📜
𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲
𑁧𑁭. 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁄
[𑁫𑁨𑁧] 𑁧. 𑀢𑁂𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸
𑀯𑁂𑀲𑁆𑀲𑀦𑁆𑀢𑀭𑀁 ¶ ¶ ¶ 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀑𑀯𑀸𑀤𑀯𑀲𑁂𑀦 𑀓𑀣𑁂𑀲𑀺. 𑀢𑀜𑁆𑀳𑀺 𑀭𑀸𑀚𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀕𑀢𑀁 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀩𑁆𑀩𑀁, 𑀬𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀭𑀸𑀚𑀬𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀻’’𑀢𑀺 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 (𑀅. 𑀦𑀺. 𑁪.𑁭𑁦) 𑀆𑀕𑀢𑀲𑀼𑀢𑁆𑀢𑀦𑀬𑁂𑀦 𑀑𑀯𑀤𑀺𑀢𑁆𑀯𑀸 𑀅𑀕𑀢𑀺𑀕𑀫𑀦𑁂 𑀅𑀕𑀢𑀺𑀅𑀕𑀫𑀦𑁂 𑀘 𑀆𑀤𑀻𑀦𑀯𑀜𑁆𑀘 𑀆𑀦𑀺𑀲𑀁𑀲𑀜𑁆𑀘 𑀓𑀣𑁂𑀢𑁆𑀯𑀸 ‘‘𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑁋
‘𑀫𑀘𑁆𑀘𑀼𑀦𑀸 𑀲𑀗𑁆𑀕𑀭𑁄 𑀦𑀢𑁆𑀣𑀺, 𑀮𑀜𑁆𑀚𑀕𑁆𑀕𑀸𑀳𑁄 𑀦 𑀯𑀺𑀚𑁆𑀚𑀢𑀺;
𑀬𑀼𑀤𑁆𑀥𑀁 𑀦𑀢𑁆𑀣𑀺 𑀚𑀬𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀡𑀸’.
𑀢𑁂𑀲𑀁 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀅𑀜𑁆𑀜𑀸 𑀧𑀢𑀺𑀝𑁆𑀞𑀸 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀅𑀯𑀲𑁆𑀲𑀁 𑀧𑀳𑀸𑀢𑀩𑁆𑀩𑀁, 𑀦 𑀬𑀲𑀁 𑀦𑀺𑀲𑁆𑀲𑀸𑀬 𑀧𑀫𑀸𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀧𑁆𑀧𑀫𑀢𑁆𑀢𑁂𑀦𑁂𑀯 𑀳𑀼𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀩𑀼𑀤𑁆𑀥𑁂 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀽𑀭𑀬𑀫𑀸𑀦𑀸 𑀕𑀫𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀅𑀧𑀼𑀢𑁆𑀢𑀓𑁄 𑀅𑀳𑁄𑀲𑀺, 𑀧𑀢𑁆𑀣𑁂𑀦𑁆𑀢𑁄𑀧𑀺 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀦 𑀮𑀪𑀺. 𑀲𑁄 𑀏𑀓𑀤𑀺𑀯𑀲𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀲𑀪𑀸𑀕𑀁 𑀉𑀬𑁆𑀬𑀸𑀦𑁂 𑀓𑀻𑀴𑀺𑀢𑁆𑀯𑀸 𑀫𑀗𑁆𑀕𑀮𑀲𑀸𑀮𑀭𑀼𑀓𑁆𑀔𑀫𑀽𑀮𑁂 ¶ 𑀲𑀬𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀤𑁆𑀥𑁄 𑀲𑀸𑀮𑀭𑀼𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀢𑀢𑁆𑀣 𑀲𑀓𑀼𑀡𑀓𑀼𑀮𑀸𑀯𑀓𑀁 𑀧𑀲𑁆𑀲𑀺, 𑀲𑀳 𑀤𑀲𑁆𑀲𑀦𑁂𑀦𑁂𑀯𑀲𑁆𑀲 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀏𑀓𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑁂 𑀓𑀲𑁆𑀲𑀘𑀺 𑀅𑀢𑁆𑀣𑀺𑀢𑀁 𑀯𑀸 𑀦𑀢𑁆𑀣𑀺𑀢𑀁 𑀯𑀸 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣 ¶ 𑀢𑀻𑀡𑀺 𑀅𑀡𑁆𑀟𑀓𑀸𑀦𑀺 ¶ 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀢𑁂𑀦 𑀳𑀺 𑀏𑀢𑁂𑀲𑀁 𑀉𑀧𑀭𑀺 𑀦𑀸𑀲𑀯𑀸𑀢𑀁 𑀫𑀸 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀘𑀗𑁆𑀓𑁄𑀝𑀓𑁂 𑀓𑀧𑁆𑀧𑀸𑀲𑀧𑀺𑀘𑀼𑀁 𑀅𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀸𑀦𑀺 𑀅𑀡𑁆𑀟𑀓𑀸𑀦𑀺 𑀞𑀧𑁂𑀢𑁆𑀯𑀸 𑀲𑀡𑀺𑀓𑀁 𑀑𑀢𑀭𑀸𑀳𑀻’’𑀢𑀺 𑀑𑀢𑀸𑀭𑀸𑀧𑁂𑀢𑁆𑀯𑀸 𑀘𑀗𑁆𑀓𑁄𑀝𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀓𑀢𑀭𑀲𑀓𑀼𑀡𑀡𑁆𑀟𑀓𑀸𑀦𑀺 𑀦𑀸𑀫𑁂𑀢𑀸𑀦𑀻’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀢𑁂 ‘‘𑀫𑀬𑀁 𑀦 𑀚𑀸𑀦𑀸𑀫, 𑀦𑁂𑀲𑀸𑀤𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀦𑁂𑀲𑀸𑀤𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀦𑁂𑀲𑀸𑀤𑀸, ‘‘𑀫𑀳𑀸𑀭𑀸𑀚, 𑀢𑁂𑀲𑀼 𑀏𑀓𑀁 𑀉𑀮𑀽𑀓𑀅𑀡𑁆𑀟𑀁, 𑀏𑀓𑀁 𑀲𑀸𑀮𑀺𑀓𑀸𑀅𑀡𑁆𑀟𑀁, 𑀏𑀓𑀁 𑀲𑀼𑀯𑀓𑀅𑀡𑁆𑀟’’𑀦𑁆𑀢𑀺 𑀓𑀣𑀬𑀺𑀁𑀲𑀼. 𑀓𑀺𑀁 𑀧𑀦 𑀏𑀓𑀲𑁆𑀫𑀺𑀁 𑀓𑀼𑀮𑀸𑀯𑀓𑁂 𑀢𑀺𑀡𑁆𑀡𑀁 𑀲𑀓𑀼𑀡𑀺𑀓𑀸𑀦𑀁 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀆𑀫, 𑀤𑁂𑀯, 𑀧𑀭𑀺𑀧𑀦𑁆𑀣𑁂 𑀅𑀲𑀢𑀺 𑀲𑀼𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀦 𑀦𑀲𑁆𑀲𑀦𑁆𑀢𑀻𑀢𑀺. 𑀭𑀸𑀚𑀸 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀇𑀫𑁂 𑀫𑀫 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀸𑀦𑀺 𑀢𑀻𑀡𑀺 𑀅𑀡𑁆𑀟𑀸𑀦𑀺 𑀢𑀬𑁄 𑀅𑀫𑀘𑁆𑀘𑁂 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 ‘‘𑀇𑀫𑁂 𑀫𑀬𑁆𑀳𑀁 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀫𑀫𑀸𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀢𑀸𑀦𑀺 𑀲𑀸𑀥𑀼𑀓𑀁 𑀭𑀓𑁆𑀔𑀺𑀁𑀲𑀼.
𑀢𑁂𑀲𑀼 𑀧𑀞𑀫𑀁 𑀉𑀮𑀽𑀓𑀅𑀡𑁆𑀟𑀁 𑀪𑀺𑀚𑁆𑀚𑀺. 𑀅𑀫𑀘𑁆𑀘𑁄 𑀏𑀓𑀁 𑀦𑁂𑀲𑀸𑀤𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀇𑀢𑁆𑀣𑀺𑀪𑀸𑀯𑀁 𑀯𑀸 𑀧𑀼𑀭𑀺𑀲𑀪𑀸𑀯𑀁 𑀯𑀸 𑀚𑀸𑀦𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯, 𑀚𑀸𑀢𑁄’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀧𑀼𑀢𑁆𑀢𑀓𑀁 𑀫𑁂 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕, ‘𑀯𑁂𑀲𑁆𑀲𑀦𑁆𑀢𑀭𑁄’𑀢𑀺 𑀘𑀲𑁆𑀲 𑀦𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀸𑀮𑀺𑀓𑀸𑀅𑀡𑁆𑀟𑀁 𑀪𑀺𑀚𑁆𑀚𑀺. 𑀲𑁄𑀧𑀺 𑀅𑀫𑀘𑁆𑀘𑁄 𑀢𑀁 𑀦𑁂𑀲𑀸𑀤𑁂𑀦 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 ‘‘𑀇𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀥𑀻𑀢𑀸 𑀢𑁂, 𑀤𑁂𑀯, 𑀚𑀸𑀢𑀸’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲𑀧𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀥𑀻𑀢𑀭𑀁 ¶ 𑀫𑁂 𑀲𑀸𑀥𑀼𑀓𑀁 𑀧𑀝𑀺𑀚𑀕𑁆𑀕, ‘𑀓𑀼𑀡𑁆𑀟𑀮𑀺𑀦𑀻’𑀢𑀺 𑀘𑀲𑁆𑀲𑀸 𑀦𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀢𑀣𑀸 𑀅𑀓𑀸𑀲𑀺. 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀼𑀯𑀓𑀅𑀡𑁆𑀟𑀁 𑀪𑀺𑀚𑁆𑀚𑀺. 𑀲𑁄𑀧𑀺 𑀅𑀫𑀘𑁆𑀘𑁄 𑀦𑁂𑀲𑀸𑀤𑁂𑀦 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯, 𑀚𑀸𑀢𑁄’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀢𑀲𑁆𑀲𑀧𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀗𑁆𑀕𑀮𑀁 𑀓𑀢𑁆𑀯𑀸 ‘𑀚𑀫𑁆𑀩𑀼𑀓𑁄’𑀢𑀺𑀲𑁆𑀲 𑀦𑀸𑀫𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀢𑀣𑀸 𑀅𑀓𑀸𑀲𑀺. 𑀢𑁂 𑀢𑀬𑁄𑀧𑀺 𑀲𑀓𑀼𑀡𑀸 𑀢𑀺𑀡𑁆𑀡𑀁 𑀅𑀫𑀘𑁆𑀘𑀸𑀦𑀁 𑀕𑁂𑀳𑁂𑀲𑀼 𑀭𑀸𑀚𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦𑁂𑀯 𑀯𑀟𑁆𑀠𑀦𑁆𑀢𑀺. 𑀭𑀸𑀚𑀸 ‘‘𑀫𑀫 𑀧𑀼𑀢𑁆𑀢𑁄, 𑀫𑀫 𑀥𑀻𑀢𑀸’’𑀢𑀺 𑀯𑁄𑀳𑀭𑀢𑀺. 𑀅𑀣𑀲𑁆𑀲 𑀅𑀫𑀘𑁆𑀘𑀸 𑀅𑀜𑁆𑀜𑀫𑀜𑁆𑀜𑀁 𑀅𑀯𑀳𑀲𑀦𑁆𑀢𑀺 ‘‘𑀧𑀲𑁆𑀲𑀣, 𑀪𑁄, 𑀭𑀜𑁆𑀜𑁄 ¶ 𑀓𑀺𑀭𑀺𑀬𑀁, 𑀢𑀺𑀭𑀘𑁆𑀙𑀸𑀦𑀕𑀢𑁂𑀧𑀺 ‘𑀧𑀼𑀢𑁆𑀢𑁄 𑀫𑁂, 𑀥𑀻𑀢𑀸 𑀫𑁂’𑀢𑀺 𑀯𑀤𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀅𑀫𑀘𑁆𑀘𑀸 𑀏𑀢𑁂𑀲𑀁 𑀫𑀫 𑀧𑀼𑀢𑁆𑀢𑀸𑀦𑀁 𑀧𑀜𑁆𑀜𑀸𑀲𑀫𑁆𑀧𑀤𑀁 𑀦 𑀚𑀸𑀦𑀦𑁆𑀢𑀺, 𑀧𑀸𑀓𑀝𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑁂𑀓𑀁 𑀅𑀫𑀘𑁆𑀘𑀁 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀢𑀼𑀫𑁆𑀳𑀸𑀓𑀁 𑀧𑀺𑀢𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀓𑀤𑀸 𑀓𑀺𑀭 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀢𑀽’’𑀢𑀺. 𑀲𑁄 𑀅𑀫𑀘𑁆𑀘𑁄 𑀕𑀦𑁆𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀁 ¶ 𑀯𑀦𑁆𑀤𑀺𑀢𑁆𑀯𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 𑀅𑀢𑁆𑀢𑀦𑁄 𑀧𑀝𑀺𑀚𑀕𑁆𑀕𑀓𑀁 𑀅𑀫𑀘𑁆𑀘𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀺𑀭 𑀧𑀺𑀢𑀸 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀇𑀥𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀤𑀸 𑀆𑀕𑀘𑁆𑀙𑀢𑀽’’𑀢𑀺 𑀧𑀼𑀘𑁆𑀙𑀺. 𑀅𑀫𑀘𑁆𑀘𑁄 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀯 𑀧𑀺𑀢𑀸 𑀆𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 ‘‘𑀧𑀺𑀢𑀸 𑀫𑁂 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀘𑁆𑀙𑀢𑀽’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀯𑁂𑀲𑁆𑀲𑀦𑁆𑀢𑀭𑁄 𑀭𑀜𑁆𑀜𑁄 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺, 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀸𑀭𑀸𑀦𑀫𑁆𑀧𑀺 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. 𑀭𑀸𑀚𑀸 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑀲𑁆𑀲 𑀕𑁂𑀳𑁂 𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀓𑀁 𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑀫𑀚𑁆𑀛𑁂 𑀫𑀳𑀸𑀚𑀦𑀧𑀭𑀺𑀯𑀸𑀭𑁄 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀯𑁂𑀲𑁆𑀲𑀦𑁆𑀢𑀭𑀁 ¶ 𑀆𑀦𑁂𑀢𑀽’’𑀢𑀺 𑀅𑀫𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀅𑀫𑀘𑁆𑀘𑁄 𑀯𑁂𑀲𑁆𑀲𑀦𑁆𑀢𑀭𑀁 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀦𑁂𑀲𑀺. 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑁄 𑀧𑀺𑀢𑀼 𑀅𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀢𑀭𑀸 𑀲𑀳 𑀓𑀻𑀴𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 𑀫𑀳𑀸𑀚𑀦𑀫𑀚𑁆𑀛𑁂 𑀭𑀸𑀚𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀯𑁂𑀲𑁆𑀲𑀦𑁆𑀢𑀭𑀁 𑀢𑀁 𑀧𑀼𑀘𑁆𑀙𑀸𑀫𑀺, 𑀲𑀓𑀼𑀡 𑀪𑀤𑁆𑀤𑀫𑀢𑁆𑀣𑀼 𑀢𑁂;
𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁂𑀦, 𑀓𑀺𑀁 𑀲𑀼 𑀓𑀺𑀘𑁆𑀘𑀁 𑀓𑀢𑀁 𑀯𑀭’’𑀦𑁆𑀢𑀺.
𑀢𑀢𑁆𑀣 𑀲𑀓𑀼𑀡𑀸𑀢𑀺 𑀢𑀁 𑀆𑀮𑀧𑀢𑀺. 𑀓𑀺𑀁 𑀲𑀽𑀢𑀺 𑀓𑀢𑀭𑀁 𑀓𑀺𑀘𑁆𑀘𑀁 𑀓𑀢𑀁 𑀯𑀭𑀁 𑀉𑀢𑁆𑀢𑀫𑀁 𑀳𑁄𑀢𑀺, 𑀓𑀣𑁂𑀳𑀺 𑀫𑁂, 𑀢𑀸𑀢, 𑀲𑀓𑀮𑀁 𑀭𑀸𑀚𑀥𑀫𑁆𑀫𑀦𑁆𑀢𑀺 𑀏𑀯𑀁 𑀓𑀺𑀭 𑀢𑀁 𑀲𑁄 𑀧𑀼𑀘𑁆𑀙𑀺.
𑀢𑀁 𑀲𑀼𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 𑀧𑀜𑁆𑀳𑀁 𑀅𑀓𑀣𑁂𑀢𑁆𑀯𑀸𑀯 𑀭𑀸𑀚𑀸𑀦𑀁 𑀢𑀸𑀯 𑀧𑀫𑀸𑀤𑁂𑀦 𑀘𑁄𑀤𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀘𑀺𑀭𑀲𑁆𑀲𑀁 𑀯𑀢 𑀫𑀁 𑀢𑀸𑀢𑁄, 𑀓𑀁𑀲𑁄 𑀩𑀸𑀭𑀸𑀡𑀲𑀺𑀕𑁆𑀕𑀳𑁄;
𑀧𑀫𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑀁 𑀫𑀁, 𑀧𑀺𑀢𑀸 𑀧𑀼𑀢𑁆𑀢𑀁 𑀅𑀘𑁄𑀤𑀬𑀻’’𑀢𑀺.
𑀢𑀢𑁆𑀣 ¶ 𑀢𑀸𑀢𑁄𑀢𑀺 𑀧𑀺𑀢𑀸. 𑀓𑀁𑀲𑁄𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀁. 𑀩𑀸𑀭𑀸𑀡𑀲𑀺𑀕𑁆𑀕𑀳𑁄𑀢𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀩𑀸𑀭𑀸𑀡𑀲𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀦𑁆𑀢𑁄. 𑀧𑀫𑀢𑁆𑀢𑁄𑀢𑀺 𑀏𑀯𑀭𑀽𑀧𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀧𑀜𑁆𑀳𑀲𑁆𑀲 𑀅𑀧𑀼𑀘𑁆𑀙𑀦𑁂𑀦 𑀧𑀫𑀢𑁆𑀢𑁄. 𑀅𑀧𑁆𑀧𑀫𑀢𑁆𑀢𑀁 𑀫𑀦𑁆𑀢𑀺 𑀲𑀻𑀮𑀸𑀤𑀺𑀕𑀼𑀡𑀬𑁄𑀕𑁂𑀦 𑀫𑀁 𑀅𑀧𑁆𑀧𑀫𑀢𑁆𑀢𑀁. 𑀧𑀺𑀢𑀸𑀢𑀺 𑀧𑁄𑀲𑀓𑀧𑀺𑀢𑀸. 𑀅𑀘𑁄𑀤𑀬𑀻𑀢𑀺 𑀅𑀫𑀘𑁆𑀘𑁂𑀳𑀺 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀧𑀼𑀢𑁆𑀢𑁂 𑀓𑀢𑁆𑀯𑀸 𑀯𑁄𑀳𑀭𑀢𑀻’’𑀢𑀺 𑀅𑀯𑀳𑀲𑀺𑀬𑀫𑀸𑀦𑁄 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸 𑀘𑀺𑀭𑀲𑁆𑀲𑀁 𑀅𑀚𑁆𑀚 𑀘𑁄𑀤𑁂𑀲𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺 𑀯𑀤𑀢𑀺.
𑀏𑀯𑀁 ¶ 𑀲𑁄 𑀇𑀫𑀸𑀬 𑀕𑀸𑀣𑀸𑀬 𑀘𑁄𑀤𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀭𑀸𑀚𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀆𑀳 𑁋
‘‘𑀧𑀞𑀫𑁂𑀦𑁂𑀯 𑀯𑀺𑀢𑀣𑀁, 𑀓𑁄𑀥𑀁 𑀳𑀸𑀲𑀁 𑀦𑀺𑀯𑀸𑀭𑀬𑁂;
𑀢𑀢𑁄 𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀬𑁆𑀬, 𑀢𑀁 𑀯𑀢𑀁 𑀆𑀳𑀼 𑀔𑀢𑁆𑀢𑀺𑀬.
‘‘𑀬𑀁 𑀢𑁆𑀯𑀁 𑀢𑀸𑀢 𑀢𑀧𑁄𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀓𑀢𑀫𑀲𑀁𑀲𑀬𑀁;
𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀬𑀁 𑀓𑀬𑀺𑀭𑀸, 𑀦 𑀢𑀁 𑀓𑀬𑀺𑀭𑀸 𑀢𑀢𑁄 𑀧𑀼𑀦.
‘‘𑀔𑀢𑁆𑀢𑀺𑀬𑀲𑁆𑀲 𑀧𑀫𑀢𑁆𑀢𑀲𑁆𑀲, 𑀭𑀝𑁆𑀞𑀲𑁆𑀫𑀺𑀁 𑀭𑀝𑁆𑀞𑀯𑀟𑁆𑀠𑀦;
𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀭𑀜𑁆𑀜𑁄 𑀢𑀁 𑀯𑀼𑀘𑁆𑀘𑀢𑁂 𑀅𑀖𑀁.
‘‘𑀲𑀺𑀭𑀻 𑀢𑀸𑀢 𑀅𑀮𑀓𑁆𑀔𑀻 𑀘, 𑀧𑀼𑀘𑁆𑀙𑀺𑀢𑀸 𑀏𑀢𑀤𑀩𑁆𑀭𑀯𑀼𑀁;
𑀉𑀝𑁆𑀞𑀸𑀦𑀯𑀻𑀭𑀺𑀬𑁂 𑀧𑁄𑀲𑁂, 𑀭𑀫𑀸𑀳𑀁 𑀅𑀦𑀼𑀲𑀽𑀬𑀓𑁂.
‘‘𑀉𑀲𑀽𑀬𑀓𑁂 ¶ 𑀤𑀼𑀳𑀤𑀬𑁂, 𑀧𑀼𑀭𑀺𑀲𑁂 𑀓𑀫𑁆𑀫𑀤𑀼𑀲𑁆𑀲𑀓𑁂;
𑀓𑀸𑀴𑀓𑀡𑁆𑀡𑀻 𑀫𑀳𑀸𑀭𑀸𑀚, 𑀭𑀫𑀢𑀺 𑀘𑀓𑁆𑀓𑀪𑀜𑁆𑀚𑀦𑀻.
‘‘𑀲𑁄 𑀢𑁆𑀯𑀁 𑀲𑀩𑁆𑀩𑁂 𑀲𑀼𑀳𑀤𑀬𑁄, 𑀲𑀩𑁆𑀩𑁂𑀲𑀁 𑀭𑀓𑁆𑀔𑀺𑀢𑁄 𑀪𑀯;
𑀅𑀮𑀓𑁆𑀔𑀺𑀁 𑀦𑀼𑀤 𑀫𑀳𑀸𑀭𑀸𑀚, 𑀮𑀓𑁆𑀔𑁆𑀬𑀸 𑀪𑀯 𑀦𑀺𑀯𑁂𑀲𑀦𑀁.
‘‘𑀲 𑀮𑀓𑁆𑀔𑀻𑀥𑀺𑀢𑀺𑀲𑀫𑁆𑀧𑀦𑁆𑀦𑁄, 𑀧𑀼𑀭𑀺𑀲𑁄 𑀳𑀺 𑀫𑀳𑀕𑁆𑀕𑀢𑁄;
𑀅𑀫𑀺𑀢𑁆𑀢𑀸𑀦𑀁 𑀓𑀸𑀲𑀺𑀧𑀢𑀺, 𑀫𑀽𑀮𑀁 𑀅𑀕𑁆𑀕𑀜𑁆𑀘 𑀙𑀺𑀦𑁆𑀤𑀢𑀺.
‘‘𑀲𑀓𑁆𑀓𑁄𑀧𑀺 𑀳𑀺 𑀪𑀽𑀢𑀧𑀢𑀺, 𑀉𑀝𑁆𑀞𑀸𑀦𑁂 𑀦𑀧𑁆𑀧𑀫𑀚𑁆𑀚𑀢𑀺;
𑀲 𑀓𑀮𑁆𑀬𑀸𑀡𑁂 𑀥𑀺𑀢𑀺𑀁 𑀓𑀢𑁆𑀯𑀸, 𑀉𑀝𑁆𑀞𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄.
‘‘𑀕𑀦𑁆𑀥𑀩𑁆𑀩𑀸 ¶ 𑀧𑀺𑀢𑀭𑁄 𑀤𑁂𑀯𑀸, 𑀲𑀸𑀚𑀻𑀯𑀸 𑀳𑁄𑀦𑁆𑀢𑀺 𑀢𑀸𑀤𑀺𑀦𑁄;
𑀉𑀝𑁆𑀞𑀸𑀳𑀢𑁄 𑀅𑀧𑁆𑀧𑀫𑀚𑁆𑀚𑀢𑁄, 𑀅𑀦𑀼𑀢𑀺𑀝𑁆𑀞𑀦𑁆𑀢𑀺 𑀤𑁂𑀯𑀢𑀸.
‘‘𑀲𑁄 ¶ 𑀅𑀧𑁆𑀧𑀫𑀢𑁆𑀢𑁄 𑀅𑀓𑁆𑀓𑀼𑀤𑁆𑀥𑁄, 𑀢𑀸𑀢 𑀓𑀺𑀘𑁆𑀘𑀸𑀦𑀺 𑀓𑀸𑀭𑀬;
𑀯𑀸𑀬𑀫𑀲𑁆𑀲𑀼 𑀘 𑀓𑀺𑀘𑁆𑀘𑁂𑀲𑀼, 𑀦𑀸𑀮𑀲𑁄 𑀯𑀺𑀦𑁆𑀤𑀢𑁂 𑀲𑀼𑀔𑀁.
‘‘𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸, 𑀏𑀲𑀸𑀯 𑀅𑀦𑀼𑀲𑀸𑀲𑀦𑀻;
𑀅𑀮𑀁 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑀸𑀦𑀁 𑀤𑀼𑀔𑀸𑀬 𑀘𑀸’’𑀢𑀺.
𑀢𑀢𑁆𑀣 𑀧𑀞𑀫𑁂𑀦𑁂𑀯 𑀯𑀺𑀢𑀣𑀦𑁆𑀢𑀺, 𑀢𑀸𑀢, 𑀭𑀸𑀚𑀸 𑀦𑀸𑀫 𑀆𑀤𑀺𑀢𑁄𑀯 𑀫𑀼𑀲𑀸𑀯𑀸𑀤𑀁 𑀦𑀺𑀯𑀸𑀭𑀬𑁂. 𑀫𑀼𑀲𑀸𑀯𑀸𑀤𑀺𑀦𑁄 𑀳𑀺 𑀭𑀜𑁆𑀜𑁄 𑀭𑀝𑁆𑀞𑀁 𑀦𑀺𑀭𑁄𑀚𑀁 𑀳𑁄𑀢𑀺, 𑀧𑀣𑀯𑀺𑀬𑀸 𑀑𑀚𑀸 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀢𑁄 𑀲𑀢𑁆𑀢𑀭𑀢𑀦𑀫𑀢𑁆𑀢𑀁 𑀳𑁂𑀝𑁆𑀞𑀸 𑀪𑀲𑁆𑀲𑀢𑀺, 𑀢𑀢𑁄 𑀆𑀳𑀸𑀭𑁂 𑀯𑀸 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀯𑀸 𑀑𑀲𑀥𑁂𑀲𑀼 𑀑𑀚𑀸 𑀦 𑀳𑁄𑀢𑀺. 𑀦𑀺𑀭𑁄𑀚𑀸𑀳𑀸𑀭𑀪𑁄𑀚𑀦𑀸 𑀫𑀦𑀼𑀲𑁆𑀲𑀸 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺, 𑀭𑀝𑁆𑀞𑁂 𑀣𑀮𑀚𑀮𑀧𑀣𑁂𑀲𑀼 𑀆𑀬𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀭𑀸𑀚𑀸𑀦𑁄 𑀤𑀼𑀕𑁆𑀕𑀢𑀸 𑀳𑁄𑀦𑁆𑀢𑀺. 𑀢𑁂 𑀲𑁂𑀯𑀓𑁂 𑀲𑀗𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀲𑀗𑁆𑀕𑀳𑀺𑀢𑀸 𑀲𑁂𑀯𑀓𑀸 𑀭𑀸𑀚𑀸𑀦𑀁 𑀕𑀭𑀼𑀘𑀺𑀢𑁆𑀢𑁂𑀦 𑀦 𑀑𑀮𑁄𑀓𑁂𑀦𑁆𑀢𑀺. 𑀏𑀯𑀁, 𑀢𑀸𑀢, 𑀫𑀼𑀲𑀸𑀯𑀸𑀤𑁄 𑀦𑀸𑀫𑁂𑀲 𑀦𑀺𑀭𑁄𑀚𑁄, 𑀦 𑀲𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀓𑀸𑀢𑀩𑁆𑀩𑁄, 𑀲𑀘𑁆𑀘𑀁 𑀧𑀦 𑀲𑀸𑀤𑀼𑀢𑀭𑀁 𑀭𑀲𑀸𑀦𑀦𑁆𑀢𑀺 𑀢𑀤𑁂𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 𑀫𑀼𑀲𑀸𑀯𑀸𑀤𑁄 𑀦𑀸𑀫 𑀕𑀼𑀡𑀧𑀭𑀺𑀥𑀁𑀲𑀓𑁄 𑀯𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁄, 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀅𑀯𑀻𑀘𑀺𑀧𑀭𑀸𑀬𑀡𑀁 𑀓𑀭𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀥𑀫𑁆𑀫𑁄 𑀳𑀯𑁂 𑀳𑀢𑁄 𑀳𑀦𑁆𑀢𑀻’’𑀢𑀺 𑀘𑁂𑀢𑀺𑀬𑀚𑀸𑀢𑀓𑀁 (𑀚𑀸. 𑁧.𑁮.𑁪𑁫 𑀆𑀤𑀬𑁄) 𑀓𑀣𑁂𑀢𑀩𑁆𑀩𑀁.
𑀓𑁄𑀥𑀦𑁆𑀢𑀺, 𑀢𑀸𑀢, 𑀭𑀸𑀚𑀸 𑀦𑀸𑀫 𑀧𑀞𑀫𑀫𑁂𑀯 𑀓𑀼𑀚𑁆𑀛𑀦𑀮𑀓𑁆𑀔𑀡𑀁 𑀓𑁄𑀥𑀫𑁆𑀧𑀺 𑀦𑀺𑀯𑀸𑀭𑁂𑀬𑁆𑀬. 𑀢𑀸𑀢, 𑀅𑀜𑁆𑀜𑁂𑀲𑀜𑁆𑀳𑀺 𑀓𑁄𑀥𑁄 𑀔𑀺𑀧𑁆𑀧𑀁 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀺, 𑀭𑀸𑀚𑀽𑀦𑀁 𑀧𑀸𑀧𑀼𑀡𑀸𑀢𑀺. 𑀭𑀸𑀚𑀸𑀦𑁄 𑀦𑀸𑀫 𑀯𑀸𑀘𑀸𑀯𑀼𑀥𑀸 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑀫𑀢𑁆𑀢𑁂𑀦𑀸𑀧𑀺 𑀧𑀭𑀁 𑀯𑀺𑀦𑀸𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀭𑀜𑁆𑀜𑀸 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀢𑀺𑀭𑁂𑀓𑀢𑀭𑀁 𑀦𑀺𑀓𑁆𑀓𑁄𑀥𑁂𑀦 𑀪𑀯𑀺𑀢𑀩𑁆𑀩𑀁, 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀲𑀫𑁆𑀧𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀸𑀢, 𑀅𑀢𑀺𑀓𑁄𑀥𑀦𑁄 𑀦𑀸𑀫 𑀭𑀸𑀚𑀸 𑀉𑀧𑁆𑀧𑀦𑁆𑀦𑀁 𑀬𑀲𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓- (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀸𑀦𑀺 (𑀚𑀸. 𑁧.𑁫.𑁪𑁪 𑀆𑀤𑀬𑁄) 𑀓𑀣𑁂𑀢𑀩𑁆𑀩𑀸𑀦𑀺. 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀲𑁆𑀫𑀺𑀜𑁆𑀳𑀺 𑀫𑀳𑀸𑀧𑀢𑀸𑀧𑀦𑁄 𑀦𑀸𑀫 𑀭𑀸𑀚𑀸 𑀧𑀼𑀢𑁆𑀢𑀁 𑀖𑀸𑀢𑁂𑀢𑁆𑀯𑀸 ¶ 𑀧𑀼𑀢𑁆𑀢𑀲𑁄𑀓𑁂𑀦 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀫𑀢𑀸𑀬 𑀤𑁂𑀯𑀺𑀬𑀸 𑀲𑀬𑀫𑁆𑀧𑀺 𑀤𑁂𑀯𑀺𑀁 𑀅𑀦𑀼𑀲𑁄𑀘𑀦𑁆𑀢𑁄 ¶ 𑀳𑀤𑀬𑁂𑀦 𑀨𑀮𑀺𑀢𑁂𑀦𑁂𑀯 𑀫𑀭𑀺. 𑀅𑀣 𑀢𑁂 𑀢𑀬𑁄𑀧𑀺 𑀏𑀓𑀆𑀴𑀸𑀳𑀦𑁂𑀯 𑀛𑀸𑀧𑁂𑀲𑀼𑀁. 𑀢𑀲𑁆𑀫𑀸 𑀭𑀜𑁆𑀜𑀸 𑀧𑀞𑀫𑀫𑁂𑀯 𑀫𑀼𑀲𑀸𑀯𑀸𑀤𑀁 𑀯𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀓𑁄𑀥𑁄 𑀯𑀚𑁆𑀚𑁂𑀢𑀩𑁆𑀩𑁄.
𑀳𑀸𑀲𑀦𑁆𑀢𑀺 𑀳𑀲𑁆𑀲𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀉𑀧𑁆𑀧𑀺𑀮𑀸𑀯𑀺𑀢𑀘𑀺𑀢𑁆𑀢𑀢𑀸𑀬 𑀓𑁂𑀴𑀺𑀲𑀻𑀮𑀢𑀁 𑀧𑀭𑀺𑀳𑀸𑀲𑀁 𑀦𑀺𑀯𑀸𑀭𑁂𑀬𑁆𑀬. 𑀢𑀸𑀢, 𑀭𑀜𑁆𑀜𑀸 𑀦𑀸𑀫 𑀓𑁂𑀴𑀺𑀲𑀻𑀮𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀅𑀧𑀭𑀧𑀢𑁆𑀢𑀺𑀬𑁂𑀦 𑀳𑀼𑀢𑁆𑀯𑀸 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑁂𑀯 𑀓𑀸𑀢𑀩𑁆𑀩𑀸𑀦𑀺. 𑀉𑀧𑁆𑀧𑀺𑀮𑀸𑀯𑀺𑀢𑀘𑀺𑀢𑁆𑀢𑁄 𑀳𑀺 𑀭𑀸𑀚𑀸 𑀅𑀢𑀼𑀮𑁂𑀢𑁆𑀯𑀸 ¶ 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀮𑀤𑁆𑀥𑀁 𑀬𑀲𑀁 𑀯𑀺𑀦𑀸𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀭𑀪𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄) 𑀧𑀼𑀭𑁄𑀳𑀺𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀤𑀡𑁆𑀟𑀓𑀺𑀭𑀜𑁆𑀜𑁄 𑀓𑀺𑀲𑀯𑀘𑁆𑀙𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀲𑀳 𑀭𑀝𑁆𑀞𑁂𑀦 𑀉𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀓𑀼𑀓𑁆𑀓𑀼𑀴𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁄 𑀘 𑀫𑀸𑀢𑀗𑁆𑀕𑀚𑀸𑀢𑀓𑁂 (𑀚𑀸. 𑁧.𑁧𑁫.𑁧 𑀆𑀤𑀬𑁄) 𑀫𑀚𑁆𑀛𑀭𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀫𑀸𑀢𑀗𑁆𑀕𑀢𑀸𑀧𑀲𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀲𑀳 𑀭𑀝𑁆𑀞𑁂𑀦 𑀉𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑁄 𑀘 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑁂 (𑀚𑀸. 𑁧.𑁧𑁦.𑁧𑁬𑁫 𑀆𑀤𑀬𑁄) 𑀤𑀲𑀪𑀸𑀢𑀺𑀓𑀭𑀸𑀚𑀤𑀸𑀭𑀓𑀸𑀦𑀁 𑀫𑁄𑀳𑀫𑀽𑀴𑁆𑀳𑀸𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀓𑀡𑁆𑀳𑀤𑀻𑀧𑀸𑀬𑀦𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀯𑀸𑀲𑀼𑀤𑁂𑀯𑀓𑀼𑀮𑀲𑁆𑀲 𑀦𑀸𑀲𑀺𑀢𑀪𑀸𑀯𑁄 𑀘 𑀓𑀣𑁂𑀢𑀩𑁆𑀩𑁄.
𑀢𑀢𑁄 𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀬𑁆𑀬𑀸𑀢𑀺 𑀏𑀯𑀁, 𑀢𑀸𑀢, 𑀧𑀞𑀫𑀁 𑀫𑀼𑀲𑀸𑀯𑀸𑀤𑀁 𑀤𑀼𑀢𑀺𑀬𑀁 𑀓𑁄𑀥𑀁 𑀢𑀢𑀺𑀬𑀁 𑀅𑀥𑀫𑁆𑀫𑀳𑀸𑀲𑀁 𑀯𑀚𑁆𑀚𑁂𑀢𑁆𑀯𑀸 𑀢𑀢𑁄 𑀧𑀘𑁆𑀙𑀸 𑀭𑀸𑀚𑀸 𑀭𑀝𑁆𑀞𑀯𑀸𑀲𑀻𑀦𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀸𑀭𑁂𑀬𑁆𑀬. 𑀢𑀁 𑀯𑀢𑀁 𑀆𑀳𑀼 𑀔𑀢𑁆𑀢𑀺𑀬𑀸𑀢𑀺, 𑀔𑀢𑁆𑀢𑀺𑀬𑀫𑀳𑀸𑀭𑀸𑀚, 𑀬𑀁 𑀫𑀬𑀸 𑀯𑀼𑀢𑁆𑀢𑀁, 𑀏𑀢𑀁 𑀭𑀜𑁆𑀜𑁄 𑀯𑀢𑀲𑀫𑀸𑀤𑀸𑀦𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼.
𑀦 𑀢𑀁 𑀓𑀬𑀺𑀭𑀸𑀢𑀺 𑀬𑀁 𑀢𑀬𑀸 𑀭𑀸𑀕𑀸𑀤𑀺𑀯𑀲𑁂𑀦 𑀧𑀘𑁆𑀙𑀸 𑀢𑀸𑀧𑀓𑀭𑀁 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀓𑀢𑀢𑁄 𑀧𑀼𑀦 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀦 𑀓𑀬𑀺𑀭𑀸, 𑀫𑀸 𑀓𑀭𑁂𑀬𑁆𑀬𑀸𑀲𑀺, 𑀢𑀸𑀢𑀸𑀢𑀺. 𑀯𑀼𑀘𑁆𑀘𑀢𑁂𑀢𑀺 𑀢𑀁 𑀭𑀜𑁆𑀜𑁄 𑀅𑀖𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀓𑀣𑀬𑀺𑀁𑀲𑀼. 𑀲𑀺𑀭𑀻𑀢𑀺 𑀇𑀤𑀁 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑁄 𑀧𑀼𑀩𑁆𑀩𑁂 𑀩𑀸𑀭𑀸𑀡𑀲𑀺𑀬𑀁 𑀧𑀯𑀢𑁆𑀢𑀺𑀢𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀅𑀩𑁆𑀭𑀯𑀼𑀦𑁆𑀢𑀺 𑀲𑀼𑀘𑀺𑀧𑀭𑀺𑀯𑀸𑀭𑀲𑁂𑀝𑁆𑀞𑀺𑀦𑀸 𑀧𑀼𑀘𑁆𑀙𑀺𑀢𑀸 𑀓𑀣𑀬𑀺𑀁𑀲𑀼. 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀢𑀺 𑀬𑁄 𑀧𑁄𑀲𑁄 𑀉𑀝𑁆𑀞𑀸𑀦𑁂 𑀯𑀻𑀭𑀺𑀬𑁂 𑀘 𑀧𑀢𑀺𑀝𑁆𑀞𑀺𑀢𑁄, 𑀦 𑀘 𑀧𑀭𑁂𑀲𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀉𑀲𑀽𑀬𑀢𑀺, 𑀢𑀲𑁆𑀫𑀺𑀁 𑀅𑀳𑀁 𑀅𑀪𑀺𑀭𑀫𑀸𑀫𑀻𑀢𑀺 𑀆𑀳. 𑀏𑀯𑀁 𑀢𑀸𑀯 𑀢𑀸𑀢 𑀲𑀺𑀭𑀻 𑀓𑀣𑁂𑀲𑀺. 𑀉𑀲𑀽𑀬𑀓𑁂𑀢𑀺 𑀅𑀮𑀓𑁆𑀔𑀻 𑀧𑀦, 𑀢𑀸𑀢, 𑀧𑀼𑀘𑁆𑀙𑀺𑀢𑀸 𑀅𑀳𑀁 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀓𑁂 𑀤𑀼𑀳𑀤𑀬𑁂 𑀤𑀼𑀘𑀺𑀢𑁆𑀢𑁂 𑀓𑀮𑁆𑀬𑀸𑀡𑀓𑀫𑁆𑀫𑀤𑀽𑀲𑀓𑁂 𑀬𑁄 𑀓𑀮𑁆𑀬𑀸𑀡𑀓𑀫𑁆𑀫𑀁 𑀤𑀼𑀲𑁆𑀲𑀦𑁆𑀢𑁄 ¶ 𑀅𑀧𑁆𑀧𑀺𑀬𑀸𑀬𑀦𑁆𑀢𑁄 𑀅𑀝𑁆𑀝𑀻𑀬𑀦𑁆𑀢𑁄 𑀦 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀅𑀪𑀺𑀭𑀫𑀸𑀫𑀻𑀢𑀺 𑀆𑀳. 𑀏𑀯𑀁 𑀲𑀸 𑀓𑀸𑀴𑀓𑀡𑁆𑀡𑀻, 𑀫𑀳𑀸𑀭𑀸𑀚, 𑀭𑀫𑀢𑀺 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀦𑁄 𑀓𑀼𑀲𑀮𑀘𑀓𑁆𑀓𑀲𑁆𑀲 𑀪𑀜𑁆𑀚𑀦𑀻.
𑀲𑀼𑀳𑀤𑀬𑁄𑀢𑀺 𑀲𑀼𑀦𑁆𑀤𑀭𑀘𑀺𑀢𑁆𑀢𑁄 𑀳𑀺𑀢𑀘𑀺𑀢𑁆𑀢𑀓𑁄. 𑀦𑀼𑀤𑀸𑀢𑀺 𑀦𑀻𑀳𑀭. 𑀦𑀺𑀯𑁂𑀲𑀦𑀦𑁆𑀢𑀺 𑀮𑀓𑁆𑀔𑀺𑀬𑀸 𑀧𑀦 𑀦𑀺𑀯𑁂𑀲𑀦𑀁 𑀪𑀯 𑀧𑀢𑀺𑀝𑁆𑀞𑀸 𑀳𑁄𑀳𑀺. 𑀲 𑀮𑀓𑁆𑀔𑀻𑀥𑀺𑀢𑀺𑀲𑀫𑁆𑀧𑀦𑁆𑀦𑁄𑀢𑀺, 𑀫𑀳𑀸𑀭𑀸𑀚, 𑀓𑀸𑀲𑀺𑀧𑀢𑀺 𑀲𑁄 𑀧𑀼𑀭𑀺𑀲𑁄 𑀧𑀜𑁆𑀜𑀸𑀬 𑀘𑁂𑀯 𑀯𑀻𑀭𑀺𑀬𑁂𑀦 𑀘 𑀲𑀫𑁆𑀧𑀦𑁆𑀦𑁄. 𑀫𑀳𑀕𑁆𑀕𑀢𑁄𑀢𑀺 𑀫𑀳𑀚𑁆𑀛𑀸𑀲𑀬𑁄 𑀘𑁄𑀭𑀸𑀦𑀁 𑀧𑀘𑁆𑀘𑀬𑀪𑀽𑀢𑁂 𑀕𑀡𑁆𑀳𑀦𑁆𑀢𑁄 𑀅𑀫𑀺𑀢𑁆𑀢𑀸𑀦𑀁 𑀫𑀽𑀮𑀁 𑀘𑁄𑀭𑁂 𑀕𑀡𑁆𑀳𑀦𑁆𑀢𑁄 𑀅𑀫𑀺𑀢𑁆𑀢𑀸𑀦𑀁 𑀅𑀕𑁆𑀕𑀁 𑀙𑀺𑀦𑁆𑀤𑀢𑀻𑀢𑀺 𑀯𑀤𑀢𑀺. 𑀲𑀓𑁆𑀓𑁄𑀢𑀺 ¶ 𑀇𑀦𑁆𑀤𑁄. 𑀪𑀽𑀢𑀧𑀢𑀻𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀉𑀝𑁆𑀞𑀸𑀦𑁂𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑁂. 𑀦𑀧𑁆𑀧𑀫𑀚𑁆𑀚𑀢𑀻𑀢𑀺 𑀦 𑀧𑀫𑀚𑁆𑀚𑀢𑀺, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀲 𑀓𑀮𑁆𑀬𑀸𑀡𑁂𑀢𑀺 𑀲𑁄 𑀤𑁂𑀯𑀭𑀸𑀚𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑁂 𑀫𑀦𑀁 𑀓𑀭𑁄𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀅𑀓𑀢𑁆𑀯𑀸 ¶ 𑀓𑀮𑁆𑀬𑀸𑀡𑁂 𑀧𑀼𑀜𑁆𑀜𑀓𑀫𑁆𑀫𑀲𑁆𑀫𑀺𑀜𑁆𑀜𑁂𑀯 𑀥𑀺𑀢𑀺𑀁 𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀉𑀝𑁆𑀞𑀸𑀦𑁂 𑀫𑀦𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀦 𑀓𑀮𑁆𑀬𑀸𑀡𑀓𑀫𑁆𑀫𑁂 𑀯𑀻𑀭𑀺𑀬𑀓𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀭𑀪𑀗𑁆𑀕𑀚𑀸𑀢𑀓𑁂 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀓𑀧𑀺𑀝𑁆𑀞𑀸𑀭𑀸𑀫𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀲𑁆𑀲 𑀲𑀼𑀢𑀪𑀸𑀯𑁄, 𑀫𑀳𑀸𑀓𑀡𑁆𑀳𑀚𑀸𑀢𑀓𑁂 (𑀚𑀸. 𑁧.𑁧𑁨.𑁬𑁧 𑀆𑀤𑀬𑁄) 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀚𑀦𑀁 𑀢𑀸𑀲𑁂𑀢𑁆𑀯𑀸 𑀑𑀲𑀓𑁆𑀓𑀦𑁆𑀢𑀲𑁆𑀲 𑀲𑀸𑀲𑀦𑀲𑁆𑀲 𑀧𑀯𑀢𑁆𑀢𑀺𑀢𑀪𑀸𑀯𑁄 𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.
𑀕𑀦𑁆𑀥𑀩𑁆𑀩𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀳𑁂𑀝𑁆𑀞𑀸 𑀘𑀢𑀼𑀬𑁄𑀦𑀺𑀓𑀸 𑀤𑁂𑀯𑀸, 𑀘𑀢𑀼𑀬𑁄𑀦𑀺𑀓𑀢𑁆𑀢𑀸𑀬𑁂𑀯 𑀓𑀺𑀭 𑀢𑁂 𑀕𑀦𑁆𑀥𑀩𑁆𑀩𑀸 𑀦𑀸𑀫 𑀚𑀸𑀢𑀸. 𑀧𑀺𑀢𑀭𑁄𑀢𑀺 𑀩𑁆𑀭𑀳𑁆𑀫𑀸𑀦𑁄. 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀯𑀲𑁂𑀦 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀢𑀸𑀤𑀺𑀦𑁄𑀢𑀺 𑀢𑀣𑀸𑀯𑀺𑀥𑀲𑁆𑀲 𑀓𑀼𑀲𑀮𑀸𑀪𑀺𑀭𑀢𑀲𑁆𑀲 𑀭𑀜𑁆𑀜𑁄. 𑀲𑀸𑀚𑀻𑀯𑀸 𑀳𑁄𑀦𑁆𑀢𑀻𑀢𑀺 𑀲𑀫𑀸𑀦𑀚𑀻𑀯𑀺𑀓𑀸 𑀉𑀧𑀚𑀻𑀯𑀺𑀢𑀩𑁆𑀩𑀸. 𑀢𑀸𑀤𑀺𑀲𑀸 𑀳𑀺 𑀭𑀸𑀚𑀸𑀦𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀤𑁂𑀯𑀢𑀸𑀦𑀁 𑀧𑀢𑁆𑀢𑀺𑀁 𑀤𑁂𑀦𑁆𑀢𑀺, 𑀢𑀸 𑀢𑀁 𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀺𑀩𑁆𑀩𑀬𑀲𑁂𑀦 𑀯𑀟𑁆𑀠𑀦𑁆𑀢𑀺. 𑀅𑀦𑀼𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑀸𑀤𑀺𑀲𑀲𑁆𑀲 𑀭𑀜𑁆𑀜𑁄 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀫𑀸𑀤𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀤𑁂𑀯𑀢𑀸 𑀅𑀦𑀼𑀢𑀺𑀝𑁆𑀞𑀦𑁆𑀢𑀺 𑀅𑀦𑀼𑀕𑀘𑁆𑀙𑀦𑁆𑀢𑀺, 𑀥𑀫𑁆𑀫𑀺𑀓𑀁 𑀭𑀓𑁆𑀔𑀁 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.
𑀲𑁄𑀢𑀺 𑀲𑁄 𑀢𑁆𑀯𑀁. 𑀯𑀸𑀬𑀫𑀲𑁆𑀲𑀽𑀢𑀺 𑀢𑀸𑀦𑀺 𑀭𑀝𑁆𑀞𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁄 𑀢𑀼𑀮𑀦𑀯𑀲𑁂𑀦 𑀢𑀻𑀭𑀡𑀯𑀲𑁂𑀦 𑀧𑀘𑁆𑀘𑀓𑁆𑀔𑀓𑀫𑁆𑀫𑀯𑀲𑁂𑀦 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀯𑀻𑀭𑀺𑀬𑀁 𑀓𑀭𑀲𑁆𑀲𑀼. 𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸𑀢𑀺, 𑀢𑀸𑀢, 𑀬𑀁 𑀫𑀁 𑀢𑁆𑀯𑀁 𑀓𑀺𑀁𑀲𑀼 𑀓𑀺𑀘𑁆𑀘𑀁 𑀓𑀢𑀁 𑀯𑀭𑀦𑁆𑀢𑀺 ¶ 𑀧𑀼𑀘𑁆𑀙𑀺, 𑀢𑀢𑁆𑀣 𑀢𑀯 𑀧𑀜𑁆𑀳𑁂𑀬𑁂𑀯 𑀏𑀢𑁂 𑀫𑀬𑀸 ‘‘𑀧𑀞𑀫𑁂𑀦𑁂𑀯 𑀯𑀺𑀢𑀣’’𑀦𑁆𑀢𑀺𑀆𑀤𑀬𑁄 𑀯𑀼𑀢𑁆𑀢𑀸, 𑀏𑀢𑁂 𑀯𑀢𑁆𑀢𑀧𑀤𑀸 𑀯𑀢𑁆𑀢𑀓𑁄𑀝𑁆𑀞𑀸𑀲𑀸, 𑀏𑀯𑀁 𑀢𑀢𑁆𑀣 𑀯𑀢𑁆𑀢𑀲𑁆𑀲𑀼. 𑀏𑀲𑀸𑀢𑀺 𑀬𑀸 𑀢𑁂 𑀫𑀬𑀸 𑀓𑀣𑀺𑀢𑀸, 𑀏𑀲𑀸𑀯 𑀢𑀯 𑀅𑀦𑀼𑀲𑀸𑀲𑀦𑀻. 𑀅𑀮𑀦𑁆𑀢𑀺 𑀏𑀯𑀁 𑀯𑀢𑁆𑀢𑀫𑀸𑀦𑁄 𑀳𑀺 𑀭𑀸𑀚𑀸 𑀅𑀢𑁆𑀢𑀦𑁄 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑀸𑀦𑀜𑁆𑀘 𑀤𑀼𑀓𑁆𑀔𑀸𑀬 𑀅𑀮𑀁 𑀧𑀭𑀺𑀬𑀢𑁆𑀢𑁄 𑀲𑀫𑀢𑁆𑀣𑁄𑀢𑀺.
𑀏𑀯𑀁 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑁂𑀦 𑀏𑀓𑀸𑀬 𑀕𑀸𑀣𑀸𑀬 𑀭𑀜𑁆𑀜𑁄 𑀧𑀫𑀸𑀤𑀁 𑀘𑁄𑀤𑁂𑀢𑁆𑀯𑀸 𑀏𑀓𑀸𑀤𑀲𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑁂 𑀓𑀣𑀺𑀢𑁂 ‘‘𑀩𑀼𑀤𑁆𑀥𑀮𑀻𑀴𑀸𑀬 𑀧𑀜𑁆𑀳𑁄 𑀓𑀣𑀺𑀢𑁄’’𑀢𑀺 𑀫𑀳𑀸𑀚𑀦𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀲𑀸𑀥𑀼𑀓𑀸𑀭𑀲𑀢𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑁄𑀦𑁆𑀢𑁄! 𑀅𑀫𑀘𑁆𑀘𑀸 𑀫𑀫 𑀧𑀼𑀢𑁆𑀢𑁂𑀦 𑀯𑁂𑀲𑁆𑀲𑀦𑁆𑀢𑀭𑁂𑀦 𑀏𑀯𑀁 𑀓𑀣𑁂𑀦𑁆𑀢𑁂𑀦 𑀓𑁂𑀦 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀓𑀢’’𑀦𑁆𑀢𑀺. 𑀫𑀳𑀸𑀲𑁂𑀦𑀕𑀼𑀢𑁆𑀢𑁂𑀦, 𑀤𑁂𑀯𑀸𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀫𑀳𑀸𑀲𑁂𑀦𑀕𑀼𑀢𑁆𑀢𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑁂𑀲𑁆𑀲𑀦𑁆𑀢𑀭𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑁂𑀦𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀺𑀢𑁄 𑀧𑀺𑀢𑀼 𑀓𑀫𑁆𑀫𑀁 𑀅𑀓𑀸𑀲𑀻𑀢𑀺.
𑀯𑁂𑀲𑁆𑀲𑀦𑁆𑀢𑀭𑀧𑀜𑁆𑀳𑁄 𑀦𑀺𑀝𑁆𑀞𑀺𑀢𑁄.
𑀧𑀼𑀦 ¶ ¶ 𑀭𑀸𑀚𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀼𑀡𑁆𑀟𑀮𑀺𑀦𑀺𑀬𑀸 𑀲𑀦𑁆𑀢𑀺𑀓𑀁 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀫𑀡𑁆𑀟𑀧𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀼𑀡𑁆𑀟𑀮𑀺𑀦𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀺𑀦𑁆𑀦𑀁 𑀭𑀸𑀚𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀲𑀓𑁆𑀔𑀺𑀲𑀺 𑀢𑁆𑀯𑀁 𑀓𑀼𑀡𑁆𑀟𑀮𑀺𑀦𑀺, 𑀫𑀜𑁆𑀜𑀲𑀺 𑀔𑀢𑁆𑀢𑀩𑀦𑁆𑀥𑀼𑀦𑀺;
𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁂𑀦, 𑀓𑀺𑀁 𑀲𑀼 𑀓𑀺𑀘𑁆𑀘𑀁 𑀓𑀢𑀁 𑀯𑀭’’𑀦𑁆𑀢𑀺.
𑀢𑀢𑁆𑀣 𑀲𑀓𑁆𑀔𑀺𑀲𑀻𑀢𑀺 𑀫𑀬𑀸 𑀧𑀼𑀝𑁆𑀞𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀓𑀼𑀡𑁆𑀟𑀮𑀺𑀦𑀻𑀢𑀺 𑀢𑀲𑁆𑀲𑀸 𑀲𑀮𑀺𑀗𑁆𑀕𑀢𑁄 𑀆𑀕𑀢𑀦𑀸𑀫𑁂𑀦𑀸𑀮𑀧𑀢𑀺. 𑀢𑀲𑁆𑀲𑀸 𑀓𑀺𑀭 𑀤𑁆𑀯𑀻𑀲𑀼 𑀓𑀡𑁆𑀡𑀧𑀺𑀝𑁆𑀞𑁂𑀲𑀼 𑀓𑀼𑀡𑁆𑀟𑀮𑀲𑀡𑁆𑀞𑀸𑀦𑀸 𑀤𑁆𑀯𑁂 𑀮𑁂𑀔𑀸 𑀅𑀳𑁂𑀲𑀼𑀁, 𑀢𑁂𑀦𑀲𑁆𑀲𑀸 ‘‘𑀓𑀼𑀡𑁆𑀟𑀮𑀺𑀦𑀻’’𑀢𑀺 𑀦𑀸𑀫𑀁 𑀓𑀸𑀭𑁂𑀲𑀺. 𑀫𑀜𑁆𑀜𑀲𑀻𑀢𑀺 𑀚𑀸𑀦𑀺𑀲𑁆𑀲𑀲𑀺 𑀫𑀬𑀸 𑀧𑀼𑀝𑁆𑀞𑀧𑀜𑁆𑀳𑀲𑁆𑀲 𑀅𑀢𑁆𑀣𑀦𑁆𑀢𑀺. 𑀔𑀢𑁆𑀢𑀩𑀦𑁆𑀥𑀼𑀦𑀻𑀢𑀺 𑀔𑀢𑁆𑀢𑀲𑁆𑀲 𑀫𑀳𑀸𑀲𑁂𑀦𑀕𑀼𑀢𑁆𑀢𑀲𑁆𑀲 𑀪𑀕𑀺𑀦𑀺𑀪𑀸𑀯𑁂𑀦 𑀦𑀁 𑀏𑀯𑀁 𑀆𑀮𑀧𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀯𑁂𑀲𑁆𑀲𑀦𑁆𑀢𑀭𑀲𑀓𑀼𑀡𑀁 𑀏𑀯𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀇𑀫𑀫𑁂𑀯 𑀧𑀼𑀘𑁆𑀙𑀢𑀻𑀢𑀺? 𑀇𑀢𑁆𑀣𑀺𑀪𑀸𑀯𑁂𑀦. 𑀇𑀢𑁆𑀣𑀺𑀬𑁄 𑀳𑀺 𑀧𑀭𑀺𑀢𑁆𑀢𑀧𑀜𑁆𑀜𑀸, 𑀢𑀲𑁆𑀫𑀸 ‘‘𑀲𑀘𑁂 𑀲𑀓𑁆𑀓𑁄𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀦𑁄 𑀘𑁂, 𑀦 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀫𑀁𑀲𑀦𑀯𑀲𑁂𑀦 𑀏𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀜𑁆𑀜𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺.
𑀲𑀸 ¶ 𑀏𑀯𑀁 𑀭𑀜𑁆𑀜𑀸 𑀭𑀸𑀚𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑁂, ‘‘𑀢𑀸𑀢, 𑀢𑁆𑀯𑀁 𑀫𑀁 ‘𑀇𑀢𑁆𑀣𑀺𑀓𑀸 𑀦𑀸𑀫 𑀓𑀺𑀁 𑀓𑀣𑁂𑀲𑁆𑀲𑀢𑀻’𑀢𑀺 𑀯𑀻𑀫𑀁𑀲𑀲𑀺 𑀫𑀜𑁆𑀜𑁂, 𑀲𑀓𑀮𑀁 𑀢𑁂 𑀭𑀸𑀚𑀥𑀫𑁆𑀫𑀁 𑀤𑁆𑀯𑀻𑀲𑀼𑀬𑁂𑀯 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀤𑁆𑀯𑁂𑀯 𑀢𑀸𑀢 𑀧𑀤𑀓𑀸𑀦𑀺, 𑀬𑀢𑁆𑀣 𑀲𑀩𑁆𑀩𑀁 𑀧𑀢𑀺𑀝𑁆𑀞𑀺𑀢𑀁;
𑀅𑀮𑀤𑁆𑀥𑀲𑁆𑀲 𑀘 𑀬𑁄 𑀮𑀸𑀪𑁄, 𑀮𑀤𑁆𑀥𑀲𑁆𑀲 𑀘𑀸𑀦𑀼𑀭𑀓𑁆𑀔𑀡𑀸.
‘‘𑀅𑀫𑀘𑁆𑀘𑁂 𑀢𑀸𑀢 𑀚𑀸𑀦𑀸𑀳𑀺, 𑀥𑀻𑀭𑁂 𑀅𑀢𑁆𑀣𑀲𑁆𑀲 𑀓𑁄𑀯𑀺𑀤𑁂;
𑀅𑀦𑀓𑁆𑀔𑀸𑀓𑀺𑀢𑀯𑁂 𑀢𑀸𑀢, 𑀅𑀲𑁄𑀡𑁆𑀟𑁂 𑀅𑀯𑀺𑀦𑀸𑀲𑀓𑁂.
‘‘𑀬𑁄 𑀘 𑀢𑀁 𑀢𑀸𑀢 𑀭𑀓𑁆𑀔𑁂𑀬𑁆𑀬, 𑀥𑀦𑀁 𑀬𑀜𑁆𑀘𑁂𑀯 𑀢𑁂 𑀲𑀺𑀬𑀸;
𑀲𑀽𑀢𑁄𑀯 𑀭𑀣𑀁 𑀲𑀗𑁆𑀕𑀡𑁆𑀳𑁂, 𑀲𑁄 𑀢𑁂 𑀓𑀺𑀘𑁆𑀘𑀸𑀦𑀺 𑀓𑀸𑀭𑀬𑁂.
‘‘𑀲𑀼𑀲𑀗𑁆𑀕𑀳𑀺𑀢𑀦𑁆𑀢𑀚𑀦𑁄, 𑀲𑀬𑀁 𑀯𑀺𑀢𑁆𑀢𑀁 𑀅𑀯𑁂𑀓𑁆𑀔𑀺𑀬;
𑀦𑀺𑀥𑀺𑀜𑁆𑀘 𑀇𑀡𑀤𑀸𑀦𑀜𑁆𑀘, 𑀦 𑀓𑀭𑁂 𑀧𑀭𑀧𑀢𑁆𑀢𑀺𑀬𑀸.
‘‘𑀲𑀬𑀁 ¶ 𑀆𑀬𑀁 𑀯𑀬𑀁 𑀚𑀜𑁆𑀜𑀸, 𑀲𑀬𑀁 𑀚𑀜𑁆𑀜𑀸 𑀓𑀢𑀸𑀓𑀢𑀁;
𑀦𑀺𑀕𑁆𑀕𑀡𑁆𑀳𑁂 𑀦𑀺𑀕𑁆𑀕𑀳𑀸𑀭𑀳𑀁, 𑀧𑀕𑁆𑀕𑀡𑁆𑀳𑁂 𑀧𑀕𑁆𑀕𑀳𑀸𑀭𑀳𑀁.
‘‘𑀲𑀬𑀁 ¶ 𑀚𑀸𑀦𑀧𑀤𑀁 𑀅𑀢𑁆𑀣𑀁, 𑀅𑀦𑀼𑀲𑀸𑀲 𑀭𑀣𑁂𑀲𑀪;
𑀫𑀸 𑀢𑁂 𑀅𑀥𑀫𑁆𑀫𑀺𑀓𑀸 𑀬𑀼𑀢𑁆𑀢𑀸, 𑀥𑀦𑀁 𑀭𑀝𑁆𑀞𑀜𑁆𑀘 𑀦𑀸𑀲𑀬𑀼𑀁.
‘‘𑀫𑀸 𑀘 𑀯𑁂𑀕𑁂𑀦 𑀓𑀺𑀘𑁆𑀘𑀸𑀦𑀺, 𑀓𑀭𑁄𑀲𑀺 𑀓𑀸𑀭𑀬𑁂𑀲𑀺 𑀯𑀸;
𑀯𑁂𑀕𑀲𑀸 𑀳𑀺 𑀓𑀢𑀁 𑀓𑀫𑁆𑀫𑀁, 𑀫𑀦𑁆𑀤𑁄 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.
‘‘𑀫𑀸 𑀢𑁂 𑀅𑀥𑀺𑀲𑀭𑁂 𑀫𑀼𑀜𑁆𑀘, 𑀲𑀼𑀩𑀸𑀴𑁆𑀳𑀫𑀥𑀺𑀓𑁄𑀧𑀺𑀢𑀁;
𑀓𑁄𑀥𑀲𑀸 𑀳𑀺 𑀩𑀳𑀽 𑀨𑀻𑀢𑀸, 𑀓𑀼𑀮𑀸 𑀅𑀓𑀼𑀮𑀢𑀁 𑀕𑀢𑀸.
‘‘‘𑀫𑀸 𑀢𑀸𑀢 𑀇𑀲𑁆𑀲𑀭𑁄𑀫𑁆𑀳𑀻’𑀢𑀺, 𑀅𑀦𑀢𑁆𑀣𑀸𑀬 𑀧𑀢𑀸𑀭𑀬𑀺;
𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦𑀜𑁆𑀘, 𑀫𑀸 𑀢𑁂 𑀆𑀲𑀺 𑀤𑀼𑀔𑀼𑀤𑁆𑀭𑀬𑁄.
