📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀚𑀸𑀢𑀓-𑀅𑀝𑁆𑀞𑀓𑀣𑀸

𑀘𑀢𑀼𑀢𑁆𑀣𑁄 𑀪𑀸𑀕𑁄

𑁧𑁦. 𑀤𑀲𑀓𑀦𑀺𑀧𑀸𑀢𑁄

[𑁪𑁩𑁯] 𑁧. 𑀘𑀢𑀼𑀤𑁆𑀯𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀘𑀢𑀼𑀤𑁆𑀯𑀸𑀭𑀫𑀺𑀤𑀁 ¶ ¶ ¶ 𑀦𑀕𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀦𑀯𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑀚𑀸𑀢𑀓𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑀢𑀸𑀬 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀆𑀧𑀸𑀤𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀏𑀓𑁄 𑀧𑀼𑀢𑁆𑀢𑁄 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀲𑁄 𑀧𑀦 𑀤𑀼𑀲𑁆𑀲𑀻𑀮𑁄 𑀅𑀲𑁆𑀲𑀤𑁆𑀥𑁄. 𑀅𑀣 𑀦𑀁 𑀅𑀧𑀭𑀪𑀸𑀕𑁂 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀫𑀸𑀢𑀸 𑀓𑀼𑀝𑀼𑀫𑁆𑀩𑀁 𑀯𑀺𑀘𑀸𑀭𑁂𑀦𑁆𑀢𑀻 𑀆𑀳 𑁋 ‘‘𑀢𑀸𑀢, 𑀢𑀬𑀸 𑀤𑀼𑀮𑁆𑀮𑀪𑀁 𑀫𑀦𑀼𑀲𑁆𑀲𑀢𑁆𑀢𑀁 𑀮𑀤𑁆𑀥𑀁, 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔𑀸𑀳𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀳𑀺, 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺. 𑀅𑀫𑁆𑀫, 𑀦 𑀫𑀬𑁆𑀳𑀁 𑀤𑀸𑀦𑀸𑀤𑀻𑀳𑀺 𑀅𑀢𑁆𑀣𑁄, 𑀫𑀸 𑀫𑀁 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣, 𑀅𑀳𑀁 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀯𑀤𑀦𑁆𑀢𑀫𑁆𑀧𑀺 𑀦𑀁 𑀏𑀓𑀤𑀺𑀯𑀲𑀁 ¶ 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀅𑀚𑁆𑀚 𑀅𑀪𑀺𑀮𑀓𑁆𑀔𑀺𑀢𑁄 𑀫𑀳𑀸𑀉𑀧𑁄𑀲𑀣𑀤𑀺𑀯𑀲𑁄, 𑀅𑀚𑁆𑀚 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀳𑀺, 𑀅𑀳𑀁 𑀢𑁂 𑀲𑀳𑀲𑁆𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀥𑀦𑀮𑁄𑀪𑁂𑀦 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀁 𑀬𑀣𑀸 𑀏𑀓𑀫𑁆𑀧𑀺 𑀥𑀫𑁆𑀫𑀧𑀤𑀁 𑀓𑀡𑁆𑀡𑀁 𑀦 𑀧𑀳𑀭𑀢𑀺, 𑀢𑀣𑀸 𑀏𑀓𑀲𑁆𑀫𑀺𑀁 ¶ 𑀧𑀤𑁂𑀲𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺.

𑀫𑀸𑀢𑀸 𑀧𑀦𑀲𑁆𑀲 ‘‘𑀅𑀚𑁆𑀚 𑀫𑁂 𑀧𑀼𑀢𑁆𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀸𑀢𑁄𑀯 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑀁 𑀆𑀤𑀸𑀬 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀬𑀸𑀕𑀼𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀲𑁆𑀲𑀸𑀕𑀫𑀦𑀁 𑀧𑀝𑀺𑀫𑀸𑀦𑁂𑀦𑁆𑀢𑀻 𑀢𑀁 𑀏𑀓𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀥𑀫𑁆𑀫𑀓𑀣𑀺𑀓𑁄 𑀓𑁂𑀦 𑀦 𑀆𑀦𑀻𑀢𑁄’’𑀢𑀺 𑀯𑀢𑁆𑀯𑀸 ‘‘𑀦 𑀫𑀬𑁆𑀳𑀁 𑀥𑀫𑁆𑀫𑀓𑀣𑀺𑀓𑁂𑀦 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀬𑀸𑀕𑀼𑀁 𑀧𑀺𑀯𑀸’’𑀢𑀺 𑀆𑀳. 𑀲𑁄 ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀲𑀳𑀲𑁆𑀲𑀁 𑀧𑀝𑀺𑀲𑁆𑀲𑀼𑀢𑀁, 𑀢𑀁 𑀢𑀸𑀯 𑀫𑁂 𑀤𑁂𑀣, 𑀧𑀘𑁆𑀙𑀸 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀧𑀺𑀯, 𑀢𑀸𑀢, 𑀧𑀘𑁆𑀙𑀸 𑀤𑀲𑁆𑀲𑀸𑀫𑀻’’𑀢𑀺. ‘‘𑀕𑀳𑁂𑀢𑁆𑀯𑀸𑀯 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀫𑀸𑀢𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀧𑀼𑀭𑀢𑁄 𑀞𑀧𑁂𑀲𑀺. 𑀲𑁄 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀯𑀻𑀲𑀲𑀢𑀲𑀳𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀸𑀯𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀯𑁄𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀸𑀯𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 ‘‘𑀅𑀫𑁆𑀫, 𑀅𑀳𑀁 𑀦𑀸𑀯𑀸𑀬 𑀯𑁄𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀫𑀸𑀢𑀸 ‘‘𑀢𑁆𑀯𑀁 𑀢𑀸𑀢, 𑀏𑀓𑀧𑀼𑀢𑁆𑀢𑀓𑁄, 𑀇𑀫𑀲𑁆𑀫𑀺𑀁 𑀖𑀭𑁂 𑀥𑀦𑀫𑁆𑀧𑀺 𑀩𑀳𑀼, 𑀲𑀫𑀼𑀤𑁆𑀤𑁄 𑀅𑀦𑁂𑀓𑀸𑀤𑀻𑀦𑀯𑁄, 𑀫𑀸 𑀕𑀫𑀻’’𑀢𑀺 𑀦𑀺𑀯𑀸𑀭𑁂𑀲𑀺. 𑀲𑁄 ‘‘𑀅𑀳𑀁 𑀕𑀫𑀺𑀲𑁆𑀲𑀸𑀫𑁂𑀯, 𑀦 𑀲𑀓𑁆𑀓𑀸 𑀫𑀁 𑀦𑀺𑀯𑀸𑀭𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀳𑀁 𑀢𑀁, 𑀢𑀸𑀢, 𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀭𑀸 𑀳𑀢𑁆𑀣𑁂 𑀕𑀳𑀺𑀢𑁄 𑀳𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀫𑀸𑀢𑀭𑀁 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺.

𑀦𑀸𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀺𑀢𑁆𑀢𑀯𑀺𑀦𑁆𑀤𑀓𑀁 𑀦𑀺𑀲𑁆𑀲𑀸𑀬 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀦𑀺𑀘𑁆𑀘𑀮𑀸 𑀅𑀝𑁆𑀞𑀸𑀲𑀺. 𑀓𑀸𑀴𑀓𑀡𑁆𑀡𑀺𑀲𑀮𑀸𑀓𑀸 𑀓𑀭𑀺𑀬𑀫𑀸𑀦𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲𑁂𑀯 𑀳𑀢𑁆𑀣𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀢𑀺. 𑀅𑀣𑀲𑁆𑀲 𑀉𑀴𑀼𑀫𑁆𑀧𑀁 𑀤𑀢𑁆𑀯𑀸 ‘‘𑀇𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀢𑀁 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀔𑀺𑀧𑀺𑀁𑀲𑀼. 𑀢𑀸𑀯𑀤𑁂𑀯 𑀦𑀸𑀯𑀸 𑀚𑀯𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺. 𑀲𑁄𑀧𑀺 𑀉𑀴𑀼𑀫𑁆𑀧𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀨𑀮𑀺𑀓𑀯𑀺𑀫𑀸𑀦𑁂 𑀘𑀢𑀲𑁆𑀲𑁄 ¶ 𑀯𑁂𑀫𑀸𑀦𑀺𑀓𑀧𑁂𑀢𑀺𑀬𑁄 𑀅𑀤𑁆𑀤𑀲. 𑀢𑀸 𑀲𑀢𑁆𑀢𑀸𑀳𑀁 𑀤𑀼𑀓𑁆𑀔𑀁 ¶ 𑀅𑀦𑀼𑀪𑀯𑀦𑁆𑀢𑀺, 𑀲𑀢𑁆𑀢𑀸𑀳𑀁 𑀲𑀼𑀔𑀁 ¶ . 𑀲𑁄 𑀢𑀸𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀸𑀳𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺. 𑀅𑀣 𑀦𑀁 𑀢𑀸 𑀤𑀼𑀓𑁆𑀔𑀸𑀦𑀼𑀪𑀯𑀦𑀢𑁆𑀣𑀸𑀬 𑀕𑀘𑁆𑀙𑀫𑀸𑀦𑀸 ‘‘𑀲𑀸𑀫𑀺, 𑀫𑀬𑀁 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀫𑀺𑀲𑁆𑀲𑀸𑀫, 𑀬𑀸𑀯 𑀫𑀬𑀁 𑀆𑀕𑀘𑁆𑀙𑀸𑀫, 𑀢𑀸𑀯 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁄 𑀇𑀥𑁂𑀯 𑀯𑀲𑀸’’𑀢𑀺 𑀯𑀢𑁆𑀯𑀸 𑀅𑀕𑀫𑀁𑀲𑀼. 𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀨𑀮𑀓𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀘𑁆𑀙𑀦𑁆𑀢𑁄 𑀅𑀧𑀭𑀁 𑀤𑀻𑀧𑀓𑀁 𑀧𑀢𑁆𑀯𑀸 𑀢𑀢𑁆𑀣 𑀭𑀚𑀢𑀯𑀺𑀫𑀸𑀦𑁂 𑀅𑀝𑁆𑀞 𑀯𑁂𑀫𑀸𑀦𑀺𑀓𑀧𑁂𑀢𑀺𑀬𑁄 𑀤𑀺𑀲𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀧𑀭𑀲𑁆𑀫𑀺𑀁 𑀤𑀻𑀧𑀓𑁂 𑀫𑀡𑀺𑀯𑀺𑀫𑀸𑀦𑁂 𑀲𑁄𑀴𑀲, 𑀅𑀧𑀭𑀲𑁆𑀫𑀺𑀁 𑀤𑀻𑀧𑀓𑁂 𑀓𑀦𑀓𑀯𑀺𑀫𑀸𑀦𑁂 𑀤𑁆𑀯𑀢𑁆𑀢𑀺𑀁𑀲 𑀯𑁂𑀫𑀸𑀦𑀺𑀓𑀧𑁂𑀢𑀺𑀬𑁄 𑀤𑀺𑀲𑁆𑀯𑀸 𑀢𑀸𑀳𑀺 𑀲𑀤𑁆𑀥𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀸𑀲𑀫𑁆𑀧𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼𑀁 𑀕𑀢𑀓𑀸𑀮𑁂 𑀧𑀼𑀦 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀘𑀢𑀼𑀤𑁆𑀯𑀸𑀭𑀁 𑀦𑀕𑀭𑀁 𑀅𑀤𑁆𑀤𑀲. 𑀉𑀲𑁆𑀲𑀤𑀦𑀺𑀭𑀬𑁄 𑀓𑀺𑀭𑁂𑀲, 𑀩𑀳𑀽𑀦𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁 𑀓𑀫𑁆𑀫𑀓𑀭𑀡𑀸𑀦𑀼𑀪𑀯𑀦𑀝𑁆𑀞𑀸𑀦𑀁 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀦𑀕𑀭𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺.

𑀲𑁄 ‘‘𑀇𑀫𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑁂 𑀧𑀘𑁆𑀘𑀫𑀸𑀦𑀁 𑀦𑁂𑀭𑀬𑀺𑀓𑀲𑀢𑁆𑀢𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀢𑀁 𑀢𑀲𑁆𑀲 𑀲𑀻𑀲𑁂 𑀔𑀼𑀭𑀘𑀓𑁆𑀓𑀁 𑀧𑀤𑀼𑀫𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀉𑀭𑁂 𑀧𑀜𑁆𑀘𑀗𑁆𑀕𑀺𑀓𑀩𑀦𑁆𑀥𑀦𑀁 𑀉𑀭𑀘𑁆𑀙𑀤𑀧𑀲𑀸𑀥𑀦𑀁 𑀳𑀼𑀢𑁆𑀯𑀸 𑀲𑀻𑀲𑀢𑁄 𑀕𑀮𑀦𑁆𑀢𑀁 𑀮𑁄𑀳𑀺𑀢𑀁 𑀮𑁄𑀳𑀺𑀢𑀘𑀦𑁆𑀤𑀦𑀯𑀺𑀮𑁂𑀧𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀧𑀭𑀺𑀤𑁂𑀯𑀦𑀲𑀤𑁆𑀤𑁄 𑀫𑀥𑀼𑀭𑀲𑀭𑁄 𑀕𑀻𑀢𑀲𑀤𑁆𑀤𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲, 𑀘𑀺𑀭𑀁 𑀢𑀬𑀸 𑀧𑀤𑀼𑀫𑀁 𑀥𑀸𑀭𑀺𑀢𑀁, 𑀤𑁂𑀳𑀺 𑀫𑁂 𑀏𑀢’’𑀦𑁆𑀢𑀺 𑀆𑀳. ‘‘𑀲𑀫𑁆𑀫, 𑀦𑀬𑀺𑀤𑀁 𑀧𑀤𑀼𑀫𑀁, 𑀔𑀼𑀭𑀘𑀓𑁆𑀓𑀁 𑀏𑀢’’𑀦𑁆𑀢𑀺. ‘‘𑀢𑁆𑀯𑀁 𑀫𑀬𑁆𑀳𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀏𑀯𑀁 𑀯𑀤𑀲𑀻’’𑀢𑀺. 𑀦𑁂𑀭𑀬𑀺𑀓𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀓𑀫𑁆𑀫𑀁 𑀔𑀻𑀡𑀁 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸𑀧𑀺 𑀫𑀬𑀸 𑀯𑀺𑀬 𑀫𑀸𑀢𑀭𑀁 𑀧𑀳𑀭𑀺𑀢𑁆𑀯𑀸 𑀆𑀕𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀤𑀲𑁆𑀲𑀸𑀫𑀺𑀲𑁆𑀲 𑀔𑀼𑀭𑀘𑀓𑁆𑀓’’𑀦𑁆𑀢𑀺. 𑀅𑀣 𑀦𑀁 ‘‘𑀏𑀳𑀺 𑀪𑁄, 𑀕𑀡𑁆𑀳 𑀇𑀫’’𑀦𑁆𑀢𑀺 𑀯𑀢𑁆𑀯𑀸 𑀔𑀼𑀭𑀘𑀓𑁆𑀓𑀁 𑀢𑀲𑁆𑀲 𑀲𑀻𑀲𑁂 𑀔𑀺𑀧𑀺, 𑀢𑀁 𑀢𑀲𑁆𑀲 𑀫𑀢𑁆𑀣𑀓𑀁 𑀧𑀺𑀲𑀫𑀸𑀦𑀁 𑀪𑀲𑁆𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 ¶ 𑀢𑀲𑁆𑀲 𑀔𑀼𑀭𑀘𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀯 𑀔𑀼𑀭𑀘𑀓𑁆𑀓𑀁 𑀕𑀡𑁆𑀳, 𑀢𑀯 𑀔𑀼𑀭𑀘𑀓𑁆𑀓𑀁 𑀕𑀡𑁆𑀳𑀸’’𑀢𑀺 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀧𑀭𑀺𑀤𑁂𑀯𑀺, 𑀇𑀢𑀭𑁄 𑀅𑀦𑁆𑀢𑀭𑀥𑀸𑀬𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀭𑀼𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀲𑁆𑀲𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀸𑀫𑀺 𑀤𑁂𑀯𑀭𑀸𑀚, 𑀇𑀤𑀁 𑀫𑀁 𑀘𑀓𑁆𑀓𑀁 𑀲𑀡𑁆𑀳𑀓𑀭𑀡𑀺𑀬𑀁 𑀯𑀺𑀬 𑀢𑀺𑀮𑀸𑀦𑀺 𑀧𑀺𑀲𑀫𑀸𑀦𑀁 𑀑𑀢𑀭𑀢𑀺, 𑀓𑀺𑀁 𑀦𑀼 𑀔𑁄 𑀫𑀬𑀸 𑀧𑀸𑀧𑀁 𑀧𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧.

‘‘𑀘𑀢𑀼𑀤𑁆𑀯𑀸𑀭𑀫𑀺𑀤𑀁 ¶ 𑀦𑀕𑀭𑀁, 𑀆𑀬𑀲𑀁 𑀤𑀴𑁆𑀳𑀧𑀸𑀓𑀸𑀭𑀁;

𑀑𑀭𑀼𑀤𑁆𑀥𑀧𑀝𑀺𑀭𑀼𑀤𑁆𑀥𑁄𑀲𑁆𑀫𑀺, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸.

𑁨.

‘‘𑀲𑀩𑁆𑀩𑁂 ¶ 𑀅𑀧𑀺𑀳𑀺𑀢𑀸 𑀤𑁆𑀯𑀸𑀭𑀸, 𑀑𑀭𑀼𑀤𑁆𑀥𑁄𑀲𑁆𑀫𑀺 𑀬𑀣𑀸 𑀤𑀺𑀚𑁄;

𑀓𑀺𑀫𑀸𑀥𑀺𑀓𑀭𑀡𑀁 𑀬𑀓𑁆𑀔, 𑀘𑀓𑁆𑀓𑀸𑀪𑀺𑀦𑀺𑀳𑀢𑁄 𑀅𑀳’’𑀦𑁆𑀢𑀺.

𑀢𑀢𑁆𑀣 𑀤𑀴𑁆𑀳𑀧𑀸𑀓𑀸𑀭𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀁. ‘‘𑀤𑀴𑁆𑀳𑀢𑁄𑀭𑀡’’𑀦𑁆𑀢𑀺𑀧𑀺 𑀧𑀸𑀞𑁄, 𑀣𑀺𑀭𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀑𑀭𑀼𑀤𑁆𑀥𑀧𑀝𑀺𑀭𑀼𑀤𑁆𑀥𑁄𑀲𑁆𑀫𑀻𑀢𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀧𑀸𑀓𑀸𑀭𑁂𑀦 𑀭𑀼𑀤𑁆𑀥𑁄, 𑀧𑀮𑀸𑀬𑀦𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀓𑀺𑀁 𑀧𑀸𑀧𑀁 𑀧𑀓𑀢𑀦𑁆𑀢𑀺 𑀓𑀺𑀁 𑀦𑀼 𑀔𑁄 𑀫𑀬𑀸 𑀧𑀸𑀧𑀓𑀫𑁆𑀫𑀁 𑀓𑀢𑀁. 𑀅𑀧𑀺𑀳𑀺𑀢𑀸𑀢𑀺 𑀣𑀓𑀺𑀢𑀸. 𑀬𑀣𑀸 𑀤𑀺𑀚𑁄𑀢𑀺 𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑁄 𑀲𑀓𑀼𑀡𑁄 𑀯𑀺𑀬. 𑀓𑀺𑀫𑀸𑀥𑀺𑀓𑀭𑀡𑀦𑁆𑀢𑀺 𑀓𑀺𑀁 𑀓𑀸𑀭𑀡𑀁. 𑀘𑀓𑁆𑀓𑀸𑀪𑀺𑀦𑀺𑀳𑀢𑁄𑀢𑀺 𑀘𑀓𑁆𑀓𑁂𑀦 𑀅𑀪𑀺𑀦𑀺𑀳𑀢𑁄.

𑀅𑀣𑀲𑁆𑀲 𑀤𑁂𑀯𑀭𑀸𑀚𑀸 𑀓𑀸𑀭𑀡𑀁 𑀓𑀣𑁂𑀢𑀼𑀁 𑀙 𑀕𑀸𑀣𑀸 𑀅𑀪𑀸𑀲𑀺 𑁋

𑁩.

‘‘𑀮𑀤𑁆𑀥𑀸 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺;

𑀅𑀦𑀼𑀓𑀫𑁆𑀧𑀓𑀸𑀦𑀁 𑀜𑀸𑀢𑀻𑀦𑀁, 𑀯𑀘𑀦𑀁 𑀲𑀫𑁆𑀫 𑀦𑀸𑀓𑀭𑀺.

𑁪.

‘‘𑀮𑀗𑁆𑀖𑀺𑀁 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺, 𑀲𑀸𑀕𑀭𑀁 𑀅𑀧𑁆𑀧𑀲𑀺𑀤𑁆𑀥𑀺𑀓𑀁;

𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲.

𑁫.

‘‘𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁬.

‘‘𑀉𑀧𑀭𑀺𑀯𑀺𑀲𑀸𑀮𑀸 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻;

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄.

𑁭.

‘‘𑀩𑀳𑀼𑀪𑀡𑁆𑀟𑀁 𑀅𑀯𑀳𑀸𑀬, 𑀫𑀕𑁆𑀕𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬;

𑀬𑁂𑀲𑀜𑁆𑀘𑁂𑀢𑀁 𑀅𑀲𑀗𑁆𑀔𑀸𑀢𑀁, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄.

𑁮.

‘‘𑀓𑀫𑁆𑀫𑀁 ¶ 𑀲𑀫𑁂𑀓𑁆𑀔𑁂 𑀯𑀺𑀧𑀼𑀮𑀜𑁆𑀘 𑀪𑁄𑀕𑀁, 𑀇𑀘𑁆𑀙𑀁 𑀦 𑀲𑁂𑀯𑁂𑀬𑁆𑀬 𑀅𑀦𑀢𑁆𑀣𑀲𑀁𑀳𑀺𑀢𑀁;

𑀓𑀭𑁂𑀬𑁆𑀬 𑀯𑀸𑀓𑁆𑀬𑀁 𑀅𑀦𑀼𑀓𑀫𑁆𑀧𑀓𑀸𑀦𑀁, 𑀢𑀁 𑀢𑀸𑀤𑀺𑀲𑀁 𑀦𑀸𑀢𑀺𑀯𑀢𑁆𑀢𑁂𑀬𑁆𑀬 𑀘𑀓𑁆𑀓’’𑀦𑁆𑀢𑀺.

𑀢𑀢𑁆𑀣 𑀮𑀤𑁆𑀥𑀸 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀻𑀢𑀺 𑀢𑁆𑀯𑀁 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀫𑀸𑀢𑀼 𑀲𑀦𑁆𑀢𑀺𑀓𑀸 𑀲𑀳𑀲𑁆𑀲𑀁 ¶ 𑀕𑀳𑁂𑀢𑁆𑀯𑀸 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁄 𑀲𑀢𑀲𑀳𑀲𑁆𑀲𑀸𑀦𑀺 ¶ 𑀘 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺 𑀮𑀪𑀺𑀢𑁆𑀯𑀸. 𑀦𑀸𑀓𑀭𑀻𑀢𑀺 𑀢𑁂𑀦 𑀥𑀦𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑁄 𑀲𑀫𑀼𑀤𑁆𑀤𑁂 𑀆𑀤𑀻𑀦𑀯𑀜𑁆𑀘 𑀓𑀣𑁂𑀢𑁆𑀯𑀸 𑀫𑀸𑀢𑀼𑀬𑀸 𑀯𑀸𑀭𑀺𑀬𑀫𑀸𑀦𑁄𑀧𑀺 𑀅𑀦𑀼𑀓𑀫𑁆𑀧𑀓𑀸𑀦𑀁 𑀜𑀸𑀢𑀻𑀦𑀁 𑀯𑀘𑀦𑀁 𑀦 𑀓𑀭𑁄𑀲𑀺, 𑀲𑁄𑀢𑀸𑀧𑀦𑁆𑀦𑀁 𑀫𑀸𑀢𑀭𑀁 𑀧𑀳𑀭𑀺𑀢𑁆𑀯𑀸 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸𑀲𑀻𑀢𑀺 𑀤𑀻𑀧𑁂𑀢𑀺.

𑀮𑀗𑁆𑀖𑀺𑀦𑁆𑀢𑀺 𑀦𑀸𑀯𑀁 𑀉𑀮𑁆𑀮𑀗𑁆𑀖𑀦𑀲𑀫𑀢𑁆𑀣𑀁. 𑀧𑀓𑁆𑀔𑀦𑁆𑀤𑀻𑀢𑀺 𑀧𑀓𑁆𑀔𑀦𑁆𑀤𑁄𑀲𑀺. 𑀅𑀧𑁆𑀧𑀲𑀺𑀤𑁆𑀥𑀺𑀓𑀦𑁆𑀢𑀺 𑀫𑀦𑁆𑀤𑀲𑀺𑀤𑁆𑀥𑀺𑀁 𑀯𑀺𑀦𑀸𑀲𑀩𑀳𑀼𑀮𑀁. 𑀘𑀢𑀼𑀩𑁆𑀪𑀺 𑀅𑀝𑁆𑀞𑀸𑀢𑀺 𑀅𑀣 𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀦𑀸𑀯𑀸𑀬 𑀨𑀮𑀓𑀁 𑀤𑀢𑁆𑀯𑀸 𑀲𑀫𑀼𑀤𑁆𑀤𑁂 𑀔𑀺𑀢𑁆𑀢𑁄𑀧𑀺 𑀢𑁆𑀯𑀁 𑀫𑀸𑀢𑀭𑀁 𑀦𑀺𑀲𑁆𑀲𑀸𑀬 𑀏𑀓𑀤𑀺𑀯𑀲𑀁 𑀓𑀢𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀨𑀮𑀺𑀓𑀯𑀺𑀫𑀸𑀦𑁂 𑀘𑀢𑀲𑁆𑀲𑁄 𑀇𑀢𑁆𑀣𑀺𑀬𑁄 𑀮𑀪𑀺𑀢𑁆𑀯𑀸 𑀢𑀢𑁄 𑀭𑀚𑀢𑀯𑀺𑀫𑀸𑀦𑁂 𑀅𑀝𑁆𑀞, 𑀫𑀡𑀺𑀯𑀺𑀫𑀸𑀦𑁂 𑀲𑁄𑀴𑀲, 𑀓𑀦𑀓𑀯𑀺𑀫𑀸𑀦𑁂 𑀤𑁆𑀯𑀢𑁆𑀢𑀺𑀁𑀲 𑀅𑀥𑀺𑀕𑀢𑁄𑀲𑀻𑀢𑀺. 𑀅𑀢𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄𑀢𑀺 𑀅𑀣 𑀢𑁆𑀯𑀁 𑀬𑀣𑀸𑀮𑀤𑁆𑀥𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 ‘‘𑀅𑀢𑁆𑀭 𑀉𑀢𑁆𑀢𑀭𑀺𑀢𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀮𑀤𑁆𑀥𑀁 𑀮𑀤𑁆𑀥𑀁 𑀅𑀢𑀺𑀓𑁆𑀓𑀫𑀦𑀮𑁄𑀪𑀲𑀗𑁆𑀔𑀸𑀢𑀸𑀬 𑀅𑀢𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀢𑀺𑀘𑁆𑀙𑁄 𑀧𑀸𑀧𑀧𑀼𑀕𑁆𑀕𑀮𑁄 𑀢𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀔𑀻𑀡𑀢𑁆𑀢𑀸 𑀤𑁆𑀯𑀢𑁆𑀢𑀺𑀁𑀲 𑀇𑀢𑁆𑀣𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀫𑀁 𑀧𑁂𑀢𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀸𑀢𑀼𑀧𑀳𑀸𑀭𑀤𑀸𑀦𑀅𑀓𑀼𑀲𑀮𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀤𑀁 𑀔𑀼𑀭𑀘𑀓𑁆𑀓𑀁 𑀲𑀫𑁆𑀧𑀢𑁆𑀢𑁄𑀲𑀺. ‘‘𑀅𑀢𑁆𑀭𑀺𑀘𑁆𑀙’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀫𑀸𑀦𑁄𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀭𑀺𑀘𑁆𑀙𑀸’’𑀢𑀺𑀧𑀺 𑀧𑀸𑀞𑁄, 𑀅𑀢𑁆𑀭𑀺𑀘𑁆𑀙𑀸𑀬𑀸𑀢𑀺 𑀅𑀢𑁆𑀣𑁄. 𑀪𑀫𑀢𑀻𑀢𑀺 𑀢𑀲𑁆𑀲 𑀢𑁂 𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲 𑀇𑀤𑀁 𑀘𑀓𑁆𑀓𑀁 𑀫𑀢𑁆𑀣𑀓𑀁 𑀧𑀺𑀲𑀫𑀸𑀦𑀁 𑀇𑀤𑀸𑀦𑀺 𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀁 𑀯𑀺𑀬 𑀫𑀢𑁆𑀣𑀓𑁂 𑀪𑀫𑀢𑀻𑀢𑀺 𑀅𑀢𑁆𑀣𑁄.

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀻𑀢𑀺 𑀢𑀡𑁆𑀳𑀸 𑀦𑀸𑀫𑁂𑀲𑀸 𑀕𑀘𑁆𑀙𑀦𑁆𑀢𑀻 𑀉𑀧𑀭𑀽𑀧𑀭𑀺 𑀯𑀺𑀲𑀸𑀮𑀸 𑀳𑁄𑀢𑀺, 𑀲𑀫𑀼𑀤𑁆𑀤𑁄 𑀯𑀺𑀬 𑀘 𑀤𑀼𑀧𑁆𑀧𑀽𑀭𑀸, 𑀭𑀽𑀧𑀸𑀤𑀻𑀲𑀼 𑀢𑀲𑁆𑀲 𑀢𑀲𑁆𑀲 𑀇𑀘𑁆𑀙𑀦𑀇𑀘𑁆𑀙𑀸𑀬 𑀯𑀺𑀲𑀝𑀕𑀸𑀫𑀺𑀦𑀻, 𑀢𑀁 𑀏𑀯𑀭𑀽𑀧𑀁 𑀢𑀡𑁆𑀳𑀁 𑀬𑁂 𑀘 𑀅𑀦𑀼𑀕𑀺𑀚𑁆𑀛𑀦𑁆𑀢𑀺 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀅𑀮𑁆𑀮𑀻𑀬𑀦𑁆𑀢𑀺. 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄𑀢𑀺 𑀢𑁂 𑀏𑀯𑀁 𑀧𑀘𑁆𑀘𑀦𑁆𑀢𑀸 𑀔𑀼𑀭𑀘𑀓𑁆𑀓𑀁 𑀥𑀸𑀭𑁂𑀦𑁆𑀢𑀺. 𑀩𑀳𑀼𑀪𑀡𑁆𑀟𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀩𑀳𑀼𑀥𑀦𑀁 𑀑𑀳𑀸𑀬. 𑀫𑀕𑁆𑀕𑀦𑁆𑀢𑀺 𑀕𑀦𑁆𑀢𑀩𑁆𑀩𑀁 𑀅𑀧𑁆𑀧𑀲𑀺𑀤𑁆𑀥𑀺𑀓𑀁 𑀲𑀫𑀼𑀤𑁆𑀤𑀫𑀕𑁆𑀕𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀬𑀣𑀸 𑀢𑁆𑀯𑀁 𑀧𑀝𑀺𑀧𑀦𑁆𑀦𑁄, 𑀏𑀯𑀫𑁂𑀯 𑀅𑀜𑁆𑀜𑁂𑀲𑀫𑁆𑀧𑀺 𑀬𑁂𑀲𑀜𑁆𑀘𑁂𑀢𑀁 𑀅𑀲𑀗𑁆𑀔𑀸𑀢𑀁 𑀅𑀯𑀻𑀫𑀁𑀲𑀺𑀢𑀁, 𑀢𑁂 𑀬𑀣𑀸 𑀢𑁆𑀯𑀁 𑀢𑀣𑁂𑀯 𑀢𑀡𑁆𑀳𑀸𑀯𑀲𑀺𑀓𑀸 𑀳𑀼𑀢𑁆𑀯𑀸 𑀥𑀦𑀁 𑀧𑀳𑀸𑀬 𑀕𑀫𑀦𑀫𑀕𑁆𑀕𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀧𑀦𑁆𑀦𑀸 𑀘𑀓𑁆𑀓𑀥𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀓𑀫𑁆𑀫𑀁 𑀲𑀫𑁂𑀓𑁆𑀔𑁂𑀢𑀺 𑀢𑀲𑁆𑀫𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 ‘‘𑀲𑀤𑁄𑀲𑀁 𑀦𑀼 𑀔𑁄, 𑀦𑀺𑀤𑁆𑀤𑁄𑀲’’𑀦𑁆𑀢𑀺 𑀲𑀫𑁂𑀓𑁆𑀔𑁂𑀬𑁆𑀬 ¶ 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬. 𑀯𑀺𑀧𑀼𑀮𑀜𑁆𑀘 ¶ 𑀪𑁄𑀕𑀦𑁆𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀮𑀤𑁆𑀥𑀁 𑀥𑀦𑀭𑀸𑀲𑀺𑀫𑁆𑀧𑀺 𑀲𑀫𑁂𑀓𑁆𑀔𑁂𑀬𑁆𑀬. 𑀦𑀸𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑀢𑀁 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀇𑀤𑀁 𑀘𑀓𑁆𑀓𑀁 𑀦 𑀅𑀢𑀺𑀯𑀢𑁆𑀢𑁂𑀬𑁆𑀬 𑀦𑀸𑀯𑀢𑁆𑀣𑀭𑁂𑀬𑁆𑀬. ‘‘𑀦𑀸𑀢𑀺𑀯𑀢𑁆𑀢𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀦𑀸𑀯𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄.

𑀢𑀁 ¶ 𑀲𑀼𑀢𑁆𑀯𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 ‘‘𑀇𑀫𑀺𑀦𑀸 𑀤𑁂𑀯𑀧𑀼𑀢𑁆𑀢𑁂𑀦 𑀫𑀬𑀸 𑀓𑀢𑀓𑀫𑁆𑀫𑀁 𑀢𑀣𑀢𑁄 𑀜𑀸𑀢𑀁, 𑀅𑀬𑀁 𑀫𑀬𑁆𑀳𑀁 𑀧𑀘𑁆𑀘𑀦𑀧𑀫𑀸𑀡𑀫𑁆𑀧𑀺 𑀚𑀸𑀦𑀺𑀲𑁆𑀲𑀢𑀺, 𑀧𑀼𑀘𑁆𑀙𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁯.

‘‘𑀓𑀻𑀯𑀘𑀺𑀭𑀁 𑀦𑀼 𑀫𑁂 𑀬𑀓𑁆𑀔, 𑀘𑀓𑁆𑀓𑀁 𑀲𑀺𑀭𑀲𑀺 𑀞𑀲𑁆𑀲𑀢𑀺;

𑀓𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀅𑀣𑀲𑁆𑀲 𑀓𑀣𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁦.

‘‘𑀅𑀢𑀺𑀲𑀭𑁄 𑀧𑀘𑁆𑀘𑀲𑀭𑁄, 𑀫𑀺𑀢𑁆𑀢𑀯𑀺𑀦𑁆𑀤 𑀲𑀼𑀡𑁄𑀳𑀺 𑀫𑁂;

𑀘𑀓𑁆𑀓𑀁 𑀢𑁂 𑀲𑀺𑀭𑀲𑀺 𑀫𑀸𑀯𑀺𑀤𑁆𑀥𑀁, 𑀦 𑀢𑀁 𑀚𑀻𑀯𑀁 𑀧𑀫𑁄𑀓𑁆𑀔𑀲𑀻’’𑀢𑀺.

𑀢𑀢𑁆𑀣 𑀅𑀢𑀺𑀲𑀭𑁄𑀢𑀺 𑀅𑀢𑀺𑀲𑀭𑀻𑀢𑀺𑀧𑀺 𑀅𑀢𑀺𑀲𑀭𑁄, 𑀅𑀢𑀺𑀲𑀭𑀺𑀲𑁆𑀲𑀢𑀻𑀢𑀺𑀧𑀺 𑀅𑀢𑀺𑀲𑀭𑁄. 𑀧𑀘𑁆𑀘𑀲𑀭𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀫𑀺𑀢𑁆𑀢𑀯𑀺𑀦𑁆𑀤𑀓, 𑀲𑀼𑀡𑁄𑀳𑀺 𑀫𑁂 𑀯𑀘𑀦𑀁, 𑀢𑁆𑀯𑀜𑁆𑀳𑀺 𑀅𑀢𑀺𑀤𑀸𑀭𑀼𑀡𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀅𑀢𑀺𑀲𑀭𑁄, 𑀢𑀲𑁆𑀲 𑀧𑀦 𑀦 𑀲𑀓𑁆𑀓𑀸 𑀯𑀲𑁆𑀲𑀕𑀡𑀦𑀸𑀬 𑀯𑀺𑀧𑀸𑀓𑁄 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀅𑀧𑀭𑀺𑀫𑀸𑀡𑀁 𑀅𑀢𑀺𑀫𑀳𑀦𑁆𑀢𑀁 𑀯𑀺𑀧𑀸𑀓𑀤𑀼𑀓𑁆𑀔𑀁 𑀲𑀭𑀺𑀲𑁆𑀲𑀲𑀺 𑀧𑀝𑀺𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀅𑀢𑀺𑀲𑀭𑁄. 𑀢𑁂𑀦 𑀢𑁂 ‘‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀲𑀺𑀭𑀲𑀺𑀫𑀸𑀯𑀺𑀤𑁆𑀥𑀦𑁆𑀢𑀺 𑀬𑀁 𑀧𑀦 𑀢𑁂 𑀇𑀤𑀁 𑀘𑀓𑁆𑀓𑀁 𑀲𑀺𑀭𑀲𑁆𑀫𑀺𑀁 𑀆𑀯𑀺𑀤𑁆𑀥𑀁 𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀫𑀺𑀯 𑀪𑀫𑀢𑀺. 𑀦 𑀢𑀁 𑀚𑀻𑀯𑀁 𑀧𑀫𑁄𑀓𑁆𑀔𑀲𑀻𑀢𑀺 𑀢𑀁 𑀢𑁆𑀯𑀁 𑀬𑀸𑀯 𑀢𑁂 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀔𑀻𑀬𑀢𑀺, 𑀢𑀸𑀯 𑀚𑀻𑀯𑀫𑀸𑀦𑁄 𑀦 𑀧𑀫𑁄𑀓𑁆𑀔𑀲𑀺, 𑀓𑀫𑁆𑀫𑀯𑀺𑀧𑀸𑀓𑁂 𑀧𑀦 𑀔𑀻𑀡𑁂 𑀇𑀤𑀁 𑀘𑀓𑁆𑀓𑀁 𑀧𑀳𑀸𑀬 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀲𑀻𑀢𑀺.

𑀇𑀤𑀁 𑀯𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀕𑀢𑁄, 𑀇𑀢𑀭𑁄𑀧𑀺 𑀫𑀳𑀸𑀤𑀼𑀓𑁆𑀔𑀁 𑀧𑀝𑀺𑀧𑀚𑁆𑀚𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀅𑀬𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀤𑁂𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀢𑀼𑀤𑁆𑀯𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁪𑁦] 𑁨. 𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀓𑀡𑁆𑀳𑁄 ¶ ¶ 𑀯𑀢𑀸𑀬𑀁 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀓𑀧𑀺𑀮𑀯𑀢𑁆𑀣𑀼𑀁 𑀉𑀧𑀦𑀺𑀲𑁆𑀲𑀸𑀬 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀺𑀢𑀧𑀸𑀢𑀼𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀲𑀢𑁆𑀣𑀸 𑀲𑀸𑀬𑀦𑁆𑀳𑀲𑀫𑀬𑁂 ¶ 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀗𑁆𑀖𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀪𑀕𑀯𑀢𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬, 𑀦 𑀅𑀳𑁂𑀢𑀼 𑀢𑀣𑀸𑀕𑀢𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯𑀸’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀓𑀡𑁆𑀳𑁄 𑀦𑀸𑀫 𑀇𑀲𑀺 𑀅𑀳𑁄𑀲𑀺, 𑀲𑁄 𑀇𑀫𑀲𑁆𑀫𑀺𑀁 𑀪𑀽𑀫𑀺𑀧𑁆𑀧𑀤𑁂𑀲𑁂 𑀯𑀺𑀳𑀸𑀲𑀺 𑀛𑀸𑀬𑀻 𑀛𑀸𑀦𑀭𑀢𑁄, 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀻’’𑀢𑀺 𑀲𑀺𑀢𑀓𑀸𑀭𑀡𑀁 𑀯𑀢𑁆𑀯𑀸 𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀧𑀸𑀓𑀝𑀢𑁆𑀢𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀬𑀁 𑀏𑀓𑁂𑀦 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂𑀦 𑀅𑀧𑀼𑀢𑁆𑀢𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀼𑀢𑁆𑀢𑁂 𑀧𑀢𑁆𑀣𑀺𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀓𑀸𑀴𑀯𑀡𑁆𑀡𑀢𑁆𑀢𑀸 𑀧𑀦𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀓𑀡𑁆𑀳𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀫𑀡𑀺𑀧𑀝𑀺𑀫𑀸 𑀯𑀺𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀭𑀸 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀧𑁂𑀲𑀺𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀺. 𑀅𑀣 𑀦𑀁 𑀧𑀺𑀢𑀸 𑀅𑀦𑀼𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀲𑀩𑁆𑀩𑀺𑀲𑁆𑀲𑀭𑀺𑀬𑀁 𑀧𑀝𑀺𑀧𑀚𑁆𑀚𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀯𑀭𑀧𑀮𑁆𑀮𑀗𑁆𑀓𑀫𑀚𑁆𑀛𑀕𑀢𑁄 𑀲𑀼𑀯𑀡𑁆𑀡𑀧𑀝𑁆𑀝𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀥𑀦𑀁 𑀅𑀲𑀼𑀓𑁂𑀦 𑀉𑀧𑁆𑀧𑀸𑀤𑀺𑀢𑀁, 𑀏𑀢𑁆𑀢𑀓𑀁 𑀅𑀲𑀼𑀓𑁂𑀦𑀸’’𑀢𑀺 𑀧𑀼𑀩𑁆𑀩𑀜𑀸𑀢𑀻𑀳𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑀸𑀦𑀺 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀬𑁂𑀳𑀺 𑀇𑀫𑀁 𑀥𑀦𑀁 𑀉𑀧𑁆𑀧𑀸𑀤𑀺𑀢𑀁, 𑀢𑁂 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀥𑀦𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀏𑀓𑁄𑀧𑀺 𑀇𑀤𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀢𑁄 𑀦𑀸𑀫 𑀦𑀢𑁆𑀣𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀥𑀦𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀧𑀭𑀮𑁄𑀓𑀁 𑀕𑀦𑁆𑀢𑀼𑀁. 𑀧𑀜𑁆𑀘𑀦𑁆𑀦𑀁 𑀯𑁂𑀭𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁂𑀦 𑀳𑀺 𑀅𑀲𑀸𑀭𑀲𑁆𑀲 𑀥𑀦𑀲𑁆𑀲 𑀤𑀸𑀦𑀁 𑀲𑀸𑀭𑁄, 𑀩𑀳𑀼𑀭𑁄𑀕𑀲𑀸𑀥𑀸𑀭𑀡𑀪𑀸𑀯𑁂𑀦 𑀅𑀲𑀸𑀭𑀲𑁆𑀲 𑀲𑀭𑀻𑀭𑀲𑁆𑀲 𑀲𑀻𑀮𑀯𑀦𑁆𑀢𑁂𑀲𑀼 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀲𑀸𑀭𑁄, 𑀅𑀦𑀺𑀘𑁆𑀘𑀸𑀪𑀺𑀪𑀽𑀢𑀪𑀸𑀯𑁂𑀦 𑀅𑀲𑀸𑀭𑀲𑁆𑀲 ¶ 𑀚𑀻𑀯𑀺𑀢𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬𑁄𑀕𑁄 𑀲𑀸𑀭𑁄, 𑀢𑀲𑁆𑀫𑀸 𑀅𑀲𑀸𑀭𑁂𑀳𑀺 𑀪𑁄𑀕𑁂𑀳𑀺 𑀲𑀸𑀭𑀕𑁆𑀕𑀳𑀡𑀢𑁆𑀣𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺.

𑀲𑁄 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀬𑀸𑀯 𑀲𑀢𑁆𑀢𑀫𑀸 𑀤𑀺𑀯𑀲𑀸 𑀥𑀦𑀁 𑀅𑀧𑀭𑀺𑀓𑁆𑀔𑀻𑀬𑀫𑀸𑀦𑀁 ¶ 𑀤𑀺𑀲𑁆𑀯𑀸 ‘‘𑀓𑀺𑀁 𑀫𑁂 𑀥𑀦𑁂𑀦, 𑀬𑀸𑀯 𑀫𑀁 𑀚𑀭𑀸 𑀦𑀸𑀪𑀺𑀪𑀯𑀢𑀺, 𑀢𑀸𑀯𑀤𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑁂𑀳𑁂 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀤𑀺𑀦𑁆𑀦𑀁 𑀫𑁂, 𑀳𑀭𑀦𑁆𑀢𑀽’’𑀢𑀺 𑀅𑀲𑀼𑀘𑀺𑀁 𑀯𑀺𑀬 𑀚𑀺𑀕𑀼𑀘𑁆𑀙𑀦𑁆𑀢𑁄 ¶ 𑀯𑀢𑁆𑀣𑀼𑀓𑀸𑀫𑁂 𑀧𑀳𑀸𑀬 𑀫𑀳𑀸𑀚𑀦𑀲𑁆𑀲 𑀭𑁄𑀤𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀭𑀫𑀡𑀻𑀬𑀁 𑀪𑀽𑀫𑀺𑀪𑀸𑀕𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀞𑀸𑀦𑀁 𑀧𑀢𑁆𑀯𑀸 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀇𑀦𑁆𑀤𑀯𑀸𑀭𑀼𑀡𑀻𑀭𑀼𑀓𑁆𑀔𑀁 𑀕𑁄𑀘𑀭𑀕𑀸𑀫𑀁 𑀅𑀥𑀺𑀝𑁆𑀞𑀸𑀬 𑀢𑀲𑁆𑀲𑁂𑀯 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀯𑀺𑀳𑀸𑀲𑀺. 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀳𑀸𑀬 𑀆𑀭𑀜𑁆𑀜𑀺𑀓𑁄 𑀅𑀳𑁄𑀲𑀺, 𑀧𑀡𑁆𑀡𑀲𑀸𑀮𑀁 𑀅𑀓𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀺𑀓𑁄 𑀅𑀳𑁄𑀲𑀺, 𑀅𑀩𑁆𑀪𑁄𑀓𑀸𑀲𑀺𑀓𑁄 𑀦𑁂𑀲𑀚𑁆𑀚𑀺𑀓𑁄. 𑀲𑀘𑁂 𑀦𑀺𑀧𑀚𑁆𑀚𑀺𑀢𑀼𑀓𑀸𑀫𑁄, 𑀪𑀽𑀫𑀺𑀬𑀁𑀬𑁂𑀯 𑀦𑀺𑀧𑀚𑁆𑀚𑀢𑀺, 𑀤𑀦𑁆𑀢𑀫𑀽𑀲𑀮𑀺𑀓𑁄 𑀳𑀼𑀢𑁆𑀯𑀸 𑀅𑀦𑀕𑁆𑀕𑀺𑀧𑀓𑁆𑀓𑀫𑁂𑀯 𑀔𑀸𑀤𑀢𑀺, 𑀣𑀼𑀲𑀧𑀭𑀺𑀓𑁆𑀔𑀺𑀢𑁆𑀢𑀁 𑀓𑀺𑀜𑁆𑀘𑀺 𑀦 𑀔𑀸𑀤𑀢𑀺, 𑀏𑀓𑀤𑀺𑀯𑀲𑀁 𑀏𑀓𑀯𑀸𑀭𑀫𑁂𑀯 𑀔𑀸𑀤𑀢𑀺, 𑀏𑀓𑀸𑀲𑀦𑀺𑀓𑁄 𑀅𑀳𑁄𑀲𑀺. 𑀔𑀫𑀸𑀬 𑀧𑀣𑀯𑀻𑀆𑀧𑀢𑁂𑀚𑀯𑀸𑀬𑀼𑀲𑀫𑁄 𑀳𑀼𑀢𑁆𑀯𑀸 𑀏𑀢𑁂 𑀏𑀢𑁆𑀢𑀓𑁂 𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀇𑀫𑀲𑁆𑀫𑀺𑀁 𑀓𑀺𑀭 𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁄 𑀧𑀭𑀫𑀧𑁆𑀧𑀺𑀘𑁆𑀙𑁄 𑀅𑀳𑁄𑀲𑀺. 𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀢𑀢𑁆𑀣𑁂𑀯 𑀯𑀲𑀢𑀺, 𑀨𑀮𑀸𑀨𑀮𑀢𑁆𑀣𑀫𑁆𑀧𑀺 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺, 𑀭𑀼𑀓𑁆𑀔𑀲𑁆𑀲 𑀨𑀮𑀺𑀢𑀓𑀸𑀮𑁂 𑀨𑀮𑀁 𑀔𑀸𑀤𑀢𑀺, 𑀧𑀼𑀧𑁆𑀨𑀺𑀢𑀓𑀸𑀮𑁂 𑀧𑀼𑀧𑁆𑀨𑀁 𑀔𑀸𑀤𑀢𑀺, 𑀲𑀧𑀢𑁆𑀢𑀓𑀸𑀮𑁂 𑀧𑀢𑁆𑀢𑀸𑀦𑀺 𑀔𑀸𑀤𑀢𑀺, 𑀦𑀺𑀧𑁆𑀧𑀢𑁆𑀢𑀓𑀸𑀮𑁂 𑀧𑀧𑀝𑀺𑀓𑀁 𑀔𑀸𑀤𑀢𑀺. 𑀏𑀯𑀁 𑀧𑀭𑀫𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀺𑀭𑀁 𑀯𑀲𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀓𑁆𑀓𑀸𑀦𑀺 𑀨𑀮𑀸𑀦𑀺 𑀕𑀡𑁆𑀳𑀺, 𑀕𑀡𑁆𑀳𑀦𑁆𑀢𑁄 𑀧𑀦 𑀮𑁄𑀮𑀼𑀧𑁆𑀧𑀘𑀸𑀭𑁂𑀦 𑀉𑀝𑁆𑀞𑀸𑀬 𑀅𑀜𑁆𑀜𑀲𑁆𑀫𑀺𑀁 𑀧𑀤𑁂𑀲𑁂 𑀦 𑀕𑀡𑁆𑀳𑀸𑀢𑀺, 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀳𑀢𑁆𑀣𑀧𑁆𑀧𑀲𑀸𑀭𑀡𑀝𑁆𑀞𑀸𑀦𑁂 𑀞𑀺𑀢𑀸𑀦𑀺 𑀨𑀮𑀸𑀦𑀺 𑀲𑀁𑀳𑀭𑀢𑀺, 𑀢𑁂𑀲𑀼𑀧𑀺 𑀫𑀦𑀸𑀧𑀸𑀫𑀦𑀸𑀧𑀁 𑀅𑀯𑀺𑀘𑀺𑀦𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀭𑀫𑀲𑀦𑁆𑀢𑀼𑀝𑁆𑀞𑀲𑁆𑀲 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀢𑀁 𑀓𑀺𑀭 𑀲𑀓𑁆𑀓𑀲𑁆𑀲 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀉𑀡𑁆𑀳𑀁 𑀳𑁄𑀢𑀺 𑀧𑀼𑀜𑁆𑀜𑀓𑁆𑀔𑀬𑁂𑀦 ¶ 𑀯𑀸, 𑀅𑀜𑁆𑀜𑀲𑁆𑀫𑀺𑀁 ¶ 𑀯𑀸 𑀫𑀳𑀸𑀦𑀼𑀪𑀸𑀯𑀲𑀢𑁆𑀢𑁂 𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁂, 𑀥𑀫𑁆𑀫𑀺𑀓𑀸𑀦𑀁 𑀯𑀸 𑀫𑀳𑀺𑀤𑁆𑀥𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑀢𑁂𑀚𑁂𑀦 𑀉𑀡𑁆𑀳𑀁 𑀳𑁄𑀢𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀯𑀲𑀦𑁆𑀢𑀁 𑀓𑀡𑁆𑀳𑀁 𑀇𑀲𑀺𑀁 𑀭𑀼𑀓𑁆𑀔𑀨𑀮𑀸𑀦𑀺 𑀉𑀘𑁆𑀘𑀺𑀦𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀇𑀲𑀺 𑀖𑁄𑀭𑀢𑀧𑁄 𑀧𑀭𑀫𑀚𑀺𑀢𑀺𑀦𑁆𑀤𑁆𑀭𑀺𑀬𑁄, 𑀇𑀫𑀁 𑀥𑀫𑁆𑀫𑀓𑀣𑀸𑀬 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀲𑀼𑀓𑀸𑀭𑀡𑀁 𑀲𑀼𑀢𑁆𑀯𑀸 𑀯𑀭𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀇𑀫𑀫𑀲𑁆𑀲 𑀭𑀼𑀓𑁆𑀔𑀁 𑀥𑀼𑀯𑀨𑀮𑀁 𑀓𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀫𑀳𑀦𑁆𑀢𑁂𑀦𑀸𑀦𑀼𑀪𑀸𑀯𑁂𑀦 𑀲𑀻𑀖𑀁 𑀑𑀢𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀢𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀅𑀯𑀡𑁆𑀡𑁂 𑀓𑀣𑀺𑀢𑁂 𑀓𑀼𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧.

‘‘𑀓𑀡𑁆𑀳𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄, 𑀓𑀡𑁆𑀳𑀁 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁;

𑀓𑀡𑁆𑀳𑁂 𑀪𑀽𑀫𑀺𑀧𑀤𑁂𑀲𑀲𑁆𑀫𑀺𑀁, 𑀦 𑀫𑀬𑁆𑀳𑀁 𑀫𑀦𑀲𑁄 𑀧𑀺𑀬𑁄’’𑀢𑀺.

𑀢𑀢𑁆𑀣 𑀓𑀡𑁆𑀳𑁄𑀢𑀺 𑀓𑀸𑀴𑀯𑀡𑁆𑀡𑁄. 𑀪𑁄𑀚𑀦𑀦𑁆𑀢𑀺 𑀭𑀼𑀓𑁆𑀔𑀨𑀮𑀪𑁄𑀚𑀦𑀁.

𑀓𑀡𑁆𑀳𑁄 ¶ 𑀇𑀲𑀺 𑀲𑀓𑁆𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀻’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀓𑁆𑀓𑁄’’𑀢𑀺 𑀜𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨.

‘‘𑀦 𑀓𑀡𑁆𑀳𑁄 𑀢𑀘𑀲𑀸 𑀳𑁄𑀢𑀺, 𑀅𑀦𑁆𑀢𑁄𑀲𑀸𑀭𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀲𑁆𑀫𑀺𑀁 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀲 𑀯𑁂 𑀓𑀡𑁆𑀳𑁄 𑀲𑀼𑀚𑀫𑁆𑀧𑀢𑀻’’𑀢𑀺.

𑀢𑀢𑁆𑀣 𑀢𑀘𑀲𑀸𑀢𑀺 𑀢𑀘𑁂𑀦 𑀓𑀡𑁆𑀳𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀸𑀭𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀸𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀭𑀽𑀧𑁄 𑀳𑀺 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀳𑁄𑀢𑀺. 𑀲 𑀯𑁂𑀢𑀺 𑀬𑀲𑁆𑀫𑀺𑀁 𑀧𑀦 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀅𑀢𑁆𑀣𑀺, 𑀲𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀚𑀸𑀢𑁄𑀧𑀺 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄𑀧𑀺 𑀓𑀸𑀴𑀓𑁄𑀯.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀓𑀡𑁆𑀳𑀪𑀸𑀯𑀓𑀭𑀸𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀏𑀓𑀯𑀺𑀥𑀸𑀤𑀺𑀪𑁂𑀤𑁂𑀳𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀭𑀳𑀺𑀢𑁆𑀯𑀸 𑀲𑀻𑀮𑀸𑀤𑀬𑁄 𑀕𑀼𑀡𑁂 𑀧𑀲𑀁𑀲𑀺𑀢𑁆𑀯𑀸 𑀆𑀓𑀸𑀲𑁂 𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 ¶ 𑀲𑀓𑁆𑀓𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀫𑀼𑀤𑀺𑀢𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀫𑀳𑀸𑀲𑀢𑁆𑀢𑀁 𑀯𑀭𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩.

‘‘𑀏𑀢𑀲𑁆𑀫𑀺𑀁 ¶ 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀏𑀢𑀲𑁆𑀫𑀺𑀦𑁆𑀢𑀺 𑀬𑀁 𑀇𑀤𑀁 𑀢𑀬𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀯𑀺𑀬 𑀲𑀼𑀮𑀧𑀺𑀢𑀁, 𑀢𑀲𑁆𑀫𑀺𑀁 𑀲𑀼𑀮𑀧𑀺𑀢𑁂 𑀢𑀼𑀫𑁆𑀳𑀸𑀓𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀇𑀘𑁆𑀙𑀲𑀺, 𑀲𑀩𑁆𑀩𑀁 𑀢𑁂 𑀬𑀁 𑀯𑀭𑀁 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁, 𑀢𑀁 𑀤𑀫𑁆𑀫𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀓𑀺𑀁 𑀦𑀼 𑀔𑁄 𑀅𑀢𑁆𑀢𑀦𑁄 𑀅𑀯𑀡𑁆𑀡𑁂 𑀓𑀣𑀺𑀢𑁂 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄𑀢𑀺 𑀫𑀁 𑀯𑀻𑀫𑀁𑀲𑀦𑁆𑀢𑁄 𑀫𑀬𑁆𑀳𑀁 𑀙𑀯𑀺𑀯𑀡𑁆𑀡𑀜𑁆𑀘 𑀪𑁄𑀚𑀦𑀜𑁆𑀘 𑀯𑀲𑀦𑀝𑁆𑀞𑀸𑀦𑀜𑁆𑀘 𑀕𑀭𑀳𑀺𑀢𑁆𑀯𑀸 𑀇𑀤𑀸𑀦𑀺 𑀫𑀬𑁆𑀳𑀁 𑀅𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀭𑀁 𑀤𑁂𑀢𑀺, 𑀫𑀁 𑀔𑁄 𑀧𑀦𑁂𑀲 ‘𑀲𑀓𑁆𑀓𑀺𑀲𑁆𑀲𑀭𑀺𑀬𑀩𑁆𑀭𑀳𑁆𑀫𑀺𑀲𑁆𑀲𑀭𑀺𑀬𑀸𑀦𑀁 𑀅𑀢𑁆𑀣𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’𑀢𑀺𑀧𑀺 𑀫𑀜𑁆𑀜𑁂𑀬𑁆𑀬, 𑀢𑀢𑁆𑀭𑀲𑁆𑀲 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀁 𑀫𑀬𑁆𑀳𑀁 𑀧𑀭𑁂𑀲𑀼 𑀓𑁄𑀥𑁄 𑀯𑀸 𑀤𑁄𑀲𑁄 𑀯𑀸 𑀫𑀸 𑀉𑀧𑁆𑀧𑀚𑁆𑀚𑀢𑀼, 𑀧𑀭𑀲𑀫𑁆𑀧𑀢𑁆𑀢𑀺𑀬𑀁 𑀮𑁄𑀪𑁄 𑀯𑀸 𑀧𑀭𑁂𑀲𑀼 𑀲𑀺𑀦𑁂𑀳𑁄 𑀯𑀸 𑀫𑀸 𑀉𑀧𑁆𑀧𑀚𑁆𑀚𑀢𑀼, 𑀫𑀚𑁆𑀛𑀢𑁆𑀢𑁄𑀯 𑀪𑀯𑁂𑀬𑁆𑀬𑀦𑁆𑀢𑀺 𑀇𑀫𑁂 𑀫𑀬𑀸 𑀘𑀢𑁆𑀢𑀸𑀭𑁄 𑀯𑀭𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀲𑁆𑀲 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀸𑀬 𑀘𑀢𑁆𑀢𑀸𑀭𑁄 𑀯𑀭𑁂 𑀕𑀡𑁆𑀳𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁪.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀲𑀼𑀦𑀺𑀓𑁆𑀓𑁄𑀥𑀁 𑀲𑀼𑀦𑀺𑀤𑁆𑀤𑁄𑀲𑀁, 𑀦𑀺𑀮𑁆𑀮𑁄𑀪𑀁 𑀯𑀼𑀢𑁆𑀢𑀺𑀫𑀢𑁆𑀢𑀦𑁄;

𑀦𑀺𑀲𑁆𑀦𑁂𑀳𑀫𑀪𑀺𑀓𑀗𑁆𑀔𑀸𑀫𑀺, 𑀏𑀢𑁂 𑀫𑁂 𑀘𑀢𑀼𑀭𑁄 𑀯𑀭𑁂’’𑀢𑀺.

𑀢𑀢𑁆𑀣 𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓𑀸𑀢𑀺 𑀲𑀘𑁂 𑀢𑁆𑀯𑀁 𑀫𑀬𑁆𑀳𑀁 𑀯𑀭𑀁 𑀅𑀤𑀸𑀲𑀺. 𑀲𑀼𑀦𑀺𑀓𑁆𑀓𑁄𑀥𑀦𑁆𑀢𑀺 𑀅𑀓𑀼𑀚𑁆𑀛𑀦𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀓𑁆𑀓𑁄𑀥𑀁. 𑀲𑀼𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀤𑀼𑀲𑁆𑀲𑀦𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀤𑁆𑀤𑁄𑀲𑀁. 𑀦𑀺𑀮𑁆𑀮𑁄𑀪𑀦𑁆𑀢𑀺 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀦𑀺𑀮𑁆𑀮𑁄𑀪𑀁. 𑀯𑀼𑀢𑁆𑀢𑀺𑀫𑀢𑁆𑀢𑀦𑁄𑀢𑀺 𑀏𑀯𑀭𑀽𑀧𑀁 𑀅𑀢𑁆𑀢𑀦𑁄 𑀯𑀼𑀢𑁆𑀢𑀺𑀁. 𑀦𑀺𑀲𑁆𑀦𑁂𑀳𑀦𑁆𑀢𑀺 𑀧𑀼𑀢𑁆𑀢𑀥𑀻𑀢𑀸𑀤𑀻𑀲𑀼 𑀯𑀸 𑀲𑀯𑀺𑀜𑁆𑀜𑀸𑀡𑀓𑁂𑀲𑀼 𑀥𑀦𑀥𑀜𑁆𑀜𑀸𑀤𑀻𑀲𑀼 𑀯𑀸 𑀅𑀯𑀺𑀜𑁆𑀜𑀸𑀡𑀓𑁂𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀲𑀼𑀧𑀺 𑀦𑀺𑀲𑁆𑀦𑁂𑀳𑀁 𑀅𑀧𑀕𑀢𑀮𑁄𑀪𑀁. 𑀅𑀪𑀺𑀓𑀗𑁆𑀔𑀸𑀫𑀻𑀢𑀺 𑀏𑀯𑀭𑀽𑀧𑀁 𑀇𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀦𑁄 𑀯𑀼𑀢𑁆𑀢𑀺𑀁 𑀅𑀪𑀺𑀓𑀗𑁆𑀔𑀸𑀫𑀺. 𑀏𑀢𑁂 𑀫𑁂 𑀘𑀢𑀼𑀭𑁄 𑀯𑀭𑁂𑀢𑀺 𑀏𑀢𑁂 𑀦𑀺𑀓𑁆𑀓𑁄𑀥𑀸𑀤𑀺𑀓𑁂 𑀘𑀢𑀼𑀭𑁄 𑀫𑀬𑁆𑀳𑀁 𑀯𑀭𑁂 𑀤𑁂𑀳𑀻𑀢𑀺.

𑀓𑀺𑀁 𑀧𑀦𑁂𑀲 𑀦 𑀚𑀸𑀦𑀸𑀢𑀺 ‘‘𑀬𑀣𑀸 𑀦 𑀲𑀓𑁆𑀓𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀭𑀁 𑀕𑀳𑁂𑀢𑁆𑀯𑀸 𑀯𑀭𑁂𑀦 𑀓𑁄𑀥𑀸𑀤𑀬𑁄 𑀳𑀦𑀺𑀢𑀼’’𑀦𑁆𑀢𑀺. 𑀦𑁄 𑀦 𑀚𑀸𑀦𑀸𑀢𑀺, 𑀲𑀓𑁆𑀓𑁂 𑀔𑁄 𑀧𑀦 𑀯𑀭𑀁 ¶ 𑀤𑁂𑀦𑁆𑀢𑁂 𑀦 𑀕𑀡𑁆𑀳𑀸𑀫𑀻𑀢𑀺 𑀯𑀘𑀦𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀘 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀸𑀬 𑀕𑀡𑁆𑀳𑀺 ¶ . 𑀢𑀢𑁄 𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀡𑁆𑀳𑀧𑀡𑁆𑀟𑀺𑀢𑁄 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀅𑀢𑀺𑀯𑀺𑀬 𑀅𑀦𑀯𑀚𑁆𑀚𑁂 𑀯𑀭𑁂 𑀕𑀡𑁆𑀳𑀺, 𑀏𑀢𑁂𑀲𑀼 𑀯𑀭𑁂𑀲𑀼 𑀕𑀼𑀡𑀤𑁄𑀲𑀁 𑀏𑀢𑀫𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁫.

‘‘𑀓𑀺𑀁𑀦𑀼 𑀓𑁄𑀥𑁂 𑀯𑀸 𑀤𑁄𑀲𑁂 𑀯𑀸, 𑀮𑁄𑀪𑁂 𑀲𑁆𑀦𑁂𑀳𑁂 𑀘 𑀩𑁆𑀭𑀸𑀳𑁆𑀫𑀡;

𑀆𑀤𑀻𑀦𑀯𑀁 𑀢𑁆𑀯𑀁 𑀧𑀲𑁆𑀲𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀩𑁆𑀭𑀸𑀳𑁆𑀫𑀡 𑀓𑀺𑀁 𑀦𑀼 𑀔𑁄 𑀢𑁆𑀯𑀁 𑀓𑁄𑀥𑁂 𑀤𑁄𑀲𑁂 𑀮𑁄𑀪𑁂 𑀲𑁆𑀦𑁂𑀳𑁂 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀲𑀺, 𑀢𑀁 𑀢𑀸𑀯 𑀫𑁂 𑀧𑀼𑀘𑁆𑀙𑀺𑀢𑁄 𑀅𑀓𑁆𑀔𑀸𑀳𑀺, 𑀦 𑀳𑀺 𑀫𑀬𑀁 𑀏𑀢𑁆𑀣 𑀆𑀤𑀻𑀦𑀯𑀁 𑀚𑀸𑀦𑀸𑀫𑀸𑀢𑀺.

𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬.

‘‘𑀅𑀧𑁆𑀧𑁄 𑀳𑀼𑀢𑁆𑀯𑀸 𑀩𑀳𑀼 𑀳𑁄𑀢𑀺, 𑀯𑀟𑁆𑀠𑀢𑁂 𑀲𑁄 𑀅𑀔𑀦𑁆𑀢𑀺𑀚𑁄;

𑀆𑀲𑀗𑁆𑀕𑀻 𑀩𑀳𑀼𑀧𑀸𑀬𑀸𑀲𑁄, 𑀢𑀲𑁆𑀫𑀸 𑀓𑁄𑀥𑀁 𑀦 𑀭𑁄𑀘𑀬𑁂.

𑁧𑁭.

‘‘𑀤𑀼𑀝𑁆𑀞𑀲𑁆𑀲 ¶ 𑀨𑀭𑀼𑀲𑀸 𑀯𑀸𑀘𑀸, 𑀧𑀭𑀸𑀫𑀸𑀲𑁄 𑀅𑀦𑀦𑁆𑀢𑀭𑀸;

𑀢𑀢𑁄 𑀧𑀸𑀡𑀺 𑀢𑀢𑁄 𑀤𑀡𑁆𑀟𑁄, 𑀲𑀢𑁆𑀣𑀲𑁆𑀲 𑀧𑀭𑀫𑀸 𑀕𑀢𑀺;

𑀤𑁄𑀲𑁄 𑀓𑁄𑀥𑀲𑀫𑀼𑀝𑁆𑀞𑀸𑀦𑁄, 𑀢𑀲𑁆𑀫𑀸 𑀤𑁄𑀲𑀁 𑀦 𑀭𑁄𑀘𑀬𑁂.

𑁧𑁮.

‘‘𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸, 𑀦𑀺𑀓𑀢𑀻 𑀯𑀜𑁆𑀘𑀦𑀸𑀦𑀺 𑀘;

𑀤𑀺𑀲𑁆𑀲𑀦𑁆𑀢𑀺 𑀮𑁄𑀪𑀥𑀫𑁆𑀫𑁂𑀲𑀼, 𑀢𑀲𑁆𑀫𑀸 𑀮𑁄𑀪𑀁 𑀦 𑀭𑁄𑀘𑀬𑁂.

𑁧𑁯.

‘‘𑀲𑁆𑀦𑁂𑀳𑀲𑀗𑁆𑀕𑀣𑀺𑀢𑀸 𑀕𑀦𑁆𑀣𑀸, 𑀲𑁂𑀦𑁆𑀢𑀺 𑀫𑀦𑁄𑀫𑀬𑀸 𑀧𑀼𑀣𑀽;

𑀢𑁂 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁆𑀦𑁂𑀳𑀁 𑀦 𑀭𑁄𑀘𑀬𑁂’’𑀢𑀺.

𑀢𑀢𑁆𑀣 𑀅𑀔𑀦𑁆𑀢𑀺𑀚𑁄𑀢𑀺 𑀲𑁄 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑀲𑁆𑀲 𑀅𑀔𑀦𑁆𑀢𑀺𑀢𑁄 𑀚𑀸𑀢𑁄 𑀓𑁄𑀥𑁄 𑀧𑀞𑀫𑀁 𑀧𑀭𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀩𑀳𑀼 𑀳𑁄𑀢𑀺 𑀅𑀧𑀭𑀸𑀧𑀭𑀁 𑀯𑀟𑁆𑀠𑀢𑀺. 𑀢𑀲𑁆𑀲 𑀯𑀟𑁆𑀠𑀦𑀪𑀸𑀯𑁄 𑀔𑀦𑁆𑀢𑀺𑀯𑀸𑀤𑀻𑀚𑀸𑀢𑀓𑁂𑀦 (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀘𑁂𑀯 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑁂𑀦 (𑀚𑀸. 𑁧.𑁫.𑁪𑁪 𑀆𑀤𑀬𑁄) 𑀘 𑀯𑀡𑁆𑀡𑁂𑀢𑀩𑁆𑀩𑁄. 𑀅𑀧𑀺𑀘 𑀢𑀺𑀲𑁆𑀲𑀸𑀫𑀘𑁆𑀘𑀲𑁆𑀲𑀧𑁂𑀢𑁆𑀣 𑀪𑀭𑀺𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀲𑀧𑀭𑀺𑀚𑀦𑀁 𑀫𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀫𑀸𑀭𑀺𑀢𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀆𑀲𑀗𑁆𑀕𑀻𑀢𑀺 𑀆𑀲𑀗𑁆𑀕𑀓𑀭𑀡𑁄. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀺𑀢𑀁 𑀓𑀭𑁄𑀢𑀺, 𑀢𑀁 𑀯𑀢𑁆𑀣𑀼𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ¶ 𑀕𑀦𑁆𑀢𑀼𑀁 𑀦 𑀤𑁂𑀢𑀺, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀓𑁆𑀓𑁄𑀲𑀦𑀸𑀤𑀻𑀦𑀺 𑀓𑀸𑀭𑁂𑀢𑀺. 𑀩𑀳𑀼𑀧𑀸𑀬𑀸𑀲𑁄𑀢𑀺 𑀩𑀳𑀼𑀦𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀦 𑀉𑀧𑀸𑀬𑀸𑀲𑁂𑀦 𑀓𑀺𑀮𑀫𑀣𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀓𑁄𑀥𑀁 𑀦𑀺𑀲𑁆𑀲𑀸𑀬 𑀳𑀺 𑀓𑁄𑀥𑀯𑀲𑁂𑀦 𑀅𑀭𑀺𑀬𑀸𑀤𑀻𑀲𑀼 𑀓𑀢𑀯𑀻𑀢𑀺𑀓𑁆𑀓𑀫𑀸 𑀤𑀺𑀝𑁆𑀞𑀥𑀫𑁆𑀫𑁂 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀯𑀥𑀩𑀦𑁆𑀥𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀻𑀦𑀺 ¶ 𑀘𑁂𑀯 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀭𑀡𑀸𑀤𑀻𑀦𑀺 𑀘 𑀩𑀳𑀽𑀦𑀺 𑀤𑀼𑀓𑁆𑀔𑀸𑀦𑀺 𑀅𑀦𑀼𑀪𑀯𑀦𑁆𑀢𑀻𑀢𑀺 𑀓𑁄𑀥𑁄 𑀩𑀳𑀼𑀧𑀸𑀬𑀸𑀲𑁄 𑀦𑀸𑀫. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀲 𑀏𑀯𑀁 𑀅𑀦𑁂𑀓𑀸𑀤𑀻𑀦𑀯𑁄, 𑀢𑀲𑁆𑀫𑀸 𑀓𑁄𑀥𑀁 𑀦 𑀭𑁄𑀘𑁂𑀫𑀺.

𑀤𑀼𑀝𑁆𑀞𑀲𑁆𑀲𑀸𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁂𑀦 𑀓𑁄𑀥𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀤𑀼𑀲𑁆𑀲𑀦𑀮𑀓𑁆𑀔𑀡𑁂𑀦 𑀤𑁄𑀲𑁂𑀦 𑀤𑀼𑀝𑁆𑀞𑀲𑁆𑀲 𑀧𑀞𑀫𑀁 𑀢𑀸𑀯 ‘‘𑀅𑀭𑁂, 𑀤𑀸𑀲, 𑀧𑁂𑀲𑁆𑀲𑀸’’𑀢𑀺 𑀨𑀭𑀼𑀲𑀯𑀸𑀘𑀸 𑀦𑀺𑀘𑁆𑀙𑀭𑀢𑀺, 𑀯𑀸𑀘𑀸𑀬 𑀅𑀦𑀦𑁆𑀢𑀭𑀸 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀯𑀲𑁂𑀦 𑀳𑀢𑁆𑀣𑀧𑀭𑀸𑀫𑀸𑀲𑁄, 𑀢𑀢𑁄 𑀅𑀦𑀦𑁆𑀢𑀭𑀸 𑀉𑀧𑀓𑁆𑀓𑀫𑀦𑀯𑀲𑁂𑀦 𑀧𑀸𑀡𑀺 𑀧𑀯𑀢𑁆𑀢𑀢𑀺, 𑀢𑀢𑁄 𑀤𑀡𑁆𑀟𑁄, 𑀤𑀡𑁆𑀟𑀧𑁆𑀧𑀳𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀦 𑀏𑀓𑀢𑁄𑀥𑀸𑀭𑀉𑀪𑀢𑁄𑀥𑀸𑀭𑀲𑁆𑀲 𑀲𑀢𑁆𑀣𑀲𑁆𑀲 𑀧𑀭𑀫𑀸 𑀕𑀢𑀺, 𑀲𑀩𑁆𑀩𑀧𑀭𑀺𑀬𑀦𑁆𑀢𑀸 𑀲𑀢𑁆𑀣𑀦𑀺𑀧𑁆𑀨𑀢𑁆𑀢𑀺 𑀳𑁄𑀢𑀺. 𑀬𑀤𑀸 𑀳𑀺 𑀲𑀢𑁆𑀣𑁂𑀦 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀧𑀘𑁆𑀙𑀸 𑀢𑁂𑀦𑁂𑀯 𑀲𑀢𑁆𑀣𑁂𑀦 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀤𑀸 𑀤𑁄𑀲𑁄 𑀫𑀢𑁆𑀣𑀓𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀤𑁄𑀲𑁄 𑀓𑁄𑀥𑀲𑀫𑀼𑀝𑁆𑀞𑀸𑀦𑁄𑀢𑀺 𑀬𑀣𑀸 𑀅𑀦𑀫𑁆𑀩𑀺𑀮𑀁 𑀢𑀓𑁆𑀓𑀁 𑀯𑀸 𑀓𑀜𑁆𑀚𑀺𑀓𑀁 𑀯𑀸 𑀧𑀭𑀺𑀡𑀸𑀫𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀫𑁆𑀩𑀺𑀮𑀁 𑀳𑁄𑀢𑀺, 𑀢𑀁 𑀏𑀓𑀚𑀸𑀢𑀺𑀓𑀫𑁆𑀧𑀺 𑀲𑀫𑀸𑀦𑀁 𑀅𑀫𑁆𑀩𑀺𑀮𑀁 𑀅𑀦𑀫𑁆𑀩𑀺𑀮𑀦𑁆𑀢𑀺 𑀦𑀸𑀦𑀸 𑀯𑀼𑀘𑁆𑀘𑀢𑀺, 𑀢𑀣𑀸 𑀧𑀼𑀩𑁆𑀩𑀓𑀸𑀮𑁂 𑀓𑁄𑀥𑁄 𑀧𑀭𑀺𑀡𑀫𑀺𑀢𑁆𑀯𑀸 ¶ 𑀅𑀧𑀭𑀪𑀸𑀕𑁂 𑀤𑁄𑀲𑁄 𑀳𑁄𑀢𑀺. 𑀲𑁄 𑀅𑀓𑀼𑀲𑀮𑀫𑀽𑀮𑀢𑁆𑀢𑁂𑀦 𑀏𑀓𑀚𑀸𑀢𑀺𑀓𑁄𑀧𑀺 𑀲𑀫𑀸𑀦𑁄 𑀓𑁄𑀥𑁄 𑀤𑁄𑀲𑁄𑀢𑀺 𑀦𑀸𑀦𑀸 𑀯𑀼𑀘𑁆𑀘𑀢𑀺. 𑀬𑀣𑀸 𑀅𑀦𑀫𑁆𑀩𑀺𑀮𑀢𑁄 𑀅𑀫𑁆𑀩𑀺𑀮𑀁, 𑀏𑀯𑀁 𑀲𑁄𑀧𑀺 𑀓𑁄𑀥𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀓𑁄𑀥𑀲𑀫𑀼𑀝𑁆𑀞𑀸𑀦𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀅𑀦𑁂𑀓𑀸𑀤𑀻𑀦𑀯𑁄 𑀤𑁄𑀲𑁄, 𑀢𑀲𑁆𑀫𑀸 𑀤𑁄𑀲𑀫𑁆𑀧𑀺 𑀦 𑀭𑁄𑀘𑁂𑀫𑀺.

𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸𑀢𑀺 𑀤𑀺𑀯𑀸 𑀤𑀺𑀯𑀲𑁆𑀲𑁂𑀯 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑀸𑀦𑀺 𑀘 𑀆𑀯𑀼𑀥𑀁 𑀲𑀭𑀻𑀭𑁂 𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀫𑁂 𑀤𑁂𑀳𑀻’’𑀢𑀺 𑀲𑀸𑀳𑀲𑀸𑀓𑀸𑀭𑀸 𑀘. 𑀦𑀺𑀓𑀢𑀻 𑀯𑀜𑁆𑀘𑀦𑀸𑀦𑀺 𑀘𑀸𑀢𑀺 𑀧𑀢𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀲𑁆𑀲 𑀳𑀭𑀡𑀁 𑀦𑀺𑀓𑀢𑀺 𑀦𑀸𑀫, 𑀲𑀸 𑀅𑀲𑀼𑀯𑀡𑁆𑀡𑀫𑁂𑀯 ‘‘𑀲𑀼𑀯𑀡𑁆𑀡’’𑀦𑁆𑀢𑀺 𑀓𑀽𑀝𑀓𑀳𑀸𑀧𑀡𑀁 ‘‘𑀓𑀳𑀸𑀧𑀡𑁄’’𑀢𑀺 𑀤𑀢𑁆𑀯𑀸 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑁂 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀪𑀸𑀦𑀯𑀲𑁂𑀦 𑀧𑀦 𑀉𑀧𑀸𑀬𑀓𑀼𑀲𑀮𑀢𑀸𑀬 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑀁 𑀯𑀜𑁆𑀘𑀦𑀁 𑀦𑀸𑀫. 𑀢𑀲𑁆𑀲𑁂𑀯𑀁 𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸 𑁋 𑀏𑀓𑁄 𑀓𑀺𑀭 𑀉𑀚𑀼𑀚𑀸𑀢𑀺𑀓𑁄 𑀕𑀸𑀫𑀺𑀓𑀧𑀼𑀭𑀺𑀲𑁄 𑀅𑀭𑀜𑁆𑀜𑀢𑁄 𑀲𑀲𑀓𑀁 𑀆𑀦𑁂𑀢𑁆𑀯𑀸 𑀦𑀤𑀻𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀑𑀢𑀭𑀺. 𑀅𑀣𑁂𑀓𑁄 𑀥𑀼𑀢𑁆𑀢𑁄 𑀢𑀁 𑀲𑀲𑀓𑀁 𑀲𑀻𑀲𑁂 𑀓𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀑𑀢𑀺𑀡𑁆𑀡𑁄. 𑀇𑀢𑀭𑁄 𑀉𑀢𑁆𑀢𑀭𑀺𑀢𑁆𑀯𑀸 𑀲𑀲𑀓𑀁 𑀅𑀧𑀲𑁆𑀲𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀲𑀺. 𑀢𑀫𑁂𑀦𑀁 𑀥𑀼𑀢𑁆𑀢𑁄 ‘‘𑀓𑀺𑀁 𑀪𑁄 𑀯𑀺𑀮𑁄𑀓𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀲𑀲𑀓𑁄 𑀞𑀧𑀺𑀢𑁄, 𑀢𑀁 𑀦 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑁆𑀥𑀩𑀸𑀮, 𑀢𑁆𑀯𑀁 𑀦 𑀚𑀸𑀦𑀸𑀲𑀺, 𑀲𑀲𑀓𑀸 𑀦𑀸𑀫 𑀦𑀤𑀻𑀢𑀻𑀭𑁂 𑀞𑀧𑀺𑀢𑀸 𑀧𑀮𑀸𑀬𑀦𑁆𑀢𑀺, 𑀧𑀲𑁆𑀲 𑀅𑀳𑀁 𑀅𑀢𑁆𑀢𑀦𑁄 𑀲𑀲𑀓𑀁 ¶ 𑀲𑀻𑀲𑁂 𑀞𑀧𑁂𑀢𑁆𑀯𑀸𑀯 𑀦𑁆𑀳𑀸𑀬𑀸𑀫𑀻’’𑀢𑀺 𑀆𑀳. 𑀲𑁄 𑀅𑀧𑁆𑀧𑀝𑀺𑀪𑀸𑀦𑀢𑀸𑀬 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀓𑀸𑀫𑀺. 𑀏𑀓𑀓𑀳𑀸𑀧𑀡𑁂𑀦 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀢𑀁 𑀤𑀢𑁆𑀯𑀸 𑀤𑁆𑀯𑀺𑀓𑀳𑀸𑀧𑀡𑀕𑁆𑀖𑀦𑀓𑀲𑁆𑀲 𑀫𑀺𑀕𑀲𑁆𑀲 𑀕𑀳𑀺𑀢𑀯𑀢𑁆𑀣𑀼𑀧𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀤𑀺𑀲𑁆𑀲𑀦𑁆𑀢𑀺 𑀮𑁄𑀪𑀥𑀫𑁆𑀫𑁂𑀲𑀽𑀢𑀺 𑀲𑀓𑁆𑀓, 𑀇𑀫𑁂 𑀆𑀮𑁄𑀧𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀮𑁄𑀪𑀲𑀪𑀸𑀯𑁂𑀲𑀼 𑀮𑁄𑀪𑀸𑀪𑀺𑀪𑀽𑀢𑁂𑀲𑀼 𑀲𑀢𑁆𑀢𑁂𑀲𑀼 𑀤𑀺𑀲𑁆𑀲𑀦𑁆𑀢𑀺. 𑀦 𑀳𑀺 𑀅𑀮𑀼𑀤𑁆𑀥𑀸 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀮𑁄𑀪𑁄 𑀅𑀦𑁂𑀓𑀸𑀤𑀻𑀦𑀯𑁄, 𑀢𑀲𑁆𑀫𑀸 𑀮𑁄𑀪𑀫𑁆𑀧𑀺 𑀦 𑀭𑁄𑀘𑁂𑀫𑀺.

𑀲𑁆𑀦𑁂𑀳𑀲𑀗𑁆𑀕𑀣𑀺𑀢𑀸 𑀕𑀦𑁆𑀣𑀸𑀢𑀺 𑀆𑀭𑀫𑁆𑀫𑀡𑁂𑀲𑀼 𑀅𑀮𑁆𑀮𑀻𑀬𑀦𑀮𑀓𑁆𑀔𑀡𑁂𑀦 𑀲𑁆𑀦𑁂𑀳𑁂𑀦 𑀲𑀗𑁆𑀕𑀣𑀺𑀢𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑀯𑀲𑁂𑀦 𑀖𑀝𑀺𑀢𑀸 𑀲𑀼𑀢𑁆𑀢𑁂𑀦 𑀧𑀼𑀧𑁆𑀨𑀸𑀦𑀺 ¶ 𑀯𑀺𑀬 𑀩𑀤𑁆𑀥𑀸 𑀦𑀸𑀦𑀧𑁆𑀧𑀓𑀸𑀭𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸. 𑀲𑁂𑀦𑁆𑀢𑀺 𑀫𑀦𑁄𑀫𑀬𑀸 𑀧𑀼𑀣𑀽𑀢𑀺 𑀢𑁂 𑀧𑀼𑀣𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀦𑁆𑀦𑀸 𑀲𑀼𑀯𑀡𑁆𑀡𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀸𑀤𑀺𑀫𑀬𑀸𑀦𑀺 𑀆𑀪𑀭𑀡𑀸𑀤𑀻𑀦𑀺 𑀯𑀺𑀬 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀸 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁂𑀦𑁆𑀢𑀺 𑀅𑀦𑀼𑀲𑁂𑀦𑁆𑀢𑀺. 𑀢𑁂 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀻𑀢𑀺 𑀢𑁂 𑀏𑀯𑀁 𑀅𑀦𑀼𑀲𑀬𑀺𑀢𑀸 𑀩𑀮𑀯𑀢𑀸𑀧𑀁 𑀚𑀦𑁂𑀦𑁆𑀢𑀸 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀺 𑀅𑀢𑀺𑀓𑀺𑀮𑀫𑁂𑀦𑁆𑀢𑀺. 𑀢𑁂𑀲𑀁 𑀧𑀦 𑀪𑀼𑀲𑀁 𑀉𑀧𑀢𑀸𑀧𑀦𑁂 ‘‘𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺 (𑀲𑀼. 𑀦𑀺. 𑁭𑁭𑁩) 𑀕𑀸𑀣𑀸𑀬 𑀯𑀢𑁆𑀣𑀼, ‘‘𑀧𑀺𑀬𑀚𑀸𑀢𑀺𑀓𑀸 𑀳𑀺 𑀕𑀳𑀧𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀧𑀺𑀬𑀧𑁆𑀧𑀪𑀼𑀢𑀺𑀓𑀸’’ (𑀫. 𑀦𑀺. 𑁨.𑁩𑁫𑁩), ‘‘𑀧𑀺𑀬𑀢𑁄 𑀚𑀸𑀬𑀢𑀻 𑀲𑁄𑀓𑁄’’𑀢𑀺𑀆𑀤𑀻𑀦𑀺 (𑀥. 𑀧. 𑁨𑁧𑁨) 𑀲𑀼𑀢𑁆𑀢𑀸𑀦𑀺 𑀘 𑀆𑀳𑀭𑀺𑀢𑀩𑁆𑀩𑀸𑀦𑀺. 𑀅𑀧𑀺𑀘 𑀫𑀗𑁆𑀕𑀮𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀭𑀓𑁂 𑀤𑀢𑁆𑀯𑀸 𑀩𑀮𑀯𑀲𑁄𑀓𑁂𑀦 𑀳𑀤𑀬𑀁 𑀨𑀮𑀺, 𑀯𑁂𑀲𑁆𑀲𑀦𑁆𑀢𑀭𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀏𑀯𑀁 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 ¶ 𑀫𑀳𑀸𑀲𑀢𑁆𑀢𑀸𑀦𑀁 𑀧𑁂𑀫𑀁 𑀉𑀧𑀢𑀸𑀧𑀁 𑀓𑀭𑁄𑀢𑀺𑀬𑁂𑀯. 𑀅𑀬𑀁 𑀲𑁆𑀦𑁂𑀳𑁂 𑀆𑀤𑀻𑀦𑀯𑁄, 𑀢𑀲𑁆𑀫𑀸 𑀲𑁆𑀦𑁂𑀳𑀫𑁆𑀧𑀺 𑀦 𑀭𑁄𑀘𑁂𑀫𑀻𑀢𑀺.

𑀲𑀓𑁆𑀓𑁄 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀲𑀼𑀢𑁆𑀯𑀸 ‘‘𑀓𑀡𑁆𑀳𑀧𑀡𑁆𑀟𑀺𑀢 𑀢𑀬𑀸 𑀇𑀫𑁂 𑀧𑀜𑁆𑀳𑀸 𑀩𑀼𑀤𑁆𑀥𑀮𑀻𑀴𑀸𑀬 𑀲𑀸𑀥𑀼𑀓𑀁 𑀓𑀣𑀺𑀢𑀸, 𑀅𑀢𑀺𑀯𑀺𑀬 𑀢𑀼𑀝𑁆𑀞𑁄𑀲𑁆𑀫𑀺 𑀢𑁂, 𑀅𑀧𑀭𑀫𑁆𑀧𑀺 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁨𑁦.

‘‘𑀏𑀢𑀲𑁆𑀫𑀺𑀁 ¶ 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁨𑁧.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀅𑀭𑀜𑁆𑀜𑁂 𑀫𑁂 𑀯𑀺𑀳𑀭𑀢𑁄, 𑀦𑀺𑀘𑁆𑀘𑀁 𑀏𑀓𑀯𑀺𑀳𑀸𑀭𑀺𑀦𑁄;

𑀆𑀩𑀸𑀥𑀸 𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀦𑁆𑀢𑀭𑀸𑀬𑀓𑀭𑀸 𑀪𑀼𑀲𑀸’’𑀢𑀺.

𑀢𑀢𑁆𑀣 𑀅𑀦𑁆𑀢𑀭𑀸𑀬𑀓𑀭𑀸 𑀪𑀼𑀲𑀸𑀢𑀺 𑀇𑀫𑀲𑁆𑀲 𑀫𑁂 𑀢𑀧𑁄𑀓𑀫𑁆𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀸.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 ‘‘𑀓𑀡𑁆𑀳𑀧𑀡𑁆𑀟𑀺𑀢𑁄 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀦 𑀆𑀫𑀺𑀲𑀲𑀦𑁆𑀦𑀺𑀲𑁆𑀲𑀺𑀢𑀁 𑀕𑀡𑁆𑀳𑀸𑀢𑀺, 𑀢𑀧𑁄𑀓𑀫𑁆𑀫𑀦𑀺𑀲𑁆𑀲𑀺𑀢𑀫𑁂𑀯 𑀕𑀡𑁆𑀳𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑁄 𑀅𑀧𑀭𑀫𑁆𑀧𑀺 𑀯𑀭𑀁 𑀤𑀤𑀫𑀸𑀦𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁨𑁨.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀯𑀭𑀕𑁆𑀕𑀳𑀡𑀸𑀧𑀤𑁂𑀲𑁂𑀦 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁨𑁩.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀦 𑀫𑀦𑁄 𑀯𑀸 𑀲𑀭𑀻𑀭𑀁 𑀯𑀸, 𑀫𑀁-𑀓𑀢𑁂 𑀲𑀓𑁆𑀓 𑀓𑀲𑁆𑀲𑀘𑀺;

𑀓𑀤𑀸𑀘𑀺 𑀉𑀧𑀳𑀜𑁆𑀜𑁂𑀣, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂’’𑀢𑀺.

𑀢𑀢𑁆𑀣 ¶ 𑀫𑀦𑁄 𑀯𑀸𑀢𑀺 𑀫𑀦𑁄𑀤𑁆𑀯𑀸𑀭𑀁 𑀯𑀸. 𑀲𑀭𑀻𑀭𑀁 𑀯𑀸𑀢𑀺 𑀓𑀸𑀬𑀤𑁆𑀯𑀸𑀭𑀁 𑀯𑀸, 𑀯𑀘𑀻𑀤𑁆𑀯𑀸𑀭𑀫𑁆𑀧𑀺 𑀏𑀢𑁂𑀲𑀁 𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀁-𑀓𑀢𑁂𑀢𑀺 𑀫𑀫 𑀓𑀸𑀭𑀡𑀸. 𑀉𑀧𑀳𑀜𑁆𑀜𑁂𑀣𑀸𑀢𑀺 𑀉𑀧𑀖𑀸𑀢𑀁 𑀆𑀧𑀚𑁆𑀚𑁂𑀬𑁆𑀬 𑀅𑀧𑀭𑀺𑀲𑀼𑀤𑁆𑀥𑀁 𑀅𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀓𑁆𑀓 𑀤𑁂𑀯𑀭𑀸𑀚, 𑀫𑀫 𑀓𑀸𑀭𑀡𑀸 𑀫𑀁 𑀦𑀺𑀲𑁆𑀲𑀸𑀬 𑀫𑀫 𑀅𑀦𑀢𑁆𑀣𑀓𑀸𑀫𑀢𑀸𑀬 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀇𑀤𑀁 𑀢𑀺𑀯𑀺𑀥𑀫𑁆𑀧𑀺 𑀓𑀫𑁆𑀫𑀤𑁆𑀯𑀸𑀭𑀁 𑀦 𑀉𑀧𑀳𑀜𑁆𑀜𑁂𑀣, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀯𑀺𑀫𑀼𑀢𑁆𑀢𑀁 𑀧𑀭𑀺𑀲𑀼𑀤𑁆𑀥𑀫𑁂𑀯 𑀪𑀯𑁂𑀬𑁆𑀬𑀸𑀢𑀺.

𑀇𑀢𑀺 ¶ 𑀫𑀳𑀸𑀲𑀢𑁆𑀢𑁄 𑀙𑀲𑀼𑀧𑀺 𑀞𑀸𑀦𑁂𑀲𑀼 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀫𑁂𑀯 𑀕𑀡𑁆𑀳𑀺, 𑀚𑀸𑀦𑀸𑀢𑀺 𑀘𑁂𑀲 ‘‘𑀲𑀭𑀻𑀭𑀁 𑀦𑀸𑀫 𑀩𑁆𑀬𑀸𑀥𑀺𑀥𑀫𑁆𑀫𑀁, 𑀦 𑀢𑀁 𑀲𑀓𑁆𑀓𑀸 𑀲𑀓𑁆𑀓𑁂𑀦 𑀅𑀩𑁆𑀬𑀸𑀥𑀺𑀥𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺. 𑀲𑀢𑁆𑀢𑀸𑀦𑀜𑁆𑀳𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑁄 𑀅𑀲𑀓𑁆𑀓𑀸𑀬𑀢𑁆𑀢𑁄𑀯, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀇𑀫𑁂 𑀯𑀭𑁂 𑀕𑀡𑁆𑀳𑀺. 𑀲𑀓𑁆𑀓𑁄𑀧𑀺 𑀢𑀁 𑀭𑀼𑀓𑁆𑀔𑀁 𑀥𑀼𑀯𑀨𑀮𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 ‘‘𑀅𑀭𑁄𑀕𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀆𑀦𑀦𑁆𑀤, 𑀧𑀼𑀩𑁆𑀩𑁂 𑀫𑀬𑀸 𑀦𑀺𑀯𑀼𑀢𑁆𑀣𑀪𑀽𑀫𑀺𑀧𑁆𑀧𑀤𑁂𑀲𑁄 𑀘𑁂𑀲𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀓𑀡𑁆𑀳𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁪𑁧] 𑁩. 𑀘𑀢𑀼𑀧𑁄𑀲𑀣𑀺𑀓𑀚𑀸𑀢𑀓𑀯𑀡𑁆𑀡𑀦𑀸

𑁨𑁪-𑁩𑁮. 𑀬𑁄 𑀓𑁄𑀧𑀦𑁂𑀬𑁆𑀬𑁄𑀢𑀺 𑀇𑀤𑀁 𑀘𑀢𑀼𑀧𑁄𑀲𑀣𑀺𑀓𑀚𑀸𑀢𑀓𑀁 𑀧𑀼𑀡𑁆𑀡𑀓𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀘𑀢𑀼𑀧𑁄𑀲𑀣𑀺𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁪𑁨] 𑁪. 𑀲𑀗𑁆𑀔𑀚𑀸𑀢𑀓𑀯𑀡𑁆𑀡𑀦𑀸

𑀩𑀳𑀼𑀲𑁆𑀲𑀼𑀢𑁄𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀉𑀧𑀸𑀲𑀓𑁄 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀣𑀸𑀕𑀢𑀲𑁆𑀲 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 ¶ 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀉𑀧𑀸𑀲𑀓𑁄 𑀲𑀧𑀼𑀢𑁆𑀢𑀤𑀸𑀭𑁄 𑀲𑀧𑀭𑀺𑀚𑀦𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦 𑀲𑁆𑀯𑀸𑀢𑀦𑀸𑀬𑀸𑀢𑀺 𑀏𑀯𑀁 𑀲𑀢𑁆𑀢𑀸𑀳𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀁 𑀅𑀤𑀸𑀲𑀺. 𑀢𑀁 𑀧𑀦 𑀤𑀤𑀫𑀸𑀦𑁄 𑀉𑀧𑀸𑀳𑀦𑀤𑀸𑀦𑀁 𑀉𑀲𑁆𑀲𑀦𑁆𑀦𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀤𑀲𑀩𑀮𑀲𑁆𑀲 𑀤𑀺𑀦𑁆𑀦𑁄 𑀉𑀧𑀸𑀳𑀦𑀲𑀗𑁆𑀖𑀸𑀝𑁄 𑀲𑀳𑀲𑁆𑀲𑀕𑁆𑀖𑀦𑀓𑁄 ¶ 𑀅𑀳𑁄𑀲𑀺, 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀜𑁆𑀘𑀲𑀢𑀕𑁆𑀖𑀦𑀓𑁄, 𑀲𑁂𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀢𑀕𑁆𑀖𑀦𑀓𑁄. 𑀇𑀢𑀺 𑀲𑁄 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀉𑀧𑀸𑀲𑀓, 𑀉𑀴𑀸𑀭𑀁 𑀢𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁, 𑀅𑀢𑁆𑀢𑀫𑀦𑁄 𑀳𑁄𑀳𑀺, 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀏𑀓𑀁 𑀉𑀧𑀸𑀳𑀦𑀲𑀗𑁆𑀖𑀸𑀝𑀁 𑀤𑀢𑁆𑀯𑀸 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀅𑀧𑁆𑀧𑀢𑀺𑀝𑁆𑀞𑁂 𑀫𑀳𑀸𑀲𑀫𑀼𑀤𑁆𑀤𑁂𑀧𑀺 𑀉𑀧𑀸𑀳𑀦𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀧𑀢𑀺𑀝𑁆𑀞𑀁 𑀮𑀪𑀺𑀁𑀲𑀼, 𑀢𑁆𑀯𑀁 𑀧𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀲 𑀢𑁂 𑀉𑀧𑀸𑀳𑀦𑀤𑀸𑀦𑀲𑁆𑀲 𑀨𑀮𑀁 𑀓𑀲𑁆𑀫𑀸 𑀦 𑀧𑀢𑀺𑀝𑁆𑀞𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀅𑀬𑀁 𑀩𑀸𑀭𑀸𑀡𑀲𑀻 𑀫𑁄𑀴𑀺𑀦𑀻 𑀦𑀸𑀫 𑀅𑀳𑁄𑀲𑀺. 𑀫𑁄𑀴𑀺𑀦𑀺𑀦𑀕𑀭𑁂 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀗𑁆𑀔𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀯𑀺𑀢𑁆𑀢𑀼𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑀲𑀼𑀯𑀡𑁆𑀡𑀭𑀚𑀢𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀘𑀸𑀢𑀺 𑀙𑀲𑀼 𑀞𑀸𑀦𑁂𑀲𑀼 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀧𑀡𑀤𑁆𑀥𑀺𑀓𑀸𑀦𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀕𑁂𑀳𑁂 𑀥𑀦𑁂 𑀔𑀻𑀡𑁂 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑀭𑀺𑀓𑁆𑀔𑀻𑀡𑁂𑀬𑁂𑀯 𑀥𑀦𑁂 𑀦𑀸𑀯𑀸𑀬 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑁆𑀯𑀸 𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀸𑀯𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀪𑀡𑁆𑀟𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺 ¶ , 𑀢𑀸𑀯 𑀫𑁂 𑀤𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀯𑀼𑀢𑁄 𑀙𑀢𑁆𑀢𑀁 𑀆𑀤𑀸𑀬 𑀉𑀧𑀸𑀳𑀦𑀁 𑀆𑀭𑀼𑀬𑁆𑀳 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀧𑀝𑁆𑀝𑀦𑀕𑀸𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀦𑁆𑀥𑀫𑀸𑀤𑀦𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀯𑀚𑁆𑀚𑁂𑀢𑁆𑀯𑀸 𑀢𑀁 𑀥𑀦𑀸𑀳𑀭𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀭𑀺𑀲𑁄 𑀥𑀦𑀁 𑀆𑀳𑀭𑀺𑀢𑀼𑀁 𑀕𑀘𑁆𑀙𑀢𑀺, 𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀲𑁆𑀲 𑀲𑀫𑀼𑀤𑁆𑀤𑁂 𑀅𑀦𑁆𑀢𑀭𑀸𑀬𑁄, 𑀦𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀏𑀲 𑀫𑀁 𑀤𑀺𑀲𑁆𑀯𑀸 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀜𑁆𑀘 𑀫𑀬𑁆𑀳𑀁 𑀤𑀢𑁆𑀯𑀸 𑀉𑀧𑀸𑀳𑀦𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀧𑀢𑀺𑀝𑁆𑀞𑀁 𑀮𑀪𑀺𑀲𑁆𑀲𑀢𑀺, 𑀓𑀭𑀺𑀲𑁆𑀲𑀸𑀫𑀺𑀲𑁆𑀲 𑀅𑀦𑀼𑀕𑁆𑀕𑀳’’𑀦𑁆𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 𑀘𑀡𑁆𑀟𑀯𑀸𑀢𑀸𑀢𑀧𑁂 𑀅𑀗𑁆𑀕𑀸𑀭𑀲𑀦𑁆𑀣𑀭𑀲𑀤𑀺𑀲𑀁 𑀉𑀡𑁆𑀳𑀯𑀸𑀮𑀼𑀓𑀁 𑀫𑀤𑁆𑀤𑀦𑁆𑀢𑁄 𑀢𑀲𑁆𑀲 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀺.

𑀲𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑁂 𑀆𑀕𑀢𑀁, 𑀅𑀚𑁆𑀚 𑀫𑀬𑀸 𑀏𑀢𑁆𑀣 𑀤𑀸𑀦𑀩𑀻𑀚𑀁 𑀭𑁄𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀯𑁂𑀕𑁂𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀣𑁄𑀓𑀁 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀇𑀫𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀣𑀸’’𑀢𑀺 𑀯𑀢𑁆𑀯𑀸 ¶ 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑁂 ¶ 𑀯𑀸𑀮𑀼𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀯𑀸𑀲𑀺𑀢𑀧𑀭𑀺𑀲𑁆𑀲𑀸𑀯𑀺𑀢𑁂𑀦 𑀉𑀤𑀓𑁂𑀦 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀸 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳 𑀙𑀢𑁆𑀢𑀁 𑀫𑀢𑁆𑀣𑀓𑁂 𑀓𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀙𑀢𑁆𑀢𑀼𑀧𑀸𑀳𑀦𑀁 𑀅𑀤𑀸𑀲𑀺. 𑀲𑁄 𑀅𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀲𑀁𑀯𑀟𑁆𑀠𑀦𑀢𑁆𑀣𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯𑀲𑁆𑀲 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀫𑁂𑀯 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀅𑀣𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀧𑀝𑀺𑀧𑀦𑁆𑀦𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀯𑀸 𑀯𑀺𑀯𑀭𑀁 𑀅𑀤𑀸𑀲𑀺, 𑀉𑀤𑀓𑀁 𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀫𑀳𑀸𑀚𑀦𑁄 𑀫𑀭𑀡𑀪𑀬𑀪𑀻𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑁆𑀯𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀫𑀳𑀸𑀲𑀢𑁆𑀢𑁄 𑀏𑀓𑀁 𑀉𑀧𑀝𑁆𑀞𑀸𑀓𑀁 ¶ 𑀕𑀳𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀲𑀧𑁆𑀧𑀺𑀦𑀸 𑀲𑀤𑁆𑀥𑀺𑀁 𑀲𑀓𑁆𑀔𑀭𑀘𑀼𑀡𑁆𑀡𑀁 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺𑀢𑁆𑀯𑀸 𑀢𑀫𑁆𑀧𑀺 𑀔𑀸𑀤𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀽𑀧𑀓𑀬𑀝𑁆𑀞𑀺𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀇𑀫𑀸𑀬 𑀤𑀺𑀲𑀸𑀬 𑀅𑀫𑁆𑀳𑀸𑀓𑀁 𑀦𑀕𑀭’’𑀦𑁆𑀢𑀺 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀫𑀘𑁆𑀙𑀓𑀘𑁆𑀙𑀧𑀧𑀭𑀺𑀧𑀦𑁆𑀣𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀉𑀲𑀪𑀫𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑀺. 𑀫𑀳𑀸𑀚𑀦𑁄 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀉𑀧𑀝𑁆𑀞𑀸𑀓𑁂𑀦 𑀲𑀤𑁆𑀥𑀺𑀁 𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀁 𑀆𑀭𑀪𑀺. 𑀢𑀲𑁆𑀲 𑀢𑀭𑀦𑁆𑀢𑀲𑁆𑀲𑁂𑀯 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀚𑀸𑀢𑁄. 𑀲𑁄 𑀢𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀮𑁄𑀡𑁄𑀤𑀓𑁂𑀦 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀅𑀳𑁄𑀲𑀺𑀬𑁂𑀯.

𑀢𑀤𑀸 𑀧𑀦 𑀘𑀢𑀽𑀳𑀺 𑀮𑁄𑀓𑀧𑀸𑀮𑁂𑀳𑀺 𑀫𑀡𑀺𑀫𑁂𑀔𑀮𑀸 𑀦𑀸𑀫 𑀤𑁂𑀯𑀥𑀻𑀢𑀸 ‘‘𑀲𑀘𑁂 𑀲𑀫𑀼𑀤𑁆𑀤𑁂 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀢𑀺𑀲𑀭𑀡𑀕𑀢𑀸 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀯𑀸 𑀫𑀸𑀢𑀸𑀧𑀺𑀢𑀼𑀧𑀝𑁆𑀞𑀸𑀓𑀸 𑀯𑀸 𑀫𑀦𑀼𑀲𑁆𑀲𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂 𑀭𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺 𑀲𑀫𑀼𑀤𑁆𑀤𑁂 𑀆𑀭𑀓𑁆𑀔𑀡𑀢𑁆𑀣𑀸𑀬 𑀞𑀧𑀺𑀢𑀸 𑀳𑁄𑀢𑀺. 𑀲𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀲𑀢𑁆𑀢𑀸𑀳𑀫𑀦𑀼𑀪𑀯𑀺𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀼𑀤𑁆𑀤𑀁 𑀑𑀮𑁄𑀓𑁂𑀦𑁆𑀢𑀻 𑀲𑀻𑀮𑀸𑀘𑀸𑀭𑀲𑀁𑀬𑀼𑀢𑁆𑀢𑀁 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀲𑀫𑀼𑀤𑁆𑀤𑁂 𑀧𑀢𑀺𑀢𑀲𑁆𑀲, 𑀲𑀘𑁂 𑀲𑁄 𑀫𑀭𑀺𑀲𑁆𑀲𑀢𑀺 𑀅𑀢𑀺𑀯𑀺𑀬 𑀕𑀸𑀭𑀬𑁆𑀳𑀸 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀳𑀤𑀬𑀸 𑀳𑀼𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄, 𑀇𑀤𑀁 𑀤𑀺𑀩𑁆𑀩𑀪𑁄𑀚𑀦𑀁 𑀪𑀼𑀜𑁆𑀚𑀸’’𑀢𑀺 𑀆𑀳. 𑀲𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀧𑀦𑁂𑀳𑀺 𑀢𑀯 𑀪𑀢𑁆𑀢𑀁, 𑀅𑀳𑀁 𑀉𑀧𑁄𑀲𑀣𑀺𑀓𑁄’’𑀢𑀺 𑀆𑀳. 𑀅𑀣𑀲𑁆𑀲 ¶ 𑀉𑀧𑀝𑁆𑀞𑀸𑀓𑁄 𑀧𑀘𑁆𑀙𑀢𑁄 𑀆𑀕𑀢𑁄 𑀤𑁂𑀯𑀢𑀁 𑀅𑀤𑀺𑀲𑁆𑀯𑀸 𑀲𑀤𑁆𑀤𑀫𑁂𑀯 𑀲𑀼𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀓𑀢𑀺𑀲𑀼𑀔𑀼𑀫𑀸𑀮𑁄 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀤𑀼𑀓𑁆𑀔𑀺𑀢𑁄 𑀫𑀭𑀡𑀪𑀬𑁂𑀦 𑀯𑀺𑀮𑀧𑀢𑀺 𑀫𑀜𑁆𑀜𑁂, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁯.

‘‘𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀫𑁆𑀫𑁄𑀲𑀺 𑀲𑀗𑁆𑀔, 𑀤𑀺𑀝𑁆𑀞𑀸 𑀢𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;

𑀅𑀣𑀓𑁆𑀔𑀡𑁂 ¶ 𑀤𑀲𑁆𑀲𑀬𑀲𑁂 𑀯𑀺𑀮𑀸𑀧𑀁, 𑀅𑀜𑁆𑀜𑁄 𑀦𑀼 𑀓𑁄 𑀢𑁂 𑀧𑀝𑀺𑀫𑀦𑁆𑀢𑀓𑁄 𑀫𑀬𑀸’’𑀢𑀺.

𑀢𑀢𑁆𑀣 ¶ 𑀲𑀼𑀢𑀥𑀫𑁆𑀫𑁄𑀲𑀻𑀢𑀺 𑀥𑀫𑁆𑀫𑁄𑀧𑀺 𑀢𑀬𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑁄 𑀅𑀲𑀺. 𑀤𑀺𑀝𑁆𑀞𑀸 𑀢𑀬𑀸𑀢𑀺 𑀢𑁂𑀲𑀁 𑀧𑀘𑁆𑀘𑀬𑁂 𑀤𑁂𑀦𑁆𑀢𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀢𑀬𑀸 𑀤𑀺𑀝𑁆𑀞𑀸. 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀳𑀺 𑀧𑀲𑁆𑀲𑀦𑁆𑀢𑁄𑀧𑀺 𑀢𑁂 𑀦 𑀧𑀲𑁆𑀲𑀢𑀺𑀬𑁂𑀯. 𑀅𑀣𑀓𑁆𑀔𑀡𑁂𑀢𑀺 𑀅𑀣 𑀅𑀓𑁆𑀔𑀡𑁂 𑀲𑀮𑁆𑀮𑀧𑀦𑁆𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑁂𑀦 𑀯𑀘𑀦𑀲𑁆𑀲 𑀅𑀦𑁄𑀓𑀸𑀲𑁂. 𑀤𑀲𑁆𑀲𑀬𑀲𑁂𑀢𑀺 ‘‘𑀅𑀳𑀁 𑀉𑀧𑁄𑀲𑀣𑀺𑀓𑁄’’𑀢𑀺 𑀯𑀤𑀦𑁆𑀢𑁄 𑀯𑀺𑀮𑀸𑀧𑀁 𑀤𑀲𑁆𑀲𑁂𑀲𑀺. 𑀧𑀝𑀺𑀫𑀦𑁆𑀢𑀓𑁄𑀢𑀺 𑀫𑀬𑀸 𑀅𑀜𑁆𑀜𑁄 𑀓𑁄 𑀢𑀯 𑀧𑀝𑀺𑀫𑀦𑁆𑀢𑀓𑁄 𑀧𑀝𑀺𑀯𑀘𑀦𑀤𑀸𑀬𑀓𑁄, 𑀓𑀺𑀁𑀓𑀸𑀭𑀡𑀸 𑀏𑀯𑀁 𑀯𑀺𑀧𑁆𑀧𑀮𑀧𑀲𑀻𑀢𑀺?

𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀲𑁆𑀲 𑀤𑁂𑀯𑀢𑀸 𑀦 𑀧𑀜𑁆𑀜𑀸𑀬𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀦𑀸𑀳𑀁 𑀫𑀭𑀡𑀲𑁆𑀲 𑀪𑀸𑀬𑀸𑀫𑀺, 𑀅𑀢𑁆𑀣𑀺 𑀧𑀦 𑀫𑁂 𑀅𑀜𑁆𑀜𑁄 𑀧𑀝𑀺𑀫𑀦𑁆𑀢𑀓𑁄’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁦.

‘‘𑀲𑀼𑀩𑁆𑀪𑀽 𑀲𑀼𑀪𑀸 𑀲𑀼𑀧𑁆𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀼, 𑀧𑀕𑁆𑀕𑀬𑁆𑀳 𑀲𑁄𑀯𑀡𑁆𑀡𑀫𑀬𑀸𑀬 𑀧𑀸𑀢𑀺𑀬𑀸;

‘𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁’ 𑀇𑀢𑀺 𑀫𑀁 𑀯𑀤𑁂𑀢𑀺, 𑀲𑀤𑁆𑀥𑀸𑀯𑀺𑀢𑁆𑀢𑀸, 𑀢𑀫𑀳𑀁 𑀦𑁄𑀢𑀺 𑀩𑁆𑀭𑀽𑀫𑀻’’𑀢𑀺.

𑀢𑀢𑁆𑀣 𑀲𑀼𑀩𑁆𑀪𑀽𑀢𑀺 𑀲𑀼𑀪𑀫𑀼𑀔𑀸. 𑀲𑀼𑀪𑀸𑀢𑀺 𑀧𑀸𑀲𑀸𑀤𑀺𑀓𑀸 𑀉𑀢𑁆𑀢𑀫𑀭𑀽𑀧𑀥𑀭𑀸. 𑀲𑀼𑀧𑁆𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀽𑀢𑀺 𑀧𑀝𑀺𑀫𑀼𑀓𑁆𑀓𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀸. 𑀧𑀕𑁆𑀕𑀬𑁆𑀳𑀸𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀲𑀤𑁆𑀥𑀸𑀯𑀺𑀢𑁆𑀢𑀸𑀢𑀺 𑀲𑀤𑁆𑀥𑀸 𑀘𑁂𑀯 𑀢𑀼𑀝𑁆𑀞𑀘𑀺𑀢𑁆𑀢𑀸 𑀘. ‘‘𑀲𑀤𑁆𑀥𑀁 𑀘𑀺𑀢𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑀲𑀤𑁆𑀥𑀦𑁆𑀢𑀺 𑀲𑀤𑁆𑀤𑀳𑀦𑁆𑀢𑀁, 𑀘𑀺𑀢𑁆𑀢𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀁. 𑀢𑀫𑀳𑀁 ¶ 𑀦𑁄𑀢𑀻𑀢𑀺 𑀢𑀫𑀳𑀁 𑀤𑁂𑀯𑀢𑀁 𑀉𑀧𑁄𑀲𑀣𑀺𑀓𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦𑁄𑀢𑀺 𑀩𑁆𑀭𑀽𑀫𑀺, 𑀦 𑀯𑀺𑀧𑁆𑀧𑀮𑀧𑀸𑀫𑀺 𑀲𑀫𑁆𑀫𑀸𑀢𑀺.

𑀅𑀣𑀲𑁆𑀲 𑀲𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁧.

‘‘𑀏𑀢𑀸𑀤𑀺𑀲𑀁 𑀩𑁆𑀭𑀸𑀳𑁆𑀫𑀡 𑀤𑀺𑀲𑁆𑀯𑀸𑀦 𑀬𑀓𑁆𑀔𑀁, 𑀧𑀼𑀘𑁆𑀙𑁂𑀬𑁆𑀬 𑀧𑁄𑀲𑁄 𑀲𑀼𑀔𑀫𑀸𑀲𑀺𑀲𑀸𑀦𑁄;

𑀉𑀝𑁆𑀞𑁂𑀳𑀺 𑀦𑀁 𑀧𑀜𑁆𑀚𑀮𑀺𑀓𑀸𑀪𑀺𑀧𑀼𑀘𑁆𑀙, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀽’’𑀢𑀺.

𑀢𑀢𑁆𑀣 𑀲𑀼𑀔𑀫𑀸𑀲𑀺𑀲𑀸𑀦𑁄𑀢𑀺 𑀏𑀢𑀸𑀤𑀺𑀲𑀁 𑀬𑀓𑁆𑀔𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑀼𑀔𑀁 𑀆𑀲𑀻𑀲𑀦𑁆𑀢𑁄 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 ‘‘𑀅𑀫𑁆𑀳𑀸𑀓𑀁 𑀲𑀼𑀔𑀁 𑀪𑀯𑀺𑀲𑁆𑀲𑀢𑀺, 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑁂𑀬𑁆𑀬. 𑀉𑀝𑁆𑀞𑁂𑀳𑀻𑀢𑀺 𑀉𑀤𑀓𑀢𑁄 𑀉𑀝𑁆𑀞𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀉𑀝𑁆𑀞𑀳. 𑀧𑀜𑁆𑀚𑀮𑀺𑀓𑀸𑀪𑀺𑀧𑀼𑀘𑁆𑀙𑀸𑀢𑀺 𑀅𑀜𑁆𑀚𑀮𑀺𑀓𑁄 ¶ 𑀳𑀼𑀢𑁆𑀯𑀸 𑀅𑀪𑀺𑀧𑀼𑀘𑁆𑀙. 𑀉𑀤 𑀫𑀸𑀦𑀼𑀲𑀻𑀢𑀺 𑀉𑀤𑀸𑀳𑀼 𑀫𑀳𑀺𑀤𑁆𑀥𑀺𑀓𑀸 𑀫𑀸𑀦𑀼𑀲𑀻 𑀢𑁆𑀯𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀬𑀼𑀢𑁆𑀢𑀁 𑀓𑀣𑁂𑀲𑀻’’𑀢𑀺 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁨.

‘‘𑀬𑀁 ¶ 𑀢𑁆𑀯𑀁 𑀲𑀼𑀔𑁂𑀦𑀸𑀪𑀺𑀲𑀫𑁂𑀓𑁆𑀔𑀲𑁂 𑀫𑀁, 𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁 𑀇𑀢𑀺 𑀫𑀁 𑀯𑀤𑁂𑀲𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀺 𑀫𑀳𑀸𑀦𑀼𑀪𑀸𑀯𑁂, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀽’’𑀢𑀺.

𑀢𑀢𑁆𑀣 𑀬𑀁 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀲𑀼𑀔𑁂𑀦 𑀫𑀁 𑀅𑀪𑀺𑀲𑀫𑁂𑀓𑁆𑀔𑀲𑁂, 𑀧𑀺𑀬𑀘𑀓𑁆𑀔𑀽𑀳𑀺 𑀑𑀮𑁄𑀓𑁂𑀲𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺.

𑀢𑀢𑁄 𑀤𑁂𑀯𑀥𑀻𑀢𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁩.

‘‘𑀤𑁂𑀯𑀻 𑀅𑀳𑀁 𑀲𑀗𑁆𑀔 𑀫𑀳𑀸𑀦𑀼𑀪𑀸𑀯𑀸, 𑀇𑀥𑀸𑀕𑀢𑀸 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂;

𑀅𑀦𑀼𑀓𑀫𑁆𑀧𑀺𑀓𑀸 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑀸, 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀸𑀲𑁆𑀫𑀺.

𑁪𑁪.

‘‘𑀇𑀥𑀦𑁆𑀦𑀧𑀸𑀦𑀁 𑀲𑀬𑀦𑀸𑀲𑀦𑀜𑁆𑀘, 𑀬𑀸𑀦𑀸𑀦𑀺 𑀦𑀸𑀦𑀸𑀯𑀺𑀯𑀺𑀥𑀸𑀦𑀺 𑀲𑀗𑁆𑀔;

𑀲𑀩𑁆𑀩𑀲𑁆𑀲 𑀢𑁆𑀬𑀸𑀳𑀁 𑀧𑀝𑀺𑀧𑀸𑀤𑀬𑀸𑀫𑀺, 𑀬𑀁 𑀓𑀺𑀜𑁆𑀘𑀺 𑀢𑀼𑀬𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀲𑀫𑀼𑀤𑁆𑀤𑁂. 𑀦𑀸𑀦𑀸𑀯𑀺𑀯𑀺𑀥𑀸𑀦𑀻𑀢𑀺 𑀩𑀳𑀽𑀦𑀺 𑀘 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀘 𑀳𑀢𑁆𑀣𑀺𑀬𑀸𑀦𑀅𑀲𑁆𑀲𑀬𑀸𑀦𑀸𑀤𑀻𑀦𑀺 𑀅𑀢𑁆𑀣𑀺. 𑀲𑀩𑁆𑀩𑀲𑁆𑀲 𑀢𑁆𑀬𑀸𑀳𑀦𑁆𑀢𑀺 𑀢𑀲𑁆𑀲 𑀅𑀦𑁆𑀦𑀧𑀸𑀦𑀸𑀤𑀺𑀦𑁄 𑀲𑀩𑁆𑀩𑀲𑁆𑀲 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀢𑀁 𑀢𑁂 𑀅𑀦𑁆𑀦𑀧𑀸𑀦𑀸𑀤𑀺𑀁 𑀧𑀝𑀺𑀧𑀸𑀤𑀬𑀸𑀫𑀺 𑀤𑀤𑀸𑀫𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀇𑀘𑁆𑀙𑀺𑀢𑀁, 𑀢𑀁 𑀲𑀩𑁆𑀩𑀁 𑀢𑁂 𑀤𑀫𑁆𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀤𑁂𑀯𑀥𑀻𑀢𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀫𑀬𑁆𑀳𑀁 ‘𑀇𑀤𑀜𑁆𑀘𑀺𑀤𑀜𑁆𑀘 𑀤𑀫𑁆𑀫𑀻’𑀢𑀺 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀏𑀲𑀸 𑀫𑀬𑀸 𑀓𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑀸𑀢𑀼𑀓𑀸𑀫𑀸, 𑀉𑀤𑀸𑀳𑀼 𑀅𑀢𑁆𑀢𑀦𑁄 𑀩𑀮𑁂𑀦, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁪𑁫.

‘‘𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀜𑁆𑀘 𑀳𑀼𑀢𑀜𑁆𑀘 𑀫𑀬𑁆𑀳𑀁, 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀁 𑀲𑀼𑀕𑀢𑁆𑀢𑁂;

𑀲𑀼𑀲𑁆𑀲𑁄𑀡𑀺 𑀲𑀼𑀩𑁆𑀪𑀫𑀼 𑀲𑀼𑀯𑀺𑀮𑀕𑁆𑀕𑀫𑀚𑁆𑀛𑁂, 𑀓𑀺𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺.

𑀢𑀢𑁆𑀣 ¶ 𑀬𑀺𑀝𑁆𑀞𑀦𑁆𑀢𑀺 𑀤𑀸𑀦𑀯𑀲𑁂𑀦 𑀬𑀚𑀺𑀢𑀁. 𑀳𑀼𑀢𑀦𑁆𑀢𑀺 𑀆𑀳𑀼𑀦𑀧𑀸𑀳𑀼𑀦𑀯𑀲𑁂𑀦 𑀤𑀺𑀦𑁆𑀦𑀁. 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀦𑁆𑀢𑀺 𑀢𑀲𑁆𑀲 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀢𑁆𑀯𑀁 𑀇𑀲𑁆𑀲𑀭𑀸, ‘‘𑀇𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀇𑀫𑀲𑁆𑀲 𑀅𑀬’’𑀦𑁆𑀢𑀺 𑀩𑁆𑀬𑀸𑀓𑀭𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀼𑀲𑁆𑀲𑁄𑀡𑀻𑀢𑀺 𑀲𑀼𑀦𑁆𑀤𑀭𑀊𑀭𑀼𑀮𑀓𑁆𑀔𑀡𑁂. 𑀲𑀼𑀩𑁆𑀪𑀫𑀽𑀢𑀺 𑀲𑀼𑀦𑁆𑀤𑀭𑀪𑀫𑀼𑀓𑁂 ¶ . 𑀲𑀼𑀯𑀺𑀮𑀕𑁆𑀕𑀫𑀚𑁆𑀛𑁂𑀢𑀺 𑀲𑀼𑀝𑁆𑀞𑀼𑀯𑀺𑀮𑀕𑁆𑀕𑀺𑀢𑀢𑀦𑀼𑀫𑀚𑁆𑀛𑁂. 𑀓𑀺𑀲𑁆𑀲 𑀫𑁂𑀢𑀺 𑀫𑀬𑀸 𑀓𑀢𑀓𑀫𑁆𑀫𑁂𑀲𑀼 𑀓𑀢𑀭𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀅𑀧𑁆𑀧𑀢𑀺𑀝𑁆𑀞𑁂 𑀲𑀫𑀼𑀤𑁆𑀤𑁂 𑀧𑀢𑀺𑀝𑁆𑀞𑀁 𑀮𑀪𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀥𑀻𑀢𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 ‘𑀬𑀁 𑀢𑁂𑀦 𑀓𑀼𑀲𑀮𑀁 𑀓𑀢𑀁, 𑀢𑀁 𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻’𑀢𑀺 𑀅𑀜𑁆𑀜𑀸𑀬 𑀧𑀼𑀘𑁆𑀙𑀢𑀺 𑀫𑀜𑁆𑀜𑁂, 𑀓𑀣𑀬𑀺𑀲𑁆𑀲𑀸𑀫𑀺 𑀤𑀸𑀦𑀺𑀲𑁆𑀲𑀸’’𑀢𑀺 𑀢𑀁 𑀓𑀣𑁂𑀦𑁆𑀢𑀻 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀖𑀫𑁆𑀫𑁂 𑀧𑀣𑁂 𑀩𑁆𑀭𑀸𑀳𑁆𑀫𑀡 𑀏𑀓𑀪𑀺𑀓𑁆𑀔𑀼𑀁, 𑀉𑀕𑁆𑀖𑀝𑁆𑀝𑀧𑀸𑀤𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁;

𑀧𑀝𑀺𑀧𑀸𑀤𑀬𑀻 𑀲𑀗𑁆𑀔 𑀉𑀧𑀸𑀳𑀦𑀸𑀦𑀺, 𑀲𑀸 𑀤𑀓𑁆𑀔𑀺𑀡𑀸 𑀓𑀸𑀫𑀤𑀼𑀳𑀸 𑀢𑀯𑀚𑁆𑀚𑀸’’𑀢𑀺.

𑀢𑀢𑁆𑀣 𑀏𑀓𑀪𑀺𑀓𑁆𑀔𑀼𑀦𑁆𑀢𑀺 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀦𑁆𑀥𑀸𑀬𑀸𑀳. 𑀉𑀕𑁆𑀖𑀝𑁆𑀝𑀧𑀸𑀤𑀦𑁆𑀢𑀺 𑀉𑀡𑁆𑀳𑀯𑀸𑀮𑀼𑀓𑀸𑀬 𑀖𑀝𑁆𑀝𑀺𑀢𑀧𑀸𑀤𑀁. 𑀢𑀲𑀺𑀢𑀦𑁆𑀢𑀺 𑀧𑀺𑀧𑀸𑀲𑀺𑀢𑀁. 𑀧𑀝𑀺𑀧𑀸𑀤𑀬𑀻𑀢𑀺 𑀧𑀝𑀺𑀧𑀸𑀤𑁂𑀲𑀺, 𑀬𑁄𑀚𑁂𑀲𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀤𑀼𑀳𑀸𑀢𑀺 𑀲𑀩𑁆𑀩𑀓𑀸𑀫𑀤𑀸𑀬𑀺𑀓𑀸.

𑀢𑀁 ¶ 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀏𑀯𑀭𑀽𑀧𑁂𑀧𑀺 𑀦𑀸𑀫 𑀅𑀧𑁆𑀧𑀢𑀺𑀝𑁆𑀞𑁂 𑀫𑀳𑀸𑀲𑀫𑀼𑀤𑁆𑀤𑁂 𑀫𑀬𑀸 𑀤𑀺𑀦𑁆𑀦𑀉𑀧𑀸𑀳𑀦𑀤𑀸𑀦𑀁 𑀫𑀫 𑀲𑀩𑁆𑀩𑀓𑀸𑀫𑀤𑀤𑀁 𑀚𑀸𑀢𑀁, 𑀅𑀳𑁄 𑀲𑀼𑀤𑀺𑀦𑁆𑀦𑀁 𑀫𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀸𑀦’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀲𑀸 𑀳𑁄𑀢𑀼 𑀦𑀸𑀯𑀸 𑀨𑀮𑀓𑀽𑀧𑀧𑀦𑁆𑀦𑀸, 𑀅𑀦𑀯𑀲𑁆𑀲𑀼𑀢𑀸 𑀏𑀭𑀓𑀯𑀸𑀢𑀬𑀼𑀢𑁆𑀢𑀸;

𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀦 𑀳𑁂𑀢𑁆𑀣 𑀪𑀽𑀫𑀺, 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀁 𑀧𑀸𑀧𑀬𑀲𑁆𑀲𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀤𑁂𑀯𑀢𑁂, 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀏𑀓𑀁 𑀦𑀸𑀯𑀁 𑀫𑀸𑀧𑁂𑀳𑀺, 𑀔𑀼𑀤𑁆𑀤𑀓𑀁 𑀧𑀦 𑀏𑀓𑀤𑁄𑀡𑀺𑀓𑀦𑀸𑀯𑀁 𑀫𑀸𑀧𑁂𑀳𑀺, 𑀬𑀁 𑀦𑀸𑀯𑀁 𑀫𑀸𑀧𑁂𑀲𑁆𑀲𑀲𑀺, 𑀲𑀸 𑀳𑁄𑀢𑀼 𑀦𑀸𑀯𑀸 𑀩𑀳𑀽𑀳𑀺 𑀲𑀼𑀲𑀺𑀩𑁆𑀩𑀺𑀢𑁂𑀳𑀺 𑀨𑀮𑀓𑁂𑀳𑀺 𑀉𑀧𑀧𑀦𑁆𑀦𑀸, 𑀉𑀤𑀓𑀧𑀯𑁂𑀲𑀦𑀲𑁆𑀲𑀸𑀪𑀸𑀯𑁂𑀦 𑀅𑀦𑀯𑀲𑁆𑀲𑀼𑀢𑀸, 𑀏𑀭𑀓𑁂𑀦 𑀲𑀫𑁆𑀫𑀸 ¶ 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀯𑀸𑀢𑁂𑀦 𑀬𑀼𑀢𑁆𑀢𑀸, 𑀞𑀧𑁂𑀢𑁆𑀯𑀸 𑀤𑀺𑀩𑁆𑀩𑀦𑀸𑀯𑀁 𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀏𑀢𑁆𑀣 𑀪𑀽𑀫𑀺 𑀦𑀢𑁆𑀣𑀺, 𑀢𑀸𑀬 𑀧𑀦 𑀤𑀺𑀩𑁆𑀩𑀦𑀸𑀯𑀸𑀬 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀦𑀕𑀭𑀁 𑀧𑀸𑀧𑀬𑀲𑁆𑀲𑀽𑀢𑀺.

𑀤𑁂𑀯𑀥𑀻𑀢𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑀸 𑀲𑀢𑁆𑀢𑀭𑀢𑀦𑀫𑀬𑀁 𑀦𑀸𑀯𑀁 𑀫𑀸𑀧𑁂𑀲𑀺. 𑀲𑀸 𑀤𑀻𑀖𑀢𑁄 𑀅𑀝𑁆𑀞𑀉𑀲𑀪𑀸 𑀅𑀳𑁄𑀲𑀺 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀉𑀲𑀪𑀸, 𑀕𑀫𑁆𑀪𑀻𑀭𑀢𑁄 𑀯𑀻𑀲𑀢𑀺𑀬𑀝𑁆𑀞𑀺𑀓𑀸. 𑀢𑀲𑁆𑀲𑀸 𑀇𑀦𑁆𑀤𑀦𑀻𑀮𑀫𑀬𑀸 𑀢𑀬𑁄 𑀓𑀽𑀧𑀓𑀸, 𑀲𑁄𑀯𑀡𑁆𑀡𑀫𑀬𑀸𑀦𑀺 𑀬𑁄𑀢𑁆𑀢𑀸𑀦𑀺 𑀭𑀚𑀢𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀘 𑀨𑀺𑀬𑀸𑀭𑀺𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀤𑁂𑀯𑀢𑀸 𑀢𑀁 𑀦𑀸𑀯𑀁 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀽𑀭𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀅𑀮𑀗𑁆𑀓𑀢𑀦𑀸𑀯𑀸𑀬 ¶ 𑀆𑀭𑁄𑀧𑁂𑀲𑀺, 𑀉𑀧𑀝𑁆𑀞𑀸𑀓𑀁 𑀧𑀦𑀲𑁆𑀲 𑀦 𑀑𑀮𑁄𑀓𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀓𑀢𑀓𑀮𑁆𑀬𑀸𑀡𑀢𑁄 𑀢𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺, 𑀲𑁄 𑀅𑀦𑀼𑀫𑁄𑀤𑀺. 𑀢𑀤𑀸 𑀤𑁂𑀯𑀢𑀸 𑀢𑀫𑁆𑀧𑀺 𑀆𑀮𑀺𑀗𑁆𑀕𑀺𑀢𑁆𑀯𑀸 𑀦𑀸𑀯𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣 𑀦𑀁 𑀦𑀸𑀯𑀁 𑀫𑁄𑀴𑀺𑀦𑀺𑀦𑀕𑀭𑀁 𑀦𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑁂 𑀥𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑁋

𑁪𑁮.

‘‘𑀲𑀸 𑀢𑀢𑁆𑀣 𑀯𑀺𑀢𑁆𑀢𑀸 𑀲𑀼𑀫𑀦𑀸 𑀧𑀢𑀻𑀢𑀸, 𑀦𑀸𑀯𑀁 𑀲𑀼𑀘𑀺𑀢𑁆𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸;

𑀆𑀤𑀸𑀬 𑀲𑀗𑁆𑀔𑀁 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁, 𑀉𑀧𑀸𑀦𑀬𑀻 𑀦𑀕𑀭𑀁 𑀲𑀸𑀥𑀼𑀭𑀫𑁆𑀫’’𑀦𑁆𑀢𑀺. 𑁋

𑀇𑀫𑀁 𑀑𑀲𑀸𑀦𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 ¶ 𑀲𑀸𑀢𑀺 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸 𑀢𑀢𑁆𑀣 𑀲𑀫𑀼𑀤𑁆𑀤𑀫𑀚𑁆𑀛𑁂 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀯𑀺𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀧𑀻𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀢𑁆𑀢𑀸. 𑀲𑀼𑀫𑀦𑀸𑀢𑀺 𑀲𑀼𑀦𑁆𑀤𑀭𑀫𑀦𑀸 𑀧𑀸𑀫𑁄𑀚𑁆𑀚𑁂𑀦 𑀧𑀢𑀻𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀯𑀺𑀘𑀺𑀢𑁆𑀭𑀦𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀭𑀺𑀘𑀸𑀭𑀓𑁂𑀦 𑀲𑀤𑁆𑀥𑀺𑀁 𑀆𑀤𑀸𑀬 𑀲𑀸𑀥𑀼𑀭𑀫𑁆𑀫𑀁 𑀅𑀢𑀺𑀭𑀫𑀡𑀻𑀬𑀁 𑀦𑀕𑀭𑀁 𑀉𑀧𑀸𑀦𑀬𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀬𑀸𑀯𑀚𑀻𑀯𑀁 𑀅𑀧𑀭𑀺𑀫𑀺𑀢𑀥𑀦𑀁 𑀕𑁂𑀳𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀧𑀭𑀺𑀲𑁄 𑀤𑁂𑀯𑀦𑀕𑀭𑀁 𑀧𑀭𑀺𑀧𑀽𑀭𑁂𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀤𑁂𑀯𑀥𑀻𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀉𑀧𑀝𑁆𑀞𑀸𑀓𑀧𑀼𑀭𑀺𑀲𑁄 𑀆𑀦𑀦𑁆𑀤𑁄, 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀗𑁆𑀔𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁪𑁩] 𑁫. 𑀘𑀽𑀴𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀢𑁂 𑀇𑀫𑀁 𑀯𑀺𑀲𑀸𑀮𑀓𑁆𑀔𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑁄𑀥𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀦𑀺𑀬𑁆𑀬𑀸𑀦𑀺𑀓𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀓𑁄𑀥𑀁 𑀦𑀺𑀕𑁆𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀓𑁄𑀥𑀦𑁄 𑀅𑀳𑁄𑀲𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀺 𑀓𑀼𑀧𑁆𑀧𑀺 𑀩𑁆𑀬𑀸𑀧𑀚𑁆𑀚𑀺 ¶ 𑀧𑀢𑀺𑀝𑁆𑀞𑀬𑀺. 𑀲𑀢𑁆𑀣𑀸 𑀢𑀲𑁆𑀲 𑀓𑁄𑀥𑀦𑀪𑀸𑀯𑀁 𑀲𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀓𑁄𑀥𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑁄𑀥𑁄 𑀦𑀸𑀫 𑀯𑀸𑀭𑁂𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀳𑀺 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀅𑀦𑀢𑁆𑀣𑀓𑀸𑀭𑀓𑁄, 𑀢𑁆𑀯𑀁 𑀦𑀺𑀓𑁆𑀓𑁄𑀥𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑁆𑀫𑀸 𑀓𑀼𑀚𑁆𑀛𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀩𑀸𑀳𑀺𑀭𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀓𑁄𑀥𑀁 𑀦 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀦𑀺𑀕𑀫𑁂 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀧𑀼𑀢𑁆𑀢𑀓𑁄 𑀅𑀳𑁄𑀲𑀺, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀧𑀼𑀢𑁆𑀢𑀁 𑀧𑀢𑁆𑀣𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀩𑁄𑀥𑀺𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 ¶ 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀢𑀲𑁆𑀲 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀫𑀸𑀢𑀸𑀧𑀺𑀢𑀭𑁄 𑀲𑀫𑀸𑀦𑀚𑀸𑀢𑀺𑀓𑀸 𑀓𑀼𑀮𑀸 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀼𑀁. 𑀲𑀸𑀧𑀺 𑀩𑁆𑀭𑀳𑁆𑀫𑀮𑁄𑀓𑀸 𑀘𑀼𑀢𑀸𑀯 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸. 𑀢𑁂𑀲𑀁 𑀅𑀦𑀺𑀘𑁆𑀙𑀫𑀸𑀦𑀸𑀦𑀜𑁆𑀜𑁂𑀯 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑀺𑀁𑀲𑀼. 𑀉𑀪𑀺𑀦𑁆𑀦𑀁 𑀧𑀦𑁂𑀢𑁂𑀲𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑁄 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑁄, 𑀲𑀁𑀭𑀸𑀕𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀑𑀮𑁄𑀓𑀦𑀁 𑀦𑀸𑀫 𑀦𑀸𑀳𑁄𑀲𑀺, 𑀲𑀼𑀧𑀺𑀦𑁂𑀧𑀺 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀏𑀯𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀅𑀳𑁂𑀲𑀼𑀁.

𑀅𑀣𑀸𑀧𑀭𑀪𑀸𑀕𑁂 𑀫𑀳𑀸𑀲𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀲𑀼 𑀓𑀸𑀮𑀓𑀢𑁂𑀲𑀼 𑀢𑁂𑀲𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀪𑀤𑁆𑀤𑁂, 𑀢𑁆𑀯𑀁 𑀇𑀫𑀁 ¶ 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀕𑀳𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀸𑀳𑀻’’𑀢𑀺 𑀆𑀳. ‘‘𑀓𑀺𑀁 𑀓𑀭𑀺𑀲𑁆𑀲𑀣 𑀢𑀼𑀫𑁆𑀳𑁂 𑀧𑀦, 𑀅𑀬𑁆𑀬𑀧𑀼𑀢𑁆𑀢𑀸’’𑀢𑀺? ‘‘𑀫𑀬𑁆𑀳𑀁 𑀥𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀅𑀬𑁆𑀬𑀧𑀼𑀢𑁆𑀢 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀧𑀼𑀭𑀺𑀲𑀸𑀦𑀜𑁆𑀜𑁂𑀯 𑀯𑀝𑁆𑀝𑀢𑀻’’𑀢𑀺? ‘‘𑀇𑀢𑁆𑀣𑀻𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀪𑀤𑁆𑀤𑁂’’𑀢𑀺. ‘‘𑀢𑁂𑀦 𑀳𑀺 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀙𑀝𑁆𑀝𑀺𑀢𑀔𑁂𑀴𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀥𑀦𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀤𑁆𑀤𑁂’’𑀢𑀺. 𑀢𑁂 𑀉𑀪𑁄𑀧𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀨𑀮𑀸𑀨𑀮𑁂𑀳𑀺 𑀬𑀸𑀧𑁂𑀦𑁆𑀢𑀸 𑀢𑀢𑁆𑀣 𑀤𑀲𑀫𑀢𑁆𑀢𑀸𑀦𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀲𑀺𑀁𑀲𑀼, 𑀛𑀸𑀦𑀁 𑀧𑀦 𑀦𑁂𑀲𑀁 𑀦 𑀢𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂 𑀢𑀢𑁆𑀣 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦𑁂𑀯 𑀤𑀲 𑀲𑀁𑀯𑀘𑁆𑀙𑀭𑁂 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀓𑀻𑀴𑀺𑀲𑁆𑀲𑀸𑀫, 𑀉𑀬𑁆𑀬𑀸𑀦𑀁 𑀲𑁄𑀥𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀲𑁄𑀥𑀺𑀢𑀁 𑀲𑀚𑁆𑀚𑀺𑀢𑀁 𑀉𑀬𑁆𑀬𑀸𑀦𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑁂 𑀉𑀪𑁄𑀧𑀺 𑀚𑀦𑀸 𑀉𑀬𑁆𑀬𑀸𑀦𑀲𑁆𑀲 𑀏𑀓𑀧𑀲𑁆𑀲𑁂 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ¶ 𑀳𑁄𑀦𑁆𑀢𑀺. 𑀅𑀣 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑁄 𑀢𑁂 𑀉𑀪𑁄𑀧𑀺 𑀦𑀺𑀲𑀺𑀦𑁆𑀦𑀓𑁂 𑀤𑀺𑀲𑁆𑀯𑀸 𑀧𑀭𑀫𑀧𑀸𑀲𑀸𑀤𑀺𑀓𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀑𑀮𑁄𑀓𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀓𑀺𑀮𑁂𑀲𑀯𑀲𑁂𑀦 𑀓𑀫𑁆𑀧𑀦𑁆𑀢𑁄 ‘‘𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯, 𑀅𑀬𑀁 𑀧𑀭𑀺𑀩𑁆𑀩𑀸𑀚𑀺𑀓𑀸 𑀇𑀫𑀲𑁆𑀲 𑀓𑀺𑀁 𑀳𑁄𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢 𑀅𑀬𑀁 𑀢𑁂 𑀧𑀭𑀺𑀩𑁆𑀩𑀸𑀚𑀺𑀓𑀸 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀺 𑀦 𑀳𑁄𑀢𑀺, 𑀓𑁂𑀯𑀮𑀁 𑀏𑀓𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀧𑀺𑀘 𑀔𑁄 𑀧𑀦 𑀫𑁂 𑀕𑀺𑀳𑀺𑀓𑀸𑀮𑁂 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀳𑁄𑀲𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀬𑀁 𑀓𑀺𑀭𑁂𑀢𑀲𑁆𑀲 𑀓𑀺𑀜𑁆𑀘𑀺 𑀦 𑀳𑁄𑀢𑀺, 𑀅𑀧𑀺𑀘 𑀔𑁄 𑀧𑀦 𑀕𑀺𑀳𑀺𑀓𑀸𑀮𑁂 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀓𑀺𑀭𑀲𑁆𑀲 𑀅𑀳𑁄𑀲𑀺 ¶ , 𑀲𑀘𑁂 𑀧𑀦𑀸𑀳𑀁 𑀇𑀲𑁆𑀲𑀭𑀺𑀬𑀩𑀮𑁂𑀦 𑀕𑀳𑁂𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀁, 𑀓𑀺𑀁 𑀦𑀼 𑀔𑁄 𑀏𑀲 𑀓𑀭𑀺𑀲𑁆𑀲𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀬𑁄 ¶ 𑀢𑁂 𑀇𑀫𑀁 𑀯𑀺𑀲𑀸𑀮𑀓𑁆𑀔𑀺𑀁, 𑀧𑀺𑀬𑀁 𑀲𑀁𑀫𑁆𑀳𑀺𑀢𑀪𑀸𑀲𑀺𑀦𑀺𑀁;

𑀆𑀤𑀸𑀬 𑀩𑀮𑀸 𑀕𑀘𑁆𑀙𑁂𑀬𑁆𑀬, 𑀓𑀺𑀁 𑀦𑀼 𑀓𑀬𑀺𑀭𑀸𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀲𑀁𑀫𑁆𑀳𑀺𑀢𑀪𑀸𑀲𑀺𑀦𑀺𑀦𑁆𑀢𑀺 𑀫𑀦𑁆𑀤𑀳𑀲𑀺𑀢𑀪𑀸𑀲𑀺𑀦𑀺𑀁. 𑀩𑀮𑀸 𑀕𑀘𑁆𑀙𑁂𑀬𑁆𑀬𑀸𑀢𑀺 𑀩𑀮𑀓𑁆𑀓𑀸𑀭𑁂𑀦 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬. 𑀓𑀺𑀁 𑀦𑀼 𑀓𑀬𑀺𑀭𑀸𑀲𑀻𑀢𑀺 𑀢𑀲𑁆𑀲 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡 𑀓𑀺𑀁 𑀓𑀭𑁂𑀬𑁆𑀬𑀸𑀲𑀻𑀢𑀺?

𑀅𑀣𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀉𑀧𑁆𑀧𑀚𑁆𑀚𑁂 𑀫𑁂 𑀦 𑀫𑀼𑀘𑁆𑀘𑁂𑀬𑁆𑀬, 𑀦 𑀫𑁂 𑀫𑀼𑀘𑁆𑀘𑁂𑀬𑁆𑀬 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀔𑀺𑀧𑁆𑀧𑀫𑁂𑀯 𑀦𑀺𑀯𑀸𑀭𑀬𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀲𑀘𑁂 𑀇𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀫𑀫 𑀅𑀩𑁆𑀪𑀦𑁆𑀢𑀭𑁂 𑀓𑁄𑀧𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑁄 𑀫𑁂 𑀅𑀦𑁆𑀢𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦 𑀫𑀼𑀘𑁆𑀘𑁂𑀬𑁆𑀬, 𑀬𑀸𑀯𑀸𑀳𑀁 𑀚𑀻𑀯𑀸𑀫𑀺, 𑀢𑀸𑀯 𑀫𑁂 𑀦 𑀫𑀼𑀘𑁆𑀘𑁂𑀬𑁆𑀬. 𑀦𑀸𑀲𑁆𑀲 𑀅𑀦𑁆𑀢𑁄 𑀖𑀦𑀲𑀦𑁆𑀦𑀺𑀯𑀸𑀲𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀤𑀲𑁆𑀲𑀸𑀫𑀺, 𑀅𑀣 𑀔𑁄 𑀬𑀣𑀸 𑀉𑀧𑁆𑀧𑀦𑁆𑀦𑀁 𑀭𑀚𑀁 𑀯𑀺𑀧𑀼𑀮𑀸 𑀫𑁂𑀖𑀯𑀼𑀝𑁆𑀞𑀺 𑀔𑀺𑀧𑁆𑀧𑀁 𑀦𑀺𑀯𑀸𑀭𑁂𑀢𑀺, 𑀢𑀣𑀸 𑀔𑀺𑀧𑁆𑀧𑀫𑁂𑀯 𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀭𑁂𑀲𑁆𑀲𑀸𑀫𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺. 𑀭𑀸𑀚𑀸 𑀧𑀦𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸𑀧𑀺 𑀅𑀦𑁆𑀥𑀩𑀸𑀮𑀢𑀸𑀬 𑀧𑀝𑀺𑀩𑀤𑁆𑀥𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 ‘‘𑀇𑀫𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀭𑀸𑀚𑀦𑀺𑀯𑁂𑀲𑀦𑀁 𑀦𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ‘‘𑀅𑀥𑀫𑁆𑀫𑁄 𑀮𑁄𑀓𑁂 𑀯𑀢𑁆𑀢𑀢𑀺, 𑀅𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 ¶ 𑀯𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀁𑀬𑁂𑀯 𑀦𑀁 𑀆𑀤𑀸𑀬 𑀧𑀸𑀬𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀧𑀭𑀺𑀤𑁂𑀯𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀏𑀓𑀯𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀦 𑀑𑀮𑁄𑀓𑁂𑀲𑀺. 𑀢𑀁 𑀭𑁄𑀤𑀦𑁆𑀢𑀺𑀁 𑀧𑀭𑀺𑀤𑁂𑀯𑀦𑁆𑀢𑀺𑀁 𑀭𑀸𑀚𑀦𑀺𑀯𑁂𑀲𑀦𑀫𑁂𑀯 𑀦𑀬𑀺𑀁𑀲𑀼. 𑀲𑁄𑀧𑀺 𑀩𑀸𑀭𑀸𑀡𑀲𑀺𑀭𑀸𑀚𑀸 𑀉𑀬𑁆𑀬𑀸𑀦𑁂 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸𑀯 𑀲𑀻𑀖𑀢𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀲𑀸 𑀬𑀲𑀲𑁆𑀲 𑀅𑀕𑀼𑀡𑀁 𑀧𑀩𑁆𑀩𑀚𑀸𑀬 𑀏𑀯 𑀕𑀼𑀡𑀁 𑀓𑀣𑁂𑀲𑀺. 𑀭𑀸𑀚𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑀲𑁆𑀲𑀸 𑀫𑀦𑀁 𑀅𑀮𑀪𑀦𑁆𑀢𑁄 𑀢𑀁 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂 𑀓𑀸𑀭𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀺𑀓𑀸 𑀏𑀯𑀭𑀽𑀧𑀁 𑀬𑀲𑀁 𑀦 𑀇𑀘𑁆𑀙𑀢𑀺, 𑀲𑁄𑀧𑀺 𑀢𑀸𑀧𑀲𑁄 𑀏𑀯𑀭𑀽𑀧𑀁 𑀫𑀸𑀢𑀼𑀕𑀸𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑀫𑀢𑁆𑀢𑀫𑁆𑀧𑀺 ¶ 𑀦 𑀅𑀓𑀸𑀲𑀺, 𑀧𑀩𑁆𑀩𑀚𑀺𑀢𑀸 𑀔𑁄 𑀧𑀦 𑀩𑀳𑀼𑀫𑀸𑀬𑀸 𑀳𑁄𑀦𑁆𑀢𑀺, 𑀓𑀺𑀜𑁆𑀘𑀺 𑀧𑀬𑁄𑀚𑁂𑀢𑁆𑀯𑀸 𑀅𑀦𑀢𑁆𑀣𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬, 𑀕𑀘𑁆𑀙𑀸𑀫𑀺 ¶ 𑀢𑀸𑀯 𑀚𑀸𑀦𑀸𑀫𑀺 𑀓𑀺𑀁 𑀓𑀭𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀘𑀻𑀯𑀭𑀁 𑀲𑀺𑀩𑁆𑀩𑀦𑁆𑀢𑁄 𑀦𑀺𑀲𑀻𑀤𑀺. 𑀭𑀸𑀚𑀸 𑀫𑀦𑁆𑀤𑀧𑀭𑀺𑀯𑀸𑀭𑁄𑀯 𑀧𑀤𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁄 𑀲𑀡𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀘𑀻𑀯𑀭𑀫𑁂𑀯 𑀲𑀺𑀩𑁆𑀩𑀺. 𑀭𑀸𑀚𑀸 ‘‘𑀅𑀬𑀁 𑀓𑀼𑀚𑁆𑀛𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀦 𑀲𑀮𑁆𑀮𑀧𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀅𑀬𑀁 𑀓𑀽𑀝𑀢𑀸𑀧𑀲𑁄 ‘𑀓𑁄𑀥𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑀲𑁆𑀲𑀸𑀫𑀺, 𑀉𑀧𑁆𑀧𑀦𑁆𑀦𑀫𑁆𑀧𑀺 𑀦𑀁 𑀔𑀺𑀧𑁆𑀧𑀫𑁂𑀯 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀧𑀞𑀫𑀫𑁂𑀯 𑀕𑀚𑁆𑀚𑀺𑀢𑁆𑀯𑀸 𑀇𑀤𑀸𑀦𑀺 𑀓𑁄𑀥𑁂𑀦 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀦 𑀲𑀮𑁆𑀮𑀧𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁫𑁧.

‘‘𑀬𑀁 𑀦𑀼 𑀧𑀼𑀩𑁆𑀩𑁂 𑀯𑀺𑀓𑀢𑁆𑀣𑀺𑀢𑁆𑀣𑁄, 𑀩𑀮𑀫𑁆𑀳𑀺𑀯 𑀅𑀧𑀲𑁆𑀲𑀺𑀢𑁄;

𑀲𑁆𑀯𑀚𑁆𑀚 𑀢𑀼𑀡𑁆𑀳𑀺𑀓𑀢𑁄 𑀤𑀸𑀦𑀺, 𑀲𑀗𑁆𑀖𑀸𑀝𑀺𑀁 𑀲𑀺𑀩𑁆𑀩𑀫𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀩𑀮𑀫𑁆𑀳𑀺𑀯 𑀅𑀧𑀲𑁆𑀲𑀺𑀢𑁄𑀢𑀺 𑀩𑀮𑀦𑀺𑀲𑁆𑀲𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸. 𑀢𑀼𑀡𑁆𑀳𑀺𑀓𑀢𑁄𑀢𑀺 𑀓𑀺𑀜𑁆𑀘𑀺 𑀅𑀯𑀤𑀦𑁆𑀢𑁄. 𑀲𑀺𑀩𑁆𑀩𑀫𑀘𑁆𑀙𑀲𑀻𑀢𑀺 𑀲𑀺𑀩𑁆𑀩𑀦𑁆𑀢𑁄 𑀅𑀘𑁆𑀙𑀲𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀭𑀸𑀚𑀸 𑀓𑁄𑀥𑀯𑀲𑁂𑀦 𑀫𑀁 𑀦𑀸𑀮𑀧𑀢𑀻𑀢𑀺 𑀫𑀜𑁆𑀜𑀢𑀺, 𑀓𑀣𑁂𑀲𑁆𑀲𑀸𑀫𑀺 𑀤𑀸𑀦𑀺𑀲𑁆𑀲 𑀉𑀧𑁆𑀧𑀦𑁆𑀦𑀲𑁆𑀲 𑀓𑁄𑀥𑀲𑁆𑀲 𑀯𑀲𑀁 𑀅𑀕𑀢𑀪𑀸𑀯’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁫𑁨.

‘‘𑀉𑀧𑁆𑀧𑀚𑁆𑀚𑀺 𑀫𑁂 𑀦 𑀫𑀼𑀘𑁆𑀘𑀺𑀢𑁆𑀣, 𑀦 𑀫𑁂 𑀫𑀼𑀘𑁆𑀘𑀺𑀢𑁆𑀣 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀔𑀺𑀧𑁆𑀧𑀫𑁂𑀯 𑀦𑀺𑀯𑀸𑀭𑀬𑀺’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀉𑀧𑁆𑀧𑀚𑁆𑀚𑀺 𑀫𑁂, 𑀦 𑀦 𑀉𑀧𑁆𑀧𑀚𑁆𑀚𑀺, 𑀦 𑀧𑀦 𑀫𑁂 𑀫𑀼𑀘𑁆𑀘𑀺𑀢𑁆𑀣, 𑀦𑀸𑀲𑁆𑀲 𑀧𑀯𑀺𑀲𑀺𑀢𑁆𑀯𑀸 𑀳𑀤𑀬𑁂 𑀞𑀸𑀢𑀼𑀁 𑀅𑀤𑀸𑀲𑀺𑀁, 𑀇𑀢𑀺 𑀲𑁄 𑀫𑀫 𑀚𑀻𑀯𑀢𑁄 𑀦 𑀫𑀼𑀘𑁆𑀘𑀺𑀢𑁆𑀣𑁂𑀯, 𑀭𑀚𑀁 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺 𑀯𑀺𑀬 𑀔𑀺𑀧𑁆𑀧𑀫𑁂𑀯 𑀦𑀁 𑀦𑀺𑀯𑀸𑀭𑁂𑀲𑀺𑀦𑁆𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀓𑀺𑀁 𑀦𑀼 𑀔𑁄 𑀏𑀲 𑀓𑁄𑀧𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁫𑁩.

‘‘𑀓𑀺𑀁 𑀢𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑀺𑀁 𑀢𑁂 𑀦 𑀫𑀼𑀘𑁆𑀘𑀺 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀓𑀢𑀫𑀁 𑀢𑀁 𑀦𑀺𑀯𑀸𑀭𑀬𑀻’’𑀢𑀺.

𑀢𑀢𑁆𑀣 ¶ 𑀓𑀺𑀁 𑀢𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀻𑀢𑀺 𑀓𑀺𑀁 𑀢𑀯 𑀉𑀧𑁆𑀧𑀚𑁆𑀚𑀺 𑀘𑁂𑀯 𑀦 𑀫𑀼𑀘𑁆𑀘𑀺 𑀘.

𑀢𑀁 ¶ 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀏𑀯𑀁 𑀓𑁄𑀥𑁄 𑀩𑀳𑀼𑀆𑀤𑀻𑀦𑀯𑁄 𑀫𑀳𑀸𑀯𑀺𑀦𑀸𑀲𑀤𑀸𑀬𑀓𑁄, 𑀏𑀲𑁄 𑀫𑀫 𑀉𑀧𑁆𑀧𑀚𑁆𑀚𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀦𑀺𑀯𑀸𑀭𑁂𑀲𑀺’’𑀦𑁆𑀢𑀺 𑀓𑁄𑀥𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁫𑁪.

‘‘𑀬𑀫𑁆𑀳𑀺 𑀚𑀸𑀢𑁂 𑀦 𑀧𑀲𑁆𑀲𑀢𑀺, 𑀅𑀚𑀸𑀢𑁂 𑀲𑀸𑀥𑀼 𑀧𑀲𑁆𑀲𑀢𑀺;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

𑁫𑁫.

‘‘𑀬𑁂𑀦 𑀚𑀸𑀢𑁂𑀦 𑀦𑀦𑁆𑀤𑀦𑁆𑀢𑀺, 𑀅𑀫𑀺𑀢𑁆𑀢𑀸 𑀤𑀼𑀓𑁆𑀔𑀫𑁂𑀲𑀺𑀦𑁄;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

𑁫𑁬.

‘‘𑀬𑀲𑁆𑀫𑀺𑀜𑁆𑀘 𑀚𑀸𑀬𑀫𑀸𑀦𑀫𑁆𑀳𑀺, 𑀲𑀤𑀢𑁆𑀣𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

𑁫𑁭.

‘‘𑀬𑁂𑀦𑀸𑀪𑀺𑀪𑀽𑀢𑁄 𑀓𑀼𑀲𑀮𑀁 𑀚𑀳𑀸𑀢𑀺, 𑀧𑀭𑀓𑁆𑀓𑀭𑁂 𑀯𑀺𑀧𑀼𑀮𑀜𑁆𑀘𑀸𑀧𑀺 𑀅𑀢𑁆𑀣𑀁;

𑀲 𑀪𑀻𑀫𑀲𑁂𑀦𑁄 𑀩𑀮𑀯𑀸 𑀧𑀫𑀤𑁆𑀤𑀻, 𑀓𑁄𑀥𑁄 𑀫𑀳𑀸𑀭𑀸𑀚 𑀦 𑀫𑁂 𑀅𑀫𑀼𑀘𑁆𑀘𑀣.

𑁫𑁮.

‘‘𑀓𑀝𑁆𑀞𑀲𑁆𑀫𑀺𑀁 𑀫𑀢𑁆𑀣𑀫𑀸𑀦𑀲𑁆𑀫𑀺𑀁, 𑀧𑀸𑀯𑀓𑁄 𑀦𑀸𑀫 𑀚𑀸𑀬𑀢𑀺;

𑀢𑀫𑁂𑀯 𑀓𑀝𑁆𑀞𑀁 𑀟𑀳𑀢𑀺, 𑀬𑀲𑁆𑀫𑀸 𑀲𑁄 𑀚𑀸𑀬𑀢𑁂 𑀕𑀺𑀦𑀺.

𑁫𑁯.

‘‘𑀏𑀯𑀁 𑀫𑀦𑁆𑀤𑀲𑁆𑀲 𑀧𑁄𑀲𑀲𑁆𑀲, 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄;

𑀲𑀸𑀭𑀫𑁆𑀪𑀸 𑀚𑀸𑀬𑀢𑁂 𑀓𑁄𑀥𑁄, 𑀲𑁄𑀧𑀺 𑀢𑁂𑀦𑁂𑀯 𑀟𑀬𑁆𑀳𑀢𑀺.

𑁬𑁦.

‘‘𑀅𑀕𑁆𑀕𑀻𑀯 ¶ 𑀢𑀺𑀡𑀓𑀝𑁆𑀞𑀲𑁆𑀫𑀺𑀁, 𑀓𑁄𑀥𑁄 𑀬𑀲𑁆𑀲 𑀧𑀯𑀟𑁆𑀠𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑁬𑁧.

‘‘𑀅𑀦𑁂𑀥𑁄 𑀥𑀽𑀫𑀓𑁂𑀢𑀽𑀯, 𑀓𑁄𑀥𑁄 𑀬𑀲𑁆𑀲𑀽𑀧𑀲𑀫𑁆𑀫𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀆𑀳;

𑀢𑀢𑁆𑀣 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀢𑁆𑀣𑀫𑁆𑀧𑀺 𑀦 𑀧𑀲𑁆𑀲𑀢𑀺, 𑀧𑀕𑁂𑀯 𑀧𑀭𑀢𑁆𑀣𑀁. 𑀲𑀸𑀥𑀼 𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀢𑁆𑀣𑀁 𑀧𑀭𑀢𑁆𑀣𑀁 𑀉𑀪𑀬𑀢𑁆𑀣𑀫𑁆𑀧𑀺 𑀲𑀸𑀥𑀼 𑀧𑀲𑁆𑀲𑀢𑀺. 𑀤𑀼𑀫𑁆𑀫𑁂𑀥𑀕𑁄𑀘𑀭𑁄𑀢𑀺 𑀦𑀺𑀧𑁆𑀧𑀜𑁆𑀜𑀸𑀦𑀁 𑀆𑀥𑀸𑀭𑀪𑀽𑀢𑁄 𑀕𑁄𑀘𑀭𑁄. 𑀤𑀼𑀓𑁆𑀔𑀫𑁂𑀲𑀺𑀦𑁄𑀢𑀺 𑀤𑀼𑀓𑁆𑀔𑀁 𑀇𑀘𑁆𑀙𑀦𑁆𑀢𑀸. 𑀲𑀤𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 ¶ 𑀅𑀢𑁆𑀣𑀪𑀽𑀢𑀁 𑀅𑀢𑁆𑀣𑀢𑁄 𑀘𑁂𑀯 𑀥𑀫𑁆𑀫𑀢𑁄 𑀘 𑀯𑀼𑀤𑁆𑀥𑀺𑀁. 𑀧𑀭𑀓𑁆𑀓𑀭𑁂𑀢𑀺 𑀯𑀺𑀧𑀼𑀮𑀫𑁆𑀧𑀺 𑀅𑀢𑁆𑀣𑀁 𑀉𑀧𑁆𑀧𑀦𑁆𑀦𑀁 𑀧𑀭𑀢𑁄 𑀓𑀸𑀭𑁂𑀢𑀺, 𑀅𑀧𑀦𑁂𑀣, 𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄𑀢𑀺 𑀯𑀤𑀢𑀺. 𑀲 𑀪𑀻𑀫𑀲𑁂𑀦𑁄𑀢𑀺 𑀲𑁄 𑀓𑁄𑀥𑁄 𑀪𑀻𑀫𑀸𑀬 𑀪𑀬𑀚𑀦𑀦𑀺𑀬𑀸 𑀫𑀳𑀢𑀺𑀬𑀸 𑀓𑀺𑀮𑁂𑀲𑀲𑁂𑀦𑀸𑀬 ¶ 𑀲𑀫𑀦𑁆𑀦𑀸𑀕𑀢𑁄. 𑀧𑀫𑀤𑁆𑀤𑀻𑀢𑀺 𑀅𑀢𑁆𑀢𑀦𑁄 𑀩𑀮𑀯𑀪𑀸𑀯𑁂𑀦 𑀉𑀴𑀸𑀭𑁂𑀧𑀺 𑀲𑀢𑁆𑀢𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀭𑀡𑁂𑀦 𑀫𑀤𑁆𑀤𑀦𑀲𑀫𑀢𑁆𑀣𑁄. 𑀦 𑀫𑁂 𑀅𑀫𑀼𑀘𑁆𑀘𑀣𑀸𑀢𑀺 𑀫𑀫 𑀲𑀦𑁆𑀢𑀺𑀓𑀸 𑀫𑁄𑀓𑁆𑀔𑀁 𑀦 𑀮𑀪𑀢𑀺, 𑀳𑀤𑀬𑁂 𑀯𑀸 𑀧𑀦 𑀫𑁂 𑀔𑀻𑀭𑀁 𑀯𑀺𑀬 𑀫𑀼𑀳𑀼𑀢𑁆𑀢𑀁 𑀤𑀥𑀺𑀪𑀸𑀯𑁂𑀦 𑀦 𑀧𑀢𑀺𑀝𑁆𑀞𑀳𑀺𑀢𑁆𑀣𑀸𑀢𑀺𑀧𑀺 𑀅𑀢𑁆𑀣𑁄.

𑀓𑀝𑁆𑀞𑀲𑁆𑀫𑀺𑀁 𑀫𑀢𑁆𑀣𑀫𑀸𑀦𑀲𑁆𑀫𑀺𑀦𑁆𑀢𑀺 𑀅𑀭𑀡𑀻𑀲𑀳𑀺𑀢𑁂𑀦 𑀫𑀢𑁆𑀣𑀺𑀬𑀫𑀸𑀦𑁂, ‘‘𑀫𑀤𑁆𑀤𑀫𑀸𑀦𑀲𑁆𑀫𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀬𑀲𑁆𑀫𑀸𑀢𑀺 𑀬𑀢𑁄 𑀓𑀝𑁆𑀞𑀸 𑀚𑀸𑀬𑀢𑀺, 𑀢𑀫𑁂𑀯 𑀟𑀳𑀢𑀺. 𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄𑀢𑀺 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀦𑁆𑀢𑀲𑁆𑀲. 𑀲𑀸𑀭𑀫𑁆𑀪𑀸 𑀚𑀸𑀬𑀢𑁂𑀢𑀺 𑀅𑀳𑀁 𑀢𑁆𑀯𑀦𑁆𑀢𑀺 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀁 𑀓𑀭𑁄𑀦𑁆𑀢𑀲𑁆𑀲 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑀸 𑀲𑀸𑀭𑀫𑁆𑀪𑀸 𑀅𑀭𑀡𑀻𑀫𑀢𑁆𑀣𑀦𑀸 𑀯𑀺𑀬 𑀧𑀸𑀯𑀓𑁄 𑀓𑁄𑀥𑁄 𑀚𑀸𑀬𑀢𑀺. 𑀲𑁄𑀧𑀺 𑀢𑁂𑀦𑁂𑀯𑀸𑀢𑀺 𑀲𑁄𑀧𑀺 𑀩𑀸𑀮𑁄 𑀢𑁂𑀦𑁂𑀯 𑀓𑁄𑀥𑁂𑀦 𑀓𑀝𑁆𑀞𑀁 𑀯𑀺𑀬 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀅𑀦𑁂𑀥𑁄 𑀥𑀽𑀫𑀓𑁂𑀢𑀽𑀯𑀸𑀢𑀺 𑀅𑀦𑀺𑀦𑁆𑀥𑀦𑁄 𑀅𑀕𑁆𑀕𑀺 𑀯𑀺𑀬. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑁂 𑀘𑀦𑁆𑀤𑁄 𑀯𑀺𑀬 𑀮𑀤𑁆𑀥𑁄 𑀬𑀲𑁄 𑀅𑀧𑀭𑀸𑀧𑀭𑀁 𑀆𑀧𑀽𑀭𑀢𑀻𑀢𑀺.

𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂 𑀦𑀺𑀓𑁆𑀓𑁄𑀥𑀢𑀸𑀧𑀲, 𑀉𑀪𑁄𑀧𑀺 𑀢𑀼𑀫𑁆𑀳𑁂 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀸 𑀇𑀥𑁂𑀯 𑀉𑀬𑁆𑀬𑀸𑀦𑁂 𑀯𑀲𑀣, 𑀅𑀳𑀁 𑀯𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂 𑀉𑀪𑁄𑀧𑀺 𑀢𑀢𑁆𑀣𑁂𑀯 𑀯𑀲𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀧𑀭𑀺𑀩𑁆𑀩𑀸𑀚𑀺𑀓𑀸 𑀓𑀸𑀮𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀓𑀸𑀮𑀓𑀢𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁄𑀥𑀦𑁄 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀭𑀺𑀩𑁆𑀩𑀸𑀚𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀘𑀽𑀴𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁪𑁪] 𑁬. 𑀓𑀡𑁆𑀳𑀤𑀻𑀧𑀸𑀬𑀦𑀚𑀸𑀢𑀓𑀯𑀡𑁆𑀡𑀦𑀸

𑀲𑀢𑁆𑀢𑀸𑀳𑀫𑁂𑀯𑀸𑀳𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀓𑀼𑀲𑀚𑀸𑀢𑀓𑁂 (𑀚𑀸. 𑁨.𑁨𑁦.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀪𑀦𑁆𑀢𑁂’’𑀢𑀺 ¶ 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑀺𑀭𑁂𑀓𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀅𑀦𑀪𑀺𑀭𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸 𑀳𑀺𑀭𑁄𑀢𑁆𑀢𑀧𑁆𑀧𑀪𑁂𑀤𑀪𑀬𑁂𑀦 𑀅𑀢𑁆𑀢𑀦𑁄 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀦 𑀓𑀲𑁆𑀲𑀘𑀺 𑀓𑀣𑁂𑀲𑀼𑀁, 𑀢𑁆𑀯𑀁 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀸𑀤𑀺𑀲𑀲𑁆𑀲 𑀕𑀭𑀼𑀦𑁄 𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀆𑀯𑀺 𑀓𑀭𑁄𑀲𑀺, 𑀓𑀺𑀫𑀢𑁆𑀣𑀁 𑀅𑀢𑁆𑀢𑀦𑁄 𑀳𑀺𑀭𑁄𑀢𑁆𑀢𑀧𑁆𑀧𑀁 𑀦 𑀭𑀓𑁆𑀔𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀯𑀁𑀲𑀭𑀝𑁆𑀞𑁂 𑀓𑁄𑀲𑀫𑁆𑀩𑀺𑀬𑀁 𑀦𑀸𑀫 𑀦𑀕𑀭𑁂 𑀓𑁄𑀲𑀫𑁆𑀩𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑀫𑁂 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸 𑀅𑀲𑀻𑀢𑀺𑀓𑁄𑀝𑀺𑀥𑀦𑀯𑀺𑀪𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀳𑀸𑀬𑀓𑀸 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀉𑀪𑁄𑀧𑀺 𑀓𑀸𑀫𑁂 𑀧𑀳𑀸𑀬 𑀫𑀳𑀸𑀚𑀦𑀲𑁆𑀲 𑀭𑁄𑀤𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀲𑁆𑀲𑀫𑀧𑀤𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀨𑀮𑁂𑀦 𑀬𑀸𑀧𑁂𑀦𑁆𑀢𑀸 𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀯𑀲𑀺𑀁𑀲𑀼, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑁂 𑀧𑀡𑁆𑀡𑀸𑀲𑀯𑀲𑁆𑀲𑀘𑁆𑀘𑀬𑁂𑀦 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀁 𑀘𑀭𑀦𑁆𑀢𑀸 𑀓𑀸𑀲𑀺𑀭𑀝𑁆𑀞𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀭 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑀫𑀕𑀸𑀫𑁂 𑀤𑀻𑀧𑀸𑀬𑀦𑀢𑀸𑀧𑀲𑀲𑁆𑀲 𑀕𑀺𑀳𑀺𑀲𑀳𑀸𑀬𑁄 𑀫𑀡𑁆𑀟𑀩𑁆𑀬𑁄 𑀦𑀸𑀫 𑀅𑀢𑁆𑀣𑀺, 𑀢𑁂 𑀉𑀪𑁄𑀧𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀲𑁄 𑀢𑁂 𑀤𑀺𑀲𑁆𑀯𑀸𑀯 𑀅𑀢𑁆𑀢𑀫𑀦𑁄 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺. 𑀢𑁂 𑀢𑀢𑁆𑀣 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀅𑀢𑀺𑀫𑀼𑀢𑁆𑀢𑀓𑀲𑀼𑀲𑀸𑀦𑁂 𑀯𑀲𑀺𑀁𑀲𑀼. 𑀢𑀢𑁆𑀣 𑀤𑀻𑀧𑀸𑀬𑀦𑁄 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦 𑀢𑀲𑁆𑀲𑁂𑀯 𑀲𑀳𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀫𑀡𑁆𑀟𑀩𑁆𑀬𑀢𑀸𑀧𑀲𑁄 𑀢𑀢𑁆𑀣𑁂𑀯 𑀯𑀲𑀺.

𑀅𑀣𑁂𑀓𑀤𑀺𑀯𑀲𑀁 ¶ 𑀏𑀓𑁄 𑀘𑁄𑀭𑁄 𑀅𑀦𑁆𑀢𑁄𑀦𑀕𑀭𑁂 𑀘𑁄𑀭𑀺𑀓𑀁 𑀓𑀢𑁆𑀯𑀸 𑀥𑀦𑀲𑀸𑀭𑀁 𑀆𑀤𑀸𑀬 𑀦𑀺𑀓𑁆𑀔𑀦𑁆𑀢𑁄 ‘‘𑀘𑁄𑀭𑁄’’𑀢𑀺 𑀜𑀢𑁆𑀯𑀸 𑀧𑀝𑀺𑀩𑀼𑀤𑁆𑀥𑁂𑀳𑀺 𑀖𑀭𑀲𑁆𑀲𑀸𑀫𑀺𑀓𑁂𑀳𑀺 𑀘𑁂𑀯 𑀆𑀭𑀓𑁆𑀔𑀫𑀦𑀼𑀲𑁆𑀲𑁂𑀳𑀺 𑀘 𑀅𑀦𑀼𑀩𑀤𑁆𑀥𑁄 𑀦𑀺𑀤𑁆𑀥𑀫𑀦𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀕𑁂𑀦 𑀲𑀼𑀲𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀪𑀡𑁆𑀟𑀺𑀓𑀁 𑀙𑀝𑁆𑀝𑁂𑀢𑁆𑀯𑀸 𑀧𑀮𑀸𑀬𑀺 ¶ . 𑀫𑀦𑀼𑀲𑁆𑀲𑀸 𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 ‘‘𑀅𑀭𑁂 𑀤𑀼𑀝𑁆𑀞𑀚𑀝𑀺𑀮, 𑀢𑁆𑀯𑀁 𑀭𑀢𑁆𑀢𑀺𑀁 𑀘𑁄𑀭𑀺𑀓𑀁 𑀓𑀢𑁆𑀯𑀸 ¶ 𑀤𑀺𑀯𑀸 𑀢𑀸𑀧𑀲𑀭𑀽𑀧𑁂𑀦 𑀘𑀭𑀲𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼. 𑀭𑀸𑀚𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 ‘‘𑀕𑀘𑁆𑀙𑀣, 𑀦𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸’’𑀢𑀺 𑀆𑀳. 𑀢𑁂 𑀢𑀁 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀔𑀤𑀺𑀭𑀲𑀽𑀮𑀁 𑀆𑀭𑁄𑀧𑀬𑀺𑀁𑀲𑀼, 𑀢𑀸𑀧𑀲𑀲𑁆𑀲 𑀲𑀭𑀻𑀭𑁂 𑀲𑀽𑀮𑀁 𑀦 𑀧𑀯𑀺𑀲𑀢𑀺. 𑀢𑀢𑁄 𑀦𑀺𑀫𑁆𑀩𑀲𑀽𑀮𑀁 𑀆𑀳𑀭𑀺𑀁𑀲𑀼, 𑀢𑀫𑁆𑀧𑀺 𑀦 𑀧𑀯𑀺𑀲𑀢𑀺. 𑀅𑀬𑀲𑀽𑀮𑀁 𑀆𑀳𑀭𑀺𑀁𑀲𑀼, 𑀢𑀫𑁆𑀧𑀺 𑀦 𑀧𑀯𑀺𑀲𑀢𑀺. 𑀢𑀸𑀧𑀲𑁄 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀼𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀑𑀮𑁄𑀓𑁂𑀲𑀺, 𑀅𑀣𑀲𑁆𑀲 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀧𑀼𑀩𑁆𑀩𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀅𑀤𑁆𑀤𑀲. 𑀓𑀺𑀁 𑀧𑀦𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺? 𑀓𑁄𑀯𑀺𑀴𑀸𑀭𑀲𑀽𑀮𑁂 𑀫𑀓𑁆𑀔𑀺𑀓𑀸𑀯𑁂𑀥𑀦𑀁. 𑀲𑁄 𑀓𑀺𑀭 𑀧𑀼𑀭𑀺𑀫𑀪𑀯𑁂 𑀯𑀟𑁆𑀠𑀓𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀭𑀼𑀓𑁆𑀔𑀢𑀘𑁆𑀙𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀓𑁆𑀔𑀺𑀓𑀁 𑀕𑀳𑁂𑀢𑁆𑀯𑀸 𑀓𑁄𑀯𑀺𑀴𑀸𑀭𑀲𑀮𑀸𑀓𑀸𑀬 𑀲𑀽𑀮𑁂 𑀯𑀺𑀬 𑀯𑀺𑀚𑁆𑀛𑀺. 𑀢𑀫𑁂𑀦𑀁 𑀧𑀸𑀧𑀓𑀫𑁆𑀫𑀁 𑀇𑀫𑀁 𑀞𑀸𑀦𑀁 𑀧𑀢𑁆𑀯𑀸 𑀕𑀡𑁆𑀳𑀺. 𑀲𑁄 ‘‘𑀦 𑀲𑀓𑁆𑀓𑀸 𑀇𑀢𑁄 𑀧𑀸𑀧𑀸 𑀫𑀬𑀸 𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺 𑀜𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑁂 𑀆𑀳 ‘‘𑀲𑀘𑁂 𑀫𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑀼𑀓𑀸𑀫𑀢𑁆𑀣, 𑀓𑁄𑀯𑀺𑀴𑀸𑀭𑀲𑀽𑀮𑀁 𑀆𑀳𑀭𑀣𑀸’’𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀢𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑁆𑀯𑀸 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀆𑀭𑀓𑁆𑀔𑀓𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁂 𑀑𑀮𑁄𑀓𑁂𑀦𑁆𑀢𑀺. 𑀢𑀤𑀸 𑀤𑀻𑀧𑀸𑀬𑀦𑁄 ‘‘𑀘𑀺𑀭𑀤𑀺𑀝𑁆𑀞𑁄 𑀫𑁂 𑀲𑀳𑀸𑀬𑁄’’𑀢𑀺 𑀫𑀡𑁆𑀟𑀩𑁆𑀬𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 ‘‘𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑁄’’𑀢𑀺 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀺𑀁 𑀲𑀫𑁆𑀫 𑀓𑀸𑀭𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀓𑀸𑀭𑀓𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑁆𑀢𑀦𑁄 𑀫𑀦𑁄𑀧𑀤𑁄𑀲𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺, 𑀦𑀸𑀲𑀓𑁆𑀔𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀫𑁆𑀫, 𑀬𑁂𑀳𑀺 𑀅𑀳𑀁 𑀕𑀳𑀺𑀢𑁄, 𑀦𑁂𑀯 𑀢𑁂𑀲𑀁, 𑀦 𑀭𑀜𑁆𑀜𑁄 𑀉𑀧𑀭𑀺 𑀫𑀬𑁆𑀳𑀁 𑀫𑀦𑁄𑀧𑀤𑁄𑀲𑁄 𑀅𑀢𑁆𑀣𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀸𑀤𑀺𑀲𑀲𑁆𑀲 𑀲𑀻𑀮𑀯𑀢𑁄 𑀙𑀸𑀬𑀸 𑀫𑀬𑁆𑀳𑀁 𑀲𑀼𑀔𑀸’’𑀢𑀺 𑀯𑀢𑁆𑀯𑀸 𑀤𑀻𑀧𑀸𑀬𑀦𑁄 𑀲𑀽𑀮𑀁 𑀦𑀺𑀲𑁆𑀲𑀸𑀬 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀭𑀻𑀭𑁂 𑀫𑀡𑁆𑀟𑀩𑁆𑀬𑀲𑁆𑀲 𑀲𑀭𑀻𑀭𑀢𑁄 𑀮𑁄𑀳𑀺𑀢𑀩𑀺𑀦𑁆𑀤𑀽𑀦𑀺 𑀧𑀢𑀺𑀁𑀲𑀼. 𑀢𑀸𑀦𑀺 𑀲𑀼𑀯𑀡𑁆𑀡𑀯𑀡𑁆𑀡𑀲𑀭𑀻𑀭𑁂 𑀧𑀢𑀺𑀢𑀧𑀢𑀺𑀢𑀸𑀦𑀺 𑀲𑀼𑀲𑁆𑀲𑀺𑀢𑁆𑀯𑀸 𑀓𑀸𑀴𑀓𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬𑁂𑀯 𑀲𑁄 𑀓𑀡𑁆𑀳𑀤𑀻𑀧𑀸𑀬𑀦𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺.

𑀧𑀼𑀦𑀤𑀺𑀯𑀲𑁂 𑀆𑀭𑀓𑁆𑀔𑀧𑀼𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀅𑀦𑀺𑀲𑀸𑀫𑁂𑀢𑁆𑀯𑀸𑀯 𑀫𑁂 𑀓𑀢’’𑀦𑁆𑀢𑀺 𑀯𑁂𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 ¶ ‘‘𑀧𑀩𑁆𑀩𑀚𑀺𑀢, 𑀓𑀲𑁆𑀫𑀸 𑀲𑀽𑀮𑀁 𑀦𑀺𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀤𑀻𑀧𑀸𑀬𑀦𑀁 𑀧𑀼𑀘𑁆𑀙𑀺. 𑀫𑀳𑀸𑀭𑀸𑀚, 𑀇𑀫𑀁 𑀢𑀸𑀧𑀲𑀁 𑀭𑀓𑁆𑀔𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀺. 𑀓𑀺𑀁 𑀧𑀦 𑀢𑁆𑀯𑀁 𑀫𑀳𑀸𑀭𑀸𑀚, 𑀇𑀫𑀲𑁆𑀲 𑀓𑀸𑀭𑀓𑀪𑀸𑀯𑀁 𑀯𑀸 𑀅𑀓𑀸𑀭𑀓𑀪𑀸𑀯𑀁 𑀯𑀸 𑀜𑀢𑁆𑀯𑀸 𑀏𑀯𑀁 𑀓𑀸𑀭𑁂𑀲𑀻𑀢𑀺? 𑀲𑁄 𑀓𑀫𑁆𑀫𑀲𑁆𑀲 𑀅𑀲𑁄𑀥𑀺𑀢𑀪𑀸𑀯𑀁 𑀆𑀘𑀺𑀓𑁆𑀔𑀺. 𑀅𑀣𑀲𑁆𑀲 ¶ 𑀲𑁄 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀦𑀺𑀲𑀫𑁆𑀫𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁 ¶ , 𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀽’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀭𑀸𑀚𑀸 𑀫𑀡𑁆𑀟𑀩𑁆𑀬𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀽𑀮𑀁 𑀳𑀭𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀲𑀽𑀮𑀁 𑀳𑀭𑀦𑁆𑀢𑀸 𑀳𑀭𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼. 𑀫𑀡𑁆𑀟𑀩𑁆𑀬𑁄 𑀆𑀳 𑁋 ‘‘𑀫𑀳𑀸𑀭𑀸𑀚, 𑀅𑀳𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀤𑁄𑀲𑁂𑀦 𑀏𑀯𑀭𑀽𑀧𑀁 𑀪𑀬𑀁 𑀲𑀫𑁆𑀧𑀢𑁆𑀢𑁄, 𑀫𑀫 𑀲𑀭𑀻𑀭𑀢𑁄 𑀲𑀽𑀮𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀲𑀘𑁂 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀤𑀸𑀢𑀼𑀓𑀸𑀫𑁄, 𑀓𑀓𑀘𑀁 𑀆𑀳𑀭𑀸𑀧𑁂𑀢𑁆𑀯𑀸 𑀇𑀫𑀁 𑀲𑀽𑀮𑀁 𑀘𑀫𑁆𑀫𑀲𑀫𑀁 𑀙𑀺𑀦𑁆𑀤𑀸𑀧𑁂𑀳𑀻’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀅𑀦𑁆𑀢𑁄𑀲𑀭𑀻𑀭𑁂 𑀲𑀽𑀮𑁄 𑀅𑀦𑁆𑀢𑁄𑀬𑁂𑀯 𑀅𑀳𑁄𑀲𑀺. 𑀢𑀤𑀸 𑀓𑀺𑀭 𑀲𑁄 𑀲𑀼𑀔𑀼𑀫𑀁 𑀓𑁄𑀯𑀺𑀴𑀸𑀭𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀫𑀓𑁆𑀔𑀺𑀓𑀸𑀬 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀲𑀺, 𑀢𑀁 𑀢𑀲𑁆𑀲 𑀅𑀦𑁆𑀢𑁄𑀲𑀭𑀻𑀭𑁂𑀬𑁂𑀯 𑀅𑀳𑁄𑀲𑀺. 𑀲𑁄 𑀢𑁂𑀦 𑀓𑀸𑀭𑀡𑁂𑀦 𑀅𑀫𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀓𑁆𑀔𑀬𑁂𑀦𑁂𑀯 𑀫𑀭𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦 𑀫𑀢𑁄. 𑀭𑀸𑀚𑀸 𑀢𑀸𑀧𑀲𑁂 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀉𑀪𑁄𑀧𑀺 𑀉𑀬𑁆𑀬𑀸𑀦𑁂 𑀯𑀲𑀸𑀧𑁂𑀦𑁆𑀢𑁄 𑀧𑀝𑀺𑀚𑀕𑁆𑀕𑀺, 𑀢𑀢𑁄 𑀧𑀝𑁆𑀞𑀸𑀬 𑀫𑀡𑁆𑀟𑀩𑁆𑀬𑁄 𑀆𑀡𑀺𑀫𑀡𑁆𑀟𑀩𑁆𑀬𑁄 𑀦𑀸𑀫 𑀚𑀸𑀢𑁄. 𑀲𑁄 𑀭𑀸𑀚𑀸𑀦𑀁 𑀉𑀧𑀦𑀺𑀲𑁆𑀲𑀸𑀬 𑀢𑀢𑁆𑀣𑁂𑀯 𑀯𑀲𑀺, 𑀤𑀻𑀧𑀸𑀬𑀦𑁄 𑀧𑀦 𑀢𑀲𑁆𑀲 𑀯𑀡𑀁 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑀺𑀳𑀺𑀲𑀳𑀸𑀬𑀫𑀡𑁆𑀟𑀩𑁆𑀬𑀲𑁆𑀲 𑀲𑀦𑁆𑀢𑀺𑀓𑀫𑁂𑀯 𑀕𑀢𑁄.

𑀢𑀁 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀏𑀓𑁄 𑀧𑀼𑀭𑀺𑀲𑁄 𑀲𑀳𑀸𑀬𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀲𑀼𑀢𑁆𑀯𑀸𑀯 𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀧𑀼𑀢𑁆𑀢𑀤𑀸𑀭𑁄 𑀩𑀳𑀽 𑀕𑀦𑁆𑀥𑀫𑀸𑀮𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀆𑀤𑀸𑀬 𑀢𑀁 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀤𑀻𑀧𑀸𑀬𑀦𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀧𑀸𑀦𑀓𑀁 𑀧𑀸𑀬𑁂𑀢𑁆𑀯𑀸 𑀆𑀡𑀺𑀫𑀡𑁆𑀟𑀩𑁆𑀬𑀲𑁆𑀲 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀬𑀜𑁆𑀜𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀺, 𑀢𑀢𑁆𑀭 𑀘𑁂𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀆𑀲𑀻𑀯𑀺𑀲𑁄 𑀯𑀲𑀢𑀺. 𑀓𑀼𑀫𑀸𑀭𑀲𑁆𑀲 𑀪𑀽𑀫𑀺𑀬𑀁 𑀧𑀳𑀝𑀕𑁂𑀡𑁆𑀟𑀼𑀓𑁄 𑀕𑀦𑁆𑀢𑁆𑀯𑀸 𑀯𑀫𑁆𑀫𑀺𑀓𑀩𑀺𑀮𑁂 𑀆𑀲𑀻𑀯𑀺𑀲𑀲𑁆𑀲 𑀫𑀢𑁆𑀣𑀓𑁂 𑀧𑀢𑀺. 𑀲𑁄 𑀅𑀚𑀸𑀦𑀦𑁆𑀢𑁄 𑀩𑀺𑀮𑁂 𑀳𑀢𑁆𑀣𑀁 𑀧𑀯𑁂𑀲𑁂𑀲𑀺. 𑀅𑀣 𑀦𑀁 𑀓𑀼𑀤𑁆𑀥𑁄 𑀆𑀲𑀻𑀯𑀺𑀲𑁄 𑀳𑀢𑁆𑀣𑁂 𑀟𑀁𑀲𑀺. 𑀲𑁄 𑀯𑀺𑀲𑀯𑁂𑀕𑁂𑀦 𑀫𑀼𑀘𑁆𑀙𑀺𑀢𑁄 𑀢𑀢𑁆𑀣𑁂𑀯 𑀧𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ¶ 𑀲𑀧𑁆𑀧𑁂𑀦 𑀟𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀓𑀼𑀫𑀸𑀭𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀑𑀲𑀥𑀁 𑀯𑀸 𑀧𑀭𑀺𑀢𑁆𑀢𑀁 𑀯𑀸 𑀚𑀸𑀦𑀦𑁆𑀢𑀺, 𑀧𑀼𑀢𑁆𑀢𑀓𑀁 𑀦𑁄 𑀆𑀭𑁄𑀕𑀁 𑀓𑀭𑁄𑀣𑀸’’𑀢𑀺 𑀆𑀳𑀁𑀲𑀼. 𑀅𑀳𑀁 𑀑𑀲𑀥𑀁 𑀦 𑀚𑀸𑀦𑀸𑀫𑀺, 𑀦𑀸𑀳𑀁 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. ‘‘𑀢𑁂𑀦 𑀳𑀺 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀓𑀼𑀫𑀸𑀭𑀓𑁂 𑀫𑁂𑀢𑁆𑀢𑀁 𑀓𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀣𑀸’’𑀢𑀺 ¶ 𑀯𑀼𑀢𑁆𑀢𑁂 𑀢𑀸𑀧𑀲𑁄 ‘‘𑀲𑀸𑀥𑀼, 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀬𑀜𑁆𑀜𑀤𑀢𑁆𑀢𑀲𑁆𑀲 𑀲𑀻𑀲𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁨.

‘‘𑀲𑀢𑁆𑀢𑀸𑀳𑀫𑁂𑀯𑀸𑀳𑀁 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀆𑀘𑀭𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀅𑀣𑀸𑀧𑀭𑀁 𑀬𑀁 𑀘𑀭𑀺𑀢𑀁 𑀫𑀫𑁂𑀤𑀁, 𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺;

𑀅𑀓𑀸𑀫𑀓𑁄𑀯𑀸𑀧𑀺 𑀅𑀳𑀁 𑀘𑀭𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄’’𑀢𑀺.

𑀢𑀢𑁆𑀣 ¶ 𑀅𑀣𑀸𑀧𑀭𑀁 𑀬𑀁 𑀘𑀭𑀺𑀢𑀦𑁆𑀢𑀺 𑀢𑀲𑁆𑀫𑀸 𑀲𑀢𑁆𑀢𑀸𑀳𑀸 𑀉𑀢𑁆𑀢𑀭𑀺 𑀬𑀁 𑀫𑀫 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀅𑀓𑀸𑀫𑀓𑁄𑀯𑀸𑀧𑀻𑀢𑀺 𑀧𑀩𑁆𑀩𑀚𑁆𑀚𑀁 𑀅𑀦𑀺𑀘𑁆𑀙𑀦𑁆𑀢𑁄𑀬𑁂𑀯. 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺 𑀲𑀘𑁂 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀯𑀲𑁆𑀲𑀸𑀦𑀺 𑀅𑀦𑀪𑀺𑀭𑀢𑀺𑀯𑀸𑀲𑀁 𑀯𑀲𑀦𑁆𑀢𑁂𑀦 𑀫𑀬𑀸 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑀺𑀢𑀪𑀸𑀯𑁄 𑀲𑀘𑁆𑀘𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀬𑀜𑁆𑀜𑀤𑀢𑁆𑀢𑀓𑀼𑀫𑀸𑀭𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄 𑀳𑁄𑀢𑀼, 𑀚𑀻𑀯𑀺𑀢𑀁 𑀧𑀝𑀺𑀮𑀪𑀢𑀽𑀢𑀺.

𑀅𑀣𑀲𑁆𑀲 𑀲𑀳 𑀲𑀘𑁆𑀘𑀓𑀺𑀭𑀺𑀬𑀸𑀬 𑀬𑀜𑁆𑀜𑀤𑀢𑁆𑀢𑀲𑁆𑀲 𑀣𑀦𑀧𑁆𑀧𑀤𑁂𑀲𑀢𑁄 𑀉𑀤𑁆𑀥𑀁 𑀯𑀺𑀲𑀁 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀓𑀼𑀫𑀸𑀭𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸’’𑀢𑀺 𑀯𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀧𑀺𑀢𑀭𑀁 𑀓𑀡𑁆𑀳𑀤𑀻𑀧𑀸𑀬𑀦𑁄 𑀆𑀳 𑁋 ‘‘𑀫𑀬𑀸 𑀢𑀸𑀯 𑀫𑀫 𑀩𑀮𑀁 𑀓𑀢𑀁, 𑀢𑁆𑀯𑀫𑁆𑀧𑀺 𑀅𑀢𑁆𑀢𑀦𑁄 𑀩𑀮𑀁 𑀓𑀭𑁄𑀳𑀻’’𑀢𑀺. 𑀲𑁄 ‘‘𑀅𑀳𑀫𑁆𑀧𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀢𑁆𑀢𑀲𑁆𑀲 𑀉𑀭𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁩.

‘‘𑀬𑀲𑁆𑀫𑀸 𑀤𑀸𑀦𑀁 𑀦𑀸𑀪𑀺𑀦𑀦𑁆𑀤𑀺𑀁 𑀓𑀤𑀸𑀘𑀺, 𑀤𑀺𑀲𑁆𑀯𑀸𑀦𑀳𑀁 𑀅𑀢𑀺𑀣𑀺𑀁 𑀯𑀸𑀲𑀓𑀸𑀮𑁂;

𑀦 ¶ 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀼𑀁, 𑀩𑀳𑀼𑀲𑁆𑀲𑀼𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;

𑀅𑀓𑀸𑀫𑀓𑁄𑀯𑀸𑀧𑀺 𑀅𑀳𑀁 𑀤𑀤𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄’’𑀢𑀺.

𑀢𑀢𑁆𑀣 𑀯𑀸𑀲𑀓𑀸𑀮𑁂𑀢𑀺 𑀯𑀲𑀦𑀢𑁆𑀣𑀸𑀬 𑀕𑁂𑀳𑀁 𑀆𑀕𑀢𑀓𑀸𑀮𑁂. 𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀼𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀅𑀬𑀁 𑀦𑁂𑀯 𑀤𑀸𑀦𑀁 𑀅𑀪𑀺𑀦𑀦𑁆𑀤𑀢𑀺 ¶ 𑀦 𑀅𑀫𑁆𑀳𑁂’’𑀢𑀺 𑀇𑀫𑀁 𑀫𑀫 𑀅𑀧𑁆𑀧𑀺𑀬𑀪𑀸𑀯𑀁 𑀦𑁂𑀯 𑀚𑀸𑀦𑀺𑀁𑀲𑀼. 𑀅𑀳𑀜𑁆𑀳𑀺 𑀢𑁂 𑀧𑀺𑀬𑀘𑀓𑁆𑀔𑀽𑀳𑀺𑀬𑁂𑀯 𑀑𑀮𑁄𑀓𑁂𑀫𑀻𑀢𑀺 𑀤𑀻𑀧𑁂𑀢𑀺. 𑀏𑀢𑁂𑀦 𑀲𑀘𑁆𑀘𑁂𑀦𑀸𑀢𑀺 𑀲𑀘𑁂 𑀅𑀳𑀁 𑀤𑀸𑀦𑀁 𑀤𑀤𑀫𑀸𑀦𑁄 𑀯𑀺𑀧𑀸𑀓𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑀺𑀘𑁆𑀙𑀸𑀬 𑀤𑀫𑁆𑀫𑀺, 𑀅𑀦𑀺𑀘𑁆𑀙𑀦𑀪𑀸𑀯𑀁 𑀫𑀫 𑀧𑀭𑁂 𑀦 𑀚𑀸𑀦𑀦𑁆𑀢𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑀲𑁆𑀲 𑀲𑀘𑁆𑀘𑀓𑀺𑀭𑀺𑀬𑀸𑀬 𑀲𑀳 𑀓𑀝𑀺𑀢𑁄 𑀉𑀤𑁆𑀥𑀁 𑀯𑀺𑀲𑀁 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀓𑀼𑀫𑀸𑀭𑁄 𑀉𑀝𑁆𑀞𑀸𑀬 𑀦𑀺𑀲𑀻𑀤𑀺, 𑀞𑀸𑀢𑀼𑀁 𑀧𑀦 𑀦 𑀲𑀓𑁆𑀓𑁄𑀢𑀺. 𑀅𑀣𑀲𑁆𑀲 𑀧𑀺𑀢𑀸 𑀫𑀸𑀢𑀭𑀁 𑀆𑀳 ‘‘𑀪𑀤𑁆𑀤𑁂, 𑀫𑀬𑀸 𑀅𑀢𑁆𑀢𑀦𑁄 𑀩𑀮𑀁 𑀓𑀢𑀁, 𑀢𑁆𑀯𑀁 𑀇𑀤𑀸𑀦𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀉𑀝𑁆𑀞𑀸𑀬 𑀕𑀫𑀦𑀪𑀸𑀯𑀁 𑀓𑀭𑁄𑀳𑀻’’𑀢𑀺. ‘‘𑀲𑀸𑀫𑀺, 𑀅𑀢𑁆𑀣𑀺 𑀫𑀬𑁆𑀳𑀁 𑀏𑀓𑀁 𑀲𑀘𑁆𑀘𑀁, 𑀢𑀯 𑀧𑀦 𑀲𑀦𑁆𑀢𑀺𑀓𑁂 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. ‘‘𑀪𑀤𑁆𑀤𑁂, 𑀬𑀣𑀸 𑀢𑀣𑀸 𑀫𑁂 𑀧𑀼𑀢𑁆𑀢𑀁 𑀅𑀭𑁄𑀕𑀁 𑀓𑀭𑁄𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀘𑁆𑀘𑀁 𑀓𑀭𑁄𑀦𑁆𑀢𑀻 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁪.

‘‘𑀆𑀲𑀻𑀯𑀺𑀲𑁄 ¶ 𑀢𑀸𑀢 𑀧𑀳𑀽𑀢𑀢𑁂𑀚𑁄, 𑀬𑁄 𑀢𑀁 𑀅𑀟𑀁𑀲𑀻 𑀩𑀺𑀮𑀭𑀸 𑀉𑀤𑀺𑀘𑁆𑀘;

𑀢𑀲𑁆𑀫𑀺𑀜𑁆𑀘 𑀫𑁂 𑀅𑀧𑁆𑀧𑀺𑀬𑀢𑀸𑀬 𑀅𑀚𑁆𑀚, 𑀧𑀺𑀢𑀭𑀜𑁆𑀘 𑀢𑁂 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼, 𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄’’𑀢𑀺.

𑀢𑀢𑁆𑀣 𑀢𑀸𑀢𑀸𑀢𑀺 𑀧𑀼𑀢𑁆𑀢𑀁 𑀆𑀮𑀧𑀢𑀺. 𑀧𑀳𑀽𑀢𑀢𑁂𑀚𑁄𑀢𑀺 𑀩𑀮𑀯𑀯𑀺𑀲𑁄. 𑀩𑀺𑀮𑀭𑀸𑀢𑀺 𑀯𑀺𑀯𑀭𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀉𑀤𑀺𑀘𑁆𑀘𑀸𑀢𑀺 𑀉𑀝𑁆𑀞𑀳𑀺𑀢𑁆𑀯𑀸, 𑀯𑀫𑁆𑀫𑀺𑀓𑀩𑀺𑀮𑀢𑁄 𑀉𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀺𑀢𑀭𑀜𑁆𑀘 𑀢𑁂𑀢𑀺 𑀧𑀺𑀢𑀭𑀺 𑀘 𑀢𑁂. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀬𑀫𑁂𑀯 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀢𑀸𑀢, 𑀬𑀜𑁆𑀜𑀤𑀢𑁆𑀢 𑀢𑀲𑁆𑀫𑀺𑀜𑁆𑀘 𑀆𑀲𑀻𑀯𑀺𑀲𑁂 𑀢𑀯 𑀧𑀺𑀢𑀭𑀺 ¶ 𑀘 𑀅𑀧𑁆𑀧𑀺𑀬𑀪𑀸𑀯𑁂𑀦 𑀫𑀬𑁆𑀳𑀁 𑀓𑁄𑀘𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀢𑀜𑁆𑀘 𑀧𑀦 𑀅𑀧𑁆𑀧𑀺𑀬𑀪𑀸𑀯𑀁 𑀞𑀧𑁂𑀢𑁆𑀯𑀸 𑀅𑀚𑁆𑀚 𑀫𑀬𑀸 𑀓𑁄𑀘𑀺 𑀚𑀸𑀦𑀸𑀧𑀺𑀢𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺, 𑀲𑀘𑁂 𑀏𑀢𑀁 𑀲𑀘𑁆𑀘𑀁, 𑀏𑀢𑁂𑀦 𑀲𑀘𑁆𑀘𑁂𑀦 𑀢𑀯 𑀲𑁄𑀢𑁆𑀣𑀺 𑀳𑁄𑀢𑀽’’𑀢𑀺.

𑀲𑀳 𑀘 𑀲𑀘𑁆𑀘𑀓𑀺𑀭𑀺𑀬𑀸𑀬 𑀲𑀩𑁆𑀩𑀁 𑀯𑀺𑀲𑀁 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀬𑀜𑁆𑀜𑀤𑀢𑁆𑀢𑁄 𑀦𑀺𑀩𑁆𑀩𑀺𑀲𑁂𑀦 𑀲𑀭𑀻𑀭𑁂𑀦 𑀉𑀝𑁆𑀞𑀸𑀬 𑀓𑀻𑀴𑀺𑀢𑀼𑀁 𑀆𑀭𑀤𑁆𑀥𑁄. 𑀏𑀯𑀁 𑀧𑀼𑀢𑁆𑀢𑁂 𑀉𑀝𑁆𑀞𑀺𑀢𑁂 𑀫𑀡𑁆𑀟𑀩𑁆𑀬𑁄 𑀤𑀻𑀧𑀸𑀬𑀦𑀲𑁆𑀲 𑀅𑀚𑁆𑀛𑀸𑀲𑀬𑀁 𑀧𑀼𑀘𑁆𑀙𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁬𑁫.

‘‘𑀲𑀦𑁆𑀢𑀸 ¶ 𑀤𑀦𑁆𑀢𑀸𑀬𑁂𑀯 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀜𑁆𑀜𑀢𑁆𑀭 𑀓𑀡𑁆𑀳𑀸 𑀦𑀢𑁆𑀣𑀸𑀓𑀸𑀫𑀭𑀽𑀧𑀸;

𑀤𑀻𑀧𑀸𑀬𑀦 𑀓𑀺𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀘𑀭𑀲𑀺 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀓𑁂𑀘𑀺 𑀔𑀢𑁆𑀢𑀺𑀬𑀸𑀤𑀬𑁄 𑀓𑀸𑀫𑁂 𑀧𑀳𑀸𑀬 𑀇𑀥 𑀮𑁄𑀓𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀅𑀜𑁆𑀜𑀢𑁆𑀭 𑀓𑀡𑁆𑀳𑀸 𑀪𑀯𑀦𑁆𑀢𑀁 𑀓𑀡𑁆𑀳𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀅𑀓𑀸𑀫𑀭𑀽𑀧𑀸 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀛𑀸𑀦𑀪𑀸𑀯𑀦𑀸𑀬 𑀓𑀺𑀮𑁂𑀲𑀸𑀦𑀁 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑀸, 𑀘𑀓𑁆𑀔𑀸𑀤𑀻𑀦𑀺 𑀤𑁆𑀯𑀸𑀭𑀸𑀦𑀺 𑀬𑀣𑀸 𑀦𑀺𑀩𑁆𑀩𑀺𑀲𑁂𑀯𑀦𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀢𑁂𑀲𑀁 𑀤𑀫𑀺𑀢𑀢𑁆𑀢𑀸 𑀤𑀦𑁆𑀢𑀸 𑀳𑀼𑀢𑁆𑀯𑀸 𑀅𑀪𑀺𑀭𑀢𑀸𑀯 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀢𑁆𑀯𑀁 𑀧𑀦 𑀪𑀦𑁆𑀢𑁂 𑀤𑀻𑀧𑀸𑀬𑀦, 𑀓𑀺𑀁𑀓𑀸𑀭𑀡𑀸 𑀢𑀧𑀁 𑀚𑀺𑀕𑀼𑀘𑁆𑀙𑀫𑀸𑀦𑁄 𑀅𑀓𑀸𑀫𑀓𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀺, 𑀓𑀲𑁆𑀫𑀸 𑀧𑀼𑀦 𑀦 𑀅𑀕𑀸𑀭𑀫𑁂𑀯 𑀅𑀚𑁆𑀛𑀸𑀯𑀲𑀲𑀻𑀢𑀺.

𑀅𑀣𑀲𑁆𑀲 𑀲𑁄 𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁬𑁬.

‘‘𑀲𑀤𑁆𑀥𑀸𑀬 𑀦𑀺𑀓𑁆𑀔𑀫𑁆𑀫 𑀧𑀼𑀦𑀁 𑀦𑀺𑀯𑀢𑁆𑀢𑁄, 𑀲𑁄 𑀏𑀴𑀫𑀽𑀕𑁄𑀯 𑀩𑀸𑀮𑁄 𑀯𑀢𑀸𑀬𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀘𑀭𑀸𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀜𑁆𑀘 𑀲𑀢𑀜𑁆𑀘 𑀞𑀸𑀦𑀁, 𑀏𑀯𑀫𑁆𑀧𑀳𑀁 𑀧𑀼𑀜𑁆𑀜𑀓𑀭𑁄 𑀪𑀯𑀸𑀫𑀻’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀓𑀡𑁆𑀳𑁄 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀢𑀸𑀯 𑀫𑀳𑀦𑁆𑀢𑀁 𑀯𑀺𑀪𑀯𑀁 𑀧𑀳𑀸𑀬 𑀅𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀁 𑀚𑀳𑀺, 𑀧𑀼𑀦 𑀢𑀤𑀢𑁆𑀣𑀫𑁂𑀯 𑀦𑀺𑀯𑀢𑁆𑀢𑁄. 𑀲𑁄 𑀅𑀬𑀁 𑀏𑀴𑀫𑀽𑀕𑁄 𑀕𑀸𑀫𑀤𑀸𑀭𑀓𑁄 𑀯𑀺𑀬 𑀩𑀸𑀮𑁄 𑀯𑀢𑀸𑀢𑀺 𑀇𑀫𑀁 𑀯𑀸𑀤𑀁 𑀚𑀺𑀕𑀼𑀘𑁆𑀙𑀫𑀸𑀦𑁄 𑀅𑀳𑀁 𑀅𑀢𑁆𑀢𑀦𑁄 𑀳𑀺𑀭𑁄𑀢𑁆𑀢𑀧𑁆𑀧𑀪𑁂𑀤𑀪𑀬𑁂𑀦 𑀅𑀦𑀺𑀘𑁆𑀙𑀫𑀸𑀦𑁄𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀧𑀩𑁆𑀩𑀚𑁆𑀚𑀸𑀧𑀼𑀜𑁆𑀜𑀜𑁆𑀘 𑀦𑀸𑀫𑁂𑀢𑀁 𑀯𑀺𑀜𑁆𑀜𑀽𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑀁, 𑀢𑁂𑀲𑀁𑀬𑁂𑀯 𑀘 𑀲𑀢𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀏𑀯𑀁 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀅𑀳𑀁 𑀧𑀼𑀜𑁆𑀜𑀓𑀭𑁄 𑀪𑀯𑀸𑀫𑀺, 𑀅𑀲𑁆𑀲𑀼𑀫𑀼𑀔𑁄𑀧𑀺 𑀭𑀼𑀤𑀫𑀸𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺𑀬𑁂𑀯𑀸𑀢𑀺.

𑀏𑀯𑀁 ¶ 𑀲𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀫𑀡𑁆𑀟𑀩𑁆𑀬𑀁 𑀧𑀼𑀘𑁆𑀙𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁬𑁭.

‘‘𑀲𑀫𑀡𑁂 ¶ 𑀢𑀼𑀯𑀁 𑀩𑁆𑀭𑀸𑀳𑁆𑀫𑀡𑁂 𑀅𑀤𑁆𑀥𑀺𑀓𑁂 𑀘, 𑀲𑀦𑁆𑀢𑀧𑁆𑀧𑀬𑀸𑀲𑀺 𑀅𑀦𑁆𑀦𑀧𑀸𑀦𑁂𑀦 𑀪𑀺𑀓𑁆𑀔𑀁;

𑀑𑀧𑀸𑀦𑀪𑀽𑀢𑀁𑀯 𑀖𑀭𑀁 𑀢𑀯 𑀬𑀺𑀤𑀁, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑁂𑀢𑀭𑀽𑀧𑀁;

𑀅𑀣 𑀓𑀺𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀤𑀸𑀦𑀫𑀺𑀫𑀁 𑀤𑀤𑀸𑀲𑀻’’𑀢𑀺.

𑀢𑀢𑁆𑀣 𑀪𑀺𑀓𑁆𑀔𑀦𑁆𑀢𑀺 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀸𑀦𑀁 𑀪𑀺𑀓𑁆𑀔𑀜𑁆𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑀤𑀸𑀲𑀺. 𑀑𑀧𑀸𑀦𑀪𑀽𑀢𑀁𑀯𑀸𑀢𑀺 𑀘𑀢𑀼𑀫𑀳𑀸𑀧𑀣𑁂 𑀔𑀢𑀲𑀸𑀥𑀸𑀭𑀡𑀧𑁄𑀓𑁆𑀔𑀭𑀡𑀻 𑀯𑀺𑀬.

𑀢𑀢𑁄 𑀫𑀡𑁆𑀟𑀩𑁆𑀬𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀓𑀣𑁂𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁬𑁮.

‘‘𑀧𑀺𑀢𑀭𑁄 𑀘 𑀫𑁂 𑀆𑀲𑀼𑀁 𑀧𑀺𑀢𑀸𑀫𑀳𑀸 𑀘, 𑀲𑀤𑁆𑀥𑀸 𑀅𑀳𑀼𑀁 𑀤𑀸𑀦𑀧𑀢𑀻 𑀯𑀤𑀜𑁆𑀜𑀽;

𑀢𑀁 𑀓𑀼𑀮𑁆𑀮𑀯𑀢𑁆𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑁄, 𑀫𑀸𑀳𑀁 𑀓𑀼𑀮𑁂 𑀅𑀦𑁆𑀢𑀺𑀫𑀕𑀦𑁆𑀥𑀦𑁄 𑀅𑀳𑀼𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑁄, 𑀅𑀓𑀸𑀫𑀓𑁄 𑀤𑀸𑀦𑀫𑀺𑀫𑀁 𑀤𑀤𑀸𑀫𑀻’’𑀢𑀺.

𑀢𑀢𑁆𑀣 ‘‘𑀆𑀲𑀼’’𑀦𑁆𑀢𑀺 𑀧𑀤𑀲𑁆𑀲 ‘‘𑀲𑀤𑁆𑀥𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀲𑀤𑁆𑀥𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀳𑀼𑀦𑁆𑀢𑀺 𑀲𑀤𑁆𑀥𑀸 𑀳𑀼𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀤𑀸𑀦𑀚𑁂𑀝𑁆𑀞𑀓𑀸 𑀘𑁂𑀯 ‘‘𑀤𑁂𑀣 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀅𑀢𑁆𑀣𑀚𑀸𑀦𑀦𑀓𑀸 𑀘 𑀅𑀳𑁂𑀲𑀼𑀁. 𑀢𑀁 𑀓𑀼𑀮𑁆𑀮𑀯𑀢𑁆𑀢𑀦𑁆𑀢𑀺 𑀢𑀁 𑀓𑀼𑀮𑀯𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀬𑀫𑁂𑀯 𑀧𑀸𑀞𑁄. 𑀫𑀸𑀳𑀁 𑀓𑀼𑀮𑁂 𑀅𑀦𑁆𑀢𑀺𑀫𑀕𑀦𑁆𑀥𑀦𑁄 𑀅𑀳𑀼𑀦𑁆𑀢𑀺 ‘‘𑀅𑀳𑀁 𑀅𑀢𑁆𑀢𑀦𑁄 𑀓𑀼𑀮𑁂 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀘𑁂𑀯 𑀓𑀼𑀮𑀧𑀮𑀸𑀧𑁄 𑀘 𑀫𑀸 𑀅𑀳𑀼’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀢𑀁 ‘‘𑀓𑀼𑀮𑀅𑀦𑁆𑀢𑀺𑀫𑁄 𑀓𑀼𑀮𑀧𑀮𑀸𑀧𑁄’’𑀢𑀺 𑀯𑀸𑀤𑀁 𑀚𑀺𑀕𑀼𑀘𑁆𑀙𑀫𑀸𑀦𑁄 𑀤𑀸𑀦𑀁 𑀅𑀦𑀺𑀘𑁆𑀙𑀦𑁆𑀢𑁄𑀧𑀺 𑀇𑀤𑀁 𑀤𑀸𑀦𑀁 𑀤𑀤𑀸𑀫𑀻𑀢𑀺 𑀤𑀻𑀧𑁂𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀫𑀡𑁆𑀟𑀩𑁆𑀬𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀧𑀼𑀘𑁆𑀙𑀫𑀸𑀦𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁯.

‘‘𑀤𑀳𑀭𑀺𑀁 ¶ ¶ ¶ 𑀓𑀼𑀫𑀸𑀭𑀺𑀁 𑀅𑀲𑀫𑀢𑁆𑀣𑀧𑀜𑁆𑀜𑀁, 𑀬𑀁 𑀢𑀸𑀦𑀬𑀺𑀁 𑀜𑀸𑀢𑀺𑀓𑀼𑀮𑀸 𑀲𑀼𑀕𑀢𑁆𑀢𑁂;

𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀺, 𑀅𑀜𑁆𑀜𑀢𑁆𑀭 𑀓𑀸𑀫𑀸 𑀧𑀭𑀺𑀘𑀸𑀭𑀬𑀦𑁆𑀢𑀸;

𑀅𑀣 𑀓𑁂𑀦 𑀯𑀡𑁆𑀡𑁂𑀦 𑀫𑀬𑀸 𑀢𑁂 𑀪𑁄𑀢𑀺, 𑀲𑀁𑀯𑀸𑀲𑀥𑀫𑁆𑀫𑁄 𑀅𑀳𑀼 𑀏𑀯𑀭𑀽𑀧𑁄’’𑀢𑀺.

𑀢𑀢𑁆𑀣 𑀅𑀲𑀫𑀢𑁆𑀣𑀧𑀜𑁆𑀜𑀦𑁆𑀢𑀺 𑀓𑀼𑀝𑀼𑀫𑁆𑀩𑀁 𑀯𑀺𑀘𑀸𑀭𑁂𑀢𑀼𑀁 𑀅𑀧𑁆𑀧𑀝𑀺𑀩𑀮𑀧𑀜𑁆𑀜𑀁 𑀅𑀢𑀺𑀢𑀭𑀼𑀡𑀺𑀜𑁆𑀜𑁂𑀯 𑀲𑀫𑀸𑀦𑀁. 𑀬𑀁 𑀢𑀸𑀦𑀬𑀺𑀦𑁆𑀢𑀺 𑀬𑀁 𑀢𑀁 𑀆𑀦𑀬𑀺𑀁, 𑀅𑀳𑀁 𑀤𑀳𑀭𑀺𑀫𑁂𑀯 𑀲𑀫𑀸𑀦𑀁 𑀢𑀁 𑀜𑀸𑀢𑀺𑀓𑀼𑀮𑀢𑁄 𑀆𑀦𑁂𑀲𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀓𑀸𑀫𑀸 𑀧𑀭𑀺𑀘𑀸𑀭𑀬𑀦𑁆𑀢𑀸𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀺𑀦𑀸 𑀓𑀸𑀫𑁂𑀦 𑀅𑀦𑀺𑀘𑁆𑀙𑀸𑀬 𑀫𑀁 𑀧𑀭𑀺𑀘𑀸𑀭𑀬𑀦𑁆𑀢𑀸𑀧𑀺 𑀅𑀢𑁆𑀢𑀦𑁄 𑀅𑀧𑁆𑀧𑀺𑀬𑀢𑀁 𑀫𑀁 𑀦 𑀚𑀸𑀦𑀸𑀧𑁂𑀲𑀺, 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸𑀯 𑀧𑀭𑀺𑀘𑀭𑀺. 𑀓𑁂𑀦 𑀯𑀡𑁆𑀡𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀪𑁄𑀢𑀻𑀢𑀺 𑀢𑀁 𑀆𑀮𑀧𑀢𑀺. 𑀏𑀯𑀭𑀽𑀧𑁄𑀢𑀺 𑀆𑀲𑀻𑀯𑀺𑀲𑀲𑀫𑀸𑀦𑀧𑀝𑀺𑀓𑀽𑀮𑀪𑀸𑀯𑁂𑀦 𑀫𑀬𑀸 𑀲𑀤𑁆𑀥𑀺𑀁 𑀢𑀯 𑀲𑀁𑀯𑀸𑀲𑀥𑀫𑁆𑀫𑁄 𑀏𑀯𑀭𑀽𑀧𑁄 𑀧𑀺𑀬𑀲𑀁𑀯𑀸𑀲𑁄 𑀯𑀺𑀬 𑀓𑀣𑀁 𑀚𑀸𑀢𑁄𑀢𑀺.

𑀅𑀣𑀲𑁆𑀲 𑀲𑀸 𑀓𑀣𑁂𑀦𑁆𑀢𑀻 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁭𑁦.

‘‘𑀆𑀭𑀸 𑀤𑀽𑀭𑁂 𑀦𑀬𑀺𑀥 𑀓𑀤𑀸𑀘𑀺 𑀅𑀢𑁆𑀣𑀺, 𑀧𑀭𑀫𑁆𑀧𑀭𑀸 𑀦𑀸𑀫 𑀓𑀼𑀮𑁂 𑀇𑀫𑀲𑁆𑀫𑀺𑀁;

𑀢𑀁 𑀓𑀼𑀮𑁆𑀮𑀯𑀢𑁆𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑀸, 𑀫𑀸𑀳𑀁 𑀓𑀼𑀮𑁂 𑀅𑀦𑁆𑀢𑀺𑀫𑀕𑀦𑁆𑀥𑀺𑀦𑀻 𑀅𑀳𑀼𑀁;

𑀏𑀢𑀲𑁆𑀲 𑀯𑀸𑀤𑀲𑁆𑀲 𑀚𑀺𑀕𑀼𑀘𑁆𑀙𑀫𑀸𑀦𑀸, 𑀅𑀓𑀸𑀫𑀺𑀓𑀸 𑀧𑀤𑁆𑀥𑀘𑀭𑀸𑀫𑁆𑀳𑀺 𑀢𑀼𑀬𑁆𑀳’’𑀦𑁆𑀢𑀺.

𑀢𑀢𑁆𑀣 𑀆𑀭𑀸 𑀤𑀽𑀭𑁂𑀢𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀁. 𑀅𑀢𑀺𑀤𑀽𑀭𑁂𑀢𑀺 𑀯𑀸 𑀤𑀲𑁆𑀲𑁂𑀦𑁆𑀢𑀻 𑀏𑀯𑀫𑀸𑀳. 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀦 𑀓𑀤𑀸𑀘𑀻𑀢𑀺 𑀅𑀢𑁆𑀣𑁄. 𑀧𑀭𑀫𑁆𑀧𑀭𑀸𑀢𑀺 𑀧𑀼𑀭𑀺𑀲𑀧𑀭𑀫𑁆𑀧𑀭𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀅𑀫𑁆𑀳𑀸𑀓𑀁 𑀜𑀸𑀢𑀺𑀓𑀼𑀮𑁂 𑀤𑀽𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀧𑀼𑀭𑀺𑀲𑀧𑀭𑀫𑁆𑀧𑀭𑀸 𑀦𑀸𑀫 𑀦 𑀓𑀤𑀸𑀘𑀺 𑀅𑀢𑁆𑀣𑀺, 𑀏𑀓𑀺𑀢𑁆𑀣𑀺𑀬𑀸𑀧𑀺 𑀲𑀸𑀫𑀺𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀕𑀳𑀺𑀢𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀻𑀢𑀺. 𑀢𑀁 𑀓𑀼𑀮𑁆𑀮𑀯𑀢𑁆𑀢𑀦𑁆𑀢𑀺 𑀅𑀳𑀫𑁆𑀧𑀺 𑀢𑀁 𑀓𑀼𑀮𑀯𑀢𑁆𑀢𑀁 𑀓𑀼𑀮𑀧𑀯𑁂𑀡𑀺𑀁 𑀅𑀦𑀼𑀯𑀢𑁆𑀢𑀫𑀸𑀦𑀸 𑀅𑀢𑁆𑀢𑀦𑁄 𑀓𑀼𑀮𑁂 𑀧𑀘𑁆𑀙𑀺𑀫𑀺𑀓𑀸 𑀧𑀮𑀸𑀮𑀪𑀽𑀢𑀸 𑀫𑀸 𑀅𑀳𑀼𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀢𑀁 𑀓𑀼𑀮𑀅𑀦𑁆𑀢𑀺𑀫𑀸 ¶ 𑀓𑀼𑀮𑀕𑀦𑁆𑀥𑀺𑀦𑀻𑀢𑀺 𑀯𑀸𑀤𑀁 𑀚𑀺𑀕𑀼𑀘𑁆𑀙𑀫𑀸𑀦𑀸 𑀅𑀓𑀸𑀫𑀺𑀓𑀸𑀧𑀺 𑀢𑀼𑀬𑁆𑀳𑀁 𑀧𑀤𑁆𑀥𑀘𑀭𑀸𑀫𑁆𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀸𑀭𑀺𑀓𑀸 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀚𑀸𑀢𑀸𑀫𑁆𑀳𑀻𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 ‘‘𑀫𑀬𑀸 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀪𑀸𑀲𑀺𑀢𑀧𑀼𑀩𑁆𑀩𑀁 𑀕𑀼𑀬𑁆𑀳𑀁 𑀪𑀸𑀲𑀺𑀢𑀁, 𑀓𑀼𑀚𑁆𑀛𑁂𑀬𑁆𑀬𑀧𑀺 𑀫𑁂 𑀅𑀬𑀁, 𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑀸𑀧𑀲𑀲𑁆𑀲 𑀲𑀫𑁆𑀫𑀼𑀔𑁂𑀬𑁂𑀯 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀻 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁭𑁧.

‘‘𑀫𑀡𑁆𑀟𑀩𑁆𑀬 ¶ 𑀪𑀸𑀲𑀺𑀁 𑀬𑀫𑀪𑀸𑀲𑀦𑁂𑀬𑁆𑀬𑀁, 𑀢𑀁 𑀔𑀫𑁆𑀬𑀢𑀁 𑀧𑀼𑀢𑁆𑀢𑀓𑀳𑁂𑀢𑀼 𑀫𑀚𑁆𑀚;

𑀧𑀼𑀢𑁆𑀢𑀧𑁂𑀫𑀸 𑀦 𑀇𑀥 𑀧𑀭𑀢𑁆𑀣𑀺 𑀓𑀺𑀜𑁆𑀘𑀺, 𑀲𑁄 𑀦𑁄 𑀅𑀬𑀁 𑀚𑀻𑀯𑀢𑀺 𑀬𑀜𑁆𑀜𑀤𑀢𑁆𑀢𑁄’’𑀢𑀺.

𑀢𑀢𑁆𑀣 𑀢𑀁 𑀔𑀫𑁆𑀬𑀢𑀦𑁆𑀢𑀺 𑀢𑀁 𑀔𑀫𑀬𑀢𑀼. 𑀧𑀼𑀢𑁆𑀢𑀓𑀳𑁂𑀢𑀼 𑀫𑀚𑁆𑀚𑀸𑀢𑀺 𑀢𑀁 𑀫𑀫 𑀪𑀸𑀲𑀺𑀢𑀁 𑀅𑀚𑁆𑀚 𑀇𑀫𑀲𑁆𑀲 𑀧𑀼𑀢𑁆𑀢𑀲𑁆𑀲 𑀳𑁂𑀢𑀼 𑀔𑀫𑀬𑀢𑀼. 𑀲𑁄 𑀦𑁄 𑀅𑀬𑀦𑁆𑀢𑀺 𑀬𑀲𑁆𑀲 𑀧𑀼𑀢𑁆𑀢𑀲𑁆𑀲 𑀓𑀸𑀭𑀡𑀸 𑀫𑀬𑀸 𑀏𑀢𑀁 𑀪𑀸𑀲𑀺𑀢𑀁, 𑀲𑁄 𑀦𑁄 𑀧𑀼𑀢𑁆𑀢𑁄 𑀚𑀻𑀯𑀢𑀺, 𑀇𑀫𑀲𑁆𑀲 𑀚𑀻𑀯𑀺𑀢𑀮𑀸𑀪𑀪𑀸𑀯𑁂𑀦 𑀫𑁂 𑀔𑀫 𑀲𑀸𑀫𑀺, 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀢𑀯 𑀯𑀲𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀸𑀫𑀻𑀢𑀺.

𑀅𑀣 𑀦𑀁 𑀫𑀡𑁆𑀟𑀩𑁆𑀬𑁄 ‘‘𑀉𑀝𑁆𑀞𑁂𑀳𑀺 𑀪𑀤𑁆𑀤𑁂, 𑀔𑀫𑀸𑀫𑀺 𑀢𑁂, 𑀇𑀢𑁄 𑀧𑀦 𑀧𑀝𑁆𑀞𑀸𑀬 𑀫𑀸 𑀨𑀭𑀼𑀲𑀘𑀺𑀢𑁆𑀢𑀸 𑀅𑀳𑁄𑀲𑀺, 𑀅𑀳𑀫𑁆𑀧𑀺 𑀢𑁂 𑀅𑀧𑁆𑀧𑀺𑀬𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀫𑀡𑁆𑀟𑀩𑁆𑀬𑀁 𑀆𑀳 𑁋 ‘‘𑀆𑀯𑀼𑀲𑁄, 𑀢𑀬𑀸 𑀤𑀼𑀲𑁆𑀲𑀗𑁆𑀖𑀭𑀁 𑀥𑀦𑀁 𑀲𑀗𑁆𑀖𑀭𑀺𑀢𑁆𑀯𑀸 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀅𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀦𑀁 𑀤𑀤𑀦𑁆𑀢𑁂𑀦 𑀅𑀬𑀼𑀢𑁆𑀢𑀁 𑀓𑀢𑀁, 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀢𑀬𑀸 𑀅𑀫𑁆𑀳𑀸𑀓𑀁 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂 𑀞𑀢𑁆𑀯𑀸 𑀅𑀦𑀪𑀺𑀭𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑁂𑀦 𑀅𑀬𑀼𑀢𑁆𑀢𑀁 𑀓𑀢𑀁, 𑀇𑀢𑁄 𑀧𑀝𑁆𑀞𑀸𑀬 𑀇𑀤𑀸𑀦𑀺 𑀬𑀣𑀸 𑀢𑀬𑀺 𑀓𑀢𑀓𑀸𑀭𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁄 𑀅𑀪𑀺𑀭𑀢𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀳𑀻’’𑀢𑀺. 𑀢𑁂 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀅𑀕𑀫𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀪𑀭𑀺𑀬𑀸 𑀲𑀸𑀫𑀺𑀓𑁂 𑀲𑀲𑁆𑀦𑁂𑀳𑀸 𑀅𑀳𑁄𑀲𑀺, 𑀫𑀡𑁆𑀟𑀩𑁆𑀬𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀤𑁆𑀥𑀸𑀬 𑀤𑀸𑀦𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺 ¶ . 𑀢𑀤𑀸 𑀫𑀡𑁆𑀟𑀩𑁆𑀬𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀪𑀭𑀺𑀬𑀸 ¶ 𑀯𑀺𑀲𑀸𑀔𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀆𑀡𑀺𑀫𑀡𑁆𑀟𑀩𑁆𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀓𑀡𑁆𑀳𑀤𑀻𑀧𑀸𑀬𑀦𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀓𑀡𑁆𑀳𑀤𑀻𑀧𑀸𑀬𑀦𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁪𑁫] 𑁭. 𑀦𑀺𑀕𑁆𑀭𑁄𑀥𑀚𑀸𑀢𑀓𑀯𑀡𑁆𑀡𑀦𑀸

𑀦 𑀯𑀸𑀳𑀫𑁂𑀢𑀁 𑀚𑀸𑀦𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀪𑀺𑀓𑁆𑀔𑀽 𑀢𑁂𑀦 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀲𑀢𑁆𑀣𑀸 𑀢𑀯 𑀩𑀳𑀽𑀧𑀓𑀸𑀭𑁄, 𑀢𑁆𑀯𑀜𑁆𑀳𑀺 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀁 𑀮𑀪𑀺 𑀉𑀧𑀲𑀫𑁆𑀧𑀤𑀁 𑀮𑀪𑀺, 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀲𑀺, 𑀮𑀸𑀪𑀲𑀓𑁆𑀓𑀸𑀭𑁄𑀧𑀺 ¶ 𑀢𑁂 𑀤𑀲𑀩𑀮𑀲𑁆𑀲𑁂𑀯 𑀲𑀦𑁆𑀢𑀓𑁄’’𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑁂 𑀢𑀺𑀡𑀲𑀮𑀸𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀢𑁆𑀢𑀓𑀫𑁆𑀧𑀺 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀫𑀬𑁆𑀳𑀁 𑀓𑀢𑀁 𑀕𑀼𑀡𑀁 𑀦 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀭𑀸𑀚𑀕𑀳𑁂 𑀫𑀕𑀥𑀫𑀳𑀸𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀭𑀸𑀚𑀕𑀳𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀚𑀦𑀧𑀤𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀆𑀦𑁂𑀲𑀺, 𑀲𑀸 𑀯𑀜𑁆𑀛𑀸 𑀅𑀳𑁄𑀲𑀺. 𑀅𑀣𑀲𑁆𑀲𑀸 𑀅𑀧𑀭𑀪𑀸𑀕𑁂 𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺. ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀲𑁆𑀲 𑀕𑁂𑀳𑁂 𑀯𑀜𑁆𑀛𑀺𑀢𑁆𑀣𑀺𑀬𑀸 𑀯𑀲𑀦𑁆𑀢𑀺𑀬𑀸 𑀓𑀣𑀁 𑀓𑀼𑀮𑀯𑀁𑀲𑁄 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀬𑀣𑀸 𑀲𑀸 𑀲𑀼𑀡𑀸𑀢𑀺, 𑀏𑀯𑀫𑁆𑀧𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀲𑀸 𑀢𑀁 𑀲𑀼𑀢𑁆𑀯𑀸 ‘‘𑀳𑁄𑀢𑀼 𑀕𑀩𑁆𑀪𑀺𑀦𑀺𑀆𑀮𑀬𑀁 𑀓𑀢𑁆𑀯𑀸 𑀏𑀢𑁂 𑀯𑀜𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀘𑀸𑀭𑀺𑀓𑀁 𑀥𑀸𑀢𑀺𑀁 𑀆𑀳 ‘‘𑀅𑀫𑁆𑀫, 𑀕𑀩𑁆𑀪𑀺𑀦𑀺𑀬𑁄 𑀦𑀸𑀫 𑀓𑀺𑀜𑁆𑀘 𑀓𑀺𑀜𑁆𑀘 𑀓𑀭𑁄𑀦𑁆𑀢𑀻’’𑀢𑀺 𑀕𑀩𑁆𑀪𑀺𑀦𑀺𑀧𑀭𑀺𑀳𑀸𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀉𑀢𑀼𑀦𑀺𑀓𑀸𑀮𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀫𑁆𑀩𑀺𑀮𑀸𑀤𑀺𑀭𑀼𑀘𑀺𑀓𑀸 𑀳𑀼𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀦𑀁 𑀉𑀤𑁆𑀥𑀼𑀫𑀸𑀬𑀦𑀓𑀸𑀮𑁂 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑁄 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀩𑀳𑀮𑀁 𑀓𑀸𑀭𑁂𑀲𑀺, 𑀤𑀺𑀯𑀲𑁂 𑀤𑀺𑀯𑀲𑁂𑀧𑀺 𑀧𑀺𑀮𑁄𑀢𑀺𑀓𑀸𑀯𑁂𑀞𑀦𑁂𑀦 𑀘 𑀉𑀤𑀭𑀯𑀟𑁆𑀠𑀦𑀁 𑀯𑀟𑁆𑀠𑁂𑀲𑀺, 𑀣𑀦𑀫𑀼𑀔𑀸𑀦𑀺 𑀓𑀸𑀴𑀸𑀦𑀺 𑀓𑀸𑀭𑁂𑀲𑀺, 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀧𑀺 𑀅𑀜𑁆𑀜𑀢𑁆𑀭 𑀢𑀲𑁆𑀲𑀸 𑀥𑀸𑀢𑀺𑀬𑀸 𑀅𑀜𑁆𑀜𑁂𑀲𑀁 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀦 𑀓𑀭𑁄𑀢𑀺. 𑀲𑀸𑀫𑀺𑀓𑁄𑀧𑀺𑀲𑁆𑀲𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀏𑀯𑀁 𑀦𑀯 𑀫𑀸𑀲𑁂 𑀯𑀲𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀚𑀦𑀧𑀤𑁂 𑀧𑀺𑀢𑀼 𑀖𑀭𑀁 𑀕𑀦𑁆𑀢𑁆𑀯𑀸 𑀯𑀺𑀚𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀲𑀲𑀼𑀭𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀭𑀣𑀫𑀸𑀭𑀼𑀳𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 ¶ 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀲𑀸 𑀧𑀦 𑀧𑀼𑀭𑀢𑁄 𑀏𑀓𑁄 𑀲𑀢𑁆𑀣𑁄 𑀕𑀘𑁆𑀙𑀢𑀺. 𑀲𑀢𑁆𑀣𑁂𑀦 𑀯𑀲𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀁 𑀏𑀲𑀸 𑀧𑀸𑀢𑀭𑀸𑀲𑀓𑀸𑀮𑁂 𑀧𑀸𑀧𑀼𑀡𑀸𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀲𑀢𑁆𑀣𑁂 𑀏𑀓𑀸 𑀤𑀼𑀕𑁆𑀕𑀢𑀺𑀢𑁆𑀣𑀻 𑀭𑀢𑁆𑀢𑀺𑀬𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀧𑀸𑀢𑁄𑀯 𑀲𑀢𑁆𑀣𑁂 𑀕𑀘𑁆𑀙𑀦𑁆𑀢𑁂 ‘‘𑀅𑀳𑀁 𑀯𑀺𑀦𑀸 𑀲𑀢𑁆𑀣𑁂𑀦 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀲𑀓𑁆𑀓𑀸 𑀔𑁄 𑀧𑀦 𑀚𑀻𑀯𑀦𑁆𑀢𑀺𑀬𑀸 𑀧𑀼𑀢𑁆𑀢𑀁 𑀮𑀪𑀺𑀢𑀼’’𑀦𑁆𑀢𑀺 𑀦𑀺𑀕𑁆𑀭𑁄𑀥𑀫𑀽𑀮𑀚𑀸𑀮𑁂 𑀚𑀮𑀸𑀩𑀼𑀜𑁆𑀘𑁂𑀯 𑀕𑀩𑁆𑀪𑀫𑀮𑀜𑁆𑀘 𑀅𑀢𑁆𑀣𑀭𑀺𑀢𑁆𑀯𑀸 𑀧𑀼𑀢𑁆𑀢𑀁 𑀙𑀝𑁆𑀝𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀤𑀸𑀭𑀓𑀲𑁆𑀲𑀧𑀺 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀲𑁄 𑀳𑀺 𑀦 𑀬𑁄 𑀯𑀸 𑀲𑁄 𑀯𑀸, 𑀩𑁄𑀥𑀺𑀲𑀢𑁆𑀢𑁄𑀬𑁂𑀯. 𑀲𑁄 𑀧𑀦 𑀢𑀤𑀸 𑀢𑀸𑀤𑀺𑀲𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀇𑀢𑀭𑀸 𑀧𑀸𑀢𑀭𑀸𑀲𑀓𑀸𑀮𑁂 𑀢𑀁 𑀞𑀸𑀦𑀁 𑀧𑀢𑁆𑀯𑀸 ‘‘𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀬 𑀥𑀸𑀢𑀺𑀬𑀸 𑀲𑀤𑁆𑀥𑀺𑀁 𑀦𑀺𑀕𑁆𑀭𑁄𑀥𑀫𑀽𑀮𑀁 𑀕𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀫, 𑀦𑀺𑀧𑁆𑀨𑀦𑁆𑀦𑀁 𑀦𑁄 𑀓𑀺𑀘𑁆𑀘’’𑀦𑁆𑀢𑀺 𑀧𑀺𑀮𑁄𑀢𑀺𑀓𑀸𑀬𑁄 𑀅𑀧𑀦𑁂𑀢𑁆𑀯𑀸 𑀉𑀘𑁆𑀙𑀗𑁆𑀕𑀧𑀤𑁂𑀲𑀁 𑀮𑁄𑀳𑀺𑀢𑁂𑀦 𑀘 𑀕𑀩𑁆𑀪𑀫𑀮𑁂𑀦 𑀘 𑀫𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀆𑀭𑁄𑀘𑁂𑀲𑀺. 𑀢𑀸𑀯𑀤𑁂𑀯 𑀦𑀁 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀲𑀧𑀭𑀺𑀚𑀦𑁄 𑀭𑀸𑀚𑀕𑀳𑀁 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀅𑀣𑀲𑁆𑀲𑀸 𑀲𑀲𑁆𑀲𑀼𑀲𑀲𑀼𑀭𑀸 𑀯𑀺𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀧𑀺𑀢𑀼 𑀓𑀼𑀮𑁂 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀇𑀥𑁂𑀯 𑀆𑀕𑀘𑁆𑀙𑀢𑀽’’𑀢𑀺 𑀧𑁂𑀲𑀬𑀺𑀁𑀲𑀼. 𑀲𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 ¶ 𑀭𑀸𑀚𑀕𑀳𑀫𑁂𑀯 𑀧𑀸𑀯𑀺𑀲𑀺. 𑀢𑀢𑁆𑀣 𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀸𑀭𑀓𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀸 𑀦𑀺𑀕𑁆𑀭𑁄𑀥𑀫𑀽𑀮𑁂 𑀚𑀸𑀢𑀢𑁆𑀢𑀸 ‘‘𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀅𑀦𑀼𑀲𑁂𑀝𑁆𑀞𑀺𑀲𑀼𑀡𑀺𑀲𑀸𑀧𑀺 𑀯𑀺𑀚𑀸𑀬𑀦𑀢𑁆𑀣𑀸𑀬 𑀓𑀼𑀮𑀖𑀭𑀁 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀺𑀲𑁆𑀲𑀸 𑀭𑀼𑀓𑁆𑀔𑀲𑀸𑀔𑀸𑀬 𑀳𑁂𑀝𑁆𑀞𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀲𑀸𑀔𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀁 𑀤𑀺𑀯𑀲𑀜𑁆𑀜𑁂𑀯 𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀲𑁆𑀲 𑀢𑀼𑀦𑁆𑀦𑀓𑀸𑀭𑀲𑁆𑀲 𑀪𑀭𑀺𑀬𑀸𑀧𑀺 𑀧𑀺𑀮𑁄𑀢𑀺𑀓𑀦𑁆𑀢𑀭𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀧𑁄𑀢𑁆𑀢𑀺𑀓𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼.

𑀫𑀳𑀸𑀲𑁂𑀝𑁆𑀞𑀺 𑀉𑀪𑁄𑀧𑀺 𑀢𑁂 𑀤𑀸𑀭𑀓𑁂 ‘‘𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑀲𑁆𑀲 𑀚𑀸𑀢𑀤𑀺𑀯𑀲𑀜𑁆𑀜𑁂𑀯 𑀚𑀸𑀢𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀲𑀁𑀯𑀟𑁆𑀠𑁂𑀲𑀺. 𑀢𑁂 𑀏𑀓𑀢𑁄 𑀯𑀟𑁆𑀠𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀉𑀪𑁄𑀧𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀆𑀘𑀭𑀺𑀬𑀲𑁆𑀲 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀅𑀤𑀁𑀲𑀼. 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄 ¶ 𑀧𑁄𑀢𑁆𑀢𑀺𑀓𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀲𑀺. 𑀢𑁂 𑀦𑀺𑀧𑁆𑀨𑀦𑁆𑀦𑀲𑀺𑀧𑁆𑀧𑀸 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸 ‘‘𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀸𑀮𑀓𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄, ‘‘𑀲𑁆𑀯𑁂 𑀨𑀼𑀲𑁆𑀲𑀭𑀣𑀁 𑀬𑁄𑀚𑁂𑀲𑁆𑀲𑀸𑀫𑀸’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀢𑁂𑀲𑀼𑀧𑀺 𑀲𑀳𑀸𑀬𑁂𑀲𑀼 𑀭𑀼𑀓𑁆𑀔𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀲𑀼 𑀧𑁄𑀢𑁆𑀢𑀺𑀓𑁄 ¶ 𑀧𑀘𑁆𑀘𑀽𑀲𑀓𑀸𑀮𑁂 𑀉𑀝𑁆𑀞𑀸𑀬 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑀲𑁆𑀲 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀯𑀼𑀢𑁆𑀣𑀓𑀼𑀓𑁆𑀓𑀼𑀝𑁂𑀲𑀼 𑀉𑀧𑀭𑀺𑀓𑀼𑀓𑁆𑀓𑀼𑀝𑁄 𑀳𑁂𑀝𑁆𑀞𑀸𑀓𑀼𑀓𑁆𑀓𑀼𑀝𑀲𑁆𑀲 𑀲𑀭𑀻𑀭𑁂 𑀯𑀘𑁆𑀘𑀁 𑀧𑀸𑀢𑁂𑀲𑀺. 𑀅𑀣 𑀦𑀁 𑀲𑁄 ‘‘𑀓𑁂𑀦𑁂𑀢𑀁 𑀧𑀸𑀢𑀺𑀢’’𑀦𑁆𑀢𑀺 𑀆𑀳. ‘‘𑀲𑀫𑁆𑀫, 𑀫𑀸 𑀓𑀼𑀚𑁆𑀛𑀺, 𑀫𑀬𑀸 𑀅𑀚𑀸𑀦𑀦𑁆𑀢𑁂𑀦 𑀧𑀸𑀢𑀺𑀢’’𑀦𑁆𑀢𑀺 𑀆𑀳. ‘‘𑀅𑀭𑁂, 𑀢𑁆𑀯𑀁 𑀫𑀫 𑀲𑀭𑀻𑀭𑀁 𑀅𑀢𑁆𑀢𑀦𑁄 𑀯𑀘𑁆𑀘𑀝𑁆𑀞𑀸𑀦𑀁 𑀫𑀜𑁆𑀜𑀲𑀺, 𑀓𑀺𑀁 𑀫𑀫 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀻’’𑀢𑀺. 𑀅𑀣 𑀦𑀁 𑀇𑀢𑀭𑁄 ‘‘𑀅𑀭𑁂 𑀢𑁆𑀯𑀁 ‘𑀅𑀚𑀸𑀦𑀦𑁆𑀢𑁂𑀦 𑀫𑁂 𑀓𑀢’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀓𑀼𑀚𑁆𑀛𑀲𑀺𑀬𑁂𑀯, 𑀓𑀺𑀁 𑀧𑀦 𑀢𑁂 𑀧𑀫𑀸𑀡’’𑀦𑁆𑀢𑀺 𑀆𑀳. ‘‘𑀬𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀢𑀺, 𑀲𑁄 𑀧𑀸𑀢𑁄𑀯 𑀲𑀳𑀲𑁆𑀲𑀁 𑀮𑀪𑀢𑀺, 𑀢𑀲𑁆𑀫𑀸 𑀅𑀳𑀁 𑀫𑀸𑀦𑀁 𑀓𑀭𑁄𑀫𑀻’’𑀢𑀺. 𑀅𑀣 𑀦𑀁 𑀇𑀢𑀭𑁄 ‘‘𑀅𑀭𑁂 𑀏𑀢𑁆𑀢𑀓𑀫𑀢𑁆𑀢𑁂𑀦 𑀢𑁆𑀯𑀁 𑀫𑀸𑀦𑀁 𑀓𑀭𑁄𑀲𑀺, 𑀫𑀁 𑀧𑀦 𑀫𑀸𑀭𑁂𑀢𑁆𑀯𑀸 𑀬𑁄 𑀣𑀽𑀮𑀫𑀁𑀲𑀁 𑀔𑀸𑀤𑀢𑀺, 𑀲𑁄 𑀧𑀸𑀢𑁄𑀯 𑀭𑀸𑀚𑀸 𑀳𑁄𑀢𑀺, 𑀬𑁄 𑀫𑀚𑁆𑀛𑀺𑀫𑀫𑀁𑀲𑀁 𑀔𑀸𑀤𑀢𑀺, 𑀲𑁄 𑀲𑁂𑀦𑀸𑀧𑀢𑀺, 𑀬𑁄 𑀅𑀝𑁆𑀞𑀺𑀦𑀺𑀲𑁆𑀲𑀺𑀢𑀁 𑀔𑀸𑀤𑀢𑀺, 𑀲𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀳𑁄𑀢𑀻’’𑀢𑀺 𑀆𑀳.

𑀧𑁄𑀢𑁆𑀢𑀺𑀓𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑁄 𑀲𑀳𑀲𑁆𑀲𑁂𑀦, 𑀭𑀚𑁆𑀚𑀫𑁂𑀯 𑀯𑀭’’𑀦𑁆𑀢𑀺 𑀲𑀡𑀺𑀓𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀧𑀭𑀺𑀲𑀬𑀺𑀢𑀓𑀼𑀓𑁆𑀓𑀼𑀝𑀁 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀅𑀗𑁆𑀕𑀸𑀭𑁂 𑀧𑀘𑀺𑀢𑁆𑀯𑀸 𑀣𑀽𑀮𑀫𑀁𑀲𑀁 𑀦𑀺𑀕𑁆𑀭𑁄𑀥𑀲𑁆𑀲 𑀅𑀤𑀸𑀲𑀺, 𑀫𑀚𑁆𑀛𑀺𑀫𑀫𑀁𑀲𑀁 𑀲𑀸𑀔𑀲𑁆𑀲 𑀅𑀤𑀸𑀲𑀺, 𑀅𑀝𑁆𑀞𑀺𑀫𑀁𑀲𑀁 𑀅𑀢𑁆𑀢𑀦𑀸 𑀔𑀸𑀤𑀺. 𑀔𑀸𑀤𑀺𑀢𑁆𑀯𑀸 𑀧𑀦 ‘‘𑀲𑀫𑁆𑀫 𑀦𑀺𑀕𑁆𑀭𑁄𑀥, 𑀢𑁆𑀯𑀁 𑀅𑀚𑁆𑀚 𑀭𑀸𑀚𑀸 𑀪𑀯𑀺𑀲𑁆𑀲𑀲𑀺, 𑀲𑀫𑁆𑀫 𑀲𑀸𑀔, 𑀢𑁆𑀯𑀁 𑀲𑁂𑀦𑀸𑀧𑀢𑀺 𑀪𑀯𑀺𑀲𑁆𑀲𑀲𑀺, 𑀅𑀳𑀁 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑀁 𑀚𑀸𑀦𑀸𑀲𑀻’’𑀢𑀺 𑀧𑀼𑀝𑁆𑀞𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑁂 𑀢𑀬𑁄𑀧𑀺 𑀚𑀦𑀸 𑀧𑀸𑀢𑀭𑀸𑀲𑀯𑁂𑀮𑀸𑀬 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀲𑀧𑁆𑀧𑀺𑀲𑀓𑁆𑀓𑀭𑀬𑀼𑀢𑁆𑀢𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 ¶ 𑀧𑀯𑀺𑀲𑀺𑀁𑀲𑀼. 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄 𑀲𑀺𑀮𑀸𑀧𑀝𑁆𑀝𑁂 𑀦𑀺𑀧𑀚𑁆𑀚𑀺 ¶ , 𑀇𑀢𑀭𑁂 𑀤𑁆𑀯𑁂 𑀩𑀳𑀺 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀅𑀦𑁆𑀢𑁄 𑀞𑀧𑁂𑀢𑁆𑀯𑀸 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑀢𑁆𑀣 𑀯𑀺𑀢𑁆𑀣𑀸𑀭𑀓𑀣𑀸 𑀫𑀳𑀸𑀚𑀦𑀓𑀚𑀸𑀢𑀓𑁂 (𑀚𑀸. 𑁨.𑁨𑁨.𑁧𑁨𑁩 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀨𑀼𑀲𑁆𑀲𑀭𑀣𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀭𑁄𑀳𑀦𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀼𑀭𑁄𑀳𑀺𑀢𑁄 ‘‘𑀉𑀬𑁆𑀬𑀸𑀦𑁂 𑀧𑀼𑀜𑁆𑀜𑀯𑀢𑀸 𑀲𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀧𑀸𑀤𑀦𑁆𑀢𑀢𑁄 𑀲𑀸𑀝𑀓𑀁 𑀅𑀧𑀦𑁂𑀢𑁆𑀯𑀸 𑀧𑀸𑀤𑁂𑀲𑀼 𑀮𑀓𑁆𑀔𑀡𑀸𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀢𑀺𑀝𑁆𑀞𑀢𑀼 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁, 𑀲𑀓𑀮𑀚𑀫𑁆𑀩𑀼𑀤𑀻𑀧𑀲𑁆𑀲 𑀅𑀥𑀺𑀧𑀢𑀺𑀭𑀸𑀚𑀸 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀲𑀩𑁆𑀩𑀢𑀸𑀮𑀸𑀯𑀘𑀭𑁂 𑀧𑀕𑁆𑀕𑀡𑁆𑀳𑀸𑀧𑁂𑀲𑀺. 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀫𑀼𑀔𑀢𑁄 𑀲𑀸𑀝𑀓𑀁 𑀅𑀧𑀦𑁂𑀢𑁆𑀯𑀸 𑀫𑀳𑀸𑀚𑀦𑀁 𑀑𑀮𑁄𑀓𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀣 ¶ 𑀦𑀁 𑀧𑀼𑀭𑁄𑀳𑀺𑀢𑁄 𑀚𑀡𑁆𑀡𑀼𑀦𑀸 𑀧𑀢𑀺𑀝𑁆𑀞𑀸𑀬 ‘‘𑀭𑀚𑁆𑀚𑀁 𑀢𑁂 𑀤𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 ‘‘‘𑀲𑀸𑀥𑀽’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣𑁂𑀯 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺. 𑀲𑁄 𑀭𑀚𑁆𑀚𑀁 𑀧𑀢𑁆𑀯𑀸 𑀲𑀸𑀔𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀦𑀕𑀭𑀁 𑀧𑀸𑀯𑀺𑀲𑀺, 𑀧𑁄𑀢𑁆𑀢𑀺𑀓𑁄𑀧𑀺 𑀢𑁂𑀳𑀺 𑀲𑀤𑁆𑀥𑀺𑀜𑁆𑀜𑁂𑀯 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺.

𑀲𑁄 𑀏𑀓𑀤𑀺𑀯𑀲𑀁 𑀫𑀸𑀢𑀸𑀧𑀺𑀢𑀽𑀦𑀁 𑀲𑀭𑀺𑀢𑁆𑀯𑀸 𑀲𑀸𑀔𑀁 𑀆𑀳 𑁋 ‘‘𑀲𑀫𑁆𑀫, 𑀦 𑀲𑀓𑁆𑀓𑀸 𑀫𑀸𑀢𑀸𑀧𑀺𑀢𑀽𑀳𑀺 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁, 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀦𑁄 𑀆𑀦𑁂𑀳𑀻’’𑀢𑀺. 𑀲𑀸𑀔𑁄 ‘‘𑀦 𑀫𑁂 𑀢𑀢𑁆𑀣 𑀕𑀫𑀦𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀧𑁄𑀢𑁆𑀢𑀺𑀓𑀁 𑀆𑀡𑀸𑀧𑁂𑀲𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀧𑀼𑀢𑁆𑀢𑁄 𑀯𑁄 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄, 𑀏𑀣 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀢𑁂 ‘‘𑀅𑀢𑁆𑀣𑀺 𑀦𑁄 𑀢𑀸𑀯 𑀯𑀺𑀪𑀯𑀫𑀢𑁆𑀢𑀁, 𑀅𑀮𑀁 𑀢𑀢𑁆𑀣 𑀕𑀫𑀦𑁂𑀦𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼. 𑀲𑀸𑀔𑀲𑁆𑀲𑀧𑀺 𑀫𑀸𑀢𑀸𑀧𑀺𑀢𑀭𑁄 𑀅𑀯𑁄𑀘, 𑀢𑁂𑀧𑀺 𑀦 𑀇𑀘𑁆𑀙𑀺𑀁𑀲𑀼. 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀭𑁄 𑀅𑀯𑁄𑀘, ‘‘𑀫𑀬𑀁 𑀢𑀸𑀢 𑀢𑀼𑀦𑁆𑀦𑀓𑀸𑀭𑀓𑀫𑁆𑀫𑁂𑀦 𑀚𑀻𑀯𑀺𑀲𑁆𑀲𑀸𑀫 𑀅𑀮’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀢𑁂𑀲𑀁 𑀫𑀦𑀁 𑀅𑀮𑀪𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 ‘‘𑀲𑁂𑀦𑀸𑀧𑀢𑀺𑀲𑁆𑀲 𑀖𑀭𑁂 𑀫𑀕𑁆𑀕𑀓𑀺𑀮𑀫𑀣𑀁 𑀯𑀺𑀦𑁄𑀤𑁂𑀢𑁆𑀯𑀸 𑀧𑀘𑁆𑀙𑀸 𑀦𑀺𑀕𑁆𑀭𑁄𑀥𑀲𑀳𑀸𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀲𑀳𑀸𑀬𑁄 𑀓𑀺𑀭 ¶ 𑀢𑁂 𑀧𑁄𑀢𑁆𑀢𑀺𑀓𑁄 𑀦𑀸𑀫 𑀆𑀕𑀢𑁄𑀢𑀺 𑀲𑁂𑀦𑀸𑀧𑀢𑀺𑀲𑁆𑀲 𑀆𑀭𑁄𑀘𑁂𑀳𑀻’’𑀢𑀺 𑀤𑁄𑀯𑀸𑀭𑀺𑀓𑀁 𑀆𑀳, 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀸𑀔𑁄 𑀧𑀦 ‘‘𑀅𑀬𑀁 𑀫𑀬𑁆𑀳𑀁 𑀭𑀚𑁆𑀚𑀁 𑀅𑀤𑀢𑁆𑀯𑀸 𑀲𑀳𑀸𑀬𑀦𑀺𑀕𑁆𑀭𑁄𑀥𑀲𑁆𑀲 𑀅𑀤𑀸𑀲𑀻’’𑀢𑀺 𑀢𑀲𑁆𑀫𑀺𑀁 𑀯𑁂𑀭𑀁 𑀩𑀦𑁆𑀥𑀺. 𑀲𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸𑀯 𑀓𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 ‘‘𑀓𑁄 𑀇𑀫𑀲𑁆𑀲 𑀲𑀳𑀸𑀬𑁄 𑀉𑀫𑁆𑀫𑀢𑁆𑀢𑀓𑁄 𑀤𑀸𑀲𑀺𑀧𑀼𑀢𑁆𑀢𑁄, 𑀕𑀡𑁆𑀳𑀣 𑀦’’𑀦𑁆𑀢𑀺 𑀯𑀢𑁆𑀯𑀸 𑀳𑀢𑁆𑀣𑀧𑀸𑀤𑀚𑀡𑁆𑀡𑀼𑀓𑀧𑁆𑀧𑀭𑁂𑀳𑀺 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺.

𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀸𑀔𑁄 𑀫𑀫 𑀲𑀦𑁆𑀢𑀺𑀓𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻, 𑀫𑀁 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺, 𑀦𑀺𑀕𑁆𑀭𑁄𑀥𑁄 𑀧𑀦 𑀧𑀡𑁆𑀟𑀺𑀢𑁄 𑀓𑀢𑀜𑁆𑀜𑀽 𑀲𑀧𑁆𑀧𑀼𑀭𑀺𑀲𑁄, 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀧𑁄𑀢𑁆𑀢𑀺𑀓𑁄 𑀓𑀺𑀭 𑀦𑀸𑀫 𑀢𑁂 𑀲𑀳𑀸𑀬𑁄 𑀤𑁆𑀯𑀸𑀭𑁂 𑀞𑀺𑀢𑁄’’𑀢𑀺 ¶ 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀫𑀲𑁆𑀲𑀼𑀓𑀫𑁆𑀫𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀦 𑀧𑀭𑀺𑀪𑀼𑀢𑁆𑀢𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀲𑀼𑀔𑀦𑀺𑀲𑀺𑀦𑁆𑀦𑁄 𑀫𑀸𑀢𑀸𑀧𑀺𑀢𑀽𑀦𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀸𑀕𑀫𑀦𑀪𑀸𑀯𑀁 𑀲𑀼𑀡𑀺. 𑀲𑀸𑀔𑁄𑀧𑀺 ‘‘𑀧𑁄𑀢𑁆𑀢𑀺𑀓𑁄 𑀫𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀧𑀭𑀺𑀪𑀺𑀦𑁆𑀤𑁂𑀬𑁆𑀬 ¶ , 𑀫𑀬𑀺 𑀧𑀦 𑀕𑀢𑁂 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀧𑁄𑀢𑁆𑀢𑀺𑀓𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀤𑁂𑀯, 𑀅𑀳𑀁 𑀫𑀕𑁆𑀕𑀓𑀺𑀮𑀦𑁆𑀢𑁄 ‘𑀲𑀸𑀔𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀇𑀥𑀸𑀕𑀫𑀺𑀲𑁆𑀲𑀸𑀫𑀻’𑀢𑀺 𑀅𑀕𑀫𑀺𑀁. 𑀅𑀣 𑀫𑀁 𑀲𑀸𑀔𑁄 ‘𑀦𑀸𑀳𑀁 𑀢𑀁 𑀚𑀸𑀦𑀸𑀫𑀻’𑀢𑀺 𑀯𑀢𑁆𑀯𑀸 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀻𑀢𑀺 𑀲𑀤𑁆𑀤𑀳𑁂𑀬𑁆𑀬𑀸𑀲𑀺 𑀢𑁆𑀯𑀁 𑀏𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁨.

‘‘𑀦 𑀯𑀸𑀳𑀫𑁂𑀢𑀁 𑀚𑀸𑀦𑀸𑀫𑀺, 𑀓𑁄 𑀯𑀸𑀬𑀁 𑀓𑀲𑁆𑀲 𑀯𑀸𑀢𑀺 𑀯𑀸;

𑀬𑀣𑀸 𑀲𑀸𑀔𑁄 𑀯𑀤𑀺 𑀏𑀯, 𑀦𑀺𑀕𑁆𑀭𑁄𑀥 𑀓𑀺𑀦𑁆𑀢𑀺 𑀫𑀜𑁆𑀜𑀲𑀺.

𑁭𑁩.

‘‘𑀢𑀢𑁄 𑀕𑀮𑀯𑀺𑀦𑀻𑀢𑁂𑀦, 𑀧𑀼𑀭𑀺𑀲𑀸 𑀦𑀻𑀳𑀭𑀺𑀁𑀲𑀼 𑀫𑀁;

𑀤𑀢𑁆𑀯𑀸 𑀫𑀼𑀔𑀧𑀳𑀸𑀭𑀸𑀦𑀺, 𑀲𑀸𑀔𑀲𑁆𑀲 𑀯𑀘𑀦𑀁𑀓𑀭𑀸.

𑁭𑁪.

‘‘𑀏𑀢𑀸𑀤𑀺𑀲𑀁 𑀤𑀼𑀫𑁆𑀫𑀢𑀺𑀦𑀸, 𑀅𑀓𑀢𑀜𑁆𑀜𑀼𑀦 𑀤𑀼𑀩𑁆𑀪𑀺𑀦𑀸;

𑀓𑀢𑀁 𑀅𑀦𑀭𑀺𑀬𑀁 𑀲𑀸𑀔𑁂𑀦, 𑀲𑀔𑀺𑀦𑀸 𑀢𑁂 𑀚𑀦𑀸𑀥𑀺𑀧𑀸’’𑀢𑀺.

𑀢𑀢𑁆𑀣 ¶ 𑀓𑀺𑀦𑁆𑀢𑀺 𑀫𑀜𑁆𑀜𑀲𑀻𑀢𑀺 𑀬𑀣𑀸 𑀫𑀁 𑀲𑀸𑀔𑁄 𑀅𑀘𑀭𑀺, 𑀓𑀺𑀁 𑀢𑁆𑀯𑀫𑁆𑀧𑀺 𑀏𑀯𑀫𑁂𑀯 𑀫𑀜𑁆𑀜𑀲𑀺, 𑀉𑀤𑀸𑀳𑀼 𑀅𑀜𑁆𑀜𑀣𑀸 𑀫𑀜𑁆𑀜𑀲𑀺, 𑀫𑀁 𑀲𑀸𑀔𑁄 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀲𑀤𑁆𑀤𑀳𑀲𑀺, 𑀢𑀁 𑀦 𑀲𑀤𑁆𑀤𑀳𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀮𑀯𑀺𑀦𑀻𑀢𑁂𑀦𑀸𑀢𑀺 𑀕𑀮𑀕𑁆𑀕𑀸𑀳𑁂𑀦. 𑀤𑀼𑀩𑁆𑀪𑀺𑀦𑀸𑀢𑀺 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑀸.

𑀢𑀁 𑀲𑀼𑀢𑁆𑀯𑀸 𑀦𑀺𑀕𑁆𑀭𑁄𑀥𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁫.

‘‘𑀦 𑀯𑀸𑀳𑀫𑁂𑀢𑀁 𑀚𑀸𑀦𑀸𑀫𑀺, 𑀦𑀧𑀺 𑀫𑁂 𑀓𑁄𑀘𑀺 𑀲𑀁𑀲𑀢𑀺;

𑀬𑀁 𑀫𑁂 𑀢𑁆𑀯𑀁 𑀲𑀫𑁆𑀫 𑀅𑀓𑁆𑀔𑀸𑀲𑀺, 𑀲𑀸𑀔𑁂𑀦 𑀓𑀸𑀭𑀡𑀁 𑀓𑀢𑀁.

𑁭𑁬.

‘‘𑀲𑀔𑀻𑀦𑀁 𑀲𑀸𑀚𑀻𑀯𑀓𑀭𑁄, 𑀫𑀫 𑀲𑀸𑀔𑀲𑁆𑀲 𑀘𑀽𑀪𑀬𑀁;

𑀢𑁆𑀯𑀁 𑀦𑁄𑀲𑀺𑀲𑁆𑀲𑀭𑀺𑀬𑀁 𑀤𑀸𑀢𑀸, 𑀫𑀦𑀼𑀲𑁆𑀲𑁂𑀲𑀼 𑀫𑀳𑀦𑁆𑀢𑀢𑀁;

𑀢𑀬𑀸𑀫𑀸 𑀮𑀩𑁆𑀪𑀺𑀢𑀸 𑀇𑀤𑁆𑀥𑀻, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄.

𑁭𑁭.

‘‘𑀬𑀣𑀸𑀧𑀺 ¶ 𑀩𑀻𑀚𑀫𑀕𑁆𑀕𑀺𑀫𑁆𑀳𑀺, 𑀟𑀬𑁆𑀳𑀢𑀺 𑀦 𑀯𑀺𑀭𑀽𑀳𑀢𑀺;

𑀏𑀯𑀁 𑀓𑀢𑀁 𑀅𑀲𑀧𑁆𑀧𑀼𑀭𑀺𑀲𑁂, 𑀦𑀲𑁆𑀲𑀢𑀺 𑀦 𑀯𑀺𑀭𑀽𑀳𑀢𑀺.

𑁭𑁮.

‘‘𑀓𑀢𑀜𑁆𑀜𑀼𑀫𑁆𑀳𑀺 𑀘 𑀧𑁄𑀲𑀫𑁆𑀳𑀺, 𑀲𑀻𑀮𑀯𑀦𑁆𑀢𑁂 𑀅𑀭𑀺𑀬𑀯𑀼𑀢𑁆𑀢𑀺𑀦𑁂;

𑀲𑀼𑀔𑁂𑀢𑁆𑀢𑁂 𑀯𑀺𑀬 𑀩𑀻𑀚𑀸𑀦𑀺, 𑀓𑀢𑀁 𑀢𑀫𑁆𑀳𑀺 𑀦 𑀦𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀲𑀁𑀲𑀢𑀻𑀢𑀺 𑀆𑀘𑀺𑀓𑁆𑀔𑀢𑀺. 𑀓𑀸𑀭𑀡𑀁 𑀓𑀢𑀦𑁆𑀢𑀺 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀧𑁄𑀣𑀦𑀓𑁄𑀝𑁆𑀝𑀦𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀔𑀻𑀦𑀁 𑀲𑀸𑀚𑀻𑀯𑀓𑀭𑁄𑀢𑀺 𑀲𑀫𑁆𑀫, 𑀧𑁄𑀢𑁆𑀢𑀺𑀓 𑀢𑁆𑀯𑀁 𑀲𑀳𑀸𑀬𑀓𑀸𑀦𑀁 𑀲𑀼𑀆𑀚𑀻𑀯𑀓𑀭𑁄 𑀚𑀻𑀯𑀺𑀓𑀸𑀬 𑀉𑀧𑁆𑀧𑀸𑀤𑁂𑀢𑀸. 𑀫𑀫 𑀲𑀸𑀔𑀲𑁆𑀲 𑀘𑀽𑀪𑀬𑀦𑁆𑀢𑀺 𑀫𑀬𑁆𑀳𑀜𑁆𑀘 𑀲𑀸𑀔𑀲𑁆𑀲 𑀘 𑀉𑀪𑀺𑀦𑁆𑀦𑀫𑁆𑀧𑀺 𑀲𑀔𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁆𑀯𑀁 𑀦𑁄𑀲𑀺𑀲𑁆𑀲𑀭𑀺𑀬𑀦𑁆𑀢𑀺 𑀢𑁆𑀯𑀁 𑀦𑁄 𑀅𑀲𑀺 𑀇𑀲𑁆𑀲𑀭𑀺𑀬𑀁 𑀤𑀸𑀢𑀸, 𑀢𑀯 𑀲𑀦𑁆𑀢𑀺𑀓𑀸 𑀇𑀫𑀸 𑀲𑀫𑁆𑀧𑀢𑁆𑀢𑀻 𑀅𑀫𑁆𑀳𑁂𑀳𑀺 𑀮𑀤𑁆𑀥𑀸. 𑀫𑀳𑀦𑁆𑀢𑀢𑀦𑁆𑀢𑀺 𑀫𑀳𑀦𑁆𑀢𑀪𑀸𑀯𑀁.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀏𑀢𑁆𑀢𑀓𑀁 𑀓𑀣𑁂𑀦𑁆𑀢𑁂 𑀦𑀺𑀕𑁆𑀭𑁄𑀥𑁂 𑀲𑀸𑀔𑁄 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀲𑀸𑀔 𑀇𑀫𑀁 𑀧𑁄𑀢𑁆𑀢𑀺𑀓𑀁 𑀲𑀜𑁆𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣𑀲𑁆𑀲 𑀭𑀸𑀚𑀸 𑀤𑀡𑁆𑀟𑀁 𑀆𑀡𑀸𑀧𑁂𑀦𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁯.

‘‘𑀇𑀫𑀁 𑀚𑀫𑁆𑀫𑀁 𑀦𑁂𑀓𑀢𑀺𑀓𑀁, 𑀅𑀲𑀧𑁆𑀧𑀼𑀭𑀺𑀲𑀘𑀺𑀦𑁆𑀢𑀓𑀁;

𑀳𑀦𑀦𑁆𑀢𑀼 𑀲𑀸𑀔𑀁 𑀲𑀢𑁆𑀢𑀻𑀳𑀺, 𑀦𑀸𑀲𑁆𑀲 𑀇𑀘𑁆𑀙𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀚𑀫𑁆𑀫𑀦𑁆𑀢𑀺 𑀮𑀸𑀫𑀓𑀁. 𑀦𑁂𑀓𑀢𑀺𑀓𑀦𑁆𑀢𑀺 𑀯𑀜𑁆𑀘𑀓𑀁.

𑀢𑀁 𑀲𑀼𑀢𑁆𑀯𑀸 𑀧𑁄𑀢𑁆𑀢𑀺𑀓𑁄 ‘‘𑀫𑀸 𑀏𑀲 𑀩𑀸𑀮𑁄 𑀫𑀁 𑀦𑀺𑀲𑁆𑀲𑀸𑀬 𑀦𑀲𑁆𑀲𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁮𑁦.

‘‘𑀔𑀫𑀢𑀲𑁆𑀲 ¶ 𑀫𑀳𑀸𑀭𑀸𑀚, 𑀧𑀸𑀡𑀸 𑀦 𑀧𑀝𑀺𑀆𑀦𑀬𑀸;

𑀔𑀫 𑀤𑁂𑀯 𑀅𑀲𑀧𑁆𑀧𑀼𑀭𑀺𑀲𑀲𑁆𑀲, 𑀦𑀸𑀲𑁆𑀲 𑀇𑀘𑁆𑀙𑀸𑀫𑀳𑀁 𑀯𑀥’’𑀦𑁆𑀢𑀺.

𑀢𑀢𑁆𑀣 𑀔𑀫𑀢𑀲𑁆𑀲𑀸𑀢𑀺 𑀔𑀫𑀢𑀁 𑀅𑀲𑁆𑀲, 𑀏𑀢𑀲𑁆𑀲 𑀅𑀲𑀧𑁆𑀧𑀼𑀭𑀺𑀲𑀲𑁆𑀲 𑀔𑀫𑀣𑀸𑀢𑀺 𑀅𑀢𑁆𑀣𑁄. 𑀦 𑀧𑀝𑀺𑀆𑀦𑀬𑀸𑀢𑀺 𑀫𑀢𑀲𑁆𑀲 𑀦𑀸𑀫 𑀧𑀸𑀡𑀸 𑀧𑀝𑀺𑀆𑀦𑁂𑀢𑀼𑀁 𑀦 𑀲𑀓𑁆𑀓𑀸.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀸𑀔𑀲𑁆𑀲 𑀔𑀫𑀺, 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀫𑁆𑀧𑀺 𑀧𑁄𑀢𑁆𑀢𑀺𑀓𑀲𑁆𑀲𑁂𑀯 𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺 ¶ , 𑀲𑁄 𑀧𑀦 𑀦 𑀇𑀘𑁆𑀙𑀺. 𑀅𑀣𑀲𑁆𑀲 𑀲𑀩𑁆𑀩𑀲𑁂𑀦𑀸𑀦𑀻𑀦𑀁 𑀯𑀺𑀘𑀸𑀭𑀡𑀸𑀭𑀳𑀁 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀁 𑀦𑀸𑀫 𑀅𑀤𑀸𑀲𑀺. 𑀧𑀼𑀩𑁆𑀩𑁂 𑀓𑀺𑀭𑁂𑀢𑀁 𑀞𑀸𑀦𑀦𑁆𑀢𑀭𑀁 𑀦𑀸𑀳𑁄𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀚𑀸𑀢𑀁. 𑀅𑀧𑀭𑀪𑀸𑀕𑁂 𑀧𑁄𑀢𑁆𑀢𑀺𑀓𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀫𑀸𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀸𑀦𑀁 𑀑𑀯𑀸𑀤𑀯𑀲𑁂𑀦 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁮𑁧.

‘‘𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂;

𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀲𑀸𑀔𑀲𑁆𑀫𑀺 𑀚𑀻𑀯𑀺𑀢’’𑀦𑁆𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀧𑀼𑀩𑁆𑀩𑁂𑀧𑀺 𑀅𑀓𑀢𑀜𑁆𑀜𑀽𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀸𑀔𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑁄𑀢𑁆𑀢𑀺𑀓𑁄 𑀆𑀦𑀦𑁆𑀤𑁄, 𑀦𑀺𑀕𑁆𑀭𑁄𑀥𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀺𑀕𑁆𑀭𑁄𑀥𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁪𑁬] 𑁮. 𑀢𑀓𑁆𑀓𑀮𑀚𑀸𑀢𑀓𑀯𑀡𑁆𑀡𑀦𑀸

𑀦 𑀢𑀓𑁆𑀓𑀮𑀸 𑀲𑀦𑁆𑀢𑀺 𑀦 𑀆𑀮𑀼𑀯𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀧𑀺𑀢𑀼𑀧𑁄𑀲𑀓𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀤𑀮𑀺𑀤𑁆𑀤𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀤𑀦𑁆𑀢𑀓𑀝𑁆𑀞𑀫𑀼𑀔𑁄𑀤𑀓𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀪𑀢𑀺𑀁 𑀯𑀸 𑀓𑀲𑀺𑀁 𑀯𑀸 𑀓𑀢𑁆𑀯𑀸 𑀮𑀤𑁆𑀥𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀺𑀢𑀭𑀁 𑀧𑁄𑀲𑁂𑀲𑀺. 𑀅𑀣 𑀦𑀁 𑀧𑀺𑀢𑀸 𑀆𑀳 𑁋 ‘‘𑀢𑀸𑀢, 𑀢𑁆𑀯𑀁 𑀏𑀓𑀓𑁄𑀯 𑀅𑀦𑁆𑀢𑁄 𑀘 𑀩𑀳𑀺 𑀘 𑀓𑀢𑁆𑀢𑀩𑁆𑀩𑀁 𑀓𑀭𑁄𑀲𑀺, 𑀏𑀓𑀁 𑀢𑁂 𑀓𑀼𑀮𑀤𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀺, 𑀲𑀸 𑀢𑁂 𑀕𑁂𑀳𑁂 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀢𑀻’’𑀢𑀺. ‘‘𑀢𑀸𑀢, 𑀇𑀢𑁆𑀣𑀺𑀬𑁄 𑀦𑀸𑀫 𑀖𑀭𑀁 𑀆𑀕𑀢𑀸 𑀦𑁂𑀯 𑀫𑀬𑁆𑀳𑀁, 𑀦 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀲𑀼𑀔𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀫𑀸 𑀏𑀯𑀭𑀽𑀧𑀁 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀬𑀸𑀯𑀚𑀻𑀯𑀁 𑀢𑀼𑀫𑁆𑀳𑁂 𑀧𑁄𑀲𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 ¶ 𑀅𑀘𑁆𑀘𑀬𑁂𑀦 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀧𑀺𑀢𑀸 𑀅𑀦𑀺𑀘𑁆𑀙𑀫𑀸𑀦𑀲𑁆𑀲𑁂𑀯 𑀏𑀓𑀁 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀺. 𑀲𑀸 𑀲𑀲𑀼𑀭𑀲𑁆𑀲 𑀘 𑀲𑀸𑀫𑀺𑀓𑀲𑁆𑀲 𑀘 𑀉𑀧𑀓𑀸𑀭𑀺𑀓𑀸 𑀅𑀳𑁄𑀲𑀺 𑀦𑀻𑀘𑀯𑀼𑀢𑁆𑀢𑀺. 𑀲𑀸𑀫𑀺𑀓𑁄𑀧𑀺𑀲𑁆𑀲𑀸 ‘‘𑀫𑀫 𑀧𑀺𑀢𑀼 𑀉𑀧𑀓𑀸𑀭𑀺𑀓𑀸’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀫𑀦𑀸𑀧𑀁 𑀆𑀳𑀭𑀺𑀢𑁆𑀯𑀸 𑀤𑁂𑀢𑀺, 𑀲𑀸𑀧𑀺 𑀢𑀁 𑀲𑀲𑀼𑀭𑀲𑁆𑀲𑁂𑀯 𑀉𑀧𑀦𑀸𑀫𑁂𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀲𑀸𑀫𑀺𑀓𑁄 𑀮𑀤𑁆𑀥𑀁 𑀮𑀤𑁆𑀥𑀁 𑀧𑀺𑀢𑀼 𑀅𑀤𑀢𑁆𑀯𑀸 𑀫𑀬𑁆𑀳𑀫𑁂𑀯 𑀤𑁂𑀢𑀺, 𑀅𑀤𑁆𑀥𑀸 𑀧𑀺𑀢𑀭𑀺 𑀦𑀺𑀲𑁆𑀦𑁂𑀳𑁄 𑀚𑀸𑀢𑁄, 𑀇𑀫𑀁 𑀫𑀳𑀮𑁆𑀮𑀓𑀁 𑀏𑀓𑁂𑀦𑀼𑀧𑀸𑀬𑁂𑀦 𑀫𑀫 𑀲𑀸𑀫𑀺𑀓𑀲𑁆𑀲 𑀧𑀝𑀺𑀓𑁆𑀓𑀽𑀮𑀁 𑀓𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑁆𑀲𑀸𑀫𑀻’’𑀢𑀺.

𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀉𑀤𑀓𑀁 𑀅𑀢𑀺𑀲𑀻𑀢𑀁 𑀯𑀸 𑀅𑀘𑁆𑀘𑀼𑀡𑁆𑀳𑀁 𑀯𑀸, 𑀆𑀳𑀸𑀭𑀁 𑀅𑀢𑀺𑀮𑁄𑀡𑀁 𑀯𑀸 𑀅𑀮𑁄𑀡𑀁 𑀯𑀸 ¶ , 𑀪𑀢𑁆𑀢𑀁 𑀉𑀢𑁆𑀢𑀡𑁆𑀟𑀼𑀮𑀁 𑀯𑀸 𑀅𑀢𑀺𑀓𑀺𑀮𑀺𑀦𑁆𑀦𑀁 𑀯𑀸𑀢𑀺 𑀏𑀯𑀫𑀸𑀤𑀻𑀦𑀺 𑀢𑀲𑁆𑀲 𑀓𑁄𑀥𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀓𑀼𑀚𑁆𑀛𑀦𑁆𑀢𑁂 ‘‘𑀓𑁄 𑀇𑀫𑀁 𑀫𑀳𑀮𑁆𑀮𑀓𑀁 𑀉𑀧𑀝𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀨𑀭𑀼𑀲𑀸𑀦𑀺 𑀯𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑁂𑀲𑀺. 𑀢𑀢𑁆𑀣 𑀢𑀢𑁆𑀣 𑀔𑁂𑀴𑀧𑀺𑀡𑁆𑀟𑀸𑀤𑀻𑀦𑀺 𑀙𑀟𑁆𑀟𑁂𑀢𑁆𑀯𑀸𑀧𑀺 𑀲𑀸𑀫𑀺𑀓𑀁 𑀉𑀚𑁆𑀛𑀸𑀧𑁂𑀲𑀺 ‘‘𑀧𑀲𑁆𑀲 𑀧𑀺𑀢𑀼 𑀓𑀫𑁆𑀫𑀁, ‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀸 𑀓𑀭𑀻’𑀢𑀺 𑀯𑀼𑀢𑁆𑀢𑁂 𑀓𑀼𑀚𑁆𑀛𑀢𑀺, 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀧𑀺𑀢𑀭𑀁 𑀯𑀸 𑀯𑀲𑀸𑀧𑁂𑀳𑀺 𑀫𑀁 𑀯𑀸’’𑀢𑀺. 𑀅𑀣 𑀦𑀁 𑀲𑁄 ‘‘𑀪𑀤𑁆𑀤𑁂, 𑀢𑁆𑀯𑀁 𑀤𑀳𑀭𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀻𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀫𑀬𑁆𑀳𑀁 ¶ 𑀧𑀺𑀢𑀸 𑀫𑀳𑀮𑁆𑀮𑀓𑁄, 𑀢𑁆𑀯𑀁 𑀢𑀲𑁆𑀲 𑀅𑀲𑀳𑀦𑁆𑀢𑀻 𑀇𑀫𑀫𑁆𑀳𑀸 𑀕𑁂𑀳𑀸 𑀦𑀺𑀓𑁆𑀔𑀫𑀸’’𑀢𑀺 𑀆𑀳. 𑀲𑀸 𑀪𑀻𑀢𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀲𑀼𑀭𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀧𑀓𑀢𑀺𑀦𑀺𑀬𑀸𑀫𑁂𑀦𑁂𑀯 𑀧𑀝𑀺𑀚𑀕𑁆𑀕𑀺𑀢𑀼𑀁 𑀆𑀭𑀪𑀺. 𑀅𑀣 𑀲𑁄 𑀉𑀧𑀸𑀲𑀓𑁄 𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀢𑀸𑀬 𑀉𑀩𑁆𑀩𑀸𑀴𑁆𑀳𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀸𑀬 𑀅𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀓𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁, 𑀉𑀧𑀸𑀲𑀓, 𑀲𑀢𑁆𑀢𑀝𑁆𑀞 𑀤𑀺𑀯𑀲𑀸𑀦𑀺 𑀥𑀫𑁆𑀫𑀲𑁆𑀲𑀯𑀦𑀸𑀬 𑀦𑀸𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀓𑀸𑀭𑀡𑀁 𑀓𑀣𑁂𑀲𑀺. 𑀲𑀢𑁆𑀣𑀸 ‘‘𑀇𑀤𑀸𑀦𑀺 𑀢𑀸𑀯 𑀢𑀲𑁆𑀲𑀸 𑀓𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀺𑀢𑀭𑀁 𑀦 𑀦𑀻𑀳𑀭𑀸𑀧𑁂𑀲𑀺, 𑀧𑀼𑀩𑁆𑀩𑁂 𑀧𑀦 𑀏𑀢𑀺𑀲𑁆𑀲𑀸 𑀓𑀣𑀁 𑀕𑀳𑁂𑀢𑁆𑀯𑀸 𑀧𑀺𑀢𑀭𑀁 𑀆𑀫𑀓𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀆𑀯𑀸𑀝𑀁 𑀔𑀡𑀺𑀢𑁆𑀯𑀸 𑀢𑀢𑁆𑀣 𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀭𑀡𑀓𑀸𑀮𑁂 𑀅𑀳𑀁 𑀲𑀢𑁆𑀢𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀧𑀺𑀢𑀼𑀖𑀸𑀢𑀓𑀓𑀫𑁆𑀫𑀸 𑀦𑀺𑀯𑀸𑀭𑁂𑀲𑀺𑀁, 𑀢𑀤𑀸 𑀢𑁆𑀯𑀁 𑀫𑀫 𑀓𑀣𑀁 𑀲𑀼𑀢𑁆𑀯𑀸 𑀢𑀯 𑀧𑀺𑀢𑀭𑀁 𑀬𑀸𑀯𑀚𑀻𑀯𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀚𑀸𑀢𑁄, 𑀲𑁆𑀯𑀸𑀬𑀁 𑀫𑀬𑀸 𑀤𑀺𑀦𑁆𑀦𑁄 𑀑𑀯𑀸𑀤𑁄 𑀪𑀯𑀦𑁆𑀢𑀭𑀕𑀢𑀫𑁆𑀧𑀺 𑀦 𑀯𑀺𑀚𑀳𑀢𑀺, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀲𑁆𑀲𑀸 𑀓𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀢𑀬𑀸 𑀧𑀺𑀢𑀸 𑀦 𑀦𑀻𑀳𑀝𑁄’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑁂 𑀏𑀓𑀲𑁆𑀲 𑀓𑀼𑀮𑀲𑁆𑀲 𑀖𑀭𑁂 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺 𑀦𑀸𑀫𑁂𑀦 𑀲𑀯𑀺𑀝𑁆𑀞𑀓𑁄 𑀦𑀸𑀫. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀦𑁆𑀢𑁄 ¶ 𑀅𑀧𑀭𑀪𑀸𑀕𑁂 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬 𑀧𑀺𑀢𑀭𑀁 𑀧𑁄𑀲𑁂𑀲𑀻𑀢𑀺 𑀲𑀩𑁆𑀩𑀁 𑀯𑀢𑁆𑀣𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄. 𑀢𑀤𑀸 𑀲𑀸 𑀇𑀢𑁆𑀣𑀻 ‘‘𑀧𑀲𑁆𑀲 𑀧𑀺𑀢𑀼 𑀓𑀫𑁆𑀫𑀁, ‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀸 𑀓𑀭𑀻’𑀢𑀺 𑀯𑀼𑀢𑁆𑀢𑁂 𑀓𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀯𑀸 ‘‘𑀲𑀸𑀫𑀺, 𑀧𑀺𑀢𑀸 𑀢𑁂 𑀘𑀡𑁆𑀟𑁄 𑀨𑀭𑀼𑀲𑁄 𑀦𑀺𑀘𑁆𑀘𑀁 𑀓𑀮𑀳𑀁 𑀓𑀭𑁄𑀢𑀺, 𑀚𑀭𑀸𑀚𑀺𑀡𑁆𑀡𑁄 𑀩𑁆𑀬𑀸𑀥𑀺𑀧𑀻𑀴𑀺𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀫𑀭𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀏𑀢𑁂𑀦 𑀲𑀤𑁆𑀥𑀺𑀁 𑀏𑀓𑀕𑁂𑀳𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀲𑀬𑀫𑁆𑀧𑁂𑀲 𑀓𑀢𑀺𑀧𑀸𑀳𑁂𑀦 𑀫𑀭𑀺𑀲𑁆𑀲𑀢𑀺𑀬𑁂𑀯, 𑀢𑁆𑀯𑀁 𑀏𑀢𑀁 𑀆𑀫𑀓𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀆𑀯𑀸𑀝𑀁 𑀔𑀡𑀺𑀢𑁆𑀯𑀸 𑀢𑀢𑁆𑀣 𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀤𑁆𑀤𑀸𑀮𑁂𑀦 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀉𑀧𑀭𑀺 𑀧𑀁𑀲𑀼𑀦𑀸 𑀙𑀸𑀤𑁂𑀢𑁆𑀯𑀸 𑀆𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀢𑀸𑀬 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 ‘‘𑀪𑀤𑁆𑀤𑁂, 𑀧𑀼𑀭𑀺𑀲𑀫𑀸𑀭𑀡𑀁 𑀦𑀸𑀫 𑀪𑀸𑀭𑀺𑀬𑀁, 𑀓𑀣𑀁 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀅𑀳𑀁 𑀢𑁂 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. ‘‘𑀆𑀘𑀺𑀓𑁆𑀔 𑀢𑀸𑀯𑀸’’𑀢𑀺. ‘‘𑀲𑀸𑀫𑀺, 𑀢𑁆𑀯𑀁 𑀧𑀘𑁆𑀘𑀽𑀲𑀓𑀸𑀮𑁂 𑀧𑀺𑀢𑀼 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀣𑀸 𑀲𑀩𑁆𑀩𑁂 𑀲𑀼𑀡𑀦𑁆𑀢𑀺, 𑀏𑀯𑀁 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 ‘𑀢𑀸𑀢, 𑀅𑀲𑀼𑀓𑀕𑀸𑀫𑁂 𑀢𑀼𑀫𑁆𑀳𑀸𑀓𑀁 𑀉𑀤𑁆𑀥𑀸𑀭𑀡𑀓𑁄 ¶ 𑀅𑀢𑁆𑀣𑀺, 𑀫𑀬𑀺 𑀕𑀢𑁂 𑀦 𑀤𑁂𑀢𑀺, 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀦 𑀤𑀲𑁆𑀲𑀢𑁂𑀯, 𑀲𑁆𑀯𑁂 𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀢𑁄𑀯 𑀕𑀘𑁆𑀙𑀺𑀲𑁆𑀲𑀸𑀫𑀸’𑀢𑀺 𑀯𑀢𑁆𑀯𑀸 𑀢𑁂𑀦 𑀯𑀼𑀢𑁆𑀢𑀯𑁂𑀮𑀸𑀬𑀫𑁂𑀯 ¶ 𑀉𑀝𑁆𑀞𑀸𑀬 𑀬𑀸𑀦𑀓𑀁 𑀬𑁄𑀚𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀆𑀯𑀸𑀝𑀁 𑀔𑀡𑀺𑀢𑁆𑀯𑀸 𑀘𑁄𑀭𑁂𑀳𑀺 𑀅𑀘𑁆𑀙𑀺𑀦𑁆𑀦𑀲𑀤𑁆𑀤𑀁 𑀓𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀆𑀯𑀸𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀆𑀕𑀘𑁆𑀙𑀸’’𑀢𑀺.

𑀲𑀯𑀺𑀝𑁆𑀞𑀓𑁄 ‘‘𑀅𑀢𑁆𑀣𑁂𑀲 𑀉𑀧𑀸𑀬𑁄’’𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀬𑀸𑀦𑀓𑀁 𑀕𑀫𑀦𑀲𑀚𑁆𑀚𑀁 𑀅𑀓𑀸𑀲𑀺. 𑀢𑀲𑁆𑀲 𑀧𑀦𑁂𑀓𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀧𑀼𑀢𑁆𑀢𑁄 𑀅𑀢𑁆𑀣𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄. 𑀲𑁄 𑀫𑀸𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀬𑁆𑀳𑀁 𑀫𑀸𑀢𑀸 𑀧𑀸𑀧𑀥𑀫𑁆𑀫𑀸 𑀧𑀺𑀢𑀭𑀁 𑀫𑁂 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀓𑀸𑀭𑁂𑀢𑀺, 𑀅𑀳𑀁 𑀇𑀫𑀲𑁆𑀲 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀲𑀡𑀺𑀓𑀁 𑀕𑀦𑁆𑀢𑁆𑀯𑀸 𑀅𑀬𑁆𑀬𑀓𑁂𑀦 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀺. 𑀲𑀯𑀺𑀝𑁆𑀞𑀓𑁄𑀧𑀺 𑀇𑀢𑀭𑀸𑀬 𑀯𑀼𑀢𑁆𑀢𑀯𑁂𑀮𑀸𑀬 𑀬𑀸𑀦𑀓𑀁 𑀬𑁄𑀚𑁂𑀢𑁆𑀯𑀸 ‘‘𑀏𑀳𑀺, 𑀢𑀸𑀢, 𑀉𑀤𑁆𑀥𑀸𑀭𑀁 𑀲𑁄𑀥𑁂𑀲𑁆𑀲𑀸𑀫𑀸’’𑀢𑀺 𑀧𑀺𑀢𑀭𑀁 𑀬𑀸𑀦𑀓𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀓𑀼𑀫𑀸𑀭𑁄𑀧𑀺 𑀧𑀞𑀫𑀢𑀭𑀁 𑀬𑀸𑀦𑀓𑀁 𑀅𑀪𑀺𑀭𑀼𑀳𑀺. 𑀲𑀯𑀺𑀝𑁆𑀞𑀓𑁄 𑀢𑀁 ¶ 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀺𑀢𑀭𑀜𑁆𑀘 𑀓𑀼𑀫𑀸𑀭𑀓𑁂𑀦 𑀲𑀤𑁆𑀥𑀺𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀑𑀢𑀭𑀺𑀢𑁆𑀯𑀸 𑀓𑀼𑀤𑁆𑀤𑀸𑀮𑀧𑀺𑀝𑀓𑀁 𑀆𑀤𑀸𑀬 𑀏𑀓𑀲𑁆𑀫𑀺𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀘𑀢𑀼𑀭𑀲𑁆𑀲𑀸𑀯𑀸𑀝𑀁 𑀔𑀡𑀺𑀢𑀼𑀁 𑀆𑀭𑀪𑀺. 𑀓𑀼𑀫𑀸𑀭𑀓𑁄 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁨.

‘‘𑀦 𑀢𑀓𑁆𑀓𑀮𑀸 𑀲𑀦𑁆𑀢𑀺 𑀦 𑀆𑀮𑀼𑀯𑀸𑀦𑀺, 𑀦 𑀩𑀺𑀴𑀸𑀮𑀺𑀬𑁄 𑀦 𑀓𑀴𑀫𑁆𑀩𑀸𑀦𑀺 𑀢𑀸𑀢;

𑀏𑀓𑁄 𑀅𑀭𑀜𑁆𑀜𑀫𑁆𑀳𑀺 𑀲𑀼𑀲𑀸𑀦𑀫𑀚𑁆𑀛𑁂, 𑀓𑀺𑀫𑀢𑁆𑀣𑀺𑀓𑁄 𑀢𑀸𑀢 𑀔𑀡𑀸𑀲𑀺 𑀓𑀸𑀲𑀼’’𑀦𑁆𑀢𑀺.

𑀢𑀢𑁆𑀣 𑀦 𑀢𑀓𑁆𑀓𑀮𑀸 𑀲𑀦𑁆𑀢𑀻𑀢𑀺 𑀧𑀺𑀡𑁆𑀟𑀸𑀮𑀼𑀓𑀦𑁆𑀤𑀸 𑀦 𑀲𑀦𑁆𑀢𑀺. 𑀆𑀮𑀼𑀯𑀸𑀦𑀻𑀢𑀺 𑀆𑀮𑀼𑀯𑀓𑀦𑁆𑀤𑀸. 𑀩𑀺𑀴𑀸𑀮𑀺𑀬𑁄𑀢𑀺 𑀩𑀺𑀴𑀸𑀭𑀺𑀯𑀮𑁆𑀮𑀺𑀓𑀦𑁆𑀤𑀸. 𑀓𑀴𑀫𑁆𑀩𑀸𑀦𑀻𑀢𑀺 𑀢𑀸𑀮𑀓𑀦𑁆𑀤𑀸.

𑀅𑀣𑀲𑁆𑀲 𑀧𑀺𑀢𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁩.

‘‘𑀧𑀺𑀢𑀸𑀫𑀳𑁄 𑀢𑀸𑀢 𑀲𑀼𑀤𑀼𑀩𑁆𑀩𑀮𑁄 𑀢𑁂, 𑀅𑀦𑁂𑀓𑀩𑁆𑀬𑀸𑀥𑀻𑀳𑀺 𑀤𑀼𑀔𑁂𑀦 𑀨𑀼𑀝𑁆𑀞𑁄;

𑀢𑀫𑀚𑁆𑀚𑀳𑀁 𑀦𑀺𑀔𑀡𑀺𑀲𑁆𑀲𑀸𑀫𑀺 𑀲𑁄𑀩𑁆𑀪𑁂, 𑀦 𑀳𑀺𑀲𑁆𑀲 𑀢𑀁 𑀚𑀻𑀯𑀺𑀢𑀁 𑀭𑁄𑀘𑀬𑀸𑀫𑀻’’𑀢𑀺.

𑀢𑀢𑁆𑀣 ¶ 𑀅𑀦𑁂𑀓𑀩𑁆𑀬𑀸𑀥𑀻𑀳𑀻𑀢𑀺 𑀅𑀦𑁂𑀓𑁂𑀳𑀺 𑀩𑁆𑀬𑀸𑀥𑀻𑀳𑀺 𑀉𑀧𑁆𑀧𑀦𑁆𑀦𑁂𑀦 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑁄. 𑀦 𑀳𑀺𑀲𑁆𑀲 𑀢𑀦𑁆𑀢𑀺 𑀅𑀳𑀜𑁆𑀳𑀺 𑀢𑀲𑁆𑀲 𑀢𑀯 𑀧𑀺𑀢𑀸𑀫𑀳𑀲𑁆𑀲 𑀢𑀁 𑀤𑀼𑀚𑁆𑀚𑀻𑀯𑀺𑀢𑀁 𑀦 𑀇𑀘𑁆𑀙𑀸𑀫𑀺, ‘‘𑀏𑀯𑀭𑀽𑀧𑀸 𑀚𑀻𑀯𑀺𑀢𑀸 𑀫𑀭𑀡𑀫𑁂𑀯𑀲𑁆𑀲 𑀯𑀭’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀢𑀁 𑀲𑁄𑀩𑁆𑀪𑁂 𑀦𑀺𑀔𑀡𑀺𑀲𑁆𑀲𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑁄 𑀉𑀧𑀟𑁆𑀠𑀁 𑀕𑀸𑀣𑀫𑀸𑀳 𑁋

𑁮𑁪.

