑀢𑀤𑀸𑀭𑀫𑁆𑀧𑀺 𑀔𑀸𑀤𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀸 𑀦𑀦𑁆𑀤𑀦𑁆𑀢𑀺 𑀢𑀼𑀲𑁆𑀲𑀦𑁆𑀢𑀺, 𑀧𑀸𑀡𑀸𑀢𑀺𑀧𑀸𑀢𑁄 𑀆𑀲𑁂𑀯𑀺𑀢𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺…𑀧𑁂… 𑀧𑁂𑀢𑁆𑀢𑀺𑀯𑀺𑀲𑀬𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀺, 𑀬𑁄 𑀲𑀩𑁆𑀩𑀮𑀳𑀼𑀓𑁄 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀯𑀺𑀧𑀸𑀓𑁄, 𑀲𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻𑀢𑀺 𑀇𑀫𑀁 𑀧𑀸𑀡𑀸𑀢𑀺𑀧𑀸𑀢𑁂 𑀆𑀤𑀻𑀦𑀯𑀁 𑀦 𑀚𑀸𑀦𑀦𑁆𑀢𑀺. 𑀅𑀚𑀸𑀦𑀦𑁆𑀢𑀸 𑁋

‘‘𑀫𑀥𑀼𑀯𑀸 ¶ 𑀫𑀜𑁆𑀜𑀢𑀺 𑀩𑀸𑀮𑁄, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀧𑀸𑀧𑀁, 𑀩𑀸𑀮𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀻’’𑀢𑀺. (𑀥. 𑀧. 𑁬𑁯) 𑁋

𑀫𑀥𑀼𑀭𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑁋

‘‘𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺. (𑀥. 𑀧. 𑁬𑁬) 𑁋

𑀏𑀢𑁆𑀢𑀓𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺.

‘‘𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺. (𑀥. 𑀧. 𑁬𑁭);

𑀦 𑀘 𑀦𑀦𑁆𑀤𑀦𑁆𑀢𑀺 𑀲𑀭𑀻𑀭𑀥𑀸𑀭𑀺𑀦𑁄𑀢𑀺 𑀢𑀸𑀢 𑀘𑀽𑀴𑀢𑀼𑀡𑁆𑀟𑀺𑀮, 𑀬𑁂 𑀧𑀦𑁂𑀢𑁂 𑀲𑀭𑀻𑀭𑀥𑀸𑀭𑀺𑀦𑁄 𑀲𑀢𑁆𑀢𑀸, 𑀢𑁂 𑀅𑀢𑁆𑀢𑀦𑁄 𑀫𑀭𑀡𑁂 ¶ 𑀆𑀕𑀘𑁆𑀙𑀦𑁆𑀢𑁂 𑀞𑀧𑁂𑀢𑁆𑀯𑀸 𑀲𑀻𑀳𑀫𑀺𑀕𑀭𑀸𑀚𑀳𑀢𑁆𑀣𑀸𑀚𑀸𑀦𑀻𑀬𑀅𑀲𑁆𑀲𑀸𑀚𑀸𑀦𑀻𑀬𑀔𑀻𑀡𑀸𑀲𑀯𑁂 𑀅𑀯𑀲𑁂𑀲𑀸 𑀩𑁄𑀥𑀺𑀲𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀪𑀸𑀬𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺.

‘‘𑀲𑀩𑁆𑀩𑁂 ¶ 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂’’𑀢𑀺. (𑀥. 𑀧. 𑁧𑁨𑁯);

𑀧𑀼𑀡𑁆𑀡𑀸𑀬𑀸𑀢𑀺 𑀕𑀼𑀡𑀧𑀼𑀡𑁆𑀡𑀸𑀬. 𑀧𑀼𑀡𑁆𑀡𑀫𑀸𑀲𑀺𑀬𑀸𑀢𑀺 𑀧𑀼𑀡𑁆𑀡𑀘𑀦𑁆𑀤𑀬𑀼𑀢𑁆𑀢𑀸𑀬, 𑀫𑀸𑀲𑀁 𑀯𑀸 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸𑀬. 𑀢𑀤𑀸 𑀓𑀺𑀭 𑀧𑀼𑀡𑁆𑀡𑀫𑀸𑀲𑀻 𑀉𑀧𑁄𑀲𑀣𑀤𑀺𑀯𑀲𑁄 𑀳𑁄𑀢𑀺. 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢𑀦𑁆𑀢𑀺 𑀢𑀸𑀢 𑀘𑀽𑀴𑀢𑀼𑀡𑁆𑀟𑀺𑀮, 𑀫𑀸 𑀲𑁄𑀘𑀺 𑀫𑀸 𑀧𑀭𑀺𑀤𑁂𑀯𑀺, 𑀫𑀭𑀡𑀲𑁆𑀲 𑀦𑀸𑀫 𑀢𑁂 𑀪𑀸𑀬𑀦𑁆𑀢𑀺, 𑀬𑁂𑀲𑀁 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀸𑀤𑀺𑀕𑀼𑀡𑀸 𑀦𑀢𑁆𑀣𑀺. 𑀫𑀬𑀁 𑀧𑀦 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀧𑀼𑀜𑁆𑀜𑀯𑀦𑁆𑀢𑁄, 𑀢𑀲𑁆𑀫𑀸 𑀅𑀫𑁆𑀳𑀸𑀤𑀺𑀲𑀸 𑀲𑀢𑁆𑀢𑀸 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢𑀦𑁆𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀥𑀼𑀭𑁂𑀦 𑀲𑀭𑁂𑀦 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑀓𑀸𑀬𑀸 𑀅𑀗𑁆𑀕𑀼𑀮𑀺𑀬𑁄 𑀨𑁄𑀝𑁂𑀲𑀼𑀁, 𑀘𑁂𑀮𑀼𑀓𑁆𑀔𑁂𑀧𑀸 𑀘 𑀧𑀯𑀢𑁆𑀢𑀺𑀁𑀲𑀼, 𑀲𑀸𑀥𑀼𑀓𑀸𑀭𑀲𑀤𑁆𑀤𑀧𑀼𑀡𑁆𑀡𑀁 𑀅𑀦𑁆𑀢𑀮𑀺𑀓𑁆𑀔𑀁 𑀅𑀳𑁄𑀲𑀺. 𑀩𑀸𑀭𑀸𑀡𑀲𑀺𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂𑀦 𑀧𑀽𑀚𑁂𑀢𑁆𑀯𑀸 𑀫𑀳𑀮𑁆𑀮𑀺𑀓𑀸𑀬 𑀬𑀲𑀁 𑀤𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀕𑀦𑁆𑀥𑀸𑀤𑀻𑀳𑀺 𑀯𑀺𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀕𑀻𑀯𑀸𑀲𑀼 𑀫𑀡𑀺𑀭𑀢𑀦𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀝𑀺𑀚𑀕𑁆𑀕𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑁄 ¶ 𑀧𑀜𑁆𑀘 𑀲𑀻𑀮𑀸𑀦𑀺 𑀅𑀤𑀸𑀲𑀺. 𑀲𑀩𑁆𑀩𑁂 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀘 𑀓𑀸𑀲𑀺𑀭𑀝𑁆𑀞𑀯𑀸𑀲𑀺𑀦𑁄 𑀘 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀦𑁂𑀲𑀁 𑀧𑀓𑁆𑀔𑀤𑀺𑀯𑀲𑁂𑀲𑀼 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀟𑁆𑀟𑁂 𑀢𑀻𑀭𑁂𑀲𑀺. 𑀢𑀲𑁆𑀫𑀺𑀁 𑀥𑀭𑀫𑀸𑀦𑁂 𑀓𑀽𑀝𑀟𑁆𑀟𑀓𑀸𑀭𑀓𑀸 𑀦𑀸𑀫 𑀦𑀸𑀳𑁂𑀲𑀼𑀁. 𑀅𑀧𑀭𑀪𑀸𑀕𑁂 𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀲𑀭𑀻𑀭𑀧𑀭𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁂 𑀧𑁄𑀢𑁆𑀣𑀓𑁂 𑀮𑀺𑀔𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀧𑁄𑀢𑁆𑀣𑀓𑀁 𑀑𑀮𑁄𑀓𑁂𑀢𑁆𑀯𑀸 𑀅𑀟𑁆𑀟𑀁 𑀢𑀻𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀧𑁆𑀧𑀫𑀸𑀤𑁂𑀦 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀩𑁆𑀩𑁂𑀲𑀁 𑀭𑁄𑀤𑀦𑁆𑀢𑀸𑀦𑀁 𑀧𑀭𑀺𑀤𑁂𑀯𑀦𑁆𑀢𑀸𑀦𑀜𑁆𑀜𑁂𑀯 𑀲𑀤𑁆𑀥𑀺𑀁 𑀘𑀽𑀴𑀢𑀼𑀡𑁆𑀟𑀺𑀮𑁂𑀦 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁄 𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀫𑀭𑀡𑀪𑀻𑀭𑀼𑀓𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀘𑀽𑀴𑀢𑀼𑀡𑁆𑀟𑀺𑀮𑁄 𑀫𑀭𑀡𑀪𑀻𑀭𑀼𑀓𑁄 𑀪𑀺𑀓𑁆𑀔𑀼, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀳𑀸𑀢𑀼𑀡𑁆𑀟𑀺𑀮𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀢𑀼𑀡𑁆𑀟𑀺𑀮𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁮𑁯] 𑁪. 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀺𑀗𑁆𑀕𑀻𑀫𑀺𑀕𑁄𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀬𑀸𑀯 𑀥𑀦𑀼𑀕𑁆𑀕𑀳𑀧𑀬𑁄𑀚𑀦𑀸 𑀔𑀡𑁆𑀟𑀳𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁨.𑁯𑁮𑁨 𑀆𑀤𑀬𑁄) 𑀥𑀦𑀧𑀸𑀮𑀯𑀺𑀲𑁆𑀲𑀚𑁆𑀚𑀦𑀁 𑀘𑀽𑀴𑀳𑀁𑀲𑀫𑀳𑀸𑀳𑀁𑀲𑀚𑀸𑀢𑀓𑁂 (𑀚𑀸. 𑁧.𑁧𑁫.𑁧𑁩𑁩 𑀆𑀤𑀬𑁄) 𑀓𑀣𑀺𑀢𑀁. 𑀢𑀤𑀸 𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀥𑀦𑀧𑀸𑀮𑀓𑁂 𑀆𑀕𑀘𑁆𑀙𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀆𑀦𑀦𑁆𑀤𑁄 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀭𑀸𑀚𑀕𑀳𑀲𑁆𑀲 𑀧𑀼𑀩𑁆𑀩𑀧𑀲𑁆𑀲𑁂 𑀲𑀸𑀮𑀺𑀦𑁆𑀤𑀺𑀬𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀳𑁄𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀕𑀸𑀫𑁂 𑀓𑀲𑁆𑀲𑀓𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 ¶ 𑀯𑀬𑀧𑁆𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀼𑀩𑁆𑀩𑀼𑀢𑁆𑀢𑀭𑀸𑀬 𑀤𑀺𑀲𑀸𑀬 𑀏𑀓𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀓𑀭𑀻𑀲𑀲𑀳𑀲𑁆𑀲𑀫𑀢𑁆𑀢𑀁 𑀓𑀲𑀺𑀁 𑀓𑀸𑀭𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀓𑀫𑁆𑀫𑀓𑀸𑀭𑁂 ‘‘𑀓𑀲𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀫𑀼𑀔𑀥𑁄𑀯𑀦𑀢𑁆𑀣𑀸𑀬 𑀔𑁂𑀢𑁆𑀢𑀓𑁄𑀝𑀺𑀬𑀁 𑀫𑀳𑀦𑁆𑀢𑀁 𑀲𑁄𑀩𑁆𑀪𑀁 𑀉𑀧𑀲𑀗𑁆𑀓𑀫𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁄𑀩𑁆𑀪𑁂 𑀏𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀓𑁆𑀓𑀝𑀓𑁄 𑀧𑀝𑀺𑀯𑀲𑀢𑀺 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄. 𑀩𑁄𑀥𑀺𑀲𑀢𑁆𑀢𑁄 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀢𑀁 𑀲𑁄𑀩𑁆𑀪𑀁 𑀑𑀢𑀭𑀺. 𑀢𑀲𑁆𑀲 𑀫𑀼𑀔𑀥𑁄𑀯𑀦𑀓𑀸𑀮𑁂 ¶ 𑀓𑀓𑁆𑀓𑀝𑀓𑁄 𑀲𑀦𑁆𑀢𑀺𑀓𑀁 𑀆𑀕𑀫𑀸𑀲𑀺. 𑀅𑀣 𑀦𑀁 𑀲𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀲𑀸𑀝𑀓𑀦𑁆𑀢𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀔𑁂𑀢𑁆𑀢𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀢𑁆𑀣𑁂𑀯 𑀦𑀁 𑀲𑁄𑀩𑁆𑀪𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀔𑁂𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑁄 𑀧𑀞𑀫𑀁 𑀢𑀁 𑀲𑁄𑀩𑁆𑀪𑀁 𑀕𑀦𑁆𑀢𑁆𑀯𑀸 𑀓𑀓𑁆𑀓𑀝𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀺𑀲𑀸𑀝𑀓𑀦𑁆𑀢𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀓𑀫𑁆𑀫𑀦𑁆𑀢𑀁 𑀯𑀺𑀘𑀸𑀭𑁂𑀲𑀺. 𑀇𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀸𑀲𑁄 𑀤𑀴𑁆𑀳𑁄 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀦𑀺𑀩𑀤𑁆𑀥𑀁 𑀔𑁂𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀅𑀓𑁆𑀔𑀻𑀲𑀼 𑀘 𑀧𑀦𑀲𑁆𑀲 𑀧𑀜𑁆𑀘 𑀧𑀲𑀸𑀤𑀸 𑀢𑀻𑀡𑀺 𑀫𑀡𑁆𑀟𑀮𑀸𑀦𑀺 𑀯𑀺𑀲𑀼𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀣𑀲𑁆𑀲 𑀔𑁂𑀢𑁆𑀢𑀓𑁄𑀝𑀺𑀬𑀁 𑀏𑀓𑀲𑁆𑀫𑀺𑀁 𑀢𑀸𑀮𑁂 𑀓𑀸𑀓𑀓𑀼𑀮𑀸𑀯𑀓𑁂 𑀓𑀸𑀓𑀻 𑀅𑀓𑁆𑀔𑀻𑀦𑀺 𑀤𑀺𑀲𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀸𑀓𑀁 𑀆𑀳 𑁋 ‘‘𑀲𑀸𑀫𑀺, 𑀤𑁄𑀳𑀴𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺. ‘‘𑀓𑀺𑀁 𑀤𑁄𑀳𑀴𑁄 𑀦𑀸𑀫𑀸’’𑀢𑀺? ‘‘𑀏𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀓𑁆𑀔𑀻𑀦𑀺 𑀔𑀸𑀤𑀺𑀢𑀼𑀓𑀸𑀫𑀸𑀫𑁆𑀳𑀻’’𑀢𑀺. ‘‘𑀤𑀼𑀤𑁆𑀤𑁄𑀳𑀴𑁄 𑀢𑁂 𑀉𑀧𑁆𑀧𑀦𑁆𑀦𑁄, 𑀓𑁄 𑀏𑀢𑀸𑀦𑀺 𑀆𑀳𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺. ‘‘𑀢𑁆𑀯𑀁 𑀦 𑀲𑀓𑁆𑀓𑁄𑀲𑀻’’𑀢𑀺 𑀅𑀳𑀫𑁆𑀧𑁂𑀢𑀁 𑀚𑀸𑀦𑀸𑀫𑀺, 𑀬𑁄 𑀧𑀦𑁂𑀲 𑀢𑀸𑀮𑀲𑁆𑀲 𑀅𑀯𑀺𑀤𑀽𑀭𑁂 𑀯𑀫𑁆𑀫𑀺𑀓𑁄, 𑀏𑀢𑁆𑀣 𑀓𑀡𑁆𑀳𑀲𑀧𑁆𑀧𑁄 𑀯𑀲𑀢𑀺. ‘‘𑀢𑀁 𑀉𑀧𑀝𑁆𑀞𑀳, 𑀲𑁄 𑀏𑀢𑀁 𑀟𑀁𑀲𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀢𑀺, 𑀅𑀣𑀲𑁆𑀲 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑁆𑀯𑀁 𑀆𑀳𑀭𑀺𑀲𑁆𑀲𑀲𑀻’’𑀢𑀺 ¶ . 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀓𑀡𑁆𑀳𑀲𑀧𑁆𑀧𑀁 𑀉𑀧𑀝𑁆𑀞𑀳𑀺. 𑀩𑁄𑀥𑀺𑀲𑀢𑁆𑀢𑁂𑀦𑀧𑀺 𑀯𑀸𑀧𑀺𑀢𑀲𑀲𑁆𑀲𑀸𑀦𑀁 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁂 𑀓𑀓𑁆𑀓𑀝𑀓𑁄 𑀫𑀳𑀸 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀧𑁆𑀧𑁄 𑀓𑀸𑀓𑀫𑀸𑀳 ‘‘𑀲𑀫𑁆𑀫, 𑀢𑁆𑀯𑀁 𑀦𑀺𑀩𑀤𑁆𑀥𑀁 𑀫𑀁 𑀉𑀧𑀝𑁆𑀞𑀳𑀲𑀺, 𑀓𑀺𑀁 𑀢𑁂 𑀓𑀭𑁄𑀫𑀻’’𑀢𑀺. ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀤𑀸𑀲𑀺𑀬𑀸 𑀏𑀢𑀲𑁆𑀲 𑀔𑁂𑀢𑁆𑀢𑀲𑀸𑀫𑀺𑀓𑀲𑁆𑀲 𑀅𑀓𑁆𑀔𑀻𑀲𑀼 𑀤𑁄𑀳𑀴𑁄 𑀉𑀧𑁆𑀧𑀚𑁆𑀚𑀺, 𑀲𑁆𑀯𑀸𑀳𑀁 𑀢𑀼𑀫𑁆𑀳𑀸𑀓𑀁 𑀆𑀦𑀼𑀪𑀸𑀯𑁂𑀦 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀮𑀪𑀺𑀲𑁆𑀲𑀸𑀫𑀻𑀢𑀺 𑀢𑀼𑀫𑁆𑀳𑁂 𑀉𑀧𑀝𑁆𑀞𑀳𑀸𑀫𑀻’’𑀢𑀺. 𑀲𑀧𑁆𑀧𑁄 ‘‘𑀳𑁄𑀢𑀼, 𑀦𑀬𑀺𑀤𑀁 𑀕𑀭𑀼𑀓𑀁, 𑀮𑀪𑀺𑀲𑁆𑀲𑀲𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦 𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀕𑀫𑀦𑀫𑀕𑁆𑀕𑁂 𑀓𑁂𑀤𑀸𑀭𑀫𑀭𑀺𑀬𑀸𑀤𑀁 ¶ ¶ 𑀦𑀺𑀲𑁆𑀲𑀸𑀬 𑀢𑀺𑀡𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀕𑀘𑁆𑀙𑀦𑁆𑀢𑁄 𑀧𑀞𑀫𑀁 𑀲𑁄𑀩𑁆𑀪𑀁 𑀑𑀢𑀭𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀲𑀺𑀦𑁂𑀳𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀢𑁆𑀢𑀭𑀺𑀲𑀸𑀝𑀓𑀦𑁆𑀢𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑁂𑀢𑁆𑀢𑀁 𑀧𑀸𑀯𑀺𑀲𑀺. 𑀲𑀧𑁆𑀧𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀺𑀡𑁆𑀟𑀺𑀓𑀫𑀁𑀲𑁂 𑀟𑀁𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀢𑁂𑀢𑁆𑀯𑀸 𑀯𑀫𑁆𑀫𑀺𑀓𑀁 𑀲𑀦𑁆𑀥𑀸𑀬 𑀧𑀮𑀸𑀬𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀢𑀦𑀜𑁆𑀘 𑀓𑀓𑁆𑀓𑀝𑀓𑀲𑁆𑀲 𑀲𑀸𑀝𑀓𑀦𑁆𑀢𑀭𑀢𑁄 𑀮𑀗𑁆𑀖𑀦𑀜𑁆𑀘 𑀓𑀸𑀓𑀲𑁆𑀲 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀭𑁂 𑀦𑀺𑀮𑀻𑀬𑀦𑀜𑁆𑀘 𑀅𑀧𑀘𑁆𑀙𑀸𑀅𑀧𑀼𑀭𑀺𑀫𑀁 𑀅𑀳𑁄𑀲𑀺. 𑀓𑀸𑀓𑁄 𑀦𑀺𑀮𑀻𑀬𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀢𑀼𑀡𑁆𑀟𑁂𑀦 𑀧𑀳𑀭𑀺. 𑀓𑀓𑁆𑀓𑀝𑀓𑁄 ‘‘𑀇𑀫𑀁 𑀓𑀸𑀓𑀁 𑀦𑀺𑀲𑁆𑀲𑀸𑀬 𑀫𑀫 𑀲𑀳𑀸𑀬𑀲𑁆𑀲 𑀪𑀬𑀁 𑀉𑀧𑁆𑀧𑀦𑁆𑀦𑀁, 𑀏𑀢𑀲𑁆𑀫𑀺𑀁 𑀕𑀳𑀺𑀢𑁂 𑀲𑀧𑁆𑀧𑁄 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀲𑀡𑁆𑀟𑀸𑀲𑁂𑀦 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀓𑀸𑀓𑀁 𑀕𑀻𑀯𑀸𑀬𑀁 𑀅𑀴𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀓𑀺𑀮𑀫𑁂𑀢𑁆𑀯𑀸 𑀣𑁄𑀓𑀁 𑀲𑀺𑀣𑀺𑀮𑀫𑀓𑀸𑀲𑀺. 𑀓𑀸𑀓𑁄 ‘‘𑀓𑀺𑀲𑁆𑀲 𑀫𑀁 𑀲𑀫𑁆𑀫, 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀲𑀺, 𑀏𑀲 𑀫𑀁 𑀓𑀓𑁆𑀓𑀝𑀓𑁄 𑀪𑀺𑀬𑁆𑀬𑁄 𑀯𑀺𑀳𑁂𑀞𑁂𑀢𑀺, 𑀬𑀸𑀯 𑀦 𑀫𑀭𑀸𑀫𑀺, 𑀢𑀸𑀯 𑀏𑀳𑀻’’𑀢𑀺 𑀲𑀧𑁆𑀧𑀁 𑀧𑀓𑁆𑀓𑁄𑀲𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁪.

‘‘𑀲𑀺𑀗𑁆𑀕𑀻𑀫𑀺𑀕𑁄 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄, 𑀅𑀝𑁆𑀞𑀺𑀢𑁆𑀢𑀘𑁄 𑀯𑀸𑀭𑀺𑀲𑀬𑁄 𑀅𑀮𑁄𑀫𑁄;

𑀢𑁂𑀦𑀸𑀪𑀺𑀪𑀽𑀢𑁄 𑀓𑀧𑀡𑀁 𑀭𑀼𑀤𑀸𑀫𑀺, 𑀳𑀭𑁂 𑀲𑀔𑀸 𑀓𑀺𑀲𑁆𑀲 𑀦𑀼 𑀫𑀁 𑀚𑀳𑀸𑀲𑀻’’𑀢𑀺.

𑀢𑀢𑁆𑀣 𑀲𑀺𑀗𑁆𑀕𑀻𑀫𑀺𑀕𑁄𑀢𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬 𑀯𑀸 𑀅𑀴𑀲𑀗𑁆𑀔𑀸𑀢𑀸𑀦𑀁 𑀯𑀸 𑀲𑀺𑀗𑁆𑀕𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑀓𑁆𑀓𑀝𑀓𑁄 𑀯𑀼𑀢𑁆𑀢𑁄. 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄𑀢𑀺 𑀤𑀻𑀖𑁂𑀳𑀺 𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀦𑁂𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀝𑁆𑀞𑀺𑀫𑁂𑀯 𑀢𑀘𑁄 𑀅𑀲𑁆𑀲𑀸𑀢𑀺 𑀅𑀝𑁆𑀞𑀺𑀢𑁆𑀢𑀘𑁄. 𑀳𑀭𑁂 𑀲𑀔𑀸𑀢𑀺 𑀆𑀮𑀧𑀦𑀫𑁂𑀢𑀁, 𑀅𑀫𑁆𑀪𑁄 𑀲𑀳𑀸𑀬𑀸𑀢𑀺 𑀅𑀢𑁆𑀣𑁄.

𑀲𑀧𑁆𑀧𑁄 𑀢𑀁 𑀲𑀼𑀢𑁆𑀯𑀸 𑀫𑀳𑀦𑁆𑀢𑀁 𑀨𑀡𑀁 𑀓𑀢𑁆𑀯𑀸 𑀓𑀸𑀓𑀁 𑀅𑀲𑁆𑀲𑀸𑀲𑁂𑀦𑁆𑀢𑁄 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁫.

‘‘𑀲𑁄 ¶ ¶ ¶ 𑀧𑀲𑁆𑀲𑀲𑀦𑁆𑀢𑁄 𑀫𑀳𑀢𑀸 𑀨𑀡𑁂𑀦, 𑀪𑀼𑀚𑀗𑁆𑀕𑀫𑁄 𑀓𑀓𑁆𑀓𑀝𑀫𑀚𑁆𑀛𑀧𑀢𑁆𑀢𑁄;

𑀲𑀔𑀸 𑀲𑀔𑀸𑀭𑀁 𑀧𑀭𑀺𑀢𑀸𑀬𑀫𑀸𑀦𑁄, 𑀪𑀼𑀚𑀗𑁆𑀕𑀫𑀁 𑀓𑀓𑁆𑀓𑀝𑀓𑁄 𑀕𑀳𑁂𑀲𑀻’’𑀢𑀺.

𑀢𑀢𑁆𑀣 𑀓𑀓𑁆𑀓𑀝𑀫𑀚𑁆𑀛𑀧𑀢𑁆𑀢𑁄𑀢𑀺 𑀓𑀓𑁆𑀓𑀝𑀓𑀁 𑀲𑀫𑁆𑀧𑀢𑁆𑀢𑁄. 𑀲𑀔𑀸 𑀲𑀔𑀸𑀭𑀦𑁆𑀢𑀺 𑀲𑀳𑀸𑀬𑁄 𑀲𑀳𑀸𑀬𑀁. ‘‘𑀲𑀓𑀁 𑀲𑀔𑀸𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀢𑀦𑁄 𑀲𑀳𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀢𑀸𑀬𑀫𑀸𑀦𑁄𑀢𑀺 𑀭𑀓𑁆𑀔𑀫𑀸𑀦𑁄. 𑀕𑀳𑁂𑀲𑀻𑀢𑀺 𑀤𑀼𑀢𑀺𑀬𑁂𑀦 𑀅𑀴𑁂𑀦 𑀕𑀻𑀯𑀸𑀬𑀁 𑀤𑀴𑁆𑀳𑀁 𑀕𑀳𑁂𑀲𑀺.

𑀅𑀣 𑀦𑀁 𑀓𑀺𑀮𑀫𑁂𑀢𑁆𑀯𑀸 𑀣𑁄𑀓𑀁 𑀲𑀺𑀣𑀺𑀮𑀫𑀓𑀸𑀲𑀺. 𑀅𑀣 𑀲𑀧𑁆𑀧𑁄 ‘‘𑀓𑀓𑁆𑀓𑀝𑀓𑀸 𑀦𑀸𑀫 𑀦𑁂𑀯 𑀓𑀸𑀓𑀫𑀁𑀲𑀁 𑀔𑀸𑀤𑀦𑁆𑀢𑀺, 𑀦 𑀲𑀧𑁆𑀧𑀫𑀁𑀲𑀁, 𑀅𑀣 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀬𑀁 𑀅𑀫𑁆𑀳𑁂 𑀕𑀡𑁆𑀳𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁬.

‘‘𑀦 𑀯𑀸𑀬𑀲𑀁 𑀦𑁄 𑀧𑀦 𑀓𑀡𑁆𑀳𑀲𑀧𑁆𑀧𑀁, 𑀖𑀸𑀲𑀢𑁆𑀣𑀺𑀓𑁄 𑀓𑀓𑁆𑀓𑀝𑀓𑁄 𑀅𑀤𑁂𑀬𑁆𑀬;

𑀧𑀼𑀘𑁆𑀙𑀸𑀫𑀺 𑀢𑀁 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢, 𑀅𑀣 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳 𑀉𑀪𑁄 𑀕𑀳𑀻𑀢𑀸’’𑀢𑀺.

𑀢𑀢𑁆𑀣 𑀖𑀸𑀲𑀢𑁆𑀣𑀺𑀓𑁄𑀢𑀺 𑀆𑀳𑀸𑀭𑀢𑁆𑀣𑀺𑀓𑁄 𑀳𑀼𑀢𑁆𑀯𑀸. 𑀅𑀤𑁂𑀬𑁆𑀬𑀸𑀢𑀺𑀆𑀤𑀺𑀬𑁂𑀬𑁆𑀬, 𑀦-𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀦 𑀕𑀡𑁆𑀳𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀓𑀓𑁆𑀓𑀝𑀓𑁄 𑀕𑀳𑀡𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁭.

‘‘𑀅𑀬𑀁 𑀧𑀼𑀭𑀺𑀲𑁄 𑀫𑀫 𑀅𑀢𑁆𑀣𑀓𑀸𑀫𑁄, 𑀬𑁄 𑀫𑀁 𑀕𑀳𑁂𑀢𑁆𑀯𑀸𑀦 𑀤𑀓𑀸𑀬 𑀦𑁂𑀢𑀺;

𑀢𑀲𑁆𑀫𑀺𑀁 𑀫𑀢𑁂 𑀤𑀼𑀓𑁆𑀔𑀫𑀦𑀧𑁆𑀧𑀓𑀁 𑀫𑁂, 𑀅𑀳𑀜𑁆𑀘 𑀏𑀲𑁄 𑀘 𑀉𑀪𑁄 𑀦 𑀳𑁄𑀫.

𑁯𑁮.

‘‘𑀫𑀫𑀜𑁆𑀘 𑀤𑀺𑀲𑁆𑀯𑀸𑀦 𑀧𑀯𑀤𑁆𑀥𑀓𑀸𑀬𑀁, 𑀲𑀩𑁆𑀩𑁄 𑀚𑀦𑁄 𑀳𑀺𑀁𑀲𑀺𑀢𑀼𑀫𑁂𑀯 𑀫𑀺𑀘𑁆𑀙𑁂;

𑀲𑀸𑀤𑀼𑀜𑁆𑀘 𑀣𑀽𑀮𑀜𑁆𑀘 𑀫𑀼𑀤𑀼𑀜𑁆𑀘 𑀫𑀁𑀲𑀁, 𑀓𑀸𑀓𑀸𑀧𑀺 𑀫𑀁 𑀤𑀺𑀲𑁆𑀯 𑀯𑀺𑀳𑁂𑀞𑀬𑁂𑀬𑁆𑀬𑀼’’𑀦𑁆𑀢𑀺.

𑀢𑀢𑁆𑀣 ¶ ¶ 𑀅𑀬𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀁 𑀦𑀺𑀤𑁆𑀤𑀺𑀲𑀢𑀺. 𑀅𑀢𑁆𑀣𑀓𑀸𑀫𑁄𑀢𑀺 𑀳𑀺𑀢𑀓𑀸𑀫𑁄. 𑀤𑀓𑀸𑀬 𑀦𑁂𑀢𑀻𑀢𑀺 𑀬𑁄 𑀫𑀁 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀉𑀢𑁆𑀢𑀭𑀺𑀲𑀸𑀝𑀓𑁂𑀦 𑀕𑀳𑁂𑀢𑁆𑀯𑀸𑀦 𑀉𑀤𑀓𑀸𑀬 𑀦𑁂𑀢𑀺, 𑀅𑀢𑁆𑀢𑀦𑁄 𑀯𑀲𑀦𑀓𑀲𑁄𑀩𑁆𑀪𑀁 𑀧𑀸𑀧𑁂𑀢𑀺. 𑀢𑀲𑁆𑀫𑀺𑀁 𑀫𑀢𑁂𑀢𑀺 𑀲𑀘𑁂 𑀲𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀭𑀺𑀲𑁆𑀲𑀢𑀺, 𑀏𑀢𑀲𑁆𑀫𑀺𑀁 𑀫𑀢𑁂 𑀫𑀫 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀉𑀪𑁄 𑀦 𑀳𑁄𑀫𑀸𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀦 𑀪𑀯𑀺𑀲𑁆𑀲𑀸𑀫. 𑀫𑀫𑀜𑁆𑀘 𑀤𑀺𑀲𑁆𑀯𑀸𑀦𑀸𑀢𑀺 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀇𑀤𑀜𑁆𑀘 𑀅𑀧𑀭𑀁 𑀓𑀸𑀭𑀡𑀁, 𑀇𑀫𑀲𑁆𑀫𑀺𑀁 𑀫𑀢𑁂 𑀅𑀦𑀸𑀣𑀁 𑀦𑀺𑀧𑁆𑀧𑀘𑁆𑀘𑀬𑀁 𑀫𑀁 𑀧𑀯𑀟𑁆𑀠𑀺𑀢𑀓𑀸𑀬𑀁 ¶ 𑀤𑀺𑀲𑁆𑀯𑀸 𑀲𑀩𑁆𑀩𑁄 𑀚𑀦𑁄 ‘‘𑀇𑀫𑀲𑁆𑀲 𑀓𑀓𑁆𑀓𑀝𑀓𑀲𑁆𑀲 𑀲𑀸𑀤𑀼𑀜𑁆𑀘 𑀣𑀽𑀮𑀜𑁆𑀘 𑀫𑀼𑀤𑀼𑀜𑁆𑀘 𑀫𑀁𑀲’’𑀦𑁆𑀢𑀺 𑀫𑀁 𑀫𑀸𑀭𑁂𑀢𑀼𑀁 𑀇𑀘𑁆𑀙𑁂𑀬𑁆𑀬, 𑀦 𑀓𑁂𑀯𑀮𑀜𑁆𑀘 𑀚𑀦𑁄 𑀫𑀦𑀼𑀲𑁆𑀲𑁄, 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀓𑀸𑀓𑀸𑀧𑀺 𑀫𑀁 𑀤𑀺𑀲𑁆𑀯𑀸 𑀯𑀺𑀳𑁂𑀞𑀬𑁂𑀬𑁆𑀬𑀼𑀁 𑀯𑀺𑀳𑁂𑀲𑁂𑀬𑁆𑀬𑀼𑀁 𑀫𑀸𑀭𑁂𑀬𑁆𑀬𑀼𑀁.

𑀢𑀁 𑀲𑀼𑀢𑁆𑀯𑀸 𑀲𑀧𑁆𑀧𑁄 𑀘𑀺𑀦𑁆𑀢𑁂𑀲𑀺 ‘‘𑀏𑀓𑁂𑀦𑀼𑀧𑀸𑀬𑁂𑀦 𑀇𑀫𑀁 𑀯𑀜𑁆𑀘𑁂𑀢𑁆𑀯𑀸 𑀓𑀸𑀓𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀯𑀜𑁆𑀘𑁂𑀢𑀼𑀓𑀸𑀫𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁯𑁯.

‘‘𑀲𑀘𑁂𑀢𑀲𑁆𑀲 𑀳𑁂𑀢𑀼𑀫𑁆𑀳 𑀉𑀪𑁄 𑀕𑀳𑀻𑀢𑀸, 𑀉𑀝𑁆𑀞𑀸𑀢𑀼 𑀧𑁄𑀲𑁂 𑀯𑀺𑀲𑀫𑀸𑀯𑀫𑀸𑀫𑀺;

𑀫𑀫𑀜𑁆𑀘 𑀓𑀸𑀓𑀜𑁆𑀘 𑀧𑀫𑀼𑀜𑁆𑀘 𑀔𑀺𑀧𑁆𑀧𑀁, 𑀧𑀼𑀭𑁂 𑀯𑀺𑀲𑀁 𑀕𑀸𑀴𑁆𑀳𑀫𑀼𑀧𑁂𑀢𑀺 𑀫𑀘𑁆𑀘’’𑀦𑁆𑀢𑀺.

𑀢𑀢𑁆𑀣 𑀲𑀘𑁂𑀢𑀲𑁆𑀲 𑀳𑁂𑀢𑀽𑀢𑀺 𑀲𑀘𑁂 𑀏𑀢𑀲𑁆𑀲 𑀓𑀸𑀭𑀡𑀸. 𑀉𑀝𑁆𑀞𑀸𑀢𑀽𑀢𑀺 𑀦𑀺𑀩𑁆𑀩𑀺𑀲𑁄 𑀳𑁄𑀢𑀼. 𑀯𑀺𑀲𑀫𑀸𑀯𑀫𑀸𑀫𑀻𑀢𑀺 𑀅𑀳𑀫𑀲𑁆𑀲 𑀯𑀺𑀲𑀁 𑀆𑀓𑀟𑁆𑀠𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀦𑀁 𑀓𑀭𑁄𑀫𑀺. 𑀧𑀼𑀭𑁂 𑀯𑀺𑀲𑀁 𑀕𑀸𑀴𑁆𑀳𑀫𑀼𑀧𑁂𑀢𑀺 𑀫𑀘𑁆𑀘𑀦𑁆𑀢𑀺 𑀇𑀫𑀜𑁆𑀳𑀺 𑀫𑀘𑁆𑀘𑀁 𑀫𑀬𑀸 𑀅𑀦𑀸𑀯𑀫𑀺𑀬𑀫𑀸𑀦𑀁 𑀯𑀺𑀲𑀁 𑀕𑀸𑀴𑁆𑀳𑀁 𑀩𑀮𑀯𑀁 𑀳𑀼𑀢𑁆𑀯𑀸 𑀉𑀧𑀕𑀘𑁆𑀙𑁂𑀬𑁆𑀬, 𑀢𑀁 𑀬𑀸𑀯 𑀦 𑀉𑀧𑀕𑀘𑁆𑀙𑀢𑀺, 𑀢𑀸𑀯𑀤𑁂𑀯 𑀅𑀫𑁆𑀳𑁂 𑀤𑁆𑀯𑁂𑀧𑀺 𑀚𑀦𑁂 𑀔𑀺𑀧𑁆𑀧𑀁 𑀫𑀼𑀜𑁆𑀘𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀓𑁆𑀓𑀝𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀏𑀓𑁂𑀦𑀼𑀧𑀸𑀬𑁂𑀦 𑀫𑀁 𑀤𑁆𑀯𑁂𑀧𑀺 𑀚𑀦𑁂 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀓𑀸𑀫𑁄, 𑀫𑀬𑁆𑀳𑀁 𑀉𑀧𑀸𑀬𑀓𑁄𑀲𑀮𑁆𑀮𑀁 𑀦 𑀚𑀸𑀦𑀸𑀢𑀺, 𑀅𑀳𑀁 𑀤𑀸𑀦𑀺 𑀬𑀣𑀸 𑀲𑀧𑁆𑀧𑁄 𑀲𑀜𑁆𑀘𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀅𑀴𑀁 𑀲𑀺𑀣𑀺𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀸𑀓𑀁 𑀧𑀦 𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁦.

‘‘𑀲𑀧𑁆𑀧𑀁 ¶ 𑀧𑀫𑁄𑀓𑁆𑀔𑀸𑀫𑀺 𑀦 𑀢𑀸𑀯 𑀓𑀸𑀓𑀁, 𑀧𑀝𑀺𑀩𑀦𑁆𑀥𑀓𑁄 𑀳𑁄𑀳𑀺𑀢𑀺 𑀢𑀸𑀯 𑀓𑀸𑀓𑁄;

𑀧𑀼𑀭𑀺𑀲𑀜𑁆𑀘 𑀤𑀺𑀲𑁆𑀯𑀸𑀦 𑀲𑀼𑀔𑀺𑀁 𑀅𑀭𑁄𑀕𑀁, 𑀓𑀸𑀓𑀁 𑀧𑀫𑁄𑀓𑁆𑀔𑀸𑀫𑀺 𑀬𑀣𑁂𑀯 𑀲𑀧𑁆𑀧’’𑀦𑁆𑀢𑀺.

𑀢𑀢𑁆𑀣 ¶ 𑀧𑀝𑀺𑀩𑀦𑁆𑀥𑀓𑁄𑀢𑀺 𑀧𑀸𑀝𑀺𑀪𑁄𑀕𑁄. 𑀬𑀣𑁂𑀯 𑀲𑀧𑁆𑀧𑀦𑁆𑀢𑀺 𑀬𑀣𑀸 𑀪𑀯𑀦𑁆𑀢𑀁 𑀲𑀧𑁆𑀧𑀁 𑀫𑀼𑀜𑁆𑀘𑀸𑀫𑀺, 𑀢𑀣𑀸 𑀓𑀸𑀓𑀁 𑀧𑀫𑁄𑀓𑁆𑀔𑀸𑀫𑀺, 𑀓𑁂𑀯𑀮𑀁 𑀢𑁆𑀯𑀁 𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀭𑀻𑀭𑀢𑁄 𑀲𑀻𑀖𑀁 𑀯𑀺𑀲𑀁 𑀆𑀯𑀫𑀸𑀳𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀲𑁆𑀲 𑀲𑀼𑀔𑀲𑀜𑁆𑀘𑀸𑀭𑀡𑀢𑁆𑀣𑀁 𑀅𑀴𑀁 𑀲𑀺𑀣𑀺𑀮𑀫𑀓𑀸𑀲𑀺. 𑀲𑀧𑁆𑀧𑁄 𑀯𑀺𑀲𑀁 𑀆𑀯𑀫𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀲𑀭𑀻𑀭𑀁 𑀦𑀺𑀩𑁆𑀩𑀺𑀲𑀁 𑀅𑀓𑀸𑀲𑀺. 𑀲𑁄 𑀦𑀺𑀤𑁆𑀤𑀼𑀓𑁆𑀔𑁄 𑀉𑀝𑁆𑀞𑀸𑀬 𑀧𑀓𑀢𑀺𑀯𑀡𑁆𑀡𑁂𑀦𑁂𑀯 𑀅𑀝𑁆𑀞𑀸𑀲𑀺. 𑀓𑀓𑁆𑀓𑀝𑀓𑁄 ‘‘𑀲𑀘𑁂 𑀇𑀫𑁂 𑀤𑁆𑀯𑁂𑀧𑀺 𑀚𑀦𑀸 𑀅𑀭𑁄𑀕𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀯𑀟𑁆𑀠𑀺 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀦𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑁆𑀢𑀭𑀺𑀓𑀸𑀬 𑀉𑀧𑁆𑀧𑀮𑀫𑀓𑀼𑀴𑀁 𑀯𑀺𑀬 𑀅𑀴𑁂𑀳𑀺 𑀉𑀪𑀺𑀦𑁆𑀦𑀫𑁆𑀧𑀺 ¶ 𑀲𑀻𑀲𑀁 𑀓𑀧𑁆𑀧𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀓𑀸𑀓𑀻𑀧𑀺 𑀢𑀫𑁆𑀳𑀸 𑀞𑀸𑀦𑀸 𑀧𑀮𑀸𑀬𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀧𑁆𑀧𑀲𑁆𑀲 𑀲𑀭𑀻𑀭𑀁 𑀤𑀡𑁆𑀟𑀓𑁂 𑀯𑁂𑀞𑁂𑀢𑁆𑀯𑀸 𑀕𑀼𑀫𑁆𑀩𑀧𑀺𑀝𑁆𑀞𑁂 𑀔𑀺𑀧𑀺. 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀁 𑀲𑁄𑀩𑁆𑀪𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀸𑀮𑀺𑀦𑁆𑀤𑀺𑀬𑀕𑀸𑀫𑀫𑁂𑀯 𑀕𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀓𑀓𑁆𑀓𑀝𑀓𑁂𑀦 𑀲𑀤𑁆𑀥𑀺𑀁 𑀅𑀥𑀺𑀓𑀢𑀭𑁄 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁦𑁧.

‘‘𑀓𑀸𑀓𑁄 𑀢𑀤𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀫𑀸𑀭𑁄 𑀧𑀦 𑀓𑀡𑁆𑀳𑀲𑀧𑁆𑀧𑁄 𑀅𑀳𑁄𑀲𑀺;

𑀆𑀦𑀦𑁆𑀤𑀪𑀤𑁆𑀤𑁄 𑀓𑀓𑁆𑀓𑀝𑀓𑁄 𑀅𑀳𑁄𑀲𑀺, 𑀅𑀳𑀁 𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀫𑀺 𑀲𑀢𑁆𑀣𑀸’’𑀢𑀺.

𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀓𑀸𑀓𑀻 𑀧𑀦 𑀕𑀸𑀣𑀸𑀬 𑀦 𑀯𑀼𑀢𑁆𑀢𑀸, 𑀲𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀅𑀳𑁄𑀲𑀻𑀢𑀺.

𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁩𑁯𑁦] 𑁫. 𑀫𑀬𑁆𑀳𑀓𑀚𑀸𑀢𑀓𑀯𑀡𑁆𑀡𑀦𑀸

𑀲𑀓𑀼𑀡𑁄 ¶ 𑀫𑀬𑁆𑀳𑀓𑁄 𑀦𑀸𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺 𑀦𑀸𑀫 𑀅𑀟𑁆𑀠𑁄 𑀅𑀳𑁄𑀲𑀺 𑀫𑀳𑀤𑁆𑀥𑀦𑁄. 𑀲𑁄 𑀦𑁂𑀯 𑀅𑀢𑁆𑀢𑀦𑀸 𑀪𑁄𑀕𑁂 𑀪𑀼𑀜𑁆𑀚𑀺, 𑀦 𑀧𑀭𑁂𑀲𑀁 𑀅𑀤𑀸𑀲𑀺, 𑀦𑀸𑀦𑀕𑁆𑀕𑀭𑀲𑁂 𑀧𑀡𑀻𑀢𑁂 𑀪𑁄𑀚𑀦𑁂 𑀉𑀧𑀦𑀻𑀢𑁂 𑀢𑀁 𑀦 𑀪𑀼𑀜𑁆𑀚𑀢𑀺, 𑀩𑀺𑀮𑀗𑁆𑀕𑀤𑀼𑀢𑀺𑀬𑀁 ¶ 𑀓𑀡𑀸𑀚𑀓𑀁 𑀏𑀯 𑀪𑀼𑀜𑁆𑀚𑀢𑀺, 𑀥𑀽𑀧𑀺𑀢𑀯𑀸𑀲𑀺𑀢𑁂𑀲𑀼 𑀓𑀸𑀲𑀺𑀓𑀯𑀢𑁆𑀣𑁂𑀲𑀼 𑀉𑀧𑀦𑀻𑀢𑁂𑀲𑀼 𑀢𑀸𑀦𑀺 𑀳𑀸𑀭𑁂𑀢𑁆𑀯𑀸 𑀣𑀽𑀮𑀣𑀽𑀮𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑀺, 𑀆𑀚𑀸𑀦𑀻𑀬𑀬𑀼𑀢𑁆𑀢𑁂 𑀫𑀡𑀺𑀓𑀦𑀓𑀯𑀺𑀘𑀺𑀢𑁆𑀢𑁂 𑀭𑀣𑁂 𑀉𑀧𑀦𑀻𑀢𑁂 𑀢𑀫𑁆𑀧𑀺 𑀳𑀭𑀸𑀧𑁂𑀢𑁆𑀯𑀸 𑀓𑀢𑁆𑀢𑀭𑀭𑀣𑀓𑁂𑀦 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀘𑁆𑀙𑀢𑁆𑀢𑁂 𑀥𑀸𑀭𑀺𑀬𑀫𑀸𑀦𑁂 𑀢𑀁 𑀅𑀧𑀦𑁂𑀢𑁆𑀯𑀸 𑀧𑀡𑁆𑀡𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦. 𑀲𑁄 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀲𑀼 𑀧𑀼𑀜𑁆𑀜𑁂𑀲𑀼 𑀏𑀓𑀫𑁆𑀧𑀺 𑀅𑀓𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀭𑁄𑀭𑀼𑀯𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀩𑀮𑀁 𑀲𑀢𑁆𑀢𑀳𑀺 𑀭𑀢𑁆𑀢𑀺𑀤𑀺𑀯𑀲𑁂𑀳𑀺 𑀭𑀸𑀚𑀓𑀼𑀮𑀁 𑀧𑀯𑁂𑀲𑁂𑀲𑀺. 𑀢𑀲𑁆𑀫𑀺𑀁 𑀧𑀯𑁂𑀲𑀺𑀢𑁂 𑀭𑀸𑀚𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀦 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺𑀦𑁄 𑀦𑀸𑀫 𑀓𑀸𑀮𑀓𑀢𑀲𑁆𑀲 𑀅𑀲𑁆𑀲𑀸𑀫𑀺𑀓𑀥𑀦𑁂 𑀅𑀫𑁆𑀳𑀸𑀓𑀁 𑀖𑀭𑁂 𑀆𑀳𑀭𑀺𑀬𑀫𑀸𑀦𑁂𑀬𑁂𑀯 𑀲𑀢𑁆𑀢 𑀭𑀢𑁆𑀢𑀺𑀤𑀺𑀯𑀲𑀸 𑀕𑀢𑀸, 𑀲𑁄 𑀧𑀦 𑀏𑀢𑀁 𑀥𑀦𑀁 𑀮𑀪𑀺𑀢𑁆𑀯𑀸𑀧𑀺 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺, 𑀦 𑀧𑀭𑁂𑀲𑀁 𑀅𑀤𑀸𑀲𑀺, 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀧𑁄𑀓𑁆𑀔𑀭𑀡𑀻 𑀯𑀺𑀬𑀲𑁆𑀲 ¶ 𑀥𑀦𑀁 𑀅𑀳𑁄𑀲𑀺, 𑀲𑁄 𑀏𑀓𑀤𑀺𑀯𑀲𑀫𑁆𑀧𑀺 𑀧𑀡𑀻𑀢𑀪𑁄𑀚𑀦𑀸𑀤𑀻𑀦𑀁 𑀭𑀲𑀁 𑀅𑀦𑀦𑀼𑀪𑀯𑀺𑀢𑁆𑀯𑀸𑀯 𑀫𑀭𑀡𑀫𑀼𑀔𑀁 𑀧𑀯𑀺𑀝𑁆𑀞𑁄, 𑀏𑀯𑀁 𑀫𑀘𑁆𑀙𑀭𑀻 𑀅𑀧𑀼𑀜𑁆𑀜𑀲𑀢𑁆𑀢𑁄 𑀓𑀺𑀁 𑀓𑀢𑁆𑀯𑀸 𑀏𑀢𑁆𑀢𑀓𑀁 𑀥𑀦𑀁 𑀮𑀪𑀺, 𑀓𑁂𑀦 𑀘𑀲𑁆𑀲 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦 𑀭𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀫𑀳𑀸𑀭𑀸𑀚, 𑀥𑀦𑀮𑀸𑀪𑁄 𑀘, 𑀥𑀦𑀁 𑀮𑀤𑁆𑀥𑀸 𑀅𑀧𑀭𑀺𑀪𑀼𑀜𑁆𑀚𑀦𑀓𑀸𑀭𑀡𑀜𑁆𑀘 𑀢𑁂𑀦𑁂𑀯 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀅𑀲𑁆𑀲𑀤𑁆𑀥𑁄 𑀅𑀳𑁄𑀲𑀺 𑀫𑀘𑁆𑀙𑀭𑀻, 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀤𑁂𑀢𑀺, 𑀦 𑀓𑀜𑁆𑀘𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀕𑀭𑀲𑀺𑀔𑀺𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀮𑀤𑁆𑀥𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀦𑀼 𑀘𑀭𑀸𑀫 𑀫𑀳𑀸𑀲𑁂𑀝𑁆𑀞𑀻’’𑀢𑀺 𑀯𑀼𑀢𑁆𑀢𑁂 𑀧𑀼𑀭𑀺𑀲𑀁 ¶ 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙, 𑀇𑀫𑀁 𑀅𑀫𑁆𑀳𑀸𑀓𑀁 𑀖𑀭𑀁 𑀆𑀦𑁂𑀢𑁆𑀯𑀸 𑀫𑀫 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀧𑀝𑀺𑀬𑀢𑁆𑀢𑀪𑀢𑁆𑀢𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀸𑀧𑁂𑀳𑀻’’𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀖𑀭𑀁 𑀦𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀆𑀘𑀺𑀓𑁆𑀔𑀺. 𑀲𑀸 𑀦𑀸𑀦𑀕𑁆𑀕𑀭𑀲𑀪𑀢𑁆𑀢𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀲𑁄 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑁂𑀝𑁆𑀞𑀺𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀝𑀺𑀧𑀚𑁆𑀚𑀺. 𑀲𑁂𑀝𑁆𑀞𑀺 𑀭𑀸𑀚𑀓𑀼𑀮𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀮𑀤𑁆𑀥𑀁, 𑀪𑀦𑁆𑀢𑁂, 𑀪𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀮𑀤𑁆𑀥𑀁 𑀫𑀳𑀸𑀲𑁂𑀝𑁆𑀞𑀻’’𑀢𑀺. 𑀲𑁄 𑀧𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺 ¶ , ‘‘𑀇𑀫𑀁 𑀫𑁂 𑀪𑀢𑁆𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀤𑀼𑀓𑁆𑀓𑀭𑀫𑁆𑀧𑀺 𑀓𑀫𑁆𑀫𑀁 𑀓𑀭𑁂𑀬𑁆𑀬𑀼𑀁, 𑀅𑀳𑁄 𑀯𑀢 𑀫𑁂 𑀚𑀸𑀦𑀻’’𑀢𑀺 𑀅𑀧𑀭𑀘𑁂𑀢𑀦𑀁 𑀧𑀭𑀺𑀧𑀼𑀡𑁆𑀡𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀤𑀸𑀦𑀜𑁆𑀳𑀺 𑀦𑀸𑀫 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀧𑀭𑀺𑀧𑀼𑀡𑁆𑀡𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲𑁂𑀯 𑀫𑀳𑀧𑁆𑀨𑀮𑀁 𑀳𑁄𑀢𑀺.

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑀸 𑀪𑀯𑀸𑀫, 𑀤𑀤𑀫𑁆𑀧𑀺 𑀯𑁂 𑀅𑀢𑁆𑀢𑀫𑀦𑀸 𑀪𑀯𑀸𑀫;

𑀤𑀢𑁆𑀯𑀸𑀧𑀺 𑀯𑁂 𑀦𑀸𑀦𑀼𑀢𑀧𑁆𑀧𑀸𑀫 𑀧𑀘𑁆𑀙𑀸, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦𑀫𑀺𑀬𑁆𑀬𑀭𑁂. (𑀚𑀸. 𑁧.𑁧𑁦.𑁯𑁫);

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸’’. (𑀅. 𑀦𑀺. 𑁬.𑁩𑁭; 𑀧𑁂. 𑀯. 𑁩𑁦𑁫);

𑀇𑀢𑀺, 𑀫𑀳𑀸𑀭𑀸𑀚, 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺 𑀢𑀕𑀭𑀲𑀺𑀔𑀺𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀧𑀘𑁆𑀘𑀬𑁂𑀦 𑀩𑀳𑀼𑀁 𑀥𑀦𑀁 𑀮𑀪𑀺, 𑀤𑀢𑁆𑀯𑀸 𑀅𑀧𑀭𑀘𑁂𑀢𑀦𑀁 𑀧𑀡𑀻𑀢𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀪𑁄𑀕𑁂 𑀪𑀼𑀜𑁆𑀚𑀺𑀢𑀼𑀁 𑀦𑀸𑀲𑀓𑁆𑀔𑀻𑀢𑀺. ‘‘𑀧𑀼𑀢𑁆𑀢𑀁 𑀧𑀦 𑀓𑀲𑁆𑀫𑀸 𑀦 𑀮𑀪𑀺, 𑀪𑀦𑁆𑀢𑁂’’𑀢𑀺? 𑀲𑀢𑁆𑀣𑀸 ‘‘𑀧𑀼𑀢𑁆𑀢𑀲𑁆𑀲 𑀅𑀮𑀪𑀦𑀓𑀸𑀭𑀡𑀫𑁆𑀧𑀺 𑀢𑁂𑀦𑁂𑀯 𑀓𑀢𑀁, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀓𑀦𑀺𑀝𑁆𑀞𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀯𑀺𑀘𑀸𑀭𑁂𑀦𑁆𑀢𑁄 𑀖𑀭𑀤𑁆𑀯𑀸𑀭𑁂 𑀤𑀸𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺. 𑀅𑀣𑀲𑁆𑀲 𑀏𑀓𑁄 𑀧𑀼𑀢𑁆𑀢𑁄 𑀚𑀸𑀬𑀺. 𑀲𑁄 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘𑀸𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀲𑀤𑁆𑀥𑀺𑀁 𑀧𑀼𑀢𑁆𑀢𑀤𑀸𑀭𑁂𑀦 𑀲𑀩𑁆𑀩𑀁 𑀖𑀭𑀯𑀺𑀪𑀯𑀁 ¶ 𑀓𑀦𑀺𑀝𑁆𑀞𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀤𑀸𑀦𑀁 𑀧𑀯𑀢𑁆𑀢𑁂𑀳𑀻’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀺𑀳𑀸𑀲𑀺. 𑀓𑀦𑀺𑀝𑁆𑀞𑁄𑀧𑀺𑀲𑁆𑀲 𑀏𑀓𑀁 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺. 𑀲𑁄 𑀢𑀁 𑀯𑀟𑁆𑀠𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀫 𑀪𑀸𑀢𑀼 𑀧𑀼𑀢𑁆𑀢𑁂 𑀚𑀻𑀯𑀦𑁆𑀢𑁂 𑀓𑀼𑀝𑀼𑀫𑁆𑀩𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀺𑀥𑀸 𑀪𑀯𑀺𑀲𑁆𑀲𑀢𑀺, 𑀪𑀸𑀢𑀼 𑀧𑀼𑀢𑁆𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀦𑀤𑀺𑀬𑀁 𑀑𑀧𑀺𑀮𑀸𑀧𑁂𑀢𑁆𑀯𑀸 𑀫𑀸𑀭𑁂𑀲𑀺. 𑀢𑀫𑁂𑀦𑀁 𑀦𑁆𑀳𑀢𑁆𑀯𑀸 𑀆𑀕𑀢𑀁 𑀪𑀸𑀢𑀼 𑀚𑀸𑀬𑀸 ‘‘𑀓𑀼𑀳𑀺𑀁 𑀫𑀫 𑀧𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀦𑀤𑀺𑀬𑀁 𑀉𑀤𑀓𑀁 𑀓𑀻𑀴𑀺, 𑀅𑀣 𑀦𑀁 𑀉𑀤𑀓𑁂 𑀯𑀺𑀘𑀺𑀦𑀦𑁆𑀢𑁄 𑀦𑀸𑀤𑁆𑀤𑀲’’𑀦𑁆𑀢𑀺. 𑀲𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀇𑀤𑀁 𑀓𑀺𑀘𑁆𑀘𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀑𑀢𑀭𑀺𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀤𑀸𑀦𑀲𑀸𑀮𑀁 𑀅𑀤𑀺𑀲𑁆𑀯𑀸 ‘‘𑀤𑀸𑀦𑀲𑀸𑀮𑀸𑀧𑀺 𑀇𑀫𑀺𑀦𑀸 𑀅𑀲𑀧𑁆𑀧𑀼𑀭𑀺𑀲𑁂𑀦 𑀦𑀸𑀲𑀺𑀢𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀓𑀦𑀺𑀝𑁆𑀞𑁄 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑁂𑀲𑀺. 𑀲𑁄 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑁄 ‘‘𑀤𑀸𑀭𑀓𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀦𑀼 𑀔𑁄’’𑀢𑀺 𑀧𑀼𑀘𑁆𑀙𑀺. ‘‘𑀫𑀢𑁄, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀉𑀤𑀓𑀓𑀻𑀴𑀦𑀝𑁆𑀞𑀸𑀦𑁂 𑀅𑀲𑀼𑀓𑀓𑀸𑀭𑀡𑁂𑀦𑀸𑀢𑀺 𑀦 𑀚𑀸𑀦𑀸𑀫𑀻’’𑀢𑀺. ‘‘𑀓𑀺𑀁 𑀢𑁆𑀯𑀁 𑀅𑀲𑀧𑁆𑀧𑀼𑀭𑀺𑀲 𑀦 𑀚𑀸𑀦𑀺𑀲𑁆𑀲𑀲𑀺, 𑀢𑀬𑀸 𑀓𑀢𑀓𑀺𑀘𑁆𑀘𑀁 𑀫𑀬𑁆𑀳𑀁 𑀧𑀸𑀓𑀝𑀁, 𑀦𑀦𑀼 𑀢𑁆𑀯𑀁 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀢𑀁 𑀫𑀸𑀭𑁂𑀲𑀺, 𑀓𑀺𑀁 𑀦𑀼 𑀢𑁆𑀯𑀁 𑀭𑀸𑀚𑀸𑀤𑀻𑀦𑀁 𑀯𑀲𑁂𑀦 𑀦𑀲𑁆𑀲𑀫𑀸𑀦𑀁 𑀥𑀦𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀫𑀬𑁆𑀳𑀓𑀲𑀓𑀼𑀡𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺? 𑀅𑀣𑀲𑁆𑀲 𑀫𑀳𑀸𑀲𑀢𑁆𑀢𑁄 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁨.

‘‘𑀲𑀓𑀼𑀡𑁄 𑀫𑀬𑁆𑀳𑀓𑁄 𑀦𑀸𑀫, 𑀕𑀺𑀭𑀺𑀲𑀸𑀦𑀼𑀤𑀭𑀻𑀘𑀭𑁄;

𑀧𑀓𑁆𑀓𑀁 𑀧𑀺𑀧𑁆𑀨𑀮𑀺𑀫𑀸𑀭𑀼𑀬𑁆𑀳, ‘𑀫𑀬𑁆𑀳𑀁 𑀫𑀬𑁆𑀳’𑀦𑁆𑀢𑀺 𑀓𑀦𑁆𑀤𑀢𑀺.

𑁧𑁦𑁩.

‘‘𑀢𑀲𑁆𑀲𑁂𑀯𑀁 ¶ 𑀯𑀺𑀮𑀧𑀦𑁆𑀢𑀲𑁆𑀲, 𑀤𑀺𑀚𑀲𑀗𑁆𑀖𑀸 𑀲𑀫𑀸𑀕𑀢𑀸;

𑀪𑀼𑀢𑁆𑀯𑀸𑀦 𑀧𑀺𑀧𑁆𑀨𑀮𑀺𑀁 𑀬𑀦𑁆𑀢𑀺, 𑀯𑀺𑀮𑀧𑀢𑁆𑀯𑁂𑀯 𑀲𑁄 𑀤𑀺𑀚𑁄.

𑁧𑁦𑁪.

‘‘𑀏𑀯𑀫𑁂𑀯 ¶ 𑀇𑀥𑁂𑀓𑀘𑁆𑀘𑁄, 𑀲𑀗𑁆𑀖𑀭𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁;

𑀦𑁂𑀯𑀢𑁆𑀢𑀦𑁄 𑀦 𑀜𑀸𑀢𑀻𑀦𑀁, 𑀬𑀣𑁄𑀥𑀺𑀁 𑀧𑀝𑀺𑀧𑀚𑁆𑀚𑀢𑀺.

𑁧𑁦𑁫.

‘‘𑀦 𑀲𑁄 𑀅𑀘𑁆𑀙𑀸𑀤𑀦𑀁 𑀪𑀢𑁆𑀢𑀁, 𑀦 𑀫𑀸𑀮𑀁 𑀦 𑀯𑀺𑀮𑁂𑀧𑀦𑀁;

𑀅𑀦𑀼𑀪𑁄𑀢𑀺 𑀲𑀓𑀺𑀁 𑀓𑀺𑀜𑁆𑀘𑀺, 𑀦 𑀲𑀗𑁆𑀕𑀡𑁆𑀳𑀸𑀢𑀺 𑀜𑀸𑀢𑀓𑁂.

𑁧𑁦𑁬.

‘‘𑀢𑀲𑁆𑀲𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲, 𑀫𑀬𑁆𑀳𑀁 𑀫𑀬𑁆𑀳𑀦𑁆𑀢𑀺 𑀭𑀓𑁆𑀔𑀢𑁄;

𑀭𑀸𑀚𑀸𑀦𑁄 𑀅𑀣 𑀯𑀸 𑀘𑁄𑀭𑀸, 𑀤𑀸𑀬𑀸𑀤𑀸 𑀬𑁂𑀯 𑀅𑀧𑁆𑀧𑀺𑀬𑀸;

𑀥𑀦𑀫𑀸𑀤𑀸𑀬 𑀕𑀘𑁆𑀙𑀦𑁆𑀢𑀺, 𑀯𑀺𑀮𑀧𑀢𑁆𑀯𑁂𑀯 𑀲𑁄 𑀦𑀭𑁄.

𑁧𑁦𑁭.

‘‘𑀥𑀻𑀭𑁄 𑀪𑁄𑀕𑁂 𑀅𑀥𑀺𑀕𑀫𑁆𑀫, 𑀲𑀗𑁆𑀕𑀡𑁆𑀳𑀸𑀢𑀺 𑀘 𑀜𑀸𑀢𑀓𑁂;

𑀢𑁂𑀦 𑀲𑁄 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺.

𑀢𑀢𑁆𑀣 ¶ 𑀫𑀬𑁆𑀳𑀓𑁄𑀢𑀺 ‘‘𑀫𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺 𑀯𑀺𑀭𑀯𑀦𑀯𑀲𑁂𑀦 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀕𑀺𑀭𑀺𑀲𑀸𑀦𑀼𑀤𑀭𑀻𑀲𑀼 𑀘𑀭𑀢𑀻𑀢𑀺 𑀕𑀺𑀭𑀺𑀲𑀸𑀦𑀼𑀤𑀭𑀻𑀘𑀭𑁄. 𑀧𑀓𑁆𑀓𑀁 𑀧𑀺𑀧𑁆𑀨𑀮𑀺𑀦𑁆𑀢𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀁 𑀨𑀮𑀪𑀭𑀺𑀢𑀁 𑀧𑀺𑀧𑁆𑀨𑀮𑀺𑀭𑀼𑀓𑁆𑀔𑀁. 𑀓𑀦𑁆𑀤𑀢𑀻𑀢𑀺 𑀤𑀺𑀚𑀕𑀡𑁂 𑀢𑀁 𑀭𑀼𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀓𑁆𑀓𑀸𑀦𑀺 𑀔𑀸𑀤𑀦𑁆𑀢𑁂 𑀯𑀸𑀭𑁂𑀢𑀼𑀁 ‘‘𑀫𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀲𑁆𑀲𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲𑀸𑀢𑀺 𑀢𑀲𑁆𑀲 𑀯𑀺𑀮𑀧𑀦𑁆𑀢𑀲𑁆𑀲𑁂𑀯. 𑀪𑀼𑀢𑁆𑀯𑀸𑀦 𑀯𑀺𑀧𑁆𑀨𑀮𑀺𑀁 𑀬𑀦𑁆𑀢𑀻𑀢𑀺 𑀢𑀁 𑀧𑀺𑀧𑁆𑀨𑀮𑀺𑀭𑀼𑀓𑁆𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀜𑁆𑀜𑀁 𑀨𑀮𑀲𑀫𑁆𑀧𑀦𑁆𑀦𑀁 𑀭𑀼𑀓𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀯𑀺𑀮𑀧𑀢𑁆𑀯𑁂𑀯𑀸𑀢𑀺 𑀲𑁄 𑀧𑀦 𑀤𑀺𑀚𑁄 𑀯𑀺𑀮𑀧𑀢𑀺𑀬𑁂𑀯. 𑀬𑀣𑁄𑀥𑀺𑀦𑁆𑀢𑀺 𑀬𑀣𑀸𑀓𑁄𑀝𑁆𑀞𑀸𑀲𑀁, 𑀫𑀸𑀢𑀸𑀧𑀺𑀢𑀸𑀪𑀸𑀢𑀼𑀪𑀕𑀺𑀦𑀻𑀧𑀼𑀢𑁆𑀢𑀥𑀻𑀢𑀸𑀤𑀻𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀲𑁂𑀦 𑀬𑁄 𑀬𑁄 𑀓𑁄𑀝𑁆𑀞𑀸𑀲𑁄 𑀤𑀸𑀢𑀩𑁆𑀩𑁄, 𑀢𑀁 𑀢𑀁 𑀦 𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀓𑀺𑀦𑁆𑀢𑀺 𑀏𑀓𑀯𑀸𑀭𑀫𑁆𑀧𑀺 𑀦𑀸𑀦𑀼𑀪𑁄𑀢𑀺. ‘‘𑀲𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀦 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀪𑀢𑁆𑀢𑀘𑁆𑀙𑀸𑀤𑀦𑀩𑀻𑀚𑀦𑀗𑁆𑀕𑀮𑀸𑀤𑀺𑀤𑀸𑀦𑀯𑀲𑁂𑀦 𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀮𑀧𑀢𑁆𑀯𑁂𑀯 𑀲𑁄 𑀦𑀭𑁄𑀢𑀺 𑀏𑀢𑁂𑀲𑀼 𑀭𑀸𑀚𑀸𑀤𑀻𑀲𑀼 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀲𑀼 𑀓𑁂𑀯𑀮𑀁 𑀲𑁄 𑀧𑀼𑀭𑀺𑀲𑁄 𑀯𑀺𑀮𑀧𑀢𑀺𑀬𑁂𑀯. 𑀥𑀻𑀭𑁄𑀢𑀺 𑀧𑀡𑁆𑀟𑀺𑀢𑁄. 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑁂 𑀤𑀼𑀩𑁆𑀩𑀮𑀜𑀸𑀢𑀓𑁂 𑀪𑀢𑁆𑀢𑀘𑁆𑀙𑀸𑀤𑀦𑀩𑀻𑀚𑀦𑀗𑁆𑀕𑀮𑀸𑀤𑀺𑀤𑀸𑀦𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀢𑀺 𑀲𑁄 𑀧𑀼𑀭𑀺𑀲𑁄 𑀢𑁂𑀦 𑀜𑀸𑀢𑀺𑀲𑀗𑁆𑀕𑀳𑁂𑀦 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀓𑀺𑀢𑁆𑀢𑀺𑀜𑁆𑀘 𑀅𑀢𑁆𑀢𑀦𑁄 𑀯𑀡𑁆𑀡𑀪𑀡𑀦𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀤𑁂𑀯𑀦𑀕𑀭𑁂 𑀧𑀫𑁄𑀤𑀢𑀺.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀸𑀦𑀁 𑀧𑀸𑀓𑀢𑀺𑀓𑀁 𑀓𑀸𑀭𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀕𑀦𑁆𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺 𑀪𑀸𑀢𑀼 𑀧𑀼𑀢𑁆𑀢𑀲𑁆𑀲 𑀫𑀸𑀭𑀺𑀢𑀢𑁆𑀢𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀦𑁂𑀯 𑀧𑀼𑀢𑁆𑀢𑀁, 𑀦 𑀥𑀻𑀢𑀭𑀁 𑀅𑀮𑀪𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀦𑀺𑀝𑁆𑀞𑁄 𑀆𑀕𑀦𑁆𑀢𑀼𑀓𑀲𑁂𑀝𑁆𑀞𑀺 𑀅𑀳𑁄𑀲𑀺, 𑀚𑁂𑀝𑁆𑀞𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀬𑁆𑀳𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁩𑁯𑁧] 𑁬. 𑀯𑀺𑀚𑁆𑀚𑀸𑀥𑀭𑀚𑀸𑀢𑀓𑀯𑀡𑁆𑀡𑀦𑀸

𑀤𑀼𑀩𑁆𑀩𑀡𑁆𑀡𑀭𑀽𑀧𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑁄𑀓𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀳𑀸𑀓𑀡𑁆𑀳𑀚𑀸𑀢𑀓𑁂 (𑀚𑀸. 𑁧.𑁧𑁨.𑁬𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀮𑁄𑀓𑀢𑁆𑀣𑀘𑀭𑀺𑀬𑀁 𑀘𑀭𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀅𑀳𑁄𑀲𑀺. 𑀢𑀤𑀸 𑀏𑀓𑁄 𑀯𑀺𑀚𑁆𑀚𑀸𑀥𑀭𑁄 𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀤𑁆𑀥𑀺𑀁 𑀅𑀢𑀺𑀘𑀭𑀢𑀺, 𑀢𑀲𑁆𑀲𑀸 𑀧𑀭𑀺𑀘𑀸𑀭𑀺𑀓𑀸𑀬𑁄 𑀲𑀜𑁆𑀚𑀸𑀦𑀺𑀁𑀲𑀼. 𑀲𑀸 𑀲𑀬𑀫𑁂𑀯 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀏𑀓𑁄 𑀧𑀼𑀭𑀺𑀲𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀫𑀁 𑀤𑀽𑀲𑁂𑀢𑀻’’𑀢𑀺 𑀆𑀳. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀓𑀺𑀜𑁆𑀘𑀺 𑀲𑀜𑁆𑀜𑀸𑀡𑀁 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀺, 𑀤𑁂𑀯𑀸’’𑀢𑀺 𑀲𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀧𑀸𑀢𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀭𑀢𑁆𑀢𑀺𑀁 𑀆𑀕𑀦𑁆𑀢𑁆𑀯𑀸 𑀅𑀪𑀺𑀭𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀢𑁆𑀯𑀸 𑀧𑀸𑀢𑁄𑀯 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙𑀣, 𑀲𑀩𑁆𑀩𑀤𑀺𑀲𑀸𑀲𑀼 𑀑𑀮𑁄𑀓𑁂𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀓𑀢𑀚𑀸𑀢𑀺𑀳𑀺𑀗𑁆𑀕𑀼𑀮𑀧𑀜𑁆𑀘𑀗𑁆𑀕𑀼𑀮𑀺𑀓𑀧𑀼𑀭𑀺𑀲𑀁 𑀕𑀡𑁆𑀳𑀣𑀸’’𑀢𑀺. 𑀯𑀺𑀚𑁆𑀚𑀸𑀥𑀭𑁄𑀧𑀺 𑀭𑀢𑁆𑀢𑀺𑀁 𑀅𑀦𑀸𑀘𑀸𑀭𑀁 𑀓𑀢𑁆𑀯𑀸 𑀤𑀺𑀯𑀸 𑀲𑀼𑀲𑀸𑀦𑁂 𑀲𑀽𑀭𑀺𑀬𑀁 𑀦𑀫𑀲𑁆𑀲𑀦𑁆𑀢𑁄 𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀢𑀺. 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀲𑁄 ‘‘𑀧𑀸𑀓𑀝𑀁 𑀫𑁂 𑀓𑀫𑁆𑀫𑀁 𑀚𑀸𑀢’’𑀦𑁆𑀢𑀺 ¶ 𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂𑀦 𑀉𑀧𑁆𑀧𑀢𑀺𑀢𑁆𑀯𑀸 𑀕𑀢𑁄.

𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀆𑀕𑀢𑀧𑀼𑀭𑀺𑀲𑁂 ‘‘𑀅𑀤𑁆𑀤𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀤𑁆𑀤𑀲𑀸𑀫𑀸’’𑀢𑀺. ‘‘𑀓𑁄 𑀦𑀸𑀫𑁂𑀲𑁄’’𑀢𑀺? ‘‘𑀧𑀩𑁆𑀩𑀚𑀺𑀢𑁄, 𑀤𑁂𑀯𑀸’’𑀢𑀺. ‘‘𑀲𑁄 𑀳𑀺 𑀭𑀢𑁆𑀢𑀺𑀁 𑀅𑀦𑀸𑀘𑀸𑀭𑀁 𑀓𑀢𑁆𑀯𑀸 𑀤𑀺𑀯𑀸 𑀧𑀩𑁆𑀩𑀚𑀺𑀢𑀯𑁂𑀲𑁂𑀦 𑀯𑀲𑀢𑀺’’. 𑀭𑀸𑀚𑀸 ‘‘𑀇𑀫𑁂 𑀤𑀺𑀯𑀸 𑀲𑀫𑀡𑀯𑁂𑀲𑁂𑀦 𑀘𑀭𑀺𑀢𑁆𑀯𑀸 𑀭𑀢𑁆𑀢𑀺𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀻’’𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 𑀫𑀺𑀘𑁆𑀙𑀸𑀕𑀳𑀡𑀁 𑀕𑀳𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀺𑀚𑀺𑀢𑀸 𑀇𑀫𑁂 𑀲𑀩𑁆𑀩𑁂 𑀧𑀩𑁆𑀩𑀚𑀺𑀢𑀸 𑀧𑀮𑀸𑀬𑀦𑁆𑀢𑀼, 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑀭𑀸𑀚𑀸𑀡𑀁 𑀓𑀭𑀺𑀲𑁆𑀲𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀢𑀺𑀬𑁄𑀚𑀦𑀲𑀢𑀺𑀓𑀸 𑀓𑀸𑀲𑀺𑀭𑀝𑁆𑀞𑀸 𑀧𑀮𑀸𑀬𑀺𑀢𑁆𑀯𑀸 𑀲𑀩𑁆𑀩𑁂 𑀧𑀩𑁆𑀩𑀚𑀺𑀢𑀸 𑀅𑀜𑁆𑀜𑀭𑀸𑀚𑀥𑀸𑀦𑀺𑀬𑁄 𑀅𑀕𑀫𑀺𑀁𑀲𑀼. 𑀲𑀓𑀮𑀓𑀸𑀲𑀺𑀭𑀝𑁆𑀞𑁂 𑀫𑀦𑀼𑀲𑁆𑀲𑀸𑀦𑀁 𑀑𑀯𑀸𑀤𑀤𑀸𑀬𑀓𑁄 ¶ 𑀏𑀓𑁄𑀧𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁄 𑀦𑀸𑀳𑁄𑀲𑀺. 𑀅𑀦𑁄𑀯𑀸𑀤𑀓𑀸 𑀫𑀦𑀼𑀲𑁆𑀲𑀸 𑀨𑀭𑀼𑀲𑀸 𑀅𑀳𑁂𑀲𑀼𑀁, 𑀤𑀸𑀦𑀲𑀻𑀮𑀯𑀺𑀫𑀼𑀔𑀸 𑀫𑀢𑀫𑀢𑀸 𑀬𑁂𑀪𑀼𑀬𑁆𑀬𑁂𑀦 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑀓𑀸 𑀦𑀸𑀫 𑀦𑀸𑀳𑁂𑀲𑀼𑀁.

𑀲𑀓𑁆𑀓𑁄 ¶ 𑀦𑀯𑁂 𑀤𑁂𑀯𑀧𑀼𑀢𑁆𑀢𑁂 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀯𑀺𑀚𑁆𑀚𑀸𑀥𑀭𑀁 𑀦𑀺𑀲𑁆𑀲𑀸𑀬 𑀩𑀸𑀭𑀸𑀡𑀲𑀺𑀭𑀜𑁆𑀜𑀸 𑀓𑀼𑀤𑁆𑀥𑁂𑀦 𑀫𑀺𑀘𑁆𑀙𑀸𑀕𑀳𑀡𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀇𑀫𑀲𑁆𑀲 𑀭𑀜𑁆𑀜𑁄 𑀫𑀺𑀘𑁆𑀙𑀸𑀕𑀳𑀡𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀭𑀜𑁆𑀜𑁄 𑀘 𑀭𑀝𑁆𑀞𑀯𑀸𑀲𑀻𑀦𑀜𑁆𑀘 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀧𑀩𑁆𑀪𑀸𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀏𑀓𑀁 𑀫𑀳𑀮𑁆𑀮𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑁂𑀣, 𑀓𑀸𑀲𑀺𑀭𑀝𑁆𑀞𑀁 𑀧𑀲𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 𑀲𑀗𑁆𑀖𑀢𑁆𑀣𑁂𑀭𑀫𑁂𑀯 𑀮𑀪𑀺, 𑀅𑀣𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀬𑀁 𑀧𑀘𑁆𑀙𑀢𑁄 𑀳𑀼𑀢𑁆𑀯𑀸 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀫𑀲𑁆𑀲𑀦𑁆𑀢𑁄 𑀉𑀢𑁆𑀢𑀫𑀭𑀽𑀧𑀥𑀭𑁄 𑀫𑀸𑀡𑀯𑀓𑁄 𑀳𑀼𑀢𑁆𑀯𑀸 𑀲𑀓𑀮𑀦𑀕𑀭𑀲𑁆𑀲 𑀫𑀢𑁆𑀣𑀓𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀘𑀭𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 ‘‘𑀤𑁂𑀯, 𑀅𑀪𑀺𑀭𑀽𑀧𑁄 𑀫𑀸𑀡𑀯𑀓𑁄 𑀏𑀓𑀁 𑀲𑀫𑀡𑀁 𑀆𑀦𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 ¶ 𑀆𑀓𑀸𑀲𑁂 𑀞𑀺𑀢𑁄’’𑀢𑀺. 𑀭𑀸𑀚𑀸 𑀆𑀲𑀦𑀸 𑀉𑀝𑁆𑀞𑀸𑀬 𑀲𑀻𑀳𑀧𑀜𑁆𑀚𑀭𑁂 𑀞𑀢𑁆𑀯𑀸 ‘‘𑀫𑀸𑀡𑀯𑀓, 𑀓𑀲𑁆𑀫𑀸 𑀢𑁆𑀯𑀁 𑀅𑀪𑀺𑀭𑀽𑀧𑁄 𑀲𑀫𑀸𑀦𑁄 𑀏𑀢𑀲𑁆𑀲 𑀯𑀺𑀭𑀽𑀧𑀲𑁆𑀲 𑀲𑀫𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀞𑀺𑀢𑁄’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀤𑀼𑀩𑁆𑀩𑀡𑁆𑀡𑀭𑀽𑀧𑀁 𑀢𑀼𑀯𑀫𑀭𑀺𑀬𑀯𑀡𑁆𑀡𑀻, 𑀧𑀼𑀭𑀓𑁆𑀔𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀲𑀺;

𑀲𑁂𑀬𑁆𑀬𑁄 𑀦𑀼 𑀢𑁂𑀲𑁄 𑀉𑀤𑀯𑀸 𑀲𑀭𑀺𑀓𑁆𑀔𑁄, 𑀦𑀸𑀫𑀁 𑀧𑀭𑀲𑁆𑀲𑀢𑁆𑀢𑀦𑁄 𑀘𑀸𑀧𑀺 𑀩𑁆𑀭𑀽𑀳𑀻’’𑀢𑀺.

𑀢𑀢𑁆𑀣 𑀅𑀭𑀺𑀬𑀯𑀡𑁆𑀡𑀻𑀢𑀺 𑀲𑀼𑀦𑁆𑀤𑀭𑀭𑀽𑀧𑁄. 𑀲𑁂𑀬𑁆𑀬𑁄 𑀦𑀼 𑀢𑁂𑀲𑁄𑀢𑀺 𑀏𑀲𑁄 𑀯𑀺𑀭𑀽𑀧𑁄 𑀧𑀩𑁆𑀩𑀚𑀺𑀢𑁄 𑀓𑀺𑀁 𑀦𑀼 𑀢𑀬𑀸 𑀉𑀢𑁆𑀢𑀭𑀺𑀢𑀭𑁄, 𑀉𑀤𑀸𑀳𑀼 𑀲𑀭𑀺𑀓𑁆𑀔𑁄. 𑀦𑀸𑀫𑀁 𑀧𑀭𑀲𑁆𑀲𑀢𑁆𑀢𑀦𑁄 𑀘𑀸𑀧𑀻𑀢𑀺 𑀏𑀢𑀲𑁆𑀲 𑀧𑀭𑀲𑁆𑀲 𑀘 𑀅𑀢𑁆𑀢𑀦𑁄 𑀘 𑀦𑀸𑀫𑀁 𑀩𑁆𑀭𑀽𑀳𑀻𑀢𑀺 𑀧𑀼𑀘𑁆𑀙𑀢𑀺.

𑀅𑀣 𑀦𑀁 𑀲𑀓𑁆𑀓𑁄 ‘‘𑀫𑀳𑀸𑀭𑀸𑀚, 𑀲𑀫𑀡𑀸 𑀦𑀸𑀫 𑀕𑀭𑀼𑀝𑁆𑀞𑀸𑀦𑀺𑀬𑀸, 𑀢𑁂𑀦 𑀫𑁂 𑀦𑀸𑀫𑀁 𑀮𑀧𑀺𑀢𑀼𑀁 𑀦 𑀮𑀩𑁆𑀪𑀢𑀺, 𑀫𑀬𑁆𑀳𑀁 𑀧𑀦 𑀢𑁂 𑀦𑀸𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁯.

‘‘𑀦 𑀦𑀸𑀫𑀕𑁄𑀢𑁆𑀢𑀁 𑀕𑀡𑁆𑀳𑀦𑁆𑀢𑀺 𑀭𑀸𑀚, 𑀲𑀫𑁆𑀫𑀕𑁆𑀕𑀢𑀸𑀦𑀼𑀚𑁆𑀚𑀼𑀕𑀢𑀸𑀦 𑀤𑁂𑀯𑀸;

𑀅𑀳𑀜𑁆𑀘 𑀢𑁂 𑀦𑀸𑀫𑀥𑁂𑀬𑁆𑀬𑀁 𑀯𑀤𑀸𑀫𑀺, 𑀲𑀓𑁆𑀓𑁄𑀳𑀫𑀲𑁆𑀫𑀻 𑀢𑀺𑀤𑀲𑀸𑀦𑀫𑀺𑀦𑁆𑀤𑁄’’𑀢𑀺.

𑀢𑀢𑁆𑀣 ¶ 𑀲𑀫𑁆𑀫𑀕𑁆𑀕𑀢𑀸𑀦𑀼𑀚𑁆𑀚𑀼𑀕𑀢𑀸𑀦 𑀤𑁂𑀯𑀸𑀢𑀺 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀗𑁆𑀔𑀸𑀭𑁂 𑀬𑀣𑀸 𑀲𑀪𑀸𑀯𑀲𑀭𑀲𑀯𑀲𑁂𑀦 𑀲𑀫𑁆𑀫𑀲𑀺𑀢𑁆𑀯𑀸 ¶ 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀢𑁆𑀢𑀸 𑀲𑀫𑁆𑀫𑀕𑁆𑀕𑀢𑀸𑀦𑀁, 𑀉𑀚𑀼𑀦𑀸 𑀘 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀁 𑀕𑀢𑀢𑁆𑀢𑀸 𑀉𑀚𑀼𑀕𑀢𑀸𑀦𑀁 𑀫𑀳𑀸𑀔𑀻𑀡𑀸𑀲𑀯𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑁂𑀳𑀺 𑀉𑀢𑁆𑀢𑀭𑀺𑀢𑀭𑀸𑀦𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫𑀕𑁄𑀢𑁆𑀢𑀁 𑀦 𑀕𑀡𑁆𑀳𑀦𑁆𑀢𑀺. 𑀅𑀳𑀜𑁆𑀘 𑀢𑁂 𑀦𑀸𑀫𑀥𑁂𑀬𑁆𑀬𑀦𑁆𑀢𑀺 𑀅𑀧𑀺𑀘 𑀅𑀳𑀁 𑀅𑀢𑁆𑀢𑀦𑁄 𑀦𑀸𑀫𑀥𑁂𑀬𑁆𑀬𑀁 𑀢𑀼𑀬𑁆𑀳𑀁 𑀓𑀣𑁂𑀫𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀢𑀺𑀬𑀕𑀸𑀣𑀸𑀬 𑀪𑀺𑀓𑁆𑀔𑀼𑀦𑀫𑀲𑁆𑀲𑀦𑁂 𑀆𑀦𑀺𑀲𑀁𑀲𑀁 𑀧𑀼𑀘𑁆𑀙𑀺 𑁋

𑁧𑁧𑁦.

‘‘𑀬𑁄 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀁 𑀘𑀭𑀡𑀽𑀧𑀧𑀦𑁆𑀦𑀁, 𑀧𑀼𑀭𑀓𑁆𑀔𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀢𑀺;

𑀧𑀼𑀘𑁆𑀙𑀸𑀫𑀺 ¶ 𑀢𑀁 𑀤𑁂𑀯𑀭𑀸𑀚𑁂𑀢𑀫𑀢𑁆𑀣𑀁, 𑀇𑀢𑁄 𑀘𑀼𑀢𑁄 𑀓𑀺𑀁 𑀮𑀪𑀢𑁂 𑀲𑀼𑀔𑀁 𑀲𑁄’’𑀢𑀺.

𑀲𑀓𑁆𑀓𑁄 𑀘𑀢𑀼𑀢𑁆𑀣𑀕𑀸𑀣𑀸𑀬 𑀓𑀣𑁂𑀲𑀺 𑁋

𑁧𑁧𑁧.

‘‘𑀬𑁄 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀁 𑀘𑀭𑀡𑀽𑀧𑀧𑀦𑁆𑀦𑀁, 𑀧𑀼𑀭𑀓𑁆𑀔𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀢𑀺;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀮𑀪𑀢𑁂 𑀧𑀲𑀁𑀲𑀁, 𑀲𑀕𑁆𑀕𑀜𑁆𑀘 𑀲𑁄 𑀬𑀸𑀢𑀺 𑀲𑀭𑀻𑀭𑀪𑁂𑀤𑀸’’𑀢𑀺.

𑀢𑀢𑁆𑀣 𑀪𑀺𑀓𑁆𑀔𑀼𑀦𑁆𑀢𑀺 𑀪𑀺𑀦𑁆𑀦𑀓𑀺𑀮𑁂𑀲𑀁 𑀧𑀭𑀺𑀲𑀼𑀤𑁆𑀥𑀧𑀼𑀕𑁆𑀕𑀮𑀁. 𑀘𑀭𑀡𑀽𑀧𑀧𑀦𑁆𑀦𑀦𑁆𑀢𑀺 𑀲𑀻𑀮𑀘𑀭𑀡𑁂𑀦 𑀉𑀧𑁂𑀢𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀦 𑀓𑁂𑀯𑀮𑀁 𑀇𑀢𑁄 𑀘𑀼𑀢𑁄𑀬𑁂𑀯, 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀲𑁄 𑀧𑀲𑀁𑀲𑀁 𑀮𑀪𑀢𑀺, 𑀧𑀲𑀁𑀲𑀸𑀲𑀼𑀔𑀁 𑀯𑀺𑀦𑁆𑀤𑀢𑀻𑀢𑀺.

𑀭𑀸𑀚𑀸 𑀲𑀓𑁆𑀓𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀳𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁨.

‘‘𑀮𑀓𑁆𑀔𑀻 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀤𑁆𑀤𑀲𑀸𑀫;

𑀪𑀺𑀓𑁆𑀔𑀼𑀜𑁆𑀘 𑀤𑀺𑀲𑁆𑀯𑀸𑀦 𑀢𑀼𑀯𑀜𑁆𑀘 𑀲𑀓𑁆𑀓, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.

𑀢𑀢𑁆𑀣 𑀮𑀓𑁆𑀔𑀻𑀢𑀺 𑀲𑀺𑀭𑀻, 𑀧𑀜𑁆𑀜𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀚𑁆𑀚 𑀫𑀫 𑀢𑀯 𑀯𑀘𑀦𑀁 𑀲𑀼𑀡𑀦𑁆𑀢𑀲𑁆𑀲𑁂𑀯 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀚𑀸𑀦𑀦𑀧𑀜𑁆𑀜𑀸 𑀉𑀤𑀧𑀸𑀤𑀻𑀢𑀺. 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀪𑀽𑀢𑀧𑀢𑀺𑀤𑁆𑀤𑀲𑀸𑀫𑀸𑀢𑀺 𑀪𑀽𑀢𑀧𑀢𑀺𑀁 𑀅𑀤𑁆𑀤𑀲𑀸𑀫.

𑀢𑀁 ¶ 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀧𑀡𑁆𑀟𑀺𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁧𑁩.

‘‘𑀅𑀤𑁆𑀥𑀸 ¶ 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀪𑀺𑀓𑁆𑀔𑀼𑀜𑁆𑀘 𑀤𑀺𑀲𑁆𑀯𑀸𑀦 𑀫𑀫𑀜𑁆𑀘 𑀭𑀸𑀚, 𑀓𑀭𑁄𑀳𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.

𑀢𑀢𑁆𑀣 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄𑀢𑀺 𑀩𑀳𑀽𑀦𑀺 𑀓𑀸𑀭𑀡𑀸𑀦𑀺 𑀘𑀺𑀦𑁆𑀢𑀦𑀲𑀫𑀢𑁆𑀣𑀸.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁧𑁪.

‘‘𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀩𑁆𑀩𑀸𑀢𑀺𑀣𑀻𑀬𑀸𑀘𑀬𑁄𑀕𑁄 𑀪𑀯𑀺𑀢𑁆𑀯𑀸;

𑀦𑀺𑀳𑀘𑁆𑀘 𑀫𑀸𑀦𑀁 𑀅𑀪𑀺𑀯𑀸𑀤𑀬𑀺𑀲𑁆𑀲𑀁, 𑀲𑀼𑀢𑁆𑀯𑀸𑀦 𑀤𑁂𑀯𑀺𑀦𑁆𑀤 𑀲𑀼𑀪𑀸𑀲𑀺𑀢𑀸𑀦𑀻’’𑀢𑀺.

𑀢𑀢𑁆𑀣 𑀲𑀩𑁆𑀩𑀸𑀢𑀺𑀣𑀻𑀬𑀸𑀘𑀬𑁄𑀕𑁄 𑀪𑀯𑀺𑀢𑁆𑀯𑀸𑀢𑀺 𑀲𑀩𑁆𑀩𑁂𑀲𑀁 𑀅𑀢𑀺𑀣𑀻𑀦𑀁 𑀆𑀕𑀢𑀸𑀦𑀁 𑀆𑀕𑀦𑁆𑀢𑀼𑀓𑀸𑀦𑀁 𑀬𑀁 𑀬𑀁 𑀢𑁂 𑀬𑀸𑀘𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀬𑀼𑀢𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑁄 𑀪𑀯𑀺𑀢𑁆𑀯𑀸, 𑀲𑀩𑁆𑀩𑀁 𑀢𑁂𑀳𑀺 𑀬𑀸𑀘𑀺𑀢𑀬𑀸𑀘𑀺𑀢𑀁 𑀤𑀤𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀯𑀸𑀦 𑀤𑁂𑀯𑀺𑀦𑁆𑀤 𑀲𑀼𑀪𑀸𑀲𑀺𑀢𑀸𑀦𑀻𑀢𑀺 𑀢𑀯 𑀲𑀼𑀪𑀸𑀲𑀺𑀢𑀸𑀦𑀺 𑀲𑀼𑀢𑁆𑀯𑀸 𑀅𑀳𑀁 𑀏𑀯𑀭𑀽𑀧𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀯𑀺𑀚𑁆𑀚𑀸𑀥𑀭𑁄 𑀦 𑀲𑀫𑀡𑁄, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 ‘𑀅𑀢𑀼𑀘𑁆𑀙𑁄 𑀮𑁄𑀓𑁄, 𑀅𑀢𑁆𑀣𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸’𑀢𑀺 𑀜𑀢𑁆𑀯𑀸 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀭𑀸𑀚𑀸𑀦𑀁 𑀑𑀯𑀤𑀺. 𑀲𑀓𑁆𑀓𑁄𑀧𑀺 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀦𑀸𑀕𑀭𑀸𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 ‘‘𑀧𑀮𑀸𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀅𑀣 𑀢𑁂 𑀉𑀪𑁄𑀧𑀺 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀅𑀓𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀚𑁆𑀚𑀸𑀥𑀭𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁩𑁯𑁨] 𑁭. 𑀲𑀺𑀗𑁆𑀖𑀧𑀼𑀧𑁆𑀨𑀚𑀸𑀢𑀓𑀯𑀡𑁆𑀡𑀦𑀸

𑀬𑀫𑁂𑀢𑀦𑁆𑀢𑀺 ¶ ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀅𑀜𑁆𑀜𑀢𑀭𑀁 𑀅𑀭𑀜𑁆𑀜𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀧𑀤𑀼𑀫𑀲𑀭𑀁 ¶ 𑀑𑀢𑀭𑀺𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀁 𑀤𑀺𑀲𑁆𑀯𑀸 𑀅𑀥𑁄𑀯𑀸𑀢𑁂 𑀞𑀢𑁆𑀯𑀸 𑀉𑀧𑀲𑀺𑀗𑁆𑀖𑀺. 𑀅𑀣 𑀦𑀁 𑀢𑀲𑁆𑀫𑀺𑀁 𑀯𑀦𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀫𑀸𑀭𑀺𑀲, 𑀢𑁆𑀯𑀁 𑀕𑀦𑁆𑀥𑀣𑁂𑀦𑁄 𑀦𑀸𑀫, 𑀇𑀤𑀁 𑀢𑁂 𑀏𑀓𑀁 𑀣𑁂𑀬𑁆𑀬𑀗𑁆𑀕’’𑀦𑁆𑀢𑀺 𑀲𑀁𑀯𑁂𑀚𑁂𑀲𑀺. 𑀲𑁄 𑀢𑀸𑀬 𑀲𑀁𑀯𑁂𑀚𑀺𑀢𑁄 𑀧𑀼𑀦 𑀚𑁂𑀢𑀯𑀦𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 ‘‘𑀓𑀳𑀁 𑀪𑀺𑀓𑁆𑀔𑀼 𑀦𑀺𑀯𑀼𑀢𑁆𑀣𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀅𑀲𑀼𑀓𑀯𑀦𑀲𑀡𑁆𑀟𑁂 𑀦𑀸𑀫, 𑀢𑀢𑁆𑀣 𑀘 𑀫𑀁 𑀤𑁂𑀯𑀢𑀸 𑀏𑀯𑀁 𑀦𑀸𑀫 𑀲𑀁𑀯𑁂𑀚𑁂𑀲𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀔𑁄 𑀪𑀺𑀓𑁆𑀔𑀼 𑀧𑀼𑀧𑁆𑀨𑀁 𑀉𑀧𑀲𑀺𑀗𑁆𑀖𑀦𑁆𑀢𑁄 𑀢𑁆𑀯𑀫𑁂𑀯 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀲𑀁𑀯𑁂𑀚𑀺𑀢𑀧𑀼𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀸𑀲𑀺𑀓𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀅𑀧𑀭𑀪𑀸𑀕𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀁 𑀧𑀤𑀼𑀫𑀲𑀭𑀁 𑀦𑀺𑀲𑁆𑀲𑀸𑀬 𑀉𑀧𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀁 𑀉𑀧𑀲𑀺𑀗𑁆𑀖𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀏𑀓𑀸 𑀤𑁂𑀯𑀥𑀻𑀢𑀸 𑀭𑀼𑀓𑁆𑀔𑀓𑁆𑀔𑀦𑁆𑀥𑀯𑀺𑀯𑀭𑁂 𑀞𑀢𑁆𑀯𑀸 𑀲𑀁𑀯𑁂𑀚𑀬𑀫𑀸𑀦𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁫.