‘‘𑀅𑀧𑁂𑀢𑀮𑁄𑀫𑀳𑀁𑀲𑀲𑁆𑀲, 𑀭𑀜𑁆𑀜𑁄 𑀓𑀸𑀫𑀸𑀦𑀼𑀲𑀸𑀭𑀺𑀦𑁄;
𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀭𑀜𑁆𑀜𑁄 𑀢𑀁 𑀯𑀼𑀘𑁆𑀘𑀢𑁂 𑀅𑀖𑀁.
‘‘𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸, 𑀏𑀲𑀸𑀯 𑀅𑀦𑀼𑀲𑀸𑀲𑀦𑀻;
𑀤𑀓𑁆𑀔𑀲𑁆𑀲𑀼𑀤𑀸𑀦𑀺 𑀧𑀼𑀜𑁆𑀜𑀓𑀭𑁄, 𑀅𑀲𑁄𑀡𑁆𑀟𑁄 𑀅𑀯𑀺𑀦𑀸𑀲𑀓𑁄;
𑀲𑀻𑀮𑀯𑀸𑀲𑁆𑀲𑀼 𑀫𑀳𑀸𑀭𑀸𑀚, 𑀤𑀼𑀲𑁆𑀲𑀻𑀮𑁄 𑀯𑀺𑀦𑀺𑀧𑀸𑀢𑀺𑀓𑁄’’𑀢𑀺.
𑀢𑀢𑁆𑀣 ¶ 𑀧𑀤𑀓𑀸𑀦𑀻𑀢𑀺 𑀓𑀸𑀭𑀡𑀧𑀤𑀸𑀦𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀲𑀩𑁆𑀩𑀁 𑀅𑀢𑁆𑀣𑀚𑀸𑀢𑀁 𑀳𑀺𑀢𑀲𑀼𑀔𑀁 𑀧𑀢𑀺𑀝𑁆𑀞𑀺𑀢𑀁. 𑀅𑀮𑀤𑁆𑀥𑀲𑁆𑀲𑀸𑀢𑀺 𑀬𑁄 𑀘 𑀧𑀼𑀩𑁆𑀩𑁂 𑀅𑀮𑀤𑁆𑀥𑀲𑁆𑀲 𑀮𑀸𑀪𑀲𑁆𑀲 𑀮𑀸𑀪𑁄, 𑀬𑀸 𑀘 𑀮𑀤𑁆𑀥𑀲𑁆𑀲 𑀅𑀦𑀼𑀭𑀓𑁆𑀔𑀡𑀸. 𑀢𑀸𑀢, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀳𑀺 𑀮𑀸𑀪𑀲𑁆𑀲 𑀉𑀧𑁆𑀧𑀸𑀤𑀦𑀁 𑀦𑀸𑀫 𑀦 𑀪𑀸𑀭𑁄, 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦 𑀅𑀦𑀼𑀭𑀓𑁆𑀔𑀡𑀫𑁂𑀯 𑀪𑀸𑀭𑁄. 𑀏𑀓𑀘𑁆𑀘𑁄 𑀳𑀺 𑀬𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀧𑀺 𑀬𑀲𑁂 𑀧𑀫𑀢𑁆𑀢𑁄 𑀧𑀫𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀫𑀳𑀸𑀘𑁄𑀭𑁄 𑀳𑀼𑀢𑁆𑀯𑀸 𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑁄 𑀘𑀭𑀢𑀺. 𑀅𑀣 𑀦𑀁 𑀭𑀸𑀚𑀸𑀦𑁄 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺. 𑀅𑀣 𑀯𑀸 𑀉𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀲𑀼 𑀓𑀸𑀫𑀕𑀼𑀡𑁂𑀲𑀼 𑀧𑀫𑀢𑁆𑀢𑁄 𑀅𑀬𑁄𑀦𑀺𑀲𑁄 𑀥𑀦𑀁 𑀦𑀸𑀲𑁂𑀦𑁆𑀢𑁄 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑁂 𑀔𑀻𑀡𑁂 𑀓𑀧𑀡𑁄 𑀳𑀼𑀢𑁆𑀯𑀸 𑀘𑀻𑀭𑀓𑀯𑀲𑀦𑁄 𑀓𑀧𑀸𑀮𑀫𑀸𑀤𑀸𑀬 𑀘𑀭𑀢𑀺. 𑀧𑀩𑁆𑀩𑀚𑀺𑀢𑁄 𑀯𑀸 𑀧𑀦 𑀕𑀦𑁆𑀣𑀥𑀼𑀭𑀸𑀤𑀺𑀯𑀲𑁂𑀦 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀫𑀢𑁆𑀢𑁄 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀅𑀧𑀭𑁄 𑀧𑀞𑀫𑀛𑀸𑀦𑀸𑀤𑀻𑀦𑀺 ¶ 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺 𑀫𑀼𑀝𑁆𑀞𑀲𑁆𑀲𑀢𑀺𑀢𑀸𑀬 𑀢𑀣𑀸𑀭𑀽𑀧𑁂 𑀆𑀭𑀫𑁆𑀫𑀡𑁂 𑀩𑀚𑁆𑀛𑀺𑀢𑁆𑀯𑀸 𑀛𑀸𑀦𑀸 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀬𑀲𑀲𑁆𑀲 𑀯𑀸 𑀛𑀸𑀦𑀸𑀤𑀺𑀮𑀸𑀪𑀲𑁆𑀲 𑀯𑀸 𑀭𑀓𑁆𑀔𑀡𑀫𑁂𑀯 𑀤𑀼𑀓𑁆𑀓𑀭𑀁. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑀧𑀦 𑀤𑁂𑀯𑀤𑀢𑁆𑀢𑀲𑁆𑀲 𑀯𑀢𑁆𑀣𑀼 𑀘, 𑀫𑀼𑀤𑀼𑀮𑀓𑁆𑀔𑀡- (𑀚𑀸. 𑁧.𑁧.𑁬𑁬) 𑀮𑁄𑀫𑀲𑀓𑀲𑁆𑀲𑀧- (𑀚𑀸. 𑁧.𑁯.𑁬𑁦 𑀆𑀤𑀬𑁄) 𑀳𑀭𑀺𑀢𑀘𑀚𑀸𑀢𑀓- (𑀚𑀸. 𑁧.𑁯.𑁪𑁦 𑀆𑀤𑀬𑁄) 𑀲𑀗𑁆𑀓𑀧𑁆𑀧𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁧.𑁩.𑁧 𑀆𑀤𑀬𑁄) 𑀘 𑀓𑀣𑁂𑀢𑀩𑁆𑀩𑀸𑀦𑀺. 𑀏𑀓𑁄 𑀧𑀦 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑁆𑀧𑀫𑀸𑀤𑁂 𑀞𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑁄 𑀬𑀲𑁄 𑀲𑀼𑀓𑁆𑀓𑀧𑀓𑁆𑀔𑁂 𑀘𑀦𑁆𑀤𑁄 𑀯𑀺𑀬 𑀯𑀟𑁆𑀠𑀢𑀺, 𑀢𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀧𑁆𑀧𑀫𑀢𑁆𑀢𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀞𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀢𑀯 𑀉𑀧𑁆𑀧𑀦𑁆𑀦𑀁 𑀬𑀲𑀁 𑀅𑀦𑀼𑀭𑀓𑁆𑀔𑀸𑀳𑀻𑀢𑀺.
𑀚𑀸𑀦𑀸𑀳𑀻𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀸𑀤𑀻𑀦𑀁 𑀓𑀭𑀡𑀢𑁆𑀣𑀁 𑀉𑀧𑀥𑀸𑀭𑁂𑀳𑀺. 𑀅𑀦𑀓𑁆𑀔𑀸𑀓𑀺𑀢𑀯𑁂𑀢𑀺 𑀅𑀦𑀓𑁆𑀔𑁂 𑀅𑀓𑀺𑀢𑀯𑁂 𑀅𑀚𑀼𑀢𑀓𑀭𑁂 𑀘𑁂𑀯 𑀅𑀓𑁂𑀭𑀸𑀝𑀺𑀓𑁂 𑀘 ¶ . 𑀅𑀲𑁄𑀡𑁆𑀟𑁂𑀢𑀺 𑀧𑀽𑀯𑀲𑀼𑀭𑀸𑀕𑀦𑁆𑀥𑀫𑀸𑀮𑀸𑀲𑁄𑀡𑁆𑀟𑀪𑀸𑀯𑀭𑀳𑀺𑀢𑁂. 𑀅𑀯𑀺𑀦𑀸𑀲𑀓𑁂𑀢𑀺 𑀢𑀯 𑀲𑀦𑁆𑀢𑀓𑀸𑀦𑀁 𑀥𑀦𑀥𑀜𑁆𑀜𑀸𑀤𑀻𑀦𑀁 𑀅𑀯𑀺𑀦𑀸𑀲𑀓𑁂. 𑀬𑁄𑀢𑀺 𑀬𑁄 𑀅𑀫𑀘𑁆𑀘𑁄. 𑀬𑀜𑁆𑀘𑁂𑀯𑀸𑀢𑀺 𑀬𑀜𑁆𑀘 𑀢𑁂 𑀖𑀭𑁂 𑀥𑀦𑀁 𑀲𑀺𑀬𑀸, 𑀢𑀁 𑀭𑀓𑁆𑀔𑁂𑀬𑁆𑀬. 𑀲𑀽𑀢𑁄𑀯𑀸𑀢𑀺 𑀭𑀣𑀲𑀸𑀭𑀣𑀺 𑀯𑀺𑀬. 𑀬𑀣𑀸 𑀲𑀸𑀭𑀣𑀺 𑀯𑀺𑀲𑀫𑀫𑀕𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀅𑀲𑁆𑀲𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀭𑀣𑀁 𑀲𑀗𑁆𑀕𑀡𑁆𑀳𑁂𑀬𑁆𑀬, 𑀏𑀯𑀁 𑀬𑁄 𑀲𑀳 𑀪𑁄𑀕𑁂𑀳𑀺 𑀢𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀢𑁂 𑀅𑀫𑀘𑁆𑀘𑁄 𑀦𑀸𑀫 𑀢𑀸𑀤𑀺𑀲𑀁 𑀲𑀗𑁆𑀕𑀳𑁂𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀸𑀤𑀺𑀓𑀺𑀘𑁆𑀘𑀸𑀦𑀺 𑀓𑀸𑀭𑀬𑁂.
𑀲𑀼𑀲𑀗𑁆𑀕𑀳𑀺𑀢𑀦𑁆𑀢𑀚𑀦𑁄𑀢𑀺, 𑀢𑀸𑀢, 𑀬𑀲𑁆𑀲 𑀳𑀺 𑀭𑀜𑁆𑀜𑁄 𑀅𑀢𑁆𑀢𑀦𑁄 𑀅𑀦𑁆𑀢𑁄𑀚𑀦𑁄 𑀅𑀢𑁆𑀢𑀦𑁄 𑀯𑀮𑀜𑁆𑀚𑀦𑀓𑀧𑀭𑀺𑀚𑀦𑁄 𑀘 𑀤𑀸𑀦𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀸𑀤𑀻𑀦𑀺 𑀢𑁂𑀲𑀁 𑀅𑀲𑀗𑁆𑀕𑀳𑀺𑀢𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦 ¶ 𑀦𑀲𑁆𑀲𑀦𑁆𑀢𑀺, 𑀅𑀦𑁆𑀢𑁄𑀚𑀦𑀸 𑀩𑀳𑀺 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀲𑀼𑀝𑁆𑀞𑀼𑀲𑀗𑁆𑀕𑀳𑀺𑀢𑀅𑀦𑁆𑀢𑁄𑀚𑀦𑁄 𑀳𑀼𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀫𑁂 𑀯𑀺𑀢𑁆𑀢’’𑀦𑁆𑀢𑀺 𑀲𑀬𑀁 𑀅𑀢𑁆𑀢𑀦𑁄 𑀥𑀦𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀦𑀺𑀥𑀺𑀁 𑀦𑀺𑀥𑁂𑀫, 𑀅𑀲𑀼𑀓𑀲𑁆𑀲 𑀇𑀡𑀁 𑀤𑁂𑀫𑀸’’𑀢𑀺 𑀇𑀤𑀁 𑀉𑀪𑀬𑀫𑁆𑀧𑀺 𑀦 𑀓𑀭𑁂 𑀧𑀭𑀧𑀢𑁆𑀢𑀺𑀬𑀸, 𑀧𑀭𑀧𑀢𑁆𑀢𑀺𑀬𑀸𑀧𑀺 𑀢𑁆𑀯𑀁 𑀫𑀸 𑀓𑀭𑀺, 𑀲𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀫𑁂𑀯 𑀓𑀭𑁂𑀬𑁆𑀬𑀸𑀲𑀻𑀢𑀺 𑀯𑀤𑀢𑀺.
𑀆𑀬𑀁 𑀯𑀬𑀦𑁆𑀢𑀺 𑀢𑀢𑁄 𑀉𑀧𑁆𑀧𑀚𑁆𑀚𑀦𑀓𑀁 𑀆𑀬𑀜𑁆𑀘 𑀢𑁂𑀲𑀁 𑀢𑁂𑀲𑀁 𑀤𑀸𑀢𑀩𑁆𑀩𑀁 𑀯𑀬𑀜𑁆𑀘 𑀲𑀬𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀻𑀢𑀺. 𑀓𑀢𑀸𑀓𑀢𑀦𑁆𑀢𑀺 𑀲𑀗𑁆𑀕𑀸𑀫𑁂 𑀯𑀸 𑀦𑀯𑀓𑀫𑁆𑀫𑁂 𑀯𑀸 𑀅𑀜𑁆𑀜𑁂𑀲𑀼 𑀯𑀸 𑀓𑀺𑀘𑁆𑀘𑁂𑀲𑀼 ‘‘𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀫𑀬𑁆𑀳𑀁 𑀓𑀢𑀁, 𑀇𑀫𑀺𑀦𑀸 𑀦 𑀓𑀢’’𑀦𑁆𑀢𑀺 𑀏𑀢𑀫𑁆𑀧𑀺 𑀲𑀬𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀺, 𑀫𑀸 𑀧𑀭𑀧𑀢𑁆𑀢𑀺𑀬𑁄 𑀳𑁄𑀳𑀺. 𑀦𑀺𑀕𑁆𑀕𑀡𑁆𑀳𑁂𑀢𑀺, 𑀢𑀸𑀢, 𑀭𑀸𑀚𑀸 𑀦𑀸𑀫 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀓𑀸𑀭𑀓𑀁 𑀦𑀺𑀕𑁆𑀕𑀳𑀸𑀭𑀳𑀁 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑁄𑀭𑀸𑀡𑀓𑀭𑀸𑀚𑀽𑀳𑀺 𑀞𑀧𑀺𑀢𑀤𑀡𑁆𑀟𑀁 𑀑𑀮𑁄𑀓𑁂𑀢𑁆𑀯𑀸 𑀤𑁄𑀲𑀸𑀦𑀼𑀭𑀽𑀧𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀧𑀕𑁆𑀕𑀡𑁆𑀳𑁂𑀢𑀺 𑀬𑁄 𑀧𑀦 𑀧𑀕𑁆𑀕𑀳𑀸𑀭𑀳𑁄 𑀳𑁄𑀢𑀺, 𑀅𑀪𑀺𑀦𑁆𑀦𑀲𑁆𑀲 𑀯𑀸 𑀧𑀭𑀩𑀮𑀲𑁆𑀲 𑀪𑁂𑀤𑁂𑀢𑀸, 𑀪𑀺𑀦𑁆𑀦𑀲𑁆𑀲 𑀯𑀸 𑀲𑀓𑀩𑀮𑀲𑁆𑀲 𑀆𑀭𑀸𑀥𑀓𑁄, 𑀅𑀮𑀤𑁆𑀥𑀲𑁆𑀲 𑀯𑀸 𑀭𑀚𑁆𑀚𑀲𑁆𑀲 𑀆𑀳𑀭𑀓𑁄, 𑀮𑀤𑁆𑀥𑀲𑁆𑀲 𑀯𑀸 𑀣𑀸𑀯𑀭𑀓𑀸𑀭𑀓𑁄, 𑀬𑁂𑀦 𑀯𑀸 ¶ 𑀧𑀦 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀏𑀯𑀭𑀽𑀧𑀁 𑀧𑀕𑁆𑀕𑀳𑀸𑀭𑀳𑀁 𑀧𑀕𑁆𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁂𑀬𑁆𑀬. 𑀏𑀯𑀁 𑀳𑀺𑀲𑁆𑀲 𑀓𑀺𑀘𑁆𑀘𑁂𑀲𑀼 𑀅𑀜𑁆𑀜𑁂𑀧𑀺 𑀉𑀭𑀁 𑀤𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀦𑁆𑀢𑀺.
𑀚𑀸𑀦𑀧𑀤𑀦𑁆𑀢𑀺 𑀚𑀦𑀧𑀤𑀯𑀸𑀲𑀻𑀦𑀁 𑀅𑀢𑁆𑀣𑀁 𑀲𑀬𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑁂𑀯 𑀅𑀦𑀼𑀲𑀸𑀲. 𑀅𑀥𑀫𑁆𑀫𑀺𑀓𑀸 𑀬𑀼𑀢𑁆𑀢𑀸𑀢𑀺 𑀅𑀥𑀫𑁆𑀫𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸 𑀆𑀬𑀼𑀢𑁆𑀢𑀓𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀪𑀺𑀦𑁆𑀤𑀦𑁆𑀢𑀸 𑀢𑀯 𑀥𑀦𑀜𑁆𑀘 𑀭𑀝𑁆𑀞𑀜𑁆𑀘 𑀫𑀸 𑀦𑀸𑀲𑀬𑀼𑀁. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀅𑀦𑀼𑀲𑀸𑀲. 𑀯𑁂𑀕𑁂𑀦𑀸𑀢𑀺 𑀲𑀳𑀲𑀸 𑀅𑀢𑀼𑀮𑁂𑀢𑁆𑀯𑀸 𑀅𑀢𑀻𑀭𑁂𑀢𑁆𑀯𑀸. 𑀯𑁂𑀕𑀲𑀸𑀢𑀺 𑀅𑀢𑀼𑀮𑁂𑀢𑁆𑀯𑀸 𑀅𑀢𑀻𑀭𑁂𑀢𑁆𑀯𑀸 𑀙𑀦𑁆𑀤𑀸𑀤𑀺𑀯𑀲𑁂𑀦 𑀲𑀳𑀲𑀸 𑀓𑀢𑀁 𑀓𑀫𑁆𑀫𑀜𑁆𑀳𑀺 𑀦 𑀲𑀸𑀥𑀼 𑀦 𑀲𑀼𑀦𑁆𑀤𑀭𑀁. 𑀓𑀺𑀁𑀓𑀸𑀭𑀡𑀸? 𑀢𑀸𑀤𑀺𑀲𑀜𑁆𑀳𑀺 𑀓𑀢𑁆𑀯𑀸 𑀫𑀦𑁆𑀤𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀇𑀥 𑀮𑁄𑀓𑁂 𑀅𑀧𑀸𑀬𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀧𑀭𑀮𑁄𑀓𑁂 𑀘 𑀅𑀦𑀼𑀢𑀧𑁆𑀧𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 ‘‘𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸, 𑀪𑀭𑀼𑀭𑀸𑀚𑀸𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀪𑀭𑀼𑀚𑀸𑀢𑀓𑁂𑀦 (𑀚𑀸. 𑁧.𑁨.𑁧𑁨𑁫-𑁧𑁨𑁬) 𑀤𑀻𑀧𑁂𑀢𑀩𑁆𑀩𑁄 ¶ .
𑀫𑀸 𑀢𑁂 𑀅𑀥𑀺𑀲𑀭𑁂 𑀫𑀼𑀜𑁆𑀘, 𑀲𑀼𑀩𑀸𑀴𑁆𑀳𑀫𑀥𑀺𑀓𑁄𑀧𑀺𑀢𑀦𑁆𑀢𑀺, 𑀢𑀸𑀢, 𑀢𑀯 𑀳𑀤𑀬𑀁 𑀓𑀼𑀲𑀮𑀁 𑀅𑀥𑀺𑀲𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑁂 𑀧𑀭𑁂𑀲𑀁 𑀅𑀓𑀼𑀲𑀮𑀓𑀫𑁆𑀫𑁂 𑀲𑀼𑀝𑁆𑀞𑀼 𑀩𑀸𑀴𑁆𑀳𑀁 𑀅𑀥𑀺𑀓𑁄𑀧𑀺𑀢𑀁 𑀓𑀼𑀚𑁆𑀛𑀸𑀧𑀺𑀢𑀁 𑀳𑀼𑀢𑁆𑀯𑀸 𑀫𑀸 𑀫𑀼𑀜𑁆𑀘, 𑀫𑀸 𑀧𑀢𑀺𑀝𑁆𑀞𑀸𑀬𑀢𑀽𑀢𑀺 𑀅𑀢𑁆𑀣𑁄. 𑀇𑀤𑀁 ¶ 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀬𑀤𑀸 𑀢𑁂 𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑀲𑁆𑀲 𑀇𑀫𑀺𑀦𑀸 𑀧𑀼𑀭𑀺𑀲𑁄 𑀯𑀸 𑀳𑀢𑁄 𑀲𑀦𑁆𑀥𑀺 𑀯𑀸 𑀙𑀺𑀦𑁆𑀦𑁄𑀢𑀺 𑀘𑁄𑀭𑀁 𑀤𑀲𑁆𑀲𑁂𑀦𑁆𑀢𑀺, 𑀢𑀤𑀸 𑀢𑁂 𑀧𑀭𑁂𑀲𑀁 𑀯𑀘𑀦𑁂𑀳𑀺 𑀲𑀼𑀝𑁆𑀞𑀼 𑀓𑁄𑀧𑀺𑀢𑀫𑁆𑀧𑀺 𑀳𑀤𑀬𑀁 𑀓𑁄𑀥𑀯𑀲𑁂𑀦 𑀫𑀸 𑀫𑀼𑀜𑁆𑀘, 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀫𑀸 𑀤𑀡𑁆𑀟𑀁 𑀧𑀡𑁂𑀳𑀺. 𑀓𑀺𑀁𑀓𑀸𑀭𑀡𑀸? 𑀅𑀘𑁄𑀭𑀫𑁆𑀧𑀺 𑀳𑀺 ‘‘𑀘𑁄𑀭𑁄’’𑀢𑀺 𑀕𑀳𑁂𑀢𑁆𑀯𑀸 𑀆𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀓𑀼𑀚𑁆𑀛𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦 𑀢𑀲𑁆𑀲 𑀘𑁄𑀭𑀪𑀸𑀯𑀁 𑀜𑀢𑁆𑀯𑀸 𑀧𑀯𑁂𑀡𑀺𑀬𑀸 𑀞𑀧𑀺𑀢𑀤𑀡𑁆𑀟𑀯𑀲𑁂𑀦 𑀓𑀢𑁆𑀢𑀩𑁆𑀩𑀁 𑀓𑀭𑁄𑀳𑀺. 𑀭𑀜𑁆𑀜𑀸 𑀳𑀺 𑀉𑀧𑁆𑀧𑀦𑁆𑀦𑁂𑀧𑀺 𑀓𑁄𑀥𑁂 𑀳𑀤𑀬𑀁 𑀲𑀻𑀢𑀮𑀁 𑀅𑀓𑀢𑁆𑀯𑀸 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑀤𑀸 𑀧𑀦𑀲𑁆𑀲 𑀳𑀤𑀬𑀁 𑀦𑀺𑀩𑁆𑀩𑀼𑀢𑀁 𑀳𑁄𑀢𑀺 𑀫𑀼𑀤𑀼𑀓𑀁, 𑀢𑀤𑀸 𑀯𑀺𑀦𑀺𑀘𑁆𑀙𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀨𑀭𑀼𑀲𑁂 𑀳𑀺 𑀘𑀺𑀢𑁆𑀢𑁂 𑀧𑀓𑁆𑀓𑀼𑀣𑀺𑀢𑁂 𑀉𑀤𑀓𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀓𑀸𑀭𑀡𑀁 𑀦 𑀧𑀜𑁆𑀜𑀸𑀬𑀢𑀺. 𑀓𑁄𑀥𑀲𑀸 𑀳𑀻𑀢𑀺, 𑀢𑀸𑀢, 𑀓𑁄𑀥𑁂𑀦 𑀳𑀺 𑀩𑀳𑀽𑀦𑀺 𑀨𑀻𑀢𑀸𑀦𑀺 𑀭𑀸𑀚𑀓𑀼𑀮𑀸𑀦𑀺 𑀅𑀓𑀼𑀮𑀪𑀸𑀯𑀁 𑀕𑀢𑀸𑀦𑀺 𑀫𑀳𑀸𑀯𑀺𑀦𑀸𑀲𑀫𑁂𑀯 𑀧𑀢𑁆𑀢𑀸𑀦𑀻𑀢𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓- (𑀚𑀸. 𑁧.𑁪.𑁪𑁯 𑀆𑀤𑀬𑁄) 𑀦𑀸𑀴𑀺𑀓𑁂𑀭𑀭𑀸𑀚𑀯𑀢𑁆𑀣𑀼𑀲𑀳𑀲𑁆𑀲𑀩𑀸𑀳𑀼𑀅𑀚𑁆𑀚𑀼𑀦𑀯𑀢𑁆𑀣𑀼𑀆𑀤𑀻𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.
𑀫𑀸, 𑀢𑀸𑀢, 𑀇𑀲𑁆𑀲𑀭𑁄𑀫𑁆𑀳𑀻𑀢𑀺, 𑀅𑀦𑀢𑁆𑀣𑀸𑀬 𑀧𑀢𑀸𑀭𑀬𑀻𑀢𑀺, 𑀢𑀸𑀢, ‘‘𑀅𑀳𑀁 𑀧𑀣𑀯𑀺𑀲𑁆𑀲𑀭𑁄’’𑀢𑀺 𑀫𑀸 𑀫𑀳𑀸𑀚𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀅𑀦𑀢𑁆𑀣𑀸𑀬 𑀧𑀢𑀸𑀭𑀬𑀺 𑀫𑀸 𑀑𑀢𑀸𑀭𑀬𑀺, 𑀬𑀣𑀸 𑀢𑀁 𑀅𑀦𑀢𑁆𑀣𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀫𑀸 𑀏𑀯𑀫𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀫𑀸 𑀢𑁂 𑀆𑀲𑀻𑀢𑀺, 𑀢𑀸𑀢, 𑀢𑀯 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁 𑀯𑀸 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀓𑀸𑀦𑀁 𑀯𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀤𑀼𑀔𑀼𑀤𑁆𑀭𑀬𑁄 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀫𑀸 𑀆𑀲𑀺. 𑀬𑀣𑀸 𑀳𑀺 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 ¶ 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀯 𑀭𑀝𑁆𑀞𑀯𑀸𑀲𑀻𑀦𑀁 𑀢𑀁 𑀤𑀼𑀓𑁆𑀔𑀁 𑀬𑀣𑀸 𑀦 𑀳𑁄𑀢𑀺, 𑀢𑀣𑀸 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄.
𑀅𑀧𑁂𑀢𑀮𑁄𑀫𑀳𑀁𑀲𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑀬𑁂𑀳𑀺 𑀦𑀺𑀩𑁆𑀪𑀬𑀲𑁆𑀲. 𑀇𑀫𑀺𑀦𑀸 𑀇𑀫𑀁 𑀤𑀲𑁆𑀲𑁂𑀢𑀺 𑁋 𑀢𑀸𑀢, 𑀬𑁄 𑀭𑀸𑀚𑀸 𑀓𑀺𑀲𑁆𑀫𑀺𑀜𑁆𑀘𑀺 𑀆𑀲𑀗𑁆𑀓𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀫𑀫𑁂𑀯 𑀅𑀦𑀼𑀲𑁆𑀲𑀭𑀢𑀺, 𑀙𑀦𑁆𑀤𑀯𑀲𑁂𑀦 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀓𑀭𑁄𑀢𑀺, 𑀯𑀺𑀲𑁆𑀲𑀝𑁆𑀞𑀬𑀝𑁆𑀞𑀺 𑀯𑀺𑀬 𑀅𑀦𑁆𑀥𑁄 𑀦𑀺𑀭𑀗𑁆𑀓𑀼𑀲𑁄 𑀯𑀺𑀬 𑀘 𑀘𑀡𑁆𑀟𑀳𑀢𑁆𑀣𑀻 𑀳𑁄𑀢𑀺, 𑀢𑀲𑁆𑀲 𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀢𑀁 𑀪𑁄𑀕𑀩𑁆𑀬𑀲𑀦𑀁 𑀅𑀖𑀁 𑀤𑀼𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺.
𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀤𑀓𑁆𑀔𑀲𑁆𑀲𑀼𑀤𑀸𑀦𑀻𑀢𑀺, 𑀢𑀸𑀢, 𑀢𑁆𑀯𑀁 𑀇𑀫𑀁 𑀅𑀦𑀼𑀲𑀸𑀲𑀦𑀺𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀤𑀓𑁆𑀔𑁄 𑀅𑀦𑀮𑀲𑁄 𑀧𑀼𑀜𑁆𑀜𑀸𑀦𑀁 𑀓𑀭𑀡𑁂𑀦 ¶ 𑀧𑀼𑀜𑁆𑀜𑀓𑀭𑁄 𑀲𑀼𑀭𑀸𑀤𑀺𑀧𑀭𑀺𑀳𑀭𑀡𑁂𑀦. 𑀅𑀲𑁄𑀡𑁆𑀟𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀯𑀺𑀦𑀸𑀲𑀦𑁂𑀦 𑀅𑀯𑀺𑀦𑀸𑀲𑀓𑁄 𑀪𑀯𑁂𑀬𑁆𑀬𑀸𑀲𑀻𑀢𑀺. 𑀲𑀻𑀮𑀯𑀸𑀲𑁆𑀲𑀽𑀢𑀺 𑀲𑀻𑀮𑀯𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀪𑀯, 𑀤𑀲𑀲𑀼 𑀭𑀸𑀚𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀭𑀚𑁆𑀚𑀁 𑀓𑀸𑀭𑁂𑀳𑀺. 𑀤𑀼𑀲𑁆𑀲𑀻𑀮𑁄 𑀯𑀺𑀦𑀺𑀧𑀸𑀢𑀺𑀓𑁄𑀢𑀺 𑀤𑀼𑀲𑁆𑀲𑀻𑀮𑁄 𑀳𑀺, 𑀫𑀳𑀸𑀭𑀸𑀚, 𑀅𑀢𑁆𑀢𑀸𑀦𑀁 𑀦𑀺𑀭𑀬𑁂 𑀯𑀺𑀦𑀺𑀧𑀸𑀢𑁂𑀦𑁆𑀢𑁄 𑀯𑀺𑀦𑀺𑀧𑀸𑀢𑀺𑀓𑁄 𑀦𑀸𑀫 𑀳𑁄𑀢𑀻𑀢𑀺.
𑀏𑀯𑀁 ¶ 𑀓𑀼𑀡𑁆𑀟𑀮𑀺𑀦𑀻𑀧𑀺 𑀏𑀓𑀸𑀤𑀲𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑁄𑀦𑁆𑀢𑁄! 𑀅𑀫𑀘𑁆𑀘𑀸 𑀫𑀫 𑀥𑀻𑀢𑀸𑀬 𑀓𑀼𑀡𑁆𑀟𑀮𑀺𑀦𑀺𑀬𑀸 𑀏𑀯𑀁 𑀓𑀣𑀬𑀫𑀸𑀦𑀸𑀬 𑀓𑁂𑀦 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀓𑀢’’𑀦𑁆𑀢𑀺. 𑀪𑀡𑁆𑀟𑀸𑀕𑀸𑀭𑀺𑀓𑁂𑀦, 𑀤𑁂𑀯𑀸𑀢𑀺. ‘‘𑀢𑁂𑀦 𑀳𑀺𑀲𑁆𑀲𑀸 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀓𑀼𑀡𑁆𑀟𑀮𑀺𑀦𑀺𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀺𑀢𑀼 𑀓𑀫𑁆𑀫𑀁 𑀅𑀓𑀸𑀲𑀻𑀢𑀺.
𑀓𑀼𑀡𑁆𑀟𑀮𑀺𑀦𑀺𑀧𑀜𑁆𑀳𑁄 𑀦𑀺𑀝𑁆𑀞𑀺𑀢𑁄.
𑀧𑀼𑀦 𑀭𑀸𑀚𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀚𑀫𑁆𑀩𑀼𑀓𑀧𑀡𑁆𑀟𑀺𑀢𑀲𑁆𑀲 𑀲𑀦𑁆𑀢𑀺𑀓𑀁 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀘𑁆𑀘𑀸𑀕𑀢𑁄 𑀢𑀢𑁆𑀣𑁂𑀯 𑀫𑀡𑁆𑀟𑀧𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀅𑀫𑀘𑁆𑀘𑁄 𑀚𑀫𑁆𑀩𑀼𑀓𑀧𑀡𑁆𑀟𑀺𑀢𑀁 𑀓𑀜𑁆𑀘𑀦𑀪𑀤𑁆𑀤𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀻𑀞𑀁 𑀲𑀻𑀲𑁂𑀦𑀸𑀤𑀸𑀬 𑀆𑀕𑀘𑁆𑀙𑀺. 𑀧𑀡𑁆𑀟𑀺𑀢𑁄 𑀧𑀺𑀢𑀼 𑀅𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀻𑀴𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀓𑀜𑁆𑀘𑀦𑀧𑀻𑀞𑁂𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀧𑀼𑀘𑁆𑀙𑀺𑀫𑁆𑀳 𑀓𑁄𑀲𑀺𑀬𑀕𑁄𑀢𑁆𑀢𑀁, 𑀓𑀼𑀡𑁆𑀟𑀮𑀺𑀦𑀺𑀁 𑀢𑀣𑁂𑀯 𑀘;
𑀢𑁆𑀯𑀁 𑀤𑀸𑀦𑀺 𑀯𑀤𑁂𑀳𑀺 𑀚𑀫𑁆𑀩𑀼𑀓, 𑀩𑀮𑀸𑀦𑀁 𑀩𑀮𑀫𑀼𑀢𑁆𑀢𑀫’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 ¶ 𑁋 𑀢𑀸𑀢, 𑀚𑀫𑁆𑀩𑀼𑀓, 𑀅𑀳𑀁 𑀢𑀯 𑀪𑀸𑀢𑀭𑀁 𑀓𑁄𑀲𑀺𑀬𑀕𑁄𑀢𑁆𑀢𑀁 𑀯𑁂𑀲𑁆𑀲𑀦𑁆𑀢𑀭𑀁 𑀪𑀕𑀺𑀦𑀺𑀜𑁆𑀘 𑀢𑁂 𑀓𑀼𑀡𑁆𑀟𑀮𑀺𑀦𑀺𑀁 𑀭𑀸𑀚𑀥𑀫𑁆𑀫𑀁 𑀅𑀧𑀼𑀘𑁆𑀙𑀺𑀁, 𑀢𑁂 𑀅𑀢𑁆𑀢𑀦𑁄 𑀩𑀮𑁂𑀦 𑀓𑀣𑁂𑀲𑀼𑀁, 𑀬𑀣𑀸 𑀧𑀦 𑀢𑁂 𑀧𑀼𑀘𑁆𑀙𑀺𑀁, 𑀢𑀣𑁂𑀯 𑀇𑀤𑀸𑀦𑀺, 𑀧𑀼𑀢𑁆𑀢 𑀚𑀫𑁆𑀩𑀼𑀓, 𑀢𑀁 𑀧𑀼𑀘𑁆𑀙𑀸𑀫𑀺, 𑀢𑁆𑀯𑀁 𑀫𑁂 𑀭𑀸𑀚𑀥𑀫𑁆𑀫𑀜𑁆𑀘 𑀩𑀮𑀸𑀦𑀁 𑀉𑀢𑁆𑀢𑀫𑀁 𑀩𑀮𑀜𑁆𑀘 𑀓𑀣𑁂𑀳𑀻𑀢𑀺.
𑀏𑀯𑀁 𑀭𑀸𑀚𑀸 𑀫𑀳𑀸𑀲𑀢𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀅𑀜𑁆𑀜𑁂𑀲𑀁 𑀧𑀼𑀘𑁆𑀙𑀺𑀢𑀦𑀺𑀬𑀸𑀫𑁂𑀦 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀧𑀡𑁆𑀟𑀺𑀢𑁄 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀑𑀳𑀺𑀢𑀲𑁄𑀢𑁄 𑀲𑀼𑀡𑀸𑀳𑀺, 𑀲𑀩𑁆𑀩𑀁 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀧𑀲𑀸𑀭𑀺𑀢𑀳𑀢𑁆𑀣𑁂 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺 𑁋
‘‘𑀩𑀮𑀁 ¶ 𑀧𑀜𑁆𑀘𑀯𑀺𑀥𑀁 𑀮𑁄𑀓𑁂, 𑀧𑀼𑀭𑀺𑀲𑀲𑁆𑀫𑀺𑀁 𑀫𑀳𑀕𑁆𑀕𑀢𑁂;
𑀢𑀢𑁆𑀣 𑀩𑀸𑀳𑀼𑀩𑀮𑀁 𑀦𑀸𑀫, 𑀘𑀭𑀺𑀫𑀁 𑀯𑀼𑀘𑁆𑀘𑀢𑁂 𑀩𑀮𑀁.
‘‘𑀪𑁄𑀕𑀩𑀮𑀜𑁆𑀘 𑀤𑀻𑀖𑀸𑀯𑀼, 𑀤𑀼𑀢𑀺𑀬𑀁 𑀯𑀼𑀘𑁆𑀘𑀢𑁂 𑀩𑀮𑀁;
𑀅𑀫𑀘𑁆𑀘𑀩𑀮𑀜𑁆𑀘 𑀤𑀻𑀖𑀸𑀯𑀼, 𑀢𑀢𑀺𑀬𑀁 𑀯𑀼𑀘𑁆𑀘𑀢𑁂 𑀩𑀮𑀁.
‘‘𑀅𑀪𑀺𑀚𑀘𑁆𑀘𑀩𑀮𑀜𑁆𑀘𑁂𑀯, 𑀢𑀁 𑀘𑀢𑀼𑀢𑁆𑀣𑀁 𑀅𑀲𑀁𑀲𑀬𑀁;
𑀬𑀸𑀦𑀺 𑀘𑁂𑀢𑀸𑀦𑀺 𑀲𑀩𑁆𑀩𑀸𑀦𑀺, 𑀅𑀥𑀺𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄.
‘‘𑀢𑀁 ¶ 𑀩𑀮𑀸𑀦𑀁 𑀩𑀮𑀁 𑀲𑁂𑀝𑁆𑀞𑀁, 𑀅𑀕𑁆𑀕𑀁 𑀧𑀜𑁆𑀜𑀸𑀩𑀮𑀁 𑀩𑀮𑀁;
𑀧𑀜𑁆𑀜𑀸𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀅𑀢𑁆𑀣𑀁 𑀯𑀺𑀦𑁆𑀤𑀢𑀺 𑀧𑀡𑁆𑀟𑀺𑀢𑁄.
‘‘𑀅𑀧𑀺 𑀘𑁂 𑀮𑀪𑀢𑀺 𑀫𑀦𑁆𑀤𑁄, 𑀨𑀻𑀢𑀁 𑀥𑀭𑀡𑀺𑀫𑀼𑀢𑁆𑀢𑀫𑀁;
𑀅𑀓𑀸𑀫𑀲𑁆𑀲 𑀧𑀲𑀬𑁆𑀳𑀁 𑀯𑀸, 𑀅𑀜𑁆𑀜𑁄 𑀢𑀁 𑀧𑀝𑀺𑀧𑀚𑁆𑀚𑀢𑀺.
‘‘𑀅𑀪𑀺𑀚𑀸𑀢𑁄𑀧𑀺 𑀘𑁂 𑀳𑁄𑀢𑀺, 𑀭𑀚𑁆𑀚𑀁 𑀮𑀤𑁆𑀥𑀸𑀦 𑀔𑀢𑁆𑀢𑀺𑀬𑁄;
𑀤𑀼𑀧𑁆𑀧𑀜𑁆𑀜𑁄 𑀳𑀺 𑀓𑀸𑀲𑀺𑀧𑀢𑀺, 𑀲𑀩𑁆𑀩𑁂𑀦𑀧𑀺 𑀦 𑀚𑀻𑀯𑀢𑀺.
‘‘𑀧𑀜𑁆𑀜𑀸𑀯 𑀲𑀼𑀢𑀁 𑀯𑀺𑀦𑀺𑀘𑁆𑀙𑀺𑀦𑀻, 𑀧𑀜𑁆𑀜𑀸 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀟𑁆𑀠𑀦𑀻;
𑀧𑀜𑁆𑀜𑀸𑀲𑀳𑀺𑀢𑁄 𑀦𑀭𑁄 𑀇𑀥, 𑀅𑀧𑀺 𑀤𑀼𑀓𑁆𑀔𑁂 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀺.
‘‘𑀧𑀜𑁆𑀜𑀜𑁆𑀘 ¶ 𑀔𑁄 𑀅𑀲𑀼𑀲𑁆𑀲𑀽𑀲𑀁, 𑀦 𑀓𑁄𑀘𑀺 𑀅𑀥𑀺𑀕𑀘𑁆𑀙𑀢𑀺;
𑀩𑀳𑀼𑀲𑁆𑀲𑀼𑀢𑀁 𑀅𑀦𑀸𑀕𑀫𑁆𑀫, 𑀥𑀫𑁆𑀫𑀝𑁆𑀞𑀁 𑀅𑀯𑀺𑀦𑀺𑀩𑁆𑀪𑀼𑀚𑀁.
‘‘𑀬𑁄 𑀘 𑀥𑀫𑁆𑀫𑀯𑀺𑀪𑀗𑁆𑀕𑀜𑁆𑀜𑀽, 𑀓𑀸𑀮𑀼𑀝𑁆𑀞𑀸𑀬𑀻 𑀅𑀢𑀦𑁆𑀤𑀺𑀢𑁄;
𑀅𑀦𑀼𑀝𑁆𑀞𑀳𑀢𑀺 𑀓𑀸𑀮𑁂𑀦, 𑀓𑀫𑁆𑀫𑀨𑀮𑀁 𑀢𑀲𑁆𑀲𑀺𑀚𑁆𑀛𑀢𑀺.
‘‘𑀅𑀦𑀸𑀬𑀢𑀦𑀲𑀻𑀮𑀲𑁆𑀲, 𑀅𑀦𑀸𑀬𑀢𑀦𑀲𑁂𑀯𑀺𑀦𑁄;
𑀦 𑀦𑀺𑀩𑁆𑀩𑀺𑀦𑁆𑀤𑀺𑀬𑀓𑀸𑀭𑀺𑀲𑁆𑀲, 𑀲𑀫𑁆𑀫𑀤𑀢𑁆𑀣𑁄 𑀯𑀺𑀧𑀘𑁆𑀘𑀢𑀺.
‘‘𑀅𑀚𑁆𑀛𑀢𑁆𑀢𑀜𑁆𑀘 𑀧𑀬𑀼𑀢𑁆𑀢𑀲𑁆𑀲, 𑀢𑀣𑀸𑀬𑀢𑀦𑀲𑁂𑀯𑀺𑀦𑁄;
𑀅𑀦𑀺𑀩𑁆𑀩𑀺𑀦𑁆𑀤𑀺𑀬𑀓𑀸𑀭𑀺𑀲𑁆𑀲, 𑀲𑀫𑁆𑀫𑀤𑀢𑁆𑀣𑁄 𑀯𑀺𑀧𑀘𑁆𑀘𑀢𑀺.
‘‘𑀬𑁄𑀕𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑀁, 𑀲𑀫𑁆𑀪𑀢𑀲𑁆𑀲𑀸𑀦𑀼𑀭𑀓𑁆𑀔𑀡𑀁;
𑀢𑀸𑀦𑀺 𑀢𑁆𑀯𑀁 𑀢𑀸𑀢 𑀲𑁂𑀯𑀲𑁆𑀲𑀼, 𑀫𑀸 𑀅𑀓𑀫𑁆𑀫𑀸𑀬 𑀭𑀦𑁆𑀥𑀬𑀺;
𑀅𑀓𑀫𑁆𑀫𑀼𑀦𑀸 𑀳𑀺 𑀤𑀼𑀫𑁆𑀫𑁂𑀥𑁄, 𑀦𑀴𑀸𑀕𑀸𑀭𑀁𑀯 𑀲𑀻𑀤𑀢𑀻’’𑀢𑀺.
𑀢𑀢𑁆𑀣 ¶ 𑀫𑀳𑀕𑁆𑀕𑀢𑁂𑀢𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀫𑀳𑀚𑁆𑀛𑀸𑀲𑀬𑁂 𑀧𑀼𑀭𑀺𑀲𑁂 𑀧𑀜𑁆𑀘𑀯𑀺𑀥𑀁 𑀩𑀮𑀁 𑀳𑁄𑀢𑀺. 𑀩𑀸𑀳𑀼𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀘𑀭𑀺𑀫𑀦𑁆𑀢𑀺 𑀢𑀁 𑀅𑀢𑀺𑀫𑀳𑀦𑁆𑀢𑀫𑁆𑀧𑀺 𑀲𑀫𑀸𑀦𑀁 𑀮𑀸𑀫𑀓𑀫𑁂𑀯. 𑀓𑀺𑀁𑀓𑀸𑀭𑀡𑀸? 𑀅𑀦𑁆𑀥𑀩𑀸𑀮𑀪𑀸𑀯𑁂𑀦. 𑀲𑀘𑁂 𑀳𑀺 𑀓𑀸𑀬𑀩𑀮𑀁 𑀫𑀳𑀦𑁆𑀢𑀁 𑀦𑀸𑀫 𑀪𑀯𑁂𑀬𑁆𑀬, 𑀯𑀸𑀭𑀡𑀩𑀮𑀢𑁄 𑀮𑀝𑀼𑀓𑀺𑀓𑀸𑀬 𑀩𑀮𑀁 𑀔𑀼𑀤𑁆𑀤𑀓𑀁 𑀪𑀯𑁂𑀬𑁆𑀬, 𑀯𑀸𑀭𑀡𑀩𑀮𑀁 𑀧𑀦 𑀅𑀦𑁆𑀥𑀩𑀸𑀮𑀪𑀸𑀯𑁂𑀦 𑀫𑀭𑀡𑀲𑁆𑀲 𑀧𑀘𑁆𑀘𑀬𑀁 𑀚𑀸𑀢𑀁, 𑀮𑀝𑀼𑀓𑀺𑀓𑀸 𑀅𑀢𑁆𑀢𑀦𑁄 𑀜𑀸𑀡𑀓𑀼𑀲𑀮𑀢𑀸𑀬 𑀯𑀸𑀭𑀡𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀦 𑀳𑁂𑀯 𑀲𑀩𑁆𑀩𑀢𑁆𑀣 𑀩𑀮𑁂𑀦 𑀓𑀺𑀘𑁆𑀘𑀁, 𑀩𑀮𑀜𑁆𑀳𑀺 𑀩𑀸𑀮𑀲𑁆𑀲 𑀯𑀥𑀸𑀬 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀁 (𑀚𑀸. 𑁧.𑁫.𑁪𑁨) 𑀆𑀳𑀭𑀺𑀢𑀩𑁆𑀩𑀁.
𑀪𑁄𑀕𑀩𑀮𑀦𑁆𑀢𑀺 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀲𑀩𑁆𑀩𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀉𑀧𑀪𑁄𑀕𑀚𑀸𑀢𑀁 𑀪𑁄𑀕𑀩𑀮𑀁 𑀦𑀸𑀫, 𑀢𑀁 𑀓𑀸𑀬𑀩𑀮𑀢𑁄 𑀫𑀳𑀦𑁆𑀢𑀢𑀭𑀁. 𑀅𑀫𑀘𑁆𑀘𑀩𑀮𑀦𑁆𑀢𑀺 𑀅𑀪𑁂𑀚𑁆𑀚𑀫𑀦𑁆𑀢𑀲𑁆𑀲 𑀲𑀽𑀭𑀲𑁆𑀲 𑀲𑀼𑀳𑀤𑀬𑀲𑁆𑀲 𑀅𑀫𑀘𑁆𑀘𑀫𑀡𑁆𑀟𑀮𑀲𑁆𑀲 𑀅𑀢𑁆𑀣𑀺𑀢𑀸, 𑀢𑀁 𑀩𑀮𑀁 𑀲𑀗𑁆𑀕𑀸𑀫𑀲𑀽𑀭𑀢𑀸𑀬 𑀧𑀼𑀭𑀺𑀫𑁂𑀳𑀺 𑀩𑀮𑁂𑀳𑀺 𑀫𑀳𑀦𑁆𑀢𑀢𑀭𑀁. 𑀅𑀪𑀺𑀚𑀘𑁆𑀘𑀩𑀮𑀦𑁆𑀢𑀺 𑀢𑀻𑀡𑀺 𑀓𑀼𑀮𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀯𑀲𑁂𑀦 𑀚𑀸𑀢𑀺𑀲𑀫𑁆𑀧𑀢𑁆𑀢𑀺 ¶ , 𑀢𑀁 𑀇𑀢𑀭𑁂𑀳𑀺 𑀩𑀮𑁂𑀳𑀺 𑀫𑀳𑀦𑁆𑀢𑀢𑀭𑀁. 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀏𑀯 𑀳𑀺 𑀲𑀼𑀚𑁆𑀛𑀦𑁆𑀢𑀺, 𑀦 𑀇𑀢𑀭𑁂𑀢𑀺. 𑀬𑀸𑀦𑀺 𑀘𑁂𑀢𑀸𑀦𑀻𑀢𑀺 𑀬𑀸𑀦𑀺 𑀘 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀩𑀮𑀸𑀦𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀥𑀺𑀕𑀡𑁆𑀳𑀸𑀢𑀺 𑀅𑀪𑀺𑀪𑀯𑀢𑀺, 𑀢𑀁 𑀲𑀩𑁆𑀩𑀩𑀮𑀸𑀦𑀁 𑀧𑀜𑁆𑀜𑀸𑀩𑀮𑀁 𑀲𑁂𑀝𑁆𑀞𑀦𑁆𑀢𑀺 𑀘 𑀅𑀕𑁆𑀕𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀁𑀓𑀸𑀭𑀡𑀸? 𑀢𑁂𑀦 𑀳𑀺 𑀩𑀮𑁂𑀦 𑀉𑀧𑀢𑁆𑀣𑀤𑁆𑀥𑁄 𑀧𑀡𑁆𑀟𑀺𑀢𑁄 𑀅𑀢𑁆𑀣𑀁 𑀯𑀺𑀦𑁆𑀤𑀢𑀺, 𑀯𑀼𑀟𑁆𑀠𑀺𑀁 𑀧𑀸𑀧𑀼𑀡𑀸𑀢𑀺 ¶ . 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 ‘‘𑀧𑀼𑀡𑁆𑀡𑀁 𑀦𑀤𑀺𑀁 𑀬𑁂𑀦 𑀘 𑀧𑁂𑀬𑁆𑀬𑀫𑀸𑀳𑀽’’𑀢𑀺 𑀧𑀼𑀡𑁆𑀡𑀦𑀤𑀻𑀚𑀸𑀢𑀓𑀜𑁆𑀘 (𑀚𑀸. 𑁧.𑁨.𑁧𑁨𑁭 𑀆𑀤𑀬𑁄) 𑀲𑀺𑀭𑀻𑀓𑀸𑀴𑀓𑀡𑁆𑀡𑀺𑀧𑀜𑁆𑀳𑀁 𑀧𑀜𑁆𑀘𑀧𑀡𑁆𑀟𑀺𑀢𑀧𑀜𑁆𑀳𑀜𑁆𑀘 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓- (𑀚𑀸. 𑁧.𑁭.𑁪𑁬 𑀆𑀤𑀬𑁄) 𑀲𑀫𑁆𑀪𑀯𑀚𑀸𑀢𑀓- (𑀚𑀸. 𑁧.𑁧𑁬.𑁧𑁩𑁮 𑀆𑀤𑀬𑁄) 𑀲𑀭𑀪𑀗𑁆𑀕𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄) 𑀘 𑀓𑀣𑁂𑀢𑀩𑁆𑀩𑀸𑀦𑀺.
𑀫𑀦𑁆𑀤𑁄𑀢𑀺 𑀫𑀦𑁆𑀤𑀧𑀜𑁆𑀜𑁄 𑀩𑀸𑀮𑁄. 𑀨𑀻𑀢𑀦𑁆𑀢𑀺, 𑀢𑀸𑀢, 𑀫𑀦𑁆𑀤𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀲𑀢𑁆𑀢𑀭𑀢𑀦𑀧𑀼𑀡𑁆𑀡𑀁 𑀘𑁂𑀧𑀺 𑀉𑀢𑁆𑀢𑀫𑀁 𑀥𑀭𑀡𑀺𑀁 𑀮𑀪𑀢𑀺, 𑀢𑀲𑁆𑀲 𑀅𑀦𑀺𑀘𑁆𑀙𑀫𑀸𑀦𑀲𑁆𑀲𑁂𑀯 𑀧𑀲𑀬𑁆𑀳𑀓𑀸𑀭𑀁 𑀯𑀸 𑀧𑀦 𑀓𑀢𑁆𑀯𑀸 𑀅𑀜𑁆𑀜𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀢𑀁 𑀧𑀝𑀺𑀧𑀚𑁆𑀚𑀢𑀺. 𑀫𑀦𑁆𑀤𑁄 𑀳𑀺 𑀮𑀤𑁆𑀥𑀁 𑀬𑀲𑀁 𑀭𑀓𑁆𑀔𑀺𑀢𑀼𑀁 𑀓𑀼𑀮𑀲𑀦𑁆𑀢𑀓𑀁 𑀯𑀸 𑀧𑀦 𑀧𑀯𑁂𑀡𑀺𑀆𑀕𑀢𑀫𑁆𑀧𑀺 𑀭𑀚𑁆𑀚𑀁 𑀅𑀥𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 ‘‘𑀅𑀤𑁆𑀥𑀸 𑀧𑀸𑀤𑀜𑁆𑀚𑀮𑀻 𑀲𑀩𑁆𑀩𑁂, 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀢𑀻’’𑀢𑀺 𑀧𑀸𑀤𑀜𑁆𑀚𑀮𑀻𑀚𑀸𑀢𑀓𑀁 (𑀚𑀸. 𑁧.𑁨.𑁧𑁯𑁪-𑁧𑁯𑁫) 𑀓𑀣𑁂𑀢𑀩𑁆𑀩𑀁. 𑀮𑀤𑁆𑀥𑀸𑀦𑀸𑀢𑀺 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸𑀧𑀺. 𑀲𑀩𑁆𑀩𑁂𑀦𑀧𑀻𑀢𑀺 𑀢𑁂𑀦 𑀲𑀓𑀮𑁂𑀦𑀧𑀺 𑀭𑀚𑁆𑀚𑁂𑀦 𑀦 𑀚𑀻𑀯𑀢𑀺, 𑀅𑀦𑀼𑀧𑀸𑀬𑀓𑀼𑀲𑀮𑀢𑀸𑀬 𑀤𑀼𑀕𑁆𑀕𑀢𑁄𑀯 𑀳𑁄𑀢𑀻𑀢𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀅𑀧𑀡𑁆𑀟𑀺𑀢𑀲𑁆𑀲 𑀅𑀕𑀼𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀜𑀁 𑀧𑀲𑀁𑀲𑀦𑁆𑀢𑁄 ‘‘𑀧𑀜𑁆𑀜𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀢𑀦𑁆𑀢𑀺 𑀲𑀼𑀢𑀧𑀭𑀺𑀬𑀢𑁆𑀢𑀺. 𑀢𑀜𑁆𑀳𑀺 𑀧𑀜𑁆𑀜𑀸𑀯 𑀯𑀺𑀦𑀺𑀘𑁆𑀙𑀺𑀦𑀢𑀺. 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀟𑁆𑀠𑀦𑀻𑀢𑀺 𑀓𑀺𑀢𑁆𑀢𑀺𑀖𑁄𑀲𑀲𑁆𑀲 𑀘 𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀘 𑀯𑀟𑁆𑀠𑀦𑀻. 𑀤𑀼𑀓𑁆𑀔𑁂 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀻𑀢𑀺 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀉𑀧𑀸𑀬𑀓𑀼𑀲𑀮𑀢𑀸𑀬 𑀲𑀼𑀔𑀁 𑀧𑀝𑀺𑀮𑀪𑀢𑀺. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑁋
‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯’’. (𑀚𑀸. 𑁧.𑁧.𑁫𑁭);
𑀅𑀮𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘𑀸’’𑀢𑀺. (𑀚𑀸. 𑁧.𑁨.𑁧𑁧𑁫) 𑁋
𑀆𑀤𑀻𑀦𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.
𑀅𑀲𑀼𑀲𑁆𑀲𑀽𑀲𑀦𑁆𑀢𑀺 𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁂 𑀅𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀅𑀲𑁆𑀲𑀼𑀡𑀦𑁆𑀢𑁄. 𑀥𑀫𑁆𑀫𑀝𑁆𑀞𑀦𑁆𑀢𑀺 𑀲𑀪𑀸𑀯𑀓𑀸𑀭𑀡𑁂 𑀞𑀺𑀢𑀁 𑀩𑀳𑀼𑀲𑁆𑀲𑀼𑀢𑀁 𑀅𑀦𑀸𑀕𑀫𑁆𑀫 𑀢𑀁 𑀅𑀲𑀤𑁆𑀤𑀳𑀦𑁆𑀢𑁄. 𑀅𑀯𑀺𑀦𑀺𑀩𑁆𑀪𑀼𑀚𑀦𑁆𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀅𑀦𑁄𑀕𑀸𑀳𑀦𑁆𑀢𑁄 𑀅𑀢𑀻𑀭𑁂𑀦𑁆𑀢𑁄 𑀦 𑀓𑁄𑀘𑀺 𑀧𑀜𑁆𑀜𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀸𑀢𑀸𑀢𑀺.
𑀥𑀫𑁆𑀫𑀯𑀺𑀪𑀗𑁆𑀕𑀜𑁆𑀜𑀽𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀺𑀪𑀗𑁆𑀕𑀓𑀼𑀲𑀮𑁄. 𑀓𑀸𑀮𑀼𑀝𑁆𑀞𑀸𑀬𑀻𑀢𑀺 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀯𑀻𑀭𑀺𑀬𑀲𑁆𑀲 𑀓𑀸𑀭𑀓𑁄. 𑀅𑀦𑀼𑀝𑁆𑀞𑀳𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀁 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ¶ 𑀓𑀫𑁆𑀫𑀨𑀮𑀁 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀅𑀦𑀸𑀬𑀢𑀦𑀲𑀻𑀮𑀲𑁆𑀲𑀸𑀢𑀺 𑀅𑀦𑀸𑀬𑀢𑀦𑀁 𑀯𑀼𑀘𑁆𑀘𑀢𑀺 𑀮𑀸𑀪𑀬𑀲𑀲𑀼𑀔𑀸𑀦𑀁 𑀅𑀦𑀸𑀓𑀭𑁄 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀁, 𑀢𑀁𑀲𑀻𑀮𑀲𑁆𑀲 𑀢𑁂𑀦 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀦𑀸𑀬𑀢𑀦𑀪𑀽𑀢𑀫𑁂𑀯 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲, 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀓𑀸𑀮𑁂 𑀦𑀺𑀩𑁆𑀩𑀺𑀦𑁆𑀤𑀺𑀬𑀓𑀸𑀭𑀺𑀲𑁆𑀲 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀏𑀯𑀭𑀽𑀧𑀲𑁆𑀲, 𑀢𑀸𑀢, 𑀧𑀼𑀕𑁆𑀕𑀮𑀲𑁆𑀲 𑀓𑀫𑁆𑀫𑀸𑀦𑀁 𑀅𑀢𑁆𑀣𑁄 𑀲𑀫𑁆𑀫𑀸 𑀦 𑀯𑀺𑀧𑀘𑁆𑀘𑀢𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀻𑀡𑀺 𑀓𑀼𑀮𑀕𑁆𑀕𑀸𑀦𑀺 𑀘 𑀙 𑀓𑀸𑀫𑀲𑀕𑁆𑀕𑀸𑀦𑀺 𑀘 𑀦 𑀉𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀜𑁆𑀘𑀸𑀢𑀺 ¶ 𑀅𑀢𑁆𑀢𑀦𑁄 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀦𑀺𑀘𑁆𑀘𑀪𑀸𑀯𑀦𑀸𑀤𑀺𑀯𑀲𑁂𑀦 𑀧𑀬𑀼𑀢𑁆𑀢𑀲𑁆𑀲. 𑀢𑀣𑀸𑀬𑀢𑀦𑀲𑁂𑀯𑀺𑀦𑁄𑀢𑀺 𑀢𑀣𑁂𑀯 𑀲𑀻𑀮𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀫𑀸𑀦𑀲𑁆𑀲. 𑀯𑀺𑀧𑀘𑁆𑀘𑀢𑀻𑀢𑀺 𑀲𑀫𑁆𑀧𑀚𑁆𑀚𑀢𑀺 𑀫𑀳𑀦𑁆𑀢𑀁 𑀬𑀲𑀁 𑀤𑁂𑀢𑀺.
𑀬𑁄𑀕𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑀦𑁆𑀢𑀺 𑀬𑁄𑀕𑁂 𑀬𑀼𑀜𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑀓𑁂 𑀓𑀸𑀭𑀡𑁂 𑀧𑀬𑁄𑀕𑀓𑁄𑀝𑁆𑀞𑀸𑀲𑀪𑀽𑀢𑀁 𑀧𑀜𑁆𑀜𑀁. 𑀲𑀫𑁆𑀪𑀢𑀲𑁆𑀲𑀸𑀢𑀺 𑀭𑀸𑀲𑀺𑀓𑀢𑀲𑁆𑀲 𑀥𑀦𑀲𑁆𑀲 𑀅𑀦𑀼𑀭𑀓𑁆𑀔𑀡𑀁. 𑀢𑀸𑀦𑀺 𑀢𑁆𑀯𑀦𑁆𑀢𑀺 𑀏𑀢𑀸𑀦𑀺 𑀘 𑀤𑁆𑀯𑁂 𑀧𑀼𑀭𑀺𑀫𑀸𑀦𑀺 𑀘 𑀫𑀬𑀸 𑀯𑀼𑀢𑁆𑀢𑀓𑀸𑀭𑀡𑀸𑀦𑀺 𑀲𑀩𑁆𑀩𑀸𑀦𑀺, 𑀢𑀸𑀢, 𑀢𑁆𑀯𑀁 𑀲𑁂𑀯𑀲𑁆𑀲𑀼, 𑀫𑀬𑀸 𑀯𑀼𑀢𑁆𑀢𑀁 𑀑𑀯𑀸𑀤𑀁 𑀳𑀤𑀬𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑁂 ¶ 𑀥𑀦𑀁 𑀭𑀓𑁆𑀔. 𑀫𑀸 𑀅𑀓𑀫𑁆𑀫𑀸𑀬 𑀭𑀦𑁆𑀥𑀬𑀻𑀢𑀺 𑀅𑀬𑀼𑀢𑁆𑀢𑁂𑀦 𑀅𑀓𑀸𑀭𑀡𑁂𑀦 𑀫𑀸 𑀭𑀦𑁆𑀥𑀬𑀺, 𑀢𑀁 𑀥𑀦𑀁 𑀫𑀸 𑀛𑀸𑀧𑀬𑀺 𑀫𑀸 𑀦𑀸𑀲𑀬𑀺. 𑀓𑀺𑀁𑀓𑀸𑀭𑀡𑀸? 𑀅𑀓𑀫𑁆𑀫𑀼𑀦𑀸 𑀳𑀻𑀢𑀺 𑀅𑀬𑀼𑀢𑁆𑀢𑀓𑀫𑁆𑀫𑀓𑀭𑀡𑁂𑀦 𑀤𑀼𑀫𑁆𑀫𑁂𑀥𑁄 𑀧𑀼𑀕𑁆𑀕𑀮𑁄 𑀲𑀓𑀁 𑀥𑀦𑀁 𑀦𑀸𑀲𑁂𑀢𑁆𑀯𑀸 𑀧𑀘𑁆𑀙𑀸 𑀤𑀼𑀕𑁆𑀕𑀢𑁄. 𑀦𑀴𑀸𑀕𑀸𑀭𑀁𑀯 𑀲𑀻𑀤𑀢𑀻𑀢𑀺 𑀬𑀣𑀸 𑀦𑀴𑀸𑀕𑀸𑀭𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀚𑀻𑀭𑀫𑀸𑀦𑀁 𑀅𑀧𑁆𑀧𑀢𑀺𑀝𑁆𑀞𑀁 𑀧𑀢𑀢𑀺, 𑀏𑀯𑀁 𑀅𑀓𑀸𑀭𑀡𑁂𑀦 𑀥𑀦𑀁 𑀦𑀸𑀲𑁂𑀢𑁆𑀯𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.