‘‘𑀲𑀗𑁆𑀓𑀧𑁆𑀧𑀫𑁂𑀢𑀁 ¶ 𑀧𑀝𑀺𑀮𑀤𑁆𑀥 𑀧𑀸𑀧𑀓𑀁, 𑀅𑀘𑁆𑀘𑀸𑀳𑀺𑀢𑀁 𑀓𑀫𑁆𑀫 𑀓𑀭𑁄𑀲𑀺 𑀮𑀼𑀤𑁆𑀤’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑀸𑀢, 𑀢𑁆𑀯𑀁 ‘‘𑀧𑀻𑀢𑀭𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀫𑀭𑀡𑀤𑀼𑀓𑁆𑀔𑁂𑀦 𑀬𑁄𑀚𑁂𑀦𑁆𑀢𑁄 𑀏𑀢𑀁 𑀧𑀸𑀧𑀓𑀁 𑀲𑀗𑁆𑀓𑀧𑁆𑀧𑀁 𑀧𑀝𑀺𑀮𑀤𑁆𑀥𑀸 𑀢𑀲𑁆𑀲 𑀘 𑀲𑀗𑁆𑀓𑀧𑁆𑀧𑀯𑀲𑁂𑀦 𑀳𑀺𑀢𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑀢𑁆𑀢𑀸 𑀅𑀘𑁆𑀘𑀸𑀳𑀺𑀢𑀁 𑀓𑀫𑁆𑀫𑀁 𑀓𑀭𑁄𑀲𑀺 𑀮𑀼𑀤𑁆𑀤𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀓𑀼𑀫𑀸𑀭𑁄 𑀧𑀺𑀢𑀼 𑀳𑀢𑁆𑀣𑀢𑁄 𑀓𑀼𑀤𑁆𑀤𑀸𑀮𑀁 𑀕𑀳𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀆𑀯𑀸𑀝𑀁 𑀔𑀡𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀧𑀺𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ ‘‘𑀓𑀲𑁆𑀫𑀸, 𑀢𑀸𑀢, 𑀆𑀯𑀸𑀝𑀁 𑀔𑀡𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀲𑁆𑀲 𑀓𑀣𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

‘‘𑀫𑀬𑀸𑀧𑀺 𑀢𑀸𑀢 𑀧𑀝𑀺𑀮𑀘𑁆𑀙𑀲𑁂 𑀢𑀼𑀯𑀁, 𑀏𑀢𑀸𑀤𑀺𑀲𑀁 𑀓𑀫𑁆𑀫 𑀚𑀭𑀽𑀧𑀦𑀻𑀢𑁄;

𑀢𑀁 𑀓𑀼𑀮𑁆𑀮𑀯𑀢𑁆𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑁄, 𑀅𑀳𑀫𑁆𑀧𑀺 𑀢𑀁 𑀦𑀺𑀔𑀡𑀺𑀲𑁆𑀲𑀸𑀫𑀺 𑀲𑁄𑀩𑁆𑀪𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑀸𑀢, 𑀅𑀳𑀫𑁆𑀧𑀺 𑀏𑀢𑀲𑁆𑀫𑀺𑀁 𑀲𑁄𑀩𑁆𑀪𑁂 𑀢𑀁 𑀫𑀳𑀮𑁆𑀮𑀓𑀓𑀸𑀮𑁂 𑀦𑀺𑀔𑀡𑀺𑀲𑁆𑀲𑀸𑀫𑀺, 𑀇𑀢𑀺 𑀔𑁄 𑀢𑀸𑀢, 𑀫𑀬𑀸𑀧𑀺 𑀓𑀢𑁂 𑀇𑀫𑀲𑁆𑀫𑀺𑀁 𑀲𑁄𑀩𑁆𑀪𑁂 𑀢𑀼𑀯𑀁 𑀚𑀭𑀽𑀧𑀦𑀻𑀢𑁄 𑀏𑀢𑀸𑀤𑀺𑀲𑀁 𑀓𑀫𑁆𑀫𑀁 𑀧𑀝𑀺𑀮𑀘𑁆𑀙𑀲𑁂, 𑀬𑀁 𑀏𑀢𑀁 𑀢𑀬𑀸 𑀧𑀯𑀢𑁆𑀢𑀺𑀢𑀁 𑀓𑀼𑀮𑀯𑀢𑁆𑀢𑀁, 𑀢𑀁 𑀅𑀦𑀼𑀯𑀢𑁆𑀢𑀫𑀸𑀦𑁄 𑀯𑀬𑀧𑁆𑀧𑀢𑁆𑀢𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀯𑀲𑀦𑁆𑀢𑁄 𑀅𑀳𑀫𑁆𑀧𑀺 𑀢𑀁 𑀦𑀺𑀔𑀡𑀺𑀲𑁆𑀲𑀸𑀫𑀺 𑀲𑁄𑀩𑁆𑀪𑁂𑀢𑀺.

𑀅𑀣𑀲𑁆𑀲 𑀧𑀺𑀢𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁮𑁫.

‘‘𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀆𑀲𑀚𑁆𑀚 𑀫𑀁 𑀢𑁆𑀯𑀁 𑀯𑀤𑀲𑁂 𑀓𑀼𑀫𑀸𑀭;

𑀧𑀼𑀢𑁆𑀢𑁄 𑀫𑀫𑀁 𑀑𑀭𑀲𑀓𑁄 𑀲𑀫𑀸𑀦𑁄, 𑀅𑀳𑀻𑀢𑀸𑀦𑀼𑀓𑀫𑁆𑀧𑀻 𑀫𑀫 𑀢𑁆𑀯𑀁𑀲𑀺 𑀧𑀼𑀢𑁆𑀢𑀸’’𑀢𑀺.

𑀢𑀢𑁆𑀣 𑀧𑀓𑀼𑀩𑁆𑀩𑀫𑀸𑀦𑁄𑀢𑀺 𑀅𑀪𑀺𑀪𑀯𑀦𑁆𑀢𑁄. 𑀆𑀲𑀚𑁆𑀚𑀸𑀢𑀺 𑀖𑀝𑁆𑀝𑁂𑀢𑁆𑀯𑀸.

𑀏𑀯𑀁 ¶ 𑀯𑀼𑀢𑁆𑀢𑁂 𑀧𑀡𑁆𑀟𑀺𑀢𑀓𑀼𑀫𑀸𑀭𑀓𑁄 𑀏𑀓𑀁 𑀧𑀝𑀺𑀯𑀘𑀦𑀕𑀸𑀣𑀁, 𑀤𑁆𑀯𑁂 𑀉𑀤𑀸𑀦𑀕𑀸𑀣𑀸𑀢𑀺 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁬.

‘‘𑀦 𑀢𑀸𑀳𑀁 𑀢𑀸𑀢 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀢𑁂 𑀅𑀳𑀫𑁆𑀧𑀺 𑀢𑀸𑀢;

𑀧𑀸𑀧𑀜𑁆𑀘 𑀢𑀁 𑀓𑀫𑁆𑀫 𑀧𑀓𑀼𑀩𑁆𑀩𑀫𑀸𑀦𑀁, 𑀅𑀭𑀳𑀸𑀫𑀺 𑀦𑁄 𑀯𑀸𑀭𑀬𑀺𑀢𑀼𑀁 𑀢𑀢𑁄.

𑁮𑁭.

‘‘𑀬𑁄 ¶ 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀲𑀯𑀺𑀝𑁆𑀞, 𑀅𑀤𑀽𑀲𑀓𑁂 𑀳𑀺𑀁𑀲𑀢𑀺 𑀧𑀸𑀧𑀥𑀫𑁆𑀫𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀅𑀲𑀁𑀲𑀬𑀁 𑀲𑁄 𑀦𑀺𑀭𑀬𑀁 𑀉𑀧𑁂𑀢𑀺.

𑁮𑁮.

‘‘𑀬𑁄 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀲𑀯𑀺𑀝𑁆𑀞, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀸𑀢𑀺;

𑀓𑀸𑀬𑀲𑁆𑀲 ¶ 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀅𑀲𑀁𑀲𑀬𑀁 𑀲𑁄 𑀲𑀼𑀕𑀢𑀺𑀁 𑀉𑀧𑁂𑀢𑀻’’𑀢𑀺. 𑁋

𑀇𑀫𑀁 𑀧𑀦 𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀺𑀢𑀸 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁯.

‘‘𑀦 𑀫𑁂 𑀢𑁆𑀯𑀁 𑀧𑀼𑀢𑁆𑀢 𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀳𑀺𑀢𑀸𑀦𑀼𑀓𑀫𑁆𑀧𑀻 𑀫𑁂 𑀢𑁆𑀯𑀁𑀲𑀺 𑀧𑀼𑀢𑁆𑀢;

𑀅𑀳𑀜𑁆𑀘 𑀢𑀁 𑀫𑀸𑀢𑀭𑀸 𑀯𑀼𑀘𑁆𑀘𑀫𑀸𑀦𑁄, 𑀏𑀢𑀸𑀤𑀺𑀲𑀁 𑀓𑀫𑁆𑀫 𑀓𑀭𑁄𑀫𑀺 𑀮𑀼𑀤𑁆𑀤’’𑀦𑁆𑀢𑀺.

𑀢𑀢𑁆𑀣 𑀅𑀳𑀜𑁆𑀘 𑀢𑀁 𑀫𑀸𑀢𑀭𑀸𑀢𑀺 𑀅𑀳𑀜𑁆𑀘 𑀢𑁂 𑀫𑀸𑀢𑀭𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑁄 ‘‘𑀢𑀸𑀢, 𑀇𑀢𑁆𑀣𑀺𑀬𑁄 𑀦𑀸𑀫 𑀉𑀧𑁆𑀧𑀦𑁆𑀦𑁂 𑀤𑁄𑀲𑁂 𑀅𑀦𑀺𑀕𑁆𑀕𑀬𑁆𑀳𑀫𑀸𑀦𑀸 𑀧𑀼𑀦𑀧𑁆𑀧𑀼𑀦𑀁 𑀧𑀸𑀧𑀁 𑀓𑀭𑁄𑀦𑁆𑀢𑀺, 𑀫𑀫 𑀫𑀸𑀢𑀸 𑀬𑀣𑀸 𑀧𑀼𑀦 𑀏𑀯𑀭𑀽𑀧𑀁 𑀦 𑀓𑀭𑁄𑀢𑀺, 𑀢𑀣𑀸 𑀦𑀁 𑀧𑀡𑀸𑀫𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁯𑁦.

‘‘𑀬𑀸 𑀢𑁂 𑀲𑀸 𑀪𑀭𑀺𑀬𑀸 𑀅𑀦𑀭𑀺𑀬𑀭𑀽𑀧𑀸, 𑀫𑀸𑀢𑀸 𑀫𑀫𑁂𑀲𑀸 𑀲𑀓𑀺𑀬𑀸 𑀚𑀦𑁂𑀢𑁆𑀢𑀺;

𑀦𑀺𑀤𑁆𑀥𑀸𑀧𑀬𑁂 𑀢𑀜𑁆𑀘 𑀲𑀓𑀸 𑀅𑀕𑀸𑀭𑀸, 𑀅𑀜𑁆𑀜𑀫𑁆𑀧𑀺 𑀢𑁂 𑀲𑀸 𑀤𑀼𑀔𑀫𑀸𑀯𑀳𑁂𑀬𑁆𑀬𑀸’’𑀢𑀺.

𑀲𑀯𑀺𑀝𑁆𑀞𑀓𑁄 ¶ 𑀧𑀡𑁆𑀟𑀺𑀢𑀧𑀼𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑀼𑀢𑁆𑀯𑀸 ‘‘𑀕𑀘𑁆𑀙𑀸𑀫, 𑀢𑀸𑀢𑀸’’𑀢𑀺 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦 𑀘 𑀧𑀺𑀢𑀭𑀸 𑀘 𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀬𑀸𑀲𑀺. 𑀲𑀸𑀧𑀺 𑀔𑁄 𑀅𑀦𑀸𑀘𑀸𑀭𑀸 ‘‘𑀦𑀺𑀓𑁆𑀔𑀦𑁆𑀢𑀸 𑀦𑁄 𑀕𑁂𑀳𑀸 𑀓𑀸𑀴𑀓𑀡𑁆𑀡𑀻’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀅𑀮𑁆𑀮𑀕𑁄𑀫𑀬𑁂𑀦 𑀕𑁂𑀳𑀁 𑀉𑀧𑀮𑀺𑀫𑁆𑀧𑁂𑀢𑁆𑀯𑀸 𑀧𑀸𑀬𑀸𑀲𑀁 𑀧𑀘𑀺𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀻 𑀢𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀦𑀺𑀓𑁆𑀔𑀦𑁆𑀢𑀁 𑀓𑀸𑀴𑀓𑀡𑁆𑀡𑀺𑀁 𑀧𑀼𑀦 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀭𑁂 𑀦𑀺𑀓𑀢𑀺𑀓, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀴𑀓𑀡𑁆𑀡𑀺𑀁 𑀧𑀼𑀦 𑀆𑀤𑀸𑀬 𑀆𑀕𑀢𑁄𑀲𑀻’’𑀢𑀺 𑀧𑀭𑀺𑀪𑀸𑀲𑀺. 𑀲𑀯𑀺𑀝𑁆𑀞𑀓𑁄 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀬𑀸𑀦𑀓𑀁 𑀫𑁄𑀘𑁂𑀢𑁆𑀯𑀸 ‘‘𑀅𑀦𑀸𑀘𑀸𑀭𑁂 𑀓𑀺𑀁 𑀯𑀤𑁂𑀲𑀻’’𑀢𑀺 𑀢𑀁 𑀲𑀼𑀓𑁄𑀝𑁆𑀝𑀺𑀢𑀁 𑀓𑁄𑀝𑁆𑀝𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀇𑀫𑀁 𑀕𑁂𑀳𑀁 𑀧𑀸𑀯𑀺𑀲𑀻’’𑀢𑀺 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺. 𑀢𑀢𑁄 𑀧𑀺𑀢𑀭𑀜𑁆𑀘 𑀧𑀼𑀢𑁆𑀢𑀜𑁆𑀘 𑀦𑁆𑀳𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑁆𑀳𑀸𑀬𑀺𑀢𑁆𑀯𑀸 𑀢𑀬𑁄𑀧𑀺 ¶ 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀲𑀸𑀧𑀺 𑀧𑀸𑀧𑀥𑀫𑁆𑀫𑀸 𑀓𑀢𑀺𑀧𑀸𑀳𑀁 𑀅𑀜𑁆𑀜𑀲𑁆𑀫𑀺𑀁 𑀕𑁂𑀳𑁂 𑀯𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀆𑀳 𑁋 ‘‘𑀢𑀸𑀢, 𑀫𑀫 𑀫𑀸𑀢𑀸 𑀏𑀢𑁆𑀢𑀓𑁂𑀦 𑀦 𑀩𑀼𑀚𑁆𑀛𑀢𑀺, 𑀢𑀼𑀫𑁆𑀳𑁂 𑀫𑀫 𑀫𑀸𑀢𑀼 𑀫𑀗𑁆𑀓𑀼𑀪𑀸𑀯𑀓𑀭𑀡𑀢𑁆𑀣𑀁 ‘𑀅𑀲𑀼𑀓𑀕𑀸𑀫𑀓𑁂 𑀫𑀫 𑀫𑀸𑀢𑀼𑀮𑀥𑀻𑀢𑀸 𑀅𑀢𑁆𑀣𑀺 ¶ , 𑀲𑀸 𑀫𑀬𑁆𑀳𑀁 𑀧𑀺𑀢𑀭𑀜𑁆𑀘 𑀧𑀼𑀢𑁆𑀢𑀜𑁆𑀘 𑀫𑀜𑁆𑀘 𑀧𑀝𑀺𑀚𑀕𑁆𑀕𑀺𑀲𑁆𑀲𑀢𑀺, 𑀢𑀁 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀆𑀤𑀸𑀬 𑀬𑀸𑀦𑀓𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑁂𑀢𑁆𑀢𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀲𑀸𑀬𑀁 𑀆𑀕𑀘𑁆𑀙𑀣𑀸’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺.

𑀧𑀝𑀺𑀯𑀺𑀲𑁆𑀲𑀓𑀓𑀼𑀮𑁂 𑀇𑀢𑁆𑀣𑀺𑀬𑁄 ‘‘𑀲𑀸𑀫𑀺𑀓𑁄 𑀓𑀺𑀭 𑀢𑁂 𑀅𑀜𑁆𑀜𑀁 𑀪𑀭𑀺𑀬𑀁 𑀆𑀦𑁂𑀢𑀼𑀁 𑀅𑀲𑀼𑀓𑀕𑀸𑀫𑀁 𑀦𑀸𑀫 𑀕𑀢𑁄’’𑀢𑀺 𑀢𑀲𑁆𑀲𑀸 𑀆𑀘𑀺𑀓𑁆𑀔𑀺𑀁𑀲𑀼. 𑀲𑀸 ‘‘𑀤𑀸𑀦𑀺𑀫𑁆𑀳𑀺 𑀦𑀝𑁆𑀞𑀸, 𑀦𑀢𑁆𑀣𑀺 𑀫𑁂 𑀧𑀼𑀦 𑀑𑀓𑀸𑀲𑁄’’𑀢𑀺 𑀪𑀻𑀢𑀸 𑀢𑀲𑀺𑀢𑀸 𑀳𑀼𑀢𑁆𑀯𑀸 ‘‘𑀧𑀼𑀢𑁆𑀢𑀫𑁂𑀯 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀟𑀺𑀢𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀢𑀸𑀢, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀫𑀫 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀇𑀢𑁄 𑀧𑀝𑁆𑀞𑀸𑀬 𑀢𑀯 𑀧𑀺𑀢𑀭𑀜𑁆𑀘 𑀧𑀺𑀢𑀸𑀫𑀳𑀜𑁆𑀘 𑀅𑀮𑀗𑁆𑀓𑀢𑀘𑁂𑀢𑀺𑀬𑀁 𑀯𑀺𑀬 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀧𑀼𑀦 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀖𑀭𑁂 𑀧𑀯𑁂𑀲𑀦𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀅𑀫𑁆𑀫, 𑀲𑀘𑁂 𑀧𑀼𑀦 𑀏𑀯𑀭𑀽𑀧𑀁 𑀦 𑀓𑀭𑀺𑀲𑁆𑀲𑀣, 𑀓𑀭𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀺𑀢𑀼 𑀆𑀕𑀢𑀓𑀸𑀮𑁂 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁯𑁧.

‘‘𑀬𑀸 𑀢𑁂 𑀲𑀸 𑀪𑀭𑀺𑀬𑀸 𑀅𑀦𑀭𑀺𑀬𑀭𑀽𑀧𑀸, 𑀫𑀸𑀢𑀸 𑀫𑀫𑁂𑀲𑀸 𑀲𑀓𑀺𑀬𑀸 𑀚𑀦𑁂𑀢𑁆𑀢𑀺;

𑀤𑀦𑁆𑀢𑀸 𑀓𑀭𑁂𑀡𑀽𑀯 𑀯𑀲𑀽𑀧𑀦𑀻𑀢𑀸, 𑀲𑀸 𑀧𑀸𑀧𑀥𑀫𑁆𑀫𑀸 𑀧𑀼𑀦𑀭𑀸𑀯𑀚𑀸𑀢𑀽’’𑀢𑀺.

𑀢𑀢𑁆𑀣 ¶ 𑀓𑀭𑁂𑀡𑀽𑀯𑀸𑀢𑀺 𑀢𑀸𑀢, 𑀇𑀤𑀸𑀦𑀺 𑀲𑀸 𑀆𑀦𑁂𑀜𑁆𑀚𑀓𑀸𑀭𑀡𑀁 𑀓𑀸𑀭𑀺𑀓𑀸 𑀳𑀢𑁆𑀣𑀺𑀦𑀻 𑀯𑀺𑀬 𑀤𑀦𑁆𑀢𑀸 𑀯𑀲𑀁 𑀉𑀧𑀦𑀻𑀢𑀸 𑀦𑀺𑀩𑁆𑀩𑀺𑀲𑁂𑀯𑀦𑀸 𑀚𑀸𑀢𑀸. 𑀧𑀼𑀦𑀭𑀸𑀕𑀚𑀸𑀢𑀽𑀢𑀺 𑀧𑀼𑀦 𑀇𑀫𑀁 𑀕𑁂𑀳𑀁 𑀆𑀕𑀘𑁆𑀙𑀢𑀽𑀢𑀺.

𑀏𑀯𑀁 𑀲𑁄 𑀧𑀺𑀢𑀼 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀆𑀦𑁂𑀲𑀺. 𑀲𑀸 𑀲𑀸𑀫𑀺𑀓𑀜𑁆𑀘 𑀲𑀲𑀼𑀭𑀜𑁆𑀘 𑀔𑀫𑀸𑀧𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀦𑁆𑀢𑀸 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀲𑀸𑀫𑀺𑀓𑀜𑁆𑀘 𑀲𑀲𑀼𑀭𑀜𑁆𑀘 𑀧𑀼𑀢𑁆𑀢𑀜𑁆𑀘 𑀧𑀝𑀺𑀚𑀕𑁆𑀕𑀺. 𑀉𑀪𑁄𑀧𑀺 𑀘 𑀧𑀼𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀺𑀢𑀼𑀧𑁄𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀧𑀺𑀢𑀸 𑀘 𑀧𑀼𑀢𑁆𑀢𑁄 𑀘 𑀲𑀼𑀡𑀺𑀲𑀸 𑀘 𑀢𑁂𑀬𑁂𑀯 𑀅𑀳𑁂𑀲𑀼𑀁, 𑀧𑀡𑁆𑀟𑀺𑀢𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀢𑀓𑁆𑀓𑀮𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁪𑁭] 𑁯. 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀁 ¶ 𑀢𑁂 𑀯𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀭𑀜𑁆𑀜𑁄 𑀅𑀲𑀤𑁆𑀤𑀳𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀅𑀦𑁆𑀢𑀭𑀸𑀪𑀢𑁆𑀢𑁂 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀥𑀸𑀦𑀓𑀸𑀮𑁂 𑀤𑁂𑀯𑀢𑀸 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘𑀧𑀼𑀢𑁆𑀢𑁄 𑀢𑁂 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀅𑀧𑁆𑀧𑀸𑀳𑀸𑀭𑀢𑀸𑀬 𑀫𑀢𑁄’𑀢𑀺 𑀫𑀬𑁆𑀳𑀁 𑀆𑀭𑁄𑀘𑁂𑀲𑀼’’𑀦𑁆𑀢𑀺 𑀆𑀳. 𑀲𑀢𑁆𑀣𑀸𑀭𑀸 𑀘 ‘‘𑀲𑀤𑁆𑀤𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀤𑁆𑀤𑀳𑀺𑀁, 𑀪𑀦𑁆𑀢𑁂, 𑀆𑀓𑀸𑀲𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑀺𑀬𑁄𑀧𑀺 𑀤𑁂𑀯𑀢𑀸, ‘𑀫𑀫 𑀧𑀼𑀢𑁆𑀢𑀲𑁆𑀲 𑀩𑁄𑀥𑀺𑀢𑀮𑁂 𑀩𑀼𑀤𑁆𑀥𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀢𑁆𑀣𑀻’𑀢𑀺 𑀧𑀝𑀺𑀓𑁆𑀔𑀺𑀧𑀺’’𑀦𑁆𑀢𑀺 𑀆𑀳. ‘‘𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀫𑀳𑀸𑀥𑀫𑁆𑀫𑀧𑀸𑀮𑀓𑀸𑀮𑁂𑀧𑀺 ‘𑀧𑀼𑀢𑁆𑀢𑁄 𑀢𑁂 𑀫𑀢𑁄 𑀇𑀫𑀸𑀦𑀺𑀲𑁆𑀲 𑀅𑀝𑁆𑀞𑀻𑀦𑀻’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲𑀧𑀺 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 ‘𑀅𑀫𑁆𑀳𑀸𑀓𑀁 𑀓𑀼𑀮𑁂 𑀢𑀭𑀼𑀡𑀓𑀸𑀮𑁂 𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻’𑀢𑀺 𑀦 𑀲𑀤𑁆𑀤𑀳𑀺, 𑀇𑀤𑀸𑀦𑀺 𑀧𑀦 𑀓𑀲𑁆𑀫𑀸 𑀲𑀤𑁆𑀤𑀳𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀓𑀸𑀲𑀺𑀭𑀝𑁆𑀞𑁂 𑀥𑀫𑁆𑀫𑀧𑀸𑀮𑀕𑀸𑀫𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀥𑀫𑁆𑀫𑀧𑀸𑀮𑀓𑀼𑀮𑀲𑁆𑀲 𑀯𑀲𑀦𑀢𑀸𑀬 𑀏𑀢𑀁 𑀦𑀸𑀫𑀁 𑀮𑀪𑀺. 𑀢𑀢𑁆𑀣 𑀤𑀲𑀦𑁆𑀦𑀁 𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀧𑀸𑀮𑀦𑀢𑁄 ‘‘𑀥𑀫𑁆𑀫𑀧𑀸𑀮𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀢𑁄 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺, 𑀢𑀲𑁆𑀲 𑀓𑀼𑀮𑁂 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀸𑀧𑀺 𑀤𑀸𑀦𑀁 𑀤𑁂𑀦𑁆𑀢𑀺, 𑀲𑀻𑀮𑀁 𑀭𑀓𑁆𑀔𑀦𑁆𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀣 𑀦𑀁 𑀯𑀬𑀧𑁆𑀧𑀢𑁆𑀢𑀁 𑀧𑀺𑀢𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀢𑀓𑁆𑀓𑀲𑀺𑀮𑀁 𑀧𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺, 𑀧𑀜𑁆𑀘𑀦𑁆𑀦𑀁 𑀫𑀸𑀡𑀯𑀓𑀲𑀢𑀸𑀦𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀅𑀳𑁄𑀲𑀺. 𑀢𑀤𑀸 𑀆𑀘𑀭𑀺𑀬𑀲𑁆𑀲 𑀚𑁂𑀝𑁆𑀞𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀆𑀘𑀭𑀺𑀬𑁄 𑀫𑀸𑀡𑀯𑀓𑀧𑀭𑀺𑀯𑀼𑀢𑁄 ¶ 𑀜𑀸𑀢𑀺𑀕𑀡𑁂𑀦 𑀲𑀤𑁆𑀥𑀺𑀁 𑀭𑁄𑀤𑀦𑁆𑀢𑁄 𑀓𑀦𑁆𑀤𑀦𑁆𑀢𑁄 𑀲𑀼𑀲𑀸𑀦𑁂 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑀺. 𑀢𑀢𑁆𑀣 𑀆𑀘𑀭𑀺𑀬𑁄 𑀘 𑀜𑀸𑀢𑀺𑀯𑀕𑁆𑀕𑁄 𑀘𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀥𑀫𑁆𑀫𑀧𑀸𑀮𑁄𑀬𑁂𑀯𑁂𑀓𑁄 𑀦 𑀭𑁄𑀤𑀢𑀺 𑀦 𑀧𑀭𑀺𑀤𑁂𑀯𑀢𑀺. 𑀅𑀧𑀺𑀘 𑀔𑁄 𑀧𑀦 𑀢𑁂𑀲𑀼 𑀧𑀜𑁆𑀘𑀲𑀢𑁂𑀲𑀼 𑀫𑀸𑀡𑀯𑁂𑀲𑀼 𑀲𑀼𑀲𑀸𑀦𑀸 𑀆𑀕𑀫𑁆𑀫 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀳𑁄 𑀏𑀯𑀭𑀽𑀧𑁄 𑀦𑀸𑀫 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀢𑀭𑀼𑀡𑀫𑀸𑀡𑀯𑁄 𑀢𑀭𑀼𑀡𑀓𑀸𑀮𑁂𑀬𑁂𑀯 𑀫𑀸𑀢𑀸𑀧𑀺𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄 𑀫𑀭𑀡𑀧𑁆𑀧𑀢𑁆𑀢𑁄’’𑀢𑀺 𑀯𑀤𑀦𑁆𑀢𑁂𑀲𑀼 ‘‘𑀲𑀫𑁆𑀫𑀸, 𑀢𑀼𑀫𑁆𑀳𑁂 ‘𑀢𑀭𑀼𑀡𑁄’𑀢𑀺 𑀪𑀡𑀣, 𑀅𑀣 𑀓𑀲𑁆𑀫𑀸 𑀢𑀭𑀼𑀡𑀓𑀸𑀮𑁂𑀬𑁂𑀯 𑀫𑀭𑀢𑀺, 𑀦𑀦𑀼 𑀅𑀬𑀼𑀢𑁆𑀢𑀁 𑀢𑀭𑀼𑀡𑀓𑀸𑀮𑁂 𑀫𑀭𑀺𑀢𑀼’’𑀦𑁆𑀢𑀺 𑀆𑀳.

𑀅𑀣 𑀦𑀁 𑀢𑁂 𑀆𑀳𑀁𑀲𑀼 ‘‘𑀓𑀺𑀁 𑀧𑀦 𑀲𑀫𑁆𑀫, 𑀢𑁆𑀯𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀫𑀭𑀡𑀪𑀸𑀯𑀁 𑀦 𑀚𑀸𑀦𑀸𑀲𑀻’’𑀢𑀺? 𑀚𑀸𑀦𑀸𑀫𑀺, 𑀢𑀭𑀼𑀡𑀓𑀸𑀮𑁂 𑀧𑀦 𑀦 𑀫𑀭𑀦𑁆𑀢𑀺, 𑀫𑀳𑀮𑁆𑀮𑀓𑀓𑀸𑀮𑁂𑀬𑁂𑀯 𑀫𑀭𑀦𑁆𑀢𑀻𑀢𑀺. 𑀦𑀦𑀼 𑀅𑀦𑀺𑀘𑁆𑀘𑀸 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 ¶ 𑀳𑀼𑀢𑁆𑀯𑀸 𑀅𑀪𑀸𑀯𑀺𑀦𑁄𑀢𑀺? ‘‘𑀲𑀘𑁆𑀘𑀁 𑀅𑀦𑀺𑀘𑁆𑀘𑀸, 𑀤𑀳𑀭𑀓𑀸𑀮𑁂 𑀧𑀦 𑀲𑀢𑁆𑀢𑀸 𑀦 𑀫𑀭𑀦𑁆𑀢𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀫𑀭𑀦𑁆𑀢𑀺, 𑀅𑀦𑀺𑀘𑁆𑀘𑀢𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺. ‘‘𑀓𑀺𑀁 𑀲𑀫𑁆𑀫, 𑀥𑀫𑁆𑀫𑀧𑀸𑀮, 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀦 𑀓𑁂𑀘𑀺 𑀫𑀭𑀦𑁆𑀢𑀻’’𑀢𑀺? ‘‘𑀤𑀳𑀭𑀓𑀸𑀮𑁂 𑀧𑀦 𑀦 𑀫𑀭𑀦𑁆𑀢𑀺, 𑀫𑀳𑀮𑁆𑀮𑀓𑀓𑀸𑀮𑁂𑀬𑁂𑀯 𑀫𑀭𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦𑁂𑀲𑀸 𑀢𑀼𑀫𑁆𑀳𑀸𑀓𑀁 𑀓𑀼𑀮𑀧𑀯𑁂𑀡𑀻’’𑀢𑀺? ‘‘𑀆𑀫 𑀓𑀼𑀮𑀧𑀯𑁂𑀡𑀻’’𑀢𑀺. 𑀫𑀸𑀡𑀯𑀸 𑀢𑀁 𑀢𑀲𑁆𑀲 𑀓𑀣𑀁 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀅𑀣 𑀦𑀁 𑀲𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀲𑀘𑁆𑀘𑀁 𑀓𑀺𑀭 𑀢𑀸𑀢 𑀥𑀫𑁆𑀫𑀧𑀸𑀮, 𑀢𑀼𑀫𑁆𑀳𑀸𑀓𑀁 𑀓𑀼𑀮𑁂 𑀤𑀳𑀭𑀓𑀸𑀮𑁂 𑀦 𑀫𑀻𑀬𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀆𑀘𑀭𑀺𑀬𑀸’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀅𑀢𑀺𑀯𑀺𑀬 𑀅𑀘𑁆𑀙𑀭𑀺𑀬𑀁 𑀯𑀤𑀢𑀺, 𑀇𑀫𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀏𑀢𑀁 𑀲𑀘𑁆𑀘𑀁, 𑀅𑀳𑀫𑁆𑀧𑀺 𑀢𑀫𑁂𑀯 ¶ 𑀥𑀫𑁆𑀫𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀢𑁆𑀢𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀢𑁆𑀢𑀝𑁆𑀞𑀤𑀺𑀯𑀲𑀘𑁆𑀘𑀬𑁂𑀦 𑀥𑀫𑁆𑀫𑀧𑀸𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀅𑀳𑀁 𑀔𑀺𑀧𑁆𑀧𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀬𑀸𑀯 𑀫𑀫𑀸𑀕𑀫𑀦𑀸 𑀇𑀫𑁂 𑀫𑀸𑀡𑀯𑁂 𑀲𑀺𑀧𑁆𑀧𑀁 𑀯𑀸𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀏𑀓𑀲𑁆𑀲 𑀏𑀴𑀓𑀲𑁆𑀲 ¶ 𑀅𑀝𑁆𑀞𑀻𑀦𑀺 𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀲𑀺𑀩𑁆𑀩𑀓𑁂 𑀓𑀢𑁆𑀯𑀸 𑀏𑀓𑀁 𑀘𑀽𑀴𑀼𑀧𑀝𑁆𑀞𑀸𑀓𑀁 𑀆𑀤𑀸𑀬 𑀢𑀓𑁆𑀓𑀲𑀺𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀕𑀸𑀫𑀁 𑀧𑀢𑁆𑀯𑀸 ‘‘𑀓𑀢𑀭𑀁 𑀫𑀳𑀸𑀥𑀫𑁆𑀫𑀧𑀸𑀮𑀲𑁆𑀲 𑀕𑁂𑀳’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀲𑀫𑀦𑀼𑀲𑁆𑀲𑁂𑀲𑀼 𑀬𑁄 𑀬𑁄 𑀧𑀞𑀫𑀁 𑀅𑀤𑁆𑀤𑀲, 𑀲𑁄 𑀲𑁄 𑀆𑀘𑀭𑀺𑀬𑀲𑁆𑀲 𑀳𑀢𑁆𑀣𑀢𑁄 𑀙𑀢𑁆𑀢𑀁 𑀕𑀡𑁆𑀳𑀺, 𑀉𑀧𑀸𑀳𑀦𑀁 𑀕𑀡𑁆𑀳𑀺, 𑀉𑀧𑀝𑁆𑀞𑀸𑀓𑀲𑁆𑀲𑀧𑀺 𑀳𑀢𑁆𑀣𑀢𑁄 𑀧𑀲𑀺𑀩𑁆𑀩𑀓𑀁 𑀕𑀡𑁆𑀳𑀺. ‘‘𑀧𑀼𑀢𑁆𑀢𑀲𑁆𑀲 𑀯𑁄 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑀲𑁆𑀲 𑀆𑀘𑀭𑀺𑀬𑁄 𑀤𑁆𑀯𑀸𑀭𑁂 𑀞𑀺𑀢𑁄𑀢𑀺 𑀓𑀼𑀫𑀸𑀭𑀲𑁆𑀲 𑀧𑀺𑀢𑀼 𑀆𑀭𑁄𑀘𑁂𑀣𑀸’’𑀢𑀺 𑀘 𑀯𑀼𑀢𑁆𑀢𑀸 ‘‘𑀲𑀸𑀥𑀽’’𑀢𑀺 𑀕𑀦𑁆𑀢𑁆𑀯𑀸 𑀆𑀭𑁄𑀘𑀬𑀺𑀁𑀲𑀼. 𑀲𑁄 𑀯𑁂𑀕𑁂𑀦 𑀤𑁆𑀯𑀸𑀭𑀫𑀽𑀮𑀁 𑀕𑀦𑁆𑀢𑁆𑀯𑀸 ‘‘𑀇𑀢𑁄 𑀏𑀣𑀸’’𑀢𑀺 𑀢𑀁 𑀖𑀭𑀁 𑀅𑀪𑀺𑀦𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀸𑀤𑀥𑁄𑀯𑀦𑀸𑀤𑀺𑀓𑀺𑀘𑁆𑀘𑀁 𑀅𑀓𑀸𑀲𑀺.

𑀆𑀘𑀭𑀺𑀬𑁄 𑀪𑀼𑀢𑁆𑀢𑀪𑁄𑀚𑀦𑁄 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑀓𑀸𑀮𑁂 ‘‘𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑁄 𑀢𑁂 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑁄 𑀧𑀜𑁆𑀜𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀜𑁆𑀘 𑀲𑀺𑀧𑁆𑀧𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄, 𑀅𑀧𑀺𑀘 𑀔𑁄 𑀧𑀦𑁂𑀓𑁂𑀦 𑀅𑀨𑀸𑀲𑀼𑀓𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀫𑀸 𑀲𑁄𑀘𑀺𑀢𑁆𑀣𑀸’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀳𑀲𑀺𑀢𑀁 𑀳𑀲𑀺. ‘‘𑀓𑀺𑀁 𑀦𑀼 𑀩𑁆𑀭𑀸𑀳𑁆𑀫𑀡, 𑀳𑀲𑀲𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀦 𑀫𑀭𑀢𑀺, 𑀅𑀜𑁆𑀜𑁄 𑀓𑁄𑀘𑀺 𑀫𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. ‘‘𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑁄𑀬𑁂𑀯 𑀢𑁂 𑀫𑀢𑁄, 𑀧𑀼𑀢𑁆𑀢𑀲𑁆𑀲𑁂𑀯 𑀢𑁂 𑀅𑀝𑁆𑀞𑀻𑀦𑀺 𑀤𑀺𑀲𑁆𑀯𑀸 𑀲𑀤𑁆𑀤𑀳𑀸’’𑀢𑀺 𑀅𑀝𑁆𑀞𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀢𑁂 𑀧𑀼𑀢𑁆𑀢𑀲𑁆𑀲 𑀅𑀝𑁆𑀞𑀻𑀦𑀻’’𑀢𑀺 𑀆𑀳. 𑀏𑀢𑀸𑀦𑀺 𑀏𑀴𑀓𑀲𑁆𑀲 𑀯𑀸 𑀲𑀼𑀦𑀔𑀲𑁆𑀲 𑀯𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀧𑀼𑀢𑁆𑀢𑁄 𑀦 𑀫𑀭𑀢𑀺, 𑀅𑀫𑁆𑀳𑀸𑀓𑀸𑀜𑁆𑀳𑀺 𑀓𑀼𑀮𑁂 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀢𑀭𑀼𑀡𑀓𑀸𑀮𑁂 𑀫𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀢𑁆𑀯𑀁 𑀫𑀼𑀲𑀸 𑀪𑀡𑀲𑀻𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀩𑁆𑀩𑁂𑀧𑀺 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀳𑀲𑀺𑀢𑀁 𑀳𑀲𑀺𑀁𑀲𑀼. 𑀆𑀘𑀭𑀺𑀬𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀢𑀼𑀫𑁆𑀳𑀸𑀓𑀁 𑀓𑀼𑀮𑀧𑀯𑁂𑀡𑀺𑀬𑀁 𑀤𑀳𑀭𑀸𑀦𑀁 𑀅𑀫𑀭𑀡𑁂𑀦 𑀦 𑀲𑀓𑁆𑀓𑀸 𑀅𑀳𑁂𑀢𑀼𑀓𑁂𑀦 𑀪𑀯𑀺𑀢𑀼𑀁, 𑀓𑁂𑀦 𑀯𑁄 𑀓𑀸𑀭𑀡𑁂𑀦 𑀤𑀳𑀭𑀸 𑀦 𑀫𑀻𑀬𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁯𑁨.

‘‘𑀓𑀺𑀁 ¶ 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀅𑀓𑁆𑀔𑀸𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀏𑀢𑀫𑀢𑁆𑀣𑀁, 𑀓𑀲𑁆𑀫𑀸 𑀦𑀼 𑀢𑀼𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺.

𑀢𑀢𑁆𑀣 ¶ ¶ 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁. 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲𑀸𑀢𑀺 𑀢𑀼𑀫𑁆𑀳𑀸𑀓𑀁 𑀓𑀼𑀮𑁂 𑀤𑀳𑀭𑀸𑀦𑀁 𑀅𑀫𑀭𑀡𑀁 𑀦𑀸𑀫 𑀓𑀢𑀭𑀲𑀼𑀘𑀭𑀺𑀢𑀲𑁆𑀲 𑀯𑀺𑀧𑀸𑀓𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀬𑁂𑀲𑀁 𑀕𑀼𑀡𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁 𑀓𑀼𑀮𑁂 𑀤𑀳𑀭𑀸 𑀦 𑀫𑀻𑀬𑀦𑁆𑀢𑀺, 𑀢𑁂 𑀯𑀡𑁆𑀡𑀬𑀦𑁆𑀢𑁄 𑁋

𑁯𑁩.

‘‘𑀥𑀫𑁆𑀫𑀁 𑀘𑀭𑀸𑀫 𑀦 𑀫𑀼𑀲𑀸 𑀪𑀡𑀸𑀫, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑀸𑀫;

𑀅𑀦𑀭𑀺𑀬𑀁 𑀧𑀭𑀺𑀯𑀚𑁆𑀚𑁂𑀫𑀼 𑀲𑀩𑁆𑀩𑀁, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁯𑁪.

‘‘𑀲𑀼𑀡𑁄𑀫 𑀥𑀫𑁆𑀫𑀁 𑀅𑀲𑀢𑀁 𑀲𑀢𑀜𑁆𑀘, 𑀦 𑀘𑀸𑀧𑀺 𑀥𑀫𑁆𑀫𑀁 𑀅𑀲𑀢𑀁 𑀭𑁄𑀘𑀬𑀸𑀫;

𑀳𑀺𑀢𑁆𑀯𑀸 𑀅𑀲𑀦𑁆𑀢𑁂 𑀦 𑀚𑀳𑀸𑀫 𑀲𑀦𑁆𑀢𑁂, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁯𑁫.

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑀸 𑀪𑀯𑀸𑀫, 𑀤𑀤𑀫𑁆𑀧𑀺 𑀯𑁂 𑀅𑀢𑁆𑀢𑀫𑀦𑀸 𑀪𑀯𑀸𑀫;

𑀤𑀢𑁆𑀯𑀸𑀧𑀺 𑀯𑁂 𑀦𑀸𑀦𑀼𑀢𑀧𑁆𑀧𑀸𑀫 𑀧𑀘𑁆𑀙𑀸, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁯𑁬.

‘‘𑀲𑀫𑀡𑁂 𑀫𑀬𑀁 𑀩𑁆𑀭𑀸𑀳𑁆𑀫𑀡𑁂 𑀅𑀤𑁆𑀥𑀺𑀓𑁂 𑀘, 𑀯𑀦𑀺𑀩𑁆𑀩𑀓𑁂 𑀬𑀸𑀘𑀦𑀓𑁂 𑀤𑀮𑀺𑀤𑁆𑀤𑁂;

𑀅𑀦𑁆𑀦𑁂𑀦 𑀧𑀸𑀦𑁂𑀦 𑀅𑀪𑀺𑀢𑀧𑁆𑀧𑀬𑀸𑀫, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁯𑁭.

‘‘𑀫𑀬𑀜𑁆𑀘 𑀪𑀭𑀺𑀬𑀁 𑀦𑀸𑀢𑀺𑀓𑁆𑀓𑀫𑀸𑀫, 𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁯𑁮.

‘‘𑀧𑀸𑀡𑀸𑀢𑀺𑀧𑀸𑀢𑀸 ¶ 𑀯𑀺𑀭𑀫𑀸𑀫 𑀲𑀩𑁆𑀩𑁂, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫;

𑀅𑀫𑀚𑁆𑀚𑀧𑀸 𑀦𑁄𑀧𑀺 𑀫𑀼𑀲𑀸 𑀪𑀡𑀸𑀫, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁯𑁯.

‘‘𑀏𑀢𑀸𑀲𑀼 𑀯𑁂 𑀚𑀸𑀬𑀭𑁂 𑀲𑀼𑀢𑁆𑀢𑀫𑀸𑀲𑀼, 𑀫𑁂𑀥𑀸𑀯𑀺𑀦𑁄 𑀳𑁄𑀦𑁆𑀢𑀺 𑀧𑀳𑀽𑀢𑀧𑀜𑁆𑀜𑀸;

𑀩𑀳𑀼𑀲𑁆𑀲𑀼𑀢𑀸 𑀯𑁂𑀤𑀕𑀼𑀦𑁄 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁧𑁦𑁦.

‘‘𑀫𑀸𑀢𑀸 ¶ 𑀧𑀺𑀢𑀸 𑀘 𑀪𑀕𑀺𑀦𑀻 𑀪𑀸𑀢𑀭𑁄 𑀘, 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀫𑀬𑀜𑁆𑀘 𑀲𑀩𑁆𑀩𑁂;

𑀥𑀫𑁆𑀫𑀁 𑀘𑀭𑀸𑀫 𑀧𑀭𑀮𑁄𑀓𑀳𑁂𑀢𑀼, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂.

𑁧𑁦𑁧.

‘‘𑀤𑀸𑀲𑀸 𑀘 𑀤𑀸𑀲𑁆𑀬𑁄 𑀅𑀦𑀼𑀚𑀻𑀯𑀺𑀦𑁄 𑀘, 𑀧𑀭𑀺𑀘𑀸𑀭𑀓𑀸 𑀓𑀫𑁆𑀫𑀓𑀭𑀸 𑀘 𑀲𑀩𑁆𑀩𑁂;

𑀥𑀫𑁆𑀫𑀁 ¶ 𑀘𑀭𑀦𑁆𑀢𑀺 𑀧𑀭𑀮𑁄𑀓𑀳𑁂𑀢𑀼, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀆𑀳.

𑀢𑀢𑁆𑀣 𑀥𑀫𑁆𑀫𑀁 𑀘𑀭𑀸𑀫𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀘𑀭𑀸𑀫, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀳𑁂𑀢𑀼 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀫, 𑀧𑀭𑀪𑀡𑁆𑀟𑀁 𑀮𑁄𑀪𑀘𑀺𑀢𑁆𑀢𑁂𑀦 𑀦 𑀑𑀮𑁄𑀓𑁂𑀫𑀸𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀫𑀼𑀲𑀸𑀯𑀸𑀤𑁄 𑀘𑁂𑀢𑁆𑀣 𑀫𑀼𑀲𑀸𑀯𑀸𑀤𑀺𑀲𑁆𑀲 𑀅𑀓𑀭𑀡𑀧𑀸𑀧𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀉𑀲𑁆𑀲𑀦𑁆𑀦𑀯𑀲𑁂𑀦 𑀧𑀼𑀦 𑀯𑀼𑀢𑁆𑀢𑁄. 𑀢𑁂 𑀓𑀺𑀭 𑀳𑀲𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀫𑀼𑀲𑀸 𑀦 𑀪𑀡𑀦𑁆𑀢𑀺. 𑀧𑀸𑀧𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀦𑀺𑀭𑀬𑀕𑀸𑀫𑀺𑀓𑀫𑁆𑀫𑀸𑀦𑀺. 𑀅𑀦𑀭𑀺𑀬𑀦𑁆𑀢𑀺 𑀅𑀭𑀺𑀬𑀕𑀭𑀳𑀺𑀢𑀁 𑀲𑀩𑁆𑀩𑀁 𑀅𑀲𑀼𑀦𑁆𑀤𑀭𑀁 𑀅𑀧𑀭𑀺𑀲𑀼𑀤𑁆𑀥𑀁 𑀓𑀫𑁆𑀫𑀁 𑀧𑀭𑀺𑀯𑀚𑁆𑀚𑀬𑀸𑀫. 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀦𑁆𑀢𑀺 𑀏𑀢𑁆𑀣 𑀳𑀺-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄, 𑀢𑁂𑀦 𑀓𑀸𑀭𑀡𑁂𑀦 𑀅𑀫𑁆𑀳𑀸𑀓𑀁 𑀤𑀳𑀭𑀸 𑀦 𑀫𑀻𑀬𑀦𑁆𑀢𑀺, 𑀅𑀦𑁆𑀢𑀭𑀸 𑀅𑀓𑀸𑀮𑀫𑀭𑀡𑀁 𑀦𑀸𑀫 𑀦𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀢𑀲𑁆𑀫𑀸 𑀅𑀫𑁆𑀳’’𑀦𑁆𑀢𑀺𑀧𑀺 𑀧𑀸𑀞𑁄. 𑀲𑀼𑀡𑁄𑀫𑀸𑀢𑀺 𑀫𑀬𑀁 𑀓𑀺𑀭𑀺𑀬𑀯𑀸𑀤𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀓𑀼𑀲𑀮𑀤𑀻𑀧𑀦𑀫𑁆𑀧𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀓𑀼𑀲𑀮𑀤𑀻𑀧𑀦𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑁄𑀫 ¶ , 𑀲𑁄 𑀧𑀦 𑀦𑁄 𑀲𑀼𑀢𑀫𑀢𑁆𑀢𑀓𑁄𑀯 𑀳𑁄𑀢𑀺, 𑀢𑀁 𑀦 𑀭𑁄𑀘𑀬𑀸𑀫. 𑀢𑁂𑀳𑀺 𑀧𑀦 𑀦𑁄 𑀲𑀤𑁆𑀥𑀺𑀁 𑀯𑀺𑀕𑁆𑀕𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸 𑀫𑀸 𑀳𑁄𑀢𑀽𑀢𑀺 𑀥𑀫𑁆𑀫𑀁 𑀲𑀼𑀡𑀸𑀫, 𑀲𑀼𑀢𑁆𑀯𑀸𑀧𑀺 𑀳𑀺𑀢𑁆𑀯𑀸 𑀅𑀲𑀦𑁆𑀢𑁂 𑀲𑀦𑁆𑀢𑁂 𑀯𑀢𑁆𑀢𑀸𑀫, 𑀏𑀓𑀫𑁆𑀧𑀺 𑀔𑀡𑀁 𑀦 𑀚𑀳𑀸𑀫 𑀲𑀦𑁆𑀢𑁂, 𑀧𑀸𑀧𑀫𑀺𑀢𑁆𑀢𑁂 𑀧𑀳𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁂𑀯𑀺𑀦𑁄𑀯 𑀳𑁄𑀫𑀸𑀢𑀺.

𑀲𑀫𑀡𑁂 𑀫𑀬𑀁 𑀩𑁆𑀭𑀸𑀳𑁆𑀫𑀡𑁂𑀢𑀺 𑀫𑀬𑀁 𑀲𑀫𑀺𑀢𑀧𑀸𑀧𑁂 𑀩𑀸𑀳𑀺𑀢𑀧𑀸𑀧𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀧𑀺 𑀅𑀯𑀲𑁂𑀲𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀧𑀺 𑀅𑀤𑁆𑀥𑀺𑀓𑀬𑀸𑀘𑀓𑁂 𑀲𑁂𑀲𑀚𑀦𑁂𑀧𑀺 𑀅𑀦𑁆𑀦𑀧𑀸𑀦𑁂𑀦 𑀅𑀪𑀺𑀢𑀧𑁆𑀧𑁂𑀫𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀧𑀦 𑀅𑀬𑀁 𑀕𑀸𑀣𑀸 ‘‘𑀧𑀼𑀩𑁆𑀩𑁂𑀯 𑀤𑀸𑀦𑀸’’𑀢𑀺 𑀕𑀸𑀣𑀸𑀬 𑀧𑀘𑁆𑀙𑀢𑁄 𑀆𑀕𑀢𑀸. 𑀦𑀸𑀢𑀺𑀓𑁆𑀓𑀫𑀸𑀫𑀸𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀳𑀺 𑀅𑀜𑁆𑀜𑀁 𑀫𑀺𑀘𑁆𑀙𑀸𑀘𑀸𑀭𑀁 𑀦 𑀓𑀭𑁄𑀫. 𑀅𑀜𑁆𑀜𑀢𑁆𑀭 𑀢𑀸𑀳𑀻𑀢𑀺 𑀢𑀸 𑀅𑀢𑁆𑀢𑀦𑁄 𑀪𑀭𑀺𑀬𑀸 𑀞𑀧𑁂𑀢𑁆𑀯𑀸 𑀲𑁂𑀲𑀇𑀢𑁆𑀣𑀻𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫, 𑀅𑀫𑁆𑀳𑀸𑀓𑀁 𑀪𑀭𑀺𑀬𑀸𑀧𑀺 𑀲𑁂𑀲𑀧𑀼𑀭𑀺𑀲𑁂𑀲𑀼 𑀏𑀯𑀫𑁂𑀯 𑀯𑀢𑁆𑀢𑀦𑁆𑀢𑀺. 𑀚𑀸𑀬𑀭𑁂𑀢𑀺 𑀚𑀸𑀬𑀦𑁆𑀢𑀺. 𑀲𑀼𑀢𑁆𑀢𑀫𑀸𑀲𑀽𑀢𑀺 𑀲𑀼𑀲𑀻𑀮𑀸𑀲𑀼 𑀉𑀢𑁆𑀢𑀫𑀺𑀢𑁆𑀣𑀻𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀏𑀢𑀸𑀲𑀼 𑀲𑀫𑁆𑀧𑀦𑁆𑀦𑀲𑀻𑀮𑀸𑀲𑀼 𑀉𑀢𑁆𑀢𑀫𑀺𑀢𑁆𑀣𑀻𑀲𑀼 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀸 𑀚𑀸𑀬𑀦𑁆𑀢𑀺, 𑀢𑁂 𑀫𑁂𑀥𑀸𑀯𑀺𑀦𑁄𑀢𑀺 𑀏𑀯𑀁𑀧𑀓𑀸𑀭𑀸 𑀳𑁄𑀦𑁆𑀢𑀺, 𑀓𑀼𑀢𑁄 𑀢𑁂𑀲𑀁 𑀅𑀦𑁆𑀢𑀭𑀸 𑀫𑀭𑀡𑀁, 𑀢𑀲𑁆𑀫𑀸𑀧𑀺 𑀅𑀫𑁆𑀳𑀸𑀓𑀁 𑀓𑀼𑀮𑁂 𑀤𑀳𑀭𑀸 𑀦 𑀫𑀭𑀦𑁆𑀢𑀻𑀢𑀺. 𑀥𑀫𑁆𑀫𑀁 𑀘𑀭𑀸𑀫𑀸𑀢𑀺 𑀧𑀭𑀮𑁄𑀓𑀢𑁆𑀣𑀸𑀬 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑀁 𑀘𑀭𑀸𑀫. 𑀤𑀸𑀲𑁆𑀬𑁄𑀢𑀺 𑀤𑀸𑀲𑀺𑀬𑁄.

𑀅𑀯𑀲𑀸𑀦𑁂 ¶ 𑁋

𑁧𑁦𑁨.

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻.

𑁧𑁦𑁩.

‘‘𑀥𑀫𑁆𑀫𑁄 ¶ 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀯𑀺𑀬 𑀯𑀲𑁆𑀲𑀓𑀸𑀮𑁂;

𑀥𑀫𑁆𑀫𑁂𑀦 𑀕𑀼𑀢𑁆𑀢𑁄 𑀫𑀫 𑀥𑀫𑁆𑀫𑀧𑀸𑀮𑁄, 𑀅𑀜𑁆𑀜𑀲𑁆𑀲 𑀅𑀝𑁆𑀞𑀻𑀦𑀺 𑀲𑀼𑀔𑀻 𑀓𑀼𑀫𑀸𑀭𑁄’’𑀢𑀺. 𑁋

𑀇𑀫𑀸𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀘𑀸𑀭𑀻𑀦𑀁 𑀕𑀼𑀡𑀁 𑀓𑀣𑁂𑀲𑀺.

𑀢𑀢𑁆𑀣 𑀭𑀓𑁆𑀔𑀢𑀻𑀢𑀺 𑀥𑀫𑁆𑀫𑁄 𑀦𑀸𑀫𑁂𑀲𑁄 𑀭𑀓𑁆𑀔𑀺𑀢𑁄 𑀅𑀢𑁆𑀢𑀦𑁄 𑀭𑀓𑁆𑀔𑀺𑀢𑀁 𑀧𑀝𑀺𑀭𑀓𑁆𑀔𑀢𑀺. 𑀲𑀼𑀔𑀫𑀸𑀯𑀳𑀢𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀲𑀼𑀔𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀆𑀯𑀳𑀢𑀺. 𑀦 ¶ 𑀤𑀼𑀕𑁆𑀕𑀢𑀺𑀦𑁆𑀢𑀺 𑀦𑀺𑀭𑀬𑀸𑀤𑀺𑀪𑁂𑀤𑀁 𑀤𑀼𑀕𑁆𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀏𑀯𑀁 𑀩𑁆𑀭𑀸𑀳𑁆𑀫𑀡, 𑀫𑀬𑀁 𑀥𑀫𑁆𑀫𑀁 𑀭𑀓𑁆𑀔𑀸𑀫, 𑀥𑀫𑁆𑀫𑁄𑀧𑀺 𑀅𑀫𑁆𑀳𑁂 𑀭𑀓𑁆𑀔𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦 𑀕𑀼𑀢𑁆𑀢𑁄𑀢𑀺 𑀫𑀳𑀸𑀙𑀢𑁆𑀢𑀲𑀤𑀺𑀲𑁂𑀦 𑀅𑀢𑁆𑀢𑀦𑀸 𑀕𑁄𑀧𑀺𑀢𑀥𑀫𑁆𑀫𑁂𑀦 𑀕𑀼𑀢𑁆𑀢𑁄. 𑀅𑀜𑁆𑀜𑀲𑁆𑀲 𑀅𑀝𑁆𑀞𑀻𑀦𑀻𑀢𑀺 𑀢𑀬𑀸 𑀆𑀦𑀻𑀢𑀸𑀦𑀺 𑀅𑀝𑁆𑀞𑀻𑀦𑀺 𑀅𑀜𑁆𑀜𑀲𑁆𑀲 𑀏𑀴𑀓𑀲𑁆𑀲 𑀯𑀸 𑀲𑀼𑀦𑀔𑀲𑁆𑀲 𑀯𑀸 𑀅𑀝𑁆𑀞𑀻𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀙𑀟𑁆𑀟𑁂𑀣𑁂𑀢𑀸𑀦𑀺, 𑀫𑀫 𑀧𑀼𑀢𑁆𑀢𑁄 𑀲𑀼𑀔𑀻 𑀓𑀼𑀫𑀸𑀭𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑁄 ‘‘𑀫𑀬𑁆𑀳𑀁 𑀆𑀕𑀫𑀦𑀁 𑀲𑀼𑀆𑀕𑀫𑀦𑀁, 𑀲𑀨𑀮𑀁, 𑀦𑁄 𑀦𑀺𑀧𑁆𑀨𑀮’’𑀦𑁆𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀥𑀫𑁆𑀫𑀧𑀸𑀮𑀲𑁆𑀲 𑀧𑀺𑀢𑀭𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀫𑀬𑀸 𑀆𑀕𑀘𑁆𑀙𑀦𑁆𑀢𑁂𑀦 𑀢𑀼𑀫𑁆𑀳𑀸𑀓𑀁 𑀯𑀻𑀫𑀁𑀲𑀦𑀢𑁆𑀣𑀸𑀬 𑀇𑀫𑀸𑀦𑀺 𑀏𑀴𑀓𑀅𑀝𑁆𑀞𑀻𑀦𑀺 𑀆𑀪𑀢𑀸𑀦𑀺, 𑀧𑀼𑀢𑁆𑀢𑁄 𑀢𑁂 𑀅𑀭𑁄𑀕𑁄𑀬𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀓𑁆𑀔𑀺𑀢𑀥𑀫𑁆𑀫𑀁 𑀫𑀬𑁆𑀳𑀫𑁆𑀧𑀺 𑀤𑁂𑀣𑀸’’𑀢𑀺 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀧𑀸𑀮𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑁂𑀲𑁂𑀲𑀺.

𑀲𑀢𑁆𑀣𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀆𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁪𑁮] 𑁧𑁦. 𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀲𑁆𑀫𑀲𑁂 ¶ 𑀓𑀢𑀧𑀸𑀧𑀫𑁆𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀜𑁆𑀳𑀺 𑀪𑀺𑀓𑁆𑀔𑀽 𑀤𑁂𑀯𑀤𑀢𑁆𑀢𑀲𑁆𑀲 𑀅𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀥𑀦𑀼𑀕𑁆𑀕𑀳𑀸𑀤𑀺𑀧𑀬𑁄𑀚𑀦𑁂𑀦 𑀤𑀲𑀩𑀮𑀲𑁆𑀲 𑀯𑀥𑀢𑁆𑀣𑀫𑁂𑀯 𑀉𑀧𑀸𑀬𑀁 𑀓𑀭𑁄𑀢𑀻’’𑀢𑀺. 𑀲𑀢𑁆𑀣𑀸 ¶ 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀏𑀲 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑁄𑀲𑀫𑁆𑀩𑀺𑀬𑀁 𑀓𑁄𑀲𑀫𑁆𑀩𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀯𑁂𑀴𑀼𑀯𑀦𑁂 𑀓𑀼𑀓𑁆𑀓𑀼𑀝𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀦𑁂𑀓𑀲𑀢𑀓𑀼𑀓𑁆𑀓𑀼𑀝𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑁂 𑀯𑀲𑀢𑀺, 𑀢𑀲𑁆𑀲𑀸𑀯𑀺𑀤𑀽𑀭𑁂 𑀏𑀓𑁄 𑀲𑁂𑀦𑁄 𑀯𑀲𑀢𑀺 ¶ . 𑀲𑁄 𑀉𑀧𑀸𑀬𑁂𑀦 𑀏𑀓𑁂𑀓𑀁 𑀓𑀼𑀓𑁆𑀓𑀼𑀝𑀁 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑁄 𑀞𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀲𑁂𑀲𑁂 𑀔𑀸𑀤𑀺, 𑀩𑁄𑀥𑀺𑀲𑀢𑁆𑀢𑁄 𑀏𑀓𑀓𑁄𑀯 𑀅𑀳𑁄𑀲𑀺. 𑀲𑁄 𑀅𑀧𑁆𑀧𑀫𑀢𑁆𑀢𑁄 𑀯𑁂𑀮𑀸𑀬 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀯𑀲𑀢𑀺. 𑀲𑁄 𑀲𑁂𑀦𑁄 𑀢𑀁 𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀏𑀓𑁂𑀦 𑀦𑀁 𑀉𑀧𑀸𑀬𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲𑀸𑀯𑀺𑀤𑀽𑀭𑁂 𑀲𑀸𑀔𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 ‘‘𑀲𑀫𑁆𑀫 𑀓𑀼𑀓𑁆𑀓𑀼𑀝𑀭𑀸𑀚, 𑀢𑁆𑀯𑀁 𑀫𑀬𑁆𑀳𑀁 𑀓𑀲𑁆𑀫𑀸 𑀪𑀸𑀬𑀲𑀺, 𑀅𑀳𑀁 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀢𑁆𑀢𑀼𑀓𑀸𑀫𑁄, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀤𑁂𑀲𑁂 𑀲𑀫𑁆𑀧𑀦𑁆𑀦𑀕𑁄𑀘𑀭𑁄, 𑀢𑀢𑁆𑀣 𑀉𑀪𑁄𑀧𑀺 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀁𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 ‘‘𑀲𑀫𑁆𑀫, 𑀫𑀬𑁆𑀳𑀁 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀕𑀘𑁆𑀙 𑀢𑁆𑀯’’𑀦𑁆𑀢𑀺. ‘‘𑀲𑀫𑁆𑀫, 𑀢𑁆𑀯𑀁 𑀫𑀬𑀸 𑀧𑀼𑀩𑁆𑀩𑁂 𑀓𑀢𑀧𑀸𑀧𑀢𑀸𑀬 𑀦 𑀲𑀤𑁆𑀤𑀳𑀲𑀺, 𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀦 𑀫𑀬𑁆𑀳𑀁 𑀢𑀸𑀤𑀺𑀲𑁂𑀦 𑀲𑀳𑀸𑀬𑁂𑀦𑀢𑁆𑀣𑁄, 𑀕𑀘𑁆𑀙 𑀢𑁆𑀯’’𑀦𑁆𑀢𑀺. 𑀇𑀢𑀺 𑀦𑀁 𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀢𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀸𑀫 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀦𑀖𑀝𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀤𑁂𑀯𑀢𑀸𑀲𑀼 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸𑀲𑀼 𑀥𑀫𑁆𑀫𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑁋

𑁧𑁦𑁪.

‘‘𑀦𑀸𑀲𑁆𑀫𑀲𑁂 𑀓𑀢𑀧𑀸𑀧𑀫𑁆𑀳𑀺, 𑀦𑀸𑀲𑁆𑀫𑀲𑁂 𑀅𑀮𑀺𑀓𑀯𑀸𑀤𑀺𑀦𑁂;

𑀦𑀸𑀲𑁆𑀫𑀲𑁂 𑀅𑀢𑁆𑀢𑀢𑁆𑀣𑀧𑀜𑁆𑀜𑀫𑁆𑀳𑀺, 𑀅𑀢𑀺𑀲𑀦𑁆𑀢𑁂𑀧𑀺 𑀦𑀸𑀲𑁆𑀫𑀲𑁂.

𑁧𑁦𑁫.

‘‘𑀪𑀯𑀦𑁆𑀢𑀺 𑀳𑁂𑀓𑁂 𑀧𑀼𑀭𑀺𑀲𑀸, 𑀕𑁄𑀧𑀺𑀧𑀸𑀲𑀺𑀓𑀚𑀸𑀢𑀺𑀓𑀸;

𑀖𑀲𑀦𑁆𑀢𑀺 𑀫𑀜𑁆𑀜𑁂 𑀫𑀺𑀢𑁆𑀢𑀸𑀦𑀺, 𑀯𑀸𑀘𑀸𑀬 𑀦 𑀘 𑀓𑀫𑁆𑀫𑀼𑀦𑀸.

𑁧𑁦𑁬.

‘‘𑀲𑀼𑀓𑁆𑀔𑀜𑁆𑀚𑀮𑀺𑀧𑀕𑁆𑀕𑀳𑀺𑀢𑀸 ¶ , 𑀯𑀸𑀘𑀸𑀬 𑀧𑀮𑀺𑀕𑀼𑀡𑁆𑀞𑀺𑀢𑀸;

𑀫𑀦𑀼𑀲𑁆𑀲𑀨𑁂𑀕𑁆𑀕𑀽 𑀦𑀸𑀲𑀻𑀤𑁂, 𑀬𑀲𑁆𑀫𑀺𑀁 𑀦𑀢𑁆𑀣𑀺 𑀓𑀢𑀜𑁆𑀜𑀼𑀢𑀸.

𑁧𑁦𑁭.

‘‘𑀦 ¶ 𑀳𑀺 𑀅𑀜𑁆𑀜𑀜𑁆𑀜𑀘𑀺𑀢𑁆𑀢𑀸𑀦𑀁, 𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦 𑀯𑀸;

𑀦𑀸𑀦𑀸𑀯𑀺𑀓𑀢𑁆𑀯𑀸 𑀲𑀁𑀲𑀕𑁆𑀕𑀁, 𑀢𑀸𑀤𑀺𑀲𑀫𑁆𑀧𑀺 𑀘 𑀦𑀸𑀲𑁆𑀫𑀲𑁂.

𑁧𑁦𑁮.

‘‘𑀅𑀦𑀭𑀺𑀬𑀓𑀫𑁆𑀫𑀫𑁄𑀓𑁆𑀓𑀦𑁆𑀢𑀁, 𑀅𑀣𑁂𑀢𑀁 𑀲𑀩𑁆𑀩𑀖𑀸𑀢𑀺𑀦𑀁;

𑀦𑀺𑀲𑀺𑀢𑀁𑀯 𑀧𑀝𑀺𑀘𑁆𑀙𑀦𑁆𑀦𑀁, 𑀢𑀸𑀤𑀺𑀲𑀫𑁆𑀧𑀺 𑀘 𑀦𑀸𑀲𑁆𑀫𑀲𑁂.

𑁧𑁦𑁯.

‘‘𑀫𑀺𑀢𑁆𑀢𑀭𑀽𑀧𑁂𑀦𑀺𑀥𑁂𑀓𑀘𑁆𑀘𑁂, 𑀲𑀸𑀔𑀮𑁆𑀬𑁂𑀦 𑀅𑀘𑁂𑀢𑀲𑀸;

𑀯𑀺𑀯𑀺𑀥𑁂𑀳𑀺 𑀉𑀧𑀸𑀬𑀦𑁆𑀢𑀺, 𑀢𑀸𑀤𑀺𑀲𑀫𑁆𑀧𑀺 𑀘 𑀦𑀸𑀲𑁆𑀫𑀲𑁂.

𑁧𑁧𑁦.

‘‘𑀆𑀫𑀺𑀲𑀁 ¶ 𑀯𑀸 𑀥𑀦𑀁 𑀯𑀸𑀧𑀺, 𑀬𑀢𑁆𑀣 𑀧𑀲𑁆𑀲𑀢𑀺 𑀢𑀸𑀤𑀺𑀲𑁄;

𑀤𑀼𑀩𑁆𑀪𑀺𑀁 𑀓𑀭𑁄𑀢𑀺 𑀤𑀼𑀫𑁆𑀫𑁂𑀥𑁄, 𑀢𑀜𑁆𑀘 𑀳𑀦𑁆𑀢𑁆𑀯𑀸𑀦 𑀕𑀘𑁆𑀙𑀢𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀆𑀳;

𑀢𑀢𑁆𑀣 𑀦𑀸𑀲𑁆𑀫𑀲𑁂𑀢𑀺 𑀦𑀸𑀲𑁆𑀲𑀲𑁂. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀦 𑀯𑀺𑀲𑁆𑀲𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀧𑀸𑀧𑀫𑁆𑀳𑀻𑀢𑀺 𑀧𑀞𑀫𑀁 𑀓𑀢𑀧𑀸𑀧𑁂 𑀧𑀼𑀕𑁆𑀕𑀮𑁂. 𑀅𑀮𑀺𑀓𑀯𑀸𑀤𑀺𑀦𑁂𑀢𑀺 𑀫𑀼𑀲𑀸𑀯𑀸𑀤𑀺𑀫𑁆𑀳𑀺𑀧𑀺 𑀦 𑀯𑀺𑀲𑁆𑀲𑀲𑁂. 𑀢𑀲𑁆𑀲 𑀳𑀺 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀧𑀸𑀧𑀁 𑀦𑀢𑁆𑀣𑀺. 𑀦𑀸𑀲𑁆𑀫𑀲𑁂 𑀅𑀢𑁆𑀢𑀢𑁆𑀣𑀧𑀜𑁆𑀜𑀫𑁆𑀳𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀯 𑀬𑀲𑁆𑀲 𑀧𑀜𑁆𑀜𑀸 𑀲𑁆𑀦𑁂𑀳𑀯𑀲𑁂𑀦 𑀦 𑀪𑀚𑀢𑀺, 𑀥𑀦𑀢𑁆𑀣𑀺𑀓𑁄𑀯 𑀪𑀚𑀢𑀺, 𑀢𑀲𑁆𑀫𑀺𑀁 𑀅𑀢𑁆𑀢𑀢𑁆𑀣𑀧𑀜𑁆𑀜𑁂𑀧𑀺 𑀦 𑀯𑀺𑀲𑁆𑀲𑀲𑁂. 𑀅𑀢𑀺𑀲𑀦𑁆𑀢𑁂𑀢𑀺 𑀅𑀦𑁆𑀢𑁄 𑀉𑀧𑀲𑀫𑁂 𑀅𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀘 𑀩𑀳𑀺 𑀉𑀧𑀲𑀫𑀤𑀲𑁆𑀲𑀦𑁂𑀦 𑀅𑀢𑀺𑀲𑀦𑁆𑀢𑁂 𑀯𑀺𑀬 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁂𑀧𑀺 𑀩𑀺𑀮𑀧𑀝𑀺𑀘𑁆𑀙𑀦𑁆𑀦𑀆𑀲𑀻𑀯𑀺𑀲𑀲𑀤𑀺𑀲𑁂 𑀓𑀼𑀳𑀓𑀧𑀼𑀕𑁆𑀕𑀮𑁂. 𑀕𑁄𑀧𑀺𑀧𑀸𑀲𑀺𑀓𑀚𑀸𑀢𑀺𑀓𑀸𑀢𑀺 𑀕𑀼𑀦𑁆𑀦𑀁 𑀧𑀺𑀧𑀸𑀲𑀓𑀚𑀸𑀢𑀺𑀓𑀸 𑀯𑀺𑀬, 𑀧𑀺𑀧𑀸𑀲𑀺𑀢𑀕𑁄𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀧𑀺𑀧𑀸𑀲𑀺𑀢𑀕𑀸𑀯𑁄 𑀢𑀺𑀢𑁆𑀣𑀁 𑀑𑀢𑀭𑀺𑀢𑁆𑀯𑀸 𑀫𑀼𑀔𑀧𑀽𑀭𑀁 𑀉𑀤𑀓𑀁 𑀧𑀺𑀯𑀦𑁆𑀢𑀺, 𑀦 𑀧𑀦 𑀉𑀤𑀓𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯 𑀏𑀓𑀘𑁆𑀘𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀥𑀼𑀭𑀯𑀘𑀦𑁂𑀦 𑀫𑀺𑀢𑁆𑀢𑀸𑀦𑀺 𑀖𑀲𑀦𑁆𑀢𑀺, 𑀧𑀺𑀬𑀯𑀘𑀦𑀸𑀦𑀼𑀘𑁆𑀙𑀯𑀺𑀓𑀁 𑀧𑀦 𑀦 𑀓𑀭𑁄𑀦𑁆𑀢𑀺, 𑀢𑀸𑀤𑀺𑀲𑁂𑀲𑀼 𑀯𑀺𑀲𑁆𑀲𑀸𑀲𑁄 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

𑀲𑀼𑀓𑁆𑀔𑀜𑁆𑀚𑀮𑀺𑀧𑀕𑁆𑀕𑀳𑀺𑀢𑀸𑀢𑀺 𑀧𑀕𑁆𑀕𑀳𑀺𑀢𑀢𑀼𑀘𑁆𑀙𑀅𑀜𑁆𑀚𑀮𑀺𑀦𑁄. 𑀯𑀸𑀘𑀸𑀬 𑀧𑀮𑀺𑀕𑀼𑀡𑁆𑀞𑀺𑀢𑀸𑀢𑀺 ‘‘𑀇𑀤𑀁 𑀤𑀲𑁆𑀲𑀸𑀫, 𑀇𑀤𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑀺𑀓𑀸. 𑀫𑀦𑀼𑀲𑁆𑀲𑀨𑁂𑀕𑁆𑀕𑀽𑀢𑀺 𑀏𑀯𑀭𑀽𑀧𑀸 𑀅𑀲𑀸𑀭𑀓𑀸 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑀨𑁂𑀕𑁆𑀕𑀽 𑀦𑀸𑀫. 𑀦𑀸𑀲𑀻𑀤𑁂𑀢𑀺 𑀦 𑀆𑀲𑀻𑀤𑁂 𑀏𑀯𑀭𑀽𑀧𑁂 𑀦 𑀉𑀧𑀕𑀘𑁆𑀙𑁂𑀬𑁆𑀬. 𑀬𑀲𑁆𑀫𑀺𑀁 𑀦𑀢𑁆𑀣𑀻𑀢𑀺 𑀬𑀲𑁆𑀫𑀺𑀜𑁆𑀘 𑀧𑀼𑀕𑁆𑀕𑀮𑁂 𑀓𑀢𑀜𑁆𑀜𑀼𑀢𑀸 𑀦𑀢𑁆𑀣𑀺, 𑀢𑀫𑁆𑀧𑀺 𑀦𑀸𑀲𑀻𑀤𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀜𑁆𑀜𑀘𑀺𑀢𑁆𑀢𑀸𑀦𑀦𑁆𑀢𑀺 𑀅𑀜𑁆𑀜𑁂𑀦𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 ¶ , 𑀮𑀳𑀼𑀘𑀺𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑀸𑀦𑀁 𑀇𑀢𑁆𑀣𑀻𑀦𑀁 𑀯𑀸 𑀧𑀼𑀭𑀺𑀲𑀸𑀦𑀁 𑀯𑀸 𑀦 𑀯𑀺𑀲𑁆𑀲𑀲𑁂𑀢𑀺 𑀤𑀻𑀧𑁂𑀢𑀺. 𑀦𑀸𑀦𑀸𑀯𑀺𑀓𑀢𑁆𑀯𑀸 𑀲𑀁𑀲𑀕𑁆𑀕𑀦𑁆𑀢𑀺 𑀬𑁄𑀧𑀺 𑀦 𑀲𑀓𑁆𑀓𑀸 𑀅𑀦𑀼𑀧𑀕𑀦𑁆𑀢𑁆𑀯𑀸 𑀏𑀢𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀦𑁆𑀢𑀺 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀦𑀸𑀦𑀸𑀓𑀸𑀭𑀡𑁂𑀳𑀺 𑀲𑀁𑀲𑀕𑁆𑀕𑀫𑀸𑀯𑀺𑀓𑀢𑁆𑀯𑀸 𑀤𑀴𑁆𑀳𑀁 𑀓𑀭𑀺𑀢𑁆𑀯𑀸 𑀧𑀘𑁆𑀙𑀸 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀢𑀸𑀤𑀺𑀲𑀫𑁆𑀧𑀺 𑀧𑀼𑀕𑁆𑀕𑀮𑀁 𑀦𑀸𑀲𑁆𑀫𑀲𑁂 𑀦 𑀯𑀺𑀲𑁆𑀲𑀲𑁂𑀬𑁆𑀬𑀸𑀢𑀺 𑀤𑀻𑀧𑁂𑀢𑀺.

𑀅𑀦𑀭𑀺𑀬𑀓𑀫𑁆𑀫𑀫𑁄𑀓𑁆𑀓𑀦𑁆𑀢𑀢𑀺 𑀅𑀦𑀭𑀺𑀬𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀁 𑀓𑀫𑁆𑀫𑀁 𑀑𑀢𑀭𑀺𑀢𑁆𑀯𑀸 𑀞𑀺𑀢𑀁. 𑀅𑀣𑁂𑀢𑀦𑁆𑀢𑀺 𑀅𑀣𑀺𑀭𑀁 𑀅𑀧𑁆𑀧𑀢𑀺𑀝𑁆𑀞𑀺𑀢𑀯𑀘𑀦𑀁. 𑀲𑀩𑁆𑀩𑀖𑀸𑀢𑀺𑀦𑀦𑁆𑀢𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 ¶ 𑀉𑀧𑀖𑀸𑀢𑀓𑀭𑀁. 𑀦𑀺𑀲𑀺𑀢𑀁𑀯 ¶ 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀓𑁄𑀲𑀺𑀬𑀸 𑀯𑀸 𑀧𑀺𑀮𑁄𑀢𑀺𑀓𑀸𑀬 𑀯𑀸 𑀧𑀝𑀺𑀘𑁆𑀙𑀦𑁆𑀦𑀁 𑀦𑀺𑀲𑀺𑀢𑀔𑀕𑁆𑀕𑀫𑀺𑀯. 𑀢𑀸𑀤𑀺𑀲𑀫𑁆𑀧𑀻𑀢𑀺 𑀏𑀯𑀭𑀽𑀧𑀫𑁆𑀧𑀺 𑀅𑀫𑀺𑀢𑁆𑀢𑀁 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀁 𑀦 𑀯𑀺𑀲𑁆𑀲𑀲𑁂𑀬𑁆𑀬. 𑀲𑀸𑀔𑀮𑁆𑀬𑁂𑀦𑀸𑀢𑀺 𑀫𑀝𑁆𑀞𑀯𑀘𑀦𑁂𑀦. 𑀅𑀘𑁂𑀢𑀲𑀸𑀢𑀺 𑀅𑀘𑀺𑀢𑁆𑀢𑀓𑁂𑀦. 𑀯𑀘𑀦𑀫𑁂𑀯 𑀳𑀺 𑀦𑁂𑀲𑀁 𑀫𑀝𑁆𑀞𑀁, 𑀘𑀺𑀢𑁆𑀢𑀁 𑀧𑀦 𑀣𑀤𑁆𑀥𑀁 𑀨𑀭𑀼𑀲𑀁. 𑀯𑀺𑀯𑀺𑀥𑁂𑀳𑀻𑀢𑀺 𑀯𑀺𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀑𑀢𑀸𑀭𑀸𑀧𑁂𑀓𑁆𑀔𑀸 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀸𑀤𑀺𑀲𑀫𑁆𑀧𑀻𑀢𑀺 𑀬𑁄 𑀏𑀢𑁂𑀳𑀺 𑀅𑀫𑀺𑀢𑁆𑀢𑁂𑀳𑀺 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁂𑀳𑀺 𑀲𑀤𑀺𑀲𑁄 𑀳𑁄𑀢𑀺, 𑀢𑀫𑁆𑀧𑀺 𑀦 𑀯𑀺𑀲𑁆𑀲𑀲𑁂𑀢𑀺 𑀅𑀢𑁆𑀣𑁄. 𑀆𑀫𑀺𑀲𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀥𑀦𑀦𑁆𑀢𑀺 𑀫𑀜𑁆𑀘𑀧𑀝𑀺𑀧𑀸𑀤𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀯𑀲𑁂𑀲𑀁. 𑀬𑀢𑁆𑀣 𑀧𑀲𑁆𑀲𑀢𑀻𑀢𑀺 𑀲𑀳𑀸𑀬𑀓𑀕𑁂𑀳𑁂 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀲𑁆𑀲𑀢𑀺. 𑀤𑀼𑀩𑁆𑀪𑀺𑀁 𑀓𑀭𑁄𑀢𑀻𑀢𑀺 𑀤𑀼𑀩𑁆𑀪𑀺𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀁 𑀥𑀦𑀁 𑀳𑀭𑀢𑀺. 𑀢𑀜𑁆𑀘 𑀳𑀦𑁆𑀢𑁆𑀯𑀸𑀦𑀸𑀢𑀺 𑀢𑀜𑁆𑀘 𑀲𑀳𑀸𑀬𑀓𑀫𑁆𑀧𑀺 𑀙𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀇𑀢𑀺 𑀇𑀫𑀸 𑀲𑀢𑁆𑀢 𑀕𑀸𑀣𑀸 𑀓𑀼𑀓𑁆𑀓𑀼𑀝𑀭𑀸𑀚𑀸 𑀓𑀣𑁂𑀲𑀺.

𑁧𑁧𑁧.

‘‘𑀫𑀺𑀢𑁆𑀢𑀭𑀽𑀧𑁂𑀦 𑀩𑀳𑀯𑁄, 𑀙𑀦𑁆𑀦𑀸 𑀲𑁂𑀯𑀦𑁆𑀢𑀺 𑀲𑀢𑁆𑀢𑀯𑁄;

𑀚𑀳𑁂 𑀓𑀸𑀧𑀼𑀭𑀺𑀲𑁂 𑀳𑁂𑀢𑁂, 𑀓𑀼𑀓𑁆𑀓𑀼𑀝𑁄 𑀯𑀺𑀬 𑀲𑁂𑀦𑀓𑀁.

𑁧𑁧𑁨.

‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀅𑀫𑀺𑀢𑁆𑀢𑀯𑀲𑀫𑀦𑁆𑀯𑁂𑀢𑀺, 𑀧𑀘𑁆𑀙𑀸 𑀘 𑀫𑀦𑀼𑀢𑀧𑁆𑀧𑀢𑀺.

𑁧𑁧𑁩.

‘‘𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀓𑀼𑀓𑁆𑀓𑀼𑀝𑁄 𑀯𑀺𑀬 𑀲𑁂𑀦𑀓𑀸.

𑁧𑁧𑁪.

‘‘𑀢𑀁 𑀢𑀸𑀤𑀺𑀲𑀁 𑀓𑀽𑀝𑀫𑀺𑀯𑁄𑀟𑁆𑀟𑀺𑀢𑀁 𑀯𑀦𑁂, 𑀅𑀥𑀫𑁆𑀫𑀺𑀓𑀁 𑀦𑀺𑀘𑁆𑀘𑀯𑀺𑀥𑀁𑀲𑀓𑀸𑀭𑀺𑀦𑀁;

𑀆𑀭𑀸 𑀯𑀺𑀯𑀚𑁆𑀚𑁂𑀬𑁆𑀬 𑀦𑀭𑁄 𑀯𑀺𑀘𑀓𑁆𑀔𑀡𑁄, 𑀲𑁂𑀦𑀁 𑀬𑀣𑀸 𑀓𑀼𑀓𑁆𑀓𑀼𑀝𑁄 𑀯𑀁𑀲𑀓𑀸𑀦𑀦𑁂’’𑀢𑀺. 𑁋

𑀇𑀫𑀸 𑀘𑀢𑀲𑁆𑀲𑁄 𑀥𑀫𑁆𑀫𑀭𑀸𑀚𑁂𑀦 𑀪𑀸𑀲𑀺𑀢𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.

𑀢𑀢𑁆𑀣 ¶ 𑀚𑀳𑁂 𑀓𑀸𑀧𑀼𑀭𑀺𑀲𑁂 𑀳𑁂𑀢𑁂𑀢𑀺 𑀪𑀺𑀓𑁆𑀔𑀯𑁂, 𑀏𑀢𑁂 𑀓𑀸𑀧𑀼𑀭𑀺𑀲𑁂 𑀧𑀡𑁆𑀟𑀺𑀢𑁄 𑀚𑀳𑁂𑀬𑁆𑀬. 𑀳-𑀓𑀸𑀭𑁄 𑀧𑀦𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀘𑁆𑀙𑀸 𑀘 𑀫𑀦𑀼𑀢𑀧𑁆𑀧𑀢𑀻𑀢𑀺 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺. 𑀓𑀽𑀝𑀫𑀺𑀯𑁄𑀟𑁆𑀟𑀺𑀢𑀦𑁆𑀢𑀺 𑀯𑀦𑁂 𑀫𑀺𑀕𑀸𑀦𑀁 𑀩𑀦𑁆𑀥𑀦𑀢𑁆𑀣𑀸𑀬 𑀓𑀽𑀝𑀧𑀸𑀲𑀁 𑀯𑀺𑀬 𑀑𑀟𑁆𑀟𑀺𑀢𑀁. 𑀦𑀺𑀘𑁆𑀘𑀯𑀺𑀥𑀁𑀲𑀓𑀸𑀭𑀺𑀦𑀦𑁆𑀢𑀺 𑀦𑀺𑀘𑁆𑀘𑀁 𑀯𑀺𑀤𑁆𑀥𑀁𑀲𑀦𑀓𑀭𑀁. 𑀯𑀁𑀲𑀓𑀸𑀦𑀦𑁂𑀢𑀺 𑀬𑀣𑀸 𑀯𑀁𑀲𑀯𑀦𑁂 𑀓𑀼𑀓𑁆𑀓𑀼𑀝𑁄 𑀲𑁂𑀦𑀁 𑀯𑀺𑀯𑀚𑁆𑀚𑁂𑀢𑀺, 𑀏𑀯𑀁 𑀯𑀺𑀘𑀓𑁆𑀔𑀡𑁄 𑀧𑀸𑀧𑀫𑀺𑀢𑁆𑀢𑁂 𑀯𑀺𑀯𑀚𑁆𑀚𑁂𑀬𑁆𑀬.

𑀲𑁄𑀧𑀺 ¶ 𑀢𑀸 𑀕𑀸𑀣𑀸 𑀯𑀢𑁆𑀯𑀸 𑀲𑁂𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀘𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀲𑁆𑀲𑀲𑀺, 𑀚𑀸𑀦𑀺𑀲𑁆𑀲𑀸𑀫𑀺 𑀢𑁂 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀢𑀚𑁆𑀚𑁂𑀲𑀺. 𑀲𑁂𑀦𑁄 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀕𑀢𑁄.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀯𑁂 𑀤𑁂𑀯𑀤𑀢𑁆𑀢𑁄 𑀧𑀼𑀩𑁆𑀩𑁂𑀧𑀺 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑁂𑀦𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

[𑁪𑁪𑁯] 𑁧𑁧. 𑀫𑀝𑁆𑀞𑀓𑀼𑀡𑁆𑀟𑀮𑀻𑀚𑀸𑀢𑀓𑀯𑀡𑁆𑀡𑀦𑀸

𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀢𑀧𑀼𑀢𑁆𑀢𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀲𑁆𑀲 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀺𑀬𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀼𑀢𑁆𑀢𑀲𑁄𑀓𑀲𑀫𑀧𑁆𑀧𑀺𑀢𑁄 𑀦 𑀦𑁆𑀳𑀸𑀬𑀢𑀺 𑀦 𑀪𑀼𑀜𑁆𑀚𑀢𑀺 𑀦 𑀓𑀫𑁆𑀫𑀦𑁆𑀢𑁂 𑀯𑀺𑀘𑀸𑀭𑁂𑀢𑀺, 𑀦 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀓𑁂𑀯𑀮𑀁 ‘‘𑀧𑀺𑀬𑀧𑀼𑀢𑁆𑀢𑀓, 𑀫𑀁 𑀑𑀳𑀸𑀬 𑀧𑀞𑀫𑀢𑀭𑀁 𑀕𑀢𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀯𑀺𑀧𑁆𑀧𑀮𑀧𑀢𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀢𑀲𑁆𑀲 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀅𑀣𑀲𑁆𑀲 𑀕𑁂𑀳𑀚𑀦𑁄 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀲𑀢𑁆𑀣𑀸 𑀓𑀭𑀼𑀡𑀸𑀲𑀻𑀢𑀮𑁂𑀦 𑀯𑀘𑀦𑁂𑀦 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁, 𑀉𑀧𑀸𑀲𑀓, 𑀧𑀼𑀢𑁆𑀢𑀓𑀁 𑀅𑀦𑀼𑀲𑁄𑀘𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀸𑀲𑀓, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀼𑀢𑁆𑀢𑁂 𑀓𑀸𑀮𑀓𑀢𑁂 𑀲𑁄𑀓𑀲𑀫𑀧𑁆𑀧𑀺𑀢𑀸 𑀯𑀺𑀘𑀭𑀦𑁆𑀢𑀸𑀧𑀺 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 ‘𑀅𑀮𑀩𑁆𑀪𑀦𑀻𑀬𑀝𑁆𑀞𑀸𑀦’𑀦𑁆𑀢𑀺 𑀢𑀣𑀢𑁄 𑀜𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑁄𑀓𑀁 𑀦 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑀲𑁆𑀲 𑀫𑀳𑀸𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀧𑀜𑁆𑀘𑀤𑀲𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀏𑀓𑁂𑀦 𑀩𑁆𑀬𑀸𑀥𑀺𑀦𑀸 𑀨𑀼𑀝𑁆𑀞𑁄 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀢𑁄 𑀧𑀝𑁆𑀞𑀸𑀬 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀙𑀸𑀭𑀺𑀓𑀧𑀼𑀜𑁆𑀚𑀁 𑀆𑀯𑀺𑀚𑁆𑀛𑀦𑁆𑀢𑁄 𑀧𑀭𑀺𑀤𑁂𑀯𑀢𑀺, 𑀲𑀩𑁆𑀩𑀓𑀫𑁆𑀫𑀦𑁆𑀢𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑁄𑀓𑀲𑀫𑀧𑁆𑀧𑀺𑀢𑁄 𑀯𑀺𑀘𑀭𑀢𑀺. 𑀢𑀤𑀸 𑀤𑁂𑀯𑀧𑀼𑀢𑁆𑀢𑁄 𑀅𑀦𑀼𑀯𑀺𑀘𑀭𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀓𑀁 𑀉𑀧𑀫𑀁 𑀓𑀢𑁆𑀯𑀸 𑀲𑁄𑀓𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀤𑁂𑀯𑀦𑀓𑀸𑀮𑁂 𑀢𑀲𑁆𑀲𑁂𑀯 𑀧𑀼𑀢𑁆𑀢𑀯𑀡𑁆𑀡𑀻 𑀳𑀼𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀞𑀢𑁆𑀯𑀸 𑀉𑀪𑁄 𑀳𑀢𑁆𑀣𑁂 𑀲𑀻𑀲𑁂 𑀞𑀧𑁂𑀢𑁆𑀯𑀸 ¶ 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀢𑁆𑀢𑀧𑁂𑀫𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 ‘‘𑀢𑀸𑀢 𑀫𑀸𑀡𑀯, 𑀇𑀫𑀲𑁆𑀫𑀺𑀁 𑀲𑀼𑀲𑀸𑀦𑀫𑀚𑁆𑀛𑁂 𑀓𑀲𑁆𑀫𑀸 𑀧𑀭𑀺𑀤𑁂𑀯𑀲𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁫.

‘‘𑀅𑀮𑀗𑁆𑀓𑀢𑁄 𑀫𑀝𑁆𑀞𑀓𑀼𑀡𑁆𑀟𑀮𑀻, 𑀫𑀸𑀮𑀥𑀸𑀭𑀻 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀲𑀺, 𑀯𑀦𑀫𑀚𑁆𑀛𑁂 𑀓𑀺𑀁 𑀤𑀼𑀓𑁆𑀔𑀺𑀢𑁄 𑀢𑀼𑀯’’𑀦𑁆𑀢𑀺.

𑀢𑀢𑁆𑀣 𑀅𑀮𑀗𑁆𑀓𑀢𑁄𑀢𑀺 𑀦𑀸𑀦𑀸𑀪𑀭𑀡𑀯𑀺𑀪𑀽𑀲𑀺𑀢𑁄. 𑀫𑀝𑁆𑀞𑀓𑀼𑀡𑁆𑀟𑀮𑀻𑀢𑀺 𑀓𑀭𑀡𑀧𑀭𑀺𑀦𑀺𑀝𑁆𑀞𑀺𑀢𑁂𑀳𑀺 𑀫𑀝𑁆𑀞𑁂𑀳𑀺 𑀓𑀼𑀡𑁆𑀟𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀫𑀸𑀮𑀥𑀸𑀭𑀻𑀢𑀺 𑀯𑀺𑀘𑀺𑀢𑁆𑀭𑀓𑀼𑀲𑀼𑀫𑀫𑀸𑀮𑀥𑀭𑁄. 𑀳𑀭𑀺𑀘𑀦𑁆𑀤𑀦𑀼𑀲𑁆𑀲𑀤𑁄𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀘𑀦𑁆𑀤𑀦𑁂𑀦 𑀅𑀦𑀼𑀮𑀺𑀢𑁆𑀢𑁄. 𑀯𑀦𑀫𑀚𑁆𑀛𑁂𑀢𑀺 𑀲𑀼𑀲𑀸𑀦𑀫𑀚𑁆𑀛𑁂. 𑀓𑀺𑀁 𑀤𑀼𑀓𑁆𑀔𑀺𑀢𑁄 𑀢𑀼𑀯𑀦𑁆𑀢𑀺 𑀓𑀺𑀁𑀓𑀸𑀭𑀡𑀸 𑀤𑀼𑀓𑁆𑀔𑀺𑀢𑁄 𑀢𑁆𑀯𑀁, 𑀆𑀘𑀺𑀓𑁆𑀔, 𑀅𑀳𑀁 𑀢𑁂 𑀬𑀁 𑀇𑀘𑁆𑀙𑀲𑀺, 𑀢𑀁 𑀤𑀲𑁆𑀲𑀸𑀫𑀻𑀢𑀺 𑀆𑀳.

𑀅𑀣𑀲𑁆𑀲 𑀓𑀣𑁂𑀦𑁆𑀢𑁄 𑀫𑀸𑀡𑀯𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁬.

‘‘𑀲𑁄𑀯𑀡𑁆𑀡𑀫𑀬𑁄 𑀧𑀪𑀲𑁆𑀲𑀭𑁄, 𑀉𑀧𑁆𑀧𑀦𑁆𑀦𑁄 𑀭𑀣𑀧𑀜𑁆𑀚𑀭𑁄 𑀫𑀫;

𑀢𑀲𑁆𑀲 𑀘𑀓𑁆𑀓𑀬𑀼𑀕𑀁 𑀦 𑀯𑀺𑀦𑁆𑀤𑀸𑀫𑀺, 𑀢𑁂𑀦 𑀤𑀼𑀓𑁆𑀔𑁂𑀦 𑀚𑀳𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁭.

‘‘𑀲𑁄𑀯𑀡𑁆𑀡𑀫𑀬𑀁 𑀫𑀡𑀻𑀫𑀬𑀁, 𑀮𑁄𑀳𑀫𑀬𑀁 𑀅𑀣 𑀭𑀽𑀧𑀺𑀬𑀸𑀫𑀬𑀁;

𑀧𑀸𑀯𑀤 𑀭𑀣𑀁 𑀓𑀭𑀺𑀲𑁆𑀲𑀸𑀫𑀺 𑀢𑁂, 𑀘𑀓𑁆𑀓𑀬𑀼𑀕𑀁 𑀧𑀝𑀺𑀧𑀸𑀤𑀬𑀸𑀫𑀺 𑀢’’𑀦𑁆𑀢𑀺.

𑀢𑀢𑁆𑀣 ¶ 𑀧𑀸𑀯𑀤𑀸𑀢𑀺 𑀬𑀸𑀤𑀺𑀲𑁂𑀦 𑀢𑁂 𑀅𑀢𑁆𑀣𑁄 𑀬𑀸𑀤𑀺𑀲𑀁 𑀭𑁄𑀘𑁂𑀲𑀺, 𑀢𑀸𑀤𑀺𑀲𑀁 𑀯𑀤, 𑀅𑀳𑀁 𑀢𑁂 𑀭𑀣 𑀓𑀭𑀺𑀲𑁆𑀲𑀸𑀫𑀺. 𑀧𑀝𑀺𑀧𑀸𑀤𑀬𑀸𑀫𑀺 𑀢𑀦𑁆𑀢𑀺 𑀢𑀁 𑀧𑀜𑁆𑀚𑀭𑀸𑀦𑀼𑀭𑀽𑀧𑀁 𑀘𑀓𑁆𑀓𑀬𑀼𑀕𑀁 𑀅𑀥𑀺𑀕𑀘𑁆𑀙𑀸𑀧𑁂𑀫𑀺.

𑀢𑀁 ¶ 𑀲𑀼𑀢𑁆𑀯𑀸 𑀫𑀸𑀡𑀯𑁂𑀦 𑀓𑀣𑀺𑀢𑀸𑀬 𑀕𑀸𑀣𑀸𑀬 𑀧𑀞𑀫𑀧𑀸𑀤𑀁 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀓𑀣𑁂𑀲𑀺, 𑀲𑁂𑀲𑀁 𑀫𑀸𑀡𑀯𑁄.

𑁧𑁧𑁮.

‘‘𑀲𑁄 𑀫𑀸𑀡𑀯𑁄 𑀢𑀲𑁆𑀲 𑀧𑀸𑀯𑀤𑀺, 𑀘𑀦𑁆𑀤𑀲𑀽𑀭𑀺𑀬𑀸 ¶ 𑀉𑀪𑀬𑁂𑀢𑁆𑀣 𑀪𑀸𑀢𑀭𑁄;

𑀲𑁄𑀯𑀡𑁆𑀡𑀫𑀬𑁄 𑀭𑀣𑁄 𑀫𑀫, 𑀢𑁂𑀦 𑀘𑀓𑁆𑀓𑀬𑀼𑀕𑁂𑀦 𑀲𑁄𑀪𑀢𑀻’’𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀢𑀤𑀦𑀦𑁆𑀢𑀭𑀁 𑀆𑀳 𑁋

𑁧𑁧𑁯.

‘‘𑀩𑀸𑀮𑁄 𑀔𑁄 𑀢𑁆𑀯𑀁𑀲𑀺 𑀫𑀸𑀡𑀯, 𑀬𑁄 𑀢𑁆𑀯𑀁 𑀧𑀢𑁆𑀣𑀬𑀲𑀺 𑀅𑀧𑀢𑁆𑀣𑀺𑀬𑀁;

𑀫𑀜𑁆𑀜𑀸𑀫𑀺 𑀢𑀼𑀯𑀁 𑀫𑀭𑀺𑀲𑁆𑀲𑀲𑀺, 𑀦 𑀳𑀺 𑀢𑁆𑀯𑀁 𑀮𑀘𑁆𑀙𑀲𑀺 𑀘𑀦𑁆𑀤𑀲𑀽𑀭𑀺𑀬𑁂’’𑀢𑀺. 𑁋

𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀅𑀧𑀢𑁆𑀣𑀺𑀬𑀦𑁆𑀢𑀺 𑀅𑀧𑀢𑁆𑀣𑁂𑀢𑀩𑁆𑀩𑀁.

𑀢𑀢𑁄 𑀫𑀸𑀡𑀯𑁄 𑀆𑀳 𑁋

𑁧𑁨𑁦.

‘‘𑀕𑀫𑀦𑀸𑀕𑀫𑀦𑀫𑁆𑀧𑀺 𑀤𑀺𑀲𑁆𑀲𑀢𑀺, 𑀯𑀡𑁆𑀡𑀥𑀸𑀢𑀼 𑀉𑀪𑀬𑁂𑀢𑁆𑀣 𑀯𑀻𑀣𑀺𑀬𑁄;

𑀧𑁂𑀢𑁄 𑀧𑀦 𑀦𑁂𑀯 𑀤𑀺𑀲𑁆𑀲𑀢𑀺, 𑀓𑁄 𑀦𑀼 𑀔𑁄 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄’’𑀢𑀺.

𑀫𑀸𑀡𑀯𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀕𑀫𑀦𑀸𑀕𑀫𑀦𑀦𑁆𑀢𑀺 𑀉𑀕𑁆𑀕𑀫𑀦𑀜𑁆𑀘 𑀅𑀢𑁆𑀣𑀕𑀫𑀦𑀜𑁆𑀘. 𑀯𑀡𑁆𑀡𑁄𑀬𑁂𑀯 𑀯𑀡𑁆𑀡𑀥𑀸𑀢𑀼. 𑀉𑀪𑀬𑁂𑀢𑁆𑀣 𑀯𑀻𑀣𑀺𑀬𑁄𑀢𑀺 𑀏𑀢𑁆𑀣 𑀆𑀓𑀸𑀲𑁂 ‘‘𑀅𑀬𑀁 𑀘𑀦𑁆𑀤𑀲𑁆𑀲 𑀯𑀻𑀣𑀺, 𑀅𑀬𑀁 𑀲𑀽𑀭𑀺𑀬𑀲𑁆𑀲 𑀯𑀻𑀣𑀻’’𑀢𑀺 𑀏𑀯𑀁 𑀉𑀪𑀬𑀕𑀫𑀦𑀸𑀕𑀫𑀦𑀪𑀽𑀫𑀺𑀬𑁄𑀧𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀧𑁂𑀢𑁄 𑀧𑀦𑀸𑀢𑀺 𑀧𑀭𑀮𑁄𑀓𑀁 𑀕𑀢𑀲𑀢𑁆𑀢𑁄 𑀧𑀦 𑀦 𑀤𑀺𑀲𑁆𑀲𑀢𑁂𑀯. 𑀓𑁄 𑀦𑀼 𑀔𑁄𑀢𑀺 𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀓𑀦𑁆𑀤𑀦𑁆𑀢𑀸𑀦𑀁 𑀓𑁄 𑀦𑀼 𑀔𑁄 𑀩𑀸𑀮𑁆𑀬𑀢𑀭𑁄𑀢𑀺.

𑀏𑀯𑀁 ¶ 𑀫𑀸𑀡𑀯𑁂 𑀓𑀣𑁂𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁨𑁧.

‘‘𑀲𑀘𑁆𑀘𑀁 𑀔𑁄 𑀯𑀤𑁂𑀲𑀺 𑀫𑀸𑀡𑀯, 𑀅𑀳𑀫𑁂𑀯 𑀓𑀦𑁆𑀤𑀢𑀁 𑀩𑀸𑀮𑁆𑀬𑀢𑀭𑁄;

𑀘𑀦𑁆𑀤𑀁 𑀯𑀺𑀬 𑀤𑀸𑀭𑀓𑁄 𑀭𑀼𑀤𑀁, 𑀧𑁂𑀢𑀁 𑀓𑀸𑀮𑀓𑀢𑀸𑀪𑀺𑀧𑀢𑁆𑀣𑀬𑁂’’𑀢𑀺.

𑀢𑀢𑁆𑀣 𑀘𑀦𑁆𑀤𑀁 𑀯𑀺𑀬 𑀤𑀸𑀭𑀓𑁄𑀢𑀺 𑀬𑀣𑀸 𑀤𑀳𑀭𑁄 𑀕𑀸𑀫𑀤𑀸𑀭𑀓𑁄 ‘‘𑀘𑀦𑁆𑀤𑀁 𑀤𑁂𑀣𑀸’’𑀢𑀺 𑀘𑀦𑁆𑀤𑀲𑁆𑀲𑀢𑁆𑀣𑀸𑀬 𑀭𑁄𑀤𑁂𑀬𑁆𑀬, 𑀏𑀯𑀁 𑀅𑀳𑀫𑁆𑀧𑀺 𑀧𑁂𑀢𑀁 𑀓𑀸𑀮𑀓𑀢𑀁 𑀅𑀪𑀺𑀧𑀢𑁆𑀣𑁂𑀫𑀻𑀢𑀺.

𑀇𑀢𑀺 ¶ 𑀩𑁆𑀭𑀸𑀳𑁆𑀫𑀡𑁄 𑀫𑀸𑀡𑀯𑀲𑁆𑀲 𑀓𑀣𑀸𑀬 𑀦𑀺𑀲𑁆𑀲𑁄𑀓𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁨.

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁨𑁩.

‘‘𑀅𑀩𑁆𑀩𑀳𑀻 ¶ 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨𑁪.

‘‘𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯𑀸’’𑀢𑀺.

𑀅𑀣 𑀦𑀁 𑀫𑀸𑀡𑀯𑁄 ‘‘𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲𑀢𑁆𑀣𑀸𑀬 𑀢𑁆𑀯𑀁 𑀭𑁄𑀤𑀲𑀺, 𑀅𑀳𑀁 𑀢𑁂 𑀧𑀼𑀢𑁆𑀢𑁄, 𑀅𑀳𑀁 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀫𑀁 𑀅𑀦𑀼𑀲𑁄𑀘𑀺, 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔𑀸𑀳𑀺, 𑀉𑀧𑁄𑀲𑀣𑀁 𑀓𑀭𑁄𑀳𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀓𑀸𑀮𑀓𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀳𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.𑀢𑀤𑀸 𑀥𑀫𑁆𑀫𑀤𑁂𑀲𑀓𑀤𑁂𑀯𑀧𑀼𑀢𑁆𑀢𑁄 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀝𑁆𑀞𑀓𑀼𑀡𑁆𑀟𑀮𑀻𑀚𑀸𑀢𑀓𑀯𑀡𑁆𑀡𑀦𑀸 𑀏𑀓𑀸𑀤𑀲𑀫𑀸.

[𑁪𑁫𑁦] 𑁧𑁨. 𑀩𑀺𑀮𑀸𑀭𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀘𑀦𑁆𑀢𑀸𑀧𑀻𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀸𑀦𑀯𑀺𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀸𑀦𑀯𑀺𑀢𑁆𑀢𑁄 𑀅𑀳𑁄𑀲𑀺 𑀤𑀸𑀦𑀚𑁆𑀛𑀸𑀲𑀬𑁄, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀅𑀜𑁆𑀜𑀲𑁆𑀲 𑀅𑀤𑀢𑁆𑀯𑀸 𑀦 𑀪𑀼𑀜𑁆𑀚𑀺, 𑀅𑀦𑁆𑀢𑀫𑀲𑁄 𑀧𑀸𑀦𑀻𑀬𑀫𑁆𑀧𑀺 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀅𑀤𑀢𑁆𑀯𑀸 𑀦 𑀧𑀺𑀯𑀺, 𑀏𑀯𑀁 𑀤𑀸𑀦𑀸𑀪𑀺𑀭𑀢𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀕𑀼𑀡𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 ¶ 𑀪𑀺𑀓𑁆𑀔𑀼 𑀤𑀸𑀦𑀯𑀺𑀢𑁆𑀢𑁄 𑀤𑀸𑀦𑀚𑁆𑀛𑀸𑀲𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀯𑁂 𑀅𑀬𑀁 𑀧𑀼𑀩𑁆𑀩𑁂 𑀅𑀲𑁆𑀲𑀤𑁆𑀥𑁄 𑀅𑀳𑁄𑀲𑀺 𑀅𑀧𑁆𑀧𑀲𑀦𑁆𑀦𑁄, 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀉𑀤𑁆𑀥𑀭𑀺𑀢𑁆𑀯𑀸 𑀓𑀲𑁆𑀲𑀘𑀺 𑀦 𑀅𑀤𑀸𑀲𑀺, 𑀅𑀣 𑀦𑀁 𑀅𑀳𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀤𑀸𑀦𑀨𑀮𑀁 𑀜𑀸𑀧𑁂𑀲𑀺𑀁, 𑀢𑀫𑁂𑀯 𑀤𑀸𑀦𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀪𑀯𑀦𑁆𑀢𑀭𑁂𑀧𑀺 𑀦 𑀧𑀚𑀳𑀢𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀥𑀦𑀯𑀺𑀮𑁄𑀓𑀦𑀁 𑀓𑀢𑁆𑀯𑀸 ‘‘𑀥𑀦𑀁 𑀧𑀜𑁆𑀜𑀸𑀬𑀢𑀺, 𑀏𑀢𑀲𑁆𑀲 ¶ 𑀉𑀧𑁆𑀧𑀸𑀤𑀓𑀸 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀇𑀫𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀸𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 ‘‘𑀇𑀤𑀁 𑀤𑀸𑀦𑀯𑀢𑁆𑀢𑀁 𑀫𑀸 𑀉𑀧𑀘𑁆𑀙𑀺𑀦𑁆𑀤𑀻’’𑀢𑀺 𑀧𑀼𑀢𑁆𑀢𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀧𑀼𑀢𑁆𑀢𑁄𑀧𑀺𑀲𑁆𑀲 𑀢𑀣𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀑𑀯𑀤𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀘𑀦𑁆𑀤𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀽𑀭𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀧𑀺 𑀧𑀼𑀢𑁆𑀢𑁄 𑀫𑀸𑀢𑀮𑀺𑀲𑀗𑁆𑀕𑀸𑀳𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀙𑀝𑁆𑀞𑁄 𑀧𑀦 𑀅𑀲𑁆𑀲𑀤𑁆𑀥𑁄 𑀅𑀳𑁄𑀲𑀺 𑀣𑀤𑁆𑀥𑀘𑀺𑀢𑁆𑀢𑁄 𑀦𑀺𑀲𑁆𑀦𑁂𑀳𑁄 𑀫𑀘𑁆𑀙𑀭𑀻, 𑀤𑀸𑀦𑀲𑀸𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀬𑀸𑀘𑀓𑁂 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺, 𑀓𑀲𑁆𑀲𑀘𑀺 𑀢𑀺𑀡𑀕𑁆𑀕𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀦 𑀤𑁂𑀢𑀺. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀧𑀯𑀢𑁆𑀢𑀢𑀺 𑀦𑀼 𑀔𑁄 𑀫𑁂 𑀤𑀸𑀦𑀯𑀁𑀲𑁄, 𑀉𑀤𑀸𑀳𑀼 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀧𑀼𑀢𑁆𑀢𑁄 𑀫𑁂 𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 ¶ 𑀘𑀦𑁆𑀤𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀽𑀭𑀺𑀬𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀸𑀢𑀮𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀙𑀝𑁆𑀞𑁄 𑀧𑀦 𑀢𑀁 𑀯𑀁𑀲𑀁 𑀉𑀧𑀘𑁆𑀙𑀺𑀦𑁆𑀤𑀻’’𑀢𑀺 𑀧𑀲𑁆𑀲𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑀁 𑀧𑀸𑀧𑀥𑀫𑁆𑀫𑀁 𑀤𑀫𑁂𑀢𑁆𑀯𑀸 𑀤𑀸𑀦𑀨𑀮𑀁 𑀚𑀸𑀦𑀸𑀧𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀘𑀦𑁆𑀤𑀲𑀽𑀭𑀺𑀬𑀫𑀸𑀢𑀮𑀺𑀧𑀜𑁆𑀘𑀲𑀺𑀔𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫𑀸, 𑀅𑀫𑁆𑀳𑀸𑀓𑀁 𑀯𑀁𑀲𑁂 𑀙𑀝𑁆𑀞𑁄 𑀓𑀼𑀮𑀯𑀁𑀲𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀦𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀬𑀸𑀘𑀓𑁂 𑀦𑀻𑀳𑀭𑀸𑀧𑁂𑀲𑀺, 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀤𑁂𑀢𑀺, 𑀏𑀣 𑀦𑀁 𑀤𑀫𑁂𑀲𑁆𑀲𑀸𑀫𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀢𑀫𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀘𑀗𑁆𑀓𑀫𑀢𑀺. 𑀲𑀓𑁆𑀓𑁄 ‘‘𑀢𑀼𑀫𑁆𑀳𑁂 𑀫𑀫 𑀧𑀯𑀺𑀝𑁆𑀞𑀓𑀸𑀮𑁂 𑀧𑀘𑁆𑀙𑀢𑁄 𑀧𑀝𑀺𑀧𑀸𑀝𑀺𑀬𑀸 𑀆𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 ‘‘𑀪𑁄 𑀫𑀳𑀸𑀲𑁂𑀝𑁆𑀞𑀺, 𑀪𑁄𑀚𑀦𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. ‘‘𑀩𑁆𑀭𑀸𑀳𑁆𑀫𑀡 𑀦𑀢𑁆𑀣𑀺 𑀢𑀯 𑀇𑀥 𑀪𑀢𑁆𑀢𑀁, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸’’𑀢𑀺. ‘‘𑀪𑁄 𑀫𑀳𑀸𑀲𑁂𑀝𑁆𑀞𑀺, 𑀩𑁆𑀭𑀸𑀳𑁆𑀫𑀡𑁂𑀳𑀺 𑀪𑀢𑁆𑀢𑁂 𑀬𑀸𑀘𑀺𑀢𑁂 ¶ 𑀦 𑀤𑀸𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀫𑀫 𑀕𑁂𑀳𑁂 𑀧𑀓𑁆𑀓𑀫𑁆𑀧𑀺 𑀧𑀘𑀺𑀢𑀩𑁆𑀩𑀫𑁆𑀧𑀺 𑀪𑀢𑁆𑀢𑀁 𑀦𑀢𑁆𑀣𑀺, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸’’𑀢𑀺. ‘‘𑀫𑀳𑀸𑀲𑁂𑀝𑁆𑀞𑀺, 𑀏𑀓𑀁 𑀢𑁂 𑀲𑀺𑀮𑁄𑀓𑀁 𑀓𑀣𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀳𑀻’’𑀢𑀺. ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀢𑀯 𑀲𑀺𑀮𑁄𑀓𑁂𑀦𑀢𑁆𑀣𑁄, 𑀫𑀸 𑀇𑀥 𑀢𑀺𑀝𑁆𑀞𑀸’’𑀢𑀺. 𑀲𑀓𑁆𑀓𑁄 𑀢𑀲𑁆𑀲 𑀓𑀣𑀁 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁫.

‘‘𑀅𑀧𑀘𑀦𑁆𑀢𑀸𑀧𑀺 ¶ 𑀤𑀺𑀘𑁆𑀙𑀦𑁆𑀢𑀺, 𑀲𑀦𑁆𑀢𑁄 𑀮𑀤𑁆𑀥𑀸𑀦 𑀪𑁄𑀚𑀦𑀁;

𑀓𑀺𑀫𑁂𑀯 𑀢𑁆𑀯𑀁 𑀧𑀘𑀫𑀸𑀦𑁄, 𑀬𑀁 𑀦 𑀤𑀚𑁆𑀚𑀸 𑀦 𑀢𑀁 𑀲𑀫𑀁.

𑁧𑁨𑁬.

‘‘𑀫𑀘𑁆𑀙𑁂𑀭𑀸 𑀘 𑀧𑀫𑀸𑀤𑀸 𑀘, 𑀏𑀯𑀁 𑀤𑀸𑀦𑀁 𑀦 𑀤𑀻𑀬𑀢𑀺;

𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑁂𑀦, 𑀤𑁂𑀬𑁆𑀬𑀁 𑀳𑁄𑀢𑀺 𑀯𑀺𑀚𑀸𑀦𑀢𑀸’’𑀢𑀺.

𑀢𑀸𑀲𑀁 𑀅𑀢𑁆𑀣𑁄 𑁋 𑀫𑀳𑀸𑀲𑁂𑀝𑁆𑀞𑀺 𑀅𑀧𑀘𑀦𑁆𑀢𑀸𑀧𑀺 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀮𑀤𑁆𑀥𑀫𑁆𑀧𑀺 𑀪𑁄𑀚𑀦𑀁 𑀤𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀦 𑀏𑀓𑀓𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀓𑀺𑀫𑁂𑀯 𑀢𑁆𑀯𑀁 𑀧𑀘𑀫𑀸𑀦𑁄 𑀬𑀁 𑀦 𑀤𑀤𑁂𑀬𑁆𑀬𑀸𑀲𑀺, 𑀦 𑀢𑀁 𑀲𑀫𑀁, 𑀢𑀁 𑀢𑀯 𑀅𑀦𑀼𑀭𑀽𑀧𑀁 𑀅𑀦𑀼𑀘𑁆𑀙𑀯𑀺𑀓𑀁 𑀦 𑀳𑁄𑀢𑀺. 𑀤𑀸𑀦𑀜𑁆𑀳𑀺 𑀫𑀘𑁆𑀙𑁂𑀭𑁂𑀦 𑀘 𑀧𑀫𑀸𑀤𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀤𑁄𑀲𑁂𑀳𑀺 𑀦 𑀤𑀻𑀬𑀢𑀺, 𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑁂𑀦 𑀯𑀺𑀚𑀸𑀦𑀢𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁂𑀦 𑀤𑀸𑀢𑀩𑁆𑀩𑀫𑁂𑀯 𑀳𑁄𑀢𑀻𑀢𑀺.

𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤, 𑀣𑁄𑀓𑀁 𑀮𑀘𑁆𑀙𑀲𑀻’’𑀢𑀺 𑀆𑀳. 𑀲𑀓𑁆𑀓𑁄 𑀧𑀯𑀺𑀲𑀺𑀢𑁆𑀯𑀸 𑀢𑁂 𑀲𑀺𑀮𑁄𑀓𑁂 𑀲𑀚𑁆𑀛𑀸𑀬𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀘𑀦𑁆𑀤𑁄 𑀆𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀬𑀸𑀘𑀺. ‘‘𑀦𑀢𑁆𑀣𑀺 𑀢𑁂 𑀪𑀢𑁆𑀢𑀁, 𑀕𑀘𑁆𑀙𑀸’’𑀢𑀺 𑀘 ¶ 𑀯𑀼𑀢𑁆𑀢𑁄 ‘‘𑀫𑀳𑀸𑀲𑁂𑀝𑁆𑀞𑀺 𑀅𑀦𑁆𑀢𑁄 𑀏𑀓𑁄 𑀩𑁆𑀭𑀸𑀳𑁆𑀫𑀡𑁄 𑀦𑀺𑀲𑀺𑀦𑁆𑀦𑁄, 𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀁 𑀫𑀜𑁆𑀜𑁂 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀦𑀢𑁆𑀣𑀺 𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀁, 𑀦𑀺𑀓𑁆𑀔𑀫𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀫𑀳𑀸𑀲𑁂𑀝𑁆𑀞𑀺 𑀇𑀗𑁆𑀖 𑀢𑀸𑀯 𑀲𑀺𑀮𑁄𑀓𑀁 𑀲𑀼𑀡𑀸𑀳𑀻’’𑀢𑀺 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁭.

‘‘𑀬𑀲𑁆𑀲𑁂𑀯 𑀪𑀻𑀢𑁄 𑀦 𑀤𑀤𑀸𑀢𑀺 𑀫𑀘𑁆𑀙𑀭𑀻, 𑀢𑀤𑁂𑀯𑀸𑀤𑀤𑀢𑁄 𑀪𑀬𑀁;

𑀚𑀺𑀖𑀘𑁆𑀙𑀸 𑀘 𑀧𑀺𑀧𑀸𑀲𑀸 𑀘, 𑀬𑀲𑁆𑀲 𑀪𑀸𑀬𑀢𑀺 𑀫𑀘𑁆𑀙𑀭𑀻;

𑀢𑀫𑁂𑀯 𑀩𑀸𑀮𑀁 𑀨𑀼𑀲𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁧𑁨𑁮.

‘‘𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀁, 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑀢𑀢𑁆𑀣 𑀬𑀲𑁆𑀲 𑀪𑀸𑀬𑀢𑀻𑀢𑀺 ‘‘𑀅𑀳𑀁 𑀅𑀜𑁆𑀜𑁂𑀲𑀁 𑀤𑀢𑁆𑀯𑀸 𑀲𑀬𑀁 𑀚𑀺𑀖𑀘𑁆𑀙𑀺𑀢𑁄 𑀘 𑀧𑀺𑀧𑀸𑀲𑀺𑀢𑁄 𑀘 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀬𑀲𑁆𑀲𑀸 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀪𑀸𑀬𑀢𑀺. 𑀢𑀫𑁂𑀯𑀸𑀢𑀺 ¶ 𑀢𑀜𑁆𑀜𑁂𑀯 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀲𑀗𑁆𑀔𑀸𑀢𑀁 𑀪𑀬𑀁 𑀏𑀢𑀁 𑀩𑀸𑀮𑀁 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀇𑀥𑀮𑁄𑀓𑁂 𑀧𑀭𑀮𑁄𑀓𑁂 𑀘 𑀨𑀼𑀲𑀢𑀺 𑀧𑀻𑀴𑁂𑀢𑀺, 𑀅𑀘𑁆𑀘𑀦𑁆𑀢𑀤𑀸𑀮𑀺𑀤𑁆𑀤𑀺𑀬𑀁 𑀧𑀸𑀧𑀼𑀡𑀸𑀢𑀺. 𑀫𑀮𑀸𑀪𑀺𑀪𑀽𑀢𑀺 𑀫𑀘𑁆𑀙𑀭𑀺𑀬𑀫𑀮𑀁 𑀅𑀪𑀺𑀪𑀯𑀦𑁆𑀢𑁄.

𑀢𑀲𑁆𑀲𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀧𑀯𑀺𑀲, 𑀣𑁄𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄𑀧𑀺 𑀧𑀯𑀺𑀲𑀺𑀢𑁆𑀯𑀸 ¶ 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀢𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀽𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀬𑀸𑀘𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁯.

‘‘𑀤𑀼𑀤𑁆𑀤𑀤𑀁 𑀤𑀤𑀫𑀸𑀦𑀸𑀦𑀁, 𑀤𑀼𑀓𑁆𑀓𑀭𑀁 𑀓𑀫𑁆𑀫 𑀓𑀼𑀩𑁆𑀩𑀢𑀁;

𑀅𑀲𑀦𑁆𑀢𑁄 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀲𑀢𑀁 𑀥𑀫𑁆𑀫𑁄 𑀤𑀼𑀭𑀦𑁆𑀦𑀬𑁄.

𑁧𑁩𑁦.

‘‘𑀢𑀲𑁆𑀫𑀸 𑀲𑀢𑀜𑁆𑀘 𑀅𑀲𑀢𑀁, 𑀦𑀸𑀦𑀸 𑀳𑁄𑀢𑀺 𑀇𑀢𑁄 𑀕𑀢𑀺;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀡𑀸’’𑀢𑀺.

𑀢𑀢𑁆𑀣 𑀤𑀼𑀤𑁆𑀤𑀤𑀦𑁆𑀢𑀺 𑀤𑀸𑀦𑀁 𑀦𑀸𑀫 𑀤𑀼𑀤𑁆𑀤𑀤𑀁 𑀫𑀘𑁆𑀙𑁂𑀭𑀁 𑀅𑀪𑀺𑀪𑀯𑀺𑀢𑁆𑀯𑀸 𑀤𑀸𑀢𑀩𑁆𑀩𑀢𑁄, 𑀢𑀁 𑀤𑀤𑀫𑀸𑀦𑀸𑀦𑀁. 𑀤𑀼𑀓𑁆𑀓𑀭𑀦𑁆𑀢𑀺 𑀢𑀤𑁂𑀯 𑀤𑀸𑀦𑀓𑀫𑁆𑀫𑀁 𑀤𑀼𑀓𑁆𑀓𑀭𑀁 𑀬𑀼𑀤𑁆𑀥𑀲𑀤𑀺𑀲𑀁, 𑀢𑀁 𑀓𑀼𑀩𑁆𑀩𑀢𑀁. 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀸 𑀤𑀸𑀦𑀨𑀮𑀁 𑀅𑀚𑀸𑀦𑀦𑁆𑀢𑀸 𑀢𑁂𑀲𑀁 𑀕𑀢𑀫𑀕𑁆𑀕𑀁 𑀦𑀸𑀦𑀼𑀕𑀘𑁆𑀙𑀦𑁆𑀢𑀺. 𑀲𑀢𑀁 𑀥𑀫𑁆𑀫𑁄𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀥𑀫𑁆𑀫𑁄 𑀅𑀜𑁆𑀜𑁂𑀳𑀺 𑀤𑀼𑀭𑀦𑀼𑀕𑀫𑁄. 𑀅𑀲𑀦𑁆𑀢𑁄𑀢𑀺 𑀫𑀘𑁆𑀙𑀭𑀺𑀬𑀯𑀲𑁂𑀦 𑀤𑀸𑀦𑀁 𑀅𑀤𑀢𑁆𑀯𑀸 𑀅𑀲𑀧𑁆𑀧𑀼𑀭𑀺𑀲𑀸 𑀦𑀺𑀭𑀬𑀁 𑀬𑀦𑁆𑀢𑀺.

𑀲𑁂𑀝𑁆𑀞𑀺 ¶ 𑀕𑀳𑁂𑀢𑀩𑁆𑀩𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀢𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤, 𑀣𑁄𑀓𑀁 𑀮𑀘𑁆𑀙𑀲𑀻’’𑀢𑀺 𑀆𑀳. 𑀢𑀢𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀸𑀢𑀮𑀺 𑀆𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀬𑀸𑀘𑀺𑀢𑁆𑀯𑀸 ‘‘𑀦𑀢𑁆𑀣𑀻’’𑀢𑀺 𑀯𑀘𑀦𑀫𑀢𑁆𑀢𑀓𑀸𑀮𑀫𑁂𑀯 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁧.

‘‘𑀅𑀧𑁆𑀧𑀲𑁆𑀫𑁂𑀓𑁂 𑀧𑀯𑁂𑀘𑁆𑀙𑀦𑁆𑀢𑀺, 𑀩𑀳𑀼𑀦𑁂𑀓𑁂 𑀦 𑀤𑀺𑀘𑁆𑀙𑀭𑁂;

𑀅𑀧𑁆𑀧𑀲𑁆𑀫𑀸 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸’’𑀢𑀺.

𑀢𑀢𑁆𑀣 𑀅𑀧𑁆𑀧𑀲𑁆𑀫𑁂𑀓𑁂 𑀧𑀯𑁂𑀘𑁆𑀙𑀦𑁆𑀢𑀻𑀢𑀺 𑀫𑀳𑀸𑀲𑁂𑀝𑁆𑀞𑀺 𑀏𑀓𑀘𑁆𑀘𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀅𑀧𑁆𑀧𑀲𑁆𑀫𑀺𑀫𑁆𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀧𑀯𑁂𑀘𑁆𑀙𑀦𑁆𑀢𑀺, 𑀤𑀤𑀦𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀩𑀳𑀼𑀦𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸 𑀏𑀓𑁂 𑀲𑀢𑁆𑀢𑀸 𑀦 𑀤𑀺𑀘𑁆𑀙𑀭𑁂 𑀦 𑀤𑀤𑀦𑁆𑀢𑀺. 𑀤𑀓𑁆𑀔𑀺𑀡𑀸𑀢𑀺 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀁. 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸𑀢𑀺 𑀏𑀯𑀁 𑀤𑀺𑀦𑁆𑀦𑀸 𑀓𑀝𑀘𑁆𑀙𑀼𑀪𑀢𑁆𑀢𑀫𑀢𑁆𑀢𑀸𑀧𑀺 𑀤𑀓𑁆𑀔𑀺𑀡𑀸 𑀲𑀳𑀲𑁆𑀲𑀤𑀸𑀦𑁂𑀦 𑀲𑀤𑁆𑀥𑀺𑀁 𑀫𑀺𑀢𑀸, 𑀫𑀳𑀸𑀨𑀮𑀢𑁆𑀢𑀸 𑀲𑀳𑀲𑁆𑀲𑀤𑀸𑀦𑀲𑀤𑀺𑀲𑀸𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀢𑀫𑁆𑀧𑀺 ¶ 𑀲𑁄 ‘‘𑀢𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀸’’𑀢𑀺 𑀆𑀳. 𑀢𑀢𑁄 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀲𑀺𑀔𑁄 𑀆𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀬𑀸𑀘𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀕𑀘𑁆𑀙𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀦 𑀕𑀢𑀧𑀼𑀩𑁆𑀩𑁄, 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀁 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀆𑀭𑀪𑀦𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁨.

‘‘𑀥𑀫𑁆𑀫𑀁 ¶ 𑀘𑀭𑁂 𑀬𑁄𑀧𑀺 𑀲𑀫𑀼𑀜𑁆𑀙𑀓𑀁 𑀘𑀭𑁂, 𑀤𑀸𑀭𑀜𑁆𑀘 𑀧𑁄𑀲𑀁 𑀤𑀤𑀫𑀧𑁆𑀧𑀓𑀲𑁆𑀫𑀺𑀁;

𑀲𑀢𑀁 𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦𑀁, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂’’𑀢𑀺.

𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑀁. 𑀲𑀫𑀼𑀜𑁆𑀙𑀓𑀦𑁆𑀢𑀺 𑀕𑀸𑀫𑁂 𑀯𑀸 𑀆𑀫𑀓𑀧𑀓𑁆𑀓𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀭𑀜𑁆𑀜𑁂 𑀯𑀸 𑀨𑀮𑀸𑀨𑀮𑀳𑀭𑀡𑀲𑀗𑁆𑀔𑀸𑀢𑀁 𑀉𑀜𑁆𑀙𑀁 𑀬𑁄 𑀘𑀭𑁂𑀬𑁆𑀬, 𑀲𑁄𑀧𑀺 𑀥𑀫𑁆𑀫𑀫𑁂𑀯 𑀘𑀭𑁂. 𑀤𑀸𑀭𑀜𑁆𑀘 𑀧𑁄𑀲𑀦𑁆𑀢𑀺 𑀅𑀢𑁆𑀢𑀦𑁄 𑀘 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑁄𑀬𑁂𑀯. 𑀤𑀤𑀫𑀧𑁆𑀧𑀓𑀲𑁆𑀫𑀺𑀦𑁆𑀢𑀺 𑀧𑀭𑀺𑀢𑁆𑀢𑁂 𑀯𑀸 𑀤𑁂𑀬𑁆𑀬𑀥𑀫𑁆𑀫𑁂 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀫𑀸𑀦𑁄 𑀥𑀫𑁆𑀫𑀁 𑀘𑀭𑁂𑀢𑀺 𑀅𑀢𑁆𑀣𑁄. 𑀲𑀢𑀁 𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦𑀦𑁆𑀢𑀺 𑀧𑀭𑀁 𑀧𑁄𑀣𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀲𑀳𑀲𑁆𑀲𑁂𑀦 𑀬𑀸𑀕𑀁 𑀬𑀚𑀦𑁆𑀢𑀸𑀦𑀁 𑀲𑀳𑀲𑁆𑀲𑀬𑀸𑀕𑀻𑀦𑀁 𑀇𑀲𑁆𑀲𑀭𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺. 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂𑀢𑀺 𑀢𑁂𑀲𑀁 𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀢𑀸𑀦𑀁 𑀲𑀳𑀲𑁆𑀲𑀬𑀸𑀕𑀻𑀦𑀁 𑀬𑀸𑀕𑀸 𑀢𑀣𑀸𑀯𑀺𑀥𑀲𑁆𑀲 𑀥𑀫𑁆𑀫𑁂𑀦 𑀲𑀫𑁂𑀦 ¶ 𑀤𑁂𑀬𑁆𑀬𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀲𑁆𑀲 𑀲𑁄𑀴𑀲𑀺𑀁 𑀓𑀮𑀁 𑀦 𑀅𑀕𑁆𑀖𑀦𑁆𑀢𑀻𑀢𑀺.

𑀲𑁂𑀝𑁆𑀞𑀺 𑀧𑀜𑁆𑀘𑀲𑀺𑀔𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀲𑀺. 𑀅𑀣 𑀦𑀁 𑀅𑀦𑀕𑁆𑀖𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁩.

‘‘𑀓𑁂𑀦𑁂𑀲 𑀬𑀜𑁆𑀜𑁄 𑀯𑀺𑀧𑀼𑀮𑁄 𑀫𑀳𑀕𑁆𑀖𑀢𑁄, 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲 𑀦 𑀅𑀕𑁆𑀖𑀫𑁂𑀢𑀺;

𑀓𑀣𑀁 𑀲𑀢𑀁 𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦𑀁, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂’’𑀢𑀺.

𑀢𑀢𑁆𑀣 𑀬𑀜𑁆𑀜𑁄𑀢𑀺 𑀤𑀸𑀦𑀬𑀸𑀕𑁄 𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀯𑀺𑀧𑀼𑀮𑁄, 𑀯𑀺𑀧𑀼𑀮𑀢𑁆𑀢𑀸𑀯 𑀫𑀳𑀕𑁆𑀖𑀢𑁄. 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲𑀸𑀢𑀺 𑀥𑀫𑁆𑀫𑁂𑀦 𑀤𑀺𑀦𑁆𑀦𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀅𑀕𑁆𑀖𑀁 𑀦 𑀉𑀧𑁂𑀢𑀺. 𑀓𑀣𑀁 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺 𑀩𑁆𑀭𑀸𑀳𑁆𑀫𑀡, 𑀓𑀣𑀁 ¶ 𑀲𑀳𑀲𑁆𑀲𑀬𑀸𑀕𑀻𑀦𑀁 𑀧𑀼𑀭𑀺𑀲𑀸𑀦𑀁 𑀩𑀳𑀽𑀦𑀁 𑀲𑀳𑀲𑁆𑀲𑀸𑀦𑀁 𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀢𑀸 𑀇𑀲𑁆𑀲𑀭𑀸 𑀢𑀣𑀸𑀯𑀺𑀥𑀲𑁆𑀲 𑀥𑀫𑁆𑀫𑁂𑀦 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀸𑀬𑀓𑀲𑁆𑀲 𑀏𑀓𑀲𑁆𑀲 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀲𑁆𑀲 𑀓𑀮𑀁 𑀦𑀸𑀕𑁆𑀖𑀦𑁆𑀢𑀻𑀢𑀺.

𑀅𑀣𑀲𑁆𑀲 𑀓𑀣𑁂𑀦𑁆𑀢𑁄 𑀧𑀜𑁆𑀘𑀲𑀺𑀔𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁩𑁪.

‘‘𑀤𑀤𑀦𑁆𑀢𑀺 𑀳𑁂𑀓𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸, 𑀙𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀅𑀣 𑀲𑁄𑀘𑀬𑀺𑀢𑁆𑀯𑀸;

𑀲𑀸 𑀤𑀓𑁆𑀔𑀺𑀡𑀸 𑀅𑀲𑁆𑀲𑀼𑀫𑀼𑀔𑀸 𑀲𑀤𑀡𑁆𑀟𑀸, 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲 𑀦 𑀅𑀕𑁆𑀖𑀫𑁂𑀢𑀺;

𑀏𑀯𑀁 𑀲𑀢𑀁 𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦𑀁, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑁂’’𑀢𑀺.

𑀢𑀢𑁆𑀣 𑀯𑀺𑀲𑀫𑁂𑀢𑀺 𑀯𑀺𑀲𑀫𑁂 𑀓𑀸𑀬𑀓𑀫𑁆𑀫𑀸𑀤𑀺𑀫𑁆𑀳𑀺 𑀦𑀺𑀯𑀺𑀝𑁆𑀞𑀸. 𑀙𑁂𑀢𑁆𑀯𑀸𑀢𑀺 𑀓𑀺𑀮𑀫𑁂𑀢𑁆𑀯𑀸. 𑀯𑀥𑀺𑀢𑁆𑀯𑀸𑀢𑀺 𑀫𑀸𑀭𑁂𑀢𑁆𑀯𑀸. 𑀲𑁄𑀘𑀬𑀺𑀢𑁆𑀯𑀸𑀢𑀺 𑀲𑀲𑁄𑀓𑁂 𑀓𑀢𑁆𑀯𑀸.

𑀲𑁄 ¶ 𑀧𑀜𑁆𑀘𑀲𑀺𑀔𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑀘𑁆𑀙, 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤, 𑀣𑁄𑀓𑀁 𑀮𑀘𑁆𑀙𑀲𑀻’’𑀢𑀺 𑀆𑀳. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀢𑁄 𑀩𑀺𑀮𑀸𑀭𑀓𑁄𑀲𑀺𑀬𑁄 𑀲𑁂𑀝𑁆𑀞𑀺 𑀏𑀓𑀁 𑀤𑀸𑀲𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀏𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀮𑀸𑀧𑀯𑀻𑀳𑀻𑀦𑀁 𑀦𑀸𑀴𑀺𑀁 𑀦𑀸𑀴𑀺𑀁 𑀤𑁂𑀳𑀻’’𑀢𑀺 𑀆𑀳. 𑀲𑀸 𑀯𑀻𑀳𑀻 𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑁂 𑀆𑀤𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀣𑀸’’𑀢𑀺 𑀆𑀳. ‘‘𑀦 𑀅𑀫𑁆𑀳𑀸𑀓𑀁 𑀯𑀻𑀳𑀺𑀦𑀸 𑀅𑀢𑁆𑀣𑁄, 𑀦 𑀫𑀬𑀁 𑀯𑀻𑀳𑀺𑀁 𑀆𑀫𑀲𑀸𑀫𑀸’’𑀢𑀺. ‘‘𑀅𑀬𑁆𑀬, 𑀯𑀻𑀳𑀺𑀁 𑀓𑀺𑀭𑁂𑀢𑁂 𑀦𑀸𑀫𑀲𑀦𑁆𑀢𑀻’’𑀢𑀺? ‘‘𑀢𑁂𑀦 𑀳𑀺 𑀢𑁂𑀲𑀁 𑀢𑀡𑁆𑀟𑀼𑀮𑁂 𑀤𑁂𑀳𑀻’’𑀢𑀺. 𑀲𑀸 𑀢𑀡𑁆𑀟𑀼𑀮𑁂 𑀆𑀤𑀸𑀬 𑀕𑀦𑁆𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀢𑀡𑁆𑀟𑀼𑀮𑁂 𑀕𑀡𑁆𑀳𑀣𑀸’’𑀢𑀺 𑀆𑀳. ‘‘𑀫𑀬𑀁 𑀆𑀫𑀓𑀁 𑀦 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺. ‘‘𑀅𑀬𑁆𑀬, 𑀆𑀫𑀓𑀁 𑀓𑀺𑀭 𑀦 𑀕𑀡𑁆𑀳𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺 𑀢𑁂𑀲𑀁 𑀓𑀭𑁄𑀝𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀕𑁄𑀪𑀢𑁆𑀢𑀁 𑀤𑁂𑀳𑀻’’𑀢𑀺. 𑀲𑀸 𑀢𑁂𑀲𑀁 𑀓𑀭𑁄𑀝𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀫𑀳𑀸𑀕𑁄𑀡𑀸𑀦𑀁 𑀧𑀓𑁆𑀓𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀧𑀜𑁆𑀘𑀧𑀺 𑀚𑀦𑀸 𑀓𑀩𑀴𑁂 𑀯𑀟𑁆𑀠𑁂𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀮𑁂 𑀮𑀕𑁆𑀕𑀸𑀧𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀲𑀜𑁆𑀜𑀸 𑀫𑀢𑀸 𑀯𑀺𑀬 𑀦𑀺𑀧𑀚𑁆𑀚𑀺𑀁𑀲𑀼. 𑀤𑀸𑀲𑀻 𑀢𑁂 𑀤𑀺𑀲𑁆𑀯𑀸 ‘‘𑀫𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀪𑀻𑀢𑀸 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀆𑀭𑁄𑀘𑁂𑀲𑀺 ‘‘𑀅𑀬𑁆𑀬, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀕𑁄𑀪𑀢𑁆𑀢𑀁 𑀕𑀺𑀮𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ¶ 𑀫𑀢𑀸’’𑀢𑀺.

𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀅𑀬𑀁 𑀧𑀸𑀧𑀥𑀫𑁆𑀫𑁄 𑀲𑀼𑀔𑀼𑀫𑀸𑀮𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑁄𑀪𑀢𑁆𑀢𑀁 𑀤𑀸𑀧𑁂𑀲𑀺, 𑀢𑁂 𑀢𑀁 𑀕𑀺𑀮𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀢𑀸𑀢𑀺 𑀫𑀁 𑀕𑀭𑀳𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 𑀤𑀸𑀲𑀺𑀁 𑀆𑀳 𑁋 ‘‘𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸 𑀏𑀢𑁂𑀲𑀁 𑀓𑀭𑁄𑀝𑀺𑀓𑁂𑀲𑀼 𑀪𑀢𑁆𑀢𑀁 𑀳𑀭𑀺𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀁 𑀲𑀸𑀮𑀺𑀪𑀢𑁆𑀢𑀁 𑀯𑀟𑁆𑀠𑁂𑀳𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀲𑁂𑀝𑁆𑀞𑀺 𑀅𑀦𑁆𑀢𑀭𑀧𑀻𑀣𑀺𑀁 𑀧𑀝𑀺𑀧𑀦𑁆𑀦𑀫𑀦𑀼𑀲𑁆𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀳𑀁 𑀫𑀫 𑀪𑀼𑀜𑁆𑀚𑀦𑀦𑀺𑀬𑀸𑀫𑁂𑀦 𑀏𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑀢𑁆𑀢𑀁 𑀤𑀸𑀧𑁂𑀲𑀺𑀁, 𑀏𑀢𑁂 𑀮𑁄𑀪𑁂𑀦 𑀫𑀳𑀦𑁆𑀢𑁂 𑀧𑀺𑀡𑁆𑀟𑁂 𑀓𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀸 𑀕𑀮𑁂 𑀮𑀕𑁆𑀕𑀸𑀧𑁂𑀢𑁆𑀯𑀸 𑀫𑀢𑀸, 𑀫𑀫 𑀦𑀺𑀤𑁆𑀤𑁄𑀲𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀭𑀺𑀲𑀁 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀢𑀺𑀢𑁂 𑀩𑁆𑀭𑀸𑀳𑁆𑀫𑀡𑀸 𑀉𑀝𑁆𑀞𑀸𑀬 𑀫𑀳𑀸𑀚𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀧𑀲𑁆𑀲𑀣𑀺𑀫𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀫𑀼𑀲𑀸𑀯𑀸𑀤𑀺𑀢𑀁, ‘𑀅𑀫𑁆𑀳𑀸𑀓𑀁 𑀅𑀢𑁆𑀢𑀦𑁄 𑀪𑀼𑀜𑁆𑀚𑀦𑀪𑀢𑁆𑀢𑀁 𑀤𑀸𑀧𑁂𑀲𑀺’𑀦𑁆𑀢𑀺 𑀯𑀤𑀢𑀺, 𑀧𑀞𑀫𑀁 𑀕𑁄𑀪𑀢𑁆𑀢𑀁 𑀅𑀫𑁆𑀳𑀸𑀓𑀁 𑀤𑀢𑁆𑀯𑀸 𑀅𑀫𑁆𑀳𑁂𑀲𑀼 𑀫𑀢𑁂𑀲𑀼 𑀯𑀺𑀬 𑀦𑀺𑀧𑀦𑁆𑀦𑁂𑀲𑀼 𑀇𑀫𑀁 𑀪𑀢𑁆𑀢𑀁 𑀯𑀟𑁆𑀠𑀸𑀧𑁂𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀫𑀼𑀔𑁂𑀳𑀺 𑀕𑀳𑀺𑀢𑀪𑀢𑁆𑀢𑀁 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀫𑀳𑀸𑀚𑀦𑁄 𑀲𑁂𑀝𑁆𑀞𑀺𑀁 𑀕𑀭𑀳𑀺 ‘‘𑀅𑀦𑁆𑀥𑀩𑀸𑀮, 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀁 𑀦𑀸𑀲𑁂𑀲𑀺, 𑀤𑀸𑀦𑀲𑀸𑀮𑀁 𑀛𑀸𑀧𑁂𑀲𑀺, 𑀬𑀸𑀘𑀓𑁂 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺, 𑀇𑀤𑀸𑀦𑀺 𑀇𑀫𑁂𑀲𑀁 𑀲𑀼𑀔𑀼𑀫𑀸𑀮𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑀢𑁆𑀢𑀁 𑀤𑁂𑀦𑁆𑀢𑁄 𑀕𑁄𑀪𑀢𑁆𑀢𑀁 𑀤𑀸𑀧𑁂𑀲𑀺, 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀢𑀯 𑀖𑀭𑁂 𑀯𑀺𑀪𑀯𑀁 𑀕𑀻𑀯𑀸𑀬𑀁 𑀩𑀦𑁆𑀥𑀺𑀢𑁆𑀯𑀸 𑀕𑀫𑀺𑀲𑁆𑀲𑀲𑀺 𑀫𑀜𑁆𑀜𑁂’’𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀫𑀳𑀸𑀚𑀦𑀁 𑀧𑀼𑀘𑁆𑀙𑀺 ‘‘𑀚𑀸𑀦𑀸𑀣, 𑀢𑀼𑀫𑁆𑀳𑁂 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀥𑀦𑀁 𑀓𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀸’’𑀢𑀺. ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀲𑀼𑀓𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 ¶ 𑀫𑀳𑀸𑀲𑁂𑀝𑁆𑀞𑀺 𑀦𑀸𑀫 𑀤𑀸𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀻’’𑀢𑀺 𑀲𑀼𑀢𑀧𑀼𑀩𑁆𑀩𑀁 𑀢𑀼𑀫𑁆𑀳𑁂𑀳𑀻𑀢𑀺. ‘‘𑀆𑀫 𑀲𑀼𑀡𑀸𑀫𑀸’’𑀢𑀺. ‘‘𑀅𑀳𑀁 𑀲𑁄 𑀲𑁂𑀝𑁆𑀞𑀺, 𑀤𑀸𑀦𑀁 𑀤𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀧𑀼𑀢𑁆𑀢𑁄𑀧𑀺 𑀫𑁂 𑀢𑀁 𑀯𑀁𑀲𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀘𑀦𑁆𑀤𑁄 ¶ 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀽𑀭𑀺𑀬𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀸𑀢𑀮𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑁂𑀲𑀼 𑀅𑀬𑀁 𑀘𑀦𑁆𑀤𑁄, 𑀅𑀬𑀁 𑀲𑀽𑀭𑀺𑀬𑁄, 𑀅𑀬𑀁 𑀫𑀸𑀢𑀮𑀺𑀲𑀗𑁆𑀕𑀸𑀳𑀓𑁄, 𑀅𑀬𑀁 𑀇𑀫𑀲𑁆𑀲 ¶ 𑀧𑀸𑀧𑀥𑀫𑁆𑀫𑀲𑁆𑀲 𑀧𑀺𑀢𑀸 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄, 𑀏𑀯𑀁 𑀩𑀳𑀼𑀕𑀼𑀡𑀁 𑀏𑀢𑀁 𑀤𑀸𑀦𑀁 𑀦𑀸𑀫, 𑀓𑀢𑁆𑀢𑀩𑁆𑀩𑀫𑁂𑀯 𑀓𑀼𑀲𑀮𑀁 𑀧𑀡𑁆𑀟𑀺𑀢𑁂𑀳𑀻’’𑀢𑀺 𑀓𑀣𑁂𑀦𑁆𑀢𑀸 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀁 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀦𑁆𑀢𑁂𑀦𑀸𑀦𑀼𑀪𑀸𑀯𑁂𑀦 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀚𑀮𑀫𑀸𑀦𑀲𑀭𑀻𑀭𑀸 𑀅𑀝𑁆𑀞𑀁𑀲𑀼, 𑀲𑀓𑀮𑀦𑀕𑀭𑀁 𑀧𑀚𑁆𑀚𑀮𑀦𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀲𑀓𑁆𑀓𑁄 𑀫𑀳𑀸𑀚𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀬𑀁 𑀅𑀢𑁆𑀢𑀦𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀆𑀕𑀘𑁆𑀙𑀦𑁆𑀢𑀸 𑀇𑀫𑀁 𑀓𑀼𑀮𑀯𑀁𑀲𑀦𑀸𑀲𑀓𑀭𑀁 𑀧𑀸𑀧𑀥𑀫𑁆𑀫𑀩𑀺𑀮𑀸𑀭𑀓𑁄𑀲𑀺𑀬𑀁 𑀦𑀺𑀲𑁆𑀲𑀸𑀬 𑀆𑀕𑀢𑀸, 𑀅𑀬𑀁 𑀧𑀸𑀧𑀥𑀫𑁆𑀫𑁄 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀁 𑀦𑀸𑀲𑁂𑀢𑁆𑀯𑀸 𑀤𑀸𑀦𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀬𑀸𑀘𑀓𑁂 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀯𑀁𑀲𑀁 𑀲𑀫𑀼𑀘𑁆𑀙𑀺𑀦𑁆𑀤𑀺, ‘𑀅𑀬𑀁 𑀅𑀤𑀸𑀦𑀲𑀻𑀮𑁄 𑀳𑀼𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’𑀢𑀺 𑀇𑀫𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀆𑀕𑀢𑀸𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀤𑀸𑀦𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀩𑀺𑀮𑀸𑀭𑀓𑁄𑀲𑀺𑀬𑁄 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 ‘‘𑀤𑁂𑀯, 𑀅𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀧𑁄𑀭𑀸𑀡𑀓𑀼𑀮𑀯𑀁𑀲𑀁 𑀅𑀦𑀸𑀲𑀸𑀧𑁂𑀢𑁆𑀯𑀸 𑀤𑀸𑀦𑀁 𑀧𑀯𑀢𑁆𑀢𑁂𑀲𑁆𑀲𑀸𑀫𑀺, 𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑀫𑀲𑁄 𑀉𑀤𑀓𑀤𑀦𑁆𑀢𑀧𑁄𑀦𑀁 𑀉𑀧𑀸𑀤𑀸𑀬 𑀅𑀢𑁆𑀢𑀦𑁄 𑀮𑀤𑁆𑀥𑀸𑀳𑀸𑀭𑀁 𑀧𑀭𑀲𑁆𑀲 𑀅𑀤𑀢𑁆𑀯𑀸 𑀦 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀓𑁆𑀓𑀲𑁆𑀲 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺. 𑀲𑀓𑁆𑀓𑁄 𑀢𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑁂 𑀆𑀤𑀸𑀬 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑁄𑀧𑀺 𑀲𑁂𑀝𑁆𑀞𑀺 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀅𑀬𑀁 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀅𑀲𑁆𑀲𑀤𑁆𑀥𑁄 𑀅𑀳𑁄𑀲𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑀸𑀢𑀸, 𑀅𑀳𑀁 𑀧𑀦 𑀦𑀁 𑀤𑀫𑁂𑀢𑁆𑀯𑀸 𑀤𑀸𑀦𑀨𑀮𑀁 𑀚𑀸𑀦𑀸𑀧𑁂𑀲𑀺𑀁, 𑀢𑀫𑁂𑀯 𑀘𑀺𑀢𑁆𑀢𑀁 𑀪𑀯𑀦𑁆𑀢𑀭𑀕𑀢𑀫𑁆𑀧𑀺 𑀦 𑀚𑀳𑀸𑀢𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑁂𑀝𑁆𑀞𑀺 𑀅𑀬𑀁 𑀤𑀸𑀦𑀧𑀢𑀺𑀓𑁄 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀘𑀦𑁆𑀤𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀽𑀭𑀺𑀬𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀫𑀸𑀢𑀮𑀺 𑀓𑀲𑁆𑀲𑀧𑁄, 𑀧𑀜𑁆𑀘𑀲𑀺𑀔𑁄 𑀆𑀦𑀦𑁆𑀤𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀺𑀮𑀸𑀭𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀤𑁆𑀯𑀸𑀤𑀲𑀫𑀸.

[𑁪𑁫𑁧] 𑁧𑁩. 𑀘𑀓𑁆𑀓𑀯𑀸𑀓𑀚𑀸𑀢𑀓𑀯𑀡𑁆𑀡𑀦𑀸

𑀯𑀡𑁆𑀡𑀯𑀸 ¶ ¶ 𑀅𑀪𑀺𑀭𑀽𑀧𑁄𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀮𑁄𑀮𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀘𑀻𑀯𑀭𑀸𑀤𑀻𑀳𑀺 𑀅𑀢𑀺𑀢𑁆𑀢𑁄 ‘‘𑀓𑀳𑀁 𑀲𑀗𑁆𑀖𑀪𑀢𑁆𑀢𑀁, 𑀓𑀳𑀁 𑀦𑀺𑀫𑀦𑁆𑀢𑀦’’𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀘𑀭𑀢𑀺, 𑀆𑀫𑀺𑀲𑀓𑀣𑀸𑀬𑀫𑁂𑀯 𑀅𑀪𑀺𑀭𑀫𑀢𑀺. 𑀅𑀣𑀜𑁆𑀜𑁂 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸𑀦𑀼𑀕𑁆𑀕𑀳𑁂𑀦 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀮𑁄𑀮𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 ¶ 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑁄𑀮𑁄 𑀅𑀳𑁄𑀲𑀺, 𑀮𑁄𑀮𑀪𑀸𑀯𑁄 𑀘 𑀦𑀸𑀫 𑀧𑀸𑀧𑀓𑁄, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀮𑁄𑀮𑀪𑀸𑀯𑀁 𑀦𑀺𑀲𑁆𑀲𑀸𑀬 𑀩𑀸𑀭𑀸𑀡𑀲𑀺𑀬𑀁 𑀳𑀢𑁆𑀣𑀺𑀓𑀼𑀡𑀧𑀸𑀤𑀻𑀳𑀺 𑀅𑀢𑀺𑀢𑁆𑀢𑁄 𑀫𑀳𑀸𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀮𑁄𑀮𑀓𑀸𑀓𑁄 𑀩𑀸𑀭𑀸𑀡𑀲𑀺𑀬𑀁 𑀳𑀢𑁆𑀣𑀺𑀓𑀼𑀡𑀧𑀸𑀤𑀻𑀳𑀺 𑀅𑀢𑀺𑀢𑁆𑀢𑁄 ‘‘𑀅𑀭𑀜𑁆𑀜𑀁 𑀦𑀼 𑀔𑁄 𑀓𑀻𑀤𑀺𑀲’’𑀦𑁆𑀢𑀺 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣𑀧𑀺 𑀨𑀮𑀸𑀨𑀮𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄 𑀕𑀗𑁆𑀕𑀸𑀬 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀚𑀬𑀫𑁆𑀧𑀢𑀺𑀓𑁂 𑀘𑀓𑁆𑀓𑀯𑀸𑀓𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀲𑀓𑀼𑀡𑀸 𑀅𑀢𑀺𑀯𑀺𑀬 𑀲𑁄𑀪𑀦𑁆𑀢𑀺, 𑀇𑀫𑁂 𑀇𑀫𑀲𑁆𑀫𑀺𑀁 𑀕𑀗𑁆𑀕𑀸𑀢𑀻𑀭𑁂 𑀩𑀳𑀼𑀁 𑀫𑀘𑁆𑀙𑀫𑀁𑀲𑀁 𑀔𑀸𑀤𑀦𑁆𑀢𑀺 𑀫𑀜𑁆𑀜𑁂, 𑀇𑀫𑁂 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀫𑀬𑀸𑀧𑀺 𑀇𑀫𑁂𑀲𑀁 𑀪𑁄𑀚𑀦𑀁 𑀕𑁄𑀘𑀭𑀁 𑀔𑀸𑀤𑀺𑀢𑁆𑀯𑀸 𑀯𑀡𑁆𑀡𑀯𑀦𑁆𑀢𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂𑀲𑀁 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀓𑁆𑀓𑀯𑀸𑀓𑀁 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁫.

‘‘𑀯𑀡𑁆𑀡𑀯𑀸 𑀅𑀪𑀺𑀭𑀽𑀧𑁄𑀲𑀺, 𑀖𑀦𑁄 𑀲𑀜𑁆𑀚𑀸𑀢𑀭𑁄𑀳𑀺𑀢𑁄;

𑀘𑀓𑁆𑀓𑀯𑀸𑀓 𑀲𑀼𑀭𑀽𑀧𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀺𑀦𑁆𑀤𑁆𑀭𑀺𑀬𑁄.

𑁧𑁩𑁬.

‘‘𑀧𑀸𑀞𑀻𑀦𑀁 𑀧𑀸𑀯𑀼𑀲𑀁 𑀫𑀘𑁆𑀙𑀁, 𑀩𑀮𑀚𑀁 𑀫𑀼𑀜𑁆𑀚𑀭𑁄𑀳𑀺𑀢𑀁;

𑀕𑀗𑁆𑀕𑀸𑀬 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄, 𑀏𑀯𑀁 𑀪𑀼𑀜𑁆𑀚𑀲𑀺 𑀪𑁄𑀚𑀦’’𑀦𑁆𑀢𑀺.

𑀢𑀢𑁆𑀣 𑀖𑀦𑁄𑀢𑀺 𑀖𑀦𑀲𑀭𑀻𑀭𑁄. 𑀲𑀜𑁆𑀚𑀸𑀢𑀭𑁄𑀳𑀺𑀢𑁄𑀢𑀺 𑀉𑀢𑁆𑀢𑀢𑁆𑀢𑀲𑀼𑀯𑀡𑁆𑀡𑀁 𑀯𑀺𑀬 𑀲𑀼𑀝𑁆𑀞𑀼𑀚𑀸𑀢𑀭𑁄𑀳𑀺𑀢𑀯𑀡𑁆𑀡𑁄. 𑀧𑀸𑀞𑀻𑀦𑀦𑁆𑀢𑀺 𑀧𑀸𑀞𑀻𑀦𑀦𑀸𑀫𑀓𑀁 𑀧𑀸𑀲𑀸𑀡𑀫𑀘𑁆𑀙𑀁. 𑀧𑀸𑀯𑀼𑀲𑀦𑁆𑀢𑀺 𑀫𑀳𑀸𑀫𑀼𑀔𑀫𑀘𑁆𑀙𑀁, ‘‘𑀧𑀸𑀳𑀼𑀲’’𑀦𑁆𑀢𑀺𑀧𑀺 𑀧𑀸𑀞𑁄. 𑀩𑀮𑀚𑀦𑁆𑀢𑀺 𑀩𑀮𑀚𑀫𑀘𑁆𑀙𑀁. 𑀫𑀼𑀜𑁆𑀚𑀭𑁄𑀳𑀺𑀢𑀦𑁆𑀢𑀺 𑀫𑀼𑀜𑁆𑀚𑀫𑀘𑁆𑀙𑀜𑁆𑀘 𑀭𑁄𑀳𑀺𑀢𑀫𑀘𑁆𑀙𑀜𑁆𑀘. 𑀏𑀯𑀁 𑀪𑀼𑀜𑁆𑀚𑀲𑀻𑀢𑀺 𑀏𑀯𑀭𑀽𑀧𑀁 𑀪𑁄𑀚𑀦𑀁 𑀫𑀜𑁆𑀜𑁂 𑀪𑀼𑀜𑁆𑀚𑀲𑀻𑀢𑀺 𑀧𑀼𑀘𑁆𑀙𑀢𑀺.

𑀘𑀓𑁆𑀓𑀯𑀸𑀓𑁄 ¶ 𑀢𑀲𑁆𑀲 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁭.

‘‘𑀦 ¶ 𑀯𑀸𑀳𑀫𑁂𑀢𑀁 𑀪𑀼𑀜𑁆𑀚𑀸𑀫𑀺, 𑀚𑀗𑁆𑀕𑀮𑀸𑀦𑁄𑀤𑀓𑀸𑀦𑀺 𑀯𑀸;

𑀅𑀜𑁆𑀜𑀢𑁆𑀭 𑀲𑁂𑀯𑀸𑀮𑀧𑀡𑀓𑀸, 𑀏𑀢𑀁 𑀫𑁂 𑀲𑀫𑁆𑀫 𑀪𑁄𑀚𑀦’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀲𑀫𑁆𑀫, 𑀅𑀜𑁆𑀜𑀢𑁆𑀭 𑀲𑁂𑀯𑀸𑀮𑀸 𑀘 𑀧𑀡𑀓𑀸 𑀘 𑀲𑁂𑀲𑀸𑀦𑀺 𑀚𑀗𑁆𑀕𑀮𑀸𑀦𑀺 𑀯𑀸 𑀑𑀤𑀓𑀸𑀦𑀺 𑀯𑀸 𑀫𑀁𑀲𑀸𑀦𑀺 𑀆𑀤𑀸𑀬 𑀏𑀢𑀁 𑀪𑁄𑀚𑀦𑀁 𑀦 𑀪𑀼𑀜𑁆𑀚𑀸𑀫𑀺, 𑀬𑀁 𑀧𑀦𑁂𑀢𑀁 𑀲𑁂𑀯𑀸𑀮𑀧𑀡𑀓𑀁, 𑀏𑀢𑀁 𑀫𑁂 𑀲𑀫𑁆𑀫, 𑀪𑁄𑀚𑀦𑀦𑁆𑀢𑀺.

𑀢𑀢𑁄 ¶ 𑀓𑀸𑀓𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁮.

‘‘𑀦 𑀯𑀸𑀳𑀫𑁂𑀢𑀁 𑀲𑀤𑁆𑀤𑀳𑀸𑀫𑀺, 𑀘𑀓𑁆𑀓𑀯𑀸𑀓𑀲𑁆𑀲 𑀪𑁄𑀚𑀦𑀁;

𑀅𑀳𑀫𑁆𑀧𑀺 𑀲𑀫𑁆𑀫 𑀪𑀼𑀜𑁆𑀚𑀸𑀫𑀺, 𑀕𑀸𑀫𑁂 𑀮𑁄𑀡𑀺𑀬𑀢𑁂𑀮𑀺𑀬𑀁.

𑁧𑁩𑁯.

‘‘𑀫𑀦𑀼𑀲𑁆𑀲𑁂𑀲𑀼 𑀓𑀢𑀁 𑀪𑀢𑁆𑀢𑀁, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀦 𑀘 𑀫𑁂 𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀘𑀓𑁆𑀓𑀯𑀸𑀓 𑀬𑀣𑀸 𑀢𑀼𑀯’’𑀦𑁆𑀢𑀺.

𑀢𑀢𑁆𑀣 𑀬𑀣𑀸 𑀢𑀼𑀯𑀦𑁆𑀢𑀺 𑀬𑀣𑀸 𑀢𑀼𑀯𑀁 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀲𑀭𑀻𑀭𑀯𑀡𑁆𑀡𑁄, 𑀢𑀸𑀤𑀺𑀲𑁄 𑀫𑀬𑁆𑀳𑀁 𑀯𑀡𑁆𑀡𑁄 𑀦𑀢𑁆𑀣𑀺, 𑀏𑀢𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀢𑀯 ‘‘𑀲𑁂𑀯𑀸𑀮𑀧𑀡𑀓𑀁 𑀫𑀫 𑀪𑁄𑀚𑀦’’𑀦𑁆𑀢𑀺 𑀯𑀤𑀦𑁆𑀢𑀲𑁆𑀲 𑀯𑀘𑀦𑀁 𑀦 𑀲𑀤𑁆𑀤𑀳𑀸𑀫𑀻𑀢𑀺.

𑀅𑀣𑀲𑁆𑀲 𑀘𑀓𑁆𑀓𑀯𑀸𑀓𑁄 𑀤𑀼𑀩𑁆𑀩𑀡𑁆𑀡𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁦.

‘‘𑀲𑀫𑁆𑀧𑀲𑁆𑀲𑀁 𑀅𑀢𑁆𑀢𑀦𑀺 𑀯𑁂𑀭𑀁, 𑀳𑀺𑀁𑀲𑀬𑀁 𑀫𑀸𑀦𑀼𑀲𑀺𑀁 𑀧𑀚𑀁;

𑀉𑀢𑁆𑀭𑀲𑁆𑀢𑁄 𑀖𑀲𑀲𑀻 𑀪𑀻𑀢𑁄, 𑀢𑁂𑀦 𑀯𑀡𑁆𑀡𑁄 𑀢𑀯𑁂𑀤𑀺𑀲𑁄.

𑁧𑁪𑁧.

‘‘𑀲𑀩𑁆𑀩𑀮𑁄𑀓𑀯𑀺𑀭𑀼𑀤𑁆𑀥𑁄𑀲𑀺, 𑀥𑀗𑁆𑀓 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸;

𑀮𑀤𑁆𑀥𑁄 𑀧𑀺𑀡𑁆𑀟𑁄 𑀦 𑀧𑀻𑀡𑁂𑀢𑀺, 𑀢𑁂𑀦 𑀯𑀡𑁆𑀡𑁄 𑀢𑀯𑁂𑀤𑀺𑀲𑁄.

𑁧𑁪𑁨.

‘‘𑀅𑀳𑀫𑁆𑀧𑀺 𑀲𑀫𑁆𑀫 𑀪𑀼𑀜𑁆𑀚𑀸𑀫𑀺, 𑀅𑀳𑀺𑀁𑀲𑀁 𑀲𑀩𑁆𑀩𑀧𑀸𑀡𑀺𑀦𑀁;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀭𑀸𑀲𑀗𑁆𑀓𑀻, 𑀅𑀲𑁄𑀓𑁄 𑀅𑀓𑀼𑀢𑁄𑀪𑀬𑁄.

𑁧𑁪𑁩.

‘‘𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀁, 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀁;

𑀅𑀳𑀺𑀁𑀲𑀸𑀬 𑀘𑀭 𑀮𑁄𑀓𑁂, 𑀧𑀺𑀬𑁄 𑀳𑁄𑀳𑀺𑀲𑀺 𑀫𑀁𑀫𑀺𑀯.

𑁧𑁪𑁪.

‘‘𑀬𑁄 ¶ 𑀦 𑀳𑀦𑁆𑀢𑀺 𑀦 𑀖𑀸𑀢𑁂𑀢𑀺, 𑀦 𑀚𑀺𑀦𑀸𑀢𑀺 𑀦 𑀚𑀸𑀧𑀬𑁂;

𑀫𑁂𑀢𑁆𑀢𑀁𑀲𑁄 𑀲𑀩𑁆𑀩𑀪𑀽𑀢𑁂𑀲𑀼, 𑀯𑁂𑀭𑀁 𑀢𑀲𑁆𑀲 𑀦 𑀓𑁂𑀦𑀘𑀻’’𑀢𑀺.

𑀢𑀢𑁆𑀣 𑀲𑀫𑁆𑀧𑀲𑁆𑀲𑀦𑁆𑀢𑀺 𑀲𑀫𑁆𑀫 𑀓𑀸𑀓 𑀢𑁆𑀯𑀁 𑀧𑀭𑁂𑀲𑀼 𑀉𑀧𑁆𑀧𑀦𑁆𑀦𑀁 𑀅𑀢𑁆𑀢𑀦𑀺 𑀯𑁂𑀭𑀘𑀺𑀢𑁆𑀢𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀫𑀸𑀦𑀼𑀲𑀺𑀁 𑀧𑀚𑀁 𑀳𑀺𑀁𑀲𑀦𑁆𑀢𑁄 𑀯𑀺𑀳𑁂𑀞𑁂𑀦𑁆𑀢𑁄. 𑀉𑀢𑁆𑀭𑀲𑁆𑀢𑁄𑀢𑀺 𑀪𑀻𑀢𑁄. 𑀖𑀲𑀲𑀻𑀢𑀺 𑀪𑀼𑀜𑁆𑀚𑀲𑀺. 𑀢𑁂𑀦 𑀢𑁂 𑀏𑀤𑀺𑀲𑁄 𑀩𑀻𑀪𑀘𑁆𑀙𑀯𑀡𑁆𑀡𑁄 ¶ 𑀚𑀸𑀢𑁄. 𑀥𑀗𑁆𑀓𑀸𑀢𑀺 𑀓𑀸𑀓𑀁 𑀆𑀮𑀧𑀢𑀺. 𑀧𑀺𑀡𑁆𑀟𑁄𑀢𑀺 𑀪𑁄𑀚𑀦𑀁. 𑀅𑀳𑀺𑀁𑀲𑀁 𑀲𑀩𑁆𑀩𑀧𑀸𑀡𑀺𑀦𑀦𑁆𑀢𑀺 𑀅𑀳𑀁 𑀧𑀦 𑀲𑀩𑁆𑀩𑀲𑀢𑁆𑀢𑁂 𑀅𑀳𑀺𑀁𑀲𑀦𑁆𑀢𑁄 ¶ 𑀪𑀼𑀜𑁆𑀚𑀸𑀫𑀻𑀢𑀺 𑀯𑀤𑀢𑀺. 𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀦𑁆𑀢𑀺 𑀲𑁄 𑀢𑁆𑀯𑀫𑁆𑀧𑀺 𑀯𑀻𑀭𑀺𑀬𑀁 𑀓𑀭𑁄𑀳𑀺, 𑀅𑀢𑁆𑀢𑀦𑁄 𑀲𑀻𑀮𑀺𑀬𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑀪𑀸𑀯𑀁 𑀯𑀻𑀢𑀺𑀯𑀢𑁆𑀢𑀲𑁆𑀲𑀼. 𑀅𑀳𑀺𑀁𑀲𑀸𑀬𑀸𑀢𑀺 𑀅𑀳𑀺𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀮𑁄𑀓𑁂 𑀘𑀭. 𑀧𑀺𑀬𑁄 𑀳𑁄𑀳𑀺𑀲𑀺 𑀫𑀁𑀫𑀺𑀯𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀫𑀬𑀸 𑀲𑀤𑀺𑀲𑁄𑀯 𑀮𑁄𑀓𑀲𑁆𑀲 𑀧𑀺𑀬𑁄 𑀳𑁄𑀳𑀺𑀲𑀺. 𑀦 𑀚𑀺𑀦𑀸𑀢𑀻𑀢𑀺 𑀥𑀦𑀚𑀸𑀦𑀺𑀁 𑀦 𑀓𑀭𑁄𑀢𑀺. 𑀦 𑀚𑀸𑀧𑀬𑁂𑀢𑀺 𑀅𑀜𑁆𑀜𑁂𑀧𑀺 𑀦 𑀓𑀸𑀭𑁂𑀢𑀺. 𑀫𑁂𑀢𑁆𑀢𑀁𑀲𑁄𑀢𑀺 𑀫𑁂𑀢𑁆𑀢𑀓𑁄𑀝𑁆𑀞𑀸𑀲𑁄 𑀫𑁂𑀢𑁆𑀢𑀘𑀺𑀢𑁆𑀢𑁄. 𑀦 𑀓𑁂𑀦𑀘𑀻𑀢𑀺 𑀓𑁂𑀦𑀘𑀺 𑀏𑀓𑀲𑀢𑁆𑀢𑁂𑀦𑀧𑀺 𑀲𑀤𑁆𑀥𑀺𑀁 𑀢𑀲𑁆𑀲 𑀯𑁂𑀭𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀢𑀲𑁆𑀫𑀸 𑀲𑀘𑁂 𑀮𑁄𑀓𑀲𑁆𑀲 𑀧𑀺𑀬𑁄 𑀪𑀯𑀺𑀢𑀼𑀁 𑀇𑀘𑁆𑀙𑀲𑀺, 𑀲𑀩𑁆𑀩𑀯𑁂𑀭𑁂𑀳𑀺 𑀯𑀺𑀭𑀫𑀸𑀳𑀻𑀢𑀺 𑀏𑀯𑀁 𑀘𑀓𑁆𑀓𑀯𑀸𑀓𑁄 𑀓𑀸𑀓𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀓𑀸𑀓𑁄 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀕𑁄𑀘𑀭𑀁 𑀫𑀬𑁆𑀳𑀁 𑀦 𑀓𑀣𑁂𑀣, 𑀓𑀸 𑀓𑀸’’𑀢𑀺 𑀯𑀲𑁆𑀲𑀦𑁆𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀉𑀓𑁆𑀓𑀸𑀭𑀪𑀽𑀫𑀺𑀬𑀜𑁆𑀜𑁂𑀯 𑀑𑀢𑀭𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀮𑁄𑀮𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀓𑀸𑀓𑁄 𑀮𑁄𑀮𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀘𑀓𑁆𑀓𑀯𑀸𑀓𑀻 𑀭𑀸𑀳𑀼𑀮𑀫𑀸𑀢𑀸, 𑀘𑀓𑁆𑀓𑀯𑀸𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀘𑀓𑁆𑀓𑀯𑀸𑀓𑀚𑀸𑀢𑀓𑀯𑀡𑁆𑀡𑀦𑀸 𑀢𑁂𑀭𑀲𑀫𑀸.

[𑁪𑁫𑁨] 𑁧𑁪. 𑀪𑀽𑀭𑀺𑀧𑀜𑁆𑀜𑀚𑀸𑀢𑀓𑀯𑀡𑁆𑀡𑀦𑀸

𑁧𑁪𑁫-𑁧𑁫𑁪. 𑀲𑀘𑁆𑀘𑀁 𑀓𑀺𑀭𑀸𑀢𑀺 𑀇𑀤𑀁 𑀪𑀽𑀭𑀺𑀧𑀜𑁆𑀜𑀚𑀸𑀢𑀓𑀁 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀪𑀽𑀭𑀺𑀧𑀜𑁆𑀜𑀚𑀸𑀢𑀓𑀯𑀡𑁆𑀡𑀦𑀸 𑀘𑀼𑀤𑁆𑀤𑀲𑀫𑀸.

[𑁪𑁫𑁩] 𑁧𑁫. 𑀫𑀳𑀸𑀫𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸

𑀓𑀺𑀁𑀲𑀼 ¶ 𑀦𑀭𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀫𑀗𑁆𑀕𑀮𑀲𑀼𑀢𑁆𑀢𑀁 (𑀔𑀼. 𑀧𑀸. 𑁫.𑁧 𑀆𑀤𑀬𑁄) 𑀆𑀭𑀩𑁆𑀪 𑀓𑀣𑁂𑀲𑀺. 𑀭𑀸𑀚𑀕𑀳𑀦𑀕𑀭𑀲𑁆𑀫𑀺𑀜𑁆𑀳𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀏𑀓𑁄 𑀧𑀼𑀭𑀺𑀲𑁄 ‘‘𑀅𑀚𑁆𑀚 𑀫𑁂 𑀫𑀗𑁆𑀕𑀮𑀓𑀺𑀭𑀺𑀬𑀸 𑀅𑀢𑁆𑀣𑀻’’𑀢𑀺 𑀉𑀝𑁆𑀞𑀸𑀬 𑀅𑀕𑀫𑀸𑀲𑀺. 𑀅𑀧𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑀁 ‘𑀫𑀗𑁆𑀕𑀮’𑀦𑁆𑀢𑀺 𑀯𑀢𑁆𑀯𑀸𑀯 𑀕𑀢𑁄, 𑀓𑀺𑀁 𑀏𑀢𑀁 𑀫𑀗𑁆𑀕𑀮𑀁 𑀦𑀸𑀫𑀸’’𑀢𑀺 𑀆𑀳 ¶ . 𑀢𑀫𑀜𑁆𑀜𑁄 ‘‘𑀅𑀪𑀺𑀫𑀗𑁆𑀕𑀮𑀭𑀽𑀧𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀦𑀸𑀫. 𑀏𑀓𑀘𑁆𑀘𑁄 𑀳𑀺 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀲𑀩𑁆𑀩𑀲𑁂𑀢𑀁 𑀉𑀲𑀪𑀁 𑀯𑀸 𑀧𑀲𑁆𑀲𑀢𑀺, 𑀕𑀩𑁆𑀪𑀺𑀦𑀺𑀢𑁆𑀣𑀺𑀁 𑀯𑀸 𑀭𑁄𑀳𑀺𑀢𑀫𑀘𑁆𑀙𑀁 𑀯𑀸 𑀧𑀼𑀡𑁆𑀡𑀖𑀝𑀁 𑀯𑀸 𑀦𑀯𑀦𑀻𑀢𑀁 𑀯𑀸 𑀕𑁄𑀲𑀧𑁆𑀧𑀺𑀁 𑀯𑀸 𑀅𑀳𑀢𑀯𑀢𑁆𑀣𑀁 𑀯𑀸 𑀧𑀸𑀬𑀸𑀲𑀁 𑀯𑀸 𑀧𑀲𑁆𑀲𑀢𑀺, 𑀇𑀢𑁄 𑀉𑀢𑁆𑀢𑀭𑀺 𑀫𑀗𑁆𑀕𑀮𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀢𑁂𑀦 𑀓𑀣𑀺𑀢𑀁 𑀏𑀓𑀘𑁆𑀘𑁂 ‘‘𑀲𑀼𑀓𑀣𑀺𑀢’’𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀁𑀲𑀼. 𑀅𑀧𑀭𑁄 ‘‘𑀦𑁂𑀢𑀁 ¶ 𑀫𑀗𑁆𑀕𑀮𑀁, 𑀲𑀼𑀢𑀁 𑀦𑀸𑀫 𑀫𑀗𑁆𑀕𑀮𑀁. 𑀏𑀓𑀘𑁆𑀘𑁄 𑀳𑀺 ‘𑀧𑀼𑀡𑁆𑀡𑀸’𑀢𑀺 𑀯𑀤𑀦𑁆𑀢𑀸𑀦𑀁 𑀲𑀼𑀡𑀸𑀢𑀺, 𑀢𑀣𑀸 ‘𑀯𑀟𑁆𑀠𑀸’𑀢𑀺 ‘𑀯𑀟𑁆𑀠𑀫𑀸𑀦𑀸’𑀢𑀺 𑀲𑀼𑀡𑀸𑀢𑀺, ‘𑀪𑀼𑀜𑁆𑀚𑀸’𑀢𑀺 ‘𑀔𑀸𑀤𑀸’𑀢𑀺 𑀯𑀤𑀦𑁆𑀢𑀸𑀦𑀁 𑀲𑀼𑀡𑀸𑀢𑀺, 𑀇𑀢𑁄 𑀉𑀢𑁆𑀢𑀭𑀺 𑀫𑀗𑁆𑀕𑀮𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀢𑁂𑀦 𑀓𑀣𑀺𑀢𑀫𑁆𑀧𑀺 𑀏𑀓𑀘𑁆𑀘𑁂 ‘‘𑀲𑀼𑀓𑀣𑀺𑀢’’𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀁𑀲𑀼. 𑀅𑀧𑀭𑁄 ‘‘𑀦 𑀏𑀢𑀁 𑀫𑀗𑁆𑀕𑀮𑀁, 𑀫𑀼𑀢𑀁 𑀦𑀸𑀫 𑀫𑀗𑁆𑀕𑀮𑀁. 𑀏𑀓𑀘𑁆𑀘𑁄 𑀳𑀺 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀧𑀣𑀯𑀺𑀁 𑀆𑀫𑀲𑀢𑀺, 𑀳𑀭𑀺𑀢𑀢𑀺𑀡𑀁 𑀅𑀮𑁆𑀮𑀕𑁄𑀫𑀬𑀁 𑀧𑀭𑀺𑀲𑀼𑀤𑁆𑀥𑀲𑀸𑀝𑀓𑀁 𑀭𑁄𑀳𑀺𑀢𑀫𑀘𑁆𑀙𑀁 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀁 𑀆𑀫𑀲𑀢𑀺, 𑀇𑀢𑁄 𑀉𑀢𑁆𑀢𑀭𑀺 𑀫𑀗𑁆𑀕𑀮𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀢𑁂𑀦 𑀓𑀣𑀺𑀢𑀫𑁆𑀧𑀺 𑀏𑀓𑀘𑁆𑀘𑁂 ‘‘𑀲𑀼𑀓𑀣𑀺𑀢’’𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀁𑀲𑀼. 𑀏𑀯𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀲𑀼𑀢𑀫𑀗𑁆𑀕𑀮𑀺𑀓𑀸 𑀫𑀼𑀢𑀫𑀗𑁆𑀕𑀮𑀺𑀓𑀸𑀢𑀺 𑀢𑀺𑀲𑁆𑀲𑁄𑀧𑀺 𑀧𑀭𑀺𑀲𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀪𑀼𑀫𑁆𑀫𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 ‘‘𑀇𑀤𑀁 𑀫𑀗𑁆𑀕𑀮’’𑀦𑁆𑀢𑀺 𑀢𑀣𑀢𑁄 𑀦 𑀚𑀸𑀦𑀺𑀁𑀲𑀼.

𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀁 𑀫𑀗𑁆𑀕𑀮𑀧𑀜𑁆𑀳𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀜𑁆𑀜𑀢𑁆𑀭 𑀪𑀕𑀯𑀢𑀸 𑀅𑀜𑁆𑀜𑁄 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀩𑀳𑀽 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘𑀸’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀤𑁆𑀯𑀸𑀤𑀲𑀳𑀺 𑀕𑀸𑀣𑀸𑀳𑀺 𑀅𑀝𑁆𑀞𑀢𑀺𑀁𑀲 𑀫𑀳𑀸𑀫𑀗𑁆𑀕𑀮𑀸𑀦𑀺 𑀓𑀣𑁂𑀲𑀺. 𑀫𑀗𑁆𑀕𑀮𑀲𑀼𑀢𑁆𑀢𑁂 𑀯𑀺𑀦𑀺𑀯𑀝𑁆𑀝𑀦𑁆𑀢𑁂𑀬𑁂𑀯 𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀕𑀡𑀦𑀧𑀣𑁄 𑀦𑀢𑁆𑀣𑀺. 𑀲𑀓𑁆𑀓𑁄 𑀫𑀗𑁆𑀕𑀮𑀁 𑀲𑀼𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀢𑁆𑀣𑀸𑀭𑀸 𑀫𑀗𑁆𑀕𑀮𑁂 𑀓𑀣𑀺𑀢𑁂 𑀲𑀤𑁂𑀯𑀓𑁄 𑀮𑁄𑀓𑁄 ‘‘𑀲𑀼𑀓𑀣𑀺𑀢’’𑀦𑁆𑀢𑀺 𑀅𑀪𑀺𑀦𑀦𑁆𑀤𑀺. 𑀢𑀤𑀸 ¶ 𑀥𑀫𑁆𑀫𑀲𑀪𑀸𑀬𑀁 𑀢𑀣𑀸𑀕𑀢𑀲𑁆𑀲 𑀕𑀼𑀡𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀁 𑀫𑀗𑁆𑀕𑀮𑀧𑀜𑁆𑀳𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀕𑀦𑀢𑀮𑁂 𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀓𑀣𑁂𑀲𑀺, 𑀏𑀯𑀁 𑀫𑀳𑀸𑀧𑀜𑁆𑀜𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑀲𑁆𑀲 𑀫𑀫 𑀫𑀗𑁆𑀕𑀮𑀧𑀜𑁆𑀳𑀓𑀣𑀦𑀁, 𑀲𑁆𑀯𑀸𑀳𑀁 𑀩𑁄𑀥𑀺𑀲𑀢𑁆𑀢𑀘𑀭𑀺𑀬𑀁 𑀘𑀭𑀦𑁆𑀢𑁄𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀗𑁆𑀕𑀮𑀧𑀜𑁆𑀳𑀁 𑀓𑀣𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀯𑀺𑀪𑀯𑀲𑀫𑁆𑀧𑀦𑁆𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀭𑀓𑁆𑀔𑀺𑀢𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀓𑀢𑀤𑀸𑀭𑀧𑀭𑀺𑀕𑁆𑀕𑀳𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀭𑀢𑀦𑀯𑀺𑀮𑁄𑀓𑀦𑀁 𑀓𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ¶ 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀦𑀼𑀧𑀼𑀩𑁆𑀩𑁂𑀦𑀲𑁆𑀲 𑀧𑀭𑀺𑀯𑀸𑀭𑁄 𑀫𑀳𑀸 𑀅𑀳𑁄𑀲𑀺, 𑀧𑀜𑁆𑀘 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀢𑁂 𑀢𑀸𑀧𑀲𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀆𑀘𑀭𑀺𑀬, 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀳𑀺𑀫𑀯𑀦𑁆𑀢𑀢𑁄 𑀑𑀢𑀭𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀕𑀘𑁆𑀙𑀸𑀫, 𑀏𑀯𑀁 𑀦𑁄 𑀲𑀭𑀻𑀭𑀜𑁆𑀘 𑀣𑀺𑀭𑀁 𑀪𑀯𑀺𑀲𑁆𑀲𑀢𑀺, 𑀚𑀗𑁆𑀖𑀯𑀺𑀳𑀸𑀭𑁄 𑀘 𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀢𑁂 ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀅𑀳𑀁 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀸 𑀑𑀢𑀭𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀁𑀲𑀼. 𑀢𑁂𑀲𑀁 𑀫𑀳𑀸𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀬𑀁 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁂 𑀫𑀳𑀸𑀚𑀦𑀓𑀸𑀬𑁂 𑀫𑀗𑁆𑀕𑀮𑀧𑀜𑁆𑀳𑁄 𑀲𑀫𑀼𑀝𑁆𑀞𑀸𑀢𑀺. 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀤𑀸 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀗𑁆𑀕𑀮𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑀁 𑀅𑀧𑀲𑁆𑀲𑀦𑁆𑀢𑁄 𑀫𑀳𑀸𑀚𑀦𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀇𑀲𑀺𑀕𑀡𑀁 𑀫𑀗𑁆𑀕𑀮𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀇𑀲𑀬𑁄 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀬𑀁 𑀏𑀢𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀅𑀧𑀺𑀘 𑀔𑁄 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀭𑀓𑁆𑀔𑀺𑀢𑀢𑀸𑀧𑀲𑁄 𑀦𑀸𑀫 𑀫𑀳𑀸𑀧𑀜𑁆𑀜𑁄 𑀳𑀺𑀫𑀯𑀦𑁆𑀢𑁂 𑀯𑀲𑀢𑀺, 𑀲𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀫𑀗𑁆𑀕𑀮𑀧𑀜𑁆𑀳𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 ‘‘𑀪𑀦𑁆𑀢𑁂, 𑀳𑀺𑀫𑀯𑀦𑁆𑀢𑁄 ¶ 𑀦𑀸𑀫 𑀤𑀽𑀭𑁂 𑀤𑀼𑀕𑁆𑀕𑀫𑁄𑀯, 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀫𑀬𑀁 𑀢𑀢𑁆𑀣 𑀕𑀦𑁆𑀢𑀼𑀁, 𑀲𑀸𑀥𑀼 𑀯𑀢 𑀢𑀼𑀫𑁆𑀳𑁂𑀬𑁂𑀯 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦𑀸𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀓𑀣𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 𑀆𑀘𑀭𑀺𑀬𑁂𑀦 𑀭𑀜𑁆𑀜𑁄 𑀥𑀫𑁆𑀫𑀺𑀓𑀪𑀸𑀯𑁂 𑀚𑀦𑀧𑀤𑀘𑀸𑀭𑀺𑀢𑁆𑀢𑁂 𑀘 𑀧𑀼𑀘𑁆𑀙𑀺𑀢𑁂 𑀢𑀁 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑁂𑀢𑁆𑀯𑀸 ¶ 𑀭𑀜𑁆𑀜𑁄 𑀬𑀸𑀘𑀦𑀸𑀬 𑀘 𑀅𑀢𑁆𑀢𑀦𑁄 𑀧𑀜𑁆𑀳𑀲𑀯𑀦𑀢𑁆𑀣𑀁 𑀆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀲𑀸𑀥𑀼 𑀦𑁄 𑀪𑀦𑁆𑀢𑁂, 𑀫𑀗𑁆𑀕𑀮𑀧𑀜𑁆𑀳𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀢𑀢𑁄 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁫.

‘‘𑀓𑀺𑀁𑀲𑀼 𑀦𑀭𑁄 𑀚𑀧𑁆𑀧𑀫𑀥𑀺𑀘𑁆𑀘 𑀓𑀸𑀮𑁂, 𑀓𑀁 𑀯𑀸 𑀯𑀺𑀚𑁆𑀚𑀁 𑀓𑀢𑀫𑀁 𑀯𑀸 𑀲𑀼𑀢𑀸𑀦𑀁;

𑀲𑁄 𑀫𑀘𑁆𑀘𑁄 𑀅𑀲𑁆𑀫𑀺𑀜𑁆𑀘 𑀧𑀭𑀫𑁆𑀳𑀺 𑀮𑁄𑀓𑁂, 𑀓𑀣𑀁 𑀓𑀭𑁄 𑀲𑁄𑀢𑁆𑀣𑀸𑀦𑁂𑀦 𑀕𑀼𑀢𑁆𑀢𑁄’’𑀢𑀺.

𑀢𑀢𑁆𑀣 𑀓𑀸𑀮𑁂𑀢𑀺 𑀫𑀗𑁆𑀕𑀮𑀧𑀢𑁆𑀣𑀦𑀓𑀸𑀮𑁂. 𑀯𑀺𑀚𑁆𑀚𑀦𑁆𑀢𑀺 𑀯𑁂𑀤𑀁. 𑀲𑀼𑀢𑀸𑀦𑀦𑁆𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀧𑀭𑀺𑀬𑀢𑁆𑀢𑀻𑀦𑀁. 𑀅𑀲𑁆𑀫𑀺𑀜𑁆𑀘𑀸𑀢𑀺 𑀏𑀢𑁆𑀣 𑀘𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑁄𑀢𑁆𑀣𑀸𑀦𑁂𑀦𑀸𑀢𑀺 𑀲𑁄𑀢𑁆𑀣𑀺𑀪𑀸𑀯𑀸𑀯𑀳𑁂𑀦 𑀫𑀗𑁆𑀕𑀮𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀆𑀘𑀭𑀺𑀬, 𑀧𑀼𑀭𑀺𑀲𑁄 𑀫𑀗𑁆𑀕𑀮𑀁 𑀇𑀘𑁆𑀙𑀦𑁆𑀢𑁄 𑀫𑀗𑁆𑀕𑀮𑀓𑀸𑀮𑁂 𑀓𑀺𑀁𑀲𑀼 𑀦𑀸𑀫 𑀚𑀧𑁆𑀧𑀦𑁆𑀢𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀓𑀢𑀭𑀁 𑀯𑀸 𑀯𑁂𑀤𑀁 𑀓𑀢𑀭𑀁 𑀯𑀸 𑀲𑀼𑀢𑀸𑀦𑀁 𑀅𑀦𑁆𑀢𑀭𑁂 𑀲𑀼𑀢𑀧𑀭𑀺𑀬𑀢𑁆𑀢𑀺𑀁 𑀅𑀥𑀻𑀬𑀺𑀢𑁆𑀯𑀸 𑀲𑁄 𑀫𑀘𑁆𑀘𑁄 𑀇𑀫𑀲𑁆𑀫𑀺𑀜𑁆𑀘 𑀮𑁄𑀓𑁂 𑀧𑀭𑀫𑁆𑀳𑀺 𑀘 𑀓𑀣𑀁 𑀓𑀭𑁄 𑀏𑀢𑁂𑀲𑀼 𑀚𑀧𑁆𑀧𑀸𑀤𑀻𑀲𑀼 𑀓𑀺𑀁 𑀓𑁂𑀦 𑀦𑀺𑀬𑀸𑀫𑁂𑀦 𑀓𑀭𑁄𑀦𑁆𑀢𑁄 𑀲𑁄𑀢𑁆𑀣𑀸𑀦𑁂𑀦 𑀦𑀺𑀭𑀧𑀭𑀸𑀥𑀫𑀗𑁆𑀕𑀮𑁂𑀦 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄 𑀳𑁄𑀢𑀺, 𑀢𑀁 𑀉𑀪𑀬𑀮𑁄𑀓𑀳𑀺𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑀫𑀗𑁆𑀕𑀮𑀁 𑀅𑀫𑁆𑀳𑀸𑀓𑀁 𑀓𑀣𑁂𑀳𑀻’’𑀢𑀺.

𑀏𑀯𑀁 ¶ 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁂𑀦 𑀫𑀗𑁆𑀕𑀮𑀧𑀜𑁆𑀳𑀁 𑀧𑀼𑀝𑁆𑀞𑁄 𑀫𑀳𑀸𑀲𑀢𑁆𑀢𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑀗𑁆𑀔𑀁 𑀙𑀺𑀦𑁆𑀤𑀦𑁆𑀢𑁄 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀗𑁆𑀕𑀮’’𑀦𑁆𑀢𑀺 𑀩𑀼𑀤𑁆𑀥𑀮𑀻𑀴𑀸𑀬 𑀫𑀗𑁆𑀕𑀮𑀁 𑀓𑀣𑁂𑀦𑁆𑀢𑁄 𑀆𑀳 𑁋

𑁧𑁫𑁬.

‘‘𑀬𑀲𑁆𑀲 ¶ 𑀤𑁂𑀯𑀸 𑀧𑀺𑀢𑀭𑁄 𑀘 𑀲𑀩𑁆𑀩𑁂, 𑀲𑀭𑀻𑀲𑀧𑀸 𑀲𑀩𑁆𑀩𑀪𑀽𑀢𑀸𑀦𑀺 𑀘𑀸𑀧𑀺;

𑀫𑁂𑀢𑁆𑀢𑀸𑀬 𑀦𑀺𑀘𑁆𑀘𑀁 𑀅𑀧𑀘𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀪𑀽𑀢𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀽’’𑀢𑀺.

𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀤𑁂𑀯𑀸𑀢𑀺 𑀪𑀼𑀫𑁆𑀫𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀧𑀺𑀢𑀭𑁄 𑀘𑀸𑀢𑀺 𑀢𑀢𑀼𑀢𑁆𑀢𑀭𑀺 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀸𑀦𑁄. 𑀲𑀭𑀻𑀲𑀧𑀸𑀢𑀺 𑀤𑀻𑀖𑀚𑀸𑀢𑀺𑀓𑀸. 𑀲𑀩𑁆𑀩𑀪𑀽𑀢𑀸𑀦𑀺 𑀘𑀸𑀧𑀻𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀘 𑀲𑀩𑁆𑀩𑀸𑀦𑀺𑀧𑀺 𑀪𑀽𑀢𑀸𑀦𑀺. 𑀫𑁂𑀢𑁆𑀢𑀸𑀬 𑀦𑀺𑀘𑁆𑀘𑀁 𑀅𑀧𑀘𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀢𑁂 𑀲𑀩𑁆𑀩𑁂 𑀲𑀢𑁆𑀢𑀸 𑀤𑀲𑀤𑀺𑀲𑀸𑀨𑀭𑀡𑀯𑀲𑁂𑀦 𑀧𑀯𑀢𑁆𑀢𑀸𑀬 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀅𑀧𑀘𑀺𑀢𑀸 𑀳𑁄𑀦𑁆𑀢𑀺. 𑀪𑀽𑀢𑁂𑀲𑀼 𑀯𑁂𑀢𑀺 𑀢𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑀲𑀢𑁆𑀢𑁂𑀲𑀼 𑀲𑁄𑀢𑁆𑀣𑀸𑀦𑀁 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀁 𑀦𑀺𑀭𑀧𑀭𑀸𑀥𑀫𑀗𑁆𑀕𑀮𑀁 ¶ 𑀆𑀳𑀼. 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀳𑀺 𑀧𑀼𑀕𑁆𑀕𑀮𑁄 𑀲𑀩𑁆𑀩𑁂𑀲𑀁 𑀧𑀺𑀬𑁄 𑀳𑁄𑀢𑀺 𑀧𑀭𑀽𑀧𑀓𑁆𑀓𑀫𑁂𑀦 𑀅𑀯𑀺𑀓𑁄𑀧𑀺𑀬𑁄. 𑀇𑀢𑀺 𑀲𑁄 𑀇𑀫𑀺𑀦𑀸 𑀫𑀗𑁆𑀕𑀮𑁂𑀦 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀳𑁄𑀢𑀻𑀢𑀺.

𑀇𑀢𑀺 𑀫𑀳𑀸𑀲𑀢𑁆𑀢𑁄 𑀧𑀞𑀫𑀁 𑀫𑀗𑁆𑀕𑀮𑀁 𑀓𑀣𑁂𑀢𑁆𑀯𑀸 𑀤𑀼𑀢𑀺𑀬𑀸𑀤𑀻𑀦𑀺 𑀓𑀣𑁂𑀦𑁆𑀢𑁄 𑁋

𑁧𑁫𑁭.

‘‘𑀬𑁄 𑀲𑀩𑁆𑀩𑀮𑁄𑀓𑀲𑁆𑀲 𑀦𑀺𑀯𑀸𑀢𑀯𑀼𑀢𑁆𑀢𑀺, 𑀇𑀢𑁆𑀣𑀻𑀧𑀼𑀫𑀸𑀦𑀁 𑀲𑀳𑀤𑀸𑀭𑀓𑀸𑀦𑀁;

𑀔𑀦𑁆𑀢𑀸 𑀤𑀼𑀭𑀼𑀢𑁆𑀢𑀸𑀦𑀫𑀧𑁆𑀧𑀝𑀺𑀓𑀽𑀮𑀯𑀸𑀤𑀻, 𑀅𑀥𑀺𑀯𑀸𑀲𑀦𑀁 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁫𑁮.

‘‘𑀬𑁄 𑀦𑀸𑀯𑀚𑀸𑀦𑀸𑀢𑀺 𑀲𑀳𑀸𑀬𑀫𑀢𑁆𑀢𑁂, 𑀲𑀺𑀧𑁆𑀧𑁂𑀦 𑀓𑀼𑀮𑁆𑀬𑀸𑀳𑀺 𑀥𑀦𑁂𑀦 𑀚𑀘𑁆𑀘𑀸;

𑀭𑀼𑀘𑀺𑀧𑀜𑁆𑀜𑁄 𑀅𑀢𑁆𑀣𑀓𑀸𑀮𑁂 𑀫𑀢𑀻𑀫𑀸, 𑀲𑀳𑀸𑀬𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁫𑁯.

‘‘𑀫𑀺𑀢𑁆𑀢𑀸𑀦𑀺 𑀯𑁂 𑀬𑀲𑁆𑀲 𑀪𑀯𑀦𑁆𑀢𑀺 𑀲𑀦𑁆𑀢𑁄, 𑀲𑀁𑀯𑀺𑀲𑁆𑀲𑀢𑁆𑀣𑀸 𑀅𑀯𑀺𑀲𑀁𑀯𑀸𑀤𑀓𑀲𑁆𑀲;

𑀦 𑀫𑀺𑀢𑁆𑀢𑀤𑀼𑀩𑁆𑀪𑀻 𑀲𑀁𑀯𑀺𑀪𑀸𑀕𑀻 𑀥𑀦𑁂𑀦, 𑀫𑀺𑀢𑁆𑀢𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁦.

‘‘𑀬𑀲𑁆𑀲 ¶ 𑀪𑀭𑀺𑀬𑀸 𑀢𑀼𑀮𑁆𑀬𑀯𑀬𑀸 𑀲𑀫𑀕𑁆𑀕𑀸, 𑀅𑀦𑀼𑀩𑁆𑀩𑀢𑀸 𑀥𑀫𑁆𑀫𑀓𑀸𑀫𑀸 𑀧𑀚𑀸𑀢𑀸;

𑀓𑁄𑀮𑀺𑀦𑀺𑀬𑀸 𑀲𑀻𑀮𑀯𑀢𑀻 𑀧𑀢𑀺𑀩𑁆𑀩𑀢𑀸, 𑀤𑀸𑀭𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁧.

‘‘𑀬𑀲𑁆𑀲 𑀭𑀸𑀚𑀸 𑀪𑀽𑀢𑀧𑀢𑀺 𑀬𑀲𑀲𑁆𑀲𑀻, 𑀚𑀸𑀦𑀸𑀢𑀺 𑀲𑁄𑀘𑁂𑀬𑁆𑀬𑀁 𑀧𑀭𑀓𑁆𑀓𑀫𑀜𑁆𑀘;

𑀅𑀤𑁆𑀯𑁂𑀚𑁆𑀛𑀢𑀸 𑀲𑀼𑀳𑀤𑀬𑀁 𑀫𑀫𑀦𑁆𑀢𑀺, 𑀭𑀸𑀚𑀽𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁨.

‘‘𑀅𑀦𑁆𑀦𑀜𑁆𑀘 ¶ 𑀧𑀸𑀦𑀜𑁆𑀘 𑀤𑀤𑀸𑀢𑀺 𑀲𑀤𑁆𑀥𑁄, 𑀫𑀸𑀮𑀜𑁆𑀘 𑀕𑀦𑁆𑀥𑀜𑁆𑀘 𑀯𑀺𑀮𑁂𑀧𑀦𑀜𑁆𑀘;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀫𑁄𑀤𑀫𑀸𑀦𑁄, 𑀲𑀕𑁆𑀕𑁂𑀲𑀼 𑀯𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀼.

𑁧𑁬𑁩.

‘‘𑀬𑀫𑀭𑀺𑀬𑀥𑀫𑁆𑀫𑁂𑀦 𑀧𑀼𑀦𑀦𑁆𑀢𑀺 𑀯𑀼𑀤𑁆𑀥𑀸, 𑀆𑀭𑀸𑀥𑀺𑀢𑀸 𑀲𑀫𑀘𑀭𑀺𑀬𑀸𑀬 𑀲𑀦𑁆𑀢𑁄;

𑀩𑀳𑀼𑀲𑁆𑀲𑀼𑀢𑀸 ¶ 𑀇𑀲𑀬𑁄 𑀲𑀻𑀮𑀯𑀦𑁆𑀢𑁄, 𑀅𑀭𑀳𑀦𑁆𑀢𑀫𑀚𑁆𑀛𑁂 𑀲𑁄𑀢𑁆𑀣𑀸𑀦𑀁 𑀢𑀤𑀸𑀳𑀽’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀫𑀼𑀤𑀼𑀘𑀺𑀢𑁆𑀢𑀢𑀸𑀬 𑀲𑀩𑁆𑀩𑀮𑁄𑀓𑀲𑁆𑀲 𑀦𑀻𑀘𑀯𑀼𑀢𑁆𑀢𑀺 𑀳𑁄𑀢𑀺. 𑀔𑀦𑁆𑀢𑀸 𑀤𑀼𑀭𑀼𑀢𑁆𑀢𑀸𑀦𑀦𑁆𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀸𑀦𑀁 𑀤𑀼𑀝𑁆𑀞𑀯𑀘𑀦𑀸𑀦𑀁 𑀅𑀥𑀺𑀯𑀸𑀲𑀓𑁄 𑀳𑁄𑀢𑀺. 𑀅𑀧𑁆𑀧𑀝𑀺𑀓𑀽𑀮𑀯𑀸𑀤𑀻𑀢𑀺 ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁, 𑀅𑀯𑀥𑀺 𑀫’’𑀦𑁆𑀢𑀺 𑀬𑀼𑀕𑀕𑁆𑀕𑀸𑀳𑀁 𑀅𑀓𑀭𑁄𑀦𑁆𑀢𑁄 𑀅𑀦𑀼𑀓𑀽𑀮𑀫𑁂𑀯 𑀯𑀤𑀢𑀺. 𑀅𑀥𑀺𑀯𑀸𑀲𑀦𑀦𑁆𑀢𑀺 𑀇𑀤𑀁 𑀅𑀥𑀺𑀯𑀸𑀲𑀦𑀁 𑀢𑀲𑁆𑀲 𑀲𑁄𑀢𑁆𑀣𑀸𑀦𑀁 𑀦𑀺𑀭𑀧𑀭𑀸𑀥𑀫𑀗𑁆𑀕𑀮𑀁 𑀧𑀡𑁆𑀟𑀺𑀢𑀸 𑀯𑀤𑀦𑁆𑀢𑀺.

𑀲𑀳𑀸𑀬𑀫𑀢𑁆𑀢𑁂𑀢𑀺 𑀲𑀳𑀸𑀬𑁂 𑀘 𑀲𑀳𑀸𑀬𑀫𑀢𑁆𑀢𑁂 𑀘. 𑀢𑀢𑁆𑀣 𑀲𑀳𑀧𑀁𑀲𑀼𑀓𑀻𑀴𑀺𑀢𑀸 𑀲𑀳𑀸𑀬𑀸 𑀦𑀸𑀫, 𑀤𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀏𑀓𑀢𑁄 𑀯𑀼𑀢𑁆𑀣𑀸 𑀲𑀳𑀸𑀬𑀫𑀢𑁆𑀢𑀸 𑀦𑀸𑀫, 𑀢𑁂 𑀲𑀩𑁆𑀩𑁂𑀧𑀺 ‘‘𑀅𑀳𑀁 𑀲𑀺𑀧𑁆𑀧𑀯𑀸, 𑀇𑀫𑁂 𑀦𑀺𑀲𑀺𑀧𑁆𑀧𑀸’’𑀢𑀺 𑀏𑀯𑀁 𑀲𑀺𑀧𑁆𑀧𑁂𑀦 𑀯𑀸 ‘‘𑀅𑀳𑀁 𑀓𑀼𑀮𑀻𑀦𑁄, 𑀇𑀫𑁂 𑀦 𑀓𑀼𑀮𑀻𑀦𑀸’’𑀢𑀺 𑀏𑀯𑀁 𑀓𑀼𑀮𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀸𑀳𑀺 𑀓𑀼𑀮𑁆𑀬𑀸𑀳𑀺 𑀯𑀸, ‘‘𑀅𑀳𑀁 𑀅𑀟𑁆𑀠𑁄, 𑀇𑀫𑁂 𑀤𑀼𑀕𑁆𑀕𑀢𑀸’’𑀢𑀺 𑀏𑀯𑀁 𑀥𑀦𑁂𑀦 𑀯𑀸, ‘‘𑀅𑀳𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑁄, 𑀇𑀫𑁂 𑀤𑀼𑀚𑁆𑀚𑀸𑀢𑀸’’𑀢𑀺 𑀏𑀯𑀁 𑀚𑀘𑁆𑀘𑀸 𑀯𑀸 𑀦𑀸𑀯𑀚𑀸𑀦𑀸𑀢𑀺. 𑀭𑀼𑀘𑀺𑀧𑀜𑁆𑀜𑁄𑀢𑀺 𑀲𑀸𑀥𑀼𑀧𑀜𑁆𑀜𑁄 𑀲𑀼𑀦𑁆𑀤𑀭𑀧𑀜𑁆𑀜𑁄 ¶ . 𑀅𑀢𑁆𑀣𑀓𑀸𑀮𑁂𑀢𑀺 𑀓𑀲𑁆𑀲𑀘𑀺𑀤𑁂𑀯 𑀅𑀢𑁆𑀣𑀲𑁆𑀲 𑀓𑀸𑀭𑀡𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁂. 𑀫𑀢𑀻𑀫𑀸𑀢𑀺 𑀢𑀁 𑀢𑀁 𑀅𑀢𑁆𑀣𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀘𑀸𑀭𑀡𑀲𑀫𑀢𑁆𑀣𑀢𑀸𑀬 𑀫𑀢𑀺𑀫𑀸 𑀳𑀼𑀢𑁆𑀯𑀸 𑀢𑁂 𑀲𑀳𑀸𑀬𑁂 𑀦𑀸𑀯𑀚𑀸𑀦𑀸𑀢𑀺. 𑀲𑀳𑀸𑀬𑁂𑀲𑀽𑀢𑀺 𑀢𑀁 𑀢𑀲𑁆𑀲 𑀅𑀦𑀯𑀚𑀸𑀦𑀦𑀁 𑀲𑀳𑀸𑀬𑁂𑀲𑀼 𑀲𑁄𑀢𑁆𑀣𑀸𑀦𑀁 𑀦𑀸𑀫𑀸𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀆𑀳𑀼. 𑀢𑁂𑀦 𑀳𑀺 𑀲𑁄 𑀦𑀺𑀭𑀧𑀭𑀸𑀥𑀫𑀗𑁆𑀕𑀮𑁂𑀦 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀕𑀼𑀢𑁆𑀢𑁄 𑀳𑁄𑀢𑀺. 𑀢𑀢𑁆𑀣 𑀧𑀡𑁆𑀟𑀺𑀢𑁂 𑀲𑀳𑀸𑀬𑁂 𑀦𑀺𑀲𑁆𑀲𑀸𑀬 𑀲𑁄𑀢𑁆𑀣𑀺𑀪𑀸𑀯𑁄 𑀓𑀼𑀲𑀦𑀸𑀴𑀺𑀚𑀸𑀢𑀓𑁂𑀦 (𑀚𑀸. 𑁧.𑁧.𑁧𑁨𑁧 𑀆𑀤𑀬𑁄) 𑀓𑀣𑁂𑀢𑀩𑁆𑀩𑁄.

𑀲𑀦𑁆𑀢𑁄𑀢𑀺 𑀧𑀡𑁆𑀟𑀺𑀢𑀸 𑀲𑀧𑁆𑀧𑀼𑀭𑀺𑀲𑀸 𑀬𑀲𑁆𑀲 𑀫𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀲𑀁𑀯𑀺𑀲𑁆𑀲𑀢𑁆𑀣𑀸𑀢𑀺 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀲𑁆𑀲𑁂𑀯 𑀕𑀳𑀡𑀯𑀲𑁂𑀦 𑀯𑀺𑀲𑁆𑀲𑀸𑀲𑀫𑀸𑀧𑀦𑁆𑀦𑀸. 𑀅𑀯𑀺𑀲𑀁𑀯𑀸𑀤𑀓𑀲𑁆𑀲𑀸𑀢𑀺 𑀅𑀯𑀺𑀲𑀁𑀯𑀸𑀤𑀦𑀲𑀻𑀮𑀲𑁆𑀲. 𑀦 𑀫𑀺𑀢𑁆𑀢𑀤𑀼𑀩𑁆𑀪𑀻𑀢𑀺 𑀬𑁄 𑀘 𑀫𑀺𑀢𑁆𑀢𑀤𑀼𑀩𑁆𑀪𑀻 𑀦 𑀳𑁄𑀢𑀺. 𑀲𑀁𑀯𑀺𑀪𑀸𑀕𑀻 𑀥𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀥𑀦𑁂𑀦 𑀫𑀺𑀢𑁆𑀢𑀸𑀦𑀁 𑀲𑀁𑀯𑀺𑀪𑀸𑀕𑀁 𑀓𑀭𑁄𑀢𑀺. 𑀫𑀺𑀢𑁆𑀢𑁂𑀲𑀽𑀢𑀺 𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀮𑀤𑁆𑀥𑀩𑁆𑀩𑀁 𑀢𑀲𑁆𑀲 𑀢𑀁 𑀫𑀺𑀢𑁆𑀢𑁂𑀲𑀼 𑀲𑁄𑀢𑁆𑀣𑀸𑀦𑀁 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 𑀏𑀯𑀭𑀽𑀧𑁂𑀳𑀺 𑀫𑀺𑀢𑁆𑀢𑁂𑀳𑀺 𑀭𑀓𑁆𑀔𑀺𑀢𑁄 𑀲𑁄𑀢𑁆𑀣𑀺𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀲𑁄𑀢𑁆𑀣𑀺𑀪𑀸𑀯𑁄 𑀫𑀳𑀸𑀉𑀓𑁆𑀓𑀼𑀲𑀚𑀸𑀢𑀓𑀸𑀤𑀻𑀳𑀺 (𑀚𑀸. 𑁧.𑁧𑁪.𑁪𑁪 𑀆𑀤𑀬𑁄) 𑀓𑀣𑁂𑀢𑀩𑁆𑀩𑁄.

𑀢𑀼𑀮𑁆𑀬𑀯𑀬𑀸𑀢𑀺 ¶ 𑀲𑀫𑀸𑀦𑀯𑀬𑀸. 𑀲𑀫𑀕𑁆𑀕𑀸𑀢𑀺 𑀲𑀫𑀕𑁆𑀕𑀯𑀸𑀲𑀸. 𑀅𑀦𑀼𑀩𑁆𑀩𑀢𑀸𑀢𑀺 𑀅𑀦𑀼𑀯𑀢𑁆𑀢𑀺𑀢𑀸. 𑀥𑀫𑁆𑀫𑀓𑀸𑀫𑀸𑀢𑀺 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑀁 𑀭𑁄𑀘𑁂𑀢𑀺. 𑀧𑀚𑀸𑀢𑀸𑀢𑀺 𑀯𑀺𑀚𑀸𑀬𑀺𑀦𑀻, 𑀦 𑀯𑀜𑁆𑀛𑀸. 𑀤𑀸𑀭𑁂𑀲𑀽𑀢𑀺 𑀏𑀢𑁂𑀳𑀺 𑀲𑀻𑀮𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀫𑀸𑀢𑀼𑀕𑀸𑀫𑁂 𑀕𑁂𑀳𑁂 𑀯𑀲𑀦𑁆𑀢𑁂 𑀲𑀸𑀫𑀺𑀓𑀲𑁆𑀲 𑀲𑁄𑀢𑁆𑀣𑀺 𑀳𑁄𑀢𑀻𑀢𑀺 𑀧𑀡𑁆𑀟𑀺𑀢𑀸 𑀓𑀣𑁂𑀦𑁆𑀢𑀺. 𑀢𑀢𑁆𑀣 𑀲𑀻𑀮𑀯𑀦𑁆𑀢𑀁 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀲𑁄𑀢𑁆𑀣𑀺𑀪𑀸𑀯𑁄 𑀫𑀡𑀺𑀘𑁄𑀭𑀚𑀸𑀢𑀓- (𑀚𑀸. 𑁧.𑁨.𑁮𑁭 𑀆𑀤𑀬𑁄) 𑀲𑀫𑁆𑀩𑀽𑀮𑀚𑀸𑀢𑀓- (𑀚𑀸. 𑁧.𑁧𑁬.𑁨𑁯𑁭 𑀆𑀤𑀬𑁄) 𑀔𑀡𑁆𑀟𑀳𑀸𑀮𑀚𑀸𑀢𑀓𑁂𑀳𑀺 (𑀚𑀸. 𑁨.𑁨𑁨.𑁯𑁮𑁨 𑀆𑀤𑀬𑁄) 𑀓𑀣𑁂𑀢𑀩𑁆𑀩𑁄.

𑀲𑁄𑀘𑁂𑀬𑁆𑀬𑀦𑁆𑀢𑀺 𑀲𑀼𑀘𑀺𑀪𑀸𑀯𑀁. 𑀅𑀤𑁆𑀯𑁂𑀚𑁆𑀛𑀢𑀸𑀢𑀺 𑀅𑀤𑁆𑀯𑁂𑀚𑁆𑀛𑀢𑀸𑀬 𑀦 𑀏𑀲 𑀫𑀬𑀸 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀅𑀤𑁆𑀯𑁂𑀚𑁆𑀛𑀪𑀸𑀯𑁂𑀦 𑀬𑀁 𑀚𑀸𑀦𑀸𑀢𑀺. 𑀲𑀼𑀳𑀤𑀬𑀁 𑀫𑀫𑀦𑁆𑀢𑀺 𑀲𑀼𑀳𑀤𑁄 𑀅𑀬𑀁 𑀫𑀫𑀦𑁆𑀢𑀺 𑀘 𑀬𑀁 𑀚𑀸𑀦𑀸𑀢𑀺. 𑀭𑀸𑀚𑀽𑀲𑀼 𑀯𑁂𑀢𑀺 𑀏𑀯𑀁 𑀭𑀸𑀚𑀽𑀲𑀼 𑀲𑁂𑀯𑀓𑀸𑀦𑀁 𑀲𑁄𑀢𑁆𑀣𑀸𑀦𑀁 𑀦𑀸𑀫𑀸𑀢𑀺 𑀧𑀡𑁆𑀟𑀺𑀢𑀸 𑀓𑀣𑁂𑀦𑁆𑀢𑀺. 𑀤𑀤𑀸𑀢𑀺 ¶ 𑀲𑀤𑁆𑀥𑁄𑀢𑀺 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑀤𑀸𑀢𑀺. 𑀲𑀕𑁆𑀕𑁂𑀲𑀼 𑀯𑁂𑀢𑀺 𑀏𑀯𑀁 𑀲𑀕𑁆𑀕𑁂 𑀤𑁂𑀯𑀮𑁄𑀓𑁂 𑀲𑁄𑀢𑁆𑀣𑀸𑀦𑀁 𑀦𑀺𑀭𑀧𑀭𑀸𑀥𑀫𑀗𑁆𑀕𑀮𑀦𑁆𑀢𑀺 𑀧𑀡𑁆𑀟𑀺𑀢𑀸 𑀓𑀣𑁂𑀦𑁆𑀢𑀺, 𑀢𑀁 𑀧𑁂𑀢𑀯𑀢𑁆𑀣𑀼𑀯𑀺𑀫𑀸𑀦𑀯𑀢𑁆𑀣𑀽𑀳𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑀧𑀼𑀦𑀦𑁆𑀢𑀺 ¶ 𑀯𑀼𑀤𑁆𑀥𑀸𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀜𑀸𑀡𑀯𑀼𑀤𑁆𑀥𑀸 𑀅𑀭𑀺𑀬𑀥𑀫𑁆𑀫𑁂𑀦 𑀧𑀼𑀦𑀦𑁆𑀢𑀺 𑀧𑀭𑀺𑀲𑁄𑀥𑁂𑀦𑁆𑀢𑀺. 𑀲𑀫𑀘𑀭𑀺𑀬𑀸𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑀸. 𑀇𑀲𑀬𑁄𑀢𑀺 𑀏𑀲𑀺𑀢𑀕𑀼𑀡𑀸. 𑀲𑀻𑀮𑀯𑀦𑁆𑀢𑁄𑀢𑀺 𑀅𑀭𑀺𑀬𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀭𑀳𑀦𑁆𑀢𑀫𑀚𑁆𑀛𑁂𑀢𑀺 𑀅𑀭𑀳𑀦𑁆𑀢𑀸𑀦𑀁 𑀫𑀚𑁆𑀛𑁂 𑀧𑀝𑀺𑀮𑀪𑀺𑀢𑀩𑁆𑀩𑀁 𑀢𑀁 𑀲𑁄𑀢𑁆𑀣𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸 𑀓𑀣𑁂𑀦𑁆𑀢𑀺. 𑀅𑀭𑀳𑀦𑁆𑀢𑁄 𑀳𑀺 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀝𑀺𑀧𑀸𑀤𑁂𑀦𑁆𑀢𑀸 𑀆𑀭𑀸𑀥𑀓𑀁 𑀧𑀼𑀕𑁆𑀕𑀮𑀁 𑀅𑀭𑀺𑀬𑀫𑀕𑁆𑀕𑁂𑀦 𑀧𑀼𑀦𑀦𑁆𑀢𑀺, 𑀲𑁄𑀧𑀺 𑀅𑀭𑀳𑀸𑀯 𑀳𑁄𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀅𑀝𑁆𑀞𑀳𑀺 𑀕𑀸𑀣𑀸𑀳𑀺 𑀅𑀝𑁆𑀞 𑀫𑀳𑀸𑀫𑀗𑁆𑀕𑀮𑀸𑀦𑀺 𑀓𑀣𑁂𑀢𑁆𑀯𑀸 𑀢𑁂𑀲𑀜𑁆𑀜𑁂𑀯 𑀫𑀗𑁆𑀕𑀮𑀸𑀦𑀁 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁬𑁪.

‘‘𑀏𑀢𑀸𑀦𑀺 𑀔𑁄 𑀲𑁄𑀢𑁆𑀣𑀸𑀦𑀸𑀦𑀺 𑀮𑁄𑀓𑁂, 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀲𑀼𑀔𑀼𑀤𑁆𑀭𑀬𑀸𑀦𑀺;

𑀢𑀸𑀦𑀻𑀥 𑀲𑁂𑀯𑁂𑀣 𑀦𑀭𑁄 𑀲𑀧𑀜𑁆𑀜𑁄, 𑀦 𑀳𑀺 𑀫𑀗𑁆𑀕𑀮𑁂 𑀓𑀺𑀜𑁆𑀘𑀦𑀫𑀢𑁆𑀣𑀺 𑀲𑀘𑁆𑀘’’𑀦𑁆𑀢𑀺.

𑀢𑀢𑁆𑀣 𑀦 𑀳𑀺 𑀫𑀗𑁆𑀕𑀮𑁂𑀢𑀺 𑀢𑀲𑁆𑀫𑀺𑀁 𑀧𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀧𑁆𑀧𑀪𑁂𑀤𑁂 𑀫𑀗𑁆𑀕𑀮𑁂 𑀓𑀺𑀜𑁆𑀘𑀦𑀁 𑀏𑀓𑀫𑀗𑁆𑀕𑀮𑀫𑁆𑀧𑀺 𑀲𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀧𑀦𑁂𑀓𑀁 𑀧𑀭𑀫𑀢𑁆𑀣𑀲𑀘𑁆𑀘𑀦𑁆𑀢𑀺.

𑀇𑀲𑀬𑁄 𑀢𑀸𑀦𑀺 𑀫𑀗𑁆𑀕𑀮𑀸𑀦𑀺 𑀲𑀼𑀢𑁆𑀯𑀸 𑀲𑀢𑁆𑀢𑀝𑁆𑀞𑀤𑀺𑀯𑀲𑀘𑁆𑀘𑀬𑁂𑀦 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀕𑀫𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺. 𑀢𑁂 𑀢𑀲𑁆𑀲 𑀆𑀘𑀭𑀺𑀬𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦 𑀫𑀗𑁆𑀕𑀮𑀧𑀜𑁆𑀳𑀁 ¶ 𑀓𑀣𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀆𑀕𑀫𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂 𑀫𑀗𑁆𑀕𑀮𑀁 𑀧𑀸𑀓𑀝𑀁 𑀅𑀳𑁄𑀲𑀺. 𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀺𑀢𑁆𑀯𑀸 𑀫𑀢𑀫𑀢𑀸 𑀲𑀕𑁆𑀕𑀧𑀣𑀁 𑀧𑀽𑀭𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀇𑀲𑀺𑀕𑀡𑀁 𑀆𑀤𑀸𑀬 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀫𑀗𑁆𑀕𑀮𑀧𑀜𑁆𑀳𑀁 𑀓𑀣𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺 ¶ , 𑀫𑀗𑁆𑀕𑀮𑀧𑀜𑁆𑀳𑀧𑀼𑀘𑁆𑀙𑀓𑁄 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀘𑀭𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀫𑀗𑁆𑀕𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀦𑁆𑀦𑀭𑀲𑀫𑀸.

[𑁪𑁫𑁪] 𑁧𑁬. 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸

𑀉𑀝𑁆𑀞𑁂𑀳𑀺 ¶ 𑀓𑀡𑁆𑀳𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀢𑀧𑀼𑀢𑁆𑀢𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀝𑁆𑀞𑀓𑀼𑀡𑁆𑀟𑀮𑀺𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸 𑀢𑀁 𑀉𑀧𑀸𑀲𑀓𑀁 ‘‘𑀓𑀺𑀁, 𑀉𑀧𑀸𑀲𑀓, 𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀸𑀲𑀓, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀢𑀧𑀼𑀢𑁆𑀢𑀁 𑀦𑀸𑀦𑀼𑀲𑁄𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀉𑀢𑁆𑀢𑀭𑀧𑀣𑁂 𑀓𑀁𑀲𑀪𑁄𑀕𑁂 𑀅𑀲𑀺𑀢𑀜𑁆𑀚𑀦𑀦𑀕𑀭𑁂 𑀫𑀳𑀸𑀓𑀁𑀲𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀓𑀁𑀲𑁄 𑀘, 𑀉𑀧𑀓𑀁𑀲𑁄 𑀘𑀸𑀢𑀺 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀤𑁂𑀯𑀕𑀩𑁆𑀪𑀸 𑀦𑀸𑀫 𑀏𑀓𑀸 𑀥𑀻𑀢𑀸. 𑀢𑀲𑁆𑀲𑀸 𑀚𑀸𑀢𑀤𑀺𑀯𑀲𑁂 𑀦𑁂𑀫𑀺𑀢𑁆𑀢𑀓𑀸 𑀩𑁆𑀭𑀸𑀳𑁆𑀫𑀡𑀸 ‘‘𑀏𑀢𑀺𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀧𑀼𑀢𑁆𑀢𑀸 𑀓𑀁𑀲𑀕𑁄𑀢𑁆𑀢𑀁 𑀓𑀁𑀲𑀯𑀁𑀲𑀁 𑀦𑀸𑀲𑁂𑀲𑁆𑀲𑀦𑁆𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀭𑀸𑀚𑀸 𑀩𑀮𑀯𑀲𑀺𑀦𑁂𑀳𑁂𑀦 𑀥𑀻𑀢𑀭𑀁 𑀯𑀺𑀦𑀸𑀲𑁂𑀢𑀼𑀁 𑀦𑀸𑀲𑀓𑁆𑀔𑀺, ‘‘𑀪𑀸𑀢𑀭𑁄 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀓𑀁𑀲𑁄 𑀭𑀸𑀚𑀸 𑀅𑀳𑁄𑀲𑀺, 𑀉𑀧𑀓𑀁𑀲𑁄 𑀉𑀧𑀭𑀸𑀚𑀸. 𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀲𑀘𑁂 𑀫𑀬𑀁 𑀪𑀕𑀺𑀦𑀺𑀁 𑀦𑀸𑀲𑁂𑀲𑁆𑀲𑀸𑀫, 𑀕𑀸𑀭𑀬𑁆𑀳𑀸 𑀪𑀯𑀺𑀲𑁆𑀲𑀸𑀫, 𑀏𑀢𑀁 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀦𑀺𑀲𑁆𑀲𑀸𑀫𑀺𑀓𑀁 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀏𑀓𑀣𑀽𑀡𑀓𑀁 𑀧𑀸𑀲𑀸𑀤𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁. 𑀦𑀦𑁆𑀤𑀺𑀕𑁄𑀧𑀸 𑀦𑀸𑀫 𑀢𑀲𑁆𑀲𑀸 𑀧𑀭𑀺𑀘𑀸𑀭𑀺𑀓𑀸 𑀅𑀳𑁄𑀲𑀺. 𑀅𑀦𑁆𑀥𑀓𑀯𑁂𑀡𑁆𑀟𑁄 𑀦𑀸𑀫 𑀤𑀸𑀲𑁄 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀆𑀭𑀓𑁆𑀔𑀫𑀓𑀸𑀲𑀺.

𑀢𑀤𑀸 𑀉𑀢𑁆𑀢𑀭𑀫𑀥𑀼𑀭𑀸𑀬 𑀫𑀳𑀸𑀲𑀸𑀕𑀭𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀲𑀸𑀕𑀭𑁄, 𑀉𑀧𑀲𑀸𑀕𑀭𑁄 𑀘𑀸𑀢𑀺 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑀸𑀕𑀭𑁄 𑀭𑀸𑀚𑀸 𑀅𑀳𑁄𑀲𑀺, 𑀉𑀧𑀲𑀸𑀕𑀭𑁄 𑀉𑀧𑀭𑀸𑀚𑀸. 𑀲𑁄 𑀉𑀧𑀓𑀁𑀲𑀲𑁆𑀲 𑀲𑀳𑀸𑀬𑀓𑁄 𑀏𑀓𑀸𑀘𑀭𑀺𑀬𑀓𑀼𑀮𑁂 𑀏𑀓𑀢𑁄 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄. 𑀲𑁄 𑀲𑀸𑀕𑀭𑀲𑁆𑀲 𑀪𑀸𑀢𑀼 𑀅𑀦𑁆𑀢𑁂𑀧𑀼𑀭𑁂 ¶ 𑀤𑀼𑀩𑁆𑀪𑀺𑀢𑁆𑀯𑀸 𑀪𑀸𑀬𑀫𑀸𑀦𑁄 𑀧𑀮𑀸𑀬𑀺𑀢𑁆𑀯𑀸 𑀓𑀁𑀲𑀪𑁄𑀕𑁂 𑀉𑀧𑀓𑀁𑀲𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀉𑀧𑀓𑀁𑀲𑁄 𑀢𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺, 𑀭𑀸𑀚𑀸 𑀢𑀲𑁆𑀲 ¶ 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺. 𑀲𑁄 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀤𑁂𑀯𑀕𑀩𑁆𑀪𑀸𑀬 𑀦𑀺𑀯𑀸𑀲𑀁 𑀏𑀓𑀣𑀫𑁆𑀪𑀁 𑀧𑀸𑀲𑀸𑀤𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲𑁂𑀲𑁄 𑀦𑀺𑀯𑀸𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 𑀤𑁂𑀯𑀕𑀩𑁆𑀪𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀤𑁂𑀯𑀕𑀩𑁆𑀪𑀸𑀧𑀺 𑀏𑀓𑀤𑀺𑀯𑀲𑀁 𑀢𑀁 𑀉𑀧𑀓𑀁𑀲𑁂𑀦 𑀲𑀤𑁆𑀥𑀺𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀳𑀸𑀲𑀸𑀕𑀭𑀲𑁆𑀲 𑀧𑀼𑀢𑁆𑀢𑁄 𑀉𑀧𑀲𑀸𑀕𑀭𑁄 𑀦𑀸𑀫𑀸’’𑀢𑀺 𑀦𑀦𑁆𑀤𑀺𑀕𑁄𑀧𑀸𑀬 ¶ 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁄𑀲𑀺. 𑀉𑀧𑀲𑀸𑀕𑀭𑁄 𑀦𑀦𑁆𑀤𑀺𑀕𑁄𑀧𑀸𑀬 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀪𑀕𑀺𑀦𑀺, 𑀲𑀓𑁆𑀔𑀺𑀲𑁆𑀲𑀲𑀺 𑀫𑁂 𑀤𑁂𑀯𑀕𑀩𑁆𑀪𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳. 𑀲𑀸 ‘‘𑀦 𑀏𑀢𑀁 𑀲𑀸𑀫𑀺, 𑀕𑀭𑀼𑀓’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀤𑁂𑀯𑀕𑀩𑁆𑀪𑀸𑀬 𑀆𑀭𑁄𑀘𑁂𑀲𑀺. 𑀲𑀸 𑀧𑀓𑀢𑀺𑀬𑀸𑀯 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀦𑁆𑀤𑀺𑀕𑁄𑀧𑀸 𑀉𑀧𑀲𑀸𑀕𑀭𑀲𑁆𑀲 𑀲𑀜𑁆𑀜𑀁 𑀤𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀢𑀁 𑀧𑀸𑀲𑀸𑀤𑀁 𑀆𑀭𑁄𑀧𑁂𑀲𑀺. 𑀲𑁄 𑀤𑁂𑀯𑀕𑀩𑁆𑀪𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣 𑀦𑁂𑀲𑀁 𑀧𑀼𑀦𑀧𑁆𑀧𑀼𑀦𑀁 𑀲𑀁𑀯𑀸𑀲𑁂𑀦 𑀤𑁂𑀯𑀕𑀩𑁆𑀪𑀸 𑀕𑀩𑁆𑀪𑀁 𑀧𑀝𑀺𑀮𑀪𑀺.

𑀅𑀧𑀭𑀪𑀸𑀕𑁂 𑀢𑀲𑁆𑀲𑀸 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀁 𑀧𑀸𑀓𑀝𑀁 𑀅𑀳𑁄𑀲𑀺. 𑀪𑀸𑀢𑀭𑁄 𑀦𑀦𑁆𑀤𑀺𑀕𑁄𑀧𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀸 𑀅𑀪𑀬𑀁 𑀬𑀸𑀘𑀺𑀢𑁆𑀯𑀸 𑀢𑀁 𑀅𑀦𑁆𑀢𑀭𑀁 𑀓𑀣𑁂𑀲𑀺. 𑀢𑁂 𑀲𑀼𑀢𑁆𑀯𑀸 ‘‘𑀪𑀕𑀺𑀦𑀺𑀁 𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀲𑀘𑁂 𑀥𑀻𑀢𑀭𑀁 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀦 𑀦𑀸𑀲𑁂𑀲𑁆𑀲𑀸𑀫, 𑀲𑀘𑁂 𑀧𑀦 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀦𑀸𑀲𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁂𑀯𑀕𑀩𑁆𑀪𑀁 𑀉𑀧𑀲𑀸𑀕𑀭𑀲𑁆𑀲𑁂𑀯 𑀅𑀤𑀁𑀲𑀼. 𑀲𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀪𑀸𑀢𑀭𑁄 𑀲𑀼𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀢𑀲𑁆𑀲𑀸 ‘‘𑀅𑀜𑁆𑀚𑀦𑀤𑁂𑀯𑀻’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂𑀲𑀁 𑀪𑁄𑀕𑀯𑀟𑁆𑀠𑀫𑀸𑀦𑀁 𑀦𑀸𑀫 𑀪𑁄𑀕𑀕𑀸𑀫𑀁 𑀅𑀤𑀁𑀲𑀼. 𑀉𑀧𑀲𑀸𑀕𑀭𑁄 𑀤𑁂𑀯𑀕𑀩𑁆𑀪𑀁 𑀕𑀳𑁂𑀢𑁆𑀯𑀸 𑀪𑁄𑀕𑀯𑀟𑁆𑀠𑀫𑀸𑀦𑀕𑀸𑀫𑁂 𑀯𑀲𑀺. 𑀤𑁂𑀯𑀕𑀩𑁆𑀪𑀸𑀬 𑀧𑀼𑀦𑀧𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺, 𑀦𑀦𑁆𑀤𑀺𑀕𑁄𑀧𑀸𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀕𑀩𑁆𑀪𑀁 𑀧𑀝𑀺𑀮𑀪𑀺. 𑀢𑀸𑀲𑀼 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸𑀲𑀼 𑀏𑀓𑀤𑀺𑀯𑀲𑀫𑁂𑀯 𑀤𑁂𑀯𑀕𑀩𑁆𑀪𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀦𑀦𑁆𑀤𑀺𑀕𑁄𑀧𑀸 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀤𑁂𑀯𑀕𑀩𑁆𑀪𑀸 𑀧𑀼𑀢𑁆𑀢𑀲𑁆𑀲 𑀯𑀺𑀦𑀸𑀲𑀦𑀪𑀬𑁂𑀦 𑀧𑀼𑀢𑁆𑀢𑀁 𑀦𑀦𑁆𑀤𑀺𑀕𑁄𑀧𑀸𑀬 𑀭𑀳𑀲𑁆𑀲𑁂𑀦 𑀧𑁂𑀲𑁂𑀢𑁆𑀯𑀸 𑀢𑀲𑁆𑀲𑀸 𑀥𑀻𑀢𑀭𑀁 𑀆𑀳𑀭𑀸𑀧𑁂𑀲𑀺. 𑀢𑀲𑁆𑀲𑀸 𑀯𑀺𑀚𑀸𑀢𑀪𑀸𑀯𑀁 𑀪𑀸𑀢𑀺𑀓𑀸𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂 ‘‘𑀧𑀼𑀢𑁆𑀢𑀁 𑀯𑀺𑀚𑀸𑀢𑀸, 𑀥𑀻𑀢𑀭’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀻𑀢𑀭’’𑀦𑁆𑀢𑀺 ¶ 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀧𑁄𑀲𑁂𑀣𑀸’’𑀢𑀺 𑀆𑀳𑀁𑀲𑀼. 𑀏𑀢𑁂𑀦𑀼𑀧𑀸𑀬𑁂𑀦 𑀤𑁂𑀯𑀕𑀩𑁆𑀪𑀸 𑀤𑀲 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺, 𑀤𑀲 𑀥𑀻𑀢𑀭𑁄 𑀦𑀦𑁆𑀤𑀺𑀕𑁄𑀧𑀸 𑀯𑀺𑀚𑀸𑀬𑀺. 𑀤𑀲 𑀧𑀼𑀢𑁆𑀢𑀸 𑀦𑀦𑁆𑀤𑀺𑀕𑁄𑀧𑀸𑀬 𑀲𑀦𑁆𑀢𑀺𑀓𑁂 𑀯𑀟𑁆𑀠𑀦𑁆𑀢𑀺, 𑀥𑀻𑀢𑀭𑁄 𑀤𑁂𑀯𑀕𑀩𑁆𑀪𑀸𑀬. 𑀢𑀁 𑀅𑀦𑁆𑀢𑀭𑀁 𑀓𑁄𑀘𑀺 𑀦 𑀚𑀸𑀦𑀸𑀢𑀺. 𑀤𑁂𑀯𑀕𑀩𑁆𑀪𑀸𑀬 𑀚𑁂𑀝𑁆𑀞𑀧𑀼𑀢𑁆𑀢𑁄 𑀯𑀸𑀲𑀼𑀤𑁂𑀯𑁄 𑀦𑀸𑀫 𑀅𑀳𑁄𑀲𑀺, 𑀤𑀼𑀢𑀺𑀬𑁄 𑀩𑀮𑀤𑁂𑀯𑁄, 𑀢𑀢𑀺𑀬𑁄 𑀘𑀦𑁆𑀤𑀤𑁂𑀯𑁄, 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑀤𑁂𑀯𑁄, 𑀧𑀜𑁆𑀘𑀫𑁄 𑀅𑀕𑁆𑀕𑀺𑀤𑁂𑀯𑁄, 𑀙𑀝𑁆𑀞𑁄 𑀯𑀭𑀼𑀡𑀤𑁂𑀯𑁄, 𑀲𑀢𑁆𑀢𑀫𑁄 𑀅𑀚𑁆𑀚𑀼𑀦𑁄, 𑀅𑀝𑁆𑀞𑀫𑁄 𑀧𑀚𑁆𑀚𑀼𑀦𑁄, 𑀦𑀯𑀫𑁄 𑀖𑀝𑀧𑀡𑁆𑀟𑀺𑀢𑁄, 𑀤𑀲𑀫𑁄 𑀅𑀗𑁆𑀓𑀼𑀭𑁄 𑀦𑀸𑀫 𑀅𑀳𑁄𑀲𑀺. 𑀢𑁂 𑀅𑀦𑁆𑀥𑀓𑀯𑁂𑀡𑁆𑀟𑀤𑀸𑀲𑀧𑀼𑀢𑁆𑀢𑀸 𑀤𑀲 𑀪𑀸𑀢𑀺𑀓𑀸 𑀘𑁂𑀝𑀓𑀸𑀢𑀺 𑀧𑀸𑀓𑀝𑀸 𑀅𑀳𑁂𑀲𑀼𑀁.

𑀢𑁂 𑀅𑀧𑀭𑀪𑀸𑀕𑁂 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑀸 𑀓𑀓𑁆𑀔𑀴𑀸 𑀨𑀭𑀼𑀲𑀸 𑀳𑀼𑀢𑁆𑀯𑀸 𑀯𑀺𑀮𑁄𑀧𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺 ¶ , 𑀭𑀜𑁆𑀜𑁄 𑀕𑀘𑁆𑀙𑀦𑁆𑀢𑁂 𑀧𑀡𑁆𑀡𑀸𑀓𑀸𑀭𑁂𑀧𑀺 𑀯𑀺𑀮𑀼𑀫𑁆𑀧𑀦𑁆𑀢𑁂𑀯. 𑀫𑀦𑀼𑀲𑁆𑀲𑀸 ¶ 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀦𑁆𑀥𑀓𑀯𑁂𑀡𑁆𑀟𑀤𑀸𑀲𑀧𑀼𑀢𑁆𑀢𑀸 𑀤𑀲 𑀪𑀸𑀢𑀺𑀓𑀸 𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀦𑁆𑀢𑀻’’𑀢𑀺 𑀭𑀸𑀚𑀗𑁆𑀕𑀡𑁂 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 𑀅𑀦𑁆𑀥𑀓𑀯𑁂𑀡𑁆𑀟𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀧𑀼𑀢𑁆𑀢𑁂𑀳𑀺 𑀯𑀺𑀮𑁄𑀧𑀁 𑀓𑀸𑀭𑀸𑀧𑁂𑀲𑀻’’𑀢𑀺 𑀢𑀚𑁆𑀚𑁂𑀲𑀺. 𑀏𑀯𑀁 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀫𑀦𑀼𑀲𑁆𑀲𑁂𑀳𑀺 𑀉𑀧𑀓𑁆𑀓𑁄𑀲𑁂 𑀓𑀢𑁂 𑀭𑀸𑀚𑀸 𑀢𑀁 𑀲𑀦𑁆𑀢𑀚𑁆𑀚𑁂𑀲𑀺. 𑀲𑁄 𑀫𑀭𑀡𑀪𑀬𑀪𑀻𑀢𑁄 𑀭𑀸𑀚𑀸𑀦𑀁 𑀅𑀪𑀬𑀁 𑀬𑀸𑀘𑀺𑀢𑁆𑀯𑀸 ‘‘𑀤𑁂𑀯, 𑀏𑀢𑁂 𑀦 𑀫𑀬𑁆𑀳𑀁 𑀧𑀼𑀢𑁆𑀢𑀸, 𑀉𑀧𑀲𑀸𑀕𑀭𑀲𑁆𑀲 𑀧𑀼𑀢𑁆𑀢𑀸’’𑀢𑀺 𑀢𑀁 𑀅𑀦𑁆𑀢𑀭𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀪𑀻𑀢𑁄 ‘‘𑀓𑁂𑀦 𑀢𑁂 𑀉𑀧𑀸𑀬𑁂𑀦 𑀕𑀡𑁆𑀳𑀸𑀫𑀸’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀢𑁂, 𑀤𑁂𑀯, 𑀫𑀮𑁆𑀮𑀬𑀼𑀤𑁆𑀥𑀯𑀺𑀢𑁆𑀢𑀓𑀸, 𑀦𑀕𑀭𑁂 𑀬𑀼𑀤𑁆𑀥𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀦𑁂 𑀬𑀼𑀤𑁆𑀥𑀫𑀡𑁆𑀟𑀮𑀁 𑀆𑀕𑀢𑁂 𑀕𑀸𑀳𑀸𑀧𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀘𑀸𑀭𑀼𑀭𑀜𑁆𑀘, 𑀫𑀼𑀝𑁆𑀞𑀺𑀓𑀜𑁆𑀘𑀸𑀢𑀺 𑀤𑁆𑀯𑁂 𑀫𑀮𑁆𑀮𑁂 𑀧𑁄𑀲𑁂𑀢𑁆𑀯𑀸 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀬𑀼𑀤𑁆𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀬𑀼𑀤𑁆𑀥𑀫𑀡𑁆𑀟𑀮𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀅𑀓𑁆𑀔𑀯𑀸𑀝𑀁 𑀓𑀸𑀭𑁂𑀢𑁆𑀯𑀸 𑀬𑀼𑀤𑁆𑀥𑀫𑀡𑁆𑀟𑀮𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀁 𑀩𑀦𑁆𑀥𑀸𑀧𑁂𑀲𑀺. 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺. 𑀘𑀓𑁆𑀓𑀸𑀢𑀺𑀘𑀓𑁆𑀓𑀁 𑀫𑀜𑁆𑀘𑀸𑀢𑀺𑀫𑀜𑁆𑀘𑀁 𑀩𑀦𑁆𑀥𑀺𑀢𑁆𑀯𑀸 𑀘𑀸𑀭𑀼𑀭𑀫𑀼𑀝𑁆𑀞𑀺𑀓𑀸 𑀬𑀼𑀤𑁆𑀥𑀫𑀡𑁆𑀟𑀮𑀁 𑀆𑀕𑀦𑁆𑀢𑁆𑀯𑀸 𑀯𑀕𑁆𑀕𑀦𑁆𑀢𑀸 𑀕𑀚𑁆𑀚𑀦𑁆𑀢𑀸 𑀅𑀧𑁆𑀨𑁄𑀝𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀤𑀲 𑀪𑀸𑀢𑀺𑀓𑀸𑀧𑀺 𑀆𑀕𑀦𑁆𑀢𑁆𑀯𑀸 𑀭𑀚𑀓𑀯𑀻𑀣𑀺𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀡𑁆𑀡𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀕𑀦𑁆𑀥𑀸𑀧𑀡𑁂𑀲𑀼 𑀕𑀦𑁆𑀥𑀁 ¶ , 𑀫𑀸𑀮𑀸𑀓𑀸𑀭𑀸𑀧𑀡𑁂𑀲𑀼 𑀫𑀸𑀮𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀺𑀮𑀺𑀢𑁆𑀢𑀕𑀢𑁆𑀢𑀸 𑀫𑀸𑀮𑀥𑀸𑀭𑀺𑀦𑁄 𑀓𑀢𑀓𑀡𑁆𑀡𑀧𑀽𑀭𑀸 𑀯𑀕𑁆𑀕𑀦𑁆𑀢𑀸 𑀕𑀚𑁆𑀚𑀦𑁆𑀢𑀸 𑀅𑀧𑁆𑀨𑁄𑀝𑁂𑀦𑁆𑀢𑀸 𑀬𑀼𑀤𑁆𑀥𑀫𑀡𑁆𑀟𑀮𑀁 𑀧𑀯𑀺𑀲𑀺𑀁𑀲𑀼.

𑀢𑀲𑁆𑀫𑀺𑀁 𑀔𑀡𑁂 𑀘𑀸𑀭𑀼𑀭𑁄 𑀅𑀧𑁆𑀨𑁄𑀝𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀩𑀮𑀤𑁂𑀯𑁄 𑀢𑀁 𑀤𑀺𑀲𑁆𑀯𑀸 ‘‘𑀦 𑀦𑀁 𑀳𑀢𑁆𑀣𑁂𑀦 𑀙𑀼𑀧𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑀺𑀲𑀸𑀮𑀢𑁄 𑀫𑀳𑀦𑁆𑀢𑀁 𑀳𑀢𑁆𑀣𑀺𑀬𑁄𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀯𑀕𑁆𑀕𑀺𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀬𑁄𑀢𑁆𑀢𑀁 𑀔𑀺𑀧𑀺𑀢𑁆𑀯𑀸 𑀘𑀸𑀭𑀼𑀭𑀁 𑀉𑀤𑀭𑁂 𑀯𑁂𑀞𑁂𑀢𑁆𑀯𑀸 𑀤𑁆𑀯𑁂 𑀬𑁄𑀢𑁆𑀢𑀓𑁄𑀝𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀯𑀢𑁆𑀢𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑀫𑀢𑁆𑀣𑀓𑁂 𑀪𑀫𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑁄𑀣𑁂𑀢𑁆𑀯𑀸 𑀩𑀳𑀺 𑀅𑀓𑁆𑀔𑀯𑀸𑀝𑁂 𑀔𑀺𑀧𑀺. 𑀘𑀸𑀭𑀼𑀭𑁂 𑀫𑀢𑁂 𑀭𑀸𑀚𑀸 𑀫𑀼𑀝𑁆𑀞𑀺𑀓𑀫𑀮𑁆𑀮𑀁 𑀆𑀡𑀸𑀧𑁂𑀲𑀺. 𑀲𑁄 𑀉𑀝𑁆𑀞𑀸𑀬 𑀯𑀕𑁆𑀕𑀺𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀅𑀧𑁆𑀨𑁄𑀝𑁂𑀲𑀺. 𑀩𑀮𑀤𑁂𑀯𑁄 𑀢𑀁 𑀧𑁄𑀣𑁂𑀢𑁆𑀯𑀸 𑀅𑀝𑁆𑀞𑀻𑀦𑀺 𑀲𑀜𑁆𑀘𑀼𑀡𑁆𑀡𑁂𑀢𑁆𑀯𑀸 ‘‘𑀅𑀫𑀮𑁆𑀮𑁄𑀫𑁆𑀳𑀺, 𑀅𑀫𑀮𑁆𑀮𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀫𑁂𑀯 ‘‘𑀦𑀸𑀳𑀁 𑀢𑀯 𑀫𑀮𑁆𑀮𑀪𑀸𑀯𑀁 𑀯𑀸 𑀅𑀫𑀮𑁆𑀮𑀪𑀸𑀯𑀁 𑀯𑀸 𑀚𑀸𑀦𑀸𑀫𑀻’’𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑁄𑀣𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀩𑀳𑀺 𑀅𑀓𑁆𑀔𑀯𑀸𑀝𑁂 𑀔𑀺𑀧𑀺. 𑀫𑀼𑀝𑁆𑀞𑀺𑀓𑁄 𑀫𑀭𑀦𑁆𑀢𑁄 ‘‘𑀬𑀓𑁆𑀔𑁄 𑀳𑀼𑀢𑁆𑀯𑀸 𑀢𑀁 𑀔𑀸𑀤𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀲𑁄 𑀓𑀸𑀮𑀫𑀢𑁆𑀢𑀺𑀓𑀅𑀝𑀯𑀺𑀬𑀁 𑀦𑀸𑀫 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀭𑀸𑀚𑀸 ‘‘𑀕𑀡𑁆𑀳𑀣 𑀤𑀲 𑀪𑀸𑀢𑀺𑀓𑁂 𑀘𑁂𑀝𑀓𑁂’’𑀢𑀺 𑀉𑀝𑁆𑀞𑀳𑀺 ¶ . 𑀢𑀲𑁆𑀫𑀺𑀁 𑀔𑀡𑁂 𑀯𑀸𑀲𑀼𑀤𑁂𑀯𑁄 𑀘𑀓𑁆𑀓𑀁 𑀔𑀺𑀧𑀺. 𑀢𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀪𑀸𑀢𑀺𑀓𑀸𑀦𑀁 𑀲𑀻𑀲𑀸𑀦𑀺 𑀧𑀸𑀢𑁂𑀲𑀺. 𑀫𑀳𑀸𑀚𑀦𑁄 𑀪𑀻𑀢𑀢𑀲𑀺𑀢𑁄 ‘‘𑀅𑀯𑀲𑁆𑀲𑀬𑀸 𑀦𑁄 𑀳𑁄𑀣𑀸’’𑀢𑀺 𑀢𑁂𑀲𑀁 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑁂 𑀤𑁆𑀯𑁂𑀧𑀺 𑀫𑀸𑀢𑀼𑀮𑁂 𑀫𑀸𑀭𑁂𑀢𑁆𑀯𑀸 𑀅𑀲𑀺𑀢𑀜𑁆𑀚𑀦𑀦𑀕𑀭𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀢𑀢𑁆𑀣 𑀓𑀢𑁆𑀯𑀸 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀸𑀮𑀬𑁄𑀦𑀓𑀭𑀜𑁆𑀜𑁄 𑀦𑀺𑀯𑀸𑀲𑀁 𑀅𑀬𑀼𑀚𑁆𑀛𑀦𑀕𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁 𑀧𑀭𑀺𑀔𑀸𑀭𑀼𑀓𑁆𑀔𑀕𑀳𑀦𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸𑀦𑀁 ¶ 𑀕𑀳𑁂𑀢𑁆𑀯𑀸 𑀢𑀁 𑀭𑀚𑁆𑀚𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀤𑁆𑀯𑀸𑀭𑀯𑀢𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀲 𑀧𑀦 𑀦𑀕𑀭𑀲𑁆𑀲 𑀏𑀓𑀢𑁄 𑀲𑀫𑀼𑀤𑁆𑀤𑁄 𑀏𑀓𑀢𑁄 𑀧𑀩𑁆𑀩𑀢𑁄, 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀁 𑀓𑀺𑀭 𑀢𑀁 𑀅𑀳𑁄𑀲𑀺.

𑀢𑀲𑁆𑀲 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀞𑀺𑀢𑀬𑀓𑁆𑀔𑁄 𑀧𑀘𑁆𑀘𑀸𑀫𑀺𑀢𑁆𑀢𑁂 𑀤𑀺𑀲𑁆𑀯𑀸 𑀕𑀤𑁆𑀭𑀪𑀯𑁂𑀲𑁂𑀦 𑀕𑀤𑁆𑀭𑀪𑀭𑀯𑀁 𑀭𑀯𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 ¶ 𑀲𑀓𑀮𑀦𑀕𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀏𑀓𑀲𑁆𑀫𑀺𑀁 𑀤𑀻𑀧𑀓𑁂 𑀢𑀺𑀝𑁆𑀞𑀢𑀺. 𑀧𑀘𑁆𑀘𑀸𑀫𑀺𑀢𑁆𑀢𑁂𑀲𑀼 𑀕𑀢𑁂𑀲𑀼 𑀧𑀼𑀦𑀸𑀕𑀦𑁆𑀢𑁆𑀯𑀸 𑀲𑀓𑀝𑁆𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀢𑀤𑀸𑀧𑀺 𑀲𑁄 𑀕𑀤𑁆𑀭𑀪𑁄 𑀢𑁂𑀲𑀁 𑀤𑀲𑀦𑁆𑀦𑀁 𑀪𑀸𑀢𑀺𑀓𑀸𑀦𑀁 𑀆𑀕𑀫𑀦𑀁 𑀜𑀢𑁆𑀯𑀸 𑀕𑀤𑁆𑀭𑀪𑀭𑀯𑀁 𑀭𑀯𑀺. 𑀦𑀕𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀤𑀻𑀧𑀓𑁂 𑀧𑀢𑀺𑀝𑁆𑀞𑀸𑀬 𑀢𑁂𑀲𑀼 𑀦𑀕𑀭𑀁 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁂𑀲𑀼 𑀧𑀼𑀦𑀸𑀕𑀦𑁆𑀢𑁆𑀯𑀸 𑀲𑀓𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂 𑀧𑀼𑀦 𑀦𑀺𑀯𑀢𑁆𑀢𑀺𑀁𑀲𑀼, 𑀧𑀼𑀦𑀧𑀺 𑀕𑀤𑁆𑀭𑀪𑁄 𑀢𑀣𑁂𑀯 𑀅𑀓𑀸𑀲𑀺. 𑀢𑁂 𑀤𑁆𑀯𑀸𑀭𑀯𑀢𑀺𑀦𑀕𑀭𑁂 𑀭𑀚𑁆𑀚𑀁 𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀡𑁆𑀳𑀤𑀻𑀧𑀸𑀬𑀦𑀲𑁆𑀲 𑀇𑀲𑀺𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑀁 𑀤𑁆𑀯𑀸𑀭𑀯𑀢𑀺𑀬𑀁 𑀭𑀚𑁆𑀚𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀫, 𑀏𑀓𑀁 𑀦𑁄 𑀉𑀧𑀸𑀬𑀁 𑀓𑀭𑁄𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀭𑀺𑀔𑀸𑀧𑀺𑀝𑁆𑀞𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀏𑀓𑁄 𑀕𑀤𑁆𑀭𑀪𑁄 𑀘𑀭𑀢𑀺. 𑀲𑁄 𑀳𑀺 𑀅𑀫𑀺𑀢𑁆𑀢𑁂 𑀤𑀺𑀲𑁆𑀯𑀸 𑀯𑀺𑀭𑀯𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀦𑀕𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀼𑀫𑁆𑀳𑁂 𑀢𑀲𑁆𑀲 𑀧𑀸𑀤𑁂 𑀕𑀡𑁆𑀳𑀣, 𑀅𑀬𑀁 𑀯𑁄 𑀦𑀺𑀧𑁆𑀨𑀚𑁆𑀚𑀦𑀽𑀧𑀸𑀬𑁄’’𑀢𑀺 𑀯𑀼𑀢𑁆𑀢𑁂 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀕𑀤𑁆𑀭𑀪𑀲𑁆𑀲 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀦𑀺𑀧𑀢𑀺𑀢𑁆𑀯𑀸 ‘‘𑀲𑀸𑀫𑀺, 𑀞𑀧𑁂𑀢𑁆𑀯𑀸 𑀢𑀼𑀫𑁆𑀳𑁂 𑀅𑀜𑁆𑀜𑁄 𑀅𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀕𑀡𑁆𑀳𑀦𑀓𑀸𑀮𑁂 𑀫𑀸 𑀭𑀯𑀺𑀢𑁆𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀕𑀤𑁆𑀭𑀪𑁄 ‘‘𑀦 𑀲𑀓𑁆𑀓𑀸 𑀦 𑀯𑀺𑀭𑀯𑀺𑀢𑀼𑀁, 𑀢𑀼𑀫𑁆𑀳𑁂 𑀧𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀭𑁄 𑀚𑀦𑀸 𑀫𑀳𑀦𑁆𑀢𑀸𑀦𑀺 𑀅𑀬𑀦𑀗𑁆𑀕𑀮𑀸𑀦𑀺 𑀕𑀳𑁂𑀢𑁆𑀯𑀸 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀫𑀳𑀦𑁆𑀢𑁂 𑀅𑀬𑀔𑀸𑀡𑀼𑀓𑁂 𑀪𑀽𑀫𑀺𑀬𑀁 𑀆𑀓𑁄𑀝𑁂𑀢𑁆𑀯𑀸 𑀦𑀕𑀭𑀲𑁆𑀲 𑀉𑀧𑁆𑀧𑀢𑀦𑀓𑀸𑀮𑁂 𑀦𑀗𑁆𑀕𑀮𑀸𑀦𑀺 𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀩𑀤𑁆𑀥𑀁 𑀅𑀬𑀲𑀗𑁆𑀔𑀮𑀺𑀓𑀁 𑀅𑀬𑀔𑀸𑀡𑀼𑀓𑁂 𑀩𑀦𑁆𑀥𑁂𑀬𑁆𑀬𑀸𑀣, 𑀦𑀕𑀭𑀁 𑀉𑀧𑁆𑀧𑀢𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀆𑀳.

𑀢𑁂 ¶ ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀅𑀯𑀺𑀭𑀯𑀦𑁆𑀢𑁂𑀬𑁂𑀯 𑀦𑀗𑁆𑀕𑀮𑀸𑀦𑀺 𑀆𑀤𑀸𑀬 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀔𑀸𑀡𑀼𑀓𑁂 𑀪𑀽𑀫𑀺𑀬𑀁 𑀆𑀓𑁄𑀝𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀕𑀤𑁆𑀭𑀪𑁄 𑀯𑀺𑀭𑀯𑀺, 𑀦𑀕𑀭𑀁 𑀉𑀧𑁆𑀧𑀢𑀺𑀢𑀼𑀫𑀸𑀭𑀪𑀺. 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀞𑀺𑀢𑀸 𑀘𑀢𑀽𑀳𑀺 𑀅𑀬𑀦𑀗𑁆𑀕𑀮𑁂𑀳𑀺 𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀩𑀤𑁆𑀥𑀸 𑀅𑀬𑀲𑀗𑁆𑀔𑀮𑀺𑀓𑀸 𑀔𑀸𑀡𑀼𑀓𑁂𑀲𑀼 𑀩𑀦𑁆𑀥𑀺𑀁𑀲𑀼, 𑀦𑀕𑀭𑀁 𑀉𑀧𑁆𑀧𑀢𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀤𑀲 𑀪𑀸𑀢𑀺𑀓𑀸 𑀢𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀁𑀲𑀼. 𑀏𑀯𑀁 𑀢𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀢𑁂𑀲𑀝𑁆𑀞𑀺𑀬𑀸 ¶ 𑀦𑀕𑀭𑀲𑀳𑀲𑁆𑀲𑁂𑀲𑀼 𑀲𑀩𑁆𑀩𑀭𑀸𑀚𑀸𑀦𑁄 𑀘𑀓𑁆𑀓𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀯𑀢𑀺𑀬𑀁 𑀯𑀲𑀫𑀸𑀦𑀸 𑀭𑀚𑁆𑀚𑀁 𑀤𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀯𑀺𑀪𑀚𑀺𑀁𑀲𑀼, 𑀪𑀕𑀺𑀦𑀺𑀁 𑀧𑀦 𑀅𑀜𑁆𑀚𑀦𑀤𑁂𑀯𑀺𑀁 𑀦 𑀲𑀭𑀺𑀁𑀲𑀼. 𑀢𑀢𑁄 𑀧𑀼𑀦 ‘‘𑀏𑀓𑀸𑀤𑀲 𑀓𑁄𑀝𑁆𑀞𑀸𑀲𑁂 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀅𑀗𑁆𑀓𑀼𑀭𑁄 ‘‘𑀫𑀫 𑀓𑁄𑀝𑁆𑀞𑀸𑀲𑀁 𑀢𑀲𑁆𑀲𑀸 𑀤𑁂𑀣, 𑀅𑀳𑀁 𑀯𑁄𑀳𑀸𑀭𑀁 𑀓𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀚𑀦𑀧𑀤𑁂 𑀫𑀬𑁆𑀳𑀁 𑀲𑀼𑀗𑁆𑀓𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀓𑁄𑀝𑁆𑀞𑀸𑀲𑀁 𑀪𑀕𑀺𑀦𑀺𑀬𑀸 𑀤𑀢𑁆𑀯𑀸 𑀲𑀤𑁆𑀥𑀺𑀁 𑀢𑀸𑀬 𑀦𑀯 𑀭𑀸𑀚𑀸𑀦𑁄 𑀤𑁆𑀯𑀸𑀭𑀯𑀢𑀺𑀬𑀁 𑀯𑀲𑀺𑀁𑀲𑀼. 𑀅𑀗𑁆𑀓𑀼𑀭𑁄 𑀧𑀦 𑀯𑀡𑀺𑀚𑁆𑀚𑀫𑀓𑀸𑀲𑀺. 𑀏𑀯𑀁 𑀢𑁂𑀲𑀼 𑀅𑀧𑀭𑀸𑀧𑀭𑀁 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀫𑀸𑀦𑁂𑀲𑀼 𑀅𑀤𑁆𑀥𑀸𑀦𑁂 𑀕𑀢𑁂 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼.

𑀢𑀤𑀸 ¶ 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁄 𑀅𑀳𑁄𑀲𑀺. 𑀢𑀤𑀸 𑀯𑀸𑀲𑀼𑀤𑁂𑀯𑀫𑀳𑀸𑀭𑀸𑀚𑀲𑁆𑀲 𑀏𑀓𑁄 𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀲𑁄𑀓𑀧𑀭𑁂𑀢𑁄 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀫𑀜𑁆𑀘𑀲𑁆𑀲 𑀅𑀝𑀦𑀺𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀮𑀧𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀖𑀝𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀓𑁄𑀘𑀺 𑀫𑀫 𑀪𑀸𑀢𑀼 𑀲𑁄𑀓𑀁 𑀳𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀉𑀧𑀸𑀬𑁂𑀦𑀲𑁆𑀲 𑀲𑁄𑀓𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀉𑀫𑁆𑀫𑀢𑁆𑀢𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀲𑀲𑀁 𑀫𑁂 𑀤𑁂𑀣, 𑀲𑀲𑀁 𑀫𑁂 𑀤𑁂𑀣𑀸’’𑀢𑀺 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀲𑀓𑀮𑀦𑀕𑀭𑀁 𑀯𑀺𑀘𑀭𑀺. ‘‘𑀖𑀝𑀧𑀡𑁆𑀟𑀺𑀢𑁄 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄’’𑀢𑀺 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀭𑁄𑀳𑀺𑀡𑁂𑀬𑁆𑀬𑁄 𑀦𑀸𑀫 𑀅𑀫𑀘𑁆𑀘𑁄 𑀯𑀸𑀲𑀼𑀤𑁂𑀯𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁫.

‘‘𑀉𑀝𑁆𑀞𑁂𑀳𑀺 𑀓𑀡𑁆𑀳 𑀓𑀺𑀁 𑀲𑁂𑀲𑀺, 𑀓𑁄 𑀅𑀢𑁆𑀣𑁄 𑀲𑀼𑀧𑀦𑁂𑀦 𑀢𑁂;

𑀬𑁄𑀧𑀺 𑀢𑀼𑀬𑁆𑀳𑀁 𑀲𑀓𑁄 𑀪𑀸𑀢𑀸, 𑀳𑀤𑀬𑀁 𑀘𑀓𑁆𑀔𑀼 𑀘 𑀤𑀓𑁆𑀔𑀺𑀡𑀁;

𑀢𑀲𑁆𑀲 𑀯𑀸𑀢𑀸 𑀩𑀮𑀻𑀬𑀦𑁆𑀢𑀺, 𑀖𑀝𑁄 𑀚𑀧𑁆𑀧𑀢𑀺 𑀓𑁂𑀲𑀯𑀸’’𑀢𑀺.

𑀢𑀢𑁆𑀣 ¶ 𑀓𑀡𑁆𑀳𑀸𑀢𑀺 𑀕𑁄𑀢𑁆𑀢𑁂𑀦𑀸𑀮𑀧𑀢𑀺, 𑀓𑀡𑁆𑀳𑀸𑀬𑀦𑀕𑁄𑀢𑁆𑀢𑁄 𑀓𑀺𑀭𑁂𑀲. 𑀓𑁄 𑀅𑀢𑁆𑀣𑁄𑀢𑀺 𑀓𑀢𑀭𑀸 𑀦𑀸𑀫 𑀯𑀟𑁆𑀠𑀺. 𑀳𑀤𑀬𑀁 𑀘𑀓𑁆𑀔𑀼 𑀘 𑀤𑀓𑁆𑀔𑀺𑀡𑀦𑁆𑀢𑀺 𑀳𑀤𑀬𑁂𑀦 𑀘𑁂𑀯 𑀤𑀓𑁆𑀔𑀺𑀡𑀘𑀓𑁆𑀔𑀼𑀦𑀸 𑀘 𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀯𑀸𑀢𑀸 𑀩𑀮𑀻𑀬𑀦𑁆𑀢𑀻𑀢𑀺 𑀢𑀲𑁆𑀲 𑀳𑀤𑀬𑀁 𑀅𑀧𑀲𑁆𑀫𑀸𑀭𑀯𑀸𑀢𑀸 𑀅𑀯𑀢𑁆𑀣𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀚𑀧𑁆𑀧𑀢𑀻𑀢𑀺 ‘‘𑀲𑀲𑀁 𑀫𑁂 𑀤𑁂𑀣𑀸’’𑀢𑀺 𑀯𑀺𑀧𑁆𑀧𑀮𑀧𑀢𑀺. 𑀓𑁂𑀲𑀯𑀸𑀢𑀺 𑀲𑁄 𑀓𑀺𑀭 𑀓𑁂𑀲𑀲𑁄𑀪𑀦𑀢𑀸𑀬 ‘‘𑀓𑁂𑀲𑀯𑀸’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀢𑁂𑀦 𑀢𑀁 𑀦𑀸𑀫𑁂𑀦𑀸𑀮𑀧𑀢𑀺.

𑀏𑀯𑀁 ¶ 𑀅𑀫𑀘𑁆𑀘𑁂𑀦 𑀯𑀼𑀢𑁆𑀢𑁂 𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀪𑀸𑀯𑀁 𑀜𑀢𑁆𑀯𑀸 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁬.

‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑁄𑀳𑀺𑀡𑁂𑀬𑁆𑀬𑀲𑁆𑀲 𑀓𑁂𑀲𑀯𑁄;

𑀢𑀭𑀫𑀸𑀦𑀭𑀽𑀧𑁄 𑀯𑀼𑀝𑁆𑀞𑀸𑀲𑀺, 𑀪𑀸𑀢𑀼𑀲𑁄𑀓𑁂𑀦 𑀅𑀝𑁆𑀝𑀺𑀢𑁄’’𑀢𑀺.

𑀭𑀸𑀚𑀸 𑀉𑀝𑁆𑀞𑀸𑀬 𑀲𑀻𑀖𑀁 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀖𑀝𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀉𑀪𑁄𑀲𑀼 𑀳𑀢𑁆𑀣𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬𑁭.

‘‘𑀓𑀺𑀁 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀓𑁂𑀯𑀮𑀁 𑀤𑁆𑀯𑀸𑀭𑀓𑀁 𑀇𑀫𑀁;

𑀲𑀲𑁄 𑀲𑀲𑁄𑀢𑀺 𑀮𑀧𑀲𑀺, 𑀓𑁄 𑀦𑀼 𑀢𑁂 𑀲𑀲𑀫𑀸𑀳𑀭𑀻’’𑀢𑀺.

𑀢𑀢𑁆𑀣 ¶ 𑀓𑁂𑀯𑀮𑀁 𑀤𑁆𑀯𑀸𑀭𑀓𑀁 𑀇𑀫𑀦𑁆𑀢𑀺 𑀓𑀲𑁆𑀫𑀸 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀲𑀓𑀮𑀁 𑀇𑀫𑀁 𑀤𑁆𑀯𑀸𑀭𑀯𑀢𑀺𑀦𑀕𑀭𑀁 𑀯𑀺𑀘𑀭𑀦𑁆𑀢𑁄 ‘‘𑀲𑀲𑁄 𑀲𑀲𑁄’’𑀢𑀺 𑀮𑀧𑀲𑀺. 𑀓𑁄 𑀢𑀯 𑀲𑀲𑀁 𑀳𑀭𑀺, 𑀓𑁂𑀦 𑀢𑁂 𑀲𑀲𑁄 𑀕𑀳𑀺𑀢𑁄𑀢𑀺 𑀧𑀼𑀘𑁆𑀙𑀢𑀺.

𑀲𑁄 𑀭𑀜𑁆𑀜𑀸 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀤𑁂𑀯 𑀯𑀘𑀦𑀁 𑀯𑀤𑀢𑀺. 𑀭𑀸𑀚𑀸 𑀧𑀼𑀦 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬𑁮.

‘‘𑀲𑁄𑀯𑀡𑁆𑀡𑀫𑀬𑀁 𑀫𑀡𑀻𑀫𑀬𑀁, 𑀮𑁄𑀳𑀫𑀬𑀁 𑀅𑀣 𑀭𑀽𑀧𑀺𑀬𑀸𑀫𑀬𑀁;

𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀫𑀬𑀁, 𑀓𑀸𑀭𑀬𑀺𑀲𑁆𑀲𑀸𑀫𑀺 𑀢𑁂 𑀲𑀲𑀁.

𑁧𑁬𑁯.

‘‘𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀲𑀲𑀓𑀸, 𑀅𑀭𑀜𑁆𑀜𑁂 𑀯𑀦𑀕𑁄𑀘𑀭𑀸;

𑀢𑁂𑀧𑀺 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀓𑀻𑀤𑀺𑀲𑀁 𑀲𑀲𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑁂𑀲𑀼 𑀲𑀼𑀯𑀡𑁆𑀡𑀫𑀬𑀸𑀤𑀻𑀲𑀼 𑀬𑀁 𑀇𑀘𑁆𑀙𑀲𑀺, 𑀢𑀁 𑀯𑀤, 𑀅𑀳𑀁 𑀢𑁂 𑀓𑀸𑀭𑁂𑀢𑁆𑀯𑀸 𑀤𑀲𑁆𑀲𑀸𑀫𑀺, 𑀅𑀣𑀸𑀧𑀺 𑀢𑁂 𑀦 𑀭𑁄𑀘𑁂𑀲𑀺, 𑀅𑀜𑁆𑀜𑁂𑀧𑀺 𑀅𑀭𑀜𑁆𑀜𑁂 ¶ 𑀯𑀦𑀕𑁄𑀘𑀭𑀸 𑀲𑀲𑀓𑀸 𑀅𑀢𑁆𑀣𑀺, 𑀢𑁂𑀧𑀺 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀯𑀤 𑀪𑀤𑁆𑀭𑀫𑀼𑀔, 𑀓𑀻𑀤𑀺𑀲𑀁 𑀲𑀲𑀫𑀺𑀘𑁆𑀙𑀲𑀻𑀢𑀺.

𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀖𑀝𑀧𑀡𑁆𑀟𑀺𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁭𑁦.

‘‘𑀦 𑀘𑀸𑀳𑀫𑁂𑀢𑁂 𑀇𑀘𑁆𑀙𑀸𑀫𑀺, 𑀬𑁂 𑀲𑀲𑀸 𑀧𑀣𑀯𑀺𑀲𑁆𑀲𑀺𑀢𑀸;

𑀘𑀦𑁆𑀤𑀢𑁄 𑀲𑀲𑀫𑀺𑀘𑁆𑀙𑀸𑀫𑀺, 𑀢𑀁 𑀫𑁂 𑀑𑀳𑀭 𑀓𑁂𑀲𑀯𑀸’’𑀢𑀺.

𑀢𑀢𑁆𑀣 𑀑𑀳𑀭𑀸𑀢𑀺 𑀑𑀢𑀸𑀭𑁂𑀳𑀺.

𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀫𑁂 𑀪𑀸𑀢𑀸 𑀉𑀫𑁆𑀫𑀢𑁆𑀢𑀓𑁄𑀯 𑀚𑀸𑀢𑁄’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁧.

‘‘𑀲𑁄 ¶ 𑀦𑀽𑀦 𑀫𑀥𑀼𑀭𑀁 𑀜𑀸𑀢𑀺, 𑀚𑀻𑀯𑀺𑀢𑀁 𑀯𑀺𑀚𑀳𑀺𑀲𑁆𑀲𑀲𑀺;

𑀅𑀧𑀢𑁆𑀣𑀺𑀬𑀁 𑀬𑁄 𑀧𑀢𑁆𑀣𑀬𑀲𑀺, 𑀘𑀦𑁆𑀤𑀢𑁄 𑀲𑀲𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 ¶ 𑀜𑀸𑀢𑀻𑀢𑀺 𑀓𑀦𑀺𑀝𑁆𑀞𑀁 𑀆𑀮𑀧𑀦𑁆𑀢𑁄 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀢𑀸𑀢, 𑀫𑀬𑁆𑀳𑀁 𑀧𑀺𑀬𑀜𑀸𑀢𑀺 𑀲𑁄 𑀢𑁆𑀯𑀁 𑀦𑀽𑀦 𑀅𑀢𑀺𑀫𑀥𑀼𑀭𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀯𑀺𑀚𑀳𑀺𑀲𑁆𑀲𑀲𑀺, 𑀬𑁄 𑀅𑀧𑀢𑁆𑀣𑁂𑀢𑀩𑁆𑀩𑀁 𑀧𑀢𑁆𑀣𑀬𑀲𑀻’’𑀢𑀺.

𑀖𑀝𑀧𑀡𑁆𑀟𑀺𑀢𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀘𑁆𑀘𑀮𑁄 𑀞𑀢𑁆𑀯𑀸 ‘‘𑀪𑀸𑀢𑀺𑀓, 𑀢𑁆𑀯𑀁 𑀘𑀦𑁆𑀤𑀢𑁄 𑀲𑀲𑀓𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀢𑀁 𑀅𑀮𑀪𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀪𑀸𑀯𑀁 𑀚𑀸𑀦𑀦𑁆𑀢𑁄 𑀓𑀺𑀁 𑀓𑀸𑀭𑀡𑀸 𑀫𑀢𑀧𑀼𑀢𑁆𑀢𑀁 𑀅𑀦𑀼𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁭𑁨.

‘‘𑀏𑀯𑀁 𑀘𑁂 𑀓𑀡𑁆𑀳 𑀚𑀸𑀦𑀸𑀲𑀺, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀺;

𑀓𑀲𑁆𑀫𑀸 𑀧𑀼𑀭𑁂 𑀫𑀢𑀁 𑀧𑀼𑀢𑁆𑀢𑀁, 𑀅𑀚𑁆𑀚𑀸𑀧𑀺 𑀫𑀦𑀼𑀲𑁄𑀘𑀲𑀻’’𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀇𑀤𑀁 𑀅𑀮𑀩𑁆𑀪𑀦𑁂𑀬𑁆𑀬𑀝𑁆𑀞𑀸𑀦𑀁 𑀦𑀸𑀫 𑀦 𑀧𑀢𑁆𑀣𑁂𑀢𑀩𑁆𑀩𑀦𑁆𑀢𑀺 𑀬𑀤𑀺 𑀏𑀯𑀁 𑀚𑀸𑀦𑀸𑀲𑀺. 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀻𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄𑀯 𑀬𑀤𑀺 𑀅𑀜𑁆𑀜𑀁 𑀅𑀦𑀼𑀲𑀸𑀲𑀲𑀻𑀢𑀺 𑀅𑀢𑁆𑀣𑁄. 𑀧𑀼𑀭𑁂𑀢𑀺 𑀅𑀣 𑀓𑀲𑁆𑀫𑀸 𑀇𑀢𑁄 𑀘𑀢𑀼𑀫𑀸𑀲𑀫𑀢𑁆𑀣𑀓𑁂 𑀫𑀢𑀧𑀼𑀢𑁆𑀢𑀁 𑀅𑀚𑁆𑀚𑀸𑀧𑀺 𑀅𑀦𑀼𑀲𑁄𑀘𑀲𑀻𑀢𑀺 𑀯𑀤𑀢𑀺.

𑀏𑀯𑀁 𑀲𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑀓𑁄𑀯 ‘‘𑀪𑀸𑀢𑀺𑀓, 𑀅𑀳𑀁 𑀢𑀸𑀯 𑀧𑀜𑁆𑀜𑀸𑀬𑀫𑀸𑀦𑀁 𑀧𑀢𑁆𑀣𑁂𑀫𑀺, 𑀢𑁆𑀯𑀁 𑀧𑀦 𑀅𑀧𑀜𑁆𑀜𑀸𑀬𑀫𑀸𑀦𑀲𑁆𑀲 𑀲𑁄𑀘𑀲𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀼𑀦 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁭𑁩.

‘‘𑀬𑀁 ¶ 𑀦 𑀮𑀩𑁆𑀪𑀸 𑀫𑀦𑀼𑀲𑁆𑀲𑁂𑀦, 𑀅𑀫𑀦𑀼𑀲𑁆𑀲𑁂𑀦 𑀯𑀸 𑀧𑀼𑀦;

𑀚𑀸𑀢𑁄 𑀫𑁂 𑀫𑀸 𑀫𑀭𑀻 𑀧𑀼𑀢𑁆𑀢𑁄, 𑀓𑀼𑀢𑁄 𑀮𑀩𑁆𑀪𑀸 𑀅𑀮𑀩𑁆𑀪𑀺𑀬𑀁.

𑁧𑁭𑁪.

‘‘𑀦 𑀫𑀦𑁆𑀢𑀸 𑀫𑀽𑀮𑀪𑁂𑀲𑀚𑁆𑀚𑀸, 𑀑𑀲𑀥𑁂𑀳𑀺 𑀥𑀦𑁂𑀦 𑀯𑀸;

𑀲𑀓𑁆𑀓𑀸 𑀆𑀦𑀬𑀺𑀢𑀼𑀁 𑀓𑀡𑁆𑀳, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀻’’𑀢𑀺.

𑀢𑀢𑁆𑀣 𑀬𑀦𑁆𑀢𑀺 𑀪𑀸𑀢𑀺𑀓 𑀬𑀁 𑀏𑀯𑀁 𑀚𑀸𑀢𑁄 𑀫𑁂 𑀧𑀼𑀢𑁆𑀢𑁄 𑀫𑀸 𑀫𑀭𑀻𑀢𑀺 𑀫𑀦𑀼𑀲𑁆𑀲𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀧𑀼𑀦 𑀦 𑀮𑀩𑁆𑀪𑀸 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀁 𑀢𑁆𑀯𑀁 𑀧𑀢𑁆𑀣𑁂𑀲𑀺, 𑀢𑀤𑁂𑀢𑀁 𑀓𑀼𑀢𑁄 𑀮𑀩𑁆𑀪𑀸 𑀓𑁂𑀦 𑀓𑀸𑀭𑀡𑁂𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀦 𑀲𑀓𑁆𑀓𑀸𑀢𑀺 𑀤𑀻𑀧𑁂𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀮𑀩𑁆𑀪𑀺𑀬𑀁, 𑀅𑀮𑀩𑁆𑀪𑀦𑁂𑀬𑁆𑀬𑀝𑁆𑀞𑀸𑀦𑀜𑁆𑀳𑀺 𑀦𑀸𑀫𑁂𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀦𑁆𑀢𑀸𑀢𑀺 𑀫𑀦𑁆𑀢𑀧𑀬𑁄𑀕𑁂𑀦. 𑀫𑀽𑀮𑀪𑁂𑀲𑀚𑁆𑀚𑀸𑀢𑀺 𑀫𑀽𑀮𑀪𑁂𑀲𑀚𑁆𑀚𑁂𑀦. 𑀑𑀲𑀥𑁂𑀳𑀻𑀢𑀺 𑀦𑀸𑀦𑀸𑀯𑀺𑀥𑁄𑀲𑀥𑁂𑀳𑀺. 𑀥𑀦𑁂𑀦 𑀯𑀸𑀢𑀺 𑀓𑁄𑀝𑀺𑀲𑀢𑀲𑀗𑁆𑀔𑁆𑀬𑁂𑀦𑀧𑀺 𑀥𑀦𑁂𑀦 𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀁 𑀢𑁆𑀯𑀁 𑀧𑁂𑀢𑀫𑀦𑀼𑀲𑁄𑀘𑀲𑀺, 𑀢𑀁 𑀏𑀢𑁂𑀳𑀺 𑀫𑀦𑁆𑀢𑀧𑀬𑁄𑀕𑀸𑀤𑀻𑀳𑀺 𑀆𑀦𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺.

𑀭𑀸𑀚𑀸 ¶ 𑀢𑀁 𑀲𑀼𑀢𑁆𑀯𑀸 ‘‘𑀬𑀼𑀢𑁆𑀢𑀁, 𑀢𑀸𑀢, 𑀲𑀮𑁆𑀮𑀓𑁆𑀔𑀺𑀢𑀁 𑀫𑁂, 𑀫𑀫 𑀲𑁄𑀓𑀳𑀭𑀡𑀢𑁆𑀣𑀸𑀬 𑀢𑀬𑀸 𑀇𑀤𑀁 𑀓𑀢’’𑀦𑁆𑀢𑀺 𑀖𑀝𑀧𑀡𑁆𑀟𑀺𑀢𑀁 𑀯𑀡𑁆𑀡𑁂𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁭𑁫.

‘‘𑀬𑀲𑁆𑀲 ¶ 𑀏𑀢𑀸𑀤𑀺𑀲𑀸 𑀅𑀲𑁆𑀲𑀼, 𑀅𑀫𑀘𑁆𑀘𑀸 𑀧𑀼𑀭𑀺𑀲𑀧𑀡𑁆𑀟𑀺𑀢𑀸;

𑀬𑀣𑀸 𑀦𑀺𑀚𑁆𑀛𑀸𑀧𑀬𑁂 𑀅𑀚𑁆𑀚, 𑀖𑀝𑁄 𑀧𑀼𑀭𑀺𑀲𑀧𑀡𑁆𑀟𑀺𑀢𑁄.

𑁧𑁭𑁬.

‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁭𑁭.

‘‘𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁭𑁮.

‘‘𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯𑀸’’𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀬𑁂𑀦 𑀓𑀸𑀭𑀡𑁂𑀦 𑀅𑀚𑁆𑀚 𑀫𑀁 𑀧𑀼𑀢𑁆𑀢𑀲𑁄𑀓𑀧𑀭𑁂𑀢𑀁 𑀖𑀝𑁄 𑀧𑀼𑀭𑀺𑀲𑀧𑀡𑁆𑀟𑀺𑀢𑁄 𑀲𑁄𑀓𑀳𑀭𑀡𑀢𑁆𑀣𑀸𑀬 𑀦𑀺𑀚𑁆𑀛𑀸𑀧𑀬𑁂 𑀦𑀺𑀚𑁆𑀛𑀸𑀧𑁂𑀲𑀺 𑀩𑁄𑀥𑁂𑀲𑀺. 𑀬𑀲𑁆𑀲 𑀅𑀜𑁆𑀜𑀲𑁆𑀲𑀧𑀺 𑀏𑀢𑀸𑀤𑀺𑀲𑀸 𑀧𑀼𑀭𑀺𑀲𑀧𑀡𑁆𑀟𑀺𑀢𑀸 𑀅𑀫𑀘𑁆𑀘𑀸 𑀅𑀲𑁆𑀲𑀼, 𑀢𑀲𑁆𑀲 𑀓𑀼𑀢𑁄 𑀲𑁄𑀓𑁄𑀢𑀺. 𑀲𑁂𑀲𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯.

𑀅𑀯𑀲𑀸𑀦𑁂 ¶ 𑁋

𑁧𑁭𑁯.

‘‘𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀦𑀺𑀯𑀢𑁆𑀢𑀬𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀖𑀝𑁄 𑀚𑁂𑀝𑁆𑀞𑀁𑀯 𑀪𑀸𑀢𑀭’’𑀦𑁆𑀢𑀺. 𑁋

𑀅𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑀏𑀯𑀁 𑀖𑀝𑀓𑀼𑀫𑀸𑀭𑁂𑀦 𑀯𑀻𑀢𑀲𑁄𑀓𑁂 𑀓𑀢𑁂 𑀯𑀸𑀲𑀼𑀤𑁂𑀯𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁂 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀤𑀲𑀪𑀸𑀢𑀺𑀓𑀧𑀼𑀢𑁆𑀢𑀸 𑀓𑀼𑀫𑀸𑀭𑀸 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀓𑀡𑁆𑀳𑀤𑀻𑀧𑀸𑀬𑀦𑀁 ‘𑀤𑀺𑀩𑁆𑀩𑀘𑀓𑁆𑀔𑀼𑀓𑁄’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫 𑀢𑀸𑀯 𑀦’’𑀦𑁆𑀢𑀺. 𑀢𑁂 𑀏𑀓𑀁 𑀤𑀳𑀭𑀓𑀼𑀫𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀕𑀩𑁆𑀪𑀺𑀦𑀺𑀆𑀓𑀸𑀭𑁂𑀦 𑀤𑀲𑁆𑀲𑁂𑀢𑁆𑀯𑀸 𑀉𑀤𑀭𑁂 𑀫𑀲𑀽𑀭𑀓𑀁 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀬𑀁 𑀓𑀼𑀫𑀸𑀭𑀺𑀓𑀸 𑀓𑀺𑀁 𑀯𑀺𑀚𑀸𑀬𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑀸𑀧𑀲𑁄 ‘‘𑀤𑀲𑀪𑀸𑀢𑀺𑀓𑀭𑀸𑀚𑀽𑀦𑀁 𑀯𑀺𑀦𑀸𑀲𑀓𑀸𑀮𑁄 𑀧𑀢𑁆𑀢𑁄, 𑀫𑀬𑁆𑀳𑀁 𑀦𑀼 𑀔𑁄 𑀆𑀬𑀼𑀲𑀗𑁆𑀔𑀸𑀭𑁄 𑀓𑀻𑀤𑀺𑀲𑁄 ¶ 𑀳𑁄𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚𑁂𑀯 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀓𑀼𑀫𑀸𑀭𑀸 𑀇𑀫𑀺𑀦𑀸 𑀢𑀼𑀫𑁆𑀳𑀸𑀓𑀁 𑀓𑁄 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 ‘‘𑀓𑀣𑁂𑀣𑁂𑀯 𑀦𑁄, 𑀪𑀦𑁆𑀢𑁂’’𑀢𑀺 𑀦𑀺𑀩𑀤𑁆𑀥𑁄 ‘‘𑀅𑀬𑀁 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀔𑀤𑀺𑀭𑀖𑀝𑀺𑀓𑀁 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀢𑀸𑀬 𑀯𑀸𑀲𑀼𑀤𑁂𑀯𑀓𑀼𑀮𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀅𑀧𑀺𑀘 𑀔𑁄 𑀧𑀦 𑀢𑀼𑀫𑁆𑀳𑁂 𑀢𑀁 𑀔𑀤𑀺𑀭𑀖𑀝𑀺𑀓𑀁 𑀕𑀳𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀁 𑀦𑀤𑀺𑀬𑀁 𑀧𑀓𑁆𑀔𑀺𑀧𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀢𑁂 ‘‘𑀓𑀽𑀝𑀚𑀝𑀺𑀮, 𑀧𑀼𑀭𑀺𑀲𑁄 𑀯𑀺𑀚𑀸𑀬𑀦𑀓𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑀦𑁆𑀢𑀭𑀚𑁆𑀚𑀼𑀓𑀁 𑀦𑀸𑀫 𑀓𑀫𑁆𑀫𑀓𑀭𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀬𑀺𑀁𑀲𑀼. 𑀭𑀸𑀚𑀸𑀦𑁄 𑀓𑀼𑀫𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀸 𑀢𑀸𑀧𑀲𑀁 𑀫𑀸𑀭𑀬𑀺𑀢𑁆𑀣𑀸’’𑀢𑀺 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀲𑀼𑀢𑁆𑀯𑀸 𑀪𑀻𑀢𑀸 𑀢𑀲𑁆𑀲 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀲𑁆𑀲 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀁 𑀔𑀤𑀺𑀭𑀖𑀝𑀺𑀓𑀁 𑀛𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀁 𑀦𑀤𑀺𑀬𑀁 𑀔𑀺𑀧𑀺𑀁𑀲𑀼. 𑀲𑀸 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑀸 𑀫𑀼𑀔𑀤𑁆𑀯𑀸𑀭𑁂 𑀏𑀓𑀧𑀲𑁆𑀲𑁂 𑀮𑀕𑁆𑀕𑀺, 𑀢𑀢𑁄 𑀏𑀭𑀓𑀁 𑀦𑀺𑀩𑁆𑀩𑀢𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀢𑁂 𑀭𑀸𑀚𑀸𑀦𑁄 ‘‘𑀲𑀫𑀼𑀤𑁆𑀤𑀓𑀻𑀴𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀫𑀼𑀔𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑁂 𑀔𑀸𑀤𑀦𑁆𑀢𑀸 𑀧𑀺𑀯𑀦𑁆𑀢𑀸 𑀓𑀻𑀴𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀳𑀢𑁆𑀣𑀧𑀸𑀤𑀧𑀭𑀸𑀫𑀸𑀲𑀸 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀯𑀸 𑀫𑀳𑀸𑀓𑀮𑀳𑀁 𑀓𑀭𑀺𑀁𑀲𑀼. 𑀅𑀣𑁂𑀓𑁄 𑀅𑀜𑁆𑀜𑀁 𑀫𑀼𑀕𑁆𑀕𑀭𑀁 𑀅𑀮𑀪𑀦𑁆𑀢𑁄 𑀏𑀭𑀓𑀯𑀦𑀢𑁄 𑀏𑀓𑀁 𑀏𑀭𑀓𑀧𑀢𑁆𑀢𑀁 𑀕𑀡𑁆𑀳𑀺. 𑀢𑀁 𑀕𑀳𑀺𑀢𑀫𑀢𑁆𑀢𑀫𑁂𑀯 𑀔𑀤𑀺𑀭𑀫𑀼𑀲𑀮𑀁 𑀅𑀳𑁄𑀲𑀺. 𑀲𑁄 𑀢𑁂𑀦 𑀫𑀳𑀸𑀚𑀦𑀁 𑀧𑁄𑀣𑁂𑀲𑀺 ¶ . 𑀅𑀣𑀜𑁆𑀜𑁂𑀳𑀺 𑀲𑀩𑁆𑀩𑁂𑀳𑀺 𑀕𑀳𑀺𑀢𑀕𑀳𑀺𑀢𑀁 𑀔𑀤𑀺𑀭𑀫𑀼𑀲𑀮𑀫𑁂𑀯 𑀅𑀳𑁄𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀼 𑀫𑀳𑀸𑀯𑀺𑀦𑀸𑀲𑀁 𑀯𑀺𑀦𑀲𑁆𑀲𑀦𑁆𑀢𑁂𑀲𑀼 𑀯𑀸𑀲𑀼𑀤𑁂𑀯𑁄 𑀘 𑀩𑀮𑀤𑁂𑀯𑁄 𑀘 𑀪𑀕𑀺𑀦𑀻 𑀅𑀜𑁆𑀚𑀦𑀤𑁂𑀯𑀻 𑀘 𑀧𑀼𑀭𑁄𑀳𑀺𑀢𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀚𑀦𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀮𑀸𑀬𑀺𑀁𑀲𑀼, 𑀲𑁂𑀲𑀸 𑀲𑀩𑁆𑀩𑁂𑀧𑀺 𑀯𑀺𑀦𑀝𑁆𑀞𑀸. 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀭𑀣𑁂𑀦 𑀧𑀮𑀸𑀬𑀦𑁆𑀢𑀸 𑀓𑀸𑀴𑀫𑀢𑁆𑀢𑀺𑀓𑀅𑀝𑀯𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁄 𑀳𑀺 𑀫𑀼𑀝𑁆𑀞𑀺𑀓𑀫𑀮𑁆𑀮𑁄 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄 𑀩𑀮𑀤𑁂𑀯𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁆𑀣 𑀕𑀸𑀫𑀁 𑀫𑀸𑀧𑁂𑀢𑁆𑀯𑀸 𑀫𑀮𑁆𑀮𑀯𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀓𑁄 𑀬𑀼𑀚𑁆𑀛𑀺𑀢𑀼𑀓𑀸𑀫𑁄’’𑀢𑀺 𑀯𑀕𑁆𑀕𑀦𑁆𑀢𑁄 𑀕𑀚𑁆𑀚𑀦𑁆𑀢𑁄 𑀅𑀧𑁆𑀨𑁄𑀝𑁂𑀦𑁆𑀢𑁄 𑀯𑀺𑀘𑀭𑀺. 𑀩𑀮𑀤𑁂𑀯𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀪𑀸𑀢𑀺𑀓, 𑀅𑀳𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀸𑀲𑀼𑀤𑁂𑀯𑁂 𑀯𑀸𑀭𑁂𑀦𑁆𑀢𑁂𑀬𑁂𑀯 𑀭𑀣𑀸 𑀑𑀭𑀼𑀬𑁆𑀳 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀕𑁆𑀕𑀦𑁆𑀢𑁄 𑀕𑀚𑁆𑀚𑀦𑁆𑀢𑁄 𑀅𑀧𑁆𑀨𑁄𑀝𑁂𑀲𑀺. 𑀅𑀣 𑀦𑀁 𑀲𑁄 𑀧𑀲𑀸𑀭𑀺𑀢𑀳𑀢𑁆𑀣𑁂𑀬𑁂𑀯 𑀕𑀳𑁂𑀢𑁆𑀯𑀸 𑀫𑀽𑀮𑀓𑀦𑁆𑀤𑀁 𑀯𑀺𑀬 𑀔𑀸𑀤𑀺. 𑀯𑀸𑀲𑀼𑀤𑁂𑀯𑁄 𑀢𑀲𑁆𑀲 𑀫𑀢𑀪𑀸𑀯𑀁 𑀜𑀢𑁆𑀯𑀸 𑀪𑀕𑀺𑀦𑀺𑀜𑁆𑀘 𑀧𑀼𑀭𑁄𑀳𑀺𑀢𑀜𑁆𑀘 𑀆𑀤𑀸𑀬 𑀲𑀩𑁆𑀩𑀭𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀲𑀽𑀭𑀺𑀬𑁄𑀤𑀬𑁂 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀢𑁆𑀯𑀸 ‘‘𑀆𑀳𑀸𑀭𑀁 𑀧𑀘𑀺𑀢𑁆𑀯𑀸 𑀆𑀳𑀭𑀣𑀸’’𑀢𑀺 𑀪𑀕𑀺𑀦𑀺𑀜𑁆𑀘 𑀧𑀼𑀭𑁄𑀳𑀺𑀢𑀜𑁆𑀘 𑀕𑀸𑀫𑀁 𑀧𑀳𑀺𑀡𑀺𑀢𑁆𑀯𑀸 𑀲𑀬𑀁 𑀏𑀓𑀲𑁆𑀫𑀺𑀁 𑀕𑀘𑁆𑀙𑀦𑁆𑀢𑀭𑁂 𑀧𑀝𑀺𑀘𑁆𑀙𑀦𑁆𑀦𑁄 𑀦𑀺𑀧𑀚𑁆𑀚𑀺.

𑀅𑀣 𑀦𑀁 𑀚𑀭𑀸 𑀦𑀸𑀫 𑀏𑀓𑁄 𑀮𑀼𑀤𑁆𑀤𑀓𑁄 𑀕𑀘𑁆𑀙𑀁 𑀘𑀮𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀲𑀽𑀓𑀭𑁄 𑀏𑀢𑁆𑀣 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀲𑀢𑁆𑀢𑀺𑀁 𑀔𑀺𑀧𑀺𑀢𑁆𑀯𑀸 𑀧𑀸𑀤𑁂 𑀯𑀺𑀚𑁆𑀛𑀺𑀢𑁆𑀯𑀸 ‘‘𑀓𑁄 𑀫𑀁 𑀯𑀺𑀚𑁆𑀛𑀻’’𑀢𑀺 𑀯𑀼𑀢𑁆𑀢𑁂 𑀫𑀦𑀼𑀲𑁆𑀲𑀲𑁆𑀲 𑀯𑀺𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀪𑀻𑀢𑁄 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺 ¶ . 𑀭𑀸𑀚𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 ‘‘𑀫𑀸𑀢𑀼𑀮, 𑀫𑀸 𑀪𑀸𑀬𑀺, 𑀏𑀳𑀻’’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀕𑀢𑀁 ‘‘𑀓𑁄𑀲𑀺 𑀦𑀸𑀫 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀲𑀸𑀫𑀺, 𑀚𑀭𑀸 𑀦𑀸𑀫𑀸’’𑀢𑀺 ¶ 𑀯𑀼𑀢𑁆𑀢𑁂 ‘‘𑀚𑀭𑀸𑀬 𑀯𑀺𑀤𑁆𑀥𑁄 𑀫𑀭𑀺𑀲𑁆𑀲𑀢𑀻𑀢𑀺 𑀓𑀺𑀭 𑀫𑀁 𑀧𑁄𑀭𑀸𑀡𑀸 𑀩𑁆𑀬𑀸𑀓𑀭𑀺𑀁𑀲𑀼, 𑀦𑀺𑀲𑁆𑀲𑀁𑀲𑀬𑀁 𑀅𑀚𑁆𑀚 𑀫𑀬𑀸 𑀫𑀭𑀺𑀢𑀩𑁆𑀩’’𑀦𑁆𑀢𑀺 𑀜𑀢𑁆𑀯𑀸 ‘‘𑀫𑀸𑀢𑀼𑀮, 𑀫𑀸 𑀪𑀸𑀬𑀺, 𑀏𑀳𑀺 𑀧𑀳𑀸𑀭𑀁 𑀫𑁂 𑀩𑀦𑁆𑀥𑀸’’𑀢𑀺 𑀢𑁂𑀦 𑀧𑀳𑀸𑀭𑀫𑀼𑀔𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀩𑀮𑀯𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼, 𑀇𑀢𑀭𑁂𑀳𑀺 𑀆𑀪𑀢𑀁 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀢𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀚𑁆𑀚 𑀅𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀧𑀦 𑀲𑀼𑀔𑀼𑀫𑀸𑀮𑀸 𑀅𑀜𑁆𑀜𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣, 𑀇𑀫𑀁 𑀯𑀺𑀚𑁆𑀚𑀁 𑀲𑀺𑀓𑁆𑀔𑀣𑀸’’𑀢𑀺 𑀏𑀓𑀁 𑀯𑀺𑀚𑁆𑀚𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀏𑀯𑀁 𑀅𑀜𑁆𑀚𑀦𑀤𑁂𑀯𑀺𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀯 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀉𑀧𑀸𑀲𑀓, 𑀏𑀯𑀁 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁄𑀓𑀁 𑀳𑀭𑀺𑀁𑀲𑀼, 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀯𑀢𑁆𑀯𑀸 ¶ 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑁄𑀳𑀺𑀡𑁂𑀬𑁆𑀬𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀯𑀸𑀲𑀼𑀤𑁂𑀯𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀅𑀯𑀲𑁂𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀖𑀝𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸 𑀲𑁄𑀴𑀲𑀫𑀸.