‘‘𑀬𑀫𑁂𑀢𑀁 𑀯𑀸𑀭𑀺𑀚𑀁 𑀧𑀼𑀧𑁆𑀨𑀁, 𑀅𑀤𑀺𑀦𑁆𑀦𑀁 𑀉𑀧𑀲𑀺𑀗𑁆𑀖𑀲𑀺;

𑀏𑀓𑀗𑁆𑀕𑀫𑁂𑀢𑀁 𑀣𑁂𑀬𑁆𑀬𑀸𑀦𑀁, 𑀕𑀦𑁆𑀥𑀣𑁂𑀦𑁄𑀲𑀺 𑀫𑀸𑀭𑀺𑀲𑀸’’𑀢𑀺.

𑀢𑀢𑁆𑀣 𑀏𑀓𑀗𑁆𑀕𑀫𑁂𑀢𑀦𑁆𑀢𑀺 𑀏𑀓𑀓𑁄𑀝𑁆𑀞𑀸𑀲𑁄 𑀏𑀲.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁬.

‘‘𑀦 𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀺, 𑀆𑀭𑀸 𑀲𑀺𑀗𑁆𑀖𑀸𑀫𑀺 𑀯𑀸𑀭𑀺𑀚𑀁;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀆𑀭𑀸 𑀲𑀺𑀗𑁆𑀖𑀸𑀫𑀻𑀢𑀺 𑀤𑀽𑀭𑁂 𑀞𑀺𑀢𑁄 𑀖𑀸𑀬𑀸𑀫𑀺. 𑀯𑀡𑁆𑀡𑁂𑀦𑀸𑀢𑀺 𑀓𑀸𑀭𑀡𑁂𑀦.

𑀢𑀲𑁆𑀫𑀺𑀁 ¶ 𑀔𑀡𑁂 𑀏𑀓𑁄 𑀧𑀼𑀭𑀺𑀲𑁄 𑀢𑀲𑁆𑀫𑀺𑀁 𑀲𑀭𑁂 𑀪𑀺𑀲𑀸𑀦𑀺 𑀘𑁂𑀯 𑀔𑀡𑀢𑀺, 𑀧𑀼𑀡𑁆𑀟𑀭𑀻𑀓𑀸𑀦𑀺 𑀘 𑀪𑀜𑁆𑀚𑀢𑀺 ¶ . 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀫𑀁 𑀆𑀭𑀸 𑀞𑀢𑁆𑀯𑀸 𑀉𑀧𑀲𑀺𑀗𑁆𑀖𑀦𑁆𑀢𑀁 ‘𑀘𑁄𑀭𑁄’𑀢𑀺 𑀯𑀤𑀲𑀺, 𑀏𑀢𑀁 𑀧𑀼𑀭𑀺𑀲𑀁 ¶ 𑀓𑀲𑁆𑀫𑀸 𑀦 𑀪𑀡𑀲𑀻’’𑀢𑀺 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁭.

‘‘𑀬𑁄𑀬𑀁 𑀪𑀺𑀲𑀸𑀦𑀺 𑀔𑀡𑀢𑀺, 𑀧𑀼𑀡𑁆𑀟𑀭𑀻𑀓𑀸𑀦𑀺 𑀪𑀜𑁆𑀚𑀢𑀺;

𑀏𑀯𑀁 𑀆𑀓𑀺𑀡𑁆𑀡𑀓𑀫𑁆𑀫𑀦𑁆𑀢𑁄, 𑀓𑀲𑁆𑀫𑀸 𑀏𑀲𑁄 𑀦 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀆𑀓𑀺𑀡𑁆𑀡𑀓𑀫𑁆𑀫𑀦𑁆𑀢𑁄𑀢𑀺 𑀓𑀓𑁆𑀔𑀴𑀓𑀫𑁆𑀫𑀦𑁆𑀢𑁄 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑁄.

𑀅𑀣𑀲𑁆𑀲 𑀅𑀯𑀘𑀦𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑀻 𑀤𑁂𑀯𑀢𑀸 𑀘𑀢𑀼𑀢𑁆𑀣𑀧𑀜𑁆𑀘𑀫𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧𑁮.

‘‘𑀆𑀓𑀺𑀡𑁆𑀡𑀮𑀼𑀤𑁆𑀤𑁄 𑀧𑀼𑀭𑀺𑀲𑁄, 𑀥𑀸𑀢𑀺𑀘𑁂𑀮𑀁𑀯 𑀫𑀓𑁆𑀔𑀺𑀢𑁄;

𑀢𑀲𑁆𑀫𑀺𑀁 𑀫𑁂 𑀯𑀘𑀦𑀁 𑀦𑀢𑁆𑀣𑀺, 𑀢𑀜𑁆𑀘𑀸𑀭𑀳𑀸𑀫𑀺 𑀯𑀢𑁆𑀢𑀯𑁂.

𑁧𑁧𑁯.

‘‘𑀅𑀦𑀗𑁆𑀕𑀡𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑁄;

𑀯𑀸𑀮𑀕𑁆𑀕𑀫𑀢𑁆𑀢𑀁 𑀧𑀸𑀧𑀲𑁆𑀲, 𑀅𑀩𑁆𑀪𑀸𑀫𑀢𑁆𑀢𑀁𑀯 𑀔𑀸𑀬𑀢𑀻’’𑀢𑀺.

𑀢𑀢𑁆𑀣 𑀥𑀸𑀢𑀺𑀘𑁂𑀮𑀁𑀯𑀸𑀢𑀺 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀫𑀼𑀢𑁆𑀢𑀕𑀽𑀣𑀫𑀓𑁆𑀔𑀺𑀢𑀁 𑀥𑀸𑀢𑀺𑀤𑀸𑀲𑀺𑀬𑀸 𑀦𑀺𑀯𑀢𑁆𑀣𑀘𑁂𑀮𑀁 𑀯𑀺𑀬 𑀅𑀬𑀁 𑀧𑀸𑀧𑀫𑀓𑁆𑀔𑀺𑀢𑁄𑀬𑁂𑀯, 𑀢𑁂𑀦 𑀓𑀸𑀭𑀡𑁂𑀦 𑀢𑀲𑁆𑀫𑀺𑀁 𑀫𑀫 𑀯𑀘𑀦𑀁 𑀦𑀢𑁆𑀣𑀺. 𑀢𑀜𑁆𑀘𑀸𑀭𑀳𑀸𑀫𑀻𑀢𑀺 𑀲𑀫𑀡𑀸 𑀧𑀦 𑀑𑀯𑀸𑀤𑀓𑁆𑀔𑀫𑀸 𑀳𑁄𑀦𑁆𑀢𑀺 𑀧𑀺𑀬𑀲𑀻𑀮𑀸, 𑀢𑀲𑁆𑀫𑀸 𑀢𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀬𑀼𑀢𑁆𑀢𑀁 𑀓𑀭𑁄𑀦𑁆𑀢𑀁 𑀯𑀢𑁆𑀢𑀼𑀁 𑀅𑀭𑀳𑀸𑀫𑀺 𑀲𑀫𑀡𑀸𑀢𑀺. 𑀅𑀦𑀗𑁆𑀕𑀡𑀲𑁆𑀲𑀸𑀢𑀺 𑀦𑀺𑀤𑁆𑀤𑁄𑀲𑀲𑁆𑀲 𑀢𑀼𑀫𑁆𑀳𑀸𑀤𑀺𑀲𑀲𑁆𑀲. 𑀅𑀩𑁆𑀪𑀸𑀫𑀢𑁆𑀢𑀁𑀯 𑀔𑀸𑀬𑀢𑀻𑀢𑀺 𑀫𑀳𑀸𑀫𑁂𑀖𑀧𑁆𑀧𑀫𑀸𑀡𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀇𑀤𑀸𑀦𑀺 𑀓𑀲𑁆𑀫𑀸 𑀏𑀯𑀭𑀽𑀧𑀁 𑀤𑁄𑀲𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀭𑁄𑀲𑀻𑀢𑀺.

𑀢𑀸𑀬 𑀧𑀦 𑀲𑀁𑀯𑁂𑀚𑀺𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁨𑁦.

‘‘𑀅𑀤𑁆𑀥𑀸 𑀫𑀁 𑀬𑀓𑁆𑀔 𑀚𑀸𑀦𑀸𑀲𑀺, 𑀅𑀣𑁄 𑀫𑀁 𑀅𑀦𑀼𑀓𑀫𑁆𑀧𑀲𑀺;

𑀧𑀼𑀦𑀧𑀺 𑀬𑀓𑁆𑀔 𑀯𑀚𑁆𑀚𑀸𑀲𑀺, 𑀬𑀤𑀸 𑀧𑀲𑁆𑀲𑀲𑀺 𑀏𑀤𑀺𑀲’’𑀦𑁆𑀢𑀺.

𑀢𑀢𑁆𑀣 𑀬𑀓𑁆𑀔𑀸𑀢𑀺 𑀤𑁂𑀯𑀢𑀁 𑀆𑀮𑀧𑀢𑀺. 𑀯𑀚𑁆𑀚𑀸𑀲𑀻𑀢𑀺 𑀯𑀤𑁂𑀬𑁆𑀬𑀸𑀲𑀺. 𑀬𑀤𑀸 𑀧𑀲𑁆𑀲𑀲𑀺 𑀏𑀤𑀺𑀲𑀦𑁆𑀢𑀺 𑀬𑀤𑀸 𑀫𑀫 𑀏𑀯𑀭𑀽𑀧𑀁 𑀤𑁄𑀲𑀁 𑀧𑀲𑁆𑀲𑀲𑀺, 𑀢𑀤𑀸 𑀏𑀯𑀁 𑀫𑀫 𑀯𑀤𑁂𑀬𑁆𑀬𑀸𑀲𑀻𑀢𑀺 𑀯𑀤𑀢𑀺.

𑀅𑀣𑀲𑁆𑀲 ¶ ¶ 𑀲𑀸 𑀤𑁂𑀯𑀥𑀻𑀢𑀸 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁧.

‘‘𑀦𑁂𑀯 𑀢𑀁 𑀉𑀧𑀚𑀻𑀯𑀸𑀫𑀺, 𑀦𑀧𑀺 𑀢𑁂 𑀪𑀢𑀓𑀸𑀫𑁆𑀳𑀲𑁂;

𑀢𑁆𑀯𑀫𑁂𑀯 𑀪𑀺𑀓𑁆𑀔𑀼 𑀚𑀸𑀦𑁂𑀬𑁆𑀬, 𑀬𑁂𑀦 𑀕𑀘𑁆𑀙𑁂𑀬𑁆𑀬 𑀲𑀼𑀕𑁆𑀕𑀢𑀺’’𑀦𑁆𑀢𑀺.

𑀢𑀢𑁆𑀣 ¶ 𑀪𑀢𑀓𑀸𑀫𑁆𑀳𑀲𑁂𑀢𑀺 𑀢𑀯 𑀪𑀢𑀺𑀳𑀢𑀸 𑀓𑀫𑁆𑀫𑀓𑀭𑀸𑀧𑀺 𑀦 𑀳𑁄𑀫. 𑀓𑀺𑀁𑀓𑀸𑀭𑀡𑀸 𑀢𑀁 𑀲𑀩𑁆𑀩𑀓𑀸𑀮𑀁 𑀭𑀓𑁆𑀔𑀫𑀸𑀦𑀸 𑀯𑀺𑀘𑀭𑀺𑀲𑁆𑀲𑀸𑀫𑀸𑀢𑀺 𑀤𑀻𑀧𑁂𑀢𑀺. 𑀬𑁂𑀦 𑀕𑀘𑁆𑀙𑁂𑀬𑁆𑀬𑀸𑀢𑀺 𑀪𑀺𑀓𑁆𑀔𑀼 𑀬𑁂𑀦 𑀓𑀫𑁆𑀫𑁂𑀦 𑀢𑁆𑀯𑀁 𑀲𑀼𑀕𑀢𑀺𑀁 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀢𑁆𑀯𑀫𑁂𑀯 𑀢𑀁 𑀚𑀸𑀦𑁂𑀬𑁆𑀬𑀸𑀲𑀻𑀢𑀺.

𑀏𑀯𑀁 𑀲𑀸 𑀢𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀫𑁂𑀯 𑀧𑀯𑀺𑀝𑁆𑀞𑀸. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀺𑀗𑁆𑀖𑀧𑀼𑀧𑁆𑀨𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁩𑁯𑁩] 𑁮. 𑀯𑀺𑀖𑀸𑀲𑀸𑀤𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀲𑀼𑀔𑀁 𑀯𑀢 𑀚𑀻𑀯𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀓𑁂𑀴𑀺𑀲𑀻𑀮𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂𑀲𑀼 𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀧𑀸𑀲𑀸𑀤𑀁 𑀓𑀫𑁆𑀧𑁂𑀢𑁆𑀯𑀸 𑀲𑀁𑀯𑁂𑀚𑀺𑀢𑁂𑀲𑀼 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀢𑁂𑀲𑀁 𑀅𑀕𑀼𑀡𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀢𑁂 𑀓𑁂𑀴𑀺𑀲𑀻𑀮𑀓𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀅𑀳𑁄𑀲𑀺. 𑀅𑀣 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀓𑀕𑀸𑀫𑁂 𑀲𑀢𑁆𑀢 𑀪𑀸𑀢𑀭𑁄 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑀚𑁆𑀛𑀸𑀭𑀜𑁆𑀜𑁂 𑀯𑀲𑀦𑁆𑀢𑀸 𑀬𑁄𑀕𑁂 𑀬𑁄𑀕𑀁 𑀅𑀓𑀢𑁆𑀯𑀸 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸 𑀳𑀼𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀓𑀻𑀴𑀁 ¶ 𑀓𑀻𑀴𑀦𑁆𑀢𑀸 ¶ 𑀘𑀭𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀇𑀫𑁂 𑀲𑀁𑀯𑁂𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀓𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀮𑀻𑀬𑀺𑀢𑁆𑀯𑀸 𑀢𑁂 𑀲𑀁𑀯𑁂𑀚𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁨.

‘‘𑀲𑀼𑀲𑀼𑀔𑀁 ¶ 𑀯𑀢 𑀚𑀻𑀯𑀦𑁆𑀢𑀺, 𑀬𑁂 𑀚𑀦𑀸 𑀯𑀺𑀖𑀸𑀲𑀸𑀤𑀺𑀦𑁄;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻’’𑀢𑀺.

𑀢𑀢𑁆𑀣 𑀯𑀺𑀖𑀸𑀲𑀸𑀤𑀺𑀦𑁄𑀢𑀺 𑀪𑀼𑀢𑁆𑀢𑀸𑀢𑀺𑀭𑁂𑀓𑀁 𑀪𑀼𑀜𑁆𑀚𑀦𑁆𑀢𑁂 𑀲𑀦𑁆𑀥𑀸𑀬𑀸𑀳. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀬𑁂 𑀏𑀯𑀭𑀽𑀧𑀸, 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀢𑁂𑀲𑀁 𑀲𑀼𑀕𑀢𑀺 𑀳𑁄𑀢𑀺, 𑀲𑀕𑁆𑀕𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑀅𑀣 𑀢𑁂𑀲𑀼 𑀏𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀯𑀲𑁂𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁩.

‘‘𑀲𑀼𑀓𑀲𑁆𑀲 𑀪𑀸𑀲𑀫𑀸𑀦𑀲𑁆𑀲, 𑀦 𑀦𑀺𑀲𑀸𑀫𑁂𑀣 𑀧𑀡𑁆𑀟𑀺𑀢𑀸;

𑀇𑀤𑀁 𑀲𑀼𑀡𑀸𑀣 𑀲𑁄𑀤𑀭𑀺𑀬𑀸, 𑀅𑀫𑁆𑀳𑁂𑀯𑀸𑀬𑀁 𑀧𑀲𑀁𑀲𑀢𑀻’’𑀢𑀺.

𑀢𑀢𑁆𑀣 𑀪𑀸𑀲𑀫𑀸𑀦𑀲𑁆𑀲𑀸𑀢𑀺 𑀫𑀸𑀦𑀼𑀲𑀺𑀓𑀸𑀬 𑀯𑀸𑀘𑀸𑀬 𑀪𑀡𑀦𑁆𑀢𑀲𑁆𑀲. 𑀦 𑀦𑀺𑀲𑀸𑀫𑁂𑀣𑀸𑀢𑀺 𑀦 𑀲𑀼𑀡𑀸𑀣. 𑀇𑀤𑀁 𑀲𑀼𑀡𑀸𑀣𑀸𑀢𑀺 𑀇𑀤𑀫𑀲𑁆𑀲 𑀯𑀘𑀦𑀁 𑀲𑀼𑀡𑀸𑀣. 𑀲𑁄𑀤𑀭𑀺𑀬𑀸𑀢𑀺 𑀲𑀫𑀸𑀦𑁂 𑀉𑀤𑀭𑁂 𑀯𑀼𑀢𑁆𑀣𑀪𑀸𑀯𑁂𑀦 𑀢𑁂 𑀆𑀮𑀧𑀦𑁆𑀢𑁄 𑀆𑀳.

𑀅𑀣 𑀦𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀲𑀼𑀓𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁪.

‘‘𑀦𑀸𑀳𑀁 𑀢𑀼𑀫𑁆𑀳𑁂 𑀧𑀲𑀁𑀲𑀸𑀫𑀺, 𑀓𑀼𑀡𑀧𑀸𑀤𑀸 𑀲𑀼𑀡𑀸𑀣 𑀫𑁂;

𑀉𑀘𑁆𑀙𑀺𑀝𑁆𑀞𑀪𑁄𑀚𑀺𑀦𑁄 𑀢𑀼𑀫𑁆𑀳𑁂, 𑀦 𑀢𑀼𑀫𑁆𑀳𑁂 𑀯𑀺𑀖𑀸𑀲𑀸𑀤𑀺𑀦𑁄’’𑀢𑀺.

𑀢𑀢𑁆𑀣 𑀓𑀼𑀡𑀧𑀸𑀤𑀸𑀢𑀺 𑀓𑀼𑀡𑀧𑀔𑀸𑀤𑀓𑀸𑀢𑀺 𑀢𑁂 𑀆𑀮𑀧𑀢𑀺.

𑀢𑁂 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁨𑁫.

‘‘𑀲𑀢𑁆𑀢𑀯𑀲𑁆𑀲𑀸 𑀧𑀩𑁆𑀩𑀚𑀺𑀢𑀸, 𑀫𑀚𑁆𑀛𑀸𑀭𑀜𑁆𑀜𑁂 𑀲𑀺𑀔𑀡𑁆𑀟𑀺𑀦𑁄;

𑀯𑀺𑀖𑀸𑀲𑁂𑀦𑁂𑀯 𑀬𑀸𑀧𑁂𑀦𑁆𑀢𑀸, 𑀫𑀬𑀜𑁆𑀘𑁂 𑀪𑁄𑀢𑁄 𑀕𑀸𑀭𑀬𑁆𑀳𑀸;

𑀓𑁂 𑀦𑀼 𑀪𑁄𑀢𑁄 𑀧𑀲𑀁𑀲𑀺𑀬𑀸’’𑀢𑀺.

𑀢𑀢𑁆𑀣 ¶ 𑀲𑀺𑀔𑀡𑁆𑀟𑀺𑀦𑁄𑀢𑀺 𑀘𑀽𑀴𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀯𑀺𑀖𑀸𑀲𑁂𑀦𑁂𑀯𑀸𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀲𑀻𑀳𑀩𑁆𑀬𑀕𑁆𑀖𑀯𑀺𑀖𑀸𑀲𑁂𑀦𑁂𑀯 𑀬𑀸𑀧𑁂𑀦𑁆𑀢𑀸 𑀬𑀤𑀺 𑀪𑁄𑀢𑁄 𑀕𑀸𑀭𑀬𑁆𑀳𑀸, 𑀅𑀣 𑀓𑁂 𑀦𑀼 𑀢𑁂 𑀧𑀲𑀁𑀲𑀺𑀬𑀸𑀢𑀺.

𑀢𑁂 ¶ 𑀮𑀚𑁆𑀚𑀸𑀧𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁬.

‘‘𑀢𑀼𑀫𑁆𑀳𑁂 𑀲𑀻𑀳𑀸𑀦𑀁 𑀩𑁆𑀬𑀕𑁆𑀖𑀸𑀦𑀁, 𑀯𑀸𑀴𑀸𑀦𑀜𑁆𑀘𑀸𑀯𑀲𑀺𑀝𑁆𑀞𑀓𑀁;

𑀉𑀘𑁆𑀙𑀺𑀝𑁆𑀞𑁂𑀦𑁂𑀯 𑀬𑀸𑀧𑁂𑀦𑁆𑀢𑀸, 𑀫𑀜𑁆𑀜𑀺𑀯𑁆𑀳𑁄 𑀯𑀺𑀖𑀸𑀲𑀸𑀤𑀺𑀦𑁄’’𑀢𑀺.

𑀢𑀢𑁆𑀣 𑀯𑀸𑀴𑀸𑀦𑀜𑁆𑀘𑀸𑀯𑀲𑀺𑀝𑁆𑀞𑀓𑀦𑁆𑀢𑀺 𑀲𑁂𑀲𑀯𑀸𑀴𑀫𑀺𑀕𑀸𑀦𑀜𑁆𑀘 𑀅𑀯𑀲𑀺𑀝𑁆𑀞𑀓𑀁 𑀉𑀘𑁆𑀙𑀺𑀝𑁆𑀞𑀪𑁄𑀚𑀦𑀁.

𑀢𑀁 ¶ 𑀲𑀼𑀢𑁆𑀯𑀸 𑀢𑀸𑀧𑀲𑀸 ‘‘𑀲𑀘𑁂 𑀫𑀬𑀁 𑀦 𑀯𑀺𑀖𑀸𑀲𑀸𑀤𑀸, 𑀅𑀣 𑀓𑁂 𑀘𑀭𑀳𑀺 𑀢𑁂 𑀯𑀺𑀖𑀸𑀲𑀸𑀤𑀸’’𑀢𑀺? 𑀅𑀣 𑀢𑁂𑀲𑀁 𑀲𑁄 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁨𑁭.

‘‘𑀬𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑀡𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀯𑀦𑀺𑀩𑁆𑀩𑀺𑀦𑁄;

𑀤𑀢𑁆𑀯𑀸𑀯 𑀲𑁂𑀲𑀁 𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀚𑀦𑀸 𑀯𑀺𑀖𑀸𑀲𑀸𑀤𑀺𑀦𑁄’’𑀢𑀺.

𑀢𑀢𑁆𑀣 𑀯𑀦𑀺𑀩𑁆𑀩𑀺𑀦𑁄𑀢𑀺 𑀢𑀁 𑀢𑀁 𑀪𑀡𑁆𑀟𑀁 𑀬𑀸𑀘𑀦𑀓𑀲𑁆𑀲. 𑀏𑀯𑀁 𑀢𑁂 𑀮𑀚𑁆𑀚𑀸𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀢𑁆𑀢 𑀪𑀸𑀢𑀭𑁄 𑀇𑀫𑁂 𑀓𑁂𑀴𑀺𑀲𑀻𑀮𑀓𑀸 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀺𑀖𑀸𑀲𑀸𑀤𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁩𑁯𑁪] 𑁯. 𑀯𑀝𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀧𑀡𑀻𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀮𑁄𑀮𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄 𑀪𑀺𑀓𑁆𑀔𑀼 𑀇𑀤𑀸𑀦𑁂𑀯 𑀮𑁄𑀮𑁄, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀮𑁄𑀮𑁄𑀬𑁂𑀯, 𑀮𑁄𑀮𑀢𑀸𑀬 𑀧𑀦 𑀩𑀸𑀭𑀸𑀡𑀲𑀺𑀬𑀁 𑀳𑀢𑁆𑀣𑀺𑀕𑀯𑀸𑀲𑁆𑀲𑀧𑀼𑀭𑀺𑀲𑀓𑀼𑀡𑀧𑁂𑀳𑀺 ¶ 𑀅𑀢𑀺𑀢𑁆𑀢𑁄 ‘𑀇𑀢𑁄 𑀉𑀢𑁆𑀢𑀭𑀺𑀢𑀭𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀯𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀜𑁆𑀜𑁂 𑀮𑀽𑀔𑀢𑀺𑀡𑀩𑀻𑀚𑀸𑀳𑀸𑀭𑁄 𑀯𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀮𑁄𑀮𑀓𑀸𑀓𑁄 𑀳𑀢𑁆𑀣𑀺𑀓𑀼𑀡𑀧𑀸𑀤𑀻𑀳𑀺 𑀅𑀢𑀺𑀢𑁆𑀢𑁄 ‘‘𑀇𑀢𑁄 𑀉𑀢𑁆𑀢𑀭𑀺𑀢𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀸𑀨𑀮𑀁 𑀔𑀸𑀤𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 ¶ 𑀤𑀺𑀲𑁆𑀯𑀸 ‘‘𑀅𑀬𑀁 𑀯𑀝𑁆𑀝𑀓𑁄 𑀅𑀢𑀺𑀯𑀺𑀬 𑀣𑀽𑀮𑀲𑀭𑀻𑀭𑁄, 𑀫𑀥𑀼𑀭𑀁 𑀕𑁄𑀘𑀭𑀁 𑀔𑀸𑀤𑀢𑀺 𑀫𑀜𑁆𑀜𑁂, 𑀏𑀢𑀲𑁆𑀲 𑀕𑁄𑀘𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀔𑀸𑀤𑀺𑀢𑁆𑀯𑀸 𑀅𑀳𑀫𑁆𑀧𑀺 𑀣𑀽𑀮𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀲𑀸𑀔𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀪𑁄 𑀯𑀝𑁆𑀝𑀓, 𑀓𑀺𑀁 𑀦𑀸𑀫 𑀧𑀡𑀻𑀢𑀸𑀳𑀸𑀭𑀁 𑀪𑀼𑀜𑁆𑀚𑀲𑀺, 𑀣𑀽𑀮𑀲𑀭𑀻𑀭𑁄 𑀅𑀳𑁄𑀲𑀻’’𑀢𑀺? 𑀩𑁄𑀥𑀺𑀲𑀢𑁆𑀢𑁄 ¶ 𑀢𑁂𑀦 𑀧𑀼𑀘𑁆𑀙𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁮.

‘‘𑀧𑀡𑀻𑀢𑀁 𑀪𑀼𑀜𑁆𑀚𑀲𑁂 𑀪𑀢𑁆𑀢𑀁, 𑀲𑀧𑁆𑀧𑀺𑀢𑁂𑀮𑀜𑁆𑀘 𑀫𑀸𑀢𑀼𑀮;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀓𑀺𑀲𑁄 𑀢𑁆𑀯𑀫𑀲𑀺 𑀯𑀸𑀬𑀲𑀸’’𑀢𑀺.

𑀢𑀢𑁆𑀣 𑀪𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀪𑁄𑀚𑀦𑀦𑀺𑀬𑀸𑀫𑁂𑀦 𑀧𑀝𑀺𑀬𑀸𑀤𑀺𑀢𑀪𑀢𑁆𑀢𑀁. 𑀫𑀸𑀢𑀼𑀮𑀸𑀢𑀺 𑀢𑀁 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦 𑀆𑀮𑀧𑀢𑀺. 𑀓𑀺𑀲𑁄𑀢𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑁄.

𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀸𑀓𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁯.

‘‘𑀅𑀫𑀺𑀢𑁆𑀢𑀫𑀚𑁆𑀛𑁂 𑀯𑀲𑀢𑁄, 𑀢𑁂𑀲𑀼 𑀆𑀫𑀺𑀲𑀫𑁂𑀲𑀢𑁄;

𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀳𑀤𑀬𑀲𑁆𑀲, 𑀓𑀼𑀢𑁄 𑀓𑀸𑀓𑀲𑁆𑀲 𑀤𑀴𑁆𑀳𑀺𑀬𑀁.

𑁧𑁩𑁦.

‘‘𑀦𑀺𑀘𑁆𑀘𑀁 𑀉𑀩𑁆𑀩𑁂𑀕𑀺𑀦𑁄 𑀓𑀸𑀓𑀸, 𑀥𑀗𑁆𑀓𑀸 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸;

𑀮𑀤𑁆𑀥𑁄 𑀧𑀺𑀡𑁆𑀟𑁄 𑀦 𑀧𑀻𑀡𑁂𑀢𑀺, 𑀓𑀺𑀲𑁄 𑀢𑁂𑀦𑀲𑁆𑀫𑀺 𑀯𑀝𑁆𑀝𑀓.

𑁧𑁩𑁧.

‘‘𑀮𑀽𑀔𑀸𑀦𑀺 𑀢𑀺𑀡𑀩𑀻𑀚𑀸𑀦𑀺, 𑀅𑀧𑁆𑀧𑀲𑁆𑀦𑁂𑀳𑀸𑀦𑀺 𑀪𑀼𑀜𑁆𑀚𑀲𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀣𑀽𑀮𑁄 𑀢𑁆𑀯𑀫𑀲𑀺 𑀯𑀝𑁆𑀝𑀓𑀸’’𑀢𑀺.

𑀢𑀢𑁆𑀣 𑀤𑀴𑁆𑀳𑀺𑀬𑀦𑁆𑀢𑀺 𑀏𑀯𑀭𑀽𑀧𑀲𑁆𑀲 𑀫𑀬𑁆𑀳𑀁 𑀓𑀸𑀓𑀲𑁆𑀲 𑀓𑀼𑀢𑁄 𑀤𑀴𑁆𑀳𑀻𑀪𑀸𑀯𑁄, 𑀓𑀼𑀢𑁄 𑀣𑀽𑀮𑀦𑁆𑀢𑀺 𑀅𑀢𑁆𑀣𑁄. 𑀉𑀩𑁆𑀩𑁂𑀕𑀺𑀦𑁄𑀢𑀺 ¶ 𑀉𑀩𑁆𑀩𑁂𑀕𑀯𑀦𑁆𑀢𑁄. 𑀥𑀗𑁆𑀓𑀸𑀢𑀺 𑀓𑀸𑀓𑀸𑀦𑀫𑁂𑀯 𑀦𑀸𑀫𑀁. 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸 𑀮𑀤𑁆𑀥𑁄𑀢𑀺 𑀓𑀸𑀓𑁂𑀦 𑀫𑀦𑀼𑀲𑁆𑀲𑀲𑀦𑁆𑀢𑀓𑀯𑀺𑀮𑀼𑀫𑁆𑀧𑀦𑀲𑀗𑁆𑀔𑀸𑀢𑁂𑀦 𑀧𑀸𑀧𑁂𑀦 𑀓𑀫𑁆𑀫𑁂𑀦 𑀮𑀤𑁆𑀥𑁄 𑀧𑀺𑀡𑁆𑀟𑁄. 𑀦 𑀧𑀻𑀡𑁂𑀢𑀻𑀢𑀺 𑀦 𑀢𑀧𑁆𑀧𑁂𑀢𑀺. 𑀢𑁂𑀦𑀲𑁆𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦𑀸𑀳𑀁 𑀓𑀺𑀲𑁄 𑀅𑀲𑁆𑀫𑀺. 𑀅𑀧𑁆𑀧𑀲𑁆𑀦𑁂𑀳𑀸𑀦𑀻𑀢𑀺 𑀫𑀦𑁆𑀤𑁄𑀚𑀸𑀦𑀺. 𑀇𑀤𑀁 𑀓𑀸𑀓𑁄 𑀩𑁄𑀥𑀺𑀲𑀢𑁆𑀢𑀁 ‘‘𑀧𑀡𑀻𑀢𑀪𑁄𑀚𑀦𑀁 𑀔𑀸𑀤𑀢𑀻’’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸𑀧𑀺 𑀯𑀝𑁆𑀝𑀓𑀸𑀦𑀁 𑀕𑀳𑀺𑀢𑀕𑁄𑀘𑀭𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀣𑀽𑀮𑀪𑀸𑀯𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁨.

‘‘𑀅𑀧𑁆𑀧𑀺𑀘𑁆𑀙𑀸 ¶ 𑀅𑀧𑁆𑀧𑀘𑀺𑀦𑁆𑀢𑀸𑀬, 𑀅𑀤𑀽𑀭𑀕𑀫𑀦𑁂𑀦 𑀘;

𑀮𑀤𑁆𑀥𑀸𑀮𑀤𑁆𑀥𑁂𑀦 𑀬𑀸𑀧𑁂𑀦𑁆𑀢𑁄, 𑀣𑀽𑀮𑁄 𑀢𑁂𑀦𑀲𑁆𑀫𑀺 𑀯𑀸𑀬𑀲.

𑁧𑁩𑁩.

‘‘𑀅𑀧𑁆𑀧𑀺𑀘𑁆𑀙𑀲𑁆𑀲 𑀳𑀺 𑀧𑁄𑀲𑀲𑁆𑀲, 𑀅𑀧𑁆𑀧𑀘𑀺𑀦𑁆𑀢𑀲𑀼𑀔𑀲𑁆𑀲 𑀘;

𑀲𑀼𑀲𑀗𑁆𑀕𑀳𑀺𑀢𑀫𑀸𑀦𑀲𑁆𑀲, 𑀯𑀼𑀢𑁆𑀢𑀻 𑀲𑀼𑀲𑀫𑀼𑀤𑀸𑀦𑀬𑀸’’𑀢𑀺.

𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑀸𑀢𑀺 𑀆𑀳𑀸𑀭𑁂𑀲𑀼 𑀅𑀧𑁆𑀧𑀺𑀘𑁆𑀙𑀢𑀸𑀬 𑀦𑀺𑀢𑁆𑀢𑀡𑁆𑀳𑀢𑀸𑀬, 𑀓𑁂𑀯𑀮𑀁 𑀲𑀭𑀻𑀭𑀬𑀸𑀧𑀦𑀯𑀲𑁂𑀦𑁂𑀯 𑀆𑀳𑀸𑀭𑀸𑀳𑀭𑀡𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀘𑀺𑀦𑁆𑀢𑀸𑀬𑀸𑀢𑀺 ‘‘𑀅𑀚𑁆𑀚 𑀓𑀳𑀁 𑀆𑀳𑀸𑀭𑀁 ¶ 𑀮𑀪𑀺𑀲𑁆𑀲𑀸𑀫𑀺, 𑀲𑁆𑀯𑁂 𑀓𑀳’’𑀦𑁆𑀢𑀺 𑀏𑀯𑀁 𑀆𑀳𑀸𑀭𑀘𑀺𑀦𑁆𑀢𑀸𑀬 𑀅𑀪𑀸𑀯𑁂𑀦. 𑀅𑀤𑀽𑀭𑀕𑀫𑀦𑁂𑀦 𑀘𑀸𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀫𑀥𑀼𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑀺𑀤𑀽𑀭𑀕𑀫𑀦𑁂𑀦 𑀘. 𑀮𑀤𑁆𑀥𑀸𑀮𑀤𑁆𑀥𑁂𑀦𑀸𑀢𑀺 𑀮𑀽𑀔𑀁 𑀯𑀸 𑀳𑁄𑀢𑀼 𑀧𑀡𑀻𑀢𑀁 𑀯𑀸, 𑀬𑀁 𑀮𑀤𑁆𑀥𑀁, 𑀢𑁂𑀦𑁂𑀯. 𑀣𑀽𑀮𑁄 𑀢𑁂𑀦𑀲𑁆𑀫𑀻𑀢𑀺 𑀢𑁂𑀦 𑀘𑀢𑀼𑀩𑁆𑀩𑀺𑀥𑁂𑀦 𑀓𑀸𑀭𑀡𑁂𑀦 𑀣𑀽𑀮𑁄 𑀅𑀲𑁆𑀫𑀺. 𑀯𑀸𑀬𑀲𑀸𑀢𑀺 𑀓𑀸𑀓𑀁 𑀆𑀮𑀧𑀢𑀺. 𑀅𑀧𑁆𑀧𑀘𑀺𑀦𑁆𑀢𑀲𑀼𑀔𑀲𑁆𑀲𑀸𑀢𑀺 𑀆𑀳𑀸𑀭𑀘𑀺𑀦𑁆𑀢𑀸𑀭𑀳𑀺𑀢𑀸𑀦𑀁 𑀅𑀧𑁆𑀧𑀘𑀺𑀦𑁆𑀢𑀸𑀦𑀫𑀭𑀺𑀬𑀸𑀦𑀁 𑀲𑀼𑀔𑀁 𑀅𑀲𑁆𑀲𑀢𑁆𑀣𑀻𑀢𑀺 𑀅𑀧𑁆𑀧𑀘𑀺𑀦𑁆𑀢𑀲𑀼𑀔𑁄, 𑀢𑀲𑁆𑀲 𑀢𑀸𑀤𑀺𑀲𑁂𑀦 𑀲𑀼𑀔𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀲𑀼𑀲𑀗𑁆𑀕𑀳𑀺𑀢𑀫𑀸𑀦𑀲𑁆𑀲𑀸𑀢𑀺 ‘‘𑀏𑀢𑁆𑀢𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀭𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀼𑀝𑁆𑀞𑀼 𑀲𑀗𑁆𑀕𑀳𑀺𑀢𑀸𑀳𑀸𑀭𑀫𑀸𑀦𑀲𑁆𑀲. 𑀯𑀼𑀢𑁆𑀢𑀻 𑀲𑀼𑀲𑀫𑀼𑀤𑀸𑀦𑀬𑀸𑀢𑀺 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀺𑀢𑀯𑀼𑀢𑁆𑀢𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀲𑀫𑀼𑀤𑀸𑀦𑁂𑀢𑀼𑀁 𑀲𑀼𑀲𑀫𑀼𑀤𑀸𑀦𑀬𑀸 𑀲𑀼𑀦𑀺𑀩𑁆𑀩𑀢𑁆𑀢𑀺𑀬𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀮𑁄𑀮𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀯𑀝𑁆𑀝𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀯𑀝𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁩𑁯𑁫] 𑁧𑁦. 𑀧𑀸𑀭𑀸𑀯𑀢𑀚𑀸𑀢𑀓𑀯𑀡𑁆𑀡𑀦𑀸

𑀘𑀺𑀭𑀲𑁆𑀲𑀁 ¶ 𑀯𑀢 𑀧𑀲𑁆𑀲𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑁄𑀮𑀪𑀺𑀓𑁆𑀔𑀼𑀁𑀬𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀭𑀸𑀯𑀢𑁄 𑀳𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀫𑀳𑀸𑀦𑀲𑁂 𑀦𑀻𑀴𑀧𑀘𑁆𑀙𑀺𑀬𑀁 𑀯𑀲𑀢𑀺. 𑀓𑀸𑀓𑁄𑀧𑀺 ¶ 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀢𑀻𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀪𑀢𑁆𑀢𑀓𑀸𑀭𑀓𑁄 𑀓𑀸𑀓𑀧𑀢𑁆𑀢𑀸𑀦𑀺 𑀮𑀼𑀜𑁆𑀘𑀺𑀢𑁆𑀯𑀸 𑀧𑀺𑀝𑁆𑀞𑁂𑀦 𑀢𑀁 𑀫𑀓𑁆𑀔𑁂𑀢𑁆𑀯𑀸 𑀏𑀓𑀁 𑀓𑀧𑀸𑀮𑀔𑀡𑁆𑀟𑀁 𑀯𑀺𑀚𑁆𑀛𑀺𑀢𑁆𑀯𑀸 𑀓𑀡𑁆𑀞𑁂 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀘𑁆𑀙𑀺𑀬𑀁 𑀧𑀓𑁆𑀔𑀺𑀧𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁪.

‘‘𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫𑀺, 𑀲𑀳𑀸𑀬𑀁 𑀫𑀡𑀺𑀥𑀸𑀭𑀺𑀦𑀁;

𑀲𑀼𑀓𑀢𑀸 𑀫𑀲𑁆𑀲𑀼𑀓𑀼𑀢𑁆𑀢𑀺𑀬𑀸, 𑀲𑁄𑀪𑀢𑁂 𑀯𑀢 𑀫𑁂 𑀲𑀔𑀸’’𑀢𑀺.

𑀢𑀢𑁆𑀣 𑀫𑀲𑁆𑀲𑀼𑀓𑀼𑀢𑁆𑀢𑀺𑀬𑀸𑀢𑀺 𑀇𑀫𑀸𑀬 𑀫𑀲𑁆𑀲𑀼𑀓𑀺𑀭𑀺𑀬𑀸𑀬.

𑀢𑀁 ¶ 𑀲𑀼𑀢𑁆𑀯𑀸 𑀓𑀸𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁫.

‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑁄, 𑀅𑀳𑀁 𑀓𑀫𑁆𑀫𑁂𑀲𑀼 𑀩𑁆𑀬𑀸𑀯𑀝𑁄;

𑀘𑀺𑀭𑀲𑁆𑀲𑀁 𑀦𑁆𑀳𑀸𑀧𑀺𑀢𑀁 𑀮𑀤𑁆𑀥𑀸, 𑀮𑁄𑀫𑀁 𑀢𑀁 𑀅𑀚𑁆𑀚 𑀳𑀸𑀭𑀬𑀺’’𑀦𑁆𑀢𑀺.

𑀢𑀢𑁆𑀣 𑀅𑀳𑀁 𑀓𑀫𑁆𑀫𑁂𑀲𑀼 𑀩𑁆𑀬𑀸𑀯𑀝𑁄𑀢𑀺 𑀅𑀳𑀁 𑀲𑀫𑁆𑀫 𑀧𑀸𑀭𑀸𑀯𑀢, 𑀭𑀸𑀚𑀓𑀫𑁆𑀫𑁂𑀲𑀼 𑀩𑁆𑀬𑀸𑀯𑀝𑁄 𑀑𑀓𑀸𑀲𑀁 𑀅𑀮𑀪𑀦𑁆𑀢𑁄 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑁄 𑀅𑀳𑁄𑀲𑀺𑀦𑁆𑀢𑀺 𑀯𑀤𑀢𑀺. 𑀅𑀚𑁆𑀚 𑀳𑀸𑀭𑀬𑀺𑀦𑁆𑀢𑀺 𑀅𑀚𑁆𑀚 𑀳𑀸𑀭𑁂𑀲𑀺𑀁.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁬.

‘‘𑀬𑀁 𑀦𑀼 𑀮𑁄𑀫𑀁 𑀅𑀳𑀸𑀭𑁂𑀲𑀺, 𑀤𑀼𑀮𑁆𑀮𑀪𑀁 𑀮𑀤𑁆𑀥 𑀓𑀧𑁆𑀧𑀓𑀁;

𑀅𑀣 𑀓𑀺𑀜𑁆𑀘𑀭𑀳𑀺 𑀢𑁂 𑀲𑀫𑁆𑀫, 𑀓𑀡𑁆𑀞𑁂 𑀓𑀺𑀡𑀺𑀓𑀺𑀡𑀸𑀬𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑀁 𑀢𑀸𑀯 𑀤𑀼𑀮𑁆𑀮𑀪𑀁 𑀓𑀧𑁆𑀧𑀓𑀁 𑀮𑀪𑀺𑀢𑁆𑀯𑀸 𑀮𑁄𑀫𑀁 𑀳𑀭𑀸𑀧𑁂𑀲𑀺, 𑀢𑀁 𑀳𑀭𑀸𑀧𑀬, 𑀅𑀣 𑀓𑀺𑀜𑁆𑀘𑀭𑀳𑀺 𑀢𑁂 𑀯𑀬𑀲𑁆𑀲 𑀇𑀤𑀁 𑀓𑀡𑁆𑀞𑁂 𑀓𑀺𑀡𑀺𑀓𑀺𑀡𑀸𑀬𑀢𑀻𑀢𑀺.

𑀢𑀢𑁄 𑀓𑀸𑀓𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁭.

‘‘𑀫𑀦𑀼𑀲𑁆𑀲𑀲𑀼𑀔𑀼𑀫𑀸𑀮𑀸𑀦𑀁, 𑀫𑀡𑀺 𑀓𑀡𑁆𑀞𑁂𑀲𑀼 𑀮𑀫𑁆𑀩𑀢𑀺;

𑀢𑁂𑀲𑀸𑀳𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀫𑀸 𑀢𑁆𑀯𑀁 𑀫𑀜𑁆𑀜𑀺 𑀤𑀯𑀸 𑀓𑀢𑀁.

𑁧𑁩𑁮.

‘‘𑀲𑀘𑁂𑀧𑀺𑀫𑀁 𑀧𑀺𑀳𑀬𑀲𑀺, 𑀫𑀲𑁆𑀲𑀼𑀓𑀼𑀢𑁆𑀢𑀺𑀁 𑀲𑀼𑀓𑀸𑀭𑀺𑀢𑀁;

𑀓𑀸𑀭𑀬𑀺𑀲𑁆𑀲𑀸𑀫𑀺 𑀢𑁂 𑀲𑀫𑁆𑀫, 𑀫𑀡𑀺𑀜𑁆𑀘𑀸𑀧𑀺 𑀤𑀤𑀸𑀫𑀺 𑀢𑁂’’𑀢𑀺.

𑀢𑀢𑁆𑀣 𑀫𑀡𑀻𑀢𑀺 𑀏𑀯𑀭𑀽𑀧𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀏𑀓𑀁 𑀫𑀡𑀺𑀭𑀢𑀦𑀁 𑀓𑀡𑁆𑀞𑁂𑀲𑀼 𑀮𑀫𑁆𑀩𑀢𑀺. 𑀢𑁂𑀲𑀸𑀳𑀦𑁆𑀢𑀺 𑀢𑁂𑀲𑀁 𑀅𑀳𑀁. 𑀫𑀸 𑀢𑁆𑀯𑀁 𑀫𑀜𑁆𑀜𑀻𑀢𑀺 𑀢𑁆𑀯𑀁 𑀧𑀦 ‘‘𑀏𑀢𑀁 𑀫𑀬𑀸 𑀤𑀯𑀸 𑀓𑀢’’𑀦𑁆𑀢𑀺 ¶ 𑀫𑀸 𑀫𑀜𑁆𑀜𑀺. 𑀲𑀘𑁂𑀧𑀺𑀫𑀁 𑀧𑀺𑀳𑀬𑀲𑀻𑀢𑀺 𑀲𑀘𑁂 𑀇𑀫𑀁 𑀫𑀫 𑀓𑀢𑀁 𑀫𑀲𑁆𑀲𑀼𑀓𑀼𑀢𑁆𑀢𑀺𑀁 𑀢𑁆𑀯𑀁 𑀇𑀘𑁆𑀙𑀲𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁩𑁯.

‘‘𑀢𑁆𑀯𑀜𑁆𑀜𑁂𑀯 𑀫𑀡𑀺𑀦𑀸 𑀙𑀦𑁆𑀦𑁄, 𑀲𑀼𑀓𑀢𑀸𑀬 𑀘 𑀫𑀲𑁆𑀲𑀼𑀬𑀸;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫𑀺, 𑀧𑀺𑀬𑀁 𑀫𑁂 𑀢𑀯𑀤𑀲𑁆𑀲𑀦’’𑀦𑁆𑀢𑀺.

𑀢𑀢𑁆𑀣 𑀫𑀡𑀺𑀦𑀸𑀢𑀺 𑀫𑀡𑀺𑀦𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀯𑀸𑀬𑀲, 𑀢𑁆𑀯𑀜𑁆𑀜𑁂𑀯 𑀇𑀫𑀲𑁆𑀲 𑀫𑀡𑀺𑀦𑁄 𑀅𑀦𑀼𑀘𑁆𑀙𑀯𑀺𑀓𑁄 𑀇𑀫𑀺𑀲𑁆𑀲𑀸 𑀘 𑀲𑀼𑀓𑀢𑀸𑀬 𑀫𑀲𑁆𑀲𑀼𑀬𑀸 ¶ , 𑀫𑀫 𑀧𑀦 𑀢𑀯 𑀅𑀤𑀲𑁆𑀲𑀦𑀫𑁂𑀯 𑀧𑀺𑀬𑀁, 𑀢𑀲𑁆𑀫𑀸 𑀢𑀁 𑀆𑀫𑀦𑁆𑀢𑀬𑀺𑀢𑁆𑀯𑀸 𑀕𑀘𑁆𑀙𑀸𑀫𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑁄. 𑀓𑀸𑀓𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀮𑁄𑀮𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀧𑀸𑀭𑀸𑀯𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀸𑀭𑀸𑀯𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀔𑀭𑀧𑀼𑀢𑁆𑀢𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑀚𑀸𑀢𑀓𑀼𑀤𑁆𑀤𑀸𑀦𑀁 𑁋

𑀅𑀯𑀸𑀭𑀺𑀬𑀁 𑀲𑁂𑀢𑀓𑁂𑀢𑀼, 𑀤𑀭𑀻𑀫𑀼𑀔𑀜𑁆𑀘 𑀦𑁂𑀭𑀼 𑀘;

𑀆𑀲𑀗𑁆𑀓𑀫𑀺𑀕𑀸𑀮𑁄𑀧𑀜𑁆𑀘, 𑀓𑀸𑀴𑀓𑀡𑁆𑀡𑀻 𑀘 𑀓𑀼𑀓𑁆𑀓𑀼𑀝𑀁.

𑀥𑀫𑁆𑀫𑀥𑀚𑀜𑁆𑀘 𑀦𑀦𑁆𑀤𑀺𑀬𑀁, 𑀔𑀭𑀧𑀼𑀢𑁆𑀢𑀁 𑀲𑀽𑀘𑀺 𑀘𑁂𑀯;

𑀢𑀼𑀡𑁆𑀟𑀺𑀮𑀁 𑀲𑁄𑀡𑁆𑀡𑀓𑀓𑁆𑀓𑀝𑀁, 𑀫𑀬𑁆𑀳𑀓𑀁 𑀯𑀺𑀚𑁆𑀚𑀸𑀥𑀭𑀜𑁆𑀘𑁂𑀯.

𑀲𑀺𑀗𑁆𑀖𑀧𑀼𑀧𑁆𑀨𑀁 𑀯𑀺𑀖𑀸𑀲𑀸𑀤𑀁, 𑀯𑀝𑁆𑀝𑀓𑀜𑁆𑀘 𑀧𑀸𑀭𑀸𑀯𑀢𑀁;

𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑀸𑀣𑁂𑀭𑀸, 𑀙𑀓𑁆𑀓𑁂 𑀯𑀻𑀲𑀢𑀺 𑀚𑀸𑀢𑀓𑁂.

𑀙𑀓𑁆𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀧𑀸𑀢𑁄

𑁧. 𑀓𑀼𑀓𑁆𑀓𑀼𑀯𑀕𑁆𑀕𑁄

[𑁩𑁯𑁬] 𑁧. 𑀓𑀼𑀓𑁆𑀓𑀼𑀚𑀸𑀢𑀓𑀯𑀡𑁆𑀡𑀦𑀸

𑀤𑀺𑀬𑀟𑁆𑀠𑀓𑀼𑀓𑁆𑀓𑀽𑀢𑀺 ¶ ¶ ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑁄𑀯𑀸𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀢𑁂𑀲𑀓𑀼𑀡𑀚𑀸𑀢𑀓𑁂 (𑀚𑀸. 𑁨.𑁧𑁭.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀭𑀸𑀚𑀸 𑀅𑀕𑀢𑀺𑀕𑀫𑀦𑁂 𑀧𑀢𑀺𑀝𑁆𑀞𑀸𑀬 𑀅𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀚𑀦𑀧𑀤𑀁 𑀧𑀻𑀴𑁂𑀢𑁆𑀯𑀸 𑀥𑀦𑀫𑁂𑀯 𑀲𑀁𑀳𑀭𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 𑀑𑀯𑀤𑀺𑀢𑀼𑀓𑀸𑀫𑁄 𑀏𑀓𑀁 𑀉𑀧𑀫𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀯𑀸𑀲𑀸𑀕𑀸𑀭𑀁 𑀯𑀺𑀧𑁆𑀧𑀓𑀢𑀁 𑀳𑁄𑀢𑀺 𑀅𑀦𑀺𑀝𑁆𑀞𑀺𑀢𑀘𑁆𑀙𑀤𑀦𑀁, 𑀤𑀸𑀭𑀼𑀓𑀡𑁆𑀡𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀕𑁄𑀧𑀸𑀦𑀲𑀺𑀬𑁄 𑀧𑀯𑁂𑀲𑀺𑀢𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀭𑀸𑀚𑀸 𑀓𑀻𑀴𑀦𑀢𑁆𑀣𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀢𑀁 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 𑀓𑀡𑁆𑀡𑀺𑀓𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀉𑀧𑀭𑀺𑀧𑀢𑀦𑀪𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀞𑀺𑀢𑁄 𑀧𑀼𑀦 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀓𑀡𑁆𑀡𑀺𑀓𑀸 𑀞𑀺𑀢𑀸, 𑀓𑀺𑀁 𑀦𑀺𑀲𑁆𑀲𑀸𑀬 𑀕𑁄𑀧𑀸𑀦𑀲𑀺𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧.

‘‘𑀤𑀺𑀬𑀟𑁆𑀠𑀓𑀼𑀓𑁆𑀓𑀽 ¶ 𑀉𑀤𑀬𑁂𑀦 𑀓𑀡𑁆𑀡𑀺𑀓𑀸, 𑀯𑀺𑀤𑀢𑁆𑀣𑀺𑀬𑁄 𑀅𑀝𑁆𑀞 𑀧𑀭𑀺𑀓𑁆𑀔𑀺𑀧𑀦𑁆𑀢𑀺 𑀦𑀁;

𑀲𑀸 𑀲𑀺𑀁𑀲𑀧𑀸, 𑀲𑀸𑀭𑀫𑀬𑀸 𑀅𑀨𑁂𑀕𑁆𑀕𑀼𑀓𑀸, 𑀓𑀼𑀳𑀺𑀁 𑀞𑀺𑀢𑀸 𑀉𑀧𑁆𑀧𑀭𑀺𑀢𑁄 𑀦 𑀥𑀁𑀲𑀢𑀻’’𑀢𑀺.

𑀢𑀢𑁆𑀣 𑀤𑀺𑀬𑀟𑁆𑀠𑀓𑀼𑀓𑁆𑀓𑀽𑀢𑀺 𑀤𑀺𑀬𑀟𑁆𑀠𑀭𑀢𑀦𑀸. 𑀉𑀤𑀬𑁂𑀦𑀸𑀢𑀺 𑀉𑀘𑁆𑀘𑀢𑁆𑀢𑁂𑀦. 𑀧𑀭𑀺𑀓𑁆𑀔𑀺𑀧𑀦𑁆𑀢𑀺 𑀦𑀦𑁆𑀢𑀺 𑀢𑀁 𑀧𑀦𑁂𑀢𑀁 𑀅𑀝𑁆𑀞 𑀯𑀺𑀤𑀢𑁆𑀣𑀺𑀬𑁄 𑀧𑀭𑀺𑀓𑁆𑀔𑀺𑀧𑀦𑁆𑀢𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀅𑀝𑁆𑀞𑀯𑀺𑀤𑀢𑁆𑀣𑀺𑀧𑀫𑀸𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀳𑀺𑀁 𑀞𑀺𑀢𑀸𑀢𑀺 𑀓𑀢𑁆𑀣 𑀧𑀢𑀺𑀝𑁆𑀞𑀺𑀢𑀸 𑀳𑀼𑀢𑁆𑀯𑀸. 𑀦 𑀥𑀁𑀲𑀢𑀻𑀢𑀺 𑀦 𑀧𑀢𑀢𑀺.

𑀢𑀁 ¶ ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀮𑀤𑁆𑀥𑀸 𑀤𑀸𑀦𑀺 𑀫𑁂 𑀭𑀜𑁆𑀜𑁄 𑀑𑀯𑀸𑀤𑀢𑁆𑀣𑀸𑀬 𑀉𑀧𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁨.

‘‘𑀬𑀸 𑀢𑀺𑀁𑀲𑀢𑀺 𑀲𑀸𑀭𑀫𑀬𑀸 𑀅𑀦𑀼𑀚𑁆𑀚𑀼𑀓𑀸, 𑀧𑀭𑀺𑀓𑀺𑀭𑀺𑀬 𑀕𑁄𑀧𑀸𑀦𑀲𑀺𑀬𑁄 𑀲𑀫𑀁 𑀞𑀺𑀢𑀸;

𑀢𑀸𑀳𑀺 𑀲𑀼𑀲𑀗𑁆𑀕𑀳𑀺𑀢𑀸 𑀩𑀮𑀲𑀸 𑀧𑀻𑀴𑀺𑀢𑀸, 𑀲𑀫𑀁 𑀞𑀺𑀢𑀸 𑀉𑀧𑁆𑀧𑀭𑀺𑀢𑁄 𑀦 𑀥𑀁𑀲𑀢𑀺.

𑁩.

‘‘𑀏𑀯𑀫𑁆𑀧𑀺 𑀫𑀺𑀢𑁆𑀢𑁂𑀳𑀺 𑀤𑀴𑁆𑀳𑁂𑀳𑀺 𑀧𑀡𑁆𑀟𑀺𑀢𑁄, 𑀅𑀪𑁂𑀚𑁆𑀚𑀭𑀽𑀧𑁂𑀳𑀺 𑀲𑀼𑀘𑀻𑀳𑀺 𑀫𑀦𑁆𑀢𑀺𑀪𑀺;

𑀲𑀼𑀲𑀗𑁆𑀕𑀳𑀻𑀢𑁄 𑀲𑀺𑀭𑀺𑀬𑀸 𑀦 𑀥𑀁𑀲𑀢𑀺, 𑀕𑁄𑀧𑀸𑀦𑀲𑀻𑀪𑀸𑀭𑀯𑀳𑀸𑀯 𑀓𑀡𑁆𑀡𑀺𑀓𑀸’’𑀢𑀺.

𑀢𑀢𑁆𑀣 𑀬𑀸 𑀢𑀺𑀁𑀲𑀢𑀺 𑀲𑀸𑀭𑀫𑀬𑀸𑀢𑀺 𑀬𑀸 𑀏𑀢𑀸 𑀲𑀸𑀭𑀭𑀼𑀓𑁆𑀔𑀫𑀬𑀸 𑀢𑀺𑀁𑀲𑀢𑀺 𑀕𑁄𑀧𑀸𑀦𑀲𑀺𑀬𑁄. 𑀧𑀭𑀺𑀓𑀺𑀭𑀺𑀬𑀸𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸. 𑀲𑀫𑀁 𑀞𑀺𑀢𑀸𑀢𑀺 𑀲𑀫𑀪𑀸𑀕𑁂𑀦 𑀞𑀺𑀢𑀸. 𑀩𑀮𑀲𑀸 𑀧𑀻𑀴𑀺𑀢𑀸𑀢𑀺 𑀢𑀸𑀳𑀺 𑀢𑀸𑀳𑀺 𑀕𑁄𑀧𑀸𑀦𑀲𑀻𑀳𑀺 𑀩𑀮𑁂𑀦 𑀧𑀻𑀴𑀺𑀢𑀸 𑀲𑀼𑀝𑁆𑀞𑀼 𑀲𑀗𑁆𑀕𑀳𑀺𑀢𑀸 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸. 𑀧𑀡𑁆𑀟𑀺𑀢𑁄𑀢𑀺 𑀜𑀸𑀡𑀲𑀫𑁆𑀧𑀦𑁆𑀦𑁄 𑀭𑀸𑀚𑀸. 𑀲𑀼𑀘𑀻𑀳𑀻𑀢𑀺 𑀲𑀼𑀘𑀺𑀲𑀫𑀸𑀘𑀸𑀭𑁂𑀳𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀳𑀺. 𑀫𑀦𑁆𑀢𑀺𑀪𑀻𑀢𑀺 𑀫𑀦𑁆𑀢𑀓𑀼𑀲𑀮𑁂𑀳𑀺. 𑀕𑁄𑀧𑀸𑀦𑀲𑀻𑀪𑀸𑀭𑀯𑀳𑀸𑀯 𑀓𑀡𑁆𑀡𑀺𑀓𑀸𑀢𑀺 𑀬𑀣𑀸 𑀕𑁄𑀧𑀸𑀦𑀲𑀻𑀦𑀁 𑀪𑀸𑀭𑀁 𑀯𑀳𑀫𑀸𑀦𑀸 𑀓𑀡𑁆𑀡𑀺𑀓𑀸 𑀦 𑀥𑀁𑀲𑀢𑀺 𑀦 𑀧𑀢𑀢𑀺, 𑀏𑀯𑀁 𑀭𑀸𑀚𑀸𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀫𑀦𑁆𑀢𑀻𑀳𑀺 𑀅𑀪𑀺𑀚𑁆𑀚𑀳𑀤𑀬𑁂𑀳𑀺 𑀲𑀼𑀲𑀗𑁆𑀕𑀳𑀺𑀢𑁄 𑀲𑀺𑀭𑀺𑀢𑁄 𑀦 𑀥𑀁𑀲𑀢𑀺 𑀦 𑀧𑀢𑀢𑀺 𑀦 𑀧𑀭𑀺𑀳𑀸𑀬𑀢𑀺.

𑀭𑀸𑀚𑀸 ¶ 𑀩𑁄𑀥𑀺𑀲𑀢𑁆𑀢𑁂 𑀓𑀣𑁂𑀦𑁆𑀢𑁂𑀬𑁂𑀯 𑀅𑀢𑁆𑀢𑀦𑁄 𑀓𑀺𑀭𑀺𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀡𑁆𑀡𑀺𑀓𑀸𑀬 𑀅𑀲𑀢𑀺 𑀕𑁄𑀧𑀸𑀦𑀲𑀺𑀬𑁄 𑀦 𑀢𑀺𑀝𑁆𑀞𑀦𑁆𑀢𑀺, 𑀕𑁄𑀧𑀸𑀦𑀲𑀻𑀳𑀺 𑀅𑀲𑀗𑁆𑀕𑀳𑀺𑀢𑀸 𑀓𑀡𑁆𑀡𑀺𑀓𑀸 𑀦 𑀢𑀺𑀝𑁆𑀞𑀢𑀺, 𑀕𑁄𑀧𑀸𑀦𑀲𑀻𑀲𑀼 𑀪𑀺𑀚𑁆𑀚𑀦𑁆𑀢𑀻𑀲𑀼 𑀓𑀡𑁆𑀡𑀺𑀓𑀸 𑀧𑀢𑀢𑀺, 𑀏𑀯𑀫𑁂𑀯 𑀅𑀥𑀫𑁆𑀫𑀺𑀓𑁄 𑀭𑀸𑀚𑀸 𑀅𑀢𑁆𑀢𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑁂 𑀘 𑀩𑀮𑀓𑀸𑀬𑁂 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀘 𑀅𑀲𑀗𑁆𑀕𑀡𑁆𑀳𑀦𑁆𑀢𑁄 𑀢𑁂𑀲𑀼 𑀪𑀺𑀚𑁆𑀚𑀦𑁆𑀢𑁂𑀲𑀼 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑁄 𑀇𑀲𑁆𑀲𑀭𑀺𑀬𑀸 𑀥𑀁𑀲𑀢𑀺, 𑀭𑀜𑁆𑀜𑀸 𑀦𑀸𑀫 𑀥𑀫𑁆𑀫𑀺𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀫𑀸𑀢𑀼𑀮𑀼𑀗𑁆𑀕𑀁 𑀆𑀳𑀭𑀺𑀁𑀲𑀼. 𑀭𑀸𑀚𑀸 ‘‘𑀲𑀳𑀸𑀬, 𑀇𑀫𑀁 𑀫𑀸𑀢𑀼𑀮𑀼𑀗𑁆𑀕𑀁 𑀔𑀸𑀤𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀳𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀫𑀁 𑀔𑀸𑀤𑀺𑀢𑀼𑀁 𑀅𑀚𑀸𑀦𑀦𑁆𑀢𑀸 𑀢𑀺𑀢𑁆𑀢𑀓𑀁 𑀯𑀸 𑀓𑀭𑁄𑀦𑁆𑀢𑀺 𑀅𑀫𑁆𑀩𑀺𑀮𑀁 𑀯𑀸, 𑀚𑀸𑀦𑀦𑁆𑀢𑀸 ¶ 𑀧𑀦 𑀧𑀡𑁆𑀟𑀺𑀢𑀸 𑀢𑀺𑀢𑁆𑀢𑀓𑀁 𑀳𑀸𑀭𑁂𑀢𑁆𑀯𑀸 𑀅𑀫𑁆𑀩𑀺𑀮𑀁 𑀅𑀦𑀻𑀳𑀭𑀺𑀢𑁆𑀯𑀸 𑀫𑀸𑀢𑀼𑀮𑀼𑀗𑁆𑀕𑀭𑀲𑀁 𑀅𑀦𑀸𑀲𑁂𑀢𑁆𑀯𑀸𑀯 𑀔𑀸𑀤𑀦𑁆𑀢𑀻’’𑀢𑀺 𑀭𑀜𑁆𑀜𑁄 𑀇𑀫𑀸𑀬 𑀉𑀧𑀫𑀸𑀬 𑀥𑀦𑀲𑀗𑁆𑀖𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁪.

‘‘𑀔𑀭𑀢𑁆𑀢𑀘𑀁 𑀩𑁂𑀮𑁆𑀮𑀁 𑀬𑀣𑀸𑀧𑀺 𑀲𑀢𑁆𑀣𑀯𑀸, 𑀅𑀦𑀸𑀫𑀲𑀦𑁆𑀢𑁄𑀧𑀺 𑀓𑀭𑁄𑀢𑀺 𑀢𑀺𑀢𑁆𑀢𑀓𑀁;

𑀲𑀫𑀸𑀳𑀭𑀁 𑀲𑀸𑀤𑀼𑀁 𑀓𑀭𑁄𑀢𑀺 𑀧𑀢𑁆𑀣𑀺𑀯, 𑀅𑀲𑀸𑀤𑀼𑀁 𑀓𑀬𑀺𑀭𑀸 𑀢𑀦𑀼𑀩𑀦𑁆𑀥𑀫𑀼𑀤𑁆𑀥𑀭𑀁.

𑁫.

‘‘𑀏𑀯𑀫𑁆𑀧𑀺 ¶ 𑀕𑀸𑀫𑀦𑀺𑀕𑀫𑁂𑀲𑀼 𑀧𑀡𑁆𑀟𑀺𑀢𑁄, 𑀅𑀲𑀸𑀳𑀲𑀁 𑀭𑀸𑀚𑀥𑀦𑀸𑀦𑀺 𑀲𑀗𑁆𑀖𑀭𑀁;

𑀥𑀫𑁆𑀫𑀸𑀦𑀼𑀯𑀢𑁆𑀢𑀻 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀲 𑀨𑀸𑀢𑀺 𑀓𑀬𑀺𑀭𑀸 𑀅𑀯𑀺𑀳𑁂𑀞𑀬𑀁 𑀧𑀭’’𑀦𑁆𑀢𑀺.

𑀢𑀢𑁆𑀣 𑀔𑀭𑀢𑁆𑀢𑀘𑀦𑁆𑀢𑀺 𑀣𑀤𑁆𑀥𑀢𑀘𑀁. 𑀩𑁂𑀮𑁆𑀮𑀦𑁆𑀢𑀺 𑀫𑀸𑀢𑀼𑀮𑀼𑀗𑁆𑀕𑀁. ‘𑀩𑁂𑀮’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀲𑀢𑁆𑀣𑀯𑀸𑀢𑀺 𑀲𑀢𑁆𑀣𑀓𑀳𑀢𑁆𑀣𑁄. 𑀅𑀦𑀸𑀫𑀲𑀦𑁆𑀢𑁄𑀢𑀺 𑀩𑀳𑀺𑀢𑀘𑀁 𑀢𑀦𑀼𑀓𑀫𑁆𑀧𑀺 𑀅𑀢𑀘𑁆𑀙𑀦𑁆𑀢𑁄 𑀇𑀤𑀁 𑀨𑀮𑀁 𑀢𑀺𑀢𑁆𑀢𑀓𑀁 𑀓𑀭𑁄𑀢𑀺. 𑀲𑀫𑀸𑀳𑀭𑀦𑁆𑀢𑀺 𑀲𑀫𑀸𑀳𑀭𑀦𑁆𑀢𑁄 𑀩𑀳𑀺𑀢𑀘𑀁 𑀢𑀘𑁆𑀙𑀦𑁆𑀢𑁄 𑀅𑀦𑁆𑀢𑁄 𑀘 𑀅𑀫𑁆𑀩𑀺𑀮𑀁 𑀅𑀦𑀻𑀳𑀭𑀦𑁆𑀢𑁄 𑀢𑀁 𑀲𑀸𑀤𑀼𑀁 𑀓𑀭𑁄𑀢𑀺. 𑀧𑀢𑁆𑀣𑀺𑀯𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀢𑀦𑀼𑀩𑀦𑁆𑀥𑀫𑀼𑀤𑁆𑀥𑀭𑀦𑁆𑀢𑀺 ¶ 𑀢𑀦𑀼𑀓𑀁 𑀧𑀦 𑀢𑀘𑀁 𑀉𑀤𑁆𑀥𑀭𑀦𑁆𑀢𑁄 𑀲𑀩𑁆𑀩𑀲𑁄 𑀢𑀺𑀢𑁆𑀢𑀓𑀲𑁆𑀲 𑀅𑀦𑀧𑀦𑀻𑀢𑀢𑁆𑀢𑀸 𑀢𑀁 𑀅𑀲𑀸𑀤𑀼𑀫𑁂𑀯 𑀓𑀬𑀺𑀭𑀸. 𑀏𑀯𑀦𑁆𑀢𑀺 𑀏𑀯𑀁 𑀧𑀡𑁆𑀟𑀺𑀢𑁄 𑀭𑀸𑀚𑀸𑀧𑀺 𑀅𑀲𑀸𑀳𑀲𑀁 𑀲𑀸𑀳𑀲𑀺𑀬𑀸 𑀢𑀡𑁆𑀳𑀸𑀬 𑀯𑀲𑀁 𑀅𑀕𑀘𑁆𑀙𑀦𑁆𑀢𑁄 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀭𑀝𑁆𑀞𑀁 𑀅𑀧𑀻𑀴𑁂𑀢𑁆𑀯𑀸 𑀉𑀧𑀘𑀺𑀓𑀸𑀦𑀁 𑀯𑀫𑁆𑀫𑀺𑀓𑀯𑀟𑁆𑀠𑀦𑀦𑀺𑀬𑀸𑀫𑁂𑀦 𑀫𑀥𑀼𑀓𑀭𑀸𑀦𑀁 𑀭𑁂𑀡𑀼𑀁 𑀕𑀳𑁂𑀢𑁆𑀯𑀸 𑀫𑀥𑀼𑀓𑀭𑀡𑀦𑀺𑀬𑀸𑀫𑁂𑀦 𑀘 𑀥𑀦𑀁 𑀲𑀗𑁆𑀖𑀭𑀦𑁆𑀢𑁄 𑁋

‘‘𑀤𑀸𑀦𑀁 𑀲𑀻𑀮𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;

𑀅𑀓𑁆𑀓𑁄𑀥𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀺𑀜𑁆𑀘 𑀅𑀯𑀺𑀭𑁄𑀥𑀦’’𑀦𑁆𑀢𑀺. 𑁋

𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀭𑀸𑀚𑀥𑀫𑁆𑀫𑀸𑀦𑀁 𑀅𑀦𑀼𑀯𑀢𑁆𑀢𑀦𑁂𑀦 𑀥𑀫𑁆𑀫𑀸𑀦𑀼𑀯𑀢𑁆𑀢𑀻 𑀳𑀼𑀢𑁆𑀯𑀸 𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀨𑀸𑀢𑀺𑀁 𑀯𑀟𑁆𑀠𑀺𑀁 𑀓𑀭𑁂𑀬𑁆𑀬 𑀧𑀭𑀁 𑀅𑀯𑀺𑀳𑁂𑀞𑁂𑀦𑁆𑀢𑁄𑀬𑁂𑀯𑀸𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀧𑁄𑀓𑁆𑀔𑀭𑀡𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀁 𑀩𑀸𑀮𑀲𑀽𑀭𑀺𑀬𑀯𑀡𑁆𑀡𑀁 𑀉𑀤𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀁 𑀧𑀤𑀼𑀫𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀲𑀳𑀸𑀬, 𑀇𑀫𑀁 ¶ 𑀧𑀤𑀼𑀫𑀁 𑀉𑀤𑀓𑁂 𑀲𑀜𑁆𑀚𑀸𑀢𑀫𑁂𑀯 𑀉𑀤𑀓𑁂𑀦 𑀅𑀮𑀺𑀫𑁆𑀧𑀫𑀸𑀦𑀁 𑀞𑀺𑀢’’𑀦𑁆𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁬.

‘‘𑀑𑀤𑀸𑀢𑀫𑀽𑀮𑀁 𑀲𑀼𑀘𑀺𑀯𑀸𑀭𑀺𑀲𑀫𑁆𑀪𑀯𑀁, 𑀚𑀸𑀢𑀁 𑀬𑀣𑀸 𑀧𑁄𑀓𑁆𑀔𑀭𑀡𑀻𑀲𑀼 𑀅𑀫𑁆𑀩𑀼𑀚𑀁;

𑀧𑀤𑀼𑀫𑀁 𑀬𑀣𑀸 𑀅𑀕𑁆𑀕𑀺𑀦𑀺𑀓𑀸𑀲𑀺𑀨𑀸𑀮𑀺𑀫𑀁, 𑀦 𑀓𑀤𑁆𑀤𑀫𑁄 𑀦 𑀭𑀚𑁄 𑀦 𑀯𑀸𑀭𑀺 𑀮𑀺𑀫𑁆𑀧𑀢𑀺.

𑁭.

‘‘𑀏𑀯𑀫𑁆𑀧𑀺 𑀯𑁄𑀳𑀸𑀭𑀲𑀼𑀘𑀺𑀁 𑀅𑀲𑀸𑀳𑀲𑀁, 𑀯𑀺𑀲𑀼𑀤𑁆𑀥𑀓𑀫𑁆𑀫𑀦𑁆𑀢𑀫𑀧𑁂𑀢𑀧𑀸𑀧𑀓𑀁;

𑀦 𑀮𑀺𑀫𑁆𑀧𑀢𑀺 𑀓𑀫𑁆𑀫𑀓𑀺𑀮𑁂𑀲 𑀢𑀸𑀤𑀺𑀲𑁄, 𑀚𑀸𑀢𑀁 𑀬𑀣𑀸 𑀧𑁄𑀓𑁆𑀔𑀭𑀡𑀻𑀲𑀼 𑀅𑀫𑁆𑀩𑀼𑀚’’𑀦𑁆𑀢𑀺.

𑀢𑀢𑁆𑀣 𑀑𑀤𑀸𑀢𑀫𑀽𑀮𑀦𑁆𑀢𑀺 𑀧𑀡𑁆𑀟𑀭𑀫𑀽𑀮𑀁. 𑀅𑀫𑁆𑀩𑀼𑀚𑀦𑁆𑀢𑀺 𑀧𑀤𑀼𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀕𑁆𑀕𑀺𑀦𑀺𑀓𑀸𑀲𑀺𑀨𑀸𑀮𑀺𑀫𑀦𑁆𑀢𑀺 𑀅𑀕𑁆𑀕𑀺𑀦𑀺𑀓𑀸𑀲𑀺𑀦𑀸 𑀲𑀽𑀭𑀺𑀬𑁂𑀦 𑀨𑀸𑀮𑀺𑀢𑀁 𑀯𑀺𑀓𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀓𑀤𑁆𑀤𑀫𑁄 𑀦 ¶ 𑀭𑀚𑁄 𑀦 𑀯𑀸𑀭𑀺 𑀮𑀺𑀫𑁆𑀧𑀢𑀻𑀢𑀺 𑀦𑁂𑀯 𑀓𑀤𑁆𑀤𑀫𑁄 𑀦 𑀭𑀚𑁄 𑀦 𑀉𑀤𑀓𑀁 𑀮𑀺𑀫𑁆𑀧𑀢𑀺, 𑀦 𑀫𑀓𑁆𑀔𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀮𑀺𑀧𑁆𑀧𑀢𑀺’’𑀘𑁆𑀘𑁂𑀯 𑀯𑀸 𑀧𑀸𑀞𑁄, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀸𑀦𑀺 𑀧𑀘𑁆𑀘𑀢𑁆𑀢𑀯𑀘𑀦𑀸𑀦𑀺, 𑀏𑀢𑁂𑀲𑀼 𑀓𑀤𑁆𑀤𑀫𑀸𑀤𑀻𑀲𑀼 𑀦 𑀮𑀺𑀧𑁆𑀧𑀢𑀺, 𑀦 𑀅𑀮𑁆𑀮𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀯𑁄𑀳𑀸𑀭𑀲𑀼𑀘𑀺𑀦𑁆𑀢𑀺 ¶ 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀺𑀓𑀭𑀸𑀚𑀽𑀳𑀺 𑀮𑀺𑀔𑀸𑀧𑁂𑀢𑁆𑀯𑀸 𑀞𑀧𑀺𑀢𑀯𑀺𑀦𑀺𑀘𑁆𑀙𑀬𑀯𑁄𑀳𑀸𑀭𑁂 𑀲𑀼𑀘𑀺𑀁, 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀬𑀓𑀸𑀭𑀓𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀸𑀳𑀲𑀦𑁆𑀢𑀺 𑀥𑀫𑁆𑀫𑀺𑀓𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑀢𑁆𑀢𑀸𑀬𑁂𑀯 𑀲𑀸𑀳𑀲𑀺𑀓𑀓𑀺𑀭𑀺𑀬𑀸𑀬 𑀯𑀺𑀭𑀳𑀺𑀢𑀁. 𑀯𑀺𑀲𑀼𑀤𑁆𑀥𑀓𑀫𑁆𑀫𑀦𑁆𑀢𑀦𑁆𑀢𑀺 𑀢𑁂𑀦𑁂𑀯 𑀅𑀲𑀸𑀳𑀲𑀺𑀓𑀝𑁆𑀞𑁂𑀦 𑀯𑀺𑀲𑀼𑀤𑁆𑀥𑀓𑀫𑁆𑀫𑀦𑁆𑀢𑀁 𑀲𑀘𑁆𑀘𑀯𑀸𑀤𑀺𑀁 𑀦𑀺𑀓𑁆𑀓𑁄𑀥𑀁 𑀫𑀚𑁆𑀛𑀢𑁆𑀢𑀁 𑀢𑀼𑀮𑀸𑀪𑀽𑀢𑀁 𑀮𑁄𑀓𑀲𑁆𑀲. 𑀅𑀧𑁂𑀢𑀧𑀸𑀧𑀓𑀦𑁆𑀢𑀺 𑀅𑀧𑀕𑀢𑀧𑀸𑀧𑀓𑀫𑁆𑀫𑀁. 𑀦 𑀮𑀺𑀫𑁆𑀧𑀢𑀺 𑀓𑀫𑁆𑀫𑀓𑀺𑀮𑁂𑀲 𑀢𑀸𑀤𑀺𑀲𑁄𑀢𑀺 𑀢𑀁 𑀭𑀸𑀚𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄𑀢𑀺 𑀅𑀬𑀁 𑀓𑀫𑁆𑀫𑀓𑀺𑀮𑁂𑀲𑁄 𑀦 𑀅𑀮𑁆𑀮𑀻𑀬𑀢𑀺. 𑀓𑀺𑀁𑀓𑀸𑀭𑀡𑀸? 𑀢𑀸𑀤𑀺𑀲𑁄 𑀚𑀸𑀢𑀁 𑀬𑀣𑀸 𑀧𑁄𑀓𑁆𑀔𑀭𑀡𑀻𑀲𑀼 𑀅𑀫𑁆𑀩𑀼𑀚𑀁. 𑀢𑀸𑀤𑀺𑀲𑁄 𑀳𑀺 𑀭𑀸𑀚𑀸 𑀬𑀣𑀸 𑀧𑁄𑀓𑁆𑀔𑀭𑀡𑀻𑀲𑀼 𑀚𑀸𑀢𑀁 𑀧𑀤𑀼𑀫𑀁 𑀅𑀦𑀼𑀧𑀮𑀺𑀢𑁆𑀢𑀁, 𑀏𑀯𑀁 𑀅𑀦𑀼𑀧𑀮𑀺𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀓𑁆𑀓𑀼𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁩𑁯𑁭] 𑁨. 𑀫𑀦𑁄𑀚𑀚𑀸𑀢𑀓𑀯𑀡𑁆𑀡𑀦𑀸

𑀬𑀣𑀸 𑀘𑀸𑀧𑁄 𑀦𑀺𑀦𑁆𑀦𑀫𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀧𑀓𑁆𑀔𑀲𑁂𑀯𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀳𑁂𑀝𑁆𑀞𑀸 𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑁂 (𑀚𑀸. 𑁧.𑁧.𑁨𑁬) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀯𑀺𑀧𑀓𑁆𑀔𑀲𑁂𑀯𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑀼𑀢𑁆𑀯𑀸 𑀲𑀻𑀳𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀲𑀦𑁆𑀢𑁄 𑀤𑁆𑀯𑁂 𑀧𑁄𑀢𑀓𑁂 𑀮𑀪𑀺 𑁋 𑀧𑀼𑀢𑁆𑀢𑀜𑁆𑀘 𑀥𑀻𑀢𑀭𑀜𑁆𑀘. 𑀧𑀼𑀢𑁆𑀢𑀲𑁆𑀲 𑀫𑀦𑁄𑀚𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀏𑀓𑀁 𑀲𑀻𑀳𑀧𑁄𑀢𑀺𑀓𑀁 𑀕𑀡𑁆𑀳𑀺. 𑀇𑀢𑀺 𑀢𑁂 𑀧𑀜𑁆𑀘 𑀚𑀦𑀸 𑀅𑀳𑁂𑀲𑀼𑀁. 𑀫𑀦𑁄𑀚𑁄 𑀯𑀦𑀫𑀳𑀺𑀁𑀲𑀸𑀤𑀬𑁄 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀘 𑀪𑀕𑀺𑀦𑀺𑀜𑁆𑀘 𑀧𑀚𑀸𑀧𑀢𑀺𑀜𑁆𑀘 𑀧𑁄𑀲𑁂𑀢𑀺. 𑀲𑁄 ¶ 𑀏𑀓𑀤𑀺𑀯𑀲𑀁 𑀕𑁄𑀘𑀭𑀪𑀽𑀫𑀺𑀬𑀁 𑀕𑀺𑀭𑀺𑀬𑀁 𑀦𑀸𑀫 𑀲𑀺𑀗𑁆𑀕𑀸𑀮𑀁 𑀧𑀮𑀸𑀬𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀁 𑀉𑀭𑁂𑀦 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀲𑀫𑁆𑀫𑀸’’𑀢𑀺 ¶ 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀧𑀝𑁆𑀞𑀸𑀢𑀼𑀓𑀸𑀫𑁄𑀫𑁆𑀳𑀺, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀉𑀧𑀝𑁆𑀞𑀳𑀲𑁆𑀲𑀽’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀕𑀼𑀳𑀁 𑀆𑀦𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢 𑀫𑀦𑁄𑀚, 𑀲𑀺𑀗𑁆𑀕𑀸𑀮𑀸 𑀦𑀸𑀫 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀅𑀓𑀺𑀘𑁆𑀘𑁂 𑀦𑀺𑀬𑁄𑀚𑁂𑀦𑁆𑀢𑀺, 𑀫𑀸 𑀏𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀓𑀭𑀻’’𑀢𑀺 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀺𑀗𑁆𑀕𑀸𑀮𑁄 𑀅𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀫𑀦𑁄𑀚𑀁 𑀆𑀳 𑁋 ‘‘𑀲𑀸𑀫𑀺, 𑀅𑀫𑁆𑀳𑁂𑀳𑀺 𑀞𑀧𑁂𑀢𑁆𑀯𑀸 𑀅𑀲𑁆𑀲𑀫𑀁𑀲𑀁 𑀅𑀜𑁆𑀜𑀁 𑀅𑀔𑀸𑀤𑀺𑀢𑀧𑀼𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀅𑀲𑁆𑀲𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. ‘‘𑀓𑀳𑀁 𑀧𑀦, 𑀲𑀫𑁆𑀫, 𑀅𑀲𑁆𑀲𑀸 𑀳𑁄𑀦𑁆𑀢𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀬𑀁 𑀦𑀤𑀻𑀢𑀻𑀭𑁂’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀲𑁆𑀲𑀸𑀦𑀁 𑀦𑀤𑀺𑀬𑀸 𑀦𑁆𑀳𑀸𑀦𑀯𑁂𑀮𑀸𑀬𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀅𑀲𑁆𑀲𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀯𑁂𑀕𑁂𑀦 𑀅𑀢𑁆𑀢𑀦𑁄 𑀕𑀼𑀳𑀸𑀤𑁆𑀯𑀸𑀭𑀫𑁂𑀯 𑀆𑀕𑀢𑁄. 𑀅𑀣𑀲𑁆𑀲 𑀧𑀺𑀢𑀸 𑀅𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 ‘‘𑀢𑀸𑀢, 𑀅𑀲𑁆𑀲𑀸 𑀦𑀸𑀫 𑀭𑀸𑀚𑀪𑁄𑀕𑀸, 𑀭𑀸𑀚𑀸𑀦𑁄 𑀘 𑀦𑀸𑀫 𑀅𑀦𑁂𑀓𑀫𑀸𑀬𑀸 𑀓𑀼𑀲𑀮𑁂𑀳𑀺 ¶ 𑀥𑀦𑀼𑀕𑁆𑀕𑀳𑁂𑀳𑀺 𑀯𑀺𑀚𑁆𑀛𑀸𑀧𑁂𑀦𑁆𑀢𑀺, 𑀅𑀲𑁆𑀲𑀫𑀁𑀲𑀔𑀸𑀤𑀦𑀲𑀻𑀳𑀸 𑀦𑀸𑀫 𑀤𑀻𑀖𑀸𑀬𑀼𑀓𑀸 𑀦 𑀳𑁄𑀦𑁆𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀅𑀲𑁆𑀲𑀁 𑀕𑀡𑁆𑀳𑀻’’𑀢𑀺 𑀆𑀳. 𑀲𑁄 𑀧𑀺𑀢𑀼 𑀯𑀘𑀦𑀁 𑀅𑀓𑀢𑁆𑀯𑀸 𑀕𑀡𑁆𑀳𑀢𑁂𑀯. ‘‘𑀲𑀻𑀳𑁄 𑀅𑀲𑁆𑀲𑁂 𑀕𑀡𑁆𑀳𑀸𑀢𑀻’’𑀢𑀺 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀦𑁆𑀢𑁄𑀦𑀕𑀭𑁂𑀬𑁂𑀯 𑀅𑀲𑁆𑀲𑀸𑀦𑀁 𑀧𑁄𑀓𑁆𑀔𑀭𑀡𑀺𑀁 𑀓𑀸𑀭𑀸𑀧𑁂𑀲𑀺. 𑀢𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀬𑁂𑀯. 𑀭𑀸𑀚𑀸 𑀅𑀲𑁆𑀲𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀅𑀦𑁆𑀢𑁄𑀲𑀸𑀮𑀸𑀬𑀫𑁂𑀯 𑀢𑀺𑀡𑁄𑀤𑀓𑀁 𑀤𑀸𑀧𑁂𑀲𑀺. 𑀲𑀻𑀳𑁄 𑀧𑀸𑀓𑀸𑀭𑀫𑀢𑁆𑀣𑀓𑁂𑀦 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀸𑀮𑀸𑀢𑁄𑀧𑀺 𑀕𑀡𑁆𑀳𑀺𑀬𑁂𑀯.

𑀭𑀸𑀚𑀸 𑀏𑀓𑀁 𑀅𑀓𑁆𑀔𑀡𑀯𑁂𑀥𑀺𑀁 𑀥𑀦𑀼𑀕𑁆𑀕𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀲𑀺 𑀢𑀸𑀢, 𑀲𑀻𑀳𑀁 𑀯𑀺𑀚𑁆𑀛𑀺𑀢𑀼’’𑀦𑁆𑀢𑀺 𑀆𑀳. 𑀲𑁄 ‘‘𑀲𑀓𑁆𑀓𑁄𑀫𑀻’’𑀢𑀺 𑀯𑀢𑁆𑀯𑀸 𑀧𑀸𑀓𑀸𑀭𑀁 𑀦𑀺𑀲𑁆𑀲𑀸𑀬 𑀲𑀻𑀳𑀲𑁆𑀲 𑀆𑀕𑀫𑀦𑀫𑀕𑁆𑀕𑁂 𑀅𑀝𑁆𑀝𑀓𑀁 𑀓𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀻𑀳𑁄 𑀆𑀕𑀦𑁆𑀢𑁆𑀯𑀸 𑀩𑀳𑀺𑀲𑀼𑀲𑀸𑀦𑁂 𑀲𑀺𑀗𑁆𑀕𑀸𑀮𑀁 𑀞𑀧𑁂𑀢𑁆𑀯𑀸 𑀅𑀲𑁆𑀲𑀕𑀳𑀡𑀢𑁆𑀣𑀸𑀬 𑀦𑀕𑀭𑀁 𑀧𑀓𑁆𑀔𑀦𑁆𑀤𑀺. 𑀥𑀦𑀼𑀕𑁆𑀕𑀳𑁄 𑀆𑀕𑀫𑀦𑀓𑀸𑀮𑁂 ‘‘𑀅𑀢𑀺𑀢𑀺𑀔𑀺𑀡𑁄 𑀯𑁂𑀕𑁄’’𑀢𑀺 𑀲𑀻𑀳𑀁 𑀅𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑁆𑀲𑀁 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 𑀕𑀭𑀼𑀪𑀸𑀭𑀢𑀸𑀬 𑀑𑀮𑀻𑀦𑀯𑁂𑀕𑀁 𑀲𑀻𑀳𑀁 𑀢𑀺𑀔𑀺𑀡𑁂𑀦 𑀦𑀸𑀭𑀸𑀘𑁂𑀦 𑀧𑀘𑁆𑀙𑀸𑀪𑀸𑀕𑁂 𑀯𑀺𑀚𑁆𑀛𑀺. 𑀦𑀸𑀭𑀸𑀘𑁄 𑀧𑀼𑀭𑀺𑀫𑀓𑀸𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀲𑀻𑀳𑁄 ¶ ‘‘𑀯𑀺𑀤𑁆𑀥𑁄𑀲𑁆𑀫𑀻’’𑀢𑀺 𑀯𑀺𑀭𑀯𑀺. 𑀥𑀦𑀼𑀕𑁆𑀕𑀳𑁄 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑀦𑀺 𑀯𑀺𑀬 𑀚𑀺𑀬𑀁 𑀧𑁄𑀣𑁂𑀲𑀺. 𑀲𑀺𑀗𑁆𑀕𑀸𑀮𑁄 𑀲𑀻𑀳𑀲𑁆𑀲 𑀘 𑀚𑀺𑀬𑀸𑀬 𑀘 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀲𑀳𑀸𑀬𑁄 𑀫𑁂 𑀥𑀦𑀼𑀕𑁆𑀕𑀳𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀫𑀢𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀇𑀤𑀸𑀦𑀺 𑀫𑀫 𑀧𑀓𑀢𑀺𑀬𑀸 𑀯𑀲𑀦𑀯𑀦𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑀸𑀯 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮.

‘‘𑀬𑀣𑀸 𑀘𑀸𑀧𑁄 𑀦𑀺𑀦𑁆𑀦𑀫𑀢𑀺, 𑀚𑀺𑀬𑀸 𑀘𑀸𑀧𑀺 𑀦𑀺𑀓𑀽𑀚𑀢𑀺;

𑀳𑀜𑁆𑀜𑀢𑁂 𑀦𑀽𑀦 𑀫𑀦𑁄𑀚𑁄, 𑀫𑀺𑀕𑀭𑀸𑀚𑀸 𑀲𑀔𑀸 𑀫𑀫.

𑁯.

‘‘𑀳𑀦𑁆𑀤 ¶ 𑀤𑀸𑀦𑀺 𑀯𑀦𑀦𑁆𑀢𑀸𑀦𑀺, 𑀧𑀓𑁆𑀓𑀫𑀸𑀫𑀺 𑀬𑀣𑀸𑀲𑀼𑀔𑀁;

𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸’’𑀢𑀺.

𑀢𑀢𑁆𑀣 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦𑁂𑀯 𑀘𑀸𑀧𑁄 𑀦𑀺𑀦𑁆𑀦𑀫𑀢𑀺. 𑀳𑀜𑁆𑀜𑀢𑁂 𑀦𑀽𑀦𑀸𑀢𑀺 𑀦𑀽𑀦 𑀳𑀜𑁆𑀜𑀢𑀺. 𑀦𑁂𑀢𑀸𑀤𑀺𑀲𑀸𑀢𑀺 𑀏𑀯𑀭𑀽𑀧𑀸 𑀫𑀢𑀓𑀸 𑀲𑀳𑀸𑀬𑀸 𑀦𑀸𑀫 𑀦 𑀳𑁄𑀦𑁆𑀢𑀺. 𑀮𑀩𑁆𑀪𑀸 𑀫𑁂𑀢𑀺 𑀚𑀻𑀯𑀢𑁄 𑀫𑀫 𑀲𑀳𑀸𑀬𑁄 𑀦𑀸𑀫 𑀲𑀓𑁆𑀓𑀸 𑀮𑀤𑁆𑀥𑀼𑀁.

𑀲𑀻𑀳𑁄𑀧𑀺 𑀏𑀓𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀅𑀲𑁆𑀲𑀁 𑀕𑀼𑀳𑀸𑀤𑁆𑀯𑀸𑀭𑁂 𑀧𑀸𑀢𑁂𑀢𑁆𑀯𑀸 𑀲𑀬𑀫𑁆𑀧𑀺 𑀫𑀭𑀺𑀢𑁆𑀯𑀸 𑀧𑀢𑀺. 𑀅𑀣𑀲𑁆𑀲 𑀜𑀸𑀢𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀧𑀳𑀸𑀭𑀫𑀼𑀔𑁂𑀳𑀺 ¶ 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀁 𑀧𑀸𑀧𑀚𑀦𑀲𑁂𑀯𑀺𑀢𑀸𑀬 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀁 𑀅𑀤𑁆𑀤𑀲𑀁𑀲𑀼, 𑀤𑀺𑀲𑁆𑀯𑀸 𑀘𑀲𑁆𑀲 𑀫𑀸𑀢𑀸 𑀧𑀺𑀢𑀸 𑀪𑀕𑀺𑀦𑀻 𑀧𑀚𑀸𑀧𑀢𑀻𑀢𑀺 𑀧𑀝𑀺𑀧𑀸𑀝𑀺𑀬𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀪𑀸𑀲𑀺𑀁𑀲𑀼 𑁋

𑁧𑁦.

‘‘𑀦 𑀧𑀸𑀧𑀚𑀦𑀲𑀁𑀲𑁂𑀯𑀻, 𑀅𑀘𑁆𑀘𑀦𑁆𑀢𑀁 𑀲𑀼𑀔𑀫𑁂𑀥𑀢𑀺;

𑀫𑀦𑁄𑀚𑀁 𑀧𑀲𑁆𑀲 𑀲𑁂𑀫𑀸𑀦𑀁, 𑀕𑀺𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻.

𑁧𑁧.

‘‘𑀦 𑀧𑀸𑀧𑀲𑀫𑁆𑀧𑀯𑀗𑁆𑀓𑁂𑀦, 𑀫𑀸𑀢𑀸 𑀧𑀼𑀢𑁆𑀢𑁂𑀦 𑀦𑀦𑁆𑀤𑀢𑀺;

𑀫𑀦𑁄𑀚𑀁 𑀧𑀲𑁆𑀲 𑀲𑁂𑀫𑀸𑀦𑀁, 𑀅𑀘𑁆𑀙𑀦𑁆𑀦𑀁 𑀲𑀫𑁆𑀳𑀺 𑀮𑁄𑀳𑀺𑀢𑁂.

𑁧𑁨.

‘‘𑀏𑀯𑀫𑀸𑀧𑀚𑁆𑀚𑀢𑁂 𑀧𑁄𑀲𑁄, 𑀧𑀸𑀧𑀺𑀬𑁄 𑀘 𑀦𑀺𑀕𑀘𑁆𑀙𑀢𑀺;

𑀬𑁄 𑀯𑁂 𑀳𑀺𑀢𑀸𑀦𑀁 𑀯𑀘𑀦𑀁, 𑀦 𑀓𑀭𑁄𑀢𑀺 𑀅𑀢𑁆𑀣𑀤𑀲𑁆𑀲𑀺𑀦𑀁.

𑁧𑁩.

‘‘𑀏𑀯𑀜𑁆𑀘 𑀲𑁄 𑀳𑁄𑀢𑀺 𑀢𑀢𑁄 𑀘 𑀧𑀸𑀧𑀺𑀬𑁄, 𑀬𑁄 𑀉𑀢𑁆𑀢𑀫𑁄 𑀅𑀥𑀫𑀚𑀦𑀽𑀧𑀲𑁂𑀯𑀻;

𑀧𑀲𑁆𑀲𑀼𑀢𑁆𑀢𑀫𑀁 ¶ 𑀅𑀥𑀫𑀚𑀦𑀽𑀧𑀲𑁂𑀯𑀺𑀢𑀁, 𑀫𑀺𑀕𑀸𑀥𑀺𑀧𑀁 𑀲𑀭𑀯𑀭𑀯𑁂𑀕𑀦𑀺𑀤𑁆𑀥𑀼𑀢’’𑀦𑁆𑀢𑀺.