𑀏𑀯𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑁄 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀧𑀜𑁆𑀘 𑀩𑀮𑀸𑀦𑀺 𑀯𑀡𑁆𑀡𑁂𑀢𑁆𑀯𑀸 𑀧𑀜𑁆𑀜𑀸𑀩𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀤𑀲𑀳𑀺 𑀕𑀸𑀣𑀸𑀳𑀺 𑀭𑀜𑁆𑀜𑁄 𑀑𑀯𑀸𑀤𑀁 𑀤𑁂𑀦𑁆𑀢𑁄 𑀆𑀳 𑁋
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀽𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀧𑀼𑀢𑁆𑀢𑀤𑀸𑀭𑁂𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀯𑀸𑀳𑀦𑁂𑀲𑀼 𑀩𑀮𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 ¶ 𑀘𑀭 𑀫𑀳𑀸𑀭𑀸𑀚, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀭𑀝𑁆𑀞𑁂 𑀚𑀦𑀧𑀤𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀕𑀧𑀓𑁆𑀔𑀻𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 ¶ 𑀘𑀭 𑀫𑀳𑀸𑀭𑀸𑀚, 𑀥𑀫𑁆𑀫𑁄 𑀘𑀺𑀡𑁆𑀡𑁄 𑀲𑀼𑀔𑀸𑀯𑀳𑁄;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸;
𑀲𑀼𑀘𑀺𑀡𑁆𑀡𑁂𑀦 𑀤𑀺𑀯𑀁 𑀧𑀢𑁆𑀢𑀸, 𑀫𑀸 𑀥𑀫𑁆𑀫𑀁 𑀭𑀸𑀚 𑀧𑀸𑀫𑀤𑁄’’𑀢𑀺.
𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀇𑀥 𑀥𑀫𑁆𑀫𑀦𑁆𑀢𑀺 𑀫𑀸𑀢𑀸𑀧𑀺𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑀁. 𑀢𑀁 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀤𑀸𑀦𑀫𑀸𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀲𑀭𑀻𑀭𑀓𑀺𑀘𑁆𑀘𑀧𑀭𑀺𑀳𑀭𑀡𑀁 𑀓𑀭𑁄𑀦𑁆𑀢𑁄𑀯 𑀧𑀽𑀭𑁂𑀳𑀻𑀢𑀺 𑀯𑀤𑀢𑀺. 𑀧𑀼𑀢𑁆𑀢𑀤𑀸𑀭𑁂𑀲𑀽𑀢𑀺 𑀧𑀼𑀢𑁆𑀢𑀥𑀻𑀢𑀭𑁄 𑀢𑀸𑀯 𑀧𑀸𑀧𑀸 𑀦𑀺𑀯𑀸𑀭𑁂𑀢𑁆𑀯𑀸 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 ¶ 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀢𑀺𑀭𑀽𑀧𑀓𑀼𑀮𑀯𑀁𑀲𑁂𑀦 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀦𑁆𑀢𑁄 𑀲𑀫𑀬𑁂 𑀥𑀦𑀁 𑀤𑁂𑀦𑁆𑀢𑁄 𑀧𑀼𑀢𑁆𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫, 𑀪𑀭𑀺𑀬𑀁 𑀲𑀫𑁆𑀫𑀸𑀦𑁂𑀦𑁆𑀢𑁄 𑀅𑀦𑀯𑀫𑀸𑀦𑁂𑀦𑁆𑀢𑁄 𑀅𑀦𑀢𑀺𑀘𑀭𑀦𑁆𑀢𑁄 𑀇𑀲𑁆𑀲𑀭𑀺𑀬𑀁 𑀯𑁄𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀮𑀗𑁆𑀓𑀸𑀭𑀁 𑀅𑀦𑀼𑀧𑁆𑀧𑀤𑁂𑀦𑁆𑀢𑁄 𑀤𑀸𑀭𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀽𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 𑀅𑀯𑀺𑀲𑀁𑀯𑀸𑀤𑁂𑀦𑁆𑀢𑁄 𑀏𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀯𑀸𑀳𑀦𑁂𑀲𑀼 𑀩𑀮𑁂𑀲𑀼 𑀘𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀯𑀸𑀳𑀦𑀸𑀦𑀁 𑀩𑀮𑀓𑀸𑀬𑀲𑁆𑀲 𑀘 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑁂𑀦𑁆𑀢𑁄 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀫𑀳𑀮𑁆𑀮𑀓𑀓𑀸𑀮𑁂 𑀓𑀫𑁆𑀫𑁂𑀲𑀼 𑀅𑀬𑁄𑀚𑁂𑀦𑁆𑀢𑁄 𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫.
𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘𑀸𑀢𑀺 𑀕𑀸𑀫𑀦𑀺𑀕𑀫𑀯𑀸𑀲𑀺𑀦𑁄 𑀤𑀡𑁆𑀟𑀩𑀮𑀻𑀳𑀺 𑀅𑀧𑀻𑀴𑁂𑀦𑁆𑀢𑁄𑀯 𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀭𑀝𑁆𑀞𑁂 𑀚𑀦𑀧𑀤𑁂𑀲𑀼 𑀘𑀸𑀢𑀺 𑀭𑀝𑁆𑀞𑀜𑁆𑀘 𑀚𑀦𑀧𑀤𑀜𑁆𑀘 𑀅𑀓𑀸𑀭𑀡𑁂𑀦 𑀓𑀺𑀮𑀫𑁂𑀦𑁆𑀢𑁄 𑀳𑀺𑀢𑀘𑀺𑀢𑁆𑀢𑀁 𑀅𑀧𑀘𑁆𑀘𑀼𑀧𑀝𑁆𑀞𑀧𑁂𑀦𑁆𑀢𑁄 ¶ 𑀢𑀢𑁆𑀣 𑀅𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫, 𑀅𑀧𑀻𑀴𑁂𑀦𑁆𑀢𑁄 𑀧𑀦 𑀳𑀺𑀢𑀘𑀺𑀢𑁆𑀢𑁂𑀦 𑀨𑀭𑀦𑁆𑀢𑁄 𑀢𑀢𑁆𑀣 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘𑀸𑀢𑀺 𑀢𑁂𑀲𑀁 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑁂𑀦𑁆𑀢𑁄𑀯 𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀫𑀺𑀕𑀧𑀓𑁆𑀔𑀻𑀲𑀽𑀢𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀲𑀓𑀼𑀡𑀸𑀦𑀁 𑀅𑀪𑀬𑀁 𑀤𑁂𑀦𑁆𑀢𑁄 𑀢𑁂𑀲𑀼 𑀥𑀫𑁆𑀫𑀁 𑀘𑀭𑀢𑀺 𑀦𑀸𑀫. 𑀥𑀫𑁆𑀫𑁄 𑀘𑀺𑀡𑁆𑀡𑁄𑀢𑀺 𑀲𑀼𑀘𑀭𑀺𑀢𑀥𑀫𑁆𑀫𑁄 𑀘𑀺𑀡𑁆𑀡𑁄. 𑀲𑀼𑀔𑀸𑀯𑀳𑁄𑀢𑀺 𑀢𑀻𑀲𑀼 𑀓𑀼𑀮𑀲𑀫𑁆𑀧𑀤𑀸𑀲𑀼 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀲𑀼𑀔𑀁 𑀆𑀯𑀳𑀢𑀺. 𑀲𑀼𑀘𑀺𑀡𑁆𑀡𑁂𑀦𑀸𑀢𑀺 𑀇𑀥 𑀘𑀺𑀡𑁆𑀡𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀦𑀸 𑀲𑀼𑀘𑀺𑀡𑁆𑀡𑁂𑀦. 𑀤𑀺𑀯𑀁 𑀧𑀢𑁆𑀢𑀸𑀢𑀺 𑀤𑁂𑀯𑀮𑁄𑀓𑀩𑁆𑀭𑀳𑁆𑀫𑀮𑁄𑀓𑀲𑀗𑁆𑀔𑀸𑀢𑀁 𑀤𑀺𑀯𑀁 𑀕𑀢𑀸, 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀮𑀸𑀪𑀺𑀦𑁄 𑀚𑀸𑀢𑀸. 𑀫𑀸 𑀥𑀫𑁆𑀫𑀁 𑀭𑀸𑀚 𑀧𑀸𑀫𑀤𑁄𑀢𑀺 𑀢𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀚𑀻𑀯𑀺𑀢𑀁 𑀚𑀳𑀦𑁆𑀢𑁄𑀧𑀺 𑀥𑀫𑁆𑀫𑀁 𑀫𑀸 𑀧𑀫𑀚𑁆𑀚𑀻𑀢𑀺.
𑀏𑀯𑀁 ¶ 𑀤𑀲 𑀥𑀫𑁆𑀫𑀘𑀭𑀺𑀬𑀕𑀸𑀣𑀸𑀬𑁄 𑀯𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀑𑀯𑀤𑀦𑁆𑀢𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋
‘‘𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸, 𑀏𑀲𑀸𑀯 𑀅𑀦𑀼𑀲𑀸𑀲𑀦𑀻;
𑀲𑀧𑁆𑀧𑀜𑁆𑀜𑀲𑁂𑀯𑀻 𑀓𑀮𑁆𑀬𑀸𑀡𑀻, 𑀲𑀫𑀢𑁆𑀢𑀁 𑀲𑀸𑀫 𑀢𑀁 𑀯𑀺𑀤𑀽’’𑀢𑀺.
𑀢𑀢𑁆𑀣 𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀧𑀤𑀸𑀢𑀺 𑀇𑀤𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀲𑀧𑁆𑀧𑀜𑁆𑀜𑀲𑁂𑀯𑀻 𑀓𑀮𑁆𑀬𑀸𑀡𑀻, 𑀲𑀫𑀢𑁆𑀢𑀁 𑀲𑀸𑀫 𑀢𑀁 𑀯𑀺𑀤𑀽𑀢𑀺, 𑀫𑀳𑀸𑀭𑀸𑀚, 𑀢𑀁 𑀫𑀬𑀸 𑀯𑀼𑀢𑁆𑀢𑀁 𑀑𑀯𑀸𑀤𑀁 𑀢𑁆𑀯𑀁 𑀦𑀺𑀘𑁆𑀘𑀓𑀸𑀮𑀁 𑀲𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀲𑁂𑀯𑀻 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀲𑀫𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀲𑀸𑀫𑀁 𑀯𑀺𑀤𑀽 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁄𑀯 𑀚𑀸𑀦𑀺𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀸𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑁄 𑀫𑀳𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀺, 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑁄𑀦𑁆𑀢𑁄! 𑀅𑀫𑀘𑁆𑀘𑀸 𑀫𑀫 𑀧𑀼𑀢𑁆𑀢𑁂𑀦 ¶ 𑀢𑀭𑀼𑀡𑀚𑀫𑁆𑀩𑀼𑀨𑀮𑀲𑀫𑀸𑀦𑀢𑀼𑀡𑁆𑀟𑁂𑀦 𑀚𑀫𑁆𑀩𑀼𑀓𑀧𑀡𑁆𑀟𑀺𑀢𑁂𑀦 𑀏𑀯𑀁 𑀓𑀣𑁂𑀦𑁆𑀢𑁂𑀦 𑀓𑁂𑀦 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀓𑀢’’𑀦𑁆𑀢𑀺. 𑀲𑁂𑀦𑀸𑀧𑀢𑀺𑀦𑀸, 𑀤𑁂𑀯𑀸𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀚𑀫𑁆𑀩𑀼𑀓𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀺𑀢𑀼 𑀓𑀫𑁆𑀫𑀸𑀦𑀺 𑀅𑀓𑀸𑀲𑀺. 𑀢𑀺𑀡𑁆𑀡𑀁 𑀲𑀓𑀼𑀡𑀸𑀦𑀁 𑀫𑀳𑀦𑁆𑀢𑁄 𑀲𑀓𑁆𑀓𑀸𑀭𑁄 𑀅𑀳𑁄𑀲𑀺. 𑀢𑀬𑁄𑀧𑀺 𑀚𑀦𑀸 𑀭𑀜𑁆𑀜𑁄 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀺𑀁𑀲𑀼. 𑀫𑀳𑀸𑀲𑀢𑁆𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀭𑀸𑀚𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀓𑀼𑀡𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑀸𑀫𑀺, 𑀚𑀫𑁆𑀩𑀼𑀓𑀲𑀓𑀼𑀡 𑀭𑀸𑀚𑀸 𑀢𑀼𑀫𑁆𑀳𑀸𑀓𑀁 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀩𑁆𑀩𑀁 𑀅𑀓𑀸𑀲𑀻’’𑀢𑀺 𑀯𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 ‘‘𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦𑀢𑁆𑀣𑁄, 𑀢𑀼𑀫𑁆𑀳𑁂 𑀅𑀧𑁆𑀧𑀫𑀢𑁆𑀢𑀸 𑀭𑀚𑁆𑀚𑀁 𑀓𑀸𑀭𑁂𑀣𑀸’’𑀢𑀺 𑀫𑀳𑀸𑀚𑀦𑀁 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀧𑀯𑀢𑁆𑀢𑁂𑀬𑁆𑀬𑀸𑀣𑀸’’𑀢𑀺 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀢𑀲𑁆𑀲𑁄𑀯𑀸𑀤𑁄 𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀢𑀺.
𑀲𑀢𑁆𑀣𑀸 ¶ 𑀭𑀜𑁆𑀜𑁄 𑀑𑀯𑀸𑀤𑀯𑀲𑁂𑀦 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀓𑀼𑀡𑁆𑀟𑀮𑀺𑀦𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀯𑁂𑀲𑁆𑀲𑀦𑁆𑀢𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀚𑀫𑁆𑀩𑀼𑀓𑀲𑀓𑀼𑀡𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀢𑁂𑀲𑀓𑀼𑀡𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.
[𑁫𑁨𑁨] 𑁨. 𑀲𑀭𑀪𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸
𑀅𑀮𑀗𑁆𑀓𑀢𑀸 ¶ 𑀓𑀼𑀡𑁆𑀟𑀮𑀺𑀦𑁄 𑀲𑀼𑀯𑀢𑁆𑀣𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑀣𑀸𑀕𑀢𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑀁 𑀅𑀢𑁆𑀢𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀸𑀴𑀓𑀕𑀸𑀫𑀓𑁂 𑀚𑀸𑀢𑁄𑀯𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀸𑀲𑀺. 𑀢𑀤𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀓𑀸𑀴𑀲𑀺𑀮𑀸𑀬𑀁 𑀯𑀺𑀳𑀭𑀢𑀺. 𑀲𑁄 𑀧𑀦 𑀇𑀤𑁆𑀥𑀺𑀩𑀮𑁂𑀦 𑀓𑁄𑀝𑀺𑀧𑁆𑀧𑀢𑁆𑀢𑀪𑀸𑀯𑁂𑀦 𑀤𑁂𑀯𑀮𑁄𑀓𑀘𑀸𑀭𑀺𑀓𑀜𑁆𑀘 𑀉𑀲𑁆𑀲𑀤𑀦𑀺𑀭𑀬𑀘𑀸𑀭𑀺𑀓𑀜𑁆𑀘 𑀕𑀘𑁆𑀙𑀢𑀺. 𑀤𑁂𑀯𑀮𑁄𑀓𑁂 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀺𑀲𑁆𑀯𑀸 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀘 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀅𑀲𑀼𑀓𑁄 𑀉𑀧𑀸𑀲𑀓𑁄 𑀅𑀲𑀼𑀓𑀸 𑀘 𑀉𑀧𑀸𑀲𑀺𑀓𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺, 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀲𑀼 𑀅𑀲𑀼𑀓𑁄 𑀘 𑀅𑀲𑀼𑀓𑀸 𑀘 𑀦𑀺𑀭𑀬𑀸𑀤𑀻𑀲𑀼 𑀅𑀲𑀼𑀓𑀅𑀧𑀸𑀬𑁂 ¶ 𑀦𑀸𑀫 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀲𑀺. 𑀫𑀦𑀼𑀲𑁆𑀲𑀸 𑀲𑀸𑀲𑀦𑁂 𑀧𑀲𑀻𑀤𑀦𑁆𑀢𑀺, 𑀢𑀺𑀢𑁆𑀣𑀺𑀬𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀺. 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀓𑁆𑀓𑀸𑀭𑁄 𑀫𑀳𑀦𑁆𑀢𑁄 𑀅𑀳𑁄𑀲𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀳𑀸𑀬𑀢𑀺.
𑀢𑁂 𑀣𑁂𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀚𑀻𑀯𑀦𑁆𑀢𑁂 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑀸 𑀪𑀺𑀚𑁆𑀚𑀦𑁆𑀢𑀺, 𑀲𑀓𑁆𑀓𑀸𑀭𑁄 𑀘 𑀧𑀭𑀺𑀳𑀸𑀬𑀢𑀺, 𑀫𑀸𑀭𑀸𑀧𑁂𑀲𑁆𑀲𑀸𑀫 𑀦’’𑀦𑁆𑀢𑀺 𑀣𑁂𑀭𑀲𑁆𑀲 𑀫𑀸𑀭𑀡𑀢𑁆𑀣𑀁 𑀲𑀫𑀡𑀕𑀼𑀢𑁆𑀢𑀓𑀲𑁆𑀲 𑀦𑀸𑀫 𑀘𑁄𑀭𑀲𑁆𑀲 𑀲𑀳𑀲𑁆𑀲𑀁 𑀅𑀤𑀁𑀲𑀼. 𑀲𑁄 ‘‘𑀣𑁂𑀭𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀓𑀸𑀴𑀲𑀺𑀮𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀇𑀤𑁆𑀥𑀺𑀬𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀘𑁄𑀭𑁄 𑀢𑀁 𑀤𑀺𑀯𑀲𑀁 𑀣𑁂𑀭𑀁 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂𑀧𑀻𑀢𑀺 𑀙 𑀤𑀺𑀯𑀲𑁂 𑀅𑀕𑀫𑀸𑀲𑀺. 𑀣𑁂𑀭𑁄𑀧𑀺 𑀢𑀣𑁂𑀯 𑀇𑀤𑁆𑀥𑀺𑀬𑀸 𑀧𑀓𑁆𑀓𑀸𑀫𑀺. 𑀲𑀢𑁆𑀢𑀫𑁂 𑀧𑀦 𑀤𑀺𑀯𑀲𑁂 𑀣𑁂𑀭𑀲𑁆𑀲 𑀧𑀼𑀩𑁆𑀩𑁂 𑀓𑀢𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀑𑀓𑀸𑀲𑀁 𑀮𑀪𑀺. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀪𑀭𑀺𑀬𑀸𑀬 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑁂𑀢𑀼𑀓𑀸𑀫𑁄 𑀬𑀸𑀦𑀓𑁂𑀦 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀘𑁄𑀭𑀸𑀦𑀁 𑀉𑀝𑁆𑀞𑀺𑀢𑀸𑀓𑀸𑀭𑀁 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀣𑁂𑀲𑀺 𑀧𑀳𑀭𑀺. 𑀢𑁂 𑀘𑀓𑁆𑀔𑀼𑀤𑀼𑀩𑁆𑀩𑀮𑀢𑀸𑀬 𑀭𑀽𑀧𑀤𑀲𑁆𑀲𑀦𑀭𑀳𑀺𑀢𑀸 𑀢𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀅𑀲𑀜𑁆𑀚𑀸𑀦𑀦𑁆𑀢𑀸 ‘‘𑀘𑁄𑀭𑀸 𑀏𑀯 𑀏𑀢𑁂’’𑀢𑀺 𑀲𑀜𑁆𑀜𑀸𑀬, ‘‘𑀢𑀸𑀢, 𑀅𑀲𑀼𑀓𑀸 𑀦𑀸𑀫 𑀘𑁄𑀭𑀸 𑀦𑁄 𑀖𑀸𑀢𑁂𑀦𑁆𑀢𑀺, 𑀢𑁆𑀯𑀁 𑀧𑀝𑀺𑀓𑁆𑀓𑀫𑀸𑀳𑀻’’𑀢𑀺 𑀢𑀲𑁆𑀲𑁂𑀯𑀢𑁆𑀣𑀸𑀬 𑀧𑀭𑀺𑀤𑁂𑀯𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀬𑀸 𑀧𑁄𑀣𑀺𑀬𑀫𑀸𑀦𑀸𑀧𑀺 𑀫𑀬𑁆𑀳𑀁 𑀬𑁂𑀯𑀢𑁆𑀣𑀸𑀬 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀬𑀼𑀢𑁆𑀢𑀁 𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺. 𑀅𑀣 𑀦𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 𑀘𑁄𑀭𑀸𑀦𑀁 𑀧𑀮𑀸𑀬𑀦𑀸𑀓𑀸𑀭𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 ‘‘𑀅𑀫𑁆𑀫 ¶ , 𑀢𑀸𑀢𑀸, 𑀫𑀸 𑀪𑀸𑀬𑀺𑀢𑁆𑀣, 𑀘𑁄𑀭𑀸 𑀧𑀮𑀸𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀕𑁂𑀳𑀫𑁂𑀯 𑀆𑀦𑁂𑀲𑀺. 𑀢𑀁 𑀓𑀫𑁆𑀫𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀪𑀲𑁆𑀫𑀧𑀝𑀺𑀘𑁆𑀙𑀦𑁆𑀦𑁄 𑀅𑀗𑁆𑀕𑀸𑀭𑀭𑀸𑀲𑀺 𑀯𑀺𑀬 𑀞𑀢𑁆𑀯𑀸 𑀇𑀫𑀁 𑀅𑀦𑁆𑀢𑀺𑀫𑀲𑀭𑀻𑀭𑀁 𑀉𑀧𑀥𑀸𑀯𑀺𑀢𑁆𑀯𑀸 𑀕𑀡𑁆𑀳𑀺. 𑀬𑀣𑀸 𑀳𑀺 𑀧𑀦 𑀲𑀼𑀦𑀔𑀮𑀼𑀤𑁆𑀤𑀓𑁂𑀦 𑀫𑀺𑀕𑀁 𑀤𑀺𑀲𑁆𑀯𑀸 𑀲𑀼𑀦𑀔𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀫𑀺𑀕𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀕𑀡𑁆𑀳𑀸𑀢𑀺, 𑀏𑀯𑀁 𑀇𑀤𑀁 𑀓𑀫𑁆𑀫𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀑𑀓𑀸𑀲𑀁 𑀮𑀪𑀢𑀺, 𑀢𑀲𑁆𑀫𑀺𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑁂𑀦 𑀫𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺.
𑀣𑁂𑀭𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲 𑀆𑀓𑀟𑁆𑀠𑀺𑀢𑀪𑀸𑀯𑀁 𑀜𑀢𑁆𑀯𑀸 𑀦 𑀅𑀧𑀕𑀘𑁆𑀙𑀺. 𑀣𑁂𑀭𑁄 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑀲𑀫𑀢𑁆𑀣𑀯𑁂𑀚𑀬𑀦𑁆𑀢𑀓𑀫𑁆𑀧𑀦𑀲𑀫𑀢𑁆𑀣𑀸𑀧𑀺𑀲𑁆𑀲 𑀇𑀤𑁆𑀥𑀺 𑀓𑀫𑁆𑀫𑀩𑀮𑁂𑀦 𑀤𑀼𑀩𑁆𑀩𑀮𑀢𑀁 𑀧𑀢𑁆𑀢𑀸. 𑀘𑁄𑀭𑁄 𑀣𑁂𑀭𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀅𑀝𑁆𑀞𑀻𑀦𑀺 𑀢𑀡𑁆𑀟𑀼𑀮𑀓𑀡𑀫𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀲𑀜𑁆𑀘𑀼𑀡𑁆𑀡𑁂𑀢𑁆𑀯𑀸 𑀧𑀮𑀸𑀮𑀧𑀺𑀝𑁆𑀞𑀺𑀓𑀓𑀭𑀡𑀁 𑀦𑀸𑀫 𑀓𑀢𑁆𑀯𑀸 ‘‘𑀫𑀢𑁄’’𑀢𑀺 𑀲𑀜𑁆𑀜𑀸𑀬 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑀧𑀺𑀝𑁆𑀞𑁂 𑀔𑀺𑀧𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀧𑀓𑁆𑀓𑀸𑀫𑀺. 𑀣𑁂𑀭𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀭𑀻𑀭𑀁 𑀛𑀸𑀦𑀯𑁂𑀞𑀦𑁂𑀦 𑀯𑁂𑀞𑁂𑀢𑁆𑀯𑀸 𑀣𑀺𑀭𑀁 𑀓𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀆𑀬𑀼𑀲𑀗𑁆𑀔𑀸𑀭𑁄 𑀫𑁂 𑀑𑀲𑁆𑀲𑀝𑁆𑀞𑁄, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦’’𑀆𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀢𑁆𑀣 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀻’’𑀢𑀺. ‘‘𑀓𑀸𑀴𑀲𑀺𑀮𑀸𑀧𑀝𑁆𑀝𑁂, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺, 𑀫𑁄𑀕𑁆𑀕𑀮𑁆𑀮𑀸𑀦, 𑀥𑀫𑁆𑀫𑀁 𑀫𑀬𑁆𑀳𑀁 𑀓𑀣𑁂𑀢𑁆𑀯𑀸 𑀬𑀸𑀳𑀺, 𑀢𑀸𑀤𑀺𑀲𑀲𑁆𑀲 𑀲𑀸𑀯𑀓𑀲𑁆𑀲 𑀇𑀤𑀸𑀦𑀺 𑀤𑀲𑁆𑀲𑀦𑀁 𑀦𑀢𑁆𑀣𑀻𑀢𑀺. 𑀲𑁄 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀸𑀮𑀧𑁆𑀧𑀫𑀸𑀡𑀁 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀸 𑀇𑀤𑁆𑀥𑀺𑀬𑁄 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀸𑀴𑀲𑀺𑀮𑀸𑀬𑀁 𑀅𑀝𑀯𑀺𑀬𑀁 𑀧𑀭𑀺𑀦𑀺𑀩𑁆𑀩𑀸𑀬𑀺.
𑀢𑀗𑁆𑀔𑀡𑀜𑁆𑀜𑁂𑀯 𑀙 𑀤𑁂𑀯𑀮𑁄𑀓𑀸 𑀏𑀓𑀓𑁄𑀮𑀸𑀳𑀮𑀸 𑀅𑀳𑁂𑀲𑀼𑀁, ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀆𑀘𑀭𑀺𑀬𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀸𑀯𑀸𑀲𑀥𑀽𑀫𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀘𑁂𑀯 𑀦𑀸𑀦𑀸𑀤𑀸𑀭𑀽𑀦𑀺 𑀘 𑀕𑀳𑁂𑀢𑁆𑀯𑀸 𑀆𑀕𑀫𑀺𑀁𑀲𑀼, 𑀏𑀓𑀽𑀦𑀲𑀢𑀭𑀢𑀦𑀘𑀦𑁆𑀤𑀦𑀘𑀺𑀢𑀓𑀸 ¶ 𑀅𑀳𑁄𑀲𑀺. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀲𑀺. 𑀆𑀴𑀸𑀳𑀦𑀲𑁆𑀲 𑀲𑀫𑀦𑁆𑀢𑀢𑁄 𑀬𑁄𑀚𑀦𑀫𑀢𑁆𑀢𑁂 𑀧𑀤𑁂𑀲𑁂 𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀺. 𑀤𑁂𑀯𑀸𑀦𑀁 𑀅𑀦𑁆𑀢𑀭𑁂 𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀤𑁂𑀯𑀸 𑀅𑀳𑁂𑀲𑀼𑀁. 𑀬𑀣𑀸𑀓𑁆𑀓𑀫𑁂𑀦 𑀤𑁂𑀯𑀸𑀦𑀁 𑀅𑀦𑁆𑀢𑀭𑁂 𑀬𑀓𑁆𑀔𑀸 𑀢𑀺𑀝𑁆𑀞𑀦𑁆𑀢𑀺, 𑀬𑀓𑁆𑀔𑀸𑀦𑀁 𑀅𑀦𑁆𑀢𑀭𑁂 𑀕𑀦𑁆𑀥𑀩𑁆𑀩𑀸 𑀢𑀺𑀝𑁆𑀞𑀦𑁆𑀢𑀺, 𑀕𑀦𑁆𑀥𑀩𑁆𑀩𑀸𑀦𑀁 𑀅𑀦𑁆𑀢𑀭𑁂 𑀦𑀸𑀕𑀸 𑀢𑀺𑀝𑁆𑀞𑀦𑁆𑀢𑀺, 𑀦𑀸𑀕𑀸𑀦𑀁 𑀅𑀦𑁆𑀢𑀭𑁂 𑀯𑁂𑀦𑀢𑁂𑀬𑁆𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀯𑁂𑀦𑀢𑁂𑀬𑁆𑀬𑀸𑀦𑀁 𑀅𑀦𑁆𑀢𑀭𑁂 𑀓𑀺𑀦𑁆𑀦𑀭𑀸 𑀢𑀺𑀝𑁆𑀞𑀦𑁆𑀢𑀺, 𑀓𑀺𑀦𑁆𑀦𑀭𑀸𑀦𑀁 𑀅𑀦𑁆𑀢𑀭𑁂 𑀙𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀙𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀲𑀼𑀯𑀡𑁆𑀡𑀘𑀸𑀫𑀭𑀸 ¶ 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀢𑀭𑁂 𑀥𑀚𑀸 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀝𑀸𑀓𑀸 𑀢𑀺𑀝𑁆𑀞𑀦𑁆𑀢𑀺. 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀸𑀥𑀼𑀓𑀻𑀴𑀁 𑀓𑀻𑀴𑀺𑀁𑀲𑀼. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀥𑀸𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑁂𑀴𑀼𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺. 𑀢𑀤𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑁂 ¶ 𑀅𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀸 𑀫𑀳𑀦𑁆𑀢𑀁 𑀲𑀫𑁆𑀫𑀸𑀦𑀁 𑀦 𑀮𑀪𑀺, 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀦 𑀩𑀼𑀤𑁆𑀥𑀸𑀦𑀁 𑀲𑀫𑀻𑀧𑁂 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀫𑀳𑀸𑀲𑀫𑁆𑀫𑀸𑀦𑀁 𑀮𑀪𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀫 𑀲𑀦𑁆𑀢𑀺𑀓𑀸 𑀲𑀫𑁆𑀫𑀸𑀦𑀁 𑀮𑀪𑀢𑀺, 𑀧𑀼𑀩𑁆𑀩𑁂𑀧𑀺 𑀮𑀪𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑁄𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀲𑀩𑁆𑀩𑀸𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼. 𑀧𑀼𑀭𑁄𑀳𑀺𑀢𑁄 𑀧𑀼𑀢𑁆𑀢𑀲𑁆𑀲 𑀚𑀸𑀢𑀓𑁆𑀔𑀡𑁂 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀦𑀓𑁆𑀔𑀢𑁆𑀢𑀬𑁄𑀕𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑀢𑁆𑀢𑀸 𑀏𑀲𑁄 𑀓𑀼𑀫𑀸𑀭𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀥𑀦𑀼𑀕𑁆𑀕𑀳𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀲𑀼𑀔𑀲𑀬𑀺𑀢𑀪𑀸𑀯𑀁 𑀧𑀼𑀘𑁆𑀙𑀺. ‘‘𑀓𑀼𑀢𑁄 𑀫𑁂, 𑀆𑀘𑀭𑀺𑀬, 𑀲𑀼𑀔𑀁, 𑀅𑀚𑁆𑀚 𑀲𑀓𑀮𑀦𑀺𑀯𑁂𑀲𑀦𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀸 𑀪𑀸𑀬𑀺, 𑀤𑁂𑀯, 𑀦 𑀢𑀼𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑁂𑀬𑁂𑀯, 𑀲𑀓𑀮𑀦𑀕𑀭𑁂𑀧𑀺 𑀧𑀚𑁆𑀚𑀮𑀺𑀁𑀲𑀼𑀬𑁂𑀯, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀓𑀼𑀫𑀸𑀭𑀲𑁆𑀲 𑀚𑀸𑀢𑀢𑁆𑀢𑀸 𑀏𑀯𑀁 𑀅𑀳𑁄𑀲𑀻’’𑀢𑀺. ‘‘𑀆𑀘𑀭𑀺𑀬, 𑀏𑀯𑀁 𑀚𑀸𑀢𑀓𑀼𑀫𑀸𑀭𑀲𑁆𑀲 𑀧𑀦 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀦 𑀓𑀺𑀜𑁆𑀘𑀺, 𑀫𑀳𑀸𑀭𑀸𑀚, 𑀲𑁄 𑀧𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀥𑀦𑀼𑀕𑁆𑀕𑀳𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀲𑀸𑀥𑀼, 𑀆𑀘𑀭𑀺𑀬, 𑀢𑁂𑀦 𑀳𑀺 𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀅𑀫𑁆𑀳𑀸𑀓𑀁 𑀤𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀔𑀻𑀭𑀫𑀽𑀮𑀁 𑀢𑀸𑀯 𑀲𑀳𑀲𑁆𑀲𑀁 𑀤𑀸𑀧𑁂𑀲𑀺. 𑀧𑀼𑀭𑁄𑀳𑀺𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀤𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀚𑀸𑀢𑀓𑁆𑀔𑀡𑁂 𑀆𑀯𑀼𑀥𑀸𑀦𑀁 𑀧𑀚𑁆𑀚𑀮𑀺𑀢𑀢𑁆𑀢𑀸 ‘‘𑀚𑁄𑀢𑀺𑀧𑀸𑀮𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺.
𑀲𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑀫𑀸𑀦𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀉𑀢𑁆𑀢𑀫𑀭𑀽𑀧𑀥𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸, ‘‘𑀢𑀸𑀢, 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 ¶ 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀧𑁆𑀧𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀘𑀭𑀺𑀬𑀪𑀸𑀕𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 ¶ 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑁂𑀦𑁂𑀯 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀆𑀘𑀭𑀺𑀬𑁄 𑀢𑀼𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀔𑀕𑁆𑀕𑀭𑀢𑀦𑀁 𑀲𑀦𑁆𑀥𑀺𑀬𑀼𑀢𑁆𑀢𑀁 𑀫𑁂𑀡𑁆𑀟𑀓𑀲𑀺𑀗𑁆𑀕𑀥𑀦𑀼𑀁 𑀲𑀦𑁆𑀥𑀺𑀬𑀼𑀢𑁆𑀢𑀁 𑀢𑀽𑀡𑀻𑀭𑀁 𑀅𑀢𑁆𑀢𑀦𑁄 𑀲𑀦𑁆𑀦𑀸𑀳𑀓𑀜𑁆𑀘𑀼𑀓𑀁 𑀉𑀡𑁆𑀳𑀻𑀲𑀜𑁆𑀘 𑀤𑀢𑁆𑀯𑀸 ‘‘𑀢𑀸𑀢 𑀚𑁄𑀢𑀺𑀧𑁄𑀮, 𑀅𑀳𑀁 𑀫𑀳𑀮𑁆𑀮𑀓𑁄, 𑀇𑀤𑀸𑀦𑀺 𑀢𑁆𑀯𑀁 𑀇𑀫𑁂 𑀫𑀸𑀡𑀯𑀓𑁂 𑀲𑀺𑀓𑁆𑀔𑀸𑀧𑁂𑀳𑀻’’𑀢𑀺 𑀧𑀜𑁆𑀘𑀲𑀢𑀫𑀸𑀡𑀯𑀓𑁂𑀧𑀺 𑀢𑀲𑁆𑀲𑁂𑀯 𑀦𑀺𑀬𑁆𑀬𑀸𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀁 𑀉𑀧𑀓𑀭𑀡𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀆𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀧𑀺𑀢𑀸 𑀅𑀯𑁄𑀘 ‘‘𑀉𑀕𑁆𑀕𑀳𑀺𑀢𑀁 𑀢𑁂, 𑀢𑀸𑀢, 𑀲𑀺𑀧𑁆𑀧’’𑀦𑁆𑀢𑀺. ‘‘𑀆𑀫, 𑀢𑀸𑀢𑀸’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀫𑁂 ¶ , 𑀤𑁂𑀯, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀓𑀭𑁄𑀢𑀽’’𑀢𑀺 𑀆𑀳. ‘‘𑀆𑀘𑀭𑀺𑀬, 𑀅𑀫𑁆𑀳𑁂 𑀉𑀧𑀝𑁆𑀞𑀳𑀢𑀽’’𑀢𑀺. ‘‘𑀧𑀭𑀺𑀩𑁆𑀩𑀬𑀫𑀲𑁆𑀲 𑀚𑀸𑀦𑀸𑀣, 𑀤𑁂𑀯𑀸’’𑀢𑀺. ‘‘𑀲𑁄 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀮𑀪𑀢𑀽’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀸’’𑀢𑀺 𑀆𑀳. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺.
𑀭𑀸𑀚𑀧𑀸𑀤𑀫𑀽𑀮𑀺𑀓𑀸 𑀉𑀚𑁆𑀛𑀸𑀬𑀺𑀁𑀲𑀼 𑁋 ‘‘𑀫𑀬𑀁 𑀚𑁄𑀢𑀺𑀧𑀸𑀮𑁂𑀦 𑀓𑀢𑀓𑀫𑁆𑀫𑀁 𑀦 𑀧𑀲𑁆𑀲𑀸𑀫, 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀢𑀺, 𑀫𑀬𑀫𑀲𑁆𑀲 𑀲𑀺𑀧𑁆𑀧𑀁 𑀧𑀲𑁆𑀲𑀺𑀢𑀼𑀓𑀸𑀫𑀸’’𑀢𑀺. 𑀭𑀸𑀚𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑀲𑁆𑀲 𑀓𑀣𑁂𑀲𑀺. 𑀧𑀼𑀭𑁄𑀳𑀺𑀢𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀧𑀼𑀢𑁆𑀢𑀲𑁆𑀲𑀸𑀭𑁄𑀘𑁂𑀲𑀺. 𑀲𑁄 ‘‘𑀲𑀸𑀥𑀼, 𑀢𑀸𑀢, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀲𑁆𑀲𑁂𑀲𑁆𑀲𑀸𑀫𑀺 𑀲𑀺𑀧𑁆𑀧𑀁, 𑀅𑀧𑀺𑀘 𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑀽’’𑀢𑀺 𑀆𑀳. 𑀧𑀼𑀭𑁄𑀳𑀺𑀢𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀲𑀺. 𑀲𑀝𑁆𑀞𑀺𑀲𑀳𑀲𑁆𑀲𑀸 𑀥𑀦𑀼𑀕𑁆𑀕𑀳𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀦𑀕𑀭𑀯𑀸𑀲𑀺𑀦𑁄 𑀚𑁄𑀢𑀺𑀧𑀸𑀮𑀲𑁆𑀲 𑀲𑀺𑀧𑁆𑀧𑀁 𑀧𑀲𑁆𑀲𑀦𑁆𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀧𑀮𑁆𑀮𑀗𑁆𑀓𑀯𑀭𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀥𑀦𑀼𑀕𑁆𑀕𑀳𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀚𑁄𑀢𑀺𑀧𑀸𑀮𑁄 𑀆𑀕𑀘𑁆𑀙𑀢𑀽’’𑀢𑀺 𑀧𑁂𑀲𑁂𑀲𑀺. 𑀲𑁄 𑀆𑀘𑀭𑀺𑀬𑁂𑀦 𑀤𑀺𑀦𑁆𑀦𑀸𑀦𑀺 𑀥𑀦𑀼𑀢𑀽𑀡𑀻𑀭𑀲𑀦𑁆𑀦𑀸𑀳𑀓𑀜𑁆𑀘𑀼𑀓𑀉𑀡𑁆𑀳𑀻𑀲𑀸𑀦𑀺 𑀦𑀺𑀯𑀸𑀲𑀦𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀔𑀕𑁆𑀕𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀓𑀢𑀺𑀯𑁂𑀲𑁂𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.
𑀥𑀦𑀼𑀕𑁆𑀕𑀳𑀸 ‘‘𑀚𑁄𑀢𑀺𑀧𑀸𑀮𑁄 𑀓𑀺𑀭 𑀥𑀦𑀼𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 𑀆𑀕𑀢𑁄, 𑀥𑀦𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀦 𑀆𑀕𑀢𑀢𑁆𑀢𑀸 𑀅𑀫𑁆𑀳𑀸𑀓𑀁 𑀳𑀢𑁆𑀣𑀢𑁄 𑀥𑀦𑀼𑀁 𑀕𑀳𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺 ¶ , 𑀦𑀸𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀓𑀢𑀺𑀓𑀁 𑀓𑀭𑀺𑀁𑀲𑀼. 𑀭𑀸𑀚𑀸 𑀚𑁄𑀢𑀺𑀧𑀸𑀮𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀺𑀧𑁆𑀧𑀁 𑀤𑀲𑁆𑀲𑁂𑀳𑀻’’𑀢𑀺 𑀆𑀳. 𑀲𑁄 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀞𑀺𑀢𑁄 𑀲𑀸𑀝𑀓𑀁 𑀅𑀧𑀦𑁂𑀢𑁆𑀯𑀸 𑀲𑀦𑁆𑀦𑀸𑀳𑀓𑀜𑁆𑀘𑀼𑀓𑀁 𑀧𑀯𑁂𑀲𑁂𑀢𑁆𑀯𑀸 𑀉𑀡𑁆𑀳𑀻𑀲𑀁 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀫𑁂𑀡𑁆𑀟𑀓𑀲𑀺𑀗𑁆𑀕𑀥𑀦𑀼𑀫𑁆𑀳𑀺 𑀧𑀯𑀸𑀮𑀯𑀡𑁆𑀡𑀁 𑀚𑀺𑀬𑀁 𑀆𑀭𑁄𑀧𑁂𑀢𑁆𑀯𑀸 𑀢𑀽𑀡𑀻𑀭𑀁 𑀧𑀺𑀝𑁆𑀞𑁂 𑀩𑀦𑁆𑀥𑀺𑀢𑁆𑀯𑀸 𑀔𑀕𑁆𑀕𑀁 𑀯𑀸𑀫𑀢𑁄 𑀓𑀢𑁆𑀯𑀸 𑀯𑀚𑀺𑀭𑀕𑁆𑀕𑀁 𑀦𑀸𑀭𑀸𑀘𑀁 𑀦𑀔𑀧𑀺𑀝𑁆𑀞𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀸𑀡𑀺𑀁 𑀯𑀺𑀯𑀭𑀺𑀢𑁆𑀯𑀸 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀮𑀗𑁆𑀓𑀢𑀦𑀸𑀕𑀓𑀼𑀫𑀸𑀭𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑀸 𑀯𑀕𑁆𑀕𑀦𑁆𑀢𑀺 𑀦𑀤𑀦𑁆𑀢𑀺 𑀅𑀧𑁆𑀨𑁄𑀝𑁂𑀦𑁆𑀢𑀺 𑀲𑁂𑀴𑁂𑀦𑁆𑀢𑀺. 𑀭𑀸𑀚𑀸 ‘‘𑀤𑀲𑁆𑀲𑁂𑀳𑀺, 𑀚𑁄𑀢𑀺𑀧𑀸𑀮, 𑀲𑀺𑀧𑁆𑀧’’𑀦𑁆𑀢𑀺 𑀆𑀳. 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀥𑀦𑀼𑀕𑁆𑀕𑀳𑁂𑀲𑀼 𑀅𑀓𑁆𑀔𑀡𑀯𑁂𑀥𑀺𑀯𑀸𑀮𑀯𑁂𑀥𑀺𑀲𑀭𑀯𑁂𑀥𑀺𑀲𑀤𑁆𑀤𑀯𑁂𑀥𑀺𑀦𑁄 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑁂 𑀧𑀓𑁆𑀓𑁄𑀲𑀸𑀧𑁂𑀳𑀻𑀢𑀺. 𑀅𑀣 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀲𑀺.
𑀫𑀳𑀸𑀲𑀢𑁆𑀢𑁄 𑀭𑀸𑀚𑀗𑁆𑀕𑀡𑁂 𑀘𑀢𑀼𑀭𑀲𑁆𑀲𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀫𑀡𑁆𑀟𑀮𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀘𑀢𑁆𑀢𑀸𑀭𑁄 𑀥𑀦𑀼𑀕𑁆𑀕𑀳𑁂 𑀞𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀲 𑀢𑀺𑀁𑀲 𑀢𑀺𑀁𑀲 𑀓𑀡𑁆𑀟𑀲𑀳𑀲𑁆𑀲𑀸𑀦𑀺 𑀤𑀸𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀲 𑀲𑀦𑁆𑀢𑀺𑀓𑁂 𑀏𑀓𑁂𑀓𑀁 𑀓𑀡𑁆𑀟𑀤𑀸𑀬𑀓𑀁 𑀞𑀧𑁂𑀢𑁆𑀯𑀸 𑀲𑀬𑀁 𑀯𑀚𑀺𑀭𑀕𑁆𑀕𑀁 𑀦𑀸𑀭𑀸𑀘𑀁 𑀕𑀳𑁂𑀢𑁆𑀯𑀸 𑀫𑀡𑁆𑀟𑀮𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀫𑁂 𑀘𑀢𑁆𑀢𑀸𑀭𑁄 ¶ 𑀥𑀦𑀼𑀕𑁆𑀕𑀳𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀭𑁂 𑀔𑀺𑀧𑀺𑀢𑁆𑀯𑀸 𑀫𑀁 𑀯𑀺𑀚𑁆𑀛𑀦𑁆𑀢𑀼, 𑀅𑀳𑀁 𑀏𑀢𑁂𑀳𑀺 𑀔𑀺𑀢𑁆𑀢𑀓𑀡𑁆𑀟𑀸𑀦𑀺 𑀦𑀺𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀏𑀯𑀁 𑀓𑀭𑁄𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀥𑀦𑀼𑀕𑁆𑀕𑀳𑀸 𑀆𑀳𑀁𑀲𑀼, ‘‘𑀫𑀳𑀸𑀭𑀸𑀚, 𑀫𑀬𑀁 𑀅𑀓𑁆𑀔𑀡𑀯𑁂𑀥𑀺𑀯𑀸𑀮𑀯𑁂𑀥𑀺𑀲𑀭𑀯𑁂𑀥𑀺𑀲𑀤𑁆𑀤𑀯𑁂𑀥𑀺𑀦𑁄, 𑀚𑁄𑀢𑀺𑀧𑀸𑀮𑁄 𑀢𑀭𑀼𑀡𑀤𑀸𑀭𑀓𑁄, 𑀦 𑀫𑀬𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺. 𑀫𑀳𑀸𑀲𑀢𑁆𑀢𑁄 ‘‘𑀲𑀘𑁂 𑀲𑀓𑁆𑀓𑁄𑀣, 𑀯𑀺𑀚𑁆𑀛𑀣 𑀫’’𑀦𑁆𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀓𑀡𑁆𑀟𑀸𑀦𑀺 𑀔𑀺𑀧𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑀸𑀦𑀺 𑀦𑀸𑀭𑀸𑀘𑁂𑀦 𑀧𑀳𑀭𑀺𑀢𑁆𑀯𑀸 𑀬𑀣𑀸 𑀯𑀸 𑀢𑀣𑀸 ¶ 𑀯𑀸 𑀦 𑀧𑀸𑀢𑁂𑀲𑀺, 𑀩𑁄𑀥𑀺𑀓𑁄𑀝𑁆𑀞𑀓𑀁 𑀧𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀢𑀸𑀮𑁂𑀦 𑀢𑀸𑀮𑀁, 𑀯𑀸𑀮𑁂𑀦 𑀯𑀸𑀮𑀁, 𑀤𑀡𑁆𑀟𑀓𑁂𑀦 𑀤𑀡𑁆𑀟𑀓𑀁, 𑀯𑀸𑀚𑁂𑀦 𑀯𑀸𑀚𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄 𑀔𑀺𑀧𑀺𑀢𑁆𑀯𑀸 𑀲𑀭𑀕𑀩𑁆𑀪𑀁 𑀅𑀓𑀸𑀲𑀺. 𑀥𑀦𑀼𑀕𑁆𑀕𑀳𑀸𑀦𑀁 𑀓𑀡𑁆𑀟𑀸𑀦𑀺 𑀔𑀻𑀡𑀸𑀦𑀺. 𑀲𑁄 𑀢𑁂𑀲𑀁 𑀓𑀡𑁆𑀟𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 𑀲𑀭𑀕𑀩𑁆𑀪𑀁 𑀅𑀯𑀺𑀦𑀸𑀲𑁂𑀦𑁆𑀢𑁄𑀯 𑀉𑀧𑁆𑀧𑀢𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄 𑀉𑀦𑁆𑀦𑀸𑀤𑁂𑀦𑁆𑀢𑁄 𑀯𑀕𑁆𑀕𑀦𑁆𑀢𑁄 𑀅𑀧𑁆𑀨𑁄𑀝𑁂𑀦𑁆𑀢𑁄 𑀲𑁂𑀴𑁂𑀦𑁆𑀢𑁄 𑀅𑀘𑁆𑀙𑀭𑀁 𑀧𑀳𑀭𑀦𑁆𑀢𑁄 𑀫𑀳𑀸𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀯𑀢𑁆𑀣𑀸𑀪𑀭𑀡𑀸𑀤𑀻𑀦𑀺 𑀔𑀺𑀧𑀺. 𑀏𑀯𑀁 𑀏𑀓𑀭𑀸𑀲𑀺𑀪𑀽𑀢𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑁆𑀬𑀁 𑀥𑀦𑀁 𑀅𑀳𑁄𑀲𑀺.
𑀅𑀣 ¶ 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀲𑀺𑀧𑁆𑀧𑀁 𑀦𑀸𑀫𑁂𑀢𑀁 𑀚𑁄𑀢𑀺𑀧𑀸𑀮𑀸’’𑀢𑀺? 𑀲𑀭𑀧𑀝𑀺𑀩𑀸𑀳𑀦𑀁 𑀦𑀸𑀫, 𑀤𑁂𑀯𑀸𑀢𑀺. 𑀅𑀜𑁆𑀜𑁂 𑀏𑀢𑀁 𑀚𑀸𑀦𑀦𑁆𑀢𑀸 𑀅𑀢𑁆𑀣𑀻𑀢𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀦𑀢𑁆𑀣𑀺, 𑀤𑁂𑀯𑀸𑀢𑀺. 𑀅𑀧𑀭𑀁 𑀤𑀲𑁆𑀲𑁂𑀳𑀺, 𑀢𑀸𑀢𑀸𑀢𑀺. 𑀤𑁂𑀯, 𑀏𑀢𑁂 𑀢𑀸𑀯 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀞𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀫𑀁 𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, 𑀅𑀳𑀁 𑀧𑀦𑁂𑀢𑁂 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀞𑀺𑀢𑁂 𑀏𑀓𑁂𑀦𑁂𑀯 𑀲𑀭𑁂𑀦 𑀯𑀺𑀚𑁆𑀛𑀺𑀲𑁆𑀲𑀸𑀫𑀻𑀢𑀺. 𑀥𑀦𑀼𑀕𑁆𑀕𑀳𑀸 𑀞𑀸𑀢𑀼𑀁 𑀦 𑀉𑀲𑁆𑀲𑀳𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀘𑀢𑀲𑁆𑀲𑁄 𑀓𑀤𑀮𑀺𑀬𑁄 𑀞𑀧𑀸𑀧𑁂𑀢𑁆𑀯𑀸 𑀦𑀸𑀭𑀸𑀘𑀧𑀼𑀗𑁆𑀔𑁂 𑀭𑀢𑁆𑀢𑀲𑀼𑀢𑁆𑀢𑀓𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀓𑀤𑀮𑀺𑀁 𑀲𑀦𑁆𑀥𑀸𑀬 𑀔𑀺𑀧𑀺. 𑀦𑀸𑀭𑀸𑀘𑁄 𑀢𑀁 𑀓𑀤𑀮𑀺𑀁 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁄 𑀤𑀼𑀢𑀺𑀬𑀁, 𑀢𑀢𑁄 𑀢𑀢𑀺𑀬𑀁, 𑀢𑀢𑁄 𑀘𑀢𑀼𑀢𑁆𑀣𑀁, 𑀢𑀢𑁄 𑀧𑀞𑀫𑀁 𑀯𑀺𑀤𑁆𑀥𑀫𑁂𑀯 𑀯𑀺𑀚𑁆𑀛𑀺𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀳𑀢𑁆𑀣𑁂𑀬𑁂𑀯 𑀧𑀢𑀺𑀝𑁆𑀞𑀳𑀺. 𑀓𑀤𑀮𑀺𑀬𑁄 𑀲𑀼𑀢𑁆𑀢𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀝𑁆𑀞𑀁𑀲𑀼. 𑀫𑀳𑀸𑀚𑀦𑁄 𑀉𑀦𑁆𑀦𑀸𑀤𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀭𑀸𑀚𑀸 ‘‘𑀓𑀺𑀁 𑀲𑀺𑀧𑁆𑀧𑀁 𑀦𑀸𑀫𑁂𑀢𑀁, 𑀢𑀸𑀢𑀸’’𑀢𑀺? 𑀘𑀓𑁆𑀓𑀯𑀺𑀤𑁆𑀥𑀁 𑀦𑀸𑀫, 𑀤𑁂𑀯𑀸𑀢𑀺. 𑀅𑀧𑀭𑀫𑁆𑀧𑀺 𑀤𑀲𑁆𑀲𑁂𑀳𑀺, 𑀢𑀸𑀢𑀸𑀢𑀺. 𑀫𑀳𑀸𑀲𑀢𑁆𑀢𑁄 𑀲𑀭𑀮𑀝𑁆𑀞𑀺𑀁 𑀦𑀸𑀫, 𑀲𑀭𑀭𑀚𑁆𑀚𑀼𑀁 𑀦𑀸𑀫, 𑀲𑀭𑀯𑁂𑀥𑀺𑀁 𑀦𑀸𑀫 𑀤𑀲𑁆𑀲𑁂𑀲𑀺, 𑀲𑀭𑀧𑀸𑀲𑀸𑀤𑀁 𑀦𑀸𑀫, 𑀲𑀭𑀲𑁄𑀧𑀸𑀦𑀁 𑀦𑀸𑀫, 𑀲𑀭𑀫𑀡𑁆𑀟𑀧𑀁 𑀦𑀸𑀫, 𑀲𑀭𑀧𑀸𑀓𑀸𑀭𑀁 𑀦𑀸𑀫, 𑀲𑀭𑀧𑁄𑀓𑁆𑀔𑀭𑀡𑀺𑀁 𑀦𑀸𑀫 𑀅𑀓𑀸𑀲𑀺, 𑀲𑀭𑀧𑀤𑀼𑀫𑀁 𑀦𑀸𑀫 𑀧𑀼𑀧𑁆𑀨𑀸𑀧𑁂𑀲𑀺, 𑀲𑀭𑀯𑀲𑁆𑀲𑀁 𑀦𑀸𑀫 𑀯𑀲𑁆𑀲𑀸𑀧𑁂𑀲𑀺. 𑀇𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 ¶ 𑀇𑀫𑀸𑀦𑀺 𑀤𑁆𑀯𑀸𑀤𑀲 𑀲𑀺𑀧𑁆𑀧𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁂𑀬𑁂𑀯 𑀲𑀢𑁆𑀢 𑀫𑀳𑀸𑀓𑀸𑀬𑁂 𑀧𑀤𑀸𑀮𑁂𑀲𑀺, 𑀅𑀝𑁆𑀞𑀗𑁆𑀕𑀼𑀮𑀩𑀳𑀮𑀁 𑀉𑀤𑀼𑀫𑁆𑀩𑀭𑀧𑀤𑀭𑀁 𑀯𑀺𑀚𑁆𑀛𑀺, 𑀘𑀢𑀼𑀭𑀗𑁆𑀕𑀼𑀮𑀩𑀳𑀮𑀁 𑀅𑀲𑀦𑀧𑀤𑀭𑀁, 𑀤𑁆𑀯𑀗𑁆𑀕𑀼𑀮𑀩𑀳𑀮𑀁 𑀢𑀫𑁆𑀩𑀧𑀝𑁆𑀝𑀁, 𑀏𑀓𑀗𑁆𑀕𑀼𑀮𑀩𑀳𑀮𑀁 𑀅𑀬𑀧𑀝𑁆𑀝𑀁, 𑀏𑀓𑀸𑀩𑀤𑁆𑀥𑀁 𑀨𑀮𑀓𑀲𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀮𑀸𑀮𑀲𑀓𑀝𑀯𑀸𑀮𑀼𑀓𑀲𑀓𑀝𑀧𑀤𑀭𑀲𑀓𑀝𑀸𑀦𑀁 𑀧𑀼𑀭𑀺𑀫𑀪𑀸𑀕𑁂𑀦 𑀲𑀭𑀁 𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸𑀪𑀸𑀕𑁂𑀦 𑀦𑀺𑀓𑁆𑀔𑀫𑀸𑀧𑁂𑀲𑀺, 𑀧𑀘𑁆𑀙𑀸𑀪𑀸𑀕𑁂𑀦 𑀲𑀭𑀁 𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀪𑀸𑀕𑁂𑀦 𑀦𑀺𑀓𑁆𑀔𑀫𑀸𑀧𑁂𑀲𑀺, 𑀉𑀤𑀓𑁂 𑀘𑀢𑀼𑀉𑀲𑀪𑀁, 𑀣𑀮𑁂 𑀅𑀝𑁆𑀞𑀉𑀲𑀪𑀝𑁆𑀞𑀸𑀦𑀁 𑀓𑀡𑁆𑀟𑀁 𑀧𑁂𑀲𑁂𑀲𑀺. 𑀯𑀸𑀢𑀺𑀗𑁆𑀕𑀡𑀲𑀜𑁆𑀜𑀸𑀬 𑀉𑀲𑀪𑀫𑀢𑁆𑀢𑀓𑁂 𑀯𑀸𑀮𑀁 𑀯𑀺𑀚𑁆𑀛𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀭𑁂 𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀲𑀭𑀧𑀸𑀲𑀸𑀤𑀸𑀤𑀻𑀦𑀺 𑀓𑀢𑁆𑀯𑀸 𑀧𑀼𑀦 𑀏𑀓𑁂𑀦 𑀲𑀭𑁂𑀦 𑀢𑁂 𑀲𑀭𑁂 ¶ 𑀧𑀸𑀢𑁂𑀦𑁆𑀢𑁄 𑀪𑀗𑁆𑀕𑀯𑀺𑀪𑀗𑁆𑀕𑁂 𑀅𑀓𑀸𑀲𑀻𑀢𑀺 ‘‘𑀲𑀭𑀪𑀗𑁆𑀕𑁄’’𑀢𑀺 𑀦𑀸𑀫 𑀧𑀜𑁆𑀜𑀸𑀢𑁄. 𑀢𑀲𑁆𑀲 𑀏𑀢𑁆𑀢𑀓𑀸𑀦𑀺 𑀲𑀺𑀧𑁆𑀧𑀸𑀦𑀺 𑀤𑀲𑁆𑀲𑁂𑀦𑁆𑀢𑀲𑁆𑀲𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄.
𑀅𑀣𑀲𑁆𑀲 𑀭𑀸𑀚𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 ‘‘𑀚𑁄𑀢𑀺𑀧𑀸𑀮, 𑀅𑀚𑁆𑀚 𑀯𑀺𑀓𑀸𑀮𑁄, 𑀲𑁆𑀯𑁂 𑀢𑁆𑀯𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀲𑀓𑁆𑀓𑀸𑀭𑀁 𑀕𑀡𑁆𑀳𑀺𑀲𑁆𑀲𑀲𑀺, 𑀓𑁂𑀲𑀫𑀲𑁆𑀲𑀼𑀁 𑀓𑀸𑀭𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀏𑀳𑀻’’𑀢𑀺 𑀢𑀁 𑀤𑀺𑀯𑀲𑀁 𑀧𑀭𑀺𑀩𑁆𑀩𑀬𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁 𑀅𑀤𑀸𑀲𑀺. 𑀫𑀳𑀸𑀲𑀢𑁆𑀢𑁄 ¶ ‘‘𑀇𑀫𑀺𑀦𑀸 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑁆𑀬𑀁 𑀥𑀦𑀁 𑀲𑀸𑀫𑀺𑀓𑀸𑀦𑀜𑁆𑀜𑁂𑀯 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑁆𑀳𑀸𑀬𑀺𑀢𑀼𑀁 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀓𑀸𑀭𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀅𑀦𑁄𑀧𑀫𑀸𑀬 𑀲𑀺𑀭𑀺𑀬𑀸 𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑀁 𑀅𑀪𑀺𑀭𑀼𑀬𑁆𑀳 𑀦𑀺𑀧𑀦𑁆𑀦𑁄 𑀤𑁆𑀯𑁂 𑀬𑀸𑀫𑁂 𑀲𑀬𑀺𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀩𑀼𑀤𑁆𑀥𑁄 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀯 𑀅𑀢𑁆𑀢𑀦𑁄 𑀲𑀺𑀧𑁆𑀧𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀫𑀫 𑀲𑀺𑀧𑁆𑀧𑀲𑁆𑀲 𑀆𑀤𑀺𑀢𑁄𑀯 𑀧𑀭𑀫𑀸𑀭𑀡𑀁 𑀧𑀜𑁆𑀜𑀸𑀬𑀢𑀺, 𑀫𑀚𑁆𑀛𑁂 𑀓𑀺𑀮𑁂𑀲𑀧𑀭𑀺𑀪𑁄𑀕𑁄, 𑀧𑀭𑀺𑀬𑁄𑀲𑀸𑀦𑁂 𑀦𑀺𑀭𑀬𑀫𑁆𑀳𑀺 𑀧𑀝𑀺𑀲𑀦𑁆𑀥𑀺, 𑀧𑀸𑀡𑀸𑀢𑀺𑀧𑀸𑀢𑁄 𑀓𑀺𑀮𑁂𑀲𑀧𑀭𑀺𑀪𑁄𑀕𑁂𑀲𑀼 𑀘 𑀅𑀥𑀺𑀫𑀢𑁆𑀢𑀧𑁆𑀧𑀫𑀸𑀤𑁄 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀭𑀜𑁆𑀜𑀸 𑀫𑀬𑁆𑀳𑀁 𑀫𑀳𑀦𑁆𑀢𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀺𑀦𑁆𑀦𑀁, 𑀫𑀳𑀦𑁆𑀢𑀁 𑀫𑁂 𑀇𑀲𑁆𑀲𑀭𑀺𑀬𑀁 𑀪𑀯𑀺𑀲𑁆𑀲𑀢𑀺, 𑀪𑀭𑀺𑀬𑀸 𑀘 𑀧𑀼𑀢𑁆𑀢𑀥𑀻𑀢𑀭𑁄 𑀘 𑀩𑀳𑀽 𑀪𑀯𑀺𑀲𑁆𑀲𑀦𑁆𑀢𑀺. 𑀓𑀺𑀮𑁂𑀲𑀯𑀢𑁆𑀣𑀼 𑀔𑁄 𑀧𑀦 𑀯𑁂𑀧𑀼𑀮𑁆𑀮𑀕𑀢𑀁 𑀤𑀼𑀘𑁆𑀘𑀚𑀁 𑀳𑁄𑀢𑀺, 𑀇𑀤𑀸𑀦𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀓𑁄𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑀼𑀁 𑀬𑀼𑀢𑁆𑀢𑀁 𑀫𑀬𑁆𑀳’’𑀦𑁆𑀢𑀺 𑀫𑀳𑀸𑀲𑀬𑀦𑀢𑁄 𑀉𑀝𑁆𑀞𑀸𑀬 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀦𑁆𑀢𑁄 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀅𑀕𑁆𑀕𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀓𑁄𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑁄𑀥𑀸𑀯𑀭𑀺𑀦𑀤𑀻𑀢𑀻𑀭𑁂 𑀢𑀺𑀬𑁄𑀚𑀦𑀺𑀓𑀁 𑀓𑀧𑀺𑀝𑁆𑀞𑀯𑀦𑀁 𑀲𑀦𑁆𑀥𑀸𑀬 𑀧𑀸𑀬𑀸𑀲𑀺.
𑀢𑀲𑁆𑀲 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀯𑀺𑀲𑁆𑀲𑀓𑀫𑁆𑀫𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀚𑀸𑀢𑀺𑀧𑀸𑀮𑁄 𑀅𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀺, 𑀕𑁄𑀥𑀸𑀯𑀭𑀺𑀦𑀤𑀻𑀢𑀻𑀭𑁂 𑀓𑀧𑀺𑀝𑁆𑀞𑀯𑀦𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀧𑀝𑀺𑀬𑀸𑀤𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀏𑀓𑀧𑀤𑀺𑀓𑀫𑀕𑁆𑀕𑀁 𑀤𑀺𑀲𑁆𑀯𑀸 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑁂𑀦 𑀫𑀕𑁆𑀕𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀤𑀺𑀲𑁆𑀯𑀸 ‘‘𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀫 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀅𑀜𑁆𑀜𑀸𑀲𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀝𑀓𑀁 𑀅𑀧𑀦𑁂𑀢𑁆𑀯𑀸 𑀭𑀢𑁆𑀢𑀯𑀸𑀓𑀘𑀺𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁𑀲𑀕𑀢𑀁 𑀅𑀓𑀸𑀲𑀺, 𑀚𑀝𑀸𑀫𑀡𑁆𑀟𑀮𑀁 𑀩𑀦𑁆𑀥𑀺𑀢𑁆𑀯𑀸 𑀔𑀸𑀭𑀺𑀓𑀸𑀚𑀁 𑀅𑀁𑀲𑁂 𑀓𑀢𑁆𑀯𑀸 𑀓𑀢𑁆𑀢𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀗𑁆𑀓𑀫𑀁 𑀆𑀭𑀼𑀬𑁆𑀳 𑀓𑀢𑀺𑀧𑀬𑀯𑀸𑀭𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀲𑀺𑀭𑀺𑀬𑀸 𑀯𑀦𑀁 𑀉𑀧𑀲𑁄𑀪𑀬𑀫𑀸𑀦𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀏𑀓𑀓𑁄𑀯 𑀯𑀺𑀳𑀸𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀤𑀬𑁄 𑀜𑀸𑀢𑀺𑀯𑀕𑁆𑀕𑀸𑀧𑀺𑀲𑁆𑀲 𑀢𑀁 𑀅𑀧𑀲𑁆𑀲𑀦𑁆𑀢𑀸 𑀭𑁄𑀤𑀦𑁆𑀢𑀸 𑀧𑀭𑀺𑀤𑁂𑀯𑀦𑁆𑀢𑀸 𑀯𑀺𑀘𑀭𑀦𑁆𑀢𑀺.