𑀇𑀢𑀺 𑀲𑁄𑀴𑀲𑀚𑀸𑀢𑀓𑀧𑀝𑀺𑀫𑀡𑁆𑀟𑀺𑀢𑀲𑁆𑀲

𑀤𑀲𑀓𑀦𑀺𑀧𑀸𑀢𑀚𑀸𑀢𑀓𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀸𑀢𑀓𑀼𑀤𑁆𑀤𑀸𑀦𑀁 𑁋

𑀘𑀢𑀼𑀤𑁆𑀯𑀸𑀭𑁄 𑀓𑀡𑁆𑀳𑀼𑀧𑁄𑀲𑁄, 𑀲𑀗𑁆𑀔 𑀩𑁄𑀥𑀺 𑀤𑀻𑀧𑀸𑀬𑀦𑁄;

𑀦𑀺𑀕𑁆𑀭𑁄𑀥 𑀢𑀓𑁆𑀓𑀮 𑀥𑀫𑁆𑀫-𑀧𑀸𑀮𑁄 𑀓𑀼𑀓𑁆𑀓𑀼𑀝 𑀓𑀼𑀡𑁆𑀟𑀮𑀻;

𑀩𑀺𑀮𑀸𑀭 𑀘𑀓𑁆𑀓 𑀪𑀽𑀭𑀺 𑀘, 𑀫𑀗𑁆𑀕𑀮 𑀖𑀝 𑀲𑁄𑀴𑀲.

𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀓𑀦𑀺𑀧𑀸𑀢𑁄

[𑁪𑁫𑁫] 𑁧. 𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀢𑀲𑁆𑀲 ¶ ¶ ¶ 𑀦𑀸𑀕𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑀯𑀢𑁆𑀣𑀼𑀲𑀤𑀺𑀲𑀫𑁂𑀯. 𑀲𑀢𑁆𑀣𑀸 𑀧𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀸 𑀪𑀺𑀓𑁆𑀔𑀯𑁂, 𑀏𑀢𑀁 𑀪𑀺𑀓𑁆𑀔𑀼𑀁 𑀉𑀚𑁆𑀛𑀸𑀬𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑀺 𑀫𑀸𑀢𑀭𑀸 𑀯𑀺𑀬𑀼𑀢𑁆𑀢𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀲𑀼𑀲𑁆𑀲𑀫𑀸𑀦𑀸 𑀭𑀸𑀚𑀸𑀭𑀳𑀁 𑀪𑁄𑀚𑀦𑀁 𑀮𑀪𑀺𑀢𑁆𑀯𑀸𑀧𑀺 ‘𑀫𑀸𑀢𑀭𑀸 𑀯𑀺𑀦𑀸 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺 𑀫𑀸𑀢𑀭𑀁 𑀤𑀺𑀲𑁆𑀯𑀸𑀯 𑀕𑁄𑀘𑀭𑀁 𑀕𑀡𑁆𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀫𑀸𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀩𑁆𑀩𑀲𑁂𑀢𑁄 𑀅𑀳𑁄𑀲𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀅𑀲𑀻𑀢𑀺𑀳𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀸𑀭𑁄. 𑀲𑁄 𑀚𑀭𑀸𑀚𑀺𑀡𑁆𑀡𑀁 𑀫𑀸𑀢𑀭𑀁 𑀧𑁄𑀲𑁂𑀲𑀺, 𑀫𑀸𑀢𑀸 𑀧𑀦𑀲𑁆𑀲 𑀅𑀦𑁆𑀥𑀸. 𑀲𑁄 𑀫𑀥𑀼𑀭𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀳𑀢𑁆𑀣𑀻𑀦𑀁 𑀤𑀢𑁆𑀯𑀸 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀳𑀢𑁆𑀣𑀻 𑀢𑀲𑁆𑀲𑀸 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸𑀯 𑀔𑀸𑀤𑀦𑁆𑀢𑀺. 𑀲𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀬𑀽𑀣𑀁 𑀙𑀟𑁆𑀟𑁂𑀢𑁆𑀯𑀸 𑀫𑀸𑀢𑀭𑀫𑁂𑀯 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀅𑀜𑁆𑀜𑁂𑀲𑀁 𑀳𑀢𑁆𑀣𑀻𑀦𑀁 𑀅𑀚𑀸𑀦𑀦𑁆𑀢𑀸𑀦𑀁 𑀫𑀸𑀢𑀭𑀁 𑀕𑀳𑁂𑀢𑁆𑀯𑀸 𑀘𑀡𑁆𑀟𑁄𑀭𑀡𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀦𑀴𑀺𑀦𑀺𑀁 𑀉𑀧𑀦𑀺𑀲𑁆𑀲𑀸𑀬 𑀞𑀺𑀢𑀸𑀬 𑀧𑀩𑁆𑀩𑀢𑀕𑀼𑀳𑀸𑀬𑀁 𑀫𑀸𑀢𑀭𑀁 𑀞𑀧𑁂𑀢𑁆𑀯𑀸 𑀧𑁄𑀲𑁂𑀲𑀺. 𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀯𑀦𑀘𑀭𑀓𑁄 𑀫𑀕𑁆𑀕𑀫𑀽𑀴𑁆𑀳𑁄 𑀤𑀺𑀲𑀁 𑀯𑀯𑀢𑁆𑀣𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀦𑁆𑀢𑁂𑀦 ¶ 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀅𑀦𑀸𑀣𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑀁 𑀏𑀲 𑀫𑀬𑀺 𑀞𑀺𑀢𑁂 𑀇𑀥 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀪𑀬𑁂𑀦 𑀧𑀮𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀦𑀢𑁆𑀣𑀺 𑀢𑁂 𑀫𑀁 𑀦𑀺𑀲𑁆𑀲𑀸𑀬 𑀪𑀬𑀁, 𑀫𑀸 𑀧𑀮𑀸𑀬𑀺, 𑀓𑀲𑁆𑀫𑀸 𑀢𑁆𑀯𑀁 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀸𑀫𑀺, 𑀅𑀳𑀁 𑀫𑀕𑁆𑀕𑀫𑀽𑀴𑁆𑀳𑁄, 𑀅𑀚𑁆𑀚 𑀫𑁂 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀪𑁄 𑀧𑀼𑀭𑀺𑀲, 𑀫𑀸 𑀪𑀸𑀬𑀺, 𑀅𑀳𑀁 𑀢𑀁 𑀫𑀦𑀼𑀲𑁆𑀲𑀧𑀣𑁂 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀻𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑁄𑀧𑀺 𑀧𑀸𑀧𑁄 ‘‘𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀲𑀜𑁆𑀜𑀁 𑀧𑀩𑁆𑀩𑀢𑀲𑀜𑁆𑀜𑀁 𑀓𑀭𑁄𑀦𑁆𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 ¶ ¶ 𑀓𑀸𑀮𑁂 𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀻 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 ‘‘𑀲𑀘𑁂 𑀓𑁂𑀦𑀘𑀺 𑀓𑀢𑁆𑀣𑀘𑀺 𑀑𑀧𑀯𑀬𑁆𑀳𑀁 𑀓𑀸𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀳𑀢𑁆𑀣𑀻 𑀤𑀺𑀝𑁆𑀞𑁄 𑀅𑀢𑁆𑀣𑀺, 𑀲𑁄 𑀆𑀘𑀺𑀓𑁆𑀔𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀲𑁄 𑀧𑀼𑀭𑀺𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀬𑀸, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀑𑀧𑀯𑀬𑁆𑀳𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀲𑀩𑁆𑀩𑀲𑁂𑀢𑁄 𑀲𑀻𑀮𑀯𑀸 𑀳𑀢𑁆𑀣𑀺𑀭𑀸𑀚𑀸 𑀤𑀺𑀝𑁆𑀞𑁄, 𑀅𑀳𑀁 𑀫𑀕𑁆𑀕𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀫𑀬𑀸 𑀲𑀤𑁆𑀥𑀺𑀁 𑀳𑀢𑁆𑀣𑀸𑀘𑀭𑀺𑀬𑁂 𑀧𑁂𑀲𑁂𑀢𑁆𑀯𑀸 𑀢𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 ‘‘𑀇𑀫𑀁 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀇𑀫𑀺𑀦𑀸 𑀯𑀼𑀢𑁆𑀢𑀁 𑀳𑀢𑁆𑀣𑀺𑀦𑀸𑀕𑀁 𑀆𑀦𑁂𑀣𑀸’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀳𑀢𑁆𑀣𑀸𑀘𑀭𑀺𑀬𑀁 𑀧𑁂𑀲𑁂𑀲𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀦𑀴𑀺𑀦𑀺𑀁 𑀧𑀯𑀺𑀲𑀺𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀁 𑀧𑀲𑁆𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀳𑀢𑁆𑀣𑀸𑀘𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀪𑀬𑀁 𑀦 𑀅𑀜𑁆𑀜𑀢𑁄 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀸 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀔𑁄 𑀧𑀦 𑀫𑀳𑀸𑀩𑀮𑁄 𑀳𑀢𑁆𑀣𑀺𑀲𑀳𑀲𑁆𑀲𑀫𑁆𑀧𑀺 𑀯𑀺𑀤𑁆𑀥𑀁𑀲𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀫𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀲𑀭𑀝𑁆𑀞𑀓𑀁 𑀲𑁂𑀦𑀸𑀯𑀸𑀳𑀦𑀁 𑀦𑀸𑀲𑁂𑀢𑀼𑀁, 𑀲𑀘𑁂 𑀧𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀺, 𑀲𑀻𑀮𑀁 𑀫𑁂 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀚𑁆𑀚 𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑀺𑀬𑀫𑀸𑀦𑁄𑀧𑀺 𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀬 𑀲𑀻𑀲𑀁 𑀦𑀸𑀫𑁂𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀅𑀝𑁆𑀞𑀸𑀲𑀺. 𑀳𑀢𑁆𑀣𑀸𑀘𑀭𑀺𑀬𑁄 𑀧𑀤𑀼𑀫𑀲𑀭𑀁 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀳𑀺 𑀧𑀼𑀢𑁆𑀢𑀸’’𑀢𑀺 𑀭𑀚𑀢𑀤𑀸𑀫𑀲𑀤𑀺𑀲𑀸𑀬 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀧𑀦 𑀧𑀼𑀢𑁆𑀢𑁂 𑀅𑀦𑀸𑀕𑀘𑁆𑀙𑀦𑁆𑀢𑁂 ‘‘𑀧𑀼𑀢𑁆𑀢𑁄 𑀫𑁂 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀦𑀻𑀢𑁄 ¶ 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀢𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦 𑀅𑀬𑀁 𑀯𑀦𑀲𑀡𑁆𑀟𑁄 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧.

‘‘𑀢𑀲𑁆𑀲 𑀦𑀸𑀕𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦, 𑀯𑀺𑀭𑀽𑀴𑁆𑀳𑁄 𑀲𑀮𑁆𑀮𑀓𑀻 𑀘 𑀓𑀼𑀝𑀚𑀸 𑀘;

𑀓𑀼𑀭𑀼𑀯𑀺𑀦𑁆𑀤𑀓𑀭𑀯𑀻𑀭𑀸 𑀪𑀺𑀲𑀲𑀸𑀫𑀸 𑀘, 𑀦𑀺𑀯𑀸𑀢𑁂 𑀧𑀼𑀧𑁆𑀨𑀺𑀢𑀸 𑀘 𑀓𑀡𑀺𑀓𑀸𑀭𑀸.

𑁨.

‘‘𑀓𑁄𑀘𑀺𑀤𑁂𑀯 𑀲𑀼𑀯𑀡𑁆𑀡𑀓𑀸𑀬𑀼𑀭𑀸, 𑀦𑀸𑀕𑀭𑀸𑀚𑀁 𑀪𑀭𑀦𑁆𑀢𑀺 𑀧𑀺𑀡𑁆𑀟𑁂𑀦;

𑀬𑀢𑁆𑀣 𑀭𑀸𑀚𑀸 𑀭𑀸𑀚𑀓𑀼𑀫𑀸𑀭𑁄 𑀯𑀸, 𑀓𑀯𑀘𑀫𑀪𑀺𑀳𑁂𑀲𑁆𑀲𑀢𑀺 𑀅𑀙𑀫𑁆𑀪𑀺𑀢𑁄’’𑀢𑀺.

𑀢𑀢𑁆𑀣 ¶ 𑀯𑀺𑀭𑀽𑀴𑁆𑀳𑀸𑀢𑀺 𑀯𑀟𑁆𑀠𑀺𑀢𑀸 𑀦𑀸𑀫, 𑀦𑀢𑁆𑀣𑁂𑀢𑁆𑀣 𑀲𑀁𑀲𑀬𑁄𑀢𑀺 𑀅𑀲𑀁𑀲𑀬𑀯𑀲𑁂𑀦𑁂𑀯𑀫𑀸𑀳. 𑀲𑀮𑁆𑀮𑀓𑀻 𑀘 𑀓𑀼𑀝𑀚𑀸 𑀘𑀸𑀢𑀺 𑀇𑀦𑁆𑀤𑀲𑀸𑀮𑀭𑀼𑀓𑁆𑀔𑀸 𑀘 𑀓𑀼𑀝𑀚𑀭𑀼𑀓𑁆𑀔𑀸 𑀘. 𑀓𑀼𑀭𑀼𑀯𑀺𑀦𑁆𑀤𑀓𑀭𑀯𑀻𑀭𑀸 𑀪𑀺𑀲𑀲𑀸𑀫𑀸 𑀘𑀸𑀢𑀺 𑀓𑀼𑀭𑀼𑀯𑀺𑀦𑁆𑀤𑀭𑀼𑀓𑁆𑀔𑀸 𑀘 𑀓𑀭𑀯𑀻𑀭𑀦𑀸𑀫𑀓𑀸𑀦𑀺 𑀫𑀳𑀸𑀢𑀺𑀡𑀸𑀦𑀺 𑀘 𑀪𑀺𑀲𑀸𑀦𑀺 𑀘 𑀲𑀸𑀫𑀸𑀓𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁂 𑀘 𑀲𑀩𑁆𑀩𑁂 𑀇𑀤𑀸𑀦𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀦𑀺𑀯𑀸𑀢𑁂𑀢𑀺 𑀧𑀩𑁆𑀩𑀢𑀧𑀸𑀤𑁂. 𑀧𑀼𑀧𑁆𑀨𑀺𑀢𑀸𑀢𑀺 𑀫𑀫 𑀧𑀼𑀢𑁆𑀢𑁂𑀦 𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸 𑀅𑀔𑀸𑀤𑀺𑀬𑀫𑀸𑀦𑀸 𑀓𑀡𑀺𑀓𑀸𑀭𑀸𑀧𑀺 𑀧𑀼𑀧𑁆𑀨𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀘𑀺𑀤𑁂𑀯𑀸𑀢𑀺 𑀓𑀢𑁆𑀣𑀘𑀺𑀤𑁂𑀯 𑀕𑀸𑀫𑁂 𑀯𑀸 𑀦𑀕𑀭𑁂 𑀯𑀸. 𑀲𑀼𑀯𑀡𑁆𑀡𑀓𑀸𑀬𑀼𑀭𑀸𑀢𑀺 𑀲𑀼𑀯𑀡𑁆𑀡𑀸𑀪𑀭𑀡𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸. 𑀪𑀭𑀦𑁆𑀢𑀺 𑀧𑀺𑀡𑁆𑀟𑁂𑀦𑀸𑀢𑀺 𑀅𑀚𑁆𑀚 𑀫𑀸𑀢𑀼𑀧𑁄𑀲𑀓𑀁 𑀦𑀸𑀕𑀭𑀸𑀚𑀁 𑀭𑀸𑀚𑀸𑀭𑀳𑀲𑁆𑀲 𑀪𑁄𑀚𑀦𑀲𑁆𑀲 𑀲𑀼𑀯𑀟𑁆𑀠𑀺𑀢𑁂𑀦 𑀧𑀺𑀡𑁆𑀟𑁂𑀦 𑀧𑁄𑀲𑁂𑀦𑁆𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀦𑀸𑀕𑀭𑀸𑀚𑁂 𑀭𑀸𑀚𑀸 𑀦𑀺𑀲𑀻𑀤𑀺𑀢𑁆𑀯𑀸. 𑀓𑀯𑀘𑀫𑀪𑀺𑀳𑁂𑀲𑁆𑀲𑀢𑀻𑀢𑀺 ¶ 𑀲𑀗𑁆𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀓𑀯𑀘𑀁 𑀅𑀪𑀺𑀳𑀦𑀺𑀲𑁆𑀲𑀢𑀺 𑀪𑀺𑀦𑁆𑀤𑀺𑀲𑁆𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀢𑁆𑀣 𑀫𑀫 𑀧𑀼𑀢𑁆𑀢𑁂 𑀦𑀺𑀲𑀺𑀦𑁆𑀦𑁄 𑀭𑀸𑀚𑀸 𑀯𑀸 𑀭𑀸𑀚𑀓𑀼𑀫𑀸𑀭𑁄 𑀯𑀸 𑀅𑀙𑀫𑁆𑀪𑀺𑀢𑁄 𑀳𑀼𑀢𑁆𑀯𑀸 𑀲𑀧𑀢𑁆𑀢𑀸𑀦𑀁 𑀓𑀯𑀘𑀁 𑀳𑀦𑀺𑀲𑁆𑀲𑀢𑀺, 𑀢𑀁 𑀫𑁂 𑀧𑀼𑀢𑁆𑀢𑀁 𑀦𑀸𑀕𑀭𑀸𑀚𑀸𑀦𑀁 𑀲𑀼𑀯𑀡𑁆𑀡𑀸𑀪𑀭𑀡𑀸 𑀅𑀚𑁆𑀚 𑀧𑀺𑀡𑁆𑀟𑁂𑀦 𑀪𑀭𑀦𑁆𑀢𑀻’’𑀢𑀺.

𑀳𑀢𑁆𑀣𑀸𑀘𑀭𑀺𑀬𑁄𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀲𑀺. 𑀳𑀢𑁆𑀣𑀸𑀘𑀭𑀺𑀬𑁄 𑀩𑁄𑀥𑀺𑀲𑀢𑁆𑀢𑀁 𑀓𑀢𑀕𑀦𑁆𑀥𑀧𑀭𑀺𑀪𑀡𑁆𑀟𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀳𑀢𑁆𑀣𑀺𑀲𑀸𑀮𑀁 𑀦𑁂𑀢𑁆𑀯𑀸 𑀯𑀺𑀘𑀺𑀢𑁆𑀭𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀧𑁂𑀲𑀺. 𑀲𑁄 ‘‘𑀫𑀸𑀢𑀭𑀁 𑀯𑀺𑀦𑀸 𑀕𑁄𑀘𑀭𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀡𑁆𑀟𑀁 𑀦 𑀕𑀡𑁆𑀳𑀺. 𑀅𑀣 𑀦𑀁 𑀬𑀸𑀘𑀦𑁆𑀢𑁄 𑀭𑀸𑀚𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩.

‘‘𑀕𑀡𑁆𑀳𑀸𑀳𑀺 ¶ 𑀦𑀸𑀕 𑀓𑀩𑀴𑀁, 𑀫𑀸 𑀦𑀸𑀕 𑀓𑀺𑀲𑀓𑁄 𑀪𑀯;

𑀩𑀳𑀽𑀦𑀺 𑀭𑀸𑀚𑀓𑀺𑀘𑁆𑀘𑀸𑀦𑀺, 𑀢𑀸𑀦𑀺 𑀦𑀸𑀕 𑀓𑀭𑀺𑀲𑁆𑀲𑀲𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪.

‘‘𑀲𑀸 𑀦𑀽𑀦𑀲𑀸 𑀓𑀧𑀡𑀺𑀓𑀸, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺.

𑀢𑀢𑁆𑀣 𑀲𑀸 𑀦𑀽𑀦𑀲𑀸𑀢𑀺 𑀫𑀳𑀸𑀭𑀸𑀚, 𑀦𑀽𑀦 𑀲𑀸 𑀏𑀲𑀸. 𑀓𑀧𑀡𑀺𑀓𑀸𑀢𑀺 𑀧𑀼𑀢𑁆𑀢𑀯𑀺𑀬𑁄𑀕𑁂𑀦 𑀓𑀧𑀡𑀸. 𑀔𑀸𑀡𑀼𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀢𑀁 𑀭𑀼𑀓𑁆𑀔𑀓𑀮𑀺𑀗𑁆𑀕𑀭𑀁. 𑀖𑀝𑁆𑀝𑁂𑀢𑀻𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀤𑁂𑀦 𑀧𑁄𑀣𑁂𑀦𑁆𑀢𑀻 𑀦𑀽𑀦 𑀧𑀸𑀤𑁂𑀦 𑀳𑀦𑀢𑀺 ¶ . 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻𑀢𑀺 𑀘𑀡𑁆𑀟𑁄𑀭𑀡𑀧𑀩𑁆𑀩𑀢𑀸𑀪𑀺𑀫𑀼𑀔𑀻, 𑀧𑀩𑁆𑀩𑀢𑀧𑀸𑀤𑁂 𑀧𑀭𑀺𑀧𑁆𑀨𑀦𑁆𑀤𑀫𑀸𑀦𑀸𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀭𑀸𑀚𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁫.

‘‘𑀓𑀸 𑀦𑀼 𑀢𑁂 𑀲𑀸 𑀫𑀳𑀸𑀦𑀸𑀕, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁬.

‘‘𑀫𑀸𑀢𑀸 𑀫𑁂 𑀲𑀸 𑀫𑀳𑀸𑀭𑀸𑀚, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀻’’𑀢𑀺.

𑀭𑀸𑀚𑀸 𑀙𑀝𑁆𑀞𑀕𑀸𑀣𑀸𑀬 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀫𑀼𑀜𑁆𑀘𑀸𑀧𑁂𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁭.

‘‘𑀫𑀼𑀜𑁆𑀘𑀣𑁂𑀢𑀁 𑀫𑀳𑀸𑀦𑀸𑀕𑀁, 𑀬𑁄𑀬𑀁 𑀪𑀭𑀢𑀺 𑀫𑀸𑀢𑀭𑀁;

𑀲𑀫𑁂𑀢𑀼 𑀫𑀸𑀢𑀭𑀸 𑀦𑀸𑀕𑁄, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀻’’𑀢𑀺.

𑀢𑀢𑁆𑀣 𑀬𑁄𑀬𑀁 𑀪𑀭𑀢𑀻𑀢𑀺 𑀅𑀬𑀁 𑀦𑀸𑀕𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀅𑀦𑁆𑀥𑀁 𑀫𑀸𑀢𑀭𑀁 𑀧𑁄𑀲𑁂𑀫𑀺, 𑀫𑀬𑀸 𑀯𑀺𑀦𑀸 𑀫𑀬𑁆𑀳𑀁 𑀫𑀸𑀢𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑀸𑀬 𑀯𑀺𑀦𑀸 𑀫𑀬𑁆𑀳𑀁 𑀇𑀲𑁆𑀲𑀭𑀺𑀬𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀚𑁆𑀚 𑀫𑁂 𑀫𑀸𑀢𑀼 𑀕𑁄𑀘𑀭𑀁 𑀅𑀮𑀪𑀦𑁆𑀢𑀺𑀬𑀸 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺 𑀯𑀤𑀢𑀺, 𑀢𑀲𑁆𑀫𑀸 𑀬𑁄 𑀅𑀬𑀁 𑀫𑀸𑀢𑀭𑀁 𑀪𑀭𑀢𑀺, 𑀏𑀢𑀁 𑀫𑀳𑀸𑀦𑀸𑀕𑀁 𑀔𑀺𑀧𑁆𑀧𑀁 𑀫𑀼𑀜𑁆𑀘𑀣. 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀻𑀢𑀺 𑀲𑀤𑁆𑀥𑀺𑀁 𑀏𑀲 𑀫𑀸𑀢𑀭𑀸 𑀲𑀫𑁂𑀢𑀼 𑀲𑀫𑀸𑀕𑀘𑁆𑀙𑀢𑀽𑀢𑀺.

𑀅𑀝𑁆𑀞𑀫𑀦𑀯𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀳𑁄𑀦𑁆𑀢𑀺 𑁋

𑁮.

‘‘𑀫𑀼𑀢𑁆𑀢𑁄 𑀘 𑀩𑀦𑁆𑀥𑀦𑀸 𑀦𑀸𑀕𑁄, 𑀫𑀼𑀢𑁆𑀢𑀫𑀸𑀤𑀸𑀬 𑀓𑀼𑀜𑁆𑀚𑀭𑁄;

𑀫𑀼𑀳𑀼𑀢𑁆𑀢𑀁 𑀅𑀲𑁆𑀲𑀸𑀲𑀬𑀺𑀢𑁆𑀯𑀸, 𑀅𑀕𑀫𑀸 𑀬𑁂𑀦 𑀧𑀩𑁆𑀩𑀢𑁄.

𑁯.

‘‘𑀢𑀢𑁄 ¶ 𑀲𑁄 𑀦𑀴𑀺𑀦𑀺𑀁 𑀕𑀦𑁆𑀢𑁆𑀯𑀸, 𑀲𑀻𑀢𑀁 𑀓𑀼𑀜𑁆𑀚𑀭𑀲𑁂𑀯𑀺𑀢𑀁;

𑀲𑁄𑀡𑁆𑀟𑀸𑀬𑀽𑀤𑀓𑀫𑀸𑀳𑀢𑁆𑀯𑀸, 𑀫𑀸𑀢𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺.

𑀲𑁄 𑀓𑀺𑀭 𑀦𑀸𑀕𑁄 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑀭𑀸𑀚𑀥𑀫𑁆𑀫𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀑𑀯𑀸𑀤𑀁 ¶ 𑀤𑀢𑁆𑀯𑀸 𑀫𑀳𑀸𑀚𑀦𑁂𑀦 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀤𑀳𑁂𑀯 𑀢𑀁 𑀧𑀤𑀼𑀫𑀲𑀭𑀁 𑀧𑀢𑁆𑀯𑀸 ‘‘𑀫𑀫 𑀫𑀸𑀢𑀭𑀁 𑀕𑁄𑀘𑀭𑀁 𑀕𑀸𑀳𑀸𑀧𑁂𑀢𑁆𑀯𑀸𑀯 𑀲𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀁 𑀪𑀺𑀲𑀫𑀼𑀴𑀸𑀮𑀁 𑀆𑀤𑀸𑀬 𑀲𑁄𑀡𑁆𑀟𑀧𑀽𑀭𑀁 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀕𑀼𑀳𑀸𑀮𑁂𑀡𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀼𑀳𑀸𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑀸𑀬 𑀫𑀸𑀢𑀼𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀫𑀸𑀢𑀼 𑀲𑀭𑀻𑀭𑀲𑁆𑀲 𑀨𑀲𑁆𑀲𑀧𑀝𑀺𑀮𑀸𑀪𑀢𑁆𑀣𑀁 ¶ 𑀉𑀧𑀭𑀺 𑀉𑀤𑀓𑀁 𑀲𑀺𑀜𑁆𑀘𑀺, 𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺 ‘‘𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀁 𑀅𑀓𑁆𑀓𑁄𑀲𑀦𑁆𑀢𑀻 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁦.

‘‘𑀓𑁄𑀬𑀁 𑀅𑀦𑀭𑀺𑀬𑁄 𑀤𑁂𑀯𑁄, 𑀅𑀓𑀸𑀮𑁂𑀦𑀧𑀺 𑀯𑀲𑁆𑀲𑀢𑀺;

𑀕𑀢𑁄 𑀫𑁂 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀬𑁄 𑀫𑀬𑁆𑀳𑀁 𑀧𑀭𑀺𑀘𑀸𑀭𑀓𑁄’’𑀢𑀺.

𑀢𑀢𑁆𑀣 𑀅𑀢𑁆𑀭𑀚𑁄𑀢𑀺 𑀅𑀢𑁆𑀢𑀢𑁄 𑀚𑀸𑀢𑁄.

𑀅𑀣 𑀦𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀏𑀓𑀸𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁧.

‘‘𑀉𑀝𑁆𑀞𑁂𑀳𑀺 𑀅𑀫𑁆𑀫 𑀓𑀺𑀁 𑀲𑁂𑀲𑀺, 𑀆𑀕𑀢𑁄 𑀢𑁆𑀬𑀸𑀳𑀫𑀢𑁆𑀭𑀚𑁄;

𑀫𑀼𑀢𑁆𑀢𑁄𑀫𑁆𑀳𑀺 𑀓𑀸𑀲𑀺𑀭𑀸𑀚𑁂𑀦, 𑀯𑁂𑀤𑁂𑀳𑁂𑀦 𑀬𑀲𑀲𑁆𑀲𑀺𑀦𑀸’’𑀢𑀺.

𑀢𑀢𑁆𑀣 𑀆𑀕𑀢𑁄 𑀢𑁆𑀬𑀸𑀳𑀦𑁆𑀢𑀺 𑀆𑀕𑀢𑁄 𑀢𑁂 𑀅𑀳𑀁. 𑀯𑁂𑀤𑁂𑀳𑁂𑀦𑀸𑀢𑀺 𑀜𑀸𑀡𑀲𑀫𑁆𑀧𑀦𑁆𑀦𑁂𑀦. 𑀬𑀲𑀲𑁆𑀲𑀺𑀦𑀸𑀢𑀺 𑀫𑀳𑀸𑀧𑀭𑀺𑀯𑀸𑀭𑁂𑀦 𑀢𑁂𑀦 𑀭𑀜𑁆𑀜𑀸 𑀫𑀗𑁆𑀕𑀮𑀳𑀢𑁆𑀣𑀺𑀪𑀸𑀯𑀸𑀬 𑀕𑀳𑀺𑀢𑁄𑀧𑀺 𑀅𑀳𑀁 𑀫𑀼𑀢𑁆𑀢𑁄, 𑀇𑀤𑀸𑀦𑀺 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑁄 𑀉𑀝𑁆𑀞𑁂𑀳𑀺 𑀕𑁄𑀘𑀭𑀁 𑀕𑀡𑁆𑀳𑀸𑀳𑀻𑀢𑀺.

𑀲𑀸 𑀢𑀼𑀝𑁆𑀞𑀫𑀸𑀦𑀲𑀸 𑀭𑀜𑁆𑀜𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀻 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁨.

‘‘𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀬𑁄 𑀫𑁂 𑀧𑀼𑀢𑁆𑀢𑀁 𑀧𑀫𑁄𑀘𑁂𑀲𑀺, 𑀲𑀤𑀸 𑀯𑀼𑀤𑁆𑀥𑀸𑀧𑀘𑀸𑀬𑀺𑀓’’𑀦𑁆𑀢𑀺.

𑀢𑀤𑀸 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀦𑀴𑀺𑀦𑀺𑀬𑀸 𑀅𑀯𑀺𑀤𑀽𑀭𑁂 𑀕𑀸𑀫𑀁 𑀫𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀫𑀸𑀢𑀼 𑀘𑀲𑁆𑀲 𑀦𑀺𑀩𑀤𑁆𑀥𑀁 𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀭𑀺 𑀓𑀸𑀮𑀓𑀢𑀸𑀬 𑀢𑀲𑁆𑀲𑀸 𑀲𑀭𑀻𑀭𑀧𑀭𑀺𑀳𑀸𑀭𑀁 𑀓𑀢𑁆𑀯𑀸 ¶ 𑀓𑀸𑀭𑀡𑁆𑀟𑀓𑀅𑀲𑁆𑀲𑀫𑀧𑀤𑀁 𑀦𑀸𑀫 𑀕𑀢𑁄. 𑀢𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀳𑀺𑀫𑀯𑀦𑁆𑀢𑀢𑁄 𑀑𑀢𑀭𑀺𑀢𑁆𑀯𑀸 𑀧𑀜𑁆𑀘𑀲𑀢𑀸 𑀇𑀲𑀬𑁄 𑀯𑀲𑀺𑀁𑀲𑀼, 𑀢𑀁 𑀯𑀢𑁆𑀢𑀁 𑀢𑁂𑀲𑀁 𑀅𑀤𑀸𑀲𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀸𑀦𑀭𑀽𑀧𑀁 𑀲𑀺𑀮𑀸𑀧𑀝𑀺𑀫𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀲𑀺 ¶ . 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀳𑀢𑁆𑀣𑀺𑀫𑀳𑀁 𑀦𑀸𑀫 𑀓𑀭𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 ¶ 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀸𑀧𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑁄, 𑀳𑀢𑁆𑀣𑀸𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀸𑀢𑀸 𑀳𑀢𑁆𑀣𑀺𑀦𑀻 𑀫𑀳𑀸𑀫𑀸𑀬𑀸, 𑀫𑀸𑀢𑀼𑀧𑁄𑀲𑀓𑀦𑀸𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁫𑁬] 𑁨. 𑀚𑀼𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀲𑀼𑀡𑁄𑀳𑀺 𑀫𑀬𑁆𑀳𑀁 𑀯𑀘𑀦𑀁 𑀚𑀦𑀺𑀦𑁆𑀤𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀮𑀤𑁆𑀥𑀯𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀪𑀕𑀯𑀢𑁄 𑀅𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀣𑁂𑀭𑁄 𑀦𑀸𑀕𑀲𑀫𑀸𑀮𑁄, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀡𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄, 𑀏𑀓𑀤𑀸 𑀦𑀦𑁆𑀤𑁄, 𑀏𑀓𑀤𑀸 𑀲𑀸𑀕𑀢𑁄, 𑀏𑀓𑀤𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺𑀫𑁆𑀳𑀺 𑀫𑀳𑀮𑁆𑀮𑀓𑁄, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀫𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺. ‘‘𑀪𑀦𑁆𑀢𑁂, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀉𑀝𑁆𑀞𑀺𑀢𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀬𑁄 ‘‘𑀢𑀼𑀫𑁆𑀳𑀸𑀓𑀁 𑀧𑀢𑁆𑀣𑀦𑀸 𑀫𑀢𑁆𑀣𑀓𑀁 𑀧𑀢𑁆𑀢𑀸, 𑀅𑀮’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀪𑀺𑀓𑁆𑀔𑀽 𑀆𑀦𑀦𑁆𑀤𑀢𑁆𑀣𑁂𑀭𑀁 ‘‘𑀢𑁆𑀯𑀁 𑀆𑀯𑀼𑀲𑁄, 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀲𑀘𑁂 𑀫𑁂 𑀪𑀦𑁆𑀢𑁂, 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑀦𑀁 𑀦 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀧𑀦 𑀪𑀕𑀯𑀸 𑀫𑀬𑀸 𑀕𑀳𑀺𑀢𑀁 𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀅𑀳𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀆𑀕𑀢𑀁 𑀧𑀭𑀺𑀲𑀁 𑀆𑀕𑀢𑀓𑁆𑀔𑀡𑁂𑀬𑁂𑀯 𑀤𑀲𑁆𑀲𑁂𑀢𑀼𑀁 𑀮𑀪𑀺𑀲𑁆𑀲𑀸𑀫𑀺 ¶ , 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀔𑀡𑁂𑀬𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀘𑁂 𑀬𑀁 𑀪𑀕𑀯𑀸 𑀫𑀫 𑀧𑀭𑀫𑁆𑀫𑀼𑀔𑀸 𑀥𑀫𑁆𑀫𑀁 𑀓𑀣𑁂𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀳𑀁 ¶ 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂 𑀘𑀢𑀲𑁆𑀲𑁄 𑀘 𑀆𑀬𑀸𑀘𑀦𑀸𑀢𑀺 𑀅𑀝𑁆𑀞 𑀯𑀭𑁂 𑀬𑀸𑀘𑀺, 𑀪𑀕𑀯𑀸𑀧𑀺𑀲𑁆𑀲 𑀅𑀤𑀸𑀲𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀲𑁄 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀦𑀁 𑀧𑀢𑁆𑀯𑀸 𑀆𑀕𑀫𑀲𑀫𑁆𑀧𑀤𑀸, 𑀅𑀥𑀺𑀕𑀫𑀲𑀫𑁆𑀧𑀤𑀸, 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀤𑀸, 𑀅𑀢𑁆𑀢𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀲𑀫𑁆𑀧𑀤𑀸, 𑀢𑀺𑀢𑁆𑀣𑀯𑀸𑀲𑀲𑀫𑁆𑀧𑀤𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸, 𑀩𑀼𑀤𑁆𑀥𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸𑀢𑀺 𑀇𑀫𑀸𑀳𑀺 𑀲𑀢𑁆𑀢𑀳𑀺 𑀲𑀫𑁆𑀧𑀤𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞𑀯𑀭𑀤𑀸𑀬𑀚𑁆𑀚𑀁 𑀮𑀪𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀜𑁆𑀜𑀸𑀢𑁄 𑀕𑀕𑀦𑀫𑀚𑁆𑀛𑁂 𑀘𑀦𑁆𑀤𑁄 𑀯𑀺𑀬 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 ¶ 𑀯𑀭𑀤𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀆𑀦𑀦𑁆𑀤𑀁 𑀯𑀭𑁂𑀦 𑀲𑀦𑁆𑀢𑀧𑁆𑀧𑁂𑀲𑀺𑀁, 𑀧𑀼𑀩𑁆𑀩𑁂𑀧𑀸𑀳𑀁 𑀬𑀁 𑀬𑀁 𑀏𑀲 𑀬𑀸𑀘𑀺, 𑀢𑀁 𑀢𑀁 𑀅𑀤𑀸𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀚𑀼𑀡𑁆𑀳𑀓𑀼𑀫𑀸𑀭𑁄 𑀦𑀸𑀫 𑀳𑀼𑀢𑁆𑀯𑀸 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑁂 𑀆𑀘𑀭𑀺𑀬𑀲𑁆𑀲 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀩𑀸𑀳𑀼𑀦𑀸 𑀧𑀳𑀭𑀺𑀢𑁆𑀯𑀸 𑀢𑀲𑁆𑀲 𑀪𑀢𑁆𑀢𑀧𑀸𑀢𑀺𑀁 𑀪𑀺𑀦𑁆𑀤𑀺𑀁, 𑀩𑁆𑀭𑀸𑀳𑁆𑀫𑀡𑁄 𑀧𑀢𑀺𑀢𑁆𑀯𑀸 𑀯𑀺𑀭𑀯𑀺. 𑀓𑀼𑀫𑀸𑀭𑁄 𑀓𑀸𑀭𑀼𑀜𑁆𑀜𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀢𑀬𑀸, 𑀢𑀸𑀢, 𑀫𑀫 𑀪𑀺𑀓𑁆𑀔𑀸𑀪𑀸𑀚𑀦𑀁 𑀪𑀺𑀦𑁆𑀦𑀁, 𑀪𑀢𑁆𑀢𑀫𑀽𑀮𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀩𑁆𑀭𑀸𑀳𑁆𑀫𑀡, 𑀦 𑀤𑀸𑀦𑀸𑀳𑀁 𑀢𑀯 𑀪𑀢𑁆𑀢𑀫𑀽𑀮𑀁 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀅𑀳𑀁 𑀔𑁄 𑀧𑀦 𑀓𑀸𑀲𑀺𑀓𑀭𑀜𑁆𑀜𑁄 𑀧𑀼𑀢𑁆𑀢𑁄 𑀚𑀼𑀡𑁆𑀳𑀓𑀼𑀫𑀸𑀭𑁄 𑀦𑀸𑀫, 𑀫𑀬𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂 𑀆𑀕𑀦𑁆𑀢𑁆𑀯𑀸 𑀫𑀁 𑀥𑀦𑀁 𑀬𑀸𑀘𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑁄 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀺𑀢𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀧𑀺𑀢𑀸 ‘‘𑀚𑀻𑀯𑀦𑁆𑀢𑁂𑀦 𑀫𑁂 𑀧𑀼𑀢𑁆𑀢𑁄 𑀤𑀺𑀝𑁆𑀞𑁄, 𑀭𑀸𑀚𑀪𑀽𑀢𑀫𑁆𑀧𑀺 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀲𑁄 ¶ 𑀚𑀼𑀡𑁆𑀳𑀭𑀸𑀚𑀸 𑀦𑀸𑀫 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀫 𑀪𑀢𑁆𑀢𑀫𑀽𑀮𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀮𑀗𑁆𑀓𑀢𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀫𑁂𑀯 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀞𑀺𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀚𑀬𑀸𑀧𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀅𑀢𑀺𑀓𑁆𑀓𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦 𑀅𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩.

‘‘𑀲𑀼𑀡𑁄𑀳𑀺 ¶ 𑀫𑀬𑁆𑀳𑀁 𑀯𑀘𑀦𑀁 𑀚𑀦𑀺𑀦𑁆𑀤, 𑀅𑀢𑁆𑀣𑁂𑀦 𑀚𑀼𑀡𑁆𑀳𑀫𑁆𑀳𑀺 𑀇𑀥𑀸𑀦𑀼𑀧𑀢𑁆𑀢𑁄;

𑀦 𑀩𑁆𑀭𑀸𑀳𑁆𑀫𑀡𑁂 𑀅𑀤𑁆𑀥𑀺𑀓𑁂 𑀢𑀺𑀝𑁆𑀞𑀫𑀸𑀦𑁂, 𑀕𑀦𑁆𑀢𑀩𑁆𑀩𑀫𑀸𑀳𑀼 𑀤𑁆𑀯𑀺𑀧𑀤𑀺𑀦𑁆𑀤 𑀲𑁂𑀝𑁆𑀞𑀸’’𑀢𑀺.

𑀢𑀢𑁆𑀣 𑀚𑀼𑀡𑁆𑀳𑀫𑁆𑀳𑀻𑀢𑀺 𑀫𑀳𑀸𑀭𑀸𑀚, 𑀢𑀬𑀺 𑀚𑀼𑀡𑁆𑀳𑀫𑁆𑀳𑀺 𑀅𑀳𑀁 𑀏𑀓𑁂𑀦 𑀅𑀢𑁆𑀣𑁂𑀦 𑀇𑀥𑀸𑀦𑀼𑀧𑁆𑀧𑀢𑁆𑀢𑁄, 𑀦 𑀦𑀺𑀓𑁆𑀓𑀸𑀭𑀡𑀸 𑀇𑀥𑀸𑀕𑀢𑁄𑀫𑁆𑀳𑀻𑀢𑀺 𑀤𑀻𑀧𑁂𑀢𑀺. 𑀅𑀤𑁆𑀥𑀺𑀓𑁂𑀢𑀺 𑀅𑀤𑁆𑀥𑀸𑀦𑀁 𑀆𑀕𑀢𑁂. 𑀕𑀦𑁆𑀢𑀩𑁆𑀩𑀦𑁆𑀢𑀺 𑀢𑀁 𑀅𑀤𑁆𑀥𑀺𑀓𑀁 𑀅𑀤𑁆𑀥𑀸𑀦𑀫𑀸𑀕𑀢𑀁 𑀬𑀸𑀘𑀫𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀡𑁆𑀟𑀺𑀢𑀸 𑀦 𑀆𑀳𑀼 𑀦 𑀓𑀣𑁂𑀦𑁆𑀢𑀻𑀢𑀺.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀢𑁆𑀣𑀺𑀁 𑀯𑀚𑀺𑀭𑀗𑁆𑀓𑀼𑀲𑁂𑀦 𑀦𑀺𑀕𑁆𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪.

‘‘𑀲𑀼𑀡𑁄𑀫𑀺 ¶ 𑀢𑀺𑀝𑁆𑀞𑀸𑀫𑀺 𑀯𑀤𑁂𑀳𑀺 𑀩𑁆𑀭𑀳𑁆𑀫𑁂, 𑀬𑁂𑀦𑀸𑀲𑀺 𑀅𑀢𑁆𑀣𑁂𑀦 𑀇𑀥𑀸𑀦𑀼𑀧𑀢𑁆𑀢𑁄;

𑀓𑀁 𑀯𑀸 𑀢𑁆𑀯𑀫𑀢𑁆𑀣𑀁 𑀫𑀬𑀺 𑀧𑀢𑁆𑀣𑀬𑀸𑀦𑁄, 𑀇𑀥𑀸𑀕𑀫𑁄 𑀩𑁆𑀭𑀳𑁆𑀫𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺.

𑀢𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄.

𑀢𑀢𑁄 𑀧𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀭𑀜𑁆𑀜𑁄 𑀘 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀲𑁂𑀲𑀕𑀸𑀣𑀸 𑀓𑀣𑀺𑀢𑀸 𑁋

𑁧𑁫.

‘‘𑀤𑀤𑀸𑀳𑀺 𑀫𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁𑀲𑀢𑀸𑀦𑀺;

𑀧𑀭𑁄𑀲𑀳𑀲𑁆𑀲𑀜𑁆𑀘 𑀲𑀼𑀯𑀡𑁆𑀡𑀦𑀺𑀓𑁆𑀔𑁂, 𑀪𑀭𑀺𑀬𑀸 𑀘 𑀫𑁂 𑀲𑀸𑀤𑀺𑀲𑀻 𑀤𑁆𑀯𑁂 𑀤𑀤𑀸𑀳𑀺.

𑁧𑁬.

‘‘𑀢𑀧𑁄 ¶ 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑁄, 𑀫𑀦𑁆𑀢𑀸 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀘𑀺𑀢𑁆𑀢𑀭𑀽𑀧𑀸;

𑀬𑀓𑁆𑀔𑀸 𑀦𑀼 𑀢𑁂 𑀅𑀲𑁆𑀲𑀯𑀸 𑀲𑀦𑁆𑀢𑀺 𑀓𑁂𑀘𑀺, 𑀅𑀢𑁆𑀣𑀁 𑀯𑀸 𑀫𑁂 𑀅𑀪𑀺𑀚𑀸𑀦𑀸𑀲𑀺 𑀓𑀢𑁆𑀢𑀁.

𑁧𑁭.

‘‘𑀦 ¶ 𑀫𑁂 𑀢𑀧𑁄 𑀅𑀢𑁆𑀣𑀺 𑀦 𑀘𑀸𑀧𑀺 𑀫𑀦𑁆𑀢𑀸, 𑀬𑀓𑁆𑀔𑀸𑀧𑀺 𑀫𑁂 𑀅𑀲𑁆𑀲𑀯𑀸 𑀦𑀢𑁆𑀣𑀺 𑀓𑁂𑀘𑀺;

𑀅𑀢𑁆𑀣𑀫𑁆𑀧𑀺 𑀢𑁂 𑀦𑀸𑀪𑀺𑀚𑀸𑀦𑀸𑀫𑀺 𑀓𑀢𑁆𑀢𑀁, 𑀧𑀼𑀩𑁆𑀩𑁂 𑀘 𑀔𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺.

𑁧𑁮.

‘‘𑀧𑀞𑀫𑀁 𑀇𑀤𑀁 𑀤𑀲𑁆𑀲𑀦𑀁 𑀚𑀸𑀦𑀢𑁄 𑀫𑁂, 𑀦 𑀢𑀸𑀪𑀺𑀚𑀸𑀦𑀸𑀫𑀺 𑀇𑀢𑁄 𑀧𑀼𑀭𑀢𑁆𑀣𑀸;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀓𑀤𑀸 𑀓𑀼𑀳𑀺𑀁 𑀯𑀸 𑀅𑀳𑀼 𑀲𑀗𑁆𑀕𑀫𑁄 𑀦𑁄.

𑁧𑁯.

‘‘𑀕𑀦𑁆𑀥𑀸𑀭𑀭𑀸𑀚𑀲𑁆𑀲 𑀧𑀼𑀭𑀫𑁆𑀳𑀺 𑀭𑀫𑁆𑀫𑁂, 𑀅𑀯𑀲𑀺𑀫𑁆𑀳𑀲𑁂 𑀢𑀓𑁆𑀓𑀲𑀻𑀮𑀸𑀬𑀁 𑀤𑁂𑀯;

𑀢𑀢𑁆𑀣𑀦𑁆𑀥𑀓𑀸𑀭𑀫𑁆𑀳𑀺 𑀢𑀺𑀫𑀻𑀲𑀺𑀓𑀸𑀬𑀁, 𑀅𑀁𑀲𑁂𑀦 𑀅𑀁𑀲𑀁 𑀲𑀫𑀖𑀝𑁆𑀝𑀬𑀺𑀫𑁆𑀳.

𑁨𑁦.

‘‘𑀢𑁂 𑀢𑀢𑁆𑀣 𑀞𑀢𑁆𑀯𑀸𑀦 𑀉𑀪𑁄 𑀚𑀦𑀺𑀦𑁆𑀤, 𑀲𑀸𑀭𑀸𑀡𑀺𑀬𑀁 𑀯𑀻𑀢𑀺𑀲𑀸𑀭𑀬𑀺𑀫𑁆𑀳 𑀢𑀢𑁆𑀣;

𑀲𑀸𑀬𑁂𑀯 𑀦𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺, 𑀢𑀢𑁄 𑀦 𑀧𑀘𑁆𑀙𑀸 𑀦 𑀧𑀼𑀭𑁂 𑀅𑀳𑁄𑀲𑀺.

𑁨𑁧.

‘‘𑀬𑀤𑀸 𑀓𑀤𑀸𑀘𑀺 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂, 𑀲𑀫𑀸𑀕𑀫𑁄 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀦 𑀧𑀡𑁆𑀟𑀺𑀢𑀸 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀯𑀺𑀦𑀸𑀲𑀬𑀦𑁆𑀢𑀺.

𑁨𑁨.

‘‘𑀩𑀸𑀮𑀸𑀯 𑀔𑁄 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀯𑀺𑀦𑀸𑀲𑀬𑀦𑁆𑀢𑀺;

𑀩𑀳𑀼𑀫𑁆𑀧𑀺 𑀩𑀸𑀮𑁂𑀲𑀼 𑀓𑀢𑀁 𑀯𑀺𑀦𑀲𑁆𑀲𑀢𑀺, 𑀢𑀣𑀸 𑀳𑀺 𑀩𑀸𑀮𑀸 𑀅𑀓𑀢𑀜𑁆𑀜𑀼𑀭𑀽𑀧𑀸.

𑁨𑁩.

‘‘𑀥𑀻𑀭𑀸 ¶ 𑀘 𑀔𑁄 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀦 𑀦𑀸𑀲𑀬𑀦𑁆𑀢𑀺;

𑀅𑀧𑁆𑀧𑀫𑁆𑀧𑀺 ¶ 𑀥𑀻𑀭𑁂𑀲𑀼 𑀓𑀢𑀁 𑀦 𑀦𑀲𑁆𑀲𑀢𑀺, 𑀢𑀣𑀸 𑀳𑀺 𑀥𑀻𑀭𑀸 𑀲𑀼𑀓𑀢𑀜𑁆𑀜𑀼𑀭𑀽𑀧𑀸.

𑁨𑁪.

‘‘𑀤𑀤𑀸𑀫𑀺 ¶ 𑀢𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁𑀲𑀢𑀸𑀦𑀺;

𑀧𑀭𑁄𑀲𑀳𑀲𑁆𑀲𑀜𑁆𑀘 𑀲𑀼𑀯𑀡𑁆𑀡𑀦𑀺𑀓𑁆𑀔𑁂, 𑀪𑀭𑀺𑀬𑀸 𑀘 𑀢𑁂 𑀲𑀸𑀤𑀺𑀲𑀻 𑀤𑁆𑀯𑁂 𑀤𑀤𑀸𑀫𑀺.

𑁨𑁫.

‘‘𑀏𑀯𑀁 𑀲𑀢𑀁 𑀳𑁄𑀢𑀺 𑀲𑀫𑁂𑀘𑁆𑀘 𑀭𑀸𑀚, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;

𑀆𑀧𑀽𑀭𑀢𑀻 𑀓𑀸𑀲𑀺𑀧𑀢𑀻 𑀢𑀣𑀸𑀳𑀁, 𑀢𑀬𑀸𑀧𑀺 𑀫𑁂 𑀲𑀗𑁆𑀕𑀫𑁄 𑀅𑀚𑁆𑀚 𑀮𑀤𑁆𑀥𑁄’’𑀢𑀺.

𑀢𑀢𑁆𑀣 𑀲𑀸𑀤𑀺𑀲𑀻𑀢𑀺 𑀭𑀽𑀧𑀯𑀡𑁆𑀡𑀚𑀸𑀢𑀺𑀓𑀼𑀮𑀧𑀤𑁂𑀲𑁂𑀦 𑀫𑀬𑀸 𑀲𑀸𑀤𑀺𑀲𑀻 𑀏𑀓𑀲𑀤𑀺𑀲𑀸 𑀤𑁆𑀯𑁂 𑀫𑀳𑀸𑀬𑀲𑀸 𑀪𑀭𑀺𑀬𑀸 𑀘 𑀫𑁂 𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀪𑀺𑀁𑀲𑀭𑀽𑀧𑁄𑀢𑀺 𑀓𑀺𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀩𑀮𑀯𑀭𑀽𑀧𑀲𑀻𑀮𑀸𑀘𑀸𑀭𑀕𑀼𑀡𑀲𑀗𑁆𑀔𑀸𑀢𑀁 𑀢𑀧𑁄𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀫𑀦𑁆𑀢𑀸 𑀦𑀼 𑀢𑁂𑀢𑀺 𑀉𑀤𑀸𑀳𑀼 𑀯𑀺𑀘𑀺𑀢𑁆𑀭𑀭𑀽𑀧𑀸 𑀲𑀩𑁆𑀩𑀢𑁆𑀣𑀲𑀸𑀥𑀓𑀸 𑀫𑀦𑁆𑀢𑀸 𑀢𑁂 𑀅𑀢𑁆𑀣𑀺. 𑀅𑀲𑁆𑀲𑀯𑀸𑀢𑀺 𑀯𑀘𑀦𑀓𑀸𑀭𑀓𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀬𑀓𑀸 𑀬𑀓𑁆𑀔𑀸 𑀯𑀸 𑀢𑁂 𑀓𑁂𑀘𑀺 𑀲𑀦𑁆𑀢𑀺. 𑀓𑀢𑁆𑀢𑀦𑁆𑀢𑀺 𑀓𑀢𑀁, 𑀉𑀤𑀸𑀳𑀼 𑀢𑀬𑀸 𑀓𑀢𑀁 𑀓𑀺𑀜𑁆𑀘𑀺 𑀫𑀫 𑀅𑀢𑁆𑀣𑀁 𑀅𑀪𑀺𑀚𑀸𑀦𑀸𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀗𑁆𑀕𑀢𑀺𑀫𑀢𑁆𑀢𑀦𑁆𑀢𑀺 𑀲𑀫𑀸𑀕𑀫𑀫𑀢𑁆𑀢𑀁 𑀢𑀬𑀸 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀫𑀫 𑀆𑀲𑀻𑀢𑀺 𑀯𑀤𑀢𑀺. 𑀚𑀸𑀦𑀢𑁄 𑀫𑁂𑀢𑀺 𑀚𑀸𑀦𑀦𑁆𑀢𑀲𑁆𑀲 𑀫𑀫 𑀇𑀤𑀁 𑀧𑀞𑀫𑀁 𑀢𑀯 𑀤𑀲𑁆𑀲𑀦𑀁. 𑀦 𑀢𑀸𑀪𑀺𑀚𑀸𑀦𑀸𑀫𑀻𑀢𑀺 𑀦 𑀢𑀁 𑀅𑀪𑀺𑀚𑀸𑀦𑀸𑀫𑀺. 𑀢𑀺𑀫𑀻𑀲𑀺𑀓𑀸𑀬𑀦𑁆𑀢𑀺 𑀩𑀳𑀮𑀢𑀺𑀫𑀺𑀭𑀸𑀬𑀁 𑀭𑀢𑁆𑀢𑀺𑀬𑀁. 𑀢𑁂 𑀢𑀢𑁆𑀣 𑀞𑀢𑁆𑀯𑀸𑀦𑀸𑀢𑀺 𑀢𑁂 𑀫𑀬𑀁 𑀢𑀲𑁆𑀫𑀺𑀁 𑀅𑀁𑀲𑁂𑀦 𑀅𑀁𑀲𑀁 𑀖𑀝𑁆𑀝𑀺𑀢𑀝𑁆𑀞𑀸𑀦𑁂 𑀞𑀢𑁆𑀯𑀸 𑀯𑀻𑀢𑀺𑀲𑀸𑀭𑀬𑀺𑀫𑁆𑀳 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀣𑀁 𑀯𑀻𑀢𑀺𑀲𑀸𑀭𑀬𑀺𑀫𑁆𑀳, 𑀅𑀳𑀁 ‘‘𑀪𑀺𑀓𑁆𑀔𑀸𑀪𑀸𑀚𑀦𑀁 𑀫𑁂 𑀢𑀬𑀸 𑀪𑀺𑀦𑁆𑀦𑀁, 𑀪𑀢𑁆𑀢𑀫𑀽𑀮𑀁 𑀫𑁂 𑀤𑁂𑀳𑀻’’𑀢𑀺 𑀅𑀯𑀘𑀁, 𑀢𑁆𑀯𑀁 ‘‘𑀇𑀤𑀸𑀦𑀸𑀳𑀁 𑀢𑀯 𑀪𑀢𑁆𑀢𑀫𑀽𑀮𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀳𑀁 𑀔𑁄 𑀧𑀦 𑀓𑀸𑀲𑀺𑀓𑀭𑀜𑁆𑀜𑁄 𑀧𑀼𑀢𑁆𑀢𑁄 𑀚𑀼𑀡𑁆𑀳𑀓𑀼𑀫𑀸𑀭𑁄 𑀦𑀸𑀫, 𑀫𑀬𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂 𑀆𑀕𑀦𑁆𑀢𑁆𑀯𑀸 𑀫𑀁 𑀥𑀦𑀁 𑀬𑀸𑀘𑁂𑀬𑁆𑀬𑀸𑀲𑀻’’𑀢𑀺 𑀅𑀯𑀘𑀸𑀢𑀺 𑀇𑀫𑀁 𑀲𑀸𑀭𑀡𑀻𑀬𑀓𑀣𑀁 𑀓𑀭𑀺𑀫𑁆𑀳𑀸𑀢𑀺 𑀆𑀳. 𑀲𑀸𑀬𑁂𑀯 𑀦𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀻𑀢𑀺 𑀤𑁂𑀯, 𑀅𑀫𑁆𑀳𑀸𑀓𑀁 𑀲𑀸𑀬𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺, 𑀏𑀓𑀫𑀼𑀳𑀼𑀢𑁆𑀢𑀺𑀓𑀫𑀳𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁄𑀢𑀺 𑀢𑀢𑁄 𑀧𑀦 𑀢𑀁𑀫𑀼𑀳𑀼𑀢𑁆𑀢𑀺𑀓𑀫𑀺𑀢𑁆𑀢𑀥𑀫𑁆𑀫𑀢𑁄 𑀧𑀘𑁆𑀙𑀸 𑀯𑀸 𑀧𑀼𑀭𑁂 𑀯𑀸 𑀓𑀤𑀸𑀘𑀺 𑀅𑀫𑁆𑀳𑀸𑀓𑀁 𑀲𑀗𑁆𑀕𑀢𑀺 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑀸.

𑀦 𑀧𑀡𑁆𑀟𑀺𑀢𑀸𑀢𑀺 𑀩𑁆𑀭𑀸𑀳𑁆𑀫𑀡 𑀧𑀡𑁆𑀟𑀺𑀢𑀸 𑀦𑀸𑀫 𑀢𑀁𑀫𑀼𑀳𑀼𑀢𑁆𑀢𑀺𑀓𑀁 𑀲𑀗𑁆𑀕𑀢𑀺𑀁 𑀯𑀸 𑀘𑀺𑀭𑀓𑀸𑀮𑀲𑀦𑁆𑀣𑀯𑀸𑀦𑀺 𑀯𑀸 𑀬𑀁 𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀓𑀢𑀕𑀼𑀡𑀁 𑀯𑀸 𑀦 𑀦𑀸𑀲𑁂𑀦𑁆𑀢𑀺. 𑀩𑀳𑀼𑀫𑁆𑀧𑀻𑀢𑀺 𑀩𑀳𑀼𑀓𑀫𑁆𑀧𑀺 ¶ . 𑀅𑀓𑀢𑀜𑁆𑀜𑀼𑀭𑀽𑀧𑀸𑀢𑀺 𑀬𑀲𑁆𑀫𑀸 𑀩𑀸𑀮𑀸 𑀅𑀓𑀢𑀜𑁆𑀜𑀼𑀲𑀪𑀸𑀯𑀸, 𑀢𑀲𑁆𑀫𑀸 𑀢𑁂𑀲𑀼 𑀩𑀳𑀼𑀫𑁆𑀧𑀺 𑀓𑀢𑀁 𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀓𑀢𑀜𑁆𑀜𑀼𑀭𑀽𑀧𑀸𑀢𑀺 𑀲𑀼𑀝𑁆𑀞𑀼 𑀓𑀢𑀜𑁆𑀜𑀼𑀲𑀪𑀸𑀯𑀸. 𑀏𑀢𑁆𑀣𑀸𑀧𑀺 𑀢𑀢𑁆𑀣𑀸𑀧𑀺 𑀢𑀣𑀸 𑀳𑀻𑀢𑀺 𑀳𑀺-𑀓𑀸𑀭𑁄 𑀓𑀸𑀭𑀡𑀢𑁆𑀣𑁄. 𑀤𑀤𑀸𑀫𑀺 𑀢𑁂𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 𑀬𑀸𑀘𑀺𑀢𑀬𑀸𑀘𑀺𑀢𑀁 𑀤𑀤𑀦𑁆𑀢𑁄 𑀏𑀯𑀫𑀸𑀳. 𑀏𑀯𑀁 𑀲𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 ¶ 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀯𑀤𑀢𑀺, 𑀲𑀢𑀁 ¶ 𑀲𑀧𑁆𑀧𑀼𑀭𑀺𑀲𑀸𑀦𑀁 𑀏𑀓𑀯𑀸𑀭𑀫𑁆𑀧𑀺 𑀲𑀫𑁂𑀘𑁆𑀘 𑀲𑀗𑁆𑀕𑀢𑀺 𑀦𑀸𑀫 𑀏𑀯𑀁 𑀳𑁄𑀢𑀺. 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯𑀸𑀢𑀺 𑀏𑀢𑁆𑀣 𑀭-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀸𑀭𑀓𑀸𑀦𑀦𑁆𑀢𑀺 𑀢𑀸𑀭𑀓𑀕𑀡𑀫𑀚𑁆𑀛𑁂. 𑀓𑀸𑀲𑀺𑀧𑀢𑀻𑀢𑀺 𑀭𑀸𑀚𑀸𑀦𑀫𑀸𑀮𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀤𑁂𑀯, 𑀓𑀸𑀲𑀺𑀭𑀝𑁆𑀞𑀸𑀥𑀺𑀧𑀢𑀺 𑀬𑀣𑀸 𑀘𑀦𑁆𑀤𑁄 𑀢𑀸𑀭𑀓𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄 𑀢𑀸𑀭𑀓𑀕𑀡𑀧𑀭𑀺𑀯𑀼𑀢𑁄 𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀼𑀡𑁆𑀡𑀫𑀸 𑀆𑀧𑀽𑀭𑀢𑀺, 𑀢𑀣𑀸 𑀅𑀳𑀫𑁆𑀧𑀺 𑀅𑀚𑁆𑀚 𑀢𑀬𑀸 𑀤𑀺𑀦𑁆𑀦𑁂𑀳𑀺 𑀕𑀸𑀫𑀯𑀭𑀸𑀤𑀻𑀳𑀺 𑀆𑀧𑀽𑀭𑀸𑀫𑀻’’𑀢𑀺. 𑀢𑀬𑀸𑀧𑀺 𑀫𑁂𑀢𑀺 𑀫𑀬𑀸 𑀧𑀼𑀩𑁆𑀩𑁂 𑀢𑀬𑀸 𑀲𑀤𑁆𑀥𑀺𑀁 𑀮𑀤𑁆𑀥𑁄𑀧𑀺 𑀲𑀗𑁆𑀕𑀫𑁄 𑀅𑀮𑀤𑁆𑀥𑁄𑀯, 𑀅𑀚𑁆𑀚 𑀧𑀦 𑀫𑀫 𑀫𑀦𑁄𑀭𑀣𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀫𑀬𑀸 𑀢𑀬𑀸 𑀲𑀳 𑀲𑀗𑁆𑀕𑀫𑁄 𑀮𑀤𑁆𑀥𑁄 𑀦𑀸𑀫𑀸𑀢𑀺 𑀦𑀺𑀧𑁆𑀨𑀦𑁆𑀦𑀁 𑀫𑁂 𑀢𑀬𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀨𑀮𑀦𑁆𑀢𑀺 𑀯𑀤𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀆𑀦𑀦𑁆𑀤𑀁 𑀯𑀭𑁂𑀦 𑀲𑀦𑁆𑀢𑀧𑁆𑀧𑁂𑀲𑀺𑀁 𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀼𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁫𑁭] 𑁩. 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀬𑀲𑁄𑀓𑀭𑁄 𑀧𑀼𑀜𑁆𑀜𑀓𑀭𑁄𑀳𑀫𑀲𑁆𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀧𑀣𑀯𑀺𑀧𑀯𑁂𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀇𑀤𑀸𑀦𑁂𑀯𑁂𑀲, 𑀪𑀺𑀓𑁆𑀔𑀯𑁂, 𑀫𑀫 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄, 𑀧𑀼𑀩𑁆𑀩𑁂𑀧𑀺 𑀥𑀫𑁆𑀫𑀘𑀓𑁆𑀓𑁂 ¶ 𑀧𑀳𑀸𑀭𑀁 𑀤𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀯𑀻𑀘𑀺𑀧𑀭𑀸𑀬𑀡𑁄 𑀚𑀸𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀥𑀫𑁆𑀫𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀤𑁂𑀯𑀤𑀢𑁆𑀢𑁄 𑀅𑀥𑀫𑁆𑀫𑁄 𑀦𑀸𑀫. 𑀢𑁂𑀲𑀼 𑀥𑀫𑁆𑀫𑁄 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀤𑀺𑀩𑁆𑀩𑀭𑀣𑀯𑀭𑀫𑀪𑀺𑀭𑀼𑀬𑁆𑀳 𑀅𑀘𑁆𑀙𑀭𑀸𑀕𑀡𑀧𑀭𑀺𑀯𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑁂𑀲𑀼 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀯𑀺𑀭𑀫𑀺𑀢𑁆𑀯𑀸 𑀫𑀸𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑀁 𑀧𑀺𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑀁 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑀜𑁆𑀘 𑀧𑀽𑀭𑁂𑀣 ¶ , 𑀏𑀯𑀁 𑀲𑀕𑁆𑀕𑀧𑀭𑀸𑀬𑀡𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺𑀲𑁆𑀲𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀅𑀥𑀫𑁆𑀫𑁄 𑀧𑀦 𑀤𑁂𑀯𑀧𑀼𑀢𑁆𑀢𑁄 ‘‘𑀧𑀸𑀡𑀁 𑀳𑀦𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑀁 𑀯𑀸𑀫𑀁 𑀓𑀭𑁄𑀢𑀺. 𑀅𑀣 𑀢𑁂𑀲𑀁 ¶ 𑀆𑀓𑀸𑀲𑁂 𑀭𑀣𑀸 𑀲𑀫𑁆𑀫𑀼𑀔𑀸 𑀅𑀳𑁂𑀲𑀼𑀁. 𑀅𑀣 𑀦𑁂𑀲𑀁 𑀧𑀭𑀺𑀲𑀸 ‘‘𑀢𑀼𑀫𑁆𑀳𑁂 𑀓𑀲𑁆𑀲, 𑀢𑀼𑀫𑁆𑀳𑁂 𑀓𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀬𑀁 𑀥𑀫𑁆𑀫𑀲𑁆𑀲, 𑀫𑀬𑀁 𑀅𑀥𑀫𑁆𑀫𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀤𑁆𑀯𑀺𑀥𑀸 𑀚𑀸𑀢𑀸. 𑀥𑀫𑁆𑀫𑁄𑀧𑀺 𑀅𑀥𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀅𑀥𑀫𑁆𑀫𑁄, 𑀅𑀳𑀁 𑀥𑀫𑁆𑀫𑁄, 𑀫𑀕𑁆𑀕𑁄 𑀫𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑁄, 𑀢𑀯 𑀭𑀣𑀁 𑀑𑀓𑁆𑀓𑀸𑀫𑁂𑀢𑁆𑀯𑀸 𑀫𑀬𑁆𑀳𑀁 𑀫𑀕𑁆𑀕𑀁 𑀤𑁂𑀳𑀻’’𑀢𑀺 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁬.

‘‘𑀬𑀲𑁄𑀓𑀭𑁄 𑀧𑀼𑀜𑁆𑀜𑀓𑀭𑁄𑀳𑀫𑀲𑁆𑀫𑀺, 𑀲𑀤𑀸𑀢𑁆𑀣𑀼𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀫𑀕𑁆𑀕𑀸𑀭𑀳𑁄 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄, 𑀥𑀫𑁆𑀫𑁄 𑀅𑀳𑀁 𑀤𑁂𑀳𑀺 𑀅𑀥𑀫𑁆𑀫 𑀫𑀕𑁆𑀕’’𑀦𑁆𑀢𑀺.

𑀢𑀢𑁆𑀣 𑀬𑀲𑁄𑀓𑀭𑁄𑀢𑀺 𑀅𑀳𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀬𑀲𑀤𑀸𑀬𑀓𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀤𑀸𑀢𑁆𑀣𑀼𑀢𑁄𑀢𑀺 𑀲𑀤𑀸 𑀣𑀼𑀢𑁄 𑀦𑀺𑀘𑁆𑀘𑀧𑀲𑀢𑁆𑀣𑁄. 𑀢𑀢𑁄 𑀧𑀭𑀸 𑁋

𑁨𑁭.

‘‘𑀅𑀥𑀫𑁆𑀫𑀬𑀸𑀦𑀁 𑀤𑀴𑁆𑀳𑀫𑀸𑀭𑀼𑀳𑀺𑀢𑁆𑀯𑀸, 𑀅𑀲𑀦𑁆𑀢𑀲𑀦𑁆𑀢𑁄 𑀩𑀮𑀯𑀸𑀳𑀫𑀲𑁆𑀫𑀺;

𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀁, 𑀫𑀕𑁆𑀕𑀁 𑀅𑀳𑀁 𑀥𑀫𑁆𑀫 𑀅𑀤𑀺𑀦𑁆𑀦𑀧𑀼𑀩𑁆𑀩𑀁.

𑁨𑁮.

‘‘𑀥𑀫𑁆𑀫𑁄 ¶ 𑀳𑀯𑁂 𑀧𑀸𑀢𑀼𑀭𑀳𑁄𑀲𑀺 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀅𑀥𑀫𑁆𑀫𑁄 𑀉𑀤𑀧𑀸𑀤𑀺 𑀮𑁄𑀓𑁂;

𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀲𑀦𑀦𑁆𑀢𑀦𑁄 𑀘, 𑀉𑀬𑁆𑀬𑀸𑀳𑀺 𑀚𑁂𑀝𑁆𑀞𑀲𑁆𑀲 𑀓𑀦𑀺𑀝𑁆𑀞 𑀫𑀕𑁆𑀕𑀸.

𑁨𑁯.

‘‘𑀦 𑀬𑀸𑀘𑀦𑀸𑀬 𑀦𑀧𑀺 𑀧𑀸𑀢𑀺𑀭𑀽𑀧𑀸, 𑀦 𑀅𑀭𑀳𑀢𑀸 𑀢𑁂𑀳𑀁 𑀤𑀤𑁂𑀬𑁆𑀬𑀁 𑀫𑀕𑁆𑀕𑀁;

𑀬𑀼𑀤𑁆𑀥𑀜𑁆𑀘 ¶ 𑀦𑁄 𑀳𑁄𑀢𑀼 𑀉𑀪𑀺𑀦𑁆𑀦𑀫𑀚𑁆𑀚, 𑀬𑀼𑀤𑁆𑀥𑀫𑁆𑀳𑀺 𑀬𑁄 𑀚𑁂𑀲𑁆𑀲𑀢𑀺 𑀢𑀲𑁆𑀲 𑀫𑀕𑁆𑀕𑁄.

𑁩𑁦.

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀲𑀝𑁄𑀳𑀫𑀲𑁆𑀫𑀺, 𑀫𑀳𑀩𑁆𑀩𑀮𑁄 𑀅𑀫𑀺𑀢𑀬𑀲𑁄 𑀅𑀢𑀼𑀮𑁆𑀬𑁄;

𑀕𑀼𑀡𑁂𑀳𑀺 𑀲𑀩𑁆𑀩𑁂𑀳𑀺 𑀉𑀧𑁂𑀢𑀭𑀽𑀧𑁄, 𑀥𑀫𑁆𑀫𑁄 𑀅𑀥𑀫𑁆𑀫 𑀢𑁆𑀯𑀁 𑀓𑀣𑀁 𑀯𑀺𑀚𑁂𑀲𑁆𑀲𑀲𑀺.

𑁩𑁧.

‘‘𑀮𑁄𑀳𑁂𑀦 𑀯𑁂 𑀳𑀜𑁆𑀜𑀢𑀺 𑀚𑀸𑀢𑀭𑀽𑀧𑀁, 𑀦 𑀚𑀸𑀢𑀭𑀽𑀧𑁂𑀦 𑀳𑀦𑀦𑁆𑀢𑀺 𑀮𑁄𑀳𑀁;

𑀲𑀘𑁂 𑀅𑀥𑀫𑁆𑀫𑁄 𑀳𑀜𑁆𑀙𑀢𑀺 𑀥𑀫𑁆𑀫𑀫𑀚𑁆𑀚, 𑀅𑀬𑁄 𑀲𑀼𑀯𑀡𑁆𑀡𑀁 𑀯𑀺𑀬 𑀤𑀲𑁆𑀲𑀦𑁂𑀬𑁆𑀬𑀁.

𑁩𑁨.

‘‘𑀲𑀘𑁂 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫, 𑀦 𑀢𑀼𑀬𑁆𑀳 𑀯𑀼𑀟𑁆𑀠𑀸 𑀘 𑀕𑀭𑀽 𑀘 𑀅𑀢𑁆𑀣𑀺;

𑀫𑀕𑁆𑀕𑀜𑁆𑀘 𑀢𑁂 𑀤𑀫𑁆𑀫𑀺 𑀧𑀺𑀬𑀸𑀧𑁆𑀧𑀺𑀬𑁂𑀦, 𑀯𑀸𑀘𑀸𑀤𑀼𑀭𑀼𑀢𑁆𑀢𑀸𑀦𑀺𑀧𑀺 𑀢𑁂 𑀔𑀫𑀸𑀫𑀻’’𑀢𑀺. 𑁋

𑀇𑀫𑀸 𑀙 𑀕𑀸𑀣𑀸 𑀢𑁂𑀲𑀜𑁆𑀜𑁂𑀯 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀓𑀣𑀺𑀢𑀸.

𑀢𑀢𑁆𑀣 ¶ 𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀦𑁆𑀢𑀺 𑀲𑁄𑀫𑁆𑀳𑀺 𑀅𑀳𑀁 𑀅𑀥𑀫𑁆𑀫𑁄 𑀅𑀥𑀫𑁆𑀫𑀬𑀸𑀦𑀁 𑀭𑀣𑀁 𑀆𑀭𑀼𑀴𑁆𑀳𑁄 𑀅𑀪𑀻𑀢𑁄 𑀩𑀮𑀯𑀸. 𑀓𑀺𑀁𑀓𑀸𑀭𑀡𑀸 𑀅𑀚𑁆𑀚 𑀪𑁄 𑀥𑀫𑁆𑀫, 𑀓𑀲𑁆𑀲𑀘𑀺 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀫𑀕𑁆𑀕𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻𑀢𑀺. 𑀧𑀼𑀩𑁆𑀩𑁂𑀢𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄 𑀘 𑀧𑀼𑀩𑁆𑀩𑁂 𑀧𑀸𑀢𑀼𑀭𑀳𑁄𑀲𑀺, 𑀧𑀘𑁆𑀙𑀸 𑀅𑀥𑀫𑁆𑀫𑁄. 𑀚𑁂𑀝𑁆𑀞𑁄 𑀘𑀸𑀢𑀺 𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁂𑀦 𑀅𑀳𑀁 𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀧𑁄𑀭𑀸𑀡𑀓𑁄 𑀘, 𑀢𑁆𑀯𑀁 𑀧𑀦 𑀓𑀦𑀺𑀝𑁆𑀞𑁄, 𑀢𑀲𑁆𑀫𑀸 𑀫𑀕𑁆𑀕𑀸 𑀉𑀬𑁆𑀬𑀸𑀳𑀻𑀢𑀺 𑀯𑀤𑀢𑀺. 𑀦𑀧𑀺 ¶ 𑀧𑀸𑀢𑀺𑀭𑀽𑀧𑀸𑀢𑀺 𑀅𑀳𑀜𑁆𑀳𑀺 𑀢𑁂 𑀦𑁂𑀯 𑀬𑀸𑀘𑀦𑀸𑀬 𑀦 𑀧𑀢𑀺𑀭𑀽𑀧𑀯𑀘𑀦𑁂𑀦 𑀫𑀕𑁆𑀕𑀸𑀭𑀳𑀢𑀸𑀬 𑀫𑀕𑁆𑀕𑀁 𑀤𑀤𑁂𑀬𑁆𑀬𑀁. 𑀅𑀦𑀼𑀯𑀺𑀲𑀝𑁄𑀢𑀺 𑀅𑀳𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀢𑁆𑀢𑀦𑁄 𑀕𑀼𑀡𑁂𑀦 𑀧𑀢𑁆𑀣𑀝𑁄 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄. 𑀮𑁄𑀳𑁂𑀦𑀸𑀢𑀺 𑀅𑀬𑀫𑀼𑀝𑁆𑀞𑀺𑀓𑁂𑀦. 𑀳𑀜𑁆𑀙𑀢𑀻𑀢𑀺 𑀳𑀦𑀺𑀲𑁆𑀲𑀢𑀺. 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫𑀸𑀢𑀺 𑀲𑀘𑁂 𑀢𑁆𑀯𑀁 𑀬𑀼𑀤𑁆𑀥𑀩𑀮𑁄𑀲𑀺 𑀅𑀥𑀫𑁆𑀫. 𑀯𑀼𑀟𑁆𑀠𑀸 𑀘 𑀕𑀭𑀽 𑀘𑀸𑀢𑀺 𑀬𑀤𑀺 𑀢𑀼𑀬𑁆𑀳𑀁 ‘‘𑀇𑀫𑁂 𑀯𑀼𑀟𑁆𑀠𑀸, 𑀇𑀫𑁂 𑀕𑀭𑀽 𑀧𑀡𑁆𑀟𑀺𑀢𑀸’’𑀢𑀺 𑀏𑀯𑀁 𑀦𑀢𑁆𑀣𑀺. 𑀧𑀺𑀬𑀸𑀧𑁆𑀧𑀺𑀬𑁂𑀦𑀸𑀢𑀺 𑀧𑀺𑀬𑁂𑀦𑀸𑀧𑀺 𑀅𑀧𑁆𑀧𑀺𑀬𑁂𑀦𑀸𑀧𑀺 𑀤𑀤𑀦𑁆𑀢𑁄 𑀧𑀺𑀬𑁂𑀦 𑀯𑀺𑀬 𑀢𑁂 𑀫𑀕𑁆𑀕𑀁 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀩𑁄𑀥𑀺𑀲𑀢𑁆𑀢𑁂𑀦 ¶ 𑀧𑀦 𑀇𑀫𑀸𑀬 𑀕𑀸𑀣𑀸𑀬 𑀓𑀣𑀺𑀢𑀓𑁆𑀔𑀡𑁂𑀬𑁂𑀯 𑀅𑀥𑀫𑁆𑀫𑁄 𑀭𑀣𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀁𑀲𑀺𑀭𑁄 𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀦𑀺𑀩𑁆𑀩𑀢𑁆𑀢𑀺. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩.

‘‘𑀇𑀤𑀜𑁆𑀘 𑀲𑀼𑀢𑁆𑀯𑀸 𑀯𑀘𑀦𑀁 𑀅𑀥𑀫𑁆𑀫𑁄, 𑀅𑀯𑀁𑀲𑀺𑀭𑁄 𑀧𑀢𑀺𑀢𑁄 𑀉𑀤𑁆𑀥𑀧𑀸𑀤𑁄;

𑀬𑀼𑀤𑁆𑀥𑀢𑁆𑀣𑀺𑀓𑁄 𑀘𑁂 𑀦 𑀮𑀪𑀸𑀫𑀺 𑀬𑀼𑀤𑁆𑀥𑀁, 𑀏𑀢𑁆𑀢𑀸𑀯𑀢𑀸 𑀳𑁄𑀢𑀺 𑀳𑀢𑁄 𑀅𑀥𑀫𑁆𑀫𑁄.

𑁩𑁪.

‘‘𑀔𑀦𑁆𑀢𑀻𑀩𑀮𑁄 𑀬𑀼𑀤𑁆𑀥𑀩𑀮𑀁 𑀯𑀺𑀚𑁂𑀢𑁆𑀯𑀸, 𑀳𑀦𑁆𑀢𑁆𑀯𑀸 𑀅𑀥𑀫𑁆𑀫𑀁 𑀦𑀺𑀳𑀦𑀺𑀢𑁆𑀯 𑀪𑀽𑀫𑁆𑀬𑀸;

𑀧𑀸𑀬𑀸𑀲𑀺 𑀯𑀺𑀢𑁆𑀢𑁄 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦𑀁, 𑀫𑀕𑁆𑀕𑁂𑀦𑁂𑀯 𑀅𑀢𑀺𑀩𑀮𑁄 𑀲𑀘𑁆𑀘𑀦𑀺𑀓𑁆𑀓𑀫𑁄.

𑁩𑁫.

‘‘𑀫𑀸𑀢𑀸 𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀅𑀲𑀫𑁆𑀫𑀸𑀦𑀺𑀢𑀸 𑀬𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺 𑀢𑁂;

𑀬𑀣𑀸 𑀅𑀥𑀫𑁆𑀫𑁄 𑀧𑀢𑀺𑀢𑁄 𑀅𑀯𑀁𑀲𑀺𑀭𑁄.

𑁩𑁬.

‘‘𑀫𑀸𑀢𑀸 𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀲𑀼𑀲𑀫𑁆𑀫𑀸𑀦𑀺𑀢𑀸 𑀬𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑁂;

𑀬𑀣𑀸𑀧𑀺 𑀥𑀫𑁆𑀫𑁄 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦’’𑀦𑁆𑀢𑀺.

𑀢𑀢𑁆𑀣 ¶ 𑀬𑀼𑀤𑁆𑀥𑀢𑁆𑀣𑀺𑀓𑁄 𑀘𑁂𑀢𑀺 𑀅𑀬𑀁 𑀢𑀲𑁆𑀲 𑀯𑀺𑀮𑀸𑀧𑁄, 𑀲𑁄 𑀓𑀺𑀭𑁂𑀯𑀁 𑀯𑀺𑀮𑀧𑀦𑁆𑀢𑁄𑀬𑁂𑀯 𑀧𑀢𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄 ¶ . 𑀏𑀢𑁆𑀢𑀸𑀯𑀢𑀸𑀢𑀺 𑀪𑀺𑀓𑁆𑀔𑀯𑁂, 𑀬𑀸𑀯𑀢𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄, 𑀢𑀸𑀯𑀢𑀸 𑀅𑀥𑀫𑁆𑀫𑁄 𑀳𑀢𑁄 𑀦𑀸𑀫 𑀳𑁄𑀢𑀺. 𑀔𑀦𑁆𑀢𑀻𑀩𑀮𑁄𑀢𑀺 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀥𑀫𑁆𑀫𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀻𑀩𑀮𑁄 𑀢𑀁 𑀬𑀼𑀤𑁆𑀥𑀩𑀮𑀁 𑀯𑀺𑀚𑁂𑀢𑁆𑀯𑀸 𑀯𑀥𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀳𑀦𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀯𑀺𑀢𑁆𑀢𑀚𑀸𑀢𑀢𑀸𑀬 𑀯𑀺𑀢𑁆𑀢𑁄 𑀅𑀢𑁆𑀢𑀦𑁄 𑀭𑀣𑀁 𑀆𑀭𑀼𑀬𑁆𑀳 𑀫𑀕𑁆𑀕𑁂𑀦𑁂𑀯 𑀲𑀘𑁆𑀘𑀦𑀺𑀓𑁆𑀓𑀫𑁄 𑀢𑀣𑀧𑀭𑀓𑁆𑀓𑀫𑁄 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀧𑀸𑀬𑀸𑀲𑀺. 𑀅𑀲𑀫𑁆𑀫𑀸𑀦𑀺𑀢𑀸𑀢𑀺 𑀅𑀲𑀓𑁆𑀓𑀢𑀸. 𑀲𑀭𑀻𑀭𑀤𑁂𑀳𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀮𑁄𑀓𑁂 𑀲𑀭𑀻𑀭𑀲𑀗𑁆𑀔𑀸𑀢𑀁 𑀤𑁂𑀳𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀦𑀺𑀭𑀬𑀁 𑀯𑀚𑀦𑁆𑀢𑀻𑀢𑀺 𑀬𑀲𑁆𑀲 𑀧𑀸𑀧𑀧𑀼𑀕𑁆𑀕𑀮𑀲𑁆𑀲 𑀏𑀢𑁂 𑀲𑀓𑁆𑀓𑀸𑀭𑀸𑀭𑀳𑀸 𑀕𑁂𑀳𑁂 𑀅𑀲𑀓𑁆𑀓𑀢𑀸, 𑀢𑀣𑀸𑀭𑀽𑀧𑀸 𑀬𑀣𑀸 𑀅𑀥𑀫𑁆𑀫𑁄 𑀧𑀢𑀺𑀢𑁄 𑀅𑀯𑀁𑀲𑀺𑀭𑁄, 𑀏𑀯𑀁 𑀅𑀯𑀁𑀲𑀺𑀭𑀸 ¶ 𑀦𑀺𑀭𑀬𑀁 𑀯𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀕𑀢𑀺𑀁 𑀯𑀚𑀦𑁆𑀢𑀻𑀢𑀺 𑀬𑀲𑁆𑀲 𑀧𑀦𑁂𑀢𑁂 𑀲𑀓𑁆𑀓𑀢𑀸, 𑀢𑀸𑀤𑀺𑀲𑀸 𑀧𑀡𑁆𑀟𑀺𑀢𑀸 𑀬𑀣𑀸𑀧𑀺 𑀥𑀫𑁆𑀫𑁄 𑀲𑀦𑁆𑀤𑀦𑀁 𑀅𑀪𑀺𑀭𑀼𑀬𑁆𑀳 𑀤𑁂𑀯𑀮𑁄𑀓𑀁 𑀕𑀢𑁄, 𑀏𑀯𑀁 𑀲𑀼𑀕𑀢𑀺𑀁 𑀯𑀚𑀦𑁆𑀢𑀻𑀢𑀺.

𑀲𑀢𑁆𑀣𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀥𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀧𑀭𑀺𑀲𑀸𑀧𑀺𑀲𑁆𑀲 𑀤𑁂𑀯𑀤𑀢𑁆𑀢𑀧𑀭𑀺𑀲𑀸, 𑀥𑀫𑁆𑀫𑁄 𑀧𑀦 𑀅𑀳𑀫𑁂𑀯, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸𑀬𑁂𑀯𑀸’’𑀢𑀺.

𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁫𑁮] 𑁪. 𑀉𑀤𑀬𑀚𑀸𑀢𑀓𑀯𑀡𑁆𑀡𑀦𑀸

𑀏𑀓𑀸 𑀦𑀺𑀲𑀺𑀦𑁆𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀓𑀼𑀲𑀚𑀸𑀢𑀓𑁂 (𑀚𑀸. 𑁨.𑁨𑁦.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑀲𑁆𑀫𑀸 𑀓𑀺𑀮𑁂𑀲𑀯𑀲𑁂𑀦 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀺? 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀲𑀫𑀺𑀤𑁆𑀥𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀲𑀼𑀭𑀼𑀦𑁆𑀥𑀦𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸𑀬 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀏𑀓𑀕𑀩𑁆𑀪𑁂 𑀯𑀲𑀦𑁆𑀢𑀸𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀪𑀯𑀲𑁂𑀦 𑀦 𑀑𑀮𑁄𑀓𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀓𑀸𑀲𑀺𑀭𑀝𑁆𑀞𑁂 𑀲𑀼𑀭𑀼𑀦𑁆𑀥𑀦𑀦𑀕𑀭𑁂 𑀓𑀸𑀲𑀺𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀦𑁂𑀯 𑀧𑀼𑀢𑁆𑀢𑁄, 𑀦 𑀥𑀻𑀢𑀸 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀤𑁂𑀯𑀺𑀬𑁄 ‘‘𑀧𑀼𑀢𑁆𑀢𑁂 𑀧𑀢𑁆𑀣𑁂𑀣𑀸’’𑀢𑀺 𑀆𑀳. 𑀅𑀕𑁆𑀕𑀫𑀳𑁂𑀲𑀻𑀧𑀺 𑀭𑀜𑁆𑀜𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀫𑀳𑀸𑀚𑀦𑀲𑁆𑀲 𑀳𑀤𑀬𑀁 𑀯𑀟𑁆𑀠𑁂𑀢𑁆𑀯𑀸 𑀚𑀸𑀢𑀪𑀸𑀯𑁂𑀦 ‘‘𑀉𑀤𑀬𑀪𑀤𑁆𑀤𑁄’’𑀢𑀺 ¶ 𑀦𑀸𑀫𑀁 𑀓𑀭𑀺𑀁𑀲𑀼. 𑀓𑀼𑀫𑀸𑀭𑀲𑁆𑀲 𑀧𑀤𑀲𑀸 𑀘𑀭𑀡𑀓𑀸𑀮𑁂 𑀅𑀜𑁆𑀜𑁄𑀧𑀺 𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀅𑀜𑁆𑀜𑀢𑀭𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀓𑀼𑀫𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀸𑀧𑀺 ‘‘𑀉𑀤𑀬𑀪𑀤𑁆𑀤𑀸’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀓𑀼𑀫𑀸𑀭𑁄 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺 ¶ , 𑀚𑀸𑀢𑀩𑁆𑀭𑀳𑁆𑀫𑀘𑀸𑀭𑀻 𑀧𑀦 𑀅𑀳𑁄𑀲𑀺, 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀦 𑀢𑀲𑁆𑀲 𑀓𑀺𑀮𑁂𑀲𑁂𑀲𑀼 𑀘𑀺𑀢𑁆𑀢𑀁 𑀅𑀮𑁆𑀮𑀻𑀬𑀺. 𑀭𑀸𑀚𑀸 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑀼𑀓𑀸𑀫𑁄 ‘‘𑀓𑀼𑀫𑀸𑀭𑀲𑁆𑀲 𑀇𑀤𑀸𑀦𑀺 𑀭𑀚𑁆𑀚𑀲𑀼𑀔𑀲𑁂𑀯𑀦𑀓𑀸𑀮𑁄, 𑀦𑀸𑀝𑀓𑀸𑀧𑀺𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄, 𑀓𑀺𑀮𑁂𑀲𑁂𑀲𑀼 𑀫𑁂 𑀘𑀺𑀢𑁆𑀢𑀁 𑀦 𑀅𑀮𑁆𑀮𑀻𑀬𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 𑀭𑀢𑁆𑀢𑀚𑀫𑁆𑀩𑀼𑀦𑀤𑀫𑀬𑀁 𑀇𑀢𑁆𑀣𑀺𑀭𑀽𑀧𑀁 𑀓𑀸𑀭𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀇𑀢𑁆𑀣𑀺𑀁 𑀮𑀪𑀫𑀸𑀦𑁄 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑁂𑀲𑁂𑀲𑀺. 𑀢𑁂 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀭𑀺𑀳𑀸𑀭𑀸𑀧𑁂𑀢𑁆𑀯𑀸 𑀢𑀣𑀸𑀭𑀽𑀧𑀁 𑀇𑀢𑁆𑀣𑀺𑀁 𑀅𑀮𑀪𑀦𑁆𑀢𑀸 𑀉𑀤𑀬𑀪𑀤𑁆𑀤𑀁 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀲𑀼𑀁. 𑀲𑀸 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑁂𑀲𑀁 𑀅𑀦𑀺𑀘𑁆𑀙𑀫𑀸𑀦𑀸𑀦𑀜𑁆𑀜𑁂𑀯 𑀯𑁂𑀫𑀸𑀢𑀺𑀓𑀁 𑀪𑀕𑀺𑀦𑀺𑀁 𑀉𑀤𑀬𑀪𑀤𑁆𑀤𑀓𑀼𑀫𑀸𑀭𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀢𑁂 𑀧𑀦 𑀤𑁆𑀯𑁂𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀫𑁂𑀯 𑀯𑀲𑀺𑀁𑀲𑀼.

𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀩𑁄𑀥𑀺𑀲𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀉𑀪𑁄 𑀏𑀓𑀕𑀩𑁆𑀪𑁂 𑀯𑀲𑀫𑀸𑀦𑀸𑀧𑀺 𑀮𑁄𑀪𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀑𑀮𑁄𑀓𑁂𑀲𑀼𑀁, 𑀅𑀧𑀺𑀘 𑀔𑁄 𑀧𑀦 ‘‘𑀬𑁄 𑀅𑀫𑁆𑀳𑁂𑀲𑀼 𑀧𑀞𑀫𑀢𑀭𑀁 𑀓𑀸𑀮𑀁 𑀓𑀭𑁄𑀢𑀺, 𑀲𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’𑀢𑀺 𑀆𑀭𑁄𑀘𑁂𑀢𑀽’’𑀢𑀺 𑀲𑀗𑁆𑀕𑀭𑀫𑀓𑀁𑀲𑀼. 𑀅𑀣 𑀔𑁄 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀲𑁂𑀓𑀢𑁄 𑀲𑀢𑁆𑀢𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀓𑀸𑀮𑀫𑀓𑀸𑀲𑀺. 𑀅𑀜𑁆𑀜𑁄 𑀭𑀸𑀚𑀸 𑀦𑀸𑀳𑁄𑀲𑀺, 𑀉𑀤𑀬𑀪𑀤𑁆𑀤𑀸𑀬𑀬𑁂𑀯 𑀆𑀡𑀸 𑀧𑀯𑀢𑁆𑀢𑀺. 𑀅𑀫𑀘𑁆𑀘𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀘𑀼𑀢𑀺𑀓𑁆𑀔𑀡𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀢𑁆𑀢𑀁 𑀧𑀢𑁆𑀯𑀸 𑀬𑀲𑀫𑀳𑀦𑁆𑀢𑀢𑀸𑀬 𑀲𑀢𑁆𑀢𑀸𑀳𑀁 𑀅𑀦𑀼𑀲𑁆𑀲𑀭𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀺 𑀲𑁄 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀉𑀤𑀬𑀪𑀤𑁆𑀤𑀁 𑀭𑀸𑀚𑀥𑀻𑀢𑀭𑀁 𑀥𑀦𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀗𑁆𑀕𑀭𑀁 𑀫𑁄𑀘𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀤𑀸 ¶ 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁄 𑀳𑁄𑀢𑀺. 𑀭𑀸𑀚𑀥𑀻𑀢𑀸𑀧𑀺 𑀢𑀁 𑀤𑀺𑀯𑀲𑀁 𑀭𑀢𑁆𑀢𑀺𑀪𑀸𑀕𑁂 𑀧𑀺𑀳𑀺𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀞𑀧𑀺𑀢𑀆𑀭𑀓𑁆𑀔𑁂 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀯𑀭𑀢𑀮𑁂 𑀅𑀮𑀗𑁆𑀓𑀢𑀲𑀺𑀭𑀺𑀕𑀩𑁆𑀪𑁂 𑀏𑀓𑀺𑀓𑀸𑀯 𑀦𑀺𑀘𑁆𑀘𑀮𑀸 𑀅𑀢𑁆𑀢𑀦𑁄 ¶ 𑀲𑀻𑀮𑀁 𑀆𑀯𑀚𑁆𑀚𑀫𑀸𑀦𑀸 𑀦𑀺𑀲𑀻𑀤𑀺. 𑀅𑀣 𑀲𑀓𑁆𑀓𑁄 𑀲𑀼𑀯𑀡𑁆𑀡𑀫𑀸𑀲𑀓𑀧𑀽𑀭𑀁 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀲𑀬𑀦𑀕𑀩𑁆𑀪𑁂𑀬𑁂𑀯 𑀧𑀸𑀢𑀼𑀪𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁭.

‘‘𑀏𑀓𑀸 𑀦𑀺𑀲𑀺𑀦𑁆𑀦𑀸 𑀲𑀼𑀘𑀺 𑀲𑀜𑁆𑀜𑀢𑀽𑀭𑀽, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀅𑀦𑀺𑀦𑁆𑀤𑀺𑀢𑀗𑁆𑀕𑀻;

𑀬𑀸𑀘𑀸𑀫𑀺 𑀢𑀁 𑀓𑀺𑀦𑁆𑀦𑀭𑀦𑁂𑀢𑁆𑀢𑀘𑀓𑁆𑀔𑀼, 𑀇𑀫𑁂𑀓𑀭𑀢𑁆𑀢𑀺𑀁 𑀉𑀪𑀬𑁄 𑀯𑀲𑁂𑀫𑀸’’𑀢𑀺.

𑀢𑀢𑁆𑀣 ¶ 𑀲𑀼𑀘𑀻𑀢𑀺 𑀲𑀼𑀘𑀺𑀯𑀢𑁆𑀣𑀦𑀺𑀯𑀢𑁆𑀣𑀸. 𑀲𑀜𑁆𑀜𑀢𑀽𑀭𑀽𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑀊𑀭𑀽, 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀢𑁆𑀯𑀸 𑀲𑀼𑀘𑀺𑀯𑀢𑁆𑀣𑀸 𑀏𑀓𑀺𑀓𑀸𑀯 𑀦𑀺𑀲𑀺𑀦𑁆𑀦𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀺𑀦𑁆𑀤𑀺𑀢𑀗𑁆𑀕𑀻𑀢𑀺 𑀧𑀸𑀤𑀦𑁆𑀢𑀢𑁄 𑀬𑀸𑀯 𑀓𑁂𑀲𑀕𑁆𑀕𑀸 𑀅𑀦𑀺𑀦𑁆𑀤𑀺𑀢𑀲𑀭𑀻𑀭𑀸 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀲𑀭𑀻𑀭𑀸. 𑀓𑀺𑀦𑁆𑀦𑀭𑀦𑁂𑀢𑁆𑀢𑀘𑀓𑁆𑀔𑀽𑀢𑀺 𑀢𑀻𑀳𑀺 𑀫𑀡𑁆𑀟𑀮𑁂𑀳𑀺 𑀧𑀜𑁆𑀘𑀳𑀺 𑀘 𑀧𑀲𑀸𑀤𑁂𑀳𑀺 𑀉𑀧𑀲𑁄𑀪𑀺𑀢𑀢𑁆𑀢𑀸 𑀓𑀺𑀦𑁆𑀦𑀭𑀸𑀦𑀁 𑀦𑁂𑀢𑁆𑀢𑀲𑀤𑀺𑀲𑁂𑀳𑀺 𑀘𑀓𑁆𑀔𑀽𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀇𑀫𑁂𑀓𑀭𑀢𑁆𑀢𑀺𑀦𑁆𑀢𑀺 𑀇𑀫𑀁 𑀏𑀓𑀭𑀢𑁆𑀢𑀁 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀅𑀮𑀗𑁆𑀓𑀢𑀲𑀬𑀦𑀕𑀩𑁆𑀪𑁂 𑀏𑀓𑀢𑁄 𑀯𑀲𑁂𑀬𑁆𑀬𑀸𑀫𑀸𑀢𑀺 𑀬𑀸𑀘𑀢𑀺.

𑀢𑀢𑁄 𑀭𑀸𑀚𑀥𑀻𑀢𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁮.

‘‘𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀁, 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀁;

𑀭𑀓𑁆𑀔𑀺𑀢𑀁 𑀔𑀕𑁆𑀕𑀳𑀢𑁆𑀣𑁂𑀳𑀺, 𑀤𑀼𑀧𑁆𑀧𑀯𑁂𑀲𑀫𑀺𑀤𑀁 𑀧𑀼𑀭𑀁.

𑁩𑁯.

‘‘𑀤𑀳𑀭𑀲𑁆𑀲 𑀬𑀼𑀯𑀺𑀦𑁄 𑀘𑀸𑀧𑀺, 𑀆𑀕𑀫𑁄 𑀘 𑀦 𑀯𑀺𑀚𑁆𑀚𑀢𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀲𑀗𑁆𑀕𑀫𑀁 𑀇𑀘𑁆𑀙𑀲𑁂 𑀫𑀬𑀸’’𑀢𑀺.

𑀢𑀢𑁆𑀣 𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀦𑁆𑀢𑀺 𑀇𑀤𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀲𑀼𑀭𑀼𑀦𑁆𑀥𑀦𑀧𑀼𑀭𑀁 𑀅𑀦𑁆𑀢𑀭𑀦𑁆𑀢𑀭𑀸 𑀉𑀤𑀓𑀧𑀭𑀺𑀔𑀸𑀦𑀁 𑀓𑀤𑁆𑀤𑀫𑀧𑀭𑀺𑀔𑀸𑀦𑀁 𑀲𑀼𑀓𑁆𑀔𑀧𑀭𑀺𑀔𑀸𑀦𑀁 𑀑𑀓𑀺𑀡𑁆𑀡𑀢𑁆𑀢𑀸 𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀁. 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀦𑁆𑀢𑀺 𑀣𑀺𑀭𑀢𑀭𑁂𑀳𑀺 𑀅𑀝𑁆𑀝𑀸𑀮𑀓𑁂𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀔𑀕𑁆𑀕𑀳𑀢𑁆𑀣𑁂𑀳𑀻𑀢𑀺 𑀆𑀯𑀼𑀥𑀳𑀢𑁆𑀣𑁂𑀳𑀺 𑀤𑀲𑀳𑀺 𑀬𑁄𑀥𑀲𑀳𑀲𑁆𑀲𑁂𑀳𑀺 𑀭𑀓𑁆𑀔𑀺𑀢𑀁. 𑀤𑀼𑀧𑁆𑀧𑀯𑁂𑀲𑀫𑀺𑀤𑀁 𑀧𑀼𑀭𑀦𑁆𑀢𑀺 𑀇𑀤𑀁 𑀲𑀓𑀮𑀧𑀼𑀭𑀫𑁆𑀧𑀺 𑀢𑀲𑁆𑀲 𑀅𑀦𑁆𑀢𑁄 𑀫𑀸𑀧𑀺𑀢𑀁 𑀫𑀬𑁆𑀳𑀁 𑀦𑀺𑀯𑀸𑀲𑀧𑀼𑀭𑀫𑁆𑀧𑀺 𑀉𑀪𑀬𑀁 𑀓𑀲𑁆𑀲𑀘𑀺 𑀧𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑀸. 𑀆𑀕𑀫𑁄 𑀘𑀸𑀢𑀺 𑀇𑀥 𑀇𑀫𑀸𑀬 ¶ 𑀯𑁂𑀮𑀸𑀬 𑀢𑀭𑀼𑀡𑀲𑁆𑀲 𑀯𑀸 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀲𑁆𑀲 𑀯𑀸 𑀣𑀸𑀫𑀲𑀫𑁆𑀧𑀦𑁆𑀦𑀬𑁄𑀥𑀲𑁆𑀲 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲 𑀆𑀕𑀫𑁄 𑀦𑀸𑀫 𑀦𑀢𑁆𑀣𑀺. 𑀲𑀗𑁆𑀕𑀫𑀦𑁆𑀢𑀺 𑀅𑀣 𑀢𑁆𑀯𑀁 𑀓𑁂𑀦 𑀓𑀸𑀭𑀡𑁂𑀦 𑀇𑀫𑀸𑀬 𑀯𑁂𑀮𑀸𑀬 𑀫𑀬𑀸 𑀲𑀳 𑀲𑀫𑀸𑀕𑀫𑀁 𑀇𑀘𑁆𑀙𑀲𑀻𑀢𑀺.

𑀅𑀣 𑀲𑀓𑁆𑀓𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁪𑁦.

‘‘𑀬𑀓𑁆𑀔𑁄𑀳𑀫𑀲𑁆𑀫𑀺 ¶ 𑀓𑀮𑁆𑀬𑀸𑀡𑀺, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀢𑁆𑀯𑀁 𑀫𑀁 𑀦𑀦𑁆𑀤𑀬 𑀪𑀤𑁆𑀤𑀦𑁆𑀢𑁂, 𑀧𑀼𑀡𑁆𑀡𑀓𑀁𑀲𑀁 𑀤𑀤𑀸𑀫𑀺 𑀢𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀮𑁆𑀬𑀸𑀡𑀺, 𑀲𑀼𑀦𑁆𑀤𑀭𑀤𑀲𑁆𑀲𑀦𑁂 𑀅𑀳𑀫𑁂𑀓𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀇𑀥𑀸𑀕𑀢𑁄, 𑀢𑁆𑀯𑀁 𑀅𑀚𑁆𑀚 𑀫𑀁 𑀦𑀦𑁆𑀤𑀬 𑀢𑁄𑀲𑁂𑀳𑀺, 𑀅𑀳𑀁 𑀢𑁂 𑀇𑀫𑀁 𑀲𑀼𑀯𑀡𑁆𑀡𑀫𑀸𑀲𑀓𑀧𑀼𑀡𑁆𑀡𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀤𑀤𑀸𑀫𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀥𑀻𑀢𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁪𑁧.

‘‘𑀤𑁂𑀯𑀁𑀯 𑀬𑀓𑁆𑀔𑀁 𑀅𑀣 𑀯𑀸 𑀫𑀦𑀼𑀲𑁆𑀲𑀁, 𑀦 𑀧𑀢𑁆𑀣𑀬𑁂 𑀉𑀤𑀬𑀫𑀢𑀺𑀘𑁆𑀘 𑀅𑀜𑁆𑀜𑀁;

𑀕𑀘𑁆𑀙𑁂𑀯 𑀢𑁆𑀯𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀫𑀸 𑀘𑀲𑁆𑀲𑀼 𑀕𑀦𑁆𑀢𑁆𑀯𑀸 𑀧𑀼𑀦𑀭𑀸𑀯𑀚𑀺𑀢𑁆𑀣𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀤𑁂𑀯𑀭𑀸𑀚, 𑀤𑁂𑀯𑀁 𑀯𑀸 𑀬𑀓𑁆𑀔𑀁 𑀯𑀸 𑀉𑀤𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀫𑀺, 𑀲𑁄 𑀢𑁆𑀯𑀁 𑀕𑀘𑁆𑀙𑁂𑀯, 𑀫𑀸 𑀇𑀥 𑀅𑀝𑁆𑀞𑀸𑀲𑀺, 𑀦 𑀫𑁂 𑀢𑀬𑀸 𑀆𑀪𑀢𑁂𑀦 𑀧𑀡𑁆𑀡𑀸𑀓𑀸𑀭𑁂𑀦 𑀅𑀢𑁆𑀣𑁄, 𑀕𑀦𑁆𑀢𑁆𑀯𑀸 𑀘 𑀫𑀸 𑀇𑀫𑀁 𑀞𑀸𑀦𑀁 𑀧𑀼𑀦𑀭𑀸𑀯𑀚𑀺𑀢𑁆𑀣𑀸𑀢𑀺.

𑀲𑁄 𑀢𑀲𑁆𑀲𑀸 𑀲𑀻𑀳𑀦𑀸𑀤𑀁 𑀲𑀼𑀢𑁆𑀯𑀸 𑀅𑀝𑁆𑀞𑀢𑁆𑀯𑀸 𑀕𑀢𑀲𑀤𑀺𑀲𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀳𑀺𑀢𑁄 𑀅𑀝𑁆𑀞𑀸𑀲𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀢𑀸𑀬 𑀯𑁂𑀮𑀸𑀬𑀫𑁂𑀯 𑀲𑀼𑀯𑀡𑁆𑀡𑀫𑀸𑀲𑀓𑀧𑀽𑀭𑀁 𑀭𑀚𑀢𑀧𑀸𑀢𑀺𑀁 𑀆𑀤𑀸𑀬 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁪𑁨.

‘‘𑀬𑀸 𑀲𑀸 𑀭𑀢𑀺 𑀉𑀢𑁆𑀢𑀫𑀸 𑀓𑀸𑀫𑀪𑁄𑀕𑀺𑀦𑀁, 𑀬𑀁𑀳𑁂𑀢𑀼 𑀲𑀢𑁆𑀢𑀸 𑀯𑀺𑀲𑀫𑀁 𑀘𑀭𑀦𑁆𑀢𑀺;

𑀫𑀸 𑀢𑀁 𑀭𑀢𑀺𑀁 𑀚𑀻𑀬𑀺 𑀢𑀼𑀯𑀁 𑀲𑀼𑀘𑀺𑀫𑁆𑀳𑀺𑀢𑁂, 𑀤𑀤𑀸𑀫𑀺 𑀢𑁂 𑀭𑀽𑀧𑀺𑀬𑀁 𑀓𑀁𑀲𑀧𑀽𑀭’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀪𑀤𑁆𑀤𑁂, 𑀭𑀸𑀚𑀥𑀻𑀢𑁂 𑀬𑀸 𑀏𑀲𑀸 𑀓𑀸𑀫𑀪𑁄𑀕𑀺𑀲𑀢𑁆𑀢𑀸𑀦𑀁 𑀭𑀢𑀻𑀲𑀼 𑀫𑁂𑀣𑀼𑀦𑀓𑀸𑀫𑀭𑀢𑀺 𑀦𑀸𑀫 𑀉𑀢𑁆𑀢𑀫𑀸 𑀭𑀢𑀺, 𑀬𑀲𑁆𑀲𑀸 𑀭𑀢𑀺𑀬𑀸 𑀓𑀸𑀭𑀡𑀸 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀲𑀫𑀁 𑀘𑀭𑀦𑁆𑀢𑀺, 𑀢𑀁 𑀭𑀢𑀺𑀁 𑀢𑁆𑀯𑀁 𑀪𑀤𑁆𑀤𑁂, 𑀲𑀼𑀘𑀺𑀫𑁆𑀳𑀺𑀢𑁂 𑀫𑀦𑀸𑀧𑀳𑀲𑀺𑀢𑁂 𑀫𑀸 𑀚𑀻𑀬𑀺, 𑀅𑀳𑀫𑁆𑀧𑀺 𑀆𑀕𑀘𑁆𑀙𑀦𑁆𑀢𑁄 𑀦 𑀢𑀼𑀘𑁆𑀙𑀳𑀢𑁆𑀣𑁄 𑀆𑀕𑀢𑁄, 𑀳𑀺𑀬𑁆𑀬𑁄 𑀲𑀼𑀯𑀡𑁆𑀡𑀫𑀸𑀲𑀓𑀧𑀽𑀭𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀳𑀭𑀺𑀁, 𑀅𑀚𑁆𑀚 𑀭𑀽𑀧𑀺𑀬𑀧𑀸𑀢𑀺𑀁, 𑀇𑀫𑀁 𑀢𑁂 𑀅𑀳𑀁 𑀭𑀽𑀧𑀺𑀬𑀧𑀸𑀢𑀺𑀁 𑀲𑀼𑀯𑀡𑁆𑀡𑀧𑀽𑀭𑀁 𑀤𑀤𑀸𑀫𑀻𑀢𑀺.

𑀭𑀸𑀚𑀥𑀻𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀓𑀣𑀸𑀲𑀮𑁆𑀮𑀸𑀧𑀁 𑀮𑀪𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀆𑀕𑀫𑀺𑀲𑁆𑀲𑀢𑀺, 𑀦 𑀤𑀸𑀦𑀺 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀓𑀺𑀜𑁆𑀘𑀺 𑀦 ¶ 𑀓𑀣𑁂𑀲𑀺.

𑀲𑀓𑁆𑀓𑁄 𑀢𑀲𑁆𑀲𑀸 𑀅𑀓𑀣𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀳𑀺𑀢𑁄 𑀳𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀸𑀬𑀫𑁂𑀯 𑀯𑁂𑀮𑀸𑀬 𑀮𑁄𑀳𑀧𑀸𑀢𑀺𑀁 𑀓𑀳𑀸𑀧𑀡𑀧𑀽𑀭𑀁 𑀆𑀤𑀸𑀬 ‘‘𑀪𑀤𑁆𑀤𑁂, 𑀢𑁆𑀯𑀁 𑀫𑀁 𑀓𑀸𑀫𑀭𑀢𑀺𑀬𑀸 𑀲𑀦𑁆𑀢𑀧𑁆𑀧𑁂𑀳𑀺, 𑀇𑀫𑀁 𑀢𑁂 𑀓𑀳𑀸𑀧𑀡𑀧𑀽𑀭𑀁 𑀮𑁄𑀳𑀧𑀸𑀢𑀺𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀥𑀻𑀢𑀸 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁪𑁩.

‘‘𑀦𑀸𑀭𑀺𑀁 ¶ 𑀦𑀭𑁄 𑀦𑀺𑀚𑁆𑀛𑀧𑀬𑀁 𑀥𑀦𑁂𑀦, 𑀉𑀓𑁆𑀓𑀁𑀲𑀢𑀻 𑀬𑀢𑁆𑀣 𑀓𑀭𑁄𑀢𑀺 𑀙𑀦𑁆𑀤𑀁;

𑀯𑀺𑀧𑀘𑁆𑀘𑀦𑀻𑀓𑁄 𑀢𑀯 𑀤𑁂𑀯𑀥𑀫𑁆𑀫𑁄, 𑀧𑀘𑁆𑀘𑀓𑁆𑀔𑀢𑁄 𑀣𑁄𑀓𑀢𑀭𑁂𑀦 𑀏𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑁄 𑀧𑀼𑀭𑀺𑀲, 𑀢𑁆𑀯𑀁 𑀚𑀴𑁄. 𑀦𑀭𑁄 𑀳𑀺 𑀦𑀸𑀫 𑀦𑀸𑀭𑀺𑀁 𑀓𑀺𑀮𑁂𑀲𑀭𑀢𑀺𑀓𑀸𑀭𑀡𑀸 𑀥𑀦𑁂𑀦 𑀦𑀺𑀚𑁆𑀛𑀸𑀧𑁂𑀦𑁆𑀢𑁄 𑀲𑀜𑁆𑀜𑀸𑀧𑁂𑀦𑁆𑀢𑁄 𑀬𑀢𑁆𑀣 𑀦𑀸𑀭𑀺𑀬𑀸 𑀙𑀦𑁆𑀤𑀁 𑀓𑀭𑁄𑀢𑀺, 𑀢𑀁 𑀉𑀓𑁆𑀓𑀁𑀲𑀢𑀺 𑀯𑀡𑁆𑀡𑁂𑀢𑁆𑀯𑀸 𑀣𑁄𑀫𑁂𑀢𑁆𑀯𑀸 𑀩𑀳𑀼𑀢𑀭𑁂𑀦 𑀥𑀦𑁂𑀦 𑀧𑀮𑁄𑀪𑁂𑀢𑀺, 𑀢𑀼𑀬𑁆𑀳𑀁 𑀧𑀦𑁂𑀲𑁄 𑀤𑁂𑀯𑀲𑀪𑀸𑀯𑁄 𑀯𑀺𑀧𑀘𑁆𑀘𑀦𑀻𑀓𑁄, 𑀢𑁆𑀯𑀜𑁆𑀳𑀺 𑀫𑀬𑀸 𑀧𑀘𑁆𑀘𑀓𑁆𑀔𑀢𑁄 𑀣𑁄𑀓𑀢𑀭𑁂𑀦 𑀏𑀲𑀺, 𑀧𑀞𑀫𑀤𑀺𑀯𑀲𑁂 𑀲𑀼𑀯𑀡𑁆𑀡𑀧𑀽𑀭𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀳𑀭𑀺𑀢𑁆𑀯𑀸, 𑀤𑀼𑀢𑀺𑀬𑀤𑀺𑀯𑀲𑁂 𑀲𑀼𑀯𑀡𑁆𑀡𑀧𑀽𑀭𑀁 𑀭𑀽𑀧𑀺𑀬𑀧𑀸𑀢𑀺𑀁, 𑀢𑀢𑀺𑀬𑀤𑀺𑀯𑀲𑁂 𑀓𑀳𑀸𑀧𑀡𑀧𑀽𑀭𑀁 𑀮𑁄𑀳𑀧𑀸𑀢𑀺𑀁 𑀆𑀳𑀭𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 ‘‘𑀪𑀤𑁆𑀤𑁂 𑀭𑀸𑀚𑀓𑀼𑀫𑀸𑀭𑀺, 𑀅𑀳𑀁 𑀙𑁂𑀓𑀯𑀸𑀡𑀺𑀚𑁄 𑀦 𑀦𑀺𑀭𑀢𑁆𑀣𑀓𑁂𑀦 𑀅𑀢𑁆𑀣𑀁 𑀦𑀸𑀲𑁂𑀫𑀺, 𑀲𑀘𑁂 𑀢𑁆𑀯𑀁 𑀆𑀬𑀼𑀦𑀸 𑀯𑀸 𑀯𑀡𑁆𑀡𑁂𑀦 𑀯𑀸 𑀯𑀟𑁆𑀠𑁂𑀬𑁆𑀬𑀸𑀲𑀺, 𑀅𑀳𑀁 𑀢𑁂 𑀧𑀡𑁆𑀡𑀸𑀓𑀸𑀭𑀁 𑀯𑀟𑁆𑀠𑁂𑀢𑁆𑀯𑀸 𑀆𑀳𑀭𑁂𑀬𑁆𑀬𑀁, 𑀢𑁆𑀯𑀁 𑀧𑀦 𑀧𑀭𑀺𑀳𑀸𑀬𑀲𑁂𑀯, 𑀢𑁂𑀦𑀸𑀳𑀫𑁆𑀧𑀺 𑀥𑀦𑀁 𑀧𑀭𑀺𑀳𑀸𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁪.

‘‘𑀆𑀬𑀼 ¶ 𑀘 𑀯𑀡𑁆𑀡𑁄 𑀘 𑀫𑀦𑀼𑀲𑁆𑀲𑀮𑁄𑀓𑁂, 𑀦𑀺𑀳𑀻𑀬𑀢𑀺 𑀫𑀦𑀼𑀚𑀸𑀦𑀁 𑀲𑀼𑀕𑀢𑁆𑀢𑁂;

𑀢𑁂𑀦𑁂𑀯 𑀯𑀡𑁆𑀡𑁂𑀦 𑀥𑀦𑀫𑁆𑀧𑀺 𑀢𑀼𑀬𑁆𑀳𑀁, 𑀦𑀺𑀳𑀻𑀬𑀢𑀺 𑀚𑀺𑀡𑁆𑀡𑀢𑀭𑀸𑀲𑀺 𑀅𑀚𑁆𑀚.

𑁪𑁫.

‘‘𑀏𑀯𑀁 𑀫𑁂 𑀧𑁂𑀓𑁆𑀔𑀫𑀸𑀦𑀲𑁆𑀲, 𑀭𑀸𑀚𑀧𑀼𑀢𑁆𑀢𑀺 𑀬𑀲𑀲𑁆𑀲𑀺𑀦𑀺;

𑀳𑀸𑀬𑀢𑁂𑀯 𑀢𑀯 𑀯𑀡𑁆𑀡𑁄, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂.

𑁪𑁬.

‘‘𑀇𑀫𑀺𑀦𑀸𑀯 𑀢𑁆𑀯𑀁 𑀯𑀬𑀲𑀸, 𑀭𑀸𑀚𑀧𑀼𑀢𑁆𑀢𑀺 𑀲𑀼𑀫𑁂𑀥𑀲𑁂;

𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸𑀲𑀺, 𑀪𑀺𑀬𑁆𑀬𑁄 𑀯𑀡𑁆𑀡𑀯𑀢𑀻 𑀲𑀺𑀬𑀸’’𑀢𑀺.

𑀢𑀢𑁆𑀣 𑀦𑀺𑀳𑀻𑀬𑀢𑀻𑀢𑀺 𑀧𑀭𑀺𑀲𑁆𑀲𑀸𑀯𑀦𑁂 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀧𑀭𑀺𑀳𑀸𑀬𑀢𑀺. 𑀫𑀦𑀼𑀲𑁆𑀲𑀮𑁄𑀓𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸 𑀚𑀻𑀯𑀺𑀢𑁂𑀦 𑀯𑀡𑁆𑀡𑁂𑀦 𑀘𑀓𑁆𑀔𑀼𑀧𑀲𑀸𑀤𑀸𑀤𑀻𑀳𑀺 𑀘 𑀤𑀺𑀦𑁂 𑀤𑀺𑀦𑁂 𑀧𑀭𑀺𑀳𑀸𑀬𑀦𑁆𑀢𑁂𑀯. 𑀚𑀺𑀡𑁆𑀡𑀢𑀭𑀸𑀲𑀻𑀢𑀺 ¶ 𑀫𑀫 𑀧𑀞𑀫𑀁 𑀆𑀕𑀢𑀤𑀺𑀯𑀲𑁂 𑀧𑀯𑀢𑁆𑀢𑀜𑁆𑀳𑀺 𑀢𑁂 𑀆𑀬𑀼 𑀳𑀺𑀬𑁆𑀬𑁄 𑀤𑀺𑀯𑀲𑀁 𑀦 𑀧𑀸𑀧𑀼𑀡𑀺, 𑀓𑀼𑀞𑀸𑀭𑀺𑀬𑀸 𑀙𑀺𑀦𑁆𑀦𑀁 𑀯𑀺𑀬 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀺, 𑀳𑀺𑀬𑁆𑀬𑁄 𑀧𑀯𑀢𑁆𑀢𑀫𑁆𑀧𑀺 𑀅𑀚𑁆𑀚𑀤𑀺𑀯𑀲𑀁 𑀦 𑀧𑀸𑀧𑀼𑀡𑀺, 𑀳𑀺𑀬𑁆𑀬𑁄𑀯 𑀓𑀼𑀞𑀸𑀭𑀺𑀬𑀸 𑀙𑀺𑀦𑁆𑀦𑀁 𑀯𑀺𑀬 𑀦𑀺𑀭𑀼𑀚𑁆𑀛𑀺, 𑀢𑀲𑁆𑀫𑀸 𑀅𑀚𑁆𑀚 𑀚𑀺𑀡𑁆𑀡𑀢𑀭𑀸𑀲𑀺 𑀚𑀸𑀢𑀸. 𑀏𑀯𑀁 𑀫𑁂𑀢𑀺 𑀢𑀺𑀝𑁆𑀞𑀢𑀼 𑀳𑀺𑀬𑁆𑀬𑁄 𑀘 𑀧𑀭𑀳𑀺𑀬𑁆𑀬𑁄 𑀘, 𑀅𑀚𑁆𑀚𑁂𑀯 𑀧𑀦 𑀫𑀬𑁆𑀳𑀁 𑀏𑀯𑀁 𑀧𑁂𑀓𑁆𑀔𑀫𑀸𑀦𑀲𑁆𑀲𑁂𑀯 𑀳𑀸𑀬𑀢𑁂𑀯 𑀢𑀯 𑀯𑀡𑁆𑀡𑁄. 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀫𑁂𑀯 𑀕𑀫𑀺𑀲𑁆𑀲𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸𑀯𑀸𑀢𑀺 𑀢𑀲𑁆𑀫𑀸 𑀪𑀤𑁆𑀤𑁂, 𑀲𑀘𑁂 𑀢𑁆𑀯𑀁 𑀇𑀫𑀺𑀦𑀸 𑀯𑀬𑁂𑀦𑁂𑀯 𑀇𑀫𑀲𑁆𑀫𑀺𑀁 𑀲𑀼𑀯𑀡𑁆𑀡𑀯𑀡𑁆𑀡𑁂 𑀲𑀭𑀻𑀭𑁂 𑀭𑀚𑀸𑀬 ¶ 𑀅𑀯𑀺𑀮𑀼𑀢𑁆𑀢𑁂𑀬𑁂𑀯 𑀲𑁂𑀝𑁆𑀞𑀘𑀭𑀺𑀬𑀁 𑀘𑀭𑁂𑀬𑁆𑀬𑀸𑀲𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁂𑀬𑁆𑀬𑀸𑀲𑀺. 𑀪𑀺𑀬𑁆𑀬𑁄 𑀯𑀡𑁆𑀡𑀯𑀢𑀻 𑀲𑀺𑀬𑀸𑀢𑀺 𑀅𑀢𑀺𑀭𑁂𑀓𑀢𑀭𑀯𑀡𑁆𑀡𑀸 𑀪𑀯𑁂𑀬𑁆𑀬𑀸𑀲𑀻𑀢𑀺.

𑀢𑀢𑁄 𑀭𑀸𑀚𑀥𑀻𑀢𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀤𑁂𑀯𑀸 𑀦 𑀚𑀻𑀭𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸, 𑀕𑀢𑁆𑀢𑁂𑀲𑀼 𑀢𑁂𑀲𑀁 𑀯𑀮𑀺𑀬𑁄 𑀦 𑀳𑁄𑀦𑁆𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀓𑀣𑀁 𑀦𑀼 𑀤𑁂𑀯𑀸𑀦 𑀲𑀭𑀻𑀭𑀤𑁂𑀳𑁄’’𑀢𑀺.

𑀢𑀢𑁆𑀣 ¶ 𑀲𑀭𑀻𑀭𑀤𑁂𑀳𑁄𑀢𑀺 𑀲𑀭𑀻𑀭𑀲𑀗𑁆𑀔𑀸𑀢𑁄 𑀤𑁂𑀳𑁄, 𑀤𑁂𑀯𑀸𑀦𑀁 𑀲𑀭𑀻𑀭𑀁 𑀓𑀣𑀁 𑀦 𑀚𑀻𑀭𑀢𑀺, 𑀇𑀤𑀁 𑀅𑀳𑀁 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀯𑀤𑀢𑀺.

𑀅𑀣𑀲𑁆𑀲𑀸 𑀓𑀣𑁂𑀦𑁆𑀢𑁄 𑀲𑀓𑁆𑀓𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁪𑁮.

‘‘𑀤𑁂𑀯𑀸 𑀦 𑀚𑀻𑀭𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸, 𑀕𑀢𑁆𑀢𑁂𑀲𑀼 𑀢𑁂𑀲𑀁 𑀯𑀮𑀺𑀬𑁄 𑀦 𑀳𑁄𑀦𑁆𑀢𑀺;

𑀲𑀼𑀯𑁂 𑀲𑀼𑀯𑁂 𑀪𑀺𑀬𑁆𑀬𑀢𑀭𑁄𑀯 𑀢𑁂𑀲𑀁, 𑀤𑀺𑀩𑁆𑀩𑁄 𑀘 𑀯𑀡𑁆𑀡𑁄 𑀯𑀺𑀧𑀼𑀮𑀸 𑀘 𑀪𑁄𑀕𑀸’’𑀢𑀺.

𑀢𑀢𑁆𑀣 𑀬𑀣𑀸 𑀫𑀦𑀼𑀲𑁆𑀲𑀸𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸 𑀚𑀻𑀭𑀦𑁆𑀢𑀸 𑀭𑀽𑀧𑁂𑀦 𑀯𑀡𑁆𑀡𑁂𑀦 𑀪𑁄𑀕𑁂𑀦 𑀘𑀓𑁆𑀔𑀼𑀧𑀲𑀸𑀤𑀸𑀤𑀻𑀳𑀺 𑀘 𑀚𑀻𑀭𑀦𑁆𑀢𑀺, 𑀦 𑀏𑀯𑀁 𑀤𑁂𑀯𑀸. 𑀢𑁂𑀲𑀜𑁆𑀳𑀺 𑀕𑀢𑁆𑀢𑁂𑀲𑀼 𑀯𑀮𑀺𑀬𑁄𑀧𑀺 𑀦 𑀲𑀦𑁆𑀢𑀺, 𑀫𑀝𑁆𑀞𑀓𑀜𑁆𑀘𑀦𑀧𑀝𑁆𑀝𑀫𑀺𑀯 𑀲𑀭𑀻𑀭𑀁 𑀳𑁄𑀢𑀺. 𑀲𑀼𑀯𑁂 𑀲𑀼𑀯𑁂𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂. 𑀪𑀺𑀬𑁆𑀬𑀢𑀭𑁄𑀯𑀸𑀢𑀺 𑀅𑀢𑀺𑀭𑁂𑀓𑀢𑀭𑁄𑀯 𑀢𑁂𑀲𑀁 𑀤𑀺𑀩𑁆𑀩𑁄 𑀘 𑀯𑀡𑁆𑀡𑁄 𑀯𑀺𑀧𑀼𑀮𑀸 𑀘 𑀪𑁄𑀕𑀸 𑀳𑁄𑀦𑁆𑀢𑀺, 𑀫𑀦𑀼𑀲𑁆𑀲𑁂𑀲𑀼 𑀳𑀺 𑀭𑀽𑀧𑀧𑀭𑀺𑀳𑀸𑀦𑀺 𑀘𑀺𑀭𑀚𑀸𑀢𑀪𑀸𑀯𑀲𑁆𑀲 𑀲𑀓𑁆𑀔𑀺, 𑀤𑁂𑀯𑁂𑀲𑀼 𑀅𑀢𑀺𑀭𑁂𑀓𑀭𑀽𑀧𑀲𑀫𑁆𑀧𑀢𑁆𑀢𑀺 𑀘 𑀅𑀢𑀺𑀭𑁂𑀓𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺 𑀘. 𑀏𑀯𑀁 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀦𑀸𑀫𑁂𑀲 𑀤𑁂𑀯𑀮𑁄𑀓𑁄 ¶ . 𑀢𑀲𑁆𑀫𑀸 𑀢𑁆𑀯𑀁 𑀚𑀭𑀁 𑀅𑀧𑁆𑀧𑀢𑁆𑀯𑀸𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚, 𑀏𑀯𑀁 𑀧𑀭𑀺𑀳𑀸𑀦𑀺𑀬𑀲𑀪𑀸𑀯𑀸 𑀫𑀦𑀼𑀲𑁆𑀲𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀧𑀭𑀺𑀳𑀸𑀦𑀺𑀬𑀲𑀪𑀸𑀯𑀁 𑀏𑀯𑀭𑀽𑀧𑀁 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀲𑀻𑀢𑀺.

𑀲𑀸 𑀤𑁂𑀯𑀮𑁄𑀓𑀲𑁆𑀲 𑀯𑀡𑁆𑀡𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀕𑀫𑀦𑀫𑀕𑁆𑀕𑀁 𑀧𑀼𑀘𑁆𑀙𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁪𑁯.

‘‘𑀓𑀺𑀁𑀲𑀽𑀥 𑀪𑀻𑀢𑀸 𑀚𑀦𑀢𑀸 𑀅𑀦𑁂𑀓𑀸, 𑀫𑀕𑁆𑀕𑁄 𑀘 𑀦𑁂𑀓𑀸𑀬𑀢𑀦𑀁 𑀧𑀯𑀼𑀢𑁆𑀢𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀓𑀢𑁆𑀣𑀝𑁆𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂’’𑀢𑀺.

𑀢𑀢𑁆𑀣 𑀓𑀺𑀁𑀲𑀽𑀥 𑀪𑀻𑀢𑀸𑀢𑀺 𑀤𑁂𑀯𑀭𑀸𑀚, 𑀅𑀬𑀁 𑀔𑀢𑁆𑀢𑀺𑀬𑀸𑀤𑀺𑀪𑁂𑀤𑀸 𑀅𑀦𑁂𑀓𑀸 𑀚𑀦𑀢𑀸 𑀓𑀺𑀁𑀪𑀻𑀢𑀸 𑀓𑀲𑁆𑀲 𑀪𑀬𑁂𑀦 ¶ 𑀧𑀭𑀺𑀳𑀸𑀦𑀺𑀬𑀲𑀪𑀸𑀯𑀸 𑀫𑀦𑀼𑀲𑁆𑀲𑀮𑁄𑀓𑀸 𑀤𑁂𑀯𑀮𑁄𑀓𑀁 𑀦 𑀕𑀘𑁆𑀙𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀫𑀕𑁆𑀕𑁄𑀢𑀺 𑀤𑁂𑀯𑀮𑁄𑀓𑀕𑀸𑀫𑀺𑀫𑀕𑁆𑀕𑁄. 𑀇𑀥 𑀧𑀦 ‘‘𑀓𑀺’’𑀦𑁆𑀢𑀺 𑀆𑀳𑀭𑀺𑀢𑁆𑀯𑀸 ‘‘𑀓𑁄’’𑀢𑀺 𑀧𑀼𑀘𑁆𑀙𑀸 𑀓𑀸𑀢𑀩𑁆𑀩𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀅𑀦𑁂𑀓𑀢𑀺𑀢𑁆𑀣𑀸𑀬𑀢𑀦𑀯𑀲𑁂𑀦 𑀧𑀡𑁆𑀟𑀺𑀢𑁂𑀳𑀺 𑀧𑀯𑀼𑀢𑁆𑀢𑁄 𑀤𑁂𑀯𑀮𑁄𑀓𑀫𑀕𑁆𑀕𑁄 𑀓𑁄 𑀓𑀢𑀭𑁄’’𑀢𑀺 𑀯𑀼𑀢𑁆𑀢𑁄. 𑀓𑀢𑁆𑀣𑀝𑁆𑀞𑀺𑀢𑁄𑀢𑀺 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀓𑀢𑀭𑀲𑁆𑀫𑀺𑀁 𑀫𑀕𑁆𑀕𑁂 𑀞𑀺𑀢𑁄 𑀦 𑀪𑀸𑀬𑀢𑀻𑀢𑀺.

𑀅𑀣𑀲𑁆𑀲𑀸 ¶ 𑀓𑀣𑁂𑀦𑁆𑀢𑁄 𑀲𑀓𑁆𑀓𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀲𑀫𑁆𑀫𑀸, 𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄;

𑀩𑀳𑀼𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽;

𑀲𑀗𑁆𑀕𑀸𑀳𑀓𑁄 𑀲𑀔𑀺𑀮𑁄 𑀲𑀡𑁆𑀳𑀯𑀸𑀘𑁄, 𑀏𑀢𑁆𑀣𑀝𑁆𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀤𑁆𑀤𑁂, 𑀉𑀤𑀬𑁂 𑀯𑀸𑀘𑀁 𑀫𑀦𑀜𑁆𑀘 𑀲𑀫𑁆𑀫𑀸 𑀞𑀧𑁂𑀢𑁆𑀯𑀸 𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀭𑁄𑀦𑁆𑀢𑁄 𑀇𑀫𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑁄 𑀩𑀳𑀼𑀅𑀦𑁆𑀦𑀧𑀸𑀦𑁂 𑀧𑀳𑀽𑀢𑀤𑁂𑀬𑁆𑀬𑀥𑀫𑁆𑀫𑁂 𑀖𑀭𑁂 𑀯𑀲𑀦𑁆𑀢𑁄 ‘‘𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀅𑀢𑁆𑀣𑀻’’𑀢𑀺 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀫𑀼𑀤𑀼𑀘𑀺𑀢𑁆𑀢𑁄 𑀤𑀸𑀦𑀲𑀁𑀯𑀺𑀪𑀸𑀕𑀢𑀸𑀬 𑀲𑀁𑀯𑀺𑀪𑀸𑀕𑀻 𑀧𑀩𑁆𑀩𑀚𑀺𑀢𑀸 𑀪𑀺𑀓𑁆𑀔𑀸𑀬 𑀘𑀭𑀫𑀸𑀦𑀸 𑀯𑀤𑀦𑁆𑀢𑀺 𑀦𑀸𑀫, 𑀢𑁂𑀲𑀁 𑀧𑀘𑁆𑀘𑀬𑀤𑀸𑀦𑁂𑀦 𑀢𑀲𑁆𑀲 𑀯𑀸𑀤𑀲𑁆𑀲 𑀚𑀸𑀦𑀦𑀢𑁄 𑀯𑀤𑀜𑁆𑀜𑀽 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀳𑀢𑀸𑀬 𑀲𑀗𑁆𑀕𑀸𑀳𑀓𑁄 𑀧𑀺𑀬𑀯𑀸𑀤𑀺𑀢𑀸𑀬 𑀲𑀔𑀺𑀮𑁄 𑀫𑀝𑁆𑀞𑀯𑀘𑀦𑀢𑀸𑀬 𑀲𑀡𑁆𑀳𑀯𑀸𑀘𑁄 𑀏𑀢𑁆𑀣 𑀏𑀢𑁆𑀢𑀓𑁂 𑀕𑀼𑀡𑀭𑀸𑀲𑀺𑀫𑁆𑀳𑀺 𑀞𑀺𑀢𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀦 𑀪𑀸𑀬𑀢𑀻𑀢𑀺.

𑀢𑀢𑁄 ¶ 𑀭𑀸𑀚𑀥𑀻𑀢𑀸 𑀢𑀁 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀣𑀼𑀢𑀺𑀁 𑀓𑀭𑁄𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁫𑁧.

‘‘𑀅𑀦𑀼𑀲𑀸𑀲𑀲𑀺 𑀫𑀁 𑀬𑀓𑁆𑀔, 𑀬𑀣𑀸 𑀫𑀸𑀢𑀸 𑀬𑀣𑀸 𑀧𑀺𑀢𑀸;

𑀉𑀴𑀸𑀭𑀯𑀡𑁆𑀡 𑀧𑀼𑀘𑁆𑀙𑀸𑀫𑀺, 𑀓𑁄 𑀦𑀼 𑀢𑁆𑀯𑀫𑀲𑀺 𑀲𑀼𑀩𑁆𑀭𑀳𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀓𑁂 𑀅𑀦𑀼𑀲𑀸𑀲𑀦𑁆𑀢𑀺, 𑀢𑀣𑀸 𑀫𑀁 𑀅𑀦𑀼𑀲𑀸𑀲𑀲𑀺. 𑀉𑀴𑀸𑀭𑀯𑀡𑁆𑀡 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀭𑀽𑀧𑀤𑀸𑀭𑀓 𑀓𑁄 𑀦𑀼 𑀅𑀲𑀺 𑀢𑁆𑀯𑀁 𑀏𑀯𑀁 𑀅𑀘𑁆𑀘𑀼𑀕𑁆𑀕𑀢𑀲𑀭𑀻𑀭𑁄𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁫𑁨.

‘‘𑀉𑀤𑀬𑁄𑀳𑀫𑀲𑁆𑀫𑀺 𑀓𑀮𑁆𑀬𑀸𑀡𑀺, 𑀲𑀗𑁆𑀕𑀭𑀢𑁆𑀢𑀸 𑀇𑀥𑀸𑀕𑀢𑁄;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫𑀺, 𑀫𑀼𑀢𑁆𑀢𑁄𑀲𑁆𑀫𑀺 𑀢𑀯 𑀲𑀗𑁆𑀕𑀭𑀸’’𑀢𑀺.

𑀢𑀲𑁆𑀲𑀢𑁆𑀣𑁄 ¶ ¶ 𑁋 𑀓𑀮𑁆𑀬𑀸𑀡𑀤𑀲𑁆𑀲𑀦𑁂 𑀅𑀳𑀁 𑀧𑀼𑀭𑀺𑀫𑀪𑀯𑁂 𑀢𑀯 𑀲𑀸𑀫𑀺𑀓𑁄 𑀉𑀤𑀬𑁄 𑀦𑀸𑀫 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀇𑀥𑀸𑀕𑀘𑁆𑀙𑀦𑁆𑀢𑁄 𑀦 𑀓𑀺𑀮𑁂𑀲𑀯𑀲𑁂𑀦𑀸𑀕𑀢𑁄, 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀧𑀦 𑀲𑀗𑁆𑀕𑀭𑀁 𑀫𑁄𑀘𑁂𑀲𑁆𑀲𑀸𑀫𑀻𑀢𑀺 𑀲𑀗𑁆𑀕𑀭𑀢𑁆𑀢𑀸 𑀧𑀼𑀩𑁆𑀩𑁂 𑀲𑀗𑁆𑀕𑀭𑀲𑁆𑀲 𑀓𑀢𑀢𑁆𑀢𑀸 𑀆𑀕𑀢𑁄𑀲𑁆𑀫𑀺, 𑀇𑀤𑀸𑀦𑀺 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀕𑀘𑁆𑀙𑀸𑀫𑀺, 𑀫𑀼𑀢𑁆𑀢𑁄𑀲𑁆𑀫𑀺 𑀢𑀯 𑀲𑀗𑁆𑀕𑀭𑀸𑀢𑀺.

𑀭𑀸𑀚𑀥𑀻𑀢𑀸 𑀅𑀲𑁆𑀲𑀲𑀺𑀢𑁆𑀯𑀸 ‘‘𑀲𑀸𑀫𑀺, 𑀢𑁆𑀯𑀁 𑀉𑀤𑀬𑀪𑀤𑁆𑀤𑀭𑀸𑀚𑀸’’𑀢𑀺 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀬𑀫𑀸𑀦𑀸 ‘‘𑀅𑀳𑀁 𑀢𑀼𑀫𑁆𑀳𑁂𑀳𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀸𑀫𑀺, 𑀢𑀣𑀸 𑀫𑀁 𑀅𑀦𑀼𑀲𑀸𑀲𑀣𑀸’’𑀢𑀺 𑀯𑀢𑁆𑀯𑀸 𑀇𑀢𑀭𑀁 𑀕𑀸𑀣𑀁 𑀅𑀪𑀸𑀲𑀺 𑁋

𑁫𑁩.

‘‘𑀲𑀘𑁂 𑀔𑁄 𑀢𑁆𑀯𑀁 𑀉𑀤𑀬𑁄𑀲𑀺, 𑀲𑀗𑁆𑀕𑀭𑀢𑁆𑀢𑀸 𑀇𑀥𑀸𑀕𑀢𑁄;

𑀅𑀦𑀼𑀲𑀸𑀲 𑀫𑀁 𑀭𑀸𑀚𑀧𑀼𑀢𑁆𑀢, 𑀬𑀣𑀸𑀲𑁆𑀲 𑀧𑀼𑀦 𑀲𑀗𑁆𑀕𑀫𑁄’’𑀢𑀺.

𑀅𑀣 𑀦𑀁 𑀅𑀦𑀼𑀲𑀸𑀲𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁪.

‘‘𑀅𑀢𑀺𑀧𑀢𑀢𑀺 𑀯𑀬𑁄 𑀔𑀡𑁄 𑀢𑀣𑁂𑀯, 𑀞𑀸𑀦𑀁 𑀦𑀢𑁆𑀣𑀺 𑀥𑀼𑀯𑀁 𑀘𑀯𑀦𑁆𑀢𑀺 𑀲𑀢𑁆𑀢𑀸;

𑀧𑀭𑀺𑀚𑀻𑀬𑀢𑀺 𑀅𑀤𑁆𑀥𑀼𑀯𑀁 𑀲𑀭𑀻𑀭𑀁, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁫.

‘‘𑀓𑀲𑀺𑀡𑀸 𑀧𑀣𑀯𑀻 𑀥𑀦𑀲𑁆𑀲 𑀧𑀽𑀭𑀸, 𑀏𑀓𑀲𑁆𑀲𑁂𑀯 𑀲𑀺𑀬𑀸 𑀅𑀦𑀜𑁆𑀜𑀥𑁂𑀬𑁆𑀬𑀸;

𑀢𑀁 𑀘𑀸𑀧𑀺 𑀚𑀳𑀢𑀺 𑀅𑀯𑀻𑀢𑀭𑀸𑀕𑁄, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁬.

‘‘𑀫𑀸𑀢𑀸 ¶ 𑀘 𑀧𑀺𑀢𑀸 𑀘 𑀪𑀸𑀢𑀭𑁄 𑀘, 𑀪𑀭𑀺𑀬𑀸 𑀬𑀸𑀧𑀺 𑀥𑀦𑁂𑀦 𑀳𑁄𑀢𑀺 𑀓𑀻𑀢𑀸;

𑀢𑁂 𑀘𑀸𑀧𑀺 𑀚𑀳𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁭.

‘‘𑀓𑀸𑀬𑁄 ¶ 𑀧𑀭𑀪𑁄𑀚𑀦𑀦𑁆𑀢𑀺 𑀜𑀢𑁆𑀯𑀸, 𑀲𑀁𑀲𑀸𑀭𑁂 𑀲𑀼𑀕𑀢𑀺𑀜𑁆𑀘 𑀤𑀼𑀕𑁆𑀕𑀢𑀺𑀜𑁆𑀘;

𑀇𑀢𑁆𑀢𑀭𑀯𑀸𑀲𑁄𑀢𑀺 𑀚𑀸𑀦𑀺𑀬𑀸𑀦, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫’’𑀦𑁆𑀢𑀺.

𑀢𑀢𑁆𑀣 𑀅𑀢𑀺𑀧𑀢𑀢𑀻𑀢𑀺 𑀅𑀢𑀺𑀯𑀺𑀬 𑀧𑀢𑀢𑀺, 𑀲𑀻𑀖𑀁 𑀅𑀢𑀺𑀓𑁆𑀓𑀫𑀢𑀺. 𑀯𑀬𑁄𑀢𑀺 𑀧𑀞𑀫𑀯𑀬𑀸𑀤𑀺𑀢𑀺𑀯𑀺𑀥𑁄𑀧𑀺 𑀯𑀬𑁄. 𑀔𑀡𑁄 𑀢𑀣𑁂𑀯𑀸𑀢𑀺 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁄𑀧𑀺 𑀢𑀣𑁂𑀯 𑀅𑀢𑀺𑀧𑀢𑀢𑀺. 𑀉𑀪𑀬𑁂𑀦𑀧𑀺 𑀪𑀺𑀦𑁆𑀦𑁄 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑁄 𑀦𑀸𑀫 𑀲𑀻𑀖𑀲𑁄𑀢𑀸 𑀦𑀤𑀻 𑀯𑀺𑀬 𑀅𑀦𑀺𑀯𑀢𑁆𑀢𑀦𑁆𑀢𑁄 𑀲𑀻𑀖𑀁 𑀅𑀢𑀺𑀓𑁆𑀓𑀫𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀞𑀸𑀦𑀁 𑀦𑀢𑁆𑀣𑀻𑀢𑀺 ‘‘𑀉𑀧𑁆𑀧𑀦𑁆𑀦𑀸 𑀲𑀗𑁆𑀔𑀸𑀭𑀸 𑀅𑀪𑀺𑀚𑁆𑀚𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀸𑀬𑀧𑀺 ¶ 𑀢𑁂𑀲𑀁 𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀥𑀼𑀯𑀁 𑀏𑀓𑀁𑀲𑁂𑀦𑁂𑀯 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀘𑀯𑀦𑁆𑀢𑀺, ‘‘𑀥𑀼𑀯𑀁 𑀫𑀭𑀡𑀁, 𑀅𑀤𑁆𑀥𑀼𑀯𑀁 𑀚𑀻𑀯𑀺𑀢’’𑀦𑁆𑀢𑀺 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀳𑀻𑀢𑀺 𑀤𑀻𑀧𑁂𑀢𑀺. 𑀧𑀭𑀺𑀚𑀻𑀬𑀢𑀻𑀢𑀺 𑀇𑀤𑀁 𑀲𑀼𑀯𑀡𑁆𑀡𑀯𑀡𑁆𑀡𑀫𑁆𑀧𑀺 𑀲𑀭𑀻𑀭𑀁 𑀚𑀻𑀭𑀢𑁂𑀯, 𑀏𑀯𑀁 𑀚𑀸𑀦𑀸𑀳𑀺. 𑀫𑀸 𑀧𑀫𑀸𑀤𑀦𑁆𑀢𑀺 𑀢𑀲𑁆𑀫𑀸 𑀢𑁆𑀯𑀁 𑀉𑀤𑀬𑀪𑀤𑁆𑀤𑁂 𑀫𑀸 𑀧𑀫𑀸𑀤𑀁 𑀆𑀧𑀚𑁆𑀚𑀺, 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀘𑀭𑀸𑀳𑀻𑀢𑀺.

𑀓𑀲𑀺𑀡𑀸𑀢𑀺 𑀲𑀓𑀮𑀸. 𑀏𑀓𑀲𑁆𑀲𑁂𑀯𑀸𑀢𑀺 𑀬𑀤𑀺 𑀏𑀓𑀲𑁆𑀲𑁂𑀯 𑀭𑀜𑁆𑀜𑁄, 𑀢𑀲𑁆𑀫𑀺𑀁 𑀏𑀓𑀲𑁆𑀫𑀺𑀁𑀬𑁂𑀯 𑀅𑀦𑀜𑁆𑀜𑀸𑀥𑀻𑀦𑀸 𑀅𑀲𑁆𑀲. 𑀢𑀁 𑀘𑀸𑀧𑀺 𑀚𑀳𑀢𑀺 𑀅𑀯𑀻𑀢𑀭𑀸𑀕𑁄𑀢𑀺 𑀢𑀡𑁆𑀳𑀸𑀯𑀲𑀺𑀓𑁄 𑀧𑀼𑀕𑁆𑀕𑀮𑁄 𑀏𑀢𑁆𑀢𑀓𑁂𑀦𑀧𑀺 𑀬𑀲𑁂𑀦 𑀅𑀢𑀺𑀢𑁆𑀢𑁄 𑀫𑀭𑀡𑀓𑀸𑀮𑁂 𑀅𑀯𑀻𑀢𑀭𑀸𑀕𑁄𑀯 𑀢𑀁 𑀯𑀺𑀚𑀳𑀢𑀺. 𑀏𑀯𑀁 𑀢𑀡𑁆𑀳𑀸𑀬 𑀅𑀧𑀽𑀭𑀡𑀻𑀬𑀪𑀸𑀯𑀁 𑀚𑀸𑀦𑀸𑀳𑀻𑀢𑀺 𑀤𑀻𑀧𑁂𑀢𑀺. 𑀢𑁂 𑀘𑀸𑀧𑀻𑀢𑀺 𑀫𑀸𑀢𑀸 𑀧𑀼𑀢𑁆𑀢𑀁, 𑀧𑀼𑀢𑁆𑀢𑁄 𑀫𑀸𑀢𑀭𑀁, 𑀧𑀺𑀢𑀸 𑀧𑀼𑀢𑁆𑀢𑀁, 𑀧𑀼𑀢𑁆𑀢𑁄 𑀧𑀺𑀢𑀭𑀁, 𑀪𑀸𑀢𑀸 𑀪𑀕𑀺𑀦𑀺𑀁, 𑀪𑀕𑀺𑀦𑀻 𑀪𑀸𑀢𑀭𑀁, 𑀪𑀭𑀺𑀬𑀸 𑀲𑀸𑀫𑀺𑀓𑀁, 𑀲𑀸𑀫𑀺𑀓𑁄 𑀪𑀭𑀺𑀬𑀦𑁆𑀢𑀺 𑀏𑀢𑁂 𑀅𑀜𑁆𑀜𑀫𑀜𑁆𑀜𑀁 𑀚𑀳𑀦𑁆𑀢𑀺, 𑀦𑀸𑀦𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀸𑀦𑀁 𑀦𑀸𑀦𑀸𑀪𑀸𑀯𑀯𑀺𑀦𑀸𑀪𑀸𑀯𑀁 𑀚𑀸𑀦𑀸𑀳𑀻𑀢𑀺 𑀤𑀻𑀧𑁂𑀢𑀺.

𑀧𑀭𑀪𑁄𑀚𑀦𑀦𑁆𑀢𑀺 𑀯𑀺𑀯𑀺𑀥𑀸𑀦𑀁 𑀓𑀸𑀓𑀸𑀤𑀻𑀦𑀁 𑀧𑀭𑀲𑀢𑁆𑀢𑀸𑀦𑀁 𑀪𑁄𑀚𑀦𑀁. 𑀇𑀢𑁆𑀢𑀭𑀯𑀸𑀲𑁄𑀢𑀺 𑀬𑀸 𑀏𑀲𑀸 𑀇𑀫𑀲𑁆𑀫𑀺𑀁 𑀲𑀁𑀲𑀸𑀭𑁂 𑀫𑀦𑀼𑀲𑁆𑀲𑀪𑀽𑀢𑀸 𑀲𑀼𑀕𑁆𑀕𑀢𑀺 𑀘 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀤𑀼𑀕𑁆𑀕𑀢𑀺 𑀘, 𑀏𑀢𑀁 𑀉𑀪𑀬𑀫𑁆𑀧𑀺 ‘‘𑀇𑀢𑁆𑀢𑀭𑀯𑀸𑀲𑁄’’𑀢𑀺 𑀚𑀸𑀦𑀺𑀢𑁆𑀯𑀸 𑀫𑀸 𑀧𑀫𑀸𑀤𑀁, 𑀘𑀭𑀲𑁆𑀲𑀼 𑀥𑀫𑁆𑀫𑀁. 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀦𑀸𑀦𑀸𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀸𑀕𑀫𑁄 𑀧𑀭𑀺𑀢𑁆𑀢𑁄, 𑀇𑀫𑁂 𑀲𑀢𑁆𑀢𑀸 𑀅𑀧𑁆𑀧𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀏𑀓𑀢𑁄 𑀯𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻𑀢𑀺.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲𑀸 𑀑𑀯𑀸𑀤𑀫𑀤𑀸𑀲𑀺. 𑀲𑀸𑀧𑀺 𑀢𑀲𑁆𑀲 𑀥𑀫𑁆𑀫𑀓𑀣𑀸𑀬 𑀧𑀲𑀻𑀤𑀺𑀢𑁆𑀯𑀸 𑀣𑀼𑀢𑀺𑀁 𑀓𑀭𑁄𑀦𑁆𑀢𑀻 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁫𑁮.

‘‘𑀲𑀸𑀥𑀼 ¶ 𑀪𑀸𑀲𑀢𑀺𑀬𑀁 𑀬𑀓𑁆𑀔𑁄, 𑀅𑀧𑁆𑀧𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁;

𑀓𑀲𑀺𑀭𑀜𑁆𑀘 𑀧𑀭𑀺𑀢𑁆𑀢𑀜𑁆𑀘, 𑀢𑀜𑁆𑀘 𑀤𑀼𑀓𑁆𑀔𑁂𑀦 𑀲𑀁𑀬𑀼𑀢𑀁;

𑀲𑀸𑀳𑀁 𑀏𑀓𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀳𑀺𑀢𑁆𑀯𑀸 𑀓𑀸𑀲𑀺𑀁 𑀲𑀼𑀭𑀼𑀦𑁆𑀥𑀦’’𑀦𑁆𑀢𑀺.

𑀢𑀢𑁆𑀣 𑀲𑀸𑀥𑀽𑀢𑀺 ‘‘𑀅𑀧𑁆𑀧𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢’’𑀦𑁆𑀢𑀺 𑀪𑀸𑀲𑀫𑀸𑀦𑁄 𑀅𑀬𑀁 𑀤𑁂𑀯𑀭𑀸𑀚𑀸 𑀲𑀸𑀥𑀼 𑀪𑀸𑀲𑀢𑀺. 𑀓𑀺𑀁𑀓𑀸𑀭𑀡𑀸? 𑀇𑀤𑀜𑁆𑀳𑀺 𑀓𑀲𑀺𑀭𑀜𑁆𑀘 𑀤𑀼𑀓𑁆𑀔𑀁 𑀅𑀲𑁆𑀲𑀸𑀤𑀭𑀳𑀺𑀢𑀁, 𑀧𑀭𑀺𑀢𑁆𑀢𑀜𑁆𑀘 𑀦 𑀩𑀳𑀼𑀓𑀁 𑀇𑀢𑁆𑀢𑀭𑀓𑀸𑀮𑀁. 𑀲𑀘𑁂 𑀳𑀺 𑀓𑀲𑀺𑀭𑀫𑁆𑀧𑀺 𑀲𑀫𑀸𑀦𑀁 𑀤𑀻𑀖𑀓𑀸𑀮𑀁 𑀧𑀯𑀢𑁆𑀢𑁂𑀬𑁆𑀬, 𑀧𑀭𑀺𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀲𑀼𑀔𑀁 𑀪𑀯𑁂𑀬𑁆𑀬, 𑀇𑀤𑀁 𑀧𑀦 𑀓𑀲𑀺𑀭𑀜𑁆𑀘𑁂𑀯 𑀧𑀭𑀺𑀢𑁆𑀢𑀜𑁆𑀘 𑀲𑀓𑀮𑁂𑀦 𑀯𑀝𑁆𑀝𑀤𑀼𑀓𑁆𑀔𑁂𑀦 𑀲𑀁𑀬𑀼𑀢𑀁 𑀲𑀦𑁆𑀦𑀺𑀳𑀺𑀢𑀁. 𑀲𑀸𑀳𑀦𑁆𑀢𑀺 𑀲𑀸 𑀅𑀳𑀁. 𑀲𑀼𑀭𑀼𑀦𑁆𑀥𑀦𑀦𑁆𑀢𑀺 𑀲𑀼𑀭𑀼𑀦𑁆𑀥𑀦𑀦𑀕𑀭𑀜𑁆𑀘 𑀓𑀸𑀲𑀺𑀭𑀝𑁆𑀞𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀏𑀓𑀺𑀓𑀸𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀆𑀳.

𑀩𑁄𑀥𑀺𑀲𑀢𑁆𑀢𑁄 ¶ 𑀢𑀲𑁆𑀲𑀸 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀸𑀧𑀺 𑀧𑀼𑀦𑀤𑀺𑀯𑀲𑁂 𑀅𑀫𑀘𑁆𑀘𑁂 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂𑀬𑁂𑀯 𑀭𑀫𑀡𑀻𑀬𑁂 𑀉𑀬𑁆𑀬𑀸𑀦𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀭𑀸𑀚𑀥𑀻𑀢𑀸 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀉𑀤𑀬𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁫𑁯] 𑁫. 𑀧𑀸𑀦𑀻𑀬𑀚𑀸𑀢𑀓𑀯𑀡𑁆𑀡𑀦𑀸

𑀫𑀺𑀢𑁆𑀢𑁄 𑀫𑀺𑀢𑁆𑀢𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀮𑁂𑀲𑀦𑀺𑀕𑁆𑀕𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀧𑀜𑁆𑀘𑀲𑀢𑀸 𑀕𑀺𑀳𑀺𑀲𑀳𑀸𑀬𑀓𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀸 𑀅𑀦𑁆𑀢𑁄𑀓𑁄𑀝𑀺𑀲𑀦𑁆𑀣𑀸𑀭𑁂 𑀯𑀲𑀦𑁆𑀢𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀼𑀁. 𑀲𑀩𑁆𑀩𑀁 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀢𑁄 𑀆𑀡𑀢𑁆𑀢𑀺𑀬𑀸 𑀧𑀦𑀸𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀦𑁆𑀦𑀺𑀧𑀸𑀢𑀺𑀢𑁂 𑀲𑀢𑁆𑀣𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 ‘‘𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑀬𑀺𑀢𑁆𑀣𑀸’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑁂𑀯 ‘‘𑀪𑀺𑀓𑁆𑀔𑀯𑁂, 𑀓𑀺𑀮𑁂𑀲𑁄 𑀔𑀼𑀤𑁆𑀤𑀓𑁄 𑀦𑀸𑀫 𑀦𑀢𑁆𑀣𑀺, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸 𑀓𑀺𑀮𑁂𑀲𑀸 𑀦𑀺𑀕𑁆𑀕𑀳𑁂𑀢𑀩𑁆𑀩𑀸, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀩𑀼𑀤𑁆𑀥𑁂 𑀓𑀺𑀮𑁂𑀲𑁂 𑀦𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀓𑀸𑀲𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀤𑁆𑀯𑁂 𑀲𑀳𑀸𑀬𑀓𑀸 𑀧𑀸𑀦𑀻𑀬𑀢𑀼𑀫𑁆𑀩𑀸𑀦𑀺 𑀆𑀤𑀸𑀬 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀧𑁂𑀢𑁆𑀯𑀸 𑀔𑁂𑀢𑁆𑀢𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀺𑀧𑀸𑀲𑀺𑀢𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀧𑀸𑀦𑀻𑀬𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀦𑀻𑀬𑀁 𑀭𑀓𑁆𑀔𑀦𑁆𑀢𑁄 𑀇𑀢𑀭𑀲𑁆𑀲 𑀢𑀼𑀫𑁆𑀩𑀢𑁄 𑀧𑀺𑀯𑀺𑀢𑁆𑀯𑀸 𑀲𑀸𑀬𑀁 𑀅𑀭𑀜𑁆𑀜𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀞𑀺𑀢𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀓𑀸𑀬𑀤𑁆𑀯𑀸𑀭𑀸𑀤𑀻𑀳𑀺 𑀅𑀚𑁆𑀚 𑀓𑀺𑀜𑁆𑀘𑀺 𑀧𑀸𑀧𑀁 𑀓𑀢’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀣𑁂𑀦𑁂𑀢𑁆𑀯𑀸 𑀧𑀸𑀦𑀻𑀬𑀲𑁆𑀲 𑀧𑀺𑀯𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀅𑀬𑀁 𑀢𑀡𑁆𑀳𑀸 𑀯𑀟𑁆𑀠𑀫𑀸𑀦𑀸 𑀫𑀁 𑀅𑀧𑀸𑀬𑁂𑀲𑀼 𑀔𑀺𑀧𑀺𑀲𑁆𑀲𑀢𑀺, 𑀇𑀫𑀁 𑀓𑀺𑀮𑁂𑀲𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀦𑀻𑀬𑀲𑁆𑀲 𑀣𑁂𑀦𑁂𑀢𑁆𑀯𑀸 𑀧𑀺𑀯𑀺𑀢𑀪𑀸𑀯𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀯𑀚𑁆𑀚𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀇𑀢𑀭𑁄 𑀦𑁆𑀳𑀸𑀬𑀺𑀢𑁆𑀯𑀸 𑀉𑀝𑁆𑀞𑀺𑀢𑁄 ‘‘𑀏𑀳𑀺, 𑀲𑀫𑁆𑀫, 𑀖𑀭𑀁 𑀕𑀘𑁆𑀙𑀸𑀫𑀸’’𑀢𑀺 𑀆𑀳. ‘‘𑀕𑀘𑁆𑀙 𑀢𑁆𑀯𑀁, 𑀫𑀫 𑀖𑀭𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ¶ 𑀦𑀸𑀫 𑀫𑀬’’𑀦𑁆𑀢𑀺. ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸 𑀦 𑀳𑁄𑀦𑁆𑀢𑀻’’𑀢𑀺. ‘‘𑀅𑀣 𑀓𑀻𑀤𑀺𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺? ‘‘𑀤𑁆𑀯𑀗𑁆𑀕𑀼𑀮𑀓𑁂𑀲𑀸 𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀸 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀯𑀲𑀦𑁆𑀢𑀻’’𑀢𑀺. 𑀲𑁄 𑀲𑀻𑀲𑀁 𑀧𑀭𑀸𑀫𑀲𑀺, 𑀢𑀁 𑀔𑀡𑀜𑁆𑀜𑁂𑀯𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀢𑁆𑀣𑀫𑁂𑀯, 𑀯𑀺𑀚𑁆𑀚𑀼𑀮𑀢𑀸𑀲𑀤𑀺𑀲𑀁 𑀓𑀸𑀬𑀩𑀦𑁆𑀥𑀦𑀁 𑀩𑀤𑁆𑀥𑀫𑁂𑀯, 𑀅𑀮𑀢𑁆𑀢𑀓𑀧𑀸𑀝𑀮𑀯𑀡𑁆𑀡𑀁 𑀉𑀢𑁆𑀢𑀭𑀸𑀲𑀗𑁆𑀕𑀘𑀻𑀯𑀭𑀁 𑀏𑀓𑀁𑀲𑀁 𑀓𑀢𑀫𑁂𑀯, 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑁂 𑀞𑀧𑀺𑀢𑀫𑁂𑀯, 𑀪𑀫𑀭𑀯𑀡𑁆𑀡𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀯𑀸𑀫𑀅𑀁𑀲𑀓𑀽𑀝𑁂 𑀮𑀕𑁆𑀕𑀺𑀢𑁄𑀯 𑀅𑀳𑁄𑀲𑀺. 𑀲𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂𑀬𑁂𑀯 𑀑𑀢𑀭𑀺.

𑀅𑀧𑀭𑁄𑀧𑀺 𑀓𑀸𑀲𑀺𑀕𑀸𑀫𑁂𑀬𑁂𑀯 𑀓𑀼𑀝𑀼𑀫𑁆𑀩𑀺𑀓𑁄 𑀆𑀧𑀡𑁂 𑀦𑀺𑀲𑀺𑀦𑁆𑀦𑁄 𑀏𑀓𑀁 𑀧𑀼𑀭𑀺𑀲𑀁 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 𑀇𑀢𑁆𑀣𑀺𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀮𑁄𑀪𑁄 𑀯𑀟𑁆𑀠𑀫𑀸𑀦𑁄 𑀫𑀁 ¶ 𑀅𑀧𑀸𑀬𑁂𑀲𑀼 𑀔𑀺𑀧𑀺𑀲𑁆𑀲𑀢𑀻’’𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 ¶ 𑀕𑀢𑁄.

𑀅𑀧𑀭𑁂𑀧𑀺 𑀓𑀸𑀲𑀺𑀕𑀸𑀫𑀯𑀸𑀲𑀺𑀦𑁄𑀬𑁂𑀯 𑀤𑁆𑀯𑁂 𑀧𑀺𑀢𑀸𑀧𑀼𑀢𑁆𑀢𑀸 𑀏𑀓𑀢𑁄 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀅𑀝𑀯𑀻𑀫𑀼𑀔𑁂 𑀧𑀦 𑀘𑁄𑀭𑀸 𑀉𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀢𑁂 𑀧𑀺𑀢𑀸𑀧𑀼𑀢𑁆𑀢𑁂 𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀥𑀦𑀁 𑀆𑀳𑀭𑀺𑀢𑁆𑀯𑀸 𑀢𑀯 𑀧𑀼𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀧𑀺𑀢𑀭𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀤𑁆𑀯𑁂 𑀪𑀸𑀢𑀭𑁄 𑀮𑀪𑀺𑀢𑁆𑀯𑀸 𑀓𑀦𑀺𑀝𑁆𑀞𑀁 𑀕𑀳𑁂𑀢𑁆𑀯𑀸 𑀚𑁂𑀝𑁆𑀞𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑁂 𑀮𑀪𑀺𑀢𑁆𑀯𑀸 𑀆𑀘𑀭𑀺𑀬𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀲𑀺𑀧𑁆𑀧𑀮𑁄𑀪𑁂𑀦 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀆𑀘𑀭𑀺𑀬𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀣 𑀢𑁂 𑀧𑀺𑀢𑀸𑀧𑀼𑀢𑁆𑀢𑀸𑀧𑀺 𑀢𑀢𑁆𑀣 𑀘𑁄𑀭𑀸𑀦𑀁 𑀉𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀢𑁆𑀯𑀁 𑀫𑀁 ‘𑀧𑀺𑀢𑀸’𑀢𑀺 𑀫𑀸 𑀯𑀤, 𑀅𑀳𑀫𑁆𑀧𑀺 𑀢𑀁 ‘𑀧𑀼𑀢𑁆𑀢𑁄’𑀢𑀺 𑀦 𑀯𑀓𑁆𑀔𑀸𑀫𑀻’’𑀢𑀺 𑀓𑀢𑀺𑀓𑀁 𑀓𑀢𑁆𑀯𑀸 𑀘𑁄𑀭𑁂𑀳𑀺 𑀕𑀳𑀺𑀢𑀓𑀸𑀮𑁂 ‘‘𑀢𑀼𑀫𑁆𑀳𑁂 𑀅𑀜𑁆𑀜𑀫𑀜𑁆𑀜𑀁 𑀓𑀺𑀁 𑀳𑁄𑀣𑀸’’𑀢𑀺 𑀧𑀼𑀝𑁆𑀞𑀸 ‘‘𑀦 𑀓𑀺𑀜𑁆𑀘𑀺 𑀳𑁄𑀫𑀸’’𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀅𑀝𑀯𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀞𑀺𑀢𑁂𑀲𑀼 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀲𑀻𑀮𑀁 𑀲𑁄𑀥𑁂𑀦𑁆𑀢𑁄 𑀢𑀁 𑀫𑀼𑀲𑀸𑀯𑀸𑀤𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀧𑀸𑀧𑀁 𑀯𑀟𑁆𑀠𑀫𑀸𑀦𑀁 𑀫𑀁 𑀅𑀧𑀸𑀬𑁂𑀲𑀼 𑀔𑀺𑀧𑀺𑀲𑁆𑀲𑀢𑀺, 𑀇𑀫𑀁 𑀓𑀺𑀮𑁂𑀲𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀧𑀺𑀢𑀼 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 𑀕𑀢𑁄.

𑀅𑀧𑀭𑁄𑀧𑀺 𑀓𑀸𑀲𑀺𑀕𑀸𑀫𑁂𑀬𑁂𑀯 𑀧𑀦 𑀏𑀓𑁄 𑀕𑀸𑀫𑀪𑁄𑀚𑀓𑁄 𑀫𑀸𑀖𑀸𑀢𑀁 𑀓𑀸𑀭𑀸𑀧𑁂𑀲𑀺. 𑀅𑀣 𑀦𑀁 𑀩𑀮𑀺𑀓𑀫𑁆𑀫𑀓𑀸𑀮𑁂 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀳 ‘‘𑀲𑀸𑀫𑀺, 𑀫𑀬𑀁 𑀫𑀺𑀕𑀲𑀽𑀓𑀭𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀬𑀓𑁆𑀔𑀸𑀦𑀁 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀩𑀮𑀺𑀓𑀫𑁆𑀫𑀓𑀸𑀮𑁄 𑀏𑀲𑁄’’𑀢𑀺. 𑀢𑀼𑀫𑁆𑀳𑀸𑀓𑀁 𑀧𑀼𑀩𑁆𑀩𑁂 𑀓𑀭𑀡𑀦𑀺𑀬𑀸𑀫𑁂𑀦𑁂𑀯 𑀓𑀭𑁄𑀣𑀸𑀢𑀺 𑀫𑀦𑀼𑀲𑁆𑀲𑀸 𑀩𑀳𑀼𑀁 𑀧𑀸𑀡𑀸𑀢𑀺𑀧𑀸𑀢𑀫𑀓𑀁𑀲𑀼. 𑀲𑁄 𑀩𑀳𑀼𑀁 𑀫𑀘𑁆𑀙𑀫𑀁𑀲𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀫𑀦𑀼𑀲𑁆𑀲𑀸 𑀏𑀢𑁆𑀢𑀓𑁂 𑀧𑀸𑀡𑁂 𑀫𑀸𑀭𑁂𑀦𑁆𑀢𑀸 𑀫𑀫𑁂𑀯𑁂𑀓𑀲𑁆𑀲 𑀯𑀘𑀦𑁂𑀦 𑀫𑀸𑀭𑀬𑀺𑀁𑀲𑀽’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀯𑀸𑀢𑀧𑀸𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀯𑀺𑀧𑀲𑁆𑀲𑀦𑀁 ¶ 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 𑀕𑀢𑁄.

𑀅𑀧𑀭𑁄𑀧𑀺 𑀓𑀸𑀲𑀺𑀭𑀝𑁆𑀞𑁂𑀬𑁂𑀯 𑀕𑀸𑀫𑀪𑁄𑀚𑀓𑁄 𑀫𑀚𑁆𑀚𑀯𑀺𑀓𑁆𑀓𑀬𑀁 𑀯𑀸𑀭𑁂𑀢𑁆𑀯𑀸 ‘‘𑀲𑀸𑀫𑀺, 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀲𑀼𑀭𑀸𑀙𑀡𑁄 𑀦𑀸𑀫 𑀳𑁄𑀢𑀺, 𑀓𑀺𑀁 𑀓𑀭𑁄𑀫𑀸’’𑀢𑀺 𑀫𑀳𑀸𑀚𑀦𑁂𑀦 𑀯𑀼𑀢𑁆𑀢𑁄 ‘‘𑀢𑀼𑀫𑁆𑀳𑀸𑀓𑀁 𑀧𑁄𑀭𑀸𑀡𑀓𑀦𑀺𑀬𑀸𑀫𑁂𑀦𑁂𑀯 𑀓𑀭𑁄𑀣𑀸’’𑀢𑀺 ¶ ¶ 𑀆𑀳. 𑀫𑀦𑀼𑀲𑁆𑀲𑀸 𑀙𑀡𑀁 𑀓𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀳𑀢𑁆𑀣𑀧𑀸𑀤𑁂 𑀪𑀜𑁆𑀚𑀺𑀢𑁆𑀯𑀸 𑀲𑀻𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀡𑁆𑀡𑁂 𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀼𑀤𑀡𑁆𑀟𑁂𑀦 𑀩𑀚𑁆𑀛𑀺𑀁𑀲𑀼. 𑀕𑀸𑀫𑀪𑁄𑀚𑀓𑁄 𑀢𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀺 𑀅𑀦𑀦𑀼𑀚𑀸𑀦𑀦𑁆𑀢𑁂 𑀇𑀫𑁂 𑀇𑀫𑀁 𑀤𑀼𑀓𑁆𑀔𑀁 𑀦 𑀯𑀺𑀦𑁆𑀤𑁂𑀬𑁆𑀬𑀼’’𑀦𑁆𑀢𑀺. 𑀲𑁄 𑀏𑀢𑁆𑀢𑀓𑁂𑀦 𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀯𑀸𑀢𑀧𑀸𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀫𑁂𑀯 𑀕𑀢𑁄.

𑀅𑀧𑀭𑀪𑀸𑀕𑁂 𑀢𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀫𑀸𑀤𑀻𑀳𑀺 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀭𑀸𑀚𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀞𑀫𑀯𑀬𑁂 𑀧𑀩𑁆𑀩𑀚𑁆𑀚𑀸 𑀲𑁄𑀪𑀢𑀺, 𑀇𑀫𑀲𑁆𑀫𑀺𑀁 𑀯𑀬𑁂 𑀧𑀩𑁆𑀩𑀚𑀦𑁆𑀢𑀸 𑀓𑀣𑀁 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀺𑀢𑁆𑀣, 𑀓𑀺𑀁 𑀯𑁄 𑀆𑀭𑀫𑁆𑀫𑀡𑀁 𑀅𑀳𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑁂 𑀢𑀲𑁆𑀲 𑀓𑀣𑁂𑀦𑁆𑀢𑀸 𑁋

𑁫𑁯.

‘‘𑀫𑀺𑀢𑁆𑀢𑁄 𑀫𑀺𑀢𑁆𑀢𑀲𑁆𑀲 𑀧𑀸𑀦𑀻𑀬𑀁, 𑀅𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀺𑀲𑀁;

𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁦.

‘‘𑀧𑀭𑀤𑀸𑀭𑀜𑁆𑀘 𑀤𑀺𑀲𑁆𑀯𑀸𑀦, 𑀙𑀦𑁆𑀤𑁄 𑀫𑁂 𑀉𑀤𑀧𑀚𑁆𑀚𑀣;

𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁧.

‘‘𑀧𑀺𑀢𑀭𑀁 𑀫𑁂 𑀫𑀳𑀸𑀭𑀸𑀚, 𑀘𑁄𑀭𑀸 𑀅𑀕𑀡𑁆𑀳𑀼 𑀓𑀸𑀦𑀦𑁂;

𑀢𑁂𑀲𑀸𑀳𑀁 𑀧𑀼𑀘𑁆𑀙𑀺𑀢𑁄 𑀚𑀸𑀦𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑀺𑀁.

𑁬𑁨.

‘‘𑀢𑁂𑀦 ¶ 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁩.

‘‘𑀧𑀸𑀡𑀸𑀢𑀺𑀧𑀸𑀢𑀫𑀓𑀭𑀼𑀁, 𑀲𑁄𑀫𑀬𑀸𑀕𑁂 𑀉𑀧𑀝𑁆𑀞𑀺𑀢𑁂;

𑀢𑁂𑀲𑀸𑀳𑀁 𑀲𑀫𑀦𑀼𑀜𑁆𑀜𑀸𑀲𑀺𑀁.

𑁬𑁪.

‘‘𑀢𑁂𑀦 ¶ 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁫.

‘‘𑀲𑀼𑀭𑀸𑀫𑁂𑀭𑀬𑀫𑀸𑀥𑀼𑀓𑀸, 𑀬𑁂 𑀚𑀦𑀸 𑀧𑀞𑀫𑀸𑀲𑀼 𑀦𑁄;

𑀩𑀳𑀽𑀦𑀁 𑀢𑁂 𑀅𑀦𑀢𑁆𑀣𑀸𑀬, 𑀫𑀚𑁆𑀚𑀧𑀸𑀦𑀫𑀓𑀧𑁆𑀧𑀬𑀼𑀁;

𑀢𑁂𑀲𑀸𑀳𑀁 ¶ 𑀲𑀫𑀦𑀼𑀜𑁆𑀜𑀸𑀲𑀺𑀁.

𑁬𑁬.

‘‘𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳’’𑀦𑁆𑀢𑀺. 𑁋

𑀇𑀫𑀸 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼. 𑀭𑀸𑀚𑀸𑀧𑀺 𑀏𑀓𑀫𑁂𑀓𑀲𑁆𑀲 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀬𑀁 𑀧𑀩𑁆𑀩𑀚𑁆𑀚𑀸 𑀢𑀼𑀫𑁆𑀳𑀸𑀓𑀁 𑀬𑁂𑀯𑀸𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀣𑀼𑀢𑀺𑀫𑀓𑀸𑀲𑀺.

𑀢𑀢𑁆𑀣 𑀫𑀺𑀢𑁆𑀢𑁄 𑀫𑀺𑀢𑁆𑀢𑀲𑁆𑀲𑀸𑀢𑀺 𑀫𑀳𑀸𑀭𑀸𑀚, 𑀅𑀳𑀁 𑀏𑀓𑀲𑁆𑀲 𑀫𑀺𑀢𑁆𑀢𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀫𑀺𑀢𑁆𑀢𑀲𑁆𑀲 𑀲𑀦𑁆𑀢𑀓𑀁 𑀧𑀸𑀦𑀻𑀬𑀁 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀸 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀳𑀁 𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀁 𑀧𑀸𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺. 𑀙𑀦𑁆𑀤𑁄𑀢𑀺 𑀫𑀳𑀸𑀭𑀸𑀚, 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀫𑀫 𑀧𑀭𑀤𑀸𑀭𑀁 𑀤𑀺𑀲𑁆𑀯𑀸 𑀓𑀸𑀫𑁂 𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀺. 𑀅𑀕𑀡𑁆𑀳𑀽𑀢𑀺 𑀅𑀕𑀡𑁆𑀳𑀺𑀁𑀲𑀼. 𑀚𑀸𑀦𑀦𑁆𑀢𑀺 𑀢𑁂𑀲𑀁 𑀘𑁄𑀭𑀸𑀦𑀁 ‘‘𑀅𑀬𑀁 𑀓𑀺𑀁 𑀢𑁂 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁄 𑀚𑀸𑀦𑀦𑁆𑀢𑁄𑀬𑁂𑀯 ‘‘𑀦 𑀓𑀺𑀜𑁆𑀘𑀺 𑀳𑁄𑀢𑀻’’𑀢𑀺 𑀅𑀜𑁆𑀜𑀣𑀸 𑀩𑁆𑀬𑀸𑀓𑀸𑀲𑀺𑀁. 𑀲𑁄𑀫𑀬𑀸𑀕𑁂𑀢𑀺 𑀦𑀯𑀘𑀦𑁆𑀤𑁂 𑀉𑀝𑁆𑀞𑀺𑀢𑁂 𑀲𑁄𑀫𑀬𑀸𑀕𑀁 𑀦𑀸𑀫 𑀬𑀓𑁆𑀔𑀩𑀮𑀺𑀁 𑀓𑀭𑀺𑀁𑀲𑀼, 𑀢𑀲𑁆𑀫𑀺𑀁 𑀉𑀧𑀝𑁆𑀞𑀺𑀢𑁂. 𑀲𑀫𑀦𑀼𑀜𑁆𑀜𑀸𑀲𑀺𑀦𑁆𑀢𑀺 𑀲𑀫𑀦𑀼𑀜𑁆𑀜𑁄 𑀆𑀲𑀺𑀁. 𑀲𑀼𑀭𑀸𑀫𑁂𑀭𑀬𑀫𑀸𑀥𑀼𑀓𑀸𑀢𑀺 𑀧𑀺𑀝𑁆𑀞𑀲𑀼𑀭𑀸𑀤𑀺𑀲𑀼𑀭𑀜𑁆𑀘 𑀧𑀼𑀧𑁆𑀨𑀸𑀲𑀯𑀸𑀤𑀺𑀫𑁂𑀭𑀬𑀜𑁆𑀘 𑀧𑀓𑁆𑀓𑀫𑀥𑀼 𑀯𑀺𑀬 𑀫𑀥𑀼𑀭𑀁 𑀫𑀜𑁆𑀜𑀫𑀸𑀦𑀸. 𑀬𑁂 𑀚𑀦𑀸 𑀧𑀞𑀫𑀸𑀲𑀼 𑀦𑁄𑀢𑀺 𑀬𑁂 𑀦𑁄 𑀕𑀸𑀫𑁂 𑀚𑀦𑀸 𑀧𑀞𑀫𑀁 𑀏𑀯𑀭𑀽𑀧𑀸 𑀆𑀲𑀼𑀁 𑀅𑀳𑁂𑀲𑀼𑀁. 𑀩𑀳𑀽𑀦𑀁 𑀢𑁂𑀢𑀺 𑀢𑁂 𑀏𑀓𑀤𑀺𑀯𑀲𑀁 𑀏𑀓𑀲𑁆𑀫𑀺𑀁 𑀙𑀡𑁂 𑀧𑀢𑁆𑀢𑁂 𑀩𑀳𑀽𑀦𑀁 𑀅𑀦𑀢𑁆𑀣𑀸𑀬 𑀫𑀚𑁆𑀚𑀧𑀸𑀦𑀁 𑀅𑀓𑀧𑁆𑀧𑀬𑀺𑀁𑀲𑀼.

𑀭𑀸𑀚𑀸 ¶ 𑀢𑁂𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑀻𑀯𑀭𑀲𑀸𑀝𑀓𑁂 𑀘 𑀪𑁂𑀲𑀚𑁆𑀚𑀸𑀦𑀺 𑀘 𑀤𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀧𑀺 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀕𑀫𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸 𑀯𑀢𑁆𑀣𑀼𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑁄 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 ¶ 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀢𑁆𑀣𑀺𑀬𑁄 𑀅𑀦𑀸𑀮𑀧𑀺𑀢𑁆𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀉𑀝𑁆𑀞𑀸𑀬 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑁂𑀢𑀪𑀺𑀢𑁆𑀢𑀺𑀬𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁄 𑀛𑀸𑀦𑀧𑁆𑀧𑀢𑁆𑀢𑁄 𑀓𑀸𑀫𑁂 𑀕𑀭𑀳𑀦𑁆𑀢𑁄 𑁋

𑁬𑁭.

‘‘𑀥𑀺𑀭𑀢𑁆𑀣𑀼 𑀲𑀼𑀩𑀳𑀽 𑀓𑀸𑀫𑁂, 𑀤𑀼𑀕𑁆𑀕𑀦𑁆𑀥𑁂 𑀩𑀳𑀼𑀓𑀡𑁆𑀝𑀓𑁂;

𑀬𑁂 𑀅𑀳𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀦𑀸𑀮𑀪𑀺𑀁 𑀢𑀸𑀤𑀺𑀲𑀁 𑀲𑀼𑀔’’𑀦𑁆𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀩𑀳𑀼𑀓𑀡𑁆𑀝𑀓𑁂𑀢𑀺 𑀩𑀳𑀽 𑀧𑀘𑁆𑀘𑀸𑀫𑀺𑀢𑁆𑀢𑁂. 𑀬𑁂 𑀅𑀳𑀦𑁆𑀢𑀺 𑀬𑁄 𑀅𑀳𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀸𑀤𑀺𑀲𑀦𑁆𑀢𑀺 𑀏𑀢𑀸𑀤𑀺𑀲𑀁 𑀓𑀺𑀮𑁂𑀲𑀭𑀳𑀺𑀢𑀁 𑀛𑀸𑀦𑀲𑀼𑀔𑀁.

𑀅𑀣𑀲𑁆𑀲 ¶ 𑀅𑀕𑁆𑀕𑀫𑀳𑁂𑀲𑀻 ‘‘𑀅𑀬𑀁 𑀭𑀸𑀚𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑁄 𑀅𑀳𑁄𑀲𑀺, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀅𑀓𑀣𑁂𑀢𑁆𑀯𑀸𑀯 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀝𑁆𑀞𑁄, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀤𑁆𑀯𑀸𑀭𑁂 𑀞𑀺𑀢𑀸 𑀭𑀜𑁆𑀜𑁄 𑀓𑀸𑀫𑁂𑀲𑀼 𑀕𑀭𑀳𑀦𑁆𑀢𑀲𑁆𑀲 𑀉𑀤𑀸𑀦𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀢𑁆𑀯𑀁 𑀓𑀸𑀫𑁂 𑀕𑀭𑀳𑀲𑀺, 𑀓𑀸𑀫𑀲𑀼𑀔𑀲𑀤𑀺𑀲𑀁 𑀦𑀸𑀫 𑀲𑀼𑀔𑀁 𑀦𑀢𑁆𑀣𑀻’’𑀢𑀺 𑀓𑀸𑀫𑁂 𑀯𑀡𑁆𑀡𑁂𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁬𑁮.

‘‘𑀫𑀳𑀲𑁆𑀲𑀸𑀤𑀸 𑀲𑀼𑀔𑀸 𑀓𑀸𑀫𑀸, 𑀦𑀢𑁆𑀣𑀺 𑀓𑀸𑀫𑀸 𑀧𑀭𑀁 𑀲𑀼𑀔𑀁;

𑀬𑁂 𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀺, 𑀲𑀕𑁆𑀕𑀁 𑀢𑁂 𑀉𑀧𑀧𑀚𑁆𑀚𑀭𑁂’’𑀢𑀺.

𑀢𑀢𑁆𑀣 𑀫𑀳𑀲𑁆𑀲𑀸𑀤𑀸𑀢𑀺 𑀫𑀳𑀸𑀭𑀸𑀚, 𑀏𑀢𑁂 𑀓𑀸𑀫𑀸 𑀦𑀸𑀫 𑀫𑀳𑀸𑀅𑀲𑁆𑀲𑀸𑀤𑀸, 𑀇𑀢𑁄 𑀉𑀢𑁆𑀢𑀭𑀺𑀁 𑀅𑀜𑁆𑀜𑀁 𑀲𑀼𑀔𑀁 𑀦𑀢𑁆𑀣𑀺. 𑀓𑀸𑀫𑀲𑁂𑀯𑀺𑀦𑁄 𑀳𑀺 𑀅𑀧𑀸𑀬𑁂 𑀅𑀦𑀼𑀧𑀕𑀫𑁆𑀫 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 ‘‘𑀦𑀲𑁆𑀲 𑀯𑀲𑀮𑀺, 𑀓𑀺𑀁 𑀓𑀣𑁂𑀲𑀺, 𑀓𑀸𑀫𑁂𑀲𑀼 𑀲𑀼𑀔𑀁 𑀦𑀸𑀫 𑀓𑀼𑀢𑁄 𑀅𑀢𑁆𑀣𑀺, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸 𑀏𑀢𑁂’’𑀢𑀺 𑀕𑀭𑀳𑀦𑁆𑀢𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁯.

‘‘𑀅𑀧𑁆𑀧𑀲𑁆𑀲𑀸𑀤𑀸 𑀤𑀼𑀔𑀸 𑀓𑀸𑀫𑀸, 𑀦𑀢𑁆𑀣𑀺 𑀓𑀸𑀫𑀸 𑀧𑀭𑀁 𑀤𑀼𑀔𑀁;

𑀬𑁂 𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂.

𑁭𑁦.

‘‘𑀅𑀲𑀻 ¶ 𑀬𑀣𑀸 𑀲𑀼𑀦𑀺𑀲𑀺𑀢𑁄, 𑀦𑁂𑀢𑁆𑀢𑀺𑀁𑀲𑁄𑀯 𑀲𑀼𑀧𑀸𑀬𑀺𑀓𑁄;

𑀲𑀢𑁆𑀢𑀻𑀯 𑀉𑀭𑀲𑀺 𑀔𑀺𑀢𑁆𑀢𑀸, 𑀓𑀸𑀫𑀸 𑀤𑀼𑀓𑁆𑀔𑀢𑀭𑀸 𑀢𑀢𑁄.

𑁭𑁧.

‘‘𑀅𑀗𑁆𑀕𑀸𑀭𑀸𑀦𑀁𑀯 ¶ 𑀚𑀮𑀺𑀢𑀁, 𑀓𑀸𑀲𑀼𑀁 𑀲𑀸𑀥𑀺𑀓𑀧𑁄𑀭𑀺𑀲𑀁;

𑀨𑀸𑀮𑀁𑀯 𑀤𑀺𑀯𑀲𑀁𑀢𑀢𑁆𑀢𑀁, 𑀓𑀸𑀫𑀸 𑀤𑀼𑀓𑁆𑀔𑀢𑀭𑀸 𑀢𑀢𑁄.

𑁭𑁨.

‘‘𑀯𑀺𑀲𑀁 𑀬𑀣𑀸 𑀳𑀮𑀸𑀳𑀮𑀁, 𑀢𑁂𑀮𑀁 𑀧𑀓𑁆𑀓𑀼𑀣𑀺𑀢𑀁 𑀬𑀣𑀸;

𑀢𑀫𑁆𑀩𑀮𑁄𑀳𑀯𑀺𑀮𑀻𑀦𑀁𑀯, 𑀓𑀸𑀫𑀸 𑀤𑀼𑀓𑁆𑀔𑀢𑀭𑀸 𑀢𑀢𑁄’’𑀢𑀺.

𑀢𑀢𑁆𑀣 𑀦𑁂𑀢𑁆𑀢𑀺𑀁𑀲𑁄𑀢𑀺 𑀦𑀺𑀓𑁆𑀓𑀭𑀼𑀡𑁄, 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀔𑀕𑁆𑀕𑀲𑁆𑀲 𑀦𑀸𑀫𑀁. 𑀤𑀼𑀓𑁆𑀔𑀢𑀭𑀸𑀢𑀺 𑀏𑀯𑀁 𑀚𑀮𑀺𑀢𑀗𑁆𑀕𑀸𑀭𑀓𑀸𑀲𑀼𑀁 𑀯𑀸 𑀤𑀺𑀯𑀲𑀁 𑀢𑀢𑁆𑀢𑀁 𑀨𑀸𑀮𑀁 𑀯𑀸 𑀧𑀝𑀺𑀘𑁆𑀘 𑀬𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄𑀧𑀺 𑀓𑀸𑀫𑀸𑀬𑁂𑀯 𑀤𑀼𑀓𑁆𑀔𑀢𑀭𑀸𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀕𑀸𑀣𑀸𑀬 𑀬𑀣𑀸 𑀏𑀢𑀸𑀦𑀺 𑀯𑀺𑀲𑀸𑀤𑀻𑀦𑀺 𑀤𑀼𑀓𑁆𑀔𑀸𑀯𑀳𑀦𑀢𑁄 𑀤𑀼𑀓𑁆𑀔𑀸𑀦𑀺, 𑀏𑀯𑀁 𑀓𑀸𑀫𑀸𑀧𑀺 𑀤𑀼𑀓𑁆𑀔𑀸, 𑀢𑀁 𑀧𑀦 𑀓𑀸𑀫𑀤𑀼𑀓𑁆𑀔𑀁 𑀇𑀢𑀭𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑀼𑀓𑁆𑀔𑀢𑀭𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀤𑁂𑀯𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀪𑁄𑀦𑁆𑀢𑁄 𑀅𑀫𑀘𑁆𑀘𑀸, 𑀢𑀼𑀫𑁆𑀳𑁂 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀣, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀭𑁄𑀤𑀦𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀉𑀝𑁆𑀞𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀦𑀺𑀮𑀧𑀣𑁂𑀦𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀓𑀺𑀮𑁂𑀲𑁄 𑀔𑀼𑀤𑁆𑀤𑀓𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀧𑀡𑁆𑀟𑀺𑀢𑁂𑀳𑀺 𑀦𑀺𑀕𑁆𑀕𑀳𑀺𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼, 𑀤𑁂𑀯𑀻 𑀭𑀸𑀳𑀼𑀮𑀫𑀸𑀢𑀸 𑀅𑀳𑁄𑀲𑀺, 𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀧𑀸𑀦𑀻𑀬𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁬𑁦] 𑁬. 𑀬𑀼𑀥𑀜𑁆𑀘𑀬𑀚𑀸𑀢𑀓𑀯𑀡𑁆𑀡𑀦𑀸

𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀩𑁆𑀬𑀽𑀴𑁆𑀳𑀦𑁆𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 ‘‘𑀆𑀯𑀼𑀲𑁄, 𑀲𑀘𑁂 𑀤𑀲𑀩𑀮𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀅𑀪𑀯𑀺𑀲𑁆𑀲 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀭𑀺𑀤𑁆𑀥𑀻𑀳𑀺 𑀲𑀫𑀺𑀤𑁆𑀥𑁄 𑀧𑀭𑁄𑀲𑀳𑀲𑁆𑀲𑀧𑀼𑀢𑁆𑀢𑀧𑀭𑀺𑀯𑀸𑀭𑁄 ¶ , 𑀲𑁄 𑀏𑀯𑀭𑀽𑀧𑀁 𑀲𑀺𑀭𑀺𑀯𑀺𑀪𑀯𑀁 𑀧𑀳𑀸𑀬 𑀓𑀸𑀫𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀙𑀦𑁆𑀦𑀲𑀳𑀸𑀬𑁄𑀯 𑀓𑀡𑁆𑀝𑀓𑀫𑀸𑀭𑀼𑀬𑁆𑀳 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁄𑀫𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄’’𑀢𑀺 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀚𑁆𑀚𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀭𑀫𑁆𑀫𑀦𑀕𑀭𑁂 𑀲𑀩𑁆𑀩𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀅𑀬𑀜𑁆𑀳𑀺 𑀩𑀸𑀭𑀸𑀡𑀲𑀻 𑀉𑀤𑀬𑀚𑀸𑀢𑀓𑁂 (𑀚𑀸. 𑁧.𑁧𑁧.𑁩𑁭 𑀆𑀤𑀬𑁄) 𑀲𑀼𑀭𑀼𑀦𑁆𑀥𑀦𑀦𑀕𑀭𑀁 𑀦𑀸𑀫 𑀚𑀸𑀢𑀸, 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑁂 (𑀚𑀸. 𑁨.𑁧𑁭.𑁧𑁯𑁫 𑀆𑀤𑀬𑁄) 𑀲𑀼𑀤𑀲𑁆𑀲𑀦𑀁 𑀦𑀸𑀫, 𑀲𑁄𑀡𑀦𑀦𑁆𑀤𑀚𑀸𑀢𑀓𑁂 (𑀚𑀸. 𑁨.𑁨𑁦.𑁯𑁨 𑀆𑀤𑀬𑁄) 𑀩𑁆𑀭𑀳𑁆𑀫𑀯𑀟𑁆𑀠𑀦𑀁 𑀦𑀸𑀫, 𑀔𑀡𑁆𑀟𑀳𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁨.𑁯𑁮𑁨 𑀆𑀤𑀬𑁄) 𑀧𑀼𑀧𑁆𑀨𑀯𑀢𑀻 ¶ 𑀦𑀸𑀫, 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀚𑀸𑀢𑀓𑁂 (𑀚𑀸. 𑁧.𑁧𑁦.𑁩𑁯 𑀆𑀤𑀬𑁄) 𑀫𑁄𑀴𑀺𑀦𑀻 𑀦𑀸𑀫, 𑀇𑀫𑀲𑁆𑀫𑀺𑀁 𑀧𑀦 𑀬𑀼𑀥𑀜𑁆𑀘𑀬𑀚𑀸𑀢𑀓𑁂 𑀭𑀫𑁆𑀫𑀦𑀕𑀭𑀁 𑀦𑀸𑀫 𑀅𑀳𑁄𑀲𑀺. 𑀏𑀯𑀫𑀲𑁆𑀲𑀸 𑀓𑀤𑀸𑀘𑀺 𑀦𑀸𑀫𑀁 𑀧𑀭𑀺𑀯𑀢𑁆𑀢𑀢𑀺. 𑀢𑀢𑁆𑀣 𑀲𑀩𑁆𑀩𑀤𑀢𑁆𑀢𑀭𑀜𑁆𑀜𑁄 𑀧𑀼𑀢𑁆𑀢𑀲𑀳𑀲𑁆𑀲𑀁 𑀅𑀳𑁄𑀲𑀺. 𑀬𑀼𑀥𑀜𑁆𑀘𑀬𑀲𑁆𑀲 𑀦𑀸𑀫 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀲𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀭𑀣𑀯𑀭𑀫𑀸𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀲𑀺𑀭𑀺𑀯𑀺𑀪𑀯𑁂𑀦 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀕𑁆𑀕𑀢𑀺𑀡𑀕𑁆𑀕𑀲𑀸𑀔𑀕𑁆𑀕𑀫𑀓𑁆𑀓𑀝𑀓𑀲𑀼𑀢𑁆𑀢𑀚𑀸𑀮𑀸𑀤𑀻𑀲𑀼 𑀫𑀼𑀢𑁆𑀢𑀸𑀚𑀸𑀮𑀸𑀓𑀸𑀭𑁂𑀦 𑀮𑀕𑁆𑀕𑀺𑀢𑀉𑀲𑁆𑀲𑀯𑀩𑀺𑀦𑁆𑀤𑀽𑀦𑀺 𑀤𑀺𑀲𑁆𑀯𑀸 ‘‘𑀲𑀫𑁆𑀫 𑀲𑀸𑀭𑀣𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀢𑁂 𑀤𑁂𑀯, 𑀳𑀺𑀫𑀲𑀫𑀬𑁂 𑀧𑀢𑀦𑀓𑀉𑀲𑁆𑀲𑀯𑀩𑀺𑀦𑁆𑀤𑀽𑀦𑀺 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀤𑀺𑀯𑀲𑀪𑀸𑀕𑀁 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀲𑀸𑀬𑀦𑁆𑀳𑀓𑀸𑀮𑁂 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀢𑁂 𑀅𑀤𑀺𑀲𑁆𑀯𑀸𑀯 ‘‘𑀲𑀫𑁆𑀫 𑀲𑀸𑀭𑀣𑀺, 𑀓𑀳𑀁 𑀦𑀼 𑀔𑁄 𑀏𑀢𑁂 𑀉𑀲𑁆𑀲𑀯𑀩𑀺𑀦𑁆𑀤𑀽, 𑀦 𑀢𑁂 𑀇𑀤𑀸𑀦𑀺 𑀧𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀢𑁂 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀲𑀩𑁆𑀩𑁂𑀯 𑀪𑀺𑀚𑁆𑀚𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑀗𑁆𑀔𑀸𑀭𑀸𑀧𑀺 𑀢𑀺𑀡𑀕𑁆𑀕𑁂 𑀉𑀲𑁆𑀲𑀯𑀩𑀺𑀦𑁆𑀤𑀼𑀲𑀤𑀺𑀲𑀸𑀯, 𑀫𑀬𑀸 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀅𑀧𑀻𑀴𑀺𑀢𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀉𑀲𑁆𑀲𑀯𑀩𑀺𑀦𑁆𑀤𑀼𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀤𑀺𑀢𑁆𑀢𑁂 𑀯𑀺𑀬 𑀢𑀬𑁄 𑀪𑀯𑁂 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀬 𑀯𑀺𑀦𑀺𑀘𑁆𑀙𑀬𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀁𑀬𑁂𑀯 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁩.

‘‘𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀩𑁆𑀬𑀽𑀴𑁆𑀳𑀁 ¶ ¶ , 𑀅𑀳𑀁 𑀯𑀦𑁆𑀤𑁂 𑀭𑀣𑁂𑀲𑀪𑀁;

𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁 𑀭𑀸𑀚, 𑀢𑀁 𑀤𑁂𑀯𑁄 𑀅𑀦𑀼𑀫𑀜𑁆𑀜𑀢𑀽’’𑀢𑀺.

𑀢𑀢𑁆𑀣 𑀧𑀭𑀺𑀩𑁆𑀬𑀽𑀴𑁆𑀳𑀦𑁆𑀢𑀺 𑀧𑀭𑀺𑀯𑀸𑀭𑀺𑀢𑀁. 𑀢𑀁 𑀤𑁂𑀯𑁄𑀢𑀺 𑀢𑀁 𑀫𑀫 𑀧𑀩𑁆𑀩𑀚𑁆𑀚𑀁 𑀤𑁂𑀯𑁄 𑀅𑀦𑀼𑀚𑀸𑀦𑀸𑀢𑀽𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀭𑀸𑀚𑀸 𑀦𑀺𑀯𑀸𑀭𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁪.

‘‘𑀲𑀘𑁂 𑀢𑁂 𑀊𑀦𑀁 𑀓𑀸𑀫𑁂𑀳𑀺, 𑀅𑀳𑀁 𑀧𑀭𑀺𑀧𑀽𑀭𑀬𑀸𑀫𑀺 𑀢𑁂;

𑀬𑁄 𑀢𑀁 𑀳𑀺𑀁 𑀲𑀢𑀺 𑀯𑀸𑀭𑁂𑀫𑀺, 𑀫𑀸 𑀧𑀩𑁆𑀩𑀚 𑀬𑀼𑀥𑀜𑁆𑀘𑀬𑀸’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀓𑀼𑀫𑀸𑀭𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁫.

‘‘𑀦 𑀫𑀢𑁆𑀣𑀺 𑀊𑀦𑀁 𑀓𑀸𑀫𑁂𑀳𑀺, 𑀳𑀺𑀁𑀲𑀺𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺;

𑀤𑀻𑀧𑀜𑁆𑀘 𑀓𑀸𑀢𑀼𑀫𑀺𑀘𑁆𑀙𑀸𑀫𑀺, 𑀬𑀁 𑀚𑀭𑀸 𑀦𑀸𑀪𑀺𑀓𑀻𑀭𑀢𑀻’’𑀢𑀺.

𑀢𑀢𑁆𑀣 𑀤𑀻𑀧𑀜𑁆𑀘𑀸𑀢𑀺 𑀢𑀸𑀢 𑀦𑁂𑀯 𑀫𑀬𑁆𑀳𑀁 𑀓𑀸𑀫𑁂𑀳𑀺 𑀊𑀦𑀁 𑀅𑀢𑁆𑀣𑀺, 𑀦 𑀫𑀁 𑀳𑀺𑀁𑀲𑀦𑁆𑀢𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺, 𑀅𑀳𑀁 𑀧𑀦 𑀧𑀭𑀮𑁄𑀓𑀕𑀫𑀦𑀸𑀬 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀸𑀢𑀼𑀫𑀺𑀘𑁆𑀙𑀸𑀫𑀺. 𑀓𑀻𑀤𑀺𑀲𑀁? 𑀬𑀁 𑀚𑀭𑀸 𑀦𑀸𑀪𑀺𑀓𑀻𑀭𑀢𑀺 𑀦 𑀯𑀺𑀤𑁆𑀥𑀁𑀲𑁂𑀢𑀺, 𑀢𑀫𑀳𑀁 𑀓𑀸𑀢𑀼𑀫𑀺𑀘𑁆𑀙𑀸𑀫𑀺, 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀺𑀲𑁆𑀲𑀸𑀫𑀺, 𑀦 𑀫𑁂 𑀓𑀸𑀫𑁂𑀳𑀺 𑀅𑀢𑁆𑀣𑁄, 𑀅𑀦𑀼𑀚𑀸𑀦𑀸𑀣 𑀫𑀁, 𑀫𑀳𑀸𑀭𑀸𑀚𑀸𑀢𑀺 𑀯𑀤𑀢𑀺.

𑀇𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺, 𑀭𑀸𑀚𑀸 ‘‘𑀫𑀸 𑀧𑀩𑁆𑀩𑀚𑀸’’𑀢𑀺 𑀯𑀸𑀭𑁂𑀢𑀺. 𑀢𑀫𑀢𑁆𑀣𑀫𑀸𑀯𑀺𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀉𑀧𑀟𑁆𑀠𑀁 𑀕𑀸𑀣𑀫𑀸𑀳 𑁋

𑁭𑁬.

‘‘𑀧𑀼𑀢𑁆𑀢𑁄 𑀯𑀸 𑀧𑀺𑀢𑀭𑀁 𑀬𑀸𑀘𑁂, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀫𑁄𑀭𑀲’’𑀦𑁆𑀢𑀺.

𑀢𑀢𑁆𑀣 𑀯𑀸-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑁄 𑀘 𑀧𑀺𑀢𑀭𑀁 𑀬𑀸𑀘𑀢𑀺, 𑀧𑀺𑀢𑀸 𑀘 𑀑𑀭𑀲𑀁 𑀧𑀼𑀢𑁆𑀢𑀁 𑀬𑀸𑀘𑀢𑀻’’𑀢𑀺.

𑀲𑁂𑀲𑀁 𑀉𑀧𑀟𑁆𑀠𑀕𑀸𑀣𑀁 𑀭𑀸𑀚𑀸 𑀆𑀳 𑁋

‘‘𑀦𑁂𑀕𑀫𑁄 ¶ 𑀢𑀁 𑀬𑀸𑀘𑁂 𑀢𑀸𑀢, 𑀫𑀸 𑀧𑀩𑁆𑀩𑀚 𑀬𑀼𑀥𑀜𑁆𑀘𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀬𑀁 𑀢𑁂 𑀢𑀸𑀢 𑀦𑀺𑀕𑀫𑀯𑀸𑀲𑀺𑀫𑀳𑀸𑀚𑀦𑁄 𑀬𑀸𑀘𑀢𑀺, 𑀦𑀕𑀭𑀚𑀦𑁄𑀧𑀺 𑀫𑀸 𑀢𑁆𑀯𑀁 𑀧𑀩𑁆𑀩𑀚𑀸𑀢𑀺.

𑀓𑀼𑀫𑀸𑀭𑁄 𑀧𑀼𑀦𑀧𑀺 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁭𑁭.

‘‘𑀫𑀸 ¶ 𑀫𑀁 𑀤𑁂𑀯 𑀦𑀺𑀯𑀸𑀭𑁂𑀳𑀺, 𑀧𑀩𑁆𑀩𑀚𑀦𑁆𑀢𑀁 𑀭𑀣𑁂𑀲𑀪;

𑀫𑀸𑀳𑀁 𑀓𑀸𑀫𑁂𑀳𑀺 𑀲𑀫𑁆𑀫𑀢𑁆𑀢𑁄, 𑀚𑀭𑀸𑀬 𑀯𑀲𑀫𑀦𑁆𑀯𑀕𑀽’’𑀢𑀺.

𑀢𑀢𑁆𑀣 𑀯𑀲𑀫𑀦𑁆𑀯𑀕𑀽𑀢𑀺 𑀫𑀸 𑀅𑀳𑀁 𑀓𑀸𑀫𑁂𑀳𑀺 𑀲𑀫𑁆𑀫𑀢𑁆𑀢𑁄 𑀧𑀫𑀢𑁆𑀢𑁄 𑀚𑀭𑀸𑀬 𑀯𑀲𑀕𑀸𑀫𑀻 𑀦𑀸𑀫 𑀳𑁄𑀫𑀺, 𑀯𑀝𑁆𑀝𑀤𑀼𑀓𑁆𑀔𑀁 𑀧𑀦 𑀔𑁂𑀧𑁂𑀢𑁆𑀯𑀸 𑀬𑀣𑀸 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀯𑀺𑀚𑁆𑀛𑀦𑀓𑁄 𑀳𑁄𑀫𑀺,. 𑀢𑀣𑀸 𑀫𑀁 𑀑𑀮𑁄𑀓𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀅𑀧𑁆𑀧𑀝𑀺𑀪𑀸𑀡𑁄 𑀅𑀳𑁄𑀲𑀺. 𑀫𑀸𑀢𑀸 𑀧𑀦𑀲𑁆𑀲 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯𑀺, 𑀧𑀺𑀢𑀭𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀓𑀺𑀁 𑀢𑀼𑀫𑁆𑀳𑁂 𑀓𑀣𑁂𑀣𑀸’’𑀢𑀺 𑀦𑀺𑀭𑀲𑁆𑀲𑀸𑀲𑁂𑀦 𑀫𑀼𑀔𑁂𑀦 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀖𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀸𑀘𑀫𑀸𑀦𑀸 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁭𑁮.

‘‘𑀅𑀳𑀁 𑀢𑀁 𑀢𑀸𑀢 𑀬𑀸𑀘𑀸𑀫𑀺, 𑀅𑀳𑀁 𑀧𑀼𑀢𑁆𑀢 𑀦𑀺𑀯𑀸𑀭𑀬𑁂;

𑀘𑀺𑀭𑀁 𑀢𑀁 𑀤𑀝𑁆𑀞𑀼𑀫𑀺𑀘𑁆𑀙𑀸𑀫𑀺, 𑀫𑀸 𑀧𑀩𑁆𑀩𑀚 𑀬𑀼𑀥𑀜𑁆𑀘𑀬𑀸’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀓𑀼𑀫𑀸𑀭𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁭𑁯.

‘‘𑀉𑀲𑁆𑀲𑀸𑀯𑁄𑀯 𑀢𑀺𑀡𑀕𑁆𑀕𑀫𑁆𑀳𑀺, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀏𑀯𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀫𑀸 𑀫𑀁 𑀅𑀫𑁆𑀫 𑀦𑀺𑀯𑀸𑀭𑀬𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀫𑁆𑀫, 𑀬𑀣𑀸 𑀢𑀺𑀡𑀕𑁆𑀕𑁂 𑀉𑀲𑁆𑀲𑀯𑀩𑀺𑀦𑁆𑀤𑀼 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀁 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀣𑀯𑀺𑀬𑀁 𑀧𑀢𑀢𑀺, 𑀏𑀯𑀁 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀁 𑀢𑀸𑀯𑀓𑀸𑀮𑀺𑀓𑀁 𑀅𑀘𑀺𑀭𑀝𑁆𑀞𑀺𑀢𑀺𑀓𑀁, 𑀏𑀯𑀭𑀽𑀧𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀓𑀣𑀁 𑀢𑁆𑀯𑀁 𑀘𑀺𑀭𑀁 𑀫𑀁 𑀧𑀲𑁆𑀲𑀲𑀺, 𑀫𑀸 𑀫𑀁 𑀦𑀺𑀯𑀸𑀭𑁂𑀳𑀻𑀢𑀺.

𑀏𑀯𑀁 ¶ 𑀯𑀼𑀢𑁆𑀢𑁂𑀧𑀺 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯. 𑀢𑀢𑁄 𑀫𑀳𑀸𑀲𑀢𑁆𑀢𑁄 𑀧𑀺𑀢𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁦.

‘‘𑀢𑀭𑀫𑀸𑀦𑁄 𑀇𑀫𑀁 𑀬𑀸𑀦𑀁, 𑀆𑀭𑁄𑀧𑁂𑀢𑀼 𑀭𑀣𑁂𑀲𑀪;

𑀫𑀸 𑀫𑁂 𑀫𑀸𑀢𑀸 𑀢𑀭𑀦𑁆𑀢𑀲𑁆𑀲, 𑀅𑀦𑁆𑀢𑀭𑀸𑀬𑀓𑀭𑀸 𑀅𑀳𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀢𑀸𑀢 𑀭𑀣𑁂𑀲𑀪, 𑀇𑀫𑀁 𑀫𑀫 𑀫𑀸𑀢𑀭𑀁 𑀢𑀭𑀫𑀸𑀦𑁄 𑀧𑀼𑀭𑀺𑀲𑁄 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬𑀸𑀦𑀁 𑀆𑀭𑁄𑀧𑁂𑀢𑀼, 𑀫𑀸 𑀫𑁂 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀓𑀦𑁆𑀢𑀸𑀭𑀁 𑀢𑀭𑀦𑁆𑀢𑀲𑁆𑀲 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀫𑀸𑀢𑀸 𑀅𑀦𑁆𑀢𑀭𑀸𑀬𑀓𑀭𑀸 𑀅𑀳𑀽𑀢𑀺.

𑀭𑀸𑀚𑀸 ¶ 𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀕𑀘𑁆𑀙, 𑀪𑀤𑁆𑀤𑁂, 𑀢𑀯 𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀭𑀢𑀺𑀯𑀟𑁆𑀠𑀦𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀸’’𑀢𑀺 𑀆𑀳. 𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀦𑀸𑀭𑀻𑀕𑀡𑀧𑀭𑀺𑀯𑀼𑀢𑀸 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀓𑀸 𑀦𑀼 𑀔𑁄 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀻’’𑀢𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼 𑀕𑀢𑀓𑀸𑀮𑁂 𑀧𑀼𑀦 𑀧𑀺𑀢𑀭𑀁 𑀬𑀸𑀘𑀺. 𑀭𑀸𑀚𑀸 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀢𑁂𑀦 𑀳𑀺 𑀢𑀸𑀢, 𑀢𑀯 𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀳𑀺, 𑀧𑀩𑁆𑀩𑀚𑀸𑀳𑀻’’𑀢𑀺 𑀅𑀦𑀼𑀚𑀸𑀦𑀺. 𑀭𑀜𑁆𑀜𑁄 𑀅𑀦𑀼𑀜𑁆𑀜𑀸𑀢𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑁄 𑀬𑀼𑀥𑀺𑀝𑁆𑀞𑀺𑀮𑀓𑀼𑀫𑀸𑀭𑁄 𑀦𑀸𑀫 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀢𑀸𑀢, 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀅𑀦𑀼𑀚𑀸𑀦𑀸𑀧𑁂𑀲𑀺. 𑀉𑀪𑁄𑀧𑀺 𑀪𑀸𑀢𑀭𑁄 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀫𑀳𑀸𑀚𑀦𑀧𑀭𑀺𑀯𑀼𑀢𑀸 𑀯𑀺𑀦𑀺𑀘𑁆𑀙𑀬𑀢𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀤𑁂𑀯𑀻𑀧𑀺 𑀫𑀳𑀸𑀲𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑁂 𑀧𑀩𑁆𑀩𑀚𑀺𑀢𑁂 𑀭𑀫𑁆𑀫𑀦𑀕𑀭𑀁 𑀢𑀼𑀘𑁆𑀙𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁮𑁧.

‘‘𑀅𑀪𑀺𑀥𑀸𑀯𑀣 𑀪𑀤𑁆𑀤𑀦𑁆𑀢𑁂, 𑀲𑀼𑀜𑁆𑀜𑀁 𑀳𑁂𑀲𑁆𑀲𑀢𑀺 𑀭𑀫𑁆𑀫𑀓𑀁;

𑀬𑀼𑀥𑀜𑁆𑀘𑀬𑁄 𑀅𑀦𑀼𑀜𑁆𑀜𑀸𑀢𑁄, 𑀲𑀩𑁆𑀩𑀤𑀢𑁆𑀢𑁂𑀦 𑀭𑀸𑀚𑀺𑀦𑀸.

𑁮𑁨.

‘‘𑀬𑁄𑀳𑀼 ¶ 𑀲𑁂𑀝𑁆𑀞𑁄 𑀲𑀳𑀲𑁆𑀲𑀲𑁆𑀲, 𑀬𑀼𑀯𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑁄;

𑀲𑁄𑀬𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁄, 𑀓𑀸𑀲𑀸𑀬𑀯𑀲𑀦𑁄 𑀩𑀮𑀻’’𑀢𑀺.

𑀢𑀢𑁆𑀣 𑀅𑀪𑀺𑀥𑀸𑀯𑀣𑀸𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀦𑀸𑀭𑀺𑀬𑁄 𑀲𑀩𑁆𑀩𑀸 𑀯𑁂𑀕𑁂𑀦 𑀥𑀸𑀯𑀣𑀸𑀢𑀺 𑀆𑀡𑀸𑀧𑁂𑀢𑀺. 𑀪𑀤𑁆𑀤𑀦𑁆𑀢𑁂𑀢𑀺 𑀏𑀯𑀁 𑀕𑀦𑁆𑀢𑁆𑀯𑀸 ‘‘𑀪𑀤𑁆𑀤𑀁 𑀢𑀯 𑀳𑁄𑀢𑀽’’𑀢𑀺 𑀯𑀤𑀣. 𑀭𑀫𑁆𑀫𑀓𑀦𑁆𑀢𑀺 𑀭𑀫𑁆𑀫𑀦𑀕𑀭𑀁 𑀲𑀦𑁆𑀥𑀸𑀬𑀸𑀳. 𑀬𑁄𑀳𑀼 𑀲𑁂𑀝𑁆𑀞𑁄𑀢𑀺 𑀬𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀲𑀳𑀲𑁆𑀲𑀲𑁆𑀲 𑀲𑁂𑀝𑁆𑀞𑁄 𑀅𑀳𑁄𑀲𑀺, 𑀲𑁄 𑀧𑀩𑁆𑀩𑀚𑀺𑀢𑁄𑀢𑀺 𑀧𑀩𑁆𑀩𑀚𑁆𑀚𑀸𑀬 𑀕𑀘𑁆𑀙𑀦𑁆𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳.

𑀩𑁄𑀥𑀺𑀲𑀢𑁆𑀢𑁄𑀧𑀺 ¶ 𑀦 𑀢𑀸𑀯 𑀧𑀩𑁆𑀩𑀚𑀢𑀺. 𑀲𑁄 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀓𑀦𑀺𑀝𑁆𑀞𑀁 𑀬𑀼𑀥𑀺𑀝𑁆𑀞𑀺𑀮𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀫𑀳𑀸𑀚𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀉𑀪𑁄𑀧𑀺 𑀪𑀸𑀢𑀭𑁄 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑁄𑀭𑀫𑁂 𑀞𑀸𑀦𑁂 𑀅𑀲𑁆𑀲𑀫𑀧𑀤𑀁 𑀓𑀭𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀤𑀻𑀳𑀺 𑀬𑀸𑀯𑀚𑀻𑀯𑀁 𑀬𑀸𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁. 𑀢𑀫𑀢𑁆𑀣𑀁 𑀑𑀲𑀸𑀦𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸𑀬 𑀤𑀻𑀧𑁂𑀢𑀺 𑁋

𑁮𑁩.

‘‘𑀉𑀪𑁄 𑀓𑀼𑀫𑀸𑀭𑀸 𑀧𑀩𑁆𑀩𑀚𑀺𑀢𑀸, 𑀬𑀼𑀥𑀜𑁆𑀘𑀬𑁄 𑀬𑀼𑀥𑀺𑀝𑁆𑀞𑀺𑀮𑁄;

𑀧𑀳𑀸𑀬 𑀫𑀸𑀢𑀸𑀧𑀺𑀢𑀭𑁄, 𑀲𑀗𑁆𑀕𑀁 𑀙𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄’’𑀢𑀺.

𑀢𑀢𑁆𑀣 ¶ 𑀫𑀘𑁆𑀘𑀼𑀦𑁄𑀢𑀺 𑀫𑀸𑀭𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀺𑀓𑁆𑀔𑀯𑁂, 𑀬𑀼𑀥𑀜𑁆𑀘𑀬𑁄 𑀘 𑀬𑀼𑀥𑀺𑀝𑁆𑀞𑀺𑀮𑁄 𑀘 𑀢𑁂 𑀉𑀪𑁄𑀧𑀺 𑀓𑀼𑀫𑀸𑀭𑀸 𑀫𑀸𑀢𑀸𑀧𑀺𑀢𑀭𑁄 𑀧𑀳𑀸𑀬 𑀫𑀸𑀭𑀲𑁆𑀲 𑀲𑀦𑁆𑀢𑀓𑀁 𑀭𑀸𑀕𑀤𑁄𑀲𑀫𑁄𑀳𑀲𑀗𑁆𑀕𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 ‘‘𑀦 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀬𑀼𑀥𑀺𑀝𑁆𑀞𑀺𑀮𑀓𑀼𑀫𑀸𑀭𑁄 𑀆𑀦𑀦𑁆𑀤𑁄, 𑀬𑀼𑀥𑀜𑁆𑀘𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀬𑀼𑀥𑀜𑁆𑀘𑀬𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁬𑁧] 𑁭. 𑀤𑀲𑀭𑀣𑀚𑀸𑀢𑀓𑀯𑀡𑁆𑀡𑀦𑀸

𑀏𑀣 𑀮𑀓𑁆𑀔𑀡 𑀲𑀻𑀢𑀸 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀢𑀧𑀺𑀢𑀺𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀲𑁄𑀓𑀸𑀪𑀺𑀪𑀽𑀢𑁄 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀲𑁄𑀓𑀸𑀦𑀼𑀯𑀢𑁆𑀢𑀓𑁄𑀯 𑀅𑀳𑁄𑀲𑀺. 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀏𑀓𑀁 𑀧𑀘𑁆𑀙𑀸𑀲𑀫𑀡𑀁 ¶ 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀫𑀥𑀼𑀭𑀯𑀘𑀦𑁂𑀦 𑀆𑀮𑀧𑀦𑁆𑀢𑁄 ‘‘𑀓𑀺𑀁 𑀲𑁄𑀘𑀲𑀺 𑀉𑀧𑀸𑀲𑀓𑀸’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂, 𑀧𑀺𑀢𑀼𑀲𑁄𑀓𑁄 𑀫𑀁 𑀩𑀸𑀥𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀸𑀲𑀓, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀝𑁆𑀞𑀯𑀺𑀥𑁂 𑀮𑁄𑀓𑀥𑀫𑁆𑀫𑁂 𑀢𑀣𑀢𑁄 𑀚𑀸𑀦𑀦𑁆𑀢𑀸 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑁄𑀓𑀁 𑀦 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀤𑀲𑀭𑀣𑀫𑀳𑀸𑀭𑀸𑀚𑀸 𑀦𑀸𑀫 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 ¶ 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀺𑀓𑀸 𑀅𑀕𑁆𑀕𑀫𑀳𑁂𑀲𑀻 𑀤𑁆𑀯𑁂 𑀧𑀼𑀢𑁆𑀢𑁂 𑀏𑀓𑀜𑁆𑀘 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀚𑁂𑀝𑁆𑀞𑀧𑀼𑀢𑁆𑀢𑁄 𑀭𑀸𑀫𑀧𑀡𑁆𑀟𑀺𑀢𑁄 𑀦𑀸𑀫 𑀅𑀳𑁄𑀲𑀺, 𑀤𑀼𑀢𑀺𑀬𑁄 𑀮𑀓𑁆𑀔𑀡𑀓𑀼𑀫𑀸𑀭𑁄 𑀦𑀸𑀫, 𑀥𑀻𑀢𑀸 𑀲𑀻𑀢𑀸 𑀤𑁂𑀯𑀻 𑀦𑀸𑀫. 𑀅𑀧𑀭𑀪𑀸𑀕𑁂 𑀫𑀳𑁂𑀲𑀻 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀓𑀸𑀮𑀓𑀢𑀸𑀬 𑀘𑀺𑀭𑀢𑀭𑀁 𑀲𑁄𑀓𑀯𑀲𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑁂𑀳𑀺 𑀲𑀜𑁆𑀜𑀸𑀧𑀺𑀢𑁄 𑀢𑀲𑁆𑀲𑀸 𑀓𑀢𑁆𑀢𑀩𑁆𑀩𑀧𑀭𑀺𑀳𑀸𑀭𑀁 ¶ 𑀓𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸. 𑀲𑀸𑀧𑀺 𑀅𑀧𑀭𑀪𑀸𑀕𑁂 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀮𑀤𑁆𑀥𑀕𑀩𑁆𑀪𑀧𑀭𑀺𑀳𑀸𑀭𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀪𑀭𑀢𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀭𑀸𑀚𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 ‘‘𑀪𑀤𑁆𑀤𑁂, 𑀯𑀭𑀁 𑀢𑁂 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑀸 𑀕𑀳𑀺𑀢𑀓𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀯𑀭𑁄 𑀤𑀺𑀦𑁆𑀦𑁄, 𑀇𑀤𑀸𑀦𑀺𑀲𑁆𑀲 𑀯𑀭𑀁 𑀤𑁂𑀣𑀸’’𑀢𑀺 𑀆𑀳. 𑀕𑀡𑁆𑀳, 𑀪𑀤𑁆𑀤𑁂𑀢𑀺. ‘‘𑀤𑁂𑀯, 𑀧𑀼𑀢𑁆𑀢𑀲𑁆𑀲 𑀫𑁂 𑀭𑀚𑁆𑀚𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 ‘‘𑀦𑀲𑁆𑀲, 𑀯𑀲𑀮𑀺, 𑀫𑀬𑁆𑀳𑀁 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀯𑀺𑀬 𑀚𑀮𑀦𑁆𑀢𑀺, 𑀢𑁂 𑀫𑀸𑀭𑀸𑀧𑁂𑀢𑁆𑀯𑀸 𑀢𑀯 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀬𑀸𑀘𑀲𑀻’’𑀢𑀺 𑀢𑀚𑁆𑀚𑁂𑀲𑀺. 𑀲𑀸 𑀪𑀻𑀢𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀭𑀸𑀚𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀭𑀚𑁆𑀚𑀫𑁂𑀯 𑀬𑀸𑀘𑀺.

𑀭𑀸𑀚𑀸 𑀢𑀲𑁆𑀲𑀸 𑀢𑀁 𑀯𑀭𑀁 𑀅𑀤𑀢𑁆𑀯𑀸𑀯 𑀘𑀺𑀦𑁆𑀢𑁂𑀲𑀺 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀓𑀢𑀜𑁆𑀜𑀽 𑀫𑀺𑀢𑁆𑀢𑀤𑀼𑀩𑁆𑀪𑀻, 𑀅𑀬𑀁 𑀫𑁂 𑀓𑀽𑀝𑀧𑀡𑁆𑀡𑀁 𑀯𑀸 𑀓𑀽𑀝𑀮𑀜𑁆𑀚𑀁 𑀯𑀸 𑀓𑀢𑁆𑀯𑀸 𑀧𑀼𑀢𑁆𑀢𑁂 𑀖𑀸𑀢𑀸𑀧𑁂𑀬𑁆𑀬𑀸’’𑀢𑀺. 𑀲𑁄 𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀇𑀥 𑀯𑀲𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀬𑁄𑀧𑀺 𑀪𑀯𑁂𑀬𑁆𑀬, 𑀢𑀼𑀫𑁆𑀳𑁂 𑀲𑀸𑀫𑀦𑁆𑀢𑀭𑀚𑁆𑀚𑀁 𑀯𑀸 𑀅𑀭𑀜𑁆𑀜𑀁 𑀯𑀸 𑀕𑀦𑁆𑀢𑁆𑀯𑀸 𑀫𑀫 𑀫𑀭𑀡𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀦𑁂𑀫𑀺𑀢𑁆𑀢𑀓𑁂 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀜𑁆𑀜𑀸𑀦𑀺 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 ¶ 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀢𑀸𑀢𑀸, 𑀇𑀢𑁄 𑀤𑁆𑀯𑀸𑀤𑀲𑀯𑀲𑁆𑀲𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀦𑁆𑀢𑀸 𑀧𑀸𑀲𑀸𑀤𑀸 𑀑𑀢𑀭𑀺𑀁𑀲𑀼. 𑀲𑀻𑀢𑀸 𑀤𑁂𑀯𑀻 ‘‘𑀅𑀳𑀫𑁆𑀧𑀺 𑀪𑀸𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀦𑁆𑀢𑀻 𑀦𑀺𑀓𑁆𑀔𑀫𑀺. 𑀢𑀬𑁄𑀧𑀺 𑀚𑀦𑀸 𑀫𑀳𑀸𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀚𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑁆𑀧𑀦𑁆𑀦𑁄𑀤𑀓𑁂 𑀲𑀼𑀮𑀪𑀨𑀮𑀸𑀨𑀮𑁂 𑀧𑀤𑁂𑀲𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀨𑀮𑀸𑀨𑀮𑁂𑀦 𑀬𑀸𑀧𑁂𑀦𑁆𑀢𑀸 𑀯𑀲𑀺𑀁𑀲𑀼.

𑀮𑀓𑁆𑀔𑀡𑀧𑀡𑁆𑀟𑀺𑀢𑁄 𑀘 𑀲𑀻𑀢𑀸 𑀘 𑀭𑀸𑀫𑀧𑀡𑁆𑀟𑀺𑀢𑀁 𑀬𑀸𑀘𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀲𑁆𑀫𑀸 𑀅𑀲𑁆𑀲𑀫𑁂𑀬𑁂𑀯 𑀳𑁄𑀣, 𑀫𑀬𑀁 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀢𑀼𑀫𑁆𑀳𑁂 𑀧𑁄𑀲𑁂𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀫𑀧𑀡𑁆𑀟𑀺𑀢𑁄 𑀢𑀢𑁆𑀣𑁂𑀯 𑀳𑁄𑀢𑀺. 𑀇𑀢𑀭𑁂 𑀤𑁆𑀯𑁂 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀢𑀁 𑀧𑀝𑀺𑀚𑀕𑁆𑀕𑀺𑀁𑀲𑀼. 𑀏𑀯𑀁 𑀢𑁂𑀲𑀁 𑀨𑀮𑀸𑀨𑀮𑁂𑀦 𑀬𑀸𑀧𑁂𑀢𑁆𑀯𑀸 𑀯𑀲𑀦𑁆𑀢𑀸𑀦𑀁 𑀤𑀲𑀭𑀣𑀫𑀳𑀸𑀭𑀸𑀚𑀸 𑀧𑀼𑀢𑁆𑀢𑀲𑁄𑀓𑁂𑀦 𑀦𑀯𑀫𑁂 𑀲𑀁𑀯𑀘𑁆𑀙𑀭𑁂 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 ¶ 𑀤𑁂𑀯𑀻 ‘‘𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀪𑀭𑀢𑀓𑀼𑀫𑀸𑀭𑀲𑁆𑀲 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 𑀧𑀦 ‘‘𑀙𑀢𑁆𑀢𑀲𑁆𑀲𑀸𑀫𑀺𑀓𑀸 𑀅𑀭𑀜𑁆𑀜𑁂 𑀯𑀲𑀦𑁆𑀢𑀻’’𑀢𑀺 𑀦 𑀅𑀤𑀁𑀲𑀼. 𑀪𑀭𑀢𑀓𑀼𑀫𑀸𑀭𑁄 ¶ ‘‘𑀫𑀫 𑀪𑀸𑀢𑀭𑀁 𑀭𑀸𑀫𑀧𑀡𑁆𑀟𑀺𑀢𑀁 𑀅𑀭𑀜𑁆𑀜𑀢𑁄 𑀆𑀦𑁂𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀲𑁂𑀢𑁆𑀯𑀸 𑀓𑀢𑀺𑀧𑀬𑁂𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀮𑀓𑁆𑀔𑀡𑀧𑀡𑁆𑀟𑀺𑀢𑀲𑁆𑀲 𑀘 𑀲𑀻𑀢𑀸𑀬 𑀘 𑀅𑀭𑀜𑁆𑀜𑀁 𑀕𑀢𑀓𑀸𑀮𑁂 𑀅𑀲𑁆𑀲𑀫𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀤𑁆𑀯𑀸𑀭𑁂 𑀞𑀧𑀺𑀢𑀓𑀜𑁆𑀘𑀦𑀭𑀽𑀧𑀓𑀁 𑀯𑀺𑀬 𑀭𑀸𑀫𑀧𑀡𑁆𑀟𑀺𑀢𑀁 𑀦𑀺𑀭𑀸𑀲𑀗𑁆𑀓𑀁 𑀲𑀼𑀔𑀦𑀺𑀲𑀺𑀦𑁆𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀭𑀜𑁆𑀜𑁄 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀲𑀤𑁆𑀥𑀺𑀁 𑀅𑀫𑀘𑁆𑀘𑁂𑀳𑀺 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀭𑁄𑀤𑀢𑀺. 𑀭𑀸𑀫𑀧𑀡𑁆𑀟𑀺𑀢𑁄 𑀧𑀦 𑀦𑁂𑀯 𑀲𑁄𑀘𑀺, 𑀦 𑀧𑀭𑀺𑀤𑁂𑀯𑀺, 𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀫𑀢𑁆𑀢𑀫𑁆𑀧𑀺𑀲𑁆𑀲 𑀦𑀸𑀳𑁄𑀲𑀺. 𑀪𑀭𑀢𑀲𑁆𑀲 𑀧𑀦 𑀭𑁄𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀲𑀸𑀬𑀦𑁆𑀳𑀲𑀫𑀬𑁂 𑀇𑀢𑀭𑁂 𑀤𑁆𑀯𑁂 𑀨𑀮𑀸𑀨𑀮𑀁 𑀆𑀤𑀸𑀬 𑀆𑀕𑀫𑀺𑀁𑀲𑀼. 𑀭𑀸𑀫𑀧𑀡𑁆𑀟𑀺𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀤𑀳𑀭𑀸 𑀫𑀬𑁆𑀳𑀁 𑀯𑀺𑀬 𑀧𑀭𑀺𑀕𑁆𑀕𑀡𑁆𑀳𑀦𑀧𑀜𑁆𑀜𑀸 𑀏𑀢𑁂𑀲𑀁 𑀦𑀢𑁆𑀣𑀺, 𑀲𑀳𑀲𑀸 ¶ ‘𑀧𑀺𑀢𑀸 𑀯𑁄 𑀫𑀢𑁄’𑀢𑀺 𑀯𑀼𑀢𑁆𑀢𑁂 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀳𑀤𑀬𑀫𑁆𑀧𑀺 𑀢𑁂𑀲𑀁 𑀨𑀮𑁂𑀬𑁆𑀬, 𑀉𑀧𑀸𑀬𑁂𑀦 𑀢𑁂 𑀉𑀤𑀓𑀁 𑀑𑀢𑀸𑀭𑁂𑀢𑁆𑀯𑀸 𑀏𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑁂𑀲𑀁 𑀧𑀼𑀭𑀢𑁄 𑀏𑀓𑀁 𑀉𑀤𑀓𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀢𑀺𑀘𑀺𑀭𑁂𑀦 𑀆𑀕𑀢𑀸, 𑀇𑀤𑀁 𑀯𑁄 𑀤𑀡𑁆𑀟𑀓𑀫𑁆𑀫𑀁 𑀳𑁄𑀢𑀼, 𑀇𑀫𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀢𑀺𑀝𑁆𑀞𑀣𑀸’’𑀢𑀺 𑀉𑀧𑀟𑁆𑀠𑀕𑀸𑀣𑀁 𑀢𑀸𑀯 𑀆𑀳 𑁋

𑁮𑁪.

‘‘𑀏𑀣 𑀮𑀓𑁆𑀔𑀡 𑀲𑀻𑀢𑀸 𑀘, 𑀉𑀪𑁄 𑀑𑀢𑀭𑀣𑁄𑀤𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀏𑀣 𑀮𑀓𑁆𑀔𑀡 𑀲𑀻𑀢𑀸 𑀘 𑀆𑀕𑀘𑁆𑀙𑀣, 𑀉𑀪𑁄𑀧𑀺 𑀑𑀢𑀭𑀣 𑀉𑀤𑀓𑀦𑁆𑀢𑀺;

𑀢𑁂 𑀏𑀓𑀯𑀘𑀦𑁂𑀦𑁂𑀯 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀧𑀺𑀢𑀼 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑁄 𑀲𑁂𑀲𑀁 𑀉𑀧𑀟𑁆𑀠𑀕𑀸𑀣𑀫𑀸𑀳 𑁋

‘‘𑀏𑀯𑀸𑀬𑀁 𑀪𑀭𑀢𑁄 𑀆𑀳, 𑀭𑀸𑀚𑀸 𑀤𑀲𑀭𑀣𑁄 𑀫𑀢𑁄’’𑀢𑀺.

𑀢𑁂 𑀧𑀺𑀢𑀼 𑀫𑀢𑀲𑀸𑀲𑀦𑀁 𑀲𑀼𑀢𑁆𑀯𑀸𑀯 𑀯𑀺𑀲𑀜𑁆𑀜𑀸 𑀅𑀳𑁂𑀲𑀼𑀁. 𑀧𑀼𑀦𑀧𑀺 𑀦𑁂𑀲𑀁 𑀓𑀣𑁂𑀲𑀺, 𑀧𑀼𑀦𑀧𑀺 𑀢𑁂 𑀯𑀺𑀲𑀜𑁆𑀜𑀸 𑀅𑀳𑁂𑀲𑀼𑀦𑁆𑀢𑀺 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀯𑀺𑀲𑀜𑁆𑀜𑀺𑀢𑀁 𑀧𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀣𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀮𑀤𑁆𑀥𑀲𑁆𑀲𑀸𑀲𑁂𑀲𑀼 𑀢𑁂𑀲𑀼 ¶ 𑀲𑀩𑁆𑀩𑁂 𑀅𑀜𑁆𑀜𑀫𑀜𑁆𑀜𑀁 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀤𑀸 𑀪𑀭𑀢𑀓𑀼𑀫𑀸𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀪𑀸𑀢𑀸 𑀮𑀓𑁆𑀔𑀡𑀓𑀼𑀫𑀸𑀭𑁄 𑀘 𑀪𑀕𑀺𑀦𑀻 𑀘 𑀲𑀻𑀢𑀸 𑀤𑁂𑀯𑀻 𑀧𑀺𑀢𑀼 𑀫𑀢𑀲𑀸𑀲𑀦𑀁 𑀲𑀼𑀢𑁆𑀯𑀸𑀯 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀭𑀸𑀫𑀧𑀡𑁆𑀟𑀺𑀢𑁄 𑀧𑀦 𑀦𑁂𑀯 𑀲𑁄𑀘𑀢𑀺, 𑀦 𑀧𑀭𑀺𑀤𑁂𑀯𑀢𑀺, 𑀓𑀺𑀁 𑀦𑀼 𑀔𑁄 𑀢𑀲𑁆𑀲 𑀅𑀲𑁄𑀘𑀦𑀓𑀸𑀭𑀡𑀁, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁫.

‘‘𑀓𑁂𑀦 ¶ 𑀭𑀸𑀫𑀧𑁆𑀧𑀪𑀸𑀯𑁂𑀦, 𑀲𑁄𑀘𑀺𑀢𑀩𑁆𑀩𑀁 𑀦 𑀲𑁄𑀘𑀲𑀺;

𑀧𑀺𑀢𑀭𑀁 𑀓𑀸𑀮𑀓𑀢𑀁 𑀲𑀼𑀢𑁆𑀯𑀸, 𑀦 𑀢𑀁 𑀧𑀲𑀳𑀢𑁂 𑀤𑀼𑀔’’𑀦𑁆𑀢𑀺.

𑀢𑀢𑁆𑀣 𑀧𑀪𑀸𑀯𑁂𑀦𑀸𑀢𑀺 𑀆𑀦𑀼𑀪𑀸𑀯𑁂𑀦. 𑀦 𑀢𑀁 𑀧𑀲𑀳𑀢𑁂 𑀤𑀼𑀔𑀦𑁆𑀢𑀺 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀓𑁂𑀦 𑀓𑀸𑀭𑀡𑁂𑀦 𑀢𑀁 𑀦 𑀧𑀻𑀴𑁂𑀢𑀺, 𑀓𑀺𑀁 𑀢𑁂 𑀅𑀲𑁄𑀘𑀦𑀓𑀸𑀭𑀡𑀁, 𑀓𑀣𑁂𑀳𑀺 𑀢𑀸𑀯 𑀦𑀦𑁆𑀢𑀺.

𑀅𑀣𑀲𑁆𑀲 𑀭𑀸𑀫𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀅𑀲𑁄𑀘𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑁋

𑁮𑁬.

‘‘𑀬𑀁 𑀦 𑀲𑀓𑁆𑀓𑀸 𑀦𑀺𑀧𑀸𑀮𑁂𑀢𑀼𑀁, 𑀧𑁄𑀲𑁂𑀦 𑀮𑀧𑀢𑀁 𑀩𑀳𑀼𑀁;

𑀲 𑀓𑀺𑀲𑁆𑀲 𑀯𑀺𑀜𑁆𑀜𑀽 𑀫𑁂𑀥𑀸𑀯𑀻, 𑀅𑀢𑁆𑀢𑀸𑀦𑀫𑀼𑀧𑀢𑀸𑀧𑀬𑁂.

𑁮𑁭.

‘‘𑀤𑀳𑀭𑀸 ¶ 𑀘 𑀳𑀺 𑀯𑀼𑀤𑁆𑀥𑀸 𑀘, 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸;

𑀅𑀟𑁆𑀠𑀸 𑀘𑁂𑀯 𑀤𑀮𑀺𑀤𑁆𑀤𑀸 𑀘, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀡𑀸.

𑁮𑁮.

‘‘𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦𑀁, 𑀦𑀺𑀘𑁆𑀘𑀁 𑀧𑀢𑀦𑀢𑁄 𑀪𑀬𑀁;

𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀁.

𑁮𑁯.

‘‘𑀲𑀸𑀬𑀫𑁂𑀓𑁂 𑀦 𑀤𑀺𑀲𑁆𑀲𑀦𑁆𑀢𑀺, 𑀧𑀸𑀢𑁄 𑀤𑀺𑀝𑁆𑀞𑀸 𑀩𑀳𑀼𑀚𑁆𑀚𑀦𑀸;

𑀧𑀸𑀢𑁄 𑀏𑀓𑁂 𑀦 𑀤𑀺𑀲𑁆𑀲𑀦𑁆𑀢𑀺, 𑀲𑀸𑀬𑀁 𑀤𑀺𑀝𑁆𑀞𑀸 𑀩𑀳𑀼𑀚𑁆𑀚𑀦𑀸.

𑁯𑁦.

‘‘𑀧𑀭𑀺𑀤𑁂𑀯𑀬𑀫𑀸𑀦𑁄 𑀘𑁂, 𑀓𑀺𑀜𑁆𑀘𑀺𑀤𑀢𑁆𑀣𑀁 𑀉𑀤𑀩𑁆𑀩𑀳𑁂;

𑀲𑀫𑁆𑀫𑀽𑀴𑁆𑀳𑁄 𑀳𑀺𑀁𑀲𑀫𑀢𑁆𑀢𑀸𑀦𑀁, 𑀓𑀬𑀺𑀭𑀸 𑀢𑀁 𑀯𑀺𑀘𑀓𑁆𑀔𑀡𑁄.

𑁯𑁧.

‘‘𑀓𑀺𑀲𑁄 𑀯𑀺𑀯𑀡𑁆𑀡𑁄 𑀪𑀯𑀢𑀺, 𑀳𑀺𑀁𑀲𑀫𑀢𑁆𑀢𑀸𑀦𑀫𑀢𑁆𑀢𑀦𑁄;

𑀦 𑀢𑁂𑀦 𑀧𑁂𑀢𑀸 𑀧𑀸𑀮𑁂𑀦𑁆𑀢𑀺, 𑀦𑀺𑀭𑀢𑁆𑀣𑀸 𑀧𑀭𑀺𑀤𑁂𑀯𑀦𑀸.

𑁯𑁨.

‘‘𑀬𑀣𑀸 𑀲𑀭𑀡𑀫𑀸𑀤𑀺𑀢𑁆𑀢𑀁, 𑀯𑀸𑀭𑀺𑀦𑀸 𑀧𑀭𑀺𑀦𑀺𑀩𑁆𑀩𑀬𑁂;

𑀏𑀯𑀫𑁆𑀧𑀺 𑀥𑀻𑀭𑁄 𑀲𑀼𑀢𑀯𑀸, 𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀦𑀭𑁄;

𑀔𑀺𑀧𑁆𑀧𑀫𑀼𑀧𑁆𑀧𑀢𑀺𑀢𑀁 𑀲𑁄𑀓𑀁, 𑀯𑀸𑀢𑁄 𑀢𑀽𑀮𑀁𑀯 𑀥𑀁𑀲𑀬𑁂.

𑁯𑁩.

‘‘𑀫𑀘𑁆𑀘𑁄 ¶ ¶ 𑀏𑀓𑁄𑀯 𑀅𑀘𑁆𑀘𑁂𑀢𑀺, 𑀏𑀓𑁄𑀯 𑀚𑀸𑀬𑀢𑁂 𑀓𑀼𑀮𑁂;

𑀲𑀁𑀬𑁄𑀕𑀧𑀭𑀫𑀸𑀢𑁆𑀯𑁂𑀯, 𑀲𑀫𑁆𑀪𑁄𑀕𑀸 𑀲𑀩𑁆𑀩𑀧𑀸𑀡𑀺𑀦𑀁.

𑁯𑁪.

‘‘𑀢𑀲𑁆𑀫𑀸 𑀳𑀺 𑀥𑀻𑀭𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲, 𑀲𑀫𑁆𑀧𑀲𑁆𑀲𑀢𑁄 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘;

𑀅𑀜𑁆𑀜𑀸𑀬 𑀥𑀫𑁆𑀫𑀁 𑀳𑀤𑀬𑀁 𑀫𑀦𑀜𑁆𑀘, 𑀲𑁄𑀓𑀸 𑀫𑀳𑀦𑁆𑀢𑀸𑀧𑀺 𑀦 𑀢𑀸𑀧𑀬𑀦𑁆𑀢𑀺.

𑁯𑁫.

‘‘𑀲𑁄𑀳𑀁 𑀤𑀲𑁆𑀲𑀜𑁆𑀘 𑀪𑁄𑀓𑁆𑀔𑀜𑁆𑀘, 𑀪𑀭𑀺𑀲𑁆𑀲𑀸𑀫𑀺 𑀘 𑀜𑀸𑀢𑀓𑁂;

𑀲𑁂𑀲𑀜𑁆𑀘 𑀧𑀸𑀮𑀬𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀫𑁂𑀢𑀁 𑀯𑀺𑀚𑀸𑀦𑀢𑁄’’𑀢𑀺. 𑁋

𑀇𑀫𑀸𑀳𑀺 𑀤𑀲𑀳𑀺 𑀕𑀸𑀣𑀸𑀳𑀺 𑀅𑀦𑀺𑀘𑁆𑀘𑀢𑀁 𑀧𑀓𑀸𑀲𑁂𑀢𑀺.

𑀢𑀢𑁆𑀣 𑀦𑀺𑀧𑀸𑀮𑁂𑀢𑀼𑀦𑁆𑀢𑀺 𑀭𑀓𑁆𑀔𑀺𑀢𑀼𑀁. 𑀮𑀧𑀢𑀦𑁆𑀢𑀺 𑀮𑀧𑀦𑁆𑀢𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀢𑀸𑀢 𑀪𑀭𑀢, 𑀬𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀩𑀳𑀼𑀫𑁆𑀧𑀺 𑀯𑀺𑀮𑀧𑀦𑁆𑀢𑀸𑀦𑀁 𑀧𑀼𑀭𑀺𑀲𑀸𑀦𑀁 𑀏𑀓𑁂𑀦𑀸𑀧𑀺 𑀫𑀸 𑀉𑀘𑁆𑀙𑀺𑀚𑁆𑀚𑀻𑀢𑀺 𑀦 𑀲𑀓𑁆𑀓𑀸 𑀭𑀓𑁆𑀔𑀺𑀢𑀼𑀁, 𑀲𑁄 𑀤𑀸𑀦𑀺 𑀫𑀸𑀤𑀺𑀲𑁄 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀢𑀣𑀢𑁄 𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀽 𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀫𑀭𑀡𑀧𑀭𑀺𑀬𑁄𑀲𑀸𑀦𑀚𑀻𑀯𑀺𑀢𑁂𑀲𑀼 𑀲𑀢𑁆𑀢𑁂𑀲𑀼 𑀓𑀺𑀲𑁆𑀲 𑀅𑀢𑁆𑀢𑀸𑀦𑀫𑀼𑀧𑀢𑀸𑀧𑀬𑁂, 𑀓𑀺𑀁𑀓𑀸𑀭𑀡𑀸 𑀅𑀦𑀼𑀧𑀓𑀸𑀭𑁂𑀦 𑀲𑁄𑀓𑀤𑀼𑀓𑁆𑀔𑁂𑀦 𑀅𑀢𑁆𑀢𑀸𑀦𑀁 𑀲𑀦𑁆𑀢𑀸𑀧𑁂𑀬𑁆𑀬𑀸’’𑀢𑀺.

𑀤𑀳𑀭𑀸 𑀘𑀸𑀢𑀺 𑀕𑀸𑀣𑀸 ‘‘𑀫𑀘𑁆𑀘𑀼 𑀦𑀸𑀫𑁂𑀲 𑀢𑀸𑀢 𑀪𑀭𑀢, 𑀦𑁂𑀯 ¶ 𑀲𑀼𑀯𑀡𑁆𑀡𑀭𑀽𑀧𑀓𑀲𑀤𑀺𑀲𑀸𑀦𑀁 𑀤𑀳𑀭𑀸𑀦𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀓𑀸𑀤𑀻𑀦𑀁, 𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸𑀦𑀁 𑀫𑀳𑀸𑀬𑁄𑀥𑀸𑀦𑀁, 𑀦 𑀩𑀸𑀮𑀸𑀦𑀁 𑀧𑀼𑀣𑀼𑀚𑁆𑀚𑀦𑀲𑀢𑁆𑀢𑀸𑀦𑀁, 𑀦 𑀩𑀼𑀤𑁆𑀥𑀸𑀤𑀻𑀦𑀁 𑀧𑀡𑁆𑀟𑀺𑀢𑀸𑀦𑀁, 𑀦 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀁 𑀇𑀲𑁆𑀲𑀭𑀸𑀦𑀁, 𑀦 𑀦𑀺𑀤𑁆𑀥𑀦𑀸𑀦𑀁 𑀤𑀮𑀺𑀤𑁆𑀤𑀸𑀤𑀻𑀦𑀁 𑀮𑀚𑁆𑀚𑀢𑀺, 𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀫𑀘𑁆𑀘𑀼𑀧𑀭𑀸𑀬𑀡𑀸 𑀫𑀭𑀡𑀫𑀼𑀔𑁂 𑀲𑀁𑀪𑀕𑁆𑀕𑀯𑀺𑀪𑀕𑁆𑀕𑀸 𑀪𑀯𑀦𑁆𑀢𑀺𑀬𑁂𑀯𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸.

𑀦𑀺𑀘𑁆𑀘𑀁 𑀧𑀢𑀦𑀢𑁄𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀳𑀺 𑀢𑀸𑀢 𑀪𑀭𑀢, 𑀧𑀓𑁆𑀓𑀸𑀦𑀁 𑀨𑀮𑀸𑀦𑀁 𑀧𑀓𑁆𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀇𑀤𑀸𑀦𑀺 𑀯𑀡𑁆𑀝𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀲𑁆𑀲𑀦𑁆𑀢𑀺, 𑀇𑀤𑀸𑀦𑀺 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀢𑀦𑀢𑁄 𑀪𑀬𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀏𑀓𑀁𑀲𑀺𑀓𑀫𑁂𑀯 𑀪𑀯𑀢𑀺, 𑀏𑀯𑀁 𑀆𑀲𑀗𑁆𑀓𑀦𑀻𑀬𑀢𑁄 𑀏𑀯𑀁 𑀚𑀸𑀢𑀸𑀦𑀁 𑀫𑀘𑁆𑀘𑀸𑀦𑀫𑁆𑀧𑀺 𑀏𑀓𑀁𑀲𑀺𑀓𑀁𑀬𑁂𑀯 𑀫𑀭𑀡𑀢𑁄 𑀪𑀬𑀁, 𑀦𑀢𑁆𑀣𑀺 𑀲𑁄 𑀔𑀡𑁄 𑀯𑀸 𑀮𑀬𑁄 𑀯𑀸 𑀬𑀢𑁆𑀣 𑀢𑁂𑀲𑀁 𑀫𑀭𑀡𑀁 𑀦 𑀆𑀲𑀗𑁆𑀓𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺.

𑀲𑀸𑀬𑀦𑁆𑀢𑀺 ¶ 𑀯𑀺𑀓𑀸𑀮𑁂. 𑀇𑀫𑀺𑀦𑀸 𑀭𑀢𑁆𑀢𑀺𑀪𑀸𑀕𑁂 𑀘 𑀤𑀺𑀝𑁆𑀞𑀸𑀦𑀁 𑀤𑀺𑀯𑀲𑀪𑀸𑀕𑁂 𑀅𑀤𑀲𑁆𑀲𑀦𑀁, 𑀤𑀺𑀯𑀲𑀪𑀸𑀕𑁂 𑀘 𑀤𑀺𑀝𑁆𑀞𑀸𑀦𑀁 𑀭𑀢𑁆𑀢𑀺𑀪𑀸𑀕𑁂 𑀅𑀤𑀲𑁆𑀲𑀦𑀁 𑀤𑀻𑀧𑁂𑀢𑀺. 𑀓𑀺𑀜𑁆𑀘𑀺𑀤𑀢𑁆𑀣𑀦𑁆𑀢𑀺 ‘‘𑀧𑀺𑀢𑀸 𑀫𑁂, 𑀧𑀼𑀢𑁆𑀢𑁄 𑀫𑁂’’𑀢𑀺𑀆𑀤𑀻𑀳𑀺 𑀧𑀭𑀺𑀤𑁂𑀯𑀫𑀸𑀦𑁄𑀯 𑀧𑁄𑀲𑁄 𑀲𑀫𑁆𑀫𑀽𑀴𑁆𑀳𑁄 𑀅𑀢𑁆𑀢𑀸𑀦𑀁 𑀳𑀺𑀁𑀲𑀦𑁆𑀢𑁄 𑀓𑀺𑀮𑀫𑁂𑀦𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀢𑁆𑀣𑀁 𑀆𑀳𑀭𑁂𑀬𑁆𑀬. 𑀓𑀬𑀺𑀭𑀸 ¶ 𑀢𑀁 𑀯𑀺𑀘𑀓𑁆𑀔𑀡𑁄𑀢𑀺 𑀅𑀣 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀏𑀯𑀁 𑀧𑀭𑀺𑀤𑁂𑀯𑀁 𑀓𑀭𑁂𑀬𑁆𑀬, 𑀬𑀲𑁆𑀫𑀸 𑀧𑀦 𑀧𑀭𑀺𑀤𑁂𑀯𑀦𑁆𑀢𑁄 𑀫𑀢𑀁 𑀯𑀸 𑀆𑀦𑁂𑀢𑀼𑀁 𑀅𑀜𑁆𑀜𑀁 𑀯𑀸 𑀢𑀲𑁆𑀲 𑀯𑀟𑁆𑀠𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀦𑀺𑀭𑀢𑁆𑀣𑀓𑀢𑁆𑀢𑀸 𑀧𑀭𑀺𑀤𑁂𑀯𑀺𑀢𑀲𑁆𑀲 𑀧𑀡𑁆𑀟𑀺𑀢𑀸 𑀦 𑀧𑀭𑀺𑀤𑁂𑀯𑀦𑁆𑀢𑀺.

𑀅𑀢𑁆𑀢𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑁂𑀦 𑀳𑀺𑀁𑀲𑀦𑁆𑀢𑁄. 𑀦 𑀢𑁂𑀦𑀸𑀢𑀺 𑀢𑁂𑀦 𑀧𑀭𑀺𑀤𑁂𑀯𑁂𑀦 𑀧𑀭𑀮𑁄𑀓𑀁 𑀕𑀢𑀸 𑀲𑀢𑁆𑀢𑀸 𑀦 𑀧𑀸𑀮𑁂𑀦𑁆𑀢𑀺 𑀦 𑀬𑀸𑀧𑁂𑀦𑁆𑀢𑀺. 𑀦𑀺𑀭𑀢𑁆𑀣𑀸𑀢𑀺 𑀢𑀲𑁆𑀫𑀸 𑀢𑁂𑀲𑀁 𑀫𑀢𑀲𑀢𑁆𑀢𑀸𑀦𑀁 𑀅𑀬𑀁 𑀧𑀭𑀺𑀤𑁂𑀯𑀦𑀸 𑀦𑀺𑀭𑀢𑁆𑀣𑀓𑀸. 𑀲𑀭𑀡𑀦𑁆𑀢𑀺 𑀦𑀺𑀯𑀸𑀲𑀕𑁂𑀳𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀯𑀲𑀦𑀸𑀕𑀸𑀭𑁂 𑀆𑀤𑀺𑀢𑁆𑀢𑁂 𑀫𑀼𑀳𑀼𑀢𑁆𑀢𑀫𑁆𑀧𑀺 𑀯𑁄𑀲𑀸𑀦𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀖𑀝𑀲𑀢𑁂𑀦 𑀖𑀝𑀲𑀳𑀲𑁆𑀲𑁂𑀦 𑀯𑀸𑀭𑀺𑀦𑀸 𑀦𑀺𑀩𑁆𑀩𑀸𑀧𑀬𑀢𑁂𑀯, 𑀏𑀯𑀁 𑀥𑀻𑀭𑁄 𑀉𑀧𑁆𑀧𑀢𑀺𑀢𑀁 𑀲𑁄𑀓𑀁 𑀔𑀺𑀧𑁆𑀧𑀫𑁂𑀯 𑀦𑀺𑀩𑁆𑀩𑀸𑀧𑀬𑁂. 𑀢𑀽𑀮𑀁 𑀯𑀺𑀬 𑀘 𑀯𑀸𑀢𑁄 𑀬𑀣𑀸 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀥𑀁𑀲𑀬𑁂 𑀯𑀺𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀫𑀘𑁆𑀘𑁄 𑀏𑀓𑁄𑀯 𑀅𑀘𑁆𑀘𑁂𑀢𑀻𑀢𑀺 𑀏𑀢𑁆𑀣 𑀢𑀸𑀢 𑀪𑀭𑀢, 𑀇𑀫𑁂 𑀲𑀢𑁆𑀢𑀸 𑀓𑀫𑁆𑀫𑀲𑁆𑀲𑀓𑀸 𑀦𑀸𑀫, 𑀢𑀣𑀸 𑀳𑀺 𑀇𑀢𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀲𑀢𑁆𑀢𑁄 𑀏𑀓𑁄𑀯 𑀅𑀘𑁆𑀘𑁂𑀢𑀺 𑀅𑀢𑀺𑀓𑁆𑀓𑀫𑀢𑀺, 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑁂 𑀚𑀸𑀬𑀫𑀸𑀦𑁄𑀧𑀺 𑀏𑀓𑁄𑀯 𑀕𑀦𑁆𑀢𑁆𑀯𑀸 𑀚𑀸𑀬𑀢𑀺. 𑀢𑀢𑁆𑀣 𑀢𑀢𑁆𑀣 𑀧𑀦 𑀜𑀸𑀢𑀺𑀫𑀺𑀢𑁆𑀢𑀲𑀁𑀬𑁄𑀕𑁂𑀦 ‘‘𑀅𑀬𑀁 𑀫𑁂 𑀧𑀺𑀢𑀸, 𑀅𑀬𑀁 𑀫𑁂 𑀫𑀸𑀢𑀸, 𑀅𑀬𑀁 𑀫𑁂 𑀫𑀺𑀢𑁆𑀢𑁄’’𑀢𑀺 𑀲𑀁𑀬𑁄𑀕𑀧𑀭𑀫𑀸𑀢𑁆𑀯𑁂𑀯 𑀲𑀫𑁆𑀪𑁄𑀕𑀸 𑀲𑀩𑁆𑀩𑀧𑀸𑀡𑀻𑀦𑀁, 𑀧𑀭𑀫𑀢𑁆𑀣𑁂𑀦 𑀧𑀦 𑀢𑀻𑀲𑀼𑀧𑀺 𑀪𑀯𑁂𑀲𑀼 𑀓𑀫𑁆𑀫𑀲𑁆𑀲𑀓𑀸𑀯𑁂𑀢𑁂 𑀲𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑁂𑀲𑀁 𑀲𑀢𑁆𑀢𑀸𑀦𑀁 𑀜𑀸𑀢𑀺𑀫𑀺𑀢𑁆𑀢𑀲𑀁𑀬𑁄𑀕𑀁 𑀜𑀸𑀢𑀺𑀫𑀺𑀢𑁆𑀢𑀧𑀭𑀺𑀪𑁄𑀕𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀇𑀢𑁄 𑀧𑀭𑀁 𑀅𑀜𑁆𑀜𑀁 𑀦𑀢𑁆𑀣𑀺, 𑀢𑀲𑁆𑀫𑀸. 𑀲𑀫𑁆𑀧𑀲𑁆𑀲𑀢𑁄𑀢𑀺 𑀇𑀫𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁 𑀦𑀸𑀦𑀸𑀪𑀸𑀯𑀯𑀺𑀦𑀸𑀪𑀸𑀯𑀫𑁂𑀯 𑀲𑀫𑁆𑀫𑀸 𑀧𑀲𑁆𑀲𑀢𑁄. 𑀅𑀜𑁆𑀜𑀸𑀬 𑀥𑀫𑁆𑀫𑀦𑁆𑀢𑀺 𑀅𑀝𑁆𑀞𑀯𑀺𑀥𑀮𑁄𑀓𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸. 𑀳𑀤𑀬𑀁 𑀫𑀦𑀜𑁆𑀘𑀸𑀢𑀺 ¶ 𑀇𑀤𑀁 𑀉𑀪𑀬𑀫𑁆𑀧𑀺 𑀘𑀺𑀢𑁆𑀢𑀲𑁆𑀲𑁂𑀯 𑀦𑀸𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋

‘‘𑀮𑀸𑀪𑁄 ¶ 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀘, 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀘 𑀲𑀼𑀔𑀜𑁆𑀘 𑀤𑀼𑀓𑁆𑀔𑀁;

𑀏𑀢𑁂 𑀅𑀦𑀺𑀘𑁆𑀘𑀸 𑀫𑀦𑀼𑀚𑁂𑀲𑀼 𑀥𑀫𑁆𑀫𑀸, 𑀫𑀸 𑀲𑁄𑀘 𑀓𑀺𑀁 𑀲𑁄𑀘𑀲𑀺 𑀧𑁄𑀝𑁆𑀞𑀧𑀸𑀤𑀸’’𑀢𑀺. (𑀚𑀸. 𑁧.𑁪.𑁧𑁧𑁪) 𑁋

𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀮𑁄𑀓𑀥𑀫𑁆𑀫𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀻𑀬𑀢𑀺, 𑀢𑀲𑁆𑀲 𑀘 𑀅𑀦𑀺𑀘𑁆𑀘𑀢𑀁 𑀜𑀢𑁆𑀯𑀸 𑀞𑀺𑀢𑀲𑁆𑀲 𑀥𑀻𑀭𑀲𑁆𑀲 𑀧𑀺𑀢𑀼𑀧𑀼𑀢𑁆𑀢𑀫𑀭𑀡𑀸𑀤𑀺𑀯𑀢𑁆𑀣𑀼𑀓𑀸 𑀫𑀳𑀦𑁆𑀢𑀸𑀧𑀺 𑀲𑁄𑀓𑀸 𑀳𑀤𑀬𑀁 𑀦 𑀢𑀸𑀧𑀬𑀦𑁆𑀢𑀻𑀢𑀺. 𑀏𑀢𑀁 𑀯𑀸 𑀅𑀝𑁆𑀞𑀯𑀺𑀥𑀁 𑀮𑁄𑀓𑀥𑀫𑁆𑀫𑀁 𑀜𑀢𑁆𑀯𑀸 𑀞𑀺𑀢𑀲𑁆𑀲 𑀳𑀤𑀬𑀯𑀢𑁆𑀣𑀼𑀜𑁆𑀘 𑀫𑀦𑀜𑁆𑀘 𑀫𑀳𑀦𑁆𑀢𑀸𑀧𑀺 𑀲𑁄𑀓𑀸 𑀦 𑀢𑀸𑀧𑀬𑀦𑁆𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑁄𑀳𑀁 ¶ 𑀤𑀲𑁆𑀲𑀜𑁆𑀘 𑀪𑁄𑀓𑁆𑀔𑀜𑁆𑀘𑀸𑀢𑀺 𑀕𑀸𑀣𑀸𑀬 𑁋 𑀢𑀸𑀢 𑀪𑀭𑀢, 𑀅𑀦𑁆𑀥𑀩𑀸𑀮𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀬 𑀫𑀫 𑀭𑁄𑀤𑀦𑀧𑀭𑀺𑀤𑁂𑀯𑀦𑀁 𑀦𑀸𑀫 𑀦 𑀅𑀦𑀼𑀘𑁆𑀙𑀯𑀺𑀓𑀁, 𑀅𑀳𑀁 𑀧𑀦 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀞𑀸𑀦𑁂 𑀞𑀢𑁆𑀯𑀸 𑀓𑀧𑀡𑀸𑀤𑀻𑀦𑀁 𑀤𑀸𑀦𑀸𑀭𑀳𑀸𑀦𑀁 𑀤𑀸𑀦𑀁, 𑀞𑀸𑀦𑀦𑁆𑀢𑀭𑀸𑀭𑀳𑀸𑀦𑀁 𑀞𑀸𑀦𑀦𑁆𑀢𑀭𑀁, 𑀬𑀲𑀸𑀭𑀳𑀸𑀦𑀁 𑀬𑀲𑀁 𑀤𑀲𑁆𑀲𑀸𑀫𑀺, 𑀧𑀺𑀢𑀭𑀸 𑀫𑁂 𑀧𑀭𑀺𑀪𑀼𑀢𑁆𑀢𑀦𑀬𑁂𑀦 𑀇𑀲𑁆𑀲𑀭𑀺𑀬𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀜𑀸𑀢𑀓𑁂 𑀘 𑀧𑁄𑀲𑁂𑀲𑁆𑀲𑀸𑀫𑀺, 𑀅𑀯𑀲𑁂𑀲𑀜𑁆𑀘 𑀅𑀦𑁆𑀢𑁄𑀧𑀭𑀺𑀚𑀦𑀸𑀤𑀺𑀓𑀁 𑀚𑀦𑀁 𑀧𑀸𑀮𑁂𑀲𑁆𑀲𑀸𑀫𑀺, 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀯𑀜𑁆𑀳𑀺 𑀚𑀸𑀦𑀢𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑀲𑁆𑀲 𑀅𑀦𑀼𑀭𑀽𑀧𑀁 𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄.

𑀧𑀭𑀺𑀲𑀸 𑀇𑀫𑀁 𑀭𑀸𑀫𑀧𑀡𑁆𑀟𑀺𑀢𑀲𑁆𑀲 𑀅𑀦𑀺𑀘𑁆𑀘𑀢𑀸𑀧𑀓𑀸𑀲𑀦𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀺𑀲𑁆𑀲𑁄𑀓𑀸 𑀅𑀳𑁂𑀲𑀼𑀁. 𑀢𑀢𑁄 𑀪𑀭𑀢𑀓𑀼𑀫𑀸𑀭𑁄 𑀭𑀸𑀫𑀧𑀡𑁆𑀟𑀺𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀣𑀸’’𑀢𑀺 𑀆𑀳. 𑀢𑀸𑀢 𑀮𑀓𑁆𑀔𑀡𑀜𑁆𑀘, 𑀲𑀻𑀢𑀸𑀤𑁂𑀯𑀺𑀜𑁆𑀘 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀣𑀸𑀢𑀺. 𑀢𑀼𑀫𑁆𑀳𑁂 𑀧𑀦, 𑀤𑁂𑀯𑀸𑀢𑀺. 𑀢𑀸𑀢, 𑀫𑀫 𑀧𑀺𑀢𑀸 ‘‘𑀤𑁆𑀯𑀸𑀤𑀲𑀯𑀲𑁆𑀲𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀸𑀲𑀻’’𑀢𑀺 𑀫𑀁 𑀅𑀯𑁄𑀘, 𑀅𑀳𑀁 𑀇𑀤𑀸𑀦𑁂𑀯 𑀕𑀘𑁆𑀙𑀦𑁆𑀢𑁄 𑀢𑀲𑁆𑀲 𑀯𑀘𑀦𑀓𑀭𑁄 𑀦𑀸𑀫 𑀦 𑀳𑁄𑀫𑀺, 𑀅𑀜𑁆𑀜𑀸𑀦𑀺𑀧𑀺 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻𑀢𑀺. ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀓𑁄 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀻’’𑀢𑀺? ‘‘𑀢𑀼𑀫𑁆𑀳𑁂 𑀓𑀸𑀭𑁂𑀣𑀸’’𑀢𑀺. ‘‘𑀦 𑀫𑀬𑀁 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀬𑀸𑀯 𑀫𑀫𑀸𑀕𑀫𑀦𑀸 𑀇𑀫𑀸 𑀧𑀸𑀤𑀼𑀓𑀸 𑀓𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀢𑀺𑀡𑀧𑀸𑀤𑀼𑀓𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀅𑀤𑀸𑀲𑀺. 𑀢𑁂 𑀢𑀬𑁄𑀧𑀺 𑀚𑀦𑀸 𑀧𑀸𑀤𑀼𑀓𑀸 𑀕𑀳𑁂𑀢𑁆𑀯𑀸 𑀭𑀸𑀫𑀧𑀡𑁆𑀟𑀺𑀢𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑀸 𑀩𑀸𑀭𑀸𑀡𑀲𑀺𑀁 𑀅𑀕𑀫𑀁𑀲𑀼. 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀧𑀸𑀤𑀼𑀓𑀸 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁. 𑀅𑀫𑀘𑁆𑀘𑀸 𑀢𑀺𑀡𑀧𑀸𑀤𑀼𑀓𑀸 𑀭𑀸𑀚𑀧𑀮𑁆𑀮𑀗𑁆𑀓𑁂 𑀞𑀧𑁂𑀢𑁆𑀯𑀸 ¶ 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺. 𑀲𑀘𑁂 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑁄 𑀳𑁄𑀢𑀺, 𑀧𑀸𑀤𑀼𑀓𑀸 𑀅𑀜𑁆𑀜𑀫𑀜𑁆𑀜𑀁 ¶ 𑀧𑀝𑀺𑀳𑀜𑁆𑀜𑀦𑁆𑀢𑀺. 𑀢𑀸𑀬 𑀲𑀜𑁆𑀜𑀸𑀬 𑀧𑀼𑀦 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺. 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀢𑀓𑀸𑀮𑁂 𑀧𑀸𑀤𑀼𑀓𑀸 𑀦𑀺𑀲𑁆𑀲𑀤𑁆𑀤𑀸 𑀲𑀦𑁆𑀦𑀺𑀲𑀻𑀤𑀦𑁆𑀢𑀺. 𑀭𑀸𑀫𑀧𑀡𑁆𑀟𑀺𑀢𑁄 𑀢𑀺𑀡𑁆𑀡𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀅𑀭𑀜𑁆𑀜𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀁 𑀧𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀢𑀲𑁆𑀲 𑀆𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀓𑀼𑀫𑀸𑀭𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀲𑀻𑀢𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼. 𑀏𑀯𑀁 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑁄 𑀫𑀳𑀸𑀲𑀢𑁆𑀢𑁄 𑀅𑀮𑀗𑁆𑀓𑀢𑀭𑀣𑁂 𑀞𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀦𑁆𑀤𑀓𑀧𑀸𑀲𑀸𑀤𑀯𑀭𑀲𑁆𑀲 𑀫𑀳𑀸𑀢𑀮𑀁 𑀅𑀪𑀺𑀭𑀼𑀳𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄𑀴𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑁯𑁬.

‘‘𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀝𑁆𑀞𑀺 𑀯𑀲𑁆𑀲𑀲𑀢𑀸𑀦𑀺 𑀘;

𑀓𑀫𑁆𑀩𑀼𑀕𑀻𑀯𑁄 𑀫𑀳𑀸𑀩𑀸𑀳𑀼, 𑀭𑀸𑀫𑁄 𑀭𑀚𑁆𑀚𑀫𑀓𑀸𑀭𑀬𑀻’’𑀢𑀺. 𑁋

𑀅𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀢𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀢𑀢𑁆𑀣 ¶ 𑀓𑀫𑁆𑀩𑀼𑀕𑀻𑀯𑁄𑀢𑀺 𑀲𑀼𑀯𑀡𑁆𑀡𑀸𑀴𑀺𑀗𑁆𑀕𑀲𑀤𑀺𑀲𑀕𑀻𑀯𑁄. 𑀲𑀼𑀯𑀡𑁆𑀡𑀜𑁆𑀳𑀺 𑀓𑀫𑁆𑀩𑀽𑀢𑀺 𑀯𑀼𑀘𑁆𑀘𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑀼𑀝𑀼𑀫𑁆𑀩𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀤𑀲𑀭𑀣𑀫𑀳𑀸𑀭𑀸𑀚𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀅𑀳𑁄𑀲𑀺, 𑀫𑀸𑀢𑀸 𑀫𑀳𑀸𑀫𑀸𑀬𑀸𑀤𑁂𑀯𑀻, 𑀲𑀻𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀪𑀭𑀢𑁄 𑀆𑀦𑀦𑁆𑀤𑁄, 𑀮𑀓𑁆𑀔𑀡𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀭𑀸𑀫𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀤𑀲𑀭𑀣𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁬𑁨] 𑁮. 𑀲𑀁𑀯𑀭𑀚𑀸𑀢𑀓𑀯𑀡𑁆𑀡𑀦𑀸

𑀚𑀸𑀦𑀦𑁆𑀢𑁄 𑀦𑁄 𑀫𑀳𑀸𑀭𑀸𑀚𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀧𑀕𑀼𑀡𑀸𑀦𑀺 𑀓𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀯𑀲𑁆𑀲𑁄 ¶ 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 ‘‘𑀅𑀭𑀜𑁆𑀜𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀇𑀭𑀺𑀬𑀸𑀧𑀣𑁂 𑀧𑀲𑀦𑁆𑀦𑀫𑀦𑀼𑀲𑁆𑀲𑁂𑀳𑀺 ¶ 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀉𑀧𑀝𑁆𑀞𑀺𑀬𑀫𑀸𑀦𑁄 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀬𑀼𑀜𑁆𑀚𑀦𑁆𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑁂𑀦 𑀯𑀻𑀭𑀺𑀬𑁂𑀦 𑀢𑁂𑀫𑀸𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀑𑀪𑀸𑀲𑀫𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀤𑁆𑀥𑀸 𑀅𑀳𑀁 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁂𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀤𑀧𑀭𑀫𑁄, 𑀓𑀺𑀁 𑀫𑁂 𑀅𑀭𑀜𑁆𑀜𑀯𑀸𑀲𑁂𑀦, 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀭𑀽𑀧𑀲𑀺𑀭𑀺𑀁 𑀧𑀲𑁆𑀲𑀦𑁆𑀢𑁄 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀘𑁂𑀯 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑁂𑀳𑀺 𑀘 𑀆𑀕𑀫𑀦𑀓𑀸𑀭𑀡𑀁 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀓𑀣𑁂𑀢𑁆𑀯𑀸 𑀢𑁂𑀳𑀺 ‘‘𑀓𑀲𑁆𑀫𑀸 𑀏𑀯𑀫𑀓𑀸𑀲𑀻’’𑀢𑀺 𑀕𑀭𑀳𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀙𑀫𑀸𑀦𑀁 𑀪𑀺𑀓𑁆𑀔𑀼𑀁 𑀆𑀦𑀬𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁, 𑀪𑀦𑁆𑀢𑁂, 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺𑀢𑁆𑀯𑀸 𑀆𑀕𑀢𑁄’’𑀢𑀺 𑀆𑀭𑁄𑀘𑀺𑀢𑁂 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀪𑀺𑀓𑁆𑀔𑀼 𑀯𑀻𑀭𑀺𑀬𑀁 𑀑𑀲𑁆𑀲𑀚𑀺, 𑀇𑀫𑀲𑁆𑀫𑀺𑀜𑁆𑀳𑀺 𑀲𑀸𑀲𑀦𑁂 𑀦𑀺𑀩𑁆𑀩𑀻𑀭𑀺𑀬𑀲𑁆𑀲 𑀓𑀼𑀲𑀻𑀢𑀧𑀼𑀕𑁆𑀕𑀮𑀲𑁆𑀲 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀆𑀭𑀤𑁆𑀥𑀯𑀻𑀭𑀺𑀬𑀸 𑀇𑀫𑀁 𑀥𑀫𑁆𑀫𑀁 𑀆𑀭𑀸𑀥𑁂𑀦𑁆𑀢𑀺, 𑀢𑁆𑀯𑀁 𑀔𑁄 𑀧𑀦 𑀧𑀼𑀩𑁆𑀩𑁂 𑀯𑀻𑀭𑀺𑀬𑀯𑀸 𑀑𑀯𑀸𑀤𑀓𑁆𑀔𑀫𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑀲𑀢𑀲𑁆𑀲 𑀲𑀩𑁆𑀩𑀓𑀦𑀺𑀝𑁆𑀞𑁄 𑀳𑀼𑀢𑁆𑀯𑀸𑀧𑀺 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀧𑀢𑁆𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀁𑀯𑀭𑀓𑀼𑀫𑀸𑀭𑁄 𑀦𑀸𑀫 𑀧𑀼𑀢𑁆𑀢𑀲𑀢𑀲𑁆𑀲 𑀲𑀩𑁆𑀩𑀓𑀦𑀺𑀝𑁆𑀞𑁄 𑀅𑀳𑁄𑀲𑀺. 𑀭𑀸𑀚𑀸 𑀏𑀓𑁂𑀓𑀁 𑀧𑀼𑀢𑁆𑀢𑀁 ‘‘𑀲𑀺𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀺𑀓𑁆𑀔𑀸𑀧𑁂𑀣𑀸’’𑀢𑀺 𑀏𑀓𑁂𑀓𑀲𑁆𑀲 𑀅𑀫𑀘𑁆𑀘𑀲𑁆𑀲 𑀅𑀤𑀸𑀲𑀺. 𑀲𑀁𑀯𑀭𑀓𑀼𑀫𑀸𑀭𑀲𑁆𑀲 𑀆𑀘𑀭𑀺𑀬𑁄 𑀅𑀫𑀘𑁆𑀘𑁄 𑀩𑁄𑀥𑀺𑀲𑀢𑁆𑀢𑁄 𑀅𑀳𑁄𑀲𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑀲𑁆𑀲 𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑁄. 𑀅𑀫𑀘𑁆𑀘𑀸 𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑁂 𑀭𑀸𑀚𑀧𑀼𑀢𑁆𑀢𑁂 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑁂𑀲𑀁 𑀚𑀦𑀧𑀤𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀁𑀯𑀭𑀓𑀼𑀫𑀸𑀭𑁄 𑀲𑀩𑁆𑀩𑀲𑀺𑀧𑁆𑀧𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀢𑀸𑀢, 𑀲𑀘𑁂 𑀫𑀁 𑀧𑀺𑀢𑀸 𑀚𑀦𑀧𑀤𑀁 𑀧𑁂𑀲𑁂𑀢𑀺, 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀢𑀸𑀢, 𑀢𑁆𑀯𑀁 𑀚𑀦𑀧𑀤𑁂 𑀤𑀻𑀬𑀫𑀸𑀦𑁂 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 ‘𑀤𑁂𑀯 𑀅𑀳𑀁 𑀲𑀩𑁆𑀩𑀓𑀦𑀺𑀝𑁆𑀞𑁄, 𑀫𑀬𑀺𑀧𑀺 𑀕𑀢𑁂 𑀢𑀼𑀫𑁆𑀳𑀸𑀓𑀁 𑀧𑀸𑀤𑀫𑀽𑀮𑀁 𑀢𑀼𑀘𑁆𑀙𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀸𑀤𑀫𑀽𑀮𑁂𑀬𑁂𑀯 𑀯𑀲𑀺𑀲𑁆𑀲𑀸𑀫𑀻’𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀲𑀁𑀯𑀭𑀓𑀼𑀫𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀺𑀦𑁆𑀦𑀁 𑀧𑀼𑀘𑁆𑀙𑀺 ‘‘𑀓𑀺𑀁 𑀢𑀸𑀢, 𑀲𑀺𑀧𑁆𑀧𑀁 𑀢𑁂 𑀦𑀺𑀝𑁆𑀞𑀺𑀢’’𑀦𑁆𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑀼𑀬𑁆𑀳𑀫𑁆𑀧𑀺 𑀚𑀦𑀧𑀤𑀁 𑀤𑁂𑀫𑀻’’𑀢𑀺. ‘‘𑀤𑁂𑀯 𑀢𑀼𑀫𑁆𑀳𑀸𑀓𑀁 𑀧𑀸𑀤𑀫𑀽𑀮𑀁 ¶ 𑀢𑀼𑀘𑁆𑀙𑀁 𑀪𑀯𑀺𑀲𑁆𑀲𑀢𑀺, 𑀧𑀸𑀤𑀫𑀽𑀮𑁂𑀬𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂𑀬𑁂𑀯 𑀳𑀼𑀢𑁆𑀯𑀸 𑀧𑀼𑀦𑀧𑀺 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀢𑀸𑀢 𑀅𑀜𑁆𑀜𑀁 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀢𑀸𑀢 𑀭𑀸𑀚𑀸𑀦𑀁 𑀏𑀓𑀁 𑀧𑀼𑀭𑀸𑀡𑀼𑀬𑁆𑀬𑀸𑀦𑀁 𑀬𑀸𑀘𑀸𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀉𑀬𑁆𑀬𑀸𑀦𑀁 𑀬𑀸𑀘𑀺𑀢𑁆𑀯𑀸 𑀢𑀢𑁆𑀣 𑀚𑀸𑀢𑀓𑁂𑀳𑀺 𑀧𑀼𑀧𑁆𑀨𑀨𑀮𑁂𑀳𑀺 𑀦𑀕𑀭𑁂 𑀇𑀲𑁆𑀲𑀭𑀚𑀦𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀢𑀸𑀢, 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀪𑀢𑁆𑀢𑀯𑁂𑀢𑀦𑀁 𑀢𑁆𑀯𑀫𑁂𑀯 𑀤𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀳𑀸𑀧𑁂𑀢𑁆𑀯𑀸 𑀪𑀢𑁆𑀢𑀯𑁂𑀢𑀦𑀁 𑀤𑀢𑁆𑀯𑀸 𑀧𑀼𑀦 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀤𑀸𑀲𑀧𑁄𑀭𑀺𑀲𑀸𑀦𑀫𑁆𑀧𑀺 𑀳𑀢𑁆𑀣𑀻𑀦𑀫𑁆𑀧𑀺 𑀅𑀲𑁆𑀲𑀸𑀦𑀫𑁆𑀧𑀺 𑀩𑀮𑀓𑀸𑀬𑀲𑁆𑀲𑀧𑀺 𑀯𑀢𑁆𑀢𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀤𑀸𑀲𑀺, 𑀢𑀺𑀭𑁄𑀚𑀦𑀧𑀤𑁂𑀳𑀺 𑀆𑀕𑀢𑀸𑀦𑀁 𑀤𑀽𑀢𑀸𑀤𑀻𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀸𑀤𑀻𑀦𑀺 𑀯𑀸𑀡𑀺𑀚𑀸𑀦𑀁 𑀲𑀼𑀗𑁆𑀓𑀦𑁆𑀢𑀺 𑀲𑀩𑁆𑀩𑀓𑀭𑀡𑀻𑀬𑀸𑀦𑀺 𑀅𑀢𑁆𑀢𑀦𑀸𑀯 𑀅𑀓𑀸𑀲𑀺. 𑀏𑀯𑀁 𑀲𑁄 𑀫𑀳𑀸𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀩𑁆𑀩𑀁 𑀅𑀦𑁆𑀢𑁄𑀚𑀦𑀜𑁆𑀘 𑀩𑀳𑀺𑀚𑀦𑀜𑁆𑀘 𑀦𑀸𑀕𑀭𑁂 𑀘 𑀭𑀝𑁆𑀞𑀯𑀸𑀲𑀺𑀦𑁄 𑀘 𑀆𑀕𑀦𑁆𑀢𑀼𑀓𑁂 𑀘 𑀆𑀬𑀯𑀢𑁆𑀢𑀦𑁂 𑀘 𑀢𑁂𑀦 𑀢𑁂𑀦 𑀲𑀗𑁆𑀕𑀳𑀯𑀢𑁆𑀣𑀼𑀦𑀸 𑀆𑀩𑀦𑁆𑀥𑀺𑀢𑁆𑀯𑀸 𑀲𑀗𑁆𑀕𑀡𑁆𑀳𑀺, 𑀲𑀩𑁆𑀩𑁂𑀲𑀁 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄.

𑀅𑀧𑀭𑀪𑀸𑀕𑁂 𑀭𑀸𑀚𑀸𑀦𑀁 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀁 𑀅𑀫𑀘𑁆𑀘𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀲𑁂𑀢𑀘𑁆𑀙𑀢𑁆𑀢𑀁 𑀓𑀲𑁆𑀲 𑀤𑁂𑀫𑀸’’𑀢𑀺? ‘‘𑀢𑀸𑀢, 𑀫𑀫 𑀧𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀲𑀸𑀫𑀺𑀦𑁄𑀯. 𑀬𑁄 𑀧𑀦 𑀢𑀼𑀫𑁆𑀳𑀸𑀓𑀁 𑀫𑀦𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯 𑀲𑁂𑀢𑀘𑁆𑀙𑀢𑁆𑀣𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀢𑀲𑁆𑀫𑀺𑀁 𑀓𑀸𑀮𑀓𑀢𑁂 𑀢𑀲𑁆𑀲 𑀲𑀭𑀻𑀭𑀧𑀭𑀺𑀳𑀸𑀭𑀁 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀭𑀜𑁆𑀜𑀸 ‘𑀬𑁄 𑀢𑀼𑀫𑁆𑀳𑀸𑀓𑀁 𑀫𑀦𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀬𑁆𑀬𑀸𑀣𑀸’𑀢𑀺 𑀯𑀼𑀢𑁆𑀢𑀁, 𑀅𑀫𑁆𑀳𑀸𑀓𑀜𑁆𑀘 𑀅𑀬𑀁 𑀲𑀁𑀯𑀭𑀓𑀼𑀫𑀸𑀭𑁄 𑀫𑀦𑀁 𑀕𑀡𑁆𑀳𑀸𑀢𑀻’’𑀢𑀺 𑀜𑀸𑀢𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀢𑀲𑁆𑀲 𑀓𑀜𑁆𑀘𑀦𑀫𑀸𑀮𑀁 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺𑀁𑀲𑀼. 𑀲𑀁𑀯𑀭𑀫𑀳𑀸𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀇𑀢𑀭𑁂 𑀏𑀓𑀽𑀦𑀲𑀢𑀓𑀼𑀫𑀸𑀭𑀸 ‘‘𑀧𑀺𑀢𑀸 𑀓𑀺𑀭 𑀦𑁄 𑀓𑀸𑀮𑀓𑀢𑁄, 𑀲𑀁𑀯𑀭𑀓𑀼𑀫𑀸𑀭𑀲𑁆𑀲 𑀓𑀺𑀭 𑀲𑁂𑀢𑀘𑁆𑀙𑀢𑁆𑀢𑀁 ¶ 𑀉𑀲𑁆𑀲𑀸𑀧𑁂𑀲𑀼𑀁, 𑀲𑁄 𑀲𑀩𑁆𑀩𑀓𑀦𑀺𑀝𑁆𑀞𑁄, 𑀢𑀲𑁆𑀲 𑀙𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀺, 𑀲𑀩𑁆𑀩𑀚𑁂𑀝𑁆𑀞𑀓𑀲𑁆𑀲 ¶ 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀏𑀓𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀙𑀢𑁆𑀢𑀁 𑀯𑀸 𑀦𑁄 𑀤𑁂𑀢𑀼, 𑀬𑀼𑀤𑁆𑀥𑀁 𑀯𑀸’’𑀢𑀺 𑀲𑀁𑀯𑀭𑀫𑀳𑀸𑀭𑀸𑀚𑀲𑁆𑀲 𑀧𑀡𑁆𑀡𑀁 𑀧𑁂𑀲𑁂𑀢𑁆𑀯𑀸 𑀦𑀕𑀭𑀁 𑀉𑀧𑀭𑀼𑀦𑁆𑀥𑀺𑀁𑀲𑀼. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀭𑀸𑀚, 𑀢𑀯 𑀪𑀸𑀢𑀺𑀓𑁂𑀳𑀺 ¶ 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑁆𑀯𑀁 𑀧𑀺𑀢𑀼 𑀲𑀦𑁆𑀢𑀓𑀁 𑀥𑀦𑀁 𑀲𑀢𑀓𑁄𑀝𑁆𑀞𑀸𑀲𑁂 𑀓𑀸𑀭𑁂𑀢𑁆𑀯𑀸 𑀏𑀓𑀽𑀦𑀲𑀢𑀁 𑀪𑀸𑀢𑀺𑀓𑀸𑀦𑀁 𑀧𑁂𑀲𑁂𑀢𑁆𑀯𑀸 ‘‘𑀇𑀫𑀁 𑀢𑀼𑀫𑁆𑀳𑀸𑀓𑀁 𑀓𑁄𑀝𑁆𑀞𑀸𑀲𑀁 𑀧𑀺𑀢𑀼 𑀲𑀦𑁆𑀢𑀓𑀁 𑀕𑀡𑁆𑀳𑀣, 𑀦𑀸𑀳𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀸𑀫𑀻’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀸𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀣𑀲𑁆𑀲 𑀲𑀩𑁆𑀩𑀚𑁂𑀝𑁆𑀞𑀪𑀸𑀢𑀺𑀓𑁄 𑀉𑀧𑁄𑀲𑀣𑀓𑀼𑀫𑀸𑀭𑁄 𑀦𑀸𑀫 𑀲𑁂𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢𑀸, 𑀭𑀸𑀚𑀸𑀦𑀁 𑀦𑀸𑀫 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀺, 𑀅𑀬𑀜𑁆𑀘 𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑁄 𑀧𑀝𑀺𑀲𑀢𑁆𑀢𑀼𑀧𑀺 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺, 𑀅𑀫𑁆𑀳𑀸𑀓𑀁 𑀧𑀺𑀢𑀼 𑀲𑀦𑁆𑀢𑀓𑀁 𑀥𑀦𑀁 𑀧𑁂𑀲𑁂𑀢𑁆𑀯𑀸 ‘𑀦𑀸𑀳𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀸𑀫𑀻’𑀢𑀺 𑀧𑁂𑀲𑁂𑀲𑀺, 𑀦 𑀔𑁄 𑀧𑀦 𑀫𑀬𑀁 𑀲𑀩𑁆𑀩𑁂𑀧𑀺 𑀏𑀓𑀓𑁆𑀔𑀡𑁂 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑁆𑀲𑀸𑀫, 𑀏𑀓𑀲𑁆𑀲𑁂𑀯 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑁆𑀲𑀸𑀫, 𑀅𑀬𑀫𑁂𑀯 𑀭𑀸𑀚𑀸 𑀳𑁄𑀢𑀼, 𑀏𑀣 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀭𑀸𑀚𑀓𑀼𑀝𑀼𑀫𑁆𑀩𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀚𑀦𑀧𑀤𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀅𑀣 𑀢𑁂 𑀲𑀩𑁆𑀩𑁂𑀧𑀺 𑀓𑀼𑀫𑀸𑀭𑀸 𑀦𑀕𑀭𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀧𑀝𑀺𑀲𑀢𑁆𑀢𑀼𑀦𑁄 𑀅𑀳𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼.

𑀭𑀸𑀚𑀸𑀧𑀺 𑀢𑁂𑀲𑀁 𑀅𑀫𑀘𑁆𑀘𑁂𑀳𑀺 𑀧𑀡𑁆𑀡𑀸𑀓𑀸𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀝𑀺𑀫𑀕𑁆𑀕𑀁 𑀧𑁂𑀲𑁂𑀢𑀺. 𑀓𑀼𑀫𑀸𑀭𑀸 𑀦𑀸𑀢𑀺𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀢𑁆𑀢𑀺𑀓𑀸𑀯 𑀆𑀕𑀦𑁆𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀁𑀯𑀭𑀫𑀳𑀸𑀭𑀸𑀚𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀦𑀻𑀘𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀁𑀯𑀭𑀫𑀳𑀸𑀭𑀸𑀚𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀲𑀻𑀳𑀸𑀲𑀦𑁂 𑀦𑀺𑀲𑀻𑀤𑀺, 𑀫𑀳𑀦𑁆𑀢𑁄 𑀬𑀲𑁄 𑀫𑀳𑀦𑁆𑀢𑀁 𑀲𑀺𑀭𑀺𑀲𑁄𑀪𑀕𑁆𑀕𑀁 𑀅𑀳𑁄𑀲𑀺, 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁 𑀓𑀫𑁆𑀧𑀺. 𑀉𑀧𑁄𑀲𑀣𑀓𑀼𑀫𑀸𑀭𑁄 𑀲𑀁𑀯𑀭𑀫𑀳𑀸𑀭𑀸𑀚𑀲𑁆𑀲 𑀲𑀺𑀭𑀺𑀯𑀺𑀪𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀸 𑀅𑀢𑁆𑀢𑀦𑁄 𑀅𑀘𑁆𑀘𑀬𑁂𑀦 𑀲𑀁𑀯𑀭𑀓𑀼𑀫𑀸𑀭𑀲𑁆𑀲 𑀭𑀸𑀚𑀪𑀸𑀯𑀁 𑀜𑀢𑁆𑀯𑀸 𑀫𑀜𑁆𑀜𑁂 𑀅𑀫𑁆𑀳𑀸𑀓𑀁 𑀚𑀦𑀧𑀤𑁂 𑀤𑀢𑁆𑀯𑀸 𑀇𑀫𑀲𑁆𑀲 𑀦 𑀅𑀤𑀸𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁭.

‘‘𑀚𑀸𑀦𑀦𑁆𑀢𑁄 ¶ 𑀦𑁄 𑀫𑀳𑀸𑀭𑀸𑀚, 𑀢𑀯 𑀲𑀻𑀮𑀁 𑀚𑀦𑀸𑀥𑀺𑀧𑁄;

𑀇𑀫𑁂 𑀓𑀼𑀫𑀸𑀭𑁂 𑀧𑀽𑀚𑁂𑀦𑁆𑀢𑁄, 𑀦 𑀢𑀁 𑀓𑁂𑀦𑀘𑀺 𑀫𑀜𑁆𑀜𑀣.

𑁯𑁮.

‘‘𑀢𑀺𑀝𑁆𑀞𑀦𑁆𑀢𑁂 𑀦𑁄 𑀫𑀳𑀸𑀭𑀸𑀚𑁂, 𑀅𑀤𑀼 𑀤𑁂𑀯𑁂 𑀤𑀺𑀯𑀗𑁆𑀕𑀢𑁂;

𑀜𑀸𑀢𑀻 𑀢𑀁 𑀲𑀫𑀦𑀼𑀜𑁆𑀜𑀺𑀁𑀲𑀼, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

𑁯𑁯.

‘‘𑀓𑁂𑀦 𑀲𑀁𑀯𑀭 𑀯𑀢𑁆𑀢𑁂𑀦, 𑀲𑀜𑁆𑀚𑀸𑀢𑁂 𑀅𑀪𑀺𑀢𑀺𑀝𑁆𑀞𑀲𑀺;

𑀓𑁂𑀦 𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀜𑀸𑀢𑀺𑀲𑀗𑁆𑀖𑀸 𑀲𑀫𑀸𑀕𑀢𑀸’’𑀢𑀺.