𑀢𑀢𑁆𑀣 𑀅𑀘𑁆𑀘𑀦𑁆𑀢𑀁 𑀲𑀼𑀔𑀫𑁂𑀥𑀢𑀻𑀢𑀺 𑀦 𑀘𑀺𑀭𑀁 𑀲𑀼𑀔𑀁 𑀮𑀪𑀢𑀺. 𑀕𑀺𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻𑀢𑀺 𑀅𑀬𑀁 𑀏𑀯𑀭𑀽𑀧𑀸 𑀕𑀺𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻𑀢𑀺 𑀕𑀭𑀳𑀦𑁆𑀢𑁄 𑀆𑀳. 𑀧𑀸𑀧𑀲𑀫𑁆𑀧𑀯𑀗𑁆𑀓𑁂𑀦𑀸𑀢𑀺 𑀧𑀸𑀧𑁂𑀲𑀼 𑀲𑀫𑁆𑀧𑀯𑀗𑁆𑀓𑁂𑀦 𑀧𑀸𑀧𑀲𑀳𑀸𑀬𑁂𑀦. 𑀅𑀘𑁆𑀙𑀦𑁆𑀦𑀦𑁆𑀢𑀺 𑀦𑀺𑀫𑀼𑀕𑁆𑀕𑀁. 𑀧𑀸𑀧𑀺𑀬𑁄 𑀘 𑀦𑀺𑀕𑀘𑁆𑀙𑀢𑀻𑀢𑀺 𑀧𑀸𑀧𑀜𑁆𑀘 𑀯𑀺𑀦𑁆𑀤𑀢𑀺. 𑀳𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑀓𑀸𑀫𑀸𑀦𑀁. 𑀅𑀢𑁆𑀣𑀤𑀲𑁆𑀲𑀺𑀦𑀦𑁆𑀢𑀺 𑀅𑀦𑀸𑀕𑀢𑀅𑀢𑁆𑀣𑀁 𑀧𑀲𑁆𑀲𑀦𑁆𑀢𑀸𑀦𑀁. 𑀧𑀸𑀧𑀺𑀬𑁄𑀢𑀺 𑀧𑀸𑀧𑀢𑀭𑁄. 𑀅𑀥𑀫𑀚𑀦𑀽𑀧𑀲𑁂𑀯𑀻𑀢𑀺 𑀅𑀥𑀫𑀚𑀦𑀁 𑀉𑀧𑀲𑁂𑀯𑀻. 𑀉𑀢𑁆𑀢𑀫𑀦𑁆𑀢𑀺 𑀲𑀭𑀻𑀭𑀩𑀮𑁂𑀦 𑀚𑁂𑀝𑁆𑀞𑀓𑀁.

𑀧𑀘𑁆𑀙𑀺𑀫𑀸 ¶ 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑁋

𑁧𑁪.

‘‘𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻, 𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀕𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁, 𑀢𑀲𑁆𑀫𑀸𑀢𑁆𑀢𑀦𑀸 𑀉𑀢𑁆𑀢𑀭𑀺𑀢𑀭𑀁 𑀪𑀚𑁂𑀣𑀸’’𑀢𑀺.

𑀢𑀢𑁆𑀣 𑀦𑀺𑀳𑀻𑀬𑀢𑀻𑀢𑀺 𑀪𑀺𑀓𑁆𑀔𑀯𑁂, 𑀦𑀺𑀳𑀻𑀦𑀲𑁂𑀯𑀻 𑀦𑀸𑀫 𑀫𑀦𑁄𑀚𑁄 𑀲𑀻𑀳𑁄 𑀯𑀺𑀬 𑀦𑀺𑀳𑀻𑀬𑀢𑀺 𑀧𑀭𑀺𑀳𑀸𑀬𑀢𑀺 𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺. 𑀢𑀼𑀮𑁆𑀬𑀲𑁂𑀯𑀻𑀢𑀺 𑀲𑀻𑀮𑀸𑀤𑀻𑀳𑀺 𑀅𑀢𑁆𑀢𑀦𑀸 ¶ 𑀲𑀤𑀺𑀲𑀁 𑀲𑁂𑀯𑀫𑀸𑀦𑁄 𑀦 𑀳𑀸𑀬𑀢𑀺, 𑀯𑀟𑁆𑀠𑀺𑀬𑁂𑀯 𑀧𑀦𑀲𑁆𑀲 𑀳𑁄𑀢𑀺. 𑀲𑁂𑀝𑁆𑀞𑀫𑀼𑀧𑀕𑀫𑀦𑁆𑀢𑀺 𑀲𑀻𑀮𑀸𑀤𑀻𑀳𑀺 𑀉𑀢𑁆𑀢𑀭𑀺𑀢𑀭𑀁𑀬𑁂𑀯 𑀉𑀧𑀕𑀘𑁆𑀙𑀦𑁆𑀢𑁄. 𑀉𑀤𑁂𑀢𑀺 𑀔𑀺𑀧𑁆𑀧𑀦𑁆𑀢𑀺 𑀲𑀻𑀖𑀫𑁂𑀯 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀉𑀤𑁂𑀢𑀺, 𑀯𑀼𑀤𑁆𑀥𑀺𑀁 𑀉𑀧𑀕𑀘𑁆𑀙𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀯𑀺𑀧𑀓𑁆𑀔𑀲𑁂𑀯𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀲𑀺𑀗𑁆𑀕𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀫𑀦𑁄𑀚𑁄 𑀯𑀺𑀧𑀓𑁆𑀔𑀲𑁂𑀯𑀓𑁄, 𑀪𑀕𑀺𑀦𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀪𑀭𑀺𑀬𑀸 𑀔𑁂𑀫𑀸 𑀪𑀺𑀓𑁆𑀔𑀼𑀦𑀻, 𑀫𑀸𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀧𑀺𑀢𑀸 𑀲𑀻𑀳𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀦𑁄𑀚𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁩𑁯𑁮] 𑁩. 𑀲𑀼𑀢𑀦𑀼𑀚𑀸𑀢𑀓𑀯𑀡𑁆𑀡𑀦𑀸

𑀭𑀸𑀚𑀸 𑀢𑁂 𑀪𑀢𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀤𑀼𑀕𑁆𑀕𑀢𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀢𑀦𑀽𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀪𑀢𑀺𑀁 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑁆𑀯𑀸 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀫𑀸𑀢𑀭𑀁 𑀧𑁄𑀲𑁂𑀢𑀺. 𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀫𑀺𑀕𑀯𑀺𑀢𑁆𑀢𑀓𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀬𑀲𑁆𑀲 𑀞𑀺𑀢𑀝𑁆𑀞𑀸𑀦𑁂𑀦 𑀫𑀺𑀕𑁄 𑀧𑀮𑀸𑀬𑀢𑀺, 𑀲𑁄 𑀇𑀫𑀁 𑀦𑀸𑀫 𑀚𑀺𑀢𑁄’’𑀢𑀺 𑀲𑀩𑁆𑀩𑁂𑀲𑀁 𑀆𑀭𑁄𑀘𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀥𑀼𑀯𑀫𑀕𑁆𑀕𑀝𑁆𑀞𑀸𑀦𑁂 𑀓𑁄𑀝𑁆𑀞𑀓𑀁 𑀙𑀸𑀤𑁂𑀢𑁆𑀯𑀸 𑀅𑀤𑀁𑀲𑀼. 𑀫𑀦𑀼𑀲𑁆𑀲𑁂𑀳𑀺 𑀫𑀺𑀕𑀸𑀦𑀁 𑀯𑀲𑀦𑀝𑁆𑀞𑀸𑀦𑀸𑀦𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀦𑁆𑀦𑀸𑀤𑁂𑀦𑁆𑀢𑁂𑀳𑀺 𑀉𑀝𑁆𑀞𑀸𑀧𑀺𑀢𑁂𑀲𑀼 𑀫𑀺𑀕𑁂𑀲𑀼 𑀏𑀓𑁄 𑀏𑀡𑀺𑀫𑀺𑀕𑁄 𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑀁 𑀧𑀝𑀺𑀧𑀚𑁆𑀚𑀺. 𑀭𑀸𑀚𑀸 ‘‘𑀢𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀲𑀭𑀁 𑀔𑀺𑀧𑀺 ¶ . 𑀉𑀕𑁆𑀕𑀳𑀺𑀢𑀫𑀸𑀬𑁄 𑀫𑀺𑀕𑁄 𑀲𑀭𑀁 𑀫𑀳𑀸𑀨𑀸𑀲𑀼𑀓𑀸𑀪𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑀁 𑀜𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀭𑁂𑀦 𑀯𑀺𑀤𑁆𑀥𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀢𑀺. 𑀭𑀸𑀚𑀸 ‘‘𑀫𑀺𑀕𑁄 𑀫𑁂 𑀯𑀺𑀤𑁆𑀥𑁄’’𑀢𑀺 𑀕𑀳𑀡𑀢𑁆𑀣𑀸𑀬 𑀥𑀸𑀯𑀺. 𑀫𑀺𑀕𑁄 𑀉𑀝𑁆𑀞𑀸𑀬 𑀯𑀸𑀢𑀯𑁂𑀕𑁂𑀦 𑀧𑀮𑀸𑀬𑀺, 𑀅𑀫𑀘𑁆𑀘𑀸𑀤𑀬𑁄 𑀭𑀸𑀚𑀸𑀦𑀁 𑀅𑀯𑀳𑀲𑀺𑀁𑀲𑀼. 𑀲𑁄 𑀫𑀺𑀕𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀓𑀺𑀮𑀦𑁆𑀢𑀓𑀸𑀮𑁂 𑀔𑀕𑁆𑀕𑁂𑀦 𑀤𑁆𑀯𑀺𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀤𑀡𑁆𑀟𑀓𑁂 𑀮𑀕𑁆𑀕𑀺𑀢𑁆𑀯𑀸 ¶ 𑀓𑀸𑀚𑀁 𑀯𑀳𑀦𑁆𑀢𑁄 𑀯𑀺𑀬 𑀆𑀕𑀘𑁆𑀙𑀦𑁆𑀢𑁄 ‘‘𑀣𑁄𑀓𑀁 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀲𑀫𑀻𑀧𑁂 𑀞𑀺𑀢𑀁 𑀯𑀝𑀭𑀼𑀓𑁆𑀔𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀢𑀲𑁆𑀫𑀺𑀁 𑀧𑀦 𑀯𑀝𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑁄 𑀫𑀖𑀤𑁂𑀯𑁄 𑀦𑀸𑀫 𑀬𑀓𑁆𑀔𑁄 𑀢𑀢𑁆𑀣 𑀧𑀯𑀺𑀝𑁆𑀞𑁂 𑀯𑁂𑀲𑁆𑀲𑀯𑀡𑀲𑁆𑀲 𑀲𑀦𑁆𑀢𑀺𑀓𑀸 𑀔𑀸𑀤𑀺𑀢𑀼𑀁 𑀮𑀪𑀺. 𑀲𑁄 𑀭𑀸𑀚𑀸𑀦𑀁 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀁 ‘‘𑀢𑀺𑀝𑁆𑀞 𑀪𑀓𑁆𑀔𑁄𑀲𑀺 𑀫𑁂’’𑀢𑀺 𑀳𑀢𑁆𑀣𑁂 𑀕𑀡𑁆𑀳𑀺. ‘‘𑀢𑁆𑀯𑀁 𑀓𑁄𑀦𑀸𑀫𑁄𑀲𑀻’’𑀢𑀺? ‘‘𑀅𑀳𑀁 𑀇𑀥 𑀦𑀺𑀩𑁆𑀩𑀢𑁆𑀢𑀬𑀓𑁆𑀔𑁄, 𑀇𑀫𑀁 𑀞𑀸𑀦𑀁 𑀧𑀯𑀺𑀝𑁆𑀞𑀓𑁂 𑀔𑀸𑀤𑀺𑀢𑀼𑀁 𑀮𑀪𑀸𑀫𑀻’’𑀢𑀺. 𑀭𑀸𑀚𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 ‘‘𑀓𑀺𑀁 𑀅𑀚𑁆𑀚𑁂𑀯 𑀫𑀁 𑀔𑀸𑀤𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀦𑀺𑀩𑀤𑁆𑀥𑀁 𑀔𑀸𑀤𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀮𑀪𑀦𑁆𑀢𑁄 𑀦𑀺𑀩𑀤𑁆𑀥𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 ‘‘𑀇𑀫𑀁 𑀅𑀚𑁆𑀚 𑀫𑀺𑀕𑀁 𑀔𑀸𑀤𑀺𑀢𑁆𑀯𑀸 𑀫𑀁 𑀯𑀺𑀲𑁆𑀲𑀚𑁆𑀚𑁂𑀳𑀺, 𑀅𑀳𑀁 𑀢𑁂 𑀲𑁆𑀯𑁂 𑀧𑀝𑁆𑀞𑀸𑀬 𑀏𑀓𑀸𑀬 𑀪𑀢𑁆𑀢𑀧𑀸𑀢𑀺𑀬𑀸 𑀲𑀤𑁆𑀥𑀺𑀁 𑀏𑀓𑀁 𑀫𑀦𑀼𑀲𑁆𑀲𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀅𑀧𑁂𑀲𑀺𑀢𑀤𑀺𑀯𑀲𑁂 𑀢𑀜𑁆𑀜𑁂𑀯 ¶ 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑀁 𑀩𑀸𑀭𑀸𑀡𑀲𑀺𑀭𑀸𑀚𑀸, 𑀫𑀬𑁆𑀳𑀁 𑀅𑀯𑀺𑀚𑁆𑀚𑀫𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀬𑀓𑁆𑀔𑁄 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀫𑀢𑁆𑀣𑀁 𑀏𑀓𑀲𑁆𑀲 𑀅𑀢𑁆𑀣𑀘𑀭𑀓𑀲𑁆𑀲 𑀅𑀫𑀘𑁆𑀘𑀲𑁆𑀲 𑀓𑀣𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀓𑀢𑁄, 𑀤𑁂𑀯𑀸’’𑀢𑀺? ‘‘𑀦 𑀓𑀢𑁄’’𑀢𑀺. ‘‘𑀅𑀬𑀼𑀢𑁆𑀢𑀁 𑀯𑁄 𑀓𑀢𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀩𑀳𑀽 𑀩𑀦𑁆𑀥𑀦𑀸𑀕𑀸𑀭𑁂 𑀫𑀦𑀼𑀲𑁆𑀲𑀸’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁 𑀏𑀢𑀁 𑀓𑀫𑁆𑀫𑀁 𑀓𑀭, 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀤𑁂𑀳𑀻’’𑀢𑀺.

𑀅𑀫𑀘𑁆𑀘𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀩𑀦𑁆𑀥𑀦𑀸𑀕𑀸𑀭𑀢𑁄 𑀫𑀦𑀼𑀲𑁆𑀲𑀁 𑀦𑀻𑀳𑀭𑀺𑀢𑁆𑀯𑀸 𑀪𑀢𑁆𑀢𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀬𑀓𑁆𑀔𑀲𑁆𑀲 𑀧𑁂𑀲𑁂𑀲𑀺. 𑀬𑀓𑁆𑀔𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀦𑀼𑀲𑁆𑀲𑀁 𑀔𑀸𑀤𑀢𑀺. 𑀅𑀧𑀭𑀪𑀸𑀕𑁂 𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀦𑀺𑀫𑁆𑀫𑀦𑀼𑀲𑁆𑀲𑀸𑀦𑀺 𑀚𑀸𑀢𑀸𑀦𑀺. 𑀭𑀸𑀚𑀸 𑀪𑀢𑁆𑀢𑀳𑀸𑀭𑀓𑀁 𑀅𑀮𑀪𑀦𑁆𑀢𑁄 𑀫𑀭𑀡𑀪𑀬𑁂𑀦 𑀓𑀫𑁆𑀧𑀺. 𑀅𑀣 𑀦𑀁 𑀅𑀫𑀘𑁆𑀘𑁄 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀤𑁂𑀯, 𑀚𑀻𑀯𑀺𑀢𑀸𑀲𑀸𑀢𑁄 𑀥𑀦𑀸𑀲𑀸𑀯 𑀩𑀮𑀯𑀢𑀭𑀸, 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀞𑀧𑁂𑀢𑁆𑀯𑀸 ‘𑀓𑁄 𑀇𑀫𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀬𑀓𑁆𑀔𑀲𑁆𑀲 𑀪𑀢𑁆𑀢𑀁 𑀆𑀤𑀸𑀬 𑀕𑀫𑀺𑀲𑁆𑀲𑀢𑀻’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀫𑀸’’𑀢𑀺 𑀯𑀢𑁆𑀯𑀸 𑀢𑀣𑀸 𑀓𑀸𑀭𑁂𑀲𑀺. 𑀅𑀣 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀪𑀢𑀺𑀬𑀸 𑀫𑀸𑀲𑀓𑀟𑁆𑀠𑀫𑀸𑀲𑀓𑀁 𑀲𑀗𑁆𑀖𑀭𑀺𑀢𑁆𑀯𑀸 𑀓𑀺𑀘𑁆𑀙𑁂𑀦 𑀫𑀸𑀢𑀭𑀁 𑀧𑁄𑀲𑁂𑀫𑀺, 𑀇𑀫𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀫𑀸𑀢𑀼 𑀤𑀢𑁆𑀯𑀸 𑀬𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀺, 𑀲𑀘𑁂 𑀬𑀓𑁆𑀔𑀁 𑀤𑀫𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀫𑀸𑀢𑀸 𑀫𑁂 𑀲𑀼𑀔𑀁 𑀚𑀻𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀫𑀢𑁆𑀣𑀁 𑀫𑀸𑀢𑀼 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀮𑀁 𑀢𑀸𑀢, 𑀦 𑀫𑀫 𑀅𑀢𑁆𑀣𑁄 𑀥𑀦𑁂𑀦𑀸’’𑀢𑀺 𑀤𑁆𑀯𑁂 𑀯𑀸𑀭𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀢𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 ‘‘𑀆𑀳𑀭𑀣, 𑀅𑀬𑁆𑀬, 𑀲𑀳𑀲𑁆𑀲𑀁, 𑀅𑀳𑀁 𑀪𑀢𑁆𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀫𑀸𑀢𑀼 𑀤𑀢𑁆𑀯𑀸 ‘‘𑀅𑀫𑁆𑀫 ¶ , 𑀫𑀸 𑀘𑀺𑀦𑁆𑀢𑀬𑀺 ¶ , 𑀅𑀳𑀁 𑀬𑀓𑁆𑀔𑀁 𑀤𑀫𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀚𑁆𑀚𑁂𑀯 𑀢𑀯 𑀅𑀲𑁆𑀲𑀼𑀓𑀺𑀮𑀺𑀦𑁆𑀦𑀫𑀼𑀔𑀁 𑀳𑀸𑀲𑀸𑀧𑁂𑀦𑁆𑀢𑁄𑀯 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀢𑁄 𑀭𑀜𑁆𑀜𑀸 ‘‘𑀢𑀸𑀢, 𑀢𑁆𑀯𑀁 𑀪𑀢𑁆𑀢𑀁 𑀳𑀭𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀤𑁂𑀯𑀸’’𑀢𑀺 𑀆𑀳. ‘‘𑀓𑀺𑀁 𑀢𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁 ¶ 𑀲𑀼𑀯𑀡𑁆𑀡𑀧𑀸𑀤𑀼𑀓𑀸, 𑀤𑁂𑀯𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀤𑁂𑀯, 𑀲𑁄 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀭𑀼𑀓𑁆𑀔𑀫𑀽𑀮𑁂 𑀪𑀽𑀫𑀺𑀬𑀁 𑀞𑀺𑀢𑀓𑁂 𑀔𑀸𑀤𑀺𑀢𑀼𑀁 𑀮𑀪𑀢𑀺, 𑀅𑀳𑀁 𑀏𑀢𑀲𑁆𑀲 𑀲𑀦𑁆𑀢𑀓𑀪𑀽𑀫𑀺𑀬𑀁 𑀅𑀝𑁆𑀞𑀢𑁆𑀯𑀸 𑀧𑀸𑀤𑀼𑀓𑀸𑀲𑀼 𑀞𑀲𑁆𑀲𑀸𑀫𑀻’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀙𑀢𑁆𑀢𑀁, 𑀤𑁂𑀯𑀸’’𑀢𑀺. ‘‘𑀇𑀤𑀁 𑀓𑀺𑀫𑀢𑁆𑀣𑀸𑀬𑀸’’𑀢𑀺? ‘‘𑀤𑁂𑀯, 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀞𑀺𑀢𑀓𑁂 𑀔𑀸𑀤𑀺𑀢𑀼𑀁 𑀮𑀪𑀢𑀺, 𑀅𑀳𑀁 𑀢𑀲𑁆𑀲 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀅𑀝𑁆𑀞𑀢𑁆𑀯𑀸 𑀙𑀢𑁆𑀢𑀘𑁆𑀙𑀸𑀬𑀸𑀬 𑀞𑀲𑁆𑀲𑀸𑀫𑀻’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀔𑀕𑁆𑀕𑀁, 𑀤𑁂𑀯𑀸’’𑀢𑀺. ‘‘𑀇𑀫𑀺𑀦𑀸 𑀓𑁄 𑀅𑀢𑁆𑀣𑁄’’𑀢𑀺? ‘‘𑀤𑁂𑀯, 𑀅𑀫𑀦𑀼𑀲𑁆𑀲𑀸𑀧𑀺 𑀆𑀯𑀼𑀥𑀳𑀢𑁆𑀣𑀸𑀦𑀁 𑀪𑀸𑀬𑀦𑁆𑀢𑀺𑀬𑁂𑀯𑀸’’𑀢𑀺. ‘‘𑀅𑀜𑁆𑀜𑀁 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀪𑀼𑀜𑁆𑀚𑀦𑀓𑀪𑀢𑁆𑀢𑀁 𑀤𑁂𑀣, 𑀤𑁂𑀯𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸, 𑀢𑀸𑀢𑀸’’𑀢𑀺? ‘‘𑀤𑁂𑀯, 𑀫𑀸𑀤𑀺𑀲𑀲𑁆𑀲 𑀦𑀸𑀫 𑀧𑀡𑁆𑀟𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀢𑁆𑀢𑀺𑀓𑀧𑀸𑀢𑀺𑀬𑀸 𑀮𑀽𑀔𑀪𑁄𑀚𑀦𑀁 𑀳𑀭𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺. ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀭𑀸𑀚𑀸 𑀲𑀩𑁆𑀩𑀁 𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂 𑀧𑀝𑀺𑀧𑀸𑀤𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺𑀢𑁆𑀣, 𑀅𑀚𑁆𑀚𑀸𑀳𑀁 𑀬𑀓𑁆𑀔𑀁 𑀤𑀫𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑁄𑀢𑁆𑀣𑀺𑀁 𑀓𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀉𑀧𑀓𑀭𑀡𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀭𑀼𑀓𑁆𑀔𑀲𑁆𑀲𑀸𑀯𑀺𑀤𑀽𑀭𑁂 𑀞𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀤𑀼𑀓𑀁 𑀆𑀭𑀼𑀬𑁆𑀳 𑀔𑀕𑁆𑀕𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀫𑀢𑁆𑀣𑀓𑁂 𑀓𑀢𑁆𑀯𑀸 𑀓𑀜𑁆𑀘𑀦𑀧𑀸𑀢𑀺𑀬𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀬𑀸𑀲𑀺. 𑀬𑀓𑁆𑀔𑁄 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀦 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀆𑀕𑀫𑀦𑀦𑀺𑀬𑀸𑀫𑁂𑀦 𑀏𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀼𑀓𑁆𑀔𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀅𑀲𑀺𑀢𑀼𑀡𑁆𑀟𑁂𑀦 𑀪𑀢𑁆𑀢𑀧𑀸𑀢𑀺𑀁 𑀅𑀦𑁆𑀢𑁄𑀙𑀸𑀬𑀸𑀬 𑀓𑀭𑀺𑀢𑁆𑀯𑀸 𑀙𑀸𑀬𑀸𑀬 𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳.

𑁧𑁫.

‘‘𑀭𑀸𑀚𑀸 𑀢𑁂 𑀪𑀢𑁆𑀢𑀁 𑀧𑀸𑀳𑁂𑀲𑀺, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀫𑀖𑀤𑁂𑀯𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑁂, 𑀏𑀳𑀺 𑀦𑀺𑀓𑁆𑀔𑀫𑁆𑀫 𑀪𑀼𑀜𑁆𑀚𑀲𑀽’’𑀢𑀺.

𑀢𑀢𑁆𑀣 ¶ 𑀧𑀸𑀳𑁂𑀲𑀻𑀢𑀺 𑀧𑀳𑀺𑀡𑀺. 𑀫𑀖𑀤𑁂𑀯𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑁂𑀢𑀺 𑀫𑀖𑀤𑁂𑀯𑁄𑀢𑀺 𑀯𑀝𑀭𑀼𑀓𑁆𑀔𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑁂𑀢𑀺 𑀤𑁂𑀯𑀢𑀁 𑀆𑀮𑀧𑀢𑀺.

𑀢𑀁 ¶ ¶ 𑀲𑀼𑀢𑁆𑀯𑀸 𑀬𑀓𑁆𑀔𑁄 ‘‘𑀇𑀫𑀁 𑀧𑀼𑀭𑀺𑀲𑀁 𑀯𑀜𑁆𑀘𑁂𑀢𑁆𑀯𑀸 𑀅𑀦𑁆𑀢𑁄𑀙𑀸𑀬𑀸𑀬 𑀧𑀯𑀺𑀝𑁆𑀞𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬.

‘‘𑀏𑀳𑀺 𑀫𑀸𑀡𑀯 𑀑𑀭𑁂𑀦, 𑀪𑀺𑀓𑁆𑀔𑀫𑀸𑀤𑀸𑀬 𑀲𑀽𑀧𑀺𑀢𑀁;

𑀢𑁆𑀯𑀜𑁆𑀘 𑀫𑀸𑀡𑀯 𑀪𑀺𑀓𑁆𑀔𑀸 𑀘, 𑀉𑀪𑁄 𑀪𑀓𑁆𑀔𑀸 𑀪𑀯𑀺𑀲𑁆𑀲𑀣𑀸’’𑀢𑀺.

𑀢𑀢𑁆𑀣 𑀪𑀺𑀓𑁆𑀔𑀦𑁆𑀢𑀺 𑀫𑀫 𑀦𑀺𑀩𑀤𑁆𑀥𑀪𑀺𑀓𑁆𑀔𑀁. 𑀲𑀽𑀧𑀺𑀢𑀦𑁆𑀢𑀺 𑀲𑀽𑀧𑀲𑀫𑁆𑀧𑀦𑁆𑀦𑀁.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁭.

‘‘𑀅𑀧𑁆𑀧𑀓𑁂𑀦 𑀢𑀼𑀯𑀁 𑀬𑀓𑁆𑀔, 𑀣𑀼𑀮𑁆𑀮𑀫𑀢𑁆𑀣𑀁 𑀚𑀳𑀺𑀲𑁆𑀲𑀲𑀺;

𑀪𑀺𑀓𑁆𑀔𑀁 𑀢𑁂 𑀦𑀸𑀳𑀭𑀺𑀲𑁆𑀲𑀦𑁆𑀢𑀺, 𑀚𑀦𑀸 𑀫𑀭𑀡𑀲𑀜𑁆𑀜𑀺𑀦𑁄.

𑁧𑁮.

‘‘𑀮𑀤𑁆𑀥𑀸𑀬 𑀬𑀓𑁆𑀔𑀸 𑀢𑀯 𑀦𑀺𑀘𑁆𑀘𑀪𑀺𑀓𑁆𑀔𑀁, 𑀲𑀼𑀘𑀺𑀁 𑀧𑀡𑀻𑀢𑀁 𑀭𑀲𑀲𑀸 𑀉𑀧𑁂𑀢𑀁;

𑀪𑀺𑀓𑁆𑀔𑀜𑁆𑀘 𑀢𑁂 𑀆𑀳𑀭𑀺𑀬𑁄 𑀦𑀭𑁄 𑀇𑀥, 𑀲𑀼𑀤𑀼𑀮𑁆𑀮𑀪𑁄 𑀳𑁂𑀳𑀺𑀢𑀺 𑀪𑀓𑁆𑀔𑀺𑀢𑁂 𑀫𑀬𑀻’’𑀢𑀺.

𑀢𑀢𑁆𑀣 𑀣𑀼𑀮𑁆𑀮𑀫𑀢𑁆𑀣𑀦𑁆𑀢𑀺 𑀅𑀧𑁆𑀧𑀓𑁂𑀦 𑀓𑀸𑀭𑀡𑁂𑀦 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀚𑀳𑀺𑀲𑁆𑀲𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀫𑀭𑀡𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀦 𑀆𑀳𑀭𑀺𑀲𑁆𑀲𑀦𑁆𑀢𑀺, 𑀅𑀣 𑀢𑁆𑀯𑀁 𑀫𑀺𑀮𑀸𑀢𑀲𑀸𑀔𑁄 𑀯𑀺𑀬 𑀭𑀼𑀓𑁆𑀔𑁄 𑀦𑀺𑀭𑀸𑀳𑀸𑀭𑁄 𑀤𑀼𑀩𑁆𑀩𑀮𑁄 𑀪𑀯𑀺𑀲𑁆𑀲𑀲𑀻𑀢𑀺. 𑀮𑀤𑁆𑀥𑀸𑀬𑀦𑁆𑀢𑀺 𑀮𑀤𑁆𑀥𑀅𑀬𑀁 𑀮𑀤𑁆𑀥𑀸𑀕𑀫𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀬𑀓𑁆𑀔, 𑀬𑀁 𑀅𑀳𑀁 𑀅𑀚𑁆𑀚 𑀆𑀳𑀭𑀺𑀁, 𑀇𑀤𑀁 𑀢𑀯 𑀦𑀺𑀘𑁆𑀘𑀪𑀺𑀓𑁆𑀔𑀁 𑀲𑀼𑀘𑀺𑀁 𑀧𑀡𑀻𑀢𑀁 𑀉𑀢𑁆𑀢𑀫𑀁 𑀭𑀲𑁂𑀦 𑀉𑀧𑁂𑀢𑀁 𑀮𑀤𑁆𑀥𑀸𑀕𑀫𑀦𑀁 𑀤𑁂𑀯𑀲𑀺𑀓𑀁 𑀢𑁂 𑀆𑀕𑀘𑁆𑀙𑀺𑀲𑁆𑀲𑀢𑀺. 𑀆𑀳𑀭𑀺𑀬𑁄𑀢𑀺 𑀆𑀳𑀭𑀡𑀓𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀘𑁂 𑀢𑁆𑀯𑀁 𑀇𑀫𑀁 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀆𑀕𑀢𑀁 𑀫𑀁 𑀪𑀓𑁆𑀔𑀲𑀺, 𑀅𑀣𑁂𑀯𑀁 𑀫𑀬𑀺 𑀪𑀓𑁆𑀔𑀺𑀢𑁂 𑀪𑀺𑀓𑁆𑀔𑀜𑁆𑀘 𑀢𑁂 𑀆𑀳𑀭𑀡𑀓𑁄 𑀅𑀜𑁆𑀜𑁄 𑀦𑀭𑁄 𑀇𑀥 𑀲𑀼𑀤𑀼𑀮𑁆𑀮𑀪𑁄 𑀪𑀯𑀺𑀲𑁆𑀲𑀢𑀺. 𑀓𑀺𑀁𑀓𑀸𑀭𑀡𑀸? 𑀫𑀸𑀤𑀺𑀲𑁄 𑀳𑀺 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑁄 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀺 𑀧𑀦 𑀔𑀸𑀤𑀺𑀢𑁂 𑀲𑀼𑀢𑀦𑀼𑀧𑀺 𑀦𑀸𑀫 𑀬𑀓𑁆𑀔𑁂𑀦 𑀔𑀸𑀤𑀺𑀢𑁄, 𑀅𑀜𑁆𑀜𑀲𑁆𑀲 𑀓𑀲𑁆𑀲 𑀲𑁄 𑀮𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀪𑀢𑁆𑀢𑀸𑀳𑀭𑀡𑀓𑀁 𑀦 𑀮𑀪𑀺𑀲𑁆𑀲𑀲𑀺, 𑀅𑀣 𑀢𑁂 𑀇𑀢𑁄 𑀧𑀝𑁆𑀞𑀸𑀬 𑀪𑁄𑀚𑀦𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀫𑁆𑀧𑀺 𑀭𑀸𑀚𑀸𑀦𑀁 𑀕𑀡𑁆𑀳𑀺𑀢𑀼𑀁 𑀦 𑀮𑀪𑀺𑀲𑁆𑀲𑀲𑀺. 𑀓𑀲𑁆𑀫𑀸? 𑀭𑀼𑀓𑁆𑀔𑀢𑁄 𑀩𑀳𑀺𑀪𑀸𑀯𑁂𑀦. 𑀲𑀘𑁂 𑀧𑀦𑀺𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀁 𑀧𑀳𑀺𑀡𑀺𑀲𑁆𑀲𑀲𑀺, 𑀅𑀳𑀁 𑀢𑁂 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀦𑀺𑀩𑀤𑁆𑀥𑀁 𑀪𑀢𑁆𑀢𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀅𑀢𑁆𑀢𑀸𑀦𑀫𑁆𑀧𑀺 𑀘 𑀢𑁂 ¶ 𑀔𑀸𑀤𑀺𑀢𑀼𑀁 ¶ 𑀦 𑀤𑀲𑁆𑀲𑀸𑀫𑀺, 𑀅𑀳𑀫𑁆𑀧𑀺 𑀢𑀯 𑀲𑀦𑁆𑀢𑀺𑀓𑁂 𑀞𑀸𑀦𑁂 𑀦 𑀞𑀲𑁆𑀲𑀸𑀫𑀺, 𑀧𑀸𑀤𑀼𑀓𑀸𑀲𑀼 𑀞𑀲𑁆𑀲𑀸𑀫𑀺, 𑀭𑀼𑀓𑁆𑀔𑀘𑁆𑀙𑀸𑀬𑀸𑀬𑀫𑁆𑀧𑀺 𑀢𑁂 𑀦 𑀞𑀲𑁆𑀲𑀸𑀫𑀺, 𑀅𑀢𑁆𑀢𑀦𑁄 𑀙𑀢𑁆𑀢𑀘𑁆𑀙𑀸𑀬𑀸𑀬𑀫𑁂𑀯 𑀞𑀲𑁆𑀲𑀸𑀫𑀺, 𑀲𑀘𑁂 𑀧𑀦 𑀫𑀬𑀸 𑀲𑀤𑁆𑀥𑀺𑀁 𑀯𑀺𑀭𑀼𑀚𑁆𑀛𑀺𑀲𑁆𑀲𑀲𑀺, 𑀔𑀕𑁆𑀕𑁂𑀦 𑀢𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 ¶ , 𑀅𑀳𑀜𑁆𑀳𑀺 𑀅𑀚𑁆𑀚 𑀏𑀢𑀤𑀢𑁆𑀣𑀫𑁂𑀯 𑀲𑀚𑁆𑀚𑁄 𑀳𑀼𑀢𑁆𑀯𑀸 𑀆𑀕𑀢𑁄𑀢𑀺. 𑀏𑀯𑀁 𑀓𑀺𑀭 𑀦𑀁 𑀫𑀳𑀸𑀲𑀢𑁆𑀢𑁄 𑀢𑀚𑁆𑀚𑁂𑀲𑀺.

𑀬𑀓𑁆𑀔𑁄 ‘‘𑀬𑀼𑀢𑁆𑀢𑀭𑀽𑀧𑀁 𑀫𑀸𑀡𑀯𑁄 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁯.

‘‘𑀫𑀫𑁂𑀯 𑀲𑀼𑀢𑀦𑁄 𑀅𑀢𑁆𑀣𑁄, 𑀬𑀣𑀸 𑀪𑀸𑀲𑀲𑀺 𑀫𑀸𑀡𑀯;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀫𑀸𑀢𑀭𑀁.

𑁨𑁦.

‘‘𑀔𑀕𑁆𑀕𑀁 𑀙𑀢𑁆𑀢𑀜𑁆𑀘 𑀧𑀸𑀢𑀺𑀜𑁆𑀘, 𑀕𑀘𑁆𑀙𑀫𑀸𑀤𑀸𑀬 𑀫𑀸𑀡𑀯;

𑀲𑁄𑀢𑁆𑀣𑀺𑀁 𑀧𑀲𑁆𑀲𑀢𑀼 𑀢𑁂 𑀫𑀸𑀢𑀸, 𑀢𑁆𑀯𑀜𑁆𑀘 𑀧𑀲𑁆𑀲𑀸𑀳𑀺 𑀫𑀸𑀢𑀭’’𑀦𑁆𑀢𑀺.

𑀢𑀢𑁆𑀣 𑀲𑀼𑀢𑀦𑁄𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀮𑀧𑀢𑀺. 𑀬𑀣𑀸 𑀪𑀸𑀲𑀲𑀻𑀢𑀺 𑀬𑀣𑀸 𑀢𑁆𑀯𑀁 𑀪𑀸𑀲𑀲𑀺, 𑀢𑀣𑀸 𑀬𑁄 𑀏𑀲 𑀢𑀬𑀸 𑀪𑀸𑀲𑀺𑀢𑁄 𑀅𑀢𑁆𑀣𑁄, 𑀏𑀲𑁄 𑀫𑀫𑁂𑀯𑀢𑁆𑀣𑁄, 𑀫𑀬𑁆𑀳𑀫𑁂𑀯 𑀯𑀟𑁆𑀠𑀻𑀢𑀺.

𑀬𑀓𑁆𑀔𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀫 𑀓𑀫𑁆𑀫𑀁 𑀦𑀺𑀧𑁆𑀨𑀦𑁆𑀦𑀁, 𑀤𑀫𑀺𑀢𑁄 𑀫𑁂 𑀬𑀓𑁆𑀔𑁄, 𑀩𑀳𑀼𑀜𑁆𑀘 𑀥𑀦𑀁 𑀮𑀤𑁆𑀥𑀁, 𑀭𑀜𑁆𑀜𑁄 𑀘 𑀯𑀘𑀦𑀁 𑀓𑀢’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀬𑀓𑁆𑀔𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁨𑁧.

‘‘𑀏𑀯𑀁 𑀬𑀓𑁆𑀔 𑀲𑀼𑀔𑀻 𑀳𑁄𑀳𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀥𑀦𑀜𑁆𑀘 𑀫𑁂 𑀅𑀥𑀺𑀕𑀢𑀁, 𑀭𑀜𑁆𑀜𑁄 𑀘 𑀯𑀘𑀦𑀁 𑀓𑀢’’𑀦𑁆𑀢𑀺. 𑁋

𑀯𑀢𑁆𑀯𑀸 𑀘 𑀧𑀦 𑀬𑀓𑁆𑀔𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀧𑀭𑁂𑀲𑀁 𑀮𑁄𑀳𑀺𑀢𑀫𑀁𑀲𑀪𑀓𑁆𑀔𑁄 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀇𑀢𑁄 𑀧𑀝𑁆𑀞𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀫𑀸 𑀓𑀭𑀻’’𑀢𑀺 𑀲𑀻𑀮𑁂 𑀘 𑀆𑀦𑀺𑀲𑀁𑀲𑀁, 𑀤𑀼𑀲𑁆𑀲𑀻𑀮𑁆𑀬𑁂 𑀘 𑀆𑀤𑀻𑀦𑀯𑀁 𑀓𑀣𑁂𑀢𑁆𑀯𑀸 𑀬𑀓𑁆𑀔𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀢𑁂 𑀅𑀭𑀜𑁆𑀜𑀯𑀸𑀲𑁂𑀦, 𑀏𑀳𑀺 𑀦𑀕𑀭𑀤𑁆𑀯𑀸𑀭𑁂 𑀢𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀕𑁆𑀕𑀪𑀢𑁆𑀢𑀮𑀸𑀪𑀺𑀁 𑀓𑀭𑁄𑀫𑀻’’𑀢𑀺 𑀬𑀓𑁆𑀔𑁂𑀦 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑀕𑁆𑀕𑀸𑀤𑀻𑀦𑀺 𑀬𑀓𑁆𑀔𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. ‘‘𑀲𑀼𑀢𑀦𑀼 𑀫𑀸𑀡𑀯𑁄 𑀬𑀓𑁆𑀔𑀁 𑀕𑀳𑁂𑀢𑁆𑀯𑀸 𑀏𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀅𑀫𑀘𑁆𑀘𑀧𑀭𑀺𑀯𑀼𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 ¶ 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀬𑀓𑁆𑀔𑀁 𑀦𑀕𑀭𑀤𑁆𑀯𑀸𑀭𑁂 ¶ 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀕𑁆𑀕𑀪𑀢𑁆𑀢𑀮𑀸𑀪𑀺𑀦𑀁 𑀓𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀸𑀕𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀅𑀬𑀜𑁆𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀬𑀓𑁆𑀔𑁄 𑀅𑀗𑁆𑀕𑀼𑀮𑀺𑀫𑀸𑀮𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀼𑀢𑀦𑀼𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁩𑁯𑁯] 𑁪. 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸

𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀺𑀚𑁆𑀛𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀯𑀼𑀤𑁆𑀥𑁂 𑀧𑀭𑀺𑀳𑀻𑀦𑀘𑀓𑁆𑀔𑀼𑀓𑁂 𑀫𑀸𑀢𑀸𑀧𑀺𑀢𑀭𑁄 𑀕𑀺𑀚𑁆𑀛𑀕𑀼𑀳𑀸𑀬𑀁 𑀞𑀧𑁂𑀢𑁆𑀯𑀸 𑀕𑁄𑀫𑀁𑀲𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀧𑁄𑀲𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀲𑀼𑀲𑀸𑀦𑁂 𑀏𑀓𑁄 𑀦𑁂𑀲𑀸𑀤𑁄 𑀅𑀦𑀺𑀬𑀫𑁂𑀢𑁆𑀯𑀸 𑀕𑀺𑀚𑁆𑀛𑀸𑀦𑀁 𑀧𑀸𑀲𑁂 𑀑𑀟𑁆𑀟𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀕𑁄𑀫𑀁𑀲𑀸𑀤𑀺𑀁 𑀧𑀭𑀺𑀬𑁂𑀲𑀦𑁆𑀢𑁄 𑀲𑀼𑀲𑀸𑀦𑀁 𑀧𑀯𑀺𑀝𑁆𑀞𑁄 𑀧𑀸𑀤𑁂𑀦 𑀧𑀸𑀲𑁂 𑀩𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦 𑀘𑀺𑀦𑁆𑀢𑁂𑀲𑀺, 𑀯𑀼𑀤𑁆𑀥𑁂 𑀧𑀭𑀺𑀳𑀻𑀦𑀘𑀓𑁆𑀔𑀼𑀓𑁂 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀓𑀣𑀁 𑀦𑀼 𑀔𑁄 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀬𑀸𑀧𑁂𑀲𑁆𑀲𑀦𑁆𑀢𑀺, 𑀫𑀫 𑀩𑀤𑁆𑀥𑀪𑀸𑀯𑀫𑁆𑀧𑀺 𑀅𑀚𑀸𑀦𑀦𑁆𑀢𑀸 𑀅𑀦𑀸𑀣𑀸 𑀦𑀺𑀧𑁆𑀧𑀘𑁆𑀘𑀬𑀸 𑀧𑀩𑁆𑀩𑀢𑀕𑀼𑀳𑀸𑀬𑀫𑁂𑀯 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑁂’’𑀢𑀺 𑀯𑀺𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁨.

‘‘𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀸 𑀕𑀺𑀭𑀺𑀤𑀭𑀻𑀲𑀬𑀸;

𑀅𑀳𑀁 𑀩𑀤𑁆𑀥𑁄𑀲𑁆𑀫𑀺 𑀧𑀸𑀲𑁂𑀦, 𑀦𑀺𑀮𑀻𑀬𑀲𑁆𑀲 𑀯𑀲𑀁 𑀕𑀢𑁄’’𑀢𑀺.

𑀢𑀢𑁆𑀣 𑀦𑀺𑀮𑀻𑀬𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀦𑁂𑀲𑀸𑀤𑀧𑀼𑀢𑁆𑀢𑀲𑁆𑀲.

𑀅𑀣 ¶ 𑀦𑁂𑀲𑀸𑀤𑀧𑀼𑀢𑁆𑀢𑁄 𑀕𑀺𑀚𑁆𑀛𑀭𑀸𑀚𑀲𑁆𑀲 ¶ 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁩.

‘‘𑀓𑀺𑀁 𑀕𑀺𑀚𑁆𑀛 𑀧𑀭𑀺𑀤𑁂𑀯𑀲𑀺, 𑀓𑀸 𑀦𑀼 𑀢𑁂 𑀧𑀭𑀺𑀤𑁂𑀯𑀦𑀸;

𑀦 𑀫𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀪𑀸𑀲𑀦𑁆𑀢𑁄 𑀫𑀸𑀦𑀼𑀲𑀺𑀁 𑀤𑀺𑀚𑁄’’𑀢𑀺.

𑀕𑀺𑀚𑁆𑀛𑁄 𑀆𑀳 𑁋

𑁨𑁪.

‘‘𑀪𑀭𑀸𑀫𑀺 ¶ 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂;

𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀯𑀲𑀁 𑀕𑀢𑁄 𑀢𑀯𑀸’’𑀢𑀺.

𑀦𑁂𑀲𑀸𑀤𑁄 𑀆𑀳 𑁋

𑁨𑁫.

‘‘𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺;

𑀓𑀲𑁆𑀫𑀸 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀻’’𑀢𑀺.

𑀕𑀺𑀚𑁆𑀛𑀭𑀸𑀚𑀸 𑀆𑀳 𑁋

𑁨𑁬.

‘‘𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀻’’𑀢𑀺.

𑁨𑁭.

‘‘𑀪𑀭𑀲𑁆𑀲𑀼 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀜𑀸𑀢𑀓𑁂.

𑁨𑁮.

‘‘𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀪𑀭𑀺𑀲𑁆𑀲𑀁 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂’’𑀢𑀺. 𑁋

𑀦𑁂𑀲𑀸𑀤𑀧𑀼𑀢𑁆𑀢𑁂𑀦 𑀤𑀼𑀢𑀺𑀬𑀸, 𑀕𑀺𑀚𑁆𑀛𑁂𑀦 𑀢𑀢𑀺𑀬𑀸𑀢𑀺 𑀇𑀫𑀸 𑀕𑀸𑀣𑀸 𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀸.

𑀢𑀢𑁆𑀣 𑀬𑀁 𑀦𑀽𑀢𑀺 𑀬𑀁 𑀦𑀼 𑀏𑀢𑀁 𑀮𑁄𑀓𑁂 𑀓𑀣𑀻𑀬𑀢𑀺. 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀻𑀢𑀺 𑀬𑁄𑀚𑀦𑀲𑀢𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑀸𑀦𑀺𑀧𑀺 𑀓𑀼𑀡𑀧𑀸𑀦𑀺 𑀧𑀲𑁆𑀲𑀢𑀺, 𑀢𑀁 𑀬𑀤𑀺 𑀢𑀣𑀁, 𑀅𑀣 𑀓𑀲𑁆𑀫𑀸 𑀢𑁆𑀯𑀁 𑀇𑀫𑀁 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀺, 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸𑀧𑀺 𑀦 𑀚𑀸𑀦𑀸𑀲𑀻𑀢𑀺.

𑀧𑀭𑀸𑀪𑀯𑁄𑀢𑀺 𑀯𑀺𑀦𑀸𑀲𑁄. 𑀪𑀭𑀲𑁆𑀲𑀽𑀢𑀺 𑀇𑀤𑀁 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀡𑁆𑀟𑀺𑀢𑁄 𑀕𑀺𑀚𑁆𑀛𑀭𑀸𑀚𑀸 𑀧𑀭𑀺𑀤𑁂𑀯𑀦𑁆𑀢𑁄 𑀦 𑀅𑀢𑁆𑀢𑀦𑁄 𑀧𑀭𑀺𑀤𑁂𑀯𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 ¶ 𑀧𑀭𑀺𑀤𑁂𑀯𑀢𑀺, 𑀦𑀸𑀬𑀁 𑀫𑀸𑀭𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀆𑀳, 𑀯𑀢𑁆𑀯𑀸 𑀘 𑀧𑀦 𑀧𑀺𑀬𑀘𑀺𑀢𑁆𑀢𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦 𑀧𑀸𑀲𑀁 𑀫𑁄𑀘𑁂𑀲𑀺.

𑀅𑀣𑀲𑁆𑀲 ¶ 𑀩𑁄𑀥𑀺𑀲𑀢𑁆𑀢𑁄 𑀫𑀭𑀡𑀫𑀼𑀔𑀸 𑀧𑀫𑀼𑀢𑁆𑀢𑁄 𑀲𑀼𑀔𑀺𑀢𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀑𑀲𑀸𑀦𑀕𑀸𑀣𑀁 𑀯𑀢𑁆𑀯𑀸 𑀫𑀼𑀔𑀧𑀽𑀭𑀁 𑀫𑀁𑀲𑀁 𑀆𑀤𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺 ¶ .

𑀢𑀤𑀸 𑀦𑁂𑀲𑀸𑀤𑀧𑀼𑀢𑁆𑀢𑁄 𑀙𑀦𑁆𑀦𑁄 𑀅𑀳𑁄𑀲𑀺, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀕𑀺𑀚𑁆𑀛𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁦𑁦] 𑁫. 𑀤𑀩𑁆𑀪𑀧𑀼𑀧𑁆𑀨𑀚𑀸𑀢𑀓𑀯𑀡𑁆𑀡𑀦𑀸

𑀅𑀦𑀼𑀢𑀻𑀭𑀘𑀸𑀭𑀻 𑀪𑀤𑁆𑀤𑀦𑁆𑀢𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑁂 𑀧𑀳𑀸𑀬 𑀫𑀳𑀸𑀢𑀡𑁆𑀳𑁄 𑀅𑀳𑁄𑀲𑀺. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀤𑁆𑀯𑁂 𑀢𑀬𑁄 𑀯𑀺𑀳𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀙𑀢𑁆𑀢𑀁 𑀯𑀸 𑀉𑀧𑀸𑀳𑀦𑀁 𑀯𑀸 𑀏𑀓𑀲𑁆𑀫𑀺𑀁 𑀓𑀢𑁆𑀢𑀭𑀬𑀝𑁆𑀞𑀺𑀁 𑀯𑀸 𑀉𑀤𑀓𑀢𑀼𑀫𑁆𑀩𑀁 𑀯𑀸 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀬𑀁 𑀯𑀲𑀢𑀺. 𑀲𑁄 𑀏𑀓𑀲𑁆𑀫𑀺𑀁 𑀚𑀦𑀧𑀤𑀯𑀺𑀳𑀸𑀭𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 ‘‘𑀪𑀺𑀓𑁆𑀔𑀽𑀳𑀺 𑀦𑀸𑀫 𑀅𑀧𑁆𑀧𑀺𑀘𑁆𑀙𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀆𑀓𑀸𑀲𑁂 𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀲𑀦𑁆𑀢𑁄𑀲𑀤𑀻𑀧𑀓𑀁 𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀫𑀦𑀸𑀧𑀸𑀦𑀺 𑀧𑀢𑁆𑀢𑀘𑀻𑀯𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀸𑀦𑀺 𑀘𑁂𑀯 𑀧𑀁𑀲𑀼𑀓𑀽𑀮𑀘𑀻𑀯𑀭𑀸𑀦𑀺 𑀘 𑀕𑀡𑁆𑀳𑀺𑀁𑀲𑀼. 𑀲𑁄 𑀢𑀸𑀦𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀲 𑀅𑀭𑀜𑁆𑀜𑀯𑀺𑀳𑀸𑀭𑀲𑁆𑀲 𑀧𑀺𑀝𑁆𑀞𑀺𑀪𑀸𑀕𑁂 𑀧𑀸𑀤𑁂 𑀯𑀮𑁆𑀮𑀺𑀬𑀸 𑀧𑀮𑀺𑀩𑀼𑀤𑁆𑀥𑁄 ‘‘𑀅𑀤𑁆𑀥𑀸 𑀏𑀢𑁆𑀣 𑀓𑀺𑀜𑁆𑀘𑀺 𑀮𑀤𑁆𑀥𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀢𑀢𑁆𑀣 𑀧𑀦 𑀤𑁆𑀯𑁂 𑀫𑀳𑀮𑁆𑀮𑀓𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂 𑀤𑁆𑀯𑁂 𑀘 𑀣𑀽𑀮𑀲𑀸𑀝𑀓𑁂 𑀏𑀓𑀜𑁆𑀘 𑀲𑀼𑀔𑀼𑀫𑀓𑀫𑁆𑀩𑀮𑀁 𑀮𑀪𑀺𑀢𑁆𑀯𑀸 𑀪𑀸𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀣𑁂𑀭𑁄 𑀦𑁄 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 ‘‘𑀫𑀬𑀁, 𑀪𑀦𑁆𑀢𑁂, 𑀇𑀫𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀪𑀸𑀚𑁂𑀢𑀼𑀁 𑀦 𑀲𑀓𑁆𑀓𑁄𑀫, 𑀇𑀫𑀁 𑀦𑁄 𑀦𑀺𑀲𑁆𑀲𑀸𑀬 𑀯𑀺𑀯𑀸𑀤𑁄 𑀳𑁄𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀸𑀚𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀆𑀳𑀁𑀲𑀼. 𑀲𑁄 ¶ ‘‘𑀲𑀸𑀥𑀼 𑀪𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀤𑁆𑀯𑁂 𑀣𑀽𑀮𑀲𑀸𑀝𑀓𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀪𑀸𑀚𑁂𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀺𑀦𑀬𑀥𑀭𑀸𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀓𑀫𑁆𑀩𑀮𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑁂𑀧𑀺 𑀣𑁂𑀭𑀸 𑀓𑀫𑁆𑀩𑀮𑁂 𑀲𑀸𑀮𑀬𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀥𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ¶ ‘‘𑀮𑀩𑁆𑀪𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀦𑀬𑀥𑀭𑀸𑀦𑀁 𑀏𑀯𑀁 𑀯𑀺𑀮𑁄𑀧𑀁 𑀔𑀸𑀤𑀺𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀪𑀺𑀓𑁆𑀔𑀽 𑀉𑀧𑀦𑀦𑁆𑀤𑀢𑁆𑀣𑁂𑀭𑁂𑀦 𑀆𑀪𑀢𑀁 𑀧𑀢𑁆𑀢𑀘𑀻𑀯𑀭𑀭𑀸𑀲𑀺𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀜𑁆𑀜𑁄𑀲𑀺 𑀢𑁆𑀯𑀁 𑀆𑀯𑀼𑀲𑁄, 𑀩𑀳𑀼𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁 𑀮𑀤𑁆𑀥’’𑀦𑁆𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀓𑀼𑀢𑁄 𑀫𑁂 𑀆𑀯𑀼𑀲𑁄, 𑀧𑀼𑀜𑁆𑀜𑀁, 𑀇𑀫𑀺𑀦𑀸 𑀫𑁂 𑀉𑀧𑀸𑀬𑁂𑀦 𑀇𑀤𑀁 𑀮𑀤𑁆𑀥’’𑀦𑁆𑀢𑀺 𑀲𑀩𑁆𑀩𑀁 𑀓𑀣𑁂𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀫𑀳𑀸𑀢𑀡𑁆𑀳𑁄 𑀫𑀳𑀸𑀮𑁄𑀪𑁄’’𑀢𑀺. 𑀲𑀢𑁆𑀣𑀸 ¶ 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀉𑀧𑀦𑀦𑁆𑀤𑁂𑀦 𑀧𑀝𑀺𑀧𑀤𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑀁, 𑀧𑀭𑀲𑁆𑀲 𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀧𑀞𑀫𑀁 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀧𑀭𑁄 𑀑𑀯𑀤𑀺𑀢𑀩𑁆𑀩𑁄’’𑀢𑀺.

‘‘𑀅𑀢𑁆𑀢𑀸𑀦𑀫𑁂𑀯 𑀧𑀞𑀫𑀁, 𑀧𑀢𑀺𑀭𑀽𑀧𑁂 𑀦𑀺𑀯𑁂𑀲𑀬𑁂;

𑀅𑀣𑀜𑁆𑀜𑀫𑀦𑀼𑀲𑀸𑀲𑁂𑀬𑁆𑀬, 𑀦 𑀓𑀺𑀮𑀺𑀲𑁆𑀲𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺. (𑀥. 𑀧. 𑁧𑁫𑁮) 𑁋

𑀇𑀫𑀸𑀬 𑀥𑀫𑁆𑀫𑀧𑀤𑁂 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀉𑀧𑀦𑀦𑁆𑀤𑁄 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀳𑀸𑀢𑀡𑁆𑀳𑁄 𑀫𑀳𑀸𑀮𑁄𑀪𑁄𑀯, 𑀦 𑀘 𑀧𑀦 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀇𑀫𑁂𑀲𑀁 𑀲𑀦𑁆𑀢𑀓𑀁 𑀯𑀺𑀮𑀼𑀫𑁆𑀧𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀦𑀤𑀻𑀢𑀻𑀭𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀢𑀤𑀸 𑀏𑀓𑁄 𑀲𑀺𑀗𑁆𑀕𑀸𑀮𑁄 𑀫𑀸𑀬𑀸𑀯𑀺𑀁 𑀦𑀸𑀫 𑀪𑀭𑀺𑀬𑀁 𑀕𑀳𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀺𑀗𑁆𑀕𑀸𑀮𑀻 𑀲𑀺𑀗𑁆𑀕𑀸𑀮𑀁 𑀆𑀳 ‘‘𑀤𑁄𑀳𑀴𑁄 𑀫𑁂 𑀲𑀸𑀫𑀺, 𑀉𑀧𑁆𑀧𑀦𑁆𑀦𑁄, 𑀅𑀮𑁆𑀮𑀭𑁄𑀳𑀺𑀢𑀫𑀘𑁆𑀙𑀁 𑀔𑀸𑀤𑀺𑀢𑀼𑀁 𑀇𑀘𑁆𑀙𑀸𑀫𑀻’’𑀢𑀺. 𑀲𑀺𑀗𑁆𑀕𑀸𑀮𑁄 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀳𑁄𑀳𑀺, 𑀆𑀳𑀭𑀺𑀲𑁆𑀲𑀸𑀫𑀺 𑀢𑁂’’𑀢𑀺 𑀦𑀤𑀻𑀢𑀻𑀭𑁂 𑀘𑀭𑀦𑁆𑀢𑁄 𑀯𑀮𑁆𑀮𑀺𑀬𑀸 𑀧𑀸𑀤𑁂 𑀧𑀮𑀺𑀩𑀼𑀚𑁆𑀛𑀺𑀢𑁆𑀯𑀸 𑀅𑀦𑀼𑀢𑀻𑀭𑀫𑁂𑀯 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀫𑁆𑀪𑀻𑀭𑀘𑀸𑀭𑀻 𑀘 𑀅𑀦𑀼𑀢𑀻𑀭𑀘𑀸𑀭𑀻 𑀘𑀸𑀢𑀺 𑀤𑁆𑀯𑁂 𑀉𑀤𑁆𑀤𑀸 𑀫𑀘𑁆𑀙𑁂 𑀧𑀭𑀺𑀬𑁂𑀲𑀦𑁆𑀢𑀸 𑀢𑀻𑀭𑁂 𑀅𑀝𑁆𑀞𑀁𑀲𑀼. 𑀢𑁂𑀲𑀼 𑀕𑀫𑁆𑀪𑀻𑀭𑀘𑀸𑀭𑀻 𑀫𑀳𑀦𑁆𑀢𑀁 𑀭𑁄𑀳𑀺𑀢𑀫𑀘𑁆𑀙𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀉𑀤𑀓𑁂 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀦𑀗𑁆𑀕𑀼𑀝𑁆𑀞𑁂 𑀕𑀡𑁆𑀳𑀺. 𑀩𑀮𑀯𑀸 𑀫𑀘𑁆𑀙𑁄 𑀧𑀭𑀺𑀓𑀟𑁆𑀠𑀦𑁆𑀢𑁄 𑀬𑀸𑀲𑀺. 𑀲𑁄 𑀕𑀫𑁆𑀪𑀻𑀭𑀘𑀸𑀭𑀻 𑀉𑀤𑁆𑀤𑁄 ‘‘𑀫𑀳𑀸𑀫𑀘𑁆𑀙𑁄 𑀉𑀪𑀺𑀦𑁆𑀦𑀫𑁆𑀧𑀺 𑀦𑁄 𑀧𑀳𑁄𑀲𑁆𑀲𑀢𑀺, 𑀏𑀳𑀺 𑀫𑁂 𑀲𑀳𑀸𑀬𑁄 𑀳𑁄𑀳𑀻’’𑀢𑀺 𑀇𑀢𑀭𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀅𑀦𑀼𑀢𑀻𑀭𑀘𑀸𑀭𑀻 ¶ 𑀪𑀤𑁆𑀤𑀦𑁆𑀢𑁂, 𑀲𑀳𑀸𑀬𑀫𑀦𑀼𑀥𑀸𑀯 𑀫𑀁;

𑀫𑀳𑀸 𑀫𑁂 𑀕𑀳𑀺𑀢𑁄 𑀫𑀘𑁆𑀙𑁄, 𑀲𑁄 𑀫𑀁 𑀳𑀭𑀢𑀺 𑀯𑁂𑀕𑀲𑀸’’𑀢𑀺.

𑀢𑀢𑁆𑀣 ¶ 𑀲𑀳𑀸𑀬𑀫𑀦𑀼𑀥𑀸𑀯 𑀫𑀦𑁆𑀢𑀺 𑀲𑀳𑀸𑀬 𑀅𑀦𑀼𑀥𑀸𑀯 𑀫𑀁, 𑀲𑀦𑁆𑀥𑀺𑀯𑀲𑁂𑀦 𑀫-𑀓𑀸𑀭𑁄 𑀯𑀼𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸𑀳𑀁 𑀇𑀫𑀺𑀦𑀸 𑀫𑀘𑁆𑀙𑁂𑀦 𑀦 𑀲𑀁𑀳𑀻𑀭𑀸𑀫𑀺, 𑀏𑀯𑀁 𑀫𑀁 𑀦𑀗𑁆𑀕𑀼𑀝𑁆𑀞𑀔𑀡𑁆𑀟𑁂 𑀕𑀳𑁂𑀢𑁆𑀯𑀸 𑀢𑁆𑀯𑀁 𑀅𑀦𑀼𑀥𑀸𑀯𑀸𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀇𑀢𑀭𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁦.

‘‘𑀕𑀫𑁆𑀪𑀻𑀭𑀘𑀸𑀭𑀻 𑀪𑀤𑁆𑀤𑀦𑁆𑀢𑁂, 𑀤𑀴𑁆𑀳𑀁 𑀕𑀡𑁆𑀳𑀸𑀳𑀺 𑀣𑀸𑀫𑀲𑀸;

𑀅𑀳𑀁 𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀲𑀼𑀧𑀡𑁆𑀡𑁄 𑀉𑀭𑀕𑀸𑀫𑀺𑀯𑀸’’𑀢𑀺.

𑀢𑀢𑁆𑀣 𑀣𑀸𑀫𑀲𑀸𑀢𑀺 𑀣𑀸𑀫𑁂𑀦. 𑀉𑀤𑁆𑀥𑀭𑀺𑀲𑁆𑀲𑀸𑀫𑀻𑀢𑀺 𑀦𑀻𑀳𑀭𑀺𑀲𑁆𑀲𑀸𑀫𑀺. 𑀲𑀼𑀧𑀡𑁆𑀡𑁄 𑀉𑀭𑀕𑀸𑀫𑀺𑀯𑀸𑀢𑀺 𑀕𑀭𑀼𑀴𑁄 𑀲𑀧𑁆𑀧𑀁 𑀯𑀺𑀬.

𑀅𑀣 𑀤𑁆𑀯𑁂𑀧𑀺 𑀢𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀭𑁄𑀳𑀺𑀢𑀫𑀘𑁆𑀙𑀁 𑀦𑀻𑀳𑀭𑀺𑀢𑁆𑀯𑀸 𑀣𑀮𑁂 𑀞𑀧𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 ‘‘𑀢𑁆𑀯𑀁 𑀪𑀸𑀚𑁂𑀳𑀺, 𑀢𑁆𑀯𑀁 𑀪𑀸𑀚𑁂𑀳𑀻’’𑀢𑀺 𑀓𑀮𑀳𑀁 𑀓𑀢𑁆𑀯𑀸 𑀪𑀸𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀺𑀗𑁆𑀕𑀸𑀮𑁄 𑀢𑀁 𑀞𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑁂 𑀢𑀁 𑀤𑀺𑀲𑁆𑀯𑀸 𑀉𑀪𑁄𑀧𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ‘‘𑀅𑀬𑀁, 𑀲𑀫𑁆𑀫, 𑀤𑀩𑁆𑀪𑀧𑀼𑀧𑁆𑀨𑀫𑀘𑁆𑀙𑁄 𑀅𑀫𑁆𑀳𑁂𑀳𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀕𑀳𑀺𑀢𑁄, 𑀢𑀁 𑀦𑁄 𑀪𑀸𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀯𑀺𑀯𑀸𑀤𑁄 𑀉𑀧𑁆𑀧𑀦𑁆𑀦𑁄, 𑀲𑀫𑀪𑀸𑀕𑀁 𑀦𑁄 𑀪𑀸𑀚𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀢𑀢𑀺𑀬𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁩𑁧.

‘‘𑀯𑀺𑀯𑀸𑀤𑁄 𑀦𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀤𑀩𑁆𑀪𑀧𑀼𑀧𑁆𑀨 𑀲𑀼𑀡𑁄𑀳𑀺 𑀫𑁂;

𑀲𑀫𑁂𑀳𑀺 𑀫𑁂𑀥𑀕𑀁 𑀲𑀫𑁆𑀫𑀸, 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢’’𑀦𑁆𑀢𑀺.

𑀢𑀢𑁆𑀣 𑀤𑀩𑁆𑀪𑀧𑀼𑀧𑁆𑀨𑀸𑀢𑀺 𑀤𑀩𑁆𑀪𑀧𑀼𑀧𑁆𑀨𑀲𑀫𑀸𑀦𑀯𑀡𑁆𑀡𑀢𑀸𑀬 𑀢𑀁 𑀆𑀮𑀧𑀦𑁆𑀢𑀺. 𑀫𑁂𑀥𑀕𑀦𑁆𑀢𑀺 𑀓𑀮𑀳𑀁.

𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀺𑀗𑁆𑀕𑀸𑀮𑁄 𑀅𑀢𑁆𑀢𑀦𑁄 𑀩𑀮𑀁 𑀤𑀻𑀧𑁂𑀦𑁆𑀢𑁄 𑁋

𑁩𑁨.

‘‘𑀥𑀫𑁆𑀫𑀝𑁆𑀞𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀩𑀳𑀽 𑀅𑀟𑁆𑀟𑀸 𑀫𑁂 𑀢𑀻𑀭𑀺𑀢𑀸;

𑀲𑀫𑁂𑀫𑀺 𑀫𑁂𑀥𑀕𑀁 𑀲𑀫𑁆𑀫𑀸, 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢’’𑀦𑁆𑀢𑀺. 𑁋

𑀇𑀤𑀁 𑀕𑀸𑀣𑀁 𑀯𑀢𑁆𑀯𑀸 𑀪𑀸𑀚𑁂𑀦𑁆𑀢𑁄 𑁋

𑁩𑁩.

‘‘𑀅𑀦𑀼𑀢𑀻𑀭𑀘𑀸𑀭𑀺 ¶ ¶ 𑀦𑀗𑁆𑀕𑀼𑀝𑁆𑀞𑀁, 𑀲𑀻𑀲𑀁 𑀕𑀫𑁆𑀪𑀻𑀭𑀘𑀸𑀭𑀺𑀦𑁄;

𑀅𑀘𑁆𑀘𑀸𑀬𑀁 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄, 𑀥𑀫𑁆𑀫𑀝𑁆𑀞𑀲𑁆𑀲 𑀪𑀯𑀺𑀲𑁆𑀲𑀢𑀻’’𑀢𑀺. 𑁋

𑀇𑀫𑀁 𑀕𑀸𑀣𑀫𑀸𑀳 𑁋

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀅𑀳𑀁 𑀧𑀼𑀩𑁆𑀩𑁂 𑀭𑀸𑀚𑀽𑀦𑀁 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄 𑀆𑀲𑀺𑀁, 𑀢𑁂𑀦 𑀫𑀬𑀸 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀳𑀽 𑀅𑀟𑁆𑀟𑀸 𑀢𑀻𑀭𑀺𑀢𑀸, 𑀢𑁂𑀲𑀁 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀻𑀦𑀁 𑀩𑀳𑀽 𑀅𑀟𑁆𑀟𑀸 𑀢𑀻𑀭𑀺𑀢𑀸 𑀯𑀺𑀦𑀺𑀘𑁆𑀙𑀺𑀢𑀸, 𑀲𑁆𑀯𑀸𑀳𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀫𑀚𑀸𑀢𑀺𑀓𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁 𑀅𑀟𑁆𑀟𑀁 𑀢𑀻𑀭𑁂𑀢𑀼𑀁 𑀓𑀺𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀳𑀁 𑀯𑁄 𑀲𑀫𑁂𑀫𑀺 𑀫𑁂𑀥𑀕𑀁, 𑀲𑀫𑁆𑀫𑀸 𑀫𑀁 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑀸𑀓𑀁 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀽𑀢𑀺 ¶ .

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀫𑀘𑁆𑀙𑀁 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀅𑀦𑀼𑀢𑀻𑀭𑀘𑀸𑀭𑀺 𑀢𑁆𑀯𑀁 𑀦𑀗𑁆𑀕𑀼𑀝𑁆𑀞𑀁 𑀕𑀡𑁆𑀳, 𑀲𑀻𑀲𑀁 𑀕𑀫𑁆𑀪𑀻𑀭𑀘𑀸𑀭𑀺𑀦𑁄 𑀳𑁄𑀢𑀼. 𑀅𑀘𑁆𑀘𑀸𑀬𑀁 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄𑀢𑀺 𑀅𑀧𑀺𑀘 𑀅𑀬𑀁 𑀫𑀚𑁆𑀛𑀺𑀫𑁄 𑀓𑁄𑀝𑁆𑀞𑀸𑀲𑁄. 𑀅𑀣 𑀯𑀸 𑀅𑀘𑁆𑀘𑀸𑀢𑀺 𑀅𑀢𑀺𑀘𑁆𑀘, 𑀇𑀫𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀅𑀬𑀁 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄 𑀥𑀫𑁆𑀫𑀝𑁆𑀞𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑀸𑀫𑀺𑀓𑀲𑁆𑀲 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀢𑀁 𑀫𑀘𑁆𑀙𑀁 𑀯𑀺𑀪𑀚𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑀮𑀳𑀁 𑀅𑀓𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀜𑁆𑀘 𑀲𑀻𑀲𑀜𑁆𑀘 𑀔𑀸𑀤𑀣𑀸’’𑀢𑀺 𑀯𑀢𑁆𑀯𑀸 𑀫𑀚𑁆𑀛𑀺𑀫𑀔𑀡𑁆𑀟𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀧𑀮𑀸𑀬𑀺. 𑀢𑁂 𑀲𑀳𑀲𑁆𑀲𑀁 𑀧𑀭𑀸𑀚𑀺𑀢𑀸 𑀯𑀺𑀬 𑀤𑀼𑀫𑁆𑀫𑀼𑀔𑀸 𑀦𑀺𑀲𑀻𑀤𑀺𑀢𑁆𑀯𑀸 𑀕𑀸𑀣𑀫𑀸𑀳𑀁𑀲𑀼 𑁋

𑁩𑁪.

‘‘𑀘𑀺𑀭𑀫𑁆𑀧𑀺 𑀪𑀓𑁆𑀔𑁄 𑀅𑀪𑀯𑀺𑀲𑁆𑀲, 𑀲𑀘𑁂 𑀦 𑀯𑀺𑀯𑀤𑁂𑀫𑀲𑁂;

𑀅𑀲𑀻𑀲𑀓𑀁 𑀅𑀦𑀗𑁆𑀕𑀼𑀝𑁆𑀞𑀁, 𑀲𑀺𑀗𑁆𑀕𑀸𑀮𑁄 𑀳𑀭𑀢𑀺 𑀭𑁄𑀳𑀺𑀢’’𑀦𑁆𑀢𑀺.

𑀢𑀢𑁆𑀣 𑀘𑀺𑀭𑀫𑁆𑀧𑀻𑀢𑀺 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀺𑀗𑁆𑀕𑀸𑀮𑁄𑀧𑀺 ‘‘𑀅𑀚𑁆𑀚 𑀪𑀭𑀺𑀬𑀁 𑀭𑁄𑀳𑀺𑀢𑀫𑀘𑁆𑀙𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀪𑀺𑀦𑀦𑁆𑀤𑀫𑀸𑀦𑀸 𑁋

𑁩𑁫.

‘‘𑀬𑀣𑀸𑀧𑀺 𑀭𑀸𑀚𑀸 𑀦𑀦𑁆𑀤𑁂𑀬𑁆𑀬, 𑀭𑀚𑁆𑀚𑀁 𑀮𑀤𑁆𑀥𑀸𑀦 𑀔𑀢𑁆𑀢𑀺𑀬𑁄;

𑀏𑀯𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀤𑀺𑀲𑁆𑀯𑀸 𑀧𑀼𑀡𑁆𑀡𑀫𑀼𑀔𑀁 𑀧𑀢𑀺’’𑀦𑁆𑀢𑀺. 𑁋

𑀇𑀫𑀁 ¶ 𑀕𑀸𑀣𑀁 𑀯𑀢𑁆𑀯𑀸 𑀅𑀥𑀺𑀕𑀫𑀽𑀧𑀸𑀬𑀁 𑀧𑀼𑀘𑁆𑀙𑀦𑁆𑀢𑀻 𑁋

𑁩𑁬.

‘‘𑀓𑀣𑀁 𑀦𑀼 𑀣𑀮𑀚𑁄 𑀲𑀦𑁆𑀢𑁄, 𑀉𑀤𑀓𑁂 𑀫𑀘𑁆𑀙𑀁 𑀧𑀭𑀸𑀫𑀲𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀣𑀁 𑀅𑀥𑀺𑀕𑀢𑀁 𑀢𑀬𑀸’’𑀢𑀺. 𑁋

𑀇𑀫𑀁 𑀕𑀸𑀣𑀫𑀸𑀳 𑁋

𑀢𑀢𑁆𑀣 ¶ 𑀓𑀣𑀁 𑀦𑀽𑀢𑀺 ‘‘𑀔𑀸𑀤, 𑀪𑀤𑁆𑀤𑁂’’𑀢𑀺 𑀫𑀘𑁆𑀙𑀔𑀡𑁆𑀟𑁂 𑀧𑀼𑀭𑀢𑁄 𑀞𑀧𑀺𑀢𑁂 ‘‘𑀓𑀣𑀁 𑀦𑀼 𑀢𑁆𑀯𑀁 𑀣𑀮𑀚𑁄 𑀲𑀫𑀸𑀦𑁄 𑀉𑀤𑀓𑁂 𑀫𑀘𑁆𑀙𑀁 𑀕𑀡𑁆𑀳𑀻’’𑀢𑀺 𑀧𑀼𑀘𑁆𑀙𑀺.

𑀲𑀺𑀗𑁆𑀕𑀸𑀮𑁄 𑀢𑀲𑁆𑀲𑀸 𑀅𑀥𑀺𑀕𑀫𑀽𑀧𑀸𑀬𑀁 𑀆𑀘𑀺𑀓𑁆𑀔𑀦𑁆𑀢𑁄 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁩𑁭.

‘‘𑀯𑀺𑀯𑀸𑀤𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀯𑀺𑀯𑀸𑀤𑁂𑀦 𑀥𑀦𑀓𑁆𑀔𑀬𑀸;

𑀚𑀻𑀦𑀸 𑀉𑀤𑁆𑀤𑀸 𑀯𑀺𑀯𑀸𑀤𑁂𑀦, 𑀪𑀼𑀜𑁆𑀚 𑀫𑀸𑀬𑀸𑀯𑀺 𑀭𑁄𑀳𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀯𑀺𑀯𑀸𑀤𑁂𑀦 𑀓𑀺𑀲𑀸 𑀳𑁄𑀦𑁆𑀢𑀻𑀢𑀺 𑀪𑀤𑁆𑀤𑁂, 𑀇𑀫𑁂 𑀲𑀢𑁆𑀢𑀸 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀸 𑀯𑀺𑀯𑀸𑀤𑀁 𑀦𑀺𑀲𑁆𑀲𑀸𑀬 𑀓𑀺𑀲𑀸 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀳𑁄𑀦𑁆𑀢𑀺. 𑀯𑀺𑀯𑀸𑀤𑁂𑀦 𑀥𑀦𑀓𑁆𑀔𑀬𑀸𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀁 𑀥𑀦𑀸𑀦𑀁 𑀔𑀬𑀸 𑀯𑀺𑀯𑀸𑀤𑁂𑀦𑁂𑀯 𑀳𑁄𑀦𑁆𑀢𑀺. 𑀤𑁆𑀯𑀻𑀲𑀼𑀧𑀺 𑀯𑀺𑀯𑀤𑀦𑁆𑀢𑁂𑀲𑀼 𑀏𑀓𑁄 𑀧𑀭𑀸𑀚𑀺𑀢𑁄 𑀧𑀭𑀸𑀚𑀺𑀢𑀢𑁆𑀢𑀸 𑀥𑀦𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀇𑀢𑀭𑁄 𑀚𑀬𑀪𑀸𑀕𑀤𑀸𑀦𑁂𑀦. 𑀚𑀻𑀦𑀸 𑀉𑀤𑁆𑀤𑀸𑀢𑀺 𑀤𑁆𑀯𑁂 𑀉𑀤𑁆𑀤𑀸𑀧𑀺 𑀯𑀺𑀯𑀸𑀤𑁂𑀦𑁂𑀯 𑀇𑀫𑀁 𑀫𑀘𑁆𑀙𑀁 𑀚𑀻𑀦𑀸, 𑀢𑀲𑁆𑀫𑀸 𑀢𑁆𑀯𑀁 𑀫𑀬𑀸 𑀆𑀪𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀫𑀸 𑀧𑀼𑀘𑁆𑀙, 𑀓𑁂𑀯𑀮𑀁 𑀇𑀫𑀁 𑀪𑀼𑀜𑁆𑀚 𑀫𑀸𑀬𑀸𑀯𑀺 𑀭𑁄𑀳𑀺𑀢𑀦𑁆𑀢𑀺.

𑀇𑀢𑀭𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑁋

𑁩𑁮.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀯𑀸𑀤𑁄 𑀬𑀢𑁆𑀣 𑀚𑀸𑀬𑀢𑀺;

𑀥𑀫𑁆𑀫𑀝𑁆𑀞𑀁 𑀧𑀝𑀺𑀥𑀸𑀯𑀢𑀺, 𑀲𑁄 𑀳𑀺 𑀦𑁂𑀲𑀁 𑀯𑀺𑀦𑀸𑀬𑀓𑁄;

𑀥𑀦𑀸𑀧𑀺 𑀢𑀢𑁆𑀣 𑀚𑀻𑀬𑀦𑁆𑀢𑀺, 𑀭𑀸𑀚𑀓𑁄𑀲𑁄 𑀧𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 𑀏𑀯𑀫𑁂𑀯𑀸𑀢𑀺 𑀪𑀺𑀓𑁆𑀔𑀯𑁂, 𑀬𑀣𑀸 𑀏𑀢𑁂 𑀉𑀤𑁆𑀤𑀸 𑀚𑀻𑀦𑀸, 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼𑀧𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀯𑀺𑀯𑀸𑀤𑁄 𑀚𑀸𑀬𑀢𑀺, 𑀢𑀢𑁆𑀣 𑀢𑁂 𑀫𑀦𑀼𑀲𑁆𑀲𑀸 𑀥𑀫𑁆𑀫𑀝𑁆𑀞𑀁 𑀧𑀢𑀺𑀥𑀸𑀯𑀦𑁆𑀢𑀺, 𑀯𑀺𑀦𑀺𑀘𑁆𑀙𑀬𑀲𑀸𑀫𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀲𑁄 𑀳𑀺 𑀦𑁂𑀲𑀁 𑀯𑀺𑀦𑀸𑀬𑀓𑁄, 𑀲𑁄 𑀢𑁂𑀲𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀯𑀸𑀤𑀯𑀽𑀧𑀲𑀫𑀓𑁄𑀢𑀺 𑀅𑀢𑁆𑀣𑁄. 𑀥𑀦𑀸𑀧𑀺 ¶ 𑀢𑀢𑁆𑀣𑀸𑀢𑀺 𑀢𑀢𑁆𑀣 𑀢𑁂 𑀯𑀺𑀯𑀸𑀤𑀸𑀧𑀦𑁆𑀦𑀸 𑀥𑀦𑀢𑁄𑀧𑀺 𑀚𑀻𑀬𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀤𑀡𑁆𑀟𑁂𑀦 𑀘𑁂𑀯 𑀚𑀬𑀪𑀸𑀕𑀕𑁆𑀕𑀳𑀡𑁂𑀦 𑀘 𑀭𑀸𑀚𑀓𑁄𑀲𑁄 𑀧𑀯𑀟𑁆𑀠𑀢𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀺𑀗𑁆𑀕𑀸𑀮𑁄 𑀉𑀧𑀦𑀦𑁆𑀤𑁄 𑀅𑀳𑁄𑀲𑀺, 𑀉𑀤𑁆𑀤𑀸 𑀤𑁆𑀯𑁂 𑀫𑀳𑀮𑁆𑀮𑀓𑀸, 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀓𑀸 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀩𑁆𑀪𑀧𑀼𑀧𑁆𑀨𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁦𑁧] 𑁬. 𑀧𑀡𑁆𑀡𑀓𑀚𑀸𑀢𑀓𑀯𑀡𑁆𑀡𑀦𑀸

𑀧𑀡𑁆𑀡𑀓𑀁 ¶ 𑀢𑀺𑀔𑀺𑀡𑀥𑀸𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀅𑀬𑀁 𑀇𑀢𑁆𑀣𑀻 𑀢𑀼𑀬𑁆𑀳𑀁 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀇𑀫𑀁 𑀦𑀺𑀲𑁆𑀲𑀸𑀬 𑀘𑁂𑀢𑀲𑀺𑀓𑀭𑁄𑀕𑁂𑀦 𑀫𑀭𑀦𑁆𑀢𑁄 𑀧𑀡𑁆𑀟𑀺𑀢𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀅𑀮𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀫𑀤𑁆𑀤𑀯𑀫𑀳𑀸𑀭𑀸𑀚𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑁂𑀦𑀓𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀤𑁆𑀤𑀯𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺, ‘‘𑀲𑁂𑀦𑀓𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀢𑁆𑀢𑁂 𑀲𑀓𑀮𑀦𑀕𑀭𑁂 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀜𑁆𑀜𑀸𑀬𑀺. 𑀢𑀤𑀸 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀦𑀺𑀭𑀸𑀳𑀸𑀭𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀳𑀸𑀬𑀓𑁂𑀳𑀺 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸𑀧𑀺 ‘‘𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀦 𑀤𑀺𑀲𑁆𑀲𑀢𑀺, 𑀓𑀳𑀁 𑀦𑀼 𑀔𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀳𑀁 𑀢𑁂 𑀇𑀫𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀫𑁆𑀫𑀺, 𑀲𑀢𑁆𑀢𑀸𑀳𑀁 𑀖𑀭𑁂 𑀓𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀆𑀦𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀯𑀺𑀚𑀺𑀢𑀁 𑀅𑀕𑀫𑀲𑀼𑀁, 𑀓𑁄𑀘𑀺 𑀕𑀢𑀝𑁆𑀞𑀸𑀦𑀁 𑀦 𑀚𑀸𑀦𑀺, 𑀦𑀸𑀯𑀸𑀬 𑀕𑀢𑀫𑀕𑁆𑀕𑁄 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀯𑀺𑀘𑀺𑀦𑀦𑁆𑀢𑁄𑀧𑀺 𑀢𑀲𑁆𑀲 𑀕𑀢𑀝𑁆𑀞𑀸𑀦𑀁 𑀦 𑀅𑀜𑁆𑀜𑀸𑀲𑀺. 𑀅𑀣𑀲𑁆𑀲 𑀢𑀁 𑀦𑀺𑀲𑁆𑀲𑀸𑀬 𑀩𑀮𑀯𑀲𑁄𑀓𑁄 ¶ 𑀉𑀧𑁆𑀧𑀚𑁆𑀚𑀺, 𑀳𑀤𑀬𑀁 𑀉𑀡𑁆𑀳𑀁 𑀳𑀼𑀢𑁆𑀯𑀸 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲 𑀓𑀼𑀘𑁆𑀙𑀺𑀢𑁄 𑀮𑁄𑀳𑀺𑀢𑀁 𑀦𑀺𑀓𑁆𑀔𑀫𑀺, 𑀩𑁆𑀬𑀸𑀥𑀺 𑀫𑀳𑀦𑁆𑀢𑁄 𑀅𑀳𑁄𑀲𑀺. 𑀫𑀳𑀦𑁆𑀢𑀸𑀧𑀺 𑀭𑀸𑀚𑀯𑁂𑀚𑁆𑀚𑀸 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑀲𑁆𑀲 𑀭𑀜𑁆𑀜𑁄 𑀩𑁆𑀬𑀸𑀥𑀺 𑀦𑀢𑁆𑀣𑀺, 𑀪𑀭𑀺𑀬𑀁 𑀧𑀦 𑀅𑀧𑀲𑁆𑀲𑀦𑁆𑀢𑁄 𑀘𑁂𑀢𑀲𑀺𑀓𑀭𑁄𑀕𑁂𑀦 𑀨𑀼𑀝𑁆𑀞𑁄, 𑀉𑀧𑀸𑀬𑁂𑀦 𑀢𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀬𑀼𑀭𑀜𑁆𑀘 𑀧𑀼𑀓𑁆𑀓𑀼𑀲𑀜𑁆𑀘𑀸𑀢𑀺 𑀤𑁆𑀯𑁂 𑀭𑀜𑁆𑀜𑁄 𑀧𑀡𑁆𑀟𑀺𑀢𑀸𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀤𑁂𑀯𑀺𑀬𑀸 𑀅𑀤𑀲𑁆𑀲𑀦𑁂𑀦 ¶ 𑀘𑁂𑀢𑀲𑀺𑀓𑀁 𑀭𑁄𑀕𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀭𑁄𑀕𑁄 𑀦𑀢𑁆𑀣𑀺, 𑀩𑀳𑀽𑀧𑀓𑀸𑀭𑁄 𑀘 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑀭𑀸𑀚𑀸, 𑀢𑀲𑁆𑀫𑀸 𑀉𑀧𑀸𑀬𑁂𑀦 𑀦𑀁 𑀢𑀺𑀓𑀺𑀘𑁆𑀙𑀸𑀫, 𑀭𑀸𑀚𑀗𑁆𑀕𑀡𑁂 ¶ 𑀲𑀫𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀅𑀲𑀺𑀁 𑀕𑀺𑀮𑀺𑀢𑀼𑀁 𑀚𑀸𑀦𑀦𑁆𑀢𑁂𑀦 𑀅𑀲𑀺𑀁 𑀕𑀺𑀮𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀲𑀻𑀳𑀧𑀜𑁆𑀚𑀭𑁂 𑀓𑀢𑁆𑀯𑀸 𑀲𑀫𑀚𑁆𑀚𑀁 𑀑𑀮𑁄𑀓𑀸𑀧𑁂𑀲𑁆𑀲𑀸𑀫, 𑀭𑀸𑀚𑀸 𑀅𑀲𑀺𑀁 𑀕𑀺𑀮𑀦𑁆𑀢𑀁 𑀤𑀺𑀲𑁆𑀯𑀸 ‘𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄 𑀅𑀜𑁆𑀜𑀁 𑀤𑀼𑀓𑁆𑀓𑀭𑀢𑀭’𑀦𑁆𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀢𑀁 𑀲𑀫𑁆𑀫 𑀆𑀬𑀼𑀭, 𑀢𑁆𑀯𑀁 ‘𑀅𑀲𑀼𑀓𑀁 𑀦𑀸𑀫 𑀤𑀤𑀸𑀫𑀻𑀢𑀺 𑀯𑀘𑀦𑀁 𑀇𑀢𑁄 𑀤𑀼𑀓𑁆𑀓𑀭𑀢𑀭’𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺, 𑀢𑀢𑁄 𑀲𑀫𑁆𑀫 𑀧𑀼𑀓𑁆𑀓𑀼𑀲, 𑀢𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀢𑁆𑀯𑀁 ‘𑀫𑀳𑀸𑀭𑀸𑀚, 𑀤𑀤𑀸𑀫𑀻𑀢𑀺 𑀯𑀢𑁆𑀯𑀸 𑀅𑀤𑀤𑀢𑁄 𑀲𑀸 𑀯𑀸𑀘𑀸 𑀅𑀨𑀮𑀸 𑀳𑁄𑀢𑀺, 𑀢𑀣𑀸𑀭𑀽𑀧𑀁 𑀯𑀸𑀘𑀁 𑀦 𑀓𑁂𑀘𑀺 𑀉𑀧𑀚𑀻𑀯𑀦𑁆𑀢𑀺 𑀦 𑀔𑀸𑀤𑀦𑁆𑀢𑀺 𑀦 𑀧𑀺𑀯𑀦𑁆𑀢𑀺, 𑀬𑁂 𑀧𑀦 𑀢𑀲𑁆𑀲 𑀯𑀘𑀦𑀲𑁆𑀲𑀸𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑀺, 𑀬𑀣𑀸𑀧𑀝𑀺𑀜𑁆𑀜𑀸𑀢𑀫𑀢𑁆𑀣𑀁 𑀤𑁂𑀦𑁆𑀢𑀺𑀬𑁂𑀯, 𑀇𑀤𑀁 𑀢𑀢𑁄 𑀤𑀼𑀓𑁆𑀓𑀭𑀢𑀭’𑀦𑁆𑀢𑀺 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺, 𑀇𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀁 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀫𑀚𑁆𑀚𑀁 𑀓𑀸𑀭𑁂𑀲𑀺.

𑀅𑀣 𑀢𑁂 𑀢𑀬𑁄𑀧𑀺 𑀧𑀡𑁆𑀟𑀺𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀸𑀚𑀗𑁆𑀕𑀡𑁂 𑀲𑀫𑀚𑁆𑀚𑁄 𑀯𑀢𑁆𑀢𑀢𑀺, 𑀢𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀤𑀼𑀓𑁆𑀔𑀫𑁆𑀧𑀺 𑀦 𑀤𑀼𑀓𑁆𑀔𑀁 𑀳𑁄𑀢𑀺, 𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀭𑀸𑀚𑀸𑀦𑀁 𑀦𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀲𑀫𑀚𑁆𑀚𑀁 𑀑𑀮𑁄𑀓𑀸𑀧𑁂𑀲𑀼𑀁. 𑀩𑀳𑀽 𑀚𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀸𑀦𑀦𑀓𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀼𑀁. 𑀏𑀓𑁄 𑀧𑀦 𑀧𑀼𑀭𑀺𑀲𑁄 𑀢𑁂𑀢𑁆𑀢𑀺𑀁𑀲𑀗𑁆𑀕𑀼𑀮𑀁 𑀢𑀺𑀔𑀺𑀡𑀥𑀸𑀭𑀁 𑀅𑀲𑀺𑀭𑀢𑀦𑀁 𑀕𑀺𑀮𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀏𑀢𑀁 𑀅𑀲𑀺𑀁 𑀕𑀺𑀮𑀢𑀺, ‘𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄 𑀅𑀜𑁆𑀜𑀁 𑀤𑀼𑀓𑁆𑀓𑀭𑀢𑀭’𑀦𑁆𑀢𑀺 𑀇𑀫𑁂 𑀧𑀡𑁆𑀟𑀺𑀢𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀬𑀼𑀭𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁯.

‘‘𑀧𑀡𑁆𑀡𑀓𑀁 𑀢𑀺𑀔𑀺𑀡𑀥𑀸𑀭𑀁, 𑀅𑀲𑀺𑀁 𑀲𑀫𑁆𑀧𑀦𑁆𑀦𑀧𑀸𑀬𑀺𑀦𑀁;

𑀧𑀭𑀺𑀲𑀸𑀬𑀁 𑀧𑀼𑀭𑀺𑀲𑁄 𑀕𑀺𑀮𑀢𑀺, 𑀓𑀺𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀬𑀤𑀜𑁆𑀜𑀁 𑀤𑀼𑀓𑁆𑀓𑀭𑀁 𑀞𑀸𑀦𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 𑀧𑀡𑁆𑀡𑀓𑀦𑁆𑀢𑀺 𑀧𑀡𑁆𑀡𑀓𑀭𑀝𑁆𑀞𑁂 𑀉𑀧𑁆𑀧𑀦𑁆𑀦𑀁. 𑀲𑀫𑁆𑀧𑀦𑁆𑀦𑀧𑀸𑀬𑀺𑀦𑀦𑁆𑀢𑀺 𑀲𑀫𑁆𑀧𑀦𑁆𑀦𑀁 𑀧𑀭𑀮𑁄𑀳𑀺𑀢𑀧𑀸𑀬𑀺𑀦𑀁. 𑀧𑀭𑀺𑀲𑀸𑀬𑀦𑁆𑀢𑀺 𑀧𑀭𑀺𑀲𑀫𑀚𑁆𑀛𑁂 𑀥𑀦𑀮𑁄𑀪𑁂𑀦 𑀅𑀬𑀁 𑀧𑀼𑀭𑀺𑀲𑁄 𑀕𑀺𑀮𑀢𑀺. 𑀬𑀤𑀜𑁆𑀜𑀦𑁆𑀢𑀺 𑀇𑀢𑁄 𑀅𑀲𑀺𑀕𑀺𑀮𑀦𑀢𑁄 𑀬𑀁 𑀅𑀜𑁆𑀜𑀁 𑀤𑀼𑀓𑁆𑀓𑀭𑀢𑀭𑀁 𑀓𑀸𑀭𑀡𑀁, 𑀢𑀁 𑀫𑀬𑀸 𑀧𑀼𑀘𑁆𑀙𑀺𑀢𑁄 𑀓𑀣𑁂𑀳𑀻𑀢𑀺.

𑀅𑀣𑀲𑁆𑀲 ¶ ¶ ¶ 𑀲𑁄 𑀢𑀁 𑀓𑀣𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁦.

‘‘𑀕𑀺𑀮𑁂𑀬𑁆𑀬 𑀧𑀼𑀭𑀺𑀲𑁄 𑀮𑁄𑀪𑀸, 𑀅𑀲𑀺𑀁 𑀲𑀫𑁆𑀧𑀦𑁆𑀦𑀧𑀸𑀬𑀺𑀦𑀁;

𑀬𑁄 𑀘 𑀯𑀚𑁆𑀚𑀸 𑀤𑀤𑀸𑀫𑀻𑀢𑀺, 𑀢𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀲𑀩𑁆𑀩𑀜𑁆𑀜𑀁 𑀲𑀼𑀓𑀭𑀁 𑀞𑀸𑀦𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀤𑁆𑀤𑀯𑀸’’𑀢𑀺.

𑀢𑀢𑁆𑀣 𑀯𑀚𑁆𑀚𑀸𑀢𑀺 𑀯𑀤𑁂𑀬𑁆𑀬. 𑀢𑀁 𑀤𑀼𑀓𑁆𑀓𑀭𑀢𑀭𑀦𑁆𑀢𑀺 ‘‘𑀤𑀤𑀸𑀫𑀻’’𑀢𑀺 𑀯𑀘𑀦𑀁 𑀢𑀢𑁄 𑀅𑀲𑀺𑀕𑀺𑀮𑀦𑀢𑁄 𑀤𑀼𑀓𑁆𑀓𑀭𑀢𑀭𑀁. 𑀲𑀩𑁆𑀩𑀜𑁆𑀜𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀢𑀯 𑀤𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀲𑀩𑁆𑀩𑀫𑁆𑀧𑀺 𑀓𑀸𑀭𑀡𑀁 𑀲𑀼𑀓𑀭𑀁. 𑀫𑀤𑁆𑀤𑀯𑀸𑀢𑀺 𑀭𑀸𑀚𑀸𑀦𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑀭𑀜𑁆𑀜𑁄 𑀆𑀬𑀼𑀭𑀧𑀡𑁆𑀟𑀺𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀲𑀺𑀕𑀺𑀮𑀦𑀢𑁄 𑀓𑀺𑀭 ‘𑀇𑀤𑀁 𑀦𑀸𑀫 𑀤𑀫𑁆𑀫𑀻’𑀢𑀺 𑀯𑀘𑀦𑀁 𑀤𑀼𑀓𑁆𑀓𑀭𑀁, 𑀅𑀳𑀜𑁆𑀘 ‘𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀤𑁂𑀯𑀺𑀁 𑀤𑀫𑁆𑀫𑀻’𑀢𑀺 𑀅𑀯𑀘𑀁, 𑀅𑀢𑀺𑀤𑀼𑀓𑁆𑀓𑀭𑀁 𑀯𑀢 𑀫𑁂 𑀓𑀢’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑀲𑁆𑀲𑁂𑀯 𑀳𑀤𑀬𑀲𑁄𑀓𑁄 𑀣𑁄𑀓𑀁 𑀢𑀦𑀼𑀢𑁆𑀢𑀁 𑀕𑀢𑁄. 𑀲𑁄 𑀢𑀢𑁄 ‘‘𑀧𑀭𑀲𑁆𑀲 𑀇𑀫𑀁 𑀤𑀫𑁆𑀫𑀻𑀢𑀺 𑀯𑀘𑀦𑀢𑁄 𑀧𑀦 𑀅𑀜𑁆𑀜𑀁 𑀤𑀼𑀓𑁆𑀓𑀭𑀢𑀭𑀁 𑀅𑀢𑁆𑀣𑀺 𑀦𑀼 𑀔𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀓𑁆𑀓𑀼𑀲𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁧.