𑀅𑀣𑁂𑀓𑁄 ¶ ¶ 𑀯𑀦𑀘𑀭𑀓𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀓𑀧𑀺𑀝𑁆𑀞𑀓𑀅𑀲𑁆𑀲𑀫𑀧𑀤𑁂 𑀦𑀺𑀲𑀺𑀦𑁆𑀦𑀁 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀲𑀺. 𑀢𑁂 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 ‘‘𑀏𑀣 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀯𑀦𑀘𑀭𑀓𑁂𑀦 𑀤𑁂𑀲𑀺𑀢𑁂𑀦 𑀫𑀕𑁆𑀕𑁂𑀦 𑀕𑁄𑀥𑀸𑀯𑀭𑀺𑀦𑀤𑀻𑀢𑀻𑀭𑀁 𑀧𑀸𑀧𑀼𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀤𑀻𑀢𑀻𑀭𑀁 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑁂 𑀲𑀩𑁆𑀩𑁂 𑀅𑀲𑁆𑀲𑀫𑀧𑀤𑀁 ¶ 𑀧𑀯𑁂𑀲𑁂𑀢𑁆𑀯𑀸 𑀢𑀢𑁆𑀭𑀧𑀺 𑀢𑁂𑀲𑀁 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄𑀯 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀯 𑀧𑀩𑁆𑀩𑀚𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀢𑀢𑁆𑀣𑁂𑀯 𑀯𑀲𑀺. 𑀅𑀣𑀲𑁆𑀲 𑀢𑀢𑁆𑀣 𑀯𑀲𑀦𑀪𑀸𑀯𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀜𑁆𑀜𑁂𑀧𑀺 𑀭𑀸𑀚𑀸𑀦𑁄 𑀭𑀝𑁆𑀞𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼, 𑀲𑀫𑀸𑀕𑀫𑁄 𑀫𑀳𑀸 𑀅𑀳𑁄𑀲𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑀭𑀺𑀲𑀸 𑀅𑀳𑁂𑀲𑀼𑀁. 𑀬𑁄 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀢𑀺, 𑀫𑀳𑀸𑀲𑀢𑁆𑀢𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀢𑀺. 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑀸 𑀲𑀸𑀮𑀺𑀲𑁆𑀲𑀭𑁄 𑀫𑁂𑀡𑁆𑀟𑀺𑀲𑁆𑀲𑀭𑁄 𑀧𑀩𑁆𑀩𑀢𑁄 𑀓𑀸𑀴𑀤𑁂𑀯𑀺𑀮𑁄 𑀓𑀺𑀲𑀯𑀘𑁆𑀙𑁄 𑀅𑀦𑀼𑀲𑀺𑀲𑁆𑀲𑁄 𑀦𑀸𑀭𑀤𑁄𑀢𑀺 𑀲𑀢𑁆𑀢 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀦𑁄 𑀅𑀳𑁂𑀲𑀼𑀁. 𑀅𑀧𑀭𑀪𑀸𑀕𑁂 𑀓𑀧𑀺𑀝𑁆𑀞𑀓𑀅𑀲𑁆𑀲𑀫𑁄 𑀧𑀭𑀺𑀧𑀽𑀭𑀺. 𑀇𑀲𑀺𑀕𑀡𑀲𑁆𑀲 𑀯𑀲𑀦𑁄𑀓𑀸𑀲𑁄 𑀦𑀧𑁆𑀧𑀳𑁄𑀢𑀺.
𑀅𑀣 𑀫𑀳𑀸𑀲𑀢𑁆𑀢𑁄 𑀲𑀸𑀮𑀺𑀲𑁆𑀲𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀸𑀮𑀺𑀲𑁆𑀲𑀭, 𑀅𑀬𑀁 𑀅𑀲𑁆𑀲𑀫𑁄 𑀇𑀲𑀺𑀕𑀡𑀲𑁆𑀲 𑀦𑀧𑁆𑀧𑀳𑁄𑀢𑀺, 𑀢𑁆𑀯𑀁 𑀇𑀫𑀁 𑀇𑀲𑀺𑀕𑀡𑀁 𑀕𑀳𑁂𑀢𑁆𑀯𑀸 𑀫𑀚𑁆𑀛𑀭𑀜𑁆𑀜𑁄 𑀯𑀺𑀚𑀺𑀢𑁂 𑀓𑀮𑀧𑁆𑀧𑀘𑀼𑀮𑁆𑀮𑀓𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑀁 𑀇𑀲𑀺𑀕𑀡𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀫𑀦𑀼𑀲𑁆𑀲𑁂𑀲𑀼 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁂𑀲𑀼 𑀧𑀼𑀦 𑀅𑀲𑁆𑀲𑀫𑁄 𑀧𑀭𑀺𑀧𑀽𑀭𑀺. 𑀩𑁄𑀥𑀺𑀲𑀢𑁆𑀢𑁄 𑀫𑁂𑀡𑁆𑀟𑀺𑀲𑁆𑀲𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀫𑁂𑀡𑁆𑀟𑀺𑀲𑁆𑀲𑀭, 𑀢𑁆𑀯𑀁 𑀇𑀫𑀁 𑀇𑀲𑀺𑀕𑀡𑀁 𑀆𑀤𑀸𑀬 𑀲𑀼𑀭𑀝𑁆𑀞𑀚𑀦𑀧𑀤𑀲𑁆𑀲 𑀲𑀻𑀫𑀦𑁆𑀢𑀭𑁂 𑀲𑀸𑀢𑁄𑀤𑀺𑀓𑀸 𑀦𑀸𑀫 𑀦𑀤𑀻 𑀅𑀢𑁆𑀣𑀺, 𑀢𑀲𑁆𑀲𑀸 𑀢𑀻𑀭𑁂 𑀯𑀲𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺, 𑀧𑀼𑀦 𑀓𑀧𑀺𑀝𑁆𑀞𑀓𑀅𑀲𑁆𑀲𑀫𑁄 𑀧𑀭𑀺𑀧𑀽𑀭𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀢𑀢𑀺𑀬𑀯𑀸𑀭𑁂 𑀧𑀩𑁆𑀩𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀩𑁆𑀩𑀢, 𑀢𑁆𑀯𑀁 𑀫𑀳𑀸𑀅𑀝𑀯𑀺𑀬𑀁 𑀅𑀜𑁆𑀚𑀦𑀧𑀩𑁆𑀩𑀢𑁄 𑀦𑀸𑀫 𑀅𑀢𑁆𑀣𑀺, 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀘𑀢𑀼𑀢𑁆𑀣𑀯𑀸𑀭𑁂 𑀓𑀸𑀴𑀤𑁂𑀯𑀺𑀮𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀸𑀴𑀤𑁂𑀯𑀺𑀮, 𑀢𑁆𑀯𑀁 𑀤𑀓𑁆𑀔𑀺𑀡𑀧𑀣𑁂 𑀅𑀯𑀦𑁆𑀢𑀺𑀭𑀝𑁆𑀞𑁂 𑀖𑀦𑀲𑁂𑀮𑀧𑀩𑁆𑀩𑀢𑁄 𑀦𑀸𑀫 𑀅𑀢𑁆𑀣𑀺, 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀸𑀳𑀻’’𑀢𑀺 ¶ 𑀧𑁂𑀲𑁂𑀲𑀺. 𑀧𑀼𑀦 𑀓𑀧𑀺𑀝𑁆𑀞𑀓𑀅𑀲𑁆𑀲𑀫𑁄 𑀧𑀭𑀺𑀧𑀽𑀭𑀺, 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀅𑀦𑁂𑀓𑀲𑀢𑀲𑀳𑀲𑁆𑀲𑀇𑀲𑀺𑀕𑀡𑁄 𑀅𑀳𑁄𑀲𑀺. 𑀓𑀺𑀲𑀯𑀘𑁆𑀙𑁄 𑀧𑀦 𑀫𑀳𑀸𑀲𑀢𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀤𑀡𑁆𑀟𑀓𑀺𑀭𑀜𑁆𑀜𑁄 ¶ 𑀯𑀺𑀚𑀺𑀢𑁂 𑀓𑀼𑀫𑁆𑀪𑀯𑀢𑀺𑀦𑀕𑀭𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀉𑀬𑁆𑀬𑀸𑀦𑁂 𑀯𑀺𑀳𑀸𑀲𑀺. 𑀦𑀸𑀭𑀤𑁄 𑀫𑀚𑁆𑀛𑀺𑀫𑀤𑁂𑀲𑁂 𑀅𑀜𑁆𑀚𑀦𑀕𑀺𑀭𑀺𑀦𑀸𑀫𑀓𑁂 𑀧𑀩𑁆𑀩𑀢𑀚𑀸𑀮𑀦𑁆𑀢𑀭𑁂 𑀯𑀺𑀳𑀸𑀲𑀺. 𑀅𑀦𑀼𑀲𑀺𑀲𑁆𑀲𑁄 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂𑀯 𑀅𑀳𑁄𑀲𑀺.
𑀢𑀲𑁆𑀫𑀺𑀁 𑀓𑀸𑀮𑁂 𑀤𑀡𑁆𑀟𑀓𑀺𑀭𑀸𑀚𑀸 𑀏𑀓𑀁 𑀮𑀤𑁆𑀥𑀲𑀓𑁆𑀓𑀸𑀭𑀁 𑀕𑀡𑀺𑀓𑀁 𑀞𑀸𑀦𑀸 𑀘𑀸𑀯𑁂𑀲𑀺. 𑀲𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 ¶ 𑀯𑀺𑀘𑀭𑀦𑁆𑀢𑀻 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀓𑀺𑀲𑀯𑀘𑁆𑀙𑀢𑀸𑀧𑀲𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀸𑀴𑀓𑀡𑁆𑀡𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀲𑀭𑀻𑀭𑁂 𑀓𑀮𑀺𑀁 𑀧𑀯𑀸𑀳𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀢𑀲𑁆𑀲𑀽𑀧𑀭𑀺 𑀩𑀳𑀮𑀔𑁂𑀴𑀁 𑀦𑀺𑀝𑁆𑀞𑀼𑀪𑀦𑁆𑀢𑀻 𑀓𑀺𑀲𑀯𑀘𑁆𑀙𑀢𑀸𑀧𑀲𑀲𑁆𑀲 𑀚𑀝𑀦𑁆𑀢𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀫𑁆𑀧𑀺𑀲𑁆𑀲 𑀲𑀻𑀲𑁂𑀬𑁂𑀯 𑀔𑀺𑀧𑀺𑀢𑁆𑀯𑀸 𑀲𑀬𑀁 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀕𑀢𑀸. 𑀭𑀸𑀚𑀸𑀧𑀺 𑀢𑀁 𑀲𑀭𑀺𑀢𑁆𑀯𑀸 𑀧𑀼𑀦 𑀧𑀸𑀓𑀢𑀺𑀓𑀫𑁂𑀯 𑀅𑀓𑀸𑀲𑀺. 𑀲𑀸 𑀫𑁄𑀳𑀫𑀽𑀴𑁆𑀳𑀸 𑀳𑀼𑀢𑁆𑀯𑀸 ‘‘𑀓𑀸𑀴𑀓𑀡𑁆𑀡𑀺𑀲𑀭𑀻𑀭𑁂 𑀓𑀮𑀺𑀁 𑀧𑀯𑀸𑀳𑁂𑀢𑁆𑀯𑀸 𑀫𑀫𑁆𑀧𑀺 𑀭𑀸𑀚𑀸 𑀧𑀼𑀦 𑀞𑀸𑀦𑁂 𑀞𑀧𑁂𑀢𑀺 𑀫𑀬𑀸 𑀬𑀲𑁄 𑀮𑀤𑁆𑀥𑁄’’𑀢𑀺 𑀲𑀜𑁆𑀜𑀫𑀓𑀸𑀲𑀺. 𑀢𑀢𑁄 𑀦𑀘𑀺𑀭𑀲𑁆𑀲𑁂𑀯 𑀭𑀸𑀚𑀸 𑀧𑀼𑀭𑁄𑀳𑀺𑀢𑀁 𑀞𑀸𑀦𑀢𑁄 𑀘𑀸𑀯𑁂𑀲𑀺. 𑀲𑁄 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑁆𑀯𑀁 𑀓𑁂𑀦 𑀓𑀸𑀭𑀡𑁂𑀦 𑀧𑀼𑀦 𑀞𑀸𑀦𑀁 𑀮𑀪𑀲𑀻’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀸 ‘‘𑀭𑀸𑀚𑀼𑀬𑁆𑀬𑀸𑀦𑁂 𑀓𑀸𑀴𑀓𑀡𑁆𑀡𑀺𑀲𑀭𑀻𑀭𑁂 𑀓𑀮𑀺𑀲𑁆𑀲 𑀧𑀯𑀸𑀳𑀺𑀢𑀢𑁆𑀢𑀸’’𑀢𑀺 𑀆𑀭𑁄𑀘𑁂𑀲𑀺. 𑀧𑀼𑀭𑁄𑀳𑀺𑀢𑁄 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀢𑀲𑁆𑀲 𑀲𑀭𑀻𑀭𑁂 𑀓𑀮𑀺𑀁 𑀧𑀯𑀸𑀳𑁂𑀲𑀺, 𑀢𑀫𑁆𑀧𑀺 𑀭𑀸𑀚𑀸 𑀧𑀼𑀦 𑀞𑀸𑀦𑁂 𑀞𑀧𑁂𑀲𑀺. 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀧𑀘𑁆𑀘𑀦𑁆𑀢𑁄 𑀓𑀼𑀧𑁆𑀧𑀺. 𑀲𑁄 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀬𑀼𑀤𑁆𑀥𑀸𑀬 𑀦𑀺𑀓𑁆𑀔𑀫𑀺. 𑀅𑀣 𑀦𑀁 𑀫𑁄𑀳𑀫𑀽𑀴𑁆𑀳𑁄 𑀧𑀼𑀭𑁄𑀳𑀺𑀢𑁄, ‘‘𑀫𑀳𑀸𑀭𑀸𑀚, 𑀓𑀺𑀁 𑀢𑀼𑀫𑁆𑀳𑁂 𑀚𑀬𑀁 𑀇𑀘𑁆𑀙𑀣, 𑀉𑀤𑀸𑀳𑀼 𑀧𑀭𑀸𑀚𑀬’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀚𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀢𑁂𑀦 𑀳𑀺 𑀭𑀸𑀚𑀼𑀬𑁆𑀬𑀸𑀦𑁂 𑀓𑀸𑀴𑀓𑀡𑁆𑀡𑀻 𑀯𑀲𑀢𑀺, 𑀢𑀲𑁆𑀲 𑀲𑀭𑀻𑀭𑁂 𑀓𑀮𑀺𑀁 𑀧𑀯𑀸𑀳𑁂𑀢𑁆𑀯𑀸 𑀬𑀸𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀓𑀣𑀁 𑀕𑀳𑁂𑀢𑁆𑀯𑀸 ‘‘𑀬𑁂 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀉𑀬𑁆𑀬𑀸𑀦𑁂 𑀓𑀸𑀴𑀓𑀡𑁆𑀡𑀺𑀲𑀭𑀻𑀭𑁂 𑀓𑀮𑀺𑀁 𑀧𑀯𑀸𑀳𑁂𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀲𑀬𑀫𑁂𑀯 𑀢𑀲𑁆𑀲 𑀚𑀝𑀦𑁆𑀢𑀭𑁂 𑀔𑁂𑀴𑀁 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀜𑁆𑀘 𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀬𑀺. 𑀩𑀮𑀓𑀸𑀬𑁄𑀧𑀺𑀲𑁆𑀲 𑀢𑀣𑀸 𑀅𑀓𑀸𑀲𑀺.
𑀢𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀲𑁂𑀦𑀸𑀧𑀢𑀺 𑀕𑀦𑁆𑀢𑁆𑀯𑀸 𑀢𑀸𑀧𑀲𑀁 𑀤𑀺𑀲𑁆𑀯𑀸 𑀤𑀦𑁆𑀢𑀓𑀝𑁆𑀞𑀸𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀲𑀸𑀥𑀼𑀓𑀁 𑀦𑁆𑀳𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀭𑀜𑁆𑀜𑁄 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀆𑀯𑀼𑀲𑀸 ¶ 𑀫𑀬𑁆𑀳𑀁 𑀫𑀦𑁄𑀧𑀤𑁄𑀲𑁄 𑀦𑀢𑁆𑀣𑀺, 𑀤𑁂𑀯𑀢𑀸 𑀧𑀦 𑀓𑀼𑀧𑀺𑀢𑀸 ¶ 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀓𑀮𑀭𑀝𑁆𑀞𑀁 𑀅𑀭𑀝𑁆𑀞𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑁆𑀯𑀁 𑀧𑀼𑀢𑁆𑀢𑀤𑀸𑀭𑀁 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀬𑀸𑀳𑀻𑀢𑀺. 𑀲𑁄 𑀪𑀻𑀢𑀢𑀲𑀺𑀢𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺, 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀦 𑀕𑀡𑁆𑀳𑀺. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀆𑀤𑀸𑀬 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀁 𑀭𑀝𑁆𑀞𑀁 𑀅𑀕𑀫𑀸𑀲𑀺. 𑀲𑀭𑀪𑀗𑁆𑀕𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀤𑁆𑀯𑁂 𑀢𑀭𑀼𑀡𑀢𑀸𑀧𑀲𑁂 𑀧𑁂𑀲𑁂𑀢𑁆𑀯𑀸 ‘‘𑀓𑀺𑀲𑀯𑀘𑁆𑀙𑀁 𑀫𑀜𑁆𑀘𑀲𑀺𑀯𑀺𑀓𑀸𑀬 𑀆𑀦𑁂𑀣𑀸’’𑀢𑀺 𑀆𑀓𑀸𑀲𑁂𑀦 𑀆𑀡𑀸𑀧𑁂𑀲𑀺. 𑀭𑀸𑀚𑀸 𑀬𑀼𑀚𑁆𑀛𑀺𑀢𑁆𑀯𑀸 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀦𑀕𑀭𑀫𑁂𑀯 𑀧𑀘𑁆𑀘𑀸𑀕𑀫𑀺. 𑀢𑀲𑁆𑀫𑀺𑀁 𑀆𑀕𑀢𑁂 𑀤𑁂𑀯𑀢𑀸 𑀧𑀞𑀫𑀁 𑀤𑁂𑀯𑀁 𑀯𑀲𑁆𑀲𑀸𑀧𑁂𑀲𑀼𑀁, 𑀯𑀲𑁆𑀲𑁄𑀖𑁂𑀦 𑀲𑀩𑁆𑀩𑀓𑀼𑀡𑀧𑁂𑀲𑀼 𑀅𑀯𑀳𑀝𑁂𑀲𑀼 𑀲𑀼𑀤𑁆𑀥𑀯𑀸𑀮𑀼𑀓𑀯𑀲𑁆𑀲𑀁 𑀯𑀲𑁆𑀲𑀺, 𑀲𑀼𑀤𑁆𑀥𑀯𑀸𑀮𑀼𑀓𑀫𑀢𑁆𑀣𑀓𑁂 𑀤𑀺𑀩𑁆𑀩𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀺, 𑀤𑀺𑀩𑁆𑀩𑀧𑀼𑀧𑁆𑀨𑀫𑀢𑁆𑀣𑀓𑁂 𑀫𑀸𑀲𑀓𑀯𑀲𑁆𑀲𑀁, 𑀫𑀸𑀲𑀓𑀫𑀢𑁆𑀣𑀓𑁂 𑀓𑀳𑀸𑀧𑀡𑀯𑀲𑁆𑀲𑀁, 𑀓𑀳𑀸𑀧𑀡𑀫𑀢𑁆𑀣𑀓𑁂 𑀤𑀺𑀩𑁆𑀩𑀸𑀪𑀭𑀡𑀯𑀲𑁆𑀲𑀁 𑀯𑀲𑁆𑀲𑀺, 𑀫𑀦𑀼𑀲𑁆𑀲𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀪𑀭𑀡𑀸𑀦𑀺 𑀕𑀡𑁆𑀳𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀅𑀣 𑀦𑁂𑀲𑀁 𑀲𑀭𑀻𑀭𑁂 𑀲𑀫𑁆𑀧𑀚𑁆𑀚𑀮𑀺𑀢𑀁 𑀦𑀸𑀦𑀧𑁆𑀧𑀓𑀸𑀭𑀁 𑀆𑀯𑀼𑀥𑀯𑀲𑁆𑀲𑀁 𑀯𑀲𑁆𑀲𑀺, 𑀫𑀦𑀼𑀲𑁆𑀲𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀚𑁆𑀚𑀺𑀁𑀲𑀼. 𑀅𑀣 𑀦𑁂𑀲𑀁 𑀉𑀧𑀭𑀺 𑀫𑀳𑀦𑁆𑀢𑀫𑀳𑀦𑁆𑀢𑀸 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀸 𑀧𑀢𑀺𑀁𑀲𑀼 ¶ , 𑀢𑁂𑀲𑀁 𑀉𑀧𑀭𑀺 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀧𑀚𑁆𑀚𑀮𑀺𑀢𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀢𑀺𑀁𑀲𑀼, 𑀢𑁂𑀲𑀁 𑀉𑀧𑀭𑀺 𑀲𑀝𑁆𑀞𑀺𑀳𑀢𑁆𑀣𑀝𑁆𑀞𑀸𑀦𑀁 𑀧𑀽𑀭𑀬𑀦𑁆𑀢𑀁 𑀲𑀼𑀔𑀼𑀫𑀯𑀸𑀮𑀼𑀓𑀯𑀲𑁆𑀲𑀁 𑀯𑀲𑁆𑀲𑀺. 𑀏𑀯𑀁 𑀲𑀝𑁆𑀞𑀺𑀬𑁄𑀚𑀦𑀝𑁆𑀞𑀸𑀦𑀁 𑀅𑀭𑀝𑁆𑀞𑀁 𑀅𑀳𑁄𑀲𑀺, 𑀢𑀲𑁆𑀲 𑀏𑀯𑀁 𑀅𑀭𑀝𑁆𑀞𑀪𑀸𑀯𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀜𑁆𑀜𑀸𑀬𑀺.
𑀅𑀣 𑀢𑀲𑁆𑀲 𑀭𑀝𑁆𑀞𑀲𑁆𑀲 𑀅𑀦𑀦𑁆𑀢𑀭𑀭𑀝𑁆𑀞𑀸𑀥𑀺𑀧𑀢𑀺𑀦𑁄 𑀓𑀸𑀮𑀺𑀗𑁆𑀕𑁄, 𑀅𑀝𑁆𑀞𑀓𑁄, 𑀪𑀻𑀫𑀭𑀣𑁄𑀢𑀺 𑀢𑀬𑁄 𑀭𑀸𑀚𑀸𑀦𑁄 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀧𑀼𑀩𑁆𑀩𑁂 𑀩𑀸𑀭𑀸𑀡𑀲𑀺𑀬𑀁 𑀓𑀮𑀸𑀩𑀼𑀓𑀸𑀲𑀺𑀓𑀭𑀸𑀚𑀸 𑀔𑀦𑁆𑀢𑀺𑀯𑀸𑀤𑀺𑀢𑀸𑀧𑀲𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄𑀢𑀺 𑀲𑀽𑀬𑀢𑀺, 𑀢𑀣𑀸 ‘‘𑀦𑀸𑀴𑀺𑀓𑁂𑀭𑀭𑀸𑀚𑀸 𑀢𑀸𑀧𑀲𑁂 𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑁂𑀢𑁆𑀯𑀸, 𑀲𑀳𑀲𑁆𑀲𑀩𑀸𑀳𑀼 𑀅𑀚𑁆𑀚𑀼𑀦𑁄 𑀘 𑀅𑀗𑁆𑀕𑀻𑀭𑀲𑁂 𑀅𑀧𑀭𑀚𑁆𑀛𑀺𑀢𑁆𑀯𑀸, 𑀇𑀤𑀸𑀦𑀺 𑀤𑀡𑁆𑀟𑀓𑀺𑀭𑀸𑀚𑀸 𑀓𑀺𑀲𑀯𑀘𑁆𑀙𑁂 𑀅𑀧𑀭𑀚𑁆𑀛𑀺𑀢𑁆𑀯𑀸 𑀲𑀳 𑀭𑀝𑁆𑀞𑁂𑀦 𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀲𑀽𑀬𑀢𑀺. 𑀇𑀫𑁂𑀲𑀁 𑀧𑀦 𑀘𑀢𑀼𑀦𑁆𑀦𑀁 𑀭𑀸𑀚𑀽𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀫𑀬𑀁 𑀦 𑀚𑀸𑀦𑀸𑀫, 𑀢𑀁 𑀦𑁄 𑀞𑀧𑁂𑀢𑁆𑀯𑀸 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀁 𑀅𑀜𑁆𑀜𑁄 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 ¶ . 𑀢𑁂 𑀢𑀬𑁄𑀧𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀜𑁆𑀳𑀧𑀼𑀘𑁆𑀙𑀦𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀁𑀲𑀼. 𑀢𑁂 𑀧𑀦 ‘‘𑀅𑀲𑀼𑀓𑁄𑀧𑀺 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀦 𑀚𑀸𑀦𑀦𑁆𑀢𑀺, 𑀏𑀓𑁂𑀓𑁄 ‘‘𑀅𑀳𑀫𑁂𑀯 𑀕𑀘𑁆𑀙𑀸𑀫𑀻’’𑀢𑀺 𑀫𑀜𑁆𑀜𑀢𑀺, 𑀢𑁂𑀲𑀁 𑀕𑁄𑀥𑀸𑀯𑀭𑀺𑀦𑀤𑀺𑀢𑁄 𑀅𑀯𑀺𑀤𑀽𑀭𑁂 𑀲𑀫𑀸𑀕𑀫𑁄 ¶ 𑀅𑀳𑁄𑀲𑀺. 𑀢𑁂 𑀭𑀣𑁂𑀳𑀺 𑀑𑀢𑀭𑀺𑀢𑁆𑀯𑀸 𑀢𑀬𑁄𑀧𑀺 𑀏𑀓𑀫𑁂𑀯 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀕𑁄𑀥𑀸𑀯𑀭𑀺𑀦𑀤𑀻𑀢𑀻𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼.
𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑀢𑁆𑀢 𑀧𑀜𑁆𑀳𑁂 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑁂 𑀧𑀜𑁆𑀳𑁂 𑀞𑀧𑁂𑀢𑁆𑀯𑀸 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀁 𑀅𑀜𑁆𑀜𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀢𑀁 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀇𑀫𑁂𑀧𑀺 𑀢𑀬𑁄 𑀭𑀸𑀚𑀸𑀦𑁄 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀕𑁄𑀥𑀸𑀯𑀭𑀺𑀦𑀤𑀻𑀢𑀻𑀭𑀁 𑀧𑀢𑁆𑀢𑀸, 𑀏𑀢𑁂𑀲𑀁 𑀧𑀜𑁆𑀳𑁂𑀧𑀺 𑀅𑀳𑀫𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀤𑁂𑀯𑀮𑁄𑀓𑀢𑁄 𑀑𑀢𑀭𑀺. 𑀢𑀁 𑀤𑀺𑀯𑀲𑀫𑁂𑀯 𑀓𑀺𑀲𑀯𑀘𑁆𑀙𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑀼𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀦𑁂𑀓𑀲𑀳𑀲𑁆𑀲𑀸 𑀇𑀲𑀬𑁄 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀫𑀡𑁆𑀟𑀧𑀜𑁆𑀘 𑀓𑀸𑀭𑁂𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑀸 𑀇𑀲𑀺𑀕𑀡𑀸 𑀓𑀺𑀲𑀯𑀘𑁆𑀙𑀲𑁆𑀲 𑀢𑀸𑀧𑀲𑀲𑁆𑀲 𑀘𑀦𑁆𑀤𑀦𑀘𑀺𑀢𑀓𑀁 𑀓𑀢𑁆𑀯𑀸 𑀲𑀭𑀻𑀭𑀁 𑀛𑀸𑀧𑁂𑀲𑀼𑀁. 𑀆𑀴𑀸𑀳𑀦𑀲𑁆𑀲 𑀲𑀫𑀦𑁆𑀢𑀸 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀤𑀺𑀩𑁆𑀩𑀓𑀼𑀲𑀼𑀫𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀲𑁆𑀲𑀫𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀳𑀺 𑀇𑀲𑀺𑀕𑀡𑁂𑀳𑀺 𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺. 𑀢𑁂𑀲𑀫𑁆𑀧𑀺 𑀭𑀸𑀚𑀽𑀦𑀁 𑀦𑀤𑀻𑀢𑀻𑀭𑀁 𑀆𑀕𑀢𑀓𑀸𑀮𑁂 𑀫𑀳𑀸𑀲𑁂𑀦𑀸𑀯𑀸𑀳𑀦𑀢𑀽𑀭𑀺𑀬𑀲𑀤𑁆𑀤𑁄 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀅𑀦𑀼𑀲𑀺𑀲𑁆𑀲𑀁 𑀢𑀸𑀧𑀲𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀢𑀸𑀯 𑀚𑀸𑀦𑀸𑀳𑀺, 𑀓𑀺𑀁 𑀲𑀤𑁆𑀤𑁄 𑀦𑀸𑀫𑁂𑀲𑁄’’𑀢𑀺 𑀆𑀳. 𑀲𑁄 𑀧𑀸𑀦𑀻𑀬𑀖𑀝𑀁 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂 𑀭𑀸𑀚𑀸𑀦𑁄 𑀤𑀺𑀲𑁆𑀯𑀸 𑀧𑀼𑀘𑁆𑀙𑀦𑀯𑀲𑁂𑀦 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀅𑀮𑀗𑁆𑀓𑀢𑀸 𑀓𑀼𑀡𑁆𑀟𑀮𑀺𑀦𑁄 𑀲𑀼𑀯𑀢𑁆𑀣𑀸, 𑀯𑁂𑀴𑀼𑀭𑀺𑀬𑀫𑀼𑀢𑁆𑀢𑀸𑀣𑀭𑀼𑀔𑀕𑁆𑀕𑀩𑀦𑁆𑀥𑀸;
𑀭𑀣𑁂𑀲𑀪𑀸 𑀢𑀺𑀝𑁆𑀞𑀣 𑀓𑁂 𑀦𑀼 𑀢𑀼𑀫𑁆𑀳𑁂, 𑀓𑀣𑀁 𑀯𑁄 𑀚𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺.
𑀢𑀢𑁆𑀣 𑀯𑁂𑀴𑀼𑀭𑀺𑀬𑀫𑀼𑀢𑁆𑀢𑀸𑀣𑀭𑀼𑀔𑀕𑁆𑀕𑀩𑀦𑁆𑀥𑀸𑀢𑀺 ¶ 𑀯𑁂𑀴𑀼𑀭𑀺𑀬𑀫𑀡𑀻𑀳𑀺 𑀘𑁂𑀯 𑀫𑀼𑀢𑁆𑀢𑀸𑀮𑀫𑁆𑀩𑀓𑁂𑀳𑀺 𑀘 𑀅𑀮𑀗𑁆𑀓𑀢𑀣𑀭𑀽𑀳𑀺 𑀔𑀕𑁆𑀕𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀢𑀺𑀝𑁆𑀞𑀣𑀸𑀢𑀺 𑀏𑀓𑀲𑁆𑀫𑀺𑀁 𑀭𑀣𑁂 𑀢𑀺𑀝𑁆𑀞𑀣. 𑀓𑁂 𑀦𑀽𑀢𑀺 𑀓𑁂 𑀦𑀸𑀫 𑀢𑀼𑀫𑁆𑀳𑁂, 𑀓𑀣𑀁 𑀯𑁄 𑀲𑀜𑁆𑀚𑀸𑀦𑀦𑁆𑀢𑀻𑀢𑀺?
𑀢𑁂 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂𑀲𑀼 𑀅𑀝𑁆𑀞𑀓𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀅𑀳𑀫𑀝𑁆𑀞𑀓𑁄 ¶ 𑀪𑀻𑀫𑀭𑀣𑁄 𑀧𑀦𑀸𑀬𑀁, 𑀓𑀸𑀮𑀺𑀗𑁆𑀕𑀭𑀸𑀚𑀸 𑀧𑀦 𑀉𑀕𑁆𑀕𑀢𑁄𑀬𑀁;
𑀲𑀼𑀲𑀜𑁆𑀜𑀢𑀸𑀦𑀁 𑀇𑀲𑀻𑀦𑀁 𑀤𑀲𑁆𑀲𑀦𑀸𑀬, 𑀇𑀥𑀸𑀕𑀢𑀸 𑀧𑀼𑀘𑁆𑀙𑀺𑀢𑀸𑀬𑁂𑀫𑁆𑀳 𑀧𑀜𑁆𑀳𑁂’’𑀢𑀺.
𑀢𑀢𑁆𑀣 𑀉𑀕𑁆𑀕𑀢𑁄𑀢𑀺 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀲𑀼𑀲𑀜𑁆𑀜𑀢𑀸𑀦𑀁 𑀇𑀲𑀻𑀦𑀦𑁆𑀢𑀺, 𑀪𑀦𑁆𑀢𑁂, 𑀦 𑀫𑀬𑀁 𑀯𑀦𑀓𑀻𑀴𑀸𑀤𑀻𑀦𑀁 𑀅𑀢𑁆𑀣𑀸𑀬 𑀆𑀕𑀢𑀸, 𑀅𑀣 𑀔𑁄 𑀓𑀸𑀬𑀸𑀤𑀻𑀳𑀺 𑀲𑀼𑀲𑀜𑁆𑀜𑀢𑀸𑀦𑀁 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀇𑀲𑀻𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀇𑀥𑀸𑀕𑀢𑀸. 𑀧𑀼𑀘𑁆𑀙𑀺𑀢𑀸𑀬𑁂𑀫𑁆𑀳 𑀧𑀜𑁆𑀳𑁂𑀢𑀺 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀁 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑀼𑀁 𑀏𑀫𑁆𑀳, 𑀆𑀕𑀢𑀸𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀬-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀓𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.
𑀅𑀣 𑀦𑁂 𑀢𑀸𑀧𑀲𑁄 ‘‘𑀲𑀸𑀥𑀼 𑀫𑀳𑀸𑀭𑀸𑀚𑀸, 𑀆𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀜𑁆𑀜𑁂𑀯 𑀆𑀕𑀢𑀸𑀢𑁆𑀣, 𑀢𑁂𑀦 𑀳𑀺 𑀦𑁆𑀳𑀢𑁆𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀫𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀣𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑀣𑁂𑀯𑁂 𑀧𑀼𑀜𑁆𑀙𑀦𑁆𑀢𑁄 𑀆𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀤𑁂𑀯𑀕𑀡𑀧𑀭𑀺𑀯𑀼𑀢𑀁 𑀏𑀭𑀸𑀯𑀡𑀓𑁆𑀔𑀦𑁆𑀥𑀯𑀭𑀕𑀢𑀁 𑀑𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀯𑁂𑀳𑀸𑀬𑀲𑀁 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂, 𑀧𑀣𑀤𑁆𑀥𑀼𑀦𑁄 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄;
𑀧𑀼𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀓𑀢𑀁 𑀢𑀁 𑀚𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺.
𑀢𑀢𑁆𑀣 𑀯𑁂𑀳𑀸𑀬𑀲𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀦𑁆𑀢𑀮𑀺𑀓𑁆𑀔𑁂 𑀆𑀓𑀸𑀲𑁂 𑀢𑀺𑀝𑁆𑀞𑀲𑀺. 𑀧𑀣𑀤𑁆𑀥𑀼𑀦𑁄𑀢𑀺 𑀧𑀣𑀤𑁆𑀥𑀕𑀢𑁄, 𑀅𑀤𑁆𑀥𑀧𑀣𑁂 𑀕𑀕𑀦𑀫𑀚𑁆𑀛𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋
‘‘𑀬𑀫𑀸𑀳𑀼 ¶ 𑀤𑁂𑀯𑁂𑀲𑀼 ‘𑀲𑀼𑀚𑀫𑁆𑀧𑀢𑀻’𑀢𑀺, ‘𑀫𑀖𑀯𑀸’𑀢𑀺 𑀢𑀁 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂;
𑀲 𑀤𑁂𑀯𑀭𑀸𑀚𑀸 𑀇𑀤𑀫𑀚𑁆𑀚 𑀧𑀢𑁆𑀢𑁄, 𑀲𑀼𑀲𑀜𑁆𑀜𑀢𑀸𑀦𑀁 𑀇𑀲𑀻𑀦𑀁 𑀤𑀲𑁆𑀲𑀦𑀸𑀬𑀸’’𑀢𑀺.
𑀢𑀢𑁆𑀣 ¶ 𑀲 𑀤𑁂𑀯𑀭𑀸𑀚𑀸𑀢𑀺 𑀲𑁄 𑀅𑀳𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸. 𑀇𑀤𑀫𑀚𑁆𑀚 𑀧𑀢𑁆𑀢𑁄𑀢𑀺 𑀇𑀤𑀁 𑀞𑀸𑀦𑀁 𑀅𑀚𑁆𑀚 𑀆𑀕𑀢𑁄. 𑀤𑀲𑁆𑀲𑀦𑀸𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀸𑀬 𑀯𑀦𑁆𑀤𑀦𑀢𑁆𑀣𑀸𑀬 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀜𑁆𑀘 𑀧𑀜𑁆𑀳𑀁 𑀧𑀼𑀘𑁆𑀙𑀦𑀢𑁆𑀣𑀸𑀬𑀸𑀢𑀺 𑀆𑀳.
𑀅𑀣 ¶ 𑀦𑀁 𑀅𑀦𑀼𑀲𑀺𑀲𑁆𑀲𑁄 ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀧𑀘𑁆𑀙𑀸 𑀆𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀆𑀤𑀸𑀬 𑀅𑀲𑁆𑀲𑀫𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀢𑀺𑀡𑁆𑀡𑀁 𑀭𑀸𑀚𑀽𑀦𑀁 𑀤𑁂𑀯𑀭𑀸𑀚𑀲𑁆𑀲 𑀘 𑀧𑀜𑁆𑀳𑀧𑀼𑀘𑁆𑀙𑀦𑀢𑁆𑀣𑀸𑀬 𑀆𑀕𑀢𑀪𑀸𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀫𑀳𑀸𑀯𑀺𑀲𑀸𑀮𑀫𑀸𑀴𑀓𑁂 𑀦𑀺𑀲𑀻𑀤𑀺. 𑀢𑀬𑁄 𑀭𑀸𑀚𑀸𑀦𑁄 𑀆𑀕𑀦𑁆𑀢𑁆𑀯𑀸 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀑𑀢𑀭𑀺𑀢𑁆𑀯𑀸 𑀇𑀲𑀺𑀕𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄 𑀇𑀲𑀺𑀕𑀡𑀁 𑀯𑀡𑁆𑀡𑁂𑀢𑁆𑀯𑀸 𑀯𑀦𑁆𑀤𑀫𑀸𑀦𑁄 𑀧𑀜𑁆𑀘𑀫𑀁 𑀕𑀸𑀣𑀫𑀸𑀳 𑁋
‘‘𑀤𑀽𑀭𑁂 𑀲𑀼𑀢𑀸 𑀦𑁄 𑀇𑀲𑀬𑁄 𑀲𑀫𑀸𑀕𑀢𑀸, 𑀫𑀳𑀺𑀤𑁆𑀥𑀺𑀓𑀸 𑀇𑀤𑁆𑀥𑀺𑀕𑀼𑀡𑀽𑀧𑀧𑀦𑁆𑀦𑀸;
𑀯𑀦𑁆𑀤𑀸𑀫𑀺 𑀢𑁂 𑀅𑀬𑀺𑀭𑁂 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀬𑁂 𑀚𑀻𑀯𑀮𑁄𑀓𑁂𑀢𑁆𑀣 𑀫𑀦𑀼𑀲𑁆𑀲𑀲𑁂𑀝𑁆𑀞𑀸’’𑀢𑀺.
𑀢𑀢𑁆𑀣 𑀤𑀽𑀭𑁂 𑀲𑀼𑀢𑀸 𑀦𑁄𑀢𑀺, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀢𑀼𑀫𑁆𑀳𑁂 𑀤𑀽𑀭𑁂 𑀤𑁂𑀯𑀮𑁄𑀓𑁂 𑀞𑀺𑀢𑁂𑀳𑀺𑀬𑁂𑀯 𑀲𑀼𑀢𑀸𑀢𑀺 𑀫𑀫𑀸𑀬𑀦𑁆𑀢𑁄 𑀏𑀯𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂 𑀇𑀥 𑀲𑀫𑀸𑀕𑀢𑀸 𑀅𑀫𑁆𑀳𑀸𑀓𑀁 𑀇𑀲𑀬𑁄 𑀤𑀽𑀭𑁂 𑀲𑀼𑀢𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀲𑁆𑀲𑀼𑀢𑀸 𑀧𑀸𑀓𑀝𑀸𑀢𑀺. 𑀫𑀳𑀺𑀤𑁆𑀥𑀺𑀓𑀸𑀢𑀺 𑀫𑀳𑀸𑀦𑀼𑀪𑀸𑀯𑀸. 𑀇𑀤𑁆𑀥𑀺𑀕𑀼𑀡𑀽𑀧𑀧𑀦𑁆𑀦𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀇𑀤𑁆𑀥𑀺𑀕𑀼𑀡𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀬𑀺𑀭𑁂𑀢𑀺, 𑀅𑀬𑁆𑀬𑁂. 𑀬𑁂𑀢𑀺 𑀬𑁂 𑀢𑀼𑀫𑁆𑀳𑁂 𑀇𑀫𑀲𑁆𑀫𑀺𑀁 𑀚𑀻𑀯𑀮𑁄𑀓𑁂 𑀫𑀦𑀼𑀲𑁆𑀲𑁂𑀲𑀼 𑀲𑁂𑀝𑁆𑀞𑀸𑀢𑀺.
𑀏𑀯𑀁 𑀇𑀲𑀺𑀕𑀡𑀁 𑀯𑀡𑁆𑀡𑁂𑀢𑁆𑀯𑀸 𑀲𑀓𑁆𑀓𑁄 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀧𑀭𑀺𑀳𑀭𑀦𑁆𑀢𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀇𑀲𑀻𑀦𑀁 𑀅𑀥𑁄𑀯𑀸𑀢𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀅𑀦𑀼𑀲𑀺𑀲𑁆𑀲𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳 𑁋
‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀺 𑀫𑀸𑀮𑀼𑀢𑁂𑀦;
𑀇𑀢𑁄 𑀧𑀝𑀺𑀓𑁆𑀓𑀫𑁆𑀫 𑀲𑀳𑀲𑁆𑀲𑀦𑁂𑀢𑁆𑀢, 𑀕𑀦𑁆𑀥𑁄 𑀇𑀲𑀻𑀦𑀁 𑀅𑀲𑀼𑀘𑀺 𑀤𑁂𑀯𑀭𑀸𑀚𑀸’’𑀢𑀺.
𑀢𑀢𑁆𑀣 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀦𑁆𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀧𑀝𑀺𑀓𑁆𑀓𑀫 𑀅𑀧𑁂𑀳𑀺. 𑀲𑀳𑀲𑁆𑀲𑀦𑁂𑀢𑁆𑀢𑀸𑀢𑀺 𑀆𑀮𑀧𑀦𑀫𑁂𑀢𑀁. 𑀲𑀓𑁆𑀓𑁄 𑀳𑀺 𑀅𑀫𑀘𑁆𑀘𑀲𑀳𑀲𑁆𑀲𑁂𑀳𑀺 𑀘𑀺𑀦𑁆𑀢𑀺𑀢𑀁 𑀅𑀢𑁆𑀣𑀁 𑀏𑀓𑀓𑁄𑀯 𑀧𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀲𑀳𑀲𑁆𑀲𑀦𑁂𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺 ¶ . 𑀅𑀣 𑀯𑀸 𑀲𑀳𑀲𑁆𑀲𑀦𑁂𑀢𑁆𑀢𑀸𑀦𑀁 𑀧𑀦 𑀤𑁂𑀯𑀸𑀦𑀁 𑀤𑀲𑁆𑀲𑀦𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑀦𑀲𑀫𑀢𑁆𑀣𑁄𑀢𑀺 ¶ 𑀲𑀳𑀲𑁆𑀲𑀦𑁂𑀢𑁆𑀢𑀸 ¶ . 𑀅𑀲𑀼𑀘𑀻𑀢𑀺 𑀲𑁂𑀤𑀫𑀮𑀸𑀤𑀻𑀳𑀺 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑁄, 𑀢𑀼𑀫𑁆𑀳𑁂 𑀘 𑀲𑀼𑀘𑀺𑀓𑀸𑀫𑀸, 𑀢𑁂𑀦 𑀯𑁄 𑀏𑀲 𑀕𑀦𑁆𑀥𑁄 𑀩𑀸𑀥𑀢𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀼 𑀫𑀸𑀮𑀼𑀢𑁂𑀦;
𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀁 𑀲𑀼𑀭𑀪𑀺𑀁𑀯 𑀫𑀸𑀮𑀁, 𑀕𑀦𑁆𑀥𑀜𑁆𑀘 𑀏𑀢𑀁 𑀧𑀸𑀝𑀺𑀓𑀗𑁆𑀔𑀸𑀫 𑀪𑀦𑁆𑀢𑁂;
𑀦 𑀳𑁂𑀢𑁆𑀣 𑀤𑁂𑀯𑀸 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀦𑁄’’𑀢𑀺.
𑀢𑀢𑁆𑀣 𑀕𑀘𑁆𑀙𑀢𑀽𑀢𑀺 𑀬𑀣𑀸𑀲𑀼𑀔𑀁 𑀧𑀯𑀢𑁆𑀢𑀢𑀼, 𑀦𑀸𑀲𑀧𑀼𑀝𑀁 𑀦𑁄 𑀧𑀳𑀭𑀢𑀽𑀢𑀺 𑀅𑀢𑁆𑀣𑁄. 𑀧𑀸𑀝𑀺𑀓𑀗𑁆𑀔𑀸𑀫𑀸𑀢𑀺 𑀇𑀘𑁆𑀙𑀸𑀫 𑀧𑀢𑁆𑀣𑁂𑀫. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀕𑀦𑁆𑀥𑁂 𑀤𑁂𑀯𑀸 𑀚𑀺𑀕𑀼𑀘𑁆𑀙𑀲𑀜𑁆𑀜𑀺𑀦𑁄 𑀦 𑀳𑁄𑀦𑁆𑀢𑀺. 𑀤𑀼𑀲𑁆𑀲𑀻𑀮𑁂𑀬𑁂𑀯 𑀳𑀺 𑀤𑁂𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀦 𑀲𑀻𑀮𑀯𑀦𑁆𑀢𑁂𑀢𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀦𑀼𑀲𑀺𑀲𑁆𑀲 𑀅𑀳𑀁 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀆𑀕𑀢𑁄, 𑀑𑀓𑀸𑀲𑀁 𑀫𑁂 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀇𑀲𑀺𑀕𑀡𑀁 𑀑𑀓𑀸𑀲𑀁 𑀓𑀭𑁄𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀧𑀼𑀭𑀺𑀦𑁆𑀤𑀤𑁄 𑀪𑀽𑀢𑀧𑀢𑀻 𑀬𑀲𑀲𑁆𑀲𑀻, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀓𑁆𑀓𑁄 𑀫𑀖𑀯𑀸 𑀲𑀼𑀚𑀫𑁆𑀧𑀢𑀺;
𑀲 𑀤𑁂𑀯𑀭𑀸𑀚𑀸 𑀅𑀲𑀼𑀭𑀕𑀡𑀧𑁆𑀧𑀫𑀤𑁆𑀤𑀦𑁄, 𑀑𑀓𑀸𑀲𑀫𑀸𑀓𑀗𑁆𑀔𑀢𑀺 𑀧𑀜𑁆𑀳 𑀧𑀼𑀘𑁆𑀙𑀺𑀢𑀼𑀁.
‘‘𑀓𑁄 𑀦𑁂𑀯𑀺𑀫𑁂𑀲𑀁 𑀇𑀥 𑀧𑀡𑁆𑀟𑀺𑀢𑀸𑀦𑀁, 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀦𑀺𑀧𑀼𑀡𑁂 𑀩𑁆𑀬𑀸𑀓𑀭𑀺𑀲𑁆𑀲𑀢𑀺;
𑀢𑀺𑀡𑀜𑁆𑀘 𑀭𑀜𑁆𑀜𑀁 𑀫𑀦𑀼𑀚𑀸𑀥𑀺𑀧𑀸𑀦𑀁, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀘 𑀯𑀸𑀲𑀯𑀲𑁆𑀲𑀸’’𑀢𑀺.
𑀢𑀢𑁆𑀣 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺𑀆𑀤𑀻𑀦𑀺 𑀲𑀓𑁆𑀓𑀲𑁆𑀲𑁂𑀯 𑀕𑀼𑀡𑀦𑀸𑀫𑀸𑀦𑀺. 𑀲𑁄 𑀳𑀺 𑀧𑀼𑀭𑁂 𑀤𑀸𑀦𑀁 𑀤𑀺𑀦𑁆𑀦𑀢𑁆𑀢𑀸 𑀧𑀼𑀭𑀺𑀦𑁆𑀤𑀤𑁄, 𑀪𑀽𑀢𑁂𑀲𑀼 𑀚𑁂𑀝𑁆𑀞𑀓𑀢𑁆𑀢𑀸 𑀪𑀽𑀢𑀧𑀢𑀺, 𑀧𑀭𑀺𑀯𑀸𑀭𑀲𑀫𑁆𑀧𑀤𑀸𑀬 𑀬𑀲𑀲𑁆𑀲𑀻, 𑀧𑀭𑀫𑀺𑀲𑁆𑀲𑀭𑀢𑀸𑀬 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀲𑀢𑁆𑀢𑀦𑁆𑀦𑀁 𑀯𑀢𑁆𑀢𑀧𑀤𑀸𑀦𑀁 𑀲𑀼𑀝𑁆𑀞𑀼 𑀓𑀢𑀢𑁆𑀢𑀸 𑀲𑀓𑁆𑀓𑁄, 𑀧𑀼𑀭𑀺𑀫𑀚𑀸𑀢𑀺𑀯𑀲𑁂𑀦 𑀫𑀖𑀯𑀸, 𑀲𑀼𑀚𑀸𑀬 𑀅𑀲𑀼𑀭𑀓𑀜𑁆𑀜𑀸𑀬 𑀧𑀢𑀺𑀪𑀸𑀯𑁂𑀦 ¶ 𑀲𑀼𑀚𑀫𑁆𑀧𑀢𑀺, 𑀤𑁂𑀯𑀸𑀦𑀁 𑀭𑀜𑁆𑀚𑀦𑀢𑀸𑀬 𑀤𑁂𑀯𑀭𑀸𑀚𑀸. 𑀓𑁄 𑀦𑁂𑀯𑀸𑀢𑀺 𑀓𑁄 𑀦𑀼 𑀏𑀯. 𑀦𑀺𑀧𑀼𑀡𑁂𑀢𑀺 𑀲𑀡𑁆𑀳𑀲𑀼𑀔𑀼𑀫𑁂 𑀧𑀜𑁆𑀳𑁂. 𑀭𑀜𑁆𑀜𑀦𑁆𑀢𑀺 𑀭𑀸𑀚𑀽𑀦𑀁. 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀚𑀽𑀦𑀁 𑀫𑀦𑀁 𑀕𑀳𑁂𑀢𑁆𑀯𑀸 𑀓𑁄 𑀇𑀫𑁂𑀲𑀁 𑀧𑀡𑁆𑀟𑀺𑀢𑀸𑀦𑀁 𑀇𑀲𑀻𑀦𑀁 𑀧𑀜𑁆𑀳𑁂 𑀓𑀣𑁂𑀲𑁆𑀲𑀢𑀺, 𑀧𑀜𑁆𑀳𑀁 𑀦𑁂𑀲𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑀁 𑀚𑀸𑀦𑀸𑀣𑀸𑀢𑀺 𑀯𑀤𑀢𑀺.
𑀢𑀁 ¶ ¶ 𑀲𑀼𑀢𑁆𑀯𑀸 𑀇𑀲𑀺𑀕𑀡𑁄, ‘‘𑀫𑀸𑀭𑀺𑀲, 𑀅𑀦𑀼𑀲𑀺𑀲𑁆𑀲 𑀢𑁆𑀯𑀁 𑀧𑀣𑀯𑀺𑀬𑀁 𑀞𑀢𑁆𑀯𑀸 𑀧𑀣𑀯𑀺𑀁 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀓𑀣𑁂𑀲𑀺, 𑀞𑀧𑁂𑀢𑁆𑀯𑀸 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀁 𑀓𑁄 𑀅𑀜𑁆𑀜𑁄 𑀏𑀢𑁂𑀲𑀁 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀬𑀁 𑀇𑀲𑀺 𑀲𑀭𑀪𑀗𑁆𑀕𑁄 𑀢𑀧𑀲𑁆𑀲𑀻, 𑀬𑀢𑁄 𑀚𑀸𑀢𑁄 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸;
𑀆𑀘𑁂𑀭𑀧𑀼𑀢𑁆𑀢𑁄 𑀲𑀼𑀯𑀺𑀦𑀻𑀢𑀭𑀽𑀧𑁄, 𑀲𑁄 𑀦𑁂𑀲𑀁 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑀺𑀲𑁆𑀲𑀢𑀻’’𑀢𑀺.
𑀢𑀢𑁆𑀣 𑀲𑀭𑀪𑀗𑁆𑀕𑁄𑀢𑀺 𑀲𑀭𑁂 𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀲𑀭𑀧𑀸𑀲𑀸𑀤𑀸𑀤𑀻𑀦𑀺 𑀓𑀢𑁆𑀯𑀸 𑀧𑀼𑀦 𑀏𑀓𑁂𑀦 𑀲𑀭𑁂𑀦 𑀢𑁂 𑀲𑀭𑁂 𑀧𑀸𑀢𑁂𑀦𑁆𑀢𑁄 𑀪𑀗𑁆𑀕𑀯𑀺𑀪𑀗𑁆𑀕𑁂 𑀅𑀓𑀸𑀲𑀻𑀢𑀺 𑀲𑀭𑀪𑀗𑁆𑀕𑁄. 𑀫𑁂𑀣𑀼𑀦𑀲𑁆𑀫𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀢𑁄. 𑀲𑁄 𑀓𑀺𑀭 𑀫𑁂𑀣𑀼𑀦𑀁 𑀅𑀲𑁂𑀯𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀆𑀘𑁂𑀭𑀧𑀼𑀢𑁆𑀢𑁄𑀢𑀺 𑀭𑀜𑁆𑀜𑁄 𑀆𑀘𑀭𑀺𑀬𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀧𑀼𑀢𑁆𑀢𑁄.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀲𑀺𑀕𑀡𑁄 𑀅𑀦𑀼𑀲𑀺𑀲𑁆𑀲𑀁 𑀆𑀳 𑁋 ‘‘𑀫𑀸𑀭𑀺𑀲, 𑀢𑁆𑀯𑀫𑁂𑀯 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀇𑀲𑀺𑀕𑀡𑀲𑁆𑀲 𑀯𑀘𑀦𑁂𑀦 𑀲𑀓𑁆𑀓𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀓𑀣𑀦𑀸𑀬 𑀑𑀓𑀸𑀲𑀁 𑀓𑀸𑀭𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑁄𑀳𑀺, 𑀬𑀸𑀘𑀦𑁆𑀢𑀺 𑀢𑀁 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;
𑀓𑁄𑀡𑁆𑀟𑀜𑁆𑀜 𑀏𑀲𑁄 𑀫𑀦𑀼𑀚𑁂𑀲𑀼 𑀥𑀫𑁆𑀫𑁄, 𑀬𑀁 𑀯𑀼𑀤𑁆𑀥𑀫𑀸𑀕𑀘𑁆𑀙𑀢𑀺 𑀏𑀲 𑀪𑀸𑀭𑁄’’𑀢𑀺.
𑀢𑀢𑁆𑀣 𑀓𑁄𑀡𑁆𑀟𑀜𑁆𑀜𑀸𑀢𑀺 𑀢𑀁 𑀕𑁄𑀢𑁆𑀢𑁂𑀦𑀸𑀮𑀧𑀢𑀺. 𑀥𑀫𑁆𑀫𑁄𑀢𑀺 𑀲𑀪𑀸𑀯𑁄. 𑀬𑀁 𑀯𑀼𑀤𑁆𑀥𑀦𑁆𑀢𑀺 𑀬𑀁 𑀧𑀜𑁆𑀜𑀸𑀬 𑀯𑀼𑀤𑁆𑀥𑀁 𑀧𑀼𑀭𑀺𑀲𑀁 𑀏𑀲 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀪𑀸𑀭𑁄 𑀦𑀸𑀫 𑀆𑀕𑀘𑁆𑀙𑀢𑀺, 𑀏𑀲𑁄 𑀫𑀦𑀼𑀚𑁂𑀲𑀼 𑀲𑀪𑀸𑀯𑁄, 𑀢𑀲𑁆𑀫𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀲𑀳𑀲𑁆𑀲𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀧𑀸𑀓𑀝𑀁 𑀓𑀢𑁆𑀯𑀸 𑀤𑁂𑀯𑀭𑀜𑁆𑀜𑁄 𑀧𑀜𑁆𑀳𑁂 𑀓𑀣𑁂𑀳𑀻𑀢𑀺.
𑀢𑀢𑁄 ¶ 𑀫𑀳𑀸𑀧𑀼𑀭𑀺𑀲𑁄 𑀑𑀓𑀸𑀲𑀁 𑀓𑀭𑁄𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄, 𑀬𑀁 𑀓𑀺𑀜𑁆𑀘𑀺 𑀧𑀜𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁;
𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀯𑀺𑀬𑀸𑀓𑀭𑀺𑀲𑁆𑀲𑀁, 𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺.
𑀢𑀢𑁆𑀣 ¶ 𑀬𑀁 𑀓𑀺𑀜𑁆𑀘𑀻𑀢𑀺 𑀦 𑀓𑁂𑀯𑀮𑀁 𑀢𑀼𑀫𑁆𑀳𑀸𑀓𑀁𑀬𑁂𑀯, 𑀅𑀣 𑀔𑁄 𑀲𑀤𑁂𑀯𑀓𑀲𑁆𑀲𑀧𑀺 𑀮𑁄𑀓𑀲𑁆𑀲 𑀬𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁, 𑀢𑀁 𑀫𑀁 𑀪𑀯𑀦𑁆𑀢𑁄 𑀧𑀼𑀘𑁆𑀙𑀦𑁆𑀢𑀼. 𑀅𑀳𑀜𑁆𑀳𑀺 𑀯𑁄 𑀇𑀥𑀮𑁄𑀓𑀦𑀺𑀲𑁆𑀲𑀺𑀢𑀁 𑀯𑀸 𑀧𑀭𑀮𑁄𑀓𑀦𑀺𑀲𑁆𑀲𑀺𑀢𑀁 𑀯𑀸 𑀲𑀩𑁆𑀩𑀁 𑀧𑀜𑁆𑀳𑀁 𑀇𑀫𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀲𑀫𑁆𑀧𑀯𑀸𑀭𑁂𑀲𑀺.
𑀏𑀯𑀁 ¶ 𑀢𑁂𑀦 𑀑𑀓𑀸𑀲𑁂 𑀓𑀢𑁂 𑀲𑀓𑁆𑀓𑁄 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀢𑁄 𑀘 𑀫𑀖𑀯𑀸 𑀲𑀓𑁆𑀓𑁄, 𑀅𑀢𑁆𑀣𑀤𑀲𑁆𑀲𑀻 𑀧𑀼𑀭𑀺𑀦𑁆𑀤𑀤𑁄;
𑀅𑀧𑀼𑀘𑁆𑀙𑀺 𑀧𑀞𑀫𑀁 𑀧𑀜𑁆𑀳𑀁, 𑀬𑀜𑁆𑀘𑀸𑀲𑀺 𑀅𑀪𑀺𑀧𑀢𑁆𑀣𑀺𑀢𑀁.
‘‘𑀓𑀺𑀁 𑀲𑀽 𑀯𑀥𑀺𑀢𑁆𑀯𑀸 𑀦 𑀓𑀤𑀸𑀘𑀺 𑀲𑁄𑀘𑀢𑀺, 𑀓𑀺𑀲𑁆𑀲𑀧𑁆𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺;
𑀓𑀲𑁆𑀲𑀻𑀥 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣, 𑀅𑀓𑁆𑀔𑀸𑀳𑀺 𑀫𑁂 𑀓𑁄𑀡𑁆𑀟𑀜𑁆𑀜 𑀏𑀢𑀫𑀢𑁆𑀣’’𑀦𑁆𑀢𑀺.
𑀢𑀢𑁆𑀣 𑀬𑀜𑁆𑀘𑀸𑀲𑀻𑀢𑀺 𑀬𑀁 𑀢𑀲𑁆𑀲 𑀫𑀦𑀲𑀸 𑀅𑀪𑀺𑀧𑀢𑁆𑀣𑀺𑀢𑀁 𑀆𑀲𑀺, 𑀢𑀁 𑀧𑀼𑀘𑁆𑀙𑀻𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀏𑀢𑀁 𑀫𑀬𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀅𑀓𑁆𑀔𑀸𑀳𑀺 𑀫𑁂𑀢𑀺 𑀏𑀓𑀕𑀸𑀣𑀸𑀬 𑀢𑀬𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺.
𑀢𑀢𑁄 𑀧𑀭𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀆𑀳 𑁋
‘‘𑀓𑁄𑀥𑀁 𑀯𑀥𑀺𑀢𑁆𑀯𑀸 𑀦 𑀓𑀤𑀸𑀘𑀺 𑀲𑁄𑀘𑀢𑀺, 𑀫𑀓𑁆𑀔𑀧𑁆𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺;
𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’’𑀢𑀺.
𑀢𑀢𑁆𑀣 𑀓𑁄𑀥𑀁 𑀯𑀥𑀺𑀢𑁆𑀯𑀸𑀢𑀺 𑀓𑁄𑀥𑀁 𑀫𑀸𑀭𑁂𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸. 𑀲𑁄𑀘𑀦𑁆𑀢𑁄 𑀳𑀺 𑀧𑀝𑀺𑀖𑀘𑀺𑀢𑁆𑀢𑁂𑀦𑁂𑀯 𑀲𑁄𑀘𑀢𑀺, 𑀓𑁄𑀥𑀸𑀪𑀸𑀯𑀸 𑀓𑀼𑀢𑁄 𑀲𑁄𑀓𑁄. 𑀢𑁂𑀦 𑀯𑀼𑀢𑁆𑀢𑀁 ¶ ‘‘𑀦 𑀓𑀤𑀸𑀘𑀺 𑀲𑁄𑀘𑀢𑀻’’𑀢𑀺. 𑀫𑀓𑁆𑀔𑀧𑁆𑀧𑀳𑀸𑀦𑀦𑁆𑀢𑀺 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀓𑀢𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑀲𑁆𑀲 𑀅𑀓𑀢𑀜𑁆𑀜𑀼𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀫𑀓𑁆𑀔𑀲𑁆𑀲 𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀳𑀻𑀦𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀨𑀭𑀼𑀲𑀁 𑀯𑀘𑀦𑀁 𑀔𑀫𑁂𑀣. 𑀲𑀦𑁆𑀢𑁄𑀢𑀺 𑀧𑁄𑀭𑀸𑀡𑀓𑀸 𑀧𑀡𑁆𑀟𑀺𑀢𑀸 𑀏𑀯𑀁 𑀓𑀣𑁂𑀦𑁆𑀢𑀺.
𑀲𑀓𑁆𑀓𑁄 𑀆𑀳 𑁋
‘‘𑀲𑀓𑁆𑀓𑀸 𑀉𑀪𑀺𑀦𑁆𑀦𑀁 𑀯𑀘𑀦𑀁 𑀢𑀺𑀢𑀺𑀓𑁆𑀔𑀺𑀢𑀼𑀁, 𑀲𑀤𑀺𑀲𑀲𑁆𑀲 𑀯𑀸 𑀲𑁂𑀝𑁆𑀞𑀢𑀭𑀲𑁆𑀲 𑀯𑀸𑀧𑀺;
𑀓𑀣𑀁 𑀦𑀼 𑀳𑀻𑀦𑀲𑁆𑀲 𑀯𑀘𑁄 𑀔𑀫𑁂𑀣, 𑀅𑀓𑁆𑀔𑀸𑀳𑀺 𑀫𑁂 𑀓𑁄𑀡𑁆𑀟𑀜𑁆𑀜 𑀏𑀢𑀫𑀢𑁆𑀣’’𑀦𑁆𑀢𑀺.