𑀢𑀢𑁆𑀣 ¶ ¶ 𑀚𑀸𑀦𑀦𑁆𑀢𑁄 𑀦𑁄𑀢𑀺 𑀚𑀸𑀦𑀦𑁆𑀢𑁄 𑀦𑀼. 𑀚𑀦𑀸𑀥𑀺𑀧𑁄𑀢𑀺 𑀅𑀫𑁆𑀳𑀸𑀓𑀁 𑀧𑀺𑀢𑀸 𑀦𑀭𑀺𑀦𑁆𑀤𑁄. 𑀇𑀫𑁂𑀢𑀺 𑀇𑀫𑁂 𑀏𑀓𑀽𑀦𑀲𑀢𑁂 𑀓𑀼𑀫𑀸𑀭𑁂. 𑀧𑀸𑀴𑀺𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀜𑁆𑀜𑁂 𑀓𑀼𑀫𑀸𑀭𑁂’’𑀢𑀺 𑀮𑀺𑀔𑀺𑀢𑀁. 𑀧𑀽𑀚𑁂𑀦𑁆𑀢𑁄𑀢𑀺 𑀢𑁂𑀦 𑀢𑁂𑀦 𑀚𑀦𑀧𑀤𑁂𑀦 𑀫𑀸𑀦𑁂𑀦𑁆𑀢𑁄. 𑀦 𑀢𑀁 𑀓𑁂𑀦𑀘𑀻𑀢𑀺 𑀔𑀼𑀤𑁆𑀤𑀓𑁂𑀦𑀸𑀧𑀺 𑀓𑁂𑀦𑀘𑀺 𑀚𑀦𑀧𑀤𑁂𑀦 𑀢𑀁 𑀧𑀽𑀚𑁂𑀢𑀩𑁆𑀩𑀁 𑀦 𑀫𑀜𑁆𑀜𑀺𑀢𑁆𑀣, ‘‘𑀅𑀬𑀁 𑀫𑀫 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀫𑀜𑁆𑀜𑁂 𑀅𑀢𑁆𑀢𑀦𑁄 𑀧𑀸𑀤𑀫𑀽𑀮𑁂𑀬𑁂𑀯 𑀯𑀸𑀲𑁂𑀲𑀻𑀢𑀺. 𑀢𑀺𑀝𑁆𑀞𑀦𑁆𑀢𑁂 𑀦𑁄𑀢𑀺 𑀢𑀺𑀝𑁆𑀞𑀦𑁆𑀢𑁂 𑀦𑀼, 𑀥𑀭𑀫𑀸𑀦𑁂𑀬𑁂𑀯 𑀦𑀽𑀢𑀺 𑀧𑀼𑀘𑁆𑀙𑀢𑀺, 𑀅𑀤𑀼 𑀤𑁂𑀯𑁂𑀢𑀺 𑀉𑀤𑀸𑀳𑀼 𑀅𑀫𑁆𑀳𑀸𑀓𑀁 𑀧𑀺𑀢𑀭𑀺 𑀤𑀺𑀯𑀗𑁆𑀕𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀼𑀟𑁆𑀠𑀺𑀁 𑀧𑀲𑁆𑀲𑀦𑁆𑀢𑀸 𑀲𑀤𑁆𑀥𑀺𑀁 𑀭𑀸𑀚𑀓𑀸𑀭𑀓𑁂𑀳𑀺 𑀦𑁂𑀕𑀫𑀚𑀸𑀦𑀧𑀤𑁂𑀳𑀺 𑀜𑀸𑀢𑀬𑁄 𑀢𑀁 ‘‘𑀭𑀸𑀚𑀸 𑀳𑁄𑀳𑀻’’𑀢𑀺 𑀲𑀫𑀦𑀼𑀜𑁆𑀜𑀺𑀁𑀲𑀼. 𑀯𑀢𑁆𑀢𑁂𑀦𑀸𑀢𑀺 𑀲𑀻𑀮𑀸𑀘𑀸𑀭𑁂𑀦. 𑀲𑀜𑁆𑀚𑀸𑀢𑁂 𑀅𑀪𑀺𑀢𑀺𑀝𑁆𑀞𑀲𑀻𑀢𑀺 𑀲𑀫𑀸𑀦𑀚𑀸𑀢𑀺𑀓𑁂 𑀏𑀓𑀽𑀦𑀲𑀢𑀪𑀸𑀢𑀭𑁄 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀲𑀺. 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀦 𑀅𑀪𑀺𑀪𑀯𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀁𑀯𑀭𑀫𑀳𑀸𑀭𑀸𑀚𑀸 𑀅𑀢𑁆𑀢𑀦𑁄 𑀕𑀼𑀡𑀁 𑀓𑀣𑁂𑀦𑁆𑀢𑁄 𑀙 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁦.

‘‘𑀦 𑀭𑀸𑀚𑀧𑀼𑀢𑁆𑀢 𑀉𑀲𑀽𑀬𑀸𑀫𑀺, 𑀲𑀫𑀡𑀸𑀦𑀁 𑀫𑀳𑁂𑀲𑀺𑀦𑀁;

𑀲𑀓𑁆𑀓𑀘𑁆𑀘𑀁 𑀢𑁂 𑀦𑀫𑀲𑁆𑀲𑀸𑀫𑀺, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀢𑀸𑀤𑀺𑀦𑀁.

𑁧𑁦𑁧.

‘‘𑀢𑁂 𑀫𑀁 𑀥𑀫𑁆𑀫𑀕𑀼𑀡𑁂 𑀬𑀼𑀢𑁆𑀢𑀁, 𑀲𑀼𑀲𑁆𑀲𑀽𑀲𑀫𑀦𑀼𑀲𑀽𑀬𑀓𑀁;

𑀲𑀫𑀡𑀸 𑀫𑀦𑀼𑀲𑀸𑀲𑀦𑁆𑀢𑀺, 𑀇𑀲𑀻 𑀥𑀫𑁆𑀫𑀕𑀼𑀡𑁂 𑀭𑀢𑀸.

𑁧𑁦𑁨.

‘‘𑀢𑁂𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀫𑀡𑀸𑀦𑀁 𑀫𑀳𑁂𑀲𑀺𑀦𑀁;

𑀦 𑀓𑀺𑀜𑁆𑀘𑀺 𑀅𑀢𑀺𑀫𑀜𑁆𑀜𑀸𑀫𑀺, 𑀥𑀫𑁆𑀫𑁂 𑀫𑁂 𑀦𑀺𑀭𑀢𑁄 𑀫𑀦𑁄.

𑁧𑁦𑁩.

‘‘𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀢𑁂𑀲𑀁 𑀦𑀧𑁆𑀧𑀝𑀺𑀩𑀦𑁆𑀥𑀸𑀫𑀺, 𑀦𑀺𑀯𑀺𑀝𑁆𑀞𑀁 𑀪𑀢𑁆𑀢𑀯𑁂𑀢𑀦𑀁.

𑁧𑁦𑁪.

‘‘𑀫𑀳𑀸𑀫𑀢𑁆𑀢𑀸 𑀘 𑀫𑁂 𑀅𑀢𑁆𑀣𑀺, 𑀫𑀦𑁆𑀢𑀺𑀦𑁄 𑀧𑀭𑀺𑀘𑀸𑀭𑀓𑀸;

𑀩𑀸𑀭𑀸𑀡𑀲𑀺𑀁 𑀯𑁄𑀳𑀭𑀦𑁆𑀢𑀺, 𑀩𑀳𑀼𑀫𑀁𑀲𑀲𑀼𑀭𑁄𑀤𑀦𑀁.

𑁧𑁦𑁫.

‘‘𑀅𑀣𑁄𑀧𑀺 ¶ 𑀯𑀸𑀡𑀺𑀚𑀸 𑀨𑀻𑀢𑀸, 𑀦𑀸𑀦𑀸𑀭𑀝𑁆𑀞𑁂𑀳𑀺 𑀆𑀕𑀢𑀸;

𑀢𑁂𑀲𑀼 𑀫𑁂 𑀯𑀺𑀳𑀺𑀢𑀸 𑀭𑀓𑁆𑀔𑀸, 𑀏𑀯𑀁 𑀚𑀸𑀦𑀸𑀳𑀼𑀧𑁄𑀲𑀣𑀸’’𑀢𑀺.

𑀢𑀢𑁆𑀣 ¶ 𑀦 𑀭𑀸𑀚𑀧𑀼𑀢𑁆𑀢𑀸𑀢𑀺 𑀅𑀳𑀁 𑀭𑀸𑀚𑀧𑀼𑀢𑁆𑀢, 𑀓𑀜𑁆𑀘𑀺 𑀲𑀢𑁆𑀢𑀁 ‘‘𑀅𑀬𑀁 𑀲𑀫𑁆𑀧𑀢𑁆𑀢𑀺 𑀇𑀫𑀲𑁆𑀲 𑀫𑀸 ¶ 𑀳𑁄𑀢𑀽’’𑀢𑀺 𑀦 𑀉𑀲𑀽𑀬𑀸𑀫𑀺. 𑀢𑀸𑀤𑀺𑀦𑀦𑁆𑀢𑀺 𑀢𑀸𑀤𑀺𑀮𑀓𑁆𑀔𑀡𑀬𑀼𑀢𑁆𑀢𑀸𑀦𑀁 𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑀸𑀦𑀁 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀕𑀼𑀡𑀸𑀦𑀁 𑀏𑀲𑀺𑀢𑀢𑀸𑀬 𑀫𑀳𑁂𑀲𑀻𑀦𑀁 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀧𑀸𑀤𑁂 𑀯𑀦𑁆𑀤𑀸𑀫𑀺, 𑀤𑀸𑀦𑀁 𑀤𑀤𑀦𑁆𑀢𑁄 𑀥𑀫𑁆𑀫𑀺𑀓𑀜𑁆𑀘 𑀦𑁂𑀲𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀢𑁂 𑀦𑀫𑀲𑁆𑀲𑀸𑀫𑀺, 𑀫𑀦𑁂𑀦 𑀲𑀫𑁆𑀧𑀺𑀬𑀸𑀬𑀦𑁆𑀢𑁄 𑀘 𑀧𑀽𑀚𑁂𑀫𑀻𑀢𑀺 𑀅𑀢𑁆𑀣𑁄. 𑀢𑁂 𑀫𑀦𑁆𑀢𑀺 𑀢𑁂 𑀲𑀫𑀡𑀸 𑀫𑀁 ‘‘𑀅𑀬𑀁 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑁄 𑀲𑀼𑀲𑁆𑀲𑀽𑀲𑀁 𑀅𑀦𑀼𑀲𑀽𑀬𑀓𑁄’’𑀢𑀺 𑀢𑀣𑀢𑁄 𑀜𑀢𑁆𑀯𑀸 𑀫𑀁 𑀥𑀫𑁆𑀫𑀕𑀼𑀡𑁂 𑀬𑀼𑀢𑁆𑀢𑀁 𑀲𑀼𑀲𑁆𑀲𑀽𑀲𑀁 𑀅𑀦𑀼𑀲𑀽𑀬𑀓𑀁 𑀅𑀦𑀼𑀲𑀸𑀲𑀦𑁆𑀢𑀺, ‘‘𑀇𑀤𑀁 𑀓𑀭, 𑀇𑀤𑀁 𑀫𑀸 𑀓𑀭𑀻’’𑀢𑀺 𑀑𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀸𑀳𑀦𑁆𑀢𑀺 𑀢𑁂𑀲𑀁 𑀅𑀳𑀁. 𑀳𑀢𑁆𑀣𑀸𑀭𑁄𑀳𑀸𑀢𑀺 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀬𑀼𑀚𑁆𑀛𑀦𑀓𑀸 𑀬𑁄𑀥𑀸. 𑀅𑀦𑀻𑀓𑀝𑁆𑀞𑀸𑀢𑀺 𑀳𑀢𑁆𑀣𑀸𑀦𑀻𑀓𑀸𑀤𑀻𑀲𑀼 𑀞𑀺𑀢𑀸. 𑀭𑀣𑀺𑀓𑀸𑀢𑀺 𑀭𑀣𑀬𑁄𑀥𑀸. 𑀧𑀢𑁆𑀢𑀺𑀓𑀸𑀭𑀓𑀸𑀢𑀺 𑀧𑀢𑁆𑀢𑀺𑀦𑁄𑀯. 𑀦𑀺𑀯𑀺𑀝𑁆𑀞𑀦𑁆𑀢𑀺 𑀬𑀁 𑀢𑁂𑀳𑀺 𑀲𑀚𑁆𑀚𑀺𑀢𑀁 𑀪𑀢𑁆𑀢𑀜𑁆𑀘 𑀯𑁂𑀢𑀦𑀜𑁆𑀘, 𑀅𑀳𑀁 𑀢𑀁 𑀦𑀧𑁆𑀧𑀝𑀺𑀩𑀦𑁆𑀥𑀸𑀫𑀺, 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀫𑀳𑀸𑀫𑀢𑁆𑀢𑀸𑀢𑀺 𑀪𑀸𑀢𑀺𑀓, 𑀫𑀬𑁆𑀳𑀁 𑀫𑀳𑀸𑀧𑀜𑁆𑀜𑀸 𑀫𑀦𑁆𑀢𑁂𑀲𑀼 𑀓𑀼𑀲𑀮𑀸 𑀫𑀳𑀸𑀅𑀫𑀘𑁆𑀘𑀸 𑀘𑁂𑀯 𑀅𑀯𑀲𑁂𑀲𑀫𑀦𑁆𑀢𑀺𑀦𑁄 𑀘 𑀧𑀭𑀺𑀘𑀸𑀭𑀓𑀸 𑀅𑀢𑁆𑀣𑀺. 𑀇𑀫𑀺𑀦𑀸 𑀇𑀫𑀁 𑀤𑀲𑁆𑀲𑁂𑀢𑀺 ‘‘𑀢𑀼𑀫𑁆𑀳𑁂 𑀫𑀦𑁆𑀢𑀲𑀫𑁆𑀧𑀦𑁆𑀦𑁂 𑀧𑀡𑁆𑀟𑀺𑀢𑁂 𑀆𑀘𑀭𑀺𑀬𑁂 𑀦 𑀮𑀪𑀺𑀢𑁆𑀣, 𑀅𑀫𑁆𑀳𑀸𑀓𑀁 𑀧𑀦 𑀆𑀘𑀭𑀺𑀬𑀸 𑀧𑀡𑁆𑀟𑀺𑀢𑀸 𑀉𑀧𑀸𑀬𑀓𑀼𑀲𑀮𑀸, 𑀢𑁂 𑀦𑁄 𑀲𑁂𑀢𑀘𑁆𑀙𑀢𑁆𑀢𑁂𑀦 𑀬𑁄𑀚𑁂𑀲𑀼’’𑀦𑁆𑀢𑀺. 𑀩𑀸𑀭𑀸𑀡𑀲𑀺𑀦𑁆𑀢𑀺 𑀪𑀸𑀢𑀺𑀓, 𑀫𑀫 𑀙𑀢𑁆𑀢𑀁 𑀉𑀲𑁆𑀲𑀸𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀥𑀫𑁆𑀫𑀺𑀓𑁄 𑀅𑀦𑁆𑀯𑀤𑁆𑀥𑀫𑀸𑀲𑀁 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑁂𑀦 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀩𑀸𑀭𑀸𑀡𑀲𑀺𑀬𑀁 𑀩𑀳𑀼𑀁 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀫𑀘𑁆𑀙𑀫𑀁𑀲𑀁 𑀧𑀸𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀼𑀭𑁄𑀤𑀓𑀜𑁆𑀘 𑀚𑀸𑀢’’𑀦𑁆𑀢𑀺 𑀏𑀯𑀁 𑀭𑀝𑁆𑀞𑀯𑀸𑀲𑀺𑀦𑁄 𑀩𑀳𑀼𑀫𑀁𑀲𑀲𑀼𑀭𑁄𑀤𑀓𑀁 𑀓𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀯𑁄𑀳𑀭𑀦𑁆𑀢𑀺. 𑀨𑀻𑀢𑀸𑀢𑀺 𑀳𑀢𑁆𑀣𑀺𑀭𑀢𑀦𑀅𑀲𑁆𑀲𑀭𑀢𑀦𑀫𑀼𑀢𑁆𑀢𑀭𑀢𑀦𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀦𑀺𑀭𑀼𑀧𑀤𑁆𑀤𑀯𑀸 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑀸 𑀨𑀻𑀢𑀸 𑀲𑀫𑀺𑀤𑁆𑀥𑀸. 𑀏𑀯𑀁 𑀚𑀸𑀦𑀸𑀳𑀻𑀢𑀺 𑀪𑀸𑀢𑀺𑀓 𑀉𑀧𑁄𑀲𑀣 𑀅𑀳𑀁 𑀇𑀫𑁂𑀳𑀺 𑀏𑀢𑁆𑀢𑀓𑁂𑀳𑀺 𑀓𑀸𑀭𑀡𑁂𑀳𑀺 𑀲𑀩𑁆𑀩𑀓𑀦𑀺𑀝𑁆𑀞𑁄𑀧𑀺 𑀳𑀼𑀢𑁆𑀯𑀸 𑀫𑀫 𑀪𑀸𑀢𑀺𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀧𑀢𑁆𑀢𑁄, 𑀏𑀯𑀁 𑀚𑀸𑀦𑀸𑀳𑀻𑀢𑀺.

𑀅𑀣𑀲𑁆𑀲 𑀕𑀼𑀡𑀁 𑀲𑀼𑀢𑁆𑀯𑀸 𑀉𑀧𑁄𑀲𑀣𑀓𑀼𑀫𑀸𑀭𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁬.

‘‘𑀥𑀫𑁆𑀫𑁂𑀦 𑀓𑀺𑀭 𑀜𑀸𑀢𑀻𑀦𑀁, 𑀭𑀚𑁆𑀚𑀁 𑀓𑀸𑀭𑁂𑀳𑀺 𑀲𑀁𑀯𑀭;

𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀘𑀸𑀲𑀺, 𑀅𑀣𑁄𑀧𑀺 𑀜𑀸𑀢𑀺𑀦𑀁 𑀳𑀺𑀢𑁄.

𑁧𑁦𑁭.

‘‘𑀢𑀁 ¶ 𑀢𑀁 𑀜𑀸𑀢𑀺𑀧𑀭𑀺𑀩𑁆𑀬𑀽𑀴𑁆𑀳𑀁, 𑀦𑀸𑀦𑀸𑀭𑀢𑀦𑀫𑁄𑀘𑀺𑀢𑀁;

𑀅𑀫𑀺𑀢𑁆𑀢𑀸 𑀦𑀧𑁆𑀧𑀲𑀳𑀦𑁆𑀢𑀺, 𑀇𑀦𑁆𑀤𑀁𑀯 𑀅𑀲𑀼𑀭𑀸𑀥𑀺𑀧𑁄’’𑀢𑀺.

𑀢𑀢𑁆𑀣 ¶ 𑀥𑀫𑁆𑀫𑁂𑀦 𑀓𑀺𑀭 𑀜𑀸𑀢𑀻𑀦𑀦𑁆𑀢𑀺 𑀢𑀸𑀢 𑀲𑀁𑀯𑀭 𑀫𑀳𑀸𑀭𑀸𑀚, 𑀥𑀫𑁆𑀫𑁂𑀦 𑀓𑀺𑀭 𑀢𑁆𑀯𑀁 𑀏𑀓𑀽𑀦𑀲𑀢𑀸𑀦𑀁 𑀜𑀸𑀢𑀻𑀦𑀁 ¶ 𑀅𑀢𑁆𑀢𑀦𑁄 𑀚𑁂𑀝𑁆𑀞𑀪𑀸𑀢𑀺𑀓𑀸𑀦𑀁 𑀆𑀦𑀼𑀪𑀸𑀯𑀁 𑀅𑀪𑀺𑀪𑀯𑀲𑀺, 𑀇𑀢𑁄 𑀧𑀝𑁆𑀞𑀸𑀬 𑀢𑁆𑀯𑀫𑁂𑀯 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀢𑁆𑀯𑀫𑁂𑀯 𑀫𑁂𑀥𑀸𑀯𑀻 𑀘𑁂𑀯 𑀧𑀡𑁆𑀟𑀺𑀢𑁄 𑀘 𑀜𑀸𑀢𑀻𑀦𑀜𑁆𑀘 𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀢𑀦𑁆𑀢𑀺 𑀏𑀯𑀁 𑀯𑀺𑀯𑀺𑀥𑀕𑀼𑀡𑀲𑀫𑁆𑀧𑀦𑁆𑀦𑀁 𑀢𑀁. 𑀜𑀸𑀢𑀺𑀧𑀭𑀺𑀩𑁆𑀬𑀽𑀴𑁆𑀳𑀦𑁆𑀢𑀺 𑀅𑀫𑁆𑀳𑁂𑀳𑀺 𑀏𑀓𑀽𑀦𑀲𑀢𑁂𑀳𑀺 𑀜𑀸𑀢𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀁. 𑀦𑀸𑀦𑀸𑀭𑀢𑀦𑀫𑁄𑀘𑀺𑀢𑀦𑁆𑀢𑀺 𑀦𑀸𑀦𑀸𑀭𑀢𑀦𑁂𑀳𑀺 𑀑𑀘𑀺𑀢𑀁 𑀲𑀜𑁆𑀘𑀺𑀢𑀁 𑀩𑀳𑀼𑀭𑀢𑀦𑀲𑀜𑁆𑀘𑀬𑀁. 𑀅𑀲𑀼𑀭𑀸𑀥𑀺𑀧𑁄𑀢𑀺 𑀬𑀣𑀸 𑀢𑀸𑀯𑀢𑀺𑀁𑀲𑁂𑀳𑀺 𑀧𑀭𑀺𑀯𑀸𑀭𑀺𑀢𑀁 𑀇𑀦𑁆𑀤𑀁 𑀅𑀲𑀼𑀭𑀭𑀸𑀚𑀸 𑀦𑀧𑁆𑀧𑀲𑀳𑀢𑀺, 𑀏𑀯𑀁 𑀅𑀫𑁆𑀳𑁂𑀳𑀺 𑀆𑀭𑀓𑁆𑀔𑀁 𑀓𑀭𑁄𑀦𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑀁 𑀢𑀁 𑀢𑀺𑀬𑁄𑀚𑀦𑀲𑀢𑀺𑀓𑁂 𑀓𑀸𑀲𑀺𑀭𑀝𑁆𑀞𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁 𑀅𑀫𑀺𑀢𑁆𑀢𑀸 𑀦𑀧𑁆𑀧𑀲𑀳𑀦𑁆𑀢𑀻𑀢𑀺 𑀤𑀻𑀧𑁂𑀢𑀺.

𑀲𑀁𑀯𑀭𑀫𑀳𑀸𑀭𑀸𑀚𑀸 𑀲𑀩𑁆𑀩𑁂𑀲𑀫𑁆𑀧𑀺 𑀪𑀸𑀢𑀺𑀓𑀸𑀦𑀁 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺. 𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀸𑀲𑀟𑁆𑀠𑀫𑀸𑀲𑀁 𑀯𑀲𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚 𑀚𑀦𑀧𑀤𑁂𑀲𑀼 𑀘𑁄𑀭𑁂𑀲𑀼 𑀉𑀝𑁆𑀞𑀳𑀦𑁆𑀢𑁂𑀲𑀼 𑀫𑀬𑀁 𑀚𑀸𑀦𑀺𑀲𑁆𑀲𑀸𑀫, 𑀢𑁆𑀯𑀁 𑀭𑀚𑁆𑀚𑀲𑀼𑀔𑀁 𑀅𑀦𑀼𑀪𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀦𑀧𑀤𑀁 𑀕𑀢𑀸. 𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀦𑀕𑀭𑀁 𑀧𑀽𑀭𑁂𑀦𑁆𑀢𑁄 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀏𑀯𑀁 𑀢𑁆𑀯𑀁 𑀧𑀼𑀩𑁆𑀩𑁂 𑀑𑀯𑀸𑀤𑀓𑁆𑀔𑀫𑁄, 𑀇𑀤𑀸𑀦𑀺 𑀓𑀲𑁆𑀫𑀸 𑀯𑀻𑀭𑀺𑀬𑀁 𑀦 𑀅𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑀤𑀸 𑀲𑀁𑀯𑀭𑀫𑀳𑀸𑀭𑀸𑀚𑀸 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀉𑀧𑁄𑀲𑀣𑀓𑀼𑀫𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑁂𑀲𑀪𑀸𑀢𑀺𑀓𑀸 𑀣𑁂𑀭𑀸𑀦𑀼𑀣𑁂𑀭𑀸, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀑𑀯𑀸𑀤𑀤𑀸𑀬𑀓𑁄 𑀅𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀁𑀯𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁬𑁩] 𑁯. 𑀲𑀼𑀧𑁆𑀧𑀸𑀭𑀓𑀚𑀸𑀢𑀓𑀯𑀡𑁆𑀡𑀦𑀸

𑀉𑀫𑁆𑀫𑀼𑀚𑁆𑀚𑀦𑁆𑀢𑀺 𑀦𑀺𑀫𑀼𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀲𑀸𑀬𑀦𑁆𑀳𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦𑀺𑀓𑁆𑀔𑀫𑀦𑀁 𑀆𑀕𑀫𑀬𑀫𑀸𑀦𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀅𑀳𑁄 ¶ 𑀲𑀢𑁆𑀣𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀢𑀢𑁆𑀭 𑀢𑀢𑁆𑀭 𑀉𑀧𑀸𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀧𑀼𑀮𑀸𑀬 𑀧𑀣𑀯𑀻𑀲𑀫𑀸𑀬, 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀕𑀫𑁆𑀪𑀻𑀭𑀸𑀬, 𑀆𑀓𑀸𑀲𑁄 𑀯𑀺𑀬 𑀯𑀺𑀢𑁆𑀣𑀺𑀡𑁆𑀡𑀸𑀬, 𑀲𑀓𑀮𑀚𑀫𑁆𑀩𑀼𑀤𑀻𑀧𑀲𑁆𑀫𑀺𑀜𑁆𑀳𑀺 𑀉𑀝𑁆𑀞𑀺𑀢𑀧𑀜𑁆𑀳𑁄 𑀤𑀲𑀩𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀝𑁆𑀞𑀺𑀢𑀊𑀫𑀺𑀬𑁄 𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺, 𑀯𑁂𑀮𑀁 𑀧𑀢𑁆𑀯𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀏𑀯𑀁 ¶ 𑀦 𑀓𑁄𑀘𑀺 𑀧𑀜𑁆𑀳𑁄 𑀤𑀲𑀩𑀮𑀁 𑀅𑀢𑀺𑀓𑁆𑀓𑀫𑀢𑀺, 𑀲𑀢𑁆𑀣𑀼 𑀧𑀸𑀤𑀫𑀽𑀮𑀁 ¶ 𑀧𑀢𑁆𑀯𑀸 𑀪𑀺𑀚𑁆𑀚𑀢𑁂𑀯𑀸’’𑀢𑀺 𑀤𑀲𑀩𑀮𑀲𑁆𑀲 𑀫𑀳𑀸𑀧𑀜𑁆𑀜𑀸𑀧𑀸𑀭𑀫𑀺𑀁 𑀯𑀡𑁆𑀡𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 𑀧𑀜𑁆𑀜𑀯𑀸, 𑀧𑀼𑀩𑁆𑀩𑁂𑀧𑀺 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀧𑀜𑁆𑀜𑀯𑀸𑀯, 𑀅𑀦𑁆𑀥𑁄 𑀳𑀼𑀢𑁆𑀯𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀲𑀜𑁆𑀜𑀸𑀬 ‘𑀇𑀫𑀲𑁆𑀫𑀺𑀁 𑀇𑀫𑀲𑁆𑀫𑀺𑀁 𑀲𑀫𑀼𑀤𑁆𑀤𑁂 𑀇𑀤𑀁 𑀦𑀸𑀫 𑀇𑀤𑀁 𑀦𑀸𑀫 𑀭𑀢𑀦’𑀦𑁆𑀢𑀺 𑀅𑀜𑁆𑀜𑀸𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀼𑀭𑀼𑀭𑀝𑁆𑀞𑁂 𑀓𑀼𑀭𑀼𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀓𑀼𑀭𑀼𑀓𑀘𑁆𑀙𑀁 𑀦𑀸𑀫 𑀧𑀝𑁆𑀝𑀦𑀕𑀸𑀫𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀼𑀭𑀼𑀓𑀘𑁆𑀙𑁂 𑀦𑀺𑀬𑀸𑀫𑀓𑀚𑁂𑀝𑁆𑀞𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀧𑀸𑀲𑀸𑀤𑀺𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, ‘‘𑀲𑀼𑀧𑁆𑀧𑀸𑀭𑀓𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂𑀬𑁂𑀯 𑀦𑀺𑀬𑀸𑀫𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀦𑀺𑀬𑀸𑀫𑀓𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀦𑀺𑀬𑀸𑀫𑀓𑀓𑀫𑁆𑀫𑀁 𑀅𑀓𑀸𑀲𑀺, 𑀧𑀡𑁆𑀟𑀺𑀢𑁄 𑀜𑀸𑀡𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀢𑁂𑀦 𑀆𑀭𑀼𑀴𑁆𑀳𑀦𑀸𑀯𑀸𑀬 𑀩𑁆𑀬𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀅𑀧𑀭𑀪𑀸𑀕𑁂 𑀮𑁄𑀡𑀚𑀮𑀧𑀳𑀝𑀸𑀦𑀺 𑀤𑁆𑀯𑁂𑀧𑀺 𑀘𑀓𑁆𑀔𑀽𑀦𑀺 𑀦𑀲𑁆𑀲𑀺𑀁𑀲𑀼. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀬𑀸𑀫𑀓𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸𑀧𑀺 𑀦𑀺𑀬𑀸𑀫𑀓𑀓𑀫𑁆𑀫𑀁 𑀅𑀓𑀢𑁆𑀯𑀸 ‘‘𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺. 𑀅𑀣 𑀦𑀁 𑀭𑀸𑀚𑀸 𑀅𑀕𑁆𑀖𑀸𑀧𑀦𑀺𑀬𑀓𑀫𑁆𑀫𑁂 𑀞𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑁄 𑀳𑀢𑁆𑀣𑀺𑀭𑀢𑀦𑀅𑀲𑁆𑀲𑀭𑀢𑀦𑀫𑀼𑀢𑁆𑀢𑀲𑀸𑀭𑀫𑀡𑀺𑀲𑀸𑀭𑀸𑀤𑀻𑀦𑀺 𑀅𑀕𑁆𑀖𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 ‘‘𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀴𑀧𑀸𑀲𑀸𑀡𑀓𑀽𑀝𑀯𑀡𑁆𑀡𑀁 𑀏𑀓𑀁 𑀯𑀸𑀭𑀡𑀁 𑀆𑀦𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 ‘‘𑀧𑀡𑁆𑀟𑀺𑀢𑀲𑁆𑀲 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀲𑁄 𑀳𑀢𑁆𑀣𑁂𑀦 𑀢𑀲𑁆𑀲 𑀲𑀭𑀻𑀭𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 ‘‘𑀦𑀸𑀬𑀁 𑀫𑀗𑁆𑀕𑀮𑀳𑀢𑁆𑀣𑀻 𑀪𑀯𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑁄, 𑀧𑀸𑀤𑁂𑀳𑀺 𑀯𑀸𑀫𑀦𑀥𑀸𑀢𑀼𑀓𑁄 𑀏𑀲, 𑀏𑀢𑀜𑁆𑀳𑀺 𑀫𑀸𑀢𑀸 𑀯𑀺𑀚𑀸𑀬𑀫𑀸𑀦𑀸 𑀅𑀗𑁆𑀓𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀢𑀲𑁆𑀫𑀸 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀧𑀘𑁆𑀙𑀺𑀫𑀧𑀸𑀤𑁂𑀳𑀺 𑀯𑀸𑀫𑀦𑀥𑀸𑀢𑀼𑀓𑁄 𑀳𑁄𑀢𑀻’’𑀢𑀺 ¶ 𑀆𑀳. 𑀳𑀢𑁆𑀣𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂 𑀧𑀼𑀘𑁆𑀙𑀺𑀁𑀲𑀼. 𑀢𑁂 ‘‘𑀲𑀘𑁆𑀘𑀁 𑀧𑀡𑁆𑀟𑀺𑀢𑁄 𑀓𑀣𑁂𑀢𑀻’’𑀢𑀺 𑀯𑀤𑀺𑀁𑀲𑀼. 𑀢𑀁 𑀓𑀸𑀭𑀡𑀁 ¶ 𑀭𑀸𑀚𑀸 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀢𑀲𑁆𑀲 𑀅𑀝𑁆𑀞 𑀓𑀳𑀸𑀧𑀡𑁂 𑀤𑀸𑀧𑁂𑀲𑀺.

𑀧𑀼𑀦𑁂𑀓𑀤𑀺𑀯𑀲𑀁 ‘‘𑀭𑀜𑁆𑀜𑁄 𑀫𑀗𑁆𑀕𑀮𑀅𑀲𑁆𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀁 𑀅𑀲𑁆𑀲𑀁 𑀆𑀦𑀬𑀺𑀁𑀲𑀼. 𑀢𑀫𑁆𑀧𑀺 𑀭𑀸𑀚𑀸 𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀲𑁄 𑀢𑀫𑁆𑀧𑀺 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 ‘‘𑀅𑀬𑀁 𑀫𑀗𑁆𑀕𑀮𑀅𑀲𑁆𑀲𑁄 𑀪𑀯𑀺𑀢𑀼𑀁 𑀦 𑀬𑀼𑀢𑁆𑀢𑁄, 𑀏𑀢𑀲𑁆𑀲 𑀳𑀺 𑀚𑀸𑀢𑀤𑀺𑀯𑀲𑁂𑀬𑁂𑀯 𑀫𑀸𑀢𑀸 𑀫𑀭𑀺, 𑀢𑀲𑁆𑀫𑀸 𑀫𑀸𑀢𑀼 𑀔𑀻𑀭𑀁 𑀅𑀮𑀪𑀦𑁆𑀢𑁄 𑀦 𑀲𑀫𑁆𑀫𑀸 𑀯𑀟𑁆𑀠𑀺𑀢𑁄’’𑀢𑀺 𑀆𑀳. 𑀲𑀸𑀧𑀺𑀲𑁆𑀲 𑀓𑀣𑀸 𑀲𑀘𑁆𑀘𑀸𑀯 𑀅𑀳𑁄𑀲𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀅𑀝𑁆𑀞 𑀓𑀳𑀸𑀧𑀡𑁂 𑀤𑀸𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 ‘‘𑀭𑀜𑁆𑀜𑁄 𑀫𑀗𑁆𑀕𑀮𑀭𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀭𑀣𑀁 𑀆𑀳𑀭𑀺𑀁𑀲𑀼. 𑀢𑀫𑁆𑀧𑀺 𑀭𑀸𑀚𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀲𑁄 𑀢𑀫𑁆𑀧𑀺 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 ‘‘𑀅𑀬𑀁 𑀭𑀣𑁄 𑀲𑀼𑀲𑀺𑀭𑀭𑀼𑀓𑁆𑀔𑁂𑀦 𑀓𑀢𑁄, 𑀢𑀲𑁆𑀫𑀸 𑀭𑀜𑁆𑀜𑁄 𑀦𑀸𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀆𑀳. 𑀲𑀸𑀧𑀺𑀲𑁆𑀲 𑀓𑀣𑀸 𑀲𑀘𑁆𑀘𑀸𑀯 𑀅𑀳𑁄𑀲𑀺. 𑀭𑀸𑀚𑀸 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀅𑀝𑁆𑀞𑁂𑀯 ¶ 𑀓𑀳𑀸𑀧𑀡𑁂 𑀤𑀸𑀧𑁂𑀲𑀺. 𑀅𑀣𑀲𑁆𑀲 𑀫𑀳𑀕𑁆𑀖𑀁 𑀓𑀫𑁆𑀩𑀮𑀭𑀢𑀦𑀁 𑀆𑀳𑀭𑀺𑀁𑀲𑀼. 𑀢𑀫𑁆𑀧𑀺 𑀢𑀲𑁆𑀲𑁂𑀯 𑀧𑁂𑀲𑁂𑀲𑀺. 𑀲𑁄 𑀢𑀫𑁆𑀧𑀺 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁 𑀏𑀓𑀝𑁆𑀞𑀸𑀦𑀁 𑀅𑀢𑁆𑀣𑀻’’𑀢𑀺 𑀆𑀳. 𑀲𑁄𑀥𑁂𑀦𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀅𑀝𑁆𑀞𑁂𑀯 𑀓𑀳𑀸𑀧𑀡𑁂 𑀤𑀸𑀧𑁂𑀲𑀺.

𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀭𑀸𑀚𑀸 𑀏𑀯𑀭𑀽𑀧𑀸𑀦𑀺𑀧𑀺 𑀅𑀘𑁆𑀙𑀭𑀺𑀬𑀸𑀦𑀺 𑀤𑀺𑀲𑁆𑀯𑀸 𑀅𑀝𑁆𑀞𑁂𑀯 𑀓𑀳𑀸𑀧𑀡𑁂 𑀤𑀸𑀧𑁂𑀲𑀺, 𑀇𑀫𑀲𑁆𑀲 𑀤𑀸𑀬𑁄 𑀦𑁆𑀳𑀸𑀧𑀺𑀢𑀤𑀸𑀬𑁄, 𑀦𑁆𑀳𑀸𑀧𑀺𑀢𑀚𑀸𑀢𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀏𑀯𑀭𑀽𑀧𑁂𑀦 𑀭𑀸𑀚𑀼𑀧𑀝𑁆𑀞𑀸𑀦𑁂𑀦, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀓𑀼𑀭𑀼𑀓𑀘𑁆𑀙𑀧𑀝𑁆𑀝𑀦𑀫𑁂𑀯 𑀧𑀘𑁆𑀘𑀸𑀕𑀫𑀺. 𑀢𑀲𑁆𑀫𑀺𑀁 𑀢𑀢𑁆𑀣 𑀯𑀲𑀦𑁆𑀢𑁂 𑀯𑀸𑀡𑀺𑀚𑀸 𑀦𑀸𑀯𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀓𑀁 𑀦𑀺𑀬𑀸𑀫𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀲𑀼𑀁. ‘‘𑀲𑀼𑀧𑁆𑀧𑀸𑀭𑀓𑀧𑀡𑁆𑀟𑀺𑀢𑁂𑀦 𑀆𑀭𑀼𑀴𑁆𑀳𑀦𑀸𑀯𑀸 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀏𑀲 𑀧𑀡𑁆𑀟𑀺𑀢𑁄 𑀉𑀧𑀸𑀬𑀓𑀼𑀲𑀮𑁄, 𑀅𑀦𑁆𑀥𑁄 𑀲𑀫𑀸𑀦𑁄𑀧𑀺 𑀲𑀼𑀧𑁆𑀧𑀸𑀭𑀓𑀧𑀡𑁆𑀟𑀺𑀢𑁄𑀯 𑀉𑀢𑁆𑀢𑀫𑁄’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀦𑀺𑀬𑀸𑀫𑀓𑁄 𑀦𑁄 𑀳𑁄𑀳𑀻’’𑀢𑀺 𑀯𑀢𑁆𑀯𑀸 ‘‘𑀢𑀸𑀢𑀸, 𑀅𑀳𑀁 𑀅𑀦𑁆𑀥𑁄, 𑀓𑀣𑀁 𑀦𑀺𑀬𑀸𑀫𑀓𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀫𑀺, 𑀅𑀦𑁆𑀥𑀸𑀧𑀺 𑀢𑀼𑀫𑁆𑀳𑁂𑀬𑁂𑀯 𑀅𑀫𑁆𑀳𑀸𑀓𑀁 𑀉𑀢𑁆𑀢𑀫𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄 ‘‘𑀲𑀸𑀥𑀼 𑀢𑀸𑀢𑀸, 𑀢𑀼𑀫𑁆𑀳𑁂𑀳𑀺 𑀆𑀭𑁄𑀘𑀺𑀢𑀲𑀜𑁆𑀜𑀸𑀬 𑀦𑀺𑀬𑀸𑀫𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 ¶ 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀢𑁂 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀦𑀸𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀦𑀺𑀭𑀼𑀧𑀤𑁆𑀤𑀯𑀸 𑀅𑀕𑀫𑀸𑀲𑀺, 𑀢𑀢𑁄 𑀅𑀓𑀸𑀮𑀯𑀸𑀢𑀁 𑀉𑀧𑁆𑀧𑀸𑀢𑀺𑀢𑀁 𑀉𑀧𑁆𑀧𑀚𑁆𑀚𑀺, 𑀦𑀸𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀓𑀢𑀺𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀯𑀺𑀘𑀭𑀺𑀢𑁆𑀯𑀸 𑀔𑀼𑀭𑀫𑀸𑀮𑀻𑀲𑀫𑀼𑀤𑁆𑀤𑀁 𑀦𑀸𑀫 𑀧𑀢𑁆𑀢𑀸. 𑀢𑀢𑁆𑀣 ¶ 𑀫𑀘𑁆𑀙𑀸 𑀫𑀦𑀼𑀲𑁆𑀲𑀲𑀫𑀸𑀦𑀲𑀭𑀻𑀭𑀸 𑀔𑀼𑀭𑀦𑀸𑀲𑀸 𑀉𑀤𑀓𑁂 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺. 𑀯𑀸𑀡𑀺𑀚𑀸 𑀢𑁂 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑀁 𑀢𑀲𑁆𑀲 𑀲𑀫𑀼𑀤𑁆𑀤𑀲𑁆𑀲 𑀦𑀸𑀫𑀁 𑀧𑀼𑀘𑁆𑀙𑀦𑁆𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁦𑁮.

‘‘𑀉𑀫𑁆𑀫𑀼𑀚𑁆𑀚𑀦𑁆𑀢𑀺 𑀦𑀺𑀫𑀼𑀚𑁆𑀚𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀔𑀼𑀭𑀦𑀸𑀲𑀺𑀓𑀸;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬’’𑀦𑁆𑀢𑀺.

𑀏𑀯𑀁 𑀢𑁂𑀳𑀺 𑀧𑀼𑀝𑁆𑀞𑁄 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀦𑀺𑀬𑀸𑀫𑀓𑀲𑀼𑀢𑁆𑀢𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁯.

‘‘𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀔𑀼𑀭𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀧𑀬𑀸𑀢𑀸𑀦𑀦𑁆𑀢𑀺 𑀓𑀼𑀭𑀼𑀓𑀘𑁆𑀙𑀧𑀝𑁆𑀝𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁. 𑀥𑀦𑁂𑀲𑀺𑀦𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀯𑀸𑀡𑀺𑀚𑀸𑀦𑀁 𑀥𑀦𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀁. 𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬𑀸𑀢𑀺 𑀢𑀸𑀢 𑀢𑀼𑀫𑁆𑀳𑀸𑀓𑀁 𑀇𑀫𑀸𑀬 𑀯𑀺𑀤𑁂𑀲𑀁 𑀧𑀓𑁆𑀔𑀦𑁆𑀤𑀦𑀸𑀯𑀸𑀬 𑀓𑀫𑁆𑀫𑀓𑀸𑀭𑀓𑀁 𑀧𑀓𑀢𑀺𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑁄 𑀅𑀬𑀁 𑀲𑀫𑀼𑀤𑁆𑀤𑁄 ‘‘𑀔𑀼𑀭𑀫𑀸𑀮𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀢𑀁 𑀧𑀡𑁆𑀟𑀺𑀢𑀸 𑀓𑀣𑁂𑀦𑁆𑀢𑀻𑀢𑀺.

𑀢𑀲𑁆𑀫𑀺𑀁 ¶ 𑀧𑀦 𑀲𑀫𑀼𑀤𑁆𑀤𑁂 𑀯𑀚𑀺𑀭𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀫𑀳𑀸𑀲𑀢𑁆𑀢𑁄 ‘‘𑀲𑀘𑀸𑀳𑀁 ‘𑀅𑀬𑀁 𑀯𑀚𑀺𑀭𑀲𑀫𑀼𑀤𑁆𑀤𑁄’𑀢𑀺 𑀏𑀯𑀁 𑀏𑀢𑁂𑀲𑀁 𑀓𑀣𑁂𑀲𑁆𑀲𑀸𑀫𑀺, 𑀮𑁄𑀪𑁂𑀦 𑀩𑀳𑀼𑀁 𑀯𑀚𑀺𑀭𑀁 𑀕𑀡𑁆𑀳𑀺𑀢𑁆𑀯𑀸 𑀦𑀸𑀯𑀁 𑀑𑀲𑀻𑀤𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀦𑀸𑀯𑀁 𑀮𑀕𑁆𑀕𑀸𑀧𑁂𑀢𑁆𑀯𑀸 𑀉𑀧𑀸𑀬𑁂𑀦𑁂𑀓𑀁 𑀬𑁄𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀘𑁆𑀙𑀕𑀳𑀡𑀦𑀺𑀬𑀸𑀫𑁂𑀦 𑀚𑀸𑀮𑀁 𑀔𑀺𑀧𑀸𑀧𑁂𑀢𑁆𑀯𑀸 𑀯𑀚𑀺𑀭𑀲𑀸𑀭𑀁 𑀉𑀤𑁆𑀥𑀭𑀺𑀢𑁆𑀯𑀸 𑀦𑀸𑀯𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀅𑀧𑁆𑀧𑀕𑁆𑀖𑀪𑀡𑁆𑀟𑀁 𑀙𑀟𑁆𑀟𑀸𑀧𑁂𑀲𑀺. 𑀦𑀸𑀯𑀸 𑀢𑀁 𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀅𑀕𑁆𑀕𑀺𑀫𑀸𑀮𑀺𑀁 𑀦𑀸𑀫 𑀕𑀢𑀸. 𑀲𑁄 𑀧𑀚𑁆𑀚𑀮𑀺𑀢𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀫𑀚𑁆𑀛𑀦𑁆𑀳𑀺𑀓𑀲𑀽𑀭𑀺𑀬𑁄 𑀯𑀺𑀬 𑀘 𑀑𑀪𑀸𑀲𑀁 𑀫𑀼𑀜𑁆𑀘𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀯𑀸𑀡𑀺𑀚𑀸 𑁋

𑁧𑁧𑁦.

‘‘𑀬𑀣𑀸 𑀅𑀕𑁆𑀕𑀻𑀯 𑀲𑀽𑀭𑀺𑀬𑁄𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬’’𑀦𑁆𑀢𑀺. 𑁋 𑀕𑀸𑀣𑀸𑀬 𑀢𑀁 𑀧𑀼𑀘𑁆𑀙𑀺𑀁𑀲𑀼;

𑀫𑀳𑀸𑀲𑀢𑁆𑀢𑁄𑀧𑀺 ¶ 𑀢𑁂𑀲𑀁 𑀅𑀦𑀦𑁆𑀢𑀭𑀕𑀸𑀣𑀸𑀬 𑀓𑀣𑁂𑀲𑀺 𑁋

𑁧𑁧𑁧.

‘‘𑀓𑀼𑀭𑀼𑀓𑀘𑁆𑀙𑀸 ¶ 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀅𑀕𑁆𑀕𑀺𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀫𑀺𑀁 𑀧𑀦 𑀲𑀫𑀼𑀤𑁆𑀤𑁂 𑀲𑀼𑀯𑀡𑁆𑀡𑀁 𑀉𑀲𑁆𑀲𑀦𑁆𑀦𑀁 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀢𑁄𑀧𑀺 𑀲𑀼𑀯𑀡𑁆𑀡𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀸𑀯𑀸𑀬𑀁 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀦𑀸𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀔𑀻𑀭𑀁 𑀯𑀺𑀬 𑀤𑀥𑀺𑀁 𑀯𑀺𑀬 𑀘 𑀑𑀪𑀸𑀲𑀦𑁆𑀢𑀁 𑀤𑀥𑀺𑀫𑀸𑀮𑀺𑀁 𑀦𑀸𑀫 𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺. 𑀯𑀸𑀡𑀺𑀚𑀸 𑁋

𑁧𑁧𑁨.

‘‘𑀬𑀣𑀸 𑀤𑀥𑀻𑀯 𑀔𑀻𑀭𑀁𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬’’𑀦𑁆𑀢𑀺. 𑁋

𑀕𑀸𑀣𑀸𑀬 𑀢𑀲𑁆𑀲𑀧𑀺 𑀦𑀸𑀫𑀁 𑀧𑀼𑀘𑁆𑀙𑀺𑀁𑀲𑀼.

𑀫𑀳𑀸𑀲𑀢𑁆𑀢𑁄 𑀅𑀦𑀦𑁆𑀢𑀭𑀕𑀸𑀣𑀸𑀬 𑀆𑀘𑀺𑀓𑁆𑀔𑀺 𑁋

𑁧𑁧𑁩.

‘‘𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀤𑀥𑀺𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀫𑀺𑀁 𑀧𑀦 𑀲𑀫𑀼𑀤𑁆𑀤𑁂 𑀭𑀚𑀢𑀁 𑀉𑀲𑁆𑀲𑀦𑁆𑀦𑀁 𑀅𑀳𑁄𑀲𑀺. 𑀲𑁄 𑀢𑀫𑁆𑀧𑀺 𑀉𑀧𑀸𑀬𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀦𑀸𑀯𑀸𑀬𑀁 𑀧𑀓𑁆𑀔𑀺𑀧𑀸𑀧𑁂𑀲𑀺 ¶ . 𑀦𑀸𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀻𑀮𑀓𑀼𑀲𑀢𑀺𑀡𑀁 𑀯𑀺𑀬 𑀲𑀫𑁆𑀧𑀦𑁆𑀦𑀲𑀲𑁆𑀲𑀁 𑀯𑀺𑀬 𑀘 𑀑𑀪𑀸𑀲𑀫𑀸𑀦𑀁 𑀦𑀻𑀮𑀯𑀡𑁆𑀡𑀁 𑀓𑀼𑀲𑀫𑀸𑀮𑀺𑀁 𑀦𑀸𑀫 𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺. 𑀯𑀸𑀡𑀺𑀚𑀸 𑁋

𑁧𑁧𑁪.

‘‘𑀬𑀣𑀸 𑀓𑀼𑀲𑁄𑀯 𑀲𑀲𑁆𑀲𑁄𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬’’𑀦𑁆𑀢𑀺. 𑁋

𑀕𑀸𑀣𑀸𑀬 𑀢𑀲𑁆𑀲𑀧𑀺 𑀦𑀸𑀫𑀁 𑀧𑀼𑀘𑁆𑀙𑀺𑀁𑀲𑀼.

𑀲𑁄 𑀅𑀦𑀦𑁆𑀢𑀭𑀕𑀸𑀣𑀸𑀬 𑀆𑀘𑀺𑀓𑁆𑀔𑀺 𑁋

𑁧𑁧𑁫.

‘‘𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀓𑀼𑀲𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀫𑀺𑀁 𑀧𑀦 𑀲𑀫𑀼𑀤𑁆𑀤𑁂 𑀦𑀻𑀮𑀫𑀡𑀺𑀭𑀢𑀦𑀁 𑀉𑀲𑁆𑀲𑀦𑁆𑀦𑀁 𑀅𑀳𑁄𑀲𑀺. 𑀲𑁄 𑀢𑀫𑁆𑀧𑀺 𑀉𑀧𑀸𑀬𑁂𑀦𑁂𑀯 𑀕𑀸𑀳𑀸𑀧𑁂𑀢𑁆𑀯𑀸 𑀦𑀸𑀯𑀸𑀬𑀁 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀦𑀸𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ¶ 𑀦𑀴𑀯𑀦𑀁 𑀯𑀺𑀬 𑀯𑁂𑀴𑀼𑀯𑀦𑀁 𑀯𑀺𑀬 𑀘 𑀔𑀸𑀬𑀫𑀸𑀦𑀁 𑀦𑀴𑀫𑀸𑀮𑀺𑀁 𑀦𑀸𑀫 𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺. 𑀯𑀸𑀡𑀺𑀚𑀸 𑁋

𑁧𑁧𑁬.

‘‘𑀬𑀣𑀸 ¶ 𑀦𑀴𑁄𑀯 𑀯𑁂𑀴𑀽𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬’’𑀦𑁆𑀢𑀺. 𑁋

𑀕𑀸𑀣𑀸𑀬 𑀢𑀲𑁆𑀲𑀧𑀺 𑀦𑀸𑀫𑀁 𑀧𑀼𑀘𑁆𑀙𑀺𑀁𑀲𑀼.

𑀫𑀳𑀸𑀲𑀢𑁆𑀢𑁄 𑀅𑀦𑀦𑁆𑀢𑀭𑀕𑀸𑀣𑀸𑀬 𑀓𑀣𑁂𑀲𑀺 𑁋

𑁧𑁧𑁭.

‘‘𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀦𑀴𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀫𑀺𑀁 𑀧𑀦 𑀲𑀫𑀼𑀤𑁆𑀤𑁂 𑀫𑀲𑀸𑀭𑀕𑀮𑁆𑀮𑀁 𑀯𑁂𑀴𑀼𑀭𑀺𑀬𑀁 𑀉𑀲𑁆𑀲𑀦𑁆𑀦𑀁 𑀅𑀳𑁄𑀲𑀺. 𑀲𑁄 𑀢𑀫𑁆𑀧𑀺 𑀉𑀧𑀸𑀬𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀦𑀸𑀯𑀸𑀬𑀁 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀅𑀧𑀭𑁄 𑀦𑀬𑁄 𑁋 𑀦𑀴𑁄𑀢𑀺 𑀯𑀺𑀘𑁆𑀙𑀺𑀓𑀦𑀴𑁄𑀧𑀺 𑀓𑀓𑁆𑀓𑀝𑀓𑀦𑀴𑁄𑀧𑀺, 𑀲𑁄 ¶ 𑀭𑀢𑁆𑀢𑀯𑀡𑁆𑀡𑁄 𑀳𑁄𑀢𑀺. 𑀯𑁂𑀴𑀽𑀢𑀺 𑀧𑀦 𑀧𑀯𑀸𑀴𑀲𑁆𑀲𑁂𑀢𑀁 𑀦𑀸𑀫𑀁, 𑀲𑁄 𑀘 𑀲𑀫𑀼𑀤𑁆𑀤𑁄 𑀧𑀯𑀸𑀴𑀼𑀲𑁆𑀲𑀦𑁆𑀦𑁄 𑀭𑀢𑁆𑀢𑁄𑀪𑀸𑀲𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀬𑀣𑀸 𑀦𑀴𑁄𑀯 𑀯𑁂𑀴𑀼𑀯𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑀢𑁄 𑀧𑀯𑀸𑀴𑀁 𑀕𑀸𑀳𑀸𑀧𑁂𑀲𑀻𑀢𑀺.

𑀯𑀸𑀡𑀺𑀚𑀸 𑀦𑀴𑀫𑀸𑀮𑀺𑀁 𑀅𑀢𑀺𑀓𑁆𑀓𑀦𑁆𑀢𑀸 𑀩𑀮𑀯𑀸𑀫𑀼𑀔𑀲𑀫𑀼𑀤𑁆𑀤𑀁 𑀦𑀸𑀫 𑀧𑀲𑁆𑀲𑀺𑀁𑀲𑀼. 𑀢𑀢𑁆𑀣 𑀉𑀤𑀓𑀁 𑀓𑀟𑁆𑀠𑀺𑀢𑁆𑀯𑀸 𑀓𑀟𑁆𑀠𑀺𑀢𑁆𑀯𑀸 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀉𑀕𑁆𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀉𑀕𑁆𑀕𑀢𑁂 𑀉𑀤𑀓𑀁 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀙𑀺𑀦𑁆𑀦𑀧𑀧𑀸𑀢𑀫𑀳𑀸𑀲𑁄𑀩𑁆𑀪𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀊𑀫𑀺𑀬𑀸 𑀉𑀕𑁆𑀕𑀢𑀸𑀬 𑀏𑀓𑀢𑁄 𑀧𑀧𑀸𑀢𑀲𑀤𑀺𑀲𑀁 𑀳𑁄𑀢𑀺, 𑀪𑀬𑀚𑀦𑀦𑁄 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀸𑀦𑀺 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀳𑀤𑀬𑀁 𑀨𑀸𑀮𑁂𑀦𑁆𑀢𑁄 𑀯𑀺𑀬 𑀘. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑀸 𑀪𑀻𑀢𑀢𑀲𑀺𑀢𑀸 𑁋

𑁧𑁧𑁮.

‘‘𑀫𑀳𑀩𑁆𑀪𑀬𑁄 𑀪𑀺𑀁𑀲𑀦𑀓𑁄, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺𑀫𑀸𑀦𑀼𑀲𑁄;

𑀬𑀣𑀸 𑀲𑁄𑀩𑁆𑀪𑁄 𑀧𑀧𑀸𑀢𑁄𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬’’𑀦𑁆𑀢𑀺. 𑁋

𑀕𑀸𑀣𑀸𑀬 𑀢𑀲𑁆𑀲𑀧𑀺 𑀦𑀸𑀫𑀁 𑀧𑀼𑀘𑁆𑀙𑀺𑀁𑀲𑀼.

𑀢𑀢𑁆𑀣 ¶ 𑀲𑀼𑀬𑁆𑀬𑀢𑀺𑀫𑀸𑀦𑀼𑀲𑁄𑀢𑀺 𑀲𑀼𑀬𑁆𑀬𑀢𑀺 𑀅𑀫𑀸𑀦𑀼𑀲𑁄 𑀲𑀤𑁆𑀤𑁄.

𑁧𑁧𑁯.

‘‘𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀩𑀮𑀯𑀸𑀫𑀼𑀔𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀩𑁄𑀥𑀺𑀲𑀢𑁆𑀢𑁄 𑀅𑀦𑀦𑁆𑀢𑀭𑀕𑀸𑀣𑀸𑀬 𑀢𑀲𑁆𑀲 𑀦𑀸𑀫𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑀸𑀢𑀸, 𑀇𑀫𑀁 𑀩𑀮𑀯𑀸𑀫𑀼𑀔𑀲𑀫𑀼𑀤𑁆𑀤𑀁 ¶ 𑀧𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀸 𑀦𑀸𑀯𑀸 𑀦𑀸𑀫 𑀦𑀢𑁆𑀣𑀺, 𑀅𑀬𑀁 𑀲𑀫𑁆𑀧𑀢𑁆𑀢𑀦𑀸𑀯𑀁 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑁂𑀢𑀻’’𑀢𑀺 𑀆𑀳. 𑀢𑀜𑁆𑀘 𑀦𑀸𑀯𑀁 𑀲𑀢𑁆𑀢 𑀫𑀦𑀼𑀲𑁆𑀲𑀲𑀢𑀸𑀦𑀺 𑀅𑀪𑀺𑀭𑀼𑀳𑀺𑀁𑀲𑀼. 𑀢𑁂 𑀲𑀩𑁆𑀩𑁂 𑀫𑀭𑀡𑀪𑀬𑀪𑀻𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀅𑀯𑀻𑀘𑀺𑀫𑁆𑀳𑀺 𑀧𑀘𑁆𑀘𑀫𑀸𑀦𑀲𑀢𑁆𑀢𑀸 𑀯𑀺𑀬 𑀅𑀢𑀺𑀓𑀸𑀭𑀼𑀜𑁆𑀜𑀁 𑀭𑀯𑀁 𑀫𑀼𑀜𑁆𑀘𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀏𑀢𑁂𑀲𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀲𑀘𑁆𑀘𑀓𑀺𑀭𑀺𑀬𑀸𑀬 𑀢𑁂𑀲𑀁 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀆𑀫𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢𑀸, 𑀔𑀺𑀧𑁆𑀧𑀁 𑀫𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀅𑀳𑀢𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀧𑀼𑀡𑁆𑀡𑀧𑀸𑀢𑀺𑀁 𑀲𑀚𑁆𑀚𑁂𑀢𑁆𑀯𑀸 𑀦𑀸𑀯𑀸𑀬 𑀥𑀼𑀭𑁂 𑀞𑀧𑁂𑀣𑀸’’𑀢𑀺. 𑀢𑁂 𑀯𑁂𑀕𑁂𑀦 𑀢𑀣𑀸 𑀓𑀭𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀼𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀦𑀸𑀯𑀸𑀬 𑀥𑀼𑀭𑁂 𑀞𑀺𑀢𑁄 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁨𑁦.

‘‘𑀬𑀢𑁄 ¶ 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀲𑀜𑁆𑀘𑀺𑀘𑁆𑀘, 𑀏𑀓𑀧𑀸𑀡𑀫𑁆𑀧𑀺 𑀳𑀺𑀁𑀲𑀺𑀢𑀁;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀲𑁄𑀢𑁆𑀣𑀺𑀁 𑀦𑀸𑀯𑀸 𑀦𑀺𑀯𑀢𑁆𑀢𑀢𑀽’’𑀢𑀺.

𑀢𑀢𑁆𑀣 𑀬𑀢𑁄𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀅𑀢𑁆𑀢𑀸𑀦𑀁 𑀲𑀭𑀸𑀫𑀺, 𑀬𑀢𑁄 𑀧𑀝𑁆𑀞𑀸𑀬 𑀘𑀫𑁆𑀳𑀺 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀧𑀸𑀡𑀫𑁆𑀧𑀺 𑀳𑀺𑀁𑀲𑀺𑀢𑀦𑁆𑀢𑀺 𑀏𑀢𑁆𑀣𑀦𑁆𑀢𑀭𑁂 𑀲𑀜𑁆𑀘𑀺𑀘𑁆𑀘 𑀏𑀓𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀧𑀸𑀡𑀫𑁆𑀧𑀺 𑀳𑀺𑀁𑀲𑀺𑀢𑀁 𑀦𑀸𑀪𑀺𑀚𑀸𑀦𑀸𑀫𑀺. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀁, 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀢𑀺𑀡𑀲𑀮𑀸𑀓𑀫𑁆𑀧𑀺 𑀉𑀧𑀸𑀤𑀸𑀬 𑀫𑀬𑀸 𑀧𑀭𑀲𑀦𑁆𑀢𑀓𑀁 𑀦 𑀕𑀳𑀺𑀢𑀧𑀼𑀩𑁆𑀩𑀁, 𑀮𑁄𑀪𑀯𑀲𑁂𑀦 𑀧𑀭𑀤𑀸𑀭𑀁 𑀦 𑀑𑀮𑁄𑀓𑀺𑀢𑀧𑀼𑀩𑁆𑀩𑀁, 𑀫𑀼𑀲𑀸 𑀦 𑀪𑀸𑀲𑀺𑀢𑀧𑀼𑀩𑁆𑀩𑀸, 𑀢𑀺𑀡𑀕𑁆𑀕𑁂𑀦𑀸𑀧𑀺 𑀫𑀚𑁆𑀚𑀁 𑀦 𑀧𑀺𑀯𑀺𑀢𑀧𑀼𑀩𑁆𑀩𑀦𑁆𑀢𑀺 𑀏𑀯𑀁 𑀧𑀜𑁆𑀘𑀲𑀻𑀮𑀯𑀲𑁂𑀦 𑀧𑀦 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺, 𑀓𑀢𑁆𑀯𑀸 𑀘 𑀧𑀦 𑀧𑀼𑀡𑁆𑀡𑀧𑀸𑀢𑀺𑀬𑀸 𑀉𑀤𑀓𑀁 𑀦𑀸𑀯𑀸𑀬 𑀥𑀼𑀭𑁂 𑀅𑀪𑀺𑀲𑀺𑀜𑁆𑀘𑀺.

𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀺𑀤𑁂𑀲𑀁 𑀧𑀓𑁆𑀔𑀦𑁆𑀤𑀦𑀸𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀇𑀤𑁆𑀥𑀺𑀫𑀸 𑀯𑀺𑀬 𑀲𑀘𑁆𑀘𑀸𑀦𑀼𑀪𑀸𑀯𑁂𑀦 𑀏𑀓𑀤𑀺𑀯𑀲𑁂𑀦𑁂𑀯 𑀓𑀼𑀭𑀼𑀓𑀘𑁆𑀙𑀧𑀝𑁆𑀝𑀦𑀁 𑀅𑀕𑀫𑀸𑀲𑀺. 𑀕𑀦𑁆𑀢𑁆𑀯𑀸 𑀘 𑀧𑀦 𑀣𑀮𑁂𑀧𑀺 𑀅𑀝𑁆𑀞𑀼𑀲𑀪𑀫𑀢𑁆𑀢𑀁 𑀞𑀸𑀦𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀦𑀸𑀯𑀺𑀓𑀲𑁆𑀲 𑀖𑀭𑀤𑁆𑀯𑀸𑀭𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑁂𑀲𑀁 𑀯𑀸𑀡𑀺𑀚𑀸𑀦𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀧𑀯𑀸𑀴𑀫𑀼𑀢𑁆𑀢𑀯𑀚𑀺𑀭𑀸𑀦𑀺 𑀪𑀸𑀚𑁂𑀢𑁆𑀯𑀸 ¶ 𑀅𑀤𑀸𑀲𑀺. ‘‘𑀏𑀢𑁆𑀢𑀓𑁂𑀳𑀺 ¶ 𑀯𑁄 𑀭𑀢𑀦𑁂𑀳𑀺 𑀅𑀮𑀁, 𑀫𑀸 𑀧𑀼𑀦 𑀲𑀫𑀼𑀤𑁆𑀤𑀁 𑀧𑀯𑀺𑀲𑀣𑀸’’𑀢𑀺 𑀢𑁂𑀲𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀫𑀳𑀸𑀧𑀜𑁆𑀜𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀲𑀼𑀧𑁆𑀧𑀸𑀭𑀓𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀧𑁆𑀧𑀸𑀭𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

𑀚𑀸𑀢𑀓𑀼𑀤𑁆𑀤𑀸𑀦𑀁 𑁋

𑀫𑀸𑀢𑀼𑀧𑁄𑀲𑀓 𑀚𑀼𑀡𑁆𑀳𑁄 𑀘, 𑀥𑀫𑁆𑀫 𑀉𑀤𑀬 𑀧𑀸𑀦𑀻𑀬𑁄;

𑀬𑀼𑀥𑀜𑁆𑀘𑀬𑁄 𑀤𑀲𑀭𑀣𑁄, 𑀲𑀁𑀯𑀭𑁄 𑀘 𑀲𑀼𑀧𑁆𑀧𑀸𑀭𑀓𑁄;

𑀏𑀓𑀸𑀤𑀲𑀦𑀺𑀧𑀸𑀢𑀫𑁆𑀳𑀺, 𑀲𑀗𑁆𑀕𑀻𑀢𑀸 𑀦𑀯 𑀚𑀸𑀢𑀓𑀸.

𑀏𑀓𑀸𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

[𑁪𑁬𑁪] 𑁧. 𑀘𑀽𑀴𑀓𑀼𑀡𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑁧-𑁧𑁨.

𑀮𑀼𑀤𑁆𑀥𑀸𑀦𑀁 ¶ ¶ ¶ 𑀮𑀳𑀼𑀘𑀺𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀚𑀸𑀢𑀓𑀁 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺;

𑀘𑀽𑀴𑀓𑀼𑀡𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁬𑁫] 𑁨. 𑀪𑀤𑁆𑀤𑀲𑀸𑀮𑀚𑀸𑀢𑀓𑀯𑀡𑁆𑀡𑀦𑀸

𑀓𑀸 𑀢𑁆𑀯𑀁 𑀲𑀼𑀤𑁆𑀥𑁂𑀳𑀺 𑀯𑀢𑁆𑀣𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑀺𑀩𑀤𑁆𑀥𑀪𑁄𑀚𑀦𑀁 𑀧𑀯𑀢𑁆𑀢𑀢𑀺, 𑀢𑀣𑀸 𑀯𑀺𑀲𑀸𑀔𑀸𑀬 𑀘 𑀓𑁄𑀲𑀮𑀭𑀜𑁆𑀜𑁄 𑀘. 𑀢𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀤𑀻𑀬𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀦𑁂𑀢𑁆𑀣 𑀓𑁄𑀘𑀺 𑀯𑀺𑀲𑁆𑀲𑀸𑀲𑀺𑀓𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀭𑀸𑀚𑀦𑀺𑀯𑁂𑀲𑀦𑁂 𑀦 𑀪𑀼𑀜𑁆𑀚𑀦𑁆𑀢𑀺, 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀯𑀸 𑀯𑀺𑀲𑀸𑀔𑀸𑀬 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀧𑀡𑁆𑀡𑀸𑀓𑀸𑀭𑀁 𑀆𑀳𑀝𑀁 ‘‘𑀪𑀺𑀓𑁆𑀔𑀽𑀦𑀁 𑀤𑁂𑀣𑀸’’𑀢𑀺 𑀪𑀢𑁆𑀢𑀕𑁆𑀕𑀁 𑀧𑁂𑀲𑁂𑀢𑁆𑀯𑀸 ‘‘𑀪𑀢𑁆𑀢𑀕𑁆𑀕𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀳𑀁 𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀕𑁂𑀳𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀪𑁄𑀚𑀦𑀁 𑀦𑀸𑀫 𑀓𑀺𑀁 𑀧𑀭𑀫’’𑀦𑁆𑀢𑀺 𑀧𑀼𑀘𑁆𑀙𑀺. 𑀯𑀺𑀲𑁆𑀲𑀸𑀲𑀧𑀭𑀫𑀁 𑀫𑀳𑀸𑀭𑀸𑀚, 𑀓𑀜𑁆𑀚𑀺𑀓𑀫𑀢𑁆𑀢𑀓𑀫𑁆𑀧𑀺 𑀯𑀺𑀲𑁆𑀲𑀸𑀲𑀺𑀓𑁂𑀦 𑀤𑀺𑀦𑁆𑀦𑀁 𑀫𑀥𑀼𑀭𑀁 𑀳𑁄𑀢𑀻𑀢𑀺. 𑀪𑀦𑁆𑀢𑁂, 𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀸𑀲𑁄 𑀳𑁄𑀢𑀻𑀢𑀺? ‘‘𑀜𑀸𑀢𑀻𑀳𑀺 𑀯𑀸 𑀲𑁂𑀓𑁆𑀔𑀓𑀼𑀮𑁂𑀳𑀺 𑀯𑀸, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀏𑀓𑀁 𑀲𑀓𑁆𑀬𑀥𑀻𑀢𑀭𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀦𑀁 𑀜𑀸𑀢𑀓𑁂 𑀯𑀺𑀬 ¶ 𑀯𑀺𑀲𑁆𑀲𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀁 𑀤𑀽𑀢𑀁 𑀧𑁂𑀲𑁂𑀲𑀺 ‘‘𑀥𑀻𑀢𑀭𑀁 𑀫𑁂 𑀤𑁂𑀣, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀜𑀸𑀢𑀺𑀪𑀸𑀯𑀁 𑀇𑀘𑁆𑀙𑀸𑀫𑀻’’𑀢𑀺.

𑀲𑀸𑀓𑀺𑀬𑀸 ¶ ¶ 𑀤𑀽𑀢𑀯𑀘𑀦𑀁 𑀲𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 ‘‘𑀫𑀬𑀁 𑀓𑁄𑀲𑀮𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀯𑀲𑀸𑀫, 𑀲𑀘𑁂 𑀤𑀸𑀭𑀺𑀓𑀁 𑀦 𑀤𑀲𑁆𑀲𑀸𑀫, 𑀫𑀳𑀦𑁆𑀢𑀁 𑀯𑁂𑀭𑀁 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀤𑀲𑁆𑀲𑀸𑀫, 𑀓𑀼𑀮𑀯𑀁𑀲𑁄 𑀦𑁄 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺. 𑀅𑀣 𑀦𑁂 𑀫𑀳𑀸𑀦𑀸𑀫𑁄 𑀆𑀳 𑁋 ‘‘𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀫 𑀥𑀻𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀦𑀸𑀫 𑀦𑀸𑀕𑀫𑀼𑀡𑁆𑀟𑀸𑀬 𑀦𑀸𑀫 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀧𑀺𑀢𑀼 𑀯𑀁𑀲𑁂𑀦 𑀔𑀢𑁆𑀢𑀺𑀬𑀚𑀸𑀢𑀺𑀓𑀸, 𑀢𑀫𑀲𑁆𑀲 ‘𑀔𑀢𑁆𑀢𑀺𑀬𑀓𑀜𑁆𑀜𑀸’𑀢𑀺 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺. 𑀲𑀸𑀓𑀺𑀬𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀽𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀸𑀥𑀼, 𑀤𑀸𑀭𑀺𑀓𑀁 𑀤𑀲𑁆𑀲𑀸𑀫, 𑀇𑀤𑀸𑀦𑁂𑀯 𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳𑀁𑀲𑀼. 𑀤𑀽𑀢𑀸 𑀘𑀺𑀦𑁆𑀢𑁂𑀲𑀼𑀁 ‘‘𑀇𑀫𑁂 𑀲𑀸𑀓𑀺𑀬𑀸 𑀦𑀸𑀫 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑀺𑀫𑀸𑀦𑀺𑀦𑁄, ‘𑀲𑀤𑀺𑀲𑀻 𑀦𑁄’𑀢𑀺 𑀯𑀢𑁆𑀯𑀸 𑀅𑀲𑀤𑀺𑀲𑀺𑀫𑁆𑀧𑀺 𑀤𑀤𑁂𑀬𑁆𑀬𑀼𑀁, 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀫𑀸𑀦𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀫𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀬𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀲𑀸𑀓𑀺𑀬𑀸 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀫𑀳𑀸𑀦𑀸𑀫𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀫 𑀪𑁄𑀚𑀦𑀓𑀸𑀮𑁂 𑀯𑀸𑀲𑀪𑀔𑀢𑁆𑀢𑀺𑀬𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀫𑀬𑀸 𑀏𑀓𑀲𑁆𑀫𑀺𑀁 𑀓𑀩𑀴𑁂 𑀕𑀳𑀺𑀢𑀫𑀢𑁆𑀢𑁂 ‘𑀤𑁂𑀯, 𑀅𑀲𑀼𑀓𑀭𑀸𑀚𑀸 𑀧𑀡𑁆𑀡𑀁 𑀧𑀳𑀺𑀡𑀺, 𑀇𑀫𑀁 𑀢𑀸𑀯 𑀲𑀸𑀲𑀦𑀁 𑀲𑀼𑀡𑀸𑀣𑀸’𑀢𑀺 𑀧𑀡𑁆𑀡𑀁 𑀤𑀲𑁆𑀲𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀪𑀼𑀜𑁆𑀚𑀫𑀸𑀦𑁂 𑀓𑀼𑀫𑀸𑀭𑀺𑀓𑀁 𑀅𑀮𑀗𑁆𑀓𑀭𑀺𑀁𑀲𑀼.

𑀫𑀳𑀸𑀦𑀸𑀫𑁄 ‘‘𑀥𑀻𑀢𑀭𑀁 𑀫𑁂 𑀆𑀦𑁂𑀣, 𑀫𑀬𑀸 𑀲𑀤𑁆𑀥𑀺𑀁 𑀪𑀼𑀜𑁆𑀚𑀢𑀽’’𑀢𑀺 𑀆𑀳. 𑀅𑀣 𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀸𑀯𑀤𑁂𑀯 𑀣𑁄𑀓𑀁 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀆𑀦𑀬𑀺𑀁𑀲𑀼. 𑀲𑀸 ‘‘𑀧𑀺𑀢𑀭𑀸 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀧𑀸𑀢𑀺𑀬𑀁 𑀳𑀢𑁆𑀣𑀁 𑀑𑀢𑀸𑀭𑁂𑀲𑀺. 𑀫𑀳𑀸𑀦𑀸𑀫𑁄𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀞𑀧𑁂𑀲𑀺. 𑀤𑀼𑀢𑀺𑀬𑀧𑀺𑀡𑁆𑀟𑀸𑀬 𑀳𑀢𑁆𑀣𑁂 𑀧𑀲𑀸𑀭𑀺𑀢𑁂 ‘‘𑀤𑁂𑀯, 𑀅𑀲𑀼𑀓𑀭𑀜𑁆𑀜𑀸 𑀧𑀡𑁆𑀡𑀁 𑀧𑀳𑀺𑀢𑀁, 𑀇𑀫𑀁 𑀢𑀸𑀯 𑀲𑀸𑀲𑀦𑀁 𑀲𑀼𑀡𑀸𑀣𑀸’’𑀢𑀺 𑀧𑀡𑁆𑀡𑀁 𑀉𑀧𑀦𑀸𑀫𑁂𑀲𑀼𑀁. 𑀫𑀳𑀸𑀦𑀸𑀫𑁄 ‘‘𑀅𑀫𑁆𑀫, 𑀢𑁆𑀯𑀁 𑀪𑀼𑀜𑁆𑀚𑀸𑀳𑀻’’𑀢𑀺 𑀤𑀓𑁆𑀔𑀺𑀡𑀳𑀢𑁆𑀣𑀁 ¶ 𑀧𑀸𑀢𑀺𑀬𑀸𑀬𑁂𑀯 𑀓𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀧𑀡𑁆𑀡𑀁 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀢𑀁 𑀲𑀸𑀲𑀦𑀁 𑀉𑀧𑀥𑀸𑀭𑁂𑀦𑁆𑀢𑀲𑁆𑀲𑁂𑀯 𑀇𑀢𑀭𑀸 𑀪𑀼𑀜𑁆𑀚𑀺. 𑀲𑁄 𑀢𑀲𑁆𑀲𑀸 𑀪𑀼𑀢𑁆𑀢𑀓𑀸𑀮𑁂 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀤𑀽𑀢𑀸 ‘‘𑀦𑀺𑀘𑁆𑀙𑀬𑁂𑀦𑁂𑀲𑀸 𑀏𑀢𑀲𑁆𑀲 𑀥𑀻𑀢𑀸’’𑀢𑀺 𑀦𑀺𑀝𑁆𑀞𑀫𑀓𑀁𑀲𑀼, 𑀦 𑀢𑀁 𑀅𑀦𑁆𑀢𑀭𑀁 𑀚𑀸𑀦𑀺𑀢𑀼𑀁 𑀲𑀓𑁆𑀔𑀺𑀁𑀲𑀼. 𑀫𑀳𑀸𑀦𑀸𑀫𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 ¶ 𑀥𑀻𑀢𑀭𑀁 𑀧𑁂𑀲𑁂𑀲𑀺. 𑀤𑀽𑀢𑀸𑀧𑀺 𑀦𑀁 𑀲𑀸𑀯𑀢𑁆𑀣𑀺𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀓𑀼𑀫𑀸𑀭𑀺𑀓𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀫𑀳𑀸𑀦𑀸𑀫𑀲𑁆𑀲 𑀥𑀻𑀢𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 𑀲𑀓𑀮𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀢𑀁 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀅𑀪𑀺𑀲𑀺𑀜𑁆𑀘𑀸𑀧𑁂𑀲𑀺. 𑀲𑀸 𑀭𑀜𑁆𑀜𑁄 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸.

𑀅𑀣𑀲𑁆𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀫𑀤𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀬𑁆𑀬𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 ‘‘𑀲𑀓𑁆𑀬𑀭𑀸𑀚𑀥𑀻𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀓𑀺𑀫𑀲𑁆𑀲 𑀦𑀸𑀫𑀁 𑀓𑀭𑁄𑀫𑀸’’𑀢𑀺. 𑀢𑀁 𑀧𑀦 𑀲𑀸𑀲𑀦𑀁 ¶ 𑀕𑀳𑁂𑀢𑁆𑀯𑀸 𑀕𑀢𑁄 𑀅𑀫𑀘𑁆𑀘𑁄 𑀣𑁄𑀓𑀁 𑀩𑀥𑀺𑀭𑀥𑀸𑀢𑀼𑀓𑁄, 𑀲𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀬𑁆𑀬𑀓𑀲𑁆𑀲𑀸𑀭𑁄𑀘𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀢𑁆𑀢𑀁 𑀅𑀯𑀺𑀚𑀸𑀬𑀺𑀢𑁆𑀯𑀸𑀧𑀺 𑀲𑀩𑁆𑀩𑀁 𑀚𑀦𑀁 𑀅𑀪𑀺𑀪𑀯𑀢𑀺, 𑀇𑀤𑀸𑀦𑀺 𑀧𑀦 𑀅𑀢𑀺𑀯𑀺𑀬 𑀭𑀜𑁆𑀜𑁄 𑀯𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑁄 𑀩𑀥𑀺𑀭𑀅𑀫𑀘𑁆𑀘𑁄 ‘‘𑀯𑀮𑁆𑀮𑀪𑀸’’𑀢𑀺 𑀯𑀘𑀦𑀁 𑀤𑀼𑀲𑁆𑀲𑀼𑀢𑀁 𑀲𑀼𑀢𑁆𑀯𑀸 ‘‘𑀯𑀺𑀝𑀝𑀽𑀪𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀓𑀺𑀭 ‘𑀯𑀺𑀝𑀝𑀽𑀪𑁄’𑀢𑀺 𑀦𑀸𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀧𑁄𑀭𑀸𑀡𑀓𑀁 𑀦𑁄 𑀓𑀼𑀮𑀤𑀢𑁆𑀢𑀺𑀓𑀁 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀯𑀺𑀝𑀝𑀽𑀪𑁄’’𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀼𑀫𑀸𑀭𑁄 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀅𑀜𑁆𑀜𑁂𑀲𑀁 𑀓𑀼𑀫𑀸𑀭𑀸𑀦𑀁 𑀫𑀸𑀢𑀸𑀫𑀳𑀓𑀼𑀮𑀢𑁄 𑀳𑀢𑁆𑀣𑀺𑀭𑀽𑀧𑀓𑀅𑀲𑁆𑀲𑀭𑀽𑀧𑀓𑀸𑀤𑀻𑀦𑀺 𑀆𑀳𑀭𑀺𑀬𑀫𑀸𑀦𑀸𑀦𑀺 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀫, 𑀅𑀜𑁆𑀜𑁂𑀲𑀁 𑀫𑀸𑀢𑀸𑀫𑀳𑀓𑀼𑀮𑀢𑁄 𑀧𑀡𑁆𑀡𑀸𑀓𑀸𑀭𑁄 𑀆𑀳𑀭𑀺𑀬𑀢𑀺, 𑀫𑀬𑁆𑀳𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀦 𑀧𑁂𑀲𑁂𑀲𑀺, 𑀓𑀺𑀁 𑀢𑁆𑀯𑀁 𑀦𑀺𑀫𑁆𑀫𑀸𑀢𑀸 𑀦𑀺𑀧𑁆𑀧𑀺𑀢𑀸𑀲𑀻’’𑀢𑀺? 𑀅𑀣 𑀦𑀁 𑀲𑀸 ‘‘𑀢𑀸𑀢, 𑀲𑀓𑁆𑀬𑀭𑀸𑀚𑀸𑀦𑁄 𑀫𑀸𑀢𑀸𑀫𑀳𑀸 𑀤𑀽𑀭𑁂 𑀧𑀦 𑀯𑀲𑀦𑁆𑀢𑀺, 𑀢𑁂𑀦 𑀢𑁂 𑀓𑀺𑀜𑁆𑀘𑀺 𑀦 𑀧𑁂𑀲𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀯𑀜𑁆𑀘𑁂𑀲𑀺.

𑀧𑀼𑀦 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 ‘‘𑀅𑀫𑁆𑀫, 𑀫𑀸𑀢𑀸𑀫𑀳𑀓𑀼𑀮𑀁 𑀧𑀲𑁆𑀲𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 ‘‘𑀅𑀮𑀁 𑀢𑀸𑀢, 𑀓𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀸𑀭𑀺𑀬𑀫𑀸𑀦𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀢𑁂𑀦 𑀳𑀺 ¶ 𑀕𑀘𑁆𑀙𑀸𑀳𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀭𑁂𑀢𑀭𑀁 𑀧𑀡𑁆𑀡𑀁 𑀧𑁂𑀲𑁂𑀲𑀺 ‘‘𑀅𑀳𑀁 𑀇𑀥 𑀲𑀼𑀔𑀁 𑀯𑀲𑀸𑀫𑀺, 𑀲𑀸𑀫𑀺𑀦𑁄 𑀓𑀺𑀜𑁆𑀘𑀺 𑀅𑀦𑁆𑀢𑀭𑀁 𑀫𑀸 𑀤𑀲𑁆𑀲𑀬𑀺𑀁𑀲𑀽’’𑀢𑀺. 𑀲𑀸𑀓𑀺𑀬𑀸 𑀯𑀺𑀝𑀝𑀽𑀪𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀯𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀢𑀲𑁆𑀲 𑀤𑀳𑀭𑀤𑀳𑀭𑁂 𑀓𑀼𑀫𑀸𑀭𑀓𑁂 𑀚𑀦𑀧𑀤𑀁 𑀧𑀳𑀺𑀡𑀺𑀁𑀲𑀼. 𑀓𑀼𑀫𑀸𑀭𑁂 𑀓𑀧𑀺𑀮𑀯𑀢𑁆𑀣𑀼𑀁 𑀲𑀫𑁆𑀧𑀢𑁆𑀢𑁂 𑀲𑀸𑀓𑀺𑀬𑀸 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀓𑀼𑀫𑀸𑀭𑁄 𑀲𑀦𑁆𑀣𑀸𑀕𑀸𑀭𑀁 ¶ 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 ‘‘𑀅𑀬𑀁 𑀢𑁂, 𑀢𑀸𑀢, 𑀫𑀸𑀢𑀸𑀫𑀳𑁄, 𑀅𑀬𑀁 𑀫𑀸𑀢𑀼𑀮𑁄’’𑀢𑀺 𑀯𑀤𑀺𑀁𑀲𑀼 𑀲𑁄 𑀲𑀩𑁆𑀩𑁂 𑀯𑀦𑁆𑀤𑀫𑀸𑀦𑁄 𑀯𑀺𑀘𑀭𑀺. 𑀲𑁄 𑀬𑀸𑀯𑀧𑀺𑀝𑁆𑀞𑀺𑀬𑀸 𑀭𑀼𑀚𑀦𑀧𑁆𑀧𑀫𑀸𑀡𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑁆𑀧𑀺 𑀅𑀢𑁆𑀢𑀸𑀦𑀁 𑀯𑀦𑁆𑀤𑀫𑀸𑀦𑀁 𑀅𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑀁 𑀯𑀦𑁆𑀤𑀦𑁆𑀢𑀸 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀲𑀸𑀓𑀺𑀬𑀸 ‘‘𑀢𑀸𑀢, 𑀢𑀯 𑀓𑀦𑀺𑀝𑁆𑀞𑀓𑀼𑀫𑀸𑀭𑀸 𑀚𑀦𑀧𑀤𑀁 𑀕𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀲𑁄 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. 𑀅𑀣𑁂𑀓𑀸 𑀤𑀸𑀲𑀻 𑀲𑀦𑁆𑀣𑀸𑀕𑀸𑀭𑁂 𑀢𑁂𑀦 𑀦𑀺𑀲𑀺𑀦𑁆𑀦𑀨𑀮𑀓𑀁 ‘‘𑀇𑀤𑀁 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀤𑀸𑀲𑀺𑀬𑀸 𑀧𑀼𑀢𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀨𑀮𑀓’’𑀦𑁆𑀢𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀔𑀻𑀭𑁄𑀤𑀓𑁂𑀦 𑀥𑁄𑀯𑀺. 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀆𑀯𑀼𑀥𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑁄 𑀢𑀁 𑀕𑀡𑁆𑀳𑀦𑁆𑀢𑁄 𑀯𑀺𑀝𑀝𑀽𑀪𑀓𑀼𑀫𑀸𑀭𑀲𑁆𑀲 𑀅𑀓𑁆𑀓𑁄𑀲𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀁 𑀅𑀦𑁆𑀢𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲 𑀚𑀸𑀢𑀸’’𑀢𑀺 𑀜𑀢𑁆𑀯𑀸 𑀕𑀦𑁆𑀢𑁆𑀯𑀸 𑀩𑀮𑀓𑀸𑀬𑀲𑁆𑀲 𑀓𑀣𑁂𑀲𑀺. ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀓𑀺𑀭 𑀤𑀸𑀲𑀺𑀬𑀸 𑀥𑀻𑀢𑀸’’𑀢𑀺 𑀫𑀳𑀸𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀓𑀼𑀫𑀸𑀭𑁄 𑀢𑀁 𑀲𑀼𑀢𑁆𑀯𑀸 ‘‘𑀏𑀢𑁂 𑀢𑀸𑀯 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑀁 𑀔𑀻𑀭𑁄𑀤𑀓𑁂𑀦 𑀥𑁄𑀯𑀦𑁆𑀢𑀼, 𑀅𑀳𑀁 𑀧𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 ¶ 𑀏𑀢𑁂𑀲𑀁 𑀕𑀮𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀁 𑀕𑀢𑁂 𑀅𑀫𑀘𑁆𑀘𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀲𑀩𑁆𑀩𑁂 𑀫𑀬𑁆𑀳𑀁 𑀤𑀸𑀲𑀺𑀥𑀻𑀢𑀭𑀁 𑀅𑀤𑀁𑀲𑀽’’𑀢𑀺 𑀲𑀸𑀓𑀺𑀬𑀸𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀘 𑀧𑀼𑀢𑁆𑀢𑀲𑁆𑀲 𑀘 𑀤𑀺𑀦𑁆𑀦𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀤𑀸𑀲𑀻𑀳𑀺 𑀮𑀤𑁆𑀥𑀩𑁆𑀩𑀧𑀭𑀺𑀳𑀸𑀭𑀫𑀢𑁆𑀢𑀫𑁂𑀯 𑀤𑀸𑀧𑁂𑀲𑀺. 𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀢𑁆𑀣𑀸 𑀭𑀸𑀚𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀜𑀸𑀢𑀓𑁂𑀳𑀺 𑀤𑀸𑀲𑀺𑀥𑀻𑀢𑀸 𑀫𑀬𑁆𑀳𑀁 𑀤𑀺𑀦𑁆𑀦𑀸, 𑀢𑁂𑀦𑀲𑁆𑀲𑀸 𑀅𑀳𑀁 𑀲𑀧𑀼𑀢𑁆𑀢𑀸𑀬 𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀤𑀸𑀲𑀻𑀳𑀺 𑀮𑀤𑁆𑀥𑀩𑁆𑀩𑀧𑀭𑀺𑀳𑀸𑀭𑀫𑀢𑁆𑀢𑀫𑁂𑀯 𑀤𑀸𑀧𑁂𑀲𑀺’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀬𑀼𑀢𑁆𑀢𑀁, 𑀫𑀳𑀸𑀭𑀸𑀚, 𑀲𑀸𑀓𑀺𑀬𑁂𑀳𑀺 ¶ 𑀓𑀢𑀁, 𑀤𑀤𑀦𑁆𑀢𑁂𑀳𑀺 𑀦𑀸𑀫 𑀲𑀫𑀸𑀦𑀚𑀸𑀢𑀺𑀓𑀸 𑀤𑀸𑀢𑀩𑁆𑀩𑀸 𑀅𑀲𑁆𑀲. 𑀢𑀁 𑀧𑀦 𑀫𑀳𑀸𑀭𑀸𑀚, 𑀯𑀤𑀸𑀫𑀺 𑀯𑀸𑀲𑀪𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀭𑀸𑀚𑀥𑀻𑀢𑀸 𑀔𑀢𑁆𑀢𑀺𑀬𑀲𑁆𑀲 𑀭𑀜𑁆𑀜𑁄 𑀕𑁂𑀳𑁂 𑀅𑀪𑀺𑀲𑁂𑀓𑀁 𑀮𑀪𑀺, 𑀯𑀺𑀝𑀝𑀽𑀪𑁄𑀧𑀺 𑀔𑀢𑁆𑀢𑀺𑀬𑀭𑀸𑀚𑀸𑀦𑀫𑁂𑀯 𑀧𑀝𑀺𑀘𑁆𑀘 𑀚𑀸𑀢𑁄, 𑀫𑀸𑀢𑀼𑀕𑁄𑀢𑁆𑀢𑀁 𑀦𑀸𑀫 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀧𑀺𑀢𑀼𑀕𑁄𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀤𑀮𑀺𑀤𑁆𑀤𑀺𑀢𑁆𑀣𑀺𑀬𑀸 𑀓𑀝𑁆𑀞𑀳𑀸𑀭𑀺𑀓𑀸𑀬𑀧𑀺 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀅𑀤𑀁𑀲𑀼, 𑀢𑀲𑁆𑀲𑀸 𑀘 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀓𑀼𑀫𑀸𑀭𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀭𑀚𑁆𑀚𑀁 𑀓𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 𑀦𑀸𑀫 𑀚𑀸𑀢𑁄’’𑀢𑀺 𑀓𑀝𑁆𑀞𑀯𑀸𑀳𑀦𑀚𑀸𑀢𑀓𑀁 (𑀚𑀸. 𑁧.𑁧.𑁭) 𑀓𑀣𑁂𑀲𑀺 ¶ . 𑀭𑀸𑀚𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀺𑀢𑀼𑀕𑁄𑀢𑁆𑀢𑀫𑁂𑀯 𑀓𑀺𑀭 𑀧𑀫𑀸𑀡’’𑀦𑁆𑀢𑀺 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀧𑀓𑀢𑀺𑀧𑀭𑀺𑀳𑀸𑀭𑀫𑁂𑀯 𑀤𑀸𑀧𑁂𑀲𑀺.

𑀭𑀜𑁆𑀜𑁄 𑀧𑀦 𑀩𑀦𑁆𑀥𑀼𑀮𑁄 𑀦𑀸𑀫 𑀲𑁂𑀦𑀸𑀧𑀢𑀺 𑀫𑀮𑁆𑀮𑀺𑀓𑀁 𑀦𑀸𑀫 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀯𑀜𑁆𑀛𑀁 ‘‘𑀢𑀯 𑀓𑀼𑀮𑀖𑀭𑀫𑁂𑀯 𑀕𑀘𑁆𑀙𑀸𑀳𑀻’’𑀢𑀺 𑀓𑀼𑀲𑀺𑀦𑀸𑀭𑀫𑁂𑀯 𑀧𑁂𑀲𑁂𑀲𑀺. 𑀲𑀸 ‘‘𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀸𑀫𑀺𑀓𑁄 𑀫𑁂, 𑀪𑀦𑁆𑀢𑁂, 𑀓𑀼𑀮𑀖𑀭𑀁 𑀧𑁂𑀲𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀓𑀲𑁆𑀫𑀸’’𑀢𑀺 𑀯𑀼𑀢𑁆𑀢𑀸 ‘‘𑀯𑀜𑁆𑀛𑀸 𑀅𑀧𑀼𑀢𑁆𑀢𑀺𑀓𑀸, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸𑀭𑀸 ‘‘𑀬𑀤𑀺 𑀏𑀯𑀁 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀺𑀯𑀢𑁆𑀢𑀸𑀳𑀻’’𑀢𑀺 𑀯𑀼𑀢𑁆𑀢𑀸 𑀢𑀼𑀝𑁆𑀞𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑁂𑀲𑀦𑀫𑁂𑀯 𑀧𑀼𑀦 𑀅𑀕𑀫𑀸𑀲𑀺. ‘‘𑀓𑀲𑁆𑀫𑀸 𑀦𑀺𑀯𑀢𑁆𑀢𑀲𑀻’’𑀢𑀺 𑀧𑀼𑀝𑁆𑀞𑀸 ‘‘𑀤𑀲𑀩𑀮𑁂𑀦 𑀦𑀺𑀯𑀢𑁆𑀢𑀺𑀢𑀸𑀫𑁆𑀳𑀻’’𑀢𑀺 𑀆𑀳. 𑀲𑁂𑀦𑀸𑀧𑀢𑀺 ‘‘𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺 𑀢𑀣𑀸𑀕𑀢𑁂𑀦 𑀓𑀸𑀭𑀡’’𑀦𑁆𑀢𑀺 𑀆𑀳. 𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀤𑁄𑀳𑀴𑀸 ‘‘𑀤𑁄𑀳𑀴𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀤𑁄𑀳𑀴𑁄’’𑀢𑀺? ‘‘𑀯𑁂𑀲𑀸𑀮𑀺𑀬𑀸 𑀦𑀕𑀭𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑀁 𑀅𑀪𑀺𑀲𑁂𑀓𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀓𑀸𑀫𑀸𑀫𑁆𑀳𑀺, 𑀲𑀸𑀫𑀻’’𑀢𑀺. 𑀲𑁂𑀦𑀸𑀧𑀢𑀺 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀲𑀳𑀲𑁆𑀲𑀣𑀸𑀫𑀥𑀦𑀼𑀁 𑀕𑀳𑁂𑀢𑁆𑀯𑀸 𑀢𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀣𑀁 𑀧𑀸𑀚𑁂𑀦𑁆𑀢𑁄 𑀯𑁂𑀲𑀸𑀮𑀺𑀁 𑀧𑀸𑀯𑀺𑀲𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀓𑁄𑀲𑀮𑀭𑀜𑁆𑀜𑁄 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀦𑀸 𑀲𑀤𑁆𑀥𑀺𑀁 𑀏𑀓𑀸𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀫𑀳𑀸𑀮𑀺 𑀦𑀸𑀫 𑀮𑀺𑀘𑁆𑀙𑀯𑀻 𑀅𑀦𑁆𑀥𑁄 𑀮𑀺𑀘𑁆𑀙𑀯𑀻𑀦𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀦𑁆𑀢𑁄 𑀤𑁆𑀯𑀸𑀭𑀲𑀫𑀻𑀧𑁂 𑀯𑀲𑀢𑀺. 𑀲𑁄 𑀭𑀣𑀲𑁆𑀲 𑀉𑀫𑁆𑀫𑀸𑀭𑁂 𑀧𑀝𑀺𑀖𑀝𑁆𑀝𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀩𑀦𑁆𑀥𑀼𑀮𑀫𑀮𑁆𑀮𑀲𑁆𑀲 𑀭𑀣𑀧𑀢𑀦𑀲𑀤𑁆𑀤𑁄 ¶ 𑀏𑀲𑁄, 𑀅𑀚𑁆𑀚 𑀮𑀺𑀘𑁆𑀙𑀯𑀻𑀦𑀁 ¶ 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀆𑀳. 𑀧𑁄𑀓𑁆𑀔𑀭𑀡𑀺𑀬𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀆𑀭𑀓𑁆𑀔𑀸 𑀩𑀮𑀯𑀸, 𑀉𑀧𑀭𑀺 𑀮𑁄𑀳𑀚𑀸𑀮𑀁 𑀧𑀢𑁆𑀣𑀝𑀁, 𑀲𑀓𑀼𑀡𑀸𑀦𑀫𑁆𑀧𑀺 𑀑𑀓𑀸𑀲𑁄 𑀦𑀢𑁆𑀣𑀺. 𑀲𑁂𑀦𑀸𑀧𑀢𑀺 𑀧𑀦 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀆𑀭𑀓𑁆𑀔𑀓𑁂 𑀔𑀕𑁆𑀕𑁂𑀦 𑀧𑀳𑀭𑀦𑁆𑀢𑁄 𑀧𑀮𑀸𑀧𑁂𑀢𑁆𑀯𑀸 𑀮𑁄𑀳𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀧𑁄𑀓𑁆𑀔𑀭𑀡𑀺𑀬𑀁 𑀪𑀭𑀺𑀬𑀁 𑀑𑀢𑀸𑀭𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀧𑀸𑀬𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑁆𑀳𑀢𑁆𑀯𑀸 𑀫𑀮𑁆𑀮𑀺𑀓𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀸𑀬𑀸𑀲𑀺. 𑀆𑀭𑀓𑁆𑀔𑀓𑀸 𑀕𑀦𑁆𑀢𑁆𑀯𑀸 𑀮𑀺𑀘𑁆𑀙𑀯𑀻𑀦𑀁 𑀆𑀭𑁄𑀘𑁂𑀲𑀼𑀁. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀓𑀼𑀚𑁆𑀛𑀺𑀢𑁆𑀯𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀆𑀭𑀼𑀬𑁆𑀳 ‘‘𑀩𑀦𑁆𑀥𑀼𑀮𑀫𑀮𑁆𑀮𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀫𑀳𑀸𑀮𑀺𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀮𑀺 ‘‘𑀫𑀸 𑀕𑀫𑀺𑀢𑁆𑀣, 𑀲𑁄 𑀳𑀺 𑀯𑁄 𑀲𑀩𑁆𑀩𑁂 𑀖𑀸𑀢𑀬𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑁂𑀧𑀺 ‘‘𑀫𑀬𑀁 𑀕𑀫𑀺𑀲𑁆𑀲𑀸𑀫𑀬𑁂𑀯𑀸’’𑀢𑀺 𑀯𑀤𑀺𑀁𑀲𑀼. 𑀢𑁂𑀦 𑀳𑀺 𑀘𑀓𑁆𑀓𑀲𑁆𑀲 𑀬𑀸𑀯 𑀦𑀸𑀪𑀺𑀢𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑀁 ¶ 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀢𑀢𑁄 𑀅𑀦𑀺𑀯𑀢𑁆𑀢𑀦𑁆𑀢𑀸 𑀧𑀼𑀭𑀢𑁄 𑀅𑀲𑀦𑀺𑀲𑀤𑁆𑀤𑀁 𑀯𑀺𑀬 𑀲𑀼𑀡𑀺𑀲𑁆𑀲𑀣, 𑀢𑀫𑁆𑀳𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀢𑀢𑁄 𑀅𑀦𑀺𑀯𑀢𑁆𑀢𑀦𑁆𑀢𑀸 𑀢𑀼𑀫𑁆𑀳𑀸𑀓𑀁 𑀭𑀣𑀥𑀼𑀭𑁂𑀲𑀼 𑀙𑀺𑀤𑁆𑀤𑀁 𑀧𑀲𑁆𑀲𑀺𑀲𑁆𑀲𑀣, 𑀢𑀫𑁆𑀳𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀧𑀼𑀭𑀢𑁄 𑀫𑀸𑀕𑀫𑀺𑀢𑁆𑀣𑀸𑀢𑀺. 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯.

𑀫𑀮𑁆𑀮𑀺𑀓𑀸 𑀤𑀺𑀲𑁆𑀯𑀸 ‘‘𑀭𑀣𑀸, 𑀲𑀸𑀫𑀺, 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀆𑀳. 𑀢𑁂𑀦 𑀳𑀺 𑀏𑀓𑀲𑁆𑀲 𑀭𑀣𑀲𑁆𑀲 𑀯𑀺𑀬 𑀧𑀜𑁆𑀜𑀸𑀬𑀦𑀓𑀸𑀮𑁂 𑀫𑀫 𑀆𑀭𑁄𑀘𑁂𑀬𑁆𑀬𑀸𑀲𑀻𑀢𑀺. 𑀲𑀸 𑀬𑀤𑀸 𑀲𑀩𑁆𑀩𑁂 𑀏𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀢𑀤𑀸 ‘‘𑀏𑀓𑀫𑁂𑀯 𑀲𑀸𑀫𑀺 𑀭𑀣𑀲𑀻𑀲𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀩𑀦𑁆𑀥𑀼𑀮𑁄 ‘‘𑀢𑁂𑀦 𑀳𑀺 𑀇𑀫𑀸 𑀭𑀲𑁆𑀫𑀺𑀬𑁄 𑀕𑀡𑁆𑀳𑀸𑀳𑀻’’𑀢𑀺 𑀢𑀲𑁆𑀲𑀸 𑀭𑀲𑁆𑀫𑀺𑀬𑁄 𑀤𑀢𑁆𑀯𑀸 𑀭𑀣𑁂 𑀞𑀺𑀢𑁄𑀯 𑀥𑀦𑀼𑀁 𑀆𑀭𑁄𑀧𑁂𑀢𑀺, 𑀭𑀣𑀘𑀓𑁆𑀓𑀁 𑀬𑀸𑀯 𑀦𑀸𑀪𑀺𑀢𑁄 𑀧𑀣𑀯𑀺𑀁 𑀧𑀸𑀯𑀺𑀲𑀺, 𑀮𑀺𑀘𑁆𑀙𑀯𑀺𑀦𑁄 𑀢𑀁 𑀞𑀸𑀦𑀁 𑀤𑀺𑀲𑁆𑀯𑀸𑀧𑀺 𑀦 𑀦𑀺𑀯𑀢𑁆𑀢𑀺𑀁𑀲𑀼. 𑀇𑀢𑀭𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀚𑀺𑀬𑀁 𑀧𑁄𑀣𑁂𑀲𑀺, 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀢𑁂 𑀢𑀢𑁄𑀧𑀺 𑀦 𑀦𑀺𑀯𑀢𑁆𑀢𑀺𑀁𑀲𑀼, 𑀅𑀦𑀼𑀩𑀦𑁆𑀥𑀦𑁆𑀢𑀸 𑀕𑀘𑁆𑀙𑀦𑁆𑀢𑁂𑀯. 𑀩𑀦𑁆𑀥𑀼𑀮𑁄 𑀭𑀣𑁂 𑀞𑀺𑀢𑀓𑁄𑀯 𑀏𑀓𑀁 𑀲𑀭𑀁 𑀔𑀺𑀧𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀭𑀣𑀲𑀢𑀸𑀦𑀁 𑀭𑀣𑀲𑀻𑀲𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀧𑀜𑁆𑀘 𑀭𑀸𑀚𑀲𑀢𑀸𑀦𑀺 𑀧𑀭𑀺𑀓𑀭𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀺𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀢𑁂 𑀅𑀢𑁆𑀢𑀦𑁄 𑀯𑀺𑀤𑁆𑀥𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀢𑀺𑀝𑁆𑀞 𑀭𑁂, 𑀢𑀺𑀝𑁆𑀞 𑀭𑁂’’𑀢𑀺 𑀯𑀤𑀦𑁆𑀢𑀸 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯. 𑀩𑀦𑁆𑀥𑀼𑀮𑁄 𑀭𑀣𑀁 𑀞𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀢𑀓𑀸, 𑀫𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀬𑀼𑀤𑁆𑀥𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀢𑁂 ‘‘𑀫𑀢𑀓𑀸 𑀦𑀸𑀫 𑀅𑀫𑁆𑀳𑀸𑀤𑀺𑀲𑀸 𑀦𑁂𑀯 𑀳𑁄𑀦𑁆𑀢𑀻’’𑀢𑀺 𑀯𑀤𑀺𑀁𑀲𑀼. ‘‘𑀢𑁂𑀦 𑀳𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲 𑀧𑀭𑀺𑀓𑀭𑀁 𑀫𑁄𑀘𑁂𑀣𑀸’’𑀢𑀺. 𑀢𑁂 ¶ 𑀫𑁄𑀘𑀬𑀺𑀁𑀲𑀼. 𑀲𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀫𑀭𑀺𑀢𑁆𑀯𑀸 𑀧𑀢𑀺𑀢𑁄. 𑀅𑀣 𑀦𑁂 ‘‘𑀲𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀏𑀯𑀭𑀽𑀧𑀸, 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀲𑀁𑀯𑀺𑀥𑀸𑀢𑀩𑁆𑀩𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀦𑁆𑀦𑀸𑀳𑀁 𑀫𑁄𑀘𑁂𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀓𑀢𑁆𑀯𑀸 𑀲𑀩𑁆𑀩𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸.

𑀩𑀦𑁆𑀥𑀼𑀮𑁄𑀧𑀺 𑀫𑀮𑁆𑀮𑀺𑀓𑀁 𑀲𑀸𑀯𑀢𑁆𑀣𑀺𑀁 𑀆𑀦𑁂𑀲𑀺. 𑀲𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀬𑀫𑀓𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺, 𑀲𑀩𑁆𑀩𑁂𑀧𑀺 𑀲𑀽𑀭𑀸 𑀣𑀸𑀫𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀲𑀩𑁆𑀩𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀓𑁂𑀓𑀲𑁆𑀲𑀧𑀺 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀳𑁄𑀲𑀺 ¶ . 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀘𑁆𑀙𑀦𑁆𑀢𑁂𑀳𑀺 𑀢𑁂𑀳𑁂𑀯 𑀭𑀸𑀚𑀗𑁆𑀕𑀡𑀁 𑀧𑀭𑀺𑀧𑀽𑀭𑀺. 𑀅𑀣𑁂𑀓𑀤𑀺𑀯𑀲𑀁 𑀯𑀺𑀦𑀺𑀘𑁆𑀙𑀬𑁂 𑀓𑀽𑀝𑀟𑁆𑀟𑀧𑀭𑀸𑀚𑀺𑀢𑀸 𑀫𑀦𑀼𑀲𑁆𑀲𑀸 𑀩𑀦𑁆𑀥𑀼𑀮𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀭𑀯𑀁 𑀯𑀺𑀭𑀯𑀦𑁆𑀢𑀸 𑀯𑀺𑀦𑀺𑀘𑁆𑀙𑀬𑀅𑀫𑀘𑁆𑀘𑀸𑀦𑀁 𑀓𑀽𑀝𑀟𑁆𑀟𑀓𑀸𑀭𑀡𑀁 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄𑀧𑀺 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀟𑁆𑀟𑀁 𑀢𑀻𑀭𑁂𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁, 𑀅𑀲𑁆𑀲𑀸𑀫𑀺𑀓𑀫𑁂𑀯 𑀅𑀲𑁆𑀲𑀸𑀫𑀺𑀓𑀁 ¶ 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀭𑀸𑀚𑀸 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀫𑀘𑁆𑀘𑁂 𑀳𑀸𑀭𑁂𑀢𑁆𑀯𑀸 𑀩𑀦𑁆𑀥𑀼𑀮𑀲𑁆𑀲𑁂𑀯 𑀯𑀺𑀦𑀺𑀘𑁆𑀙𑀬𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀦𑀺. 𑀢𑀢𑁄 𑀧𑁄𑀭𑀸𑀡𑀓𑀯𑀺𑀦𑀺𑀘𑁆𑀙𑀬𑀺𑀓𑀸 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀅𑀧𑁆𑀧𑀮𑀸𑀪𑀸 𑀳𑀼𑀢𑁆𑀯𑀸 ‘‘𑀩𑀦𑁆𑀥𑀼𑀮𑁄 𑀭𑀚𑁆𑀚𑀁 𑀧𑀢𑁆𑀣𑁂𑀢𑀻’’𑀢𑀺 𑀭𑀸𑀚𑀓𑀼𑀮𑁂 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀢𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, ‘‘𑀇𑀫𑀲𑁆𑀫𑀺𑀁 𑀇𑀥𑁂𑀯 𑀖𑀸𑀢𑀺𑀬𑀫𑀸𑀦𑁂 𑀕𑀭𑀳𑀸 𑀫𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀬𑀼𑀢𑁆𑀢𑀧𑀼𑀭𑀺𑀲𑁂𑀳𑀺 𑀧𑀘𑁆𑀘𑀦𑁆𑀢𑀁 𑀧𑀳𑀭𑀸𑀧𑁂𑀢𑁆𑀯𑀸 𑀢𑁂 𑀧𑀮𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀓𑀸𑀮𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑀦𑁆𑀥𑀼𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀘𑁆𑀘𑀦𑁆𑀢𑁄 𑀓𑀺𑀭 𑀓𑀼𑀧𑀺𑀢𑁄, 𑀢𑀯 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀘𑁄𑀭𑁂 𑀕𑀡𑁆𑀳𑀸𑀳𑀻’’𑀢𑀺 𑀧𑀳𑀺𑀡𑀺𑀢𑁆𑀯𑀸 ‘‘𑀏𑀢𑁆𑀣𑁂𑀯𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀳𑀭𑀣𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀲𑀫𑀢𑁆𑀣𑁂 𑀫𑀳𑀸𑀬𑁄𑀥𑁂 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀦𑁆𑀢𑁂𑀬𑁂𑀯 ‘‘𑀲𑁂𑀦𑀸𑀧𑀢𑀺 𑀓𑀺𑀭 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸𑀯 𑀧𑀬𑀼𑀢𑁆𑀢𑀓𑀘𑁄𑀭𑀸 𑀧𑀮𑀸𑀬𑀺𑀁𑀲𑀼. 𑀲𑁄 𑀢𑀁 𑀧𑀤𑁂𑀲𑀁 𑀆𑀯𑀸𑀲𑀸𑀧𑁂𑀢𑁆𑀯𑀸 𑀚𑀦𑀧𑀤𑀁 𑀲𑀡𑁆𑀞𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀅𑀣𑀲𑁆𑀲 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀢𑁂 𑀬𑁄𑀥𑀸 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀻𑀲𑀁 𑀙𑀺𑀦𑁆𑀤𑀺𑀁𑀲𑀼. 𑀢𑀁 𑀤𑀺𑀯𑀲𑀁 𑀫𑀮𑁆𑀮𑀺𑀓𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 ‘‘𑀲𑀸𑀫𑀺𑀓𑀲𑁆𑀲 𑀢𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀳𑀺 𑀲𑀻𑀲𑀁 𑀙𑀺𑀦𑁆𑀤𑀺𑀁𑀲𑀽’’𑀢𑀺 𑀧𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ¶ 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀡𑁆𑀡𑀁 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑁂𑀯 𑀧𑀭𑀺𑀯𑀺𑀲𑀺. 𑀅𑀣𑀲𑁆𑀲𑀸 𑀧𑀭𑀺𑀘𑀸𑀭𑀺𑀓𑀸 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀤𑀢𑁆𑀯𑀸 𑀲𑀧𑁆𑀧𑀺𑀘𑀸𑀝𑀺𑀁 𑀆𑀳𑀭𑀦𑁆𑀢𑀺𑀬𑁄 𑀣𑁂𑀭𑀸𑀦𑀁 𑀧𑀼𑀭𑀢𑁄 𑀘𑀸𑀝𑀺𑀁 𑀪𑀺𑀦𑁆𑀤𑀺𑀁𑀲𑀼. 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀉𑀧𑀸𑀲𑀺𑀓𑁂, 𑀪𑁂𑀤𑀦𑀥𑀫𑁆𑀫𑀁 𑀪𑀺𑀦𑁆𑀦𑀁, 𑀦 𑀘𑀺𑀦𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀲𑀸 𑀉𑀘𑁆𑀙𑀗𑁆𑀕𑀢𑁄 𑀧𑀡𑁆𑀡𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀤𑁆𑀯𑀢𑁆𑀢𑀺𑀁𑀲𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀢𑀼 𑀲𑀻𑀲𑀁 𑀙𑀺𑀦𑁆𑀦𑀦𑁆𑀢𑀺 𑀫𑁂 𑀇𑀫𑀁 𑀧𑀡𑁆𑀡𑀁 𑀆𑀳𑀭𑀺𑀁𑀲𑀼, 𑀅𑀳𑀁 𑀇𑀤𑀁 𑀲𑀼𑀢𑁆𑀯𑀸𑀧𑀺 𑀦 𑀘𑀺𑀦𑁆𑀢𑁂𑀫𑀺, 𑀲𑀧𑁆𑀧𑀺𑀘𑀸𑀝𑀺𑀬𑀸 𑀪𑀺𑀦𑁆𑀦𑀸𑀬 𑀓𑀺𑀁 𑀘𑀺𑀦𑁆𑀢𑁂𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢’’𑀦𑁆𑀢𑀺𑀆𑀤𑀻𑀦𑀺 (𑀲𑀼. 𑀦𑀺. 𑁫𑁭𑁯) 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀧𑀺 𑀤𑁆𑀯𑀢𑁆𑀢𑀺𑀁𑀲 𑀲𑀼𑀡𑀺𑀲𑀸𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀓𑀫𑁆𑀫𑀨𑀮𑀁 𑀮𑀪𑀺𑀁𑀲𑀼, 𑀢𑀼𑀫𑁆𑀳𑁂 𑀫𑀸 𑀲𑁄𑀘𑀺𑀢𑁆𑀣 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀭𑀜𑁆𑀜𑁄 𑀉𑀧𑀭𑀺 𑀫𑀦𑁄𑀧𑀤𑁄𑀲𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀑𑀯𑀤𑀺.

𑀭𑀜𑁆𑀜𑁄 𑀘𑀭𑀧𑀼𑀭𑀺𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀦𑀺𑀤𑁆𑀤𑁄𑀲𑀪𑀸𑀯𑀁 𑀭𑀜𑁆𑀜𑁄 𑀓𑀣𑀬𑀺𑀁𑀲𑀼. 𑀭𑀸𑀚𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀢𑀲𑁆𑀲𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀮𑁆𑀮𑀺𑀓𑀜𑁆𑀘 𑀲𑀼𑀡𑀺𑀲𑀸𑀬𑁄 ¶ 𑀘𑀲𑁆𑀲𑀸 𑀔𑀫𑀸𑀧𑁂𑀢𑁆𑀯𑀸 𑀫𑀮𑁆𑀮𑀺𑀓𑀸𑀬 𑀯𑀭𑀁 𑀅𑀤𑀸𑀲𑀺. 𑀲𑀸 ¶ ‘‘𑀕𑀳𑀺𑀢𑁄 𑀫𑁂 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀫𑀢𑀓𑀪𑀢𑁆𑀢𑀁 𑀤𑀢𑁆𑀯𑀸 𑀦𑁆𑀳𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀫𑁂 𑀯𑀭𑁄 𑀤𑀺𑀦𑁆𑀦𑁄, 𑀫𑀬𑁆𑀳𑀜𑁆𑀘 𑀅𑀜𑁆𑀜𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑁂 𑀲𑀼𑀡𑀺𑀲𑀸𑀦𑀁 𑀫𑀫 𑀘 𑀓𑀼𑀮𑀖𑀭𑀕𑀫𑀦𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀆𑀳. 𑀭𑀸𑀚𑀸 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀤𑁆𑀯𑀢𑁆𑀢𑀺𑀁𑀲𑀸𑀬 𑀲𑀼𑀡𑀺𑀲𑀸𑀦𑀁 𑀲𑀓𑀓𑀼𑀮𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀓𑀼𑀲𑀺𑀦𑀸𑀭𑀦𑀕𑀭𑁂 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀓𑀸𑀭𑀸𑀬𑀦𑀲𑁆𑀲 𑀦𑀸𑀫 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀧𑀦 ‘‘𑀫𑀸𑀢𑀼𑀮𑁄 𑀫𑁂 𑀇𑀫𑀺𑀦𑀸 𑀫𑀸𑀭𑀺𑀢𑁄’’𑀢𑀺 𑀭𑀜𑁆𑀜𑁄 𑀑𑀢𑀸𑀭𑀁 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀭𑀸𑀚𑀸𑀧𑀺 𑀦𑀺𑀧𑁆𑀧𑀭𑀸𑀥𑀲𑁆𑀲 𑀩𑀦𑁆𑀥𑀼𑀮𑀲𑁆𑀲 𑀫𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦 𑀮𑀪𑀢𑀺, 𑀭𑀚𑁆𑀚𑀲𑀼𑀔𑀁 𑀦𑀸𑀦𑀼𑀪𑁄𑀢𑀺.

𑀢𑀤𑀸 𑀲𑀢𑁆𑀣𑀸 𑀲𑀸𑀓𑀺𑀬𑀸𑀦𑀁 𑀯𑁂𑀴𑀼𑀁 𑀦𑀸𑀫 𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑀸𑀫𑀢𑁄 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀤𑀻𑀖𑀓𑀸𑀭𑀸𑀬𑀦𑀲𑁆𑀲 𑀤𑀢𑁆𑀯𑀸 𑀏𑀓𑀓𑁄𑀯 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀁 𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 (𑀫. 𑀦𑀺. 𑁨.𑁩𑁬𑁪 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀤𑀻𑀖𑀓𑀸𑀭𑀸𑀬𑀦𑁄 𑀢𑀸𑀦𑀺 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀝𑀝𑀽𑀪𑀁 ¶ 𑀭𑀸𑀚𑀸𑀦𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀏𑀓𑀁 𑀅𑀲𑁆𑀲𑀁 𑀏𑀓𑀜𑁆𑀘 𑀉𑀧𑀝𑁆𑀞𑀸𑀦𑀓𑀸𑀭𑀺𑀓𑀁 𑀫𑀸𑀢𑀼𑀕𑀸𑀫𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀺𑀬𑀓𑀣𑀁 𑀓𑀣𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀲𑁂𑀦𑀁 𑀅𑀤𑀺𑀲𑁆𑀯𑀸 𑀢𑀁 𑀫𑀸𑀢𑀼𑀕𑀸𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀪𑀸𑀕𑀺𑀦𑁂𑀬𑁆𑀬𑀁 𑀅𑀚𑀸𑀢𑀲𑀢𑁆𑀢𑀼𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀯𑀺𑀝𑀝𑀽𑀪𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀦𑀕𑀭𑀁 𑀕𑀘𑁆𑀙𑀦𑁆𑀢𑁄 𑀯𑀺𑀓𑀸𑀮𑁂 𑀤𑁆𑀯𑀸𑀭𑁂𑀲𑀼 𑀧𑀺𑀳𑀺𑀢𑁂𑀲𑀼 𑀦𑀕𑀭𑀁 𑀧𑀯𑀺𑀲𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀏𑀓𑀺𑀲𑁆𑀲𑀸𑀬 𑀲𑀸𑀮𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀸𑀢𑀸𑀢𑀧𑁂𑀦 𑀓𑀺𑀮𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 ‘‘𑀤𑁂𑀯 𑀓𑁄𑀲𑀮𑀦𑀭𑀺𑀦𑁆𑀤, 𑀇𑀤𑀸𑀦𑀺 𑀅𑀦𑀸𑀣𑁄𑀲𑀺 𑀚𑀸𑀢𑁄’’𑀢𑀺 𑀯𑀺𑀮𑀧𑀦𑁆𑀢𑀺𑀬𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀫𑀸𑀢𑀼𑀮𑀲𑁆𑀲 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀲𑀺.

𑀯𑀺𑀝𑀝𑀽𑀪𑁄𑀧𑀺 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀢𑀁 𑀯𑁂𑀭𑀁 𑀲𑀭𑀺𑀢𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀲𑀸𑀓𑀺𑀬𑁂 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀢𑀺𑀲𑀗𑁆𑀖𑀲𑁆𑀲 𑀯𑀺𑀦𑀸𑀲𑀁 𑀤𑀺𑀲𑁆𑀯𑀸 ‘‘𑀜𑀸𑀢𑀺𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ¶ 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀬𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑁂 𑀏𑀓𑀲𑁆𑀫𑀺𑀁 𑀓𑀩𑀭𑀘𑁆𑀙𑀸𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀢𑁄 𑀅𑀯𑀺𑀤𑀽𑀭𑁂 𑀯𑀺𑀝𑀝𑀽𑀪𑀲𑁆𑀲 𑀭𑀚𑁆𑀚𑀲𑀻𑀫𑀸𑀬 𑀅𑀦𑁆𑀢𑁄 𑀲𑀦𑁆𑀤𑀘𑁆𑀙𑀸𑀬𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀯𑀺𑀝𑀝𑀽𑀪𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀁𑀓𑀸𑀭𑀡𑀸 𑀏𑀯𑀭𑀽𑀧𑀸𑀬 𑀉𑀡𑁆𑀳𑀯𑁂𑀮𑀸𑀬 𑀇𑀫𑀲𑁆𑀫𑀺𑀁 𑀓𑀩𑀭𑀘𑁆𑀙𑀸𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀣, 𑀏𑀢𑀲𑁆𑀫𑀺𑀁 𑀲𑀦𑁆𑀤𑀘𑁆𑀙𑀸𑀬𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀳𑁄𑀢𑀼, 𑀫𑀳𑀸𑀭𑀸𑀚, 𑀜𑀸𑀢𑀓𑀸𑀦𑀁 𑀙𑀸𑀬𑀸 ¶ 𑀦𑀸𑀫 𑀲𑀻𑀢𑀮𑀸’’𑀢𑀺 𑀯𑀼𑀢𑁆𑀢𑁂 ‘‘𑀜𑀸𑀢𑀓𑀸𑀦𑀁 𑀭𑀓𑁆𑀔𑀡𑀢𑁆𑀣𑀸𑀬 𑀲𑀢𑁆𑀣𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀧𑀘𑁆𑀘𑀸𑀕𑀫𑀺. 𑀲𑀢𑁆𑀣𑀸𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀕𑀢𑁄.

𑀭𑀸𑀚𑀸 𑀲𑀸𑀓𑀺𑀬𑀸𑀦𑀁 𑀤𑁄𑀲𑀁 𑀲𑀭𑀺𑀢𑁆𑀯𑀸 𑀤𑀼𑀢𑀺𑀬𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑁂𑀯 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀘𑀢𑀼𑀢𑁆𑀣𑀯𑀸𑀭𑁂 𑀧𑀦 𑀢𑀲𑁆𑀫𑀺𑀁 𑀦𑀺𑀓𑁆𑀔𑀦𑁆𑀢𑁂 𑀲𑀢𑁆𑀣𑀸 𑀲𑀸𑀓𑀺𑀬𑀸𑀦𑀁 𑀧𑀼𑀩𑁆𑀩𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀢𑁂𑀲𑀁 𑀦𑀤𑀺𑀬𑀁 𑀯𑀺𑀲𑀧𑀓𑁆𑀔𑀺𑀧𑀦𑀧𑀸𑀧𑀓𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀩𑀸𑀳𑀺𑀭𑀪𑀸𑀯𑀁 𑀜𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀦 𑀅𑀕𑀫𑀸𑀲𑀺. 𑀯𑀺𑀝𑀝𑀽𑀪𑀭𑀸𑀚𑀸 𑀔𑀻𑀭𑀧𑀸𑀬𑀓𑁂 𑀤𑀸𑀭𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀲𑀸𑀓𑀺𑀬𑁂 𑀖𑀸𑀢𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑁂𑀦 𑀦𑀺𑀲𑀺𑀦𑁆𑀦𑀨𑀮𑀓𑀁 𑀥𑁄𑀯𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺. 𑀲𑀢𑁆𑀣𑀭𑀺 𑀢𑀢𑀺𑀬𑀯𑀸𑀭𑁂 𑀕𑀫𑀦𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ¶ 𑀦𑀺𑀝𑁆𑀞𑀸𑀧𑀺𑀢𑀪𑀢𑁆𑀢𑀓𑀺𑀘𑁆𑀘𑁂 𑀕𑀦𑁆𑀥𑀓𑀼𑀝𑀺𑀬𑀁 𑀧𑀯𑀺𑀲𑀦𑁆𑀢𑁂 𑀤𑀺𑀲𑀸𑀳𑀺 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀜𑀸𑀢𑀓𑁂 𑀫𑀭𑀡𑀪𑀬𑀸 𑀫𑁄𑀘𑁂𑀲𑀺, 𑀏𑀯𑀁 𑀜𑀸𑀢𑀓𑀸𑀦𑀁 𑀅𑀢𑁆𑀣𑀘𑀭𑁄 𑀲𑀢𑁆𑀣𑀸’’𑀢𑀺 𑀪𑀕𑀯𑀢𑁄 𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑀣𑀸𑀕𑀢𑁄 𑀜𑀸𑀢𑀓𑀸𑀦𑀁 𑀅𑀢𑁆𑀣𑀁 𑀘𑀭𑀢𑀺, 𑀧𑀼𑀩𑁆𑀩𑁂𑀧𑀺 𑀘𑀭𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 ‘‘𑀚𑀫𑁆𑀩𑀼𑀤𑀻𑀧𑀢𑀮𑁂 𑀭𑀸𑀚𑀸𑀦𑁄 𑀩𑀳𑀼𑀣𑀫𑁆𑀪𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀲𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀽𑀳𑀺 𑀣𑀫𑁆𑀪𑁂𑀳𑀺 𑀧𑀸𑀲𑀸𑀤𑀓𑀭𑀡𑀁 𑀦𑀸𑀫 𑀅𑀦𑀘𑁆𑀙𑀭𑀺𑀬𑀁, 𑀬𑀁𑀦𑀽𑀦𑀸𑀳𑀁 𑀏𑀓𑀣𑀫𑁆𑀪𑀓𑀁 𑀧𑀸𑀲𑀸𑀤𑀁 𑀓𑀸𑀭𑁂𑀬𑁆𑀬𑀁, 𑀏𑀯𑀁 𑀲𑀩𑁆𑀩𑀭𑀸𑀚𑀽𑀦𑀁 𑀅𑀕𑁆𑀕𑀭𑀸𑀚𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀟𑁆𑀠𑀓𑀻 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀏𑀓𑀣𑀫𑁆𑀪𑀓𑀁 𑀧𑀸𑀲𑀸𑀤𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 ¶ 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀉𑀚𑀽 𑀫𑀳𑀦𑁆𑀢𑁂 𑀏𑀓𑀣𑀫𑁆𑀪𑀓𑀧𑀸𑀲𑀸𑀤𑀸𑀭𑀳𑁂 𑀩𑀳𑀽 𑀭𑀼𑀓𑁆𑀔𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀭𑀼𑀓𑁆𑀔𑀸 𑀲𑀦𑁆𑀢𑀺, 𑀫𑀕𑁆𑀕𑁄 𑀧𑀦 𑀯𑀺𑀲𑀫𑁄, 𑀦 𑀲𑀓𑁆𑀓𑀸 𑀑𑀢𑀸𑀭𑁂𑀢𑀼𑀁, 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀭𑀸𑀚𑀸 ‘‘𑀓𑁂𑀦𑀘𑀺 𑀉𑀧𑀸𑀬𑁂𑀦 𑀲𑀡𑀺𑀓𑀁 𑀑𑀢𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀤𑁂𑀯, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀦 𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀫 𑀉𑀬𑁆𑀬𑀸𑀦𑁂 𑀏𑀓𑀁 𑀭𑀼𑀓𑁆𑀔𑀁 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀯𑀟𑁆𑀠𑀓𑀻 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀲𑀼𑀚𑀸𑀢𑀁 𑀉𑀚𑀼𑀓𑀁 𑀕𑀸𑀫𑀦𑀺𑀕𑀫𑀧𑀽𑀚𑀺𑀢𑀁 𑀭𑀸𑀚𑀓𑀼𑀮𑀢𑁄𑀧𑀺 𑀮𑀤𑁆𑀥𑀩𑀮𑀺𑀓𑀫𑁆𑀫𑀁 𑀫𑀗𑁆𑀕𑀮𑀲𑀸𑀮𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀉𑀬𑁆𑀬𑀸𑀦𑁂 𑀭𑀼𑀓𑁆𑀔𑁄 𑀦𑀸𑀫 𑀫𑀫 𑀧𑀝𑀺𑀩𑀤𑁆𑀥𑁄, 𑀕𑀘𑁆𑀙𑀣 𑀪𑁄 𑀢𑀁 𑀙𑀺𑀦𑁆𑀤𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑁂 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀢𑁆𑀯𑀸 𑀲𑀼𑀢𑁆𑀢𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀧𑁆𑀨𑀓𑀡𑁆𑀡𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀇𑀢𑁄 ¶ 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀸𑀫, 𑀭𑀸𑀚𑀸 𑀙𑀺𑀦𑁆𑀤𑀸𑀧𑁂𑀢𑀺, 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀼, 𑀅𑀫𑁆𑀳𑀸𑀓𑀁 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀲𑀸𑀯𑁂𑀲𑀼𑀁.

𑀅𑀣 ¶ 𑀢𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀇𑀫𑁂 𑀯𑀟𑁆𑀠𑀓𑀻 𑀇𑀫𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀯𑀺𑀫𑀸𑀦𑀁 𑀫𑁂 𑀦𑀲𑁆𑀲𑀺𑀲𑁆𑀲𑀢𑀺, 𑀯𑀺𑀫𑀸𑀦𑀧𑀭𑀺𑀬𑀦𑁆𑀢𑀺𑀓𑀫𑁂𑀯 𑀔𑁄 𑀧𑀦 𑀫𑀬𑁆𑀳𑀁 𑀚𑀻𑀯𑀺𑀢𑀁, 𑀇𑀫𑀜𑁆𑀘 𑀭𑀓𑁆𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀢𑀭𑀼𑀡𑀲𑀸𑀮𑀭𑀼𑀓𑁆𑀔𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀦𑀁 𑀫𑀫 𑀜𑀸𑀢𑀺𑀤𑁂𑀯𑀢𑀸𑀦𑀫𑁆𑀧𑀺 𑀩𑀳𑀽𑀦𑀺 𑀯𑀺𑀫𑀸𑀦𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺. 𑀯𑀺𑀫𑀸𑀦𑀧𑀭𑀺𑀬𑀦𑁆𑀢𑀺𑀓𑀫𑁂𑀯 𑀫𑀫 𑀜𑀸𑀢𑀻𑀦𑀁 𑀤𑁂𑀯𑀢𑀸𑀦𑀫𑁆𑀧𑀺 𑀚𑀻𑀯𑀺𑀢𑀁, 𑀦 𑀔𑁄 𑀧𑀦 𑀫𑀁 𑀢𑀣𑀸 𑀅𑀢𑁆𑀢𑀦𑁄 𑀯𑀺𑀦𑀸𑀲𑁄 𑀩𑀸𑀥𑀢𑀺, 𑀬𑀣𑀸 𑀜𑀸𑀢𑀻𑀦𑀁, 𑀢𑀲𑁆𑀫𑀸 𑀦𑁂𑀲𑀁 𑀫𑀬𑀸 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀭𑀜𑁆𑀜𑁄 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑀮𑀕𑀩𑁆𑀪𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀉𑀲𑁆𑀲𑀺𑀲𑀓𑀧𑀲𑁆𑀲𑁂 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀪𑀻𑀢𑀢𑀲𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩.

‘‘𑀓𑀸 𑀢𑁆𑀯𑀁 𑀲𑀼𑀤𑁆𑀥𑁂𑀳𑀺 𑀯𑀢𑁆𑀣𑁂𑀳𑀺, 𑀅𑀖𑁂 𑀯𑁂𑀳𑀸𑀬𑀲𑀁 𑀞𑀺𑀢𑀸;

𑀓𑁂𑀦 𑀢𑁆𑀬𑀸𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀺, 𑀓𑀼𑀢𑁄 𑀢𑀁 𑀪𑀬𑀫𑀸𑀕𑀢’’𑀦𑁆𑀢𑀺.

𑀢𑀢𑁆𑀣 𑀓𑀸 𑀢𑁆𑀯𑀦𑁆𑀢𑀺 𑀦𑀸𑀕𑀬𑀓𑁆𑀔𑀲𑀼𑀧𑀡𑁆𑀡𑀲𑀓𑁆𑀓𑀸𑀤𑀻𑀲𑀼 𑀓𑀸 𑀦𑀸𑀫 𑀢𑁆𑀯𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀯𑀢𑁆𑀣𑁂𑀳𑀻𑀢𑀺 𑀯𑀘𑀦𑀫𑀢𑁆𑀢𑀫𑁂𑀯𑁂𑀢𑀁, 𑀲𑀩𑁆𑀩𑁂𑀧𑀺 𑀧𑀦 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀅𑀖𑁂𑀢𑀺 𑀅𑀧𑁆𑀧𑀝𑀺𑀖𑁂 𑀆𑀓𑀸𑀲𑁂. 𑀯𑁂𑀳𑀸𑀬𑀲𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑁂𑀦 𑀢𑁆𑀬𑀸𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀯 𑀅𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀺. 𑀓𑀼𑀢𑁄𑀢𑀺 𑀜𑀸𑀢𑀺𑀯𑀺𑀬𑁄𑀕𑀥𑀦𑀯𑀺𑀦𑀸𑀲𑀸𑀤𑀻𑀦𑀁 𑀓𑀺𑀁 𑀦𑀺𑀲𑁆𑀲𑀸𑀬 𑀢𑀁 𑀪𑀬𑀫𑀸𑀕𑀢𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀢𑀢𑁄 ¶ 𑀤𑁂𑀯𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪.

‘‘𑀢𑀯𑁂𑀯 𑀤𑁂𑀯 𑀯𑀺𑀚𑀺𑀢𑁂, 𑀪𑀤𑁆𑀤𑀲𑀸𑀮𑁄𑀢𑀺 𑀫𑀁 𑀯𑀺𑀤𑀽;

𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀺𑀝𑁆𑀞𑀢𑁄 𑀧𑀽𑀚𑀺𑀢𑀲𑁆𑀲 𑀫𑁂.

𑁧𑁫.

‘‘𑀓𑀸𑀭𑀬𑀦𑁆𑀢𑀸 𑀦𑀕𑀭𑀸𑀦𑀺, 𑀅𑀕𑀸𑀭𑁂 𑀘 𑀤𑀺𑀲𑀫𑁆𑀧𑀢𑀺;

𑀯𑀺𑀯𑀺𑀥𑁂 𑀘𑀸𑀧𑀺 𑀧𑀸𑀲𑀸𑀤𑁂, 𑀦 𑀫𑀁 𑀢𑁂 𑀅𑀘𑁆𑀘𑀫𑀜𑁆𑀜𑀺𑀲𑀼𑀁;

𑀬𑀣𑁂𑀯 𑀫𑀁 𑀢𑁂 𑀧𑀽𑀚𑁂𑀲𑀼𑀁, 𑀢𑀣𑁂𑀯 𑀢𑁆𑀯𑀫𑁆𑀧𑀺 𑀧𑀽𑀚𑀬𑀸’’𑀢𑀺.

𑀢𑀢𑁆𑀣 ¶ 𑀢𑀺𑀝𑁆𑀞𑀢𑁄𑀢𑀺 𑀲𑀓𑀮𑀩𑀸𑀭𑀸𑀡𑀲𑀺𑀦𑀕𑀭𑁂𑀳𑀺 𑀘𑁂𑀯 𑀕𑀸𑀫𑀦𑀺𑀕𑀫𑁂𑀳𑀺 𑀘 𑀢𑀬𑀸 𑀘 𑀧𑀽𑀚𑀺𑀢𑀲𑁆𑀲 𑀦𑀺𑀘𑁆𑀘𑀁 𑀩𑀮𑀺𑀓𑀫𑁆𑀫𑀜𑁆𑀘 𑀲𑀓𑁆𑀓𑀸𑀭𑀜𑁆𑀘 𑀮𑀪𑀦𑁆𑀢𑀲𑁆𑀲 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀢𑀺𑀝𑁆𑀞𑀦𑁆𑀢𑀲𑁆𑀲 𑀏𑀢𑁆𑀢𑀓𑁄 𑀓𑀸𑀮𑁄 𑀕𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀕𑀭𑀸𑀦𑀻𑀢𑀺 𑀦𑀕𑀭𑀧𑀝𑀺𑀲𑀗𑁆𑀔𑀭𑀡𑀓𑀫𑁆𑀫𑀸𑀦𑀺. 𑀅𑀕𑀸𑀭𑁂𑀘𑀸𑀢𑀺 𑀪𑀽𑀫𑀺𑀕𑁂𑀳𑀸𑀦𑀺. 𑀤𑀺𑀲𑀫𑁆𑀧𑀢𑀻𑀢𑀺 𑀤𑀺𑀲𑀸𑀦𑀁 ¶ 𑀧𑀢𑀺, 𑀫𑀳𑀸𑀭𑀸𑀚. 𑀦 𑀫𑀁 𑀢𑁂𑀢𑀺 𑀢𑁂 𑀦𑀕𑀭𑀧𑀝𑀺𑀲𑀗𑁆𑀔𑀭𑀡𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀫𑀁 𑀦𑀸𑀢𑀺𑀫𑀜𑁆𑀜𑀺𑀲𑀼𑀁 𑀦𑀸𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀺𑀳𑁂𑀞𑀬𑀺𑀁𑀲𑀼, 𑀫𑀫 𑀦𑀺𑀯𑀸𑀲𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦 𑀓𑀭𑀺𑀁𑀲𑀼, 𑀫𑀬𑁆𑀳𑀁 𑀧𑀦 𑀲𑀓𑁆𑀓𑀸𑀭𑀫𑁂𑀯 𑀓𑀭𑀺𑀁𑀲𑀽𑀢𑀺 𑀅𑀯𑀘. 𑀬𑀣𑁂𑀯𑀸𑀢𑀺 𑀢𑀲𑁆𑀫𑀸 𑀬𑀣𑁂𑀯 𑀢𑁂 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀫𑀁 𑀧𑀽𑀚𑀬𑀺𑀁𑀲𑀼, 𑀏𑀓𑁄𑀧𑀺 𑀇𑀫𑀁 𑀭𑀼𑀓𑁆𑀔𑀁 𑀦 𑀙𑀺𑀦𑁆𑀤𑀸𑀧𑁂𑀲𑀺, 𑀢𑁆𑀯𑀜𑁆𑀘𑀸𑀧𑀺 𑀫𑀁 𑀢𑀣𑁂𑀯 𑀧𑀽𑀚𑀬, 𑀫𑀸 𑀫𑁂 𑀭𑀼𑀓𑁆𑀔𑀁 𑀙𑁂𑀤𑀬𑀻𑀢𑀺.

𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬.

‘‘𑀢𑀁 𑀇𑀯𑀸𑀳𑀁 𑀦 𑀧𑀲𑁆𑀲𑀸𑀫𑀺, 𑀣𑀽𑀮𑀁 𑀓𑀸𑀬𑁂𑀦 𑀢𑁂 𑀤𑀼𑀫𑀁;

𑀆𑀭𑁄𑀳𑀧𑀭𑀺𑀡𑀸𑀳𑁂𑀦, 𑀅𑀪𑀺𑀭𑀽𑀧𑁄𑀲𑀺 𑀚𑀸𑀢𑀺𑀬𑀸.

𑁧𑁭.

‘‘𑀧𑀸𑀲𑀸𑀤𑀁 𑀓𑀸𑀭𑀬𑀺𑀲𑁆𑀲𑀸𑀫𑀺, 𑀏𑀓𑀢𑁆𑀣𑀫𑁆𑀪𑀁 𑀫𑀦𑁄𑀭𑀫𑀁;

𑀢𑀢𑁆𑀣 𑀢𑀁 𑀉𑀧𑀦𑁂𑀲𑁆𑀲𑀸𑀫𑀺, 𑀘𑀺𑀭𑀁 𑀢𑁂 𑀬𑀓𑁆𑀔 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀧𑀫𑀸𑀡𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀯 𑀧𑀫𑀸𑀡𑁂𑀦 𑀢𑀁 𑀯𑀺𑀬 𑀣𑀽𑀮𑀁 𑀫𑀳𑀦𑁆𑀢𑀁 𑀅𑀜𑁆𑀜𑀁 𑀤𑀼𑀫𑀁 𑀦 𑀧𑀲𑁆𑀲𑀸𑀫𑀺, 𑀢𑁆𑀯𑀜𑁆𑀜𑁂𑀯 𑀧𑀦 𑀆𑀭𑁄𑀳𑀧𑀭𑀺𑀡𑀸𑀳𑁂𑀦 𑀲𑀼𑀚𑀸𑀢𑀲𑀗𑁆𑀔𑀸𑀢𑀸𑀬 𑀲𑀫𑀲𑀡𑁆𑀞𑀸𑀦𑀉𑀚𑀼𑀪𑀸𑀯𑀧𑁆𑀧𑀓𑀸𑀭𑀸𑀬 𑀚𑀸𑀢𑀺𑀬𑀸 𑀘 𑀅𑀪𑀺𑀭𑀽𑀧𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀏𑀓𑀣𑀫𑁆𑀪𑀧𑀸𑀲𑀸𑀤𑀸𑀭𑀳𑁄𑀢𑀺. 𑀧𑀸𑀲𑀸𑀤𑀦𑁆𑀢𑀺 𑀢𑀲𑁆𑀫𑀸 𑀢𑀁 𑀙𑁂𑀤𑀸𑀧𑁂𑀢𑁆𑀯𑀸 𑀅𑀳𑀁 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑁂𑀯. 𑀢𑀢𑁆𑀣 𑀢𑀦𑁆𑀢𑀺 𑀢𑀁 ¶ 𑀧𑀦𑀸𑀳𑀁 𑀲𑀫𑁆𑀫 𑀤𑁂𑀯𑀭𑀸𑀚, 𑀢𑀢𑁆𑀣 𑀧𑀸𑀲𑀸𑀤𑁂 𑀉𑀧𑀦𑁂𑀲𑁆𑀲𑀸𑀫𑀺, 𑀲𑁄 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑁄 𑀅𑀕𑁆𑀕𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀮𑀪𑀦𑁆𑀢𑁄 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄 𑀲𑀼𑀔𑀁 𑀚𑀻𑀯𑀺𑀲𑁆𑀲𑀲𑀺, 𑀦𑀺𑀯𑀸𑀲𑀝𑁆𑀞𑀸𑀦𑀸𑀪𑀸𑀯𑁂𑀦 𑀫𑁂 𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀸 𑀘𑀺𑀦𑁆𑀢𑀬𑀺, 𑀘𑀺𑀭𑀁 𑀢𑁂 𑀬𑀓𑁆𑀔 𑀚𑀻𑀯𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀤𑁂𑀯𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮.

‘‘𑀏𑀯𑀁 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺, 𑀲𑀭𑀻𑀭𑁂𑀦 𑀯𑀺𑀦𑀸𑀪𑀸𑀯𑁄;

𑀧𑀼𑀣𑀼𑀲𑁄 𑀫𑀁 𑀯𑀺𑀓𑀦𑁆𑀢𑀺𑀢𑁆𑀯𑀸, 𑀔𑀡𑁆𑀟𑀲𑁄 𑀅𑀯𑀓𑀦𑁆𑀢𑀣.

𑁧𑁯.

‘‘𑀅𑀕𑁆𑀕𑁂 ¶ 𑀘 𑀙𑁂𑀢𑁆𑀯𑀸 𑀫𑀚𑁆𑀛𑁂 𑀘, 𑀧𑀘𑁆𑀙𑀸 𑀫𑀽𑀮𑀫𑁆𑀳𑀺 𑀙𑀺𑀦𑁆𑀤𑀣;

𑀏𑀯𑀁 𑀫𑁂 𑀙𑀺𑀚𑁆𑀚𑀫𑀸𑀦𑀲𑁆𑀲, 𑀦 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸’’𑀢𑀺.

𑀢𑀢𑁆𑀣 ¶ 𑀏𑀯𑀁 𑀘𑀺𑀢𑁆𑀢𑀁 𑀉𑀤𑀧𑀸𑀤𑀻𑀢𑀺 𑀬𑀤𑀺 𑀏𑀯𑀁 𑀘𑀺𑀢𑁆𑀢𑀁 𑀢𑀯 𑀉𑀧𑁆𑀧𑀦𑁆𑀦𑀁. 𑀲𑀭𑀻𑀭𑁂𑀦 𑀯𑀺𑀦𑀸𑀪𑀸𑀯𑁄𑀢𑀺 𑀬𑀤𑀺 𑀢𑁂 𑀫𑀫 𑀲𑀭𑀻𑀭𑁂𑀦 𑀪𑀤𑁆𑀤𑀲𑀸𑀮𑀭𑀼𑀓𑁆𑀔𑁂𑀦 𑀲𑀤𑁆𑀥𑀺𑀁 𑀫𑀫 𑀯𑀺𑀦𑀸𑀪𑀸𑀯𑁄 𑀧𑀢𑁆𑀣𑀺𑀢𑁄. 𑀧𑀼𑀣𑀼𑀲𑁄𑀢𑀺 𑀩𑀳𑀼𑀥𑀸. 𑀯𑀺𑀓𑀦𑁆𑀢𑀺𑀢𑁆𑀯𑀸𑀢𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀔𑀡𑁆𑀟𑀲𑁄𑀢𑀺 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸 𑀅𑀯𑀓𑀦𑁆𑀢𑀣. 𑀅𑀕𑁆𑀕𑁂 𑀘𑀸𑀢𑀺 𑀅𑀯𑀓𑀦𑁆𑀢𑀦𑁆𑀢𑀸 𑀧𑀦 𑀧𑀞𑀫𑀁 𑀅𑀕𑁆𑀕𑁂, 𑀢𑀢𑁄 𑀫𑀚𑁆𑀛𑁂 𑀙𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀫𑀽𑀮𑁂 𑀙𑀺𑀦𑁆𑀤𑀣. 𑀏𑀯𑀜𑁆𑀳𑀺 𑀫𑁂 𑀙𑀺𑀚𑁆𑀚𑀫𑀸𑀦𑀲𑁆𑀲 𑀦 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸, 𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀪𑀯𑁂𑀬𑁆𑀬𑀸𑀢𑀺 𑀬𑀸𑀘𑀢𑀺.

𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁦.

‘‘𑀳𑀢𑁆𑀣𑀧𑀸𑀤𑀁 𑀬𑀣𑀸 𑀙𑀺𑀦𑁆𑀤𑁂, 𑀓𑀡𑁆𑀡𑀦𑀸𑀲𑀜𑁆𑀘 𑀚𑀻𑀯𑀢𑁄;

𑀢𑀢𑁄 𑀧𑀘𑁆𑀙𑀸 𑀲𑀺𑀭𑁄 𑀙𑀺𑀦𑁆𑀤𑁂, 𑀢𑀁 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸.

𑁨𑁧.

‘‘𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀙𑀺𑀦𑁆𑀦𑀁, 𑀪𑀤𑁆𑀤𑀲𑀸𑀮 𑀯𑀦𑀧𑁆𑀧𑀢𑀺;

𑀓𑀺𑀁𑀳𑁂𑀢𑀼 𑀓𑀺𑀁 𑀉𑀧𑀸𑀤𑀸𑀬, 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀳𑀢𑁆𑀣𑀧𑀸𑀤𑀦𑁆𑀢𑀺 𑀳𑀢𑁆𑀣𑁂 𑀘 𑀧𑀸𑀤𑁂 𑀘. 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀙𑀺𑀚𑁆𑀚𑀦𑁆𑀢𑀲𑁆𑀲 𑀘𑁄𑀭𑀲𑁆𑀲 𑀢𑀁 𑀫𑀭𑀡𑀁 𑀤𑀼𑀓𑁆𑀔𑀁 𑀲𑀺𑀬𑀸. 𑀲𑀼𑀔𑀁 𑀦𑀽𑀢𑀺 𑀲𑀫𑁆𑀫 𑀪𑀤𑁆𑀤𑀲𑀸𑀮, 𑀯𑀚𑁆𑀛𑀧𑁆𑀧𑀢𑁆𑀢𑀸 𑀘𑁄𑀭𑀸 𑀲𑀼𑀔𑁂𑀦 𑀫𑀭𑀺𑀢𑀼𑀓𑀸𑀫𑀸 𑀲𑀻𑀲𑀘𑁆𑀙𑁂𑀤𑀁 𑀬𑀸𑀘𑀦𑁆𑀢𑀺, 𑀦 𑀔𑀡𑁆𑀟𑀲𑁄 𑀙𑁂𑀤𑀦𑀁, 𑀢𑁆𑀯𑀁 𑀧𑀦 𑀏𑀯𑀁 𑀬𑀸𑀘𑀲𑀺, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺 ‘‘𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀙𑀺𑀦𑁆𑀦’’𑀦𑁆𑀢𑀺. 𑀓𑀺𑀁𑀳𑁂𑀢𑀽𑀢𑀺 𑀔𑀡𑁆𑀟𑀲𑁄 𑀙𑀺𑀦𑁆𑀦𑀁 𑀦𑀸𑀫 𑀦 𑀲𑀼𑀔𑀁, 𑀓𑀸𑀭𑀡𑁂𑀦 𑀧𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑀅𑀣𑀲𑁆𑀲 ¶ 𑀆𑀘𑀺𑀓𑁆𑀔𑀦𑁆𑀢𑁄 𑀪𑀤𑁆𑀤𑀲𑀸𑀮𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨.

‘‘𑀬𑀜𑁆𑀘 𑀳𑁂𑀢𑀼𑀫𑀼𑀧𑀸𑀤𑀸𑀬, 𑀳𑁂𑀢𑀼𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁;

𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀸𑀫𑀺, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁨𑁩.

‘‘𑀜𑀸𑀢𑀻 𑀫𑁂 𑀲𑀼𑀔𑀲𑀁𑀯𑀤𑁆𑀥𑀸, 𑀫𑀫 𑀧𑀲𑁆𑀲𑁂 𑀦𑀺𑀯𑀸𑀢𑀚𑀸;

𑀢𑁂𑀧𑀺𑀳𑀁 𑀉𑀧𑀳𑀺𑀁𑀲𑁂𑀬𑁆𑀬, 𑀧𑀭𑁂𑀲𑀁 𑀅𑀲𑀼𑀔𑁄𑀘𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀳𑁂𑀢𑀼𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀫𑀳𑀸𑀭𑀸𑀚, 𑀬𑀁 𑀳𑁂𑀢𑀼𑀲𑀪𑀸𑀯𑀬𑀼𑀢𑁆𑀢𑀫𑁂𑀯, 𑀦 𑀳𑁂𑀢𑀼𑀧𑀢𑀺𑀭𑀽𑀧𑀓𑀁, 𑀳𑁂𑀢𑀼𑀁 𑀉𑀧𑀸𑀤𑀸𑀬 𑀆𑀭𑀩𑁆𑀪 𑀲𑀦𑁆𑀥𑀸𑀬𑀸𑀳𑀁 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀸𑀫𑀺, 𑀢𑀁 𑀑𑀳𑀺𑀢𑀲𑁄𑀢𑁄 𑀲𑀼𑀡𑁄𑀳𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀻 ¶ 𑀫𑁂𑀢𑀺 𑀫𑀫 𑀪𑀤𑁆𑀤𑀲𑀸𑀮𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬 𑀲𑀼𑀔𑀲𑀁𑀯𑀤𑁆𑀥𑀸 𑀫𑀫 𑀧𑀲𑁆𑀲𑁂 𑀢𑀭𑀼𑀡𑀲𑀸𑀮𑀭𑀼𑀓𑁆𑀔𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀫𑀬𑀸 𑀓𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀢𑁆𑀢𑀸 𑀦𑀺𑀯𑀸𑀢𑀚𑀸 𑀫𑀫 𑀜𑀸𑀢𑀓𑀸 𑀤𑁂𑀯𑀲𑀗𑁆𑀖𑀸 𑀅𑀢𑁆𑀣𑀺, 𑀢𑁂 𑀅𑀳𑀁 𑀯𑀺𑀲𑀸𑀮𑀲𑀸𑀔𑀯𑀺𑀝𑀧𑁄 𑀫𑀽𑀮𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀢𑀦𑁆𑀢𑁄 𑀉𑀧𑀳𑀺𑀁𑀲𑁂𑀬𑁆𑀬𑀁, 𑀲𑀁𑀪𑀕𑁆𑀕𑀯𑀺𑀫𑀸𑀦𑁂 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀭𑁂𑀲𑀁 𑀅𑀲𑀼𑀔𑁄𑀘𑀺𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀫𑀬𑀸 𑀢𑁂𑀲𑀁 𑀧𑀭𑁂𑀲𑀁 𑀜𑀸𑀢𑀺𑀤𑁂𑀯𑀲𑀗𑁆𑀖𑀸𑀦𑀁 𑀅𑀲𑀼𑀔𑀁 𑀤𑀼𑀓𑁆𑀔𑀁 𑀑𑀘𑀺𑀢𑀁 𑀯𑀟𑁆𑀠𑀺𑀢𑀁, 𑀦 𑀘𑀸𑀳𑀁 𑀢𑁂𑀲𑀁 𑀤𑀼𑀓𑁆𑀔𑀓𑀸𑀫𑁄, 𑀢𑀲𑁆𑀫𑀸 𑀪𑀤𑁆𑀤𑀲𑀸𑀮𑀁 𑀔𑀡𑁆𑀟𑀲𑁄 𑀔𑀡𑁆𑀟𑀲𑁄 𑀙𑀺𑀦𑁆𑀤𑀸𑀧𑁂𑀫𑀻𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀥𑀫𑁆𑀫𑀺𑀓𑁄 𑀯𑀢𑀸𑀬𑀁, 𑀤𑁂𑀯𑀧𑀼𑀢𑁆𑀢𑁄, 𑀅𑀢𑁆𑀢𑀦𑁄 𑀯𑀺𑀫𑀸𑀦𑀯𑀺𑀦𑀸𑀲𑀢𑁄𑀧𑀺 𑀜𑀸𑀢𑀻𑀦𑀁 𑀯𑀺𑀫𑀸𑀦𑀯𑀺𑀦𑀸𑀲𑀁 𑀦 𑀇𑀘𑁆𑀙𑀢𑀺, 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀁 𑀘𑀭𑀢𑀺, 𑀅𑀪𑀬𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁨𑁪.

‘‘𑀘𑁂𑀢𑁂𑀬𑁆𑀬𑀭𑀽𑀧𑀁 𑀘𑁂𑀢𑁂𑀲𑀺, 𑀪𑀤𑁆𑀤𑀲𑀸𑀮 𑀯𑀦𑀧𑁆𑀧𑀢𑀺;

𑀳𑀺𑀢𑀓𑀸𑀫𑁄𑀲𑀺 𑀜𑀸𑀢𑀻𑀦𑀁, 𑀅𑀪𑀬𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂’’𑀢𑀺.

𑀢𑀢𑁆𑀣 𑀘𑁂𑀢𑁂𑀬𑁆𑀬𑀭𑀽𑀧𑀁 𑀘𑁂𑀢𑁂𑀲𑀻𑀢𑀺 𑀜𑀸𑀢𑀻𑀲𑀼 𑀫𑀼𑀤𑀼𑀘𑀺𑀢𑁆𑀢𑀢𑀸𑀬 𑀘𑀺𑀦𑁆𑀢𑁂𑀦𑁆𑀢𑁄 𑀘𑀺𑀦𑁆𑀢𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀘𑀺𑀦𑁆𑀢𑁂𑀲𑀺. 𑀙𑁂𑀤𑁂𑀬𑁆𑀬𑀭𑀽𑀧𑀁 𑀙𑁂𑀤𑁂𑀲𑀻𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀦𑁆𑀢𑁄 𑀙𑁂𑀤𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀙𑁂𑀤𑁂𑀲𑀻𑀢𑀺. 𑀅𑀪𑀬𑀦𑁆𑀢𑀺 𑀏𑀢𑀲𑁆𑀫𑀺𑀁 𑀢𑁂 𑀲𑀫𑁆𑀫, 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀅𑀪𑀬𑀁 𑀤𑀤𑀸𑀫𑀺, 𑀦 𑀫𑁂 𑀧𑀸𑀲𑀸𑀤𑁂𑀦𑀢𑁆𑀣𑁄, 𑀦𑀸𑀳𑀁 𑀢𑀁 𑀙𑁂𑀤𑀸𑀧𑁂𑀲𑁆𑀲𑀸𑀫𑀺, 𑀕𑀘𑁆𑀙 𑀜𑀸𑀢𑀺𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀓𑁆𑀓𑀢𑀕𑀭𑀼𑀓𑀢𑁄 𑀲𑀼𑀔𑀁 𑀚𑀻𑀯𑀸𑀢𑀺 𑀆𑀳.

𑀤𑁂𑀯𑀭𑀸𑀚𑀸 ¶ 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀜𑀸𑀢𑀢𑁆𑀣𑀘𑀭𑀺𑀬𑀁 𑀅𑀘𑀭𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀢𑀭𑀼𑀡𑀲𑀸𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀪𑀤𑁆𑀤𑀲𑀸𑀮𑀤𑁂𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀪𑀤𑁆𑀤𑀲𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁬𑁬] 𑁩. 𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸

𑀓𑀲𑀦𑁆𑀢𑀺 ¶ ¶ 𑀯𑀧𑀦𑁆𑀢𑀺 𑀢𑁂 𑀚𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀭𑀬𑁂 𑀧𑀢𑀺𑀢𑀪𑀸𑀯𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀅𑀕𑁆𑀕𑀲𑀸𑀯𑀓𑁂𑀲𑀼 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂𑀲𑀼 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀡𑁆𑀳𑀮𑁄𑀳𑀺𑀢𑁂 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑁂 𑀩𑀮𑀯𑀯𑁂𑀤𑀦𑀸𑀧𑀻𑀴𑀺𑀢𑁄 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀅𑀳𑀫𑁂𑀯 𑀦𑀯 𑀫𑀸𑀲𑁂 𑀢𑀣𑀸𑀕𑀢𑀲𑁆𑀲 𑀅𑀦𑀢𑁆𑀣𑀁 𑀘𑀺𑀦𑁆𑀢𑁂𑀲𑀺𑀁, 𑀲𑀢𑁆𑀣𑀼 𑀧𑀦 𑀫𑀬𑀺 𑀧𑀸𑀧𑀘𑀺𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀦𑀫𑁆𑀧𑀺 𑀫𑀬𑀺 𑀆𑀖𑀸𑀢𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀸 𑀓𑀢𑀓𑀫𑁆𑀫𑁂𑀦 𑀅𑀳𑀫𑁂𑀯 𑀇𑀤𑀸𑀦𑀺 𑀅𑀦𑀸𑀣𑁄 𑀚𑀸𑀢𑁄, 𑀲𑀢𑁆𑀣𑀸𑀭𑀸𑀧𑀺𑀫𑁆𑀳𑀺 𑀯𑀺𑀲𑁆𑀲𑀝𑁆𑀞𑁄 𑀫𑀳𑀸𑀣𑁂𑀭𑁂𑀳𑀺𑀧𑀺 𑀜𑀸𑀢𑀺𑀲𑁂𑀝𑁆𑀞𑁂𑀦 𑀭𑀸𑀳𑀼𑀮𑀢𑁆𑀣𑁂𑀭𑁂𑀦𑀧𑀺 𑀲𑀓𑁆𑀬𑀭𑀸𑀚𑀓𑀼𑀮𑁂𑀳𑀺𑀧𑀺, 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀜𑁆𑀘𑀓𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀭𑀢𑁆𑀢𑀺𑀁 𑀭𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑁄 𑀓𑁄𑀲𑀮𑀭𑀝𑁆𑀞𑀁 𑀲𑀫𑁆𑀧𑀸𑀧𑀼𑀡𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 ‘‘𑀤𑁂𑀯𑀤𑀢𑁆𑀢𑁄 𑀓𑀺𑀭, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀔𑀫𑀸𑀧𑁂𑀢𑀼𑀁 𑀆𑀕𑀘𑁆𑀙𑀢𑀻’’𑀢𑀺. ‘‘𑀆𑀦𑀦𑁆𑀤, 𑀤𑁂𑀯𑀤𑀢𑁆𑀢𑁄 𑀫𑀫 𑀤𑀲𑁆𑀲𑀦𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺.

𑀅𑀣 𑀢𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑀧𑀼𑀦 𑀣𑁂𑀭𑁄 𑀆𑀭𑁄𑀘𑁂𑀲𑀺, 𑀪𑀕𑀯𑀸𑀧𑀺 𑀢𑀣𑁂𑀯 𑀅𑀯𑀘. 𑀢𑀲𑁆𑀲 𑀚𑁂𑀢𑀯𑀦𑁂 𑀧𑁄𑀓𑁆𑀔𑀭𑀡𑀺𑀬𑀸 𑀲𑀫𑀻𑀧𑀁 𑀆𑀕𑀢𑀲𑁆𑀲 𑀧𑀸𑀧𑀁 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺, 𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀦𑁆𑀳𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀫𑀜𑁆𑀘𑀓𑀢𑁄 𑀫𑀁 𑀆𑀯𑀼𑀲𑁄 𑀑𑀢𑀸𑀭𑁂𑀣, 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀲 𑀑𑀢𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀫𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀤𑁂 𑀅𑀮𑀤𑁆𑀥𑁂𑀬𑁂𑀯 𑀫𑀳𑀸𑀧𑀣𑀯𑀻 𑀯𑀺𑀯𑀭𑀫𑀤𑀸𑀲𑀺. 𑀢𑀸𑀯𑀤𑁂𑀯 𑀢𑀁 𑀅𑀯𑀻𑀘𑀺𑀢𑁄 ¶ 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀸𑀬 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀺. 𑀲𑁄 ‘‘𑀧𑀸𑀧𑀓𑀫𑁆𑀫𑀁 𑀫𑁂 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑁋

‘‘𑀇𑀫𑁂𑀳𑀺 𑀅𑀝𑁆𑀞𑀻𑀳𑀺 𑀢𑀫𑀕𑁆𑀕𑀧𑀼𑀕𑁆𑀕𑀮𑀁, 𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀤𑀫𑁆𑀫𑀲𑀸𑀭𑀣𑀺𑀁;

𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁, 𑀧𑀸𑀡𑁂𑀳𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀫𑀻’’𑀢𑀺. (𑀫𑀺. 𑀧. 𑁪.𑁧.𑁩) 𑁋

𑀇𑀫𑀸𑀬 𑀕𑀸𑀣𑀸𑀬 𑀲𑀭𑀡𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀅𑀯𑀻𑀘𑀺𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀦 𑀧𑀜𑁆𑀘 𑀉𑀧𑀝𑁆𑀞𑀸𑀓𑀓𑀼𑀮𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺𑀧𑀺 𑀢𑀧𑁆𑀧𑀓𑁆𑀔𑀺𑀓𑀸𑀦𑀺 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀏𑀯𑀁 𑀲𑁄 𑀢𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀕𑀡𑁆𑀳𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀧𑀸𑀧𑁄 𑀮𑀸𑀪𑀲𑀓𑁆𑀓𑀸𑀭𑀕𑀺𑀤𑁆𑀥𑀢𑀸𑀬 ¶ ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀝𑁆𑀞𑀸𑀦𑁂 𑀓𑁄𑀧𑀁 𑀩𑀦𑁆𑀥𑀺𑀢𑁆𑀯𑀸 𑀅𑀦𑀸𑀕𑀢𑀪𑀬𑀫𑀦𑁄𑀮𑁄𑀓𑁂𑀢𑁆𑀯𑀸 𑀧𑀜𑁆𑀘𑀳𑀺 𑀓𑀼𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀅𑀯𑀻𑀘𑀺𑀧𑀭𑀸𑀬𑀡𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀮𑀸𑀪𑀲𑀓𑁆𑀓𑀸𑀭𑀕𑀺𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑀸𑀕𑀢𑀪𑀬𑀁 𑀦 𑀑𑀮𑁄𑀓𑁂𑀲𑀺, 𑀧𑀼𑀩𑁆𑀩𑁂𑀧𑀺 𑀅𑀦𑀸𑀕𑀢𑀪𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀕𑀺𑀤𑁆𑀥𑁂𑀦 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀓𑀼𑀮𑀲𑀳𑀲𑁆𑀲𑀦𑀺𑀯𑀸𑀲𑁄 𑀫𑀳𑀸𑀯𑀟𑁆𑀠𑀓𑀻𑀕𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀣 𑀯𑀟𑁆𑀠𑀓𑀻 ‘‘𑀢𑀼𑀫𑁆𑀳𑀸𑀓𑀁 𑀫𑀜𑁆𑀘𑀁 𑀓𑀭𑀺𑀲𑁆𑀲𑀸𑀫, 𑀧𑀻𑀞𑀁 𑀓𑀭𑀺𑀲𑁆𑀲𑀸𑀫, 𑀕𑁂𑀳𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀩𑀳𑀼𑀁 𑀇𑀡𑀁 𑀕𑀳𑁂𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑀺𑀝𑁆𑀞𑀤𑀺𑀝𑁆𑀞𑁂 𑀯𑀟𑁆𑀠𑀓𑀻 𑀘𑁄𑀤𑁂𑀦𑁆𑀢𑀺 𑀧𑀮𑀺𑀩𑀼𑀤𑁆𑀥𑀦𑁆𑀢𑀺. 𑀢𑁂 𑀇𑀡𑀸𑀬𑀺𑀓𑁂𑀳𑀺 𑀉𑀧𑀤𑁆𑀤𑀼𑀢𑀸 𑀲𑀼𑀔𑀁 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀢𑀺𑀁 𑀦𑀸𑀯𑀁 𑀩𑀦𑁆𑀥𑀺𑀢𑁆𑀯𑀸 𑀦𑀤𑀺𑀁 𑀑𑀢𑀸𑀭𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀕𑀸𑀫𑀢𑁄 𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀕𑀸𑀫𑀁 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀫𑀸𑀤𑀸𑀬 𑀦𑀸𑀯𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 ¶ 𑀆𑀭𑀼𑀬𑁆𑀳 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀢𑀯𑁂𑀕𑁂𑀦 𑀯𑀺𑀘𑀭𑀦𑁆𑀢𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀏𑀓𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀤𑀻𑀧𑀓𑁂 𑀲𑀬𑀁𑀚𑀸𑀢𑀲𑀸𑀮𑀺𑀉𑀘𑁆𑀙𑀼𑀓𑀤𑀮𑀺𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀺 𑀯𑀺𑀯𑀺𑀥𑀨𑀮𑀸𑀦𑀺 𑀅𑀢𑁆𑀣𑀺, 𑀅𑀜𑁆𑀜𑀢𑀭𑁄 𑀧𑀪𑀺𑀦𑁆𑀦𑀦𑀸𑀯𑁄 𑀧𑀼𑀭𑀺𑀲𑁄 𑀧𑀞𑀫𑀢𑀭𑀁 𑀢𑀁 𑀤𑀻𑀧𑀓𑀁 𑀧𑀢𑁆𑀯𑀸 𑀲𑀸𑀮𑀺𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄 𑀉𑀘𑁆𑀙𑀼𑀆𑀤𑀻𑀦𑀺 𑀔𑀸𑀤𑀫𑀸𑀦𑁄 𑀣𑀽𑀮𑀲𑀭𑀻𑀭𑁄 𑀦𑀕𑁆𑀕𑁄 𑀧𑀭𑀽𑀴𑁆𑀳𑀓𑁂𑀲𑀫𑀲𑁆𑀲𑀼 𑀢𑀲𑁆𑀫𑀺𑀁 𑀤𑀻𑀧𑀓𑁂 𑀧𑀝𑀺𑀯𑀲𑀢𑀺.

𑀯𑀟𑁆𑀠𑀓𑀻 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀲𑀘𑁂 𑀅𑀬𑀁 𑀤𑀻𑀧𑀓𑁄 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑁂𑀧𑀺 𑀅𑀫𑁆𑀳𑁂 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫 𑀢𑀸𑀯 𑀦’’𑀦𑁆𑀢𑀺. 𑀅𑀣 𑀲𑀢𑁆𑀢𑀝𑁆𑀞 𑀧𑀼𑀭𑀺𑀲𑀸 𑀲𑀽𑀭𑀸 𑀩𑀮𑀯𑀦𑁆𑀢𑁄 ¶ 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑀸 𑀳𑀼𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀤𑀻𑀧𑀓𑀁 𑀧𑀭𑀺𑀕𑁆𑀕𑀡𑁆𑀳𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀧𑀼𑀭𑀺𑀲𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀉𑀘𑁆𑀙𑀼𑀭𑀲𑀁 𑀧𑀺𑀯𑀺𑀢𑁆𑀯𑀸 𑀲𑀼𑀔𑀧𑁆𑀧𑀢𑁆𑀢𑁄 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀭𑀚𑀢𑀧𑀝𑁆𑀝𑀲𑀤𑀺𑀲𑁂 𑀯𑀸𑀮𑀼𑀓𑀢𑀮𑁂 𑀲𑀻𑀢𑀘𑁆𑀙𑀸𑀬𑀸𑀬 𑀉𑀢𑁆𑀢𑀸𑀦𑀓𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀓𑀲𑀦𑁆𑀢𑀸 𑀯𑀧𑀦𑁆𑀢𑀸 𑀏𑀯𑀭𑀽𑀧𑀁 𑀲𑀼𑀔𑀁 𑀦 𑀮𑀪𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑀢𑁄 𑀫𑀬𑁆𑀳𑀁 𑀅𑀬𑀫𑁂𑀯 𑀤𑀻𑀧𑀓𑁄 𑀯𑀭’’𑀦𑁆𑀢𑀺 𑀕𑀸𑀬𑀫𑀸𑀦𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀅𑀣 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑁄 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁫.

‘‘𑀓𑀲𑀦𑁆𑀢𑀺 𑀯𑀧𑀦𑁆𑀢𑀺 𑀢𑁂 𑀚𑀦𑀸, 𑀫𑀦𑀼𑀚𑀸 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄;

𑀦𑀬𑀺𑀫𑀲𑁆𑀲 𑀤𑀻𑀧𑀓𑀲𑁆𑀲 𑀪𑀸𑀕𑀺𑀦𑁄, 𑀚𑀫𑁆𑀩𑀼𑀤𑀻𑀧𑀸 𑀇𑀤𑀫𑁂𑀯 𑀦𑁄 𑀯𑀭’’𑀦𑁆𑀢𑀺.

𑀢𑀢𑁆𑀣 ¶ 𑀢𑁂 𑀚𑀦𑀸𑀢𑀺 𑀢𑁂 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀚𑀦𑀸. 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄𑀢𑀺 𑀦𑀸𑀦𑀸𑀓𑀫𑁆𑀫𑀸𑀦𑀁 𑀨𑀮𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀸.

𑀅𑀣 𑀢𑁂 𑀤𑀻𑀧𑀓𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀼𑀭𑀺𑀲𑀸 𑀢𑀲𑁆𑀲 𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀦𑀼𑀲𑁆𑀲𑀲𑀤𑁆𑀤𑁄 𑀯𑀺𑀬 𑀲𑀼𑀬𑁆𑀬𑀢𑀺, 𑀚𑀸𑀦𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀻𑀢𑀢𑀲𑀺𑀢𑀸 𑀲𑀭𑁂 𑀲𑀦𑁆𑀦𑀳𑀺𑀁𑀲𑀼. 𑀲𑁄𑀧𑀺 𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀥𑀪𑀬𑁂𑀦 ‘‘𑀦𑀸𑀳𑀁, 𑀲𑀸𑀫𑀺, 𑀬𑀓𑁆𑀔𑁄, 𑀧𑀼𑀭𑀺𑀲𑁄𑀫𑁆𑀳𑀺, 𑀚𑀻𑀯𑀺𑀢𑀁 𑀫𑁂 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑁄 ‘‘𑀧𑀼𑀭𑀺𑀲𑀸 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸 𑀦𑀕𑁆𑀕𑀸 𑀦 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸 𑀫𑀦𑀼𑀲𑁆𑀲𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀲𑀺. 𑀢𑁂 𑀢𑀁 𑀧𑀼𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀢𑀢𑁆𑀣 𑀆𑀕𑀢𑀦𑀺𑀬𑀸𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄𑀧𑀺 𑀲𑀩𑁆𑀩𑀁 𑀢𑁂𑀲𑀁 𑀓𑀣𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀇𑀥𑀸𑀕𑀢𑀸 ¶ , 𑀅𑀬𑀁 𑀉𑀢𑁆𑀢𑀫𑀤𑀻𑀧𑁄, 𑀦 𑀏𑀢𑁆𑀣 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑀺, 𑀲𑀬𑀁𑀚𑀸𑀢𑀲𑀸𑀮𑀻𑀦𑀜𑁆𑀘𑁂𑀯 𑀉𑀘𑁆𑀙𑀼𑀆𑀤𑀻𑀦𑀜𑁆𑀘𑁂𑀢𑁆𑀣 𑀅𑀦𑁆𑀢𑁄 𑀦𑀢𑁆𑀣𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀦𑁆𑀢𑀸 𑀯𑀲𑀣𑀸’’𑀢𑀺 𑀆𑀳. 𑀇𑀥 𑀧𑀦 𑀯𑀲𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀅𑀜𑁆𑀜𑁄 𑀧𑀭𑀺𑀧𑀦𑁆𑀣𑁄 ¶ 𑀦𑀢𑁆𑀣𑀺, 𑀅𑀜𑁆𑀜𑀁 𑀪𑀬𑀁 𑀏𑀢𑁆𑀣 𑀦𑀢𑁆𑀣𑀺, 𑀅𑀬𑀁 𑀧𑀦 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁄, 𑀅𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀤𑀺𑀲𑁆𑀯𑀸 𑀓𑀼𑀚𑁆𑀛𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀢𑀁 𑀓𑀭𑁄𑀦𑁆𑀢𑀸 𑀯𑀸𑀮𑀼𑀓𑀁 𑀯𑀺𑀬𑀽𑀳𑀺𑀢𑁆𑀯𑀸 𑀯𑀸𑀮𑀼𑀓𑀸𑀬 𑀧𑀝𑀺𑀘𑁆𑀙𑀸𑀤𑁂𑀬𑁆𑀬𑀸𑀣, 𑀏𑀢𑁆𑀢𑀓𑀁 𑀇𑀥 𑀪𑀬𑀁, 𑀅𑀜𑁆𑀜𑀁 𑀦𑀢𑁆𑀣𑀺, 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑀸 𑀪𑀯𑁂𑀬𑁆𑀬𑀸𑀣𑀸𑀢𑀺. 𑀢𑁂 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀓𑀼𑀮𑀲𑀳𑀲𑁆𑀲𑁂 𑀧𑀜𑁆𑀘𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀓𑀼𑀮𑀲𑀢𑀸𑀦𑀁 𑀚𑁂𑀝𑁆𑀞𑀓𑀸 𑀤𑁆𑀯𑁂 𑀯𑀟𑁆𑀠𑀓𑀻 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁄 𑀩𑀸𑀮𑁄 𑀅𑀳𑁄𑀲𑀺 𑀭𑀲𑀕𑀺𑀤𑁆𑀥𑁄, 𑀏𑀓𑁄 𑀧𑀡𑁆𑀟𑀺𑀢𑁄 𑀭𑀲𑁂𑀲𑀼 𑀅𑀦𑀮𑁆𑀮𑀻𑀦𑁄.

𑀅𑀧𑀭𑀪𑀸𑀕𑁂 𑀲𑀩𑁆𑀩𑁂𑀧𑀺 𑀢𑁂 𑀢𑀢𑁆𑀣 𑀲𑀼𑀔𑀁 𑀯𑀲𑀦𑁆𑀢𑀸 𑀣𑀽𑀮𑀲𑀭𑀻𑀭𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀘𑀺𑀭𑀁 𑀧𑀻𑀢𑀸 𑀦𑁄 𑀲𑀼𑀭𑀸, 𑀉𑀘𑁆𑀙𑀼𑀭𑀲𑁂𑀦 𑀫𑁂𑀭𑀬𑀁 𑀓𑀢𑁆𑀯𑀸 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀫𑁂𑀭𑀬𑀁 𑀓𑀸𑀭𑁂𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀫𑀤𑀯𑀲𑁂𑀦 𑀕𑀸𑀬𑀦𑁆𑀢𑀸 𑀦𑀘𑁆𑀘𑀦𑁆𑀢𑀸 𑀓𑀻𑀴𑀦𑁆𑀢𑀸 𑀧𑀫𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑀻𑀧𑀓𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁 𑀓𑀭𑀺𑀁𑀲𑀼. 𑀤𑁂𑀯𑀢𑀸 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀓𑀻𑀴𑀸𑀫𑀡𑁆𑀟𑀮𑀁 𑀧𑀝𑀺𑀓𑀽𑀮𑀁 𑀓𑀭𑁄𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀫𑀳𑀸𑀲𑀫𑀼𑀤𑁆𑀤𑀁 𑀉𑀢𑁆𑀢𑀭𑀸𑀧𑁂𑀢𑁆𑀯𑀸 𑀤𑀻𑀧𑀓𑀥𑁄𑀯𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 ‘‘𑀅𑀬𑀁 𑀓𑀸𑀴𑀧𑀓𑁆𑀔𑁄, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀫𑀸𑀕𑀫𑁄 𑀘 𑀪𑀺𑀦𑁆𑀦𑁄, 𑀇𑀢𑁄 𑀤𑀸𑀦𑀺 𑀧𑀦𑁆𑀦𑀭𑀲𑀫𑁂 𑀤𑀺𑀯𑀲𑁂 𑀧𑀼𑀡𑁆𑀡𑀫𑀻𑀉𑀧𑁄𑀲𑀣𑀤𑀺𑀯𑀲𑁂 𑀘𑀦𑁆𑀤𑀲𑁆𑀲𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀫𑀼𑀤𑁆𑀤𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑁂𑀧𑀺𑀫𑁂 𑀖𑀸𑀢𑁂𑀲𑁆𑀲𑀸𑀫𑀸’’𑀢𑀺 𑀤𑀺𑀯𑀲𑀁 𑀞𑀧𑀬𑀺𑀁𑀲𑀼. 𑀅𑀣 𑀦𑁂𑀲𑀁 𑀅𑀦𑁆𑀢𑀭𑁂 𑀏𑀓𑁄 𑀥𑀫𑁆𑀫𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀫𑀸 𑀇𑀫𑁂 𑀫𑀫 𑀧𑀲𑁆𑀲𑀦𑁆𑀢𑀲𑁆𑀲 𑀦𑀲𑁆𑀲𑀺𑀁𑀲𑀽’’𑀢𑀺 𑀅𑀦𑀼𑀓𑀫𑁆𑀧𑀸𑀬 𑀢𑁂𑀲𑀼 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀖𑀭𑀤𑁆𑀯𑀸𑀭𑁂 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑁂𑀲𑀼 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀲𑀓𑀮𑀤𑀻𑀧𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀅𑀫𑁆𑀪𑁄 𑀯𑀟𑁆𑀠𑀓𑀻, 𑀤𑁂𑀯𑀢𑀸 𑀢𑀼𑀫𑁆𑀳𑀸𑀓𑀁 𑀓𑀼𑀤𑁆𑀥𑀸. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀸 𑀯𑀲𑀺𑀢𑁆𑀣, 𑀇𑀢𑁄 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀳𑀺 𑀤𑁂𑀯𑀢𑀸 𑀲𑀫𑀼𑀤𑁆𑀤𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 ¶ 𑀲𑀩𑁆𑀩𑁂𑀯 𑀢𑀼𑀫𑁆𑀳𑁂 𑀖𑀸𑀢𑁂𑀲𑁆𑀲𑀦𑁆𑀢𑀺, 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀣𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁬.

‘‘𑀢𑀺𑀧𑀜𑁆𑀘𑀭𑀢𑁆𑀢𑀽𑀧𑀕𑀢𑀫𑁆𑀳𑀺 ¶ 𑀘𑀦𑁆𑀤𑁂, 𑀯𑁂𑀕𑁄 𑀫𑀳𑀸 𑀳𑁂𑀳𑀺𑀢𑀺 𑀲𑀸𑀕𑀭𑀲𑁆𑀲;

𑀉𑀧𑁆𑀮𑀯𑀺𑀲𑁆𑀲𑀁 𑀤𑀻𑀧𑀫𑀺𑀫𑀁 𑀉𑀴𑀸𑀭𑀁, 𑀫𑀸 𑀯𑁄 𑀯𑀥𑀻 𑀕𑀘𑁆𑀙𑀣 𑀮𑁂𑀡𑀫𑀜𑁆𑀜’’𑀦𑁆𑀢𑀺.

𑀢𑀢𑁆𑀣 ¶ 𑀉𑀧𑁆𑀮𑀯𑀺𑀲𑁆𑀲𑀦𑁆𑀢𑀺 𑀇𑀫𑀁 𑀤𑀻𑀧𑀓𑀁 𑀉𑀧𑁆𑀮𑀯𑀦𑁆𑀢𑁄 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀅𑀪𑀺𑀪𑀯𑀺𑀲𑁆𑀲𑀢𑀺. 𑀫𑀸 𑀯𑁄 𑀯𑀥𑀻𑀢𑀺 𑀲𑁄 𑀲𑀸𑀕𑀭𑀯𑁂𑀕𑁄 𑀢𑀼𑀫𑁆𑀳𑁂 𑀫𑀸 𑀯𑀥𑀺.

𑀇𑀢𑀺 𑀲𑁄 𑀢𑁂𑀲𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀞𑀸𑀦𑀫𑁂𑀯 𑀕𑀢𑁄. 𑀢𑀲𑁆𑀫𑀺𑀁 𑀕𑀢𑁂 𑀅𑀧𑀭𑁄 𑀲𑀸𑀳𑀲𑀺𑀓𑁄 𑀓𑀓𑁆𑀔𑀴𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀇𑀫𑁂 𑀇𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑁂𑀬𑁆𑀬𑀼𑀁, 𑀅𑀳𑀁 𑀦𑁂𑀲𑀁 𑀕𑀫𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀲𑀩𑁆𑀩𑁂𑀧𑀺𑀫𑁂 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀲𑀓𑀮𑀤𑀻𑀧𑀁 𑀏𑀓𑁄𑀪𑀸𑀲𑀁 𑀓𑀭𑁄𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀏𑀓𑁄 𑀤𑁂𑀯𑀧𑀼𑀢𑁆𑀢𑁄 𑀇𑀥𑀸𑀕𑀢𑁄, 𑀦𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀕𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑁄 𑀯𑁄 𑀓𑀺𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀇𑀫𑀁 𑀦𑀸𑀫, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑁄 𑀢𑀼𑀫𑁆𑀳𑀸𑀓𑀁 𑀇𑀥 𑀦𑀺𑀯𑀸𑀲𑀁 𑀦 𑀇𑀘𑁆𑀙𑀢𑀺, 𑀤𑁄𑀲𑁂𑀦 𑀓𑀣𑁂𑀢𑀺, 𑀢𑀼𑀫𑁆𑀳𑁂 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁭.

‘‘𑀦 𑀚𑀸𑀢𑀼𑀬𑀁 𑀲𑀸𑀕𑀭𑀯𑀸𑀭𑀺𑀯𑁂𑀕𑁄, 𑀉𑀧𑁆𑀮𑀯𑀺𑀲𑁆𑀲𑀁 𑀤𑀻𑀧𑀫𑀺𑀫𑀁 𑀉𑀴𑀸𑀭𑀁;

𑀢𑀁 𑀫𑁂 𑀦𑀺𑀫𑀺𑀢𑁆𑀢𑁂𑀳𑀺 𑀩𑀳𑀽𑀳𑀺 𑀤𑀺𑀝𑁆𑀞𑀁, 𑀫𑀸 𑀪𑁂𑀣 𑀓𑀺𑀁 𑀲𑁄𑀘𑀣 𑀫𑁄𑀤𑀣𑀯𑁆𑀳𑁄.

𑁨𑁮.

‘‘𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀧𑀢𑁆𑀢𑀢𑁆𑀣 𑀆𑀯𑀸𑀲𑀫𑀺𑀫𑀁 𑀉𑀴𑀸𑀭𑀁;

𑀦 𑀯𑁄 𑀪𑀬𑀁 𑀧𑀝𑀺𑀧𑀲𑁆𑀲𑀸𑀫𑀺 𑀓𑀺𑀜𑁆𑀘𑀺, 𑀆𑀧𑀼𑀢𑁆𑀢𑀧𑀼𑀢𑁆𑀢𑁂𑀳𑀺 𑀧𑀫𑁄𑀤𑀣𑀯𑁆𑀳𑁄’’𑀢𑀺.

𑀢𑀢𑁆𑀣 ¶ 𑀦 𑀚𑀸𑀢𑀼𑀬𑀦𑁆𑀢𑀺 𑀦 𑀚𑀸𑀢𑀼 𑀅𑀬𑀁. 𑀫𑀸 𑀪𑁂𑀣𑀸𑀢𑀺 𑀫𑀸 𑀪𑀸𑀬𑀺𑀢𑁆𑀣. 𑀫𑁄𑀤𑀣𑀯𑁆𑀳𑁄𑀢𑀺 𑀧𑀫𑁄𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑁄𑀣. 𑀆𑀧𑀼𑀢𑁆𑀢𑀧𑀼𑀢𑁆𑀢𑁂𑀳𑀻𑀢𑀺 𑀬𑀸𑀯 𑀧𑀼𑀢𑁆𑀢𑀸𑀦𑀫𑁆𑀧𑀺 𑀧𑀼𑀢𑁆𑀢𑁂𑀳𑀺 𑀧𑀫𑁄𑀤𑀣, 𑀦𑀢𑁆𑀣𑀺 𑀯𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀪𑀬𑀦𑁆𑀢𑀺.

𑀏𑀯𑀁 𑀲𑁄 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀢𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀧𑀓𑁆𑀓𑀦𑁆𑀢𑀓𑀸𑀮𑁂 𑀥𑀫𑁆𑀫𑀺𑀓𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁄 𑀩𑀸𑀮𑀯𑀟𑁆𑀠𑀓𑀻 ‘‘𑀲𑀼𑀡𑀦𑁆𑀢𑀼 𑀫𑁂, 𑀪𑁄𑀦𑁆𑀢𑁄, 𑀯𑀘𑀦’’𑀦𑁆𑀢𑀺 𑀲𑁂𑀲𑀯𑀟𑁆𑀠𑀓𑀻 𑀆𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀬𑁄 ¶ 𑀤𑁂𑀯𑁄𑀬𑀁 𑀤𑀓𑁆𑀔𑀺𑀡𑀸𑀬𑀁 𑀤𑀺𑀲𑀸𑀬𑀁, 𑀔𑁂𑀫𑀦𑁆𑀢𑀺 𑀧𑀓𑁆𑀓𑁄𑀲𑀢𑀺 𑀢𑀲𑁆𑀲 𑀲𑀘𑁆𑀘𑀁;

𑀦 𑀉𑀢𑁆𑀢𑀭𑁄 𑀯𑁂𑀤𑀺 𑀪𑀬𑀸𑀪𑀬𑀲𑁆𑀲, 𑀫𑀸 𑀪𑁂𑀣 𑀓𑀺𑀁 𑀲𑁄𑀘𑀣 𑀫𑁄𑀤𑀣𑀯𑁆𑀳𑁄’’𑀢𑀺.

𑀢𑀢𑁆𑀣 ¶ 𑀤𑀓𑁆𑀔𑀺𑀡𑀸𑀬𑀦𑁆𑀢𑀺 𑀤𑀓𑁆𑀔𑀺𑀡𑀸𑀬, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀭𑀲𑀕𑀺𑀤𑁆𑀥𑀸 𑀧𑀜𑁆𑀘𑀲𑀢𑀸 𑀯𑀟𑁆𑀠𑀓𑀻 𑀢𑀲𑁆𑀲 𑀩𑀸𑀮𑀲𑁆𑀲 𑀯𑀘𑀦𑀁 𑀆𑀤𑀺𑀬𑀺𑀁𑀲𑀼. 𑀇𑀢𑀭𑁄 𑀧𑀦 𑀧𑀡𑁆𑀟𑀺𑀢𑀯𑀟𑁆𑀠𑀓𑀻 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁄 𑀢𑁂 𑀯𑀟𑁆𑀠𑀓𑀻 𑀆𑀫𑀦𑁆𑀢𑁂𑀢𑁆𑀯𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁦.

‘‘𑀬𑀣𑀸 𑀇𑀫𑁂 𑀯𑀺𑀧𑁆𑀧𑀯𑀤𑀦𑁆𑀢𑀺 𑀬𑀓𑁆𑀔𑀸, 𑀏𑀓𑁄 𑀪𑀬𑀁 𑀲𑀁𑀲𑀢𑀺 𑀔𑁂𑀫𑀫𑁂𑀓𑁄;

𑀢𑀤𑀺𑀗𑁆𑀖 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀡𑀸𑀣, 𑀔𑀺𑀧𑁆𑀧𑀁 𑀮𑀳𑀼𑀁 𑀫𑀸 𑀯𑀺𑀦𑀲𑁆𑀲𑀺𑀫𑁆𑀳 𑀲𑀩𑁆𑀩𑁂.

𑁩𑁧.

‘‘𑀲𑀩𑁆𑀩𑁂 𑀲𑀫𑀸𑀕𑀫𑁆𑀫 𑀓𑀭𑁄𑀫 𑀦𑀸𑀯𑀁, 𑀤𑁄𑀡𑀺𑀁 𑀤𑀴𑁆𑀳𑀁 𑀲𑀩𑁆𑀩𑀬𑀦𑁆𑀢𑀽𑀧𑀧𑀦𑁆𑀦𑀁;

𑀲𑀘𑁂 𑀅𑀬𑀁 𑀤𑀓𑁆𑀔𑀺𑀡𑁄 𑀲𑀘𑁆𑀘𑀫𑀸𑀳, 𑀫𑁄𑀖𑀁 𑀧𑀝𑀺𑀓𑁆𑀓𑁄𑀲𑀢𑀺 𑀉𑀢𑁆𑀢𑀭𑁄𑀬𑀁;

𑀲𑀸 𑀘𑁂𑀯 𑀦𑁄 𑀳𑁂𑀳𑀺𑀢𑀺 𑀆𑀧𑀤𑀢𑁆𑀣𑀸, 𑀇𑀫𑀜𑁆𑀘 𑀤𑀻𑀧𑀁 𑀦 𑀧𑀭𑀺𑀘𑁆𑀘𑀚𑁂𑀫.

𑁩𑁨.

‘‘𑀲𑀘𑁂 𑀘 𑀔𑁄 𑀉𑀢𑁆𑀢𑀭𑁄 𑀲𑀘𑁆𑀘𑀫𑀸𑀳, 𑀫𑁄𑀖𑀁 𑀧𑀝𑀺𑀓𑁆𑀓𑁄𑀲𑀢𑀺 𑀤𑀓𑁆𑀔𑀺𑀡𑁄𑀬𑀁;

𑀢𑀫𑁂𑀯 ¶ 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀲𑀩𑁆𑀩𑁂, 𑀏𑀯𑀁 𑀫𑀬𑀁 𑀲𑁄𑀢𑁆𑀣𑀺 𑀢𑀭𑁂𑀫𑀼 𑀧𑀸𑀭𑀁.

𑁩𑁩.

‘‘𑀦 𑀯𑁂 𑀲𑀼𑀕𑀡𑁆𑀳𑀁 𑀧𑀞𑀫𑁂𑀦 𑀲𑁂𑀝𑁆𑀞𑀁, 𑀓𑀦𑀺𑀝𑁆𑀞𑀫𑀸𑀧𑀸𑀣𑀕𑀢𑀁 𑀕𑀳𑁂𑀢𑁆𑀯𑀸;

𑀬𑁄 𑀘𑀻𑀥 𑀢𑀘𑁆𑀙𑀁 𑀧𑀯𑀺𑀘𑁂𑀬𑁆𑀬 𑀕𑀡𑁆𑀳𑀢𑀺, 𑀲 𑀯𑁂 𑀦𑀭𑁄 𑀲𑁂𑀝𑁆𑀞𑀫𑀼𑀧𑁂𑀢𑀺 𑀞𑀸𑀦’’𑀦𑁆𑀢𑀺.

𑀢𑀢𑁆𑀣 ¶ 𑀯𑀺𑀧𑁆𑀧𑀯𑀤𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀁 𑀯𑀤𑀦𑁆𑀢𑀺. 𑀮𑀳𑀼𑀦𑁆𑀢𑀺 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑀤𑀻𑀧𑀦𑀁. 𑀤𑁄𑀡𑀺𑀦𑁆𑀢𑀺 𑀕𑀫𑁆𑀪𑀻𑀭𑀁 𑀫𑀳𑀸𑀦𑀸𑀯𑀁. 𑀲𑀩𑁆𑀩𑀬𑀦𑁆𑀢𑀽𑀧𑀧𑀦𑁆𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀨𑀺𑀬𑀸𑀭𑀺𑀢𑁆𑀢𑀸𑀤𑀻𑀳𑀺 𑀬𑀦𑁆𑀢𑁂𑀳𑀺 𑀉𑀧𑀧𑀦𑁆𑀦𑀁. 𑀲𑀸 𑀘𑁂𑀯 𑀦𑁄 𑀳𑁂𑀳𑀺𑀢𑀺 𑀆𑀧𑀤𑀢𑁆𑀣𑀸𑀢𑀺 𑀲𑀸 𑀘 𑀦𑁄 𑀦𑀸𑀯𑀸 𑀧𑀘𑁆𑀙𑀸𑀧𑀺 𑀉𑀧𑁆𑀧𑀦𑁆𑀦𑀸𑀬 𑀆𑀧𑀤𑀸𑀬 𑀅𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀜𑁆𑀘 𑀤𑀻𑀧𑀁 𑀦 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫. 𑀢𑀭𑁂𑀫𑀽𑀢𑀺 𑀢𑀭𑀺𑀲𑁆𑀲𑀸𑀫. 𑀦 𑀯𑁂 𑀲𑀼𑀕𑀡𑁆𑀳𑀦𑁆𑀢𑀺 𑀦 𑀯𑁂 𑀲𑀼𑀔𑁂𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀲𑁂𑀝𑁆𑀞𑀦𑁆𑀢𑀺 𑀉𑀢𑁆𑀢𑀫𑀁 𑀢𑀣𑀁 𑀲𑀘𑁆𑀘𑀁. 𑀓𑀦𑀺𑀝𑁆𑀞𑀦𑁆𑀢𑀺 𑀧𑀞𑀫𑀯𑀘𑀦𑀁 𑀉𑀧𑀸𑀤𑀸𑀬 𑀧𑀘𑁆𑀙𑀺𑀫𑀯𑀘𑀦𑀁 𑀓𑀦𑀺𑀝𑁆𑀞𑀁 𑀦𑀸𑀫. 𑀇𑀥𑀸𑀧𑀺 ‘‘𑀦 𑀯𑁂 𑀲𑀼𑀕𑀡𑁆𑀳’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀪𑁄 𑀯𑀟𑁆𑀠𑀓𑀻, 𑀬𑁂𑀦 𑀓𑁂𑀦𑀘𑀺 𑀧𑀞𑀫𑁂𑀦 𑀯𑀼𑀢𑁆𑀢𑀯𑀘𑀦𑀁 ‘‘𑀇𑀤𑀫𑁂𑀯 𑀲𑁂𑀝𑁆𑀞𑀁 𑀢𑀣𑀁 𑀲𑀘𑁆𑀘’’𑀦𑁆𑀢𑀺 𑀲𑀼𑀔𑀁 𑀦 𑀕𑀡𑁆𑀳𑀺𑀢𑀩𑁆𑀩𑀫𑁂𑀯, 𑀬𑀣𑀸 𑀘 𑀢𑀁, 𑀏𑀯𑀁 𑀓𑀦𑀺𑀝𑁆𑀞𑀁 𑀕𑀘𑁆𑀙𑀸 𑀯𑀼𑀢𑁆𑀢𑀯𑀘𑀦𑀫𑁆𑀧𑀺 ‘‘𑀇𑀤𑀫𑁂𑀯 𑀢𑀣𑀁 𑀲𑀘𑁆𑀘’’𑀦𑁆𑀢𑀺 𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀬𑀁 𑀧𑀦 𑀲𑁄𑀢𑀯𑀺𑀲𑀬𑀁 𑀆𑀧𑀸𑀣𑀕𑀢𑀁 𑀳𑁄𑀢𑀺, 𑀢𑀁 𑀆𑀧𑀸𑀣𑀕𑀢𑀁 𑀕𑀳𑁂𑀢𑁆𑀯𑀸 𑀬𑁄 𑀇𑀥 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀧𑀼𑀭𑀺𑀫𑀯𑀘𑀦𑀜𑁆𑀘 𑀧𑀘𑁆𑀙𑀺𑀫𑀯𑀘𑀦𑀜𑁆𑀘 𑀧𑀯𑀺𑀘𑁂𑀬𑁆𑀬 𑀯𑀺𑀘𑀺𑀦𑀺𑀢𑁆𑀯𑀸 𑀢𑀻𑀭𑁂𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀢𑀘𑁆𑀙𑀁 𑀕𑀡𑁆𑀳𑀸𑀢𑀺, 𑀬𑀁 𑀢𑀣𑀁 𑀲𑀘𑁆𑀘𑀁 𑀲𑀪𑀸𑀯𑀪𑀽𑀢𑀁, 𑀢𑀤𑁂𑀯 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀲 𑀯𑁂 𑀦𑀭𑁄 𑀲𑁂𑀝𑁆𑀞𑀫𑀼𑀧𑁂𑀢𑀺 𑀞𑀸𑀦𑀦𑁆𑀢𑀺 𑀲𑁄 𑀉𑀢𑁆𑀢𑀫𑀁 𑀞𑀸𑀦𑀁 𑀉𑀧𑁂𑀢𑀺 𑀅𑀥𑀺𑀕𑀘𑁆𑀙𑀢𑀺 𑀯𑀺𑀦𑁆𑀤𑀢𑀺 𑀮𑀪𑀢𑀻𑀢𑀺.

𑀲𑁄 ¶ 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀪𑁄, 𑀫𑀬𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑁂𑀯𑀢𑀸𑀦𑀁 𑀯𑀘𑀦𑀁 𑀓𑀭𑀺𑀲𑁆𑀲𑀸𑀫, 𑀦𑀸𑀯𑀁 𑀢𑀸𑀯 𑀲𑀚𑁆𑀚𑁂𑀬𑁆𑀬𑀸𑀫. 𑀲𑀘𑁂 𑀧𑀞𑀫𑀲𑁆𑀲 𑀯𑀘𑀦𑀁 𑀲𑀘𑁆𑀘𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀸𑀫, 𑀅𑀣 𑀇𑀢𑀭𑀲𑁆𑀲 𑀯𑀘𑀦𑀁 𑀲𑀘𑁆𑀘𑀁 𑀪𑀯𑀺𑀲𑁆𑀲𑀢𑀺, 𑀦𑀸𑀯𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀩𑀸𑀮𑀯𑀟𑁆𑀠𑀓𑀻 ‘‘𑀅𑀫𑁆𑀪𑁄, 𑀢𑁆𑀯𑀁 𑀉𑀤𑀓𑀧𑀸𑀢𑀺𑀬𑀁 ¶ 𑀲𑀼𑀲𑀼𑀫𑀸𑀭𑀁 𑀧𑀲𑁆𑀲𑀲𑀺, 𑀅𑀢𑀻𑀯 𑀤𑀻𑀖𑀁 𑀧𑀲𑁆𑀲𑀲𑀺, 𑀧𑀞𑀫𑀤𑁂𑀯𑀧𑀼𑀢𑁆𑀢𑁄 𑀅𑀫𑁆𑀳𑁂𑀲𑀼 𑀤𑁄𑀲𑀯𑀲𑁂𑀦 𑀓𑀣𑁂𑀲𑀺, 𑀧𑀘𑁆𑀙𑀺𑀫𑁄 𑀲𑀺𑀦𑁂𑀳𑁂𑀦𑁂𑀯, 𑀇𑀫𑀁 𑀏𑀯𑀭𑀽𑀧𑀁 𑀯𑀭𑀤𑀻𑀧𑀁 𑀧𑀳𑀸𑀬 𑀓𑀼𑀳𑀺𑀁 𑀕𑀫𑀺𑀲𑁆𑀲𑀸𑀫, 𑀲𑀘𑁂 𑀧𑀦 𑀢𑁆𑀯𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀯 𑀧𑀭𑀺𑀲𑀁 𑀕𑀡𑁆𑀳𑀺𑀢𑁆𑀯𑀸 𑀦𑀸𑀯𑀁 𑀓𑀭𑁄𑀳𑀺, 𑀅𑀫𑁆𑀳𑀸𑀓𑀁 𑀦𑀸𑀯𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀆𑀳. 𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀦𑀸𑀯𑀁 𑀲𑀚𑁆𑀚𑁂𑀢𑁆𑀯𑀸 𑀦𑀸𑀯𑀸𑀬 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀧𑀭𑀺𑀲𑁄 𑀦𑀸𑀯𑀸𑀬 𑀅𑀝𑁆𑀞𑀸𑀲𑀺.

𑀢𑀢𑁄 𑀧𑀼𑀡𑁆𑀡𑀫𑀤𑀺𑀯𑀲𑁂 𑀘𑀦𑁆𑀤𑀲𑁆𑀲 𑀉𑀕𑁆𑀕𑀫𑀦𑀯𑁂𑀮𑀸𑀬 𑀲𑀫𑀼𑀤𑁆𑀤𑀢𑁄 𑀊𑀫𑀺 𑀉𑀢𑁆𑀢𑀭𑀺𑀢𑁆𑀯𑀸 𑀚𑀸𑀡𑀼𑀓𑀧𑀫𑀸𑀡𑀸 𑀳𑀼𑀢𑁆𑀯𑀸 𑀤𑀻𑀧𑀓𑀁 𑀥𑁄𑀯𑀺𑀢𑁆𑀯𑀸 𑀕𑀢𑀸. 𑀧𑀡𑁆𑀟𑀺𑀢𑁄 𑀲𑀫𑀼𑀤𑁆𑀤𑀲𑁆𑀲 𑀉𑀢𑁆𑀢𑀭𑀡𑀪𑀸𑀯𑀁 𑀜𑀢𑁆𑀯𑀸 𑀦𑀸𑀯𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀩𑀸𑀮𑀯𑀟𑁆𑀠𑀓𑀺𑀧𑀓𑁆𑀔𑀺𑀓𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 ‘‘𑀲𑀫𑀼𑀤𑁆𑀤𑀢𑁄 𑀊𑀫𑀺 𑀤𑀻𑀧𑀥𑁄𑀯𑀦𑀢𑁆𑀣𑀸𑀬 𑀆𑀕𑀢𑀸, 𑀏𑀢𑁆𑀢𑀓𑀫𑁂𑀯 𑀏𑀢’’𑀦𑁆𑀢𑀺 𑀓𑀣𑁂𑀦𑁆𑀢𑀸 ¶ 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀧𑀝𑀺𑀧𑀸𑀝𑀺𑀬𑀸 𑀓𑀝𑀺𑀧𑁆𑀧𑀫𑀸𑀡𑀸 𑀧𑀼𑀭𑀺𑀲𑀧𑁆𑀧𑀫𑀸𑀡𑀸 𑀢𑀸𑀮𑀧𑁆𑀧𑀫𑀸𑀡𑀸 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀸 𑀲𑀸𑀕𑀭𑀊𑀫𑀺 𑀤𑀻𑀧𑀓𑀫𑁆𑀧𑀺 𑀯𑀼𑀬𑁆𑀳𑀫𑀸𑀦𑀸 𑀆𑀕𑀜𑁆𑀙𑀺. 𑀧𑀡𑁆𑀟𑀺𑀢𑁄 𑀉𑀧𑀸𑀬𑀓𑀼𑀲𑀮𑀢𑀸𑀬 𑀭𑀲𑁂 𑀅𑀮𑀕𑁆𑀕𑁄 𑀲𑁄𑀢𑁆𑀣𑀺𑀦𑀸 𑀕𑀢𑁄, 𑀩𑀸𑀮𑀯𑀟𑁆𑀠𑀓𑀻 𑀭𑀲𑀕𑀺𑀤𑁆𑀥𑁂𑀦 𑀅𑀦𑀸𑀕𑀢𑀪𑀬𑀁 𑀅𑀦𑁄𑀮𑁄𑀓𑁂𑀦𑁆𑀢𑁄 𑀧𑀜𑁆𑀘𑀳𑀺 𑀓𑀼𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀦𑀸𑀲𑀁 𑀧𑀢𑁆𑀢𑁄.

𑀇𑀢𑁄 𑀧𑀭𑀸 𑀲𑀸𑀦𑀼𑀲𑀸𑀲𑀦𑀻 𑀢𑀫𑀢𑁆𑀣𑀁 𑀤𑀻𑀧𑀬𑀫𑀸𑀦𑀸 𑀢𑀺𑀲𑁆𑀲𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀳𑁄𑀦𑁆𑀢𑀺 𑁋

𑁩𑁪.

‘‘𑀬𑀣𑀸𑀧𑀺 𑀢𑁂 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂, 𑀲𑀓𑀫𑁆𑀫𑀼𑀦𑀸 𑀲𑁄𑀢𑁆𑀣𑀺 𑀯𑀳𑀺𑀁𑀲𑀼 𑀯𑀸𑀡𑀺𑀚𑀸;

𑀅𑀦𑀸𑀕𑀢𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀬𑀸𑀦, 𑀅𑀧𑁆𑀧𑀫𑁆𑀧𑀺 𑀦𑀸𑀘𑁆𑀘𑁂𑀢𑀺 𑀲 𑀪𑀽𑀭𑀺𑀧𑀜𑁆𑀜𑁄.

𑁩𑁫.

‘‘𑀩𑀸𑀮𑀸 𑀘 𑀫𑁄𑀳𑁂𑀦 𑀭𑀲𑀸𑀦𑀼𑀕𑀺𑀤𑁆𑀥𑀸, 𑀅𑀦𑀸𑀕𑀢𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀢𑁆𑀣𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀻𑀤𑀦𑁆𑀢𑀺 𑀅𑀢𑁆𑀣𑀚𑀸𑀢𑁂, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸.

𑁩𑁬.

‘‘𑀅𑀦𑀸𑀕𑀢𑀁 ¶ 𑀧𑀝𑀺𑀓𑀬𑀺𑀭𑀸𑀣 𑀓𑀺𑀘𑁆𑀘𑀁, ‘𑀫𑀸 𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀲𑀺’;

𑀢𑀁 𑀢𑀸𑀤𑀺𑀲𑀁 𑀧𑀝𑀺𑀓𑀢𑀓𑀺𑀘𑁆𑀘𑀓𑀸𑀭𑀺𑀁, 𑀦 𑀢𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀢𑀻’’𑀢𑀺.

𑀢𑀢𑁆𑀣 𑀲𑀓𑀫𑁆𑀫𑀼𑀦𑀸𑀢𑀺 𑀅𑀦𑀸𑀕𑀢𑀪𑀬𑀁 𑀤𑀺𑀲𑁆𑀯𑀸 𑀧𑀼𑀭𑁂𑀢𑀭𑀁 𑀓𑀢𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦. 𑀲𑁄𑀢𑁆𑀣𑀺 𑀯𑀳𑀺𑀁𑀲𑀽𑀢𑀺 𑀔𑁂𑀫𑁂𑀦 𑀕𑀫𑀺𑀁𑀲𑀼. 𑀯𑀸𑀡𑀺𑀚𑀸𑀢𑀺 𑀲𑀫𑀼𑀤𑁆𑀤𑁂 𑀯𑀺𑀘𑀭𑀡𑀪𑀸𑀯𑁂𑀦 𑀯𑀟𑁆𑀠𑀓𑀻 𑀯𑀼𑀢𑁆𑀢𑀸. 𑀧𑀝𑀺𑀯𑀺𑀚𑁆𑀛𑀺𑀬𑀸𑀦𑀸𑀢𑀺 𑀏𑀯𑀁, 𑀪𑀺𑀓𑁆𑀔𑀯𑁂 ¶ , 𑀧𑀞𑀫𑀢𑀭𑀁 𑀓𑀢𑁆𑀢𑀩𑁆𑀩𑀁 𑀅𑀦𑀸𑀕𑀢𑀁 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀇𑀥𑀮𑁄𑀓𑁂 𑀪𑀽𑀭𑀺𑀧𑀜𑁆𑀜𑁄 𑀓𑀼𑀮𑀧𑀼𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀦 𑀅𑀘𑁆𑀘𑁂𑀢𑀺 𑀦𑀸𑀢𑀺𑀯𑀢𑁆𑀢𑀢𑀺, 𑀦 𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀢𑁆𑀣𑀦𑁆𑀢𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀢𑁆𑀣𑀁, 𑀧𑀞𑀫𑀫𑁂𑀯 𑀓𑀢𑁆𑀢𑀩𑁆𑀩𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀢𑀺 𑀬𑀤𑀸 𑀢𑀁 𑀅𑀦𑀸𑀕𑀢𑀁 𑀅𑀢𑁆𑀣𑀚𑀸𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀻𑀤𑀦𑁆𑀢𑀺, 𑀅𑀢𑁆𑀣𑁂 𑀚𑀸𑀢𑁂 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀦 𑀮𑀪𑀦𑁆𑀢𑀺, 𑀲𑀫𑀼𑀤𑁆𑀤𑁂 𑀢𑁂 𑀩𑀸𑀮𑀯𑀟𑁆𑀠𑀓𑀻 𑀫𑀦𑀼𑀲𑁆𑀲𑀸 𑀯𑀺𑀬 𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀺.

𑀅𑀦𑀸𑀕𑀢𑀦𑁆𑀢𑀺 ¶ 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀅𑀦𑀸𑀕𑀢𑀁 𑀧𑀞𑀫𑀢𑀭𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀸 𑀧𑀝𑀺𑀓𑀬𑀺𑀭𑀸𑀣, 𑀧𑀼𑀭𑁂𑀢𑀭𑀫𑁂𑀯 𑀓𑀭𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀫𑀸 𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀲𑀺, 𑀧𑀼𑀭𑁂 𑀓𑀢𑁆𑀢𑀩𑁆𑀩𑀜𑁆𑀳𑀺 𑀧𑀼𑀭𑁂 𑀅𑀓𑀬𑀺𑀭𑀫𑀸𑀦𑀁 𑀧𑀘𑁆𑀙𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀮𑁂 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑁂𑀦 𑀩𑁆𑀬𑀥𑁂𑀢𑀺, 𑀢𑀁 𑀫𑀁 𑀫𑀸 𑀩𑁆𑀬𑀥𑁂𑀲𑀻𑀢𑀺 𑀧𑀞𑀫𑀫𑁂𑀯 𑀦𑀁 𑀧𑀡𑁆𑀟𑀺𑀢𑁄 𑀓𑀭𑁂𑀬𑁆𑀬. 𑀢𑀁 𑀢𑀸𑀤𑀺𑀲𑀦𑁆𑀢𑀺 𑀬𑀣𑀸 𑀧𑀡𑁆𑀟𑀺𑀢𑀁 𑀧𑀼𑀭𑀺𑀲𑀁. 𑀧𑀝𑀺𑀓𑀢𑀓𑀺𑀘𑁆𑀘𑀓𑀸𑀭𑀺𑀦𑁆𑀢𑀺 𑀧𑀝𑀺𑀓𑀘𑁆𑀘𑁂𑀯 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀸𑀭𑀺𑀦𑀁. 𑀢𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂𑀢𑀺 𑀅𑀦𑀸𑀕𑀢𑀁 𑀓𑀺𑀘𑁆𑀘𑀁 𑀓𑀬𑀺𑀭𑀫𑀸𑀦𑀁 𑀧𑀘𑁆𑀙𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀸𑀮𑁂 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀓𑀸𑀮𑁂 𑀢𑀸𑀤𑀺𑀲𑀁 𑀧𑀼𑀭𑀺𑀫𑀁 𑀦 𑀩𑁆𑀬𑀥𑁂𑀢𑀺 𑀦 𑀩𑀸𑀥𑀢𑀺. 𑀓𑀲𑁆𑀫𑀸? 𑀧𑀼𑀭𑁂𑀬𑁂𑀯 𑀓𑀢𑀢𑁆𑀢𑀸𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁂 𑀮𑀕𑁆𑀕𑁄 𑀅𑀦𑀸𑀕𑀢𑀪𑀬𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀧𑀭𑀺𑀲𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀮𑀯𑀟𑁆𑀠𑀓𑀻 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀤𑀓𑁆𑀔𑀺𑀡𑀤𑀺𑀲𑀸𑀬 𑀞𑀺𑀢𑁄 𑀅𑀥𑀫𑁆𑀫𑀺𑀓𑀤𑁂𑀯𑀧𑀼𑀢𑁆𑀢𑁄 𑀓𑁄𑀓𑀸𑀮𑀺𑀓𑁄, 𑀉𑀢𑁆𑀢𑀭𑀤𑀺𑀲𑀸𑀬 𑀞𑀺𑀢𑁄 𑀥𑀫𑁆𑀫𑀺𑀓𑀤𑁂𑀯𑀧𑀼𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀡𑁆𑀟𑀺𑀢𑀯𑀟𑁆𑀠𑀓𑀻 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁬𑁭] 𑁪. 𑀓𑀸𑀫𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀫𑀁 ¶ 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀅𑀘𑀺𑀭𑀯𑀢𑀻𑀢𑀻𑀭𑁂 𑀔𑁂𑀢𑁆𑀢𑀓𑀭𑀡𑀢𑁆𑀣𑀸𑀬 𑀅𑀭𑀜𑁆𑀜𑀁 𑀓𑁄𑀝𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀢𑁆𑀯𑀸 ‘‘𑀔𑁂𑀢𑁆𑀢𑀝𑁆𑀞𑀸𑀦𑀁 𑀓𑁄𑀝𑀸𑀧𑁂𑀫𑀺 𑀪𑁄, 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀅𑀕𑀫𑀸𑀲𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀙𑀺𑀦𑁆𑀦𑀭𑀼𑀓𑁆𑀔𑁂 𑀳𑀸𑀭𑁂𑀢𑁆𑀯𑀸 𑀔𑁂𑀢𑁆𑀢𑀲𑁆𑀲 𑀲𑁄𑀥𑀦𑀓𑀸𑀮𑁂 𑀓𑀲𑀦𑀓𑀸𑀮𑁂 𑀓𑁂𑀤𑀸𑀭𑀩𑀦𑁆𑀥𑀦𑀓𑀸𑀮𑁂 𑀯𑀧𑀦𑀓𑀸𑀮𑁂𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 ¶ 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀯𑀧𑀦𑀤𑀺𑀯𑀲𑁂 𑀧𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀚𑁆𑀚, 𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀯𑀧𑁆𑀧𑀫𑀗𑁆𑀕𑀮𑀁, 𑀅𑀳𑀁 𑀇𑀫𑀲𑁆𑀫𑀺𑀁 𑀲𑀲𑁆𑀲𑁂 𑀦𑀺𑀧𑁆𑀨𑀦𑁆𑀦𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ¶ 𑀫𑀳𑀸𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀲𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀲𑁆𑀲𑀁 𑀑𑀮𑁄𑀓𑁂𑀫𑀺 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀪𑀺𑀡𑁆𑀳𑀁 𑀆𑀕𑀘𑁆𑀙𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀪𑀢𑁆𑀢𑁂𑀦 𑀅𑀢𑁆𑀣𑀺𑀓𑁄, 𑀤𑀲𑁆𑀲𑀸𑀫𑀳𑀁 𑀢𑀲𑁆𑀲 𑀪𑀢𑁆𑀢’’𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀢𑀤𑀺𑀯𑀲𑁂 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀅𑀕𑀫𑀸𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑀺𑀯𑀺𑀬 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀧𑀭𑀺𑀡𑀢𑁂 𑀲𑀲𑁆𑀲𑁂 ‘‘𑀲𑁆𑀯𑁂 𑀔𑁂𑀢𑁆𑀢𑀁 𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁂 𑀩𑁆𑀭𑀸𑀳𑁆𑀫𑀡𑁂 𑀅𑀘𑀺𑀭𑀯𑀢𑀺𑀬𑀸 𑀉𑀧𑀭𑀺 𑀲𑀩𑁆𑀩𑀭𑀢𑁆𑀢𑀺𑀁 𑀓𑀭𑀓𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀳𑁄𑀖𑁄 𑀆𑀕𑀦𑁆𑀢𑁆𑀯𑀸 𑀏𑀓𑀦𑀸𑀴𑀺𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀲𑀲𑁆𑀲𑀁 𑀲𑀫𑀼𑀤𑁆𑀤𑀁 𑀧𑀯𑁂𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀑𑀖𑀫𑁆𑀳𑀺 𑀧𑀢𑀺𑀢𑁂 𑀲𑀲𑁆𑀲𑀯𑀺𑀦𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀳𑁄𑀲𑀺, 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑁄 𑀳𑀢𑁆𑀣𑁂𑀦 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀭𑁄𑀤𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑁄𑀓𑀸𑀪𑀺𑀪𑀽𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑁂𑀲𑁂𑀢𑁆𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 ¶ 𑀲𑀼𑀢𑁆𑀯𑀸 ‘‘𑀧𑀝𑀺𑀲𑀦𑁆𑀣𑀸𑀭𑀢𑁆𑀣𑀸𑀬 𑀫𑁂 𑀲𑀳𑀸𑀬𑁄 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀮𑀤𑁆𑀥𑀲𑁆𑀲𑀸𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺. 𑀲𑀢𑁆𑀣𑀸 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀲𑁆𑀫𑀸 𑀢𑁆𑀯𑀁 𑀤𑀼𑀫𑁆𑀫𑀦𑁄𑀲𑀺, 𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀪𑁄 𑀕𑁄𑀢𑀫, 𑀅𑀘𑀺𑀭𑀯𑀢𑀻𑀢𑀻𑀭𑁂 𑀫𑀬𑀸 𑀭𑀼𑀓𑁆𑀔𑀘𑁆𑀙𑁂𑀤𑀦𑀢𑁄 𑀧𑀝𑁆𑀞𑀸𑀬 𑀓𑀢𑀁 𑀓𑀫𑁆𑀫𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀅𑀳𑀁 ‘‘𑀇𑀫𑀲𑁆𑀫𑀺𑀁 𑀲𑀲𑁆𑀲𑁂 𑀦𑀺𑀧𑁆𑀨𑀦𑁆𑀦𑁂 𑀢𑀼𑀫𑁆𑀳𑀸𑀓𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀺𑀘𑀭𑀸𑀫𑀺, 𑀇𑀤𑀸𑀦𑀺 𑀫𑁂 𑀲𑀩𑁆𑀩𑀁 𑀢𑀁 𑀲𑀲𑁆𑀲𑀁 𑀫𑀳𑁄𑀖𑁄 𑀲𑀫𑀼𑀤𑁆𑀤𑀫𑁂𑀯 𑀧𑀯𑁂𑀲𑁂𑀲𑀺, 𑀓𑀺𑀜𑁆𑀘𑀺 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀺, 𑀲𑀓𑀝𑀲𑀢𑀫𑀢𑁆𑀢𑀁 𑀥𑀜𑁆𑀜𑀁 𑀯𑀺𑀦𑀝𑁆𑀞𑀁, 𑀢𑁂𑀦 𑀫𑁂 𑀫𑀳𑀸𑀲𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺. ‘‘𑀓𑀺𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀲𑁄𑀘𑀦𑁆𑀢𑀲𑁆𑀲 𑀦𑀝𑁆𑀞𑀁 𑀧𑀼𑀦𑀸𑀕𑀘𑁆𑀙𑀢𑀻’’𑀢𑀺. ‘‘𑀦𑁄 𑀳𑁂𑀢𑀁 𑀪𑁄 𑀕𑁄𑀢𑀫𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑁄𑀘𑀲𑀺, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀥𑀦𑀥𑀜𑁆𑀜𑀁 𑀦𑀸𑀫 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀦𑀲𑁆𑀲𑀦𑀓𑀸𑀮𑁂 𑀦𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀲𑀗𑁆𑀔𑀸𑀭𑀕𑀢𑀁 𑀅𑀦𑀲𑁆𑀲𑀦𑀥𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀫𑀸 𑀘𑀺𑀦𑁆𑀢𑀬𑀻’’𑀢𑀺. 𑀇𑀢𑀺 𑀦𑀁 𑀲𑀢𑁆𑀣𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀢𑀲𑁆𑀲 𑀲𑀧𑁆𑀧𑀸𑀬𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀓𑀸𑀫𑀲𑀼𑀢𑁆𑀢𑀁 (𑀲𑀼. 𑀦𑀺. 𑁭𑁭𑁨 𑀆𑀤𑀬𑁄) 𑀓𑀣𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 ¶ 𑀲𑁄𑀘𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀢𑀁 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. ‘‘𑀲𑀢𑁆𑀣𑀸 𑀅𑀲𑀼𑀓𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀁 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀁 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺 𑀲𑀓𑀮𑀦𑀕𑀭𑀁 𑀅𑀜𑁆𑀜𑀸𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑀲𑀩𑀮𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀁 𑀓𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑁄 𑀳𑀼𑀢𑁆𑀯𑀸 𑀉𑀧𑀸𑀬𑁂𑀦𑁂𑀯 𑀢𑀲𑁆𑀲 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀁 ¶ 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀏𑀢𑀁 𑀦𑀺𑀲𑁆𑀲𑁄𑀓𑀫𑀓𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀚𑁂𑀝𑁆𑀞𑀓𑀲𑁆𑀲 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺, 𑀓𑀦𑀺𑀝𑁆𑀞𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁. 𑀅𑀧𑀭𑀪𑀸𑀕𑁂 𑀩𑁆𑀭𑀳𑁆𑀫𑀤𑀢𑁆𑀢𑁂 𑀓𑀸𑀮𑀓𑀢𑁂 𑀅𑀫𑀘𑁆𑀘𑀸 𑀚𑁂𑀝𑁆𑀞𑀓𑀲𑁆𑀲 𑀅𑀪𑀺𑀲𑁂𑀓𑀁 𑀧𑀝𑁆𑀞𑀧𑁂𑀲𑀼𑀁. 𑀲𑁄 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄, 𑀓𑀦𑀺𑀝𑁆𑀞𑀲𑁆𑀲 𑀫𑁂 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀦𑀺𑀝𑁆𑀞𑀲𑁆𑀲 𑀅𑀪𑀺𑀲𑁂𑀓𑁂 𑀓𑀢𑁂 ‘‘𑀦 𑀫𑁂 𑀇𑀲𑁆𑀲𑀭𑀺𑀬𑁂𑀦𑀢𑁆𑀣𑁄’’𑀢𑀺 𑀉𑀧𑀭𑀚𑁆𑀚𑀸𑀤𑀻𑀦𑀺𑀧𑀺 𑀦 𑀇𑀘𑁆𑀙𑀺. ‘‘𑀢𑁂𑀦 𑀳𑀺 𑀲𑀸𑀤𑀽𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀦 𑀫𑁂 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀺𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀩𑀸𑀭𑀸𑀡𑀲𑀺𑀢𑁄 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀲𑁂𑀝𑁆𑀞𑀺𑀓𑀼𑀮𑀁 𑀦𑀺𑀲𑁆𑀲𑀸𑀬 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀲𑀺. 𑀢𑁂 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀪𑀸𑀯𑀁 𑀜𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦𑀸𑀤𑀁𑀲𑀼, 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦𑁂𑀯 𑀢𑀁 𑀧𑀭𑀺𑀳𑀭𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀭𑀸𑀚𑀓𑀫𑁆𑀫𑀺𑀓𑀸 𑀔𑁂𑀢𑁆𑀢𑀧𑁆𑀧𑀫𑀸𑀡𑀕𑁆𑀕𑀳𑀡𑀢𑁆𑀣𑀸𑀬 𑀢𑀁 𑀕𑀸𑀫𑀁 𑀅𑀕𑀫𑀁𑀲𑀼. 𑀲𑁂𑀝𑁆𑀞𑀺 𑀭𑀸𑀚𑀓𑀼𑀫𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀸𑀫𑀺, 𑀫𑀬𑀁 𑀢𑀼𑀫𑁆𑀳𑁂 𑀧𑁄𑀲𑁂𑀫, 𑀓𑀦𑀺𑀝𑁆𑀞𑀪𑀸𑀢𑀺𑀓𑀲𑁆𑀲 𑀧𑀡𑁆𑀡𑀁 𑀧𑁂𑀲𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀩𑀮𑀺𑀁 𑀳𑀸𑀭𑁂𑀣𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀅𑀲𑀼𑀓𑀲𑁂𑀝𑁆𑀞𑀺𑀓𑀼𑀮𑀁 𑀦𑀸𑀫 𑀉𑀧𑀦𑀺𑀲𑁆𑀲𑀸𑀬 𑀯𑀲𑀸𑀫𑀺, 𑀫𑀁 𑀦𑀺𑀲𑁆𑀲𑀸𑀬 𑀏𑀢𑁂𑀲𑀁 𑀩𑀮𑀺𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀧𑀡𑁆𑀡𑀁 𑀧𑁂𑀲𑁂𑀲𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀣𑀸 𑀓𑀸𑀭𑁂𑀲𑀺.

𑀅𑀣 𑀦𑀁 𑀲𑀓𑀮𑀕𑀸𑀫𑀯𑀸𑀲𑀺𑀦𑁄𑀧𑀺 𑀚𑀦𑀧𑀤𑀯𑀸𑀲𑀺𑀦𑁄𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀬𑀁 𑀢𑀼𑀫𑁆𑀳𑀸𑀓𑀜𑁆𑀜𑁂𑀯 𑀩𑀮𑀺𑀁 𑀤𑀲𑁆𑀲𑀸𑀫, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀼𑀗𑁆𑀓𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀧𑀡𑁆𑀡𑀁 𑀧𑁂𑀲𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀢𑀢𑁄 ¶ 𑀧𑀝𑁆𑀞𑀸𑀬 𑀢𑁂 𑀢𑀲𑁆𑀲𑁂𑀯 𑀩𑀮𑀺𑀁 𑀅𑀤𑀁𑀲𑀼. 𑀅𑀣𑀲𑁆𑀲 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀅𑀳𑁄𑀲𑀺, 𑀢𑁂𑀦 𑀲𑀤𑁆𑀥𑀺𑀜𑁆𑀜𑁂𑀯𑀲𑁆𑀲 𑀢𑀡𑁆𑀳𑀸𑀧𑀺 𑀫𑀳𑀢𑀻 𑀚𑀸𑀢𑀸. 𑀲𑁄 𑀅𑀧𑀭𑀪𑀸𑀕𑁂𑀧𑀺 𑀲𑀩𑁆𑀩𑀁 𑀚𑀦𑀧𑀤𑀁 𑀬𑀸𑀘𑀺, 𑀉𑀧𑀟𑁆𑀠𑀭𑀚𑁆𑀚𑀁 𑀬𑀸𑀘𑀺, 𑀓𑀦𑀺𑀝𑁆𑀞𑁄𑀧𑀺 𑀢𑀲𑁆𑀲 𑀅𑀤𑀸𑀲𑀺𑀬𑁂𑀯. 𑀲𑁄 𑀢𑀡𑁆𑀳𑀸𑀬 𑀯𑀟𑁆𑀠𑀫𑀸𑀦𑀸𑀬 𑀉𑀧𑀟𑁆𑀠𑀭𑀚𑁆𑀚𑁂𑀦𑀧𑀺 𑀅𑀲𑀦𑁆𑀢𑀼𑀝𑁆𑀞𑁄 ‘‘𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀚𑀦𑀧𑀤𑀧𑀭𑀺𑀯𑀼𑀢𑁄 𑀢𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀩𑀳𑀺𑀦𑀕𑀭𑁂 𑀞𑀢𑁆𑀯𑀸 ‘‘𑀭𑀚𑁆𑀚𑀁 𑀯𑀸 𑀫𑁂 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀓𑀦𑀺𑀝𑁆𑀞𑀲𑁆𑀲 𑀧𑀡𑁆𑀡𑀁 𑀧𑀳𑀺𑀡𑀺. 𑀓𑀦𑀺𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑀸𑀮𑁄 𑀧𑀼𑀩𑁆𑀩𑁂 𑀭𑀚𑁆𑀚𑀫𑁆𑀧𑀺 𑀉𑀧𑀭𑀚𑁆𑀚𑀸𑀤𑀻𑀦𑀺𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 ‘𑀬𑀼𑀤𑁆𑀥𑁂𑀦 𑀕𑀡𑁆𑀳𑀸𑀫𑀻’𑀢𑀺 𑀯𑀤𑀢𑀺, 𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑀁 𑀬𑀼𑀤𑁆𑀥𑁂𑀦 𑀫𑀸𑀭𑁂𑀲𑁆𑀲𑀸𑀫𑀺, 𑀕𑀭𑀳𑀸 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀭𑀚𑁆𑀚𑁂𑀦𑀸’’𑀢𑀺. 𑀅𑀣𑀲𑁆𑀲 ‘‘𑀅𑀮𑀁 𑀬𑀼𑀤𑁆𑀥𑁂𑀦, 𑀭𑀚𑁆𑀚𑀁 𑀕𑀡𑁆𑀳𑀢𑀽’’𑀢𑀺 𑀧𑁂𑀲𑁂𑀲𑀺. 𑀲𑁄 𑀭𑀚𑁆𑀚𑀁 𑀕𑀡𑁆𑀳𑀺𑀢𑁆𑀯𑀸 𑀓𑀦𑀺𑀝𑁆𑀞𑀲𑁆𑀲 𑀉𑀧𑀭𑀚𑁆𑀚𑀁 𑀤𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀢𑀡𑁆𑀳𑀸𑀯𑀲𑀺𑀓𑁄 𑀳𑀼𑀢𑁆𑀯𑀸 𑀏𑀓𑁂𑀦 𑀭𑀚𑁆𑀚𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀤𑁆𑀯𑁂 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀧𑀢𑁆𑀣𑁂𑀢𑁆𑀯𑀸 ¶ 𑀢𑀡𑁆𑀳𑀸𑀬 𑀓𑁄𑀝𑀺𑀁 𑀦𑀸𑀤𑁆𑀤𑀲.

𑀢𑀤𑀸 ¶ 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀓𑁂 𑀦𑀼 𑀔𑁄 𑀮𑁄𑀓𑁂 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑀺, 𑀓𑁂 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀓𑁂 𑀢𑀡𑁆𑀳𑀸𑀯𑀲𑀺𑀓𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀢𑀡𑁆𑀳𑀸𑀯𑀲𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀩𑀸𑀮𑁄 𑀩𑀸𑀭𑀸𑀡𑀲𑀺𑀭𑀚𑁆𑀚𑁂𑀦𑀧𑀺 𑀦 𑀢𑀼𑀲𑁆𑀲𑀢𑀺, 𑀅𑀳𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀸𑀡𑀯𑀓𑀯𑁂𑀲𑁂𑀦 𑀭𑀸𑀚𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀏𑀓𑁄 𑀉𑀧𑀸𑀬𑀓𑀼𑀲𑀮𑁄 𑀫𑀸𑀡𑀯𑁄 𑀤𑁆𑀯𑀸𑀭𑁂 𑀞𑀺𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀢𑁆𑀯𑀸 ‘‘𑀧𑀯𑀺𑀲𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀚𑀬𑀸𑀧𑁂𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚 𑀢𑀼𑀫𑁆𑀳𑀸𑀓𑀁 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀭𑀳𑁄 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀆𑀳. 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 𑀢𑀸𑀯𑀤𑁂𑀯 𑀫𑀦𑀼𑀲𑁆𑀲𑀸 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀅𑀣 𑀦𑀁 𑀫𑀸𑀡𑀯𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀨𑀻𑀢𑀸𑀦𑀺 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸𑀦𑀺 𑀲𑀫𑁆𑀧𑀦𑁆𑀦𑀩𑀮𑀯𑀸𑀳𑀦𑀸𑀦𑀺 𑀢𑀻𑀡𑀺 𑀦𑀕𑀭𑀸𑀦𑀺 𑀧𑀲𑁆𑀲𑀸𑀫𑀺, 𑀅𑀳𑀁 𑀢𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀺, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀲𑀻𑀖𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸𑀦𑀼𑀪𑀸𑀯𑁂𑀦 ‘‘𑀓𑁄 𑀯𑀸 𑀢𑁆𑀯𑀁, 𑀓𑀼𑀢𑁄 𑀯𑀸 𑀆𑀕𑀢𑁄, 𑀓𑀺𑀁 𑀯𑀸 𑀢𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀦 𑀧𑀼𑀘𑁆𑀙𑀺. 𑀲𑁄𑀧𑀺 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀫𑁂𑀯 𑀅𑀕𑀫𑀸𑀲𑀺.

𑀭𑀸𑀚𑀸 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀓𑁄 𑀫𑀸𑀡𑀯𑁄 ‘𑀅𑀫𑁆𑀳𑀸𑀓𑀁 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’𑀢𑀺 𑀆𑀳, 𑀢𑀁 𑀧𑀓𑁆𑀓𑁄𑀲𑀣, 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 ¶ 𑀩𑀮𑀓𑀸𑀬𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀣, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀲𑀓𑁆𑀓𑀸𑀭𑁄 𑀯𑀸 𑀓𑀢𑁄, 𑀦𑀺𑀯𑀸𑀲𑀝𑁆𑀞𑀸𑀦𑀁 𑀯𑀸 𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦𑁂𑀯 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺𑀁, 𑀦 𑀦𑀺𑀯𑀸𑀲𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀁, 𑀕𑀘𑁆𑀙𑀣 𑀦𑀁 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀉𑀧𑀥𑀸𑀭𑁂𑀦𑁆𑀢𑀸 𑀦𑀁 𑀅𑀤𑀺𑀲𑁆𑀯𑀸 ‘‘𑀫𑀳𑀸𑀭𑀸𑀚, 𑀲𑀓𑀮𑀦𑀕𑀭𑁂 𑀫𑀸𑀡𑀯𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀤𑁄𑀫𑀦𑀲𑁆𑀲𑀚𑀸𑀢𑁄 ‘‘𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀦𑀝𑁆𑀞𑀁, 𑀫𑀳𑀦𑁆𑀢𑁂𑀦𑀫𑁆𑀳𑀺 𑀬𑀲𑁂𑀦 𑀧𑀭𑀺𑀳𑀻𑀦𑁄, ‘𑀦𑁂𑀯 𑀫𑁂 𑀧𑀭𑀺𑀩𑁆𑀩𑀬𑀁 𑀅𑀤𑀸𑀲𑀺, 𑀦 𑀘 𑀧𑀼𑀘𑁆𑀙𑀺 𑀦𑀺𑀯𑀸𑀲𑀝𑁆𑀞𑀸𑀦’𑀦𑁆𑀢𑀺 𑀫𑀬𑁆𑀳𑀁 𑀓𑀼𑀚𑁆𑀛𑀺𑀢𑁆𑀯𑀸 𑀫𑀸𑀡𑀯𑁄 ¶ 𑀅𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀢𑀡𑁆𑀳𑀸𑀯𑀲𑀺𑀓𑀲𑁆𑀲 𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀲𑀭𑀻𑀭𑁂 𑀧𑀭𑀺𑀟𑀬𑁆𑀳𑀦𑁆𑀢𑁂 𑀉𑀤𑀭𑀁 𑀔𑁄𑀪𑁂𑀢𑁆𑀯𑀸 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀉𑀤𑀧𑀸𑀤𑀺. 𑀏𑀓𑀁 𑀪𑀸𑀚𑀦𑀁 𑀧𑀯𑀺𑀲𑀢𑀺, 𑀏𑀓𑀁 𑀦𑀺𑀓𑁆𑀔𑀫𑀢𑀺, 𑀯𑁂𑀚𑁆𑀚𑀸 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀭𑀸𑀚𑀸 𑀓𑀺𑀮𑀫𑀢𑀺. 𑀅𑀣𑀲𑁆𑀲 𑀩𑁆𑀬𑀸𑀥𑀺𑀢𑀪𑀸𑀯𑁄 𑀲𑀓𑀮𑀦𑀕𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀓𑁆𑀓𑀲𑀺𑀮𑀢𑁄 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑁂 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄 𑀢𑀁 𑀭𑀜𑁆𑀜𑁄 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀏𑀓𑁄 𑀓𑀺𑀭 𑀢𑀭𑀼𑀡𑀫𑀸𑀡𑀯𑁄 𑀢𑀼𑀫𑁆𑀳𑁂 𑀢𑀺𑀓𑀺𑀘𑁆𑀙𑀺𑀢𑀼𑀁 𑀆𑀕𑀢𑁄’’𑀢𑀺 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 ‘‘𑀫𑀳𑀦𑁆𑀢𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀯𑁂𑀚𑁆𑀚𑀸𑀧𑀺 𑀫𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀺𑀁 𑀢𑀭𑀼𑀡𑀫𑀸𑀡𑀯𑁄 𑀲𑀓𑁆𑀔𑀺𑀲𑁆𑀲𑀢𑀺, 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣 𑀦’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀫𑀬𑁆𑀳𑀁 𑀯𑁂𑀚𑁆𑀚𑀓𑀫𑁆𑀫𑁂𑀦 𑀯𑁂𑀢𑀦𑀁 𑀦𑀢𑁆𑀣𑀺, 𑀅𑀳𑀁 𑀢𑀺𑀓𑀺𑀘𑁆𑀙𑀸𑀫𑀺, 𑀓𑁂𑀯𑀮𑀁 𑀪𑁂𑀲𑀚𑁆𑀚𑀫𑀽𑀮𑀫𑀢𑁆𑀢𑀁 𑀤𑁂𑀢𑀽’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 ¶ 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀫𑀸𑀡𑀯𑁄 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀅𑀳𑀁 𑀢𑁂 𑀢𑀺𑀓𑀺𑀘𑁆𑀙𑀸𑀫𑀺, 𑀅𑀧𑀺𑀘 𑀔𑁄 𑀧𑀦 𑀫𑁂 𑀭𑁄𑀕𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀸𑀳𑀻’’𑀢𑀺 𑀆𑀳. 𑀭𑀸𑀚𑀸 𑀳𑀭𑀸𑀬𑀫𑀸𑀦𑁄 ‘‘𑀓𑀺𑀁 𑀢𑁂 𑀲𑀫𑀼𑀝𑁆𑀞𑀸𑀦𑁂𑀦, 𑀪𑁂𑀲𑀚𑁆𑀚𑀁 𑀏𑀯 𑀓𑀭𑁄𑀳𑀻’’𑀢𑀺 𑀆𑀳. 𑀫𑀳𑀸𑀭𑀸𑀚, 𑀯𑁂𑀚𑁆𑀚𑀸 𑀦𑀸𑀫 ‘‘𑀅𑀬𑀁 𑀩𑁆𑀬𑀸𑀥𑀺 𑀇𑀫𑀁 𑀦𑀺𑀲𑁆𑀲𑀸𑀬 𑀲𑀫𑀼𑀝𑁆𑀞𑀺𑀢𑁄’’𑀢𑀺 𑀜𑀢𑁆𑀯𑀸 𑀅𑀦𑀼𑀘𑁆𑀙𑀯𑀺𑀓𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀻𑀢𑀺. 𑀭𑀸𑀚𑀸 ‘‘𑀲𑀸𑀥𑀼 𑀢𑀸𑀢𑀸’’𑀢𑀺 𑀲𑀫𑀼𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 ‘‘𑀏𑀓𑁂𑀦 𑀫𑀸𑀡𑀯𑁂𑀦 𑀆𑀕𑀦𑁆𑀢𑁆𑀯𑀸 𑀢𑀻𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀓𑀣𑁂𑀢𑁆𑀯𑀸 ‘‘𑀇𑀢𑀺 𑀫𑁂 𑀢𑀸𑀢, 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬 𑀩𑁆𑀬𑀸𑀥𑀺 𑀉𑀧𑁆𑀧𑀦𑁆𑀦𑁄, 𑀲𑀘𑁂 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑁄𑀲𑀺, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺 𑀆𑀳. 𑀓𑀺𑀁 𑀧𑀦 𑀫𑀳𑀸𑀭𑀸𑀚, 𑀲𑁄𑀘𑀦𑀸𑀬 𑀢𑀸𑀦𑀺 𑀦𑀕𑀭𑀸𑀦𑀺 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺? ‘‘𑀦 𑀲𑀓𑁆𑀓𑀸 𑀢𑀸𑀢𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑁄𑀘𑀲𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑀫𑁂𑀯 𑀳𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼𑀁 ¶ 𑀅𑀢𑁆𑀢𑀦𑁄 𑀓𑀸𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀳𑀸𑀬 𑀕𑀫𑀦𑀻𑀬𑀁 ¶ , 𑀘𑀢𑀽𑀲𑀼 𑀦𑀕𑀭𑁂𑀲𑀼 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸𑀧𑀺 𑀢𑁆𑀯𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦 𑀘𑀢𑀲𑁆𑀲𑁄 𑀪𑀢𑁆𑀢𑀧𑀸𑀢𑀺𑀬𑁄 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀦 𑀘𑀢𑀽𑀲𑀼 𑀲𑀬𑀦𑁂𑀲𑀼 𑀲𑀬𑀺𑀲𑁆𑀲𑀲𑀺, 𑀦 𑀘𑀢𑁆𑀢𑀸𑀭𑀺 𑀯𑀢𑁆𑀣𑀬𑀼𑀕𑀸𑀦𑀺 𑀅𑀘𑁆𑀙𑀸𑀤𑁂𑀲𑁆𑀲𑀲𑀺, 𑀢𑀡𑁆𑀳𑀸𑀯𑀲𑀺𑀓𑁂𑀦 𑀦𑀸𑀫 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀬𑀜𑁆𑀳𑀺 𑀢𑀡𑁆𑀳𑀸 𑀦𑀸𑀫 𑀯𑀟𑁆𑀠𑀫𑀸𑀦𑀸 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀘𑁆𑀘𑀺𑀢𑀼𑀁 𑀦 𑀤𑁂𑀢𑀻𑀢𑀺.

𑀇𑀢𑀺 𑀦𑀁 𑀫𑀳𑀸𑀲𑀢𑁆𑀢𑁄 𑀑𑀯𑀤𑀺𑀢𑁆𑀯𑀸 𑀅𑀣𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁭.

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑁩𑁮.

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀢𑀢𑁄 𑀦𑀁 𑀅𑀧𑀭𑀁 𑀓𑀸𑀫𑁂, 𑀖𑀫𑁆𑀫𑁂 𑀢𑀡𑁆𑀳𑀁𑀯 𑀯𑀺𑀦𑁆𑀤𑀢𑀺.

𑁩𑁯.

‘‘𑀕𑀯𑀁𑀯 𑀲𑀺𑀗𑁆𑀕𑀺𑀦𑁄 𑀲𑀺𑀗𑁆𑀕𑀁, 𑀯𑀟𑁆𑀠𑀫𑀸𑀦𑀲𑁆𑀲 𑀯𑀟𑁆𑀠𑀢𑀺;

𑀏𑀯𑀁 𑀫𑀦𑁆𑀤𑀲𑁆𑀲 𑀧𑁄𑀲𑀲𑁆𑀲, 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄;

𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀺𑀧𑀸𑀲𑀸 𑀘, 𑀯𑀟𑁆𑀠𑀫𑀸𑀦𑀲𑁆𑀲 𑀯𑀟𑁆𑀠𑀢𑀺.

𑁪𑁦.

‘‘𑀧𑀣𑀩𑁆𑀬𑀸 𑀲𑀸𑀮𑀺𑀬𑀯𑀓𑀁, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀤𑀢𑁆𑀯𑀸 𑀘 𑀦𑀸𑀮𑀫𑁂𑀓𑀲𑁆𑀲, 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀁 𑀘𑀭𑁂.

𑁪𑁧.

‘‘𑀭𑀸𑀚𑀸 𑀧𑀲𑀬𑁆𑀳 𑀧𑀣𑀯𑀺𑀁 𑀯𑀺𑀚𑀺𑀢𑁆𑀯𑀸, 𑀲𑀲𑀸𑀕𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀦𑁆𑀢𑁄;

𑀑𑀭𑀁 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀢𑁆𑀢𑀭𑀽𑀧𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀧𑀺 𑀧𑀢𑁆𑀣𑀬𑁂𑀣.

𑁪𑁨.

‘‘𑀬𑀸𑀯 ¶ 𑀅𑀦𑀼𑀲𑁆𑀲𑀭𑀁 𑀓𑀸𑀫𑁂, 𑀫𑀦𑀲𑀸 𑀢𑀺𑀢𑁆𑀢𑀺 𑀦𑀸𑀚𑁆𑀛𑀕𑀸;

𑀢𑀢𑁄 𑀦𑀺𑀯𑀢𑁆𑀢𑀸 𑀧𑀝𑀺𑀓𑁆𑀓𑀫𑁆𑀫 𑀤𑀺𑀲𑁆𑀯𑀸, 𑀢𑁂 𑀯𑁂 𑀲𑀼𑀢𑀺𑀢𑁆𑀢𑀸 𑀬𑁂 𑀧𑀜𑁆𑀜𑀸𑀬 𑀢𑀺𑀢𑁆𑀢𑀸.

𑁪𑁩.

‘‘𑀧𑀜𑁆𑀜𑀸𑀬 𑀢𑀺𑀢𑁆𑀢𑀺𑀦𑀁 𑀲𑁂𑀝𑁆𑀞𑀁, 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀺;

𑀧𑀜𑁆𑀜𑀸𑀬 𑀢𑀺𑀢𑁆𑀢𑀁 𑀧𑀼𑀭𑀺𑀲𑀁, 𑀢𑀡𑁆𑀳𑀸 𑀦 𑀓𑀼𑀭𑀼𑀢𑁂 𑀯𑀲𑀁.

𑁪𑁪.

‘‘𑀅𑀧𑀘𑀺𑀦𑁂𑀣𑁂𑀯 ¶ 𑀓𑀸𑀫𑀸𑀦𑀁, 𑀅𑀧𑁆𑀧𑀺𑀘𑁆𑀙𑀲𑁆𑀲 𑀅𑀮𑁄𑀮𑀼𑀧𑁄;

𑀲𑀫𑀼𑀤𑁆𑀤𑀫𑀢𑁆𑀢𑁄 𑀧𑀼𑀭𑀺𑀲𑁄, 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀺.

𑁪𑁫.

‘‘𑀭𑀣𑀓𑀸𑀭𑁄𑀯 𑀘𑀫𑁆𑀫𑀲𑁆𑀲, 𑀧𑀭𑀺𑀓𑀦𑁆𑀢𑀁 𑀉𑀧𑀸𑀳𑀦𑀁;

𑀬𑀁 ¶ 𑀬𑀁 𑀘𑀚𑀢𑀺 𑀓𑀸𑀫𑀸𑀦𑀁, 𑀢𑀁 𑀢𑀁 𑀲𑀫𑁆𑀧𑀚𑁆𑀚𑀢𑁂 𑀲𑀼𑀔𑀁;

𑀲𑀩𑁆𑀩𑀜𑁆𑀘𑁂 𑀲𑀼𑀔𑀫𑀺𑀘𑁆𑀙𑁂𑀬𑁆𑀬, 𑀲𑀩𑁆𑀩𑁂 𑀓𑀸𑀫𑁂 𑀧𑀭𑀺𑀘𑁆𑀘𑀚𑁂’’𑀢𑀺.

𑀢𑀢𑁆𑀣 𑀓𑀸𑀫𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀫𑁆𑀧𑀺 𑀓𑀺𑀮𑁂𑀲𑀓𑀸𑀫𑀫𑁆𑀧𑀺. 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀧𑀢𑁆𑀣𑀬𑀫𑀸𑀦𑀲𑁆𑀲. 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀻𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀁 𑀓𑀸𑀫𑀺𑀢𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺 𑀘𑁂, 𑀦𑀺𑀧𑁆𑀨𑀚𑁆𑀚𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀢𑀢𑁄 𑀦𑀁 𑀅𑀧𑀭𑀁 𑀓𑀸𑀫𑁂𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀭𑀦𑁆𑀢𑀺 𑀧𑀭𑀪𑀸𑀕𑀤𑀻𑀧𑀦𑀁. 𑀓𑀸𑀫𑁂𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲 𑀢𑀁 𑀓𑀸𑀫𑀺𑀢𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺, 𑀢𑀲𑁆𑀫𑀺𑀁 𑀲𑀫𑀺𑀤𑁆𑀥𑁂 𑀢𑀢𑁄 𑀧𑀭𑀁 𑀲𑁄 𑀧𑀼𑀕𑁆𑀕𑀮𑁄 𑀓𑀸𑀫𑀬𑀫𑀸𑀦𑁄 𑀬𑀣𑀸 𑀦𑀸𑀫 𑀖𑀫𑁆𑀫𑁂 𑀕𑀺𑀫𑁆𑀳𑀓𑀸𑀮𑁂 𑀯𑀸𑀢𑀸𑀢𑀧𑁂𑀦 𑀓𑀺𑀮𑀦𑁆𑀢𑁄 𑀢𑀡𑁆𑀳𑀁 𑀯𑀺𑀦𑁆𑀤𑀢𑀺, 𑀧𑀸𑀦𑀻𑀬𑀧𑀺𑀧𑀸𑀲𑀁 𑀧𑀝𑀺𑀮𑀪𑀢𑀺, 𑀏𑀯𑀁 𑀪𑀺𑀬𑁆𑀬𑁄 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀢𑁂 𑀓𑀸𑀫𑁂 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀭𑀽𑀧𑀢𑀡𑁆𑀳𑀸𑀤𑀺𑀓𑀸 𑀢𑀡𑁆𑀳𑀸 𑀘𑀲𑁆𑀲 𑀯𑀟𑁆𑀠𑀢𑀺𑀬𑁂𑀯𑀸𑀢𑀺. 𑀕𑀯𑀁𑀯𑀸𑀢𑀺 𑀕𑁄𑀭𑀽𑀧𑀲𑁆𑀲 𑀯𑀺𑀬. 𑀲𑀺𑀗𑁆𑀕𑀺𑀦𑁄𑀢𑀺 𑀫𑀢𑁆𑀣𑀓𑀁 𑀧𑀤𑀸𑀮𑁂𑀢𑁆𑀯𑀸 𑀉𑀝𑁆𑀞𑀺𑀢𑀲𑀺𑀗𑁆𑀕𑀲𑁆𑀲. 𑀫𑀦𑁆𑀤𑀲𑁆𑀲𑀸𑀢𑀺 𑀫𑀦𑁆𑀤𑀧𑀜𑁆𑀜𑀲𑁆𑀲. 𑀩𑀸𑀮𑀲𑁆𑀲𑀸𑀢𑀺 𑀩𑀸𑀮𑀥𑀫𑁆𑀫𑁂 𑀬𑀼𑀢𑁆𑀢𑀲𑁆𑀲. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀘𑁆𑀙𑀓𑀲𑁆𑀲 𑀯𑀟𑁆𑀠𑀦𑁆𑀢𑀲𑁆𑀲 𑀲𑀭𑀻𑀭𑁂𑀦𑁂𑀯 𑀲𑀤𑁆𑀥𑀺𑀁 𑀲𑀺𑀗𑁆𑀕𑀁 𑀯𑀟𑁆𑀠𑀢𑀺, 𑀏𑀯𑀁 𑀅𑀦𑁆𑀥𑀩𑀸𑀮𑀲𑁆𑀲𑀧𑀺 𑀅𑀧𑁆𑀧𑀢𑁆𑀢𑀓𑀸𑀫𑀢𑀡𑁆𑀳𑀸 𑀘 𑀧𑀢𑁆𑀢𑀓𑀸𑀫𑀧𑀺𑀧𑀸𑀲𑀸 𑀘 𑀅𑀧𑀭𑀸𑀧𑀭𑀁 𑀯𑀟𑁆𑀠𑀢𑀻𑀢𑀺.

𑀲𑀸𑀮𑀺𑀬𑀯𑀓𑀦𑁆𑀢𑀺 𑀲𑀸𑀮𑀺𑀔𑁂𑀢𑁆𑀢𑀬𑀯𑀔𑁂𑀢𑁆𑀢𑀁. 𑀏𑀢𑁂𑀦 𑀲𑀸𑀮𑀺𑀬𑀯𑀸𑀤𑀺𑀓𑀁 𑀲𑀩𑁆𑀩𑀁 𑀥𑀜𑁆𑀜𑀁 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑀧𑀤𑁂𑀦 𑀲𑀩𑁆𑀩𑀁 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀁 𑀤𑀲𑁆𑀲𑁂𑀢𑀺. 𑀧𑀞𑀫𑀧𑀤𑁂𑀦 𑀯𑀸 𑀲𑀩𑁆𑀩𑀁 𑀅𑀯𑀺𑀜𑁆𑀜𑀸𑀡𑀓𑀁, 𑀇𑀢𑀭𑁂𑀦 𑀲𑀯𑀺𑀜𑁆𑀜𑀸𑀡𑀓𑀁. 𑀤𑀢𑁆𑀯𑀸 𑀘𑀸𑀢𑀺 𑀤𑀢𑁆𑀯𑀸𑀧𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀺𑀝𑁆𑀞𑀦𑁆𑀢𑀼 𑀢𑀻𑀡𑀺 𑀭𑀚𑁆𑀚𑀸𑀦𑀺, 𑀲𑀘𑁂 𑀲𑁄 𑀫𑀸𑀡𑀯𑁄 𑀅𑀜𑁆𑀜𑀁 𑀯𑀸 𑀲𑀓𑀮𑀫𑁆𑀧𑀺 𑀧𑀣𑀯𑀺𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀭𑀢𑀦𑀧𑀽𑀭𑀁 𑀓𑀲𑁆𑀲𑀘𑀺 𑀤𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀇𑀤𑀫𑁆𑀧𑀺 𑀏𑀢𑁆𑀢𑀓𑀁 𑀯𑀢𑁆𑀣𑀼 𑀏𑀓𑀲𑁆𑀲𑁂𑀯 𑀅𑀧𑀭𑀺𑀬𑀦𑁆𑀢𑀁, 𑀏𑀯𑀁 𑀤𑀼𑀧𑁆𑀧𑀽𑀭𑀸 𑀏𑀲𑀸 𑀢𑀡𑁆𑀳𑀸 𑀦𑀸𑀫. 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀁 𑀘𑀭𑁂𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀧𑀼𑀭𑀺𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀅𑀳𑀼𑀢𑁆𑀯𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀻𑀦𑀺 𑀧𑀽𑀭𑁂𑀦𑁆𑀢𑁄 𑀘𑀭𑁂𑀬𑁆𑀬.

𑀑𑀭𑀦𑁆𑀢𑀺 ¶ ¶ 𑀑𑀭𑀺𑀫𑀓𑁄𑀝𑁆𑀞𑀸𑀲𑀁 𑀧𑀢𑁆𑀯𑀸 𑀢𑁂𑀦 𑀅𑀢𑀺𑀢𑁆𑀢𑀭𑀽𑀧𑁄 𑀧𑀼𑀦 𑀲𑀫𑀼𑀤𑁆𑀤𑀧𑀸𑀭𑀫𑁆𑀧𑀺 𑀧𑀢𑁆𑀣𑀬𑁂𑀣. 𑀏𑀯𑀁 𑀢𑀡𑁆𑀳𑀸𑀯𑀲𑀺𑀓𑀲𑀢𑁆𑀢𑀸 𑀦𑀸𑀫 𑀤𑀼𑀧𑁆𑀧𑀽𑀭𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀯𑀸𑀢𑀺 𑀅𑀦𑀺𑀬𑀸𑀫𑀺𑀢𑀧𑀭𑀺𑀘𑁆𑀙𑁂𑀤𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀦𑀸𑀚𑁆𑀛𑀕𑀸𑀢𑀺 𑀦 𑀯𑀺𑀦𑁆𑀤𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀧𑀭𑀺𑀬𑀦𑁆𑀢𑁂𑀧𑀺 𑀓𑀸𑀫𑁂 ¶ 𑀫𑀦𑀲𑀸 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀺𑀢𑁆𑀢𑀺𑀁 𑀦 𑀯𑀺𑀦𑁆𑀤𑀢𑀺, 𑀧𑀢𑁆𑀢𑀼𑀓𑀸𑀫𑁄𑀯 𑀳𑁄𑀢𑀺, 𑀏𑀯𑀁 𑀓𑀸𑀫𑁂𑀲𑀼 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸 𑀯𑀟𑁆𑀠𑀢𑁂𑀯. 𑀢𑀢𑁄 𑀦𑀺𑀯𑀢𑁆𑀢𑀸𑀢𑀺 𑀢𑀢𑁄 𑀧𑀦 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀢𑁄 𑀘𑀺𑀢𑁆𑀢𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀸𑀬𑁂𑀦 𑀧𑀝𑀺𑀓𑁆𑀓𑀫𑁆𑀫 𑀜𑀸𑀡𑁂𑀦 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀬𑁂 𑀧𑀜𑁆𑀜𑀸𑀬 𑀢𑀺𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀸, 𑀢𑁂 𑀢𑀺𑀢𑁆𑀢𑀸 𑀦𑀸𑀫.

𑀧𑀜𑁆𑀜𑀸𑀬 𑀢𑀺𑀢𑁆𑀢𑀺𑀦𑀁 𑀲𑁂𑀝𑁆𑀞𑀦𑁆𑀢𑀺 𑀧𑀜𑁆𑀜𑀸𑀬 𑀢𑀺𑀢𑁆𑀢𑀻𑀦𑀁 𑀅𑀬𑀁 𑀧𑀭𑀺𑀧𑀼𑀡𑁆𑀡𑀲𑁂𑀝𑁆𑀞𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀻𑀢𑀺 ‘‘𑀦 𑀳𑀻’’𑀢𑀺𑀧𑀺 𑀧𑀸𑀞𑁄. 𑀬𑀲𑁆𑀫𑀸 𑀧𑀜𑁆𑀜𑀸𑀬 𑀢𑀺𑀢𑁆𑀢𑁄 𑀧𑀼𑀭𑀺𑀲𑁄 𑀓𑀸𑀫𑁂𑀳𑀺 𑀦 𑀧𑀭𑀺𑀟𑀬𑁆𑀳𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑀼𑀭𑀼𑀢𑁂 𑀯𑀲𑀦𑁆𑀢𑀺 𑀢𑀸𑀤𑀺𑀲𑀜𑁆𑀳𑀺 𑀧𑀼𑀭𑀺𑀲𑀁 𑀢𑀡𑁆𑀳𑀸 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁆𑀯𑁂𑀯 𑀧𑀦 𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀲𑀭𑀪𑀗𑁆𑀕𑀫𑀸𑀡𑀯𑁄 𑀯𑀺𑀬 𑀘 𑀅𑀟𑁆𑀠𑀫𑀸𑀲𑀓𑀭𑀸𑀚𑀸 𑀯𑀺𑀬 𑀘 𑀢𑀡𑁆𑀳𑀸𑀯𑀲𑁂 𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀘𑀺𑀦𑁂𑀣𑁂𑀯𑀸𑀢𑀺 𑀯𑀺𑀤𑁆𑀥𑀁𑀲𑁂𑀣𑁂𑀯. 𑀲𑀫𑀼𑀤𑁆𑀤𑀫𑀢𑁆𑀢𑁄𑀢𑀺 𑀫𑀳𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀼𑀤𑁆𑀤𑀧𑁆𑀧𑀫𑀸𑀡𑁄. 𑀲𑁄 𑀫𑀳𑀦𑁆𑀢𑁂𑀦 𑀅𑀕𑁆𑀕𑀺𑀦𑀸𑀧𑀺 𑀲𑀫𑀼𑀤𑁆𑀤𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁂𑀳𑀺 𑀦 𑀢𑀧𑁆𑀧𑀢𑀺 𑀦 𑀟𑀬𑁆𑀳𑀢𑀺.

𑀭𑀣𑀓𑀸𑀭𑁄𑀢𑀺 𑀘𑀫𑁆𑀫𑀓𑀸𑀭𑁄. 𑀧𑀭𑀺𑀓𑀦𑁆𑀢𑀦𑁆𑀢𑀺 𑀧𑀭𑀺𑀓𑀦𑁆𑀢𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀘𑀫𑁆𑀫𑀓𑀸𑀭𑁄 𑀉𑀧𑀸𑀳𑀦𑀁 𑀧𑀭𑀺𑀓𑀦𑁆𑀢𑀦𑁆𑀢𑁄 𑀬𑀁 𑀬𑀁 𑀘𑀫𑁆𑀫𑀲𑁆𑀲 𑀅𑀕𑀬𑁆𑀳𑀽𑀧𑀕𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀁 𑀢𑀁 𑀘𑀚𑀺𑀢𑁆𑀯𑀸 𑀉𑀧𑀸𑀳𑀦𑀁 𑀓𑀢𑁆𑀯𑀸 𑀉𑀧𑀸𑀳𑀦𑀫𑀽𑀮𑀁 𑀮𑀪𑀺𑀢𑁆𑀯𑀸 𑀲𑀼𑀔𑀺𑀢𑁄 𑀳𑁄𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀘𑀫𑁆𑀫𑀓𑀸𑀭𑀲𑀢𑁆𑀣𑀲𑀤𑀺𑀲𑀸𑀬 𑀧𑀜𑁆𑀜𑀸𑀬 𑀓𑀦𑁆𑀢𑀦𑁆𑀢𑁄 𑀬𑀁 𑀬𑀁 𑀑𑀥𑀺𑀁 𑀓𑀸𑀫𑀸𑀦𑀁 𑀘𑀚𑀢𑀺, 𑀢𑁂𑀦 𑀢𑁂𑀦𑀲𑁆𑀲 𑀓𑀸𑀫𑁄𑀥𑀺𑀦𑀸 𑀭𑀳𑀺𑀢𑀁 𑀢𑀁 𑀢𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀜𑁆𑀘 𑀲𑀼𑀔𑀁 𑀲𑀫𑁆𑀧𑀚𑁆𑀚𑀢𑀺 𑀯𑀺𑀕𑀢𑀤𑀭𑀣𑀁, 𑀲𑀘𑁂 𑀧𑀦 𑀲𑀩𑁆𑀩𑀫𑁆𑀧𑀺 𑀓𑀸𑀬𑀓𑀫𑁆𑀫𑀸𑀤𑀺𑀲𑀼𑀔𑀁 𑀯𑀺𑀕𑀢𑀧𑀭𑀺𑀴𑀸𑀳𑀫𑁂𑀯 𑀇𑀘𑁆𑀙𑁂𑀬𑁆𑀬, 𑀓𑀲𑀺𑀡𑀁 𑀪𑀸𑀯𑁂𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑁂 𑀓𑀸𑀫𑁂 𑀧𑀭𑀺𑀘𑁆𑀘𑀚𑁂𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀇𑀫𑀁 𑀕𑀸𑀣𑀁 𑀓𑀣𑁂𑀦𑁆𑀢𑀲𑁆𑀲 𑀭𑀜𑁆𑀜𑁄 𑀲𑁂𑀢𑀘𑁆𑀙𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀑𑀤𑀸𑀢𑀓𑀲𑀺𑀡𑀚𑁆𑀛𑀸𑀦𑀁 𑀉𑀤𑀧𑀸𑀤𑀺, 𑀭𑀸𑀚𑀸𑀧𑀺 𑀅𑀭𑁄𑀕𑁄 𑀅𑀳𑁄𑀲𑀺. 𑀲𑁄 𑀢𑀼𑀝𑁆𑀞𑁄 𑀲𑀬𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀯𑁂𑀚𑁆𑀚𑀸 𑀫𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, ¶ 𑀧𑀡𑁆𑀟𑀺𑀢𑀫𑀸𑀡𑀯𑁄 𑀧𑀦 𑀅𑀢𑁆𑀢𑀦𑁄 𑀜𑀸𑀡𑁄𑀲𑀥𑁂𑀦 𑀫𑀁 𑀦𑀺𑀭𑁄𑀕𑀁 𑀅𑀓𑀸𑀲𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀅𑀝𑁆𑀞 ¶ 𑀢𑁂 𑀪𑀸𑀲𑀺𑀢𑀸 𑀕𑀸𑀣𑀸, 𑀲𑀩𑁆𑀩𑀸 𑀳𑁄𑀦𑁆𑀢𑀺 𑀲𑀳𑀲𑁆𑀲𑀺𑀬𑀸;

𑀧𑀝𑀺𑀕𑀡𑁆𑀳 𑀫𑀳𑀸𑀩𑁆𑀭𑀳𑁆𑀫𑁂, 𑀲𑀸𑀥𑁂𑀢𑀁 𑀢𑀯 𑀪𑀸𑀲𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀅𑀝𑁆𑀞𑀸𑀢𑀺 𑀤𑀼𑀢𑀺𑀬𑀕𑀸𑀣𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀸𑀫𑀸𑀤𑀻𑀦𑀯𑀲𑀁𑀬𑀼𑀢𑁆𑀢𑀸 𑀅𑀝𑁆𑀞. 𑀲𑀳𑀲𑁆𑀲𑀺𑀬𑀸𑀢𑀺 𑀲𑀳𑀲𑁆𑀲𑀸𑀭𑀳𑀸. 𑀧𑀝𑀺𑀕𑀡𑁆𑀳𑀸𑀢𑀺 𑀅𑀝𑁆𑀞 𑀲𑀳𑀲𑁆𑀲𑀸𑀦𑀺 𑀕𑀡𑁆𑀳. 𑀲𑀸𑀥𑁂𑀢𑀁 𑀢𑀯 𑀪𑀸𑀲𑀺𑀢𑀦𑁆𑀢𑀺 𑀲𑀸𑀥𑀼 𑀏𑀢𑀁 𑀢𑀯 𑀯𑀘𑀦𑀁.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀏𑀓𑀸𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁪𑁭.

‘‘𑀦 𑀫𑁂 𑀅𑀢𑁆𑀣𑁄 𑀲𑀳𑀲𑁆𑀲𑁂𑀳𑀺, 𑀲𑀢𑁂𑀳𑀺 𑀦𑀳𑀼𑀢𑁂𑀳𑀺 𑀯𑀸;

𑀧𑀘𑁆𑀙𑀺𑀫𑀁 𑀪𑀸𑀲𑀢𑁄 𑀕𑀸𑀣𑀁, 𑀓𑀸𑀫𑁂 𑀫𑁂 𑀦 𑀭𑀢𑁄 𑀫𑀦𑁄’’𑀢𑀺.

𑀢𑀢𑁆𑀣 𑀧𑀘𑁆𑀙𑀺𑀫𑀦𑁆𑀢𑀺 ‘‘𑀭𑀣𑀓𑀸𑀭𑁄𑀯 𑀘𑀫𑁆𑀫𑀲𑁆𑀲𑀸’’𑀢𑀺 𑀕𑀸𑀣𑀁. 𑀓𑀸𑀫𑁂 𑀫𑁂 𑀦 𑀭𑀢𑁄 𑀫𑀦𑁄𑀢𑀺 𑀇𑀫𑀁 𑀕𑀸𑀣𑀁 𑀪𑀸𑀲𑀫𑀸𑀦𑀲𑁆𑀲𑁂𑀯 𑀫𑀫 𑀯𑀢𑁆𑀣𑀼𑀓𑀸𑀫𑁂𑀧𑀺 𑀓𑀺𑀮𑁂𑀲𑀓𑀸𑀫𑁂𑀧𑀺 𑀫𑀦𑁄 𑀦𑀸𑀪𑀺𑀭𑀫𑀸𑀫𑀺. 𑀅𑀳𑀜𑁆𑀳𑀺 𑀇𑀫𑀁 𑀕𑀸𑀣𑀁 𑀪𑀸𑀲𑀫𑀸𑀦𑁄 𑀅𑀢𑁆𑀢𑀦𑁄𑀯 𑀥𑀫𑁆𑀫𑀤𑁂𑀲𑀦𑀸𑀬 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺𑀁, 𑀫𑀳𑀸𑀭𑀸𑀚𑀸𑀢𑀺.

𑀭𑀸𑀚𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀢𑀼𑀲𑁆𑀲𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀡𑁆𑀡𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁪𑁮.

‘‘𑀪𑀤𑁆𑀭𑀓𑁄 𑀯𑀢𑀸𑀬𑀁 𑀫𑀸𑀡𑀯𑀓𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀬𑁄 𑀇𑀫𑀁 𑀢𑀡𑁆𑀳𑀁 𑀤𑀼𑀓𑁆𑀔𑀚𑀦𑀦𑀺𑀁, 𑀧𑀭𑀺𑀚𑀸𑀦𑀸𑀢𑀺 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 𑀤𑀼𑀓𑁆𑀔𑀚𑀦𑀦𑀺𑀦𑁆𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀚𑀦𑀦𑀺𑀁. 𑀧𑀭𑀺𑀚𑀸𑀦𑀸𑀢𑀻𑀢𑀺 𑀧𑀭𑀺𑀚𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺, 𑀮𑀼𑀜𑁆𑀘𑀺𑀢𑁆𑀯𑀸 𑀦𑀻𑀳𑀭𑀻𑀢𑀺 𑀩𑁄𑀥𑀺𑀲𑀢𑁆𑀢𑀁 𑀯𑀡𑁆𑀡𑁂𑀦𑁆𑀢𑁄 𑀏𑀯𑀫𑀸𑀳.

𑀩𑁄𑀥𑀺𑀲𑀢𑁆𑀢𑁄𑀧𑀺 ‘‘𑀫𑀳𑀸𑀭𑀸𑀚, 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀘𑀭𑀸’’𑀢𑀺 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀆𑀓𑀸𑀲𑁂𑀦 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀸𑀳𑀁 𑀏𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀺𑀲𑁆𑀲𑁄𑀓𑀫𑀓𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀫𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁬𑁮] 𑁫. 𑀚𑀦𑀲𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸

𑀤𑀲 ¶ ¶ 𑀔𑀮𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀑𑀯𑀸𑀤𑀢𑁆𑀣𑀸𑀬 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀭𑀸𑀚𑀸 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑁄 𑀓𑀺𑀮𑁂𑀲𑀲𑀼𑀔𑀦𑀺𑀲𑁆𑀲𑀺𑀢𑁄 𑀯𑀺𑀦𑀺𑀘𑁆𑀙𑀬𑀫𑁆𑀧𑀺 𑀦 𑀧𑀝𑁆𑀞𑀧𑁂𑀲𑀺, 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀫𑁆𑀧𑀺 𑀧𑀫𑀚𑁆𑀚𑀺. 𑀲𑁄 𑀏𑀓𑀤𑀺𑀯𑀲𑁂 𑀤𑀲𑀩𑀮𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀭𑀣𑀯𑀭𑀫𑀸𑀭𑀼𑀬𑁆𑀳 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀫𑀳𑀸𑀭𑀸𑀚 𑀘𑀺𑀭𑀁 𑀦 𑀧𑀜𑁆𑀜𑀸𑀬𑀲𑀻’’𑀢𑀺 𑀯𑀢𑁆𑀯𑀸 ‘‘𑀩𑀳𑀼𑀓𑀺𑀘𑁆𑀘𑀢𑀸𑀬 𑀦𑁄 𑀪𑀦𑁆𑀢𑁂 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀲𑁆𑀲 𑀑𑀓𑀸𑀲𑁄 𑀦 𑀚𑀸𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚, 𑀫𑀸𑀤𑀺𑀲𑁂 𑀦𑀸𑀫 𑀑𑀯𑀸𑀤𑀤𑀸𑀬𑀓𑁂 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂 𑀥𑀼𑀭𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂 𑀅𑀬𑀼𑀢𑁆𑀢𑀁 𑀢𑀯 𑀧𑀫𑀚𑁆𑀚𑀺𑀢𑀼𑀁, 𑀭𑀜𑁆𑀜𑀸 𑀦𑀸𑀫 𑀭𑀸𑀚𑀓𑀺𑀘𑁆𑀘𑁂𑀲𑀼 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀭𑀝𑁆𑀞𑀯𑀸𑀲𑀻𑀦𑀁 𑀫𑀸𑀢𑀸𑀧𑀺𑀢𑀼𑀲𑀫𑁂𑀦 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀦𑁆𑀢𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺, 𑀭𑀜𑁆𑀜𑁄 𑀳𑀺 𑀥𑀫𑁆𑀫𑀺𑀓𑀪𑀸𑀯𑁂 𑀲𑀢𑀺 𑀧𑀭𑀺𑀲𑀸𑀧𑀺𑀲𑁆𑀲 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀬𑀁 𑀫𑀬𑀺 𑀅𑀦𑀼𑀲𑀸𑀲𑀦𑁆𑀢𑁂 𑀢𑁆𑀯𑀁 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀸𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀲𑀸𑀲𑀓𑀆𑀘𑀭𑀺𑀬𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸𑀯 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀬 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀕𑁆𑀕𑀧𑀣𑀁 𑀧𑀽𑀭𑀬𑀫𑀸𑀦𑀸 𑀅𑀕𑀫𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, ‘‘𑀚𑀦𑀲𑀦𑁆𑀥𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀣𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀢𑀓𑁆𑀓𑀲𑀺𑀮𑀢𑁄 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀓𑀸𑀮𑁂 𑀭𑀸𑀚𑀸 𑀲𑀩𑁆𑀩𑀸𑀦𑀺 𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀲𑁄𑀥𑀸𑀧𑁂𑀢𑁆𑀯𑀸 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 ¶ 𑀦𑀕𑀭𑀫𑀚𑁆𑀛𑁂 𑀭𑀸𑀚𑀤𑁆𑀯𑀸𑀭𑁂 𑀘𑀸𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀙 𑀲𑀢𑀲𑀳𑀲𑁆𑀲𑀸𑀦𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀦𑀺𑀘𑁆𑀘𑀁 𑀯𑀺𑀯𑀝𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀥𑀫𑁆𑀫𑀪𑀡𑁆𑀟𑀺𑀓𑀁 𑀲𑁄𑀥𑀸𑀧𑁂𑀢𑁆𑀯𑀸 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀮𑁄𑀓𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀧𑀜𑁆𑀘 𑀲𑀻𑀮𑀸𑀦𑀺 ¶ 𑀭𑀓𑁆𑀔𑀦𑁆𑀢𑁄 𑀉𑀧𑁄𑀲𑀣𑀯𑀸𑀲𑀁 𑀯𑀲𑀦𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀭𑀝𑁆𑀞𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀤𑀸𑀦𑀁 𑀤𑁂𑀣, 𑀲𑀻𑀮𑀁 𑀲𑀫𑀸𑀤𑀺𑀬𑀣, 𑀪𑀸𑀯𑀦𑀁 𑀪𑀸𑀯𑁂𑀣, 𑀥𑀫𑁆𑀫𑁂𑀦 𑀓𑀫𑁆𑀫𑀦𑁆𑀢𑁂 𑀘 𑀯𑁄𑀳𑀸𑀭𑁂 𑀘 𑀧𑀬𑁄𑀚𑁂𑀣, 𑀤𑀳𑀭𑀓𑀸𑀮𑁂𑀬𑁂𑀯 𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀣, 𑀥𑀦𑀁 𑀉𑀧𑁆𑀧𑀸𑀤𑁂𑀣, 𑀕𑀸𑀫𑀓𑀽𑀝𑀓𑀫𑁆𑀫𑀁 𑀯𑀸 𑀧𑀺𑀲𑀼𑀡𑀯𑀸𑀘𑀸𑀓𑀫𑁆𑀫𑀁 𑀯𑀸 𑀫𑀸 𑀓𑀭𑀺𑀢𑁆𑀣, 𑀘𑀡𑁆𑀟𑀸 𑀨𑀭𑀼𑀲𑀸 𑀫𑀸 𑀅𑀳𑀼𑀯𑀢𑁆𑀣, 𑀫𑀸𑀢𑀼𑀧𑀝𑁆𑀞𑀸𑀦𑀁 𑀧𑀺𑀢𑀼𑀧𑀝𑁆𑀞𑀸𑀦𑀁 𑀧𑀽𑀭𑁂𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀪𑀯𑀣𑀸’’𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀚𑀦𑁂 𑀲𑀼𑀘𑀭𑀺𑀢𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀦𑁆𑀦𑀭𑀲𑀻𑀉𑀧𑁄𑀲𑀣𑁂 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑁄 ‘‘𑀫𑀳𑀸𑀚𑀦𑀲𑁆𑀲 𑀪𑀺𑀬𑁆𑀬𑁄 𑀳𑀺𑀢𑀲𑀼𑀔𑀢𑁆𑀣𑀸𑀬 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀭𑁄𑀥𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀦𑀕𑀭𑀚𑀦𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀮𑀗𑁆𑀓𑀢𑀭𑀢𑀦𑀫𑀡𑁆𑀟𑀧𑀫𑀚𑁆𑀛𑁂 𑀲𑀼𑀧𑀜𑁆𑀜𑀢𑁆𑀢𑀯𑀭𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀫𑁆𑀪𑁄, 𑀦𑀕𑀭𑀯𑀸𑀲𑀺𑀦𑁄 𑀢𑀼𑀫𑁆𑀳𑀸𑀓𑀁 ¶ 𑀢𑀧𑀦𑀻𑀬𑁂 𑀘 𑀅𑀢𑀧𑀦𑀻𑀬𑁂 𑀘 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀣𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑀢𑁆𑀣𑀸 𑀲𑀘𑁆𑀘𑀧𑀭𑀺𑀪𑀸𑀯𑀺𑀢𑀁 𑀫𑀼𑀔𑀭𑀢𑀦𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀫𑀥𑀼𑀭𑁂𑀦 𑀲𑀭𑁂𑀦 𑀓𑁄𑀲𑀮𑀭𑀜𑁆𑀜𑁄 𑀆𑀯𑀺 𑀓𑀭𑁄𑀦𑁆𑀢𑁄 𑁋

𑁪𑁯.

‘‘𑀤𑀲 𑀔𑀮𑀼 𑀇𑀫𑀸𑀦𑀺 𑀞𑀸𑀦𑀸𑀦𑀺, 𑀬𑀸𑀦𑀺 𑀧𑀼𑀩𑁆𑀩𑁂 𑀅𑀓𑀭𑀺𑀢𑁆𑀯𑀸;

𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀺, 𑀇𑀘𑁆𑀘𑁂𑀯𑀸𑀳 𑀚𑀦𑀲𑀦𑁆𑀥𑁄.

𑁫𑁦.

‘‘𑀅𑀮𑀤𑁆𑀥𑀸 𑀯𑀺𑀢𑁆𑀢𑀁 𑀢𑀧𑁆𑀧𑀢𑀺, 𑀧𑀼𑀩𑁆𑀩𑁂 𑀅𑀲𑀫𑀼𑀤𑀸𑀦𑀺𑀢𑀁;

𑀦 𑀧𑀼𑀩𑁆𑀩𑁂 𑀥𑀦𑀫𑁂𑀲𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁧.

‘‘𑀲𑀓𑁆𑀬𑀭𑀽𑀧𑀁 𑀧𑀼𑀭𑁂 𑀲𑀦𑁆𑀢𑀁, 𑀫𑀬𑀸 𑀲𑀺𑀧𑁆𑀧𑀁 𑀦 𑀲𑀺𑀓𑁆𑀔𑀺𑀢𑀁;

𑀓𑀺𑀘𑁆𑀙𑀸 𑀯𑀼𑀢𑁆𑀢𑀺 𑀅𑀲𑀺𑀧𑁆𑀧𑀲𑁆𑀲, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁨.

‘‘𑀓𑀽𑀝𑀯𑁂𑀤𑀻 𑀧𑀼𑀭𑁂 𑀆𑀲𑀺𑀁, 𑀧𑀺𑀲𑀼𑀡𑁄 𑀧𑀺𑀝𑁆𑀞𑀺𑀫𑀁𑀲𑀺𑀓𑁄;

𑀘𑀡𑁆𑀟𑁄 𑀘 𑀨𑀭𑀼𑀲𑁄 𑀘𑀸𑀧𑀺, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁩.

‘‘𑀧𑀸𑀡𑀸𑀢𑀺𑀧𑀸𑀢𑀻 ¶ ¶ 𑀧𑀼𑀭𑁂 𑀆𑀲𑀺𑀁, 𑀮𑀼𑀤𑁆𑀤𑁄 𑀘𑀸𑀧𑀺 𑀅𑀦𑀸𑀭𑀺𑀬𑁄;

𑀪𑀽𑀢𑀸𑀦𑀁 𑀦𑀸𑀧𑀘𑀸𑀬𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁪.

‘‘𑀩𑀳𑀽𑀲𑀼 𑀯𑀢 𑀲𑀦𑁆𑀢𑀻𑀲𑀼, 𑀅𑀦𑀸𑀧𑀸𑀤𑀸𑀲𑀼 𑀇𑀢𑁆𑀣𑀺𑀲𑀼;

𑀧𑀭𑀤𑀸𑀭𑀁 𑀅𑀲𑁂𑀯𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁫.

‘‘𑀩𑀳𑀼𑀫𑁆𑀳𑀺 𑀯𑀢 𑀲𑀦𑁆𑀢𑀫𑁆𑀳𑀺, 𑀅𑀦𑁆𑀦𑀧𑀸𑀦𑁂 𑀉𑀧𑀝𑁆𑀞𑀺𑀢𑁂;

𑀦 𑀧𑀼𑀩𑁆𑀩𑁂 𑀅𑀤𑀤𑀁 𑀤𑀸𑀦𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁬.

‘‘𑀫𑀸𑀢𑀭𑀁 𑀧𑀺𑀢𑀭𑀁 𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀼 𑀲𑀦𑁆𑀢𑁄 𑀦 𑀧𑁄𑀲𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁭.

‘‘𑀆𑀘𑀭𑀺𑀬𑀫𑀦𑀼𑀲𑀢𑁆𑀣𑀸𑀭𑀁 ¶ , 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑀁;

𑀧𑀺𑀢𑀭𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁮.

‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘𑀸𑀧𑀺, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂;

𑀦 𑀧𑀼𑀩𑁆𑀩𑁂 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁯.

‘‘𑀲𑀸𑀥𑀼 𑀳𑁄𑀢𑀺 𑀢𑀧𑁄 𑀘𑀺𑀡𑁆𑀡𑁄, 𑀲𑀦𑁆𑀢𑁄 𑀘 𑀧𑀬𑀺𑀭𑀼𑀧𑀸𑀲𑀺𑀢𑁄;

𑀦 𑀘 𑀧𑀼𑀩𑁆𑀩𑁂 𑀢𑀧𑁄 𑀘𑀺𑀡𑁆𑀡𑁄, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁬𑁦.

‘‘𑀬𑁄 𑀘 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲 𑀧𑀘𑁆𑀙𑀸 𑀦𑀸𑀦𑀼𑀢𑀧𑁆𑀧𑀢𑀻’’𑀢𑀺. 𑁋 𑀇𑀫𑀸 𑀕𑀸𑀣𑀸 𑀆𑀳;

𑀢𑀢𑁆𑀣 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀧𑀼𑀩𑁆𑀩𑁂𑀢𑀺 𑀧𑀞𑀫𑀫𑁂𑀯 𑀅𑀓𑀭𑀺𑀢𑁆𑀯𑀸. 𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀻𑀢𑀺 𑀲𑁄 𑀧𑀞𑀫𑀁 𑀓𑀢𑁆𑀢𑀩𑁆𑀩𑀸𑀦𑀁 𑀅𑀓𑀸𑀭𑀓𑁄 𑀧𑀼𑀕𑁆𑀕𑀮𑁄 𑀧𑀘𑁆𑀙𑀸 𑀇𑀥𑀮𑁄𑀓𑁂𑀧𑀺 𑀧𑀭𑀮𑁄𑀓𑁂𑀧𑀺 𑀢𑀧𑁆𑀧𑀢𑀺 𑀓𑀺𑀮𑀫𑀢𑀺. ‘‘𑀧𑀘𑁆𑀙𑀸 𑀯𑀸 𑀅𑀦𑀼𑀢𑀧𑁆𑀧𑀢𑀻’’𑀢𑀺𑀧𑀺 𑀧𑀸𑀞𑁄. 𑀇𑀘𑁆𑀘𑁂𑀯𑀸𑀳𑀸𑀢𑀺 𑀇𑀢𑀺 𑀏𑀯𑀁 𑀆𑀳𑀸𑀢𑀺 𑀧𑀤𑀘𑁆𑀙𑁂𑀤𑁄, 𑀇𑀢𑀺 𑀏𑀯𑀁 𑀭𑀸𑀚𑀸 𑀚𑀦𑀲𑀦𑁆𑀥𑁄 𑀅𑀯𑁄𑀘. 𑀇𑀘𑁆𑀘𑀲𑁆𑀲𑀼𑀳𑀸𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀅𑀲𑁆𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁 𑀇𑀢𑀺 𑀅𑀲𑁆𑀲𑀼 𑀆𑀳𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀇𑀤𑀸𑀦𑀺 𑀢𑀸𑀦𑀺 𑀤𑀲 𑀢𑀧𑀦𑀻𑀬𑀓𑀸𑀭𑀡𑀸𑀦𑀺 𑀧𑀓𑀸𑀲𑁂𑀢𑀼𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀸 𑀳𑁄𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂𑀢𑀺 𑀧𑀞𑀫𑀫𑁂𑀯 𑀢𑀭𑀼𑀡𑀓𑀸𑀮𑁂 𑀧𑀭𑀓𑁆𑀓𑀫𑀁 𑀓𑀢𑁆𑀯𑀸 𑀅𑀲𑀫𑀼𑀤𑀸𑀦𑀺𑀢𑀁 𑀅𑀲𑀫𑁆𑀪𑀢𑀁 𑀥𑀦𑀁 ¶ 𑀫𑀳𑀮𑁆𑀮𑀓𑀓𑀸𑀮𑁂 𑀅𑀮𑀪𑀺𑀢𑁆𑀯𑀸 𑀢𑀧𑁆𑀧𑀢𑀺 𑀲𑁄𑀘𑀢𑀺, 𑀧𑀭𑁂 𑀘 𑀲𑀼𑀔𑀺𑀢𑁂 𑀤𑀺𑀲𑁆𑀯𑀸 𑀲𑀬𑀁 𑀤𑀼𑀓𑁆𑀔𑀁 𑀚𑀻𑀯𑀦𑁆𑀢𑁄 ‘‘𑀧𑀼𑀩𑁆𑀩𑁂 𑀥𑀦𑀁 𑀦 𑀧𑀭𑀺𑀬𑁂𑀲𑀺𑀲𑁆𑀲’’𑀦𑁆𑀢𑀺 𑀏𑀯𑀁 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀢𑀺, 𑀢𑀲𑁆𑀫𑀸 𑀫𑀳𑀮𑁆𑀮𑀓𑀓𑀸𑀮𑁂 𑀲𑀼𑀔𑀁 𑀚𑀻𑀯𑀺𑀢𑀼𑀓𑀸𑀫𑀸 𑀤𑀳𑀭𑀓𑀸𑀮𑁂𑀬𑁂𑀯 𑀥𑀫𑁆𑀫𑀺𑀓𑀸𑀦𑀺 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸 𑀥𑀦𑀁 𑀧𑀭𑀺𑀬𑁂𑀲𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀭𑁂 𑀲𑀦𑁆𑀢𑀦𑁆𑀢𑀺 𑀧𑀼𑀭𑁂 𑀤𑀳𑀭𑀓𑀸𑀮𑁂 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀫𑀬𑀸 𑀓𑀸𑀢𑀼𑀁 𑀲𑀓𑁆𑀬𑀭𑀽𑀧𑀁 𑀲𑀫𑀸𑀦𑀁 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀺𑀓𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀦 ¶ 𑀲𑀺𑀓𑁆𑀔𑀺𑀢𑀁. 𑀓𑀺𑀘𑁆𑀙𑀸𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀅𑀲𑀺𑀧𑁆𑀧𑀲𑁆𑀲 𑀤𑀼𑀓𑁆𑀔𑀸 𑀚𑀻𑀯𑀺𑀢𑀯𑀼𑀢𑁆𑀢𑀺, 𑀦𑁂𑀯 𑀲𑀓𑁆𑀓𑀸 𑀢𑀤𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀼𑀁, 𑀢𑀲𑁆𑀫𑀸 𑀫𑀳𑀮𑁆𑀮𑀓𑀓𑀸𑀮𑁂 𑀲𑀼𑀔𑀁 𑀚𑀻𑀯𑀺𑀢𑀼𑀓𑀸𑀫𑀸 𑀢𑀭𑀼𑀡𑀓𑀸𑀮𑁂𑀬𑁂𑀯 𑀲𑀺𑀧𑁆𑀧𑀁 𑀲𑀺𑀓𑁆𑀔𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀝𑀯𑁂𑀤𑀻𑀢𑀺 𑀓𑀽𑀝𑀚𑀸𑀦𑀦𑀓𑁄 𑀕𑀸𑀫𑀓𑀽𑀝𑀓𑁄 𑀯𑀸 𑀮𑁄𑀓𑀲𑁆𑀲 𑀅𑀦𑀢𑁆𑀣𑀓𑀸𑀭𑀓𑁄 𑀯𑀸 𑀢𑀼𑀮𑀸𑀓𑀽𑀝𑀸𑀤𑀺𑀓𑀸𑀭𑀓𑁄 𑀯𑀸 𑀓𑀽𑀝𑀝𑁆𑀝𑀓𑀸𑀭𑀓𑁄 𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀺𑀦𑁆𑀢𑀺 𑀏𑀯𑀭𑀽𑀧𑁄 𑀅𑀳𑀁 𑀧𑀼𑀩𑁆𑀩𑁂 𑀅𑀳𑁄𑀲𑀺𑀁. 𑀧𑀺𑀲𑀼𑀡𑁄𑀢𑀺 𑀧𑁂𑀲𑀼𑀜𑁆𑀜𑀓𑀸𑀭𑀡𑁄. 𑀧𑀺𑀝𑁆𑀞𑀺𑀫𑀁𑀲𑀺𑀓𑁄𑀢𑀺 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑁄 𑀧𑀭𑁂𑀲𑀁 𑀧𑀺𑀝𑁆𑀞𑀺𑀫𑀁𑀲𑀔𑀸𑀤𑀓𑁄. 𑀇𑀢𑀺 𑀧𑀘𑁆𑀙𑀸𑀢𑀺 𑀏𑀯𑀁 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀅𑀦𑀼𑀢𑀧𑁆𑀧𑀢𑀺 ¶ , 𑀢𑀲𑁆𑀫𑀸 𑀲𑀘𑁂 𑀦𑀺𑀭𑀬𑁂 𑀦 𑀯𑀲𑀺𑀢𑀼𑀓𑀸𑀫𑀸𑀢𑁆𑀣, 𑀫𑀸 𑀏𑀯𑀭𑀽𑀧𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀣𑀸𑀢𑀺 𑀑𑀯𑀤𑀢𑀺.

𑀮𑀼𑀤𑁆𑀤𑁄𑀢𑀺 𑀤𑀸𑀭𑀼𑀡𑁄. 𑀅𑀦𑀸𑀭𑀺𑀬𑁄𑀢𑀺 𑀦 𑀅𑀭𑀺𑀬𑁄 𑀦𑀻𑀘𑀲𑀫𑀸𑀘𑀸𑀭𑁄. 𑀦𑀸𑀧𑀘𑀸𑀬𑀺𑀲𑁆𑀲𑀦𑁆𑀢𑀺 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀯𑀲𑁂𑀦 𑀦𑀻𑀘𑀯𑀼𑀢𑁆𑀢𑀺𑀓𑁄 𑀦𑀸𑀳𑁄𑀲𑀺𑀁. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀸𑀧𑀸𑀤𑀸𑀲𑀽𑀢𑀺 𑀆𑀧𑀸𑀤𑀸𑀦𑀁 𑀆𑀧𑀸𑀤𑁄, 𑀧𑀭𑀺𑀕𑁆𑀕𑀳𑁄𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀆𑀧𑀸𑀤𑁄 𑀬𑀸𑀲𑀁 𑀢𑀸 𑀅𑀦𑀸𑀧𑀸𑀤𑀸, 𑀅𑀜𑁆𑀜𑁂𑀳𑀺 𑀅𑀓𑀢𑀧𑀭𑀺𑀕𑁆𑀕𑀳𑀸𑀲𑀽𑀢𑀺 𑀅𑀢𑁆𑀣𑁄. 𑀉𑀧𑀝𑁆𑀞𑀺𑀢𑁂𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁂. 𑀦 𑀧𑀼𑀩𑁆𑀩𑁂𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀤𑀸𑀦𑀁 𑀦 𑀅𑀤𑀤𑀁. 𑀧𑀳𑀼 𑀲𑀦𑁆𑀢𑁄𑀢𑀺 𑀥𑀦𑀩𑀮𑁂𑀦𑀸𑀧𑀺 𑀓𑀸𑀬𑀩𑀮𑁂𑀦𑀸𑀧𑀺 𑀧𑁄𑀲𑀺𑀢𑀼𑀁 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄 𑀲𑀫𑀸𑀦𑁄. 𑀆𑀘𑀭𑀺𑀬𑀦𑁆𑀢𑀺 𑀆𑀘𑀸𑀭𑁂 𑀲𑀺𑀓𑁆𑀔𑀸𑀧𑀦𑀢𑁄 𑀇𑀥 𑀧𑀺𑀢𑀸 ‘‘𑀆𑀘𑀭𑀺𑀬𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀦𑀼𑀲𑀢𑁆𑀣𑀸𑀭𑀦𑁆𑀢𑀺 𑀅𑀦𑀼𑀲𑀸𑀲𑀓𑀁. 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑀦𑁆𑀢𑀺 𑀲𑀩𑁆𑀩𑁂 𑀯𑀢𑁆𑀣𑀼𑀓𑀸𑀫𑀭𑀲𑁂 𑀆𑀳𑀭𑀺𑀢𑁆𑀯𑀸 𑀧𑁄𑀲𑀺𑀢𑀸𑀭𑀁. 𑀅𑀢𑀺𑀫𑀜𑁆𑀜𑀺𑀲𑁆𑀲𑀦𑁆𑀢𑀺 𑀢𑀲𑁆𑀲 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀺𑀲𑁆𑀲𑀁.

𑀦 𑀧𑀼𑀩𑁆𑀩𑁂𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀧𑀺 𑀕𑀺𑀮𑀸𑀦𑀸𑀕𑀺𑀮𑀸𑀦𑁂𑀧𑀺 𑀘𑀻𑀯𑀭𑀸𑀤𑀻𑀦𑀺 𑀤𑀢𑁆𑀯𑀸 𑀅𑀧𑁆𑀧𑀝𑀺𑀚𑀕𑁆𑀕𑀦𑁂𑀦 𑀦 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁. 𑀢𑀧𑁄𑀢𑀺 𑀲𑀼𑀘𑀭𑀺𑀢𑀢𑀧𑁄. 𑀲𑀦𑁆𑀢𑁄𑀢𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀉𑀧𑀲𑀦𑁆𑀢𑁄 𑀲𑀻𑀮𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀺𑀯𑀺𑀥𑀲𑀼𑀘𑀭𑀺𑀢𑀲𑀗𑁆𑀔𑀸𑀢𑁄 ¶ 𑀢𑀧𑁄 𑀘𑀺𑀡𑁆𑀡𑁄 𑀏𑀯𑀭𑀽𑀧𑁄 𑀘 𑀉𑀧𑀲𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀺𑀢𑁄 𑀦𑀸𑀫 𑀲𑀸𑀥𑀼 𑀲𑀼𑀦𑁆𑀤𑀭𑁄. 𑀦 𑀧𑀼𑀩𑁆𑀩𑁂𑀢𑀺 𑀫𑀬𑀸 𑀤𑀳𑀭𑀓𑀸𑀮𑁂 𑀏𑀯𑀭𑀽𑀧𑁄 𑀢𑀧𑁄 𑀦 𑀘𑀺𑀡𑁆𑀡𑁄, 𑀇𑀢𑀺 𑀧𑀘𑁆𑀙𑀸 𑀚𑀭𑀸𑀚𑀺𑀡𑁆𑀡𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀅𑀦𑀼𑀢𑀧𑁆𑀧𑀢𑀺 𑀲𑁄𑀘𑀢𑀺. 𑀲𑀘𑁂 𑀢𑀼𑀫𑁆𑀳𑁂 𑀏𑀯𑀁 𑀦 𑀲𑁄𑀘𑀺𑀢𑀼𑀓𑀸𑀫𑀸, 𑀢𑀧𑁄𑀓𑀫𑁆𑀫𑀁 𑀓𑀭𑁄𑀣𑀸𑀢𑀺 𑀯𑀤𑀢𑀺. 𑀬𑁄 𑀘 𑀏𑀢𑀸𑀦𑀻𑀢𑀺 𑀬𑁄 𑀧𑀦 𑀏𑀢𑀸𑀦𑀺 𑀤𑀲 𑀓𑀸𑀭𑀡𑀸𑀦𑀺 𑀧𑀞𑀫𑀫𑁂𑀯 𑀉𑀧𑀸𑀬𑁂𑀦 𑀧𑀝𑀺𑀧𑀚𑁆𑀚𑀢𑀺 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀧𑀼𑀭𑀺𑀲𑁂𑀳𑀺 𑀓𑀢𑁆𑀢𑀩𑁆𑀩𑀸𑀦𑀺 𑀥𑀫𑁆𑀫𑀺𑀓𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁄 𑀲𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀧𑀼𑀭𑀺𑀲𑁄 𑀧𑀘𑁆𑀙𑀸 𑀦𑀸𑀦𑀼𑀢𑀧𑁆𑀧𑀢𑀺, 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄𑀯 𑀳𑁄𑀢𑀻𑀢𑀺.