‘‘𑀩𑁆𑀬𑀸𑀓𑀸𑀲𑀺 𑀆𑀬𑀼𑀭𑁄 𑀧𑀜𑁆𑀳𑀁, 𑀅𑀢𑁆𑀣𑀁 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀧𑀼𑀓𑁆𑀓𑀼𑀲𑀁 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀬𑀤𑀜𑁆𑀜𑀁 𑀤𑀼𑀓𑁆𑀓𑀭𑀁 𑀞𑀸𑀦𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀢𑁆𑀣 𑀧𑀜𑁆𑀳𑀁 𑀅𑀢𑁆𑀣𑀦𑁆𑀢𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀩𑁆𑀬𑀸𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄𑀢𑀺 𑀢𑀤𑀢𑁆𑀣𑀚𑁄𑀢𑀓𑁂 𑀕𑀦𑁆𑀣𑁂 𑀓𑀼𑀲𑀮𑁄. 𑀢𑀢𑁄𑀢𑀺 𑀢𑀢𑁄 𑀯𑀘𑀦𑀢𑁄 𑀓𑀺𑀁 𑀤𑀼𑀓𑁆𑀓𑀭𑀢𑀭𑀦𑁆𑀢𑀺.

𑀅𑀣𑀲𑁆𑀲 𑀩𑁆𑀬𑀸𑀓𑀭𑁄𑀦𑁆𑀢𑁄 𑀧𑀼𑀓𑁆𑀓𑀼𑀲𑀧𑀡𑁆𑀟𑀺𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁨.

‘‘𑀦 𑀯𑀸𑀘𑀫𑀼𑀧𑀚𑀻𑀯𑀦𑁆𑀢𑀺, 𑀅𑀨𑀮𑀁 𑀕𑀺𑀭𑀫𑀼𑀤𑀻𑀭𑀺𑀢𑀁;

𑀬𑁄 𑀘 𑀤𑀢𑁆𑀯𑀸 𑀅𑀯𑀸𑀓𑀬𑀺𑀭𑀸, 𑀢𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀲𑀩𑁆𑀩𑀜𑁆𑀜𑀁 𑀲𑀼𑀓𑀭𑀁 𑀞𑀸𑀦𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀤𑁆𑀤𑀯𑀸’’𑀢𑀺.

𑀢𑀢𑁆𑀣 𑀤𑀢𑁆𑀯𑀸𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀤𑀫𑁆𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸. 𑀅𑀯𑀸𑀓𑀬𑀺𑀭𑀸𑀢𑀺 𑀢𑀁 𑀧𑀝𑀺𑀜𑁆𑀜𑀸𑀢𑀫𑀢𑁆𑀣𑀁 ¶ 𑀤𑀤𑀦𑁆𑀢𑁄 𑀢𑀲𑁆𑀫𑀺𑀁 𑀮𑁄𑀪𑀁 𑀅𑀯𑀸𑀓𑀭𑁂𑀬𑁆𑀬 𑀙𑀺𑀦𑁆𑀤𑁂𑀬𑁆𑀬, 𑀢𑀁 𑀪𑀡𑁆𑀟𑀁 ¶ 𑀤𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄𑀢𑀺 𑀢𑀢𑁄 𑀅𑀲𑀺𑀕𑀺𑀮𑀦𑀢𑁄 ‘‘𑀅𑀲𑀼𑀓𑀁 𑀦𑀸𑀫 𑀢𑁂 𑀤𑀫𑁆𑀫𑀻’’𑀢𑀺 𑀯𑀘𑀦𑀢𑁄 𑀘 𑀢𑀤𑁂𑀯 𑀤𑀼𑀓𑁆𑀓𑀭𑀢𑀭𑀁.

𑀭𑀜𑁆𑀜𑁄 ¶ 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀳𑀁 ‘𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀤𑁂𑀯𑀺𑀁 𑀤𑀫𑁆𑀫𑀻’𑀢𑀺 𑀧𑀞𑀫𑀁 𑀯𑀢𑁆𑀯𑀸 𑀯𑀸𑀘𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀢𑀁 𑀅𑀤𑀸𑀲𑀺𑀁, 𑀤𑀼𑀓𑁆𑀓𑀭𑀁 𑀯𑀢 𑀫𑁂 𑀓𑀢’’𑀦𑁆𑀢𑀺 𑀧𑀭𑀺𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀲𑁄𑀓𑁄 𑀢𑀦𑀼𑀓𑀢𑀭𑁄 𑀚𑀸𑀢𑁄. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑁂𑀦𑀓𑀧𑀡𑁆𑀟𑀺𑀢𑀢𑁄 𑀅𑀜𑁆𑀜𑁄 𑀧𑀡𑁆𑀟𑀺𑀢𑀢𑀭𑁄 𑀦𑀸𑀫 𑀦𑀢𑁆𑀣𑀺, 𑀇𑀫𑀁 𑀧𑀜𑁆𑀳𑀁 𑀏𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁪𑁩.

‘‘𑀩𑁆𑀬𑀸𑀓𑀸𑀲𑀺 𑀧𑀼𑀓𑁆𑀓𑀼𑀲𑁄 𑀧𑀜𑁆𑀳𑀁, 𑀅𑀢𑁆𑀣𑀁 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀲𑁂𑀦𑀓𑀁 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀬𑀤𑀜𑁆𑀜𑀁 𑀤𑀼𑀓𑁆𑀓𑀭𑀁 𑀞𑀸𑀦𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀅𑀣𑀲𑁆𑀲 𑀩𑁆𑀬𑀸𑀓𑀭𑁄𑀦𑁆𑀢𑁄 𑀲𑁂𑀦𑀓𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁪𑁪.

‘‘𑀤𑀤𑁂𑀬𑁆𑀬 𑀧𑀼𑀭𑀺𑀲𑁄 𑀤𑀸𑀦𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀬𑁄 𑀘 𑀤𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑁂, 𑀢𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀲𑀩𑁆𑀩𑀜𑁆𑀜𑀁 𑀲𑀼𑀓𑀭𑀁 𑀞𑀸𑀦𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀤𑁆𑀤𑀯𑀸’’𑀢𑀺.

𑀢𑀢𑁆𑀣 𑀦𑀸𑀦𑀼𑀢𑀧𑁆𑀧𑁂𑀢𑀺 𑀅𑀢𑁆𑀢𑀦𑁄 𑀅𑀢𑀺𑀓𑀦𑁆𑀢𑀁 𑀅𑀢𑀺𑀫𑀦𑀸𑀧𑀁 𑀧𑀺𑀬𑀪𑀡𑁆𑀟𑀁 𑀧𑀭𑀲𑁆𑀲 𑀤𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀫𑀬𑀸 𑀇𑀤𑀁 𑀤𑀺𑀦𑁆𑀦’’𑀦𑁆𑀢𑀺 𑀏𑀯𑀁 𑀢𑀁 𑀧𑀺𑀬𑀪𑀡𑁆𑀟𑀁 𑀆𑀭𑀩𑁆𑀪 𑀬𑁄 𑀧𑀘𑁆𑀙𑀸 𑀦 𑀢𑀧𑁆𑀧𑀢𑀺 𑀦 𑀲𑁄𑀘𑀢𑀺, 𑀢𑀁 𑀅𑀲𑀺𑀕𑀺𑀮𑀦𑀢𑁄 𑀘 ‘‘𑀅𑀲𑀼𑀓𑀁 𑀦𑀸𑀫 𑀢𑁂 𑀤𑀫𑁆𑀫𑀻’’𑀢𑀺 𑀯𑀘𑀦𑀢𑁄 𑀘 𑀢𑀲𑁆𑀲 𑀤𑀸𑀦𑀢𑁄 𑀘 𑀤𑀼𑀓𑁆𑀓𑀭𑀢𑀭𑀁.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑀸 𑀓𑀣𑁂𑀲𑀺. 𑀤𑀸𑀦𑀜𑁆𑀳𑀺 𑀤𑀢𑁆𑀯𑀸 𑀅𑀧𑀭𑀘𑁂𑀢𑀦𑀸𑀯 𑀤𑀼𑀲𑁆𑀲𑀦𑁆𑀥𑀸𑀭𑀺𑀬𑀸, 𑀢𑀲𑁆𑀲𑀸 𑀲𑀦𑁆𑀥𑀸𑀭𑀡𑀤𑀼𑀓𑁆𑀓𑀭𑀢𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂𑀦 𑀤𑀻𑀧𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀤𑀼 𑀘𑀸𑀧𑀁 𑀕𑀳𑁂𑀢𑁆𑀯𑀸𑀦, 𑀔𑀕𑁆𑀕𑀁 𑀩𑀦𑁆𑀥𑀺𑀬 𑀯𑀸𑀫𑀢𑁄;

𑀆𑀦𑁂𑀲𑁆𑀲𑀸𑀫𑀺 𑀲𑀓𑁂 𑀧𑀼𑀢𑁆𑀢𑁂, 𑀧𑀼𑀢𑁆𑀢𑀸𑀦𑀜𑁆𑀳𑀺 𑀯𑀥𑁄 𑀤𑀼𑀔𑁄.

‘‘𑀅𑀝𑁆𑀞𑀸𑀦𑀫𑁂𑀢𑀁 ¶ 𑀤𑀼𑀓𑁆𑀔𑀭𑀽𑀧𑀁, 𑀬𑀁 𑀓𑀼𑀫𑀸𑀭𑀸 𑀯𑀺𑀳𑀜𑁆𑀜𑀭𑁂;

𑀲𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬, 𑀓𑁄 𑀤𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀻’’𑀢𑀺. (𑀚𑀸. 𑁨.𑁨𑁨.𑁨𑁧𑁫𑁮-𑁨𑁧𑁫𑁯);

𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀲𑀺 ‘‘𑀅𑀳𑀁 𑀅𑀢𑁆𑀢𑀦𑁄 𑀫𑀦𑁂𑀦𑁂𑀯 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀤𑁂𑀯𑀺𑀁 𑀤𑀢𑁆𑀯𑀸 𑀲𑀓𑀫𑀦𑀁 𑀲𑀦𑁆𑀥𑀸𑀭𑁂𑀢𑀼𑀁 ¶ 𑀦 𑀲𑀓𑁆𑀓𑁄𑀫𑀺, 𑀲𑁄𑀘𑀸𑀫𑀺 𑀓𑀺𑀮𑀫𑀸𑀫𑀺, 𑀦 𑀫𑁂 𑀇𑀤𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀲𑀘𑁂 𑀲𑀸 𑀫𑀬𑀺 𑀲𑀲𑀺𑀦𑁂𑀳𑀸 𑀪𑀯𑁂𑀬𑁆𑀬 ¶ , 𑀇𑀫𑀁 𑀇𑀲𑁆𑀲𑀭𑀺𑀬𑀁 𑀙𑀟𑁆𑀟𑁂𑀢𑁆𑀯𑀸 𑀦 𑀧𑀮𑀸𑀬𑁂𑀬𑁆𑀬, 𑀫𑀬𑀺 𑀧𑀦 𑀲𑀺𑀦𑁂𑀳𑀁 𑀅𑀓𑀢𑁆𑀯𑀸 𑀧𑀮𑀸𑀢𑀸𑀬 𑀓𑀺𑀁 𑀢𑀸𑀬 𑀫𑀬𑁆𑀳’’𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀧𑀤𑀼𑀫𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀲𑁄𑀓𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁄, 𑀢𑀗𑁆𑀔𑀡𑀜𑁆𑀜𑁂𑀯𑀲𑁆𑀲 𑀓𑀼𑀘𑁆𑀙𑀺 𑀧𑀭𑀺𑀲𑀡𑁆𑀞𑀸𑀲𑀺. 𑀲𑁄 𑀦𑀺𑀭𑁄𑀕𑁄 𑀲𑀼𑀔𑀺𑀢𑁄 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁪𑁫.

‘‘𑀩𑁆𑀬𑀸𑀓𑀸𑀲𑀺 𑀆𑀬𑀼𑀭𑁄 𑀧𑀜𑁆𑀳𑀁, 𑀅𑀣𑁄 𑀧𑀼𑀓𑁆𑀓𑀼𑀲𑀧𑁄𑀭𑀺𑀲𑁄;

𑀲𑀩𑁆𑀩𑁂 𑀧𑀜𑁆𑀳𑁂 𑀅𑀢𑀺𑀪𑁄𑀢𑀺, 𑀬𑀣𑀸 𑀪𑀸𑀲𑀢𑀺 𑀲𑁂𑀦𑀓𑁄’’𑀢𑀺.

𑀢𑀢𑁆𑀣 𑀬𑀣𑀸 𑀪𑀸𑀲𑀢𑀻𑀢𑀺 𑀬𑀣𑀸 𑀧𑀡𑁆𑀟𑀺𑀢𑁄 𑀪𑀸𑀲𑀢𑀺, 𑀢𑀣𑁂𑀯𑁂𑀢𑀁 𑀤𑀸𑀦𑀁 𑀦𑀸𑀫 𑀤𑀢𑁆𑀯𑀸 𑀦𑁂𑀯 𑀅𑀦𑀼𑀢𑀧𑁆𑀧𑀺𑀢𑀩𑁆𑀩𑀦𑁆𑀢𑀺. 𑀇𑀫𑀁 𑀧𑀦𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀢𑀼𑀝𑁆𑀞𑁄 𑀩𑀳𑀼𑀁 𑀥𑀦𑀫𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑀸𑀚𑀫𑀳𑁂𑀲𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀭𑀸𑀚𑀸 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀆𑀬𑀼𑀭𑀧𑀡𑁆𑀟𑀺𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀧𑀼𑀓𑁆𑀓𑀼𑀲𑀧𑀡𑁆𑀟𑀺𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑁂𑀦𑀓𑀧𑀡𑁆𑀟𑀺𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀡𑁆𑀡𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁦𑁨] 𑁭. 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀚𑀦𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺 ¶ , 𑀲𑁂𑀦𑀓𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺, 𑀭𑀸𑀚𑀸 𑀢𑀁 𑀅𑀫𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀫𑀳𑀦𑁆𑀢𑀜𑁆𑀘𑀲𑁆𑀲 𑀬𑀲𑀁 𑀅𑀦𑀼𑀧𑁆𑀧𑀤𑀸𑀲𑀺 ¶ . 𑀲𑁄 𑀭𑀜𑁆𑀜𑁄 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀺, 𑀫𑀥𑀼𑀭𑀓𑀣𑁄 𑀥𑀫𑁆𑀫𑀓𑀣𑀺𑀓𑁄 𑀳𑀼𑀢𑁆𑀯𑀸 𑀭𑀸𑀚𑀸𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑀸𑀦𑁂 𑀉𑀧𑁄𑀲𑀣𑀓𑀫𑁆𑀫𑁂 𑀤𑀲𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀽𑀢𑀺 𑀇𑀫𑀸𑀬 𑀓𑀮𑁆𑀬𑀸𑀡𑀧𑀝𑀺𑀧𑀤𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀺 ¶ , 𑀲𑀓𑀮𑀭𑀝𑁆𑀞𑁂 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀧𑀓𑁆𑀔𑀤𑀺𑀯𑀲𑁂𑀲𑀼 𑀭𑀸𑀚𑀸 𑀘 𑀉𑀧𑀭𑀸𑀚𑀸𑀤𑀬𑁄 𑀘 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀲𑀪𑀁 𑀲𑀚𑁆𑀚𑁂𑀦𑁆𑀢𑀺. 𑀫𑀳𑀸𑀲𑀢𑁆𑀢𑁄 𑀲𑀚𑁆𑀚𑀺𑀢𑀥𑀫𑁆𑀫𑀲𑀪𑀸𑀬𑀁 𑀭𑀢𑀦𑀧𑀮𑁆𑀮𑀗𑁆𑀓𑀯𑀭𑀕𑀢𑁄 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀓𑀣𑀸𑀲𑀤𑀺𑀲𑀸𑀯𑀲𑁆𑀲 𑀓𑀣𑀸 𑀳𑁄𑀢𑀺.

𑀅𑀣 𑀅𑀜𑁆𑀜𑀢𑀭𑁄 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄 𑀥𑀦𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 ‘‘𑀪𑀺𑀓𑁆𑀔𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀢𑁄. 𑀢𑀲𑁆𑀲 𑀕𑀢𑀓𑀸𑀮𑁂 𑀢𑀁 𑀓𑀼𑀮𑀁 𑀓𑀳𑀸𑀧𑀡𑁂 𑀯𑀴𑀜𑁆𑀚𑁂𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀓𑀳𑀸𑀧𑀡𑁂 𑀆𑀳𑀭𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀓𑀳𑀸𑀧𑀡𑁂 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀤𑀳𑀭𑀢𑀸𑀬 𑀓𑀸𑀫𑁂𑀲𑀼 𑀅𑀢𑀺𑀢𑁆𑀢𑀸 𑀅𑀜𑁆𑀜𑁂𑀦 𑀢𑀭𑀼𑀡𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀺. 𑀲𑁄𑀴𑀲 𑀳𑀺 𑀅𑀢𑀧𑁆𑀧𑀦𑀻𑀬𑀯𑀢𑁆𑀣𑀽𑀦𑀺 𑀦𑀸𑀫. 𑀓𑀢𑀫𑀸𑀦𑀺 𑀲𑁄𑀴𑀲? 𑀲𑀸𑀕𑀭𑁄 𑀲𑀩𑁆𑀩𑀲𑀯𑀦𑁆𑀢𑀻𑀳𑀺 𑀦 𑀢𑀧𑁆𑀧𑀢𑀺, 𑀅𑀕𑁆𑀕𑀺 𑀉𑀧𑀸𑀤𑀸𑀦𑁂𑀦 𑀦 𑀢𑀧𑁆𑀧𑀢𑀺, 𑀭𑀸𑀚𑀸 𑀭𑀝𑁆𑀞𑁂𑀦 𑀦 𑀢𑀧𑁆𑀧𑀢𑀺, 𑀩𑀸𑀮𑁄 𑀧𑀸𑀧𑁂𑀳𑀺 𑀦 𑀢𑀧𑁆𑀧𑀢𑀺, 𑀇𑀢𑁆𑀣𑀻 𑀫𑁂𑀣𑀼𑀦𑀥𑀫𑁆𑀫𑁂𑀦 𑀅𑀮𑀗𑁆𑀓𑀸𑀭𑁂𑀦 𑀯𑀺𑀚𑀸𑀬𑀦𑁂𑀦𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀦 𑀢𑀧𑁆𑀧𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑁂𑀳𑀺 𑀦 𑀢𑀧𑁆𑀧𑀢𑀺, 𑀛𑀸𑀬𑀻 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸 𑀦 𑀢𑀧𑁆𑀧𑀢𑀺, 𑀲𑁂𑀓𑁆𑀔𑁄 𑀅𑀧𑀘𑀬𑁂𑀦 𑀦 𑀢𑀧𑁆𑀧𑀢𑀺, 𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀕𑀼𑀡𑁂𑀦 𑀦 𑀢𑀧𑁆𑀧𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀦 𑀢𑀧𑁆𑀧𑀢𑀺, 𑀥𑀫𑁆𑀫𑀓𑀣𑀺𑀓𑁄 𑀲𑀸𑀓𑀘𑁆𑀙𑀸𑀬 𑀦 𑀢𑀧𑁆𑀧𑀢𑀺, 𑀯𑀺𑀲𑀸𑀭𑀤𑁄 𑀧𑀭𑀺𑀲𑀸𑀬 𑀦 𑀢𑀧𑁆𑀧𑀢𑀺, 𑀲𑀤𑁆𑀥𑁄 𑀲𑀗𑁆𑀖𑀼𑀧𑀝𑁆𑀞𑀸𑀦𑁂𑀦 𑀦 𑀢𑀧𑁆𑀧𑀢𑀺, 𑀤𑀸𑀬𑀓𑁄 𑀧𑀭𑀺𑀘𑁆𑀘𑀸𑀕𑁂𑀦 𑀦 𑀢𑀧𑁆𑀧𑀢𑀺, 𑀧𑀡𑁆𑀟𑀺𑀢𑁄 𑀥𑀫𑁆𑀫𑀲𑁆𑀲𑀯𑀦𑁂𑀦 𑀦 𑀢𑀧𑁆𑀧𑀢𑀺, 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀢𑀣𑀸𑀕𑀢𑀤𑀲𑁆𑀲𑀦𑁂𑀦 𑀦 𑀢𑀧𑁆𑀧𑀦𑁆𑀢𑀻𑀢𑀺.

𑀲𑀸𑀧𑀺 𑀩𑁆𑀭𑀸𑀳𑁆𑀫𑀡𑀻 𑀫𑁂𑀣𑀼𑀦𑀥𑀫𑁆𑀫𑁂𑀦, 𑀅𑀢𑀺𑀢𑁆𑀢𑀸 ¶ 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀲𑁆𑀲𑀢𑁆𑀣𑀸 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀤𑀼𑀫𑁆𑀫𑀦𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀓𑀺𑀁 𑀪𑁄𑀢𑀻’’𑀢𑀺 𑀯𑀼𑀢𑁆𑀢𑀸 ‘‘𑀩𑁆𑀭𑀸𑀳𑁆𑀫𑀡, 𑀅𑀳𑀁 𑀢𑀯 𑀕𑁂𑀳𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀤𑀸𑀲𑀺𑀤𑀸𑀲𑀁 𑀆𑀦𑁂𑀳𑀻’’𑀢𑀺 𑀆𑀳. ‘‘𑀪𑁄𑀢𑀺 𑀥𑀦𑀁 𑀫𑁂 𑀦𑀢𑁆𑀣𑀺, 𑀓𑀺𑀁 𑀤𑀢𑁆𑀯𑀸 𑀆𑀦𑁂𑀫𑀻’’𑀢𑀺. ‘‘𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀥𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺. ‘‘𑀢𑁂𑀦 𑀳𑀺 𑀪𑁄𑀢𑀺 𑀧𑀸𑀣𑁂𑀬𑁆𑀬𑀁 𑀫𑁂 𑀲𑀚𑁆𑀚𑁂𑀳𑀻’’𑀢𑀺. ‘‘𑀲𑀸 𑀢𑀲𑁆𑀲 𑀩𑀤𑁆𑀥𑀲𑀢𑁆𑀢𑀽𑀦𑀜𑁆𑀘 𑀅𑀩𑀤𑁆𑀥𑀲𑀢𑁆𑀢𑀽𑀦𑀜𑁆𑀘 𑀘𑀫𑁆𑀫𑀧𑀲𑀺𑀩𑁆𑀩𑀓𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺’’. 𑀩𑁆𑀭𑀸𑀳𑁆𑀫𑀡𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 ¶ 𑀘𑀭𑀦𑁆𑀢𑁄 𑀲𑀢𑁆𑀢 𑀓𑀳𑀸𑀧𑀡𑀲𑀢𑀸𑀦𑀺 𑀮𑀪𑀺𑀢𑁆𑀯𑀸 ‘‘𑀅𑀮𑀁 𑀫𑁂 𑀏𑀢𑁆𑀢𑀓𑀁 𑀥𑀦𑀁 𑀤𑀸𑀲𑀺𑀤𑀸𑀲𑀫𑀽𑀮𑀸𑀬𑀸’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀫𑀁 𑀆𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 ¶ 𑀧𑀲𑀺𑀩𑁆𑀩𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀢𑁆𑀢𑀼𑀁 𑀔𑀸𑀤𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑀫𑀼𑀔𑀁 𑀅𑀩𑀦𑁆𑀥𑀺𑀢𑁆𑀯𑀸𑀯 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀁 𑀑𑀢𑀺𑀡𑁆𑀡𑁄. 𑀅𑀣𑁂𑀓𑀲𑁆𑀫𑀺𑀁 𑀭𑀼𑀓𑁆𑀔𑀲𑀼𑀲𑀺𑀭𑁂 𑀏𑀓𑁄 𑀓𑀡𑁆𑀳𑀲𑀧𑁆𑀧𑁄 𑀲𑀢𑁆𑀢𑀼𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑀁 𑀧𑀯𑀺𑀲𑀺𑀢𑁆𑀯𑀸 𑀪𑁄𑀕𑀁 𑀆𑀪𑀼𑀚𑀺𑀢𑁆𑀯𑀸 𑀲𑀢𑁆𑀢𑀼𑀁 𑀔𑀸𑀤𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀩𑁆𑀭𑀸𑀳𑁆𑀫𑀡𑁄 𑀆𑀕𑀦𑁆𑀢𑁆𑀯𑀸 𑀧𑀲𑀺𑀩𑁆𑀩𑀓𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑀁 𑀩𑀦𑁆𑀥𑀺𑀢𑁆𑀯𑀸 𑀅𑀁𑀲𑁂 𑀓𑀢𑁆𑀯𑀸 𑀧𑀸𑀬𑀸𑀲𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀔𑀦𑁆𑀥𑀯𑀺𑀝𑀧𑁂 𑀞𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀲𑀘𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀲𑀺𑀲𑁆𑀲𑀲𑀺, 𑀲𑀬𑀁 𑀫𑀭𑀺𑀲𑁆𑀲𑀲𑀺, 𑀲𑀘𑁂 𑀅𑀚𑁆𑀚 𑀖𑀭𑀁 𑀕𑀫𑀺𑀲𑁆𑀲𑀲𑀺, 𑀪𑀭𑀺𑀬𑀸 𑀢𑁂 𑀫𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀲𑁄 𑀑𑀮𑁄𑀓𑁂𑀦𑁆𑀢𑁄 𑀤𑁂𑀯𑀢𑀁 𑀅𑀤𑀺𑀲𑁆𑀯𑀸 𑀪𑀻𑀢𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀭𑁄𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀩𑀸𑀭𑀸𑀡𑀲𑀺𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺.

𑀢𑀤𑀸 𑀘 𑀧𑀦𑁆𑀦𑀭𑀲𑀼𑀧𑁄𑀲𑀣𑁄 𑀳𑁄𑀢𑀺 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀦𑀤𑀺𑀯𑀲𑁄. 𑀫𑀳𑀸𑀚𑀦𑁄 𑀦𑀸𑀦𑀸𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀳𑀢𑁆𑀣𑁄 𑀯𑀕𑁆𑀕𑀯𑀕𑁆𑀕𑁄 𑀳𑀼𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀅𑀚𑁆𑀚 𑀲𑁂𑀦𑀓𑀧𑀡𑁆𑀟𑀺𑀢𑁄 𑀫𑀥𑀼𑀭𑀲𑁆𑀲𑀭𑁂𑀦 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀺𑀁 𑀢𑁆𑀯𑀫𑁆𑀧𑀺 𑀦 𑀚𑀸𑀦𑀸𑀲𑀻’’𑀢𑀺 𑀯𑀼𑀢𑁆𑀢𑁂 𑀘𑀺𑀦𑁆𑀢𑁂𑀲𑀺 ‘‘𑀧𑀡𑁆𑀟𑀺𑀢𑁄 𑀓𑀺𑀭 𑀥𑀫𑁆𑀫𑀓𑀣𑀺𑀓𑁄, 𑀅𑀳𑀜𑁆𑀘𑀫𑁆𑀳𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑁄, 𑀧𑀡𑁆𑀟𑀺𑀢𑀸 𑀔𑁄 𑀧𑀦 𑀫𑀳𑀦𑁆𑀢𑀫𑁆𑀧𑀺 ¶ 𑀲𑁄𑀓𑀁 𑀳𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑁄𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀧𑀭𑀺𑀬𑀦𑁆𑀢𑁂 𑀲𑀢𑁆𑀢𑀼𑀧𑀲𑀺𑀩𑁆𑀩𑀓𑁂𑀦 𑀔𑀦𑁆𑀥𑀕𑀢𑁂𑀦 𑀥𑀫𑁆𑀫𑀸𑀲𑀦𑀢𑁄 𑀅𑀯𑀺𑀤𑀽𑀭𑁂 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀆𑀓𑀸𑀲𑀕𑀗𑁆𑀕𑀁 𑀑𑀢𑀭𑀦𑁆𑀢𑁄 𑀯𑀺𑀬 𑀅𑀫𑀢𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑁄 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺.

𑀧𑀡𑁆𑀟𑀺𑀢𑀸 𑀘 𑀦𑀸𑀫 𑀤𑀺𑀲𑀸𑀘𑀓𑁆𑀔𑀼𑀓𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀲𑀢𑁆𑀢𑁄 𑀧𑀲𑀦𑁆𑀦𑀧𑀜𑁆𑀘𑀧𑀲𑀸𑀤𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀧𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀏𑀢𑁆𑀢𑀓𑀸 𑀧𑀭𑀺𑀲𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺, 𑀅𑀬𑀁 𑀧𑀦𑁂𑀓𑁄 𑀩𑁆𑀭𑀸𑀳𑁆𑀫𑀡𑁄 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀭𑁄𑀤𑀢𑀺, 𑀏𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀲𑁆𑀲𑀼𑀚𑀦𑀦𑀲𑀫𑀢𑁆𑀣𑁂𑀦 𑀲𑁄𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀫𑀲𑁆𑀲 𑀅𑀫𑁆𑀩𑀺𑀮𑁂𑀦 ¶ 𑀧𑀳𑀭𑀺𑀢𑁆𑀯𑀸 𑀢𑀫𑁆𑀩𑀫𑀮𑀁 𑀯𑀺𑀬 𑀧𑀤𑀼𑀫𑀧𑀮𑀸𑀲𑀢𑁄 𑀉𑀤𑀓𑀩𑀺𑀦𑁆𑀤𑀼𑀁 𑀯𑀺𑀬 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀏𑀢𑁆𑀣𑁂𑀯 𑀦𑀁 𑀦𑀺𑀲𑁆𑀲𑁄𑀓𑀁 𑀢𑀼𑀝𑁆𑀞𑀫𑀸𑀦𑀲𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀲𑁂𑀦𑀓𑀧𑀡𑁆𑀟𑀺𑀢𑁄 𑀦𑀸𑀫𑀸𑀳𑀁, 𑀇𑀤𑀸𑀦𑁂𑀯 𑀢𑀁 𑀦𑀺𑀲𑁆𑀲𑁄𑀓𑀁 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀲𑁆𑀲𑀢𑁆𑀣𑁄 𑀓𑀣𑁂𑀳𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀓𑀼𑀧𑀺𑀢𑀺𑀦𑁆𑀤𑁆𑀭𑀺𑀬𑁄𑀲𑀺, 𑀦𑁂𑀢𑁆𑀢𑁂𑀳𑀺 𑀢𑁂 𑀯𑀸𑀭𑀺𑀕𑀡𑀸 𑀲𑀯𑀦𑁆𑀢𑀺;

𑀓𑀺𑀁 𑀢𑁂 𑀦𑀝𑁆𑀞𑀁 𑀓𑀺𑀁 𑀧𑀦 𑀧𑀢𑁆𑀣𑀬𑀸𑀦𑁄, 𑀇𑀥𑀸𑀕𑀫𑀸 𑀩𑁆𑀭𑀳𑁆𑀫𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺.

𑀢𑀢𑁆𑀣 ¶ 𑀓𑀼𑀧𑀺𑀢𑀺𑀦𑁆𑀤𑁆𑀭𑀺𑀬𑁄𑀲𑀻𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑁂𑀯 𑀲𑀦𑁆𑀥𑀸𑀬 ‘‘𑀓𑀼𑀧𑀺𑀢𑀺𑀦𑁆𑀤𑁆𑀭𑀺𑀬𑁄𑀲𑀻’’𑀢𑀺 𑀆𑀳. 𑀯𑀸𑀭𑀺𑀕𑀡𑀸𑀢𑀺 𑀅𑀲𑁆𑀲𑀼𑀩𑀺𑀦𑁆𑀤𑀽𑀦𑀺. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀜𑁆𑀳𑀺 𑀫𑀳𑀸𑀲𑀢𑁆𑀢𑁄 𑀘𑁄𑀤𑁂𑀦𑁆𑀢𑁄 𑀏𑀯𑀫𑀸𑀳 ‘‘𑀩𑁆𑀭𑀸𑀳𑁆𑀫𑀡, 𑀲𑀢𑁆𑀢𑀸 𑀦𑀸𑀫 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑁄𑀘𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀺𑀬𑀚𑀸𑀢𑀺𑀓𑁂 𑀦𑀝𑁆𑀞𑁂 𑀯𑀸, 𑀓𑀺𑀜𑁆𑀘𑀺𑀤𑁂𑀯 𑀧𑀺𑀬𑀚𑀸𑀢𑀺𑀓𑀁 𑀧𑀢𑁆𑀣𑁂𑀢𑁆𑀯𑀸 𑀅𑀮𑀪𑀦𑁆𑀢𑀸 𑀯𑀸. 𑀢𑀢𑁆𑀣 𑀓𑀺𑀁 𑀢𑁂 𑀦𑀝𑁆𑀞𑀁, 𑀓𑀺𑀁 𑀯𑀸 𑀧𑀦 𑀧𑀢𑁆𑀣𑀬𑀦𑁆𑀢𑁄 𑀢𑁆𑀯𑀁 𑀇𑀥 𑀆𑀕𑀢𑁄, 𑀇𑀤𑀁 𑀫𑁂 𑀔𑀺𑀧𑁆𑀧𑀁 𑀩𑁆𑀭𑀽𑀳𑀻’’𑀢𑀺.

𑀅𑀣𑀲𑁆𑀲 ¶ 𑀅𑀢𑁆𑀢𑀦𑁄 𑀲𑁄𑀓𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀫𑀺𑀬𑁆𑀬𑁂𑀣 𑀪𑀭𑀺𑀬𑀸 𑀯𑀚𑀢𑁄 𑀫𑀫𑀚𑁆𑀚, 𑀅𑀕𑀘𑁆𑀙𑀢𑁄 𑀫𑀭𑀡𑀫𑀸𑀳 𑀬𑀓𑁆𑀔𑁄;

𑀏𑀢𑁂𑀦 𑀤𑀼𑀓𑁆𑀔𑁂𑀦 𑀧𑀯𑁂𑀥𑀺𑀢𑁄𑀲𑁆𑀫𑀺, 𑀅𑀓𑁆𑀔𑀸𑀳𑀺 𑀫𑁂 𑀲𑁂𑀦𑀓 𑀏𑀢𑀫𑀢𑁆𑀣’’𑀦𑁆𑀢𑀺.

𑀢𑀢𑁆𑀣 𑀯𑀚𑀢𑁄𑀢𑀺 𑀕𑁂𑀳𑀁 𑀕𑀘𑁆𑀙𑀦𑁆𑀢𑀲𑁆𑀲. 𑀅𑀕𑀘𑁆𑀙𑀢𑁄𑀢𑀺 𑀅𑀕𑀘𑁆𑀙𑀦𑁆𑀢𑀲𑁆𑀲. 𑀬𑀓𑁆𑀔𑁄𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀸 𑀭𑀼𑀓𑁆𑀔𑀤𑁂𑀯𑀢𑀸 𑀏𑀯𑀫𑀸𑀳𑀸𑀢𑀺 𑀯𑀤𑀢𑀺. 𑀲𑀸 𑀓𑀺𑀭 𑀤𑁂𑀯𑀢𑀸 ‘‘𑀧𑀲𑀺𑀩𑁆𑀩𑀓𑁂 𑀢𑁂 𑀩𑁆𑀭𑀸𑀳𑁆𑀫𑀡, 𑀓𑀡𑁆𑀳𑀲𑀧𑁆𑀧𑁄’’𑀢𑀺 𑀅𑀦𑀸𑀘𑀺𑀓𑁆𑀔𑀦𑁆𑀢𑀻 𑀩𑁄𑀥𑀺𑀲𑀢𑁆𑀢𑀲𑁆𑀲 𑀜𑀸𑀡𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀦𑀸𑀘𑀺𑀓𑁆𑀔𑀺. 𑀏𑀢𑁂𑀦 𑀤𑀼𑀓𑁆𑀔𑁂𑀦𑀸𑀢𑀺 𑀕𑀘𑁆𑀙𑀢𑁄 𑀪𑀭𑀺𑀬𑀸𑀬 𑀫𑀭𑀡𑀤𑀼𑀓𑁆𑀔𑁂𑀦, 𑀅𑀕𑀘𑁆𑀙𑀢𑁄 𑀅𑀢𑁆𑀢𑀦𑁄 𑀫𑀭𑀡𑀤𑀼𑀓𑁆𑀔𑁂𑀦, 𑀢𑁂𑀦𑀲𑁆𑀫𑀺 𑀧𑀯𑁂𑀥𑀺𑀢𑁄 𑀖𑀝𑁆𑀝𑀺𑀢𑁄 𑀓𑀫𑁆𑀧𑀺𑀢𑁄. 𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀓𑀸𑀭𑀡𑀁. 𑀬𑁂𑀦 𑀫𑁂 𑀓𑀸𑀭𑀡𑁂𑀦 ¶ 𑀕𑀘𑁆𑀙𑀢𑁄 𑀪𑀭𑀺𑀬𑀸𑀬 𑀫𑀭𑀡𑀁, 𑀅𑀕𑀘𑁆𑀙𑀢𑁄 𑀅𑀢𑁆𑀢𑀦𑁄 𑀫𑀭𑀡𑀁 𑀳𑁄𑀢𑀺, 𑀏𑀢𑀁 𑀫𑁂 𑀓𑀸𑀭𑀡𑀁 𑀆𑀘𑀺𑀓𑁆𑀔𑀸𑀳𑀻𑀢𑀺 𑀅𑀢𑁆𑀣𑁄.

𑀫𑀳𑀸𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀫𑀼𑀤𑁆𑀤𑀫𑀢𑁆𑀣𑀓𑁂 𑀚𑀸𑀮𑀁 𑀔𑀺𑀧𑀦𑁆𑀢𑁄 𑀯𑀺𑀬 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀩𑀳𑀽𑀦𑀺 𑀫𑀭𑀡𑀓𑀸𑀭𑀡𑀸𑀦𑀺. 𑀲𑀫𑀼𑀤𑁆𑀤𑁂 𑀦𑀺𑀫𑀼𑀕𑁆𑀕𑀸𑀧𑀺 𑀫𑀭𑀦𑁆𑀢𑀺, 𑀢𑀢𑁆𑀣 𑀯𑀸𑀴𑀫𑀘𑁆𑀙𑁂𑀳𑀺 𑀕𑀳𑀺𑀢𑀸𑀧𑀺, 𑀕𑀗𑁆𑀕𑀸𑀬 𑀧𑀢𑀺𑀢𑀸𑀧𑀺, 𑀢𑀢𑁆𑀣 𑀲𑀼𑀲𑀼𑀫𑀸𑀭𑁂𑀳𑀺 𑀕𑀳𑀺𑀢𑀸𑀧𑀺, 𑀭𑀼𑀓𑁆𑀔𑀢𑁄 𑀧𑀢𑀺𑀢𑀸𑀧𑀺, 𑀓𑀡𑁆𑀝𑀓𑁂𑀦 𑀯𑀺𑀤𑁆𑀥𑀸𑀧𑀺, 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀆𑀯𑀼𑀥𑁂𑀳𑀺 𑀧𑀳𑀝𑀸𑀧𑀺, 𑀯𑀺𑀲𑀁 𑀔𑀸𑀤𑀺𑀢𑁆𑀯𑀸𑀧𑀺, 𑀉𑀩𑁆𑀩𑀦𑁆𑀥𑀺𑀢𑁆𑀯𑀸𑀧𑀺, 𑀧𑀧𑀸𑀢𑁂 𑀧𑀢𑀺𑀢𑀸𑀧𑀺, 𑀅𑀢𑀺𑀲𑀻𑀢𑀸𑀤𑀻𑀳𑀺 𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀸 𑀭𑁄𑀕𑁂𑀳𑀺 𑀉𑀧𑀤𑁆𑀤𑀼𑀢𑀸𑀧𑀺 𑀫𑀭𑀦𑁆𑀢𑀺𑀬𑁂𑀯, 𑀏𑀯𑀁 𑀩𑀳𑀽𑀲𑀼 𑀫𑀭𑀡𑀓𑀸𑀭𑀡𑁂𑀲𑀼 𑀓𑀢𑀭𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀚𑁆𑀚𑁂𑀲 𑀩𑁆𑀭𑀸𑀳𑁆𑀫𑀡𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀲𑀦𑁆𑀢𑁄 𑀲𑀬𑀁 𑀫𑀭𑀺𑀲𑁆𑀲𑀢𑀺, 𑀕𑁂𑀳𑀫𑀲𑁆𑀲 𑀯𑀚𑀢𑁄 𑀪𑀭𑀺𑀬𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀘𑀺𑀦𑁆𑀢𑁂𑀦𑁆𑀢𑁄 𑀏𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀔𑀦𑁆𑀥𑁂 𑀧𑀲𑀺𑀩𑁆𑀩𑀓𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀧𑀲𑀺𑀩𑁆𑀩𑀓𑁂 𑀏𑀓𑁂𑀦 𑀲𑀧𑁆𑀧𑁂𑀦 𑀧𑀯𑀺𑀝𑁆𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀯𑀺𑀲𑀦𑁆𑀢𑁄 𑀘 𑀧𑀦𑁂𑀲𑁄 𑀇𑀫𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑁂 𑀧𑀸𑀢𑀭𑀸𑀲𑀲𑀫𑀬𑁂 𑀲𑀢𑁆𑀢𑀼𑀁 𑀔𑀸𑀤𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑀫𑀼𑀔𑀁 𑀅𑀩𑀦𑁆𑀥𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀕𑀢𑁂 𑀲𑀢𑁆𑀢𑀼𑀕𑀦𑁆𑀥𑁂𑀦 𑀲𑀧𑁆𑀧𑁄 𑀧𑀯𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀆𑀕𑀢𑁄 𑀲𑀧𑁆𑀧𑀲𑁆𑀲 𑀧𑀯𑀺𑀝𑁆𑀞𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑀁 𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀧𑀓𑁆𑀓𑀦𑁆𑀢𑁄 ¶ 𑀪𑀯𑀺𑀲𑁆𑀲𑀢𑀺, 𑀲𑀘𑀸𑀬𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀲𑀦𑁆𑀢𑁄 𑀲𑀸𑀬𑀁 𑀯𑀲𑀦𑀝𑁆𑀞𑀸𑀦𑁂 ‘‘𑀲𑀢𑁆𑀢𑀼𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀧𑀲𑀺𑀩𑁆𑀩𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑀁 𑀧𑀯𑁂𑀲𑁂𑀲𑁆𑀲𑀢𑀺 ¶ , 𑀅𑀣 𑀦𑀁 𑀲𑀧𑁆𑀧𑁄 𑀳𑀢𑁆𑀣𑁂 𑀟𑀁𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀇𑀤𑀫𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀲𑀦𑁆𑀢𑀲𑁆𑀲 𑀫𑀭𑀡𑀓𑀸𑀭𑀡𑀁. 𑀲𑀘𑁂 𑀧𑀦 𑀕𑁂𑀳𑀁 𑀕𑀘𑁆𑀙𑁂𑀬𑁆𑀬, 𑀧𑀲𑀺𑀩𑁆𑀩𑀓𑁄 𑀪𑀭𑀺𑀬𑀸𑀬 𑀳𑀢𑁆𑀣𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀸 ‘𑀅𑀦𑁆𑀢𑁄𑀪𑀡𑁆𑀟𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀧𑀲𑀺𑀩𑁆𑀩𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑀁 𑀧𑀯𑁂𑀲𑁂𑀲𑁆𑀲𑀢𑀺, 𑀅𑀣 𑀦𑀁 𑀲𑀧𑁆𑀧𑁄 𑀟𑀁𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀇𑀤𑀫𑀲𑁆𑀲 𑀅𑀚𑁆𑀚 𑀕𑁂𑀳𑀁 𑀕𑀢𑀲𑁆𑀲 𑀪𑀭𑀺𑀬𑀸𑀬 𑀫𑀭𑀡𑀓𑀸𑀭𑀡’’𑀦𑁆𑀢𑀺 𑀉𑀧𑀸𑀬𑀓𑁄𑀲𑀮𑁆𑀮𑀜𑀸𑀡𑁂𑀦𑁂𑀯 𑀅𑀜𑁆𑀜𑀸𑀲𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑀺𑀦𑀸 𑀓𑀡𑁆𑀳𑀲𑀧𑁆𑀧𑁂𑀦 𑀲𑀽𑀭𑁂𑀦 𑀦𑀺𑀩𑁆𑀪𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀸𑀨𑀸𑀲𑀼𑀓𑀁 𑀧𑀳𑀭𑀦𑁆𑀢𑁄𑀧𑀺 𑀧𑀲𑀺𑀩𑁆𑀩𑀓𑁂 𑀅𑀢𑁆𑀢𑀦𑁄 𑀘𑀮𑀦𑀁 𑀯𑀸 𑀨𑀦𑁆𑀤𑀦𑀁 𑀯𑀸 𑀦 𑀤𑀲𑁆𑀲𑁂𑀢𑀺, 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑀁 𑀦 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀓𑀡𑁆𑀳𑀲𑀧𑁆𑀧𑁂𑀦 𑀲𑀽𑀭𑁂𑀦 𑀦𑀺𑀩𑁆𑀪𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀇𑀤𑀫𑁆𑀧𑀺 𑀲𑁄 𑀉𑀧𑀸𑀬𑀓𑁄𑀲𑀮𑁆𑀮𑀜𑀸𑀡𑁂𑀦𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀅𑀜𑁆𑀜𑀸𑀲𑀺. 𑀏𑀯𑀁 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀲𑀧𑁆𑀧𑀁 𑀧𑀲𑀺𑀩𑁆𑀩𑀓𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀫𑀳𑀸𑀲𑀢𑁆𑀢𑁄 𑀉𑀧𑀸𑀬𑀓𑁄𑀲𑀮𑁆𑀮𑀜𑀸𑀡𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁮.

‘‘𑀩𑀳𑀽𑀦𑀺 ¶ 𑀞𑀸𑀦𑀸𑀦𑀺 𑀯𑀺𑀘𑀺𑀦𑁆𑀢𑀬𑀺𑀢𑁆𑀯𑀸, 𑀬𑀫𑁂𑀢𑁆𑀣 𑀯𑀓𑁆𑀔𑀸𑀫𑀺 𑀢𑀤𑁂𑀯 𑀲𑀘𑁆𑀘𑀁;

𑀫𑀜𑁆𑀜𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀲𑀢𑁆𑀢𑀼𑀪𑀲𑁆𑀢𑀁, 𑀅𑀚𑀸𑀦𑀢𑁄 𑀓𑀡𑁆𑀳𑀲𑀧𑁆𑀧𑁄 𑀧𑀯𑀺𑀝𑁆𑀞𑁄’’𑀢𑀺.

𑀢𑀢𑁆𑀣 𑀩𑀳𑀽𑀦𑀺 𑀞𑀸𑀦𑀸𑀦𑀻𑀢𑀺 𑀩𑀳𑀽𑀦𑀺 𑀓𑀸𑀭𑀡𑀸𑀦𑀺. 𑀯𑀺𑀘𑀺𑀦𑁆𑀢𑀬𑀺𑀢𑁆𑀯𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀘𑀺𑀦𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀧𑀝𑀺𑀯𑁂𑀥𑁄 𑀳𑀼𑀢𑁆𑀯𑀸. 𑀬𑀫𑁂𑀢𑁆𑀣 𑀯𑀓𑁆𑀔𑀸𑀫𑀻𑀢𑀺 𑀬𑀁 𑀢𑁂 𑀅𑀳𑀁 𑀏𑀢𑁂𑀲𑀼 𑀓𑀸𑀭𑀡𑁂𑀲𑀼 𑀏𑀢𑀁 𑀓𑀸𑀭𑀡𑀁 𑀯𑀓𑁆𑀔𑀸𑀫𑀺. 𑀢𑀤𑁂𑀯 𑀲𑀘𑁆𑀘𑀦𑁆𑀢𑀺 𑀢𑀤𑁂𑀯 𑀢𑀣𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀓𑀣𑀺𑀢𑀲𑀤𑀺𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀫𑀜𑁆𑀜𑀸𑀫𑀻𑀢𑀺 𑀲𑀮𑁆𑀮𑀓𑁆𑀔𑁂𑀫𑀺. 𑀲𑀢𑁆𑀢𑀼𑀪𑀲𑁆𑀢𑀦𑁆𑀢𑀺 𑀲𑀢𑁆𑀢𑀼𑀧𑀲𑀺𑀩𑁆𑀩𑀓𑀁. 𑀅𑀚𑀸𑀦𑀢𑁄𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀏𑀓𑁄 𑀓𑀡𑁆𑀳𑀲𑀧𑁆𑀧𑁄 𑀧𑀯𑀺𑀝𑁆𑀞𑁄𑀢𑀺 𑀫𑀜𑁆𑀜𑀸𑀫𑀻𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 ‘‘𑀅𑀢𑁆𑀣𑀺 𑀢𑁂 𑀩𑁆𑀭𑀸𑀳𑁆𑀫𑀡, 𑀏𑀢𑀲𑁆𑀫𑀺𑀁 𑀧𑀲𑀺𑀩𑁆𑀩𑀓𑁂 𑀲𑀢𑁆𑀢𑀽’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀧𑀡𑁆𑀟𑀺𑀢𑀸’’𑀢𑀺. ‘‘𑀅𑀚𑁆𑀚 𑀧𑀸𑀢𑀭𑀸𑀲𑀯𑁂𑀮𑀸𑀬 𑀲𑀢𑁆𑀢𑀼𑀁 𑀔𑀸𑀤𑀻’’𑀢𑀺? ‘‘𑀆𑀫, 𑀧𑀡𑁆𑀟𑀺𑀢𑀸’’𑀢𑀺. ‘‘𑀓𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺? ‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀧𑀡𑁆𑀟𑀺𑀢𑀸’’𑀢𑀺. ‘‘𑀲𑀢𑁆𑀢𑀼𑀁 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀕𑀘𑁆𑀙𑀦𑁆𑀢𑁄 𑀧𑀲𑀺𑀩𑁆𑀩𑀓𑀫𑀼𑀔𑀁 𑀩𑀦𑁆𑀥𑀺, 𑀦 𑀩𑀦𑁆𑀥𑀻’’𑀢𑀺? ‘‘𑀦 𑀩𑀦𑁆𑀥𑀺𑀁, 𑀧𑀡𑁆𑀟𑀺𑀢𑀸’’𑀢𑀺. ‘‘𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀆𑀕𑀢𑁄 𑀧𑀲𑀺𑀩𑁆𑀩𑀓𑀁 𑀑𑀮𑁄𑀓𑁂𑀢𑁆𑀯𑀸 𑀩𑀦𑁆𑀥𑀻’’𑀢𑀺. ‘‘𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀩𑀦𑁆𑀥𑀺𑀁, 𑀧𑀡𑁆𑀟𑀺𑀢𑀸’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀢𑀯 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀕𑀢𑀓𑀸𑀮𑁂 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀢𑁂 𑀲𑀢𑁆𑀢𑀼𑀕𑀦𑁆𑀥𑁂𑀦 𑀧𑀲𑀺𑀩𑁆𑀩𑀓𑀁 𑀲𑀧𑁆𑀧𑁄 𑀧𑀯𑀺𑀝𑁆𑀞𑁄𑀢𑀺 𑀫𑀜𑁆𑀜𑀸𑀫𑀺, 𑀏𑀯𑀫𑁂𑀢𑁆𑀣 𑀆𑀕𑀢𑁄 𑀢𑁆𑀯𑀁, 𑀢𑀲𑁆𑀫𑀸 𑀧𑀲𑀺𑀩𑁆𑀩𑀓𑀁 𑀑𑀢𑀸𑀭𑁂𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑀫𑀼𑀔𑀁 ¶ 𑀫𑁄𑀘𑁂𑀢𑁆𑀯𑀸 𑀧𑀝𑀺𑀓𑁆𑀓𑀫𑁆𑀫 𑀞𑀺𑀢𑁄 𑀏𑀓𑀁 𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑀁 𑀢𑀸𑀯 𑀧𑀳𑀭, 𑀢𑀢𑁄 𑀧𑀢𑁆𑀣𑀝𑀨𑀡𑀁 𑀲𑀼𑀲𑀽𑀢𑀺𑀲𑀤𑁆𑀤𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀓𑀡𑁆𑀳𑀲𑀧𑁆𑀧𑀁 𑀤𑀺𑀲𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀆𑀤𑀸𑀬 𑀤𑀡𑁆𑀟𑀁 𑀧𑀭𑀺𑀲𑀼𑀫𑁆𑀪 𑀪𑀲𑁆𑀢𑀁, 𑀧𑀲𑁆𑀲𑁂𑀴𑀫𑀽𑀕𑀁 𑀉𑀭𑀕𑀁 𑀤𑀼𑀚𑀺𑀯𑁆𑀳𑀁;

𑀙𑀺𑀦𑁆𑀤𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺, 𑀪𑀼𑀚𑀗𑁆𑀕𑀫𑀁 𑀧𑀲𑁆𑀲 𑀧𑀫𑀼𑀜𑁆𑀘 𑀪𑀲𑁆𑀢’’𑀦𑁆𑀢𑀺.

𑀢𑀢𑁆𑀣 𑀧𑀭𑀺𑀲𑀼𑀫𑁆𑀪𑀸𑀢𑀺 𑀧𑀳𑀭. 𑀧𑀲𑁆𑀲𑁂𑀴𑀫𑀽𑀕𑀦𑁆𑀢𑀺 𑀏𑀴𑀁 𑀧𑀕𑁆𑀖𑀭𑀦𑁆𑀢𑁂𑀦 𑀫𑀼𑀔𑁂𑀦 𑀏𑀴𑀫𑀽𑀕𑀁 𑀧𑀲𑀺𑀩𑁆𑀩𑀓𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀤𑀼𑀚𑀺𑀯𑁆𑀳𑀁 𑀉𑀭𑀕𑀁 𑀧𑀲𑁆𑀲. 𑀙𑀦𑁆𑀤𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀻𑀢𑀺 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀧𑀲𑀺𑀩𑁆𑀩𑀓𑁂 𑀲𑀧𑁆𑀧𑁄, 𑀉𑀤𑀸𑀳𑀼 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺 𑀘 𑀅𑀚𑁆𑀚 𑀙𑀺𑀦𑁆𑀤, 𑀫𑀬𑁆𑀳𑀁 𑀲𑀤𑁆𑀤𑀳, 𑀅𑀯𑀺𑀢𑀣𑀜𑁆𑀳𑀺 𑀫𑁂 𑀯𑁂𑀬𑁆𑀬𑀸𑀓𑀭𑀡𑀁, 𑀇𑀤𑀸𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀁 𑀪𑀼𑀚𑀗𑁆𑀕𑀫𑀁 𑀧𑀲𑁆𑀲 𑀧𑀫𑀼𑀜𑁆𑀘 𑀪𑀲𑁆𑀢𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑁄 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀪𑀬𑀧𑁆𑀧𑀢𑁆𑀢𑁄 𑀢𑀣𑀸 𑀅𑀓𑀸𑀲𑀺. 𑀲𑀧𑁆𑀧𑁄𑀧𑀺 𑀲𑀢𑁆𑀢𑀼𑀪𑀲𑁆𑀢𑁂 𑀤𑀡𑁆𑀟𑁂𑀦 𑀧𑀳𑀝𑁂 𑀧𑀲𑀺𑀩𑁆𑀩𑀓𑀫𑀼𑀔𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀚𑀦𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀲𑀁𑀯𑀺𑀕𑁆𑀕𑀭𑀽𑀧𑁄 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀢𑀼𑀪𑀲𑁆𑀢𑀁 𑀧𑀫𑀼𑀜𑁆𑀘𑀺;

𑀅𑀣 𑀦𑀺𑀓𑁆𑀔𑀫𑀺 𑀉𑀭𑀕𑁄 𑀉𑀕𑁆𑀕𑀢𑁂𑀚𑁄, 𑀆𑀲𑀻𑀯𑀺𑀲𑁄 𑀲𑀧𑁆𑀧𑁄 𑀨𑀡𑀁 𑀓𑀭𑀺𑀢𑁆𑀯𑀸’’𑀢𑀺.

𑀲𑀧𑁆𑀧𑀲𑁆𑀲 𑀨𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 ‘‘𑀫𑀳𑀸𑀲𑀢𑁆𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲𑁂𑀯 𑀩𑁆𑀬𑀸𑀓𑀭𑀡𑀁 𑀅𑀳𑁄𑀲𑀻’’𑀢𑀺 𑀫𑀳𑀸𑀚𑀦𑁄 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺, 𑀅𑀗𑁆𑀕𑀼𑀮𑀺𑀨𑁄𑀝𑀦𑀲𑀳𑀲𑁆𑀲𑀸𑀦𑀺 𑀧𑀭𑀺𑀩𑁆𑀪𑀫𑀺𑀁𑀲𑀼, 𑀖𑀦𑀫𑁂𑀖𑀯𑀲𑁆𑀲𑀁 𑀯𑀺𑀬 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺, 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺𑀁𑀲𑀼, 𑀫𑀳𑀸𑀧𑀣𑀯𑀻𑀪𑀺𑀚𑁆𑀚𑀦𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀇𑀤𑀁 𑀧𑀦 𑀩𑀼𑀤𑁆𑀥𑀮𑀻𑀴𑀸𑀬 𑀏𑀯𑀭𑀽𑀧𑀲𑁆𑀲 𑀧𑀜𑁆𑀳𑀲𑁆𑀲 𑀓𑀣𑀦𑀁 𑀦𑀸𑀫 𑀦𑁂𑀯 𑀚𑀸𑀢𑀺𑀬𑀸 𑀩𑀮𑀁, 𑀦 𑀕𑁄𑀢𑁆𑀢𑀓𑀼𑀮𑀧𑁆𑀧𑀤𑁂𑀲𑀸𑀦𑀁 𑀩𑀮𑀁, 𑀓𑀲𑁆𑀲 𑀧𑀦𑁂𑀢𑀁 𑀩𑀮𑀦𑁆𑀢𑀺? 𑀧𑀜𑁆𑀜𑀸𑀬 𑀩𑀮𑀁. 𑀧𑀜𑁆𑀜𑀯𑀸 𑀳𑀺 𑀧𑀼𑀕𑁆𑀕𑀮𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀧𑀯𑀺𑀲𑀢𑀺, 𑀲𑀸𑀯𑀓𑀧𑀸𑀭𑀫𑀺𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀫𑁆𑀧𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀫𑁆𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑁂𑀲𑀼 𑀳𑀺 𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀯 𑀲𑁂𑀝𑁆𑀞𑀸, 𑀅𑀯𑀲𑁂𑀲𑀸 𑀢𑀲𑁆𑀲𑀸 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀧𑀜𑁆𑀜𑀸 ¶ 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;

𑀲𑀻𑀮𑀁 𑀲𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄, 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀻’’𑀢𑀺. (𑀚𑀸. 𑁨.𑁧𑁭.𑁮𑁧);

𑀏𑀯𑀁 𑀓𑀣𑀺𑀢𑁂 𑀘 𑀧𑀦 𑀫𑀳𑀸𑀲𑀢𑁆𑀢𑁂𑀦 𑀧𑀜𑁆𑀳𑁂 𑀏𑀓𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀲𑀧𑁆𑀧𑀲𑁆𑀲 𑀫𑀼𑀔𑀩𑀦𑁆𑀥𑀦𑀁 𑀓𑀢𑁆𑀯𑀸 𑀲𑀧𑁆𑀧𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀬𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀭𑀜𑁆𑀜𑁄 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀉𑀧𑀟𑁆𑀠𑀕𑀸𑀣𑀫𑀸𑀳 𑁋

𑁫𑁧.

‘‘𑀲𑀼𑀮𑀤𑁆𑀥𑀮𑀸𑀪𑀸 𑀚𑀦𑀓𑀲𑁆𑀲 𑀭𑀜𑁆𑀜𑁄;

𑀬𑁄 𑀧𑀲𑁆𑀲𑀢𑀻 𑀲𑁂𑀦𑀓𑀁 𑀲𑀸𑀥𑀼𑀧𑀜𑁆𑀜’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀬𑁄 𑀲𑀸𑀥𑀼𑀧𑀜𑁆𑀜𑀁 𑀉𑀢𑁆𑀢𑀫𑀧𑀜𑁆𑀜𑀁 𑀲𑁂𑀦𑀓𑀧𑀡𑁆𑀟𑀺𑀢𑀁 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀺𑀬𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀼𑀁 𑀮𑀪𑀢𑀺, 𑀢𑀲𑁆𑀲 𑀭𑀜𑁆𑀜𑁄 𑀚𑀦𑀓𑀲𑁆𑀲 𑀏𑀢𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀤𑀲𑁆𑀲𑀦𑀮𑀸𑀪𑀸 𑀲𑀼𑀮𑀤𑁆𑀥𑀮𑀸𑀪𑀸 𑀯𑀢, 𑀏𑀢𑁂𑀦 𑀮𑀤𑁆𑀥𑁂𑀲𑀼 𑀲𑀩𑁆𑀩𑀮𑀸𑀪𑁂𑀲𑀼 𑀏𑀢𑁂𑀯 𑀮𑀸𑀪𑀸 𑀲𑀼𑀮𑀤𑁆𑀥𑀮𑀸𑀪𑀸 𑀦𑀸𑀫𑀸𑀢𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀭𑀜𑁆𑀜𑁄 ¶ 𑀣𑀼𑀢𑀺𑀁 𑀓𑀢𑁆𑀯𑀸 𑀧𑀼𑀦 𑀧𑀲𑀺𑀩𑁆𑀩𑀓𑀢𑁄 𑀲𑀢𑁆𑀢 𑀓𑀳𑀸𑀧𑀡𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀢𑀼𑀝𑁆𑀞𑀺𑀤𑀸𑀬𑀁 𑀤𑀸𑀢𑀼𑀓𑀸𑀫𑁄 𑀤𑀺𑀬𑀟𑁆𑀠𑀕𑀸𑀣𑀫𑀸𑀳 𑁋

‘‘𑀯𑀺𑀯𑀝𑁆𑀝𑀙𑀤𑁆𑀤𑁄 𑀦𑀼𑀲𑀺 𑀲𑀩𑁆𑀩𑀤𑀲𑁆𑀲𑀻, 𑀜𑀸𑀡𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀁.

𑁫𑁨.

‘‘𑀇𑀫𑀸𑀦𑀺 𑀫𑁂 𑀲𑀢𑁆𑀢𑀲𑀢𑀸𑀦𑀺 𑀅𑀢𑁆𑀣𑀺, 𑀕𑀡𑁆𑀳𑀸𑀳𑀺 𑀲𑀩𑁆𑀩𑀸𑀦𑀺 𑀤𑀤𑀸𑀫𑀺 𑀢𑀼𑀬𑁆𑀳𑀁;

𑀢𑀬𑀸 𑀳𑀺 𑀫𑁂 𑀚𑀻𑀯𑀺𑀢𑀫𑀚𑁆𑀚 𑀮𑀤𑁆𑀥𑀁, 𑀅𑀣𑁄𑀧𑀺 𑀪𑀭𑀺𑀬𑀸𑀬 𑀫𑀓𑀸𑀲𑀺 𑀲𑁄𑀢𑁆𑀣𑀺’’𑀦𑁆𑀢𑀺.

𑀢𑀢𑁆𑀣 𑀯𑀺𑀯𑀝𑁆𑀝𑀙𑀤𑁆𑀤𑁄 𑀦𑀼𑀲𑀺 𑀲𑀩𑁆𑀩𑀤𑀲𑁆𑀲𑀻𑀢𑀺 𑀓𑀺𑀁 𑀦𑀼 𑀔𑁄 𑀢𑁆𑀯𑀁 𑀲𑀩𑁆𑀩𑁂𑀲𑀼 𑀥𑀫𑁆𑀫𑀸𑀓𑀸𑀭𑁂𑀲𑀼 𑀯𑀺𑀯𑀝𑁆𑀝𑀙𑀤𑀦𑁄 𑀯𑀺𑀯𑀝𑁆𑀝𑀦𑁂𑀬𑁆𑀬𑀥𑀫𑁆𑀫𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀢𑀺 𑀣𑀼𑀢𑀺𑀯𑀲𑁂𑀦 𑀧𑀼𑀘𑁆𑀙𑀢𑀺. 𑀜𑀸𑀡𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀦𑁆𑀢𑀺 𑀉𑀤𑀸𑀳𑀼 𑀅𑀲𑀩𑁆𑀩𑀜𑁆𑀜𑀼𑀲𑁆𑀲𑀧𑀺 𑀲𑀢𑁄 𑀢𑀯 𑀜𑀸𑀡𑀁 𑀅𑀢𑀺𑀯𑀺𑀬 𑀪𑀺𑀁𑀲𑀭𑀽𑀧𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀩𑀮𑀯𑀦𑁆𑀢𑀺. 𑀢𑀬𑀸 𑀳𑀺 𑀫𑁂𑀢𑀺 𑀢𑀬𑀸 𑀳𑀺 𑀤𑀺𑀦𑁆𑀦𑀢𑁆𑀢𑀸 𑀅𑀚𑁆𑀚 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥𑀁. 𑀅𑀣𑁄𑀧𑀺 𑀪𑀭𑀺𑀬𑀸𑀬 𑀫𑀓𑀸𑀲𑀺 𑀲𑁄𑀢𑁆𑀣𑀺𑀦𑁆𑀢𑀺 𑀅𑀣𑁄𑀧𑀺 𑀫𑁂 𑀪𑀭𑀺𑀬𑀸𑀬 𑀢𑁆𑀯𑀫𑁂𑀯 𑀲𑁄𑀢𑁆𑀣𑀺𑀁 𑀅𑀓𑀸𑀲𑀺.

𑀇𑀢𑀺 ¶ 𑀲𑁄 𑀯𑀢𑁆𑀯𑀸 ‘‘𑀲𑀘𑁂𑀧𑀺 𑀲𑀢𑀲𑀳𑀲𑁆𑀲𑀁 𑀪𑀯𑁂𑀬𑁆𑀬, 𑀤𑀤𑁂𑀬𑁆𑀬𑀫𑁂𑀯𑀸𑀳𑀁, 𑀏𑀢𑁆𑀢𑀓𑀫𑁂𑀯 𑀫𑁂 𑀥𑀦𑀁, 𑀇𑀫𑀸𑀦𑀺 𑀫𑁂 𑀲𑀢𑁆𑀢 𑀲𑀢𑀸𑀦𑀺 𑀕𑀡𑁆𑀳𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀩𑁄𑀥𑀺𑀲𑀢𑁆𑀢𑀁 𑀬𑀸𑀘𑀺. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁩.

‘‘𑀦 𑀧𑀡𑁆𑀟𑀺𑀢𑀸 𑀯𑁂𑀢𑀦𑀫𑀸𑀤𑀺𑀬𑀦𑁆𑀢𑀺, 𑀘𑀺𑀢𑁆𑀭𑀸𑀳𑀺 𑀕𑀸𑀣𑀸𑀳𑀺 𑀲𑀼𑀪𑀸𑀲𑀺𑀢𑀸𑀳𑀺;

𑀇𑀢𑁄𑀧𑀺 𑀢𑁂 𑀩𑁆𑀭𑀳𑁆𑀫𑁂 𑀤𑀤𑀦𑁆𑀢𑀼 𑀯𑀺𑀢𑁆𑀢𑀁, 𑀆𑀤𑀸𑀬 𑀢𑁆𑀯𑀁 𑀕𑀘𑁆𑀙 𑀲𑀓𑀁 𑀦𑀺𑀓𑁂𑀢’’𑀦𑁆𑀢𑀺.

𑀢𑀢𑁆𑀣 𑀯𑁂𑀢𑀦𑀦𑁆𑀢𑀺 𑀯𑁂𑀢𑁆𑀢𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀢𑁄𑀧𑀺 𑀢𑁂 𑀩𑁆𑀭𑀳𑁆𑀫𑁂𑀢𑀺 𑀩𑁆𑀭𑀸𑀳𑁆𑀫𑀡, 𑀇𑀢𑁄 𑀫𑀫 𑀧𑀸𑀤𑀫𑀽𑀮𑀢𑁄𑀧𑀺 𑀢𑀼𑀬𑁆𑀳𑀁 𑀥𑀦𑀁 𑀤𑀤𑀦𑁆𑀢𑀼. 𑀯𑀺𑀢𑁆𑀢𑀁 𑀆𑀤𑀸𑀬 𑀢𑁆𑀯𑀁 𑀕𑀘𑁆𑀙𑀸𑀢𑀺 ¶ 𑀇𑀢𑁄 𑀅𑀜𑁆𑀜𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀆𑀤𑀸𑀬 𑀲𑀓𑀦𑀺𑀯𑁂𑀲𑀦𑀁 𑀕𑀘𑁆𑀙.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀳𑀲𑁆𑀲𑀁 𑀧𑀽𑀭𑀸𑀧𑁂𑀦𑁆𑀢𑁄 𑀓𑀳𑀸𑀧𑀡𑁂 𑀤𑀸𑀧𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑁂𑀦 𑀢𑁆𑀯𑀁 𑀥𑀦𑀪𑀺𑀓𑁆𑀔𑀸𑀬 𑀧𑁂𑀲𑀺𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀪𑀭𑀺𑀬𑀸𑀬 𑀫𑁂 𑀧𑀡𑁆𑀟𑀺𑀢𑀸’’𑀢𑀺. ‘‘𑀪𑀭𑀺𑀬𑀸 ¶ 𑀧𑀦 𑀢𑁂 𑀫𑀳𑀮𑁆𑀮𑀺𑀓𑀸, 𑀤𑀳𑀭𑀸’’𑀢𑀺. ‘‘𑀤𑀳𑀭𑀸, 𑀧𑀡𑁆𑀟𑀺𑀢𑀸’’𑀢𑀺. ‘‘𑀢𑁂𑀦 𑀳𑀺 𑀲𑀸 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀻 ‘𑀦𑀺𑀩𑁆𑀪𑀬𑀸 𑀳𑀼𑀢𑁆𑀯𑀸 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀢𑀁 𑀧𑁂𑀲𑁂𑀲𑀺, 𑀲𑀘𑁂 𑀇𑀫𑁂 𑀓𑀳𑀸𑀧𑀡𑁂 𑀖𑀭𑀁 𑀦𑁂𑀲𑁆𑀲𑀲𑀺, 𑀲𑀸 𑀢𑁂 𑀤𑀼𑀓𑁆𑀔𑁂𑀦 𑀮𑀤𑁆𑀥𑀓𑀳𑀸𑀧𑀡𑁂 𑀅𑀢𑁆𑀢𑀦𑁄 𑀚𑀸𑀭𑀲𑁆𑀲 𑀤𑀲𑁆𑀲𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀉𑀚𑀼𑀓𑀫𑁂𑀯 𑀕𑁂𑀳𑀁 𑀅𑀕𑀦𑁆𑀢𑁆𑀯𑀸 𑀩𑀳𑀺𑀕𑀸𑀫𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀓𑀳𑀸𑀧𑀡𑁂 𑀞𑀧𑁂𑀢𑁆𑀯𑀸 𑀧𑀯𑀺𑀲𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀓𑀳𑀸𑀧𑀡𑁂 𑀞𑀧𑁂𑀢𑁆𑀯𑀸 𑀲𑀸𑀬𑀁 𑀕𑁂𑀳𑀁 𑀅𑀕𑀫𑀸𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀭𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑀸 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀪𑁄𑀢𑀻’’𑀢𑀺 𑀆𑀳. 𑀲𑀸 𑀢𑀲𑁆𑀲 𑀲𑀤𑁆𑀤𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑀻𑀧𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂 𑀇𑀢𑀭𑀁 𑀦𑀻𑀳𑀭𑀺𑀢𑁆𑀯𑀸 𑀤𑁆𑀯𑀸𑀭𑀫𑀽𑀮𑁂 𑀞𑀧𑁂𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑁂 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀢𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀲𑀳𑀲𑁆𑀲𑀁 𑀫𑁂 𑀮𑀤𑁆𑀥’’𑀦𑁆𑀢𑀺. ‘‘𑀓𑀳𑀁 𑀧𑀦 𑀢’’𑀦𑁆𑀢𑀺. ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀞𑀧𑀺𑀢𑀁, 𑀧𑀸𑀢𑁄𑀯 𑀆𑀳𑀭𑀺𑀲𑁆𑀲𑀸𑀫𑀺, 𑀫𑀸 𑀘𑀺𑀦𑁆𑀢𑀬𑀻’’𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀚𑀸𑀭𑀲𑁆𑀲 𑀆𑀘𑀺𑀓𑁆𑀔𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀦𑀸 𑀞𑀧𑀺𑀢𑀁 𑀯𑀺𑀬 𑀕𑀡𑁆𑀳𑀺.

𑀩𑁆𑀭𑀸𑀳𑁆𑀫𑀡𑁄 𑀧𑀼𑀦𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀓𑀳𑀸𑀧𑀡𑁂 𑀅𑀧𑀲𑁆𑀲𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀳𑀸𑀧𑀡𑁂 𑀦 𑀧𑀲𑁆𑀲𑀸𑀫𑀺, 𑀧𑀡𑁆𑀟𑀺𑀢𑀸’’𑀢𑀺 𑀆𑀳. ‘‘𑀪𑀭𑀺𑀬𑀸𑀬 𑀢𑁂 𑀆𑀘𑀺𑀓𑁆𑀔𑀻’’𑀢𑀺? ‘‘𑀆𑀫, 𑀧𑀡𑁆𑀟𑀺𑀢𑀸’’𑀢𑀺. 𑀫𑀳𑀸𑀲𑀢𑁆𑀢𑁄 𑀢𑀸𑀬 𑀚𑀸𑀭𑀲𑁆𑀲 𑀆𑀘𑀺𑀓𑁆𑀔𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀧𑀦 𑀢𑁂 𑀩𑁆𑀭𑀸𑀳𑁆𑀫𑀡, 𑀪𑀭𑀺𑀬𑀸𑀬 𑀓𑀼𑀮𑀽𑀧𑀓𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀧𑀡𑁆𑀟𑀺𑀢𑀸’’𑀢𑀺. ‘‘𑀢𑀼𑀬𑁆𑀳𑀫𑁆𑀧𑀺 𑀅𑀢𑁆𑀣𑀻’’𑀢𑀺? ‘‘𑀆𑀫, 𑀧𑀡𑁆𑀟𑀺𑀢𑀸’’𑀢𑀺. 𑀅𑀣𑀲𑁆𑀲 𑀫𑀳𑀸𑀲𑀢𑁆𑀢𑁄 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀧𑀭𑀺𑀩𑁆𑀩𑀬𑀁 𑀤𑀸𑀧𑁂𑀢𑁆𑀯𑀸 ¶ ‘‘𑀕𑀘𑁆𑀙 𑀧𑀞𑀫𑀤𑀺𑀯𑀲𑁂 𑀢𑀯 𑀲𑀢𑁆𑀢, 𑀪𑀭𑀺𑀬𑀸𑀬 𑀢𑁂 𑀲𑀢𑁆𑀢𑀸𑀢𑀺 𑀘𑀼𑀤𑁆𑀤𑀲 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀣, 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀓𑁂𑀓𑀁 𑀳𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀯 𑀏𑀓𑀁, 𑀪𑀭𑀺𑀬𑀸𑀬 𑀢𑁂 𑀏𑀓𑀦𑁆𑀢𑀺 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑀭𑀺𑀬𑀸𑀬 𑀢𑁂 𑀲𑀢𑁆𑀢 𑀤𑀺𑀯𑀲𑁂 𑀦𑀺𑀫𑀦𑁆𑀢𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀩𑀤𑁆𑀥𑀁 𑀆𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀳𑀻’’𑀢𑀺 ¶ 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸 ¶ 𑀓𑀢𑁆𑀯𑀸 ‘‘𑀲𑀮𑁆𑀮𑀓𑁆𑀔𑀺𑀢𑁄 𑀫𑁂 𑀧𑀡𑁆𑀟𑀺𑀢, 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀦𑀓𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀅𑀲𑀼𑀓𑀭𑀼𑀓𑁆𑀔𑀫𑀽𑀮𑀢𑁄 𑀢𑁂 𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀓𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀕𑀳𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀕𑀡𑁆𑀳𑀸𑀫𑀺, 𑀧𑀡𑁆𑀟𑀺𑀢𑀸’’𑀢𑀺. ‘‘𑀢𑁆𑀯𑀁 𑀫𑀫 𑀲𑁂𑀦𑀓𑀧𑀡𑁆𑀟𑀺𑀢𑀪𑀸𑀯𑀁 𑀦 𑀚𑀸𑀦𑀸𑀲𑀺, 𑀆𑀳𑀭𑀸𑀧𑁂𑀲𑁆𑀲𑀸𑀫𑀺 𑀢𑁂 𑀓𑀳𑀸𑀧𑀡𑁂’’𑀢𑀺. 𑀲𑁄 𑀪𑀻𑀢𑁄 ‘‘𑀕𑀳𑀺𑀢𑀸 𑀫𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. ‘‘𑀓𑀼𑀳𑀺𑀁 𑀢𑁂 𑀞𑀧𑀺𑀢𑀸’’𑀢𑀺? ‘‘𑀢𑀢𑁆𑀣𑁂𑀯, 𑀧𑀡𑁆𑀟𑀺𑀢, 𑀞𑀧𑀺𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀢𑁂 𑀲𑀸𑀬𑁂𑀯 𑀪𑀭𑀺𑀬𑀸 𑀳𑁄𑀢𑀼, 𑀉𑀤𑀸𑀳𑀼 𑀅𑀜𑁆𑀜𑀁 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺. ‘‘𑀲𑀸𑀬𑁂𑀯 𑀫𑁂 𑀳𑁄𑀢𑀼, 𑀧𑀡𑁆𑀟𑀺𑀢𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀦𑀼𑀲𑁆𑀲𑁂 𑀧𑁂𑀲𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀳𑀸𑀧𑀡𑁂 𑀘 𑀩𑁆𑀭𑀸𑀳𑁆𑀫𑀡𑀺𑀜𑁆𑀘 𑀆𑀳𑀭𑀸𑀧𑁂𑀢𑁆𑀯𑀸 𑀘𑁄𑀭𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑀢𑁄 𑀓𑀳𑀸𑀧𑀡𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀧𑁂𑀢𑁆𑀯𑀸 𑀇𑀢𑀭𑀲𑁆𑀲 𑀭𑀸𑀚𑀸𑀡𑀁 𑀓𑀸𑀭𑁂𑀢𑁆𑀯𑀸 𑀦𑀕𑀭𑀸 𑀦𑀻𑀳𑀭𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑀸𑀧𑀺 𑀭𑀸𑀚𑀸𑀡𑀁 𑀓𑀸𑀭𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄𑀬𑁂𑀯 𑀲𑀦𑁆𑀢𑀺𑀓𑁂 𑀯𑀲𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀲𑀘𑁆𑀙𑀺𑀓𑀭𑀺𑀁𑀲𑀼. 𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀲𑁂𑀦𑀓𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁦𑁩] 𑁮. 𑀅𑀝𑁆𑀞𑀺𑀲𑁂𑀦𑀚𑀸𑀢𑀓𑀯𑀡𑁆𑀡𑀦𑀸

𑀬𑁂𑀫𑁂 𑀅𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀆𑀴𑀯𑀺𑀁 𑀦𑀺𑀲𑁆𑀲𑀸𑀬 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁄 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀳𑁂𑀝𑁆𑀞𑀸 𑀫𑀡𑀺𑀓𑀡𑁆𑀞𑀚𑀸𑀢𑀓𑁂 (𑀚𑀸. 𑁧.𑁩.𑁭 𑀆𑀤𑀬𑁄) 𑀓𑀣𑀺𑀢𑀫𑁂𑀯. 𑀲𑀢𑁆𑀣𑀸 𑀧𑀦 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑁂 ¶ 𑀩𑀼𑀤𑁆𑀥𑁂 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀽𑀳𑀺 𑀧𑀯𑀸𑀭𑀺𑀢𑀸𑀧𑀺 ‘𑀬𑀸𑀘𑀦𑀸 𑀦𑀸𑀫 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸’𑀢𑀺 𑀦 𑀬𑀸𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀦𑀺𑀕𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀝𑁆𑀞𑀺𑀲𑁂𑀦𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀭𑀸𑀚𑀗𑁆𑀕𑀡𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀲𑁆𑀲𑀸𑀘𑀸𑀭𑀯𑀺𑀳𑀸𑀭𑁂 𑀧𑀲𑀻𑀤𑀺𑀢𑁆𑀯𑀸 𑀢𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑀢𑀮𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀪𑁄𑀚𑀦𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀧𑁂𑀲𑀺, 𑀤𑀺𑀯𑀲𑀲𑁆𑀲 𑀘 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀥𑀫𑁆𑀫𑀓𑀣𑀸𑀬 𑀧𑀲𑀦𑁆𑀦𑁄 𑀭𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 ‘‘𑀬𑁂𑀦 𑀯𑁄 𑀅𑀢𑁆𑀣𑁄, 𑀢𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀧𑀯𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀁 𑀦𑀸𑀫 𑀫𑁂 𑀤𑁂𑀳𑀻’’𑀢𑀺 𑀦 𑀯𑀤𑀢𑀺. 𑀅𑀜𑁆𑀜𑁂 𑀬𑀸𑀘𑀓𑀸 ‘‘𑀇𑀤𑀁 𑀤𑁂𑀳𑀺, 𑀇𑀤𑀁 𑀤𑁂𑀳𑀻’’𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀬𑀸𑀘𑀦𑁆𑀢𑀺, 𑀭𑀸𑀚𑀸 𑀅𑀲𑀚𑁆𑀚𑀫𑀸𑀦𑁄 𑀤𑁂𑀢𑀺𑀬𑁂𑀯. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀅𑀜𑁆𑀜𑁂 𑀬𑀸𑀘𑀦𑀓𑀯𑀦𑀺𑀩𑁆𑀩𑀓𑀸 ‘𑀇𑀤𑀜𑁆𑀘𑀺𑀤𑀜𑁆𑀘 𑀅𑀫𑁆𑀳𑀸𑀓𑀁 𑀤𑁂𑀳𑀻’𑀢𑀺 𑀫𑀁 𑀬𑀸𑀘𑀦𑁆𑀢𑀺, 𑀅𑀬𑁆𑀬𑁄 𑀧𑀦 𑀅𑀝𑁆𑀞𑀺𑀲𑁂𑀦𑁄 𑀧𑀯𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀓𑀺𑀜𑁆𑀘𑀺 𑀬𑀸𑀘𑀢𑀺, 𑀧𑀜𑁆𑀜𑀯𑀸 𑀔𑁄 𑀧𑀦𑁂𑀲 𑀉𑀧𑀸𑀬𑀓𑀼𑀲𑀮𑁄, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀅𑀜𑁆𑀜𑁂𑀲𑀁 𑀬𑀸𑀘𑀦𑀓𑀸𑀭𑀡𑀁 𑀢𑀲𑁆𑀲 𑀘 𑀅𑀬𑀸𑀘𑀦𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁪.

‘‘𑀬𑁂𑀫𑁂 𑀅𑀳𑀁 𑀦 𑀚𑀸𑀦𑀸𑀫𑀺, 𑀅𑀝𑁆𑀞𑀺𑀲𑁂𑀦 𑀯𑀦𑀺𑀩𑁆𑀩𑀓𑁂;

𑀢𑁂 𑀫𑀁 𑀲𑀗𑁆𑀕𑀫𑁆𑀫 𑀬𑀸𑀘𑀦𑁆𑀢𑀺, 𑀓𑀲𑁆𑀫𑀸 𑀫𑀁 𑀢𑁆𑀯𑀁 𑀦 𑀬𑀸𑀘𑀲𑀻’’𑀢𑀺.

𑀢𑀢𑁆𑀣 ¶ 𑀯𑀦𑀺𑀩𑁆𑀩𑀓𑁂𑀢𑀺 𑀬𑀸𑀘𑀦𑀓𑁂. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑁆𑀬, 𑀅𑀝𑁆𑀞𑀺𑀲𑁂𑀦, 𑀬𑁂𑀫𑁂 𑀯𑀦𑀺𑀩𑁆𑀩𑀓𑁂 𑀅𑀳𑀁 𑀦𑀸𑀫𑀕𑁄𑀢𑁆𑀢𑀚𑀸𑀢𑀺𑀓𑀼𑀮𑀧𑁆𑀧𑀤𑁂𑀲𑁂𑀦 ‘‘𑀇𑀫𑁂 𑀦𑀸𑀫𑁂𑀢𑁂’’𑀢𑀺𑀧𑀺 𑀦 𑀚𑀸𑀦𑀸𑀫𑀺, 𑀢𑁂 𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀬𑀸𑀘𑀦𑁆𑀢𑀺, 𑀢𑁆𑀯𑀁 𑀧𑀦 𑀓𑀲𑁆𑀫𑀸 𑀫𑀁 𑀓𑀺𑀜𑁆𑀘𑀺 𑀦 𑀬𑀸𑀘𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁫.

‘‘𑀬𑀸𑀘𑀓𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺, 𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄;

𑀢𑀲𑁆𑀫𑀸𑀳𑀁 𑀢𑀁 𑀦 𑀬𑀸𑀘𑀸𑀫𑀺, 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀽’’𑀢𑀺.

𑀢𑀢𑁆𑀣 ¶ 𑀬𑀸𑀘𑀓𑁄 𑀅𑀧𑁆𑀧𑀺𑀬𑁄 𑀳𑁄𑀢𑀻𑀢𑀺 𑀬𑁄 𑀳𑀺, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 ‘‘𑀇𑀤𑀁 𑀫𑁂 𑀤𑁂𑀳𑀻’’𑀢𑀺 𑀬𑀸𑀘𑀓𑁄, 𑀲𑁄 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀫𑀺𑀢𑁆𑀢𑀸𑀫𑀘𑁆𑀘𑀸𑀤𑀻𑀦𑀫𑁆𑀧𑀺 𑀅𑀧𑁆𑀧𑀺𑀬𑁄 𑀳𑁄𑀢𑀺 𑀅𑀫𑀦𑀸𑀧𑁄. 𑀢𑀲𑁆𑀲 𑀅𑀧𑁆𑀧𑀺𑀬𑀪𑀸𑀯𑁄 ¶ 𑀫𑀡𑀺𑀓𑀡𑁆𑀞𑀚𑀸𑀢𑀓𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀸𑀘𑀦𑁆𑀢𑀺 𑀬𑀸𑀘𑀺𑀢𑀪𑀡𑁆𑀟𑀁. 𑀅𑀤𑀤𑀦𑁆𑀢𑀺 𑀅𑀤𑀤𑀫𑀸𑀦𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄𑀧𑀺 𑀬𑀸𑀘𑀺𑀢𑀁 𑀦 𑀤𑁂𑀢𑀺, 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀆𑀤𑀺𑀁 𑀓𑀢𑁆𑀯𑀸 𑀅𑀤𑀤𑀫𑀸𑀦𑁄 𑀧𑀼𑀕𑁆𑀕𑀮𑁄 𑀬𑀸𑀘𑀓𑀲𑁆𑀲 𑀅𑀧𑁆𑀧𑀺𑀬𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀸𑀘𑀓𑁄𑀧𑀺 𑀤𑀸𑀬𑀓𑀲𑁆𑀲, 𑀬𑀸𑀘𑀺𑀢𑀁 𑀪𑀡𑁆𑀟𑀁 𑀅𑀤𑀤𑀦𑁆𑀢𑁄𑀧𑀺 𑀬𑀸𑀘𑀓𑀲𑁆𑀲 𑀅𑀧𑁆𑀧𑀺𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀳𑀁 𑀢𑀁 𑀦 𑀬𑀸𑀘𑀸𑀫𑀺. 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀽𑀢𑀺 𑀲𑀘𑁂 𑀳𑀺 𑀅𑀳𑀁 𑀬𑀸𑀘𑁂𑀬𑁆𑀬𑀫𑁂𑀯, 𑀢𑀯 𑀯𑀺𑀤𑁂𑀲𑁆𑀲𑁄 𑀪𑀯𑁂𑀬𑁆𑀬, 𑀲𑀸 𑀫𑁂 𑀢𑀯 𑀲𑀦𑁆𑀢𑀺𑀓𑀸 𑀉𑀧𑁆𑀧𑀦𑁆𑀦𑀸 𑀯𑀺𑀤𑁂𑀲𑁆𑀲𑀦𑀸, 𑀲𑀘𑁂 𑀧𑀦 𑀢𑁆𑀯𑀁 𑀦 𑀤𑀤𑁂𑀬𑁆𑀬𑀸𑀲𑀺, 𑀫𑀫 𑀯𑀺𑀤𑁂𑀲𑁆𑀲𑁄 𑀪𑀯𑁂𑀬𑁆𑀬𑀸𑀲𑀺, 𑀲𑀸 𑀘 𑀫𑀫 𑀢𑀬𑀺 𑀯𑀺𑀤𑁂𑀲𑁆𑀲𑀦𑀸, 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀼, 𑀫𑀸 𑀦𑁄 𑀉𑀪𑀺𑀦𑁆𑀦𑀫𑁆𑀧𑀺 𑀫𑁂𑀢𑁆𑀢𑀸 𑀪𑀺𑀚𑁆𑀚𑀻𑀢𑀺 𑀏𑀢𑀫𑀢𑁆𑀣𑀁 𑀲𑀫𑁆𑀧𑀲𑁆𑀲𑀦𑁆𑀢𑁄 𑀅𑀳𑀁 𑀢𑀁 𑀦 𑀓𑀺𑀜𑁆𑀘𑀺 𑀬𑀸𑀘𑀸𑀫𑀻𑀢𑀺.

𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁬.

‘‘𑀬𑁄 𑀯𑁂 𑀬𑀸𑀘𑀦𑀚𑀻𑀯𑀸𑀦𑁄, 𑀓𑀸𑀮𑁂 𑀬𑀸𑀘𑀁 𑀦 𑀬𑀸𑀘𑀢𑀺;

𑀧𑀭𑀜𑁆𑀘 𑀧𑀼𑀜𑁆𑀜𑀸 𑀥𑀁𑀲𑁂𑀢𑀺, 𑀅𑀢𑁆𑀢𑀦𑀸𑀧𑀺 𑀦 𑀚𑀻𑀯𑀢𑀺.

𑁫𑁭.

‘‘𑀬𑁄 𑀘 𑀬𑀸𑀘𑀦𑀚𑀻𑀯𑀸𑀦𑁄, 𑀓𑀸𑀮𑁂 𑀬𑀸𑀘𑀜𑁆𑀳𑀺 𑀬𑀸𑀘𑀢𑀺;

𑀧𑀭𑀜𑁆𑀘 𑀧𑀼𑀜𑁆𑀜𑀁 𑀮𑀩𑁆𑀪𑁂𑀢𑀺, 𑀅𑀢𑁆𑀢𑀦𑀸𑀧𑀺 𑀘 𑀚𑀻𑀯𑀢𑀺.

𑁫𑁮.

‘‘𑀦 𑀯𑁂𑀤𑁂𑀲𑁆𑀲𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀤𑀺𑀲𑁆𑀯𑀸 𑀬𑀸𑀘𑀓𑀫𑀸𑀕𑀢𑁂;

𑀩𑁆𑀭𑀳𑁆𑀫𑀘𑀸𑀭𑀺 𑀧𑀺𑀬𑁄 𑀫𑁂𑀲𑀺, 𑀯𑀤 𑀢𑁆𑀯𑀁 𑀪𑀜𑁆𑀜𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀬𑀸𑀘𑀦𑀚𑀻𑀯𑀸𑀦𑁄𑀢𑀺 𑀬𑀸𑀘𑀦𑀚𑀻𑀯𑀫𑀸𑀦𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑁆𑀬, 𑀅𑀝𑁆𑀞𑀺𑀲𑁂𑀦 𑀬𑁄 𑀬𑀸𑀘𑀦𑁂𑀦 𑀚𑀻𑀯𑀫𑀸𑀦𑁄 𑀥𑀫𑁆𑀫𑀺𑀓𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑀸𑀘𑀺𑀢𑀩𑁆𑀩𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀓𑀺𑀜𑁆𑀘𑀺𑀤𑁂𑀯 𑀬𑀸𑀘𑀺𑀢𑀩𑁆𑀩𑀁 𑀦 𑀬𑀸𑀘𑀢𑀺, 𑀲𑁄 𑀧𑀭𑀜𑁆𑀘 𑀤𑀸𑀬𑀓𑀁 𑀧𑀼𑀜𑁆𑀜𑀸 𑀥𑀁𑀲𑁂𑀢𑀺 𑀧𑀭𑀺𑀳𑀸𑀧𑁂𑀢𑀺, 𑀅𑀢𑁆𑀢𑀦𑀸𑀧𑀺 𑀘 𑀲𑀼𑀔𑀁 𑀦 𑀚𑀻𑀯𑀢𑀺. 𑀧𑀼𑀜𑁆𑀜𑀁 𑀮𑀩𑁆𑀪𑁂𑀢𑀻𑀢𑀺 ¶ 𑀓𑀸𑀮𑁂 𑀧𑀦 𑀬𑀸𑀘𑀺𑀢𑀩𑁆𑀩𑀁 𑀬𑀸𑀘𑀦𑁆𑀢𑁄 𑀧𑀭𑀜𑁆𑀘 𑀧𑀼𑀜𑁆𑀜𑀁 𑀅𑀥𑀺𑀕𑀫𑁂𑀢𑀺, 𑀅𑀢𑁆𑀢𑀦𑀸𑀧𑀺 𑀘 𑀲𑀼𑀔𑀁 𑀚𑀻𑀯𑀢𑀺. 𑀦 𑀯𑁂𑀤𑁂𑀲𑁆𑀲𑀦𑁆𑀢𑀻𑀢𑀺 𑀬𑀁 𑀢𑁆𑀯𑀁 𑀯𑀤𑁂𑀲𑀺 ‘‘𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀽’’𑀢𑀺, 𑀢𑀁 𑀓𑀲𑁆𑀫𑀸 𑀯𑀤𑀲𑀺. 𑀲𑀧𑁆𑀧𑀜𑁆𑀜𑀸 𑀳𑀺 𑀤𑀸𑀦𑀜𑁆𑀘 ¶ 𑀤𑀸𑀦𑀨𑀮𑀜𑁆𑀘 𑀚𑀸𑀦𑀦𑁆𑀢𑀸 𑀧𑀡𑁆𑀟𑀺𑀢𑀸 𑀬𑀸𑀘𑀓𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀦 𑀤𑁂𑀲𑁆𑀲𑀦𑁆𑀢𑀺 𑀦 𑀓𑀼𑀚𑁆𑀛𑀦𑁆𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀦 𑀧𑀫𑀼𑀤𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀸𑀘𑀓𑀫𑀸𑀕𑀢𑁂𑀢𑀺 𑀫-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄, 𑀬𑀸𑀘𑀓𑁂 𑀆𑀕𑀢𑁂𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀸𑀭𑀺 𑀧𑀺𑀬𑁄 𑀫𑁂𑀲𑀻𑀢𑀺 𑀅𑀬𑁆𑀬 𑀅𑀝𑁆𑀞𑀺𑀲𑁂𑀦, 𑀧𑀭𑀺𑀲𑀼𑀤𑁆𑀥𑀘𑀸𑀭𑀺 𑀫𑀳𑀸𑀧𑀼𑀜𑁆𑀜, 𑀢𑁆𑀯𑀁 𑀫𑀬𑁆𑀳𑀁 𑀅𑀢𑀺𑀯𑀺𑀬 𑀧𑀺𑀬𑁄, 𑀢𑀲𑁆𑀫𑀸 𑀯𑀭𑀁 𑀢𑁆𑀯𑀁 𑀫𑀁 𑀯𑀤𑁂𑀳𑀺 𑀬𑀸𑀘𑀸𑀳𑀺𑀬𑁂𑀯. 𑀪𑀜𑁆𑀜𑀫𑀺𑀘𑁆𑀙𑀲𑀻𑀢𑀺 𑀬𑀁𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀇𑀘𑁆𑀙𑀲𑀺, 𑀲𑀩𑁆𑀩𑀁 𑀯𑀤, 𑀭𑀚𑁆𑀚𑀫𑁆𑀧𑀺 𑀢𑁂 𑀤𑀲𑁆𑀲𑀸𑀫𑀺𑀬𑁂𑀯𑀸𑀢𑀺.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 𑀭𑀜𑁆𑀜𑀸 𑀭𑀚𑁆𑀚𑁂𑀦𑀸𑀧𑀺 𑀧𑀯𑀸𑀭𑀺𑀢𑁄 𑀦𑁂𑀯 𑀓𑀺𑀜𑁆𑀘𑀺 𑀬𑀸𑀘𑀺. 𑀭𑀜𑁆𑀜𑁄 𑀧𑀦 𑀏𑀯𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂 𑀓𑀣𑀺𑀢𑁂 𑀫𑀳𑀸𑀲𑀢𑁆𑀢𑁄𑀧𑀺 𑀧𑀩𑁆𑀩𑀚𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀭𑀸𑀚, 𑀬𑀸𑀘𑀦𑀸 𑀳𑀺 𑀦𑀸𑀫𑁂𑀲𑀸 𑀓𑀸𑀫𑀪𑁄𑀕𑀻𑀦𑀁 𑀕𑀺𑀳𑀻𑀦𑀁 𑀆𑀘𑀺𑀡𑁆𑀡𑀸, 𑀦 𑀧𑀩𑁆𑀩𑀚𑀺𑀢𑀸𑀦𑀁, 𑀧𑀩𑁆𑀩𑀚𑀺𑀢𑁂𑀦 𑀧𑀦 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀺𑀳𑀻𑀳𑀺 𑀅𑀲𑀫𑀸𑀦𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀩𑁆𑀩𑀚𑀺𑀢𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁫𑁯.

‘‘𑀦 𑀯𑁂 𑀬𑀸𑀘𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀥𑀻𑀭𑁄 𑀘 𑀯𑁂𑀤𑀺𑀢𑀼𑀫𑀭𑀳𑀢𑀺;

𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺.