𑀲𑀭𑀪𑀗𑁆𑀕𑁄 𑀆𑀳 𑁋
‘‘𑀪𑀬𑀸 ¶ 𑀳𑀺 𑀲𑁂𑀝𑁆𑀞𑀲𑁆𑀲 𑀯𑀘𑁄 𑀔𑀫𑁂𑀣, 𑀲𑀸𑀭𑀫𑁆𑀪𑀳𑁂𑀢𑀽 𑀧𑀦 𑀲𑀸𑀤𑀺𑀲𑀲𑁆𑀲;
𑀬𑁄 ¶ 𑀘𑀻𑀥 𑀳𑀻𑀦𑀲𑁆𑀲 𑀯𑀘𑁄 𑀔𑀫𑁂𑀣, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’’𑀢𑀺. 𑁋
𑀏𑀯𑀫𑀸𑀤𑀻𑀦𑀁 𑀕𑀸𑀣𑀸𑀦𑀁 𑀯𑀘𑀦𑀧𑁆𑀧𑀝𑀺𑀯𑀘𑀦𑀯𑀲𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.
𑀢𑀢𑁆𑀣 𑀅𑀓𑁆𑀔𑀸𑀳𑀺 𑀫𑁂𑀢𑀺, 𑀪𑀦𑁆𑀢𑁂 𑀓𑁄𑀡𑁆𑀟𑀜𑁆𑀜, 𑀢𑀼𑀫𑁆𑀳𑁂𑀳𑀺 𑀤𑁆𑀯𑁂 𑀧𑀜𑁆𑀳𑀸 𑀲𑀼𑀓𑀣𑀺𑀢𑀸, 𑀏𑀓𑁄 𑀫𑁂 𑀘𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀓𑀣𑀁 𑀲𑀓𑁆𑀓𑀸 𑀅𑀢𑁆𑀢𑀦𑁄 𑀳𑀻𑀦𑀢𑀭𑀲𑁆𑀲 𑀯𑀘𑀦𑀁 𑀅𑀥𑀺𑀯𑀸𑀲𑁂𑀢𑀼𑀁, 𑀢𑀁 𑀫𑀫 𑀅𑀓𑁆𑀔𑀸𑀳𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀏𑀢𑀁 𑀔𑀦𑁆𑀢𑀺𑀦𑁆𑀢𑀺 𑀬𑀤𑁂𑀢𑀁 𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀳𑀻𑀦𑀲𑁆𑀲 𑀯𑀘𑀦𑀁 𑀔𑀫𑀦𑀁, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀦𑁆𑀢𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀯𑀤𑀦𑁆𑀢𑀺. 𑀬𑀁 𑀧𑀦𑁂𑀢𑀁 𑀚𑀸𑀢𑀺𑀆𑀤𑀻𑀳𑀺 𑀲𑁂𑀝𑁆𑀞𑀲𑁆𑀲 𑀪𑀬𑁂𑀦, 𑀲𑀤𑀺𑀲𑀲𑁆𑀲 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁂 𑀲𑀸𑀭𑀫𑁆𑀪𑁂 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀔𑀫𑀦𑀁, 𑀦𑁂𑀲𑀸 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄.
𑀏𑀯𑀁 𑀯𑀼𑀢𑁆𑀢𑁂 𑀲𑀓𑁆𑀓𑁄 𑀫𑀳𑀸𑀲𑀢𑁆𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀧𑀞𑀫𑀁 𑀢𑀼𑀫𑁆𑀳𑁂 ‘𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘𑀬𑁄 𑀘𑀻𑀥 𑀳𑀻𑀦𑀲𑁆𑀲 𑀯𑀘𑁄 𑀔𑀫𑁂𑀣, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’𑀢𑀺 𑀯𑀤𑀣, 𑀦 𑀯𑁄 𑀧𑀼𑀭𑀺𑀫𑁂𑀦 𑀧𑀘𑁆𑀙𑀺𑀫𑀁 𑀲𑀫𑁂𑀢𑀻’’𑀢𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄, ‘‘𑀲𑀓𑁆𑀓, 𑀧𑀘𑁆𑀙𑀺𑀫𑀁 𑀫𑀬𑀸 ‘𑀅𑀬𑀁 𑀳𑀻𑀦𑁄’𑀢𑀺 𑀜𑀢𑁆𑀯𑀸 𑀨𑀭𑀼𑀲𑀯𑀘𑀦𑀁 𑀅𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀧𑀦 𑀦 𑀲𑀓𑁆𑀓𑀸 𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑁂𑀦 𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑀸𑀤𑀺𑀪𑀸𑀯𑁄 𑀜𑀸𑀢𑀼𑀁, 𑀢𑀲𑁆𑀫𑀸 ¶ 𑀧𑀼𑀭𑀺𑀫𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀢𑀸𑀦𑀁 𑀅𑀜𑁆𑀜𑀢𑁆𑀭 𑀲𑀁𑀯𑀸𑀲𑀸 𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑁂𑀦 𑀲𑁂𑀝𑁆𑀞𑀸𑀤𑀺𑀪𑀸𑀯𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀁 𑀧𑀓𑀸𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀓𑀣𑀁 𑀯𑀺𑀚𑀜𑁆𑀜𑀸 𑀘𑀢𑀼𑀧𑀢𑁆𑀣𑀭𑀽𑀧𑀁, 𑀲𑁂𑀝𑁆𑀞𑀁 𑀲𑀭𑀺𑀓𑁆𑀔𑀁 𑀅𑀣𑀯𑀸𑀧𑀺 𑀳𑀻𑀦𑀁;
𑀯𑀺𑀭𑀽𑀧𑀭𑀽𑀧𑁂𑀦 𑀘𑀭𑀦𑁆𑀢𑀺 𑀲𑀦𑁆𑀢𑁄, 𑀢𑀲𑁆𑀫𑀸 𑀳𑀺 𑀲𑀩𑁆𑀩𑁂𑀲𑀁 𑀯𑀘𑁄 𑀔𑀫𑁂𑀣𑀸’’𑀢𑀺.
𑀢𑀢𑁆𑀣 𑀘𑀢𑀼𑀧𑀢𑁆𑀣𑀭𑀽𑀧𑀦𑁆𑀢𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀲𑀪𑀸𑀯𑀁. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀭𑀽𑀧𑀸𑀦𑀁 𑀮𑀸𑀫𑀓𑀧𑀼𑀕𑁆𑀕𑀮𑀸𑀦𑀁 𑀭𑀽𑀧𑁂𑀦 𑀉𑀢𑁆𑀢𑀫𑀕𑀼𑀡𑀸 𑀲𑀦𑁆𑀢𑁄𑀧𑀺 𑀯𑀺𑀘𑀭𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁.
𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸, ‘‘𑀪𑀦𑁆𑀢𑁂, 𑀏𑀢𑀸𑀬 𑀦𑁄 𑀔𑀦𑁆𑀢𑀺𑀬𑀸 𑀆𑀦𑀺𑀲𑀁𑀲𑀁 𑀓𑀣𑁂𑀳𑀻’’𑀢𑀺 𑀬𑀸𑀘𑀺. 𑀅𑀣𑀲𑁆𑀲 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀦 ¶ 𑀳𑁂𑀢𑀫𑀢𑁆𑀣𑀁 𑀫𑀳𑀢𑀻𑀧𑀺 𑀲𑁂𑀦𑀸, 𑀲𑀭𑀸𑀚𑀺𑀓𑀸 𑀬𑀼𑀚𑁆𑀛𑀫𑀸𑀦𑀸 𑀮𑀪𑁂𑀣;
𑀬𑀁 ¶ 𑀔𑀦𑁆𑀢𑀺𑀫𑀸 𑀲𑀧𑁆𑀧𑀼𑀭𑀺𑀲𑁄 𑀮𑀪𑁂𑀣, 𑀔𑀦𑁆𑀢𑀻𑀩𑀮𑀲𑁆𑀲𑀽𑀧𑀲𑀫𑀦𑁆𑀢𑀺 𑀯𑁂𑀭𑀸’’𑀢𑀺.
𑀢𑀢𑁆𑀣 𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀯𑁂𑀭𑀯𑀽𑀧𑀲𑀫𑀦𑀺𑀧𑁆𑀧𑀝𑀺𑀖𑀲𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀣𑀁.
𑀏𑀯𑀁 𑀫𑀳𑀸𑀲𑀢𑁆𑀢𑁂𑀦 𑀔𑀦𑁆𑀢𑀺𑀕𑀼𑀡𑁂 𑀓𑀣𑀺𑀢𑁂 𑀢𑁂 𑀭𑀸𑀚𑀸𑀦𑁄 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀓𑁆𑀓𑁄 𑀅𑀢𑁆𑀢𑀦𑁄𑀯 𑀧𑀜𑁆𑀳𑁂 𑀧𑀼𑀘𑁆𑀙𑀢𑀺, 𑀅𑀫𑁆𑀳𑀸𑀓𑀁 𑀧𑀼𑀘𑁆𑀙𑀦𑁄𑀓𑀸𑀲𑀁 𑀦 𑀤𑀲𑁆𑀲𑀢𑀻’’𑀢𑀺. 𑀅𑀣 𑀦𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀲𑀓𑁆𑀓𑁄 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑁂 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀞𑀧𑁂𑀢𑁆𑀯𑀸𑀯 𑀢𑁂𑀲𑀁 𑀓𑀗𑁆𑀔𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀲𑀼𑀪𑀸𑀲𑀺𑀢𑀁 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;
𑀬𑀣𑀸 𑀅𑀳𑀼𑀁 𑀤𑀡𑁆𑀟𑀓𑀻 𑀦𑀸𑀴𑀺𑀓𑁂𑀭𑁄, 𑀅𑀣𑀚𑁆𑀚𑀼𑀦𑁄 𑀓𑀮𑀸𑀩𑀼 𑀘𑀸𑀧𑀺 𑀭𑀸𑀚𑀸;
𑀢𑁂𑀲𑀁 𑀕𑀢𑀺𑀁 𑀩𑁆𑀭𑀽𑀳𑀺 𑀲𑀼𑀧𑀸𑀧𑀓𑀫𑁆𑀫𑀺𑀦𑀁, 𑀓𑀢𑁆𑀣𑀽𑀧𑀧𑀦𑁆𑀦𑀸 𑀇𑀲𑀻𑀦𑀁 𑀯𑀺𑀳𑁂𑀞𑀓𑀸’’𑀢𑀺.
𑀢𑀢𑁆𑀣 ¶ 𑀅𑀦𑀼𑀫𑁄𑀤𑀺𑀬𑀸𑀦𑀸𑀢𑀺 𑀇𑀤𑀁 𑀫𑀬𑀸 𑀧𑀼𑀝𑁆𑀞𑀸𑀦𑀁 𑀢𑀺𑀡𑁆𑀡𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀲𑀗𑁆𑀔𑀸𑀢𑀁 𑀢𑀯 𑀲𑀼𑀪𑀸𑀲𑀺𑀢𑀁 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀬𑀣𑀸 𑀅𑀳𑀼𑀦𑁆𑀢𑀺 𑀬𑀣𑀸 𑀘𑀢𑁆𑀢𑀸𑀭𑁄 𑀚𑀦𑀸 𑀅𑀳𑁂𑀲𑀼𑀁. 𑀓𑀮𑀸𑀩𑀼 𑀘𑀸𑀢𑀺 𑀓𑀮𑀸𑀩𑀼𑀭𑀸𑀚𑀸 𑀘. 𑀅𑀣𑀚𑁆𑀚𑀼𑀦𑁄𑀢𑀺 𑀅𑀣 𑀅𑀚𑁆𑀚𑀼𑀦𑀭𑀸𑀚𑀸.
𑀅𑀣𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀧𑀜𑁆𑀘 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀓𑀺𑀲𑀜𑁆𑀳𑀺 𑀯𑀘𑁆𑀙𑀁 𑀅𑀯𑀓𑀺𑀭𑀺𑀬 𑀤𑀡𑁆𑀟𑀓𑀻, 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀲𑀚𑀦𑁄 𑀲𑀭𑀝𑁆𑀞𑁄;
𑀓𑀼𑀓𑁆𑀓𑀼𑀴𑀦𑀸𑀫𑁂 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺, 𑀢𑀲𑁆𑀲 𑀨𑀼𑀮𑀺𑀗𑁆𑀕𑀸𑀦𑀺 𑀧𑀢𑀦𑁆𑀢𑀺 𑀓𑀸𑀬𑁂.
‘‘𑀬𑁄 𑀲𑀜𑁆𑀜𑀢𑁂 𑀧𑀩𑁆𑀩𑀚𑀺𑀢𑁂 𑀅𑀳𑁂𑀞𑀬𑀺, 𑀥𑀫𑁆𑀫𑀁 𑀪𑀡𑀦𑁆𑀢𑁂 𑀲𑀫𑀡𑁂 𑀅𑀤𑀽𑀲𑀓𑁂;
𑀢𑀁 𑀦𑀸𑀴𑀺𑀓𑁂𑀭𑀁 𑀲𑀼𑀦𑀔𑀸 𑀧𑀭𑀢𑁆𑀣, 𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦𑀁.
‘‘𑀅𑀣𑀚𑁆𑀚𑀼𑀦𑁄 𑀦𑀺𑀭𑀬𑁂 𑀲𑀢𑁆𑀢𑀺𑀲𑀽𑀮𑁂, 𑀅𑀯𑀁𑀲𑀺𑀭𑁄 𑀧𑀢𑀺𑀢𑁄 𑀉𑀤𑁆𑀥𑀁𑀧𑀸𑀤𑁄;
𑀅𑀗𑁆𑀕𑀻𑀭𑀲𑀁 ¶ 𑀕𑁄𑀢𑀫𑀁 𑀳𑁂𑀞𑀬𑀺𑀢𑁆𑀯𑀸, 𑀔𑀦𑁆𑀢𑀺𑀁 𑀢𑀧𑀲𑁆𑀲𑀺𑀁 𑀘𑀺𑀭𑀩𑁆𑀭𑀳𑁆𑀫𑀘𑀸𑀭𑀺𑀁.
‘‘𑀬𑁄 𑀔𑀡𑁆𑀟𑀲𑁄 𑀧𑀩𑁆𑀩𑀚𑀺𑀢𑀁 𑀅𑀙𑁂𑀤𑀬𑀺, 𑀔𑀦𑁆𑀢𑀺𑀁 𑀯𑀤𑀦𑁆𑀢𑀁 𑀲𑀫𑀡𑀁 𑀅𑀤𑀽𑀲𑀓𑀁;
𑀓𑀮𑀸𑀩𑀼𑀯𑀻𑀘𑀺𑀁 𑀉𑀧𑀧𑀚𑁆𑀚 𑀧𑀘𑁆𑀘𑀢𑀺, 𑀫𑀳𑀸𑀧𑀢𑀸𑀧𑀁 𑀓𑀝𑀼𑀓𑀁 𑀪𑀬𑀸𑀦𑀓𑀁.
‘‘𑀏𑀢𑀸𑀦𑀺 ¶ 𑀲𑀼𑀢𑁆𑀯𑀸 𑀦𑀺𑀭𑀬𑀸𑀦𑀺 𑀧𑀡𑁆𑀟𑀺𑀢𑁄, 𑀅𑀜𑁆𑀜𑀸𑀦𑀺 𑀧𑀸𑀧𑀺𑀝𑁆𑀞𑀢𑀭𑀸𑀦𑀺 𑀘𑁂𑀢𑁆𑀣;
𑀥𑀫𑁆𑀫𑀁 𑀘𑀭𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼, 𑀏𑀯𑀁𑀓𑀭𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦’’𑀦𑁆𑀢𑀺.
𑀢𑀢𑁆𑀣 𑀓𑀺𑀲𑀦𑁆𑀢𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀓𑀺𑀲𑀲𑀭𑀻𑀭𑀁. 𑀅𑀯𑀓𑀺𑀭𑀺𑀬𑀸𑀢𑀺 𑀅𑀯𑀓𑀺𑀭𑀺𑀢𑁆𑀯𑀸 𑀦𑀺𑀝𑁆𑀞𑀼𑀪𑀦𑀤𑀦𑁆𑀢𑀓𑀝𑁆𑀞𑀧𑀸𑀢𑀦𑁂𑀦 𑀢𑀲𑁆𑀲 𑀲𑀭𑀻𑀭𑁂 𑀓𑀮𑀺𑀁 𑀧𑀯𑀸𑀳𑁂𑀢𑁆𑀯𑀸. 𑀉𑀘𑁆𑀙𑀺𑀦𑁆𑀦𑀫𑀽𑀮𑁄𑀢𑀺 ¶ 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀳𑀼𑀢𑁆𑀯𑀸. 𑀲𑀚𑀦𑁄𑀢𑀺 𑀲𑀧𑀭𑀺𑀲𑁄. 𑀓𑀼𑀓𑁆𑀓𑀼𑀴𑀦𑀸𑀫𑁂 𑀦𑀺𑀭𑀬𑀫𑁆𑀳𑀻𑀢𑀺 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑁂 𑀓𑀧𑁆𑀧𑀲𑀡𑁆𑀞𑀺𑀢𑁂 𑀉𑀡𑁆𑀳𑀙𑀸𑀭𑀺𑀓𑀦𑀺𑀭𑀬𑁂. 𑀨𑀼𑀮𑀺𑀗𑁆𑀕𑀸𑀦𑀻𑀢𑀺 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀸. 𑀢𑀲𑁆𑀲 𑀓𑀺𑀭 𑀢𑀢𑁆𑀣 𑀉𑀡𑁆𑀳𑀓𑀼𑀓𑁆𑀓𑀼𑀴𑁂 𑀦𑀺𑀫𑀼𑀕𑁆𑀕𑀲𑁆𑀲 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀉𑀡𑁆𑀳𑀸 𑀙𑀸𑀭𑀺𑀓𑀸 𑀧𑀯𑀺𑀲𑀦𑁆𑀢𑀺, 𑀲𑀻𑀲𑁂 𑀫𑀳𑀦𑁆𑀢𑀫𑀳𑀦𑁆𑀢𑀸 𑀅𑀗𑁆𑀕𑀸𑀭𑀸 𑀧𑀢𑀦𑁆𑀢𑀺. 𑀢𑁂𑀲𑀁 𑀧𑀦 𑀧𑀢𑀦𑀓𑀸𑀮𑁂 𑀲𑀓𑀮𑀲𑀭𑀻𑀭𑀁 𑀤𑀻𑀧𑀭𑀼𑀓𑁆𑀔𑁄 𑀯𑀺𑀬 𑀚𑀮𑀢𑀺, 𑀩𑀮𑀯𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀸𑀯𑀺𑀭𑀯𑀁 𑀭𑀯𑀢𑀺. 𑀲𑀭𑀪𑀗𑁆𑀕𑀲𑀢𑁆𑀣𑀸 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀁 𑀢𑀢𑁆𑀣 𑀢𑀣𑀸𑀧𑀘𑁆𑀘𑀫𑀸𑀦𑀁 𑀤𑀲𑁆𑀲𑁂𑀲𑀺, 𑀫𑀳𑀸𑀚𑀦𑁄 𑀪𑀬𑀲𑀦𑁆𑀢𑀸𑀲𑀫𑀸𑀧𑀚𑁆𑀚𑀺. 𑀢𑀲𑁆𑀲 𑀅𑀢𑀺𑀯𑀺𑀬 𑀪𑀻𑀢𑀪𑀸𑀯𑀁 𑀜𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀁 𑀦𑀺𑀭𑀬𑀁 𑀅𑀦𑁆𑀢𑀭𑀥𑀸𑀧𑁂𑀲𑀺.
𑀥𑀫𑁆𑀫𑀁 𑀪𑀡𑀦𑁆𑀢𑁂𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀪𑀸𑀲𑀦𑁆𑀢𑁂. 𑀲𑀫𑀡𑁂𑀢𑀺 𑀲𑀫𑀺𑀢𑀧𑀸𑀧𑁂. 𑀅𑀤𑀽𑀲𑀓𑁂𑀢𑀺 𑀦𑀺𑀭𑀧𑀭𑀸𑀥𑁂. 𑀦𑀸𑀴𑀺𑀓𑁂𑀭𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀭𑀸𑀚𑀸𑀦𑀁. 𑀧𑀭𑀢𑁆𑀣𑀸𑀢𑀺 𑀧𑀭𑀮𑁄𑀓𑁂 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁. 𑀲𑀗𑁆𑀕𑀫𑁆𑀫𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀫𑀸𑀕𑀦𑁆𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀦𑁆𑀢𑀫𑀳𑀦𑁆𑀢𑀸 𑀲𑀼𑀦𑀔𑀸 𑀔𑀸𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑀦𑁆𑀢𑀧𑀼𑀭𑀦𑀕𑀭𑁂 𑀦𑀸𑀴𑀺𑀓𑁂𑀭𑁂 𑀦𑀸𑀫 𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀏𑀓𑁄 𑀫𑀳𑀸𑀢𑀸𑀧𑀲𑁄 𑀧𑀜𑁆𑀘𑀲𑀢𑀢𑀸𑀧𑀲𑀧𑀭𑀺𑀯𑀼𑀢𑁄 𑀳𑀺𑀫𑀯𑀦𑁆𑀢𑀸 𑀆𑀕𑀫𑁆𑀫 𑀭𑀸𑀚𑀼𑀬𑁆𑀬𑀸𑀦𑁂 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. ‘‘𑀥𑀫𑁆𑀫𑀺𑀓𑀢𑀸𑀧𑀲𑁄 𑀉𑀬𑁆𑀬𑀸𑀦𑁂 𑀯𑀲𑀢𑀻’’𑀢𑀺 𑀭𑀜𑁆𑀜𑁄𑀧𑀺 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀧𑀦 𑀅𑀥𑀫𑁆𑀫𑀺𑀓𑁄 𑀅𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀅𑀫𑀘𑁆𑀘𑁂𑀲𑀼 𑀢𑀸𑀧𑀲𑀁 𑀧𑀲𑀁𑀲𑀦𑁆𑀢𑁂𑀲𑀼 ‘‘𑀅𑀳𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀸𑀧𑀲𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀓𑀺𑀁, 𑀫𑀳𑀸𑀭𑀸𑀚, 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀚𑀦𑀁 𑀦 𑀧𑀻𑀴𑁂𑀲𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀬𑀁 𑀓𑀽𑀝𑀚𑀝𑀺𑀮𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀸𑀕𑀭𑀸𑀦𑀁 𑀲𑀦𑁆𑀢𑀺𑀓𑁂 𑀫𑀫𑀜𑁆𑀜𑁂𑀯 𑀅𑀕𑀼𑀡𑀁 𑀓𑀣𑁂𑀲𑀺 𑀫𑀜𑁆𑀜𑁂, 𑀳𑁄𑀢𑀼 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑀁 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀼𑀭𑀸𑀡𑀕𑀽𑀣𑀲𑁆𑀲 𑀘𑀸𑀝𑀺𑀬𑁄 𑀧𑀭𑀺𑀧𑀽𑀭𑀸𑀧𑁂𑀢𑁆𑀯𑀸 𑀢𑀸𑀧𑀲𑁂𑀲𑀼 𑀆𑀕𑀢𑁂𑀲𑀼 𑀢𑁂𑀲𑀁 𑀪𑀺𑀓𑁆𑀔𑀸𑀪𑀸𑀚𑀦𑀸𑀦𑀺 𑀕𑀽𑀣𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀫𑀼𑀲𑀮𑀸𑀦𑀺 𑀘 𑀮𑁄𑀳𑀤𑀡𑁆𑀟𑁂 𑀘 𑀕𑀸𑀳𑀸𑀧𑁂𑀢𑁆𑀯𑀸 ¶ 𑀇𑀲𑀻𑀦𑀁 𑀲𑀻𑀲𑀸𑀦𑀺 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀚𑀝𑀸𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀓𑀟𑁆𑀠𑀸𑀧𑁂𑀢𑁆𑀯𑀸 𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀪𑀺𑀦𑁆𑀦𑀁 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀦𑀔𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀭𑀲𑁆𑀲 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀲𑀭𑀻𑀭𑀁 ¶ 𑀅𑀳𑁄𑀲𑀺. 𑀅𑀣 𑀦𑀁 𑀫𑀳𑀦𑁆𑀢𑀫𑀳𑀦𑁆𑀢𑀸 𑀫𑀳𑀸𑀳𑀢𑁆𑀣𑀺𑀧𑁆𑀧𑀫𑀸𑀡𑀸 𑀧𑀜𑁆𑀘𑀯𑀡𑁆𑀡𑀸 𑀲𑀼𑀦𑀔𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀟𑀁𑀲𑀺𑀢𑁆𑀯𑀸 𑀦𑀯𑀬𑁄𑀚𑀦𑀸𑀬 𑀚𑀮𑀺𑀢𑀅𑀬𑀧𑀣𑀯𑀺𑀬𑀸 𑀧𑀸𑀢𑁂𑀢𑁆𑀯𑀸 𑀫𑀼𑀔𑀧𑀽𑀭𑀁 𑀮𑀼𑀜𑁆𑀘𑀦𑁆𑀢𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀔𑀸𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀁 𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀪𑀻𑀢𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑀭𑀥𑀸𑀧𑁂𑀲𑀺.
𑀅𑀣𑀚𑁆𑀚𑀼𑀦𑁄𑀢𑀺 ¶ 𑀲𑀳𑀲𑁆𑀲𑀩𑀸𑀳𑀼𑀭𑀸𑀚𑀸. 𑀅𑀗𑁆𑀕𑀻𑀭𑀲𑀦𑁆𑀢𑀺 𑀅𑀗𑁆𑀕𑁂𑀳𑀺 𑀭𑀁𑀲𑀻𑀦𑀁 𑀦𑀺𑀘𑁆𑀙𑀭𑀡𑀢𑁄 𑀏𑀯𑀁𑀮𑀤𑁆𑀥𑀦𑀸𑀫𑀁. 𑀳𑁂𑀞𑀬𑀺𑀢𑁆𑀯𑀸𑀢𑀺 𑀯𑀺𑀳𑁂𑀞𑁂𑀢𑁆𑀯𑀸 𑀯𑀺𑀲𑀧𑀻𑀢𑀓𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸. 𑀲𑁄 𑀓𑀺𑀭 𑀅𑀚𑁆𑀚𑀼𑀦𑁄 𑀦𑀸𑀫 𑀭𑀸𑀚𑀸 𑀫𑀳𑀺𑀲𑀓𑀭𑀝𑁆𑀞𑁂 𑀓𑁂𑀢𑀓𑀭𑀸𑀚𑀥𑀸𑀦𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀫𑀺𑀕𑀯𑀁 𑀕𑀦𑁆𑀢𑁆𑀯𑀸 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀅𑀗𑁆𑀕𑀸𑀭𑀧𑀓𑁆𑀓𑀫𑀁𑀲𑀁 𑀔𑀸𑀤𑀦𑁆𑀢𑁄 𑀯𑀺𑀘𑀭𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀺𑀕𑀸𑀦𑀁 𑀆𑀕𑀫𑀦𑀝𑁆𑀞𑀸𑀦𑁂 𑀓𑁄𑀝𑁆𑀞𑀓𑀁 𑀓𑀢𑁆𑀯𑀸 𑀫𑀺𑀕𑁂 𑀑𑀮𑁄𑀓𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀤𑀸 𑀲𑁄 𑀢𑀸𑀧𑀲𑁄 𑀢𑀲𑁆𑀲 𑀭𑀜𑁆𑀜𑁄 𑀅𑀯𑀺𑀤𑀽𑀭𑁂 𑀏𑀓𑀁 𑀓𑀸𑀭𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀨𑀮𑀸𑀦𑀺 𑀑𑀘𑀺𑀦𑀦𑁆𑀢𑁄 𑀑𑀘𑀺𑀦𑀺𑀢𑀨𑀮𑀲𑀸𑀔𑀁 𑀫𑀼𑀜𑁆𑀘𑀺. 𑀢𑀲𑁆𑀲𑀸 𑀯𑀺𑀲𑁆𑀲𑀝𑁆𑀞𑀸𑀬 𑀲𑀤𑁆𑀤𑁂𑀦 𑀢𑀁𑀞𑀸𑀦𑀁 𑀧𑀢𑁆𑀢𑀸 𑀫𑀺𑀕𑀸 𑀧𑀮𑀸𑀬𑀺𑀁𑀲𑀼. 𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 𑀢𑀸𑀧𑀲𑀁 𑀯𑀺𑀲𑀫𑀺𑀲𑁆𑀲𑀺𑀢𑁂𑀦 𑀲𑀮𑁆𑀮𑁂𑀦 𑀯𑀺𑀚𑁆𑀛𑀺. 𑀲𑁄 𑀧𑀭𑀺𑀕𑀮𑀺𑀢𑁆𑀯𑀸 𑀧𑀢𑀦𑁆𑀢𑁄 𑀫𑀢𑁆𑀣𑀓𑁂𑀦 𑀔𑀤𑀺𑀭𑀔𑀸𑀡𑀼𑀓𑀁 𑀆𑀲𑀸𑀤𑁂𑀢𑁆𑀯𑀸 𑀲𑀽𑀮𑀕𑁆𑀕𑁂𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀭𑀸𑀚𑀸 𑀢𑀗𑁆𑀔𑀡𑁂𑀬𑁂𑀯 𑀤𑁆𑀯𑀺𑀥𑀸 𑀪𑀺𑀦𑁆𑀦𑀁 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀢𑀺𑀲𑀽𑀮𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀭𑀻𑀭𑀁 𑀅𑀳𑁄𑀲𑀺. 𑀢𑀢𑁆𑀭 𑀢𑀁 𑀦𑀺𑀭𑀬𑀧𑀸𑀮𑀸 𑀚𑀮𑀺𑀢𑁂𑀳𑀺 𑀆𑀯𑀼𑀥𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀚𑀮𑀺𑀢𑀁 𑀅𑀬𑀧𑀩𑁆𑀩𑀢𑀁 𑀆𑀭𑁄𑀧𑁂𑀦𑁆𑀢𑀺. 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑀓𑀸𑀮𑁂 𑀯𑀸𑀢𑁄 𑀧𑀳𑀭𑀢𑀺, 𑀲𑁄 𑀯𑀸𑀢𑀧𑁆𑀧𑀳𑀸𑀭𑁂𑀦 𑀧𑀭𑀺𑀕𑀮𑀺𑀢𑁆𑀯𑀸 𑀧𑀢𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀳𑁂𑀝𑁆𑀞𑀸 𑀦𑀯𑀬𑁄𑀚𑀦𑀸𑀬 𑀚𑀮𑀺𑀢𑀅𑀬𑀧𑀣𑀯𑀺𑀬𑀸 𑀫𑀳𑀸𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀁 𑀚𑀮𑀺𑀢𑀁 𑀅𑀬𑀲𑀽𑀮𑀁 𑀉𑀝𑁆𑀞𑀳𑀢𑀺. 𑀲𑁄 𑀲𑀽𑀮𑀕𑁆𑀕𑀫𑀢𑁆𑀣𑀓𑁂𑀬𑁂𑀯 𑀆𑀲𑀸𑀤𑁂𑀢𑁆𑀯𑀸 𑀲𑀽𑀮𑀸𑀯𑀼𑀢𑁄 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀧𑀣𑀯𑀻 𑀚𑀮𑀢𑀺, 𑀲𑀽𑀮𑀁 𑀚𑀮𑀢𑀺, 𑀢𑀲𑁆𑀲 𑀲𑀭𑀻𑀭𑀁 𑀚𑀮𑀢𑀺. 𑀲𑁄 𑀢𑀢𑁆𑀣 𑀫𑀳𑀸𑀭𑀯𑀁 𑀭𑀯𑀦𑁆𑀢𑁄 𑀧𑀘𑁆𑀘𑀢𑀺. 𑀫𑀳𑀸𑀲𑀢𑁆𑀢𑁄 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀢𑀁 𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀪𑀻𑀢𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑀭𑀥𑀸𑀧𑁂𑀲𑀺.
𑀔𑀡𑁆𑀟𑀲𑁄𑀢𑀺 𑀘𑀢𑁆𑀢𑀸𑀭𑁄 𑀳𑀢𑁆𑀣𑀧𑀸𑀤𑁂 𑀓𑀡𑁆𑀡𑀦𑀸𑀲𑀜𑁆𑀘 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸. 𑀅𑀤𑀽𑀲𑀓𑀦𑁆𑀢𑀺 𑀦𑀺𑀭𑀧𑀭𑀸𑀥𑀁. 𑀢𑀣𑀸 𑀙𑁂𑀤𑀸𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀓𑀲𑀸𑀳𑀺 𑀧𑀳𑀸𑀭𑀲𑀳𑀲𑁆𑀲𑁂𑀳𑀺 𑀢𑀸𑀴𑀸𑀧𑁂𑀢𑁆𑀯𑀸 𑀚𑀝𑀸𑀲𑀼 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀸𑀧𑁂𑀢𑁆𑀯𑀸 𑀧𑀝𑀺𑀓𑀼𑀚𑁆𑀚𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ¶ 𑀧𑀺𑀝𑁆𑀞𑀺𑀬𑀁 𑀧𑀡𑁆𑀳𑀺𑀬𑀸 𑀧𑀳𑀭𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀁 𑀅𑀓𑀸𑀲𑀺. 𑀓𑀮𑀸𑀩𑀼𑀯𑀻𑀘𑀺𑀦𑁆𑀢𑀺 𑀓𑀮𑀸𑀩𑀼 𑀅𑀯𑀻𑀘𑀺𑀁. 𑀓𑀝𑀼𑀓𑀦𑁆𑀢𑀺 𑀢𑀺𑀔𑀺𑀡𑀯𑁂𑀤𑀦𑀁, 𑀏𑀯𑀭𑀽𑀧𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀙𑀦𑁆𑀦𑀁 𑀚𑀸𑀮𑀸𑀦𑀁 𑀅𑀦𑁆𑀢𑀭𑁂 𑀧𑀘𑁆𑀘𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀓𑀮𑀸𑀩𑀼𑀭𑀜𑁆𑀜𑁄 𑀯𑀢𑁆𑀣𑀼 𑀔𑀦𑁆𑀢𑀺𑀯𑀸𑀤𑀺𑀚𑀸𑀢𑀓𑁂 (𑀚𑀸. 𑁧.𑁪.𑁪𑁯-𑁫𑁨) 𑀓𑀣𑀺𑀢𑀫𑁂𑀯. 𑀅𑀜𑁆𑀜𑀸𑀦𑀺 𑀧𑀸𑀧𑀺𑀝𑁆𑀞𑀢𑀭𑀸𑀦𑀺 𑀘𑁂𑀢𑁆𑀣𑀸𑀢𑀺 𑀏𑀢𑁂𑀳𑀺 𑀦𑀺𑀭𑀬𑁂𑀳𑀺 𑀧𑀸𑀧𑀺𑀝𑁆𑀞𑀢𑀭𑀸𑀦𑀺 𑀘 𑀅𑀜𑁆𑀜𑀸𑀦𑀺 𑀦𑀺𑀭𑀬𑀸𑀦𑀺 𑀲𑀼𑀢𑁆𑀯𑀸. 𑀥𑀫𑁆𑀫𑀁 𑀘𑀭𑁂𑀢𑀺, 𑀲𑀓𑁆𑀓 𑀤𑁂𑀯𑀭𑀸𑀚, 𑀧𑀡𑁆𑀟𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀦 𑀓𑁂𑀯𑀮𑀁 𑀏𑀢𑁂𑀬𑁂𑀯 𑀘𑀢𑁆𑀢𑀸𑀭𑁄 𑀦𑀺𑀭𑀬𑀸, 𑀏𑀢𑁂𑀬𑁂𑀯 𑀘 𑀭𑀸𑀚𑀸𑀦𑁄 𑀦𑁂𑀭𑀬𑀺𑀓𑀸, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀦𑀺𑀭𑀬𑀸, 𑀅𑀜𑁆𑀜𑁂𑀧𑀺 𑀘 𑀭𑀸𑀚𑀸𑀦𑁄 𑀦𑀺𑀭𑀬𑁂𑀲𑀼 𑀉𑀧𑁆𑀧𑀦𑁆𑀦𑀸𑀢𑀺 𑀯𑀺𑀤𑀺𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀤𑀸𑀦𑀥𑀫𑁆𑀫𑀺𑀓𑀸𑀭𑀓𑁆𑀔𑀸𑀯𑀭𑀡𑀲𑀁𑀯𑀺𑀥𑀸𑀦𑀲𑀗𑁆𑀔𑀸𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀥𑀫𑁆𑀫𑀁 𑀘𑀭𑁂𑀬𑁆𑀬𑀸𑀢𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑁂𑀦 𑀘𑀢𑀼𑀦𑁆𑀦𑀁 𑀭𑀸𑀚𑀽𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀤𑀲𑁆𑀲𑀺𑀢𑁂 𑀢𑀬𑁄 𑀭𑀸𑀚𑀸𑀦𑁄 𑀦𑀺𑀓𑁆𑀓𑀗𑁆𑀔𑀸 𑀅𑀳𑁂𑀲𑀼𑀁. 𑀢𑀢𑁄 𑀲𑀓𑁆𑀓𑁄 𑀅𑀯𑀲𑁂𑀲𑁂 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀲𑀼𑀪𑀸𑀲𑀺𑀢𑀁 ¶ 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;
𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀺;
𑀓𑀣𑀁𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀦𑁄 𑀲𑀺𑀭𑀺 𑀦𑁄 𑀚𑀳𑀸𑀢𑀻’’𑀢𑀺.
𑀢𑀢𑁆𑀣 𑀓𑀣𑀁𑀯𑀺𑀥𑀁 𑀦𑁄 𑀲𑀺𑀭𑀺 𑀦𑁄 𑀚𑀳𑀸𑀢𑀻𑀢𑀺 𑀓𑀣𑀁𑀯𑀺𑀥𑀁 𑀦𑀼 𑀧𑀼𑀭𑀺𑀲𑀁 𑀧𑀝𑀺𑀮𑀤𑁆𑀥𑀲𑀺𑀭𑀻 𑀦 𑀚𑀳𑀸𑀢𑀻𑀢𑀺.
𑀅𑀣𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀬𑁄𑀥 𑀲𑀜𑁆𑀜𑀢𑁄, 𑀫𑀦𑀲𑀸 𑀘 𑀓𑀺𑀜𑁆𑀘𑀺 𑀦 𑀓𑀭𑁄𑀢𑀺 𑀧𑀸𑀧𑀁;
𑀦 𑀅𑀢𑁆𑀢𑀳𑁂𑀢𑀽 𑀅𑀮𑀺𑀓𑀁 𑀪𑀡𑁂𑀢𑀺, 𑀢𑀣𑀸𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺.
‘‘𑀕𑀫𑁆𑀪𑀻𑀭𑀧𑀜𑁆𑀳𑀁 ¶ 𑀫𑀦𑀲𑀸𑀪𑀺𑀘𑀺𑀦𑁆𑀢𑀬𑀁, 𑀦𑀸𑀘𑁆𑀘𑀸𑀳𑀺𑀢𑀁 𑀓𑀫𑁆𑀫 𑀓𑀭𑁄𑀢𑀺 𑀮𑀼𑀤𑁆𑀤𑀁;
𑀓𑀸𑀮𑀸𑀕𑀢𑀁 𑀅𑀢𑁆𑀣𑀧𑀤𑀁 𑀦 𑀭𑀺𑀜𑁆𑀘𑀢𑀺, 𑀢𑀣𑀸𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀺.
‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;
𑀤𑀼𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁, 𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀺.
‘‘𑀏𑀢𑁂𑀳𑀺 𑀲𑀩𑁆𑀩𑁂𑀳𑀺 𑀕𑀼𑀡𑁂𑀳𑀼𑀧𑁂𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽;
𑀲𑀗𑁆𑀕𑀸𑀳𑀓𑀁 𑀲𑀔𑀺𑀮𑀁 𑀲𑀡𑁆𑀳𑀯𑀸𑀘𑀁, 𑀢𑀣𑀸𑀯𑀺𑀥𑀁 𑀦𑁄 𑀲𑀺𑀭𑀺 𑀦𑁄 𑀚𑀳𑀸𑀢𑀻’’𑀢𑀺.
𑀢𑀢𑁆𑀣 ¶ ‘‘𑀓𑀸𑀬𑁂𑀦𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀢𑀺𑀯𑀺𑀥𑀲𑀼𑀘𑀭𑀺𑀢𑀤𑁆𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀦 𑀅𑀢𑁆𑀢𑀳𑁂𑀢𑀽𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀯𑁂𑀢𑀁, 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀬𑀲𑀳𑁂𑀢𑀼 𑀯𑀸 𑀥𑀦𑀳𑁂𑀢𑀼 𑀯𑀸 𑀮𑀸𑀪𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀅𑀮𑀺𑀓𑀁 𑀦 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘𑁂𑀲 𑀅𑀢𑁆𑀣𑁄 ‘‘𑀯𑀸𑀘𑀸𑀬 𑀲𑀜𑁆𑀜𑀢𑁄’’𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄, 𑀫𑀼𑀲𑀸𑀯𑀸𑀤𑀺𑀦𑁄 𑀧𑀦 𑀅𑀓𑀢𑁆𑀢𑀩𑁆𑀩𑀁 𑀧𑀸𑀧𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀕𑀭𑀼𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀼𑀦 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀧𑀼𑀕𑁆𑀕𑀮𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺.
𑀕𑀫𑁆𑀪𑀻𑀭𑀧𑀜𑁆𑀳𑀦𑁆𑀢𑀺 𑀅𑀢𑁆𑀣𑀢𑁄 𑀘 𑀧𑀸𑀴𑀺𑀢𑁄 𑀘 𑀕𑀫𑁆𑀪𑀻𑀭𑀁 𑀕𑀼𑀴𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓- (𑀚𑀸. 𑁧.𑁭.𑁪𑁬 𑀆𑀤𑀬𑁄) 𑀲𑀫𑁆𑀪𑀯𑀚𑀸𑀢𑀓- (𑀚𑀸. 𑁧.𑁧𑁬.𑁧𑁩𑁮 𑀆𑀤𑀬𑁄) 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂𑀲𑀼 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀕𑀢𑀲𑀤𑀺𑀲𑀁 𑀧𑀜𑁆𑀳𑀁. 𑀫𑀦𑀲𑀸𑀪𑀺𑀘𑀺𑀦𑁆𑀢𑀬𑀦𑁆𑀢𑀺 𑀫𑀦𑀲𑀸 𑀅𑀪𑀺𑀘𑀺𑀦𑁆𑀢𑁂𑀦𑁆𑀢𑁄 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀘𑀦𑁆𑀤𑀲𑀳𑀲𑁆𑀲𑀁 𑀲𑀽𑀭𑀺𑀬𑀲𑀳𑀲𑁆𑀲𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀧𑀸𑀓𑀝𑀁 𑀓𑀢𑁆𑀯𑀸 𑀬𑁄 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 ¶ 𑀅𑀢𑁆𑀣𑁄. 𑀦𑀸𑀘𑁆𑀘𑀸𑀳𑀺𑀢𑀦𑁆𑀢𑀺 𑀦 𑀅𑀢𑀺𑀅𑀳𑀺𑀢𑀁, 𑀳𑀺𑀢𑀸𑀢𑀺𑀓𑁆𑀓𑀦𑁆𑀢𑀁 𑀮𑀼𑀤𑁆𑀤𑀁 𑀨𑀭𑀼𑀲𑀁 𑀲𑀸𑀳𑀲𑀺𑀓𑀓𑀫𑁆𑀫𑀜𑁆𑀘 𑀬𑁄 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑁋
‘‘𑀦 ¶ 𑀧𑀡𑁆𑀟𑀺𑀢𑀸 𑀅𑀢𑁆𑀢𑀲𑀼𑀔𑀲𑁆𑀲 𑀳𑁂𑀢𑀼, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀲𑀫𑀸𑀘𑀭𑀦𑁆𑀢𑀺;
𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀸 𑀧𑀺𑀴𑀺𑀢𑀸𑀧𑀺 𑀲𑀦𑁆𑀢𑀸, 𑀙𑀦𑁆𑀤𑀸 𑀤𑁄𑀲𑀸 𑀘 𑀦 𑀚𑀳𑀦𑁆𑀢𑀺 𑀥𑀫𑁆𑀫’’𑀦𑁆𑀢𑀺. 𑁋
𑀪𑀽𑀭𑀺𑀧𑀜𑁆𑀳𑁄 𑀓𑀣𑁂𑀢𑀩𑁆𑀩𑁄.
𑀓𑀸𑀮𑀸𑀕𑀢𑀦𑁆𑀢𑀺 𑀏𑀢𑁆𑀣 𑀤𑀸𑀦𑀁 𑀤𑀸𑀢𑀩𑁆𑀩𑀓𑀸𑀮𑁂, 𑀲𑀻𑀮𑀁 𑀭𑀓𑁆𑀔𑀡𑀓𑀸𑀮𑁂, 𑀉𑀧𑁄𑀲𑀣𑀁 𑀉𑀧𑀯𑀸𑀲𑀓𑀸𑀮𑁂, 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀦𑀓𑀸𑀮𑁂, 𑀧𑀩𑁆𑀩𑀚𑀺𑀢𑀓𑀸𑀮𑁂, 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑁂, 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀫𑀺𑀁 𑀬𑀼𑀜𑁆𑀚𑀦𑀓𑀸𑀮𑁂 𑀘𑀸𑀢𑀺 𑀇𑀫𑀸𑀦𑀺 𑀤𑀸𑀦𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑁄 𑀓𑀸𑀮𑀸𑀕𑀢𑀁 𑀅𑀢𑁆𑀣𑀧𑀤𑀁 𑀦 𑀭𑀺𑀜𑁆𑀘𑀢𑀺 𑀦 𑀳𑀸𑀧𑁂𑀢𑀺 𑀦 𑀕𑀴𑀸𑀧𑁂𑀢𑀺 𑀦𑀸𑀫. 𑀢𑀣𑀸𑀯𑀺𑀥𑀦𑁆𑀢𑀺 𑀲𑀓𑁆𑀓 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀘 𑀧𑀜𑁆𑀜𑀯𑀦𑁆𑀢𑀁 𑀓𑀣𑁂𑀦𑁆𑀢𑀸 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀓𑀣𑁂𑀦𑁆𑀢𑀺.
‘‘𑀬𑁄 𑀯𑁂’’𑀢𑀺 𑀕𑀸𑀣𑀸𑀬 𑀧𑀭𑁂𑀦 𑀅𑀢𑁆𑀢𑀦𑁄 𑀓𑀢𑀕𑀼𑀡𑀁 𑀚𑀸𑀦𑀸𑀢𑀻𑀢𑀺 𑀓𑀢𑀜𑁆𑀜𑀽. 𑀏𑀯𑀁 𑀜𑀢𑁆𑀯𑀸 𑀧𑀦 𑀬𑁂𑀦𑀲𑁆𑀲 𑀕𑀼𑀡𑁄 𑀓𑀢𑁄, 𑀢𑀲𑁆𑀲 𑀕𑀼𑀡𑀁 𑀧𑀝𑀺𑀓𑀭𑁄𑀦𑁆𑀢𑁄 𑀓𑀢𑀯𑁂𑀤𑀻 𑀦𑀸𑀫. 𑀤𑀼𑀔𑀺𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀤𑀼𑀓𑁆𑀔𑀧𑁆𑀧𑀢𑁆𑀢𑀲𑁆𑀲 𑀤𑀼𑀓𑁆𑀔𑀁 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑁆𑀯𑀸 𑀬𑁄 𑀢𑀲𑁆𑀲 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀲𑀳𑀢𑁆𑀣𑁂𑀦 𑀲𑀓𑁆𑀓𑀘𑁆𑀘𑀁 𑀓𑀭𑁄𑀢𑀺, 𑀩𑀼𑀤𑁆𑀥𑀸𑀤𑀬𑁄 𑀏𑀯𑀭𑀽𑀧𑀁 𑀲𑀧𑁆𑀧𑀼𑀭𑀺𑀲𑀁 𑀦𑀸𑀫 𑀓𑀣𑁂𑀦𑁆𑀢𑀺. 𑀅𑀧𑀺𑀘 𑀲𑀧𑁆𑀧𑀼𑀭𑀺𑀲𑀸 𑀦𑀸𑀫 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺𑀦𑁄 𑀳𑁄𑀦𑁆𑀢𑀻𑀢𑀺 𑀲𑀢𑀧𑀢𑁆𑀢𑀚𑀸𑀢𑀓- (𑀚𑀸. 𑁧.𑁩.𑁮𑁫-𑁮𑁭) 𑀘𑀽𑀴𑀳𑀁𑀲𑀚𑀸𑀢𑀓- (𑀚𑀸. 𑁧.𑁧𑁫.𑁧𑁩𑁩 𑀆𑀤𑀬𑁄) 𑀫𑀳𑀸𑀳𑀁𑀲𑀚𑀸𑀢𑀓𑀸𑀤𑀻𑀦𑀺 (𑀚𑀸. 𑁨.𑁨𑁧.𑁮𑁯 𑀆𑀤𑀬𑁄) 𑀓𑀣𑁂𑀢𑀩𑁆𑀩𑀸𑀦𑀺. 𑀏𑀢𑁂𑀳𑀺 𑀲𑀩𑁆𑀩𑁂𑀳𑀻𑀢𑀺 𑀲𑀓𑁆𑀓 𑀬𑁄 𑀏𑀢𑁂𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀩𑁆𑀩𑁂𑀳𑀺𑀧𑀺 𑀕𑀼𑀡𑁂𑀳𑀺 𑀉𑀧𑁂𑀢𑁄. 𑀲𑀤𑁆𑀥𑁄𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀼𑀤𑀽𑀢𑀺 𑀧𑀺𑀬𑀪𑀸𑀡𑀻. 𑀲𑀁𑀯𑀺𑀪𑀸𑀕𑀻𑀢𑀺 𑀲𑀻𑀮𑀲𑀁𑀯𑀺𑀪𑀸𑀕𑀤𑀸𑀦𑀲𑀁𑀯𑀺𑀪𑀸𑀕𑀸𑀪𑀺𑀭𑀢𑀢𑁆𑀢𑀸 𑀲𑀁𑀯𑀺𑀪𑀸𑀕𑀻. 𑀬𑀸𑀘𑀓𑀸𑀦𑀁 𑀯𑀘𑀦𑀁 𑀜𑀢𑁆𑀯𑀸 𑀤𑀸𑀦𑀯𑀲𑁂𑀦 𑀯𑀤𑀜𑁆𑀜𑀽. 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀢𑁂𑀲𑀁 𑀢𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁄 𑀲𑀗𑁆𑀕𑀸𑀳𑀓𑀁, 𑀫𑀥𑀼𑀭𑀯𑀘𑀦𑀢𑀸𑀬 𑀲𑀔𑀺𑀮𑀁, 𑀫𑀝𑁆𑀞𑀯𑀘𑀦𑀢𑀸𑀬 𑀲𑀡𑁆𑀳𑀯𑀸𑀘𑀁 𑀢𑀣𑀸𑀯𑀺𑀥𑀁 𑀦𑀼 𑀧𑀼𑀕𑁆𑀕𑀮𑀁 𑀅𑀥𑀺𑀕𑀢𑀬𑀲𑀲𑁄𑀪𑀕𑁆𑀕𑀲𑀗𑁆𑀔𑀸𑀢𑀸 𑀲𑀺𑀭𑀻 𑀦𑁄 𑀚𑀳𑀸𑀢𑀺, 𑀦𑀸𑀲𑁆𑀲 𑀲𑀺𑀭𑀻 𑀯𑀺𑀦𑀲𑁆𑀲𑀢𑀻𑀢𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁄 𑀧𑀭𑀁 𑀲𑁂𑀲𑀧𑀜𑁆𑀳𑀸𑀦𑀁 𑀧𑀼𑀘𑁆𑀙𑀸 𑀘 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀳𑁄𑀢𑀺 𑁋
‘‘𑀲𑀼𑀪𑀸𑀲𑀺𑀢𑀁 ¶ ¶ 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;
𑀲𑀻𑀮𑀁 𑀲𑀺𑀭𑀺𑀜𑁆𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑀁, 𑀧𑀜𑁆𑀜𑀜𑁆𑀘 𑀓𑀁 𑀲𑁂𑀝𑁆𑀞𑀢𑀭𑀁 𑀯𑀤𑀦𑁆𑀢𑀺.
‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;
𑀲𑀻𑀮𑀁 𑀲𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄, 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀺.
‘‘𑀲𑀼𑀪𑀸𑀲𑀺𑀢𑀁 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;
𑀓𑀣𑀁𑀓𑀭𑁄 𑀓𑀺𑀦𑁆𑀢𑀺𑀓𑀭𑁄 𑀓𑀺𑀫𑀸𑀘𑀭𑀁, 𑀓𑀺𑀁 𑀲𑁂𑀯𑀫𑀸𑀦𑁄 𑀮𑀪𑀢𑀻𑀥 𑀧𑀜𑁆𑀜𑀁;
𑀧𑀜𑁆𑀜𑀸𑀬 𑀤𑀸𑀦𑀺𑀧𑁆𑀧𑀝𑀺𑀧𑀤𑀁 𑀯𑀤𑁂𑀳𑀺, 𑀓𑀣𑀁𑀓𑀭𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀫𑀘𑁆𑀘𑁄.
‘‘𑀲𑁂𑀯𑁂𑀣 𑀯𑀼𑀤𑁆𑀥𑁂 𑀦𑀺𑀧𑀼𑀡𑁂 𑀩𑀳𑀼𑀲𑁆𑀲𑀼𑀢𑁂, 𑀉𑀕𑁆𑀕𑀸𑀳𑀓𑁄 𑀘 𑀧𑀭𑀺𑀧𑀼𑀘𑁆𑀙𑀓𑁄 𑀲𑀺𑀬𑀸;
𑀲𑀼𑀡𑁂𑀬𑁆𑀬 𑀲𑀓𑁆𑀓𑀘𑁆𑀘 𑀲𑀼𑀪𑀸𑀲𑀺𑀢𑀸𑀦𑀺, 𑀏𑀯𑀁𑀓𑀭𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀫𑀘𑁆𑀘𑁄.
‘‘𑀲 𑀧𑀜𑁆𑀜𑀯𑀸 𑀓𑀸𑀫𑀕𑀼𑀡𑁂 𑀅𑀯𑁂𑀓𑁆𑀔𑀢𑀺, 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀘;
𑀏𑀯𑀁 𑀯𑀺𑀧𑀲𑁆𑀲𑀻 𑀧𑀚𑀳𑀸𑀢𑀺 𑀙𑀦𑁆𑀤𑀁, 𑀤𑀼𑀓𑁆𑀔𑁂𑀲𑀼 𑀓𑀸𑀫𑁂𑀲𑀼 𑀫𑀳𑀩𑁆𑀪𑀬𑁂𑀲𑀼.
‘‘𑀲 𑀯𑀻𑀢𑀭𑀸𑀕𑁄 𑀧𑀯𑀺𑀦𑁂𑀬𑁆𑀬 𑀤𑁄𑀲𑀁, 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀪𑀸𑀯𑀬𑁂 𑀅𑀧𑁆𑀧𑀫𑀸𑀡𑀁;
𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀦𑀺𑀦𑁆𑀤𑀺𑀢𑁄 𑀩𑁆𑀭𑀳𑁆𑀫𑀫𑀼𑀧𑁂𑀢𑀺 𑀞𑀸𑀦’’𑀦𑁆𑀢𑀺.
𑀢𑀢𑁆𑀣 ¶ 𑀲𑀻𑀮𑀦𑁆𑀢𑀺 𑀆𑀘𑀸𑀭𑀲𑀻𑀮𑀁. 𑀲𑀺𑀭𑀺𑀦𑁆𑀢𑀺 𑀇𑀲𑁆𑀲𑀭𑀺𑀬𑀲𑀺𑀭𑀺𑀁. 𑀲𑀢𑀜𑁆𑀘 𑀥𑀫𑁆𑀫𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀁. 𑀧𑀜𑁆𑀜𑀦𑁆𑀢𑀺 𑀲𑀼𑀧𑀜𑁆𑀜𑀁. 𑀏𑀯𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀓𑀢𑀭𑀁 𑀥𑀫𑁆𑀫𑀁 𑀲𑁂𑀝𑁆𑀞𑀢𑀭𑀁 𑀯𑀤𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀧𑀜𑁆𑀜𑀸 𑀳𑀻𑀢𑀺, 𑀲𑀓𑁆𑀓, 𑀏𑀢𑁂𑀲𑀼 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀬𑀸 𑀏𑀲𑀸 𑀧𑀜𑁆𑀜𑀸 ¶ 𑀦𑀸𑀫, 𑀲𑀸𑀯 𑀲𑁂𑀝𑁆𑀞𑀸, 𑀇𑀢𑀺 𑀩𑀼𑀤𑁆𑀥𑀸𑀤𑀬𑁄 𑀓𑀼𑀲𑀮𑀸 𑀯𑀤𑀦𑁆𑀢𑀺. 𑀬𑀣𑀸 𑀳𑀺 𑀢𑀸𑀭𑀓𑀕𑀡𑀸 𑀘𑀦𑁆𑀤𑀁 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀘𑀦𑁆𑀤𑁄𑀯 𑀢𑁂𑀲𑀁 𑀉𑀢𑁆𑀢𑀫𑁄. 𑀏𑀯𑀁 𑀲𑀻𑀮𑀜𑁆𑀘 𑀲𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄𑀢𑀺 𑀏𑀢𑁂 𑀢𑀬𑁄𑀧𑀺 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀺 𑀧𑀜𑁆𑀜𑀯𑀦𑁆𑀢𑀫𑁂𑀯 𑀅𑀦𑀼𑀕𑀘𑁆𑀙𑀦𑁆𑀢𑀺, 𑀧𑀜𑁆𑀜𑀸𑀬 𑀏𑀯 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.
‘‘𑀓𑀣𑀁𑀓𑀭𑁄’’𑀢𑀺𑀆𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀓𑀣𑀁𑀓𑀭𑁄𑀢𑀺 𑀓𑀺𑀁 𑀦𑀸𑀫 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀆𑀘𑀭𑀦𑁆𑀢𑁄 𑀓𑀺𑀁 𑀲𑁂𑀯𑀫𑀸𑀦𑁄 𑀪𑀚𑀫𑀸𑀦𑁄 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀇𑀥𑀮𑁄𑀓𑁂 𑀧𑀜𑁆𑀜𑀁 𑀮𑀪𑀢𑀺, 𑀧𑀜𑁆𑀜𑀸𑀬𑀫𑁂𑀯 𑀧𑀝𑀺𑀧𑀤𑀁 𑀯𑀤𑁂𑀳𑀺, 𑀚𑀸𑀦𑀺𑀢𑀼𑀓𑀸𑀫𑁄𑀫𑁆𑀳𑀺, 𑀓𑀣𑀁𑀓𑀭𑁄 𑀫𑀘𑁆𑀘𑁄 𑀧𑀜𑁆𑀜𑀯𑀸 𑀦𑀸𑀫 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀯𑀼𑀤𑁆𑀥𑁂𑀢𑀺 𑀧𑀜𑁆𑀜𑀸𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁂 𑀧𑀡𑁆𑀟𑀺𑀢𑁂. 𑀦𑀺𑀧𑀼𑀡𑁂𑀢𑀺 𑀲𑀼𑀔𑀼𑀫𑀓𑀸𑀭𑀡𑀚𑀸𑀦𑀦𑀲𑀫𑀢𑁆𑀣𑁂. 𑀏𑀯𑀁𑀓𑀭𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 ¶ 𑀧𑀼𑀕𑁆𑀕𑀮𑁂 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀸𑀴𑀺𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀅𑀢𑁆𑀣𑀁 𑀧𑀼𑀘𑁆𑀙𑀢𑀺, 𑀧𑀸𑀲𑀸𑀡𑁂 𑀮𑁂𑀔𑀁 𑀔𑀡𑀦𑁆𑀢𑁄 𑀯𑀺𑀬 𑀓𑀜𑁆𑀘𑀦𑀦𑀸𑀴𑀺𑀬𑀸 𑀲𑀻𑀳𑀯𑀲𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀯𑀺𑀬 𑀑𑀳𑀺𑀢𑀲𑁄𑀢𑁄 𑀲𑀓𑁆𑀓𑀘𑁆𑀘𑀁 𑀲𑀼𑀪𑀸𑀲𑀺𑀢𑀸𑀦𑀺 𑀲𑀼𑀡𑀸𑀢𑀺, 𑀅𑀬𑀁 𑀏𑀯𑀁𑀓𑀭𑁄 𑀫𑀘𑁆𑀘𑁄 𑀧𑀜𑁆𑀜𑀯𑀸 𑀳𑁄𑀢𑀻𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀲𑀽𑀭𑀺𑀬𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀧𑀜𑁆𑀜𑀸𑀬 𑀧𑀝𑀺𑀧𑀤𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀕𑀼𑀡𑀁 𑀓𑀣𑁂𑀦𑁆𑀢𑁄 ‘‘𑀲 𑀧𑀜𑁆𑀜𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀕𑀼𑀡𑁂𑀢𑀺 𑀓𑀸𑀫𑀓𑁄𑀝𑁆𑀞𑀸𑀲𑁂 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀢𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀤𑀼𑀓𑁆𑀔𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀤𑀼𑀓𑁆𑀔𑀢𑁄, 𑀅𑀝𑁆𑀞𑀦𑀯𑀼𑀢𑀺𑀬𑀸 𑀭𑁄𑀕𑀫𑀼𑀔𑀸𑀦𑀁 𑀓𑀸𑀫𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑁂𑀦 𑀭𑁄𑀕𑀢𑁄 𑀘 𑀅𑀯𑁂𑀓𑁆𑀔𑀢𑀺 𑀑𑀮𑁄𑀓𑁂𑀢𑀺, 𑀲𑁄 𑀏𑀯𑀁 𑀯𑀺𑀧𑀲𑁆𑀲𑀻 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀓𑀸𑀫𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀢𑀁 𑀧𑀲𑁆𑀲𑀦𑁆𑀢𑁄 ‘‘𑀓𑀸𑀫𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀓𑀸𑀫𑀸𑀦𑀁 𑀧𑀳𑀸𑀦𑀫𑁂𑀯 𑀲𑀼𑀔’’𑀦𑁆𑀢𑀺 𑀯𑀺𑀤𑀺𑀢𑁆𑀯𑀸 𑀤𑀼𑀓𑁆𑀔𑁂𑀲𑀼 𑀓𑀸𑀫𑁂𑀲𑀼 𑀫𑀳𑀩𑁆𑀪𑀬𑁂𑀲𑀼 𑀙𑀦𑁆𑀤𑀁 𑀧𑀚𑀳𑀸𑀢𑀺. 𑀲 𑀯𑀻𑀢𑀭𑀸𑀕𑁄𑀢𑀺, ‘‘𑀲𑀓𑁆𑀓, 𑀲𑁄 𑀧𑀼𑀕𑁆𑀕𑀮𑁄 𑀏𑀯𑀁 𑀯𑀻𑀢𑀭𑀸𑀕𑁄 𑀦𑀯𑀸𑀖𑀸𑀢𑀯𑀢𑁆𑀣𑀼𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀪𑀸𑀯𑀤𑁄𑀲𑀁 𑀯𑀺𑀦𑁂𑀢𑁆𑀯𑀸 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀬𑁆𑀬, 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑀁 𑀢𑀁 𑀪𑀸𑀯𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀅𑀕𑀭𑀳𑀺𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁂 𑀓𑀸𑀫𑀸𑀦𑀁 𑀤𑁄𑀲𑀁 𑀓𑀣𑁂𑀦𑁆𑀢𑁂𑀬𑁂𑀯 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀭𑀸𑀚𑀽𑀦𑀁 𑀲𑀩𑀮𑀓𑀸𑀬𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀭𑀸𑀕𑁄 𑀧𑀳𑀻𑀦𑁄. 𑀢𑀁 𑀜𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑁂𑀲𑀁 𑀧𑀳𑀁𑀲𑀦𑀯𑀲𑁂𑀦 𑀕𑀸𑀣𑀫𑀸𑀳 𑁋
‘‘𑀫𑀳𑀢𑁆𑀣𑀺𑀬𑀁 ¶ 𑀆𑀕𑀫𑀦𑀁 𑀅𑀳𑁄𑀲𑀺, 𑀢𑀯𑀫𑀝𑁆𑀞𑀓𑀸 𑀪𑀻𑀫𑀭𑀣𑀲𑁆𑀲 𑀘𑀸𑀧𑀺;
𑀓𑀸𑀮𑀺𑀗𑁆𑀕𑀭𑀸𑀚𑀲𑁆𑀲 𑀘 𑀉𑀕𑁆𑀕𑀢𑀲𑁆𑀲, 𑀲𑀩𑁆𑀩𑁂𑀲 𑀯𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄’’𑀢𑀺.
𑀢𑀢𑁆𑀣 ¶ 𑀫𑀳𑀢𑁆𑀣𑀺𑀬𑀦𑁆𑀢𑀺 𑀫𑀳𑀢𑁆𑀣𑀁 𑀫𑀳𑀸𑀯𑀺𑀧𑁆𑀨𑀸𑀭𑀁 𑀫𑀳𑀸𑀚𑀼𑀢𑀺𑀓𑀁. 𑀢𑀯𑀫𑀝𑁆𑀞𑀓𑀸𑀢𑀺 𑀢𑀯 𑀅𑀝𑁆𑀞𑀓𑀸. 𑀧𑀳𑀻𑀦𑁄𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑁄.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸𑀦𑁄 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑀸 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀏𑀯𑀫𑁂𑀢𑀁 𑀧𑀭𑀘𑀺𑀢𑁆𑀢𑀯𑁂𑀤𑀺, 𑀲𑀩𑁆𑀩𑁂𑀲 𑀦𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄;
𑀓𑀭𑁄𑀳𑀺 𑀑𑀓𑀸𑀲𑀫𑀦𑀼𑀕𑁆𑀕𑀳𑀸𑀬, 𑀬𑀣𑀸 𑀕𑀢𑀺𑀁 𑀢𑁂 𑀅𑀪𑀺𑀲𑀫𑁆𑀪𑀯𑁂𑀫𑀸’’𑀢𑀺.