𑀇𑀢𑀺 ¶ 𑀫𑀳𑀸𑀲𑀢𑁆𑀢𑁄 𑀅𑀦𑁆𑀯𑀤𑁆𑀥𑀫𑀸𑀲𑀁 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑁄𑀧𑀺𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀢𑀸𑀦𑀺 𑀤𑀲 𑀞𑀸𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄𑀯 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀫𑀳𑀸𑀭𑀸𑀚, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀸𑀘𑀭𑀺𑀬𑀓𑀸𑀧𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸𑀯 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀕𑁆𑀕𑀧𑀣𑁂 𑀧𑀢𑀺𑀝𑁆𑀞𑀸𑀧𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀚𑀦𑀲𑀦𑁆𑀥𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀦𑀲𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁬𑁯] 𑁬. 𑀫𑀳𑀸𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑀓𑀡𑁆𑀳𑁄 ¶ 𑀓𑀡𑁆𑀳𑁄 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑁄𑀓𑀢𑁆𑀣𑀘𑀭𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀬𑀸𑀯𑀜𑁆𑀘𑀺𑀤𑀁, 𑀆𑀯𑀼𑀲𑁄, 𑀲𑀢𑁆𑀣𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀅𑀢𑁆𑀢𑀦𑁄 𑀨𑀸𑀲𑀼𑀯𑀺𑀳𑀸𑀭𑀁 𑀧𑀳𑀸𑀬 𑀮𑁄𑀓𑀲𑁆𑀲𑁂𑀯 𑀅𑀢𑁆𑀣𑀁 𑀘𑀭𑀢𑀺, 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀲𑀬𑀁 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸𑀦𑀁 𑀥𑀫𑁆𑀫𑀘𑀓𑁆𑀓𑀁 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩 𑀆𑀤𑀬𑁄; 𑀧𑀝𑀺. 𑀫. 𑁨.𑁩𑁦) 𑀧𑀯𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀫𑀺𑀬𑀸 𑀧𑀓𑁆𑀔𑀲𑁆𑀲 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀁 (𑀲𑀁. 𑀦𑀺. 𑁩.𑁫𑁯; 𑀫𑀳𑀸𑀯. 𑁨𑁦 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺. 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀢𑁂𑀪𑀸𑀢𑀺𑀓𑀚𑀝𑀺𑀮𑀸𑀦𑀁 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀕𑀬𑀸𑀲𑀻𑀲𑁂 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀁 (𑀲𑀁. 𑀦𑀺. 𑁪.𑁨𑁩𑁫; 𑀫𑀳𑀸𑀯. 𑁫𑁪) 𑀓𑀣𑁂𑀢𑁆𑀯𑀸 𑀚𑀝𑀺𑀮𑀲𑀳𑀲𑁆𑀲𑀸𑀦𑀁 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀫𑀳𑀸𑀓𑀲𑁆𑀲𑀧𑀲𑁆𑀲 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺 ¶ 𑀧𑀘𑁆𑀘𑀼𑀕𑁆𑀕𑀫𑀦𑀁 𑀕𑀦𑁆𑀢𑁆𑀯𑀸 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀏𑀓𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀧𑀼𑀓𑁆𑀓𑀼𑀲𑀸𑀢𑀺𑀓𑀼𑀮𑀧𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀯𑀻𑀲𑀬𑁄𑀚𑀦𑀲𑀢𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀏𑀓𑁄 𑀧𑀘𑁆𑀙𑀸𑀪𑀢𑁆𑀢𑀁 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀢𑀸𑀯 𑀓𑀓𑁆𑀔𑀴𑀁 𑀨𑀭𑀼𑀲𑀁 𑀅𑀗𑁆𑀕𑀼𑀮𑀺𑀫𑀸𑀮𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀆𑀴𑀯𑀓𑀁 𑀬𑀓𑁆𑀔𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀲𑁄𑀢𑁆𑀣𑀺𑀁 𑀅𑀓𑀸𑀲𑀺. 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑁂𑀫𑀸𑀲𑀁 𑀯𑀲𑀦𑁆𑀢𑁄 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀲𑀫𑁆𑀧𑀸𑀤𑁂𑀲𑀺, 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑁆𑀯𑀸 𑀩𑀓𑀩𑁆𑀭𑀳𑁆𑀫𑀼𑀦𑁄 𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑀦𑁆𑀦𑀁 𑀩𑁆𑀭𑀳𑁆𑀫𑀲𑀳𑀲𑁆𑀲𑀸𑀦𑀁 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀭𑀡𑀸𑀦𑀺 𑀘𑁂𑀯 𑀲𑀻𑀮𑀸𑀦𑀺𑀘 𑀫𑀕𑁆𑀕𑀨𑀮𑀸𑀦𑀺 𑀘 𑀤𑁂𑀢𑀺, 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺 ¶ 𑀦𑀸𑀦𑀧𑁆𑀧𑀓𑀸𑀭𑀁 𑀅𑀢𑁆𑀣𑀁 𑀘𑀭𑀢𑀻’’𑀢𑀺 𑀤𑀲𑀩𑀮𑀲𑁆𑀲 𑀮𑁄𑀓𑀢𑁆𑀣𑀘𑀭𑀺𑀬𑀕𑀼𑀡𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀲𑁄𑀳𑀁 𑀇𑀤𑀸𑀦𑀺 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀮𑁄𑀓𑀲𑁆𑀲 𑀅𑀢𑁆𑀣𑀁 𑀘𑀭𑁂𑀬𑁆𑀬𑀁, 𑀧𑀼𑀩𑁆𑀩𑁂 𑀲𑀭𑀸𑀕𑀓𑀸𑀮𑁂𑀧𑀺 𑀮𑁄𑀓𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀉𑀲𑀻𑀦𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀬 𑀫𑀳𑀸𑀚𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀸 𑀫𑁄𑀘𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀽𑀭𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀸𑀲𑀦𑀁 𑀑𑀲𑀓𑁆𑀓𑀺. 𑀪𑀺𑀓𑁆𑀔𑀽 𑀏𑀓𑀯𑀻𑀲𑀢𑀺𑀬𑀸 𑀅𑀦𑁂𑀲𑀦𑀸𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀪𑀺𑀓𑁆𑀔𑀽 𑀕𑀺𑀳𑀺𑀲𑀁𑀲𑀕𑁆𑀕𑀁 𑀓𑀭𑁄𑀦𑁆𑀢𑀺, 𑀧𑀼𑀢𑁆𑀢𑀥𑀻𑀢𑀸𑀤𑀻𑀳𑀺 𑀯𑀟𑁆𑀠𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀕𑀺𑀳𑀺𑀲𑀁𑀲𑀕𑁆𑀕𑀁 𑀓𑀭𑁄𑀦𑁆𑀢𑀺, 𑀧𑀼𑀢𑁆𑀢𑀥𑀻𑀢𑀸𑀤𑀻𑀳𑀺 𑀯𑀟𑁆𑀠𑀦𑁆𑀢𑀺. 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀥𑀫𑁆𑀫𑀁, 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀼𑀦𑀺𑀥𑀫𑁆𑀫𑀁, 𑀉𑀧𑁄𑀲𑀓𑀸 𑀉𑀧𑀸𑀲𑀓𑀥𑀫𑁆𑀫𑀁, 𑀉𑀧𑀸𑀲𑀺𑀓𑀸 𑀉𑀧𑀸𑀲𑀺𑀓𑀥𑀫𑁆𑀫𑀁, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 ¶ 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀁𑀲𑀼, 𑀫𑀢𑀫𑀢𑀸 𑀅𑀧𑀸𑀬𑁂𑀲𑀼 𑀧𑀭𑀺𑀧𑀽𑀭𑁂𑀲𑀼𑀁. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀦𑀯𑁂 𑀦𑀯𑁂 𑀤𑁂𑀯𑁂 𑀅𑀧𑀲𑁆𑀲𑀦𑁆𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀢𑁆𑀣𑀼 𑀲𑀸𑀲𑀦𑀁 𑀑𑀲𑀓𑁆𑀓𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄, 𑀫𑀳𑀸𑀚𑀦𑀁 𑀢𑀸𑀲𑁂𑀢𑁆𑀯𑀸 𑀪𑀻𑀢𑀪𑀸𑀯𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀅𑀲𑁆𑀲𑀸𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀑𑀲𑀓𑁆𑀓𑀺𑀢𑀁 𑀲𑀸𑀲𑀦𑀁 𑀧𑀕𑁆𑀕𑀬𑁆𑀳 𑀅𑀧𑀭𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀁 𑀧𑀯𑀢𑁆𑀢𑀦𑀓𑀸𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 ¶ 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀫𑀸𑀢𑀮𑀺𑀤𑁂𑀯𑀧𑀼𑀢𑁆𑀢𑀁 𑀫𑁄𑀘𑀧𑁆𑀧𑀫𑀸𑀡𑀤𑀸𑀞𑀁 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀯𑀺𑀦𑀺𑀕𑁆𑀕𑀢𑀭𑀲𑁆𑀫𑀺𑀬𑀸 𑀪𑀬𑀸𑀦𑀓𑀁 𑀓𑀢𑁆𑀯𑀸 𑀕𑀩𑁆𑀪𑀺𑀦𑀻𑀦𑀁 𑀤𑀲𑁆𑀲𑀦𑁂𑀦𑁂𑀯 𑀕𑀩𑁆𑀪𑀧𑀸𑀢𑀦𑀲𑀫𑀢𑁆𑀣𑀁 𑀖𑁄𑀭𑀭𑀽𑀧𑀁 𑀆𑀚𑀸𑀦𑁂𑀬𑁆𑀬𑀧𑁆𑀧𑀫𑀸𑀡𑀁 𑀓𑀸𑀴𑀯𑀡𑁆𑀡𑀁 𑀫𑀳𑀸𑀓𑀡𑁆𑀳𑀲𑀼𑀦𑀔𑀁 𑀫𑀸𑀧𑁂𑀢𑁆𑀯𑀸 𑀧𑀜𑁆𑀘𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀫𑀸𑀮𑀁 ¶ 𑀓𑀡𑁆𑀞𑁂 𑀧𑀺𑀴𑀦𑁆𑀥𑀺𑀢𑁆𑀯𑀸 𑀭𑀚𑁆𑀚𑀼𑀓𑁄𑀝𑀺𑀓𑀁 𑀆𑀤𑀸𑀬 𑀲𑀬𑀁 𑀤𑁆𑀯𑁂 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀧𑀘𑁆𑀙𑀸𑀫𑀼𑀔𑁂 𑀧𑀜𑁆𑀘𑀥𑀸 𑀓𑁂𑀲𑁂 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀆𑀭𑁄𑀧𑀺𑀢𑀧𑀯𑀸𑀴𑀯𑀡𑁆𑀡𑀚𑀺𑀬𑀁 𑀫𑀳𑀸𑀥𑀦𑀼𑀁 𑀕𑀳𑁂𑀢𑁆𑀯𑀸 𑀯𑀚𑀺𑀭𑀕𑁆𑀕𑀦𑀸𑀭𑀸𑀘𑀁 𑀦𑀔𑁂𑀦 𑀧𑀭𑀺𑀯𑀝𑁆𑀝𑁂𑀦𑁆𑀢𑁄 𑀯𑀦𑀘𑀭𑀓𑀯𑁂𑀲𑀁 𑀕𑀳𑁂𑀢𑁆𑀯𑀸 𑀦𑀕𑀭𑀢𑁄 𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀑𑀢𑀭𑀺𑀢𑁆𑀯𑀸 ‘‘𑀦𑀲𑁆𑀲𑀢𑀺 𑀮𑁄𑀓𑁄, 𑀦𑀲𑁆𑀲𑀢𑀺 𑀮𑁄𑀓𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀁 𑀅𑀦𑀼𑀲𑀸𑀯𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀉𑀢𑁆𑀢𑀸𑀲𑁂𑀢𑁆𑀯𑀸 𑀦𑀕𑀭𑀽𑀧𑀘𑀸𑀭𑀁 𑀧𑀢𑁆𑀯𑀸 𑀧𑀼𑀦 𑀲𑀤𑁆𑀤𑀫𑀓𑀸𑀲𑀺.

𑀫𑀦𑀼𑀲𑁆𑀲𑀸 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀉𑀢𑁆𑀭𑀲𑁆𑀢𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀻𑀖𑀁 𑀦𑀕𑀭𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀸𑀧𑁂𑀲𑀺. 𑀲𑀓𑁆𑀓𑁄𑀧𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀧𑀸𑀓𑀸𑀭𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀲𑀼𑀦𑀔𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑁄𑀦𑀕𑀭𑁂 𑀧𑀢𑀺𑀝𑁆𑀞𑀳𑀺. 𑀫𑀦𑀼𑀲𑁆𑀲𑀸 𑀪𑀻𑀢𑀢𑀲𑀺𑀢𑀸 𑀧𑀮𑀸𑀬𑀺𑀢𑁆𑀯𑀸 𑀕𑁂𑀳𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀬𑀺𑀁𑀲𑀼. 𑀫𑀳𑀸𑀓𑀡𑁆𑀳𑁄𑀧𑀺 𑀤𑀺𑀝𑁆𑀞𑀤𑀺𑀝𑁆𑀞𑁂 𑀫𑀦𑀼𑀲𑁆𑀲𑁂 𑀉𑀧𑀥𑀸𑀯𑀺𑀢𑁆𑀯𑀸 𑀲𑀦𑁆𑀢𑀸𑀲𑁂𑀦𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀗𑁆𑀕𑀡𑁂 𑀫𑀦𑀼𑀲𑁆𑀲𑀸 𑀪𑀬𑁂𑀦 𑀧𑀮𑀸𑀬𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀁𑀲𑀼. 𑀉𑀲𑀻𑀦𑀓𑀭𑀸𑀚𑀸𑀧𑀺 𑀑𑀭𑁄𑀥𑁂 𑀕𑀳𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀫𑀳𑀸𑀓𑀡𑁆𑀳𑁄 𑀲𑀼𑀦𑀔𑁄 𑀧𑀼𑀭𑀺𑀫𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 𑀫𑀳𑀸𑀪𑀼𑀲𑁆𑀲𑀺𑀢𑀁 𑀪𑀼𑀲𑁆𑀲𑀺. 𑀢𑀲𑁆𑀲 𑀲𑀤𑁆𑀤𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁, 𑀉𑀧𑀭𑀺 𑀪𑀯𑀕𑁆𑀕𑀁 𑀧𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀦𑀺𑀦𑁆𑀦𑀸𑀤𑀁 𑀅𑀳𑁄𑀲𑀺. 𑀯𑀺𑀥𑀼𑀭𑀚𑀸𑀢𑀓𑁂 (𑀚𑀸. 𑁨.𑁨𑁨.𑁧𑁩𑁪𑁬 𑀆𑀤𑀬𑁄) 𑀳𑀺 𑀧𑀼𑀡𑁆𑀡𑀓𑀬𑀓𑁆𑀔𑀭𑀜𑁆𑀜𑁄, 𑀓𑀼𑀲𑀚𑀸𑀢𑀓𑁂 (𑀚𑀸. 𑁨.𑁨𑁦.𑁧 𑀆𑀤𑀬𑁄) 𑀓𑀼𑀲𑀭𑀜𑁆𑀜𑁄, 𑀪𑀽𑀭𑀺𑀤𑀢𑁆𑀢𑀚𑀸𑀢𑀓𑁂 (𑀚𑀸. 𑁨.𑁨𑁨.𑁭𑁮𑁪 𑀆𑀤𑀬𑁄) 𑀲𑀼𑀤𑀲𑁆𑀲𑀦𑀦𑀸𑀕𑀭𑀜𑁆𑀜𑁄, 𑀇𑀫𑀲𑁆𑀫𑀺𑀁 𑀫𑀳𑀸𑀓𑀡𑁆𑀳𑀚𑀸𑀢𑀓𑁂 𑀅𑀬𑀁 𑀲𑀤𑁆𑀤𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀤𑁆𑀤𑀸 𑀚𑀫𑁆𑀩𑀼𑀤𑀺𑀧𑁂 𑀫𑀳𑀸𑀲𑀤𑁆𑀤𑀸 𑀦𑀸𑀫 𑀅𑀳𑁂𑀲𑀼𑀁.

𑀦𑀕𑀭𑀯𑀸𑀲𑀺𑀦𑁄 𑀪𑀻𑀢𑀢𑀲𑀺𑀢𑀸 𑀳𑀼𑀢𑁆𑀯𑀸 𑀏𑀓𑀧𑀼𑀭𑀺𑀲𑁄𑀧𑀺 𑀲𑀓𑁆𑀓𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀭𑀸𑀚𑀸𑀬𑁂𑀯 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀯𑀸𑀢𑀧𑀸𑀦𑀁 𑀦𑀺𑀲𑁆𑀲𑀸𑀬 𑀲𑀓𑁆𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀮𑀼𑀤𑁆𑀤𑀓, 𑀓𑀲𑁆𑀫𑀸 𑀢𑁂 ¶ 𑀲𑀼𑀦𑀔𑁄 𑀪𑀼𑀲𑁆𑀲𑀢𑀻’’𑀢𑀺 𑀆𑀳. ‘‘𑀙𑀸𑀢𑀪𑀸𑀯𑁂𑀦, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺 𑀢𑀲𑁆𑀲 𑀪𑀢𑁆𑀢𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁄𑀚𑀦𑀲𑁆𑀲 𑀘 𑀅𑀢𑁆𑀢𑀦𑁄 𑀘 𑀧𑀓𑁆𑀓𑀪𑀢𑁆𑀢𑀁 𑀲𑀩𑁆𑀩𑀁 𑀤𑀸𑀧𑁂𑀲𑀺. 𑀢𑀁 𑀲𑀩𑁆𑀩𑀁 𑀲𑀼𑀦𑀔𑁄 𑀏𑀓𑀓𑀩𑀴𑀁 𑀯𑀺𑀬 𑀓𑀢𑁆𑀯𑀸 𑀧𑀼𑀦 𑀲𑀤𑁆𑀤𑀫𑀓𑀸𑀲𑀺. 𑀧𑀼𑀦 𑀭𑀸𑀚𑀸 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀸𑀦𑀺𑀧𑀺 𑀫𑁂 𑀲𑀼𑀦𑀔𑁄 ¶ 𑀙𑀸𑀢𑁄𑀬𑁂𑀯𑀸’’𑀢𑀺 ¶ 𑀲𑀼𑀢𑁆𑀯𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀧𑀓𑁆𑀓𑀪𑀢𑁆𑀢𑀁 𑀲𑀩𑁆𑀩𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦𑀺𑀝𑁆𑀞𑀸𑀧𑀺𑀢𑁂 𑀲𑀓𑀮𑀦𑀕𑀭𑀲𑁆𑀲 𑀧𑀓𑁆𑀓𑀪𑀢𑁆𑀢𑀁 𑀤𑀸𑀧𑁂𑀲𑀺. 𑀢𑀫𑁆𑀧𑀺 𑀲𑁄 𑀢𑀣𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 ‘‘𑀦 𑀏𑀲 𑀲𑀼𑀦𑀔𑁄, 𑀦𑀺𑀲𑁆𑀲𑀁𑀲𑀬𑀁 𑀏𑀲 𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀺, 𑀆𑀕𑀫𑀦𑀓𑀸𑀭𑀡𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀪𑀻𑀢𑀢𑀲𑀺𑀢𑁄 𑀳𑀼𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁧.

‘‘𑀓𑀡𑁆𑀳𑁄 𑀓𑀡𑁆𑀳𑁄 𑀘 𑀖𑁄𑀭𑁄 𑀘, 𑀲𑀼𑀓𑁆𑀓𑀤𑀸𑀞𑁄 𑀧𑀪𑀸𑀲𑀯𑀸;

𑀩𑀤𑁆𑀥𑁄 𑀧𑀜𑁆𑀘𑀳𑀺 𑀭𑀚𑁆𑀚𑀽𑀳𑀺, 𑀓𑀺𑀁 𑀭𑀯𑀺 𑀲𑀼𑀦𑀔𑁄 𑀢𑀯𑀸’’𑀢𑀺.

𑀢𑀢𑁆𑀣 𑀓𑀡𑁆𑀳𑁄 𑀓𑀡𑁆𑀳𑁄𑀢𑀺 𑀪𑀬𑀯𑀲𑁂𑀦 𑀤𑀴𑁆𑀳𑀻𑀯𑀲𑁂𑀦 𑀯𑀸 𑀆𑀫𑁂𑀟𑀺𑀢𑀁. 𑀖𑁄𑀭𑁄𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀪𑀬𑀚𑀦𑀓𑁄. 𑀧𑀪𑀸𑀲𑀯𑀸𑀢𑀺 𑀤𑀸𑀞𑀸 𑀦𑀺𑀓𑁆𑀔𑀦𑁆𑀢𑀭𑀁𑀲𑀺𑀧𑀪𑀸𑀲𑁂𑀦 𑀧𑀪𑀸𑀲𑀯𑀸. 𑀓𑀺𑀁 𑀭𑀯𑀻𑀢𑀺 𑀓𑀺𑀁 𑀯𑀺𑀭𑀯𑀺. 𑀢𑀯𑁂𑀲 𑀏𑀯𑀭𑀽𑀧𑁄 𑀓𑀓𑁆𑀔𑀴𑁄 𑀲𑀼𑀦𑀔𑁄 𑀓𑀺𑀁 𑀓𑀭𑁄𑀢𑀺, 𑀓𑀺𑀁 𑀫𑀺𑀕𑁂 𑀕𑀡𑁆𑀳𑀸𑀢𑀺, 𑀉𑀤𑀸𑀳𑀼 𑀢𑁂 𑀅𑀫𑀺𑀢𑁆𑀢𑁂, 𑀓𑀺𑀁 𑀢𑁂 𑀇𑀫𑀺𑀦𑀸, 𑀯𑀺𑀲𑁆𑀲𑀚𑁆𑀚𑁂𑀳𑀺 𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁨.

‘‘𑀦𑀸𑀬𑀁 𑀫𑀺𑀕𑀸𑀦𑀫𑀢𑁆𑀣𑀸𑀬, 𑀉𑀲𑀻𑀦𑀓 𑀪𑀯𑀺𑀲𑁆𑀲𑀢𑀺;

𑀫𑀦𑀼𑀲𑁆𑀲𑀸𑀦𑀁 𑀅𑀦𑀬𑁄 𑀳𑀼𑀢𑁆𑀯𑀸, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀬𑀜𑁆𑀳𑀺 ‘‘𑀫𑀺𑀕𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀇𑀥 𑀦𑀸𑀕𑀢𑁄, 𑀢𑀲𑁆𑀫𑀸 𑀫𑀺𑀕𑀸𑀦𑀁 𑀅𑀢𑁆𑀣𑁄 𑀦 𑀪𑀯𑀺𑀲𑁆𑀲𑀢𑀺, 𑀫𑀦𑀼𑀲𑁆𑀲𑀫𑀁𑀲𑀁 𑀧𑀦 𑀔𑀸𑀤𑀺𑀢𑀼𑀁 𑀆𑀕𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀅𑀦𑀬𑁄 𑀫𑀳𑀸𑀯𑀺𑀦𑀸𑀲𑀓𑀸𑀭𑀓𑁄 𑀳𑀼𑀢𑁆𑀯𑀸 𑀬𑀤𑀸 𑀅𑀦𑁂𑀦 𑀫𑀦𑀼𑀲𑁆𑀲𑀸 𑀯𑀺𑀦𑀸𑀲𑀁 𑀧𑀸𑀧𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀅𑀬𑀁 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺, 𑀫𑀫 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺.

𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀧𑀦 𑀢𑁂 𑀪𑁄 𑀮𑀼𑀤𑁆𑀤𑀓-𑀲𑀼𑀦𑀔𑁄 𑀲𑀩𑁆𑀩𑁂𑀲𑀁𑀬𑁂𑀯 𑀫𑀦𑀼𑀲𑁆𑀲𑀸𑀦𑀁 𑀫𑀁𑀲𑀁 𑀔𑀸𑀤𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀢𑀯 𑀅𑀫𑀺𑀢𑁆𑀢𑀸𑀦𑀜𑁆𑀜𑁂𑀯𑀸’’𑀢𑀺 ¶ 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀫𑀺𑀢𑁆𑀢𑀸𑀦𑀜𑁆𑀜𑁂𑀯 𑀫𑁂, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑁂 𑀧𑀦 𑀇𑀥 𑀢𑁂 𑀅𑀫𑀺𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀥𑀫𑁆𑀫𑀸𑀪𑀺𑀭𑀢𑀸 𑀯𑀺𑀲𑀫𑀘𑀸𑀭𑀺𑀦𑁄, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀣𑁂𑀳𑀺 𑀢𑀸𑀯 𑀦𑁂 𑀅𑀫𑁆𑀳𑀸𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀓𑀣𑁂𑀦𑁆𑀢𑁄 𑀤𑁂𑀯𑀭𑀸𑀚𑀸 𑀤𑀲 𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁩.

‘‘𑀧𑀢𑁆𑀢𑀳𑀢𑁆𑀣𑀸 ¶ 𑀲𑀫𑀡𑀓𑀸, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀦𑀗𑁆𑀕𑀮𑁂𑀳𑀺 𑀓𑀲𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁪.

‘‘𑀢𑀧𑀲𑁆𑀲𑀺𑀦𑀺𑀬𑁄 ¶ 𑀧𑀩𑁆𑀩𑀚𑀺𑀢𑀸, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀬𑀤𑀸 𑀮𑁄𑀓𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁫.

‘‘𑀤𑀻𑀖𑁄𑀢𑁆𑀢𑀭𑁄𑀝𑁆𑀞𑀸 𑀚𑀝𑀺𑀮𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀇𑀡𑀁 𑀘𑁄𑀤𑀸𑀬 𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁬.

‘‘𑀅𑀥𑀺𑀘𑁆𑀘 𑀯𑁂𑀤𑁂 𑀲𑀸𑀯𑀺𑀢𑁆𑀢𑀺𑀁, 𑀬𑀜𑁆𑀜𑀢𑀦𑁆𑀢𑀜𑁆𑀘 𑀩𑁆𑀭𑀸𑀳𑁆𑀫𑀡𑀸;

𑀪𑀢𑀺𑀓𑀸𑀬 𑀬𑀚𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁭.

‘‘𑀫𑀸𑀢𑀭𑀁 𑀧𑀺𑀢𑀭𑀁 𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀽 𑀲𑀦𑁆𑀢𑁄 𑀦 𑀪𑀭𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁮.

‘‘𑀫𑀸𑀢𑀭𑀁 𑀧𑀺𑀢𑀭𑀁 𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀩𑀸𑀮𑀸 𑀢𑀼𑀫𑁆𑀳𑁂𑀢𑀺 𑀯𑀓𑁆𑀔𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁯.

‘‘𑀆𑀘𑀭𑀺𑀬𑀪𑀭𑀺𑀬𑀁 𑀲𑀔𑀺𑀁, 𑀫𑀸𑀢𑀼𑀮𑀸𑀦𑀺𑀁 𑀧𑀺𑀢𑀼𑀘𑁆𑀙𑀓𑀺𑀁;

𑀬𑀤𑀸 𑀮𑁄𑀓𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁭𑁦.

‘‘𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸𑀦, 𑀔𑀕𑁆𑀕𑀁 𑀧𑀕𑁆𑀕𑀬𑁆𑀳 𑀩𑁆𑀭𑀸𑀳𑁆𑀫𑀡𑀸;

𑀧𑀦𑁆𑀣𑀖𑀸𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁭𑁧.

‘‘𑀲𑀼𑀓𑁆𑀓𑀘𑁆𑀙𑀯𑀻 𑀯𑁂𑀥𑀯𑁂𑀭𑀸, 𑀣𑀽𑀮𑀩𑀸𑀳𑀽 𑀅𑀧𑀸𑀢𑀼𑀪𑀸;

𑀫𑀺𑀢𑁆𑀢𑀪𑁂𑀤𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁭𑁨.

‘‘𑀫𑀸𑀬𑀸𑀯𑀺𑀦𑁄 𑀦𑁂𑀓𑀢𑀺𑀓𑀸, 𑀅𑀲𑀧𑁆𑀧𑀼𑀭𑀺𑀲𑀘𑀺𑀦𑁆𑀢𑀓𑀸;

𑀬𑀤𑀸 𑀮𑁄𑀓𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀻’’𑀢𑀺.

𑀢𑀢𑁆𑀣 ¶ 𑀲𑀫𑀡𑀓𑀸𑀢𑀺 ‘‘𑀫𑀬𑀁 𑀲𑀫𑀡𑀸𑀫𑁆𑀳𑀸’’𑀢𑀺 𑀧𑀝𑀺𑀜𑁆𑀜𑀸𑀫𑀢𑁆𑀢𑀓𑁂𑀦 𑀳𑀻𑀴𑀺𑀢𑀯𑁄𑀳𑀸𑀭𑁂𑀦𑁂𑀯𑀫𑀸𑀳. 𑀓𑀲𑀺𑀲𑁆𑀲𑀦𑁆𑀢𑀻𑀢𑀺 𑀢𑁂 𑀢𑀤𑀸𑀧𑀺 𑀓𑀲𑀦𑁆𑀢𑀺𑀬𑁂𑀯. 𑀅𑀬𑀁 𑀧𑀦 ¶ 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀏𑀯𑀫𑀸𑀳. 𑀅𑀬𑀜𑁆𑀳𑀺𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀏𑀢𑁂 𑀏𑀯𑀭𑀽𑀧𑀸 𑀤𑀼𑀲𑁆𑀲𑀻𑀮𑀸 𑀫𑀫 𑀅𑀫𑀺𑀢𑁆𑀢𑀸, 𑀬𑀤𑀸 𑀫𑀫 𑀲𑀼𑀦𑀔𑁂𑀦 𑀏𑀢𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀁 ¶ 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀏𑀲 𑀓𑀡𑁆𑀳𑁄 𑀇𑀢𑁄 𑀧𑀜𑁆𑀘𑀭𑀚𑁆𑀚𑀼𑀩𑀦𑁆𑀥𑀦𑀸 𑀧𑀫𑁄𑀓𑁆𑀔𑀢𑀻𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀕𑀸𑀣𑀸𑀲𑀼 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀩𑁆𑀩𑀚𑀺𑀢𑀸𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸. 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀅𑀕𑀸𑀭𑀫𑀚𑁆𑀛𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑁄 𑀯𑀺𑀘𑀭𑀺𑀲𑁆𑀲𑀦𑁆𑀢𑀺. 𑀤𑀻𑀖𑁄𑀢𑁆𑀢𑀭𑁄𑀝𑁆𑀞𑀸𑀢𑀺 𑀤𑀸𑀞𑀺𑀓𑀸𑀦𑀁 𑀯𑀟𑁆𑀠𑀺𑀢𑀢𑁆𑀢𑀸 𑀤𑀻𑀖𑀼𑀢𑁆𑀢𑀭𑁄𑀝𑁆𑀞𑀸. 𑀧𑀗𑁆𑀓𑀤𑀦𑁆𑀢𑀸𑀢𑀺 𑀧𑀗𑁆𑀓𑁂𑀦 𑀫𑀮𑁂𑀦 𑀲𑀫𑀦𑁆𑀦𑀸𑀕𑀢𑀤𑀦𑁆𑀢𑀸. 𑀇𑀡𑀁 𑀘𑁄𑀤𑀸𑀬𑀸𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀯𑀟𑁆𑀠𑀺𑀬𑀸 𑀇𑀡𑀁 𑀧𑀬𑁄𑀚𑁂𑀢𑁆𑀯𑀸 𑀢𑀁 𑀘𑁄𑀤𑁂𑀢𑁆𑀯𑀸 𑀢𑀢𑁄 𑀮𑀤𑁆𑀥𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀬𑀤𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀸𑀯𑀺𑀢𑁆𑀢𑀺𑀦𑁆𑀢𑀺 𑀲𑀸𑀯𑀺𑀢𑁆𑀢𑀺𑀜𑁆𑀘 𑀅𑀥𑀺𑀬𑀺𑀢𑁆𑀯𑀸. 𑀬𑀜𑁆𑀜𑀢𑀦𑁆𑀢𑀜𑁆𑀘𑀸𑀢𑀺 𑀬𑀜𑁆𑀜𑀯𑀺𑀥𑀸𑀬𑀓𑀢𑀦𑁆𑀢𑀁, 𑀬𑀜𑁆𑀜𑀁 𑀅𑀥𑀺𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀢𑀺𑀓𑀸𑀬𑀸𑀢𑀺 𑀢𑁂 𑀢𑁂 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫, 𑀥𑀦𑀁 𑀤𑁂𑀣𑀸’’𑀢𑀺 𑀏𑀯𑀁 𑀪𑀢𑀺𑀅𑀢𑁆𑀣𑀸𑀬 𑀬𑀤𑀸 𑀬𑀜𑁆𑀜𑀁 𑀬𑀚𑀺𑀲𑁆𑀲𑀦𑁆𑀢𑀺. 𑀧𑀳𑀽 𑀲𑀦𑁆𑀢𑁄𑀢𑀺 𑀪𑀭𑀺𑀢𑀼𑀁 𑀧𑁄𑀲𑁂𑀢𑀼𑀁 𑀲𑀫𑀢𑁆𑀣𑀸 𑀲𑀫𑀸𑀦𑀸. 𑀩𑀸𑀮𑀸 𑀢𑀼𑀫𑁆𑀳𑁂𑀢𑀺 𑀢𑀼𑀫𑁆𑀳𑁂 𑀩𑀸𑀮𑀸 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀣𑀸𑀢𑀺 𑀬𑀤𑀸 𑀯𑀓𑁆𑀔𑀦𑁆𑀢𑀺. 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀮𑁄𑀓𑀥𑀫𑁆𑀫𑀲𑁂𑀯𑀦𑀯𑀲𑁂𑀦 𑀕𑀫𑀺𑀲𑁆𑀲𑀦𑁆𑀢𑀺. 𑀧𑀦𑁆𑀣𑀖𑀸𑀢𑀦𑁆𑀢𑀺 𑀧𑀦𑁆𑀣𑁂 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀢𑁂𑀲𑀁 𑀪𑀡𑁆𑀟𑀕𑁆𑀕𑀳𑀡𑀁.

𑀲𑀼𑀓𑁆𑀓𑀘𑁆𑀙𑀯𑀻𑀢𑀺 𑀓𑀲𑀸𑀯𑀘𑀼𑀡𑁆𑀡𑀸𑀤𑀺𑀖𑀁𑀲𑀦𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀲𑀼𑀓𑁆𑀓𑀘𑁆𑀙𑀯𑀺𑀯𑀡𑁆𑀡𑀸. 𑀯𑁂𑀥𑀯𑁂𑀭𑀸𑀢𑀺 𑀯𑀺𑀥𑀯𑀸 𑀅𑀧𑀢𑀺𑀓𑀸, 𑀢𑀸𑀳𑀺 𑀯𑀺𑀥𑀯𑀸𑀳𑀺 𑀯𑁂𑀭𑀁 𑀘𑀭𑀦𑁆𑀢𑀻𑀢𑀺 𑀯𑁂𑀥𑀯𑁂𑀭𑀸. 𑀣𑀽𑀮𑀩𑀸𑀳𑀽𑀢𑀺 𑀧𑀸𑀤𑀧𑀭𑀺𑀫𑀤𑁆𑀤𑀦𑀸𑀤𑀻𑀳𑀺 𑀲𑀫𑀼𑀝𑁆𑀞𑀸𑀧𑀺𑀢𑀫𑀁𑀲𑀢𑀸𑀬 𑀫𑀳𑀸𑀩𑀸𑀳𑀽. 𑀅𑀧𑀸𑀢𑀼𑀪𑀸𑀢𑀺 𑀅𑀧𑀸𑀢𑀼𑀪𑀸𑀯𑀸, 𑀥𑀦𑀼𑀧𑁆𑀧𑀸𑀤𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑀪𑁂𑀤𑀦𑁆𑀢𑀺 𑀫𑀺𑀣𑀼𑀪𑁂𑀤𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀸 𑀏𑀯𑀭𑀽𑀧𑀸 𑀇𑀢𑁆𑀣𑀺𑀥𑀼𑀢𑁆𑀢𑀸 ‘‘𑀇𑀫𑀸 𑀅𑀫𑁆𑀳𑁂 𑀦 𑀚𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀳𑀺𑀭𑀜𑁆𑀜𑀸 𑀯𑀺𑀥𑀯𑀸 𑀉𑀧𑀕𑀦𑁆𑀢𑁆𑀯𑀸 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀢𑀸𑀲𑀁 𑀲𑀦𑁆𑀢𑀓𑀁 𑀔𑀸𑀤𑀺𑀢𑁆𑀯𑀸 𑀢𑀸𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑁂𑀤𑀁 ¶ 𑀓𑀭𑀺𑀲𑁆𑀲𑀦𑁆𑀢𑀺 ¶ , 𑀯𑀺𑀲𑁆𑀲𑀸𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀲𑀳𑀺𑀭𑀜𑁆𑀜𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀲 𑀢𑁂 𑀘𑁄𑀭𑁂 𑀲𑀩𑁆𑀩𑁂𑀯 𑀔𑀸𑀤𑀺𑀢𑁆𑀯𑀸 𑀫𑀼𑀘𑁆𑀘𑀺𑀲𑁆𑀲𑀢𑀺. 𑀅𑀲𑀧𑁆𑀧𑀼𑀭𑀺𑀲𑀘𑀺𑀦𑁆𑀢𑀓𑀸𑀢𑀺 𑀅𑀲𑀧𑁆𑀧𑀼𑀭𑀺𑀲𑀘𑀺𑀢𑁆𑀢𑁂𑀳𑀺 𑀧𑀭𑀤𑀼𑀓𑁆𑀔𑀘𑀺𑀦𑁆𑀢𑀦𑀲𑀻𑀮𑀸. 𑀢𑀤𑀸𑀢𑀺 𑀢𑀤𑀸 𑀲𑀩𑁆𑀩𑁂𑀧𑀺𑀫𑁂 𑀖𑀸𑀢𑁂𑀢𑁆𑀯𑀸 𑀔𑀸𑀤𑀺𑀢𑀫𑀁𑀲𑁄 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀇𑀫𑁂 𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀅𑀫𑀺𑀢𑁆𑀢𑀸’’𑀢𑀺 𑀢𑁂 𑀢𑁂 𑀅𑀥𑀫𑁆𑀫𑀓𑀸𑀭𑀓𑁂 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀢𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑁄 𑀢𑀢𑁄 𑀫𑀳𑀸𑀚𑀦𑀲𑁆𑀲 𑀉𑀢𑁆𑀭𑀲𑁆𑀢𑀓𑀸𑀮𑁂 𑀲𑀼𑀦𑀔𑀁 𑀭𑀚𑁆𑀚𑀼𑀬𑀸 𑀆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀓𑀢𑁆𑀯𑀸 𑀮𑀼𑀤𑁆𑀤𑀓𑀯𑁂𑀲𑀁 𑀯𑀺𑀚𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀚𑀮𑀫𑀸𑀦𑁄 𑀞𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀳𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, ‘𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’𑀢𑀺 𑀆𑀕𑀢𑁄, 𑀧𑀫𑀢𑁆𑀢𑀸 𑀳𑀺 𑀫𑀳𑀸𑀚𑀦𑀸, 𑀅𑀥𑀫𑁆𑀫𑀁 𑀯𑀢𑁆𑀢𑀺𑀢𑁆𑀯𑀸 𑀫𑀢𑀫𑀢𑀸 𑀲𑀫𑁆𑀧𑀢𑀺 𑀅𑀧𑀸𑀬𑁂 𑀧𑀽𑀭𑁂𑀦𑁆𑀢𑀺, 𑀤𑁂𑀯𑀮𑁄𑀓𑁄 𑀢𑀼𑀘𑁆𑀙𑁄 𑀯𑀺𑀬 ¶ 𑀯𑀺𑀢𑁄, 𑀇𑀢𑁄 𑀧𑀝𑁆𑀞𑀸𑀬 𑀅𑀥𑀫𑁆𑀫𑀺𑀓𑁂𑀲𑀼 𑀓𑀢𑁆𑀢𑀩𑁆𑀩𑀁 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀘𑀢𑀽𑀳𑀺 𑀲𑀢𑀸𑀭𑀳𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀤𑀸𑀦𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀑𑀲𑀓𑁆𑀓𑀺𑀢𑀲𑀸𑀲𑀦𑀁 𑀅𑀜𑁆𑀜𑀁 𑀯𑀲𑁆𑀲𑀲𑀳𑀲𑁆𑀲𑀁 𑀧𑀯𑀢𑁆𑀢𑀦𑀲𑀫𑀢𑁆𑀣𑀁 𑀓𑀢𑁆𑀯𑀸 𑀫𑀸𑀢𑀮𑀺𑀁 𑀆𑀤𑀸𑀬 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀫𑀳𑀸𑀚𑀦𑀸 𑀤𑀸𑀦𑀲𑀻𑀮𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀯𑁂 𑀧𑀼𑀩𑁆𑀩𑁂𑀧𑀸𑀳𑀁 𑀮𑁄𑀓𑀲𑁆𑀲 𑀅𑀢𑁆𑀣𑀫𑁂𑀯 𑀘𑀭𑀸𑀫𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀢𑀮𑀺 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀓𑀡𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁭𑁦] 𑁭. 𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑁭𑁩-𑁯𑁩. 𑀓𑁄𑀲𑀺𑀬𑀚𑀸𑀢𑀓𑀁 𑀲𑀼𑀥𑀸𑀪𑁄𑀚𑀦𑀚𑀸𑀢𑀓𑁂 (𑀚𑀸. 𑁨.𑁨𑁧.𑁧𑁯𑁨 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑁄𑀲𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁭𑁧] 𑁮. 𑀫𑁂𑀡𑁆𑀟𑀓𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸

𑁯𑁪-𑁧𑁦𑁫. 𑀫𑁂𑀡𑁆𑀟𑀓𑀧𑀜𑁆𑀳𑀚𑀸𑀢𑀓𑀁 ¶ 𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀫𑁂𑀡𑁆𑀟𑀓𑀧𑀜𑁆𑀳𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁭𑁨] 𑁯. 𑀫𑀳𑀸𑀧𑀤𑀼𑀫𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀤𑀝𑁆𑀞𑀸 ¶ 𑀧𑀭𑀢𑁄 𑀤𑁄𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀺𑀜𑁆𑀘𑀫𑀸𑀡𑀯𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀤𑀲𑀩𑀮𑀲𑁆𑀲 𑀧𑀼𑀣𑀼𑀪𑀽𑀢𑁂𑀲𑀼 𑀲𑀸𑀯𑀓𑁂𑀲𑀼 𑀅𑀧𑀭𑀺𑀫𑀸𑀡𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁂𑀲𑀼 𑀧𑀢𑁆𑀣𑀝𑁂𑀲𑀼 𑀕𑀼𑀡𑀲𑀫𑀼𑀤𑀬𑁂𑀲𑀼 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀺. 𑀢𑀺𑀢𑁆𑀣𑀺𑀬𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀲𑀤𑀺𑀲𑀸 𑀅𑀳𑁂𑀲𑀼𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑀸. 𑀢𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄𑀯 𑀩𑀼𑀤𑁆𑀥𑁄, 𑀫𑀬𑀫𑁆𑀧𑀺 𑀩𑀼𑀤𑁆𑀥𑀸, 𑀓𑀺𑀁 𑀢𑀲𑁆𑀲𑁂𑀯 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀫𑁂𑀯, 𑀅𑀫𑁆𑀳𑀸𑀓𑀫𑁆𑀧𑀺 ¶ 𑀤𑁂𑀣 𑀓𑀭𑁄𑀣𑀸’’𑀢𑀺 𑀏𑀯𑀁 𑀫𑀦𑀼𑀲𑁆𑀲𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀸𑀧𑀺 𑀮𑀸𑀪𑀲𑀓𑁆𑀓𑀸𑀭𑀁 𑀅𑀮𑀪𑀦𑁆𑀢𑀸 𑀭𑀳𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀬𑁆𑀬𑀸𑀫𑀸’’𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀢𑀤𑀸 𑀲𑀸𑀯𑀢𑁆𑀣𑀺𑀬𑀁 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀦𑀸𑀫𑁂𑀓𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀤𑁂𑀯𑀘𑁆𑀙𑀭𑀸 𑀯𑀺𑀬. 𑀢𑀲𑁆𑀲𑀸 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺. 𑀅𑀣𑁂𑀓𑁄 𑀔𑀭𑀫𑀦𑁆𑀢𑀻 𑀏𑀯𑀫𑀸𑀳 𑁋 ‘‘𑀘𑀺𑀜𑁆𑀘𑀫𑀸𑀡𑀯𑀺𑀓𑀁 𑀧𑀝𑀺𑀘𑁆𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀲𑁆𑀲𑀸𑀫𑀸’’𑀢𑀺. 𑀢𑁂 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀲𑀸 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀢𑀺𑀢𑁆𑀣𑀺𑀬𑀸 𑀢𑀸𑀬 𑀲𑀤𑁆𑀥𑀺𑀁 𑀦 𑀓𑀣𑁂𑀲𑀼𑀁. 𑀲𑀸 ‘‘𑀓𑁄 𑀦𑀼 𑀔𑁄 𑀫𑁂 𑀤𑁄𑀲𑁄’’𑀢𑀺 𑀬𑀸𑀯𑀢𑀢𑀺𑀬𑀁 ‘‘𑀯𑀦𑁆𑀤𑀸𑀫𑀺 𑀅𑀬𑁆𑀬𑀸’’𑀢𑀺 𑀯𑀢𑁆𑀯𑀸 ‘‘𑀅𑀬𑁆𑀬𑀸, 𑀓𑁄 𑀦𑀼 𑀔𑁄 𑀫𑁂 𑀤𑁄𑀲𑁄, 𑀓𑀺𑀁 𑀫𑀬𑀸 𑀲𑀤𑁆𑀥𑀺𑀁 𑀦 𑀓𑀣𑁂𑀣𑀸’’𑀢𑀺 𑀆𑀳. ‘‘𑀪𑀕𑀺𑀦𑀺, 𑀲𑀫𑀡𑀁 𑀕𑁄𑀢𑀫𑀁 𑀅𑀫𑁆𑀳𑁂 𑀯𑀺𑀳𑁂𑀞𑁂𑀦𑁆𑀢𑀁 𑀳𑀢𑀮𑀸𑀪𑀲𑀓𑁆𑀓𑀸𑀭𑁂 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀦 𑀚𑀸𑀦𑀸𑀲𑀻’’𑀢𑀺. ‘‘𑀦𑀸𑀳𑀁 𑀚𑀸𑀦𑀸𑀫𑀺 𑀅𑀬𑁆𑀬𑀸, 𑀫𑀬𑀸 𑀓𑀺𑀁 𑀧𑀦𑁂𑀢𑁆𑀣 𑀓𑀢𑁆𑀢𑀩𑁆𑀩𑀦𑁆𑀢𑀺. 𑀲𑀘𑁂 𑀢𑁆𑀯𑀁 𑀪𑀕𑀺𑀦𑀺, 𑀅𑀫𑁆𑀳𑀸𑀓𑀁 𑀲𑀼𑀔𑀫𑀺𑀘𑁆𑀙𑀲𑀺, 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀁 𑀦𑀸𑀲𑁂𑀳𑀻’’𑀢𑀺.

𑀲𑀸 ¶ ‘‘𑀲𑀸𑀥𑀼 𑀅𑀬𑁆𑀬𑀸, 𑀫𑀬𑁆𑀳𑀫𑁂𑀯𑁂𑀲𑁄 𑀪𑀸𑀭𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀢𑁆𑀯𑀸 𑀇𑀢𑁆𑀣𑀺𑀫𑀸𑀬𑀸𑀲𑀼 𑀓𑀼𑀲𑀮𑀢𑀸𑀬 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀯𑀢𑁆𑀣𑀺𑀯𑀸𑀲𑀻𑀦𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀦𑀲𑀫𑀬𑁂 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀁 𑀧𑀝𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 ¶ 𑀕𑀘𑁆𑀙𑀦𑁆𑀢𑀻 ‘‘𑀇𑀫𑀸𑀬 𑀯𑁂𑀮𑀸𑀬 𑀓𑀼𑀳𑀺𑀁 𑀕𑀘𑁆𑀙𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀫𑀫 𑀕𑀫𑀦𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀢𑁆𑀯𑀸 𑀚𑁂𑀢𑀯𑀦𑀲𑀫𑀻𑀧𑁂 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 ‘‘𑀅𑀕𑁆𑀕𑀯𑀦𑁆𑀤𑀦𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑁂 𑀉𑀧𑀸𑀲𑀓𑀚𑀦𑁂 𑀚𑁂𑀢𑀯𑀦𑁂 𑀯𑀼𑀢𑁆𑀣𑀸 𑀯𑀺𑀬 𑀳𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀢𑀺. ‘‘𑀓𑀼𑀳𑀺𑀁 𑀯𑀼𑀢𑁆𑀣𑀸𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀫𑀫 𑀯𑀼𑀢𑁆𑀣𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀢𑁆𑀯𑀸 𑀫𑀸𑀲𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀧𑀼𑀘𑁆𑀙𑀺𑀬𑀫𑀸𑀦𑀸 ‘‘𑀚𑁂𑀢𑀯𑀦𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀸 𑀯𑀼𑀢𑁆𑀣𑀸𑀫𑁆𑀳𑀻’’𑀢𑀺 𑀆𑀳. 𑀧𑀼𑀣𑀼𑀚𑁆𑀚𑀦𑀸𑀦𑀁 ‘‘𑀲𑀘𑁆𑀘𑀁 𑀦𑀼 𑀔𑁄 𑀏𑀢𑀁, 𑀦𑁄’’𑀢𑀺 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂𑀫𑀸𑀲𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀺𑀮𑁄𑀢𑀺𑀓𑀸𑀳𑀺 𑀉𑀤𑀭𑀁 𑀯𑁂𑀞𑁂𑀢𑁆𑀯𑀸 𑀕𑀩𑁆𑀪𑀺𑀦𑀺𑀯𑀡𑁆𑀡𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀭𑀺 𑀭𑀢𑁆𑀢𑀧𑀝𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀲𑀫𑀡𑀁 𑀕𑁄𑀢𑀫𑀁 𑀧𑀝𑀺𑀘𑁆𑀘 𑀕𑀩𑁆𑀪𑁄 𑀫𑁂 𑀮𑀤𑁆𑀥𑁄’’𑀢𑀺 𑀅𑀦𑁆𑀥𑀩𑀸𑀮𑁂 𑀕𑀸𑀳𑀸𑀧𑁂𑀢𑁆𑀯𑀸 𑀅𑀝𑁆𑀞𑀦𑀯𑀫𑀸𑀲𑀘𑁆𑀘𑀬𑁂𑀦 𑀉𑀤𑀭𑁂 𑀤𑀸𑀭𑀼𑀫𑀡𑁆𑀟𑀮𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀧𑀭𑀺 𑀭𑀢𑁆𑀢𑀧𑀝𑀁 𑀧𑀸𑀭𑀼𑀧𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑁄 𑀕𑁄𑀳𑀦𑀼𑀓𑁂𑀦 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀉𑀲𑁆𑀲𑀤𑁂 𑀤𑀲𑁆𑀲𑁂𑀢𑁆𑀯𑀸 𑀓𑀺𑀮𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀳𑀼𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀣𑀸𑀕𑀢𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 ‘‘𑀫𑀳𑀸𑀲𑀫𑀡, 𑀫𑀳𑀸𑀚𑀦𑀲𑁆𑀲 𑀢𑀸𑀯 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀫𑀥𑀼𑀭𑁄 𑀢𑁂 𑀲𑀤𑁆𑀤𑁄, 𑀲𑀼𑀨𑀼𑀲𑀺𑀢𑀁 𑀤𑀦𑁆𑀢𑀸𑀯𑀭𑀡𑀁, 𑀅𑀳𑀁 𑀧𑀦 𑀢𑀁 𑀧𑀝𑀺𑀘𑁆𑀘 𑀕𑀩𑁆𑀪𑀁 𑀮𑀪𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀚𑀸𑀢𑀸, 𑀦𑁂𑀯 𑀫𑁂 𑀲𑀽𑀢𑀺𑀖𑀭𑀁 𑀚𑀸𑀦𑀸𑀲𑀺, 𑀦 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺, 𑀲𑀬𑀁 𑀅𑀓𑀭𑁄𑀦𑁆𑀢𑁄 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺 𑀅𑀜𑁆𑀜𑀢𑀭𑀁 𑀓𑁄𑀲𑀮𑀭𑀸𑀚𑀸𑀦𑀁 𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀯𑀸 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀯𑀸 ‘‘𑀇𑀫𑀺𑀲𑁆𑀲𑀸 𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀬 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀁 𑀓𑀭𑁄𑀳𑀻’𑀢𑀺 𑀦 𑀯𑀤𑀲𑀺, 𑀅𑀪𑀺𑀭𑀫𑀺𑀢𑀼𑀁𑀬𑁂𑀯 ¶ 𑀚𑀸𑀦𑀸𑀲𑀺, 𑀕𑀩𑁆𑀪𑀧𑀭𑀺𑀳𑀸𑀭𑀁 𑀦 𑀚𑀸𑀦𑀸𑀲𑀻’’𑀢𑀺 𑀕𑀽𑀣𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀤𑀽𑀲𑁂𑀢𑀼𑀁 𑀯𑀸𑀬𑀫𑀦𑁆𑀢𑀻 𑀯𑀺𑀬 𑀧𑀭𑀺𑀲𑀫𑀚𑁆𑀛𑁂 𑀢𑀣𑀸𑀕𑀢𑀁 𑀅𑀓𑁆𑀓𑁄𑀲𑀺. 𑀢𑀣𑀸𑀕𑀢𑁄 𑀥𑀫𑁆𑀫𑀓𑀣𑀁 𑀞𑀧𑁂𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀅𑀪𑀺𑀦𑀤𑀦𑁆𑀢𑁄 ‘‘𑀪𑀕𑀺𑀦𑀺, 𑀢𑀬𑀸 𑀓𑀣𑀺𑀢𑀲𑁆𑀲 𑀢𑀣𑀪𑀸𑀯𑀁 𑀯𑀸 𑀅𑀢𑀣𑀪𑀸𑀯𑀁 𑀯𑀸 𑀅𑀳𑀜𑁆𑀘𑁂𑀯 𑀢𑁆𑀯𑀜𑁆𑀘 𑀚𑀸𑀦𑀸𑀫𑀸’’𑀢𑀺 𑀆𑀳. 𑀆𑀫, 𑀲𑀫𑀡, 𑀢𑀬𑀸 𑀘 𑀫𑀬𑀸 𑀘 𑀜𑀸𑀢𑀪𑀸𑀯𑁂𑀦𑁂𑀢𑀁 𑀚𑀸𑀢𑀦𑁆𑀢𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑀫𑀸𑀦𑁄 ‘‘𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀢𑀣𑀸𑀕𑀢𑀁 𑀅𑀪𑀽𑀢𑁂𑀦 𑀅𑀓𑁆𑀓𑁄𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀇𑀫𑀁 𑀯𑀢𑁆𑀣𑀼𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀘𑀢𑀽𑀳𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀫𑀺. 𑀤𑁂𑀯𑀧𑀼𑀢𑁆𑀢𑀸 𑀫𑀽𑀲𑀺𑀓𑀧𑁄𑀢𑀓𑀸 𑀳𑀼𑀢𑁆𑀯𑀸 𑀤𑀸𑀭𑀼𑀫𑀡𑁆𑀟𑀮𑀺𑀓𑀲𑁆𑀲 ¶ 𑀩𑀦𑁆𑀥𑀦𑀭𑀚𑁆𑀚𑀼𑀓𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀙𑀺𑀦𑁆𑀤𑀺𑀁𑀲𑀼, 𑀧𑀸𑀭𑀼𑀢𑀧𑀝𑀁 𑀯𑀸𑀢𑁄 𑀉𑀓𑁆𑀔𑀺𑀧𑀺, 𑀤𑀸𑀭𑀼𑀫𑀡𑁆𑀟𑀮𑀺𑀓𑀁 𑀧𑀢𑀫𑀸𑀦𑀁 𑀢𑀲𑁆𑀲𑀸 𑀧𑀸𑀤𑀧𑀺𑀝𑁆𑀞𑀺𑀬𑀁 𑀧𑀢𑀺, 𑀉𑀪𑁄 𑀅𑀕𑁆𑀕𑀧𑀸𑀤𑀸 𑀙𑀺𑀚𑁆𑀚𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀉𑀝𑁆𑀞𑀸𑀬 ‘‘𑀓𑀸𑀴𑀓𑀡𑁆𑀡𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀓𑁆𑀓𑁄𑀲𑀲𑀻’’𑀢𑀺 𑀲𑀻𑀲𑁂 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀺𑀳𑀢𑁆𑀣𑀸 𑀚𑁂𑀢𑀯𑀦𑀸 𑀦𑀻𑀳𑀭𑀺𑀁𑀲𑀼. 𑀅𑀣𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀘𑀓𑁆𑀔𑀼𑀧𑀣𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑁂 𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀯𑀭𑀫𑀤𑀸𑀲𑀺, 𑀅𑀯𑀻𑀘𑀺𑀢𑁄 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺. 𑀲𑀸 𑀓𑀼𑀮𑀤𑀢𑁆𑀢𑀺𑀬𑀁 𑀓𑀫𑁆𑀩𑀮𑀁 𑀧𑀸𑀭𑀼𑀧𑀫𑀸𑀦𑀸 𑀯𑀺𑀬 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺, 𑀤𑀲𑀩𑀮𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀯𑀟𑁆𑀠𑀺. 𑀧𑀼𑀦𑀤𑀺𑀯𑀲𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀘𑀺𑀜𑁆𑀘𑀫𑀸𑀡𑀯𑀺𑀓𑀸 𑀏𑀯𑀁 𑀉𑀴𑀸𑀭𑀕𑀼𑀡𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀽𑀢𑁂𑀦 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀏𑀲𑀸 𑀫𑀁 𑀅𑀪𑀽𑀢𑁂𑀦 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀨𑀼𑀮𑁆𑀮𑀧𑀤𑀼𑀫𑀲𑀲𑁆𑀲𑀺𑀭𑀺𑀓𑀫𑀼𑀔𑀢𑁆𑀢𑀸 𑀧𑀦𑀲𑁆𑀲 ‘‘𑀧𑀤𑀼𑀫𑀓𑀼𑀫𑀸𑀭𑁄’’𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀫𑀺. 𑀅𑀣𑀲𑁆𑀲 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀢𑀼𑀁 𑀅𑀕𑁆𑀕𑀫𑀳𑁂𑀲𑀺𑀁 𑀆𑀳 ‘‘𑀪𑀤𑁆𑀤𑁂, 𑀇𑀥𑁂𑀯 𑀯𑀲, 𑀅𑀳𑀁 𑀧𑀘𑁆𑀘𑀦𑁆𑀢𑀁 𑀓𑀼𑀧𑀺𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀦𑀸𑀳𑀁 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀺, 𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀬𑀼𑀤𑁆𑀥𑀪𑀽𑀫𑀺𑀬𑀸 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀸𑀯 𑀫𑀫𑀸𑀕𑀫𑀦𑀸 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑀸 𑀯𑀲, 𑀅𑀳𑀁 𑀧𑀤𑀼𑀫𑀓𑀼𑀫𑀸𑀭𑀁 𑀬𑀣𑀸 𑀢𑀯 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀆𑀡𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀫𑀺𑀢𑁆𑀢𑁂 𑀧𑀮𑀸𑀧𑁂𑀢𑁆𑀯𑀸 𑀚𑀦𑀧𑀤𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀩𑀳𑀺𑀦𑀕𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀲𑀺 ¶ . 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀼 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 ¶ 𑀦𑀕𑀭𑀁 ¶ 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑁂𑀳𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀏𑀓𑀓𑁄𑀯 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀲𑀸 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀫𑁆𑀫, 𑀓𑀺𑀁 𑀅𑀫𑁆𑀳𑀸𑀓𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 ‘‘𑀅𑀫𑁆𑀫𑀸𑀢𑀺 𑀫𑀁 𑀯𑀤𑀲𑀻’’𑀢𑀺 𑀉𑀝𑁆𑀞𑀸𑀬 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀲𑀬𑀦𑀁 𑀅𑀪𑀺𑀭𑀼𑀳𑀸’’𑀢𑀺 𑀆𑀳. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀬𑀸𑀯 𑀭𑀸𑀚𑀸 𑀦 𑀆𑀕𑀘𑁆𑀙𑀢𑀺, 𑀢𑀸𑀯 𑀉𑀪𑁄𑀧𑀺 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀫𑀫 𑀫𑀸𑀢𑀸 𑀘 𑀲𑀲𑀸𑀫𑀺𑀓𑀸 𑀘, 𑀫𑀬𑀸 𑀲𑀧𑀭𑀺𑀕𑁆𑀕𑀳𑁄 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀓𑀺𑀮𑁂𑀲𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀦 𑀑𑀮𑁄𑀓𑀺𑀢𑀧𑀼𑀩𑁆𑀩𑁄, 𑀓𑀣𑀁 𑀢𑀬𑀸 𑀲𑀤𑁆𑀥𑀺𑀁 𑀏𑀯𑀭𑀽𑀧𑀁 𑀓𑀺𑀮𑀺𑀝𑁆𑀞𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀓𑀣𑁂𑀢𑁆𑀯𑀸 𑀢𑀲𑁆𑀫𑀺𑀁 𑀅𑀦𑀺𑀘𑁆𑀙𑀫𑀸𑀦𑁂 ‘‘𑀫𑀫 𑀯𑀘𑀦𑀁 𑀦 𑀓𑀭𑁄𑀲𑀻’’𑀢𑀺 𑀆𑀳. ‘‘𑀆𑀫, 𑀦 𑀓𑀭𑁄𑀫𑀻’’𑀢𑀺. ‘‘𑀢𑁂𑀦 𑀳𑀺 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀲𑀻𑀲𑀁 𑀢𑁂 𑀙𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀫𑀳𑀸𑀲𑀢𑁆𑀢𑁄 ‘‘𑀢𑀯 𑀭𑀼𑀘𑀺𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀮𑀚𑁆𑀚𑀸𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸 𑀪𑀻𑀢𑀢𑀲𑀺𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀅𑀬𑀁 𑀧𑀞𑀫𑀁 𑀧𑀺𑀢𑀼 𑀆𑀭𑁄𑀘𑁂𑀲𑁆𑀲𑀢𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀺, 𑀅𑀳𑀫𑁂𑀯 𑀧𑀼𑀭𑁂𑀢𑀭𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑀮𑁄𑀫𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀭𑀻𑀭𑁂 𑀦𑀔𑀭𑀸𑀚𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀼𑀳𑀺𑀁 𑀤𑁂𑀯𑀻𑀢𑀺 𑀭𑀜𑁆𑀜𑁄 𑀧𑀼𑀘𑁆𑀙𑀦𑀓𑀸𑀮𑁂 ‘‘𑀕𑀺𑀮𑀸𑀦𑀸’𑀢𑀺 𑀓𑀣𑁂𑀬𑁆𑀬𑀸𑀣𑀸’’𑀢𑀺 𑀧𑀭𑀺𑀘𑀸𑀭𑀺𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀕𑀺𑀮𑀸𑀦𑀸𑀮𑀬𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀭𑀸𑀚𑀸𑀧𑀺 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀦𑀺𑀯𑁂𑀲𑀦𑀁 𑀆𑀭𑀼𑀬𑁆𑀳 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀼𑀳𑀺𑀁 𑀤𑁂𑀯𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀺𑀮𑀸𑀦𑀸’’𑀢𑀺 𑀲𑀼𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀓𑀺𑀁 𑀢𑁂 𑀤𑁂𑀯𑀺, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀲𑁆𑀲 𑀯𑀘𑀦𑀁 𑀅𑀲𑀼𑀡𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀼𑀘𑁆𑀙𑀺𑀢𑀸 ‘‘𑀫𑀳𑀸𑀭𑀸𑀚, 𑀓𑀲𑁆𑀫𑀸 𑀓𑀣𑁂𑀲𑀺, 𑀢𑀼𑀡𑁆𑀳𑀻 𑀳𑁄𑀳𑀺, 𑀲𑀲𑀸𑀫𑀺𑀓𑀇𑀢𑁆𑀣𑀺𑀬𑁄 𑀦𑀸𑀫 𑀫𑀸𑀤𑀺𑀲𑀸 𑀦 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑁂𑀦 𑀢𑁆𑀯𑀁 𑀯𑀺𑀳𑁂𑀞𑀺𑀢𑀸𑀲𑀺, 𑀲𑀻𑀖𑀁 𑀫𑁂 𑀓𑀣𑁂𑀳𑀺 ¶ , 𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀁𑀲𑀺 𑀢𑁆𑀯𑀁, 𑀫𑀳𑀸𑀭𑀸𑀚, 𑀦𑀕𑀭𑁂 𑀞𑀧𑁂𑀢𑁆𑀯𑀸 𑀕𑀢𑁄’’𑀢𑀺 𑀯𑀢𑁆𑀯𑀸 ‘‘𑀧𑀤𑀼𑀫𑀓𑀼𑀫𑀸𑀭’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑁄 𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 ‘𑀢𑀸𑀢, 𑀫𑀸 𑀏𑀯𑀁 𑀓𑀭𑁄𑀳𑀺, 𑀅𑀳𑀁 𑀢𑀯 𑀫𑀸𑀢𑀸’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀭𑀸𑀚𑀸 𑀦𑀢𑁆𑀣𑀺, 𑀅𑀳𑀁 𑀢𑀁 𑀕𑁂𑀳𑁂 𑀓𑀭𑀺𑀢𑁆𑀯𑀸 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀺𑀲𑁆𑀲𑀸𑀫𑀻’𑀢𑀺 𑀫𑀁 𑀓𑁂𑀲𑁂𑀲𑀼 ¶ 𑀕𑀳𑁂𑀢𑁆𑀯𑀸 𑀅𑀧𑀭𑀸𑀧𑀭𑀁 𑀮𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀓𑀭𑁄𑀦𑁆𑀢𑀺𑀁 𑀫𑀁 𑀧𑀸𑀢𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀕𑀢𑁄’’𑀢𑀺 𑀆𑀳.

𑀭𑀸𑀚𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 𑀆𑀲𑀻𑀯𑀺𑀲𑁄 𑀯𑀺𑀬 𑀓𑀼𑀤𑁆𑀥𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙𑀣, 𑀪𑀡𑁂, 𑀧𑀤𑀼𑀫𑀓𑀼𑀫𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀣𑀸’’𑀢𑀺. 𑀢𑁂 𑀦𑀕𑀭𑀁 𑀅𑀯𑀢𑁆𑀣𑀭𑀦𑁆𑀢𑀸 𑀯𑀺𑀬 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀩𑀦𑁆𑀥𑀺𑀢𑁆𑀯𑀸 𑀧𑀳𑀭𑀺𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀡𑀯𑁂𑀭𑀫𑀸𑀮𑀁 𑀕𑀻𑀯𑀸𑀬𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀯𑀚𑁆𑀛𑀁 𑀓𑀢𑁆𑀯𑀸 𑀆𑀦𑀬𑀺𑀁𑀲𑀼 ¶ . 𑀲𑁄 ‘‘𑀤𑁂𑀯𑀺𑀬𑀸 𑀇𑀤𑀁 𑀓𑀫𑁆𑀫’’𑀦𑁆𑀢𑀺 𑀜𑀢𑁆𑀯𑀸 ‘‘𑀪𑁄 𑀧𑀼𑀭𑀺𑀲𑀸, 𑀦𑀸𑀳𑀁 𑀭𑀜𑁆𑀜𑁄 𑀤𑁄𑀲𑀓𑀸𑀭𑀓𑁄, 𑀦𑀺𑀧𑁆𑀧𑀭𑀸𑀥𑁄𑀳𑀫𑀲𑁆𑀫𑀻’’𑀢𑀺 𑀯𑀺𑀮𑀧𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀲𑀓𑀮𑀦𑀕𑀭𑀁 𑀲𑀁𑀔𑀼𑀩𑁆𑀪𑀺𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀁 𑀖𑀸𑀢𑀸𑀧𑁂𑀲𑀻’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 ‘‘𑀇𑀤𑀁 𑀢𑁂 𑀲𑀸𑀫𑀺, 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀅𑀣 𑀦𑀁 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀤𑀺𑀲𑁆𑀯𑀸𑀯 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀬𑀁 𑀅𑀭𑀸𑀚𑀸𑀯 𑀭𑀸𑀚𑀮𑀻𑀴𑀁 𑀓𑀭𑁄𑀢𑀺, 𑀫𑀫 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀅𑀧𑀭𑀚𑁆𑀛𑀢𑀺, 𑀕𑀘𑁆𑀙𑀣 𑀦𑀁 𑀘𑁄𑀭𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑁂𑀣𑀸’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 ‘‘𑀦 𑀫𑀬𑁆𑀳𑀁, 𑀢𑀸𑀢, 𑀏𑀯𑀭𑀽𑀧𑁄 𑀅𑀧𑀭𑀸𑀥𑁄 𑀅𑀢𑁆𑀣𑀺, 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀫𑀸 𑀫𑀁 𑀦𑀸𑀲𑁂𑀳𑀻’’𑀢𑀺 𑀧𑀺𑀢𑀭𑀁 𑀬𑀸𑀘𑀺. 𑀲𑁄 𑀢𑀲𑁆𑀲 𑀓𑀣𑀁 𑀦 𑀕𑀡𑁆𑀳𑀺.

𑀢𑀢𑁄 𑀲𑁄𑀴𑀲𑀲𑀳𑀲𑁆𑀲𑀸 𑀅𑀦𑁆𑀢𑁂𑀧𑀼𑀭𑀺𑀓𑀸 ‘‘𑀢𑀸𑀢 𑀫𑀳𑀸𑀧𑀤𑀼𑀫𑀓𑀼𑀫𑀸𑀭, 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀇𑀤𑀁 𑀮𑀤𑁆𑀥’’𑀦𑁆𑀢𑀺 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀲𑀩𑁆𑀩𑁂 ¶ 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀬𑁄𑀧𑀺 𑀅𑀫𑀘𑁆𑀘𑀧𑀭𑀺𑀚𑀦𑀸𑀧𑀺 ‘‘𑀤𑁂𑀯, 𑀓𑀼𑀫𑀸𑀭𑁄 𑀲𑀻𑀮𑀸𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁄 𑀯𑀁𑀲𑀸𑀦𑀼𑀭𑀓𑁆𑀔𑀺𑀢𑁄 𑀭𑀚𑁆𑀚𑀤𑀸𑀬𑀸𑀤𑁄, 𑀫𑀸 𑀦𑀁 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 𑀯𑀺𑀦𑀸𑀲𑁂𑀳𑀺, 𑀭𑀜𑁆𑀜𑀸 𑀦𑀸𑀫 𑀦𑀺𑀲𑀫𑁆𑀫𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀢 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼 𑁋

𑁧𑁦𑁬.

‘‘𑀦𑀸𑀤𑀝𑁆𑀞𑀸 𑀧𑀭𑀢𑁄 𑀤𑁄𑀲𑀁, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀇𑀲𑁆𑀲𑀭𑁄 𑀧𑀡𑀬𑁂 𑀤𑀡𑁆𑀟𑀁, 𑀲𑀸𑀫𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬.

𑁧𑁦𑁭.

‘‘𑀬𑁄 𑀘 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸, 𑀤𑀡𑁆𑀟𑀁 𑀓𑀼𑀩𑁆𑀩𑀢𑀺 𑀔𑀢𑁆𑀢𑀺𑀬𑁄;

𑀲𑀓𑀡𑁆𑀝𑀓𑀁 𑀲𑁄 𑀕𑀺𑀮𑀢𑀺, 𑀚𑀘𑁆𑀘𑀦𑁆𑀥𑁄𑀯 𑀲𑀫𑀓𑁆𑀔𑀺𑀓𑀁.

𑁧𑁦𑁮.

‘‘𑀅𑀤𑀡𑁆𑀟𑀺𑀬𑀁 ¶ 𑀤𑀡𑁆𑀟𑀬𑀢𑀺, 𑀤𑀡𑁆𑀟𑀺𑀬𑀜𑁆𑀘 𑀅𑀤𑀡𑁆𑀟𑀺𑀬𑀁;

𑀅𑀦𑁆𑀥𑁄𑀯 𑀯𑀺𑀲𑀫𑀁 𑀫𑀕𑁆𑀕𑀁, 𑀦 𑀚𑀸𑀦𑀸𑀢𑀺 𑀲𑀫𑀸𑀲𑀫𑀁.

𑁧𑁦𑁯.

‘‘𑀬𑁄 𑀘 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀲𑀼𑀤𑀺𑀝𑁆𑀞𑀫𑀦𑀼𑀲𑀸𑀲𑁂𑀬𑁆𑀬, 𑀲 𑀯𑁂 𑀯𑁄𑀳𑀭𑀺𑀢𑀼 𑀫𑀭𑀳𑀢𑀺.

𑁧𑁧𑁦.

‘‘𑀦𑁂𑀓𑀦𑁆𑀢𑀫𑀼𑀤𑀼𑀦𑀸 𑀲𑀓𑁆𑀓𑀸, 𑀏𑀓𑀦𑁆𑀢𑀢𑀺𑀔𑀺𑀡𑁂𑀦 𑀯𑀸;

𑀅𑀢𑁆𑀢𑀁 𑀫𑀳𑀦𑁆𑀢𑁂 𑀞𑀧𑁂𑀢𑀼𑀁, 𑀢𑀲𑁆𑀫𑀸 𑀉𑀪𑀬𑀫𑀸𑀘𑀭𑁂.

𑁧𑁧𑁧.

‘‘𑀧𑀭𑀺𑀪𑀽𑀢𑁄 ¶ 𑀫𑀼𑀤𑀼 𑀳𑁄𑀢𑀺, 𑀅𑀢𑀺𑀢𑀺𑀓𑁆𑀔𑁄 𑀘 𑀯𑁂𑀭𑀯𑀸;

𑀏𑀢𑀜𑁆𑀘 𑀉𑀪𑀬𑀁 𑀜𑀢𑁆𑀯𑀸, 𑀅𑀦𑀼𑀫𑀚𑁆𑀛𑀁 𑀲𑀫𑀸𑀘𑀭𑁂.

𑁧𑁧𑁨.

‘‘𑀩𑀳𑀼𑀫𑁆𑀧𑀺 𑀭𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀤𑀼𑀝𑁆𑀞𑁄𑀧𑀺 𑀩𑀳𑀼 𑀪𑀸𑀲𑀢𑀺;

𑀦 𑀇𑀢𑁆𑀣𑀺𑀓𑀸𑀭𑀡𑀸 𑀭𑀸𑀚, 𑀧𑀼𑀢𑁆𑀢𑀁 𑀖𑀸𑀢𑁂𑀢𑀼𑀫𑀭𑀳𑀲𑀻’’𑀢𑀺.

𑀢𑀢𑁆𑀣 𑀦𑀸𑀤𑀝𑁆𑀞𑀸𑀢𑀺 𑀦 𑀅𑀤𑀺𑀲𑁆𑀯𑀸. 𑀧𑀭𑀢𑁄𑀢𑀺 𑀧𑀭𑀲𑁆𑀲. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀦𑀺. 𑀅𑀡𑀼𑀁𑀣𑀽𑀮𑀸𑀦𑀻𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀸𑀦𑀺 𑀯𑀚𑁆𑀚𑀸𑀦𑀺. 𑀲𑀸𑀫𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬𑀸𑀢𑀺 𑀧𑀭𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀁 𑀅𑀓𑀢𑁆𑀯𑀸 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 𑀤𑀡𑁆𑀟𑀁 𑀦 𑀧𑀡𑀬𑁂 𑀦 𑀧𑀝𑁆𑀞𑀧𑁂𑀬𑁆𑀬. 𑀫𑀳𑀸𑀲𑀫𑁆𑀫𑀢𑀭𑀸𑀚𑀓𑀸𑀮𑀲𑁆𑀫𑀺𑀜𑁆𑀳𑀺 𑀲𑀢𑀢𑁄 𑀉𑀢𑁆𑀢𑀭𑀺 𑀤𑀡𑁆𑀟𑁄 𑀦𑀸𑀫 𑀦𑀢𑁆𑀣𑀺, 𑀢𑀸𑀴𑀦𑀕𑀭𑀳𑀡𑀧𑀩𑁆𑀩𑀸𑀚𑀦𑀢𑁄 𑀉𑀤𑁆𑀥𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑀖𑀸𑀢𑀦𑀁 𑀦𑀸𑀫 𑀦𑀢𑁆𑀣𑀺, 𑀧𑀘𑁆𑀙𑀸 𑀓𑀓𑁆𑀔𑀴𑀭𑀸𑀚𑀽𑀦𑀁𑀬𑁂𑀯 𑀓𑀸𑀮𑁂 𑀏𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀥𑀸𑀬 𑀢𑁂 𑀅𑀫𑀘𑁆𑀘𑀸 ‘‘𑀏𑀓𑀦𑁆𑀢𑁂𑀦𑁂𑀯 𑀧𑀭𑀲𑁆𑀲 𑀤𑁄𑀲𑀁 𑀲𑀸𑀫𑀁 𑀅𑀤𑀺𑀲𑁆𑀯𑀸 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀏𑀯𑀫𑀸𑀳𑀁𑀲𑀼.

𑀬𑁄 𑀘 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀫𑀳𑀸𑀭𑀸𑀚, 𑀏𑀯𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀤𑁄𑀲𑀸𑀦𑀼𑀘𑁆𑀙𑀯𑀺𑀓𑁂 𑀤𑀡𑁆𑀟𑁂 𑀧𑀡𑁂𑀢𑀩𑁆𑀩𑁂 𑀬𑁄 𑀭𑀸𑀚𑀸 𑀅𑀕𑀢𑀺𑀕𑀫𑀦𑁂 𑀞𑀺𑀢𑁄 𑀢𑀁 𑀤𑁄𑀲𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀤𑀡𑁆𑀟𑀁 𑀓𑀭𑁄𑀢𑀺, 𑀲𑁄 ¶ 𑀅𑀢𑁆𑀢𑀦𑁄 𑀤𑀼𑀓𑁆𑀔𑀓𑀸𑀭𑀡𑀁 𑀓𑀭𑁄𑀦𑁆𑀢𑁄 𑀲𑀓𑀡𑁆𑀝𑀓𑀁 𑀪𑁄𑀚𑀦𑀁 𑀕𑀺𑀮𑀢𑀺 𑀦𑀸𑀫, 𑀚𑀘𑁆𑀘𑀦𑁆𑀥𑁄 𑀯𑀺𑀬 𑀘 𑀲𑀫𑀓𑁆𑀔𑀺𑀓𑀁 𑀪𑀼𑀜𑁆𑀚𑀢𑀺 𑀦𑀸𑀫. 𑀅𑀤𑀡𑁆𑀟𑀺𑀬𑀦𑁆𑀢𑀺 𑀬𑁄 𑀅𑀤𑀡𑁆𑀟𑀺𑀬𑀁 𑀅𑀤𑀡𑁆𑀟𑀧𑀡𑁂𑀢𑀩𑁆𑀩𑀜𑁆𑀘 𑀤𑀡𑁆𑀟𑁂𑀢𑁆𑀯𑀸 𑀤𑀡𑁆𑀟𑀺𑀬𑀜𑁆𑀘 𑀤𑀡𑁆𑀟𑀧𑀡𑁂𑀢𑀩𑁆𑀩𑀁 𑀅𑀤𑀡𑁆𑀟𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀫𑁂𑀯 𑀓𑀭𑁄𑀢𑀺, 𑀲𑁄 𑀅𑀦𑁆𑀥𑁄 𑀯𑀺𑀬 𑀯𑀺𑀲𑀫𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀦 𑀚𑀸𑀦𑀸𑀢𑀺 𑀲𑀫𑀸𑀲𑀫𑀁, 𑀢𑀢𑁄 𑀧𑀸𑀲𑀸𑀡𑀸𑀤𑀻𑀲𑀼 𑀧𑀓𑁆𑀔𑀮𑀦𑁆𑀢𑁄 𑀅𑀦𑁆𑀥𑁄 𑀯𑀺𑀬 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀻𑀢𑀺 ¶ 𑀅𑀢𑁆𑀣𑁄. 𑀏𑀢𑀸𑀦𑀺 𑀞𑀸𑀦𑀸𑀦𑀻𑀢𑀺 𑀏𑀢𑀸𑀦𑀺 𑀤𑀡𑁆𑀟𑀺𑀬𑀸𑀤𑀡𑁆𑀟𑀺𑀬𑀓𑀸𑀭𑀡𑀸𑀦𑀺 𑀘𑁂𑀯 𑀤𑀡𑁆𑀟𑀺𑀬𑀓𑀸𑀭𑀡𑁂𑀲𑀼𑀧𑀺 𑀅𑀡𑀼𑀁𑀣𑀽𑀮𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀲𑀼𑀤𑀺𑀝𑁆𑀞𑀁 𑀤𑀺𑀲𑁆𑀯𑀸 𑀅𑀦𑀼𑀲𑀸𑀲𑁂𑀬𑁆𑀬, 𑀲 𑀯𑁂 𑀯𑁄𑀳𑀭𑀺𑀢𑀼𑀁 𑀭𑀚𑁆𑀚𑀫𑀦𑀼𑀲𑀸𑀲𑀺𑀢𑀼𑀁 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀁 𑀫𑀳𑀦𑁆𑀢𑁂 𑀞𑀧𑁂𑀢𑀼𑀦𑁆𑀢𑀺 𑀏𑀯𑀭𑀽𑀧𑁄 𑀅𑀦𑀼𑀧𑁆𑀧𑀦𑁆𑀦𑁂 𑀪𑁄𑀕𑁂 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑁂 𑀣𑀸𑀯𑀭𑁂 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀫𑀳𑀦𑁆𑀢𑁂 𑀉𑀴𑀸𑀭𑁂 𑀇𑀲𑁆𑀲𑀭𑀺𑀬𑁂 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀤𑀽𑀢𑀺 𑀫𑀼𑀤𑀼𑀭𑀸𑀚𑀸 𑀭𑀝𑁆𑀞𑀯𑀸𑀲𑀻𑀦𑀁 𑀧𑀭𑀺𑀪𑀽𑀢𑁄 𑀳𑁄𑀢𑀺 𑀅𑀯𑀜𑁆𑀜𑀸𑀢𑁄, 𑀲𑁄 𑀭𑀚𑁆𑀚𑀁 𑀦𑀺𑀘𑁆𑀘𑁄𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑁂𑀭𑀯𑀸𑀢𑀺 𑀅𑀢𑀺𑀢𑀺𑀓𑁆𑀔𑀲𑁆𑀲 𑀧𑀦 𑀲𑀩𑁆𑀩𑁂𑀧𑀺 𑀭𑀝𑁆𑀞𑀯𑀸𑀲𑀺𑀦𑁄 𑀯𑁂𑀭𑀺𑀦𑁄 𑀳𑁄𑀦𑁆𑀢𑀻𑀢𑀺 𑀲𑁄 𑀯𑁂𑀭𑀯𑀸 𑀦𑀸𑀫 𑀳𑁄𑀢𑀺. 𑀅𑀦𑀼𑀫𑀚𑁆𑀛𑀦𑁆𑀢𑀺 𑀅𑀦𑀼𑀪𑀽𑀢𑀁 𑀫𑀼𑀤𑀼𑀢𑀺𑀔𑀺𑀡𑀪𑀸𑀯𑀸𑀦𑀁 𑀫𑀚𑁆𑀛𑀁 𑀲𑀫𑀸𑀘𑀭𑁂, 𑀅𑀫𑀼𑀤𑀼 𑀅𑀢𑀺𑀓𑁆𑀔𑁄 𑀳𑀼𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦 𑀇𑀢𑁆𑀣𑀺𑀓𑀸𑀭𑀡𑀸𑀢𑀺 𑀧𑀸𑀧𑀁 𑀮𑀸𑀫𑀓𑀁 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀯𑀁𑀲𑀸𑀦𑀼𑀭𑀓𑁆𑀔𑀓𑀁 𑀙𑀢𑁆𑀢𑀤𑀸𑀬𑀸𑀤𑀁 𑀧𑀼𑀢𑁆𑀢𑀁 𑀖𑀸𑀢𑁂𑀢𑀼𑀁 𑀦𑀸𑀭𑀳𑀲𑀺, 𑀫𑀳𑀸𑀭𑀸𑀚𑀸𑀢𑀺.

𑀏𑀯𑀁 ¶ 𑀦𑀸𑀦𑀸𑀓𑀸𑀭𑀡𑁂𑀳𑀺 𑀓𑀣𑁂𑀦𑁆𑀢𑀸𑀧𑀺 𑀅𑀫𑀘𑁆𑀘𑀸 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀸𑀘𑀦𑁆𑀢𑁄 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀦𑁆𑀥𑀩𑀸𑀮𑁄 𑀧𑀦 𑀭𑀸𑀚𑀸 ‘‘𑀕𑀘𑁆𑀙𑀣 𑀦𑀁 𑀘𑁄𑀭𑀧𑀧𑀸𑀢𑁂 𑀔𑀺𑀧𑀣𑀸’’𑀢𑀺 𑀆𑀡𑀸𑀧𑁂𑀦𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁩.

‘‘𑀲𑀩𑁆𑀩𑁄𑀯 𑀮𑁄𑀓𑁄 𑀏𑀓𑀢𑁄, 𑀇𑀢𑁆𑀣𑀻 𑀘 𑀅𑀬𑀫𑁂𑀓𑀺𑀓𑀸;

𑀢𑁂𑀦𑀸𑀳𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀁, 𑀕𑀘𑁆𑀙𑀣 𑀧𑀓𑁆𑀔𑀺𑀧𑀣𑁂𑀯 𑀢’’𑀦𑁆𑀢𑀺.

𑀢𑀢𑁆𑀣 𑀢𑁂𑀦𑀸𑀳𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀲𑀩𑁆𑀩𑁄 𑀮𑁄𑀓𑁄 𑀏𑀓𑀢𑁄 𑀓𑀼𑀫𑀸𑀭𑀲𑁆𑀲𑁂𑀯 𑀧𑀓𑁆𑀔𑁄 𑀳𑀼𑀢𑁆𑀯𑀸 𑀞𑀺𑀢𑁄, 𑀅𑀬𑀜𑁆𑀘 𑀇𑀢𑁆𑀣𑀻 𑀏𑀓𑀺𑀓𑀸𑀯, 𑀢𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀇𑀫𑀺𑀲𑁆𑀲𑀸 𑀯𑀘𑀦𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀁, 𑀕𑀘𑁆𑀙𑀣 𑀢𑀁 𑀧𑀩𑁆𑀩𑀢𑀁 𑀆𑀭𑁄𑀧𑁂𑀢𑁆𑀯𑀸 𑀧𑀧𑀸𑀢𑁂 𑀔𑀺𑀧𑀣𑁂𑀯𑀸𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀲𑁄𑀴𑀲𑀲𑀳𑀲𑁆𑀲𑀸𑀲𑀼 𑀭𑀸𑀚𑀇𑀢𑁆𑀣𑀻𑀲𑀼 𑀏𑀓𑀸𑀧𑀺 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀺𑀢𑁆𑀯𑀸 𑀓𑁂𑀲𑁂 𑀯𑀺𑀓𑀺𑀭𑀬𑀫𑀸𑀦𑀸 𑀯𑀺𑀮𑀧𑀺𑀁𑀲𑀼. 𑀭𑀸𑀚𑀸 ‘‘𑀇𑀫𑁂 𑀇𑀫𑀲𑁆𑀲 𑀧𑀧𑀸𑀢𑁂 𑀔𑀺𑀧𑀦𑀁 ¶ 𑀧𑀝𑀺𑀩𑀸𑀳𑁂𑀬𑁆𑀬𑀼’’𑀦𑁆𑀢𑀺 𑀲𑀧𑀭𑀺𑀯𑀸𑀭𑁄 𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲𑁂𑀯 𑀦𑀁 𑀉𑀤𑁆𑀥𑀁𑀧𑀸𑀤𑀁 𑀅𑀯𑀁𑀲𑀺𑀭𑀁 𑀓𑀢𑁆𑀯𑀸 𑀕𑀸𑀳𑀸𑀧𑁂𑀢𑁆𑀯𑀸 𑀧𑀧𑀸𑀢𑁂 𑀔𑀺𑀧𑀸𑀧𑁂𑀲𑀺. 𑀅𑀣𑀲𑁆𑀲 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀫𑀸 𑀪𑀸𑀬𑀺 𑀫𑀳𑀸𑀧𑀤𑀼𑀫𑀸’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ¶ 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑀁 𑀨𑀭𑀸𑀧𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀧𑀢𑀺𑀝𑁆𑀞𑀺𑀢𑀦𑀸𑀕𑀭𑀸𑀚𑀲𑁆𑀲 𑀨𑀡𑀕𑀩𑁆𑀪𑁂 𑀞𑀧𑁂𑀲𑀺. 𑀦𑀸𑀕𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀬𑀲𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀢𑁆𑀣 𑀏𑀓𑀲𑀁𑀯𑀘𑁆𑀙𑀭𑀁 𑀯𑀲𑀺𑀢𑁆𑀯𑀸 ‘‘𑀫𑀦𑀼𑀲𑁆𑀲𑀧𑀣𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀢𑀭𑀁 𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀦𑀸𑀕𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑁄𑀧𑀺 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀢𑀢𑁆𑀣 𑀧𑀝𑀺𑀯𑀲𑀢𑀺.

𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀯𑀦𑀘𑀭𑀓𑁄 𑀢𑀁 𑀞𑀸𑀦𑀁 𑀧𑀢𑁆𑀢𑁄 𑀫𑀳𑀸𑀲𑀢𑁆𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀦𑀦𑀼 𑀢𑁆𑀯𑀁 𑀤𑁂𑀯, 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 ‘‘𑀤𑁂𑀯, 𑀧𑀼𑀢𑁆𑀢𑁄 𑀢𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀢𑀺, 𑀅𑀳𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀆𑀕𑀢𑁄’’𑀢𑀺. ‘‘𑀧𑀘𑁆𑀘𑀓𑁆𑀔𑀢𑁄 𑀢𑁂 𑀤𑀺𑀝𑁆𑀞𑁄’’𑀢𑀺? ‘‘𑀆𑀫 𑀤𑁂𑀯𑀸’’𑀢𑀺. 𑀭𑀸𑀚𑀸 𑀫𑀳𑀸𑀩𑀮𑀓𑀸𑀬𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀦𑀧𑀭𑀺𑀬𑀦𑁆𑀢𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀓𑀜𑁆𑀘𑀦𑀭𑀽𑀧𑀲𑀤𑀺𑀲𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑀁 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀫𑀘𑁆𑀘𑀸𑀧𑀺 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ¶ 𑀦𑀺𑀲𑀻𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀸𑀚𑀸𑀦𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀢𑀸𑀢, 𑀫𑀬𑀸 𑀢𑁆𑀯𑀁 𑀕𑀫𑁆𑀪𑀻𑀭𑁂 ¶ 𑀧𑀧𑀸𑀢𑁂 𑀔𑀺𑀧𑀸𑀧𑀺𑀢𑁄, 𑀓𑀣𑀁 𑀲𑀚𑀻𑀯𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁪.

‘‘𑀅𑀦𑁂𑀓𑀢𑀸𑀮𑁂 𑀦𑀭𑀓𑁂, 𑀕𑀫𑁆𑀪𑀻𑀭𑁂 𑀘 𑀲𑀼𑀤𑀼𑀢𑁆𑀢𑀭𑁂;

𑀧𑀸𑀢𑀺𑀢𑁄 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀓𑁂𑀦 𑀢𑁆𑀯𑀁 𑀢𑀢𑁆𑀣 𑀦𑀸𑀫𑀭𑀻’’𑀢𑀺.

𑀢𑀢𑁆𑀣 𑀅𑀦𑁂𑀓𑀢𑀸𑀮𑁂𑀢𑀺 𑀅𑀦𑁂𑀓𑀢𑀸𑀮𑀧𑁆𑀧𑀫𑀸𑀡𑁂. 𑀦𑀸𑀫𑀭𑀻𑀢𑀺 𑀦 𑀅𑀫𑀭𑀺.

𑀢𑀢𑁄𑀧𑀭𑀁 𑁋

𑁧𑁧𑁫.

‘‘𑀦𑀸𑀕𑁄 𑀚𑀸𑀢𑀨𑀡𑁄 𑀢𑀢𑁆𑀣, 𑀣𑀸𑀫𑀯𑀸 𑀕𑀺𑀭𑀺𑀲𑀸𑀦𑀼𑀚𑁄;

𑀧𑀘𑁆𑀘𑀕𑁆𑀕𑀳𑀺 𑀫𑀁 𑀪𑁄𑀕𑁂𑀳𑀺, 𑀢𑁂𑀦𑀸𑀳𑀁 𑀢𑀢𑁆𑀣 𑀦𑀸𑀫𑀭𑀺𑀁.

𑁧𑁧𑁬.

‘‘𑀏𑀳𑀺 ¶ 𑀢𑀁 𑀧𑀝𑀺𑀦𑁂𑀲𑁆𑀲𑀸𑀫𑀺, 𑀭𑀸𑀚𑀧𑀼𑀢𑁆𑀢 𑀲𑀓𑀁 𑀖𑀭𑀁;

𑀭𑀚𑁆𑀚𑀁 𑀓𑀸𑀭𑁂𑀳𑀺 𑀪𑀤𑁆𑀤𑀦𑁆𑀢𑁂, 𑀓𑀺𑀁 𑀅𑀭𑀜𑁆𑀜𑁂 𑀓𑀭𑀺𑀲𑁆𑀲𑀲𑀺.

𑁧𑁧𑁭.

‘‘𑀬𑀣𑀸 𑀕𑀺𑀮𑀺𑀢𑁆𑀯𑀸 𑀩𑀴𑀺𑀲𑀁, 𑀉𑀤𑁆𑀥𑀭𑁂𑀬𑁆𑀬 𑀲𑀮𑁄𑀳𑀺𑀢𑀁;

𑀉𑀤𑁆𑀥𑀭𑀺𑀢𑁆𑀯𑀸 𑀲𑀼𑀔𑀻 𑀅𑀲𑁆𑀲, 𑀏𑀯𑀁 𑀧𑀲𑁆𑀲𑀸𑀫𑀺 𑀅𑀢𑁆𑀢𑀦𑀁.

𑁧𑁧𑁮.

‘‘𑀓𑀺𑀁 𑀦𑀼 𑀢𑁆𑀯𑀁 𑀩𑀴𑀺𑀲𑀁 𑀩𑁆𑀭𑀽𑀲𑀺, 𑀓𑀺𑀁 𑀢𑁆𑀯𑀁 𑀩𑁆𑀭𑀽𑀲𑀺 𑀲𑀮𑁄𑀳𑀺𑀢𑀁;

𑀓𑀺𑀁 𑀦𑀼 𑀢𑁆𑀯𑀁 𑀉𑀩𑁆𑀪𑀢𑀁 𑀩𑁆𑀭𑀽𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁧𑁯.

‘‘𑀓𑀸𑀫𑀸𑀳𑀁 𑀩𑀴𑀺𑀲𑀁 𑀩𑁆𑀭𑀽𑀫𑀺, 𑀳𑀢𑁆𑀣𑀺𑀅𑀲𑁆𑀲𑀁 𑀲𑀮𑁄𑀳𑀺𑀢𑀁;

𑀘𑀢𑁆𑀢𑀸𑀳𑀁 𑀉𑀩𑁆𑀪𑀢𑀁 𑀩𑁆𑀭𑀽𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀔𑀢𑁆𑀢𑀺𑀬𑀸’’𑀢𑀺. 𑁋

𑀇𑀫𑀸𑀲𑀼 𑀧𑀜𑁆𑀘𑀲𑀼 𑀏𑀓𑀦𑁆𑀢𑀭𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀩𑁄𑀥𑀺𑀲𑀢𑁆𑀢𑀲𑁆𑀲, 𑀤𑁆𑀯𑁂 𑀭𑀜𑁆𑀜𑁄.

𑀢𑀢𑁆𑀣 ¶ 𑀧𑀘𑁆𑀘𑀕𑁆𑀕𑀳𑀺 𑀫𑀦𑁆𑀢𑀺 𑀧𑀩𑁆𑀩𑀢𑀧𑀢𑀦𑀓𑀸𑀮𑁂 𑀤𑁂𑀯𑀢𑀸𑀬 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑁂𑀦 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀉𑀧𑀦𑀻𑀢𑀁 𑀫𑀁 𑀧𑀝𑀺𑀕𑁆𑀕𑀡𑁆𑀳𑀺, 𑀕𑀳𑁂𑀢𑁆𑀯𑀸 𑀘 𑀧𑀦 𑀦𑀸𑀕𑀪𑀯𑀦𑀁 𑀆𑀦𑁂𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 ‘‘𑀫𑀦𑀼𑀲𑁆𑀲𑀧𑀣𑀁 𑀫𑀁 𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀫𑀁 𑀫𑀦𑀼𑀲𑁆𑀲𑀧𑀣𑀁 𑀆𑀦𑁂𑀲𑀺. 𑀅𑀳𑀁 𑀇𑀥𑀸𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀇𑀢𑀺 𑀢𑁂𑀦 𑀤𑁂𑀯𑀢𑀸𑀬 𑀘 𑀦𑀸𑀕𑀭𑀸𑀚𑀲𑁆𑀲 𑀘 𑀆𑀦𑀼𑀪𑀸𑀯𑁂𑀦 𑀅𑀳𑀁 𑀢𑀢𑁆𑀣 𑀦𑀸𑀫𑀭𑀺𑀦𑁆𑀢𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺.

𑀏𑀳𑀻𑀢𑀺 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀢𑀸𑀢, 𑀅𑀳𑀁 𑀩𑀸𑀮𑀪𑀸𑀯𑁂𑀦 𑀇𑀢𑁆𑀣𑀺𑀬𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁂 𑀢𑀬𑀺 𑀅𑀧𑀭𑀚𑁆𑀛𑀺𑀁, 𑀔𑀫𑀸𑀳𑀺 𑀫𑁂 𑀤𑁄𑀲’’𑀦𑁆𑀢𑀺 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀫𑀳𑀸𑀭𑀸𑀚, 𑀔𑀫𑀸𑀫 𑀢𑁂 𑀤𑁄𑀲𑀁, 𑀇𑀢𑁄 𑀧𑀭𑀁 𑀧𑀼𑀦 𑀫𑀸 𑀏𑀯𑀁 𑀅𑀦𑀺𑀲𑀫𑁆𑀫𑀓𑀸𑀭𑀻 𑀪𑀯𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀸𑀢, 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀼𑀮𑀲𑀦𑁆𑀢𑀓𑀁 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁄 𑀫𑀬𑁆𑀳𑀁 𑀔𑀫𑀲𑀺 𑀦𑀸𑀫𑀸’’𑀢𑀺 𑀏𑀯𑀫𑀸𑀳.

𑀉𑀤𑁆𑀥𑀭𑀺𑀢𑁆𑀯𑀸𑀢𑀺 ¶ 𑀳𑀤𑀬𑀯𑀓𑁆𑀓𑀸𑀤𑀻𑀦𑀺 𑀅𑀲𑀫𑁆𑀧𑀢𑁆𑀢𑀫𑁂𑀯 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀼𑀔𑀻 𑀅𑀲𑁆𑀲. 𑀏𑀯𑀁 𑀧𑀲𑁆𑀲𑀸𑀫𑀺 𑀅𑀢𑁆𑀢𑀦𑀦𑁆𑀢𑀺 𑀅𑀢𑁆𑀢𑀸𑀦𑀁 𑀫𑀳𑀸𑀭𑀸𑀚, 𑀏𑀯𑀁 𑀅𑀳𑀫𑁆𑀧𑀺 𑀧𑀼𑀦 𑀲𑁄𑀢𑁆𑀣𑀺𑀪𑀸𑀯𑀧𑁆𑀧𑀢𑁆𑀢𑀁 𑀕𑀺𑀮𑀺𑀢𑀩𑀴𑀺𑀲𑀁 𑀧𑀼𑀭𑀺𑀲𑀫𑀺𑀯 𑀅𑀢𑁆𑀢𑀸𑀦𑀁 𑀧𑀲𑁆𑀲𑀸𑀫𑀻𑀢𑀺. ‘‘𑀓𑀺𑀁 𑀦𑀼 𑀢𑁆𑀯’’𑀦𑁆𑀢𑀺 𑀇𑀤𑀁 𑀭𑀸𑀚𑀸 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀲𑁄𑀢𑀼𑀁 𑀧𑀼𑀘𑁆𑀙𑀢𑀺. 𑀓𑀸𑀫𑀸𑀳𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀳𑀁. 𑀳𑀢𑁆𑀣𑀺𑀅𑀲𑁆𑀲𑀁 𑀲𑀮𑁄𑀳𑀺𑀢𑀦𑁆𑀢𑀺 𑀏𑀯𑀁 𑀳𑀢𑁆𑀣𑀺𑀅𑀲𑁆𑀲𑀭𑀣𑀯𑀸𑀳𑀦𑀁 𑀲𑀢𑁆𑀢𑀭𑀢𑀦𑀸𑀤𑀺𑀯𑀺𑀪𑀯𑀁 ‘‘𑀲𑀮𑁄𑀳𑀺𑀢’’𑀦𑁆𑀢𑀺 𑀩𑁆𑀭𑀽𑀫𑀺. 𑀘𑀢𑁆𑀢𑀸𑀳𑀦𑁆𑀢𑀺 𑀘𑀢𑁆𑀢𑀁 𑀅𑀳𑀁, 𑀬𑀤𑀸 𑀢𑀁 𑀲𑀩𑁆𑀩𑀫𑁆𑀧𑀺 𑀘𑀢𑁆𑀢𑀁 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑀁, 𑀢𑀁 𑀤𑀸𑀦𑀸𑀳𑀁 ‘‘𑀉𑀩𑁆𑀪𑀢’’𑀦𑁆𑀢𑀺 𑀩𑁆𑀭𑀽𑀫𑀺.

‘‘𑀇𑀢𑀺 ¶ 𑀔𑁄, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀭𑀚𑁆𑀚𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑁆𑀯𑀁 𑀧𑀦 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀅𑀕𑀢𑀺𑀕𑀫𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺 𑀫𑀳𑀸𑀲𑀢𑁆𑀢𑁄 𑀧𑀺𑀢𑀼 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁄 𑀭𑀸𑀚𑀸 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀦𑀕𑀭𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. ‘‘𑀅𑀳𑀁 𑀓𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑁂𑀦 𑀆𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁂𑀦 𑀧𑀼𑀢𑁆𑀢𑁂𑀦 𑀯𑀺𑀬𑁄𑀕𑀁 𑀧𑀢𑁆𑀢𑁄’’𑀢𑀺? ‘‘𑀅𑀕𑁆𑀕𑀫𑀳𑁂𑀲𑀺𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀁 𑀉𑀤𑁆𑀥𑀁𑀧𑀸𑀤𑀁 𑀕𑀸𑀳𑀸𑀧𑁂𑀢𑁆𑀯𑀸 𑀘𑁄𑀭𑀧𑀧𑀸𑀢𑁂 𑀔𑀺𑀧𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑁂𑀲𑀸 𑀫𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑁋

𑁧𑁨𑁦.

‘‘𑀘𑀺𑀜𑁆𑀘𑀫𑀸𑀡𑀯𑀺𑀓𑀸 ¶ 𑀫𑀸𑀢𑀸, 𑀤𑁂𑀯𑀤𑀢𑁆𑀢𑁄 𑀘 𑀫𑁂 𑀧𑀺𑀢𑀸;

𑀆𑀦𑀦𑁆𑀤𑁄 𑀧𑀡𑁆𑀟𑀺𑀢𑁄 𑀦𑀸𑀕𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀤𑁂𑀯𑀢𑀸;

𑀭𑀸𑀚𑀧𑀼𑀢𑁆𑀢𑁄 𑀅𑀳𑀁 𑀆𑀲𑀺𑀁, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺. 𑁋

𑀑𑀲𑀸𑀦𑀕𑀸𑀣𑀸𑀬 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺.

𑀫𑀳𑀸𑀧𑀤𑀼𑀫𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁭𑁩] 𑁧𑁦. 𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀅𑀢𑁆𑀣𑀘𑀭𑀓𑀁 𑀅𑀫𑀘𑁆𑀘𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀭𑀜𑁆𑀜𑁄 𑀩𑀳𑀽𑀧𑀓𑀸𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀭𑀸𑀚𑀸 𑀅𑀢𑀺𑀭𑁂𑀓𑀲𑀫𑁆𑀫𑀸𑀦𑀁 𑀓𑀸𑀭𑁂𑀲𑀺. 𑀅𑀯𑀲𑁂𑀲𑀸 𑀦𑀁 𑀅𑀲𑀳𑀫𑀸𑀦𑀸 ‘‘𑀤𑁂𑀯, 𑀅𑀲𑀼𑀓𑁄 𑀦𑀸𑀫 𑀅𑀫𑀘𑁆𑀘𑁄 𑀢𑀼𑀫𑁆𑀳𑀸𑀓𑀁 𑀅𑀦𑀢𑁆𑀣𑀓𑀸𑀭𑀓𑁄’’𑀢𑀺 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀢𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀓𑀺𑀜𑁆𑀘𑀺 𑀤𑁄𑀲𑀁 𑀅𑀤𑀺𑀲𑁆𑀯𑀸 ‘‘𑀅𑀳𑀁 𑀇𑀫𑀲𑁆𑀲 𑀓𑀺𑀜𑁆𑀘𑀺 𑀤𑁄𑀲𑀁 𑀦 𑀧𑀲𑁆𑀲𑀸𑀫𑀺, 𑀓𑀣𑀁 𑀦𑀼 𑀔𑁄 𑀲𑀓𑁆𑀓𑀸 𑀫𑀬𑀸 𑀇𑀫𑀲𑁆𑀲 𑀫𑀺𑀢𑁆𑀢𑀪𑀸𑀯𑀁 𑀯𑀸 𑀅𑀫𑀺𑀢𑁆𑀢𑀪𑀸𑀯𑀁 𑀯𑀸 𑀚𑀸𑀦𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑀁 𑀧𑀜𑁆𑀳𑀁 𑀞𑀧𑁂𑀢𑁆𑀯𑀸 𑀢𑀣𑀸𑀕𑀢𑀁 ¶ 𑀅𑀜𑁆𑀜𑁄 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀣𑀁 𑀦𑀼 𑀔𑁄 𑀲𑀓𑁆𑀓𑀸 𑀧𑀼𑀭𑀺𑀲𑁂𑀦 𑀅𑀢𑁆𑀢𑀦𑁄 𑀫𑀺𑀢𑁆𑀢𑀪𑀸𑀯𑀁 𑀯𑀸 𑀅𑀫𑀺𑀢𑁆𑀢𑀪𑀸𑀯𑀁 𑀯𑀸 𑀚𑀸𑀦𑀺𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂𑀧𑀺 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑀸 𑀇𑀫𑀁 𑀧𑀜𑁆𑀳𑀁 𑀘𑀺𑀦𑁆𑀢𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 𑀓𑀣𑀺𑀢𑀯𑀲𑁂𑀦 ¶ 𑀜𑀢𑁆𑀯𑀸 𑀅𑀫𑀺𑀢𑁆𑀢𑁂 𑀯𑀚𑁆𑀚𑁂𑀢𑁆𑀯𑀸 𑀫𑀺𑀢𑁆𑀢𑁂 𑀲𑁂𑀯𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀅𑀳𑁄𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀏𑀓𑀁 𑀅𑀢𑁆𑀣𑀘𑀭𑀓𑀁 𑀅𑀫𑀘𑁆𑀘𑀁 𑀲𑁂𑀲𑀸 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀣𑀁 𑀦𑀼 𑀔𑁄 𑀲𑀓𑁆𑀓𑀸 𑀫𑀺𑀢𑁆𑀢𑀁 𑀯𑀸 𑀅𑀫𑀺𑀢𑁆𑀢𑀁 𑀯𑀸 𑀜𑀸𑀢𑀼’’𑀦𑁆𑀢𑀺 𑀫𑀳𑀸𑀲𑀢𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁧.

‘‘𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀼𑀩𑁆𑀩𑀸𑀦𑀁, 𑀓𑀣𑀁 𑀯𑀺𑀜𑁆𑀜𑀽 𑀧𑀭𑀓𑁆𑀓𑀫𑁂;

𑀅𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬 𑀫𑁂𑀥𑀸𑀯𑀻, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀁 𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀯𑀸 𑀲𑁄𑀢𑁂𑀦 ¶ 𑀲𑀼𑀢𑁆𑀯𑀸 𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀅𑀫𑀺𑀢𑁆𑀢𑁄’’𑀢𑀺 𑀚𑀸𑀦𑁂𑀬𑁆𑀬, 𑀢𑀲𑁆𑀲 𑀚𑀸𑀦𑀦𑀢𑁆𑀣𑀸𑀬 𑀓𑀣𑀁 𑀯𑀺𑀜𑁆𑀜𑀽 𑀧𑀭𑀓𑁆𑀓𑀫𑁂𑀬𑁆𑀬𑀸𑀢𑀺.

𑀅𑀣𑀲𑁆𑀲 𑀅𑀫𑀺𑀢𑁆𑀢𑀮𑀓𑁆𑀔𑀡𑀁 𑀓𑀣𑁂𑀦𑁆𑀢𑁄 𑀆𑀳 𑁋

𑁧𑁨𑁨.

‘‘𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸, 𑀦 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀺;

𑀘𑀓𑁆𑀔𑀽𑀦𑀺 𑀘𑀲𑁆𑀲 𑀦 𑀤𑀤𑀸𑀢𑀺, 𑀧𑀝𑀺𑀮𑁄𑀫𑀜𑁆𑀘 𑀯𑀢𑁆𑀢𑀢𑀺.

𑁧𑁨𑁩.

‘‘𑀅𑀫𑀺𑀢𑁆𑀢𑁂 𑀢𑀲𑁆𑀲 𑀪𑀚𑀢𑀺, 𑀫𑀺𑀢𑁆𑀢𑁂 𑀢𑀲𑁆𑀲 𑀦 𑀲𑁂𑀯𑀢𑀺;

𑀯𑀡𑁆𑀡𑀓𑀸𑀫𑁂 𑀦𑀺𑀯𑀸𑀭𑁂𑀢𑀺, 𑀅𑀓𑁆𑀓𑁄𑀲𑀦𑁆𑀢𑁂 𑀧𑀲𑀁𑀲𑀢𑀺.

𑁧𑁨𑁪.

‘‘𑀕𑀼𑀬𑁆𑀳𑀜𑁆𑀘 𑀢𑀲𑁆𑀲 𑀦𑀓𑁆𑀔𑀸𑀢𑀺, 𑀢𑀲𑁆𑀲 𑀕𑀼𑀬𑁆𑀳𑀁 𑀦 𑀕𑀽𑀳𑀢𑀺;

𑀓𑀫𑁆𑀫𑀁 𑀢𑀲𑁆𑀲 𑀦 𑀯𑀡𑁆𑀡𑁂𑀢𑀺, 𑀧𑀜𑁆𑀜𑀲𑁆𑀲 𑀦𑀧𑁆𑀧𑀲𑀁𑀲𑀢𑀺.

𑁧𑁨𑁫.

‘‘𑀅𑀪𑀯𑁂 𑀦𑀦𑁆𑀤𑀢𑀺 𑀢𑀲𑁆𑀲, 𑀪𑀯𑁂 𑀢𑀲𑁆𑀲 𑀦 𑀦𑀦𑁆𑀤𑀢𑀺;

𑀅𑀘𑁆𑀙𑁂𑀭𑀁 𑀪𑁄𑀚𑀦𑀁 𑀮𑀤𑁆𑀥𑀸, 𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑁂 𑀲𑀢𑀺;

𑀢𑀢𑁄 𑀦𑀁 𑀦𑀸𑀦𑀼𑀓𑀫𑁆𑀧𑀢𑀺, 𑀅𑀳𑁄 𑀲𑁄𑀧𑀺 𑀮𑀪𑁂𑀬𑁆𑀬𑀺𑀢𑁄.

𑁧𑁨𑁬.

‘‘𑀇𑀘𑁆𑀘𑁂𑀢𑁂 𑀲𑁄𑀴𑀲𑀸𑀓𑀸𑀭𑀸, 𑀅𑀫𑀺𑀢𑁆𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀬𑁂𑀳𑀺 𑀅𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄’’𑀢𑀺.

𑀫𑀳𑀸𑀲𑀢𑁆𑀢𑁄 ¶ 𑀇𑀫𑀸 𑀧𑀜𑁆𑀘 𑀕𑀸𑀣𑀸 𑀯𑀢𑁆𑀯𑀸𑀦 𑀧𑀼𑀦 𑁋

𑁧𑁨𑁭.

‘‘𑀓𑀸𑀦𑀺 ¶ 𑀓𑀫𑁆𑀫𑀸𑀦𑀺 𑀓𑀼𑀩𑁆𑀩𑀸𑀦𑀁, 𑀓𑀣𑀁 𑀯𑀺𑀜𑁆𑀜𑀽 𑀧𑀭𑀓𑁆𑀓𑀫𑁂;

𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬 𑀫𑁂𑀥𑀸𑀯𑀻, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀫𑀺𑀢𑁆𑀢𑀮𑀓𑁆𑀔𑀡𑀁 𑀧𑀼𑀝𑁆𑀞𑁄 𑀲𑁂𑀲𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁮.

‘‘𑀧𑀯𑀼𑀢𑁆𑀣𑀁 ¶ 𑀢𑀲𑁆𑀲 𑀲𑀭𑀢𑀺, 𑀆𑀕𑀢𑀁 𑀅𑀪𑀺𑀦𑀦𑁆𑀤𑀢𑀺;

𑀢𑀢𑁄 𑀓𑁂𑀮𑀸𑀬𑀺𑀢𑁄 𑀳𑁄𑀢𑀺, 𑀯𑀸𑀘𑀸𑀬 𑀧𑀝𑀺𑀦𑀦𑁆𑀤𑀢𑀺.

𑁧𑁨𑁯.

‘‘𑀫𑀺𑀢𑁆𑀢𑁂 𑀢𑀲𑁆𑀲𑁂𑀯 𑀪𑀚𑀢𑀺, 𑀅𑀫𑀺𑀢𑁆𑀢𑁂 𑀢𑀲𑁆𑀲 𑀦 𑀲𑁂𑀯𑀢𑀺;

𑀅𑀓𑁆𑀓𑁄𑀲𑀦𑁆𑀢𑁂 𑀦𑀺𑀯𑀸𑀭𑁂𑀢𑀺, 𑀯𑀡𑁆𑀡𑀓𑀸𑀫𑁂 𑀧𑀲𑀁𑀲𑀢𑀺.

𑁧𑁩𑁦.

‘‘𑀕𑀼𑀬𑁆𑀳𑀜𑁆𑀘 𑀢𑀲𑁆𑀲 𑀅𑀓𑁆𑀔𑀸𑀢𑀺, 𑀢𑀲𑁆𑀲 𑀕𑀼𑀬𑁆𑀳𑀜𑁆𑀘 𑀕𑀽𑀳𑀢𑀺;

𑀓𑀫𑁆𑀫𑀜𑁆𑀘 𑀢𑀲𑁆𑀲 𑀯𑀡𑁆𑀡𑁂𑀢𑀺, 𑀧𑀜𑁆𑀜𑀁 𑀢𑀲𑁆𑀲 𑀧𑀲𑀁𑀲𑀢𑀺.

𑁧𑁩𑁧.

‘‘𑀪𑀯𑁂 𑀘 𑀦𑀦𑁆𑀤𑀢𑀺 𑀢𑀲𑁆𑀲, 𑀅𑀪𑀯𑁂 𑀢𑀲𑁆𑀲 𑀦 𑀦𑀦𑁆𑀤𑀢𑀺;

𑀅𑀘𑁆𑀙𑁂𑀭𑀁 𑀪𑁄𑀚𑀦𑀁 𑀮𑀤𑁆𑀥𑀸, 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑁂 𑀲𑀢𑀺;

𑀢𑀢𑁄 𑀦𑀁 𑀅𑀦𑀼𑀓𑀫𑁆𑀧𑀢𑀺, 𑀅𑀳𑁄 𑀲𑁄𑀧𑀺 𑀮𑀪𑁂𑀬𑁆𑀬𑀺𑀢𑁄.

𑁧𑁩𑁨.

‘‘𑀇𑀘𑁆𑀘𑁂𑀢𑁂 𑀲𑁄𑀴𑀲𑀸𑀓𑀸𑀭𑀸, 𑀫𑀺𑀢𑁆𑀢𑀲𑁆𑀫𑀺𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀬𑁂𑀳𑀺 𑀫𑀺𑀢𑁆𑀢𑀜𑁆𑀘 𑀚𑀸𑀦𑁂𑀬𑁆𑀬, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸𑀢𑀺 𑀢𑀁 𑀫𑀺𑀢𑁆𑀢𑀁 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀤𑀺𑀲𑁆𑀯𑀸 𑀲𑀺𑀢𑀁 𑀦 𑀓𑀭𑁄𑀢𑀺, 𑀧𑀳𑀝𑁆𑀞𑀸𑀓𑀸𑀭𑀁 𑀦 𑀤𑀲𑁆𑀲𑁂𑀢𑀺. 𑀦 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀻𑀢𑀺 𑀢𑀲𑁆𑀲 𑀓𑀣𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀦 𑀧𑀝𑀺𑀦𑀦𑁆𑀤𑀢𑀺 𑀦 𑀢𑀼𑀲𑁆𑀲𑀢𑀺. 𑀘𑀓𑁆𑀔𑀽𑀦𑀺 𑀘𑀲𑁆𑀲 𑀦 𑀤𑀤𑀸𑀢𑀻𑀢𑀺 𑀑𑀮𑁄𑀓𑁂𑀦𑁆𑀢𑀁 𑀦 𑀑𑀮𑁄𑀓𑁂𑀢𑀺. 𑀧𑀝𑀺𑀮𑁄𑀫𑀜𑁆𑀘𑀸𑀢𑀺 𑀢𑀲𑁆𑀲 𑀓𑀣𑀁 𑀧𑀝𑀺𑀧𑁆𑀨𑀭𑀢𑀺 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀯𑀡𑁆𑀡𑀓𑀸𑀫𑁂𑀢𑀺 𑀢𑀲𑁆𑀲 𑀯𑀡𑁆𑀡𑀁 𑀪𑀡𑀦𑁆𑀢𑁂. 𑀦𑀓𑁆𑀔𑀸𑀢𑀻𑀢𑀺 𑀅𑀢𑁆𑀢𑀦𑁄 𑀕𑀼𑀬𑁆𑀳𑀁 𑀢𑀲𑁆𑀲 𑀦 𑀆𑀘𑀺𑀓𑁆𑀔𑀢𑀺. 𑀓𑀫𑁆𑀫𑀁 𑀢𑀲𑁆𑀲𑀸𑀢𑀺 𑀢𑁂𑀦 𑀓𑀢𑀓𑀫𑁆𑀫𑀁 𑀦 𑀯𑀡𑁆𑀡𑀬𑀢𑀺. 𑀧𑀜𑁆𑀜𑀲𑁆𑀲𑀸𑀢𑀺 𑀅𑀲𑁆𑀲 𑀧𑀜𑁆𑀜𑀁 𑀦𑀧𑁆𑀧𑀲𑀁𑀲𑀢𑀺, 𑀜𑀸𑀡𑀲𑀫𑁆𑀧𑀤𑀁 𑀦 𑀧𑀲𑀁𑀲𑀢𑀺. 𑀅𑀪𑀯𑁂𑀢𑀺 𑀅𑀯𑀟𑁆𑀠𑀺𑀬𑀁. 𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑁂 𑀲𑀢𑀻𑀢𑀺 𑀢𑀲𑁆𑀲 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀲𑁆𑀲 ‘‘𑀫𑀫 𑀫𑀺𑀢𑁆𑀢𑀲𑁆𑀲𑀧𑀺 𑀇𑀢𑁄 𑀤𑀲𑁆𑀲𑀸𑀫𑀻’’𑀢𑀺 𑀲𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀦𑀸𑀦𑀼𑀓𑀫𑁆𑀧𑀢𑀻𑀢𑀺 𑀫𑀼𑀤𑀼𑀘𑀺𑀢𑁆𑀢𑁂𑀦 𑀦 𑀘𑀺𑀦𑁆𑀢𑁂𑀢𑀺. 𑀮𑀪𑁂𑀬𑁆𑀬𑀺𑀢𑁄𑀢𑀺 𑀮𑀪𑁂𑀬𑁆𑀬 𑀇𑀢𑁄. 𑀆𑀓𑀸𑀭𑀸𑀢𑀺 𑀓𑀸𑀭𑀡𑀸𑀦𑀺. 𑀧𑀯𑀼𑀢𑁆𑀣𑀦𑁆𑀢𑀺 𑀯𑀺𑀤𑁂𑀲𑀕𑀢𑀁 ¶ . 𑀓𑁂𑀮𑀸𑀬𑀺𑀢𑁄𑀢𑀺 𑀓𑁂𑀮𑀸𑀬𑀢𑀺 𑀫𑀫𑀸𑀬𑀢𑀺 𑀧𑀢𑁆𑀣𑁂𑀢𑀺 𑀧𑀺𑀳𑁂𑀢𑀺 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀘𑀸𑀬𑀸𑀢𑀺 𑀫𑀥𑀼𑀭𑀯𑀘𑀦𑁂𑀦 𑀢𑀁 𑀲𑀫𑀼𑀤𑀸𑀘𑀭𑀦𑁆𑀢𑁄 𑀧𑀝𑀺𑀦𑀦𑁆𑀤𑀢𑀺 𑀢𑀼𑀲𑁆𑀲𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀭𑀸𑀚𑀸 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀓𑀣𑀸𑀬 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀅𑀤𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀧𑁂𑀲 𑀧𑀜𑁆𑀳𑁄 𑀲𑀫𑀼𑀝𑁆𑀞𑀳𑀺, 𑀧𑀡𑁆𑀟𑀺𑀢𑀸𑀯 𑀦𑀁 ¶ 𑀓𑀣𑀬𑀺𑀁𑀲𑀼, 𑀇𑀫𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀫𑀺𑀢𑁆𑀢𑀸𑀫𑀺𑀢𑁆𑀢𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀚𑀸𑀢𑀓𑀼𑀤𑁆𑀤𑀸𑀦𑀁 𑁋

𑀓𑀼𑀡𑀸𑀮𑀁 𑀪𑀤𑁆𑀤𑀲𑀸𑀮𑀜𑁆𑀘, 𑀲𑀫𑀼𑀤𑁆𑀤𑀯𑀸𑀡𑀺𑀚 𑀧𑀡𑁆𑀟𑀺𑀢𑀁;

𑀚𑀦𑀲𑀦𑁆𑀥𑀁 𑀫𑀳𑀸𑀓𑀡𑁆𑀳𑀁, 𑀓𑁄𑀲𑀺𑀬𑀁 𑀲𑀺𑀭𑀺𑀫𑀦𑁆𑀢𑀓𑀁.

𑀧𑀤𑀼𑀫𑀁 𑀫𑀺𑀢𑁆𑀢𑀸𑀫𑀺𑀢𑁆𑀢𑀜𑁆𑀘, 𑀇𑀘𑁆𑀘𑁂𑀢𑁂 𑀤𑀲 𑀚𑀸𑀢𑀓𑁂;

𑀲𑀗𑁆𑀕𑀸𑀬𑀺𑀁𑀲𑀼 𑀫𑀳𑀸𑀣𑁂𑀭𑀸, 𑀤𑁆𑀯𑀸𑀤𑀲𑀫𑁆𑀳𑀺 𑀦𑀺𑀧𑀸𑀢𑀓𑁂.

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀓𑀦𑀺𑀧𑀸𑀢𑁄

[𑁪𑁭𑁪] 𑁧. 𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀸𑀲𑀺 ¶ ¶ ¶ 𑀫𑁂 𑀅𑀫𑁆𑀩𑀨𑀮𑀸𑀦𑀺 𑀧𑀼𑀩𑁆𑀩𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁄 𑀳𑀺 ‘‘𑀅𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀬𑁆𑀳𑀁 𑀲𑀫𑀡𑁄 𑀕𑁄𑀢𑀫𑁄 𑀦𑁂𑀯 𑀆𑀘𑀭𑀺𑀬𑁄 𑀦 𑀉𑀧𑀚𑁆𑀛𑀸𑀬𑁄’’𑀢𑀺 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀛𑀸𑀦𑀧𑀭𑀺𑀳𑀻𑀦𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑁄 𑀩𑀳𑀺𑀚𑁂𑀢𑀯𑀦𑁂 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀅𑀯𑀻𑀘𑀺𑀁 𑀧𑀸𑀯𑀺𑀲𑀺. 𑀢𑀤𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀧𑀼𑀭𑁄𑀳𑀺𑀢𑀓𑀼𑀮𑀁 𑀅𑀳𑀺𑀯𑀸𑀢𑀭𑁄𑀕𑁂𑀦 𑀯𑀺𑀦𑀲𑁆𑀲𑀺. 𑀏𑀓𑁄𑀯 𑀧𑀼𑀢𑁆𑀢𑁄 𑀪𑀺𑀢𑁆𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀢𑁄. 𑀲𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀘 𑀅𑀯𑀲𑁂𑀲𑀲𑀺𑀧𑁆𑀧𑀸𑀦𑀺 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 ‘‘𑀤𑁂𑀲𑀘𑀸𑀭𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀭𑀦𑁆𑀢𑁄 𑀏𑀓𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀧𑀸𑀧𑀼𑀡𑀺. 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀘𑀡𑁆𑀟𑀸𑀮𑀕𑀸𑀫𑀓𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀝𑀺𑀯𑀲𑀢𑀺, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀅𑀓𑀸𑀮𑁂 𑀨𑀮𑀁 𑀕𑀡𑁆𑀳𑀸𑀧𑀦𑀫𑀦𑁆𑀢𑀁 𑀚𑀸𑀦𑀸𑀢𑀺. 𑀲𑁄 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀓𑀸𑀚𑀁 𑀆𑀤𑀸𑀬 𑀢𑀢𑁄 𑀕𑀸𑀫𑀸 𑀦𑀺𑀓𑁆𑀔𑀺𑀫𑀺𑀢𑁆𑀯𑀸 𑀅𑀭𑀜𑁆𑀜𑁂 𑀏𑀓𑀁 𑀅𑀫𑁆𑀩𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀢𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 𑀢𑀁 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀫𑁆𑀩𑀭𑀼𑀓𑁆𑀔𑀁 𑀏𑀓𑁂𑀦 ¶ 𑀉𑀤𑀓𑀧𑀲𑀢𑁂𑀦 𑀧𑀳𑀭𑀢𑀺. 𑀭𑀼𑀓𑁆𑀔𑀢𑁄 𑀢𑀗𑁆𑀔𑀡𑀜𑁆𑀜𑁂𑀯 𑀧𑀼𑀭𑀸𑀡𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀦𑀯𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀺𑀢𑁆𑀯𑀸 𑀧𑀢𑀦𑁆𑀢𑀺, 𑀅𑀫𑁆𑀩𑀨𑀮𑀸𑀦𑀺 𑀉𑀝𑁆𑀞𑀸𑀬 𑀫𑀼𑀳𑀼𑀢𑁆𑀢𑁂𑀦𑁂𑀯 𑀧𑀘𑁆𑀘𑀺𑀢𑁆𑀯𑀸 𑀫𑀥𑀼𑀭𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀤𑀺𑀩𑁆𑀩𑀭𑀲𑀲𑀤𑀺𑀲𑀸𑀦𑀺 𑀳𑀼𑀢𑁆𑀯𑀸 𑀭𑀼𑀓𑁆𑀔𑀢𑁄 𑀧𑀢𑀦𑁆𑀢𑀺. 𑀫𑀳𑀸𑀲𑀢𑁆𑀢𑁄 𑀢𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺𑀢𑁆𑀯𑀸 𑀓𑀸𑀚𑀁 𑀧𑀽𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑀺.

𑀲𑁄 ¶ ¶ 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀫𑀳𑀸𑀲𑀢𑁆𑀢𑀁 𑀅𑀓𑀸𑀮𑁂 𑀅𑀫𑁆𑀩𑀧𑀓𑁆𑀓𑀸𑀦𑀺 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑁂𑀦 𑀢𑁂𑀳𑀺 𑀫𑀦𑁆𑀢𑀩𑀮𑁂𑀦 𑀉𑀧𑁆𑀧𑀦𑁆𑀦𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀇𑀫𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀅𑀦𑀕𑁆𑀖𑀫𑀦𑁆𑀢𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀫𑁆𑀩𑀸𑀦𑀺 𑀆𑀳𑀭𑀡𑀦𑀺𑀬𑀸𑀫𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀣𑀢𑁄 𑀜𑀢𑁆𑀯𑀸 𑀢𑀲𑁆𑀫𑀺𑀁 𑀅𑀭𑀜𑁆𑀜𑀢𑁄 𑀅𑀦𑀸𑀕𑀢𑁂𑀬𑁂𑀯 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀁 ‘‘𑀓𑀼𑀳𑀺𑀁 𑀅𑀬𑁆𑀬𑁄, 𑀆𑀘𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀭𑀜𑁆𑀜𑀁 𑀕𑀢𑁄’’𑀢𑀺 𑀯𑀼𑀢𑁆𑀢𑁂 𑀢𑀁 𑀆𑀕𑀢𑀁 𑀆𑀕𑀫𑀬𑀫𑀸𑀦𑁄𑀯 𑀞𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀢𑁄 𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀕𑁂𑀳𑁂 𑀞𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀅𑀬𑀁 𑀫𑀸𑀡𑀯𑁄 𑀫𑀦𑁆𑀢𑀢𑁆𑀣𑀸𑀬 𑀆𑀕𑀢𑁄, 𑀢𑀲𑁆𑀲 𑀳𑀢𑁆𑀣𑁂 𑀫𑀦𑁆𑀢𑁄 𑀦𑀲𑁆𑀲𑀢𑀺, 𑀅𑀲𑀧𑁆𑀧𑀼𑀭𑀺𑀲𑁄 𑀏𑀲𑁄’’𑀢𑀺. 𑀫𑀸𑀡𑀯𑁄𑀧𑀺 ‘‘𑀅𑀳𑀁 𑀇𑀫𑀁 𑀫𑀦𑁆𑀢𑀁 𑀆𑀘𑀭𑀺𑀬𑀲𑁆𑀲 𑀉𑀧𑀓𑀸𑀭𑀓𑁄 𑀳𑀼𑀢𑁆𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀕𑁂𑀳𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀤𑀸𑀭𑀽𑀦𑀺 𑀆𑀳𑀭𑀢𑀺, 𑀯𑀻𑀳𑀺𑀁 𑀓𑁄𑀝𑁆𑀝𑁂𑀢𑀺, 𑀪𑀢𑁆𑀢𑀁 𑀧𑀘𑀢𑀺, 𑀤𑀦𑁆𑀢𑀓𑀝𑁆𑀞𑀫𑀼𑀔𑀥𑁄𑀯𑀦𑀸𑀤𑀻𑀦𑀺 𑀤𑁂𑀢𑀺, 𑀧𑀸𑀤𑀁 𑀥𑁄𑀯𑀢𑀺.

𑀏𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑁂𑀦 ‘‘𑀢𑀸𑀢 𑀫𑀸𑀡𑀯, 𑀫𑀜𑁆𑀘𑀧𑀸𑀤𑀸𑀦𑀁 𑀫𑁂 𑀉𑀧𑀥𑀸𑀦𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑀁 𑀅𑀧𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀊𑀭𑀼𑀫𑁆𑀳𑀺 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀧𑀭𑀪𑀸𑀕𑁂 𑀫𑀳𑀸𑀲𑀢𑁆𑀢𑀲𑁆𑀲 𑀪𑀭𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲𑀸 𑀧𑀲𑀽𑀢𑀺𑀓𑀸𑀮𑁂 𑀧𑀭𑀺𑀓𑀫𑁆𑀫𑀁 𑀲𑀩𑁆𑀩𑀫𑀓𑀸𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀫𑀳𑀸𑀲𑀢𑁆𑀢𑀁 𑀆𑀳 ‘‘𑀲𑀸𑀫𑀺, 𑀅𑀬𑀁 𑀫𑀸𑀡𑀯𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀫𑀦𑁆𑀢𑀢𑁆𑀣𑀸𑀬 𑀅𑀫𑁆𑀳𑀸𑀓𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀢𑀺, 𑀏𑀢𑀲𑁆𑀲 𑀳𑀢𑁆𑀣𑁂 𑀫𑀦𑁆𑀢𑁄 𑀢𑀺𑀝𑁆𑀞𑀢𑀼 𑀯𑀸 𑀫𑀸 𑀯𑀸, 𑀤𑁂𑀣 𑀢𑀲𑁆𑀲 𑀫𑀦𑁆𑀢’’𑀦𑁆𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ¶ 𑀢𑀲𑁆𑀲 𑀫𑀦𑁆𑀢𑀁 𑀤𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀢𑀸𑀢, 𑀅𑀦𑀕𑁆𑀖𑁄𑀬𑀁 𑀫𑀦𑁆𑀢𑁄, 𑀢𑀯 𑀇𑀫𑀁 𑀦𑀺𑀲𑁆𑀲𑀸𑀬 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀭𑀜𑁆𑀜𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀦 𑀯𑀸 ‘𑀓𑁄 𑀢𑁂 𑀆𑀘𑀭𑀺𑀬𑁄’𑀢𑀺 𑀧𑀼𑀝𑁆𑀞𑀓𑀸𑀮𑁂 𑀫𑀸 𑀫𑀁 𑀦𑀺𑀕𑀽𑀳𑀺𑀢𑁆𑀣𑁄, 𑀲𑀘𑁂 𑀳𑀺 ‘𑀘𑀡𑁆𑀟𑀸𑀮𑀲𑁆𑀲 𑀫𑁂 𑀲𑀦𑁆𑀢𑀺𑀓𑀸 𑀫𑀦𑁆𑀢𑁄 𑀕𑀳𑀺𑀢𑁄’𑀢𑀺 𑀮𑀚𑁆𑀚𑀦𑁆𑀢𑁄 ‘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀫𑁂 𑀆𑀘𑀭𑀺𑀬𑁄’𑀢𑀺 𑀓𑀣𑁂𑀲𑁆𑀲𑀲𑀺, 𑀇𑀫𑀲𑁆𑀲 𑀫𑀦𑁆𑀢𑀲𑁆𑀲 𑀨𑀮𑀁 𑀦 𑀮𑀪𑀺𑀲𑁆𑀲𑀲𑀻’’𑀢𑀺. 𑀲𑁄 ‘‘𑀓𑀺𑀁 𑀓𑀸𑀭𑀡𑀸 𑀢𑀁 𑀦𑀺𑀕𑀽𑀳𑀺𑀲𑁆𑀲𑀸𑀫𑀺, 𑀓𑁂𑀦𑀘𑀺 𑀧𑀼𑀝𑁆𑀞𑀓𑀸𑀮𑁂 𑀢𑀼𑀫𑁆𑀳𑁂𑀬𑁂𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀘𑀡𑁆𑀟𑀸𑀮𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑁆𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀅𑀫𑁆𑀩𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀮𑀪𑀺.

𑀅𑀣𑁂𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀧𑀸𑀮𑁄 𑀢𑀲𑁆𑀲 𑀳𑀢𑁆𑀣𑀢𑁄 𑀅𑀫𑁆𑀩𑀁 𑀓𑀺𑀡𑀺𑀢𑁆𑀯𑀸 𑀭𑀜𑁆𑀜𑁄 𑀅𑀤𑀸𑀲𑀺. 𑀭𑀸𑀚𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀓𑀼𑀢𑁄 𑀲𑀫𑁆𑀫, 𑀢𑀬𑀸 𑀏𑀯𑀭𑀽𑀧𑀁 𑀅𑀫𑁆𑀩𑀁 ¶ 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. 𑀤𑁂𑀯, 𑀏𑀓𑁄 𑀫𑀸𑀡𑀯𑁄 𑀅𑀓𑀸𑀮𑀅𑀫𑁆𑀩𑀨𑀮𑀸𑀦𑀺 𑀆𑀦𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀸𑀢𑀺, 𑀢𑀢𑁄 𑀫𑁂 𑀕𑀳𑀺𑀢𑀦𑁆𑀢𑀺. 𑀢𑁂𑀦 𑀳𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀥𑁂𑀯 𑀅𑀫𑁆𑀩𑀸𑀦𑀺 𑀆𑀳𑀭𑀢𑀽’’𑀢𑀺 𑀦𑀁 𑀯𑀤𑁂𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀫𑀸𑀡𑀯𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀫𑁆𑀩𑀸𑀦𑀺 𑀭𑀸𑀚𑀓𑀼𑀮𑀁 𑀳𑀭𑀢𑀺. 𑀅𑀣 𑀭𑀜𑁆𑀜𑀸 ‘‘𑀉𑀧𑀝𑁆𑀞𑀳 𑀫’’𑀦𑁆𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁄 𑀩𑀳𑀼𑀁 𑀥𑀦𑀁 𑀮𑀪𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀧𑀼𑀘𑁆𑀙𑀺 ‘‘𑀫𑀸𑀡𑀯, 𑀓𑀼𑀢𑁄 𑀅𑀓𑀸𑀮𑁂 𑀏𑀯𑀁 ¶ 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀅𑀫𑁆𑀩𑀸𑀦𑀺 𑀮𑀪𑀲𑀺, 𑀓𑀺𑀁 𑀢𑁂 𑀦𑀸𑀕𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸 𑀤𑁂𑀯𑁄 𑀯𑀸 𑀓𑁄𑀘𑀺 𑀤𑁂𑀢𑀺, 𑀉𑀤𑀸𑀳𑀼 𑀫𑀦𑁆𑀢𑀩𑀮𑀁 𑀏𑀢’’𑀦𑁆𑀢𑀺? ‘‘𑀦 𑀫𑁂 𑀫𑀳𑀸𑀭𑀸𑀚, 𑀓𑁄𑀘𑀺 𑀤𑁂𑀢𑀺, 𑀅𑀦𑀕𑁆𑀖𑁄 𑀧𑀦 𑀫𑁂 𑀫𑀦𑁆𑀢𑁄 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀩𑀮’’𑀦𑁆𑀢𑀺. ‘‘𑀢𑁂𑀦 𑀳𑀺 𑀫𑀬𑀫𑁆𑀧𑀺 𑀢𑁂 𑀏𑀓𑀤𑀺𑀯𑀲𑀁 𑀫𑀦𑁆𑀢𑀩𑀮𑀁 𑀤𑀝𑁆𑀞𑀼𑀓𑀸𑀫𑀸’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀧𑀼𑀦𑀤𑀺𑀯𑀲𑁂 𑀢𑁂𑀦 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀤𑀲𑁆𑀲𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀅𑀫𑁆𑀩𑀭𑀼𑀓𑁆𑀔𑀁 𑀉𑀧𑀕𑀦𑁆𑀢𑁆𑀯𑀸 𑀲𑀢𑁆𑀢𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀭𑀼𑀓𑁆𑀔𑀁 𑀉𑀤𑀓𑁂𑀦 𑀧𑀳𑀭𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀅𑀫𑁆𑀩𑀭𑀼𑀓𑁆𑀔𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀨𑀮𑀁 𑀕𑀳𑁂𑀢𑁆𑀯𑀸 ¶ 𑀫𑀳𑀸𑀫𑁂𑀖𑁄 𑀯𑀺𑀬 𑀅𑀫𑁆𑀩𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺, 𑀘𑁂𑀮𑀼𑀓𑁆𑀔𑁂𑀧𑀸 𑀧𑀯𑀢𑁆𑀢𑀺𑀁𑀲𑀼.

𑀭𑀸𑀚𑀸 𑀅𑀫𑁆𑀩𑀨𑀮𑀸𑀦𑀺 𑀔𑀸𑀤𑀺𑀢𑁆𑀯𑀸 𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀫𑀸𑀡𑀯𑀓, 𑀏𑀯𑀭𑀽𑀧𑁄 𑀢𑁂 𑀅𑀘𑁆𑀙𑀭𑀺𑀬𑀫𑀦𑁆𑀢𑁄 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀫𑀸𑀡𑀯𑁄 ‘‘𑀲𑀘𑀸𑀳𑀁 ‘𑀘𑀡𑁆𑀟𑀸𑀮𑀲𑁆𑀲 𑀲𑀦𑁆𑀢𑀺𑀓𑁂’𑀢𑀺 𑀯𑀓𑁆𑀔𑀸𑀫𑀺, 𑀮𑀚𑁆𑀚𑀺𑀢𑀩𑁆𑀩𑀓𑀁 𑀪𑀯𑀺𑀲𑁆𑀲𑀢𑀺, 𑀫𑀜𑁆𑀘 𑀕𑀭𑀳𑀺𑀲𑁆𑀲𑀦𑁆𑀢𑀺, 𑀫𑀦𑁆𑀢𑁄 𑀔𑁄 𑀧𑀦 𑀫𑁂 𑀧𑀕𑀼𑀡𑁄, 𑀇𑀤𑀸𑀦𑀺 𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑀁 𑀆𑀘𑀭𑀺𑀬𑀁 𑀅𑀧𑀤𑀺𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 ‘‘𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀺𑀢𑁄 𑀫𑁂’’𑀢𑀺 𑀯𑀤𑀦𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀫𑀦𑁆𑀢𑁄 𑀅𑀦𑁆𑀢𑀭𑀥𑀸𑀬𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀢𑀁 𑀆𑀤𑀸𑀬 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 ‘‘𑀅𑀫𑁆𑀩𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀡𑀯, 𑀅𑀫𑁆𑀩𑀸𑀦𑀺 𑀆𑀳𑀭𑀸𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀅𑀫𑁆𑀩𑀁 𑀉𑀧𑀕𑀦𑁆𑀢𑁆𑀯𑀸 𑀲𑀢𑁆𑀢𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 ‘‘𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀫𑀦𑁆𑀢𑁂 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀅𑀦𑁆𑀢𑀭𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀮𑀚𑁆𑀚𑀺𑀢𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀅𑀬𑀁 𑀧𑀼𑀩𑁆𑀩𑁂 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀅𑀫𑁆𑀩𑀸𑀦𑀺 𑀆𑀳𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑁂𑀢𑀺, 𑀖𑀦𑀫𑁂𑀖𑀯𑀲𑁆𑀲𑀁 𑀯𑀺𑀬 𑀅𑀫𑁆𑀩𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀺, 𑀇𑀤𑀸𑀦𑀺 𑀣𑀤𑁆𑀥𑁄 𑀯𑀺𑀬 𑀞𑀺𑀢𑁄, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧.

‘‘𑀅𑀳𑀸𑀲𑀺 ¶ 𑀫𑁂 𑀅𑀫𑁆𑀩𑀨𑀮𑀸𑀦𑀺 𑀧𑀼𑀩𑁆𑀩𑁂, 𑀅𑀡𑀽𑀦𑀺 𑀣𑀽𑀮𑀸𑀦𑀺 𑀘 𑀩𑁆𑀭𑀳𑁆𑀫𑀘𑀸𑀭𑀺;

𑀢𑁂𑀳𑁂𑀯 𑀫𑀦𑁆𑀢𑁂𑀳𑀺 𑀦 𑀤𑀸𑀦𑀺 𑀢𑀼𑀬𑁆𑀳𑀁, 𑀤𑀼𑀫𑀧𑁆𑀨𑀮𑀸 𑀧𑀸𑀢𑀼𑀪𑀯𑀦𑁆𑀢𑀺 𑀩𑁆𑀭𑀳𑁆𑀫𑁂’’𑀢𑀺.

𑀢𑀢𑁆𑀣 𑀅𑀳𑀸𑀲𑀻𑀢𑀺 𑀆𑀳𑀭𑀺. 𑀤𑀼𑀫𑀧𑁆𑀨𑀮𑀸𑀢𑀺 𑀭𑀼𑀓𑁆𑀔𑀨𑀮𑀸𑀦𑀺.

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀲𑀘𑁂 ‘𑀅𑀚𑁆𑀚 𑀅𑀫𑁆𑀩𑀨𑀮𑀁 𑀦 𑀕𑀡𑁆𑀳𑀸𑀫𑀻’𑀢𑀺 𑀯𑀓𑁆𑀔𑀸𑀫𑀺, 𑀭𑀸𑀚𑀸 𑀫𑁂 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀫𑀼𑀲𑀸𑀯𑀸𑀤𑁂𑀦 𑀦𑀁 𑀯𑀜𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨.

‘‘𑀦𑀓𑁆𑀔𑀢𑁆𑀢𑀬𑁄𑀕𑀁 ¶ 𑀧𑀝𑀺𑀫𑀸𑀦𑀬𑀸𑀫𑀺, 𑀔𑀡𑀁 𑀫𑀼𑀳𑀼𑀢𑁆𑀢𑀜𑁆𑀘 𑀫𑀦𑁆𑀢𑁂 𑀦 𑀧𑀲𑁆𑀲𑀁;

𑀦𑀓𑁆𑀔𑀢𑁆𑀢𑀬𑁄𑀕𑀜𑁆𑀘 ¶ 𑀔𑀡𑀜𑁆𑀘 𑀮𑀤𑁆𑀥𑀸, 𑀅𑀤𑁆𑀥𑀸 𑀳𑀭𑀺𑀲𑁆𑀲𑀫𑁆𑀩𑀨𑀮𑀁 𑀧𑀳𑀽𑀢’’𑀦𑁆𑀢𑀺.

𑀢𑀢𑁆𑀣 𑀅𑀤𑁆𑀥𑀸𑀳𑀭𑀺𑀲𑁆𑀲𑀫𑁆𑀩𑀨𑀮𑀦𑁆𑀢𑀺 𑀅𑀤𑁆𑀥𑀸 𑀅𑀫𑁆𑀩𑀨𑀮𑀁 𑀆𑀳𑀭𑀺𑀲𑁆𑀲𑀸𑀫𑀺.

𑀭𑀸𑀚𑀸 ‘‘𑀅𑀬𑀁 𑀅𑀜𑁆𑀜𑀤𑀸 𑀦𑀓𑁆𑀔𑀢𑁆𑀢𑀬𑁄𑀕𑀁 𑀦 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩.

‘‘𑀦𑀓𑁆𑀔𑀢𑁆𑀢𑀬𑁄𑀕𑀁 𑀦 𑀧𑀼𑀭𑁂 𑀅𑀪𑀸𑀡𑀺, 𑀔𑀡𑀁 𑀫𑀼𑀳𑀼𑀢𑁆𑀢𑀁 𑀦 𑀧𑀼𑀭𑁂 𑀅𑀲𑀁𑀲𑀺;

𑀲𑀬𑀁 𑀳𑀭𑀻 𑀅𑀫𑁆𑀩𑀨𑀮𑀁 𑀧𑀳𑀽𑀢𑀁, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀭𑀲𑁂𑀦𑀼𑀧𑁂𑀢𑀁.

𑁪.

‘‘𑀫𑀦𑁆𑀢𑀸𑀪𑀺𑀚𑀧𑁆𑀧𑁂𑀦 𑀧𑀼𑀭𑁂 𑀳𑀺 𑀢𑀼𑀬𑁆𑀳𑀁, 𑀤𑀼𑀫𑀧𑁆𑀨𑀮𑀸 𑀧𑀸𑀢𑀼𑀪𑀯𑀦𑁆𑀢𑀺 𑀩𑁆𑀭𑀳𑁆𑀫𑁂;

𑀲𑁆𑀯𑀸𑀚𑁆𑀚 𑀦 𑀧𑀸𑀭𑁂𑀲𑀺 𑀚𑀧𑁆𑀧𑀫𑁆𑀧𑀺 𑀫𑀦𑁆𑀢𑀁, 𑀅𑀬𑀁 𑀲𑁄 𑀓𑁄 𑀦𑀸𑀫 𑀢𑀯𑀚𑁆𑀚 𑀥𑀫𑁆𑀫𑁄’’𑀢𑀺.

𑀢𑀢𑁆𑀣 𑀦 𑀧𑀸𑀭𑁂𑀲𑀻𑀢𑀺 𑀦 𑀲𑀓𑁆𑀓𑁄𑀲𑀺. 𑀚𑀧𑁆𑀧𑀫𑁆𑀧𑀻𑀢𑀺 𑀚𑀧𑁆𑀧𑀦𑁆𑀢𑁄𑀧𑀺 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀧𑀺. 𑀅𑀬𑀁 𑀲𑁄𑀢𑀺 𑀅𑀬𑀫𑁂𑀯 𑀲𑁄 𑀢𑀯 𑀲𑀪𑀸𑀯𑁄 𑀅𑀚𑁆𑀚 𑀓𑁄 𑀦𑀸𑀫 𑀚𑀸𑀢𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀫𑀸𑀡𑀯𑁄 ‘‘𑀦 𑀲𑀓𑁆𑀓𑀸 𑀭𑀸𑀚𑀸𑀦𑀁 𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀼𑀁, 𑀲𑀘𑁂𑀧𑀺 𑀫𑁂 𑀲𑀪𑀸𑀯𑁂 𑀓𑀣𑀺𑀢𑁂 𑀆𑀡𑀁 𑀓𑀭𑁂𑀬𑁆𑀬, 𑀓𑀭𑁄𑀢𑀼, 𑀲𑀪𑀸𑀯𑀫𑁂𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁫.

‘‘𑀘𑀡𑁆𑀟𑀸𑀮𑀧𑀼𑀢𑁆𑀢𑁄 ¶ 𑀫𑀫 𑀲𑀫𑁆𑀧𑀤𑀸𑀲𑀺, 𑀥𑀫𑁆𑀫𑁂𑀦 𑀫𑀦𑁆𑀢𑁂 𑀧𑀓𑀢𑀺𑀜𑁆𑀘 𑀲𑀁𑀲𑀺;

𑀫𑀸 𑀘𑀲𑁆𑀲𑀼 𑀫𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁, 𑀕𑀼𑀬𑁆𑀳𑀺𑀢𑁆𑀣𑁄 𑀅𑀢𑁆𑀣𑀁 𑀯𑀺𑀚𑀳𑁂𑀬𑁆𑀬 𑀫𑀦𑁆𑀢𑁄.

𑁬.

‘‘𑀲𑁄𑀳𑀁 𑀚𑀦𑀺𑀦𑁆𑀤𑁂𑀦 𑀚𑀦𑀫𑁆𑀳𑀺 𑀧𑀼𑀝𑁆𑀞𑁄, 𑀫𑀓𑁆𑀔𑀸𑀪𑀺𑀪𑀽𑀢𑁄 𑀅𑀮𑀺𑀓𑀁 𑀅𑀪𑀸𑀡𑀺𑀁;

‘𑀫𑀦𑁆𑀢𑀸 𑀇𑀫𑁂 𑀩𑁆𑀭𑀸𑀳𑁆𑀫𑀡𑀲𑁆𑀲𑀸’𑀢𑀺 𑀫𑀺𑀘𑁆𑀙𑀸, 𑀧𑀳𑀻𑀦𑀫𑀦𑁆𑀢𑁄 𑀓𑀧𑀡𑁄 𑀭𑀼𑀤𑀸𑀫𑀻’’𑀢𑀺.

𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀲𑀫𑁂𑀦 𑀓𑀸𑀭𑀡𑁂𑀦 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀯 𑀅𑀤𑀸𑀲𑀺. 𑀧𑀓𑀢𑀺𑀜𑁆𑀘 𑀲𑀁𑀲𑀻𑀢𑀺 ‘‘𑀫𑀸 𑀫𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁 𑀕𑀼𑀬𑁆𑀳𑀺𑀢𑁆𑀣𑁄, 𑀲𑀘𑁂 𑀕𑀽𑀳𑀲𑀺 ¶ , 𑀫𑀦𑁆𑀢𑀸 𑀢𑁂 𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀦𑀲𑁆𑀲𑀦𑀧𑀓𑀢𑀺𑀜𑁆𑀘 𑀫𑀬𑁆𑀳𑀁 𑀲𑀁𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀫𑀺𑀘𑁆𑀙𑀸𑀢𑀺 ‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀫𑀬𑀸 𑀇𑀫𑁂 𑀫𑀦𑁆𑀢𑀸 𑀕𑀳𑀺𑀢𑀸’’𑀢𑀺 ¶ 𑀫𑀺𑀘𑁆𑀙𑀸𑀬 𑀅𑀪𑀡𑀺𑀁, 𑀢𑁂𑀦 𑀫𑁂 𑀢𑁂 𑀫𑀦𑁆𑀢𑀸 𑀦𑀝𑁆𑀞𑀸, 𑀲𑁆𑀯𑀸𑀳𑀁 𑀧𑀳𑀻𑀦𑀫𑀦𑁆𑀢𑁄 𑀇𑀤𑀸𑀦𑀺 𑀓𑀧𑀡𑁄 𑀭𑀼𑀤𑀸𑀫𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀬𑀁 𑀧𑀸𑀧𑀥𑀫𑁆𑀫𑁄 𑀏𑀯𑀭𑀽𑀧𑀁 𑀭𑀢𑀦𑀫𑀦𑁆𑀢𑀁 𑀦 𑀑𑀮𑁄𑀓𑁂𑀲𑀺, 𑀏𑀯𑀭𑀽𑀧𑀲𑁆𑀫𑀺𑀜𑁆𑀳𑀺 𑀉𑀢𑁆𑀢𑀫𑀭𑀢𑀦𑀫𑀦𑁆𑀢𑁂 𑀮𑀤𑁆𑀥𑁂 𑀚𑀸𑀢𑀺 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀕𑀭𑀳𑀦𑁆𑀢𑁄 𑁋

𑁭.

‘‘𑀏𑀭𑀡𑁆𑀟𑀸 𑀧𑀼𑀘𑀺𑀫𑀦𑁆𑀤𑀸 𑀯𑀸, 𑀅𑀣 𑀯𑀸 𑀧𑀸𑀮𑀺𑀪𑀤𑁆𑀤𑀓𑀸;

𑀫𑀥𑀼𑀁 𑀫𑀥𑀼𑀢𑁆𑀣𑀺𑀓𑁄 𑀯𑀺𑀦𑁆𑀤𑁂, 𑀲𑁄 𑀳𑀺 𑀢𑀲𑁆𑀲 𑀤𑀼𑀫𑀼𑀢𑁆𑀢𑀫𑁄.

𑁮.

‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀬𑀫𑁆𑀳𑀸 𑀥𑀫𑁆𑀫𑀁 𑀯𑀺𑀚𑀸𑀦𑁂𑀬𑁆𑀬, 𑀲𑁄 𑀳𑀺 𑀢𑀲𑁆𑀲 𑀦𑀭𑀼𑀢𑁆𑀢𑀫𑁄.

𑁯.

‘‘𑀇𑀫𑀲𑁆𑀲 𑀤𑀡𑁆𑀟𑀜𑁆𑀘 𑀯𑀥𑀜𑁆𑀘 𑀤𑀢𑁆𑀯𑀸, 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣 𑀚𑀫𑁆𑀫𑀁;

𑀬𑁄 𑀉𑀢𑁆𑀢𑀫𑀢𑁆𑀣𑀁 𑀓𑀲𑀺𑀭𑁂𑀦 𑀮𑀤𑁆𑀥𑀁, 𑀫𑀸𑀦𑀸𑀢𑀺𑀫𑀸𑀦𑁂𑀦 𑀯𑀺𑀦𑀸𑀲𑀬𑀺𑀢𑁆𑀣𑀸’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀆𑀳.

𑀢𑀢𑁆𑀣 ¶ 𑀫𑀥𑀼𑀢𑁆𑀣𑀺𑀓𑁄𑀢𑀺 𑀫𑀥𑀼𑀅𑀢𑁆𑀣𑀺𑀓𑁄 𑀧𑀼𑀭𑀺𑀲𑁄 𑀅𑀭𑀜𑁆𑀜𑁂 𑀫𑀥𑀼𑀁 𑀑𑀮𑁄𑀓𑁂𑀦𑁆𑀢𑁄 𑀏𑀢𑁂𑀲𑀁 𑀭𑀼𑀓𑁆𑀔𑀸𑀦𑀁 𑀬𑀢𑁄 𑀫𑀥𑀼𑀁 𑀮𑀪𑀢𑀺, 𑀲𑁄𑀯 𑀤𑀼𑀫𑁄 𑀢𑀲𑁆𑀲 𑀤𑀼𑀫𑀼𑀢𑁆𑀢𑀫𑁄 𑀦𑀸𑀫. 𑀢𑀣𑁂𑀯 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑀫𑁆𑀳𑀸 𑀧𑀼𑀭𑀺𑀲𑀸 𑀥𑀫𑁆𑀫𑀁 𑀓𑀸𑀭𑀡𑀁 𑀬𑀼𑀢𑁆𑀢𑀁 𑀅𑀢𑁆𑀣𑀁 𑀯𑀺𑀚𑀸𑀦𑁂𑀬𑁆𑀬, 𑀲𑁄𑀯 𑀢𑀲𑁆𑀲 𑀉𑀢𑁆𑀢𑀫𑁄 𑀦𑀭𑁄 𑀦𑀸𑀫. 𑀇𑀫𑀲𑁆𑀲 𑀤𑀡𑁆𑀟𑀜𑁆𑀘𑀸𑀢𑀺 𑀇𑀫𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀲𑀩𑁆𑀩𑀲𑁆𑀲𑀳𑀭𑀡𑀤𑀡𑁆𑀟𑀜𑁆𑀘 𑀯𑁂𑀴𑀼𑀧𑁂𑀲𑀺𑀓𑀸𑀤𑀻𑀳𑀺 𑀧𑀺𑀝𑁆𑀞𑀺𑀘𑀫𑁆𑀫𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀥𑀜𑁆𑀘 𑀤𑀢𑁆𑀯𑀸 𑀇𑀫𑀁 𑀚𑀫𑁆𑀫𑀁 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣, 𑀔𑀮𑀺𑀓𑀸𑀭𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀦𑀺𑀤𑁆𑀥𑀫𑀣 𑀦𑀺𑀓𑁆𑀓𑀟𑁆𑀠𑀣, 𑀓𑀺𑀁 𑀇𑀫𑀺𑀦𑀸 𑀇𑀥 𑀯𑀲𑀦𑁆𑀢𑁂𑀦𑀸𑀢𑀺.

𑀭𑀸𑀚𑀧𑀼𑀭𑀺𑀲𑀸 𑀢𑀣𑀸 𑀓𑀢𑁆𑀯𑀸 ‘‘𑀢𑀯𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀭𑀸𑀥𑁂𑀢𑁆𑀯𑀸𑀯 𑀲𑀘𑁂 𑀧𑀼𑀦 𑀫𑀦𑁆𑀢𑁂 𑀮𑀪𑀺𑀲𑁆𑀲𑀲𑀺, 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸𑀲𑀺, 𑀦𑁄 𑀘𑁂, 𑀇𑀫𑀁 𑀤𑀺𑀲𑀁 𑀫𑀸 𑀑𑀮𑁄𑀓𑁂𑀬𑁆𑀬𑀸𑀲𑀻’’𑀢𑀺 𑀢𑀁 𑀦𑀺𑀩𑁆𑀩𑀺𑀲𑀬𑀫𑀓𑀁𑀲𑀼. 𑀲𑁄 𑀅𑀦𑀸𑀣𑁄 𑀳𑀼𑀢𑁆𑀯𑀸 ‘‘𑀞𑀧𑁂𑀢𑁆𑀯𑀸 𑀆𑀘𑀭𑀺𑀬𑀁 𑀦 𑀫𑁂 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀭𑀸𑀥𑁂𑀢𑁆𑀯𑀸 𑀧𑀼𑀦 𑀫𑀦𑁆𑀢𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀭𑁄𑀤𑀦𑁆𑀢𑁄 𑀢𑀁 𑀕𑀸𑀫𑀁 𑀅𑀕𑀫𑀸𑀲𑀺. 𑀅𑀣 ¶ 𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀪𑀭𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀧𑀲𑁆𑀲 𑀢𑀁 𑀧𑀸𑀧𑀥𑀫𑁆𑀫𑀁 𑀧𑀭𑀺𑀳𑀻𑀦𑀫𑀦𑁆𑀢𑀁 𑀧𑀼𑀦 𑀆𑀕𑀘𑁆𑀙𑀦𑁆𑀢’’𑀦𑁆𑀢𑀺 𑀆𑀳. 𑀲𑁄 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀆𑀘𑀭𑀺𑀬, 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀅𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀫𑀦𑁆𑀢𑁂 𑀬𑀸𑀘𑀦𑁆𑀢𑁄 𑁋

𑁧𑁦.

‘‘𑀬𑀣𑀸 𑀲𑀫𑀁 𑀫𑀜𑁆𑀜𑀫𑀸𑀦𑁄 𑀧𑀢𑁂𑀬𑁆𑀬, 𑀲𑁄𑀩𑁆𑀪𑀁 𑀕𑀼𑀳𑀁 𑀦𑀭𑀓𑀁 𑀧𑀽𑀢𑀺𑀧𑀸𑀤𑀁;

𑀭𑀚𑁆𑀚𑀽𑀢𑀺 𑀯𑀸 𑀅𑀓𑁆𑀓𑀫𑁂 𑀓𑀡𑁆𑀳𑀲𑀧𑁆𑀧𑀁, 𑀅𑀦𑁆𑀥𑁄 𑀬𑀣𑀸 𑀚𑁄𑀢𑀺𑀫𑀥𑀺𑀝𑁆𑀞𑀳𑁂𑀬𑁆𑀬;

𑀏𑀯𑀫𑁆𑀧𑀺 𑀫𑀁 𑀢𑀁 𑀔𑀮𑀺𑀢𑀁 𑀲𑀧𑀜𑁆𑀜, 𑀧𑀳𑀻𑀦𑀫𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀤𑀸𑀳𑀻’’𑀢𑀺. 𑁋 𑀕𑀸𑀣𑀫𑀸𑀳;

𑀢𑀢𑁆𑀣 𑀬𑀣𑀸 𑀲𑀫𑀦𑁆𑀢𑀺 𑀬𑀣𑀸 𑀧𑀼𑀭𑀺𑀲𑁄 𑀇𑀤𑀁 𑀲𑀫𑀁 𑀞𑀸𑀦𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀲𑁄𑀩𑁆𑀪𑀁 𑀯𑀸 𑀕𑀼𑀳𑀁 𑀯𑀸 𑀪𑀽𑀫𑀺𑀬𑀸 𑀨𑀮𑀺𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀦𑀭𑀓𑀁 𑀯𑀸 𑀧𑀽𑀢𑀺𑀧𑀸𑀤𑀁 𑀯𑀸 𑀧𑀢𑁂𑀬𑁆𑀬. 𑀧𑀽𑀢𑀺𑀧𑀸𑀤𑁄𑀢𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀭𑀼𑀓𑁆𑀔𑁂 𑀲𑀼𑀲𑁆𑀲𑀺𑀢𑁆𑀯𑀸 𑀫𑀢𑁂 𑀢𑀲𑁆𑀲 ¶ 𑀫𑀽𑀮𑁂𑀲𑀼 𑀧𑀽𑀢𑀺𑀓𑁂𑀲𑀼 𑀚𑀸𑀢𑁂𑀲𑀼 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀆𑀯𑀸𑀝𑁄 𑀳𑁄𑀢𑀺, 𑀢𑀲𑁆𑀲 𑀦𑀸𑀫𑀁. 𑀚𑁄𑀢𑀺𑀫𑀥𑀺𑀝𑁆𑀞𑀳𑁂𑀬𑁆𑀬𑀸𑀢𑀺 𑀅𑀕𑁆𑀕𑀺𑀁 𑀅𑀓𑁆𑀓𑀫𑁂𑀬𑁆𑀬. 𑀏𑀯𑀫𑁆𑀧𑀻𑀢𑀺 𑀏𑀯𑀁 𑀅𑀳𑀫𑁆𑀧𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑀸 𑀅𑀦𑁆𑀥𑁄 𑀢𑀼𑀫𑁆𑀳𑀸𑀓𑀁 𑀯𑀺𑀲𑁂𑀲𑀁 𑀅𑀚𑀸𑀦𑀦𑁆𑀢𑁄 𑀢𑀼𑀫𑁆𑀳𑁂𑀲𑀼 𑀔𑀮𑀺𑀢𑁄, 𑀢𑀁 𑀫𑀁 𑀔𑀮𑀺𑀢𑀁 𑀯𑀺𑀤𑀺𑀢𑁆𑀯𑀸 𑀲𑀧𑀜𑁆𑀜 𑀜𑀸𑀡𑀲𑀫𑁆𑀧𑀦𑁆𑀦 𑀧𑀳𑀻𑀦𑀫𑀦𑁆𑀢𑀲𑁆𑀲 𑀫𑀫 𑀧𑀼𑀦𑀧𑀺 𑀤𑁂𑀣𑀸𑀢𑀺.

𑀅𑀣 𑀦𑀁 𑀆𑀘𑀭𑀺𑀬𑁄 ‘‘𑀢𑀸𑀢, 𑀓𑀺𑀁 𑀓𑀣𑁂𑀲𑀺, 𑀅𑀦𑁆𑀥𑁄 𑀳𑀺 𑀲𑀜𑁆𑀜𑀸𑀬 𑀤𑀺𑀦𑁆𑀦𑀸𑀬 𑀲𑁄𑀩𑁆𑀪𑀸𑀤𑀻𑀦𑀺 𑀧𑀭𑀺𑀳𑀭𑀢𑀺, 𑀫𑀬𑀸 𑀧𑀞𑀫𑀫𑁂𑀯 𑀢𑀯 𑀓𑀣𑀺𑀢𑀁, 𑀇𑀤𑀸𑀦𑀺 𑀓𑀺𑀫𑀢𑁆𑀣𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑁋

𑁧𑁧.

‘‘𑀥𑀫𑁆𑀫𑁂𑀦 𑀫𑀦𑁆𑀢𑀁 𑀢𑀯 𑀲𑀫𑁆𑀧𑀤𑀸𑀲𑀺𑀁, 𑀢𑀼𑀯𑀫𑁆𑀧𑀺 𑀥𑀫𑁆𑀫𑁂𑀦 𑀧𑀝𑀺𑀕𑁆𑀕𑀳𑁂𑀲𑀺;

𑀧𑀓𑀢𑀺𑀫𑁆𑀧𑀺 𑀢𑁂 𑀅𑀢𑁆𑀢𑀫𑀦𑁄 𑀅𑀲𑀁𑀲𑀺𑀁, 𑀥𑀫𑁆𑀫𑁂 𑀞𑀺𑀢𑀁 𑀢𑀁 𑀦 𑀚𑀳𑁂𑀬𑁆𑀬 𑀫𑀦𑁆𑀢𑁄.

𑁧𑁨.

‘‘𑀬𑁄 ¶ 𑀩𑀸𑀮-𑀫𑀦𑁆𑀢𑀁 𑀓𑀲𑀺𑀭𑁂𑀦 𑀮𑀤𑁆𑀥𑀁, 𑀬𑀁 𑀤𑀼𑀮𑁆𑀮𑀪𑀁 𑀅𑀚𑁆𑀚 𑀫𑀦𑀼𑀲𑁆𑀲𑀮𑁄𑀓𑁂;

𑀓𑀺𑀜𑁆𑀘𑀸𑀧𑀺 𑀮𑀤𑁆𑀥𑀸 𑀚𑀻𑀯𑀺𑀢𑀼𑀁 𑀅𑀧𑁆𑀧𑀧𑀜𑁆𑀜𑁄, 𑀯𑀺𑀦𑀸𑀲𑀬𑀻 𑀅𑀮𑀺𑀓𑀁 𑀪𑀸𑀲𑀫𑀸𑀦𑁄.

𑁧𑁩.

‘‘𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀅𑀓𑀢𑀜𑁆𑀜𑀼𑀦𑁄 𑀘, 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀅𑀲𑀜𑁆𑀜𑀢𑀲𑁆𑀲;

𑀫𑀦𑁆𑀢𑁂 𑀫𑀬𑀁 𑀢𑀸𑀤𑀺𑀲𑀓𑁂 𑀦 𑀤𑁂𑀫, 𑀓𑀼𑀢𑁄 𑀫𑀦𑁆𑀢𑀸 𑀕𑀘𑁆𑀙 𑀦 𑀫𑀬𑁆𑀳𑀁 𑀭𑀼𑀘𑁆𑀘𑀲𑀻’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀆𑀳.

𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀅𑀳𑀫𑁆𑀧𑀺 𑀢𑀯 𑀆𑀘𑀭𑀺𑀬𑀪𑀸𑀕𑀁 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑁂𑀦𑁂𑀯 𑀫𑀦𑁆𑀢𑀁 𑀲𑀫𑁆𑀧𑀤𑀸𑀲𑀺𑀁, 𑀢𑁆𑀯𑀫𑁆𑀧𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀲𑀺. 𑀥𑀫𑁆𑀫𑁂 𑀞𑀺𑀢𑀦𑁆𑀢𑀺 𑀆𑀘𑀭𑀺𑀬𑀧𑀽𑀚𑀓𑀥𑀫𑁆𑀫𑁂 ¶ 𑀞𑀺𑀢𑀁. 𑀢𑀸𑀤𑀺𑀲𑀓𑁂𑀢𑀺 𑀢𑀣𑀸𑀭𑀽𑀧𑁂 𑀅𑀓𑀸𑀮𑀨𑀮𑀕𑀡𑁆𑀳𑀸𑀧𑀓𑁂 𑀫𑀦𑁆𑀢𑁂 𑀦 𑀤𑁂𑀫, 𑀕𑀘𑁆𑀙 𑀦 𑀫𑁂 𑀭𑀼𑀘𑁆𑀘𑀲𑀻𑀢𑀺.

𑀲𑁄 𑀏𑀯𑀁 𑀆𑀘𑀭𑀺𑀬𑁂𑀦 𑀉𑀬𑁆𑀬𑁄𑀚𑀺𑀢𑁄 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀸𑀣𑀫𑀭𑀡𑀁 𑀫𑀭𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀅𑀓𑀢𑀜𑁆𑀜𑀽 𑀫𑀸𑀡𑀯𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀫𑁆𑀩𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁭𑁫] 𑁨. 𑀨𑀦𑁆𑀤𑀦𑀚𑀸𑀢𑀓𑀯𑀡𑁆𑀡𑀦𑀸

𑀓𑀼𑀞𑀸𑀭𑀺𑀳𑀢𑁆𑀣𑁄 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀭𑁄𑀳𑀺𑀡𑀻𑀦𑀤𑀻𑀢𑀻𑀭𑁂 𑀯𑀺𑀳𑀭𑀦𑁆𑀢𑁄 𑀜𑀸𑀢𑀓𑀸𑀦𑀁 𑀓𑀮𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀓𑀼𑀡𑀸𑀮𑀚𑀸𑀢𑀓𑁂 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 𑀜𑀸𑀢𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 𑁋 𑀫𑀳𑀸𑀭𑀸𑀚𑀸, 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀳𑀺𑀦𑀕𑀭𑁂 𑀯𑀟𑁆𑀠𑀓𑀺𑀕𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀭𑁂𑀓𑁄 𑀩𑁆𑀭𑀸𑀳𑁆𑀫𑀡𑀯𑀟𑁆𑀠𑀓𑀻 𑀅𑀭𑀜𑁆𑀜𑀢𑁄 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀭𑀣𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀫𑀳𑀸𑀨𑀦𑁆𑀤𑀦𑀭𑀼𑀓𑁆𑀔𑁄 𑀅𑀳𑁄𑀲𑀺 ¶ . 𑀏𑀓𑁄 𑀓𑀸𑀴𑀲𑀻𑀳𑁄 𑀕𑁄𑀘𑀭𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀏𑀓𑁄 𑀲𑀼𑀓𑁆𑀔𑀤𑀡𑁆𑀟𑀓𑁄 𑀧𑀢𑀺𑀢𑁆𑀯𑀸 𑀔𑀦𑁆𑀥𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀣𑁄𑀓𑀁 𑀔𑀦𑁆𑀥𑁂𑀦 𑀭𑀼𑀚𑀦𑁆𑀢𑁂𑀦 𑀪𑀻𑀢𑀢𑀲𑀺𑀢𑁄 𑀉𑀝𑁆𑀞𑀸𑀬 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑁄 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀜𑁆𑀜𑁄 𑀫𑀁 𑀲𑀻𑀳𑁄 𑀯𑀸 𑀩𑁆𑀬𑀕𑁆𑀖𑁄 𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀫𑀁 𑀏𑀢𑁆𑀣 𑀦𑀺𑀧𑀚𑁆𑀚𑀦𑁆𑀢𑀁 𑀦 𑀲𑀳𑀢𑀺 𑀫𑀜𑁆𑀜𑁂, 𑀳𑁄𑀢𑀼 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀸𑀦𑁂 𑀓𑁄𑀧𑀁 𑀩𑀦𑁆𑀥𑀺𑀢𑁆𑀯𑀸 𑀭𑀼𑀓𑁆𑀔𑀁 𑀧𑀳𑀭𑀺𑀢𑁆𑀯𑀸 ‘‘𑀦𑁂𑀯 𑀢𑀯 𑀭𑀼𑀓𑁆𑀔𑀲𑁆𑀲 𑀧𑀢𑁆𑀢𑀁 𑀔𑀸𑀤𑀸𑀫𑀺, 𑀦 𑀲𑀸𑀔𑀁 𑀪𑀜𑁆𑀚𑀸𑀫𑀺, 𑀇𑀥 𑀅𑀜𑁆𑀜𑁂 𑀫𑀺𑀕𑁂 𑀯𑀲𑀦𑁆𑀢𑁂 𑀲𑀳𑀲𑀺, 𑀫𑀁 𑀦 𑀲𑀳𑀲𑀺, 𑀓𑁄 𑀫𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀺, 𑀓𑀢𑀺𑀧𑀸𑀳𑀁 𑀆𑀕𑀫𑁂𑀳𑀺, 𑀲𑀫𑀽𑀮𑀁 𑀢𑁂 𑀭𑀼𑀓𑁆𑀔𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀤𑁂𑀯𑀢𑀁 𑀢𑀚𑁆𑀚𑁂𑀢𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀉𑀧𑀥𑀸𑀭𑁂𑀦𑁆𑀢𑁄 𑀯𑀺𑀘𑀭𑀺. 𑀢𑀤𑀸 𑀲𑁄 𑀩𑁆𑀭𑀸𑀳𑁆𑀫𑀡𑀯𑀟𑁆𑀠𑀓𑀻 𑀤𑁆𑀯𑁂 𑀢𑀬𑁄 𑀫𑀦𑀼𑀲𑁆𑀲𑁂 𑀆𑀤𑀸𑀬 𑀭𑀣𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀬𑀸𑀦𑀓𑁂𑀦 𑀢𑀁 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀬𑀸𑀦𑀓𑀁 𑀞𑀧𑁂𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀳𑀢𑁆𑀣𑁄 𑀭𑀼𑀓𑁆𑀔𑁂 𑀉𑀧𑀥𑀸𑀭𑁂𑀦𑁆𑀢𑁄 𑀨𑀦𑁆𑀤𑀦𑀲𑀫𑀻𑀧𑀁 𑀅𑀕𑀫𑀸𑀲𑀺. 𑀓𑀸𑀴𑀲𑀻𑀳𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚, 𑀫𑀬𑀸 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺 ¶ . 𑀯𑀟𑁆𑀠𑀓𑀻 𑀘 𑀇𑀢𑁄 𑀘𑀺𑀢𑁄 𑀑𑀮𑁄𑀓𑁂𑀢𑁆𑀯𑀸 ¶ 𑀨𑀦𑁆𑀤𑀦𑀲𑀫𑀻𑀧𑁂𑀦 𑀧𑀸𑀬𑀸𑀲𑀺. 𑀲𑁄 ‘‘𑀬𑀸𑀯 𑀏𑀲𑁄 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯𑀤𑁂𑀯𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪.

‘‘𑀓𑀼𑀞𑀸𑀭𑀺𑀳𑀢𑁆𑀣𑁄 𑀧𑀼𑀭𑀺𑀲𑁄, 𑀯𑀦𑀫𑁄𑀕𑀬𑁆𑀳 𑀢𑀺𑀝𑁆𑀞𑀲𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀤𑀸𑀭𑀼𑀁 𑀙𑁂𑀢𑀼𑀫𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀧𑀼𑀭𑀺𑀲𑁄𑀢𑀺 𑀢𑁆𑀯𑀁 𑀓𑀼𑀞𑀸𑀭𑀺𑀳𑀢𑁆𑀣𑁄 𑀏𑀓𑁄 𑀧𑀼𑀭𑀺𑀲𑁄 𑀇𑀫𑀁 𑀯𑀦𑀁 𑀑𑀕𑀬𑁆𑀳 𑀢𑀺𑀝𑁆𑀞𑀲𑀻𑀢𑀺.

𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀫𑀺𑀕𑁄 𑀫𑀦𑀼𑀲𑁆𑀲𑀯𑀸𑀘𑀁 𑀪𑀸𑀲𑀦𑁆𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀏𑀲 𑀭𑀣𑀸𑀦𑀼𑀘𑁆𑀙𑀯𑀺𑀓𑀁 ¶ 𑀤𑀸𑀭𑀼𑀁 𑀚𑀸𑀦𑀺𑀲𑁆𑀲𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁫.

‘‘𑀇𑀲𑁆𑀲𑁄 𑀯𑀦𑀸𑀦𑀺 𑀘𑀭𑀲𑀺, 𑀲𑀫𑀸𑀦𑀺 𑀯𑀺𑀲𑀫𑀸𑀦𑀺 𑀘;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀤𑀸𑀭𑀼𑀁 𑀦𑁂𑀫𑀺𑀬𑀸 𑀤𑀴𑁆𑀳’’𑀦𑁆𑀢𑀺.

𑀢𑀢𑁆𑀣 𑀇𑀲𑁆𑀲𑁄𑀢𑀺 𑀢𑁆𑀯𑀫𑁆𑀧𑀺 𑀏𑀓𑁄 𑀓𑀸𑀴𑀲𑀻𑀳𑁄 𑀯𑀦𑀸𑀦𑀺 𑀘𑀭𑀲𑀺, 𑀢𑁆𑀯𑀁 𑀭𑀣𑀸𑀦𑀼𑀘𑁆𑀙𑀯𑀺𑀓𑀁 𑀤𑀸𑀭𑀼𑀁 𑀚𑀸𑀦𑀺𑀲𑁆𑀲𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀸𑀴𑀲𑀻𑀳𑁄 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁬.

‘‘𑀦𑁂𑀯 𑀲𑀸𑀮𑁄 𑀦 𑀔𑀤𑀺𑀭𑁄, 𑀦𑀸𑀲𑁆𑀲𑀓𑀡𑁆𑀡𑁄 𑀓𑀼𑀢𑁄 𑀥𑀯𑁄;

𑀭𑀼𑀓𑁆𑀔𑁄 𑀘 𑀨𑀦𑁆𑀤𑀦𑁄 𑀦𑀸𑀫, 𑀢𑀁 𑀤𑀸𑀭𑀼𑀁 𑀦𑁂𑀫𑀺𑀬𑀸 𑀤𑀴𑁆𑀳’’𑀦𑁆𑀢𑀺.

𑀲𑁄 𑀢𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀲𑀼𑀤𑀺𑀯𑀲𑁂𑀦 𑀯𑀢𑀫𑁆𑀳𑀺 𑀅𑀚𑁆𑀚 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀫𑁂 𑀭𑀣𑀸𑀦𑀼𑀘𑁆𑀙𑀯𑀺𑀓𑀁 𑀤𑀸𑀭𑀼𑀁 𑀆𑀘𑀺𑀓𑁆𑀔𑀢𑀺, 𑀅𑀳𑁄 𑀲𑀸𑀥𑀽’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁭.

‘‘𑀓𑀻𑀤𑀺𑀲𑀸𑀦𑀺𑀲𑁆𑀲 𑀧𑀢𑁆𑀢𑀸𑀦𑀺, 𑀔𑀦𑁆𑀥𑁄 𑀯𑀸 𑀧𑀦 𑀓𑀻𑀤𑀺𑀲𑁄;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀬𑀣𑀸 𑀚𑀸𑀦𑁂𑀫𑀼 𑀨𑀦𑁆𑀤𑀦’’𑀦𑁆𑀢𑀺.

𑀅𑀣𑀲𑁆𑀲 ¶ 𑀲𑁄 𑀆𑀘𑀺𑀓𑁆𑀔𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮.

‘‘𑀬𑀲𑁆𑀲 𑀲𑀸𑀔𑀸 𑀧𑀮𑀫𑁆𑀩𑀦𑁆𑀢𑀺, 𑀦𑀫𑀦𑁆𑀢𑀺 𑀦 𑀘 𑀪𑀜𑁆𑀚𑀭𑁂;

𑀲𑁄 𑀭𑀼𑀓𑁆𑀔𑁄 𑀨𑀦𑁆𑀤𑀦𑁄 𑀦𑀸𑀫, 𑀬𑀲𑁆𑀲 𑀫𑀽𑀮𑁂 𑀅𑀳𑀁 𑀞𑀺𑀢𑁄.

𑁧𑁯.

‘‘𑀅𑀭𑀸𑀦𑀁 ¶ 𑀘𑀓𑁆𑀓𑀦𑀸𑀪𑀻𑀦𑀁, 𑀈𑀲𑀸𑀦𑁂𑀫𑀺𑀭𑀣𑀲𑁆𑀲 𑀘;

𑀲𑀩𑁆𑀩𑀲𑁆𑀲 𑀢𑁂 𑀓𑀫𑁆𑀫𑀦𑀺𑀬𑁄, 𑀅𑀬𑀁 𑀳𑁂𑀲𑁆𑀲𑀢𑀺 𑀨𑀦𑁆𑀤𑀦𑁄’’𑀢𑀺.

𑀢𑀢𑁆𑀣 ‘‘𑀅𑀭𑀸𑀦’’𑀦𑁆𑀢𑀺 𑀇𑀤𑀁 𑀲𑁄 ‘‘𑀓𑀤𑀸𑀘𑁂𑀲 𑀇𑀫𑀁 𑀭𑀼𑀓𑁆𑀔𑀁 𑀦 𑀕𑀡𑁆𑀳𑁂𑀬𑁆𑀬, 𑀕𑀼𑀡𑀫𑁆𑀧𑀺𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀈𑀲𑀸𑀦𑁂𑀫𑀺𑀭𑀣𑀲𑁆𑀲 𑀘𑀸𑀢𑀺 𑀈𑀲𑀸𑀬 𑀘 𑀦𑁂𑀫𑀺𑀬𑀸 𑀘 𑀲𑁂𑀲𑀲𑁆𑀲 𑀘 𑀭𑀣𑀲𑁆𑀲 𑀲𑀩𑁆𑀩𑀲𑁆𑀲 𑀢𑁂 𑀏𑀲 𑀓𑀫𑁆𑀫𑀦𑀺𑀬𑁄 𑀓𑀫𑁆𑀫𑀓𑁆𑀔𑀫𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀲𑁄 𑀏𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀏𑀓𑀫𑀦𑁆𑀢𑁂 𑀯𑀺𑀘𑀭𑀺, 𑀯𑀟𑁆𑀠𑀓𑀻𑀧𑀺 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀭𑀼𑀓𑁆𑀔𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀏𑀢𑀲𑁆𑀲 𑀉𑀧𑀭𑀺 𑀦 𑀓𑀺𑀜𑁆𑀘𑀺 𑀧𑀸𑀢𑀺𑀢𑀁, 𑀅𑀬𑀁 𑀅𑀝𑁆𑀞𑀸𑀦𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀫 𑀯𑀺𑀫𑀸𑀦𑀁 𑀦𑀸𑀲𑁂𑀢𑀺, 𑀅𑀳𑀜𑁆𑀘 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀺, 𑀏𑀓𑁂𑀦𑀼𑀧𑀸𑀬𑁂𑀦 ¶ 𑀇𑀫𑀜𑁆𑀘 𑀇𑀲𑁆𑀲𑀁 𑀯𑀺𑀦𑀸𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀯𑀦𑀓𑀫𑁆𑀫𑀺𑀓𑀧𑀼𑀭𑀺𑀲𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀪𑁄 𑀧𑀼𑀭𑀺𑀲 𑀫𑀦𑀸𑀧𑁄 𑀢𑁂 𑀭𑀼𑀓𑁆𑀔𑁄 𑀮𑀤𑁆𑀥𑁄, 𑀇𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀭𑀣𑀦𑁂𑀫𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀇𑀫𑀺𑀦𑀸 𑀭𑀼𑀓𑁆𑀔𑁂𑀦 𑀭𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑁂𑀦 𑀢𑁂 𑀅𑀓𑁆𑀔𑀸𑀢𑀦𑁆𑀢𑀺. ‘‘𑀏𑀓𑁂𑀦 𑀓𑀸𑀴𑀲𑀻𑀳𑁂𑀦𑀸’’𑀢𑀺. ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑁂𑀦 𑀅𑀓𑁆𑀔𑀸𑀢𑀁, 𑀇𑀫𑀺𑀦𑀸 𑀭𑀼𑀓𑁆𑀔𑁂𑀦 𑀭𑀣𑁄 𑀲𑀼𑀦𑁆𑀤𑀭𑁄 𑀪𑀯𑀺𑀲𑁆𑀲𑀢𑀺, 𑀓𑀸𑀴𑀲𑀻𑀳𑀲𑁆𑀲 𑀕𑀮𑀘𑀫𑁆𑀫𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁂 𑀞𑀸𑀦𑁂 𑀅𑀬𑀧𑀝𑁆𑀝𑁂𑀦 𑀯𑀺𑀬 𑀦𑁂𑀫𑀺𑀫𑀡𑁆𑀟𑀮𑁂 𑀧𑀭𑀺𑀓𑁆𑀔𑀺𑀢𑁆𑀢𑁂 𑀦𑁂𑀫𑀺 𑀘 𑀣𑀺𑀭𑀸 𑀪𑀯𑀺𑀲𑁆𑀲𑀢𑀺, 𑀩𑀳𑀼𑀜𑁆𑀘 𑀥𑀦𑀁 𑀮𑀪𑀺𑀲𑁆𑀲𑀲𑀻’’𑀢𑀺. ‘‘𑀓𑀸𑀴𑀲𑀻𑀳𑀘𑀫𑁆𑀫𑀁 𑀓𑀼𑀢𑁄 𑀮𑀘𑁆𑀙𑀸𑀫𑀻’’𑀢𑀺? ‘‘𑀢𑁆𑀯𑀁 𑀩𑀸𑀮𑀓𑁄𑀲𑀺, 𑀅𑀬𑀁 𑀢𑀯 𑀭𑀼𑀓𑁆𑀔𑁄 𑀯𑀦𑁂 𑀞𑀺𑀢𑁄 𑀦 𑀧𑀮𑀸𑀬𑀢𑀺, 𑀢𑁆𑀯𑀁 𑀬𑁂𑀦 𑀢𑁂 𑀭𑀼𑀓𑁆𑀔𑁄 𑀅𑀓𑁆𑀔𑀸𑀢𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘𑀲𑀸𑀫𑀺 𑀢𑀬𑀸 𑀤𑀲𑁆𑀲𑀺𑀢𑀭𑀼𑀓𑁆𑀔𑀁 𑀓𑀢𑀭𑀝𑁆𑀞𑀸𑀦𑁂 𑀙𑀺𑀦𑁆𑀤𑀸𑀫𑀻’𑀢𑀺 𑀯𑀜𑁆𑀘𑁂𑀢𑁆𑀯𑀸 𑀆𑀦𑁂𑀳𑀺, 𑀅𑀣 𑀦𑀁 𑀦𑀺𑀭𑀸𑀲𑀗𑁆𑀓𑀁 ‘𑀇𑀥 𑀘 𑀏𑀢𑁆𑀣 𑀘 𑀙𑀺𑀦𑁆𑀤𑀸’𑀢𑀺 𑀫𑀼𑀔𑀢𑀼𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀁 𑀢𑀺𑀔𑀺𑀡𑁂𑀦 𑀫𑀳𑀸𑀨𑀭𑀲𑀼𑀦𑀸 𑀓𑁄𑀝𑁆𑀝𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀘𑀫𑁆𑀫𑀁 𑀆𑀤𑀸𑀬 𑀯𑀭𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀸’’𑀢𑀺 𑀯𑁂𑀭𑀁 𑀅𑀧𑁆𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁨𑁦.

‘‘𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀢𑀸𑀯𑀤𑁂 𑀅𑀚𑁆𑀛𑀪𑀸𑀲𑀣;

𑀫𑀬𑁆𑀳𑀫𑁆𑀧𑀺 𑀯𑀘𑀦𑀁 𑀅𑀢𑁆𑀣𑀺, 𑀪𑀸𑀭𑀤𑁆𑀯𑀸𑀚 𑀲𑀼𑀡𑁄𑀳𑀺 𑀫𑁂.

𑁨𑁧.

‘‘𑀇𑀲𑁆𑀲𑀲𑁆𑀲 ¶ 𑀉𑀧𑀓𑁆𑀔𑀦𑁆𑀥𑀫𑁆𑀳𑀸, 𑀉𑀓𑁆𑀓𑀘𑁆𑀘 𑀘𑀢𑀼𑀭𑀗𑁆𑀕𑀼𑀮𑀁;

𑀢𑁂𑀦 𑀦𑁂𑀫𑀺𑀁 𑀧𑀲𑀸𑀭𑁂𑀲𑀺, 𑀏𑀯𑀁 𑀤𑀴𑁆𑀳𑀢𑀭𑀁 𑀲𑀺𑀬𑀸.

𑁨𑁨.

‘‘𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀯𑁂𑀭𑀁 𑀅𑀧𑁆𑀧𑁂𑀲𑀺 𑀢𑀸𑀯𑀤𑁂;

𑀚𑀸𑀢𑀸𑀦𑀜𑁆𑀘 𑀅𑀚𑀸𑀢𑀸𑀦𑀁, 𑀇𑀲𑁆𑀲𑀸𑀦𑀁 𑀤𑀼𑀓𑁆𑀔𑀫𑀸𑀯𑀳𑀻’’𑀢𑀺.

𑀢𑀢𑁆𑀣 ¶ 𑀪𑀸𑀭𑀤𑁆𑀯𑀸𑀚𑀸𑀢𑀺 𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀉𑀧𑀓𑁆𑀔𑀦𑁆𑀥𑀫𑁆𑀳𑀸𑀢𑀺 𑀔𑀦𑁆𑀥𑀢𑁄. 𑀉𑀓𑁆𑀓𑀘𑁆𑀘𑀸𑀢𑀺 𑀉𑀓𑁆𑀓𑀦𑁆𑀢𑀺𑀢𑁆𑀯𑀸.

𑀯𑀟𑁆𑀠𑀓𑀻 𑀭𑀼𑀓𑁆𑀔𑀤𑁂𑀯𑀢𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀅𑀚𑁆𑀚 𑀫𑀬𑁆𑀳𑀁 𑀫𑀗𑁆𑀕𑀮𑀤𑀺𑀯𑀲𑁄’’𑀢𑀺 𑀓𑀸𑀴𑀲𑀻𑀳𑀁 𑀖𑀸𑀢𑁂𑀢𑁆𑀯𑀸 𑀭𑀼𑀓𑁆𑀔𑀁 𑀙𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁨𑁩.

‘‘𑀇𑀘𑁆𑀘𑁂𑀯𑀁 𑀨𑀦𑁆𑀤𑀦𑁄 𑀇𑀲𑁆𑀲𑀁, 𑀇𑀲𑁆𑀲𑁄 𑀘 𑀧𑀦 𑀨𑀦𑁆𑀤𑀦𑀁;

𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑁂𑀦, 𑀅𑀜𑁆𑀜𑀫𑀜𑁆𑀜𑀫𑀖𑀸𑀢𑀬𑀼𑀁.

𑁨𑁪.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑀸𑀦𑀁, 𑀯𑀺𑀯𑀸𑀤𑁄 𑀬𑀢𑁆𑀣 𑀚𑀸𑀬𑀢𑀺;

𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀺, 𑀬𑀣𑀸 𑀢𑁂 𑀇𑀲𑁆𑀲𑀨𑀦𑁆𑀤𑀦𑀸.

𑁨𑁫.

‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀫𑁆𑀫𑁄𑀤𑀣 𑀫𑀸 𑀯𑀺𑀯𑀤𑀣, 𑀫𑀸 𑀳𑁄𑀣 𑀇𑀲𑁆𑀲𑀨𑀦𑁆𑀤𑀦𑀸.

𑁨𑁬.

‘‘𑀲𑀸𑀫𑀕𑁆𑀕𑀺𑀫𑁂𑀯 𑀲𑀺𑀓𑁆𑀔𑁂𑀣, 𑀩𑀼𑀤𑁆𑀥𑁂𑀳𑁂𑀢𑀁 𑀧𑀲𑀁𑀲𑀺𑀢𑀁;

𑀲𑀸𑀫𑀕𑁆𑀕𑀺𑀭𑀢𑁄 𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻’’𑀢𑀺.

𑀢𑀢𑁆𑀣 𑀅𑀖𑀸𑀢𑀬𑀼𑀦𑁆𑀢𑀺 𑀖𑀸𑀢𑀸𑀧𑁂𑀲𑀼𑀁. 𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀻𑀢𑀺 𑀫𑀳𑀸𑀭𑀸𑀚𑀸 𑀬𑀢𑁆𑀣 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀯𑀺𑀯𑀸𑀤𑁄 𑀳𑁄𑀢𑀺, 𑀢𑀢𑁆𑀣 𑀬𑀣𑀸 𑀦𑀸𑀫 𑀫𑀬𑀽𑀭𑀸 𑀦𑀘𑁆𑀘𑀦𑁆𑀢𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀭𑀳𑀲𑁆𑀲𑀗𑁆𑀕𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀫𑀦𑀼𑀲𑁆𑀲𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀭𑀦𑁆𑀥𑀁 𑀧𑀓𑀸𑀲𑁂𑀦𑁆𑀢𑀸 𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀺 𑀦𑀸𑀫. 𑀬𑀣𑀸 𑀢𑁂 𑀇𑀲𑁆𑀲𑀨𑀦𑁆𑀤𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀭𑀦𑁆𑀥𑀁 𑀧𑀓𑀸𑀲𑁂𑀦𑁆𑀢𑀸 𑀦𑀘𑁆𑀘𑀺𑀁𑀲𑀼 𑀦𑀸𑀫. 𑀢𑀁 𑀯𑁄𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀼𑀫𑁆𑀳𑁂 𑀯𑀤𑀸𑀫𑀺. 𑀪𑀤𑁆𑀤𑀁 𑀯𑁄𑀢𑀺 𑀪𑀤𑁆𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼. 𑀬𑀸𑀯𑀦𑁆𑀢𑁂𑀢𑁆𑀣𑀸𑀢𑀺 𑀬𑀸𑀯𑀦𑁆𑀢𑁄 𑀏𑀢𑁆𑀣 𑀇𑀲𑁆𑀲𑀨𑀦𑁆𑀤𑀦𑀲𑀤𑀺𑀲𑀸 𑀫𑀸 𑀅𑀳𑀼𑀯𑀢𑁆𑀣. 𑀲𑀸𑀫𑀕𑁆𑀕𑀺𑀫𑁂𑀯 𑀲𑀺𑀓𑁆𑀔𑁂𑀣𑀸𑀢𑀺 𑀲𑀫𑀕𑁆𑀕𑀪𑀸𑀯𑀫𑁂𑀯 𑀢𑀼𑀫𑁆𑀳𑁂 𑀲𑀺𑀓𑁆𑀔𑀣, 𑀇𑀤𑀁 𑀧𑀜𑁆𑀜𑀸𑀯𑀼𑀤𑁆𑀥𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀲𑀁𑀲𑀺𑀢𑀁 ¶ . 𑀥𑀫𑁆𑀫𑀝𑁆𑀞𑁄𑀢𑀺 𑀲𑀼𑀘𑀭𑀺𑀢𑀥𑀫𑁆𑀫𑁂 𑀞𑀺𑀢𑁄. 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻𑀢𑀺 𑀬𑁄𑀕𑁂𑀳𑀺 𑀔𑁂𑀫𑀸 𑀦𑀺𑀩𑁆𑀩𑀸𑀦𑀸 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑁂𑀦 𑀤𑁂𑀲𑀦𑀸𑀓𑀽𑀝𑀁 𑀕𑀡𑁆𑀳𑀺. 𑀲𑀓𑁆𑀬𑀭𑀸𑀚𑀸𑀦𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀫𑀕𑁆𑀕𑀸 𑀚𑀸𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀢𑀁 𑀓𑀸𑀭𑀡𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀯𑀼𑀢𑁆𑀣𑀤𑁂𑀯𑀢𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀨𑀦𑁆𑀤𑀦𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁭𑁬] 𑁩. 𑀚𑀯𑀦𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸

𑀇𑀥𑁂𑀯 ¶ 𑀳𑀁𑀲 𑀦𑀺𑀧𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀴𑁆𑀳𑀥𑀫𑁆𑀫𑀥𑀦𑀼𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀁 (𑀲𑀁. 𑀦𑀺. 𑁨.𑁨𑁨𑁮) 𑀆𑀭𑀩𑁆𑀪 𑀓𑀣𑁂𑀲𑀺. 𑀪𑀕𑀯𑀢𑀸 𑀳𑀺 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸 𑀲𑀼𑀲𑀺𑀓𑁆𑀔𑀺𑀢𑀸 𑀓𑀢𑀳𑀢𑁆𑀣𑀸 𑀓𑀢𑀽𑀧𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀼, 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 ‘𑀅𑀳𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀤𑀴𑁆𑀳𑀥𑀫𑁆𑀫𑀸𑀦𑀁 𑀥𑀦𑀼𑀕𑁆𑀕𑀳𑀸𑀦𑀁 𑀲𑀼𑀲𑀺𑀓𑁆𑀔𑀺𑀢𑀸𑀦𑀁 𑀓𑀢𑀳𑀢𑁆𑀣𑀸𑀦𑀁 𑀓𑀢𑀽𑀧𑀸𑀲𑀦𑀸𑀦𑀁 ¶ 𑀘𑀢𑀼𑀤𑁆𑀤𑀺𑀲𑀸 𑀓𑀡𑁆𑀟𑁂 𑀔𑀺𑀢𑁆𑀢𑁂 𑀅𑀧𑀢𑀺𑀝𑁆𑀞𑀺𑀢𑁂 𑀧𑀣𑀯𑀺𑀬𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, ‘𑀚𑀯𑀦𑁄 𑀧𑀼𑀭𑀺𑀲𑁄 𑀧𑀭𑀫𑁂𑀦 𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑁄’𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺? ‘‘𑀏𑀯𑀁 𑀪𑀦𑁆𑀢𑁂’’𑀢𑀺. 𑀬𑀣𑀸 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑁄. 𑀬𑀣𑀸 𑀘, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄, 𑀬𑀣𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀚𑀯𑁄, 𑀬𑀣𑀸 𑀘 𑀬𑀸 𑀤𑁂𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀚𑀯𑁄, 𑀢𑀢𑁄 𑀲𑀻𑀖𑀢𑀭𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀬𑀦𑁆𑀢𑀺, 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑁋

𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀓𑀣𑀺𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑁂 𑀇𑀢𑁆𑀢𑀭𑁂 𑀤𑀼𑀩𑁆𑀩𑀮𑁂 𑀓𑀢𑁆𑀯𑀸 𑀧𑀭𑀺𑀤𑀻𑀧𑁂𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀅𑀢𑀺𑀯𑀺𑀬 𑀲𑀦𑁆𑀢𑀸𑀲𑀁 𑀧𑀸𑀧𑁂𑀲𑀺, 𑀅𑀳𑁄 𑀩𑀼𑀤𑁆𑀥𑀩𑀮𑀁 𑀦𑀸𑀫𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀇𑀢𑁆𑀢𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀫𑀬𑀸 𑀳𑀺 𑀧𑀼𑀩𑁆𑀩𑁂 𑀅𑀳𑁂𑀢𑀼𑀓𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑀧𑀺 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀇𑀢𑁆𑀢𑀭𑀪𑀸𑀯𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀓𑀮𑀭𑀸𑀚𑀧𑀭𑀺𑀲𑀁 𑀲𑀁𑀯𑁂𑀚𑁂𑀢𑁆𑀯𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀚𑀯𑀦𑀳𑀁𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀘𑀺𑀢𑁆𑀢𑀓𑀽𑀝𑁂 𑀧𑀝𑀺𑀯𑀲𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀚𑀫𑁆𑀩𑀼𑀤𑀻𑀧𑀢𑀮𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀲𑀧𑀭𑀺𑀯𑀸𑀭𑁄 𑀲𑀬𑀁𑀚𑀸𑀢𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀆𑀓𑀸𑀲𑁂 𑀲𑀼𑀯𑀡𑁆𑀡𑀓𑀺𑀮𑀜𑁆𑀚𑀁 𑀧𑀢𑁆𑀣𑀭𑀦𑁆𑀢𑁄 𑀯𑀺𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀩𑀸𑀭𑀸𑀡𑀲𑀺𑀦𑀕𑀭𑀲𑁆𑀲 𑀫𑀢𑁆𑀣𑀓𑁂𑀦 𑀫𑀦𑁆𑀤𑀫𑀦𑁆𑀤𑀸𑀬 𑀯𑀺𑀮𑀸𑀲𑀕𑀢𑀺𑀬𑀸 𑀘𑀺𑀢𑁆𑀢𑀓𑀽𑀝𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸𑀧𑀺 𑀫𑀸𑀤𑀺𑀲𑁂𑀦 𑀭𑀜𑁆𑀜𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀫𑀘𑁆𑀘𑀸𑀦𑀁 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀳𑀁𑀲𑁂 𑀧𑀼𑀘𑁆𑀙𑀺 ‘‘𑀭𑀸𑀚𑀸 ¶ , 𑀫𑀫 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺? ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀭𑀜𑁆𑀜𑁄 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑁄 𑀳𑁄𑀢𑀽’’𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀉𑀬𑁆𑀬𑀸𑀦𑀁 𑀕𑀢𑀓𑀸𑀮𑁂 𑀅𑀦𑁄𑀢𑀢𑁆𑀢𑀤𑀳𑀁 𑀕𑀦𑁆𑀢𑁆𑀯𑀸 𑀏𑀓𑁂𑀦 𑀧𑀓𑁆𑀔𑁂𑀦 𑀉𑀤𑀓𑀁, 𑀏𑀓𑁂𑀦 𑀘𑀦𑁆𑀤𑀦𑀘𑀼𑀡𑁆𑀡𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀢𑁂𑀦 𑀉𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀘𑀦𑁆𑀤𑀦𑀘𑀼𑀡𑁆𑀡𑁂𑀦 𑀑𑀓𑀺𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑀧𑀭𑀺𑀯𑀸𑀭𑁄 𑀘𑀺𑀢𑁆𑀢𑀓𑀽𑀝𑀁 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸 𑀫𑀳𑀸𑀲𑀢𑁆𑀢𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀲𑀳𑀸𑀬𑁄 𑀫𑁂 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀺, 𑀲𑀳𑀸𑀬𑁄 𑀫𑁂 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀘𑁆𑀙𑀢𑀺.

𑀢𑀤𑀸 𑀫𑀳𑀸𑀲𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑀸 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 ‘‘𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀫𑀬𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺. ‘‘𑀢𑀸𑀢𑀸, 𑀲𑀽𑀭𑀺𑀬𑀚𑀯𑁄 𑀦𑀸𑀫 𑀲𑀻𑀖𑁄, 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣, 𑀅𑀦𑁆𑀢𑀭𑀸𑀯 𑀯𑀺𑀦𑀲𑁆𑀲𑀺𑀲𑁆𑀲𑀣, 𑀫𑀸 𑀕𑀫𑀺𑀢𑁆𑀣𑀸’’𑀢𑀺. 𑀢𑁂 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀁𑀲𑀼, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑁂 𑀬𑀸𑀯𑀢𑀢𑀺𑀬𑀁 𑀯𑀸𑀭𑁂𑀲𑀺𑀬𑁂𑀯. 𑀢𑁂 𑀫𑀸𑀦𑀣𑀤𑁆𑀥𑀸 𑀅𑀢𑁆𑀢𑀦𑁄 𑀩𑀮𑀁 𑀅𑀚𑀸𑀦𑀦𑁆𑀢𑀸 𑀫𑀳𑀸𑀲𑀢𑁆𑀢𑀲𑁆𑀲 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 ‘‘𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺 𑀲𑀽𑀭𑀺𑀬𑁂 𑀅𑀦𑀼𑀕𑁆𑀕𑀢𑁂𑀬𑁂𑀯 𑀕𑀦𑁆𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑁂 𑀅𑀤𑀺𑀲𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀢𑁂 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀅𑀦𑁆𑀢𑀭𑀸𑀯 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀚𑀻𑀯𑀺𑀢𑀁 𑀢𑁂𑀲𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀉𑀕𑁆𑀕𑀢𑁂 𑀲𑀽𑀭𑀺𑀬𑀫𑀡𑁆𑀟𑀮𑁂 𑀳𑀁𑀲𑀧𑁄𑀢𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀧𑀓𑁆𑀔𑀦𑁆𑀤𑀺𑀁𑀲𑀼, 𑀫𑀳𑀸𑀲𑀢𑁆𑀢𑁄𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀓𑁆𑀔𑀦𑁆𑀤𑀺. 𑀓𑀦𑀺𑀝𑁆𑀞𑀪𑀸𑀢𑀺𑀓𑁄 ¶ 𑀬𑀸𑀯 𑀧𑀼𑀩𑁆𑀩𑀡𑁆𑀳𑀲𑀫𑀬𑀸 𑀚𑀯𑀺𑀢𑁆𑀯𑀸 𑀓𑀺𑀮𑀫𑀺, 𑀧𑀓𑁆𑀔𑀲𑀦𑁆𑀥𑀻𑀲𑀼 𑀅𑀕𑁆𑀕𑀺𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀪𑀸𑀢𑀺𑀓, 𑀦 𑀲𑀓𑁆𑀓𑁄𑀫𑀻’’𑀢𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀺, 𑀚𑀻𑀯𑀺𑀢𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀔𑀧𑀜𑁆𑀚𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀅𑀲𑁆𑀲𑀸𑀲𑁂𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀁 𑀦𑁂𑀢𑁆𑀯𑀸 𑀳𑀁𑀲𑀸𑀦𑀁 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀧𑀼𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀽𑀭𑀺𑀬𑀁 𑀧𑀢𑁆𑀯𑀸 𑀇𑀢𑀭𑁂𑀦 𑀲𑀤𑁆𑀥𑀺𑀁 𑀧𑀸𑀬𑀸𑀲𑀺. 𑀲𑁄𑀧𑀺 𑀬𑀸𑀯 𑀉𑀧𑀓𑀝𑁆𑀞𑀫𑀚𑁆𑀛𑀦𑁆𑀳𑀺𑀓𑀸 𑀲𑀽𑀭𑀺𑀬𑁂𑀦 ¶ 𑀲𑀤𑁆𑀥𑀺𑀁 𑀚𑀯𑀺𑀢𑁆𑀯𑀸 𑀓𑀺𑀮𑀫𑀺, 𑀧𑀓𑁆𑀔𑀲𑀦𑁆𑀥𑀻𑀲𑀼 𑀅𑀕𑁆𑀕𑀺𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀪𑀸𑀢𑀺𑀓, 𑀦 𑀲𑀓𑁆𑀓𑁄𑀫𑀻’’𑀢𑀺. 𑀢𑀫𑁆𑀧𑀺 𑀫𑀳𑀸𑀲𑀢𑁆𑀢𑁄 𑀢𑀣𑁂𑀯 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀓𑁆𑀔𑀧𑀜𑁆𑀚𑀭𑁂𑀦𑀸𑀤𑀸𑀬 𑀘𑀺𑀢𑁆𑀢𑀓𑀽𑀝𑀫𑁂𑀯 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀽𑀭𑀺𑀬𑁄 𑀦𑀪𑀫𑀚𑁆𑀛𑀁 𑀧𑀸𑀧𑀼𑀡𑀺.

𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀫𑀫 𑀅𑀚𑁆𑀚 𑀲𑀭𑀻𑀭𑀩𑀮𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀏𑀓𑀯𑁂𑀕𑁂𑀦 𑀲𑀽𑀭𑀺𑀬𑀁 𑀧𑀸𑀧𑀼𑀡𑀺𑀢𑁆𑀯𑀸 𑀓𑀸𑀮𑁂𑀦 𑀧𑀼𑀭𑀢𑁄, 𑀓𑀸𑀮𑁂𑀦 𑀧𑀘𑁆𑀙𑀢𑁄 𑀚𑀯𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀦𑀁 𑀦𑀸𑀫 𑀦𑀺𑀭𑀢𑁆𑀣𑀓𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀪𑀽𑀢𑀁, 𑀓𑀺𑀁 𑀫𑁂 𑀇𑀫𑀺𑀦𑀸, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀫𑀫 𑀲𑀳𑀸𑀬𑀓𑀲𑁆𑀲 𑀭𑀜𑁆𑀜𑁄 𑀅𑀢𑁆𑀣𑀬𑀼𑀢𑁆𑀢𑀁 𑀥𑀫𑁆𑀫𑀬𑀼𑀢𑁆𑀢𑀁 𑀓𑀣𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀽𑀭𑀺𑀬𑁂 𑀦𑀪𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀅𑀦𑁆𑀢𑀦𑁆𑀢𑁂𑀦 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀯𑁂𑀕𑀁 𑀧𑀭𑀺𑀳𑀸𑀧𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀦𑁆𑀢𑀦𑁆𑀢𑁂𑀦 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀲𑀓𑀮𑀦𑀕𑀭𑀁 𑀳𑀁𑀲𑀘𑁆𑀙𑀦𑁆𑀦𑀁 𑀯𑀺𑀬 𑀅𑀳𑁄𑀲𑀺, 𑀙𑀺𑀤𑁆𑀤𑀁 𑀦𑀸𑀫 𑀦 𑀧𑀜𑁆𑀜𑀸𑀬𑀺, 𑀅𑀦𑀼𑀓𑁆𑀓𑀫𑁂𑀦 𑀯𑁂𑀕𑁂 𑀧𑀭𑀺𑀳𑀸𑀬𑀦𑁆𑀢𑁂 𑀆𑀓𑀸𑀲𑁂 𑀙𑀺𑀤𑁆𑀤𑀸𑀦𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀯𑁂𑀕𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀆𑀕𑀢𑁄 𑀫𑁂 𑀲𑀳𑀸𑀬𑁄’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀢𑀲𑁆𑀲 𑀦𑀺𑀲𑀻𑀤𑀦𑀢𑁆𑀣𑀸𑀬 𑀓𑀜𑁆𑀘𑀦𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀲𑀫𑁆𑀫, 𑀧𑀯𑀺𑀲, 𑀇𑀥 𑀦𑀺𑀲𑀻𑀤𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁭.

‘‘𑀇𑀥𑁂𑀯 𑀳𑀁𑀲 𑀦𑀺𑀧𑀢, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀁;

𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀫𑀺𑀥𑀢𑁆𑀣𑀺 𑀧𑀯𑁂𑀤𑀬𑀸’’𑀢𑀺.

𑀢𑀢𑁆𑀣 ‘‘𑀇𑀥𑀸’’𑀢𑀺 𑀓𑀜𑁆𑀘𑀦𑀧𑀻𑀞𑀁 𑀲𑀦𑁆𑀥𑀸𑀬𑀸𑀳. 𑀦𑀺𑀧𑀢𑀸𑀢𑀺 𑀦𑀺𑀲𑀻𑀤. 𑀇𑀲𑁆𑀲𑀭𑁄𑀲𑀻𑀢𑀺 𑀢𑁆𑀯𑀁 𑀇𑀫𑀲𑁆𑀲 𑀞𑀸𑀦𑀲𑁆𑀲 𑀇𑀲𑁆𑀲𑀭𑁄 𑀲𑀸𑀫𑀺 𑀳𑀼𑀢𑁆𑀯𑀸 𑀆𑀕𑀢𑁄𑀲𑀻𑀢𑀺 𑀯𑀤𑀢𑀺. 𑀬𑀫𑀺𑀥𑀢𑁆𑀣𑀺 𑀧𑀯𑁂𑀤𑀬𑀸𑀢𑀺 ¶ 𑀬𑀁 𑀇𑀫𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀅𑀢𑁆𑀣𑀺, 𑀢𑀁 𑀅𑀧𑀭𑀺𑀲𑀗𑁆𑀓𑀦𑁆𑀢𑁄 𑀅𑀫𑁆𑀳𑀸𑀓𑀁 𑀓𑀣𑁂𑀳𑀻𑀢𑀺.

𑀫𑀳𑀸𑀲𑀢𑁆𑀢𑁄 𑀓𑀜𑁆𑀘𑀦𑀧𑀻𑀞𑁂 𑀦𑀺𑀲𑀻𑀤𑀺. 𑀭𑀸𑀚𑀸 𑀲𑀢𑀧𑀸𑀓𑀲𑀳𑀲𑁆𑀲𑀧𑀸𑀓𑁂𑀳𑀺 𑀢𑁂𑀮𑁂𑀳𑀺 𑀢𑀲𑁆𑀲 𑀧𑀓𑁆𑀔𑀦𑁆𑀢𑀭𑀸𑀦𑀺 𑀫𑀓𑁆𑀔𑁂𑀢𑁆𑀯𑀸 𑀓𑀜𑁆𑀘𑀦𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂 𑀘 𑀫𑀥𑀼𑀭𑁄𑀤𑀓𑀜𑁆𑀘 𑀲𑀓𑁆𑀔𑀭𑁄𑀤𑀓𑀜𑁆𑀘 𑀤𑀸𑀧𑁂𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ¶ ‘‘𑀲𑀫𑁆𑀫, 𑀢𑁆𑀯𑀁 𑀏𑀓𑀓𑁄𑀯 𑀆𑀕𑀢𑁄𑀲𑀺, 𑀓𑀼𑀳𑀺𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 ‘‘𑀲𑀫𑁆𑀫, 𑀫𑀫𑀧𑀺 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀯𑁂𑀕𑀁 𑀤𑀲𑁆𑀲𑁂𑀳𑀻’’𑀢𑀺. 𑀫𑀳𑀸𑀭𑀸𑀚, 𑀦 𑀲𑀓𑁆𑀓𑀸 𑀲𑁄 𑀯𑁂𑀕𑁄 𑀤𑀲𑁆𑀲𑁂𑀢𑀼𑀦𑁆𑀢𑀺. 𑀢𑁂𑀦 𑀳𑀺 𑀫𑁂 𑀲𑀭𑀺𑀓𑁆𑀔𑀓𑀫𑀢𑁆𑀢𑀁 ¶ 𑀤𑀲𑁆𑀲𑁂𑀳𑀻𑀢𑀺. 𑀲𑀸𑀥𑀼, 𑀫𑀳𑀸𑀭𑀸𑀚, 𑀲𑀭𑀺𑀓𑁆𑀔𑀓𑀫𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀅𑀓𑁆𑀔𑀡𑀯𑁂𑀥𑀻 𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺. 𑀭𑀸𑀚𑀸 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑁂 𑀕𑀳𑁂𑀢𑁆𑀯𑀸 𑀦𑀺𑀯𑁂𑀲𑀦𑀸 𑀑𑀭𑀼𑀬𑁆𑀳 𑀭𑀸𑀚𑀗𑁆𑀕𑀡𑁂 𑀲𑀺𑀮𑀸𑀣𑀫𑁆𑀪𑀁 𑀦𑀺𑀔𑀡𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀻𑀯𑀸𑀬𑀁 𑀖𑀡𑁆𑀝𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀺𑀮𑀸𑀣𑀫𑁆𑀪𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑁂 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀘𑀢𑀼𑀤𑁆𑀤𑀺𑀲𑀸𑀪𑀺𑀫𑀼𑀔𑁂 𑀞𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀢𑀼𑀤𑁆𑀤𑀺𑀲𑀸𑀪𑀺𑀫𑀼𑀔𑀸 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺 𑀔𑀺𑀧𑀦𑁆𑀢𑀼, 𑀢𑀸𑀦𑀺 𑀅𑀳𑀁 𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀸𑀦𑁂𑀯 𑀆𑀳𑀭𑀺𑀢𑁆𑀯𑀸 𑀏𑀢𑁂𑀲𑀁 𑀧𑀸𑀤𑀫𑀽𑀮𑁂 𑀧𑀸𑀢𑁂𑀲𑁆𑀲𑀸𑀫𑀺. 𑀫𑀫 𑀓𑀡𑁆𑀟𑀕𑀳𑀡𑀢𑁆𑀣𑀸𑀬 𑀕𑀢𑀪𑀸𑀯𑀁 𑀖𑀡𑁆𑀝𑀲𑀤𑁆𑀤𑀲𑀜𑁆𑀜𑀸𑀬 𑀚𑀸𑀦𑁂𑀬𑁆𑀬𑀸𑀲𑀺, 𑀫𑀁 𑀧𑀦 𑀦 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀔𑀺𑀢𑁆𑀢𑀓𑀡𑁆𑀟𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑁂𑀲𑀁 𑀧𑀸𑀤𑀫𑀽𑀮𑁂 𑀧𑀸𑀢𑁂𑀢𑁆𑀯𑀸 𑀲𑀺𑀮𑀸𑀣𑀫𑁆𑀪𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀢𑁂, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀯𑁂𑀕𑁄’’𑀢𑀺 𑀯𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀬𑀁 𑀯𑁂𑀕𑁄 𑀫𑀬𑁆𑀳𑀁 𑀦𑁂𑀯 𑀉𑀢𑁆𑀢𑀫𑁄, 𑀫𑀚𑁆𑀛𑀺𑀫𑁄, 𑀧𑀭𑀺𑀢𑁆𑀢𑁄 𑀮𑀸𑀫𑀓𑀯𑁂𑀕𑁄 𑀏𑀲, 𑀏𑀯𑀁 𑀲𑀻𑀖𑁄, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀯𑁂𑀕𑁄’’𑀢𑀺 𑀆𑀳.

𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 ‘‘𑀲𑀫𑁆𑀫, 𑀅𑀢𑁆𑀣𑀺 𑀧𑀦 𑀢𑀼𑀫𑁆𑀳𑀸𑀓𑀁 𑀯𑁂𑀕𑀢𑁄 𑀅𑀜𑁆𑀜𑁄 𑀲𑀻𑀖𑀢𑀭𑁄 𑀯𑁂𑀕𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀉𑀢𑁆𑀢𑀫𑀯𑁂𑀕𑀢𑁄𑀧𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀸 𑀲𑀻𑀖𑀢𑀭𑀁 𑀔𑀻𑀬𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺, 𑀔𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀔𑀡𑀺𑀓𑀦𑀺𑀭𑁄𑀥𑀯𑀲𑁂𑀦 𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺, 𑀢𑀢𑁄 𑀦𑀸𑀫𑀥𑀫𑁆𑀫𑀸𑀦𑀁. 𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀭𑀡𑀪𑀬𑀪𑀻𑀢𑁄 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺, 𑀫𑀳𑀸𑀚𑀦𑁄 𑀉𑀢𑁆𑀭𑀸𑀲𑀁 𑀧𑀢𑁆𑀢𑁄 𑀅𑀳𑁄𑀲𑀺. 𑀭𑀜𑁆𑀜𑁄 𑀫𑀼𑀔𑀁 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 ¶ 𑀲𑀢𑀺𑀁 𑀮𑀪𑀸𑀧𑁂𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺, 𑀫𑀭𑀡𑀲𑁆𑀲𑀢𑀺𑀁 ¶ 𑀪𑀸𑀯𑁂𑀳𑀺, 𑀥𑀫𑁆𑀫𑀁 𑀘𑀭𑀸𑀳𑀺, 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀳𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀤𑁂𑀯𑀸’’𑀢𑀺 𑀑𑀯𑀤𑀺. 𑀅𑀣 𑀭𑀸𑀚𑀸 ‘‘𑀲𑀸𑀫𑀺, 𑀫𑀬𑀁 𑀢𑀼𑀫𑁆𑀳𑀸𑀤𑀺𑀲𑁂𑀦 𑀜𑀸𑀡𑀩𑀮𑀲𑀫𑁆𑀧𑀦𑁆𑀦𑁂𑀦 𑀆𑀘𑀭𑀺𑀬𑁂𑀦 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀘𑀺𑀢𑁆𑀢𑀓𑀽𑀝𑀁 𑀅𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀫𑀬𑁆𑀳𑀁 𑀑𑀯𑀸𑀤𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀬𑀸𑀘𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁮.

‘‘𑀲𑀯𑀦𑁂𑀦 𑀏𑀓𑀲𑁆𑀲 𑀧𑀺𑀬𑀸 𑀪𑀯𑀦𑁆𑀢𑀺, 𑀤𑀺𑀲𑁆𑀯𑀸 𑀧𑀦𑁂𑀓𑀲𑁆𑀲 𑀯𑀺𑀬𑁂𑀢𑀺 𑀙𑀦𑁆𑀤𑁄;

𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀧𑀺𑀬𑀸 𑀪𑀯𑀦𑁆𑀢𑀺, 𑀓𑀘𑁆𑀘𑀺𑀦𑁆𑀦𑀼 𑀫𑁂 𑀧𑀻𑀬𑀲𑀺 𑀤𑀲𑁆𑀲𑀦𑁂𑀦.

𑁨𑁯.

‘‘𑀲𑀯𑀦𑁂𑀦 𑀧𑀺𑀬𑁄 𑀫𑁂𑀲𑀺, 𑀪𑀺𑀬𑁆𑀬𑁄 𑀘𑀸𑀕𑀫𑁆𑀫 𑀤𑀲𑁆𑀲𑀦𑀁;

𑀏𑀯𑀁 𑀧𑀺𑀬𑀤𑀲𑁆𑀲𑀦𑁄 𑀫𑁂, 𑀯𑀲 𑀳𑀁𑀲 𑀫𑀫𑀦𑁆𑀢𑀺𑀓𑁂’’𑀢𑀺.

𑀢𑀸𑀲𑀁 𑀅𑀢𑁆𑀣𑁄 𑁋 𑀲𑀫𑁆𑀫 𑀳𑀁𑀲𑀭𑀸𑀚 𑀲𑀯𑀦𑁂𑀦 𑀏𑀓𑀲𑁆𑀲 𑀏𑀓𑀘𑁆𑀘𑁂 𑀧𑀺𑀬𑀸 𑀳𑁄𑀦𑁆𑀢𑀺, ‘‘𑀏𑀯𑀁 𑀕𑀼𑀡𑁄 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀲𑀯𑀦𑁂𑀦 𑀧𑀺𑀬𑀸𑀬𑀢𑀺, 𑀏𑀓𑀲𑁆𑀲 𑀧𑀦 𑀏𑀓𑀘𑁆𑀘𑁂 𑀤𑀺𑀲𑁆𑀯𑀸𑀯 𑀙𑀦𑁆𑀤𑁄 𑀯𑀺𑀕𑀘𑁆𑀙𑀢𑀺, 𑀧𑁂𑀫𑀁 𑀅𑀦𑁆𑀢𑀭𑀥𑀸𑀬𑀢𑀺 ¶ , 𑀔𑀸𑀤𑀺𑀢𑀼𑀁 𑀆𑀕𑀢𑀸 𑀬𑀓𑁆𑀔𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀏𑀓𑀲𑁆𑀲 𑀏𑀓𑀘𑁆𑀘𑁂 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘𑀸𑀢𑀺 𑀉𑀪𑀬𑀣𑀸𑀧𑀺 𑀧𑀺𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀢𑀁 𑀧𑀼𑀘𑁆𑀙𑀸𑀫𑀺. 𑀓𑀘𑁆𑀘𑀺𑀦𑁆𑀦𑀼 𑀫𑁂 𑀧𑀻𑀬𑀲𑀺 𑀤𑀲𑁆𑀲𑀦𑁂𑀦𑀸𑀢𑀺 𑀓𑀘𑁆𑀘𑀺 𑀦𑀼 𑀢𑁆𑀯𑀁 𑀫𑀁 𑀧𑀺𑀬𑀸𑀬𑀲𑀺, 𑀫𑀬𑁆𑀳𑀁 𑀧𑀦 𑀢𑁆𑀯𑀁 𑀲𑀯𑀦𑁂𑀦 𑀧𑀺𑀬𑁄𑀯, 𑀤𑀲𑁆𑀲𑀦𑀁 𑀧𑀦𑀸𑀕𑀫𑁆𑀫 𑀅𑀢𑀺𑀧𑀺𑀬𑁄𑀯. 𑀏𑀯𑀁 𑀫𑀫 𑀧𑀺𑀬𑀤𑀲𑁆𑀲𑀦𑁄 𑀲𑀫𑀸𑀦𑁄 𑀘𑀺𑀢𑁆𑀢𑀓𑀽𑀝𑀁 𑀅𑀕𑀦𑁆𑀢𑁆𑀯𑀸 𑀇𑀥 𑀫𑀫 𑀲𑀦𑁆𑀢𑀺𑀓𑁂 𑀯𑀲𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁩𑁦.

‘‘𑀯𑀲𑁂𑀬𑁆𑀬𑀸𑀫 𑀢𑀯𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀫𑀢𑁆𑀢𑁄 𑀘 𑀏𑀓𑀤𑀸 𑀯𑀚𑁆𑀚𑁂, 𑀳𑀁𑀲𑀭𑀸𑀚𑀁 𑀧𑀘𑀦𑁆𑀢𑀼 𑀫𑁂’’𑀢𑀺.

𑀢𑀢𑁆𑀣 𑀫𑀢𑁆𑀢𑁄 𑀘 𑀏𑀓𑀤𑀸𑀢𑀺 𑀫𑀳𑀸𑀭𑀸𑀚, 𑀫𑀬𑀁 𑀢𑀯 𑀖𑀭𑁂 𑀦𑀺𑀘𑁆𑀘𑀁 𑀧𑀽𑀚𑀺𑀢𑀸 𑀯𑀲𑁂𑀬𑁆𑀬𑀸𑀫, 𑀢𑁆𑀯𑀁 𑀧𑀦 𑀓𑀤𑀸𑀘𑀺 𑀲𑀼𑀭𑀸𑀫𑀤𑀫𑀢𑁆𑀢𑁄 𑀫𑀁𑀲𑀔𑀸𑀤𑀦𑀢𑁆𑀣𑀁 ‘‘𑀳𑀁𑀲𑀭𑀸𑀚𑀁 𑀧𑀘𑀦𑁆𑀢𑀼 𑀫𑁂’’𑀢𑀺 𑀯𑀤𑁂𑀬𑁆𑀬𑀸𑀲𑀺, 𑀅𑀣 𑀏𑀯𑀁 𑀢𑀯 𑀅𑀦𑀼𑀚𑀻𑀯𑀺𑀦𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀧𑀘𑁂𑀬𑁆𑀬𑀼𑀁, 𑀢𑀤𑀸𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲 ¶ ¶ 𑀭𑀸𑀚𑀸 ‘‘𑀢𑁂𑀦 𑀳𑀺 𑀫𑀚𑁆𑀚𑀫𑁂𑀯 𑀦 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀤𑀸𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁧.

‘‘𑀥𑀺𑀭𑀢𑁆𑀣𑀼 𑀢𑀁 𑀫𑀚𑁆𑀚𑀧𑀸𑀦𑀁, 𑀬𑀁 𑀫𑁂 𑀧𑀺𑀬𑀢𑀭𑀁 𑀢𑀬𑀸;

𑀦 𑀘𑀸𑀧𑀺 𑀫𑀚𑁆𑀚𑀁 𑀧𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀯𑀘𑁆𑀙𑀲𑀻 𑀖𑀭𑁂’’𑀢𑀺.

𑀢𑀢𑁄 𑀧𑀭𑀁 𑀩𑁄𑀥𑀺𑀲𑀢𑁆𑀢𑁄 𑀙 𑀕𑀸𑀣𑀸 𑀆𑀳 𑁋

𑁩𑁨.

‘‘𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁩𑁩.

‘‘𑀅𑀧𑀺 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄.

𑁩𑁪.

‘‘𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀅𑀯𑀺𑀤𑀽𑀭𑁂 𑀲𑀳𑀸𑀧𑀺 𑀲𑁄;

𑀲𑀦𑁆𑀢𑀺𑀓𑁂𑀧𑀺 𑀳𑀺 𑀲𑁄 𑀤𑀽𑀭𑁂, 𑀬𑀲𑁆𑀫𑀺𑀁 𑀦𑀸𑀯𑀺𑀲𑀢𑁂 𑀫𑀦𑁄.

𑁩𑁫.

‘‘𑀅𑀦𑁆𑀢𑁄𑀧𑀺 ¶ 𑀲𑁄 𑀳𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀤𑀼𑀝𑁆𑀞𑀘𑀺𑀢𑁆𑀢𑁄.

𑁩𑁬.

‘‘𑀲𑀁𑀯𑀲𑀦𑁆𑀢𑀸 𑀯𑀺𑀯𑀲𑀦𑁆𑀢𑀺, 𑀬𑁂 𑀤𑀺𑀲𑀸 𑀢𑁂 𑀭𑀣𑁂𑀲𑀪;

𑀆𑀭𑀸 𑀲𑀦𑁆𑀢𑁄 𑀲𑀁𑀯𑀲𑀦𑁆𑀢𑀺, 𑀫𑀦𑀲𑀸 𑀭𑀝𑁆𑀞𑀯𑀟𑁆𑀠𑀦.

𑁩𑁭.

‘‘𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦, 𑀧𑀺𑀬𑁄 𑀪𑀯𑀢𑀺 𑀅𑀧𑁆𑀧𑀺𑀬𑁄;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫, 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸’’𑀢𑀺.

𑀢𑀢𑁆𑀣 𑀯𑀲𑁆𑀲𑀺𑀢𑀦𑁆𑀢𑀺 𑀫𑀳𑀸𑀭𑀸𑀚, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀉𑀚𑀼𑀳𑀤𑀬𑀸, 𑀢𑁂𑀦 𑀢𑁂𑀲𑀁 𑀯𑀲𑁆𑀲𑀺𑀢𑀁 𑀲𑀼𑀯𑀺𑀚𑀸𑀦𑀁, 𑀫𑀦𑀼𑀲𑁆𑀲𑀸 𑀧𑀦 𑀓𑀓𑁆𑀔𑀴𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀁 𑀤𑀼𑀩𑁆𑀩𑀺𑀚𑀸𑀦𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀧𑀼𑀩𑁆𑀩𑁂𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀧𑀞𑀫𑀫𑁂𑀯 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀢𑁆𑀯𑀁 𑀫𑀬𑁆𑀳𑀁 𑀜𑀸𑀢𑀓𑁄 𑀫𑀺𑀢𑁆𑀢𑁄 𑀧𑀸𑀡𑀲𑀫𑁄 𑀲𑀔𑀸’’𑀢𑀺 𑀅𑀧𑀺 𑀏𑀯𑀁 𑀫𑀜𑁆𑀜𑀢𑀺, 𑀲𑁆𑀯𑁂𑀯 𑀧𑀘𑁆𑀙𑀸 𑀤𑀺𑀲𑁄 𑀯𑁂𑀭𑀻 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀤𑀼𑀩𑁆𑀩𑀺𑀚𑀸𑀦𑀁 𑀦𑀸𑀫 𑀫𑀦𑀼𑀲𑁆𑀲𑀳𑀤𑀬𑀦𑁆𑀢𑀺. 𑀦𑀺𑀯𑀺𑀲𑀢𑀻𑀢𑀺 𑀫𑀳𑀸𑀭𑀸𑀚, 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑁂𑀫𑀯𑀲𑁂𑀦 𑀫𑀦𑁄 𑀦𑀺𑀯𑀺𑀲𑀢𑀺, 𑀲𑁄 𑀤𑀽𑀭𑁂 ¶ 𑀯𑀲𑀦𑁆𑀢𑁄𑀧𑀺 𑀅𑀯𑀺𑀤𑀽𑀭𑁂 𑀲𑀳𑀸𑀧𑀺 𑀯𑀲𑀢𑀺𑀬𑁂𑀯 𑀦𑀸𑀫. 𑀬𑀲𑁆𑀫𑀺𑀁 𑀧𑀦 𑀧𑀼𑀕𑁆𑀕𑀮𑁂 𑀫𑀦𑁄 𑀦 𑀦𑀺𑀯𑀺𑀲𑀢𑀺 𑀅𑀧𑁂𑀢𑀺, 𑀲𑁄 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄𑀧𑀺 𑀤𑀽𑀭𑁂𑀬𑁂𑀯.

𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀻𑀢𑀺 𑀫𑀳𑀸𑀭𑀸𑀚, 𑀬𑁄 𑀲𑀳𑀸𑀬𑁄 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑁄 𑀘𑀺𑀢𑁆𑀢𑁂𑀦 𑀅𑀮𑁆𑀮𑀻𑀦𑀢𑁆𑀢𑀸 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀯𑀲𑀦𑁆𑀢𑁄𑀧𑀺 𑀅𑀦𑁆𑀢𑁄𑀬𑁂𑀯 ¶ 𑀳𑁄𑀢𑀺. 𑀬𑁄 𑀧𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀲𑁄 𑀘𑀺𑀢𑁆𑀢𑁂𑀦 𑀅𑀦𑀮𑁆𑀮𑀻𑀦𑀢𑁆𑀢𑀸 𑀅𑀦𑁆𑀢𑁄 𑀯𑀲𑀦𑁆𑀢𑁄𑀧𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀦𑀸𑀫. 𑀬𑁂 𑀤𑀺𑀲𑀸 𑀢𑁂𑀢𑀺 𑀬𑁂 𑀯𑁂𑀭𑀺𑀦𑁄 𑀧𑀘𑁆𑀘𑀢𑁆𑀣𑀺𑀓𑀸, 𑀢𑁂 𑀏𑀓𑀢𑁄 𑀯𑀲𑀦𑁆𑀢𑀸𑀧𑀺 𑀤𑀽𑀭𑁂 𑀯𑀲𑀦𑁆𑀢𑀺𑀬𑁂𑀯 𑀦𑀸𑀫. 𑀲𑀦𑁆𑀢𑁄 𑀧𑀦 𑀧𑀡𑁆𑀟𑀺𑀢𑀸 𑀆𑀭𑀸 𑀞𑀺𑀢𑀸𑀧𑀺 𑀫𑁂𑀢𑁆𑀢𑀸𑀪𑀸𑀯𑀺𑀢𑁂𑀦 𑀫𑀦𑀲𑀸 𑀆𑀯𑀚𑁆𑀚𑁂𑀦𑁆𑀢𑀸 𑀲𑀁𑀯𑀲𑀦𑁆𑀢𑀺𑀬𑁂𑀯. 𑀧𑀼𑀭𑀸 𑀢𑁂 𑀳𑁄𑀫𑀸𑀢𑀺 𑀬𑀸𑀯 𑀢𑀯 𑀅𑀧𑁆𑀧𑀺𑀬𑀸 𑀦 𑀳𑁄𑀫, 𑀢𑀸𑀯𑀤𑁂𑀯 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀕𑀘𑁆𑀙𑀸𑀫𑀸𑀢𑀺 𑀯𑀤𑀢𑀺.

𑀅𑀣 𑀦𑀁 𑀭𑀸𑀚𑀸 𑀆𑀳 𑁋

𑁩𑁮.

‘‘𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀦𑀁, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺;

𑀧𑀭𑀺𑀘𑀸𑀭𑀓𑀸𑀦𑀁 𑀲𑀢𑀁, 𑀯𑀘𑀦𑀁 𑀦 𑀓𑀭𑁄𑀲𑀺 𑀦𑁄;

𑀏𑀯𑀁 𑀢𑀁 𑀅𑀪𑀺𑀬𑀸𑀘𑀸𑀫, 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬’’𑀦𑁆𑀢𑀺.

𑀢𑀢𑁆𑀣 ¶ 𑀏𑀯𑀁 𑀘𑁂𑀢𑀺 𑀲𑀘𑁂 𑀳𑀁𑀲𑀭𑀸𑀚, 𑀏𑀯𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀬𑀸𑀘𑀫𑀸𑀦𑀸𑀦𑀁 𑀅𑀫𑁆𑀳𑀸𑀓𑀁 𑀇𑀫𑀁 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺, 𑀢𑀯 𑀧𑀭𑀺𑀘𑀸𑀭𑀓𑀸𑀦𑀁 𑀲𑀫𑀸𑀦𑀸𑀦𑀁 𑀯𑀘𑀦𑀁 𑀦 𑀓𑀭𑁄𑀲𑀺, 𑀅𑀣 𑀦𑀁 𑀏𑀯𑀁 𑀬𑀸𑀘𑀸𑀫. 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬𑀦𑁆𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀇𑀥 𑀆𑀕𑀫𑀦𑀸𑀬 𑀯𑀸𑀭𑀁 𑀓𑀭𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁩𑁯.

‘‘𑀏𑀯𑀁 𑀘𑁂 𑀦𑁄 𑀯𑀺𑀳𑀭𑀢𑀁, 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺;

𑀢𑀼𑀬𑁆𑀳𑀁 𑀘𑀸𑀧𑀺 𑀫𑀳𑀸𑀭𑀸𑀚, 𑀫𑀬𑁆𑀳𑀜𑁆𑀘 𑀭𑀝𑁆𑀞𑀯𑀟𑁆𑀠𑀦;

𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀫𑀼, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂’’𑀢𑀺.

𑀢𑀢𑁆𑀣 𑀏𑀯𑀁 𑀘𑁂 𑀦𑁄𑀢𑀺 𑀫𑀳𑀸𑀭𑀸𑀚, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀲𑀘𑁂 𑀅𑀫𑁆𑀳𑀸𑀓𑀫𑁆𑀧𑀺 𑀏𑀯𑀁 𑀯𑀺𑀳𑀭𑀦𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀅𑀧𑀺𑀘 𑀢𑁆𑀯𑀁 𑀫𑀬𑀸 𑀤𑀺𑀦𑁆𑀦𑀁 𑀑𑀯𑀸𑀤𑀫𑁂𑀯 𑀫𑀫 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀏𑀯𑀁 𑀇𑀢𑁆𑀢𑀭𑀚𑀻𑀯𑀺𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀯𑀜𑁆𑀳𑀺 ¶ 𑀫𑁂 𑀑𑀯𑀸𑀤𑀁 𑀓𑀭𑁄𑀦𑁆𑀢𑁄 𑀫𑀁 𑀧𑀲𑁆𑀲𑀺𑀲𑁆𑀲𑀢𑀺𑀬𑁂𑀯𑀸𑀢𑀺. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑀧𑀺 𑀫𑀬𑀸 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀦𑀺𑀝𑁆𑀞𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀫𑀚𑁆𑀛𑀺𑀫𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑁂𑀲𑀳𑀁𑀲𑀕𑀡𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀚𑀯𑀦𑀳𑀁𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀚𑀯𑀦𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁭𑁭] 𑁪. 𑀘𑀽𑀴𑀦𑀸𑀭𑀤𑀚𑀸𑀢𑀓𑀯𑀡𑁆𑀡𑀦𑀸

𑀦 ¶ 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀺𑀭𑁂𑀓𑀲𑁆𑀲 𑀓𑀼𑀮𑀲𑁆𑀲 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀥𑀻𑀢𑀸 𑀅𑀳𑁄𑀲𑀺 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸, 𑀦 𑀘 𑀦𑀁 𑀓𑁄𑀘𑀺 𑀯𑀸𑀭𑁂𑀲𑀺. 𑀅𑀣𑀲𑁆𑀲𑀸 𑀫𑀸𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀫 𑀥𑀻𑀢𑀸 𑀯𑀬𑀧𑁆𑀧𑀢𑁆𑀢𑀸, 𑀦 𑀘 𑀦𑀁 𑀓𑁄𑀘𑀺 𑀯𑀸𑀭𑁂𑀢𑀺, 𑀆𑀫𑀺𑀲𑁂𑀦 𑀫𑀘𑁆𑀙𑀁 𑀯𑀺𑀬 𑀏𑀢𑀸𑀬 𑀏𑀓𑀁 𑀲𑀸𑀓𑀺𑀬𑀪𑀺𑀓𑁆𑀔𑀼𑀁 𑀧𑀮𑁄𑀪𑁂𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 ¶ 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑀤𑀸 𑀘 𑀲𑀸𑀯𑀢𑁆𑀣𑀺𑀯𑀸𑀲𑀻 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀺𑀓𑁆𑀔𑀸𑀓𑀸𑀫𑀢𑀁 𑀧𑀳𑀸𑀬 𑀆𑀮𑀲𑀺𑀬𑁄 𑀲𑀭𑀻𑀭𑀫𑀡𑁆𑀟𑀦𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀸𑀲𑀺. 𑀫𑀳𑀸𑀉𑀧𑀸𑀲𑀺𑀓𑀸 𑀕𑁂𑀳𑁂 𑀬𑀸𑀕𑀼𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀭𑀲𑀢𑀡𑁆𑀳𑀸𑀬 𑀩𑀦𑁆𑀥𑀺𑀢𑁆𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑀁 𑀉𑀧𑀥𑀸𑀭𑁂𑀦𑁆𑀢𑀻 𑀢𑁂𑀧𑀺𑀝𑀓𑀆𑀪𑀺𑀥𑀫𑁆𑀫𑀺𑀓𑀯𑀺𑀦𑀬𑀥𑀭𑀸𑀦𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀓𑀜𑁆𑀘𑀺 𑀕𑀬𑁆𑀳𑀼𑀧𑀕𑀁 𑀅𑀤𑀺𑀲𑁆𑀯𑀸 𑀢𑁂𑀲𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀦𑀁 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀘𑁆𑀙𑀺𑀦𑁆𑀦𑀯𑀮𑀸𑀳𑀓𑀲𑀤𑀺𑀲𑀸𑀦𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀅𑀦𑁆𑀢𑀭𑁂 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸𑀯 𑀏𑀓𑀁 𑀬𑀸𑀯 𑀩𑀳𑀺 𑀅𑀧𑀗𑁆𑀕𑀸 𑀅𑀓𑁆𑀔𑀻𑀦𑀺 𑀅𑀜𑁆𑀚𑁂𑀢𑁆𑀯𑀸 𑀓𑁂𑀲𑁂 𑀑𑀲𑀡𑁆𑀳𑁂𑀢𑁆𑀯𑀸 𑀤𑀼𑀓𑀽𑀮𑀦𑁆𑀢𑀭𑀯𑀸𑀲𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀖𑀝𑀺𑀢𑀫𑀝𑁆𑀞𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀡𑀺𑀯𑀡𑁆𑀡𑀧𑀢𑁆𑀢𑀁 𑀆𑀤𑀸𑀬 𑀫𑀦𑁄𑀭𑀫𑀁 𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑀁 𑀯𑀺𑀲𑁆𑀲𑀝𑁆𑀞𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀏𑀣 ¶ , 𑀪𑀦𑁆𑀢𑁂’’𑀢𑀺 𑀖𑀭𑀁 𑀆𑀦𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀆𑀤𑀻𑀳𑀺 𑀧𑀭𑀺𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀢𑀁 𑀪𑀺𑀓𑁆𑀔𑀼𑀁 ‘‘𑀪𑀦𑁆𑀢𑁂, 𑀇𑀢𑁄 𑀧𑀝𑁆𑀞𑀸𑀬 𑀇𑀥𑁂𑀯𑀸𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀲𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀅𑀧𑀭𑀪𑀸𑀕𑁂 𑀯𑀺𑀲𑁆𑀲𑀸𑀲𑀺𑀓𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀉𑀧𑀸𑀲𑀺𑀓𑀸 𑀢𑀲𑁆𑀲 𑀲𑀯𑀦𑀧𑀣𑁂 𑀞𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀕𑁂𑀳𑁂 𑀉𑀧𑀪𑁄𑀕𑀧𑀭𑀺𑀪𑁄𑀕𑀫𑀢𑁆𑀢𑀸 𑀅𑀢𑁆𑀣𑀺, 𑀢𑀣𑀸𑀭𑀽𑀧𑁄 𑀧𑀦 𑀫𑁂 𑀧𑀼𑀢𑁆𑀢𑁄 𑀯𑀸 𑀚𑀸𑀫𑀸𑀢𑀸 𑀯𑀸 𑀕𑁂𑀳𑀁 𑀯𑀺𑀘𑀸𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀦𑀼 𑀔𑁄 𑀓𑀣𑁂𑀢𑀻’’𑀢𑀺 𑀣𑁄𑀓𑀁 𑀳𑀤𑀬𑁂 𑀯𑀺𑀤𑁆𑀥𑁄 𑀯𑀺𑀬 𑀅𑀳𑁄𑀲𑀺. 𑀲𑀸 𑀥𑀻𑀢𑀭𑀁 𑀆𑀳 ‘‘𑀇𑀫𑀁 𑀧𑀮𑁄𑀪𑁂𑀢𑁆𑀯𑀸 𑀢𑀯 𑀯𑀲𑁂 𑀯𑀢𑁆𑀢𑀸𑀧𑁂𑀳𑀻’’𑀢𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀇𑀢𑁆𑀣𑀺𑀓𑀼𑀢𑁆𑀢𑀯𑀺𑀮𑀸𑀲𑁂𑀳𑀺 𑀢𑀁 𑀧𑀮𑁄𑀪𑁂𑀲𑀺. 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀢𑀺 ¶ 𑀦 𑀘 𑀣𑀽𑀮𑀲𑀭𑀻𑀭𑀸 𑀤𑀝𑁆𑀞𑀩𑁆𑀩𑀸, 𑀣𑀽𑀮𑀸 𑀯𑀸 𑀳𑁄𑀢𑀼 𑀓𑀺𑀲𑀸 𑀯𑀸, 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁂𑀦 𑀧𑀦 𑀣𑀽𑀮𑀢𑀸𑀬 ‘‘𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀤𑀳𑀭𑁄 𑀓𑀺𑀮𑁂𑀲𑀯𑀲𑀺𑀓𑁄 𑀳𑀼𑀢𑁆𑀯𑀸 ‘‘𑀦 𑀤𑀸𑀦𑀸𑀳𑀁 𑀩𑀼𑀤𑁆𑀥𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀫𑀺𑀲𑁆𑀲𑀸𑀫𑀺, 𑀢𑀢𑁆𑀭 𑀫𑁂 𑀯𑀢𑁆𑀣𑀸𑀦𑀺 𑀧𑁂𑀲𑁂𑀣𑀸’’𑀢𑀺 𑀯𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 ‘‘𑀉𑀓𑁆𑀓𑀡𑁆𑀞𑀺𑀢𑁄𑀲𑁆𑀫𑀻’’𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀳. 𑀢𑁂 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀬, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀧𑀼𑀩𑁆𑀩𑁂𑀧𑁂𑀲𑀸 𑀢𑀯 𑀅𑀭𑀜𑁆𑀜𑁂 𑀯𑀲𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀫𑀳𑀦𑁆𑀢𑀁 𑀅𑀦𑀢𑁆𑀣𑀫𑀓𑀸𑀲𑀺, 𑀧𑀼𑀦 𑀢𑁆𑀯𑀁 𑀏𑀢𑀫𑁂𑀯 𑀦𑀺𑀲𑁆𑀲𑀸𑀬 𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀫𑀳𑀸𑀪𑁄𑀕𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀲𑀺, 𑀅𑀣𑀲𑁆𑀲 𑀪𑀭𑀺𑀬𑀸 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀲𑁄 ‘‘𑀬𑀣𑁂𑀯 𑀫𑁂 𑀧𑀺𑀬𑀪𑀭𑀺𑀬𑀸𑀬, 𑀏𑀯𑀁 𑀫𑀬𑀺𑀧𑀺 𑀫𑀭𑀡𑀁 𑀆𑀕𑀫𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀫𑁂 𑀧𑀳𑀸𑀬 𑀧𑀼𑀢𑁆𑀢𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀅𑀭𑀜𑁆𑀜𑁂 𑀯𑀺𑀳𑀸𑀲𑀺. 𑀢𑀤𑀸 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀘𑁄𑀭𑀸 𑀚𑀦𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 ¶ 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀓𑀭𑀫𑀭𑁂 𑀕𑀳𑁂𑀢𑁆𑀯𑀸 𑀪𑀡𑁆𑀟𑀺𑀓𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀦𑁆𑀢𑀁 𑀧𑀸𑀧𑀬𑀺𑀁𑀲𑀼. 𑀢𑁂𑀲𑀁 𑀅𑀦𑁆𑀢𑀭𑁂 𑀏𑀓𑀸 𑀅𑀪𑀺𑀭𑀽𑀧𑀸 𑀓𑀼𑀫𑀸𑀭𑀺𑀓𑀸 𑀓𑁂𑀭𑀸𑀝𑀺𑀓𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀅𑀫𑁆𑀳𑁂 𑀕𑀳𑁂𑀢𑁆𑀯𑀸 𑀤𑀸𑀲𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀏𑀓𑁂𑀦 𑀉𑀧𑀸𑀬𑁂𑀦 𑀧𑀮𑀸𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 ‘‘𑀲𑀸𑀫𑀺, 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀢𑀼𑀓𑀸𑀫𑀸𑀫𑁆𑀳𑀺, 𑀣𑁄𑀓𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀣𑀸’’𑀢𑀺 𑀯𑀢𑁆𑀯𑀸 𑀘𑁄𑀭𑁂 𑀯𑀜𑁆𑀘𑁂𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀦𑁆𑀢𑀻 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀢𑁆𑀢𑀁 𑀅𑀲𑁆𑀲𑀫𑁂 𑀞𑀧𑁂𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑀓𑀸𑀮𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀁 𑀅𑀲𑁆𑀲𑀫𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀁 𑀢𑀸𑀧𑀲𑀓𑀼𑀫𑀸𑀭𑀁 ¶ 𑀓𑀸𑀫𑀭𑀢𑀺𑀬𑀸 𑀧𑀮𑁄𑀪𑁂𑀢𑁆𑀯𑀸 𑀲𑀻𑀮𑀫𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀢𑁂 𑀅𑀭𑀜𑁆𑀜𑀯𑀸𑀲𑁂𑀦, 𑀏𑀳𑀺 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫, 𑀢𑀢𑁆𑀭 𑀳𑀺 𑀭𑀽𑀧𑀸𑀤𑀬𑁄 𑀓𑀸𑀫𑀕𑀼𑀡𑀸 𑀲𑀼𑀮𑀪𑀸’’𑀢𑀺 𑀆𑀳. 𑀲𑁄𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀧𑀺𑀢𑀸 𑀢𑀸𑀯 𑀫𑁂 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁 𑀆𑀳𑀭𑀺𑀢𑀼𑀁 𑀕𑀢𑁄, 𑀢𑀁 𑀤𑀺𑀲𑁆𑀯𑀸 𑀉𑀪𑁄𑀧𑀺 𑀏𑀓𑀢𑁄𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳.

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀢𑀭𑀼𑀡𑀤𑀸𑀭𑀓𑁄 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀺, 𑀧𑀺𑀢𑀭𑀸 𑀧𑀦𑀲𑁆𑀲 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀲𑁄 𑀆𑀕𑀦𑁆𑀢𑁆𑀯𑀸 ‘𑀇𑀥 𑀓𑀺𑀁 𑀓𑀭𑁄𑀲𑀻’𑀢𑀺 𑀫𑀁 𑀧𑁄𑀣𑁂𑀢𑁆𑀯𑀸 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑁂𑀢𑁆𑀯𑀸 𑀅𑀭𑀜𑁆𑀜𑁂 𑀔𑀺𑀧𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 ‘‘𑀅𑀳𑀁 𑀧𑀼𑀭𑀢𑁄 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀧𑀘𑁆𑀙𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀫𑀕𑁆𑀕𑀲𑀜𑁆𑀜𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀲𑁆𑀲𑀸 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁄 𑀬𑀣𑀸 𑀧𑀼𑀭𑁂 𑀓𑀺𑀜𑁆𑀘𑀺 𑀯𑀢𑁆𑀢𑀁 𑀅𑀓𑀢𑁆𑀯𑀸 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀦𑁆𑀢𑁄𑀧𑀡𑁆𑀡𑀲𑀸𑀮𑀸𑀬 𑀧𑀚𑁆𑀛𑀸𑀬𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀫𑀳𑀸𑀲𑀢𑁆𑀢𑁄 𑀨𑀮𑀸𑀨𑀮𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀸𑀢𑀼𑀕𑀸𑀫𑀲𑁆𑀲 𑀧𑀤𑀯𑀮𑀜𑁆𑀚𑁄, ‘‘𑀧𑀼𑀢𑁆𑀢𑀲𑁆𑀲 𑀫𑀫 𑀲𑀻𑀮𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀸𑀨𑀮𑀁 𑀑𑀢𑀸𑀭𑁂𑀢𑁆𑀯𑀸 𑀧𑀼𑀢𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁦.

‘‘𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀦 𑀢𑁂 𑀉𑀤𑀓𑀫𑀸𑀪𑀢𑀁;

𑀅𑀕𑁆𑀕𑀻𑀧𑀺 𑀢𑁂 𑀦 𑀳𑀸𑀧𑀺𑀢𑁄, 𑀓𑀺𑀁 𑀦𑀼 𑀫𑀦𑁆𑀤𑁄𑀯 𑀛𑀸𑀬𑀲𑀻’’𑀢𑀺.

𑀢𑀢𑁆𑀣 ¶ 𑀅𑀕𑁆𑀕𑀻𑀧𑀺 𑀢𑁂 𑀦 𑀳𑀸𑀧𑀺𑀢𑁄𑀢𑀺 𑀅𑀕𑁆𑀕𑀺𑀧𑀺 𑀢𑁂 𑀦 𑀚𑀸𑀮𑀺𑀢𑁄. 𑀫𑀦𑁆𑀤𑁄𑀯𑀸𑀢𑀺 𑀦𑀺𑀧𑁆𑀧𑀜𑁆𑀜𑁄 𑀅𑀦𑁆𑀥𑀩𑀸𑀮𑁄 𑀯𑀺𑀬.

𑀲𑁄 𑀧𑀺𑀢𑀼 𑀓𑀣𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑀸𑀭𑀯𑁂𑀦𑁂𑀯 𑀅𑀭𑀜𑁆𑀜𑀯𑀸𑀲𑁂 𑀅𑀦𑀼𑀲𑁆𑀲𑀸𑀳𑀁 𑀧𑀯𑁂𑀤𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁪𑁧.

‘‘𑀦 ¶ 𑀉𑀲𑁆𑀲𑀳𑁂 𑀯𑀦𑁂 𑀯𑀢𑁆𑀣𑀼𑀁, 𑀓𑀲𑁆𑀲𑀧𑀸𑀫𑀦𑁆𑀢𑀬𑀸𑀫𑀺 𑀢𑀁;

𑀤𑀼𑀓𑁆𑀔𑁄 𑀯𑀸𑀲𑁄 𑀅𑀭𑀜𑁆𑀜𑀫𑁆𑀳𑀺, 𑀭𑀝𑁆𑀞𑀁 𑀇𑀘𑁆𑀙𑀸𑀫𑀺 𑀕𑀦𑁆𑀢𑀯𑁂.

𑁪𑁨.

‘‘𑀬𑀣𑀸 𑀅𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑀲𑁆𑀫𑀺𑀁 𑀚𑀦𑀧𑀤𑁂 𑀯𑀲𑀁;

𑀆𑀘𑀸𑀭𑀁 𑀩𑁆𑀭𑀳𑁆𑀫𑁂 𑀲𑀺𑀓𑁆𑀔𑁂𑀬𑁆𑀬𑀁, 𑀢𑀁 𑀥𑀫𑁆𑀫𑀁 𑀅𑀦𑀼𑀲𑀸𑀲 𑀫’’𑀦𑁆𑀢𑀺.

𑀢𑀢𑁆𑀣 ¶ 𑀓𑀲𑁆𑀲𑀧𑀸𑀫𑀦𑁆𑀢𑀬𑀸𑀫𑀺 𑀢𑀦𑁆𑀢𑀺 𑀓𑀲𑁆𑀲𑀧 𑀆𑀫𑀦𑁆𑀢𑀬𑀸𑀫𑀺 𑀢𑀁. 𑀕𑀦𑁆𑀢𑀯𑁂𑀢𑀺 𑀕𑀦𑁆𑀢𑀼𑀁. 𑀆𑀘𑀸𑀭𑀦𑁆𑀢𑀺 𑀬𑀲𑁆𑀫𑀺𑀁 𑀚𑀦𑀧𑀤𑁂 𑀯𑀲𑀸𑀫𑀺, 𑀢𑀢𑁆𑀣 𑀯𑀲𑀦𑁆𑀢𑁄 𑀬𑀣𑀸 𑀆𑀘𑀸𑀭𑀁 𑀚𑀦𑀧𑀤𑀘𑀸𑀭𑀺𑀢𑁆𑀢𑀁 𑀲𑀺𑀓𑁆𑀔𑁂𑀬𑁆𑀬𑀁 𑀚𑀸𑀦𑁂𑀬𑁆𑀬𑀁, 𑀢𑀁 𑀥𑀫𑁆𑀫𑀁 𑀅𑀦𑀼𑀲𑀸𑀲 𑀑𑀯𑀤𑀸𑀳𑀻𑀢𑀺 𑀯𑀤𑀢𑀺.

𑀫𑀳𑀸𑀲𑀢𑁆𑀢𑁄 ‘‘𑀲𑀸𑀥𑀼, 𑀢𑀸𑀢, 𑀤𑁂𑀲𑀘𑀸𑀭𑀺𑀢𑁆𑀢𑀁 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁪𑁩.

‘‘𑀲𑀘𑁂 𑀅𑀭𑀜𑁆𑀜𑀁 𑀳𑀺𑀢𑁆𑀯𑀸𑀦, 𑀯𑀦𑀫𑀽𑀮𑀨𑀮𑀸𑀦𑀺 𑀘;

𑀭𑀝𑁆𑀞𑁂 𑀭𑁄𑀘𑀬𑀲𑁂 𑀯𑀸𑀲𑀁, 𑀢𑀁 𑀥𑀫𑁆𑀫𑀁 𑀦𑀺𑀲𑀸𑀫𑁂𑀳𑀺 𑀫𑁂.

𑁪𑁪.

‘‘𑀯𑀺𑀲𑀁 𑀫𑀸 𑀧𑀝𑀺𑀲𑁂𑀯𑀺𑀢𑁆𑀣𑁄, 𑀧𑀧𑀸𑀢𑀁 𑀧𑀭𑀺𑀯𑀚𑁆𑀚𑀬;

𑀧𑀗𑁆𑀓𑁂 𑀘 𑀫𑀸 𑀯𑀺𑀲𑀻𑀤𑀺𑀢𑁆𑀣𑁄, 𑀬𑀢𑁆𑀢𑁄 𑀘𑀸𑀲𑀻𑀯𑀺𑀲𑁂 𑀘𑀭𑁂’’𑀢𑀺.

𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀲𑀘𑁂 𑀭𑀝𑁆𑀞𑀯𑀸𑀲𑀁 𑀭𑁄𑀘𑁂𑀲𑀺, 𑀢𑁂𑀦 𑀳𑀺 𑀢𑁆𑀯𑀁 𑀚𑀦𑀧𑀤𑀘𑀸𑀭𑀺𑀢𑁆𑀢𑀁 𑀥𑀫𑁆𑀫𑀁 𑀦𑀺𑀲𑀸𑀫𑁂𑀳𑀺. 𑀬𑀢𑁆𑀢𑁄 𑀘𑀸𑀲𑀻𑀯𑀺𑀲𑁂𑀢𑀺 𑀆𑀲𑀻𑀯𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀬𑀢𑁆𑀢𑁄 𑀧𑀝𑀺𑀬𑀢𑁆𑀢𑁄 𑀘𑀭𑁂𑀬𑁆𑀬𑀸𑀲𑀺, 𑀲𑀓𑁆𑀓𑁄𑀦𑁆𑀢𑁄 𑀆𑀲𑀻𑀯𑀺𑀲𑀁 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀢𑀸𑀧𑀲𑀓𑀼𑀫𑀸𑀭𑁄 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀺 𑁋

𑁪𑁫.

‘‘𑀓𑀺𑀁 ¶ 𑀦𑀼 𑀯𑀺𑀲𑀁 𑀧𑀧𑀸𑀢𑁄 𑀯𑀸, 𑀧𑀗𑁆𑀓𑁄 𑀯𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;

𑀓𑀁 𑀢𑁆𑀯𑀁 𑀆𑀲𑀻𑀯𑀺𑀲𑀁 𑀩𑁆𑀭𑀽𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀇𑀢𑀭𑁄𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺 𑁋

𑁪𑁬.

‘‘𑀆𑀲𑀯𑁄 𑀢𑀸𑀢 𑀮𑁄𑀓𑀲𑁆𑀫𑀺𑀁, 𑀲𑀼𑀭𑀸 𑀦𑀸𑀫 𑀧𑀯𑀼𑀘𑁆𑀘𑀢𑀺;

𑀫𑀦𑀼𑀜𑁆𑀜𑁄 𑀲𑀼𑀭𑀪𑀻 𑀯𑀕𑁆𑀕𑀼, 𑀲𑀸𑀤𑀼 𑀔𑀼𑀤𑁆𑀤𑀭𑀲𑀽𑀧𑀫𑁄;

𑀯𑀺𑀲𑀁 𑀢𑀤𑀸𑀳𑀼 𑀅𑀭𑀺𑀬𑀸 𑀲𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁪𑁭.

‘‘𑀇𑀢𑁆𑀣𑀺𑀬𑁄 ¶ 𑀢𑀸𑀢 𑀮𑁄𑀓𑀲𑁆𑀫𑀺𑀁, 𑀧𑀫𑀢𑁆𑀢𑀁 𑀧𑀫𑀣𑁂𑀦𑁆𑀢𑀺 𑀢𑀸;

𑀳𑀭𑀦𑁆𑀢𑀺 𑀬𑀼𑀯𑀺𑀦𑁄 𑀘𑀺𑀢𑁆𑀢𑀁, 𑀢𑀽𑀮𑀁 𑀪𑀝𑁆𑀞𑀁𑀯 𑀫𑀸𑀮𑀼𑀢𑁄;

𑀧𑀧𑀸𑀢𑁄 𑀏𑀲𑁄 𑀅𑀓𑁆𑀔𑀸𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁪𑁮.

‘‘𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀧𑀽𑀚𑀸 𑀧𑀭𑀓𑀼𑀮𑁂𑀲𑀼 𑀘;

𑀧𑀗𑁆𑀓𑁄 𑀏𑀲𑁄 𑀘 𑀅𑀓𑁆𑀔𑀸𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁪𑁯.

‘‘𑀲𑀲𑀢𑁆𑀣𑀸 𑀢𑀸𑀢 𑀭𑀸𑀚𑀸𑀦𑁄, 𑀆𑀯𑀲𑀦𑁆𑀢𑀺 𑀫𑀳𑀺𑀁 𑀇𑀫𑀁;

𑀢𑁂 𑀢𑀸𑀤𑀺𑀲𑁂 𑀫𑀦𑀼𑀲𑁆𑀲𑀺𑀦𑁆𑀤𑁂, 𑀫𑀳𑀦𑁆𑀢𑁂 𑀢𑀸𑀢 𑀦𑀸𑀭𑀤.

𑁫𑁦.

‘‘𑀇𑀲𑁆𑀲𑀭𑀸𑀦𑀁 ¶ 𑀅𑀥𑀺𑀧𑀢𑀻𑀦𑀁, 𑀦 𑀢𑁂𑀲𑀁 𑀧𑀸𑀤𑀢𑁄 𑀘𑀭𑁂;

𑀆𑀲𑀻𑀯𑀺𑀲𑁄𑀢𑀺 𑀅𑀓𑁆𑀔𑀸𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁫𑁧.

‘‘𑀪𑀢𑁆𑀢𑀢𑁆𑀣𑁄 𑀪𑀢𑁆𑀢𑀓𑀸𑀮𑁂 𑀘, 𑀬𑀁 𑀕𑁂𑀳𑀫𑀼𑀧𑀲𑀗𑁆𑀓𑀫𑁂;

𑀬𑀤𑁂𑀢𑁆𑀣 𑀓𑀼𑀲𑀮𑀁 𑀚𑀜𑁆𑀜𑀸, 𑀢𑀢𑁆𑀣 𑀖𑀸𑀲𑁂𑀲𑀦𑀁 𑀘𑀭𑁂.

𑁫𑁨.

‘‘𑀧𑀯𑀺𑀲𑀺𑀢𑁆𑀯𑀸 𑀧𑀭𑀓𑀼𑀮𑀁, 𑀧𑀸𑀦𑀢𑁆𑀣𑀁 𑀪𑁄𑀚𑀦𑀸𑀬 𑀯𑀸;

𑀫𑀺𑀢𑀁 𑀔𑀸𑀤𑁂 𑀫𑀺𑀢𑀁 𑀪𑀼𑀜𑁆𑀚𑁂, 𑀦 𑀘 𑀭𑀽𑀧𑁂 𑀫𑀦𑀁 𑀓𑀭𑁂.

𑁫𑁩.

‘‘𑀕𑁄𑀝𑁆𑀞𑀁 𑀫𑀚𑁆𑀚𑀁 𑀓𑀺𑀭𑀸𑀝𑀜𑁆𑀘, 𑀲𑀪𑀸 𑀦𑀺𑀓𑀺𑀭𑀡𑀸𑀦𑀺 𑀘;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀳𑀺, 𑀬𑀸𑀦𑀻𑀯 𑀯𑀺𑀲𑀫𑀁 𑀧𑀣’’𑀦𑁆𑀢𑀺.

𑀢𑀢𑁆𑀣 ¶ 𑀆𑀲𑀯𑁄𑀢𑀺 𑀧𑀼𑀧𑁆𑀨𑀸𑀲𑀯𑀸𑀤𑀺. 𑀯𑀺𑀲𑀁 𑀢𑀤𑀸𑀳𑀽𑀢𑀺 𑀢𑀁 𑀆𑀲𑀯𑀲𑀗𑁆𑀔𑀸𑀢𑀁 𑀲𑀼𑀭𑀁 𑀅𑀭𑀺𑀬𑀸 ‘‘𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀺𑀲’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀫𑀢𑁆𑀢𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀁. 𑀢𑀽𑀮𑀁 𑀪𑀝𑁆𑀞𑀁𑀯𑀸𑀢𑀺 𑀭𑀼𑀓𑁆𑀔𑀸 𑀪𑀲𑁆𑀲𑀺𑀢𑁆𑀯𑀸 𑀧𑀢𑀺𑀢𑀢𑀽𑀮𑀁 𑀯𑀺𑀬. 𑀅𑀓𑁆𑀔𑀸𑀢𑁄𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀓𑀣𑀺𑀢𑁄. 𑀲𑀺𑀮𑁄𑀓𑁄𑀢𑀺 𑀓𑀺𑀢𑁆𑀢𑀺𑀯𑀡𑁆𑀡𑁄. 𑀲𑀓𑁆𑀓𑀸𑀭𑁄𑀢𑀺 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀺. 𑀧𑀽𑀚𑀸𑀢𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀸. 𑀧𑀗𑁆𑀓𑁄𑀢𑀺 𑀏𑀲 𑀑𑀲𑀻𑀤𑀸𑀧𑀦𑀝𑁆𑀞𑁂𑀦 ‘‘𑀧𑀗𑁆𑀓𑁄’’𑀢𑀺 𑀅𑀓𑁆𑀔𑀸𑀢𑁄. 𑀫𑀳𑀦𑁆𑀢𑁂𑀢𑀺 𑀫𑀳𑀦𑁆𑀢𑀪𑀸𑀯𑀧𑁆𑀧𑀢𑁆𑀢𑁂. 𑀦 𑀢𑁂𑀲𑀁 𑀧𑀸𑀤𑀢𑁄 𑀘𑀭𑁂𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀦 𑀘𑀭𑁂, 𑀭𑀸𑀚𑀓𑀼𑀮𑀽𑀧𑀓𑁄 𑀦 𑀪𑀯𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀭𑀸𑀚𑀸𑀦𑁄 𑀳𑀺 𑀆𑀲𑀻𑀯𑀺𑀲𑀸 𑀯𑀺𑀬 𑀫𑀼𑀳𑀼𑀢𑁆𑀢𑁂𑀦𑁂𑀯 𑀓𑀼𑀚𑁆𑀛𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺. 𑀅𑀧𑀺𑀘 𑀅𑀦𑁆𑀢𑁂𑀧𑀼𑀭𑀧𑁆𑀧𑀯𑁂𑀲𑀦𑁂 𑀯𑀼𑀢𑁆𑀢𑀸𑀤𑀻𑀦𑀯𑀯𑀲𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀢𑁆𑀢𑀢𑁆𑀣𑁄𑀢𑀺 ¶ 𑀪𑀢𑁆𑀢𑁂𑀦 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸. 𑀬𑀤𑁂𑀢𑁆𑀣 𑀓𑀼𑀲𑀮𑀦𑁆𑀢𑀺 𑀬𑀁 𑀢𑁂𑀲𑀼 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁂𑀲𑀼 𑀕𑁂𑀳𑁂𑀲𑀼 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁 𑀧𑀜𑁆𑀘𑀅𑀕𑁄𑀘𑀭𑀭𑀳𑀺𑀢𑀁 𑀚𑀸𑀦𑁂𑀬𑁆𑀬𑀸𑀲𑀺, 𑀢𑀢𑁆𑀣 𑀖𑀸𑀲𑁂𑀲𑀦𑀁 𑀘𑀭𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀦 𑀘 𑀭𑀽𑀧𑁂 𑀫𑀦𑀁 𑀓𑀭𑁂𑀢𑀺 𑀧𑀭𑀓𑀼𑀮𑁂 𑀫𑀢𑁆𑀢𑀜𑁆𑀜𑀽 𑀳𑀼𑀢𑁆𑀯𑀸 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀢𑀢𑁆𑀣 𑀇𑀢𑁆𑀣𑀺𑀭𑀽𑀧𑁂 𑀫𑀦𑀁 𑀫𑀸 𑀓𑀭𑁂𑀬𑁆𑀬𑀸𑀲𑀺, 𑀫𑀸 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀢𑁆𑀣𑀺𑀭𑀽𑀧𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺 𑀯𑀤𑀢𑀺. 𑀕𑁄𑀝𑁆𑀞𑀁 𑀫𑀚𑁆𑀚𑀁 𑀓𑀺𑀭𑀸𑀝𑀦𑁆𑀢𑀺 𑀅𑀬𑀁 𑀧𑁄𑀢𑁆𑀣𑀓𑁂𑀲𑀼 𑀧𑀸𑀞𑁄, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀕𑁄𑀝𑁆𑀞𑀁 𑀫𑀚𑁆𑀚𑀁 𑀓𑀺𑀭𑀸𑀲𑀜𑁆𑀘𑀸’’𑀢𑀺 𑀯𑀢𑁆𑀯𑀸 ‘‘𑀕𑁄𑀝𑁆𑀞𑀦𑁆𑀢𑀺 𑀕𑀼𑀦𑁆𑀦𑀁 𑀞𑀺𑀢𑀝𑁆𑀞𑀸𑀦𑀁. 𑀫𑀚𑁆𑀚𑀦𑁆𑀢𑀺 𑀧𑀸𑀦𑀸𑀕𑀸𑀭𑀁. 𑀓𑀺𑀭𑀸𑀲𑀦𑁆𑀢𑀺 𑀥𑀼𑀢𑁆𑀢𑀓𑁂𑀭𑀸𑀝𑀺𑀓𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀪𑀸 𑀦𑀺𑀓𑀺𑀭𑀡𑀸𑀦𑀺 𑀘𑀸𑀢𑀺 𑀲𑀪𑀸𑀬𑁄 𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀦𑀁 𑀦𑀺𑀓𑀺𑀭𑀡𑀝𑁆𑀞𑀸𑀦𑀸𑀦𑀺 𑀘. 𑀆𑀭𑀓𑀸𑀢𑀺 𑀏𑀢𑀸𑀦𑀺 𑀲𑀩𑁆𑀩𑀸𑀦𑀺 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀲𑀺. 𑀬𑀸𑀦𑀻𑀯𑀸𑀢𑀺 𑀲𑀧𑁆𑀧𑀺𑀢𑁂𑀮𑀬𑀸𑀦𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀲𑀫𑀁 𑀫𑀕𑁆𑀕𑀁 𑀯𑀺𑀬.

𑀫𑀸𑀡𑀯𑁄 𑀧𑀺𑀢𑀼 𑀓𑀣𑁂𑀦𑁆𑀢𑀲𑁆𑀲𑁂𑀯 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀢𑀸𑀢, 𑀅𑀮𑀁 𑀫𑁂 𑀫𑀦𑀼𑀲𑁆𑀲𑀧𑀣𑁂𑀦𑀸’’𑀢𑀺 𑀆𑀳. 𑀅𑀣𑀲𑁆𑀲 𑀧𑀺𑀢𑀸 ¶ 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀉𑀪𑁄𑀧𑀺 𑀧𑀺𑀢𑀸𑀧𑀼𑀢𑁆𑀢𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀸 𑀓𑀼𑀫𑀸𑀭𑀺𑀓𑀸 𑀅𑀬𑀁 𑀓𑀼𑀫𑀸𑀭𑀺𑀓𑀸 𑀅𑀳𑁄𑀲𑀺, 𑀢𑀸𑀧𑀲𑀓𑀼𑀫𑀸𑀭𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀽𑀴𑀦𑀸𑀭𑀤𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁭𑁮] 𑁫. 𑀤𑀽𑀢𑀚𑀸𑀢𑀓𑀯𑀡𑁆𑀡𑀦𑀸

𑀤𑀽𑀢𑁂 𑀢𑁂 𑀩𑁆𑀭𑀳𑁆𑀫𑁂 𑀧𑀸𑀳𑁂𑀲𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀜𑁆𑀜𑀸𑀧𑀲𑀁𑀲𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀧𑀲𑁆𑀲𑀣, 𑀆𑀯𑀼𑀲𑁄, 𑀤𑀲𑀩𑀮𑀲𑁆𑀲 𑀉𑀧𑀸𑀬𑀓𑁄𑀲𑀮𑁆𑀮𑀁, 𑀦𑀦𑁆𑀤𑀲𑁆𑀲 ¶ 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀅𑀘𑁆𑀙𑀭𑀸𑀕𑀡𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀘𑀽𑀴𑀧𑀦𑁆𑀣𑀓𑀲𑁆𑀲 𑀧𑀺𑀮𑁄𑀢𑀺𑀓𑀁 𑀤𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀧𑀤𑀼𑀫𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀏𑀯𑀁 𑀦𑀸𑀦𑀸𑀉𑀧𑀸𑀬𑁂𑀳𑀺 𑀲𑀢𑁆𑀢𑁂 𑀯𑀺𑀦𑁂𑀢𑀻’’𑀢𑀺 ¶ . 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀇𑀤𑀸𑀦𑁂𑀯 ‘𑀇𑀫𑀺𑀦𑀸 𑀇𑀤𑀁 𑀳𑁄𑀢𑀻’𑀢𑀺 𑀉𑀧𑀸𑀬𑀓𑀼𑀲𑀮𑁄, 𑀧𑀼𑀩𑁆𑀩𑁂𑀧𑀺 𑀉𑀧𑀸𑀬𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀚𑀦𑀧𑀤𑁄 𑀅𑀳𑀺𑀭𑀜𑁆𑀜𑁄 𑀅𑀳𑁄𑀲𑀺. 𑀲𑁄 𑀳𑀺 𑀚𑀦𑀧𑀤𑀁 𑀧𑀻𑀴𑁂𑀢𑁆𑀯𑀸 𑀥𑀦𑀫𑁂𑀯 𑀲𑀁𑀓𑀟𑁆𑀠𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 ‘‘𑀧𑀘𑁆𑀙𑀸 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀆𑀘𑀭𑀺𑀬𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑁄 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 ‘‘𑀆𑀘𑀭𑀺𑀬, 𑀢𑀼𑀫𑁆𑀳𑀸𑀓𑀁 𑀥𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀚𑀦𑀧𑀤𑁂 𑀘𑀭𑀦𑁆𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀢𑁆𑀢 𑀦𑀺𑀓𑁆𑀔𑁂 𑀮𑀪𑀺𑀢𑁆𑀯𑀸 ‘‘𑀆𑀘𑀭𑀺𑀬𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀗𑁆𑀕𑀁 𑀑𑀢𑀭𑀺𑀢𑀼𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀢𑀲𑁆𑀲 𑀢𑀢𑁆𑀣 𑀦𑀸𑀯𑀸𑀬 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀢𑀁 𑀲𑀼𑀯𑀡𑁆𑀡𑀁 𑀉𑀤𑀓𑁂 𑀧𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀤𑀼𑀮𑁆𑀮𑀪𑀁 𑀳𑀺𑀭𑀜𑁆𑀜𑀁, 𑀚𑀦𑀧𑀤𑁂 𑀧𑀼𑀦 𑀆𑀘𑀭𑀺𑀬𑀥𑀦𑁂 𑀧𑀭𑀺𑀬𑁂𑀲𑀺𑀬𑀫𑀸𑀦𑁂 ¶ 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀕𑀗𑁆𑀕𑀸𑀢𑀻𑀭𑁂𑀬𑁂𑀯 𑀦𑀺𑀭𑀸𑀳𑀸𑀭𑁄 𑀦𑀺𑀲𑀻𑀤𑁂𑀬𑁆𑀬𑀁, 𑀢𑀲𑁆𑀲 𑀫𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀸 𑀚𑀸𑀦𑀺𑀲𑁆𑀲𑀢𑀺, 𑀢𑀢𑁄 𑀅𑀫𑀘𑁆𑀘𑁂 𑀧𑁂𑀲𑁂𑀲𑁆𑀲𑀢𑀺, 𑀅𑀳𑀁 𑀢𑁂𑀳𑀺 𑀲𑀤𑁆𑀥𑀺𑀁 𑀦 𑀫𑀦𑁆𑀢𑁂𑀲𑁆𑀲𑀸𑀫𑀺, 𑀢𑀢𑁄 𑀭𑀸𑀚𑀸 𑀲𑀬𑀁 𑀆𑀕𑀫𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀘𑀭𑀺𑀬𑀥𑀦𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀕𑀗𑁆𑀕𑀸𑀢𑀻𑀭𑁂 𑀉𑀢𑁆𑀢𑀭𑀺𑀲𑀸𑀝𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀬𑀜𑁆𑀜𑀲𑀼𑀢𑁆𑀢𑀁 𑀩𑀳𑀺 𑀞𑀧𑁂𑀢𑁆𑀯𑀸 𑀭𑀚𑀢𑀧𑀝𑁆𑀝𑀯𑀡𑁆𑀡𑁂 𑀯𑀸𑀮𑀼𑀓𑀢𑀮𑁂 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀲𑀻𑀤𑀺. 𑀢𑀁 𑀦𑀺𑀭𑀸𑀳𑀸𑀭𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀓𑀲𑁆𑀫𑀸 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺, 𑀓𑀲𑁆𑀲𑀘𑀺 𑀦 𑀓𑀣𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀤𑁆𑀯𑀸𑀭𑀕𑀸𑀫𑀯𑀸𑀲𑀺𑀦𑁄 𑀢𑀲𑁆𑀲 𑀢𑀢𑁆𑀣 𑀦𑀺𑀲𑀺𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼, 𑀢𑁂𑀲𑀫𑁆𑀧𑀺 𑀦 𑀓𑀣𑁂𑀲𑀺. 𑀢𑁂 𑀢𑀲𑁆𑀲 𑀓𑀺𑀮𑀫𑀣𑀁 𑀤𑀺𑀲𑁆𑀯𑀸 𑀧𑀭𑀺𑀤𑁂𑀯𑀦𑁆𑀢𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀢𑀺𑀬𑀤𑀺𑀯𑀲𑁂 𑀦𑀕𑀭𑀯𑀸𑀲𑀺𑀦𑁄 𑀆𑀕𑀫𑀺𑀁𑀲𑀼, 𑀘𑀢𑀼𑀢𑁆𑀣𑀤𑀺𑀯𑀲𑁂 𑀦𑀕𑀭𑀢𑁄 𑀇𑀲𑁆𑀲𑀭𑀚𑀦𑀸, 𑀧𑀜𑁆𑀘𑀫𑀤𑀺𑀯𑀲𑁂 𑀭𑀸𑀚𑀧𑀼𑀭𑀺𑀲𑀸. 𑀙𑀝𑁆𑀞𑀤𑀺𑀯𑀲𑁂 𑀭𑀸𑀚𑀸 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺, 𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀦 𑀓𑀣𑁂𑀲𑀺. 𑀲𑀢𑁆𑀢𑀫𑀤𑀺𑀯𑀲𑁂 𑀭𑀸𑀚𑀸 𑀪𑀬𑀝𑁆𑀝𑀺𑀢𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁫𑁪.

‘‘𑀤𑀽𑀢𑁂 𑀢𑁂 𑀩𑁆𑀭𑀳𑁆𑀫𑁂 𑀧𑀸𑀳𑁂𑀲𑀺𑀁, 𑀕𑀗𑁆𑀕𑀸𑀢𑀻𑀭𑀲𑁆𑀫𑀺 𑀛𑀸𑀬𑀢𑁄;

𑀢𑁂𑀲𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀸𑀲𑀺, 𑀤𑀼𑀓𑁆𑀔𑀁 𑀕𑀼𑀬𑁆𑀳𑀫𑀢𑀁 𑀦𑀼 𑀢𑁂’’𑀢𑀺.

𑀢𑀢𑁆𑀣 ¶ 𑀤𑀼𑀓𑁆𑀔𑀁 𑀕𑀼𑀬𑁆𑀳𑀫𑀢𑀁 𑀦𑀼 𑀢𑁂𑀢𑀺 𑀓𑀺𑀁 𑀦𑀼 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀁 𑀢𑀯 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀢𑁂 𑀕𑀼𑀬𑁆𑀳𑀫𑁂𑀯 𑀫𑀢𑀁, 𑀦 𑀅𑀜𑁆𑀜𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀤𑀼𑀓𑁆𑀔𑀁 𑀦𑀸𑀫 𑀳𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀲𑀢𑁆𑀢 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁫.

‘‘𑀲𑀘𑁂 𑀢𑁂 𑀤𑀼𑀓𑁆𑀔𑀫𑀼𑀧𑁆𑀧𑀚𑁆𑀚𑁂, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦;

𑀫𑀸 𑀔𑁄 𑀦𑀁 𑀢𑀲𑁆𑀲 𑀅𑀓𑁆𑀔𑀸𑀳𑀺, 𑀬𑁄 𑀢𑀁 𑀤𑀼𑀓𑁆𑀔𑀸 𑀦 𑀫𑁄𑀘𑀬𑁂.

𑁫𑁬.

‘‘𑀬𑁄 𑀢𑀲𑁆𑀲 𑀤𑀼𑀓𑁆𑀔𑀚𑀸𑀢𑀲𑁆𑀲, 𑀏𑀓𑀗𑁆𑀕𑀫𑀧𑀺 𑀪𑀸𑀕𑀲𑁄;

𑀯𑀺𑀧𑁆𑀧𑀫𑁄𑀘𑁂𑀬𑁆𑀬 𑀥𑀫𑁆𑀫𑁂𑀦, 𑀓𑀸𑀫𑀁 𑀢𑀲𑁆𑀲 𑀧𑀯𑁂𑀤𑀬.

𑁫𑁭.

‘‘𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁫𑁮.

‘‘𑀅𑀧𑀺 ¶ 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄.

𑁫𑁯.

‘‘𑀬𑁄 𑀅𑀢𑁆𑀢𑀦𑁄 𑀤𑀼𑀓𑁆𑀔𑀫𑀦𑀸𑀦𑀼𑀧𑀼𑀝𑁆𑀞𑁄, 𑀧𑀯𑁂𑀤𑀬𑁂 𑀚𑀦𑁆𑀢𑀼 𑀅𑀓𑀸𑀮𑀭𑀽𑀧𑁂;

𑀆𑀦𑀦𑁆𑀤𑀺𑀦𑁄 𑀢𑀲𑁆𑀲 𑀪𑀯𑀦𑁆𑀢𑀺 𑀫𑀺𑀢𑁆𑀢𑀸, 𑀳𑀺𑀢𑁂𑀲𑀺𑀦𑁄 𑀢𑀲𑁆𑀲 𑀤𑀼𑀔𑀻 𑀪𑀯𑀦𑁆𑀢𑀺.

𑁬𑁦.

‘‘𑀓𑀸𑀮𑀜𑁆𑀘 𑀜𑀢𑁆𑀯𑀸𑀦 𑀢𑀣𑀸𑀯𑀺𑀥𑀲𑁆𑀲, 𑀫𑁂𑀥𑀸𑀯𑀺𑀦𑀁 𑀏𑀓𑀫𑀦𑀁 𑀯𑀺𑀤𑀺𑀢𑁆𑀯𑀸;

𑀅𑀓𑁆𑀔𑁂𑀬𑁆𑀬 𑀢𑀺𑀩𑁆𑀩𑀸𑀦𑀺 𑀧𑀭𑀲𑁆𑀲 𑀥𑀻𑀭𑁄, 𑀲𑀡𑁆𑀳𑀁 𑀕𑀺𑀭𑀁 𑀅𑀢𑁆𑀣𑀯𑀢𑀺𑀁 𑀧𑀫𑀼𑀜𑁆𑀘𑁂.

𑁬𑁧.

‘‘𑀲𑀘𑁂 𑀘 𑀚𑀜𑁆𑀜𑀸 𑀅𑀯𑀺𑀲𑀬𑁆𑀳𑀫𑀢𑁆𑀢𑀦𑁄, 𑀦 𑀢𑁂 𑀳𑀺 𑀫𑀬𑁆𑀳𑀁 𑀲𑀼𑀔𑀸𑀕𑀫𑀸𑀬;

𑀏𑀓𑁄𑀯 𑀢𑀺𑀩𑁆𑀩𑀸𑀦𑀺 𑀲𑀳𑁂𑀬𑁆𑀬 𑀥𑀻𑀭𑁄, 𑀲𑀘𑁆𑀘𑀁 𑀳𑀺𑀭𑁄𑀢𑁆𑀢𑀧𑁆𑀧𑀫𑀧𑁂𑀓𑁆𑀔𑀫𑀸𑀦𑁄’’𑀢𑀺.

𑀢𑀢𑁆𑀣 ¶ 𑀉𑀧𑁆𑀧𑀚𑁆𑀚𑁂𑀢𑀺 𑀲𑀘𑁂 𑀢𑀯 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀫𑀸 𑀅𑀓𑁆𑀔𑀸𑀳𑀻𑀢𑀺 𑀫𑀸 𑀓𑀣𑁂𑀳𑀺. 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄𑀢𑀺 𑀢𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑀯𑀲𑁆𑀲𑀺𑀢𑀢𑁄𑀧𑀺 𑀤𑀼𑀩𑁆𑀩𑀺𑀚𑀸𑀦𑀢𑀭𑀁, 𑀢𑀲𑁆𑀫𑀸 𑀢𑀣𑀢𑁄 𑀅𑀚𑀸𑀦𑀺𑀢𑁆𑀯𑀸 𑀳𑀭𑀺𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀦 𑀓𑀣𑁂𑀢𑀩𑁆𑀩𑀫𑁂𑀯𑀸𑀢𑀺. 𑀅𑀧𑀺 𑀘𑁂𑀢𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀯. 𑀅𑀦𑀸𑀦𑀼𑀧𑀼𑀝𑁆𑀞𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀼𑀝𑁆𑀞𑁄. 𑀧𑀯𑁂𑀤𑀬𑁂𑀢𑀺 𑀓𑀣𑁂𑀢𑀺. 𑀅𑀓𑀸𑀮𑀭𑀽𑀧𑁂𑀢𑀺 𑀅𑀓𑀸𑀮𑁂. 𑀓𑀸𑀮𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀬𑁆𑀳𑀲𑁆𑀲 𑀓𑀣𑀦𑀓𑀸𑀮𑀁. 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 𑀧𑀡𑁆𑀟𑀺𑀢𑀧𑀼𑀭𑀺𑀲𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀦𑀁 𑀯𑀺𑀤𑀺𑀢𑁆𑀯𑀸 𑀢𑀣𑀸𑀯𑀺𑀥𑀲𑁆𑀲 𑀆𑀘𑀺𑀓𑁆𑀔𑁂𑀬𑁆𑀬. 𑀢𑀺𑀩𑁆𑀩𑀸𑀦𑀻𑀢𑀺 𑀤𑀼𑀓𑁆𑀔𑀸𑀦𑀺.

𑀲𑀘𑁂𑀢𑀺 ¶ 𑀬𑀤𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀅𑀯𑀺𑀲𑀬𑁆𑀳𑀁 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀧𑀼𑀭𑀺𑀲𑀓𑀸𑀭𑁂𑀦 𑀅𑀢𑁂𑀓𑀺𑀘𑁆𑀙𑀁 𑀚𑀸𑀦𑁂𑀬𑁆𑀬. 𑀢𑁂 𑀳𑀻𑀢𑀺 𑀢𑁂 𑀏𑀯 𑀮𑁄𑀓𑀧𑀯𑁂𑀡𑀺𑀓𑀸, 𑀅𑀝𑁆𑀞𑀮𑁄𑀓𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀣 𑀅𑀬𑀁 𑀮𑁄𑀓𑀧𑀯𑁂𑀡𑀻 𑀦 𑀫𑀬𑁆𑀳𑀁 𑀏𑀯 𑀲𑀼𑀔𑀸𑀕𑀫𑀸𑀬 𑀉𑀧𑁆𑀧𑀦𑁆𑀦𑀸, 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀧𑀭𑀺𑀫𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂 𑀲𑀼𑀔𑀫𑁂𑀯 𑀧𑀢𑁆𑀣𑁂𑀦𑁆𑀢𑁂𑀦 𑀧𑀭𑀲𑁆𑀲 𑀤𑀼𑀓𑁆𑀔𑀸𑀭𑁄𑀧𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀁, 𑀦𑁂𑀢𑀁 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑁆𑀢𑀩𑁆𑀩𑀁, 𑀅𑀢𑁆𑀣𑀺 𑀘 𑀫𑁂 𑀳𑀺𑀭𑀻 𑀑𑀢𑁆𑀢𑀧𑁆𑀧𑀦𑁆𑀢𑀺 𑀲𑀘𑁆𑀘𑀁 𑀲𑀁𑀯𑀺𑀚𑁆𑀚𑀫𑀸𑀦𑀁 𑀅𑀢𑁆𑀢𑀦𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀧𑁂𑀓𑁆𑀔𑀫𑀸𑀦𑁄𑀯 𑀅𑀜𑁆𑀜𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸 𑀏𑀓𑁄𑀯 𑀢𑀺𑀩𑁆𑀩𑀸𑀦𑀺 𑀲𑀳𑁂𑀬𑁆𑀬 𑀥𑀻𑀭𑁄𑀢𑀺.

𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀲𑀢𑁆𑀢𑀳𑀺 𑀕𑀸𑀣𑀸𑀳𑀺 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀥𑀦𑀲𑁆𑀲 𑀧𑀭𑀺𑀬𑁂𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁬𑁨.

‘‘𑀅𑀳𑀁 𑀭𑀝𑁆𑀞𑁂 𑀯𑀺𑀘𑀭𑀦𑁆𑀢𑁄, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀪𑀺𑀓𑁆𑀔𑀫𑀸𑀦𑁄 𑀫𑀳𑀸𑀭𑀸𑀚, 𑀆𑀘𑀭𑀺𑀬𑀲𑁆𑀲 𑀥𑀦𑀢𑁆𑀣𑀺𑀓𑁄.

𑁬𑁩.

‘‘𑀕𑀳𑀧𑀢𑀻 𑀭𑀸𑀚𑀧𑀼𑀭𑀺𑀲𑁂, 𑀫𑀳𑀸𑀲𑀸𑀮𑁂 𑀘 𑀩𑁆𑀭𑀸𑀳𑁆𑀫𑀡𑁂;

𑀅𑀮𑀢𑁆𑀣𑀁 𑀲𑀢𑁆𑀢 𑀦𑀺𑀓𑁆𑀔𑀸𑀦𑀺, 𑀲𑀼𑀯𑀡𑁆𑀡𑀲𑁆𑀲 𑀚𑀦𑀸𑀥𑀺𑀧;

𑀢𑁂 𑀫𑁂 𑀦𑀝𑁆𑀞𑀸 𑀫𑀳𑀸𑀭𑀸𑀚, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲𑀁.

𑁬𑁪.

‘‘𑀧𑀼𑀭𑀺𑀲𑀸 𑀢𑁂 𑀫𑀳𑀸𑀭𑀸𑀚, 𑀫𑀦𑀲𑀸𑀦𑀼𑀯𑀺𑀘𑀺𑀦𑁆𑀢𑀺𑀢𑀸;

𑀦𑀸𑀮𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑀼𑀁, 𑀢𑀲𑁆𑀫𑀸 𑀢𑁂𑀲𑀁 𑀦 𑀩𑁆𑀬𑀸𑀳𑀭𑀺𑀁.

𑁬𑁫.

‘‘𑀢𑁆𑀯𑀜𑁆𑀘 ¶ 𑀔𑁄 𑀫𑁂 𑀫𑀳𑀸𑀭𑀸𑀚, 𑀫𑀦𑀲𑀸𑀦𑀼𑀯𑀺𑀘𑀺𑀦𑁆𑀢𑀺𑀢𑁄;

𑀅𑀮𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑀼𑀁, 𑀢𑀲𑁆𑀫𑀸 𑀢𑀼𑀬𑁆𑀳𑀁 𑀧𑀯𑁂𑀤𑀬𑀺’’𑀦𑁆𑀢𑀺.

𑀢𑀢𑁆𑀣 𑀪𑀺𑀓𑁆𑀔𑀫𑀸𑀦𑁄𑀢𑀺 𑀏𑀢𑁂 𑀕𑀳𑀧𑀢𑀺𑀆𑀤𑀬𑁄 𑀬𑀸𑀘𑀫𑀸𑀦𑁄. 𑀢𑁂 𑀫𑁂𑀢𑀺 𑀢𑁂 𑀲𑀢𑁆𑀢 𑀦𑀺𑀓𑁆𑀔𑀸 𑀫𑀫 𑀕𑀗𑁆𑀕𑀁 𑀢𑀭𑀦𑁆𑀢𑀲𑁆𑀲 𑀦𑀝𑁆𑀞𑀸, 𑀕𑀗𑁆𑀕𑀸𑀬𑀁 𑀧𑀢𑀺𑀢𑀸. 𑀧𑀼𑀭𑀺𑀲𑀸 𑀢𑁂𑀢𑀺 𑀫𑀳𑀸𑀭𑀸𑀚, 𑀢𑀯 𑀤𑀽𑀢𑀧𑀼𑀭𑀺𑀲𑀸. 𑀅𑀦𑀼𑀯𑀺𑀘𑀺𑀦𑁆𑀢𑀺𑀢𑀸𑀢𑀺 ‘‘𑀦𑀸𑀮𑀁 𑀇𑀫𑁂 𑀫𑀁 𑀤𑀼𑀓𑁆𑀔𑀸 𑀫𑁄𑀘𑁂𑀢𑀼’’𑀦𑁆𑀢𑀺 𑀫𑀬𑀸 𑀜𑀸𑀢𑀸. 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑁂𑀲𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀦𑀸𑀘𑀺𑀓𑁆𑀔𑀺𑀁. 𑀧𑀯𑁂𑀤𑀬𑀺𑀦𑁆𑀢𑀺 𑀓𑀣𑁂𑀲𑀺𑀁.

𑀭𑀸𑀚𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀸 𑀘𑀺𑀦𑁆𑀢𑀬𑀺, 𑀩𑁆𑀭𑀸𑀳𑁆𑀫𑀡, 𑀅𑀳𑀁 𑀢𑁂 𑀆𑀘𑀭𑀺𑀬𑀥𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀺𑀕𑀼𑀡𑀥𑀦𑀫𑀤𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁬𑁬.

‘‘𑀢𑀲𑁆𑀲𑀸𑀤𑀸𑀲𑀺 ¶ 𑀧𑀲𑀦𑁆𑀦𑀢𑁆𑀢𑁄, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀚𑀸𑀢𑀭𑀽𑀧𑀫𑀬𑁂 𑀦𑀺𑀓𑁆𑀔𑁂, 𑀲𑀼𑀯𑀡𑁆𑀡𑀲𑁆𑀲 𑀘𑀢𑀼𑀤𑁆𑀤𑀲𑀸’’𑀢𑀺.