𑀢𑀢𑁆𑀣 𑀲𑀧𑁆𑀧𑀜𑁆𑀜𑀸𑀢𑀺 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀤𑀲𑀸𑀯𑀓𑀸 𑀘 𑀩𑁄𑀥𑀺𑀬𑀸 𑀧𑀝𑀺𑀧𑀦𑁆𑀦𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀩𑁄𑀥𑀺𑀲𑀢𑁆𑀢𑀸 𑀘 𑀲𑀩𑁆𑀩𑁂𑀧𑀺 𑀲𑀧𑁆𑀧𑀜𑁆𑀜𑀸 𑀘 𑀲𑀼𑀲𑀻𑀮𑀸 𑀘, 𑀏𑀢𑁂 𑀏𑀯𑀭𑀽𑀧𑀸 𑀲𑀧𑁆𑀧𑀜𑁆𑀜𑀸 ‘‘𑀅𑀫𑁆𑀳𑀸𑀓𑀁 𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀣𑀸’’𑀢𑀺 𑀦 𑀬𑀸𑀘𑀦𑁆𑀢𑀺. 𑀥𑀻𑀭𑁄 𑀘 𑀯𑁂𑀤𑀺𑀢𑀼𑀫𑀭𑀳𑀢𑀻𑀢𑀺 𑀉𑀧𑀝𑁆𑀞𑀸𑀓𑁄 𑀧𑀦 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀕𑀺𑀮𑀸𑀦𑀓𑀸𑀮𑁂 𑀘 𑀅𑀕𑀺𑀮𑀸𑀦𑀓𑀸𑀮𑁂 𑀘 𑀬𑁂𑀦 𑀬𑁂𑀦𑀢𑁆𑀣𑁄, 𑀢𑀁 𑀲𑀩𑁆𑀩𑀁 𑀲𑀬𑀫𑁂𑀯 𑀯𑁂𑀤𑀺𑀢𑀼𑀁 𑀚𑀸𑀦𑀺𑀢𑀼𑀁 𑀅𑀭𑀳𑀢𑀺. 𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀭𑀺𑀬𑀸 𑀧𑀦 𑀯𑀸𑀘𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀬𑁂𑀦𑀢𑁆𑀣𑀺𑀓𑀸 𑀳𑁄𑀦𑁆𑀢𑀺, 𑀢𑀁 𑀉𑀤𑁆𑀤𑀺𑀲𑁆𑀲 𑀓𑁂𑀯𑀮𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀢𑀺𑀝𑁆𑀞𑀦𑁆𑀢𑀺, 𑀦𑁂𑀯 𑀓𑀸𑀬𑀗𑁆𑀕𑀁 𑀯𑀸 𑀯𑀸𑀘𑀗𑁆𑀕𑀁 𑀯𑀸 𑀓𑁄𑀧𑁂𑀦𑁆𑀢𑀺. 𑀓𑀸𑀬𑀯𑀺𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀳𑀺 𑀓𑀸𑀬𑀗𑁆𑀕𑀁 𑀓𑁄𑀧𑁂𑀢𑀺 𑀦𑀸𑀫, 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑁄 𑀯𑀸𑀘𑀗𑁆𑀕𑀁 𑀓𑁄𑀧𑁂𑀢𑀺 𑀦𑀸𑀫, 𑀢𑀤𑀼𑀪𑀬𑀁 𑀅𑀓𑀢𑁆𑀯𑀸 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺. 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸𑀢𑀺 𑀏𑀲𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀅𑀓𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀸𑀬 𑀢𑀺𑀝𑁆𑀞𑀫𑀸𑀦𑀸 𑀅𑀭𑀺𑀬𑀸𑀦𑀁 𑀬𑀸𑀘𑀦𑀸 𑀦𑀸𑀫.

𑀭𑀸𑀚𑀸 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀪𑀦𑁆𑀢𑁂, 𑀬𑀤𑀺 𑀲𑀧𑁆𑀧𑀜𑁆𑀜𑁄 𑀉𑀧𑀝𑁆𑀞𑀸𑀓𑁄 𑀅𑀢𑁆𑀢𑀦𑀸𑀯 𑀜𑀢𑁆𑀯𑀸 𑀓𑀼𑀮𑀽𑀧𑀓𑀲𑁆𑀲 𑀤𑀸𑀢𑀩𑁆𑀩𑀁 𑀤𑁂𑀢𑀺, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀇𑀤𑀜𑁆𑀘𑀺𑀤𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀤𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁬𑁦.

‘‘𑀤𑀤𑀸𑀫𑀺 ¶ 𑀢𑁂 𑀩𑁆𑀭𑀸𑀳𑁆𑀫𑀡 𑀭𑁄𑀳𑀺𑀡𑀻𑀦𑀁, 𑀕𑀯𑀁 𑀲𑀳𑀲𑁆𑀲𑀁 𑀲𑀳 𑀧𑀼𑀗𑁆𑀕𑀯𑁂𑀦;

𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀣𑀁 𑀦 𑀤𑀚𑁆𑀚𑀸, 𑀲𑀼𑀢𑁆𑀯𑀸𑀦 𑀕𑀸𑀣𑀸 𑀢𑀯 𑀥𑀫𑁆𑀫𑀬𑀼𑀢𑁆𑀢𑀸’’𑀢𑀺.

𑀢𑀢𑁆𑀣 𑀭𑁄𑀳𑀺𑀡𑀻𑀦𑀦𑁆𑀢𑀺 𑀭𑀢𑁆𑀢𑀯𑀡𑁆𑀡𑀸𑀦𑀁. 𑀕𑀯𑀁 𑀲𑀳𑀲𑁆𑀲𑀦𑁆𑀢𑀺 𑀔𑀻𑀭𑀤𑀥𑀺𑀆𑀤𑀺𑀫𑀥𑀼𑀭𑀭𑀲𑀧𑀭𑀺𑀪𑁄𑀕𑀢𑁆𑀣𑀸𑀬 𑀏𑀯𑀭𑀽𑀧𑀸𑀦𑀁 𑀕𑀼𑀦𑁆𑀦𑀁 𑀲𑀳𑀲𑁆𑀲𑀁 𑀢𑀼𑀬𑁆𑀳𑀁 𑀤𑀫𑁆𑀫𑀺, 𑀢𑀁 𑀫𑁂 𑀧𑀝𑀺𑀕𑁆𑀕𑀡𑁆𑀳. 𑀅𑀭𑀺𑀬𑁄𑀢𑀺 𑀆𑀘𑀸𑀭𑀅𑀭𑀺𑀬𑁄. 𑀅𑀭𑀺𑀬𑀲𑁆𑀲𑀸𑀢𑀺 𑀆𑀘𑀸𑀭𑀅𑀭𑀺𑀬𑀲𑁆𑀲. 𑀓𑀣𑀁 𑀦 𑀤𑀚𑁆𑀚𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀦 𑀤𑀤𑁂𑀬𑁆𑀬.

𑀏𑀯𑀁 𑀯𑀼𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀳𑀁 𑀫𑀳𑀸𑀭𑀸𑀚, 𑀅𑀓𑀺𑀜𑁆𑀘𑀦𑁄 𑀧𑀩𑁆𑀩𑀚𑀺𑀢𑁄, 𑀦 𑀫𑁂 𑀕𑀸𑀯𑀻𑀳𑀺 𑀅𑀢𑁆𑀣𑁄’’𑀢𑀺 ¶ 𑀧𑀝𑀺𑀓𑁆𑀔𑀺𑀧𑀺. 𑀭𑀸𑀚𑀸 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀲𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑀸. 𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀅𑀝𑁆𑀞𑀺𑀲𑁂𑀦𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀅𑀝𑁆𑀞𑀺𑀲𑁂𑀦𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁦𑁪] 𑁯. 𑀓𑀧𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑀢𑁆𑀣 𑀯𑁂𑀭𑀻 𑀦𑀺𑀯𑀲𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀧𑀣𑀯𑀺𑀧𑀯𑁂𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀧𑀣𑀯𑀺𑀁 𑀧𑀯𑀺𑀝𑁆𑀞𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀲𑀳 𑀧𑀭𑀺𑀲𑀸𑀬 𑀦𑀝𑁆𑀞𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀲𑀳 𑀧𑀭𑀺𑀲𑀸𑀬 𑀦𑀝𑁆𑀞𑁄, 𑀧𑀼𑀩𑁆𑀩𑁂𑀧𑀺 𑀦𑀲𑁆𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀜𑁆𑀘𑀲𑀢𑀓𑀧𑀺𑀧𑀭𑀺𑀯𑀸𑀭𑁄 𑀭𑀸𑀚𑀼𑀬𑁆𑀬𑀸𑀦𑁂 ¶ 𑀯𑀲𑀺. 𑀤𑁂𑀯𑀤𑀢𑁆𑀢𑁄𑀧𑀺 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀜𑁆𑀘𑀲𑀢𑀓𑀧𑀺𑀧𑀭𑀺𑀯𑀸𑀭𑁄 𑀢𑀢𑁆𑀣𑁂𑀯 𑀯𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀼𑀭𑁄𑀳𑀺𑀢𑁂 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁂 𑀏𑀓𑁄 ¶ 𑀮𑁄𑀮𑀓𑀧𑀺 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑀤𑁆𑀯𑀸𑀭𑁂 𑀢𑁄𑀭𑀡𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀯𑀘𑁆𑀘𑀧𑀺𑀡𑁆𑀟𑀁 𑀧𑀸𑀢𑁂𑀢𑁆𑀯𑀸 𑀧𑀼𑀦 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀫𑀼𑀔𑁂 𑀧𑀸𑀢𑁂𑀲𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑀺 𑀢𑀼𑀫𑁆𑀳𑀸𑀓𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀫𑀓𑁆𑀓𑀝𑁂 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀧𑀼𑀦 𑀦𑁆𑀳𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂𑀦 𑀯𑁂𑀭𑀁 𑀕𑀳𑁂𑀢𑁆𑀯𑀸 𑀫𑀓𑁆𑀓𑀝𑀸𑀦𑀁 𑀲𑀦𑁆𑀢𑀚𑁆𑀚𑀺𑀢𑀪𑀸𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 ‘‘𑀯𑁂𑀭𑀻𑀦𑀁 𑀦𑀺𑀯𑀲𑀦𑀝𑁆𑀞𑀸𑀦𑁂 𑀦𑀸𑀫 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀩𑁆𑀩𑁄𑀧𑀺 𑀓𑀧𑀺𑀕𑀡𑁄 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀽’’𑀢𑀺 𑀓𑀧𑀺𑀲𑀳𑀲𑁆𑀲𑀲𑁆𑀲𑀧𑀺 𑀆𑀭𑁄𑀘𑀸𑀧𑁂𑀲𑀺. 𑀤𑀼𑀩𑁆𑀩𑀘𑀓𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀫𑀓𑁆𑀓𑀝𑁂 𑀕𑀳𑁂𑀢𑁆𑀯𑀸 ‘‘𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑀺𑀲𑁆𑀲𑀸 𑀯𑀻𑀳𑀺𑀓𑁄𑀝𑁆𑀝𑀺𑀓𑀸𑀬 𑀤𑀸𑀲𑀺𑀬𑀸 𑀆𑀢𑀧𑁂 𑀧𑀲𑀸𑀭𑀺𑀢𑀯𑀻𑀳𑀺𑀁 𑀔𑀸𑀤𑀦𑁆𑀢𑁄 𑀏𑀓𑁄 𑀏𑀴𑀓𑁄 𑀉𑀫𑁆𑀫𑀼𑀓𑁆𑀓𑁂𑀦 𑀧𑀳𑀸𑀭𑀁 𑀮𑀪𑀺𑀢𑁆𑀯𑀸 𑀆𑀤𑀺𑀢𑁆𑀢𑀲𑀭𑀻𑀭𑁄 𑀧𑀮𑀸𑀬𑀦𑁆𑀢𑁄 𑀏𑀓𑀺𑀲𑁆𑀲𑀸 𑀳𑀢𑁆𑀣𑀺𑀲𑀸𑀮𑀁 𑀦𑀺𑀲𑁆𑀲𑀸𑀬 𑀢𑀺𑀡𑀓𑀼𑀝𑀺𑀬𑀸 𑀓𑀼𑀝𑁆𑀝𑁂 𑀲𑀭𑀻𑀭𑀁 𑀖𑀁𑀲𑀺 ¶ . 𑀲𑁄 𑀅𑀕𑁆𑀕𑀺 𑀢𑀺𑀡𑀓𑀼𑀝𑀺𑀓𑀁 𑀕𑀡𑁆𑀳𑀺, 𑀢𑀢𑁄 𑀉𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀁 𑀕𑀡𑁆𑀳𑀺, 𑀳𑀢𑁆𑀣𑀺𑀲𑀸𑀮𑀸𑀬 𑀳𑀢𑁆𑀣𑀻𑀦𑀁 𑀧𑀺𑀝𑁆𑀞𑀺 𑀛𑀸𑀬𑀺, 𑀳𑀢𑁆𑀣𑀺𑀯𑁂𑀚𑁆𑀚𑀸 𑀳𑀢𑁆𑀣𑀻𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑀺.

𑀧𑀼𑀭𑁄𑀳𑀺𑀢𑁄𑀧𑀺 𑀫𑀓𑁆𑀓𑀝𑀸𑀦𑀁 𑀕𑀳𑀡𑀽𑀧𑀸𑀬𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣 𑀦𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀭𑀸𑀚𑀸 𑀆𑀳 ‘‘𑀆𑀘𑀭𑀺𑀬, 𑀩𑀳𑀽 𑀦𑁄 𑀳𑀢𑁆𑀣𑀻 𑀯𑀡𑀺𑀢𑀸 𑀚𑀸𑀢𑀸, 𑀳𑀢𑁆𑀣𑀺𑀯𑁂𑀚𑁆𑀚𑀸 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀦𑀸𑀲𑀺 𑀦𑀼 𑀔𑁄 𑀓𑀺𑀜𑁆𑀘𑀺 𑀪𑁂𑀲𑀚𑁆𑀚’’𑀦𑁆𑀢𑀺? ‘‘𑀚𑀸𑀦𑀸𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀦𑀸𑀫𑀸’’𑀢𑀺? ‘‘𑀫𑀓𑁆𑀓𑀝𑀯𑀲𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀳𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺? ‘‘𑀦𑀦𑀼 𑀉𑀬𑁆𑀬𑀸𑀦𑁂 𑀩𑀳𑀽 𑀫𑀓𑁆𑀓𑀝𑀸’’𑀢𑀺? 𑀭𑀸𑀚𑀸 ‘‘𑀉𑀬𑁆𑀬𑀸𑀦𑁂 𑀫𑀓𑁆𑀓𑀝𑁂 𑀫𑀸𑀭𑁂𑀢𑁆𑀯𑀸 𑀯𑀲𑀁 𑀆𑀦𑁂𑀣𑀸’’𑀢𑀺 𑀆𑀳. 𑀥𑀦𑀼𑀕𑁆𑀕𑀳𑀸 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀢𑁂𑀧𑀺 𑀫𑀓𑁆𑀓𑀝𑁂 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀲𑀼𑀁. 𑀏𑀓𑁄 𑀧𑀦 𑀚𑁂𑀝𑁆𑀞𑀓𑀫𑀓𑁆𑀓𑀝𑁄 𑀧𑀮𑀸𑀬𑀦𑁆𑀢𑁄 𑀲𑀭𑀧𑀳𑀸𑀭𑀁 𑀮𑀪𑀺𑀢𑁆𑀯𑀸𑀧𑀺 𑀢𑀢𑁆𑀣𑁂𑀯 𑀅𑀧𑀢𑀺𑀢𑁆𑀯𑀸 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀧𑀢𑀺. 𑀯𑀸𑀦𑀭𑀸 ‘‘𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀫𑀢𑁄’’𑀢𑀺 𑀢𑀲𑁆𑀲 𑀧𑀳𑀸𑀭𑀁 𑀮𑀤𑁆𑀥𑀸 𑀫𑀢𑀪𑀸𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀕𑀦𑁆𑀢𑁆𑀯𑀸 𑀓𑀧𑀺𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀁 𑀅𑀓𑀢𑁆𑀯𑀸 𑀯𑁂𑀭𑀺𑀝𑁆𑀞𑀸𑀦𑁂 𑀯𑀲𑀦𑁆𑀢𑀸 𑀦𑀸𑀫 𑀏𑀯𑀁 𑀯𑀺𑀦𑀲𑁆𑀲𑀦𑁆𑀢𑀻’’𑀢𑀺 𑀓𑀧𑀺𑀕𑀡𑀲𑁆𑀲 𑀑𑀯𑀸𑀤𑀯𑀲𑁂𑀦 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁧.

‘‘𑀬𑀢𑁆𑀣 𑀯𑁂𑀭𑀻 𑀦𑀺𑀯𑀲𑀢𑀺, 𑀦 𑀯𑀲𑁂 𑀢𑀢𑁆𑀣 𑀧𑀡𑁆𑀟𑀺𑀢𑁄;

𑀏𑀓𑀭𑀢𑁆𑀢𑀁 𑀤𑁆𑀯𑀺𑀭𑀢𑁆𑀢𑀁 𑀯𑀸, 𑀤𑀼𑀓𑁆𑀔𑀁 𑀯𑀲𑀢𑀺 𑀯𑁂𑀭𑀺𑀲𑀼.

𑁬𑁨.

‘‘𑀤𑀺𑀲𑁄 ¶ 𑀯𑁂 𑀮𑀳𑀼𑀘𑀺𑀢𑁆𑀢𑀲𑁆𑀲, 𑀧𑁄𑀲𑀲𑁆𑀲𑀸𑀦𑀼𑀯𑀺𑀥𑀻𑀬𑀢𑁄;

𑀏𑀓𑀲𑁆𑀲 𑀓𑀧𑀺𑀦𑁄 𑀳𑁂𑀢𑀼, 𑀬𑀽𑀣𑀲𑁆𑀲 𑀅𑀦𑀬𑁄 𑀓𑀢𑁄.

𑁬𑁩.

‘‘𑀩𑀸𑀮𑁄𑀯 𑀧𑀡𑁆𑀟𑀺𑀢𑀫𑀸𑀦𑀻, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀲𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀦𑁆𑀢𑁆𑀯𑀸, 𑀲𑀬𑁂𑀣𑀸𑀬𑀁 𑀬𑀣𑀸 𑀓𑀧𑀺.

𑁬𑁪.

‘‘𑀦 𑀲𑀸𑀥𑀼 𑀩𑀮𑀯𑀸 𑀩𑀸𑀮𑁄, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀅𑀳𑀺𑀢𑁄 𑀪𑀯𑀢𑀺 𑀜𑀸𑀢𑀻𑀦𑀁, 𑀲𑀓𑀼𑀡𑀸𑀦𑀁𑀯 𑀘𑁂𑀢𑀓𑁄.

𑁬𑁫.

‘‘𑀥𑀻𑀭𑁄𑀯 𑀩𑀮𑀯𑀸 𑀲𑀸𑀥𑀼, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀳𑀺𑀢𑁄 𑀪𑀯𑀢𑀺 𑀜𑀸𑀢𑀻𑀦𑀁, 𑀢𑀺𑀤𑀲𑀸𑀦𑀁𑀯 𑀯𑀸𑀲𑀯𑁄.

𑁬𑁬.

‘‘𑀬𑁄 ¶ 𑀘 𑀲𑀻𑀮𑀜𑁆𑀘 𑀧𑀜𑁆𑀜𑀜𑁆𑀘, 𑀲𑀼𑀢𑀜𑁆𑀘𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘.

𑁬𑁭.

‘‘𑀢𑀲𑁆𑀫𑀸 𑀢𑀼𑀮𑁂𑀬𑁆𑀬 𑀫𑀢𑁆𑀢𑀸𑀦𑀁, 𑀲𑀻𑀮𑀧𑀜𑁆𑀜𑀸𑀲𑀼𑀢𑀸𑀫𑀺𑀯;

𑀕𑀡𑀁 𑀯𑀸 𑀧𑀭𑀺𑀳𑀭𑁂 𑀥𑀻𑀭𑁄, 𑀏𑀓𑁄 𑀯𑀸𑀧𑀺 𑀧𑀭𑀺𑀩𑁆𑀩𑀚𑁂’’𑀢𑀺.

𑀢𑀢𑁆𑀣 𑀮𑀳𑀼𑀘𑀺𑀢𑁆𑀢𑀲𑁆𑀲𑀸𑀢𑀺 𑀮𑀳𑀼𑀘𑀺𑀢𑁆𑀢𑁄 𑀅𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑁄𑀲𑁄 𑀮𑀳𑀼𑀘𑀺𑀢𑁆𑀢𑀲𑁆𑀲 𑀫𑀺𑀢𑁆𑀢𑀲𑁆𑀲 𑀯𑀸 𑀜𑀸𑀢𑀺𑀦𑁄 𑀯𑀸 𑀅𑀦𑀼𑀯𑀺𑀥𑀻𑀬𑀢𑀺 𑀅𑀦𑀼𑀯𑀢𑁆𑀢𑀢𑀺, 𑀢𑀲𑁆𑀲 𑀧𑁄𑀲𑀲𑁆𑀲 𑀅𑀦𑀼𑀯𑀺𑀥𑀻𑀬𑀢𑁄 𑀲𑁄 𑀮𑀳𑀼𑀘𑀺𑀢𑁆𑀢𑁄 𑀤𑀺𑀲𑁄 𑀳𑁄𑀢𑀺, 𑀯𑁂𑀭𑀺𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀏𑀓𑀲𑁆𑀲 𑀓𑀧𑀺𑀦𑁄𑀢𑀺 𑀧𑀲𑁆𑀲𑀣 𑀏𑀓𑀲𑁆𑀲 𑀮𑀳𑀼𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀩𑀸𑀮𑀲𑁆𑀲 𑀓𑀧𑀺𑀦𑁄 𑀳𑁂𑀢𑀼 𑀅𑀬𑀁 𑀲𑀓𑀮𑀲𑁆𑀲 𑀬𑀽𑀣𑀲𑁆𑀲 𑀅𑀦𑀬𑁄 𑀅𑀯𑀼𑀟𑁆𑀠𑀺 𑀫𑀳𑀸𑀯𑀺𑀦𑀸𑀲𑁄 𑀓𑀢𑁄𑀢𑀺. 𑀧𑀡𑁆𑀟𑀺𑀢𑀫𑀸𑀦𑀻𑀢𑀺 𑀬𑁄 𑀲𑀬𑀁 𑀩𑀸𑀮𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀧𑀡𑁆𑀟𑀺𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑁄 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀁 𑀅𑀓𑀢𑁆𑀯𑀸 𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀘𑁆𑀙𑀢𑀺, 𑀲𑁄 𑀲𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀦𑁆𑀢𑁆𑀯𑀸 𑀬𑀣𑀸𑀬𑀁 𑀤𑀼𑀩𑁆𑀩𑀘𑀓𑀧𑀺 𑀫𑀢𑀲𑀬𑀦𑀁 𑀲𑀬𑀺𑀢𑁄, 𑀏𑀯𑀁 𑀲𑀬𑁂𑀣𑀸𑀢𑀺 𑀅𑀢𑁆𑀣𑁄.

𑀦 𑀲𑀸𑀥𑀽𑀢𑀺 𑀩𑀸𑀮𑁄 𑀦𑀸𑀫 𑀩𑀮𑀲𑀫𑁆𑀧𑀦𑁆𑀦𑁄 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄 𑀦 𑀲𑀸𑀥𑀼 𑀦 𑀮𑀤𑁆𑀥𑀓𑁄. 𑀓𑀺𑀁𑀓𑀸𑀭𑀡𑀸? 𑀲𑁄 𑀳𑀺 𑀅𑀳𑀺𑀢𑁄 𑀪𑀯𑀢𑀺 𑀜𑀸𑀢𑀻𑀦𑀁, 𑀯𑀺𑀦𑀸𑀲𑀫𑁂𑀯 𑀯𑀳𑀢𑀺. 𑀲𑀓𑀼𑀡𑀸𑀦𑀁𑀯 𑀘𑁂𑀢𑀓𑁄𑀢𑀺 𑀬𑀣𑀸 𑀳𑀺 𑀢𑀺𑀢𑁆𑀢𑀺𑀭𑀲𑀓𑀼𑀡𑀸𑀦𑀁 ¶ 𑀤𑀻𑀧𑀓𑀢𑀺𑀢𑁆𑀢𑀺𑀭𑁄 𑀤𑀺𑀯𑀲𑀫𑁆𑀧𑀺 𑀯𑀲𑁆𑀲𑀦𑁆𑀢𑁄 𑀅𑀜𑁆𑀜𑁂 𑀲𑀓𑀼𑀡𑁂 𑀦 𑀫𑀸𑀭𑁂𑀢𑀺, 𑀜𑀸𑀢𑀓𑁂𑀯 𑀫𑀸𑀭𑁂𑀢𑀺, 𑀢𑁂𑀲𑀜𑁆𑀜𑁂𑀯 𑀅𑀳𑀺𑀢𑁄 𑀳𑁄𑀢𑀺, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀳𑀺𑀢𑁄 𑀪𑀯𑀢𑀻𑀢𑀺 𑀓𑀸𑀬𑁂𑀦𑀧𑀺 𑀯𑀸𑀘𑀸𑀬𑀧𑀺 𑀫𑀦𑀲𑀸𑀧𑀺 𑀳𑀺𑀢𑀓𑀸𑀭𑀓𑁄𑀬𑁂𑀯. 𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀻𑀢𑀺 𑀬𑁄 𑀇𑀥 𑀧𑀼𑀕𑁆𑀕𑀮𑁄 𑀏𑀢𑁂 𑀲𑀻𑀮𑀸𑀤𑀬𑁄 𑀕𑀼𑀡𑁂 𑀅𑀢𑁆𑀢𑀦𑀺 ¶ 𑀧𑀲𑁆𑀲𑀢𑀺, 𑀲𑁄 ‘‘𑀫𑀬𑁆𑀳𑀁 𑀆𑀘𑀸𑀭𑀲𑀻𑀮𑀫𑁆𑀧𑀺 𑀅𑀢𑁆𑀣𑀺, 𑀧𑀜𑁆𑀜𑀸𑀧𑀺 𑀲𑀼𑀢𑀧𑀭𑀺𑀬𑀢𑁆𑀢𑀺𑀧𑀺 𑀅𑀢𑁆𑀣𑀻’’𑀢𑀺 𑀢𑀣𑀢𑁄 𑀚𑀸𑀦𑀺𑀢𑁆𑀯𑀸 𑀕𑀡𑀁 𑀧𑀭𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀸𑀦𑀦𑁆𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀫𑁂𑀯 𑀘𑀭𑀢𑀺.

𑀢𑀼𑀮𑁂𑀬𑁆𑀬 𑀫𑀢𑁆𑀢𑀸𑀦𑀦𑁆𑀢𑀺 𑀢𑀼𑀮𑁂𑀬𑁆𑀬 𑀅𑀢𑁆𑀢𑀸𑀦𑀁. 𑀢𑀼𑀮𑁂𑀬𑁆𑀬𑀸𑀢𑀺 𑀢𑀼𑀮𑁂𑀢𑁆𑀯𑀸. 𑀲𑀻𑀮𑀧𑀜𑁆𑀜𑀸𑀲𑀼𑀢𑀸𑀫𑀺𑀯𑀸𑀢𑀺 𑀏𑀢𑀸𑀦𑀺 𑀲𑀻𑀮𑀸𑀤𑀻𑀦𑀺 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀲𑀻𑀮𑀸𑀤𑀻𑀦𑀺 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀢𑀲𑁆𑀫𑀸 𑀧𑀡𑁆𑀟𑀺𑀢𑁄 𑀏𑀢𑀸𑀦𑀺 𑀲𑀻𑀮𑀸𑀤𑀻𑀦𑀺 𑀯𑀺𑀬 𑀅𑀢𑁆𑀢𑀸𑀦𑀫𑁆𑀧𑀺 𑀢𑁂𑀲𑀼 𑀢𑀼𑀮𑁂𑀢𑁆𑀯𑀸 ‘‘𑀧𑀢𑀺𑀝𑁆𑀞𑀺𑀢𑁄 𑀦𑀼 𑀔𑁄𑀫𑁆𑀳𑀺 𑀲𑀻𑀮𑁂 𑀧𑀜𑁆𑀜𑀸𑀬 𑀲𑀼𑀢𑁂’’𑀢𑀺 𑀢𑀻𑀭𑁂𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀥𑀻𑀭𑁄 𑀕𑀡𑀁 𑀯𑀸 𑀧𑀭𑀺𑀳𑀭𑁂𑀬𑁆𑀬, 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑁄 𑀯𑀸 𑀳𑀼𑀢𑁆𑀯𑀸 𑀧𑀭𑀺𑀩𑁆𑀩𑀚𑁂𑀬𑁆𑀬 𑀯𑀢𑁆𑀢𑁂𑀬𑁆𑀬, 𑀧𑀭𑀺𑀲𑀼𑀧𑀝𑁆𑀞𑀸𑀓𑁂𑀦𑀧𑀺 𑀯𑀺𑀯𑁂𑀓𑀘𑀸𑀭𑀺𑀦𑀸𑀧𑀺 𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀓𑀧𑀺𑀭𑀸𑀚𑀸 𑀳𑀼𑀢𑁆𑀯𑀸𑀧𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀓𑀺𑀘𑁆𑀘𑀁 𑀓𑀣𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑀼𑀩𑁆𑀩𑀘𑀓𑀧𑀺 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀭𑀺𑀲𑀸𑀧𑀺𑀲𑁆𑀲 𑀤𑁂𑀯𑀤𑀢𑁆𑀢𑀧𑀭𑀺𑀲𑀸, 𑀧𑀡𑁆𑀟𑀺𑀢𑀓𑀧𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀧𑀺𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁦𑁫] 𑁧𑁦. 𑀩𑀓𑀚𑀸𑀢𑀓𑀯𑀡𑁆𑀡𑀦𑀸

𑀤𑁆𑀯𑀸𑀲𑀢𑁆𑀢𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀓𑀩𑁆𑀭𑀳𑁆𑀫𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀳𑀺 ‘‘𑀇𑀤𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢𑀁 𑀅𑀘𑀯𑀦𑀥𑀫𑁆𑀫𑀁, 𑀇𑀢𑁄 𑀅𑀜𑁆𑀜𑀁 𑀮𑁄𑀓𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀺. 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑁄 𑀓𑀺𑀭𑁂𑀲 𑀩𑁆𑀭𑀳𑁆𑀫𑀸 𑀧𑀼𑀩𑁆𑀩𑁂 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀯𑁂𑀳𑀧𑁆𑀨𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀧𑀜𑁆𑀘𑀓𑀧𑁆𑀧𑀲𑀢𑀧𑀭𑀺𑀫𑀸𑀡𑀁 𑀆𑀬𑀼𑀁 𑀔𑁂𑀧𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀁 𑀔𑁂𑀧𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀝𑁆𑀞𑀓𑀧𑁆𑀧𑀸𑀬𑀼𑀓𑁂𑀲𑀼 𑀆𑀪𑀲𑁆𑀲𑀭𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁆𑀭𑀲𑁆𑀲 𑀏𑀲𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀳𑀺 𑀦𑁂𑀯 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀼𑀢𑀺𑀁, 𑀦 𑀢𑀢𑁆𑀣 𑀉𑀧𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺, 𑀢𑀤𑀼𑀪𑀬𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 𑀏𑀯𑀁 𑀤𑀺𑀝𑁆𑀞𑀺𑀁 𑀕𑀡𑁆𑀳𑀺. 𑀪𑀕𑀯𑀸 𑀢𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑁂𑀬𑁆𑀬𑀣𑀸𑀧𑀺 ¶ 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 ¶ 𑀩𑁆𑀭𑀳𑁆𑀫𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀏𑀳𑀺 𑀔𑁄, 𑀫𑀸𑀭𑀺𑀲, 𑀲𑁆𑀯𑀸𑀕𑀢𑀁 𑀫𑀸𑀭𑀺𑀲, 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺, 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀇𑀤𑀜𑁆𑀳𑀺 𑀫𑀸𑀭𑀺𑀲, 𑀦𑀺𑀘𑁆𑀘𑀁 𑀇𑀤𑀁 𑀥𑀼𑀯𑀁 𑀇𑀤𑀁 𑀲𑀲𑁆𑀲𑀢𑀁 𑀇𑀤𑀁 𑀓𑁂𑀯𑀮𑀁 𑀇𑀤𑀁 𑀅𑀘𑀯𑀦𑀥𑀫𑁆𑀫𑀁, 𑀇𑀤𑀜𑁆𑀳𑀺 𑀦 𑀘 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀇𑀢𑁄 𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀻’’𑀢𑀺 𑀆𑀳.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀩𑀓𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 ‘‘𑀅𑀯𑀺𑀚𑁆𑀚𑀸𑀕𑀢𑁄 𑀯𑀢 𑀪𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀅𑀯𑀺𑀚𑁆𑀚𑀸𑀕𑀢𑁄 𑀯𑀢 𑀪𑁄 𑀩𑀓𑁄 𑀩𑁆𑀭𑀳𑁆𑀫𑀸, 𑀬𑀢𑁆𑀭 𑀳𑀺 𑀦𑀸𑀫 𑀅𑀦𑀺𑀘𑁆𑀘𑀜𑁆𑀜𑁂𑀯 𑀲𑀫𑀸𑀦𑀁 𑀦𑀺𑀘𑁆𑀘𑀦𑁆𑀢𑀺 𑀯𑀓𑁆𑀔𑀢𑀺…𑀧𑁂… 𑀲𑀦𑁆𑀢𑀜𑁆𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁, 𑀦𑀢𑁆𑀣𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀓𑁆𑀔𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁭𑁫). 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀳𑁆𑀫𑀸 ‘‘𑀢𑁆𑀯𑀁 𑀏𑀯𑀁 𑀓𑀣𑁂𑀲𑀺, 𑀢𑁆𑀯𑀁 𑀏𑀯𑀁 𑀓𑀣𑁂𑀲𑀺, 𑀇𑀢𑀺 𑀫𑀁 𑀏𑀲 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀅𑀦𑀼𑀩𑀦𑁆𑀥𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸 𑀦𑀸𑀫 𑀤𑀼𑀩𑁆𑀩𑀮𑁄 𑀘𑁄𑀭𑁄 𑀓𑀢𑀺𑀧𑀬𑁂 𑀧𑀳𑀸𑀭𑁂 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀅𑀳𑀫𑁂𑀯 𑀘𑁄𑀭𑁄, 𑀅𑀲𑀼𑀓𑁄𑀧𑀺 𑀘𑁄𑀭𑁄 𑀅𑀲𑀼𑀓𑁄𑀧𑀺 𑀘𑁄𑀭𑁄’’𑀢𑀺 𑀲𑀩𑁆𑀩𑁂𑀧𑀺 𑀲𑀳𑀸𑀬𑀓𑁂 𑀆𑀘𑀺𑀓𑁆𑀔𑀢𑀺, 𑀢𑀣𑁂𑀯 𑀪𑀕𑀯𑀢𑁄 𑀅𑀦𑀼𑀬𑁄𑀕𑀪𑀬𑁂𑀦 𑀪𑀻𑀢𑁄 𑀅𑀜𑁆𑀜𑁂𑀧𑀺 𑀅𑀢𑁆𑀢𑀦𑁄 𑀲𑀳𑀸𑀬𑀓𑁂 𑀆𑀘𑀺𑀓𑁆𑀔𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁮.

‘‘𑀤𑁆𑀯𑀸𑀲𑀢𑁆𑀢𑀢𑀺 ¶ 𑀕𑁄𑀢𑀫 𑀧𑀼𑀜𑁆𑀜𑀓𑀫𑁆𑀫𑀸, 𑀯𑀲𑀯𑀢𑁆𑀢𑀺𑀦𑁄 𑀚𑀸𑀢𑀺𑀚𑀭𑀁 𑀅𑀢𑀻𑀢𑀸;

𑀅𑀬𑀫𑀦𑁆𑀢𑀺𑀫𑀸 𑀯𑁂𑀤𑀕𑀽 𑀩𑁆𑀭𑀳𑁆𑀫𑀧𑀢𑁆𑀢𑀺, 𑀅𑀲𑁆𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀚𑀦𑀸 𑀅𑀦𑁂𑀓𑀸’’𑀢𑀺. (𑀲𑀁. 𑀦𑀺. 𑁧.𑁧𑁭𑁫);

𑀢𑀢𑁆𑀣 𑀤𑁆𑀯𑀸𑀲𑀢𑁆𑀢𑀢𑀻𑀢𑀺 𑀦 𑀓𑁂𑀯𑀮𑀁 𑀪𑁄 𑀕𑁄𑀢𑀫, 𑀅𑀳𑀫𑁂𑀯, 𑀅𑀣 𑀔𑁄 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀫𑀬𑀁 𑀤𑁆𑀯𑀸𑀲𑀢𑁆𑀢𑀢𑀺 𑀚𑀦𑀸 𑀧𑀼𑀜𑁆𑀜𑀓𑀫𑁆𑀫𑀸 𑀅𑀜𑁆𑀜𑁂𑀲𑀁 𑀉𑀧𑀭𑀺 𑀅𑀢𑁆𑀣𑀦𑁄 𑀯𑀲𑀁 𑀯𑀢𑁆𑀢𑀦𑁂𑀦 𑀯𑀲𑀯𑀢𑁆𑀢𑀺𑀦𑁄 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀅𑀢𑀻𑀢𑀸, 𑀅𑀬𑀁 𑀦𑁄 𑀯𑁂𑀤𑁂𑀳𑀺 𑀕𑀢𑀢𑁆𑀢𑀸 𑀯𑁂𑀤𑀕𑀽, 𑀅𑀬𑀁 𑀪𑁄 𑀕𑁄𑀢𑀫 𑀅𑀦𑁆𑀢𑀺𑀫𑀸 𑀩𑁆𑀭𑀳𑁆𑀫𑀧𑀢𑁆𑀢𑀺, 𑀧𑀘𑁆𑀙𑀺𑀫𑀓𑁄𑀝𑀺𑀧𑁆𑀧𑀢𑁆𑀢𑀺 𑀲𑁂𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀺. 𑀅𑀲𑁆𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀚𑀦𑀸 𑀅𑀦𑁂𑀓𑀸𑀢𑀺 𑀅𑀫𑁆𑀳𑁂 𑀅𑀜𑁆𑀜𑁂 𑀩𑀳𑀽 𑀚𑀦𑀸 𑀧𑀜𑁆𑀚𑀮𑀺𑀓𑀸 𑀳𑀼𑀢𑁆𑀯𑀸 𑁋 ‘‘𑀅𑀬𑀁 𑀔𑁄 𑀪𑀯𑀁 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀦𑀫𑀲𑁆𑀲𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, ‘‘𑀅𑀳𑁄 𑀯𑀢 𑀫𑀬𑀫𑁆𑀧𑀺 𑀏𑀯𑀭𑀽𑀧𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀲 ¶ ¶ 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁯.

‘‘𑀅𑀧𑁆𑀧𑀁 𑀳𑀺 𑀏𑀢𑀁 𑀦 𑀳𑀺 𑀤𑀻𑀖𑀫𑀸𑀬𑀼, 𑀬𑀁 𑀢𑁆𑀯𑀁 𑀩𑀓 𑀫𑀜𑁆𑀜𑀲𑀺 𑀤𑀻𑀖𑀫𑀸𑀬𑀼𑀁;

𑀲𑀢𑀁 𑀲𑀳𑀲𑁆𑀲𑀸𑀦𑀺 𑀦𑀺𑀭𑀩𑁆𑀩𑀼𑀤𑀸𑀦𑀁, 𑀆𑀬𑀼𑀁 𑀧𑀚𑀸𑀦𑀸𑀫𑀺 𑀢𑀯𑀸𑀳 𑀩𑁆𑀭𑀳𑁆𑀫𑁂’’𑀢𑀺. (𑀲𑀁. 𑀦𑀺. 𑁧.𑁧𑁭𑁫);

𑀢𑀢𑁆𑀣 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀦𑀺𑀭𑀩𑁆𑀩𑀼𑀤𑀸𑀦𑀦𑁆𑀢𑀺 𑀦𑀺𑀭𑀩𑁆𑀩𑀼𑀤𑀲𑀗𑁆𑀔𑀸𑀢𑀸𑀦𑀁 𑀕𑀡𑀦𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀺. 𑀯𑀲𑁆𑀲𑀸𑀦𑀜𑁆𑀳𑀺 𑀤𑀲𑀤𑀲𑀓𑀁 𑀲𑀢𑀁, 𑀤𑀲 𑀲𑀢𑀸𑀦𑀁 𑀲𑀳𑀲𑁆𑀲𑀁, 𑀲𑀢𑀁 𑀲𑀳𑀲𑁆𑀲𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀁 𑀓𑁄𑀝𑀺 𑀦𑀸𑀫, 𑀲𑀢𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀧𑀓𑁄𑀝𑀺 𑀦𑀸𑀫, 𑀲𑀢𑀁 𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀓𑁄𑀝𑀺𑀧𑀓𑁄𑀝𑀺 𑀦𑀸𑀫, 𑀲𑀢𑀁 𑀓𑁄𑀝𑀺𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀏𑀓𑀁 𑀦𑀳𑀼𑀢𑀁 𑀦𑀸𑀫, 𑀲𑀢𑀁 𑀦𑀳𑀼𑀢𑀲𑀢𑀲𑀳𑀲𑁆𑀲𑀸𑀦𑀁 𑀏𑀓𑀁 𑀦𑀺𑀦𑁆𑀦𑀳𑀼𑀢𑀁 𑀦𑀸𑀫. 𑀙𑁂𑀓𑁄 𑀕𑀡𑀓𑁄 𑀏𑀢𑁆𑀢𑀓𑀁 𑀕𑀡𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁄 𑀧𑀭𑀁 𑀕𑀡𑀦𑀸 𑀦𑀸𑀫 𑀩𑀼𑀤𑁆𑀥𑀸𑀦𑀫𑁂𑀯 𑀯𑀺𑀲𑀬𑁄. 𑀢𑀢𑁆𑀣 𑀲𑀢𑀁 𑀦𑀺𑀦𑁆𑀦𑀳𑀼𑀢𑀲𑀢𑀲𑀳𑀲𑁆𑀲𑀸𑀦𑀁 𑀏𑀓𑀁 𑀅𑀩𑁆𑀩𑀼𑀤𑀁, 𑀯𑀻𑀲𑀢𑀺 𑀅𑀩𑁆𑀩𑀼𑀤𑀸𑀦𑀺 𑀏𑀓𑀁 𑀦𑀺𑀭𑀩𑁆𑀩𑀼𑀤𑀁, 𑀢𑁂𑀲𑀁 𑀦𑀺𑀭𑀩𑁆𑀩𑀼𑀤𑀲𑀢𑀲𑀳𑀲𑁆𑀲𑀸𑀦𑀁 𑀏𑀓𑀁 𑀅𑀳𑀳𑀁 𑀦𑀸𑀫, 𑀏𑀢𑁆𑀢𑀓𑀁 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀢𑀲𑁆𑀫𑀺𑀁 𑀪𑀯𑁂 𑀅𑀯𑀲𑀺𑀝𑁆𑀞𑀁 𑀆𑀬𑀼, 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀏𑀯𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀩𑀓𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁦.

‘‘𑀅𑀦𑀦𑁆𑀢𑀤𑀲𑁆𑀲𑀻 ¶ 𑀪𑀕𑀯𑀸𑀳𑀫𑀲𑁆𑀫𑀺, 𑀚𑀸𑀢𑀺𑀚𑁆𑀚𑀭𑀁 𑀲𑁄𑀓𑀫𑀼𑀧𑀸𑀢𑀺𑀯𑀢𑁆𑀢𑁄;

𑀓𑀺𑀁 𑀫𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀆𑀘𑀺𑀓𑁆𑀔 𑀫𑁂 𑀢𑀁 𑀬𑀫𑀳𑀁 𑀯𑀺𑀚𑀜𑁆𑀜’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁭𑁫);

𑀢𑀢𑁆𑀣 𑀪𑀕𑀯𑀸𑀢𑀺 𑀪𑀕𑀯𑀸 𑀢𑀼𑀫𑁆𑀳𑁂 ‘‘𑀆𑀬𑀼𑀁 𑀧𑀚𑀸𑀦𑀸𑀫𑀺 𑀢𑀯𑀸𑀳’’𑀦𑁆𑀢𑀺 𑀯𑀤𑀦𑁆𑀢𑀸 ‘‘𑀅𑀳𑀁 𑀅𑀦𑀦𑁆𑀢𑀤𑀲𑁆𑀲𑀻 𑀚𑀸𑀢𑀺𑀚𑀭𑀜𑁆𑀘 𑀲𑁄𑀓𑀜𑁆𑀘 𑀉𑀧𑀸𑀢𑀺𑀯𑀢𑁆𑀢𑁄𑀲𑁆𑀫𑀻’’𑀢𑀺 𑀯𑀤𑀣. 𑀯𑀢𑀲𑀻𑀮𑀯𑀢𑁆𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀜𑁆𑀘 𑀲𑀻𑀮𑀯𑀢𑁆𑀢𑀜𑁆𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀢𑀼𑀫𑁆𑀳𑁂 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸, 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀫𑀬𑁆𑀳𑀁 𑀧𑀼𑀭𑀸𑀡𑀁 𑀯𑀢𑀜𑁆𑀘 𑀲𑀻𑀮𑀯𑀢𑁆𑀢𑀜𑁆𑀘, 𑀆𑀘𑀺𑀓𑁆𑀔 𑀫𑁂 𑀢𑀁, 𑀬𑀫𑀳𑀁 𑀢𑀬𑀸 𑀆𑀘𑀺𑀓𑁆𑀔𑀺𑀢𑀁 𑀬𑀸𑀣𑀸𑀯𑀲𑀭𑀲𑀢𑁄 𑀯𑀺𑀚𑀸𑀦𑁂𑀬𑁆𑀬𑀦𑁆𑀢𑀺.

𑀅𑀣𑀲𑁆𑀲 ¶ 𑀪𑀕𑀯𑀸 𑀅𑀢𑀻𑀢𑀸𑀦𑀺 𑀯𑀢𑁆𑀣𑀽𑀦𑀺 𑀆𑀳𑀭𑀺𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁧.

‘‘𑀬𑀁 𑀢𑁆𑀯𑀁 𑀅𑀧𑀸𑀬𑁂𑀲𑀺 𑀩𑀳𑀽 𑀫𑀦𑀼𑀲𑁆𑀲𑁂, 𑀧𑀺𑀧𑀸𑀲𑀺𑀢𑁂 𑀖𑀫𑁆𑀫𑀦𑀺 𑀲𑀫𑁆𑀧𑀭𑁂𑀢𑁂;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁨.

‘‘𑀬𑀁 ¶ 𑀏𑀡𑀺𑀓𑀽𑀮𑀲𑁆𑀫𑀺 𑀚𑀦𑀁 𑀕𑀳𑀻𑀢𑀁, 𑀅𑀫𑁄𑀘𑀬𑀻 𑀕𑀬𑁆𑀳𑀓 𑀦𑀻𑀬𑀫𑀸𑀦𑀁;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁩.

‘‘𑀕𑀗𑁆𑀕𑀸𑀬 𑀲𑁄𑀢𑀲𑁆𑀫𑀺𑀁 𑀕𑀳𑀻𑀢𑀦𑀸𑀯𑀁, 𑀮𑀼𑀤𑁆𑀤𑁂𑀦 𑀦𑀸𑀕𑁂𑀦 𑀫𑀦𑀼𑀲𑁆𑀲𑀓𑀧𑁆𑀧𑀸;

𑀅𑀫𑁄𑀘𑀬𑀺 𑀢𑁆𑀯𑀁 𑀩𑀮𑀲𑀸 𑀧𑀲𑀬𑁆𑀳, 𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁;

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁪.

‘‘𑀓𑀧𑁆𑀧𑁄 𑀘 𑀢𑁂 𑀩𑀤𑁆𑀥𑀘𑀭𑁄 𑀅𑀳𑁄𑀲𑀺𑀁, 𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 𑀯𑀢𑀺𑀦𑀁 𑀅𑀫𑀜𑁆𑀜𑀁;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁫);

𑀢𑀢𑁆𑀣 𑀅𑀧𑀸𑀬𑁂𑀲𑀻𑀢𑀺 𑀧𑀸𑀬𑁂𑀲𑀺. 𑀖𑀫𑁆𑀫𑀦𑀺 𑀲𑀫𑁆𑀧𑀭𑁂𑀢𑁂𑀢𑀺 𑀖𑀫𑁆𑀫𑁂𑀦 𑀲𑀫𑁆𑀧𑀭𑁂𑀢𑁂 𑀅𑀢𑀺𑀯𑀺𑀬 𑀨𑀼𑀝𑁆𑀞𑁂 𑀖𑀫𑁆𑀫𑀓𑀺𑀮𑀦𑁆𑀢𑁂. 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯𑀸𑀢𑀺 𑀧𑀘𑁆𑀘𑀽𑀲𑀓𑀸𑀮𑁂 𑀲𑀼𑀧𑀦𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀲𑀼𑀧𑀺𑀦𑀓𑀁 𑀯𑀺𑀬 𑀅𑀦𑀼𑀲𑁆𑀲𑀭𑀸𑀫𑀺. 𑀲𑁄 𑀓𑀺𑀭 𑀩𑀓𑀩𑁆𑀭𑀳𑁆𑀫𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀫𑀭𑀼𑀓𑀦𑁆𑀢𑀸𑀭𑁂 𑀯𑀲𑀦𑁆𑀢𑁄 𑀩𑀳𑀽𑀦𑀁 𑀓𑀦𑁆𑀢𑀸𑀭𑀧𑀝𑀺𑀧𑀦𑁆𑀦𑀸𑀦𑀁 ¶ 𑀧𑀸𑀦𑀻𑀬𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀲𑀢𑁆𑀣𑀯𑀸𑀳𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀫𑀭𑀼𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀺. 𑀫𑀦𑀼𑀲𑁆𑀲𑀸 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀆𑀳𑀺𑀡𑁆𑀟𑀺𑀢𑁆𑀯𑀸 𑀔𑀻𑀡𑀤𑀸𑀭𑀼𑀤𑀓𑀸 𑀦𑀺𑀭𑀸𑀳𑀸𑀭𑀸 𑀉𑀡𑁆𑀳𑀸𑀪𑀺𑀪𑀽𑀢𑀸 ‘‘𑀇𑀤𑀸𑀦𑀺 𑀦𑁄 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺 𑀲𑀓𑀝𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑁄𑀡𑁂 ¶ 𑀫𑁄𑀘𑁂𑀢𑁆𑀯𑀸 𑀳𑁂𑀝𑁆𑀞𑀸𑀲𑀓𑀝𑁂𑀲𑀼 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀤𑀸 𑀢𑀸𑀧𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀫𑀸 𑀦𑀲𑁆𑀲𑀺𑀁𑀲𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀕𑀗𑁆𑀕𑀸𑀲𑁄𑀢𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀸𑀪𑀺𑀫𑀼𑀔𑀁 𑀅𑀓𑀸𑀲𑀺, 𑀅𑀯𑀺𑀤𑀽𑀭𑁂 𑀘 𑀏𑀓𑀁 𑀯𑀦𑀲𑀡𑁆𑀟𑀁 𑀫𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀕𑁄𑀡𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀯𑀦𑀲𑀡𑁆𑀟𑀢𑁄 𑀢𑀺𑀡𑀁 𑀮𑀸𑀬𑀺𑀢𑁆𑀯𑀸 𑀤𑀸𑀭𑀽𑀦𑀺 𑀕𑀳𑁂𑀢𑁆𑀯𑀸 𑀤𑀺𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀭𑁄𑀕𑀸 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀺𑀁𑀲𑀼, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀏𑀡𑀺𑀓𑀽𑀮𑀲𑁆𑀫𑀺𑀦𑁆𑀢𑀺 𑀏𑀡𑀺𑀬𑀸 𑀦𑀸𑀫 𑀦𑀤𑀺𑀬𑀸 𑀓𑀽𑀮𑁂. 𑀕𑀬𑁆𑀳𑀓 𑀦𑀻𑀬𑀫𑀸𑀦𑀦𑁆𑀢𑀺 𑀓𑀭𑀫𑀭𑀕𑀸𑀳𑀁 𑀕𑀳𑁂𑀢𑁆𑀯𑀸 𑀦𑀻𑀬𑀫𑀸𑀦𑀁. 𑀲𑁄 𑀓𑀺𑀭 𑀢𑀸𑀧𑀲𑁄 𑀅𑀧𑀭𑀲𑁆𑀫𑀺𑀁 𑀓𑀸𑀮𑁂 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑀺𑀲𑁆𑀲𑀸𑀬 𑀦𑀤𑀻𑀢𑀻𑀭𑁂 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺. 𑀅𑀣𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀧𑀩𑁆𑀩𑀢𑀢𑁄 𑀘𑁄𑀭𑀸 𑀑𑀢𑀭𑀺𑀢𑁆𑀯𑀸 𑀢𑀁 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀚𑀦𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀢𑀁 𑀆𑀭𑁄𑀧𑁂𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑀸𑀭𑀓𑀫𑀦𑀼𑀲𑁆𑀲𑁂 𑀞𑀧𑁂𑀢𑁆𑀯𑀸 𑀧𑀩𑁆𑀩𑀢𑀩𑀺𑀮𑀁 𑀧𑀯𑀺𑀲𑀺𑀢𑁆𑀯𑀸 𑀆𑀳𑀸𑀭𑀁 𑀧𑀘𑀸𑀧𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀸𑀧𑀲𑁄 𑀕𑁄𑀫𑀳𑀺𑀁𑀲𑀸𑀤𑀻𑀦𑀜𑁆𑀘𑁂𑀯 𑀤𑀸𑀭𑀓𑀤𑀸𑀭𑀺𑀓𑀸𑀤𑀻𑀦𑀜𑁆𑀘 𑀫𑀳𑀦𑁆𑀢𑀁 𑀅𑀝𑁆𑀝𑀲𑁆𑀲𑀭𑀁 𑀲𑀼𑀢𑁆𑀯𑀸 ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀫𑀸 𑀦𑀲𑁆𑀲𑀺𑀁𑀲𑀽’’𑀢𑀺 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀪𑀸𑀯𑀁 𑀚𑀳𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀭𑀸𑀚𑀸 𑀳𑀼𑀢𑁆𑀯𑀸 𑀬𑀼𑀤𑁆𑀥𑀪𑁂𑀭𑀺𑀁 𑀆𑀓𑁄𑀝𑀸𑀧𑁂𑀦𑁆𑀢𑁄 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀘𑀸𑀭𑀓𑀫𑀦𑀼𑀲𑁆𑀲𑀸 ¶ 𑀢𑀁 𑀤𑀺𑀲𑁆𑀯𑀸 𑀘𑁄𑀭𑀸𑀦𑀁 𑀆𑀭𑁄𑀘𑁂𑀲𑀼𑀁. 𑀘𑁄𑀭𑀸 ‘‘𑀭𑀜𑁆𑀜𑀸 𑀲𑀤𑁆𑀥𑀺𑀁 𑀯𑀺𑀕𑁆𑀕𑀳𑁄 𑀦𑀸𑀫 𑀦 𑀬𑀼𑀢𑁆𑀢𑁄’’𑀢𑀺 𑀲𑀩𑁆𑀩𑀁 𑀕𑀳𑀺𑀢𑀕𑀳𑀺𑀢𑀁 𑀪𑀡𑁆𑀟𑀓𑀁 𑀙𑀟𑁆𑀟𑁂𑀢𑁆𑀯𑀸 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼. 𑀢𑀸𑀧𑀲𑁄 𑀢𑁂 𑀲𑀩𑁆𑀩𑁂 𑀆𑀦𑁂𑀢𑁆𑀯𑀸 𑀲𑀓𑀕𑀸𑀫𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀕𑀳𑀻𑀢𑀦𑀸𑀯𑀦𑁆𑀢𑀺 𑀦𑀺𑀕𑁆𑀕𑀳𑀺𑀢𑀦𑀸𑀯𑀁. 𑀮𑀼𑀤𑁆𑀤𑁂𑀦𑀸𑀢𑀺 𑀓𑀓𑁆𑀔𑀴𑁂𑀦. 𑀫𑀦𑀼𑀲𑁆𑀲𑀓𑀧𑁆𑀧𑀸𑀢𑀺 𑀫𑀦𑀼𑀲𑁆𑀲𑁂 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬. 𑀩𑀮𑀲𑀸𑀢𑀺 𑀩𑀮𑁂𑀦. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀅𑀧𑀭𑀲𑁆𑀫𑀺𑀁 𑀓𑀸𑀮𑁂 𑀲𑁄 𑀢𑀸𑀧𑀲𑁄 𑀕𑀗𑁆𑀕𑀸𑀢𑀻𑀭𑁂 𑀯𑀺𑀳𑀸𑀲𑀺. 𑀢𑀤𑀸 𑀫𑀦𑀼𑀲𑁆𑀲𑀸 𑀤𑁆𑀯𑁂 𑀢𑀬𑁄 𑀦𑀸𑀯𑀸𑀲𑀗𑁆𑀖𑀸𑀝𑁂 𑀩𑀦𑁆𑀥𑀺𑀢𑁆𑀯𑀸 𑀲𑀗𑁆𑀖𑀸𑀝𑀫𑀢𑁆𑀣𑀓𑁂 𑀧𑀼𑀧𑁆𑀨𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀗𑁆𑀖𑀸𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀦𑁆𑀢𑀸 𑀧𑀺𑀯𑀦𑁆𑀢𑀸 𑀲𑀫𑁆𑀩𑀦𑁆𑀥𑀓𑀼𑀮𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀧𑀻𑀢𑀸𑀯𑀲𑁂𑀲𑀁 𑀲𑀼𑀭𑀁 𑀪𑀼𑀢𑁆𑀢𑀔𑀸𑀤𑀺𑀢𑀸𑀯𑀲𑁂𑀲𑀸𑀦𑀺 𑀪𑀢𑁆𑀢𑀫𑀘𑁆𑀙𑀫𑀁𑀲𑀢𑀫𑁆𑀩𑀼𑀮𑀸𑀤𑀻𑀦𑀺 𑀕𑀗𑁆𑀕𑀸𑀬𑀫𑁂𑀯 𑀧𑀸𑀢𑁂𑀦𑁆𑀢𑀺. 𑀕𑀗𑁆𑀕𑁂𑀬𑁆𑀬𑁄 𑀦𑀸𑀕𑀭𑀸𑀚𑀸 ‘‘𑀇𑀫𑁂 𑀉𑀘𑁆𑀙𑀺𑀝𑁆𑀞𑀓𑀁 𑀫𑀫 𑀉𑀧𑀭𑀺 𑀔𑀺𑀧𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀲𑀩𑁆𑀩𑁂 𑀢𑁂 𑀚𑀦𑁂 𑀕𑀳𑁂𑀢𑁆𑀯𑀸 𑀕𑀗𑁆𑀕𑀸𑀬 𑀑𑀲𑀻𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀁 𑀏𑀓𑀤𑁄𑀡𑀺𑀓𑀦𑀸𑀯𑀧𑁆𑀧𑀫𑀸𑀡𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀉𑀤𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 ¶ 𑀨𑀡𑀁 𑀥𑀸𑀭𑀬𑀫𑀸𑀦𑁄 𑀢𑁂𑀲𑀁 𑀅𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑁂 𑀦𑀸𑀕𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀲𑀤𑁆𑀤𑀁 𑀓𑀭𑀺𑀁𑀲𑀼. 𑀢𑀸𑀧𑀲𑁄 𑀢𑁂𑀲𑀁 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀸𑀕𑀭𑀸𑀚𑀲𑁆𑀲 𑀘 𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀫𑀸 𑀦𑀲𑁆𑀲𑀺𑀁𑀲𑀽’’𑀢𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀬𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀔𑀺𑀧𑁆𑀧𑀁 𑀲𑀼𑀧𑀡𑁆𑀡𑀯𑀡𑁆𑀡𑀁 𑀅𑀢𑁆𑀢𑀸𑀦𑀁 𑀫𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺 ¶ . 𑀦𑀸𑀕𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺. 𑀫𑀦𑀼𑀲𑁆𑀲𑀸 𑀲𑁄𑀢𑁆𑀣𑀺𑀪𑀸𑀯𑀁 𑀧𑀢𑁆𑀯𑀸 𑀅𑀕𑀫𑀁𑀲𑀼, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀩𑀤𑁆𑀥𑀘𑀭𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄. 𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 𑀯𑀢𑀺𑀦𑀁 𑀅𑀫𑀜𑁆𑀜𑀦𑁆𑀢𑀺 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀘𑁂𑀯 𑀯𑀢𑀲𑀫𑁆𑀧𑀦𑁆𑀦𑁄 𑀘 𑀢𑀸𑀧𑀲𑁄𑀢𑀺 𑀢𑀁 𑀫𑀜𑁆𑀜𑀫𑀸𑀦𑁄. 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀫𑀳𑀸𑀩𑁆𑀭𑀳𑁆𑀫𑁂 𑀅𑀳𑀁 𑀅𑀢𑀻𑀢𑁂 𑀢𑀯 𑀓𑁂𑀲𑀯𑀢𑀸𑀧𑀲𑀓𑀸𑀮𑁂 𑀓𑀧𑁆𑀧𑁄 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀳𑀼𑀢𑁆𑀯𑀸 𑀢𑀼𑀬𑁆𑀳𑀁 𑀦𑀸𑀭𑀤𑁂𑀦 𑀦𑀸𑀫 𑀅𑀫𑀘𑁆𑀘𑁂𑀦 𑀩𑀸𑀭𑀸𑀡𑀲𑀺𑀢𑁄 𑀳𑀺𑀫𑀯𑀦𑁆𑀢𑀁 𑀆𑀦𑀻𑀢𑀲𑁆𑀲 𑀭𑁄𑀕𑀁 𑀯𑀽𑀧𑀲𑀫𑁂𑀲𑀺𑀁. 𑀅𑀣 𑀦𑀁 𑀦𑀸𑀭𑀤𑁄 𑀤𑀼𑀢𑀺𑀬𑀯𑀸𑀭𑁂 𑀆𑀕𑀦𑁆𑀢𑁆𑀯𑀸 𑀦𑀺𑀭𑁄𑀕𑀁 𑀤𑀺𑀲𑁆𑀯𑀸 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀦𑀼𑀲𑁆𑀲𑀺𑀦𑁆𑀤𑀁 𑀚𑀳𑀺𑀢𑁆𑀯𑀸𑀦, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀓𑀣𑀁 𑀦𑀼 𑀪𑀕𑀯𑀸 𑀓𑁂𑀲𑀺, 𑀓𑀧𑁆𑀧𑀲𑁆𑀲 𑀭𑀫𑀢𑀺 𑀅𑀲𑁆𑀲𑀫𑁂’’𑀢𑀺. (𑀚𑀸. 𑁧.𑁪.𑁧𑁮𑁧);

𑀢𑀫𑁂𑀦𑀁 𑀢𑁆𑀯𑀁 𑀏𑀢𑀤𑀯𑁄𑀘 𑁋

‘‘𑀲𑀸𑀤𑀽𑀦𑀺 𑀭𑀫𑀡𑀻𑀬𑀸𑀦𑀺, 𑀲𑀦𑁆𑀢𑀺 𑀯𑀓𑁆𑀔𑀸 𑀫𑀦𑁄𑀭𑀫𑀸;

𑀲𑀼𑀪𑀸𑀲𑀺𑀢𑀸𑀦𑀺 𑀓𑀧𑁆𑀧𑀲𑁆𑀲, 𑀦𑀸𑀭𑀤 𑀭𑀫𑀬𑀦𑁆𑀢𑀺 𑀫’’𑀦𑁆𑀢𑀺. (𑀚𑀸. 𑁧.𑁪.𑁧𑁮𑁨);

𑀇𑀢𑀺𑀲𑁆𑀲 𑀪𑀕𑀯𑀸 𑀇𑀫𑀁 𑀅𑀢𑁆𑀢𑀦𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀳𑀼𑀢𑁆𑀯𑀸 𑀭𑁄𑀕𑀲𑁆𑀲 𑀯𑀽𑀧𑀲𑀫𑀺𑀢𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀜𑁆𑀘 𑀧𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑀼𑀲𑁆𑀲𑀮𑁄𑀓𑁂 𑀓𑀢𑀓𑀫𑁆𑀫𑀁 𑀲𑀩𑁆𑀩𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀮𑁆𑀮𑀓𑁆𑀔𑀸𑀧𑁂𑀦𑁆𑀢𑁄𑀯 𑀓𑀣𑁂𑀲𑀺.

𑀲𑁄 ¶ 𑀲𑀢𑁆𑀣𑀼 𑀯𑀘𑀦𑁂𑀦 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁭𑁫.

‘‘𑀅𑀤𑁆𑀥𑀸 𑀧𑀚𑀸𑀦𑀸𑀲𑀺 𑀫𑀫𑁂𑀢𑀫𑀸𑀬𑀼𑀁, 𑀅𑀜𑁆𑀜𑀫𑁆𑀧𑀺 𑀚𑀸𑀦𑀸𑀲𑀺 𑀢𑀣𑀸 𑀳𑀺 𑀩𑀼𑀤𑁆𑀥𑁄;

𑀢𑀣𑀸 𑀳𑀺 𑀢𑀸𑀬𑀁 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺.

𑀢𑀢𑁆𑀣 ¶ 𑀢𑀣𑀸 𑀳𑀺 𑀩𑀼𑀤𑁆𑀥𑁄𑀢𑀺 𑀢𑀣𑀸 𑀳𑀺 𑀢𑁆𑀯𑀁 𑀩𑀼𑀤𑁆𑀥𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀜𑁆𑀜𑀸𑀢𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸𑀬𑁂𑀯 𑀳𑀺 𑀢𑁂 𑀩𑀼𑀤𑁆𑀥𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀢𑀸𑀬𑀦𑁆𑀢𑀺 𑀩𑀼𑀤𑁆𑀥𑀢𑁆𑀢𑀸𑀬𑁂𑀯 𑀘 𑀧𑀦 𑀢𑀯 𑀅𑀬𑀁 𑀚𑀮𑀺𑀢𑁄 𑀲𑀭𑀻𑀭𑀧𑁆𑀧𑀪𑀸𑀦𑀼𑀪𑀸𑀯𑁄. 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀻𑀢𑀺 𑀇𑀫𑀁 𑀲𑀓𑀮𑀫𑁆𑀧𑀺 𑀩𑁆𑀭𑀳𑁆𑀫𑀮𑁄𑀓𑀁 𑀑𑀪𑀸𑀲𑁂𑀦𑁆𑀢𑁄 𑀢𑀺𑀝𑁆𑀞𑀢𑀺.

𑀏𑀯𑀁 ¶ 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀕𑀼𑀡𑀁 𑀚𑀸𑀦𑀸𑀧𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀫𑁆𑀧𑀢𑁆𑀢𑀸𑀦𑀁 𑀤𑀲𑀫𑀢𑁆𑀢𑀸𑀦𑀁 𑀩𑁆𑀭𑀳𑁆𑀫𑀲𑀳𑀲𑁆𑀲𑀸𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀇𑀢𑀺 𑀪𑀕𑀯𑀸 𑀩𑀳𑀽𑀦𑀁 𑀩𑁆𑀭𑀳𑁆𑀫𑀸𑀦𑀁 𑀅𑀯𑀲𑁆𑀲𑀬𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀸 𑀚𑁂𑀢𑀯𑀦𑀁 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑁂𑀲𑀯𑀢𑀸𑀧𑀲𑁄 𑀩𑀓𑀩𑁆𑀭𑀳𑁆𑀫𑀸 𑀅𑀳𑁄𑀲𑀺, 𑀓𑀧𑁆𑀧𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀓𑀼𑀓𑁆𑀓𑀼𑀯𑀕𑁆𑀕𑁄 𑀧𑀞𑀫𑁄.

𑁨. 𑀕𑀦𑁆𑀥𑀸𑀭𑀯𑀕𑁆𑀕𑁄

[𑁪𑁦𑁬] 𑁧. 𑀕𑀦𑁆𑀥𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀳𑀺𑀢𑁆𑀯𑀸 ¶ 𑀕𑀸𑀫𑀲𑀳𑀲𑁆𑀲𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀪𑁂𑀲𑀚𑁆𑀚𑀲𑀦𑁆𑀦𑀺𑀥𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁. 𑀆𑀬𑀲𑁆𑀫𑀢𑀸 𑀳𑀺 𑀧𑀺𑀮𑀺𑀦𑁆𑀤𑀯𑀘𑁆𑀙𑁂𑀦 𑀆𑀭𑀸𑀫𑀺𑀓𑀓𑀼𑀮𑀁 𑀫𑁄𑀘𑁂𑀢𑀼𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀸𑀲𑀸𑀤𑁂 𑀇𑀤𑁆𑀥𑀺𑀩𑀮𑁂𑀦 𑀲𑁄𑀯𑀡𑁆𑀡𑀫𑀬𑁂 𑀓𑀢𑁂 𑀫𑀦𑀼𑀲𑁆𑀲𑀸 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀧𑀳𑀺𑀡𑀺𑀁𑀲𑀼. 𑀲𑁄 𑀢𑀸𑀦𑀺 𑀧𑀭𑀺𑀲𑀸𑀬 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀭𑀺𑀲𑀸 𑀧𑀦𑀲𑁆𑀲 𑀩𑀸𑀳𑀼𑀮𑁆𑀮𑀺𑀓𑀸 𑀅𑀳𑁄𑀲𑀺, 𑀮𑀤𑁆𑀥𑀁 ¶ 𑀮𑀤𑁆𑀥𑀁 𑀓𑁄𑀴𑀫𑁆𑀩𑁂𑀧𑀺 𑀖𑀝𑁂𑀧𑀺 𑀧𑀢𑁆𑀢𑀢𑁆𑀣𑀯𑀺𑀓𑀸𑀬𑁄𑀧𑀺 𑀧𑀽𑀭𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀲𑀺. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀫𑀳𑀺𑀘𑁆𑀙𑀸 𑀇𑀫𑁂 𑀲𑀫𑀡𑀸 𑀅𑀦𑁆𑀢𑁄𑀓𑁄𑀝𑁆𑀞𑀸𑀕𑀸𑀭𑀺𑀓𑀸’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺 (𑀧𑀸𑀭𑀸. 𑁬𑁨𑁨-𑁬𑁨𑁩) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀲𑀻𑀮𑀫𑀢𑁆𑀢𑀓𑀁 𑀭𑀓𑁆𑀔𑀦𑁆𑀢𑀸𑀧𑀺 𑀮𑁄𑀡𑀲𑀓𑁆𑀔𑀭𑀫𑀢𑁆𑀢𑀓𑀁 𑀧𑀼𑀦𑀤𑀺𑀯𑀲𑀢𑁆𑀣𑀸𑀬 𑀦𑀺𑀤𑀳𑀦𑁆𑀢𑁂 ¶ 𑀕𑀭𑀳𑀺𑀁𑀲𑀼, 𑀢𑀼𑀫𑁆𑀳𑁂 𑀧𑀦 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀤𑀺𑀯𑀲𑀢𑁆𑀣𑀸𑀬 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀸 𑀅𑀬𑀼𑀢𑁆𑀢𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀕𑀦𑁆𑀥𑀸𑀭𑀭𑀝𑁆𑀞𑁂 𑀩𑁄𑀥𑀺𑀲𑀢𑁆𑀢𑁄 𑀕𑀦𑁆𑀥𑀸𑀭𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀫𑀚𑁆𑀛𑀺𑀫𑀧𑀤𑁂𑀲𑁂𑀧𑀺 𑀯𑀺𑀤𑁂𑀳𑀭𑀝𑁆𑀞𑁂 𑀯𑀺𑀤𑁂𑀳𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑁂 𑀤𑁆𑀯𑁂𑀧𑀺 𑀭𑀸𑀚𑀸𑀦𑁄 𑀅𑀤𑀺𑀝𑁆𑀞𑀲𑀳𑀸𑀬𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀣𑀺𑀭𑀯𑀺𑀲𑁆𑀲𑀸𑀲𑀸 𑀅𑀳𑁂𑀲𑀼𑀁. 𑀢𑀤𑀸 𑀫𑀦𑀼𑀲𑁆𑀲𑀸 𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀺, 𑀢𑀺𑀁𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀚𑀻𑀯𑀦𑁆𑀢𑀺. 𑀅𑀣𑁂𑀓𑀤𑀸 𑀕𑀦𑁆𑀥𑀸𑀭𑀭𑀸𑀚𑀸 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀫𑀳𑀸𑀢𑀮𑁂 𑀧𑀜𑁆𑀜𑀢𑁆𑀢𑀯𑀭𑀧𑀮𑁆𑀮𑀗𑁆𑀓𑀫𑀚𑁆𑀛𑀕𑀢𑁄 𑀯𑀺𑀯𑀝𑁂𑀦 𑀲𑀻𑀳𑀧𑀜𑁆𑀚𑀭𑁂𑀦 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀅𑀫𑀘𑁆𑀘𑀸𑀦𑀁 𑀥𑀫𑁆𑀫𑀢𑁆𑀣𑀬𑀼𑀢𑁆𑀢𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀕𑀦𑀢𑀮𑀁 𑀅𑀢𑀺𑀮𑀗𑁆𑀖𑀦𑁆𑀢𑀫𑀺𑀯 𑀧𑀭𑀺𑀧𑀼𑀡𑁆𑀡𑀁 𑀘𑀦𑁆𑀤𑀫𑀡𑁆𑀟𑀮𑀁 𑀭𑀸𑀳𑀼 𑀅𑀯𑀢𑁆𑀣𑀭𑀺, 𑀘𑀦𑁆𑀤𑀧𑁆𑀧𑀪𑀸 𑀅𑀦𑁆𑀢𑀭𑀥𑀸𑀬𑀺. 𑀅𑀫𑀘𑁆𑀘𑀸 𑀘𑀦𑁆𑀤𑀸𑀮𑁄𑀓𑀁 𑀅𑀧𑀲𑁆𑀲𑀦𑁆𑀢𑀸 𑀘𑀦𑁆𑀤𑀲𑁆𑀲 𑀭𑀸𑀳𑀼𑀦𑀸 𑀕𑀳𑀺𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀘𑀦𑁆𑀤𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀘𑀦𑁆𑀤𑁄 𑀆𑀕𑀦𑁆𑀢𑀼𑀓𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀦𑀺𑀧𑁆𑀧𑀪𑁄 𑀚𑀸𑀢𑁄, 𑀫𑀬𑁆𑀳𑀫𑁆𑀧𑁂𑀲 𑀭𑀸𑀚𑀧𑀭𑀺𑀯𑀸𑀭𑁄 𑀉𑀧𑀓𑁆𑀓𑀺𑀮𑁂𑀲𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀸𑀳𑀁 𑀭𑀸𑀳𑀼𑀦𑀸 𑀕𑀳𑀺𑀢𑀘𑀦𑁆𑀤𑁄 𑀯𑀺𑀬 𑀦𑀺𑀧𑁆𑀧𑀪𑁄 𑀪𑀯𑁂𑀬𑁆𑀬𑀁, 𑀯𑀺𑀲𑀼𑀤𑁆𑀥𑁂 𑀕𑀕𑀦𑀢𑀭𑁂 𑀯𑀺𑀭𑁄𑀘𑀦𑁆𑀢𑀁 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑀺𑀁 𑀫𑁂 𑀧𑀭𑁂𑀦 𑀑𑀯𑀤𑀺𑀢𑁂𑀦 ¶ , 𑀓𑀼𑀮𑁂 𑀘 𑀕𑀡𑁂 𑀘 𑀅𑀮𑀕𑁆𑀕𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀑𑀯𑀤𑀦𑁆𑀢𑁄 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀇𑀤𑀁 𑀫𑁂 𑀧𑀢𑀺𑀭𑀽𑀧’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀬𑀁 𑀇𑀘𑁆𑀙𑀣, 𑀢𑀁 ¶ 𑀭𑀸𑀚𑀸𑀦𑀁 𑀓𑀭𑁄𑀣𑀸’’𑀢𑀺 𑀭𑀚𑁆𑀚𑀁 𑀅𑀫𑀘𑁆𑀘𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀯𑀺𑀤𑁂𑀳𑀭𑀸𑀚𑀸𑀧𑀺 ‘‘𑀲𑀼𑀔𑀁 𑀫𑁂 𑀲𑀳𑀸𑀬𑀲𑁆𑀲𑀸’’𑀢𑀺 𑀯𑀸𑀡𑀺𑀚𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀫𑀫 𑀲𑀳𑀸𑀬𑁂 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀭𑀚𑁆𑀚𑁂𑀦 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀬𑁄𑀚𑀦𑀺𑀓𑁂 𑀫𑀺𑀣𑀺𑀮𑀦𑀕𑀭𑁂 𑀢𑀺𑀬𑁄𑀚𑀦𑀲𑀢𑀺𑀓𑁂 𑀯𑀺𑀤𑁂𑀳𑀭𑀝𑁆𑀞𑁂 𑀲𑁄𑀴𑀲𑀲𑀼 𑀕𑀸𑀫𑀲𑀳𑀲𑁆𑀲𑁂𑀲𑀼 𑀧𑀽𑀭𑀺𑀢𑀸𑀦𑀺 𑀓𑁄𑀝𑁆𑀞𑀸𑀕𑀸𑀭𑀸𑀦𑀺, 𑀲𑁄𑀴𑀲𑀲𑀳𑀲𑁆𑀲𑀸 𑀘 𑀦𑀸𑀝𑀓𑀺𑀢𑁆𑀣𑀺𑀬𑁄 𑀙𑀟𑁆𑀟𑁂𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀭𑁄 𑀅𑀫𑀦𑀲𑀺𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀳𑀼𑀢𑁆𑀯𑀸 𑀲𑀫𑀧𑁆𑀧𑀯𑀢𑁆𑀢𑀯𑀸𑀲𑀁 𑀯𑀲𑀦𑁆𑀢𑁄 𑀯𑀺𑀘𑀭𑀺. 𑀢𑁂 𑀉𑀪𑁄𑀧𑀺 𑀲𑀫𑀯𑀢𑁆𑀢𑀘𑀸𑀭𑀁 𑀘𑀭𑀦𑁆𑀢𑀸 𑀅𑀧𑀭𑀪𑀸𑀕𑁂 𑀲𑀫𑀸𑀕𑀘𑁆𑀙𑀺𑀁𑀲𑀼, 𑀦 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀺𑀁𑀲𑀼, 𑀲𑀫𑁆𑀫𑁄𑀤𑀫𑀸𑀦𑀸 𑀏𑀓𑀢𑁄𑀯 𑀲𑀫𑀧𑁆𑀧𑀯𑀢𑁆𑀢𑀯𑀸𑀲𑀁 𑀯𑀲𑀺𑀁𑀲𑀼. 𑀢𑀤𑀸 𑀯𑀺𑀤𑁂𑀳𑀢𑀸𑀧𑀲𑁄 𑀕𑀦𑁆𑀥𑀸𑀭𑀢𑀸𑀧𑀲𑀲𑁆𑀲 𑀉𑀧𑀝𑁆𑀞𑀸𑀦𑀁 𑀓𑀭𑁄𑀢𑀺. 𑀢𑁂𑀲𑀁 ¶ 𑀏𑀓𑀲𑁆𑀫𑀺𑀁 𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀢𑁆𑀣𑀬𑀼𑀢𑁆𑀢𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀕𑀕𑀦𑀢𑀮𑁂 𑀯𑀺𑀭𑁄𑀘𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀭𑀸𑀳𑀼 𑀅𑀯𑀢𑁆𑀣𑀭𑀺. 𑀯𑀺𑀤𑁂𑀳𑀢𑀸𑀧𑀲𑁄 ‘‘𑀓𑀺𑀁 𑀦𑀼 𑀔𑁄 𑀘𑀦𑁆𑀤𑀲𑁆𑀲 𑀧𑀪𑀸 𑀦𑀝𑁆𑀞𑀸’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀭𑀸𑀳𑀼𑀦𑀸 𑀕𑀳𑀺𑀢𑀁 𑀘𑀦𑁆𑀤𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀼 𑀔𑁄 𑀏𑀲 𑀆𑀘𑀭𑀺𑀬, 𑀘𑀦𑁆𑀤𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑁆𑀧𑀪𑀫𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀅𑀦𑁆𑀢𑁂𑀯𑀸𑀲𑀺𑀓 𑀅𑀬𑀁 𑀭𑀸𑀳𑀼 𑀦𑀸𑀫 𑀘𑀦𑁆𑀤𑀲𑁆𑀲𑁂𑀓𑁄 𑀉𑀧𑀓𑁆𑀓𑀺𑀮𑁂𑀲𑁄, 𑀯𑀺𑀭𑁄𑀘𑀺𑀢𑀼𑀁 𑀦 𑀤𑁂𑀢𑀺, 𑀅𑀳𑀫𑁆𑀧𑀺 𑀭𑀸𑀳𑀼𑀕𑀳𑀺𑀢𑀁 𑀘𑀦𑁆𑀤𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀧𑀭𑀺𑀲𑀼𑀤𑁆𑀥𑀲𑁆𑀲 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀆𑀕𑀦𑁆𑀢𑀼𑀓𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀦𑀺𑀧𑁆𑀧𑀪𑀁 𑀚𑀸𑀢𑀁, 𑀫𑀬𑁆𑀳𑀫𑁆𑀧𑀺 𑀇𑀤𑀁 𑀭𑀚𑁆𑀚𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑀸𑀯 𑀘𑀦𑁆𑀤𑀫𑀡𑁆𑀟𑀮𑀁 𑀭𑀸𑀳𑀼 𑀯𑀺𑀬 𑀇𑀤𑀁 𑀦𑀺𑀧𑁆𑀧𑀪𑀁 𑀦 𑀓𑀭𑁄𑀢𑀺, 𑀢𑀸𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀤𑁂𑀯 𑀭𑀸𑀳𑀼𑀕𑀳𑀺𑀢𑀁 𑀘𑀦𑁆𑀤𑀫𑀡𑁆𑀟𑀮𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀳𑀸𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀢𑀺. ‘‘𑀆𑀘𑀭𑀺𑀬, 𑀢𑁆𑀯𑀁 𑀕𑀦𑁆𑀥𑀸𑀭𑀭𑀸𑀚𑀸’’𑀢𑀺 ¶ ? ‘‘𑀆𑀫, 𑀅𑀳’’𑀦𑁆𑀢𑀺. ‘‘𑀆𑀘𑀭𑀺𑀬, 𑀅𑀳𑀫𑁆𑀧𑀺 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀦𑀕𑀭𑁂 𑀯𑀺𑀤𑁂𑀳𑀭𑀸𑀚𑀸 𑀦𑀸𑀫, 𑀦𑀦𑀼 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀅𑀤𑀺𑀝𑁆𑀞𑀲𑀳𑀸𑀬𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀆𑀭𑀫𑁆𑀫𑀡𑀁 𑀅𑀳𑁄𑀲𑀻’’𑀢𑀺? 𑀅𑀳𑀁 ‘‘𑀢𑀼𑀫𑁆𑀳𑁂 𑀧𑀩𑁆𑀩𑀚𑀺𑀢𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀤𑁆𑀥𑀸 𑀧𑀩𑁆𑀩𑀚𑁆𑀚𑀸𑀬 𑀫𑀳𑀦𑁆𑀢𑀁 𑀕𑀼𑀡𑀁 𑀅𑀤𑁆𑀤𑀲𑀸’’𑀢𑀺 𑀢𑀼𑀫𑁆𑀳𑁂𑀬𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄𑀢𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀅𑀢𑀺𑀯𑀺𑀬 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑀸 𑀳𑀼𑀢𑁆𑀯𑀸 𑀯𑀺𑀳𑀭𑀺𑀁𑀲𑀼. 𑀢𑀢𑁆𑀣 𑀤𑀻𑀖𑀭𑀢𑁆𑀢𑀁 𑀯𑀲𑀺𑀢𑁆𑀯𑀸 𑀘 𑀧𑀦 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀢𑁄 𑀑𑀢𑀭𑀺𑀢𑁆𑀯𑀸 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼.

𑀫𑀦𑀼𑀲𑁆𑀲𑀸 𑀢𑁂𑀲𑀁 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀭𑀢𑁆𑀢𑀺𑀤𑀺𑀯𑀝𑁆𑀞𑀸𑀦𑀸𑀤𑀻𑀦𑀺 𑀫𑀸𑀧𑁂𑀢𑁆𑀯𑀸 𑀯𑀲𑀸𑀧𑁂𑀲𑀼𑀁. 𑀅𑀦𑁆𑀢𑀭𑀸𑀫𑀕𑁆𑀕𑁂𑀧𑀺 𑀦𑁂𑀲𑀁 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀢𑁆𑀣𑀸𑀬 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀲𑀼𑀁. 𑀢𑁂 𑀧𑀘𑁆𑀘𑀦𑁆𑀢𑀕𑀸𑀫𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀢𑀸𑀬 𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀧𑀺 𑀫𑀦𑀼𑀲𑁆𑀲𑀸 𑀢𑁂𑀲𑀁 𑀆𑀳𑀸𑀭𑀁 𑀤𑀤𑀫𑀸𑀦𑀸 𑀏𑀓𑀤𑀸 𑀮𑁄𑀡𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀏𑀓𑀤𑀸 𑀧𑀡𑁆𑀡𑀧𑀼𑀝𑁂 𑀩𑀦𑁆𑀥𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀏𑀓𑀤𑀸 𑀅𑀮𑁄𑀡𑀓𑀸𑀳𑀸𑀭𑀫𑁂𑀯 𑀤𑁂𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀧𑀡𑁆𑀡𑀧𑀼𑀝𑁂 𑀩𑀳𑀼𑀢𑀭𑀁 𑀮𑁄𑀡𑀁 𑀅𑀤𑀁𑀲𑀼. 𑀯𑀺𑀤𑁂𑀳𑀢𑀸𑀧𑀲𑁄 𑀮𑁄𑀡𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀓𑀸𑀮𑁂 𑀧𑀳𑁄𑀦𑀓𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀧𑀫𑀸𑀡𑀬𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑀺𑀭𑁂𑀓𑀁 𑀧𑀡𑁆𑀡𑀧𑀼𑀝𑁂 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀮𑁄𑀡𑀓𑀤𑀺𑀯𑀲𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀺𑀡𑀯𑀝𑁆𑀝𑀺𑀓𑀅𑀦𑁆𑀢𑀭𑁂 𑀞𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀅𑀮𑁄𑀡𑀓𑁂 𑀆𑀳𑀸𑀭𑁂 𑀮𑀤𑁆𑀥𑁂 𑀯𑀺𑀤𑁂𑀳𑁄 𑀕𑀦𑁆𑀥𑀸𑀭𑀲𑁆𑀲 𑀪𑀺𑀓𑁆𑀔𑀸𑀪𑀸𑀚𑀦𑀁 𑀤𑀢𑁆𑀯𑀸 𑀢𑀺𑀡𑀯𑀝𑁆𑀝𑀺𑀓𑀅𑀦𑁆𑀢𑀭𑀢𑁄 𑀮𑁄𑀡𑀁 𑀆𑀳𑀭𑀺𑀢𑁆𑀯𑀸 ‘‘𑀆𑀘𑀭𑀺𑀬, 𑀮𑁄𑀡𑀁 𑀕𑀡𑁆𑀳𑀣𑀸’’𑀢𑀺 𑀆𑀳. ‘‘𑀅𑀚𑁆𑀚 𑀫𑀦𑀼𑀲𑁆𑀲𑁂𑀳𑀺 ¶ 𑀮𑁄𑀡𑀁 𑀦 𑀤𑀺𑀦𑁆𑀦𑀁, 𑀢𑁆𑀯𑀁 𑀓𑀼𑀢𑁄 𑀮𑀪𑀲𑀻’’𑀢𑀺? ‘‘𑀆𑀘𑀭𑀺𑀬, 𑀧𑀼𑀭𑀺𑀫𑀤𑀺𑀯𑀲𑁂 𑀫𑀦𑀼𑀲𑁆𑀲𑀸 𑀩𑀳𑀼𑀁 𑀮𑁄𑀡𑀫𑀤𑀁𑀲𑀼, 𑀅𑀣𑀸𑀳𑀁 ‘𑀅𑀮𑁄𑀡𑀓𑀤𑀺𑀯𑀲𑁂 𑀪𑀯𑀺𑀲𑁆𑀲𑀢𑀻’𑀢𑀺 𑀅𑀢𑀺𑀭𑁂𑀓𑀁 𑀮𑁄𑀡𑀁 𑀞𑀧𑁂𑀲𑀺’’𑀦𑁆𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑁄𑀖𑀧𑀼𑀭𑀺𑀲, 𑀢𑀺𑀬𑁄𑀚𑀦𑀲𑀢𑀺𑀓𑀁 𑀯𑀺𑀤𑁂𑀳𑀭𑀝𑁆𑀞𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀧𑀢𑁆𑀯𑀸 𑀇𑀤𑀸𑀦𑀺 𑀮𑁄𑀡𑀲𑀓𑁆𑀔𑀭𑀸𑀬 𑀢𑀡𑁆𑀳𑀁 𑀚𑀦𑁂𑀲𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀑𑀯𑀤𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁬.

‘‘𑀳𑀺𑀢𑁆𑀯𑀸 ¶ 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑁄𑀴𑀲;

𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀨𑀻𑀢𑀸𑀦𑀺, 𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀻’’𑀢𑀺.

𑀢𑀢𑁆𑀣 𑀓𑁄𑀝𑁆𑀞𑀸𑀕𑀸𑀭𑀸𑀦𑀻𑀢𑀺 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀘𑁂𑀯 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀘 𑀥𑀜𑁆𑀜𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀘. 𑀨𑀻𑀢𑀸𑀦𑀻𑀢𑀺 𑀧𑀽𑀭𑀸𑀦𑀺. 𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀻𑀢𑀺 𑀇𑀤𑀸𑀦𑀺 ‘‘𑀲𑁆𑀯𑁂 𑀪𑀯𑀺𑀲𑁆𑀲𑀢𑀺, 𑀢𑀢𑀺𑀬𑀤𑀺𑀯𑀲𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀡𑀫𑀢𑁆𑀢𑀁 𑀲𑀦𑁆𑀦𑀺𑀥𑀺𑀁 𑀓𑀭𑁄𑀲𑀻𑀢𑀺.

𑀯𑀺𑀤𑁂𑀳𑁄 𑀏𑀯𑀁 𑀕𑀭𑀳𑀺𑀬𑀫𑀸𑀦𑁄 𑀕𑀭𑀳𑀁 𑀅𑀲𑀳𑀦𑁆𑀢𑁄 𑀧𑀝𑀺𑀧𑀓𑁆𑀔𑁄 𑀳𑀼𑀢𑁆𑀯𑀸 ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀤𑁄𑀲𑀁 𑀅𑀤𑀺𑀲𑁆𑀯𑀸 𑀫𑀬𑁆𑀳𑀫𑁂𑀯 𑀤𑁄𑀲𑀁 𑀧𑀲𑁆𑀲𑀣, 𑀦𑀦𑀼 𑀢𑀼𑀫𑁆𑀳𑁂 ‘𑀓𑀺𑀁 𑀫𑁂 𑀧𑀭𑁂𑀦 𑀑𑀯𑀤𑀺𑀢𑁂𑀦, 𑀅𑀢𑁆𑀢𑀸𑀦𑀫𑁂𑀯 𑀑𑀯𑀤𑀺𑀲𑁆𑀲𑀸𑀫𑀻’𑀢𑀺 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸, 𑀢𑀼𑀫𑁆𑀳𑁂 𑀇𑀤𑀸𑀦𑀺 𑀫𑀁 𑀓𑀲𑁆𑀫𑀸 𑀑𑀯𑀤𑀣𑀸’’𑀢𑀺 𑀘𑁄𑀤𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁭.

‘‘𑀳𑀺𑀢𑁆𑀯𑀸 𑀕𑀦𑁆𑀥𑀸𑀭𑀯𑀺𑀲𑀬𑀁, 𑀧𑀳𑀽𑀢𑀥𑀦𑀥𑀸𑀭𑀺𑀬𑀁;

𑀧𑀲𑀸𑀲𑀦𑀢𑁄 𑀦𑀺𑀓𑁆𑀔𑀦𑁆𑀢𑁄, 𑀇𑀥 𑀤𑀸𑀦𑀺 𑀧𑀲𑀸𑀲𑀲𑀻’’𑀢𑀺.

𑀢𑀢𑁆𑀣 𑀧𑀲𑀸𑀲𑀦𑀢𑁄𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀤𑀸𑀦𑀢𑁄. 𑀇𑀥 𑀤𑀸𑀦𑀻𑀢𑀺 𑀇𑀤𑀸𑀦𑀺 𑀇𑀥 𑀅𑀭𑀜𑁆𑀜𑁂 𑀓𑀲𑁆𑀫𑀸 𑀫𑀁 𑀑𑀯𑀤𑀣𑀸𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁮.

‘‘𑀥𑀫𑁆𑀫𑀁 𑀪𑀡𑀸𑀫𑀺 𑀯𑁂𑀤𑁂𑀳, 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀺;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺.

𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀲𑀪𑀸𑀯𑀁, 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀁 𑀧𑀲𑀢𑁆𑀣𑀁 𑀓𑀸𑀭𑀡𑀫𑁂𑀯. 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀻𑀢𑀺 𑀅𑀥𑀫𑁆𑀫𑁄 𑀦𑀸𑀫 𑀅𑀲𑀪𑀸𑀯𑁄 𑀫𑀬𑁆𑀳𑀁 𑀓𑀤𑀸𑀘𑀺𑀧𑀺 𑀦 𑀭𑀼𑀘𑁆𑀘𑀢𑀺. 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻𑀢𑀺 𑀫𑀫 𑀲𑀪𑀸𑀯𑀫𑁂𑀯 𑀓𑀸𑀭𑀡𑀫𑁂𑀯 𑀪𑀡𑀦𑁆𑀢𑀲𑁆𑀲 𑀧𑀸𑀧𑀁 𑀦𑀸𑀫 𑀳𑀤𑀬𑁂 ¶ 𑀦 𑀮𑀺𑀫𑁆𑀧𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀑𑀯𑀸𑀤𑀤𑀸𑀦𑀁 𑀦𑀸𑀫𑁂𑀢𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀯𑁂𑀡𑀻. 𑀢𑁂𑀳𑀺 𑀤𑀺𑀦𑁆𑀦𑁄𑀯𑀸𑀤𑀁 𑀩𑀸𑀮𑀸 𑀦 𑀕𑀡𑁆𑀳𑀦𑁆𑀢𑀺, 𑀑𑀯𑀸𑀤𑀤𑀸𑀬𑀓𑀲𑁆𑀲 𑀧𑀦 𑀧𑀸𑀧𑀁 𑀦𑀸𑀫 𑀦𑀢𑁆𑀣𑀺.

‘‘𑀦𑀺𑀥𑀻𑀦𑀁𑀯 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂;

𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

‘‘𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬, 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺, 𑀅𑀲𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑁄’’𑀢𑀺. (𑀥. 𑀧. 𑁭𑁬-𑁭𑁭);

𑀯𑀺𑀤𑁂𑀳𑀢𑀸𑀧𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀆𑀘𑀭𑀺𑀬, 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀓𑀣𑁂𑀦𑁆𑀢𑁂𑀦𑀧𑀺 𑀧𑀭𑀁 𑀖𑀝𑁆𑀝𑁂𑀢𑁆𑀯𑀸 𑀭𑁄𑀲𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 ¶ 𑀯𑀝𑁆𑀝𑀢𑀺, 𑀢𑁆𑀯𑀁 𑀫𑀁 𑀓𑀼𑀡𑁆𑀞𑀲𑀢𑁆𑀣𑀓𑁂𑀦 𑀫𑀼𑀡𑁆𑀟𑁂𑀦𑁆𑀢𑁄 𑀯𑀺𑀬 𑀅𑀢𑀺𑀨𑀭𑀼𑀲𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁭𑁯.

‘‘𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀧𑀭𑁄 𑀮𑀪𑀢𑀺 𑀭𑀼𑀧𑁆𑀧𑀦𑀁;

𑀫𑀳𑀢𑁆𑀣𑀺𑀬𑀫𑁆𑀧𑀺 𑀘𑁂 𑀯𑀸𑀘𑀁, 𑀦 𑀢𑀁 𑀪𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 𑀬𑁂𑀦 𑀓𑁂𑀦𑀘𑀻𑀢𑀺 𑀥𑀫𑁆𑀫𑀬𑀼𑀢𑁆𑀢𑁂𑀦𑀸𑀧𑀺 𑀓𑀸𑀭𑀡𑁂𑀦. 𑀮𑀪𑀢𑀺 𑀭𑀼𑀧𑁆𑀧𑀦𑀦𑁆𑀢𑀺 𑀖𑀝𑁆𑀝𑀦𑀁 𑀤𑀼𑀲𑁆𑀲𑀦𑀁 𑀓𑀼𑀧𑁆𑀧𑀦𑀁 𑀮𑀪𑀢𑀺𑀬𑁂𑀯. 𑀦 𑀢𑀁 𑀪𑀸𑀲𑁂𑀬𑁆𑀬𑀸𑀢𑀺 𑀢𑀲𑁆𑀫𑀸 𑀢𑀁 𑀧𑀭𑀧𑀼𑀕𑁆𑀕𑀮𑀁 𑀬𑀸𑀬 𑀲𑁄 𑀯𑀸𑀘𑀸𑀬 𑀤𑀼𑀲𑁆𑀲𑀢𑀺, 𑀢𑀁 𑀫𑀳𑀢𑁆𑀣𑀺𑀬𑀁 𑀫𑀳𑀦𑁆𑀢𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀫𑁆𑀧𑀺 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀣𑀲𑁆𑀲 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁮𑁦.

‘‘𑀓𑀸𑀫𑀁 ¶ 𑀭𑀼𑀧𑁆𑀧𑀢𑀼 𑀯𑀸 𑀫𑀸 𑀯𑀸, 𑀪𑀼𑀲𑀁𑀯 𑀯𑀺𑀓𑀺𑀭𑀻𑀬𑀢𑀼;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺.