𑀢𑀢𑁆𑀣 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀧𑀩𑁆𑀩𑀚𑁆𑀚𑀢𑁆𑀣𑀸𑀬 𑀑𑀓𑀸𑀲𑀁 𑀦𑁄 𑀓𑀭𑁄𑀳𑀺. 𑀬𑀣𑀸 𑀫𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀯 𑀕𑀢𑀺𑀁 𑀦𑀺𑀧𑁆𑀨𑀢𑁆𑀢𑀺𑀁 𑀅𑀪𑀺𑀲𑀫𑁆𑀪𑀯𑁂𑀫 𑀧𑀸𑀧𑀼𑀡𑁂𑀬𑁆𑀬𑀸𑀫, 𑀢𑀬𑀸 𑀧𑀝𑀺𑀯𑀺𑀤𑁆𑀥𑀕𑀼𑀡𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀫𑀸𑀢𑀺 𑀯𑀤𑀺𑀁𑀲𑀼.
𑀅𑀣 ¶ 𑀦𑁂𑀲𑀁 𑀑𑀓𑀸𑀲𑀁 𑀓𑀭𑁄𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀓𑀭𑁄𑀫𑀺 𑀑𑀓𑀸𑀲𑀫𑀦𑀼𑀕𑁆𑀕𑀳𑀸𑀬, 𑀢𑀣𑀸 𑀳𑀺 𑀯𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄;
𑀨𑀭𑀸𑀣 𑀓𑀸𑀬𑀁 𑀯𑀺𑀧𑀼𑀮𑀸𑀬 𑀧𑀻𑀢𑀺𑀬𑀸, 𑀬𑀣𑀸 𑀕𑀢𑀺𑀁 𑀫𑁂 𑀅𑀪𑀺𑀲𑀫𑁆𑀪𑀯𑁂𑀣𑀸’’𑀢𑀺.
𑀢𑀢𑁆𑀣 𑀨𑀭𑀸𑀣 𑀓𑀸𑀬𑀦𑁆𑀢𑀺 𑀛𑀸𑀦𑀧𑀻𑀢𑀺𑀬𑀸 𑀯𑀺𑀧𑀼𑀮𑀸𑀬 𑀓𑀸𑀬𑀁 𑀨𑀭𑀣𑀸𑀢𑀺.
𑀢𑀁 𑀲𑀼𑀢𑁆𑀯𑀸 𑀢𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀸 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀲𑀩𑁆𑀩𑀁 𑀓𑀭𑀺𑀲𑁆𑀲𑀸𑀫 𑀢𑀯𑀸𑀦𑀼𑀲𑀸𑀲𑀦𑀺𑀁, 𑀬𑀁 𑀬𑀁 𑀢𑀼𑀯𑀁 𑀯𑀓𑁆𑀔𑀲𑀺 𑀪𑀽𑀭𑀺𑀧𑀜𑁆𑀜;
𑀨𑀭𑀸𑀫 𑀓𑀸𑀬𑀁 𑀯𑀺𑀧𑀼𑀮𑀸𑀬 𑀧𑀻𑀢𑀺𑀬𑀸, 𑀬𑀣𑀸 𑀕𑀢𑀺𑀁 𑀢𑁂 𑀅𑀪𑀺𑀲𑀫𑁆𑀪𑀯𑁂𑀫𑀸’’𑀢𑀺.
𑀅𑀣 𑀦𑁂𑀲𑀁 𑀲𑀩𑀮𑀓𑀸𑀬𑀸𑀦𑀁 𑀫𑀳𑀸𑀲𑀢𑁆𑀢𑁄 𑀧𑀩𑁆𑀩𑀚𑁆𑀚𑀁 𑀤𑀸𑀧𑁂𑀢𑁆𑀯𑀸 𑀇𑀲𑀺𑀕𑀡𑀁 𑀉𑀬𑁆𑀬𑁄𑀚𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀓𑀢𑀸𑀬 ¶ 𑀯𑀘𑁆𑀙𑀲𑁆𑀲 𑀓𑀺𑀲𑀲𑁆𑀲 𑀧𑀽𑀚𑀸, 𑀕𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;
𑀛𑀸𑀦𑁂 𑀭𑀢𑀸 𑀳𑁄𑀣 𑀲𑀤𑀸 𑀲𑀫𑀸𑀳𑀺𑀢𑀸, 𑀏𑀲𑀸 𑀭𑀢𑀻 𑀧𑀩𑁆𑀩𑀚𑀺𑀢𑀲𑁆𑀲 𑀲𑁂𑀝𑁆𑀞𑀸’’𑀢𑀺.
𑀢𑀢𑁆𑀣 𑀕𑀘𑁆𑀙𑀦𑁆𑀢𑀽𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀼.
𑀇𑀲𑀬𑁄 ¶ 𑀢𑀲𑁆𑀲 𑀲𑀭𑀪𑀗𑁆𑀕𑀲𑀢𑁆𑀣𑀼𑀦𑁄 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀲𑀓𑀸𑀦𑀺 𑀯𑀲𑀦𑀝𑁆𑀞𑀸𑀦𑀸𑀦𑀺 𑀕𑀫𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀉𑀝𑁆𑀞𑀸𑀬𑀸𑀲𑀦𑀸 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀽𑀭𑀺𑀬𑀁 𑀦𑀫𑀲𑁆𑀲𑀦𑁆𑀢𑁄 𑀯𑀺𑀬 𑀫𑀳𑀸𑀲𑀢𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀲𑀧𑀭𑀺𑀲𑁄 𑀧𑀓𑁆𑀓𑀸𑀫𑀺. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀲𑀼𑀢𑁆𑀯𑀸𑀦 𑀕𑀸𑀣𑀸 𑀧𑀭𑀫𑀢𑁆𑀣𑀲𑀁𑀳𑀺𑀢𑀸, 𑀲𑀼𑀪𑀸𑀲𑀺𑀢𑀸 𑀇𑀲𑀺𑀦𑀸 𑀧𑀡𑁆𑀟𑀺𑀢𑁂𑀦;
𑀢𑁂 𑀯𑁂𑀤𑀚𑀸𑀢𑀸 𑀅𑀦𑀼𑀫𑁄𑀤𑀫𑀸𑀦𑀸, 𑀧𑀓𑁆𑀓𑀸𑀫𑀼 𑀤𑁂𑀯𑀸 𑀤𑁂𑀯𑀧𑀼𑀭𑀁 𑀬𑀲𑀲𑁆𑀲𑀺𑀦𑁄.
‘‘𑀕𑀸𑀣𑀸 𑀇𑀫𑀸 𑀅𑀢𑁆𑀣𑀯𑀢𑀻 𑀲𑀼𑀩𑁆𑀬𑀜𑁆𑀚𑀦𑀸, 𑀲𑀼𑀪𑀸𑀲𑀺𑀢𑀸 𑀇𑀲𑀺𑀦𑀸 𑀧𑀡𑁆𑀟𑀺𑀢𑁂𑀦;
𑀬𑁄 𑀓𑁄𑀘𑀺𑀫𑀸 𑀅𑀝𑁆𑀞𑀺𑀓𑀢𑁆𑀯𑀸 𑀲𑀼𑀡𑁂𑀬𑁆𑀬, 𑀮𑀪𑁂𑀣 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁;
𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁, 𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂’’𑀢𑀺.
𑀢𑀢𑁆𑀣 ¶ 𑀧𑀭𑀫𑀢𑁆𑀣𑀲𑀁𑀳𑀺𑀢𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀤𑀻𑀧𑀦𑁂𑀦 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀸. 𑀕𑀸𑀣𑀸 𑀇𑀫𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀭𑀪𑀗𑁆𑀕𑀲𑀢𑁆𑀣𑀼𑀦𑁄 𑀦𑀺𑀩𑁆𑀩𑀸𑀦𑀤𑀸𑀬𑀓𑀁 𑀲𑀼𑀪𑀸𑀲𑀺𑀢𑀁 𑀯𑀡𑁆𑀡𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀅𑀢𑁆𑀣𑀯𑀢𑀻𑀢𑀺 𑀦𑀺𑀩𑁆𑀩𑀸𑀦𑀤𑀸𑀬𑀓𑀝𑁆𑀞𑁂𑀦 𑀧𑀭𑀫𑀢𑁆𑀣𑀦𑀺𑀲𑁆𑀲𑀺𑀢𑀸. 𑀲𑀼𑀩𑁆𑀬𑀜𑁆𑀚𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑀩𑁆𑀬𑀜𑁆𑀚𑀦𑀸. 𑀲𑀼𑀪𑀸𑀲𑀺𑀢𑀸𑀢𑀺 𑀲𑀼𑀓𑀣𑀺𑀢𑀸. 𑀅𑀝𑁆𑀞𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀺𑀓𑀪𑀸𑀯𑀁 𑀓𑀢𑁆𑀯𑀸 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀼𑀡𑁂𑀬𑁆𑀬. 𑀧𑀼𑀩𑁆𑀩𑀸𑀧𑀭𑀺𑀬𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁 𑀧𑀼𑀩𑁆𑀩𑀯𑀺𑀲𑁂𑀲𑁄, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀅𑀧𑀭𑀯𑀺𑀲𑁂𑀲𑁄. 𑀤𑀼𑀢𑀺𑀬𑀚𑁆𑀛𑀸𑀦𑀁 𑀧𑀼𑀩𑁆𑀩𑀯𑀺𑀲𑁂𑀲𑁄, 𑀢𑀢𑀺𑀬𑀚𑁆𑀛𑀸𑀦𑀁 𑀅𑀧𑀭𑀯𑀺𑀲𑁂𑀲𑁄𑀢𑀺 𑀏𑀯𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀢𑀼𑀫𑀕𑁆𑀕𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦 𑀞𑀺𑀢𑀁 𑀯𑀺𑀲𑁂𑀲𑀁. 𑀅𑀤𑀲𑁆𑀲𑀦𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑁂 𑀅𑀧𑀭𑀯𑀺𑀲𑁂𑀲𑀁 ¶ 𑀅𑀭𑀳𑀢𑁆𑀢𑀁 𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑁂𑀬𑁆𑀬. 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀳𑀺 𑀧𑀼𑀕𑁆𑀕𑀮𑁄 𑀫𑀘𑁆𑀘𑀼𑀭𑀸𑀚𑀲𑁆𑀲 𑀅𑀤𑀲𑁆𑀲𑀦𑀁 𑀕𑀢𑁄 𑀦𑀸𑀫 𑀳𑁄𑀢𑀻𑀢𑀺.
𑀏𑀯𑀁 𑀲𑀢𑁆𑀣𑀸 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀴𑀸𑀳𑀦𑁂 𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀻’’𑀢𑀺 𑀯𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀦𑁆𑀢𑁄 𑀆𑀳 𑁋
‘‘𑀲𑀸𑀮𑀺𑀲𑁆𑀲𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑁂𑀡𑁆𑀟𑀺𑀲𑁆𑀲𑀭𑁄 𑀘 𑀓𑀲𑁆𑀲𑀧𑁄;
𑀧𑀩𑁆𑀩𑀢𑁄 𑀅𑀦𑀼𑀭𑀼𑀤𑁆𑀥𑁄 𑀘, 𑀓𑀘𑁆𑀘𑀸𑀬𑀦𑁄 𑀘 𑀤𑁂𑀯𑀮𑁄;
‘‘𑀅𑀦𑀼𑀲𑀺𑀲𑁆𑀲𑁄 𑀘 𑀆𑀦𑀦𑁆𑀤𑁄, 𑀓𑀺𑀲𑀯𑀘𑁆𑀙𑁄 𑀘 𑀓𑁄𑀮𑀺𑀢𑁄;
𑀦𑀸𑀭𑀤𑁄 𑀉𑀤𑀸𑀬𑀺𑀢𑁆𑀣𑁂𑀭𑁄, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸;
𑀲𑀭𑀪𑀗𑁆𑀕𑁄 𑀮𑁄𑀓𑀦𑀸𑀣𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺.
𑀲𑀭𑀪𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.
[𑁫𑁨𑁩] 𑁩. 𑀅𑀮𑀫𑁆𑀩𑀼𑀲𑀸𑀚𑀸𑀢𑀓𑀯𑀡𑁆𑀡𑀦𑀸
𑀅𑀣𑀩𑁆𑀭𑀯𑀻𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑁂 (𑀚𑀸. 𑁧.𑁮.𑁬𑁦 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀏𑀲𑀸 𑀇𑀢𑁆𑀣𑀻 𑀢𑀼𑀬𑁆𑀳𑀁 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀛𑀸𑀦𑀁 𑀦𑀸𑀲𑁂𑀢𑁆𑀯𑀸 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀫𑀽𑀴𑁆𑀳𑁄 𑀯𑀺𑀲𑀜𑁆𑀜𑀻 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀬 𑀲𑀜𑁆𑀜𑀸𑀬 𑀫𑀳𑀸𑀧𑀭𑀺𑀤𑁂𑀯𑀁 𑀧𑀭𑀺𑀤𑁂𑀯𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀲𑀺. 𑀅𑀣𑁂𑀓𑀸 𑀫𑀺𑀕𑀻 𑀢𑀲𑁆𑀲 𑀧𑀲𑁆𑀲𑀸𑀯𑀝𑁆𑀞𑀸𑀦𑁂 𑀲𑀫𑁆𑀪𑀯𑀫𑀺𑀲𑁆𑀲𑀓𑀁 𑀢𑀺𑀡𑀁 𑀔𑀸𑀤𑀺𑀢𑁆𑀯𑀸 𑀉𑀤𑀓𑀁 𑀧𑀺𑀯𑀺. 𑀏𑀢𑁆𑀢𑀓𑁂𑀦𑁂𑀯 𑀘 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀢𑀺𑀡𑀁 𑀔𑀸𑀤𑀺𑀢𑁆𑀯𑀸 𑀅𑀲𑁆𑀲𑀫𑀲𑁆𑀲 𑀲𑀸𑀫𑀦𑁆𑀢𑁂𑀬𑁂𑀯 𑀯𑀺𑀘𑀭𑀢𑀺 ¶ . 𑀫𑀳𑀸𑀲𑀢𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀅𑀜𑁆𑀜𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀫𑀦𑀼𑀲𑁆𑀲𑀤𑀸𑀭𑀓𑀁 𑀯𑀺𑀚𑀸𑀬𑀺. 𑀫𑀳𑀸𑀲𑀢𑁆𑀢𑁄 𑀢𑀁 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑀝𑀺𑀚𑀕𑁆𑀕𑀺, ‘‘𑀇𑀲𑀺𑀲𑀺𑀗𑁆𑀕𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀯𑀺𑀜𑁆𑀜𑀼𑀢𑀧𑁆𑀧𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀳𑀮𑁆𑀮𑀓𑀓𑀸𑀮𑁂 𑀢𑀁 𑀆𑀤𑀸𑀬 𑀦𑀸𑀭𑀺𑀯𑀦𑀁 𑀦𑀸𑀫 𑀕𑀦𑁆𑀢𑁆𑀯𑀸, ‘‘𑀢𑀸𑀢, 𑀇𑀫𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑁂 𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀤𑀺𑀲𑀸 𑀇𑀢𑁆𑀣𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺, 𑀢𑀸 𑀅𑀢𑁆𑀢𑀦𑁄 𑀯𑀲𑀁 𑀕𑀢𑁂 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺, 𑀦 𑀢𑀸𑀲𑀁 𑀯𑀲𑀁 𑀦𑀸𑀫 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.
𑀇𑀲𑀺𑀲𑀺𑀗𑁆𑀕𑁄𑀧𑀺 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺, 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀅𑀬𑀁 𑀫𑀁 𑀲𑀓𑁆𑀓𑀢𑁆𑀢𑀸 𑀘𑀸𑀯𑁂𑀬𑁆𑀬, 𑀏𑀓𑀁 𑀅𑀘𑁆𑀙𑀭𑀁 𑀧𑁂𑀲𑁂𑀢𑁆𑀯𑀸 𑀲𑀻𑀮𑀫𑀲𑁆𑀲 𑀪𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀓𑀮𑀤𑁂𑀯𑀮𑁄𑀓𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀅𑀢𑁆𑀢𑀦𑁄 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀲𑀗𑁆𑀔𑀸𑀦𑀁 𑀧𑀭𑀺𑀘𑀸𑀭𑀺𑀓𑀸𑀦𑀁 𑀫𑀚𑁆𑀛𑁂 𑀏𑀓𑀁 𑀅𑀮𑀫𑁆𑀩𑀼𑀲𑀁 𑀦𑀸𑀫 𑀅𑀘𑁆𑀙𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀢𑀲𑁆𑀲 𑀲𑀻𑀮𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀻𑀮𑀪𑁂𑀤𑀁 𑀓𑀸𑀢𑀼𑀁 𑀆𑀡𑀸𑀧𑁂𑀲𑀺. 𑀢𑀫𑀢𑁆𑀣𑀁 ¶ 𑀆𑀯𑀺𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀅𑀣𑀩𑁆𑀭𑀯𑀺 𑀩𑁆𑀭𑀳𑀸 𑀇𑀦𑁆𑀤𑁄, 𑀯𑀢𑁆𑀭𑀪𑀽 𑀚𑀬𑀢𑀁 𑀧𑀺𑀢𑀸;
𑀤𑁂𑀯𑀓𑀜𑁆𑀜𑀁 𑀧𑀭𑀸𑀪𑁂𑀢𑁆𑀯𑀸, 𑀲𑀼𑀥𑀫𑁆𑀫𑀸𑀬𑀁 𑀅𑀮𑀫𑁆𑀩𑀼𑀲’’𑀦𑁆𑀢𑀺.
𑀢𑀢𑁆𑀣 𑀩𑁆𑀭𑀳𑀸𑀢𑀺 𑀫𑀳𑀸. 𑀯𑀢𑁆𑀭𑀪𑀽𑀢𑀺 𑀯𑀢𑁆𑀭𑀲𑁆𑀲 𑀦𑀸𑀫 𑀅𑀲𑀼𑀭𑀲𑁆𑀲 𑀅𑀪𑀺𑀪𑀯𑀺𑀢𑀸. 𑀚𑀬𑀢𑀁 𑀧𑀺𑀢𑀸𑀢𑀺 𑀚𑀬𑀦𑁆𑀢𑀸𑀦𑀁 𑀚𑀬𑀧𑁆𑀧𑀢𑁆𑀢𑀸𑀦𑀁 𑀲𑁂𑀲𑀸𑀦𑀁 𑀢𑁂𑀢𑁆𑀢𑀺𑀁𑀲𑀸𑀬 𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀺𑀢𑀼𑀓𑀺𑀘𑁆𑀘𑀲𑀸𑀥𑀦𑁂𑀦 𑀧𑀺𑀢𑀸. 𑀧𑀭𑀸𑀪𑁂𑀢𑁆𑀯𑀸𑀢𑀺 𑀳𑀤𑀬𑀁 𑀪𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀯𑀺𑀬 𑀢𑀁 ‘‘𑀧𑀝𑀺𑀩𑀮𑀸 𑀅𑀬’’𑀦𑁆𑀢𑀺 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀥𑀫𑁆𑀫𑀸𑀬𑀦𑁆𑀢𑀺 𑀲𑀼𑀥𑀫𑁆𑀫𑀸𑀬𑀁 𑀤𑁂𑀯𑀲𑀪𑀸𑀬𑀁.
𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀁 𑀅𑀮𑀫𑁆𑀩𑀼𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀇𑀤𑀫𑀸𑀳 𑁋
‘‘𑀫𑀺𑀲𑁆𑀲𑁂 ¶ 𑀤𑁂𑀯𑀸 𑀢𑀁 𑀬𑀸𑀘𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀇𑀦𑁆𑀤𑀓𑀸;
𑀇𑀲𑀺𑀧𑁆𑀧𑀮𑁄𑀪𑀦𑁂 𑀕𑀘𑁆𑀙, 𑀇𑀲𑀺𑀲𑀺𑀗𑁆𑀕𑀁 𑀅𑀮𑀫𑁆𑀩𑀼𑀲𑁂’’𑀢𑀺.
𑀢𑀢𑁆𑀣 ¶ 𑀫𑀺𑀲𑁆𑀲𑁂𑀢𑀺 𑀢𑀁 𑀆𑀮𑀧𑀢𑀺, 𑀇𑀤𑀜𑁆𑀘 𑀢𑀲𑁆𑀲𑀸 𑀦𑀸𑀫𑀁, 𑀲𑀩𑁆𑀩𑀸 𑀧𑀦𑀺𑀢𑁆𑀣𑀺𑀬𑁄 𑀧𑀼𑀭𑀺𑀲𑁂 𑀓𑀺𑀮𑁂𑀲𑀫𑀺𑀲𑁆𑀲𑀦𑁂𑀦 𑀫𑀺𑀲𑁆𑀲𑀦𑀢𑁄 ‘‘𑀫𑀺𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀦 𑀲𑀸𑀥𑀸𑀭𑀡𑁂𑀦 𑀕𑀼𑀡𑀦𑀸𑀫𑁂𑀦𑀸𑀮𑀧𑀦𑁆𑀢𑁄 𑀏𑀯𑀫𑀸𑀳. 𑀇𑀲𑀺𑀧𑁆𑀧𑀮𑁄𑀪𑀦𑁂𑀢𑀺 𑀇𑀲𑀻𑀦𑀁 𑀧𑀮𑁄𑀪𑀦𑀲𑀫𑀢𑁆𑀣𑁂. 𑀇𑀲𑀺𑀲𑀺𑀗𑁆𑀕𑀦𑁆𑀢𑀺 𑀢𑀲𑁆𑀲 𑀓𑀺𑀭 𑀫𑀢𑁆𑀣𑀓𑁂 𑀫𑀺𑀕𑀲𑀺𑀗𑁆𑀕𑀸𑀓𑀸𑀭𑁂𑀦 𑀤𑁆𑀯𑁂 𑀘𑀽𑀴𑀸 𑀉𑀝𑁆𑀞𑀳𑀺𑀁𑀲𑀼, 𑀢𑀲𑁆𑀫𑀸 𑀏𑀯𑀁 𑀯𑀼𑀘𑁆𑀘𑀢𑀺.
𑀇𑀢𑀺 𑀲𑀓𑁆𑀓𑁄 ‘‘𑀕𑀘𑁆𑀙 𑀇𑀲𑀺𑀲𑀺𑀗𑁆𑀕𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀁 𑀆𑀦𑁂𑀢𑁆𑀯𑀸 𑀲𑀻𑀮𑀫𑀲𑁆𑀲 𑀪𑀺𑀦𑁆𑀤𑀸’’𑀢𑀺 𑀅𑀮𑀫𑁆𑀩𑀼𑀲𑀁 𑀆𑀡𑀸𑀧𑁂𑀲𑀺.
‘‘𑀧𑀼𑀭𑀸𑀬𑀁 𑀅𑀫𑁆𑀳𑁂 𑀅𑀘𑁆𑀘𑁂𑀢𑀺, 𑀯𑀢𑁆𑀢𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸;
𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀯𑀼𑀤𑁆𑀥𑁄, 𑀢𑀲𑁆𑀲 𑀫𑀕𑁆𑀕𑀸𑀦𑀺 𑀆𑀯𑀭𑀸’’𑀢𑀺. 𑁋 𑀯𑀘𑀦𑀁 𑀆𑀳;
𑀢𑀢𑁆𑀣 𑀧𑀼𑀭𑀸𑀬𑀦𑁆𑀢𑀺 𑀅𑀬𑀁 𑀢𑀸𑀧𑀲𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸 𑀘, 𑀲𑁄 𑀧𑀦𑁂𑀲 𑀤𑀻𑀖𑀸𑀬𑀼𑀓𑀢𑀸𑀬 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂 𑀫𑀕𑁆𑀕𑁂 𑀅𑀪𑀺𑀭𑀢𑁄 𑀕𑀼𑀡𑀯𑀼𑀤𑁆𑀥𑀺𑀬𑀸 𑀘 𑀯𑀼𑀤𑁆𑀥𑁄. 𑀢𑀲𑁆𑀫𑀸 𑀬𑀸𑀯 𑀏𑀲 𑀅𑀫𑁆𑀳𑁂 𑀦𑀸𑀢𑀺𑀓𑁆𑀓𑀫𑀢𑀺, 𑀦 𑀅𑀪𑀺𑀪𑀯𑀺𑀢𑁆𑀯𑀸 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀺, 𑀢𑀸𑀯𑀤𑁂𑀯 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀤𑁂𑀯𑀮𑁄𑀓𑀕𑀫𑀦𑀸𑀦𑀺 𑀫𑀕𑁆𑀕𑀸𑀦𑀺 𑀆𑀯𑀭, 𑀬𑀣𑀸 𑀇𑀥 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀅𑀮𑀫𑁆𑀩𑀼𑀲𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀤𑁂𑀯𑀭𑀸𑀚 𑀓𑀺𑀫𑁂𑀯 𑀢𑁆𑀯𑀁, 𑀫𑀫𑁂𑀯 𑀢𑀼𑀯𑀁 𑀲𑀺𑀓𑁆𑀔𑀲𑀺;
𑀇𑀲𑀺𑀧𑁆𑀧𑀮𑁄𑀪𑀦𑁂 𑀕𑀘𑁆𑀙, 𑀲𑀦𑁆𑀢𑀺 𑀅𑀜𑁆𑀜𑀸𑀧𑀺 𑀅𑀘𑁆𑀙𑀭𑀸.
‘‘𑀫𑀸𑀤𑀺𑀲𑀺𑀬𑁄 𑀧𑀯𑀭𑀸 𑀘𑁂𑀯, 𑀅𑀲𑁄𑀓𑁂 𑀦𑀦𑁆𑀤𑀦𑁂 𑀯𑀦𑁂;
𑀢𑀸𑀲𑀫𑁆𑀧𑀺 𑀳𑁄𑀢𑀼 𑀧𑀭𑀺𑀬𑀸𑀬𑁄, 𑀢𑀸𑀧𑀺 𑀬𑀦𑁆𑀢𑀼 𑀧𑀮𑁄𑀪𑀦𑀸’’𑀢𑀺.
𑀢𑀢𑁆𑀣 ¶ 𑀓𑀺𑀫𑁂𑀯 𑀢𑁆𑀯𑀦𑁆𑀢𑀺 𑀓𑀺𑀁 𑀦𑀸𑀫𑁂𑀢𑀁 𑀢𑁆𑀯𑀁 𑀓𑀭𑁄𑀲𑀻𑀢𑀺 𑀤𑀻𑀧𑁂𑀢𑀺. 𑀫𑀫𑁂𑀯 𑀢𑀼𑀯𑀁 𑀲𑀺𑀓𑁆𑀔𑀲𑀻𑀢𑀺 𑀇𑀫𑀲𑁆𑀫𑀺𑀁 𑀲𑀓𑀮𑀤𑁂𑀯𑀮𑁄𑀓𑁂 𑀫𑀫𑁂𑀯 𑀢𑀼𑀯𑀁 𑀇𑀓𑁆𑀔𑀲𑀺, 𑀅𑀜𑁆𑀜𑀁 𑀦 𑀧𑀲𑁆𑀲𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀲-𑀓𑀸𑀭𑁄 𑀧𑀦𑁂𑀢𑁆𑀣 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀓𑀭𑁄. 𑀇𑀲𑀺𑀧𑁆𑀧𑀮𑁄𑀪𑀦𑁂 𑀕𑀘𑁆𑀙𑀸𑀢𑀺 𑀓𑀺𑀁𑀓𑀸𑀭𑀡𑀸 𑀫𑀜𑁆𑀜𑁂𑀯 𑀏𑀯𑀁 𑀯𑀤𑁂𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀧𑀯𑀭𑀸 𑀘𑁂𑀯𑀸𑀢𑀺 𑀫𑀬𑀸 𑀉𑀢𑁆𑀢𑀭𑀺𑀢𑀭𑀸 𑀘𑁂𑀯. 𑀅𑀲𑁄𑀓𑁂𑀢𑀺 𑀲𑁄𑀓𑀭𑀳𑀺𑀢𑁂. 𑀦𑀦𑁆𑀤𑀦𑁂𑀢𑀺 𑀦𑀦𑁆𑀤𑀺𑀚𑀦𑀓𑁂. 𑀧𑀭𑀺𑀬𑀸𑀬𑁄𑀢𑀺 𑀕𑀫𑀦𑀯𑀸𑀭𑁄.
𑀢𑀢𑁄 ¶ 𑀲𑀓𑁆𑀓𑁄 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀅𑀤𑁆𑀥𑀸 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀲𑀦𑁆𑀢𑀺 𑀅𑀜𑁆𑀜𑀸𑀧𑀺 𑀅𑀘𑁆𑀙𑀭𑀸;
𑀢𑀸𑀤𑀺𑀲𑀺𑀬𑁄 𑀧𑀯𑀭𑀸 𑀘𑁂𑀯, 𑀅𑀲𑁄𑀓𑁂 𑀦𑀦𑁆𑀤𑀦𑁂 𑀯𑀦𑁂.
‘‘𑀦 𑀢𑀸 𑀏𑀯𑀁 𑀧𑀚𑀸𑀦𑀦𑁆𑀢𑀺, 𑀧𑀸𑀭𑀺𑀘𑀭𑀺𑀬𑀁 𑀧𑀼𑀫𑀁 𑀕𑀢𑀸;
𑀬𑀸𑀤𑀺𑀲𑀁 𑀢𑁆𑀯𑀁 𑀧𑀚𑀸𑀦𑀸𑀲𑀺, 𑀦𑀸𑀭𑀺 𑀲𑀩𑁆𑀩𑀗𑁆𑀕𑀲𑁄𑀪𑀦𑁂.
‘‘𑀢𑁆𑀯𑀫𑁂𑀯 𑀕𑀘𑁆𑀙 𑀓𑀮𑁆𑀬𑀸𑀡𑀺, 𑀇𑀢𑁆𑀣𑀻𑀦𑀁 𑀧𑀯𑀭𑀸 𑀘𑀲𑀺;
𑀢𑀯𑁂𑀯 𑀯𑀡𑁆𑀡𑀭𑀽𑀧𑁂𑀦, 𑀲𑀯𑀲𑀫𑀸𑀦𑀬𑀺𑀲𑁆𑀲𑀲𑀻’’𑀢𑀺.
𑀢𑀢𑁆𑀣 𑀧𑀼𑀫𑀁 𑀕𑀢𑀸𑀢𑀺 𑀧𑀼𑀭𑀺𑀲𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀲𑀫𑀸𑀦𑀸 𑀧𑀼𑀭𑀺𑀲𑀧𑀮𑁄𑀪𑀺𑀦𑀺𑀧𑀸𑀭𑀺𑀘𑀭𑀺𑀬𑀁 𑀦 𑀚𑀸𑀦𑀦𑁆𑀢𑀺. 𑀯𑀡𑁆𑀡𑀭𑀽𑀧𑁂𑀦𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀘𑁂𑀯 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘. 𑀲𑀯𑀲𑀫𑀸𑀦𑀬𑀺𑀲𑁆𑀲𑀲𑀻𑀢𑀺 𑀢𑀁 𑀢𑀸𑀧𑀲𑀁 𑀅𑀢𑁆𑀢𑀦𑁄 𑀯𑀲𑀁 𑀆𑀦𑁂𑀲𑁆𑀲𑀲𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀅𑀮𑀫𑁆𑀩𑀼𑀲𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀦 𑀯𑀸𑀳𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀤𑁂𑀯𑀭𑀸𑀚𑁂𑀦 𑀧𑁂𑀲𑀺𑀢𑀸;
𑀯𑀺𑀪𑁂𑀫𑀺 𑀘𑁂𑀢𑀁 𑀆𑀲𑀸𑀤𑀼𑀁, 𑀉𑀕𑁆𑀕𑀢𑁂𑀚𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄.
‘‘𑀅𑀦𑁂𑀓𑁂 𑀦𑀺𑀭𑀬𑀁 𑀧𑀢𑁆𑀢𑀸, 𑀇𑀲𑀺𑀫𑀸𑀲𑀸𑀤𑀺𑀬𑀸 𑀚𑀦𑀸;
𑀆𑀧𑀦𑁆𑀦𑀸 𑀫𑁄𑀳𑀲𑀁𑀲𑀸𑀭𑀁, 𑀢𑀲𑁆𑀫𑀸 𑀮𑁄𑀫𑀸𑀦𑀺 𑀳𑀁𑀲𑀬𑁂’’𑀢𑀺.
𑀢𑀢𑁆𑀣 𑀦 𑀯𑀸𑀳𑀦𑁆𑀢𑀺 𑀦 𑀯𑁂 𑀅𑀳𑀁. 𑀯𑀺𑀪𑁂𑀫𑀻𑀢𑀺 𑀪𑀸𑀬𑀸𑀫𑀺. 𑀆𑀲𑀸𑀤𑀼𑀦𑁆𑀢𑀺 𑀆𑀲𑀸𑀤𑀺𑀢𑀼𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑀸𑀳𑀁, 𑀤𑁂𑀯, 𑀢𑀬𑀸 𑀧𑁂𑀲𑀺𑀢𑀸 𑀦 𑀕𑀫𑀺𑀲𑁆𑀲𑀸𑀫𑀺, 𑀅𑀧𑀺𑀘𑀸𑀳𑀁 𑀢𑀁 𑀇𑀲𑀺𑀁 𑀲𑀻𑀮𑀪𑁂𑀤𑀦𑀢𑁆𑀣𑀸𑀬 𑀅𑀮𑁆𑀮𑀻𑀬𑀺𑀢𑀼𑀁 𑀪𑀸𑀬𑀸𑀫𑀺, 𑀉𑀕𑁆𑀕𑀢𑁂𑀚𑁄 𑀳𑀺 𑀲𑁄𑀢𑀺. 𑀆𑀲𑀸𑀤𑀺𑀬𑀸𑀢𑀺 𑀆𑀲𑀸𑀤𑁂𑀢𑁆𑀯𑀸. 𑀫𑁄𑀳𑀲𑀁𑀲𑀸𑀭𑀦𑁆𑀢𑀺 𑀫𑁄𑀳𑁂𑀦 𑀲𑀁𑀲𑀸𑀭𑀁, 𑀫𑁄𑀳𑁂𑀦 𑀇𑀲𑀺𑀁 𑀧𑀮𑁄𑀪𑁂𑀢𑁆𑀯𑀸 𑀲𑀁𑀲𑀸𑀭𑀁 𑀆𑀧𑀦𑁆𑀦𑀸 𑀯𑀝𑁆𑀝𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀸 𑀲𑀢𑁆𑀢𑀸 𑀕𑀡𑀦𑀧𑀣𑀁 𑀅𑀢𑀺𑀓𑁆𑀓𑀦𑁆𑀢𑀸 ¶ . 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀮𑁄𑀫𑀸𑀦𑀺 𑀳𑀁𑀲𑀬𑁂𑀢𑀺 𑀅𑀳𑀁 𑀮𑁄𑀫𑀸𑀦𑀺 𑀉𑀝𑁆𑀞𑀧𑁂𑀫𑀺, ‘‘𑀢𑀲𑁆𑀲 𑀓𑀺𑀭𑀸𑀳𑀁 𑀲𑀻𑀮𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸𑀬 𑀫𑁂 𑀮𑁄𑀫𑀸𑀦𑀺 𑀧𑀳𑀁𑀲𑀦𑁆𑀢𑀻𑀢𑀺 𑀯𑀤𑀢𑀺.
‘‘𑀇𑀤𑀁 𑀯𑀢𑁆𑀯𑀸𑀦 𑀧𑀓𑁆𑀓𑀸𑀫𑀺, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻;
𑀫𑀺𑀲𑁆𑀲𑀸 𑀫𑀺𑀲𑁆𑀲𑀺𑀢𑀼𑀫𑀺𑀘𑁆𑀙𑀦𑁆𑀢𑀻, 𑀇𑀲𑀺𑀲𑀺𑀗𑁆𑀕𑀁 𑀅𑀮𑀫𑁆𑀩𑀼𑀲𑀸.
‘‘𑀲𑀸 ¶ ¶ 𑀘 𑀢𑀁 𑀯𑀦𑀫𑁄𑀕𑀬𑁆𑀳, 𑀇𑀲𑀺𑀲𑀺𑀗𑁆𑀕𑁂𑀦 𑀭𑀓𑁆𑀔𑀺𑀢𑀁;
𑀩𑀺𑀫𑁆𑀩𑀺𑀚𑀸𑀮𑀓𑀲𑀜𑁆𑀙𑀦𑁆𑀦𑀁, 𑀲𑀫𑀦𑁆𑀢𑀸 𑀅𑀤𑁆𑀥𑀬𑁄𑀚𑀦𑀁.
‘‘𑀧𑀸𑀢𑁄𑀯 𑀧𑀸𑀢𑀭𑀸𑀲𑀫𑁆𑀳𑀺, 𑀉𑀤𑀡𑁆𑀳𑀲𑀫𑀬𑀁 𑀧𑀢𑀺;
𑀅𑀕𑁆𑀕𑀺𑀝𑁆𑀞𑀁 𑀧𑀭𑀺𑀫𑀚𑁆𑀚𑀦𑁆𑀢𑀁, 𑀇𑀲𑀺𑀲𑀺𑀗𑁆𑀕𑀁 𑀉𑀧𑀸𑀕𑀫𑀻’’𑀢𑀺. 𑁋 𑀇𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸;
𑀢𑀢𑁆𑀣 𑀧𑀓𑁆𑀓𑀸𑀫𑀻𑀢𑀺 𑀢𑁂𑀦 𑀳𑀺, 𑀤𑁂𑀯𑀭𑀸𑀚, 𑀆𑀯𑀚𑁆𑀚𑁂𑀬𑁆𑀬𑀸𑀲𑀺 𑀫𑀦𑁆𑀢𑀺 𑀅𑀢𑁆𑀢𑀦𑁄 𑀲𑀬𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀇𑀲𑀺𑀲𑀺𑀗𑁆𑀕𑀁 𑀓𑀺𑀮𑁂𑀲𑁂𑀦 𑀫𑀺𑀲𑁆𑀲𑀺𑀢𑀼𑀁 𑀇𑀘𑁆𑀙𑀦𑁆𑀢𑀻 𑀧𑀓𑁆𑀓𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸 𑀅𑀘𑁆𑀙𑀭𑀸 𑀢𑀲𑁆𑀲 𑀅𑀲𑁆𑀲𑀫𑀁 𑀕𑀢𑀸𑀢𑀺. 𑀩𑀺𑀫𑁆𑀩𑀺𑀚𑀸𑀮𑀓𑀲𑀜𑁆𑀙𑀦𑁆𑀦𑀦𑁆𑀢𑀺 𑀭𑀢𑁆𑀢𑀗𑁆𑀓𑀼𑀭𑀯𑀦𑁂𑀦 𑀲𑀜𑁆𑀙𑀦𑁆𑀦𑀁. 𑀧𑀸𑀢𑁄𑀯 𑀧𑀸𑀢𑀭𑀸𑀲𑀫𑁆𑀳𑀻𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀢𑀭𑀸𑀲𑀯𑁂𑀮𑀸𑀬 𑀧𑀸𑀢𑁄𑀯 𑀧𑀕𑁂𑀬𑁂𑀯 𑀅𑀢𑀺𑀧𑀕𑁂𑀯. 𑀉𑀤𑀡𑁆𑀳𑀲𑀫𑀬𑀁 𑀧𑀢𑀻𑀢𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀫𑁂𑀯. 𑀅𑀕𑁆𑀕𑀺𑀝𑁆𑀞𑀦𑁆𑀢𑀺 𑀅𑀕𑁆𑀕𑀺𑀲𑀸𑀮𑀁. 𑀭𑀢𑁆𑀢𑀺𑀁 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀧𑀸𑀢𑁄𑀯 𑀦𑁆𑀳𑀢𑁆𑀯𑀸 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀣𑁄𑀓𑀁 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑁆𑀕𑀺𑀲𑀸𑀮𑀁 𑀲𑀫𑁆𑀫𑀚𑁆𑀚𑀦𑁆𑀢𑀁 𑀢𑀁 𑀇𑀲𑀺𑀲𑀺𑀗𑁆𑀕𑀁 𑀲𑀸 𑀉𑀧𑀸𑀕𑀫𑀺, 𑀇𑀢𑁆𑀣𑀺𑀯𑀺𑀮𑀸𑀲𑀁 𑀤𑀲𑁆𑀲𑁂𑀦𑁆𑀢𑀻 𑀢𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺.
𑀅𑀣 𑀦𑀁 𑀢𑀸𑀧𑀲𑁄 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋
‘‘𑀓𑀸 𑀦𑀼 𑀯𑀺𑀚𑁆𑀚𑀼𑀭𑀺𑀯𑀸𑀪𑀸𑀲𑀺, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸;
𑀯𑀺𑀘𑀺𑀢𑁆𑀢𑀳𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸.
‘‘𑀆𑀤𑀺𑀘𑁆𑀘𑀯𑀡𑁆𑀡𑀲𑀗𑁆𑀓𑀸𑀲𑀸, 𑀳𑁂𑀫𑀘𑀦𑁆𑀤𑀦𑀕𑀦𑁆𑀥𑀺𑀦𑀻;
𑀲𑀜𑁆𑀜𑀢𑀽𑀭𑀽 𑀫𑀳𑀸𑀫𑀸𑀬𑀸, 𑀓𑀼𑀫𑀸𑀭𑀻 𑀘𑀸𑀭𑀼𑀤𑀲𑁆𑀲𑀦𑀸.
‘‘𑀯𑀺𑀮𑀕𑁆𑀕𑀸 𑀫𑀼𑀤𑀼𑀓𑀸 𑀲𑀼𑀤𑁆𑀥𑀸, 𑀧𑀸𑀤𑀸 𑀢𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;
𑀕𑀫𑀦𑀸 𑀓𑀸𑀫𑀦𑀻𑀬𑀸 𑀢𑁂, 𑀳𑀭𑀦𑁆𑀢𑀺𑀬𑁂𑀯 𑀫𑁂 𑀫𑀦𑁄.
‘‘𑀅𑀦𑀼𑀧𑀼𑀩𑁆𑀩𑀸 ¶ 𑀘 𑀢𑁂 𑀊𑀭𑀽, 𑀦𑀸𑀕𑀦𑀸𑀲𑀲𑀫𑀽𑀧𑀫𑀸;
𑀯𑀺𑀫𑀝𑁆𑀞𑀸 𑀢𑀼𑀬𑁆𑀳𑀁 𑀲𑀼𑀲𑁆𑀲𑁄𑀡𑀻, 𑀅𑀓𑁆𑀔𑀲𑁆𑀲 𑀨𑀮𑀓𑀁 𑀬𑀣𑀸.
‘‘𑀉𑀧𑁆𑀧𑀮𑀲𑁆𑀲𑁂𑀯 𑀓𑀺𑀜𑁆𑀚𑀓𑁆𑀔𑀸, 𑀦𑀸𑀪𑀺 𑀢𑁂 𑀲𑀸𑀥𑀼𑀲𑀡𑁆𑀞𑀺𑀢𑀸;
𑀧𑀼𑀭𑀸 𑀓𑀡𑁆𑀳𑀜𑁆𑀚𑀦𑀲𑁆𑀲𑁂𑀯, 𑀤𑀽𑀭𑀢𑁄 𑀧𑀢𑀺𑀤𑀺𑀲𑁆𑀲𑀢𑀺.
‘‘𑀤𑀼𑀯𑀺𑀥𑀸 ¶ 𑀚𑀸𑀢𑀸 𑀉𑀭𑀚𑀸, 𑀅𑀯𑀡𑁆𑀝𑀸 𑀲𑀸𑀥𑀼𑀧𑀘𑁆𑀘𑀼𑀤𑀸;
𑀧𑀬𑁄𑀥𑀭𑀸 𑀅𑀧𑀢𑀺𑀢𑀸, 𑀅𑀟𑁆𑀠𑀮𑀸𑀩𑀼𑀲𑀫𑀸 𑀣𑀦𑀸.
‘‘𑀤𑀻𑀖𑀸 𑀓𑀫𑁆𑀩𑀼𑀢𑀮𑀸𑀪𑀸𑀲𑀸, 𑀕𑀻𑀯𑀸 𑀏𑀡𑁂𑀬𑁆𑀬𑀓𑀸 𑀬𑀣𑀸;
𑀧𑀡𑁆𑀟𑀭𑀸𑀯𑀭𑀡𑀸 𑀯𑀕𑁆𑀕𑀼, 𑀘𑀢𑀼𑀢𑁆𑀣𑀫𑀦𑀲𑀦𑁆𑀦𑀺𑀪𑀸.
‘‘𑀉𑀤𑁆𑀥𑀕𑁆𑀕𑀸 ¶ 𑀘 𑀅𑀥𑀕𑁆𑀕𑀸 𑀘, 𑀤𑀼𑀫𑀕𑁆𑀕𑀧𑀭𑀺𑀫𑀚𑁆𑀚𑀺𑀢𑀸;
𑀤𑀼𑀯𑀺𑀚𑀸 𑀦𑁂𑀮𑀲𑀫𑁆𑀪𑀽𑀢𑀸, 𑀤𑀦𑁆𑀢𑀸 𑀢𑀯 𑀲𑀼𑀤𑀲𑁆𑀲𑀦𑀸.
‘‘𑀅𑀧𑀡𑁆𑀟𑀭𑀸 𑀮𑁄𑀳𑀺𑀢𑀦𑁆𑀢𑀸, 𑀚𑀺𑀜𑁆𑀚𑀽𑀓𑀨𑀮𑀲𑀦𑁆𑀦𑀺𑀪𑀸;
𑀆𑀬𑀢𑀸 𑀘 𑀯𑀺𑀲𑀸𑀮𑀸 𑀘, 𑀦𑁂𑀢𑁆𑀢𑀸 𑀢𑀯 𑀲𑀼𑀤𑀲𑁆𑀲𑀦𑀸.
‘‘𑀦𑀸𑀢𑀺𑀤𑀻𑀖𑀸 𑀲𑀼𑀲𑀫𑁆𑀫𑀝𑁆𑀞𑀸, 𑀓𑀦𑀓𑀩𑁆𑀬𑀸𑀲𑀫𑁄𑀘𑀺𑀢𑀸;
𑀉𑀢𑁆𑀢𑀫𑀗𑁆𑀕𑀭𑀼𑀳𑀸 𑀢𑀼𑀬𑁆𑀳𑀁, 𑀓𑁂𑀲𑀸 𑀘𑀦𑁆𑀤𑀦𑀕𑀦𑁆𑀥𑀺𑀓𑀸.
‘‘𑀬𑀸𑀯𑀢𑀸 𑀓𑀲𑀺𑀕𑁄𑀭𑀓𑁆𑀔𑀸, 𑀯𑀸𑀡𑀺𑀚𑀸𑀦𑀜𑁆𑀘 𑀬𑀸 𑀕𑀢𑀺;
𑀇𑀲𑀻𑀦𑀜𑁆𑀘 𑀧𑀭𑀓𑁆𑀓𑀦𑁆𑀢𑀁, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁.
‘‘𑀦 𑀢𑁂 𑀲𑀫𑀲𑀫𑀁 𑀧𑀲𑁆𑀲𑁂, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂;
𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.
𑀢𑀢𑁆𑀣 𑀯𑀺𑀘𑀺𑀢𑁆𑀢𑀳𑀢𑁆𑀣𑀸𑀪𑀭𑀡𑀸𑀢𑀺 𑀯𑀺𑀘𑀺𑀢𑁆𑀢𑁂𑀳𑀺 𑀳𑀢𑁆𑀣𑀸𑀪𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀳𑁂𑀫𑀘𑀦𑁆𑀤𑀦𑀕𑀦𑁆𑀥𑀺𑀦𑀻𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀘𑀦𑁆𑀤𑀦𑀕𑀦𑁆𑀥𑀯𑀺𑀮𑁂𑀧𑀦𑀸. 𑀲𑀜𑁆𑀜𑀢𑀽𑀭𑀽𑀢𑀺 𑀲𑀼𑀯𑀝𑁆𑀝𑀺𑀢𑀖𑀦𑀊𑀭𑀼 𑀲𑀫𑁆𑀧𑀦𑁆𑀦𑀊𑀭𑀼𑀮𑀓𑁆𑀔𑀡𑀸. 𑀯𑀺𑀮𑀕𑁆𑀕𑀸𑀢𑀺 𑀲𑀁𑀔𑀺𑀢𑁆𑀢𑀫𑀚𑁆𑀛𑀸. 𑀫𑀼𑀤𑀼𑀓𑀸𑀢𑀺 𑀫𑀼𑀤𑀼 𑀲𑀼𑀔𑀼𑀫𑀸𑀮𑀸. 𑀲𑀼𑀤𑁆𑀥𑀸𑀢𑀺 𑀦𑀺𑀫𑁆𑀫𑀮𑀸. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀢𑀺 𑀲𑀫𑀁 𑀧𑀣𑀯𑀺𑀁 𑀨𑀼𑀲𑀦𑁆𑀢𑀸 ¶ 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀸. 𑀕𑀫𑀦𑀸𑀢𑀺 𑀕𑀘𑁆𑀙𑀫𑀸𑀦𑀸. 𑀓𑀸𑀫𑀦𑀻𑀬𑀸𑀢𑀺 𑀓𑀦𑁆𑀢𑀸 𑀓𑀸𑀫𑀺𑀢𑀩𑁆𑀩𑀬𑀼𑀢𑁆𑀢𑀓𑀸. 𑀳𑀭𑀦𑁆𑀢𑀺𑀬𑁂𑀯 𑀫𑁂 𑀫𑀦𑁄𑀢𑀺 𑀏𑀢𑁂 𑀏𑀯𑀭𑀽𑀧𑁂𑀦 𑀧𑀭𑀫𑁂𑀦 𑀇𑀢𑁆𑀣𑀺𑀯𑀺𑀮𑀸𑀲𑁂𑀦 𑀘𑀗𑁆𑀓𑀫𑀦𑁆𑀢𑀺𑀬𑀸 𑀢𑀯 𑀧𑀸𑀤𑀸 𑀫𑀫 𑀘𑀺𑀢𑁆𑀢𑀁 𑀳𑀭𑀦𑁆𑀢𑀺𑀬𑁂𑀯. 𑀯𑀺𑀫𑀝𑁆𑀞𑀸𑀢𑀺 𑀯𑀺𑀲𑀸𑀮𑀸. 𑀲𑀼𑀲𑁆𑀲𑁄𑀡𑀻𑀢𑀺 𑀲𑀼𑀦𑁆𑀤𑀭𑀲𑁄𑀡𑀻. 𑀅𑀓𑁆𑀔𑀲𑁆𑀲𑀸𑀢𑀺 𑀲𑀼𑀦𑁆𑀤𑀭𑀯𑀡𑁆𑀡𑀲𑁆𑀲 𑀅𑀓𑁆𑀔𑀲𑁆𑀲 𑀲𑀼𑀯𑀡𑁆𑀡𑀨𑀮𑀓𑀁 𑀯𑀺𑀬 𑀯𑀺𑀲𑀸𑀮𑀸 𑀢𑁂 𑀲𑁄𑀡𑀻𑀢𑀺 𑀯𑀤𑀢𑀺. 𑀉𑀧𑁆𑀧𑀮𑀲𑁆𑀲𑁂𑀯 𑀓𑀺𑀜𑁆𑀚𑀓𑁆𑀔𑀸𑀢𑀺 𑀦𑀻𑀮𑀼𑀧𑁆𑀧𑀮𑀓𑀡𑁆𑀡𑀺𑀓𑀸 𑀯𑀺𑀬. 𑀓𑀡𑁆𑀳𑀜𑁆𑀚𑀦𑀲𑁆𑀲𑁂𑀯𑀸𑀢𑀺 𑀲𑀼𑀔𑀼𑀫𑀓𑀡𑁆𑀳𑀮𑁄𑀫𑀘𑀺𑀢𑁆𑀢𑀢𑁆𑀢𑀸 𑀏𑀯𑀫𑀸𑀳.
‘‘𑀤𑀼𑀯𑀺𑀥𑀸’’𑀢𑀺𑀕𑀸𑀣𑀁 𑀣𑀦𑁂 𑀯𑀡𑁆𑀡𑀬𑀦𑁆𑀢𑁄 𑀆𑀳. 𑀢𑁂 𑀳𑀺 𑀤𑁆𑀯𑁂 𑀳𑀼𑀢𑁆𑀯𑀸 𑀉𑀭𑁂 𑀚𑀸𑀢𑀸 𑀯𑀡𑁆𑀝𑀲𑁆𑀲 𑀅𑀪𑀸𑀯𑀸 𑀅𑀯𑀡𑁆𑀝𑀸, 𑀉𑀭𑁂 𑀮𑀕𑁆𑀕𑀸 𑀏𑀯 𑀳𑀼𑀢𑁆𑀯𑀸 𑀲𑀼𑀝𑁆𑀞𑀼 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 ¶ 𑀲𑀸𑀥𑀼𑀧𑀘𑁆𑀘𑀼𑀤𑀸, 𑀧𑀬𑀲𑁆𑀲 𑀥𑀸𑀭𑀡𑀢𑁄 𑀧𑀬𑁄𑀥𑀭𑀸, 𑀅𑀧𑀢𑀺𑀢𑀸𑀢𑀺 𑀦 𑀧𑀢𑀺𑀢𑀸, 𑀅𑀫𑀺𑀮𑀸𑀢𑀢𑀸𑀬 𑀯𑀸 𑀅𑀮𑀫𑁆𑀩𑀦𑀢𑀸𑀬 𑀯𑀸 𑀦 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸𑀢𑀺 𑀅𑀧𑀢𑀺𑀢𑀸, 𑀲𑀼𑀯𑀡𑁆𑀡𑀨𑀮𑀓𑁂 𑀞𑀧𑀺𑀢𑀲𑀼𑀯𑀡𑁆𑀡𑀫𑀬𑀯𑀝𑁆𑀝𑀅𑀮𑀸𑀩𑀼𑀦𑁄 𑀅𑀟𑁆𑀠𑁂𑀦 𑀲𑀤𑀺𑀲𑀢𑀸𑀬 𑀅𑀟𑁆𑀠𑀮𑀸𑀩𑀼𑀲𑀫𑀸 𑀣𑀦𑀸. 𑀏𑀡𑁂𑀬𑁆𑀬𑀓𑀸 𑀬𑀣𑀸𑀢𑀺 𑀏𑀡𑀻𑀫𑀺𑀕𑀲𑁆𑀲 𑀳𑀺 𑀤𑀻𑀖𑀸 𑀘 𑀯𑀝𑁆𑀝𑀸 𑀘 𑀕𑀻𑀯𑀸 𑀲𑁄𑀪𑀢𑀺 𑀬𑀣𑀸, 𑀏𑀯𑀁 𑀢𑀯 𑀕𑀻𑀯𑀸 𑀣𑁄𑀓𑀁 𑀤𑀻𑀖𑀸. 𑀓𑀫𑁆𑀩𑀼𑀢𑀮𑀸𑀪𑀸𑀲𑀸𑀢𑀺 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀢𑀮𑀲𑀦𑁆𑀦𑀺𑀪𑀸 𑀕𑀻𑀯𑀸𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀭𑀸𑀯𑀭𑀡𑀸𑀢𑀺 𑀤𑀦𑁆𑀢𑀸𑀯𑀭𑀡𑀸. 𑀘𑀢𑀼𑀢𑁆𑀣𑀫𑀦𑀲𑀦𑁆𑀦𑀺𑀪𑀸𑀢𑀺 𑀘𑀢𑀼𑀢𑁆𑀣𑀫𑀦𑁄 𑀯𑀼𑀘𑁆𑀘𑀢𑀺 𑀘𑀢𑀼𑀢𑁆𑀣𑀫𑀦𑀯𑀢𑁆𑀣𑀼𑀪𑀽𑀢𑀸 𑀚𑀺𑀯𑁆𑀳𑀸. 𑀅𑀪𑀺𑀭𑀢𑁆𑀢𑀪𑀸𑀯𑁂𑀦 𑀚𑀺𑀯𑁆𑀳𑀸𑀲𑀤𑀺𑀲𑀁 𑀢𑁂 𑀑𑀝𑁆𑀞𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀤𑀢𑀺. 𑀉𑀤𑁆𑀥𑀕𑁆𑀕𑀸𑀢𑀺 𑀳𑁂𑀝𑁆𑀞𑀺𑀫𑀤𑀦𑁆𑀢𑀸. 𑀅𑀥𑀕𑁆𑀕𑀸𑀢𑀺 𑀉𑀧𑀭𑀺𑀫𑀤𑀦𑁆𑀢𑀸. 𑀤𑀼𑀫𑀕𑁆𑀕𑀧𑀭𑀺𑀫𑀚𑁆𑀚𑀺𑀢𑀸𑀢𑀺 ¶ 𑀤𑀦𑁆𑀢𑀓𑀝𑁆𑀞𑀧𑀭𑀺𑀫𑀚𑁆𑀚𑀺𑀢𑀸 𑀧𑀭𑀺𑀲𑀼𑀤𑁆𑀥𑀸. 𑀤𑀼𑀯𑀺𑀚𑀸𑀢𑀺 𑀤𑁆𑀯𑀺𑀚𑀸. 𑀦𑁂𑀮𑀲𑀫𑁆𑀪𑀽𑀢𑀸𑀢𑀺 𑀦𑀺𑀤𑁆𑀤𑁄𑀲𑁂𑀲𑀼 𑀳𑀦𑀼𑀫𑀁𑀲𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀫𑁆𑀪𑀽𑀢𑀸.
𑀅𑀧𑀡𑁆𑀟𑀭𑀸𑀢𑀺 𑀓𑀡𑁆𑀳𑀸. 𑀮𑁄𑀳𑀺𑀢𑀦𑁆𑀢𑀸𑀢𑀺 𑀭𑀢𑁆𑀢𑀧𑀭𑀺𑀬𑀦𑁆𑀢𑀸. 𑀚𑀺𑀜𑁆𑀚𑀽𑀓𑀨𑀮𑀲𑀦𑁆𑀦𑀺𑀪𑀸𑀢𑀺 𑀭𑀢𑁆𑀢𑀝𑁆𑀞𑀸𑀦𑁂 𑀚𑀺𑀜𑁆𑀚𑀼𑀓𑀨𑀮𑀲𑀤𑀺𑀲𑀸. 𑀲𑀼𑀤𑀲𑁆𑀲𑀦𑀸𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀸 𑀧𑀜𑁆𑀘𑀧𑀲𑀸𑀤𑀲𑀫𑀦𑁆𑀦𑀸𑀕𑀢𑀸. 𑀦𑀸𑀢𑀺𑀤𑀻𑀖𑀸𑀢𑀺 𑀧𑀫𑀸𑀡𑀬𑀼𑀢𑁆𑀢𑀸. 𑀲𑀼𑀲𑀫𑁆𑀫𑀝𑁆𑀞𑀸𑀢𑀺 𑀲𑀼𑀝𑁆𑀞𑀼 𑀲𑀫𑁆𑀫𑀝𑁆𑀞𑀸. 𑀓𑀦𑀓𑀩𑁆𑀬𑀸𑀲𑀫𑁄𑀘𑀺𑀢𑀸𑀢𑀺 𑀓𑀦𑀓𑀩𑁆𑀬𑀸 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀨𑀡𑀺𑀓𑀸, 𑀢𑀸𑀬 𑀕𑀦𑁆𑀥𑀢𑁂𑀮𑀁 𑀆𑀤𑀸𑀬 𑀧𑀳𑀭𑀺𑀢𑀸 𑀲𑀼𑀭𑀘𑀺𑀢𑀸. 𑀓𑀲𑀺𑀕𑁄𑀭𑀓𑁆𑀔𑀸𑀢𑀺 𑀇𑀫𑀺𑀦𑀸 𑀓𑀲𑀺𑀜𑁆𑀘 𑀕𑁄𑀭𑀓𑁆𑀔𑀜𑁆𑀘 𑀦𑀺𑀲𑁆𑀲𑀸𑀬 𑀚𑀻𑀯𑀦𑀓𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀬𑀸 𑀕𑀢𑀻𑀢𑀺 𑀬𑀢𑁆𑀢𑀓𑀸 𑀦𑀺𑀧𑁆𑀨𑀢𑁆𑀢𑀺. 𑀧𑀭𑀓𑁆𑀓𑀦𑁆𑀢𑀦𑁆𑀢𑀺 𑀬𑀢𑁆𑀢𑀓𑀁 𑀇𑀲𑀻𑀦𑀁 𑀧𑀭𑀓𑁆𑀓𑀦𑁆𑀢𑀁, 𑀯𑀺𑀢𑁆𑀣𑀸𑀭𑀻𑀓𑀢𑀸 𑀇𑀫𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑁂 𑀬𑀢𑁆𑀢𑀓𑀸 𑀇𑀲𑀬𑁄 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀢𑁂 𑀲𑀫𑀲𑀫𑀦𑁆𑀢𑀺 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀏𑀓𑀫𑁆𑀧𑀺 𑀭𑀽𑀧𑀮𑀻𑀴𑀸𑀯𑀺𑀮𑀸𑀲𑀸𑀤𑀺𑀲𑀫𑀢𑀸𑀬 𑀢𑀬𑀸 𑀲𑀫𑀸𑀦𑀁 𑀦 𑀧𑀲𑁆𑀲𑀸𑀫𑀺. 𑀓𑁄 𑀯𑀸 𑀢𑁆𑀯𑀦𑁆𑀢𑀺 𑀇𑀤𑀁 𑀢𑀲𑁆𑀲𑀸 𑀇𑀢𑁆𑀣𑀺𑀪𑀸𑀯𑀁 𑀚𑀸𑀦𑀦𑁆𑀢𑁄 𑀧𑀼𑀭𑀺𑀲𑀯𑁄𑀳𑀸𑀭𑀯𑀲𑁂𑀦 𑀧𑀼𑀘𑁆𑀙𑀢𑀺.
𑀏𑀯𑀁 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀸 𑀅𑀢𑁆𑀢𑀦𑁄 𑀯𑀡𑁆𑀡𑀁 𑀪𑀸𑀲𑀦𑁆𑀢𑁂 𑀢𑀸𑀧𑀲𑁂 𑀅𑀮𑀫𑁆𑀩𑀼𑀲𑀸 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀓𑀣𑀸𑀬 𑀬𑀣𑀸𑀦𑀼𑀲𑀦𑁆𑀥𑀺𑀁 𑀕𑀢𑀸𑀬 𑀢𑀲𑁆𑀲 𑀲𑀫𑁆𑀫𑀽𑀴𑁆𑀳𑀪𑀸𑀯𑀁 𑀜𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀦 ¶ 𑀧𑀜𑁆𑀳𑀓𑀸𑀮𑁄 𑀪𑀤𑁆𑀤𑀦𑁆𑀢𑁂, 𑀓𑀲𑁆𑀲𑀧𑁂𑀯𑀁 𑀕𑀢𑁂 𑀲𑀢𑀺;
𑀏𑀳𑀺 𑀲𑀫𑁆𑀫 𑀭𑀫𑀺𑀲𑁆𑀲𑀸𑀫, 𑀉𑀪𑁄 𑀅𑀲𑁆𑀫𑀸𑀓𑀫𑀲𑁆𑀲𑀫𑁂;
𑀏𑀳𑀺 𑀢𑀁 𑀉𑀧𑀕𑀽𑀳𑀺𑀲𑁆𑀲𑀁, 𑀭𑀢𑀻𑀦𑀁 𑀓𑀼𑀲𑀮𑁄 𑀪𑀯𑀸’’𑀢𑀺.
𑀢𑀢𑁆𑀣 ¶ 𑀓𑀲𑁆𑀲𑀧𑁂𑀯𑀁 𑀕𑀢𑁂 𑀲𑀢𑀻𑀢𑀺 𑀓𑀲𑁆𑀲𑀧𑀕𑁄𑀢𑁆𑀢 𑀏𑀯𑀁 𑀢𑀯 𑀘𑀺𑀢𑁆𑀢𑁂 𑀧𑀯𑀢𑁆𑀢𑁂 𑀲𑀢𑀺 𑀧𑀜𑁆𑀳𑀓𑀸𑀮𑁄 𑀦 𑀳𑁄𑀢𑀺. 𑀲𑀫𑁆𑀫𑀸𑀢𑀺 𑀯𑀬𑀲𑁆𑀲, 𑀧𑀺𑀬𑀯𑀘𑀦𑀸𑀮𑀧𑀦𑀫𑁂𑀢𑀁. 𑀭𑀢𑀻𑀦𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀻𑀦𑀁.