𑀢𑀢𑁆𑀣 𑀚𑀸𑀢𑀭𑀽𑀧𑀫𑀬𑁂𑀢𑀺 𑀢𑁂 𑀲𑀼𑀯𑀡𑁆𑀡𑀲𑁆𑀲 𑀘𑀢𑀼𑀤𑁆𑀤𑀲 𑀦𑀺𑀓𑁆𑀔𑁂 𑀚𑀸𑀢𑀭𑀽𑀧𑀫𑀬𑁂𑀬𑁂𑀯 𑀅𑀤𑀸𑀲𑀺, 𑀦 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀑𑀯𑀸𑀤𑀁 𑀤𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀥𑀦𑀁 𑀤𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀭𑀸𑀚𑀸𑀧𑀺 𑀢𑀲𑁆𑀲𑁄𑀯𑀸𑀤𑁂 𑀞𑀺𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀉𑀪𑁄𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀉𑀧𑀸𑀬𑀓𑀼𑀲𑀮𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀆𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀤𑀽𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁭𑁯] 𑁬. 𑀓𑀸𑀮𑀺𑀗𑁆𑀕𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸

𑀭𑀸𑀚𑀸 𑀓𑀸𑀮𑀺𑀗𑁆𑀕𑁄 𑀘𑀓𑁆𑀓𑀯𑀢𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀓𑀢𑀁 𑀫𑀳𑀸𑀩𑁄𑀥𑀺𑀧𑀽𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑁂𑀦𑁂𑀬𑁆𑀬𑀲𑀗𑁆𑀕𑀳𑀢𑁆𑀣𑀸𑀬 𑀳𑀺 𑀢𑀣𑀸𑀕𑀢𑁂 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁂 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀧𑀽𑀚𑀦𑀻𑀬𑀝𑁆𑀞𑀸𑀦𑀁 𑀅𑀮𑀪𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑁂 𑀧𑀸𑀢𑁂𑀢𑁆𑀯𑀸 ¶ 𑀕𑀘𑁆𑀙𑀦𑁆𑀢𑀺, 𑀢𑁂 𑀉𑀴𑀸𑀭𑀧𑀸𑀫𑁄𑀚𑁆𑀚𑀸 𑀦 𑀳𑁄𑀦𑁆𑀢𑀺. 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀢𑀣𑀸𑀕𑀢𑀲𑁆𑀲 𑀚𑁂𑀢𑀯𑀦𑀁 𑀆𑀕𑀢𑀓𑀸𑀮𑁂 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀬𑀁 𑀯𑀺𑀳𑀸𑀭𑁄 𑀢𑀣𑀸𑀕𑀢𑁂 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁂 𑀦𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀦𑀻𑀬𑀝𑁆𑀞𑀸𑀦𑀁 𑀦 𑀳𑁄𑀢𑀺, 𑀲𑀸𑀥𑀼, 𑀪𑀦𑁆𑀢𑁂, 𑀢𑀣𑀸𑀕𑀢𑀲𑁆𑀲 𑀇𑀫𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀏𑀓𑀲𑁆𑀲 𑀧𑀽𑀚𑀦𑀻𑀬𑀝𑁆𑀞𑀸𑀦𑀲𑁆𑀲 𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸𑀕𑀢𑀁 𑀧𑀼𑀘𑁆𑀙𑀺 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀘𑁂𑀢𑀺𑀬𑀸𑀦𑀻’’𑀢𑀺? ‘‘𑀢𑀻𑀡𑀺 𑀆𑀦𑀦𑁆𑀤𑀸’’𑀢𑀺. ‘‘𑀓𑀢𑀫𑀸𑀦𑀺, 𑀪𑀦𑁆𑀢𑁂, 𑀢𑀻𑀡𑀻’’𑀢𑀺? ‘‘𑀲𑀸𑀭𑀻𑀭𑀺𑀓𑀁 𑀧𑀸𑀭𑀺𑀪𑁄𑀕𑀺𑀓𑀁 𑀉𑀤𑁆𑀤𑀺𑀲𑁆𑀲𑀓’’𑀦𑁆𑀢𑀺. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀥𑀭𑀦𑁆𑀢𑁂𑀲𑀼𑀬𑁂𑀯 𑀘𑁂𑀢𑀺𑀬𑀁 𑀓𑀸𑀢𑀼’’𑀦𑁆𑀢𑀺. ‘‘𑀆𑀦𑀦𑁆𑀤, 𑀲𑀸𑀭𑀻𑀭𑀺𑀓𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀳𑁄𑀢𑀺, 𑀉𑀤𑁆𑀤𑀺𑀲𑁆𑀲𑀓𑀁 𑀅𑀯𑀢𑁆𑀣𑀼𑀓𑀁 𑀫𑀫𑀸𑀬𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀩𑀼𑀤𑁆𑀥𑁂𑀳𑀺 𑀧𑀭𑀺𑀪𑀼𑀢𑁆𑀢𑁄 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄 𑀩𑀼𑀤𑁆𑀥𑁂𑀲𑀼 𑀥𑀭𑀦𑁆𑀢𑁂𑀲𑀼𑀧𑀺 𑀘𑁂𑀢𑀺𑀬𑀫𑁂𑀯𑀸’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀚𑁂𑀢𑀯𑀦𑀯𑀺𑀳𑀸𑀭𑁄 𑀅𑀧𑁆𑀧𑀝𑀺𑀲𑀭𑀡𑁄 𑀳𑁄𑀢𑀺, 𑀫𑀳𑀸𑀚𑀦𑁄 𑀧𑀽𑀚𑀦𑀻𑀬𑀝𑁆𑀞𑀸𑀦𑀁 ¶ 𑀦 𑀮𑀪𑀢𑀺, 𑀫𑀳𑀸𑀩𑁄𑀥𑀺𑀢𑁄 𑀩𑀻𑀚𑀁 𑀆𑀳𑀭𑀺𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑁂 𑀭𑁄𑀧𑁂𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀲𑀸𑀥𑀼, 𑀆𑀦𑀦𑁆𑀤, 𑀭𑁄𑀧𑁂𑀳𑀺, 𑀏𑀯𑀁 𑀲𑀦𑁆𑀢𑁂 𑀚𑁂𑀢𑀯𑀦𑁂 𑀫𑀫 𑀦𑀺𑀩𑀤𑁆𑀥𑀯𑀸𑀲𑁄 𑀯𑀺𑀬 𑀪𑀯𑀺𑀲𑁆𑀲𑀢𑀻’’𑀢𑀺.

𑀣𑁂𑀭𑁄 𑀓𑁄𑀲𑀮𑀦𑀭𑀺𑀦𑁆𑀤𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀯𑀺𑀲𑀸𑀔𑀸𑀤𑀻𑀦𑀜𑁆𑀘 𑀆𑀭𑁄𑀘𑁂𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑁂 𑀩𑁄𑀥𑀺𑀭𑁄𑀧𑀦𑀝𑁆𑀞𑀸𑀦𑁂 𑀆𑀯𑀸𑀝𑀁 𑀔𑀡𑀸𑀧𑁂𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀅𑀳𑀁 𑀚𑁂𑀢𑀯𑀦𑀤𑁆𑀯𑀸𑀭𑁂 𑀩𑁄𑀥𑀺𑀁 𑀭𑁄𑀧𑁂𑀲𑁆𑀲𑀸𑀫𑀺, 𑀫𑀳𑀸𑀩𑁄𑀥𑀺𑀢𑁄 𑀫𑁂 𑀩𑁄𑀥𑀺𑀧𑀓𑁆𑀓𑀁 𑀆𑀳𑀭𑀣𑀸’’𑀢𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀓𑀸𑀲𑁂𑀦 𑀩𑁄𑀥𑀺𑀫𑀡𑁆𑀟𑀁 𑀕𑀦𑁆𑀢𑁆𑀯𑀸 𑀯𑀡𑁆𑀝𑀸 𑀧𑀭𑀺𑀕𑀮𑀦𑁆𑀢𑀁 ¶ 𑀧𑀓𑁆𑀓𑀁 𑀪𑀽𑀫𑀺𑀁 𑀅𑀲𑀫𑁆𑀧𑀢𑁆𑀢𑀫𑁂𑀯 𑀘𑀻𑀯𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀅𑀚𑁆𑀚 𑀩𑁄𑀥𑀺𑀁 𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀓𑁄𑀲𑀮𑀭𑀸𑀚𑀸𑀤𑀻𑀦𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀆𑀕𑀫𑀺, 𑀢𑀣𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀲𑀸𑀔𑀸 𑀘 𑀅𑀜𑁆𑀜𑁄 𑀘 𑀲𑀤𑁆𑀥𑁄 𑀚𑀦𑁄. 𑀣𑁂𑀭𑁄 𑀫𑀳𑀸𑀩𑁄𑀥𑀺𑀭𑁄𑀧𑀦𑀝𑁆𑀞𑀸𑀦𑁂 𑀫𑀳𑀦𑁆𑀢𑀁 𑀲𑀼𑀯𑀡𑁆𑀡𑀓𑀝𑀸𑀳𑀁 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀙𑀺𑀤𑁆𑀤𑀁 𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑀓𑀮𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 ‘‘𑀇𑀤𑀁 𑀩𑁄𑀥𑀺𑀧𑀓𑁆𑀓𑀁 𑀭𑁄𑀧𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀅𑀤𑀸𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀭𑀚𑁆𑀚𑀁 𑀦𑀸𑀫 𑀦 𑀲𑀩𑁆𑀩𑀓𑀸𑀮𑀁 𑀅𑀫𑁆𑀳𑀸𑀓𑀁 𑀳𑀢𑁆𑀣𑁂 𑀢𑀺𑀝𑁆𑀞𑀢𑀺, 𑀇𑀤𑀁 𑀫𑀬𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀭𑁄𑀧𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 ¶ . 𑀲𑁄 𑀢𑀁 𑀩𑁄𑀥𑀺𑀧𑀓𑁆𑀓𑀁 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀦𑁆𑀥𑀓𑀮𑀮𑀁 𑀯𑀺𑀬𑀽𑀳𑀺𑀢𑁆𑀯𑀸 𑀢𑀢𑁆𑀣 𑀧𑀸𑀢𑁂𑀲𑀺. 𑀢𑀲𑁆𑀫𑀺𑀁 𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀦𑀗𑁆𑀕𑀮𑀲𑀻𑀲𑀧𑁆𑀧𑀫𑀸𑀡𑁄 𑀩𑁄𑀥𑀺𑀔𑀦𑁆𑀥𑁄 𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑁄 𑀉𑀝𑁆𑀞𑀳𑀺, 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀉𑀤𑁆𑀥𑀜𑁆𑀘𑀸𑀢𑀺 𑀧𑀜𑁆𑀘 𑀫𑀳𑀸𑀲𑀸𑀔𑀸 𑀧𑀡𑁆𑀡𑀸𑀲𑀳𑀢𑁆𑀣𑀸𑀯 𑀦𑀺𑀓𑁆𑀔𑀫𑀺𑀁𑀲𑀼. 𑀇𑀢𑀺 𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀅𑀝𑁆𑀞𑀸𑀭𑀲𑀫𑀢𑁆𑀢𑁂 𑀲𑀼𑀯𑀡𑁆𑀡𑀭𑀚𑀢𑀖𑀝𑁂 𑀕𑀦𑁆𑀥𑁄𑀤𑀓𑁂𑀦 𑀧𑀽𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑁂 𑀫𑀳𑀸𑀩𑁄𑀥𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀲𑀺, 𑀲𑀢𑁆𑀢𑀭𑀢𑀦𑀫𑀬𑀁 𑀯𑁂𑀤𑀺𑀓𑀁 𑀓𑀸𑀭𑁂𑀲𑀺, 𑀲𑀼𑀯𑀡𑁆𑀡𑀫𑀺𑀲𑁆𑀲𑀓𑀁 𑀯𑀸𑀮𑀼𑀓𑀁 𑀑𑀓𑀺𑀭𑀺, 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑁂𑀲𑀺, 𑀲𑀢𑁆𑀢𑀭𑀢𑀦𑀫𑀬𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀓𑀸𑀭𑁂𑀲𑀺, 𑀲𑀓𑁆𑀓𑀸𑀭𑁄 𑀫𑀳𑀸 𑀅𑀳𑁄𑀲𑀺.

𑀣𑁂𑀭𑁄 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀫𑀳𑀸𑀩𑁄𑀥𑀺𑀫𑀽𑀮𑁂 𑀲𑀫𑀸𑀧𑀦𑁆𑀦𑀲𑀫𑀸𑀧𑀢𑁆𑀢𑀺𑀁 𑀫𑀬𑀸 𑀭𑁄𑀧𑀺𑀢𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬 𑀲𑀫𑀸𑀧𑀚𑁆𑀚𑀣𑀸’’𑀢𑀺 𑀆𑀳. ‘‘𑀆𑀦𑀦𑁆𑀤, 𑀓𑀺𑀁 𑀓𑀣𑁂𑀲𑀺, 𑀫𑀬𑀺 𑀫𑀳𑀸𑀩𑁄𑀥𑀺𑀫𑀽𑀮𑁂 𑀲𑀫𑀸𑀧𑀦𑁆𑀦𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀜𑁆𑀜𑁄 𑀧𑀤𑁂𑀲𑁄 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. ‘‘𑀪𑀦𑁆𑀢𑁂, 𑀫𑀳𑀸𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬 𑀇𑀫𑀲𑁆𑀲 𑀪𑀽𑀫𑀺𑀧𑁆𑀧𑀤𑁂𑀲𑀲𑁆𑀲 𑀥𑀼𑀯𑀦𑀺𑀬𑀸𑀫𑁂𑀦 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀢𑀁 𑀩𑁄𑀥𑀺𑀫𑀽𑀮𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺. 𑀲𑀢𑁆𑀣𑀸 𑀏𑀓𑀭𑀢𑁆𑀢𑀺𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀧𑀭𑀺𑀪𑀼𑀜𑁆𑀚𑀺. 𑀣𑁂𑀭𑁄 𑀓𑁄𑀲𑀮𑀭𑀸𑀚𑀸𑀤𑀻𑀦𑀁 𑀓𑀣𑁂𑀢𑁆𑀯𑀸 𑀩𑁄𑀥𑀺𑀫𑀳𑀁 𑀦𑀸𑀫 𑀓𑀸𑀭𑁂𑀲𑀺. 𑀲𑁄𑀧𑀺 𑀔𑁄 𑀩𑁄𑀥𑀺𑀭𑀼𑀓𑁆𑀔𑁄 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀭𑁄𑀧𑀺𑀢𑀢𑁆𑀢𑀸 𑀆𑀦𑀦𑁆𑀤𑀩𑁄𑀥𑀺𑀬𑁂𑀯𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀤𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀥𑀭𑀦𑁆𑀢𑁂𑀬𑁂𑀯 𑀢𑀣𑀸𑀕𑀢𑁂 𑀩𑁄𑀥𑀺𑀁 𑀭𑁄𑀧𑁂𑀢𑁆𑀯𑀸 𑀫𑀳𑀸𑀧𑀽𑀚𑀁 𑀓𑀸𑀭𑁂𑀲𑀺 ¶ , 𑀅𑀳𑁄 𑀫𑀳𑀸𑀕𑀼𑀡𑁄 𑀣𑁂𑀭𑁄’’𑀢𑀺 ¶ . 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀆𑀦𑀦𑁆𑀤𑁄 𑀲𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀫𑀦𑀼𑀲𑁆𑀲𑁂 𑀕𑀳𑁂𑀢𑁆𑀯𑀸 𑀩𑀳𑀼𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀩𑁄𑀥𑀺𑀫𑀳𑀁 𑀓𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑀦𑁆𑀢𑀧𑀼𑀭𑀦𑀕𑀭𑁂 𑀓𑀸𑀮𑀺𑀗𑁆𑀕𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀫𑀳𑀸𑀓𑀸𑀮𑀺𑀗𑁆𑀕𑁄, 𑀘𑀽𑀴𑀓𑀸𑀮𑀺𑀗𑁆𑀕𑁄𑀢𑀺 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀦𑁂𑀫𑀺𑀢𑁆𑀢𑀓𑀸 ‘‘𑀚𑁂𑀝𑁆𑀞𑀧𑀼𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺, 𑀓𑀦𑀺𑀝𑁆𑀞𑁄 𑀧𑀦 𑀇𑀲𑀺𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺𑀲𑁆𑀲𑀢𑀺, 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀅𑀧𑀭𑀪𑀸𑀕𑁂 𑀚𑁂𑀝𑁆𑀞𑀧𑀼𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀅𑀳𑁄𑀲𑀺, 𑀓𑀦𑀺𑀝𑁆𑀞𑁄 𑀧𑀦 𑀉𑀧𑀭𑀸𑀚𑀸. 𑀲𑁄 ‘‘𑀧𑀼𑀢𑁆𑀢𑁄 𑀓𑀺𑀭 𑀫𑁂 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀅𑀓𑀸𑀲𑀺. 𑀭𑀸𑀚𑀸 𑀅𑀲𑀳𑀦𑁆𑀢𑁄 ‘‘𑀘𑀽𑀴𑀓𑀸𑀮𑀺𑀗𑁆𑀕𑀁 𑀕𑀡𑁆𑀳𑀸’’𑀢𑀺 𑀏𑀓𑀁 𑀅𑀢𑁆𑀣𑀘𑀭𑀓𑀁 𑀆𑀡𑀸𑀧𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 ‘‘𑀓𑀼𑀫𑀸𑀭, 𑀭𑀸𑀚𑀸 𑀢𑀁 𑀕𑀡𑁆𑀳𑀸𑀧𑁂𑀢𑀼𑀓𑀸𑀫𑁄, 𑀢𑀯 𑀚𑀻𑀯𑀺𑀢𑀁 𑀭𑀓𑁆𑀔𑀸𑀳𑀻’’𑀢𑀺 𑀆𑀳. 𑀲𑁄 𑀅𑀢𑁆𑀢𑀦𑁄 𑀮𑀜𑁆𑀚𑀦𑀫𑀼𑀤𑁆𑀤𑀺𑀓𑀜𑁆𑀘 𑀲𑀼𑀔𑀼𑀫𑀓𑀫𑁆𑀩𑀮𑀜𑁆𑀘 𑀔𑀕𑁆𑀕𑀜𑁆𑀘𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀅𑀢𑁆𑀣𑀘𑀭𑀓𑀸𑀫𑀘𑁆𑀘𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑀸𑀬 𑀲𑀜𑁆𑀜𑀸𑀬 𑀫𑀫 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦𑀤𑀻𑀢𑀻𑀭𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀫𑀤𑁆𑀤𑀭𑀝𑁆𑀞𑁂𑀧𑀺 𑀲𑀸𑀕𑀮𑀦𑀕𑀭𑁂 𑀫𑀤𑁆𑀤𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀢𑀁 𑀦𑁂𑀫𑀺𑀢𑁆𑀢𑀓𑀸 ‘‘𑀅𑀬𑀁 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀢𑀺, 𑀧𑀼𑀢𑁆𑀢𑁄 𑀧𑀦𑀲𑁆𑀲𑀸 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀲𑀸𑀕𑀮𑀦𑀕𑀭𑀁 𑀭𑀼𑀦𑁆𑀥𑀺𑀁𑀲𑀼. 𑀫𑀤𑁆𑀤𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀇𑀫𑀁 𑀏𑀓𑀲𑁆𑀲 𑀤𑀲𑁆𑀲𑀸𑀫𑀺, 𑀲𑁂𑀲𑀭𑀸𑀚𑀸𑀦𑁄 𑀓𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀫𑀫 𑀥𑀻𑀢𑀭𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀥𑀻𑀢𑀭𑀜𑁆𑀘 𑀪𑀭𑀺𑀬𑀜𑁆𑀘 𑀕𑀳𑁂𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀘𑀽𑀴𑀓𑀸𑀮𑀺𑀗𑁆𑀕𑀓𑀼𑀫𑀸𑀭𑀲𑁆𑀲 𑀅𑀲𑁆𑀲𑀫𑀧𑀤𑀢𑁄 𑀉𑀧𑀭𑀺𑀪𑀸𑀕𑁂 𑀅𑀲𑁆𑀲𑀫𑀁 ¶ 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀢𑀢𑁆𑀣 𑀧𑀝𑀺𑀯𑀲𑀢𑀺. 𑀫𑀸𑀢𑀸𑀧𑀺𑀢𑀭𑁄 ‘‘𑀥𑀻𑀢𑀭𑀁 𑀭𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀅𑀲𑁆𑀲𑀫𑀧𑀤𑁂 𑀓𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺. 𑀲𑀸 𑀢𑁂𑀲𑀁 𑀕𑀢𑀓𑀸𑀮𑁂 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀁 𑀓𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀞𑀧𑀺𑀢𑀲𑁄𑀧𑀸𑀦𑀧𑀦𑁆𑀢𑀺 𑀯𑀺𑀬 𑀚𑀸𑀢𑁄 𑀏𑀓𑁄 𑀲𑀼𑀧𑀼𑀧𑁆𑀨𑀺𑀢𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀓𑀻𑀴𑀺𑀢𑁆𑀯𑀸 𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀁 𑀉𑀤𑀓𑁂 𑀔𑀺𑀧𑀺. 𑀢𑀁 𑀏𑀓𑀤𑀺𑀯𑀲𑀁 𑀕𑀗𑁆𑀕𑀸𑀬𑀁 𑀦𑁆𑀳𑀸𑀬𑀦𑁆𑀢𑀲𑁆𑀲 𑀘𑀽𑀴𑀓𑀸𑀮𑀺𑀗𑁆𑀕𑀓𑀼𑀫𑀸𑀭𑀲𑁆𑀲 𑀲𑀻𑀲𑁂 𑀮𑀕𑁆𑀕𑀺. 𑀲𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀓𑀢𑀁, 𑀦𑁄 𑀘 𑀔𑁄 𑀫𑀳𑀮𑁆𑀮𑀺𑀓𑀸𑀬, 𑀢𑀭𑀼𑀡𑀓𑀼𑀫𑀸𑀭𑀺𑀓𑀸𑀬 𑀓𑀢𑀓𑀫𑁆𑀫𑀁, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀓𑀺𑀮𑁂𑀲𑀯𑀲𑁂𑀦 𑀉𑀧𑀭𑀺𑀕𑀗𑁆𑀕𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀅𑀫𑁆𑀩𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀕𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 ‘‘𑀪𑀤𑁆𑀤𑁂, 𑀓𑀸 𑀦𑀸𑀫 𑀢𑁆𑀯’’𑀦𑁆𑀢𑀺 𑀆𑀳. ‘‘𑀫𑀦𑀼𑀲𑁆𑀲𑀺𑀢𑁆𑀣𑀻𑀳𑀫𑀲𑁆𑀫𑀺 𑀲𑀸𑀫𑀻’’𑀢𑀺 ¶ . ‘‘𑀢𑁂𑀦 𑀳𑀺 𑀑𑀢𑀭𑀸𑀳𑀻’’𑀢𑀺. ‘‘𑀦 𑀲𑀓𑁆𑀓𑀸 𑀲𑀸𑀫𑀺, 𑀅𑀳𑀁 𑀔𑀢𑁆𑀢𑀺𑀬𑀸’’𑀢𑀺. ‘‘𑀪𑀤𑁆𑀤𑁂, 𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄𑀬𑁂𑀯, 𑀑𑀢𑀭𑀸𑀳𑀻’’𑀢𑀺. 𑀲𑀸𑀫𑀺, 𑀦 𑀯𑀘𑀦𑀫𑀢𑁆𑀢𑁂𑀦𑁂𑀯 𑀔𑀢𑁆𑀢𑀺𑀬𑁄 𑀳𑁄𑀢𑀺, 𑀬𑀤𑀺𑀲𑀺 𑀔𑀢𑁆𑀢𑀺𑀬𑁄, 𑀔𑀢𑁆𑀢𑀺𑀬𑀫𑀸𑀬𑀁 ¶ 𑀓𑀣𑁂𑀳𑀻’’𑀢𑀺. 𑀢𑁂 𑀉𑀪𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑀢𑁆𑀢𑀺𑀬𑀫𑀸𑀬𑀁 𑀓𑀣𑀬𑀺𑀁𑀲𑀼. 𑀭𑀸𑀚𑀥𑀻𑀢𑀸 𑀑𑀢𑀭𑀺.

𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀚𑁆𑀛𑀸𑀘𑀸𑀭𑀁 𑀘𑀭𑀺𑀁𑀲𑀼. 𑀲𑀸 𑀫𑀸𑀢𑀸𑀧𑀺𑀢𑀽𑀲𑀼 𑀆𑀕𑀢𑁂𑀲𑀼 𑀢𑀲𑁆𑀲 𑀓𑀸𑀮𑀺𑀗𑁆𑀕𑀭𑀸𑀚𑀧𑀼𑀢𑁆𑀢𑀪𑀸𑀯𑀜𑁆𑀘𑁂𑀯 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀓𑀸𑀭𑀡𑀜𑁆𑀘 𑀯𑀺𑀢𑁆𑀣𑀸𑀭𑁂𑀦 𑀢𑁂𑀲𑀁 𑀓𑀣𑁂𑀲𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀢𑀲𑁆𑀲 𑀅𑀤𑀁𑀲𑀼. 𑀢𑁂𑀲𑀁 𑀧𑀺𑀬𑀲𑀁𑀯𑀸𑀲𑁂𑀦 𑀯𑀲𑀦𑁆𑀢𑀸𑀦𑀁 𑀭𑀸𑀚𑀥𑀻𑀢𑀸 𑀕𑀩𑁆𑀪𑀁 𑀮𑀪𑀺𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀓𑀸𑀮𑀺𑀗𑁆𑀕𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀧𑀺𑀢𑀼 𑀘𑁂𑀯 𑀅𑀬𑁆𑀬𑀓𑀲𑁆𑀲 𑀘 𑀲𑀦𑁆𑀢𑀺𑀓𑁂 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀧𑀺𑀢𑀸 𑀦𑀓𑁆𑀔𑀢𑁆𑀢𑀬𑁄𑀕𑀯𑀲𑁂𑀦 𑀪𑀸𑀢𑀼 𑀫𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀢𑀸𑀢, 𑀫𑀸 𑀢𑁆𑀯𑀁 𑀅𑀭𑀜𑁆𑀜𑁂 𑀯𑀲, 𑀧𑁂𑀢𑁆𑀢𑁂𑀬𑁆𑀬𑁄 𑀢𑁂 𑀫𑀳𑀸𑀓𑀸𑀮𑀺𑀗𑁆𑀕𑁄 𑀓𑀸𑀮𑀓𑀢𑁄, 𑀢𑁆𑀯𑀁 𑀤𑀦𑁆𑀢𑀧𑀼𑀭𑀦𑀕𑀭𑀁 𑀕𑀦𑁆𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑀁 𑀲𑀓𑀮𑀭𑀚𑁆𑀚𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑀸 ¶ 𑀆𑀦𑀻𑀢𑀁 𑀫𑀼𑀤𑁆𑀤𑀺𑀓𑀜𑁆𑀘 𑀓𑀫𑁆𑀩𑀮𑀜𑁆𑀘 𑀔𑀕𑁆𑀕𑀜𑁆𑀘 𑀤𑀢𑁆𑀯𑀸 ‘‘𑀢𑀸𑀢, 𑀤𑀦𑁆𑀢𑀧𑀼𑀭𑀦𑀕𑀭𑁂 𑀅𑀲𑀼𑀓𑀯𑀻𑀣𑀺𑀬𑀁 𑀅𑀫𑁆𑀳𑀸𑀓𑀁 𑀅𑀢𑁆𑀣𑀘𑀭𑀓𑁄 𑀅𑀫𑀘𑁆𑀘𑁄 𑀅𑀢𑁆𑀣𑀺, 𑀢𑀲𑁆𑀲 𑀕𑁂𑀳𑁂 𑀲𑀬𑀦𑀫𑀚𑁆𑀛𑁂 𑀑𑀢𑀭𑀺𑀢𑁆𑀯𑀸 𑀇𑀫𑀸𑀦𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀢𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀪𑀸𑀯𑀁 𑀆𑀘𑀺𑀓𑁆𑀔, 𑀲𑁄 𑀢𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀘 𑀅𑀬𑁆𑀬𑀓𑀸𑀬𑁆𑀬𑀺𑀓𑁂 𑀘 𑀯𑀦𑁆𑀤𑀺𑀢𑁆𑀯𑀸 𑀧𑀼𑀜𑁆𑀜𑀫𑀳𑀺𑀤𑁆𑀥𑀺𑀬𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀲𑀬𑀦𑀧𑀺𑀝𑁆𑀞𑁂𑀬𑁂𑀯 𑀑𑀢𑀭𑀺𑀢𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀘𑀽𑀴𑀓𑀸𑀮𑀺𑀗𑁆𑀕𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀸𑀦𑀺 𑀭𑀢𑀦𑀸𑀦𑀺 𑀤𑀲𑁆𑀲𑁂𑀲𑀺. 𑀅𑀫𑀘𑁆𑀘𑁄 𑀭𑀸𑀚𑀧𑀭𑀺𑀲𑀸𑀬 𑀆𑀭𑁄𑀘𑁂𑀲𑀺. 𑀅𑀫𑀘𑁆𑀘𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺𑀁𑀲𑀼.

𑀅𑀣𑀲𑁆𑀲 𑀓𑀸𑀮𑀺𑀗𑁆𑀕𑀪𑀸𑀭𑀤𑁆𑀯𑀸𑀚𑁄 𑀦𑀸𑀫 𑀧𑀼𑀭𑁄𑀳𑀺𑀢𑁄 𑀢𑀲𑁆𑀲 𑀤𑀲 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀸𑀦𑀺 𑀆𑀘𑀺𑀓𑁆𑀔𑀺. 𑀲𑁄 𑀢𑀁 𑀯𑀢𑁆𑀢𑀁 𑀧𑀽𑀭𑁂𑀲𑀺. 𑀅𑀣𑀲𑁆𑀲 𑀧𑀦𑁆𑀦𑀭𑀲𑀉𑀧𑁄𑀲𑀣𑀤𑀺𑀯𑀲𑁂 𑀘𑀓𑁆𑀓𑀤𑀳𑀢𑁄 𑀘𑀓𑁆𑀓𑀭𑀢𑀦𑀁, 𑀉𑀧𑁄𑀲𑀣𑀓𑀼𑀮𑀢𑁄 𑀳𑀢𑁆𑀣𑀺𑀭𑀢𑀦𑀁, 𑀯𑀮𑀸𑀳𑀓𑀓𑀼𑀮𑀢𑁄 𑀅𑀲𑁆𑀲𑀭𑀢𑀦𑀁, 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀢𑁄 𑀫𑀡𑀺𑀭𑀢𑀦𑀁 𑀆𑀕𑀫𑀺, 𑀇𑀢𑁆𑀣𑀺𑀭𑀢𑀦𑀕𑀳𑀧𑀢𑀺𑀭𑀢𑀦𑀧𑀭𑀺𑀡𑀸𑀬𑀓𑀭𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀲𑁄 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀭𑀚𑁆𑀚𑀁 𑀕𑀡𑁆𑀳𑀺𑀢𑁆𑀯𑀸 𑀏𑀓𑀤𑀺𑀯𑀲𑀜𑁆𑀘 𑀙𑀢𑁆𑀢𑀺𑀁𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀲𑀩𑁆𑀩𑀲𑁂𑀢𑀁 𑀓𑁂𑀮𑀸𑀲𑀓𑀽𑀝𑀧𑀝𑀺𑀪𑀸𑀕𑀁 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀲𑀺𑀭𑀺𑀯𑀺𑀮𑀸𑀲𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀚𑀬𑀧𑀮𑁆𑀮𑀗𑁆𑀓𑀲𑁆𑀲 𑀧𑀣𑀯𑀻𑀦𑀸𑀪𑀺𑀪𑀽𑀢𑀲𑁆𑀲 𑀫𑀳𑀸𑀩𑁄𑀥𑀺𑀫𑀡𑁆𑀟𑀲𑁆𑀲 𑀉𑀧𑀭𑀺𑀪𑀸𑀕𑁂 𑀦𑀸𑀕𑁄 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀭𑀸𑀚𑀸 𑀧𑀼𑀦𑀧𑁆𑀧𑀼𑀦𑀁 𑀘𑁄𑀤𑁂𑀲𑀺, 𑀲𑁄 𑀦𑀸𑀲𑀓𑁆𑀔𑀺𑀬𑁂𑀯. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁭.

‘‘𑀭𑀸𑀚𑀸 ¶ ¶ 𑀓𑀸𑀮𑀺𑀗𑁆𑀕𑁄 𑀘𑀓𑁆𑀓𑀯𑀢𑁆𑀢𑀺, 𑀥𑀫𑁆𑀫𑁂𑀦 𑀧𑀣𑀯𑀺𑀫𑀦𑀼𑀲𑀸𑀲𑀁;

𑀅𑀕𑀫𑀸 𑀩𑁄𑀥𑀺𑀲𑀫𑀻𑀧𑀁, 𑀦𑀸𑀕𑁂𑀦 𑀫𑀳𑀸𑀦𑀼𑀪𑀸𑀯𑁂𑀦𑀸’’𑀢𑀺.

𑀅𑀣 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 ‘‘𑀆𑀓𑀸𑀲𑁂 𑀆𑀯𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀭𑀸𑀚𑀸 𑀳𑀢𑁆𑀣𑀺𑀁 𑀧𑁂𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 ¶ , 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀲𑀩𑁆𑀩𑀩𑀼𑀤𑁆𑀥𑀸𑀦𑀁𑀬𑁂𑀯 𑀚𑀬𑀧𑀮𑁆𑀮𑀗𑁆𑀓𑀁 𑀧𑀣𑀯𑀻𑀦𑀸𑀪𑀺𑀫𑀡𑁆𑀟𑀮𑀪𑀽𑀢𑀁 𑀪𑀽𑀫𑀺𑀪𑀸𑀕𑀁 𑀧𑀲𑁆𑀲𑀺. 𑀢𑀤𑀸 𑀓𑀺𑀭 𑀢𑀢𑁆𑀣 𑀅𑀝𑁆𑀞𑀭𑀸𑀚𑀓𑀭𑀻𑀲𑀫𑀢𑁆𑀢𑁂 𑀞𑀸𑀦𑁂 𑀓𑁂𑀲𑀫𑀲𑁆𑀲𑀼𑀫𑀢𑁆𑀢𑀫𑁆𑀧𑀺 𑀢𑀺𑀡𑀁 𑀦𑀸𑀫 𑀦𑀢𑁆𑀣𑀺, 𑀭𑀚𑀢𑀧𑀝𑁆𑀝𑀯𑀡𑁆𑀡𑀯𑀸𑀮𑀼𑀓𑀸 𑀯𑀺𑀧𑁆𑀧𑀓𑀺𑀡𑁆𑀡𑀸 𑀳𑁄𑀦𑁆𑀢𑀺, 𑀲𑀫𑀦𑁆𑀢𑀸 𑀢𑀺𑀡𑀮𑀢𑀸𑀯𑀦𑀧𑁆𑀧𑀢𑀺𑀬𑁄 𑀩𑁄𑀥𑀺𑀫𑀡𑁆𑀟𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀯𑀝𑁆𑀝𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀸𑀪𑀺𑀫𑀼𑀔𑀸𑀯 𑀅𑀝𑁆𑀞𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀪𑀽𑀫𑀺𑀪𑀸𑀕𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀜𑁆𑀳𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦𑀁, 𑀇𑀫𑀲𑁆𑀲 𑀉𑀧𑀭𑀺𑀪𑀸𑀕𑁂 𑀲𑀓𑁆𑀓𑀸𑀤𑀻𑀳𑀺𑀧𑀺 𑀦 𑀲𑀓𑁆𑀓𑀸 𑀕𑀦𑁆𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 ‘‘𑀑𑀢𑀭𑀸’’𑀢𑀺 𑀆𑀳. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁬𑁮.

‘‘𑀓𑀸𑀮𑀺𑀗𑁆𑀕𑁄 𑀪𑀸𑀭𑀤𑁆𑀯𑀸𑀚𑁄 𑀘, 𑀭𑀸𑀚𑀸𑀦𑀁 𑀓𑀸𑀮𑀺𑀗𑁆𑀕𑀁 𑀲𑀫𑀡𑀓𑁄𑀮𑀜𑁆𑀜𑀁;

𑀘𑀓𑁆𑀓𑀁 𑀯𑀢𑁆𑀢𑀬𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀧𑀜𑁆𑀚𑀮𑀻 𑀇𑀤𑀫𑀯𑁄𑀘.

𑁬𑁯.

‘‘𑀧𑀘𑁆𑀘𑁄𑀭𑁄𑀳 𑀫𑀳𑀸𑀭𑀸𑀚, 𑀪𑀽𑀫𑀺𑀪𑀸𑀕𑁄 𑀬𑀣𑀸 𑀲𑀫𑀡𑀼𑀕𑁆𑀕𑀢𑁄;

𑀇𑀥 𑀅𑀦𑀥𑀺𑀯𑀭𑀸 𑀩𑀼𑀤𑁆𑀥𑀸, 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑀯𑀺𑀭𑁄𑀘𑀦𑁆𑀢𑀺.

𑁭𑁦.

‘‘𑀧𑀤𑀓𑁆𑀔𑀺𑀡𑀢𑁄 𑀆𑀯𑀝𑁆𑀝𑀸, 𑀢𑀺𑀡𑀮𑀢𑀸 𑀅𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑀲𑁆𑀫𑀺𑀁;

𑀧𑀣𑀯𑀺𑀬𑀸 𑀦𑀸𑀪𑀺𑀬𑀁 𑀫𑀡𑁆𑀟𑁄, 𑀇𑀢𑀺 𑀦𑁄 𑀲𑀼𑀢𑀁 𑀫𑀦𑁆𑀢𑁂 𑀫𑀳𑀸𑀭𑀸𑀚.

𑁭𑁧.

‘‘𑀲𑀸𑀕𑀭𑀧𑀭𑀺𑀬𑀦𑁆𑀢𑀸𑀬, 𑀫𑁂𑀤𑀺𑀦𑀺𑀬𑀸 𑀲𑀩𑁆𑀩𑀪𑀽𑀢𑀥𑀭𑀡𑀺𑀬𑀸;

𑀧𑀣𑀯𑀺𑀬𑀸 𑀅𑀬𑀁 𑀫𑀡𑁆𑀟𑁄, 𑀑𑀭𑁄𑀳𑀺𑀢𑁆𑀯𑀸 𑀦𑀫𑁄 𑀓𑀭𑁄𑀳𑀺.

𑁭𑁨.

‘‘𑀬𑁂 𑀢𑁂 𑀪𑀯𑀦𑁆𑀢𑀺 𑀦𑀸𑀕𑀸 𑀘, 𑀅𑀪𑀺𑀚𑀸𑀢𑀸 𑀘 𑀓𑀼𑀜𑁆𑀚𑀭𑀸;

𑀏𑀢𑁆𑀢𑀸𑀯𑀢𑀸 𑀧𑀤𑁂𑀲𑀁 𑀢𑁂, 𑀦𑀸𑀕𑀸 𑀦𑁂𑀯 𑀫𑀼𑀧𑀬𑀦𑁆𑀢𑀺.

𑁭𑁩.

‘‘𑀅𑀪𑀺𑀚𑀸𑀢𑁄 𑀦𑀸𑀕𑁄 𑀓𑀸𑀫𑀁, 𑀧𑁂𑀲𑁂𑀳𑀺 𑀓𑀼𑀜𑁆𑀚𑀭𑀁 𑀤𑀦𑁆𑀢𑀺𑀁;

𑀏𑀢𑁆𑀢𑀸𑀯𑀢𑀸 𑀧𑀤𑁂𑀲𑁄, 𑀲𑀓𑁆𑀓𑀸 𑀦𑀸𑀕𑁂𑀦 𑀫𑀼𑀧𑀕𑀦𑁆𑀢𑀼𑀁.

𑁭𑁪.

‘‘𑀢𑀁 ¶ ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀓𑀸𑀮𑀺𑀗𑁆𑀕𑁄, 𑀯𑁂𑀬𑁆𑀬𑀜𑁆𑀚𑀦𑀺𑀓𑀯𑀘𑁄 𑀦𑀺𑀲𑀸𑀫𑁂𑀢𑁆𑀯𑀸;

𑀲𑀫𑁆𑀧𑁂𑀲𑁂𑀲𑀺 𑀦𑀸𑀕𑀁 𑀜𑀲𑁆𑀲𑀸𑀫, 𑀫𑀬𑀁 𑀬𑀣𑀺𑀫𑀲𑁆𑀲𑀺𑀤𑀁 𑀯𑀘𑀦𑀁.

𑁭𑁫.

‘‘𑀲𑀫𑁆𑀧𑁂𑀲𑀺𑀢𑁄 𑀘 𑀭𑀜𑁆𑀜𑀸, 𑀦𑀸𑀕𑁄 𑀓𑁄𑀜𑁆𑀘𑁄𑀯 𑀅𑀪𑀺𑀦𑀤𑀺𑀢𑁆𑀯𑀸𑀦;

𑀧𑀝𑀺𑀲𑀓𑁆𑀓𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀕𑀭𑀼𑀁𑀯 𑀪𑀸𑀭𑀁 𑀅𑀲𑀳𑀫𑀸𑀦𑁄’’𑀢𑀺.

𑀢𑀢𑁆𑀣 ¶ 𑀲𑀫𑀡𑀓𑁄𑀮𑀜𑁆𑀜𑀦𑁆𑀢𑀺 𑀢𑀸𑀧𑀲𑀸𑀦𑀁 𑀧𑀼𑀢𑁆𑀢𑀁. 𑀘𑀓𑁆𑀓𑀁 𑀯𑀢𑁆𑀢𑀬𑀢𑁄𑀢𑀺 𑀘𑀓𑁆𑀓𑀁 𑀯𑀢𑁆𑀢𑀬𑀫𑀸𑀦𑀁, 𑀘𑀓𑁆𑀓𑀯𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀪𑀽𑀫𑀺𑀪𑀸𑀕𑀁 𑀯𑀻𑀫𑀁𑀲𑀺𑀢𑁆𑀯𑀸. 𑀲𑀫𑀡𑀼𑀕𑁆𑀕𑀢𑁄𑀢𑀺 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑁄. 𑀅𑀦𑀥𑀺𑀯𑀭𑀸𑀢𑀺 𑀅𑀢𑀼𑀮𑁆𑀬𑀸 𑀅𑀧𑁆𑀧𑀫𑁂𑀬𑁆𑀬𑀸. 𑀯𑀺𑀭𑁄𑀘𑀦𑁆𑀢𑀻𑀢𑀺 𑀯𑀺𑀳𑀢𑀲𑀩𑁆𑀩𑀓𑀺𑀮𑁂𑀲𑀦𑁆𑀥𑀓𑀸𑀭𑀸 𑀢𑀭𑀼𑀡𑀲𑀽𑀭𑀺𑀬𑀸 𑀯𑀺𑀬 𑀇𑀥 𑀦𑀺𑀲𑀺𑀦𑁆𑀦𑀸 𑀯𑀺𑀭𑁄𑀘𑀦𑁆𑀢𑀺. 𑀢𑀺𑀡𑀮𑀢𑀸𑀢𑀺 𑀢𑀺𑀡𑀸𑀦𑀺 𑀘 𑀮𑀢𑀸𑀬𑁄 𑀘. 𑀫𑀡𑁆𑀟𑁄𑀢𑀺 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀸𑀬 𑀧𑀣𑀯𑀺𑀬𑀸 𑀫𑀡𑁆𑀟𑁄 𑀲𑀸𑀭𑁄 𑀦𑀸𑀪𑀺𑀪𑀽𑀢𑁄 𑀅𑀘𑀮𑀝𑁆𑀞𑀸𑀦𑀁, 𑀓𑀧𑁆𑀧𑁂 𑀲𑀡𑁆𑀞𑀳𑀦𑁆𑀢𑁂 𑀧𑀞𑀫𑀁 𑀲𑀡𑁆𑀞𑀳𑀢𑀺, 𑀯𑀺𑀦𑀲𑁆𑀲𑀦𑁆𑀢𑁂 𑀧𑀘𑁆𑀙𑀸 𑀯𑀺𑀦𑀲𑁆𑀲𑀢𑀺. 𑀇𑀢𑀺 𑀦𑁄 𑀲𑀼𑀢𑀦𑁆𑀢𑀺 𑀏𑀯𑀁 𑀅𑀫𑁆𑀳𑁂𑀳𑀺 𑀮𑀓𑁆𑀔𑀡𑀫𑀦𑁆𑀢𑀯𑀲𑁂𑀦 𑀲𑀼𑀢𑀁. 𑀑𑀭𑁄𑀳𑀺𑀢𑁆𑀯𑀸𑀢𑀺 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀇𑀫𑀲𑁆𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦𑀲𑁆𑀲 𑀦𑀫𑁄 𑀓𑀭𑁄𑀳𑀺, 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀭𑁄𑀳𑀺.

𑀬𑁂 𑀢𑁂𑀢𑀺 𑀬𑁂 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀳𑀢𑁆𑀣𑀺𑀭𑀢𑀦𑀲𑀗𑁆𑀔𑀸𑀢𑀸 𑀉𑀧𑁄𑀲𑀣𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑀸𑀕𑀸. 𑀏𑀢𑁆𑀢𑀸𑀯𑀢𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀏𑀢𑁆𑀢𑀓𑀁 𑀧𑀤𑁂𑀲𑀁 𑀦𑁂𑀯 𑀉𑀧𑀬𑀦𑁆𑀢𑀺, 𑀓𑁄𑀝𑁆𑀝𑀺𑀬𑀫𑀸𑀦𑀸𑀧𑀺 𑀦 𑀉𑀧𑀕𑀘𑁆𑀙𑀦𑁆𑀢𑀺𑀬𑁂𑀯. 𑀅𑀪𑀺𑀚𑀸𑀢𑁄𑀢𑀺 𑀕𑁄𑀘𑀭𑀺𑀬𑀸𑀤𑀻𑀦𑀺 𑀅𑀝𑁆𑀞 𑀳𑀢𑁆𑀣𑀺𑀓𑀼𑀮𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑁄𑀲𑀣𑀓𑀼𑀮𑁂 𑀚𑀸𑀢𑁄. 𑀓𑀼𑀜𑁆𑀚𑀭𑀦𑁆𑀢𑀺 𑀉𑀢𑁆𑀢𑀫𑀁. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁄 𑀧𑀤𑁂𑀲𑁄 𑀲𑀓𑁆𑀓𑀸 𑀏𑀢𑁂𑀦 𑀦𑀸𑀕𑁂𑀦 𑀉𑀧𑀕𑀦𑁆𑀢𑀼𑀁, 𑀇𑀢𑁄 𑀉𑀢𑁆𑀢𑀭𑀺 𑀦 𑀲𑀓𑁆𑀓𑀸, 𑀅𑀪𑀺𑀓𑀗𑁆𑀔𑀦𑁆𑀢𑁄 𑀯𑀚𑀺𑀭𑀗𑁆𑀓𑀼𑀲𑁂𑀦 𑀲𑀜𑁆𑀜𑀁 𑀤𑀢𑁆𑀯𑀸 𑀧𑁂𑀲𑁂𑀳𑀻𑀢𑀺. 𑀯𑁂𑀬𑁆𑀬𑀜𑁆𑀚𑀦𑀺𑀓𑀯𑀘𑁄 𑀦𑀺𑀲𑀸𑀫𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀭𑀸𑀚𑀸 𑀢𑀲𑁆𑀲 𑀮𑀓𑁆𑀔𑀡𑀧𑀸𑀞𑀓𑀲𑁆𑀲 𑀯𑁂𑀬𑁆𑀬𑀜𑁆𑀚𑀦𑀺𑀓𑀲𑁆𑀲 𑀓𑀸𑀮𑀺𑀗𑁆𑀕𑀪𑀸𑀭𑀤𑁆𑀯𑀸𑀚𑀲𑁆𑀲 𑀯𑀘𑁄 𑀦𑀺𑀲𑀸𑀫𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀜𑀲𑁆𑀲𑀸𑀫 𑀫𑀬𑀁 𑀬𑀣𑀸 𑀇𑀫𑀲𑁆𑀲 𑀯𑀘𑀦𑀁 𑀬𑀤𑀺 𑀯𑀸 𑀲𑀘𑁆𑀘𑀁 𑀬𑀤𑀺 𑀯𑀸 𑀅𑀮𑀺𑀓’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 𑀦𑀸𑀕𑀁 𑀧𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀓𑁄𑀜𑁆𑀘𑁄𑀯 𑀅𑀪𑀺𑀦𑀤𑀺𑀢𑁆𑀯𑀸𑀦𑀸𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀦𑀸𑀕𑁄 𑀢𑁂𑀦 𑀭𑀜𑁆𑀜𑀸 𑀯𑀚𑀺𑀭𑀗𑁆𑀓𑀼𑀲𑁂𑀦 𑀘𑁄𑀤𑁂𑀢𑁆𑀯𑀸 𑀧𑁂𑀲𑀺𑀢𑁄 𑀓𑁄𑀜𑁆𑀘𑀲𑀓𑀼𑀡𑁄 𑀯𑀺𑀬 𑀦𑀤𑀺𑀢𑁆𑀯𑀸 𑀧𑀝𑀺𑀲𑀓𑁆𑀓𑀺𑀢𑁆𑀯𑀸 𑀲𑁄𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀻𑀯𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀕𑀭𑀼𑀁 𑀪𑀸𑀭𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀬 𑀆𑀓𑀸𑀲𑁂𑀬𑁂𑀯 𑀦𑀺𑀲𑀻𑀤𑀺.

𑀲𑁄 ¶ 𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀺𑀚𑁆𑀛𑀺𑀬𑀫𑀸𑀦𑁄 𑀯𑁂𑀤𑀦𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀧𑀦𑀲𑁆𑀲 𑀫𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀯 𑀅𑀳𑁄𑀲𑀺. 𑀓𑀸𑀮𑀺𑀗𑁆𑀕𑀪𑀸𑀭𑀤𑁆𑀯𑀸𑀚𑁄 ‘‘𑀫𑀳𑀸𑀭𑀸𑀚, 𑀢𑀯 𑀦𑀸𑀕𑁄 𑀦𑀺𑀭𑀼𑀤𑁆𑀥𑁄, 𑀅𑀜𑁆𑀜𑀁 𑀳𑀢𑁆𑀣𑀺𑀁 𑀲𑀗𑁆𑀓𑀫𑀸’’𑀢𑀺 𑀆𑀳. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁭𑁬.

‘‘𑀓𑀸𑀮𑀺𑀗𑁆𑀕𑀪𑀸𑀭𑀤𑁆𑀯𑀸𑀚𑁄 ¶ , 𑀦𑀸𑀕𑀁 𑀔𑀻𑀡𑀸𑀬𑀼𑀓𑀁 𑀯𑀺𑀤𑀺𑀢𑁆𑀯𑀸𑀦;

𑀭𑀸𑀚𑀸𑀦𑀁 𑀓𑀸𑀮𑀺𑀗𑁆𑀕𑀁, 𑀢𑀭𑀫𑀸𑀦𑁄 𑀅𑀚𑁆𑀛𑀪𑀸𑀲𑀺𑀢𑁆𑀣;

𑀅𑀜𑁆𑀜𑀁 𑀲𑀗𑁆𑀓𑀫 𑀦𑀸𑀕𑀁, 𑀦𑀸𑀕𑁄 𑀔𑀻𑀡𑀸𑀬𑀼𑀓𑁄 𑀫𑀳𑀸𑀭𑀸𑀚𑀸’’𑀢𑀺.

𑀢𑀢𑁆𑀣 ¶ 𑀦𑀸𑀕𑁄 𑀔𑀻𑀡𑀸𑀬𑀼𑀓𑁄𑀢𑀺 𑀦𑀸𑀕𑁄 𑀢𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄, 𑀬𑀁 𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑁂𑀦 𑀦 𑀲𑀓𑁆𑀓𑀸 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁂𑀦 𑀩𑁄𑀥𑀺𑀫𑀡𑁆𑀟𑀫𑀢𑁆𑀣𑀓𑁂𑀦 𑀕𑀦𑁆𑀢𑀼𑀁. 𑀅𑀜𑁆𑀜𑀁 𑀦𑀸𑀕𑀁 𑀲𑀗𑁆𑀓𑀫𑀸𑀢𑀺 𑀭𑀜𑁆𑀜𑁄 𑀧𑀼𑀜𑁆𑀜𑀺𑀤𑁆𑀥𑀺𑀩𑀮𑁂𑀦 𑀅𑀜𑁆𑀜𑁄 𑀦𑀸𑀕𑁄 𑀉𑀧𑁄𑀲𑀣𑀓𑀼𑀮𑀢𑁄 𑀆𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀁 𑀉𑀧𑀦𑀸𑀫𑁂𑀲𑀺.

𑀭𑀸𑀚𑀸 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀢𑀳𑀢𑁆𑀣𑀻 𑀪𑀽𑀫𑀺𑀬𑀁 𑀧𑀢𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁭𑁭.

‘‘𑀢𑀁 𑀲𑀼𑀢𑁆𑀯𑀸 𑀓𑀸𑀮𑀺𑀗𑁆𑀕𑁄, 𑀢𑀭𑀫𑀸𑀦𑁄 𑀲𑀗𑁆𑀓𑀫𑀻 𑀦𑀸𑀕𑀁;

𑀲𑀗𑁆𑀓𑀦𑁆𑀢𑁂𑀯 𑀭𑀜𑁆𑀜𑁂 𑀦𑀸𑀕𑁄, 𑀢𑀢𑁆𑀣𑁂𑀯 𑀧𑀢𑀺 𑀪𑀼𑀫𑁆𑀬𑀸;

𑀯𑁂𑀬𑁆𑀬𑀜𑁆𑀚𑀦𑀺𑀓𑀯𑀘𑁄, 𑀬𑀣𑀸 𑀢𑀣𑀸 𑀅𑀳𑀼 𑀦𑀸𑀕𑁄’’𑀢𑀺.

𑀅𑀣 𑀭𑀸𑀚𑀸 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀩𑁄𑀥𑀺𑀫𑀡𑁆𑀟𑀁 𑀑𑀮𑁄𑀓𑁂𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀪𑀸𑀭𑀤𑁆𑀯𑀸𑀚𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀆𑀳 𑁋

𑁭𑁮.

‘‘𑀓𑀸𑀮𑀺𑀗𑁆𑀕𑁄 𑀭𑀸𑀚𑀸 𑀓𑀸𑀮𑀺𑀗𑁆𑀕𑀁, 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘;

𑀢𑁆𑀯𑀫𑁂𑀯 𑀅𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻’’𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀢𑀁 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀦𑀻𑀘𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑁂𑀬𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀡𑁆𑀡𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁯.

‘‘𑀢𑀁 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀸𑀮𑀺𑀗𑁆𑀕, 𑀩𑁆𑀭𑀸𑀳𑁆𑀫𑀡𑁄 𑀇𑀤𑀫𑀯𑁄𑀘;

𑀯𑁂𑀬𑁆𑀬𑀜𑁆𑀚𑀦𑀺𑀓𑀸 𑀳𑀺 𑀫𑀬𑀁, 𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀦𑁄 𑀫𑀳𑀸𑀭𑀸𑀚.

𑁮𑁦.

‘‘𑀲𑀩𑁆𑀩𑀜𑁆𑀜𑀽 ¶ 𑀲𑀩𑁆𑀩𑀯𑀺𑀤𑀽 𑀘, 𑀩𑀼𑀤𑁆𑀥𑀸 𑀦 𑀮𑀓𑁆𑀔𑀡𑁂𑀦 𑀚𑀸𑀦𑀦𑁆𑀢𑀺;

𑀆𑀕𑀫𑀩𑀮𑀲𑀸 𑀳𑀺 𑀫𑀬𑀁, 𑀩𑀼𑀤𑁆𑀥𑀸 𑀲𑀩𑁆𑀩𑀁 𑀧𑀚𑀸𑀦𑀦𑁆𑀢𑀻’’𑀢𑀺.

𑀢𑀢𑁆𑀣 ¶ 𑀯𑁂𑀬𑁆𑀬𑀜𑁆𑀚𑀦𑀺𑀓𑀸𑀢𑀺 𑀫𑀳𑀸𑀭𑀸𑀚, 𑀫𑀬𑀁 𑀩𑁆𑀬𑀜𑁆𑀚𑀦𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑀸 𑀲𑀼𑀢𑀩𑀼𑀤𑁆𑀥𑀸 𑀦𑀸𑀫, 𑀩𑀼𑀤𑁆𑀥𑀸 𑀧𑀦 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀯𑀺𑀤𑀽. 𑀩𑀼𑀤𑁆𑀥𑀸 𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀚𑀸𑀦𑀦𑁆𑀢𑀺 𑀘𑁂𑀯 𑀧𑀲𑁆𑀲𑀦𑁆𑀢𑀺 𑀘, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀢𑁂 𑀲𑀩𑁆𑀩𑀁 𑀚𑀸𑀦𑀦𑁆𑀢𑀺, 𑀦 𑀮𑀓𑁆𑀔𑀡𑁂𑀦. 𑀫𑀬𑀁 𑀧𑀦 𑀆𑀕𑀫𑀩𑀮𑀲𑀸 𑀅𑀢𑁆𑀢𑀦𑁄 𑀲𑀺𑀧𑁆𑀧𑀩𑀮𑁂𑀦𑁂𑀯 𑀚𑀸𑀦𑀸𑀫, 𑀢𑀜𑁆𑀘 𑀏𑀓𑀤𑁂𑀲𑀫𑁂𑀯, 𑀩𑀼𑀤𑁆𑀥𑀸 𑀧𑀦 𑀲𑀩𑁆𑀩𑀁 𑀧𑀚𑀸𑀦𑀦𑁆𑀢𑀻𑀢𑀺.

𑀭𑀸𑀚𑀸 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀯𑀸𑀲𑀺𑀓𑁂𑀳𑀺 𑀩𑀳𑀼𑀕𑀦𑁆𑀥𑀫𑀸𑀮𑀁 𑀆𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀲𑀢𑁆𑀢𑀸𑀳𑀁 𑀯𑀲𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀧𑀽𑀚𑀁 𑀓𑀸𑀭𑁂𑀲𑀺. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁮𑁧.

‘‘𑀫𑀳𑀬𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁, 𑀦𑀸𑀦𑀸𑀢𑀼𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺;

𑀫𑀸𑀮𑀸𑀯𑀺𑀮𑁂𑀧𑀦𑀁 𑀅𑀪𑀺𑀳𑀭𑀺𑀢𑁆𑀯𑀸, 𑀅𑀣 𑀭𑀸𑀚𑀸 𑀫𑀦𑀼𑀧𑀸𑀬𑀸𑀲𑀺.

𑁮𑁨.

‘‘𑀲𑀝𑁆𑀞𑀺 𑀯𑀸𑀳𑀲𑀳𑀲𑁆𑀲𑀸𑀦𑀺, 𑀧𑀼𑀧𑁆𑀨𑀸𑀦𑀁 𑀲𑀦𑁆𑀦𑀺𑀧𑀸𑀢𑀬𑀺;

𑀧𑀽𑀚𑁂𑀲𑀺 𑀭𑀸𑀚𑀸 𑀓𑀸𑀮𑀺𑀗𑁆𑀕𑁄, 𑀩𑁄𑀥𑀺𑀫𑀡𑁆𑀟𑀫𑀦𑀼𑀢𑁆𑀢𑀭’’𑀦𑁆𑀢𑀺.

𑀢𑀢𑁆𑀣 𑀫𑀦𑀼𑀧𑀸𑀬𑀸𑀲𑀻𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀲𑀼𑀯𑀡𑁆𑀡𑀢𑁆𑀣𑀫𑁆𑀪𑀁 𑀉𑀲𑁆𑀲𑀸𑀧𑁂𑀲𑀺. 𑀢𑀲𑁆𑀲 𑀲𑀢𑁆𑀢𑀭𑀢𑀦𑀫𑀬𑀸 𑀯𑁂𑀤𑀺𑀓𑀸 𑀓𑀸𑀭𑁂𑀲𑀺, 𑀭𑀢𑀦𑀫𑀺𑀲𑁆𑀲𑀓𑀁 𑀯𑀸𑀮𑀼𑀓𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀓𑀸𑀭𑁂𑀲𑀺, 𑀲𑀢𑁆𑀢𑀭𑀢𑀦𑀫𑀬𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀓𑀸𑀭𑁂𑀲𑀺, 𑀤𑁂𑀯𑀲𑀺𑀓𑀁 𑀧𑀼𑀧𑁆𑀨𑀸𑀦𑀁 𑀲𑀝𑁆𑀞𑀺𑀯𑀸𑀳𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀸𑀢𑀬𑀺, 𑀏𑀯𑀁 𑀩𑁄𑀥𑀺𑀫𑀡𑁆𑀟𑀁 𑀧𑀽𑀚𑁂𑀲𑀺. 𑀧𑀸𑀴𑀺𑀬𑀁 𑀧𑀦 ‘‘𑀲𑀝𑁆𑀞𑀺 𑀯𑀸𑀳𑀲𑀳𑀲𑁆𑀲𑀸𑀦𑀺 𑀧𑀼𑀧𑁆𑀨𑀸𑀦’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀆𑀕𑀢𑀁.

𑀏𑀯𑀁 𑀫𑀳𑀸𑀩𑁄𑀥𑀺𑀧𑀽𑀚𑀁 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀬𑁆𑀬𑀓𑀸𑀬𑁆𑀬𑀺𑀓𑁂 𑀘 𑀆𑀤𑀸𑀬 𑀤𑀦𑁆𑀢𑀧𑀼𑀭𑀫𑁂𑀯 𑀆𑀦𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀆𑀦𑀦𑁆𑀤𑁄 𑀩𑁄𑀥𑀺𑀧𑀽𑀚𑀁 𑀓𑀸𑀭𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀸𑀡𑀯𑀓𑀓𑀸𑀮𑀺𑀗𑁆𑀕𑁄 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀸𑀮𑀺𑀗𑁆𑀕𑀪𑀸𑀭𑀤𑁆𑀯𑀸𑀚𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀸𑀮𑀺𑀗𑁆𑀕𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁮𑁦] 𑁭. 𑀅𑀓𑀺𑀢𑁆𑀢𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀓𑀺𑀢𑁆𑀢𑀺𑀁 ¶ 𑀤𑀺𑀲𑁆𑀯𑀸 𑀲𑀫𑁆𑀫𑀦𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀲𑀸𑀯𑀢𑁆𑀣𑀺𑀯𑀸𑀲𑀺𑀁 𑀤𑀸𑀦𑀧𑀢𑀺𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀤𑀺𑀯𑀲𑁂 𑀅𑀭𑀺𑀬𑀲𑀗𑁆𑀖𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀅𑀤𑀸𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀉𑀧𑀸𑀲𑀓, 𑀫𑀳𑀸 𑀢𑁂 𑀧𑀭𑀺𑀘𑁆𑀘𑀸𑀕𑁄, 𑀅𑀳𑁄 𑀤𑀼𑀓𑁆𑀓𑀭𑀁 𑀢𑀬𑀸 𑀓𑀢𑀁, 𑀅𑀬𑀜𑁆𑀳𑀺 𑀤𑀸𑀦𑀯𑀁𑀲𑁄 𑀦𑀸𑀫 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑁄, 𑀤𑀸𑀦𑀁 𑀦𑀸𑀫 𑀕𑀺𑀳𑀺𑀦𑀸𑀧𑀺 𑀧𑀩𑁆𑀩𑀚𑀺𑀢𑁂𑀦𑀸𑀧𑀺 𑀤𑀸𑀢𑀩𑁆𑀩𑀫𑁂𑀯. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀦 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀦𑁆𑀢𑀸𑀧𑀺 𑀅𑀮𑁄𑀡𑀓𑀁 𑀯𑀺𑀥𑀽𑀧𑀦𑀁 𑀉𑀤𑀓𑀫𑀢𑁆𑀢𑀲𑀺𑀢𑁆𑀢𑀁 𑀓𑀸𑀭𑀧𑀡𑁆𑀡𑀁 ¶ 𑀔𑀸𑀤𑀫𑀸𑀦𑀸𑀧𑀺 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀲𑀬𑀁 𑀧𑀻𑀢𑀺𑀲𑀼𑀔𑁂𑀦 𑀬𑀸𑀧𑀬𑀺𑀁𑀲𑀽’’𑀢𑀺 𑀯𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀤𑀁 𑀢𑀸𑀯 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑀁, 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀅𑀧𑀸𑀓𑀝𑀁, 𑀢𑀁 𑀦𑁄 𑀓𑀣𑁂𑀣𑀸’’𑀢𑀺 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀅𑀓𑀺𑀢𑁆𑀢𑀻’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀪𑀕𑀺𑀦𑀻𑀧𑀺 𑀚𑀸𑀬𑀺, ‘‘𑀬𑀲𑀯𑀢𑀻’’𑀢𑀺𑀲𑁆𑀲𑀸 𑀦𑀸𑀫𑀁 𑀓𑀭𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑁄 𑀢𑁂𑀲𑀁 𑀧𑁂𑀢𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀢𑁆𑀯𑀸 𑀥𑀦𑀯𑀺𑀮𑁄𑀓𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀲𑀼𑀓𑁄 𑀦𑀸𑀫 𑀏𑀢𑁆𑀢𑀓𑀁 𑀥𑀦𑀁 𑀲𑀡𑁆𑀞𑀧𑁂𑀢𑁆𑀯𑀸 𑀅𑀢𑀻𑀢𑁄, 𑀅𑀲𑀼𑀓𑁄 𑀏𑀢𑁆𑀢𑀓’’𑀦𑁆𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀇𑀤𑀁 𑀥𑀦𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀥𑀦𑀲𑁆𑀲 𑀲𑀁𑀳𑀸𑀭𑀓𑀸, 𑀲𑀩𑁆𑀩𑁂 𑀇𑀫𑀁 𑀥𑀦𑀁 𑀧𑀳𑀸𑀬𑁂𑀯 𑀕𑀢𑀸, 𑀅𑀳𑀁 𑀧𑀦 𑀢𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀺𑀦𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀇𑀫𑀁 𑀥𑀦𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳 ¶ . ‘‘𑀢𑀼𑀫𑁆𑀳𑀸𑀓𑀁 𑀧𑀦 𑀓𑁄 𑀅𑀚𑁆𑀛𑀸𑀲𑀬𑁄’’𑀢𑀺? ‘‘𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺. ‘‘𑀪𑀸𑀢𑀺𑀓, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀙𑀟𑁆𑀟𑀺𑀢𑀁 𑀔𑁂𑀴𑀁 𑀦 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀺, 𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀥𑀦𑁂𑀦 𑀅𑀢𑁆𑀣𑀺𑀓𑀸 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀲𑁆𑀲 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺.

𑀲𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀥𑀦𑁂 𑀅𑀔𑀻𑀬𑀫𑀸𑀦𑁂 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀲𑀗𑁆𑀔𑀸𑀭𑀸 𑀔𑀻𑀬𑀦𑁆𑀢𑀺, 𑀓𑀺𑀁 𑀫𑁂 𑀥𑀦𑀓𑀻𑀴𑀸𑀬, 𑀅𑀢𑁆𑀣𑀺𑀓𑀸 𑀢𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀤𑀺𑀦𑁆𑀦𑀜𑁆𑀜𑁂𑀯 𑀳𑀭𑀦𑁆𑀢𑀽’’𑀢𑀺 𑀲𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀕𑁂𑀳𑀁 𑀧𑀳𑀸𑀬 𑀜𑀸𑀢𑀺𑀫𑀡𑁆𑀟𑀮𑀲𑁆𑀲 𑀧𑀭𑀺𑀤𑁂𑀯𑀦𑁆𑀢𑀲𑁆𑀲 𑀪𑀕𑀺𑀦𑀺𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺. 𑀬𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺, 𑀢𑀁 𑀅𑀓𑀺𑀢𑁆𑀢𑀺𑀤𑁆𑀯𑀸𑀭𑀁 𑀦𑀸𑀫 𑀚𑀸𑀢𑀁, 𑀬𑁂𑀦 𑀢𑀺𑀢𑁆𑀣𑁂𑀦 𑀦𑀤𑀺𑀁 𑀑𑀢𑀺𑀡𑁆𑀡𑁄, 𑀢𑀫𑁆𑀧𑀺 𑀅𑀓𑀺𑀢𑁆𑀢𑀺𑀢𑀺𑀢𑁆𑀣𑀁 𑀦𑀸𑀫 𑀚𑀸𑀢𑀁. 𑀲𑁄 𑀤𑁆𑀯𑁂 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀭𑀫𑀡𑀻𑀬𑁂 𑀞𑀸𑀦𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀩𑀳𑀼𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀯𑀸𑀲𑀺𑀦𑁄 ¶ 𑀧𑀩𑁆𑀩𑀚𑀺𑀁𑀲𑀼. 𑀫𑀳𑀸𑀧𑀭𑀺𑀯𑀸𑀭𑁄 𑀅𑀳𑁄𑀲𑀺, 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀦𑀺𑀩𑁆𑀩𑀢𑁆𑀢𑀺, 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁄 𑀯𑀺𑀬 𑀧𑀯𑀢𑁆𑀢𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑀸, 𑀧𑀭𑀺𑀯𑀸𑀭𑁄𑀧𑀺 𑀫𑀳𑀦𑁆𑀢𑁄, 𑀫𑀬𑀸 𑀏𑀓𑀓𑁂𑀦𑁂𑀯 𑀯𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑁂𑀮𑀸𑀬 𑀅𑀦𑁆𑀢𑀫𑀲𑁄 𑀪𑀕𑀺𑀦𑀺𑀫𑁆𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀤𑀫𑀺𑀴𑀭𑀝𑁆𑀞𑀁 𑀧𑀢𑁆𑀯𑀸 𑀓𑀸𑀯𑀻𑀭𑀧𑀝𑁆𑀝𑀦𑀲𑀫𑀻𑀧𑁂 𑀉𑀬𑁆𑀬𑀸𑀦𑁂 𑀯𑀺𑀳𑀭𑀦𑁆𑀢𑁄 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑀢𑁆𑀭𑀸𑀧𑀺𑀲𑁆𑀲 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀦𑀸𑀕𑀤𑀻𑀧𑀲𑀫𑀻𑀧𑁂 𑀓𑀸𑀭𑀤𑀻𑀧𑁂 𑀑𑀢𑀭𑀺. 𑀢𑀤𑀸 𑀓𑀸𑀭𑀤𑀻𑀧𑁄 𑀅𑀳𑀺𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀢𑀢𑁆𑀣 𑀫𑀳𑀦𑁆𑀢𑀁 𑀓𑀸𑀭𑀭𑀼𑀓𑁆𑀔𑀁 𑀉𑀧𑀦𑀺𑀲𑁆𑀲𑀸𑀬 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀣 𑀢𑀲𑁆𑀲 𑀯𑀲𑀦𑀪𑀸𑀯𑀁 𑀦 𑀓𑁄𑀘𑀺 𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀪𑀕𑀺𑀦𑀻 𑀪𑀸𑀢𑀭𑀁 𑀕𑀯𑁂𑀲𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀤𑀫𑀺𑀴𑀭𑀝𑁆𑀞𑀁 𑀧𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 𑀢𑁂𑀦 𑀯𑀲𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀲𑀺, 𑀛𑀸𑀦𑀁 𑀧𑀦 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀫𑀳𑀸𑀲𑀢𑁆𑀢𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀨𑀮𑀓𑀸𑀮𑁂 𑀨𑀮𑀸𑀦𑀺 𑀔𑀸𑀤𑀢𑀺, 𑀧𑀢𑁆𑀢𑀓𑀸𑀮𑁂 𑀧𑀢𑁆𑀢𑀸𑀦𑀺 𑀉𑀤𑀓𑀲𑀺𑀢𑁆𑀢𑀸𑀦𑀺 𑀔𑀸𑀤𑀢𑀺. 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑁄 𑀦𑀼 𑀔𑁄 𑀫𑀁 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀏𑀲 𑀢𑀸𑀧𑀲𑁄 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀲𑀓𑁆𑀓𑀢𑁆𑀢𑀁 𑀦𑀼 𑀔𑁄 𑀧𑀢𑁆𑀣𑁂𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀁, 𑀯𑀻𑀫𑀺𑀁𑀲𑀺𑀲𑁆𑀲𑀸𑀫𑀺 𑀦𑀁. 𑀅𑀬𑀜𑁆𑀳𑀺 𑀤𑀼𑀓𑁆𑀔𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀉𑀤𑀓𑀲𑀺𑀢𑁆𑀢𑀸𑀦𑀺 𑀓𑀸𑀭𑀧𑀡𑁆𑀡𑀸𑀦𑀺 ¶ 𑀔𑀸𑀤𑀢𑀺, 𑀲𑀘𑁂 𑀲𑀓𑁆𑀓𑀢𑁆𑀢𑀁 𑀧𑀢𑁆𑀣𑁂𑀢𑀺, 𑀅𑀢𑁆𑀢𑀦𑁄 𑀲𑀺𑀢𑁆𑀢𑀧𑀢𑁆𑀢𑀸𑀦𑀺 𑀫𑀬𑁆𑀳𑀁 𑀤𑀲𑁆𑀲𑀢𑀺, 𑀦𑁄 𑀘𑁂, 𑀦 𑀤𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀸𑀭𑀧𑀡𑁆𑀡𑀸𑀦𑀺 𑀲𑁂𑀤𑁂𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 ‘‘𑀲𑀻𑀢𑀮𑀪𑀽𑀢𑀸𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀧𑀼𑀭𑀢𑁄 𑀲𑀓𑁆𑀓𑁄 𑀪𑀺𑀓𑁆𑀔𑀸𑀬 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀮𑀸𑀪𑀸 𑀯𑀢 𑀫𑁂, 𑀬𑁄𑀳𑀁 𑀬𑀸𑀘𑀓𑀁 𑀧𑀲𑁆𑀲𑀸𑀫𑀺, 𑀅𑀚𑁆𑀚 𑀫𑁂 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 ¶ 𑀧𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀓𑀪𑀸𑀚𑀦𑁂𑀦𑁂𑀯 𑀆𑀤𑀸𑀬 𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀫𑁂 𑀤𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀅𑀢𑁆𑀢𑀦𑁄 𑀅𑀲𑁂𑀲𑁂𑀢𑁆𑀯𑀸𑀯 𑀢𑀲𑁆𑀲 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀢𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀅𑀧𑀘𑀺𑀢𑁆𑀯𑀸 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀘𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺.

𑀲𑀓𑁆𑀓𑁄 𑀧𑀼𑀦 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀅𑀕𑀫𑀸𑀲𑀺. 𑀧𑀼𑀦𑀧𑀺𑀲𑁆𑀲 𑀤𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀣𑁂𑀯 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯 𑀤𑀢𑁆𑀯𑀸 ‘‘𑀅𑀳𑁄 𑀫𑁂 𑀮𑀸𑀪𑀸 𑀯𑀢, 𑀓𑀸𑀭𑀧𑀡𑁆𑀡𑀸𑀦𑀺 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁 𑀧𑀲𑀼𑀢’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀢𑀬𑁄 𑀤𑀺𑀯𑀲𑁂 𑀅𑀦𑀸𑀳𑀸𑀭𑀢𑀸𑀬 𑀤𑀼𑀩𑁆𑀩𑀮𑁄𑀧𑀺 𑀲𑀫𑀸𑀦𑁄 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀻𑀤𑀺. 𑀲𑀓𑁆𑀓𑁄𑀧𑀺 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 ¶ 𑀩𑁆𑀭𑀸𑀳𑁆𑀫𑀡𑁄 𑀢𑀬𑁄 𑀤𑀺𑀯𑀲𑁂 𑀦𑀺𑀭𑀸𑀳𑀸𑀭𑁄 𑀳𑀼𑀢𑁆𑀯𑀸 𑀏𑀯𑀁 𑀤𑀼𑀩𑁆𑀩𑀮𑁄𑀧𑀺 𑀤𑀸𑀦𑀁 𑀤𑁂𑀦𑁆𑀢𑁄 𑀢𑀼𑀝𑁆𑀞𑀘𑀺𑀢𑁆𑀢𑁄𑀯 𑀤𑁂𑀢𑀺, 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀳𑀁 𑀇𑀫𑀁 ‘𑀇𑀤𑀁 𑀦𑀸𑀫 𑀧𑀢𑁆𑀣𑁂𑀢𑁆𑀯𑀸 𑀤𑁂𑀢𑀻’𑀢𑀺 𑀦 𑀚𑀸𑀦𑀸𑀫𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀅𑀚𑁆𑀛𑀸𑀲𑀬𑀫𑀲𑁆𑀲 𑀲𑀼𑀢𑁆𑀯𑀸 𑀤𑀸𑀦𑀓𑀸𑀭𑀡𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀫𑀚𑁆𑀛𑀦𑁆𑀳𑀺𑀓𑁂 𑀯𑀻𑀢𑀺𑀯𑀢𑁆𑀢𑁂 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀕𑀕𑀦𑀢𑀮𑁂 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀚𑀮𑀫𑀸𑀦𑁄 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀼𑀭𑀢𑁄𑀯 𑀞𑀢𑁆𑀯𑀸 ‘‘𑀅𑀫𑁆𑀪𑁄 𑀢𑀸𑀧𑀲, 𑀏𑀯𑀁 𑀉𑀡𑁆𑀳𑀯𑀸𑀢𑁂 𑀧𑀳𑀭𑀦𑁆𑀢𑁂 𑀏𑀯𑀭𑀽𑀧𑁂 𑀮𑁄𑀡𑀚𑀮𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀭𑀜𑁆𑀜𑁂 𑀓𑀺𑀫𑀢𑁆𑀣𑀁 𑀢𑀧𑁄𑀓𑀫𑁆𑀫𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁮𑁩.

‘‘𑀅𑀓𑀺𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀫𑁆𑀫𑀦𑁆𑀢𑀁, 𑀲𑀓𑁆𑀓𑁄 𑀪𑀽𑀢𑀧𑀢𑀻 𑀩𑁆𑀭𑀯𑀺;

𑀓𑀺𑀁 𑀧𑀢𑁆𑀣𑀬𑀁 𑀫𑀳𑀸𑀩𑁆𑀭𑀳𑁆𑀫𑁂, 𑀏𑀓𑁄 𑀲𑀫𑁆𑀫𑀲𑀺 𑀖𑀫𑁆𑀫𑀦𑀻’’𑀢𑀺.

𑀢𑀢𑁆𑀣 𑀓𑀺𑀁 𑀧𑀢𑁆𑀣𑀬𑀦𑁆𑀢𑀺 𑀓𑀺𑀁 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁄, 𑀉𑀤𑀸𑀳𑀼 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀆𑀤𑀻𑀦𑀁 𑀅𑀜𑁆𑀜𑀢𑀭𑀦𑁆𑀢𑀺.

𑀫𑀳𑀸𑀲𑀢𑁆𑀢𑁄 ¶ 𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑀪𑀸𑀯𑀜𑁆𑀘𑀲𑁆𑀲 𑀜𑀢𑁆𑀯𑀸 ‘‘𑀦𑀸𑀳𑀁 𑀏𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑁂𑀫𑀺, 𑀲𑀩𑁆𑀩𑀜𑁆𑀜𑀼𑀢𑀁 𑀧𑀦 𑀧𑀢𑁆𑀣𑁂𑀦𑁆𑀢𑁄 𑀢𑀧𑁄𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀧𑀓𑀸𑀲𑁂𑀢𑀼𑀁 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁪.

‘‘𑀤𑀼𑀓𑁆𑀔𑁄 ¶ 𑀧𑀼𑀦𑀩𑁆𑀪𑀯𑁄 𑀲𑀓𑁆𑀓, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁;

𑀲𑀫𑁆𑀫𑁄𑀳𑀫𑀭𑀡𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀫𑀺 𑀯𑀸𑀲𑀯𑀸’’𑀢𑀺.

𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺 𑀔𑀦𑁆𑀥𑀸𑀦𑀁 𑀪𑁂𑀤𑀦𑀁 𑀲𑀫𑁆𑀫𑁄𑀳𑀫𑀭𑀡𑀜𑁆𑀘 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀬𑀢𑁆𑀣𑁂𑀢𑀸𑀦𑀺 𑀦𑀢𑁆𑀣𑀺, 𑀢𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀇𑀥 𑀲𑀫𑁆𑀫𑀸𑀫𑀻𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀚𑁆𑀛𑀸𑀲𑀬𑀢𑀁 𑀤𑀻𑀧𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀲𑀩𑁆𑀩𑀪𑀯𑁂𑀲𑀼 𑀓𑀺𑀭𑀸𑀬𑀁 𑀉𑀓𑁆𑀓𑀡𑁆𑀞𑀺𑀢𑁄 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺, 𑀯𑀭𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀯𑀭𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁮𑁫.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀻𑀢𑀺 𑀬𑀁 𑀫𑀦𑀲𑀸 𑀇𑀘𑁆𑀙𑀲𑀺, 𑀢𑀁 𑀤𑀫𑁆𑀫𑀺, 𑀯𑀭𑀁 𑀕𑀡𑁆𑀳𑀸𑀳𑀻𑀢𑀺.

𑀫𑀳𑀸𑀲𑀢𑁆𑀢𑁄 ¶ 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁮𑁬.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀬𑁂𑀦 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘, 𑀥𑀦𑀥𑀜𑁆𑀜𑀁 𑀧𑀺𑀬𑀸𑀦𑀺 𑀘;

𑀮𑀤𑁆𑀥𑀸 𑀦𑀭𑀸 𑀦 𑀢𑀧𑁆𑀧𑀦𑁆𑀢𑀺, 𑀲𑁄 𑀮𑁄𑀪𑁄 𑀦 𑀫𑀬𑀻 𑀯𑀲𑁂’’𑀢𑀺.

𑀢𑀢𑁆𑀣 𑀯𑀭𑀜𑁆𑀘𑁂 𑀫𑁂 𑀅𑀤𑁄𑀢𑀺 𑀲𑀘𑁂 𑀯𑀭𑀁 𑀫𑀬𑁆𑀳𑀁 𑀤𑁂𑀲𑀺. 𑀧𑀺𑀬𑀸𑀦𑀺 𑀘𑀸𑀢𑀺 𑀅𑀜𑁆𑀜𑀸𑀦𑀺 𑀘 𑀬𑀸𑀦𑀺 𑀧𑀺𑀬𑀪𑀡𑁆𑀟𑀸𑀦𑀺. 𑀦 𑀢𑀧𑁆𑀧𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀼𑀢𑁆𑀢𑀸𑀤𑀬𑁄 𑀧𑀢𑁆𑀣𑁂𑀦𑁆𑀢𑀺𑀬𑁂𑀯, 𑀦 𑀢𑀺𑀢𑁆𑀢𑀺𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀦 𑀫𑀬𑀻 𑀯𑀲𑁂𑀢𑀺 𑀫𑀬𑀺 𑀫𑀸 𑀯𑀲𑀢𑀼 𑀫𑀸 𑀉𑀧𑁆𑀧𑀚𑁆𑀚𑀢𑀼.

𑀅𑀣𑀲𑁆𑀲 𑀲𑀓𑁆𑀓𑁄 𑀢𑀼𑀲𑁆𑀲𑀺𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀯𑀭𑀁 𑀤𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀘 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼 𑁋

𑁮𑁭.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁮𑁮.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀜𑁆𑀘, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀬𑁂𑀦 𑀚𑀸𑀢𑁂𑀦 𑀚𑀻𑀬𑀦𑁆𑀢𑀺, 𑀲𑁄 𑀤𑁄𑀲𑁄 𑀦 𑀫𑀬𑀻 𑀯𑀲𑁂.

𑁮𑁯.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁯𑁦.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀩𑀸𑀮𑀁 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

𑁯𑁧.

‘‘𑀓𑀺𑀁 ¶ 𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

𑁯𑁨.

‘‘𑀅𑀦𑀬𑀁 ¶ 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦𑀁.

𑁯𑁩.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁯𑁪.

‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

𑁯𑁫.

‘‘𑀓𑀺𑀁 𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

𑁯𑁬.

‘‘𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀥𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀼𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄.

𑁯𑁭.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁯𑁮.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀁, 𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸.

𑁯𑁯.

‘‘𑀤𑀤𑀢𑁄 𑀫𑁂 𑀦 𑀔𑀻𑀬𑁂𑀣, 𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀁;

𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀁, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

𑁧𑁦𑁦.

‘‘𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁧𑁦𑁧.

‘‘𑀯𑀭𑀜𑁆𑀘𑁂 ¶ 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀦 𑀫𑀁 𑀧𑀼𑀦 𑀉𑀧𑁂𑀬𑁆𑀬𑀸𑀲𑀺, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

𑁧𑁦𑁨.

‘‘𑀩𑀳𑀽𑀳𑀺 𑀯𑀢𑀘𑀭𑀺𑀬𑀸𑀳𑀺, 𑀦𑀭𑀸 𑀘 𑀅𑀣 𑀦𑀸𑀭𑀺𑀬𑁄;

𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀦𑁆𑀢𑀺, 𑀓𑀺𑀁 𑀦𑀼 𑀫𑁂 𑀤𑀲𑁆𑀲𑀦𑁂 𑀪𑀬𑀁.

𑁧𑁦𑁩.

‘‘𑀢𑀁 𑀢𑀸𑀤𑀺𑀲𑀁 𑀤𑁂𑀯𑀯𑀡𑁆𑀡𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀤𑀺𑀲𑁆𑀯𑀸 𑀢𑀧𑁄 𑀧𑀫𑀚𑁆𑀚𑁂𑀬𑁆𑀬𑀁, 𑀏𑀢𑀁 𑀢𑁂 𑀤𑀲𑁆𑀲𑀦𑁂 𑀪𑀬’’𑀦𑁆𑀢𑀺.

𑀢𑀢𑁆𑀣 𑀬𑁂𑀦 𑀚𑀸𑀢𑁂𑀦𑀸𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀚𑀸𑀢𑁂𑀦 𑀓𑀼𑀤𑁆𑀥𑀸 𑀲𑀢𑁆𑀢𑀸 𑀧𑀸𑀡𑀯𑀥𑀸𑀤𑀻𑀦𑀁 𑀓𑀢𑀢𑁆𑀢𑀸 𑀭𑀸𑀚𑀤𑀡𑁆𑀟𑀯𑀲𑁂𑀦 𑀯𑀺𑀲𑀔𑀸𑀤𑀦𑀸𑀤𑀻𑀳𑀺 𑀯𑀸 𑀅𑀢𑁆𑀢𑀦𑁄 𑀫𑀭𑀡𑀯𑀲𑁂𑀦 ¶ 𑀏𑀢𑀸𑀦𑀺 𑀔𑁂𑀢𑁆𑀢𑀸𑀤𑀻𑀦𑀺 𑀚𑀻𑀬𑀦𑁆𑀢𑀺, 𑀲𑁄 𑀤𑁄𑀲𑁄 𑀫𑀬𑀺 𑀦 𑀯𑀲𑁂𑀬𑁆𑀬𑀸𑀢𑀺 𑀬𑀸𑀘𑀢𑀺. 𑀦 𑀲𑀼𑀡𑁂𑀢𑀺 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀯𑀲𑀢𑀻𑀢𑀺𑀧𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀦 𑀲𑀼𑀡𑁂𑀬𑁆𑀬𑀁. 𑀓𑀺𑀁 𑀦𑀼 𑀢𑁂 𑀅𑀓𑀭𑀦𑁆𑀢𑀺 𑀓𑀺𑀁 𑀦𑀼 𑀢𑀯 𑀩𑀸𑀮𑁂𑀦 𑀫𑀸𑀢𑀸 𑀫𑀸𑀭𑀺𑀢𑀸, 𑀉𑀤𑀸𑀳𑀼 𑀢𑀯 𑀧𑀺𑀢𑀸, 𑀅𑀜𑁆𑀜𑀁 𑀯𑀸 𑀧𑀦 𑀢𑁂 𑀓𑀺𑀁 𑀦𑀸𑀫 𑀅𑀦𑀢𑁆𑀣𑀁 𑀩𑀸𑀮𑁄 𑀅𑀓𑀭𑀁.

𑀅𑀦𑀬𑀁 𑀦𑀬𑀢𑀻𑀢𑀺 𑀅𑀓𑀸𑀭𑀡𑀁 ‘‘𑀓𑀸𑀭𑀡’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀸𑀫𑀻𑀢𑀺 𑀏𑀯𑀭𑀽𑀧𑀸𑀦𑀺 𑀅𑀦𑀢𑁆𑀣𑀓𑀫𑁆𑀫𑀸𑀦𑀺 𑀘𑀺𑀦𑁆𑀢𑁂𑀢𑀺. 𑀅𑀥𑀼𑀭𑀸𑀬𑀦𑁆𑀢𑀺 𑀲𑀤𑁆𑀥𑀸𑀥𑀼𑀭𑀲𑀻𑀮𑀥𑀼𑀭𑀧𑀜𑁆𑀜𑀸𑀥𑀼𑀭𑁂𑀲𑀼 𑀅𑀬𑁄𑀚𑁂𑀢𑁆𑀯𑀸 𑀅𑀬𑁄𑀕𑁂 𑀦𑀺𑀬𑀼𑀜𑁆𑀚𑀢𑀺. 𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀻𑀢𑀺 𑀤𑀼𑀦𑁆𑀦𑀬𑁄𑀯 𑀢𑀲𑁆𑀲 𑀲𑁂𑀬𑁆𑀬𑁄 𑀳𑁄𑀢𑀺. 𑀧𑀜𑁆𑀘 𑀤𑀼𑀲𑁆𑀲𑀻𑀮𑀓𑀫𑁆𑀫𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑀫𑁂𑀯 𑀲𑁂𑀬𑁆𑀬𑁄𑀢𑀺 𑀕𑀡𑁆𑀳𑀸𑀢𑀺, 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀤𑀼𑀦𑁆𑀦𑀬𑁄 𑀳𑁄𑀢𑀺 𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀲𑀫𑁆𑀫𑀸 𑀯𑀼𑀢𑁆𑀢𑁄𑀢𑀺 𑀳𑁂𑀢𑀼𑀦𑀸 ¶ 𑀓𑀸𑀭𑀡𑁂𑀦 𑀯𑀼𑀢𑁆𑀢𑁄 𑀓𑀼𑀧𑁆𑀧𑀢𑀺. 𑀯𑀺𑀦𑀬𑀦𑁆𑀢𑀺 ‘‘𑀏𑀯𑀁 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀓𑀁 𑀆𑀘𑀸𑀭𑀯𑀺𑀦𑀬𑀁 𑀦 𑀚𑀸𑀦𑀸𑀢𑀺, 𑀑𑀯𑀸𑀤𑀜𑁆𑀘 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀲𑀸𑀥𑀼 𑀢𑀲𑁆𑀲𑀸𑀢𑀺 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀢𑀲𑁆𑀲 𑀅𑀤𑀲𑁆𑀲𑀦𑀫𑁂𑀯 𑀲𑀸𑀥𑀼.

𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀻𑀢𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬. 𑀤𑀺𑀩𑁆𑀩𑀸 𑀪𑀓𑁆𑀔𑀸𑀢𑀺 𑀤𑀺𑀩𑁆𑀩𑀪𑁄𑀚𑀦𑀁 𑀬𑀸𑀘𑀓𑀸𑀢𑀺 𑀢𑀲𑁆𑀲 𑀤𑀺𑀩𑁆𑀩𑀪𑁄𑀚𑀦𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀸. 𑀯𑀢𑀘𑀭𑀺𑀬𑀸𑀳𑀻𑀢𑀺 𑀤𑀸𑀦𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑁂𑀳𑀺. 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀦𑁆𑀢𑀻𑀢𑀺 𑀤𑀲𑁆𑀲𑀦𑀁 𑀫𑀫 𑀅𑀪𑀺𑀓𑀗𑁆𑀔𑀦𑁆𑀢𑀺. 𑀢𑀁 𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁. 𑀧𑀫𑀚𑁆𑀚𑁂𑀬𑁆𑀬𑀦𑁆𑀢𑀺 𑀧𑀫𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀁. 𑀢𑀯 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀬𑁆𑀬𑀁, 𑀏𑀯𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑁂 𑀢𑀧𑁄𑀓𑀫𑁆𑀫𑁂 𑀲𑀓𑁆𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀧𑀫𑀢𑁆𑀢𑁄 𑀦𑀸𑀫 𑀪𑀯𑁂𑀬𑁆𑀬𑀁, 𑀏𑀢𑀁 𑀢𑀯 𑀤𑀲𑁆𑀲𑀦𑁂 𑀫𑀬𑁆𑀳𑀁 𑀪𑀬𑀦𑁆𑀢𑀺.

𑀲𑀓𑁆𑀓𑁄 ‘‘𑀲𑀸𑀥𑀼, 𑀪𑀦𑁆𑀢𑁂, 𑀇𑀢𑁄 𑀧𑀝𑁆𑀞𑀸𑀬 𑀦 𑀢𑁂 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ¶ 𑀧𑀓𑁆𑀓𑀸𑀫𑀺. 𑀫𑀳𑀸𑀲𑀢𑁆𑀢𑁄 𑀬𑀸𑀯𑀚𑀻𑀯𑀁 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀓𑀺𑀢𑁆𑀢𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁮𑁧] 𑁮. 𑀢𑀓𑁆𑀓𑀸𑀭𑀺𑀬𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀫𑁂𑀯 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑀺 𑀩𑀸𑀮𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑁄𑀯𑀲𑁆𑀲𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀕𑀡𑀁 𑀧𑀳𑀸𑀬 𑀯𑀺𑀯𑀺𑀢𑁆𑀢𑀸𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀸 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑁄𑀓𑀸𑀮𑀺𑀓𑀭𑀝𑁆𑀞𑁂 𑀓𑁄𑀓𑀸𑀮𑀺𑀓𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀏𑀯𑀫𑀸𑀳𑀁𑀲𑀼 ‘‘𑀆𑀯𑀼𑀲𑁄 𑀓𑁄𑀓𑀸𑀮𑀺𑀓, 𑀢𑀁 ¶ 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁, 𑀅𑀫𑁆𑀳𑁂 𑀘 𑀦𑀺𑀲𑁆𑀲𑀸𑀬 𑀢𑀯 𑀨𑀸𑀲𑀼𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀢𑁂𑀫𑀸𑀲𑀁 𑀇𑀥 𑀯𑀲𑁂𑀬𑁆𑀬𑀸𑀫𑀸’’𑀢𑀺. ‘‘𑀓𑁄 𑀧𑀦𑀸𑀯𑀼𑀲𑁄, 𑀫𑀁 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑀸𑀓𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺. 𑀲𑀘𑁂 𑀢𑁆𑀯𑀁 𑀆𑀯𑀼𑀲𑁄 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀇𑀥 𑀯𑀺𑀳𑀭𑀦𑁆𑀢𑀻’’𑀢𑀺 𑀓𑀲𑁆𑀲𑀘𑀺 𑀦𑀸𑀭𑁄𑀘𑁂𑀬𑁆𑀬𑀸𑀲𑀺, 𑀫𑀬𑀁 𑀲𑀼𑀔𑀁 𑀯𑀺𑀳𑀭𑁂𑀬𑁆𑀬𑀸𑀫, 𑀅𑀬𑀁 𑀢𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀨𑀸𑀲𑀼𑀯𑀺𑀳𑀸𑀭𑁄𑀢𑀺. ‘‘𑀅𑀣 ¶ 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀫𑀬𑁆𑀳𑀁 𑀓𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀫𑀬𑀁 𑀢𑀼𑀬𑁆𑀳𑀁 𑀅𑀦𑁆𑀢𑁄𑀢𑁂𑀫𑀸𑀲𑀁 𑀥𑀫𑁆𑀫𑀁 𑀯𑀸𑀘𑁂𑀲𑁆𑀲𑀸𑀫, 𑀥𑀫𑁆𑀫𑀓𑀣𑀁 𑀓𑀣𑁂𑀲𑁆𑀲𑀸𑀫, 𑀏𑀲 𑀢𑀼𑀬𑁆𑀳𑀁 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺. ‘‘𑀯𑀲𑀣𑀸𑀯𑀼𑀲𑁄, 𑀬𑀣𑀸𑀚𑁆𑀛𑀸𑀲𑀬𑁂𑀦𑀸’’𑀢𑀺. 𑀲𑁄 𑀢𑁂𑀲𑀁 𑀧𑀢𑀺𑀭𑀽𑀧𑀁 𑀲𑁂𑀦𑀸𑀲𑀦𑀁 𑀅𑀤𑀸𑀲𑀺. 𑀢𑁂 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀲𑀼𑀔𑀁 𑀯𑀲𑀺𑀁𑀲𑀼. 𑀓𑁄𑀘𑀺 𑀦𑁂𑀲𑀁 𑀢𑀢𑁆𑀣 𑀯𑀲𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺.

𑀢𑁂 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 ‘‘𑀆𑀯𑀼𑀲𑁄, 𑀢𑀁 𑀦𑀺𑀲𑁆𑀲𑀸𑀬 𑀲𑀼𑀔𑀁 𑀯𑀼𑀢𑁆𑀣𑀸𑀫𑁆𑀳, 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀕𑀘𑁆𑀙𑀸𑀫𑀸’’𑀢𑀺 𑀢𑀁 𑀆𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂 𑀆𑀤𑀸𑀬 𑀥𑀼𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺. 𑀣𑁂𑀭𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀲𑀺 ‘‘𑀉𑀧𑀸𑀲𑀓𑀸, 𑀢𑀼𑀫𑁆𑀳𑁂 𑀢𑀺𑀭𑀘𑁆𑀙𑀸𑀦𑀲𑀤𑀺𑀲𑀸, 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀢𑁂𑀫𑀸𑀲𑀁 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑁂 𑀦 𑀚𑀸𑀦𑀺𑀢𑁆𑀣, 𑀇𑀤𑀸𑀦𑀺 𑀢𑁂 𑀕𑀢𑀸’’𑀢𑀺. 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸 𑀧𑀦, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀦𑀸𑀭𑁄𑀘𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀩𑀳𑀼𑀁 𑀲𑀧𑁆𑀧𑀺𑀢𑁂𑀮𑀸𑀤𑀺𑀪𑁂𑀲𑀚𑁆𑀚𑀜𑁆𑀘𑁂𑀯 𑀯𑀢𑁆𑀣𑀘𑁆𑀙𑀸𑀤𑀦𑀜𑁆𑀘 𑀕𑀳𑁂𑀢𑁆𑀯𑀸 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀔𑀫𑀣 𑀦𑁄, 𑀪𑀦𑁆𑀢𑁂, 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀅𑀕𑁆𑀕𑀲𑀸𑀯𑀓𑀪𑀸𑀯𑀁 𑀦 𑀚𑀸𑀦𑀸𑀫, 𑀅𑀚𑁆𑀚 𑀦𑁄 𑀓𑁄𑀓𑀸𑀮𑀺𑀓𑀪𑀤𑀦𑁆𑀢𑀲𑁆𑀲 𑀯𑀘𑀦𑁂𑀦 𑀜𑀸𑀢𑀸, 𑀅𑀫𑁆𑀳𑀸𑀓𑀁 𑀅𑀦𑀼𑀓𑀫𑁆𑀧𑀸𑀬 𑀇𑀫𑀸𑀦𑀺 𑀪𑁂𑀲𑀚𑁆𑀚𑀯𑀢𑁆𑀣𑀘𑁆𑀙𑀸𑀤𑀦𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼.

𑀓𑁄𑀓𑀸𑀮𑀺𑀓𑁄 ¶ ‘‘𑀣𑁂𑀭𑀸 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸, 𑀇𑀫𑀸𑀦𑀺 𑀯𑀢𑁆𑀣𑀸𑀦𑀺 𑀅𑀢𑁆𑀢𑀦𑀸 𑀅𑀕𑁆𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀤𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀢𑁄. 𑀣𑁂𑀭𑀸 𑀪𑀺𑀓𑁆𑀔𑀼𑀧𑀭𑀺𑀧𑀸𑀘𑀺𑀢𑀢𑁆𑀢𑀸 𑀢𑀢𑁄 𑀓𑀺𑀜𑁆𑀘𑀺 𑀦𑁂𑀯 𑀅𑀢𑁆𑀢𑀦𑀸 𑀕𑀡𑁆𑀳𑀺𑀁𑀲𑀼, 𑀦 𑀓𑁄𑀓𑀸𑀮𑀺𑀓𑀲𑁆𑀲 𑀤𑀸𑀧𑁂𑀲𑀼𑀁. 𑀉𑀧𑀸𑀲𑀓𑀸 ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀅𑀕𑀡𑁆𑀳𑀦𑁆𑀢𑀸 𑀧𑀼𑀦 𑀅𑀫𑁆𑀳𑀸𑀓𑀁 𑀅𑀦𑀼𑀓𑀫𑁆𑀧𑀸𑀬 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀣𑁂𑀭𑀸 𑀅𑀦𑀥𑀺𑀯𑀸𑀲𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄 ‘‘𑀇𑀫𑁂 𑀣𑁂𑀭𑀸 𑀅𑀢𑁆𑀢𑀦𑀸 𑀅𑀕𑀡𑁆𑀳𑀦𑁆𑀢𑀸 𑀫𑀬𑁆𑀳𑀁 𑀦 𑀤𑀸𑀧𑁂𑀲𑀼’’𑀦𑁆𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺. 𑀣𑁂𑀭𑀸𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀣𑁄𑀓𑀁 𑀯𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑁂 𑀘 𑀆𑀤𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀓𑁄𑀓𑀸𑀮𑀺𑀓𑀭𑀝𑁆𑀞𑀁 𑀧𑀢𑁆𑀢𑀸. 𑀢𑁂 𑀉𑀧𑀸𑀲𑀓𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀣𑁂𑀭𑁂 𑀆𑀤𑀸𑀬 𑀢𑀫𑁂𑀯 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀧𑀳𑀼𑀢𑀁 𑀪𑁂𑀲𑀚𑁆𑀚𑀯𑀢𑁆𑀣𑀘𑁆𑀙𑀸𑀤𑀦𑀁 ¶ 𑀉𑀧𑁆𑀧𑀚𑁆𑀚𑀺, 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑀪𑀺𑀓𑁆𑀔𑀽 𑀘𑀻𑀯𑀭𑀸𑀦𑀺 𑀯𑀺𑀘𑀸𑀭𑁂𑀦𑁆𑀢𑀸 𑀲𑀤𑁆𑀥𑀺𑀁 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀤𑁂𑀦𑁆𑀢𑀺 ¶ , 𑀓𑁄𑀓𑀸𑀮𑀺𑀓𑀲𑁆𑀲 𑀦 𑀤𑁂𑀦𑁆𑀢𑀺, 𑀣𑁂𑀭𑀸𑀧𑀺 𑀢𑀲𑁆𑀲 𑀦 𑀤𑀸𑀧𑁂𑀦𑁆𑀢𑀺. 𑀓𑁄𑀓𑀸𑀮𑀺𑀓𑁄 𑀘𑀻𑀯𑀭𑀁 𑀅𑀮𑀪𑀺𑀢𑁆𑀯𑀸 ‘‘𑀧𑀸𑀧𑀺𑀘𑁆𑀙𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀼𑀩𑁆𑀩𑁂 𑀤𑀻𑀬𑀫𑀸𑀦𑀁 𑀮𑀸𑀪𑀁 𑀅𑀕𑁆𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀕𑀡𑁆𑀳𑀦𑁆𑀢𑀺, 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀅𑀜𑁆𑀜𑁂 𑀦 𑀑𑀮𑁄𑀓𑁂𑀦𑁆𑀢𑀻’’𑀢𑀺 𑀣𑁂𑀭𑁂 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀣𑁂𑀭𑀸 ‘‘𑀅𑀬𑀁 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀅𑀓𑀼𑀲𑀮𑀁 𑀧𑀲𑀯𑀢𑀻’’𑀢𑀺 𑀲𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀅𑀜𑁆𑀜𑀁, 𑀪𑀦𑁆𑀢𑁂, 𑀓𑀢𑀺𑀧𑀸𑀳𑀁 𑀯𑀲𑀣𑀸’’𑀢𑀺 𑀫𑀦𑀼𑀲𑁆𑀲𑁂𑀳𑀺 𑀬𑀸𑀘𑀺𑀬𑀫𑀸𑀦𑀸𑀧𑀺 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀇𑀘𑁆𑀙𑀺𑀁𑀲𑀼.

𑀅𑀣𑁂𑀓𑁄 𑀤𑀳𑀭𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀉𑀧𑀸𑀲𑀓𑀸, 𑀓𑀣𑀁 𑀣𑁂𑀭𑀸 𑀯𑀲𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑁄 𑀣𑁂𑀭𑁄 𑀇𑀥 𑀇𑀫𑁂𑀲𑀁 𑀯𑀸𑀲𑀁 𑀦 𑀲𑀳𑀢𑀻’’𑀢𑀺. 𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀓𑀺𑀭 𑀣𑁂𑀭𑀸𑀦𑀁 𑀇𑀥 𑀯𑀸𑀲𑀁 𑀦 𑀲𑀳𑀣, 𑀕𑀘𑁆𑀙𑀣 𑀦𑁂 𑀔𑀫𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑁂𑀣, 𑀲𑀘𑁂 𑀦 𑀦𑀺𑀯𑀢𑁆𑀢𑁂𑀣, 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀲𑀣𑀸’’𑀢𑀺 𑀆𑀳𑀁𑀲𑀼. 𑀲𑁄 𑀉𑀧𑀸𑀲𑀓𑀸𑀦𑀁 𑀪𑀬𑁂𑀦 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀬𑀸𑀘𑀺. 𑀣𑁂𑀭𑀸 ‘‘𑀕𑀘𑁆𑀙𑀸𑀯𑀼𑀲𑁄, 𑀦 𑀫𑀬𑀁 𑀦𑀺𑀯𑀢𑁆𑀢𑀸𑀫𑀸’’𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀣𑁂𑀭𑁂 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀳𑀸𑀭𑀫𑁂𑀯 𑀧𑀘𑁆𑀘𑀸𑀕𑀢𑁄. 𑀅𑀣 𑀦𑀁 𑀉𑀧𑀸𑀲𑀓𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀦𑀺𑀯𑀢𑁆𑀢𑀺𑀢𑀸 𑀢𑁂, 𑀪𑀦𑁆𑀢𑁂, 𑀣𑁂𑀭𑀸’’𑀢𑀺. ‘‘𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁 𑀆𑀯𑀼𑀲𑁄’’𑀢𑀺. 𑀅𑀣 𑀦𑀁 ‘‘𑀇𑀫𑀲𑁆𑀫𑀺𑀁 𑀧𑀸𑀧𑀥𑀫𑁆𑀫𑁂 𑀯𑀲𑀦𑁆𑀢𑁂 𑀇𑀥 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀦 𑀯𑀲𑀺𑀲𑁆𑀲𑀦𑁆𑀢𑀺, 𑀦𑀺𑀓𑁆𑀓𑀟𑁆𑀠𑀸𑀫 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀸 𑀢𑁆𑀯𑀁 𑀇𑀥 𑀯𑀲𑀺, 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀼𑀬𑁆𑀳𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻’’𑀢𑀺 𑀆𑀳𑀁𑀲𑀼. 𑀲𑁄 𑀢𑁂𑀳𑀺 𑀦𑀺𑀓𑁆𑀓𑀟𑁆𑀠𑀺𑀢𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀸𑀧𑀺𑀘𑁆𑀙𑀸, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀫𑀸 𑀳𑁂𑀯𑀁 𑀓𑁄𑀓𑀸𑀮𑀺𑀓, 𑀅𑀯𑀘, 𑀫𑀸 𑀳𑁂𑀯𑀁 𑀓𑁄𑀓𑀸𑀮𑀺𑀓 𑀅𑀯𑀘, 𑀧𑀲𑀸𑀤𑁂𑀳𑀺 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁, 𑀢𑁂 𑀧𑁂𑀲𑀮𑀸 𑀪𑀺𑀓𑁆𑀔𑀽’’𑀢𑀺 𑀯𑀸𑀭𑁂𑀢𑀺. 𑀯𑀸𑀭𑀺𑀢𑁄𑀧𑀺 𑀓𑁄𑀓𑀸𑀮𑀺𑀓𑁄 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀤𑁆𑀤𑀳𑀣, 𑀅𑀳𑀁 𑀧𑀘𑁆𑀘𑀓𑁆𑀔𑀢𑁄 𑀅𑀤𑁆𑀤𑀲𑀁, 𑀧𑀸𑀧𑀺𑀘𑁆𑀙𑀸 𑀏𑀢𑁂 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀸 𑀤𑀼𑀲𑁆𑀲𑀻𑀮𑀸’’𑀢𑀺 𑀯𑀢𑁆𑀯𑀸 𑀬𑀸𑀯𑀢𑀢𑀺𑀬𑀁 𑀲𑀢𑁆𑀣𑀸𑀭𑀸 𑀯𑀸𑀭𑀺𑀢𑁄𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀧𑀓𑁆𑀓𑀦𑁆𑀢𑀫𑀢𑁆𑀢𑀲𑁆𑀲𑁂𑀯 𑀲𑀓𑀮𑀲𑀭𑀻𑀭𑁂 𑀲𑀸𑀲𑀧𑀫𑀢𑁆𑀢𑀸 𑀧𑀺𑀴𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀺𑀢𑁆𑀯𑀸 ¶ 𑀩𑁂𑀴𑀼𑀯𑀧𑀓𑁆𑀓𑀫𑀢𑁆𑀢𑀸 𑀳𑀼𑀢𑁆𑀯𑀸 𑀪𑀺𑀚𑁆𑀚𑀺𑀢𑁆𑀯𑀸 𑀧𑀼𑀩𑁆𑀩𑀮𑁄𑀳𑀺𑀢𑀸𑀦𑀺 𑀧𑀕𑁆𑀖𑀭𑀺𑀁𑀲𑀼. 𑀲𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀧𑀚𑁆𑀚𑀺. ‘‘𑀓𑁄𑀓𑀸𑀮𑀺𑀓𑁂𑀦 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀓𑁆𑀓𑀼𑀝𑁆𑀞𑀸’’𑀢𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀅𑀣𑀲𑁆𑀲 ¶ 𑀉𑀧𑀚𑁆𑀛𑀸𑀬𑁄 𑀢𑀼𑀭𑀽 𑀦𑀸𑀫 𑀩𑁆𑀭𑀳𑁆𑀫𑀸 ¶ 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀣𑁂𑀭𑁂 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀓𑁄𑀓𑀸𑀮𑀺𑀓, 𑀨𑀭𑀼𑀲𑀁 𑀢𑁂 𑀓𑀫𑁆𑀫𑀁 𑀓𑀢𑀁, 𑀅𑀕𑁆𑀕𑀲𑀸𑀯𑀓𑁂 𑀧𑀲𑀸𑀤𑁂𑀳𑀻’’𑀢𑀺 𑀆𑀳. ‘‘𑀓𑁄 𑀧𑀦 𑀢𑁆𑀯𑀁 𑀆𑀯𑀼𑀲𑁄’’𑀢𑀺? ‘‘𑀢𑀼𑀭𑀽 𑀩𑁆𑀭𑀳𑁆𑀫𑀸 𑀦𑀸𑀫𑀸𑀳’’𑀦𑁆𑀢𑀺. ‘‘𑀦𑀦𑀼 𑀢𑁆𑀯𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑀸𑀕𑀸𑀫𑀻𑀢𑀺 𑀩𑁆𑀬𑀸𑀓𑀢𑁄, 𑀅𑀦𑀸𑀕𑀸𑀫𑀻 𑀘 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀅𑀲𑁆𑀫𑀸 𑀮𑁄𑀓𑀸𑀢𑀺 𑀯𑀼𑀢𑁆𑀢𑀁, 𑀢𑁆𑀯𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀬𑀓𑁆𑀔𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀫𑀳𑀸𑀩𑁆𑀭𑀳𑁆𑀫𑀁 𑀅𑀧𑀲𑀸𑀤𑁂𑀲𑀺. 𑀲𑁄 𑀢𑀁 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀢𑀯 𑀯𑀸𑀘𑀸𑀬 𑀢𑁆𑀯𑀜𑁆𑀜𑁂𑀯 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀫𑁂𑀯 𑀕𑀢𑁄. 𑀓𑁄𑀓𑀸𑀮𑀺𑀓𑁄𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀧𑀤𑀼𑀫𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀸 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀺, 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀅𑀕𑀼𑀡𑀁 𑀓𑀣𑁂𑀦𑁆𑀢𑀸 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀓𑁄𑀓𑀸𑀮𑀺𑀓𑁄 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀅𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀧𑀤𑀼𑀫𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀓𑁄𑀓𑀸𑀮𑀺𑀓𑁄 𑀯𑀘𑀦𑁂𑀦 𑀳𑀢𑁄 𑀅𑀢𑁆𑀢𑀦𑁄 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀏𑀲 𑀅𑀢𑁆𑀢𑀦𑁄 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀧𑀺𑀗𑁆𑀕𑀮𑁄 𑀦𑀺𑀓𑁆𑀔𑀦𑁆𑀢𑀤𑀸𑀞𑁄 𑀅𑀳𑁄𑀲𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀅𑀜𑁆𑀜𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀅𑀢𑀺𑀘𑀭𑀺, 𑀲𑁄𑀧𑀺 𑀢𑀸𑀤𑀺𑀲𑁄𑀯. 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑀺𑀁 𑀧𑀼𑀦𑀧𑁆𑀧𑀼𑀦𑀁 𑀯𑀸𑀭𑁂𑀦𑁆𑀢𑁄𑀧𑀺 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀁 𑀫𑀫 𑀯𑁂𑀭𑀺𑀁 𑀲𑀳𑀢𑁆𑀣𑀸 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀉𑀧𑀸𑀬𑁂𑀦 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ‘‘𑀫𑀳𑀸𑀭𑀸𑀚, 𑀢𑀯 𑀦𑀕𑀭𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀦𑀕𑀭𑀁, 𑀢𑁆𑀯𑀁 𑀅𑀕𑁆𑀕𑀭𑀸𑀚𑀸, 𑀏𑀯𑀁 𑀅𑀕𑁆𑀕𑀭𑀜𑁆𑀜𑁄 𑀦𑀸𑀫 𑀢𑀯 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀤𑀼𑀬𑀼𑀢𑁆𑀢𑀁 𑀅𑀯𑀫𑀗𑁆𑀕𑀮’’𑀦𑁆𑀢𑀺. ‘‘𑀆𑀘𑀭𑀺𑀬, 𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀫𑀗𑁆𑀕𑀮𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀧𑀼𑀭𑀸𑀡𑀤𑁆𑀯𑀸𑀭𑀁 𑀳𑀸𑀭𑁂𑀢𑁆𑀯𑀸 𑀫𑀗𑁆𑀕𑀮𑀬𑀼𑀢𑁆𑀢𑀸𑀦𑀺 𑀤𑀸𑀭𑀽𑀦𑀺 𑀕𑀳𑁂𑀢𑁆𑀯𑀸 𑀦𑀕𑀭𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀪𑀽𑀢𑀸𑀦𑀁 𑀩𑀮𑀺𑀁 𑀤𑀢𑁆𑀯𑀸 𑀫𑀗𑁆𑀕𑀮𑀦𑀓𑁆𑀔𑀢𑁆𑀢𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀢𑁂𑀦 𑀳𑀺 𑀏𑀯𑀁 𑀓𑀭𑁄𑀣𑀸’’𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀓𑁆𑀓𑀸𑀭𑀺𑀬𑁄 𑀦𑀸𑀫 𑀫𑀸𑀡𑀯𑁄 ¶ 𑀳𑀼𑀢𑁆𑀯𑀸 ¶ 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀧𑀼𑀭𑁄𑀳𑀺𑀢𑁄 𑀧𑀼𑀭𑀸𑀡𑀤𑁆𑀯𑀸𑀭𑀁 𑀳𑀸𑀭𑁂𑀢𑁆𑀯𑀸 𑀦𑀯𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀦𑀺𑀝𑁆𑀞𑀺𑀢𑀁, 𑀤𑁂𑀯, 𑀤𑁆𑀯𑀸𑀭𑀁, 𑀲𑁆𑀯𑁂 𑀪𑀤𑁆𑀤𑀓𑀁 𑀦𑀓𑁆𑀔𑀢𑁆𑀢𑀁, 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀮𑀺𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀆𑀘𑀭𑀺𑀬, 𑀩𑀮𑀺𑀓𑀫𑁆𑀫𑀢𑁆𑀣𑀸𑀬 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀤𑁂𑀯, 𑀫𑀳𑁂𑀲𑀓𑁆𑀔𑀁 𑀤𑁆𑀯𑀸𑀭𑀁 𑀫𑀳𑁂𑀲𑀓𑁆𑀔𑀸𑀳𑀺 𑀤𑁂𑀯𑀢𑀸𑀳𑀺 ¶ 𑀧𑀭𑀺𑀕𑁆𑀕𑀳𑀺𑀢𑀁, 𑀏𑀓𑀁 𑀧𑀺𑀗𑁆𑀕𑀮𑀁 𑀦𑀺𑀓𑁆𑀔𑀦𑁆𑀢𑀤𑀸𑀞𑀁 𑀉𑀪𑀢𑁄𑀯𑀺𑀲𑀼𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀫𑀁𑀲𑀮𑁄𑀳𑀺𑀢𑁂𑀦 𑀩𑀮𑀺𑀁 𑀓𑀢𑁆𑀯𑀸 𑀲𑀭𑀻𑀭𑀁 𑀳𑁂𑀝𑁆𑀞𑀸 𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀜𑁆𑀘 𑀦𑀕𑀭𑀲𑁆𑀲 𑀘 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀲𑀸𑀥𑀼 𑀆𑀘𑀭𑀺𑀬, 𑀏𑀯𑀭𑀽𑀧𑀁 𑀩𑁆𑀭𑀸𑀳𑁆𑀫𑀡𑀁 𑀫𑀸𑀭𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺.

𑀲𑁄 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀲𑁆𑀯𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀭𑀓𑁆𑀔𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀼𑀭𑀺𑀢𑀢𑀼𑀭𑀺𑀢𑁄 𑀪𑀭𑀺𑀬𑀁 𑀆𑀳 𑁋 ‘‘𑀧𑀸𑀧𑁂 𑀘𑀡𑁆𑀟𑀸𑀮𑀺 𑀇𑀢𑁄 𑀧𑀝𑁆𑀞𑀸𑀬 𑀓𑁂𑀦 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀲𑁆𑀲𑀲𑀺, 𑀲𑁆𑀯𑁂 𑀢𑁂 𑀚𑀸𑀭𑀁 𑀫𑀸𑀭𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀺𑀭𑀧𑀭𑀸𑀥𑀁 𑀓𑀺𑀁𑀓𑀸𑀭𑀡𑀸 𑀫𑀸𑀭𑁂𑀲𑁆𑀲𑀲𑀻’’𑀢𑀺? 𑀭𑀸𑀚𑀸 ‘‘𑀓𑀴𑀸𑀭𑀧𑀺𑀗𑁆𑀕𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀁𑀲𑀮𑁄𑀳𑀺𑀢𑁂𑀦 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀆𑀳, ‘‘𑀚𑀸𑀭𑁄 𑀘 𑀢𑁂 𑀓𑀴𑀸𑀭𑀧𑀺𑀗𑁆𑀕𑀮𑁄, 𑀢𑀁 𑀫𑀸𑀭𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀚𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀲𑀸𑀲𑀦𑀁 𑀧𑀸𑀳𑁂𑀲𑀺 ‘‘𑀭𑀸𑀚𑀸 𑀓𑀺𑀭 𑀓𑀴𑀸𑀭𑀧𑀺𑀗𑁆𑀕𑀮𑀁 𑀩𑁆𑀭𑀸𑀳𑁆𑀫𑀡𑀁 𑀫𑀸𑀭𑁂𑀢𑁆𑀯𑀸 𑀩𑀮𑀺𑀁 𑀓𑀸𑀢𑀼𑀓𑀸𑀫𑁄, 𑀲𑀘𑁂 𑀚𑀻𑀯𑀺𑀢𑀼𑀓𑀸𑀫𑁄, 𑀅𑀜𑁆𑀜𑁂𑀧𑀺 𑀢𑀬𑀸 𑀲𑀤𑀺𑀲𑁂 𑀩𑁆𑀭𑀸𑀳𑁆𑀫𑀡𑁂 𑀕𑀳𑁂𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀧𑀮𑀸𑀬𑀲𑁆𑀲𑀽’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀁 𑀦𑀕𑀭𑁂 𑀧𑀸𑀓𑀝𑀁 𑀅𑀳𑁄𑀲𑀺, 𑀲𑀓𑀮𑀦𑀕𑀭𑀢𑁄 𑀲𑀩𑁆𑀩𑁂 𑀓𑀴𑀸𑀭𑀧𑀺𑀗𑁆𑀕𑀮𑀸 𑀧𑀮𑀸𑀬𑀺𑀁𑀲𑀼.

𑀧𑀼𑀭𑁄𑀳𑀺𑀢𑁄 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀮𑀸𑀢𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀧𑀸𑀢𑁄𑀯 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀅𑀲𑀼𑀓𑀝𑁆𑀞𑀸𑀦𑁂 𑀓𑀴𑀸𑀭𑀧𑀺𑀗𑁆𑀕𑀮𑁄 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀣𑀺, 𑀢𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀢𑁂 𑀢𑀁 𑀅𑀧𑀲𑁆𑀲𑀦𑁆𑀢𑀸 𑀆𑀕𑀦𑁆𑀢𑁆𑀯𑀸 ‘‘𑀧𑀮𑀸𑀢𑁄 𑀓𑀺𑀭𑀸’’𑀢𑀺 𑀆𑀭𑁄𑀘𑁂𑀲𑀼𑀁. ‘‘𑀅𑀜𑁆𑀜𑀢𑁆𑀣 𑀉𑀧𑀥𑀸𑀭𑁂𑀣𑀸’’𑀢𑀺 ¶ 𑀲𑀓𑀮𑀦𑀕𑀭𑀁 𑀉𑀧𑀥𑀸𑀭𑁂𑀦𑁆𑀢𑀸𑀧𑀺 𑀦 𑀧𑀲𑁆𑀲𑀺𑀁𑀲𑀼. 𑀢𑀢𑁄 ‘‘𑀅𑀜𑁆𑀜𑀁 𑀉𑀧𑀥𑀸𑀭𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀞𑀧𑁂𑀢𑁆𑀯𑀸 𑀧𑀼𑀭𑁄𑀳𑀺𑀢𑀁 𑀅𑀜𑁆𑀜𑁄 𑀏𑀯𑀭𑀽𑀧𑁄 𑀦𑀢𑁆𑀣𑀻’’𑀢𑀺 𑀯𑀤𑀺𑀁𑀲𑀼. 𑀧𑀼𑀭𑁄𑀳𑀺𑀢𑀁 𑀦 𑀲𑀓𑁆𑀓𑀸 𑀫𑀸𑀭𑁂𑀢𑀼𑀦𑁆𑀢𑀺. ‘‘𑀤𑁂𑀯, 𑀓𑀺𑀁 𑀓𑀣𑁂𑀣, 𑀧𑀼𑀭𑁄𑀳𑀺𑀢𑀲𑁆𑀲 𑀓𑀸𑀭𑀡𑀸 𑀅𑀚𑁆𑀚 𑀤𑁆𑀯𑀸𑀭𑁂 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑁂 𑀦𑀕𑀭𑀁 𑀅𑀕𑀼𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀆𑀘𑀭𑀺𑀬𑁄 𑀓𑀣𑁂𑀦𑁆𑀢𑁄 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀢𑁄 𑀲𑀁𑀯𑀘𑁆𑀙𑀭𑀘𑁆𑀘𑀬𑁂𑀦 𑀦𑀓𑁆𑀔𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀓𑀣𑁂𑀲𑀺, 𑀲𑀁𑀯𑀘𑁆𑀙𑀭𑀁 𑀦𑀕𑀭𑁂 𑀅𑀤𑁆𑀯𑀸𑀭𑀓𑁂 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀑𑀓𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀫𑀸𑀭𑁂𑀢𑁆𑀯𑀸 𑀅𑀜𑁆𑀜𑁂𑀦 𑀩𑁆𑀬𑀢𑁆𑀢𑁂𑀦 ¶ 𑀩𑁆𑀭𑀸𑀳𑁆𑀫𑀡𑁂𑀦 𑀩𑀮𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀅𑀜𑁆𑀜𑁄 𑀆𑀘𑀭𑀺𑀬𑀲𑀤𑀺𑀲𑁄 𑀧𑀡𑁆𑀟𑀺𑀢𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺? ‘‘𑀅𑀢𑁆𑀣𑀺 𑀤𑁂𑀯, 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀢𑀓𑁆𑀓𑀸𑀭𑀺𑀬𑀫𑀸𑀡𑀯𑁄 𑀦𑀸𑀫, 𑀢𑀲𑁆𑀲 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀤𑀢𑁆𑀯𑀸 𑀫𑀗𑁆𑀕𑀮𑀁 𑀓𑀭𑁄𑀣𑀸’’𑀢𑀺.

𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀫𑁆𑀫𑀸𑀦𑀁 𑀓𑀸𑀭𑁂𑀢𑁆𑀯𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀤𑀢𑁆𑀯𑀸 𑀢𑀣𑀸 𑀓𑀸𑀢𑀼𑀁 𑀆𑀡𑀸𑀧𑁂𑀲𑀺. 𑀲𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀕𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀧𑀼𑀭𑁄𑀳𑀺𑀢𑀁 𑀭𑀸𑀚𑀸𑀦𑀼𑀪𑀸𑀯𑁂𑀦 𑀩𑀦𑁆𑀥𑀺𑀢𑁆𑀯𑀸 𑀆𑀦𑀬𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀤𑁆𑀯𑀸𑀭𑀝𑁆𑀞𑀧𑀦𑀝𑁆𑀞𑀸𑀦𑁂 𑀆𑀯𑀸𑀝𑀁 𑀔𑀡𑀸𑀧𑁂𑀢𑁆𑀯𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑁄𑀲𑀸𑀡𑀺𑀬𑀁 𑀅𑀝𑁆𑀞𑀸𑀲𑀺. 𑀆𑀘𑀭𑀺𑀬𑁄 𑀆𑀯𑀸𑀝𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀅𑀮𑀪𑀦𑁆𑀢𑁄 ‘‘𑀅𑀢𑁆𑀣𑁄 𑀢𑀸𑀯 ¶ 𑀫𑁂 𑀦𑀺𑀧𑁆𑀨𑀸𑀤𑀺𑀢𑁄 𑀅𑀳𑁄𑀲𑀺, 𑀩𑀸𑀮𑀢𑁆𑀢𑀸 𑀧𑀦 𑀫𑀼𑀔𑀁 𑀭𑀓𑁆𑀔𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑁂𑀕𑁂𑀦 𑀧𑀸𑀧𑀺𑀢𑁆𑀣𑀺𑀬𑀸 𑀓𑀣𑁂𑀲𑀺𑀁, 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀯𑀥𑁄 𑀆𑀪𑀢𑁄’’𑀢𑀺 𑀫𑀳𑀸𑀲𑀢𑁆𑀢𑀁 𑀆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁪.

‘‘𑀅𑀳𑀫𑁂𑀯 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑀺 𑀩𑀸𑀮𑁄, 𑀪𑁂𑀓𑁄𑀯𑀭𑀜𑁆𑀜𑁂 𑀅𑀳𑀺𑀫𑀯𑁆𑀳𑀸𑀬𑀫𑀸𑀦𑁄;

𑀢𑀓𑁆𑀓𑀸𑀭𑀺𑀬𑁂 𑀲𑁄𑀩𑁆𑀪𑀫𑀺𑀫𑀁 𑀧𑀢𑀸𑀫𑀺, 𑀦 𑀓𑀺𑀭𑁂𑀯 𑀲𑀸𑀥𑀼 𑀅𑀢𑀺𑀯𑁂𑀮𑀪𑀸𑀡𑀻’’𑀢𑀺.

𑀢𑀢𑁆𑀣 ¶ 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑀻𑀢𑀺 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑀺𑀁. 𑀪𑁂𑀓𑁄𑀯𑀸𑀢𑀺 𑀬𑀣𑀸 𑀅𑀭𑀜𑁆𑀜𑁂 𑀫𑀡𑁆𑀟𑀽𑀓𑁄 𑀯𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀔𑀸𑀤𑀓𑀁 𑀅𑀳𑀺𑀁 𑀅𑀯𑁆𑀳𑀸𑀬𑀫𑀸𑀦𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑀢𑀺 𑀦𑀸𑀫, 𑀏𑀯𑀁 𑀅𑀳𑀫𑁂𑀯 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑀺𑀁. 𑀢𑀓𑁆𑀓𑀸𑀭𑀺𑀬𑁂𑀢𑀺 𑀢𑀲𑁆𑀲 𑀦𑀸𑀫𑀁, 𑀢𑀓𑁆𑀓𑀸𑀭𑀺𑀬𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀁 𑀦𑀸𑀫𑀁, 𑀢𑁂𑀦𑁂𑀯 𑀢𑀁 𑀆𑀮𑀧𑀦𑁆𑀢𑁄 𑀏𑀯𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁫.

‘‘𑀧𑀧𑁆𑀧𑁄𑀢𑀺 𑀫𑀘𑁆𑀘𑁄 𑀅𑀢𑀺𑀯𑁂𑀮𑀪𑀸𑀡𑀻, 𑀩𑀦𑁆𑀥𑀁 𑀯𑀥𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘;

𑀅𑀢𑁆𑀢𑀸𑀦𑀫𑁂𑀯 𑀕𑀭𑀳𑀸𑀲𑀺 𑀏𑀢𑁆𑀣, 𑀆𑀘𑁂𑀭 𑀬𑀁 𑀢𑀁 𑀦𑀺𑀔𑀡𑀦𑁆𑀢𑀺 𑀲𑁄𑀩𑁆𑀪𑁂’’𑀢𑀺.

𑀢𑀢𑁆𑀣 ¶ 𑀅𑀢𑀺𑀯𑁂𑀮𑀪𑀸𑀡𑀻𑀢𑀺 𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀢𑁆𑀯𑀸 𑀓𑀣𑀦𑀁 𑀦𑀸𑀫 𑀦 𑀲𑀸𑀥𑀼, 𑀅𑀢𑀺𑀯𑁂𑀮𑀪𑀸𑀡𑀻 𑀧𑀼𑀭𑀺𑀲𑁄 𑀦 𑀲𑀸𑀥𑀽𑀢𑀺 𑀅𑀢𑁆𑀣𑁄. 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘𑀸𑀢𑀺 𑀆𑀘𑀭𑀺𑀬, 𑀏𑀯𑀫𑁂𑀯 𑀅𑀢𑀺𑀯𑁂𑀮𑀪𑀸𑀡𑀻 𑀧𑀼𑀭𑀺𑀲𑁄 𑀯𑀥𑀁 𑀩𑀦𑁆𑀥𑀜𑁆𑀘 𑀲𑁄𑀓𑀜𑁆𑀘 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀜𑁆𑀘 𑀧𑀧𑁆𑀧𑁄𑀢𑀺. 𑀕𑀭𑀳𑀸𑀲𑀻𑀢𑀺 𑀧𑀭𑀁 𑀅𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀸𑀦𑀁𑀬𑁂𑀯 𑀕𑀭𑀳𑁂𑀬𑁆𑀬𑀸𑀲𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀓𑀸𑀭𑀡𑁂. 𑀆𑀘𑁂𑀭 𑀬𑀁 𑀢𑀦𑁆𑀢𑀺 𑀆𑀘𑀭𑀺𑀬, 𑀬𑁂𑀦 𑀓𑀸𑀭𑀡𑁂𑀦 𑀢𑀁 𑀦𑀺𑀔𑀡𑀦𑁆𑀢𑀺 𑀲𑁄𑀩𑁆𑀪𑁂, 𑀢𑀁 𑀢𑀬𑀸𑀯 𑀓𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀸𑀦𑀫𑁂𑀯 𑀕𑀭𑀳𑁂𑀬𑁆𑀬𑀸𑀲𑀻𑀢𑀺 𑀯𑀤𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀆𑀘𑀭𑀺𑀬, 𑀯𑀸𑀘𑀁 𑀅𑀭𑀓𑁆𑀔𑀺𑀢𑁆𑀯𑀸 𑀦 𑀓𑁂𑀯𑀮𑀁 𑀢𑁆𑀯𑀫𑁂𑀯 𑀤𑀼𑀓𑁆𑀔𑀧𑁆𑀧𑀢𑁆𑀢𑁄, 𑀅𑀜𑁆𑀜𑁄𑀧𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀧𑀼𑀩𑁆𑀩𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀓𑀸𑀴𑀻 𑀦𑀸𑀫 𑀕𑀡𑀺𑀓𑀸 𑀅𑀳𑁄𑀲𑀺, 𑀢𑀲𑁆𑀲𑀸 𑀢𑀼𑀡𑁆𑀟𑀺𑀮𑁄 𑀦𑀸𑀫 𑀪𑀸𑀢𑀸. 𑀓𑀸𑀴𑀻 𑀏𑀓𑀤𑀺𑀯𑀲𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀢𑀺. 𑀢𑀼𑀡𑁆𑀟𑀺𑀮𑁄 𑀧𑀦 𑀇𑀢𑁆𑀣𑀺𑀥𑀼𑀢𑁆𑀢𑁄 𑀲𑀼𑀭𑀸𑀥𑀼𑀢𑁆𑀢𑁄 𑀅𑀓𑁆𑀔𑀥𑀼𑀢𑁆𑀢𑁄 𑀅𑀳𑁄𑀲𑀺. 𑀲𑀸 𑀢𑀲𑁆𑀲 𑀥𑀦𑀁 𑀤𑁂𑀢𑀺, 𑀲𑁄 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀸𑀲𑁂𑀢𑀺. 𑀲𑀸 𑀢𑀁 𑀯𑀸𑀭𑁂𑀦𑁆𑀢𑀻𑀧𑀺 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀏𑀓𑀤𑀺𑀯𑀲𑀁 𑀚𑀽𑀢𑀧𑀭𑀸𑀚𑀺𑀢𑁄 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀓𑀝𑀲𑀸𑀭𑀓𑀔𑀡𑁆𑀟𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑀸 𑀕𑁂𑀳𑀁 𑀆𑀕𑀫𑀺 ¶ . 𑀢𑀸𑀬 𑀘 𑀤𑀸𑀲𑀺𑀬𑁄 𑀆𑀡𑀢𑁆𑀢𑀸 𑀳𑁄𑀦𑁆𑀢𑀺 ‘‘𑀢𑀼𑀡𑁆𑀟𑀺𑀮𑀲𑁆𑀲 𑀆𑀕𑀢𑀓𑀸𑀮𑁂 ¶ 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀕𑀻𑀯𑀸𑀬𑀁 𑀦𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑁂𑀬𑁆𑀬𑀸𑀣𑀸’’𑀢𑀺. 𑀢𑀸 𑀢𑀣𑀸 𑀓𑀭𑀺𑀁𑀲𑀼. 𑀲𑁄 𑀤𑁆𑀯𑀸𑀭𑀫𑀽𑀮𑁂 𑀭𑁄𑀤𑀦𑁆𑀢𑁄 𑀅𑀝𑁆𑀞𑀸𑀲𑀺.

𑀅𑀣𑁂𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀦𑀺𑀘𑁆𑀘𑀓𑀸𑀮𑀁 𑀓𑀸𑀴𑀺𑀬𑀸 𑀲𑀳𑀲𑁆𑀲𑀁 𑀆𑀳𑀭𑀸𑀧𑁂𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀢𑀼𑀡𑁆𑀟𑀺𑀮 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀚𑀽𑀢𑀧𑀭𑀸𑀚𑀺𑀢𑁄 𑀫𑀫 𑀪𑀕𑀺𑀦𑀺𑀬𑀸 𑀲𑀦𑁆𑀢𑀺𑀓𑀁 𑀆𑀕𑀢𑁄𑀫𑁆𑀳𑀺, 𑀢𑀁 𑀫𑀁 𑀤𑀸𑀲𑀺𑀬𑁄 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀺𑀁𑀲𑀽’’𑀢𑀺. ‘‘𑀢𑁂𑀦 𑀳𑀺 𑀢𑀺𑀝𑁆𑀞, 𑀪𑀕𑀺𑀦𑀺𑀬𑀸 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀲𑁄 𑀕𑀦𑁆𑀢𑁆𑀯𑀸 ‘‘𑀪𑀸𑀢𑀸 𑀢𑁂 𑀓𑀝𑀲𑀸𑀭𑀓𑀔𑀡𑁆𑀟𑀁 𑀦𑀺𑀯𑀸𑀲𑁂𑀢𑁆𑀯𑀸 𑀤𑁆𑀯𑀸𑀭𑀫𑀽𑀮𑁂 𑀞𑀺𑀢𑁄, 𑀯𑀢𑁆𑀣𑀸𑀦𑀺𑀲𑁆𑀲 𑀓𑀺𑀫𑀢𑁆𑀣𑀁 𑀦 𑀤𑁂𑀲𑀻’’𑀢𑀺 𑀆𑀳. ‘‘𑀅𑀳𑀁 𑀢𑀸𑀯 𑀦 𑀤𑁂𑀫𑀺, 𑀲𑀘𑁂 𑀧𑀦 𑀢𑁂 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀢𑁆𑀯𑀁 𑀤𑁂𑀳𑀻’’𑀢𑀺. 𑀢𑀲𑁆𑀫𑀺𑀁 𑀧𑀦 𑀕𑀡𑀺𑀓𑀸𑀬 𑀖𑀭𑁂 𑀇𑀤𑀁𑀘𑀸𑀭𑀺𑀢𑁆𑀢𑀁 𑁋 𑀆𑀪𑀢𑀲𑀳𑀲𑁆𑀲𑀢𑁄 𑀧𑀜𑁆𑀘𑀲𑀢𑀸𑀦𑀺 𑀕𑀡𑀺𑀓𑀸𑀬 𑀳𑁄𑀦𑁆𑀢𑀺, 𑀧𑀜𑁆𑀘𑀲𑀢𑀸𑀦𑀺 𑀯𑀢𑁆𑀣𑀕𑀦𑁆𑀥𑀫𑀸𑀮𑀫𑀽𑀮𑀸𑀦𑀺 𑀳𑁄𑀦𑁆𑀢𑀺. 𑀆𑀕𑀢𑀧𑀼𑀭𑀺𑀲𑀸 𑀢𑀲𑁆𑀫𑀺𑀁 𑀖𑀭𑁂 𑀮𑀤𑁆𑀥𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀕𑀘𑁆𑀙𑀦𑁆𑀢𑀸 𑀆𑀪𑀢𑀯𑀢𑁆𑀣𑀸𑀦𑁂𑀯 𑀦𑀺𑀯𑀸𑀲𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀸𑀬 𑀤𑀺𑀦𑁆𑀦𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀝𑀓𑁂 𑀢𑀼𑀡𑁆𑀟𑀺𑀮𑀲𑁆𑀲 𑀤𑀸𑀧𑁂𑀲𑀺. 𑀲𑁄 𑀦𑀺𑀯𑀸𑀲𑁂𑀢𑁆𑀯𑀸 𑀦𑀤𑀦𑁆𑀢𑁄 ¶ 𑀕𑀚𑁆𑀚𑀦𑁆𑀢𑁄 𑀕𑀦𑁆𑀢𑁆𑀯𑀸 𑀲𑀼𑀭𑀸𑀕𑁂𑀳𑀁 𑀧𑀸𑀯𑀺𑀲𑀺. 𑀓𑀸𑀴𑀻𑀧𑀺 𑀤𑀸𑀲𑀺𑀬𑁄 𑀆𑀡𑀸𑀧𑁂𑀲𑀺 ‘‘𑀲𑁆𑀯𑁂 𑀏𑀢𑀲𑁆𑀲 𑀕𑀫𑀦𑀓𑀸𑀮𑁂 𑀯𑀢𑁆𑀣𑀸𑀦𑀺 𑀅𑀘𑁆𑀙𑀺𑀦𑁆𑀤𑁂𑀬𑁆𑀬𑀸𑀣𑀸’’𑀢𑀺. 𑀢𑀸 𑀢𑀲𑁆𑀲 𑀦𑀺𑀓𑁆𑀔𑀫𑀦𑀓𑀸𑀮𑁂 𑀇𑀢𑁄 𑀘𑀺𑀢𑁄 𑀘 𑀉𑀧𑀥𑀸𑀯𑀺𑀢𑁆𑀯𑀸 𑀯𑀺𑀮𑀼𑀫𑁆𑀧𑀫𑀸𑀦𑀸 𑀲𑀸𑀝𑀓𑁂 𑀕𑀳𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀬𑀸𑀳𑀺 𑀓𑀼𑀫𑀸𑀭𑀸’’𑀢𑀺 𑀦𑀕𑁆𑀕𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀦𑀕𑁆𑀕𑁄𑀯 𑀦𑀺𑀓𑁆𑀔𑀫𑀺. 𑀚𑀦𑁄 𑀧𑀭𑀺𑀳𑀸𑀲𑀁 𑀓𑀭𑁄𑀢𑀺. 𑀲𑁄 𑀮𑀚𑁆𑀚𑀺𑀢𑁆𑀯𑀸 ‘‘𑀫𑀬𑀸𑀯𑁂𑀢𑀁 𑀓𑀢𑀁, 𑀅𑀳𑀫𑁂𑀯 𑀅𑀢𑁆𑀢𑀦𑁄 𑀫𑀼𑀔𑀁 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀧𑀭𑀺𑀤𑁂𑀯𑀺. 𑀇𑀤𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁬.

‘‘𑀓𑀺𑀫𑁂𑀯𑀳𑀁 𑀢𑀼𑀡𑁆𑀟𑀺𑀮𑀫𑀦𑀼𑀧𑀼𑀘𑁆𑀙𑀺𑀁, 𑀓𑀭𑁂𑀬𑁆𑀬 𑀲𑀁 𑀪𑀸𑀢𑀭𑀁 𑀓𑀸𑀴𑀺𑀓𑀸𑀬𑀁;

𑀦𑀕𑁆𑀕𑁄𑀯𑀳𑀁 𑀯𑀢𑁆𑀣𑀬𑀼𑀕𑀜𑁆𑀘 𑀚𑀻𑀦𑁄, 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀩𑀳𑀼𑀢𑀸𑀤𑀺𑀲𑁄𑀯𑀸’’𑀢𑀺.

𑀢𑀢𑁆𑀣 ¶ 𑀩𑀳𑀼𑀢𑀸𑀤𑀺𑀲𑁄𑀯𑀸𑀢𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀺 𑀅𑀢𑁆𑀢𑀦𑀸 𑀓𑀢𑁂𑀦 𑀤𑀼𑀓𑁆𑀔𑀁 𑀧𑀢𑁆𑀢𑁄, 𑀢𑁆𑀯𑀫𑁆𑀧𑀺 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀢𑀼𑀬𑁆𑀳𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀺 𑀅𑀢𑁆𑀣𑁄. 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀢𑀸𑀤𑀺𑀲𑁄𑀯.

𑀅𑀧𑀭𑁄𑀧𑀺 𑀩𑀸𑀭𑀸𑀡𑀲𑀺𑀬𑀁 𑀅𑀚𑀧𑀸𑀮𑀸𑀦𑀁 𑀧𑀫𑀸𑀤𑁂𑀦 𑀕𑁄𑀘𑀭𑀪𑀽𑀫𑀺𑀬𑀁 𑀤𑁆𑀯𑀻𑀲𑀼 𑀫𑁂𑀡𑁆𑀟𑁂𑀲𑀼 𑀬𑀼𑀚𑁆𑀛𑀦𑁆𑀢𑁂𑀲𑀼 𑀏𑀓𑁄 𑀓𑀼𑀮𑀺𑀗𑁆𑀕𑀲𑀓𑀼𑀡𑁄 ‘‘𑀇𑀫𑁂 𑀤𑀸𑀦𑀺 𑀪𑀺𑀦𑁆𑀦𑁂𑀳𑀺 𑀲𑀻𑀲𑁂𑀳𑀺 𑀫𑀭𑀺𑀲𑁆𑀲𑀦𑁆𑀢𑀺, 𑀯𑀸𑀭𑁂𑀲𑁆𑀲𑀸𑀫𑀺 𑀢𑁂𑀢𑀺 𑀫𑀸𑀢𑀼𑀮𑀸 𑀫𑀸 𑀬𑀼𑀚𑁆𑀛𑀣𑀸’’𑀢𑀺 𑀯𑀸𑀭𑁂𑀢𑁆𑀯𑀸 𑀢𑁂𑀲𑀁 𑀓𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀸𑀦𑀜𑁆𑀜𑁂𑀯 𑀧𑀺𑀝𑁆𑀞𑀺𑀬𑀫𑁆𑀧𑀺 𑀲𑀻𑀲𑁂𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀢𑁂𑀦 𑀳𑀺 𑀫𑀁 𑀫𑀸𑀭𑁂𑀢𑁆𑀯𑀸 𑀬𑀼𑀚𑁆𑀛𑀣𑀸’’𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀲𑀻𑀲𑀦𑁆𑀢𑀭𑀁 𑀧𑀸𑀯𑀺𑀲𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀬𑀼𑀚𑁆𑀛𑀺𑀁𑀲𑀼𑀬𑁂𑀯. 𑀲𑁄 𑀲𑀡𑁆𑀳𑀓𑀭𑀡𑀺𑀬𑀁 𑀧𑀺𑀲𑀺𑀢𑁄 𑀯𑀺𑀬 𑀅𑀢𑁆𑀢𑀦𑀸 𑀓𑀢𑁂𑀦𑁂𑀯 𑀯𑀺𑀦𑀸𑀲𑀁 𑀧𑀢𑁆𑀢𑁄. 𑀇𑀤𑀫𑁆𑀧𑀺 𑀅𑀧𑀭𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁧𑁦𑁭.

‘‘𑀬𑁄 ¶ 𑀬𑀼𑀚𑁆𑀛𑀫𑀸𑀦𑀸𑀦𑀫𑀬𑀼𑀚𑁆𑀛𑀫𑀸𑀦𑁄, 𑀫𑁂𑀡𑁆𑀟𑀦𑁆𑀢𑀭𑀁 𑀅𑀘𑁆𑀘𑀼𑀧𑀢𑀻 𑀓𑀼𑀮𑀺𑀗𑁆𑀕𑁄;

𑀲𑁄 𑀧𑀺𑀁𑀲𑀺𑀢𑁄 𑀫𑁂𑀡𑁆𑀟𑀲𑀺𑀭𑁂𑀳𑀺 𑀢𑀢𑁆𑀣, 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀩𑀳𑀼𑀢𑀸𑀤𑀺𑀲𑁄𑀯𑀸’’𑀢𑀺.

𑀢𑀢𑁆𑀣 𑀫𑁂𑀡𑁆𑀟𑀦𑁆𑀢𑀭𑀦𑁆𑀢𑀺 𑀫𑁂𑀡𑁆𑀟𑀸𑀦𑀁 𑀅𑀦𑁆𑀢𑀭𑀁. 𑀅𑀘𑁆𑀘𑀼𑀧𑀢𑀻𑀢𑀺 𑀅𑀢𑀺𑀕𑀦𑁆𑀢𑁆𑀯𑀸 𑀉𑀧𑁆𑀧𑀢𑀺, 𑀆𑀓𑀸𑀲𑁂 𑀲𑀻𑀲𑀸𑀦𑀁 𑀯𑁂𑀫𑀚𑁆𑀛𑁂 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀺𑀁𑀲𑀺𑀢𑁄𑀢𑀺 𑀧𑀻𑀴𑀺𑀢𑁄.

𑀅𑀧𑀭𑁂𑀧𑀺 ¶ 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀕𑁄𑀧𑀸𑀮𑀓𑀸 𑀨𑀮𑀺𑀢𑀁 𑀢𑀸𑀮𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀏𑀓𑀁 𑀢𑀸𑀮𑀨𑀮𑀢𑁆𑀣𑀸𑀬 𑀭𑀼𑀓𑁆𑀔𑀁 𑀆𑀭𑁄𑀧𑁂𑀲𑀼𑀁. 𑀢𑀲𑁆𑀫𑀺𑀁 𑀨𑀮𑀸𑀦𑀺 𑀧𑀸𑀢𑁂𑀦𑁆𑀢𑁂 𑀏𑀓𑁄 𑀓𑀡𑁆𑀳𑀲𑀧𑁆𑀧𑁄 𑀯𑀫𑁆𑀫𑀺𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀸𑀮𑀭𑀼𑀓𑁆𑀔𑀁 𑀆𑀭𑀼𑀳𑀺. 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀤𑀡𑁆𑀟𑁂𑀳𑀺 𑀧𑀳𑀭𑀦𑁆𑀢𑀸 𑀦𑀺𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑁂 ‘‘𑀲𑀧𑁆𑀧𑁄 𑀢𑀸𑀮𑀁 𑀅𑀪𑀺𑀭𑀼𑀳𑀢𑀻’’𑀢𑀺 𑀇𑀢𑀭𑀲𑁆𑀲 𑀆𑀘𑀺𑀓𑁆𑀔𑀺𑀁𑀲𑀼. 𑀲𑁄 𑀪𑀻𑀢𑁄 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀳𑁂𑀝𑁆𑀞𑀸 𑀞𑀺𑀢𑀸 𑀏𑀓𑀁 𑀣𑀺𑀭𑀲𑀸𑀝𑀓𑀁 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀲𑀸𑀝𑀓𑁂 𑀧𑀢𑀸’’𑀢𑀺 𑀆𑀳𑀁𑀲𑀼. 𑀲𑁄 𑀧𑀢𑀦𑁆𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑁂 𑀲𑀸𑀝𑀓𑀫𑀚𑁆𑀛𑁂 𑀧𑀢𑀺. 𑀢𑀲𑁆𑀲 𑀧𑀦 𑀧𑀸𑀢𑀦𑀯𑁂𑀕𑁂𑀦 𑀢𑁂 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 ¶ 𑀲𑀻𑀲𑁂𑀳𑀺 𑀧𑀳𑀭𑀺𑀢𑁆𑀯𑀸 𑀪𑀺𑀦𑁆𑀦𑁂𑀳𑀺 𑀲𑀻𑀲𑁂𑀳𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸. 𑀇𑀤𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁮.

‘‘𑀘𑀢𑀼𑀭𑁄 𑀚𑀦𑀸 𑀧𑁄𑀢𑁆𑀣𑀓𑀫𑀕𑁆𑀕𑀳𑁂𑀲𑀼𑀁, 𑀏𑀓𑀜𑁆𑀘 𑀧𑁄𑀲𑀁 𑀅𑀦𑀼𑀭𑀓𑁆𑀔𑀫𑀸𑀦𑀸;

𑀲𑀩𑁆𑀩𑁂𑀯 𑀢𑁂 𑀪𑀺𑀦𑁆𑀦𑀲𑀺𑀭𑀸 𑀲𑀬𑀺𑀁𑀲𑀼, 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀩𑀳𑀼𑀢𑀸𑀤𑀺𑀲𑁄𑀯𑀸’’𑀢𑀺.

𑀢𑀢𑁆𑀣 𑀧𑁄𑀢𑁆𑀣𑀓𑀦𑁆𑀢𑀺 𑀲𑀸𑀡𑀲𑀸𑀝𑀓𑀁. 𑀲𑀩𑁆𑀩𑁂𑀯 𑀢𑁂𑀢𑀺 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀚𑀦𑀸 𑀅𑀢𑁆𑀢𑀦𑀸 𑀓𑀢𑁂𑀦𑁂𑀯 𑀪𑀺𑀦𑁆𑀦𑀲𑀻𑀲𑀸 𑀲𑀬𑀺𑀁𑀲𑀼.

𑀅𑀧𑀭𑁂𑀧𑀺 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀏𑀴𑀓𑀘𑁄𑀭𑀸 𑀭𑀢𑁆𑀢𑀺𑀁 𑀏𑀓𑀁 𑀅𑀚𑀁 𑀣𑁂𑀦𑁂𑀢𑁆𑀯𑀸 ‘‘𑀤𑀺𑀯𑀸 𑀅𑀭𑀜𑁆𑀜𑁂 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀲𑀸 𑀅𑀯𑀲𑁆𑀲𑀦𑀢𑁆𑀣𑀸𑀬 𑀫𑀼𑀔𑀁 𑀩𑀦𑁆𑀥𑀺𑀢𑁆𑀯𑀸 𑀯𑁂𑀴𑀼𑀕𑀼𑀫𑁆𑀩𑁂 𑀞𑀧𑁂𑀲𑀼𑀁. 𑀧𑀼𑀦𑀤𑀺𑀯𑀲𑁂 𑀢𑀁 𑀔𑀸𑀤𑀺𑀢𑀼𑀁 𑀕𑀘𑁆𑀙𑀦𑁆𑀢𑀸 𑀆𑀯𑀼𑀥𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀢𑁂 ‘‘𑀅𑀚𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫, 𑀆𑀳𑀭𑀣𑀸𑀯𑀼𑀥’’𑀦𑁆𑀢𑀺 𑀏𑀓𑀲𑁆𑀲𑀧𑀺 𑀳𑀢𑁆𑀣𑁂 𑀆𑀯𑀼𑀥𑀁 𑀅𑀤𑀺𑀲𑁆𑀯𑀸 ‘‘𑀯𑀺𑀦𑀸 𑀆𑀯𑀼𑀥𑁂𑀦 𑀏𑀢𑀁 𑀫𑀸𑀭𑁂𑀢𑁆𑀯𑀸𑀧𑀺 𑀫𑀁𑀲𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀯𑀺𑀲𑁆𑀲𑀚𑁆𑀚𑁂𑀣 𑀦𑀁, 𑀧𑀼𑀜𑁆𑀜𑀫𑀲𑁆𑀲 𑀅𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑀤𑀸 𑀏𑀓𑁄 𑀦𑀴𑀓𑀸𑀭𑁄 𑀯𑁂𑀴𑀼𑀁 𑀕𑀳𑁂𑀢𑁆𑀯𑀸 ‘‘𑀧𑀼𑀦𑀧𑀺 𑀆𑀕𑀦𑁆𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀦𑀴𑀓𑀸𑀭𑀲𑀢𑁆𑀣𑀁 𑀯𑁂𑀴𑀼𑀕𑀼𑀫𑁆𑀩𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀚𑀸 ‘‘𑀫𑀼𑀢𑁆𑀢𑀸𑀫𑁆𑀳𑀻’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀯𑁂𑀴𑀼𑀫𑀽𑀮𑁂 𑀓𑀻𑀴𑀫𑀸𑀦𑀸 𑀧𑀘𑁆𑀙𑀺𑀫𑀧𑀸𑀤𑁂𑀳𑀺 𑀧𑀳𑀭𑀺𑀢𑁆𑀯𑀸 𑀢𑀁 𑀲𑀢𑁆𑀣𑀁 𑀧𑀸𑀢𑁂𑀲𑀺. 𑀘𑁄𑀭𑀸 𑀲𑀢𑁆𑀣𑀲𑀤𑁆𑀤𑀁 𑀲𑀼𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑀸 𑀅𑀚𑀁 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀁𑀲𑀼. 𑀇𑀢𑀺 ‘‘𑀲𑀸𑀧𑀺 𑀅𑀚𑀸 𑀅𑀢𑁆𑀢𑀦𑀸 𑀓𑀢𑁂𑀦𑁂𑀯 𑀫𑀢𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁦𑁯.

‘‘𑀅𑀚𑀸 ¶ ¶ 𑀬𑀣𑀸 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀩𑀤𑁆𑀥𑀸, 𑀅𑀯𑀓𑁆𑀔𑀺𑀧𑀦𑁆𑀢𑀻 𑀅𑀲𑀺𑀫𑀚𑁆𑀛𑀕𑀘𑁆𑀙𑀺;

𑀢𑁂𑀦𑁂𑀯 𑀢𑀲𑁆𑀲𑀸 𑀕𑀮𑀓𑀸𑀯𑀓𑀦𑁆𑀢𑀁, 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀩𑀳𑀼𑀢𑀸𑀤𑀺𑀲𑁄𑀯𑀸’’𑀢𑀺.

𑀢𑀢𑁆𑀣 𑀅𑀯𑀓𑁆𑀔𑀺𑀧𑀦𑁆𑀢𑀻𑀢𑀺 𑀓𑀻𑀴𑀫𑀸𑀦𑀸 𑀧𑀘𑁆𑀙𑀺𑀫𑀧𑀸𑀤𑁂 𑀔𑀺𑀧𑀦𑁆𑀢𑀻.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀘𑀦𑀁 𑀭𑀓𑁆𑀔𑀺𑀢𑁆𑀯𑀸 𑀫𑀺𑀢𑀪𑀸𑀡𑀺𑀦𑁄 𑀦𑀸𑀫 𑀫𑀭𑀡𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀓𑀺𑀦𑁆𑀦𑀭𑀯𑀢𑁆𑀣𑀼𑀁 𑀆𑀳𑀭𑀺.

𑀩𑀸𑀭𑀸𑀡𑀲𑀺𑀯𑀸𑀲𑀻 𑀓𑀺𑀭𑁂𑀓𑁄 𑀮𑀼𑀤𑁆𑀤𑀓𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑁂𑀦𑀼𑀧𑀸𑀬𑁂𑀦 𑀚𑀬𑀫𑁆𑀧𑀢𑀺𑀓𑁂 𑀤𑁆𑀯𑁂 𑀓𑀺𑀦𑁆𑀦𑀭𑁂 𑀕𑀳𑁂𑀢𑁆𑀯𑀸 𑀆𑀦𑁂𑀢𑁆𑀯𑀸 𑀭𑀜𑁆𑀜𑁄 𑀅𑀤𑀸𑀲𑀺. 𑀭𑀸𑀚𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑁂 𑀓𑀺𑀦𑁆𑀦𑀭𑁂 𑀤𑀺𑀲𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀮𑀼𑀤𑁆𑀤, 𑀇𑀫𑁂𑀲𑀁 𑀓𑁄 𑀕𑀼𑀡𑁄’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀏𑀢𑁂 𑀫𑀥𑀼𑀭𑁂𑀦 𑀲𑀤𑁆𑀤𑁂𑀦 𑀕𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀁 𑀦𑀘𑁆𑀘𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀏𑀯𑀁 𑀕𑀸𑀬𑀺𑀢𑀼𑀜𑁆𑀘 𑀦𑀘𑁆𑀘𑀺𑀢𑀼𑀜𑁆𑀘 𑀦 𑀚𑀸𑀦𑀦𑁆𑀢𑀻’’𑀢𑀺. 𑀭𑀸𑀚𑀸 𑀮𑀼𑀤𑁆𑀤𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 𑀓𑀺𑀦𑁆𑀦𑀭𑁂 ‘‘𑀕𑀸𑀬𑀣 𑀦𑀘𑁆𑀘𑀣𑀸’’𑀢𑀺 𑀆𑀳. 𑀓𑀺𑀦𑁆𑀦𑀭𑀸 ‘‘𑀲𑀘𑁂 𑀫𑀬𑀁 𑀕𑀸𑀬𑀦𑁆𑀢𑀸 𑀩𑁆𑀬𑀜𑁆𑀚𑀦𑀁 𑀧𑀭𑀺𑀧𑀼𑀡𑁆𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀤𑀼𑀕𑁆𑀕𑀻𑀢𑀁 𑀳𑁄𑀢𑀺, 𑀅𑀫𑁆𑀳𑁂 𑀕𑀭𑀳𑀺𑀲𑁆𑀲𑀦𑁆𑀢𑀺 𑀯𑀥𑀺𑀲𑁆𑀲𑀦𑁆𑀢𑀺, 𑀩𑀳𑀼𑀁 𑀓𑀣𑁂𑀦𑁆𑀢𑀸𑀦𑀜𑁆𑀘 𑀧𑀦 𑀫𑀼𑀲𑀸𑀯𑀸𑀤𑁄𑀧𑀺 𑀳𑁄𑀢𑀻’’𑀢𑀺 𑀫𑀼𑀲𑀸𑀯𑀸𑀤𑀪𑀬𑁂𑀦 𑀭𑀜𑁆𑀜𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑀸𑀧𑀺 𑀦 𑀕𑀸𑀬𑀺𑀁𑀲𑀼 𑀦 𑀦𑀘𑁆𑀘𑀺𑀁𑀲𑀼. 𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀇𑀫𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀆𑀳𑀭𑀣𑀸’’𑀢𑀺 𑀆𑀡𑀸𑀧𑁂𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁦.

‘‘𑀇𑀫𑁂 𑀦 𑀤𑁂𑀯𑀸 𑀦 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑀸, 𑀫𑀺𑀕𑀸 𑀇𑀫𑁂 𑀅𑀢𑁆𑀣𑀯𑀲𑀁 𑀕𑀢𑀸 𑀫𑁂;

𑀏𑀓𑀜𑁆𑀘 𑀦𑀁 𑀲𑀸𑀬𑀫𑀸𑀲𑁂 𑀧𑀘𑀦𑁆𑀢𑀼, 𑀏𑀓𑀁 𑀧𑀼𑀦𑀧𑁆𑀧𑀸𑀢𑀭𑀸𑀲𑁂 𑀧𑀘𑀦𑁆𑀢𑀽’’𑀢𑀺.

𑀢𑀢𑁆𑀣 𑀫𑀺𑀕𑀸 𑀇𑀫𑁂𑀢𑀺 𑀇𑀫𑁂 𑀲𑀘𑁂 𑀤𑁂𑀯𑀸 𑀕𑀦𑁆𑀥𑀩𑁆𑀩𑀸 𑀯𑀸 𑀪𑀯𑁂𑀬𑁆𑀬𑀼𑀁, 𑀦𑀘𑁆𑀘𑁂𑀬𑁆𑀬𑀼𑀜𑁆𑀘𑁂𑀯 𑀕𑀸𑀬𑁂𑀬𑁆𑀬𑀼𑀜𑁆𑀘, 𑀇𑀫𑁂 𑀧𑀦 𑀫𑀺𑀕𑀸 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀅𑀢𑁆𑀣𑀯𑀲𑀁 𑀕𑀢𑀸 𑀫𑁂𑀢𑀺 𑀅𑀢𑁆𑀣𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀮𑀼𑀤𑁆𑀤𑁂𑀦 𑀆𑀦𑀻𑀢𑀢𑁆𑀢𑀸 𑀅𑀢𑁆𑀣𑀯𑀲𑁂𑀦 𑀫𑀫 𑀳𑀢𑁆𑀣𑀁 𑀕𑀢𑀸. 𑀏𑀢𑁂𑀲𑀼 𑀏𑀓𑀁 𑀲𑀸𑀬𑀫𑀸𑀲𑁂, 𑀏𑀓𑀁 𑀧𑀸𑀢𑀭𑀸𑀲𑁂 𑀧𑀘𑀦𑁆𑀢𑀽𑀢𑀺.

𑀓𑀺𑀦𑁆𑀦𑀭𑀻 𑀘𑀺𑀦𑁆𑀢𑁂𑀲𑀺 ‘‘𑀭𑀸𑀚𑀸 𑀓𑀼𑀤𑁆𑀥𑁄 𑀦𑀺𑀲𑁆𑀲𑀁𑀲𑀬𑀁 𑀫𑀸𑀭𑁂𑀲𑁆𑀲𑀢𑀺, 𑀇𑀤𑀸𑀦𑀺 𑀓𑀣𑁂𑀢𑀼𑀁 𑀓𑀸𑀮𑁄’’𑀢𑀺 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁧.

‘‘𑀲𑀢𑀁 ¶ 𑀲𑀳𑀲𑁆𑀲𑀸𑀦𑀺 𑀤𑀼𑀪𑀸𑀲𑀺𑀢𑀸𑀦𑀺, 𑀓𑀮𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺 𑀲𑀼𑀪𑀸𑀲𑀺𑀢𑀲𑁆𑀲;

𑀤𑀼𑀩𑁆𑀪𑀸𑀲𑀺𑀢𑀁 𑀲𑀗𑁆𑀓𑀫𑀸𑀦𑁄 𑀓𑀺𑀮𑁂𑀲𑁄, 𑀢𑀲𑁆𑀫𑀸 𑀢𑀼𑀡𑁆𑀳𑀻 𑀓𑀺𑀫𑁆𑀧𑀼𑀭𑀺𑀲𑀸 𑀦 𑀩𑀸𑀮𑁆𑀬𑀸’’𑀢𑀺.

𑀢𑀢𑁆𑀣 ¶ ¶ 𑀲𑀗𑁆𑀓𑀫𑀸𑀦𑁄 𑀓𑀺𑀮𑁂𑀲𑁄𑀢𑀺 𑀓𑀤𑀸𑀘𑀺 𑀅𑀳𑀁 𑀪𑀸𑀲𑀫𑀸𑀦𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀸𑀲𑁂𑀬𑁆𑀬𑀁, 𑀏𑀯𑀁 𑀤𑀼𑀩𑁆𑀪𑀸𑀲𑀺𑀢𑀁 𑀲𑀗𑁆𑀓𑀫𑀸𑀦𑁄 𑀓𑀺𑀮𑀺𑀲𑁆𑀲𑀢𑀺 𑀓𑀺𑀮𑀫𑀢𑀺. 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀼𑀫𑁆𑀳𑀸𑀓𑀁 𑀦 𑀕𑀸𑀬𑀺𑀁, 𑀦 𑀩𑀸𑀮𑀪𑀸𑀯𑁂𑀦𑀸𑀢𑀺.

𑀭𑀸𑀚𑀸 𑀓𑀺𑀦𑁆𑀦𑀭𑀺𑀬𑀸 𑀢𑀼𑀲𑁆𑀲𑀺𑀢𑁆𑀯𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁧𑁨.

‘‘𑀬𑀸 𑀫𑁂𑀲𑀸 𑀩𑁆𑀬𑀸𑀳𑀸𑀲𑀺 𑀧𑀫𑀼𑀜𑁆𑀘𑀣𑁂𑀢𑀁, 𑀕𑀺𑀭𑀺𑀜𑁆𑀘 𑀦𑀁 𑀳𑀺𑀫𑀯𑀦𑁆𑀢𑀁 𑀦𑀬𑀦𑁆𑀢𑀼;

𑀇𑀫𑀜𑁆𑀘 𑀔𑁄 𑀤𑁂𑀦𑁆𑀢𑀼 𑀫𑀳𑀸𑀦𑀲𑀸𑀬, 𑀧𑀸𑀢𑁄𑀯 𑀦𑀁 𑀧𑀸𑀢𑀭𑀸𑀲𑁂 𑀧𑀘𑀦𑁆𑀢𑀽’’𑀢𑀺.

𑀢𑀢𑁆𑀣 𑀬𑀸 𑀫𑁂𑀲𑀸𑀢𑀺 𑀬𑀸 𑀫𑁂 𑀏𑀲𑀸. 𑀤𑁂𑀦𑁆𑀢𑀽𑀢𑀺 𑀫𑀳𑀸𑀦𑀲𑀢𑁆𑀣𑀸𑀬 𑀤𑁂𑀦𑁆𑀢𑀼.

𑀓𑀺𑀦𑁆𑀦𑀭𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀫𑀁 𑀅𑀓𑀣𑁂𑀦𑁆𑀢𑀁 𑀅𑀯𑀲𑁆𑀲𑀁 𑀫𑀸𑀭𑁂𑀲𑁆𑀲𑀢𑀺, 𑀇𑀤𑀸𑀦𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁧𑁩.

‘‘𑀧𑀚𑁆𑀚𑀼𑀦𑁆𑀦𑀦𑀸𑀣𑀸 𑀧𑀲𑀯𑁄, 𑀧𑀲𑀼𑀦𑀸𑀣𑀸 𑀅𑀬𑀁 𑀧𑀚𑀸;

𑀢𑁆𑀯𑀁 𑀦𑀸𑀣𑁄𑀲𑀺 𑀫𑀳𑀸𑀭𑀸𑀚, 𑀦𑀸𑀣𑁄𑀳𑀁 𑀪𑀭𑀺𑀬𑀸𑀬 𑀫𑁂;

𑀤𑁆𑀯𑀺𑀦𑁆𑀦𑀫𑀜𑁆𑀜𑀢𑀭𑀁 𑀜𑀢𑁆𑀯𑀸, 𑀫𑀼𑀢𑁆𑀢𑁄 𑀕𑀘𑁆𑀙𑁂𑀬𑁆𑀬 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀧𑀚𑁆𑀚𑀼𑀦𑁆𑀦𑀦𑀸𑀣𑀸 𑀧𑀲𑀯𑁄𑀢𑀺 𑀢𑀺𑀡𑀪𑀓𑁆𑀔𑀸 𑀧𑀲𑀯𑁄 𑀫𑁂𑀖𑀦𑀸𑀣𑀸 𑀦𑀸𑀫. 𑀧𑀲𑀼𑀦𑀸𑀣𑀸 𑀅𑀬𑀁 𑀧𑀚𑀸𑀢𑀺 𑀅𑀬𑀁 𑀧𑀦 𑀫𑀦𑀼𑀲𑁆𑀲𑀧𑀚𑀸 𑀧𑀜𑁆𑀘𑀕𑁄𑀭𑀲𑁂𑀦 𑀉𑀧𑀚𑀻𑀯𑀦𑁆𑀢𑀻 𑀧𑀲𑀼𑀦𑀸𑀣𑀸 𑀧𑀲𑀼𑀧𑀢𑀺𑀝𑁆𑀞𑀸. 𑀢𑁆𑀯𑀁 𑀦𑀸𑀣𑁄𑀲𑀻𑀢𑀺 𑀢𑁆𑀯𑀁 𑀫𑀫 𑀧𑀢𑀺𑀝𑁆𑀞𑀸 𑀅𑀲𑀺. 𑀦𑀸𑀣𑁄𑀳𑀦𑁆𑀢𑀺 𑀫𑀫 𑀪𑀭𑀺𑀬𑀸𑀬 𑀅𑀳𑀁 𑀦𑀸𑀣𑁄, 𑀅𑀳𑀫𑀲𑁆𑀲𑀸 𑀧𑀢𑀺𑀝𑁆𑀞𑀸. 𑀤𑁆𑀯𑀺𑀦𑁆𑀦𑀫𑀜𑁆𑀜𑀢𑀭𑀁 𑀜𑀢𑁆𑀯𑀸, 𑀫𑀼𑀢𑁆𑀢𑁄 𑀕𑀘𑁆𑀙𑁂𑀬𑁆𑀬 𑀧𑀩𑁆𑀩𑀢𑀦𑁆𑀢𑀺 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀏𑀓𑀁 𑀫𑀢𑀁 𑀜𑀢𑁆𑀯𑀸 𑀲𑀬𑀁 𑀫𑀭𑀡𑀢𑁄 𑀫𑀼𑀢𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑁂𑀬𑁆𑀬, 𑀚𑀻𑀯𑀫𑀸𑀦𑀸 𑀧𑀦 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀚𑀳𑀸𑀫, 𑀢𑀲𑁆𑀫𑀸 𑀲𑀘𑁂𑀧𑀺 𑀇𑀫𑀁 𑀳𑀺𑀫𑀯𑀦𑁆𑀢𑀁 𑀧𑁂𑀲𑁂𑀢𑀼𑀓𑀸𑀫𑁄, 𑀫𑀁 𑀧𑀞𑀫𑀁 𑀫𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀧𑁂𑀲𑁂𑀳𑀻𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀦 𑀫𑀬𑀁 𑀢𑀯 𑀯𑀘𑀦𑀁 𑀅𑀓𑀸𑀢𑀼𑀓𑀸𑀫𑀢𑀸𑀬 𑀢𑀼𑀡𑁆𑀳𑀻 𑀅𑀳𑀼𑀫𑁆𑀳, 𑀫𑀬𑀁 𑀓𑀣𑀸𑀬 𑀧𑀦 𑀤𑁄𑀲𑀁 𑀤𑀺𑀲𑁆𑀯𑀸 𑀦 𑀓𑀣𑀬𑀺𑀫𑁆𑀳𑀸’’𑀢𑀺 𑀤𑀻𑀧𑁂𑀦𑁆𑀢𑁄 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁧𑁪.

‘‘𑀦 𑀯𑁂 𑀦𑀺𑀦𑁆𑀤𑀸 𑀲𑀼𑀧𑀭𑀺𑀯𑀚𑁆𑀚𑀬𑁂𑀣, 𑀦𑀸𑀦𑀸 𑀚𑀦𑀸 𑀲𑁂𑀯𑀺𑀢𑀩𑁆𑀩𑀸 𑀚𑀦𑀺𑀦𑁆𑀤;

𑀬𑁂𑀦𑁂𑀯 ¶ 𑀏𑀓𑁄 𑀮𑀪𑀢𑁂 𑀧𑀲𑀁𑀲𑀁, 𑀢𑁂𑀦𑁂𑀯 𑀅𑀜𑁆𑀜𑁄 𑀮𑀪𑀢𑁂 𑀦𑀺𑀦𑁆𑀤𑀺𑀢𑀸𑀭𑀁.

𑁧𑁧𑁫.

‘‘𑀲𑀩𑁆𑀩𑁄 ¶ 𑀮𑁄𑀓𑁄 𑀧𑀭𑀺𑀘𑀺𑀢𑁆𑀢𑁄 𑀅𑀢𑀺𑀘𑀺𑀢𑁆𑀢𑁄, 𑀲𑀩𑁆𑀩𑁄 𑀮𑁄𑀓𑁄 𑀘𑀺𑀢𑁆𑀢𑀯𑀸 𑀲𑀫𑁆𑀳𑀺 𑀘𑀺𑀢𑁆𑀢𑁂;

𑀧𑀘𑁆𑀘𑁂𑀓𑀘𑀺𑀢𑁆𑀢𑀸 𑀧𑀼𑀣𑀼 𑀲𑀩𑁆𑀩𑀲𑀢𑁆𑀢𑀸, 𑀓𑀲𑁆𑀲𑀻𑀥 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂’’𑀢𑀺.

𑀢𑀢𑁆𑀣 𑀲𑀼𑀧𑀭𑀺𑀯𑀚𑁆𑀚𑀬𑁂𑀣𑀸𑀢𑀺 𑀫𑀳𑀸𑀭𑀸𑀚, 𑀦𑀺𑀦𑁆𑀤𑀸 𑀦𑀸𑀫 𑀲𑀼𑀔𑁂𑀦 𑀧𑀭𑀺𑀯𑀚𑁆𑀚𑁂𑀢𑀼𑀁 𑀦 𑀲𑀓𑁆𑀓𑀸. 𑀦𑀸𑀦𑀸 𑀚𑀦𑀸𑀢𑀺 𑀦𑀸𑀦𑀸𑀙𑀦𑁆𑀤𑀸 𑀚𑀦𑀸. 𑀬𑁂𑀦𑁂𑀯𑀸𑀢𑀺 𑀬𑁂𑀦 𑀲𑀻𑀮𑀸𑀤𑀺𑀕𑀼𑀡𑁂𑀦 𑀏𑀓𑁄 𑀧𑀲𑀁𑀲𑀁 𑀮𑀪𑀢𑀺, 𑀢𑁂𑀦𑁂𑀯 𑀅𑀜𑁆𑀜𑁄 𑀦𑀺𑀦𑁆𑀤𑀺𑀢𑀸𑀭𑀁 𑀮𑀪𑀢𑀺. 𑀅𑀫𑁆𑀳𑀸𑀓𑀜𑁆𑀳𑀺 𑀓𑀺𑀦𑁆𑀦𑀭𑀸𑀦𑀁 𑀅𑀦𑁆𑀢𑀭𑁂 𑀓𑀣𑀦𑁂𑀦 𑀧𑀲𑀁𑀲𑀁 𑀮𑀪𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀦𑀺𑀦𑁆𑀤𑀁, 𑀇𑀢𑀺 𑀦𑀺𑀦𑁆𑀤𑀸 𑀦𑀸𑀫 𑀤𑀼𑀧𑁆𑀧𑀭𑀺𑀯𑀚𑁆𑀚𑀺𑀬𑀸, 𑀲𑁆𑀯𑀸𑀳𑀁 𑀓𑀣𑀁 𑀢𑀯 𑀲𑀦𑁆𑀢𑀺𑀓𑀸 𑀧𑀲𑀁𑀲𑀁 𑀮𑀪𑀺𑀲𑁆𑀲𑀸𑀫𑀻𑀢𑀺.

𑀲𑀩𑁆𑀩𑁄 𑀮𑁄𑀓𑁄 𑀧𑀭𑀺𑀘𑀺𑀢𑁆𑀢𑁄𑀢𑀺 𑀫𑀳𑀸𑀭𑀸𑀚, 𑀅𑀲𑀧𑁆𑀧𑀼𑀭𑀺𑀲𑁄 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀘𑀺𑀢𑁆𑀢𑁂𑀦, 𑀲𑀧𑁆𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺 𑀆𑀤𑀺𑀘𑀺𑀢𑁆𑀢𑁂𑀦 𑀅𑀢𑀺𑀘𑀺𑀢𑁆𑀢𑁄𑀢𑀺, 𑀏𑀯𑀁 𑀲𑀩𑁆𑀩𑁄 𑀮𑁄𑀓𑁄 𑀧𑀭𑀺𑀘𑀺𑀢𑁆𑀢𑁄 𑀅𑀢𑀺𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀯𑀸 𑀲𑀫𑁆𑀳𑀺 𑀘𑀺𑀢𑁆𑀢𑁂𑀢𑀺 𑀲𑀩𑁆𑀩𑁄 𑀧𑀦 𑀮𑁄𑀓𑁄 𑀅𑀢𑁆𑀢𑀦𑁄 𑀳𑀻𑀦𑁂𑀦 𑀯𑀸 𑀧𑀡𑀻𑀢𑁂𑀦 𑀯𑀸 𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀯𑀸 𑀦𑀸𑀫. 𑀧𑀘𑁆𑀘𑁂𑀓𑀘𑀺𑀢𑁆𑀢𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑀘𑀺𑀢𑁆𑀢𑀸 𑀧𑀼𑀣𑀼𑀧𑁆𑀧𑀪𑁂𑀤𑀸 𑀲𑀩𑁆𑀩𑁂 𑀲𑀢𑁆𑀢𑀸. 𑀢𑁂𑀲𑀼 𑀓𑀲𑁆𑀲𑁂𑀓𑀲𑁆𑀲 𑀢𑀯 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀘𑀺𑀢𑁆𑀢𑁂𑀦 𑀓𑀺𑀦𑁆𑀦𑀭𑀻 𑀯𑀸 𑀫𑀸𑀤𑀺𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 ‘‘𑀅𑀬𑀁 𑀫𑀫 𑀘𑀺𑀢𑁆𑀢𑀯𑀲𑁂𑀦 𑀦 𑀯𑀢𑁆𑀢𑀢𑀻’’𑀢𑀺, 𑀫𑀸 𑀫𑀬𑁆𑀳𑀁 𑀓𑀼𑀚𑁆𑀛𑀺. 𑀲𑀩𑁆𑀩𑀲𑀢𑁆𑀢𑀸 ¶ 𑀳𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀯𑀲𑁂𑀦 𑀕𑀘𑁆𑀙𑀦𑁆𑀢𑀺, 𑀤𑁂𑀯𑀸𑀢𑀺. 𑀓𑀺𑀫𑁆𑀧𑀼𑀭𑀺𑀲𑁄 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀭𑀸𑀚𑀸 ‘‘𑀲𑀪𑀸𑀯𑀫𑁂𑀯 𑀓𑀣𑁂𑀢𑀺 𑀧𑀡𑁆𑀟𑀺𑀢𑁄 𑀓𑀺𑀦𑁆𑀦𑀭𑁄’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁧𑁬.

‘‘𑀢𑀼𑀡𑁆𑀳𑀻 𑀅𑀳𑀽 𑀓𑀺𑀫𑁆𑀧𑀼𑀭𑀺𑀲𑁄 𑀲𑀪𑀭𑀺𑀬𑁄, 𑀬𑁄 𑀤𑀸𑀦𑀺 𑀩𑁆𑀬𑀸𑀳𑀸𑀲𑀺 𑀪𑀬𑀲𑁆𑀲 𑀪𑀻𑀢𑁄;

𑀲𑁄 𑀤𑀸𑀦𑀺 𑀫𑀼𑀢𑁆𑀢𑁄 𑀲𑀼𑀔𑀺𑀢𑁄 𑀅𑀭𑁄𑀕𑁄, 𑀯𑀸𑀘𑀸𑀓𑀺𑀭𑁂𑀯𑀢𑁆𑀣𑀯𑀢𑀻 𑀦𑀭𑀸𑀦’’𑀦𑁆𑀢𑀺.

𑀢𑀢𑁆𑀣 𑀯𑀸𑀘𑀸𑀓𑀺𑀭𑁂𑀯𑀢𑁆𑀣𑀯𑀢𑀻 𑀦𑀭𑀸𑀦𑀦𑁆𑀢𑀺 𑀯𑀸𑀘𑀸𑀕𑀺𑀭𑀸 𑀏𑀯 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀣𑀯𑀢𑀻 𑀳𑀺𑀢𑀸𑀯𑀳𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀭𑀸𑀚𑀸 𑀓𑀺𑀦𑁆𑀦𑀭𑁂 𑀲𑀼𑀯𑀡𑁆𑀡𑀧𑀜𑁆𑀚𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀫𑁂𑀯 𑀮𑀼𑀤𑁆𑀤𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙 𑀪𑀡𑁂, 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 ¶ ‘‘𑀆𑀘𑀭𑀺𑀬, 𑀏𑀯𑀁 𑀓𑀺𑀦𑁆𑀦𑀭𑀸 𑀯𑀸𑀘𑀁 𑀭𑀓𑁆𑀔𑀺𑀢𑁆𑀯𑀸 𑀧𑀢𑁆𑀢𑀓𑀸𑀮𑁂 𑀓𑀣𑀺𑀢𑁂𑀦 𑀲𑀼𑀪𑀸𑀲𑀺𑀢𑁂𑀦𑁂𑀯 𑀫𑀼𑀢𑁆𑀢𑀸, 𑀢𑁆𑀯𑀁 𑀧𑀦 𑀤𑀼𑀓𑁆𑀓𑀣𑀺𑀢𑁂𑀦 𑀫𑀳𑀸𑀤𑀼𑀓𑁆𑀔𑀁 𑀧𑀢𑁆𑀢𑁄’’𑀢𑀺 𑀇𑀤𑀁 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀫𑀸 𑀪𑀸𑀬𑀺, 𑀚𑀻𑀯𑀺𑀢𑀁 𑀢𑁂 𑀅𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀅𑀲𑁆𑀲𑀸𑀲𑁂𑀲𑀺, ‘‘𑀅𑀧𑀺𑀘 𑀔𑁄 𑀧𑀦 𑀢𑀼𑀫𑁆𑀳𑁂 𑀫𑀁 𑀭𑀓𑁆𑀔𑁂𑀬𑁆𑀬𑀸𑀣𑀸’’𑀢𑀺𑀯𑀼𑀢𑁆𑀢𑁂 ‘‘𑀦 𑀢𑀸𑀯 𑀦𑀓𑁆𑀔𑀢𑁆𑀢𑀬𑁄𑀕𑁄 𑀮𑀩𑁆𑀪𑀢𑀻’’𑀢𑀺 ¶ 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀫𑀢𑀁 𑀏𑀴𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀚𑀻𑀯𑀸𑀳𑀻’’𑀢𑀺 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀏𑀴𑀓𑀫𑀁𑀲𑁂𑀦 𑀩𑀮𑀺𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀓𑁄𑀓𑀸𑀮𑀺𑀓𑁄 𑀯𑀸𑀘𑀸𑀬 𑀳𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀴𑀸𑀭𑀧𑀺𑀗𑁆𑀕𑀮𑁄 𑀓𑁄𑀓𑀸𑀮𑀺𑀓𑁄 𑀅𑀳𑁄𑀲𑀺, 𑀢𑀓𑁆𑀓𑀸𑀭𑀺𑀬𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀓𑁆𑀓𑀸𑀭𑀺𑀬𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁮𑁨] 𑁯. 𑀭𑀼𑀭𑀼𑀫𑀺𑀕𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸

𑀢𑀲𑁆𑀲 ¶ 𑀕𑀸𑀫𑀯𑀭𑀁 𑀤𑀫𑁆𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀪𑀺𑀓𑁆𑀔𑀽𑀳𑀺 ‘‘𑀩𑀳𑀽𑀧𑀓𑀸𑀭𑁄 𑀢𑁂 𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑀲𑀢𑁆𑀣𑀸, 𑀢𑁆𑀯𑀁 𑀢𑀣𑀸𑀕𑀢𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀁 𑀮𑀪𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀡𑁆𑀳𑀺, 𑀮𑀸𑀪𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀻’’𑀢𑀺 𑀯𑀼𑀢𑁆𑀢𑁄 ‘‘𑀆𑀯𑀼𑀲𑁄, 𑀲𑀢𑁆𑀣𑀸𑀭𑀸 𑀫𑀫 𑀢𑀺𑀡𑀕𑁆𑀕𑀫𑀢𑁆𑀢𑁄𑀧𑀺 𑀉𑀧𑀓𑀸𑀭𑁄 𑀦 𑀓𑀢𑁄, 𑀅𑀳𑀁 𑀲𑀬𑀫𑁂𑀯 𑀧𑀩𑁆𑀩𑀚𑀺𑀁, 𑀲𑀬𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀡𑁆𑀳𑀺𑀁, 𑀲𑀬𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀺’’𑀦𑁆𑀢𑀺 𑀓𑀣𑁂𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀓𑀢𑀜𑁆𑀜𑀽 𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁄 𑀅𑀓𑀢𑀯𑁂𑀤𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀅𑀓𑀢𑀜𑁆𑀜𑀽, 𑀧𑀼𑀩𑁆𑀩𑁂𑀧𑀺 𑀅𑀓𑀢𑀜𑁆𑀜𑀽𑀬𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀚𑀻𑀯𑀺𑀢𑁂 𑀤𑀺𑀦𑁆𑀦𑁂𑀧𑀺 𑀫𑀫 𑀕𑀼𑀡𑀫𑀢𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀲𑁂𑀝𑁆𑀞𑀺 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 ‘‘𑀫𑀳𑀸𑀥𑀦𑀓𑁄’’𑀢𑀺𑀲𑁆𑀲, 𑀦𑀸𑀫𑀁 𑀓𑀢𑁆𑀯𑀸 ‘‘𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀫𑀫 𑀧𑀼𑀢𑁆𑀢𑁄 𑀓𑀺𑀮𑀫𑀺𑀲𑁆𑀲𑀢𑀻’’𑀢𑀺 𑀦 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀕𑀻𑀢𑀦𑀘𑁆𑀘𑀯𑀸𑀤𑀺𑀢𑀔𑀸𑀤𑀦𑀪𑁄𑀚𑀦𑀢𑁄 𑀉𑀤𑁆𑀥𑀁 𑀦 𑀓𑀺𑀜𑁆𑀘𑀺 𑀅𑀜𑁆𑀜𑀸𑀲𑀺. 𑀢𑀁 𑀯𑀬𑀧𑁆𑀧𑀢𑁆𑀢𑀁 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑁄 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀇𑀢𑁆𑀣𑀺𑀥𑀼𑀢𑁆𑀢𑀲𑀼𑀭𑀸𑀥𑀼𑀢𑁆𑀢𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 𑀦𑀸𑀦𑀸𑀩𑁆𑀬𑀲𑀦𑀫𑀼𑀔𑁂𑀳𑀺 ¶ 𑀇𑀡𑀁 𑀆𑀤𑀸𑀬 𑀢𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀡𑀸𑀬𑀺𑀓𑁂𑀳𑀺 𑀘𑁄𑀤𑀺𑀬𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦, 𑀏𑀓𑁂𑀦𑀫𑁆𑀳𑀺 𑀅𑀢𑁆𑀢𑀪𑀸𑀯𑁂𑀦 𑀅𑀜𑁆𑀜𑁄 𑀯𑀺𑀬 𑀚𑀸𑀢𑁄, 𑀫𑀢𑀁 𑀫𑁂 𑀲𑁂𑀬𑁆𑀬𑁄’’𑀢𑀺. 𑀲𑁄 𑀇𑀡𑀸𑀬𑀺𑀓𑁂 𑀆𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀇𑀡𑀧𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣, 𑀕𑀗𑁆𑀕𑀸𑀢𑀻𑀭𑁂 𑀫𑁂 𑀦𑀺𑀤𑀳𑀺𑀢𑀁 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁 𑀅𑀢𑁆𑀣𑀺, 𑀢𑀁 𑀯𑁄 𑀤𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑁂𑀦 ¶ 𑀲𑀤𑁆𑀥𑀺𑀁 𑀅𑀕𑀫𑀁𑀲𑀼. 𑀲𑁄 ‘‘𑀇𑀥 𑀥𑀦’’𑀦𑁆𑀢𑀺 𑀦𑀺𑀥𑀺𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀯𑀺𑀬 ‘‘𑀕𑀗𑁆𑀕𑀸𑀬𑀁 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀮𑀸𑀬𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀧𑀢𑀺. 𑀲𑁄 𑀘𑀡𑁆𑀟𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑁄 𑀓𑀸𑀭𑀼𑀜𑁆𑀜𑀭𑀯𑀁 𑀯𑀺𑀭𑀯𑀺.

𑀢𑀤𑀸 𑀫𑀳𑀸𑀲𑀢𑁆𑀢𑁄 𑀭𑀼𑀭𑀼𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀯𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀏𑀓𑀓𑁄𑀯 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀭𑀫𑀡𑀻𑀬𑁂 𑀲𑀸𑀮𑀫𑀺𑀲𑁆𑀲𑀓𑁂 𑀲𑀼𑀧𑀼𑀧𑁆𑀨𑀺𑀢𑀅𑀫𑁆𑀩𑀯𑀦𑁂 𑀯𑀲𑀢𑀺 𑀉𑀧𑁄𑀲𑀣𑀁 𑀉𑀧𑀯𑀼𑀢𑁆𑀣𑀸𑀬. 𑀢𑀲𑁆𑀲 𑀲𑀭𑀻𑀭𑀘𑁆𑀙𑀯𑀺 𑀲𑀼𑀫𑀚𑁆𑀚𑀺𑀢𑀓𑀜𑁆𑀘𑀦𑀧𑀝𑁆𑀝𑀯𑀡𑁆𑀡𑀸 𑀅𑀳𑁄𑀲𑀺, 𑀳𑀢𑁆𑀣𑀧𑀸𑀤𑀸 ¶ 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬, 𑀦𑀗𑁆𑀕𑀼𑀝𑁆𑀞𑀁 𑀘𑀸𑀫𑀭𑀻𑀦𑀗𑁆𑀕𑀼𑀝𑁆𑀞𑀁 𑀯𑀺𑀬, 𑀲𑀺𑀗𑁆𑀕𑀸𑀦𑀺 𑀭𑀚𑀢𑀤𑀸𑀫𑀲𑀤𑀺𑀲𑀸𑀦𑀺, 𑀅𑀓𑁆𑀔𑀻𑀦𑀺 𑀲𑀼𑀫𑀚𑁆𑀚𑀺𑀢𑀫𑀡𑀺𑀕𑀼𑀴𑀺𑀓𑀸 𑀯𑀺𑀬, 𑀫𑀼𑀔𑀁 𑀑𑀤𑀳𑀺𑀢𑁆𑀯𑀸 𑀞𑀧𑀺𑀢𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀁 𑀯𑀺𑀬. 𑀏𑀯𑀭𑀽𑀧𑀁 𑀢𑀲𑁆𑀲 𑀭𑀽𑀧𑀁 𑀅𑀳𑁄𑀲𑀺. 𑀲𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀢𑀲𑁆𑀲 𑀓𑀸𑀭𑀼𑀜𑁆𑀜𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀦𑀼𑀲𑁆𑀲𑀲𑀤𑁆𑀤𑁄 𑀲𑀽𑀬𑀢𑀺, 𑀫𑀸 𑀫𑀬𑀺 𑀥𑀭𑀦𑁆𑀢𑁂 𑀫𑀭𑀢𑀼, 𑀚𑀻𑀯𑀺𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀬𑀦𑀕𑀼𑀫𑁆𑀩𑀸 𑀉𑀝𑁆𑀞𑀸𑀬 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀫𑀸 𑀪𑀸𑀬𑀺, 𑀚𑀻𑀯𑀺𑀢𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀢𑀻𑀭𑀁 𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀨𑀮𑀸𑀨𑀮𑀸𑀦𑀺 𑀤𑀢𑁆𑀯𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 ‘‘𑀪𑁄 𑀧𑀼𑀭𑀺𑀲, 𑀅𑀳𑀁 𑀢𑀁 𑀇𑀢𑁄 𑀅𑀭𑀜𑁆𑀜𑀢𑁄 𑀦𑀻𑀳𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑀕𑁆𑀕𑁂 𑀞𑀧𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀲𑁄𑀢𑁆𑀣𑀺𑀦𑀸 𑀕𑀫𑀺𑀲𑁆𑀲𑀲𑀺, 𑀅𑀧𑀺𑀘 𑀔𑁄 𑀧𑀦 𑀢𑁆𑀯𑀁 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀓𑀜𑁆𑀘𑀦𑀫𑀺𑀕𑁄 𑀯𑀲𑀢𑀻’𑀢𑀺 𑀥𑀦𑀓𑀸𑀭𑀡𑀸 𑀫𑀁 𑀭𑀜𑁆𑀜𑁄 𑀘𑁂𑀯 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀘 𑀫𑀸 𑀆𑀘𑀺𑀓𑁆𑀔𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼 𑀲𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑀕𑁆𑀕𑁂 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀢𑀲𑁆𑀲 𑀩𑀸𑀭𑀸𑀡𑀲𑀺𑀧𑀯𑀺𑀲𑀦𑀤𑀺𑀯𑀲𑁂𑀬𑁂𑀯 𑀔𑁂𑀫𑀸 𑀦𑀸𑀫 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀧𑀘𑁆𑀘𑀽𑀲𑀓𑀸𑀮𑁂 𑀲𑀼𑀧𑀺𑀦𑀦𑁆𑀢𑁂 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀺𑀕𑀁 𑀅𑀢𑁆𑀢𑀦𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑀺𑀲𑁆𑀯𑀸 ¶ 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀏𑀯𑀭𑀽𑀧𑁄 𑀫𑀺𑀕𑁄 𑀦 𑀪𑀯𑁂𑀬𑁆𑀬, 𑀦𑀸𑀳𑀁 𑀲𑀼𑀧𑀺𑀦𑁂 𑀧𑀲𑁆𑀲𑁂𑀬𑁆𑀬𑀁, 𑀅𑀤𑁆𑀥𑀸 𑀪𑀯𑀺𑀲𑁆𑀲𑀢𑀺, 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀳𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀺𑀕𑀁 𑀧𑀲𑁆𑀲𑀺𑀢𑀼𑀁 𑀇𑀘𑁆𑀙𑀸𑀫𑀺, 𑀲𑀼𑀯𑀡𑁆𑀡𑀯𑀡𑁆𑀡𑀫𑀺𑀕𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸𑀫𑁆𑀳𑀺, 𑀮𑀪𑀺𑀲𑁆𑀲𑀸𑀫𑀺 𑀘𑁂, 𑀚𑀻𑀯𑁂𑀬𑁆𑀬𑀁, 𑀦𑁄 𑀘𑁂, 𑀦𑀢𑁆𑀣𑀺 𑀫𑁂 𑀚𑀻𑀯𑀺𑀢’’𑀦𑁆𑀢𑀺 𑀆𑀳. 𑀭𑀸𑀚𑀸 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀲𑀘𑁂 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀣𑀺, 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀫𑀺𑀕𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀤𑁂𑀯, 𑀳𑁄𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂 𑀲𑀳𑀲𑁆𑀲𑀣𑀯𑀺𑀓𑀁 𑀞𑀧𑁂𑀢𑁆𑀯𑀸 𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀺𑀕𑀁 𑀆𑀘𑀺𑀓𑁆𑀔𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀤𑁆𑀥𑀺𑀁 𑀲𑀳𑀲𑁆𑀲𑀣𑀯𑀺𑀓𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂𑀦 𑀢𑀜𑁆𑀘 𑀳𑀢𑁆𑀣𑀺𑀁 𑀢𑀢𑁄 𑀘 𑀉𑀢𑁆𑀢𑀭𑀺 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀕𑀸𑀣𑀁 𑀮𑀺𑀔𑀸𑀧𑁂𑀢𑁆𑀯𑀸 𑀏𑀓𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀳𑀺 𑀢𑀸𑀢, 𑀫𑀫 𑀯𑀘𑀦𑁂𑀦 𑀇𑀫𑀁 𑀕𑀸𑀣𑀁 𑀦𑀕𑀭𑀯𑀸𑀲𑀻𑀦𑀁 𑀓𑀣𑁂𑀳𑀻’’𑀢𑀺 𑀇𑀫𑀲𑁆𑀫𑀺𑀁 𑀚𑀸𑀢𑀓𑁂 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁭.

‘‘𑀢𑀲𑁆𑀲 ¶ ¶ 𑀕𑀸𑀫𑀯𑀭𑀁 𑀤𑀫𑁆𑀫𑀺, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;

𑀬𑁄 𑀫𑁂 𑀢𑀁 𑀫𑀺𑀕𑀫𑀓𑁆𑀔𑀸𑀢𑀺, 𑀫𑀺𑀕𑀸𑀦𑀁 𑀫𑀺𑀕𑀫𑀼𑀢𑁆𑀢𑀫’’𑀦𑁆𑀢𑀺.

𑀅𑀫𑀘𑁆𑀘𑁄 𑀲𑀼𑀯𑀡𑁆𑀡𑀧𑀝𑁆𑀝𑀁 𑀕𑀳𑁂𑀢𑁆𑀯𑀸 𑀲𑀓𑀮𑀦𑀕𑀭𑁂 𑀯𑀸𑀘𑀸𑀧𑁂𑀲𑀺. 𑀅𑀣 𑀲𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀦𑁆𑀢𑁄𑀯 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀭𑀜𑁆𑀜𑁄 𑀏𑀯𑀭𑀽𑀧𑀁 𑀫𑀺𑀕𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀫𑀁 𑀭𑀜𑁆𑀜𑁄 𑀤𑀲𑁆𑀲𑁂𑀳𑀻’’𑀢𑀺 𑀆𑀳. 𑀅𑀫𑀘𑁆𑀘𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀢𑀭𑀺𑀢𑁆𑀯𑀸 𑀢𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁 𑀓𑀺𑀭, 𑀤𑁂𑀯, 𑀢𑀁 𑀫𑀺𑀕𑀁 𑀆𑀘𑀺𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀤𑀲𑁆𑀲𑁂𑀲𑀺. 𑀭𑀸𑀚𑀸 ‘‘𑀲𑀘𑁆𑀘𑀁 𑀅𑀫𑁆𑀪𑁄 𑀧𑀼𑀭𑀺𑀲𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀲𑀘𑁆𑀘𑀁 𑀫𑀳𑀸𑀭𑀸𑀚, 𑀢𑁆𑀯𑀁 𑀏𑀢𑀁 𑀬𑀲𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀯𑀤𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁮.

‘‘𑀫𑀬𑁆𑀳𑀁 𑀕𑀸𑀫𑀯𑀭𑀁 𑀤𑁂𑀳𑀺, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;

𑀅𑀳𑀁 𑀢𑁂 𑀫𑀺𑀕𑀫𑀓𑁆𑀔𑀺𑀲𑁆𑀲𑀁, 𑀫𑀺𑀕𑀸𑀦𑀁 𑀫𑀺𑀕𑀫𑀼𑀢𑁆𑀢𑀫’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀺𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀅𑀩𑁆𑀪𑁄 𑀓𑀼𑀳𑀺𑀁 𑀲𑁄 𑀫𑀺𑀕𑁄 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀢𑀫𑁂𑀯 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑁄 𑀫𑀺𑀢𑁆𑀢𑀤𑀼𑀩𑁆𑀪𑀻 ‘‘𑀲𑁂𑀦𑀁, 𑀤𑁂𑀯, 𑀲𑀦𑁆𑀦𑀺𑀲𑀻𑀤𑀸𑀧𑁂𑀳𑀻’’𑀢𑀺 ¶ 𑀯𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀬 𑀲𑁂𑀦𑀸𑀬 𑀏𑀲𑁄, 𑀤𑁂𑀯, 𑀲𑀼𑀯𑀡𑁆𑀡𑀫𑀺𑀕𑁄 𑀏𑀢𑀲𑁆𑀫𑀺𑀁 𑀯𑀦𑁂 𑀯𑀲𑀢𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁯.

‘‘𑀏𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑀲𑁆𑀫𑀺𑀁, 𑀅𑀫𑁆𑀩𑀸 𑀲𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸, 𑀏𑀢𑁆𑀣𑁂𑀲𑁄 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺.

𑀢𑀢𑁆𑀣 𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸𑀢𑀺 𑀏𑀢𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀽𑀫𑀺 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀬 𑀭𑀢𑁆𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀢𑀺𑀡𑀚𑀸𑀢𑀺𑀬𑀸 𑀲𑀜𑁆𑀙𑀦𑁆𑀦𑀸, 𑀲𑀲𑀓𑀼𑀘𑁆𑀙𑀺 𑀯𑀺𑀬 𑀫𑀼𑀤𑀼𑀓𑀸, 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀏𑀲𑁄 𑀢𑀺𑀝𑁆𑀞𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 ‘‘𑀢𑀲𑁆𑀲 𑀫𑀺𑀕𑀲𑁆𑀲 𑀧𑀮𑀸𑀬𑀺𑀢𑀼𑀁 𑀅𑀤𑀢𑁆𑀯𑀸 𑀔𑀺𑀧𑁆𑀧𑀁 𑀆𑀯𑀼𑀥𑀳𑀢𑁆𑀣𑁂𑀳𑀺 𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀯𑀦𑀲𑀡𑁆𑀟𑀁 𑀧𑀭𑀺𑀯𑀸𑀭𑁂𑀣𑀸’’𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀉𑀦𑁆𑀦𑀤𑀺𑀁𑀲𑀼. 𑀭𑀸𑀚𑀸 𑀓𑀢𑀺𑀧𑀬𑁂𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀲𑁄𑀧𑀺𑀲𑁆𑀲 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀳𑀦𑁆𑀢𑁄 𑀩𑀮𑀓𑀸𑀬𑀲𑀤𑁆𑀤𑁄, 𑀢𑀫𑁆𑀳𑀸 𑀫𑁂 𑀧𑀼𑀭𑀺𑀲𑀸 ¶ 𑀪𑀬𑁂𑀦 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 ¶ . 𑀲𑁄 𑀉𑀝𑁆𑀞𑀸𑀬 𑀲𑀓𑀮𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀣𑁂𑀯 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀭𑀸𑀚𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀕𑀩𑀮𑁄 𑀫𑀺𑀕𑁄 𑀅𑀯𑀢𑁆𑀣𑀭𑀦𑁆𑀢𑁄 𑀯𑀺𑀬 𑀆𑀕𑀘𑁆𑀙𑁂𑀬𑁆𑀬, 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀇𑀫𑀁 𑀫𑀺𑀕𑀁 𑀲𑀦𑁆𑀢𑀸𑀲𑁂𑀢𑁆𑀯𑀸 𑀲𑀘𑁂 𑀧𑀮𑀸𑀬𑀢𑀺, 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁨𑁦.

‘‘𑀥𑀦𑀼𑀁 𑀅𑀤𑁆𑀯𑁂𑀚𑁆𑀛𑀁 𑀓𑀢𑁆𑀯𑀸𑀦, 𑀉𑀲𑀼𑀁 𑀲𑀦𑁆𑀦𑀬𑁆𑀳𑀼𑀧𑀸𑀕𑀫𑀺;

𑀫𑀺𑀕𑁄 𑀘 𑀤𑀺𑀲𑁆𑀯𑀸 𑀭𑀸𑀚𑀸𑀦𑀁, 𑀤𑀽𑀭𑀢𑁄 𑀅𑀚𑁆𑀛𑀪𑀸𑀲𑀣.

𑁧𑁨𑁧.

‘‘𑀆𑀕𑀫𑁂𑀳𑀺 𑀫𑀳𑀸𑀭𑀸𑀚, 𑀫𑀸 𑀫𑀁 𑀯𑀺𑀚𑁆𑀛𑀺 𑀭𑀣𑁂𑀲𑀪;

𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀏𑀢𑁆𑀣𑁂𑀲𑁄 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺.

𑀢𑀢𑁆𑀣 ¶ 𑀅𑀤𑁆𑀯𑁂𑀚𑁆𑀛𑀁 𑀓𑀢𑁆𑀯𑀸𑀦𑀸𑀢𑀺 𑀚𑀺𑀬𑀸𑀬 𑀘 𑀲𑀭𑁂𑀦 𑀘 𑀲𑀤𑁆𑀥𑀺𑀁 𑀏𑀓𑀫𑁂𑀯 𑀓𑀢𑁆𑀯𑀸. 𑀲𑀦𑁆𑀦𑀬𑁆𑀳𑀸𑀢𑀺 𑀲𑀦𑁆𑀦𑀬𑁆𑀳𑀺𑀢𑁆𑀯𑀸. 𑀆𑀕𑀫𑁂𑀳𑀻𑀢𑀺 ‘‘𑀢𑀺𑀝𑁆𑀞, 𑀫𑀳𑀸𑀭𑀸𑀚, 𑀫𑀸 𑀫𑀁 𑀯𑀺𑀚𑁆𑀛𑀺, 𑀚𑀻𑀯𑀕𑁆𑀕𑀸𑀳𑀫𑁂𑀯 𑀕𑀡𑁆𑀳𑀸𑀳𑀻’’𑀢𑀺 𑀫𑀥𑀼𑀭𑀸𑀬 𑀫𑀦𑀼𑀲𑁆𑀲𑀯𑀸𑀘𑀸𑀬 𑀅𑀪𑀸𑀲𑀺.

𑀭𑀸𑀚𑀸 𑀢𑀲𑁆𑀲 𑀫𑀥𑀼𑀭𑀓𑀣𑀸𑀬 𑀩𑀦𑁆𑀥𑀺𑀢𑁆𑀯𑀸 𑀥𑀦𑀼𑀁 𑀑𑀢𑀸𑀭𑁂𑀢𑁆𑀯𑀸 𑀕𑀸𑀭𑀯𑁂𑀦 𑀅𑀝𑁆𑀞𑀸𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀲𑀩𑁆𑀩𑀸𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀲𑀢𑁆𑀢𑁄 𑀲𑀼𑀯𑀡𑁆𑀡𑀓𑀺𑀗𑁆𑀓𑀺𑀡𑀺𑀓𑀁 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀫𑀥𑀼𑀭𑁂𑀦 𑀲𑀭𑁂𑀦 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺 ‘‘𑀓𑁄 𑀦𑀼 𑀢𑁂 𑀇𑀤𑀫𑀓𑁆𑀔𑀸𑀲𑀺, 𑀏𑀢𑁆𑀣𑁂𑀲𑁄 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺? 𑀢𑀲𑁆𑀫𑀺𑀁 𑀔𑀡𑁂 𑀧𑀸𑀧𑀧𑀼𑀭𑀺𑀲𑁄 𑀣𑁄𑀓𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀲𑁄𑀢𑀧𑀣𑁂𑀯 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀇𑀫𑀺𑀦𑀸 𑀫𑁂 𑀤𑀲𑁆𑀲𑀺𑀢𑁄’’𑀢𑀺 𑀓𑀣𑁂𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁧𑁨𑁨.

‘‘𑀏𑀲 𑀧𑀸𑀧𑀘𑀭𑁄 𑀧𑁄𑀲𑁄, 𑀲𑀫𑁆𑀫 𑀢𑀺𑀝𑁆𑀞𑀢𑀺 𑀆𑀭𑀓𑀸;

𑀲𑁄𑀬𑀁 𑀫𑁂 𑀇𑀤𑀫𑀓𑁆𑀔𑀸𑀲𑀺, 𑀏𑀢𑁆𑀣𑁂𑀲𑁄 𑀢𑀺𑀝𑁆𑀞𑀢𑁂 𑀫𑀺𑀕𑁄’’𑀢𑀺.

𑀢𑀢𑁆𑀣 𑀧𑀸𑀧𑀘𑀭𑁄𑀢𑀺 𑀯𑀺𑀲𑁆𑀲𑀝𑁆𑀞𑀸𑀘𑀸𑀭𑁄.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀕𑀭𑀳𑀺𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁩.

‘‘𑀲𑀘𑁆𑀘𑀁 ¶ ¶ 𑀓𑀺𑀭𑁂𑀯 𑀫𑀸𑀳𑀁𑀲𑀼, 𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥;

𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 𑀲𑁂𑀬𑁆𑀬𑁄, 𑀦 𑀢𑁆𑀯𑁂𑀯𑁂𑀓𑀘𑁆𑀘𑀺𑀬𑁄 𑀦𑀭𑁄’’𑀢𑀺.

𑀢𑀢𑁆𑀣 𑀦𑀺𑀧𑁆𑀮𑀯𑀺𑀢𑀦𑁆𑀢𑀺 𑀉𑀢𑁆𑀢𑀸𑀭𑀺𑀢𑀁. 𑀏𑀓𑀘𑁆𑀘𑀺𑀬𑁄𑀢𑀺 𑀏𑀓𑀘𑁆𑀘𑁄 𑀧𑀦 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀸𑀧𑀧𑀼𑀕𑁆𑀕𑀮𑁄 𑀉𑀤𑀓𑁂 𑀧𑀢𑀦𑁆𑀢𑁄𑀧𑀺 𑀉𑀢𑁆𑀢𑀸𑀭𑀺𑀢𑁄 𑀦 𑀢𑁆𑀯𑁂𑀯 𑀲𑁂𑀬𑁆𑀬𑁄. 𑀓𑀝𑁆𑀞𑀜𑁆𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀫𑀺𑀢𑁆𑀢𑀤𑀼𑀩𑁆𑀪𑀻 𑀧𑀦 𑀧𑀸𑀧𑀧𑀼𑀕𑁆𑀕𑀮𑁄 𑀯𑀺𑀦𑀸𑀲𑀸𑀬, 𑀢𑀲𑁆𑀫𑀸 𑀢𑀢𑁄 𑀓𑀝𑁆𑀞𑀫𑁂𑀯 𑀯𑀭𑀢𑀭𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼, 𑀫𑀬𑀸 𑀧𑀦 𑀢𑁂𑀲𑀁 𑀯𑀘𑀦𑀁 𑀦 𑀓𑀢𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁨𑁪.

‘‘𑀓𑀺𑀁 𑀦𑀼 𑀭𑀼𑀭𑀼 𑀕𑀭𑀳𑀲𑀺 𑀫𑀺𑀕𑀸𑀦𑀁, 𑀓𑀺𑀁 𑀧𑀓𑁆𑀔𑀻𑀦𑀁 𑀓𑀺𑀁 𑀧𑀦 𑀫𑀸𑀦𑀼𑀲𑀸𑀦𑀁;

𑀪𑀬𑀁 ¶ 𑀳𑀺 𑀫𑀁 𑀯𑀺𑀦𑁆𑀤𑀢𑀺𑀦𑀧𑁆𑀧𑀭𑀽𑀧𑀁, 𑀲𑀼𑀢𑁆𑀯𑀸𑀦 𑀢𑀁 𑀫𑀸𑀦𑀼𑀲𑀺𑀁 𑀪𑀸𑀲𑀫𑀸𑀦’’𑀦𑁆𑀢𑀺.

𑀢𑀢𑁆𑀣 𑀫𑀺𑀕𑀸𑀦𑀦𑁆𑀢𑀺 𑀫𑀺𑀕𑀸𑀦𑀫𑀜𑁆𑀜𑀢𑀭𑀁 𑀕𑀭𑀳𑀲𑀺, 𑀉𑀤𑀸𑀳𑀼 𑀧𑀓𑁆𑀔𑀻𑀦𑀁, 𑀫𑀸𑀦𑀼𑀲𑀸𑀦𑀦𑁆𑀢𑀺 𑀧𑀼𑀘𑁆𑀙𑀺. 𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀻𑀢𑀺 𑀪𑀬𑀁 𑀫𑀁 𑀧𑀝𑀺𑀮𑀪𑀢𑀺, 𑀅𑀳𑀁 𑀅𑀢𑁆𑀢𑀦𑀺 𑀅𑀦𑀺𑀲𑁆𑀲𑀭𑁄 𑀪𑀬𑀲𑀦𑁆𑀢𑀓𑁄 𑀯𑀺𑀬 𑀳𑁄𑀫𑀺. 𑀅𑀦𑀧𑁆𑀧𑀭𑀽𑀧𑀦𑁆𑀢𑀺 𑀫𑀳𑀦𑁆𑀢𑀁.

𑀢𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀦 𑀫𑀺𑀕𑀁, 𑀦 𑀧𑀓𑁆𑀔𑀺𑀁 𑀕𑀭𑀳𑀸𑀫𑀺, 𑀫𑀦𑀼𑀲𑁆𑀲𑀁 𑀧𑀦 𑀕𑀭𑀳𑀸𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁫.

‘‘𑀬𑀫𑀼𑀤𑁆𑀥𑀭𑀺𑀁 𑀯𑀸𑀳𑀦𑁂 𑀯𑀼𑀬𑁆𑀳𑀫𑀸𑀦𑀁, 𑀫𑀳𑁄𑀤𑀓𑁂 𑀲𑀮𑀺𑀮𑁂 𑀲𑀻𑀖𑀲𑁄𑀢𑁂;

𑀢𑀢𑁄𑀦𑀺𑀤𑀸𑀦𑀁 𑀪𑀬𑀫𑀸𑀕𑀢𑀁 𑀫𑀫, 𑀤𑀼𑀓𑁆𑀔𑁄 𑀳𑀯𑁂 𑀭𑀸𑀚 𑀅𑀲𑀩𑁆𑀪𑀺 𑀲𑀗𑁆𑀕𑀫𑁄’’𑀢𑀺.

𑀢𑀢𑁆𑀣 𑀯𑀸𑀳𑀦𑁂𑀢𑀺 𑀧𑀢𑀺𑀢𑀧𑀢𑀺𑀢𑁂 𑀯𑀳𑀺𑀢𑀼𑀁 𑀲𑀫𑀢𑁆𑀣𑁂 𑀕𑀗𑁆𑀕𑀸𑀯𑀳𑁂. 𑀫𑀳𑁄𑀤𑀓𑁂 𑀲𑀮𑀺𑀮𑁂𑀢𑀺 𑀫𑀳𑀸𑀉𑀤𑀓𑁂 𑀫𑀳𑀸𑀲𑀮𑀺𑀮𑁂𑀢𑀺 𑀅𑀢𑁆𑀣𑁄. 𑀉𑀪𑀬𑁂𑀦𑀸𑀧𑀺 𑀕𑀗𑁆𑀕𑀸𑀯𑀳𑀲𑁆𑀲𑁂𑀯 𑀩𑀳𑀼𑀉𑀤𑀓𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀫𑀳𑀸𑀭𑀸𑀚, 𑀬𑁄 𑀫𑀬𑁆𑀳𑀁 𑀢𑀬𑀸 𑀤𑀲𑁆𑀲𑀺𑀢𑁄 𑀧𑀼𑀭𑀺𑀲𑁄, 𑀏𑀲𑁄 𑀫𑀬𑀸 𑀕𑀗𑁆𑀕𑀸𑀬 𑀯𑀼𑀬𑁆𑀳𑀫𑀸𑀦𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀓𑀸𑀭𑀼𑀜𑁆𑀜𑀭𑀯𑀁 𑀯𑀺𑀭𑀯𑀦𑁆𑀢𑁄 𑀉𑀤𑁆𑀥𑀭𑀺𑀢𑁄, 𑀢𑀢𑁄𑀦𑀺𑀤𑀸𑀦𑀁 𑀫𑁂 𑀇𑀤𑀫𑀚𑁆𑀚 𑀪𑀬𑀁 𑀆𑀕𑀢𑀁, 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀫𑀸𑀕𑀫𑁄 𑀦𑀸𑀫 𑀤𑀼𑀓𑁆𑀔𑁄, 𑀫𑀳𑀸𑀭𑀸𑀚𑀸𑀢𑀺.

𑀢𑀁 ¶ ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀯𑀁 𑀩𑀳𑀽𑀧𑀓𑀸𑀭𑀲𑁆𑀲 𑀦𑀸𑀫 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀯𑀺𑀚𑁆𑀛𑀺𑀢𑁆𑀯𑀸 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁬.

‘‘𑀲𑁄𑀳𑀁 𑀘𑀢𑀼𑀧𑁆𑀧𑀢𑁆𑀢𑀫𑀺𑀫𑀁 𑀯𑀺𑀳𑀗𑁆𑀕𑀫𑀁, 𑀢𑀦𑀼𑀘𑁆𑀙𑀺𑀤𑀁 𑀳𑀤𑀬𑁂 𑀑𑀲𑁆𑀲𑀚𑀸𑀫𑀺;

𑀳𑀦𑀸𑀫𑀺 𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀅𑀓𑀺𑀘𑁆𑀘𑀓𑀸𑀭𑀺𑀁, 𑀬𑁄 𑀢𑀸𑀤𑀺𑀲𑀁 𑀓𑀫𑁆𑀫𑀓𑀢𑀁 𑀦 𑀚𑀸𑀦𑁂’’𑀢𑀺.

𑀢𑀢𑁆𑀣 𑀘𑀢𑀼𑀧𑁆𑀧𑀢𑁆𑀢𑀦𑁆𑀢𑀺 𑀘𑀢𑀽𑀳𑀺 𑀯𑀸𑀚𑀧𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀯𑀺𑀳𑀗𑁆𑀕𑀫𑀦𑁆𑀢𑀺 𑀆𑀓𑀸𑀲𑀕𑀸𑀫𑀺𑀁. 𑀢𑀦𑀼𑀘𑁆𑀙𑀺𑀤𑀦𑁆𑀢𑀺 𑀲𑀭𑀻𑀭𑀙𑀺𑀦𑁆𑀤𑀦𑀁. 𑀑𑀲𑁆𑀲𑀚𑀸𑀫𑀻𑀢𑀺 𑀏𑀢𑀲𑁆𑀲 𑀳𑀤𑀬𑁂 𑀯𑀺𑀲𑁆𑀲𑀚𑁆𑀚𑁂𑀫𑀺.

𑀢𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀏𑀲 𑀫𑀁 𑀦𑀺𑀲𑁆𑀲𑀸𑀬 𑀦𑀲𑁆𑀲𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀸𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁭.

‘‘𑀥𑀻𑀭𑀲𑁆𑀲 ¶ 𑀩𑀸𑀮𑀲𑁆𑀲 𑀳𑀯𑁂 𑀚𑀦𑀺𑀦𑁆𑀤, 𑀲𑀦𑁆𑀢𑁄 𑀯𑀥𑀁 𑀦𑀧𑁆𑀧𑀲𑀁𑀲𑀦𑁆𑀢𑀺 𑀚𑀸𑀢𑀼;

𑀓𑀸𑀫𑀁 𑀖𑀭𑀁 𑀕𑀘𑁆𑀙𑀢𑀼 𑀧𑀸𑀧𑀥𑀫𑁆𑀫𑁄, 𑀬𑀜𑁆𑀘𑀲𑁆𑀲 𑀪𑀝𑁆𑀞𑀁 𑀢𑀤𑁂𑀢𑀲𑁆𑀲 𑀤𑁂𑀳𑀺;

𑀅𑀳𑀜𑁆𑀘 𑀢𑁂 𑀓𑀸𑀫𑀓𑀭𑁄 𑀪𑀯𑀸𑀫𑀻’’𑀢𑀺.

𑀢𑀢𑁆𑀣 𑀓𑀸𑀫𑀦𑁆𑀢𑀺 𑀓𑀸𑀫𑁂𑀦 𑀬𑀣𑀸𑀭𑀼𑀘𑀺𑀬𑀸 𑀅𑀢𑁆𑀢𑀦𑁄 𑀖𑀭𑀁 𑀕𑀘𑁆𑀙𑀢𑀼. 𑀬𑀜𑁆𑀘𑀲𑁆𑀲 𑀪𑀝𑁆𑀞𑀁 𑀢𑀤𑁂𑀢𑀲𑁆𑀲 𑀤𑁂𑀳𑀻𑀢𑀺 𑀬𑀜𑁆𑀘 𑀢𑀲𑁆𑀲 ‘‘𑀇𑀤𑀁 𑀦𑀸𑀫 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀢𑀬𑀸 𑀓𑀣𑀺𑀢𑀁, 𑀢𑀁 𑀢𑀲𑁆𑀲 𑀤𑁂𑀳𑀺. 𑀓𑀸𑀫𑀓𑀭𑁄𑀢𑀺 𑀇𑀘𑁆𑀙𑀸𑀓𑀭𑁄, 𑀬𑀁 𑀇𑀘𑁆𑀙𑀲𑀺, 𑀢𑀁 𑀓𑀭𑁄𑀳𑀺, 𑀫𑀁𑀲𑀁 𑀯𑀸 𑀫𑁂 𑀔𑀸𑀤, 𑀓𑀻𑀴𑀸𑀫𑀺𑀕𑀁 𑀯𑀸 𑀓𑀭𑁄𑀳𑀺, 𑀲𑀩𑁆𑀩𑀢𑁆𑀣 𑀢𑁂 𑀅𑀦𑀼𑀓𑀽𑀮𑀯𑀢𑁆𑀢𑀻 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁨𑁮.

‘‘𑀅𑀤𑁆𑀥𑀸 𑀭𑀼𑀭𑀽 𑀅𑀜𑁆𑀜𑀢𑀭𑁄 𑀲𑀢𑀁 𑀲𑁄, 𑀬𑁄 𑀤𑀼𑀩𑁆𑀪𑀢𑁄 𑀫𑀸𑀦𑀼𑀲𑀲𑁆𑀲 𑀦 𑀤𑀼𑀩𑁆𑀪𑀺;

𑀓𑀸𑀫𑀁 𑀖𑀭𑀁 𑀕𑀘𑁆𑀙𑀢𑀼 𑀧𑀸𑀧𑀥𑀫𑁆𑀫𑁄, 𑀬𑀜𑁆𑀘𑀲𑁆𑀲 𑀪𑀝𑁆𑀞𑀁 𑀢𑀤𑁂𑀢𑀲𑁆𑀲 𑀤𑀫𑁆𑀫𑀺;

𑀅𑀳𑀜𑁆𑀘 𑀢𑁂 𑀓𑀸𑀫𑀘𑀸𑀭𑀁 𑀤𑀤𑀸𑀫𑀻’’𑀢𑀺.

𑀢𑀢𑁆𑀣 ¶ 𑀲𑀢𑀁 𑀲𑁄𑀢𑀺 𑀅𑀤𑁆𑀥𑀸 𑀢𑁆𑀯𑀁 𑀲𑀢𑀁 𑀧𑀡𑁆𑀟𑀺𑀢𑀸𑀦𑀁 𑀅𑀜𑁆𑀜𑀢𑀭𑁄. 𑀓𑀸𑀫𑀘𑀸𑀭𑀦𑁆𑀢𑀺 𑀅𑀳𑀁 𑀢𑀯 𑀥𑀫𑁆𑀫𑀓𑀣𑀸𑀬 𑀧𑀲𑀻𑀤𑀺𑀢𑁆𑀯𑀸 𑀢𑀼𑀬𑁆𑀳𑀁 𑀓𑀸𑀫𑀘𑀸𑀭𑀁 𑀅𑀪𑀬𑀁 𑀤𑀤𑀸𑀫𑀺, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂 𑀦𑀺𑀩𑁆𑀪𑀬𑀸 𑀬𑀣𑀸𑀭𑀼𑀘𑀺𑀬𑀸 𑀯𑀺𑀳𑀭𑀣𑀸𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀯𑀭𑀁 𑀅𑀤𑀸𑀲𑀺.

𑀅𑀣 ¶ 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀦𑀸𑀫 𑀅𑀜𑁆𑀜𑀁 𑀫𑀼𑀔𑁂𑀦 𑀪𑀸𑀲𑀦𑁆𑀢𑀺, 𑀅𑀜𑁆𑀜𑀁 𑀓𑀸𑀬𑁂𑀦 𑀓𑀭𑁄𑀦𑁆𑀢𑀻’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁯.

‘‘𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁧𑁩𑁦.

‘‘𑀅𑀧𑀺 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄’’𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀫𑀺𑀕𑀭𑀸𑀚, 𑀫𑀸 𑀫𑀁 𑀏𑀯𑀁 𑀫𑀜𑁆𑀜𑀺, 𑀅𑀳𑀜𑁆𑀳𑀺 𑀭𑀚𑁆𑀚𑀁 𑀚𑀳𑀦𑁆𑀢𑁄𑀧𑀺 𑀦 𑀢𑀼𑀬𑁆𑀳𑀁 𑀤𑀺𑀦𑁆𑀦𑀯𑀭𑀁 𑀚𑀳𑀺𑀲𑁆𑀲𑀁, 𑀲𑀤𑁆𑀤𑀳𑀣, 𑀫𑀬𑁆𑀳’’𑀦𑁆𑀢𑀺 ¶ 𑀯𑀭𑀁 𑀅𑀤𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑀁 𑀯𑀭𑀁 𑀕𑀡𑁆𑀳𑀺. 𑀭𑀸𑀚𑀸𑀧𑀺 𑀢𑀁 𑀯𑀭𑀁 𑀤𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀦𑀕𑀭𑀁 𑀦𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀜𑁆𑀘 𑀦𑀕𑀭𑀜𑁆𑀘 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀥𑀫𑁆𑀫𑀁 𑀤𑁂𑀲𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀤𑁂𑀯𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀘 𑀭𑀸𑀚𑀧𑀭𑀺𑀲𑀸𑀬 𑀘 𑀫𑀥𑀼𑀭𑀸𑀬 𑀫𑀦𑀼𑀲𑁆𑀲𑀪𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀤𑀲𑀳𑀺 𑀭𑀸𑀚𑀥𑀫𑁆𑀫𑁂𑀳𑀺 𑀑𑀯𑀤𑀺𑀢𑁆𑀯𑀸 𑀫𑀳𑀸𑀚𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀭𑀸𑀚𑀸 ‘‘𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑀫𑁆𑀫𑀻’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀺𑀕𑀧𑀓𑁆𑀔𑀻𑀦𑀁 𑀓𑁄𑀘𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀫𑀺𑀕𑀕𑀡𑁄 𑀫𑀦𑀼𑀲𑁆𑀲𑀸𑀦𑀁 𑀲𑀲𑁆𑀲𑀸𑀦𑀺 𑀔𑀸𑀤𑀢𑀺, 𑀓𑁄𑀘𑀺 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀳𑀸𑀚𑀦𑁄 𑀭𑀸𑀚𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀉𑀧𑀓𑁆𑀓𑁄𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁧.

‘‘𑀲𑀫𑀸𑀕𑀢𑀸 𑀚𑀸𑀦𑀧𑀤𑀸, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸;

𑀫𑀺𑀕𑀸 𑀲𑀲𑁆𑀲𑀸𑀦𑀺 𑀔𑀸𑀤𑀦𑁆𑀢𑀺, 𑀢𑀁 𑀤𑁂𑀯𑁄 𑀧𑀝𑀺𑀲𑁂𑀥𑀢𑀽’’𑀢𑀺.

𑀢𑀢𑁆𑀣 𑀢𑀁 𑀤𑁂𑀯𑁄𑀢𑀺 𑀢𑀁 𑀫𑀺𑀕𑀕𑀡𑀁 𑀤𑁂𑀯𑁄 𑀧𑀝𑀺𑀲𑁂𑀥𑀢𑀽𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁩𑁨.

‘‘𑀓𑀸𑀫𑀁 𑀚𑀦𑀧𑀤𑁄 𑀫𑀸𑀲𑀺, 𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀼;

𑀦 𑀢𑁆𑀯𑁂𑀯𑀸𑀳𑀁 𑀭𑀼𑀭𑀼𑀁 𑀤𑀼𑀩𑁆𑀪𑁂, 𑀤𑀢𑁆𑀯𑀸 𑀅𑀪𑀬𑀤𑀓𑁆𑀔𑀺𑀡𑀁.

𑁧𑁩𑁩.

‘‘𑀫𑀸 ¶ ¶ 𑀫𑁂 𑀚𑀦𑀧𑀤𑁄 𑀆𑀲𑀺, 𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀼;

𑀦 𑀢𑁆𑀯𑁂𑀯𑀸𑀳𑀁 𑀫𑀺𑀕𑀭𑀸𑀚𑀲𑁆𑀲, 𑀯𑀭𑀁 𑀤𑀢𑁆𑀯𑀸 𑀫𑀼𑀲𑀸 𑀪𑀡𑁂’’𑀢𑀺.

𑀢𑀢𑁆𑀣 𑀫𑀸𑀲𑀻𑀢𑀺 𑀓𑀸𑀫𑀁 𑀫𑀬𑁆𑀳𑀁 𑀚𑀦𑀧𑀤𑁄 𑀫𑀸 𑀳𑁄𑀢𑀼. 𑀭𑀼𑀭𑀼𑀦𑁆𑀢𑀺 𑀦 𑀢𑁆𑀯𑁂𑀯 𑀅𑀳𑀁 𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀭𑀼𑀭𑀼𑀫𑀺𑀕𑀭𑀸𑀚𑀲𑁆𑀲 𑀅𑀪𑀬𑀤𑀓𑁆𑀔𑀺𑀡𑀁 𑀤𑀢𑁆𑀯𑀸 𑀤𑀼𑀩𑁆𑀪𑀺𑀲𑁆𑀲𑀸𑀫𑀻𑀢𑀺.

𑀫𑀳𑀸𑀚𑀦𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀧𑀝𑀺𑀓𑁆𑀓𑀫𑀺. 𑀲𑀸 𑀓𑀣𑀸 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀫𑀺𑀕𑀕𑀡𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸𑀦𑀁 𑀲𑀲𑁆𑀲𑀸𑀦𑀺 𑀫𑀸 𑀔𑀸𑀤𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀔𑁂𑀢𑁆𑀢𑁂𑀲𑀼 𑀧𑀡𑁆𑀡𑀲𑀜𑁆𑀜𑀁 𑀩𑀦𑁆𑀥𑀦𑁆𑀢𑀽’’𑀢𑀺 ¶ 𑀫𑀦𑀼𑀲𑁆𑀲𑀸𑀦𑀁 𑀖𑁄𑀲𑀸𑀧𑁂𑀲𑀺. 𑀢𑁂 𑀢𑀣𑀸 𑀩𑀦𑁆𑀥𑀺𑀁𑀲𑀼, 𑀢𑀸𑀬 𑀲𑀜𑁆𑀜𑀸𑀬 𑀫𑀺𑀕𑀸 𑀬𑀸𑀯𑀚𑁆𑀚𑀢𑀦𑀸 𑀲𑀲𑁆𑀲𑀸𑀦𑀺 𑀦 𑀔𑀸𑀤𑀦𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀅𑀓𑀢𑀜𑁆𑀜𑀽𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀭𑀼𑀭𑀼𑀫𑀺𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀭𑀼𑀭𑀼𑀫𑀺𑀕𑀭𑀸𑀚𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁮𑁩] 𑁧𑁦. 𑀲𑀭𑀪𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑀸 𑀲𑀁𑀔𑀺𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀯𑀺𑀢𑁆𑀣𑀸𑀭𑁂𑀦 𑀩𑁆𑀬𑀸𑀓𑀭𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀓𑀤𑀸 𑀧𑀦 𑀲𑀢𑁆𑀣𑀸 𑀣𑁂𑀭𑀁 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺? 𑀤𑁂𑀯𑁄𑀭𑁄𑀳𑀦𑁂. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀦𑀼𑀧𑀼𑀩𑁆𑀩𑀺𑀓𑀣𑀸. 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀳𑀺 𑀲𑀦𑁆𑀢𑀓𑁂 𑀘𑀦𑁆𑀤𑀦𑀧𑀢𑁆𑀢𑁂 𑀆𑀬𑀲𑁆𑀫𑀢𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁂𑀦 𑀇𑀤𑁆𑀥𑀺𑀬𑀸 𑀕𑀳𑀺𑀢𑁂 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀺. 𑀢𑀤𑀸 𑀢𑀺𑀢𑁆𑀣𑀺𑀬𑀸 ‘‘𑀧𑀝𑀺𑀓𑁆𑀔𑀺𑀢𑁆𑀢𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁, 𑀇𑀤𑀸𑀦𑀺 𑀲𑀬𑀫𑁆𑀧𑀺 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀗𑁆𑀓𑀼𑀪𑀽𑀢𑁂𑀳𑀺 𑀅𑀢𑁆𑀢𑀦𑁄 𑀲𑀸𑀯𑀓𑁂𑀳𑀺 ‘‘𑀓𑀺𑀁, 𑀪𑀦𑁆𑀢𑁂, 𑀇𑀤𑁆𑀥𑀺𑀬𑀸 𑀧𑀢𑁆𑀢𑀁 𑀦 𑀕𑀡𑁆𑀳𑀣𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 ‘‘𑀦𑁂𑀢𑀁 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀤𑀼𑀓𑁆𑀓𑀭𑀁, 𑀙𑀯𑀲𑁆𑀲 𑀧𑀦 𑀤𑀸𑀭𑀼𑀧𑀢𑁆𑀢𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀲𑀡𑁆𑀳𑀲𑀼𑀔𑀼𑀫𑀕𑀼𑀡𑀁 𑀓𑁄 𑀕𑀺𑀳𑀻𑀦𑀁 𑀧𑀓𑀸𑀲𑁂𑀲𑁆𑀲𑀢𑀻𑀢𑀺 𑀦 𑀕𑀡𑁆𑀳𑀺𑀫𑁆𑀳, 𑀲𑀫𑀡𑀸 𑀧𑀦 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀮𑁄𑀮𑀢𑀸𑀬 𑀇𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀕𑀡𑁆𑀳𑀺𑀁𑀲𑀼. 𑀫𑀸 ‘𑀅𑀫𑁆𑀳𑀸𑀓𑀁 𑀇𑀤𑁆𑀥𑀺𑀓𑀭𑀡𑀁 𑀪𑀸𑀭𑁄’𑀢𑀺 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀬𑀜𑁆𑀳𑀺 𑀢𑀺𑀝𑁆𑀞𑀦𑁆𑀢𑀼 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸, 𑀆𑀓𑀗𑁆𑀔𑀫𑀸𑀦𑀸 𑀧𑀦 ¶ 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀇𑀤𑁆𑀥𑀺𑀁 𑀤𑀲𑁆𑀲𑁂𑀲𑁆𑀲𑀸𑀫, 𑀲𑀘𑁂 𑀳𑀺 𑀲𑀫𑀡𑁄 𑀕𑁄𑀢𑀫𑁄 𑀏𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀫𑀬𑀁 𑀤𑁆𑀯𑀺𑀕𑀼𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀓𑀣𑀬𑀺𑀁𑀲𑀼.

𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁 ‘‘𑀪𑀦𑁆𑀢𑁂, 𑀢𑀺𑀢𑁆𑀣𑀺𑀬𑀸 𑀓𑀺𑀭 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀓𑀭𑁄𑀦𑁆𑀢𑀼, 𑀅𑀳𑀫𑁆𑀧𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑁄 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 ‘‘𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀺𑀭 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. ‘‘𑀫𑀳𑀸𑀭𑀸𑀚, 𑀢𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀧𑀜𑁆𑀜𑀢𑁆𑀢𑀁, 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 ¶ 𑀦𑀢𑁆𑀣𑀺. ‘‘𑀬𑀣𑀸 𑀳𑀺, 𑀫𑀳𑀸𑀭𑀸𑀚, 𑀢𑀯 𑀉𑀬𑁆𑀬𑀸𑀦𑁂 𑀧𑀼𑀧𑁆𑀨𑀨𑀮𑀁 𑀅𑀜𑁆𑀜𑁂𑀲𑀁 𑀯𑀸𑀭𑀺𑀢𑀁, 𑀦 𑀢𑀯, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺. ‘‘𑀓𑀢𑁆𑀣 𑀧𑀦, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂’’𑀢𑀺. ‘‘𑀅𑀫𑁆𑀳𑁂𑀳𑀺 𑀢𑀢𑁆𑀣 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀦𑀢𑁆𑀣𑀺 𑀓𑀺𑀜𑁆𑀘𑀺 𑀫𑀳𑀸𑀭𑀸𑀚𑀸’’𑀢𑀺. 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀫𑀦𑀼𑀲𑁆𑀲𑀸 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀢𑁆𑀣𑀸 𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀺. ‘‘𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼’’𑀦𑁆𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽 𑀓𑀣𑀬𑀦𑁆𑀢𑀺. 𑀫𑀳𑀸𑀚𑀦𑁄 ‘‘𑀅𑀘𑁆𑀙𑀭𑀺𑀬𑀭𑀽𑀧𑀁 𑀓𑀺𑀭 𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀺, 𑀧𑀲𑁆𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀖𑀭𑀤𑁆𑀯𑀸𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀸 ‘‘𑀫𑀬𑀫𑁆𑀧𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀝𑁆𑀞𑀸𑀦𑁂 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀉𑀧𑀝𑁆𑀞𑀸𑀓𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀫𑁂𑀯 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 ‘‘𑀧𑀸𑀝𑀺𑀳𑀸𑀭𑀺𑀬𑀁 𑀓𑀺𑀭, 𑀪𑀦𑁆𑀢𑁂, 𑀓𑀭𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀤𑀸, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀲𑀺𑀬’’𑀦𑁆𑀢𑀺 𑀆𑀳. ‘‘𑀫𑀡𑁆𑀟𑀧𑀁 𑀓𑀭𑁄𑀫𑀺 𑀪𑀦𑁆𑀢𑁂’’𑀢𑀺? ‘‘𑀅𑀮𑀁 𑀫𑀳𑀸𑀭𑀸𑀚, 𑀫𑀫 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀝𑁆𑀞𑀸𑀦𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀭𑀢𑀦𑀫𑀡𑁆𑀟𑀧𑀁 𑀓𑀭𑀺𑀲𑁆𑀲𑀢𑀻’’𑀢𑀺. ‘‘𑀏𑀢𑀁 𑀓𑀸𑀭𑀡𑀁 𑀦𑀕𑀭𑁂 𑀉𑀕𑁆𑀖𑁄𑀲𑀸𑀧𑁂𑀫𑀺, 𑀪𑀦𑁆𑀢𑁂’’𑀢𑀺? ‘‘𑀉𑀕𑁆𑀖𑁄𑀲𑀸𑀧𑁂𑀳𑀺 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀥𑀫𑁆𑀫𑀖𑁄𑀲𑀓𑀁 𑀅𑀮𑀗𑁆𑀓𑀢𑀳𑀢𑁆𑀣𑀺𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀪𑀕𑀯𑀸 𑀓𑀺𑀭 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂’’𑀢𑀺 𑀬𑀸𑀯 𑀙𑀝𑁆𑀞𑀤𑀺𑀯𑀲𑀸 𑀤𑁂𑀯𑀲𑀺𑀓𑀁 𑀖𑁄𑀲𑀦𑀁 𑀓𑀸𑀭𑁂𑀲𑀺. 𑀢𑀺𑀢𑁆𑀣𑀺𑀬𑀸 ‘‘𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀓𑀺𑀭 𑀓𑀭𑀺𑀲𑁆𑀲𑀢𑀻’’𑀢𑀺 𑀲𑀸𑀫𑀺𑀓𑀸𑀦𑀁 𑀥𑀦𑀁 ¶ 𑀤𑀢𑁆𑀯𑀸 𑀲𑀸𑀯𑀢𑁆𑀣𑀺𑀲𑀸𑀫𑀦𑁆𑀢𑁂 𑀅𑀫𑁆𑀩𑀭𑀼𑀓𑁆𑀔𑁂 𑀙𑀺𑀦𑁆𑀤𑀸𑀧𑀬𑀺𑀁𑀲𑀼. 𑀥𑀫𑁆𑀫𑀖𑁄𑀲𑀓𑁄 𑀧𑀼𑀡𑁆𑀡𑀫𑀻𑀤𑀺𑀯𑀲𑁂 𑀧𑀸𑀢𑁄𑀯 ‘‘𑀅𑀚𑁆𑀚, 𑀪𑀕𑀯𑀢𑁄 𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀉𑀕𑁆𑀖𑁄𑀲𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀬𑁂 𑀬𑁂 𑀕𑀦𑁆𑀢𑀼𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑁂 𑀢𑁂 𑀲𑀸𑀯𑀢𑁆𑀣𑀺𑀁 𑀧𑀢𑁆𑀢𑀫𑁂𑀯 𑀅𑀢𑁆𑀢𑀸𑀦𑀁 𑀧𑀲𑁆𑀲𑀺𑀁𑀲𑀼, 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀧𑀭𑀺𑀲𑀸 𑀅𑀳𑁄𑀲𑀺.

𑀲𑀢𑁆𑀣𑀸 ¶ 𑀧𑀸𑀢𑁄𑀯 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀁 𑀦𑀺𑀓𑁆𑀔𑀫𑀺. 𑀓𑀡𑁆𑀟𑁄 𑀦𑀸𑀫 𑀉𑀬𑁆𑀬𑀸𑀦𑀧𑀸𑀮𑁄 𑀧𑀺𑀡𑁆𑀟𑀺𑀧𑀓𑁆𑀓𑀫𑁂𑀯 𑀓𑀼𑀫𑁆𑀪𑀧𑀫𑀸𑀡𑀁 𑀫𑀳𑀦𑁆𑀢𑀁 𑀅𑀫𑁆𑀩𑀧𑀓𑁆𑀓𑀁 𑀭𑀜𑁆𑀜𑁄 𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀁 𑀦𑀕𑀭𑀤𑁆𑀯𑀸𑀭𑁂 𑀤𑀺𑀲𑁆𑀯𑀸 ‘‘𑀇𑀤𑀁 𑀢𑀣𑀸𑀕𑀢𑀲𑁆𑀲𑁂𑀯 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀅𑀤𑀸𑀲𑀺. 𑀲𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀆𑀦𑀦𑁆𑀤, 𑀇𑀫𑀁 𑀅𑀫𑁆𑀩𑀝𑁆𑀞𑀺𑀁 𑀉𑀬𑁆𑀬𑀸𑀦𑀧𑀸𑀮𑀓𑀲𑁆𑀲 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑁄𑀧𑀦𑀢𑁆𑀣𑀸𑀬 𑀤𑁂𑀳𑀺, 𑀏𑀲 𑀓𑀡𑁆𑀟𑀫𑁆𑀩𑁄 ¶ 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀭𑁄𑀧𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀅𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀽𑀮𑀸𑀦𑀺 𑀑𑀢𑀭𑀺𑀁𑀲𑀼, 𑀦𑀗𑁆𑀕𑀮𑀲𑀻𑀲𑀧𑀫𑀸𑀡𑁄 𑀭𑀢𑁆𑀢𑀗𑁆𑀓𑀼𑀭𑁄 𑀉𑀝𑁆𑀞𑀳𑀺, 𑀫𑀳𑀸𑀚𑀦𑀲𑁆𑀲 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀧𑀡𑁆𑀡𑀸𑀲𑀳𑀢𑁆𑀣𑀓𑁆𑀔𑀦𑁆𑀥𑁄 𑀧𑀡𑁆𑀡𑀸𑀲𑀳𑀢𑁆𑀣𑀲𑀸𑀔𑁄 𑀉𑀩𑁆𑀩𑁂𑀥𑀢𑁄 𑀘 𑀳𑀢𑁆𑀣𑀲𑀢𑀺𑀓𑁄 𑀅𑀫𑁆𑀩𑀭𑀼𑀓𑁆𑀔𑁄 𑀲𑀫𑁆𑀧𑀚𑁆𑀚𑀺, 𑀢𑀸𑀯𑀤𑁂𑀯𑀲𑁆𑀲 𑀧𑀼𑀧𑁆𑀨𑀸𑀦𑀺 𑀘 𑀨𑀮𑀸𑀦𑀺 𑀘 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀫𑀥𑀼𑀓𑀭𑀧𑀭𑀺𑀯𑀼𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀨𑀮𑀪𑀭𑀺𑀢𑁄 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀯𑀸𑀢𑀧𑁆𑀧𑀳𑀭𑀡𑀓𑀸𑀮𑁂 𑀫𑀥𑀼𑀭𑀧𑀓𑁆𑀓𑀸𑀦𑀺 𑀧𑀢𑀺𑀁𑀲𑀼. 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀸 𑀪𑀺𑀓𑁆𑀔𑀽 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀆𑀕𑀫𑀺𑀁𑀲𑀼.

𑀲𑀸𑀬𑀦𑁆𑀳𑀲𑀫𑀬𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀢𑁆𑀣𑀼 𑀭𑀢𑀦𑀫𑀡𑁆𑀟𑀧𑀓𑀭𑀡𑀁 𑀅𑀫𑁆𑀳𑀸𑀓𑀁 𑀪𑀸𑀭𑁄’’𑀢𑀺 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀦𑀻𑀮𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀁 𑀲𑀢𑁆𑀢𑀭𑀢𑀦𑀫𑀡𑁆𑀟𑀧𑀁 𑀓𑀸𑀭𑁂𑀲𑀺. 𑀏𑀯𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁 𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀩𑀳𑀼𑀚𑀦𑀲𑁆𑀲 𑀧𑀲𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀑𑀭𑀼𑀬𑁆𑀳 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀯𑀻𑀲𑀢𑀺 𑀧𑀸𑀡𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀢𑀢𑁄 ‘‘𑀧𑀼𑀭𑀺𑀫𑀩𑀼𑀤𑁆𑀥𑀸 𑀧𑀦 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀓𑀢𑁆𑀣 𑀕𑀘𑁆𑀙𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀢𑀸𑀯𑀢𑀺𑀁𑀲𑀪𑀯𑀦’’𑀦𑁆𑀢𑀺 𑀜𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀸 𑀉𑀝𑁆𑀞𑀸𑀬 𑀤𑀓𑁆𑀔𑀺𑀡𑀧𑀸𑀤𑀁 𑀬𑀼𑀕𑀦𑁆𑀥𑀭𑀫𑀼𑀤𑁆𑀥𑀦𑀺 𑀞𑀧𑁂𑀢𑁆𑀯𑀸 𑀯𑀸𑀫𑀧𑀸𑀤𑁂𑀦 𑀲𑀺𑀦𑁂𑀭𑀼𑀫𑀢𑁆𑀣𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀢𑁂𑀫𑀸𑀲𑀁 𑀤𑁂𑀯𑀸𑀦𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀓𑀣𑁂𑀲𑀺. 𑀧𑀭𑀺𑀲𑀸 𑀲𑀢𑁆𑀣𑀼 𑀕𑀢𑀝𑁆𑀞𑀸𑀦𑀁 𑀅𑀚𑀸𑀦𑀦𑁆𑀢𑀻 ¶ ‘‘𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣𑁂𑀯 𑀢𑁂𑀫𑀸𑀲𑀁 𑀯𑀲𑀺. 𑀉𑀧𑀓𑀝𑁆𑀞𑀸𑀬 𑀧𑀯𑀸𑀭𑀡𑀸𑀬 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 ‘‘𑀓𑀳𑀁 𑀧𑀦 𑀏𑀢𑀭𑀳𑀺 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺? ‘‘𑀏𑀲𑁄, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑁂 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀯𑀲𑀻’’𑀢𑀺. ‘‘𑀫𑁄𑀕𑁆𑀕𑀮𑁆𑀮𑀸𑀦, 𑀅𑀳𑀁 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀑𑀢𑀭𑀺𑀲𑁆𑀲𑀸𑀫𑀺, 𑀢𑀣𑀸𑀕𑀢𑀁 𑀤𑀝𑁆𑀞𑀼𑀓𑀸𑀫𑀸 𑀲𑀗𑁆𑀓𑀲𑁆𑀲𑀦𑀕𑀭𑁂 𑀏𑀓𑀢𑁄 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀭𑀺𑀲𑀸𑀬 𑀆𑀭𑁄𑀘𑁂𑀢𑁆𑀯𑀸 𑀲𑀓𑀮𑀧𑀭𑀺𑀲𑀁 𑀲𑀸𑀯𑀢𑁆𑀣𑀺𑀢𑁄 𑀢𑀺𑀁𑀲𑀬𑁄𑀚𑀦𑀁 𑀲𑀗𑁆𑀓𑀲𑁆𑀲𑀦𑀕𑀭𑀁 𑀏𑀓𑀫𑀼𑀳𑀼𑀢𑁆𑀢𑁂𑀦𑁂𑀯 𑀧𑀸𑀧𑁂𑀲𑀺.

𑀲𑀢𑁆𑀣𑀸 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀮𑁄𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀓𑁆𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀓𑁆𑀓𑁄 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀫𑀦𑀼𑀲𑁆𑀲𑀮𑁄𑀓𑀕𑀫𑀦𑀢𑁆𑀣𑀸𑀬 𑀢𑀻𑀡𑀺 𑀲𑁄𑀧𑀸𑀦𑀸𑀦𑀺 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀲𑁄𑀧𑀸𑀦𑀲𑀻𑀲𑀁 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀥𑀼𑀭𑀲𑁄𑀧𑀸𑀦𑀁 𑀓𑀢𑁆𑀯𑀸 ¶ 𑀫𑀚𑁆𑀛𑁂 𑀫𑀡𑀺𑀫𑀬𑀁, 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀭𑀚𑀢𑀫𑀬𑀁, 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀲𑀼𑀯𑀡𑁆𑀡𑀫𑀬𑀦𑁆𑀢𑀺 ¶ 𑀢𑀻𑀡𑀺 𑀲𑁄𑀧𑀸𑀦𑀸𑀦𑀺 𑀫𑀸𑀧𑁂𑀲𑀺, 𑀲𑀢𑁆𑀢𑀭𑀢𑀦𑀫𑀬𑀸 𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑁂𑀧𑀸. 𑀲𑀢𑁆𑀣𑀸 𑀮𑁄𑀓𑀯𑀺𑀯𑀭𑀡𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀫𑀡𑀺𑀫𑀬𑁂𑀦 𑀲𑁄𑀧𑀸𑀦𑁂𑀦 𑀑𑀢𑀭𑀺. 𑀲𑀓𑁆𑀓𑁄 𑀧𑀢𑁆𑀢𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺, 𑀲𑀼𑀬𑀸𑀫𑁄 𑀯𑀸𑀮𑀩𑀻𑀚𑀦𑀺𑀁, 𑀲𑀳𑀫𑁆𑀧𑀢𑀺 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀺𑀁𑀲𑀼. 𑀲𑀢𑁆𑀣𑀸𑀭𑀁 𑀥𑀼𑀭𑀲𑁄𑀧𑀸𑀦𑁂 𑀧𑀢𑀺𑀝𑁆𑀞𑀺𑀢𑀁 𑀧𑀞𑀫𑀫𑁂𑀯 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀦𑁆𑀤𑀺, 𑀧𑀘𑁆𑀙𑀸 𑀲𑁂𑀲𑀧𑀭𑀺𑀲𑀸. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 ‘‘𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀇𑀤𑁆𑀥𑀺𑀫𑀸’𑀢𑀺 𑀧𑀸𑀓𑀝𑁄, 𑀉𑀧𑀸𑀮𑀺 ‘𑀯𑀺𑀦𑀬𑀥𑀭𑁄’𑀢𑀺. 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀦 𑀫𑀳𑀸𑀧𑀜𑁆𑀜𑀕𑀼𑀡𑁄 𑀅𑀧𑀸𑀓𑀝𑁄, 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀏𑀢𑁂𑀦 𑀲𑀤𑀺𑀲𑁄 𑀲𑀫𑀧𑀜𑁆𑀜𑁄 𑀦𑀸𑀫 𑀦𑀢𑁆𑀣𑀺, 𑀧𑀜𑁆𑀜𑀸𑀕𑀼𑀡𑀫𑀲𑁆𑀲 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀢𑀸𑀯 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀁 𑀧𑀼𑀣𑀼𑀚𑁆𑀚𑀦𑀸𑀯 𑀓𑀣𑀬𑀺𑀁𑀲𑀼 𑀢𑀢𑁄 𑀲𑁄𑀢𑀸𑀧𑀦𑁆𑀦𑀸𑀦𑀁 𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀫𑁆𑀧𑀺 𑀲𑁄𑀢𑀸𑀧𑀦𑁆𑀦𑀸𑀯 𑀓𑀣𑀬𑀺𑀁𑀲𑀼, 𑀧𑀼𑀣𑀼𑀚𑁆𑀚𑀦𑀸 𑀦 𑀚𑀸𑀦𑀺𑀁𑀲𑀼. 𑀏𑀯𑀁 𑀲𑀓𑀤𑀸𑀕𑀸𑀫𑀺𑀯𑀺𑀲𑀬𑁂 𑀅𑀦𑀸𑀕𑀸𑀫𑀺𑀯𑀺𑀲𑀬𑁂 𑀔𑀻𑀡𑀸𑀲𑀯𑀯𑀺𑀲𑀬𑁂 𑀫𑀳𑀸𑀲𑀸𑀯𑀓𑀯𑀺𑀲𑀬𑁂 𑀘 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀫𑁆𑀧𑀺 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀦 𑀚𑀸𑀦𑀺𑀁𑀲𑀼, 𑀉𑀧𑀭𑀺𑀫𑀸 𑀉𑀧𑀭𑀺𑀫𑀸𑀯 𑀓𑀣𑀬𑀺𑀁𑀲𑀼. 𑀅𑀕𑁆𑀕𑀲𑀸𑀯𑀓𑀯𑀺𑀲𑀬𑁂 𑀧𑀼𑀝𑁆𑀞𑀧𑀜𑁆𑀳𑀫𑁆𑀧𑀺 𑀅𑀕𑁆𑀕𑀲𑀸𑀯𑀓𑀸𑀯 𑀓𑀣𑀬𑀺𑀁𑀲𑀼, 𑀅𑀜𑁆𑀜𑁂 𑀦 𑀚𑀸𑀦𑀺𑀁𑀲𑀼. 𑀢𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀁 𑀣𑁂𑀭𑁄𑀯 𑀓𑀣𑁂𑀲𑀺, 𑀅𑀜𑁆𑀜𑁂 𑀦 𑀚𑀸𑀦𑀺𑀁𑀲𑀼.

𑀫𑀦𑀼𑀲𑁆𑀲𑀸 ¶ ‘‘𑀓𑁄 𑀦𑀸𑀫 𑀏𑀲 𑀣𑁂𑀭𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀓𑀣𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀳𑁄 𑀫𑀳𑀸𑀧𑀜𑁆𑀜𑁄’’𑀢𑀺 𑀯𑀤𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀣𑁂𑀭𑀲𑁆𑀲 𑀫𑀳𑀸𑀧𑀜𑁆𑀜𑀕𑀼𑀡𑁄 𑀧𑀸𑀓𑀝𑁄 𑀚𑀸𑀢𑁄. 𑀅𑀣 𑀦𑀁 𑀲𑀢𑁆𑀣𑀸 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺. (𑀲𑀼. 𑀦𑀺. 𑁧𑁦𑁪𑁪; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁬𑁩; 𑀦𑁂𑀢𑁆𑀢𑀺. 𑁧𑁪) 𑁋

𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀦𑀼 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳. 𑀣𑁂𑀭𑁄 𑀧𑀜𑁆𑀳𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀢𑁆𑀣𑀸 𑀫𑀁 𑀲𑁂𑀔𑀸𑀲𑁂𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀧𑀝𑀺𑀧𑀤𑀁 𑀧𑀼𑀘𑁆𑀙𑀢𑀻’’𑀢𑀺 𑀧𑀜𑁆𑀳𑁂 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸 ‘‘𑀆𑀕𑀫𑀦𑀧𑀝𑀺𑀧𑀤𑀸 𑀦𑀸𑀫 𑀔𑀦𑁆𑀥𑀸𑀤𑀺𑀯𑀲𑁂𑀦 𑀩𑀳𑀽𑀳𑀺 𑀫𑀼𑀔𑁂𑀳𑀺 𑀲𑀓𑁆𑀓𑀸 𑀓𑀣𑁂𑀢𑀼𑀁, 𑀓𑀢𑀁 𑀦𑀼 𑀔𑁄 𑀓𑀣𑁂𑀦𑁆𑀢𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑁂 𑀓𑀗𑁆𑀔𑀺. 𑀲𑀢𑁆𑀣𑀸 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀧𑀜𑁆𑀳𑁂 𑀦𑀺𑀓𑁆𑀓𑀗𑁆𑀔𑁄, 𑀅𑀚𑁆𑀛𑀸𑀲𑀬𑁂 𑀧𑀦 𑀫𑁂 𑀓𑀗𑁆𑀔𑀢𑀺, 𑀫𑀬𑀸 𑀦𑀬𑁂 𑀅𑀤𑀺𑀦𑁆𑀦𑁂 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀦𑀬𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 ¶ 𑀦𑀬𑀁 𑀤𑀤𑀦𑁆𑀢𑁄 ‘‘𑀪𑀽𑀢𑀫𑀺𑀤𑀁 𑀲𑀸𑀭𑀺𑀧𑀼𑀢𑁆𑀢 𑀲𑀫𑀦𑀼𑀧𑀲𑁆𑀲𑀸’’𑀢𑀺 𑀆𑀳. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀫 𑀅𑀚𑁆𑀛𑀸𑀲𑀬𑀁 ¶ 𑀕𑀳𑁂𑀢𑁆𑀯𑀸 𑀓𑀣𑁂𑀦𑁆𑀢𑁄 𑀔𑀦𑁆𑀥𑀯𑀲𑁂𑀦 𑀓𑀣𑁂𑀲𑁆𑀲𑀢𑀻’’𑀢𑀺. 𑀣𑁂𑀭𑀲𑁆𑀲 𑀲𑀳 𑀦𑀬𑀤𑀸𑀦𑁂𑀦 𑀲𑁄 𑀧𑀜𑁆𑀳𑁄 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀉𑀧𑀝𑁆𑀞𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀓𑀣𑁂𑀲𑀺.

𑀲𑀢𑁆𑀣𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀺𑀁𑀲 𑀧𑀸𑀡𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀲𑀢𑁆𑀣𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀸 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀁𑀲𑀼 ‘‘𑀫𑀳𑀸𑀧𑀜𑁆𑀜𑁄, 𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀧𑀼𑀣𑀼𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀤𑀲𑀩𑀮𑁂𑀦 𑀲𑀁𑀔𑀺𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀏𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀓𑀣𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀭𑀪𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀢𑀺. 𑀭𑀸𑀚𑀸 𑀫𑀺𑀕𑀯𑀺𑀢𑁆𑀢𑀓𑁄 𑀅𑀳𑁄𑀲𑀺 𑀣𑀸𑀫𑀲𑀫𑁆𑀧𑀦𑁆𑀦𑁄, 𑀅𑀜𑁆𑀜𑀁 𑀫𑀦𑀼𑀲𑁆𑀲𑀁 ‘‘𑀫𑀦𑀼𑀲𑁆𑀲𑁄’’𑀢𑀺𑀧𑀺 𑀦 𑀕𑀡𑁂𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀺𑀕𑀯𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑁂 𑀆𑀳 𑁋 ‘‘𑀬𑀲𑁆𑀲 𑀧𑀲𑁆𑀲𑁂𑀦 𑀫𑀺𑀕𑁄 𑀧𑀮𑀸𑀬𑀢𑀺, 𑀢𑁂𑀦 𑀲𑁄 𑀤𑀡𑁆𑀟𑁄 𑀤𑀸𑀢𑀩𑁆𑀩𑁄’’𑀢𑀺. 𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀓𑀤𑀸𑀘𑀺 𑀯𑁂𑀫𑀚𑁆𑀛𑁂 𑀞𑀺𑀢𑀫𑀺𑀕𑀁 𑀯𑀺𑀚𑁆𑀛𑀦𑁆𑀢𑀺, 𑀓𑀤𑀸𑀘𑀺 𑀉𑀝𑁆𑀞𑀺𑀢𑀁, 𑀓𑀤𑀸𑀘𑀺 𑀧𑀮𑀸𑀬𑀦𑁆𑀢𑀫𑁆𑀧𑀺, 𑀅𑀚𑁆𑀚 𑀧𑀦 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑀜𑁆𑀜𑁂𑀯 𑀆𑀭𑁄𑀧𑁂𑀲𑁆𑀲𑀸𑀫𑀸’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀧𑀦 𑀓𑀢𑀺𑀓𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀥𑀼𑀭𑀫𑀕𑁆𑀕𑀁 𑀅𑀤𑀁𑀲𑀼. 𑀢𑁂 𑀫𑀳𑀦𑁆𑀢𑀁 𑀕𑀼𑀫𑁆𑀩𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀕𑁆𑀕𑀭𑀸𑀤𑀻𑀳𑀺 𑀪𑀽𑀫𑀺𑀁 𑀧𑁄𑀣𑀬𑀺𑀁𑀲𑀼. 𑀧𑀞𑀫𑀫𑁂𑀯 𑀲𑀭𑀪𑀫𑀺𑀕𑁄 𑀉𑀝𑁆𑀞𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀕𑀼𑀩𑁆𑀪𑀁 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸 𑀧𑀮𑀸𑀬𑀦𑁄𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀲𑁂𑀲𑀤𑀺𑀲𑀸𑀲𑀼 𑀫𑀦𑀼𑀲𑁆𑀲𑁂 𑀩𑀸𑀳𑀸𑀬 𑀩𑀸𑀳𑀁 𑀥𑀦𑀼𑀦𑀸 𑀥𑀦𑀼𑀁 𑀆𑀳𑀘𑁆𑀘 𑀦𑀺𑀭𑀦𑁆𑀢𑀭𑁂 𑀞𑀺𑀢𑁂 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀑𑀓𑀸𑀲𑀁 𑀅𑀤𑁆𑀤𑀲. 𑀲𑁄 𑀉𑀫𑁆𑀫𑀻𑀮𑀺𑀢𑁂𑀲𑀼 𑀅𑀓𑁆𑀔𑀻𑀲𑀼 ¶ 𑀯𑀸𑀮𑀼𑀓𑀁 𑀔𑀺𑀧𑀫𑀸𑀦𑁄 𑀯𑀺𑀬 𑀭𑀸𑀚𑀸𑀦𑀁 𑀅𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀁 𑀮𑀳𑀼𑀲𑀫𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀲𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀚𑁆𑀛𑀺. 𑀲𑀭𑀪𑀫𑀺𑀕𑀸 𑀦𑀸𑀫 𑀲𑀭𑀁 𑀯𑀜𑁆𑀘𑁂𑀢𑀼𑀁 𑀙𑁂𑀓𑀸 𑀳𑁄𑀦𑁆𑀢𑀺, 𑀲𑀭𑁂 𑀅𑀪𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑁂 𑀯𑁂𑀕𑀁 𑀳𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁂 𑀯𑁂𑀕𑁂𑀦 𑀧𑀼𑀭𑀢𑁄 𑀚𑀯𑀦𑁆𑀢𑀺, 𑀉𑀧𑀭𑀺𑀪𑀸𑀕𑁂𑀦𑀸𑀕𑀘𑁆𑀙𑀦𑁆𑀢𑁂 𑀧𑀺𑀝𑁆𑀞𑀺𑀁 𑀦𑀸𑀫𑁂𑀦𑁆𑀢𑀺, 𑀧𑀲𑁆𑀲𑁂𑀦𑀸𑀕𑀘𑁆𑀙𑀦𑁆𑀢𑁂 𑀣𑁄𑀓𑀁 𑀅𑀧𑀕𑀘𑁆𑀙𑀦𑁆𑀢𑀺, 𑀓𑀼𑀘𑁆𑀙𑀺𑀁 𑀲𑀦𑁆𑀥𑀸𑀬𑀸𑀕𑀘𑁆𑀙𑀦𑁆𑀢𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀦𑁆𑀢𑀺, 𑀲𑀭𑁂 𑀅𑀢𑀺𑀓𑁆𑀓𑀦𑁆𑀢𑁂 𑀯𑀸𑀢𑀘𑁆𑀙𑀺𑀦𑁆𑀦𑀯𑀮𑀸𑀳𑀓𑀯𑁂𑀕𑁂𑀦 𑀧𑀮𑀸𑀬𑀦𑁆𑀢𑀺.

𑀲𑁄𑀧𑀺 𑀭𑀸𑀚𑀸 𑀢𑀲𑁆𑀫𑀺𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺𑀢𑁂 ‘‘𑀲𑀭𑀪𑀫𑀺𑀕𑁄 𑀫𑁂 𑀯𑀺𑀤𑁆𑀥𑁄’’𑀢𑀺 𑀦𑀸𑀤𑀁 𑀫𑀼𑀜𑁆𑀘𑀺. 𑀲𑀭𑀪𑁄 𑀉𑀝𑁆𑀞𑀸𑀬 𑀯𑀸𑀢𑀯𑁂𑀕𑁂𑀦 𑀧𑀮𑀸𑀬𑀺. 𑀩𑀮𑀫𑀡𑁆𑀟𑀮𑀁 𑀪𑀺𑀚𑁆𑀚𑀺𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀞𑀺𑀢𑀅𑀫𑀘𑁆𑀘𑀸 𑀲𑀭𑀪𑀁 𑀧𑀮𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀫𑀺𑀕𑁄 𑀓𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀻’’𑀢𑀺? ‘‘𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦’’𑀦𑁆𑀢𑀺 ¶ . ‘‘𑀭𑀸𑀚𑀸 ‘𑀯𑀺𑀤𑁆𑀥𑁄 𑀫𑁂’𑀢𑀺 𑀯𑀤𑀢𑀺, 𑀓𑁄𑀦𑁂𑀦 𑀯𑀺𑀤𑁆𑀥𑁄, 𑀦𑀺𑀩𑁆𑀩𑀺𑀭𑀚𑁆𑀛𑁄 𑀪𑁄 𑀅𑀫𑁆𑀳𑀸𑀓𑀁 𑀭𑀸𑀚𑀸, 𑀪𑀽𑀫𑀺𑀦𑁂𑀦 𑀯𑀺𑀤𑁆𑀥𑀸’’𑀢𑀺 𑀢𑁂 𑀦𑀸𑀦𑀧𑁆𑀧𑀓𑀸𑀭𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑀺𑀁𑀲𑀼. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀫𑀁 𑀧𑀭𑀺𑀳𑀲𑀦𑁆𑀢𑀺, 𑀦 𑀫𑀫 𑀧𑀫𑀸𑀡𑀁 𑀚𑀸𑀦𑀦𑁆𑀢𑀻’’𑀢𑀺 𑀕𑀸𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀔𑀕𑁆𑀕𑀁 𑀆𑀤𑀸𑀬 ‘‘𑀲𑀭𑀪𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀅𑀦𑀼𑀩𑀦𑁆𑀥𑀺. 𑀲𑀭𑀪𑁄 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺, 𑀭𑀸𑀚𑀸𑀧𑀺 𑀧𑀸𑀯𑀺𑀲𑀺. 𑀢𑀢𑁆𑀣 𑀲𑀭𑀪𑀫𑀺𑀕𑀲𑁆𑀲 𑀕𑀫𑀦𑀫𑀕𑁆𑀕𑁂 𑀲𑀝𑁆𑀞𑀺𑀳𑀢𑁆𑀣𑀫𑀢𑁆𑀢𑁄 𑀫𑀳𑀸𑀧𑀽𑀢𑀺𑀧𑀸𑀤𑀦𑀭𑀓𑀸𑀯𑀸𑀝𑁄 ¶ 𑀅𑀢𑁆𑀣𑀺, 𑀲𑁄 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑀁 𑀉𑀤𑀓𑁂𑀦 𑀧𑀼𑀡𑁆𑀡𑁄 𑀢𑀺𑀡𑁂𑀳𑀺 𑀘 𑀧𑀝𑀺𑀘𑁆𑀙𑀦𑁆𑀦𑁄. 𑀲𑀭𑀪𑁄 𑀉𑀤𑀓𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀯 𑀆𑀯𑀸𑀝𑀪𑀸𑀯𑀁 𑀜𑀢𑁆𑀯𑀸 𑀣𑁄𑀓𑀁 𑀑𑀲𑀓𑁆𑀓𑀺𑀢𑁆𑀯𑀸 𑀕𑀢𑁄. 𑀭𑀸𑀚𑀸 𑀧𑀦 𑀉𑀚𑀼𑀓𑀫𑁂𑀯 𑀕𑀘𑁆𑀙𑀦𑁆𑀢𑁄 𑀢𑀲𑁆𑀫𑀺𑀁 𑀧𑀢𑀺.

𑀲𑀭𑀪𑁄 𑀢𑀲𑁆𑀲 𑀧𑀤𑀲𑀤𑁆𑀤𑀁 𑀅𑀲𑀼𑀡𑀦𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀦𑀭𑀓𑀸𑀯𑀸𑀝𑁂 𑀧𑀢𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀕𑀫𑁆𑀪𑀻𑀭𑀉𑀤𑀓𑁂 𑀅𑀧𑀢𑀺𑀝𑁆𑀞𑀁 𑀓𑀺𑀮𑀫𑀦𑁆𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀓𑀢𑀁 𑀅𑀧𑀭𑀸𑀥𑀁 𑀳𑀤𑀬𑁂 𑀅𑀓𑀢𑁆𑀯𑀸 ¶ 𑀲𑀜𑁆𑀚𑀸𑀢𑀓𑀸𑀭𑀼𑀜𑁆𑀜𑁄 ‘‘𑀫𑀸 𑀫𑀬𑀺 𑀧𑀲𑁆𑀲𑀦𑁆𑀢𑁂𑀯 𑀭𑀸𑀚𑀸 𑀦𑀲𑁆𑀲𑀢𑀼, 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀦𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀆𑀯𑀸𑀝𑀢𑀻𑀭𑁂 𑀞𑀺𑀢𑁄 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀸 𑀤𑀼𑀓𑁆𑀔𑀸 𑀢𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀁 𑀉𑀤𑁆𑀥𑀭𑀺𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀢𑀲𑁆𑀲𑀼𑀤𑁆𑀥𑀭𑀡𑀢𑁆𑀣𑀸𑀬 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀓𑀢𑁆𑀯𑀸𑀯 ‘‘𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑀁 𑀭𑀸𑀚𑀸𑀦𑀁 𑀲𑀝𑁆𑀞𑀺𑀳𑀢𑁆𑀣𑀸 𑀦𑀭𑀓𑀸 𑀉𑀤𑁆𑀥𑀭𑀺𑀢𑁆𑀯𑀸 𑀅𑀲𑁆𑀲𑀸𑀲𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀻𑀳𑀭𑀺𑀢𑁆𑀯𑀸 𑀲𑁂𑀦𑀸𑀬 𑀅𑀯𑀺𑀤𑀽𑀭𑁂 𑀑𑀢𑀸𑀭𑁂𑀢𑁆𑀯𑀸 𑀑𑀯𑀸𑀤𑀫𑀲𑁆𑀲 𑀤𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸 𑀫𑀳𑀸𑀲𑀢𑁆𑀢𑀁 𑀯𑀺𑀦𑀸 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀳 ‘‘𑀲𑀸𑀫𑀺 𑀲𑀭𑀪𑀫𑀺𑀕𑀭𑀸𑀚, 𑀫𑀬𑀸 𑀲𑀤𑁆𑀥𑀺𑀁 𑀩𑀸𑀭𑀸𑀡𑀲𑀺𑀁 𑀏𑀳𑀺, 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀢𑁂 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀤𑀫𑁆𑀫𑀺, 𑀢𑀁 𑀓𑀸𑀭𑁂𑀳𑀻’’𑀢𑀺. ‘‘𑀫𑀳𑀸𑀭𑀸𑀚, 𑀫𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀦 𑀫𑁂 𑀭𑀚𑁆𑀚𑁂𑀦𑀢𑁆𑀣𑁄, 𑀲𑀘𑁂 𑀢𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑁄 𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀲𑀻𑀮𑀁 𑀭𑀓𑁆𑀔𑀸𑀧𑁂𑀳𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀅𑀭𑀜𑁆𑀜𑀫𑁂𑀯 𑀧𑀸𑀯𑀺𑀲𑀺.

𑀲𑁄 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀢𑀲𑁆𑀲 𑀕𑀼𑀡𑀁 𑀲𑀭𑀦𑁆𑀢𑁄𑀯 𑀲𑁂𑀦𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀦𑀕𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑀽’’𑀢𑀺 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁂𑀦 𑀧𑀦 𑀅𑀢𑁆𑀢𑀦𑁄 𑀓𑀢𑀕𑀼𑀡𑀁 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀲𑀸𑀬𑀦𑁆𑀳𑁂 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀗𑁆𑀓𑀢𑀲𑀬𑀦𑁂 𑀲𑀬𑀺𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀁 𑀲𑀭𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀬𑀦𑀧𑀺𑀝𑁆𑀞𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀧𑀻𑀢𑀺𑀧𑀼𑀡𑁆𑀡𑁂𑀦 𑀳𑀤𑀬𑁂𑀦 𑀙𑀳𑀺 𑀕𑀸𑀣𑀸𑀳𑀺 𑀉𑀤𑀸𑀦𑁂𑀲𑀺 𑁋

𑁧𑁩𑁪.

‘‘𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

𑁧𑁩𑁫.

‘‘𑀆𑀲𑀻𑀲𑁂𑀣𑁂𑀯 ¶ 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀁.

𑁧𑁩𑁬.

‘‘𑀯𑀸𑀬𑀫𑁂𑀣𑁂𑀯 ¶ 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

𑁧𑁩𑁭.

‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀁.

𑁧𑁩𑁮.

‘‘𑀤𑀼𑀓𑁆𑀔𑀽𑀧𑀦𑀻𑀢𑁄𑀧𑀺 𑀦𑀭𑁄 𑀲𑀧𑀜𑁆𑀜𑁄, 𑀆𑀲𑀁 𑀦 𑀙𑀺𑀦𑁆𑀤𑁂𑀬𑁆𑀬 𑀲𑀼𑀔𑀸𑀕𑀫𑀸𑀬;

𑀩𑀳𑀽 ¶ 𑀳𑀺 𑀨𑀲𑁆𑀲𑀸 𑀅𑀳𑀺𑀢𑀸 𑀳𑀺𑀢𑀸 𑀘, 𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀼𑀫𑀼𑀧𑀩𑁆𑀩𑀚𑀦𑁆𑀢𑀺.

𑁧𑁩𑁯.

‘‘𑀅𑀘𑀺𑀦𑁆𑀢𑀺𑀢𑀫𑁆𑀧𑀺 𑀪𑀯𑀢𑀺, 𑀘𑀺𑀦𑁆𑀢𑀺𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑀺;

𑀦 𑀳𑀺 𑀘𑀺𑀦𑁆𑀢𑀸𑀫𑀬𑀸 𑀪𑁄𑀕𑀸, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸’’𑀢𑀺.

𑀢𑀢𑁆𑀣 𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄𑀢𑀺 𑀆𑀲𑀘𑁆𑀙𑁂𑀤𑀓𑀓𑀫𑁆𑀫𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀲𑀼 𑀆𑀲𑀁 𑀓𑀭𑁄𑀣𑁂𑀯 𑀦 𑀉𑀓𑁆𑀓𑀡𑁆𑀞𑁂𑀬𑁆𑀬. 𑀬𑀣𑀸 𑀇𑀘𑁆𑀙𑀺𑀦𑁆𑀢𑀺 𑀅𑀳𑀜𑁆𑀳𑀺 𑀲𑀝𑁆𑀞𑀺𑀳𑀢𑁆𑀣𑀸 𑀦𑀭𑀓𑀸 𑀉𑀝𑁆𑀞𑀸𑀦𑀁 𑀇𑀘𑁆𑀙𑀺𑀁, 𑀲𑁄𑀫𑁆𑀳𑀺 𑀢𑀣𑁂𑀯 𑀚𑀸𑀢𑁄, 𑀢𑀢𑁄 𑀉𑀝𑁆𑀞𑀺𑀢𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀅𑀳𑀺𑀢𑀸 𑀳𑀺𑀢𑀸 𑀘𑀸𑀢𑀺 𑀤𑀼𑀓𑁆𑀔𑀨𑀲𑁆𑀲𑀸 𑀘 𑀲𑀼𑀔𑀨𑀲𑁆𑀲𑀸 𑀘, ‘‘𑀫𑀭𑀡𑀨𑀲𑁆𑀲𑀸 𑀚𑀻𑀯𑀺𑀢𑀨𑀲𑁆𑀲𑀸 𑀘𑀸’’𑀢𑀺𑀧𑀺 𑀅𑀢𑁆𑀣𑁄, 𑀲𑀢𑁆𑀢𑀸𑀦𑀜𑁆𑀳𑀺 𑀫𑀭𑀡𑀨𑀲𑁆𑀲𑁄 𑀅𑀳𑀺𑀢𑁄 𑀚𑀻𑀯𑀺𑀢𑀨𑀲𑁆𑀲𑁄 𑀳𑀺𑀢𑁄, 𑀢𑁂𑀲𑀁 𑀅𑀯𑀺𑀢𑀓𑁆𑀓𑀺𑀢𑁄 𑀅𑀘𑀺𑀦𑁆𑀢𑀺𑀢𑁄𑀧𑀺 𑀫𑀭𑀡𑀨𑀲𑁆𑀲𑁄 𑀆𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀘𑀺𑀦𑁆𑀢𑀺 𑀢𑀫𑁆𑀧𑀻𑀢𑀺 𑀫𑀬𑀸 ‘‘𑀆𑀯𑀸𑀝𑁂 𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀦 𑀘𑀺𑀦𑁆𑀢𑀺𑀢𑀁, ‘‘𑀲𑀭𑀪𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀺𑀢𑀁, 𑀇𑀤𑀸𑀦𑀺 𑀧𑀦 𑀫𑁂 𑀘𑀺𑀦𑁆𑀢𑀺𑀢𑀁 𑀦𑀝𑁆𑀞𑀁, 𑀅𑀘𑀺𑀦𑁆𑀢𑀺𑀢𑀫𑁂𑀯 𑀚𑀸𑀢𑀁. 𑀪𑁄𑀕𑀸𑀢𑀺 𑀬𑀲𑀧𑀭𑀺𑀯𑀸𑀭𑀸. 𑀏𑀢𑁂 𑀘𑀺𑀦𑁆𑀢𑀸𑀫𑀬𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀜𑀸𑀡𑀯𑀢𑀸 𑀯𑀻𑀭𑀺𑀬𑀫𑁂𑀯 𑀓𑀸𑀢𑀩𑁆𑀩𑀁. 𑀯𑀻𑀭𑀺𑀬𑀯𑀢𑁄 𑀳𑀺 𑀅𑀘𑀺𑀦𑁆𑀢𑀺𑀢𑀫𑁆𑀧𑀺 𑀳𑁄𑀢𑀺𑀬𑁂𑀯.

𑀢𑀲𑁆𑀲𑁂𑀯𑀁 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑀲𑁆𑀲𑁂𑀯 𑀅𑀭𑀼𑀡𑀁 𑀉𑀝𑁆𑀞𑀳𑀺. 𑀧𑀼𑀭𑁄𑀳𑀺𑀢𑁄 𑀘 𑀧𑀸𑀢𑁄𑀯 𑀲𑀼𑀔𑀲𑁂𑀬𑁆𑀬𑀧𑀼𑀘𑁆𑀙𑀦𑀢𑁆𑀣𑀁 𑀆𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀺𑀢𑁄 𑀢𑀲𑁆𑀲 𑀉𑀤𑀸𑀦𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀭𑀸𑀚𑀸 𑀳𑀺𑀬𑁆𑀬𑁄 𑀫𑀺𑀕𑀯𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀲𑀭𑀪𑀫𑀺𑀕𑀁 𑀯𑀺𑀭𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀅𑀫𑀘𑁆𑀘𑁂𑀳𑀺 𑀅𑀯𑀳𑀲𑀺𑀬𑀫𑀸𑀦𑁄 ‘𑀫𑀸𑀭𑁂𑀢𑁆𑀯𑀸 𑀦𑀁 𑀆𑀳𑀭𑀺𑀲𑁆𑀲𑀸𑀫𑀻’𑀢𑀺 𑀔𑀢𑁆𑀢𑀺𑀬𑀫𑀸𑀦𑁂𑀦 𑀢𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀲𑀝𑁆𑀞𑀺𑀳𑀢𑁆𑀣𑁂 𑀦𑀭𑀓𑁂 𑀧𑀢𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀤𑀬𑀸𑀮𑀼𑀦𑀸 𑀲𑀭𑀪𑀭𑀸𑀚𑁂𑀦 𑀭𑀜𑁆𑀜𑁄 𑀤𑁄𑀲𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸 𑀉𑀤𑁆𑀥𑀭𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀫𑀜𑁆𑀜𑁂 𑀉𑀤𑀸𑀦𑀁 𑀉𑀤𑀸𑀦𑁂𑀢𑀻’’𑀢𑀺. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀭𑀜𑁆𑀜𑁄 ¶ 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀁 𑀉𑀤𑀸𑀦𑀁 𑀲𑀼𑀢𑁆𑀯𑀸 𑀲𑀼𑀫𑀚𑁆𑀚𑀺𑀢𑁂 𑀆𑀤𑀸𑀲𑁂 𑀫𑀼𑀔𑀁 ¶ 𑀑𑀮𑁄𑀓𑁂𑀦𑁆𑀢𑀲𑁆𑀲 𑀙𑀸𑀬𑀸 𑀯𑀺𑀬 𑀭𑀜𑁆𑀜𑀸 𑀘 𑀲𑀭𑀪𑁂𑀦 𑀘 𑀓𑀢𑀓𑀸𑀭𑀡𑀁 𑀧𑀸𑀓𑀝𑀁 𑀅𑀳𑁄𑀲𑀺. 𑀲𑁄 𑀦𑀔𑀕𑁆𑀕𑁂𑀦 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀭𑀸𑀚𑀸 ‘‘𑀓𑁄 𑀏𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀤𑁂𑀯 𑀧𑀼𑀭𑁄𑀳𑀺𑀢𑁄’’𑀢𑀺. 𑀅𑀣𑀲𑁆𑀲 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀇𑀢𑁄 𑀏𑀳𑀸𑀘𑀭𑀺𑀬𑀸’’𑀢𑀺 𑀆𑀳. 𑀲𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀚𑀬𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀢𑀬𑀸 𑀅𑀭𑀜𑁆𑀜𑁂 𑀓𑀢𑀓𑀸𑀭𑀡𑀁 𑀚𑀸𑀦𑀸𑀫𑀺, 𑀢𑁆𑀯𑀁 𑀏𑀓𑀁 𑀲𑀭𑀪𑀫𑀺𑀕𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀭𑀓𑁂 𑀧𑀢𑀺𑀢𑁄, 𑀅𑀣 𑀦𑀁 𑀲𑁄 𑀲𑀭𑀪𑁄 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀓𑀢𑁆𑀯𑀸 ¶ 𑀦𑀭𑀓𑀢𑁄 𑀉𑀤𑁆𑀥𑀭𑀺, 𑀲𑁄 𑀢𑁆𑀯𑀁 𑀢𑀲𑁆𑀲 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁦.

‘‘𑀲𑀭𑀪𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀬𑀁 𑀢𑁆𑀯𑀁 𑀅𑀦𑀼𑀲𑀭𑀻 𑀧𑀼𑀭𑁂;

𑀅𑀮𑀻𑀦𑀘𑀺𑀢𑁆𑀢𑀲𑁆𑀲 𑀢𑀼𑀯𑀁, 𑀯𑀺𑀓𑁆𑀓𑀦𑁆𑀢𑀫𑀦𑀼𑀚𑀻𑀯𑀲𑀺.

𑁧𑁪𑁧.

‘‘𑀬𑁄 𑀢𑀁 𑀯𑀺𑀤𑀼𑀕𑁆𑀕𑀸 𑀦𑀭𑀓𑀸 𑀲𑀫𑀼𑀤𑁆𑀥𑀭𑀺, 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀲𑀭𑀪𑁄 𑀓𑀭𑀺𑀢𑁆𑀯𑀸;

𑀤𑀼𑀓𑁆𑀔𑀽𑀧𑀦𑀻𑀢𑀁 𑀫𑀘𑁆𑀘𑀼𑀫𑀼𑀔𑀸 𑀧𑀫𑁄𑀘𑀬𑀺, 𑀅𑀮𑀻𑀦𑀘𑀺𑀢𑁆𑀢𑀁 𑀢 𑀫𑀺𑀕𑀁 𑀯𑀤𑁂𑀲𑀻’’𑀢𑀺.

𑀢𑀢𑁆𑀣 𑀅𑀦𑀼𑀲𑀭𑀻𑀢𑀺 𑀅𑀦𑀼𑀩𑀦𑁆𑀥𑀺. 𑀯𑀺𑀓𑁆𑀓𑀦𑁆𑀢𑀦𑁆𑀢𑀺 𑀉𑀤𑁆𑀥𑀭𑀡𑀢𑁆𑀣𑀸𑀬 𑀓𑀢𑀧𑀭𑀓𑁆𑀓𑀫𑀁. 𑀅𑀦𑀼𑀚𑀻𑀯𑀲𑀻𑀢𑀺 𑀉𑀧𑀚𑀻𑀯𑀲𑀺, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀼𑀤𑁆𑀥𑀭𑀻𑀢𑀺 𑀉𑀤𑁆𑀥𑀭𑀺. 𑀢 𑀫𑀺𑀕𑀁 𑀯𑀤𑁂𑀲𑀻𑀢𑀺 𑀢𑀁 𑀲𑀼𑀯𑀡𑁆𑀡𑀲𑀭𑀪𑀫𑀺𑀕𑀁 𑀇𑀥 𑀲𑀺𑀭𑀺𑀲𑀬𑀦𑁂 𑀦𑀺𑀲𑀺𑀦𑁆𑀦𑁄 𑀯𑀡𑁆𑀡𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀬𑀁 𑀫𑀬𑀸 𑀲𑀤𑁆𑀥𑀺𑀁 𑀦 𑀫𑀺𑀕𑀯𑀁 𑀕𑀢𑁄, 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀓𑀣𑀁 𑀦𑀼 𑀔𑁄 𑀚𑀸𑀦𑀸𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁨.

‘‘𑀓𑀺𑀁 𑀢𑁆𑀯𑀁 𑀦𑀼 𑀢𑀢𑁆𑀣𑁂𑀯 𑀢𑀤𑀸 𑀅𑀳𑁄𑀲𑀺, 𑀉𑀤𑀸𑀳𑀼 𑀢𑁂 𑀓𑁄𑀘𑀺 𑀦𑀁 𑀏𑀢𑀤𑀓𑁆𑀔𑀸;

𑀯𑀺𑀯𑀝𑀘𑁆𑀙𑀤𑁆𑀤𑁄 𑀦𑀼𑀲𑀺 𑀲𑀩𑁆𑀩𑀤𑀲𑁆𑀲𑀻, 𑀜𑀸𑀡𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧’’𑀦𑁆𑀢𑀺.

𑀢𑀢𑁆𑀣 𑀪𑀺𑀁𑀲𑀭𑀽𑀧𑀦𑁆𑀢𑀺 𑀓𑀺𑀁 𑀦𑀼 𑀢𑁂 𑀜𑀸𑀡𑀁 𑀩𑀮𑀯𑀚𑀸𑀢𑀺𑀓𑀁, 𑀢𑁂𑀦𑁂𑀢𑀁 𑀚𑀸𑀦𑀸𑀲𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄 ¶ ‘‘𑀦𑀸𑀳𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄, 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀢𑀬𑀸 𑀓𑀣𑀺𑀢𑀕𑀸𑀣𑀸𑀦𑀁 𑀧𑀦 𑀫𑀬𑁆𑀳𑀁 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀻’’𑀢𑀺 𑀤𑀻𑀧𑁂𑀦𑁆𑀢𑁄 𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁩.

‘‘𑀦 𑀘𑁂𑀯𑀳𑀁 𑀢𑀢𑁆𑀣 𑀢𑀤𑀸 𑀅𑀳𑁄𑀲𑀺𑀁, 𑀦 𑀘𑀸𑀧𑀺 𑀫𑁂 𑀓𑁄𑀘𑀺 𑀦𑀁 𑀏𑀢𑀤𑀓𑁆𑀔𑀸;

𑀕𑀸𑀣𑀸𑀧𑀤𑀸𑀦𑀜𑁆𑀘 ¶ 𑀲𑀼𑀪𑀸𑀲𑀺𑀢𑀸𑀦𑀁, 𑀅𑀢𑁆𑀣𑀁 𑀢𑀤𑀸𑀦𑁂𑀦𑁆𑀢𑀺 𑀚𑀦𑀺𑀦𑁆𑀤 𑀥𑀻𑀭𑀸’’𑀢𑀺.

𑀢𑀢𑁆𑀣 ¶ 𑀲𑀼𑀪𑀸𑀲𑀺𑀢𑀸𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸𑀦𑀁. 𑀅𑀢𑁆𑀣𑀁 𑀢𑀤𑀸𑀦𑁂𑀦𑁆𑀢𑀻𑀢𑀺 𑀬𑁄 𑀢𑁂𑀲𑀁 𑀅𑀢𑁆𑀣𑁄, 𑀢𑀁 𑀆𑀦𑁂𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑀻𑀢𑀺.

𑀭𑀸𑀚𑀸 𑀢𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑁄 𑀅𑀳𑁄𑀲𑀺, 𑀫𑀦𑀼𑀲𑁆𑀲𑀸𑀧𑀺 𑀧𑀼𑀜𑁆𑀜𑀸𑀪𑀺𑀭𑀢𑀸 𑀳𑀼𑀢𑁆𑀯𑀸 𑀫𑀢𑀫𑀢𑀸 𑀲𑀕𑁆𑀕𑀫𑁂𑀯 𑀧𑀽𑀭𑀬𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 ‘‘𑀮𑀓𑁆𑀔𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀭𑁄𑀳𑀺𑀢𑀫𑀸𑀤𑀸𑀬 𑀉𑀬𑁆𑀬𑀸𑀦𑀁 𑀕𑀢𑁄. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀩𑀳𑀽 𑀦𑀯𑁂 𑀤𑁂𑀯𑁂 𑀘 𑀤𑁂𑀯𑀓𑀜𑁆𑀜𑀸𑀬𑁄 𑀘 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀲𑀭𑀪𑀫𑀺𑀕𑁂𑀦 𑀦𑀭𑀓𑀸 𑀉𑀤𑁆𑀥𑀭𑀺𑀢𑁆𑀯𑀸 𑀭𑀜𑁆𑀜𑁄 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀭𑀜𑁆𑀜𑁄 𑀆𑀦𑀼𑀪𑀸𑀯𑁂𑀦 𑀫𑀳𑀸𑀚𑀦𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑁂𑀦 𑀤𑁂𑀯𑀮𑁄𑀓𑁄 𑀧𑀭𑀺𑀧𑀽𑀭𑀢𑀺, 𑀇𑀤𑀸𑀦𑀺 𑀔𑁄 𑀧𑀦 𑀭𑀸𑀚𑀸 𑀮𑀓𑁆𑀔𑀁 𑀯𑀺𑀚𑁆𑀛𑀺𑀢𑀼𑀁 𑀉𑀬𑁆𑀬𑀸𑀦𑀁 𑀕𑀢𑁄, 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑁆𑀯𑀸 𑀲𑀭𑀪𑀫𑀺𑀕𑀲𑁆𑀲 𑀕𑀼𑀡𑀁 𑀓𑀣𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀲𑀓𑁆𑀓𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑁂𑀢𑁆𑀢𑀸𑀬 𑀘𑁂𑀯 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀜𑁆𑀘 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸𑀧𑀺 ‘‘𑀮𑀓𑁆𑀔𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀲𑀭𑀁 𑀲𑀦𑁆𑀦𑀬𑁆𑀳𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀭𑀜𑁆𑀜𑁄 𑀘 𑀮𑀓𑁆𑀔𑀲𑁆𑀲 𑀘 𑀅𑀦𑁆𑀢𑀭𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀭𑀪𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀲𑀭𑀁 𑀦 𑀫𑀼𑀜𑁆𑀘𑀺. 𑀅𑀣 𑀦𑀁 𑀲𑀓𑁆𑀓𑁄 𑀧𑀼𑀭𑁄𑀳𑀺𑀢𑀲𑁆𑀲 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀕𑀸𑀣𑀁 𑀅𑀪𑀸𑀲𑀺 𑁋

𑁧𑁪𑁪.

‘‘𑀆𑀤𑀸𑀬 𑀧𑀢𑁆𑀢𑀺𑀁 𑀧𑀭𑀯𑀺𑀭𑀺𑀬𑀖𑀸𑀢𑀺𑀁, 𑀘𑀸𑀧𑁂 𑀲𑀭𑀁 𑀓𑀺𑀁 𑀯𑀺𑀘𑀺𑀓𑀺𑀘𑁆𑀙𑀲𑁂 𑀢𑀼𑀯𑀁;

𑀦𑀼𑀦𑁆𑀦𑁄 𑀲𑀭𑁄 𑀲𑀭𑀪𑀁 𑀳𑀦𑁆𑀢𑀼 𑀔𑀺𑀧𑁆𑀧𑀁, 𑀅𑀦𑁆𑀦𑀜𑁆𑀳𑀺 𑀏𑀢𑀁 𑀯𑀭𑀧𑀜𑁆𑀜 𑀭𑀜𑁆𑀜𑁄’’𑀢𑀺.

𑀢𑀢𑁆𑀣 ¶ 𑀧𑀢𑁆𑀢𑀺𑀦𑁆𑀢𑀺 𑀯𑀸𑀚𑀧𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀧𑀭𑀯𑀺𑀭𑀺𑀬𑀖𑀸𑀢𑀺𑀦𑁆𑀢𑀺 𑀧𑀭𑁂𑀲𑀁 𑀯𑀻𑀭𑀺𑀬𑀖𑀸𑀢𑀓𑀁. 𑀘𑀸𑀧𑁂 𑀲𑀭𑀦𑁆𑀢𑀺 𑀏𑀢𑀁 𑀧𑀢𑁆𑀢𑀲𑀳𑀺𑀢𑀁 𑀲𑀭𑀁 𑀘𑀸𑀧𑁂 𑀆𑀤𑀸𑀬 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀇𑀤𑀸𑀦𑀺 𑀢𑁆𑀯𑀁 𑀓𑀺𑀁 𑀯𑀺𑀘𑀺𑀓𑀺𑀘𑁆𑀙𑀲𑀺. 𑀳𑀦𑁆𑀢𑀽𑀢𑀺 𑀢𑀬𑀸 𑀯𑀺𑀲𑁆𑀲𑀝𑁆𑀞𑁄 𑀳𑀼𑀢𑁆𑀯𑀸 𑀏𑀲 𑀲𑀭𑁄 ¶ 𑀔𑀺𑀧𑁆𑀧𑀁 𑀇𑀫𑀁 𑀲𑀭𑀪𑀁 𑀳𑀦𑀢𑀼. 𑀅𑀦𑁆𑀦𑀜𑁆𑀳𑀺 𑀏𑀢𑀦𑁆𑀢𑀺 𑀯𑀭𑀧𑀜𑁆𑀜, 𑀫𑀳𑀸𑀭𑀸𑀚, 𑀲𑀭𑀪𑁄 𑀦𑀸𑀫 𑀭𑀜𑁆𑀜𑁄 𑀆𑀳𑀸𑀭𑁄 𑀪𑀓𑁆𑀔𑁄𑀢𑀺 𑀅𑀢𑁆𑀣𑁄.

𑀢𑀢𑁄 𑀭𑀸𑀚𑀸 𑀕𑀸𑀣𑀫𑀸𑀳 𑁋

𑁧𑁪𑁫.

‘‘𑀅𑀤𑁆𑀥𑀸 𑀧𑀚𑀸𑀦𑀸𑀫𑀺 𑀅𑀳𑀫𑁆𑀧𑀺 𑀏𑀢𑀁, 𑀅𑀦𑁆𑀦𑀁 𑀫𑀺𑀕𑁄 𑀩𑁆𑀭𑀸𑀳𑁆𑀫𑀡 𑀔𑀢𑁆𑀢𑀺𑀬𑀲𑁆𑀲;

𑀧𑀼𑀩𑁆𑀩𑁂 𑀓𑀢𑀜𑁆𑀘 𑀅𑀧𑀘𑀸𑀬𑀫𑀸𑀦𑁄, 𑀢𑀲𑁆𑀫𑀸 𑀫𑀺𑀕𑀁 𑀲𑀭𑀪𑀁 𑀦𑁄 𑀳𑀦𑀸𑀫𑀻’’𑀢𑀺.

𑀢𑀢𑁆𑀣 ¶ 𑀧𑀼𑀩𑁆𑀩𑁂 𑀓𑀢𑀜𑁆𑀘𑀸𑀢𑀺 𑀩𑁆𑀭𑀸𑀳𑁆𑀫𑀡, 𑀅𑀳𑀫𑁂𑀢𑀁 𑀏𑀓𑀁𑀲𑁂𑀦 𑀚𑀸𑀦𑀸𑀫𑀺 𑀬𑀣𑀸 𑀫𑀺𑀕𑁄 𑀔𑀢𑁆𑀢𑀺𑀬𑀲𑁆𑀲 𑀅𑀦𑁆𑀦𑀁, 𑀧𑀼𑀩𑁆𑀩𑁂 𑀧𑀦 𑀇𑀫𑀺𑀦𑀸 𑀫𑀬𑁆𑀳𑀁 𑀓𑀢𑀕𑀼𑀡𑀁 𑀧𑀽𑀚𑁂𑀫𑀺, 𑀢𑀲𑁆𑀫𑀸 𑀢𑀁 𑀦 𑀳𑀦𑀸𑀫𑀻𑀢𑀺.

𑀢𑀢𑁄 𑀲𑀓𑁆𑀓𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁪𑁬.

‘‘𑀦𑁂𑀲𑁄 𑀫𑀺𑀕𑁄 𑀫𑀳𑀸𑀭𑀸𑀚, 𑀅𑀲𑀼𑀭𑁂𑀲𑁄 𑀤𑀺𑀲𑀫𑁆𑀧𑀢𑀺;

𑀏𑀢𑀁 𑀳𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀺𑀦𑁆𑀤, 𑀪𑀯𑀲𑁆𑀲𑀼 𑀅𑀫𑀭𑀸𑀥𑀺𑀧𑁄.

𑁧𑁪𑁭.

‘‘𑀲𑀘𑁂 𑀘 𑀭𑀸𑀚𑀸 𑀯𑀺𑀘𑀺𑀓𑀺𑀘𑁆𑀙𑀲𑁂 𑀢𑀼𑀯𑀁, 𑀳𑀦𑁆𑀢𑀼𑀁 𑀫𑀺𑀕𑀁 𑀲𑀭𑀪𑀁 𑀲𑀳𑀸𑀬𑀓𑀁;

𑀲𑀧𑀼𑀢𑁆𑀢𑀤𑀸𑀭𑁄 𑀦𑀭𑀯𑀻𑀭𑀲𑁂𑀝𑁆𑀞, 𑀕𑀦𑁆𑀢𑀸 𑀢𑀼𑀯𑀁 𑀯𑁂𑀢𑀭𑀡𑀺𑀁 𑀬𑀫𑀲𑁆𑀲𑀸’’𑀢𑀺.

𑀢𑀢𑁆𑀣 𑀅𑀲𑀼𑀭𑁂𑀲𑁄𑀢𑀺 𑀅𑀲𑀼𑀭𑁄 𑀏𑀲𑁄, 𑀅𑀲𑀼𑀭𑀚𑁂𑀝𑁆𑀞𑀓𑁄 𑀲𑀓𑁆𑀓𑁄 𑀏𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀅𑀫𑀭𑀸𑀥𑀺𑀧𑁄𑀢𑀺 𑀢𑁆𑀯𑀁 𑀏𑀢𑀁 𑀲𑀓𑁆𑀓𑀁 𑀫𑀸𑀭𑁂𑀢𑁆𑀯𑀸 𑀲𑀬𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀳𑁄𑀳𑀻𑀢𑀺 𑀯𑀤𑀢𑀺. 𑀯𑁂𑀢𑀭𑀡𑀺𑀁 𑀬𑀫𑀲𑁆𑀲𑀸𑀢𑀺 ‘‘𑀲𑀘𑁂 𑀏𑀢𑀁 ‘𑀲𑀳𑀸𑀬𑁄 𑀫𑁂’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦 𑀫𑀸𑀭𑁂𑀲𑁆𑀲𑀲𑀺, 𑀲𑀧𑀼𑀢𑁆𑀢𑀤𑀸𑀭𑁄 𑀬𑀫𑀲𑁆𑀲 𑀯𑁂𑀢𑀭𑀡𑀺𑀦𑀺𑀭𑀬𑀁 𑀕𑀢𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀦𑀁 𑀢𑀸𑀲𑁂𑀲𑀺.