𑀢𑀢𑁆𑀣 𑀓𑀸𑀫𑀦𑁆𑀢𑀺 𑀏𑀓𑀁𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀼𑀢𑁆𑀢𑀓𑀸𑀭𑀓𑁄 𑀧𑀼𑀕𑁆𑀕𑀮𑁄 ‘‘𑀅𑀬𑀼𑀢𑁆𑀢𑀁 𑀢𑁂 𑀓𑀢’’𑀦𑁆𑀢𑀺 𑀑𑀯𑀤𑀺𑀬𑀫𑀸𑀦𑁄 𑀏𑀓𑀁𑀲𑁂𑀦𑁂𑀯 𑀓𑀼𑀚𑁆𑀛𑀢𑀼 𑀯𑀸 𑀫𑀸 𑀯𑀸 𑀓𑀼𑀚𑁆𑀛𑀢𑀼, 𑀅𑀣 𑀯𑀸 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀓𑀺𑀭𑀻𑀬𑀢𑀼, 𑀫𑀬𑁆𑀳𑀁 𑀧𑀦 𑀥𑀫𑁆𑀫𑀁 𑀪𑀡𑀦𑁆𑀢𑀲𑁆𑀲 𑀧𑀸𑀧𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀦 𑀯𑁄 𑀅𑀳𑀁, 𑀆𑀦𑀦𑁆𑀤, 𑀢𑀣𑀸 𑀧𑀭𑀓𑁆𑀓𑀫𑀺𑀲𑁆𑀲𑀸𑀫𑀺, 𑀬𑀣𑀸 𑀓𑀼𑀫𑁆𑀪𑀓𑀸𑀭𑁄 𑀆𑀫𑀓𑁂 𑀆𑀫𑀓𑀫𑀢𑁆𑀢𑁂. 𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀳𑀁 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀬𑁄 ¶ 𑀲𑀸𑀭𑁄 𑀲𑁄 𑀞𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁩.𑁧𑁯𑁬) 𑀇𑀫𑀲𑁆𑀲 𑀲𑀼𑀕𑀢𑁄𑀯𑀸𑀤𑀲𑁆𑀲 𑀅𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀞𑀢𑁆𑀯𑀸 ‘‘𑀬𑀣𑀸 𑀓𑀼𑀫𑁆𑀪𑀓𑀸𑀭𑁄 𑀪𑀸𑀚𑀦𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀆𑀓𑁄𑀝𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀆𑀫𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀧𑀓𑁆𑀓𑀫𑁂𑀯 𑀪𑀸𑀚𑀦𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀑𑀯𑀤𑀺𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀓𑁆𑀓𑀪𑀸𑀚𑀦𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀢𑀁 𑀑𑀯𑀤𑀦𑁆𑀢𑁄 𑁋

𑁮𑁧.

‘‘𑀦𑁄 𑀘𑁂 𑀅𑀲𑁆𑀲 𑀲𑀓𑀸 𑀩𑀼𑀤𑁆𑀥𑀺, 𑀯𑀺𑀦𑀬𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄;

𑀯𑀦𑁂 𑀅𑀦𑁆𑀥𑀫𑀳𑀺𑀁𑀲𑁄𑀯, 𑀘𑀭𑁂𑀬𑁆𑀬 𑀩𑀳𑀼𑀓𑁄 𑀚𑀦𑁄.

𑁮𑁨.

‘‘𑀬𑀲𑁆𑀫𑀸 𑀘 𑀧𑀦𑀺𑀥𑁂𑀓𑀘𑁆𑀘𑁂, 𑀆𑀘𑁂𑀭𑀫𑁆𑀳𑀺 𑀲𑀼𑀲𑀺𑀓𑁆𑀔𑀺𑀢𑀸;

𑀢𑀲𑁆𑀫𑀸 𑀯𑀺𑀦𑀻𑀢𑀯𑀺𑀦𑀬𑀸, 𑀘𑀭𑀦𑁆𑀢𑀺 𑀲𑀼𑀲𑀫𑀸𑀳𑀺𑀢𑀸’’𑀢𑀺. 𑁋 𑀇𑀤𑀁 𑀕𑀸𑀣𑀸𑀤𑁆𑀯𑀬𑀫𑀸𑀳;

𑀢𑀲𑁆𑀲𑀢𑁆𑀣𑁄 ¶ 𑁋 𑀲𑀫𑁆𑀫 𑀯𑁂𑀤𑁂𑀳, 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀲𑀘𑁂 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺 𑀯𑀸 𑀧𑀡𑁆𑀟𑀺𑀢𑁂 𑀑𑀯𑀸𑀤𑀤𑀸𑀬𑀓𑁂 𑀦𑀺𑀲𑁆𑀲𑀸𑀬 𑀆𑀘𑀸𑀭𑀧𑀡𑁆𑀡𑀢𑁆𑀢𑀺𑀯𑀺𑀦𑀬𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄 𑀦 𑀪𑀯𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀢𑀺𑀡𑀮𑀢𑀸𑀤𑀺𑀕𑀳𑀦𑁂 𑀯𑀦𑁂 𑀅𑀦𑁆𑀥𑀫𑀳𑀺𑀁𑀲𑁄 𑀕𑁄𑀘𑀭𑀸𑀕𑁄𑀘𑀭𑀁 𑀲𑀸𑀲𑀗𑁆𑀓𑀦𑀺𑀭𑀸𑀲𑀗𑁆𑀓𑀜𑁆𑀘 𑀞𑀸𑀦𑀁 𑀅𑀚𑀸𑀦𑀦𑁆𑀢𑁄 𑀘𑀭𑀢𑀺, 𑀢𑀣𑀸 𑀢𑀼𑀫𑁆𑀳𑀸𑀤𑀺𑀲𑁄 𑀩𑀳𑀼𑀓𑁄 𑀚𑀦𑁄 𑀘𑀭𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀇𑀥 𑀏𑀓𑀘𑁆𑀘𑁂 𑀲𑀓𑀸𑀬 𑀩𑀼𑀤𑁆𑀥𑀺𑀬𑀸 𑀭𑀳𑀺𑀢𑀸 𑀲𑀢𑁆𑀢𑀸 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀆𑀘𑀸𑀭𑀧𑀡𑁆𑀡𑀢𑁆𑀢𑀺𑀲𑀼𑀲𑀺𑀓𑁆𑀔𑀺𑀢𑀸, 𑀢𑀲𑁆𑀫𑀸 𑀆𑀘𑀭𑀺𑀬𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀯𑀺𑀦𑀬𑁂𑀦 𑀯𑀺𑀦𑀻𑀢𑀢𑁆𑀢𑀸 𑀯𑀺𑀦𑀻𑀢𑀯𑀺𑀦𑀬𑀸 𑀲𑀼𑀲𑀫𑀸𑀳𑀺𑀢𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀻𑀢𑀺.

𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀇𑀫𑀺𑀦𑀸 𑀳𑀺 𑀲𑀢𑁆𑀢𑁂𑀦 𑀕𑀺𑀳𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀸𑀦𑀼𑀭𑀽𑀧𑀸, 𑀧𑀩𑁆𑀩𑀚𑀺𑀢𑁂𑀦 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀸 𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑀩𑁆𑀩𑀸. 𑀕𑀺𑀳𑀺𑀦𑁄𑀧𑀺 𑀳𑀺 𑀅𑀢𑁆𑀢𑀦𑁄 𑀓𑀼𑀮𑀸𑀦𑀼𑀭𑀽𑀧𑁂𑀲𑀼 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀲𑀼 𑀲𑀺𑀓𑁆𑀔𑀺𑀢𑀸𑀯 𑀲𑀫𑁆𑀧𑀦𑁆𑀦𑀸𑀚𑀻𑀯𑀸 𑀳𑀼𑀢𑁆𑀯𑀸 𑀲𑀼𑀲𑀫𑀸𑀳𑀺𑀢𑀸 𑀘𑀭𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸𑀧𑀺 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑁂𑀲𑀼 ¶ 𑀧𑀸𑀲𑀸𑀤𑀺𑀓𑁂𑀲𑀼 𑀅𑀪𑀺𑀓𑁆𑀓𑀦𑁆𑀢𑀧𑀝𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀺𑀢𑀸𑀯 𑀯𑀺𑀕𑀢𑀯𑀺𑀓𑁆𑀔𑁂𑀧𑀸 𑀲𑀼𑀲𑀫𑀸𑀳𑀺𑀢𑀸 𑀘𑀭𑀦𑁆𑀢𑀺. 𑀮𑁄𑀓𑀲𑁆𑀫𑀺𑀜𑁆𑀳𑀺 𑁋

‘‘𑀩𑀸𑀳𑀼𑀲𑀘𑁆𑀘𑀜𑁆𑀘 𑀲𑀺𑀧𑁆𑀧𑀜𑁆𑀘, 𑀯𑀺𑀦𑀬𑁄 𑀘 𑀲𑀼𑀲𑀺𑀓𑁆𑀔𑀺𑀢𑁄;

𑀲𑀼𑀪𑀸𑀲𑀺𑀢𑀸 𑀘 𑀬𑀸 𑀯𑀸𑀘𑀸, 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺. (𑀔𑀼. 𑀧𑀸. 𑁫.𑁫; 𑀲𑀼. 𑀦𑀺. 𑁨𑁬𑁪);

𑀢𑀁 𑀲𑀼𑀢𑁆𑀯𑀸 𑀯𑁂𑀤𑁂𑀳𑀢𑀸𑀧𑀲𑁄 ‘‘𑀆𑀘𑀭𑀺𑀬, 𑀇𑀢𑁄 𑀧𑀝𑁆𑀞𑀸𑀬 𑀫𑀁 𑀑𑀯𑀤𑀣 𑀅𑀦𑀼𑀲𑀸𑀲𑀣, 𑀅𑀳𑀁 𑀅𑀦𑀥𑀺𑀯𑀸𑀲𑀦𑀚𑀸𑀢𑀺𑀓𑀢𑀸𑀬 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑀺𑀁, 𑀢𑀁 ¶ 𑀫𑁂 𑀔𑀫𑀣𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀔𑀫𑀸𑀧𑁂𑀲𑀺. 𑀢𑁂 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁆𑀭 𑀩𑁄𑀥𑀺𑀲𑀢𑁆𑀢𑁄 𑀯𑁂𑀤𑁂𑀳𑀢𑀸𑀧𑀲𑀲𑁆𑀲 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀢𑀁 𑀓𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀇𑀢𑀺 𑀢𑁂 𑀉𑀪𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀯𑁂𑀤𑁂𑀳𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀕𑀦𑁆𑀥𑀸𑀭𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀻’’𑀦𑁆𑀢𑀺.

𑀕𑀦𑁆𑀥𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁦𑁭] 𑁨. 𑀫𑀳𑀸𑀓𑀧𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀢𑁆𑀢𑀸𑀦𑀁 𑀲𑀗𑁆𑀓𑀫𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀪𑀤𑁆𑀤𑀲𑀸𑀮𑀚𑀸𑀢𑀓𑁂 (𑀚𑀸. 𑁧.𑁧𑁨.𑁧𑁩 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀜𑀸𑀢𑀓𑀸𑀦𑀁 𑀅𑀢𑁆𑀣𑀁 𑀘𑀭𑀢𑀻’’𑀢𑀺. 𑀲𑀢𑁆𑀣𑀸 ¶ 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀜𑀸𑀢𑀻𑀦𑀁 𑀅𑀢𑁆𑀣𑀁 𑀘𑀭𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑁄 𑀣𑀸𑀫𑀩𑀮𑀽𑀧𑁂𑀢𑁄 𑀧𑀜𑁆𑀘𑀳𑀢𑁆𑀣𑀺𑀩𑀮𑀧𑀭𑀺𑀫𑀸𑀡𑁄 𑀅𑀲𑀻𑀢𑀺𑀲𑀳𑀲𑁆𑀲𑀓𑀧𑀺𑀕𑀡𑀧𑀭𑀺𑀯𑀼𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀢𑀺. 𑀢𑀢𑁆𑀣 𑀕𑀗𑁆𑀕𑀸𑀢𑀻𑀭𑀁 𑀦𑀺𑀲𑁆𑀲𑀸𑀬 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑁄 𑀲𑀦𑁆𑀤𑀘𑁆𑀙𑀸𑀬𑁄 𑀩𑀳𑀮𑀧𑀢𑁆𑀢𑁄 ¶ 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀲𑀫𑀼𑀕𑁆𑀕𑀢𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀳𑁄𑀲𑀺 ‘‘𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀲𑁆𑀲 𑀫𑀥𑀼𑀭𑀸𑀦𑀺 𑀨𑀮𑀸𑀦𑀺 𑀤𑀺𑀩𑁆𑀩𑀕𑀦𑁆𑀥𑀭𑀲𑀸𑀦𑀺 𑀫𑀳𑀦𑁆𑀢𑀸𑀦𑀺 𑀫𑀳𑀦𑁆𑀢𑀓𑀼𑀫𑁆𑀪𑀧𑁆𑀧𑀫𑀸𑀡𑀸𑀦𑀺. 𑀢𑀲𑁆𑀲 𑀏𑀓𑀺𑀲𑁆𑀲𑀸 𑀲𑀸𑀔𑀸𑀬 𑀨𑀮𑀸𑀦𑀺 𑀣𑀮𑁂 𑀧𑀢𑀦𑁆𑀢𑀺, 𑀏𑀓𑀺𑀲𑁆𑀲𑀸 𑀲𑀸𑀔𑀸𑀬 𑀕𑀗𑁆𑀕𑀸𑀚𑀮𑁂, 𑀤𑁆𑀯𑀺𑀦𑁆𑀦𑀁 𑀲𑀸𑀔𑀸𑀦𑀁 𑀨𑀮𑀸𑀦𑀺 𑀫𑀚𑁆𑀛𑁂 𑀭𑀼𑀓𑁆𑀔𑀫𑀽𑀮𑁂 𑀧𑀢𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀕𑀡𑀁 𑀆𑀤𑀸𑀬 𑀢𑀢𑁆𑀣 𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 ‘‘𑀏𑀓𑀲𑁆𑀫𑀺𑀁 𑀓𑀸𑀮𑁂 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀉𑀤𑀓𑁂 𑀧𑀢𑀺𑀢𑀁 𑀨𑀮𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 ¶ 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀤𑀓𑀫𑀢𑁆𑀣𑀓𑁂 𑀲𑀸𑀔𑀸𑀬 𑀏𑀓𑀨𑀮𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀼𑀧𑁆𑀨𑀓𑀸𑀮𑁂 𑀓𑀴𑀸𑀬𑀫𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀔𑀸𑀤𑀸𑀧𑁂𑀢𑀺 𑀘𑁂𑀯 𑀧𑀸𑀢𑀸𑀧𑁂𑀢𑀺 𑀘. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀲𑀻𑀢𑀺𑀯𑀸𑀦𑀭𑀲𑀳𑀲𑁆𑀲𑁂𑀳𑀺 𑀅𑀤𑀺𑀝𑁆𑀞𑀁 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑀧𑀝𑀺𑀘𑁆𑀙𑀦𑁆𑀦𑀁 𑀏𑀓𑀁 𑀧𑀓𑁆𑀓𑀨𑀮𑀁 𑀦𑀤𑀺𑀬𑀁 𑀧𑀢𑀺𑀢𑁆𑀯𑀸 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀚𑀸𑀮𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑀲𑁆𑀲 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀉𑀤𑁆𑀥𑀁𑀚𑀸𑀮𑁂 𑀮𑀕𑁆𑀕𑀺. 𑀭𑀜𑁆𑀜𑁄 𑀤𑀺𑀯𑀲𑀁 𑀓𑀻𑀴𑀺𑀢𑁆𑀯𑀸 𑀲𑀸𑀬𑀁 𑀕𑀫𑀦𑀲𑀫𑀬𑁂 𑀓𑁂𑀯𑀝𑁆𑀝𑀸 𑀚𑀸𑀮𑀁 𑀉𑀓𑁆𑀔𑀺𑀧𑀦𑁆𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀲𑀼𑀓𑀨𑀮𑀁 𑀦𑀸𑀫𑀸’’𑀢𑀺 𑀅𑀚𑀸𑀦𑀦𑁆𑀢𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁.

𑀭𑀸𑀚𑀸 ‘‘𑀓𑀺𑀁𑀨𑀮𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀚𑀸𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑁂 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀯𑀦𑀘𑀭𑀓𑀸, 𑀤𑁂𑀯𑀸’’𑀢𑀺. 𑀲𑁄 𑀯𑀦𑀘𑀭𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀸 ‘‘𑀅𑀫𑁆𑀩𑀧𑀓𑁆𑀓’’𑀦𑁆𑀢𑀺 𑀲𑀼𑀢𑁆𑀯𑀸 𑀙𑀼𑀭𑀺𑀓𑀸𑀬 𑀙𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀯𑀦𑀘𑀭𑀓𑁂 𑀔𑀸𑀤𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑀸𑀧𑀺 𑀔𑀸𑀤𑀺, 𑀇𑀢𑁆𑀣𑀸𑀕𑀸𑀭𑀲𑁆𑀲𑀸𑀧𑀺 ¶ 𑀅𑀫𑀘𑁆𑀘𑀸𑀦𑀫𑁆𑀧𑀺 𑀤𑀸𑀧𑁂𑀲𑀺. 𑀭𑀜𑁆𑀜𑁄 𑀅𑀫𑁆𑀩𑀧𑀓𑁆𑀓𑀭𑀲𑁄 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀯𑀦𑀘𑀭𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀦𑀤𑀻𑀢𑀻𑀭𑁂’’𑀢𑀺 𑀯𑀼𑀢𑁆𑀢𑁂 𑀩𑀳𑀽 𑀦𑀸𑀯𑀸𑀲𑀗𑁆𑀖𑀸𑀝𑁂 𑀩𑀦𑁆𑀥𑀸𑀧𑁂𑀢𑁆𑀯𑀸 𑀯𑀦𑀘𑀭𑀓𑁂𑀳𑀺 𑀤𑁂𑀲𑀺𑀢𑀫𑀕𑁆𑀕𑁂𑀦 𑀉𑀤𑁆𑀥𑀁𑀲𑁄𑀢𑀁 𑀅𑀕𑀫𑀸𑀲𑀺. ‘‘𑀏𑀢𑁆𑀢𑀓𑀸𑀦𑀺 𑀤𑀺𑀯𑀲𑀸𑀦𑀻’’𑀢𑀺 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀣𑀺𑀢𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀧𑀦 𑀢𑀁 𑀞𑀸𑀦𑀁 𑀧𑀢𑁆𑀯𑀸 ‘‘𑀏𑀲𑁄 𑀤𑁂𑀯, 𑀭𑀼𑀓𑁆𑀔𑁄’’𑀢𑀺 𑀯𑀦𑀘𑀭𑀓𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀁𑀲𑀼. 𑀭𑀸𑀚𑀸 𑀦𑀸𑀯𑀁 𑀞𑀧𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀧𑀤𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀲𑀬𑀦𑀁 𑀧𑀜𑁆𑀜𑀧𑀸𑀧𑁂𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀸𑀦𑀺 𑀔𑀸𑀤𑀺𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑀺𑀁𑀲𑀼.

𑀫𑀳𑀸𑀲𑀢𑁆𑀢𑁄 𑀫𑀦𑀼𑀲𑁆𑀲𑁂𑀲𑀼 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁂𑀲𑀼 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀸 𑀲𑀸𑀔𑀸𑀬 𑀲𑀸𑀔𑀁 𑀘𑀭𑀦𑁆𑀢𑀸 𑀅𑀫𑁆𑀩𑀸𑀦𑀺 𑀔𑀸𑀤𑀦𑁆𑀢𑀺. 𑀭𑀸𑀚𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀓𑀧𑀺𑀕𑀡𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀥𑀦𑀼𑀕𑁆𑀕𑀳𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀬𑀣𑀸 𑀏𑀢𑁂 𑀨𑀮𑀔𑀸𑀤𑀓𑀸 𑀯𑀸𑀦𑀭𑀸 𑀦 𑀧𑀮𑀸𑀬𑀦𑁆𑀢𑀺, 𑀢𑀣𑀸 𑀢𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀚𑁆𑀛𑀣, 𑀲𑁆𑀯𑁂 𑀅𑀫𑁆𑀩𑀸𑀦𑀺 𑀘𑁂𑀯 𑀯𑀸𑀦𑀭𑀫𑀁𑀲𑀜𑁆𑀘 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀥𑀦𑀼𑀕𑁆𑀕𑀳𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀼𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀭𑁂 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂 𑀤𑀺𑀲𑁆𑀯𑀸 𑀯𑀸𑀦𑀭𑀸 𑀫𑀭𑀡𑀪𑀬𑀪𑀻𑀢𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, ‘𑀧𑀮𑀸𑀬𑀦𑀫𑀓𑁆𑀓𑀝𑁂 𑀯𑀺𑀚𑁆𑀛𑀺𑀲𑁆𑀲𑀸𑀫𑀸’𑀢𑀺 𑀭𑀼𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀥𑀦𑀼𑀕𑁆𑀕𑀳𑀸 𑀞𑀺𑀢𑀸, 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀓𑀫𑁆𑀧𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀺𑀢𑁆𑀣, 𑀅𑀳𑀁 𑀯𑁄 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀸𑀦𑀭𑀕𑀡𑀁 ¶ 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀉𑀚𑀼𑀓𑀁 𑀉𑀕𑁆𑀕𑀢𑀲𑀸𑀔𑀁 𑀆𑀭𑀼𑀬𑁆𑀳 𑀕𑀗𑁆𑀕𑀸𑀪𑀺𑀫𑀼𑀔𑀁 ¶ 𑀕𑀢𑀲𑀸𑀔𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀭𑀺𑀬𑀦𑁆𑀢𑀢𑁄 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀥𑀦𑀼𑀲𑀢𑀫𑀢𑁆𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑁆𑀫 𑀕𑀗𑁆𑀕𑀸𑀢𑀻𑀭𑁂 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑀫𑀢𑁆𑀣𑀓𑁂 𑀧𑀢𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 ‘‘𑀫𑀫𑀸𑀕𑀢𑀝𑁆𑀞𑀸𑀦𑀁 𑀏𑀢𑁆𑀢𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀓𑀸𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ¶ 𑀏𑀓𑀁 𑀯𑁂𑀢𑁆𑀢𑀮𑀢𑀁 𑀫𑀽𑀮𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀭𑀼𑀓𑁆𑀔𑁂 𑀩𑀚𑁆𑀛𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀆𑀓𑀸𑀲𑀝𑁆𑀞𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀝𑀺𑀬𑀁 𑀩𑀦𑁆𑀥𑀦𑀝𑁆𑀞𑀸𑀦𑀁 𑀦 𑀲𑀮𑁆𑀮𑀓𑁆𑀔𑁂𑀲𑀺.

𑀲𑁄 𑀢𑀁 𑀮𑀢𑀁 𑀆𑀤𑀸𑀬 𑀏𑀓𑀁 𑀓𑁄𑀝𑀺𑀁 𑀕𑀗𑁆𑀕𑀸𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀭𑀼𑀓𑁆𑀔𑁂 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀅𑀢𑁆𑀢𑀦𑁄 𑀓𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸𑀢𑀘𑁆𑀙𑀺𑀦𑁆𑀦𑀯𑀮𑀸𑀳𑀓𑁄 𑀯𑀺𑀬 𑀯𑁂𑀕𑁂𑀦 𑀥𑀦𑀼𑀲𑀢𑀫𑀢𑁆𑀢𑀁 𑀞𑀸𑀦𑀁 𑀮𑀗𑁆𑀖𑀺𑀢𑁆𑀯𑀸 𑀓𑀝𑀺𑀬𑀁 𑀩𑀦𑁆𑀥𑀦𑀝𑁆𑀞𑀸𑀦𑀲𑁆𑀲 𑀅𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸 𑀭𑀼𑀓𑁆𑀔𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀅𑀫𑁆𑀩𑀲𑀸𑀔𑀁 𑀤𑀴𑁆𑀳𑀁 𑀕𑀡𑁆𑀳𑀺𑀢𑁆𑀯𑀸 𑀯𑀸𑀦𑀭𑀕𑀡𑀲𑁆𑀲 𑀲𑀜𑁆𑀜𑀫𑀤𑀸𑀲𑀺 ‘‘𑀲𑀻𑀖𑀁 𑀫𑀫 𑀧𑀺𑀝𑁆𑀞𑀺𑀁 𑀫𑀤𑁆𑀤𑀫𑀸𑀦𑀸 𑀯𑁂𑀢𑁆𑀢𑀮𑀢𑀸𑀬 𑀲𑁄𑀢𑁆𑀣𑀺𑀕𑀫𑀦𑀁 𑀕𑀘𑁆𑀙𑀣𑀸’’𑀢𑀺. 𑀅𑀲𑀻𑀢𑀺𑀲𑀳𑀲𑁆𑀲𑀯𑀸𑀦𑀭𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀢𑀣𑀸 𑀅𑀕𑀫𑀁𑀲𑀼. 𑀢𑀤𑀸 𑀤𑁂𑀯𑀤𑀢𑁆𑀢𑁄𑀧𑀺 𑀫𑀓𑁆𑀓𑀝𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁂 𑀳𑁄𑀢𑀺. 𑀲𑁄 ‘‘𑀅𑀬𑀁 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀢𑀼𑀁 𑀓𑀸𑀮𑁄’’𑀢𑀺 𑀉𑀘𑁆𑀘𑀁 𑀲𑀸𑀔𑀁 𑀆𑀭𑀼𑀬𑁆𑀳 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀧𑀢𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀤𑀬𑀁 𑀪𑀺𑀚𑁆𑀚𑀺, 𑀩𑀮𑀯𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀲𑁄𑀧𑀺 𑀢𑀁 𑀯𑁂𑀤𑀦𑀸𑀧𑁆𑀧𑀢𑁆𑀢𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀫𑀳𑀸𑀲𑀢𑁆𑀢𑁄 𑀏𑀓𑀓𑁄𑀯 𑀅𑀳𑁄𑀲𑀺. 𑀭𑀸𑀚𑀸 𑀅𑀦𑀺𑀤𑁆𑀤𑀸𑀬𑀦𑁆𑀢𑁄 𑀯𑀸𑀦𑀭𑁂𑀳𑀺 𑀘 𑀫𑀳𑀸𑀲𑀢𑁆𑀢𑁂𑀦 𑀘 𑀓𑀢𑀓𑀺𑀭𑀺𑀬𑀁 𑀲𑀩𑁆𑀩𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀢𑀺𑀭𑀘𑁆𑀙𑀸𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀅𑀕𑀡𑁂𑀢𑁆𑀯𑀸 𑀧𑀭𑀺𑀲𑀸𑀬 𑀲𑁄𑀢𑁆𑀣𑀺𑀪𑀸𑀯𑀫𑁂𑀯 𑀅𑀓𑀸𑀲𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀲𑁄 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀳𑀸𑀲𑀢𑁆𑀢𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀦 𑀬𑀼𑀢𑁆𑀢𑀁 𑀇𑀫𑀁 𑀓𑀧𑀺𑀭𑀸𑀚𑀸𑀦𑀁 𑀦𑀸𑀲𑁂𑀢𑀼𑀁, 𑀉𑀧𑀸𑀬𑁂𑀦 𑀦𑀁 𑀑𑀢𑀸𑀭𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁄𑀕𑀗𑁆𑀕𑀸𑀬 𑀦𑀸𑀯𑀸𑀲𑀗𑁆𑀖𑀸𑀝𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀅𑀝𑁆𑀝𑀓𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀡𑀺𑀓𑀁 𑀫𑀳𑀸𑀲𑀢𑁆𑀢𑀁 𑀑𑀢𑀸𑀭𑀸𑀧𑁂𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀓𑀸𑀲𑀸𑀯𑀯𑀢𑁆𑀣𑀁 𑀧𑀢𑁆𑀣𑀭𑀸𑀧𑁂𑀢𑁆𑀯𑀸 𑀕𑀗𑁆𑀕𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀨𑀸𑀡𑀺𑀢𑁄𑀤𑀓𑀁 𑀧𑀸𑀬𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀲𑀭𑀻𑀭𑀁 𑀲𑀳𑀲𑁆𑀲𑀧𑀸𑀓𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀸𑀧𑁂𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀏𑀴𑀓𑀘𑀫𑁆𑀫𑀁 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀲𑀡𑀺𑀓𑀁 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁩.

‘‘𑀅𑀢𑁆𑀢𑀸𑀦𑀁 ¶ 𑀲𑀗𑁆𑀓𑀫𑀁 𑀓𑀢𑁆𑀯𑀸, 𑀬𑁄 𑀲𑁄𑀢𑁆𑀣𑀺𑀁 𑀲𑀫𑀢𑀸𑀭𑀬𑀺;

𑀓𑀺𑀁 𑀢𑁆𑀯𑀁 𑀢𑁂𑀲𑀁 𑀓𑀺𑀫𑁂 𑀢𑀼𑀬𑁆𑀳𑀁, 𑀳𑁄𑀦𑁆𑀢𑀺 𑀏𑀢𑁂 𑀫𑀳𑀸𑀓𑀧𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀅𑀫𑁆𑀪𑁄 𑀫𑀳𑀸𑀓𑀧𑀺, 𑀬𑁄 𑀢𑁆𑀯𑀁 𑀅𑀢𑁆𑀢𑀸𑀦𑀁 𑀲𑀗𑁆𑀓𑀫𑀁 𑀓𑀢𑁆𑀯𑀸 𑀢𑀼𑀮𑀁 𑀆𑀭𑁄𑀧𑁂𑀢𑁆𑀯𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀇𑀫𑁂 𑀯𑀸𑀦𑀭𑁂 𑀲𑁄𑀢𑁆𑀣𑀺𑀁 𑀲𑀫𑀢𑀸𑀭𑀬𑀺, 𑀔𑁂𑀫𑁂𑀦 𑀲𑀦𑁆𑀢𑀸𑀭𑁂𑀲𑀺; 𑀓𑀺𑀁 𑀢𑁆𑀯𑀁 𑀢𑁂𑀲𑀁 𑀳𑁄𑀲𑀺, 𑀓𑀺𑀫𑁂 𑀢𑀼𑀬𑁆𑀳𑀁 𑀯𑀸 𑀓𑀺𑀁𑀲𑀼 𑀏𑀢𑁂 𑀳𑁄𑀦𑁆𑀢𑀻𑀢𑀺?

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 𑀑𑀯𑀤𑀦𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁪.

‘‘𑀭𑀸𑀚𑀸𑀳𑀁 𑀇𑀲𑁆𑀲𑀭𑁄 𑀢𑁂𑀲𑀁, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀢𑁂𑀲𑀁 𑀲𑁄𑀓𑀧𑀭𑁂𑀢𑀸𑀦𑀁, 𑀪𑀻𑀢𑀸𑀦𑀁 𑀢𑁂 𑀅𑀭𑀺𑀦𑁆𑀤𑀫.

𑁮𑁫.

‘‘𑀉𑀮𑁆𑀮𑀗𑁆𑀖𑀬𑀺𑀢𑁆𑀯𑀸 𑀅𑀢𑁆𑀢𑀸𑀦𑀁, 𑀯𑀺𑀲𑁆𑀲𑀝𑁆𑀞𑀥𑀦𑀼𑀦𑁄 𑀲𑀢𑀁;

𑀢𑀢𑁄 𑀅𑀧𑀭𑀧𑀸𑀤𑁂𑀲𑀼, 𑀤𑀴𑁆𑀳𑀁 𑀩𑀦𑁆𑀥𑀁 𑀮𑀢𑀸𑀕𑀼𑀡𑀁.

𑁮𑁬.

‘‘𑀙𑀺𑀦𑁆𑀦𑀩𑁆𑀪𑀫𑀺𑀯 𑀯𑀸𑀢𑁂𑀦, 𑀦𑀼𑀡𑁆𑀡𑁄 𑀭𑀼𑀓𑁆𑀔𑀁 𑀉𑀧𑀸𑀕𑀫𑀺𑀁;

𑀲𑁄𑀳𑀁 𑀅𑀧𑁆𑀧𑀪𑀯𑀁 𑀢𑀢𑁆𑀣, 𑀲𑀸𑀔𑀁 𑀳𑀢𑁆𑀣𑁂𑀳𑀺 𑀅𑀕𑁆𑀕𑀳𑀺𑀁.

𑁮𑁭.

‘‘𑀢𑀁 𑀫𑀁 𑀯𑀺𑀬𑀸𑀬𑀢𑀁 𑀲𑀦𑁆𑀢𑀁, 𑀲𑀸𑀔𑀸𑀬 𑀘 𑀮𑀢𑀸𑀬 𑀘;

𑀲𑀫𑀦𑀼𑀓𑁆𑀓𑀫𑀦𑁆𑀢𑀸 𑀧𑀸𑀤𑁂𑀳𑀺, 𑀲𑁄𑀢𑁆𑀣𑀺𑀁 𑀲𑀸𑀔𑀸𑀫𑀺𑀕𑀸 𑀕𑀢𑀸.

𑁮𑁮.

‘‘𑀢𑀁 𑀫𑀁 𑀦 𑀢𑀧𑀢𑁂 𑀩𑀦𑁆𑀥𑁄, 𑀫𑀢𑁄 𑀫𑁂 𑀦 𑀢𑀧𑁂𑀲𑁆𑀲𑀢𑀺;

𑀲𑀼𑀔𑀫𑀸𑀳𑀭𑀺𑀢𑀁 𑀢𑁂𑀲𑀁, 𑀬𑁂𑀲𑀁 𑀭𑀚𑁆𑀚𑀫𑀓𑀸𑀭𑀬𑀺𑀁.

𑁮𑁯.

‘‘𑀏𑀲𑀸 𑀢𑁂 𑀉𑀧𑀫𑀸 𑀭𑀸𑀚, 𑀢𑀁 𑀲𑀼𑀡𑁄𑀳𑀺 𑀅𑀭𑀺𑀦𑁆𑀤𑀫;

𑀭𑀜𑁆𑀜𑀸 𑀭𑀝𑁆𑀞𑀲𑁆𑀲 𑀬𑁄𑀕𑁆𑀕𑀲𑁆𑀲, 𑀩𑀮𑀲𑁆𑀲 𑀦𑀺𑀕𑀫𑀲𑁆𑀲 𑀘;

𑀲𑀩𑁆𑀩𑁂𑀲𑀁 𑀲𑀼𑀔𑀫𑁂𑀝𑁆𑀞𑀩𑁆𑀩𑀁, 𑀔𑀢𑁆𑀢𑀺𑀬𑁂𑀦 𑀧𑀚𑀸𑀦𑀢𑀸’’𑀢𑀺.

𑀢𑀢𑁆𑀣 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀁 𑀯𑀸𑀦𑀭𑀸𑀦𑀁. 𑀪𑀻𑀢𑀸𑀦𑀁 𑀢𑁂𑀢𑀺 𑀢𑀯 𑀯𑀺𑀚𑁆𑀛𑀦𑀢𑁆𑀣𑀸𑀬 𑀆𑀡𑀸𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 𑀪𑀻𑀢𑀸𑀦𑀁. 𑀅𑀭𑀺𑀦𑁆𑀤𑀫𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀭𑀸𑀚𑀸 𑀳𑀺 𑀘𑁄𑀭𑀸𑀤𑀻𑀦𑀁 𑀅𑀭𑀻𑀦𑀁 𑀤𑀫𑀦𑀢𑁄 ‘‘𑀅𑀭𑀺𑀦𑁆𑀤𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀲𑁆𑀲𑀝𑁆𑀞𑀥𑀦𑀼𑀦𑁄 𑀲𑀢𑀦𑁆𑀢𑀺 𑀅𑀦𑀸𑀭𑁄𑀧𑀺𑀢𑀥𑀦𑀼𑀲𑀢𑀧𑁆𑀧𑀫𑀸𑀡𑀁 𑀞𑀸𑀦𑀁 𑀅𑀢𑁆𑀢𑀸𑀦𑀁 𑀆𑀓𑀸𑀲𑁂 𑀉𑀮𑁆𑀮𑀗𑁆𑀖𑀬𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄 𑀇𑀫𑀫𑁆𑀳𑀸 𑀭𑀼𑀓𑁆𑀔𑀸 𑀮𑀗𑁆𑀖𑀬𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀢𑁄. 𑀅𑀧𑀭𑀧𑀸𑀤𑁂𑀲𑀽𑀢𑀺 𑀧𑀘𑁆𑀙𑀸𑀧𑀸𑀤𑁂𑀲𑀼. 𑀇𑀤𑀁 𑀓𑀝𑀺𑀪𑀸𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀓𑀝𑀺𑀪𑀸𑀕𑁂 𑀢𑀁 𑀮𑀢𑀸𑀕𑀼𑀡𑀁 𑀤𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀧𑀘𑁆𑀙𑀺𑀫𑀧𑀸𑀤𑁂𑀳𑀺 𑀪𑀽𑀫𑀺𑀬𑀁 𑀅𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀦𑀼𑀡𑁆𑀡𑁄 ¶ 𑀭𑀼𑀓𑁆𑀔𑀁 𑀉𑀧𑀸𑀕𑀫𑀺𑀦𑁆𑀢𑀺 𑀯𑀸𑀢𑀘𑁆𑀙𑀺𑀦𑁆𑀦𑀁 𑀅𑀩𑁆𑀪𑀫𑀺𑀯 𑀅𑀢𑁆𑀢𑀦𑁄 ¶ 𑀯𑁂𑀕𑀚𑀦𑀺𑀢𑁂𑀦 𑀯𑀸𑀢𑁂𑀦 𑀦𑀼𑀡𑁆𑀡𑁄. 𑀬𑀣𑀸 𑀯𑀸𑀢𑀘𑁆𑀙𑀺𑀦𑁆𑀦𑀩𑁆𑀪𑀁 𑀯𑀸𑀢𑁂𑀦, 𑀏𑀯𑀁 𑀅𑀢𑁆𑀢𑀦𑁄 𑀯𑁂𑀕𑁂𑀦 𑀦𑀼𑀡𑁆𑀡𑁄 𑀳𑀼𑀢𑁆𑀯𑀸 𑀇𑀫𑀁 𑀅𑀫𑁆𑀩𑀭𑀼𑀓𑁆𑀔𑀁 𑀉𑀧𑀸𑀕𑀫𑀺𑀁 ¶ . 𑀅𑀧𑁆𑀧𑀪𑀯𑀦𑁆𑀢𑀺 𑀲𑁄 𑀅𑀳𑀁 𑀢𑀢𑁆𑀣 𑀆𑀓𑀸𑀲𑀧𑁆𑀧𑀤𑁂𑀲𑁂 𑀭𑀼𑀓𑁆𑀔𑀁 𑀧𑀸𑀧𑀼𑀡𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑁄 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀁 𑀳𑀢𑁆𑀣𑁂𑀳𑀺 𑀅𑀕𑁆𑀕𑀳𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀬𑀸𑀬𑀢𑀦𑁆𑀢𑀺 𑀭𑀼𑀓𑁆𑀔𑀲𑀸𑀔𑀸𑀬 𑀘 𑀯𑁂𑀢𑁆𑀢𑀮𑀢𑀸𑀬 𑀘 𑀯𑀻𑀡𑀸𑀬 𑀪𑀫𑀭𑀢𑀦𑁆𑀢𑀺 𑀯𑀺𑀬 𑀯𑀺𑀢𑀢𑀁 𑀆𑀓𑀟𑁆𑀠𑀺𑀢𑀲𑀭𑀻𑀭𑀁. 𑀲𑀫𑀦𑀼𑀓𑁆𑀓𑀫𑀦𑁆𑀢𑀸𑀢𑀺 𑀫𑀬𑀸 𑀅𑀦𑀼𑀜𑁆𑀜𑀸𑀢𑀸 𑀫𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑁂𑀳𑀺 𑀅𑀦𑀼𑀓𑁆𑀓𑀫𑀦𑁆𑀢𑀸 𑀦𑀺𑀭𑀦𑁆𑀢𑀭𑀫𑁂𑀯 𑀅𑀓𑁆𑀓𑀫𑀦𑁆𑀢𑀸 𑀲𑁄𑀢𑁆𑀣𑀺𑀁 𑀕𑀢𑀸. 𑀢𑀁 𑀫𑀁 𑀦 𑀢𑀧𑀢𑁂 𑀩𑀦𑁆𑀥𑁄𑀢𑀺 𑀢𑀁 𑀫𑀁 𑀦𑀸𑀧𑀺 𑀲𑁄 𑀯𑀮𑁆𑀮𑀺𑀬𑀸 𑀩𑀦𑁆𑀥𑁄 𑀢𑀧𑀢𑀺, 𑀦𑀸𑀧𑀺 𑀇𑀤𑀸𑀦𑀺 𑀫𑀭𑀡𑀁 𑀢𑀧𑁂𑀲𑁆𑀲𑀢𑀺. 𑀓𑀺𑀁𑀓𑀸𑀭𑀡𑀸? 𑀲𑀼𑀔𑀫𑀸𑀳𑀭𑀺𑀢𑀁 𑀢𑁂𑀲𑀦𑁆𑀢𑀺 𑀬𑀲𑁆𑀫𑀸 𑀬𑁂𑀲𑀁 𑀅𑀳𑀁 𑀭𑀚𑁆𑀚𑀫𑀓𑀸𑀭𑀬𑀺𑀁, 𑀢𑁂𑀲𑀁 𑀫𑀬𑀸 𑀲𑀼𑀔𑀫𑀸𑀳𑀭𑀺𑀢𑀁. 𑀏𑀢𑁂 𑀳𑀺 ‘‘𑀫𑀳𑀸𑀭𑀸𑀚, 𑀅𑀬𑀁 𑀦𑁄 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀳𑀭𑀺𑀢𑁆𑀯𑀸 𑀲𑀼𑀔𑀁 𑀆𑀳𑀭𑀺𑀲𑁆𑀲𑀢𑀻’’𑀢𑀺 𑀫𑀁 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀅𑀳𑀫𑁆𑀧𑀺 ‘‘𑀢𑀼𑀫𑁆𑀳𑀸𑀓𑀁 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀳𑀭𑀺𑀲𑁆𑀲𑀸𑀫𑀺’’𑀘𑁆𑀘𑁂𑀯 𑀏𑀢𑁂𑀲𑀁 𑀭𑀸𑀚𑀸 𑀚𑀸𑀢𑁄. 𑀢𑀁 𑀅𑀚𑁆𑀚 𑀫𑀬𑀸 𑀏𑀢𑁂𑀲𑀁 𑀫𑀭𑀡𑀤𑀼𑀓𑁆𑀔𑀁 𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀲𑀼𑀔𑀁 𑀆𑀳𑀝𑀁, 𑀢𑁂𑀦 𑀫𑀁 𑀦𑀸𑀧𑀺 𑀩𑀦𑁆𑀥𑁄 𑀢𑀧𑀢𑀺, 𑀦 𑀫𑀭𑀡𑀯𑀥𑁄 𑀢𑀧𑁂𑀲𑁆𑀲𑀢𑀺.

𑀏𑀲𑀸 𑀢𑁂 𑀉𑀧𑀫𑀸𑀢𑀺 𑀏𑀲𑀸 𑀢𑁂 𑀫𑀳𑀸𑀭𑀸𑀚, 𑀫𑀬𑀸 𑀓𑀢𑀓𑀺𑀭𑀺𑀬𑀸𑀬 𑀉𑀧𑀫𑀸. 𑀢𑀁 𑀲𑀼𑀡𑁄𑀳𑀻𑀢𑀺 𑀢𑀲𑁆𑀫𑀸 𑀇𑀫𑀸𑀬 𑀉𑀧𑀫𑀸𑀬 𑀲𑀁𑀲𑀦𑁆𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀬𑁆𑀬𑀫𑀸𑀦𑀁 𑀑𑀯𑀸𑀤𑀁 𑀲𑀼𑀡𑀸𑀳𑀺. 𑀭𑀜𑁆𑀜𑀸 𑀭𑀝𑁆𑀞𑀲𑁆𑀲𑀸𑀢𑀺 𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀉𑀘𑁆𑀙𑀼𑀬𑀦𑁆𑀢𑁂 𑀉𑀘𑁆𑀙𑀼𑀁 𑀯𑀺𑀬 𑀭𑀝𑁆𑀞𑀁 𑀅𑀧𑀻𑀴𑁂𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀁 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀦𑁆𑀢𑁂𑀦 𑀤𑀲𑀲𑀼 𑀭𑀸𑀚𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀫𑀬𑀸 𑀯𑀺𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 ‘‘𑀓𑀺𑀦𑁆𑀢𑀺𑀫𑁂 𑀭𑀝𑁆𑀞𑀯𑀸𑀲𑀺𑀦𑁄 𑀯𑀺𑀕𑀢𑀪𑀬𑀸 𑀕𑀺𑀫𑁆𑀳𑀓𑀸𑀮𑁂 𑀯𑀺𑀯𑀝𑀤𑁆𑀯𑀸𑀭𑁂 𑀜𑀸𑀢𑀻𑀳𑀺 𑀘 𑀧𑀭𑀺𑀯𑀸𑀭𑀓𑁂𑀳𑀺 𑀘 𑀧𑀭𑀺𑀯𑀸𑀭𑀺𑀢𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀲𑀻𑀢𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀸 𑀬𑀣𑀸𑀭𑀼𑀘𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀲𑀫𑀗𑁆𑀕𑀺𑀦𑁄 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀲𑀓𑀮𑀭𑀝𑁆𑀞𑀲𑁆𑀲 𑀘 𑀭𑀣𑀲𑀓𑀝𑀸𑀤𑀺𑀬𑀼𑀢𑁆𑀢𑀯𑀸𑀳𑀦𑀲𑁆𑀲 𑀬𑁄𑀕𑁆𑀕𑀲𑁆𑀲 𑀘 𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀩𑀮𑀲𑁆𑀲 𑀘 𑀦𑀺𑀕𑀫𑀚𑀦𑀧𑀤𑀲𑀗𑁆𑀔𑀸𑀢𑀲𑁆𑀲 𑀦𑀺𑀕𑀫𑀲𑁆𑀲 𑀘 𑀲𑀩𑁆𑀩𑁂𑀲𑀁 𑀲𑀼𑀔𑀫𑁂𑀯 𑀏𑀲𑀺𑀢𑀩𑁆𑀩𑀁 𑀕𑀯𑁂𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀔𑀢𑁆𑀢𑀺𑀬𑁂𑀦 𑀧𑀚𑀸𑀦𑀢𑀸𑀢𑀺 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 ‘‘𑀔𑀢𑁆𑀢𑀺𑀬𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀧𑀦 𑀏𑀢𑁂𑀦 𑀅𑀯𑀲𑁂𑀲𑀲𑀢𑁆𑀢𑁂 𑀅𑀢𑀺𑀓𑁆𑀓𑀫𑁆𑀫 𑀧𑀚𑀸𑀦𑀢𑀸 𑀜𑀸𑀡𑀲𑀫𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀑𑀯𑀤𑀦𑁆𑀢𑁄 𑀅𑀦𑀼𑀲𑀸𑀲𑀦𑁆𑀢𑁄𑀯 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀲𑁆𑀲 𑀓𑀧𑀺𑀭𑀸𑀚𑀲𑁆𑀲 𑀭𑀸𑀚𑀽𑀦𑀁 𑀯𑀺𑀬 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀇𑀢𑁆𑀣𑀸𑀕𑀸𑀭𑀫𑁆𑀧𑀺 𑀆𑀡𑀸𑀧𑁂𑀲𑀺 ‘‘𑀢𑀼𑀫𑁆𑀳𑁂 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀤𑀡𑁆𑀟𑀤𑀻𑀧𑀺𑀓𑀳𑀢𑁆𑀣𑀸 𑀓𑀧𑀺𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀴𑀸𑀳𑀦𑀁 𑀕𑀘𑁆𑀙𑀣𑀸’’𑀢𑀺. 𑀅𑀫𑀘𑁆𑀘𑀸 ¶ 𑀤𑀸𑀭𑀽𑀦𑀁 𑀲𑀓𑀝𑀲𑀢𑀫𑀢𑁆𑀢𑁂𑀦 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀭𑀸𑀚𑀽𑀦𑀁 𑀓𑀭𑀡𑀦𑀺𑀬𑀸𑀫𑁂𑀦𑁂𑀯 𑀫𑀳𑀸𑀲𑀢𑁆𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀻𑀲𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀴𑀸𑀳𑀦𑁂 𑀘𑁂𑀢𑀺𑀬𑀁 𑀓𑀸𑀭𑁂𑀢𑁆𑀯𑀸 𑀤𑀻𑀧𑁂 𑀚𑀸𑀮𑀸𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 ¶ 𑀲𑀻𑀲𑀓𑀧𑀸𑀮𑀁 𑀲𑀼𑀯𑀡𑁆𑀡𑀔𑀘𑀺𑀢𑀁 𑀓𑀸𑀭𑁂𑀢𑁆𑀯𑀸 𑀓𑀼𑀦𑁆𑀢𑀕𑁆𑀕𑁂 𑀞𑀧𑁂𑀢𑁆𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀭𑀸𑀚𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀥𑀸𑀢𑀼𑀧𑀽𑀚𑀁 𑀓𑀸𑀭𑁂𑀲𑀺. 𑀅𑀣 𑀦𑀁 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀤𑀼𑀝𑁆𑀞𑀓𑀧𑀺 𑀤𑁂𑀯𑀤𑀢𑁆𑀢𑁄, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀓𑀧𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀓𑀧𑀺𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁦𑁮] 𑁩. 𑀓𑀼𑀫𑁆𑀪𑀓𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀫𑁆𑀩𑀸𑀳𑀫𑀤𑁆𑀤𑀁 𑀯𑀦𑀫𑀦𑁆𑀢𑀭𑀲𑁆𑀫𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀮𑁂𑀲𑀦𑀺𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀸𑀦𑀻𑀬𑀚𑀸𑀢𑀓𑁂 (𑀚𑀸. 𑁧.𑁧𑁧.𑁫𑁯 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀧𑀜𑁆𑀘𑀲𑀢𑀸 𑀲𑀳𑀸𑀬𑀓𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑁆𑀢𑁄𑀓𑁄𑀝𑀺𑀲𑀦𑁆𑀣𑀸𑀭𑁂 𑀯𑀲𑀫𑀸𑀦𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑀬𑀺𑀁𑀲𑀼. 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀭𑀢𑁆𑀢𑀺𑀬𑀸 𑀢𑀬𑁄 𑀯𑀸𑀭𑁂, 𑀤𑀺𑀯𑀲𑀲𑁆𑀲 𑀢𑀬𑁄 𑀯𑀸𑀭𑁂𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀯𑀸𑀭𑁂 𑀑𑀮𑁄𑀓𑁂𑀦𑁆𑀢𑁄 𑀓𑀺𑀓𑀻 𑀅𑀡𑁆𑀟𑀁 𑀯𑀺𑀬, 𑀘𑀫𑀭𑀻 𑀯𑀸𑀮𑀥𑀺𑀁 𑀯𑀺𑀬, 𑀫𑀸𑀢𑀸 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬, 𑀏𑀓𑀘𑀓𑁆𑀔𑀼𑀓𑁄 𑀧𑀼𑀭𑀺𑀲𑁄 𑀘𑀓𑁆𑀔𑀼𑀁 𑀯𑀺𑀬 𑀭𑀓𑁆𑀔𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀲𑁄 𑀢𑀁 𑀤𑀺𑀯𑀲𑀁 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀚𑁂𑀢𑀯𑀦𑀁 ¶ 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀺𑀢𑀓𑁆𑀓𑀲𑀫𑀼𑀤𑀸𑀘𑀸𑀭𑀁 𑀜𑀢𑁆𑀯𑀸 ‘‘𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀩𑁆𑀪𑀦𑁆𑀢𑀭𑁂 𑀅𑀬𑀁 𑀓𑀺𑀮𑁂𑀲𑁄 𑀯𑀟𑁆𑀠𑀦𑁆𑀢𑁄 𑀅𑀭𑀳𑀢𑁆𑀢𑀲𑁆𑀲 𑀳𑁂𑀢𑀼𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀦𑁂𑀲𑀁 𑀓𑀺𑀮𑁂𑀲𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀆𑀦𑀦𑁆𑀤, 𑀅𑀦𑁆𑀢𑁄𑀓𑁄𑀝𑀺𑀲𑀦𑁆𑀣𑀸𑀭𑁂 ¶ 𑀯𑀲𑀦𑀓𑀪𑀺𑀓𑁆𑀔𑀽 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄𑀧𑀯𑀢𑁆𑀢𑀓𑀺𑀮𑁂𑀲𑀸𑀦𑀁 𑀯𑀲𑁂 𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀮𑁂𑀲𑁄 𑀳𑀺 𑀯𑀟𑁆𑀠𑀫𑀸𑀦𑁄 𑀧𑀘𑁆𑀘𑀸𑀫𑀺𑀢𑁆𑀢𑁄 𑀯𑀺𑀬 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀺𑀮𑁂𑀲𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀢𑁆𑀢𑀓𑀁 𑀆𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀧𑀯𑀢𑁆𑀢𑀓𑀺𑀮𑁂𑀲𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀦𑀕𑀭𑀲𑁆𑀲 𑀤𑁆𑀯𑀸𑀭𑀕𑀸𑀫𑁂 𑀓𑀼𑀫𑁆𑀪𑀓𑀸𑀭𑀓𑀼𑀮𑁂 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀏𑀓𑀁 𑀧𑀼𑀢𑁆𑀢𑀜𑁆𑀘 𑀥𑀻𑀢𑀭𑀜𑁆𑀘 𑀮𑀪𑀺𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑀺. 𑀢𑀤𑀸 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑀦𑁆𑀢𑀧𑀼𑀭𑀦𑀕𑀭𑁂 𑀓𑀭𑀡𑁆𑀟𑀓𑁄 𑀦𑀸𑀫 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀨𑀮𑀪𑀸𑀭𑀪𑀭𑀺𑀢𑀁 𑀫𑀥𑀼𑀭𑀨𑀮𑀁 𑀅𑀫𑁆𑀩𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄𑀬𑁂𑀯 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀏𑀓𑀁 𑀅𑀫𑁆𑀩𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀬 𑀦𑀺𑀲𑀺𑀦𑁆𑀦𑁄 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀸𑀦𑀁 𑀤𑀢𑁆𑀯𑀸 𑀅𑀫𑁆𑀩𑀁 𑀧𑀭𑀺𑀪𑀼𑀜𑁆𑀚𑀺. ‘‘𑀭𑀜𑁆𑀜𑀸 𑀕𑀳𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑁂𑀳𑀺 𑀦𑀸𑀫 𑀕𑀳𑁂𑀢𑀩𑁆𑀩𑀫𑁂𑀯𑀸’’𑀢𑀺 𑀅𑀫𑀘𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄𑀧𑀺 𑀅𑀫𑁆𑀩𑀸𑀦𑀺 𑀧𑀸𑀢𑁂𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀧𑀘𑁆𑀙𑀸 𑀆𑀕𑀢𑀸 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀫𑀼𑀕𑁆𑀕𑀭𑁂𑀳𑀺 𑀧𑁄𑀣𑁂𑀢𑁆𑀯𑀸 𑀑𑀪𑀕𑁆𑀕𑀯𑀺𑀪𑀕𑁆𑀕𑀲𑀸𑀔𑀁 𑀓𑀢𑁆𑀯𑀸 𑀆𑀫𑀓𑀨𑀮𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀔𑀸𑀤𑀺𑀁𑀲𑀼.

𑀭𑀸𑀚𑀸 𑀤𑀺𑀯𑀲𑀁 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀁 𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀢𑁄 𑀑𑀢𑀭𑀺𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀧𑀸𑀢𑁄𑀯 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑁄 𑀨𑀮𑀪𑀸𑀭𑀪𑀭𑀺𑀢𑁄 𑀲𑁄𑀪𑀫𑀸𑀦𑁄 𑀅𑀝𑁆𑀞𑀸𑀲𑀺, 𑀇𑀤𑀸𑀦𑀺 𑀕𑀳𑀺𑀢𑀨𑀮𑁄 𑀑𑀪𑀕𑁆𑀕𑀯𑀺𑀪𑀕𑁆𑀕𑁄 𑀅𑀲𑁄𑀪𑀫𑀸𑀦𑁄 𑀞𑀺𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀅𑀜𑁆𑀜𑀢𑁄 𑀑𑀮𑁄𑀓𑁂𑀦𑁆𑀢𑁄 𑀅𑀧𑀭𑀁 𑀦𑀺𑀧𑁆𑀨𑀮𑀁 𑀅𑀫𑁆𑀩𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀏𑀲 𑀭𑀼𑀓𑁆𑀔𑁄 𑀅𑀢𑁆𑀢𑀦𑁄 𑀦𑀺𑀧𑁆𑀨𑀮𑀪𑀸𑀯𑁂𑀦 𑀫𑀼𑀡𑁆𑀟𑀫𑀡𑀺𑀧𑀩𑁆𑀩𑀢𑁄 𑀯𑀺𑀬 𑀲𑁄𑀪𑀫𑀸𑀦𑁄 𑀞𑀺𑀢𑁄, 𑀅𑀬𑀁 ¶ 𑀧𑀦 𑀲𑀨𑀮𑀪𑀸𑀯𑁂𑀦 𑀇𑀫𑀁 𑀩𑁆𑀬𑀲𑀦𑀁 ¶ 𑀧𑀢𑁆𑀢𑁄, 𑀇𑀤𑀁 𑀅𑀕𑀸𑀭𑀫𑀚𑁆𑀛𑀫𑁆𑀧𑀺 𑀨𑀮𑀺𑀢𑀭𑀼𑀓𑁆𑀔𑀲𑀤𑀺𑀲𑀁, 𑀧𑀩𑁆𑀩𑀚𑁆𑀚𑀸 𑀦𑀺𑀧𑁆𑀨𑀮𑀭𑀼𑀓𑁆𑀔𑀲𑀤𑀺𑀲𑀸, 𑀲𑀥𑀦𑀲𑁆𑀲𑁂𑀯 𑀪𑀬𑀁 𑀅𑀢𑁆𑀣𑀺, 𑀦𑀺𑀤𑁆𑀥𑀦𑀲𑁆𑀲 𑀪𑀬𑀁 𑀦𑀢𑁆𑀣𑀺, 𑀫𑀬𑀸𑀧𑀺 𑀦𑀺𑀧𑁆𑀨𑀮𑀭𑀼𑀓𑁆𑀔𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀨𑀮𑀭𑀼𑀓𑁆𑀔𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀞𑀺𑀢𑀓𑁄𑀯 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀯𑀺𑀤𑁆𑀥𑀁𑀲𑀺𑀢𑀸 𑀤𑀸𑀦𑀺 𑀫𑁂 𑀫𑀸𑀢𑀼𑀓𑀼𑀘𑁆𑀙𑀺𑀓𑀼𑀝𑀺𑀓𑀸, 𑀙𑀺𑀦𑁆𑀦𑀸 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺, 𑀲𑁄𑀥𑀺𑀢𑀸 𑀲𑀁𑀲𑀸𑀭𑀉𑀓𑁆𑀓𑀸𑀭𑀪𑀽𑀫𑀺, 𑀲𑁄𑀲𑀺𑀢𑁄 𑀫𑀬𑀸 𑀅𑀲𑁆𑀲𑀼𑀲𑀫𑀼𑀤𑁆𑀤𑁄, 𑀪𑀺𑀦𑁆𑀦𑁄 𑀅𑀝𑁆𑀞𑀺𑀧𑀸𑀓𑀸𑀭𑁄, 𑀦𑀢𑁆𑀣𑀺 𑀫𑁂 𑀧𑀼𑀦 𑀧𑀝𑀺𑀲𑀦𑁆𑀥𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄𑀯 𑀅𑀝𑁆𑀞𑀸𑀲𑀺.

𑀅𑀣 𑀦𑀁 𑀅𑀫𑀘𑁆𑀘𑀸 𑀆𑀳𑀁𑀲𑀼 ‘‘𑀅𑀢𑀺𑀩𑀳𑀼𑀁 𑀞𑀺𑀢𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺. ‘‘𑀦 𑀫𑀬𑀁 𑀫𑀳𑀸𑀭𑀸𑀚𑀸𑀦𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀫𑀬’’𑀦𑁆𑀢𑀺. ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸 𑀦 𑀳𑁄𑀦𑁆𑀢𑀺, 𑀤𑁂𑀯𑀸’’𑀢𑀺. ‘‘𑀅𑀣 𑀓𑀻𑀤𑀺𑀲𑀸 𑀳𑁄𑀦𑁆𑀢𑀻’’𑀢𑀺? ‘‘𑀑𑀭𑁄𑀧𑀺𑀢𑀓𑁂𑀲𑀫𑀲𑁆𑀲𑀼𑀓𑀸𑀲𑀸𑀯𑀯𑀢𑁆𑀣𑀧𑀝𑀺𑀘𑁆𑀙𑀦𑁆𑀦𑀸 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸 𑀯𑀸𑀢𑀘𑁆𑀙𑀺𑀦𑁆𑀦𑀯𑀮𑀸𑀳𑀓𑀭𑀸𑀳𑀼𑀫𑀼𑀢𑁆𑀢𑀘𑀦𑁆𑀤𑀫𑀡𑁆𑀟𑀮𑀧𑀝𑀺𑀪𑀸𑀕𑀸 𑀳𑀺𑀫𑀯𑀦𑁆𑀢𑁂 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀲𑀦𑁆𑀢𑀺, 𑀏𑀯𑀭𑀽𑀧𑀸 𑀤𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀧𑀭𑀸𑀫𑀲𑀺, 𑀢𑀸𑀯𑀤𑁂𑀯𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀲𑀫𑀡𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺.

‘‘𑀢𑀺𑀘𑀻𑀯𑀭𑀜𑁆𑀘 ¶ 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀸 𑀲𑀫𑀡𑀧𑀭𑀺𑀓𑁆𑀔𑀸𑀭𑀸 𑀓𑀸𑀬𑀧𑀝𑀺𑀩𑀤𑁆𑀥𑀸𑀯 𑀅𑀳𑁂𑀲𑀼𑀁. 𑀲𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀦𑀺𑀮𑀧𑀣𑁂𑀦 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 𑀅𑀕𑀫𑀸𑀲𑀺.

𑀕𑀦𑁆𑀥𑀸𑀭𑀭𑀝𑁆𑀞𑁂𑀧𑀺 𑀢𑀓𑁆𑀓𑀲𑀺𑀮𑀦𑀕𑀭𑁂 𑀦𑀕𑁆𑀕𑀚𑀺 𑀦𑀸𑀫 𑀭𑀸𑀚𑀸 𑀉𑀧𑀭𑀺𑀧𑀸𑀲𑀸𑀤𑁂 𑀧𑀮𑁆𑀮𑀗𑁆𑀓𑀫𑀚𑁆𑀛𑀕𑀢𑁄 𑀏𑀓𑀁 𑀇𑀢𑁆𑀣𑀺𑀁 𑀏𑀓𑁂𑀓𑀳𑀢𑁆𑀣𑁂 𑀏𑀓𑁂𑀓𑀁 𑀫𑀡𑀺𑀯𑀮𑀬𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀦𑁆𑀥𑀁 𑀧𑀺𑀲𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀸𑀦𑀺 𑀯𑀮𑀬𑀸𑀦𑀺 𑀏𑀓𑁂𑀓𑀪𑀸𑀯𑁂𑀦 𑀦 𑀖𑀝𑁆𑀝𑁂𑀦𑁆𑀢𑀺 𑀦 𑀯𑀺𑀭𑀯𑀦𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀲𑀸 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀯𑀮𑀬𑀁 ¶ 𑀯𑀸𑀫𑀳𑀢𑁆𑀣𑁂𑀬𑁂𑀯 𑀧𑀺𑀴𑀦𑁆𑀥𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀕𑀦𑁆𑀥𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀺𑀲𑀺𑀢𑀼𑀁 𑀆𑀭𑀪𑀺, 𑀯𑀸𑀫𑀳𑀢𑁆𑀣𑁂 𑀯𑀮𑀬𑀁 𑀤𑀼𑀢𑀺𑀬𑀁 𑀆𑀕𑀫𑁆𑀫 𑀖𑀝𑁆𑀝𑀺𑀬𑀫𑀸𑀦𑀁 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 𑀢𑀸𑀦𑀺 𑀤𑁆𑀯𑁂 𑀯𑀮𑀬𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀦𑁆𑀢𑀸𑀦𑀺 𑀯𑀺𑀭𑀯𑀦𑁆𑀢𑀸𑀦𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀁 𑀯𑀮𑀬𑀁 𑀏𑀓𑁂𑀓𑀓𑀸𑀮𑁂 𑀦 𑀖𑀝𑁆𑀝𑁂𑀲𑀺, 𑀤𑀼𑀢𑀺𑀬𑀁 𑀆𑀕𑀫𑁆𑀫 𑀖𑀝𑁆𑀝𑁂𑀢𑀺, 𑀲𑀤𑁆𑀤𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀇𑀫𑁂 𑀲𑀢𑁆𑀢𑀸𑀧𑀺 𑀏𑀓𑁂𑀓𑀸 ¶ 𑀦 𑀖𑀝𑁆𑀝𑁂𑀦𑁆𑀢𑀺 𑀦 𑀯𑀺𑀯𑀤𑀦𑁆𑀢𑀺, 𑀤𑁆𑀯𑁂 𑀢𑀬𑁄 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀦𑁆𑀢𑀺, 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀅𑀳𑀁 𑀧𑀦 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑁂𑀲𑀼 𑀤𑁆𑀯𑀻𑀲𑀼 𑀭𑀚𑁆𑀚𑁂𑀲𑀼 𑀭𑀝𑁆𑀞𑀯𑀸𑀲𑀺𑀦𑁄 𑀯𑀺𑀘𑀸𑀭𑁂𑀫𑀺, 𑀫𑀬𑀸𑀧𑀺 𑀏𑀓𑀯𑀮𑀬𑀲𑀤𑀺𑀲𑁂𑀦 𑀳𑀼𑀢𑁆𑀯𑀸 𑀧𑀭𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀯𑀺𑀘𑀸𑀭𑁂𑀦𑁆𑀢𑁂𑀦 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀗𑁆𑀖𑀝𑁆𑀝𑀦𑀯𑀮𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀦𑀕𑀭𑁂 𑀦𑀺𑀫𑀺 𑀦𑀸𑀫 𑀭𑀸𑀚𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀯𑀺𑀯𑀝𑀲𑀻𑀳𑀧𑀜𑁆𑀚𑀭𑁂𑀦 𑀅𑀦𑁆𑀢𑀭𑀯𑀻𑀣𑀺𑀁 𑀧𑁂𑀓𑁆𑀔𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣𑁂𑀓𑁄 𑀲𑁂𑀦𑁄 𑀲𑀽𑀦𑀸𑀧𑀡𑀢𑁄 𑀫𑀁𑀲𑀧𑁂𑀲𑀺𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑀫𑁂𑀦𑀁 𑀇𑀢𑁄 𑀘𑀺𑀢𑁄 𑀘 𑀕𑀺𑀚𑁆𑀛𑀸𑀤𑀬𑁄 𑀲𑀓𑀼𑀡𑀸 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀳𑀸𑀭𑀳𑁂𑀢𑀼 𑀢𑀼𑀡𑁆𑀟𑁂𑀦 𑀯𑀺𑀚𑁆𑀛𑀦𑁆𑀢𑀸 𑀧𑀓𑁆𑀔𑁂𑀳𑀺 𑀧𑀳𑀭𑀦𑁆𑀢𑀸 𑀧𑀸𑀤𑁂𑀳𑀺 𑀫𑀤𑁆𑀤𑀦𑁆𑀢𑀸 𑀅𑀕𑀫𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀯𑀥𑀁 𑀅𑀲𑀳𑀫𑀸𑀦𑁄 𑀢𑀁 𑀫𑀁𑀲𑀁 𑀙𑀟𑁆𑀟𑁂𑀲𑀺. 𑀅𑀜𑁆𑀜𑁄 𑀕𑀡𑁆𑀳𑀺, 𑀲𑀓𑀼𑀡𑀸 𑀇𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀢𑁂𑀦𑀧𑀺 𑀯𑀺𑀲𑁆𑀲𑀝𑁆𑀞𑀁 𑀅𑀜𑁆𑀜𑁄 𑀅𑀕𑁆𑀕𑀳𑁂𑀲𑀺, 𑀢𑀫𑁆𑀧𑀺 𑀢𑀣𑁂𑀯 𑀯𑀺𑀳𑁂𑀞𑁂𑀲𑀼𑀁. 𑀭𑀸𑀚𑀸 𑀢𑁂 𑀲𑀓𑀼𑀡𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀬𑁄 𑀬𑁄 𑀫𑀁𑀲𑀧𑁂𑀲𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀤𑀼𑀓𑁆𑀔𑀁, 𑀬𑁄 𑀬𑁄 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀲𑀼𑀔𑀁, 𑀇𑀫𑁂𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀬𑁄 𑀬𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀤𑀼𑀓𑁆𑀔𑀁, 𑀇𑀢𑀭𑀲𑁆𑀲 𑀲𑀼𑀔𑀁, 𑀇𑀫𑁂 𑀳𑀺 𑀩𑀳𑀽𑀦𑀁 𑀲𑀸𑀥𑀸𑀭𑀡𑀸, 𑀫𑀬𑁆𑀳𑀁 𑀔𑁄 𑀧𑀦 𑀲𑁄𑀴𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀫𑀬𑀸 𑀯𑀺𑀲𑁆𑀲𑀝𑁆𑀞𑀫𑀁𑀲𑀧𑀺𑀡𑁆𑀟𑁂𑀦 𑀯𑀺𑀬 𑀲𑁂𑀦𑁂𑀦 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀳𑀸𑀬 𑀲𑀼𑀔𑀺𑀢𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀬𑀣𑀸𑀞𑀺𑀢𑁄𑀯 ¶ ¶ 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀉𑀢𑁆𑀢𑀭𑀧𑀜𑁆𑀘𑀸𑀮𑀭𑀝𑁆𑀞𑁂 𑀓𑀧𑀺𑀮𑀦𑀕𑀭𑁂 𑀤𑀼𑀫𑁆𑀫𑀼𑀔𑁄 𑀦𑀸𑀫 𑀭𑀸𑀚𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀯𑀺𑀯𑀝𑀲𑀻𑀳𑀧𑀜𑁆𑀚𑀭𑁂 𑀭𑀸𑀚𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑁄𑀧𑀸𑀮𑀓𑀸 𑀯𑀚𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼, 𑀉𑀲𑀪𑀸 𑀯𑀚𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀏𑀓𑀁 𑀕𑀸𑀯𑀺𑀁 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀢𑀢𑁆𑀣𑁂𑀓𑁄 𑀢𑀺𑀔𑀺𑀡𑀲𑀺𑀗𑁆𑀕𑁄 𑀫𑀳𑀸𑀉𑀲𑀪𑁄 𑀅𑀜𑁆𑀜𑀁 𑀉𑀲𑀪𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀓𑀺𑀮𑁂𑀲𑀫𑀘𑁆𑀙𑁂𑀭𑀸𑀪𑀺𑀪𑀽𑀢𑁄 𑀢𑀺𑀔𑀺𑀡𑁂𑀦 𑀲𑀺𑀗𑁆𑀕𑁂𑀦 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀳𑀭𑀺. 𑀢𑀲𑁆𑀲 𑀧𑀳𑀸𑀭𑀫𑀼𑀔𑁂𑀦 𑀅𑀦𑁆𑀢𑀸𑀦𑀺 𑀦𑀺𑀓𑁆𑀔𑀫𑀺𑀁𑀲𑀼, 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀭𑀸𑀚𑀸 𑀢𑀁 ¶ 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀲𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀕𑀢𑁂 𑀆𑀤𑀺𑀁 𑀓𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺, 𑀅𑀬𑀁 𑀉𑀲𑀪𑁄 𑀓𑀺𑀮𑁂𑀲𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀓𑀺𑀮𑁂𑀲𑁂𑀳𑁂𑀯 𑀓𑀫𑁆𑀧𑀦𑁆𑀢𑀺, 𑀫𑀬𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀓𑀫𑁆𑀧𑀦𑀓𑀺𑀮𑁂𑀲𑁂 𑀧𑀳𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀞𑀺𑀢𑀓𑁄𑀯 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀣𑁂𑀓𑀤𑀺𑀯𑀲𑀁 𑀘𑀢𑁆𑀢𑀸𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀸 𑀦𑀺𑀓𑁆𑀔𑀫𑁆𑀫 𑀅𑀦𑁄𑀢𑀢𑁆𑀢𑀤𑀳𑁂 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀸 𑀫𑀦𑁄𑀲𑀺𑀮𑀸𑀢𑀮𑁂 𑀞𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀯𑀮𑀸𑀳𑀓𑁂 𑀫𑀤𑁆𑀤𑀫𑀸𑀦𑀸 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀤𑁆𑀯𑀸𑀭𑀕𑀸𑀫𑀓𑀲𑁆𑀲 𑀅𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀨𑀸𑀲𑀼𑀓𑀝𑁆𑀞𑀸𑀦𑁂 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀭𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀗𑁆𑀖𑀢𑁆𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀯𑁄 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄, 𑀓𑀺𑀁 𑀦𑀼 𑀔𑁄 𑀆𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 ¶ 𑀢𑀼𑀫𑁆𑀳𑁂 𑀇𑀫𑀁 𑀪𑀺𑀓𑁆𑀔𑀸𑀘𑀭𑀺𑀬𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀬𑀣𑀸 𑀘 𑀲𑀗𑁆𑀖𑀢𑁆𑀣𑁂𑀭𑀁, 𑀏𑀯𑀁 𑀲𑁂𑀲𑁂𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 ‘‘𑀅𑀳𑀁 𑀅𑀲𑀼𑀓𑀦𑀕𑀭𑁂 𑀅𑀲𑀼𑀓𑀭𑀝𑁆𑀞𑁂 𑀅𑀲𑀼𑀓𑀭𑀸𑀚𑀸 𑀦𑀸𑀫 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀪𑀺𑀦𑀺𑀓𑁆𑀔𑀫𑀦𑀯𑀢𑁆𑀣𑀽𑀦𑀺 𑀓𑀣𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀏𑀓𑁂𑀓𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁯𑁦.

‘‘𑀅𑀫𑁆𑀩𑀸𑀳𑀫𑀤𑁆𑀤𑀁 𑀯𑀦𑀫𑀦𑁆𑀢𑀭𑀲𑁆𑀫𑀺𑀁, 𑀦𑀺𑀮𑁄𑀪𑀸𑀲𑀁 𑀨𑀮𑀺𑀢𑀁 𑀲𑀁𑀯𑀺𑀭𑀽𑀴𑁆𑀳𑀁;

𑀢𑀫𑀤𑁆𑀤𑀲𑀁 𑀨𑀮𑀳𑁂𑀢𑀼 𑀯𑀺𑀪𑀕𑁆𑀕𑀁, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁧.

‘‘𑀲𑁂𑀮𑀁 ¶ 𑀲𑀼𑀫𑀝𑁆𑀞𑀁 𑀦𑀭𑀯𑀻𑀭𑀦𑀺𑀝𑁆𑀞𑀺𑀢𑀁, 𑀦𑀸𑀭𑀻 𑀬𑀼𑀕𑀁 𑀥𑀸𑀭𑀬𑀺 𑀅𑀧𑁆𑀧𑀲𑀤𑁆𑀤𑀁;

𑀤𑀼𑀢𑀺𑀬𑀜𑁆𑀘 𑀆𑀕𑀫𑁆𑀫 𑀅𑀳𑁄𑀲𑀺 𑀲𑀤𑁆𑀤𑁄, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁨.

‘‘𑀤𑀺𑀚𑀸 ¶ 𑀤𑀺𑀚𑀁 𑀓𑀼𑀡𑀧𑀫𑀸𑀳𑀭𑀦𑁆𑀢𑀁, 𑀏𑀓𑀁 𑀲𑀫𑀸𑀦𑀁 𑀩𑀳𑀼𑀓𑀸 𑀲𑀫𑁂𑀘𑁆𑀘;

𑀆𑀳𑀸𑀭𑀳𑁂𑀢𑀽 𑀧𑀭𑀺𑀧𑀸𑀢𑀬𑀺𑀁𑀲𑀼, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁩.

‘‘𑀉𑀲𑀪𑀸𑀳𑀫𑀤𑁆𑀤𑀁 𑀬𑀽𑀣𑀲𑁆𑀲 𑀫𑀚𑁆𑀛𑁂, 𑀘𑀮𑀓𑁆𑀓𑀓𑀼𑀁 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀁;

𑀢𑀫𑀤𑁆𑀤𑀲𑀁 𑀓𑀸𑀫𑀳𑁂𑀢𑀼 𑀯𑀺𑀢𑀼𑀦𑁆𑀦𑀁, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀻’’𑀢𑀺.

𑀢𑀢𑁆𑀣 𑀅𑀫𑁆𑀩𑀸𑀳𑀫𑀤𑁆𑀤𑀦𑁆𑀢𑀺 𑀅𑀫𑁆𑀩𑀭𑀼𑀓𑁆𑀔𑀁 𑀅𑀳𑀁 𑀅𑀤𑁆𑀤𑀲𑀁. 𑀯𑀦𑀫𑀦𑁆𑀢𑀭𑀲𑁆𑀫𑀺𑀦𑁆𑀢𑀺 𑀯𑀦𑀅𑀦𑁆𑀢𑀭𑁂, 𑀅𑀫𑁆𑀩𑀯𑀦𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀲𑀁𑀯𑀺𑀭𑀽𑀴𑁆𑀳𑀦𑁆𑀢𑀺 𑀲𑀼𑀯𑀟𑁆𑀠𑀺𑀢𑀁. 𑀢𑀫𑀤𑁆𑀤𑀲𑀦𑁆𑀢𑀺 𑀢𑀁 𑀉𑀬𑁆𑀬𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑁄 𑀨𑀮𑀳𑁂𑀢𑀼 𑀯𑀺𑀪𑀕𑁆𑀕𑀁 𑀧𑀼𑀦 𑀅𑀤𑁆𑀤𑀲𑀁. 𑀢𑀁 𑀤𑀺𑀲𑁆𑀯𑀸𑀢𑀺 𑀢𑀁 𑀨𑀮𑀳𑁂𑀢𑀼 𑀯𑀺𑀪𑀕𑁆𑀕𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀇𑀫𑀁 𑀪𑀺𑀓𑁆𑀔𑀸𑀘𑀭𑀺𑀬𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁄𑀲𑁆𑀫𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀻𑀢𑀺. 𑀇𑀤𑀁 𑀲𑁄 𑀨𑀮𑀳𑁂𑀢𑀼 𑀯𑀺𑀪𑀕𑁆𑀕𑀁 𑀅𑀫𑁆𑀩𑀭𑀼𑀓𑁆𑀔𑀁 𑀤𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀘𑀺𑀢𑁆𑀢𑀸𑀘𑀸𑀭𑀁 𑀓𑀣𑁂𑀲𑀺. 𑀲𑁂𑀲𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀲𑁂𑀮𑀦𑁆𑀢𑀺 𑀫𑀡𑀺𑀯𑀮𑀬𑀁. 𑀦𑀭𑀯𑀻𑀭𑀦𑀺𑀝𑁆𑀞𑀺𑀢𑀦𑁆𑀢𑀺 𑀯𑀻𑀭𑀦𑀭𑁂𑀳𑀺 𑀦𑀺𑀝𑁆𑀞𑀺𑀢𑀁, 𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀳𑀺 ¶ 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀼𑀕𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀏𑀓𑁂𑀓𑀁 𑀓𑀢𑁆𑀯𑀸 𑀏𑀓𑀁 𑀯𑀮𑀬𑀬𑀼𑀕𑀴𑀁. 𑀤𑀺𑀚𑀸 𑀤𑀺𑀚𑀦𑁆𑀢𑀺 𑀕𑀳𑀺𑀢𑀫𑀁𑀲𑀧𑀺𑀡𑁆𑀟𑀁 𑀤𑀺𑀚𑀁 𑀅𑀯𑀲𑁂𑀲𑀤𑀺𑀚𑀸. 𑀓𑀼𑀡𑀧𑀫𑀸𑀳𑀭𑀦𑁆𑀢𑀦𑁆𑀢𑀺 𑀫𑀁𑀲𑀧𑀺𑀡𑁆𑀟𑀁 𑀆𑀤𑀸𑀬 𑀆𑀳𑀭𑀦𑁆𑀢𑀁. 𑀲𑀫𑁂𑀘𑁆𑀘𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀧𑀭𑀺𑀧𑀸𑀢𑀬𑀺𑀁𑀲𑀽𑀢𑀺 𑀓𑁄𑀝𑁆𑀝𑁂𑀦𑁆𑀢𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀉𑀲𑀪𑀸𑀳𑀫𑀤𑁆𑀤𑀦𑁆𑀢𑀺 𑀉𑀲𑀪𑀁 𑀅𑀳𑀁 𑀅𑀤𑁆𑀤𑀲𑀁. 𑀘𑀮𑀓𑁆𑀓𑀓𑀼𑀦𑁆𑀢𑀺 𑀘𑀮𑀓𑁆𑀓𑀓𑀼𑀥𑀁.

𑀩𑁄𑀥𑀺𑀲𑀢𑁆𑀢𑁄 𑀏𑀓𑁂𑀓𑀁 𑀕𑀸𑀣𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑁂𑀯 𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀭𑀽𑀧’’𑀦𑁆𑀢𑀺 𑀏𑀓𑁂𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀣𑀼𑀢𑀺𑀁 𑀅𑀓𑀸𑀲𑀺. 𑀢𑀜𑁆𑀘 𑀧𑀦 𑀘𑀢𑀽𑀳𑀺 𑀚𑀦𑁂𑀳𑀺 𑀤𑁂𑀲𑀺𑀢𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀖𑀭𑀸𑀯𑀸𑀲𑁂 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀧𑀓𑁆𑀓𑀦𑁆𑀢𑁂𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀼𑀔𑀦𑀺𑀲𑀺𑀦𑁆𑀦𑁄 𑀪𑀭𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀏𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀸 𑀅𑀧𑀮𑀺𑀩𑁄𑀥𑀸 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀅𑀳𑀁 𑀧𑀦 𑀪𑀢𑀺𑀬𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀢𑁆𑀯𑀁 𑀧𑀼𑀢𑁆𑀢𑀓𑁂 𑀲𑀗𑁆𑀕𑀡𑁆𑀳𑀦𑁆𑀢𑀻 𑀕𑁂𑀳𑁂 𑀯𑀲𑀸’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁪.

‘‘𑀓𑀭𑀡𑁆𑀟𑀓𑁄 ¶ ¶ 𑀓𑀮𑀺𑀗𑁆𑀕𑀸𑀦𑀁, 𑀕𑀦𑁆𑀥𑀸𑀭𑀸𑀦𑀜𑁆𑀘 𑀦𑀕𑁆𑀕𑀚𑀺;

𑀦𑀺𑀫𑀺𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀧𑀜𑁆𑀘𑀸𑀮𑀸𑀦𑀜𑁆𑀘 𑀤𑀼𑀫𑁆𑀫𑀼𑀔𑁄;

𑀏𑀢𑁂 𑀭𑀝𑁆𑀞𑀸𑀦𑀺 𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁𑀲𑀼 𑀅𑀓𑀺𑀜𑁆𑀘𑀦𑀸.

𑁯𑁫.

‘‘𑀲𑀩𑁆𑀩𑁂𑀧𑀺𑀫𑁂 𑀤𑁂𑀯𑀲𑀫𑀸 𑀲𑀫𑀸𑀕𑀢𑀸, 𑀅𑀕𑁆𑀕𑀻 𑀬𑀣𑀸 𑀧𑀚𑁆𑀚𑀮𑀺𑀢𑁄 𑀢𑀣𑁂𑀯𑀺𑀫𑁂;

𑀅𑀳𑀫𑁆𑀧𑀺 𑀏𑀓𑁄 𑀘𑀭𑀺𑀲𑁆𑀲𑀸𑀫𑀺 𑀪𑀕𑁆𑀕𑀯𑀺, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀻’’𑀢𑀺.

𑀢𑀸𑀲𑀁 𑀅𑀢𑁆𑀣𑁄 𑁋 𑀪𑀤𑁆𑀤𑁂, 𑀏𑀲 𑀲𑀗𑁆𑀖𑀢𑁆𑀣𑁂𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀤𑀦𑁆𑀢𑀧𑀼𑀭𑁂 𑀦𑀸𑀫 𑀦𑀕𑀭𑁂 𑀓𑀭𑀡𑁆𑀟𑀓𑁄 𑀦𑀸𑀫 𑀓𑀮𑀺𑀗𑁆𑀕𑀸𑀦𑀁 𑀚𑀦𑀧𑀤𑀲𑁆𑀲 𑀭𑀸𑀚𑀸, 𑀤𑀼𑀢𑀺𑀬𑁄 𑀢𑀓𑁆𑀓𑀲𑀺𑀮𑀦𑀕𑀭𑁂 𑀦𑀕𑁆𑀕𑀚𑀺 𑀦𑀸𑀫 𑀕𑀦𑁆𑀥𑀸𑀭𑀸𑀦𑀁 𑀚𑀦𑀧𑀤𑀲𑁆𑀲 𑀭𑀸𑀚𑀸, 𑀢𑀢𑀺𑀬𑁄 𑀫𑀺𑀣𑀺𑀮𑀦𑀕𑀭𑁂 𑀦𑀺𑀫𑀺 𑀦𑀸𑀫 𑀯𑀺𑀤𑁂𑀳𑀸𑀦𑀁 𑀚𑀦𑀧𑀤𑀲𑁆𑀲 𑀭𑀸𑀚𑀸, 𑀘𑀢𑀼𑀢𑁆𑀣𑁄 𑀓𑀧𑀺𑀮𑀦𑀕𑀭𑁂 𑀤𑀼𑀫𑁆𑀫𑀼𑀔𑁄 𑀦𑀸𑀫 𑀉𑀢𑁆𑀢𑀭𑀧𑀜𑁆𑀘𑀸𑀮𑀸𑀦𑀁 𑀚𑀦𑀧𑀤𑀲𑁆𑀲 𑀭𑀸𑀚𑀸, 𑀏𑀢𑁂 𑀏𑀯𑀭𑀽𑀧𑀸𑀦𑀺 𑀭𑀝𑁆𑀞𑀸𑀦𑀺 𑀳𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀸 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀲𑀩𑁆𑀩𑁂𑀧𑀺𑀫𑁂𑀢𑀺 𑀇𑀫𑁂 𑀧𑀦 𑀲𑀩𑁆𑀩𑁂𑀧𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑁂𑀳𑀺 𑀧𑀼𑀭𑀺𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑀸𑀦𑀸 𑀏𑀓𑀢𑁄 𑀲𑀫𑀸𑀕𑀢𑀸. 𑀅𑀕𑁆𑀕𑀻 𑀬𑀣𑀸𑀢𑀺 𑀬𑀣𑀸 𑀳𑀺 𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀑𑀪𑀸𑀲𑀢𑀺. 𑀢𑀣𑁂𑀯𑀺𑀫𑁂𑀢𑀺 𑀇𑀫𑁂𑀧𑀺 𑀢𑀣𑁂𑀯 ¶ 𑀲𑀻𑀮𑀸𑀤𑀻𑀳𑀺 𑀧𑀜𑁆𑀘𑀳𑀺 𑀕𑀼𑀡𑁂𑀳𑀺 𑀑𑀪𑀸𑀲𑀦𑁆𑀢𑀺. 𑀬𑀣𑀸 𑀏𑀢𑁂, 𑀢𑀣𑀸 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑁄 𑀘𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀪𑀕𑁆𑀕𑀯𑀻𑀢𑀺 𑀪𑀭𑀺𑀬𑀁 𑀆𑀮𑀧𑀢𑀺. 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀻𑀢𑀺 𑀭𑀽𑀧𑀸𑀤𑀬𑁄 𑀯𑀢𑁆𑀣𑀼𑀓𑀸𑀫𑁂 𑀳𑀺𑀢𑁆𑀯𑀸. 𑀬𑀣𑁄𑀥𑀺𑀓𑀸𑀦𑀻𑀢𑀺 𑀅𑀢𑁆𑀢𑀦𑁄 𑀑𑀥𑀺𑀯𑀲𑁂𑀦 𑀞𑀺𑀢𑀸𑀦𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀭𑀽𑀧𑀸𑀤𑀺𑀑𑀥𑀺𑀯𑀲𑁂𑀦 𑀬𑀣𑀸𑀞𑀺𑀢𑁂 𑀓𑀸𑀫𑁂 𑀧𑀳𑀸𑀬 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑁄 𑀘𑀭𑀺𑀲𑁆𑀲𑀸𑀫𑀻𑀢𑀺. ‘‘𑀬𑀢𑁄𑀥𑀺𑀓𑀸𑀦𑀻’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀬𑀢𑁄 𑀉𑀧𑀭𑀢𑁄 𑀑𑀥𑀺 𑀏𑀢𑁂𑀲𑀦𑁆𑀢𑀺 𑀬𑀢𑁄𑀥𑀺𑀓𑀸𑀦𑀺, 𑀉𑀧𑀭𑀢𑀓𑁄𑀝𑁆𑀞𑀸𑀲𑀸𑀦𑀺. 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀓𑀺𑀮𑁂𑀲𑀓𑀸𑀫𑀸𑀦𑀁 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀉𑀧𑀭𑀢𑁄 𑀦𑀸𑀫 𑀳𑁄𑀢𑀺 𑀦𑀺𑀭𑀼𑀤𑁆𑀥𑁄, 𑀢𑀲𑁆𑀲 𑀯𑀢𑁆𑀣𑀼𑀪𑀽𑀢𑁄 𑀓𑀸𑀫𑀓𑁄𑀝𑁆𑀞𑀸𑀲𑁄𑀧𑀺 𑀉𑀧𑀭𑀢𑁄𑀯 𑀳𑁄𑀢𑀻𑀢𑀺.

𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀬𑁆𑀳𑀫𑁆𑀧𑀺 𑀔𑁄 𑀲𑀸𑀫𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀓𑀣𑀁 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀕𑀸𑀭𑁂 𑀘𑀺𑀢𑁆𑀢𑀁 𑀦 𑀲𑀡𑁆𑀞𑀸𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁬.

‘‘𑀅𑀬𑀫𑁂𑀯 ¶ 𑀓𑀸𑀮𑁄 𑀦 𑀳𑀺 𑀅𑀜𑁆𑀜𑁄 𑀅𑀢𑁆𑀣𑀺, 𑀅𑀦𑀼𑀲𑀸𑀲𑀺𑀢𑀸 𑀫𑁂 𑀦 𑀪𑀯𑁂𑀬𑁆𑀬 𑀧𑀘𑁆𑀙𑀸;

𑀅𑀳𑀫𑁆𑀧𑀺 𑀏𑀓𑀸 𑀘𑀭𑀺𑀲𑁆𑀲𑀸𑀫𑀺 𑀪𑀕𑁆𑀕𑀯, 𑀲𑀓𑀼𑀡𑀻𑀯 𑀫𑀼𑀢𑁆𑀢𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀸’’𑀢𑀺.

𑀢𑀢𑁆𑀣 𑀅𑀦𑀼𑀲𑀸𑀲𑀺𑀢𑀸 𑀫𑁂 𑀦 𑀪𑀯𑁂𑀬𑁆𑀬 𑀧𑀘𑁆𑀙𑀸𑀢𑀺 𑀅𑀦𑀼𑀲𑀸𑀲𑀓𑁄 𑀑𑀯𑀸𑀤𑀓𑁄 𑀦 𑀪𑀯𑁂𑀬𑁆𑀬 𑀤𑀼𑀮𑁆𑀮𑀪𑀢𑁆𑀢𑀸 𑀑𑀯𑀸𑀤𑀓𑀸𑀦𑀁, 𑀢𑀲𑁆𑀫𑀸 𑀅𑀬𑀫𑁂𑀯 𑀧𑀩𑁆𑀩𑀚𑀺𑀢𑀼𑀁 𑀓𑀸𑀮𑁄, 𑀦 𑀳𑀺 𑀅𑀜𑁆𑀜𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀼𑀡𑀻𑀯 𑀫𑀼𑀢𑁆𑀢𑀸𑀢𑀺 𑀬𑀣𑀸 𑀲𑀸𑀓𑀼𑀡𑀺𑀓𑁂𑀦 𑀕𑀳𑁂𑀢𑁆𑀯𑀸 𑀲𑀓𑀼𑀡𑀧𑀘𑁆𑀙𑀺𑀬𑀁 𑀔𑀺𑀢𑁆𑀢𑀸𑀲𑀼 𑀲𑀓𑀼𑀡𑀻𑀲𑀼 𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀸 𑀏𑀓𑀸 𑀲𑀓𑀼𑀡𑀻 ¶ 𑀅𑀦𑀺𑀮𑀧𑀣𑀁 𑀮𑀗𑁆𑀖𑀬𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀺𑀓𑀸𑀯 𑀘𑀭𑁂𑀬𑁆𑀬, 𑀢𑀣𑀸 𑀅𑀳𑀫𑁆𑀧𑀺 𑀢𑀯 𑀳𑀢𑁆𑀣𑀢𑁄 𑀫𑀼𑀢𑁆𑀢𑀸 𑀏𑀓𑀺𑀓𑀸 𑀘𑀭𑀺𑀲𑁆𑀲𑀸𑀫𑀻𑀢𑀺 𑀲𑀬𑀫𑁆𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀯𑀫𑀸𑀳.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀸 𑀧𑀦 𑀩𑁄𑀥𑀺𑀲𑀢𑁆𑀢𑀁 𑀯𑀜𑁆𑀘𑁂𑀢𑁆𑀯𑀸 𑀧𑀼𑀭𑁂𑀢𑀭𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 ‘‘𑀲𑀸𑀫𑀺, 𑀧𑀸𑀦𑀻𑀬𑀢𑀺𑀢𑁆𑀣𑀁 𑀕𑀫𑀺𑀲𑁆𑀲𑀸𑀫𑀺, 𑀤𑀸𑀭𑀓𑁂 𑀑𑀮𑁄𑀓𑁂𑀳𑀻’’𑀢𑀺 𑀖𑀝𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀻 𑀯𑀺𑀬 𑀧𑀮𑀸𑀬𑀺𑀢𑁆𑀯𑀸 𑀦𑀕𑀭𑀲𑀸𑀫𑀦𑁆𑀢𑁂 𑀢𑀸𑀧𑀲𑀸𑀦𑀁 𑀲𑀦𑁆𑀢𑀺𑀓𑁂 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀅𑀦𑀸𑀕𑀫𑀦𑀁 𑀜𑀢𑁆𑀯𑀸 𑀲𑀬𑀁 𑀤𑀸𑀭𑀓𑁂 𑀧𑁄𑀲𑁂𑀲𑀺. 𑀅𑀧𑀭𑀪𑀸𑀕𑁂 𑀢𑁂𑀲𑀼 𑀣𑁄𑀓𑀁 𑀯𑀟𑁆𑀠𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀬𑀸𑀦𑀬𑀚𑀸𑀦𑀦𑀲𑀫𑀢𑁆𑀣𑀢𑀁 𑀲𑀫𑁆𑀧𑀢𑁆𑀢𑁂𑀲𑀼 𑀢𑁂𑀲𑀁 𑀯𑀻𑀫𑀁𑀲𑀦𑀢𑁆𑀣𑀁 𑀏𑀓𑀤𑀺𑀯𑀲𑀁 ¶ 𑀪𑀢𑁆𑀢𑀁 𑀧𑀘𑀦𑁆𑀢𑁄 𑀣𑁄𑀓𑀁 𑀉𑀢𑁆𑀢𑀡𑁆𑀟𑀼𑀮𑀁 𑀧𑀘𑀺, 𑀏𑀓𑀤𑀺𑀯𑀲𑀁 𑀣𑁄𑀓𑀁 𑀓𑀺𑀮𑀺𑀦𑁆𑀦𑀁, 𑀏𑀓𑀤𑀺𑀯𑀲𑀁 𑀲𑀼𑀧𑀓𑁆𑀓𑀁, 𑀏𑀓𑀤𑀺𑀯𑀲𑀁 𑀅𑀢𑀺𑀓𑀺𑀮𑀺𑀦𑁆𑀦𑀁, 𑀏𑀓𑀤𑀺𑀯𑀲𑀁 𑀅𑀮𑁄𑀡𑀓𑀁, 𑀏𑀓𑀤𑀺𑀯𑀲𑀁 𑀅𑀢𑀺𑀮𑁄𑀡𑀓𑀁. 𑀤𑀸𑀭𑀓𑀸 ‘‘𑀢𑀸𑀢, 𑀅𑀚𑁆𑀚 𑀪𑀢𑁆𑀢𑀁 𑀉𑀢𑁆𑀢𑀡𑁆𑀟𑀼𑀮𑀁, 𑀅𑀚𑁆𑀚 𑀓𑀺𑀮𑀺𑀦𑁆𑀦𑀁, 𑀅𑀚𑁆𑀚 𑀲𑀼𑀧𑀓𑁆𑀓𑀁, 𑀅𑀚𑁆𑀚 𑀅𑀢𑀺𑀓𑀺𑀮𑀺𑀦𑁆𑀦𑀁, 𑀅𑀚𑁆𑀚 𑀅𑀮𑁄𑀡𑀓𑀁, 𑀅𑀚𑁆𑀚 𑀅𑀢𑀺𑀮𑁄𑀡𑀓’’𑀦𑁆𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀫, 𑀢𑀸𑀢𑀸’’𑀢𑀺 𑀯𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀤𑀸𑀭𑀓𑀸 𑀇𑀤𑀸𑀦𑀺 𑀆𑀫𑀧𑀓𑁆𑀓𑀮𑁄𑀡𑀺𑀓𑀅𑀢𑀺𑀮𑁄𑀡𑀺𑀓𑀸𑀦𑀺 𑀚𑀸𑀦𑀦𑁆𑀢𑀺, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀚𑀻𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀫𑀬𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀢𑁂 𑀤𑀸𑀭𑀓𑁂 𑀜𑀸𑀢𑀓𑀸𑀦𑀁 𑀤𑀢𑁆𑀯𑀸 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸, 𑀇𑀫𑁂 𑀤𑀸𑀭𑀓𑁂 𑀲𑀸𑀥𑀼𑀓𑀁 𑀧𑁄𑀲𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑁄 𑀜𑀸𑀢𑀓𑀸𑀦𑀁 𑀧𑀭𑀺𑀤𑁂𑀯𑀦𑁆𑀢𑀸𑀦𑀜𑁆𑀜𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦𑀕𑀭𑀲𑁆𑀲 𑀲𑀸𑀫𑀦𑁆𑀢𑁂𑀬𑁂𑀯 𑀯𑀲𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀬𑀁 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀸 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀬𑁆𑀬, 𑀤𑀸𑀭𑀓𑀸 𑀢𑁂 𑀦𑀸𑀲𑀺𑀢𑀸 𑀫𑀜𑁆𑀜𑁂’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 ‘‘𑀦𑀸𑀳𑀁 𑀤𑀸𑀭𑀓𑁂 𑀦𑀸𑀲𑁂𑀫𑀺, 𑀢𑁂𑀲𑀁 𑀅𑀢𑁆𑀢𑀦𑁄 𑀅𑀬𑀸𑀦𑀬𑀚𑀸𑀦𑀦𑀓𑀸𑀮𑁂 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 ¶ , 𑀢𑁆𑀯𑀁 𑀢𑁂𑀲𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀅𑀪𑀺𑀭𑀫𑀸’’𑀢𑀺 𑀯𑀢𑁆𑀯𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁯𑁭.