𑀏𑀯𑀁 𑀯𑀢𑁆𑀯𑀸 𑀅𑀮𑀫𑁆𑀩𑀼𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀬𑀁 𑀫𑀬𑀺 𑀞𑀺𑀢𑀸𑀬 𑀳𑀢𑁆𑀣𑀧𑀸𑀲𑀁 𑀆𑀕𑀫𑀺𑀲𑁆𑀲𑀢𑀺, 𑀕𑀘𑁆𑀙𑀦𑁆𑀢𑀻 𑀯𑀺𑀬 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀇𑀢𑁆𑀣𑀺𑀫𑀸𑀬𑀸𑀓𑀼𑀲𑀮𑀢𑀸𑀬 𑀢𑀸𑀧𑀲𑀁 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑀻 𑀧𑀸𑀬𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀇𑀤𑀁 𑀯𑀢𑁆𑀯𑀸𑀦 𑀧𑀓𑁆𑀓𑀸𑀫𑀺, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻;
𑀫𑀺𑀲𑁆𑀲𑀸 𑀫𑀺𑀲𑁆𑀲𑀺𑀢𑀼𑀫𑀺𑀘𑁆𑀙𑀦𑁆𑀢𑀻, 𑀇𑀲𑀺𑀲𑀺𑀗𑁆𑀕𑀁 𑀅𑀮𑀫𑁆𑀩𑀼𑀲𑀸’’𑀢𑀺.
𑀅𑀣 ¶ 𑀦𑀁 𑀢𑀸𑀧𑀲𑁄 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀕𑀘𑁆𑀙𑀢𑀻’’𑀢𑀺 𑀅𑀢𑁆𑀢𑀦𑁄 𑀤𑀦𑁆𑀥𑀧𑀭𑀓𑁆𑀓𑀫𑀁 𑀫𑀦𑁆𑀤𑀕𑀫𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑁂𑀕𑁂𑀦 𑀥𑀸𑀯𑀺𑀢𑁆𑀯𑀸 𑀓𑁂𑀲𑁂𑀲𑀼 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀲𑁄 𑀘 𑀯𑁂𑀕𑁂𑀦 𑀦𑀺𑀓𑁆𑀔𑀫𑁆𑀫, 𑀙𑁂𑀢𑁆𑀯𑀸 𑀤𑀦𑁆𑀥𑀧𑀭𑀓𑁆𑀓𑀫𑀁;
𑀢𑀫𑀼𑀢𑁆𑀢𑀫𑀸𑀲𑀼 𑀯𑁂𑀡𑀻𑀲𑀼, 𑀅𑀚𑁆𑀛𑀧𑁆𑀧𑀢𑁆𑀢𑁄 𑀧𑀭𑀸𑀫𑀲𑀺.
‘‘𑀢𑀫𑀼𑀤𑀸𑀯𑀢𑁆𑀢 𑀓𑀮𑁆𑀬𑀸𑀡𑀻, 𑀧𑀮𑀺𑀲𑁆𑀲𑀚𑀺 𑀲𑀼𑀲𑁄𑀪𑀦𑀸;
𑀘𑀯𑀺𑀢𑀫𑁆𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀸, 𑀬𑀣𑀸 𑀢𑀁 𑀅𑀣 𑀢𑁄𑀲𑀺𑀢𑀸.
‘‘𑀫𑀦𑀲𑀸 𑀅𑀕𑀫𑀸 𑀇𑀦𑁆𑀤𑀁, 𑀯𑀲𑀦𑁆𑀢𑀁 𑀦𑀦𑁆𑀤𑀦𑁂 𑀯𑀦𑁂;
𑀢𑀲𑁆𑀲𑀸 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀫𑀖𑀯𑀸 𑀤𑁂𑀯𑀓𑀼𑀜𑁆𑀚𑀭𑁄.
‘‘𑀧𑀮𑁆𑀮𑀗𑁆𑀓𑀁 𑀧𑀳𑀺𑀡𑀻 𑀔𑀺𑀧𑁆𑀧𑀁, 𑀲𑁄𑀯𑀡𑁆𑀡𑀁 𑀲𑁄𑀧𑀯𑀸𑀳𑀦𑀁;
𑀲𑀉𑀢𑁆𑀢𑀭𑀘𑁆𑀙𑀤𑀧𑀜𑁆𑀜𑀸𑀲𑀁, 𑀲𑀳𑀲𑁆𑀲𑀧𑀝𑀺𑀬𑀢𑁆𑀣𑀢𑀁.
‘‘𑀢𑀫𑁂𑀦𑀁 ¶ 𑀢𑀢𑁆𑀣 𑀥𑀸𑀭𑁂𑀲𑀺, 𑀉𑀭𑁂 𑀓𑀢𑁆𑀯𑀸𑀦 𑀲𑁄𑀪𑀦𑀸;
𑀬𑀣𑀸 𑀏𑀓𑀫𑀼𑀳𑀼𑀢𑁆𑀢𑀁𑀯, 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀥𑀸𑀭𑀬𑀺.
‘‘𑀯𑀺𑀫𑀤𑁄 𑀢𑀻𑀳𑀺 𑀯𑀲𑁆𑀲𑁂𑀳𑀺, 𑀧𑀩𑀼𑀚𑁆𑀛𑀺𑀢𑁆𑀯𑀸𑀦 𑀩𑁆𑀭𑀸𑀳𑁆𑀫𑀡𑁄;
𑀅𑀤𑁆𑀤𑀲𑀸𑀲𑀺 𑀳𑀭𑀺𑀢𑀭𑀼𑀓𑁆𑀔𑁂, 𑀲𑀫𑀦𑁆𑀢𑀸 𑀅𑀕𑁆𑀕𑀺𑀬𑀸𑀬𑀦𑀁.
‘‘𑀦𑀯𑀧𑀢𑁆𑀢𑀯𑀦𑀁 𑀨𑀼𑀮𑁆𑀮𑀁, 𑀓𑁄𑀓𑀺𑀮𑀕𑁆𑀕𑀡𑀖𑁄𑀲𑀺𑀢𑀁;
𑀲𑀫𑀦𑁆𑀢𑀸 𑀧𑀯𑀺𑀮𑁄𑀓𑁂𑀢𑁆𑀯𑀸, 𑀭𑀼𑀤𑀁 𑀅𑀲𑁆𑀲𑀽𑀦𑀺 𑀯𑀢𑁆𑀢𑀬𑀺.
‘‘𑀦 ¶ 𑀚𑀼𑀳𑁂 𑀦 𑀚𑀧𑁂 𑀫𑀦𑁆𑀢𑁂, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀳𑀸𑀧𑀺𑀢𑀁;
𑀓𑁄 𑀦𑀼 𑀫𑁂 𑀧𑀸𑀭𑀺𑀘𑀭𑀺𑀬𑀸𑀬, 𑀧𑀼𑀩𑁆𑀩𑁂 𑀘𑀺𑀢𑁆𑀢𑀁 𑀧𑀮𑁄𑀪𑀬𑀺.
‘‘𑀅𑀭𑀜𑁆𑀜𑁂 𑀫𑁂 𑀯𑀺𑀳𑀭𑀢𑁄, 𑀬𑁄 𑀫𑁂 𑀢𑁂𑀚𑀸 𑀳 𑀲𑀫𑁆𑀪𑀼𑀢𑀁;
𑀦𑀸𑀦𑀸𑀭𑀢𑀦𑀧𑀭𑀺𑀧𑀽𑀭𑀁, 𑀦𑀸𑀯𑀁𑀯 𑀕𑀡𑁆𑀳𑀺 𑀅𑀡𑁆𑀡𑀯𑁂’’𑀢𑀺.
𑀢𑀢𑁆𑀣 𑀅𑀚𑁆𑀛𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀧𑀢𑁆𑀢𑁄. 𑀢𑀫𑀼𑀤𑀸𑀯𑀢𑁆𑀢 𑀓𑀮𑁆𑀬𑀸𑀡𑀻𑀢𑀺 𑀢𑀁 𑀓𑁂𑀲𑁂 𑀧𑀭𑀸𑀫𑀲𑀺𑀢𑁆𑀯𑀸 𑀞𑀺𑀢𑀁 𑀇𑀲𑀺𑀁 𑀉𑀤𑀸𑀯𑀢𑁆𑀢𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀮𑁆𑀬𑀸𑀡𑀤𑀲𑁆𑀲𑀦𑀸 𑀲𑀸 𑀲𑀼𑀝𑁆𑀞𑀼 𑀲𑁄𑀪𑀦𑀸. 𑀧𑀮𑀺𑀲𑁆𑀲𑀚𑀻𑀢𑀺 𑀆𑀮𑀺𑀗𑁆𑀕𑀺. 𑀘𑀯𑀺𑀢𑀫𑁆𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀸, 𑀬𑀣𑀸 𑀢𑀁 𑀅𑀣 𑀢𑁄𑀲𑀺𑀢𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀇𑀲𑀺𑀦𑁄 𑀢𑀸𑀯𑀤𑁂𑀯 𑀛𑀸𑀦𑀁 𑀅𑀦𑁆𑀢𑀭𑀥𑀸𑀬𑀺. 𑀢𑀲𑁆𑀫𑀺𑀁 𑀢𑀫𑁆𑀳𑀸 𑀛𑀸𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀯𑀺𑀢𑁂 𑀬𑀣𑀸 𑀢𑀁 𑀲𑀓𑁆𑀓𑁂𑀦 𑀧𑀢𑁆𑀣𑀺𑀢𑀁, 𑀢𑀣𑁂𑀯 𑀅𑀳𑁄𑀲𑀺. 𑀅𑀣 𑀲𑀓𑁆𑀓𑀲𑁆𑀲 𑀧𑀢𑁆𑀣𑀦𑀸𑀬 𑀲𑀫𑀺𑀤𑁆𑀥𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 𑀲𑀸 𑀤𑁂𑀯𑀓𑀜𑁆𑀜𑀸 𑀢𑁄𑀲𑀺𑀢𑀸, 𑀢𑀲𑁆𑀲 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀦𑀸𑀲𑁂𑀦 𑀲𑀜𑁆𑀚𑀦𑀺𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑀸𑀢𑀺 𑀅𑀢𑁆𑀣𑁄.
𑀫𑀦𑀲𑀸 𑀅𑀕𑀫𑀸𑀢𑀺 𑀲𑀸 𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀞𑀺𑀢𑀸 ‘‘𑀅𑀳𑁄 𑀯𑀢 𑀲𑀓𑁆𑀓𑁄 𑀧𑀮𑁆𑀮𑀗𑁆𑀓𑀁 𑀫𑁂 𑀧𑁂𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀫𑀦𑀲𑀸 𑀇𑀦𑁆𑀤𑀁 𑀅𑀕𑀫𑀸. 𑀦𑀦𑁆𑀤𑀦𑁂 𑀯𑀦𑁂𑀢𑀺 𑀦𑀦𑁆𑀤𑀺𑀚𑀦𑀦𑀲𑀫𑀢𑁆𑀣𑀢𑀸𑀬 𑀦𑀦𑁆𑀤𑀦𑀯𑀦𑀲𑀗𑁆𑀔𑀸𑀢𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀯𑀲𑀦𑁆𑀢𑀁. 𑀤𑁂𑀯𑀓𑀼𑀜𑁆𑀚𑀭𑁄𑀢𑀺 𑀤𑁂𑀯𑀲𑁂𑀝𑁆𑀞𑁄 ¶ . 𑀧𑀳𑀺𑀡𑀻𑀢𑀺 𑀧𑁂𑀲𑁂𑀲𑀺. ‘‘𑀧𑀸𑀳𑀺𑀡𑀻’’𑀢𑀺𑀧𑀺 𑀧𑀸𑀞𑁄. 𑀲𑁄𑀧𑀯𑀸𑀳𑀦𑀦𑁆𑀢𑀺 𑀲𑀧𑀭𑀺𑀯𑀸𑀭𑀁. 𑀲𑀉𑀢𑁆𑀢𑀭𑀘𑁆𑀙𑀤𑀧𑀜𑁆𑀜𑀸𑀲𑀦𑁆𑀢𑀺 𑀧𑀜𑁆𑀜𑀸𑀲𑀸𑀬 𑀉𑀢𑁆𑀢𑀭𑀘𑁆𑀙𑀤𑁂𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀁. 𑀲𑀳𑀲𑁆𑀲𑀧𑀝𑀺𑀬𑀢𑁆𑀣𑀢𑀦𑁆𑀢𑀺 𑀲𑀳𑀲𑁆𑀲𑀤𑀺𑀩𑁆𑀩𑀓𑁄𑀚𑀯𑀢𑁆𑀣𑀢𑀁. 𑀢𑀫𑁂𑀦𑀁 𑀢𑀢𑁆𑀣𑀸𑀢𑀺 𑀢𑀁 𑀇𑀲𑀺𑀲𑀺𑀗𑁆𑀕𑀁 𑀢𑀢𑁆𑀣 𑀤𑀺𑀩𑁆𑀩𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀸 𑀲𑀸 𑀉𑀭𑁂 𑀓𑀢𑁆𑀯𑀸 𑀥𑀸𑀭𑁂𑀲𑀺. 𑀢𑀻𑀡𑀺 𑀯𑀲𑁆𑀲𑀸𑀦𑀻𑀢𑀺 𑀏𑀓𑀫𑀼𑀳𑀼𑀢𑁆𑀢𑀁 𑀯𑀺𑀬 𑀫𑀦𑀼𑀲𑁆𑀲𑀕𑀡𑀦𑀸𑀬 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀢𑀁 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸 𑀥𑀸𑀭𑁂𑀲𑀺.
𑀯𑀺𑀫𑀤𑁄𑀢𑀺 ¶ 𑀦𑀺𑀫𑁆𑀫𑀤𑁄 𑀯𑀺𑀕𑀢𑀲𑀜𑁆𑀜𑀪𑀸𑀯𑁄. 𑀲𑁄 𑀳𑀺 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀺𑀲𑀜𑁆𑀜𑁄 𑀲𑀬𑀺𑀢𑁆𑀯𑀸 𑀧𑀘𑁆𑀙𑀸 𑀧𑀝𑀺𑀮𑀤𑁆𑀥𑀲𑀜𑁆𑀜𑁄 𑀧𑀩𑀼𑀚𑁆𑀛𑀺. 𑀢𑀲𑁆𑀫𑀺𑀁 𑀧𑀩𑀼𑀚𑁆𑀛𑀫𑀸𑀦𑁂 𑀳𑀢𑁆𑀣𑀸𑀤𑀺𑀨𑀦𑁆𑀤𑀦𑀁 𑀤𑀺𑀲𑁆𑀯𑀸𑀯 𑀅𑀮𑀫𑁆𑀩𑀼𑀲𑀸 𑀢𑀲𑁆𑀲 𑀧𑀩𑀼𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀅𑀦𑁆𑀢𑀭𑀳𑀺𑀢𑀸 𑀅𑀝𑁆𑀞𑀸𑀲𑀺. 𑀅𑀤𑁆𑀤𑀲𑀸𑀲𑀻𑀢𑀺 𑀲𑁄 𑀅𑀲𑁆𑀲𑀫𑀧𑀤𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀓𑁂𑀦 𑀦𑀼 𑀔𑁄𑀫𑁆𑀳𑀺 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑀺𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀫𑀸𑀦𑁄 𑀅𑀤𑁆𑀤𑀲𑀸𑀲𑀺. 𑀳𑀭𑀺𑀢𑀭𑀼𑀓𑁆𑀔𑁂𑀢𑀺 𑀅𑀕𑁆𑀕𑀺𑀬𑀸𑀬𑀦𑀲𑀗𑁆𑀔𑀸𑀢𑀁 𑀅𑀕𑁆𑀕𑀺𑀲𑀸𑀮𑀁 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂 𑀳𑀭𑀺𑀢𑀧𑀢𑁆𑀢𑀭𑀼𑀓𑁆𑀔𑁂. 𑀦𑀯𑀧𑀢𑁆𑀢𑀯𑀦𑀦𑁆𑀢𑀺 𑀢𑀭𑀼𑀡𑁂𑀳𑀺 𑀦𑀯𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑀁 𑀯𑀦𑀁. 𑀭𑀼𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑁄.
𑀦 ¶ 𑀚𑀼𑀳𑁂 𑀦 𑀚𑀧𑁂 𑀫𑀦𑁆𑀢𑁂𑀢𑀺 𑀅𑀬𑀫𑀲𑁆𑀲 𑀧𑀭𑀺𑀤𑁂𑀯𑀦𑀕𑀸𑀣𑀸. 𑀧𑀳𑀸𑀧𑀺𑀢𑀦𑁆𑀢𑀺 𑀳𑀸𑀧𑀺𑀢𑀁, 𑀧-𑀓𑀸𑀭𑁄 𑀉𑀧𑀲𑀕𑁆𑀕𑀫𑀢𑁆𑀢𑀁. 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀓𑁄 𑀦𑀼 𑀓𑀺𑀮𑁂𑀲𑀧𑀸𑀭𑀺𑀘𑀭𑀺𑀬𑀸𑀬 𑀇𑀢𑁄 𑀧𑀼𑀩𑁆𑀩𑁂 𑀫𑀫 𑀘𑀺𑀢𑁆𑀢𑀁 𑀧𑀮𑁄𑀪𑀬𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀬𑁄 𑀫𑁂 𑀢𑁂𑀚𑀸 𑀳 𑀲𑀫𑁆𑀪𑀼𑀢𑀦𑁆𑀢𑀺 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀬𑁄 𑀫𑀫 𑀲𑀫𑀡𑀢𑁂𑀚𑁂𑀦 𑀲𑀫𑁆𑀪𑀽𑀢𑀁 𑀛𑀸𑀦𑀕𑀼𑀡𑀁 𑀦𑀸𑀦𑀸𑀭𑀢𑀦𑀧𑀭𑀺𑀧𑀼𑀡𑁆𑀡𑀁 𑀫𑀳𑀦𑁆𑀢𑀁 𑀫𑀳𑀡𑁆𑀡𑀯𑁂 𑀦𑀸𑀯𑀁 𑀯𑀺𑀬 𑀕𑀡𑁆𑀳𑀺, 𑀯𑀺𑀦𑀸𑀲𑀁 𑀧𑀸𑀧𑁂𑀲𑀺, 𑀓𑁄 𑀦𑀸𑀫𑁂𑀲𑁄𑀢𑀺 𑀧𑀭𑀺𑀤𑁂𑀯𑀢𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀅𑀮𑀫𑁆𑀩𑀼𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀦 𑀓𑀣𑁂𑀲𑁆𑀲𑀸𑀫𑀺, 𑀅𑀬𑀁 𑀫𑁂 𑀅𑀪𑀺𑀲𑀧𑀺𑀲𑁆𑀲𑀢𑀺, 𑀳𑀦𑁆𑀤𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀞𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀳𑀁 𑀢𑁂 𑀧𑀸𑀭𑀺𑀘𑀭𑀺𑀬𑀸𑀬, 𑀤𑁂𑀯𑀭𑀸𑀚𑁂𑀦 𑀧𑁂𑀲𑀺𑀢𑀸;
𑀅𑀯𑀥𑀺𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦, 𑀧𑀫𑀸𑀤𑁄 𑀢𑁆𑀯𑀁 𑀦 𑀩𑀼𑀚𑁆𑀛𑀲𑀻’’𑀢𑀺.
𑀲𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀧𑀺𑀢𑀭𑀸 𑀤𑀺𑀦𑁆𑀦𑀑𑀯𑀸𑀤𑀁 𑀲𑀭𑀺𑀢𑁆𑀯𑀸 ‘‘𑀧𑀺𑀢𑀼 𑀯𑀘𑀦𑀁 𑀅𑀓𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄𑀫𑁆𑀳𑀻’’𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀘𑀢𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀇𑀫𑀸𑀦𑀺 𑀓𑀺𑀭 𑀫𑀁 𑀢𑀸𑀢𑁄, 𑀓𑀲𑁆𑀲𑀧𑁄 𑀅𑀦𑀼𑀲𑀸𑀲𑀢𑀺;
𑀓𑀫𑀮𑀸𑀲𑀤𑀺𑀲𑀺𑀢𑁆𑀣𑀺𑀬𑁄, 𑀢𑀸𑀬𑁄 𑀩𑀼𑀚𑁆𑀛𑁂𑀲𑀺 𑀫𑀸𑀡𑀯.
‘‘𑀉𑀭𑁂𑀕𑀡𑁆𑀟𑀸𑀬𑁄 𑀩𑀼𑀚𑁆𑀛𑁂𑀲𑀺, 𑀢𑀸𑀬𑁄 𑀩𑀼𑀚𑁆𑀛𑁂𑀲𑀺 𑀫𑀸𑀡𑀯;
𑀇𑀘𑁆𑀘𑀸𑀦𑀼𑀲𑀸𑀲𑀺 𑀫𑀁 𑀢𑀸𑀢𑁄, 𑀬𑀣𑀸 𑀫𑀁 𑀅𑀦𑀼𑀓𑀫𑁆𑀧𑀓𑁄.
‘‘𑀢𑀲𑁆𑀲𑀸𑀳𑀁 ¶ 𑀯𑀘𑀦𑀁 𑀦𑀸𑀓𑀁, 𑀧𑀺𑀢𑀼 𑀯𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;
𑀅𑀭𑀜𑁆𑀜𑁂 𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀳𑀺, 𑀲𑁆𑀯𑀚𑁆𑀚 𑀛𑀸𑀬𑀸𑀫𑀺 𑀏𑀓𑀓𑁄.
‘‘𑀲𑁄𑀳𑀁 ¶ 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀥𑀺𑀭𑀢𑁆𑀣𑀼 𑀚𑀻𑀯𑀺𑀢𑁂𑀦 𑀫𑁂;
𑀧𑀼𑀦 𑀯𑀸 𑀢𑀸𑀤𑀺𑀲𑁄 𑀳𑁂𑀲𑁆𑀲𑀁, 𑀫𑀭𑀡𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺.
𑀢𑀢𑁆𑀣 𑀇𑀫𑀸𑀦𑀻𑀢𑀺 𑀇𑀫𑀸𑀦𑀺 𑀯𑀘𑀦𑀸𑀦𑀺. 𑀓𑀫𑀮𑀸𑀲𑀤𑀺𑀲𑀺𑀢𑁆𑀣𑀺𑀬𑁄𑀢𑀺 𑀓𑀫𑀮𑀸 𑀯𑀼𑀘𑁆𑀘𑀢𑀺 𑀦𑀸𑀭𑀺𑀧𑀼𑀧𑁆𑀨𑀮𑀢𑀸, 𑀢𑀸𑀲𑀁 𑀧𑀼𑀧𑁆𑀨𑀲𑀤𑀺𑀲𑀸 𑀇𑀢𑁆𑀣𑀺𑀬𑁄. 𑀢𑀸𑀬𑁄 𑀩𑀼𑀚𑁆𑀛𑁂𑀲𑀺 𑀫𑀸𑀡𑀯𑀸𑀢𑀺 𑀫𑀸𑀡𑀯 𑀢𑁆𑀯𑀁 𑀢𑀸𑀬𑁄 𑀚𑀸𑀦𑁂𑀬𑁆𑀬𑀸𑀲𑀺, 𑀜𑀢𑁆𑀯𑀸 𑀤𑀲𑁆𑀲𑀦𑀧𑀣𑀁 𑀅𑀕𑀦𑁆𑀢𑁆𑀯𑀸 𑀧𑀮𑀸𑀧𑁂𑀬𑁆𑀬𑀸𑀲𑀻𑀢𑀺 𑀬𑀸𑀦𑀺 𑀏𑀯𑀭𑀽𑀧𑀸𑀦𑀺 𑀯𑀘𑀦𑀸𑀦𑀺 𑀢𑀤𑀸 𑀫𑀁 𑀢𑀸𑀢𑁄 𑀅𑀦𑀼𑀲𑀸𑀲𑀢𑀺, 𑀇𑀫𑀸𑀦𑀺 𑀓𑀺𑀭 𑀢𑀸𑀦𑀻𑀢𑀺. 𑀉𑀭𑁂𑀕𑀡𑁆𑀟𑀸𑀬𑁄𑀢𑀺 𑀉𑀭𑀫𑁆𑀳𑀺 𑀤𑁆𑀯𑀻𑀳𑀺 𑀕𑀡𑁆𑀟𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀢𑀸𑀬𑁄 𑀩𑀼𑀚𑁆𑀛𑁂𑀲𑀺, 𑀫𑀸𑀡𑀯𑀸𑀢𑀺, 𑀫𑀸𑀡𑀯, 𑀢𑀸𑀬𑁄 𑀅𑀢𑁆𑀢𑀦𑁄 ¶ 𑀯𑀲𑀁 𑀕𑀢𑁂 𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀻𑀢𑀺 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺. 𑀦𑀸𑀓𑀦𑁆𑀢𑀺 𑀦𑀸𑀓𑀭𑀺𑀁. 𑀛𑀸𑀬𑀸𑀫𑀻𑀢𑀺 𑀧𑀚𑁆𑀛𑀸𑀬𑀸𑀫𑀺 𑀧𑀭𑀺𑀤𑁂𑀯𑀸𑀫𑀺. 𑀥𑀺𑀭𑀢𑁆𑀣𑀼 𑀚𑀻𑀯𑀺𑀢𑁂𑀦 𑀫𑁂𑀢𑀺 𑀥𑀺𑀭𑀢𑁆𑀣𑀼 𑀕𑀭𑀳𑀺𑀢𑀁 𑀫𑀫 𑀚𑀻𑀯𑀺𑀢𑀁, 𑀚𑀻𑀯𑀺𑀢𑁂𑀦 𑀫𑁂 𑀓𑁄 𑀅𑀢𑁆𑀣𑁄. 𑀧𑀼𑀦 𑀯𑀸𑀢𑀺 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀧𑀼𑀦 𑀯𑀸 𑀢𑀸𑀤𑀺𑀲𑁄 𑀪𑀯𑀺𑀲𑁆𑀲𑀸𑀫𑀺, 𑀦𑀝𑁆𑀞𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀻𑀢𑀭𑀸𑀕𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀭𑀡𑀁 𑀯𑀸 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺.
𑀲𑁄 𑀓𑀸𑀫𑀭𑀸𑀕𑀁 𑀧𑀳𑀸𑀬 𑀧𑀼𑀦 𑀛𑀸𑀦𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣𑀲𑁆𑀲 𑀲𑀫𑀡𑀢𑁂𑀚𑀁 𑀤𑀺𑀲𑁆𑀯𑀸 𑀛𑀸𑀦𑀲𑁆𑀲 𑀘 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀜𑀢𑁆𑀯𑀸 𑀅𑀮𑀫𑁆𑀩𑀼𑀲𑀸 𑀪𑀻𑀢𑀸 𑀔𑀫𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀢𑀲𑁆𑀲 𑀢𑁂𑀚𑀁 𑀯𑀻𑀭𑀺𑀬𑀜𑁆𑀘, 𑀥𑀺𑀢𑀺𑀁 𑀜𑀢𑁆𑀯𑀸 𑀅𑀯𑀝𑁆𑀞𑀺𑀢𑀁;
𑀲𑀺𑀭𑀲𑀸 𑀅𑀕𑁆𑀕𑀳𑀻 𑀧𑀸𑀤𑁂, 𑀇𑀲𑀺𑀲𑀺𑀗𑁆𑀕𑀁 𑀅𑀮𑀫𑁆𑀩𑀼𑀲𑀸.
‘‘𑀫𑀸 𑀫𑁂 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀫𑀸 𑀫𑁂 𑀓𑀼𑀚𑁆𑀛 𑀫𑀳𑀸𑀇𑀲𑁂;
𑀫𑀳𑀸 𑀅𑀢𑁆𑀣𑁄 𑀫𑀬𑀸 𑀘𑀺𑀡𑁆𑀡𑁄, 𑀢𑀺𑀤𑀲𑀸𑀦𑀁 𑀬𑀲𑀲𑁆𑀲𑀺𑀦𑀁;
𑀢𑀬𑀸 𑀧𑀓𑀫𑁆𑀧𑀺𑀢𑀁 𑀆𑀲𑀺, 𑀲𑀩𑁆𑀩𑀁 𑀤𑁂𑀯𑀧𑀼𑀭𑀁 𑀢𑀤𑀸’’𑀢𑀺.
𑀅𑀣 𑀦𑀁 𑀲𑁄 ‘‘𑀔𑀫𑀸𑀫𑀺 𑀢𑁂, 𑀪𑀤𑁆𑀤𑁂, 𑀬𑀣𑀸𑀲𑀼𑀔𑀁 𑀕𑀘𑁆𑀙𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀢𑀸𑀯𑀢𑀺𑀁𑀲𑀸 𑀘 𑀬𑁂 𑀤𑁂𑀯𑀸, 𑀢𑀺𑀤𑀲𑀸𑀦𑀜𑁆𑀘 𑀯𑀸𑀲𑀯𑁄;
𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀔𑀻 𑀳𑁄𑀳𑀺, 𑀕𑀘𑁆𑀙 𑀓𑀜𑁆𑀜𑁂 𑀬𑀣𑀸𑀲𑀼𑀔’’𑀦𑁆𑀢𑀺.
𑀲𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀢𑁂𑀦𑁂𑀯 𑀲𑀼𑀯𑀡𑁆𑀡𑀧𑀮𑁆𑀮𑀗𑁆𑀓𑁂𑀦 𑀤𑁂𑀯𑀧𑀼𑀭𑀁 𑀕𑀢𑀸. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀢𑀲𑁆𑀲 ¶ 𑀧𑀸𑀤𑁂 𑀕𑀳𑁂𑀢𑁆𑀯𑀸𑀦, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;
𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺.
‘‘𑀬𑁄 𑀘 𑀢𑀲𑁆𑀲𑀸𑀲𑀺 𑀧𑀮𑁆𑀮𑀗𑁆𑀓𑁄, 𑀲𑁄𑀯𑀡𑁆𑀡𑁄 𑀲𑁄𑀧𑀯𑀸𑀳𑀦𑁄;
𑀲𑀉𑀢𑁆𑀢𑀭𑀘𑁆𑀙𑀤𑀧𑀜𑁆𑀜𑀸𑀲𑁄, 𑀲𑀳𑀲𑁆𑀲𑀧𑀝𑀺𑀬𑀢𑁆𑀣𑀢𑁄;
𑀢𑀫𑁂𑀯 𑀧𑀮𑁆𑀮𑀗𑁆𑀓𑀫𑀸𑀭𑀼𑀬𑁆𑀳, 𑀅𑀕𑀸 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂.
‘‘𑀢𑀫𑁄𑀓𑁆𑀓𑀫𑀺𑀯 𑀆𑀬𑀦𑁆𑀢𑀺𑀁, 𑀚𑀮𑀦𑁆𑀢𑀺𑀁 𑀯𑀺𑀚𑁆𑀚𑀼𑀢𑀁 𑀬𑀣𑀸;
𑀧𑀢𑀻𑀢𑁄 𑀲𑀼𑀫𑀦𑁄 𑀯𑀺𑀢𑁆𑀢𑁄, 𑀤𑁂𑀯𑀺𑀦𑁆𑀤𑁄 𑀅𑀤𑀤𑀸 𑀯𑀭’’𑀦𑁆𑀢𑀺.
𑀢𑀢𑁆𑀣 ¶ 𑀑𑀓𑁆𑀓𑀫𑀺𑀯𑀸𑀢𑀺 𑀤𑀻𑀧𑀓𑀁 𑀯𑀺𑀬. ‘‘𑀧𑀢𑀻𑀢𑁄’’𑀢𑀺𑀆𑀤𑀻𑀳𑀺 𑀢𑀼𑀝𑁆𑀞𑀸𑀓𑀸𑀭𑁄𑀯 𑀤𑀲𑁆𑀲𑀺𑀢𑁄 𑀅𑀤𑀤𑀸 𑀯𑀭𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸𑀬 𑀢𑀼𑀝𑁆𑀞𑁄 𑀯𑀭𑀁 𑀅𑀤𑀸𑀲𑀺.
𑀲𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀭𑀁 𑀕𑀡𑁆𑀳𑀦𑁆𑀢𑀻 𑀑𑀲𑀸𑀦𑀕𑀸𑀣𑀫𑀸𑀳 𑁋
‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;
𑀦𑀺𑀲𑀺𑀧𑁆𑀧𑀮𑁄𑀪𑀺𑀓𑀸 𑀕𑀘𑁆𑀙𑁂, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 ‘‘𑀲𑀓𑁆𑀓 𑀤𑁂𑀯𑀭𑀸𑀚, 𑀲𑀘𑁂 𑀫𑁂 𑀢𑁆𑀯𑀁 𑀯𑀭𑀁 𑀅𑀤𑁄, 𑀧𑀼𑀦 𑀇𑀲𑀺𑀧𑀮𑁄𑀪𑀺𑀓𑀸𑀬 𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀸 𑀫𑀁 𑀏𑀢𑀤𑀢𑁆𑀣𑀸𑀬 𑀧𑀳𑀺𑀡𑁂𑀬𑁆𑀬𑀸𑀲𑀺, 𑀏𑀢𑀁 𑀯𑀭𑀁 𑀯𑀭𑁂 𑀬𑀸𑀘𑀸𑀫𑀻’’𑀢𑀺.
𑀲𑀢𑁆𑀣𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀅𑀮𑀫𑁆𑀩𑀼𑀲𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀇𑀲𑀺𑀲𑀺𑀗𑁆𑀕𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀧𑀺𑀢𑀸 𑀫𑀳𑀸𑀇𑀲𑀺 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.
𑀅𑀮𑀫𑁆𑀩𑀼𑀲𑀸𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.
[𑁫𑁨𑁪] 𑁪. 𑀲𑀗𑁆𑀔𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸
𑀅𑀭𑀺𑀬𑀸𑀯𑀓𑀸𑀲𑁄𑀲𑀻𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 𑀉𑀧𑁄𑀲𑀣𑀺𑀓𑁂 𑀉𑀧𑀸𑀲𑀓𑁂 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 ‘‘𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀫𑀳𑀢𑀺𑀁 𑀦𑀸𑀕𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀉𑀧𑁄𑀲𑀣𑀯𑀸𑀲𑀁 𑀉𑀧𑀯𑀲𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀭𑀸𑀚𑀕𑀳𑁂 𑀫𑀕𑀥𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, ‘‘𑀤𑀼𑀬𑁆𑀬𑁄𑀥𑀦𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀺𑀢𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀅𑀣 𑀦𑀁 𑀧𑀺𑀢𑀸 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀯𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀺. 𑀲𑁄 𑀢𑁂𑀦𑁂𑀯 𑀧𑀮𑀺𑀩𑁄𑀥𑁂𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸 𑀫𑁂 ¶ 𑀮𑀸𑀪𑀲𑀓𑁆𑀓𑀸𑀭𑁄, 𑀦 𑀲𑀓𑁆𑀓𑀸 𑀫𑀬𑀸 𑀇𑀥 𑀯𑀲𑀦𑁆𑀢𑁂𑀦 𑀇𑀫𑀁 𑀚𑀝𑀁 𑀙𑀺𑀦𑁆𑀤𑀺𑀢𑀼𑀁, 𑀧𑀼𑀢𑁆𑀢𑀲𑁆𑀲 𑀫𑁂 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀕𑀥𑀭𑀝𑁆𑀞𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀺𑀲𑀓𑀭𑀝𑁆𑀞𑁂 𑀲𑀗𑁆𑀔𑀧𑀸𑀮𑀤𑀳𑀢𑁄 𑀦𑀸𑀫 𑀦𑀺𑀓𑁆𑀔𑀦𑁆𑀢𑀸𑀬 𑀓𑀡𑁆𑀡𑀯𑁂𑀡𑁆𑀡𑀸𑀬 𑀦𑀤𑀺𑀬𑀸 𑀦𑀺𑀯𑀢𑁆𑀢𑀦𑁂 𑀘𑀦𑁆𑀤𑀓𑀧𑀩𑁆𑀩𑀢𑀁 𑀉𑀧𑀦𑀺𑀲𑁆𑀲𑀸𑀬 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀬𑀸𑀧𑁂𑀲𑀺. 𑀢𑀫𑁂𑀦𑀁 𑀲𑀗𑁆𑀔𑀧𑀸𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀓𑀡𑁆𑀡𑀯𑁂𑀡𑁆𑀡𑀦𑀤𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑀲𑀗𑁆𑀓𑀫𑀢𑀺. 𑀲𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀣𑀲𑁆𑀲 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀤𑀝𑁆𑀞𑀼𑀓𑀸𑀫𑁄 𑀕𑀢𑀝𑁆𑀞𑀸𑀦𑀁 𑀅𑀚𑀸𑀦𑀦𑁆𑀢𑁄 𑀅𑀦𑀼𑀯𑀺𑀘𑀸𑀭𑀸𑀧𑁂𑀢𑁆𑀯𑀸 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀯𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀔𑀦𑁆𑀥𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀢𑀺𑀧𑀬𑁂𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀅𑀲𑁆𑀲𑀫𑀧𑀤𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.
𑀢𑀲𑁆𑀫𑀺𑀁 𑀔𑀡𑁂 𑀲𑀗𑁆𑀔𑀧𑀸𑀮𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀲𑁄 𑀢𑀁 𑀭𑀸𑀚𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀇𑀲𑀺𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀭𑀸𑀚𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑀢𑀭𑀭𑀸𑀚𑀸 𑀦𑀸𑀫𑁂𑀲 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺. 𑀢𑀸𑀢, 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸 𑀦𑀸𑀫𑁂𑀲𑁄𑀢𑀺. 𑀲𑁄 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀦𑀸𑀕𑀪𑀯𑀦𑁂 𑀮𑁄𑀪𑀁 𑀓𑀢𑁆𑀯𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀧𑀺𑀢𑀼 𑀪𑀺𑀓𑁆𑀔𑀸𑀳𑀸𑀭𑀁 𑀦𑀺𑀩𑀤𑁆𑀥𑀁 𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀕𑀦𑁆𑀢𑁆𑀯𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀗𑁆𑀔𑁄𑀪𑁂𑀦𑁆𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀦𑀸𑀕𑀪𑀯𑀦𑀁 𑀧𑀢𑁆𑀣𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀦𑀸𑀕𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸 𑀅𑀳𑁄𑀲𑀺 ¶ . 𑀲𑁄 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀬𑁄𑀦𑀺𑀁 𑀧𑀢𑁆𑀣𑁂𑀦𑁆𑀢𑁄 ¶ 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺. 𑀅𑀣𑀲𑁆𑀲 𑀦𑀸𑀕𑀪𑀯𑀦𑁂 𑀯𑀲𑀦𑁆𑀢𑀲𑁆𑀲 𑀉𑀧𑁄𑀲𑀣𑀯𑀸𑀲𑁄 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀡𑁆𑀡𑀯𑁂𑀡𑁆𑀡𑀸𑀬 𑀦𑀤𑀺𑀬𑀸 𑀅𑀯𑀺𑀤𑀽𑀭𑁂 𑀫𑀳𑀸𑀫𑀕𑁆𑀕𑀲𑁆𑀲 𑀘 𑀏𑀓𑀧𑀤𑀺𑀓𑀫𑀕𑁆𑀕𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑀁 𑀯𑀫𑁆𑀫𑀺𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 ‘‘𑀫𑀫 𑀘𑀫𑁆𑀫𑀫𑀁𑀲𑀸𑀤𑀻𑀳𑀺 𑀅𑀢𑁆𑀣𑀺𑀓𑀸 𑀘𑀫𑁆𑀫𑀫𑀁𑀲𑀸𑀤𑀻𑀦𑀺 𑀳𑀭𑀦𑁆𑀢𑀽’’𑀢𑀺 𑀅𑀢𑁆𑀢𑀸𑀦𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀦𑀺𑀧𑀦𑁆𑀦𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀯𑀲𑀺𑀢𑁆𑀯𑀸 𑀧𑀸𑀝𑀺𑀧𑀤𑁂 𑀦𑀸𑀕𑀪𑀯𑀦𑀁 𑀕𑀘𑁆𑀙𑀢𑀺.
𑀢𑀲𑁆𑀫𑀺𑀁 ¶ 𑀏𑀓𑀤𑀺𑀯𑀲𑀁 𑀏𑀯𑀁 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀺𑀦𑁄 𑀲𑁄𑀴𑀲 𑀚𑀦𑀸 ‘‘𑀫𑀁𑀲𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀯𑀼𑀥𑀳𑀢𑁆𑀣𑀸 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑀸 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸 𑀢𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀅𑀚𑁆𑀚 𑀕𑁄𑀥𑀸𑀧𑁄𑀢𑀓𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸, 𑀇𑀫𑀁 𑀦𑀸𑀕𑀭𑀸𑀚𑀸𑀦𑀁 𑀯𑀥𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸 𑀔𑁄 𑀧𑀦𑁂𑀲 𑀕𑀬𑁆𑀳𑀫𑀸𑀦𑁄 𑀧𑀮𑀸𑀬𑁂𑀬𑁆𑀬, 𑀬𑀣𑀸𑀦𑀺𑀧𑀦𑁆𑀦𑀫𑁂𑀯 𑀢𑀁 𑀪𑁄𑀕𑁂𑀲𑀼 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀽𑀮𑀸𑀦𑀺 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑀁 𑀫𑀳𑀦𑁆𑀢𑀁 𑀏𑀓𑀤𑁄𑀡𑀺𑀓𑀦𑀸𑀯𑀧𑁆𑀧𑀫𑀸𑀡𑀁 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀲𑀼𑀫𑀦𑀧𑀼𑀧𑁆𑀨𑀤𑀸𑀫𑀁 𑀯𑀺𑀬 𑀚𑀺𑀜𑁆𑀚𑀼𑀓𑀨𑀮𑀲𑀦𑁆𑀦𑀺𑀪𑁂𑀳𑀺 𑀅𑀓𑁆𑀔𑀻𑀳𑀺 𑀚𑀬𑀲𑀼𑀫𑀦𑀧𑀼𑀧𑁆𑀨𑀲𑀤𑀺𑀲𑁂𑀦 𑀘 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑀁 𑀅𑀢𑀺𑀯𑀺𑀬 𑀲𑁄𑀪𑀢𑀺. 𑀲𑁄 𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀚𑀦𑀸𑀦𑀁 𑀧𑀤𑀲𑀤𑁆𑀤𑁂𑀦 𑀪𑁄𑀕𑀦𑁆𑀢𑀭𑀢𑁄 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀭𑀢𑁆𑀢𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀢𑁂 𑀲𑀽𑀮𑀳𑀢𑁆𑀣𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀅𑀳𑀁 𑀅𑀢𑁆𑀢𑀸𑀦𑀁 𑀤𑀸𑀦𑀫𑀼𑀔𑁂 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀇𑀫𑁂 𑀫𑀫 𑀲𑀭𑀻𑀭𑀁 𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀭𑁄𑀦𑁆𑀢𑁂 𑀓𑁄𑀥𑀯𑀲𑁂𑀦 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀮𑀪𑁂𑀤𑀪𑀬𑁂𑀦 𑀤𑀴𑁆𑀳𑀁 𑀅𑀥𑀺𑀝𑁆𑀞𑀸𑀬 ¶ 𑀲𑀻𑀲𑀁 𑀪𑁄𑀕𑀦𑁆𑀢𑀭𑁂𑀬𑁂𑀯 𑀧𑀯𑁂𑀲𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀢𑁂 𑀉𑀧𑀕𑀦𑁆𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀸 𑀪𑀽𑀫𑀺𑀬𑀁 𑀧𑁄𑀣𑁂𑀢𑁆𑀯𑀸 𑀢𑀺𑀔𑀺𑀡𑀲𑀽𑀮𑁂𑀳𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀺𑀚𑁆𑀛𑀺𑀢𑁆𑀯𑀸 𑀲𑀓𑀡𑁆𑀝𑀓𑀓𑀸𑀴𑀯𑁂𑀢𑁆𑀢𑀬𑀝𑁆𑀞𑀺𑀬𑁄 𑀧𑀳𑀸𑀭𑀫𑀼𑀔𑁂𑀳𑀺 𑀧𑀯𑁂𑀲𑁂𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀓𑀸𑀚𑁂𑀦𑀸𑀤𑀸𑀬 𑀫𑀳𑀸𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀫𑀳𑀸𑀲𑀢𑁆𑀢𑁄 𑀲𑀽𑀮𑁂𑀳𑀺 𑀯𑀺𑀚𑁆𑀛𑀦𑀢𑁄 𑀧𑀝𑁆𑀞𑀸𑀬 𑀏𑀓𑀝𑁆𑀞𑀸𑀦𑁂𑀧𑀺 𑀓𑁄𑀥𑀯𑀲𑁂𑀦 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀢𑁂 𑀦 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀅𑀝𑁆𑀞𑀳𑀺 𑀓𑀸𑀚𑁂𑀳𑀺 𑀆𑀤𑀸𑀬 𑀦𑀻𑀬𑀫𑀸𑀦𑀲𑁆𑀲 𑀲𑀻𑀲𑀁 𑀑𑀮𑀫𑁆𑀩𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀳𑀭𑀺. 𑀅𑀣 𑀦𑀁 ‘‘𑀲𑀻𑀲𑀫𑀲𑁆𑀲 𑀑𑀮𑀫𑁆𑀩𑀢𑀻’’𑀢𑀺 𑀫𑀳𑀸𑀫𑀕𑁆𑀕𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀭𑀼𑀡𑀲𑀽𑀮𑁂𑀦 𑀦𑀸𑀲𑀸𑀧𑀼𑀝𑀁 𑀯𑀺𑀚𑁆𑀛𑀺𑀢𑁆𑀯𑀸 𑀭𑀚𑁆𑀚𑀼𑀓𑀁 𑀧𑀯𑁂𑀲𑁂𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀚𑀓𑁄𑀝𑀺𑀬𑀁 𑀮𑀕𑁆𑀕𑀺𑀢𑁆𑀯𑀸 𑀧𑀼𑀦𑀧𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼.
𑀢𑀲𑁆𑀫𑀺𑀁 𑀔𑀡𑁂 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀦𑀕𑀭𑀯𑀸𑀲𑀻 𑀆𑀴𑀸𑀭𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀆𑀤𑀸𑀬 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑁂 𑀪𑁄𑀚𑀧𑀼𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑀁 𑀢𑀣𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀲𑁄𑀴𑀲𑀦𑁆𑀦𑀫𑁆𑀧𑀺 𑀲𑁄𑀴𑀲𑀳𑀺 𑀯𑀸𑀳𑀕𑁄𑀡𑁂𑀳𑀺 𑀲𑀤𑁆𑀥𑀺𑀁 𑀧𑀲𑀢𑀁 𑀧𑀲𑀢𑀁 𑀲𑀼𑀯𑀡𑁆𑀡𑀫𑀸𑀲𑀓𑁂 𑀲𑀩𑁆𑀩𑁂𑀲𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 ¶ 𑀪𑀭𑀺𑀬𑀸𑀦𑀫𑁆𑀧𑀺 𑀦𑁂𑀲𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀅𑀣 𑀲𑁄 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 ¶ 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀴𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀕𑀪𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀻𑀳𑀺 𑀦𑀸𑀕𑀓𑀜𑁆𑀜𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀳𑀦𑁆𑀢𑀫𑀲𑁆𑀲 𑀬𑀲𑀁 𑀤𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀆𑀴𑀸𑀭𑁄 𑀦𑀸𑀕𑀪𑀯𑀦𑁂 𑀏𑀓𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀤𑀺𑀩𑁆𑀩𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀇𑀘𑁆𑀙𑀸𑀫𑀳𑀁, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 𑀦𑀸𑀕𑀭𑀸𑀚𑀲𑁆𑀲 𑀓𑀣𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀦𑀸𑀕𑀪𑀯𑀦𑀢𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀬 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 ¶ 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀯𑀦𑁆𑀤𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀅𑀭𑀺𑀬𑀸𑀯𑀓𑀸𑀲𑁄𑀲𑀺 𑀧𑀲𑀦𑁆𑀦𑀦𑁂𑀢𑁆𑀢𑁄, 𑀫𑀜𑁆𑀜𑁂 𑀪𑀯𑀁 𑀧𑀩𑁆𑀩𑀚𑀺𑀢𑁄 𑀓𑀼𑀮𑀫𑁆𑀳𑀸;
𑀓𑀣𑀁 𑀦𑀼 𑀯𑀺𑀢𑁆𑀢𑀸𑀦𑀺 𑀧𑀳𑀸𑀬 𑀪𑁄𑀕𑁂, 𑀧𑀩𑁆𑀩𑀚𑀺 𑀦𑀺𑀓𑁆𑀔𑀫𑁆𑀫 𑀖𑀭𑀸 𑀲𑀧𑀜𑁆𑀜𑀸’’𑀢𑀺.
𑀢𑀢𑁆𑀣 𑀅𑀭𑀺𑀬𑀸𑀯𑀓𑀸𑀲𑁄𑀲𑀻𑀢𑀺 𑀦𑀺𑀤𑁆𑀤𑁄𑀲𑀲𑀼𑀦𑁆𑀤𑀭𑀲𑀭𑀻𑀭𑀸𑀯𑀓𑀸𑀲𑁄𑀲𑀺, 𑀅𑀪𑀺𑀭𑀽𑀧𑁄𑀲𑀻𑀢𑀺 𑀅𑀢𑁆𑀣𑁄. 𑀧𑀲𑀦𑁆𑀦𑀦𑁂𑀢𑁆𑀢𑁄𑀢𑀺 𑀧𑀜𑁆𑀘𑀳𑀺 𑀧𑀲𑀸𑀤𑁂𑀳𑀺 𑀬𑀼𑀢𑁆𑀢𑀦𑁂𑀢𑁆𑀢𑁄. 𑀓𑀼𑀮𑀫𑁆𑀳𑀸𑀢𑀺 𑀔𑀢𑁆𑀢𑀺𑀬𑀓𑀼𑀮𑀸 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀯𑀸 𑀲𑁂𑀝𑁆𑀞𑀺𑀓𑀼𑀮𑀸 𑀯𑀸 𑀧𑀩𑁆𑀩𑀚𑀺𑀢𑁄𑀲𑀻𑀢𑀺 𑀫𑀜𑁆𑀜𑀸𑀫𑀺. 𑀓𑀣𑀁 𑀦𑀽𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀓𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀥𑀦𑀜𑁆𑀘 𑀉𑀧𑀪𑁄𑀕𑁂 𑀘 𑀧𑀳𑀸𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀲𑀺 𑀲𑀧𑀜𑁆𑀜 𑀧𑀡𑁆𑀟𑀺𑀢𑀧𑀼𑀭𑀺𑀲𑀸𑀢𑀺 𑀧𑀼𑀘𑁆𑀙𑀢𑀺.
𑀢𑀢𑁄 𑀧𑀭𑀁 𑀢𑀸𑀧𑀲𑀲𑁆𑀲 𑀘 𑀭𑀜𑁆𑀜𑁄 𑀘 𑀯𑀘𑀦𑀧𑁆𑀧𑀝𑀺𑀯𑀘𑀦𑀯𑀲𑁂𑀦 𑀕𑀸𑀣𑀸𑀦𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋
‘‘𑀲𑀬𑀁 𑀯𑀺𑀫𑀸𑀦𑀁 𑀦𑀭𑀤𑁂𑀯 𑀤𑀺𑀲𑁆𑀯𑀸, 𑀫𑀳𑀸𑀦𑀼𑀪𑀸𑀯𑀲𑁆𑀲 𑀫𑀳𑁄𑀭𑀕𑀲𑁆𑀲;
𑀤𑀺𑀲𑁆𑀯𑀸𑀦 𑀧𑀼𑀜𑁆𑀜𑀸𑀦 𑀫𑀳𑀸𑀯𑀺𑀧𑀸𑀓𑀁, 𑀲𑀤𑁆𑀥𑀸𑀬𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚.
‘‘𑀦 ¶ 𑀓𑀸𑀫𑀓𑀸𑀫𑀸 𑀦 𑀪𑀬𑀸 𑀦 𑀤𑁄𑀲𑀸, 𑀯𑀸𑀘𑀁 𑀫𑀼𑀲𑀸 𑀧𑀩𑁆𑀩𑀚𑀺𑀢𑀸 𑀪𑀡𑀦𑁆𑀢𑀺;
𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀲𑀼𑀢𑁆𑀯𑀸𑀦 𑀫𑁂 𑀚𑀸𑀬𑀺𑀳𑀺𑀢𑀺𑀧𑁆𑀧𑀲𑀸𑀤𑁄.
‘‘𑀯𑀸𑀡𑀺𑀚𑁆𑀚 𑀭𑀝𑁆𑀞𑀸𑀥𑀺𑀧 𑀕𑀘𑁆𑀙𑀫𑀸𑀦𑁄, 𑀧𑀣𑁂 𑀅𑀤𑁆𑀤𑀲𑀸𑀲𑀺𑀫𑁆𑀳𑀺 𑀪𑁄𑀚𑀧𑀼𑀢𑁆𑀢𑁂;
𑀧𑀯𑀟𑁆𑀠𑀓𑀸𑀬𑀁 𑀉𑀭𑀕𑀁 𑀫𑀳𑀦𑁆𑀢𑀁, 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂 𑀧𑀫𑁄𑀤𑀫𑀸𑀦𑁂.
‘‘𑀲𑁄𑀳𑀁 ¶ 𑀲𑀫𑀸𑀕𑀫𑁆𑀫 𑀚𑀦𑀺𑀦𑁆𑀤 𑀢𑁂𑀳𑀺, 𑀧𑀳𑀝𑁆𑀞𑀮𑁄𑀫𑁄 𑀅𑀯𑀘𑀫𑁆𑀳𑀺 𑀪𑀻𑀢𑁄;
𑀓𑀼𑀳𑀺𑀁 𑀅𑀬𑀁 𑀦𑀻𑀬𑀢𑀺 𑀪𑀻𑀫𑀓𑀸𑀬𑁄, 𑀦𑀸𑀕𑁂𑀦 𑀓𑀺𑀁 𑀓𑀸𑀳𑀣 𑀪𑁄𑀚𑀧𑀼𑀢𑁆𑀢𑀸.
‘‘𑀦𑀸𑀕𑁄 ¶ 𑀅𑀬𑀁 𑀦𑀻𑀬𑀢𑀺 𑀪𑁄𑀚𑀦𑀢𑁆𑀣𑀸, 𑀧𑀯𑀟𑁆𑀠𑀓𑀸𑀬𑁄 𑀉𑀭𑀕𑁄 𑀫𑀳𑀦𑁆𑀢𑁄;
𑀲𑀸𑀤𑀼𑀜𑁆𑀘 𑀣𑀽𑀮𑀜𑁆𑀘 𑀫𑀼𑀤𑀼𑀜𑁆𑀘 𑀫𑀁𑀲𑀁, 𑀦 𑀢𑁆𑀯𑀁 𑀭𑀲𑀜𑁆𑀜𑀸𑀲𑀺 𑀯𑀺𑀤𑁂𑀳𑀧𑀼𑀢𑁆𑀢.
‘‘𑀇𑀢𑁄 𑀫𑀬𑀁 𑀕𑀦𑁆𑀢𑁆𑀯𑀸 𑀲𑀓𑀁 𑀦𑀺𑀓𑁂𑀢𑀁, 𑀆𑀤𑀸𑀬 𑀲𑀢𑁆𑀣𑀸𑀦𑀺 𑀯𑀺𑀓𑁄𑀧𑀬𑀺𑀢𑁆𑀯𑀸;
𑀫𑀁𑀲𑀸𑀦𑀺 𑀪𑁄𑀓𑁆𑀔𑀸𑀫 𑀧𑀫𑁄𑀤𑀫𑀸𑀦𑀸, 𑀫𑀬𑀜𑁆𑀳𑀺 𑀯𑁂 𑀲𑀢𑁆𑀢𑀯𑁄 𑀧𑀦𑁆𑀦𑀕𑀸𑀦𑀁.
‘‘𑀲𑀘𑁂 𑀅𑀬𑀁 𑀦𑀻𑀬𑀢𑀺 𑀪𑁄𑀚𑀦𑀢𑁆𑀣𑀸, 𑀧𑀯𑀟𑁆𑀠𑀓𑀸𑀬𑁄 𑀉𑀭𑀕𑁄 𑀫𑀳𑀦𑁆𑀢𑁄;
𑀤𑀤𑀸𑀫𑀺 𑀯𑁄 𑀩𑀮𑀺𑀩𑀤𑁆𑀤𑀸𑀦𑀺 𑀲𑁄𑀴𑀲, 𑀦𑀸𑀕𑀁 𑀇𑀫𑀁 𑀫𑀼𑀜𑁆𑀘𑀣 𑀩𑀦𑁆𑀥𑀦𑀲𑁆𑀫𑀸.
‘‘𑀅𑀤𑁆𑀥𑀸 𑀳𑀺 𑀦𑁄 𑀪𑀓𑁆𑀔𑁄 𑀅𑀬𑀁 𑀫𑀦𑀸𑀧𑁄, 𑀩𑀳𑀽 𑀘 𑀦𑁄 𑀉𑀭𑀕𑀸 𑀪𑀼𑀢𑁆𑀢𑀧𑀼𑀩𑁆𑀩𑀸;
𑀓𑀭𑁄𑀫 𑀢𑁂 𑀢𑀁 𑀯𑀘𑀦𑀁 𑀅𑀴𑀸𑀭, 𑀫𑀺𑀢𑁆𑀢𑀜𑁆𑀘 𑀦𑁄 𑀳𑁄𑀳𑀺 𑀯𑀺𑀤𑁂𑀳𑀧𑀼𑀢𑁆𑀢.
‘‘𑀢𑀤𑀸𑀲𑁆𑀲𑀼 ¶ 𑀢𑁂 𑀩𑀦𑁆𑀥𑀦𑀸 𑀫𑁄𑀘𑀬𑀺𑀁𑀲𑀼, 𑀬𑀁 𑀦𑀢𑁆𑀣𑀼𑀢𑁄 𑀧𑀝𑀺𑀫𑁄𑀓𑁆𑀓𑀲𑁆𑀲 𑀧𑀸𑀲𑁂;
𑀫𑀼𑀢𑁆𑀢𑁄 𑀘 𑀲𑁄 𑀩𑀦𑁆𑀥𑀦𑀸 𑀦𑀸𑀕𑀭𑀸𑀚𑀸, 𑀧𑀓𑁆𑀓𑀸𑀫𑀺 𑀧𑀸𑀘𑀻𑀦𑀫𑀼𑀔𑁄 𑀫𑀼𑀳𑀼𑀢𑁆𑀢𑀁.
‘‘𑀕𑀦𑁆𑀢𑁆𑀯𑀸𑀦 𑀧𑀸𑀘𑀻𑀦𑀫𑀼𑀔𑁄 𑀫𑀼𑀳𑀼𑀢𑁆𑀢𑀁, 𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀧𑀮𑁄𑀓𑀬𑀻 𑀫𑀁;
𑀢𑀤𑀸𑀲𑁆𑀲𑀳𑀁 𑀧𑀺𑀝𑁆𑀞𑀺𑀢𑁄 𑀅𑀦𑁆𑀯𑀕𑀘𑁆𑀙𑀺𑀁, 𑀤𑀲𑀗𑁆𑀕𑀼𑀮𑀺𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸.
‘‘𑀕𑀘𑁆𑀙𑁂𑀯 𑀔𑁄 𑀢𑁆𑀯𑀁 𑀢𑀭𑀫𑀸𑀦𑀭𑀽𑀧𑁄, 𑀫𑀸 𑀢𑀁 𑀅𑀫𑀺𑀢𑁆𑀢𑀸 𑀧𑀼𑀦𑀭𑀕𑁆𑀕𑀳𑁂𑀲𑀼𑀁;
𑀤𑀼𑀓𑁆𑀔𑁄 𑀳𑀺 𑀮𑀼𑀤𑁆𑀤𑁂𑀳𑀺 𑀧𑀼𑀦𑀸 𑀲𑀫𑀸𑀕𑀫𑁄, 𑀅𑀤𑀲𑁆𑀲𑀦𑀁 𑀪𑁄𑀚𑀧𑀼𑀢𑁆𑀢𑀸𑀦 𑀕𑀘𑁆𑀙.
‘‘𑀅𑀕𑀫𑀸𑀲𑀺 𑀲𑁄 𑀭𑀳𑀤𑀁 𑀯𑀺𑀧𑁆𑀧𑀲𑀦𑁆𑀦𑀁, 𑀦𑀻𑀮𑁄𑀪𑀸𑀲𑀁 𑀭𑀫𑀡𑀻𑀬𑀁 𑀲𑀼𑀢𑀺𑀢𑁆𑀣𑀁;
𑀲𑀫𑁄𑀢𑀢𑀁 ¶ 𑀚𑀫𑁆𑀩𑀼𑀳𑀺 𑀯𑁂𑀢𑀲𑀸𑀳𑀺, 𑀧𑀸𑀯𑁂𑀓𑁆𑀔𑀺 𑀦𑀺𑀢𑁆𑀢𑀺𑀡𑁆𑀡𑀪𑀬𑁄 𑀧𑀢𑀻𑀢𑁄.
‘‘𑀲𑁄 𑀢𑀁 𑀧𑀯𑀺𑀲𑁆𑀲 𑀦𑀘𑀺𑀭𑀲𑁆𑀲 𑀦𑀸𑀕𑁄, 𑀤𑀺𑀩𑁆𑀩𑁂𑀦 𑀫𑁂 𑀧𑀸𑀢𑀼𑀭𑀳𑀽 𑀚𑀦𑀺𑀦𑁆𑀤;
𑀉𑀧𑀝𑁆𑀞𑀳𑀻 𑀫𑀁 𑀧𑀺𑀢𑀭𑀁𑀯 𑀧𑀼𑀢𑁆𑀢𑁄, 𑀳𑀤𑀬𑀗𑁆𑀕𑀫𑀁 𑀓𑀡𑁆𑀡𑀲𑀼𑀔𑀁 𑀪𑀡𑀦𑁆𑀢𑁄.
‘‘𑀢𑁆𑀯𑀁 ¶ 𑀫𑁂𑀲𑀺 𑀫𑀸𑀢𑀸 𑀘 𑀧𑀺𑀢𑀸 𑀅𑀴𑀸𑀭, 𑀅𑀩𑁆𑀪𑀦𑁆𑀢𑀭𑁄 𑀧𑀸𑀡𑀤𑀤𑁄 𑀲𑀳𑀸𑀬𑁄;
𑀲𑀓𑀜𑁆𑀘 𑀇𑀤𑁆𑀥𑀺𑀁 𑀧𑀝𑀺𑀮𑀸𑀪𑀓𑁄𑀲𑁆𑀫𑀺, 𑀅𑀴𑀸𑀭 𑀧𑀲𑁆𑀲 𑀫𑁂 𑀦𑀺𑀯𑁂𑀲𑀦𑀸𑀦𑀺;
𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀫𑀲𑀓𑁆𑀓𑀲𑀸𑀭𑀁 𑀯𑀺𑀬 𑀯𑀸𑀲𑀯𑀲𑁆𑀲𑀸’’𑀢𑀺.