𑀢𑀢𑁄 ¶ 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁮.

‘‘𑀓𑀸𑀫𑀁 𑀅𑀳𑀁 𑀚𑀸𑀦𑀧𑀤𑀸 𑀘 𑀲𑀩𑁆𑀩𑁂, 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀲𑀳𑀸𑀬𑀲𑀗𑁆𑀖𑀸;

𑀕𑀘𑁆𑀙𑁂𑀫𑀼 𑀢𑀁 𑀯𑁂𑀢𑀭𑀡𑀺𑀁 𑀬𑀫𑀲𑁆𑀲, 𑀦 𑀢𑁆𑀯𑁂𑀯 𑀳𑀜𑁆𑀜𑁄 𑀫𑀫 𑀧𑀸𑀡𑀤𑁄 𑀬𑁄.

𑁧𑁪𑁯.

‘‘𑀅𑀬𑀁 ¶ 𑀫𑀺𑀕𑁄 𑀓𑀺𑀘𑁆𑀙𑀕𑀢𑀲𑁆𑀲 𑀫𑀬𑁆𑀳𑀁, 𑀏𑀓𑀲𑁆𑀲 𑀓𑀢𑁆𑀢𑀸 𑀯𑀺𑀯𑀦𑀲𑁆𑀫𑀺 𑀖𑁄𑀭𑁂;

𑀢𑀁 𑀢𑀸𑀤𑀺𑀲𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀭𑀦𑁆𑀢𑁄, 𑀚𑀸𑀦𑀁 𑀫𑀳𑀸𑀩𑁆𑀭𑀳𑁆𑀫𑁂 𑀓𑀣𑀁 𑀳𑀦𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 𑀫𑀫 𑀧𑀸𑀡𑀤𑁄 𑀬𑁄𑀢𑀺 𑀩𑁆𑀭𑀸𑀳𑁆𑀫𑀡, 𑀬𑁄 𑀫𑀫 𑀧𑀸𑀡𑀤𑀤𑁄 𑀬𑁂𑀦 𑀫𑁂 𑀧𑀺𑀬𑀁 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀦𑀭𑀓𑀁 𑀧𑀯𑀺𑀲𑀦𑁆𑀢𑁂𑀦 𑀫𑀬𑀸 𑀲𑁄 𑀦 𑀢𑁆𑀯𑁂𑀯 𑀳𑀜𑁆𑀜𑁄 𑀦 𑀳𑀦𑀺𑀢𑀩𑁆𑀩𑁄, 𑀅𑀯𑀚𑁆𑀛𑁄 𑀏𑀲𑁄𑀢𑀺 𑀯𑀤𑀢𑀺. 𑀏𑀓𑀲𑁆𑀲 𑀓𑀢𑁆𑀢𑀸 𑀯𑀺𑀯𑀦𑀲𑁆𑀫𑀺 𑀖𑁄𑀭𑁂𑀢𑀺 𑀤𑀸𑀭𑀼𑀡𑁂 𑀅𑀭𑀜𑁆𑀜𑁂 𑀧𑀯𑀺𑀝𑁆𑀞𑀲𑁆𑀲 𑀲𑀢𑁄 𑀏𑀓𑀲𑁆𑀲 𑀅𑀲𑀳𑀸𑀬𑀓𑀲𑁆𑀲 𑀫𑀫 𑀓𑀢𑁆𑀢𑀸 𑀓𑀸𑀭𑀓𑁄 𑀚𑀻𑀯𑀺𑀢𑀲𑁆𑀲 𑀤𑀸𑀬𑀓𑁄, 𑀲𑁆𑀯𑀸𑀳𑀁 𑀢𑀁 𑀇𑀫𑀺𑀦𑀸 𑀓𑀢𑀁 𑀢𑀸𑀤𑀺𑀲𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀭𑀦𑁆𑀢𑁄𑀬𑁂𑀯 𑀢𑀁 𑀕𑀼𑀡𑀁 𑀚𑀸𑀦𑀦𑁆𑀢𑁄𑀬𑁂𑀯 𑀓𑀣𑀁 𑀳𑀦𑁂𑀬𑁆𑀬𑀁.

𑀅𑀣 ¶ 𑀲𑀓𑁆𑀓𑁄 𑀧𑀼𑀭𑁄𑀳𑀺𑀢𑀲𑁆𑀲 𑀲𑀭𑀻𑀭𑀢𑁄 𑀅𑀧𑀕𑀦𑁆𑀢𑁆𑀯𑀸 𑀲𑀓𑁆𑀓𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀭𑀜𑁆𑀜𑁄 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁫𑁦.

‘‘𑀫𑀺𑀢𑁆𑀢𑀸𑀪𑀺𑀭𑀸𑀥𑀻 𑀘𑀺𑀭𑀫𑁂𑀯 𑀚𑀻𑀯, 𑀭𑀚𑁆𑀚𑀁 𑀇𑀫𑀁 𑀥𑀫𑁆𑀫𑀕𑀼𑀡𑁂 𑀧𑀲𑀸𑀲;

𑀦𑀸𑀭𑀻𑀕𑀡𑁂𑀳𑀺 𑀧𑀭𑀺𑀘𑀸𑀭𑀺𑀬𑀦𑁆𑀢𑁄, 𑀫𑁄𑀤𑀲𑁆𑀲𑀼 𑀭𑀝𑁆𑀞𑁂 𑀢𑀺𑀤𑀺𑀯𑁂𑀯 𑀯𑀸𑀲𑀯𑁄.

𑁧𑁫𑁧.

‘‘𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀩𑁆𑀩𑀸𑀢𑀺𑀣𑀻 𑀬𑀸𑀘𑀬𑁄𑀕𑁄 𑀪𑀯𑀺𑀢𑁆𑀯𑀸;

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦’’𑀦𑁆𑀢𑀺.

𑀢𑀢𑁆𑀣 ¶ 𑀫𑀺𑀢𑁆𑀢𑀸𑀪𑀺𑀭𑀸𑀥𑀻𑀢𑀺 𑀫𑀺𑀢𑁆𑀢𑁂 𑀆𑀭𑀸𑀥𑁂𑀦𑁆𑀢𑁄 𑀢𑁄𑀲𑁂𑀦𑁆𑀢𑁄 𑀢𑁂𑀲𑀼 𑀅𑀤𑀼𑀩𑁆𑀪𑀫𑀸𑀦𑁄. 𑀲𑀩𑁆𑀩𑀸𑀢𑀺𑀣𑀻𑀢𑀺 𑀲𑀩𑁆𑀩𑁂 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀅𑀢𑀺𑀣𑀻 𑀧𑀸𑀳𑀼𑀦𑀓𑁂𑀬𑁂𑀯 𑀓𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑁄 𑀬𑀸𑀘𑀺𑀢𑀩𑁆𑀩𑀬𑀼𑀢𑁆𑀢𑀓𑁄 𑀳𑀼𑀢𑁆𑀯𑀸. 𑀅𑀦𑀺𑀦𑁆𑀤𑀺𑀢𑁄𑀢𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀡𑁂𑀦 𑀧𑀫𑀼𑀤𑀺𑀢𑁄 𑀤𑁂𑀯𑀮𑁄𑀓𑁂𑀦 𑀅𑀪𑀺𑀦𑀦𑁆𑀤𑀺𑀢𑁄 𑀳𑀼𑀢𑁆𑀯𑀸 𑀲𑀕𑁆𑀕𑀝𑁆𑀞𑀸𑀦𑀁 𑀉𑀧𑁂𑀳𑀻𑀢𑀺.

𑀏𑀯𑀁 ¶ 𑀯𑀢𑁆𑀯𑀸 𑀲𑀓𑁆𑀓𑁄 ‘‘𑀅𑀳𑀁 𑀫𑀳𑀸𑀭𑀸𑀚𑀁 𑀢𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀆𑀕𑀢𑁄, 𑀢𑁆𑀯𑀁 𑀅𑀢𑁆𑀢𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀤𑀸𑀲𑀺, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀚𑀸𑀦𑀸𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀧𑀼𑀭𑁄𑀳𑀺𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀭𑀪𑀫𑀺𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀭𑀪𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀚𑀸𑀢𑀓𑀼𑀤𑁆𑀤𑀸𑀦𑀁 𑁋

𑀅𑀫𑁆𑀩 𑀨𑀦𑁆𑀤𑀦 𑀚𑀯𑀦, 𑀦𑀸𑀭𑀤 𑀤𑀽𑀢 𑀓𑀮𑀺𑀗𑁆𑀕𑀸;

𑀅𑀓𑀺𑀢𑁆𑀢𑀺 𑀢𑀓𑁆𑀓𑀸𑀭𑀺𑀬𑀁 𑀭𑀼𑀭𑀼, 𑀲𑀭𑀪𑀁 𑀤𑀲 𑀢𑁂𑀭𑀲𑁂.

𑀢𑁂𑀭𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑁄

[𑁪𑁮𑁪] 𑁧. 𑀲𑀸𑀮𑀺𑀓𑁂𑀤𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀲𑀫𑁆𑀧𑀦𑁆𑀦𑀁 ¶ ¶ ¶ 𑀲𑀸𑀮𑀺𑀓𑁂𑀤𑀸𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀕𑀺𑀳𑀻 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀢𑁂 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀫𑀸𑀢𑀸𑀧𑀺𑀢𑀭𑁄 𑀫𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀪𑀺𑀓𑁆𑀔𑀼, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀢𑀺𑀭𑀘𑁆𑀙𑀸𑀦𑀸 𑀳𑀼𑀢𑁆𑀯𑀸 𑀲𑀼𑀯𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀚𑀺𑀡𑁆𑀡𑁂 𑀫𑀸𑀢𑀸𑀧𑀺𑀢𑀭𑁄 𑀓𑀼𑀮𑀸𑀯𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀧𑁄𑀲𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀭𑀸𑀚𑀕𑀳𑁂 𑀫𑀕𑀥𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀦𑀕𑀭𑀢𑁄 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀬 𑀲𑀸𑀮𑀺𑀤𑁆𑀤𑀺𑀬𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀬 𑀫𑀕𑀥𑀔𑁂𑀢𑁆𑀢𑀁 𑀅𑀢𑁆𑀣𑀺, 𑀢𑀢𑁆𑀣 𑀓𑁄𑀲𑀺𑀬𑀕𑁄𑀢𑁆𑀢𑁄 𑀦𑀸𑀫 𑀲𑀸𑀮𑀺𑀤𑁆𑀤𑀺𑀬𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀲𑀳𑀲𑁆𑀲𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀸𑀮𑀺𑀁 𑀯𑀧𑀸𑀧𑁂𑀲𑀺. 𑀉𑀝𑁆𑀞𑀺𑀢𑁂 𑀘 𑀧𑀦 𑀲𑀲𑁆𑀲𑁂 𑀯𑀢𑀺𑀁 𑀣𑀺𑀭𑀁 𑀓𑀸𑀭𑁂𑀢𑁆𑀯𑀸 𑀓𑀲𑁆𑀲𑀘𑀺 𑀧𑀡𑁆𑀡𑀸𑀲𑀓𑀭𑀻𑀲𑀫𑀢𑁆𑀢𑀁, 𑀓𑀲𑁆𑀲𑀘𑀺 𑀲𑀝𑁆𑀞𑀺𑀓𑀭𑀻𑀲𑀫𑀢𑁆𑀢𑀦𑁆𑀢𑀺 𑀏𑀯𑀁 𑀧𑀜𑁆𑀘𑀲𑀢𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀅𑀢𑁆𑀢𑀦𑁄 𑀧𑀼𑀭𑀺𑀲𑀸𑀦𑀁𑀬𑁂𑀯 𑀆𑀭𑀓𑁆𑀔𑀡𑀢𑁆𑀣𑀸𑀬 𑀤𑀢𑁆𑀯𑀸 𑀲𑁂𑀲𑀁 ¶ 𑀧𑀜𑁆𑀘𑀲𑀢𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀢𑀓𑀲𑁆𑀲 𑀅𑀤𑀸𑀲𑀺. 𑀲𑁄 𑀢𑀢𑁆𑀣 𑀓𑀼𑀝𑀺𑀁 𑀓𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀲𑀢𑀺. 𑀔𑁂𑀢𑁆𑀢𑀲𑁆𑀲 𑀧𑀦 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀏𑀓𑀲𑁆𑀫𑀺𑀁 𑀲𑀸𑀦𑀼𑀧𑀩𑁆𑀩𑀢𑁂 𑀫𑀳𑀦𑁆𑀢𑀁 𑀲𑀺𑀫𑁆𑀩𑀮𑀺𑀯𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀅𑀦𑁂𑀓𑀸𑀦𑀺 𑀲𑀼𑀯𑀲𑀢𑀸𑀦𑀺 𑀯𑀲𑀦𑁆𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁 𑀲𑀼𑀯𑀲𑀗𑁆𑀖𑁂 𑀲𑀼𑀯𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀅𑀪𑀺𑀭𑀽𑀧𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀲𑀓𑀝𑀦𑀸𑀪𑀺𑀧𑀫𑀸𑀡𑀲𑀭𑀻𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀫𑀳𑀮𑁆𑀮𑀓𑀓𑀸𑀮𑁂 ‘‘𑀅𑀳𑀁 𑀇𑀤𑀸𑀦𑀺 𑀤𑀽𑀭𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀢𑁆𑀯𑀁 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀸’’𑀢𑀺 𑀕𑀡𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀕𑁄𑀘𑀭𑀢𑁆𑀣𑀸𑀬 𑀕𑀦𑁆𑀢𑀼𑀁 𑀦𑀸𑀤𑀸𑀲𑀺, 𑀲𑀼𑀯𑀕𑀡𑀁 𑀧𑀭𑀺𑀳𑀭𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀲𑀬𑀁𑀚𑀸𑀢𑀲𑀸𑀮𑀺𑀯𑀦𑁂 𑀬𑀸𑀯𑀤𑀢𑁆𑀣𑀁 ¶ 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀦𑀁 𑀧𑀳𑁄𑀦𑀓𑀁 𑀕𑁄𑀘𑀭𑀁 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀲𑀺.

𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀲𑀼𑀯𑀸 𑀆𑀭𑁄𑀘𑁂𑀲𑀼𑀁 ‘‘𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀕𑀥𑀔𑁂𑀢𑁆𑀢𑁂 𑀲𑀸𑀮𑀺 𑀧𑀘𑁆𑀘𑀢𑀺, 𑀇𑀤𑀸𑀦𑀺 ¶ 𑀓𑀺𑀁 𑀦𑀼 𑀔𑁄 𑀚𑀸𑀢’’𑀦𑁆𑀢𑀺? ‘‘𑀢𑁂𑀦 𑀳𑀺 𑀚𑀸𑀦𑀸𑀣𑀸’’𑀢𑀺 𑀤𑁆𑀯𑁂 𑀲𑀼𑀯𑁂 𑀧𑀳𑀺𑀡𑀺𑀁𑀲𑀼. 𑀢𑁂 𑀕𑀦𑁆𑀢𑁆𑀯𑀸 𑀫𑀕𑀥𑀔𑁂𑀢𑁆𑀢𑁂 𑀑𑀢𑀭𑀦𑁆𑀢𑀸 𑀢𑀲𑁆𑀲 𑀪𑀢𑀺𑀬𑀸 𑀭𑀓𑁆𑀔𑀡𑀧𑀼𑀭𑀺𑀲𑀲𑁆𑀲 𑀔𑁂𑀢𑁆𑀢𑁂 𑀑𑀢𑀭𑀺𑀢𑁆𑀯𑀸 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀏𑀓𑀁 𑀲𑀸𑀮𑀺𑀲𑀻𑀲𑀁 𑀆𑀤𑀸𑀬 𑀲𑀺𑀫𑁆𑀩𑀮𑀺𑀯𑀦𑀁 𑀕𑀦𑁆𑀢𑁆𑀯𑀸 𑀲𑀸𑀮𑀺𑀲𑀻𑀲𑀁 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀢𑀢𑁆𑀣 𑀏𑀯𑀭𑀽𑀧𑁄 𑀲𑀸𑀮𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 𑀧𑀼𑀦𑀤𑀺𑀯𑀲𑁂 𑀲𑀼𑀯𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀪𑀢𑀓𑀲𑁆𑀲 𑀔𑁂𑀢𑁆𑀢𑁂 𑀑𑀢𑀭𑀺. 𑀲𑁄 𑀧𑀦 𑀧𑀼𑀭𑀺𑀲𑁄 𑀲𑀼𑀯𑁂 𑀲𑀸𑀮𑀺𑀁 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀺𑀢𑁆𑀯𑀸 𑀯𑀸𑀭𑁂𑀦𑁆𑀢𑁄𑀧𑀺 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁂𑀲𑀸 𑀲𑀼𑀯𑀸 𑀬𑀸𑀯𑀤𑀢𑁆𑀣𑀁 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀢𑀼𑀘𑁆𑀙𑀫𑀼𑀔𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀼𑀯𑀭𑀸𑀚𑀸 𑀧𑀦 𑀩𑀳𑀽𑀦𑀺 𑀲𑀸𑀮𑀺𑀲𑀻𑀲𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀳𑀼𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀤𑁂𑀢𑀺. 𑀲𑀼𑀯𑀸 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀢𑁆𑀣𑁂𑀯 𑀲𑀸𑀮𑀺𑀁 𑀔𑀸𑀤𑀺𑀁𑀲𑀼. 𑀅𑀣 𑀲𑁄 𑀧𑀼𑀭𑀺𑀲𑁄 ‘‘𑀲𑀘𑁂 𑀇𑀫𑁂 𑀅𑀜𑁆𑀜𑀁 ¶ 𑀓𑀢𑀺𑀧𑀸𑀳𑀁 𑀏𑀯𑀁 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀓𑀺𑀜𑁆𑀘𑀺 𑀦 𑀪𑀯𑀺𑀲𑁆𑀲𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀮𑀺𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀇𑀡𑀁 𑀓𑀭𑀺𑀲𑁆𑀲𑀢𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀮𑀺𑀫𑀼𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀢𑀣𑀸𑀭𑀽𑀧𑀁 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀲𑀸𑀮𑀺𑀤𑁆𑀤𑀺𑀬𑀕𑀸𑀫𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀲𑁆𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀺𑀁, 𑀪𑁄 𑀧𑀼𑀭𑀺𑀲, 𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀔𑁂𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧.

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂.

𑁨.

‘‘𑀏𑀓𑁄 𑀘 𑀢𑀢𑁆𑀣 𑀲𑀓𑀼𑀡𑁄, 𑀬𑁄 𑀦𑁂𑀲𑀁 𑀲𑀩𑁆𑀩𑀲𑀼𑀦𑁆𑀤𑀭𑁄;

𑀪𑀼𑀢𑁆𑀯𑀸 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀅𑀯𑁂𑀓𑀮𑁆𑀮𑀁. 𑀲𑀸𑀮𑀺𑀓𑁂𑀤𑀸𑀭𑀦𑁆𑀢𑀺 𑀲𑀸𑀮𑀺𑀔𑁂𑀢𑁆𑀢𑀁. 𑀲𑀩𑁆𑀩𑀲𑀼𑀦𑁆𑀤𑀭𑁄𑀢𑀺 𑀲𑀩𑁆𑀩𑁂𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀲𑀼𑀦𑁆𑀤𑀭𑁄 𑀭𑀢𑁆𑀢𑀢𑀼𑀡𑁆𑀟𑁄 𑀚𑀺𑀜𑁆𑀚𑀼𑀓𑀲𑀦𑁆𑀦𑀺𑀪𑀅𑀓𑁆𑀔𑀺 𑀭𑀢𑁆𑀢𑀧𑀸𑀤𑁄 𑀢𑀻𑀳𑀺 𑀭𑀢𑁆𑀢𑀭𑀸𑀚𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑀻𑀯𑁄 𑀫𑀳𑀸𑀫𑀬𑀽𑀭𑀧𑀫𑀸𑀡𑁄 𑀲𑁄 𑀬𑀸𑀯𑀤𑀢𑁆𑀣𑀁 𑀲𑀸𑀮𑀺𑀁 𑀔𑀸𑀤𑀺𑀢𑁆𑀯𑀸 𑀅𑀜𑁆𑀜𑀁 𑀢𑀼𑀡𑁆𑀟𑁂𑀦 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄 ¶ 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀯𑀭𑀸𑀚𑁂 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀔𑁂𑀢𑁆𑀢𑀧𑀸𑀮𑀁 𑀧𑀼𑀘𑁆𑀙𑀺 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀸𑀲𑀁 𑀑𑀟𑁆𑀟𑁂𑀢𑀼𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. 𑀅𑀣 𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁩.

‘‘𑀑𑀟𑁆𑀟𑁂𑀦𑁆𑀢𑀼 𑀯𑀸𑀮𑀧𑀸𑀲𑀸𑀦𑀺, 𑀬𑀣𑀸 𑀩𑀚𑁆𑀛𑁂𑀣 𑀲𑁄 𑀤𑀺𑀚𑁄;

𑀚𑀻𑀯𑀜𑁆𑀘 𑀦𑀁 𑀕𑀳𑁂𑀢𑁆𑀯𑀸𑀦, 𑀆𑀦𑀬𑁂𑀳𑀺 𑀫𑀫𑀦𑁆𑀢𑀺𑀓𑁂’’𑀢𑀺.

𑀢𑀢𑁆𑀣 ¶ 𑀑𑀟𑁆𑀟𑁂𑀦𑁆𑀢𑀽𑀢𑀺 𑀑𑀟𑁆𑀟𑀬𑀦𑁆𑀢𑀼. 𑀯𑀸𑀮𑀧𑀸𑀲𑀸𑀦𑀻𑀢𑀺 𑀅𑀲𑁆𑀲𑀯𑀸𑀮𑀸𑀤𑀺𑀭𑀚𑁆𑀚𑀼𑀫𑀬𑀧𑀸𑀲𑀸𑀦𑀺. 𑀚𑀻𑀯𑀜𑁆𑀘 𑀦𑀦𑁆𑀢𑀺 𑀚𑀻𑀯𑀦𑁆𑀢𑀁 𑀏𑀯 𑀦𑀁. 𑀆𑀦𑀬𑁂𑀳𑀻𑀢𑀺 𑀆𑀦𑁂𑀳𑀺.

𑀢𑀁 𑀲𑀼𑀢𑁆𑀯𑀸 𑀔𑁂𑀢𑁆𑀢𑀧𑀸𑀮𑁄 𑀲𑀸𑀮𑀺𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀇𑀡𑀲𑁆𑀲 𑀅𑀓𑀢𑀪𑀸𑀯𑁂𑀦 𑀢𑀼𑀝𑁆𑀞𑁄 𑀕𑀦𑁆𑀢𑁆𑀯𑀸 𑀅𑀲𑁆𑀲𑀯𑀸𑀮𑁂 𑀯𑀝𑁆𑀝𑁂𑀢𑁆𑀯𑀸 ‘‘𑀅𑀚𑁆𑀚 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀑𑀢𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀯𑀭𑀜𑁆𑀜𑁄 𑀑𑀢𑀭𑀡𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀘𑀸𑀝𑀺𑀧𑀫𑀸𑀡𑀁 𑀧𑀜𑁆𑀚𑀭𑀁 𑀓𑀢𑁆𑀯𑀸 𑀧𑀸𑀲𑀜𑁆𑀘 𑀑𑀟𑁆𑀟𑁂𑀢𑁆𑀯𑀸 𑀲𑀼𑀯𑀸𑀦𑀁 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀓𑀼𑀝𑀺𑀬𑀁 𑀦𑀺𑀲𑀻𑀤𑀺. 𑀲𑀼𑀯𑀭𑀸𑀚𑀸𑀧𑀺 𑀲𑀼𑀯𑀕𑀡𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀅𑀮𑁄𑀮𑀼𑀧𑁆𑀧𑀘𑀸𑀭𑀢𑀸𑀬 𑀳𑀺𑀬𑁆𑀬𑁄 𑀔𑀸𑀤𑀺𑀢𑀝𑁆𑀞𑀸𑀦𑁂 ¶ 𑀑𑀟𑁆𑀟𑀺𑀢𑀧𑀸𑀲𑁂 𑀧𑀸𑀤𑀁 𑀧𑀯𑁂𑀲𑀦𑁆𑀢𑁄𑀯 𑀑𑀢𑀭𑀺. 𑀲𑁄 𑀅𑀢𑁆𑀢𑀦𑁄 𑀩𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀇𑀤𑀸𑀦𑁂𑀯 𑀩𑀤𑁆𑀥𑀭𑀯𑀁 𑀭𑀯𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸𑀫𑁂 𑀪𑀬𑀢𑀚𑁆𑀚𑀺𑀢𑀸 𑀕𑁄𑀘𑀭𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀏𑀢𑁂𑀲𑀁 𑀕𑁄𑀘𑀭𑀕𑁆𑀕𑀳𑀡𑀁, 𑀢𑀸𑀯 𑀅𑀥𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀲𑀁 𑀲𑀼𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀩𑀤𑁆𑀥𑀭𑀯𑀁 𑀭𑀯𑀺. 𑀅𑀣 𑀲𑀩𑁆𑀩𑁂 𑀢𑁂 𑀲𑀼𑀯𑀸 𑀧𑀮𑀸𑀬𑀺𑀁𑀲𑀼. 𑀲𑀼𑀯𑀭𑀸𑀚𑀸 ‘‘𑀏𑀢𑁆𑀢𑀓𑁂𑀲𑀼 𑀫𑁂 𑀜𑀸𑀢𑀓𑁂𑀲𑀼 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀏𑀓𑁄𑀧𑀺 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀫𑀬𑀸 𑀧𑀸𑀧𑀁 𑀓𑀢’’𑀦𑁆𑀢𑀺 𑀯𑀺𑀮𑀧𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁪.

‘‘𑀏𑀢𑁂 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;

𑀏𑀓𑁄 𑀩𑀤𑁆𑀥𑁄𑀲𑁆𑀫𑀺 𑀧𑀸𑀲𑁂𑀦, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸’’𑀢𑀺.

𑀔𑁂𑀢𑁆𑀢𑀧𑀸𑀮𑁄 𑀲𑀼𑀯𑀭𑀸𑀚𑀲𑁆𑀲 𑀩𑀤𑁆𑀥𑀭𑀯𑀁 𑀲𑀼𑀯𑀸𑀦𑀜𑁆𑀘 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀓𑀼𑀝𑀺𑀬𑀸 𑀑𑀭𑀼𑀬𑁆𑀳 𑀧𑀸𑀲𑀸𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀼𑀯𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀬𑀲𑁆𑀲𑁂𑀯 𑀫𑁂 𑀧𑀸𑀲𑁄 𑀑𑀟𑁆𑀟𑀺𑀢𑁄, 𑀲𑁆𑀯𑁂𑀯 𑀩𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀲𑀼𑀯𑀭𑀸𑀚𑀸𑀦𑀁 𑀧𑀸𑀲𑀢𑁄 𑀫𑁄𑀘𑁂𑀢𑁆𑀯𑀸 𑀤𑁆𑀯𑁂 𑀧𑀸𑀤𑁂 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀤𑀴𑁆𑀳𑀁 𑀆𑀤𑀸𑀬 𑀲𑀸𑀮𑀺𑀤𑁆𑀤𑀺𑀬𑀕𑀸𑀫𑀁 ¶ 𑀕𑀦𑁆𑀢𑁆𑀯𑀸 𑀲𑀼𑀯𑀭𑀸𑀚𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀩𑀮𑀯𑀲𑀺𑀦𑁂𑀳𑁂𑀦 𑀫𑀳𑀸𑀲𑀢𑁆𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁫.

‘‘𑀉𑀤𑀭𑀁 𑀦𑀽𑀦 𑀅𑀜𑁆𑀜𑁂𑀲𑀁, 𑀲𑀼𑀯 𑀅𑀘𑁆𑀘𑁄𑀤𑀭𑀁 𑀢𑀯;

𑀪𑀼𑀢𑁆𑀯𑀸 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀲𑀺.

𑁬.

‘‘𑀓𑁄𑀝𑁆𑀞𑀁 𑀦𑀼 𑀢𑀢𑁆𑀣 𑀧𑀽𑀭𑁂𑀲𑀺, 𑀲𑀼𑀯 𑀯𑁂𑀭𑀁 𑀦𑀼 𑀢𑁂 𑀫𑀬𑀸;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀼𑀳𑀺𑀁 𑀲𑀸𑀮𑀺𑀁 𑀦𑀺𑀤𑀸𑀳𑀲𑀻’’𑀢𑀺.

𑀢𑀢𑁆𑀣 ¶ 𑀉𑀤𑀭𑀁 𑀦𑀽𑀦𑀸𑀢𑀺 𑀅𑀜𑁆𑀜𑁂𑀲𑀁 𑀉𑀤𑀭𑀁 𑀉𑀤𑀭𑀫𑁂𑀯 𑀫𑀜𑁆𑀜𑁂, 𑀢𑀯 𑀉𑀤𑀭𑀁 𑀧𑀦 𑀅𑀢𑀺𑀉𑀤𑀭𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀺𑀫𑁆𑀩𑀮𑀺𑀯𑀦𑁂. 𑀧𑀽𑀭𑁂𑀲𑀻𑀢𑀺 𑀯𑀲𑁆𑀲𑀸𑀭𑀢𑁆𑀢𑀢𑁆𑀣𑀸𑀬 𑀧𑀽𑀭𑁂𑀲𑀺. 𑀦𑀺𑀤𑀸𑀳𑀲𑀻𑀢𑀺 𑀦𑀺𑀥𑀸𑀦𑀁 𑀓𑀢𑁆𑀯𑀸 𑀞𑀧𑁂𑀲𑀺, ‘‘𑀦𑀺𑀥𑀻𑀬𑀲𑀻’’𑀢𑀺𑀧𑀺 𑀧𑀸𑀞𑁄.

𑀢𑀁 𑀲𑀼𑀢𑁆𑀯𑀸 𑀲𑀼𑀯𑀭𑀸𑀚𑀸 𑀫𑀥𑀼𑀭𑀸𑀬 𑀫𑀦𑀼𑀲𑁆𑀲𑀪𑀸𑀲𑀸𑀬 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁭.

‘‘𑀦 ¶ 𑀫𑁂 𑀯𑁂𑀭𑀁 𑀢𑀬𑀸 𑀲𑀤𑁆𑀥𑀺𑀁, 𑀓𑁄𑀝𑁆𑀞𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀇𑀡𑀁 𑀫𑀼𑀜𑁆𑀘𑀸𑀫𑀺𑀡𑀁 𑀤𑀫𑁆𑀫𑀺, 𑀲𑀫𑁆𑀧𑀢𑁆𑀢𑁄 𑀓𑁄𑀝𑀲𑀺𑀫𑁆𑀩𑀮𑀺𑀁;

𑀦𑀺𑀥𑀺𑀫𑁆𑀧𑀺 𑀢𑀢𑁆𑀣 𑀦𑀺𑀤𑀳𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑁄𑀲𑀺𑀬𑀸’’𑀢𑀺.

𑀢𑀢𑁆𑀣 𑀇𑀡𑀁 𑀫𑀼𑀜𑁆𑀘𑀸𑀫𑀺𑀡𑀁 𑀤𑀫𑁆𑀫𑀻𑀢𑀺 𑀢𑀯 𑀲𑀸𑀮𑀺𑀁 𑀳𑀭𑀺𑀢𑁆𑀯𑀸 𑀇𑀡𑀁 𑀫𑀼𑀜𑁆𑀘𑀸𑀫𑀺 𑀘𑁂𑀯 𑀤𑀫𑁆𑀫𑀺 𑀘𑀸𑀢𑀺 𑀯𑀤𑀢𑀺. 𑀦𑀺𑀥𑀺𑀫𑁆𑀧𑀻𑀢𑀺 𑀏𑀓𑀁 𑀢𑀢𑁆𑀣 𑀲𑀺𑀫𑁆𑀩𑀮𑀺𑀯𑀦𑁂 𑀅𑀦𑀼𑀕𑀸𑀫𑀺𑀓𑀦𑀺𑀥𑀺𑀫𑁆𑀧𑀺 𑀦𑀺𑀤𑀳𑀸𑀫𑀺.

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀧𑀼𑀘𑁆𑀙𑀺 𑁋

𑁮.

‘‘𑀓𑀻𑀤𑀺𑀲𑀁 𑀢𑁂 𑀇𑀡𑀤𑀸𑀦𑀁, 𑀇𑀡𑀫𑁄𑀓𑁆𑀔𑁄 𑀘 𑀓𑀻𑀤𑀺𑀲𑁄;

𑀦𑀺𑀥𑀺𑀦𑀺𑀥𑀸𑀦𑀫𑀓𑁆𑀔𑀸𑀳𑀺, 𑀅𑀣 𑀧𑀸𑀲𑀸 𑀧𑀫𑁄𑀓𑁆𑀔𑀲𑀻’’𑀢𑀺.

𑀢𑀢𑁆𑀣 𑀇𑀡𑀤𑀸𑀦𑀦𑁆𑀢𑀺 𑀇𑀡𑀲𑁆𑀲 𑀤𑀸𑀦𑀁. 𑀦𑀺𑀥𑀺𑀦𑀺𑀥𑀸𑀦𑀦𑁆𑀢𑀺 𑀦𑀺𑀥𑀺𑀦𑁄 𑀦𑀺𑀥𑀸𑀦𑀁.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀦 𑀧𑀼𑀝𑁆𑀞𑁄 𑀲𑀼𑀯𑀭𑀸𑀚𑀸 𑀢𑀲𑁆𑀲 𑀩𑁆𑀬𑀸𑀓𑀭𑁄𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁯.

‘‘𑀅𑀚𑀸𑀢𑀧𑀓𑁆𑀔𑀸 𑀢𑀭𑀼𑀡𑀸, 𑀧𑀼𑀢𑁆𑀢𑀓𑀸 𑀫𑀬𑁆𑀳 𑀓𑁄𑀲𑀺𑀬;

𑀢𑁂 𑀫𑀁 𑀪𑀢𑀸 𑀪𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀇𑀡𑀁 𑀤𑀤𑁂.

𑁧𑁦.

‘‘𑀫𑀸𑀢𑀸 𑀧𑀺𑀢𑀸 𑀘 𑀫𑁂 𑀯𑀼𑀤𑁆𑀥𑀸, 𑀚𑀺𑀡𑁆𑀡𑀓𑀸 𑀕𑀢𑀬𑁄𑀩𑁆𑀩𑀦𑀸;

𑀢𑁂𑀲𑀁 𑀢𑀼𑀡𑁆𑀟𑁂𑀦 𑀳𑀸𑀢𑀽𑀦, 𑀫𑀼𑀜𑁆𑀘𑁂 𑀧𑀼𑀩𑁆𑀩𑀓𑀢𑀁 𑀇𑀡𑀁.

𑁧𑁧.

‘‘𑀅𑀜𑁆𑀜𑁂𑀧𑀺 ¶ ¶ 𑀢𑀢𑁆𑀣 𑀲𑀓𑀼𑀡𑀸, 𑀔𑀻𑀡𑀧𑀓𑁆𑀔𑀸 𑀲𑀼𑀤𑀼𑀩𑁆𑀩𑀮𑀸;

𑀢𑁂𑀲𑀁 𑀧𑀼𑀜𑁆𑀜𑀢𑁆𑀣𑀺𑀓𑁄 𑀤𑀫𑁆𑀫𑀺, 𑀢𑀁 𑀦𑀺𑀥𑀺𑀁 𑀆𑀳𑀼 𑀧𑀡𑁆𑀟𑀺𑀢𑀸.

𑁧𑁨.

‘‘𑀈𑀤𑀺𑀲𑀁 𑀫𑁂 𑀇𑀡𑀤𑀸𑀦𑀁, 𑀇𑀡𑀫𑁄𑀓𑁆𑀔𑁄 𑀘 𑀈𑀤𑀺𑀲𑁄;

𑀦𑀺𑀥𑀺𑀦𑀺𑀥𑀸𑀦𑀫𑀓𑁆𑀔𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑁄𑀲𑀺𑀬𑀸’’𑀢𑀺.

𑀢𑀢𑁆𑀣 𑀳𑀸𑀢𑀽𑀦𑀸𑀢𑀺 𑀳𑀭𑀺𑀢𑁆𑀯𑀸. 𑀢𑀁 𑀦𑀺𑀥𑀺𑀦𑁆𑀢𑀺 𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀧𑀡𑁆𑀟𑀺𑀢𑀸 𑀅𑀦𑀼𑀕𑀸𑀫𑀺𑀓𑀦𑀺𑀥𑀺𑀁 𑀦𑀸𑀫 𑀓𑀣𑁂𑀦𑁆𑀢𑀺. 𑀦𑀺𑀥𑀺𑀦𑀺𑀥𑀸𑀦𑀦𑁆𑀢𑀺 𑀦𑀺𑀥𑀺𑀦𑁄 𑀦𑀺𑀥𑀸𑀦𑀁, ‘‘𑀦𑀺𑀥𑀸𑀦𑀦𑀺𑀥𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.

𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑁧𑁩.

‘‘𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀏𑀓𑀘𑁆𑀘𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀅𑀬𑀁 𑀥𑀫𑁆𑀫𑁄 𑀦 𑀯𑀺𑀚𑁆𑀚𑀢𑀺.

𑁧𑁪.

‘‘𑀪𑀼𑀜𑁆𑀚 ¶ 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀧𑀼𑀦𑀸𑀧𑀺 𑀲𑀼𑀯 𑀧𑀲𑁆𑀲𑁂𑀫𑀼, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦’’𑀦𑁆𑀢𑀺.

𑀢𑀢𑁆𑀣 𑀪𑀼𑀜𑁆𑀚 𑀲𑀸𑀮𑀺𑀦𑁆𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀪𑀼𑀜𑁆𑀚𑀸𑀢𑀺 𑀓𑀭𑀻𑀲𑀲𑀳𑀲𑁆𑀲𑀫𑁆𑀧𑀺 𑀢𑀲𑁆𑀲𑁂𑀯 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀏𑀯𑀫𑀸𑀳. 𑀧𑀲𑁆𑀲𑁂𑀫𑀽𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀆𑀕𑀢𑀁 𑀅𑀜𑁆𑀜𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀢𑀁 𑀧𑀲𑁆𑀲𑁂𑀬𑁆𑀬𑀸𑀫𑀸𑀢𑀺.

𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀲𑀢𑁆𑀢𑀁 𑀬𑀸𑀘𑀺𑀢𑁆𑀯𑀸 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬 𑀫𑀼𑀤𑀼𑀘𑀺𑀢𑁆𑀢𑁂𑀦 𑀑𑀮𑁄𑀓𑁂𑀦𑁆𑀢𑁄 𑀧𑀸𑀤𑀢𑁄 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 𑀪𑀤𑁆𑀤𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀜𑁆𑀘𑀦𑀢𑀝𑁆𑀝𑀓𑁂 𑀫𑀥𑀼𑀮𑀸𑀚𑁂 𑀔𑀸𑀤𑀸𑀧𑁂𑀢𑁆𑀯𑀸 𑀲𑀓𑁆𑀔𑀭𑁄𑀤𑀓𑀁 𑀧𑀸𑀬𑁂𑀲𑀺. 𑀅𑀣𑀲𑁆𑀲 𑀲𑀼𑀯𑀭𑀸𑀚𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀢𑁆𑀯𑀸 𑀑𑀯𑀸𑀤𑀁 𑀤𑁂𑀦𑁆𑀢𑁄 𑀆𑀳 𑁋

𑁧𑁫.

‘‘𑀪𑀼𑀢𑁆𑀢𑀜𑁆𑀘 𑀧𑀻𑀢𑀜𑁆𑀘 𑀢𑀯𑀲𑁆𑀲𑀫𑀫𑁆𑀳𑀺, 𑀭𑀢𑀻 𑀘 𑀦𑁄 𑀓𑁄𑀲𑀺𑀬 𑀢𑁂 𑀲𑀓𑀸𑀲𑁂;

𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁂𑀲𑀼 𑀤𑀤𑀸𑀳𑀺 𑀤𑀸𑀦𑀁, 𑀚𑀺𑀡𑁆𑀡𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀪𑀭𑀲𑁆𑀲𑀽’’𑀢𑀺.

𑀢𑀢𑁆𑀣 𑀢𑀯𑀲𑁆𑀲𑀫𑀫𑁆𑀳𑀻𑀢𑀺 𑀢𑀯 𑀦𑀺𑀯𑁂𑀲𑀦𑁂. 𑀭𑀢𑀻𑀢𑀺 𑀅𑀪𑀺𑀭𑀢𑀺.

𑀢𑀁 ¶ ¶ 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀢𑀼𑀝𑁆𑀞𑀫𑀸𑀦𑀲𑁄 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁬.

‘‘𑀮𑀓𑁆𑀔𑀻 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀬𑁄 𑀅𑀤𑁆𑀤𑀲𑀸𑀲𑀺𑀁 𑀧𑀯𑀭𑀁 𑀤𑀺𑀚𑀸𑀦𑀁;

𑀲𑀼𑀯𑀲𑁆𑀲 𑀲𑀼𑀢𑁆𑀯𑀸𑀦 𑀲𑀼𑀪𑀸𑀲𑀺𑀢𑀸𑀦𑀺, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.

𑀢𑀢𑁆𑀣 𑀮𑀓𑁆𑀔𑀻𑀢𑀺 𑀲𑀺𑀭𑀻𑀧𑀺 𑀧𑀼𑀜𑁆𑀜𑀫𑁆𑀧𑀺 𑀧𑀜𑁆𑀜𑀸𑀧𑀺.

𑀫𑀳𑀸𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀅𑀢𑁆𑀢𑀦𑁄 𑀤𑀺𑀦𑁆𑀦𑀁 𑀓𑀭𑀻𑀲𑀲𑀳𑀲𑁆𑀲𑀫𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀓𑀭𑀻𑀲𑀫𑁂𑀯 𑀕𑀡𑁆𑀳𑀺. 𑀩𑁆𑀭𑀸𑀳𑁆𑀫𑀡𑁄 𑀣𑀫𑁆𑀪𑁂 𑀦𑀺𑀔𑀦𑀺𑀢𑁆𑀯𑀸 𑀢𑀲𑁆𑀲 𑀔𑁂𑀢𑁆𑀢𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙 𑀲𑀸𑀫𑀺, 𑀅𑀲𑁆𑀲𑀼𑀫𑀼𑀔𑁂 𑀭𑁄𑀤𑀫𑀸𑀦𑁂 𑀫𑀸𑀢𑀸𑀧𑀺𑀢𑀭𑁄 𑀅𑀲𑁆𑀲𑀸𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀼𑀝𑁆𑀞𑀫𑀸𑀦𑀲𑁄 𑀲𑀸𑀮𑀺𑀲𑀻𑀲𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀭𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸, 𑀉𑀝𑁆𑀞𑁂𑀣𑀸’’𑀢𑀺 𑀆𑀳. 𑀢𑁂 𑀅𑀲𑁆𑀲𑀼𑀫𑀼𑀔𑀸 𑀭𑁄𑀤𑀫𑀸𑀦𑀸 𑀉𑀝𑁆𑀞𑀳𑀺𑀁𑀲𑀼, 𑀢𑀸𑀯𑀤𑁂𑀯 𑀲𑀼𑀯𑀕𑀡𑀸 ¶ 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑀣𑀁 𑀫𑀼𑀢𑁆𑀢𑁄𑀲𑀺, 𑀤𑁂𑀯𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺. 𑀓𑁄𑀲𑀺𑀬𑁄𑀧𑀺 𑀲𑀼𑀯𑀭𑀜𑁆𑀜𑁄 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀳𑀸𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁭.

‘‘𑀲𑁄 𑀓𑁄𑀲𑀺𑀬𑁄 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄, 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘𑀪𑀺𑀲𑀗𑁆𑀔𑀭𑀺𑀢𑁆𑀯𑀸;

𑀅𑀦𑁆𑀦𑁂𑀦 𑀧𑀸𑀦𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀦𑁆𑀢𑀧𑁆𑀧𑀬𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀘𑀸’’𑀢𑀺.

𑀢𑀢𑁆𑀣 𑀲𑀦𑁆𑀢𑀧𑁆𑀧𑀬𑀻𑀢𑀺 𑀕𑀳𑀺𑀢𑀕𑀳𑀺𑀢𑀸𑀦𑀺 𑀪𑀸𑀚𑀦𑀸𑀦𑀺 𑀧𑀽𑀭𑁂𑀦𑁆𑀢𑁄 𑀲𑀦𑁆𑀢𑀧𑁆𑀧𑁂𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀫𑀸𑀢𑀸𑀧𑀺𑀢𑀽𑀦𑀁 𑀧𑁄𑀲𑀦𑀁 𑀦𑀸𑀫 𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑁄’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀲𑀼𑀯𑀕𑀡𑀸 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁂𑀲𑀼𑀁, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀔𑁂𑀢𑁆𑀢𑀧𑀸𑀮𑁄 𑀙𑀦𑁆𑀦𑁄, 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄, 𑀲𑀼𑀯𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀸𑀮𑀺𑀓𑁂𑀤𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁪𑁮𑁫] 𑁨. 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀯𑀡𑁆𑀡𑀦𑀸

𑀉𑀧𑀦𑀻𑀬𑀢𑀺𑀤𑀁 ¶ ¶ 𑀫𑀜𑁆𑀜𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀉𑀧𑀦𑀺𑀲𑁆𑀲𑀸𑀬 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀦𑀺𑀯𑁂𑀲𑀦𑁂 𑀭𑀸𑀳𑀼𑀮𑀫𑀸𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀇𑀤𑀁 𑀧𑀦 𑀚𑀸𑀢𑀓𑀁 𑀤𑀽𑀭𑁂𑀦𑀺𑀤𑀸𑀦𑀢𑁄 𑀧𑀝𑁆𑀞𑀸𑀬 𑀓𑀣𑁂𑀢𑀩𑁆𑀩𑀁. 𑀲𑀸 𑀧𑀦𑁂𑀲𑀸 𑀦𑀺𑀤𑀸𑀦𑀓𑀣𑀸 𑀬𑀸𑀯 𑀮𑀝𑁆𑀞𑀺𑀯𑀦𑁂 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑀻𑀳𑀦𑀸𑀤𑀸 𑀅𑀧𑀡𑁆𑀡𑀓𑀚𑀸𑀢𑀓𑁂 𑀓𑀣𑀺𑀢𑀸, 𑀢𑀢𑁄 𑀧𑀭𑀁 𑀬𑀸𑀯 𑀓𑀧𑀺𑀮𑀯𑀢𑁆𑀣𑀼𑀕𑀫𑀦𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑀭𑀪𑀢𑁆𑀢𑀲𑀫𑀬𑁂 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 ‘‘𑀭𑀸𑀳𑀼𑀮𑀫𑀸𑀢𑀼 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸 𑀕𑀼𑀡𑀁 𑀯𑀡𑁆𑀡𑁂𑀦𑁆𑀢𑁄 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀭𑀸𑀳𑀼𑀮𑀫𑀸𑀢𑀼 𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀧𑀸𑀬𑀸𑀲𑀺. 𑀢𑀤𑀸 𑀢𑀲𑁆𑀲𑀸 𑀲𑀫𑁆𑀫𑀼𑀔𑀸 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀬𑁄 𑀯𑀲𑀦𑁆𑀢𑀺 𑀢𑀸𑀲𑀼 𑀔𑀢𑁆𑀢𑀺𑀬𑀓𑀜𑁆𑀜𑀸𑀦𑀁𑀬𑁂𑀯 𑀦𑀯𑀼𑀢𑀺𑀅𑀥𑀺𑀓𑀲𑀳𑀲𑁆𑀲𑀁. 𑀲𑀸 𑀢𑀣𑀸𑀕𑀢𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀲𑀩𑁆𑀩𑀸 𑀓𑀸𑀲𑀸𑀯𑀸𑀦𑁂𑀯 𑀦𑀺𑀯𑀸𑀲𑁂𑀦𑁆𑀢𑀽’’𑀢𑀺 𑀢𑀸𑀲𑀁 𑀆𑀭𑁄𑀘𑀸𑀧𑁂𑀲𑀺. 𑀢𑀸 𑀢𑀣𑀸 𑀓𑀭𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 ¶ 𑀦𑀺𑀲𑀻𑀤𑀺. 𑀅𑀣 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀺𑀁𑀲𑀼, 𑀫𑀳𑀸𑀧𑀭𑀺𑀤𑁂𑀯𑀲𑀤𑁆𑀤𑁄 𑀅𑀳𑁄𑀲𑀺. 𑀭𑀸𑀳𑀼𑀮𑀫𑀸𑀢𑀸𑀧𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑀸𑀚𑀕𑀢𑁂𑀦 𑀩𑀳𑀼𑀫𑀸𑀦𑁂𑀦 𑀲𑀕𑀸𑀭𑀯𑁂𑀦 𑀦𑀺𑀲𑀻𑀤𑀺. 𑀭𑀸𑀚𑀸 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀆𑀭𑀪𑀺, ‘‘𑀪𑀦𑁆𑀢𑁂, 𑀫𑀫 𑀲𑀼𑀡𑁆𑀳𑀸 ‘𑀢𑀼𑀫𑁆𑀳𑁂𑀳𑀺 𑀓𑀸𑀲𑀸𑀯𑀸𑀦𑀺 𑀦𑀺𑀯𑀢𑁆𑀣𑀸𑀦𑀻’𑀢𑀺 𑀲𑀼𑀢𑁆𑀯𑀸 𑀓𑀸𑀲𑀸𑀯𑀸𑀦𑁂𑀯 𑀦𑀺𑀯𑀸𑀲𑁂𑀲𑀺, ‘𑀫𑀸𑀮𑀸𑀤𑀻𑀦𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀻’𑀢𑀺 𑀲𑀼𑀢𑁆𑀯𑀸 𑀫𑀸𑀮𑀸𑀤𑀻𑀦𑀺 𑀧𑀭𑀺𑀘𑁆𑀘𑀚𑀺, ‘𑀪𑀽𑀫𑀺𑀬𑀁 𑀲𑀬𑀢𑀻’𑀢𑀺 𑀲𑀼𑀢𑁆𑀯𑀸 𑀪𑀽𑀫𑀺𑀲𑀬𑀦𑀸𑀯 𑀚𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑀺𑀢𑀓𑀸𑀮𑁂 𑀯𑀺𑀥𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀳𑀺 𑀭𑀸𑀚𑀽𑀳𑀺 𑀧𑁂𑀲𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀦 𑀕𑀡𑁆𑀳𑀺, 𑀏𑀯𑀁 𑀢𑀼𑀫𑁆𑀳𑁂𑀲𑀼 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀏𑀲𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀢𑀲𑁆𑀲𑀸 𑀕𑀼𑀡𑀓𑀣𑀁 𑀓𑀣𑁂𑀲𑀺. 𑀲𑀢𑁆𑀣𑀸 ‘‘𑀅𑀦𑀘𑁆𑀙𑀭𑀺𑀬𑀁, 𑀫𑀳𑀸𑀭𑀸𑀚, 𑀬𑀁 𑀏𑀲𑀸 𑀇𑀤𑀸𑀦𑀺 𑀫𑀫 𑀧𑀘𑁆𑀙𑀺𑀫𑁂 𑀅𑀢𑁆𑀢𑀪𑀸𑀯𑁂 𑀫𑀬𑀺 𑀲𑀲𑀺𑀦𑁂𑀳𑀸 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀸 𑀪𑀯𑁂𑀬𑁆𑀬. 𑀏𑀲𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑀺 𑀫𑀬𑀺 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀫𑀳𑀸𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀓𑀺𑀦𑁆𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀘𑀦𑁆𑀤𑀸 𑀦𑀸𑀫𑀲𑁆𑀲 𑀪𑀭𑀺𑀬𑀸. 𑀢𑁂 𑀉𑀪𑁄𑀧𑀺 𑀘𑀦𑁆𑀤𑀦𑀸𑀫𑀓𑁂 𑀭𑀚𑀢𑀧𑀩𑁆𑀩𑀢𑁂 𑀯𑀲𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀅𑀫𑀘𑁆𑀘𑀸𑀦𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑁆𑀯𑁂 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄 𑀏𑀓𑀓𑁄𑀯 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀲𑁄 𑀫𑀺𑀕𑀫𑀁𑀲𑀁 𑀔𑀸𑀤𑀦𑁆𑀢𑁄 𑀏𑀓𑀁 𑀔𑀼𑀤𑁆𑀤𑀓𑀦𑀤𑀺𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀉𑀤𑁆𑀥𑀁 𑀅𑀪𑀺𑀭𑀼𑀳𑀺. 𑀘𑀦𑁆𑀤𑀧𑀩𑁆𑀩𑀢𑀯𑀸𑀲𑀺𑀦𑁄 𑀓𑀺𑀦𑁆𑀦𑀭𑀸 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀅𑀦𑁄𑀢𑀭𑀺𑀢𑁆𑀯𑀸 𑀧𑀩𑁆𑀩𑀢𑁂𑀬𑁂𑀯 𑀯𑀲𑀦𑁆𑀢𑀺, 𑀦𑀺𑀤𑀸𑀖𑀲𑀫𑀬𑁂 𑀑𑀢𑀭𑀦𑁆𑀢𑀺. 𑀢𑀤𑀸 𑀘 𑀲𑁄 𑀘𑀦𑁆𑀤𑀓𑀺𑀦𑁆𑀦𑀭𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀑𑀢𑀭𑀺𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀦𑁆𑀢𑁄 𑀧𑀼𑀧𑁆𑀨𑀭𑁂𑀡𑀼𑀁 𑀔𑀸𑀤𑀦𑁆𑀢𑁄 𑀧𑀼𑀧𑁆𑀨𑀧𑀝𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀸𑀭𑀼𑀧𑀦𑁆𑀢𑁄 𑀮𑀢𑀸𑀤𑁄𑀮𑀸𑀳𑀺 𑀓𑀻𑀴𑀦𑁆𑀢𑁄 ¶ 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀦𑁆𑀢𑁄 𑀢𑀁 𑀔𑀼𑀤𑁆𑀤𑀓𑀦𑀤𑀺𑀁 𑀧𑀢𑁆𑀯𑀸 𑀏𑀓𑀲𑁆𑀫𑀺𑀁 𑀦𑀺𑀯𑀢𑁆𑀢𑀦𑀝𑁆𑀞𑀸𑀦𑁂 𑀑𑀢𑀭𑀺𑀢𑁆𑀯𑀸 𑀉𑀤𑀓𑁂 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀧𑀼𑀧𑁆𑀨𑀧𑀝𑁂 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀭𑀚𑀢𑀧𑀝𑁆𑀝𑀯𑀡𑁆𑀡𑀸𑀬 𑀯𑀸𑀮𑀼𑀓𑀸𑀬 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀏𑀓𑀁 𑀯𑁂𑀴𑀼 𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀲𑀬𑀦𑁂 𑀦𑀺𑀲𑀻𑀤𑀺 ¶ . 𑀢𑀢𑁄 𑀘𑀦𑁆𑀤𑀓𑀺𑀦𑁆𑀦𑀭𑁄 𑀯𑁂𑀴𑀼𑀁 𑀯𑀸𑀤𑁂𑀦𑁆𑀢𑁄 𑀫𑀥𑀼𑀭𑀲𑀤𑁆𑀤𑁂𑀦 𑀕𑀸𑀬𑀺. 𑀘𑀦𑁆𑀤𑀓𑀺𑀦𑁆𑀦𑀭𑀻 𑀫𑀼𑀤𑀼𑀳𑀢𑁆𑀣𑁂 𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀺𑀢𑀸 𑀦𑀘𑁆𑀘𑀺 𑀘𑁂𑀯 𑀕𑀸𑀬𑀺 𑀘. 𑀲𑁄 𑀭𑀸𑀚𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀤𑀲𑀤𑁆𑀤𑀁 𑀅𑀲𑀸𑀯𑁂𑀦𑁆𑀢𑁄 𑀲𑀡𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀞𑀢𑁆𑀯𑀸 𑀢𑁂 𑀓𑀺𑀦𑁆𑀦𑀭𑁂 𑀤𑀺𑀲𑁆𑀯𑀸 𑀓𑀺𑀦𑁆𑀦𑀭𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀢𑀁 𑀓𑀺𑀦𑁆𑀦𑀭𑀁 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀇𑀫𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀞𑀢𑁆𑀯𑀸 𑀘𑀦𑁆𑀤𑀓𑀺𑀦𑁆𑀦𑀭𑀁 𑀯𑀺𑀚𑁆𑀛𑀺. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀧𑀭𑀺𑀤𑁂𑀯𑀫𑀸𑀦𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁮.

‘‘𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂, 𑀘𑀦𑁆𑀤𑁂 𑀮𑁄𑀳𑀺𑀢𑀫𑀤𑁆𑀤𑀦𑁂;

𑀅𑀚𑁆𑀚 𑀚𑀳𑀸𑀫𑀺 𑀚𑀻𑀯𑀺𑀢𑀁, 𑀧𑀸𑀡𑀸 𑀫𑁂 𑀘𑀦𑁆𑀤𑁂 𑀦𑀺𑀭𑀼𑀚𑁆𑀛𑀦𑁆𑀢𑀺.

𑁧𑁯.

‘‘𑀑𑀲𑀻𑀤𑀺 𑀫𑁂 𑀤𑀼𑀓𑁆𑀔𑀁 𑀳𑀤𑀬𑀁, 𑀫𑁂 𑀟𑀬𑁆𑀳𑀢𑁂 𑀦𑀺𑀢𑀫𑁆𑀫𑀸𑀫𑀺;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁦.

‘‘𑀢𑀺𑀡𑀫𑀺𑀯 𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀺, 𑀦𑀤𑀻 𑀅𑀧𑀭𑀺𑀧𑀼𑀡𑁆𑀡𑀸𑀯 𑀲𑀼𑀲𑁆𑀲𑀸𑀫𑀺;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁧.

‘‘𑀯𑀲𑁆𑀲𑀫𑀺𑀯 𑀲𑀭𑁂 𑀧𑀸𑀤𑁂, 𑀇𑀫𑀸𑀦𑀺 𑀅𑀲𑁆𑀲𑀽𑀦𑀺 𑀯𑀢𑁆𑀢𑀭𑁂 𑀫𑀬𑁆𑀳𑀁;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀻’’𑀢𑀺.

𑀢𑀢𑁆𑀣 ¶ 𑀉𑀧𑀦𑀻𑀬𑀢𑀻𑀢𑀺 𑀲𑀦𑁆𑀢𑀢𑀺𑀯𑀺𑀘𑁆𑀙𑁂𑀤𑀁 𑀉𑀧𑀦𑀻𑀬𑀢𑀺. 𑀇𑀤𑀦𑁆𑀢𑀺 𑀚𑀻𑀯𑀺𑀢𑀁. 𑀧𑀸𑀡𑀸 𑀫𑁂𑀢𑀺 𑀪𑀤𑁆𑀤𑁂, 𑀘𑀦𑁆𑀤𑁂 𑀫𑀫 𑀚𑀻𑀯𑀺𑀢𑀧𑀸𑀡𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀑𑀲𑀻𑀤𑀺 𑀫𑁂𑀢𑀺 𑀚𑀻𑀯𑀺𑀢𑀁 𑀫𑁂 𑀑𑀲𑀻𑀤𑀢𑀺. 𑀦𑀺𑀢𑀫𑁆𑀫𑀸𑀫𑀻𑀢𑀺 𑀅𑀢𑀺𑀓𑀺𑀮𑀫𑀸𑀫𑀺. 𑀢𑀯 𑀘𑀦𑁆𑀤𑀺𑀬𑀸𑀢𑀺 𑀇𑀤𑀁 𑀫𑀫 𑀤𑀼𑀓𑁆𑀔𑀁, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺, 𑀅𑀣 𑀔𑁄 𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸 𑀲𑁄𑀓𑀳𑁂𑀢𑀼 𑀬𑀲𑁆𑀫𑀸 𑀢𑁆𑀯𑀁 𑀫𑀫 𑀯𑀺𑀬𑁄𑀕𑁂𑀦 𑀲𑁄𑀘𑀺𑀲𑁆𑀲𑀲𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀺𑀡𑀫𑀺𑀯 𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀻𑀢𑀺 𑀢𑀢𑁆𑀢𑀧𑀸𑀲𑀸𑀡𑁂 𑀔𑀺𑀢𑁆𑀢𑀢𑀺𑀡𑀫𑀺𑀯 𑀫𑀽𑀮𑀙𑀺𑀦𑁆𑀦𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀻𑀢𑀺 𑀯𑀤𑀢𑀺. 𑀲𑀭𑁂 𑀧𑀸𑀤𑁂𑀢𑀺 𑀬𑀣𑀸 𑀦𑀸𑀫 𑀧𑀩𑁆𑀩𑀢𑀧𑀸𑀤𑁂 𑀧𑀢𑀺𑀢𑀯𑀲𑁆𑀲𑀁 𑀲𑀭𑀺𑀢𑁆𑀯𑀸 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀯𑀢𑁆𑀢𑀢𑀺.

𑀫𑀳𑀸𑀲𑀢𑁆𑀢𑁄 𑀇𑀫𑀸𑀳𑀺 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀧𑀼𑀧𑁆𑀨𑀲𑀬𑀦𑁂 𑀦𑀺𑀧𑀦𑁆𑀦𑁄𑀯 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺. 𑀭𑀸𑀚𑀸 𑀧𑀢𑀺𑀝𑁆𑀞𑀺𑀢𑁄𑀯. 𑀇𑀢𑀭𑀸 𑀫𑀳𑀸𑀲𑀢𑁆𑀢𑁂 𑀧𑀭𑀺𑀤𑁂𑀯𑀦𑁆𑀢𑁂 𑀅𑀢𑁆𑀢𑀦𑁄 𑀭𑀢𑀺𑀬𑀸 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀢𑀲𑁆𑀲 ¶ 𑀯𑀺𑀤𑁆𑀥𑀪𑀸𑀯𑀁 ¶ 𑀦 𑀚𑀸𑀦𑀸𑀢𑀺, 𑀯𑀺𑀲𑀜𑁆𑀜𑀁 𑀧𑀦 𑀦𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀺𑀬𑀲𑀸𑀫𑀺𑀓𑀲𑁆𑀲 𑀤𑀼𑀓𑁆𑀔’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑀻 𑀧𑀳𑀸𑀭𑀫𑀼𑀔𑀢𑁄 𑀧𑀕𑁆𑀖𑀭𑀦𑁆𑀢𑀁 𑀮𑁄𑀳𑀺𑀢𑀁 𑀤𑀺𑀲𑁆𑀯𑀸 𑀧𑀺𑀬𑀲𑀸𑀫𑀺𑀓𑁂 𑀉𑀧𑁆𑀧𑀦𑁆𑀦𑀁 𑀩𑀮𑀯𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀭𑀸𑀚𑀸 ‘‘𑀓𑀺𑀦𑁆𑀦𑀭𑁄 𑀫𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀘𑀦𑁆𑀤𑀸 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀘𑁄𑀭𑁂𑀦 𑀧𑀺𑀬𑀲𑀸𑀫𑀺𑀓𑁄 𑀯𑀺𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀫𑁆𑀧𑀫𑀸𑀦𑀸 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀭𑀸𑀚𑀸𑀦𑀁 𑀧𑀭𑀺𑀪𑀸𑀲𑀦𑁆𑀢𑀻 𑀧𑀜𑁆𑀘 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁨.

‘‘𑀧𑀸𑀧𑁄 𑀔𑁄𑀲𑀺 𑀭𑀸𑀚𑀧𑀼𑀢𑁆𑀢, 𑀬𑁄 𑀫𑁂 𑀇𑀘𑁆𑀙𑀺𑀢𑀁 𑀧𑀢𑀺𑀁 𑀯𑀭𑀸𑀓𑀺𑀬𑀸;

𑀯𑀺𑀚𑁆𑀛𑀲𑀺 𑀯𑀦𑀫𑀽𑀮𑀲𑁆𑀫𑀺𑀁, 𑀲𑁄𑀬𑀁 𑀯𑀺𑀤𑁆𑀥𑁄 𑀙𑀫𑀸 𑀲𑁂𑀢𑀺.

𑁨𑁩.

‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀭𑀸𑀚𑀧𑀼𑀢𑁆𑀢 𑀢𑀯 𑀫𑀸𑀢𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑁂𑀓𑁆𑀔𑀫𑀸𑀦𑀸𑀬.

𑁨𑁪.

‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀭𑀸𑀚𑀧𑀼𑀢𑁆𑀢 𑀢𑀯 𑀚𑀸𑀬𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑁂𑀓𑁆𑀔𑀫𑀸𑀦𑀸𑀬.

𑁨𑁫.

‘‘𑀫𑀸 𑀘 𑀧𑀼𑀢𑁆𑀢𑀁 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀭𑀸𑀚𑀧𑀼𑀢𑁆𑀢 𑀢𑀯 𑀫𑀸𑀢𑀸;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀺.

𑁨𑁬.

‘‘𑀫𑀸 𑀘 𑀧𑀼𑀢𑁆𑀢𑀁 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀭𑀸𑀚𑀧𑀼𑀢𑁆𑀢 𑀢𑀯 𑀚𑀸𑀬𑀸;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀻’’𑀢𑀺.

𑀢𑀢𑁆𑀣 ¶ 𑀯𑀭𑀸𑀓𑀺𑀬𑀸𑀢𑀺 𑀓𑀧𑀡𑀸𑀬. 𑀧𑀝𑀺𑀫𑀼𑀜𑁆𑀘𑀢𑀽𑀢𑀺 𑀧𑀝𑀺𑀮𑀪𑀢𑀼 𑀨𑀼𑀲𑀢𑀼 𑀧𑀸𑀧𑀼𑀡𑀸𑀢𑀼. 𑀫𑀬𑁆𑀳 𑀓𑀸𑀫𑀸 𑀳𑀻𑀢𑀺 𑀫𑀬𑁆𑀳𑀁 𑀓𑀸𑀫𑁂𑀦.

𑀭𑀸𑀚𑀸 𑀦𑀁 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀧𑀭𑀺𑀪𑀸𑀲𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑀁𑀬𑁂𑀯 𑀅𑀲𑁆𑀲𑀸𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁨𑁭.

‘‘𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑁄𑀤𑀺 𑀫𑀸 𑀲𑁄𑀧𑀺, 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀺;

𑀫𑀫 𑀢𑁆𑀯𑀁 𑀳𑁂𑀳𑀺𑀲𑀺 𑀪𑀭𑀺𑀬𑀸, 𑀭𑀸𑀚𑀓𑀼𑀮𑁂 𑀧𑀽𑀚𑀺𑀢𑀸 𑀦𑀸𑀭𑀻𑀪𑀻’’𑀢𑀺.

𑀢𑀢𑁆𑀣 ¶ ¶ 𑀘𑀦𑁆𑀤𑁂𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑀺𑀤𑁂𑀯𑀦𑀓𑀸𑀮𑁂 𑀦𑀸𑀫𑀲𑁆𑀲 𑀲𑀼𑀢𑀢𑁆𑀢𑀸 𑀏𑀯𑀫𑀸𑀳. 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀻𑀢𑀺 𑀯𑀦𑀢𑀺𑀫𑀺𑀭𑀧𑀼𑀧𑁆𑀨𑀲𑀫𑀸𑀦𑀅𑀓𑁆𑀔𑀺. 𑀧𑀽𑀚𑀺𑀢𑀸 𑀦𑀸𑀭𑀻𑀪𑀻𑀢𑀺 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀺𑀓𑀸 𑀅𑀕𑁆𑀕𑀫𑀳𑁂𑀲𑀻 𑀳𑁂𑀲𑁆𑀲𑀲𑀺.

𑀘𑀦𑁆𑀤𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀁 𑀫𑀁 𑀯𑀤𑁂𑀲𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑀻 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁨𑁮.

‘‘𑀅𑀧𑀺 𑀦𑀽𑀦𑀳𑀁 𑀫𑀭𑀺𑀲𑁆𑀲𑀁, 𑀦𑀸𑀳𑀁 𑀭𑀸𑀚𑀧𑀼𑀢𑁆𑀢 𑀢𑀯 𑀳𑁂𑀲𑁆𑀲𑀁;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀻’’𑀢𑀺.

𑀢𑀢𑁆𑀣 𑀅𑀧𑀺 𑀦𑀽𑀦𑀳𑀦𑁆𑀢𑀺 𑀅𑀧𑀺 𑀏𑀓𑀁𑀲𑁂𑀦𑁂𑀯 𑀅𑀳𑀁 𑀫𑀭𑀺𑀲𑁆𑀲𑀁.

𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀘𑁆𑀙𑀦𑁆𑀤𑀭𑀸𑀕𑁄 𑀳𑀼𑀢𑁆𑀯𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁨𑁯.

‘‘𑀅𑀧𑀺 𑀪𑀻𑀭𑀼𑀓𑁂 𑀅𑀧𑀺 𑀚𑀻𑀯𑀺𑀢𑀼𑀓𑀸𑀫𑀺𑀓𑁂, 𑀓𑀺𑀫𑁆𑀧𑀼𑀭𑀺𑀲𑀺 𑀕𑀘𑁆𑀙 𑀳𑀺𑀫𑀯𑀦𑁆𑀢𑀁;

𑀢𑀸𑀮𑀻𑀲𑀢𑀕𑀭𑀪𑁄𑀚𑀦𑀸, 𑀅𑀜𑁆𑀜𑁂 𑀢𑀁 𑀫𑀺𑀕𑀸 𑀭𑀫𑀺𑀲𑁆𑀲𑀦𑁆𑀢𑀻’’𑀢𑀺.

𑀢𑀢𑁆𑀣 𑀅𑀧𑀺 𑀪𑀻𑀭𑀼𑀓𑁂𑀢𑀺 𑀪𑀻𑀭𑀼𑀚𑀸𑀢𑀺𑀓𑁂. 𑀢𑀸𑀮𑀻𑀲𑀢𑀕𑀭𑀪𑁄𑀚𑀦𑀸𑀢𑀺 𑀢𑁆𑀯𑀁 𑀢𑀸𑀮𑀻𑀲𑀧𑀢𑁆𑀢𑀢𑀕𑀭𑀧𑀢𑁆𑀢𑀪𑁄𑀚𑀦𑀸 𑀫𑀺𑀕𑀻, 𑀢𑀲𑁆𑀫𑀸 𑀅𑀜𑁆𑀜𑁂 𑀢𑀁 𑀫𑀺𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑀁 𑀭𑀸𑀚𑀓𑀼𑀮𑀸𑀭𑀳𑀸, 𑀕𑀘𑁆𑀙𑀸𑀢𑀺 𑀦𑀁 𑀅𑀯𑀘, 𑀯𑀢𑁆𑀯𑀸 𑀘 𑀧𑀦 𑀦𑀺𑀭𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸 𑀢𑀲𑁆𑀲 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀑𑀭𑀼𑀬𑁆𑀳 𑀫𑀳𑀸𑀲𑀢𑁆𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑁄𑀧𑁂𑀢𑁆𑀯𑀸 𑀧𑀩𑁆𑀩𑀢𑀢𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀻𑀲𑀫𑀲𑁆𑀲 𑀅𑀢𑁆𑀢𑀦𑁄 𑀊𑀭𑀽𑀲𑀼 𑀓𑀢𑁆𑀯𑀸 𑀩𑀮𑀯𑀧𑀭𑀺𑀤𑁂𑀯𑀁 𑀧𑀭𑀺𑀤𑁂𑀯𑀫𑀸𑀦𑀸 𑀤𑁆𑀯𑀸𑀤𑀲 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁦.

‘‘𑀢𑁂 ¶ 𑀧𑀩𑁆𑀩𑀢𑀸 𑀢𑀸 𑀘 𑀓𑀦𑁆𑀤𑀭𑀸, 𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁧.

‘‘𑀢𑁂 𑀧𑀡𑁆𑀡𑀲𑀦𑁆𑀣𑀢𑀸 𑀭𑀫𑀡𑀻𑀬𑀸, 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀘𑀺𑀡𑁆𑀡𑀸;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁨.

‘‘𑀢𑁂 ¶ 𑀧𑀼𑀧𑁆𑀨𑀲𑀦𑁆𑀣𑀢𑀸 𑀭𑀫𑀡𑀻𑀬𑀸, 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀘𑀺𑀡𑁆𑀡𑀸;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁩.

‘‘𑀅𑀘𑁆𑀙𑀸 ¶ 𑀲𑀯𑀦𑁆𑀢𑀺 𑀕𑀺𑀭𑀺𑀯𑀦𑀦𑀤𑀺𑀬𑁄, 𑀓𑀼𑀲𑀼𑀫𑀸𑀪𑀺𑀓𑀺𑀡𑁆𑀡𑀲𑁄𑀢𑀸𑀬𑁄;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁪.

‘‘𑀦𑀻𑀮𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁫.

‘‘𑀧𑀻𑀢𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁬.

‘‘𑀢𑀫𑁆𑀩𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁭.

‘‘𑀢𑀼𑀗𑁆𑀕𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁮.

‘‘𑀲𑁂𑀢𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁯.

‘‘𑀘𑀺𑀢𑁆𑀭𑀸𑀦𑀺 𑀳𑀺𑀫𑀯𑀢𑁄 𑀧𑀩𑁆𑀩𑀢𑀲𑁆𑀲, 𑀓𑀽𑀝𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑀺;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁪𑁦.

‘‘𑀬𑀓𑁆𑀔𑀕𑀡𑀲𑁂𑀯𑀺𑀢𑁂 𑀕𑀦𑁆𑀥𑀫𑀸𑀤𑀦𑁂, 𑀑𑀲𑀥𑁂𑀪𑀺 𑀲𑀜𑁆𑀙𑀦𑁆𑀦𑁂;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁪𑁧.

‘‘𑀓𑀺𑀫𑁆𑀧𑀼𑀭𑀺𑀲𑀲𑁂𑀯𑀺𑀢𑁂 ¶ 𑀕𑀦𑁆𑀥𑀫𑀸𑀤𑀦𑁂, 𑀑𑀲𑀥𑁂𑀪𑀺 𑀲𑀜𑁆𑀙𑀦𑁆𑀦𑁂;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲’’𑀦𑁆𑀢𑀺.

𑀢𑀢𑁆𑀣 ¶ 𑀢𑁂 𑀧𑀩𑁆𑀩𑀢𑀸𑀢𑀺 𑀬𑁂𑀲𑀼 𑀫𑀬𑀁 𑀏𑀓𑀢𑁄𑀯 𑀅𑀪𑀺𑀭𑀫𑀺𑀫𑁆𑀳, 𑀇𑀫𑁂 𑀢𑁂 𑀧𑀩𑁆𑀩𑀢𑀸 𑀢𑀸 𑀘 𑀓𑀦𑁆𑀤𑀭𑀸 𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 𑀢𑀣𑁂𑀯 𑀞𑀺𑀢𑀸. 𑀢𑁂𑀲𑀼 𑀅𑀳𑀁 𑀇𑀤𑀸𑀦𑀺 𑀢𑀁 𑀅𑀧𑀲𑁆𑀲𑀦𑁆𑀢𑀻 𑀓𑀣𑀁 𑀓𑀲𑁆𑀲𑀁, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁂𑀲𑀼 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀲𑁄𑀪𑀁 𑀢𑀁 𑀅𑀧𑀲𑁆𑀲𑀦𑁆𑀢𑀻 𑀓𑀣𑀁 𑀅𑀥𑀺𑀯𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀧𑀡𑁆𑀡𑀲𑀦𑁆𑀣𑀢𑀸𑀢𑀺 𑀢𑀸𑀮𑀻𑀲𑀧𑀢𑁆𑀢𑀸𑀤𑀺𑀕𑀦𑁆𑀥𑀧𑀡𑁆𑀡𑀲𑀦𑁆𑀣𑀭𑀸. 𑀅𑀘𑁆𑀙𑀸𑀢𑀺 𑀯𑀺𑀧𑁆𑀧𑀲𑀦𑁆𑀦𑁄𑀤𑀓𑀸. 𑀦𑀻𑀮𑀸𑀦𑀻𑀢𑀺 𑀦𑀻𑀮𑀫𑀡𑀺𑀫𑀬𑀸𑀦𑀺. 𑀧𑀻𑀢𑀸𑀦𑀻𑀢𑀺 𑀲𑁄𑀯𑀡𑁆𑀡𑀫𑀬𑀸𑀦𑀺. 𑀢𑀫𑁆𑀩𑀸𑀦𑀻𑀢𑀺 𑀫𑀦𑁄𑀲𑀺𑀮𑀫𑀬𑀸𑀦𑀺. 𑀢𑀼𑀗𑁆𑀕𑀸𑀦𑀻𑀢𑀺 𑀉𑀘𑁆𑀘𑀸𑀦𑀺 𑀢𑀺𑀔𑀺𑀡𑀕𑁆𑀕𑀸𑀦𑀺. 𑀲𑁂𑀢𑀸𑀦𑀻𑀢𑀺 𑀭𑀚𑀢𑀫𑀬𑀸𑀦𑀺. 𑀘𑀺𑀢𑁆𑀭𑀸𑀦𑀻𑀢𑀺 𑀲𑀢𑁆𑀢𑀭𑀢𑀦𑀫𑀺𑀲𑁆𑀲𑀓𑀸𑀦𑀺. 𑀬𑀓𑁆𑀔𑀕𑀡𑀲𑁂𑀯𑀺𑀢𑁂𑀢𑀺 𑀪𑀼𑀫𑁆𑀫𑀤𑁂𑀯𑀢𑀸𑀳𑀺 𑀲𑁂𑀯𑀺𑀢𑁂.

𑀇𑀢𑀺 𑀲𑀸 𑀤𑁆𑀯𑀸𑀤𑀲𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀉𑀭𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀲𑀦𑁆𑀢𑀸𑀧𑀪𑀸𑀯𑀁 𑀜𑀢𑁆𑀯𑀸 ‘‘𑀘𑀦𑁆𑀤𑁄 𑀚𑀻𑀯𑀢𑀺𑀬𑁂𑀯, 𑀤𑁂𑀯𑀼𑀚𑁆𑀛𑀸𑀦𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀮𑁄𑀓𑀧𑀸𑀮𑀸 𑀦𑀸𑀫 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑀺𑀧𑁆𑀧𑀯𑀼𑀢𑁆𑀣𑀸, 𑀅𑀤𑀼 𑀫𑀢𑀸 ¶ , 𑀢𑁂 𑀫𑁂 𑀧𑀺𑀬𑀲𑀸𑀫𑀺𑀓𑀁 𑀦 𑀭𑀓𑁆𑀔𑀦𑁆𑀢𑀻’’𑀢𑀺 𑀤𑁂𑀯𑀼𑀚𑁆𑀛𑀸𑀦𑀓𑀫𑁆𑀫𑀁 𑀅𑀓𑀸𑀲𑀺. 𑀢𑀲𑁆𑀲𑀸 𑀲𑁄𑀓𑀯𑁂𑀕𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀯𑁂𑀕𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀓𑀼𑀡𑁆𑀟𑀺𑀓𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀆𑀲𑀺𑀜𑁆𑀘𑀺. 𑀢𑀸𑀯𑀤𑁂𑀯 𑀯𑀺𑀲𑀁 𑀅𑀦𑁆𑀢𑀭𑀥𑀸𑀬𑀺, 𑀯𑀡𑁄 𑀭𑀼𑀳𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀤𑁆𑀥𑁄𑀢𑀺𑀧𑀺 𑀦 𑀧𑀜𑁆𑀜𑀸𑀬𑀺. 𑀫𑀳𑀸𑀲𑀢𑁆𑀢𑁄 𑀲𑀼𑀔𑀺𑀢𑁄 𑀉𑀝𑁆𑀞𑀸𑀲𑀺. 𑀘𑀦𑁆𑀤𑀸 𑀧𑀺𑀬𑀲𑀸𑀫𑀺𑀓𑀁 𑀅𑀭𑁄𑀕𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀲𑀓𑁆𑀓𑀲𑁆𑀲 𑀧𑀸𑀤𑁂 𑀯𑀦𑁆𑀤𑀦𑁆𑀢𑀻 𑀅𑀦𑀦𑁆𑀢𑀭𑀕𑀸𑀣𑀫𑀸𑀳 𑁋

𑁪𑁨.

‘‘𑀯𑀦𑁆𑀤𑁂 𑀢𑁂 𑀅𑀬𑀺𑀭𑀩𑁆𑀭𑀳𑁆𑀫𑁂, 𑀬𑁄 𑀫𑁂 𑀇𑀘𑁆𑀙𑀺𑀢𑀁 𑀧𑀢𑀺𑀁 𑀯𑀭𑀸𑀓𑀺𑀬𑀸;

𑀅𑀫𑀢𑁂𑀦 𑀅𑀪𑀺𑀲𑀺𑀜𑁆𑀘𑀺, 𑀲𑀫𑀸𑀕𑀢𑀸𑀲𑁆𑀫𑀺 𑀧𑀺𑀬𑀢𑀫𑁂𑀦𑀸’’𑀢𑀺.

𑀢𑀢𑁆𑀣 𑀅𑀫𑀢𑁂𑀦𑀸𑀢𑀺 𑀉𑀤𑀓𑀁 ‘‘𑀅𑀫𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀫𑀸𑀳. 𑀧𑀺𑀬𑀢𑀫𑁂𑀦𑀸𑀢𑀺 𑀧𑀺𑀬𑀢𑀭𑁂𑀦, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀲𑀓𑁆𑀓𑁄 𑀢𑁂𑀲𑀁 𑀑𑀯𑀸𑀤𑀫𑀤𑀸𑀲𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀘𑀦𑁆𑀤𑀧𑀩𑁆𑀩𑀢𑀢𑁄 𑀑𑀭𑀼𑀬𑁆𑀳 𑀫𑀦𑀼𑀲𑁆𑀲𑀧𑀣𑀁 𑀫𑀸 𑀕𑀫𑀺𑀢𑁆𑀣, 𑀇𑀥𑁂𑀯 𑀯𑀲𑀣𑀸’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑁂 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 ¶ 𑀕𑀢𑁄. 𑀘𑀦𑁆𑀤𑀸𑀧𑀺 ‘‘𑀓𑀺𑀁 𑀦𑁄 𑀲𑀸𑀫𑀺 𑀇𑀫𑀺𑀦𑀸 𑀧𑀭𑀺𑀧𑀦𑁆𑀣𑀝𑁆𑀞𑀸𑀦𑁂𑀦, 𑀏𑀳𑀺 𑀘𑀦𑁆𑀤𑀧𑀩𑁆𑀩𑀢𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀯𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁪𑁩.

‘‘𑀯𑀺𑀘𑀭𑀸𑀫 𑀤𑀸𑀦𑀺 𑀕𑀺𑀭𑀺𑀯𑀦𑀦𑀤𑀺𑀬𑁄, 𑀓𑀼𑀲𑀼𑀫𑀸𑀪𑀺𑀓𑀺𑀡𑁆𑀡𑀲𑁄𑀢𑀸𑀬𑁄;

𑀦𑀸𑀦𑀸𑀤𑀼𑀫𑀯𑀲𑀦𑀸𑀬𑁄, 𑀧𑀺𑀬𑀁𑀯𑀤𑀸 𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺.

𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲𑀸 𑀫𑀬𑀺 𑀅𑀲𑀁𑀳𑀻𑀭𑀘𑀺𑀢𑁆𑀢𑀸 𑀅𑀦𑀜𑁆𑀜𑀦𑁂𑀬𑁆𑀬𑀸 𑀏𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀭𑀸𑀚𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀘𑀦𑁆𑀤𑀸 𑀭𑀸𑀳𑀼𑀮𑀫𑀸𑀢𑀸, 𑀘𑀦𑁆𑀤𑀓𑀺𑀦𑁆𑀦𑀭𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁪𑁮𑁬] 𑁩. 𑀫𑀳𑀸𑀉𑀓𑁆𑀓𑀼𑀲𑀚𑀸𑀢𑀓𑀯𑀡𑁆𑀡𑀦𑀸

𑀉𑀓𑁆𑀓𑀸 𑀘𑀺𑀮𑀸𑀘𑀸 𑀩𑀦𑁆𑀥𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀺𑀢𑁆𑀢𑀩𑀦𑁆𑀥𑀓𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀧𑀭𑀺𑀚𑀺𑀡𑁆𑀡𑀲𑁆𑀲 𑀓𑀼𑀮𑀲𑁆𑀲 ¶ 𑀧𑀼𑀢𑁆𑀢𑁄 𑀲𑀳𑀸𑀬𑀁 𑀧𑁂𑀲𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀓𑀼𑀮𑀥𑀻𑀢𑀭𑀁 𑀯𑀸𑀭𑀸𑀧𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀧𑀦𑀲𑁆𑀲 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑁄 𑀫𑀺𑀢𑁆𑀢𑁄 𑀯𑀸 𑀲𑀳𑀸𑀬𑁄 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀫𑀺𑀢𑁆𑀢𑁂 𑀢𑀸𑀯 𑀩𑀦𑁆𑀥𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀘𑀢𑀽𑀳𑀺 𑀤𑁄𑀯𑀸𑀭𑀺𑀓𑁂𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺, 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀦𑀕𑀭𑀕𑀼𑀢𑁆𑀢𑀺𑀓𑀕𑀡𑀓𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀦𑀸𑀧𑀺 𑀉𑀧𑀭𑀸𑀚𑁂𑀦𑀸𑀧𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺. 𑀢𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺. 𑀢𑀢𑁄 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑀧𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀅𑀓𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀭𑀸𑀚𑀸𑀧𑀺𑀲𑁆𑀲 𑀇𑀲𑁆𑀲𑀭𑀺𑀬𑀫𑀤𑀸𑀲𑀺. 𑀲𑁄 𑀫𑀺𑀢𑁆𑀢𑀩𑀦𑁆𑀥𑀓𑁄𑀬𑁂𑀯𑀸𑀢𑀺 𑀧𑀸𑀓𑀝𑁄 𑀚𑀸𑀢𑁄. 𑀅𑀣𑀲𑁆𑀲 𑀭𑀸𑀚𑀸 𑀫𑀳𑀦𑁆𑀢𑀁 𑀕𑁂𑀳𑀁 𑀤𑀢𑁆𑀯𑀸 𑀆𑀯𑀸𑀳𑀫𑀗𑁆𑀕𑀮𑀁 𑀓𑀸𑀭𑁂𑀲𑀺. 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀫𑀳𑀸𑀚𑀦𑁄 𑀧𑀡𑁆𑀡𑀸𑀓𑀸𑀭𑁂 𑀧𑀳𑀺𑀡𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀭𑀜𑁆𑀜𑀸 𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀉𑀧𑀭𑀸𑀚𑀲𑁆𑀲, 𑀉𑀧𑀭𑀸𑀚𑁂𑀦 𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀲𑁂𑀦𑀸𑀧𑀢𑀺𑀲𑁆𑀲𑀸𑀢𑀺 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 ¶ 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀲𑀢𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀢𑁆𑀣𑀸𑀭𑀸 𑀓𑀣𑀺𑀢𑀁 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀫𑀺𑀢𑁆𑀢𑀩𑀦𑁆𑀥𑀓𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲𑀸 𑀯𑀘𑀦𑀁 𑀓𑀢𑁆𑀯𑀸 𑀲𑀩𑁆𑀩𑁂𑀳𑀺 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀮𑀪𑀺, 𑀢𑀣𑀸𑀕𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀏𑀢𑀁 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀬𑀲𑀁 𑀲𑀫𑁆𑀧𑀢𑁆𑀢𑁄, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀧𑀦𑁂𑀲 𑀏𑀢𑀺𑀲𑁆𑀲𑀸 𑀯𑀘𑀦𑁂𑀦 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀢𑁆𑀯𑀸 𑀧𑀼𑀢𑁆𑀢𑀲𑁄𑀓𑀢𑁄 𑀫𑀼𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑀘𑁆𑀘𑁂 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀬𑀢𑁆𑀣 𑀬𑀢𑁆𑀣 𑀩𑀳𑀼𑀁 𑀫𑀁𑀲𑀁 𑀮𑀪𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀫𑀺𑀕𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑁂 ¶ 𑀧𑁄𑀲𑁂𑀦𑁆𑀢𑀺. 𑀢𑁂𑀲𑀁 𑀕𑀸𑀫𑀢𑁄 𑀅𑀯𑀺𑀤𑀽𑀭𑁂 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀢𑁆𑀣𑀺. 𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑁂 𑀏𑀓𑁄 𑀲𑁂𑀦𑀲𑀓𑀼𑀡𑁄, 𑀧𑀘𑁆𑀙𑀺𑀫𑀧𑀲𑁆𑀲𑁂 𑀏𑀓𑀸 𑀲𑁂𑀦𑀲𑀓𑀼𑀡𑀻, 𑀉𑀢𑁆𑀢𑀭𑀧𑀲𑁆𑀲𑁂 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀧𑀸𑀘𑀻𑀦𑀧𑀲𑁆𑀲𑁂 𑀉𑀓𑁆𑀓𑀼𑀲𑀲𑀓𑀼𑀡𑀭𑀸𑀚𑀸 𑀯𑀲𑀢𑀺. 𑀚𑀸𑀢𑀲𑁆𑀲𑀭𑀫𑀚𑁆𑀛𑁂 𑀧𑀦 𑀉𑀦𑁆𑀦𑀢𑀝𑁆𑀞𑀸𑀦𑁂 𑀓𑀘𑁆𑀙𑀧𑁄 𑀯𑀲𑀢𑀺. 𑀢𑀤𑀸 𑀲𑁂𑀦𑁄 𑀲𑁂𑀦𑀺𑀁 ‘‘𑀪𑀭𑀺𑀬𑀸 𑀫𑁂 𑀳𑁄𑀳𑀻’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀅𑀢𑁆𑀣𑀺 𑀧𑀦 𑀢𑁂 𑀓𑁄𑀘𑀺 𑀫𑀺𑀢𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀤𑁆𑀤𑁂’’𑀢𑀺. 𑀅𑀫𑁆𑀳𑀸𑀓𑀁 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀳𑀭𑀡𑀲𑀫𑀢𑁆𑀣𑀁 𑀫𑀺𑀢𑁆𑀢𑀁 𑀯𑀸 𑀲𑀳𑀸𑀬𑀁 𑀯𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀫𑀺𑀢𑁆𑀢𑁂 𑀢𑀸𑀯 𑀕𑀡𑁆𑀳𑀸𑀳𑀻𑀢𑀺. ‘‘𑀓𑁂𑀳𑀺 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀭𑁄𑀫𑀺 𑀪𑀤𑁆𑀤𑁂’’𑀢𑀺? 𑀧𑀸𑀘𑀻𑀦𑀧𑀲𑁆𑀲𑁂 𑀯𑀲𑀦𑁆𑀢𑁂𑀦 𑀉𑀓𑁆𑀓𑀼𑀲𑀭𑀸𑀚𑁂𑀦, 𑀉𑀢𑁆𑀢𑀭𑀧𑀲𑁆𑀲𑁂 𑀲𑀻𑀳𑁂𑀦, 𑀚𑀸𑀢𑀲𑁆𑀲𑀭𑀫𑀚𑁆𑀛𑁂 𑀓𑀘𑁆𑀙𑀧𑁂𑀦 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀭𑁄𑀳𑀻𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑀤𑀸 𑀢𑁂 𑀉𑀪𑁄𑀧𑀺 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀲𑀭𑁂 𑀏𑀓𑀲𑁆𑀫𑀺𑀁 𑀤𑀻𑀧𑀓𑁂 𑀓𑀤𑀫𑁆𑀩𑀭𑀼𑀓𑁆𑀔𑁄 𑀅𑀢𑁆𑀣𑀺 𑀲𑀫𑀦𑁆𑀢𑀸 𑀉𑀤𑀓𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑀁 𑀓𑀢𑁆𑀯𑀸 𑀧𑀝𑀺𑀯𑀲𑀺𑀁𑀲𑀼.

𑀢𑁂𑀲𑀁 ¶ 𑀅𑀧𑀭𑀪𑀸𑀕𑁂 𑀤𑁆𑀯𑁂 𑀲𑀓𑀼𑀡𑀧𑁄𑀢𑀓𑀸 𑀚𑀸𑀬𑀺𑀁𑀲𑀼. 𑀢𑁂𑀲𑀁 𑀧𑀓𑁆𑀔𑁂𑀲𑀼 𑀅𑀲𑀜𑁆𑀚𑀸𑀢𑁂𑀲𑀼𑀬𑁂𑀯 𑀏𑀓𑀤𑀺𑀯𑀲𑀁 𑀢𑁂 𑀚𑀸𑀦𑀧𑀤𑀸 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀢𑀼𑀘𑁆𑀙𑀳𑀢𑁆𑀣𑁂𑀦 𑀖𑀭𑀁 𑀕𑀦𑁆𑀢𑀼𑀁, 𑀫𑀘𑁆𑀙𑁂 𑀯𑀸 𑀓𑀘𑁆𑀙𑀧𑁂 𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀢𑀁 𑀤𑀻𑀧𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀤𑀫𑁆𑀩𑀲𑁆𑀲 𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀓𑀲𑀸𑀤𑀻𑀳𑀺 𑀔𑀚𑁆𑀚𑀫𑀸𑀦𑀸 𑀢𑁂𑀲𑀁 𑀧𑀮𑀸𑀧𑀦𑀢𑁆𑀣𑀸𑀬 𑀅𑀭𑀡𑀺𑀁 𑀫𑀦𑁆𑀣𑁂𑀢𑁆𑀯𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀥𑀽𑀫𑀁 𑀓𑀭𑀺𑀁𑀲𑀼. 𑀥𑀼𑀫𑁄 𑀉𑀕𑁆𑀕𑀦𑁆𑀢𑁆𑀯𑀸 𑀲𑀓𑀼𑀡𑁂 𑀧𑀳𑀭𑀺, 𑀲𑀓𑀼𑀡𑀧𑁄𑀢𑀓𑀸 𑀯𑀺𑀭𑀯𑀺𑀁𑀲𑀼. 𑀚𑀸𑀦𑀧𑀤𑀸 𑀢𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀪𑁄, 𑀲𑀓𑀼𑀡𑀧𑁄𑀢𑀓𑀸𑀦𑀁 𑀲𑀽𑀬𑀢𑀺 𑀲𑀤𑁆𑀤𑁄, 𑀉𑀝𑁆𑀞𑁂𑀣 𑀉𑀓𑁆𑀓𑀸 𑀩𑀦𑁆𑀥𑀣, 𑀙𑀸𑀢𑀸 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀫, 𑀲𑀓𑀼𑀡𑀫𑀁𑀲𑀁 𑀔𑀸𑀤𑀺𑀢𑁆𑀯𑀸𑀯 𑀲𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀉𑀓𑁆𑀓𑀸 𑀩𑀦𑁆𑀥𑀺𑀁𑀲𑀼. 𑀲𑀓𑀼𑀡𑀺𑀓𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀧𑁄𑀢𑀓𑁂 𑀔𑀸𑀤𑀺𑀢𑀼𑀓𑀸𑀫𑀸, 𑀫𑀬𑀁 𑀏𑀯𑀭𑀽𑀧𑀲𑁆𑀲 𑀪𑀬𑀲𑁆𑀲 𑀳𑀭𑀡𑀢𑁆𑀣𑀸𑀬 𑀫𑀺𑀢𑁆𑀢𑁂 𑀕𑀡𑁆𑀳𑀺𑀫𑁆𑀳, 𑀲𑀸𑀫𑀺𑀓𑀁 𑀉𑀓𑁆𑀓𑀼𑀲𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀲𑀸𑀫𑀺 ¶ , 𑀧𑀼𑀢𑁆𑀢𑀸𑀦𑀁 𑀦𑁄 𑀉𑀧𑁆𑀧𑀦𑁆𑀦𑀪𑀬𑀁 𑀉𑀓𑁆𑀓𑀼𑀲𑀭𑀸𑀚𑀲𑁆𑀲 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁪𑁪.

‘‘𑀉𑀓𑁆𑀓𑀸 𑀘𑀺𑀮𑀸𑀘𑀸 𑀩𑀦𑁆𑀥𑀦𑁆𑀢𑀺 𑀤𑀻𑀧𑁂, 𑀧𑀚𑀸 𑀫𑀫𑀁 𑀔𑀸𑀤𑀺𑀢𑀼𑀁 𑀧𑀢𑁆𑀣𑀬𑀦𑁆𑀢𑀺;

𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀯𑀤𑁂𑀳𑀺 𑀲𑁂𑀦𑀓, 𑀆𑀘𑀺𑀓𑁆𑀔 𑀜𑀸𑀢𑀺𑀩𑁆𑀬𑀲𑀦𑀁 𑀤𑀺𑀚𑀸𑀦’’𑀦𑁆𑀢𑀺.

𑀢𑀢𑁆𑀣 𑀘𑀺𑀮𑀸𑀘𑀸𑀢𑀺 𑀚𑀸𑀦𑀧𑀤𑀸. 𑀤𑀻𑀧𑁂𑀢𑀺 𑀤𑀻𑀧𑀓𑀫𑁆𑀳𑀺. 𑀧𑀚𑀸 𑀫𑀫𑀦𑁆𑀢𑀺 𑀫𑀫 𑀧𑀼𑀢𑁆𑀢𑀓𑁂. 𑀲𑁂𑀦𑀓𑀸𑀢𑀺 𑀲𑁂𑀦𑀓𑀲𑀓𑀼𑀡𑀁 ¶ 𑀦𑀸𑀫𑁂𑀦𑀸𑀮𑀧𑀢𑀺. 𑀜𑀸𑀢𑀺𑀩𑁆𑀬𑀲𑀦𑀦𑁆𑀢𑀺 𑀧𑀼𑀢𑁆𑀢𑀸𑀦𑀁 𑀩𑁆𑀬𑀲𑀦𑀁. 𑀤𑀺𑀚𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀜𑀸𑀢𑀻𑀦𑀁 𑀤𑀺𑀚𑀸𑀦𑀁 𑀇𑀤𑀁 𑀩𑁆𑀬𑀲𑀦𑀁 𑀉𑀓𑁆𑀓𑀼𑀲𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀘𑀺𑀓𑁆𑀔𑀸𑀳𑀻𑀢𑀺 𑀯𑀤𑀢𑀺.

𑀲𑁄 𑀯𑁂𑀕𑁂𑀦 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀓𑀢𑁄𑀓𑀸𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀆𑀕𑀢𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁫.

‘‘𑀤𑀺𑀚𑁄 𑀤𑀺𑀚𑀸𑀦𑀁 𑀧𑀯𑀭𑁄𑀲𑀺 𑀧𑀓𑁆𑀔𑀺𑀫, 𑀉𑀓𑁆𑀓𑀼𑀲𑀭𑀸𑀚 𑀲𑀭𑀡𑀁 𑀢𑀁 𑀉𑀧𑁂𑀫;

𑀧𑀚𑀸 𑀫𑀫𑀁 𑀔𑀸𑀤𑀺𑀢𑀼𑀁 𑀧𑀢𑁆𑀣𑀬𑀦𑁆𑀢𑀺, 𑀮𑀼𑀤𑁆𑀤𑀸 𑀘𑀺𑀮𑀸𑀘𑀸 𑀪𑀯 𑀫𑁂 𑀲𑀼𑀔𑀸𑀬𑀸’’𑀢𑀺.

𑀢𑀢𑁆𑀣 𑀤𑀺𑀚𑁄𑀢𑀺 𑀢𑁆𑀯𑀁 𑀤𑀺𑀚𑁄 𑀘𑁂𑀯 𑀤𑀺𑀚𑀸𑀦𑀁 𑀧𑀯𑀭𑁄 𑀘.

𑀉𑀓𑁆𑀓𑀼𑀲𑀭𑀸𑀚𑀸 ¶ ‘‘𑀲𑁂𑀦𑀓 𑀫𑀸 𑀪𑀸𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁪𑁬.

‘‘𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀓𑀸𑀮𑁂 𑀅𑀓𑀸𑀮𑁂 𑀲𑀼𑀔𑀫𑁂𑀲𑀫𑀸𑀦𑀸;

𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀭𑁄𑀢𑀺 𑀓𑀺𑀘𑁆𑀘’’𑀦𑁆𑀢𑀺.

𑀢𑀢𑁆𑀣 𑀓𑀸𑀮𑁂 𑀅𑀓𑀸𑀮𑁂𑀢𑀺 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘. 𑀅𑀭𑀺𑀬𑁄𑀢𑀺 𑀇𑀥 𑀆𑀘𑀸𑀭𑀅𑀭𑀺𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀲𑁆𑀲 𑀓𑀺𑀘𑁆𑀘𑀁 𑀓𑀭𑁄𑀢𑁂𑀯, 𑀓𑀺𑀫𑁂𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀯𑀤𑀢𑀺.

𑀅𑀣 ¶ 𑀦𑀁 𑀧𑀼𑀘𑁆𑀙𑀺 ‘‘𑀓𑀺𑀁, 𑀲𑀫𑁆𑀫, 𑀭𑀼𑀓𑁆𑀔𑀁 𑀅𑀪𑀺𑀭𑀼𑀴𑁆𑀳𑀸 𑀘𑀺𑀮𑀸𑀘𑀸’’𑀢𑀺? 𑀦 𑀢𑀸𑀯 𑀅𑀪𑀺𑀭𑀼𑀴𑁆𑀳𑀸, 𑀉𑀓𑁆𑀓𑀸𑀬𑁂𑀯 𑀩𑀦𑁆𑀥𑀦𑁆𑀢𑀻𑀢𑀺. 𑀢𑁂𑀦 𑀳𑀺 𑀢𑁆𑀯𑀁 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀫𑀫 𑀲𑀳𑀸𑀬𑀺𑀓𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀫𑀫𑀸𑀕𑀫𑀦𑀪𑀸𑀯𑀁 𑀆𑀘𑀺𑀓𑁆𑀔𑀸𑀳𑀻𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀉𑀓𑁆𑀓𑀼𑀲𑀭𑀸𑀚𑀸𑀧𑀺 𑀕𑀦𑁆𑀢𑁆𑀯𑀸 𑀓𑀤𑀫𑁆𑀩𑀲𑁆𑀲 𑀅𑀯𑀺𑀤𑀽𑀭𑁂 𑀘𑀺𑀮𑀸𑀘𑀸𑀦𑀁 𑀅𑀪𑀺𑀭𑀼𑀳𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀕𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀲𑁆𑀲 𑀘𑀺𑀮𑀸𑀘𑀲𑁆𑀲 𑀅𑀪𑀺𑀭𑀼𑀳𑀦𑀓𑀸𑀮𑁂 𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑀲𑁆𑀲 𑀅𑀯𑀺𑀤𑀽𑀭𑀁 𑀅𑀪𑀺𑀭𑀼𑀴𑁆𑀳𑁂 𑀲𑀭𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀓𑁆𑀔𑁂𑀳𑀺 𑀘 𑀫𑀼𑀔𑁂𑀦 𑀘 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀉𑀓𑁆𑀓𑀸𑀬 𑀉𑀧𑀭𑀺 𑀆𑀲𑀺𑀜𑁆𑀘𑀺, 𑀲𑀸 𑀦𑀺𑀩𑁆𑀩𑀸𑀬𑀺. 𑀘𑀺𑀮𑀸𑀘𑀸 ‘‘𑀇𑀫𑀜𑁆𑀘 𑀲𑁂𑀦𑀓𑀲𑀓𑀼𑀡𑀧𑁄𑀢𑀓𑁂 𑀘𑀲𑁆𑀲 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀑𑀢𑀭𑀺𑀢𑁆𑀯𑀸 𑀧𑀼𑀦 𑀉𑀓𑁆𑀓𑀁 𑀚𑀸𑀮𑀸𑀧𑁂𑀢𑁆𑀯𑀸 𑀅𑀪𑀺𑀭𑀼𑀳𑀺𑀁𑀲𑀼. 𑀧𑀼𑀦 𑀲𑁄 𑀉𑀓𑁆𑀓𑀁 𑀯𑀺𑀚𑁆𑀛𑀸𑀧𑁂𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀩𑀤𑁆𑀥𑀁 𑀩𑀤𑁆𑀥𑀁 𑀯𑀺𑀚𑁆𑀛𑀸𑀧𑁂𑀦𑁆𑀢𑀲𑁆𑀲𑁂𑀯𑀲𑁆𑀲 𑀅𑀟𑁆𑀠𑀭𑀢𑁆𑀢𑁄 𑀚𑀸𑀢𑁄. 𑀲𑁄 𑀅𑀢𑀺𑀯𑀺𑀬 𑀓𑀺𑀮𑀫𑀺, 𑀳𑁂𑀝𑁆𑀞𑀸𑀉𑀤𑀭𑁂 𑀓𑀺𑀮𑁄𑀫𑀓𑀁 𑀢𑀦𑀼𑀢𑀁 𑀕𑀢𑀁, 𑀅𑀓𑁆𑀔𑀻𑀦𑀺 𑀭𑀢𑁆𑀢𑀸𑀦𑀺 𑀚𑀸𑀢𑀸𑀦𑀺. 𑀢𑀁 𑀤𑀺𑀲𑁆𑀯𑀸 𑀲𑀓𑀼𑀡𑀻 𑀲𑀸𑀫𑀺𑀓𑀁 𑀆𑀳 𑁋 ‘‘𑀲𑀸𑀫𑀺, 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑁄 ¶ 𑀉𑀓𑁆𑀓𑀼𑀲𑀭𑀸𑀚𑀸, 𑀏𑀢𑀲𑁆𑀲 𑀣𑁄𑀓𑀁 𑀯𑀺𑀲𑁆𑀲𑀫𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀓𑀘𑁆𑀙𑀧𑀭𑀸𑀚𑀲𑁆𑀲 𑀓𑀣𑁂𑀳𑀻’’𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀓𑁆𑀓𑀼𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁪𑁭.

‘‘𑀬𑀁 𑀳𑁄𑀢𑀺 𑀓𑀺𑀘𑁆𑀘𑀁 𑀅𑀦𑀼𑀓𑀫𑁆𑀧𑀓𑁂𑀦, 𑀅𑀭𑀺𑀬𑀲𑁆𑀲 𑀅𑀭𑀺𑀬𑁂𑀦 𑀓𑀢𑀁 𑀢𑀬𑀻𑀤𑀁;

𑀅𑀢𑁆𑀢𑀸𑀦𑀼𑀭𑀓𑁆𑀔𑀻 𑀪𑀯 𑀫𑀸 𑀅𑀟𑀬𑁆𑀳𑀺, 𑀮𑀘𑁆𑀙𑀸𑀫 𑀧𑀼𑀢𑁆𑀢𑁂 𑀢𑀬𑀺 𑀚𑀻𑀯𑀫𑀸𑀦𑁂’’𑀢𑀺.

𑀢𑀢𑁆𑀣 𑀢𑀬𑀻𑀤𑀦𑁆𑀢𑀺 𑀢𑀬𑀸 𑀇𑀤𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀲𑁄 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁪𑁮.

‘‘𑀢𑀯𑁂𑀯 𑀭𑀓𑁆𑀔𑀸𑀯𑀭𑀡𑀁 𑀓𑀭𑁄𑀦𑁆𑀢𑁄, 𑀲𑀭𑀻𑀭𑀪𑁂𑀤𑀸𑀧𑀺 𑀦 𑀲𑀦𑁆𑀢𑀲𑀸𑀫𑀺;

𑀓𑀭𑁄𑀦𑁆𑀢𑀺 𑀳𑁂𑀓𑁂 𑀲𑀔𑀺𑀦𑀁 𑀲𑀔𑀸𑀭𑁄, 𑀧𑀸𑀡𑀁 𑀘𑀚𑀦𑁆𑀢𑀸 𑀲𑀢𑀫𑁂𑀲 𑀥𑀫𑁆𑀫𑁄’’𑀢𑀺.

𑀙𑀝𑁆𑀞𑀁 ¶ 𑀧𑀦 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀕𑀼𑀡𑀁 𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋

𑁪𑁯.

‘‘𑀲𑀼𑀤𑀼𑀓𑁆𑀓𑀭𑀁 𑀓𑀫𑁆𑀫𑀫𑀓𑀸𑀲𑀺, 𑀅𑀡𑁆𑀟𑀚𑀸𑀬𑀁 𑀯𑀺𑀳𑀗𑁆𑀕𑀫𑁄;

𑀅𑀢𑁆𑀣𑀸𑀬 𑀓𑀼𑀭𑀭𑁄 𑀧𑀼𑀢𑁆𑀢𑁂, 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂’’𑀢𑀺.

𑀢𑀢𑁆𑀣 𑀓𑀼𑀭𑀭𑁄𑀢𑀺 𑀉𑀓𑁆𑀓𑀼𑀲𑀭𑀸𑀚𑀸. 𑀧𑀼𑀢𑁆𑀢𑁂𑀢𑀺 𑀲𑁂𑀦𑀓𑀲𑁆𑀲 𑀧𑀼𑀢𑁆𑀢𑁂 𑀭𑀓𑁆𑀔𑀦𑁆𑀢𑁄 𑀢𑁂𑀲𑀁 𑀅𑀢𑁆𑀣𑀸𑀬 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂 𑀬𑀸𑀯 𑀤𑀺𑀬𑀟𑁆𑀠𑀬𑀸𑀫𑀸 𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑁄 𑀤𑀼𑀓𑁆𑀓𑀭𑀁 𑀅𑀓𑀸𑀲𑀺.

𑀲𑁂𑀦𑁄𑀧𑀺 𑀉𑀓𑁆𑀓𑀼𑀲𑀁 ‘‘𑀣𑁄𑀓𑀁 𑀯𑀺𑀲𑁆𑀲𑀫𑀸𑀳𑀺, 𑀲𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀓𑀘𑁆𑀙𑀧𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 ‘‘𑀓𑀺𑀁, 𑀲𑀫𑁆𑀫, 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀏𑀯𑀭𑀽𑀧𑀁 𑀦𑀸𑀫 𑀪𑀬𑀁 𑀉𑀧𑁆𑀧𑀦𑁆𑀦𑀁, 𑀉𑀓𑁆𑀓𑀼𑀲𑀭𑀸𑀚𑀸 𑀧𑀞𑀫𑀬𑀸𑀫𑀢𑁄 𑀧𑀝𑁆𑀞𑀸𑀬 𑀯𑀸𑀬𑀫𑀦𑁆𑀢𑁄 𑀓𑀺𑀮𑀫𑀺, 𑀢𑁂𑀦𑀫𑁆𑀳𑀺 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺 𑀯𑀢𑁆𑀯𑀸 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁫𑁦.

‘‘𑀘𑀼𑀢𑀸𑀧𑀺 𑀳𑁂𑀓𑁂 𑀔𑀮𑀺𑀢𑀸 𑀲𑀓𑀫𑁆𑀫𑀼𑀦𑀸, 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀸𑀬 𑀧𑀢𑀺𑀝𑁆𑀞𑀳𑀦𑁆𑀢𑀺;

𑀧𑀼𑀢𑁆𑀢𑀸 𑀫𑀫𑀝𑁆𑀝𑀸 𑀕𑀢𑀺𑀫𑀸𑀕𑀢𑁄𑀲𑁆𑀫𑀺, 𑀅𑀢𑁆𑀣𑀁 𑀘𑀭𑁂𑀣𑁄 𑀫𑀫 𑀯𑀸𑀭𑀺𑀘𑀭𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀸𑀫𑀺, 𑀏𑀓𑀘𑁆𑀘𑁂 𑀳𑀺 𑀬𑀲𑀢𑁄 𑀯𑀸 𑀥𑀦𑀢𑁄 𑀯𑀸 𑀘𑀼𑀢𑀸𑀧𑀺 𑀲𑀓𑀫𑁆𑀫𑀼𑀦𑀸 𑀔𑀮𑀺𑀢𑀸𑀧𑀺 𑀫𑀺𑀢𑁆𑀢𑀸𑀦𑀁 ¶ 𑀅𑀦𑀼𑀓𑀫𑁆𑀧𑀸𑀬 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀫𑀫 𑀘 𑀧𑀼𑀢𑁆𑀢𑀸 𑀅𑀝𑁆𑀝𑀸 𑀆𑀢𑀼𑀭𑀸, 𑀢𑁂𑀦𑀸𑀳𑀁 𑀢𑀁 𑀕𑀢𑀺𑀁 𑀧𑀝𑀺𑀲𑀭𑀡𑀁 𑀓𑀢𑁆𑀯𑀸 𑀆𑀕𑀢𑁄𑀲𑁆𑀫𑀺, 𑀧𑀼𑀢𑁆𑀢𑀸𑀦𑀁 𑀚𑀻𑀯𑀺𑀢𑀤𑀸𑀦𑀁 𑀤𑀤𑀦𑁆𑀢𑁄 𑀅𑀢𑁆𑀣𑀁 𑀫𑁂 𑀘𑀭𑀸𑀳𑀺 𑀯𑀸𑀭𑀺𑀘𑀭𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀘𑁆𑀙𑀧𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁫𑁧.

‘‘𑀥𑀦𑁂𑀦 𑀥𑀜𑁆𑀜𑁂𑀦 𑀘 𑀅𑀢𑁆𑀢𑀦𑀸 𑀘, 𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀭𑁄𑀢𑀺 𑀓𑀺𑀘𑁆𑀘’’𑀦𑁆𑀢𑀺.

𑀅𑀣𑀲𑁆𑀲 ¶ 𑀧𑀼𑀢𑁆𑀢𑁄 𑀅𑀯𑀺𑀤𑀽𑀭𑁂 𑀦𑀺𑀧𑀦𑁆𑀦𑁄 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀸 𑀫𑁂 𑀧𑀺𑀢𑀸 𑀓𑀺𑀮𑀫𑀢𑀼, 𑀅𑀳𑀁 𑀧𑀺𑀢𑀼 𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁫𑁨.

‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑀸𑀢 𑀢𑀼𑀯𑀁 𑀦𑀺𑀲𑀻𑀤, 𑀧𑀼𑀢𑁆𑀢𑁄 𑀧𑀺𑀢𑀼 𑀘𑀭𑀢𑀺 𑀅𑀢𑁆𑀣𑀘𑀭𑀺𑀬𑀁;

𑀅𑀳𑀁 ¶ 𑀘𑀭𑀺𑀲𑁆𑀲𑀸𑀫𑀺 𑀢𑀯𑁂𑀢𑀫𑀢𑁆𑀣𑀁, 𑀲𑁂𑀦𑀲𑁆𑀲 𑀧𑀼𑀢𑁆𑀢𑁂 𑀧𑀭𑀺𑀢𑀸𑀬𑀫𑀸𑀦𑁄’’𑀢𑀺.

𑀅𑀣 𑀦𑀁 𑀧𑀺𑀢𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁫𑁩.

‘‘𑀅𑀤𑁆𑀥𑀸 𑀳𑀺 𑀢𑀸𑀢 𑀲𑀢𑀫𑁂𑀲 𑀥𑀫𑁆𑀫𑁄, 𑀧𑀼𑀢𑁆𑀢𑁄 𑀧𑀺𑀢𑀼 𑀬𑀁 𑀘𑀭𑁂 𑀅𑀢𑁆𑀣𑀘𑀭𑀺𑀬𑀁;

𑀅𑀧𑁆𑀧𑁂𑀯 𑀫𑀁 𑀤𑀺𑀲𑁆𑀯𑀸𑀦 𑀧𑀯𑀟𑁆𑀠𑀓𑀸𑀬𑀁, 𑀲𑁂𑀦𑀲𑁆𑀲 𑀧𑀼𑀢𑁆𑀢𑀸 𑀦 𑀯𑀺𑀳𑁂𑀞𑀬𑁂𑀬𑁆𑀬𑀼’’𑀦𑁆𑀢𑀺.

𑀢𑀢𑁆𑀣 𑀲𑀢𑀫𑁂𑀲 𑀥𑀫𑁆𑀫𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀏𑀲 𑀥𑀫𑁆𑀫𑁄. 𑀧𑀼𑀢𑁆𑀢𑀸𑀢𑀺 𑀲𑁂𑀦𑀲𑁆𑀲 𑀧𑀼𑀢𑁆𑀢𑁂 𑀘𑀺𑀮𑀸𑀘𑀸 𑀦 𑀳𑁂𑀞𑀬𑁂𑀬𑁆𑀬𑀼𑀦𑁆𑀢𑀺.

𑀏𑀯𑀁 𑀯𑀢𑁆𑀯𑀸 𑀫𑀳𑀸𑀓𑀘𑁆𑀙𑀧𑁄 ‘‘𑀲𑀫𑁆𑀫, 𑀫𑀸 𑀪𑀸𑀬𑀺, 𑀢𑁆𑀯𑀁 𑀧𑀼𑀭𑀢𑁄 𑀕𑀘𑁆𑀙, 𑀇𑀤𑀸𑀦𑀸𑀳𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀉𑀤𑀓𑁂 𑀧𑀢𑀺𑀢𑁆𑀯𑀸 𑀓𑀮𑀮𑀜𑁆𑀘 𑀲𑁂𑀯𑀸𑀮𑀜𑁆𑀘 𑀲𑀁𑀓𑀟𑁆𑀠𑀺𑀢𑁆𑀯𑀸 𑀆𑀤𑀸𑀬 𑀤𑀻𑀧𑀓𑀁 𑀕𑀦𑁆𑀢𑁆𑀯𑀸 𑀅𑀕𑁆𑀕𑀺𑀁 𑀯𑀺𑀚𑁆𑀛𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀘𑀺𑀮𑀸𑀘𑀸 ‘‘𑀓𑀺𑀁 𑀦𑁄 𑀲𑁂𑀦𑀧𑁄𑀢𑀓𑁂𑀳𑀺, 𑀇𑀫𑀁 𑀓𑀸𑀴𑀓𑀘𑁆𑀙𑀧𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫, 𑀅𑀬𑀁 𑀦𑁄 𑀲𑀩𑁆𑀩𑁂𑀲𑀁 𑀧𑀳𑁄𑀲𑁆𑀲𑀢𑀻’’𑀢𑀺 𑀯𑀮𑁆𑀮𑀺𑀬𑁄 𑀉𑀤𑁆𑀥𑀭𑀺𑀢𑁆𑀯𑀸 𑀚𑀺𑀬𑀸 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀣𑀧𑀺𑀮𑁄𑀢𑀺𑀓𑀸𑀧𑀺 𑀫𑁄𑀘𑁂𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀓𑀘𑁆𑀙𑀧𑀁 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀘𑁆𑀙𑀧𑁄 𑀢𑁂 𑀆𑀓𑀟𑁆𑀠𑀦𑁆𑀢𑁄 𑀕𑀦𑁆𑀢𑁆𑀯𑀸 𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀉𑀤𑀓𑁂 𑀧𑀢𑀺. 𑀢𑁂𑀧𑀺 𑀓𑀘𑁆𑀙𑀧𑀮𑁄𑀪𑁂𑀦 𑀲𑀤𑁆𑀥𑀺𑀁𑀬𑁂𑀯 𑀧𑀢𑀺𑀢𑁆𑀯𑀸 𑀉𑀤𑀓𑀧𑀼𑀡𑁆𑀡𑀸𑀬 𑀓𑀼𑀘𑁆𑀙𑀺𑀬𑀸 𑀓𑀺𑀮𑀦𑁆𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀪𑁄 𑀏𑀓𑁂𑀦 𑀦𑁄 𑀉𑀓𑁆𑀓𑀼𑀲𑁂𑀦 𑀬𑀸𑀯 𑀅𑀟𑁆𑀠𑀭𑀢𑁆𑀢𑀸 𑀉𑀓𑁆𑀓𑀸 𑀯𑀺𑀚𑁆𑀛𑀸𑀧𑀺𑀢𑀸, 𑀇𑀤𑀸𑀦𑀺 𑀇𑀫𑀺𑀦𑀸 𑀓𑀘𑁆𑀙𑀧𑁂𑀦 𑀉𑀤𑀓𑁂 𑀧𑀸𑀢𑁂𑀢𑁆𑀯𑀸 𑀉𑀤𑀓𑀁 𑀧𑀸𑀬𑁂𑀢𑁆𑀯𑀸 𑀫𑀳𑁄𑀤𑀭𑀸 ¶ 𑀓𑀢𑀫𑁆𑀳, 𑀧𑀼𑀦 𑀅𑀕𑁆𑀕𑀺𑀁 𑀓𑀭𑀺𑀢𑁆𑀯𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂𑀧𑀺 𑀇𑀫𑁂 𑀲𑁂𑀦𑀓𑀧𑁄𑀢𑀓𑁂 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀲𑀓𑀼𑀡𑀻 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀲𑀸𑀫𑀺, 𑀇𑀫𑁂 𑀬𑀸𑀬 𑀓𑀸𑀬𑀘𑀺 𑀯𑁂𑀮𑀸𑀬 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀓𑁂 𑀔𑀸𑀤𑀺𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀳𑀸𑀬𑀲𑁆𑀲 𑀦𑁄 𑀲𑀻𑀳𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀲𑀻𑀳𑀲𑁆𑀲 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀅𑀯𑁂𑀮𑀸𑀬 𑀆𑀕𑀢𑁄𑀲𑀻’’𑀢𑀺 ¶ 𑀯𑀼𑀢𑁆𑀢𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀏𑀓𑀸𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁫𑁪.

‘‘𑀧𑀲𑀽 𑀫𑀦𑀼𑀲𑁆𑀲𑀸 𑀫𑀺𑀕𑀯𑀻𑀭𑀲𑁂𑀝𑁆𑀞, 𑀪𑀬𑀝𑁆𑀝𑀺𑀢𑀸 𑀲𑁂𑀝𑁆𑀞𑀫𑀼𑀧𑀩𑁆𑀩𑀚𑀦𑁆𑀢𑀺;

𑀧𑀼𑀢𑁆𑀢𑀸 𑀫𑀫𑀝𑁆𑀝𑀸 𑀕𑀢𑀺𑀫𑀸𑀕𑀢𑁄𑀲𑁆𑀫𑀺, 𑀢𑁆𑀯𑀁 𑀦𑁄𑀲𑀺 𑀭𑀸𑀚𑀸 𑀪𑀯 𑀫𑁂 𑀲𑀼𑀔𑀸𑀬𑀸’’𑀢𑀺.

𑀢𑀢𑁆𑀣 𑀧𑀲𑀽𑀢𑀺 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑁂 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀸𑀫𑀺, 𑀫𑀺𑀕𑁂𑀲𑀼 𑀯𑀻𑀭𑀺𑀬𑁂𑀦 𑀲𑁂𑀝𑁆𑀞, 𑀲𑀩𑁆𑀩𑀮𑁄𑀓𑀲𑁆𑀫𑀺𑀜𑁆𑀳𑀺 𑀲𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀪𑀬𑀝𑁆𑀝𑀺𑀢𑀸 𑀳𑀼𑀢𑁆𑀯𑀸 𑀲𑁂𑀝𑁆𑀞𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀫𑀫 𑀘 𑀧𑀼𑀢𑁆𑀢𑀸 𑀅𑀝𑁆𑀝𑀸 𑀆𑀢𑀼𑀭𑀸. 𑀢𑀲𑁆𑀫𑀸𑀳𑀁 𑀢𑀁 𑀕𑀢𑀺𑀁 𑀓𑀢𑁆𑀯𑀸 𑀆𑀕𑀢𑁄𑀫𑁆𑀳𑀺, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀲𑀼𑀔𑀸𑀬 𑀫𑁂 𑀪𑀯𑀸𑀳𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀻𑀳𑁄 𑀕𑀸𑀣𑀫𑀸𑀳 𑁋

𑁫𑁫.

‘‘𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀆𑀬𑀸𑀫𑀺 𑀢𑁂 𑀢𑀁 𑀤𑀺𑀲𑀢𑀁 𑀯𑀥𑀸𑀬;

𑀓𑀣𑀜𑁆𑀳𑀺 𑀯𑀺𑀜𑁆𑀜𑀽 𑀧𑀳𑀼 𑀲𑀫𑁆𑀧𑀚𑀸𑀦𑁄, 𑀦 𑀯𑀸𑀬𑀫𑁂 𑀅𑀢𑁆𑀢𑀚𑀦𑀲𑁆𑀲 𑀕𑀼𑀢𑁆𑀢𑀺𑀬𑀸’’𑀢𑀺.

𑀢𑀢𑁆𑀣 𑀢𑀁 𑀤𑀺𑀲𑀢𑀦𑁆𑀢𑀺 𑀢𑀁 𑀤𑀺𑀲𑀲𑀫𑀽𑀳𑀁, 𑀢𑀁 𑀢𑀯 𑀧𑀘𑁆𑀘𑀢𑁆𑀣𑀺𑀓𑀕𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀽𑀢𑀺 𑀅𑀫𑀺𑀢𑁆𑀢𑁂 𑀳𑀦𑁆𑀢𑀼𑀁 𑀲𑀫𑀢𑁆𑀣𑁄. 𑀲𑀫𑁆𑀧𑀚𑀸𑀦𑁄𑀢𑀺 𑀫𑀺𑀢𑁆𑀢𑀲𑁆𑀲 𑀪𑀬𑀼𑀧𑁆𑀧𑀢𑁆𑀢𑀺𑀁 𑀚𑀸𑀦𑀦𑁆𑀢𑁄. 𑀅𑀢𑁆𑀢𑀚𑀦𑀲𑁆𑀲𑀸𑀢𑀺 𑀅𑀢𑁆𑀢𑀲𑀫𑀲𑁆𑀲 𑀅𑀗𑁆𑀕𑀲𑀫𑀸𑀦𑀲𑁆𑀲 𑀚𑀦𑀲𑁆𑀲, 𑀫𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀕𑀘𑁆𑀙 𑀢𑁆𑀯𑀁 𑀧𑀼𑀢𑁆𑀢𑁂 𑀲𑀫𑀲𑁆𑀲𑀸𑀲𑁂𑀳𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀡𑀺𑀯𑀡𑁆𑀡𑀁 𑀉𑀤𑀓𑀁 𑀫𑀤𑁆𑀤𑀫𑀸𑀦𑁄 𑀧𑀸𑀬𑀸𑀲𑀺. 𑀘𑀺𑀮𑀸𑀘𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀭𑀭𑁂𑀦 𑀢𑀸𑀯 𑀅𑀫𑁆𑀳𑀸𑀓𑀁 𑀉𑀓𑁆𑀓𑀸 𑀯𑀺𑀚𑁆𑀛𑀸𑀧𑀺𑀢𑀸, 𑀢𑀣𑀸 𑀓𑀘𑁆𑀙𑀧𑁂𑀦 𑀅𑀫𑁆𑀳𑁂 𑀦𑀺𑀯𑀢𑁆𑀣𑀧𑀺𑀮𑁄𑀢𑀺𑀓𑀸𑀦𑀫𑁆𑀧𑀺 𑀅𑀲𑁆𑀲𑀸𑀫𑀺𑀓𑀸 𑀓𑀢𑀸, 𑀇𑀤𑀸𑀦𑀺 𑀧𑀦 𑀦𑀝𑁆𑀞𑀫𑁆𑀳𑀸, 𑀲𑀻𑀳𑁄 𑀦𑁄 𑀚𑀻𑀯𑀺𑀢𑀓𑁆𑀔𑀬𑀫𑁂𑀯 𑀧𑀸𑀧𑁂𑀲𑁆𑀲𑀢𑀻’’𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀺𑀁𑀲𑀼. 𑀲𑀻𑀳𑁄 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦 𑀓𑀺𑀜𑁆𑀘𑀺 𑀅𑀤𑁆𑀤𑀲. 𑀅𑀣 𑀦𑀁 𑀓𑀼𑀭𑀭𑁄 ¶ 𑀘 𑀓𑀘𑁆𑀙𑀧𑁄 𑀘 𑀲𑁂𑀦𑁄 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀁𑀲𑀼. 𑀲𑁄 𑀢𑁂𑀲𑀁 𑀫𑀺𑀢𑁆𑀢𑀸𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀺𑀢𑁆𑀢𑀥𑀫𑁆𑀫𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀢𑁂𑀧𑀺 𑀲𑀓𑀞𑀸𑀦𑀸𑀦𑀺 𑀕𑀢𑀸. 𑀲𑁂𑀦𑀲𑀓𑀼𑀡𑀻 ¶ ¶ 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀅𑀫𑁆𑀳𑁂𑀳𑀺 𑀤𑀸𑀭𑀓𑀸 𑀮𑀤𑁆𑀥𑀸’’𑀢𑀺 𑀲𑀼𑀔𑀦𑀺𑀲𑀺𑀦𑁆𑀦𑀲𑀫𑀬𑁂 𑀲𑁂𑀦𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀫𑀺𑀢𑁆𑀢𑀥𑀫𑁆𑀫𑀁 𑀧𑀓𑀸𑀲𑀫𑀸𑀦𑀸 𑀙 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁬.

‘‘𑀫𑀺𑀢𑁆𑀢𑀜𑁆𑀘 𑀓𑀬𑀺𑀭𑀸𑀣 𑀲𑀼𑀳𑀤𑀬𑀜𑁆𑀘, 𑀅𑀬𑀺𑀭𑀜𑁆𑀘 𑀓𑀬𑀺𑀭𑀸𑀣 𑀲𑀼𑀔𑀸𑀕𑀫𑀸𑀬;

𑀦𑀺𑀯𑀢𑁆𑀣𑀓𑁄𑀘𑁄𑀯 𑀲𑀭𑁂𑀪𑀺𑀳𑀦𑁆𑀢𑁆𑀯𑀸, 𑀫𑁄𑀤𑀸𑀫 𑀧𑀼𑀢𑁆𑀢𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸.

𑁫𑁭.

‘‘𑀲𑀓𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑁂𑀦, 𑀲𑀳𑀸𑀬𑀲𑁆𑀲𑀸𑀧𑀮𑀸𑀬𑀺𑀦𑁄;

𑀓𑀽𑀚𑀦𑁆𑀢𑀫𑀼𑀧𑀓𑀽𑀚𑀦𑁆𑀢𑀺, 𑀮𑁄𑀫𑀲𑀸 𑀳𑀤𑀬𑀗𑁆𑀕𑀫𑀁.

𑁫𑁮.

‘‘𑀫𑀺𑀢𑁆𑀢𑀁 𑀲𑀳𑀸𑀬𑀁 𑀅𑀥𑀺𑀕𑀫𑁆𑀫 𑀧𑀡𑁆𑀟𑀺𑀢𑁄, 𑀲𑁄 𑀪𑀼𑀜𑁆𑀚𑀢𑀻 𑀧𑀼𑀢𑁆𑀢 𑀧𑀲𑀼𑀁 𑀥𑀦𑀁 𑀯𑀸;

𑀅𑀳𑀜𑁆𑀘 𑀧𑀼𑀢𑁆𑀢𑀸 𑀘 𑀧𑀢𑀻 𑀘 𑀫𑀬𑁆𑀳𑀁, 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀸𑀬 𑀲𑀫𑀗𑁆𑀕𑀺𑀪𑀽𑀢𑀸.

𑁫𑁯.

‘‘𑀭𑀸𑀚𑀯𑀢𑀸 𑀲𑀽𑀭𑀯𑀢𑀸 𑀘 𑀅𑀢𑁆𑀣𑁄, 𑀲𑀫𑁆𑀧𑀦𑁆𑀦𑀲𑀔𑀺𑀲𑁆𑀲 𑀪𑀯𑀦𑁆𑀢𑀺 𑀳𑁂𑀢𑁂;

𑀲𑁄 𑀫𑀺𑀢𑁆𑀢𑀯𑀸 𑀬𑀲𑀯𑀸 𑀉𑀕𑁆𑀕𑀢𑀢𑁆𑀢𑁄, 𑀅𑀲𑁆𑀫𑀺𑀁𑀥𑀮𑁄𑀓𑁂 𑀫𑁄𑀤𑀢𑀺 𑀓𑀸𑀫𑀓𑀸𑀫𑀻.

𑁬𑁦.

‘‘𑀓𑀭𑀡𑀻𑀬𑀸𑀦𑀺 𑀫𑀺𑀢𑁆𑀢𑀸𑀦𑀺, 𑀤𑀮𑀺𑀤𑁆𑀤𑁂𑀦𑀸𑀧𑀺 𑀲𑁂𑀦𑀓;

𑀧𑀲𑁆𑀲 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀸𑀬, 𑀲𑀫𑀕𑁆𑀕𑀫𑁆𑀳𑀸 𑀲𑀜𑀸𑀢𑀓𑁂.

𑁬𑁧.

‘‘𑀲𑀽𑀭𑁂𑀦 𑀩𑀮𑀯𑀦𑁆𑀢𑁂𑀦, 𑀬𑁄 𑀫𑀺𑀢𑁆𑀢𑁂 𑀓𑀼𑀭𑀼𑀢𑁂 𑀤𑀺𑀚𑁄;

𑀏𑀯𑀁 𑀲𑁄 𑀲𑀼𑀔𑀺𑀢𑁄 𑀳𑁄𑀢𑀺, 𑀬𑀣𑀸𑀳𑀁 𑀢𑁆𑀯𑀜𑁆𑀘 𑀲𑁂𑀦𑀓𑀸’’𑀢𑀺.

𑀢𑀢𑁆𑀣 𑀫𑀺𑀢𑁆𑀢𑀜𑁆𑀘𑀸𑀢𑀺 𑀬𑀁𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀫𑀺𑀢𑁆𑀢𑀜𑁆𑀘 𑀲𑀼𑀳𑀤𑀬𑀜𑁆𑀘 𑀲𑀼𑀳𑀤𑀬𑀲𑀳𑀸𑀬𑀜𑁆𑀘 𑀲𑀸𑀫𑀺𑀓𑀲𑀗𑁆𑀔𑀸𑀢𑀁 𑀅𑀬𑀺𑀭𑀜𑁆𑀘 𑀓𑀭𑁄𑀣𑁂𑀯. 𑀦𑀺𑀯𑀢𑁆𑀣𑀓𑁄𑀘𑁄𑀯 𑀲𑀭𑁂𑀪𑀺𑀳𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 𑀓𑁄𑀘𑁄𑀢𑀺 𑀓𑀯𑀘𑁄. 𑀬𑀣𑀸 𑀦𑀸𑀫 𑀧𑀝𑀺𑀫𑀼𑀓𑁆𑀓𑀓𑀯𑀘𑁄 𑀲𑀭𑁂 𑀅𑀪𑀺𑀳𑀦𑀢𑀺 𑀦𑀺𑀯𑀸𑀭𑁂𑀢𑀺, 𑀏𑀯𑀁 𑀫𑀬𑀫𑁆𑀧𑀺 𑀫𑀺𑀢𑁆𑀢𑀩𑀮𑁂𑀦 𑀧𑀘𑁆𑀘𑀢𑁆𑀣𑀺𑀓𑁂 𑀅𑀪𑀺𑀳𑀦𑁆𑀢𑁆𑀯𑀸 ¶ 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 ¶ 𑀫𑁄𑀤𑀸𑀫𑀸𑀢𑀺 𑀯𑀤𑀢𑀺. 𑀲𑀓𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑁂𑀦𑀸𑀢𑀺 𑀲𑀓𑀲𑁆𑀲 𑀫𑀺𑀢𑁆𑀢𑀲𑁆𑀲 𑀧𑀭𑀓𑁆𑀓𑀫𑁂𑀦. 𑀲𑀳𑀸𑀬𑀲𑁆𑀲𑀸𑀧𑀮𑀸𑀬𑀺𑀦𑁄𑀢𑀺 𑀲𑀳𑀸𑀬𑀲𑁆𑀲 𑀅𑀧𑀮𑀸𑀬𑀺𑀦𑁄 𑀫𑀺𑀕𑀭𑀸𑀚𑀲𑁆𑀲. 𑀮𑁄𑀫𑀲𑀸𑀢𑀺 𑀧𑀓𑁆𑀔𑀺𑀦𑁄 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀓𑀸 𑀫𑀜𑁆𑀘 𑀢𑀜𑁆𑀘 𑀓𑀽𑀚𑀦𑁆𑀢𑀁 𑀳𑀤𑀬𑀗𑁆𑀕𑀫𑀁 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀉𑀧𑀓𑀽𑀚𑀦𑁆𑀢𑀺. 𑀲𑀫𑀗𑁆𑀕𑀺𑀪𑀽𑀢𑀸𑀢𑀺 𑀏𑀓𑀝𑁆𑀞𑀸𑀦𑁂 𑀞𑀺𑀢𑀸.

𑀭𑀸𑀚𑀯𑀢𑀸 𑀲𑀽𑀭𑀯𑀢𑀸 𑀘 𑀅𑀢𑁆𑀣𑁄𑀢𑀺 𑀬𑀲𑁆𑀲 𑀲𑀻𑀳𑀲𑀤𑀺𑀲𑁄 𑀭𑀸𑀚𑀸 𑀉𑀓𑁆𑀓𑀼𑀲𑀓𑀘𑁆𑀙𑀧𑀲𑀤𑀺𑀲𑀸 𑀘 𑀲𑀽𑀭𑀸 𑀫𑀺𑀢𑁆𑀢𑀸 ¶ 𑀳𑁄𑀦𑁆𑀢𑀺, 𑀢𑁂𑀦 𑀭𑀸𑀚𑀯𑀢𑀸 𑀲𑀽𑀭𑀯𑀢𑀸 𑀘 𑀅𑀢𑁆𑀣𑁄 𑀲𑀓𑁆𑀓𑀸 𑀧𑀸𑀧𑀼𑀡𑀺𑀢𑀼𑀁. 𑀪𑀯𑀦𑁆𑀢𑀺 𑀳𑁂𑀢𑁂𑀢𑀺 𑀬𑁄 𑀘 𑀲𑀫𑁆𑀧𑀦𑁆𑀦𑀲𑀔𑁄 𑀧𑀭𑀺𑀧𑀼𑀡𑁆𑀡𑀫𑀺𑀢𑁆𑀢𑀥𑀫𑁆𑀫𑁄, 𑀢𑀲𑁆𑀲 𑀏𑀢𑁂 𑀲𑀳𑀸𑀬𑀸 𑀪𑀯𑀦𑁆𑀢𑀺. 𑀉𑀕𑁆𑀕𑀢𑀢𑁆𑀢𑁄𑀢𑀺 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀉𑀕𑁆𑀕𑀢𑀲𑀪𑀸𑀯𑁄. 𑀅𑀲𑁆𑀫𑀺𑀁𑀥𑀮𑁄𑀓𑁂𑀢𑀺 𑀇𑀥𑀮𑁄𑀓𑀲𑀗𑁆𑀔𑀸𑀢𑁂 𑀅𑀲𑁆𑀫𑀺𑀁 𑀮𑁄𑀓𑁂 𑀫𑁄𑀤𑀢𑀺. 𑀓𑀸𑀫𑀓𑀸𑀫𑀻𑀢𑀺 𑀲𑀸𑀫𑀺𑀓𑀁 𑀆𑀮𑀧𑀢𑀺. 𑀲𑁄 𑀳𑀺 𑀓𑀸𑀫𑁂 𑀓𑀸𑀫𑀦𑀢𑁄 𑀓𑀸𑀫𑀓𑀸𑀫𑀻 𑀦𑀸𑀫. 𑀲𑀫𑀕𑁆𑀕𑀫𑁆𑀳𑀸𑀢𑀺 𑀲𑀫𑀕𑁆𑀕𑀸 𑀚𑀸𑀢𑀫𑁆𑀳𑀸. 𑀲𑀜𑀸𑀢𑀓𑁂𑀢𑀺 𑀜𑀸𑀢𑀓𑁂𑀳𑀺 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁.

𑀏𑀯𑀁 𑀲𑀸 𑀙𑀳𑀺 𑀕𑀸𑀣𑀸𑀳𑀺 𑀫𑀺𑀢𑁆𑀢𑀥𑀫𑁆𑀫𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀳𑀸𑀬𑀓𑀸 𑀫𑀺𑀢𑁆𑀢𑀥𑀫𑁆𑀫𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀪𑀭𑀺𑀬𑀁 𑀦𑀺𑀲𑁆𑀲𑀸𑀬 𑀲𑀼𑀔𑀧𑁆𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀲𑀼𑀔𑀧𑁆𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑁂𑀦𑁄 𑀘 𑀲𑁂𑀦𑀻 𑀘 𑀚𑀬𑀫𑁆𑀧𑀢𑀺𑀓𑀸 𑀅𑀳𑁂𑀲𑀼𑀁, 𑀧𑀼𑀢𑁆𑀢𑀓𑀘𑁆𑀙𑀧𑁄 𑀭𑀸𑀳𑀼𑀮𑁄, 𑀧𑀺𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀉𑀓𑁆𑀓𑀼𑀲𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀻𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀫𑀳𑀸𑀉𑀓𑁆𑀓𑀼𑀲𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁪𑁮𑁭] 𑁪. 𑀉𑀤𑁆𑀤𑀸𑀮𑀓𑀚𑀸𑀢𑀓𑀯𑀡𑁆𑀡𑀦𑀸

𑀔𑀭𑀸𑀚𑀺𑀦𑀸 𑀚𑀝𑀺𑀮𑀸 𑀧𑀗𑁆𑀓𑀤𑀦𑁆𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀳𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀢𑀺𑀯𑀺𑀥𑀁 𑀓𑀼𑀳𑀓𑀯𑀢𑁆𑀣𑀼𑀁 𑀧𑀽𑀭𑁂𑀲𑀺. 𑀅𑀣𑀲𑁆𑀲 𑀅𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀳𑀦𑀁 𑀦𑀺𑀲𑁆𑀲𑀸𑀬 ¶ 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄. 𑀲𑁄 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀓𑀻𑀴𑀁 𑀕𑀢𑁄 𑀏𑀓𑀁 𑀅𑀪𑀺𑀭𑀽𑀧𑀁 𑀕𑀡𑀺𑀓𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀢𑀁 𑀧𑀝𑀺𑀘𑁆𑀘 𑀕𑀩𑁆𑀪𑀁 𑀧𑀝𑀺𑀮𑀪𑀺. 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀆𑀳 𑁋 ‘‘𑀲𑀸𑀫𑀺, 𑀕𑀩𑁆𑀪𑁄 𑀫𑁂 𑀧𑀢𑀺𑀝𑁆𑀞𑀺𑀢𑁄, 𑀚𑀸𑀢𑀓𑀸𑀮𑁂 𑀦𑀸𑀫𑀁 𑀓𑀭𑁄𑀦𑁆𑀢𑀻 𑀅𑀲𑁆𑀲 𑀓𑀺𑀁 𑀦𑀸𑀫𑀁 𑀓𑀭𑁄𑀫𑀻’’𑀢𑀺? 𑀲𑁄 ‘‘𑀯𑀡𑁆𑀡𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀓𑀼𑀮𑀦𑀸𑀫𑀁 𑀓𑀸𑀢𑀼’’𑀦𑁆𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀅𑀬𑀁 𑀯𑀸𑀢𑀖𑀸𑀢𑀭𑀼𑀓𑁆𑀔𑁄 𑀉𑀤𑁆𑀤𑀸𑀮𑁄 𑀦𑀸𑀫, 𑀇𑀥 𑀧𑀝𑀺𑀮𑀤𑁆𑀥𑀢𑁆𑀢𑀸 ‘𑀉𑀤𑁆𑀤𑀸𑀮𑀓𑁄’𑀢𑀺𑀲𑁆𑀲 𑀦𑀸𑀫𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁 𑀅𑀤𑀸𑀲𑀺. ‘‘𑀲𑀘𑁂 𑀥𑀻𑀢𑀸 𑀳𑁄𑀢𑀺, 𑀇𑀫𑀸𑀬 𑀦𑀁 𑀧𑁄𑀲𑁂𑀬𑁆𑀬𑀸𑀲𑀺, 𑀲𑀘𑁂 𑀧𑀼𑀢𑁆𑀢𑁄, 𑀅𑀣 𑀦𑀁 𑀯𑀬𑀧𑁆𑀧𑀢𑁆𑀢𑀁 𑀫𑀬𑁆𑀳𑀁 𑀤𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑀸 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 ‘‘𑀉𑀤𑁆𑀤𑀸𑀮𑀓𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺.

𑀲𑁄 𑀯𑀬𑀧𑁆𑀧𑀢𑁆𑀢𑁄 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀓𑁄 𑀫𑁂 𑀧𑀺𑀢𑀸’’𑀢𑀺? ‘‘𑀧𑀼𑀭𑁄𑀳𑀺𑀢𑁄 𑀢𑀸𑀢𑀸’’𑀢𑀺. ‘‘𑀬𑀤𑀺 𑀏𑀯𑀁 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀼 𑀳𑀢𑁆𑀣𑀢𑁄 𑀫𑀼𑀤𑁆𑀤𑀺𑀓𑀜𑁆𑀘 𑀆𑀘𑀭𑀺𑀬𑀪𑀸𑀕𑀜𑁆𑀘 𑀕𑀳𑁂𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑀁 𑀢𑀸𑀧𑀲𑀕𑀡𑀁 𑀤𑀺𑀲𑁆𑀯𑀸 ‘‘𑀇𑀫𑁂𑀲𑀁 𑀲𑀦𑁆𑀢𑀺𑀓𑁂 𑀯𑀭𑀲𑀺𑀧𑁆𑀧𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀧𑁆𑀧𑀮𑁄𑀪𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀲𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 ‘‘𑀆𑀘𑀭𑀺𑀬𑀸 𑀫𑀁 𑀢𑀼𑀫𑁆𑀳𑀸𑀓𑀁 𑀚𑀸𑀦𑀦𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀣𑀸’’𑀢𑀺 𑀆𑀳. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀸𑀦𑀦𑀦𑀺𑀬𑀸𑀫𑁂𑀦𑁂𑀯 𑀢𑀁 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀧𑀜𑁆𑀘𑀦𑁆𑀦𑀁 𑀢𑀸𑀧𑀲𑀲𑀢𑀸𑀦𑀁 𑀏𑀓𑁄𑀧𑀺 𑀢𑁂𑀦 𑀅𑀢𑀺𑀭𑁂𑀓𑀧𑀜𑁆𑀜𑁄 𑀦𑀸𑀳𑁄𑀲𑀺, 𑀲𑁆𑀯𑁂𑀯 𑀢𑁂𑀲𑀁 𑀧𑀜𑁆𑀜𑀸𑀬 𑀅𑀕𑁆𑀕𑁄. 𑀅𑀣𑀲𑁆𑀲 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀘𑀭𑀺𑀬𑀝𑁆𑀞𑀸𑀦𑀁 𑀅𑀤𑀁𑀲𑀼. 𑀅𑀣 𑀦𑁂 𑀲𑁄 𑀆𑀳 𑁋 ‘‘𑀫𑀸𑀭𑀺𑀲𑀸, 𑀢𑀼𑀫𑁆𑀳𑁂 𑀦𑀺𑀘𑁆𑀘𑀁 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀅𑀭𑀜𑁆𑀜𑁂𑀯 𑀯𑀲𑀣, 𑀫𑀦𑀼𑀲𑁆𑀲𑀧𑀣𑀁 𑀓𑀲𑁆𑀫𑀸 𑀦 𑀕𑀘𑁆𑀙𑀣𑀸’’𑀢𑀺? ‘‘𑀫𑀸𑀭𑀺𑀲, 𑀫𑀦𑀼𑀲𑁆𑀲𑀸 𑀦𑀸𑀫 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀸𑀭𑀸𑀧𑁂𑀦𑁆𑀢𑀺, 𑀥𑀫𑁆𑀫𑀺𑀁 𑀓𑀣𑀁 𑀪𑀡𑀸𑀧𑁂𑀦𑁆𑀢𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀫𑀬𑀁 𑀢𑁂𑀦 𑀪𑀬𑁂𑀦 𑀢𑀢𑁆𑀣 𑀦 𑀕𑀘𑁆𑀙𑀸𑀫𑀸’’𑀢𑀺. ‘‘𑀫𑀸𑀭𑀺𑀲𑀸, 𑀲𑀘𑁂𑀧𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀫𑀦𑀁 𑀕𑀳𑁂𑀢𑁆𑀯𑀸 𑀓𑀣𑀦𑀁 𑀦𑀸𑀫 𑀫𑀬𑁆𑀳𑀁 𑀪𑀸𑀭𑁄, 𑀢𑀼𑀫𑁆𑀳𑁂 𑀫𑀸 𑀪𑀸𑀬𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 ¶ 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 ¶ 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀕𑀸𑀫𑁂 𑀪𑀺𑀓𑁆𑀔𑀸𑀬 𑀘𑀭𑀺, 𑀫𑀦𑀼𑀲𑁆𑀲𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀢𑀸𑀧𑀲𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼 𑀫𑀦𑀼𑀲𑁆𑀲𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀉𑀤𑁆𑀤𑀸𑀮𑀓𑀢𑀸𑀧𑀲𑁄 𑀤𑀸𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀢𑀺, 𑀫𑀗𑁆𑀕𑀮𑀁 𑀯𑀤𑀢𑀺, 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀫𑀦𑀼𑀲𑁆𑀲𑀸 𑀧𑀲𑀻𑀤𑀺𑀢𑁆𑀯𑀸 𑀩𑀳𑀼𑀧𑀘𑁆𑀘𑀬𑁂 𑀅𑀤𑀁𑀲𑀼. 𑀲𑀓𑀮𑀦𑀕𑀭𑀁 ‘‘𑀧𑀡𑁆𑀟𑀺𑀢𑁄 𑀕𑀡𑀲𑀢𑁆𑀣𑀸 𑀥𑀫𑁆𑀫𑀺𑀓𑀢𑀸𑀧𑀲𑁄 𑀆𑀕𑀢𑁄’’𑀢𑀺 𑀲𑀗𑁆𑀔𑀼𑀪𑀺, 𑀢𑀁 𑀭𑀜𑁆𑀜𑁄𑀧𑀺 𑀓𑀣𑀬𑀺𑀁𑀲𑀼.

𑀭𑀸𑀚𑀸 ‘‘𑀓𑀼𑀳𑀺𑀁 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀬𑁆𑀬𑀸𑀦𑁂’’𑀢𑀺 𑀲𑀼𑀢𑁆𑀯𑀸 ‘‘𑀲𑀸𑀥𑀼 𑀅𑀚𑁆𑀚 𑀢𑁂𑀲𑀁 𑀤𑀲𑁆𑀲𑀦𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀏𑀓𑁄 𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀯𑁄 𑀧𑀲𑁆𑀲𑀺𑀢𑀼𑀁 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀉𑀤𑁆𑀤𑀸𑀮𑀓𑀲𑁆𑀲 𑀓𑀣𑁂𑀲𑀺. 𑀲𑁄𑀧𑀺 𑀇𑀲𑀺𑀕𑀡𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀸𑀭𑀺𑀲𑀸, 𑀭𑀸𑀚𑀸 𑀓𑀺𑀭 𑀆𑀕𑀫𑀺𑀲𑁆𑀲𑀢𑀺, 𑀇𑀲𑁆𑀲𑀭𑁂 𑀦𑀸𑀫 𑀏𑀓𑀤𑀺𑀯𑀲𑀁 𑀆𑀭𑀸𑀥𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀮𑀁 𑀳𑁄𑀢𑀻’’𑀢𑀺. ‘‘𑀓𑀺𑀁 𑀧𑀦 𑀓𑀸𑀢𑀩𑁆𑀩𑀁 𑀆𑀘𑀭𑀺𑀬𑀸’’𑀢𑀺? 𑀲𑁄 𑀏𑀯𑀫𑀸𑀳 𑁋 ‘‘𑀢𑀼𑀫𑁆𑀳𑁂𑀲𑀼 𑀏𑀓𑀘𑁆𑀘𑁂 𑀯𑀕𑁆𑀕𑀼𑀮𑀺𑀯𑀢𑀁 𑀘𑀭𑀦𑁆𑀢𑀼, 𑀏𑀓𑀘𑁆𑀘𑁂 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀼, 𑀏𑀓𑀘𑁆𑀘𑁂 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑀸 𑀪𑀯𑀦𑁆𑀢𑀼, 𑀏𑀓𑀘𑁆𑀘𑁂 𑀧𑀜𑁆𑀘𑀸𑀢𑀧𑀁 𑀢𑀧𑀦𑁆𑀢𑀼, 𑀏𑀓𑀘𑁆𑀘𑁂 𑀉𑀤𑀓𑁄𑀭𑁄𑀳𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀼, 𑀏𑀓𑀘𑁆𑀘𑁂 𑀢𑀢𑁆𑀣 𑀢𑀢𑁆𑀣 𑀫𑀦𑁆𑀢𑁂 𑀲𑀚𑁆𑀛𑀸𑀬𑀦𑁆𑀢𑀽’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀲𑀬𑀁 𑀧𑀦 𑀅𑀝𑁆𑀞 𑀯𑀸 𑀤𑀲 𑀯𑀸 𑀧𑀡𑁆𑀟𑀺𑀢𑀯𑀸𑀤𑀺𑀦𑁄 𑀕𑀳𑁂𑀢𑁆𑀯𑀸 𑀫𑀦𑁄𑀭𑀫𑁂 𑀆𑀥𑀸𑀭𑀓𑁂 𑀭𑀫𑀡𑀻𑀬𑀁 𑀧𑁄𑀢𑁆𑀣𑀓𑀁 ¶ 𑀞𑀧𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀯𑀼𑀢𑁄 𑀲𑀼𑀧𑀜𑁆𑀜𑀢𑁆𑀢𑁂 𑀲𑀸𑀧𑀲𑁆𑀲𑀬𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀧𑀼𑀭𑁄𑀳𑀺𑀢𑀁 𑀆𑀤𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂 𑀫𑀺𑀘𑁆𑀙𑀸𑀢𑀧𑀁 𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀧𑀸𑀬𑀪𑀬𑀫𑁆𑀳𑀸 𑀫𑀼𑀢𑁆𑀢𑀸’’𑀢𑀺 𑀧𑀲𑀻𑀤𑀺𑀢𑁆𑀯𑀸 𑀉𑀤𑁆𑀤𑀸𑀮𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀢𑀼𑀝𑁆𑀞𑀫𑀸𑀦𑀲𑁄 𑀧𑀼𑀭𑁄𑀳𑀺𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁨.

‘‘𑀔𑀭𑀸𑀚𑀺𑀦𑀸 𑀚𑀝𑀺𑀮𑀸 𑀧𑀗𑁆𑀓𑀤𑀦𑁆𑀢𑀸, 𑀤𑀼𑀫𑁆𑀫𑀓𑁆𑀔𑀭𑀽𑀧𑀸 𑀬𑁂 𑀫𑀦𑁆𑀢𑀁 𑀚𑀧𑁆𑀧𑀦𑁆𑀢𑀺;

𑀓𑀘𑁆𑀘𑀺𑀦𑁆𑀦𑀼 𑀢𑁂 𑀫𑀸𑀦𑀼𑀲𑀓𑁂 𑀧𑀬𑁄𑀕𑁂, 𑀇𑀤𑀁 𑀯𑀺𑀤𑀽 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀸’’𑀢𑀺.

𑀢𑀢𑁆𑀣 ¶ 𑀔𑀭𑀸𑀚𑀺𑀦𑀸𑀢𑀺 𑀲𑀔𑀼𑀭𑁂𑀳𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀧𑀗𑁆𑀓𑀤𑀦𑁆𑀢𑀸𑀢𑀺 𑀤𑀦𑁆𑀢𑀓𑀝𑁆𑀞𑀲𑁆𑀲 𑀅𑀔𑀸𑀤𑀦𑁂𑀦 𑀫𑀮𑀕𑁆𑀕𑀳𑀺𑀢𑀤𑀦𑁆𑀢𑀸. 𑀤𑀼𑀫𑁆𑀫𑀓𑁆𑀔𑀭𑀽𑀧𑀸𑀢𑀺 𑀅𑀦𑀜𑁆𑀚𑀺𑀢𑀓𑁆𑀔𑀸 𑀅𑀫𑀡𑁆𑀟𑀺𑀢𑀭𑀽𑀧𑀸 ¶ 𑀮𑀽𑀔𑀲𑀗𑁆𑀖𑀸𑀝𑀺𑀥𑀭𑀸. 𑀫𑀸𑀦𑀼𑀲𑀓𑁂 𑀧𑀬𑁄𑀕𑁂𑀢𑀺 𑀫𑀦𑀼𑀲𑁆𑀲𑁂𑀳𑀺 𑀓𑀢𑁆𑀢𑀩𑁆𑀩𑀯𑀻𑀭𑀺𑀬𑁂. 𑀇𑀤𑀁 𑀯𑀺𑀤𑀽𑀢𑀺 𑀇𑀤𑀁 𑀢𑀧𑀘𑀭𑀡𑀜𑁆𑀘 𑀫𑀦𑁆𑀢𑀲𑀚𑁆𑀛𑀸𑀬𑀦𑀜𑁆𑀘 𑀚𑀸𑀦𑀦𑁆𑀢𑀸. 𑀅𑀧𑀸𑀬𑀸𑀢𑀺 𑀓𑀘𑁆𑀘𑀺 𑀆𑀘𑀭𑀺𑀬, 𑀇𑀫𑁂 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀢𑁆𑀢𑀸𑀢𑀺 𑀧𑀼𑀘𑁆𑀙𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑁄 ‘‘𑀅𑀬𑀁 𑀭𑀸𑀚𑀸 𑀅𑀝𑁆𑀞𑀸𑀦𑁂 𑀧𑀲𑀦𑁆𑀦𑁄, 𑀢𑀼𑀡𑁆𑀳𑀻 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁩.

‘‘𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁂𑀣 𑀭𑀸𑀚, 𑀩𑀳𑀼𑀲𑁆𑀲𑀼𑀢𑁄 𑀘𑁂 𑀦 𑀘𑀭𑁂𑀬𑁆𑀬 𑀥𑀫𑁆𑀫𑀁;

𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸’’𑀢𑀺.

𑀢𑀢𑁆𑀣 𑀩𑀳𑀼𑀲𑁆𑀲𑀼𑀢𑁄 𑀘𑁂𑀢𑀺 𑀲𑀘𑁂 𑀫𑀳𑀸𑀭𑀸𑀚, ‘‘𑀅𑀳𑀁 𑀩𑀳𑀼𑀲𑁆𑀲𑀼𑀢𑁄𑀫𑁆𑀳𑀻’’𑀢𑀺 𑀧𑀕𑀼𑀡𑀯𑁂𑀤𑁄𑀧𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀦 𑀘𑀭𑁂𑀬𑁆𑀬, 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀧𑀸𑀧𑀸𑀦𑁂𑀯 𑀓𑀭𑁂𑀬𑁆𑀬, 𑀢𑀺𑀝𑁆𑀞𑀦𑁆𑀢𑀼 𑀢𑀬𑁄 𑀯𑁂𑀤𑀸, 𑀲𑀳𑀲𑁆𑀲𑀯𑁂𑀤𑁄𑀧𑀺 𑀲𑀫𑀸𑀦𑁄 𑀢𑀁 𑀩𑀸𑀳𑀼𑀲𑀘𑁆𑀘𑀁 𑀧𑀝𑀺𑀘𑁆𑀘 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀘𑀭𑀡𑀁 𑀅𑀧𑁆𑀧𑀢𑁆𑀯𑀸 𑀅𑀧𑀸𑀬𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑁂𑀬𑁆𑀬𑀸𑀢𑀺.

𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀤𑁆𑀤𑀸𑀮𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀭𑀸𑀚𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀇𑀲𑀺𑀕𑀡𑀲𑁆𑀲 𑀧𑀲𑀻𑀤𑀺, 𑀅𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀘𑀭𑀦𑁆𑀢𑀁 𑀕𑁄𑀡𑀁 𑀤𑀡𑁆𑀟𑁂𑀦 𑀧𑀳𑀭𑀦𑁆𑀢𑁄 𑀯𑀺𑀬 𑀯𑀟𑁆𑀠𑀺𑀢𑀪𑀢𑁆𑀢𑁂 𑀓𑀘𑀯𑀭𑀁 𑀔𑀺𑀧𑀦𑁆𑀢𑁄 𑀯𑀺𑀬 𑀓𑀣𑁂𑀲𑀺, 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁬𑁪.

‘‘𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸;

𑀫𑀜𑁆𑀜𑀸𑀫𑀺 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀜𑁆𑀜𑁂𑀯 𑀲𑀘𑁆𑀘’’𑀦𑁆𑀢𑀺.

𑀢𑀢𑁆𑀣 ¶ 𑀅𑀨𑀮𑀸𑀢𑀺 𑀢𑀯 𑀯𑀸𑀤𑁂 𑀯𑁂𑀤𑀸 𑀘 𑀲𑁂𑀲𑀲𑀺𑀧𑁆𑀧𑀸𑀦𑀺 𑀘 𑀅𑀨𑀮𑀸𑀦𑀺 𑀆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀓𑀲𑁆𑀫𑀸 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀲𑀻𑀮𑀲𑀁𑀬𑀫𑁂𑀦 𑀲𑀤𑁆𑀥𑀺𑀁 𑀘𑀭𑀡𑀜𑁆𑀜𑁂𑀯 𑀏𑀓𑀁 𑀲𑀘𑁆𑀘𑀁 𑀆𑀧𑀚𑁆𑀚𑀢𑀻𑀢𑀺.

𑀢𑀢𑁄 ¶ ¶ 𑀧𑀼𑀭𑁄𑀳𑀺𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋

𑁬𑁫.

‘‘𑀦 𑀳𑁂𑀯 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀜𑁆𑀜𑁂𑀯 𑀲𑀘𑁆𑀘𑀁;

𑀓𑀺𑀢𑁆𑀢𑀺𑀜𑁆𑀳𑀺 𑀧𑀧𑁆𑀧𑁄𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂, 𑀲𑀦𑁆𑀢𑀺𑀁 𑀧𑀼𑀡𑀸𑀢𑀺 𑀘𑀭𑀡𑁂𑀦 𑀤𑀦𑁆𑀢𑁄’’𑀢𑀺.

𑀢𑀢𑁆𑀣 𑀦 𑀳𑁂𑀯𑀸𑀢𑀺 𑀦𑀸𑀳𑀁 ‘‘𑀯𑁂𑀤𑀸 𑀅𑀨𑀮𑀸’’𑀢𑀺 𑀯𑀤𑀸𑀫𑀺, 𑀅𑀧𑀺𑀘 𑀔𑁄 𑀧𑀦 𑀲𑀲𑀁𑀬𑀫𑀁 𑀘𑀭𑀡𑀁 𑀲𑀘𑁆𑀘𑀫𑁂𑀯 𑀲𑀪𑀸𑀯𑀪𑀽𑀢𑀁 𑀉𑀢𑁆𑀢𑀫𑀁. 𑀢𑁂𑀦 𑀳𑀺 𑀲𑀓𑁆𑀓𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀁. 𑀲𑀦𑁆𑀢𑀺𑀁 𑀧𑀼𑀡𑀸𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀘𑀭𑀡𑁂𑀦 𑀤𑀦𑁆𑀢𑁄 𑀪𑀬𑀲𑀦𑁆𑀢𑀺𑀓𑀭𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀉𑀤𑁆𑀤𑀸𑀮𑀓𑁄 ‘‘𑀦 𑀲𑀓𑁆𑀓𑀸 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀞𑀸𑀢𑀼𑀁, ‘𑀧𑀼𑀢𑁆𑀢𑁄 𑀢𑀯𑀸𑀳’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀺𑀦𑁂𑀳𑀁 𑀅𑀓𑀭𑁄𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀧𑀼𑀢𑁆𑀢𑀪𑀸𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋

𑁬𑁬.

‘‘𑀪𑀘𑁆𑀘𑀸 𑀫𑀸𑀢𑀸 𑀧𑀺𑀢𑀸 𑀩𑀦𑁆𑀥𑀽, 𑀬𑁂𑀦 𑀚𑀸𑀢𑁄 𑀲𑀬𑁂𑀯 𑀲𑁄;

𑀉𑀤𑁆𑀤𑀸𑀮𑀓𑁄 𑀅𑀳𑀁 𑀪𑁄𑀢𑁄, 𑀲𑁄𑀢𑁆𑀢𑀺𑀬𑀸𑀓𑀼𑀮𑀯𑀁𑀲𑀓𑁄’’𑀢𑀺.

𑀢𑀢𑁆𑀣 𑀪𑀘𑁆𑀘𑀸𑀢𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀲𑁂𑀲𑀩𑀦𑁆𑀥𑀽 𑀘 𑀪𑀭𑀺𑀢𑀩𑁆𑀩𑀸 𑀦𑀸𑀫. 𑀬𑁂𑀦 𑀧𑀦 𑀚𑀸𑀢𑁄, 𑀲𑁄𑀬𑁂𑀯 𑀲𑁄 𑀳𑁄𑀢𑀺. 𑀅𑀢𑁆𑀢𑀸𑀬𑁂𑀯 𑀳𑀺 𑀅𑀢𑁆𑀢𑀦𑁄 𑀚𑀸𑀬𑀢𑀺, 𑀅𑀳𑀜𑁆𑀘 𑀢𑀬𑀸𑀯 𑀉𑀤𑁆𑀤𑀸𑀮𑀓𑀭𑀼𑀓𑁆𑀔𑀫𑀽𑀮𑁂 𑀚𑀦𑀺𑀢𑁄, 𑀢𑀬𑀸 𑀯𑀼𑀢𑁆𑀢𑀫𑁂𑀯 𑀦𑀸𑀫𑀁 𑀓𑀢𑀁, 𑀉𑀤𑁆𑀤𑀸𑀮𑀓𑁄 𑀅𑀳𑀁 𑀪𑁄𑀢𑀺.

𑀲𑁄 ‘‘𑀏𑀓𑀁𑀲𑁂𑀦 𑀢𑁆𑀯𑀁 𑀉𑀤𑁆𑀤𑀸𑀮𑀓𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀫𑀸’’𑀢𑀺 𑀯𑀢𑁆𑀯𑀸 ‘‘𑀫𑀬𑀸 𑀢𑁂 𑀫𑀸𑀢𑀼 𑀲𑀜𑁆𑀜𑀸𑀡𑀁 𑀤𑀺𑀦𑁆𑀦𑀁, 𑀢𑀁 𑀓𑀼𑀳𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀫𑀼𑀤𑁆𑀤𑀺𑀓𑀁 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀫𑀼𑀤𑁆𑀤𑀺𑀓𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀦𑀺𑀘𑁆𑀙𑀬𑁂𑀦 ‘‘𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀧𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋

𑁬𑁭.

‘‘𑀓𑀣𑀁 ¶ 𑀪𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀣𑀁 𑀪𑀯𑀢𑀺 𑀓𑁂𑀯𑀮𑀻;

𑀓𑀣𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀝𑁆𑀞𑁄 𑀓𑀺𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀉𑀤𑁆𑀤𑀸𑀮𑀓𑁄𑀧𑀺 ¶ ¶ 𑀢𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁬𑁮.

‘‘𑀦𑀺𑀭𑀁𑀓𑀢𑁆𑀯𑀸 𑀅𑀕𑁆𑀕𑀺𑀫𑀸𑀤𑀸𑀬 𑀩𑁆𑀭𑀸𑀳𑁆𑀫𑀡𑁄, 𑀆𑀧𑁄 𑀲𑀺𑀜𑁆𑀘𑀁 𑀬𑀚𑀁 𑀉𑀲𑁆𑀲𑁂𑀢𑀺 𑀬𑀽𑀧𑀁;

𑀏𑀯𑀁𑀓𑀭𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀔𑁂𑀫𑀻, 𑀥𑀫𑁆𑀫𑁂 𑀞𑀺𑀢𑀁 𑀢𑁂𑀦 𑀅𑀫𑀸𑀧𑀬𑀺𑀁𑀲𑀽’’𑀢𑀺.

𑀢𑀢𑁆𑀣 𑀦𑀺𑀭𑀁𑀓𑀢𑁆𑀯𑀸 𑀅𑀕𑁆𑀕𑀺𑀫𑀸𑀤𑀸𑀬𑀸𑀢𑀺 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀧𑀭𑀺𑀘𑀭𑀢𑀺. 𑀆𑀧𑁄 𑀲𑀺𑀜𑁆𑀘𑀁 𑀬𑀚𑀁 𑀉𑀲𑁆𑀲𑁂𑀢𑀺 𑀬𑀽𑀧𑀦𑁆𑀢𑀺 𑀅𑀪𑀺𑀲𑁂𑀘𑀦𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀫𑁆𑀫𑀸𑀧𑀸𑀲𑀁 𑀯𑀸 𑀯𑀸𑀚𑀧𑁂𑀬𑁆𑀬𑀁 𑀯𑀸 𑀦𑀺𑀭𑀕𑁆𑀕𑀴𑀁 𑀯𑀸 𑀬𑀚𑀦𑁆𑀢𑁄 𑀲𑀼𑀯𑀡𑁆𑀡𑀬𑀽𑀧𑀁 𑀉𑀲𑁆𑀲𑀸𑀧𑁂𑀢𑀺. 𑀔𑁂𑀫𑀻𑀢𑀺 𑀔𑁂𑀫𑀧𑁆𑀧𑀢𑁆𑀢𑁄. 𑀅𑀫𑀸𑀧𑀬𑀺𑀁𑀲𑀽𑀢𑀺 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀥𑀫𑁆𑀫𑁂 𑀞𑀺𑀢𑀁 𑀓𑀣𑀬𑀺𑀁𑀲𑀼.

𑀢𑀁 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑁄 𑀢𑁂𑀦 𑀓𑀣𑀺𑀢𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀕𑀭𑀳𑀦𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁬𑁯.

‘‘𑀦 𑀲𑀼𑀤𑁆𑀥𑀺 𑀲𑁂𑀘𑀦𑁂𑀦𑀢𑁆𑀣𑀺, 𑀦𑀸𑀧𑀺 𑀓𑁂𑀯𑀮𑀻 𑀩𑁆𑀭𑀸𑀳𑁆𑀫𑀡𑁄;

𑀦 𑀔𑀦𑁆𑀢𑀻 𑀦𑀸𑀧𑀺 𑀲𑁄𑀭𑀘𑁆𑀘𑀁, 𑀦𑀸𑀧𑀺 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀢𑀢𑁆𑀣 𑀲𑁂𑀘𑀦𑁂𑀦𑀸𑀢𑀺 𑀢𑁂𑀦 𑀯𑀼𑀢𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂𑀲𑀼 𑀏𑀓𑀁 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀕𑁆𑀕𑀺𑀧𑀭𑀺𑀘𑀭𑀡𑁂𑀦 𑀯𑀸 𑀉𑀤𑀓𑀲𑁂𑀘𑀦𑁂𑀦 𑀯𑀸 𑀧𑀲𑀼𑀖𑀸𑀢𑀬𑀜𑁆𑀜𑁂𑀦 𑀯𑀸 𑀲𑀼𑀤𑁆𑀥𑀺 𑀦𑀸𑀫 𑀦𑀢𑁆𑀣𑀺, 𑀦𑀸𑀧𑀺 𑀏𑀢𑁆𑀢𑀓𑁂𑀦 𑀩𑁆𑀭𑀸𑀳𑁆𑀫𑀡𑁄 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀦 𑀅𑀥𑀺𑀯𑀸𑀲𑀦𑀔𑀦𑁆𑀢𑀺, 𑀦 𑀲𑀻𑀮𑀲𑁄𑀭𑀘𑁆𑀘𑀁, 𑀦𑀸𑀧𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀸𑀫 𑀳𑁄𑀢𑀻’’𑀢𑀺.

𑀢𑀢𑁄 𑀦𑀁 𑀉𑀤𑁆𑀤𑀸𑀮𑀓𑁄 ‘‘𑀬𑀤𑀺 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀦 𑀳𑁄𑀢𑀺, 𑀅𑀣 𑀓𑀣𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁭𑁦.

‘‘𑀓𑀣𑀁 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀣𑀁 𑀪𑀯𑀢𑀺 𑀓𑁂𑀯𑀮𑀻;

𑀓𑀣𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀝𑁆𑀞𑁄 𑀓𑀺𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀧𑀼𑀭𑁄𑀳𑀺𑀢𑁄𑀧𑀺𑀲𑁆𑀲 ¶ ¶ 𑀓𑀣𑁂𑀦𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁭𑁧.

‘‘𑀅𑀔𑁂𑀢𑁆𑀢𑀩𑀦𑁆𑀥𑀽 𑀅𑀫𑀫𑁄 𑀦𑀺𑀭𑀸𑀲𑁄, 𑀦𑀺𑀮𑁆𑀮𑁄𑀪𑀧𑀸𑀧𑁄 𑀪𑀯𑀮𑁄𑀪𑀔𑀻𑀡𑁄;

𑀏𑀯𑀁𑀓𑀭𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀔𑁂𑀫𑀻, 𑀥𑀫𑁆𑀫𑁂 𑀞𑀺𑀢𑀁 𑀢𑁂𑀦 𑀅𑀫𑀸𑀧𑀬𑀺𑀁𑀲𑀽’’𑀢𑀺.

𑀢𑀢𑁆𑀣 ¶ 𑀅𑀔𑁂𑀢𑁆𑀢𑀩𑀦𑁆𑀥𑀽𑀢𑀺 𑀅𑀓𑁆𑀔𑁂𑀢𑁆𑀢𑁄 𑀅𑀩𑀦𑁆𑀥𑀼, 𑀔𑁂𑀢𑁆𑀢𑀯𑀢𑁆𑀣𑀼𑀕𑀸𑀫𑀦𑀺𑀕𑀫𑀧𑀭𑀺𑀕𑁆𑀕𑀳𑁂𑀦 𑀘𑁂𑀯 𑀜𑀸𑀢𑀺𑀩𑀦𑁆𑀥𑀯𑀕𑁄𑀢𑁆𑀢𑀩𑀦𑁆𑀥𑀯𑀫𑀺𑀢𑁆𑀢𑀩𑀦𑁆𑀥𑀯𑀲𑀳𑀸𑀬𑀩𑀦𑁆𑀥𑀯𑀲𑀺𑀧𑁆𑀧𑀩𑀦𑁆𑀥𑀯𑀧𑀭𑀺𑀕𑁆𑀕𑀳𑁂𑀦 𑀘 𑀭𑀳𑀺𑀢𑁄. 𑀅𑀫𑀫𑁄𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀫𑀸𑀬𑀦𑀭𑀳𑀺𑀢𑁄. 𑀦𑀺𑀭𑀸𑀲𑁄𑀢𑀺 𑀮𑀸𑀪𑀥𑀦𑀧𑀼𑀢𑁆𑀢𑀚𑀻𑀯𑀺𑀢𑀸𑀲𑀸𑀬 𑀭𑀳𑀺𑀢𑁄. 𑀦𑀺𑀮𑁆𑀮𑁄𑀪𑀧𑀸𑀧𑁄𑀢𑀺 𑀧𑀸𑀧𑀮𑁄𑀪𑀯𑀺𑀲𑀫𑀮𑁄𑀪𑁂𑀦 𑀭𑀳𑀺𑀢𑁄. 𑀪𑀯𑀮𑁄𑀪𑀔𑀻𑀡𑁄𑀢𑀺 𑀔𑀻𑀡𑀪𑀯𑀭𑀸𑀕𑁄.

𑀢𑀢𑁄 𑀉𑀤𑁆𑀤𑀸𑀮𑀓𑁄 𑀕𑀸𑀣𑀫𑀸𑀳 𑁋

𑁭𑁨.

‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀲𑀩𑁆𑀩𑁂𑀯 𑀲𑁄𑀭𑀢𑀸 𑀤𑀦𑁆𑀢𑀸, 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀲𑀩𑁆𑀩𑁂𑀲𑀁 𑀲𑀻𑀢𑀺𑀪𑀽𑀢𑀸𑀦𑀁, 𑀅𑀢𑁆𑀣𑀺 𑀲𑁂𑀬𑁆𑀬𑁄𑀣 𑀧𑀸𑀧𑀺𑀬𑁄’’𑀢𑀺.

𑀢𑀢𑁆𑀣 𑀅𑀢𑁆𑀣𑀺 𑀲𑁂𑀬𑁆𑀬𑁄𑀣 𑀧𑀸𑀧𑀺𑀬𑁄𑀢𑀺 𑀏𑀢𑁂 𑀔𑀢𑁆𑀢𑀺𑀬𑀸𑀤𑀬𑁄 𑀲𑀩𑁆𑀩𑁂𑀧𑀺 𑀲𑁄𑀭𑀘𑁆𑀘𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀏𑀯𑀁 𑀪𑀽𑀢𑀸𑀦𑀁 𑀧𑀦 𑀢𑁂𑀲𑀁 𑀅𑀬𑀁 𑀲𑁂𑀬𑁆𑀬𑁄, 𑀅𑀬𑀁 𑀧𑀸𑀧𑀺𑀬𑁄𑀢𑀺 𑀏𑀯𑀁 𑀳𑀻𑀦𑀼𑀓𑁆𑀓𑀝𑁆𑀞𑀢𑀸 𑀅𑀢𑁆𑀣𑀺, 𑀦𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺.

𑀅𑀣𑀲𑁆𑀲 ‘‘𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀳𑀻𑀦𑀼𑀓𑁆𑀓𑀝𑁆𑀞𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀩𑁆𑀭𑀸𑀳𑁆𑀫𑀡𑁄 𑀕𑀸𑀣𑀫𑀸𑀳 𑁋

𑁭𑁩.

‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀲𑀩𑁆𑀩𑁂𑀯 𑀲𑁄𑀭𑀢𑀸 𑀤𑀦𑁆𑀢𑀸, 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀲𑀩𑁆𑀩𑁂𑀲𑀁 𑀲𑀻𑀢𑀺𑀪𑀽𑀢𑀸𑀦𑀁, 𑀦𑀢𑁆𑀣𑀺 𑀲𑁂𑀬𑁆𑀬𑁄𑀣 𑀧𑀸𑀧𑀺𑀬𑁄’’𑀢𑀺.

𑀅𑀣 𑀦𑀁 𑀕𑀭𑀳𑀦𑁆𑀢𑁄 𑀉𑀤𑁆𑀤𑀸𑀮𑀓𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁭𑁪.

‘‘𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀲𑀩𑁆𑀩𑁂𑀯 𑀲𑁄𑀭𑀢𑀸 𑀤𑀦𑁆𑀢𑀸, 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸.

𑁭𑁫.

‘‘𑀲𑀩𑁆𑀩𑁂𑀲𑀁 ¶ 𑀲𑀻𑀢𑀺𑀪𑀽𑀢𑀸𑀦𑀁, 𑀦𑀢𑁆𑀣𑀺 𑀲𑁂𑀬𑁆𑀬𑁄𑀣 𑀧𑀸𑀧𑀺𑀬𑁄;

𑀧𑀦𑀝𑁆𑀞𑀁 𑀘𑀭𑀲𑀺 𑀩𑁆𑀭𑀳𑁆𑀫𑀜𑁆𑀜𑀁, 𑀲𑁄𑀢𑁆𑀢𑀺𑀬𑀸𑀓𑀼𑀮𑀯𑀁𑀲𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ ¶ 𑁋 𑀬𑀤𑀺 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀏𑀓𑁄 𑀯𑀡𑁆𑀡𑁄𑀯 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀉𑀪𑀢𑁄 𑀲𑀼𑀚𑀸𑀢𑀪𑀸𑀯𑀁 𑀦𑀸𑀲𑁂𑀦𑁆𑀢𑁄 𑀧𑀦𑀝𑁆𑀞𑀁 𑀘𑀭𑀲𑀺 𑀩𑁆𑀭𑀳𑁆𑀫𑀜𑁆𑀜𑀁, 𑀘𑀡𑁆𑀟𑀸𑀮𑀲𑀫𑁄 𑀳𑁄𑀲𑀺, 𑀲𑁄𑀢𑁆𑀢𑀺𑀬𑀓𑀼𑀮𑀯𑀁𑀲𑀢𑀁 𑀦𑀸𑀲𑁂𑀲𑀻𑀢𑀺.

𑀅𑀣 𑀦𑀁 𑀧𑀼𑀭𑁄𑀳𑀺𑀢𑁄 𑀉𑀧𑀫𑀸𑀬 𑀲𑀜𑁆𑀜𑀸𑀧𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁭𑁬.

‘‘𑀦𑀸𑀦𑀸𑀭𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺, 𑀯𑀺𑀫𑀸𑀦𑀁 𑀪𑀯𑀢𑀺 𑀙𑀸𑀤𑀺𑀢𑀁;

𑀦 𑀢𑁂𑀲𑀁 𑀙𑀸𑀬𑀸 𑀯𑀢𑁆𑀣𑀸𑀦𑀁, 𑀲𑁄 𑀭𑀸𑀕𑁄 𑀅𑀦𑀼𑀧𑀚𑁆𑀚𑀣.

𑁭𑁭.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑀤𑀸 𑀲𑀼𑀚𑁆𑀛𑀦𑁆𑀢𑀺 𑀫𑀸𑀡𑀯𑀸;

𑀢𑁂 𑀲𑀚𑀸𑀢𑀺𑀁 𑀧𑀫𑀼𑀜𑁆𑀘𑀦𑁆𑀢𑀺, 𑀥𑀫𑁆𑀫𑀫𑀜𑁆𑀜𑀸𑀬 𑀲𑀼𑀩𑁆𑀩𑀢𑀸’’𑀢𑀺.

𑀢𑀢𑁆𑀣 𑀯𑀺𑀫𑀸𑀦𑀦𑁆𑀢𑀺 𑀕𑁂𑀳𑀁 𑀯𑀸 𑀫𑀡𑁆𑀟𑀧𑀁 𑀯𑀸. 𑀙𑀸𑀬𑀸𑀢𑀺 𑀢𑁂𑀲𑀁 𑀯𑀢𑁆𑀣𑀸𑀦𑀁 𑀙𑀸𑀬𑀸 𑀲𑁄 𑀦𑀸𑀦𑀸𑀯𑀺𑀥𑁄 𑀭𑀸𑀕𑁄 𑀦 𑀉𑀧𑁂𑀢𑀺, 𑀲𑀩𑁆𑀩𑀸 𑀙𑀸𑀬𑀸 𑀏𑀓𑀯𑀡𑁆𑀡𑀸𑀯 𑀳𑁄𑀦𑁆𑀢𑀺. 𑀏𑀯𑀫𑁂𑀯𑀸𑀢𑀺 𑀫𑀦𑀼𑀲𑁆𑀲𑁂𑀲𑀼𑀧𑀺 𑀏𑀯𑀫𑁂𑀯 𑀏𑀓𑀘𑁆𑀘𑁂 𑀅𑀜𑁆𑀜𑀸𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀸𑀭𑀡𑁂𑀦𑁂𑀯 𑀘𑀸𑀢𑀼𑀯𑀡𑁆𑀡𑁂 𑀲𑀼𑀤𑁆𑀥𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀏𑀲𑀸 𑀅𑀢𑁆𑀣𑀻𑀢𑀺 𑀫𑀸 𑀕𑀡𑁆𑀳𑀺. 𑀬𑀤𑀸 𑀅𑀭𑀺𑀬𑀫𑀕𑁆𑀕𑁂𑀦 𑀫𑀸𑀡𑀯𑀸 𑀲𑀼𑀚𑁆𑀛𑀦𑁆𑀢𑀺, 𑀢𑀤𑀸 𑀢𑁂𑀳𑀺 𑀧𑀝𑀺𑀯𑀺𑀤𑁆𑀥𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀲𑀼𑀩𑁆𑀩𑀢𑀸 𑀲𑀻𑀮𑀯𑀦𑁆𑀢𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀢𑁂 𑀲𑀚𑀸𑀢𑀺𑀁 𑀫𑀼𑀜𑁆𑀘𑀦𑁆𑀢𑀺. 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀚𑀸𑀢𑀺 𑀦𑀸𑀫 𑀦𑀺𑀭𑀢𑁆𑀣𑀓𑀸𑀢𑀺.

𑀉𑀤𑁆𑀤𑀸𑀮𑀓𑁄 𑀧𑀦 𑀧𑀘𑁆𑀘𑀸𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄𑀯 𑀦𑀺𑀲𑀻𑀤𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀲𑀩𑁆𑀩𑁂 𑀏𑀢𑁂, 𑀫𑀳𑀸𑀭𑀸𑀚, 𑀓𑀼𑀳𑀓𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀓𑁄𑀳𑀜𑁆𑀜𑁂𑀦𑁂𑀯 𑀦𑀸𑀲𑁂𑀦𑁆𑀢𑀺, 𑀉𑀤𑁆𑀤𑀸𑀮𑀓𑀁 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀧𑀼𑀭𑁄𑀳𑀺𑀢𑀁 𑀓𑀭𑁄𑀣, 𑀲𑁂𑀲𑁂 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀨𑀮𑀓𑀸𑀯𑀼𑀥𑀸𑀦𑀺 𑀤𑀢𑁆𑀯𑀸 𑀲𑁂𑀯𑀓𑁂 𑀓𑀭𑁄𑀣𑀸’’𑀢𑀺. ‘‘𑀲𑀸𑀥𑀼, 𑀆𑀘𑀭𑀺𑀬𑀸’’𑀢𑀺 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀢𑁂 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑀸𑀯 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀓𑀼𑀳𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀉𑀤𑁆𑀤𑀸𑀮𑀓𑁄 ¶ 𑀓𑀼𑀳𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀭𑀸𑀚𑀸 𑀆𑀦𑀦𑁆𑀤𑁄, 𑀧𑀼𑀭𑁄𑀳𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀤𑁆𑀤𑀸𑀮𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁪𑁮𑁮] 𑁫. 𑀪𑀺𑀲𑀚𑀸𑀢𑀓𑀯𑀡𑁆𑀡𑀦𑀸

𑀅𑀲𑁆𑀲𑀁 ¶ 𑀕𑀯𑀁 𑀭𑀚𑀢𑀁 𑀚𑀸𑀢𑀭𑀽𑀧𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀦 𑀓𑀼𑀲𑀚𑀸𑀢𑀓𑁂 (𑀚𑀸. 𑁨.𑁨𑁦.𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 ¶ 𑀧𑀦 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀧𑀝𑀺𑀘𑁆𑀘𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀮𑁂𑀲𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑁆𑀫𑀸 𑀓𑀺𑀮𑁂𑀲𑀁 𑀧𑀝𑀺𑀘𑁆𑀘 𑀉𑀓𑁆𑀓𑀡𑁆𑀞𑀺𑀢𑁄𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀲𑀧𑀣𑀁 𑀓𑀢𑁆𑀯𑀸 𑀯𑀺𑀳𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, ‘‘𑀫𑀳𑀸𑀓𑀜𑁆𑀘𑀦𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀣𑀲𑁆𑀲 𑀧𑀤𑀲𑀸 𑀯𑀺𑀘𑀭𑀡𑀓𑀸𑀮𑁂 𑀅𑀧𑀭𑁄𑀧𑀺 𑀧𑀼𑀢𑁆𑀢𑁄 𑀚𑀸𑀬𑀺, ‘‘𑀉𑀧𑀓𑀜𑁆𑀘𑀦𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑀩𑁆𑀩𑀓𑀦𑀺𑀝𑁆𑀞𑀸 𑀧𑀦𑁂𑀓𑀸 𑀥𑀻𑀢𑀸, 𑀢𑀲𑁆𑀲𑀸 ‘‘𑀓𑀜𑁆𑀘𑀦𑀤𑁂𑀯𑀻’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀫𑀳𑀸𑀓𑀜𑁆𑀘𑀦𑀓𑀼𑀫𑀸𑀭𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀢𑁄 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀖𑀭𑀸𑀯𑀸𑀲𑁂𑀦 𑀩𑀦𑁆𑀥𑀺𑀢𑀼𑀓𑀸𑀫𑀸 ‘‘𑀅𑀢𑁆𑀢𑀦𑀸 𑀲𑀫𑀸𑀦𑀚𑀸𑀢𑀺𑀬𑀓𑀼𑀮𑀢𑁄 𑀢𑁂 𑀤𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫, 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀳𑀻’’𑀢𑀺 𑀯𑀤𑀺𑀁𑀲𑀼. ‘‘𑀅𑀫𑁆𑀫𑀢𑀸𑀢𑀸, 𑀦 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦𑀢𑁆𑀣𑁄, 𑀫𑀬𑁆𑀳𑀜𑁆𑀳𑀺 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀸 𑀯𑀺𑀬 𑀲𑀧𑁆𑀧𑀝𑀺𑀪𑀬𑀸, 𑀩𑀦𑁆𑀥𑀦𑀸𑀕𑀸𑀭𑀁 𑀯𑀺𑀬 𑀧𑀮𑀺𑀩𑀼𑀤𑁆𑀥𑀸, 𑀉𑀓𑁆𑀓𑀸𑀭𑀪𑀽𑀫𑀺 𑀯𑀺𑀬 𑀚𑁂𑀕𑀼𑀘𑁆𑀙𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀫𑀬𑀸 𑀲𑀼𑀧𑀺𑀦𑁂𑀦𑀧𑀺 𑀫𑁂𑀣𑀼𑀦𑀥𑀫𑁆𑀫𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀅𑀜𑁆𑀜𑁂 𑀯𑁄 𑀧𑀼𑀢𑁆𑀢𑀸 𑀅𑀢𑁆𑀣𑀺, 𑀢𑁂 𑀖𑀭𑀸𑀯𑀸𑀲𑁂𑀦 𑀦𑀺𑀫𑀦𑁆𑀢𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁄𑀧𑀺 𑀲𑀳𑀸𑀬𑁂 𑀧𑁂𑀲𑁂𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄𑀧𑀺 𑀦 𑀇𑀘𑁆𑀙𑀺.

𑀅𑀣 ¶ 𑀦𑀁 𑀲𑀳𑀸𑀬𑀸 ‘‘𑀲𑀫𑁆𑀫, 𑀓𑀺𑀁 𑀧𑀦 𑀢𑁆𑀯𑀁 𑀧𑀢𑁆𑀣𑁂𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀇𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀢𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀲𑁂𑀲𑀧𑀼𑀢𑁆𑀢𑁂 𑀦𑀺𑀫𑀦𑁆𑀢𑁂𑀲𑀼𑀁, 𑀢𑁂𑀧𑀺 𑀦 𑀇𑀘𑁆𑀙𑀺𑀁𑀲𑀼. 𑀓𑀜𑁆𑀘𑀦𑀤𑁂𑀯𑀻𑀧𑀺 𑀦 𑀇𑀘𑁆𑀙𑀺𑀬𑁂𑀯. 𑀅𑀧𑀭𑀪𑀸𑀕𑁂 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀫𑀳𑀸𑀓𑀜𑁆𑀘𑀦𑀧𑀡𑁆𑀟𑀺𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀲𑀻𑀢𑀺𑀓𑁄𑀝𑀺𑀥𑀦𑁂𑀦 𑀓𑀧𑀡𑀤𑁆𑀥𑀺𑀓𑀸𑀦𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀙 𑀪𑀸𑀢𑀭𑁄 𑀪𑀕𑀺𑀦𑀺𑀁 𑀏𑀓𑀁 𑀤𑀸𑀲𑀁 𑀏𑀓𑀁 𑀤𑀸𑀲𑀺𑀁 𑀏𑀓𑀁 𑀲𑀳𑀸𑀬𑀓𑀜𑁆𑀘 𑀆𑀤𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀢𑁂 𑀢𑀢𑁆𑀣 𑀏𑀓𑀁 𑀧𑀤𑀼𑀫𑀲𑀭𑀁 𑀦𑀺𑀲𑁆𑀲𑀸𑀬 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁂𑀳𑀺 𑀬𑀸𑀧𑀬𑀺𑀁𑀲𑀼. 𑀢𑁂 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀸 𑀏𑀓𑀢𑁄𑀯 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀏𑀓𑁄 𑀨𑀮𑀁 𑀯𑀸 𑀧𑀢𑁆𑀢𑀁 𑀯𑀸 𑀧𑀲𑁆𑀲𑀢𑀺, 𑀢𑀢𑁆𑀣 𑀇𑀢𑀭𑁂𑀧𑀺 𑀧𑀓𑁆𑀓𑁄𑀲𑀺𑀢𑁆𑀯𑀸 𑀤𑀺𑀝𑁆𑀞𑀲𑀼𑀢𑀸𑀤𑀻𑀦𑀺 ¶ 𑀓𑀣𑁂𑀦𑁆𑀢𑀸 𑀉𑀘𑁆𑀘𑀺𑀦𑀦𑁆𑀢𑀺, 𑀕𑀸𑀫𑀲𑁆𑀲 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺. 𑀅𑀣 𑀆𑀘𑀭𑀺𑀬𑁄 𑀫𑀳𑀸𑀓𑀜𑁆𑀘𑀦𑀢𑀸𑀧𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀫𑁆𑀳𑀸𑀓𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀏𑀯𑀁 𑀮𑁄𑀮𑀼𑀧𑁆𑀧𑀘𑀸𑀭𑀯𑀲𑁂𑀦 𑀨𑀮𑀸𑀨𑀮𑀢𑁆𑀣𑀸𑀬 𑀯𑀺𑀘𑀭𑀡𑀁 𑀦𑀸𑀫 𑀅𑀧𑁆𑀧𑀢𑀺𑀭𑀽𑀧𑀁, 𑀇𑀢𑁄 𑀧𑀝𑁆𑀞𑀸𑀬 𑀅𑀳𑀫𑁂𑀯 𑀨𑀮𑀸𑀨𑀮𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀅𑀲𑁆𑀲𑀫𑀁 𑀧𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀲𑀸𑀬𑀦𑁆𑀳𑀲𑀫𑀬𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀇𑀥𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸 𑀅𑀘𑁆𑀙𑀣, 𑀅𑀳𑀁 𑀨𑀮𑀸𑀨𑀮𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀉𑀧𑀓𑀜𑁆𑀘𑀦𑀸𑀤𑀬𑁄 ‘‘𑀫𑀬𑀁 𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑀺𑀢𑀸, 𑀢𑀼𑀫𑁆𑀳𑁂 𑀇𑀥𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣, 𑀪𑀕𑀺𑀦𑀻𑀧𑀺 𑀦𑁄 𑀇𑀥𑁂𑀯 𑀳𑁄𑀢𑀼, 𑀤𑀸𑀲𑀻𑀧𑀺 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀅𑀘𑁆𑀙𑀢𑀼, 𑀫𑀬𑀁 𑀅𑀝𑁆𑀞 𑀚𑀦𑀸 𑀯𑀸𑀭𑁂𑀦 𑀨𑀮𑀸𑀨𑀮𑀁 𑀆𑀳𑀭𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀧𑀦 𑀢𑀬𑁄 𑀯𑀸𑀭𑀫𑀼𑀢𑁆𑀢𑀸𑀯 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺𑀁𑀲𑀼.

𑀢𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀲𑀼𑀧𑀺 𑀚𑀦𑁂𑀲𑀼 𑀏𑀓𑁂𑀓𑁄 𑀯𑀸𑀭𑁂𑀦𑁂𑀯 𑀨𑀮𑀸𑀨𑀮𑀁 𑀆𑀳𑀭𑀢𑀺. 𑀲𑁂𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬𑀫𑁂𑀯 𑀳𑁄𑀦𑁆𑀢𑀺, 𑀅𑀓𑀸𑀭𑀡𑁂𑀦 𑀏𑀓𑀢𑁄 𑀪𑀯𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀯𑀸𑀭𑀧𑁆𑀧𑀢𑁆𑀢𑁄 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀏𑀓𑁄 𑀫𑀸𑀴𑀓𑁄 𑀅𑀢𑁆𑀣𑀺, 𑀢𑀢𑁆𑀣 𑀧𑀸𑀲𑀸𑀡𑀨𑀮𑀓𑁂 𑀏𑀓𑀸𑀤𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀖𑀡𑁆𑀟𑀺𑀲𑀜𑁆𑀜𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺. 𑀲𑁂𑀲𑀸 𑀖𑀡𑁆𑀟𑀺𑀲𑀜𑁆𑀜𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀮𑁄𑀮𑀼𑀧𑁆𑀧𑀁 𑀅𑀓𑀢𑁆𑀯𑀸 ¶ 𑀕𑀸𑀭𑀯𑀧𑀭𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀢𑁂 𑀅𑀧𑀭𑀪𑀸𑀕𑁂 𑀪𑀺𑀲𑀸𑀦𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑀸 𑀢𑀢𑁆𑀢𑀢𑀧𑀸 𑀖𑁄𑀭𑀢𑀧𑀸 𑀧𑀭𑀫𑀸𑀚𑀺𑀢𑀺𑀦𑁆𑀤𑁆𑀭𑀺𑀬𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀯𑀺𑀳𑀭𑀺𑀁𑀲𑀼. 𑀅𑀣 𑀢𑁂𑀲𑀁 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄𑀧𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀓𑀸𑀫𑀸𑀥𑀺𑀫𑀼𑀢𑁆𑀢𑀸 𑀦𑀼 𑀔𑁄 𑀇𑀫𑁂 𑀇𑀲𑀬𑁄 ¶ , 𑀦𑁄’’𑀢𑀺 𑀆𑀲𑀗𑁆𑀓𑀁 𑀓𑀭𑁄𑀢𑀺𑀬𑁂𑀯. 𑀲𑁄 ‘‘𑀇𑀫𑁂 𑀢𑀸𑀯 𑀇𑀲𑀬𑁄 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀳𑀸𑀲𑀢𑁆𑀢𑀲𑁆𑀲 𑀓𑁄𑀝𑁆𑀞𑀸𑀲𑀁 𑀢𑀬𑁄 𑀤𑀺𑀯𑀲𑁂 𑀅𑀦𑁆𑀢𑀭𑀥𑀸𑀧𑁂𑀲𑀺. 𑀲𑁄 𑀧𑀞𑀫𑀤𑀺𑀯𑀲𑁂 𑀓𑁄𑀝𑁆𑀞𑀸𑀲𑀁 𑀅𑀤𑀺𑀲𑁆𑀯𑀸 ‘‘𑀫𑀫 𑀓𑁄𑀝𑁆𑀞𑀸𑀲𑀁 𑀧𑀫𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺, 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀫𑀫 𑀤𑁄𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀡𑀸𑀫𑀦𑀯𑀲𑁂𑀦 𑀫𑀫 𑀓𑁄𑀝𑁆𑀞𑀸𑀲𑀁 𑀦 𑀞𑀧𑁂𑀲𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀢𑀺𑀬𑀤𑀺𑀯𑀲𑁂 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀫𑀬𑁆𑀳𑀁 𑀓𑁄𑀝𑁆𑀞𑀸𑀲𑀁 𑀦 𑀞𑀧𑁂𑀦𑁆𑀢𑀺, 𑀲𑀘𑁂 𑀫𑁂 𑀤𑁄𑀲𑁄 𑀅𑀢𑁆𑀣𑀺, 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀖𑀡𑁆𑀟𑀺𑀲𑀜𑁆𑀜𑀁 𑀅𑀤𑀸𑀲𑀺.

𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑁂𑀦 𑀖𑀡𑁆𑀟𑀺𑀲𑀜𑁆𑀜𑀸 𑀤𑀺𑀦𑁆𑀦𑀸’’𑀢𑀺 𑀆𑀳𑀁𑀲𑀼. ‘‘𑀫𑀬𑀸 𑀢𑀸𑀢𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸 𑀆𑀘𑀭𑀺𑀬𑀸’’𑀢𑀺? ‘‘𑀢𑀸𑀢𑀸 𑀢𑀢𑀺𑀬𑀤𑀺𑀯𑀲𑁂 𑀓𑁂𑀦 𑀨𑀮𑀸𑀨𑀮𑀁 𑀆𑀪𑀢’’𑀦𑁆𑀢𑀺? 𑀢𑁂𑀲𑀼 𑀏𑀓𑁄 𑀉𑀝𑁆𑀞𑀸𑀬 ‘‘𑀫𑀬𑀸 𑀆𑀘𑀭𑀺𑀬𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀓𑁄𑀝𑁆𑀞𑀸𑀲𑁂 𑀓𑀭𑁄𑀦𑁆𑀢𑁂𑀦 𑀢𑁂 𑀫𑀬𑁆𑀳𑀁 𑀓𑁄𑀝𑁆𑀞𑀸𑀲𑁄 𑀓𑀢𑁄𑀢𑀺. ‘‘𑀆𑀫, 𑀆𑀘𑀭𑀺𑀬, 𑀚𑁂𑀝𑁆𑀞𑀓𑀓𑁄𑀝𑁆𑀞𑀸𑀲𑁄 𑀫𑁂 𑀓𑀢𑁄’’𑀢𑀺. ‘‘𑀳𑀺𑀬𑁆𑀬𑁄 𑀓𑁂𑀦𑀸𑀪𑀢’’𑀦𑁆𑀢𑀺? ‘‘𑀫𑀬𑀸’’𑀢𑀺 𑀅𑀧𑀭𑁄 𑀉𑀝𑁆𑀞𑀸𑀬 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀓𑁄𑀝𑁆𑀞𑀸𑀲𑀁 𑀓𑀭𑁄𑀦𑁆𑀢𑁄 𑀫𑀁 𑀅𑀦𑀼𑀲𑁆𑀲𑀭𑀻𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀫𑁂 𑀚𑁂𑀝𑁆𑀞𑀓𑀓𑁄𑀝𑁆𑀞𑀸𑀲𑁄 𑀞𑀧𑀺𑀢𑁄’’𑀢𑀺. ‘‘𑀅𑀚𑁆𑀚 𑀓𑁂𑀦𑀸𑀪𑀢’’𑀦𑁆𑀢𑀺. ‘‘𑀫𑀬𑀸’’𑀢𑀺 𑀅𑀧𑀭𑁄 𑀉𑀝𑁆𑀞𑀸𑀬 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀓𑁄𑀝𑁆𑀞𑀸𑀲𑀁 𑀓𑀭𑁄𑀦𑁆𑀢𑁄 𑀫𑀁 𑀅𑀦𑀼𑀲𑁆𑀲𑀭𑀻𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀫𑁂 ¶ 𑀚𑁂𑀝𑁆𑀞𑀓𑀓𑁄𑀝𑁆𑀞𑀸𑀲𑁄 𑀓𑀢𑁄’’𑀢𑀺. ‘‘𑀢𑀸𑀢𑀸, 𑀅𑀚𑁆𑀚 𑀫𑀬𑁆𑀳𑀁 𑀓𑁄𑀝𑁆𑀞𑀸𑀲𑀁 𑀅𑀮𑀪𑀦𑁆𑀢𑀲𑁆𑀲 𑀢𑀢𑀺𑀬𑁄 𑀤𑀺𑀯𑀲𑁄, 𑀧𑀞𑀫𑀤𑀺𑀯𑀲𑁂 𑀓𑁄𑀝𑁆𑀞𑀸𑀲𑀁 𑀅𑀤𑀺𑀲𑁆𑀯𑀸 ‘𑀓𑁄𑀝𑁆𑀞𑀸𑀲𑀁 𑀓𑀭𑁄𑀦𑁆𑀢𑁄 𑀫𑀁 𑀧𑀫𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀫𑀫 𑀓𑁄𑀘𑀺 𑀤𑁄𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀅𑀚𑁆𑀚 𑀧𑀦 ‘‘𑀲𑀘𑁂 𑀫𑁂 𑀤𑁄𑀲𑁄 𑀅𑀢𑁆𑀣𑀺, 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀖𑀡𑁆𑀟𑀺𑀲𑀜𑁆𑀜𑀸𑀬 𑀢𑀼𑀫𑁆𑀳𑁂 𑀲𑀦𑁆𑀦𑀺𑀧𑀸𑀢𑁂𑀲𑀺𑀁. 𑀏𑀢𑁂 𑀪𑀺𑀲𑀓𑁄𑀝𑁆𑀞𑀸𑀲𑁂 𑀢𑀼𑀫𑁆𑀳𑁂 ‘‘𑀓𑀭𑀺𑀫𑁆𑀳𑀸’’𑀢𑀺 𑀯𑀤𑀣, 𑀅𑀳𑀁 𑀦 𑀮𑀪𑀸𑀫𑀺, 𑀏𑀢𑁂𑀲𑀁 𑀣𑁂𑀦𑁂𑀢𑁆𑀯𑀸 𑀔𑀸𑀤𑀓𑀁 𑀜𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀲𑀫𑀢𑁆𑀢𑀁 ¶ 𑀣𑁂𑀦𑀦𑀁 𑀦𑀸𑀫 𑀅𑀧𑁆𑀧𑀢𑀺𑀭𑀽𑀧𑀦𑁆𑀢𑀺. 𑀢𑁂 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀲𑀸𑀳𑀲𑀺𑀓𑀓𑀫𑁆𑀫’’𑀦𑁆𑀢𑀺 ¶ 𑀲𑀩𑁆𑀩𑁂𑀯 𑀉𑀩𑁆𑀩𑁂𑀕𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁.

𑀢𑀲𑁆𑀫𑀺𑀁 𑀅𑀲𑁆𑀲𑀫𑀧𑀤𑁂 𑀯𑀦𑀚𑁂𑀝𑁆𑀞𑀓𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸𑀧𑀺 𑀑𑀢𑀭𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀆𑀦𑁂𑀜𑁆𑀚𑀓𑀭𑀡𑀁 𑀓𑀸𑀭𑀺𑀬𑀫𑀸𑀦𑁄 𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀴𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀏𑀓𑁄 𑀯𑀸𑀭𑀡𑁄 𑀓𑀸𑀮𑁂𑀦 𑀓𑀸𑀮𑀁 𑀇𑀲𑀺𑀕𑀡𑀁 𑀯𑀦𑁆𑀤𑀢𑀺, 𑀲𑁄𑀧𑀺 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀧𑁆𑀧𑀓𑀻𑀴𑀸𑀧𑀦𑀓𑁄 𑀏𑀓𑁄 𑀯𑀸𑀦𑀭𑁄 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀲𑁆𑀲𑀫𑁂 𑀯𑀲𑀢𑀺. 𑀲𑁄𑀧𑀺 𑀢𑀁 𑀤𑀺𑀯𑀲𑀁 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀓𑁆𑀓𑁄 ‘‘𑀇𑀲𑀺𑀕𑀡𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑁄 𑀉𑀧𑀓𑀜𑁆𑀘𑀦𑀢𑀸𑀧𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑁂𑀲𑀸𑀦𑀁 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀘𑀭𑀺𑀬, 𑀅𑀳𑀁 𑀅𑀜𑁆𑀜𑁂 𑀅𑀧𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀜𑁆𑀜𑁂𑀯 𑀲𑁄𑀥𑁂𑀢𑀼𑀁 𑀮𑀪𑀸𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀮𑀪𑀲𑀻’’𑀢𑀺. 𑀲𑁄 𑀇𑀲𑀺𑀕𑀡𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀲𑀘𑁂 𑀢𑁂 𑀫𑀬𑀸 𑀪𑀺𑀲𑀸𑀦𑀺 𑀔𑀸𑀤𑀺𑀢𑀸𑀦𑀺, 𑀏𑀯𑀭𑀽𑀧𑁄 𑀦𑀸𑀫 𑀳𑁄𑀢𑀽’’𑀢𑀺 𑀲𑀧𑀣𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁭𑁮.

‘‘𑀅𑀲𑁆𑀲𑀁 𑀕𑀯𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀪𑀭𑀺𑀬𑀜𑁆𑀘 𑀲𑁄 𑀇𑀥 𑀮𑀪𑀢𑀁 𑀫𑀦𑀸𑀧𑀁;

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀲𑀫𑀗𑁆𑀕𑀺 𑀳𑁄𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀻’’𑀢𑀺.

𑀢𑀢𑁆𑀣 ‘‘𑀅𑀲𑁆𑀲𑀁 𑀕𑀯’’𑀦𑁆𑀢𑀺 𑀇𑀤𑀁 ‘‘𑀲𑁄 ‘𑀬𑀢𑁆𑀢𑀓𑀸𑀦𑀺 𑀧𑀺𑀬𑀯𑀢𑁆𑀣𑀽𑀦𑀺 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁂 𑀢𑀢𑁆𑀢𑀓𑀸𑀦𑀺 𑀲𑁄𑀓𑀤𑀼𑀓𑁆𑀔𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’𑀢𑀺 𑀯𑀢𑁆𑀣𑀼𑀓𑀸𑀫𑁂 𑀕𑀭𑀳𑀦𑁆𑀢𑁄 𑀅𑀪𑀸𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀁 𑀲𑀼𑀢𑁆𑀯𑀸 𑀇𑀲𑀺𑀕𑀡𑁄 ‘‘𑀫𑀸𑀭𑀺𑀲, 𑀫𑀸 𑀏𑀯𑀁 𑀓𑀣𑁂𑀣, 𑀅𑀢𑀺𑀪𑀸𑀭𑀺𑀬𑁄 𑀢𑁂 𑀲𑀧𑀣𑁄’’𑀢𑀺 𑀓𑀡𑁆𑀡𑁂 𑀧𑀺𑀤𑀳𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑀁 ‘‘𑀢𑀸𑀢, 𑀅𑀢𑀺𑀪𑀸𑀭𑀺𑀬𑁄 𑀢𑁂 𑀲𑀧𑀣𑁄, 𑀦 𑀢𑁆𑀯𑀁 𑀔𑀸𑀤𑀲𑀺, 𑀢𑀯 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸’’𑀢𑀺 ¶ 𑀆𑀳. 𑀢𑀲𑁆𑀫𑀺𑀁 𑀧𑀞𑀫𑀁 𑀲𑀧𑀣𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀤𑀼𑀢𑀺𑀬𑁄𑀧𑀺 𑀪𑀸𑀢𑀸 𑀲𑀳𑀲𑀸 𑀉𑀝𑁆𑀞𑀸𑀬 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀧𑀣𑁂𑀦 𑀅𑀢𑁆𑀢𑀸𑀦𑀁 𑀲𑁄𑀥𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁯.

‘‘𑀫𑀸𑀮𑀜𑁆𑀘 ¶ ¶ 𑀲𑁄 𑀓𑀸𑀲𑀺𑀓𑀘𑀦𑁆𑀤𑀦𑀜𑁆𑀘, 𑀥𑀸𑀭𑁂𑀢𑀼 𑀧𑀼𑀢𑁆𑀢𑀲𑁆𑀲 𑀩𑀳𑀽 𑀪𑀯𑀦𑁆𑀢𑀼;

𑀓𑀸𑀫𑁂𑀲𑀼 𑀢𑀺𑀩𑁆𑀩𑀁 𑀓𑀼𑀭𑀼𑀢𑀁 𑀅𑀧𑁂𑀓𑁆𑀔𑀁, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀻’’𑀢𑀺.

𑀢𑀢𑁆𑀣 𑀢𑀺𑀩𑁆𑀩𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀩𑀳𑀮𑀁 𑀅𑀧𑁂𑀓𑁆𑀔𑀁 𑀓𑀭𑁄𑀢𑀽𑀢𑀺. 𑀇𑀤𑀁 𑀲𑁄 ‘‘𑀬𑀲𑁆𑀲𑁂𑀢𑁂𑀲𑀼 𑀢𑀺𑀩𑁆𑀩𑀸 𑀅𑀧𑁂𑀓𑁆𑀔𑀸 𑀳𑁄𑀦𑁆𑀢𑀺, 𑀲𑁄 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁂 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀤𑀼𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀆𑀳.

𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀲𑁂𑀲𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀢𑀁 𑀢𑀁 𑀕𑀸𑀣𑀁 𑀅𑀪𑀸𑀲𑀺𑀁𑀲𑀼 𑁋

𑁮𑁦.

‘‘𑀧𑀳𑀽𑀢𑀥𑀜𑁆𑀜𑁄 𑀓𑀲𑀺𑀫𑀸 𑀬𑀲𑀲𑁆𑀲𑀻, 𑀧𑀼𑀢𑁆𑀢𑁂 𑀕𑀺𑀳𑀻 𑀥𑀦𑀺𑀫𑀸 𑀲𑀩𑁆𑀩𑀓𑀸𑀫𑁂;

𑀯𑀬𑀁 𑀅𑀧𑀲𑁆𑀲𑀁 𑀖𑀭𑀫𑀸𑀯𑀲𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁧.

‘‘𑀲𑁄 𑀔𑀢𑁆𑀢𑀺𑀬𑁄 𑀳𑁄𑀢𑀼 𑀧𑀲𑀬𑁆𑀳𑀓𑀸𑀭𑀻, 𑀭𑀸𑀚𑀸𑀪𑀺𑀭𑀸𑀚𑀸 𑀩𑀮𑀯𑀸 𑀬𑀲𑀲𑁆𑀲𑀻;

𑀲 𑀘𑀸𑀢𑀼𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁨.

‘‘𑀲𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀼 𑀅𑀯𑀻𑀢𑀭𑀸𑀕𑁄, 𑀫𑀼𑀳𑀼𑀢𑁆𑀢𑀦𑀓𑁆𑀔𑀢𑁆𑀢𑀧𑀣𑁂𑀲𑀼 𑀬𑀼𑀢𑁆𑀢𑁄;

𑀧𑀽𑀚𑁂𑀢𑀼 𑀦𑀁 𑀭𑀝𑁆𑀞𑀧𑀢𑀻 𑀬𑀲𑀲𑁆𑀲𑀻, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁩.

‘‘𑀅𑀚𑁆𑀛𑀸𑀬𑀓𑀁 𑀲𑀩𑁆𑀩𑀲𑀫𑀦𑁆𑀢𑀯𑁂𑀤𑀁, 𑀢𑀧𑀲𑁆𑀲𑀺𑀦𑀁 𑀫𑀜𑁆𑀜𑀢𑀼 𑀲𑀩𑁆𑀩𑀮𑁄𑀓𑁄;

𑀧𑀽𑀚𑁂𑀦𑁆𑀢𑀼 𑀦𑀁 𑀚𑀸𑀦𑀧𑀤𑀸 𑀲𑀫𑁂𑀘𑁆𑀘, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁪.

‘‘𑀘𑀢𑀼𑀲𑁆𑀲𑀤𑀁 𑀕𑀸𑀫𑀯𑀭𑀁 𑀲𑀫𑀺𑀤𑁆𑀥𑀁, 𑀤𑀺𑀦𑁆𑀦𑀜𑁆𑀳𑀺 𑀲𑁄 𑀪𑀼𑀜𑁆𑀚𑀢𑀼 𑀯𑀸𑀲𑀯𑁂𑀦;

𑀅𑀯𑀻𑀢𑀭𑀸𑀕𑁄 𑀫𑀭𑀡𑀁 𑀉𑀧𑁂𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁫.

‘‘𑀲𑁄 ¶ ¶ 𑀕𑀸𑀫𑀡𑀻 𑀳𑁄𑀢𑀼 𑀲𑀳𑀸𑀬𑀫𑀚𑁆𑀛𑁂, 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀧𑀫𑁄𑀤𑀫𑀸𑀦𑁄;

𑀲𑁄 𑀭𑀸𑀚𑀢𑁄 𑀩𑁆𑀬𑀲𑀦 𑀫𑀸𑀮𑀢𑁆𑀣 𑀓𑀺𑀜𑁆𑀘𑀺, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁬.

‘‘𑀬𑀁 ¶ 𑀏𑀓𑀭𑀸𑀚𑀸 𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀇𑀢𑁆𑀣𑀻𑀲𑀳𑀲𑁆𑀲𑀸𑀦 𑀞𑀧𑁂𑀢𑀼 𑀅𑀕𑁆𑀕𑀁;

𑀲𑀻𑀫𑀦𑁆𑀢𑀺𑀦𑀻𑀦𑀁 𑀧𑀯𑀭𑀸 𑀪𑀯𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑀸 𑀅𑀳𑀸𑀲𑀺.

𑁮𑁭.

‘‘𑀇𑀲𑀻𑀦𑀜𑁆𑀳𑀺 𑀲𑀸 𑀲𑀩𑁆𑀩𑀲𑀫𑀸𑀕𑀢𑀸𑀦𑀁, 𑀪𑀼𑀜𑁆𑀚𑁂𑀬𑁆𑀬 𑀲𑀸𑀤𑀼𑀁 𑀅𑀯𑀺𑀓𑀫𑁆𑀧𑀫𑀸𑀦𑀸;

𑀘𑀭𑀸𑀢𑀼 𑀮𑀸𑀪𑁂𑀦 𑀯𑀺𑀓𑀢𑁆𑀣𑀫𑀸𑀦𑀸, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑀸 𑀅𑀳𑀸𑀲𑀺.

𑁮𑁮.

‘‘𑀆𑀯𑀸𑀲𑀺𑀓𑁄 𑀳𑁄𑀢𑀼 𑀫𑀳𑀸𑀯𑀺𑀳𑀸𑀭𑁂, 𑀦𑀯𑀓𑀫𑁆𑀫𑀺𑀓𑁄 𑀳𑁄𑀢𑀼 𑀕𑀚𑀗𑁆𑀕𑀮𑀸𑀬𑀁;

𑀆𑀮𑁄𑀓𑀲𑀦𑁆𑀥𑀺𑀁 𑀤𑀺𑀯𑀲𑀁 𑀓𑀭𑁄𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁯.

‘‘𑀲𑁄 𑀩𑀚𑁆𑀛𑀢𑀽 𑀧𑀸𑀲𑀲𑀢𑁂𑀳𑀺 𑀙𑀩𑁆𑀪𑀺, 𑀭𑀫𑁆𑀫𑀸 𑀯𑀦𑀸 𑀦𑀺𑀬𑁆𑀬𑀢𑀼 𑀭𑀸𑀚𑀥𑀸𑀦𑀺𑀁;

𑀢𑀼𑀢𑁆𑀢𑁂𑀳𑀺 𑀲𑁄 𑀳𑀜𑁆𑀜𑀢𑀼 𑀧𑀸𑀘𑀦𑁂𑀳𑀺, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁯𑁦.

‘‘𑀅𑀮𑀓𑁆𑀓𑀫𑀸𑀮𑀻 𑀢𑀺𑀧𑀼𑀓𑀡𑁆𑀡𑀯𑀺𑀤𑁆𑀥𑁄, 𑀮𑀝𑁆𑀞𑀻𑀳𑀢𑁄 𑀲𑀧𑁆𑀧𑀫𑀼𑀔𑀁 𑀉𑀧𑁂𑀢𑀼;

𑀲𑀓𑀘𑁆𑀙𑀩𑀦𑁆𑀥𑁄 𑀯𑀺𑀲𑀺𑀔𑀁 𑀘𑀭𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀻’’𑀢𑀺.

𑀢𑀢𑁆𑀣 𑀢𑀢𑀺𑀬𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀓𑀲𑀺𑀫𑀸𑀢𑀺 𑀲𑀫𑁆𑀧𑀦𑁆𑀦𑀓𑀲𑀺𑀓𑀫𑁆𑀫𑁄. 𑀧𑀼𑀢𑁆𑀢𑁂 𑀕𑀺𑀳𑀻 𑀥𑀦𑀺𑀫𑀸 𑀲𑀩𑁆𑀩𑀓𑀸𑀫𑁂𑀢𑀺 𑀧𑀼𑀢𑁆𑀢𑁂 𑀮𑀪𑀢𑀼, 𑀕𑀺𑀳𑀻 𑀳𑁄𑀢𑀼, 𑀲𑀢𑁆𑀢𑀯𑀺𑀥𑁂𑀦 𑀭𑀢𑀦𑀥𑀦𑁂𑀦 𑀥𑀦𑀺𑀫𑀸 𑀳𑁄𑀢𑀼, 𑀭𑀽𑀧𑀸𑀤𑀺𑀪𑁂𑀤𑁂 𑀲𑀩𑁆𑀩𑀓𑀸𑀫𑁂 𑀮𑀪𑀢𑀼. 𑀯𑀬𑀁 𑀅𑀧𑀲𑁆𑀲𑀦𑁆𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑁆𑀚𑀸𑀦𑀼𑀭𑀽𑀧𑀫𑁆𑀧𑀺 𑀅𑀢𑁆𑀢𑀦𑁄 𑀯𑀬𑀁 𑀅𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑀺𑀤𑁆𑀥𑀁 ¶ 𑀖𑀭𑀫𑁂𑀯 𑀆𑀯𑀲𑀢𑀽𑀢𑀺. 𑀇𑀤𑀁 𑀲𑁄 ‘‘𑀧𑀜𑁆𑀘𑀓𑀸𑀫𑀕𑀼𑀡𑀕𑀺𑀤𑁆𑀥𑁄 𑀓𑀸𑀫𑀕𑀼𑀡𑀯𑀺𑀧𑁆𑀧𑀬𑁄𑀕𑁂𑀦 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀓𑀣𑁂𑀲𑀺.

𑀘𑀢𑀼𑀢𑁆𑀣𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 ¶ 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀭𑀸𑀚𑀽𑀦𑀁 𑀅𑀦𑁆𑀢𑀭𑁂 𑀅𑀪𑀺𑀭𑀸𑀚𑀸𑀢𑀺. 𑀇𑀤𑀁 𑀲𑁄 ‘‘𑀇𑀲𑁆𑀲𑀭𑀸𑀦𑀁 𑀦𑀸𑀫 𑀇𑀲𑁆𑀲𑀭𑀺𑀬𑁂 𑀧𑀭𑀺𑀕𑀮𑀺𑀢𑁂 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀭𑀚𑁆𑀚𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀓𑀣𑁂𑀲𑀺. 𑀧𑀜𑁆𑀘𑀫𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀅𑀯𑀻𑀢𑀭𑀸𑀕𑁄𑀢𑀺 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀢𑀡𑁆𑀳𑀸𑀬 𑀲𑀢𑀡𑁆𑀳𑁄𑀢𑀺. 𑀇𑀤𑀁 𑀲𑁄 ‘‘𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀧𑀭𑀺𑀕𑀮𑀺𑀢𑁂 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀓𑀣𑁂𑀲𑀺. 𑀙𑀝𑁆𑀞𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀢𑀧𑀲𑁆𑀲𑀺𑀦𑀦𑁆𑀢𑀺 𑀢𑀧𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀢𑀁 𑀫𑀜𑁆𑀜𑀢𑀼. 𑀇𑀤𑀁 𑀲𑁄 ‘‘𑀮𑀸𑀪𑀲𑀓𑁆𑀓𑀸𑀭𑀸𑀧𑀕𑀫𑁂𑀦 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀮𑀸𑀪𑀲𑀓𑁆𑀓𑀸𑀭𑀕𑀭𑀳𑀯𑀲𑁂𑀦 𑀓𑀣𑁂𑀲𑀺.

𑀲𑀳𑀸𑀬𑀢𑀸𑀧𑀲𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀘𑀢𑀼𑀲𑁆𑀲𑀤𑀦𑁆𑀢𑀺 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀢𑀸𑀬 𑀫𑀦𑀼𑀲𑁆𑀲𑁂𑀳𑀺, 𑀧𑀳𑀽𑀢𑀥𑀜𑁆𑀜𑀢𑀸𑀬 𑀥𑀜𑁆𑀜𑁂𑀦, 𑀲𑀼𑀮𑀪𑀤𑀸𑀭𑀼𑀢𑀸𑀬 𑀤𑀸𑀭𑀽𑀳𑀺, 𑀲𑀫𑁆𑀧𑀦𑁆𑀦𑁄𑀤𑀓𑀢𑀸𑀬 𑀉𑀤𑀓𑁂𑀦𑀸𑀢𑀺 𑀘𑀢𑀽𑀳𑀺 𑀉𑀲𑁆𑀲𑀦𑁆𑀦𑀁, 𑀘𑀢𑀼𑀲𑁆𑀲𑀤𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ¶ 𑀅𑀢𑁆𑀣𑁄. 𑀯𑀸𑀲𑀯𑁂𑀦𑀸𑀢𑀺 𑀯𑀸𑀲𑀯𑁂𑀦 𑀤𑀺𑀦𑁆𑀦𑀁 𑀯𑀺𑀬 𑀅𑀘𑀮𑀁, 𑀯𑀸𑀲𑀯𑀢𑁄 𑀮𑀤𑁆𑀥𑀯𑀭𑀸𑀦𑀼𑀪𑀸𑀯𑁂𑀦 𑀏𑀓𑀁 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀅𑀯𑀻𑀢𑀭𑀸𑀕𑁄𑀢𑀺 𑀓𑀤𑁆𑀤𑀫𑁂 𑀲𑀽𑀓𑀭𑁄 𑀯𑀺𑀬 𑀓𑀸𑀫𑀧𑀗𑁆𑀓𑁂 𑀦𑀺𑀫𑀼𑀕𑁆𑀕𑁄𑀯 𑀳𑀼𑀢𑁆𑀯𑀸. 𑀇𑀢𑀺 𑀲𑁄𑀧𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳.

𑀤𑀸𑀲𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀕𑀸𑀫𑀡𑀻𑀢𑀺 𑀕𑀸𑀫𑀚𑁂𑀝𑁆𑀞𑀓𑁄. 𑀅𑀬𑀫𑁆𑀧𑀺 𑀓𑀸𑀫𑁂 𑀕𑀭𑀳𑀦𑁆𑀢𑁄𑀬𑁂𑀯 𑀏𑀯𑀫𑀸𑀳. 𑀓𑀜𑁆𑀘𑀦𑀤𑁂𑀯𑀺𑀬𑀸 𑀯𑀼𑀢𑁆𑀢𑀕𑀸𑀣𑀸𑀬 𑀬𑀦𑁆𑀢𑀺 𑀬𑀁 𑀇𑀢𑁆𑀣𑀺𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀭𑀸𑀚𑀸𑀢𑀺 𑀅𑀕𑁆𑀕𑀭𑀸𑀚𑀸. 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀦𑁆𑀢𑀺 𑀯𑀘𑀦𑀫𑀝𑁆𑀞𑀢𑀸𑀬 𑀯𑀼𑀢𑁆𑀢𑀁, 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀻𑀫𑀦𑁆𑀢𑀺𑀦𑀻𑀦𑀦𑁆𑀢𑀺 𑀲𑀻𑀫𑀦𑁆𑀢𑀥𑀭𑀸𑀦𑀁 𑀇𑀢𑁆𑀣𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺 𑀲𑀸 𑀇𑀢𑁆𑀣𑀺𑀪𑀸𑀯𑁂 𑀞𑀢𑁆𑀯𑀸𑀧𑀺 𑀤𑀼𑀕𑁆𑀕𑀦𑁆𑀥𑀕𑀽𑀣𑀭𑀸𑀲𑀺𑀁 𑀯𑀺𑀬 𑀓𑀸𑀫𑁂 𑀕𑀭𑀳𑀦𑁆𑀢𑀻𑀬𑁂𑀯 𑀏𑀯𑀫𑀸𑀳. 𑀤𑀸𑀲𑀺𑀬𑀸 𑀯𑀼𑀢𑁆𑀢𑀕𑀸𑀣𑀸𑀬 𑀲𑀩𑁆𑀩𑀲𑀫𑀸𑀕𑀢𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀯𑀺𑀓𑀫𑁆𑀧𑀫𑀸𑀦𑀸 𑀅𑀦𑁄𑀲𑀓𑁆𑀓𑀫𑀸𑀦𑀸 𑀲𑀸𑀤𑀼𑀭𑀲𑀁 𑀪𑀼𑀜𑁆𑀚𑀢𑀽𑀢𑀺 𑀅𑀢𑁆𑀣𑁄. 𑀤𑀸𑀲𑀻𑀦𑀁 𑀓𑀺𑀭 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑀁 𑀦𑀸𑀫 𑀅𑀧𑁆𑀧𑀺𑀬𑀁. 𑀇𑀢𑀺 𑀲𑀸 𑀅𑀢𑁆𑀢𑀦𑁄 𑀅𑀧𑁆𑀧𑀺𑀬𑀢𑀸𑀬 𑀏𑀯𑀫𑀸𑀳. 𑀘𑀭𑀸𑀢𑀽𑀢𑀺 𑀘𑀭𑀢𑀼. 𑀮𑀸𑀪𑁂𑀦 𑀯𑀺𑀓𑀢𑁆𑀣𑀫𑀸𑀦𑀸𑀢𑀺 𑀮𑀸𑀪𑀳𑁂𑀢𑀼 𑀓𑀼𑀳𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀦𑁆𑀢𑀻 𑀘𑀭𑀢𑀽𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀸 𑀤𑀸𑀲𑀺𑀪𑀸𑀯𑁂 𑀞𑀺𑀢𑀸𑀧𑀺 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑁂 𑀕𑀭𑀳𑀢𑀺.

𑀤𑁂𑀯𑀢𑀸𑀬 ¶ 𑀯𑀼𑀢𑁆𑀢𑀕𑀸𑀣𑀸𑀬 𑀆𑀯𑀸𑀲𑀺𑀓𑁄𑀢𑀺 𑀆𑀯𑀸𑀲𑀚𑀕𑁆𑀕𑀦𑀓𑁄. 𑀕𑀚𑀗𑁆𑀕𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀢𑁆𑀣 𑀓𑀺𑀭 𑀤𑀩𑁆𑀩𑀲𑀫𑁆𑀪𑀸𑀭𑀸 𑀲𑀼𑀮𑀪𑀸. 𑀆𑀮𑁄𑀓𑀲𑀦𑁆𑀥𑀺𑀁 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑁂𑀦𑁂𑀯 𑀯𑀸𑀢𑀧𑀸𑀦𑀁 𑀓𑀭𑁄𑀢𑀼. 𑀲𑁄 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀕𑀚𑀗𑁆𑀕𑀮𑀦𑀕𑀭𑀁 𑀦𑀺𑀲𑁆𑀲𑀸𑀬 𑀬𑁄𑀚𑀦𑀺𑀓𑁂 𑀚𑀺𑀡𑁆𑀡𑀫𑀳𑀸𑀯𑀺𑀳𑀸𑀭𑁂 𑀆𑀯𑀸𑀲𑀺𑀓𑀲𑀗𑁆𑀖𑀢𑁆𑀣𑁂𑀭𑁄 𑀳𑀼𑀢𑁆𑀯𑀸 𑀚𑀺𑀡𑁆𑀡𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀬𑁂𑀯 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺. 𑀢𑀲𑁆𑀫𑀸 𑀢𑀤𑁂𑀯 𑀤𑀼𑀓𑁆𑀔𑀁 𑀆𑀭𑀩𑁆𑀪 𑀏𑀯𑀫𑀸𑀳. 𑀳𑀢𑁆𑀣𑀺𑀦𑀸 𑀯𑀼𑀢𑁆𑀢𑀕𑀸𑀣𑀸𑀬 𑀧𑀸𑀲𑀲𑀢𑁂𑀳𑀻𑀢𑀺 𑀩𑀳𑀽𑀳𑀺 𑀧𑀸𑀲𑁂𑀳𑀺. 𑀙𑀩𑁆𑀪𑀻𑀢𑀺 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀕𑀻𑀯𑀸𑀬 𑀓𑀝𑀺𑀪𑀸𑀕𑁂 𑀘𑀸𑀢𑀺 𑀙𑀲𑀼 𑀞𑀸𑀦𑁂𑀲𑀼. 𑀢𑀼𑀢𑁆𑀢𑁂𑀳𑀻𑀢𑀺 𑀤𑁆𑀯𑀺𑀓𑀡𑁆𑀟𑀓𑀸𑀳𑀺 𑀤𑀻𑀖𑀮𑀝𑁆𑀞𑀻𑀳𑀺. 𑀧𑀸𑀘𑀦𑁂𑀳𑀻𑀢𑀺 𑀤𑀲𑀧𑀸𑀘𑀦𑁂𑀳𑀺 𑀅𑀗𑁆𑀓𑀼𑀲𑁂𑀳𑀺 𑀯𑀸. 𑀲𑁄 𑀓𑀺𑀭 𑀅𑀢𑁆𑀢𑀦𑁄 𑀅𑀦𑀼𑀪𑀽𑀢𑀤𑀼𑀓𑁆𑀔𑀜𑁆𑀜𑁂𑀯 𑀆𑀭𑀩𑁆𑀪 𑀏𑀯𑀫𑀸𑀳.

𑀯𑀸𑀦𑀭𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀅𑀮𑀓𑁆𑀓𑀫𑀸𑀮𑀻𑀢𑀺 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀓𑀡𑁆𑀞𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀸𑀬 𑀅𑀮𑀓𑁆𑀓𑀫𑀸𑀮𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀢𑀺𑀧𑀼𑀓𑀡𑁆𑀡𑀯𑀺𑀤𑁆𑀥𑁄𑀢𑀺 𑀢𑀺𑀧𑀼𑀧𑀺𑀴𑀦𑁆𑀥𑀦𑁂𑀦 𑀧𑀺𑀴𑀦𑁆𑀥𑀓𑀡𑁆𑀡𑁄. 𑀮𑀝𑁆𑀞𑀻𑀳𑀢𑁄𑀢𑀺 𑀲𑀧𑁆𑀧𑀓𑀻𑀴𑀁 𑀲𑀺𑀓𑁆𑀔𑀸𑀧𑀬𑀫𑀸𑀦𑁄 𑀮𑀝𑁆𑀞𑀺𑀬𑀸 𑀳𑀢𑁄 𑀳𑀼𑀢𑁆𑀯𑀸. 𑀏𑀲𑁄𑀧𑀺 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀳𑀢𑁆𑀣𑁂 𑀅𑀢𑁆𑀢𑀦𑁄 𑀅𑀦𑀼𑀪𑀽𑀢𑀤𑀼𑀓𑁆𑀔𑀫𑁂𑀯 𑀲𑀦𑁆𑀥𑀸𑀬 𑀏𑀯𑀫𑀸𑀳.

𑀏𑀯𑀁 ¶ 𑀢𑁂𑀳𑀺 𑀢𑁂𑀭𑀲𑀳𑀺 𑀚𑀦𑁂𑀳𑀺 𑀲𑀧𑀣𑁂 𑀓𑀢𑁂 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀤𑀸𑀘𑀺 𑀇𑀫𑁂 ‘𑀅𑀬𑀁 𑀅𑀦𑀝𑁆𑀞𑀫𑁂𑀯 ¶ 𑀦𑀝𑁆𑀞𑀦𑁆𑀢𑀺 𑀓𑀣𑁂𑀢𑀻’𑀢𑀺 𑀫𑀬𑀺 𑀆𑀲𑀗𑁆𑀓𑀁 𑀓𑀭𑁂𑀬𑁆𑀬𑀼𑀁, 𑀅𑀳𑀫𑁆𑀧𑀺 𑀲𑀧𑀣𑀁 𑀓𑀭𑁄𑀫𑀻’’𑀢𑀺. 𑀅𑀣 𑀦𑀁 𑀓𑀭𑁄𑀦𑁆𑀢𑁄 𑀘𑀼𑀤𑁆𑀤𑀲𑀫𑀁 𑀕𑀸𑀣𑀫𑀸𑀳 𑁋

𑁯𑁧.

‘‘𑀬𑁄 𑀯𑁂 𑀅𑀦𑀝𑁆𑀞𑀁𑀯 𑀦𑀝𑁆𑀞𑀦𑁆𑀢𑀺 𑀘𑀸𑀳, 𑀓𑀸𑀫𑁂𑀯 𑀲𑁄 𑀮𑀪𑀢𑀁 𑀪𑀼𑀜𑁆𑀚𑀢𑀜𑁆𑀘;

𑀅𑀕𑀸𑀭𑀫𑀚𑁆𑀛𑁂 𑀫𑀭𑀡𑀁 𑀉𑀧𑁂𑀢𑀼, 𑀬𑁄 𑀯𑀸 𑀪𑁄𑀦𑁆𑀢𑁄 𑀲𑀗𑁆𑀓𑀢𑀺 𑀓𑀜𑁆𑀘𑀺𑀤𑁂𑀯𑀸’’𑀢𑀺.

𑀢𑀢𑁆𑀣 𑀪𑁄𑀦𑁆𑀢𑁄𑀢𑀺 𑀆𑀮𑀧𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀯𑀦𑁆𑀢𑁄 𑀬𑁄 𑀅𑀦𑀝𑁆𑀞𑁂 𑀓𑁄𑀝𑁆𑀞𑀸𑀲𑁂 ‘‘𑀦𑀝𑁆𑀞𑀁 𑀫𑁂’’𑀢𑀺 𑀯𑀤𑀢𑀺, 𑀬𑁄 𑀯𑀸 𑀢𑀼𑀫𑁆𑀳𑁂𑀲𑀼 𑀓𑀜𑁆𑀘𑀺 𑀆𑀲𑀗𑁆𑀓𑀢𑀺, 𑀲𑁄 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀮𑀪𑀢𑀼 𑀘𑁂𑀯 𑀪𑀼𑀜𑁆𑀚𑀢𑀼 𑀘, 𑀭𑀫𑀡𑀻𑀬𑀫𑁂𑀯 𑀧𑀩𑁆𑀩𑀚𑁆𑀚𑀁 𑀅𑀮𑀪𑀺𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂𑀬𑁂𑀯 𑀫𑀭𑀢𑀽𑀢𑀺.

𑀏𑀯𑀁 ¶ 𑀇𑀲𑀻𑀳𑀺 𑀲𑀧𑀣𑁂 𑀓𑀢𑁂 𑀲𑀓𑁆𑀓𑁄 𑀪𑀸𑀬𑀺𑀢𑁆𑀯𑀸 ‘‘𑀅𑀳𑀁 𑀇𑀫𑁂 𑀯𑀻𑀫𑀁𑀲𑀦𑁆𑀢𑁄 𑀪𑀺𑀲𑀸𑀦𑀺 𑀅𑀦𑁆𑀢𑀭𑀥𑀸𑀧𑁂𑀲𑀺𑀁. 𑀇𑀫𑁂 𑀘 𑀙𑀟𑁆𑀟𑀺𑀢𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀓𑀸𑀫𑁂 𑀕𑀭𑀳𑀦𑁆𑀢𑀸 𑀲𑀧𑀣𑀁 𑀓𑀭𑁄𑀦𑁆𑀢𑀺, 𑀓𑀸𑀫𑁂 𑀕𑀭𑀳𑀓𑀸𑀭𑀡𑀁 𑀢𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁨.

‘‘𑀬𑀤𑁂𑀲𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂, 𑀇𑀝𑁆𑀞𑀜𑁆𑀘 𑀓𑀦𑁆𑀢𑀜𑁆𑀘 𑀩𑀳𑀽𑀦𑀫𑁂𑀢𑀁;

𑀧𑀺𑀬𑀁 𑀫𑀦𑀼𑀜𑁆𑀜𑀁 𑀘𑀺𑀥 𑀚𑀻𑀯𑀮𑁄𑀓𑁂, 𑀓𑀲𑁆𑀫𑀸 𑀇𑀲𑀬𑁄 𑀦𑀧𑁆𑀧𑀲𑀁𑀲𑀦𑁆𑀢𑀺 𑀓𑀸𑀫𑁂’’𑀢𑀺.

𑀢𑀢𑁆𑀣 𑀬𑀤𑁂𑀲𑀫𑀸𑀦𑀸𑀢𑀺 𑀬𑀁 𑀯𑀢𑁆𑀣𑀼𑀓𑀸𑀫𑀁 𑀓𑀺𑀮𑁂𑀲𑀓𑀸𑀫𑀜𑁆𑀘 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀲𑀫𑀯𑀺𑀲𑀫𑀓𑀫𑁆𑀫𑁂𑀳𑀺 𑀧𑀭𑀺𑀬𑁂𑀲𑀫𑀸𑀦𑀸 𑀲𑀢𑁆𑀢𑀸 𑀮𑁄𑀓𑁂 𑀯𑀺𑀘𑀭𑀦𑁆𑀢𑀺, 𑀏𑀢𑀁 𑀩𑀳𑀽𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀝𑁆𑀞𑀜𑁆𑀘 𑀓𑀦𑁆𑀢𑀜𑁆𑀘 𑀧𑀺𑀬𑀜𑁆𑀘 𑀫𑀦𑀼𑀜𑁆𑀜𑀜𑁆𑀘, 𑀓𑀲𑁆𑀫𑀸 𑀇𑀲𑀬𑁄 𑀦𑀧𑁆𑀧𑀲𑀁𑀲𑀦𑁆𑀢𑀺 𑀓𑀸𑀫𑁂𑀢𑀺 𑀅𑀢𑁆𑀣𑁄. ‘‘𑀓𑀸𑀫𑁂’’𑀢𑀺 𑀇𑀫𑀺𑀦𑀸 𑀢𑀁 𑀯𑀢𑁆𑀣𑀼𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺.

𑀅𑀣𑀲𑁆𑀲 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁩.

‘‘𑀓𑀸𑀫𑁂𑀲𑀼 𑀯𑁂 𑀳𑀜𑁆𑀜𑀭𑁂 𑀩𑀚𑁆𑀛𑀭𑁂 𑀘, 𑀓𑀸𑀫𑁂𑀲𑀼 𑀤𑀼𑀓𑁆𑀔𑀜𑁆𑀘 𑀪𑀬𑀜𑁆𑀘 𑀚𑀸𑀢𑀁;

𑀓𑀸𑀫𑁂𑀲𑀼 𑀪𑀽𑀢𑀸𑀥𑀺𑀧𑀢𑀻 𑀧𑀫𑀢𑁆𑀢𑀸, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀫𑁄𑀳𑀸.

𑁯𑁪.

‘‘𑀢𑁂 𑀧𑀸𑀧𑀥𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺;

𑀆𑀤𑀻𑀦𑀯𑀁 ¶ 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀢𑀲𑁆𑀫𑀸 𑀇𑀲𑀬𑁄 𑀦𑀧𑁆𑀧𑀲𑀁𑀲𑀦𑁆𑀢𑀺 𑀓𑀸𑀫𑁂’’𑀢𑀺.

𑀢𑀢𑁆𑀣 ¶ 𑀓𑀸𑀫𑁂𑀲𑀽𑀢𑀺 𑀓𑀸𑀫𑀳𑁂𑀢𑀼, 𑀓𑀸𑀫𑁂 𑀦𑀺𑀲𑁆𑀲𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀳𑀜𑁆𑀜𑀭𑁂𑀢𑀺 𑀤𑀡𑁆𑀟𑀸𑀤𑀻𑀳𑀺 𑀳𑀜𑁆𑀜𑀦𑁆𑀢𑀺. 𑀩𑀚𑁆𑀛𑀭𑁂𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀚𑁆𑀛𑀦𑁆𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁. 𑀪𑀬𑀦𑁆𑀢𑀺 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀪𑀬𑀁. 𑀪𑀽𑀢𑀸𑀥𑀺𑀧𑀢𑀻𑀢𑀺 𑀲𑀓𑁆𑀓𑀁 𑀆𑀮𑀧𑀢𑀺. 𑀆𑀤𑀻𑀦𑀯𑀦𑁆𑀢𑀺 𑀏𑀯𑀭𑀽𑀧𑀁 𑀤𑁄𑀲𑀁. 𑀲𑁄 𑀧𑀦𑁂𑀲 𑀆𑀤𑀻𑀦𑀯𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀼𑀢𑁆𑀢𑁂𑀳𑀺 (𑀫. 𑀦𑀺. 𑁧.𑁧𑁬𑁩-𑁧𑁮𑁦) 𑀤𑀻𑀧𑁂𑀢𑀩𑁆𑀩𑁄.

𑀲𑀓𑁆𑀓𑁄 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁫.

‘‘𑀯𑀻𑀫𑀁𑀲𑀫𑀸𑀦𑁄 𑀇𑀲𑀺𑀦𑁄 𑀪𑀺𑀲𑀸𑀦𑀺, 𑀢𑀻𑀭𑁂 𑀕𑀳𑁂𑀢𑁆𑀯𑀸𑀦 𑀣𑀮𑁂 𑀦𑀺𑀥𑁂𑀲𑀺𑀁;

𑀲𑀼𑀤𑁆𑀥𑀸 𑀅𑀧𑀸𑀧𑀸 𑀇𑀲𑀬𑁄 𑀯𑀲𑀦𑁆𑀢𑀺, 𑀏𑀢𑀸𑀦𑀺 𑀢𑁂 𑀩𑁆𑀭𑀳𑁆𑀫𑀘𑀸𑀭𑀻 𑀪𑀺𑀲𑀸𑀦𑀻’’𑀢𑀺.

𑀢𑀢𑁆𑀣 𑀯𑀺𑀫𑀁𑀲𑀫𑀸𑀦𑁄𑀢𑀺 𑀪𑀦𑁆𑀢𑁂, 𑀅𑀳𑀁 ‘‘𑀇𑀫𑁂 𑀇𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑀸 𑀯𑀸, 𑀦𑁄 𑀯𑀸’’𑀢𑀺 𑀯𑀻𑀫𑀁𑀲𑀦𑁆𑀢𑁄. 𑀇𑀲𑀺𑀦𑁄𑀢𑀺 𑀢𑀯 𑀫𑀳𑁂𑀲𑀺𑀦𑁄 𑀲𑀦𑁆𑀢𑀓𑀸𑀦𑀺 𑀪𑀺𑀲𑀸𑀦𑀺. 𑀢𑀻𑀭𑁂 𑀕𑀳𑁂𑀢𑁆𑀯𑀸𑀦𑀸𑀢𑀺 𑀢𑀻𑀭𑁂 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀣𑀮𑁂 𑀏𑀓𑀫𑀦𑁆𑀢𑁂 𑀦𑀺𑀥𑁂𑀲𑀺𑀁. 𑀲𑀼𑀤𑁆𑀥𑀸𑀢𑀺 𑀇𑀤𑀸𑀦𑀺 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀧𑀣𑀓𑀺𑀭𑀺𑀬𑀸𑀬 𑀜𑀸𑀢𑀁 ‘‘𑀇𑀫𑁂 𑀇𑀲𑀬𑁄 𑀲𑀼𑀤𑁆𑀥𑀸 𑀅𑀧𑀸𑀧𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋

𑁯𑁬.

‘‘𑀦 𑀢𑁂 𑀦𑀝𑀸 𑀦𑁄 𑀧𑀦 𑀓𑀻𑀴𑀦𑁂𑀬𑁆𑀬𑀸, 𑀦 𑀩𑀦𑁆𑀥𑀯𑀸 𑀦𑁄 𑀧𑀦 𑀢𑁂 𑀲𑀳𑀸𑀬𑀸;

𑀓𑀺𑀲𑁆𑀫𑀺𑀁 𑀯𑀼𑀧𑀢𑁆𑀣𑀫𑁆𑀪 𑀲𑀳𑀲𑁆𑀲𑀦𑁂𑀢𑁆𑀢, 𑀇𑀲𑀻𑀳𑀺 𑀢𑁆𑀯𑀁 𑀓𑀻𑀴𑀲𑀺 𑀤𑁂𑀯𑀭𑀸𑀚𑀸’’𑀢𑀺.

𑀢𑀢𑁆𑀣 𑀦 𑀢𑁂 𑀦𑀝𑀸 𑀦𑁄𑀢𑀺 𑀤𑁂𑀯𑀭𑀸𑀚, 𑀫𑀬𑀁 𑀢𑀯 𑀦𑀝𑀸 𑀯𑀸 𑀓𑀻𑀴𑀺𑀢𑀩𑁆𑀩𑀬𑀼𑀢𑁆𑀢𑀓𑀸 𑀯𑀸 𑀓𑁂𑀘𑀺 𑀦 𑀳𑁄𑀫, 𑀦𑀸𑀧𑀺 𑀢𑀯 𑀜𑀸𑀢𑀓𑀸, 𑀦 𑀲𑀳𑀸𑀬𑀸, 𑀅𑀣 𑀢𑁆𑀯𑀁 𑀓𑀺𑀁 𑀯𑀸 𑀉𑀧𑀢𑁆𑀣𑀫𑁆𑀪𑀁 𑀓𑀢𑁆𑀯𑀸 𑀓𑀺𑀁 𑀦𑀺𑀲𑁆𑀲𑀸𑀬 𑀇𑀲𑀻𑀳𑀺 𑀲𑀤𑁆𑀥𑀺𑀁 𑀓𑀻𑀴𑀲𑀻𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀲𑀓𑁆𑀓𑁄 𑀔𑀫𑀸𑀧𑁂𑀦𑁆𑀢𑁄 𑀯𑀻𑀲𑀢𑀺𑀫𑀁 𑀕𑀸𑀣𑀫𑀸𑀳 𑁋

𑁯𑁭.

‘‘𑀆𑀘𑀭𑀺𑀬𑁄 𑀫𑁂𑀲𑀺 𑀧𑀺𑀢𑀸 𑀘 𑀫𑀬𑁆𑀳𑀁, 𑀏𑀲𑀸 𑀧𑀢𑀺𑀝𑁆𑀞𑀸 𑀔𑀮𑀺𑀢𑀲𑁆𑀲 𑀩𑁆𑀭𑀳𑁆𑀫𑁂;

𑀏𑀓𑀸𑀧𑀭𑀸𑀥𑀁 𑀔𑀫 𑀪𑀽𑀭𑀺𑀧𑀜𑁆𑀜, 𑀦 𑀧𑀡𑁆𑀟𑀺𑀢𑀸 𑀓𑁄𑀥𑀩𑀮𑀸 𑀪𑀯𑀦𑁆𑀢𑀻’’𑀢𑀺.

𑀢𑀢𑁆𑀣 ¶ 𑀏𑀲𑀸 𑀧𑀢𑀺𑀝𑁆𑀞𑀸𑀢𑀺 𑀏𑀲𑀸 𑀢𑀯 𑀧𑀸𑀤𑀘𑁆𑀙𑀸𑀬𑀸 𑀅𑀚𑁆𑀚 𑀫𑀫 𑀔𑀮𑀺𑀢𑀲𑁆𑀲 𑀅𑀧𑀭𑀤𑁆𑀥𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀢𑀼. 𑀓𑁄𑀥𑀩𑀮𑀸𑀢𑀺 𑀧𑀡𑁆𑀟𑀺𑀢𑀸 𑀦𑀸𑀫 𑀔𑀦𑁆𑀢𑀺𑀩𑀮𑀸 𑀪𑀯𑀦𑁆𑀢𑀺, 𑀦 𑀓𑁄𑀥𑀩𑀮𑀸𑀢𑀺.

𑀅𑀣 ¶ ¶ 𑀫𑀳𑀸𑀲𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀔𑀫𑀺𑀢𑁆𑀯𑀸 𑀲𑀬𑀁 𑀇𑀲𑀺𑀕𑀡𑀁 𑀔𑀫𑀸𑀧𑁂𑀦𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁮.

‘‘𑀲𑀼𑀯𑀸𑀲𑀺𑀢𑀁 𑀇𑀲𑀺𑀦𑀁 𑀏𑀓𑀭𑀢𑁆𑀢𑀁, 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀤𑁆𑀤𑀲𑀸𑀫;

𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀼𑀫𑀦𑀸 𑀪𑀯𑀦𑁆𑀢𑀼, 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀘𑁆𑀘𑀼𑀧𑀸𑀤𑀻 𑀪𑀺𑀲𑀸𑀦𑀻’’𑀢𑀺.

𑀢𑀢𑁆𑀣 𑀲𑀼𑀯𑀸𑀲𑀺𑀢𑀁 𑀇𑀲𑀺𑀦𑀁 𑀏𑀓𑀭𑀢𑁆𑀢𑀦𑁆𑀢𑀺 𑀆𑀬𑀲𑁆𑀫𑀦𑁆𑀢𑀸𑀦𑀁 𑀇𑀲𑀻𑀦𑀁 𑀏𑀓𑀭𑀢𑁆𑀢𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀯𑀲𑀺𑀢𑀁 𑀲𑀼𑀯𑀲𑀺𑀢𑀫𑁂𑀯. 𑀓𑀺𑀁𑀓𑀸𑀭𑀡𑀸? 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀁 𑀅𑀤𑁆𑀤𑀲𑀸𑀫, 𑀲𑀘𑁂 𑀳𑀺 𑀫𑀬𑀁 𑀦𑀕𑀭𑁂 𑀅𑀯𑀲𑀺𑀫𑁆𑀳, 𑀇𑀫𑀁 𑀦 𑀅𑀤𑁆𑀤𑀲𑀸𑀫. 𑀪𑁄𑀦𑁆𑀢𑁄𑀢𑀺 𑀪𑀯𑀦𑁆𑀢𑁄 𑀲𑀩𑁆𑀩𑁂𑀧𑀺 𑀲𑀼𑀫𑀦𑀸 𑀪𑀯𑀦𑁆𑀢𑀼, 𑀢𑀼𑀲𑁆𑀲𑀦𑁆𑀢𑀼, 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀔𑀫𑀦𑁆𑀢𑀼. 𑀓𑀺𑀁𑀓𑀸𑀭𑀡𑀸? 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀘𑁆𑀘𑀼𑀧𑀸𑀤𑀻 𑀪𑀺𑀲𑀸𑀦𑀺, 𑀬𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀪𑀺𑀲𑀸𑀦𑀺 𑀧𑀝𑀺𑀮𑀪𑀻𑀢𑀺.

𑀲𑀓𑁆𑀓𑁄 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀇𑀲𑀺𑀕𑀡𑁄𑀧𑀺 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀲𑀧𑀣𑀁 𑀓𑀢𑁆𑀯𑀸 𑀓𑀺𑀮𑁂𑀲𑁂 𑀧𑀚𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀦𑁆𑀢𑁄 𑀧𑀼𑀦 𑀲𑀢𑁆𑀣𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁯.

‘‘𑀅𑀳𑀜𑁆𑀘 𑀲𑀸𑀭𑀺𑀧𑀼𑀢𑁆𑀢𑁄 𑀘, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀓𑀲𑁆𑀲𑀧𑁄;

𑀅𑀦𑀼𑀭𑀼𑀤𑁆𑀥𑁄 𑀧𑀼𑀡𑁆𑀡𑁄 𑀆𑀦𑀦𑁆𑀤𑁄, 𑀢𑀤𑀸𑀲𑀼𑀁 𑀲𑀢𑁆𑀢 𑀪𑀸𑀢𑀭𑁄.

𑁧𑁦𑁦.

‘‘𑀪𑀕𑀺𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀤𑀸𑀲𑀻 𑀔𑀼𑀚𑁆𑀚𑀼𑀢𑁆𑀢𑀭𑀸 𑀢𑀤𑀸;

𑀘𑀺𑀢𑁆𑀢𑁄 𑀕𑀳𑀧𑀢𑀺 𑀤𑀸𑀲𑁄, 𑀬𑀓𑁆𑀔𑁄 𑀲𑀸𑀢𑀸𑀕𑀺𑀭𑁄 𑀢𑀤𑀸.

𑁧𑁦𑁧.

‘‘𑀧𑀸𑀮𑀺𑀮𑁂𑀬𑁆𑀬𑁄 𑀢𑀤𑀸 𑀦𑀸𑀕𑁄, 𑀫𑀥𑀼𑀤𑁄 𑀲𑁂𑀝𑁆𑀞𑀯𑀸𑀦𑀭𑁄;

𑀓𑀸𑀴𑀼𑀤𑀸𑀬𑀻 𑀢𑀤𑀸 𑀲𑀓𑁆𑀓𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺.

𑀪𑀺𑀲𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁪𑁮𑁯] 𑁬. 𑀲𑀼𑀭𑀼𑀘𑀺𑀚𑀸𑀢𑀓𑀯𑀡𑁆𑀡𑀦𑀸

𑀫𑀳𑁂𑀲𑀻 ¶ ¶ 𑀲𑀼𑀭𑀼𑀘𑀺𑀦𑁄 𑀪𑀭𑀺𑀬𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀮𑀤𑁆𑀥𑁂 𑀅𑀝𑁆𑀞 𑀯𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸 𑀳𑀺 𑀏𑀓𑀤𑀺𑀯𑀲𑀁 𑀚𑁂𑀢𑀯𑀦𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲𑀸 𑀧𑀦 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀘𑀸𑀢𑀼𑀤𑁆𑀤𑀻𑀧𑀺𑀓𑁄 𑀫𑀳𑀸𑀫𑁂𑀖𑁄 𑀧𑀸𑀯𑀲𑁆𑀲𑀺 ¶ . 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀣𑀸, 𑀪𑀺𑀓𑁆𑀔𑀯𑁂, 𑀚𑁂𑀢𑀯𑀦𑁂 𑀯𑀲𑁆𑀲𑀢𑀺, 𑀏𑀯𑀁 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀯𑀲𑁆𑀲𑀢𑀺, 𑀑𑀯𑀲𑁆𑀲𑀸𑀧𑁂𑀣, 𑀪𑀺𑀓𑁆𑀔𑀯𑁂, 𑀓𑀸𑀬𑀁, 𑀅𑀬𑀁 𑀧𑀘𑁆𑀙𑀺𑀫𑀓𑁄 𑀘𑀸𑀢𑀼𑀤𑁆𑀤𑀻𑀧𑀺𑀓𑁄 𑀫𑀳𑀸𑀫𑁂𑀖𑁄’’𑀢𑀺 𑀯𑀢𑁆𑀯𑀸 𑀑𑀯𑀲𑁆𑀲𑀸𑀧𑀺𑀢𑀓𑀸𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀇𑀤𑁆𑀥𑀺𑀩𑀮𑁂𑀦 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀲𑀸𑀔𑀸𑀬 𑀓𑁄𑀝𑁆𑀞𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀉𑀧𑀸𑀲𑀺𑀓𑀸 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀡𑀼𑀓𑀫𑀢𑁆𑀢𑁂𑀲𑀼𑀧𑀺 𑀑𑀖𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀓𑀝𑀺𑀫𑀢𑁆𑀢𑁂𑀲𑀼𑀧𑀺 𑀑𑀖𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀦 𑀳𑀺 𑀦𑀸𑀫 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀧𑀸𑀤𑀸 𑀯𑀸 𑀘𑀻𑀯𑀭𑀸𑀦𑀺 𑀯𑀸 𑀅𑀮𑁆𑀮𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀳𑀝𑁆𑀞𑀸 𑀉𑀤𑀕𑁆𑀕𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀝𑁆𑀞𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀸𑀦𑀺 𑀬𑀸𑀘𑀸𑀫𑀻’’𑀢𑀺. ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀯𑀺𑀲𑀸𑀔𑁂, 𑀢𑀣𑀸𑀕𑀢𑀸’’𑀢𑀺. ‘‘𑀬𑀸𑀦𑀺 𑀘, 𑀪𑀦𑁆𑀢𑁂, 𑀓𑀧𑁆𑀧𑀺𑀬𑀸𑀦𑀺 𑀬𑀸𑀦𑀺 𑀘 𑀅𑀦𑀯𑀚𑁆𑀚𑀸𑀦𑀻’’𑀢𑀺. ‘‘𑀯𑀤𑁂𑀳𑀺 𑀯𑀺𑀲𑀸𑀔𑁂’’𑀢𑀺. ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀢𑀼𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀫𑀺𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀤𑀸𑀢𑀼𑀁, 𑀥𑀼𑀯𑀬𑀸𑀕𑀼𑀁 𑀤𑀸𑀢𑀼𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀉𑀤𑀓𑀲𑀸𑀝𑀺𑀓𑀁 𑀤𑀸𑀢𑀼’’𑀦𑁆𑀢𑀺.

𑀲𑀢𑁆𑀣𑀸 ‘‘𑀓𑀁 𑀧𑀦 𑀢𑁆𑀯𑀁, 𑀯𑀺𑀲𑀸𑀔𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀸𑀬 𑀯𑀭𑀸𑀦𑀺𑀲𑀁𑀲𑁂 𑀓𑀣𑀺𑀢𑁂 ‘‘𑀲𑀸𑀥𑀼 𑀲𑀸𑀥𑀼, 𑀯𑀺𑀲𑀸𑀔𑁂, 𑀲𑀸𑀥𑀼 𑀔𑁄 𑀢𑁆𑀯𑀁, 𑀯𑀺𑀲𑀸𑀔𑁂, 𑀇𑀫𑀁 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀢𑁂, 𑀯𑀺𑀲𑀸𑀔𑁂, 𑀅𑀝𑁆𑀞 𑀯𑀭𑀸𑀦𑀻’’𑀢𑀺 𑀅𑀝𑁆𑀞 𑀯𑀭𑁂 𑀤𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀭𑀺 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸 𑀫𑀸𑀢𑀼𑀕𑀸𑀫𑀢𑁆𑀢𑀪𑀸𑀯𑁂 𑀞𑀢𑁆𑀯𑀸𑀧𑀺 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞 𑀯𑀭𑁂 𑀮𑀪𑀺, 𑀅𑀳𑁄 𑀫𑀳𑀸𑀕𑀼𑀡𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 ¶ 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀯𑀺𑀲𑀸𑀔𑀸 𑀇𑀤𑀸𑀦𑁂𑀯 𑀫𑀫 𑀲𑀦𑁆𑀢𑀺𑀓𑀸 𑀯𑀭𑁂 𑀮𑀪𑀢𑀺, 𑀧𑀼𑀩𑁆𑀩𑁂𑀧𑁂𑀲𑀸 𑀮𑀪𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀺𑀣𑀺𑀮𑀸𑀬𑀁 𑀲𑀼𑀭𑀼𑀘𑀺 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 ‘‘𑀲𑀼𑀭𑀼𑀘𑀺𑀓𑀼𑀫𑀸𑀭𑁄’’𑀢𑁆𑀯𑁂𑀯 ¶ 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀯𑀬𑀧𑁆𑀧𑀢𑁆𑀢𑁄 ‘‘𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀸𑀬𑀁 𑀦𑀺𑀲𑀻𑀤𑀺. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄𑀧𑀺 𑀧𑀼𑀢𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄 ¶ 𑀦𑀸𑀫 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀲𑀼𑀭𑀼𑀘𑀺𑀓𑀼𑀫𑀸𑀭𑀲𑁆𑀲 𑀦𑀺𑀲𑀺𑀦𑁆𑀦𑀨𑀮𑀓𑁂𑀬𑁂𑀯 𑀦𑀺𑀲𑀻𑀤𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑀸 𑀳𑀼𑀢𑁆𑀯𑀸 𑀏𑀓𑀢𑁄𑀯 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀪𑀸𑀕𑀁 𑀤𑀢𑁆𑀯𑀸 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀦𑀺𑀝𑁆𑀞𑀺𑀢𑀲𑀺𑀧𑁆𑀧𑀸 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀣𑁄𑀓𑀁 𑀫𑀕𑁆𑀕𑀁 𑀏𑀓𑀢𑁄𑀯 𑀕𑀦𑁆𑀢𑁆𑀯𑀸 𑀤𑁆𑀯𑁂𑀥𑀸𑀧𑀣𑁂 𑀞𑀺𑀢𑀸 𑀅𑀜𑁆𑀜𑀫𑀜𑁆𑀜𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀫𑀺𑀢𑁆𑀢𑀥𑀫𑁆𑀫𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀓𑀢𑀺𑀓𑀁 𑀓𑀭𑀺𑀁𑀲𑀼 ‘‘𑀲𑀘𑁂 𑀫𑀫 𑀧𑀼𑀢𑁆𑀢𑁄 𑀚𑀸𑀬𑀢𑀺, 𑀢𑀯 𑀥𑀻𑀢𑀸, 𑀢𑀯 𑀧𑀼𑀢𑁆𑀢𑁄, 𑀫𑀫 𑀥𑀻𑀢𑀸, 𑀢𑁂𑀲𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂𑀲𑀼 𑀲𑀼𑀭𑀼𑀘𑀺𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀚𑀸𑀬𑀺, ‘‘𑀲𑀼𑀭𑀼𑀘𑀺𑀓𑀼𑀫𑀸𑀭𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀥𑀻𑀢𑀸 𑀚𑀸𑀬𑀺, ‘‘𑀲𑀼𑀫𑁂𑀥𑀸’’𑀢𑀺𑀲𑁆𑀲𑀸 𑀦𑀸𑀫𑀁 𑀓𑀭𑀺𑀁𑀲𑀼.

𑀲𑀼𑀭𑀼𑀘𑀺𑀓𑀼𑀫𑀸𑀭𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀺. 𑀅𑀣 𑀦𑀁 𑀧𑀺𑀢𑀸 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀲𑀳𑀸𑀬𑀲𑁆𑀲 𑀓𑀺𑀭 𑀫𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀥𑀻𑀢𑀸 𑀅𑀢𑁆𑀣𑀺, 𑀢𑀫𑁂𑀯𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲𑀸 𑀅𑀢𑁆𑀣𑀸𑀬 𑀩𑀳𑀼𑀁 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀢𑁂𑀲𑀁 𑀅𑀦𑀸𑀕𑀢𑀓𑀸𑀮𑁂𑀬𑁂𑀯 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑁂𑀯𑀺𑀁 𑀧𑀼𑀘𑁆𑀙𑀺 ‘‘𑀪𑀤𑁆𑀤𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀦𑀸𑀫 𑀓𑀺𑀁 𑀅𑀢𑀺𑀭𑁂𑀓𑀤𑀼𑀓𑁆𑀔’’𑀦𑁆𑀢𑀺? ‘‘𑀲𑀧𑀢𑁆𑀢𑀺𑀭𑁄𑀲𑀤𑀼𑀓𑁆𑀔𑀁 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀤𑁆𑀤𑁂, 𑀅𑀫𑁆𑀳𑀸𑀓𑀁 𑀏𑀓𑀁 𑀥𑀻𑀢𑀭𑀁 𑀲𑀼𑀫𑁂𑀥𑀸𑀤𑁂𑀯𑀺𑀁 𑀢𑀫𑁆𑀳𑀸 𑀤𑀼𑀓𑁆𑀔𑀸 𑀫𑁄𑀘𑁂𑀢𑁆𑀯𑀸 𑀬𑁄 𑀏𑀢𑀁 𑀏𑀓𑀺𑀓𑀫𑁂𑀯 𑀕𑀡𑁆𑀳𑀺𑀲𑁆𑀲𑀢𑀺, 𑀢𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀆𑀳. 𑀲𑁄 𑀢𑁂𑀳𑀺 𑀅𑀫𑀘𑁆𑀘𑁂𑀳𑀺 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀦𑀸𑀫𑁂 𑀕𑀳𑀺𑀢𑁂 ‘‘𑀢𑀸𑀢𑀸, 𑀓𑀸𑀫𑀁 𑀫𑀬𑀸 𑀧𑀼𑀩𑁆𑀩𑁂 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀧𑀝𑀺𑀜𑁆𑀜𑀸 𑀓𑀢𑀸, 𑀇𑀫𑀁 𑀧𑀦 𑀫𑀬𑀁 𑀇𑀢𑁆𑀣𑀺𑀖𑀝𑀸𑀬 𑀅𑀦𑁆𑀢𑀭𑁂 𑀦 𑀔𑀺𑀧𑀺𑀢𑀼𑀓𑀸𑀫𑀸, 𑀬𑁄 𑀏𑀢𑀁 𑀏𑀓𑀺𑀓𑀫𑁂𑀯 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀤𑀸𑀢𑀼𑀓𑀸𑀫𑀫𑁆𑀳𑀸’’𑀢𑀺 𑀆𑀳. 𑀢𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 𑀧𑀦 ‘‘𑀅𑀫𑁆𑀳𑀸𑀓𑀁 𑀭𑀚𑁆𑀚𑀁 𑀫𑀳𑀦𑁆𑀢𑀁, 𑀲𑀢𑁆𑀢𑀬𑁄𑀚𑀦𑀺𑀓𑀁 𑀫𑀺𑀣𑀺𑀮𑀦𑀕𑀭𑀁, 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺 𑀭𑀝𑁆𑀞𑀧𑀭𑀺𑀘𑁆𑀙𑁂𑀤𑁄, 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀲𑁄𑀴𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀦 𑀭𑁄𑀘𑁂𑀲𑀺.

𑀲𑀼𑀭𑀼𑀘𑀺𑀓𑀼𑀫𑀸𑀭𑁄 ¶ 𑀧𑀦 𑀲𑀼𑀫𑁂𑀥𑀸𑀬 𑀭𑀽𑀧𑀲𑀫𑁆𑀧𑀤𑀁 𑀲𑀼𑀢𑁆𑀯𑀸 𑀲𑀯𑀦𑀲𑀁𑀲𑀕𑁆𑀕𑁂𑀦 ¶ 𑀩𑀚𑁆𑀛𑀺𑀢𑁆𑀯𑀸 ‘‘𑀅𑀳𑀁 𑀢𑀁 𑀏𑀓𑀺𑀓𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀦 𑀫𑀬𑁆𑀳𑀁 𑀇𑀢𑁆𑀣𑀺𑀖𑀝𑀸𑀬 𑀅𑀢𑁆𑀣𑁄, 𑀢𑀫𑁂𑀯 𑀆𑀦𑁂𑀦𑁆𑀢𑀽’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑁂𑀲𑁂𑀲𑀺. 𑀢𑁂 𑀢𑀲𑁆𑀲 𑀫𑀦𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀧𑁂𑀲𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀁 𑀆𑀦𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀏𑀓𑀢𑁄𑀯 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀲𑁄 𑀲𑀼𑀭𑀼𑀘𑀺𑀫𑀳𑀸𑀭𑀸𑀚𑀸 𑀦𑀸𑀫 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀢𑀸𑀬 𑀲𑀤𑁆𑀥𑀺𑀁 𑀧𑀺𑀬𑀲𑀁𑀯𑀸𑀲𑀁 𑀯𑀲𑀺. 𑀲𑀸 𑀧𑀦 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀲𑁆𑀲 𑀕𑁂𑀳𑁂 𑀯𑀲𑀦𑁆𑀢𑀻 𑀦𑁂𑀯 𑀧𑀼𑀢𑁆𑀢𑀁, 𑀦 𑀥𑀻𑀢𑀭𑀁 𑀮𑀪𑀺. 𑀅𑀣 𑀦𑀸𑀕𑀭𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀉𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀭𑀜𑁆𑀜𑁄 𑀤𑁄𑀲𑁄 𑀦𑀢𑁆𑀣𑀺, 𑀯𑀁𑀲𑀸𑀦𑀼𑀧𑀸𑀮𑀓𑁄 𑀧𑀦 𑀯𑁄 𑀧𑀼𑀢𑁆𑀢𑁄 𑀦 𑀯𑀺𑀚𑁆𑀚𑀢𑀺, 𑀢𑀼𑀫𑁆𑀳𑀸𑀓𑀁 𑀏𑀓𑀸𑀯 𑀤𑁂𑀯𑀻, 𑀭𑀸𑀚𑀓𑀼𑀮𑁂 𑀘 𑀦𑀸𑀫 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀲𑁄𑀴𑀲𑀳𑀺 𑀇𑀢𑁆𑀣𑀺𑀲𑀳𑀲𑁆𑀲𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀇𑀢𑁆𑀣𑀺𑀖𑀝𑀁 𑀕𑀡𑁆𑀳, 𑀤𑁂𑀯, 𑀅𑀤𑁆𑀥𑀸 𑀢𑀸𑀲𑀼 ¶ 𑀧𑀼𑀜𑁆𑀜𑀯𑀢𑀻 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑀸𑀢𑀸, 𑀓𑀺𑀁 𑀓𑀣𑁂𑀣, ‘𑀅𑀳𑀁 𑀅𑀜𑁆𑀜𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀫𑀬𑀸 𑀏𑀲𑀸 𑀆𑀦𑀻𑀢𑀸, 𑀦 𑀲𑀓𑁆𑀓𑀸 𑀫𑀼𑀲𑀸𑀯𑀸𑀤𑀁 𑀓𑀸𑀢𑀼𑀁, 𑀦 𑀫𑀬𑁆𑀳𑀁 𑀇𑀢𑁆𑀣𑀺𑀖𑀝𑀸𑀬 𑀅𑀢𑁆𑀣𑁄’’𑀢𑀺 𑀭𑀜𑁆𑀜𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀓𑁆𑀓𑀫𑀺𑀁𑀲𑀼.

𑀲𑀼𑀫𑁂𑀥𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀭𑀸𑀚𑀸 𑀢𑀸𑀯 𑀲𑀘𑁆𑀘𑀯𑀸𑀤𑀺𑀢𑀸𑀬 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀦 𑀆𑀦𑁂𑀲𑀺, 𑀅𑀳𑀫𑁂𑀯 𑀧𑀦𑀲𑁆𑀲 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀫𑀸𑀢𑀼𑀲𑀫𑀪𑀭𑀺𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸𑀯 𑀔𑀢𑁆𑀢𑀺𑀬𑀓𑀜𑁆𑀜𑀸𑀦𑀁 𑀲𑀳𑀲𑁆𑀲𑀁, 𑀅𑀫𑀘𑁆𑀘𑀓𑀜𑁆𑀜𑀸𑀦𑀁 𑀲𑀳𑀲𑁆𑀲𑀁, 𑀕𑀳𑀧𑀢𑀺𑀓𑀜𑁆𑀜𑀸𑀦𑀁 𑀲𑀳𑀲𑁆𑀲𑀁, 𑀲𑀩𑁆𑀩𑀲𑀫𑀬𑀦𑀸𑀝𑀓𑀺𑀢𑁆𑀣𑀻𑀦𑀁 𑀲𑀳𑀲𑁆𑀲𑀦𑁆𑀢𑀺 𑀘𑀢𑁆𑀢𑀸𑀭𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀆𑀦𑁂𑀲𑀺. 𑀢𑀸𑀧𑀺 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀸𑀚𑀓𑀼𑀮𑁂 𑀯𑀲𑀺𑀢𑁆𑀯𑀸 𑀦𑁂𑀯 𑀧𑀼𑀢𑁆𑀢𑀁, 𑀦 𑀥𑀻𑀢𑀭𑀁 𑀮𑀪𑀺𑀁𑀲𑀼. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀅𑀧𑀭𑀸𑀦𑀺𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀆𑀦𑁂𑀲𑀺. 𑀢𑀸𑀧𑀺 𑀦𑁂𑀯 𑀧𑀼𑀢𑁆𑀢𑀁, 𑀦 𑀥𑀻𑀢𑀭𑀁 𑀮𑀪𑀺𑀁𑀲𑀼. 𑀏𑀢𑁆𑀢𑀸𑀯𑀢𑀸 𑀲𑁄𑀴𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀁𑀲𑀼, 𑀢𑀸𑀦𑀺 𑀢𑀸𑀬 𑀏𑀓𑀺𑀓𑀸𑀬 𑀯𑀼𑀢𑁆𑀣𑁂𑀳𑀺 𑀤𑀲𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀜𑀸𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀦𑀸𑀕𑀭𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀼𑀦 𑀉𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀇𑀢𑁆𑀣𑀺𑀬𑁄 ¶ 𑀧𑀼𑀢𑁆𑀢𑀁 𑀧𑀢𑁆𑀣𑁂𑀢𑀼𑀁 𑀆𑀡𑀸𑀧𑁂𑀣𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀼𑀢𑁆𑀢𑀁 𑀧𑀢𑁆𑀣𑁂𑀣𑀸’’𑀢𑀺 𑀆𑀳. 𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀢𑁆𑀢𑀁 𑀧𑀢𑁆𑀣𑀬𑀫𑀸𑀦𑀸 𑀦𑀸𑀦𑀸𑀤𑁂𑀯𑀢𑀸 𑀦𑀫𑀲𑁆𑀲𑀦𑁆𑀢𑀺, 𑀦𑀸𑀦𑀸𑀯𑀢𑀸𑀦𑀺 𑀘𑀭𑀦𑁆𑀢𑀺, 𑀧𑀼𑀢𑁆𑀢𑁄 𑀦𑀼𑀧𑁆𑀧𑀚𑁆𑀚𑀢𑁂𑀯. 𑀅𑀣 𑀭𑀸𑀚𑀸 𑀲𑀼𑀫𑁂𑀥𑀁 𑀆𑀳 ‘‘𑀪𑀤𑁆𑀤𑁂, 𑀢𑁆𑀯𑀫𑁆𑀧𑀺 𑀧𑀼𑀢𑁆𑀢𑀁 𑀧𑀢𑁆𑀣𑁂𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀦𑁆𑀦𑀭𑀲𑀉𑀧𑁄𑀲𑀣𑀤𑀺𑀯𑀲𑁂 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀲𑀫𑀸𑀤𑀸𑀬 𑀲𑀺𑀭𑀺𑀕𑀩𑁆𑀪𑁂 𑀲𑀻𑀮𑀸𑀦𑀺 𑀆𑀯𑀚𑁆𑀚𑀫𑀸𑀦𑀸 𑀓𑀧𑁆𑀧𑀺𑀬𑀫𑀜𑁆𑀘𑀓𑁂 𑀦𑀺𑀲𑀻𑀤𑀺 ¶ . 𑀲𑁂𑀲𑀸 𑀅𑀚𑀯𑀢𑀕𑁄𑀯𑀢𑀸 𑀳𑀼𑀢𑁆𑀯𑀸 𑀧𑀼𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀅𑀕𑀫𑀁𑀲𑀼.

𑀲𑀼𑀫𑁂𑀥𑀸𑀬 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀢𑀤𑀸 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀼𑀫𑁂𑀥𑀸 𑀧𑀼𑀢𑁆𑀢𑀁 𑀧𑀢𑁆𑀣𑁂𑀢𑀺, 𑀧𑀼𑀢𑁆𑀢𑀫𑀲𑁆𑀲𑀸 𑀤𑀲𑁆𑀲𑀸𑀫𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀬𑀁 𑀯𑀸 𑀢𑀁 𑀯𑀸 𑀤𑀸𑀢𑀼𑀁, 𑀅𑀦𑀼𑀘𑁆𑀙𑀯𑀺𑀓𑀫𑀲𑁆𑀲𑀸 𑀧𑀼𑀢𑁆𑀢𑀁 𑀉𑀧𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀦𑀴𑀓𑀸𑀭𑀤𑁂𑀯𑀧𑀼𑀢𑁆𑀢𑀁 𑀧𑀲𑁆𑀲𑀺. 𑀲𑁄 𑀳𑀺 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑁄 𑀲𑀢𑁆𑀢𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀩𑀸𑀭𑀸𑀡𑀲𑀺𑀬𑀁 𑀯𑀲𑀦𑁆𑀢𑁄 𑀯𑀧𑁆𑀧𑀓𑀸𑀮𑁂 𑀔𑁂𑀢𑁆𑀢𑀁 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑁂 ‘‘𑀯𑀧𑀣𑀸’’𑀢𑀺 𑀧𑀳𑀺𑀡𑀺. 𑀲𑀬𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀼𑀦 𑀕𑀗𑁆𑀕𑀸𑀢𑀻𑀭𑀁 𑀆𑀦𑁂𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀉𑀤𑀼𑀫𑁆𑀩𑀭𑀪𑀺𑀢𑁆𑀢𑀺𑀧𑀸𑀤𑀁 𑀦𑀴𑀪𑀺𑀢𑁆𑀢𑀺𑀓𑀁 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀘𑀗𑁆𑀓𑀫𑀁 𑀓𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀢𑀢𑁆𑀣𑁂𑀯 𑀢𑁂𑀫𑀸𑀲𑀁 𑀯𑀲𑀸𑀧𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀁 𑀤𑁆𑀯𑁂 𑀧𑀺𑀢𑀸𑀧𑀼𑀢𑁆𑀢𑀸 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀢𑀸𑀬 𑀧𑀡𑁆𑀡𑀲𑀸𑀮𑀸𑀬 𑀯𑀲𑀸𑀧𑁂𑀢𑁆𑀯𑀸 𑀢𑀺𑀘𑀻𑀯𑀭𑀸𑀦𑀺 𑀅𑀤𑀁𑀲𑀼. ‘‘𑀤𑁆𑀯𑁂 𑀧𑀺𑀢𑀸𑀧𑀼𑀢𑁆𑀢𑀸 𑀦𑀴𑀓𑀸𑀭𑀸 𑀳𑀼𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀯𑁂𑀴𑀼𑀁 𑀉𑀧𑀥𑀸𑀭𑁂𑀦𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀏𑀯𑀫𑀓𑀁𑀲𑀽’’𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯.

𑀢𑁂 ¶ 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀙𑀲𑀼 𑀓𑀸𑀫𑀸𑀯𑀘𑀭𑀲𑀕𑁆𑀕𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀦 𑀫𑀳𑀦𑁆𑀢𑀁 𑀤𑁂𑀯𑀺𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑁂 𑀢𑀢𑁄 𑀘𑀯𑀺𑀢𑁆𑀯𑀸 𑀉𑀧𑀭𑀺𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀲𑀓𑁆𑀓𑁄 𑀢𑀣𑀸 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀢𑁂𑀲𑀼 𑀏𑀓𑀲𑁆𑀲 ¶ 𑀯𑀺𑀫𑀸𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀆𑀳 𑁋 ‘‘𑀫𑀸𑀭𑀺𑀲, 𑀢𑀬𑀸 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀮𑁄𑀓𑁄 𑀦𑀸𑀫 𑀚𑁂𑀕𑀼𑀘𑁆𑀙𑁄 𑀧𑀝𑀺𑀓𑀽𑀮𑁄, 𑀢𑀢𑁆𑀣 𑀞𑀺𑀢𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑀁 𑀧𑀢𑁆𑀣𑁂𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀸𑀭𑀺𑀲, 𑀤𑁂𑀯𑀮𑁄𑀓𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺, 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑁂 𑀦𑀯𑀬𑁄𑀚𑀦𑀆𑀬𑀸𑀫𑁂 𑀅𑀝𑁆𑀞𑀬𑁄𑀚𑀦𑀯𑀺𑀢𑁆𑀣𑀸𑀭𑁂 𑀭𑀢𑀦𑀧𑀸𑀲𑀸𑀤𑁂 𑀯𑀲𑀺𑀲𑁆𑀲𑀲𑀺, 𑀅𑀥𑀺𑀯𑀸𑀲𑁂𑀳𑀻’’𑀢𑀺. 𑀲𑁄 𑀅𑀥𑀺𑀯𑀸𑀲𑁂𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀇𑀲𑀺𑀯𑁂𑀲𑁂𑀦 𑀭𑀸𑀚𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀉𑀧𑀭𑀺 𑀆𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀲𑁆𑀲𑀸𑀳𑀁 𑀧𑀼𑀢𑁆𑀢𑀯𑀭𑀁 𑀤𑀫𑁆𑀫𑀺, 𑀓𑀸 𑀧𑀼𑀢𑁆𑀢𑀯𑀭𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀤𑁂𑀳𑀺, 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀲𑁄𑀴𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀢𑀢𑁄 𑀲𑀓𑁆𑀓𑁄 ¶ 𑀆𑀳 𑁋 ‘‘𑀅𑀳𑀁 𑀲𑀻𑀮𑀯𑀢𑀻𑀦𑀁 𑀧𑀼𑀢𑁆𑀢𑀁 𑀤𑀫𑁆𑀫𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀲𑀻𑀮𑀁, 𑀓𑁄 𑀆𑀘𑀸𑀭𑁄’’𑀢𑀺. 𑀢𑀸 𑀉𑀓𑁆𑀔𑀺𑀢𑁆𑀢𑀳𑀢𑁆𑀣𑁂 𑀲𑀫𑀜𑁆𑀙𑀺𑀢𑁆𑀯𑀸 ‘‘𑀲𑀘𑁂 𑀲𑀻𑀮𑀯𑀢𑀺𑀬𑀸 𑀤𑀸𑀢𑀼𑀓𑀸𑀫𑁄, 𑀲𑀼𑀫𑁂𑀥𑀸𑀬 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 𑀆𑀓𑀸𑀲𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀯𑀸𑀲𑀸𑀕𑀸𑀭𑁂 𑀲𑀻𑀳𑀧𑀜𑁆𑀚𑀭𑁂 𑀅𑀝𑁆𑀞𑀸𑀲𑀺.

𑀅𑀣𑀲𑁆𑀲𑀸 𑀢𑀸 𑀇𑀢𑁆𑀣𑀺𑀬𑁄 𑀆𑀭𑁄𑀘𑁂𑀲𑀼𑀁 ‘‘𑀏𑀣, 𑀤𑁂𑀯𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑀯𑀭𑀁 𑀤𑀲𑁆𑀲𑀸𑀫𑀻’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄’’𑀢𑀺. 𑀲𑀸 𑀕𑀭𑀼𑀧𑀭𑀺𑀳𑀸𑀭𑁂𑀦𑀸𑀕𑀦𑁆𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀻𑀮𑀯𑀢𑀺𑀬𑀸 𑀧𑀼𑀢𑁆𑀢𑀯𑀭𑀁 𑀤𑁂𑀣𑀸’’𑀢𑀺 𑀆𑀳. ‘‘𑀆𑀫 𑀤𑁂𑀯𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑁆𑀳𑀁 𑀤𑁂𑀣𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀲𑀻𑀮𑀁, 𑀓𑀣𑁂𑀳𑀺, 𑀲𑀘𑁂 𑀫𑁂 𑀭𑀼𑀘𑁆𑀘𑀢𑀺, 𑀤𑀲𑁆𑀲𑀸𑀫𑀺 𑀢𑁂 𑀧𑀼𑀢𑁆𑀢𑀯𑀭’’𑀦𑁆𑀢𑀺. 𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀮𑀕𑀼𑀡𑀁 𑀓𑀣𑁂𑀦𑁆𑀢𑀻 𑀧𑀦𑁆𑀦𑀭𑀲 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁨.

‘‘𑀫𑀳𑁂𑀲𑀻 𑀲𑀼𑀭𑀼𑀘𑀺𑀦𑁄 𑀪𑀭𑀺𑀬𑀸, 𑀆𑀦𑀻𑀢𑀸 𑀧𑀞𑀫𑀁 𑀅𑀳𑀁;

𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀬𑀁 𑀫𑀁 𑀲𑀼𑀭𑀼𑀘𑀺𑀫𑀸𑀦𑀬𑀺.

𑁧𑁦𑁩.

‘‘𑀲𑀸𑀳𑀁 𑀩𑁆𑀭𑀸𑀳𑁆𑀫𑀡 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀼𑀭𑀼𑀘𑀺𑀁 𑀅𑀢𑀺𑀫𑀜𑁆𑀜𑀺𑀢𑁆𑀣, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

𑁧𑁦𑁪.

‘‘𑀏𑀢𑁂𑀦 ¶ ¶ 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁦𑁫.

‘‘𑀪𑀢𑁆𑀢𑀼 𑀫𑀫 𑀲𑀲𑁆𑀲𑀼 𑀫𑀸𑀢𑀸, 𑀧𑀺𑀢𑀸 𑀘𑀸𑀧𑀺 𑀘 𑀲𑀲𑁆𑀲𑀼𑀭𑁄;

𑀢𑁂 𑀫𑀁 𑀩𑁆𑀭𑀳𑁆𑀫𑁂 𑀯𑀺𑀦𑁂𑀢𑀸𑀭𑁄, 𑀬𑀸𑀯 𑀅𑀝𑁆𑀞𑀁𑀲𑀼 𑀚𑀻𑀯𑀺𑀢𑀁.

𑁧𑁦𑁬.

‘‘𑀲𑀸𑀳𑀁 𑀅𑀳𑀺𑀁𑀲𑀸𑀭𑀢𑀺𑀦𑀻, 𑀓𑀸𑀫𑀲𑀸 𑀥𑀫𑁆𑀫𑀘𑀸𑀭𑀺𑀦𑀻;

𑀲𑀓𑁆𑀓𑀘𑁆𑀘𑀁 𑀢𑁂 𑀉𑀧𑀝𑁆𑀞𑀸𑀲𑀺𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸.

𑁧𑁦𑁭.

‘‘𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁦𑁮.

‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺 ¶ , 𑀲𑀳𑀪𑀭𑀺𑀬𑀸𑀦𑀺 𑀩𑁆𑀭𑀸𑀳𑁆𑀫𑀡;

𑀢𑀸𑀲𑀼 𑀇𑀲𑁆𑀲𑀸 𑀯𑀸 𑀓𑁄𑀥𑁄 𑀯𑀸, 𑀦𑀸𑀳𑀼 𑀫𑀬𑁆𑀳𑀁 𑀓𑀼𑀤𑀸𑀘𑀦𑀁.

𑁧𑁦𑁯.

‘‘𑀳𑀺𑀢𑁂𑀦 𑀢𑀸𑀲𑀁 𑀦𑀦𑁆𑀤𑀸𑀫𑀺, 𑀦 𑀘 𑀫𑁂 𑀓𑀸𑀘𑀺 𑀅𑀧𑁆𑀧𑀺𑀬𑀸;

𑀅𑀢𑁆𑀢𑀸𑀦𑀁𑀯𑀸𑀦𑀼𑀓𑀫𑁆𑀧𑀸𑀫𑀺, 𑀲𑀤𑀸 𑀲𑀩𑁆𑀩𑀸 𑀲𑀧𑀢𑁆𑀢𑀺𑀬𑁄.

𑁧𑁧𑁦.

‘‘𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁧.

‘‘𑀤𑀸𑀲𑁂 𑀓𑀫𑁆𑀫𑀓𑀭𑁂 𑀧𑁂𑀲𑁆𑀲𑁂, 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀧𑁂𑀲𑁂𑀫𑀺 𑀲𑀳𑀥𑀫𑁆𑀫𑁂𑀦, 𑀲𑀤𑀸 𑀧𑀫𑀼𑀤𑀺𑀢𑀺𑀦𑁆𑀤𑁆𑀭𑀺𑀬𑀸.

𑁧𑁧𑁨.

‘‘𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁩.

‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘𑀸𑀧𑀺, 𑀅𑀜𑁆𑀜𑁂 𑀘𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀢𑀧𑁆𑀧𑁂𑀫𑀺 𑀅𑀦𑁆𑀦𑀧𑀸𑀦𑁂𑀦, 𑀲𑀤𑀸 𑀧𑀬𑀢𑀧𑀸𑀡𑀺𑀦𑀻.

𑁧𑁧𑁪.

‘‘𑀏𑀢𑁂𑀦 ¶ 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁫.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑁆𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁;

𑀉𑀧𑁄𑀲𑀣𑀁 𑀉𑀧𑀯𑀲𑀸𑀫𑀺, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸.

𑁧𑁧𑁬.

‘‘𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸’’𑀢𑀺.

𑀢𑀢𑁆𑀣 𑀫𑀳𑁂𑀲𑀻𑀢𑀺 𑀅𑀕𑁆𑀕𑀫𑀳𑁂𑀲𑀻. 𑀲𑀼𑀭𑀼𑀘𑀺𑀦𑁄𑀢𑀺 𑀲𑀼𑀭𑀼𑀘𑀺𑀭𑀜𑁆𑀜𑁄. 𑀧𑀞𑀫𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀲𑀩𑁆𑀩𑀧𑀞𑀫𑀁. 𑀬𑀁 𑀫𑀦𑁆𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀫𑀁 𑀲𑀼𑀭𑀼𑀘𑀺 𑀆𑀦𑀬𑀺, 𑀢𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀓𑀺𑀓𑀸𑀯 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲𑀺𑀁. 𑀅𑀢𑀺𑀫𑀜𑁆𑀜𑀺𑀢𑁆𑀣𑀸𑀢𑀺 𑀫𑀼𑀳𑀼𑀢𑁆𑀢𑀫𑁆𑀧𑀺 𑀲𑀫𑁆𑀫𑀼𑀔𑀸 𑀯𑀸 𑀧𑀭𑀫𑁆𑀫𑀼𑀔𑀸 𑀯𑀸 𑀅𑀢𑀺𑀫𑀜𑁆𑀜𑀺𑀦𑁆𑀢𑀺 𑀇𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀁 𑀦 𑀚𑀸𑀦𑀸𑀫𑀺 𑀦 𑀲𑀭𑀸𑀫𑀺. 𑀇𑀲𑁂𑀢𑀺 𑀢𑀁 𑀆𑀮𑀧𑀢𑀺.

𑀢𑁂 ¶ 𑀫𑀦𑁆𑀢𑀺 𑀲𑀲𑀼𑀭𑁄 𑀘 𑀲𑀲𑁆𑀲𑀼 𑀘𑀸𑀢𑀺 𑀢𑁂 𑀉𑀪𑁄𑀧𑀺 𑀫𑀁 𑀯𑀺𑀦𑁂𑀢𑀸𑀭𑁄, 𑀢𑁂𑀳𑀺 𑀯𑀺𑀦𑀻𑀢𑀸 𑀅𑀫𑁆𑀳𑀺, 𑀢𑁂 ¶ 𑀫𑁂 𑀬𑀸𑀯 𑀚𑀻𑀯𑀺𑀁𑀲𑀼, 𑀢𑀸𑀯 𑀑𑀯𑀸𑀤𑀫𑀤𑀁𑀲𑀼. 𑀅𑀳𑀺𑀁𑀲𑀸𑀭𑀢𑀺𑀦𑀻𑀢𑀺 𑀅𑀳𑀺𑀁𑀲𑀸𑀲𑀗𑁆𑀔𑀸𑀢𑀸𑀬 𑀭𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀫𑀬𑀸 𑀳𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑁄𑀧𑀺 𑀦 𑀳𑀺𑀁𑀲𑀺𑀢𑀧𑀼𑀩𑁆𑀩𑁄. 𑀓𑀸𑀫𑀲𑀸𑀢𑀺 𑀏𑀓𑀦𑁆𑀢𑁂𑀦𑁂𑀯. 𑀥𑀫𑁆𑀫𑀘𑀸𑀭𑀺𑀦𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀽𑀭𑁂𑀫𑀺. 𑀉𑀧𑀝𑁆𑀞𑀸𑀲𑀺𑀦𑁆𑀢𑀺 𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀻 𑀉𑀧𑀝𑁆𑀞𑀳𑀺𑀁.

𑀲𑀳𑀪𑀭𑀺𑀬𑀸𑀦𑀻𑀢𑀺 𑀫𑀬𑀸 𑀲𑀳 𑀏𑀓𑀲𑀸𑀫𑀺𑀓𑀲𑁆𑀲 𑀪𑀭𑀺𑀬𑀪𑀽𑀢𑀸𑀦𑀺. 𑀦𑀸𑀳𑀽𑀢𑀺 𑀓𑀺𑀮𑁂𑀲𑀁 𑀦𑀺𑀲𑁆𑀲𑀸𑀬 𑀇𑀲𑁆𑀲𑀸𑀥𑀫𑁆𑀫𑁄 𑀯𑀸 𑀓𑁄𑀥𑀥𑀫𑁆𑀫𑁄 𑀯𑀸 𑀫𑀬𑁆𑀳𑀁 𑀦 𑀪𑀽𑀢𑀧𑀼𑀩𑁆𑀩𑁄. 𑀳𑀺𑀢𑁂𑀦𑀸𑀢𑀺 𑀬𑀁 𑀢𑀸𑀲𑀁 𑀳𑀺𑀢𑀁, 𑀢𑁂𑀦𑁂𑀯 𑀦𑀦𑁆𑀤𑀸𑀫𑀺, 𑀉𑀭𑁂 𑀯𑀼𑀢𑁆𑀣𑀥𑀻𑀢𑀭𑁄 𑀯𑀺𑀬 𑀢𑀸 𑀤𑀺𑀲𑁆𑀯𑀸 𑀢𑀼𑀲𑁆𑀲𑀸𑀫𑀺. 𑀓𑀸𑀘𑀻𑀢𑀺 𑀢𑀸𑀲𑀼 𑀏𑀓𑀸𑀧𑀺 𑀫𑀬𑁆𑀳𑀁 𑀅𑀧𑁆𑀧𑀺𑀬𑀸 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀸𑀧𑀺 𑀧𑀺𑀬𑀓𑀸𑀬𑁂𑀯. 𑀅𑀦𑀼𑀓𑀫𑁆𑀧𑀸𑀫𑀻𑀢𑀺 𑀫𑀼𑀤𑀼𑀘𑀺𑀢𑁆𑀢𑁂𑀦 𑀲𑀩𑁆𑀩𑀸 𑀲𑁄𑀴𑀲𑀲𑀳𑀲𑁆𑀲𑀸𑀧𑀺 𑀢𑀸 𑀅𑀢𑁆𑀢𑀸𑀦𑀁 𑀯𑀺𑀬 𑀅𑀦𑀼𑀓𑀫𑁆𑀧𑀸𑀫𑀺.

𑀲𑀳𑀥𑀫𑁆𑀫𑁂𑀦𑀸𑀢𑀺 𑀦𑀬𑁂𑀦 𑀓𑀸𑀭𑀡𑁂𑀦 𑀬𑁄 𑀬𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀧𑀬𑁄𑀚𑁂𑀫𑀻𑀢𑀺 𑀅𑀢𑁆𑀣𑁄. 𑀧𑀫𑀼𑀤𑀺𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀧𑁂𑀲𑁂𑀦𑁆𑀢𑀻 𑀘 𑀦𑀺𑀘𑁆𑀘𑀁 𑀧𑀫𑀼𑀤𑀺𑀢𑀺𑀦𑁆𑀤𑁆𑀭𑀺𑀬𑀸𑀯 𑀳𑀼𑀢𑁆𑀯𑀸 𑀧𑁂𑀲𑁂𑀫𑀺, ‘‘𑀅𑀭𑁂 𑀤𑀼𑀝𑁆𑀞 𑀤𑀸𑀲 𑀇𑀤𑀁 ¶ 𑀦𑀸𑀫 𑀓𑀭𑁄𑀳𑀻’𑀢𑀺 𑀏𑀯𑀁 𑀓𑀼𑀚𑁆𑀛𑀺𑀢𑁆𑀯𑀸 𑀦 𑀫𑁂 𑀓𑁄𑀘𑀺 𑀓𑀢𑁆𑀣𑀘𑀺 𑀧𑁂𑀲𑀺𑀢𑀧𑀼𑀩𑁆𑀩𑁄. 𑀧𑀬𑀢𑀧𑀸𑀡𑀺𑀦𑀻𑀢𑀺 𑀥𑁄𑀢𑀳𑀢𑁆𑀣𑀸 𑀧𑀲𑀸𑀭𑀺𑀢𑀳𑀢𑁆𑀣𑀸𑀯 𑀳𑀼𑀢𑁆𑀯𑀸. 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀅𑀝𑁆𑀞𑀫𑀻𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀦𑀼𑀕𑁆𑀕𑀫𑀦𑀯𑀲𑁂𑀦 𑀘𑀢𑁆𑀢𑀸𑀭𑁄 𑀤𑀺𑀯𑀲𑀸. 𑀲𑀤𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸, 𑀢𑁂𑀳𑀺 𑀧𑀺𑀳𑀺𑀢𑀕𑁄𑀧𑀺𑀢𑀢𑁆𑀢𑀪𑀸𑀯𑀸𑀯 𑀳𑁄𑀫𑀻𑀢𑀺.