‘‘𑀆𑀫𑀁 𑀧𑀓𑁆𑀓𑀜𑁆𑀘 𑀚𑀸𑀦𑀦𑁆𑀢𑀺, 𑀅𑀣𑁄 𑀮𑁄𑀡𑀁 𑀅𑀮𑁄𑀡𑀓𑀁;

𑀢𑀫𑀳𑀁 𑀤𑀺𑀲𑁆𑀯𑀸𑀦 𑀧𑀩𑁆𑀩𑀚𑀺𑀁, 𑀘𑀭𑁂𑀯 𑀢𑁆𑀯𑀁 𑀘𑀭𑀸𑀫𑀳’’𑀦𑁆𑀢𑀺.

𑀢𑀢𑁆𑀣 𑀢𑀫𑀳𑀦𑁆𑀢𑀺 𑀢𑀁 𑀅𑀳𑀁 𑀤𑀸𑀭𑀓𑀸𑀦𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀘𑀭𑁂𑀯 𑀢𑁆𑀯𑀁 𑀘𑀭𑀸𑀫𑀳𑀦𑁆𑀢𑀺 𑀢𑁆𑀯𑀫𑁆𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀫𑁂𑀯 𑀘𑀭, 𑀅𑀳𑀫𑁆𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀫𑁂𑀯 𑀘𑀭𑀺𑀲𑁆𑀲𑀸𑀫𑀻𑀢𑀺.

𑀇𑀢𑀺 𑀲𑁄 𑀧𑀭𑀺𑀩𑁆𑀩𑀸𑀚𑀺𑀓𑀁 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀸𑀧𑀺 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀬𑀣𑀸𑀭𑀼𑀘𑀺𑀢𑀁 𑀞𑀸𑀦𑀁 𑀕𑀢𑀸. 𑀞𑀧𑁂𑀢𑁆𑀯𑀸 𑀓𑀺𑀭 𑀢𑀁 𑀤𑀺𑀯𑀲𑀁 𑀦 𑀢𑁂 𑀧𑀼𑀦 𑀅𑀜𑁆𑀜𑀫𑀜𑁆𑀜𑀁 𑀅𑀤𑁆𑀤𑀲𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀘 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑁄, 𑀧𑀭𑀺𑀩𑁆𑀩𑀸𑀚𑀺𑀓𑀸 𑀭𑀸𑀳𑀼𑀮𑀫𑀸𑀢𑀸, 𑀧𑀭𑀺𑀩𑁆𑀩𑀸𑀚𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀼𑀫𑁆𑀪𑀓𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁦𑁯] 𑁪. 𑀤𑀴𑁆𑀳𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀁 𑀘𑁂 ¶ 𑀤𑀴𑁆𑀳𑀥𑀫𑁆𑀫𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀁 𑀦𑀺𑀲𑁆𑀲𑀸𑀬 𑀖𑁄𑀲𑀺𑀢𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀉𑀤𑁂𑀦𑀲𑁆𑀲 𑀭𑀜𑁆𑀜𑁄 𑀪𑀤𑁆𑀤𑀯𑀢𑀺𑀓𑀁 𑀳𑀢𑁆𑀣𑀺𑀦𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲𑀸 𑀧𑀦 𑀳𑀢𑁆𑀣𑀺𑀦𑀺𑀬𑀸 𑀮𑀤𑁆𑀥𑀯𑀺𑀥𑀸𑀦𑀜𑁆𑀘 𑀉𑀤𑁂𑀦𑀲𑁆𑀲 𑀭𑀸𑀚𑀯𑀁𑀲𑁄 𑀘 𑀫𑀸𑀢𑀗𑁆𑀕𑀚𑀸𑀢𑀓𑁂 (𑀚𑀸. 𑁧.𑁧𑁫.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀓𑀤𑀺𑀯𑀲𑀁 𑀧𑀦 𑀲𑀸 𑀳𑀢𑁆𑀣𑀺𑀦𑀻 𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑀻 𑀪𑀕𑀯𑀦𑁆𑀢𑀁 𑀧𑀸𑀢𑁄𑀯 𑀅𑀭𑀺𑀬𑀕𑀡𑀧𑀭𑀺𑀯𑀼𑀢𑀁 𑀅𑀦𑁄𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀪𑀕𑀯𑀸 𑀲𑀩𑁆𑀩𑀜𑁆𑀜𑀼 𑀲𑀩𑁆𑀩𑀮𑁄𑀓𑀦𑀺𑀢𑁆𑀣𑀭𑀡 𑀉𑀤𑁂𑀦𑁄 𑀯𑀁𑀲𑀭𑀸𑀚𑀸 𑀫𑀁 𑀢𑀭𑀼𑀡𑀓𑀸𑀮𑁂 𑀓𑀫𑁆𑀫𑀁 𑀦𑀺𑀢𑁆𑀣𑀭𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑁂 ‘𑀇𑀫𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀜𑁆𑀘 𑀭𑀚𑁆𑀚𑀜𑁆𑀘 𑀤𑁂𑀯𑀻 𑀘 𑀮𑀤𑁆𑀥𑀸’𑀢𑀺 𑀧𑀺𑀬𑀸𑀬𑀺𑀢𑁆𑀯𑀸 𑀫𑀳𑀦𑁆𑀢𑀁 𑀧𑀭𑀺𑀳𑀸𑀭𑀁 𑀅𑀤𑀸𑀲𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀁 ¶ 𑀕𑀦𑁆𑀥𑁂𑀦 𑀧𑀭𑀺𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀫𑀢𑁆𑀣𑀓𑁂 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀸 𑀘𑀺𑀢𑁆𑀭𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀤𑀻𑀧𑀁 𑀚𑀸𑀮𑀸𑀧𑁂𑀢𑁆𑀯𑀸 𑀥𑀽𑀫𑀢𑀝𑁆𑀝𑀓𑀁 𑀞𑀧𑀸𑀧𑁂𑀢𑁆𑀯𑀸 𑀓𑀭𑀻𑀲𑀙𑀟𑁆𑀟𑀦𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀓𑀝𑀸𑀳𑀁 𑀧𑀢𑀺𑀝𑁆𑀞𑀧𑀸𑀧𑁂𑀢𑁆𑀯𑀸 𑀫𑀁 𑀘𑀺𑀢𑁆𑀢𑀢𑁆𑀣𑀭𑀡𑀧𑀺𑀝𑁆𑀞𑁂 𑀞𑀧𑁂𑀲𑀺, 𑀭𑀸𑀚𑀸𑀭𑀳𑀜𑁆𑀘 𑀫𑁂 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀤𑀸𑀧𑁂𑀲𑀺. 𑀇𑀤𑀸𑀦𑀺 𑀧𑀦 𑀫𑁂 𑀫𑀳𑀮𑁆𑀮𑀓𑀓𑀸𑀮𑁂 𑀓𑀫𑁆𑀫𑀁 𑀦𑀺𑀢𑁆𑀣𑀭𑀺𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁂 𑀲𑀩𑁆𑀩𑀁 𑀢𑀁 𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺, 𑀅𑀦𑀸𑀣𑀸 𑀦𑀺𑀧𑁆𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀓𑁂𑀢𑀓𑀸𑀦𑀺 𑀔𑀸𑀤𑀦𑁆𑀢𑀻 𑀚𑀻𑀯𑀸𑀫𑀺, 𑀅𑀜𑁆𑀜𑀁 𑀫𑀬𑁆𑀳𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀉𑀤𑁂𑀦𑀁 𑀫𑀫 𑀕𑀼𑀡𑀁 𑀲𑀮𑁆𑀮𑀓𑁆𑀔𑀸𑀧𑁂𑀢𑁆𑀯𑀸 𑀧𑁄𑀭𑀸𑀡𑀓𑀧𑀭𑀺𑀳𑀸𑀭𑀁 𑀫𑁂 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀭𑁂𑀣 𑀪𑀕𑀯𑀸’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀢𑀣𑀸𑀕𑀢𑀁 𑀬𑀸𑀘𑀺.

𑀲𑀢𑁆𑀣𑀸 ‘‘𑀕𑀘𑁆𑀙 𑀢𑁆𑀯𑀁, 𑀅𑀳𑀁 𑀢𑁂 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀬𑀲𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀣𑀸𑀕𑀢𑀁 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀫𑀳𑀸𑀭𑀸𑀚, 𑀪𑀤𑁆𑀤𑀯𑀢𑀺𑀓𑀸 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀫𑀳𑀸𑀭𑀸𑀚, 𑀉𑀧𑀓𑀸𑀭𑀓𑀸𑀦𑀁 𑀬𑀲𑀁 𑀤𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 ¶ 𑀕𑀳𑁂𑀢𑀼𑀁 𑀦𑀸𑀫 𑀦 𑀯𑀝𑁆𑀝𑀢𑀺, 𑀓𑀢𑀜𑁆𑀜𑀼𑀦𑀸 𑀓𑀢𑀯𑁂𑀤𑀺𑀦𑀸 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀤𑁆𑀤𑀯𑀢𑀺𑀓𑀸 𑀇𑀤𑀸𑀦𑀺 𑀫𑀳𑀮𑁆𑀮𑀺𑀓𑀸 𑀚𑀭𑀸𑀚𑀺𑀡𑁆𑀡𑀸 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀓𑁂𑀢𑀓𑀸𑀦𑀺 𑀔𑀸𑀤𑀦𑁆𑀢𑀻 𑀚𑀻𑀯𑀢𑀺, 𑀢𑀁 𑀚𑀺𑀡𑁆𑀡𑀓𑀸𑀮𑁂 𑀅𑀦𑀸𑀣𑀁 𑀓𑀸𑀢𑀼𑀁 𑀢𑀼𑀫𑁆𑀳𑀸𑀓𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀪𑀤𑁆𑀤𑀯𑀢𑀺𑀓𑀸𑀬 𑀕𑀼𑀡𑀁 𑀓𑀣𑁂𑀢𑁆𑀯𑀸 ‘‘𑀲𑀩𑁆𑀩𑀁 𑀧𑁄𑀭𑀸𑀡𑀓𑀧𑀭𑀺𑀳𑀸𑀭𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀳𑀻’’𑀢𑀺 ¶ 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. ‘‘𑀢𑀣𑀸𑀕𑀢𑁂𑀦 𑀓𑀺𑀭 𑀪𑀤𑁆𑀤𑀯𑀢𑀺𑀓𑀸𑀬 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀧𑁄𑀭𑀸𑀡𑀓𑀬𑀲𑁄 𑀧𑀝𑀺𑀧𑀸𑀓𑀢𑀺𑀓𑁄 𑀓𑀸𑀭𑀺𑀢𑁄’’𑀢𑀺 𑀲𑀓𑀮𑀦𑀕𑀭𑀁 𑀧𑀢𑁆𑀣𑀭𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺 𑀲𑀸 𑀧𑀯𑀢𑁆𑀢𑀺 𑀧𑀸𑀓𑀝𑀸 𑀚𑀸𑀢𑀸. 𑀅𑀣 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸𑀭𑀸 𑀓𑀺𑀭 𑀪𑀤𑁆𑀤𑀯𑀢𑀺𑀓𑀸𑀬 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀧𑁄𑀭𑀸𑀡𑀓𑀬𑀲𑁄 𑀧𑀝𑀺𑀧𑀸𑀓𑀢𑀺𑀓𑁄 𑀓𑀸𑀭𑀺𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀏𑀢𑀺𑀲𑁆𑀲𑀸 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀦𑀝𑁆𑀞𑀬𑀲𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀤𑀴𑁆𑀳𑀥𑀫𑁆𑀫𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀁 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺. 𑀲𑁄 ¶ 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀫𑀳𑀦𑁆𑀢𑀁 𑀬𑀲𑀁 𑀮𑀪𑀺𑀢𑁆𑀯𑀸 𑀅𑀫𑀘𑁆𑀘𑀭𑀢𑀦𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀢𑀤𑀸 𑀢𑀲𑁆𑀲 𑀭𑀜𑁆𑀜𑁄 𑀏𑀓𑀸 𑀑𑀝𑁆𑀞𑀺𑀩𑁆𑀬𑀸𑀥𑀺 𑀳𑀢𑁆𑀣𑀺𑀦𑀻 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑀸 𑀫𑀳𑀩𑁆𑀩𑀮𑀸 𑀅𑀳𑁄𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀬𑁄𑀚𑀦𑀲𑀢𑀁 𑀕𑀘𑁆𑀙𑀢𑀺, 𑀭𑀜𑁆𑀜𑁄 𑀤𑀽𑀢𑁂𑀬𑁆𑀬𑀳𑀭𑀡𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀲𑀗𑁆𑀕𑀸𑀫𑁂 𑀬𑀼𑀤𑁆𑀥𑀁 𑀓𑀢𑁆𑀯𑀸 𑀲𑀢𑁆𑀢𑀼 𑀫𑀤𑁆𑀤𑀦𑀁 𑀓𑀭𑁄𑀢𑀺. 𑀭𑀸𑀚𑀸 ‘‘𑀅𑀬𑀁 𑀫𑁂 𑀩𑀳𑀽𑀧𑀓𑀸𑀭𑀸’’𑀢𑀺 𑀢𑀲𑁆𑀲𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀤𑀢𑁆𑀯𑀸 𑀉𑀤𑁂𑀦𑁂𑀦 𑀪𑀤𑁆𑀤𑀯𑀢𑀺𑀓𑀸𑀬 𑀤𑀺𑀦𑁆𑀦𑀲𑀤𑀺𑀲𑀁 𑀲𑀩𑁆𑀩𑀁 𑀧𑀭𑀺𑀳𑀸𑀭𑀁 𑀤𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀚𑀺𑀡𑁆𑀡𑀤𑀼𑀩𑁆𑀩𑀮𑀓𑀸𑀮𑁂 𑀭𑀸𑀚𑀸 𑀲𑀩𑁆𑀩𑀁 𑀬𑀲𑀁 𑀕𑀡𑁆𑀳𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀢𑀺𑀡𑀧𑀡𑁆𑀡𑀸𑀦𑀺 𑀔𑀸𑀤𑀦𑁆𑀢𑀻 𑀚𑀻𑀯𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀓𑀼𑀮𑁂 𑀪𑀸𑀚𑀦𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀭𑀸𑀚𑀸 𑀓𑀼𑀫𑁆𑀪𑀓𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀸𑀚𑀦𑀸𑀦𑀺 𑀓𑀺𑀭 𑀦𑀧𑁆𑀧𑀳𑁄𑀦𑁆𑀢𑀻’’𑀢𑀺 𑀆𑀳. ‘‘𑀕𑁄𑀫𑀬𑀸𑀳𑀭𑀡𑀬𑀸𑀦𑀓𑁂 𑀬𑁄𑀚𑁂𑀢𑀼𑀁 𑀕𑁄𑀡𑁂 𑀦 𑀮𑀪𑀸𑀫𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀑𑀝𑁆𑀞𑀺𑀩𑁆𑀬𑀸𑀥𑀺 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀭𑀢𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀢𑀁 𑀬𑁄𑀚𑁂𑀢𑁆𑀯𑀸 𑀕𑁄𑀫𑀬𑀁 𑀆𑀳𑀭𑀸’’𑀢𑀺 𑀢𑀁 𑀓𑀼𑀫𑁆𑀪𑀓𑀸𑀭𑀲𑁆𑀲 𑀅𑀤𑀸𑀲𑀺. 𑀓𑀼𑀫𑁆𑀪𑀓𑀸𑀭𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀢𑀣𑀸 𑀅𑀓𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀸 𑀦𑀕𑀭𑀸 𑀦𑀺𑀓𑁆𑀔𑀫𑀫𑀸𑀦𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑀁 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 ‘‘𑀲𑀸𑀫𑀺, 𑀭𑀸𑀚𑀸 𑀫𑀁 ‘𑀢𑀭𑀼𑀡𑀓𑀸𑀮𑁂 𑀩𑀳𑀽𑀧𑀓𑀸𑀭𑀸’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 ¶ 𑀇𑀤𑀸𑀦𑀺 𑀫𑀳𑀮𑁆𑀮𑀓𑀓𑀸𑀮𑁂 𑀲𑀩𑁆𑀩𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀬𑀺 𑀘𑀺𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀅𑀳𑀁 𑀧𑀦 𑀅𑀦𑀸𑀣𑀸 𑀅𑀭𑀜𑁆𑀜𑁂 𑀢𑀺𑀡𑀧𑀡𑁆𑀡𑀸𑀦𑀺 𑀔𑀸𑀤𑀦𑁆𑀢𑀻 𑀚𑀻𑀯𑀸𑀫𑀺, 𑀏𑀯𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀫𑀁 𑀇𑀤𑀸𑀦𑀺 𑀬𑀸𑀦𑀓𑁂 𑀬𑁄𑀚𑁂𑀢𑀼𑀁 𑀓𑀼𑀫𑁆𑀪𑀓𑀸𑀭𑀲𑁆𑀲 𑀅𑀤𑀸𑀲𑀺, 𑀞𑀧𑁂𑀢𑁆𑀯𑀸 𑀢𑀼𑀫𑁆𑀳𑁂 𑀅𑀜𑁆𑀜𑀁 𑀫𑀬𑁆𑀳𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀫𑀬𑀸 𑀭𑀜𑁆𑀜𑁄 ¶ 𑀓𑀢𑀽𑀧𑀓𑀸𑀭𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀲𑀸𑀥𑀼 𑀇𑀤𑀸𑀦𑀺 𑀫𑁂 𑀦𑀝𑁆𑀞𑀁 𑀬𑀲𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁮.

‘‘𑀅𑀳𑀁 𑀘𑁂 𑀤𑀴𑁆𑀳𑀥𑀫𑁆𑀫𑀲𑁆𑀲, 𑀯𑀳𑀦𑁆𑀢𑀻 𑀦𑀸𑀪𑀺𑀭𑀸𑀥𑀬𑀺𑀁;

𑀥𑀭𑀦𑁆𑀢𑀻 𑀉𑀭𑀲𑀺 𑀲𑀮𑁆𑀮𑀁, 𑀬𑀼𑀤𑁆𑀥𑁂 𑀯𑀺𑀓𑁆𑀓𑀦𑁆𑀢𑀘𑀸𑀭𑀺𑀦𑀻.

𑁯𑁯.

‘‘𑀦𑀽𑀦 𑀭𑀸𑀚𑀸 𑀦 𑀚𑀸𑀦𑀸𑀢𑀺, 𑀫𑀫 𑀯𑀺𑀓𑁆𑀓𑀫𑀧𑁄𑀭𑀺𑀲𑀁;

𑀲𑀗𑁆𑀕𑀸𑀫𑁂 𑀲𑀼𑀓𑀢𑀦𑁆𑀢𑀸𑀦𑀺, 𑀤𑀽𑀢𑀯𑀺𑀧𑁆𑀧𑀳𑀺𑀢𑀸𑀦𑀺 𑀘.

𑁧𑁦𑁦.

‘‘𑀲𑀸 𑀦𑀽𑀦𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀅𑀩𑀦𑁆𑀥𑀼 𑀅𑀧𑀭𑀸𑀬𑀺𑀦𑀻;

𑀢𑀤𑀸 𑀳𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀤𑀺𑀦𑁆𑀦𑀸 𑀙𑀓𑀡𑀳𑀸𑀭𑀺𑀓𑀸’’𑀢𑀺.

𑀢𑀢𑁆𑀣 ¶ 𑀯𑀳𑀦𑁆𑀢𑀻𑀢𑀺 𑀤𑀽𑀢𑁂𑀬𑁆𑀬𑀳𑀭𑀡𑀁 𑀲𑀗𑁆𑀕𑀸𑀫𑁂 𑀩𑀮𑀓𑁄𑀝𑁆𑀞𑀓𑀪𑀺𑀦𑁆𑀤𑀦𑀁 𑀢𑀁 𑀢𑀁 𑀓𑀺𑀘𑁆𑀘𑀁 𑀯𑀳𑀦𑁆𑀢𑀻 𑀦𑀺𑀢𑁆𑀣𑀭𑀦𑁆𑀢𑀻. 𑀥𑀭𑀦𑁆𑀢𑀻 𑀉𑀭𑀲𑀺 𑀲𑀮𑁆𑀮𑀦𑁆𑀢𑀺 𑀉𑀭𑀲𑁆𑀫𑀺𑀁 𑀩𑀤𑁆𑀥𑀁 𑀓𑀡𑁆𑀟𑀁 𑀯𑀸 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀬𑀼𑀤𑁆𑀥𑀓𑀸𑀮𑁂 𑀲𑀢𑁆𑀢𑀽𑀦𑀁 𑀉𑀧𑀭𑀺 𑀅𑀪𑀺𑀳𑀭𑀦𑁆𑀢𑀻. 𑀯𑀺𑀓𑁆𑀓𑀦𑁆𑀢𑀘𑀸𑀭𑀺𑀦𑀻𑀢𑀺 𑀯𑀺𑀓𑁆𑀓𑀫𑀁 𑀧𑀭𑀓𑁆𑀓𑀫𑀁 𑀓𑀢𑁆𑀯𑀸 𑀧𑀭𑀩𑀮𑀯𑀺𑀚𑀬𑁂𑀦 𑀬𑀼𑀤𑁆𑀥𑁂 𑀯𑀺𑀓𑁆𑀓𑀦𑁆𑀢𑀕𑀸𑀫𑀺𑀦𑀻. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀲𑀸𑀫𑀺, 𑀅𑀳𑀁 𑀇𑀫𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀻 𑀭𑀜𑁆𑀜𑁄 𑀤𑀴𑁆𑀳𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀦𑀸𑀭𑀸𑀥𑀬𑀺𑀁 𑀦 𑀧𑀭𑀺𑀢𑁄𑀲𑁂𑀲𑀺𑀁, 𑀓𑁄 𑀤𑀸𑀦𑀺 𑀅𑀜𑁆𑀜𑁄 𑀢𑀲𑁆𑀲 𑀘𑀺𑀢𑁆𑀢𑀁 𑀆𑀭𑀸𑀥𑀬𑀺𑀲𑁆𑀲𑀢𑀻𑀢𑀺.

𑀫𑀫 𑀯𑀺𑀓𑁆𑀓𑀫𑀧𑁄𑀭𑀺𑀲𑀦𑁆𑀢𑀺 𑀫𑀬𑀸 𑀓𑀢𑀁 𑀧𑀼𑀭𑀺𑀲𑀧𑀭𑀓𑁆𑀓𑀫𑀁. 𑀲𑀼𑀓𑀢𑀦𑁆𑀢𑀸𑀦𑀻𑀢𑀺 𑀲𑀼𑀓𑀢𑀸𑀦𑀺. 𑀬𑀣𑀸 𑀳𑀺 𑀓𑀫𑁆𑀫𑀸𑀦𑁂𑀯 𑀓𑀫𑁆𑀫𑀦𑁆𑀢𑀸𑀦𑀺, 𑀯𑀦𑀸𑀦𑁂𑀯 𑀯𑀦𑀦𑁆𑀢𑀸𑀦𑀺, 𑀏𑀯𑀫𑀺𑀥 𑀲𑀼𑀓𑀢𑀸𑀦𑁂𑀯 ‘‘𑀲𑀼𑀓𑀢𑀦𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀤𑀽𑀢𑀯𑀺𑀧𑁆𑀧𑀳𑀺𑀢𑀸𑀦𑀺 𑀘𑀸𑀢𑀺 𑀕𑀮𑁂 𑀧𑀡𑁆𑀡𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀅𑀲𑀼𑀓𑀭𑀜𑁆𑀜𑁄 𑀦𑀸𑀫 𑀤𑁂𑀳𑀻’’𑀢𑀺 𑀧𑀳𑀺𑀢𑀸𑀬 𑀫𑀬𑀸 𑀏𑀓𑀤𑀺𑀯𑀲𑁂𑀦𑁂𑀯 𑀬𑁄𑀚𑀦𑀲𑀢𑀁 𑀕𑀦𑁆𑀢𑁆𑀯𑀸 𑀓𑀢𑀸𑀦𑀺 𑀤𑀽𑀢𑀧𑁂𑀲𑀦𑀸𑀦𑀺 𑀘. 𑀦𑀽𑀦 𑀭𑀸𑀚𑀸 𑀦 𑀚𑀸𑀦𑀸𑀢𑀻𑀢𑀺 𑀦𑀽𑀦 𑀢𑀼𑀫𑁆𑀳𑀸𑀓𑀁 𑀏𑀲 𑀭𑀸𑀚𑀸 𑀏𑀢𑀸𑀦𑀺 𑀫𑀬𑀸 𑀓𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀦 𑀚𑀸𑀦𑀸𑀢𑀺. 𑀅𑀧𑀭𑀸𑀬𑀺𑀦𑀻𑀢𑀺 𑀅𑀧𑁆𑀧𑀢𑀺𑀝𑁆𑀞𑀸 ¶ 𑀅𑀧𑁆𑀧𑀝𑀺𑀲𑀭𑀡𑀸. 𑀢𑀤𑀸 𑀳𑀻𑀢𑀺 𑀢𑀣𑀸 𑀳𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀤𑀺𑀦𑁆𑀦𑀸𑀢𑀺 𑀅𑀳𑀁 𑀭𑀜𑁆𑀜𑀸 𑀙𑀓𑀡𑀳𑀸𑀭𑀺𑀓𑀸 𑀓𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀤𑀺𑀦𑁆𑀦𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 ‘‘𑀢𑁆𑀯𑀁 𑀫𑀸 𑀲𑁄𑀘𑀺, 𑀅𑀳𑀁 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀢𑀯 𑀬𑀲𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀦𑀦𑀼 𑀢𑀼𑀫𑁆𑀳𑀸𑀓𑀁 𑀅𑀲𑀼𑀓𑀸 𑀦𑀸𑀫 𑀑𑀝𑁆𑀞𑀺𑀩𑁆𑀬𑀸𑀥𑀺 𑀅𑀲𑀼𑀓𑀝𑁆𑀞𑀸𑀦𑁂 𑀘 𑀅𑀲𑀼𑀓𑀝𑁆𑀞𑀸𑀦𑁂 ¶ 𑀘 𑀉𑀭𑁂 𑀲𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀲𑀗𑁆𑀕𑀸𑀫𑀁 𑀦𑀺𑀢𑁆𑀣𑀭𑀺, 𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀕𑀻𑀯𑀸𑀬 𑀧𑀡𑁆𑀡𑀁 𑀩𑀦𑁆𑀥𑀺𑀢𑁆𑀯𑀸 𑀧𑁂𑀲𑀺𑀢𑀸 𑀬𑁄𑀚𑀦𑀲𑀢𑀁 𑀅𑀕𑀫𑀸𑀲𑀺, 𑀢𑀼𑀫𑁆𑀳𑁂𑀧𑀺𑀲𑁆𑀲𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀢𑁆𑀣, 𑀲𑀸 𑀇𑀤𑀸𑀦𑀺 𑀓𑀳’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀢𑀫𑀳𑀁 𑀓𑀼𑀫𑁆𑀪𑀓𑀸𑀭𑀲𑁆𑀲 𑀕𑁄𑀫𑀬𑀳𑀭𑀡𑀢𑁆𑀣𑀸𑀬 𑀅𑀤𑀸𑀲𑀺’’𑀦𑁆𑀢𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀼𑀢𑁆𑀢𑀁 𑀔𑁄, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀢𑀁 𑀓𑀼𑀫𑁆𑀪𑀓𑀸𑀭𑀲𑁆𑀲 𑀬𑀸𑀦𑀓𑁂 𑀬𑁄𑀚𑀦𑀢𑁆𑀣𑀸𑀬 𑀤𑀸𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀑𑀯𑀸𑀤𑀯𑀲𑁂𑀦 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁧.

‘‘𑀬𑀸𑀯𑀢𑀸𑀲𑀻𑀲𑀢𑀻 𑀧𑁄𑀲𑁄, 𑀢𑀸𑀯𑀤𑁂𑀯 𑀧𑀯𑀻𑀡𑀢𑀺;

𑀅𑀢𑁆𑀣𑀸𑀧𑀸𑀬𑁂 𑀚𑀳𑀦𑁆𑀢𑀺 𑀦𑀁, 𑀑𑀝𑁆𑀞𑀺𑀩𑁆𑀬𑀸𑀥𑀺𑀁𑀯 𑀔𑀢𑁆𑀢𑀺𑀬𑁄.

𑁧𑁦𑁨.

‘‘𑀬𑁄 ¶ 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑁆𑀣𑀸 𑀢𑀲𑁆𑀲 𑀧𑀮𑀼𑀚𑁆𑀚𑀦𑁆𑀢𑀺, 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀢𑀸.

𑁧𑁦𑁩.

‘‘𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀫𑀦𑀼𑀩𑀼𑀚𑁆𑀛𑀢𑀺;

𑀅𑀢𑁆𑀣𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀓𑀸.

𑁧𑁦𑁪.

‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀩𑁆𑀩𑁂 𑀓𑀢𑀜𑁆𑀜𑀼𑀦𑁄 𑀳𑁄𑀣, 𑀘𑀺𑀭𑀁 𑀲𑀕𑁆𑀕𑀫𑁆𑀳𑀺 𑀞𑀲𑁆𑀲𑀣𑀸’’𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀢𑁆𑀣𑁄 𑁋 𑀇𑀥𑁂𑀓𑀘𑁆𑀘𑁄 𑀅𑀜𑁆𑀜𑀸𑀡𑀚𑀸𑀢𑀺𑀓𑁄 𑀧𑁄𑀲𑁄 𑀬𑀸𑀯𑀢𑀸𑀲𑀻𑀲𑀢𑀻, 𑀬𑀸𑀯 ‘‘𑀇𑀤𑀁 𑀦𑀸𑀫 𑀫𑁂 𑀅𑀬𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀸𑀲𑀻𑀲𑀢𑀺, 𑀢𑀸𑀯𑀤𑁂𑀯 𑀢𑀁 𑀧𑀼𑀭𑀺𑀲𑀁 𑀧𑀯𑀻𑀡𑀢𑀺 𑀪𑀚𑀢𑀺 𑀲𑁂𑀯𑀢𑀺, 𑀢𑀲𑁆𑀲 𑀧𑀦 𑀅𑀢𑁆𑀣𑀸𑀧𑀸𑀬𑁂 𑀯𑀟𑁆𑀠𑀺𑀬𑀸 𑀅𑀧𑀕𑀫𑀦𑁂 𑀧𑀭𑀺𑀳𑀻𑀦𑀓𑀸𑀮𑁂 𑀢𑀁 𑀦𑀸𑀦𑀸𑀓𑀺𑀘𑁆𑀘𑁂𑀲𑀼 𑀧𑀢𑁆𑀣𑀺𑀢𑀁 𑀧𑁄𑀲𑀁 𑀏𑀓𑀘𑁆𑀘𑁂 𑀩𑀸𑀮𑀸 𑀇𑀫𑀁 𑀑𑀝𑁆𑀞𑀺𑀩𑁆𑀬𑀸𑀥𑀺𑀁 𑀅𑀬𑀁 𑀔𑀢𑁆𑀢𑀺𑀬𑁄 𑀯𑀺𑀬 𑀚𑀳𑀦𑁆𑀢𑀺.

𑀓𑀢𑀓𑀮𑁆𑀬𑀸𑀡𑁄𑀢𑀺 𑀧𑀭𑁂𑀦 𑀅𑀢𑁆𑀢𑀦𑁄 𑀓𑀢𑀓𑀮𑁆𑀬𑀸𑀡𑀓𑀫𑁆𑀫𑁄. 𑀓𑀢𑀢𑁆𑀣𑁄𑀢𑀺 𑀦𑀺𑀧𑁆𑀨𑀸𑀤𑀺𑀢𑀓𑀺𑀘𑁆𑀘𑁄. 𑀦𑀸𑀯𑀩𑀼𑀚𑁆𑀛𑀢𑀻𑀢𑀺 𑀧𑀘𑁆𑀙𑀸𑀧𑀺 𑀢𑀁 𑀧𑀭𑁂𑀦 ¶ 𑀓𑀢𑀁 𑀉𑀧𑀓𑀸𑀭𑀁 𑀢𑀲𑁆𑀲 𑀚𑀭𑀸𑀚𑀺𑀡𑁆𑀡𑀓𑀸𑀮𑁂 𑀅𑀲𑀫𑀢𑁆𑀣𑀓𑀸𑀮𑁂 𑀦 𑀲𑀭𑀢𑀺, 𑀅𑀢𑁆𑀢𑀦𑀸 𑀤𑀺𑀦𑁆𑀦𑀫𑁆𑀧𑀺 𑀬𑀲𑀁 𑀧𑀼𑀦 𑀕𑀡𑁆𑀳𑀸𑀢𑀺. 𑀧𑀮𑀼𑀚𑁆𑀚𑀦𑁆𑀢𑀻𑀢𑀺 𑀪𑀺𑀚𑁆𑀚𑀦𑁆𑀢𑀺 𑀦𑀲𑁆𑀲𑀦𑁆𑀢𑀺. 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀢𑀸𑀢𑀺 𑀬𑁂 𑀓𑁂𑀘𑀺 𑀅𑀢𑁆𑀣𑀸 𑀇𑀘𑁆𑀙𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀦𑀲𑁆𑀲𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀫𑀺𑀢𑁆𑀢𑀤𑀼𑀩𑁆𑀪𑀺𑀧𑀼𑀕𑁆𑀕𑀮𑀲𑁆𑀲 𑀳𑀺 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀁 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀩𑀻𑀚𑀁 𑀯𑀺𑀬 𑀦𑀲𑁆𑀲𑀢𑀺. 𑀓𑀢𑀢𑁆𑀣𑁄 𑀫𑀦𑀼𑀩𑀼𑀚𑁆𑀛𑀢𑀻𑀢𑀺 𑀓𑀢𑀢𑁆𑀣𑁄 𑀅𑀦𑀼𑀩𑀼𑀚𑁆𑀛𑀢𑀺, 𑀫-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 𑀕𑀳𑀺𑀢𑁄. 𑀢𑀁 𑀯𑁄 𑀯𑀤𑀸𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀼𑀫𑁆𑀳𑁂 𑀯𑀤𑀸𑀫𑀺. 𑀞𑀲𑁆𑀲𑀣𑀸𑀢𑀺 𑀓𑀢𑀜𑁆𑀜𑀼𑀦𑁄 𑀳𑀼𑀢𑁆𑀯𑀸 𑀘𑀺𑀭𑀓𑀸𑀮𑀁 𑀲𑀕𑁆𑀕𑀫𑁆𑀳𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀣.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀩𑁆𑀩𑁂𑀲𑀁 𑀑𑀯𑀸𑀤𑀁 𑀅𑀤𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀑𑀝𑁆𑀞𑀺𑀩𑁆𑀬𑀸𑀥𑀺𑀬𑀸 𑀬𑀲𑀁 𑀧𑀝𑀺𑀧𑀸𑀓𑀢𑀺𑀓𑀁 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀑𑀝𑁆𑀞𑀺𑀩𑁆𑀬𑀸𑀥𑀺 𑀪𑀤𑁆𑀤𑀯𑀢𑀺𑀓𑀸 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀅𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀴𑁆𑀳𑀥𑀫𑁆𑀫𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁧𑁦] 𑁫. 𑀲𑁄𑀫𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 ¶ 𑀫𑀁 𑀧𑀼𑀭𑁂 𑀧𑀘𑁆𑀘𑀼𑀟𑁆𑀟𑁂𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀳𑀮𑁆𑀮𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑁂𑀓𑀁 𑀲𑀸𑀫𑀡𑁂𑀭𑀁 𑀧𑀩𑁆𑀩𑀸𑀚𑁂𑀲𑀺, 𑀲𑀸𑀫𑀡𑁂𑀭𑁄 𑀢𑀲𑁆𑀲 𑀉𑀧𑀓𑀸𑀭𑀓𑁄 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑁂𑀦 𑀭𑁄𑀕𑁂𑀦 𑀓𑀸𑀮𑀫𑀓𑀸𑀲𑀺. 𑀫𑀳𑀮𑁆𑀮𑀓𑁄 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀭𑁄𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑀫𑀳𑀮𑁆𑀮𑀓𑁄 𑀲𑀸𑀫𑀡𑁂𑀭𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬 𑀭𑁄𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀢𑀺, 𑀫𑀭𑀡𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀭𑀳𑀺𑀢𑁄 𑀫𑀜𑁆𑀜𑁂’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀇𑀫𑀲𑁆𑀫𑀺𑀁 𑀫𑀢𑁂 𑀭𑁄𑀤𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀢𑁆𑀢𑀁 𑀓𑀸𑀭𑁂𑀲𑀺. 𑀅𑀣𑁂𑀓𑁄 𑀓𑀸𑀲𑀺𑀕𑀸𑀫𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀏𑀓𑀤𑀺𑀯𑀲𑀁 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁄 𑀏𑀓𑀁 𑀳𑀢𑁆𑀣𑀺𑀙𑀸𑀧𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀅𑀲𑁆𑀲𑀫𑀁 𑀆𑀦𑁂𑀢𑁆𑀯𑀸 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑁄𑀫𑀤𑀢𑁆𑀢𑁄𑀢𑀺𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀢𑀺𑀡𑀧𑀡𑁆𑀡𑀸𑀦𑀺 𑀔𑀸𑀤𑀸𑀧𑁂𑀦𑁆𑀢𑁄 𑀧𑀝𑀺𑀚𑀕𑁆𑀕𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀫𑀳𑀸𑀲𑀭𑀻𑀭𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀩𑀳𑀼𑀁 𑀪𑁄𑀚𑀦𑀁 𑀕𑀳𑁂𑀢𑁆𑀯𑀸 𑀅𑀚𑀻𑀭𑀓𑁂𑀦 𑀤𑀼𑀩𑁆𑀩𑀮𑁄 𑀅𑀳𑁄𑀲𑀺. 𑀢𑀸𑀧𑀲𑁄 𑀢𑀁 𑀅𑀲𑁆𑀲𑀫𑀧𑀤𑁂 𑀓𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁄, 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀳𑀢𑁆𑀣𑀺𑀧𑁄𑀢𑀓𑁄 𑀓𑀸𑀮𑀫𑀓𑀸𑀲𑀺. 𑀢𑀸𑀧𑀲𑁄 𑀨𑀮𑀸𑀨𑀮𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀫𑁂 𑀧𑀼𑀢𑁆𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀢𑀺, 𑀅𑀚𑁆𑀚 𑀦 𑀤𑀺𑀲𑁆𑀲𑀢𑀺, 𑀓𑀳𑀁 𑀦𑀼 𑀔𑁄 𑀕𑀢𑁄’’𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁫.

‘‘𑀬𑁄 ¶ 𑀫𑀁 𑀧𑀼𑀭𑁂 𑀧𑀘𑁆𑀘𑀼𑀟𑁆𑀟𑁂𑀢𑀺, 𑀅𑀭𑀜𑁆𑀜𑁂 𑀤𑀽𑀭𑀫𑀸𑀬𑀢𑁄;

𑀲𑁄 𑀦 𑀤𑀺𑀲𑁆𑀲𑀢𑀺 𑀫𑀸𑀢𑀗𑁆𑀕𑁄, 𑀲𑁄𑀫𑀤𑀢𑁆𑀢𑁄 𑀓𑀼𑀳𑀺𑀁 𑀕𑀢𑁄’’𑀢𑀺.

𑀢𑀢𑁆𑀣 𑀧𑀼𑀭𑁂𑀢𑀺 𑀇𑀢𑁄 𑀧𑀼𑀭𑁂. 𑀧𑀘𑁆𑀘𑀼𑀟𑁆𑀟𑁂𑀢𑀻𑀢𑀺 𑀧𑀘𑁆𑀘𑀼𑀕𑁆𑀕𑀘𑁆𑀙𑀢𑀺. 𑀅𑀭𑀜𑁆𑀜𑁂 𑀤𑀽𑀭𑀦𑁆𑀢𑀺 𑀇𑀫𑀲𑁆𑀫𑀺𑀁 𑀦𑀺𑀫𑁆𑀫𑀦𑀼𑀲𑁆𑀲𑁂 𑀅𑀭𑀜𑁆𑀜𑁂 𑀫𑀁 𑀤𑀽𑀭𑀁 𑀧𑀘𑁆𑀘𑀼𑀟𑁆𑀟𑁂𑀢𑀺. 𑀆𑀬𑀢𑁄𑀢𑀺 𑀆𑀬𑀸𑀫𑀲𑀫𑁆𑀧𑀦𑁆𑀦𑁄.

𑀏𑀯𑀁 ¶ 𑀧𑀭𑀺𑀤𑁂𑀯𑀫𑀸𑀦𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀢𑀺𑀢𑀁 𑀤𑀺𑀲𑁆𑀯𑀸 𑀕𑀮𑁂 𑀕𑀳𑁂𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁬.

‘‘𑀅𑀬𑀁 𑀯𑀸 𑀲𑁄 𑀫𑀢𑁄 𑀲𑁂𑀢𑀺, 𑀅𑀮𑁆𑀮𑀲𑀺𑀗𑁆𑀕𑀁𑀯 𑀯𑀘𑁆𑀙𑀺𑀢𑁄;

𑀪𑀽𑀫𑁆𑀬𑀸 𑀦𑀺𑀧𑀢𑀺𑀢𑁄 𑀲𑁂𑀢𑀺, 𑀅𑀫𑀭𑀸 𑀯𑀢 𑀓𑀼𑀜𑁆𑀚𑀭𑁄’’𑀢𑀺.

𑀢𑀢𑁆𑀣 𑀅𑀬𑀁 𑀯𑀸𑀢𑀺 𑀯𑀺𑀪𑀸𑀯𑀦𑀢𑁆𑀣𑁂 𑀯𑀸-𑀲𑀤𑁆𑀤𑁄. 𑀅𑀬𑀫𑁂𑀯 𑀲𑁄, 𑀦 𑀅𑀜𑁆𑀜𑁄𑀢𑀺 𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀮𑁆𑀮𑀲𑀺𑀗𑁆𑀕𑀦𑁆𑀢𑀺 𑀫𑀸𑀮𑀼𑀯𑀮𑀢𑀸𑀬 𑀅𑀕𑁆𑀕𑀧𑀯𑀸𑀮𑀁. 𑀯𑀘𑁆𑀙𑀺𑀢𑁄𑀢𑀺 𑀙𑀺𑀦𑁆𑀦𑁄, 𑀕𑀺𑀫𑁆𑀳𑀓𑀸𑀮𑁂 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀢𑀢𑁆𑀢𑀯𑀸𑀮𑀺𑀓𑀸𑀧𑀼𑀮𑀺𑀦𑁂 𑀦𑀔𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀢𑁄 𑀫𑀸𑀮𑀼𑀯𑀮𑀢𑀸𑀬 𑀅𑀗𑁆𑀓𑀼𑀭𑁄 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀽𑀫𑁆𑀬𑀸𑀢𑀺 𑀪𑀽𑀫𑀺𑀬𑀁. 𑀅𑀫𑀭𑀸 𑀯𑀢𑀸𑀢𑀺 𑀫𑀢𑁄 𑀯𑀢, ‘‘𑀅𑀫𑀭𑀻’’𑀢𑀺𑀧𑀺 𑀧𑀸𑀞𑁄.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀢𑀸𑀧𑀲𑁄 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄, 𑀇𑀤𑀸𑀦𑀺 𑀳𑀢𑁆𑀣𑀺𑀧𑁄𑀢𑀓𑁂 𑀧𑀼𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀧𑀭𑀺𑀤𑁂𑀯𑀢𑀺, 𑀲𑀁𑀯𑁂𑀚𑁂𑀢𑁆𑀯𑀸 𑀦𑀁 𑀲𑀢𑀺𑀁 𑀧𑀝𑀺𑀮𑀪𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀅𑀲𑁆𑀲𑀫𑀧𑀤𑀁 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄𑀯 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁭.

‘‘𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲 ¶ , 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀻’’𑀢𑀺.

𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀲𑀁𑀯𑀸𑀲𑁂𑀦 𑀳𑀯𑁂 𑀲𑀓𑁆𑀓, 𑀫𑀦𑀼𑀲𑁆𑀲𑀲𑁆𑀲 𑀫𑀺𑀕𑀲𑁆𑀲 𑀯𑀸;

𑀳𑀤𑀬𑁂 𑀚𑀸𑀬𑀢𑁂 𑀧𑁂𑀫𑀁, 𑀢𑀁 𑀦 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼’’𑀦𑁆𑀢𑀺.

𑀢𑀢𑁆𑀣 ¶ 𑀫𑀺𑀕𑀲𑁆𑀲 𑀯𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀩𑁆𑀩𑁂𑀧𑀺 𑀢𑀺𑀭𑀘𑁆𑀙𑀸𑀦𑀸 ‘‘𑀫𑀺𑀕𑀸’’𑀢𑀺 𑀯𑀼𑀢𑁆𑀢𑀸. 𑀢𑀦𑁆𑀢𑀺 𑀧𑀺𑀬𑀸𑀬𑀺𑀢𑀁 𑀲𑀢𑁆𑀢𑀁.

𑀅𑀣 𑀦𑀁 𑀑𑀯𑀤𑀦𑁆𑀢𑁄 𑀲𑀓𑁆𑀓𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁯.

‘‘𑀫𑀢𑀁 𑀫𑀭𑀺𑀲𑁆𑀲𑀁 𑀭𑁄𑀤𑀦𑁆𑀢𑀺, 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘;

𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺, 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄.

𑁧𑁧𑁦.

‘‘𑀓𑀦𑁆𑀤𑀺𑀢𑁂𑀦 𑀳𑀯𑁂 𑀩𑁆𑀭𑀳𑁆𑀫𑁂, 𑀫𑀢𑁄 𑀧𑁂𑀢𑁄 𑀲𑀫𑀼𑀝𑁆𑀞𑀳𑁂;

𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀭𑁄𑀤𑀸𑀫, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂’’𑀢𑀺.

𑀢𑀢𑁆𑀣 ¶ 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘𑀸𑀢𑀺 𑀩𑁆𑀭𑀳𑁆𑀫𑁂 𑀬𑁂 𑀲𑀢𑁆𑀢𑀸 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀘, 𑀲𑀩𑁆𑀩𑁂 𑀢𑁂 𑀫𑀢𑀁, 𑀬𑁄 𑀘 𑀫𑀭𑀺𑀲𑁆𑀲𑀢𑀺, 𑀢𑀁 𑀭𑁄𑀤𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀏𑀯𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼𑀲𑀼𑀓𑁆𑀔𑀦𑀓𑀸𑀮𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺. 𑀓𑀺𑀁𑀓𑀸𑀭𑀡𑀸? 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄, 𑀧𑀡𑁆𑀟𑀺𑀢𑀸 𑀳𑀺 ‘‘𑀭𑁄𑀤𑀺𑀢𑀁 𑀦𑀺𑀧𑁆𑀨𑀮’’𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀢𑁄 𑀧𑁂𑀢𑁄𑀢𑀺 𑀬𑀤𑀺 𑀏𑀲 𑀧𑁂𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀫𑀢𑁄 𑀭𑁄𑀤𑀺𑀢𑁂𑀦 𑀲𑀫𑀼𑀝𑁆𑀞𑀳𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂𑀧𑀺 𑀫𑀬𑀁 𑀲𑀫𑀸𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂 𑀭𑁄𑀤𑀸𑀫, 𑀓𑀺𑀁 𑀦𑀺𑀓𑁆𑀓𑀫𑁆𑀫𑀸 𑀅𑀘𑁆𑀙𑀸𑀫𑀸𑀢𑀺.

𑀢𑀸𑀧𑀲𑁄 𑀲𑀓𑁆𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀕𑀢𑀲𑁄𑀓𑁄 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀲𑀓𑁆𑀓𑀲𑁆𑀲 𑀣𑀼𑀢𑀺𑀯𑀲𑁂𑀦 𑀲𑁂𑀲𑀕𑀸𑀣𑀸 𑀆𑀳 𑁋

𑁧𑁧𑁧.

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁧𑁨.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁧𑁩.

‘‘𑀲𑁄𑀳𑀁 ¶ 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀯𑀸𑀲𑀯𑀸’’𑀢𑀺.

𑀢𑀸 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀏𑀯𑀁 𑀲𑀓𑁆𑀓𑁄 𑀢𑀸𑀧𑀲𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀳𑀢𑁆𑀣𑀺𑀧𑁄𑀢𑀓𑁄 𑀲𑀸𑀫𑀡𑁂𑀭𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀫𑀳𑀮𑁆𑀮𑀓𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑁄𑀫𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁧𑁧] 𑁬. 𑀲𑀼𑀲𑀻𑀫𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀴𑀸𑀦𑀺 𑀓𑁂𑀲𑀸𑀦𑀺 𑀧𑀼𑀭𑁂 𑀅𑀳𑁂𑀲𑀼𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀦𑀺𑀓𑁆𑀔𑀫𑀦𑀁 𑀯𑀡𑁆𑀡𑀬𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ¶ ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 𑀤𑀸𑀦𑀺 𑀅𑀦𑁂𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀦𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁, 𑀧𑀼𑀩𑁆𑀩𑁂𑀧𑀸𑀳𑀁 𑀢𑀺𑀬𑁄𑀚𑀦𑀲𑀢𑀺𑀓𑁂 𑀓𑀸𑀲𑀺𑀭𑀝𑁆𑀞𑁂 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂𑀬𑁂𑀯 𑀩𑀸𑀭𑀸𑀡𑀲𑀺𑀭𑀜𑁆𑀜𑁄𑀧𑀺 𑀧𑀼𑀢𑁆𑀢𑁄 𑀚𑀸𑀬𑀺. 𑀢𑁂𑀲𑀁 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀫𑀳𑀸𑀲𑀢𑁆𑀢𑀲𑁆𑀲 𑀲𑀼𑀲𑀻𑀫𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄𑀢𑀺. 𑀩𑀸𑀭𑀸𑀡𑀲𑀺𑀭𑀸𑀚𑀸 ‘‘𑀧𑀼𑀢𑁆𑀢𑁂𑀦 𑀫𑁂 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑁂 𑀚𑀸𑀢𑁄’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀡𑀸𑀧𑁂𑀢𑁆𑀯𑀸 𑀥𑀸𑀢𑀺𑀬𑁄 𑀤𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀟𑁆𑀠𑁂𑀲𑀺. 𑀢𑁂 𑀉𑀪𑁄𑀧𑀺 𑀯𑀬𑀧𑁆𑀧𑀢𑁆𑀢𑀸 𑀅𑀪𑀺𑀭𑀽𑀧𑀸 𑀤𑁂𑀯𑀓𑀼𑀫𑀸𑀭𑀯𑀡𑁆𑀡𑀺𑀦𑁄 𑀳𑀼𑀢𑁆𑀯𑀸 𑀢𑀓𑁆𑀓𑀲𑀺𑀮𑀸𑀬𑀁 ¶ 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀭𑀸𑀚𑀧𑀼𑀢𑁆𑀢𑁄 𑀉𑀧𑀭𑀸𑀚𑀸 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀔𑀸𑀤𑀦𑁆𑀢𑁄 𑀧𑀺𑀯𑀦𑁆𑀢𑁄 𑀦𑀺𑀲𑀻𑀤𑀦𑁆𑀢𑁄 𑀲𑀬𑀦𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀢𑀁 𑀞𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀦𑀕𑀭𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀬 𑀅𑀮𑀗𑁆𑀓𑀢𑁄 𑀅𑀮𑀗𑁆𑀓𑀢𑀏𑀭𑀸𑀯𑀡𑀧𑀝𑀺𑀪𑀸𑀕𑀲𑁆𑀲 𑀫𑀢𑁆𑀢𑀯𑀭𑀯𑀸𑀭𑀡𑀲𑁆𑀲 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀘𑁆𑀙𑀸𑀲𑀦𑁂 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺. 𑀫𑀸𑀢𑀸𑀧𑀺𑀲𑁆𑀲 ‘‘𑀧𑀼𑀢𑁆𑀢𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀧𑀜𑁆𑀚𑀭𑁂 𑀞𑀢𑁆𑀯𑀸 𑀢𑀲𑁆𑀲 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲 𑀧𑀘𑁆𑀙𑀢𑁄 𑀦𑀺𑀲𑀺𑀦𑁆𑀦𑀁 𑀧𑀼𑀭𑁄𑀳𑀺𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀬𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀁 𑀅𑀮𑀪𑀦𑁆𑀢𑀻 𑀏𑀢𑁆𑀣𑁂𑀯 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀭𑀸𑀚𑀸 ¶ 𑀫𑀸𑀢𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀼𑀳𑀺𑀁 𑀫𑁂 𑀫𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀺𑀮𑀸𑀦𑀸’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁 𑀅𑀫𑁆𑀫, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀮𑀚𑁆𑀚𑀸𑀬 𑀦 𑀓𑀣𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀕𑁆𑀕𑀫𑀳𑁂𑀲𑀺𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀕𑀘𑁆𑀙 𑀅𑀫𑁆𑀫𑀸𑀬 𑀅𑀨𑀸𑀲𑀼𑀓𑀁 𑀚𑀸𑀦𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑀻 𑀧𑀼𑀘𑁆𑀙𑀺, 𑀇𑀢𑁆𑀣𑀺𑀬𑁄 𑀦𑀸𑀫 𑀇𑀢𑁆𑀣𑀻𑀦𑀁 𑀭𑀳𑀲𑁆𑀲𑀁 𑀦 𑀦𑀺𑀕𑀼𑀳𑀦𑁆𑀢𑀺, 𑀲𑀸 𑀢𑀲𑁆𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀇𑀢𑀭𑀸𑀧𑀺 𑀢𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀳𑁄𑀢𑀼, 𑀕𑀘𑁆𑀙 𑀦𑀁 𑀲𑀫𑀲𑁆𑀲𑀸𑀲𑁂𑀳𑀺, 𑀧𑀼𑀭𑁄𑀳𑀺𑀢𑀁 𑀭𑀸𑀚𑀸𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀢𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀲𑀫𑀲𑁆𑀲𑀸𑀲𑁂𑀲𑀺. 𑀭𑀸𑀚𑀸𑀧𑀺 𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑀫𑁆𑀫, 𑀫𑀸𑀢𑀼 𑀫𑁂 𑀚𑀻𑀯𑀺𑀢𑀁 𑀤𑁂𑀳𑀺, 𑀢𑁆𑀯𑀁 𑀭𑀸𑀚𑀸 𑀪𑀯𑀺𑀲𑁆𑀲𑀲𑀺, 𑀲𑀸 𑀅𑀕𑁆𑀕𑀫𑀳𑁂𑀲𑀻, 𑀅𑀳𑀁 𑀉𑀧𑀭𑀸𑀚𑀸’’𑀢𑀺 ¶ 𑀆𑀳. 𑀲𑁄 ‘‘𑀦 𑀲𑀓𑁆𑀓𑀸 𑀏𑀯𑀁 𑀓𑀸𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀧𑀼𑀭𑁄𑀳𑀺𑀢𑀁 𑀭𑀸𑀚𑀸𑀦𑀁, 𑀫𑀸𑀢𑀭𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀸𑀭𑁂𑀢𑁆𑀯𑀸 𑀲𑀬𑀁 𑀉𑀧𑀭𑀸𑀚𑀸 𑀅𑀳𑁄𑀲𑀺.

𑀢𑁂𑀲𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑀸𑀦𑀁 𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 𑀅𑀕𑀸𑀭𑀫𑀚𑁆𑀛𑁂 𑀉𑀓𑁆𑀓𑀡𑁆𑀞𑀺𑀢𑁄 𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑁆𑀚𑀸𑀬 𑀦𑀺𑀦𑁆𑀦𑀘𑀺𑀢𑁆𑀢𑁄 𑀓𑀺𑀮𑁂𑀲𑀭𑀢𑀺𑀁 𑀅𑀦𑀮𑁆𑀮𑀻𑀬𑀦𑁆𑀢𑁄 𑀏𑀓𑀓𑁄𑀯 𑀢𑀺𑀝𑁆𑀞𑀢𑀺, 𑀏𑀓𑀓𑁄𑀯 𑀦𑀺𑀲𑀻𑀤𑀢𑀺, 𑀏𑀓𑀓𑁄𑀯 𑀲𑀬𑀢𑀺, 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀯𑀺𑀬 𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑀓𑀼𑀓𑁆𑀓𑀼𑀝𑁄 ¶ 𑀯𑀺𑀬 𑀘 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 ‘‘𑀅𑀬𑀁 𑀭𑀸𑀚𑀸 𑀫𑀬𑀸 𑀲𑀤𑁆𑀥𑀺𑀁 𑀦𑀸𑀪𑀺𑀭𑀫𑀢𑀺, 𑀏𑀓𑀓𑁄𑀯 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀔𑁄 𑀧𑀦 𑀤𑀳𑀭𑁄 𑀢𑀭𑀼𑀡𑁄, 𑀅𑀳𑀁 𑀫𑀳𑀮𑁆𑀮𑀺𑀓𑀸, 𑀲𑀻𑀲𑁂 𑀫𑁂 𑀧𑀮𑀺𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 ‘𑀲𑀻𑀲𑁂 𑀢𑁂 𑀤𑁂𑀯, 𑀏𑀓𑀁 𑀧𑀮𑀺𑀢𑀁 𑀧𑀜𑁆𑀜𑀸𑀬𑀢𑀻’𑀢𑀺 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀏𑀓𑁂𑀦𑀼𑀧𑀸𑀬𑁂𑀦 𑀭𑀸𑀚𑀸𑀦𑀁 𑀧𑀢𑁆𑀢𑀺𑀬𑀸𑀧𑁂𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀅𑀪𑀺𑀭𑀫𑀸𑀧𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀜𑁆𑀜𑁄 𑀲𑀻𑀲𑁂 𑀊𑀓𑀸 𑀯𑀺𑀘𑀺𑀦𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸 ‘‘𑀤𑁂𑀯, 𑀫𑀳𑀮𑁆𑀮𑀓𑁄𑀲𑀺 𑀚𑀸𑀢𑁄, 𑀲𑀻𑀲𑁂 𑀢𑁂 𑀏𑀓𑀁 𑀧𑀮𑀺𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀪𑀤𑁆𑀤𑁂, 𑀏𑀢𑀁 𑀧𑀮𑀺𑀢𑀁 𑀮𑀼𑀜𑁆𑀚𑀺𑀢𑁆𑀯𑀸 𑀫𑀬𑁆𑀳𑀁 𑀳𑀢𑁆𑀣𑁂 𑀞𑀧𑁂𑀳𑀻’’𑀢𑀺. 𑀲𑀸 𑀢𑀲𑁆𑀲 𑀲𑀻𑀲𑀢𑁄 𑀏𑀓𑀁 𑀓𑁂𑀲𑀁 𑀮𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀲𑁂 𑀧𑀮𑀺𑀢𑀁 𑀕𑀳𑁂𑀢𑁆𑀯𑀸 ‘‘𑀇𑀤𑀁 𑀢𑁂, 𑀤𑁂𑀯, 𑀧𑀮𑀺𑀢’’𑀦𑁆𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀁 𑀤𑀺𑀲𑁆𑀯𑀸𑀯 𑀪𑀻𑀢𑀢𑀲𑀺𑀢𑀲𑁆𑀲 𑀓𑀜𑁆𑀘𑀦𑀧𑀝𑁆𑀝𑀲𑀤𑀺𑀲𑀸 𑀦𑀮𑀸𑀝𑀸 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼.

𑀲𑁄 𑀅𑀢𑁆𑀢𑀸𑀦𑀁 𑀑𑀯𑀤𑀦𑁆𑀢𑁄 ‘‘𑀲𑀼𑀲𑀻𑀫, 𑀢𑁆𑀯𑀁 𑀤𑀳𑀭𑁄 𑀳𑀼𑀢𑁆𑀯𑀸 𑀫𑀳𑀮𑁆𑀮𑀓𑁄 𑀚𑀸𑀢𑁄, 𑀏𑀢𑁆𑀢𑀓𑀁 𑀓𑀸𑀮𑀁 𑀕𑀽𑀣𑀓𑀮𑀮𑁂 𑀦𑀺𑀫𑀼𑀕𑁆𑀕𑁄 𑀕𑀸𑀫𑀲𑀽𑀓𑀭𑁄 𑀯𑀺𑀬 𑀓𑀸𑀫𑀓𑀮𑀮𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀢𑀁 𑀓𑀮𑀮𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀦𑀦𑀼 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀢𑁂 𑀓𑀸𑀮𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁪.

‘‘𑀓𑀸𑀴𑀸𑀦𑀺 ¶ 𑀓𑁂𑀲𑀸𑀦𑀺 𑀧𑀼𑀭𑁂 𑀅𑀳𑁂𑀲𑀼𑀁, 𑀚𑀸𑀢𑀸𑀦𑀺 𑀲𑀻𑀲𑀫𑁆𑀳𑀺 𑀬𑀣𑀸𑀧𑀤𑁂𑀲𑁂;

𑀢𑀸𑀦𑀚𑁆𑀚 𑀲𑁂𑀢𑀸𑀦𑀺 𑀲𑀼𑀲𑀻𑀫 𑀤𑀺𑀲𑁆𑀯𑀸, 𑀥𑀫𑁆𑀫𑀁 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄’’𑀢𑀺.

𑀢𑀢𑁆𑀣 𑀬𑀣𑀸𑀧𑀤𑁂𑀲𑁂𑀢𑀺 𑀢𑀯 𑀲𑀻𑀲𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑁂𑀲𑀸𑀦𑀁 𑀅𑀦𑀼𑀭𑀽𑀧𑁂 𑀧𑀤𑁂𑀲𑁂 𑀇𑀢𑁄 𑀧𑀼𑀩𑁆𑀩𑁂 𑀓𑀸𑀴𑀸𑀦𑀺 𑀪𑀫𑀭𑀧𑀢𑁆𑀢𑀯𑀡𑁆𑀡𑀸𑀦𑀺 𑀓𑁂𑀲𑀸𑀦𑀺 𑀚𑀸𑀢𑀸𑀦𑀺 𑀅𑀳𑁂𑀲𑀼𑀦𑁆𑀢𑀺 ¶ 𑀯𑀤𑀢𑀺. 𑀥𑀫𑁆𑀫𑀁 𑀘𑀭𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀘𑀭𑀸𑀢𑀺 𑀅𑀢𑁆𑀢𑀸𑀦𑀫𑁂𑀯 𑀆𑀡𑀸𑀧𑁂𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀬𑀸 𑀢𑁂 𑀓𑀸𑀮𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀕𑀼𑀡𑁂 𑀯𑀡𑁆𑀡𑀺𑀢𑁂 𑀇𑀢𑀭𑀸 ‘‘𑀅𑀳𑀁 ‘𑀇𑀫𑀲𑁆𑀲 𑀮𑀕𑁆𑀕𑀦𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀓𑀭𑀺’’𑀦𑁆𑀢𑀺 𑀪𑀻𑀢𑀢𑀲𑀺𑀢𑀸 ‘‘𑀇𑀤𑀸𑀦𑀺𑀲𑁆𑀲 𑀅𑀧𑀩𑁆𑀩𑀚𑁆𑀚𑀦𑀢𑁆𑀣𑀸𑀬 𑀲𑀭𑀻𑀭𑀯𑀡𑁆𑀡𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧𑁫.

‘‘𑀫𑀫𑁂𑀯 ¶ 𑀤𑁂𑀯 𑀧𑀮𑀺𑀢𑀁 𑀦 𑀢𑀼𑀬𑁆𑀳𑀁, 𑀫𑀫𑁂𑀯 𑀲𑀻𑀲𑀁 𑀫𑀫 𑀉𑀢𑁆𑀢𑀫𑀗𑁆𑀕𑀁;

‘𑀅𑀢𑁆𑀣𑀁 𑀓𑀭𑀺𑀲𑁆𑀲’𑀦𑁆𑀢𑀺 𑀫𑀼𑀲𑀸 𑀅𑀪𑀸𑀡𑀺𑀁, 𑀏𑀓𑀸𑀧𑀭𑀸𑀥𑀁 𑀔𑀫 𑀭𑀸𑀚𑀲𑁂𑀝𑁆𑀞.

𑁧𑁧𑁬.

‘‘𑀤𑀳𑀭𑁄 𑀢𑀼𑀯𑀁 𑀤𑀲𑁆𑀲𑀦𑀺𑀬𑁄𑀲𑀺 𑀭𑀸𑀚, 𑀧𑀞𑀫𑀼𑀕𑁆𑀕𑀢𑁄 𑀳𑁄𑀢𑀺 𑀬𑀣𑀸 𑀓𑀴𑀻𑀭𑁄;

𑀭𑀚𑁆𑀚𑀜𑁆𑀘 𑀓𑀸𑀭𑁂𑀳𑀺 𑀫𑀫𑀜𑁆𑀘 𑀧𑀲𑁆𑀲, 𑀫𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀻 𑀚𑀦𑀺𑀦𑁆𑀤𑀸’’𑀢𑀺.

𑀢𑀢𑁆𑀣 𑀫𑀫𑁂𑀯 𑀲𑀻𑀲𑀦𑁆𑀢𑀺 𑀫𑀫𑁂𑀯 𑀲𑀻𑀲𑁂 𑀲𑀜𑁆𑀚𑀸𑀢𑀁 𑀧𑀮𑀺𑀢𑀦𑁆𑀢𑀺 𑀤𑀻𑀧𑁂𑀢𑀺. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀼𑀲𑀸 𑀓𑀣𑁂𑀲𑀺𑀁. 𑀏𑀓𑀸𑀧𑀭𑀸𑀥𑀦𑁆𑀢𑀺. 𑀇𑀫𑀁 𑀫𑀬𑁆𑀳𑀁 𑀏𑀓𑀁 𑀅𑀧𑀭𑀸𑀥𑀁. 𑀧𑀞𑀫𑀼𑀕𑁆𑀕𑀢𑁄𑀢𑀺 𑀧𑀞𑀫𑀯𑀬𑁂𑀦 𑀉𑀕𑁆𑀕𑀢𑁄. 𑀳𑁄𑀳𑀻𑀢𑀺 𑀳𑁄𑀲𑀺, 𑀧𑀞𑀫𑀯𑀬𑁂 𑀧𑀢𑀺𑀝𑁆𑀞𑀺𑀢𑁄𑀲𑀻𑀢𑀺 𑀅𑀢𑁆𑀣𑁄. ‘‘𑀳𑁄𑀲𑀻’’𑀢𑀺𑀬𑁂𑀯 𑀯𑀸 𑀧𑀸𑀞𑁄. 𑀬𑀣𑀸 𑀓𑀴𑀻𑀭𑁄𑀢𑀺 𑀬𑀣𑀸 𑀲𑀺𑀦𑀺𑀤𑁆𑀥𑀙𑀯𑀺𑀢𑀭𑀼𑀡𑀓𑀴𑀻𑀭𑁄 𑀫𑀦𑁆𑀤𑀯𑀸𑀢𑁂𑀭𑀺𑀢𑁄 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀏𑀯𑀭𑀽𑀧𑁄𑀲𑀺 𑀢𑁆𑀯𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀞𑀫𑀼𑀕𑁆𑀕𑀢𑁄 𑀳𑁄𑀢𑀻’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀧𑀞𑀫𑀼𑀕𑁆𑀕𑀢𑁄 𑀢𑀭𑀼𑀡𑀓𑀴𑀻𑀭𑁄 𑀤𑀲𑁆𑀲𑀦𑀻𑀬𑁄 𑀳𑁄𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀤𑀲𑁆𑀲𑀦𑀻𑀬𑁄𑀢𑀺. 𑀫𑀫𑀜𑁆𑀘 𑀧𑀲𑁆𑀲𑀸𑀢𑀺 𑀫𑀫𑀜𑁆𑀘 𑀑𑀮𑁄𑀓𑁂𑀳𑀺, 𑀫𑀸 𑀫𑀁 𑀅𑀦𑀸𑀣𑀁 𑀯𑀺𑀥𑀯𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀓𑀸𑀮𑀺𑀓𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀁 𑀦𑀸𑀫 𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀦𑀢𑁄 𑀓𑀸𑀮𑀺𑀓𑀁 𑀦𑀸𑀫, 𑀭𑀚𑁆𑀚𑀁 𑀧𑀦 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀓𑀸𑀫𑀕𑀼𑀡𑀲𑀼𑀔𑀼𑀧𑁆𑀧𑀸𑀤𑀦𑀢𑁄 𑀅𑀓𑀸𑀮𑀺𑀓𑀁, 𑀲𑁄 𑀢𑁆𑀯𑀁 𑀇𑀫𑀁 𑀅𑀓𑀸𑀮𑀺𑀓𑀁 𑀧𑀳𑀸𑀬 𑀫𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀻𑀢𑀺 𑀯𑀤𑀢𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑁆𑀯𑀁 𑀪𑀯𑀺𑀢𑀩𑁆𑀩𑀫𑁂𑀯𑁂𑀢𑀁 𑀓𑀣𑀁 𑀓𑀣𑁂𑀲𑀺, 𑀧𑀭𑀺𑀡𑀫𑀦𑁆𑀢𑁂 𑀳𑀺 𑀫𑀫 𑀯𑀬𑁂 𑀇𑀫𑁂𑀳𑀺 𑀓𑀸𑀴𑀓𑁂𑀲𑁂𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀸𑀡𑀯𑀸𑀓𑀲𑀤𑀺𑀲𑁂𑀳𑀺 𑀧𑀡𑁆𑀟𑀭𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀅𑀳𑀜𑁆𑀳𑀺 ¶ 𑀦𑀻𑀮𑀼𑀧𑁆𑀧𑀮𑀸𑀤𑀺𑀓𑀼𑀲𑀼𑀫𑀤𑀸𑀫𑀲𑀤𑀺𑀲𑀓𑀼𑀫𑀸𑀭𑀸𑀦𑀁 𑀓𑀜𑁆𑀘𑀦𑀭𑀽𑀧𑀧𑀝𑀺𑀪𑀸𑀕𑀸𑀦𑀁 𑀉𑀢𑁆𑀢𑀫𑀬𑁄𑀩𑁆𑀩𑀦𑀯𑀺𑀮𑀸𑀲𑀲𑀫𑁆𑀧𑀢𑁆𑀢𑀸𑀦𑀁 𑀔𑀢𑁆𑀢𑀺𑀬𑀓𑀜𑁆𑀜𑀸𑀤𑀻𑀦𑀁 𑀯𑀬𑁂 𑀧𑀭𑀺𑀡𑀫𑀦𑁆𑀢𑁂 𑀚𑀭𑀁 𑀧𑀢𑁆𑀢𑀸𑀦𑀁 𑀯𑁂𑀯𑀡𑁆𑀡𑀺𑀬𑀜𑁆𑀘𑁂𑀯 𑀲𑀭𑀻𑀭𑀪𑀗𑁆𑀕𑀜𑁆𑀘 𑀧𑀲𑁆𑀲𑀸𑀫𑀺. 𑀏𑀯𑀁 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁄𑀯𑁂𑀲 𑀪𑀤𑁆𑀤𑁂, 𑀚𑀻𑀯𑀮𑁄𑀓𑁄’’𑀢𑀺 𑀯𑀢𑁆𑀯𑀸 𑀉𑀧𑀭𑀺 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁧𑁭.

‘‘𑀧𑀲𑁆𑀲𑀸𑀫𑀺 ¶ 𑀯𑁄𑀳𑀁 𑀤𑀳𑀭𑀺𑀁 𑀓𑀼𑀫𑀸𑀭𑀺𑀁, 𑀲𑀸𑀫𑀝𑁆𑀞𑀧𑀲𑁆𑀲𑀁 𑀲𑀼𑀢𑀦𑀼𑀁 𑀲𑀼𑀫𑀚𑁆𑀛𑀁;

𑀓𑀸𑀴𑀧𑁆𑀧𑀯𑀸𑀴𑀸𑀯 𑀧𑀯𑁂𑀮𑁆𑀮𑀫𑀸𑀦𑀸, 𑀧𑀮𑁄𑀪𑀬𑀦𑁆𑀢𑀻𑀯 𑀦𑀭𑁂𑀲𑀼 𑀕𑀘𑁆𑀙𑀢𑀺.

𑁧𑁧𑁮.

‘‘𑀢𑀫𑁂𑀦 𑀧𑀲𑁆𑀲𑀸𑀫𑀺𑀧𑀭𑁂𑀦 𑀦𑀸𑀭𑀺𑀁, 𑀆𑀲𑀻𑀢𑀺𑀓𑀁 𑀦𑀸𑀯𑀼𑀢𑀺𑀓𑀁𑀯 𑀚𑀘𑁆𑀘𑀸;

𑀤𑀡𑁆𑀟𑀁 𑀕𑀳𑁂𑀢𑁆𑀯𑀸𑀦 𑀧𑀯𑁂𑀥𑀫𑀸𑀦𑀁, 𑀕𑁄𑀧𑀸𑀦𑀲𑀻𑀪𑁄𑀕𑁆𑀕𑀲𑀫𑀁 𑀘𑀭𑀦𑁆𑀢𑀺’’𑀦𑁆𑀢𑀺.

𑀢𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀸𑀫𑀝𑁆𑀞𑀧𑀲𑁆𑀲𑀦𑁆𑀢𑀺 𑀲𑀫𑁆𑀫𑀝𑁆𑀞𑀧𑀲𑁆𑀲𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀲𑀩𑁆𑀩𑀧𑀲𑁆𑀲𑁂𑀲𑀼 𑀫𑀝𑁆𑀞𑀙𑀯𑀺𑀯𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀢𑀦𑀼𑀦𑁆𑀢𑀺 𑀲𑀼𑀦𑁆𑀤𑀭𑀲𑀭𑀻𑀭𑀁. 𑀲𑀼𑀫𑀚𑁆𑀛𑀦𑁆𑀢𑀺 𑀲𑀼𑀲𑀡𑁆𑀞𑀺𑀢𑀫𑀚𑁆𑀛𑀁. 𑀓𑀸𑀴𑀧𑁆𑀧𑀯𑀸𑀴𑀸𑀯 𑀧𑀯𑁂𑀮𑁆𑀮𑀫𑀸𑀦𑀸𑀢𑀺 𑀬𑀣𑀸 𑀦𑀸𑀫 𑀢𑀭𑀼𑀡𑀓𑀸𑀮𑁂 𑀲𑀼𑀲𑀫𑀼𑀕𑁆𑀕𑀢𑀸 𑀓𑀸𑀴𑀯𑀮𑁆𑀮𑀻 𑀧𑀯𑀸𑀴𑀸 𑀯𑀸 𑀳𑀼𑀢𑁆𑀯𑀸 𑀫𑀦𑁆𑀤𑀯𑀸𑀢𑁂𑀭𑀺𑀢𑀸 𑀇𑀢𑁄 𑀘𑀺𑀢𑁄 𑀘 𑀧𑀯𑁂𑀮𑁆𑀮𑀢𑀺, 𑀏𑀯𑀁 𑀧𑀯𑁂𑀮𑁆𑀮𑀫𑀸𑀦𑀸 𑀇𑀢𑁆𑀣𑀺𑀯𑀺𑀮𑀸𑀲𑀁 𑀤𑀲𑁆𑀲𑀬𑀫𑀸𑀦𑀸 𑀓𑀼𑀫𑀸𑀭𑀺𑀓𑀸 𑀧𑀮𑁄𑀪𑀬𑀦𑁆𑀢𑀻𑀯 𑀦𑀭𑁂𑀲𑀼 𑀕𑀘𑁆𑀙𑀢𑀺. 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀧𑀼𑀭𑀺𑀲𑀸𑀦𑀁 𑀲𑀦𑁆𑀢𑀺𑀓𑁂 𑀢𑁂 𑀧𑀼𑀭𑀺𑀲𑁂 𑀓𑀺𑀮𑁂𑀲𑀯𑀲𑁂𑀦 𑀧𑀮𑁄𑀪𑀬𑀦𑁆𑀢𑀻 𑀯𑀺𑀬 𑀕𑀘𑁆𑀙𑀢𑀺.

𑀢𑀫𑁂𑀦 𑀧𑀲𑁆𑀲𑀸𑀫𑀺𑀧𑀭𑁂𑀦 𑀦𑀸𑀭𑀺𑀦𑁆𑀢𑀺 𑀢𑀫𑁂𑀦𑀁 𑀦𑀸𑀭𑀺𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀚𑀭𑀁 𑀧𑀢𑁆𑀢𑀁 𑀅𑀦𑁆𑀢𑀭𑀳𑀺𑀢𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀧𑀲𑁆𑀲𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀧𑀞𑀫𑀕𑀸𑀣𑀸𑀬 𑀭𑀽𑀧𑁂 𑀅𑀲𑁆𑀲𑀸𑀤𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀆𑀲𑀻𑀢𑀺𑀓𑀁 𑀦𑀸𑀯𑀼𑀢𑀺𑀓𑀁𑀯 𑀚𑀘𑁆𑀘𑀸𑀢𑀺 𑀅𑀲𑀻𑀢𑀺𑀲𑀁𑀯𑀘𑁆𑀙𑀭𑀁 𑀯𑀸 𑀦𑀯𑀼𑀢𑀺𑀲𑀁𑀯𑀘𑁆𑀙𑀭𑀁 𑀯𑀸 𑀚𑀸𑀢𑀺𑀬𑀸. 𑀕𑁄𑀧𑀸𑀦𑀲𑀻𑀪𑁄𑀕𑁆𑀕𑀲𑀫𑀦𑁆𑀢𑀺 𑀕𑁄𑀧𑀸𑀦𑀲𑀻𑀲𑀫𑀁 𑀪𑁄𑀕𑁆𑀕𑀁, 𑀕𑁄𑀧𑀸𑀦𑀲𑀻𑀆𑀓𑀸𑀭𑁂𑀦 𑀪𑀕𑁆𑀕𑀲𑀭𑀻𑀭𑀁 𑀑𑀦𑀫𑀺𑀢𑁆𑀯𑀸 𑀦𑀝𑁆𑀞𑀓𑀸𑀓𑀡𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺𑀁 𑀯𑀺𑀬 𑀘𑀭𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘 ¶ 𑀩𑁄𑀥𑀺𑀲𑀢𑁆𑀢𑁂𑀦 𑀤𑀳𑀭𑀓𑀸𑀮𑁂 𑀤𑀺𑀲𑁆𑀯𑀸 𑀧𑀼𑀦 𑀦𑀸𑀯𑀼𑀢𑀺𑀓𑀓𑀸𑀮𑁂 𑀤𑀺𑀝𑁆𑀞𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀜𑀸𑀡𑁂𑀦 𑀤𑀺𑀝𑁆𑀞𑀪𑀸𑀯𑀁 𑀲𑀦𑁆𑀥𑀸𑀬 𑀧𑀦𑁂𑀢𑀁 𑀯𑀼𑀢𑁆𑀢𑀁.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀭𑀽𑀧𑀲𑁆𑀲 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁧𑁯.

‘‘𑀲𑁄𑀳𑀁 ¶ ¶ 𑀢𑀫𑁂𑀯𑀸𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄, 𑀏𑀓𑁄 𑀲𑀬𑀸𑀫𑀺 𑀲𑀬𑀦𑀲𑁆𑀲 𑀫𑀚𑁆𑀛𑁂;

‘𑀅𑀳𑀫𑁆𑀧𑀺 𑀏𑀯𑀁’ 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀦 𑀕𑀳𑁂 𑀭𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄.

𑁧𑁨𑁦.

‘‘𑀭𑀚𑁆𑀚𑀼𑀯𑀸𑀮𑀫𑁆𑀩𑀦𑀻 𑀘𑁂𑀲𑀸, 𑀬𑀸 𑀕𑁂𑀳𑁂 𑀯𑀲𑀢𑁄 𑀭𑀢𑀺;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀢𑀢𑁆𑀣 𑀲𑁄𑀳𑀦𑁆𑀢𑀺 𑀲𑁄 𑀅𑀳𑀁. 𑀢𑀫𑁂𑀯𑀸𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄𑀢𑀺 𑀢𑀫𑁂𑀯 𑀭𑀽𑀧𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀘𑀺𑀦𑁆𑀢𑁂𑀦𑁆𑀢𑁄. 𑀏𑀯𑀁 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄𑀢𑀺 ‘‘𑀬𑀣𑀸 𑀏𑀲𑀸 𑀧𑀭𑀺𑀡𑀢𑀸, 𑀅𑀳𑀫𑁆𑀧𑀺 𑀚𑀭𑀁 𑀧𑀢𑁆𑀢𑁄 𑀪𑀕𑁆𑀕𑀲𑀭𑀻𑀭𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑁂𑀓𑁆𑀔𑀫𑀸𑀦𑁄. 𑀦 𑀕𑀳𑁂 𑀭𑀫𑁂𑀢𑀺 𑀕𑁂𑀳𑁂 𑀦 𑀭𑀫𑀸𑀫𑀺. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄𑀢𑀺 𑀪𑀤𑁆𑀤𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀫𑁂 𑀓𑀸𑀮𑁄, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺.

𑀭𑀚𑁆𑀚𑀼𑀯𑀸𑀮𑀫𑁆𑀩𑀦𑀻 𑀘𑁂𑀲𑀸𑀢𑀺 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄, 𑀆𑀮𑀫𑁆𑀩𑀦𑀭𑀚𑁆𑀚𑀼 𑀯𑀺𑀬 𑀏𑀲𑀸𑀢𑀺 𑀅𑀢𑁆𑀣𑁄. 𑀓𑀢𑀭𑀸? 𑀬𑀸 𑀕𑁂𑀳𑁂 𑀯𑀲𑀢𑁄 𑀭𑀢𑀺, 𑀬𑀸 𑀕𑁂𑀳𑁂 𑀯𑀲𑀦𑁆𑀢𑀲𑁆𑀲 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀸𑀫𑀭𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀸𑀫𑀸𑀦𑀁 𑀅𑀧𑁆𑀧𑀲𑁆𑀲𑀸𑀤𑀢𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀏𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀕𑀺𑀮𑀸𑀦𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀅𑀢𑁆𑀢𑀦𑁄 𑀩𑀮𑁂𑀦 𑀧𑀭𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀇𑀫𑀁 𑀆𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀬𑁆𑀬𑀸𑀲𑀻’’𑀢𑀺 𑀆𑀮𑀫𑁆𑀩𑀦𑀭𑀚𑁆𑀚𑀼𑀁 𑀩𑀦𑁆𑀥𑁂𑀬𑁆𑀬𑀼𑀁, 𑀢𑀲𑁆𑀲 𑀢𑀁 𑀆𑀮𑀫𑁆𑀩𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀦𑁆𑀢𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀪𑀯𑁂𑀬𑁆𑀬, 𑀏𑀯𑀁 𑀓𑀺𑀮𑁂𑀲𑀸𑀢𑀼𑀭𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀯𑁂𑀓𑀲𑀼𑀔𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀅𑀕𑀸𑀭𑀫𑀚𑁆𑀛𑁂 𑀞𑀧𑀺𑀢𑀸𑀦𑀺 𑀓𑀸𑀫𑀭𑀢𑀺𑀤𑀸𑀬𑀓𑀸𑀦𑀺 𑀭𑀽𑀧𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀢𑁂𑀲𑀁 𑀓𑀺𑀮𑁂𑀲𑀧𑀭𑀺𑀴𑀸𑀳𑀓𑀸𑀮𑁂 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀯𑀲𑁂𑀦 𑀢𑀸𑀦𑀺 𑀆𑀭𑀩𑁆𑀪 𑀧𑀭𑀺𑀯𑀢𑁆𑀢𑀫𑀸𑀦𑀸𑀦𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀲𑀗𑁆𑀔𑀸𑀢𑀸 𑀓𑀸𑀫𑀭𑀢𑀺 𑀦𑀸𑀫 𑀢𑀁 𑀫𑀼𑀳𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 ¶ 𑀅𑀧𑁆𑀧𑀫𑀢𑁆𑀢𑀺𑀓𑀸 𑀳𑁄𑀢𑀺, 𑀏𑀯𑀁 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸𑀢𑀺. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦𑀸𑀢𑀺 𑀬𑀲𑁆𑀫𑀸 𑀧𑀦 𑀩𑀳𑀼𑀤𑀼𑀓𑁆𑀔𑀸 𑀓𑀸𑀫𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄, 𑀢𑀲𑁆𑀫𑀸 𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀧𑀡𑁆𑀟𑀺𑀢𑀸 𑀏𑀢𑀫𑁆𑀧𑀺 𑀭𑀚𑁆𑀚𑀼𑀁 𑀙𑁂𑀢𑁆𑀯𑀸 𑀕𑀽𑀣𑀓𑀽𑀧𑁂 𑀦𑀺𑀫𑀼𑀕𑁆𑀕𑀧𑀼𑀭𑀺𑀲𑁄 𑀢𑀁 𑀧𑀚𑀳𑀦𑁆𑀢𑁄 𑀯𑀺𑀬 𑀅𑀦𑀧𑁂𑀓𑁆𑀔𑀺𑀦𑁄 𑀏𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀩𑀳𑀼𑀤𑀼𑀓𑁆𑀔𑀁 𑀓𑀸𑀫𑀲𑀼𑀔𑀁 𑀧𑀳𑀸𑀬 𑀯𑀚𑀦𑁆𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑁄𑀭𑀫𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀦𑁆𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀓𑀸𑀫𑁂𑀲𑀼 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀳𑀸𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀧𑀭𑀺𑀤𑁂𑀯𑀦𑁆𑀢𑀸𑀦𑀫𑁂𑀯 𑀲𑀺𑀭𑀺𑀯𑀺𑀪𑀯𑀁 𑀙𑀟𑁆𑀟𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀩𑀳𑀽 𑀚𑀦𑁂 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀕𑁆𑀕𑀫𑀳𑁂𑀲𑀻 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀲𑀳𑀸𑀬𑀭𑀸𑀚𑀸 𑀆𑀦𑀦𑁆𑀤𑁄, 𑀲𑀼𑀲𑀻𑀫𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀲𑀻𑀫𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁧𑁨] 𑁭. 𑀓𑁄𑀝𑀲𑀺𑀫𑁆𑀩𑀮𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀁 𑀤𑀲𑀲𑀢𑀁𑀩𑁆𑀬𑀸𑀫𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀮𑁂𑀲𑀦𑀺𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀧𑀸𑀦𑀻𑀬𑀚𑀸𑀢𑀓𑁂 (𑀚𑀸. 𑁧.𑁧𑁧.𑁫𑁯 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀥𑀸𑀧𑀺 𑀲𑀢𑁆𑀣𑀸 𑀅𑀦𑁆𑀢𑁄𑀓𑁄𑀝𑀺𑀲𑀦𑁆𑀣𑀸𑀭𑁂 𑀓𑀸𑀫𑀯𑀺𑀢𑀓𑁆𑀓𑀸𑀪𑀺𑀪𑀽𑀢𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀆𑀲𑀗𑁆𑀓𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀦𑀸𑀫 𑀆𑀲𑀗𑁆𑀓𑀺𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀮𑁂𑀲𑀸 𑀦𑀸𑀫 𑀯𑀟𑁆𑀠𑀦𑁆𑀢𑀸 𑀯𑀦𑁂 𑀦𑀺𑀕𑁆𑀭𑁄𑀥𑀸𑀤𑀬𑁄 𑀯𑀺𑀬 𑀭𑀼𑀓𑁆𑀔𑀁, 𑀧𑀼𑀭𑀺𑀲𑀁 𑀪𑀜𑁆𑀚𑀦𑁆𑀢𑀺, 𑀢𑁂𑀦𑁂𑀯 𑀧𑀼𑀩𑁆𑀩𑁂𑀧𑀺 𑀓𑁄𑀝𑀲𑀺𑀫𑁆𑀩𑀮𑀺𑀬𑀁 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀏𑀓𑀁 𑀲𑀓𑀼𑀡𑀁 𑀦𑀺𑀕𑁆𑀭𑁄𑀥𑀩𑀻𑀚𑀸𑀦𑀺 𑀔𑀸𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀓𑁆𑀔𑀲𑁆𑀲 𑀲𑀸𑀔𑀦𑁆𑀢𑀭𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑀁 𑀤𑀺𑀲𑁆𑀯𑀸 ‘𑀇𑀢𑁄 𑀫𑁂 𑀯𑀺𑀫𑀸𑀦𑀲𑁆𑀲 𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀪𑀬𑀧𑁆𑀧𑀢𑁆𑀢𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑁄𑀝𑀲𑀺𑀫𑁆𑀩𑀮𑀺𑀬𑀁 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑁄 𑀲𑀼𑀧𑀡𑁆𑀡𑀭𑀸𑀚𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 ¶ 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀧𑀓𑁆𑀔𑀯𑀸𑀢𑁂𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀏𑀓𑀁 𑀩𑁆𑀬𑀸𑀫𑀲𑀳𑀲𑁆𑀲𑀸𑀬𑀸𑀫𑀁 𑀦𑀸𑀕𑀭𑀸𑀚𑀸𑀦𑀁 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀫𑀼𑀔𑁂𑀦𑀲𑁆𑀲 𑀕𑀳𑀺𑀢𑀕𑁄𑀘𑀭𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀓𑁄𑀝𑀲𑀺𑀫𑁆𑀩𑀮𑀺𑀁 𑀲𑀦𑁆𑀥𑀸𑀬 𑀯𑀦𑀫𑀢𑁆𑀣𑀓𑁂𑀦 𑀧𑀸𑀬𑀸𑀲𑀺. 𑀦𑀸𑀕𑀭𑀸𑀚𑀸 ‘‘𑀑𑀮𑀫𑁆𑀩𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀪𑁄𑀕𑀁 𑀧𑀯𑁂𑀲𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀁 𑀯𑁂𑀞𑁂𑀢𑁆𑀯𑀸 𑀕𑀡𑁆𑀳𑀺. 𑀲𑀼𑀧𑀡𑁆𑀡𑀭𑀜𑁆𑀜𑁄 𑀫𑀳𑀸𑀩𑀮𑀢𑀸𑀬 𑀦𑀸𑀕𑀭𑀸𑀚𑀲𑁆𑀲 𑀘 𑀫𑀳𑀸𑀲𑀭𑀻𑀭𑀢𑀸𑀬 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀲𑀫𑀼𑀕𑁆𑀖𑀸𑀝𑀁 𑀅𑀕𑀫𑀸𑀲𑀺. 𑀦𑀸𑀕𑀭𑀸𑀚𑀸 𑀦𑁂𑀯 𑀭𑀼𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀼𑀧𑀡𑁆𑀡𑀭𑀸𑀚𑀸 𑀲𑀤𑁆𑀥𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂𑀦 𑀦𑀸𑀕𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀓𑁄𑀝𑀲𑀺𑀫𑁆𑀩𑀮𑀺𑀁 𑀧𑀢𑁆𑀯𑀸 𑀦𑀸𑀕𑀭𑀸𑀚𑀸𑀦𑀁 𑀔𑀦𑁆𑀥𑀧𑀺𑀝𑁆𑀞𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀉𑀤𑀭𑀫𑀲𑁆𑀲 𑀨𑀸𑀮𑁂𑀢𑁆𑀯𑀸 ¶ 𑀦𑀸𑀕𑀫𑁂𑀤𑀁 𑀔𑀸𑀤𑀺𑀢𑁆𑀯𑀸 𑀲𑁂𑀲𑀓𑀴𑁂𑀯𑀭𑀁 𑀲𑀫𑀼𑀤𑁆𑀤𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀲𑁆𑀫𑀺𑀁 𑀧𑀦 𑀦𑀺𑀕𑁆𑀭𑁄𑀥𑁂 𑀏𑀓𑀸 𑀲𑀓𑀼𑀡𑀺𑀓𑀸 𑀅𑀢𑁆𑀣𑀺, 𑀲𑀸 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀯𑀺𑀲𑁆𑀲𑀝𑁆𑀞𑁂 𑀉𑀧𑁆𑀧𑀢𑀺𑀢𑁆𑀯𑀸 𑀓𑁄𑀝𑀲𑀺𑀫𑁆𑀩𑀮𑀺𑀬𑀸 𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺. 𑀭𑀼𑀓𑁆𑀔𑀤𑁂𑀯𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀓𑀼𑀡𑀺𑀓𑀸 𑀫𑀫 𑀭𑀼𑀓𑁆𑀔𑀓𑁆𑀔𑀦𑁆𑀥𑁂 𑀯𑀘𑁆𑀘𑀁 𑀧𑀸𑀢𑁂𑀲𑁆𑀲𑀢𑀺, 𑀢𑀢𑁄 𑀦𑀺𑀕𑁆𑀭𑁄𑀥𑀕𑀘𑁆𑀙𑁄 𑀯𑀸 𑀧𑀺𑀮𑀓𑁆𑀔𑀕𑀘𑁆𑀙𑁄 𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀓𑀮𑀭𑀼𑀓𑁆𑀔𑀁 𑀑𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀢𑀺, 𑀅𑀣 𑀫𑁂 𑀯𑀺𑀫𑀸𑀦𑀁 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀪𑀻𑀢𑀢𑀲𑀺𑀢𑀸 𑀧𑀯𑁂𑀥𑀺. 𑀢𑀲𑁆𑀲𑀸 𑀧𑀯𑁂𑀥𑀦𑁆𑀢𑀺𑀬𑀸 𑀓𑁄𑀝𑀲𑀺𑀫𑁆𑀩𑀮𑀻𑀧𑀺 𑀬𑀸𑀯 𑀫𑀽𑀮𑀸 𑀧𑀯𑁂𑀥𑀺. 𑀲𑀼𑀧𑀡𑁆𑀡𑀭𑀸𑀚𑀸 𑀢𑀁 𑀧𑀯𑁂𑀥𑀫𑀸𑀦𑀁 𑀤𑀺𑀲𑁆𑀯𑀸 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁧.

‘‘𑀅𑀳𑀁 ¶ 𑀤𑀲𑀲𑀢𑀁𑀩𑁆𑀬𑀸𑀫𑀁, 𑀉𑀭𑀕𑀫𑀸𑀤𑀸𑀬 𑀆𑀕𑀢𑁄;

𑀢𑀜𑁆𑀘 𑀫𑀜𑁆𑀘 𑀫𑀳𑀸𑀓𑀸𑀬𑀁, 𑀥𑀸𑀭𑀬𑀁 𑀦𑀧𑁆𑀧𑀯𑁂𑀥𑀲𑀺.

𑁧𑁨𑁨.

‘‘𑀅𑀣𑀺𑀫𑀁 𑀔𑀼𑀤𑁆𑀤𑀓𑀁 𑀧𑀓𑁆𑀔𑀺𑀁, 𑀅𑀧𑁆𑀧𑀫𑀁𑀲𑀢𑀭𑀁 𑀫𑀬𑀸;

𑀥𑀸𑀭𑀬𑀁 𑀩𑁆𑀬𑀣𑀲𑀺 𑀪𑀻𑀢𑀸, 𑀓𑀫𑀢𑁆𑀣𑀁 𑀓𑁄𑀝𑀲𑀺𑀫𑁆𑀩𑀮𑀻’’𑀢𑀺.

𑀢𑀢𑁆𑀣 𑀤𑀲𑀲𑀢𑀁𑀩𑁆𑀬𑀸𑀫𑀦𑁆𑀢𑀺 𑀲𑀳𑀲𑁆𑀲𑀩𑁆𑀬𑀸𑀫𑀫𑀢𑁆𑀢𑀸𑀬𑀸𑀫𑀁. 𑀉𑀭𑀕𑀫𑀸𑀤𑀸𑀬 𑀆𑀕𑀢𑁄𑀢𑀺 𑀏𑀯𑀁 𑀫𑀳𑀦𑁆𑀢𑀁 𑀉𑀭𑀕𑀁 𑀆𑀤𑀸𑀬 𑀇𑀥 𑀆𑀕𑀢𑁄. 𑀢𑀜𑁆𑀘 𑀫𑀜𑁆𑀘𑀸𑀢𑀺 𑀢𑀜𑁆𑀘 𑀉𑀭𑀕𑀁 𑀫𑀜𑁆𑀘. 𑀥𑀸𑀭𑀬𑀦𑁆𑀢𑀺 𑀥𑀸𑀭𑀬𑀫𑀸𑀦𑀸. 𑀩𑁆𑀬𑀣𑀲𑀻𑀢𑀺 𑀓𑀫𑁆𑀧𑀲𑀺. 𑀓𑀫𑀢𑁆𑀣𑀦𑁆𑀢𑀺 𑀓𑀺𑀁 𑀅𑀢𑁆𑀣𑀁, 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀧𑀼𑀘𑁆𑀙𑀢𑀺, 𑀓𑀁 𑀯𑀸 𑀅𑀢𑁆𑀣𑀁 𑀲𑀫𑁆𑀧𑀲𑁆𑀲𑀫𑀸𑀦𑀸𑀢𑀺𑀧𑀺 𑀅𑀢𑁆𑀣𑁄. 𑀓𑁄𑀝𑀲𑀺𑀫𑁆𑀩𑀮𑀻𑀢𑀺 𑀭𑀼𑀓𑁆𑀔𑀦𑀸𑀫𑁂𑀦 𑀤𑁂𑀯𑀧𑀼𑀢𑁆𑀢𑀁 𑀆𑀮𑀧𑀢𑀺. 𑀲𑁄 𑀳𑀺 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑁄 𑀔𑀦𑁆𑀥𑀲𑀸𑀔𑀫𑀳𑀦𑁆𑀢𑀢𑀸𑀬 𑀓𑁄𑀝𑀲𑀺𑀫𑁆𑀩𑀮𑀺𑀦𑀸𑀫𑀁 𑀮𑀪𑀢𑀺, 𑀢𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑀤𑁂𑀯𑀧𑀼𑀢𑁆𑀢𑀲𑁆𑀲𑀧𑀺 𑀢𑀤𑁂𑀯 𑀦𑀸𑀫𑀁.

𑀅𑀣𑀲𑁆𑀲 ¶ 𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀤𑁂𑀯𑀧𑀼𑀢𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁩.