𑀏𑀯𑀁 𑀢𑀲𑁆𑀲𑀸 𑀕𑀸𑀣𑀸𑀬 𑀲𑀢𑁂𑀦𑀧𑀺 𑀲𑀳𑀲𑁆𑀲𑁂𑀦𑀧𑀺 𑀯𑀡𑁆𑀡𑀺𑀬𑀫𑀸𑀦𑀸𑀦𑀁 𑀕𑀼𑀡𑀸𑀦𑀁 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀢𑀸𑀬 𑀧𑀦𑁆𑀦𑀭𑀲𑀳𑀺 𑀕𑀸𑀣𑀸𑀳𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀯𑀡𑁆𑀡𑀺𑀢𑀓𑀸𑀮𑁂𑀬𑁂𑀯 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀩𑀳𑀼𑀓𑀭𑀡𑀻𑀬𑀢𑀸𑀬 𑀢𑀲𑁆𑀲𑀸 𑀓𑀣𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀧𑀳𑀽𑀢𑀸 𑀅𑀩𑁆𑀪𑀼𑀢𑀸𑀬𑁂𑀯 𑀢𑁂 𑀕𑀼𑀡𑀸’’𑀢𑀺 𑀢𑀁 𑀧𑀲𑀁𑀲𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁧𑁭.

‘‘𑀲𑀩𑁆𑀩𑁂𑀯 𑀢𑁂 𑀥𑀫𑁆𑀫𑀕𑀼𑀡𑀸, 𑀭𑀸𑀚𑀧𑀼𑀢𑁆𑀢𑀺 𑀬𑀲𑀲𑁆𑀲𑀺𑀦𑀺;

𑀲𑀁𑀯𑀺𑀚𑁆𑀚𑀦𑁆𑀢𑀺 𑀢𑀬𑀺 𑀪𑀤𑁆𑀤𑁂, 𑀬𑁂 𑀢𑁆𑀯𑀁 𑀓𑀺𑀢𑁆𑀢𑁂𑀲𑀺 𑀅𑀢𑁆𑀢𑀦𑀺.

𑁧𑁧𑁮.

‘‘𑀔𑀢𑁆𑀢𑀺𑀬𑁄 ¶ 𑀚𑀸𑀢𑀺𑀲𑀫𑁆𑀧𑀦𑁆𑀦𑁄, 𑀅𑀪𑀺𑀚𑀸𑀢𑁄 𑀬𑀲𑀲𑁆𑀲𑀺𑀫𑀸;

𑀥𑀫𑁆𑀫𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑁂 𑀢𑀯𑀸’’𑀢𑀺.

𑀢𑀢𑁆𑀣 𑀥𑀫𑁆𑀫𑀕𑀼𑀡𑀸𑀢𑀺 𑀲𑀪𑀸𑀯𑀕𑀼𑀡𑀸 𑀪𑀽𑀢𑀕𑀼𑀡𑀸. 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀬𑁂 𑀢𑀬𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀯 𑀢𑀬𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀅𑀪𑀺𑀚𑀸𑀢𑁄𑀢𑀺 𑀅𑀢𑀺𑀚𑀸𑀢𑁄 𑀲𑀼𑀤𑁆𑀥𑀚𑀸𑀢𑁄. 𑀬𑀲𑀲𑁆𑀲𑀺𑀫𑀸𑀢𑀺 𑀬𑀲𑀲𑀫𑁆𑀧𑀦𑁆𑀦𑁂𑀦 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀧𑁆𑀧𑀚𑁆𑀚𑀢𑁂𑀢𑀺 𑀏𑀯𑀭𑀽𑀧𑁄 𑀧𑀼𑀢𑁆𑀢𑁄 𑀢𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀫𑀸 𑀘𑀺𑀦𑁆𑀢𑀬𑀻𑀢𑀺.

𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀢𑀁 𑀧𑀼𑀘𑁆𑀙𑀦𑁆𑀢𑀻 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧𑁯.

‘‘𑀤𑀼𑀫𑁆𑀫𑀻 ¶ 𑀭𑀚𑁄𑀚𑀮𑁆𑀮𑀥𑀭𑁄, 𑀅𑀖𑁂 𑀯𑁂𑀳𑀸𑀬𑀲𑀁 𑀞𑀺𑀢𑁄;

𑀫𑀦𑀼𑀜𑁆𑀜𑀁 𑀪𑀸𑀲𑀲𑁂 𑀯𑀸𑀘𑀁, 𑀬𑀁 𑀫𑀬𑁆𑀳𑀁 𑀳𑀤𑀬𑀗𑁆𑀕𑀫𑀁.

𑁧𑁨𑁦.

‘‘𑀤𑁂𑀯𑀢𑀸𑀦𑀼𑀲𑀺 𑀲𑀕𑁆𑀕𑀫𑁆𑀳𑀸, 𑀇𑀲𑀺 𑀯𑀸𑀲𑀺 𑀫𑀳𑀺𑀤𑁆𑀥𑀺𑀓𑁄;

𑀓𑁄 𑀯𑀸𑀲𑀺 𑀢𑁆𑀯𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀢𑁆𑀢𑀸𑀦𑀁 𑀫𑁂 𑀧𑀯𑁂𑀤𑀬𑀸’’𑀢𑀺.

𑀢𑀢𑁆𑀣 𑀤𑀼𑀫𑁆𑀫𑀻𑀢𑀺 𑀅𑀦𑀜𑁆𑀚𑀺𑀢𑀸𑀫𑀡𑁆𑀟𑀺𑀢𑁄 𑀲𑀓𑁆𑀓𑁄 𑀆𑀕𑀘𑁆𑀙𑀦𑁆𑀢𑁄 𑀭𑀫𑀡𑀻𑀬𑁂𑀦 𑀢𑀸𑀧𑀲𑀯𑁂𑀲𑁂𑀦 𑀆𑀕𑀢𑁄, 𑀧𑀩𑁆𑀩𑀚𑀺𑀢𑀯𑁂𑀲𑁂𑀦 𑀆𑀕𑀢𑀢𑁆𑀢𑀸 𑀧𑀦 𑀲𑀸 𑀏𑀯𑀫𑀸𑀳. 𑀅𑀖𑁂𑀢𑀺 𑀅𑀧𑁆𑀧𑀝𑀺𑀖𑁂 𑀞𑀸𑀦𑁂. 𑀬𑀁 𑀫𑀬𑁆𑀳𑀦𑁆𑀢𑀺 𑀬𑀁 𑀏𑀢𑀁 𑀫𑀦𑀼𑀜𑁆𑀜𑀁 ¶ 𑀯𑀸𑀘𑀁 𑀫𑀬𑁆𑀳𑀁 𑀪𑀸𑀲𑀲𑀺, 𑀢𑀁 𑀪𑀸𑀲𑀫𑀸𑀦𑁄 𑀢𑁆𑀯𑀁 𑀤𑁂𑀯𑀢𑀸𑀦𑀼𑀲𑀺 𑀲𑀕𑁆𑀕𑀫𑁆𑀳𑀸 𑀇𑀥𑀸𑀕𑀢𑁄. 𑀇𑀲𑀺 𑀯𑀸𑀲𑀺 𑀫𑀳𑀺𑀤𑁆𑀥𑀺𑀓𑁄𑀢𑀺 𑀬𑀓𑁆𑀔𑀸𑀤𑀻𑀲𑀼 𑀓𑁄 𑀯𑀸 𑀢𑁆𑀯𑀁 𑀅𑀲𑀺 𑀇𑀥𑀸𑀦𑀼𑀧𑁆𑀧𑀢𑁆𑀢𑁄, 𑀅𑀢𑁆𑀢𑀸𑀦𑀁 𑀫𑁂 𑀧𑀯𑁂𑀤𑀬, 𑀬𑀣𑀸𑀪𑀽𑀢𑀁 𑀓𑀣𑁂𑀳𑀻𑀢𑀺 𑀯𑀤𑀢𑀺.

𑀲𑀓𑁆𑀓𑁄 𑀢𑀲𑁆𑀲𑀸 𑀓𑀣𑁂𑀦𑁆𑀢𑁄 𑀙 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁧.

‘‘𑀬𑀁 𑀤𑁂𑀯𑀲𑀗𑁆𑀖𑀸 𑀯𑀦𑁆𑀤𑀦𑁆𑀢𑀺, 𑀲𑀼𑀥𑀫𑁆𑀫𑀸𑀬𑀁 𑀲𑀫𑀸𑀕𑀢𑀸;

𑀲𑁄𑀳𑀁 𑀲𑀓𑁆𑀓𑁄 𑀲𑀳𑀲𑁆𑀲𑀓𑁆𑀔𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂.

𑁧𑁨𑁨.

‘‘𑀇𑀢𑁆𑀣𑀺𑀬𑁄 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀬𑀸 𑀳𑁄𑀢𑀺 𑀲𑀫𑀘𑀸𑀭𑀺𑀦𑀻;

𑀫𑁂𑀥𑀸𑀯𑀺𑀦𑀻 𑀲𑀻𑀮𑀯𑀢𑀻, 𑀲𑀲𑁆𑀲𑀼𑀤𑁂𑀯𑀸 𑀧𑀢𑀺𑀩𑁆𑀩𑀢𑀸.

𑁧𑁨𑁩.

‘‘𑀢𑀸𑀤𑀺𑀲𑀸𑀬 ¶ 𑀲𑀼𑀫𑁂𑀥𑀸𑀬, 𑀲𑀼𑀘𑀺𑀓𑀫𑁆𑀫𑀸𑀬 𑀦𑀸𑀭𑀺𑀬𑀸;

𑀤𑁂𑀯𑀸 𑀤𑀲𑁆𑀲𑀦𑀫𑀸𑀬𑀦𑁆𑀢𑀺, 𑀫𑀸𑀦𑀼𑀲𑀺𑀬𑀸 𑀅𑀫𑀸𑀦𑀼𑀲𑀸.

𑁧𑁨𑁪.

‘‘𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀘𑀺𑀡𑁆𑀡𑁂𑀦, 𑀧𑀼𑀩𑁆𑀩𑁂 𑀲𑀼𑀘𑀭𑀺𑀢𑁂𑀦 𑀘;

𑀇𑀥 𑀭𑀸𑀚𑀓𑀼𑀮𑁂 𑀚𑀸𑀢𑀸, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

𑁧𑁨𑁫.

‘‘𑀅𑀬𑀜𑁆𑀘 𑀢𑁂 𑀭𑀸𑀚𑀧𑀼𑀢𑁆𑀢𑀺, 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄;

𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀻 𑀘, 𑀓𑀺𑀢𑁆𑀢𑀻 𑀘 𑀇𑀥 𑀚𑀻𑀯𑀺𑀢𑁂.

𑁧𑁨𑁬.

‘‘𑀘𑀺𑀭𑀁 𑀲𑀼𑀫𑁂𑀥𑁂 𑀲𑀼𑀔𑀺𑀦𑀻, 𑀥𑀫𑁆𑀫𑀫𑀢𑁆𑀢𑀦𑀺 𑀧𑀸𑀮𑀬;

𑀏𑀲𑀸𑀳𑀁 𑀢𑀺𑀤𑀺𑀯𑀁 𑀬𑀸𑀫𑀺, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦’’𑀦𑁆𑀢𑀺.

𑀢𑀢𑁆𑀣 𑀲𑀳𑀲𑁆𑀲𑀓𑁆𑀔𑁄𑀢𑀺 𑀅𑀢𑁆𑀣𑀲𑀳𑀲𑁆𑀲𑀲𑁆𑀲 𑀢𑀁𑀫𑀼𑀳𑀼𑀢𑁆𑀢𑀁 𑀤𑀲𑁆𑀲𑀦𑀯𑀲𑁂𑀦 𑀲𑀳𑀲𑁆𑀲𑀓𑁆𑀔𑁄. 𑀇𑀢𑁆𑀣𑀺𑀬𑁄𑀢𑀺 𑀇𑀢𑁆𑀣𑀻. 𑀲𑀫𑀘𑀸𑀭𑀺𑀦𑀻𑀢𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀫𑀘𑀭𑀺𑀬𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀢𑀸𑀤𑀺𑀲𑀸𑀬𑀸𑀢𑀺 𑀢𑀣𑀸𑀭𑀽𑀧𑀸𑀬. 𑀲𑀼𑀫𑁂𑀥𑀸𑀬𑀸𑀢𑀺 𑀲𑀼𑀧𑀜𑁆𑀜𑀸𑀬. 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄𑀢𑀺 𑀅𑀬𑀁 𑀢𑀯 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂 𑀅𑀦𑀸𑀕𑀢𑁂 𑀘 𑀚𑀬𑀕𑁆𑀕𑀸𑀳𑁄. 𑀢𑁂𑀲𑀼 𑀅𑀦𑀸𑀕𑀢𑁂 𑀤𑁂𑀯𑀮𑁄𑀓𑀼𑀧𑁆𑀧𑀢𑁆𑀢𑀺 𑀘 𑀇𑀥 𑀚𑀻𑀯𑀺𑀢𑁂 𑀧𑀯𑀢𑁆𑀢𑀫𑀸𑀦𑁂 𑀓𑀺𑀢𑁆𑀢𑀺 𑀘𑀸𑀢𑀺 𑀅𑀬𑀁 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄 𑀦𑀸𑀫. 𑀥𑀫𑁆𑀫𑀦𑁆𑀢𑀺 𑀏𑀯𑀁 𑀲𑀪𑀸𑀯𑀕𑀼𑀡𑀁 𑀘𑀺𑀭𑀁 𑀅𑀢𑁆𑀢𑀦𑀺 𑀧𑀸𑀮𑀬. 𑀏𑀲𑀸𑀳𑀦𑁆𑀢𑀺 𑀏𑀲𑁄 𑀅𑀳𑀁. 𑀧𑀺𑀬𑀁 𑀫𑁂𑀢𑀺 𑀫𑀬𑁆𑀳𑀁 𑀢𑀯 𑀤𑀲𑁆𑀲𑀦𑀁 𑀧𑀺𑀬𑀁.

𑀤𑁂𑀯𑀮𑁄𑀓𑁂 ¶ ¶ 𑀧𑀦 𑀫𑁂 𑀓𑀺𑀘𑁆𑀘𑀓𑀭𑀡𑀻𑀬𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑀸 𑀳𑁄𑀳𑀻𑀢𑀺 𑀢𑀲𑁆𑀲𑀸 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀦𑀴𑀓𑀸𑀭𑀤𑁂𑀯𑀧𑀼𑀢𑁆𑀢𑁄 𑀧𑀦 𑀧𑀘𑁆𑀘𑀽𑀲𑀓𑀸𑀮𑁂 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺, 𑀭𑀸𑀚𑀸 𑀕𑀩𑁆𑀪𑀲𑁆𑀲 𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀫𑀳𑀸𑀧𑀦𑀸𑀤𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀉𑀪𑀬𑀭𑀝𑁆𑀞𑀯𑀸𑀲𑀺𑀦𑁄 ‘‘𑀲𑀸𑀫𑀺𑀧𑀼𑀢𑁆𑀢𑀲𑁆𑀲 𑀦𑁄 𑀔𑀻𑀭𑀫𑀽𑀮’’𑀦𑁆𑀢𑀺 𑀏𑀓𑁂𑀓𑀁 𑀓𑀳𑀸𑀧𑀡𑀁 𑀭𑀸𑀚𑀗𑁆𑀕𑀡𑁂 𑀔𑀺𑀧𑀺𑀁𑀲𑀼, 𑀫𑀳𑀸𑀥𑀦𑀭𑀸𑀲𑀺 𑀅𑀳𑁄𑀲𑀺. 𑀭𑀜𑁆𑀜𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 ‘‘𑀲𑀸𑀫𑀺𑀧𑀼𑀢𑁆𑀢𑀲𑁆𑀲 𑀦𑁄 𑀯𑀟𑁆𑀠𑀺𑀢𑀓𑀸𑀮𑁂 𑀧𑀭𑀺𑀩𑁆𑀩𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀕𑁆𑀕𑀳𑁂𑀢𑁆𑀯𑀸𑀯 𑀧𑀓𑁆𑀓𑀫𑀺𑀁𑀲𑀼. 𑀓𑀼𑀫𑀸𑀭𑁄 𑀧𑀦 𑀫𑀳𑀸𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂𑀬𑁂𑀯 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀭𑀸𑀚𑀸 𑀧𑀼𑀢𑁆𑀢𑀲𑁆𑀲 𑀯𑀬𑀁 𑀑𑀮𑁄𑀓𑁂𑀢𑁆𑀯𑀸 ¶ 𑀤𑁂𑀯𑀺𑀁 𑀆𑀳 𑁋 ‘‘𑀪𑀤𑁆𑀤𑁂, 𑀧𑀼𑀢𑁆𑀢𑀲𑁆𑀲 𑀫𑁂 𑀭𑀚𑁆𑀚𑀸𑀪𑀺𑀲𑁂𑀓𑀓𑀸𑀮𑁄, 𑀭𑀫𑀡𑀻𑀬𑀫𑀲𑁆𑀲 𑀧𑀸𑀲𑀸𑀤𑀁 𑀓𑀸𑀭𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀲𑀸𑀥𑀼 𑀤𑁂𑀯𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢𑀸, 𑀯𑀟𑁆𑀠𑀓𑀺𑀁 𑀕𑀳𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑀢𑁄 𑀅𑀯𑀺𑀤𑀽𑀭𑁂 𑀧𑀼𑀢𑁆𑀢𑀲𑁆𑀲 𑀫𑁂 𑀧𑀸𑀲𑀸𑀤𑀁 𑀫𑀸𑀧𑁂𑀣, 𑀭𑀚𑁆𑀚𑁂𑀦 𑀦𑀁 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀪𑀽𑀫𑀺𑀧𑁆𑀧𑀤𑁂𑀲𑀁 𑀯𑀻𑀫𑀁𑀲𑀦𑁆𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑀸𑀢, 𑀫𑀳𑀸𑀧𑀦𑀸𑀤𑀓𑀼𑀫𑀸𑀭𑀲𑁆𑀲 𑀆𑀬𑀸𑀫𑁂𑀦 𑀦𑀯𑀬𑁄𑀚𑀦𑀺𑀓𑀁, 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀬𑁄𑀚𑀦𑀺𑀓𑀁, 𑀉𑀩𑁆𑀩𑁂𑀥𑁂𑀦 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀺𑀓𑀁, 𑀭𑀢𑀦𑀧𑀸𑀲𑀸𑀤𑀁 𑀫𑀸𑀧𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀯𑀟𑁆𑀠𑀓𑀻𑀯𑁂𑀲𑁂𑀦 𑀯𑀟𑁆𑀠𑀓𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀏𑀣𑀸’’𑀢𑀺 𑀢𑁂 𑀧𑁂𑀲𑁂𑀢𑁆𑀯𑀸 𑀤𑀡𑁆𑀟𑀓𑁂𑀦 𑀪𑀽𑀫𑀺𑀁 𑀧𑀳𑀭𑀺, 𑀢𑀸𑀯𑀤𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀲𑀢𑁆𑀢𑀪𑀽𑀫𑀺𑀓𑁄 𑀧𑀸𑀲𑀸𑀤𑁄 𑀉𑀝𑁆𑀞𑀳𑀺. 𑀫𑀳𑀸𑀧𑀦𑀸𑀤𑀲𑁆𑀲 𑀧𑀸𑀲𑀸𑀤𑀫𑀗𑁆𑀕𑀮𑀁, 𑀙𑀢𑁆𑀢𑀫𑀗𑁆𑀕𑀮𑀁, 𑀆𑀯𑀸𑀳𑀫𑀗𑁆𑀕𑀮𑀦𑁆𑀢𑀺 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀏𑀓𑀢𑁄𑀯 𑀅𑀳𑁂𑀲𑀼𑀁. 𑀫𑀗𑁆𑀕𑀮𑀝𑁆𑀞𑀸𑀦𑁂 𑀉𑀪𑀬𑀭𑀝𑁆𑀞𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀗𑁆𑀕𑀮𑀘𑁆𑀙𑀡𑁂𑀦 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀦𑁂𑀯 𑀦𑁂 𑀭𑀸𑀚𑀸 𑀉𑀬𑁆𑀬𑁄𑀚𑁂𑀲𑀺, 𑀢𑁂𑀲𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺 ¶ 𑀲𑀩𑁆𑀩𑀁 𑀭𑀸𑀚𑀓𑀼𑀮𑀲𑀦𑁆𑀢𑀓𑀫𑁂𑀯 𑀅𑀳𑁄𑀲𑀺. 𑀢𑁂 𑀲𑀢𑁆𑀢𑀲𑀁𑀯𑀘𑁆𑀙𑀭𑀘𑁆𑀘𑀬𑁂𑀦 𑀉𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀼𑀭𑀼𑀘𑀺𑀫𑀳𑀸𑀭𑀸𑀚𑁂𑀦 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀝𑁆𑀞𑀸 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀫𑀗𑁆𑀕𑀮𑀁 𑀪𑀼𑀜𑁆𑀚𑀦𑁆𑀢𑀸𑀦𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀢𑀸𑀦𑀺, 𑀓𑀤𑀸 𑀫𑀗𑁆𑀕𑀮𑀲𑁆𑀲 𑀑𑀲𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀢𑀢𑁄 𑀭𑀸𑀚𑀸 ‘‘𑀢𑀸𑀢𑀸, 𑀧𑀼𑀢𑁆𑀢𑁂𑀦 𑀫𑁂 𑀏𑀢𑁆𑀢𑀓𑀁 𑀓𑀸𑀮𑀁 𑀦 𑀳𑀲𑀺𑀢𑀧𑀼𑀩𑁆𑀩𑀁, 𑀬𑀤𑀸 𑀲𑁄 𑀳𑀲𑀺𑀲𑁆𑀲𑀢𑀺, 𑀢𑀤𑀸 𑀕𑀫𑀺𑀲𑁆𑀲𑀣𑀸’’𑀢𑀺 𑀆𑀳. 𑀅𑀣 𑀫𑀳𑀸𑀚𑀦𑁄 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀝𑁂 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀙 𑀦𑀝𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀢𑁆𑀢 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀦𑀘𑁆𑀘𑀦𑁆𑀢𑀸 𑀭𑀸𑀚𑀸𑀦𑀁 𑀳𑀲𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀲𑁆𑀲 𑀓𑀺𑀭 𑀤𑀻𑀖𑀭𑀢𑁆𑀢𑀁 𑀤𑀺𑀩𑁆𑀩𑀦𑀸𑀝𑀓𑀸𑀦𑀁 𑀤𑀺𑀝𑁆𑀞𑀢𑁆𑀢𑀸 𑀢𑁂𑀲𑀁 𑀦𑀘𑁆𑀘𑀁 𑀅𑀫𑀦𑀼𑀜𑁆𑀜𑀁 𑀅𑀳𑁄𑀲𑀺.

𑀢𑀤𑀸 𑀪𑀡𑁆𑀟𑀼𑀓𑀡𑁆𑀟𑁄 𑀘 𑀧𑀡𑁆𑀟𑀼𑀓𑀡𑁆𑀟𑁄 𑀘𑀸𑀢𑀺 𑀤𑁆𑀯𑁂 𑀦𑀸𑀝𑀓𑀚𑁂𑀝𑁆𑀞𑀓𑀸 ‘‘𑀫𑀬𑀁 𑀭𑀸𑀚𑀸𑀦𑀁 𑀳𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀗𑁆𑀕𑀡𑀁 𑀧𑀯𑀺𑀲𑀺𑀁𑀲𑀼. 𑀢𑁂𑀲𑀼 𑀪𑀡𑁆𑀟𑀼𑀓𑀡𑁆𑀟𑁄 𑀢𑀸𑀯 𑀭𑀸𑀚𑀤𑁆𑀯𑀸𑀭𑁂 𑀫𑀳𑀦𑁆𑀢𑀁 𑀅𑀢𑀼𑀮𑀁 𑀦𑀸𑀫 𑀅𑀫𑁆𑀩𑀁 ¶ 𑀫𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑀕𑀼𑀴𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀲𑀸𑀔𑀸𑀬 𑀮𑀕𑁆𑀕𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑁂𑀦 𑀅𑀢𑀼𑀮𑀫𑁆𑀩𑀁 𑀅𑀪𑀺𑀭𑀼𑀳𑀺. 𑀅𑀢𑀼𑀮𑀫𑁆𑀩𑁄𑀢𑀺 𑀓𑀺𑀭 ¶ 𑀯𑁂𑀲𑁆𑀲𑀯𑀡𑀲𑁆𑀲 𑀅𑀫𑁆𑀩𑁄. 𑀅𑀣 𑀢𑀫𑁆𑀧𑀺 𑀯𑁂𑀲𑁆𑀲𑀯𑀡𑀲𑁆𑀲 𑀤𑀸𑀲𑀸 𑀕𑀳𑁂𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀲𑀼𑀁, 𑀲𑁂𑀲𑀦𑀸𑀝𑀓𑀸 𑀢𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀉𑀤𑀓𑁂𑀦 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀲𑁄 𑀧𑀼𑀧𑁆𑀨𑀧𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀦𑀘𑁆𑀘𑀦𑁆𑀢𑁄𑀯 𑀉𑀝𑁆𑀞𑀳𑀺. 𑀫𑀳𑀸𑀧𑀦𑀸𑀤𑁄 𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦𑁂𑀯 𑀳𑀲𑀺. 𑀧𑀡𑁆𑀟𑀼𑀓𑀡𑁆𑀟𑁄 𑀦𑀝𑁄 𑀭𑀸𑀚𑀗𑁆𑀕𑀡𑁂 𑀤𑀸𑀭𑀼𑀘𑀺𑀢𑀓𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀅𑀕𑁆𑀕𑀺𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀦𑀺𑀩𑁆𑀩𑀼𑀢𑁂 𑀘𑀺𑀢𑀓𑀁 𑀉𑀤𑀓𑁂𑀦 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀲𑁄 𑀲𑀧𑀭𑀺𑀲𑁄 𑀧𑀼𑀧𑁆𑀨𑀧𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀦𑀘𑁆𑀘𑀦𑁆𑀢𑁄𑀯 𑀉𑀝𑁆𑀞𑀳𑀺. 𑀢𑀫𑁆𑀧𑀺 𑀤𑀺𑀲𑁆𑀯𑀸 𑀭𑀸𑀚𑀸 𑀦𑁂𑀯 𑀳𑀲𑀺. 𑀇𑀢𑀺 𑀢𑀁 𑀳𑀲𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀦𑀼𑀲𑁆𑀲𑀸 𑀉𑀧𑀤𑁆𑀤𑀼𑀢𑀸 𑀅𑀳𑁂𑀲𑀼𑀁.

𑀲𑀓𑁆𑀓𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀕𑀘𑁆𑀙, 𑀢𑀸𑀢, 𑀫𑀳𑀸𑀧𑀦𑀸𑀤𑀁 𑀳𑀲𑀸𑀧𑁂𑀢𑁆𑀯𑀸 𑀏𑀳𑀻’’𑀢𑀺 𑀤𑁂𑀯𑀦𑀝𑀁 𑀧𑁂𑀲𑁂𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀆𑀓𑀸𑀲𑁂 𑀞𑀢𑁆𑀯𑀸 𑀉𑀧𑀟𑁆𑀠𑀅𑀗𑁆𑀕𑀁 𑀦𑀸𑀫 ¶ 𑀤𑀲𑁆𑀲𑁂𑀲𑀺, 𑀏𑀓𑁄𑀯 𑀳𑀢𑁆𑀣𑁄, 𑀏𑀓𑁄𑀯 𑀧𑀸𑀤𑁄, 𑀏𑀓𑀁 𑀅𑀓𑁆𑀔𑀺, 𑀏𑀓𑀸 𑀤𑀸𑀞𑀸 𑀦𑀘𑁆𑀘𑀢𑀺 𑀘𑀮𑀢𑀺 𑀨𑀦𑁆𑀤𑀢𑀺, 𑀲𑁂𑀲𑀁 𑀦𑀺𑀘𑁆𑀘𑀮𑀫𑀳𑁄𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀧𑀦𑀸𑀤𑁄 𑀣𑁄𑀓𑀁 𑀳𑀲𑀺𑀢𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀧𑀦 𑀳𑀲𑀦𑁆𑀢𑁄 𑀳𑀲𑀦𑁆𑀢𑁄 𑀳𑀸𑀲𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀗𑁆𑀕𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂𑀬𑁂𑀯 𑀧𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀗𑁆𑀕𑀮𑀁 𑀦𑀺𑀝𑁆𑀞𑀺𑀢𑀁. 𑀲𑁂𑀲𑀫𑁂𑀢𑁆𑀣 ‘‘𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸, 𑀬𑀲𑁆𑀲 𑀬𑀽𑀧𑁄 𑀲𑀼𑀯𑀡𑁆𑀡𑀬𑁄’’𑀢𑀺 𑀫𑀳𑀸𑀧𑀦𑀸𑀤𑀚𑀸𑀢𑀓𑁂𑀦 𑀯𑀡𑁆𑀡𑁂𑀢𑀩𑁆𑀩𑀁. 𑀭𑀸𑀚𑀸 𑀫𑀳𑀸𑀧𑀦𑀸𑀤𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀯𑀺𑀲𑀸𑀔𑀸 𑀧𑀼𑀩𑁆𑀩𑁂𑀧𑀺 𑀫𑀫 𑀲𑀦𑁆𑀢𑀺𑀓𑀸 𑀯𑀭𑀁 𑀮𑀪𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀳𑀸𑀧𑀦𑀸𑀤𑁄 𑀪𑀤𑁆𑀤𑀚𑀺 𑀅𑀳𑁄𑀲𑀺, 𑀲𑀼𑀫𑁂𑀥𑀸𑀤𑁂𑀯𑀻 𑀯𑀺𑀲𑀸𑀔𑀸, 𑀯𑀺𑀲𑁆𑀲𑀓𑀫𑁆𑀫𑁄 𑀆𑀦𑀦𑁆𑀤𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀭𑀼𑀘𑀺𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁪𑁯𑁦] 𑁭. 𑀧𑀜𑁆𑀘𑀼𑀧𑁄𑀲𑀣𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀸𑀦𑀺 𑀢𑀼𑀯𑀁 𑀓𑀧𑁄𑀢𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁄𑀲𑀣𑀺𑀓𑁂 𑀧𑀜𑁆𑀘𑀲𑀢𑁂 𑀉𑀧𑀸𑀲𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 𑀥𑀫𑁆𑀫𑀲𑀪𑀸𑀬𑀁 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀼𑀤𑀼𑀘𑀺𑀢𑁆𑀢𑁂𑀦 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀚𑁆𑀚 𑀉𑀧𑀸𑀲𑀓𑀸𑀦𑀁 𑀓𑀣𑀁 𑀧𑀝𑀺𑀘𑁆𑀘 𑀤𑁂𑀲𑀦𑀸 ¶ 𑀲𑀫𑀼𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀉𑀧𑁄𑀲𑀣𑀺𑀓𑀢𑁆𑀣 𑀉𑀧𑀸𑀲𑀓𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫 ¶ , 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀯𑁄 𑀓𑀢𑀁, 𑀉𑀧𑁄𑀲𑀣𑁄 𑀦𑀸𑀫𑁂𑀲 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑁄, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀦𑀺𑀕𑁆𑀕𑀳𑀢𑁆𑀣𑀁 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀫𑀕𑀥𑀭𑀝𑁆𑀞𑀸𑀤𑀻𑀦𑀁 𑀢𑀺𑀡𑁆𑀡𑀁 𑀭𑀝𑁆𑀞𑀸𑀦𑀁 𑀅𑀦𑁆𑀢𑀭𑁂 𑀅𑀝𑀯𑀻 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀲𑁆𑀲𑀫𑀁 𑀓𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀧𑀦 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀯𑁂𑀴𑀼𑀕𑀳𑀦𑁂 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀓𑀧𑁄𑀢𑀲𑀓𑀼𑀡𑁄 ¶ 𑀯𑀲𑀢𑀺, 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀅𑀳𑀺, 𑀏𑀓𑀲𑁆𑀫𑀺𑀁 𑀯𑀦𑀕𑀼𑀫𑁆𑀩𑁂 𑀲𑀺𑀗𑁆𑀕𑀸𑀮𑁄, 𑀏𑀓𑀲𑁆𑀫𑀺𑀁 𑀯𑀦𑀕𑀼𑀫𑁆𑀩𑁂 𑀅𑀘𑁆𑀙𑁄. 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀇𑀲𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀓𑀧𑁄𑀢𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀓𑀼𑀮𑀸𑀯𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀺𑀁 𑀓𑀧𑁄𑀢𑀺𑀁 𑀏𑀓𑁄 𑀲𑁂𑀦𑁄 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺. 𑀢𑀲𑁆𑀲𑀸 𑀯𑀺𑀭𑀯𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀧𑁄𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀢𑁂𑀦 𑀳𑀭𑀺𑀬𑀫𑀸𑀦𑀁 𑀧𑀲𑁆𑀲𑀺. 𑀲𑁂𑀦𑁄𑀧𑀺 𑀦𑀁 𑀯𑀺𑀭𑀯𑀦𑁆𑀢𑀺𑀁𑀬𑁂𑀯 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺. 𑀓𑀧𑁄𑀢𑁄 𑀢𑀸𑀬 𑀯𑀺𑀬𑁄𑀕𑁂𑀦 𑀭𑀸𑀕𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀭𑀸𑀕𑁄 𑀫𑀁 𑀅𑀢𑀺𑀯𑀺𑀬 𑀓𑀺𑀮𑀫𑁂𑀢𑀺, 𑀦 𑀇𑀤𑀸𑀦𑀺 𑀇𑀫𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀕𑁄𑀘𑀭𑀧𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀸𑀕𑀦𑀺𑀕𑁆𑀕𑀳𑀸𑀬 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀧𑀚𑁆𑀚𑀺.

𑀲𑀧𑁆𑀧𑁄𑀧𑀺 ‘‘𑀕𑁄𑀘𑀭𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀕𑀸𑀫𑁂 𑀕𑀸𑀯𑀻𑀦𑀁 𑀯𑀺𑀘𑀭𑀡𑀝𑁆𑀞𑀸𑀦𑁂 𑀕𑁄𑀘𑀭𑀁 𑀧𑀭𑀺𑀬𑁂𑀲𑀢𑀺. 𑀢𑀤𑀸 𑀕𑀸𑀫𑀪𑁄𑀚𑀓𑀲𑁆𑀲 𑀲𑀩𑁆𑀩𑀲𑁂𑀢𑁄 𑀫𑀗𑁆𑀕𑀮𑀉𑀲𑀪𑁄 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑀧𑀸𑀤𑁂 𑀚𑀡𑁆𑀡𑀼𑀦𑀸 𑀧𑀢𑀺𑀝𑁆𑀞𑀸𑀬 𑀲𑀺𑀗𑁆𑀕𑁂𑀳𑀺 𑀫𑀢𑁆𑀢𑀺𑀓𑀁 𑀕𑀡𑁆𑀳𑀦𑁆𑀢𑁄 𑀓𑀻𑀴𑀢𑀺, 𑀲𑀧𑁆𑀧𑁄 𑀕𑀸𑀯𑀻𑀦𑀁 𑀧𑀤𑀲𑀤𑁆𑀤𑁂𑀦 𑀪𑀻𑀢𑁄 𑀢𑀁 𑀯𑀫𑁆𑀫𑀺𑀓𑀁 𑀧𑀯𑀺𑀲𑀺𑀢𑀼𑀁 𑀧𑀓𑁆𑀓𑀦𑁆𑀢𑁄. 𑀅𑀣 𑀦𑀁 𑀉𑀲𑀪𑁄 𑀧𑀸𑀤𑁂𑀦 𑀅𑀓𑁆𑀓𑀫𑀺. 𑀲𑁄 𑀢𑀁 𑀓𑀼𑀚𑁆𑀛𑀺𑀢𑁆𑀯𑀸 𑀟𑀁𑀲𑀺, 𑀉𑀲𑀪𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄. 𑀕𑀸𑀫𑀯𑀸𑀲𑀺𑀦𑁄 ‘‘𑀉𑀲𑀪𑁄 𑀓𑀺𑀭 𑀫𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀏𑀓𑀢𑁄 𑀆𑀕𑀦𑁆𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀢𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀆𑀯𑀸𑀝𑁂 𑀦𑀺𑀔𑀡𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑀧𑁆𑀧𑁄 𑀢𑁂𑀲𑀁 𑀕𑀢𑀓𑀸𑀮𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀅𑀳𑀁 𑀓𑁄𑀥𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀳𑀤𑀬𑁂 𑀲𑁄𑀓𑀁 𑀧𑀯𑁂𑀲𑁂𑀲𑀺𑀁, 𑀦 ¶ 𑀤𑀸𑀦𑀺 𑀇𑀫𑀁 𑀓𑁄𑀥𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀓𑁄𑀥𑀦𑀺𑀕𑁆𑀕𑀳𑀸𑀬 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀧𑀚𑁆𑀚𑀺.

𑀲𑀺𑀗𑁆𑀕𑀸𑀮𑁄𑀧𑀺 ¶ 𑀕𑁄𑀘𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀏𑀓𑀁 𑀫𑀢𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 ‘‘𑀫𑀳𑀸 𑀫𑁂 𑀕𑁄𑀘𑀭𑁄 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑁄 𑀕𑀦𑁆𑀢𑁆𑀯𑀸 𑀲𑁄𑀡𑁆𑀟𑀸𑀬𑀁 𑀟𑀁𑀲𑀺, 𑀣𑀫𑁆𑀪𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀢𑀢𑁆𑀣 𑀅𑀲𑁆𑀲𑀸𑀤𑀁 𑀅𑀮𑀪𑀺𑀢𑁆𑀯𑀸 𑀤𑀦𑁆𑀢𑁂 𑀟𑀁𑀲𑀺, 𑀧𑀸𑀲𑀸𑀡𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀓𑀼𑀘𑁆𑀙𑀺𑀬𑀁 𑀟𑀁𑀲𑀺, 𑀓𑀼𑀲𑀼𑀮𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀦𑀗𑁆𑀕𑀼𑀝𑁆𑀞𑁂 𑀟𑀁𑀲𑀺, 𑀅𑀬𑀲𑀮𑀸𑀓𑁂 ¶ 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀯𑀘𑁆𑀘𑀫𑀕𑁆𑀕𑁂 𑀟𑀁𑀲𑀺, 𑀖𑀢𑀧𑀽𑀯𑁂 𑀤𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀮𑁄𑀪𑀯𑀲𑁂𑀦 𑀔𑀸𑀤𑀦𑁆𑀢𑁄 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀧𑀸𑀯𑀺𑀲𑀺, 𑀢𑀢𑁆𑀣 𑀙𑀸𑀢𑀓𑀸𑀮𑁂 𑀫𑀁𑀲𑀁 𑀔𑀸𑀤𑀢𑀺, 𑀧𑀺𑀧𑀸𑀲𑀺𑀢𑀓𑀸𑀮𑁂 𑀮𑁄𑀳𑀺𑀢𑀁 𑀧𑀺𑀯𑀢𑀺, 𑀦𑀺𑀧𑀚𑁆𑀚𑀦𑀓𑀸𑀮𑁂 𑀅𑀦𑁆𑀢𑀸𑀦𑀺 𑀘 𑀧𑀧𑁆𑀨𑀸𑀲𑀜𑁆𑀘 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑁄 ‘‘𑀇𑀥𑁂𑀯 𑀫𑁂 𑀅𑀦𑁆𑀦𑀧𑀸𑀦𑀜𑁆𑀘 𑀲𑀬𑀦𑀜𑁆𑀘 𑀦𑀺𑀧𑁆𑀨𑀦𑁆𑀦𑀁, 𑀅𑀜𑁆𑀜𑀢𑁆𑀣 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀪𑀺𑀭𑀢𑁄 𑀩𑀳𑀺 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁𑀬𑁂𑀯 𑀯𑀲𑀺. 𑀅𑀧𑀭𑀪𑀸𑀕𑁂 𑀯𑀸𑀢𑀸𑀢𑀧𑁂𑀦 𑀳𑀢𑁆𑀣𑀺𑀓𑀼𑀡𑀧𑁂 𑀲𑀼𑀓𑁆𑀔𑀦𑁆𑀢𑁂 𑀓𑀭𑀻𑀲𑀫𑀕𑁆𑀕𑁄 𑀧𑀺𑀳𑀺𑀢𑁄, 𑀲𑀺𑀗𑁆𑀕𑀸𑀮𑁄 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀦𑀺𑀧𑀚𑁆𑀚𑀫𑀸𑀦𑁄 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑁄 𑀧𑀡𑁆𑀟𑀼𑀲𑀭𑀻𑀭𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑀫𑀕𑁆𑀕𑀁 𑀦 𑀧𑀲𑁆𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀅𑀓𑀸𑀮𑀫𑁂𑀖𑁄 𑀯𑀲𑁆𑀲𑀺, 𑀓𑀭𑀻𑀲𑀫𑀕𑁆𑀕𑁄 𑀢𑁂𑀫𑀺𑀬𑀫𑀸𑀦𑁄 𑀫𑀼𑀤𑀼 𑀳𑀼𑀢𑁆𑀯𑀸 𑀯𑀺𑀯𑀭𑀁 𑀤𑀲𑁆𑀲𑁂𑀲𑀺. 𑀲𑀺𑀗𑁆𑀕𑀸𑀮𑁄 𑀙𑀺𑀤𑁆𑀤𑀁 𑀤𑀺𑀲𑁆𑀯𑀸 ‘‘𑀅𑀢𑀺𑀘𑀺𑀭𑀫𑁆𑀳𑀺 𑀓𑀺𑀮𑀦𑁆𑀢𑁄, 𑀇𑀫𑀺𑀦𑀸 𑀙𑀺𑀤𑁆𑀤𑁂𑀦 𑀧𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀓𑀭𑀻𑀲𑀫𑀕𑁆𑀕𑀁 𑀲𑀻𑀲𑁂𑀦 𑀧𑀳𑀭𑀺. 𑀢𑀲𑁆𑀲 𑀲𑀫𑁆𑀩𑀸𑀥𑀝𑁆𑀞𑀸𑀦𑁂𑀦 𑀯𑁂𑀕𑁂𑀦 𑀦𑀺𑀓𑁆𑀔𑀦𑁆𑀢𑀲𑁆𑀲 𑀲𑀺𑀦𑁆𑀦𑀲𑀭𑀻𑀭𑀲𑁆𑀲 𑀲𑀩𑁆𑀩𑀸𑀦𑀺 𑀮𑁄𑀫𑀸𑀦𑀺 𑀓𑀭𑀻𑀲𑀫𑀕𑁆𑀕𑁂 𑀮𑀕𑁆𑀕𑀸𑀦𑀺, 𑀢𑀸𑀮𑀓𑀦𑁆𑀤𑁄 𑀯𑀺𑀬 𑀦𑀺𑀮𑁆𑀮𑁄𑀫𑀲𑀭𑀻𑀭𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀲𑁄 ‘‘𑀮𑁄𑀪𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀇𑀤𑀁 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁, 𑀦 𑀤𑀸𑀦𑀺 𑀇𑀫𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀮𑁄𑀪𑀦𑀺𑀕𑁆𑀕𑀳𑀢𑁆𑀣𑀸𑀬 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀧𑀚𑁆𑀚𑀺.

𑀅𑀘𑁆𑀙𑁄𑀧𑀺 𑀅𑀭𑀜𑁆𑀜𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀢𑁆𑀭𑀺𑀘𑁆𑀙𑀸𑀪𑀺𑀪𑀽𑀢𑁄 𑀫𑀮𑁆𑀮𑀭𑀝𑁆𑀞𑁂 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀢𑁄. 𑀕𑀸𑀫𑀯𑀸𑀲𑀺𑀦𑁄 ‘‘𑀅𑀘𑁆𑀙𑁄 𑀓𑀺𑀭 𑀆𑀕𑀢𑁄’’𑀢𑀺 𑀥𑀦𑀼𑀤𑀡𑁆𑀟𑀸𑀤𑀺𑀳𑀢𑁆𑀣𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑁂𑀦 𑀧𑀯𑀺𑀝𑁆𑀞𑀁 𑀕𑀼𑀫𑁆𑀩𑀁 𑀧𑀭𑀺𑀯𑀸𑀭𑁂𑀲𑀼𑀁. 𑀲𑁄 𑀫𑀳𑀸𑀚𑀦𑁂𑀦 𑀧𑀭𑀺𑀯𑀸𑀭𑀺𑀢𑀪𑀸𑀯𑀁 𑀜𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺, 𑀧𑀮𑀸𑀬𑀦𑁆𑀢𑀫𑁂𑀯 𑀢𑀁 𑀥𑀦𑀽𑀳𑀺 𑀘𑁂𑀯 𑀤𑀡𑁆𑀟𑀸𑀤𑀻𑀳𑀺 𑀘 𑀧𑁄𑀣𑁂𑀲𑀼𑀁. 𑀲𑁄 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦 𑀮𑁄𑀳𑀺𑀢𑁂𑀦 𑀕𑀮𑀦𑁆𑀢𑁂𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 ¶ 𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀤𑀼𑀓𑁆𑀔𑀁 𑀫𑀫 𑀅𑀢𑁆𑀭𑀺𑀘𑁆𑀙𑀸𑀮𑁄𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑀁, 𑀦 𑀤𑀸𑀦𑀺 𑀇𑀫𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀅𑀢𑁆𑀭𑀺𑀘𑁆𑀙𑀸𑀦𑀺𑀕𑁆𑀕𑀳𑀸𑀬 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀦𑀺𑀧𑀚𑁆𑀚𑀺.

𑀢𑀸𑀧𑀲𑁄𑀧𑀺 𑀅𑀢𑁆𑀢𑀦𑁄 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀯𑀲𑀺𑀓𑁄 𑀳𑀼𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀣𑁂𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀲𑁆𑀲 𑀫𑀸𑀦𑀦𑀺𑀲𑁆𑀲𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀦 𑀮𑀸𑀫𑀓𑀲𑀢𑁆𑀢𑁄, 𑀩𑀼𑀤𑁆𑀥𑀗𑁆𑀓𑀼𑀭𑁄 𑀏𑀲, 𑀇𑀫𑀲𑁆𑀫𑀺𑀁𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀫𑀸𑀦𑀦𑀺𑀕𑁆𑀕𑀳𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀸𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁 𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁂𑀬𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀆𑀲𑀦𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ¶ 𑀫𑀸𑀦𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 ‘‘𑀦𑀲𑁆𑀲, 𑀯𑀲𑀮, 𑀓𑀸𑀴𑀓𑀡𑁆𑀡𑀺, 𑀫𑀼𑀡𑁆𑀟𑀓, 𑀲𑀫𑀡𑀓, 𑀓𑀺𑀫𑀢𑁆𑀣𑀁 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑁂 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺 𑀆𑀳. 𑀅𑀣 𑀦𑀁 𑀲𑁄 ‘‘𑀲𑀧𑁆𑀧𑀼𑀭𑀺𑀲, 𑀓𑀲𑁆𑀫𑀸 𑀫𑀸𑀦𑀦𑀺𑀲𑁆𑀲𑀺𑀢𑁄𑀲𑀺, 𑀅𑀳𑀁 𑀧𑀝𑀺𑀯𑀺𑀤𑁆𑀥𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄, 𑀢𑁆𑀯𑀁 𑀇𑀫𑀲𑁆𑀫𑀺𑀁𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀩𑀼𑀤𑁆𑀥𑀗𑁆𑀓𑀼𑀭𑁄𑀲𑀺, 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀆𑀕𑀢𑁄 𑀅𑀜𑁆𑀜𑀁 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀩𑀼𑀤𑁆𑀥𑀢𑁆𑀢𑀪𑀸𑀯𑁂 𑀞𑀺𑀢𑁄 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 𑀦𑀸𑀫𑀜𑁆𑀘 𑀕𑁄𑀢𑁆𑀢𑀜𑁆𑀘 𑀓𑀼𑀮𑀜𑁆𑀘 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 𑀘 𑀲𑀩𑁆𑀩𑁂 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀢𑁆𑀯𑀁 𑀫𑀸𑀦𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸 𑀨𑀭𑀼𑀲𑁄 𑀳𑁄𑀲𑀺, 𑀦𑀬𑀺𑀤𑀁 𑀢𑀯 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀑𑀯𑀸𑀤𑀫𑀤𑀸𑀲𑀺. 𑀲𑁄 𑀢𑁂𑀦 𑀏𑀯𑀁 𑀯𑀼𑀢𑁆𑀢𑁄𑀧𑀺 𑀦𑁂𑀯 𑀦𑀁 𑀯𑀦𑁆𑀤𑀺, 𑀦 𑀘 ‘‘𑀓𑀤𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀢𑀯 𑀚𑀸𑀢𑀺𑀬𑀸 𑀫𑀫 𑀕𑀼𑀡𑀸𑀦𑀁 𑀫𑀳𑀦𑁆𑀢𑀪𑀸𑀯𑀁 𑀚𑀸𑀦, 𑀲𑀘𑁂 𑀲𑀓𑁆𑀓𑁄𑀲𑀺, 𑀅𑀳𑀁 𑀯𑀺𑀬 𑀆𑀓𑀸𑀲𑁂 𑀯𑀺𑀘𑀭𑀸𑀳𑀻’’𑀢𑀺 𑀯𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀧𑀁𑀲𑀼𑀁 𑀢𑀲𑁆𑀲 𑀚𑀝𑀸𑀫𑀡𑁆𑀟𑀮𑁂 𑀯𑀺𑀓𑀺𑀭𑀦𑁆𑀢𑁄 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑁄.

𑀢𑀸𑀧𑀲𑁄 𑀢𑀲𑁆𑀲 𑀕𑀢𑀓𑀸𑀮𑁂 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀏𑀯𑀁 𑀕𑀭𑀼𑀲𑀭𑀻𑀭𑁄 𑀯𑀸𑀢𑀫𑀼𑀔𑁂 𑀔𑀺𑀢𑁆𑀢𑀢𑀽𑀮𑀧𑀺𑀘𑀼 𑀯𑀺𑀬 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑁄, 𑀅𑀳𑀁 𑀚𑀸𑀢𑀺𑀫𑀸𑀦𑁂𑀦 𑀏𑀯𑀭𑀽𑀧𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀦𑁂𑀯 𑀧𑀸𑀤𑁂 𑀯𑀦𑁆𑀤𑀺𑀁, 𑀦 𑀘 ‘‘𑀓𑀤𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀧𑀼𑀘𑁆𑀙𑀺𑀁, 𑀚𑀸𑀢𑀺 𑀦𑀸𑀫𑁂𑀲𑀸 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀻𑀮𑀘𑀭𑀡𑀫𑁂𑀯 𑀫𑀳𑀦𑁆𑀢𑀁, 𑀅𑀬𑀁 𑀔𑁄 𑀧𑀦 ¶ 𑀫𑁂 𑀫𑀸𑀦𑁄 𑀯𑀟𑁆𑀠𑀦𑁆𑀢𑁄 𑀦𑀺𑀭𑀬𑀁 𑀉𑀧𑀦𑁂𑀲𑁆𑀲𑀢𑀺, 𑀦 𑀇𑀤𑀸𑀦𑀺 𑀇𑀫𑀁 𑀫𑀸𑀦𑀁 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀦𑀦𑀺𑀕𑁆𑀕𑀳𑀸𑀬 𑀉𑀧𑁄𑀲𑀣𑀁 𑀲𑀫𑀸𑀤𑀸𑀬 𑀓𑀝𑁆𑀞𑀢𑁆𑀣𑀭𑀺𑀓𑀸𑀬 ¶ 𑀦𑀺𑀲𑀺𑀦𑁆𑀦𑁄 𑀫𑀳𑀸𑀜𑀸𑀡𑁄 𑀓𑀼𑀮𑀧𑀼𑀢𑁆𑀢𑁄 𑀫𑀸𑀦𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀓𑀲𑀺𑀡𑀁 𑀯𑀟𑁆𑀠𑁂𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀓𑀧𑁄𑀢𑀸𑀤𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀓𑀧𑁄𑀢𑀁 𑀧𑀼𑀘𑁆𑀙𑀺 ‘‘𑀢𑁆𑀯𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀦 𑀇𑀫𑀸𑀬 𑀯𑁂𑀮𑀸𑀬 𑀆𑀕𑀘𑁆𑀙𑀲𑀺, 𑀕𑁄𑀘𑀭𑀁 𑀧𑀭𑀺𑀬𑁂𑀲𑀲𑀺, 𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀉𑀧𑁄𑀲𑀣𑀺𑀓𑁄 𑀚𑀸𑀢𑁄𑀲𑀻’’𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. 𑀅𑀣 𑀦𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁭.

‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀸𑀦𑀺 𑀢𑀼𑀯𑀁 𑀓𑀧𑁄𑀢, 𑀯𑀺𑀳𑀗𑁆𑀕𑀫 𑀦 𑀢𑀯 𑀪𑁄𑀚𑀦𑀢𑁆𑀣𑁄;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀓𑀧𑁄𑀢𑀸’’𑀢𑀺.

𑀢𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀦𑀺𑀭𑀸𑀮𑀬𑁄. 𑀦 𑀢𑀯 𑀪𑁄𑀚𑀦𑀢𑁆𑀣𑁄𑀢𑀺 𑀓𑀺𑀁 𑀅𑀚𑁆𑀚 𑀢𑀯 𑀪𑁄𑀚𑀦𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺.

𑀢𑀁 ¶ 𑀲𑀼𑀢𑁆𑀯𑀸 𑀓𑀧𑁄𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁨𑁮.

‘‘𑀅𑀳𑀁 𑀧𑀼𑀭𑁂 𑀕𑀺𑀤𑁆𑀥𑀺𑀕𑀢𑁄 𑀓𑀧𑁄𑀢𑀺𑀬𑀸, 𑀅𑀲𑁆𑀫𑀺𑀁 𑀧𑀤𑁂𑀲𑀲𑁆𑀫𑀺𑀫𑀼𑀪𑁄 𑀭𑀫𑀸𑀫;

𑀅𑀣𑀕𑁆𑀕𑀳𑀻 𑀲𑀸𑀓𑀼𑀡𑀺𑀓𑁄 𑀓𑀧𑁄𑀢𑀺𑀁, 𑀅𑀓𑀸𑀫𑀓𑁄 𑀢𑀸𑀬 𑀯𑀺𑀦𑀸 𑀅𑀳𑁄𑀲𑀺𑀁.

𑁧𑁨𑁯.

‘‘𑀦𑀸𑀦𑀸𑀪𑀯𑀸 𑀯𑀺𑀧𑁆𑀧𑀬𑁄𑀕𑁂𑀦 𑀢𑀲𑁆𑀲𑀸, 𑀫𑀦𑁄𑀫𑀬𑀁 𑀯𑁂𑀤𑀦 𑀯𑁂𑀤𑀬𑀸𑀫𑀺;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀭𑀸𑀕𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀻’’𑀢𑀺.

𑀢𑀢𑁆𑀣 𑀭𑀫𑀸𑀫𑀸𑀢𑀺 𑀇𑀫𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀓𑀸𑀫𑀭𑀢𑀺𑀬𑀸 𑀭𑀫𑀸𑀫. 𑀲𑀸𑀓𑀼𑀡𑀺𑀓𑁄𑀢𑀺 𑀲𑁂𑀦𑀲𑀓𑀼𑀡𑁄.

𑀓𑀧𑁄𑀢𑁂𑀦 ¶ 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑀫𑁆𑀫𑁂 𑀯𑀡𑁆𑀡𑀺𑀢𑁂 𑀫𑀳𑀸𑀲𑀢𑁆𑀢𑁄 𑀲𑀧𑁆𑀧𑀸𑀤𑀻𑀲𑀼 𑀏𑀓𑁂𑀓𑀁 𑀧𑀼𑀘𑁆𑀙𑀺. 𑀢𑁂𑀧𑀺 𑀬𑀣𑀸𑀪𑀽𑀢𑀁 𑀩𑁆𑀬𑀸𑀓𑀭𑀺𑀁𑀲𑀼 𑁋

𑁧𑁩𑁦.

‘‘𑀅𑀦𑀼𑀚𑁆𑀚𑀼𑀕𑀸𑀫𑀻 ¶ 𑀉𑀭𑀕𑀸 𑀤𑀼𑀚𑀺𑀯𑁆𑀳, 𑀤𑀸𑀞𑀸𑀯𑀼𑀥𑁄 𑀖𑁄𑀭𑀯𑀺𑀲𑁄𑀲𑀺 𑀲𑀧𑁆𑀧;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀦𑀼 𑀤𑀻𑀖.

𑁧𑁩𑁧.

‘‘𑀉𑀲𑀪𑁄 𑀅𑀳𑀽 𑀩𑀮𑀯𑀸 𑀕𑀸𑀫𑀺𑀓𑀲𑁆𑀲, 𑀘𑀮𑀓𑁆𑀓𑀓𑀽 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑁄;

𑀲𑁄 𑀫𑀁 𑀅𑀓𑁆𑀓𑀫𑀺 𑀢𑀁 𑀓𑀼𑀧𑀺𑀢𑁄 𑀅𑀟𑀁𑀲𑀺𑀁, 𑀤𑀼𑀓𑁆𑀔𑀸𑀪𑀺𑀢𑀼𑀡𑁆𑀡𑁄 𑀫𑀭𑀡𑀁 𑀉𑀧𑀸𑀕𑀸.

𑁧𑁩𑁨.

‘‘𑀢𑀢𑁄 𑀚𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀕𑀸𑀫𑀸, 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀅𑀧𑀓𑁆𑀓𑀫𑀺𑀁𑀲𑀼;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀓𑁄𑀥𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀺.

𑁧𑁩𑁩.

‘‘𑀫𑀢𑀸𑀦 𑀫𑀁𑀲𑀸𑀦𑀺 𑀩𑀳𑀽 𑀲𑀼𑀲𑀸𑀦𑁂, 𑀫𑀦𑀼𑀜𑁆𑀜𑀭𑀽𑀧𑀁 𑀢𑀯 𑀪𑁄𑀚𑀦𑁂 𑀢𑀁;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀲𑀺𑀗𑁆𑀕𑀸𑀮.

𑁧𑁩𑁪.

‘‘𑀧𑀯𑀺𑀲𑀺 𑀓𑀼𑀘𑁆𑀙𑀺𑀁 𑀫𑀳𑀢𑁄 𑀕𑀚𑀲𑁆𑀲, 𑀓𑀼𑀡𑀧𑁂 𑀭𑀢𑁄 𑀳𑀢𑁆𑀣𑀺𑀫𑀁𑀲𑁂𑀲𑀼 𑀕𑀺𑀤𑁆𑀥𑁄;

𑀉𑀡𑁆𑀳𑁄 𑀘 𑀯𑀸𑀢𑁄 𑀢𑀺𑀔𑀺𑀡𑀸 𑀘 𑀭𑀲𑁆𑀫𑀺𑀬𑁄, 𑀢𑁂 𑀲𑁄𑀲𑀬𑀼𑀁 𑀢𑀲𑁆𑀲 𑀓𑀭𑀻𑀲𑀫𑀕𑁆𑀕𑀁.

𑁧𑁩𑁫.

‘‘𑀓𑀺𑀲𑁄 𑀘 𑀧𑀡𑁆𑀟𑀽 𑀘 𑀅𑀳𑀁 𑀪𑀤𑀦𑁆𑀢𑁂, 𑀦 𑀫𑁂 𑀅𑀳𑀽 𑀦𑀺𑀓𑁆𑀔𑀫𑀦𑀸𑀬 𑀫𑀕𑁆𑀕𑁄;

𑀫𑀳𑀸 𑀘 𑀫𑁂𑀖𑁄 𑀲𑀳𑀲𑀸 𑀧𑀯𑀲𑁆𑀲𑀺, 𑀲𑁄 𑀢𑁂𑀫𑀬𑀻 𑀢𑀲𑁆𑀲 𑀓𑀭𑀻𑀲𑀫𑀕𑁆𑀕𑀁.

𑁧𑁩𑁬.

‘‘𑀢𑀢𑁄 ¶ 𑀅𑀳𑀁 𑀦𑀺𑀓𑁆𑀔𑀫𑀺𑀲𑀁 𑀪𑀤𑀦𑁆𑀢𑁂, 𑀘𑀦𑁆𑀤𑁄 𑀬𑀣𑀸 𑀭𑀸𑀳𑀼𑀫𑀼𑀔𑀸 𑀧𑀫𑀼𑀢𑁆𑀢𑁄;

𑀢𑀲𑁆𑀫𑀸 ¶ 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀮𑁄𑀪𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀺.

𑁧𑁩𑁭.

‘‘𑀯𑀫𑁆𑀫𑀻𑀓𑀣𑀽𑀧𑀲𑁆𑀫𑀺𑀁 ¶ 𑀓𑀺𑀧𑀺𑀮𑁆𑀮𑀺𑀓𑀸𑀦𑀺, 𑀦𑀺𑀧𑁆𑀧𑁄𑀣𑀬𑀦𑁆𑀢𑁄 𑀢𑀼𑀯𑀁 𑀧𑀼𑀭𑁂 𑀘𑀭𑀸𑀲𑀺;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀦𑀼 𑀅𑀘𑁆𑀙.

𑁧𑁩𑁮.

‘‘𑀲𑀓𑀁 𑀦𑀺𑀓𑁂𑀢𑀁 𑀅𑀢𑀺𑀳𑀻𑀴𑀬𑀸𑀦𑁄, 𑀅𑀢𑁆𑀭𑀺𑀘𑁆𑀙𑀢𑀸 𑀫𑀮𑁆𑀮𑀕𑀸𑀫𑀁 𑀅𑀕𑀘𑁆𑀙𑀺𑀁;

𑀢𑀢𑁄 𑀚𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀕𑀸𑀫𑀸, 𑀓𑁄𑀤𑀡𑁆𑀟𑀓𑁂𑀦 𑀧𑀭𑀺𑀧𑁄𑀣𑀬𑀺𑀁𑀲𑀼 𑀫𑀁.

𑁧𑁩𑁯.

‘‘𑀲𑁄 𑀪𑀺𑀦𑁆𑀦𑀲𑀻𑀲𑁄 𑀭𑀼𑀳𑀺𑀭𑀫𑀓𑁆𑀔𑀺𑀢𑀗𑁆𑀕𑁄, 𑀧𑀘𑁆𑀘𑀸𑀕𑀫𑀸𑀲𑀺𑀁 𑀲𑀓𑀁 𑀦𑀺𑀓𑁂𑀢𑀁;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀅𑀢𑁆𑀭𑀺𑀘𑁆𑀙𑀢𑀸 𑀫𑀸 𑀧𑀼𑀦𑀭𑀸𑀕𑀫𑀸𑀲𑀻’’𑀢𑀺.

𑀢𑀢𑁆𑀣 𑀅𑀦𑀼𑀚𑁆𑀚𑀼𑀕𑀸𑀫𑀻𑀢𑀺𑀆𑀤𑀻𑀳𑀺 𑀢𑀁 𑀆𑀮𑀧𑀢𑀺. 𑀘𑀮𑀓𑁆𑀓𑀓𑀽𑀢𑀺 𑀘𑀮𑀫𑀸𑀦𑀓𑀓𑀼𑀥𑁄. 𑀤𑀼𑀓𑁆𑀔𑀸𑀪𑀺𑀢𑀼𑀡𑁆𑀡𑁄𑀢𑀺 𑀲𑁄 𑀉𑀲𑀪𑁄 𑀤𑀼𑀓𑁆𑀔𑁂𑀦 𑀅𑀪𑀺𑀢𑀼𑀡𑁆𑀡𑁄 𑀆𑀢𑀼𑀭𑁄 𑀳𑀼𑀢𑁆𑀯𑀸. 𑀩𑀳𑀽𑀢𑀺 𑀩𑀳𑀽𑀦𑀺. 𑀧𑀯𑀺𑀲𑀻𑀢𑀺 𑀧𑀸𑀯𑀺𑀲𑀺𑀁. 𑀭𑀲𑁆𑀫𑀺𑀬𑁄𑀢𑀺 𑀲𑀽𑀭𑀺𑀬𑀭𑀲𑁆𑀫𑀺𑀬𑁄. 𑀦𑀺𑀓𑁆𑀔𑀫𑀺𑀲𑀦𑁆𑀢𑀺 𑀦𑀺𑀓𑁆𑀔𑀫𑀺𑀁. 𑀓𑀺𑀧𑀺𑀮𑁆𑀮𑀺𑀓𑀸𑀦𑀻𑀢𑀺 𑀉𑀧𑀘𑀺𑀓𑀸𑀬𑁄. 𑀦𑀺𑀧𑁆𑀧𑁄𑀣𑀬𑀦𑁆𑀢𑁄𑀢𑀺 𑀔𑀸𑀤𑀫𑀸𑀦𑁄. 𑀅𑀢𑀺𑀳𑀻𑀴𑀬𑀸𑀦𑁄𑀢𑀺 𑀅𑀢𑀺𑀫𑀜𑁆𑀜𑀦𑁆𑀢𑁄 𑀦𑀺𑀦𑁆𑀤𑀦𑁆𑀢𑁄 𑀕𑀭𑀳𑀦𑁆𑀢𑁄. 𑀓𑁄𑀤𑀡𑁆𑀟𑀓𑁂𑀦𑀸𑀢𑀺 𑀥𑀦𑀼𑀤𑀡𑁆𑀟𑀓𑁂𑀳𑀺 𑀘𑁂𑀯 𑀫𑀼𑀕𑁆𑀕𑀭𑁂𑀳𑀺 𑀘.

𑀏𑀯𑀁 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑀫𑁆𑀫𑀁 𑀯𑀡𑁆𑀡𑁂𑀢𑁆𑀯𑀸 𑀉𑀝𑁆𑀞𑀸𑀬 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀫𑀸𑀬 𑀯𑁂𑀮𑀸𑀬 𑀨𑀮𑀸𑀨𑀮𑀢𑁆𑀣𑀸𑀬 𑀕𑀘𑁆𑀙𑀣, 𑀅𑀚𑁆𑀚 𑀅𑀕𑀦𑁆𑀢𑁆𑀯𑀸 𑀓𑀲𑁆𑀫𑀸 𑀉𑀧𑁄𑀲𑀣𑀺𑀓𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁪𑁦.

‘‘𑀬𑀁 𑀦𑁄 𑀅𑀧𑀼𑀘𑁆𑀙𑀺𑀢𑁆𑀣 𑀢𑀼𑀯𑀁 𑀪𑀤𑀦𑁆𑀢𑁂, 𑀲𑀩𑁆𑀩𑁂𑀯 𑀩𑁆𑀬𑀸𑀓𑀭𑀺𑀫𑁆𑀳 𑀬𑀣𑀸𑀧𑀚𑀸𑀦𑀁;

𑀫𑀬𑀫𑁆𑀧𑀺 𑀧𑀼𑀘𑁆𑀙𑀸𑀫 𑀢𑀼𑀯𑀁 𑀪𑀤𑀦𑁆𑀢𑁂, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀦𑀼 𑀩𑁆𑀭𑀳𑁆𑀫𑁂’’𑀢𑀺.

𑀲𑁄𑀧𑀺 ¶ ¶ 𑀦𑁂𑀲𑀁 𑀩𑁆𑀬𑀸𑀓𑀸𑀲𑀺 𑁋

𑁧𑁪𑁧.

‘‘𑀅𑀦𑀽𑀧𑀮𑀺𑀢𑁆𑀢𑁄 𑀫𑀫 𑀅𑀲𑁆𑀲𑀫𑀫𑁆𑀳𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀺;

𑀲𑁄 𑀫𑀁 𑀅𑀯𑁂𑀤𑀻 𑀕𑀢𑀺𑀫𑀸𑀕𑀢𑀺𑀜𑁆𑀘, 𑀦𑀸𑀫𑀜𑁆𑀘 𑀕𑁄𑀢𑁆𑀢𑀁 𑀘𑀭𑀡𑀜𑁆𑀘 𑀲𑀩𑁆𑀩𑀁.

𑁧𑁪𑁨.

‘‘𑀏𑀯𑀫𑁆𑀧𑀳𑀁 ¶ 𑀦 𑀯𑀦𑁆𑀤𑀺 𑀢𑀲𑁆𑀲 𑀧𑀸𑀤𑁂, 𑀦 𑀘𑀸𑀧𑀺 𑀦𑀁 𑀫𑀸𑀦𑀕𑀢𑁂𑀦 𑀧𑀼𑀘𑁆𑀙𑀺𑀁;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀫𑀸𑀦𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀻’’𑀢𑀺.

𑀢𑀢𑁆𑀣 𑀬𑀁 𑀦𑁄𑀢𑀺 𑀬𑀁 𑀅𑀢𑁆𑀣𑀁 𑀢𑁆𑀯𑀁 𑀅𑀫𑁆𑀳𑁂 𑀅𑀧𑀼𑀘𑁆𑀙𑀺. 𑀬𑀣𑀸𑀧𑀚𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀧𑀚𑀸𑀦𑀦𑀦𑀺𑀬𑀸𑀫𑁂𑀦 𑀢𑀁 𑀫𑀬𑀁 𑀩𑁆𑀬𑀸𑀓𑀭𑀺𑀫𑁆𑀳. 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀅𑀮𑀺𑀢𑁆𑀢𑁄. 𑀲𑁄 𑀫𑀁 𑀅𑀯𑁂𑀤𑀻𑀢𑀺 𑀲𑁄 𑀫𑀫 𑀇𑀤𑀸𑀦𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀜𑁆𑀘 𑀕𑀢𑀝𑁆𑀞𑀸𑀦𑀜𑁆𑀘 ‘‘𑀅𑀦𑀸𑀕𑀢𑁂 𑀢𑁆𑀯𑀁 𑀏𑀯𑀁𑀦𑀸𑀫𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺 𑀏𑀯𑀁𑀕𑁄𑀢𑁆𑀢𑁄, 𑀏𑀯𑀭𑀽𑀧𑀁 𑀢𑁂 𑀲𑀻𑀮𑀘𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀦𑀸𑀫𑀜𑁆𑀘 𑀕𑁄𑀢𑁆𑀢𑀜𑁆𑀘 𑀘𑀭𑀡𑀜𑁆𑀘 𑀲𑀩𑁆𑀩𑀁 𑀫𑀁 𑀅𑀯𑁂𑀤𑀺 𑀚𑀸𑀦𑀸𑀧𑁂𑀲𑀺, 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀳𑀁 𑀦 𑀯𑀦𑁆𑀤𑀻𑀢𑀺 𑀏𑀯𑀁 𑀓𑀣𑁂𑀦𑁆𑀢𑀲𑁆𑀲𑀧𑀺 𑀢𑀲𑁆𑀲 𑀅𑀳𑀁 𑀅𑀢𑁆𑀢𑀦𑁄 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀧𑀸𑀤𑁂 𑀦 𑀯𑀦𑁆𑀤𑀺𑀦𑁆𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀢𑁂 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀸𑀯𑀺𑀲𑀺, 𑀇𑀢𑀭𑁂𑀧𑀺 𑀬𑀣𑀸𑀝𑁆𑀞𑀸𑀦𑀸𑀦𑀺 𑀅𑀕𑀫𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺, 𑀇𑀢𑀭𑁂 𑀘 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀉𑀧𑀸𑀲𑀓𑀸, 𑀉𑀧𑁄𑀲𑀣𑁄 𑀦𑀸𑀫𑁂𑀲 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀯𑀁𑀲𑁄, 𑀉𑀧𑀯𑀲𑀺𑀢𑀩𑁆𑀩𑁄 𑀉𑀧𑁄𑀲𑀣𑀯𑀸𑀲𑁄’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀧𑁄𑀢𑁄 𑀅𑀦𑀼𑀭𑀼𑀤𑁆𑀥𑁄 𑀅𑀳𑁄𑀲𑀺, 𑀅𑀘𑁆𑀙𑁄 𑀓𑀲𑁆𑀲𑀧𑁄, 𑀲𑀺𑀗𑁆𑀕𑀸𑀮𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀲𑀧𑁆𑀧𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀧𑀜𑁆𑀘𑀼𑀧𑁄𑀲𑀣𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁪𑁯𑁧] 𑁮. 𑀫𑀳𑀸𑀫𑁄𑀭𑀚𑀸𑀢𑀓𑀯𑀡𑁆𑀡𑀦𑀸

𑀲𑀘𑁂 ¶ 𑀳𑀺 𑀢𑁆𑀬𑀸𑀳𑀁 𑀥𑀦𑀳𑁂𑀢𑀼 𑀕𑀸𑀳𑀺𑀢𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 ¶ 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀅𑀬𑀁 𑀦𑀦𑁆𑀤𑀻𑀭𑀸𑀕𑁄 𑀢𑀸𑀤𑀺𑀲𑀁 𑀓𑀺𑀁 𑀦𑀸𑀫 𑀦𑀸𑀮𑁄𑀮𑁂𑀲𑁆𑀲𑀢𑀺, 𑀦 𑀳𑀺 𑀲𑀺𑀦𑁂𑀭𑀼𑀉𑀩𑁆𑀩𑀸𑀳𑀦𑀓𑀯𑀸𑀢𑁄 𑀲𑀸𑀫𑀦𑁆𑀢𑁂 𑀧𑀼𑀭𑀸𑀡𑀧𑀡𑁆𑀡𑀲𑁆𑀲 𑀮𑀚𑁆𑀚𑀢𑀺, 𑀧𑀼𑀩𑁆𑀩𑁂 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀅𑀦𑁆𑀢𑁄𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀯𑀸𑀭𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁂 𑀯𑀺𑀲𑀼𑀤𑁆𑀥𑀲𑀢𑁆𑀢𑁂𑀧𑁂𑀲 𑀆𑀮𑁄𑀮𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀘𑁆𑀘𑀦𑁆𑀢𑀧𑀤𑁂𑀲𑁂 𑀫𑁄𑀭𑀲𑀓𑀼𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀕𑀩𑁆𑀪𑁂 𑀧𑀭𑀺𑀧𑀸𑀓𑀕𑀢𑁂 𑀫𑀸𑀢𑀸 𑀕𑁄𑀘𑀭𑀪𑀽𑀫𑀺𑀬𑀁 𑀅𑀡𑁆𑀟𑀁 𑀧𑀸𑀢𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀡𑁆𑀟𑀜𑁆𑀘 𑀦𑀸𑀫 𑀫𑀸𑀢𑀼 𑀅𑀭𑁄𑀕𑀪𑀸𑀯𑁂 𑀲𑀢𑀺 𑀅𑀜𑁆𑀜𑀲𑁆𑀫𑀺𑀁 𑀤𑀻𑀖𑀚𑀸𑀢𑀺𑀓𑀸𑀤𑀺𑀧𑀭𑀺𑀧𑀦𑁆𑀣𑁂 𑀘 𑀅𑀯𑀺𑀚𑁆𑀚𑀫𑀸𑀦𑁂 𑀦 𑀦𑀲𑁆𑀲𑀢𑀺. 𑀢𑀲𑁆𑀫𑀸 𑀢𑀁 𑀅𑀡𑁆𑀟𑀁 𑀓𑀡𑀺𑀓𑀸𑀭𑀫𑀓𑀼𑀮𑀁 𑀯𑀺𑀬 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑀼𑀢𑁆𑀯𑀸 𑀧𑀭𑀺𑀡𑀢𑀓𑀸𑀮𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀪𑀺𑀚𑁆𑀚𑀺, 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑀘𑁆𑀙𑀸𑀧𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀤𑁆𑀯𑁂 𑀅𑀓𑁆𑀔𑀻𑀦𑀺 𑀚𑀺𑀜𑁆𑀚𑀼𑀓𑀸𑀨𑀮𑀲𑀤𑀺𑀲𑀸𑀦𑀺, 𑀢𑀼𑀡𑁆𑀟𑀁 𑀧𑀯𑀸𑀴𑀯𑀡𑁆𑀡𑀁, 𑀢𑀺𑀲𑁆𑀲𑁄 𑀭𑀢𑁆𑀢𑀭𑀸𑀚𑀺𑀬𑁄 𑀕𑀻𑀯𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀝𑁆𑀞𑀺𑀫𑀚𑁆𑀛𑁂𑀦 𑀅𑀕𑀫𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀪𑀡𑁆𑀟𑀲𑀓𑀝𑀫𑀢𑁆𑀢𑀲𑀭𑀻𑀭𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺. 𑀢𑀁 𑀲𑀩𑁆𑀩𑁂 𑀦𑀻𑀮𑀫𑁄𑀭𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀸𑀦𑀁 𑀓𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀲𑁄 𑀏𑀓𑀤𑀺𑀯𑀲𑀁 𑀉𑀤𑀓𑀲𑁄𑀡𑁆𑀟𑀺𑀬𑀁 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁄 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀲𑀩𑁆𑀩𑀫𑁄𑀭𑁂𑀳𑀺 𑀅𑀢𑀺𑀭𑁂𑀓𑀭𑀽𑀧𑀲𑁄𑀪𑁄, 𑀲𑀘𑀸𑀳𑀁 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀫𑀦𑀼𑀲𑁆𑀲𑀧𑀣𑁂 𑀯𑀲𑀺𑀲𑁆𑀲𑀸𑀫𑀺, 𑀧𑀭𑀺𑀧𑀦𑁆𑀣𑁄 𑀫𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀓𑁄𑀯 𑀨𑀸𑀲𑀼𑀓𑀝𑁆𑀞𑀸𑀦𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀫𑁄𑀭𑁂𑀲𑀼 𑀧𑀝𑀺𑀲𑀮𑁆𑀮𑀻𑀦𑁂𑀲𑀼 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀲𑁆𑀲𑁄 𑀧𑀩𑁆𑀩𑀢𑀭𑀸𑀚𑀺𑀬𑁄 𑀅𑀢𑀺𑀓𑁆𑀓𑀫𑁆𑀫 𑀘𑀢𑀼𑀢𑁆𑀣𑀸𑀬 𑀧𑀩𑁆𑀩𑀢𑀭𑀸𑀚𑀺𑀬𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑁂 𑀧𑀤𑀼𑀫𑀲𑀜𑁆𑀙𑀦𑁆𑀦𑁄 𑀚𑀸𑀢𑀲𑁆𑀲𑀭𑁄 𑀅𑀢𑁆𑀣𑀺, 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀁 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀸𑀔𑀸𑀬 𑀦𑀺𑀮𑀻𑀬𑀺. 𑀢𑀲𑁆𑀲 𑀧𑀦 𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂 𑀫𑀦𑀸𑀧𑀸 𑀕𑀼𑀳𑀸 𑀅𑀢𑁆𑀣𑀺. 𑀲𑁄 𑀢𑀢𑁆𑀣 𑀯𑀲𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀧𑀫𑀼𑀔𑁂 𑀧𑀩𑁆𑀩𑀢𑀢𑀮𑁂 𑀦𑀺𑀮𑀻𑀬𑀺. 𑀢𑀁 𑀧𑀦 𑀞𑀸𑀦𑀁 𑀦𑁂𑀯 𑀳𑁂𑀝𑁆𑀞𑀸𑀪𑀸𑀕𑁂𑀦 ¶ 𑀅𑀪𑀺𑀭𑀼𑀳𑀺𑀢𑀼𑀁, 𑀦 𑀉𑀧𑀭𑀺𑀪𑀸𑀕𑁂𑀦 𑀑𑀢𑀭𑀺𑀢𑀼𑀁 𑀲𑀓𑁆𑀓𑀸, 𑀩𑀺𑀴𑀸𑀮𑀤𑀻𑀖𑀚𑀸𑀢𑀺𑀓𑀫𑀦𑀼𑀲𑁆𑀲𑀪𑀬𑁂𑀳𑀺 ¶ 𑀯𑀺𑀫𑀼𑀢𑁆𑀢𑀁. 𑀲𑁄 ‘‘𑀇𑀤𑀁 𑀫𑁂 𑀨𑀸𑀲𑀼𑀓𑀝𑁆𑀞𑀸𑀦’’𑀦𑁆𑀢𑀺 𑀢𑀁 𑀤𑀺𑀯𑀲𑀁 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀩𑁆𑀩𑀢𑀕𑀼𑀳𑀸𑀢𑁄 𑀉𑀝𑁆𑀞𑀸𑀬 𑀧𑀩𑁆𑀩𑀢𑀫𑀢𑁆𑀣𑀓𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀉𑀤𑁂𑀦𑁆𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀭𑀓𑁆𑀔𑀸𑀯𑀭𑀡𑀢𑁆𑀣𑀸𑀬 ‘‘𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸’’𑀢𑀺 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀕𑁄𑀘𑀭𑀪𑀽𑀫𑀺𑀬𑀁 𑀑𑀢𑀭𑀺𑀢𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀧𑀘𑁆𑀙𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀅𑀢𑁆𑀣𑀗𑁆𑀕𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀭𑀢𑁆𑀢𑀺𑀭𑀓𑁆𑀔𑀸𑀯𑀭𑀡𑀢𑁆𑀣𑀸𑀬 ‘‘𑀅𑀧𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸’’𑀢𑀺 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀏𑀢𑁂𑀦𑀼𑀧𑀸𑀬𑁂𑀦 𑀯𑀲𑀢𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀏𑀓𑁄 𑀮𑀼𑀤𑁆𑀤𑀧𑀼𑀢𑁆𑀢𑁄 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑁄 𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑀁 𑀫𑁄𑀭𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀘𑀢𑀼𑀢𑁆𑀣𑀸𑀬 𑀧𑀩𑁆𑀩𑀢𑀭𑀸𑀚𑀺𑀬𑀸 𑀅𑀭𑀜𑁆𑀜𑁂 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀅𑀢𑁆𑀣𑀺, 𑀲𑀘𑁂 𑀭𑀸𑀚𑀸 𑀧𑀼𑀘𑁆𑀙𑀢𑀺, 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀔𑁂𑀫𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀧𑀘𑁆𑀘𑀽𑀲𑀓𑀸𑀮𑁂 𑀲𑀼𑀧𑀺𑀦𑀁 𑀧𑀲𑁆𑀲𑀺. 𑀏𑀯𑀭𑀽𑀧𑁄 𑀲𑀼𑀧𑀺𑀦𑁄 𑀅𑀳𑁄𑀲𑀺 𑁋 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀫𑁄𑀭𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀝𑁆𑀞𑀸𑀬 𑀧𑀓𑁆𑀓𑀸𑀫𑀺’’. 𑀲𑀸 ‘‘𑀫𑁄𑀭𑀭𑀸𑀚𑀸 𑀕𑀘𑁆𑀙𑀢𑀺, 𑀕𑀡𑁆𑀳𑀣 ¶ 𑀦’’𑀦𑁆𑀢𑀺 𑀯𑀤𑀦𑁆𑀢𑀻𑀬𑁂𑀯 𑀧𑀩𑀼𑀚𑁆𑀛𑀺, 𑀧𑀩𑀼𑀚𑁆𑀛𑀺𑀢𑁆𑀯𑀸 𑀘 𑀧𑀦 𑀲𑀼𑀧𑀺𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀼𑀧𑀺𑀦𑁄𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀦 𑀆𑀤𑀭𑀁 𑀓𑀭𑀺𑀲𑁆𑀲𑀢𑀺, ‘𑀤𑁄𑀳𑀴𑁄 𑀫𑁂’𑀢𑀺 𑀯𑀼𑀢𑁆𑀢𑁂 𑀓𑀭𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁄𑀳𑀴𑀺𑀦𑀻 𑀯𑀺𑀬 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀭𑀸𑀚𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀪𑀤𑁆𑀤𑁂, 𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺. ‘‘𑀤𑁄𑀳𑀴𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺. ‘‘𑀓𑀺𑀁 𑀇𑀘𑁆𑀙𑀲𑀺 𑀪𑀤𑁆𑀤𑁂’’𑀢𑀺? ‘‘𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀫𑁄𑀭𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀁 𑀤𑁂𑀯𑀸’’𑀢𑀺. ‘‘𑀪𑀤𑁆𑀤𑁂, 𑀓𑀼𑀢𑁄 𑀏𑀯𑀭𑀽𑀧𑀁 𑀫𑁄𑀭𑀁 𑀮𑀘𑁆𑀙𑀸𑀫𑀻’’𑀢𑀺? ‘‘𑀤𑁂𑀯, 𑀲𑀘𑁂 𑀦 𑀮𑀪𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀻’’𑀢𑀺. ‘‘𑀪𑀤𑁆𑀤𑁂, 𑀫𑀸 𑀘𑀺𑀦𑁆𑀢𑀬𑀺, 𑀲𑀘𑁂 𑀓𑀢𑁆𑀣𑀘𑀺 𑀅𑀢𑁆𑀣𑀺, 𑀮𑀪𑀺𑀲𑁆𑀲𑀲𑀻’’𑀢𑀺 𑀭𑀸𑀚𑀸 𑀦𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 ‘‘𑀅𑀫𑁆𑀪𑁄, 𑀤𑁂𑀯𑀻 𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀫𑁄𑀭𑀲𑁆𑀲 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸, 𑀫𑁄𑀭𑀸 ¶ 𑀦𑀸𑀫 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁄𑀦𑁆𑀢𑀻’’𑀢𑀺? ‘‘𑀩𑁆𑀭𑀸𑀳𑁆𑀫𑀡𑀸 𑀚𑀸𑀦𑀺𑀲𑁆𑀲𑀦𑁆𑀢𑀺 𑀤𑁂𑀯𑀸’’𑀢𑀺.

𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 ‘‘𑀫𑀳𑀸𑀭𑀸𑀚 𑀚𑀮𑀚𑁂𑀲𑀼 𑀫𑀘𑁆𑀙𑀓𑀘𑁆𑀙𑀧𑀓𑀓𑁆𑀓𑀝𑀓𑀸, 𑀣𑀮𑀚𑁂𑀲𑀼 𑀫𑀺𑀕𑀸 𑀳𑀁𑀲𑀸 𑀫𑁄𑀭𑀸 𑀢𑀺𑀢𑁆𑀢𑀺𑀭𑀸 𑀏𑀢𑁂 𑀢𑀺𑀭𑀘𑁆𑀙𑀸𑀦𑀕𑀢𑀸 𑀘 𑀫𑀦𑀼𑀲𑁆𑀲𑀸 𑀘 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 𑀅𑀫𑁆𑀳𑀸𑀓𑀁 𑀮𑀓𑁆𑀔𑀡𑀫𑀦𑁆𑀢𑁂𑀲𑀼 𑀆𑀕𑀢’’𑀦𑁆𑀢𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀮𑀼𑀤𑁆𑀤𑀧𑀼𑀢𑁆𑀢𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀯𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺. 𑀲𑁂𑀲𑀸 ‘‘𑀦 ¶ 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺 𑀆𑀳𑀁𑀲𑀼. 𑀬𑀲𑁆𑀲 𑀧𑀦 𑀧𑀺𑀢𑀭𑀸 𑀆𑀘𑀺𑀓𑁆𑀔𑀺𑀢𑀁, 𑀲𑁄 𑀆𑀳 𑁋 ‘‘𑀫𑀬𑀸𑀧𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀧𑀺𑀢𑀸 𑀧𑀦 𑀫𑁂 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀅𑀢𑁆𑀣𑀻’𑀢𑀺 𑀓𑀣𑁂𑀲𑀻’’𑀢𑀺. 𑀅𑀣 𑀦𑀁 𑀭𑀸𑀚𑀸 ‘‘𑀲𑀫𑁆𑀫, 𑀫𑀬𑁆𑀳𑀜𑁆𑀘 𑀤𑁂𑀯𑀺𑀬𑀸 𑀘 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀕𑀦𑁆𑀢𑁆𑀯𑀸 𑀢𑀁 𑀩𑀦𑁆𑀥𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀧𑀼𑀢𑁆𑀢𑀤𑀸𑀭𑀲𑁆𑀲 𑀥𑀦𑀁 𑀤𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 𑀧𑀸𑀲𑁂 𑀑𑀟𑁆𑀟𑁂𑀢𑁆𑀯𑀸 ‘‘𑀅𑀚𑁆𑀚 𑀩𑀚𑁆𑀛𑀺𑀲𑁆𑀲𑀢𑀺, 𑀅𑀚𑁆𑀚 𑀩𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀅𑀩𑀚𑁆𑀛𑀺𑀢𑁆𑀯𑀸𑀯 𑀫𑀢𑁄, 𑀤𑁂𑀯𑀻𑀧𑀺 𑀧𑀢𑁆𑀣𑀦𑀁 𑀅𑀮𑀪𑀦𑁆𑀢𑀻 𑀫𑀢𑀸. 𑀭𑀸𑀚𑀸 ‘‘𑀢𑀁 𑀫𑁄𑀭𑀁 𑀦𑀺𑀲𑁆𑀲𑀸𑀬 𑀧𑀺𑀬𑀪𑀭𑀺𑀬𑀸 𑀫𑁂 𑀫𑀢𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀓𑁄𑀥𑀯𑀲𑀺𑀓𑁄 𑀳𑀼𑀢𑁆𑀯𑀸 ‘‘𑀳𑀺𑀫𑀯𑀦𑁆𑀢𑁂 𑀘𑀢𑀼𑀢𑁆𑀣𑀸𑀬 𑀧𑀩𑁆𑀩𑀢𑀭𑀸𑀚𑀺𑀬𑀸 𑀲𑀼𑀯𑀡𑁆𑀡𑀯𑀡𑁆𑀡𑁄 𑀫𑁄𑀭𑁄 𑀘𑀭𑀢𑀺, 𑀢𑀲𑁆𑀲 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀚𑀭𑀸 𑀅𑀫𑀭𑀸 𑀳𑁄𑀦𑁆𑀢𑀻’’𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 𑀢𑀁 𑀧𑀝𑁆𑀝𑀁 𑀲𑀸𑀭𑀫𑀜𑁆𑀚𑀽𑀲𑀸𑀬𑀁 𑀞𑀧𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺.

𑀅𑀣 𑀅𑀜𑁆𑀜𑁄 𑀭𑀸𑀚𑀸 𑀅𑀳𑁄𑀲𑀺. 𑀲𑁄 𑀲𑀼𑀯𑀡𑁆𑀡𑀧𑀝𑁆𑀝𑁂 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 ‘‘𑀅𑀚𑀭𑁄 𑀅𑀫𑀭𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀕𑀳𑀡𑀢𑁆𑀣𑀸𑀬 𑀏𑀓𑀁 𑀮𑀼𑀤𑁆𑀤𑀧𑀼𑀢𑁆𑀢𑀁 𑀧𑁂𑀲𑁂𑀲𑀺. 𑀲𑁄𑀧𑀺 𑀢𑀢𑁆𑀣𑁂𑀯 𑀫𑀢𑁄. 𑀏𑀯𑀁 𑀙 𑀭𑀸𑀚𑀧𑀭𑀺𑀯𑀝𑁆𑀝𑀸 𑀕𑀢𑀸, 𑀙 𑀮𑀼𑀤𑁆𑀤𑀧𑀼𑀢𑁆𑀢𑀸 𑀳𑀺𑀫𑀯𑀦𑁆𑀢𑁂𑀬𑁂𑀯 𑀫𑀢𑀸. 𑀲𑀢𑁆𑀢𑀫𑁂𑀦 𑀧𑀦 𑀭𑀜𑁆𑀜𑀸 𑀧𑁂𑀲𑀺𑀢𑁄 𑀲𑀢𑁆𑀢𑀫𑁄 𑀮𑀼𑀤𑁆𑀤𑁄 ‘‘𑀅𑀚𑁆𑀚 𑀅𑀚𑁆𑀚𑁂𑀯𑀸’’𑀢𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀩𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀫𑁄𑀭𑀭𑀸𑀚𑀲𑁆𑀲 𑀧𑀸𑀤𑁂 𑀧𑀸𑀲𑀲𑁆𑀲 𑀅𑀲𑀜𑁆𑀘𑀭𑀡𑀓𑀸𑀭𑀡’’𑀦𑁆𑀢𑀺? 𑀅𑀣 𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀲𑀸𑀬𑀁𑀧𑀸𑀢𑀁 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑁄 𑀫𑁄𑀭𑁄 𑀦𑀢𑁆𑀣𑀺, 𑀇𑀫𑀺𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀪𑀸𑀯𑁂𑀦 ¶ 𑀘𑁂𑀯 𑀧𑀭𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀘𑀲𑁆𑀲 𑀧𑀸𑀤𑁄 𑀧𑀸𑀲𑁂 𑀦 𑀩𑀚𑁆𑀛𑀢𑀻’’𑀢𑀺 𑀦𑀬𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ¶ 𑀧𑀘𑁆𑀘𑀦𑁆𑀢𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑁄𑀭𑀺𑀁 𑀩𑀦𑁆𑀥𑀺𑀢𑁆𑀯𑀸 𑀬𑀣𑀸 𑀲𑀸 𑀅𑀘𑁆𑀙𑀭𑀸𑀬 𑀧𑀳𑀝𑀸𑀬 𑀯𑀲𑁆𑀲𑀢𑀺, 𑀧𑀸𑀡𑀺𑀫𑁆𑀳𑀺 𑀧𑀳𑀝𑁂 𑀦𑀘𑁆𑀘𑀢𑀺, 𑀏𑀯𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀺𑀢𑁆𑀢𑀓𑀭𑀡𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀸𑀲𑀁 𑀑𑀟𑁆𑀟𑁂𑀢𑁆𑀯𑀸 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀫𑁄𑀭𑀺𑀁 𑀯𑀲𑁆𑀲𑀸𑀧𑁂𑀲𑀺. 𑀫𑁄𑀭𑁄 𑀢𑀲𑁆𑀲𑀸 𑀲𑀤𑁆𑀤𑀁 𑀲𑀼𑀡𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀲𑀦𑁆𑀦𑀺𑀲𑀺𑀦𑁆𑀦𑀓𑀺𑀮𑁂𑀲𑁄 𑀨𑀡𑀁 𑀓𑀭𑀺𑀢𑁆𑀯𑀸 𑀤𑀡𑁆𑀟𑁂𑀦 𑀧𑀳𑀝𑀸𑀲𑀻𑀯𑀺𑀲𑁄 𑀯𑀺𑀬 𑀉𑀝𑁆𑀞𑀳𑀺. 𑀲𑁄 𑀓𑀺𑀮𑁂𑀲𑀸𑀢𑀼𑀭𑁄 𑀳𑀼𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸𑀯 𑀯𑁂𑀕𑁂𑀦 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀸𑀲𑁂 𑀧𑀸𑀤𑀁 𑀧𑀯𑁂𑀲𑁂𑀦𑁆𑀢𑁄𑀬𑁂𑀯 𑀆𑀓𑀸𑀲𑀸 𑀑𑀢𑀭𑀺. 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀅𑀲𑀜𑁆𑀘𑀭𑀡𑀓𑀧𑀸𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀲𑀜𑁆𑀘𑀭𑀺𑀢𑁆𑀯𑀸 𑀧𑀸𑀤𑀁 𑀩𑀦𑁆𑀥𑀺.

𑀅𑀣 𑀦𑀁 𑀮𑀼𑀤𑁆𑀤𑀧𑀼𑀢𑁆𑀢𑁄 𑀬𑀝𑁆𑀞𑀺𑀅𑀕𑁆𑀕𑁂 𑀑𑀮𑀫𑁆𑀩𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀁 𑀫𑁄𑀭𑀭𑀸𑀚𑀁 𑀙 𑀮𑀼𑀤𑁆𑀤𑀧𑀼𑀢𑁆𑀢𑀸 𑀩𑀦𑁆𑀥𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀳𑀫𑁆𑀧𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀦𑀸𑀲𑀓𑁆𑀔𑀺𑀁, 𑀅𑀚𑁆𑀚 ¶ 𑀧𑀦𑁂𑀲 𑀇𑀫𑀁 𑀫𑁄𑀭𑀺𑀁 𑀦𑀺𑀲𑁆𑀲𑀸𑀬 𑀓𑀺𑀮𑁂𑀲𑀸𑀢𑀼𑀭𑁄 𑀳𑀼𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀆𑀕𑀫𑁆𑀫 𑀧𑀸𑀲𑁂 𑀩𑀤𑁆𑀥𑁄 𑀳𑁂𑀝𑁆𑀞𑀸𑀲𑀻𑀲𑀓𑁄 𑀑𑀮𑀫𑁆𑀩𑀢𑀺, 𑀏𑀯𑀭𑀽𑀧𑁄 𑀫𑁂 𑀲𑀻𑀮𑀯𑀸 𑀓𑀺𑀮𑀫𑀺𑀢𑁄, 𑀏𑀯𑀭𑀽𑀧𑀁 𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀦𑁂𑀢𑀼𑀁 𑀅𑀬𑀼𑀢𑁆𑀢𑀁, 𑀓𑀺𑀁 𑀫𑁂 𑀭𑀜𑁆𑀜𑀸 𑀤𑀺𑀦𑁆𑀦𑁂𑀦 𑀲𑀓𑁆𑀓𑀸𑀭𑁂𑀦, 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀫𑀬𑀺 𑀉𑀧𑀲𑀗𑁆𑀓𑀫𑀦𑁆𑀢𑁂 ‘𑀏𑀲 𑀫𑀁 𑀫𑀸𑀭𑁂𑀢𑀼𑀁 𑀆𑀕𑀘𑁆𑀙𑀢𑀻’𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀨𑀦𑁆𑀤𑀫𑀸𑀦𑁄 𑀧𑀸𑀤𑀁 𑀯𑀸 𑀧𑀓𑁆𑀔𑀁 𑀯𑀸 𑀪𑀺𑀦𑁆𑀤𑁂𑀬𑁆𑀬, 𑀅𑀦𑀼𑀧𑀕𑀦𑁆𑀢𑁆𑀯𑀸 𑀧𑀦 𑀧𑀝𑀺𑀘𑁆𑀙𑀦𑁆𑀦𑁂 𑀞𑀢𑁆𑀯𑀸 𑀔𑀼𑀭𑀧𑁆𑀧𑁂𑀦𑀲𑁆𑀲 𑀧𑀸𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀺, 𑀢𑀢𑁄 𑀲𑀬𑀫𑁂𑀯 𑀬𑀣𑀸𑀭𑀼𑀘𑀺𑀬𑀸 𑀕𑀫𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀝𑀺𑀘𑁆𑀙𑀦𑁆𑀦𑁂 𑀞𑀢𑁆𑀯𑀸 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀆𑀓𑀟𑁆𑀠𑀺. 𑀫𑁄𑀭𑁄𑀧𑀺 ‘‘𑀅𑀬𑀁 𑀮𑀼𑀤𑁆𑀤𑀓𑁄 𑀫𑀁 𑀓𑀺𑀮𑁂𑀲𑀸𑀢𑀼𑀭𑀁 𑀓𑀢𑁆𑀯𑀸 𑀩𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀦𑀺𑀭𑀸𑀲𑀗𑁆𑀓𑁄 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀓𑀳𑀁 𑀦𑀼 𑀔𑁄 𑀲𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀫𑀸𑀭𑁂𑀢𑁆𑀯𑀸 ¶ 𑀫𑀁 𑀆𑀤𑀸𑀬 𑀕𑀦𑁆𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀳𑀼𑀢𑁆𑀯𑀸 𑀚𑀻𑀯𑀺𑀢𑀁 𑀬𑀸𑀘𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁩.

‘‘𑀲𑀘𑁂 𑀳𑀺 𑀢𑁆𑀬𑀸𑀳𑀁 𑀥𑀦𑀳𑁂𑀢𑀼 𑀕𑀸𑀳𑀺𑀢𑁄, 𑀫𑀸 𑀫𑀁 𑀯𑀥𑀻 𑀚𑀻𑀯𑀕𑀸𑀳𑀁 𑀕𑀳𑁂𑀢𑁆𑀯𑀸;

𑀭𑀜𑁆𑀜𑁄 𑀘 𑀫𑀁 𑀲𑀫𑁆𑀫 𑀉𑀧𑀦𑁆𑀢𑀺𑀓𑀁 𑀦𑁂𑀳𑀺, 𑀫𑀜𑁆𑀜𑁂 𑀥𑀦𑀁 𑀮𑀘𑁆𑀙𑀲𑀺𑀦𑀧𑁆𑀧𑀭𑀽𑀧’’𑀦𑁆𑀢𑀺.

𑀢𑀢𑁆𑀣 𑀲𑀘𑁂 𑀳𑀺 𑀢𑁆𑀬𑀸𑀳𑀦𑁆𑀢𑀺 𑀲𑀘𑁂 𑀳𑀺 𑀢𑁂 𑀅𑀳𑀁. 𑀉𑀧𑀦𑁆𑀢𑀺𑀓𑀁 𑀦𑁂𑀳𑀻𑀢𑀺 𑀉𑀧𑀲𑀦𑁆𑀢𑀺𑀓𑀁 𑀦𑁂𑀳𑀺. 𑀮𑀘𑁆𑀙𑀲𑀺𑀦𑀧𑁆𑀧𑀭𑀽𑀧𑀦𑁆𑀢𑀺 𑀮𑀘𑁆𑀙𑀲𑀺 𑀅𑀦𑀧𑁆𑀧𑀓𑀭𑀽𑀧𑀁.

𑀢𑀁 𑀲𑀼𑀢𑁆𑀯𑀸 𑀮𑀼𑀤𑁆𑀤𑀧𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑁄𑀭𑀭𑀸𑀚𑀸, ‘𑀅𑀬𑀁 𑀫𑀁 𑀯𑀺𑀚𑁆𑀛𑀺𑀢𑀼𑀓𑀸𑀫𑀢𑀸𑀬 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀻’𑀢𑀺 𑀫𑀜𑁆𑀜𑀢𑀺, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀅𑀲𑁆𑀲𑀸𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁪𑁪.

‘‘𑀦 ¶ 𑀫𑁂 𑀅𑀬𑀁 𑀢𑀼𑀬𑁆𑀳 𑀯𑀥𑀸𑀬 𑀅𑀚𑁆𑀚, 𑀲𑀫𑀸𑀳𑀺𑀢𑁄 𑀘𑀸𑀧𑀥𑀼𑀭𑁂 𑀔𑀼𑀭𑀧𑁆𑀧𑁄;

𑀧𑀸𑀲𑀜𑁆𑀘 𑀢𑁆𑀬𑀸𑀳𑀁 𑀅𑀥𑀺𑀧𑀸𑀢𑀬𑀺𑀲𑁆𑀲𑀁, 𑀬𑀣𑀸𑀲𑀼𑀔𑀁 𑀕𑀘𑁆𑀙𑀢𑀼 𑀫𑁄𑀭𑀭𑀸𑀚𑀸’’𑀢𑀺.

𑀢𑀢𑁆𑀣 𑀅𑀥𑀺𑀧𑀸𑀢𑀬𑀺𑀲𑁆𑀲𑀦𑁆𑀢𑀺 𑀙𑀺𑀦𑁆𑀤𑀬𑀺𑀲𑁆𑀲𑀁.

𑀢𑀢𑁄 ¶ 𑀫𑁄𑀭𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁪𑁫.

‘‘𑀬𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑀫𑀸𑀦𑀼𑀩𑀦𑁆𑀥𑀺, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀔𑀼𑀧𑁆𑀧𑀺𑀧𑀸𑀲𑀁 𑀲𑀳𑀦𑁆𑀢𑁄;

𑀅𑀣 𑀓𑀺𑀲𑁆𑀲 𑀫𑀁 𑀧𑀸𑀲𑀯𑀲𑀽𑀧𑀦𑀻𑀢𑀁, 𑀧𑀫𑀼𑀢𑁆𑀢𑀯𑁂 𑀇𑀘𑁆𑀙𑀲𑀺 𑀩𑀦𑁆𑀥𑀦𑀲𑁆𑀫𑀸.

𑁧𑁪𑁬.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁄 𑀦𑀼𑀲𑀚𑁆𑀚, 𑀅𑀪𑀬𑀁 𑀦𑀼 𑀢𑁂 𑀲𑀩𑁆𑀩𑀪𑀽𑀢𑁂𑀲𑀼 𑀤𑀺𑀦𑁆𑀦𑀁;

𑀬𑀁 𑀫𑀁 𑀢𑀼𑀯𑀁 𑀧𑀸𑀲𑀯𑀲𑀽𑀧𑀦𑀻𑀢𑀁, 𑀧𑀫𑀼𑀢𑁆𑀢𑀯𑁂 𑀇𑀘𑁆𑀙𑀲𑀺 𑀩𑀦𑁆𑀥𑀦𑀲𑁆𑀫𑀸’’𑀢𑀺.

𑀢𑀢𑁆𑀣 𑀬𑀦𑁆𑀢𑀺 𑀬𑀲𑁆𑀫𑀸 𑀫𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀢𑁆𑀯𑀁 𑀅𑀦𑀼𑀩𑀦𑁆𑀥𑀺, 𑀢𑀲𑁆𑀫𑀸 𑀢𑀁 𑀧𑀼𑀘𑁆𑀙𑀸𑀫𑀺, 𑀅𑀣 𑀓𑀺𑀲𑁆𑀲 𑀫𑀁 𑀧𑀸𑀲𑀯𑀲𑀁 𑀉𑀧𑀦𑀻𑀢𑀁 𑀩𑀦𑁆𑀥𑀦𑀲𑁆𑀫𑀸 𑀧𑀫𑁄𑀘𑁂𑀢𑀼𑀁 𑀇𑀘𑁆𑀙𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀢𑁄 𑀦𑀼𑀲𑀚𑁆𑀚𑀸𑀢𑀺 𑀯𑀺𑀭𑀢𑁄 𑀦𑀼𑀲𑀺 𑀅𑀚𑁆𑀚. 𑀲𑀩𑁆𑀩𑀪𑀽𑀢𑁂𑀲𑀽𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁.

𑀇𑀢𑁄 ¶ 𑀧𑀭𑀁 𑁋

𑁧𑁪𑁭.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀲𑁆𑀲 𑀩𑁆𑀭𑀽𑀳𑀺, 𑀅𑀪𑀬𑀜𑁆𑀘 𑀬𑁄 𑀲𑀩𑁆𑀩𑀪𑀽𑀢𑁂𑀲𑀼 𑀤𑁂𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀫𑁄𑀭𑀭𑀸𑀚𑁂𑀢𑀫𑀢𑁆𑀣𑀁, 𑀇𑀢𑁄 𑀘𑀼𑀢𑁄 𑀓𑀺𑀁 𑀮𑀪𑀢𑁂 𑀲𑀼𑀔𑀁 𑀲𑁄.

𑁧𑁪𑁮.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀲𑁆𑀲 𑀩𑁆𑀭𑀽𑀫𑀺, 𑀅𑀪𑀬𑀜𑁆𑀘 𑀬𑁄 𑀲𑀩𑁆𑀩𑀪𑀽𑀢𑁂𑀲𑀼 𑀤𑁂𑀢𑀺;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀮𑀪𑀢𑁂 𑀧𑀲𑀁𑀲𑀁, 𑀲𑀕𑁆𑀕𑀜𑁆𑀘 𑀲𑁄 𑀬𑀸𑀢𑀺 𑀲𑀭𑀻𑀭𑀪𑁂𑀤𑀸.

𑁧𑁪𑁯.

‘‘𑀦 𑀲𑀦𑁆𑀢𑀺 𑀤𑁂𑀯𑀸 𑀇𑀢𑀺 𑀆𑀳𑀼 𑀏𑀓𑁂, 𑀇𑀥𑁂𑀯 𑀚𑀻𑀯𑁄 𑀯𑀺𑀪𑀯𑀁 𑀉𑀧𑁂𑀢𑀺;

𑀢𑀣𑀸 𑀨𑀮𑀁 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀜𑁆𑀘 𑀯𑀤𑀦𑁆𑀢𑀺 𑀤𑀸𑀦𑀁;

𑀢𑁂𑀲𑀁 𑀯𑀘𑁄 𑀅𑀭𑀳𑀢𑀁 𑀲𑀤𑁆𑀤𑀳𑀸𑀦𑁄, 𑀢𑀲𑁆𑀫𑀸 𑀅𑀳𑀁 𑀲𑀓𑀼𑀡𑁂 𑀩𑀸𑀥𑀬𑀸𑀫𑀻’’𑀢𑀺. 𑁋

𑀇𑀫𑀸 𑀉𑀢𑁆𑀢𑀸𑀦𑀲𑀫𑁆𑀩𑀦𑁆𑀥𑀕𑀸𑀣𑀸 𑀧𑀸𑀴𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 ¶ ¶ 𑀇𑀢𑀺 𑀆𑀳𑀼 𑀏𑀓𑁂𑀢𑀺 𑀏𑀓𑀘𑁆𑀘𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁 𑀓𑀣𑁂𑀦𑁆𑀢𑀺. 𑀢𑁂𑀲𑀁 𑀯𑀘𑁄 𑀅𑀭𑀳𑀢𑀁 𑀲𑀤𑁆𑀤𑀳𑀸𑀦𑁄𑀢𑀺 𑀢𑀲𑁆𑀲 𑀓𑀺𑀭 𑀓𑀼𑀮𑀽𑀧𑀓𑀸 𑀉𑀘𑁆𑀙𑁂𑀤𑀯𑀸𑀤𑀺𑀦𑁄 𑀦𑀕𑁆𑀕𑀲𑀫𑀡𑀓𑀸. 𑀢𑁂 𑀢𑀁 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀫𑁆𑀧𑀺 𑀲𑀢𑁆𑀢𑀁 𑀉𑀘𑁆𑀙𑁂𑀤𑀯𑀸𑀤𑀁 𑀕𑀡𑁆𑀳𑀸𑀧𑁂𑀲𑀼𑀁. 𑀲𑁄 𑀢𑁂𑀳𑀺 𑀲𑀁𑀲𑀕𑁆𑀕𑁂𑀦 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀦𑀢𑁆𑀣𑀻’’𑀢𑀺 𑀕𑀳𑁂𑀢𑁆𑀯𑀸 𑀲𑀓𑀼𑀡𑁂 𑀫𑀸𑀭𑁂𑀢𑀺. 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀸 𑀏𑀲𑀸 𑀅𑀲𑀧𑁆𑀧𑀼𑀭𑀺𑀲𑀲𑁂𑀯𑀦𑀸 𑀦𑀸𑀫. 𑀢𑁂𑀬𑁂𑀯 𑀅𑀬𑀁 ‘‘𑀅𑀭𑀳𑀦𑁆𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀢𑀲𑁆𑀲𑁂𑀯 𑀧𑀭𑀮𑁄𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀬𑀝𑁆𑀞𑀺𑀬𑀁 𑀅𑀥𑁄𑀲𑀺𑀭𑁄 𑀑𑀮𑀫𑁆𑀩𑀫𑀸𑀦𑁄𑀯 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁫𑁦.

‘‘𑀘𑀦𑁆𑀤𑁄 𑀘 𑀲𑀼𑀭𑀺𑀬𑁄 𑀘 𑀉𑀪𑁄 𑀲𑀼𑀤𑀲𑁆𑀲𑀦𑀸, 𑀕𑀘𑁆𑀙𑀦𑁆𑀢𑀺 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔𑁂;

𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀭𑀲𑁆𑀲 𑀯𑀸 𑀢𑁂, 𑀓𑀣𑀁 𑀦𑀼 𑀢𑁂 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺.

𑀢𑀢𑁆𑀣 ¶ 𑀇𑀫𑀲𑁆𑀲𑀸𑀢𑀺 𑀓𑀺𑀁 𑀦𑀼 𑀢𑁂 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀲𑀦𑁆𑀢𑀺, 𑀉𑀤𑀸𑀳𑀼 𑀧𑀭𑀮𑁄𑀓𑀲𑁆𑀲𑀸𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀣𑀁 𑀦𑀼 𑀢𑁂𑀢𑀺 𑀏𑀢𑁂𑀲𑀼 𑀯𑀺𑀫𑀸𑀦𑁂𑀲𑀼 𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁂 𑀓𑀣𑀁 𑀦𑀼 𑀓𑀣𑁂𑀦𑁆𑀢𑀺, 𑀓𑀺𑀁 𑀅𑀢𑁆𑀣𑀻𑀢𑀺 𑀓𑀣𑁂𑀦𑁆𑀢𑀺, 𑀉𑀤𑀸𑀳𑀼 𑀦𑀢𑁆𑀣𑀻𑀢𑀺, 𑀓𑀺𑀁 𑀯𑀸 𑀤𑁂𑀯𑀸, 𑀉𑀤𑀸𑀳𑀼 𑀫𑀦𑀼𑀲𑁆𑀲𑀸𑀢𑀺?

𑀮𑀼𑀤𑁆𑀤𑀧𑀼𑀢𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁫𑁧.

‘‘𑀘𑀦𑁆𑀤𑁄 𑀘 𑀲𑀼𑀭𑀺𑀬𑁄 𑀘 𑀉𑀪𑁄 𑀲𑀼𑀤𑀲𑁆𑀲𑀦𑀸, 𑀕𑀘𑁆𑀙𑀦𑁆𑀢𑀺 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔𑁂;

𑀧𑀭𑀲𑁆𑀲 𑀮𑁄𑀓𑀲𑁆𑀲 𑀦 𑀢𑁂 𑀇𑀫𑀲𑁆𑀲, 𑀤𑁂𑀯𑀸𑀢𑀺 𑀢𑁂 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺.

𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀆𑀳 𑁋

𑁧𑁫𑁨.

‘‘𑀏𑀢𑁆𑀣𑁂𑀯 𑀢𑁂 𑀦𑀻𑀳𑀢𑀸 𑀳𑀻𑀦𑀯𑀸𑀤𑀸, 𑀅𑀳𑁂𑀢𑀼𑀓𑀸 𑀬𑁂 𑀦 𑀯𑀤𑀦𑁆𑀢𑀺 𑀓𑀫𑁆𑀫𑀁;

𑀢𑀣𑀸 𑀨𑀮𑀁 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀬𑁂 𑀘 𑀯𑀤𑀦𑁆𑀢𑀺 𑀤𑀸𑀦’’𑀦𑁆𑀢𑀺.

𑀢𑀢𑁆𑀣 ¶ 𑀏𑀢𑁆𑀣𑁂𑀯 𑀢𑁂 𑀦𑀺𑀳𑀢𑀸 𑀳𑀻𑀦𑀯𑀸𑀤𑀸𑀢𑀺 𑀲𑀘𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑁂𑀯𑀮𑁄𑀓𑁂 𑀞𑀺𑀢𑀸, 𑀦 𑀫𑀦𑀼𑀲𑁆𑀲𑀮𑁄𑀓𑁂, 𑀲𑀘𑁂 𑀘 𑀢𑁂 𑀤𑁂𑀯𑀸, 𑀦 𑀫𑀦𑀼𑀲𑁆𑀲𑀸, 𑀏𑀢𑁆𑀣𑁂𑀯 𑀏𑀢𑁆𑀢𑀓𑁂 𑀩𑁆𑀬𑀸𑀓𑀭𑀡𑁂 𑀢𑁂 𑀢𑀯 𑀓𑀼𑀮𑀽𑀧𑀓𑀸 𑀳𑀻𑀦𑀯𑀸𑀤𑀸 𑀦𑀻𑀳𑀢𑀸 𑀳𑁄𑀦𑁆𑀢𑀺. 𑀅𑀳𑁂𑀢𑀼𑀓𑀸 ‘‘𑀯𑀺𑀲𑀼𑀤𑁆𑀥𑀺𑀬𑀸 𑀯𑀸 𑀲𑀁𑀓𑀺𑀮𑁂𑀲𑀲𑁆𑀲 𑀯𑀸 𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺 𑀏𑀯𑀁𑀯𑀸𑀤𑀸. 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀦𑁆𑀢𑀺 𑀬𑁂 𑀘 𑀤𑀸𑀦𑀁 ‘‘𑀩𑀸𑀮𑀓𑁂𑀳𑀺 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀲𑁄 ¶ 𑀫𑀳𑀸𑀲𑀢𑁆𑀢𑁂 𑀓𑀣𑁂𑀦𑁆𑀢𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁫𑁩.

‘‘𑀅𑀤𑁆𑀥𑀸 𑀳𑀺 𑀲𑀘𑁆𑀘𑀁 𑀯𑀘𑀦𑀁 𑀢𑀯𑁂𑀤𑀁, 𑀓𑀣𑀜𑁆𑀳𑀺 𑀤𑀸𑀦𑀁 𑀅𑀨𑀮𑀁 𑀪𑀯𑁂𑀬𑁆𑀬;

𑀢𑀣𑀸 𑀨𑀮𑀁 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀜𑁆𑀘 𑀓𑀣𑀁 𑀪𑀯𑁂𑀬𑁆𑀬.

𑁧𑁫𑁪.

‘‘𑀓𑀣𑀁𑀓𑀭𑁄 𑀓𑀺𑀦𑁆𑀢𑀺𑀓𑀭𑁄 𑀓𑀺𑀫𑀸𑀘𑀭𑀁, 𑀓𑀺𑀁 𑀲𑁂𑀯𑀫𑀸𑀦𑁄 𑀓𑁂𑀦 𑀢𑀧𑁄𑀕𑀼𑀡𑁂𑀦;

𑀅𑀓𑁆𑀔𑀸𑀳𑀺 𑀫𑁂 𑀫𑁄𑀭𑀭𑀸𑀚𑁂𑀢𑀫𑀢𑁆𑀣𑀁, 𑀬𑀣𑀸 𑀅𑀳𑀁 𑀦𑁄 𑀦𑀺𑀭𑀬𑀁 𑀧𑀢𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 ¶ 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀜𑁆𑀘𑀸𑀢𑀺 𑀤𑀸𑀦𑀜𑁆𑀘 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀦𑀸𑀫 𑀓𑀣𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀣𑀁𑀓𑀭𑁄𑀢𑀺 𑀓𑀢𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄. 𑀓𑀺𑀦𑁆𑀢𑀺𑀓𑀭𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀓𑀭𑁄𑀦𑁆𑀢𑁄 𑀅𑀳𑀁 𑀦𑀺𑀭𑀬𑀁 𑀦 𑀕𑀘𑁆𑀙𑁂𑀬𑁆𑀬𑀁. 𑀇𑀢𑀭𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀲𑀘𑀸𑀳𑀁 𑀇𑀫𑀁 𑀧𑀜𑁆𑀳𑀁 𑀦 𑀓𑀣𑁂𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀮𑁄𑀓𑁄 𑀢𑀼𑀘𑁆𑀙𑁄 𑀯𑀺𑀬 𑀓𑀢𑁄 𑀪𑀯𑀺𑀲𑁆𑀲𑀢𑀺, 𑀢𑀣𑁂𑀯𑀲𑁆𑀲 𑀥𑀫𑁆𑀫𑀺𑀓𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁫𑁫.

‘‘𑀬𑁂 𑀓𑁂𑀘𑀺 𑀅𑀢𑁆𑀣𑀺 𑀲𑀫𑀡𑀸 𑀧𑀣𑀩𑁆𑀬𑀸, 𑀓𑀸𑀲𑀸𑀬𑀯𑀢𑁆𑀣𑀸 𑀅𑀦𑀕𑀸𑀭𑀺𑀬𑀸 𑀢𑁂;

𑀧𑀸𑀢𑁄𑀯 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺 𑀓𑀸𑀮𑁂, 𑀯𑀺𑀓𑀸𑀮𑀘𑀭𑀺𑀬𑀸 𑀯𑀺𑀭𑀢𑀸 𑀳𑀺 𑀲𑀦𑁆𑀢𑁄.

𑁧𑁫𑁬.

‘‘𑀢𑁂 ¶ 𑀢𑀢𑁆𑀣 𑀓𑀸𑀮𑁂𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸, 𑀧𑀼𑀘𑁆𑀙𑀸𑀳𑀺 𑀬𑀁 𑀢𑁂 𑀫𑀦𑀲𑁄 𑀧𑀺𑀬𑀁 𑀲𑀺𑀬𑀸;

𑀢𑁂 𑀢𑁂 𑀧𑀯𑀓𑁆𑀔𑀦𑁆𑀢𑀺 𑀬𑀣𑀸𑀧𑀚𑀸𑀦𑀁, 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀭𑀲𑁆𑀲 𑀘𑀢𑁆𑀣’’𑀦𑁆𑀢𑀺.

𑀢𑀢𑁆𑀣 𑀲𑀦𑁆𑀢𑁄𑀢𑀺 𑀲𑀦𑁆𑀢𑀧𑀸𑀧𑀸 𑀧𑀡𑁆𑀟𑀺𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀬𑀣𑀸𑀧𑀚𑀸𑀦𑀦𑁆𑀢𑀺 𑀢𑁂 𑀢𑀼𑀬𑁆𑀳𑀁 𑀅𑀢𑁆𑀢𑀦𑁄 𑀧𑀚𑀸𑀦𑀦𑀦𑀺𑀬𑀸𑀫𑁂𑀦 𑀯𑀓𑁆𑀔𑀦𑁆𑀢𑀺, 𑀓𑀗𑁆𑀔𑀁 𑀢𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑁂𑀲𑁆𑀲𑀦𑁆𑀢𑀺. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀭𑀲𑁆𑀲 𑀘𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫 𑀓𑀫𑁆𑀫𑁂𑀦 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀇𑀫𑀺𑀦𑀸 𑀤𑁂𑀯𑀮𑁄𑀓𑁂, 𑀇𑀫𑀺𑀦𑀸 𑀦𑀺𑀭𑀬𑀸𑀤𑀻𑀲𑀽𑀢𑀺 𑀏𑀯𑀁 𑀇𑀫𑀲𑁆𑀲 𑀘 𑀧𑀭𑀲𑁆𑀲 𑀘 𑀮𑁄𑀓𑀲𑁆𑀲 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀼𑀘𑁆𑀙𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀲𑀺. 𑀲𑁄 𑀧𑀦 𑀧𑀽𑀭𑀺𑀢𑀧𑀸𑀭𑀫𑀻 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑀁 𑀧𑀭𑀺𑀡𑀢𑀧𑀤𑀼𑀫𑀁 𑀯𑀺𑀬 𑀧𑀭𑀺𑀧𑀸𑀓𑀕𑀢𑀜𑀸𑀡𑁄 𑀯𑀺𑀘𑀭𑀢𑀺. 𑀲𑁄 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀞𑀺𑀢𑀧𑀤𑁂𑀦𑁂𑀯 𑀞𑀺𑀢𑁄 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀺𑀮𑀓𑁆𑀔𑀡𑀁 𑀲𑀫𑁆𑀫𑀲𑀦𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 ¶ 𑀧𑀝𑀺𑀯𑀺𑀚𑁆𑀛𑀺. 𑀢𑀲𑁆𑀲 𑀧𑀝𑀺𑀯𑁂𑀥𑁄 𑀘 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀲𑀢𑁄 𑀫𑁄𑀓𑁆𑀔𑁄 𑀘 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀩𑁆𑀩𑀓𑀺𑀮𑁂𑀲𑁂 𑀧𑀤𑀸𑀮𑁂𑀢𑁆𑀯𑀸 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄𑀯 𑀉𑀤𑀸𑀦𑀁 𑀉𑀤𑀸𑀦𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁫𑁭.

‘‘𑀢𑀘𑀁𑀯 ¶ 𑀚𑀺𑀡𑁆𑀡𑀁 𑀉𑀭𑀕𑁄 𑀧𑀼𑀭𑀸𑀡𑀁, 𑀧𑀡𑁆𑀟𑀽𑀧𑀮𑀸𑀲𑀁 𑀳𑀭𑀺𑀢𑁄 𑀤𑀼𑀫𑁄𑀯;

𑀏𑀲𑀧𑁆𑀧𑀳𑀻𑀦𑁄 𑀫𑀫 𑀮𑀼𑀤𑁆𑀤𑀪𑀸𑀯𑁄, 𑀚𑀳𑀸𑀫𑀳𑀁 𑀮𑀼𑀤𑁆𑀤𑀓𑀪𑀸𑀯𑀫𑀚𑁆𑀚𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀚𑀺𑀡𑁆𑀡𑀁 𑀧𑀼𑀭𑀸𑀡𑀁 𑀢𑀘𑀁 𑀉𑀭𑀕𑁄 𑀚𑀳𑀢𑀺, 𑀬𑀣𑀸 𑀘 𑀳𑀭𑀺𑀢𑁄 𑀲𑀫𑁆𑀧𑀚𑁆𑀚𑀫𑀸𑀦𑀦𑀻𑀮𑀧𑀢𑁆𑀢𑁄 𑀤𑀼𑀫𑁄 𑀓𑀢𑁆𑀣𑀘𑀺 𑀞𑀺𑀢𑀁 𑀧𑀡𑁆𑀟𑀼𑀧𑀮𑀸𑀲𑀁 𑀚𑀳𑀢𑀺, 𑀏𑀯𑀁 𑀅𑀳𑀫𑁆𑀧𑀺 𑀅𑀚𑁆𑀚 𑀮𑀼𑀤𑁆𑀤𑀪𑀸𑀯𑀁 𑀤𑀸𑀭𑀼𑀡𑀪𑀸𑀯𑀁 𑀚𑀳𑀺𑀢𑁆𑀯𑀸 𑀞𑀺𑀢𑁄, 𑀲𑁄 𑀤𑀸𑀦𑀺 𑀏𑀲 𑀧𑀳𑀻𑀦𑁄 𑀫𑀫 𑀮𑀼𑀤𑁆𑀤𑀪𑀸𑀯𑁄, 𑀲𑀸𑀥𑀼 𑀯𑀢 𑀚𑀳𑀸𑀫𑀳𑀁 𑀮𑀼𑀤𑁆𑀤𑀓𑀪𑀸𑀯𑀫𑀚𑁆𑀚𑀸𑀢𑀺. 𑀚𑀳𑀸𑀫𑀳𑀦𑁆𑀢𑀺 𑀧𑀚𑀳𑀺𑀁 𑀅𑀳𑀦𑁆𑀢𑀺 𑀅𑀢𑁆𑀣𑁄.

𑀲𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 ‘‘𑀅𑀳𑀁 𑀢𑀸𑀯 𑀲𑀩𑁆𑀩𑀓𑀺𑀮𑁂𑀲𑀩𑀦𑁆𑀥𑀦𑁂𑀳𑀺 𑀫𑀼𑀢𑁆𑀢𑁄, 𑀦𑀺𑀯𑁂𑀲𑀦𑁂 𑀧𑀦 𑀫𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀩𑀳𑀽 𑀲𑀓𑀼𑀡𑀸 𑀅𑀢𑁆𑀣𑀺, 𑀢𑁂 𑀓𑀣𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀧𑀼𑀘𑁆𑀙𑀺 𑁋 ‘‘𑀫𑁄𑀭𑀭𑀸𑀚, 𑀦𑀺𑀯𑁂𑀲𑀦𑁂 𑀫𑁂 𑀩𑀳𑀽 𑀲𑀓𑀼𑀡𑀸 ¶ 𑀩𑀤𑁆𑀥𑀸 𑀅𑀢𑁆𑀣𑀺, 𑀢𑁂 𑀓𑀣𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺? 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀜𑁂𑀯 𑀉𑀧𑀸𑀬𑀧𑀭𑀺𑀕𑁆𑀕𑀳𑀜𑀸𑀡𑀁 𑀫𑀳𑀦𑁆𑀢𑀢𑀭𑀁 𑀳𑁄𑀢𑀺, 𑀢𑁂𑀦 𑀦𑀁 𑀆𑀳 ‘‘𑀬𑀁 𑀯𑁄 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀔𑀡𑁆𑀟𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀁, 𑀢𑀁 𑀆𑀭𑀩𑁆𑀪 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀣, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀩𑀦𑁆𑀥𑀦𑀕𑀢𑁄 𑀲𑀢𑁆𑀢𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀤𑀺𑀦𑁆𑀦𑀦𑀬𑀤𑁆𑀯𑀸𑀭𑁂 𑀞𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁫𑁮.

‘‘𑀬𑁂 𑀘𑀸𑀧𑀺 𑀫𑁂 𑀲𑀓𑀼𑀡𑀸 𑀅𑀢𑁆𑀣𑀺 𑀩𑀤𑁆𑀥𑀸, 𑀲𑀢𑀸𑀦𑀺𑀦𑁂𑀓𑀸𑀦𑀺 𑀦𑀺𑀯𑁂𑀲𑀦𑀲𑁆𑀫𑀺𑀁;

𑀢𑁂𑀲𑀫𑁆𑀧𑀳𑀁 𑀚𑀻𑀯𑀺𑀢𑀫𑀚𑁆𑀚 𑀤𑀫𑁆𑀫𑀺, 𑀫𑁄𑀓𑁆𑀔𑀜𑁆𑀘 𑀢𑁂 𑀧𑀢𑁆𑀢𑀸 𑀲𑀓𑀁 𑀦𑀺𑀓𑁂𑀢’’𑀦𑁆𑀢𑀺.

𑀢𑀢𑁆𑀣 𑀫𑁄𑀓𑁆𑀔𑀜𑁆𑀘 𑀢𑁂 𑀧𑀢𑁆𑀢𑀸𑀢𑀺 𑀲𑁆𑀯𑀸𑀳𑀁 𑀫𑁄𑀓𑁆𑀔𑀁 𑀧𑀢𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄, 𑀢𑁂 𑀲𑀢𑁆𑀢𑁂 𑀚𑀻𑀯𑀺𑀢𑀤𑀸𑀦𑁂𑀦 𑀅𑀦𑀼𑀓𑀫𑁆𑀧𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦. 𑀲𑀓𑀁 𑀦𑀺𑀓𑁂𑀢𑀦𑁆𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀽𑀢𑀺 𑀯𑀤𑀢𑀺.

𑀅𑀣𑀲𑁆𑀲 ¶ 𑀲𑀘𑁆𑀘𑀓𑀺𑀭𑀺𑀬𑀸𑀲𑀫𑀓𑀸𑀮𑀫𑁂𑀯 𑀲𑀩𑁆𑀩𑁂 𑀩𑀦𑁆𑀥𑀦𑀸 𑀫𑀼𑀘𑁆𑀘𑀺𑀢𑁆𑀯𑀸 𑀢𑀼𑀝𑁆𑀞𑀺𑀭𑀯𑀁 𑀭𑀯𑀦𑁆𑀢𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀢𑁂𑀲𑀁 𑀕𑁂𑀳𑁂𑀲𑀼 𑀩𑀺𑀴𑀸𑀮𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀩𑀦𑁆𑀥𑀦𑀕𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀧𑀭𑀸𑀫𑀲𑀺. 𑀢𑀸𑀯𑀤𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 ¶ 𑀅𑀦𑁆𑀢𑀭𑀥𑀸𑀬𑀺, 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑁄 𑀳𑀼𑀢𑁆𑀯𑀸 ‘‘𑀢𑁆𑀯𑀫𑁂𑀯 𑀫𑀫 𑀧𑀢𑀺𑀝𑁆𑀞𑀸 𑀅𑀳𑁄𑀲𑀻’’𑀢𑀺 𑀫𑁄𑀭𑀭𑀸𑀚𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀫𑁄𑀭𑀭𑀸𑀚𑀸𑀧𑀺 𑀬𑀝𑁆𑀞𑀺𑀅𑀕𑁆𑀕𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀢𑁄. 𑀇𑀤𑀸𑀦𑀺 𑀮𑀼𑀤𑁆𑀤𑀲𑁆𑀲 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀧𑀸𑀲𑀳𑀢𑁆𑀣𑀲𑁆𑀲 𑀘𑀭𑀺𑀢𑁆𑀯𑀸𑀧𑀺 𑀫𑁄𑀭𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀸 𑀫𑀼𑀢𑁆𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁫𑁯.

‘‘𑀮𑀼𑀤𑁆𑀤𑁄 ¶ 𑀘𑀭𑀻 𑀧𑀸𑀲𑀳𑀢𑁆𑀣𑁄 𑀅𑀭𑀜𑁆𑀜𑁂, 𑀩𑀸𑀥𑁂𑀢𑀼 𑀫𑁄𑀭𑀸𑀥𑀺𑀧𑀢𑀺𑀁 𑀬𑀲𑀲𑁆𑀲𑀺𑀁;

𑀩𑀦𑁆𑀥𑀺𑀢𑁆𑀯𑀸 𑀫𑁄𑀭𑀸𑀥𑀺𑀧𑀢𑀺𑀁 𑀬𑀲𑀲𑁆𑀲𑀺𑀁, 𑀤𑀼𑀓𑁆𑀔𑀸 𑀲 𑀧𑀫𑀼𑀘𑁆𑀘𑀺 𑀬𑀣𑀸𑀳𑀁 𑀧𑀫𑀼𑀢𑁆𑀢𑁄’’𑀢𑀺.

𑀢𑀢𑁆𑀣 𑀩𑀸𑀥𑁂𑀢𑀽𑀢𑀺 𑀫𑀸𑀭𑁂𑀢𑀼𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳𑀦𑁆𑀢𑀺 𑀬𑀣𑀸 𑀅𑀳𑀁 𑀲𑀬𑀫𑁆𑀪𑀼𑀜𑀸𑀡𑁂𑀦 𑀫𑀼𑀢𑁆𑀢𑁄, 𑀏𑀯𑀫𑁂𑀯 𑀲𑁄𑀧𑀺 𑀫𑀼𑀢𑁆𑀢𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀤𑀸 𑀫𑁄𑀭𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀳𑀸𑀫𑁄𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁪𑁯𑁨] 𑁯. 𑀢𑀘𑁆𑀙𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸

𑀬𑀤𑁂𑀲𑀫𑀸𑀦𑀸 𑀯𑀺𑀘𑀭𑀺𑀫𑁆𑀳𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀫𑀳𑀸𑀓𑁄𑀲𑀮𑁄 𑀓𑀺𑀭 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀥𑀻𑀢𑀭𑀁 𑀤𑁂𑀦𑁆𑀢𑁄 𑀥𑀻𑀢𑀼 𑀦𑁆𑀳𑀸𑀦𑀻𑀬𑀫𑀽𑀮𑀢𑁆𑀣𑀸𑀬 𑀓𑀸𑀲𑀺𑀕𑀸𑀫𑀁 𑀅𑀤𑀸𑀲𑀺. 𑀧𑀲𑁂𑀦𑀤𑀺 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 ¶ 𑀧𑀺𑀢𑀭𑀺 𑀫𑀸𑀭𑀺𑀢𑁂 𑀢𑀁 𑀕𑀸𑀫𑀁 𑀅𑀘𑁆𑀙𑀺𑀦𑁆𑀤𑀺. 𑀢𑁂𑀲𑀼 𑀢𑀲𑁆𑀲𑀢𑁆𑀣𑀸𑀬 𑀬𑀼𑀚𑁆𑀛𑀦𑁆𑀢𑁂𑀲𑀼 𑀧𑀞𑀫𑀁 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀚𑀬𑁄 𑀅𑀳𑁄𑀲𑀺. 𑀓𑁄𑀲𑀮𑀭𑀸𑀚𑀸 𑀧𑀭𑀸𑀚𑀬𑀧𑁆𑀧𑀢𑁆𑀢𑁄 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀅𑀚𑀸𑀢𑀲𑀢𑁆𑀢𑀼𑀁 𑀕𑀡𑁆𑀳𑁂𑀬𑁆𑀬𑀸𑀫𑀸’’𑀢𑀺. 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀦𑀸𑀫 𑀫𑀦𑁆𑀢𑀓𑀼𑀲𑀮𑀸 𑀳𑁄𑀦𑁆𑀢𑀺, 𑀘𑀭𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ‘‘𑀏𑀣, 𑀢𑀼𑀫𑁆𑀳𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀪𑀤𑀦𑁆𑀢𑀸𑀦𑀁 𑀓𑀣𑀁 𑀧𑀭𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀘𑀭𑀧𑀼𑀭𑀺𑀲𑁂 𑀧𑀬𑁄𑀚𑁂𑀲𑀺. 𑀚𑁂𑀢𑀯𑀦𑁂𑀧𑀺 𑀩𑀳𑀽 𑀭𑀸𑀚𑀧𑀼𑀭𑀺𑀲𑀸 𑀧𑀩𑁆𑀩𑀚𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀤𑁆𑀯𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 ¶ 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀦𑁆𑀢𑀺, 𑀏𑀓𑁄 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫, 𑀏𑀓𑁄 𑀫𑀦𑁆𑀢𑀺𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫. 𑀢𑁂 𑀲𑀩𑁆𑀩𑀭𑀢𑁆𑀢𑀺𑀁 𑀲𑀼𑀧𑀺𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀧𑀩𑀼𑀚𑁆𑀛𑀺𑀁𑀲𑀼.

𑀢𑁂𑀲𑀼 ¶ 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀆𑀳 ‘‘𑀪𑀦𑁆𑀢𑁂, 𑀫𑀦𑁆𑀢𑀺𑀤𑀢𑁆𑀢𑀢𑁆𑀣𑁂𑀭𑀸’’𑀢𑀺. ‘‘𑀓𑀺𑀁 𑀪𑀦𑁆𑀢𑁂’’𑀢𑀺. ‘‘𑀦𑀺𑀤𑁆𑀤𑀸𑀬𑀣 𑀢𑀼𑀫𑁆𑀳𑁂’’𑀢𑀺. ‘‘𑀦 𑀦𑀺𑀤𑁆𑀤𑀸𑀬𑀸𑀫𑀺, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀪𑀦𑁆𑀢𑁂, 𑀮𑀸𑀮𑀓𑁄 𑀯𑀢𑀸𑀬𑀁 𑀓𑁄𑀲𑀮𑀭𑀸𑀚𑀸 𑀘𑀸𑀝𑀺𑀫𑀢𑁆𑀢𑀪𑁄𑀚𑀦𑀫𑁂𑀯 𑀪𑀼𑀜𑁆𑀚𑀺𑀢𑀼𑀁 𑀚𑀸𑀦𑀸𑀢𑀻’’𑀢𑀺. ‘‘𑀅𑀣 𑀓𑀺𑀁 𑀪𑀦𑁆𑀢𑁂’’𑀢𑀺. ‘‘𑀅𑀢𑁆𑀢𑀦𑁄 𑀓𑀼𑀘𑁆𑀙𑀺𑀫𑁆𑀳𑀺 𑀧𑀸𑀡𑀓𑀫𑀢𑁆𑀢𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀧𑀭𑀸𑀚𑀺𑀢𑁄 𑀭𑀸𑀚𑀸’’𑀢𑀺. ‘‘𑀓𑀺𑀦𑁆𑀢𑀺 𑀧𑀦 𑀪𑀦𑁆𑀢𑁂 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀪𑀦𑁆𑀢𑁂, 𑀫𑀦𑁆𑀢𑀺𑀤𑀢𑁆𑀢𑀢𑁆𑀣𑁂𑀭 𑀬𑀼𑀤𑁆𑀥𑀁 𑀦𑀸𑀫 𑀲𑀓𑀝𑀩𑁆𑀬𑀽𑀳𑀘𑀓𑁆𑀓𑀩𑁆𑀬𑀽𑀳𑀧𑀤𑀼𑀫𑀩𑁆𑀬𑀽𑀳𑀯𑀲𑁂𑀦 𑀢𑀺𑀯𑀺𑀥𑀁. 𑀢𑁂𑀲𑀼 𑀪𑀸𑀕𑀺𑀦𑁂𑀬𑁆𑀬𑀁 𑀅𑀚𑀸𑀢𑀲𑀢𑁆𑀢𑀼𑀁 𑀕𑀡𑁆𑀳𑀦𑁆𑀢𑁂𑀦 𑀲𑀓𑀝𑀩𑁆𑀬𑀽𑀳𑀁 𑀓𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀩𑁆𑀩𑀢𑀓𑀡𑁆𑀡𑁂 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀲𑀽𑀭𑀧𑀼𑀭𑀺𑀲𑁂 𑀞𑀧𑁂𑀢𑁆𑀯𑀸 𑀧𑀼𑀭𑀢𑁄 𑀩𑀮𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀦𑀤𑀺𑀢𑁆𑀯𑀸 𑀯𑀕𑁆𑀕𑀺𑀢𑁆𑀯𑀸 𑀓𑀼𑀫𑀺𑀦𑁂 𑀧𑀯𑀺𑀝𑁆𑀞𑀫𑀘𑁆𑀙𑀁 𑀯𑀺𑀬 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸𑀯 𑀦𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸’’𑀢𑀺.

𑀧𑀬𑁄𑀚𑀺𑀢𑀧𑀼𑀭𑀺𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀕𑀦𑁆𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀅𑀚𑀸𑀢𑀲𑀢𑁆𑀢𑀼𑀁 𑀕𑀳𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀦𑀺𑀫𑁆𑀫𑀤𑀁 𑀓𑀢𑁆𑀯𑀸 ‘‘𑀧𑀼𑀦 𑀏𑀯𑀭𑀽𑀧𑀁 𑀫𑀸 𑀓𑀭𑀻’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀥𑀻𑀢𑀭𑀁 𑀯𑀚𑀺𑀭𑀓𑀼𑀫𑀸𑀭𑀺𑀁 𑀦𑀸𑀫 𑀢𑀲𑁆𑀲 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀺𑀲𑁆𑀲𑀚𑁆𑀚𑁂𑀲𑀺. ‘‘𑀓𑁄𑀲𑀮𑀭𑀜𑁆𑀜𑀸 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀁𑀯𑀺𑀥𑀸𑀦𑁂𑀦 𑀅𑀚𑀸𑀢𑀲𑀢𑁆𑀢𑀼 𑀕𑀳𑀺𑀢𑁄’’𑀢𑀺 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀓𑀣𑀸 𑀲𑀫𑀼𑀝𑁆𑀞𑀳𑀺, 𑀥𑀫𑁆𑀫𑀲𑀪𑀸𑀬𑀫𑁆𑀧𑀺 𑀢𑀫𑁂𑀯 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑁄 𑀬𑀼𑀤𑁆𑀥𑀲𑀁𑀯𑀺𑀥𑀸𑀦𑁂 𑀙𑁂𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀦𑀕𑀭𑀲𑁆𑀲 𑀤𑁆𑀯𑀸𑀭𑀕𑀸𑀫𑀯𑀸𑀲𑀻 𑀏𑀓𑁄 𑀯𑀟𑁆𑀠𑀓𑀻 𑀤𑀸𑀭𑀼𑀅𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀆𑀯𑀸𑀝𑁂 𑀧𑀢𑀺𑀢𑀁 𑀏𑀓𑀁 𑀲𑀽𑀓𑀭𑀧𑁄𑀢𑀓𑀁 𑀤𑀺𑀲𑁆𑀯𑀸 𑀆𑀦𑁂𑀢𑁆𑀯𑀸 ‘‘𑀢𑀘𑁆𑀙𑀲𑀽𑀓𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀧𑁄𑀲𑁂𑀲𑀺. 𑀲𑁄 𑀢𑀲𑁆𑀲 𑀉𑀧𑀓𑀸𑀭𑀓𑁄 𑀅𑀳𑁄𑀲𑀺. 𑀢𑀼𑀡𑁆𑀟𑁂𑀦 𑀭𑀼𑀓𑁆𑀔𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀢𑀺, 𑀤𑀸𑀞𑀸𑀬 𑀯𑁂𑀞𑁂𑀢𑁆𑀯𑀸 𑀓𑀸𑀴𑀲𑀼𑀢𑁆𑀢𑀁 𑀓𑀟𑁆𑀠𑀢𑀺, 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀯𑀸𑀲𑀺𑀦𑀺𑀔𑀸𑀤𑀦𑀫𑀼𑀕𑁆𑀕𑀭𑁂 𑀆𑀳𑀭𑀢𑀺. 𑀲𑁄 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀫𑀳𑀸𑀩𑀮𑁄 𑀫𑀳𑀸𑀲𑀭𑀻𑀭𑁄 𑀅𑀳𑁄𑀲𑀺. 𑀅𑀣 𑀯𑀟𑁆𑀠𑀓𑀻 𑀢𑀲𑁆𑀫𑀺𑀁 𑀧𑀼𑀢𑁆𑀢𑀧𑁂𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀇𑀥 𑀯𑀲𑀦𑁆𑀢𑀁 𑀓𑁄𑀘𑀺𑀤𑁂𑀯 𑀳𑀺𑀁𑀲𑁂𑀬𑁆𑀬𑀸’’𑀢𑀺 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀏𑀓𑀓𑁄𑀯 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀜𑀸𑀢𑀓𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀢𑁂𑀳𑀺 ¶ 𑀧𑀭𑀺𑀯𑀼𑀢𑁄 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀦𑀖𑀝𑀸𑀬 𑀲𑀽𑀓𑀭𑁂 𑀧𑀭𑀺𑀬𑁂𑀲𑀦𑁆𑀢𑁄 𑀩𑀳𑀽 𑀲𑀽𑀓𑀭𑁂 𑀤𑀺𑀲𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬𑁦.

‘‘𑀬𑀤𑁂𑀲𑀫𑀸𑀦𑀸 ¶ 𑀯𑀺𑀘𑀭𑀺𑀫𑁆𑀳, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘;

𑀅𑀦𑁆𑀯𑁂𑀲𑀁 𑀯𑀺𑀘𑀭𑀺𑀁 𑀜𑀸𑀢𑀻, 𑀢𑁂𑀫𑁂 𑀅𑀥𑀺𑀕𑀢𑀸 𑀫𑀬𑀸.

𑁧𑁬𑁧.

‘‘𑀩𑀳𑀼𑀜𑁆𑀘𑀺𑀤𑀁 𑀫𑀽𑀮𑀨𑀮𑀁, 𑀪𑀓𑁆𑀔𑁄 𑀘𑀸𑀬𑀁 𑀅𑀦𑀧𑁆𑀧𑀓𑁄;

𑀭𑀫𑁆𑀫𑀸 𑀘𑀺𑀫𑀸 𑀕𑀺𑀭𑀻𑀦𑀚𑁆𑀚𑁄, 𑀨𑀸𑀲𑀼𑀯𑀸𑀲𑁄 𑀪𑀯𑀺𑀲𑁆𑀲𑀢𑀺.

𑁧𑁬𑁨.

‘‘𑀇𑀥𑁂𑀯𑀸𑀳𑀁 𑀯𑀲𑀺𑀲𑁆𑀲𑀸𑀫𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀭𑀸𑀲𑀗𑁆𑀓𑀻, 𑀅𑀲𑁄𑀓𑁄 𑀅𑀓𑀼𑀢𑁄𑀪𑀬𑁄’’𑀢𑀺.

𑀢𑀢𑁆𑀣 𑀬𑀤𑁂𑀲𑀫𑀸𑀦𑀸𑀢𑀺 𑀬𑀁 𑀜𑀸𑀢𑀺𑀕𑀡𑀁 𑀧𑀭𑀺𑀬𑁂𑀲𑀦𑁆𑀢𑀸 𑀫𑀬𑀁 𑀯𑀺𑀘𑀭𑀺𑀫𑁆𑀳. 𑀅𑀦𑁆𑀯𑁂𑀲𑀦𑁆𑀢𑀺 𑀘𑀺𑀭𑀁 𑀯𑀢 𑀅𑀦𑁆𑀯𑁂𑀲𑀦𑁆𑀢𑁄 𑀯𑀺𑀘𑀭𑀺𑀁. 𑀢𑁂𑀫𑁂𑀢𑀺 𑀢𑁂 𑀇𑀫𑁂. 𑀪𑀓𑁆𑀔𑁄𑀢𑀺 𑀲𑁆𑀯𑁂𑀯 𑀯𑀦𑀫𑀽𑀮𑀨𑀮𑀲𑀗𑁆𑀔𑀸𑀢𑁄 𑀪𑀓𑁆𑀔𑁄. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀅𑀦𑀼𑀲𑁆𑀲𑀼𑀓𑁆𑀓𑁄 𑀳𑀼𑀢𑁆𑀯𑀸.

𑀲𑀽𑀓𑀭𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁧𑁬𑁩.

‘‘𑀅𑀜𑁆𑀜𑀫𑁆𑀧𑀺 𑀮𑁂𑀡𑀁 𑀧𑀭𑀺𑀬𑁂𑀲, 𑀲𑀢𑁆𑀢𑀼 𑀦𑁄 𑀇𑀥 𑀯𑀺𑀚𑁆𑀚𑀢𑀺;

𑀲𑁄 𑀢𑀘𑁆𑀙 𑀲𑀽𑀓𑀭𑁂 𑀳𑀦𑁆𑀢𑀺, 𑀇𑀥𑀸𑀕𑀦𑁆𑀢𑁆𑀯𑀸 𑀯𑀭𑀁 𑀯𑀭’’𑀦𑁆𑀢𑀺.

𑀢𑀢𑁆𑀣 𑀢𑀘𑁆𑀙𑀸𑀢𑀺 𑀢𑀁 𑀦𑀸𑀫𑁂𑀦𑀸𑀮𑀧𑀦𑁆𑀢𑀺. 𑀯𑀭𑀁 𑀯𑀭𑀦𑁆𑀢𑀺 𑀲𑀽𑀓𑀭𑁂 𑀳𑀦𑀦𑁆𑀢𑁄 𑀣𑀽𑀮𑀫𑀁𑀲𑀁 𑀯𑀭𑀁 𑀯𑀭𑀜𑁆𑀜𑁂𑀯 𑀳𑀦𑀢𑀺.

𑀇𑀢𑁄 𑀧𑀭𑀁 𑀉𑀢𑁆𑀢𑀸𑀦𑀲𑀫𑁆𑀩𑀦𑁆𑀥𑀕𑀸𑀣𑀸 𑀧𑀸𑀴𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸 𑁋

𑁧𑁬𑁪.

‘‘𑀓𑁄 𑀦𑀼𑀫𑁆𑀳𑀸𑀓𑀁 𑀇𑀥 𑀲𑀢𑁆𑀢𑀼, 𑀓𑁄 𑀜𑀸𑀢𑀻 𑀲𑀼𑀲𑀫𑀸𑀕𑀢𑁂;

𑀤𑀼𑀧𑁆𑀧𑀥𑀁𑀲𑁂 𑀧𑀥𑀁𑀲𑁂𑀢𑀺, 𑀢𑀁 𑀫𑁂 𑀅𑀓𑁆𑀔𑀸𑀣 𑀧𑀼𑀘𑁆𑀙𑀺𑀢𑀸.

𑁧𑁬𑁫.

‘‘𑀉𑀤𑁆𑀥𑀕𑁆𑀕𑀭𑀸𑀚𑀻 ¶ 𑀫𑀺𑀕𑀭𑀸𑀚𑀸, 𑀩𑀮𑀻 𑀤𑀸𑀞𑀸𑀯𑀼𑀥𑁄 𑀫𑀺𑀕𑁄;

𑀲𑁄 𑀢𑀘𑁆𑀙 𑀲𑀽𑀓𑀭𑁂 𑀳𑀦𑁆𑀢𑀺, 𑀇𑀥𑀸𑀕𑀦𑁆𑀢𑁆𑀯𑀸 𑀯𑀭𑀁 𑀯𑀭𑀁.

𑁧𑁬𑁬.

‘‘𑀦 ¶ 𑀦𑁄 𑀤𑀸𑀞𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀩𑀮𑀁 𑀓𑀸𑀬𑁂 𑀲𑀫𑁄𑀳𑀺𑀢𑀁;

𑀲𑀩𑁆𑀩𑁂 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸𑀦, 𑀯𑀲𑀁 𑀓𑀸𑀳𑀸𑀫 𑀏𑀓𑀓𑀁.

𑁧𑁬𑁭.

‘‘𑀳𑀤𑀬𑀗𑁆𑀕𑀫𑀁 ¶ 𑀓𑀡𑁆𑀡𑀲𑀼𑀔𑀁, 𑀯𑀸𑀘𑀁 𑀪𑀸𑀲𑀲𑀺 𑀢𑀘𑁆𑀙𑀓;

𑀬𑁄𑀧𑀺 𑀬𑀼𑀤𑁆𑀥𑁂 𑀧𑀮𑀸𑀬𑁂𑀬𑁆𑀬, 𑀢𑀫𑁆𑀧𑀺 𑀧𑀘𑁆𑀙𑀸 𑀳𑀦𑀸𑀫𑀲𑁂’’𑀢𑀺.

𑀢𑀢𑁆𑀣 𑀓𑁄 𑀦𑀼𑀫𑁆𑀳𑀸𑀓𑀦𑁆𑀢𑀺 𑀅𑀳𑀁 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸𑀯 ‘‘𑀇𑀫𑁂 𑀲𑀽𑀓𑀭𑀸 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸, 𑀪𑀬𑁂𑀦 𑀦𑁂𑀲𑀁 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀢𑀲𑁆𑀫𑀸 𑀫𑁂 𑀆𑀘𑀺𑀓𑁆𑀔𑀣, 𑀓𑁄 𑀦𑀼 𑀅𑀫𑁆𑀳𑀸𑀓𑀁 𑀇𑀥 𑀲𑀢𑁆𑀢𑀼. 𑀉𑀤𑁆𑀥𑀕𑁆𑀕𑀭𑀸𑀚𑀻𑀢𑀺 𑀉𑀤𑁆𑀥𑀕𑁆𑀕𑀸𑀳𑀺 𑀲𑀭𑀻𑀭𑀭𑀸𑀚𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀬𑀕𑁆𑀖𑀁 𑀲𑀦𑁆𑀥𑀸𑀬𑁂𑀯𑀫𑀸𑀳𑀁𑀲𑀼. 𑀬𑁄𑀧𑀻𑀢𑀺 𑀬𑁄 𑀅𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀏𑀓𑁄𑀧𑀺 𑀧𑀮𑀸𑀬𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀫𑀬𑀁 𑀧𑀘𑁆𑀙𑀸 𑀳𑀦𑀺𑀲𑁆𑀲𑀸𑀫𑀸𑀢𑀺.

𑀢𑀘𑁆𑀙𑀲𑀽𑀓𑀭𑁄 𑀲𑀩𑁆𑀩𑁂 𑀲𑀽𑀓𑀭𑁂 𑀏𑀓𑀘𑀺𑀢𑁆𑀢𑁂 𑀓𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀓𑀸𑀬 𑀯𑁂𑀮𑀸𑀬 𑀩𑁆𑀬𑀕𑁆𑀖𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀅𑀚𑁆𑀚 𑀧𑀸𑀢𑁄𑀯 𑀏𑀓𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀲𑁆𑀯𑁂 𑀧𑀸𑀢𑁄𑀯 𑀆𑀕𑀫𑀺𑀲𑁆𑀲𑀢𑀻𑀢𑀺. 𑀲𑁄 𑀬𑀼𑀤𑁆𑀥𑀓𑀼𑀲𑀮𑁄 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁂𑀦 𑀲𑀓𑁆𑀓𑀸 𑀚𑁂𑀢𑀼’’𑀦𑁆𑀢𑀺 𑀪𑀽𑀫𑀺𑀲𑀻𑀲𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀏𑀓𑀁 𑀧𑀤𑁂𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀢𑁆𑀢𑀺𑀫𑁂𑀯 𑀲𑀽𑀓𑀭𑁂 𑀕𑁄𑀘𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑀢𑁄 𑀧𑀝𑁆𑀞𑀸𑀬 ‘‘𑀬𑀼𑀤𑁆𑀥𑀁 𑀦𑀸𑀫 𑀲𑀓𑀝𑀩𑁆𑀬𑀽𑀳𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀧𑀤𑀼𑀫𑀩𑁆𑀬𑀽𑀳𑀁 𑀲𑀁𑀯𑀺𑀤𑀳𑀢𑀺. 𑀫𑀚𑁆𑀛𑁂 𑀞𑀸𑀦𑁂 𑀔𑀻𑀭𑀧𑀺𑀯𑀓𑁂 𑀲𑀽𑀓𑀭𑀧𑁄𑀢𑀓𑁂 𑀞𑀧𑁂𑀲𑀺. 𑀢𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑁂𑀲𑀁 𑀫𑀸𑀢𑀭𑁄, 𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀜𑁆𑀛𑀸 𑀲𑀽𑀓𑀭𑀺𑀬𑁄, 𑀢𑀸𑀲𑀁 𑀅𑀦𑀦𑁆𑀢𑀭𑀸 𑀲𑀽𑀓𑀭𑀧𑁄𑀢𑀓𑁂, 𑀢𑁂𑀲𑀁 𑀅𑀦𑀦𑁆𑀢𑀭𑀸 𑀫𑀓𑀼𑀮𑀤𑀸𑀞𑁂 𑀢𑀭𑀼𑀡𑀲𑀽𑀓𑀭𑁂, 𑀢𑁂𑀲𑀁 𑀅𑀦𑀦𑁆𑀢𑀭𑀸 𑀫𑀳𑀸𑀤𑀸𑀞𑁂, 𑀢𑁂𑀲𑀁 𑀅𑀦𑀦𑁆𑀢𑀭𑀸 𑀚𑀺𑀡𑁆𑀡𑀲𑀽𑀓𑀭𑁂, 𑀢𑀢𑁄 𑀢𑀢𑁆𑀣 𑀢𑀢𑁆𑀣 𑀤𑀲𑀯𑀕𑁆𑀕𑀁 𑀯𑀻𑀲𑀢𑀺𑀯𑀕𑁆𑀕𑀁 𑀢𑀺𑀁𑀲𑀯𑀕𑁆𑀕𑀜𑁆𑀘 𑀓𑀢𑁆𑀯𑀸 𑀩𑀮𑀕𑀼𑀫𑁆𑀩𑀁 𑀞𑀧𑁂𑀲𑀺. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀓𑀁 𑀆𑀯𑀸𑀝𑀁, 𑀩𑁆𑀬𑀕𑁆𑀖𑀲𑁆𑀲 𑀧𑀢𑀦𑀢𑁆𑀣𑀸𑀬 𑀏𑀓𑀁 𑀲𑀼𑀧𑁆𑀧𑀲𑀡𑁆𑀞𑀸𑀦𑀁 𑀧𑀩𑁆𑀪𑀸𑀭𑀁 𑀓𑀢𑁆𑀯𑀸 𑀔𑀡𑀸𑀧𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀆𑀯𑀸𑀝𑀸𑀦𑀁 𑀅𑀦𑁆𑀢𑀭𑁂 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀧𑀻𑀞𑀓𑀁 𑀓𑀸𑀭𑁂𑀲𑀺. 𑀲𑁄 𑀣𑀸𑀫𑀲𑀫𑁆𑀧𑀦𑁆𑀦𑁂 𑀬𑁄𑀥𑀲𑀽𑀓𑀭𑁂 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀽𑀓𑀭𑁂 𑀅𑀲𑁆𑀲𑀸𑀲𑁂𑀦𑁆𑀢𑁄 𑀯𑀺𑀘𑀭𑀺. 𑀢𑀲𑁆𑀲𑁂𑀯𑀁 ¶ 𑀓𑀭𑁄𑀦𑁆𑀢𑀲𑁆𑀲𑁂𑀯 𑀲𑀽𑀭𑀺𑀬𑁄 𑀉𑀕𑁆𑀕𑀘𑁆𑀙𑀢𑀺.

𑀅𑀣 𑀩𑁆𑀬𑀕𑁆𑀖𑀭𑀸𑀚𑀸 𑀓𑀽𑀝𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑀧𑀤𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀢𑀢𑀮𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀽𑀓𑀭𑀸 ‘‘𑀆𑀕𑀢𑁄 𑀦𑁄 𑀪𑀦𑁆𑀢𑁂 𑀯𑁂𑀭𑀻’’𑀢𑀺 𑀯𑀤𑀺𑀁𑀲𑀼. 𑀫𑀸 𑀪𑀸𑀬𑀣, 𑀬𑀁 𑀬𑀁 𑀏𑀲 𑀓𑀭𑁄𑀢𑀺, 𑀢𑀁 𑀲𑀩𑁆𑀩𑀁 𑀲𑀭𑀺𑀓𑁆𑀔𑀸 𑀳𑀼𑀢𑁆𑀯𑀸 𑀓𑀭𑁄𑀣𑀸𑀢𑀺. 𑀩𑁆𑀬𑀕𑁆𑀖𑁄 𑀲𑀭𑀻𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀑𑀲𑀓𑁆𑀓𑀦𑁆𑀢𑁄 𑀯𑀺𑀬 𑀧𑀲𑁆𑀲𑀸𑀯𑀫𑀓𑀸𑀲𑀺, 𑀲𑀽𑀓𑀭𑀸𑀧𑀺 𑀢𑀣𑁂𑀯 𑀓𑀭𑀺𑀁𑀲𑀼. 𑀩𑁆𑀬𑀕𑁆𑀖𑁄 𑀲𑀽𑀓𑀭𑁂 𑀑𑀮𑁄𑀓𑁂𑀢𑁆𑀯𑀸 𑀫𑀳𑀸𑀦𑀤𑀁 𑀦𑀤𑀺, 𑀢𑁂𑀧𑀺 𑀢𑀣𑁂𑀯 𑀓𑀭𑀺𑀁𑀲𑀼. 𑀲𑁄 𑀢𑁂𑀲𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀦 𑀇𑀫𑁂 𑀧𑀼𑀩𑁆𑀩𑀲𑀤𑀺𑀲𑀸, 𑀅𑀚𑁆𑀚 ¶ 𑀫𑀬𑁆𑀳𑀁 𑀧𑀝𑀺𑀲𑀢𑁆𑀢𑀼𑀦𑁄 𑀳𑀼𑀢𑁆𑀯𑀸 𑀯𑀕𑁆𑀕𑀯𑀕𑁆𑀕𑀸 𑀞𑀺𑀢𑀸, 𑀲𑀁𑀯𑀺𑀤𑀳𑀓𑁄 𑀦𑁂𑀲𑀁 𑀲𑁂𑀦𑀸𑀦𑀸𑀬𑀓𑁄𑀧𑀺 𑀅𑀢𑁆𑀣𑀺, 𑀅𑀚𑁆𑀚 𑀫𑀬𑀸 𑀏𑀢𑁂𑀲𑀁 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀽𑀝𑀚𑀝𑀺𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀅𑀣 𑀦𑀁 𑀲𑁄 𑀢𑀼𑀘𑁆𑀙𑀳𑀢𑁆𑀣𑀁 𑀤𑀺𑀲𑁆𑀯𑀸 𑀦𑀯𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁮.

‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁄 𑀦𑀼 𑀅𑀚𑁆𑀚, 𑀅𑀪𑀬𑀁 𑀦𑀼 𑀢𑁂 𑀲𑀩𑁆𑀩𑀪𑀽𑀢𑁂𑀲𑀼 𑀤𑀺𑀦𑁆𑀦𑀁;

𑀤𑀸𑀞𑀸 𑀦𑀼 𑀢𑁂 𑀫𑀺𑀕𑀯𑀥𑀸𑀬 𑀦 𑀲𑀦𑁆𑀢𑀺, 𑀬𑁄 𑀲𑀗𑁆𑀖𑀧𑀢𑁆𑀢𑁄 𑀓𑀧𑀡𑁄𑀯 𑀛𑀸𑀬𑀲𑀻’’𑀢𑀺.

𑀢𑀢𑁆𑀣 𑀲𑀗𑁆𑀖𑀧𑀢𑁆𑀢𑁄𑀢𑀺 𑀬𑁄 𑀢𑁆𑀯𑀁 𑀲𑀽𑀓𑀭𑀲𑀗𑁆𑀖𑀧𑀢𑁆𑀢𑁄 𑀳𑀼𑀢𑁆𑀯𑀸 𑀓𑀺𑀜𑁆𑀘𑀺 𑀕𑁄𑀘𑀭𑀁 𑀅𑀮𑀪𑀺𑀢𑁆𑀯𑀸 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀻𑀢𑀺.

𑀅𑀣 𑀩𑁆𑀬𑀕𑁆𑀖𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁬𑁯.

‘‘𑀦 𑀫𑁂 𑀤𑀸𑀞𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀩𑀮𑀁 𑀓𑀸𑀬𑁂 𑀲𑀫𑁄𑀳𑀺𑀢𑀁;

𑀜𑀸𑀢𑀻 𑀘 𑀤𑀺𑀲𑁆𑀯𑀸𑀦 𑀲𑀸𑀫𑀕𑁆𑀕𑀻 𑀏𑀓𑀢𑁄, 𑀢𑀲𑁆𑀫𑀸 𑀘 𑀛𑀸𑀬𑀸𑀫𑀺 𑀯𑀦𑀫𑁆𑀳𑀺 𑀏𑀓𑀓𑁄.

𑁧𑁭𑁦.

‘‘𑀇𑀫𑀲𑁆𑀲𑀼𑀤𑀁 𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁 𑀧𑀼𑀭𑁂, 𑀪𑀬𑀝𑁆𑀝𑀺𑀢𑀸 𑀮𑁂𑀡𑀕𑀯𑁂𑀲𑀺𑀦𑁄 𑀧𑀼𑀣𑀼;

𑀢𑁂 𑀤𑀸𑀦𑀺 𑀲𑀗𑁆𑀕𑀫𑁆𑀫 𑀯𑀲𑀦𑁆𑀢𑀺 𑀏𑀓𑀢𑁄, 𑀬𑀢𑁆𑀣𑀝𑁆𑀞𑀺𑀢𑀸 𑀤𑀼𑀧𑁆𑀧𑀲𑀳𑀚𑁆𑀚 𑀢𑁂 𑀫𑀬𑀸.

𑁧𑁭𑁧.

‘‘𑀧𑀭𑀺𑀡𑀸𑀬𑀓𑀲𑀫𑁆𑀧𑀦𑁆𑀦𑀸 ¶ , 𑀲𑀳𑀺𑀢𑀸 𑀏𑀓𑀯𑀸𑀤𑀺𑀦𑁄;

𑀢𑁂 𑀫𑀁 𑀲𑀫𑀕𑁆𑀕𑀸 𑀳𑀺𑀁𑀲𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦𑁂𑀲𑀁 𑀦 𑀧𑀢𑁆𑀣𑀬𑁂’’𑀢𑀺.

𑀢𑀢𑁆𑀣 𑀲𑀸𑀫𑀕𑁆𑀕𑀻 𑀏𑀓𑀢𑁄𑀢𑀺 𑀲𑀳𑀺𑀢𑀸 𑀳𑀼𑀢𑁆𑀯𑀸 𑀏𑀓𑀢𑁄 𑀞𑀺𑀢𑁂. 𑀇𑀫𑀲𑁆𑀲𑀼𑀤𑀦𑁆𑀢𑀺 𑀇𑀫𑁂 𑀲𑀼𑀤𑀁 𑀫𑀬𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀺𑀢𑀫𑀢𑁆𑀢𑀸𑀯 𑀧𑀼𑀩𑁆𑀩𑁂 𑀤𑀺𑀲𑁄𑀤𑀺𑀲𑀁 𑀕𑀘𑁆𑀙𑀦𑁆𑀢𑀺. 𑀧𑀼𑀣𑀽𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁. 𑀬𑀢𑁆𑀣𑀝𑁆𑀞𑀺𑀢𑀸𑀢𑀺 𑀬𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀞𑀺𑀢𑀸. 𑀧𑀭𑀺𑀡𑀸𑀬𑀓𑀲𑀫𑁆𑀧𑀦𑁆𑀦𑀸𑀢𑀺 𑀲𑁂𑀦𑀸𑀦𑀸𑀬𑀓𑁂𑀦 𑀲𑀫𑁆𑀧𑀦𑁆𑀦𑀸. 𑀢𑀲𑁆𑀫𑀸 𑀦𑁂𑀲𑀁 𑀦 𑀧𑀢𑁆𑀣𑀬𑁂𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀏𑀢𑁂𑀲𑀁 𑀦 𑀧𑀢𑁆𑀣𑁂𑀫𑀺.

𑀢𑀁 ¶ 𑀲𑀼𑀢𑁆𑀯𑀸 𑀓𑀽𑀝𑀚𑀝𑀺𑀮𑁄 𑀢𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑀬𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁭𑁨.

‘‘𑀏𑀓𑁄𑀯 𑀇𑀦𑁆𑀤𑁄 𑀅𑀲𑀼𑀭𑁂 𑀚𑀺𑀦𑀸𑀢𑀺, 𑀏𑀓𑁄𑀯 𑀲𑁂𑀦𑁄 𑀳𑀦𑁆𑀢𑀺 𑀤𑀺𑀚𑁂 𑀧𑀲𑀬𑁆𑀳;

𑀏𑀓𑁄𑀯 𑀩𑁆𑀬𑀕𑁆𑀖𑁄 𑀫𑀺𑀕𑀲𑀗𑁆𑀖𑀧𑀢𑁆𑀢𑁄, 𑀯𑀭𑀁 𑀯𑀭𑀁 𑀳𑀦𑁆𑀢𑀺 𑀩𑀮𑀜𑁆𑀳𑀺 𑀢𑀸𑀤𑀺𑀲’’𑀦𑁆𑀢𑀺.

𑀢𑀢𑁆𑀣 ¶ 𑀫𑀺𑀕𑀲𑀗𑁆𑀖𑀧𑀢𑁆𑀢𑁄𑀢𑀺 𑀫𑀺𑀕𑀕𑀡𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀭𑀁 𑀯𑀭𑀁 𑀫𑀺𑀕𑀁 𑀳𑀦𑁆𑀢𑀺. 𑀩𑀮𑀜𑁆𑀳𑀺 𑀢𑀸𑀤𑀺𑀲𑀦𑁆𑀢𑀺 𑀢𑀸𑀤𑀺𑀲𑀜𑁆𑀳𑀺 𑀢𑀲𑁆𑀲 𑀩𑀮𑀁.

𑀅𑀣 𑀩𑁆𑀬𑀕𑁆𑀖𑁄 𑀕𑀸𑀣𑀫𑀸𑀳 𑁋

𑁧𑁭𑁩.

‘‘𑀦 𑀳𑁂𑀯 𑀇𑀦𑁆𑀤𑁄 𑀦 𑀲𑁂𑀦𑁄, 𑀦𑀧𑀺 𑀩𑁆𑀬𑀕𑁆𑀖𑁄 𑀫𑀺𑀕𑀸𑀥𑀺𑀧𑁄;

𑀲𑀫𑀕𑁆𑀕𑁂 𑀲𑀳𑀺𑀢𑁂 𑀜𑀸𑀢𑀻, 𑀦 𑀩𑁆𑀬𑀕𑁆𑀖𑁂 𑀓𑀼𑀭𑀼𑀢𑁂 𑀯𑀲𑁂’’𑀢𑀺.

𑀢𑀢𑁆𑀣 𑀩𑁆𑀬𑀕𑁆𑀖𑁂𑀢𑀺 𑀩𑁆𑀬𑀕𑁆𑀖𑀲𑀤𑀺𑀲𑁂 𑀳𑀼𑀢𑁆𑀯𑀸 𑀲𑀭𑀻𑀭𑀯𑀺𑀥𑀽𑀦𑀦𑀸𑀤𑀻𑀦𑀺 𑀓𑀢𑁆𑀯𑀸 𑀞𑀺𑀢𑁂 𑀯𑀲𑁂 𑀦 𑀓𑀼𑀭𑀼𑀢𑁂, 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀼𑀦 𑀚𑀝𑀺𑀮𑁄 𑀢𑀁 𑀉𑀲𑁆𑀲𑀸𑀳𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁭𑁪.

‘‘𑀓𑀼𑀫𑁆𑀪𑀻𑀮𑀓𑀸 𑀲𑀓𑀼𑀡𑀓𑀸, 𑀲𑀗𑁆𑀖𑀺𑀦𑁄 𑀕𑀡𑀘𑀸𑀭𑀺𑀦𑁄;

𑀲𑀫𑁆𑀫𑁄𑀤𑀫𑀸𑀦𑀸 𑀏𑀓𑀚𑁆𑀛𑀁, 𑀉𑀧𑁆𑀧𑀢𑀦𑁆𑀢𑀺 𑀟𑀬𑀦𑁆𑀢𑀺 𑀘.

𑁧𑁭𑁫.

‘‘𑀢𑁂𑀲𑀜𑁆𑀘 𑀟𑀬𑀫𑀸𑀦𑀸𑀦𑀁, 𑀏𑀓𑁂𑀢𑁆𑀣 𑀅𑀧𑀲𑀓𑁆𑀓𑀢𑀺;

𑀢𑀜𑁆𑀘 𑀲𑁂𑀦𑁄 𑀦𑀺𑀢𑀸𑀴𑁂𑀢𑀺, 𑀯𑁂𑀬𑁆𑀬𑀕𑁆𑀖𑀺𑀬𑁂𑀯 𑀲𑀸 𑀕𑀢𑀻’’𑀢𑀺.

𑀢𑀢𑁆𑀣 ¶ 𑀓𑀼𑀫𑁆𑀪𑀻𑀮𑀓𑀸𑀢𑀺 𑀏𑀯𑀁𑀦𑀸𑀫𑀓𑀸 𑀔𑀼𑀤𑁆𑀤𑀓𑀲𑀓𑀼𑀡𑀸. 𑀉𑀧𑁆𑀧𑀢𑀦𑁆𑀢𑀻𑀢𑀺 𑀕𑁄𑀘𑀭𑀁 𑀘𑀭𑀦𑁆𑀢𑀸 𑀉𑀧𑁆𑀧𑀢𑀦𑁆𑀢𑀺. 𑀟𑀬𑀦𑁆𑀢𑀺 𑀘𑀸𑀢𑀺 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀏𑀓𑁂𑀢𑁆𑀣 𑀅𑀧𑀲𑀓𑁆𑀓𑀢𑀻𑀢𑀺 𑀏𑀓𑁄 𑀏𑀢𑁂𑀲𑀼 𑀑𑀲𑀓𑁆𑀓𑀺𑀢𑁆𑀯𑀸 𑀯𑀸 𑀏𑀓𑀧𑀲𑁆𑀲𑁂𑀦 𑀯𑀸 𑀯𑀺𑀲𑀼𑀁 𑀕𑀘𑁆𑀙𑀢𑀺. 𑀦𑀺𑀢𑀸𑀴𑁂𑀢𑀻𑀢𑀺 𑀧𑀳𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀯𑁂𑀬𑁆𑀬𑀕𑁆𑀖𑀺𑀬𑁂𑀯 𑀲𑀸 𑀕𑀢𑀻𑀢𑀺 𑀩𑁆𑀬𑀕𑁆𑀖𑀸𑀦𑀁 𑀏𑀲𑀸𑀢𑀺 𑀯𑁂𑀬𑁆𑀬𑀕𑁆𑀖𑀺, 𑀲𑀫𑀕𑁆𑀕𑀸𑀦𑀁 𑀕𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀏𑀲𑀸 𑀏𑀯𑀭𑀽𑀧𑀸 𑀕𑀢𑀺 𑀩𑁆𑀬𑀕𑁆𑀖𑀸𑀦𑀁 𑀕𑀢𑀺𑀬𑁂𑀯 𑀦𑀸𑀫 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑁂𑀳𑀺 𑀏𑀓𑀢𑁄𑀯 𑀕𑀦𑁆𑀢𑀼𑀁, 𑀢𑀲𑁆𑀫𑀸 𑀬𑁄 𑀏𑀯𑀁 𑀢𑀢𑁆𑀣 𑀏𑀓𑁄 𑀕𑀘𑁆𑀙𑀢𑀺, 𑀢𑀁 𑀕𑀡𑁆𑀳𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀩𑁆𑀬𑀕𑁆𑀖𑀭𑀸𑀚 𑀢𑁆𑀯𑀁 𑀅𑀢𑁆𑀢𑀦𑁄 𑀩𑀮𑀁 𑀦 𑀚𑀸𑀦𑀸𑀲𑀺, 𑀫𑀸 𑀪𑀸𑀬𑀺, 𑀓𑁂𑀯𑀮𑀁 𑀢𑁆𑀯𑀁 𑀦𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤, 𑀤𑁆𑀯𑁂 𑀏𑀓𑀢𑁄 𑀕𑀘𑁆𑀙𑀦𑁆𑀢𑀸 𑀦𑀸𑀫 𑀦 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀲𑁆𑀲𑀸𑀳𑁂𑀲𑀺 ¶ . 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁭𑁬.

‘‘𑀉𑀲𑁆𑀲𑀸𑀳𑀺𑀢𑁄 ¶ 𑀚𑀝𑀺𑀮𑁂𑀦, 𑀮𑀼𑀤𑁆𑀤𑁂𑀦𑀸𑀫𑀺𑀲𑀘𑀓𑁆𑀔𑀼𑀦𑀸;

𑀤𑀸𑀞𑀻 𑀤𑀸𑀞𑀻𑀲𑀼 𑀧𑀓𑁆𑀔𑀦𑁆𑀢𑀺, 𑀫𑀜𑁆𑀜𑀫𑀸𑀦𑁄 𑀬𑀣𑀸 𑀧𑀼𑀭𑁂’’𑀢𑀺.

𑀢𑀢𑁆𑀣 𑀤𑀸𑀞𑀻𑀢𑀺 𑀲𑀬𑀁 𑀤𑀸𑀞𑀸𑀯𑀼𑀥𑁄 𑀇𑀢𑀭𑁂𑀲𑀼 𑀤𑀸𑀞𑀸𑀯𑀼𑀥𑁂𑀲𑀼 𑀧𑀓𑁆𑀔𑀦𑁆𑀤𑀺. 𑀬𑀣𑀸 𑀧𑀼𑀭𑁂𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀫𑀜𑁆𑀜𑀢𑀺, 𑀢𑀣𑁂𑀯 𑀫𑀜𑁆𑀜𑀫𑀸𑀦𑁄.

𑀲𑁄 𑀓𑀺𑀭 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀢𑀮𑁂 𑀢𑀸𑀯 𑀅𑀝𑁆𑀞𑀸𑀲𑀺. 𑀲𑀽𑀓𑀭𑀸 ‘‘𑀧𑀼𑀦𑀸𑀕𑀢𑁄 𑀲𑀸𑀫𑀺, 𑀘𑁄𑀭𑁄’’𑀢𑀺 𑀢𑀘𑁆𑀙𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 ‘‘𑀫𑀸 𑀪𑀸𑀬𑀣𑀸’’𑀢𑀺 𑀢𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 𑀉𑀝𑁆𑀞𑀸𑀬 𑀤𑁆𑀯𑀺𑀦𑁆𑀦𑀁 𑀆𑀯𑀸𑀝𑀸𑀦𑀁 𑀅𑀦𑁆𑀢𑀭𑁂 𑀧𑀻𑀞𑀓𑀸𑀬 𑀅𑀝𑁆𑀞𑀸𑀲𑀺. 𑀩𑁆𑀬𑀕𑁆𑀖𑁄 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀢𑀘𑁆𑀙𑀲𑀽𑀓𑀭𑀁 𑀲𑀦𑁆𑀥𑀸𑀬 𑀧𑀓𑁆𑀔𑀦𑁆𑀤𑀺. 𑀢𑀘𑁆𑀙𑀲𑀽𑀓𑀭𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀘𑁆𑀙𑀸𑀫𑀼𑀔𑁄 𑀧𑀼𑀭𑀺𑀫𑀆𑀯𑀸𑀝𑁂 𑀧𑀢𑀺. 𑀩𑁆𑀬𑀕𑁆𑀖𑁄 𑀘 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀦𑁆𑀢𑁆𑀯𑀸 𑀲𑀼𑀧𑁆𑀧𑀧𑀩𑁆𑀪𑀸𑀭𑁂 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀧𑀼𑀜𑁆𑀚𑀓𑀺𑀢𑁄𑀯 𑀅𑀝𑁆𑀞𑀸𑀲𑀺. 𑀢𑀘𑁆𑀙𑀲𑀽𑀓𑀭𑁄 𑀯𑁂𑀕𑁂𑀦 𑀉𑀝𑁆𑀞𑀸𑀬 𑀢𑀲𑁆𑀲 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀤𑀸𑀞𑀁 𑀑𑀢𑀸𑀭𑁂𑀢𑁆𑀯𑀸 𑀬𑀸𑀯 𑀳𑀤𑀬𑀸 𑀨𑀸𑀮𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀩𑀳𑀺𑀆𑀯𑀸𑀝𑁂 𑀧𑀸𑀢𑁂𑀢𑁆𑀯𑀸 ‘‘𑀕𑀡𑁆𑀳𑀣𑀺𑀫𑀁 𑀤𑀸𑀲’’𑀦𑁆𑀢𑀺 𑀆𑀳. 𑀧𑀞𑀫𑀸𑀕𑀢𑀸 ¶ 𑀏𑀓𑀯𑀸𑀭𑀫𑁂𑀯 𑀢𑀼𑀡𑁆𑀟𑁄𑀢𑀸𑀭𑀡𑀫𑀢𑁆𑀢𑀁 𑀮𑀪𑀺𑀁𑀲𑀼, 𑀧𑀘𑁆𑀙𑀸 𑀆𑀕𑀢𑀸 𑀅𑀮𑀪𑀺𑀢𑁆𑀯𑀸 ‘‘𑀩𑁆𑀬𑀕𑁆𑀖𑀫𑀁𑀲𑀁 𑀦𑀸𑀫 𑀓𑀻𑀤𑀺𑀲’’𑀦𑁆𑀢𑀺 𑀯𑀤𑀺𑀁𑀲𑀼. 𑀢𑀘𑁆𑀙𑀲𑀽𑀓𑀭𑁄 𑀆𑀯𑀸𑀝𑀸 𑀉𑀢𑁆𑀢𑀭𑀺𑀢𑁆𑀯𑀸 𑀲𑀽𑀓𑀭𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀦 𑀢𑀼𑀲𑁆𑀲𑀣𑀸’’𑀢𑀺 𑀆𑀳. ‘‘𑀲𑀸𑀫𑀺, 𑀏𑀓𑁄 𑀢𑀸𑀯 𑀩𑁆𑀬𑀕𑁆𑀖𑁄 𑀕𑀳𑀺𑀢𑁄, 𑀅𑀜𑁆𑀜𑁄 𑀧𑀦𑁂𑀓𑁄 𑀤𑀲𑀩𑁆𑀬𑀕𑁆𑀖𑀕𑁆𑀖𑀦𑀓𑁄 𑀅𑀢𑁆𑀣𑀻’’𑀢𑀺? ‘‘𑀓𑁄 𑀦𑀸𑀫𑁂𑀲𑁄’’𑀢𑀺? ‘‘𑀩𑁆𑀬𑀕𑁆𑀖𑁂𑀦 𑀆𑀪𑀢𑀸𑀪𑀢𑀫𑀁𑀲𑀁 𑀔𑀸𑀤𑀓𑁄 𑀓𑀽𑀝𑀚𑀝𑀺𑀮𑁄’’𑀢𑀺. ‘‘𑀢𑁂𑀦 𑀳𑀺 𑀏𑀣, 𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺.

𑀚𑀝𑀺𑀮𑁄 ‘‘𑀩𑁆𑀬𑀕𑁆𑀖𑁄 𑀘𑀺𑀭𑀸𑀬𑀢𑀻’’𑀢𑀺 𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀩𑀳𑀽 𑀲𑀽𑀓𑀭𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀩𑁆𑀬𑀕𑁆𑀖𑀁 𑀫𑀸𑀭𑁂𑀢𑁆𑀯𑀸 𑀫𑀫 𑀫𑀸𑀭𑀡𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺 𑀫𑀜𑁆𑀜𑁂’’𑀢𑀺 𑀧𑀮𑀸𑀬𑀺𑀢𑁆𑀯𑀸 𑀏𑀓𑀁 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺. 𑀲𑀽𑀓𑀭𑀸 ‘‘𑀏𑀲 𑀭𑀼𑀓𑁆𑀔𑀁 𑀆𑀭𑀼𑀴𑁆𑀳𑁄’’𑀢𑀺 𑀯𑀤𑀺𑀁𑀲𑀼. ‘‘𑀓𑀺𑀁 𑀭𑀼𑀓𑁆𑀔’’𑀦𑁆𑀢𑀺. ‘‘𑀉𑀤𑀼𑀫𑁆𑀩𑀭𑀭𑀼𑀓𑁆𑀔’’𑀦𑁆𑀢𑀺. ‘‘𑀢𑁂𑀦 𑀳𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀇𑀤𑀸𑀦𑀺 𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀢𑀭𑀼𑀡𑀲𑀽𑀓𑀭𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑀢𑀸 ¶ 𑀧𑀁𑀲𑀼𑀁 𑀅𑀧𑀩𑁆𑀬𑀽𑀳𑀸𑀧𑁂𑀲𑀺, 𑀲𑀽𑀓𑀭𑀻𑀳𑀺 𑀫𑀼𑀔𑀧𑀽𑀭𑀁 𑀉𑀤𑀓𑀁 𑀆𑀳𑀭𑀸𑀧𑁂𑀲𑀺, 𑀫𑀳𑀸𑀤𑀸𑀞𑀲𑀽𑀓𑀭𑁂𑀳𑀺 𑀲𑀫𑀦𑁆𑀢𑀸 𑀫𑀽𑀮𑀸𑀦𑀺 𑀙𑀺𑀦𑁆𑀤𑀸𑀧𑁂𑀲𑀺. 𑀏𑀓𑀁 𑀉𑀚𑀼𑀓𑀁 𑀑𑀢𑀺𑀡𑁆𑀡𑀫𑀽𑀮𑀫𑁂𑀯 𑀅𑀝𑁆𑀞𑀸𑀲𑀺. 𑀢𑀢𑁄 𑀲𑁂𑀲𑀲𑀽𑀓𑀭𑁂 ‘‘𑀢𑀼𑀫𑁆𑀳𑁂 𑀅𑀧𑁂𑀣𑀸’’𑀢𑀺 𑀉𑀲𑁆𑀲𑀸𑀭𑁂𑀢𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀤𑀸𑀞𑀸𑀬 𑀫𑀽𑀮𑀁 𑀧𑀳𑀭𑀺, 𑀨𑀭𑀲𑀼𑀦𑀸 𑀧𑀳𑀝𑀁 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀕𑀢𑀁. 𑀭𑀼𑀓𑁆𑀔𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀺. 𑀢𑀁 𑀓𑀽𑀝𑀚𑀝𑀺𑀮𑀁 𑀧𑀢𑀦𑁆𑀢𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀁𑀲𑀁 𑀪𑀓𑁆𑀔𑁂𑀲𑀼𑀁. 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 𑀕𑀸𑀣𑀫𑀸𑀳 𑁋

𑁧𑁭𑁭.

‘‘𑀲𑀸𑀥𑀼 ¶ 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻, 𑀅𑀧𑀺 𑀭𑀼𑀓𑁆𑀔𑀸 𑀅𑀭𑀜𑁆𑀜𑀚𑀸;

𑀲𑀽𑀓𑀭𑁂𑀳𑀺 𑀲𑀫𑀕𑁆𑀕𑁂𑀳𑀺, 𑀩𑁆𑀬𑀕𑁆𑀖𑁄 𑀏𑀓𑀸𑀬𑀦𑁂 𑀳𑀢𑁄’’𑀢𑀺.

𑀢𑀢𑁆𑀣 𑀏𑀓𑀸𑀬𑀦𑁂 𑀳𑀢𑁄𑀢𑀺 𑀏𑀓𑀕𑀫𑀦𑀲𑁆𑀫𑀺𑀁𑀬𑁂𑀯 𑀳𑀢𑁄.

𑀉𑀪𑀺𑀦𑁆𑀦𑀁 𑀧𑀦 𑀦𑁂𑀲𑀁 𑀳𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁧𑁭𑁮.

‘‘𑀩𑁆𑀭𑀸𑀳𑁆𑀫𑀡𑀜𑁆𑀘𑁂𑀯 𑀩𑁆𑀬𑀕𑁆𑀖𑀜𑁆𑀘, 𑀉𑀪𑁄 𑀳𑀦𑁆𑀢𑁆𑀯𑀸𑀦 𑀲𑀽𑀓𑀭𑀸;

𑀆𑀦𑀦𑁆𑀤𑀺𑀦𑁄 𑀧𑀫𑀼𑀤𑀺𑀢𑀸, 𑀫𑀳𑀸𑀦𑀸𑀤𑀁 𑀧𑀦𑀸𑀤𑀺𑀲𑀼’’𑀦𑁆𑀢𑀺.

𑀧𑀼𑀦 ¶ 𑀢𑀘𑁆𑀙𑀲𑀽𑀓𑀭𑁄 𑀢𑁂 𑀧𑀼𑀘𑁆𑀙𑀺 ‘‘𑀅𑀜𑁆𑀜𑁂𑀧𑀺 𑀯𑁄 𑀅𑀫𑀺𑀢𑁆𑀢𑀸 𑀅𑀢𑁆𑀣𑀻’’𑀢𑀺? 𑀲𑀽𑀓𑀭𑀸 ‘‘𑀦𑀢𑁆𑀣𑀺, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀢𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀉𑀤𑀓𑀁 𑀧𑀭𑀺𑀬𑁂𑀲𑀦𑁆𑀢𑀸 𑀚𑀝𑀺𑀮𑀲𑁆𑀲 𑀧𑀸𑀦𑀻𑀬𑀲𑀗𑁆𑀔𑀁 𑀤𑀺𑀲𑁆𑀯𑀸 𑀢𑀁 𑀤𑀓𑁆𑀔𑀺𑀡𑀸𑀯𑀝𑁆𑀝𑀁 𑀲𑀗𑁆𑀔𑀭𑀢𑀦𑀁 𑀧𑀽𑀭𑁂𑀢𑁆𑀯𑀸 𑀉𑀤𑀓𑀁 𑀅𑀪𑀺𑀳𑀭𑀺𑀢𑁆𑀯𑀸 𑀢𑀘𑁆𑀙𑀲𑀽𑀓𑀭𑀁 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑀫𑀽𑀮𑁂𑀬𑁂𑀯 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀅𑀪𑀺𑀲𑁂𑀓𑀉𑀤𑀓𑀁 𑀆𑀲𑀺𑀢𑁆𑀢𑀁, 𑀲𑀽𑀓𑀭𑀺𑀫𑁂𑀯𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀉𑀤𑀼𑀫𑁆𑀩𑀭𑀪𑀤𑁆𑀤𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑁂𑀦 𑀅𑀪𑀺𑀲𑁂𑀓𑀓𑀭𑀡𑀁 𑀧𑀯𑀢𑁆𑀢𑀁. 𑀢𑀫𑁆𑀧𑀺 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋

𑁧𑁭𑁯.

‘‘𑀢𑁂 𑀲𑀼 𑀉𑀤𑀼𑀫𑁆𑀩𑀭𑀫𑀽𑀮𑀲𑁆𑀫𑀺𑀁, 𑀲𑀽𑀓𑀭𑀸 𑀲𑀼𑀲𑀫𑀸𑀕𑀢𑀸;

𑀢𑀘𑁆𑀙𑀓𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀢𑁆𑀯𑀁 𑀦𑁄 𑀭𑀸𑀚𑀸𑀲𑀺 𑀇𑀲𑁆𑀲𑀭𑁄’’𑀢𑀺.

𑀢𑀢𑁆𑀣 𑀢𑁂 𑀲𑀽𑀢𑀺 𑀢𑁂 𑀲𑀽𑀓𑀭𑀸, 𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀉𑀤𑀼𑀫𑁆𑀩𑀭𑀫𑀽𑀮𑀲𑁆𑀫𑀺𑀦𑁆𑀢𑀺 𑀉𑀤𑀼𑀫𑁆𑀩𑀭𑀲𑁆𑀲 𑀫𑀽𑀮𑁂.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑀢𑁆𑀣𑁂𑀭𑁄 𑀬𑀼𑀤𑁆𑀥𑀲𑀁𑀯𑀺𑀤𑀳𑀦𑁂 𑀙𑁂𑀓𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ¶ 𑁋 ‘‘𑀢𑀤𑀸 𑀓𑀽𑀝𑀚𑀝𑀺𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀢𑀘𑁆𑀙𑀲𑀽𑀓𑀭𑁄 𑀥𑀦𑀼𑀕𑁆𑀕𑀳𑀢𑀺𑀲𑁆𑀲𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀢𑀘𑁆𑀙𑀲𑀽𑀓𑀭𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁪𑁯𑁩] 𑁧𑁦. 𑀫𑀳𑀸𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸

𑀯𑀸𑀡𑀺𑀚𑀸 ¶ 𑀲𑀫𑀺𑀢𑀺𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀸𑀡𑀺𑀚𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀯𑁄𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀲𑀢𑁆𑀣𑀼 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 ‘‘𑀪𑀦𑁆𑀢𑁂, 𑀲𑀘𑁂 𑀅𑀭𑁄𑀕𑀸 𑀆𑀕𑀫𑀺𑀲𑁆𑀲𑀸𑀫, 𑀧𑀼𑀦 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀲𑀓𑀝𑀲𑀢𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀦𑁆𑀢𑀸𑀭𑀁 𑀧𑀢𑁆𑀯𑀸 𑀫𑀕𑁆𑀕𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀕𑁆𑀕𑀫𑀽𑀴𑁆𑀳𑀸 𑀦𑀺𑀭𑀼𑀤𑀓𑁂 𑀦𑀺𑀭𑀸𑀳𑀸𑀭𑁂 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑀸 𑀏𑀓𑀁 𑀦𑀸𑀕𑀧𑀭𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀲𑀓𑀝𑀸𑀦𑀺 𑀫𑁄𑀘𑁂𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀢𑀲𑁆𑀲 𑀉𑀤𑀓𑀢𑀺𑀦𑁆𑀢𑀸𑀦𑀺 𑀯𑀺𑀬 𑀦𑀻𑀮𑀸𑀦𑀺 𑀲𑀺𑀦𑀺𑀤𑁆𑀥𑀸𑀦𑀺 𑀧𑀢𑁆𑀢𑀸𑀦𑀺 𑀉𑀤𑀓𑀧𑀼𑀡𑁆𑀡𑀸 𑀯𑀺𑀬 𑀘 𑀲𑀸𑀔𑀸 𑀤𑀺𑀲𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀉𑀤𑀓𑀁 𑀲𑀜𑁆𑀘𑀭𑀦𑁆𑀢𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀇𑀫𑀲𑁆𑀲 𑀧𑀼𑀭𑀺𑀫𑀲𑀸𑀔𑀁 𑀙𑀺𑀦𑁆𑀤𑀸𑀫, 𑀧𑀸𑀦𑀻𑀬𑀁 𑀦𑁄 𑀤𑀲𑁆𑀲𑀢𑀻’’𑀢𑀺. 𑀅𑀣𑁂𑀓𑁄 ¶ 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀸𑀔𑀁 𑀙𑀺𑀦𑁆𑀤𑀺, 𑀢𑀢𑁄 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀺. 𑀢𑁂 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘 𑀤𑀓𑁆𑀔𑀺𑀡𑀲𑀸𑀔𑀁 𑀙𑀺𑀦𑁆𑀤𑀺𑀁𑀲𑀼, 𑀢𑀢𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀦𑀺𑀓𑁆𑀔𑀫𑀺. 𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑀸𑀔𑀁 𑀙𑀺𑀦𑁆𑀤𑀺𑀁𑀲𑀼, 𑀢𑀢𑁄 𑀅𑀮𑀗𑁆𑀓𑀢𑀇𑀢𑁆𑀣𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀸𑀳𑀺 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑁆𑀯𑀸 𑀉𑀢𑁆𑀢𑀭𑀲𑀸𑀔𑀁 𑀙𑀺𑀦𑁆𑀤𑀺𑀁𑀲𑀼, 𑀢𑀢𑁄 𑀲𑀢𑁆𑀢 𑀭𑀢𑀦𑀸𑀦𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀥𑀦𑀁 𑀕𑁄𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀤𑀸𑀦𑁂 𑀅𑀫𑁆𑀳𑀸𑀓𑀁 𑀥𑀦𑀤𑀸𑀬𑀺𑀓𑀸𑀬 𑀭𑀼𑀓𑁆𑀔𑀤𑁂𑀯𑀢𑀸𑀬 𑀧𑀢𑁆𑀢𑀺𑀁 𑀤𑁂𑀫𑀸’’𑀢𑀺 𑀧𑀢𑁆𑀢𑀺𑀁 𑀅𑀤𑀁𑀲𑀼. 𑀲𑀢𑁆𑀣𑀸 𑀦𑀺𑀝𑁆𑀞𑀺𑀢𑀪𑀢𑁆𑀢𑀓𑀺𑀘𑁆𑀘𑁄 ‘‘𑀓𑀢𑀭𑀭𑀼𑀓𑁆𑀔𑀤𑁂𑀯𑀢𑀸𑀬 𑀧𑀢𑁆𑀢𑀺𑀁 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. 𑀯𑀸𑀡𑀺𑀚𑀸 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀥𑀦𑀲𑁆𑀲 𑀮𑀤𑁆𑀥𑀸𑀓𑀸𑀭𑀁 𑀢𑀣𑀸𑀕𑀢𑀲𑁆𑀲𑀸𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑀼𑀫𑁆𑀳𑁂 𑀢𑀸𑀯 𑀫𑀢𑁆𑀢𑀜𑁆𑀜𑀼𑀢𑀸𑀬 𑀢𑀡𑁆𑀳𑀸𑀯𑀲𑀺𑀓𑀸 𑀅𑀳𑀼𑀢𑁆𑀯𑀸 𑀥𑀦𑀁 𑀮𑀪𑀺𑀢𑁆𑀣, 𑀧𑀼𑀩𑁆𑀩𑁂 𑀧𑀦 𑀅𑀫𑀢𑁆𑀢𑀜𑁆𑀜𑀼𑀢𑀸𑀬 𑀢𑀡𑁆𑀳𑀸𑀯𑀲𑀺𑀓𑀸 𑀥𑀦𑀜𑁆𑀘 𑀚𑀻𑀯𑀺𑀢𑀜𑁆𑀘 𑀯𑀺𑀚𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀦𑀕𑀭𑁂 𑀢𑀤𑁂𑀯 𑀧𑀦 𑀓𑀦𑁆𑀢𑀸𑀭𑀁 𑀲𑁆𑀯𑁂𑀯 𑀦𑀺𑀕𑁆𑀭𑁄𑀥𑁄. 𑀯𑀸𑀡𑀺𑀚𑀸 𑀫𑀕𑁆𑀕𑀫𑀽𑀴𑁆𑀳𑀸 𑀳𑀼𑀢𑁆𑀯𑀸 𑀢𑀫𑁂𑀯 𑀦𑀺𑀕𑁆𑀭𑁄𑀥𑀁 𑀧𑀲𑁆𑀲𑀺𑀁𑀲𑀼. 𑀢𑀫𑀢𑁆𑀣𑀁 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀓𑀣𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁧𑁮𑁦.

‘‘𑀯𑀸𑀡𑀺𑀚𑀸 𑀲𑀫𑀺𑀢𑀺𑀁 𑀓𑀢𑁆𑀯𑀸, 𑀦𑀸𑀦𑀸𑀭𑀝𑁆𑀞𑀢𑁄 𑀆𑀕𑀢𑀸;

𑀥𑀦𑀸𑀳𑀭𑀸 𑀧𑀓𑁆𑀓𑀫𑀺𑀁𑀲𑀼, 𑀏𑀓𑀁 𑀓𑀢𑁆𑀯𑀸𑀦 𑀕𑀸𑀫𑀡𑀺𑀁.

𑁧𑁮𑁧.

‘‘𑀢𑁂 𑀢𑀁 𑀓𑀦𑁆𑀢𑀸𑀭𑀫𑀸𑀕𑀫𑁆𑀫, 𑀅𑀧𑁆𑀧𑀪𑀓𑁆𑀔𑀁 𑀅𑀦𑁄𑀤𑀓𑀁;

𑀫𑀳𑀸𑀦𑀺𑀕𑁆𑀭𑁄𑀥𑀫𑀤𑁆𑀤𑀓𑁆𑀔𑀼𑀁, 𑀲𑀻𑀢𑀘𑁆𑀙𑀸𑀬𑀁 𑀫𑀦𑁄𑀭𑀫𑀁.

𑁧𑁮𑁨.

‘‘𑀢𑁂 ¶ 𑀘 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀬𑀸;

𑀯𑀸𑀡𑀺𑀚𑀸 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸.

𑁧𑁮𑁩.

‘‘𑀅𑀮𑁆𑀮𑀸𑀬𑀢𑁂 𑀅𑀬𑀁 𑀭𑀼𑀓𑁆𑀔𑁄, 𑀅𑀧𑀺 𑀯𑀸𑀭𑀻𑀯 𑀲𑀦𑁆𑀤𑀢𑀺;

𑀇𑀗𑁆𑀖𑀲𑁆𑀲 𑀧𑀼𑀭𑀺𑀫𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁮𑁪.

‘‘𑀲𑀸 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀅𑀘𑁆𑀙𑀁 𑀯𑀸𑀭𑀺𑀁 𑀅𑀦𑀸𑀯𑀺𑀮𑀁;

𑀢𑁂 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸, 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸.

𑁧𑁮𑁫.

‘‘𑀤𑀼𑀢𑀺𑀬𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁮𑁬.

‘‘𑀲𑀸 ¶ 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀲𑀸𑀮𑀺𑀫𑀁𑀲𑁄𑀤𑀦𑀁 𑀩𑀳𑀼𑀁;

𑀅𑀧𑁆𑀧𑁄𑀤𑀯𑀡𑁆𑀡𑁂 𑀓𑀼𑀫𑁆𑀫𑀸𑀲𑁂, 𑀲𑀺𑀗𑁆𑀕𑀺𑀁 𑀯𑀺𑀤𑀮𑀲𑀽𑀧𑀺𑀬𑁄.

𑁧𑁮𑁭.

‘‘𑀢𑁂 𑀢𑀢𑁆𑀣 𑀪𑀼𑀢𑁆𑀯𑀸 𑀔𑀸𑀤𑀺𑀢𑁆𑀯𑀸, 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸;

𑀢𑀢𑀺𑀬𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀧𑀘𑁆𑀙𑀺𑀫𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁮𑁮.

‘‘𑀲𑀸 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀘𑀺𑀢𑁆𑀭𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸.

𑁧𑁮𑁯.

‘‘𑀅𑀧𑀺 𑀲𑀼 𑀯𑀸𑀡𑀺𑀚𑀸 𑀏𑀓𑀸, 𑀦𑀸𑀭𑀺𑀬𑁄 𑀧𑀡𑁆𑀡𑀯𑀻𑀲𑀢𑀺;

𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀁𑀲𑀼, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀬𑀸;

𑀢𑁂 𑀢𑀸𑀳𑀺 𑀧𑀭𑀺𑀘𑀸𑀭𑁂𑀢𑁆𑀯𑀸, 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸.

𑁧𑁯𑁦.

‘‘𑀘𑀢𑀼𑀢𑁆𑀣𑀁 ¶ 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀉𑀢𑁆𑀢𑀭𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁯𑁧.

‘‘𑀲𑀸 ¶ 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀓𑀼𑀢𑁆𑀢𑀺𑀬𑁄 𑀧𑀝𑀺𑀬𑀸𑀦𑀺 𑀘.

𑁧𑁯𑁨.

‘‘𑀓𑀸𑀲𑀺𑀓𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀉𑀤𑁆𑀤𑀺𑀬𑀸𑀦𑀺 𑀘 𑀓𑀫𑁆𑀩𑀮𑀸;

𑀢𑁂 𑀢𑀢𑁆𑀣 𑀪𑀸𑀭𑁂 𑀩𑀦𑁆𑀥𑀺𑀢𑁆𑀯𑀸, 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸.

𑁧𑁯𑁩.

‘‘𑀧𑀜𑁆𑀘𑀫𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀫𑀽𑀮𑀁 𑀙𑀺𑀦𑁆𑀤𑀸𑀫, 𑀅𑀧𑀺 𑀪𑀺𑀬𑁆𑀬𑁄 𑀮𑀪𑀸𑀫𑀲𑁂.

𑁧𑁯𑁪.

‘‘𑀅𑀣𑀼𑀝𑁆𑀞𑀳𑀺 𑀲𑀢𑁆𑀣𑀯𑀸𑀳𑁄, 𑀬𑀸𑀘𑀫𑀸𑀦𑁄 𑀓𑀢𑀜𑁆𑀚𑀮𑀻;

𑀦𑀺𑀕𑁆𑀭𑁄𑀥𑁄 𑀓𑀺𑀁 𑀧𑀭𑀚𑁆𑀛𑀢𑀺, 𑀯𑀸𑀡𑀺𑀚𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

𑁧𑁯𑁫.

‘‘𑀯𑀸𑀭𑀺𑀤𑀸 𑀧𑀼𑀭𑀺𑀫𑀸 𑀲𑀸𑀔𑀸, 𑀅𑀦𑁆𑀦𑀧𑀸𑀦𑀜𑁆𑀘 𑀤𑀓𑁆𑀔𑀺𑀡𑀸;

𑀦𑀸𑀭𑀺𑀤𑀸 𑀧𑀘𑁆𑀙𑀺𑀫𑀸 𑀲𑀸𑀔𑀸, 𑀲𑀩𑁆𑀩𑀓𑀸𑀫𑁂 𑀘 𑀉𑀢𑁆𑀢𑀭𑀸;

𑀦𑀺𑀕𑁆𑀭𑁄𑀥𑁄 𑀓𑀺𑀁 𑀧𑀭𑀚𑁆𑀛𑀢𑀺, 𑀯𑀸𑀡𑀺𑀚𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

𑁧𑁯𑁬.

‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄.

𑁧𑁯𑁭.

‘‘𑀢𑁂 𑀘 𑀢𑀲𑁆𑀲𑀸𑀦𑀸𑀤𑀺𑀬𑀺𑀢𑁆𑀯𑀸, 𑀏𑀓𑀲𑁆𑀲 𑀯𑀘𑀦𑀁 𑀩𑀳𑀽;

𑀦𑀺𑀲𑀺𑀢𑀸𑀳𑀺 𑀓𑀼𑀞𑀸𑀭𑀻𑀳𑀺, 𑀫𑀽𑀮𑀢𑁄 𑀦𑀁 𑀉𑀧𑀓𑁆𑀓𑀫𑀼’’𑀦𑁆𑀢𑀺.

𑀢𑀢𑁆𑀣 𑀲𑀫𑀺𑀢𑀺𑀁 𑀓𑀢𑁆𑀯𑀸𑀢𑀺 𑀩𑀸𑀭𑀸𑀡𑀲𑀺𑀬𑀁 𑀲𑀫𑀸𑀕𑀫𑀁 𑀓𑀢𑁆𑀯𑀸, 𑀩𑀳𑀽 𑀏𑀓𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀓𑀫𑀺𑀁𑀲𑀽𑀢𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀪𑀡𑁆𑀟𑀁 𑀆𑀤𑀸𑀬 𑀧𑀓𑁆𑀓𑀫𑀺𑀁𑀲𑀼. 𑀕𑀸𑀫𑀡𑀺𑀦𑁆𑀢𑀺 𑀏𑀓𑀁 𑀧𑀜𑁆𑀜𑀯𑀦𑁆𑀢𑀢𑀭𑀁 𑀲𑀢𑁆𑀣𑀯𑀸𑀳𑀁 𑀓𑀢𑁆𑀯𑀸 ¶ . 𑀙𑀸𑀬𑀬𑀸𑀢𑀺 𑀙𑀸𑀬𑀸𑀬. 𑀅𑀮𑁆𑀮𑀸𑀬𑀢𑁂𑀢𑀺 𑀉𑀤𑀓𑀪𑀭𑀺𑀢𑁄 𑀯𑀺𑀬 𑀅𑀮𑁆𑀮𑁄 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺. 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀻𑀢𑀺 𑀏𑀓𑁄 𑀭𑀼𑀓𑁆𑀔𑀸𑀭𑁄𑀳𑀦𑀓𑀼𑀲𑀮𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀁 𑀙𑀺𑀦𑁆𑀤𑀺, 𑀲𑀸 𑀙𑀺𑀦𑁆𑀦𑀫𑀢𑁆𑀢𑀸𑀯 𑀧𑀕𑁆𑀖𑀭𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑁆𑀧𑁄𑀤𑀯𑀡𑁆𑀡𑁂 ¶ 𑀓𑀼𑀫𑁆𑀫𑀸𑀲𑁂𑀢𑀺 𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀲𑀤𑀺𑀲𑁂 𑀓𑀼𑀫𑁆𑀫𑀸𑀲𑁂. 𑀲𑀺𑀗𑁆𑀕𑀺𑀦𑁆𑀢𑀺 𑀲𑀺𑀗𑁆𑀕𑀺𑀯𑁂𑀭𑀸𑀤𑀺𑀓𑀁 𑀉𑀢𑁆𑀢𑀭𑀺𑀪𑀗𑁆𑀕𑀁. 𑀯𑀺𑀤𑀮𑀲𑀽𑀧𑀺𑀬𑁄𑀢𑀺 𑀫𑀼𑀕𑁆𑀕𑀲𑀽𑀧𑀸𑀤𑀬𑁄. 𑀯𑀸𑀡𑀺𑀚𑀸 𑀏𑀓𑀸𑀢𑀺 𑀏𑀓𑁂𑀓𑀲𑁆𑀲 𑀯𑀸𑀡𑀺𑀚𑀲𑁆𑀲 𑀬𑀢𑁆𑀢𑀓𑀸 𑀯𑀸𑀡𑀺𑀚𑀸 ¶ , 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀏𑀓𑁂𑀓𑀸𑀯, 𑀲𑀢𑁆𑀣𑀯𑀸𑀳𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀧𑀜𑁆𑀘𑀯𑀻𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀸𑀭𑀺𑀁𑀲𑀽𑀢𑀺 𑀧𑀭𑀺𑀯𑀸𑀭𑁂𑀲𑀼𑀁. 𑀢𑀸𑀳𑀺 𑀧𑀦 𑀲𑀤𑁆𑀥𑀺𑀁𑀬𑁂𑀯 𑀦𑀸𑀕𑀸𑀦𑀼𑀪𑀸𑀯𑁂𑀦 𑀲𑀸𑀡𑀺𑀯𑀺𑀢𑀸𑀦𑀲𑀬𑀦𑀸𑀤𑀻𑀦𑀺 𑀧𑀕𑁆𑀖𑀭𑀺𑀁𑀲𑀼.

𑀓𑀼𑀢𑁆𑀢𑀺𑀬𑁄𑀢𑀺 𑀳𑀢𑁆𑀣𑀢𑁆𑀣𑀭𑀸𑀤𑀬𑁄. 𑀧𑀝𑀺𑀬𑀸𑀦𑀺𑀘𑀸𑀢𑀺 𑀉𑀡𑁆𑀡𑀸𑀫𑀬𑀧𑀘𑁆𑀘𑀢𑁆𑀣𑀭𑀡𑀸𑀦𑀺. ‘‘𑀲𑁂𑀢𑀓𑀫𑁆𑀩𑀮𑀸𑀦𑀻’’𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀉𑀤𑁆𑀤𑀺𑀬𑀸𑀦𑀺 𑀘 𑀓𑀫𑁆𑀩𑀮𑀸𑀢𑀺 𑀉𑀤𑁆𑀤𑀺𑀬𑀸𑀦𑀺 𑀦𑀸𑀫 𑀓𑀫𑁆𑀩𑀮𑀸 𑀅𑀢𑁆𑀣𑀺. 𑀢𑁂 𑀢𑀢𑁆𑀣 𑀪𑀸𑀭𑁂 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀸𑀯𑀢𑀓𑀁 𑀇𑀘𑁆𑀙𑀺𑀁𑀲𑀼, 𑀢𑀸𑀯𑀢𑀓𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀸𑀡𑀺𑀚𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂𑀢𑀺 𑀏𑀓𑁂𑀓𑀁 𑀯𑀸𑀡𑀺𑀚𑀁 𑀆𑀮𑀧𑀦𑁆𑀢𑁄 ‘‘𑀪𑀤𑁆𑀤𑀁 𑀢𑁂 𑀅𑀢𑁆𑀣𑀽’’𑀢𑀺 𑀆𑀳. 𑀅𑀦𑁆𑀦𑀧𑀸𑀦𑀜𑁆𑀘𑀸𑀢𑀺 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀅𑀤𑀸𑀲𑀺. 𑀲𑀩𑁆𑀩𑀓𑀸𑀫𑁂 𑀘𑀸𑀢𑀺 𑀲𑀩𑁆𑀩𑀓𑀸𑀫𑁂 𑀘 𑀅𑀤𑀸𑀲𑀺. 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀻𑀢𑀺 𑀫𑀺𑀢𑁆𑀢𑀸𑀦𑀁 𑀤𑀼𑀩𑁆𑀪𑀦𑀧𑀼𑀭𑀺𑀲𑁄 𑀳𑀺 𑀧𑀸𑀧𑀓𑁄 𑀮𑀸𑀫𑀓𑁄 𑀦𑀸𑀫. 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀉𑀧𑀓𑁆𑀓𑀫𑀼𑀦𑁆𑀢𑀺 𑀫𑁄𑀳𑀸𑀯 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺𑀁𑀲𑀼.

𑀅𑀣 𑀦𑁂 𑀙𑀺𑀦𑁆𑀤𑀦𑀢𑁆𑀣𑀸𑀬 𑀭𑀼𑀓𑁆𑀔𑀁 𑀉𑀧𑀕𑀢𑁂 𑀤𑀺𑀲𑁆𑀯𑀸 𑀦𑀸𑀕𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀏𑀢𑁂𑀲𑀁 𑀧𑀺𑀧𑀸𑀲𑀺𑀢𑀸𑀦𑀁 𑀧𑀸𑀦𑀻𑀬𑀁 𑀤𑀸𑀧𑁂𑀲𑀺𑀁, 𑀢𑀢𑁄 𑀤𑀺𑀩𑁆𑀩𑀪𑁄𑀚𑀦𑀁, 𑀢𑀢𑁄 𑀲𑀬𑀦𑀸𑀤𑀻𑀦𑀺 𑀘𑁂𑀯 𑀧𑀭𑀺𑀘𑀸𑀭𑀺𑀓𑀸 𑀘 𑀦𑀸𑀭𑀺𑀬𑁄, 𑀢𑀢𑁄 𑀧𑀜𑁆𑀘𑀲𑀢𑀲𑀓𑀝𑀧𑀽𑀭𑀁 𑀭𑀢𑀦𑀁, 𑀇𑀤𑀸𑀦𑀺 𑀧𑀦𑀺𑀫𑁂 ‘‘𑀭𑀼𑀓𑁆𑀔𑀁 𑀫𑀽𑀮𑀢𑁄 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’𑀢𑀺 𑀯𑀤𑀦𑁆𑀢𑀺, 𑀅𑀢𑀺𑀯𑀺𑀬 𑀮𑀼𑀤𑁆𑀥𑀸 𑀇𑀫𑁂, 𑀞𑀧𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀁 𑀅𑀯𑀲𑁂𑀲𑁂 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 ‘‘𑀏𑀢𑁆𑀢𑀓𑀸 𑀲𑀦𑁆𑀦𑀤𑁆𑀥𑀬𑁄𑀥𑀸 𑀦𑀺𑀓𑁆𑀔𑀫𑀦𑁆𑀢𑀼, 𑀏𑀢𑁆𑀢𑀓𑀸 𑀥𑀦𑀼𑀕𑁆𑀕𑀳𑀸, 𑀏𑀢𑁆𑀢𑀓𑀸 𑀯𑀫𑁆𑀫𑀺𑀦𑁄’’𑀢𑀺 𑀲𑁂𑀦𑀁 𑀯𑀺𑀘𑀸𑀭𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀕𑀸𑀣𑀫𑀸𑀳 𑁋

𑁧𑁯𑁮.

‘‘𑀢𑀢𑁄 𑀦𑀸𑀕𑀸 𑀦𑀺𑀓𑁆𑀔𑀫𑀺𑀁𑀲𑀼, 𑀲𑀦𑁆𑀦𑀤𑁆𑀥𑀸 𑀧𑀡𑁆𑀡𑀯𑀻𑀲𑀢𑀺;

𑀥𑀦𑀼𑀕𑁆𑀕𑀳𑀸𑀦𑀁 𑀢𑀺𑀲𑀢𑀸, 𑀙𑀲𑀳𑀲𑁆𑀲𑀸 𑀘 𑀯𑀫𑁆𑀫𑀺𑀦𑁄’’𑀢𑀺.

𑀢𑀢𑁆𑀣 𑀲𑀦𑁆𑀦𑀤𑁆𑀥𑀸𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀫𑁆𑀫𑀓𑀯𑀘𑀺𑀓𑀸. 𑀥𑀦𑀼𑀕𑁆𑀕𑀳𑀸𑀦𑀁 𑀢𑀺𑀲𑀢𑀸𑀢𑀺 𑀫𑁂𑀡𑁆𑀟𑀯𑀺𑀲𑀸𑀡𑀥𑀦𑀼𑀕𑁆𑀕𑀳𑀸𑀦𑀁 𑀢𑀻𑀡𑀺 𑀲𑀢𑀸𑀦𑀺. 𑀯𑀫𑁆𑀫𑀺𑀦𑁄𑀢𑀺 𑀔𑁂𑀝𑀓𑀨𑀮𑀓𑀳𑀢𑁆𑀣𑀸 𑀙𑀲𑀳𑀲𑁆𑀲𑀸.

𑁧𑁯𑁯.

‘‘𑀏𑀢𑁂 ¶ ¶ 𑀳𑀦𑀣 𑀩𑀦𑁆𑀥𑀣, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀚𑀻𑀯𑀺𑀢𑀁;

𑀞𑀧𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀁𑀯, 𑀲𑀩𑁆𑀩𑁂 𑀪𑀲𑁆𑀫𑀁 𑀓𑀭𑁄𑀣 𑀦𑁂’’𑀢𑀺. 𑁋 𑀅𑀬𑀁 𑀦𑀸𑀕𑀭𑀸𑀚𑁂𑀦 𑀯𑀼𑀢𑁆𑀢𑀕𑀸𑀣𑀸;

𑀢𑀢𑁆𑀣 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀚𑀻𑀯𑀺𑀢𑀦𑁆𑀢𑀺 𑀓𑀲𑁆𑀲𑀘𑀺 𑀏𑀓𑀲𑁆𑀲𑀧𑀺 𑀚𑀻𑀯𑀺𑀢𑀁 𑀫𑀸 𑀫𑀼𑀜𑁆𑀘𑀺𑀢𑁆𑀣.

𑀦𑀸𑀕𑀸 ¶ 𑀢𑀣𑀸 𑀓𑀢𑁆𑀯𑀸 𑀅𑀢𑁆𑀣𑀭𑀡𑀸𑀤𑀻𑀦𑀺 𑀧𑀜𑁆𑀘𑀲𑀼 𑀲𑀓𑀝𑀲𑀢𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀁 𑀕𑀳𑁂𑀢𑁆𑀯𑀸 𑀲𑀬𑀁 𑀢𑀸𑀦𑀺 𑀲𑀓𑀝𑀸𑀦𑀺 𑀧𑀸𑀚𑁂𑀦𑁆𑀢𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀥𑀦𑀁 𑀢𑀲𑁆𑀲 𑀕𑁂𑀳𑁂 𑀧𑀝𑀺𑀲𑀸𑀫𑁂𑀢𑁆𑀯𑀸 𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀫𑁂𑀯 𑀕𑀢𑀸. 𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 𑀑𑀯𑀸𑀤𑀯𑀲𑁂𑀦 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁨𑁦𑁦.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀮𑁄𑀪𑀲𑁆𑀲 𑀦 𑀯𑀲𑀁 𑀕𑀘𑁆𑀙𑁂, 𑀳𑀦𑁂𑀬𑁆𑀬𑀸𑀭𑀺𑀲𑀓𑀁 𑀫𑀦𑀁.

𑁨𑁦𑁧.

‘‘𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀮𑁄𑀪𑀯𑀲𑀺𑀓𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸, 𑀲𑀢𑁆𑀣𑀯𑀸𑀳𑁄 𑀉𑀢𑁆𑀢𑀫𑀲𑀫𑁆𑀧𑀢𑁆𑀢𑀺𑀁, 𑀢𑀲𑁆𑀫𑀸. 𑀳𑀦𑁂𑀬𑁆𑀬𑀸𑀭𑀺𑀲𑀓𑀁 𑀫𑀦𑀦𑁆𑀢𑀺 𑀅𑀦𑁆𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀦𑀸𑀦𑀸𑀯𑀺𑀥𑀸𑀦𑀁 𑀮𑁄𑀪𑀲𑀢𑁆𑀢𑀽𑀦𑀁 𑀲𑀦𑁆𑀢𑀓𑀁 𑀫𑀦𑀁, 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁 𑀳𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀫𑀸𑀤𑀻𑀦𑀯𑀦𑁆𑀢𑀺 𑀏𑀯𑀁 𑀮𑁄𑀪𑁂 𑀆𑀤𑀻𑀦𑀯𑀁 𑀚𑀸𑀦𑀺𑀢𑁆𑀯𑀸. 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀦𑁆𑀢𑀺 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀲𑁆𑀲 𑀢𑀡𑁆𑀳𑀸 𑀲𑀫𑁆𑀪𑀯𑁄, 𑀢𑀢𑁄 𑀏𑀢𑀁 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀯𑀁 𑀢𑀡𑁆𑀳𑀸𑀯 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁 𑀜𑀢𑁆𑀯𑀸 𑀯𑀻𑀢𑀢𑀡𑁆𑀳𑁄 𑀢𑀡𑁆𑀳𑀸𑀆𑀤𑀸𑀦𑁂𑀦 𑀅𑀦𑀸𑀤𑀸𑀦𑁄 𑀫𑀕𑁆𑀕𑁂𑀦 𑀆𑀕𑀢𑀸𑀬 𑀲𑀢𑀺𑀬𑀸 𑀲𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂 𑀇𑀭𑀺𑀬𑁂𑀣 𑀯𑀢𑁆𑀢𑁂𑀣𑀸𑀢𑀺 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺.

𑀇𑀫𑀜𑁆𑀘 𑀧𑀦 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀉𑀧𑀸𑀲𑀓𑀸 𑀧𑀼𑀩𑁆𑀩𑁂 𑀮𑁄𑀪𑀯𑀲𑀺𑀓𑀸 𑀯𑀸𑀡𑀺𑀚𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑀸, 𑀢𑀲𑁆𑀫𑀸 𑀮𑁄𑀪𑀯𑀲𑀺𑀓𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑁂 𑀯𑀸𑀡𑀺𑀚𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸. 𑀢𑀤𑀸 𑀦𑀸𑀕𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀢𑁆𑀣𑀯𑀸𑀳𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀫𑀳𑀸𑀯𑀸𑀡𑀺𑀚𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

[𑁪𑁯𑁪] 𑁧𑁧. 𑀲𑀸𑀥𑀺𑀦𑀚𑀸𑀢𑀓𑀯𑀡𑁆𑀡𑀦𑀸

𑀅𑀩𑁆𑀪𑀼𑀢𑁄 ¶ ¶ 𑀯𑀢 𑀮𑁄𑀓𑀲𑁆𑀫𑀺𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁄𑀲𑀣𑀺𑀓𑁂 𑀉𑀧𑀸𑀲𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀉𑀧𑀸𑀲𑀓𑀸 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀫𑀦𑀼𑀲𑁆𑀲𑀲𑀭𑀻𑀭𑁂𑀦𑁂𑀯 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀘𑀺𑀭𑀁 𑀯𑀲𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀫𑀺𑀣𑀺𑀮𑀸𑀬𑀁 𑀲𑀸𑀥𑀺𑀦𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀘𑀸𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀉𑀦𑁆𑀦𑀗𑁆𑀕𑀮𑀁 𑀓𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀤𑁂𑀯𑀲𑀺𑀓𑀁 𑀙 𑀲𑀢𑀲𑀳𑀲𑁆𑀲𑀸𑀦𑀺 𑀯𑀬𑀓𑀭𑀡𑀁 𑀕𑀘𑁆𑀙𑀦𑁆𑀢𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀁 𑀉𑀧𑀯𑀲𑀢𑀺. 𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀫𑀢𑀫𑀢𑀸 𑀤𑁂𑀯𑀦𑀕𑀭𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀼𑀥𑀫𑁆𑀫𑀤𑁂𑀯𑀲𑀪𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀤𑁂𑀯𑀸 𑀭𑀜𑁆𑀜𑁄 𑀲𑀻𑀮𑀸𑀤𑀺𑀕𑀼𑀡𑀫𑁂𑀯 𑀯𑀡𑁆𑀡𑀬𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀲𑀤𑁂𑀯𑀸𑀧𑀺 𑀭𑀸𑀚𑀸𑀦𑀁 𑀤𑀝𑁆𑀞𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑁂𑀲𑀁 𑀫𑀦𑀁 𑀯𑀺𑀤𑀺𑀢𑁆𑀯𑀸 𑀆𑀳 𑁋 ‘‘𑀲𑀸𑀥𑀺𑀦𑀭𑀸𑀚𑀸𑀦𑀁 𑀤𑀝𑁆𑀞𑀼𑀓𑀸𑀫𑀢𑁆𑀣𑀸’’𑀢𑀺. ‘‘𑀆𑀫 𑀤𑁂𑀯𑀸’’𑀢𑀺. 𑀲𑁄 𑀫𑀸𑀢𑀮𑀺𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙 𑀢𑁆𑀯𑀁 𑀯𑁂𑀚𑀬𑀦𑁆𑀢𑀭𑀣𑀁 𑀬𑁄𑀚𑁂𑀢𑁆𑀯𑀸 𑀲𑀸𑀥𑀺𑀦𑀭𑀸𑀚𑀸𑀦𑀁 𑀆𑀦𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀣𑀁 𑀬𑁄𑀚𑁂𑀢𑁆𑀯𑀸 𑀯𑀺𑀤𑁂𑀳𑀭𑀝𑁆𑀞𑀁 𑀅𑀕𑀫𑀸𑀲𑀺, 𑀢𑀤𑀸 𑀧𑀼𑀡𑁆𑀡𑀫𑀤𑀺𑀯𑀲𑁄 𑀳𑁄𑀢𑀺. 𑀫𑀸𑀢𑀮𑀺 𑀫𑀦𑀼𑀲𑁆𑀲𑀸𑀦𑀁 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀖𑀭𑀤𑁆𑀯𑀸𑀭𑁂𑀲𑀼 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑀓𑀸𑀮𑁂 𑀘𑀦𑁆𑀤𑀫𑀡𑁆𑀟𑀮𑁂𑀦 𑀲𑀤𑁆𑀥𑀺𑀁 𑀭𑀣𑀁 𑀧𑁂𑀲𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀤𑁆𑀯𑁂 𑀘𑀦𑁆𑀤𑀸 𑀉𑀝𑁆𑀞𑀺𑀢𑀸’’𑀢𑀺 𑀯𑀤𑀦𑁆𑀢𑀸 𑀧𑀼𑀦 𑀘𑀦𑁆𑀤𑀫𑀡𑁆𑀟𑀮𑀁 𑀑𑀳𑀸𑀬 𑀭𑀣𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀘𑀦𑁆𑀤𑁄, 𑀭𑀣𑁄 𑀏𑀲𑁄, 𑀤𑁂𑀯𑀧𑀼𑀢𑁆𑀢𑁄 𑀧𑀜𑁆𑀜𑀸𑀬𑀢𑀺, 𑀓𑀲𑁆𑀲𑁂𑀲 𑀏𑀢𑀁 𑀫𑀦𑁄𑀫𑀬𑀲𑀺𑀦𑁆𑀥𑀯𑀬𑀼𑀢𑁆𑀢𑀁 𑀤𑀺𑀩𑁆𑀩𑀭𑀣𑀁 𑀆𑀦𑁂𑀢𑀺, 𑀦 𑀅𑀜𑁆𑀜𑀲𑁆𑀲, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀪𑀯𑀺𑀲𑁆𑀲𑀢𑀺, 𑀭𑀸𑀚𑀸 𑀳𑀺 𑀦𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁨𑁦𑁨.

‘‘𑀅𑀩𑁆𑀪𑀼𑀢𑁄 𑀯𑀢 𑀮𑁄𑀓𑀲𑁆𑀫𑀺𑀁, 𑀉𑀧𑁆𑀧𑀚𑁆𑀚𑀺 𑀮𑁄𑀫𑀳𑀁𑀲𑀦𑁄;

𑀤𑀺𑀩𑁆𑀩𑁄 𑀭𑀣𑁄 𑀧𑀸𑀢𑀼𑀭𑀳𑀼, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄’’𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀅𑀩𑁆𑀪𑀼𑀢𑁄 𑀯𑀢𑁂𑀲 𑀅𑀫𑁆𑀳𑀸𑀓𑀁 𑀭𑀸𑀚𑀸, 𑀮𑁄𑀓𑀲𑁆𑀫𑀺𑀁 𑀮𑁄𑀫𑀳𑀁𑀲𑀦𑁄 𑀉𑀧𑁆𑀧𑀚𑁆𑀚𑀺, 𑀬𑀲𑁆𑀲 𑀤𑀺𑀩𑁆𑀩𑁄 𑀭𑀣𑁄 𑀧𑀸𑀢𑀼𑀭𑀳𑁄𑀲𑀺 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄𑀢𑀺.

𑀫𑀸𑀢𑀮𑀺𑀧𑀺 ¶ 𑀢𑀁 𑀭𑀣𑀁 𑀆𑀦𑁂𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑁂𑀲𑀼 𑀢𑀺𑀓𑁆𑀔𑀢𑁆𑀢𑀼𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀘𑁆𑀙𑀸𑀪𑀸𑀕𑁂𑀦 𑀲𑀻𑀳𑀧𑀜𑁆𑀚𑀭𑀉𑀫𑁆𑀫𑀸𑀭𑁂 𑀞𑀧𑁂𑀢𑁆𑀯𑀸 𑀆𑀭𑁄𑀳𑀡𑀲𑀚𑁆𑀚𑀁 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀯𑀲𑀁 𑀭𑀸𑀚𑀸𑀧𑀺 𑀤𑀸𑀦𑀲𑀸𑀮𑀸𑀬𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀤𑀸𑀦𑀁 𑀤𑁂𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀅𑀮𑀗𑁆𑀓𑀢𑀫𑀳𑀸𑀢𑀮𑁂 𑀧𑀸𑀘𑀻𑀦𑀲𑀻𑀳𑀧𑀜𑁆𑀚𑀭𑀸𑀪𑀺𑀫𑀼𑀔𑁄 𑀥𑀫𑁆𑀫𑀬𑀼𑀢𑁆𑀢𑀁 𑀓𑀣𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀦𑀁 𑀫𑀸𑀢𑀮𑀺 𑀭𑀣𑀸𑀪𑀺𑀭𑀼𑀳𑀦𑀢𑁆𑀣𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀆𑀤𑀸𑀬 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁦𑁩.

‘‘𑀤𑁂𑀯𑀧𑀼𑀢𑁆𑀢𑁄 ¶ 𑀫𑀳𑀺𑀤𑁆𑀥𑀺𑀓𑁄, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀦𑀺𑀫𑀦𑁆𑀢𑀬𑀺𑀢𑁆𑀣 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁.

𑁨𑁦𑁪.

‘‘𑀏𑀳𑀺𑀫𑀁 𑀭𑀣𑀫𑀸𑀭𑀼𑀬𑁆𑀳, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀤𑁂𑀯𑀸 𑀤𑀲𑁆𑀲𑀦𑀓𑀸𑀫𑀸 𑀢𑁂, 𑀢𑀸𑀯𑀢𑀺𑀁𑀲𑀸 𑀲𑀇𑀦𑁆𑀤𑀓𑀸;

𑀲𑀭𑀫𑀸𑀦𑀸 𑀳𑀺 𑀢𑁂 𑀤𑁂𑀯𑀸, 𑀲𑀼𑀥𑀫𑁆𑀫𑀸𑀬𑀁 𑀲𑀫𑀘𑁆𑀙𑀭𑁂.

𑁨𑁦𑁫.

‘‘𑀢𑀢𑁄 𑀘 𑀭𑀸𑀚𑀸 𑀲𑀸𑀥𑀺𑀦𑁄, 𑀯𑁂𑀤𑁂𑀳𑁄 𑀫𑀺𑀣𑀺𑀮𑀕𑁆𑀕𑀳𑁄;

𑀲𑀳𑀲𑁆𑀲𑀬𑀼𑀢𑁆𑀢𑀫𑀸𑀭𑀼𑀬𑁆𑀳, 𑀅𑀕𑀸 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂;

𑀢𑀁 𑀤𑁂𑀯𑀸 𑀧𑀝𑀺𑀦𑀦𑁆𑀤𑀺𑀁𑀲𑀼, 𑀤𑀺𑀲𑁆𑀯𑀸 𑀭𑀸𑀚𑀸𑀦𑀫𑀸𑀕𑀢𑀁.

𑁨𑁦𑁬.

‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀦𑀺𑀲𑀻𑀤 𑀤𑀸𑀦𑀺 𑀭𑀸𑀚𑀻𑀲𑀺, 𑀤𑁂𑀯𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂.

𑁨𑁦𑁭.

‘‘𑀲𑀓𑁆𑀓𑁄𑀧𑀺 𑀧𑀝𑀺𑀦𑀦𑁆𑀤𑀺𑀢𑁆𑀣, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁;

𑀦𑀺𑀫𑀦𑁆𑀢𑀬𑀺𑀢𑁆𑀣 𑀓𑀸𑀫𑁂𑀳𑀺, 𑀆𑀲𑀦𑁂𑀦 𑀘 𑀯𑀸𑀲𑀯𑁄.

𑁨𑁦𑁮.

‘‘𑀲𑀸𑀥𑀼 𑀔𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀆𑀯𑀸𑀲𑀁 𑀯𑀲𑀯𑀢𑁆𑀢𑀺𑀦𑀁;

𑀯𑀲 𑀤𑁂𑀯𑁂𑀲𑀼 𑀭𑀸𑀚𑀻𑀲𑀺, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀪𑀼𑀜𑁆𑀚 𑀓𑀸𑀫𑁂 𑀅𑀫𑀸𑀦𑀼𑀲𑁂’’𑀢𑀺.

𑀢𑀢𑁆𑀣 𑀲𑀫𑀘𑁆𑀙𑀭𑁂𑀢𑀺 𑀅𑀘𑁆𑀙𑀦𑁆𑀢𑀺. 𑀅𑀕𑀸 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂𑀢𑀺 𑀤𑁂𑀯𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀞𑀺𑀢𑁂 𑀭𑀣𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺, 𑀲𑁄 𑀫𑀳𑀸𑀚𑀦𑀲𑁆𑀲 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀫𑀸𑀢𑀮𑀺 𑀭𑀸𑀚𑀸𑀦𑀁 𑀤𑁂𑀯𑀮𑁄𑀓𑀁 𑀦𑁂𑀲𑀺 ¶ . 𑀢𑀁 𑀤𑀺𑀲𑁆𑀯𑀸 𑀤𑁂𑀯𑀢𑀸 𑀘 𑀲𑀓𑁆𑀓𑁄 𑀘 𑀳𑀝𑁆𑀞𑀢𑀼𑀝𑁆𑀞𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ¶ 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀁𑀲𑀼. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀤𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀦𑀦𑁆𑀤𑀺𑀁𑀲𑀽𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀦𑁆𑀤𑀺𑀁𑀲𑀼. 𑀆𑀲𑀦𑁂𑀦 𑀘𑀸𑀢𑀺 𑀭𑀸𑀚𑀸𑀦𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 ‘‘𑀇𑀥 𑀦𑀺𑀲𑀻𑀤𑀸’’𑀢𑀺 𑀅𑀢𑁆𑀢𑀦𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑁂𑀦 𑀘 𑀓𑀸𑀫𑁂𑀳𑀺 𑀘 𑀦𑀺𑀫𑀦𑁆𑀢𑁂𑀲𑀺, 𑀉𑀧𑀟𑁆𑀠𑀭𑀚𑁆𑀚𑀁 𑀤𑀢𑁆𑀯𑀸 𑀏𑀓𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀲𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀤𑁂𑀯𑀦𑀕𑀭𑀁 𑀅𑀟𑁆𑀠𑀢𑀺𑀬𑀸 𑀘 𑀅𑀘𑁆𑀙𑀭𑀸𑀓𑁄𑀝𑀺𑀬𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀜𑁆𑀘 ¶ 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀢𑁂𑀦𑀢𑁆𑀢𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀯𑀲𑀦𑀓𑀁 𑀧𑀼𑀜𑁆𑀜𑀁 𑀔𑀻𑀡𑀁, 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀫𑀸 𑀲𑀓𑁆𑀓𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁨𑁦𑁯.

‘‘𑀅𑀳𑀁 𑀧𑀼𑀭𑁂 𑀲𑀕𑁆𑀕𑀕𑀢𑁄 𑀭𑀫𑀸𑀫𑀺, 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀘 𑀯𑀸𑀤𑀺𑀢𑁂𑀳𑀺;

𑀲𑁄 𑀤𑀸𑀦𑀺 𑀅𑀚𑁆𑀚 𑀦 𑀭𑀫𑀸𑀫𑀺 𑀲𑀕𑁆𑀕𑁂, 𑀆𑀬𑀼𑀁 𑀦𑀼 𑀔𑀻𑀡𑁄 𑀫𑀭𑀡𑀁 𑀦𑀼 𑀲𑀦𑁆𑀢𑀺𑀓𑁂;

𑀉𑀤𑀸𑀳𑀼 𑀫𑀽𑀴𑁆𑀳𑁄𑀲𑁆𑀫𑀺 𑀚𑀦𑀺𑀦𑁆𑀤𑀲𑁂𑀝𑁆𑀞𑀸’’𑀢𑀺.

𑀢𑀢𑁆𑀣 𑀆𑀬𑀼𑀁 𑀦𑀼 𑀔𑀻𑀡𑁄𑀢𑀺 𑀓𑀺𑀁 𑀦𑀼 𑀫𑀫 𑀲𑀭𑀲𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀔𑀻𑀡𑀁, 𑀉𑀤𑀸𑀳𑀼 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀯𑀲𑁂𑀦 𑀫𑀭𑀡𑀁 𑀲𑀦𑁆𑀢𑀺𑀓𑁂 𑀚𑀸𑀢𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀚𑀦𑀺𑀦𑁆𑀤𑀲𑁂𑀝𑁆𑀞𑀸𑀢𑀺 𑀚𑀦𑀺𑀦𑁆𑀤𑀸𑀦𑀁 𑀤𑁂𑀯𑀸𑀦𑀁 𑀲𑁂𑀝𑁆𑀞.

𑀅𑀣 𑀦𑀁 𑀲𑀓𑁆𑀓𑁄 𑀆𑀳 𑁋

𑁨𑁧𑁦.

‘‘𑀦 𑀢𑀸𑀬𑀼 𑀔𑀻𑀡𑀁 𑀫𑀭𑀡𑀜𑁆𑀘 𑀤𑀽𑀭𑁂, 𑀦 𑀘𑀸𑀧𑀺 𑀫𑀽𑀴𑁆𑀳𑁄 𑀦𑀭𑀯𑀻𑀭𑀲𑁂𑀝𑁆𑀞;

𑀢𑀼𑀬𑁆𑀳𑀜𑁆𑀘 𑀧𑀼𑀜𑁆𑀜𑀸𑀦𑀺 𑀧𑀭𑀺𑀢𑁆𑀢𑀓𑀸𑀦𑀺, 𑀬𑁂𑀲𑀁 𑀯𑀺𑀧𑀸𑀓𑀁 𑀇𑀥 𑀯𑁂𑀤𑀬𑀺𑀢𑁆𑀣𑁄.

𑁨𑁧𑁧.

‘‘𑀯𑀲 𑀤𑁂𑀯𑀸𑀦𑀼𑀪𑀸𑀯𑁂𑀦, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀪𑀼𑀜𑁆𑀚 𑀓𑀸𑀫𑁂 𑀅𑀫𑀸𑀦𑀼𑀲𑁂’’𑀢𑀺.

𑀢𑀢𑁆𑀣 ‘‘𑀧𑀭𑀺𑀢𑁆𑀢𑀓𑀸𑀦𑀻’’𑀢𑀺 𑀇𑀤𑀁 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀯𑀺𑀧𑀸𑀓𑀤𑀸𑀬𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀢𑀭𑀸𑀦𑀺 𑀧𑀦𑀲𑁆𑀲 𑀧𑀼𑀜𑁆𑀜𑀸𑀦𑀺 𑀧𑀣𑀯𑀺𑀬𑀁 𑀧𑀁𑀲𑀼 𑀯𑀺𑀬 𑀅𑀧𑁆𑀧𑀫𑀸𑀡𑀸𑀦𑀺. 𑀯𑀲 𑀤𑁂𑀯𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀳𑀁 𑀢𑁂 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀺 ¶ 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑀸𑀫𑀺, 𑀫𑀫𑀸𑀦𑀼𑀪𑀸𑀯𑁂𑀦 𑀯𑀲𑀸𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀆𑀳.

𑀅𑀣 ¶ 𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀆𑀳 𑁋

𑁨𑁧𑁨.

‘‘𑀬𑀣𑀸 𑀬𑀸𑀘𑀺𑀢𑀓𑀁 𑀬𑀸𑀦𑀁, 𑀬𑀣𑀸 𑀬𑀸𑀘𑀺𑀢𑀓𑀁 𑀥𑀦𑀁;

𑀏𑀯𑀁𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸.

𑁨𑁧𑁩.

‘‘𑀦 ¶ 𑀘𑀸𑀳𑀫𑁂𑀢𑀫𑀺𑀘𑁆𑀙𑀸𑀫𑀺, 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸;

𑀲𑀬𑀁𑀓𑀢𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀢𑀁 𑀫𑁂 𑀆𑀯𑁂𑀡𑀺𑀓𑀁 𑀥𑀦𑀁.

𑁨𑁧𑁪.

‘‘𑀲𑁄𑀳𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀬𑀁 𑀓𑀢𑁆𑀯𑀸 𑀲𑀼𑀔𑀺𑀢𑁄 𑀳𑁄𑀢𑀺, 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸𑀢𑀺 𑀬𑀁 𑀧𑀭𑁂𑀦 𑀤𑀺𑀦𑁆𑀦𑀢𑁆𑀢𑀸 𑀮𑀩𑁆𑀪𑀢𑀺, 𑀢𑀁 𑀬𑀸𑀘𑀺𑀢𑀓𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀬𑀸𑀘𑀺𑀢𑀓𑀜𑁆𑀳𑀺 𑀢𑀼𑀝𑁆𑀞𑀓𑀸𑀮𑁂 𑀤𑁂𑀦𑁆𑀢𑀺, 𑀅𑀢𑀼𑀝𑁆𑀞𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀻𑀢𑀺 𑀯𑀤𑀢𑀺. 𑀲𑀫𑀘𑀭𑀺𑀬𑀸𑀬𑀸𑀢𑀺 𑀓𑀸𑀬𑀸𑀤𑀻𑀳𑀺 𑀧𑀸𑀧𑀲𑁆𑀲 𑀅𑀓𑀭𑀡𑁂𑀦. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑀲𑀁𑀬𑀫𑁂𑀦. 𑀤𑀫𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦. 𑀬𑀁 𑀓𑀢𑁆𑀯𑀸𑀢𑀺 𑀬𑀁 𑀓𑀭𑀺𑀢𑁆𑀯𑀸 𑀲𑀼𑀔𑀺𑀢𑁄 𑀘𑁂𑀯 𑀳𑁄𑀢𑀺 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺, 𑀢𑀣𑀸𑀭𑀽𑀧𑀫𑁂𑀯 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀫𑀸𑀢𑀮𑀺𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙, 𑀢𑀸𑀢, 𑀲𑀸𑀥𑀺𑀦𑀭𑀸𑀚𑀸𑀦𑀁 𑀫𑀺𑀣𑀺𑀮𑀁 𑀦𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀑𑀢𑀸𑀭𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀘𑀗𑁆𑀓𑀫𑀢𑀺. 𑀅𑀣 𑀦𑀁 𑀉𑀬𑁆𑀬𑀸𑀦𑀧𑀸𑀮𑁄 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀸𑀭𑀤𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀲𑁄 𑀭𑀜𑁆𑀜𑁄 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀢𑁆𑀯𑀁 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀲 𑀘 𑀫𑀬𑁆𑀳𑀜𑁆𑀘 𑀤𑁆𑀯𑁂 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀳𑀻’’𑀢𑀺 𑀉𑀬𑁆𑀬𑀸𑀦𑀧𑀸𑀮𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 ‘‘𑀓𑀲𑁆𑀲 𑀤𑁆𑀯𑁂 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀲𑀻’’𑀢𑀺? ‘‘𑀏𑀓𑀁 𑀢𑀼𑀫𑁆𑀳𑀸𑀓𑀁, 𑀏𑀓𑀁 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄’’𑀢𑀺. 𑀅𑀣 𑀦𑀁 𑀭𑀸𑀚𑀸 ‘‘𑀓𑁄 𑀅𑀜𑁆𑀜𑁄 𑀲𑀢𑁆𑀢𑁄 𑀫𑀫 𑀲𑀦𑁆𑀢𑀺𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀏𑀓𑀲𑁆𑀫𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀸𑀤𑁂 𑀞𑀧𑁂𑀲𑀺. 𑀦𑀸𑀭𑀤𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑁄 𑀓𑀺𑀭𑀲𑁆𑀲 𑀲𑀢𑁆𑀢𑀫𑁄 𑀧𑀦𑀢𑁆𑀢𑀸. 𑀢𑀤𑀸 𑀓𑀺𑀭 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁄𑀯 𑀳𑁄𑀢𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀲𑁄 𑀦𑀸𑀭𑀤𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀺𑀘𑀭𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁧𑁫.

‘‘𑀇𑀫𑀸𑀦𑀺 ¶ 𑀢𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀇𑀫𑀁 𑀦𑀺𑀓𑁆𑀔𑀁 𑀲𑀼𑀓𑀼𑀡𑁆𑀟𑀮𑀁;

𑀇𑀫𑀸 𑀢𑀸 𑀳𑀭𑀺𑀢𑀸𑀦𑀽𑀧𑀸, 𑀇𑀫𑀸 𑀦𑀚𑁆𑀚𑁄 𑀲𑀯𑀦𑁆𑀢𑀺𑀬𑁄.

𑁨𑁧𑁬.

‘‘𑀇𑀫𑀸 ¶ 𑀢𑀸 𑀧𑁄𑀓𑁆𑀔𑀭𑀡𑀻 𑀭𑀫𑁆𑀫𑀸, 𑀘𑀓𑁆𑀓𑀯𑀸𑀓𑀧𑀓𑀽𑀚𑀺𑀢𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘;

𑀬𑀲𑁆𑀲𑀺𑀫𑀸𑀦𑀺 𑀫𑀫𑀸𑀬𑀺𑀁𑀲𑀼, 𑀓𑀺𑀁 𑀦𑀼 𑀢𑁂 𑀤𑀺𑀲𑀢𑀁 𑀕𑀢𑀸.

𑁨𑁧𑁭.

‘‘𑀢𑀸𑀦𑀻𑀥 ¶ 𑀔𑁂𑀢𑁆𑀢𑀸𑀦𑀺 𑀲𑁄 𑀪𑀽𑀫𑀺𑀪𑀸𑀕𑁄, 𑀢𑁂𑀬𑁂𑀯 𑀆𑀭𑀸𑀫𑀯𑀦𑀽𑀧𑀘𑀸𑀭𑀸;

𑀢𑀫𑁂𑀯 𑀫𑀬𑁆𑀳𑀁 𑀚𑀦𑀢𑀁 𑀅𑀧𑀲𑁆𑀲𑀢𑁄, 𑀲𑀼𑀜𑁆𑀜𑀁𑀯 𑀫𑁂 𑀦𑀸𑀭𑀤 𑀔𑀸𑀬𑀢𑁂 𑀤𑀺𑀲𑀸’’𑀢𑀺.

𑀢𑀢𑁆𑀣 𑀔𑁂𑀢𑁆𑀢𑀸𑀦𑀻𑀢𑀺 𑀪𑀽𑀫𑀺𑀪𑀸𑀕𑁂 𑀲𑀦𑁆𑀥𑀸𑀬𑀸𑀳. 𑀇𑀫𑀁 𑀦𑀺𑀓𑁆𑀔𑀦𑁆𑀢𑀺 𑀇𑀫𑀁 𑀢𑀸𑀤𑀺𑀲𑀫𑁂𑀯 𑀉𑀤𑀓𑀦𑀺𑀤𑁆𑀥𑀫𑀦𑀁. 𑀲𑀼𑀓𑀼𑀡𑁆𑀟𑀮𑀦𑁆𑀢𑀺 𑀲𑁄𑀪𑀦𑁂𑀦 𑀫𑀼𑀲𑀮𑀧𑀯𑁂𑀲𑀦𑀓𑀼𑀡𑁆𑀟𑀮𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀳𑀭𑀺𑀢𑀸𑀦𑀽𑀧𑀸𑀢𑀺 𑀉𑀤𑀓𑀦𑀺𑀤𑁆𑀥𑀫𑀦𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀳𑀭𑀺𑀢𑀢𑀺𑀡𑀲𑀜𑁆𑀙𑀦𑁆𑀦𑀸 𑀅𑀦𑀽𑀧𑀪𑀽𑀫𑀺𑀬𑁄. 𑀬𑀲𑁆𑀲𑀺𑀫𑀸𑀦𑀺 𑀫𑀫𑀸𑀬𑀺𑀁𑀲𑀽𑀢𑀺 𑀢𑀸𑀢 𑀦𑀸𑀭𑀤, 𑀬𑁂 𑀫𑀫 𑀉𑀧𑀝𑁆𑀞𑀸𑀓𑀸 𑀘 𑀑𑀭𑁄𑀥𑀸 𑀘 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀫𑀬𑀸 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑀸 𑀇𑀫𑀸𑀦𑀺 𑀞𑀸𑀦𑀸𑀦𑀺 𑀫𑀫𑀸𑀬𑀺𑀁𑀲𑀼 𑀧𑀺𑀬𑀸𑀬𑀺𑀁𑀲𑀼, 𑀓𑀢𑀭𑀁 𑀦𑀼 𑀢𑁂 𑀤𑀺𑀲𑀢𑀁 𑀕𑀢𑀸, 𑀓𑀢𑁆𑀣 𑀢𑁂 𑀧𑁂𑀲𑀺𑀢𑀸. 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀢𑀸𑀦𑁂𑀯 𑀏𑀢𑀸𑀦𑀺 𑀉𑀧𑀭𑁄𑀧𑀦𑀓𑀯𑀺𑀭𑀼𑀳𑀦𑀝𑁆𑀞𑀸𑀦𑀸𑀦𑀺. 𑀢𑁂𑀬𑁂𑀯 𑀆𑀭𑀸𑀫𑀯𑀦𑀽𑀧𑀘𑀸𑀭𑀸𑀢𑀺 𑀇𑀫𑁂 𑀢𑁂𑀬𑁂𑀯 𑀆𑀭𑀸𑀫𑀯𑀦𑀽𑀧𑀘𑀸𑀭𑀸, 𑀯𑀺𑀳𑀸𑀭𑀪𑀽𑀫𑀺𑀬𑁄𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀦𑀸𑀭𑀤𑁄 𑀆𑀳 𑁋 ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀤𑁂𑀯𑀮𑁄𑀓𑀕𑀢𑀸𑀦𑀁 𑀇𑀤𑀸𑀦𑀺 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺, 𑀅𑀳𑀁 𑀯𑁄 𑀲𑀢𑁆𑀢𑀫𑁄 𑀧𑀦𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑀸 𑀘 𑀑𑀭𑁄𑀥𑀸 𑀘 𑀫𑀭𑀡𑀫𑀼𑀔𑀁 𑀧𑀢𑁆𑀢𑀸, 𑀇𑀤𑀁 𑀯𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀭𑀚𑁆𑀚𑀁, 𑀅𑀦𑀼𑀪𑀯𑀣 𑀦’’𑀦𑁆𑀢𑀺. 𑀭𑀸𑀚𑀸 ‘‘𑀢𑀸𑀢 𑀦𑀸𑀭𑀤, 𑀦𑀸𑀳𑀁 𑀇𑀥𑀸𑀕𑀘𑁆𑀙𑀦𑁆𑀢𑁄 𑀭𑀚𑁆𑀚𑀢𑁆𑀣𑀸𑀬 𑀆𑀕𑀢𑁄, 𑀧𑀼𑀜𑁆𑀜𑀓𑀭𑀡𑀢𑁆𑀣𑀸𑀬𑀫𑁆𑀳𑀺 𑀆𑀕𑀢𑁄, 𑀅𑀳𑀁 𑀧𑀼𑀜𑁆𑀜𑀫𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸 𑀆𑀳 𑁋

𑁨𑁧𑁮.

‘‘𑀤𑀺𑀝𑁆𑀞𑀸 𑀫𑀬𑀸 𑀯𑀺𑀫𑀸𑀦𑀸𑀦𑀺, 𑀑𑀪𑀸𑀲𑁂𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸;

𑀲𑀫𑁆𑀫𑀼𑀔𑀸 𑀤𑁂𑀯𑀭𑀸𑀚𑀲𑁆𑀲, 𑀢𑀺𑀤𑀲𑀸𑀦𑀜𑁆𑀘 𑀲𑀫𑁆𑀫𑀼𑀔𑀸.

𑁨𑁧𑁯.

‘‘𑀯𑀼𑀢𑁆𑀣𑀁 ¶ 𑀫𑁂 𑀪𑀯𑀦𑀁 𑀤𑀺𑀩𑁆𑀬𑀁, 𑀪𑀼𑀢𑁆𑀢𑀸 𑀓𑀸𑀫𑀸 𑀅𑀫𑀸𑀦𑀼𑀲𑀸;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼.

𑁨𑁨𑁦.

‘‘𑀲𑁄𑀳𑀁 𑀏𑀢𑀸𑀤𑀺𑀲𑀁 𑀳𑀺𑀢𑁆𑀯𑀸, 𑀧𑀼𑀜𑁆𑀜𑀸𑀬𑀫𑁆𑀳𑀺 𑀇𑀥𑀸𑀕𑀢𑁄;

𑀥𑀫𑁆𑀫𑀫𑁂𑀯 𑀘𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄.

𑁨𑁨𑁧.

‘‘𑀅𑀤𑀡𑁆𑀟𑀸𑀯𑀘𑀭𑀁 ¶ ¶ 𑀫𑀕𑁆𑀕𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀁, 𑀬𑁂𑀦 𑀕𑀘𑁆𑀙𑀦𑁆𑀢𑀺 𑀲𑀼𑀩𑁆𑀩𑀢𑀸’’𑀢𑀺.

𑀢𑀢𑁆𑀣 𑀯𑀼𑀢𑁆𑀣𑀁 𑀫𑁂 𑀪𑀯𑀦𑀁 𑀤𑀺𑀩𑁆𑀬𑀦𑁆𑀢𑀺 𑀯𑁂𑀚𑀬𑀦𑁆𑀢𑀁 𑀲𑀦𑁆𑀥𑀸𑀬 𑀆𑀳. 𑀲𑁄𑀳𑀁 𑀏𑀢𑀸𑀤𑀺𑀲𑀦𑁆𑀢𑀺 𑀢𑀸𑀢 𑀦𑀸𑀭𑀤, 𑀲𑁄𑀳𑀁 𑀩𑀼𑀤𑁆𑀥𑀜𑀸𑀡𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀤𑀦𑀻𑀬𑀁 𑀏𑀯𑀭𑀽𑀧𑀁 𑀓𑀸𑀫𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀼𑀜𑁆𑀜𑀓𑀭𑀡𑀢𑁆𑀣𑀸𑀬 𑀇𑀥𑀸𑀕𑀢𑁄. 𑀅𑀤𑀡𑁆𑀟𑀸𑀯𑀘𑀭𑀦𑁆𑀢𑀺 𑀅𑀤𑀡𑁆𑀟𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑀳𑀢𑁆𑀣𑁂𑀳𑀺 𑀅𑀯𑀘𑀭𑀺𑀢𑀩𑁆𑀩𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁. 𑀲𑀼𑀩𑁆𑀩𑀢𑀸𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀲𑀼𑀩𑁆𑀩𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀕𑀘𑁆𑀙𑀦𑁆𑀢𑀺, 𑀅𑀳𑀫𑁆𑀧𑀺 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀕𑀦𑁆𑀢𑀼𑀁 𑀩𑁄𑀥𑀺𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑀺. 𑀦𑀸𑀭𑀤𑁄 𑀧𑀼𑀦𑀧𑀺 𑀆𑀳 𑁋 ‘‘𑀭𑀚𑁆𑀚𑀁, 𑀤𑁂𑀯, 𑀅𑀦𑀼𑀲𑀸𑀲𑀸’’𑀢𑀺. ‘‘𑀢𑀸𑀢, 𑀦 𑀫𑁂 𑀭𑀚𑁆𑀚𑁂𑀦𑀢𑁆𑀣𑁄, 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀯𑀺𑀕𑀢𑀁 𑀤𑀸𑀦𑀁 𑀲𑀢𑁆𑀢𑀸𑀳𑁂𑀦𑁂𑀯 𑀤𑀸𑀢𑀼𑀓𑀸𑀫𑀫𑁆𑀳𑀻’’𑀢𑀺. 𑀦𑀸𑀭𑀤𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀝𑀺𑀬𑀸𑀤𑁂𑀲𑀺. 𑀭𑀸𑀚𑀸 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀯𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀉𑀧𑁄𑀲𑀣𑀓𑀫𑁆𑀫𑀁 𑀦𑀸𑀫𑀸’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑁄𑀲𑀣𑀺𑀓𑁂𑀲𑀼 𑀉𑀧𑀸𑀲𑀓𑁂𑀲𑀼 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀨𑀮𑁂, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀦𑀸𑀭𑀤𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀫𑀸𑀢𑀮𑀺 𑀆𑀦𑀦𑁆𑀤𑁄, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀲𑀸𑀥𑀺𑀦𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.

𑀲𑀸𑀥𑀺𑀦𑀚𑀸𑀢𑀓𑀯𑀡𑁆𑀡𑀦𑀸 𑀏𑀓𑀸𑀤𑀲𑀫𑀸.

[𑁪𑁯𑁫] 𑁧𑁨. 𑀤𑀲𑀩𑁆𑀭𑀸𑀳𑁆𑀫𑀡𑀚𑀸𑀢𑀓𑀯𑀡𑁆𑀡𑀦𑀸

𑀭𑀸𑀚𑀸 ¶ 𑀅𑀯𑁄𑀘 𑀯𑀺𑀥𑀼𑀭𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀲𑀤𑀺𑀲𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀅𑀝𑁆𑀞𑀓𑀦𑀺𑀧𑀸𑀢𑁂 𑀆𑀤𑀺𑀢𑁆𑀢𑀚𑀸𑀢𑀓𑁂 (𑀚𑀸. 𑁧.𑁮.𑁬𑁯 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀭𑀸𑀚𑀸 𑀓𑀺𑀭 𑀢𑀁 𑀤𑀸𑀦𑀁 𑀤𑀤𑀦𑁆𑀢𑁄 𑀲𑀢𑁆𑀣𑀸𑀭𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀯𑀺𑀘𑀺𑀦𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀫𑀳𑀸𑀔𑀻𑀡𑀸𑀲𑀯𑀸𑀦𑀁𑀬𑁂𑀯 𑀅𑀤𑀸𑀲𑀺. 𑀅𑀣𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀸 ‘‘𑀆𑀯𑀼𑀲𑁄, 𑀭𑀸𑀚𑀸 𑀅𑀲𑀤𑀺𑀲𑀤𑀸𑀦𑀁 𑀤𑀤𑀦𑁆𑀢𑁄 𑀯𑀺𑀘𑀺𑀦𑀺𑀢𑁆𑀯𑀸 𑀫𑀳𑀧𑁆𑀨𑀮𑀝𑁆𑀞𑀸𑀦𑁂 𑀅𑀤𑀸𑀲𑀻’’𑀢𑀺 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 ¶ 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀬𑀁 𑀓𑁄𑀲𑀮𑀭𑀸𑀚𑀸 ¶ 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑀼𑀢𑁆𑀯𑀸 𑀯𑀺𑀘𑁂𑀬𑁆𑀬𑀤𑀸𑀦𑀁 𑀤𑁂𑀢𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂𑀧𑀺 𑀯𑀺𑀘𑁂𑀬𑁆𑀬𑀤𑀸𑀦𑀁 𑀅𑀤𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀬𑀼𑀥𑀺𑀝𑁆𑀞𑀺𑀮𑀕𑁄𑀢𑁆𑀢𑁄 𑀓𑁄𑀭𑀩𑁆𑀬𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀯𑀺𑀥𑀼𑀭𑁄 𑀦𑀸𑀫 𑀅𑀫𑀘𑁆𑀘𑁄 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀢𑀺. 𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀔𑁄𑀪𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁂𑀲𑀼 𑀏𑀓𑁄𑀧𑀺 𑀧𑀜𑁆𑀘𑀲𑀻𑀮𑀫𑀢𑁆𑀢𑀁 𑀭𑀓𑁆𑀔𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀤𑀼𑀲𑁆𑀲𑀻𑀮𑀸𑀯, 𑀤𑀸𑀦𑀁 𑀭𑀸𑀚𑀸𑀦𑀁 𑀦 𑀢𑁄𑀲𑁂𑀢𑀺. 𑀭𑀸𑀚𑀸 ‘‘𑀯𑀺𑀘𑁂𑀬𑁆𑀬𑀤𑀸𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀲𑀻𑀮𑀯𑀦𑁆𑀢𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀯𑀺𑀥𑀼𑀭𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀉𑀧𑀟𑁆𑀠𑀕𑀸𑀣𑀫𑀸𑀳 𑁋

𑁨𑁨𑁨.

‘‘𑀭𑀸𑀚𑀸 𑀅𑀯𑁄𑀘 𑀯𑀺𑀥𑀼𑀭𑀁, 𑀥𑀫𑁆𑀫𑀓𑀸𑀫𑁄 𑀬𑀼𑀥𑀺𑀝𑁆𑀞𑀺𑀮𑁄’’𑀢𑀺;

𑀧𑀭𑀢𑁄 𑀭𑀜𑁆𑀜𑁄 𑀘 𑀯𑀺𑀥𑀼𑀭𑀲𑁆𑀲 𑀘 𑀯𑀘𑀦𑀧𑀝𑀺𑀯𑀘𑀦𑀁 𑀳𑁄𑀢𑀺 𑁋

‘‘𑀩𑁆𑀭𑀸𑀳𑁆𑀫𑀡𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁨𑁩.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁨𑁪.

‘‘𑀤𑀼𑀮𑁆𑀮𑀪𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯, 𑀲𑀻𑀮𑀯𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑀸;

𑀯𑀺𑀭𑀢𑀸 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀢𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁.

𑁨𑁨𑁫.

‘‘𑀤𑀲 ¶ 𑀔𑀮𑀼 𑀫𑀳𑀸𑀭𑀸𑀚, 𑀬𑀸 𑀢𑀸 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑁄;

𑀢𑁂𑀲𑀁 𑀯𑀺𑀪𑀗𑁆𑀕𑀁 𑀯𑀺𑀘𑀬𑀁, 𑀯𑀺𑀢𑁆𑀣𑀸𑀭𑁂𑀦 𑀲𑀼𑀡𑁄𑀳𑀺 𑀫𑁂.

𑁨𑁨𑁬.

‘‘𑀧𑀲𑀺𑀩𑁆𑀩𑀓𑁂 𑀕𑀳𑁂𑀢𑁆𑀯𑀸𑀦, 𑀧𑀼𑀡𑁆𑀡𑁂 𑀫𑀽𑀮𑀲𑁆𑀲 𑀲𑀁𑀯𑀼𑀢𑁂;

𑀑𑀲𑀥𑀺𑀓𑀸𑀬𑁄 𑀕𑀦𑁆𑀣𑁂𑀦𑁆𑀢𑀺, 𑀦𑁆𑀳𑀸𑀧𑀬𑀦𑁆𑀢𑀺 𑀚𑀧𑀦𑁆𑀢𑀺 𑀘.

𑁨𑁨𑁭.

‘‘𑀢𑀺𑀓𑀺𑀘𑁆𑀙𑀓𑀲𑀫𑀸 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁨𑁮.

‘‘𑀅𑀧𑁂𑀢𑀸 ¶ ¶ 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁨𑁯.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁩𑁦.

‘‘𑀓𑀺𑀗𑁆𑀓𑀺𑀡𑀺𑀓𑀸𑀬𑁄 𑀕𑀳𑁂𑀢𑁆𑀯𑀸, 𑀖𑁄𑀲𑁂𑀦𑁆𑀢𑀺 𑀧𑀼𑀭𑀢𑁄𑀧𑀺 𑀢𑁂;

𑀧𑁂𑀲𑀦𑀸𑀦𑀺𑀧𑀺 𑀕𑀘𑁆𑀙𑀦𑁆𑀢𑀺, 𑀭𑀣𑀘𑀭𑀺𑀬𑀸𑀲𑀼 𑀲𑀺𑀓𑁆𑀔𑀭𑁂.

𑁨𑁩𑁧.

‘‘𑀧𑀭𑀺𑀘𑀸𑀭𑀓𑀲𑀫𑀸 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁩𑁨.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁩𑁩.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁩𑁪.

‘‘𑀓𑀫𑀡𑁆𑀟𑀮𑀼𑀁 𑀕𑀳𑁂𑀢𑁆𑀯𑀸𑀦, 𑀯𑀗𑁆𑀓𑀤𑀡𑁆𑀟𑀜𑁆𑀘 𑀩𑁆𑀭𑀸𑀳𑁆𑀫𑀡𑀸;

𑀧𑀘𑁆𑀘𑀼𑀧𑁂𑀲𑁆𑀲𑀦𑁆𑀢𑀺 𑀭𑀸𑀚𑀸𑀦𑁄, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;

𑀦𑀸𑀤𑀺𑀦𑁆𑀦𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫, 𑀕𑀸𑀫𑀫𑁆𑀳𑀺 𑀯𑀸 𑀯𑀦𑀫𑁆𑀳𑀺 𑀯𑀸.

𑁨𑁩𑁫.

‘‘𑀦𑀺𑀕𑁆𑀕𑀸𑀳𑀓𑀲𑀫𑀸 ¶ 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁩𑁬.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁩𑁭.

‘‘𑀯𑀺𑀭𑀢𑁂 ¶ 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁩𑁮.

‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀑𑀓𑀺𑀡𑁆𑀡𑀸 𑀭𑀚𑀭𑁂𑀡𑀽𑀳𑀺, 𑀬𑀸𑀘𑀓𑀸 𑀯𑀺𑀘𑀭𑀦𑁆𑀢𑀺 𑀢𑁂.

𑁨𑁩𑁯.

‘‘𑀔𑀸𑀡𑀼𑀖𑀸𑀢𑀲𑀫𑀸 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁪𑁦.

‘‘𑀅𑀧𑁂𑀢𑀸 ¶ 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁪𑁧.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁪𑁨.

‘‘𑀳𑀭𑀻𑀢𑀓𑀁 𑀆𑀫𑀮𑀓𑀁, 𑀅𑀫𑁆𑀩𑀁 𑀚𑀫𑁆𑀩𑀼𑀁 𑀯𑀺𑀪𑀻𑀢𑀓𑀁;

𑀮𑀩𑀼𑀚𑀁 𑀤𑀦𑁆𑀢𑀧𑁄𑀡𑀸𑀦𑀺, 𑀩𑁂𑀮𑀼𑀯𑀸 𑀩𑀤𑀭𑀸𑀦𑀺 𑀘.

𑁨𑁪𑁩.

‘‘𑀭𑀸𑀚𑀸𑀬𑀢𑀦𑀁 𑀉𑀘𑁆𑀙𑀼𑀧𑀼𑀝𑀁, 𑀥𑀽𑀫𑀦𑁂𑀢𑁆𑀢𑀁 𑀫𑀥𑀼𑀅𑀜𑁆𑀚𑀦𑀁;

𑀉𑀘𑁆𑀘𑀸𑀯𑀘𑀸𑀦𑀺 𑀧𑀡𑀺𑀬𑀸𑀦𑀺, 𑀯𑀺𑀧𑀡𑁂𑀦𑁆𑀢𑀺 𑀚𑀦𑀸𑀥𑀺𑀧.

𑁨𑁪𑁪.

‘‘𑀯𑀸𑀡𑀺𑀚𑀓𑀲𑀫𑀸 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁪𑁫.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁪𑁬.

‘‘𑀯𑀺𑀭𑀢𑁂 ¶ ¶ 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁪𑁭.

‘‘𑀓𑀲𑀺𑀯𑀸𑀡𑀺𑀚𑁆𑀚𑀁 𑀓𑀸𑀭𑁂𑀦𑁆𑀢𑀺, 𑀧𑁄𑀲𑀬𑀦𑁆𑀢𑀺 𑀅𑀚𑁂𑀴𑀓𑁂;

𑀓𑀼𑀫𑀸𑀭𑀺𑀬𑁄 𑀧𑀯𑁂𑀘𑁆𑀙𑀦𑁆𑀢𑀺, 𑀯𑀺𑀯𑀸𑀳𑀦𑁆𑀢𑀸𑀯𑀳𑀦𑁆𑀢𑀺 𑀘.

𑁨𑁪𑁮.

‘‘𑀲𑀫𑀸 𑀅𑀫𑁆𑀩𑀝𑁆𑀞𑀯𑁂𑀲𑁆𑀲𑁂𑀳𑀺, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁪𑁯.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁫𑁦.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁫𑁧.

‘‘𑀦𑀺𑀓𑁆𑀔𑀺𑀢𑁆𑀢𑀪𑀺𑀓𑁆𑀔𑀁 ¶ 𑀪𑀼𑀜𑁆𑀚𑀦𑁆𑀢𑀺, 𑀕𑀸𑀫𑁂𑀲𑁆𑀯𑁂𑀓𑁂 𑀧𑀼𑀭𑁄𑀳𑀺𑀢𑀸;

𑀩𑀳𑀽 𑀢𑁂 𑀧𑀭𑀺𑀧𑀼𑀘𑁆𑀙𑀦𑁆𑀢𑀺, 𑀅𑀡𑁆𑀟𑀘𑁆𑀙𑁂𑀤𑀸 𑀦𑀺𑀮𑀜𑁆𑀙𑀓𑀸.

𑁨𑁫𑁨.

‘‘𑀧𑀲𑀽𑀧𑀺 𑀢𑀢𑁆𑀣 𑀳𑀜𑁆𑀜𑀦𑁆𑀢𑀺, 𑀫𑀳𑀺𑀁𑀲𑀸 𑀲𑀽𑀓𑀭𑀸 𑀅𑀚𑀸;

𑀕𑁄𑀖𑀸𑀢𑀓𑀲𑀫𑀸 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁫𑁩.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁫𑁪.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁫𑁫.

‘‘𑀅𑀲𑀺𑀘𑀫𑁆𑀫𑀁 ¶ 𑀕𑀳𑁂𑀢𑁆𑀯𑀸𑀦, 𑀔𑀕𑁆𑀕𑀁 𑀧𑀕𑁆𑀕𑀬𑁆𑀳 𑀩𑁆𑀭𑀸𑀳𑁆𑀫𑀡𑀸;

𑀯𑁂𑀲𑁆𑀲𑀧𑀣𑁂𑀲𑀼 𑀢𑀺𑀝𑁆𑀞𑀦𑁆𑀢𑀺, 𑀲𑀢𑁆𑀣𑀁 𑀅𑀩𑁆𑀩𑀸𑀳𑀬𑀦𑁆𑀢𑀺𑀧𑀺.

𑁨𑁫𑁬.

‘‘𑀲𑀫𑀸 𑀕𑁄𑀧𑀦𑀺𑀲𑀸𑀤𑁂𑀳𑀺, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁫𑁭.

‘‘𑀅𑀧𑁂𑀢𑀸 ¶ 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁫𑁮.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁫𑁯.

‘‘𑀅𑀭𑀜𑁆𑀜𑁂 𑀓𑀼𑀝𑀺𑀓𑀁 𑀓𑀢𑁆𑀯𑀸, 𑀓𑀼𑀝𑀸𑀦𑀺 𑀓𑀸𑀭𑀬𑀦𑁆𑀢𑀺 𑀢𑁂;

𑀲𑀲𑀩𑀺𑀴𑀸𑀭𑁂 𑀩𑀸𑀥𑁂𑀦𑁆𑀢𑀺, 𑀆𑀕𑁄𑀥𑀸 𑀫𑀘𑁆𑀙𑀓𑀘𑁆𑀙𑀧𑀁.

𑁨𑁬𑁦.

‘‘𑀢𑁂 𑀮𑀼𑀤𑁆𑀤𑀓𑀲𑀫𑀸 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁬𑁧.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁬𑁨.

‘‘𑀯𑀺𑀭𑀢𑁂 ¶ 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁬𑁩.

‘‘𑀅𑀜𑁆𑀜𑁂 𑀥𑀦𑀲𑁆𑀲 𑀓𑀸𑀫𑀸 𑀳𑀺, 𑀳𑁂𑀝𑁆𑀞𑀸𑀫𑀜𑁆𑀘𑁂 𑀧𑀲𑀓𑁆𑀓𑀺𑀢𑀸;

𑀭𑀸𑀚𑀸𑀦𑁄 𑀉𑀧𑀭𑀺 𑀦𑁆𑀳𑀸𑀬𑀦𑁆𑀢𑀺, 𑀲𑁄𑀫𑀬𑀸𑀕𑁂 𑀉𑀧𑀝𑁆𑀞𑀺𑀢𑁂.

𑁨𑁬𑁪.

‘‘𑀫𑀮𑀫𑀚𑁆𑀚𑀓𑀲𑀫𑀸 ¶ 𑀭𑀸𑀚, 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀓𑁆𑀔𑀸𑀢𑀸 𑀢𑁂 𑀫𑀳𑀸𑀭𑀸𑀚, 𑀢𑀸𑀤𑀺𑀲𑁂 𑀦𑀺𑀧𑀢𑀸𑀫𑀲𑁂.

𑁨𑁬𑁫.

‘‘𑀅𑀧𑁂𑀢𑀸 𑀢𑁂 𑀘 𑀩𑁆𑀭𑀳𑁆𑀫𑀜𑁆𑀜𑀸, (𑀇𑀢𑀺 𑀭𑀸𑀚𑀸 𑀓𑁄𑀭𑀩𑁆𑀬𑁄)

𑀦 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀅𑀜𑁆𑀜𑁂 𑀯𑀺𑀥𑀼𑀭 𑀧𑀭𑀺𑀬𑁂𑀲, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁨𑁬𑁬.

‘‘𑀯𑀺𑀭𑀢𑁂 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀬𑁂 𑀫𑁂 𑀪𑀼𑀜𑁆𑀚𑁂𑀬𑁆𑀬𑀼 𑀪𑁄𑀚𑀦𑀁;

𑀤𑀓𑁆𑀔𑀺𑀡𑀁 𑀲𑀫𑁆𑀫 𑀤𑀲𑁆𑀲𑀸𑀫, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀢𑀢𑁆𑀣 𑀲𑀻𑀮𑀯𑀦𑁆𑀢𑁂𑀢𑀺 𑀫𑀕𑁆𑀕𑁂𑀦𑀸𑀕𑀢𑀲𑀻𑀮𑁂. 𑀩𑀳𑀼𑀲𑁆𑀲𑀼𑀢𑁂𑀢𑀺 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁂. 𑀤𑀓𑁆𑀔𑀺𑀡𑀦𑁆𑀢𑀺 𑀤𑀸𑀦𑀁. 𑀬𑁂 𑀢𑁂𑀢𑀺 𑀬𑁂 𑀥𑀫𑁆𑀫𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀯 𑀤𑀸𑀦𑀁 ¶ 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀢𑁂 𑀤𑀼𑀮𑁆𑀮𑀪𑀸. 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑁄𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀺. 𑀢𑁂𑀲𑀁 𑀯𑀺𑀪𑀗𑁆𑀕𑀁 𑀯𑀺𑀘𑀬𑀦𑁆𑀢𑀺 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀪𑀗𑁆𑀕𑀁 𑀫𑀫 𑀧𑀜𑁆𑀜𑀸𑀬 𑀯𑀺𑀘𑀺𑀢𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦 𑀲𑀼𑀡𑁄𑀳𑀺. 𑀲𑀁𑀯𑀼𑀢𑁂𑀢𑀺 𑀩𑀤𑁆𑀥𑀫𑀼𑀔𑁂. 𑀑𑀲𑀥𑀺𑀓𑀸𑀬𑁄 𑀕𑀦𑁆𑀣𑁂𑀦𑁆𑀢𑀻𑀢𑀺 ‘‘𑀇𑀤𑀁 𑀇𑀫𑀲𑁆𑀲 𑀭𑁄𑀕𑀲𑁆𑀲 𑀪𑁂𑀲𑀚𑁆𑀚𑀁, 𑀇𑀤𑀁 𑀇𑀫𑀲𑁆𑀲 𑀭𑁄𑀕𑀲𑁆𑀲 𑀪𑁂𑀲𑀚𑁆𑀚’’𑀦𑁆𑀢𑀺 𑀏𑀯𑀁 𑀲𑀺𑀮𑁄𑀓𑁂 𑀩𑀦𑁆𑀥𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀤𑁂𑀦𑁆𑀢𑀺. 𑀦𑁆𑀳𑀸𑀧𑀬𑀦𑁆𑀢𑀻𑀢𑀺 𑀦𑀳𑀸𑀧𑀦𑀁 𑀦𑀸𑀫 𑀓𑀭𑁄𑀦𑁆𑀢𑀺. 𑀚𑀧𑀦𑁆𑀢𑀺 𑀘𑀸𑀢𑀺 𑀪𑀽𑀢𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺. 𑀢𑀺𑀓𑀺𑀘𑁆𑀙𑀓𑀲𑀫𑀸𑀢𑀺 𑀯𑁂𑀚𑁆𑀚𑀲𑀤𑀺𑀲𑀸. 𑀢𑁂𑀧𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑁂𑀧𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀬𑀁, 𑀅𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀯𑁄𑀳𑀸𑀭𑁂𑀦 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀓𑁆𑀔𑀸𑀢𑀸 𑀢𑁂𑀢𑀺 𑀇𑀫𑁂 𑀢𑁂 𑀫𑀬𑀸 𑀯𑁂𑀚𑁆𑀚𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀅𑀓𑁆𑀔𑀸𑀢𑀸. 𑀦𑀺𑀧𑀢𑀸𑀫𑀲𑁂𑀢𑀺 𑀯𑀤𑁂𑀳𑀺 𑀤𑀸𑀦𑀺, 𑀓𑀺𑀁 𑀢𑀸𑀤𑀺𑀲𑁂 𑀩𑁆𑀭𑀸𑀳𑁆𑀫𑀡𑁂 𑀦𑀺𑀧𑀢𑀸𑀫, 𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀸𑀫, 𑀅𑀢𑁆𑀣𑀺 𑀢𑁂 𑀏𑀢𑁂𑀳𑀺 𑀅𑀢𑁆𑀣𑁄𑀢𑀺 𑀧𑀼𑀘𑁆𑀙𑀢𑀺. 𑀩𑁆𑀭𑀳𑁆𑀫𑀜𑁆𑀜𑀸𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀢𑁄. 𑀦 𑀢𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑁂 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀦 𑀯𑀼𑀘𑁆𑀘𑀦𑁆𑀢𑀺.

𑀓𑀺𑀗𑁆𑀓𑀺𑀡𑀺𑀓𑀸𑀬𑁄𑀢𑀺 𑀫𑀳𑀸𑀭𑀸𑀚, 𑀅𑀧𑀭𑁂𑀧𑀺 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀙𑀟𑁆𑀟𑁂𑀢𑁆𑀯𑀸 𑀚𑀻𑀯𑀺𑀓𑀢𑁆𑀣𑀸𑀬 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀧𑀼𑀭𑀢𑁄 𑀓𑀁𑀲𑀢𑀸𑀴𑁂 𑀕𑀳𑁂𑀢𑁆𑀯𑀸 𑀯𑀸𑀤𑁂𑀦𑁆𑀢𑀸 𑀕𑀸𑀬𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀧𑁂𑀲𑀦𑀸𑀦𑀺𑀧𑀻𑀢𑀺 𑀤𑀸𑀲𑀓𑀫𑁆𑀫𑀓𑀭𑀸 𑀯𑀺𑀬 𑀧𑁂𑀲𑀦𑀸𑀦𑀺𑀧𑀺 𑀕𑀘𑁆𑀙𑀦𑁆𑀢𑀺. 𑀭𑀣𑀘𑀭𑀺𑀬𑀸𑀲𑀽𑀢𑀺 𑀭𑀣𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑀺. 𑀧𑀭𑀺𑀘𑀸𑀭𑀓𑀲𑀫𑀸𑀢𑀺 𑀤𑀸𑀲𑀓𑀫𑁆𑀫𑀓𑀭𑀲𑀤𑀺𑀲𑀸. 𑀯𑀗𑁆𑀓𑀤𑀡𑁆𑀟𑀦𑁆𑀢𑀺 ¶ 𑀯𑀗𑁆𑀓𑀤𑀡𑁆𑀟𑀓𑀝𑁆𑀞𑀁. 𑀧𑀘𑁆𑀘𑀼𑀧𑁂𑀲𑁆𑀲𑀦𑁆𑀢𑀺 𑀭𑀸𑀚𑀸𑀦𑁄𑀢𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂 𑀧𑀝𑀺𑀘𑁆𑀘 𑀆𑀕𑀫𑁆𑀫 𑀲𑀦𑁆𑀥𑀸𑀬 𑀉𑀧𑀲𑁂𑀯𑀦𑁆𑀢𑀺. 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘𑀸𑀢𑀺 𑀢𑁂𑀲𑀁 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀦𑀺𑀲𑀻𑀤𑀦𑁆𑀢𑀺. 𑀦𑀺𑀕𑁆𑀕𑀸𑀳𑀓𑀲𑀫𑀸𑀢𑀺 𑀦𑀺𑀕𑁆𑀕𑀳𑀓𑀸𑀭𑀓𑁂𑀳𑀺 𑀩𑀮𑀺𑀲𑀸𑀥𑀓𑀭𑀸𑀚𑀧𑀼𑀭𑀺𑀲𑁂𑀳𑀺 𑀲𑀫𑀸. 𑀬𑀣𑀸 𑀢𑁂 𑀧𑀼𑀭𑀺𑀲𑀸 ‘‘𑀅𑀕𑁆𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀕𑁆𑀕𑀳𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀺𑀬𑁂𑀯, 𑀢𑀣𑀸 ‘‘𑀕𑀸𑀫𑁂 𑀯𑀸 ¶ 𑀯𑀦𑁂 𑀯𑀸 𑀅𑀮𑀤𑁆𑀥𑀸 𑀫𑀭𑀦𑁆𑀢𑀸𑀧𑀺 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀸’’𑀢𑀺 𑀉𑀧𑀯𑀲𑀦𑁆𑀢𑀺. 𑀢𑁂𑀧𑀻𑀢𑀺 𑀢𑁂𑀧𑀺 𑀩𑀮𑀺𑀲𑀸𑀥𑀓𑀲𑀤𑀺𑀲𑀸 𑀧𑀸𑀧𑀥𑀫𑁆𑀫𑀸.

𑀭𑀚𑀭𑁂𑀡𑀽𑀳𑀻𑀢𑀺 𑀭𑀚𑁂𑀳𑀺 𑀘 𑀧𑀁𑀲𑀽𑀳𑀺 𑀘 𑀑𑀓𑀺𑀡𑁆𑀡𑀸. 𑀬𑀸𑀘𑀓𑀸𑀢𑀺 𑀥𑀦𑀬𑀸𑀘𑀓𑀸. 𑀔𑀸𑀡𑀼𑀖𑀸𑀢𑀲𑀫𑀸𑀢𑀺 𑀫𑀮𑀻𑀦𑀲𑀭𑀻𑀭𑀢𑀸𑀬 𑀛𑀸𑀫𑀔𑁂𑀢𑁆𑀢𑁂 𑀔𑀸𑀡𑀼𑀖𑀸𑀢𑀓𑁂𑀳𑀺 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀛𑀸𑀫𑀔𑀸𑀡𑀼𑀓𑀉𑀤𑁆𑀥𑀭𑀡𑀓𑀫𑀦𑀼𑀲𑁆𑀲𑁂𑀳𑀺 𑀲𑀫𑀸𑀦𑀸, ‘‘𑀅𑀕𑁆𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀘𑁆𑀘𑀮𑀪𑀸𑀯𑁂𑀦 𑀞𑀺𑀢𑀢𑁆𑀢𑀸 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀯𑀢𑀺𑀔𑀸𑀡𑀼𑀓𑀸 𑀯𑀺𑀬𑀸𑀢𑀺𑀧𑀺 𑀅𑀢𑁆𑀣𑁄. 𑀢𑁂𑀧𑀻𑀢𑀺 𑀢𑁂𑀧𑀺 𑀢𑀣𑀸 𑀮𑀤𑁆𑀥𑀁 𑀥𑀦𑀁 𑀯𑀟𑁆𑀠𑀺𑀬𑀸 𑀧𑀬𑁄𑀚𑁂𑀢𑁆𑀯𑀸 𑀧𑀼𑀦 𑀢𑀣𑁂𑀯 𑀞𑀺𑀢𑀢𑁆𑀢𑀸 𑀤𑀼𑀲𑁆𑀲𑀻𑀮𑀸 𑀩𑁆𑀭𑀸𑀳𑁆𑀫𑀡𑀸.

𑀉𑀘𑁆𑀙𑀼𑀧𑀼𑀝𑀦𑁆𑀢𑀺 ¶ 𑀉𑀘𑁆𑀙𑀼𑀜𑁆𑀘𑁂𑀯 𑀨𑀸𑀡𑀺𑀢𑀧𑀼𑀝𑀜𑁆𑀘. 𑀫𑀥𑀼𑀅𑀜𑁆𑀚𑀦𑀦𑁆𑀢𑀺 𑀫𑀥𑀼𑀜𑁆𑀘𑁂𑀯 𑀅𑀜𑁆𑀚𑀦𑀜𑁆𑀘. 𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀫𑀳𑀕𑁆𑀖𑀅𑀧𑁆𑀧𑀕𑁆𑀖𑀸𑀦𑀺. 𑀧𑀡𑀺𑀬𑀸𑀦𑀻𑀢𑀺 𑀪𑀡𑁆𑀟𑀸𑀦𑀺. 𑀯𑀺𑀧𑀡𑁂𑀦𑁆𑀢𑀻𑀢𑀺 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀢𑁂𑀧𑀻𑀢𑀺 𑀢𑁂𑀧𑀺 𑀇𑀫𑀸𑀦𑀺 𑀏𑀢𑁆𑀢𑀓𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀓𑀧𑁆𑀧𑀓𑀸 𑀯𑀸𑀡𑀺𑀚𑀓𑀩𑁆𑀭𑀸𑀳𑁆𑀫𑀡𑀸. 𑀧𑁄𑀲𑀬𑀦𑁆𑀢𑀻𑀢𑀺 𑀕𑁄𑀭𑀲𑀯𑀺𑀓𑁆𑀓𑀬𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀢𑁆𑀣𑀁 𑀧𑁄𑀲𑁂𑀦𑁆𑀢𑀺. 𑀧𑀯𑁂𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀥𑀻𑀢𑀭𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀧𑀭𑁂𑀲𑀁 𑀤𑁂𑀦𑁆𑀢𑀺. 𑀢𑁂 𑀏𑀯𑀁 𑀧𑀭𑁂𑀲𑀁 𑀤𑀤𑀫𑀸𑀦𑀸 𑀯𑀺𑀯𑀸𑀳𑀦𑁆𑀢𑀺 𑀦𑀸𑀫, 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀕𑀡𑁆𑀳𑀫𑀸𑀦𑀸 𑀆𑀯𑀸𑀳𑀦𑁆𑀢𑀺 𑀦𑀸𑀫. 𑀅𑀫𑁆𑀩𑀝𑁆𑀞𑀯𑁂𑀲𑁆𑀲𑁂𑀳𑀻𑀢𑀺 𑀓𑀼𑀝𑀼𑀫𑁆𑀩𑀺𑀓𑁂𑀳𑀺 𑀘𑁂𑀯 𑀕𑀳𑀧𑀢𑀻𑀳𑀺 𑀘 𑀲𑀫𑀸, 𑀢𑁂𑀧𑀺 𑀯𑁄𑀳𑀸𑀭𑀯𑀲𑁂𑀦 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀦𑀺𑀓𑁆𑀔𑀺𑀢𑁆𑀢𑀪𑀺𑀓𑁆𑀔𑀦𑁆𑀢𑀺 𑀕𑀸𑀫𑀧𑀼𑀭𑁄𑀳𑀺𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀦𑀺𑀩𑀤𑁆𑀥𑀪𑀺𑀓𑁆𑀔𑀁. 𑀩𑀳𑀽 𑀢𑁂𑀢𑀺 𑀩𑀳𑀽 𑀚𑀦𑀸 𑀏𑀢𑁂 𑀕𑀸𑀫𑀧𑀼𑀭𑁄𑀳𑀺𑀢𑁂 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀫𑀗𑁆𑀕𑀮𑀸𑀦𑀺 𑀧𑀼𑀘𑁆𑀙𑀦𑁆𑀢𑀺. 𑀅𑀡𑁆𑀟𑀘𑁆𑀙𑁂𑀤𑀸 𑀦𑀺𑀮𑀜𑁆𑀙𑀓𑀸𑀢𑀺 𑀪𑀢𑀺𑀁 𑀕𑀳𑁂𑀢𑁆𑀯𑀸 𑀩𑀮𑀺𑀩𑀤𑁆𑀤𑀸𑀦𑀁 𑀅𑀡𑁆𑀟𑀘𑁆𑀙𑁂𑀤𑀓𑀸 𑀘𑁂𑀯 𑀢𑀺𑀲𑀽𑀮𑀸𑀤𑀺𑀅𑀗𑁆𑀓𑀓𑀭𑀡𑁂𑀦 𑀮𑀜𑁆𑀙𑀓𑀸 𑀘, 𑀮𑀓𑁆𑀔𑀡𑀓𑀸𑀭𑀓𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀁 𑀕𑀸𑀫𑀧𑀼𑀭𑁄𑀳𑀺𑀢𑀸𑀦𑀁 𑀕𑁂𑀳𑁂𑀲𑀼 𑀫𑀁𑀲𑀯𑀺𑀓𑁆𑀓𑀺𑀡𑀦𑀢𑁆𑀣𑀁 𑀏𑀢𑁂 𑀧𑀲𑀼𑀆𑀤𑀬𑁄𑀧𑀺 𑀳𑀜𑁆𑀜𑀦𑁆𑀢𑀺. 𑀢𑁂𑀧𑀻𑀢𑀺 𑀢𑁂𑀧𑀺 𑀕𑁄𑀖𑀸𑀢𑀓𑀲𑀫𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀲𑀺𑀘𑀫𑁆𑀫𑀦𑁆𑀢𑀺 𑀅𑀲𑀺𑀮𑀝𑁆𑀞𑀺𑀜𑁆𑀘𑁂𑀯 𑀓𑀡𑁆𑀟𑀯𑀸𑀭𑀡𑀜𑁆𑀘. 𑀯𑁂𑀲𑁆𑀲𑀧𑀣𑁂𑀲𑀽𑀢𑀺 𑀯𑀸𑀡𑀺𑀚𑀸𑀦𑀁 𑀕𑀫𑀦𑀫𑀕𑁆𑀕𑁂𑀲𑀼. 𑀲𑀢𑁆𑀣𑀁 𑀅𑀩𑁆𑀩𑀸𑀳𑀬𑀦𑁆𑀢𑀻𑀢𑀺 𑀲𑀢𑁆𑀣𑀯𑀸𑀳𑀸𑀦𑀁 𑀳𑀢𑁆𑀣𑀢𑁄 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀕𑀳𑁂𑀢𑁆𑀯𑀸 𑀲𑀢𑁆𑀣𑁂 𑀘𑁄𑀭𑀸𑀝𑀯𑀺𑀁 𑀅𑀢𑀺𑀩𑀸𑀳𑁂𑀦𑁆𑀢𑀺. 𑀕𑁄𑀧𑀦𑀺𑀲𑀸𑀤𑁂𑀳𑀻𑀢𑀺 𑀕𑁄𑀧𑀸𑀮𑀓𑁂𑀳𑀺 𑀘𑁂𑀯 𑀦𑀺𑀲𑀸𑀤𑁂𑀳𑀺 𑀘 𑀕𑀸𑀫𑀖𑀸𑀢𑀓𑀘𑁄𑀭𑁂𑀳𑀺 𑀲𑀫𑀸𑀢𑀺 𑀯𑀼𑀢𑁆𑀢𑀁. 𑀢𑁂𑀧𑀻𑀢𑀺 𑀢𑁂𑀧𑀺 𑀏𑀯𑀭𑀽𑀧𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀼𑀝𑀸𑀦𑀺 𑀓𑀸𑀭𑀬𑀦𑁆𑀢𑀺 𑀢𑁂𑀢𑀺 𑀓𑀽𑀝𑀧𑀸𑀲𑀸𑀤𑀻𑀦𑀺 𑀭𑁄𑀧𑁂𑀦𑁆𑀢𑀺. 𑀲𑀲𑀩𑀺𑀴𑀸𑀭𑁂𑀢𑀺 𑀲𑀲𑁂 𑀘𑁂𑀯 𑀩𑀺𑀴𑀸𑀭𑁂 𑀘. 𑀏𑀢𑁂𑀦 𑀣𑀮𑀘𑀭𑁂 𑀫𑀺𑀕𑁂 𑀤𑀲𑁆𑀲𑁂𑀢𑀺. 𑀆𑀕𑁄𑀥𑀸 𑀫𑀘𑁆𑀙𑀓𑀘𑁆𑀙𑀧𑀦𑁆𑀢𑀺 𑀣𑀮𑀚𑁂𑀲𑀼 𑀢𑀸𑀯 𑀆𑀕𑁄𑀥𑀢𑁄 𑀫𑀳𑀦𑁆𑀢𑁂 𑀘 𑀔𑀼𑀤𑁆𑀤𑀓𑁂 𑀘 𑀧𑀸𑀡𑀬𑁄 𑀩𑀸𑀥𑁂𑀦𑁆𑀢𑀺 𑀫𑀸𑀭𑁂𑀦𑁆𑀢𑀺, 𑀚𑀮𑀚𑁂𑀲𑀼 𑀫𑀘𑁆𑀙𑀓𑀘𑁆𑀙𑀧𑁂. 𑀢𑁂𑀧𑀻𑀢𑀺 𑀢𑁂𑀧𑀺 𑀮𑀼𑀤𑁆𑀤𑀓𑀲𑀫𑀸 ¶ 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀜𑁆𑀜𑁂 ¶ 𑀥𑀦𑀲𑁆𑀲 𑀓𑀸𑀫𑀸 𑀳𑀻𑀢𑀺 𑀅𑀧𑀭𑁂 𑀩𑁆𑀭𑀸𑀳𑁆𑀫𑀡𑀸 𑀥𑀦𑀁 𑀧𑀢𑁆𑀣𑁂𑀦𑁆𑀢𑀸. 𑀳𑁂𑀝𑁆𑀞𑀸𑀫𑀜𑁆𑀘𑁂 𑀧𑀲𑀓𑁆𑀓𑀺𑀢𑀸𑀢𑀺 ‘‘𑀓𑀮𑀺𑀧𑀯𑀸𑀳𑀓𑀫𑁆𑀫𑀁 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀭𑀢𑀦𑀫𑀬𑀁 𑀫𑀜𑁆𑀘𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑀸 𑀅𑀘𑁆𑀙𑀦𑁆𑀢𑀺. 𑀅𑀣 𑀦𑁂𑀲𑀁 𑀲𑁄𑀫𑀬𑀸𑀕𑁂 𑀉𑀧𑀝𑁆𑀞𑀺𑀢𑁂 𑀭𑀸𑀚𑀸𑀦𑁄 𑀉𑀧𑀭𑀺 𑀦𑀳𑀸𑀬𑀦𑁆𑀢𑀺, 𑀢𑁂 𑀓𑀺𑀭 𑀲𑁄𑀫𑀬𑀸𑀕𑁂 𑀦𑀺𑀝𑁆𑀞𑀺𑀢𑁂 𑀆𑀕𑀦𑁆𑀢𑁆𑀯𑀸 ¶ 𑀢𑀲𑁆𑀫𑀺𑀁 𑀫𑀜𑁆𑀘𑁂 𑀦𑀺𑀲𑀻𑀤𑀦𑁆𑀢𑀺. 𑀅𑀣 𑀦𑁂 𑀅𑀜𑁆𑀜𑁂 𑀩𑁆𑀭𑀸𑀳𑁆𑀫𑀡𑀸 ‘‘𑀓𑀮𑀺𑀁 𑀧𑀯𑀸𑀳𑁂𑀲𑁆𑀲𑀸𑀫𑀸’’𑀢𑀺 𑀦𑀳𑀸𑀧𑁂𑀦𑁆𑀢𑀺. 𑀭𑀢𑀦𑀫𑀜𑁆𑀘𑁄 𑀘𑁂𑀯 𑀭𑀜𑁆𑀜𑁄 𑀭𑀸𑀚𑀸𑀮𑀗𑁆𑀓𑀸𑀭𑁄 𑀘 𑀲𑀩𑁆𑀩𑁄 𑀳𑁂𑀝𑁆𑀞𑀸𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲𑁂𑀯 𑀳𑁄𑀢𑀺. 𑀢𑁂𑀧𑀻𑀢𑀺 𑀢𑁂𑀧𑀺 𑀫𑀮𑀫𑀚𑁆𑀚𑀓𑁂𑀳𑀺 𑀦𑀳𑀸𑀧𑀺𑀢𑁂𑀳𑀺 𑀲𑀤𑀺𑀲𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.