‘‘𑀫𑀁𑀲𑀪𑀓𑁆𑀔𑁄 𑀢𑀼𑀯𑀁 𑀭𑀸𑀚, 𑀨𑀮𑀪𑀓𑁆𑀔𑁄 𑀅𑀬𑀁 𑀤𑀺𑀚𑁄;

𑀅𑀬𑀁 𑀦𑀺𑀕𑁆𑀭𑁄𑀥𑀩𑀻𑀚𑀸𑀦𑀺, 𑀧𑀺𑀮𑀓𑁆𑀔𑀼𑀤𑀼𑀫𑁆𑀩𑀭𑀸𑀦𑀺 𑀘;

𑀅𑀲𑁆𑀲𑀢𑁆𑀣𑀸𑀦𑀺 𑀘 𑀪𑀓𑁆𑀔𑀺𑀢𑁆𑀯𑀸, 𑀔𑀦𑁆𑀥𑁂 𑀫𑁂 𑀑𑀳𑀤𑀺𑀲𑁆𑀲𑀢𑀺.

𑁧𑁨𑁪.

‘‘𑀢𑁂 𑀭𑀼𑀓𑁆𑀔𑀸 𑀲𑀁𑀯𑀺𑀭𑀽𑀳𑀦𑁆𑀢𑀺, 𑀫𑀫 𑀧𑀲𑁆𑀲𑁂 𑀦𑀺𑀯𑀸𑀢𑀚𑀸;

𑀢𑁂 𑀫𑀁 𑀧𑀭𑀺𑀬𑁄𑀦𑀦𑁆𑀥𑀺𑀲𑁆𑀲𑀦𑁆𑀢𑀺, 𑀅𑀭𑀼𑀓𑁆𑀔𑀁 𑀫𑀁 𑀓𑀭𑀺𑀲𑁆𑀲𑀭𑁂.

𑁧𑁨𑁫.

‘‘𑀲𑀦𑁆𑀢𑀺 ¶ 𑀅𑀜𑁆𑀜𑁂𑀧𑀺 𑀭𑀼𑀓𑁆𑀔𑀸 𑀲𑁂, 𑀫𑀽𑀮𑀺𑀦𑁄 𑀔𑀦𑁆𑀥𑀺𑀦𑁄 𑀤𑀼𑀫𑀸;

𑀇𑀫𑀺𑀦𑀸 𑀲𑀓𑀼𑀡𑀚𑀸𑀢𑁂𑀦, 𑀩𑀻𑀚𑀫𑀸𑀳𑀭𑀺𑀢𑀸 𑀳𑀢𑀸.

𑁧𑁨𑁬.

‘‘𑀅𑀚𑁆𑀛𑀸𑀭𑀽𑀳𑀸𑀪𑀺𑀯𑀟𑁆𑀠𑀦𑁆𑀢𑀺, 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺𑀁;

𑀢𑀲𑁆𑀫𑀸 𑀭𑀸𑀚 𑀧𑀯𑁂𑀥𑀸𑀫𑀺, 𑀲𑀫𑁆𑀧𑀲𑁆𑀲𑀁𑀦𑀸𑀕𑀢𑀁 𑀪𑀬’’𑀦𑁆𑀢𑀺.

𑀢𑀢𑁆𑀣 𑀑𑀳𑀤𑀺𑀲𑁆𑀲𑀢𑀻𑀢𑀺 𑀯𑀘𑁆𑀘𑀁 𑀧𑀸𑀢𑁂𑀲𑁆𑀲𑀢𑀺. 𑀢𑁂 𑀭𑀼𑀓𑁆𑀔𑀸𑀢𑀺 𑀢𑁂𑀳𑀺 𑀩𑀻𑀚𑁂𑀳𑀺 𑀚𑀸𑀢𑀸 𑀦𑀺𑀕𑁆𑀭𑁄𑀥𑀸𑀤𑀬𑁄 𑀭𑀼𑀓𑁆𑀔𑀸. 𑀲𑀁𑀯𑀺𑀭𑀽𑀳𑀦𑁆𑀢𑀻𑀢𑀺 𑀲𑀁𑀯𑀺𑀭𑀼𑀳𑀺𑀲𑁆𑀲𑀦𑁆𑀢𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀫𑀫 𑀧𑀲𑁆𑀲𑁂𑀢𑀺 𑀫𑀫 𑀲𑀸𑀔𑀦𑁆𑀢𑀭𑀸𑀤𑀻𑀲𑀼. 𑀦𑀺𑀯𑀸𑀢𑀚𑀸𑀢𑀺 𑀫𑀫 𑀲𑀸𑀔𑀸𑀳𑀺 𑀯𑀸𑀢𑀲𑁆𑀲 𑀦𑀺𑀯𑀸𑀭𑀺𑀢𑀢𑁆𑀢𑀸 𑀦𑀺𑀯𑀸𑀢𑁂 𑀚𑀸𑀢𑀸. 𑀢𑁂 𑀫𑀁 𑀧𑀭𑀺𑀬𑁄𑀦𑀦𑁆𑀥𑀺𑀲𑁆𑀲𑀦𑁆𑀢𑀻𑀢𑀺 𑀏𑀢𑁂 ¶ 𑀏𑀯𑀁 𑀯𑀟𑁆𑀠𑀺𑀢𑀸 𑀫𑀁 𑀧𑀭𑀺𑀬𑁄𑀦𑀦𑁆𑀥𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀓𑀭𑀺𑀲𑁆𑀲𑀭𑁂𑀢𑀺 𑀅𑀣𑁂𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀫𑀁 𑀅𑀭𑀼𑀓𑁆𑀔𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺 𑀲𑀩𑁆𑀩𑀲𑁄 𑀪𑀜𑁆𑀚𑀺𑀲𑁆𑀲𑀦𑁆𑀢𑀺. 𑀭𑀼𑀓𑁆𑀔𑀸 𑀲𑁂𑀢𑀺 𑀭𑀼𑀓𑁆𑀔𑀸. 𑀫𑀽𑀮𑀺𑀦𑁄 𑀔𑀦𑁆𑀥𑀺𑀦𑁄𑀢𑀺 𑀫𑀽𑀮𑀲𑀫𑁆𑀧𑀦𑁆𑀦𑀸 𑀘𑁂𑀯 𑀔𑀦𑁆𑀥𑀲𑀫𑁆𑀧𑀦𑁆𑀦𑀸 𑀘. 𑀤𑀼𑀫𑀸𑀢𑀺 𑀭𑀼𑀓𑁆𑀔𑀯𑁂𑀯𑀘𑀦𑀫𑁂𑀯. 𑀩𑀻𑀚𑀫𑀸𑀳𑀭𑀺𑀢𑀸𑀢𑀺 𑀩𑀻𑀚𑀁 𑀆𑀳𑀭𑀺𑀢𑁆𑀯𑀸. 𑀳𑀢𑀸𑀢𑀺 𑀅𑀜𑁆𑀜𑁂𑀧𑀺 𑀇𑀫𑀲𑁆𑀫𑀺𑀁 𑀯𑀦𑁂 𑀭𑀼𑀓𑁆𑀔𑀸 𑀯𑀺𑀦𑀸𑀲𑀺𑀢𑀸 𑀲𑀦𑁆𑀢𑀺. 𑀅𑀚𑁆𑀛𑀸𑀭𑀽𑀳𑀸𑀪𑀺𑀯𑀟𑁆𑀠𑀦𑁆𑀢𑀻𑀢𑀺 𑀦𑀺𑀕𑁆𑀭𑁄𑀥𑀸𑀤𑀬𑁄 𑀭𑀼𑀓𑁆𑀔𑀸 𑀅𑀚𑁆𑀛𑀸𑀭𑀽𑀳𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀫𑁆𑀧𑀺 𑀅𑀜𑁆𑀜𑀁 𑀯𑀦𑀧𑁆𑀧𑀢𑀺𑀁 𑀅𑀢𑀺𑀓𑁆𑀓𑀫𑁆𑀫 𑀯𑀟𑁆𑀠𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀧𑀦 𑀯𑀦𑁂 𑀧𑀢𑀺, 𑀯𑀦𑀲𑁆𑀲 𑀧𑀢𑀺, 𑀯𑀦𑀧𑁆𑀧𑀢𑀻𑀢𑀺 𑀢𑀬𑁄𑀧𑀺 𑀧𑀸𑀞𑀸𑀬𑁂𑀯. 𑀭𑀸𑀚𑀸𑀢𑀺 𑀲𑀼𑀧𑀡𑁆𑀡𑀁 𑀆𑀮𑀧𑀢𑀺.

𑀭𑀼𑀓𑁆𑀔𑀤𑁂𑀯𑀢𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀼𑀧𑀡𑁆𑀡𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁨𑁭.

‘‘𑀲𑀗𑁆𑀓𑁂𑀬𑁆𑀬 𑀲𑀗𑁆𑀓𑀺𑀢𑀩𑁆𑀩𑀸𑀦𑀺, 𑀭𑀓𑁆𑀔𑁂𑀬𑁆𑀬𑀸𑀦𑀸𑀕𑀢𑀁 𑀪𑀬𑀁;

𑀅𑀦𑀸𑀕𑀢𑀪𑀬𑀸 𑀥𑀻𑀭𑁄, 𑀉𑀪𑁄 𑀮𑁄𑀓𑁂 𑀅𑀯𑁂𑀓𑁆𑀔𑀢𑀻’’𑀢𑀺.

𑀢𑀢𑁆𑀣 ¶ 𑀅𑀦𑀸𑀕𑀢𑀁 𑀪𑀬𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀦𑀸𑀕𑀢𑀁 𑀪𑀬𑀁 𑀭𑀓𑁆𑀔𑀢𑀺 𑀦𑀸𑀫, 𑀧𑀸𑀧𑀫𑀺𑀢𑁆𑀢𑁂 𑀯𑁂𑀭𑀺𑀧𑀼𑀕𑁆𑀕𑀮𑁂 𑀘 𑀅𑀦𑀼𑀧𑀲𑀗𑁆𑀓𑀫𑀦𑁆𑀢𑁄 𑀅𑀦𑀸𑀕𑀢𑀪𑀬𑀁 𑀭𑀓𑁆𑀔𑀢𑀺 𑀦𑀸𑀫. 𑀏𑀯𑀁 𑀅𑀦𑀸𑀕𑀢𑀁 𑀪𑀬𑀁 𑀭𑀓𑁆𑀔𑁂𑀬𑁆𑀬. 𑀅𑀦𑀸𑀕𑀢𑀪𑀬𑀸𑀢𑀺 𑀅𑀦𑀸𑀕𑀢𑀪𑀬𑀓𑀸𑀭𑀡𑀸 𑀢𑀁 𑀪𑀬𑀁 𑀧𑀲𑁆𑀲𑀦𑁆𑀢𑁄 𑀥𑀻𑀭𑁄 𑀇𑀥𑀮𑁄𑀓𑀜𑁆𑀘 𑀧𑀭𑀮𑁄𑀓𑀜𑁆𑀘 𑀅𑀯𑁂𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀸𑀫.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀼𑀧𑀡𑁆𑀡𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀧𑀓𑁆𑀔𑀺𑀁 𑀢𑀫𑁆𑀳𑀸 𑀭𑀼𑀓𑁆𑀔𑀸 𑀧𑀮𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀆𑀲𑀗𑁆𑀓𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀆𑀲𑀗𑁆𑀓𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 ¶ 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀤𑀸 𑀲𑀼𑀧𑀡𑁆𑀡𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑁄𑀝𑀲𑀺𑀫𑁆𑀩𑀮𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁧𑁩] 𑁮. 𑀥𑀽𑀫𑀓𑀸𑀭𑀺𑀚𑀸𑀢𑀓𑀯𑀡𑁆𑀡𑀦𑀸

𑀭𑀸𑀚𑀸 ¶ 𑀅𑀧𑀼𑀘𑁆𑀙𑀺 𑀯𑀺𑀥𑀼𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀧𑀯𑁂𑀡𑀺𑀆𑀕𑀢𑀸𑀦𑀁 𑀧𑁄𑀭𑀸𑀡𑀓𑀬𑁄𑀥𑀸𑀦𑀁 𑀲𑀗𑁆𑀕𑀳𑀁 𑀅𑀓𑀢𑁆𑀯𑀸 𑀅𑀪𑀺𑀦𑀯𑀸𑀕𑀢𑀸𑀦𑀁 𑀆𑀕𑀦𑁆𑀢𑀼𑀓𑀸𑀦𑀜𑁆𑀜𑁂𑀯 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀸𑀲𑀺. 𑀅𑀣𑀲𑁆𑀲 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀬𑀼𑀚𑁆𑀛𑀦𑀢𑁆𑀣𑀸𑀬 𑀕𑀢𑀲𑁆𑀲 ‘‘𑀆𑀕𑀦𑁆𑀢𑀼𑀓𑀸 𑀮𑀤𑁆𑀥𑀲𑀓𑁆𑀓𑀸𑀭𑀸 𑀬𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀧𑁄𑀭𑀸𑀡𑀓𑀬𑁄𑀥𑀸 𑀦 𑀬𑀼𑀚𑁆𑀛𑀺𑀁𑀲𑀼, ‘‘𑀧𑁄𑀭𑀸𑀡𑀓𑀬𑁄𑀥𑀸 𑀬𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀕𑀦𑁆𑀢𑀼𑀓𑀸𑀧𑀺 𑀦 𑀬𑀼𑀚𑁆𑀛𑀺𑀁𑀲𑀼. 𑀘𑁄𑀭𑀸 𑀭𑀸𑀚𑀸𑀦𑀁 𑀚𑀺𑀦𑀺𑀁𑀲𑀼. 𑀭𑀸𑀚𑀸 𑀧𑀭𑀸𑀚𑀺𑀢𑁄 𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀤𑁄𑀲𑁂𑀦 𑀅𑀢𑁆𑀢𑀦𑁄 𑀧𑀭𑀸𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀅𑀳𑀫𑁂𑀯 𑀏𑀯𑀁 𑀓𑀭𑁄𑀦𑁆𑀢𑁄 𑀧𑀭𑀸𑀚𑀺𑀢𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀭𑀸𑀚𑀸𑀦𑁄 𑀧𑀭𑀸𑀚𑀺𑀢𑀧𑀼𑀩𑁆𑀩𑀸𑀢𑀺 𑀤𑀲𑀩𑀮𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀫𑀳𑀸𑀭𑀸𑀚, 𑀢𑁆𑀯𑀫𑁂𑀯𑁂𑀓𑁄, 𑀧𑁄𑀭𑀸𑀡𑀓𑀭𑀸𑀚𑀸𑀦𑁄𑀧𑀺 𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀧𑀭𑀸𑀚𑀺𑀢𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀬𑀼𑀥𑀺𑀝𑁆𑀞𑀺𑀮𑀕𑁄𑀢𑁆𑀢𑁄 𑀥𑀦𑀜𑁆𑀘𑀬𑁄 𑀦𑀸𑀫 𑀓𑁄𑀭𑀩𑁆𑀬𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀇𑀦𑁆𑀤𑀧𑀢𑁆𑀣𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺, 𑀯𑀺𑀥𑀼𑀭𑀧𑀡𑁆𑀟𑀺𑀢𑁄𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀤𑀸 𑀥𑀦𑀜𑁆𑀘𑀬𑀭𑀸𑀚𑀸 𑀧𑁄𑀭𑀸𑀡𑀓𑀬𑁄𑀥𑁂 𑀅𑀕𑀡𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑀸𑀦𑀜𑁆𑀜𑁂𑀯 𑀲𑀗𑁆𑀕𑀳𑀁 𑀅𑀓𑀸𑀲𑀺. 𑀢𑀲𑁆𑀲 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀬𑀼𑀚𑁆𑀛𑀦𑀢𑁆𑀣𑀸𑀬 𑀕𑀢𑀲𑁆𑀲 ‘‘𑀆𑀕𑀦𑁆𑀢𑀼𑀓𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀦𑁂𑀯 𑀧𑁄𑀭𑀸𑀡𑀓𑀸 𑀬𑀼𑀚𑁆𑀛𑀺𑀁𑀲𑀼, ‘‘𑀧𑁄𑀭𑀸𑀡𑀓𑀸 𑀬𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀆𑀕𑀦𑁆𑀢𑀼𑀓𑀸 𑀬𑀼𑀚𑁆𑀛𑀺𑀁𑀲𑀼. 𑀭𑀸𑀚𑀸 𑀧𑀭𑀸𑀚𑀺𑀢𑁄 𑀇𑀦𑁆𑀤𑀧𑀢𑁆𑀣𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 ‘‘𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀲𑁆𑀲 𑀓𑀢𑀪𑀸𑀯𑁂𑀦 𑀧𑀭𑀸𑀚𑀺𑀢𑁄𑀫𑁆𑀳𑀻’’𑀢𑀺 ¶ 𑀘𑀺𑀦𑁆𑀢𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 ‘‘𑀓𑀺𑀁 𑀦𑀼 𑀔𑁄 𑀅𑀳𑀫𑁂𑀯 𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀧𑀭𑀸𑀚𑀺𑀢𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀭𑀸𑀚𑀸𑀦𑁄 𑀧𑀭𑀸𑀚𑀺𑀢𑀧𑀼𑀩𑁆𑀩𑀸 𑀅𑀢𑁆𑀣𑀻𑀢𑀺 𑀯𑀺𑀥𑀼𑀭𑀧𑀡𑁆𑀟𑀺𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑀁 𑀧𑀼𑀘𑁆𑀙𑀦𑀸𑀓𑀸𑀭𑀁 𑀆𑀯𑀺𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀉𑀧𑀟𑁆𑀠𑀁 𑀕𑀸𑀣𑀫𑀸𑀳 𑁋

𑁧𑁨𑁮.

‘‘𑀭𑀸𑀚𑀸 𑀅𑀧𑀼𑀘𑁆𑀙𑀺 𑀯𑀺𑀥𑀼𑀭𑀁, 𑀥𑀫𑁆𑀫𑀓𑀸𑀫𑁄 𑀬𑀼𑀥𑀺𑀝𑁆𑀞𑀺𑀮𑁄’’𑀢𑀺.

𑀢𑀢𑁆𑀣 𑀥𑀫𑁆𑀫𑀓𑀸𑀫𑁄𑀢𑀺 𑀲𑀼𑀘𑀭𑀺𑀢𑀥𑀫𑁆𑀫𑀧𑁆𑀧𑀺𑀬𑁄.

‘‘𑀅𑀧𑀺 𑀩𑁆𑀭𑀸𑀳𑁆𑀫𑀡 𑀚𑀸𑀦𑀸𑀲𑀺, 𑀓𑁄 𑀏𑀓𑁄 𑀩𑀳𑀼 𑀲𑁄𑀘𑀢𑀻’’𑀢𑀺 𑁋

𑀲𑁂𑀲𑀉𑀧𑀟𑁆𑀠𑀕𑀸𑀣𑀸𑀬 𑀧𑀦 𑀅𑀬𑀫𑀢𑁆𑀣𑁄 𑁋 𑀅𑀧𑀺 𑀦𑀸𑀫, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀚𑀸𑀦𑀸𑀲𑀺 ‘‘𑀓𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂

𑀏𑀓𑁄 ¶ 𑀩𑀳𑀼 𑀲𑁄𑀘𑀢𑀺, 𑀦𑀸𑀦𑀸𑀓𑀸𑀭𑀡𑁂𑀦 𑀲𑁄𑀘𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀓𑀺𑀁 𑀲𑁄𑀓𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀲𑁄𑀓𑁄, 𑀧𑀼𑀩𑁆𑀩𑁂 𑀥𑀽𑀫𑀓𑀸𑀭𑀻 𑀦𑀸𑀫𑁂𑀓𑁄 𑀅𑀚𑀧𑀸𑀮𑀩𑁆𑀭𑀸𑀳𑁆𑀫𑀡𑁄 𑀫𑀳𑀦𑁆𑀢𑀁 𑀅𑀚𑀬𑀽𑀣𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀚𑀁 𑀓𑀢𑁆𑀯𑀸 𑀢𑀢𑁆𑀣 𑀅𑀚𑀸 𑀞𑀧𑁂𑀢𑁆𑀯𑀸 𑀅𑀕𑁆𑀕𑀺𑀜𑁆𑀘 𑀥𑀽𑀫𑀜𑁆𑀘 𑀓𑀢𑁆𑀯𑀸 𑀅𑀚𑀬𑀽𑀣𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀔𑀻𑀭𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀯𑀲𑀺. 𑀲𑁄 𑀢𑀢𑁆𑀣 𑀆𑀕𑀢𑁂 𑀲𑀼𑀯𑀡𑁆𑀡𑀯𑀡𑁆𑀡𑁂 𑀲𑀭𑀪𑁂 𑀤𑀺𑀲𑁆𑀯𑀸 𑀢𑁂𑀲𑀼 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀅𑀚𑀸 𑀅𑀕𑀡𑁂𑀢𑁆𑀯𑀸 𑀅𑀚𑀸𑀦𑀁 𑀲𑀓𑁆𑀓𑀸𑀭𑀁 𑀲𑀭𑀪𑀸𑀦𑀁 𑀓𑀢𑁆𑀯𑀸 𑀲𑀭𑀤𑀓𑀸𑀮𑁂 𑀲𑀭𑀪𑁂𑀲𑀼 𑀧𑀮𑀸𑀬𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀢𑁂𑀲𑀼 𑀅𑀚𑀸𑀲𑀼𑀧𑀺 𑀦𑀝𑁆𑀞𑀸𑀲𑀼 𑀲𑀭𑀪𑁂 𑀅𑀧𑀲𑁆𑀲𑀦𑁆𑀢𑁄 𑀲𑁄𑀓𑁂𑀦 𑀧𑀡𑁆𑀟𑀼𑀭𑁄𑀕𑀻 𑀳𑀼𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀬𑀁 𑀆𑀕𑀦𑁆𑀢𑀼𑀓𑀲𑀗𑁆𑀕𑀳𑀁 𑀓𑀢𑁆𑀯𑀸 𑀢𑀼𑀫𑁆𑀳𑁂𑀳𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑁄𑀘𑀺𑀢𑁆𑀯𑀸 𑀓𑀺𑀮𑀫𑀺𑀢𑁆𑀯𑀸 ¶ 𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀇𑀤𑀁 𑀉𑀤𑀸𑀳𑀭𑀡𑀁 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁧𑁨𑁯.

‘‘𑀩𑁆𑀭𑀸𑀳𑁆𑀫𑀡𑁄 𑀅𑀚𑀬𑀽𑀣𑁂𑀦, 𑀧𑀳𑀽𑀢𑁂𑀚𑁄 𑀯𑀦𑁂 𑀯𑀲𑀁;

𑀥𑀽𑀫𑀁 𑀅𑀓𑀸𑀲𑀺 𑀯𑀸𑀲𑁂𑀝𑁆𑀞𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

𑁧𑁩𑁦.

‘‘𑀢𑀲𑁆𑀲 𑀢𑀁𑀥𑀽𑀫𑀕𑀦𑁆𑀥𑁂𑀦, 𑀲𑀭𑀪𑀸 𑀫𑀓𑀲𑀟𑁆𑀟𑀺𑀢𑀸;

𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀘𑁆𑀙𑀼𑀁, 𑀥𑀽𑀫𑀓𑀸𑀭𑀺𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁩𑁧.

‘‘𑀲𑀭𑀪𑁂𑀲𑀼 𑀫𑀦𑀁 𑀓𑀢𑁆𑀯𑀸, 𑀅𑀚𑀸 𑀲𑁄 𑀦𑀸𑀯𑀩𑀼𑀚𑁆𑀛𑀣;

𑀆𑀕𑀘𑁆𑀙𑀦𑁆𑀢𑀻 𑀯𑀚𑀦𑁆𑀢𑀻 𑀯𑀸, 𑀢𑀲𑁆𑀲 𑀢𑀸 𑀯𑀺𑀦𑀲𑀼𑀁 𑀅𑀚𑀸.

𑁧𑁩𑁨.

‘‘𑀲𑀭𑀪𑀸 ¶ 𑀲𑀭𑀤𑁂 𑀓𑀸𑀮𑁂, 𑀧𑀳𑀻𑀦𑀫𑀓𑀲𑁂 𑀯𑀦𑁂;

𑀧𑀸𑀯𑀺𑀲𑀼𑀁 𑀕𑀺𑀭𑀺𑀤𑀼𑀕𑁆𑀕𑀸𑀦𑀺, 𑀦𑀤𑀻𑀦𑀁 𑀧𑀪𑀯𑀸𑀦𑀺 𑀘.

𑁧𑁩𑁩.

‘‘𑀲𑀭𑀪𑁂 𑀘 𑀕𑀢𑁂 𑀤𑀺𑀲𑁆𑀯𑀸, 𑀅𑀚𑀸 𑀘 𑀯𑀺𑀪𑀯𑀁 𑀕𑀢𑀸;

𑀓𑀺𑀲𑁄 𑀘 𑀯𑀺𑀯𑀡𑁆𑀡𑁄 𑀘𑀸𑀲𑀺, 𑀧𑀡𑁆𑀟𑀼𑀭𑁄𑀕𑀻 𑀘 𑀩𑁆𑀭𑀸𑀳𑁆𑀫𑀡𑁄.

𑁧𑁩𑁪.

‘‘𑀏𑀯𑀁 𑀬𑁄 𑀲𑀁 𑀦𑀺𑀭𑀁𑀓𑀢𑁆𑀯𑀸, 𑀆𑀕𑀦𑁆𑀢𑀼𑀁 𑀓𑀼𑀭𑀼𑀢𑁂 𑀧𑀺𑀬𑀁;

𑀲𑁄 𑀏𑀓𑁄 𑀩𑀳𑀼 𑀲𑁄𑀘𑀢𑀺, 𑀥𑀽𑀫𑀓𑀸𑀭𑀻𑀯 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀢𑀢𑁆𑀣 𑀧𑀳𑀽𑀢𑁂𑀚𑁄𑀢𑀺 𑀧𑀳𑀽𑀢𑀇𑀦𑁆𑀥𑀦𑁄. 𑀥𑀽𑀫𑀁 𑀅𑀓𑀸𑀲𑀻𑀢𑀺 𑀫𑀓𑁆𑀔𑀺𑀓𑀧𑀭𑀺𑀧𑀦𑁆𑀣𑀳𑀭𑀡𑀢𑁆𑀣𑀸𑀬 𑀅𑀕𑁆𑀕𑀺𑀜𑁆𑀘 𑀥𑀽𑀫𑀜𑁆𑀘 𑀅𑀓𑀸𑀲𑀺. 𑀯𑀸𑀲𑁂𑀝𑁆𑀞𑁄𑀢𑀺 𑀢𑀲𑁆𑀲 𑀕𑁄𑀢𑁆𑀢𑀁. 𑀅𑀢𑀦𑁆𑀤𑀺𑀢𑁄𑀢𑀺 𑀅𑀦𑀮𑀲𑁄 𑀳𑀼𑀢𑁆𑀯𑀸. 𑀢𑀁𑀥𑀽𑀫𑀕𑀦𑁆𑀥𑁂𑀦𑀸𑀢𑀺 𑀢𑁂𑀦 𑀥𑀽𑀫𑀕𑀦𑁆𑀥𑁂𑀦. 𑀲𑀭𑀪𑀸𑀢𑀺 𑀲𑀭𑀪𑀫𑀺𑀕𑀸. 𑀫𑀓𑀲𑀟𑁆𑀟𑀺𑀢𑀸𑀢𑀺 𑀫𑀓𑀲𑁂𑀳𑀺 𑀉𑀧𑀤𑁆𑀤𑀼𑀢𑀸 𑀧𑀻𑀴𑀺𑀢𑀸. 𑀲𑁂𑀲𑀫𑀓𑁆𑀔𑀺𑀓𑀸𑀧𑀺 𑀫𑀓𑀲𑀕𑁆𑀕𑀳𑀡𑁂𑀦𑁂𑀯 ¶ 𑀕𑀳𑀺𑀢𑀸. 𑀯𑀲𑁆𑀲𑀸𑀯𑀸𑀲𑀦𑁆𑀢𑀺 𑀯𑀲𑁆𑀲𑀸𑀭𑀢𑁆𑀢𑀯𑀸𑀲𑀁 𑀯𑀲𑀺𑀁𑀲𑀼. 𑀫𑀦𑀁 𑀓𑀢𑁆𑀯𑀸𑀢𑀺 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀦𑀸𑀯𑀩𑀼𑀚𑁆𑀛𑀣𑀸𑀢𑀺 𑀅𑀭𑀜𑁆𑀜𑀢𑁄 𑀘𑀭𑀺𑀢𑁆𑀯𑀸 𑀯𑀚𑀁 𑀆𑀕𑀘𑁆𑀙𑀦𑁆𑀢𑀻 𑀘𑁂𑀯 𑀯𑀚𑀢𑁄 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀻 𑀘 ‘‘𑀏𑀢𑁆𑀢𑀓𑀸 𑀆𑀕𑀢𑀸, 𑀏𑀢𑁆𑀢𑀓𑀸 𑀅𑀦𑀸𑀕𑀢𑀸’’𑀢𑀺 𑀦 𑀚𑀸𑀦𑀸𑀢𑀺. 𑀢𑀲𑁆𑀲 𑀢𑀸 𑀯𑀺𑀦𑀲𑀼𑀦𑁆𑀢𑀺 𑀢𑀲𑁆𑀲 𑀢𑀸 𑀏𑀯𑀁 𑀅𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀻𑀳𑀧𑀭𑀺𑀧𑀦𑁆𑀣𑀸𑀤𑀺𑀢𑁄 𑀅𑀭𑀓𑁆𑀔𑀺𑀬𑀫𑀸𑀦𑀸 𑀅𑀚𑀸 𑀲𑀻𑀳𑀧𑀭𑀺𑀧𑀦𑁆𑀣𑀸𑀤𑀻𑀳𑀺 𑀯𑀺𑀦𑀲𑁆𑀲𑀺𑀁𑀲𑀼, 𑀲𑀩𑁆𑀩𑀸𑀯 𑀯𑀺𑀦𑀝𑁆𑀞𑀸.

𑀦𑀤𑀻𑀦𑀁 𑀧𑀪𑀯𑀸𑀦𑀺 𑀘𑀸𑀢𑀺 𑀧𑀩𑁆𑀩𑀢𑁂𑀬𑁆𑀬𑀸𑀦𑀁 𑀦𑀤𑀻𑀦𑀁 𑀧𑀪𑀯𑀝𑁆𑀞𑀸𑀦𑀸𑀦𑀺 𑀘 𑀧𑀯𑀺𑀝𑁆𑀞𑀸. 𑀯𑀺𑀪𑀯𑀦𑁆𑀢𑀺 𑀅𑀪𑀸𑀯𑀁. 𑀅𑀚𑀸 𑀘 𑀯𑀺𑀦𑀸𑀲𑀁 𑀧𑀢𑁆𑀢𑀸 𑀤𑀺𑀲𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀓𑀺𑀲𑁄 𑀘 𑀯𑀺𑀯𑀡𑁆𑀡𑁄𑀢𑀺 𑀔𑀻𑀭𑀸𑀤𑀺𑀤𑀸𑀬𑀺𑀓𑀸 𑀅𑀚𑀸 𑀧𑀳𑀸𑀬 𑀲𑀭𑀪𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀧𑀺 𑀅𑀧𑀲𑁆𑀲𑀦𑁆𑀢𑁄 𑀉𑀪𑀢𑁄 ¶ 𑀧𑀭𑀺𑀳𑀻𑀦𑁄 𑀲𑁄𑀓𑀸𑀪𑀺𑀪𑀽𑀢𑁄 𑀓𑀺𑀲𑁄 𑀘𑁂𑀯 𑀤𑀼𑀩𑁆𑀩𑀡𑁆𑀡𑁄 𑀘 𑀅𑀳𑁄𑀲𑀺. 𑀏𑀯𑀁 𑀬𑁄 𑀲𑀁 𑀦𑀺𑀭𑀁𑀓𑀢𑁆𑀯𑀸𑀢𑀺 𑀏𑀯𑀁 𑀫𑀳𑀸𑀭𑀸𑀚, 𑀬𑁄 𑀲𑀓𑀁 𑀧𑁄𑀭𑀸𑀡𑀁 𑀅𑀚𑁆𑀛𑀢𑁆𑀢𑀺𑀓𑀁 𑀚𑀦𑀁 𑀦𑀻𑀳𑀭𑀺𑀢𑁆𑀯𑀸 𑀧𑀳𑀸𑀬 𑀓𑀺𑀲𑁆𑀫𑀺𑀜𑁆𑀘𑀺 𑀅𑀕𑀡𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑀁 𑀧𑀺𑀬𑀁 𑀓𑀭𑁄𑀢𑀺, 𑀲𑁄 𑀢𑀼𑀫𑁆𑀳𑀸𑀤𑀺𑀲𑁄 𑀏𑀓𑁄 𑀩𑀳𑀼 𑀲𑁄𑀘𑀢𑀺, 𑀅𑀬𑀁 𑀢𑁂 𑀫𑀬𑀸 𑀤𑀲𑁆𑀲𑀺𑀢𑁄 𑀥𑀽𑀫𑀓𑀸𑀭𑀻 𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀩𑀳𑀼 𑀲𑁄𑀘𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀓𑀣𑁂𑀲𑀺. 𑀲𑁄𑀧𑀺 𑀲𑀜𑁆𑀜𑀢𑁆𑀢𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀅𑀚𑁆𑀛𑀢𑁆𑀢𑀺𑀓𑀲𑀗𑁆𑀕𑀳𑀫𑁂𑀯 𑀓𑀭𑁄𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑁄𑀭𑀩𑁆𑀬𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀥𑀽𑀫𑀓𑀸𑀭𑀻 𑀧𑀲𑁂𑀦𑀤𑀺𑀓𑁄𑀲𑀮𑁄, 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀥𑀽𑀫𑀓𑀸𑀭𑀺𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁧𑁪] 𑁯. 𑀚𑀸𑀕𑀭𑀚𑀸𑀢𑀓𑀯𑀡𑁆𑀡𑀦𑀸

𑀓𑁄𑀥 ¶ 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀲𑀸𑀯𑀢𑁆𑀣𑀺𑀢𑁄 𑀲𑀓𑀝𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀢𑁆𑀣𑀯𑀸𑀳𑁄 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀫𑁄𑀘𑁂𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀯𑀸𑀲𑀁 𑀉𑀧𑀕𑀘𑁆𑀙𑀺. 𑀢𑁂 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀼𑀧𑀺𑀁𑀲𑀼, 𑀉𑀧𑀸𑀲𑀓𑁄 𑀧𑀦 𑀲𑀢𑁆𑀣𑀯𑀸𑀳𑀲𑁆𑀲 𑀲𑀦𑁆𑀢𑀺𑀓𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀁 𑀯𑀺𑀮𑀼𑀫𑁆𑀧𑀺𑀢𑀼𑀓𑀸𑀫𑀸 ¶ 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀦𑀸𑀦𑀸𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀲𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂 𑀢𑀁 𑀉𑀧𑀸𑀲𑀓𑀁 𑀘𑀗𑁆𑀓𑀫𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀦𑀺𑀤𑁆𑀤𑀸𑀬𑀦𑀓𑀸𑀮𑁂 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀝𑁆𑀞𑀁𑀲𑀼, 𑀲𑁄𑀧𑀺 𑀢𑀺𑀬𑀸𑀫𑀭𑀢𑁆𑀢𑀺𑀁 𑀘𑀗𑁆𑀓𑀫𑀺𑀬𑁂𑀯. 𑀘𑁄𑀭𑀸 𑀧𑀘𑁆𑀘𑀽𑀲𑀲𑀫𑀬𑁂 𑀕𑀳𑀺𑀢𑀕𑀳𑀺𑀢𑀸 𑀧𑀸𑀲𑀸𑀡𑀫𑀼𑀕𑁆𑀕𑀭𑀸𑀤𑀬𑁄 𑀙𑀟𑁆𑀟𑁂𑀢𑁆𑀯𑀸 ‘‘𑀪𑁄 𑀲𑀢𑁆𑀣𑀯𑀸𑀳, 𑀇𑀫𑀁 𑀅𑀧𑁆𑀧𑀫𑀸𑀤𑁂𑀦 𑀚𑀕𑁆𑀕𑀦𑁆𑀢𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀢𑁆𑀯𑀸 𑀢𑀯 𑀲𑀦𑁆𑀢𑀓𑀲𑁆𑀲 𑀲𑀸𑀫𑀺𑀓𑁄 𑀚𑀸𑀢𑁄, 𑀏𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀫𑀦𑀼𑀲𑁆𑀲𑀸 ¶ 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀢𑁂𑀳𑀺 𑀙𑀟𑁆𑀟𑀺𑀢𑀧𑀸𑀲𑀸𑀡𑀫𑀼𑀕𑁆𑀕𑀭𑀸𑀤𑀬𑁄 𑀤𑀺𑀲𑁆𑀯𑀸 ‘‘𑀇𑀫𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑁂𑀳𑀺 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀉𑀧𑀸𑀲𑀓𑀲𑁆𑀲 𑀲𑀓𑁆𑀓𑀸𑀭𑀁 𑀅𑀓𑀁𑀲𑀼. 𑀉𑀧𑀸𑀲𑀓𑁄𑀧𑀺 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀢𑀓𑀺𑀘𑁆𑀘𑁄 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁, 𑀉𑀧𑀸𑀲𑀓, 𑀦 𑀧𑀜𑁆𑀜𑀸𑀬𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀉𑀧𑀸𑀲𑀓, 𑀢𑁆𑀯𑀁𑀬𑁂𑀯 𑀅𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀚𑀕𑁆𑀕𑀦𑁆𑀢𑁄 𑀯𑀺𑀲𑁂𑀲𑀁 𑀮𑀪𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀚𑀕𑁆𑀕𑀦𑁆𑀢𑀸 𑀯𑀺𑀲𑁂𑀲𑀁 𑀕𑀼𑀡𑀁 𑀮𑀪𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀅𑀧𑀭𑀪𑀸𑀕𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀞𑀸𑀦𑀘𑀗𑁆𑀓𑀫𑀺𑀭𑀺𑀬𑀸𑀧𑀣𑁄 𑀳𑀼𑀢𑁆𑀯𑀸 𑀯𑀲𑀦𑁆𑀢𑁄 𑀦𑀺𑀤𑁆𑀤𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀘𑀗𑁆𑀓𑀫𑀢𑀺. 𑀅𑀣𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀤𑁂𑀯𑀢𑀸 ¶ 𑀢𑀼𑀲𑁆𑀲𑀺𑀢𑁆𑀯𑀸 𑀭𑀼𑀓𑁆𑀔𑀯𑀺𑀝𑀧𑁂 𑀞𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁫.

‘‘𑀓𑁄𑀥 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀓𑁄𑀥 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀓𑁄 𑀫𑀫𑁂𑀢𑀁 𑀯𑀺𑀚𑀸𑀦𑀸𑀢𑀺, 𑀓𑁄 𑀢𑀁 𑀧𑀝𑀺𑀪𑀡𑀸𑀢𑀺 𑀫𑁂’’𑀢𑀺.

𑀢𑀢𑁆𑀣 𑀓𑁄𑀥𑀸𑀢𑀺 𑀓𑁄 𑀇𑀥. 𑀓𑁄 𑀫𑀫𑁂𑀢𑀦𑁆𑀢𑀺 𑀓𑁄 𑀫𑀫 𑀏𑀢𑀁 𑀧𑀜𑁆𑀳𑀁 𑀯𑀺𑀚𑀸𑀦𑀸𑀢𑀺. 𑀓𑁄 𑀢𑀁 𑀧𑀝𑀺𑀪𑀡𑀸𑀢𑀺 𑀫𑁂𑀢𑀺 𑀏𑀢𑀁 𑀫𑀬𑀸 𑀧𑀼𑀝𑁆𑀞𑀁 𑀧𑀜𑁆𑀳𑀁 𑀫𑀬𑁆𑀳𑀁 𑀓𑁄 𑀧𑀝𑀺𑀪𑀡𑀸𑀢𑀺, 𑀓𑁄 𑀩𑁆𑀬𑀸𑀓𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑁋

𑁧𑁩𑁬.

‘‘𑀅𑀳𑀁 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀅𑀳𑀁 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀅𑀳𑀫𑁂𑀢𑀁 𑀯𑀺𑀚𑀸𑀦𑀸𑀫𑀺, 𑀅𑀳𑀁 𑀧𑀝𑀺𑀪𑀡𑀸𑀫𑀺 𑀢𑁂’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦 𑀢𑀸𑀬 𑁋

𑁧𑁩𑁭.

‘‘𑀓𑀣𑀁 ¶ 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀓𑀣𑀁 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀓𑀣𑀁 𑀏𑀢𑀁 𑀯𑀺𑀚𑀸𑀦𑀸𑀲𑀺, 𑀓𑀣𑀁 𑀧𑀝𑀺𑀪𑀡𑀸𑀲𑀺 𑀫𑁂’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑁋

𑁧𑁩𑁮.

‘‘𑀬𑁂 𑀥𑀫𑁆𑀫𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀁𑀬𑀫𑁄𑀢𑀺 𑀤𑀫𑁄𑀢𑀺 𑀘;

𑀢𑁂𑀲𑀼 𑀲𑀼𑀧𑁆𑀧𑀫𑀸𑀦𑁂𑀲𑀼, 𑀅𑀳𑀁 𑀚𑀕𑁆𑀕𑀸𑀫𑀺 𑀤𑁂𑀯𑀢𑁂.

𑁧𑁩𑁯.

‘‘𑀬𑁂𑀲𑀁 ¶ 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀢𑁂𑀲𑀼 𑀚𑀸𑀕𑀭𑀫𑀸𑀦𑁂𑀲𑀼, 𑀅𑀳𑀁 𑀲𑀼𑀢𑁆𑀢𑁄𑀲𑁆𑀫𑀺 𑀤𑁂𑀯𑀢𑁂.

𑁧𑁪𑁦.

‘‘𑀏𑀯𑀁 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀏𑀯𑀁 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀏𑀯𑀫𑁂𑀢𑀁 𑀯𑀺𑀚𑀸𑀦𑀸𑀫𑀺, 𑀏𑀯𑀁 𑀧𑀝𑀺𑀪𑀡𑀸𑀫𑀺 𑀢𑁂’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀆𑀳;

𑀢𑀢𑁆𑀣 𑀓𑀣𑀁 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄𑀢𑀺 𑀓𑀣𑀁 𑀢𑁆𑀯𑀁 𑀚𑀸𑀕𑀭𑀢𑀁 𑀲𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀲𑀼𑀢𑁆𑀢𑁄 𑀦𑀸𑀫 𑀳𑁄𑀲𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑁂 𑀥𑀫𑁆𑀫𑀦𑁆𑀢𑀺 𑀬𑁂 𑀲𑀢𑁆𑀢𑀸 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦 𑀧𑀚𑀸𑀦𑀦𑁆𑀢𑀺. 𑀲𑀁𑀬𑀫𑁄𑀢𑀺 𑀤𑀫𑁄𑀢𑀺 𑀘𑀸𑀢𑀺 ‘‘𑀅𑀬𑀁 𑀲𑀁𑀬𑀫𑁄, 𑀅𑀬𑀁 𑀤𑀫𑁄’’𑀢𑀺 𑀏𑀯𑀜𑁆𑀘 𑀬𑁂 𑀫𑀕𑁆𑀕𑁂𑀦 𑀆𑀕𑀢𑀁 𑀲𑀻𑀮𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀜𑁆𑀘 𑀦 𑀚𑀸𑀦𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀳𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀫𑀦𑀢𑁄 ‘‘𑀤𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀲𑀼𑀧𑁆𑀧𑀫𑀸𑀦𑁂𑀲𑀽𑀢𑀺 𑀢𑁂𑀲𑀼 𑀓𑀺𑀮𑁂𑀲𑀦𑀺𑀤𑁆𑀤𑀸𑀯𑀲𑁂𑀦 𑀲𑀼𑀧𑀦𑁆𑀢𑁂𑀲𑀼 𑀲𑀢𑁆𑀢𑁂𑀲𑀼 𑀅𑀳𑀁 𑀅𑀧𑁆𑀧𑀫𑀸𑀤𑀯𑀲𑁂𑀦 𑀚𑀕𑁆𑀕𑀸𑀫𑀺.

‘‘𑀬𑁂𑀲𑀁 𑀭𑀸𑀕𑁄 𑀘𑀸’’𑀢𑀺 𑀕𑀸𑀣𑀸𑀬 𑀬𑁂𑀲𑀁 𑀫𑀳𑀸𑀔𑀻𑀡𑀸𑀲𑀯𑀸𑀦𑀁 𑀧𑀤𑀲𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀤𑀺𑀬𑀟𑁆𑀠𑀲𑀳𑀲𑁆𑀲𑀢𑀡𑁆𑀳𑀸𑀮𑁄𑀪𑀲𑀗𑁆𑀔𑀸𑀢𑁄 𑀭𑀸𑀕𑁄 𑀘 𑀦𑀯𑀆𑀖𑀸𑀢𑀯𑀢𑁆𑀣𑀼𑀲𑀫𑀼𑀝𑁆𑀞𑀸𑀦𑁄 𑀤𑁄𑀲𑁄 𑀘 𑀤𑀼𑀓𑁆𑀔𑀸𑀤𑀻𑀲𑀼 𑀅𑀝𑁆𑀞𑀲𑀼 𑀯𑀢𑁆𑀣𑀽𑀲𑀼 ¶ 𑀅𑀜𑁆𑀜𑀸𑀡𑀪𑀽𑀢𑀸 𑀅𑀯𑀺𑀚𑁆𑀚𑀸 𑀘𑀸𑀢𑀺 𑀇𑀫𑁂 𑀓𑀺𑀮𑁂𑀲𑀸 𑀯𑀺𑀭𑀸𑀚𑀺𑀢𑀸 𑀧𑀳𑀻𑀦𑀸, 𑀢𑁂𑀲𑀼 𑀅𑀭𑀺𑀬𑁂𑀲𑀼 𑀲𑀩𑁆𑀩𑀸𑀓𑀸𑀭𑁂𑀦 𑀚𑀸𑀕𑀭𑀫𑀸𑀦𑁂𑀲𑀼 𑀢𑁂 𑀉𑀧𑀸𑀤𑀸𑀬 𑀅𑀳𑀁 𑀲𑀼𑀢𑁆𑀢𑁄 𑀦𑀸𑀫 𑀤𑁂𑀯𑀢𑁂𑀢𑀺 𑀅𑀢𑁆𑀣𑁄. 𑀏𑀯𑀁 𑀚𑀸𑀕𑀭𑀢𑀦𑁆𑀢𑀺 𑀏𑀯𑀁 𑀤𑁂𑀯𑀢𑁂 𑀅𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄 𑀦𑀸𑀫𑀸𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼.

𑀏𑀯𑀁 𑀫𑀳𑀸𑀲𑀢𑁆𑀢𑁂𑀦 𑀧𑀜𑁆𑀳𑁂 𑀓𑀣𑀺𑀢𑁂 𑀢𑀼𑀝𑁆𑀞𑀸 𑀤𑁂𑀯𑀢𑀸 𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑀻 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁪𑁧.

‘‘𑀲𑀸𑀥𑀼 ¶ 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀲𑀸𑀥𑀼 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀲𑀸𑀥𑀼 𑀫𑁂𑀢𑀁 𑀯𑀺𑀚𑀸𑀦𑀸𑀲𑀺, 𑀲𑀸𑀥𑀼 𑀧𑀝𑀺𑀪𑀡𑀸𑀲𑀺 𑀫𑁂’’𑀢𑀺.

𑀢𑀢𑁆𑀣 𑀲𑀸𑀥𑀽𑀢𑀺 𑀪𑀤𑁆𑀤𑀓𑀁 𑀓𑀢𑁆𑀯𑀸 𑀢𑁆𑀯𑀁 𑀇𑀫𑀁 𑀧𑀜𑁆𑀳𑀁 𑀓𑀣𑁂𑀲𑀺, 𑀫𑀬𑀫𑁆𑀧𑀺 𑀦𑀁 𑀏𑀯𑀫𑁂𑀯 𑀓𑀣𑁂𑀫𑀸𑀢𑀺. 𑀏𑀯𑀁 𑀲𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀫𑁂𑀯 𑀧𑀸𑀯𑀺𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀸𑀕𑀭𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁧𑁫] 𑁧𑁦. 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀚𑀸𑀢𑀓𑀯𑀡𑁆𑀡𑀦𑀸

𑀦 𑀓𑀺𑀭𑀢𑁆𑀣𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀳𑀺 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀲 𑀫𑀸𑀮𑀸𑀓𑀸𑀭𑀚𑁂𑀝𑁆𑀞𑀓𑀲𑁆𑀲 𑀥𑀻𑀢𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀫𑀳𑀸𑀧𑀼𑀜𑁆𑀜𑀸 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀏𑀓𑀤𑀺𑀯𑀲𑀁 𑀓𑀼𑀫𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀧𑀼𑀧𑁆𑀨𑀸𑀭𑀸𑀫𑀁 𑀕𑀘𑁆𑀙𑀦𑁆𑀢𑀻 𑀢𑀬𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀧𑀘𑁆𑀙𑀺𑀬𑀁 𑀞𑀧𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀪𑀕𑀯𑀦𑁆𑀢𑀁 𑀲𑀭𑀻𑀭𑀧𑁆𑀧𑀪𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀦𑀕𑀭𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀢𑀬𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀘𑀢𑀼𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀁 𑀧𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀲𑀺. 𑀲𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀢𑀣𑀸𑀕𑀢𑀲𑁆𑀲 𑀲𑀺𑀢𑀓𑀭𑀡𑁂’’𑀢𑀺 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀆𑀦𑀦𑁆𑀤, 𑀅𑀬𑀁 𑀓𑀼𑀫𑀸𑀭𑀺𑀓𑀸 𑀇𑀫𑁂𑀲𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀸𑀦𑀁 𑀨𑀮𑁂𑀦 𑀅𑀚𑁆𑀚𑁂𑀯 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀺𑀢𑀓𑀸𑀭𑀡𑀁 𑀓𑀣𑁂𑀲𑀺.

𑀓𑀼𑀫𑀸𑀭𑀺𑀓𑀸𑀧𑀺 𑀧𑀼𑀧𑁆𑀨𑀸𑀭𑀸𑀫𑀁 𑀕𑀢𑀸 ¶ . 𑀢𑀁 𑀤𑀺𑀯𑀲𑀫𑁂𑀯 𑀓𑁄𑀲𑀮𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑁆𑀢𑁄 𑀬𑀼𑀤𑁆𑀥𑀧𑀭𑀸𑀚𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀅𑀲𑁆𑀲𑀁 𑀅𑀪𑀺𑀭𑀼𑀬𑁆𑀳 𑀆𑀕𑀘𑁆𑀙𑀦𑁆𑀢𑁄 𑀢𑀲𑁆𑀲𑀸 𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀲𑁆𑀲𑀁 𑀢𑀁 𑀆𑀭𑀸𑀫𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺. 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑀸 𑀓𑀼𑀫𑀸𑀭𑀺𑀓𑀸 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀅𑀧𑀮𑀸𑀬𑀺𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸 𑀅𑀲𑁆𑀲𑀲𑁆𑀲 𑀦𑀸𑀲𑀭𑀚𑁆𑀚𑀼𑀬𑀸 𑀕𑀡𑁆𑀳𑀺, 𑀭𑀸𑀚𑀸 𑀅𑀲𑁆𑀲𑀧𑀺𑀝𑁆𑀞𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 ‘‘𑀲𑀲𑀸𑀫𑀺𑀓𑀸𑀲𑀺, 𑀅𑀲𑀸𑀫𑀺𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀅𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀅𑀲𑁆𑀲𑀸 𑀑𑀭𑀼𑀬𑁆𑀳 𑀯𑀸𑀢𑀸𑀢𑀧𑀓𑀺𑀮𑀦𑁆𑀢𑁄 𑀢𑀲𑁆𑀲𑀸 𑀅𑀗𑁆𑀓𑁂 𑀦𑀺𑀧𑀦𑁆𑀦𑁄 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀢𑀁 𑀅𑀲𑁆𑀲𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀮𑀓𑀸𑀬𑀧𑀭𑀺𑀯𑀼𑀢𑁄 ¶ 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀧𑁂𑀲𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀬𑀸𑀦𑀁 𑀧𑀳𑀺𑀡𑀺𑀢𑁆𑀯𑀸 ¶ 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁂𑀦 𑀓𑀼𑀮𑀖𑀭𑀢𑁄 𑀆𑀳𑀭𑀸𑀧𑁂𑀢𑁆𑀯𑀸 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀤𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀲𑀸 𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸, 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀓𑀸𑀤𑀻𑀳𑀺 𑀧𑀜𑁆𑀘𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀧𑀢𑀺𑀤𑁂𑀯𑀢𑀸, 𑀩𑀼𑀤𑁆𑀥𑀸𑀦𑀫𑁆𑀧𑀺 𑀯𑀮𑁆𑀮𑀪𑀸 𑀅𑀳𑁄𑀲𑀺. 𑀢𑀲𑁆𑀲𑀸 𑀲𑀢𑁆𑀣𑀼 𑀢𑀬𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀤𑀢𑁆𑀯𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀢𑀪𑀸𑀯𑁄 𑀲𑀓𑀮𑀦𑀕𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀕𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀩𑀼𑀤𑁆𑀥𑀸𑀦𑀁 𑀢𑀬𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀤𑀢𑁆𑀯𑀸 𑀢𑁂𑀲𑀁 𑀨𑀮𑁂𑀦 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀅𑀪𑀺𑀲𑁂𑀓𑀁 𑀧𑀢𑁆𑀢𑀸, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀫𑀳𑀸𑀕𑀼𑀡𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀫𑀮𑁆𑀮𑀺𑀓𑀸𑀬 𑀏𑀓𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀢𑀬𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀤𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑀸𑀥𑀺𑀕𑀫𑁄. 𑀓𑀲𑁆𑀫𑀸? 𑀩𑀼𑀤𑁆𑀥𑀸𑀦𑀁 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀅𑀮𑁄𑀡𑀓𑀁 𑀅𑀲𑁆𑀦𑁂𑀳𑀁 𑀅𑀨𑀸𑀡𑀺𑀢𑀁 𑀓𑀼𑀫𑁆𑀫𑀸𑀲𑀁 𑀤𑀢𑁆𑀯𑀸 𑀢𑀲𑁆𑀲 𑀨𑀮𑁂𑀦 𑀤𑀼𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀢𑀺𑀬𑁄𑀚𑀦𑀲𑀢𑀺𑀓𑁂 𑀓𑀸𑀲𑀺𑀭𑀝𑁆𑀞𑁂 𑀭𑀚𑁆𑀚𑀲𑀺𑀭𑀺𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀏𑀓𑀁 𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 ‘‘𑀧𑀸𑀢𑀭𑀸𑀲𑀢𑁆𑀣𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑁆𑀢𑀭𑀸𑀧𑀡𑀢𑁄 𑀘𑀢𑁆𑀢𑀸𑀭𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀕𑀳𑁂𑀢𑁆𑀯𑀸 𑀓𑀫𑁆𑀫𑀦𑁆𑀢𑀁 𑀕𑀘𑁆𑀙𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀦𑀕𑀭𑀸𑀪𑀺𑀫𑀼𑀔𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀁 𑀲𑀦𑁆𑀥𑀸𑀬 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑀺 ¶ , 𑀫𑀬𑁆𑀳𑀫𑁆𑀧𑀺𑀫𑁂 𑀘𑀢𑁆𑀢𑀸𑀭𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀸 𑀅𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀇𑀫𑁂 𑀇𑀫𑁂𑀲𑀁 𑀤𑀤𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀉𑀧𑀲𑀁𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑁂 𑀫𑁂 𑀳𑀢𑁆𑀣𑁂 𑀘𑀢𑁆𑀢𑀸𑀭𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀸, 𑀅𑀳𑀁 𑀇𑀫𑁂 𑀢𑀼𑀫𑁆𑀳𑀸𑀓𑀁 𑀤𑀤𑀸𑀫𑀺, 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀧𑀝𑀺𑀕𑁆𑀕𑀡𑁆𑀳𑀣, 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀯𑀸𑀮𑀺𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀲𑀸𑀔𑀸𑀪𑀗𑁆𑀕𑀁 𑀅𑀢𑁆𑀣𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑁆𑀡𑀧𑀼𑀝𑁂𑀦 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀧𑀸𑀢𑁂𑀢𑁆𑀯𑀸 𑀘𑀢𑀽𑀲𑀼 𑀧𑀢𑁆𑀢𑁂𑀲𑀼 𑀘𑀢𑁆𑀢𑀸𑀭𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀏𑀢𑁂𑀲𑀁 𑀦𑀺𑀲𑁆𑀲𑀦𑁆𑀤𑁂𑀦 𑀤𑀮𑀺𑀤𑁆𑀤𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺 𑀦𑀸𑀫 𑀫𑀸 𑀳𑁄𑀢𑀼, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 ¶ 𑀆𑀳. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀼, 𑀧𑀭𑀺𑀪𑁄𑀕𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 𑀅𑀕𑀫𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀘𑁆𑀘𑁂𑀓𑀩𑀼𑀤𑁆𑀥𑀕𑀢𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀢𑁂𑀲𑀼 𑀘𑀓𑁆𑀔𑀼𑀧𑀣𑀁 𑀅𑀢𑀻𑀢𑁂𑀲𑀼 𑀅𑀢𑁆𑀢𑀦𑁄 ¶ 𑀓𑀫𑁆𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀤𑀸𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲 𑀨𑀮𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀧𑀤𑀲𑀸 𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀅𑀳𑀁 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀪𑀢𑀓𑁄 𑀳𑀼𑀢𑁆𑀯𑀸 𑀓𑀫𑁆𑀫𑀦𑁆𑀢𑀁 𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀢𑁆𑀢𑀸𑀭𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀤𑀢𑁆𑀯𑀸 𑀢𑀲𑁆𑀲 𑀤𑀸𑀦𑀲𑁆𑀲 𑀨𑀮𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀧𑀲𑀦𑁆𑀦𑀸𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀲𑀩𑁆𑀩𑀁 𑀧𑀼𑀭𑀺𑀫𑀚𑀸𑀢𑀺𑀓𑀺𑀭𑀺𑀬𑀁 𑀚𑀸𑀢𑀺𑀲𑁆𑀲𑀭𑀜𑀸𑀡𑁂𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀧𑀲𑁆𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀁 𑀧𑀺𑀢𑀼 𑀤𑀲𑁆𑀲𑁂𑀢𑁆𑀯𑀸 𑀢𑀼𑀝𑁆𑀞𑁂𑀦 𑀧𑀺𑀢𑀭𑀸 𑀑𑀧𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀉𑀢𑁆𑀢𑀫𑀭𑀽𑀧𑀥𑀭𑀁 𑀓𑁄𑀲𑀮𑀭𑀜𑁆𑀜𑁄 𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀁𑀲𑀼, 𑀙𑀢𑁆𑀢𑀫𑀗𑁆𑀕𑀮𑀤𑀺𑀯𑀲𑁂 𑀧𑀦𑀲𑁆𑀲 𑀲𑀓𑀮𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀭𑀺𑀁𑀲𑀼.

𑀲𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀮𑀗𑁆𑀓𑀢𑀧𑀸𑀲𑀸𑀤𑀁 ¶ 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀸𑀢𑀮𑀫𑀚𑁆𑀛𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀁 𑀧𑀮𑁆𑀮𑀗𑁆𑀓𑀁 𑀅𑀪𑀺𑀭𑀼𑀬𑁆𑀳 𑀦𑀺𑀲𑀺𑀦𑁆𑀦𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂 𑀏𑀓𑀢𑁄 𑀅𑀫𑀘𑁆𑀘𑁂, 𑀏𑀓𑀢𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀆𑀤𑀬𑁄 𑀦𑀸𑀦𑀸𑀯𑀺𑀪𑀯𑁂 𑀲𑀺𑀭𑀺𑀯𑀺𑀮𑀸𑀲𑀲𑀫𑀼𑀚𑁆𑀚𑀮𑁂, 𑀏𑀓𑀢𑁄 𑀦𑀸𑀦𑀸𑀯𑀺𑀥𑀧𑀡𑁆𑀡𑀸𑀓𑀸𑀭𑀳𑀢𑁆𑀣𑁂 𑀦𑀸𑀕𑀭𑀫𑀦𑀼𑀲𑁆𑀲𑁂, 𑀏𑀓𑀢𑁄 𑀅𑀮𑀗𑁆𑀓𑀢𑀤𑁂𑀯𑀘𑁆𑀙𑀭𑀲𑀗𑁆𑀖𑀁 𑀯𑀺𑀬 𑀲𑁄𑀴𑀲𑀲𑀳𑀲𑁆𑀲𑀲𑀗𑁆𑀔𑀁 𑀦𑀸𑀝𑀓𑀺𑀢𑁆𑀣𑀺𑀕𑀡𑀦𑁆𑀢𑀺 𑀇𑀫𑀁 𑀅𑀢𑀺𑀫𑀦𑁄𑀭𑀫𑀁 𑀲𑀺𑀭𑀺𑀯𑀺𑀪𑀯𑀁 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀇𑀤𑀁 𑀲𑀼𑀯𑀡𑁆𑀡𑀧𑀺𑀡𑁆𑀟𑀺𑀓𑀁 𑀓𑀜𑁆𑀘𑀦𑀫𑀸𑀮𑀁 𑀲𑁂𑀢𑀘𑁆𑀙𑀢𑁆𑀢𑀁, 𑀇𑀫𑀸𑀦𑀺 𑀘 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀳𑀢𑁆𑀣𑀺𑀯𑀸𑀳𑀦𑀅𑀲𑁆𑀲𑀯𑀸𑀳𑀦𑀭𑀣𑀯𑀸𑀳𑀦𑀸𑀦𑀺, 𑀫𑀡𑀺𑀫𑀼𑀢𑁆𑀢𑀸𑀤𑀺𑀧𑀽𑀭𑀺𑀢𑀸 𑀲𑀸𑀭𑀕𑀩𑁆𑀪𑀸, 𑀦𑀸𑀦𑀸𑀯𑀺𑀥𑀥𑀜𑁆𑀜𑀧𑀽𑀭𑀺𑀢𑀸 𑀫𑀳𑀸𑀧𑀣𑀯𑀻, 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀦𑀸𑀭𑀺𑀬𑁄 𑀘𑀸𑀢𑀺 𑀲𑀩𑁆𑀩𑁄𑀧𑁂𑀲 𑀫𑀬𑁆𑀳𑀁 𑀲𑀺𑀭𑀺𑀯𑀺𑀪𑀯𑁄 𑀦 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑁄, 𑀘𑀢𑀼𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀤𑀺𑀦𑁆𑀦𑀲𑁆𑀲 𑀘𑀢𑀼𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀤𑀸𑀦𑀲𑁆𑀲𑁂𑀯 𑀲𑀦𑁆𑀢𑀓𑁄, 𑀢𑁂 𑀦𑀺𑀲𑁆𑀲𑀸𑀬 𑀫𑀬𑀸 𑀏𑀲 𑀮𑀤𑁆𑀥𑁄’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀸𑀓𑀝𑀁 𑀅𑀓𑀸𑀲𑀺. 𑀢𑀲𑁆𑀲 𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀧𑀽𑀭𑀺. 𑀲𑁄 𑀧𑀻𑀢𑀺𑀬𑀸 𑀢𑁂𑀫𑀺𑀢𑀳𑀤𑀬𑁄 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀉𑀤𑀸𑀦𑀕𑀻𑀢𑀁 𑀕𑀸𑀬𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁨.

‘‘𑀦 ¶ 𑀓𑀺𑀭𑀢𑁆𑀣𑀺 𑀅𑀦𑁄𑀫𑀤𑀲𑁆𑀲𑀺𑀲𑀼, 𑀧𑀸𑀭𑀺𑀘𑀭𑀺𑀬𑀸 𑀩𑀼𑀤𑁆𑀥𑁂𑀲𑀼 𑀅𑀧𑁆𑀧𑀺𑀓𑀸;

𑀲𑀼𑀓𑁆𑀔𑀸𑀬 𑀅𑀮𑁄𑀡𑀺𑀓𑀸𑀬 𑀘, 𑀧𑀲𑁆𑀲 𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸.

𑁧𑁪𑁩.

‘‘𑀳𑀢𑁆𑀣𑀺𑀕𑀯𑀸𑀲𑁆𑀲𑀸 𑀘𑀺𑀫𑁂 𑀩𑀳𑀽, 𑀥𑀦𑀥𑀜𑁆𑀜𑀁 𑀧𑀣𑀯𑀻 𑀘 𑀓𑁂𑀯𑀮𑀸;

𑀦𑀸𑀭𑀺𑀬𑁄 𑀘𑀺𑀫𑀸 𑀅𑀘𑁆𑀙𑀭𑀽𑀧𑀫𑀸, 𑀧𑀲𑁆𑀲 𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸’’𑀢𑀺.

𑀢𑀢𑁆𑀣 𑀅𑀦𑁄𑀫𑀤𑀲𑁆𑀲𑀺𑀲𑀽𑀢𑀺 𑀅𑀦𑁄𑀫𑀲𑁆𑀲 𑀅𑀮𑀸𑀫𑀓𑀲𑁆𑀲 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀦𑁄𑀫𑀤𑀲𑁆𑀲𑀺𑀦𑁄 𑀦𑀸𑀫. 𑀧𑀸𑀭𑀺𑀘𑀭𑀺𑀬𑀸𑀢𑀺 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀪𑁂𑀤𑀸 𑀲𑀸𑀫𑀻𑀘𑀺𑀓𑀺𑀭𑀺𑀬𑀸𑀧𑀺, 𑀲𑀫𑁆𑀧𑀢𑁆𑀢𑁂 ¶ 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀤𑁂𑀬𑁆𑀬𑀥𑀫𑁆𑀫𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀕𑀼𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀯𑀺𑀲𑁄𑀥𑁂𑀢𑁆𑀯𑀸 𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀦𑀓𑀺𑀭𑀺𑀬𑀸𑀧𑀺 ¶ . 𑀩𑀼𑀤𑁆𑀥𑁂𑀲𑀽𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼. 𑀅𑀧𑁆𑀧𑀺𑀓𑀸𑀢𑀺 𑀫𑀦𑁆𑀤𑀸 𑀧𑀭𑀺𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺 𑀓𑀺𑀭. 𑀲𑀼𑀓𑁆𑀔𑀸𑀬𑀸𑀢𑀺 𑀦𑀺𑀲𑁆𑀦𑁂𑀳𑀸𑀬. 𑀅𑀮𑁄𑀡𑀺𑀓𑀸𑀬𑀸𑀢𑀺 𑀨𑀸𑀡𑀺𑀢𑀯𑀺𑀭𑀳𑀺𑀢𑀸𑀬. 𑀦𑀺𑀧𑁆𑀨𑀸𑀡𑀺𑀢𑀢𑁆𑀢𑀸 𑀳𑀺 𑀲𑀸 ‘‘𑀅𑀮𑁄𑀡𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸𑀢𑀺 𑀘𑀢𑁆𑀢𑀸𑀭𑁄 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑁂 𑀏𑀓𑀢𑁄 𑀓𑀢𑁆𑀯𑀸 𑀕𑀳𑀺𑀢𑀁 𑀓𑀼𑀫𑁆𑀫𑀸𑀲𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀕𑀼𑀡𑀯𑀦𑁆𑀢𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀼𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀨𑀮𑀼𑀧𑁆𑀧𑀢𑁆𑀢𑀺𑀁 𑀧𑀸𑀝𑀺𑀓𑀗𑁆𑀔𑀫𑀸𑀦𑀸𑀦𑀁 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀯𑀺𑀲𑁄𑀥𑁂𑀢𑁆𑀯𑀸 𑀤𑀺𑀦𑁆𑀦𑀧𑀤𑀓𑁆𑀔𑀺𑀡𑀸 𑀅𑀧𑁆𑀧𑀺𑀓𑀸 𑀦𑀸𑀫 𑀦𑀢𑁆𑀣𑀺, 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀫𑁂𑀯 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀺𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸;

𑀢𑀣𑀸𑀕𑀢𑁂 𑀯𑀸 𑀲𑀫𑁆𑀩𑀼𑀤𑁆𑀥𑁂, 𑀅𑀣 𑀯𑀸 𑀢𑀲𑁆𑀲 𑀲𑀸𑀯𑀓𑁂.

‘‘𑀢𑀺𑀝𑁆𑀞𑀦𑁆𑀢𑁂 𑀦𑀺𑀩𑁆𑀩𑀼𑀢𑁂 𑀘𑀸𑀧𑀺, 𑀲𑀫𑁂 𑀘𑀺𑀢𑁆𑀢𑁂 𑀲𑀫𑀁 𑀨𑀮𑀁;

𑀘𑁂𑀢𑁄𑀧𑀡𑀺𑀥𑀺𑀳𑁂𑀢𑀼 𑀳𑀺, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺. (𑀯𑀺. 𑀯. 𑁮𑁦𑁪, 𑁮𑁦𑁬);

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀸𑀬 𑁋

‘‘𑀔𑀻𑀭𑁄𑀤𑀦𑀁 𑀅𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲; (𑀯𑀺. 𑀯. 𑁪𑁧𑁩);

𑀢𑀲𑁆𑀲𑀸 𑀫𑁂 𑀧𑀲𑁆𑀲 𑀯𑀺𑀫𑀸𑀦𑀁, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻𑀳𑀫𑀲𑁆𑀫𑀺. (𑀯𑀺. 𑀯. 𑁩𑁩𑁪);

‘‘𑀅𑀘𑁆𑀙𑀭𑀸𑀲𑀳𑀲𑁆𑀲𑀲𑁆𑀲𑀸𑀳𑀁 ¶ , 𑀧𑀯𑀭𑀸 𑀧𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑀁;

𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺.

‘‘𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. (𑀯𑀺. 𑀯. 𑁩𑁩𑁪-𑁩𑁩𑁬) 𑁋

𑀏𑀯𑀫𑀸𑀤𑀻𑀦𑀺 𑀯𑀺𑀫𑀸𑀦𑀯𑀢𑁆𑀣𑀽𑀦𑀺 𑀆𑀳𑀭𑀺𑀢𑀩𑁆𑀩𑀸𑀦𑀺.

𑀥𑀦𑀥𑀜𑁆𑀜𑀦𑁆𑀢𑀺 ¶ 𑀫𑀼𑀢𑁆𑀢𑀸𑀤𑀺𑀥𑀦𑀜𑁆𑀘 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀘. 𑀧𑀣𑀯𑀻 𑀘 𑀓𑁂𑀯𑀮𑀸𑀢𑀺 𑀲𑀓𑀮𑀸 𑀘𑁂𑀲𑀸 𑀫𑀳𑀸𑀧𑀣𑀯𑀻𑀢𑀺 𑀲𑀓𑀮𑀧𑀣𑀯𑀺𑀁 𑀳𑀢𑁆𑀣𑀕𑀢𑀁 𑀫𑀜𑁆𑀜𑀫𑀸𑀦𑁄 𑀯𑀤𑀢𑀺. 𑀧𑀲𑁆𑀲 𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸𑀢𑀺 𑀅𑀢𑁆𑀢𑀦𑁄 𑀤𑀸𑀦𑀨𑀮𑀁 𑀅𑀢𑁆𑀢𑀦𑀸𑀯 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀤𑀸𑀦𑀨𑀮𑀁 𑀓𑀺𑀭 𑀩𑁄𑀥𑀺𑀲𑀢𑁆𑀢𑀸 𑀘 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀬𑁂𑀯 𑀘 𑀚𑀸𑀦𑀦𑁆𑀢𑀺. 𑀢𑁂𑀦𑁂𑀯 𑀲𑀢𑁆𑀣𑀸 𑀇𑀢𑀺𑀯𑀼𑀢𑁆𑀢𑀓𑁂 𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀦𑁆𑀢𑁄 𑁋

‘‘𑀏𑀯𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁 𑀤𑀸𑀦𑀲𑀁𑀯𑀺𑀪𑀸𑀕𑀲𑁆𑀲 𑀯𑀺𑀧𑀸𑀓𑀁, 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀦 𑀅𑀤𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀦 𑀘 𑀦𑁂𑀲𑀁 𑀫𑀘𑁆𑀙𑁂𑀭𑀫𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬. 𑀬𑁄𑀧𑀺 𑀦𑁂𑀲𑀁 𑀅𑀲𑁆𑀲 𑀘𑀭𑀺𑀫𑁄 𑀆𑀮𑁄𑀧𑁄 𑀘𑀭𑀺𑀫𑀁 𑀓𑀩𑀴𑀁, 𑀢𑀢𑁄𑀧𑀺 𑀦 𑀅𑀲𑀁𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀲𑀘𑁂 𑀦𑁂𑀲𑀁 𑀧𑀝𑀺𑀕𑁆𑀕𑀸𑀳𑀓𑀸 𑀅𑀲𑁆𑀲𑀼. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦 𑀏𑀯𑀁 𑀚𑀸𑀦𑀦𑁆𑀢𑀺 𑀤𑀸𑀦𑀲𑀁𑀯𑀺𑀪𑀸𑀕𑀲𑁆𑀲 𑀯𑀺𑀧𑀸𑀓𑀁, 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀢𑀲𑁆𑀫𑀸 𑀅𑀤𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀫𑀘𑁆𑀙𑁂𑀭𑀫𑀮𑀜𑁆𑀘 𑀦𑁂𑀲𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 (𑀇𑀢𑀺𑀯𑀼. 𑁨𑁬).

𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀙𑀢𑁆𑀢𑀫𑀗𑁆𑀕𑀮𑀤𑀺𑀯𑀲𑁂 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑁄 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀉𑀤𑀸𑀦𑀕𑀻𑀢𑀁 𑀕𑀸𑀬𑀺. 𑀢𑀢𑁄 𑀧𑀝𑁆𑀞𑀸𑀬 ‘‘𑀭𑀜𑁆𑀜𑁄 𑀧𑀺𑀬𑀕𑀻𑀢’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀸𑀝𑀓𑀺𑀢𑁆𑀣𑀺𑀬𑁄 𑀘 𑀲𑁂𑀲𑀦𑀸𑀝𑀓𑀕𑀦𑁆𑀥𑀩𑁆𑀩𑀸𑀤𑀬𑁄𑀧𑀺 𑀘 𑀅𑀦𑁆𑀢𑁂𑀧𑀼𑀭𑀚𑀦𑁄𑀧𑀺 𑀅𑀦𑁆𑀢𑁄𑀦𑀕𑀭𑀯𑀸𑀲𑀺𑀦𑁄𑀧𑀺 𑀩𑀳𑀺𑀦𑀕𑀭𑀯𑀸𑀲𑀺𑀦𑁄𑀧𑀺 𑀧𑀸𑀦𑀸𑀕𑀸𑀭𑁂𑀲𑀼𑀧𑀺 𑀅𑀫𑀘𑁆𑀘𑀫𑀡𑁆𑀟𑀮𑁂𑀲𑀼𑀧𑀺 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀧𑀺𑀬𑀕𑀻𑀢’’𑀦𑁆𑀢𑀺 𑀢𑀤𑁂𑀯 ¶ 𑀕𑀻𑀢𑀁 𑀕𑀸𑀬𑀦𑁆𑀢𑀺. 𑀏𑀯𑀁 𑀅𑀤𑁆𑀥𑀸𑀦𑁂 𑀕𑀢𑁂 𑀅𑀕𑁆𑀕𑀫𑀳𑁂𑀲𑀻 𑀢𑀲𑁆𑀲 𑀕𑀻𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀺𑀢𑀼𑀓𑀸𑀫𑀸 𑀅𑀳𑁄𑀲𑀺, 𑀫𑀳𑀸𑀲𑀢𑁆𑀢𑀁 𑀧𑀦 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀺𑀲𑀳𑀢𑀺. 𑀅𑀣𑀲𑁆𑀲𑀸 𑀏𑀓𑀲𑁆𑀫𑀺𑀁 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀸𑀚𑀸 ‘‘𑀪𑀤𑁆𑀤𑁂, 𑀯𑀭𑀁 𑀢𑁂 𑀤𑀲𑁆𑀲𑀸𑀫𑀺, 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. ‘‘𑀲𑀸𑀥𑀼, 𑀤𑁂𑀯, 𑀕𑀡𑁆𑀳𑀸𑀫𑀻’’𑀢𑀺. ‘‘𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀲𑀼 𑀢𑁂 𑀓𑀺𑀁 𑀤𑀫𑁆𑀫𑀻’’𑀢𑀺? ‘‘𑀤𑁂𑀯, 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀫𑀬𑁆𑀳𑀁 𑀦 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀦 𑀫𑁂 𑀏𑀢𑁂𑀳𑀺 𑀅𑀢𑁆𑀣𑁄, 𑀲𑀘𑁂 𑀧𑀦 𑀤𑀸𑀢𑀼𑀓𑀸𑀫𑀸𑀢𑁆𑀣, 𑀢𑀼𑀫𑁆𑀳𑀸𑀓𑀁 𑀕𑀻𑀢𑀲𑁆𑀲 𑀅𑀢𑁆𑀣𑀁 𑀓𑀣𑁂𑀢𑁆𑀯𑀸 𑀤𑁂𑀣𑀸’’𑀢𑀺. ‘‘𑀪𑀤𑁆𑀤𑁂, 𑀓𑁄 𑀢𑁂 ¶ 𑀇𑀫𑀺𑀦𑀸 𑀯𑀭𑁂𑀦 𑀅𑀢𑁆𑀣𑁄, 𑀅𑀜𑁆𑀜𑀁 𑀕𑀡𑁆𑀳𑀸𑀳𑀻’’𑀢𑀺. ‘‘𑀤𑁂𑀯, 𑀅𑀜𑁆𑀜𑁂𑀦 𑀫𑁂 𑀅𑀢𑁆𑀣𑁄 𑀦𑀢𑁆𑀣𑀺, 𑀏𑀢𑀤𑁂𑀯 𑀕𑀡𑁆𑀳𑀸𑀫𑀻’’𑀢𑀺. ‘‘𑀲𑀸𑀥𑀼 𑀪𑀤𑁆𑀤𑁂, 𑀓𑀣𑁂𑀲𑁆𑀲𑀸𑀫𑀺, 𑀢𑀼𑀬𑁆𑀳𑀁 𑀧𑀦 𑀏𑀓𑀺𑀓𑀸𑀬 𑀭𑀳𑁄 𑀦 𑀓𑀣𑁂𑀲𑁆𑀲𑀸𑀫𑀺, 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀭𑀢𑀦𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀭𑀢𑀦𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀸𑀤𑀻𑀳𑀺 𑀘 𑀦𑀸𑀕𑀭𑁂𑀳𑀺 𑀘𑁂𑀯 𑀲𑁄𑀴𑀲𑀳𑀺 𑀇𑀢𑁆𑀣𑀺𑀲𑀳𑀲𑁆𑀲𑁂𑀳𑀺 𑀘 𑀧𑀭𑀺𑀯𑀼𑀢𑁄 𑀢𑁂𑀲𑀁 𑀫𑀚𑁆𑀛𑁂 𑀭𑀢𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀭𑀸𑀚𑀸 𑀢𑀣𑀸 𑀓𑀸𑀭𑁂𑀢𑁆𑀯𑀸 𑀅𑀫𑀭𑀕𑀡𑀧𑀭𑀺𑀯𑀼𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀬 𑀫𑀳𑀸𑀚𑀦𑀓𑀸𑀬𑀧𑀭𑀺𑀯𑀼𑀢𑁄 𑀭𑀢𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀤𑁂𑀯𑀻𑀧𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀓𑀜𑁆𑀘𑀦𑀪𑀤𑁆𑀤𑀧𑀻𑀞𑀁 𑀅𑀢𑁆𑀣𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀅𑀓𑁆𑀔𑀺𑀓𑁄𑀝𑀺𑀬𑀸 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀢𑀼𑀲𑁆𑀲𑀺𑀢𑁆𑀯𑀸 𑀕𑀸𑀬𑀦𑀫𑀗𑁆𑀕𑀮𑀕𑀻𑀢𑀲𑁆𑀲 ¶ 𑀢𑀸𑀯 𑀫𑁂 𑀅𑀢𑁆𑀣𑀁 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀣𑀸’’𑀢𑀺 𑀯𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁪.

‘‘𑀅𑀪𑀺𑀓𑁆𑀔𑀡𑀁 𑀭𑀸𑀚𑀓𑀼𑀜𑁆𑀚𑀭, 𑀕𑀸𑀣𑀸 𑀪𑀸𑀲𑀲𑀺 𑀓𑁄𑀲𑀮𑀸𑀥𑀺𑀧;

𑀧𑀼𑀘𑁆𑀙𑀸𑀫𑀺 𑀢𑀁 𑀭𑀝𑁆𑀞𑀯𑀟𑁆𑀠𑀦, 𑀩𑀸𑀴𑁆𑀳𑀁 𑀧𑀻𑀢𑀺𑀫𑀦𑁄 𑀧𑀪𑀸𑀲𑀲𑀻’’𑀢𑀺.

𑀢𑀢𑁆𑀣 𑀓𑁄𑀲𑀮𑀸𑀥𑀺𑀧𑀸𑀢𑀺 𑀦 𑀲𑁄 𑀓𑁄𑀲𑀮𑀭𑀝𑁆𑀞𑀸𑀥𑀺𑀧𑁄, 𑀓𑀼𑀲𑀮𑁂 𑀧𑀦 𑀥𑀫𑁆𑀫𑁂 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺, 𑀢𑁂𑀦 𑀦𑀁 𑀆𑀮𑀧𑀦𑁆𑀢𑀻 𑀏𑀯𑀫𑀸𑀳, 𑀓𑀼𑀲𑀮𑀸𑀥𑀺𑀧 𑀓𑀼𑀲𑀮𑀚𑁆𑀛𑀸𑀲𑀬𑀸𑀢𑀺 ¶ 𑀅𑀢𑁆𑀣𑁄. 𑀩𑀸𑀴𑁆𑀳𑀁 𑀧𑀻𑀢𑀺𑀫𑀦𑁄 𑀧𑀪𑀸𑀲𑀲𑀻𑀢𑀺 𑀅𑀢𑀺𑀯𑀺𑀬 𑀧𑀻𑀢𑀺𑀬𑀼𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀪𑀸𑀲𑀲𑀺, 𑀢𑀲𑁆𑀫𑀸 𑀓𑀣𑁂𑀣 𑀢𑀸𑀯 𑀫𑁂 𑀏𑀢𑀸𑀲𑀁 𑀕𑀸𑀣𑀸𑀦𑀁 𑀅𑀢𑁆𑀣𑀦𑁆𑀢𑀺.

𑀅𑀣𑀲𑁆𑀲 𑀕𑀸𑀣𑀸𑀦𑀫𑀢𑁆𑀣𑀁 𑀆𑀯𑀺 𑀓𑀭𑁄𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁫.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀼𑀁;

𑀧𑀭𑀓𑀫𑁆𑀫𑀓𑀭𑁄 𑀆𑀲𑀺𑀁, 𑀪𑀢𑀓𑁄 𑀲𑀻𑀮𑀲𑀁𑀯𑀼𑀢𑁄.

𑁧𑁪𑁬.

‘‘𑀓𑀫𑁆𑀫𑀸𑀬 𑀦𑀺𑀓𑁆𑀔𑀫𑀦𑁆𑀢𑁄𑀳𑀁, 𑀘𑀢𑀼𑀭𑁄 𑀲𑀫𑀡𑁂𑀤𑁆𑀤𑀲𑀁;

𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑁂, 𑀲𑀻𑀢𑀺𑀪𑀽𑀢𑁂 𑀅𑀦𑀸𑀲𑀯𑁂.

𑁧𑁪𑁭.

‘‘𑀢𑁂𑀲𑀼 ¶ 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀺𑀲𑀻𑀤𑁂𑀢𑁆𑀯𑀸 𑀧𑀡𑁆𑀡𑀲𑀦𑁆𑀣𑀢𑁂;

𑀅𑀤𑀁 𑀩𑀼𑀤𑁆𑀥𑀸𑀦𑀁 𑀓𑀼𑀫𑁆𑀫𑀸𑀲𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁪𑁮.

‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀇𑀤𑀁 𑀫𑁂 𑀏𑀤𑀺𑀲𑀁 𑀨𑀮𑀁;

𑀅𑀦𑀼𑀪𑁄𑀫𑀺 𑀇𑀤𑀁 𑀭𑀚𑁆𑀚𑀁, 𑀨𑀻𑀢𑀁 𑀥𑀭𑀡𑀺𑀫𑀼𑀢𑁆𑀢𑀫’’𑀦𑁆𑀢𑀺.

𑀢𑀢𑁆𑀣 𑀓𑀼𑀮𑁂 𑀅𑀜𑁆𑀜𑀢𑀭𑁂𑀢𑀺 𑀦𑀸𑀫𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀅𑀧𑀸𑀓𑀝𑁂 𑀏𑀓𑀲𑁆𑀫𑀺𑀁𑀬𑁂𑀯 𑀓𑀼𑀮𑁂. 𑀅𑀳𑀼𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀁. 𑀧𑀭𑀓𑀫𑁆𑀫𑀓𑀭𑁄 𑀆𑀲𑀺𑀦𑁆𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀚𑀸𑀢𑁄𑀯𑀸𑀳𑀁 𑀤𑀮𑀺𑀤𑁆𑀤𑀢𑀸𑀬 𑀧𑀭𑀲𑁆𑀲 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀧𑀭𑀓𑀫𑁆𑀫𑀓𑀭𑁄 𑀆𑀲𑀺𑀁. 𑀪𑀢𑀓𑁄𑀢𑀺 𑀧𑀭𑀯𑁂𑀢𑀦𑀪𑀢𑁄. 𑀲𑀻𑀮𑀲𑀁𑀯𑀼𑀢𑁄𑀢𑀺 𑀧𑀜𑁆𑀘𑀲𑀻𑀮𑀲𑀁𑀯𑀭𑁂 𑀞𑀺𑀢𑁄, 𑀪𑀢𑀺𑀬𑀸 𑀚𑀻𑀯𑀦𑁆𑀢𑁄𑀧𑀺 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀬 𑀲𑀻𑀮𑀲𑀫𑁆𑀧𑀦𑁆𑀦𑁄𑀯 𑀅𑀳𑁄𑀲𑀺𑀦𑁆𑀢𑀺 𑀤𑀻𑀧𑁂𑀢𑀺. 𑀓𑀫𑁆𑀫𑀸𑀬 𑀦𑀺𑀓𑁆𑀔𑀫𑀦𑁆𑀢𑁄𑀳𑀦𑁆𑀢𑀺 𑀢𑀁 𑀤𑀺𑀯𑀲𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁄 𑀅𑀳𑀁. 𑀘𑀢𑀼𑀭𑁄 𑀲𑀫𑀡𑁂𑀤𑁆𑀤𑀲𑀦𑁆𑀢𑀺 ¶ 𑀪𑀤𑁆𑀤𑁂, 𑀅𑀳𑀁 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀫𑀳𑀸𑀫𑀕𑁆𑀕𑀁 𑀆𑀭𑀼𑀬𑁆𑀳 𑀅𑀢𑁆𑀢𑀦𑁄 𑀓𑀫𑁆𑀫𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀸𑀬 𑀩𑀸𑀭𑀸𑀡𑀲𑀺𑀦𑀕𑀭𑀁 𑀧𑀯𑀺𑀲𑀦𑁆𑀢𑁂 𑀲𑀫𑀺𑀢𑀧𑀸𑀧𑁂 𑀘𑀢𑁆𑀢𑀸𑀭𑁄 𑀧𑀩𑁆𑀩𑀚𑀺𑀢𑁂 𑀅𑀤𑁆𑀤𑀲𑀁. 𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑁂𑀢𑀺 𑀏𑀓𑀯𑀻𑀲𑀢𑀺𑀬𑀸 𑀅𑀦𑁂𑀲𑀦𑀸𑀳𑀺 𑀚𑀻𑀯𑀺𑀓𑀓𑀧𑁆𑀧𑀦𑀁 𑀅𑀦𑀸𑀘𑀸𑀭𑁄 𑀦𑀸𑀫, 𑀢𑀲𑁆𑀲 𑀧𑀝𑀺𑀧𑀓𑁆𑀔𑁂𑀦 𑀆𑀘𑀸𑀭𑁂𑀦 𑀘𑁂𑀯 𑀫𑀕𑁆𑀕𑀨𑀮𑁂𑀳𑀺 𑀆𑀕𑀢𑁂𑀦 𑀲𑀻𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁂. 𑀲𑀻𑀢𑀺𑀪𑀽𑀢𑁂𑀢𑀺 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑀯𑀽𑀧𑀲𑀫𑁂𑀦 𑀘𑁂𑀯 𑀏𑀓𑀸𑀤𑀲𑀅𑀕𑁆𑀕𑀺𑀦𑀺𑀩𑁆𑀩𑀸𑀧𑀦𑁂𑀦 𑀘 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑁂. 𑀅𑀦𑀸𑀲𑀯𑁂𑀢𑀺 𑀓𑀸𑀫𑀸𑀲𑀯𑀸𑀤𑀺𑀯𑀺𑀭𑀳𑀺𑀢𑁂. 𑀦𑀺𑀲𑀻𑀤𑁂𑀢𑁆𑀯𑀸𑀢𑀺 𑀯𑀸𑀮𑀺𑀓𑀸𑀲𑀦𑀸𑀦𑀁 𑀉𑀧𑀭𑀺 𑀲𑀦𑁆𑀣𑀢𑁂 𑀧𑀡𑁆𑀡𑀲𑀦𑁆𑀣𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸. 𑀲𑀦𑁆𑀣𑀭𑁄 𑀳𑀺 𑀇𑀥 𑀲𑀦𑁆𑀣𑀢𑁄𑀢𑀺 𑀯𑀼𑀢𑁆𑀢𑁄. 𑀅𑀤𑀦𑁆𑀢𑀺 𑀦𑁂𑀲𑀁 𑀉𑀤𑀓𑀁 𑀤𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀓𑁂𑀳𑀺 𑀳𑀢𑁆𑀣𑁂𑀳𑀺 𑀓𑀼𑀫𑁆𑀫𑀸𑀲𑀁 𑀅𑀤𑀸𑀲𑀺𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀆𑀭𑁄𑀕𑁆𑀬𑀸𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀲𑁆𑀲. 𑀨𑀮𑀦𑁆𑀢𑀺 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀁. 𑀨𑀻𑀢𑀦𑁆𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀨𑀼𑀮𑁆𑀮𑀺𑀢𑀁.

𑀏𑀯𑀜𑁆𑀘 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀓𑀫𑁆𑀫𑀨𑀮𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀤𑁂𑀯𑀻 𑀧𑀲𑀦𑁆𑀦𑀫𑀦𑀸 ‘‘𑀲𑀘𑁂, 𑀫𑀳𑀸𑀭𑀸𑀚, 𑀏𑀯𑀁 𑀧𑀘𑁆𑀘𑀓𑁆𑀔𑀢𑁄 𑀤𑀸𑀦𑀨𑀮𑀁 𑀚𑀸𑀦𑀸𑀣, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑀻 𑁋

𑁧𑁪𑁯.

‘‘𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀯𑀢𑁆𑀢𑀬 𑀓𑁄𑀲𑀮𑀸𑀥𑀺𑀧;

𑀫𑀸 𑀭𑀸𑀚 𑀅𑀥𑀫𑁆𑀫𑀺𑀓𑁄 𑀅𑀳𑀼, 𑀥𑀫𑁆𑀫𑀁 𑀧𑀸𑀮𑀬 𑀓𑁄𑀲𑀮𑀸𑀥𑀺𑀧𑀸’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑀢𑀢𑁆𑀣 ¶ 𑀤𑀤𑀁 𑀪𑀼𑀜𑁆𑀚𑀸𑀢𑀺 𑀅𑀜𑁆𑀜𑁂𑀲𑀁 𑀤𑀢𑁆𑀯𑀸𑀯 𑀅𑀢𑁆𑀢𑀦𑀸 𑀪𑀼𑀜𑁆𑀚. 𑀫𑀸 𑀘 𑀧𑀫𑀸𑀤𑁄𑀢𑀺 𑀤𑀸𑀦𑀸𑀤𑀻𑀲𑀼 𑀧𑀼𑀜𑁆𑀜𑁂𑀲𑀼 𑀫𑀸 𑀧𑀫𑀚𑁆𑀚𑀺. 𑀘𑀓𑁆𑀓𑀁 𑀯𑀢𑁆𑀢𑀬 𑀓𑁄𑀲𑀮𑀸𑀥𑀺𑀧𑀸𑀢𑀺 𑀓𑀼𑀲𑀮𑀚𑁆𑀛𑀸𑀲𑀬, 𑀫𑀳𑀸𑀭𑀸𑀚, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀳𑀺. 𑀧𑀓𑀢𑀺𑀭𑀣𑁄 𑀳𑀺 𑀤𑁆𑀯𑀻𑀳𑀺 𑀘𑀓𑁆𑀓𑁂𑀳𑀺 𑀕𑀘𑁆𑀙𑀢𑀺, 𑀅𑀬𑀁 𑀧𑀦 𑀓𑀸𑀬𑁄 𑀇𑀫𑁂𑀳𑀺 𑀘𑀢𑀽𑀳𑀺 𑀘𑀓𑁆𑀓𑁂𑀳𑀺 𑀤𑁂𑀯𑀮𑁄𑀓𑀁 𑀕𑀘𑁆𑀙𑀢𑀺, 𑀢𑁂𑀦 𑀢𑁂 ‘‘𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑀁 𑀢𑁆𑀯𑀁 𑀘𑀓𑁆𑀓𑀁 𑀧𑀯𑀢𑁆𑀢𑁂𑀳𑀺. 𑀅𑀥𑀫𑁆𑀫𑀺𑀓𑁄𑀢𑀺 𑀬𑀣𑀸 𑀅𑀜𑁆𑀜𑁂 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑀸 𑀮𑁄𑀓𑀁 𑀉𑀘𑁆𑀙𑀼𑀬𑀦𑁆𑀢𑁂 𑀧𑀻𑀴𑁂𑀢𑁆𑀯𑀸 𑀯𑀺𑀬 𑀥𑀦𑀫𑁂𑀯 𑀲𑀁𑀓𑀟𑁆𑀠𑀦𑁆𑀢𑀸 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑀣𑀸 𑀢𑁆𑀯𑀁 𑀫𑀸 𑀅𑀥𑀫𑁆𑀫𑀺𑀓𑁄 𑀅𑀳𑀼. 𑀥𑀫𑁆𑀫𑀁 𑀧𑀸𑀮𑀬𑀸𑀢𑀺 𑁋

‘‘𑀤𑀸𑀦𑀁 𑀲𑀻𑀮𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;

𑀅𑀓𑁆𑀓𑁄𑀥𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀺𑀜𑁆𑀘 𑀅𑀯𑀺𑀭𑁄𑀥𑀦’’𑀦𑁆𑀢𑀺. (𑀚𑀸. 𑁨.𑁨𑁧.𑁧𑁭𑁬) 𑁋

𑀇𑀫𑀁 𑀧𑀦 𑀤𑀲𑀯𑀺𑀥𑀁 𑀭𑀸𑀚𑀥𑀫𑁆𑀫𑀫𑁂𑀯 𑀧𑀸𑀮𑀬 𑀭𑀓𑁆𑀔, 𑀫𑀸 𑀧𑀭𑀺𑀘𑁆𑀘𑀚𑀺.

𑀫𑀳𑀸𑀲𑀢𑁆𑀢𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑁋

𑁧𑁫𑁦.

‘‘𑀲𑁄𑀳𑀁 𑀢𑀤𑁂𑀯 𑀧𑀼𑀦𑀧𑁆𑀧𑀼𑀦𑀁, 𑀯𑀝𑀼𑀫𑀁 𑀆𑀘𑀭𑀺𑀲𑁆𑀲𑀸𑀫𑀺 𑀲𑁄𑀪𑀦𑁂;

𑀅𑀭𑀺𑀬𑀸𑀘𑀭𑀺𑀢𑀁 𑀲𑀼𑀓𑁄𑀲𑀮𑁂, 𑀅𑀭𑀳𑀦𑁆𑀢𑁄 𑀫𑁂 𑀫𑀦𑀸𑀧𑀸𑀯 𑀧𑀲𑁆𑀲𑀺𑀢𑀼’’𑀦𑁆𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 ¶ 𑀯𑀝𑀼𑀫𑀦𑁆𑀢𑀺 𑀫𑀕𑁆𑀕𑀁. 𑀅𑀭𑀺𑀬𑀸𑀘𑀭𑀺𑀢𑀦𑁆𑀢𑀺 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀆𑀘𑀺𑀡𑁆𑀡𑀁. 𑀲𑀼𑀓𑁄𑀲𑀮𑁂𑀢𑀺 𑀲𑁄𑀪𑀦𑁂 𑀓𑁄𑀲𑀮𑀭𑀜𑁆𑀜𑁄 𑀥𑀻𑀢𑁂𑀢𑀺 𑀅𑀢𑁆𑀣𑁄. 𑀅𑀭𑀳𑀦𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸, 𑀅𑀭𑀸𑀦𑀜𑁆𑀘 𑀅𑀭𑀻𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀦𑀁 𑀅𑀭𑀳𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀤𑁆𑀤𑁂, 𑀓𑁄𑀲𑀮𑀭𑀸𑀚𑀥𑀻𑀢𑁂 𑀲𑁄 𑀅𑀳𑀁 ‘‘𑀤𑀸𑀦𑀁 ¶ 𑀫𑁂 𑀤𑀺𑀦𑁆𑀦’’𑀦𑁆𑀢𑀺 𑀢𑀺𑀢𑁆𑀢𑀺𑀁 𑀅𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀤𑁂𑀯 𑀅𑀭𑀺𑀬𑀸𑀘𑀭𑀺𑀢𑀁 𑀤𑀸𑀦𑀫𑀕𑁆𑀕𑀁 𑀆𑀘𑀭𑀺𑀲𑁆𑀲𑀸𑀫𑀺. 𑀫𑀬𑁆𑀳𑀜𑁆𑀳𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀅𑀭𑀳𑀦𑁆𑀢𑁄 𑀫𑀦𑀸𑀧𑀤𑀲𑁆𑀲𑀦𑀸, 𑀘𑀻𑀯𑀭𑀸𑀤𑀻𑀦𑀺 𑀤𑀸𑀢𑀼𑀓𑀸𑀫𑀢𑀸𑀬 𑀢𑁂𑀬𑁂𑀯 𑀧𑀲𑁆𑀲𑀺𑀢𑀼𑀁 𑀇𑀘𑁆𑀙𑀸𑀫𑀻𑀢𑀺.