𑀢𑀢𑁆𑀣 𑀯𑀺𑀫𑀸𑀦𑀦𑁆𑀢𑀺 𑀲𑀗𑁆𑀔𑀧𑀸𑀮𑀦𑀸𑀕𑀭𑀜𑁆𑀜𑁄 𑀅𑀦𑁂𑀓𑀲𑀢𑀦𑀸𑀝𑀓𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀓𑀜𑁆𑀘𑀦𑀫𑀡𑀺𑀯𑀺𑀫𑀸𑀦𑀁. 𑀧𑀼𑀜𑁆𑀜𑀸𑀦𑀦𑁆𑀢𑀺 𑀢𑁂𑀦 𑀓𑀢𑀧𑀼𑀜𑁆𑀜𑀸𑀦𑀁 𑀫𑀳𑀦𑁆𑀢𑀁 𑀯𑀺𑀧𑀸𑀓𑀁 𑀤𑀺𑀲𑁆𑀯𑀸 𑀓𑀫𑁆𑀫𑀜𑁆𑀘 ¶ 𑀨𑀮𑀜𑁆𑀘 𑀧𑀭𑀮𑁄𑀓𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀧𑀯𑀢𑁆𑀢𑀸𑀬 𑀲𑀤𑁆𑀥𑀸𑀬 𑀅𑀳𑀁 𑀧𑀩𑁆𑀩𑀚𑀺𑀢𑁄. 𑀦 𑀓𑀸𑀫𑀓𑀸𑀫𑀸𑀢𑀺 𑀦 𑀯𑀢𑁆𑀣𑀼𑀓𑀸𑀫𑁂𑀦𑀧𑀺 𑀪𑀬𑁂𑀦𑀧𑀺 𑀤𑁄𑀲𑁂𑀦𑀧𑀺 𑀫𑀼𑀲𑀸 𑀪𑀡𑀦𑁆𑀢𑀺. 𑀚𑀸𑀬𑀺𑀳𑀺𑀢𑀻𑀢𑀺, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀬𑁆𑀳𑀫𑁆𑀧𑀺 𑀧𑀲𑀸𑀤𑁄 𑀲𑁄𑀫𑀦𑀲𑁆𑀲𑀁 𑀚𑀸𑀬𑀺𑀲𑁆𑀲𑀢𑀺. 𑀯𑀸𑀡𑀺𑀚𑁆𑀚𑀦𑁆𑀢𑀺 𑀯𑀸𑀡𑀺𑀚𑁆𑀚𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀦𑁆𑀢𑁄. 𑀧𑀣𑁂 𑀅𑀤𑁆𑀤𑀲𑀸𑀲𑀺𑀫𑁆𑀳𑀻𑀢𑀺 𑀧𑀜𑁆𑀘𑀦𑁆𑀦𑀁 𑀲𑀓𑀝𑀲𑀢𑀸𑀦𑀁 𑀧𑀼𑀭𑀢𑁄 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀫𑀳𑀸𑀫𑀕𑁆𑀕𑁂 𑀚𑀦𑀧𑀤𑀫𑀦𑀼𑀲𑁆𑀲𑁂 𑀅𑀤𑁆𑀤𑀲𑀁. 𑀧𑀯𑀟𑁆𑀠𑀓𑀸𑀬𑀦𑁆𑀢𑀺 𑀯𑀟𑁆𑀠𑀺𑀢𑀓𑀸𑀬𑀁. 𑀆𑀤𑀸𑀬𑀸𑀢𑀺 𑀅𑀝𑁆𑀞𑀳𑀺 𑀓𑀸𑀚𑁂𑀳𑀺 𑀕𑀳𑁂𑀢𑁆𑀯𑀸. 𑀅𑀯𑀘𑀫𑁆𑀳𑀻𑀢𑀺 𑀅𑀪𑀸𑀲𑀺𑀁. 𑀪𑀻𑀫𑀓𑀸𑀬𑁄𑀢𑀺 𑀪𑀬𑀚𑀦𑀓𑀓𑀸𑀬𑁄. 𑀪𑁄𑀚𑀧𑀼𑀢𑁆𑀢𑀸𑀢𑀺 𑀮𑀼𑀤𑁆𑀤𑀧𑀼𑀢𑁆𑀢𑀓𑁂 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦𑀸𑀮𑀧𑀢𑀺. 𑀯𑀺𑀤𑁂𑀳𑀧𑀼𑀢𑁆𑀢𑀸𑀢𑀺 𑀯𑀺𑀤𑁂𑀳𑀭𑀝𑁆𑀞𑀯𑀸𑀲𑀺𑀢𑀸𑀬 𑀆𑀴𑀸𑀭𑀁 𑀆𑀮𑀧𑀺𑀁𑀲𑀼. 𑀯𑀺𑀓𑁄𑀧𑀬𑀺𑀢𑁆𑀯𑀸𑀢𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀫𑀬𑀜𑁆𑀳𑀺 𑀯𑁄 𑀲𑀢𑁆𑀢𑀯𑁄𑀢𑀺 𑀫𑀬𑀁 𑀧𑀦 𑀦𑀸𑀕𑀸𑀦𑀁 𑀯𑁂𑀭𑀺𑀦𑁄 𑀦𑀸𑀫. 𑀪𑁄𑀚𑀦𑀢𑁆𑀣𑀸𑀢𑀺 𑀪𑁄𑀚𑀦𑀢𑁆𑀣𑀸𑀬. 𑀫𑀺𑀢𑁆𑀢𑀜𑁆𑀘 𑀦𑁄 𑀳𑁄𑀳𑀻𑀢𑀺 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀫𑀺𑀢𑁆𑀢𑁄 𑀳𑁄𑀳𑀺, 𑀓𑀢𑀕𑀼𑀡𑀁 𑀚𑀸𑀦.
𑀢𑀤𑀸𑀲𑁆𑀲𑀼 𑀢𑁂𑀢𑀺, 𑀫𑀳𑀸𑀭𑀸𑀚, 𑀢𑁂𑀳𑀺 𑀪𑁄𑀚𑀧𑀼𑀢𑁆𑀢𑁂𑀳𑀺 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁 𑀢𑁂𑀲𑀁 𑀲𑁄𑀴𑀲 𑀯𑀸𑀳𑀕𑁄𑀡𑁂 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀧𑀲𑀢𑀁 𑀧𑀲𑀢𑀁 𑀲𑀼𑀯𑀡𑁆𑀡𑀫𑀸𑀲𑀓𑁂 𑀪𑀭𑀺𑀬𑀸𑀦𑀜𑁆𑀘 𑀦𑁂𑀲𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀁 𑀅𑀤𑀸𑀲𑀺𑀁, 𑀅𑀣 𑀢𑁂 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸𑀦𑀁 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑀸𑀬 𑀲𑀓𑀡𑁆𑀝𑀓𑀓𑀸𑀴𑀯𑁂𑀢𑁆𑀢𑀮𑀢𑀸𑀬 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀅𑀣𑀸𑀳𑀁 𑀦𑀸𑀕𑀭𑀸𑀚𑀸𑀦𑀁 𑀓𑀺𑀮𑀫𑀦𑁆𑀢𑀁 𑀤𑀺𑀲𑁆𑀯𑀸 𑀅𑀓𑀺𑀮𑀫𑁂𑀦𑁆𑀢𑁄𑀯 𑀅𑀲𑀺𑀦𑀸 𑀢𑀸 𑀮𑀢𑀸 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀭𑀓𑀸𑀦𑀁 𑀓𑀡𑁆𑀡𑀯𑁂𑀥𑀢𑁄 𑀯𑀝𑁆𑀝𑀺𑀦𑀻𑀳𑀭𑀡𑀦𑀺𑀬𑀸𑀫𑁂𑀦 𑀅𑀤𑀼𑀓𑁆𑀔𑀸𑀧𑁂𑀦𑁆𑀢𑁄 𑀲𑀡𑀺𑀓𑀁 𑀦𑀻𑀳𑀭𑀺𑀁, 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀪𑁄𑀚𑀧𑀼𑀢𑁆𑀢𑀸 𑀬𑀁 𑀩𑀦𑁆𑀥𑀦𑀁 𑀅𑀲𑁆𑀲 𑀦𑀢𑁆𑀣𑀼𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑀸𑀲𑁂 𑀧𑀝𑀺𑀫𑁄𑀓𑁆𑀓𑀁, 𑀢𑀲𑁆𑀫𑀸 𑀩𑀦𑁆𑀥𑀦𑀸 𑀢𑀁 ¶ 𑀉𑀭𑀕𑀁 𑀫𑁄𑀘𑀬𑀺𑀁𑀲𑀼. 𑀢𑀲𑁆𑀲 𑀦𑀸𑀲𑀢𑁄 𑀲𑀳 𑀧𑀸𑀲𑁂𑀦 𑀢𑀁 𑀭𑀚𑁆𑀚𑀼𑀓𑀁 𑀦𑀻𑀳𑀭𑀺𑀁𑀲𑀽𑀢𑀺 𑀤𑀻𑀧𑁂𑀢𑀺. 𑀇𑀢𑀺 𑀢𑁂 𑀉𑀭𑀕𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀬𑀁 𑀉𑀭𑀕𑁄 𑀤𑀼𑀩𑁆𑀩𑀮𑁄, 𑀫𑀢𑀓𑀸𑀮𑁂 𑀦𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀮𑀻𑀬𑀺𑀁𑀲𑀼.
𑀧𑀼𑀡𑁆𑀡𑁂𑀳𑀻𑀢𑀺 𑀲𑁄𑀧𑀺 𑀫𑀼𑀳𑀼𑀢𑁆𑀢𑀁 𑀧𑀸𑀘𑀻𑀦𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀫𑀁 𑀧𑀮𑁄𑀓𑀬𑀺. 𑀢𑀤𑀸𑀲𑁆𑀲𑀳𑀦𑁆𑀢𑀺 𑀢𑀤𑀸 𑀅𑀲𑁆𑀲 𑀅𑀳𑀁. 𑀕𑀘𑁆𑀙𑁂𑀯𑀸𑀢𑀺 𑀏𑀯𑀁 𑀢𑀁 𑀅𑀯𑀘𑀦𑁆𑀢𑀺 𑀯𑀤𑀢𑀺. 𑀭𑀳𑀤𑀦𑁆𑀢𑀺 𑀓𑀡𑁆𑀡𑀯𑁂𑀡𑁆𑀡𑀤𑀳𑀁. 𑀲𑀫𑁄𑀢𑀢𑀦𑁆𑀢𑀺 𑀉𑀪𑀬𑀢𑀻𑀭𑁂𑀲𑀼 𑀚𑀫𑁆𑀩𑀼𑀭𑀼𑀓𑁆𑀔𑀯𑁂𑀢𑀲𑀭𑀼𑀓𑁆𑀔𑁂𑀳𑀺 𑀑𑀢𑀢𑀁 𑀯𑀺𑀢𑀢𑀁. 𑀦𑀺𑀢𑁆𑀢𑀺𑀡𑁆𑀡𑀪𑀬𑁄 𑀧𑀢𑀻𑀢𑁄𑀢𑀺 𑀲𑁄 ¶ 𑀓𑀺𑀭 𑀢𑀁 𑀤𑀳𑀁 𑀧𑀯𑀺𑀲𑀦𑁆𑀢𑁄 𑀆𑀴𑀸𑀭𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀬𑀸𑀯 𑀦𑀗𑁆𑀕𑀼𑀝𑁆𑀞𑀸 𑀑𑀢𑀭𑀺, 𑀉𑀤𑀓𑁂 ¶ 𑀧𑀯𑀺𑀝𑁆𑀞𑀝𑁆𑀞𑀸𑀦𑀫𑁂𑀯𑀲𑁆𑀲 𑀦𑀺𑀩𑁆𑀪𑀬𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀦𑀺𑀢𑁆𑀢𑀺𑀡𑁆𑀡𑀪𑀬𑁄 𑀧𑀢𑀻𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀧𑀸𑀯𑁂𑀓𑁆𑀔𑀻𑀢𑀺. 𑀧𑀯𑀺𑀲𑁆𑀲𑀸𑀢𑀺 𑀧𑀯𑀺𑀲𑀺𑀢𑁆𑀯𑀸. 𑀤𑀺𑀩𑁆𑀩𑁂𑀦 𑀫𑁂𑀢𑀺 𑀦𑀸𑀕𑀪𑀯𑀦𑁂 𑀧𑀫𑀸𑀤𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀫𑀬𑀺 𑀓𑀡𑁆𑀡𑀯𑁂𑀡𑁆𑀡𑀢𑀻𑀭𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀤𑀺𑀩𑁆𑀩𑁂𑀦 𑀧𑀭𑀺𑀯𑀸𑀭𑁂𑀦 𑀫𑀫 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀉𑀧𑀝𑁆𑀞𑀳𑀻𑀢𑀺 𑀉𑀧𑀸𑀕𑀫𑀺. 𑀅𑀩𑁆𑀪𑀦𑁆𑀢𑀭𑁄𑀢𑀺 𑀳𑀤𑀬𑀫𑀁𑀲𑀲𑀤𑀺𑀲𑁄. 𑀢𑁆𑀯𑀁 𑀫𑀫 𑀩𑀳𑀼𑀧𑀓𑀸𑀭𑁄, 𑀲𑀓𑁆𑀓𑀸𑀭𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀧𑀲𑁆𑀲 𑀫𑁂 𑀦𑀺𑀯𑁂𑀲𑀦𑀸𑀦𑀻𑀢𑀺 𑀫𑀫 𑀦𑀸𑀕𑀪𑀯𑀦𑀁 𑀧𑀲𑁆𑀲. 𑀫𑀲𑀓𑁆𑀓𑀲𑀸𑀭𑀁 𑀯𑀺𑀬𑀸𑀢𑀺 𑀫𑀲𑀓𑁆𑀓𑀲𑀸𑀭𑁄 𑀯𑀼𑀘𑁆𑀘𑀢𑀺 𑀑𑀲𑀓𑁆𑀓𑀦𑀧𑀭𑀺𑀲𑀓𑁆𑀓𑀦𑀸𑀪𑀸𑀯𑁂𑀦 𑀖𑀦𑀲𑀸𑀭𑀢𑀸𑀬 𑀘 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀢𑀢𑁆𑀣 𑀫𑀸𑀧𑀺𑀢𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀲𑀦𑁆𑀥𑀸𑀬𑁂𑀯𑀫𑀸𑀳.
𑀫𑀳𑀸𑀭𑀸𑀚! 𑀏𑀯𑀁 𑀯𑀢𑁆𑀯𑀸 𑀲𑁄 𑀦𑀸𑀕𑀭𑀸𑀚𑀸 𑀉𑀢𑁆𑀢𑀭𑀺 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀁 𑀯𑀡𑁆𑀡𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀢𑀁 𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀅𑀲𑀓𑁆𑀔𑀭𑀸 𑀘𑁂𑀯 𑀫𑀼𑀤𑀽 𑀲𑀼𑀪𑀸 𑀘;
𑀦𑀻𑀘𑀢𑁆𑀢𑀺𑀡𑀸 𑀅𑀧𑁆𑀧𑀭𑀚𑀸 𑀘 𑀪𑀽𑀫𑀺, 𑀧𑀸𑀲𑀸𑀤𑀺𑀓𑀸 𑀬𑀢𑁆𑀣 𑀚𑀳𑀦𑁆𑀢𑀺 𑀲𑁄𑀓𑀁.
‘‘𑀅𑀦𑀸𑀯𑀓𑀼𑀮𑀸 𑀯𑁂𑀴𑀼𑀭𑀺𑀬𑀽𑀧𑀦𑀻𑀮𑀸, 𑀘𑀢𑀼𑀤𑁆𑀤𑀺𑀲𑀁 𑀅𑀫𑁆𑀩𑀯𑀦𑀁 𑀲𑀼𑀭𑀫𑁆𑀫𑀁;
𑀧𑀓𑁆𑀓𑀸 𑀘 𑀧𑁂𑀲𑀻 𑀘 𑀨𑀮𑀸 𑀲𑀼𑀨𑀼𑀮𑁆𑀮𑀸, 𑀦𑀺𑀘𑁆𑀘𑁄𑀢𑀼𑀓𑀸 𑀥𑀸𑀭𑀬𑀦𑁆𑀢𑀻 𑀨𑀮𑀸𑀦𑀻’’𑀢𑀺.
𑀢𑀢𑁆𑀣 𑀅𑀲𑀓𑁆𑀔𑀭𑀸𑀢𑀺 𑀬𑀸 𑀢𑀢𑁆𑀣 𑀪𑀽𑀫𑀺 𑀧𑀸𑀲𑀸𑀡𑀲𑀓𑁆𑀔𑀭𑀭𑀳𑀺𑀢𑀸 𑀫𑀼𑀤𑀼 𑀲𑀼𑀪𑀸 𑀓𑀜𑁆𑀘𑀦𑀭𑀚𑀢𑀫𑀡𑀺𑀫𑀬𑀸 𑀲𑀢𑁆𑀢𑀭𑀢𑀦𑀯𑀸𑀮𑀼𑀓𑀸𑀓𑀺𑀡𑁆𑀡𑀸. 𑀦𑀻𑀘𑀢𑁆𑀢𑀺𑀡𑀸𑀢𑀺 𑀇𑀦𑁆𑀤𑀕𑁄𑀧𑀓𑀧𑀺𑀝𑁆𑀞𑀺𑀲𑀤𑀺𑀲𑀯𑀡𑁆𑀡𑁂𑀳𑀺 𑀦𑀻𑀘𑀢𑀺𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀅𑀧𑁆𑀧𑀭𑀚𑀸𑀢𑀺 𑀧𑀁𑀲𑀼𑀭𑀳𑀺𑀢𑀸. 𑀬𑀢𑁆𑀣 𑀚𑀳𑀦𑁆𑀢𑀺 𑀲𑁄𑀓𑀦𑁆𑀢𑀺 𑀬𑀢𑁆𑀣 𑀧𑀯𑀺𑀝𑁆𑀞𑀫𑀢𑁆𑀢𑀸𑀯 𑀦𑀺𑀲𑁆𑀲𑁄𑀓𑀸 𑀳𑁄𑀦𑁆𑀢𑀺. 𑀅𑀦𑀸𑀯𑀓𑀼𑀮𑀸𑀢𑀺 ¶ 𑀦 𑀅𑀯𑀓𑀼𑀮𑀸 𑀅𑀔𑀸𑀡𑀼𑀫𑀸 𑀉𑀧𑀭𑀺 𑀉𑀓𑁆𑀓𑀼𑀮𑀯𑀺𑀓𑀼𑀮𑀪𑀸𑀯𑀭𑀳𑀺𑀢𑀸 𑀯𑀸 𑀲𑀫𑀲𑀡𑁆𑀞𑀺𑀢𑀸. 𑀯𑁂𑀴𑀼𑀭𑀺𑀬𑀽𑀧𑀦𑀻𑀮𑀸𑀢𑀺 𑀯𑁂𑀴𑀼𑀭𑀺𑀬𑁂𑀦 𑀉𑀧𑀦𑀻𑀮𑀸, 𑀢𑀲𑁆𑀫𑀺𑀁 𑀦𑀸𑀕𑀪𑀯𑀦𑁂 𑀯𑁂𑀴𑀼𑀭𑀺𑀬𑀫𑀬𑀸 𑀧𑀲𑀦𑁆𑀦𑀲𑀮𑀺𑀮𑀸 𑀦𑀻𑀮𑁄𑀪𑀸𑀲𑀸 𑀅𑀦𑁂𑀓𑀯𑀡𑁆𑀡𑀓𑀫𑀮𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸 𑀧𑁄𑀓𑁆𑀔𑀭𑀡𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀤𑁆𑀤𑀺𑀲𑀦𑁆𑀢𑀺 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼. 𑀧𑀓𑁆𑀓𑀸 𑀘𑀸𑀢𑀺 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀅𑀫𑁆𑀩𑀭𑀼𑀓𑁆𑀔𑀸 𑀧𑀓𑁆𑀓𑀨𑀮𑀸 𑀘 ¶ 𑀅𑀟𑁆𑀠𑀧𑀓𑁆𑀓𑀨𑀮𑀸 𑀘 𑀢𑀭𑀼𑀡𑀨𑀮𑀸 𑀘 𑀨𑀼𑀮𑁆𑀮𑀺𑀢𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑁄𑀢𑀼𑀓𑀸𑀢𑀺 𑀙𑀦𑁆𑀦𑀫𑁆𑀧𑀺 𑀉𑀢𑀽𑀦𑀁 𑀅𑀦𑀼𑀭𑀽𑀧𑁂𑀳𑀺 𑀧𑀼𑀧𑁆𑀨𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺.
𑀢𑁂𑀲𑀁 𑀯𑀦𑀸𑀦𑀁 𑀦𑀭𑀤𑁂𑀯 𑀫𑀚𑁆𑀛𑁂, 𑀦𑀺𑀯𑁂𑀲𑀦𑀁 𑀪𑀲𑁆𑀲𑀭𑀲𑀦𑁆𑀦𑀺𑀓𑀸𑀲𑀁;
𑀭𑀚𑀢𑀕𑁆𑀕𑀴𑀁 𑀲𑁄𑀯𑀡𑁆𑀡𑀫𑀬𑀁 𑀉𑀴𑀸𑀭𑀁, 𑀑𑀪𑀸𑀲𑀢𑀻 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.
‘‘𑀫𑀡𑀻𑀫𑀬𑀸 ¶ 𑀲𑁄𑀡𑁆𑀡𑀫𑀬𑀸 𑀉𑀴𑀸𑀭𑀸, 𑀅𑀦𑁂𑀓𑀘𑀺𑀢𑁆𑀢𑀸 𑀲𑀢𑀢𑀁 𑀲𑀼𑀦𑀺𑀫𑁆𑀫𑀺𑀢𑀸;
𑀧𑀭𑀺𑀧𑀽𑀭𑀸 𑀓𑀜𑁆𑀜𑀸𑀳𑀺 𑀅𑀮𑀗𑁆𑀓𑀢𑀸𑀳𑀺, 𑀲𑀼𑀯𑀡𑁆𑀡𑀓𑀸𑀬𑀽𑀭𑀥𑀭𑀸𑀳𑀺 𑀭𑀸𑀚.
‘‘𑀲𑁄 𑀲𑀗𑁆𑀔𑀧𑀸𑀮𑁄 𑀢𑀭𑀫𑀸𑀦𑀭𑀽𑀧𑁄, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀅𑀦𑁄𑀫𑀯𑀡𑁆𑀡𑁄;
𑀲𑀳𑀲𑁆𑀲𑀣𑀫𑁆𑀪𑀁 𑀅𑀢𑀼𑀮𑀸𑀦𑀼𑀪𑀸𑀯𑀁, 𑀬𑀢𑁆𑀣𑀲𑁆𑀲 𑀪𑀭𑀺𑀬𑀸 𑀫𑀳𑁂𑀲𑀻 𑀅𑀳𑁄𑀲𑀺.
‘‘𑀏𑀓𑀸 𑀘 𑀦𑀸𑀭𑀻 𑀢𑀭𑀫𑀸𑀦𑀭𑀽𑀧𑀸, 𑀆𑀤𑀸𑀬 𑀯𑁂𑀴𑀼𑀭𑀺𑀬𑀫𑀬𑀁 𑀫𑀳𑀕𑁆𑀖𑀁;
𑀲𑀼𑀪𑀁 𑀫𑀡𑀺𑀁 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀁, 𑀅𑀘𑁄𑀤𑀺𑀢𑀸 𑀆𑀲𑀦𑀫𑀩𑁆𑀪𑀺𑀳𑀸𑀲𑀺.
‘‘𑀢𑀢𑁄 𑀫𑀁 𑀉𑀭𑀕𑁄 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸, 𑀦𑀺𑀲𑀻𑀤𑀬𑀻 𑀧𑀸𑀫𑀼𑀔𑀆𑀲𑀦𑀲𑁆𑀫𑀺𑀁;
𑀇𑀤𑀫𑀸𑀲𑀦𑀁 𑀅𑀢𑁆𑀭 𑀪𑀯𑀁 𑀦𑀺𑀲𑀻𑀤𑀢𑀼, 𑀪𑀯𑀜𑁆𑀳𑀺 𑀫𑁂 𑀅𑀜𑁆𑀜𑀢𑀭𑁄 𑀕𑀭𑀽𑀦𑀁.
‘‘𑀅𑀜𑁆𑀜𑀸 𑀘 𑀦𑀸𑀭𑀻 𑀢𑀭𑀫𑀸𑀦𑀭𑀽𑀧𑀸, 𑀆𑀤𑀸𑀬 𑀯𑀸𑀭𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸;
𑀧𑀸𑀤𑀸𑀦𑀺 𑀧𑀓𑁆𑀔𑀸𑀮𑀬𑀻 𑀫𑁂 𑀚𑀦𑀺𑀦𑁆𑀤, 𑀪𑀭𑀺𑀬𑀸𑀯 𑀪𑀢𑁆𑀢𑀽 𑀧𑀢𑀺𑀦𑁄 𑀧𑀺𑀬𑀲𑁆𑀲.
‘‘𑀅𑀧𑀭𑀸 ¶ ¶ 𑀘 𑀦𑀸𑀭𑀻 𑀢𑀭𑀫𑀸𑀦𑀭𑀽𑀧𑀸, 𑀧𑀕𑁆𑀕𑀬𑁆𑀳 𑀲𑁄𑀯𑀡𑁆𑀡𑀫𑀬𑀸𑀬 𑀧𑀸𑀢𑀺𑀬𑀸;
𑀅𑀦𑁂𑀓𑀲𑀽𑀧𑀁 𑀯𑀺𑀯𑀺𑀥𑀁 𑀯𑀺𑀬𑀜𑁆𑀚𑀦𑀁, 𑀉𑀧𑀦𑀸𑀫𑀬𑀻 𑀪𑀢𑁆𑀢 𑀫𑀦𑀼𑀜𑁆𑀜𑀭𑀽𑀧𑀁.
‘‘𑀢𑀼𑀭𑀺𑀬𑁂𑀳𑀺 𑀫𑀁 𑀪𑀸𑀭𑀢 𑀪𑀼𑀢𑁆𑀢𑀯𑀦𑁆𑀢𑀁, 𑀉𑀧𑀝𑁆𑀞𑀳𑀼𑀁 𑀪𑀢𑁆𑀢𑀼 𑀫𑀦𑁄 𑀯𑀺𑀤𑀺𑀢𑁆𑀯𑀸;
𑀢𑀢𑀼𑀢𑁆𑀢𑀭𑀺𑀁 𑀫𑀁 𑀦𑀺𑀧𑀢𑀻 𑀫𑀳𑀦𑁆𑀢𑀁, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀅𑀦𑀧𑁆𑀧𑀓𑁂𑀳𑀻’’𑀢𑀺.
𑀢𑀢𑁆𑀣 𑀦𑀺𑀯𑁂𑀲𑀦𑀦𑁆𑀢𑀺 𑀧𑀸𑀲𑀸𑀤𑁄. 𑀪𑀲𑁆𑀲𑀭𑀲𑀦𑁆𑀦𑀺𑀓𑀸𑀲𑀦𑁆𑀢𑀺 𑀧𑀪𑀲𑁆𑀲𑀭𑀤𑀲𑁆𑀲𑀦𑀁. 𑀭𑀚𑀢𑀕𑁆𑀕𑀴𑀦𑁆𑀢𑀺 𑀭𑀚𑀢𑀤𑁆𑀯𑀸𑀭𑀓𑀯𑀸𑀝𑀁. 𑀫𑀡𑀻𑀫𑀬𑀸𑀢𑀺 𑀏𑀯𑀭𑀽𑀧𑀸 𑀢𑀢𑁆𑀣 𑀓𑀽𑀝𑀸𑀕𑀸𑀭𑀸 𑀘 𑀕𑀩𑁆𑀪𑀸 𑀘. 𑀧𑀭𑀺𑀧𑀽𑀭𑀸𑀢𑀺 𑀲𑀫𑁆𑀧𑀼𑀡𑁆𑀡𑀸. 𑀲𑁄 𑀲𑀗𑁆𑀔𑀧𑀸𑀮𑁄𑀢𑀺, 𑀫𑀳𑀸𑀭𑀸𑀚, 𑀅𑀳𑀁 𑀏𑀯𑀁 𑀢𑀲𑁆𑀫𑀺𑀁 𑀦𑀸𑀕𑀪𑀯𑀦𑀁 𑀯𑀡𑁆𑀡𑁂𑀦𑁆𑀢𑁂 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀅𑀳𑁄𑀲𑀺𑀁, 𑀅𑀣 𑀫𑀁 𑀢𑀢𑁆𑀣 𑀦𑁂𑀢𑁆𑀯𑀸 𑀲𑁄 𑀲𑀗𑁆𑀔𑀧𑀸𑀮𑁄 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀢𑀭𑀫𑀸𑀦𑁄 𑀯𑁂𑀴𑀼𑀭𑀺𑀬𑀣𑀫𑁆𑀪𑁂𑀳𑀺 𑀲𑀳𑀲𑁆𑀲𑀣𑀫𑁆𑀪𑀁 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀲𑁆𑀲 𑀫𑀳𑁂𑀲𑀻 𑀅𑀳𑁄𑀲𑀺, 𑀢𑀁 𑀞𑀸𑀦𑀁 𑀦𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀓𑀸 𑀘𑀸𑀢𑀺 𑀫𑀬𑀺 𑀧𑀸𑀲𑀸𑀤𑀁 𑀅𑀪𑀺𑀭𑀼𑀴𑁆𑀳𑁂 𑀏𑀓𑀸 𑀇𑀢𑁆𑀣𑀻 𑀅𑀜𑁆𑀜𑁂𑀳𑀺 𑀫𑀡𑀻𑀳𑀺 𑀚𑀸𑀢𑀺𑀫𑀳𑀦𑁆𑀢𑁂𑀳𑀺 𑀉𑀧𑁂𑀢𑀁 𑀲𑀼𑀪𑀁 𑀯𑁂𑀴𑀼𑀭𑀺𑀬𑀸𑀲𑀦𑀁 𑀢𑁂𑀦 𑀦𑀸𑀕𑀭𑀸𑀚𑁂𑀦 𑀅𑀯𑀼𑀢𑁆𑀢𑀸𑀯. 𑀅𑀩𑁆𑀪𑀺𑀳𑀸𑀲𑀻𑀢𑀺 𑀅𑀪𑀺𑀳𑀭𑀺, 𑀅𑀢𑁆𑀣𑀭𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀧𑀸𑀫𑀼𑀔𑀆𑀲𑀦𑀲𑁆𑀫𑀺𑀦𑁆𑀢𑀺 𑀧𑀫𑀼𑀔𑀸𑀲𑀦𑀲𑁆𑀫𑀺𑀁, 𑀉𑀢𑁆𑀢𑀫𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀕𑀭𑀽𑀦𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 ¶ 𑀫𑁂 𑀢𑁆𑀯𑀁 𑀅𑀜𑁆𑀜𑀢𑀭𑁄𑀢𑀺 𑀏𑀯𑀁 𑀯𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺. 𑀯𑀺𑀯𑀺𑀥𑀁 𑀯𑀺𑀬𑀜𑁆𑀚𑀦𑀦𑁆𑀢𑀺 𑀯𑀺𑀯𑀺𑀥𑀁 𑀩𑁆𑀬𑀜𑁆𑀚𑀦𑀁. 𑀪𑀢𑁆𑀢 𑀫𑀦𑀼𑀜𑁆𑀜𑀭𑀽𑀧𑀦𑁆𑀢𑀺 𑀪𑀢𑁆𑀢𑀁 𑀫𑀦𑀼𑀜𑁆𑀜𑀭𑀽𑀧𑀁. 𑀪𑀸𑀭𑀢𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀪𑀼𑀢𑁆𑀢𑀯𑀦𑁆𑀢𑀦𑁆𑀢𑀺 𑀪𑀼𑀢𑁆𑀢𑀸𑀯𑀺𑀁 𑀓𑀢𑀪𑀢𑁆𑀢𑀓𑀺𑀘𑁆𑀘𑀁. 𑀉𑀧𑀝𑁆𑀞𑀳𑀼𑀦𑁆𑀢𑀺 𑀅𑀦𑁂𑀓𑀲𑀢𑁂𑀳𑀺 𑀢𑀼𑀭𑀺𑀬𑁂𑀳𑀺 𑀕𑀦𑁆𑀥𑀩𑁆𑀩𑀁 𑀓𑀼𑀭𑀼𑀫𑀸𑀦𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀪𑀢𑁆𑀢𑀼 𑀫𑀦𑁄 𑀯𑀺𑀤𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑀢𑀺𑀦𑁄 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸. 𑀢𑀢𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀕𑀦𑁆𑀥𑀩𑁆𑀩𑀓𑀭𑀡𑀢𑁄 𑀉𑀢𑁆𑀢𑀭𑀺𑀁. 𑀫𑀁 𑀦𑀺𑀧𑀢𑀻𑀢𑀺 𑀲𑁄 𑀦𑀸𑀕𑀭𑀸𑀚𑀸 𑀫𑀁 𑀉𑀧𑀲𑀗𑁆𑀓𑀫𑀺. 𑀫𑀳𑀦𑁆𑀢𑀁 𑀤𑀺𑀩𑁆𑀩𑁂𑀳𑀻𑀢𑀺 𑀫𑀳𑀦𑁆𑀢𑁂𑀳𑀺 𑀉𑀴𑀸𑀭𑁂𑀳𑀺 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀢𑁂𑀳𑀺 𑀘 𑀅𑀦𑀧𑁆𑀧𑀓𑁂𑀳𑀺.
𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 𑀧𑀦 𑀕𑀸𑀣𑀫𑀸𑀳 𑁋
‘‘𑀪𑀭𑀺𑀬𑀸 𑀫𑀫𑁂𑀢𑀸 𑀢𑀺𑀲𑀢𑀸 𑀅𑀴𑀸𑀭, 𑀲𑀩𑁆𑀩𑀢𑁆𑀢𑀫𑀚𑁆𑀛𑀸 𑀧𑀤𑀼𑀫𑀼𑀢𑁆𑀢𑀭𑀸𑀪𑀸;
𑀅𑀴𑀸𑀭 𑀏𑀢𑀸𑀲𑁆𑀲𑀼 𑀢𑁂 𑀓𑀸𑀫𑀓𑀸𑀭𑀸, 𑀤𑀤𑀸𑀫𑀺 𑀢𑁂 𑀢𑀸 𑀧𑀭𑀺𑀘𑀸𑀭𑀬𑀲𑁆𑀲𑀽’’𑀢𑀺.
𑀢𑀢𑁆𑀣 ¶ 𑀲𑀩𑁆𑀩𑀢𑁆𑀢𑀫𑀚𑁆𑀛𑀸𑀢𑀺 𑀲𑀩𑁆𑀩𑀸 𑀅𑀢𑁆𑀢𑀫𑀚𑁆𑀛𑀸, 𑀧𑀸𑀡𑀺𑀦𑀸 𑀕𑀳𑀺𑀢𑀧𑁆𑀧𑀫𑀸𑀡𑀫𑀚𑁆𑀛𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀼𑀫𑀚𑁆𑀛𑀸’’𑀢𑀺 𑀧𑀸𑀞𑁄. 𑀧𑀤𑀼𑀫𑀼𑀢𑁆𑀢𑀭𑀸𑀪𑀸𑀢𑀺 ¶ 𑀧𑀤𑀼𑀫𑀯𑀡𑁆𑀡𑀉𑀢𑁆𑀢𑀭𑀸𑀪𑀸, 𑀧𑀤𑀼𑀫𑀯𑀡𑁆𑀡𑀉𑀢𑁆𑀢𑀭𑀘𑁆𑀙𑀯𑀺𑀬𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀘𑀸𑀭𑀬𑀲𑁆𑀲𑀽𑀢𑀺 𑀢𑀸 𑀅𑀢𑁆𑀢𑀦𑁄 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀓𑀭𑁄𑀳𑀻𑀢𑀺 𑀯𑀢𑁆𑀯𑀸 𑀢𑀻𑀳𑀺 𑀇𑀢𑁆𑀣𑀺𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀫𑀬𑁆𑀳𑀁 𑀅𑀤𑀸𑀲𑀺.
𑀲𑁄 𑀆𑀳 𑁋
‘‘𑀲𑀁𑀯𑀘𑁆𑀙𑀭𑀁 𑀤𑀺𑀩𑁆𑀩𑀭𑀲𑀸𑀦𑀼𑀪𑀼𑀢𑁆𑀯𑀸, 𑀢𑀤𑀸𑀲𑁆𑀲𑀼𑀳𑀁 𑀉𑀢𑁆𑀢𑀭𑀺𑀫𑀚𑁆𑀛𑀪𑀸𑀲𑀺𑀁;
𑀦𑀸𑀕𑀲𑁆𑀲𑀺𑀤𑀁 𑀓𑀺𑀦𑁆𑀢𑀺 𑀓𑀣𑀜𑁆𑀘 𑀮𑀤𑁆𑀥𑀁, 𑀓𑀣𑀚𑁆𑀛𑀕𑀫𑀸𑀲𑀺 𑀯𑀺𑀫𑀸𑀦𑀲𑁂𑀝𑁆𑀞𑀁.
‘‘𑀅𑀥𑀺𑀘𑁆𑀘𑀮𑀤𑁆𑀥𑀁 𑀧𑀭𑀺𑀡𑀸𑀫𑀚𑀁 𑀢𑁂, 𑀲𑀬𑀁𑀓𑀢𑀁 𑀉𑀤𑀸𑀳𑀼 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;
𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀓𑀣𑀚𑁆𑀛𑀕𑀫𑀸𑀲𑀺 𑀯𑀺𑀫𑀸𑀦𑀲𑁂𑀝𑁆𑀞’’𑀦𑁆𑀢𑀺.
𑀢𑀢𑁆𑀣 𑀤𑀺𑀩𑁆𑀩𑀭𑀲𑀸𑀦𑀼𑀪𑀼𑀢𑁆𑀯𑀸𑀢𑀺 𑀤𑀺𑀩𑁆𑀩𑁂 𑀓𑀸𑀫𑀕𑀼𑀡𑀭𑀲𑁂 𑀅𑀦𑀼𑀪𑀯𑀺𑀢𑁆𑀯𑀸. 𑀢𑀤𑀸𑀲𑁆𑀲𑀼𑀳𑀦𑁆𑀢𑀺 𑀢𑀤𑀸 𑀅𑀲𑁆𑀲𑀼 𑀅𑀳𑀁. 𑀦𑀸𑀕𑀲𑁆𑀲𑀺𑀤𑀦𑁆𑀢𑀺 𑀪𑀤𑁆𑀭𑀫𑀼𑀔𑀲𑁆𑀲 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀲𑁆𑀲 𑀇𑀤𑀁 𑀲𑀫𑁆𑀧𑀢𑁆𑀢𑀺𑀚𑀸𑀢𑀁 𑀓𑀺𑀦𑁆𑀢𑀺 𑀓𑀺𑀁 𑀦𑀸𑀫 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀣𑀜𑁆𑀘 𑀓𑀢𑁆𑀯𑀸 𑀮𑀤𑁆𑀥𑀁, 𑀓𑀣𑀫𑁂𑀢𑀁 𑀯𑀺𑀫𑀸𑀦𑀲𑁂𑀝𑁆𑀞𑀁 𑀢𑁆𑀯𑀁 𑀅𑀚𑁆𑀛𑀕𑀫𑀸𑀲𑀺, 𑀇𑀢𑀺 𑀦𑀁 𑀅𑀳𑀁 𑀧𑀼𑀘𑁆𑀙𑀺𑀁. 𑀅𑀥𑀺𑀘𑁆𑀘𑀮𑀤𑁆𑀥𑀦𑁆𑀢𑀺 𑀅𑀳𑁂𑀢𑀼𑀦𑀸 𑀮𑀤𑁆𑀥𑀁. 𑀧𑀭𑀺𑀡𑀸𑀫𑀚𑀁 𑀢𑁂𑀢𑀺 𑀓𑁂𑀦𑀘𑀺 𑀢𑀯 𑀅𑀢𑁆𑀣𑀸𑀬 𑀧𑀭𑀺𑀡𑀸𑀫𑀺𑀢𑀢𑁆𑀢𑀸 𑀧𑀭𑀺𑀡𑀸𑀫𑀢𑁄 𑀚𑀸𑀢𑀁. 𑀲𑀬𑀁𑀓𑀢𑀦𑁆𑀢𑀺 𑀓𑀸𑀭𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀢𑀦𑀸𑀦𑀺 𑀤𑀢𑁆𑀯𑀸 𑀓𑀸𑀭𑀺𑀢𑀦𑁆𑀢𑀺.
𑀢𑀢𑁄 ¶ 𑀧𑀭𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀘𑀦𑀧𑁆𑀧𑀝𑀺𑀯𑀘𑀦𑀕𑀸𑀣𑀸𑀯 𑁋
‘‘𑀦𑀸𑀥𑀺𑀘𑁆𑀘𑀮𑀤𑁆𑀥𑀁 𑀦 𑀧𑀭𑀺𑀡𑀸𑀫𑀚𑀁 𑀫𑁂, 𑀦 𑀲𑀬𑀁𑀓𑀢𑀁 𑀦𑀸𑀧𑀺 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁;
𑀲𑀓𑁂𑀳𑀺 𑀓𑀫𑁆𑀫𑁂𑀳𑀺 𑀅𑀧𑀸𑀧𑀓𑁂𑀳𑀺, 𑀧𑀼𑀜𑁆𑀜𑁂𑀳𑀺 𑀫𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁.
‘‘𑀓𑀺𑀁 ¶ 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;
𑀅𑀓𑁆𑀔𑀸𑀳𑀺 𑀫𑁂 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀓𑀣𑀁 𑀦𑀼 𑀢𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁.
‘‘𑀭𑀸𑀚𑀸 𑀅𑀳𑁄𑀲𑀺𑀁 𑀫𑀕𑀥𑀸𑀦𑀫𑀺𑀲𑁆𑀲𑀭𑁄, 𑀤𑀼𑀬𑁆𑀬𑁄𑀥𑀦𑁄 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄;
𑀲𑁄 ¶ 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀲𑀁𑀯𑀺𑀤𑀺𑀢𑁆𑀯𑀸, 𑀅𑀲𑀲𑁆𑀲𑀢𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁.
‘‘𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁;
𑀑𑀧𑀸𑀦𑀪𑀽𑀢𑀁 𑀫𑁂 𑀖𑀭𑀁 𑀢𑀤𑀸𑀲𑀺, 𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.
‘‘𑀫𑀸𑀮𑀜𑁆𑀘 𑀕𑀦𑁆𑀥𑀜𑁆𑀘 𑀯𑀺𑀮𑁂𑀧𑀦𑀜𑁆𑀘, 𑀧𑀤𑀻𑀧𑀺𑀬𑀁 𑀬𑀸𑀦𑀫𑀼𑀧𑀲𑁆𑀲𑀬𑀜𑁆𑀘;
𑀅𑀘𑁆𑀙𑀸𑀤𑀦𑀁 𑀲𑀬𑀦𑀫𑀣𑀦𑁆𑀦𑀧𑀸𑀦𑀁, 𑀲𑀓𑁆𑀓𑀘𑁆𑀘 𑀤𑀸𑀦𑀸𑀦𑀺 𑀅𑀤𑀫𑁆𑀳 𑀢𑀢𑁆𑀣.
‘‘𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;
𑀢𑁂𑀦𑁂𑀯 𑀫𑁂 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁, 𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁;
𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀘𑀼𑀧𑁂𑀢𑀭𑀽𑀧𑀁, 𑀘𑀺𑀭𑀝𑁆𑀞𑀺𑀢𑀺𑀓𑀁 𑀦 𑀘 𑀲𑀲𑁆𑀲𑀢𑀸𑀬𑀁.
‘‘𑀅𑀧𑁆𑀧𑀸𑀦𑀼𑀪𑀸𑀯𑀸 𑀢𑀁 𑀫𑀳𑀸𑀦𑀼𑀪𑀸𑀯𑀁, 𑀢𑁂𑀚𑀲𑁆𑀲𑀺𑀦𑀁 𑀳𑀦𑁆𑀢𑀺 𑀅𑀢𑁂𑀚𑀯𑀦𑁆𑀢𑁄;
𑀓𑀺𑀫𑁂𑀯 𑀤𑀸𑀞𑀸𑀯𑀼𑀥 𑀓𑀺𑀁 𑀧𑀝𑀺𑀘𑁆𑀘, 𑀳𑀢𑁆𑀣𑀢𑁆𑀢𑀫𑀸𑀕𑀘𑁆𑀙𑀺 𑀯𑀦𑀺𑀩𑁆𑀩𑀓𑀸𑀦𑀁.
‘‘𑀪𑀬𑀁 𑀦𑀼 𑀢𑁂 𑀅𑀦𑁆𑀯𑀕𑀢𑀁 𑀫𑀳𑀦𑁆𑀢𑀁, 𑀢𑁂𑀚𑁄 𑀦𑀼 𑀢𑁂 𑀦𑀸𑀦𑁆𑀯𑀕𑀁 𑀤𑀦𑁆𑀢𑀫𑀽𑀮𑀁;
𑀓𑀺𑀫𑁂𑀯 𑀤𑀸𑀞𑀸𑀯𑀼𑀥 𑀓𑀺𑀁 𑀧𑀝𑀺𑀘𑁆𑀘, 𑀓𑀺𑀮𑁂𑀲𑀫𑀸𑀧𑀚𑁆𑀚𑀺 𑀯𑀦𑀺𑀩𑁆𑀩𑀓𑀸𑀦𑀁.
‘‘𑀦 ¶ 𑀫𑁂 𑀪𑀬𑀁 𑀅𑀦𑁆𑀯𑀕𑀢𑀁 𑀫𑀳𑀦𑁆𑀢𑀁, 𑀢𑁂𑀚𑁄 𑀦 𑀲𑀓𑁆𑀓𑀸 𑀫𑀫 𑀢𑁂𑀳𑀺 𑀳𑀦𑁆𑀢𑀼𑀁;
𑀲𑀢𑀜𑁆𑀘 𑀥𑀫𑁆𑀫𑀸𑀦𑀺 𑀲𑀼𑀓𑀺𑀢𑁆𑀢𑀺𑀢𑀸𑀦𑀺, 𑀲𑀫𑀼𑀤𑁆𑀤𑀯𑁂𑀮𑀸𑀯 𑀤𑀼𑀭𑀘𑁆𑀘𑀬𑀸𑀦𑀺.
‘‘𑀘𑀸𑀢𑀼𑀤𑁆𑀤𑀲𑀺𑀁 ¶ 𑀧𑀜𑁆𑀘𑀤𑀲𑀺𑀁 𑀅𑀴𑀸𑀭, 𑀉𑀧𑁄𑀲𑀣𑀁 𑀦𑀺𑀘𑁆𑀘𑀫𑀼𑀧𑀸𑀯𑀲𑀸𑀫𑀺;
𑀅𑀣𑀸𑀕𑀫𑀼𑀁 𑀲𑁄𑀴𑀲 𑀪𑁄𑀚𑀧𑀼𑀢𑁆𑀢𑀸, 𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸𑀦 𑀤𑀴𑁆𑀳𑀜𑁆𑀘 𑀧𑀸𑀲𑀁.
‘‘𑀪𑁂𑀢𑁆𑀯𑀸𑀦 ¶ 𑀦𑀸𑀲𑀁 𑀅𑀢𑀺𑀓𑀲𑁆𑀲 𑀭𑀚𑁆𑀚𑀼𑀁, 𑀦𑀬𑀺𑀁𑀲𑀼 𑀫𑀁 𑀲𑀫𑁆𑀧𑀭𑀺𑀕𑀬𑁆𑀳 𑀮𑀼𑀤𑁆𑀤𑀸;
𑀏𑀢𑀸𑀤𑀺𑀲𑀁 𑀤𑀼𑀓𑁆𑀔𑀫𑀳𑀁 𑀢𑀺𑀢𑀺𑀓𑁆𑀔𑀁, 𑀉𑀧𑁄𑀲𑀣𑀁 𑀅𑀧𑁆𑀧𑀝𑀺𑀓𑁄𑀧𑀬𑀦𑁆𑀢𑁄.
‘‘𑀏𑀓𑀸𑀬𑀦𑁂 𑀢𑀁 𑀧𑀣𑁂 𑀅𑀤𑁆𑀤𑀲𑀁𑀲𑀼, 𑀩𑀮𑁂𑀦 𑀯𑀡𑁆𑀡𑁂𑀦 𑀘𑀼𑀧𑁂𑀢𑀭𑀽𑀧𑀁;
𑀲𑀺𑀭𑀺𑀬𑀸 𑀧𑀜𑁆𑀜𑀸𑀬 𑀘 𑀪𑀸𑀯𑀺𑀢𑁄𑀲𑀺, 𑀓𑀺𑀁 𑀧𑀢𑁆𑀣𑀬𑀁 𑀦𑀸𑀕 𑀢𑀧𑁄 𑀓𑀭𑁄𑀲𑀺.
‘‘𑀦 𑀧𑀼𑀢𑁆𑀢𑀳𑁂𑀢𑀽 𑀦 𑀥𑀦𑀲𑁆𑀲 𑀳𑁂𑀢𑀽, 𑀦 𑀆𑀬𑀼𑀦𑁄 𑀘𑀸𑀧𑀺 𑀅𑀴𑀸𑀭 𑀳𑁂𑀢𑀼;
𑀫𑀦𑀼𑀲𑁆𑀲𑀬𑁄𑀦𑀺𑀁 𑀅𑀪𑀺𑀧𑀢𑁆𑀣𑀬𑀸𑀦𑁄, 𑀢𑀲𑁆𑀫𑀸 𑀧𑀭𑀓𑁆𑀓𑀫 𑀢𑀧𑁄 𑀓𑀭𑁄𑀫𑀺.
‘‘𑀢𑁆𑀯𑀁 𑀮𑁄𑀳𑀺𑀢𑀓𑁆𑀔𑁄 𑀯𑀺𑀳𑀢𑀦𑁆𑀢𑀭𑀁𑀲𑁄, 𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;
𑀲𑀼𑀭𑁄𑀲𑀺𑀢𑁄 𑀮𑁄𑀳𑀺𑀢𑀘𑀦𑁆𑀤𑀦𑁂𑀦, 𑀕𑀦𑁆𑀥𑀩𑁆𑀩𑀭𑀸𑀚𑀸𑀯 𑀤𑀺𑀲𑀸 𑀧𑀪𑀸𑀲𑀲𑀺.
‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀲𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄;
𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀲𑁂𑀬𑁆𑀬𑁄 𑀇𑀢𑁄 𑀓𑁂𑀦 𑀫𑀦𑀼𑀲𑁆𑀲𑀮𑁄𑀓𑁄.
‘‘𑀅𑀴𑀸𑀭 ¶ 𑀦𑀸𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑀮𑁄𑀓𑀸, 𑀲𑀼𑀤𑁆𑀥𑀻𑀯 𑀲𑀁𑀯𑀺𑀚𑁆𑀚𑀢𑀺 𑀲𑀁𑀬𑀫𑁄 𑀯𑀸;
𑀅𑀳𑀜𑁆𑀘 𑀮𑀤𑁆𑀥𑀸𑀦 𑀫𑀦𑀼𑀲𑁆𑀲𑀬𑁄𑀦𑀺𑀁, 𑀓𑀸𑀳𑀸𑀫𑀺 𑀚𑀸𑀢𑀺𑀫𑀭𑀡𑀲𑁆𑀲 𑀅𑀦𑁆𑀢𑀁.
‘‘𑀲𑀁𑀯𑀘𑁆𑀙𑀭𑁄 𑀫𑁂 𑀯𑀲𑀢𑁄 𑀢𑀯𑀦𑁆𑀢𑀺𑀓𑁂, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀺𑀢𑁄𑀲𑁆𑀫𑀺;
𑀆𑀫𑀦𑁆𑀢𑀬𑀺𑀢𑁆𑀯𑀸𑀦 𑀧𑀮𑁂𑀫𑀺 𑀦𑀸𑀕, 𑀘𑀺𑀭𑀧𑁆𑀧𑀯𑀼𑀝𑁆𑀞𑁄𑀲𑁆𑀫𑀺 𑀅𑀳𑀁 𑀚𑀦𑀺𑀦𑁆𑀤.
‘‘𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀅𑀦𑀼𑀚𑀻𑀯𑀺𑀦𑁄 𑀘, 𑀦𑀺𑀘𑁆𑀘𑀸𑀦𑀼𑀲𑀺𑀝𑁆𑀞𑀸 𑀉𑀧𑀢𑀺𑀝𑁆𑀞𑀣𑁂𑀢𑀁;
𑀓𑀘𑁆𑀘𑀺𑀦𑁆𑀦𑀼 ¶ 𑀢𑀁 𑀦𑀸𑀪𑀺𑀲𑀧𑀺𑀢𑁆𑀣 𑀓𑁄𑀘𑀺, 𑀧𑀺𑀬𑀜𑁆𑀳𑀺 𑀫𑁂 𑀤𑀲𑁆𑀲𑀦𑀁 𑀢𑀼𑀬𑁆𑀳𑀁 𑀅𑀴𑀸𑀭.
‘‘𑀬𑀣𑀸𑀧𑀺 𑀫𑀸𑀢𑀽 𑀘 𑀧𑀺𑀢𑀽 𑀅𑀕𑀸𑀭𑁂, 𑀧𑀼𑀢𑁆𑀢𑁄 𑀧𑀺𑀬𑁄 𑀧𑀝𑀺𑀯𑀺𑀳𑀺𑀢𑁄 𑀯𑀲𑁂𑀬𑁆𑀬;
𑀢𑀢𑁄𑀧𑀺 𑀫𑀬𑁆𑀳𑀁 𑀇𑀥𑀫𑁂𑀯 𑀲𑁂𑀬𑁆𑀬𑁄, 𑀘𑀺𑀢𑁆𑀢𑀜𑁆𑀳𑀺 𑀢𑁂 𑀦𑀸𑀕 𑀫𑀬𑀻 𑀧𑀲𑀦𑁆𑀦𑀁.
‘‘𑀫𑀡𑀻 ¶ 𑀫𑀫𑀁 𑀯𑀺𑀚𑁆𑀚𑀢𑀺 𑀮𑁄𑀳𑀺𑀢𑀗𑁆𑀓𑁄, 𑀥𑀦𑀸𑀳𑀭𑁄 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁;
𑀆𑀤𑀸𑀬 𑀢𑁆𑀯𑀁 𑀕𑀘𑁆𑀙 𑀲𑀓𑀁 𑀦𑀺𑀓𑁂𑀢𑀁, 𑀮𑀤𑁆𑀥𑀸 𑀥𑀦𑀁 𑀢𑀁 𑀫𑀡𑀺𑀫𑁄𑀲𑁆𑀲𑀚𑀲𑁆𑀲𑀽’’𑀢𑀺.
𑀢𑀢𑁆𑀣 𑀓𑀺𑀁 𑀢𑁂 𑀯𑀢𑀦𑁆𑀢𑀺 𑀓𑀺𑀁 𑀢𑀯 𑀯𑀢𑀲𑀫𑀸𑀤𑀸𑀦𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁. 𑀑𑀧𑀸𑀦𑀪𑀽𑀢𑀦𑁆𑀢𑀺 𑀘𑀢𑀼𑀫𑀳𑀸𑀧𑀣𑁂 𑀔𑀢𑀧𑁄𑀓𑁆𑀔𑀭𑀡𑀻 𑀯𑀺𑀬 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀯𑀺𑀪𑀯𑀁. 𑀦 𑀘 𑀲𑀲𑁆𑀲𑀢𑀸𑀬𑀦𑁆𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑀁 𑀲𑀫𑀸𑀦𑀫𑁆𑀧𑀺 𑀘𑁂 𑀢𑀁 𑀫𑀬𑁆𑀳𑀁 𑀲𑀲𑁆𑀲𑀢𑀁 𑀦 𑀳𑁄𑀢𑀻𑀢𑀺 𑀫𑁂 𑀓𑀣𑁂𑀢𑀺.
𑀅𑀧𑁆𑀧𑀸𑀦𑀼𑀪𑀸𑀯𑀸𑀢𑀺 𑀪𑁄𑀚𑀧𑀼𑀢𑁆𑀢𑁂 𑀲𑀦𑁆𑀥𑀸𑀬𑀸𑀳. 𑀳𑀦𑁆𑀢𑀻𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀲𑀽𑀮𑁂𑀳𑀺 𑀯𑀺𑀚𑁆𑀛𑀦𑁆𑀢𑀸 𑀓𑀺𑀁𑀓𑀸𑀭𑀡𑀸 𑀳𑀦𑀺𑀁𑀲𑀼. 𑀓𑀺𑀁 𑀧𑀝𑀺𑀘𑁆𑀘𑀸𑀢𑀺 𑀓𑀺𑀁 𑀲𑀦𑁆𑀥𑀸𑀬 𑀢𑁆𑀯𑀁 𑀢𑀤𑀸 𑀢𑁂𑀲𑀁 𑀳𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀺 𑀯𑀲𑀁 𑀉𑀧𑀕𑀢𑁄. 𑀯𑀦𑀺𑀩𑁆𑀩𑀓𑀸𑀦𑀦𑁆𑀢𑀺 𑀪𑁄𑀚𑀧𑀼𑀢𑁆𑀢𑀸 𑀇𑀥 ‘‘𑀯𑀦𑀺𑀩𑁆𑀩𑀓𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀚𑁄 𑀦𑀼 𑀢𑁂 𑀦𑀸𑀦𑁆𑀯𑀕𑀁 𑀤𑀦𑁆𑀢𑀫𑀽𑀮𑀦𑁆𑀢𑀺 𑀓𑀺𑀁 𑀦𑀼 𑀢𑀯 𑀢𑁂𑀚𑁄 ¶ 𑀪𑁄𑀚𑀧𑀼𑀢𑁆𑀢𑁂 𑀤𑀺𑀲𑁆𑀯𑀸 𑀢𑀤𑀸 𑀪𑀬𑀁 𑀫𑀳𑀦𑁆𑀢𑀁 𑀅𑀦𑁆𑀯𑀕𑀢𑀁, 𑀉𑀤𑀸𑀳𑀼 𑀯𑀺𑀲𑀁 𑀤𑀦𑁆𑀢𑀫𑀽𑀮𑀁 𑀦 𑀅𑀦𑁆𑀯𑀕𑀢𑀁. 𑀓𑀺𑀮𑁂𑀲𑀦𑁆𑀢𑀺 𑀤𑀼𑀓𑁆𑀔𑀁. 𑀯𑀦𑀺𑀩𑁆𑀩𑀓𑀸𑀦𑀦𑁆𑀢𑀺 𑀪𑁄𑀚𑀧𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂, 𑀪𑁄𑀚𑀧𑀼𑀢𑁆𑀢𑁂 𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄.
𑀢𑁂𑀚𑁄 𑀦 𑀲𑀓𑁆𑀓𑀸 𑀫𑀫 𑀢𑁂𑀳𑀺 𑀳𑀦𑁆𑀢𑀼𑀦𑁆𑀢𑀺 𑀫𑀫 𑀯𑀺𑀲𑀢𑁂𑀚𑁄 𑀅𑀜𑁆𑀜𑀲𑁆𑀲 𑀢𑁂𑀚𑁂𑀦 𑀅𑀪𑀺𑀳𑀦𑁆𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸. 𑀲𑀢𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀦𑀁. 𑀥𑀫𑁆𑀫𑀸𑀦𑀻𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀔𑀦𑁆𑀢𑀺𑀅𑀦𑀼𑀤𑁆𑀤𑀬𑀫𑁂𑀢𑁆𑀢𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀸𑀦𑀺 𑀥𑀫𑁆𑀫𑀸𑀦𑀺. 𑀲𑀼𑀓𑀺𑀢𑁆𑀢𑀺𑀢𑀸𑀦𑀻𑀢𑀺 𑀲𑀼𑀯𑀡𑁆𑀡𑀺𑀢𑀸𑀦𑀺 𑀲𑀼𑀓𑀣𑀺𑀢𑀸𑀦𑀺. 𑀓𑀺𑀦𑁆𑀢𑀺 𑀓𑀢𑁆𑀯𑀸? 𑀲𑀫𑀼𑀤𑁆𑀤𑀯𑁂𑀮𑀸𑀯 𑀤𑀼𑀭𑀘𑁆𑀘𑀬𑀸𑀦𑀻𑀢𑀺 𑀢𑁂𑀳𑀺 𑀲𑀫𑀼𑀤𑁆𑀤𑀯𑁂𑀮𑀸 𑀯𑀺𑀬 𑀲𑀧𑁆𑀧𑀼𑀭𑀺𑀲𑁂𑀳𑀺 𑀚𑀻𑀯𑀺𑀢𑀢𑁆𑀣𑀫𑁆𑀧𑀺 𑀤𑀼𑀭𑀘𑁆𑀘𑀬𑀸𑀦𑀻𑀢𑀺 𑀯𑀡𑁆𑀡𑀺𑀢𑀸𑀦𑀺, 𑀢𑀲𑁆𑀫𑀸 𑀅𑀳𑀁 𑀲𑀻𑀮𑀪𑁂𑀤𑀪𑀬𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑀸𑀤𑀺𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀫𑀫 𑀓𑁄𑀧𑀲𑁆𑀲 𑀲𑀻𑀮𑀯𑁂𑀮𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀅𑀤𑀸𑀲𑀺𑀦𑁆𑀢𑀺 𑀆𑀳.
‘‘𑀇𑀫𑀺𑀲𑁆𑀲𑀸 𑀧𑀦 𑀲𑀗𑁆𑀔𑀧𑀸𑀮𑀥𑀫𑁆𑀫𑀤𑁂𑀲𑀦𑀸𑀬 𑀤𑀲𑀧𑀺 𑀧𑀸𑀭𑀫𑀺𑀬𑁄 𑀮𑀩𑁆𑀪𑀦𑁆𑀢𑀺. 𑀢𑀤𑀸 𑀳𑀺 𑀫𑀳𑀸𑀲𑀢𑁆𑀢𑁂𑀦 𑀲𑀭𑀻𑀭𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀪𑀸𑀯𑁄 𑀤𑀸𑀦𑀧𑀸𑀭𑀫𑀻 𑀦𑀸𑀫 𑀳𑁄𑀢𑀺, 𑀢𑀣𑀸𑀭𑀽𑀧𑁂𑀦𑀸𑀧𑀺 𑀯𑀺𑀲𑀢𑁂𑀚𑁂𑀦 𑀲𑀻𑀮𑀲𑁆𑀲 𑀅𑀪𑀺𑀦𑁆𑀦𑀢𑀸 𑀲𑀻𑀮𑀧𑀸𑀭𑀫𑀻, 𑀦𑀸𑀕𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀓𑀭𑀡𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, ‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀲𑀁𑀯𑀺𑀤𑀳𑀦𑀁 𑀧𑀜𑁆𑀜𑀸𑀧𑀸𑀭𑀫𑀻, 𑀅𑀥𑀺𑀯𑀸𑀲𑀦𑀯𑀻𑀭𑀺𑀬𑀁 𑀯𑀻𑀭𑀺𑀬𑀧𑀸𑀭𑀫𑀻, 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀔𑀦𑁆𑀢𑀺𑀧𑀸𑀭𑀫𑀻, 𑀲𑀘𑁆𑀘𑀲𑀫𑀸𑀤𑀸𑀦𑀁 𑀲𑀘𑁆𑀘𑀧𑀸𑀭𑀫𑀻, ‘𑀫𑀫 𑀲𑀻𑀮𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀅𑀦𑀼𑀤𑁆𑀤𑀬𑀪𑀸𑀯𑁄 ¶ 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀯𑁂𑀤𑀦𑀸𑀬 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀻’’𑀢𑀺.
𑀅𑀣𑀸𑀕𑀫𑀼𑀦𑁆𑀢𑀺 𑀅𑀣𑁂𑀓𑀤𑀺𑀯𑀲𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀲𑁄𑀴𑀲 𑀪𑁄𑀚𑀧𑀼𑀢𑁆𑀢𑀸 𑀔𑀭𑀭𑀚𑁆𑀚𑀼𑀜𑁆𑀘 𑀤𑀴𑁆𑀳𑀧𑀸𑀲𑀜𑁆𑀘 ¶ 𑀲𑀽𑀮𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑀸. 𑀪𑁂𑀢𑁆𑀯𑀸𑀦𑀸𑀢𑀺 𑀫𑀫 𑀲𑀭𑀻𑀭𑀁 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀪𑀺𑀦𑁆𑀤𑀺𑀢𑁆𑀯𑀸 𑀲𑀓𑀡𑁆𑀝𑀓𑀓𑀸𑀴𑀯𑁂𑀢𑁆𑀢𑀮𑀢𑀸 𑀧𑀯𑁂𑀲𑁂𑀢𑁆𑀯𑀸. 𑀦𑀸𑀲𑀁 𑀅𑀢𑀺𑀓𑀲𑁆𑀲 𑀭𑀚𑁆𑀚𑀼𑀦𑁆𑀢𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀲𑀻𑀲𑀁 𑀫𑁂 𑀑𑀮𑀫𑁆𑀩𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀫𑀕𑁆𑀕𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀼𑀦 𑀦𑀸𑀲𑀫𑁆𑀧𑀺 𑀫𑁂 𑀪𑀺𑀦𑁆𑀤𑀺𑀢𑁆𑀯𑀸 𑀯𑀝𑁆𑀝𑀭𑀚𑁆𑀚𑀼𑀁 𑀅𑀢𑀺𑀓𑀲𑁆𑀲 𑀆𑀯𑀼𑀦𑀺𑀢𑁆𑀯𑀸 𑀓𑀸𑀚𑀓𑁄𑀝𑀺𑀬𑀁 𑀮𑀕𑁆𑀕𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀫𑀁 𑀦𑀬𑀺𑀁𑀲𑀼.
𑀅𑀤𑁆𑀤𑀲𑀁𑀲𑀽𑀢𑀺, 𑀲𑀫𑁆𑀫 𑀲𑀗𑁆𑀔𑀧𑀸𑀮, 𑀢𑁂 𑀪𑁄𑀚𑀧𑀼𑀢𑁆𑀢𑀸 𑀏𑀓𑀸𑀬𑀦𑁂 𑀏𑀓𑀕𑀫𑀦𑁂 𑀚𑀗𑁆𑀖𑀧𑀤𑀺𑀓𑀫𑀕𑁆𑀕𑁂 𑀢𑀁 𑀩𑀮𑁂𑀦 𑀘 𑀯𑀡𑁆𑀡𑁂𑀦 𑀘 𑀉𑀧𑁂𑀢𑀭𑀽𑀧𑀁 𑀧𑀲𑁆𑀲𑀺𑀁𑀲𑀼, 𑀢𑁆𑀯𑀁 𑀧𑀦 𑀇𑀲𑁆𑀲𑀭𑀺𑀬𑀲𑁄𑀪𑀕𑁆𑀕𑀲𑀺𑀭𑀺𑀬𑀸 𑀘 𑀧𑀜𑁆𑀜𑀸𑀬 𑀘 𑀪𑀸𑀯𑀺𑀢𑁄 𑀯𑀟𑁆𑀠𑀺𑀢𑁄, 𑀲𑁄 𑀢𑁆𑀯𑀁 𑀏𑀯𑀭𑀽𑀧𑁄 𑀲𑀫𑀸𑀦𑁄𑀧𑀺 ¶ 𑀓𑀺𑀫𑀢𑁆𑀣𑀁 𑀢𑀧𑀁 𑀓𑀭𑁄𑀲𑀺, 𑀓𑀺𑀫𑀺𑀘𑁆𑀙𑀦𑁆𑀢𑁄 𑀉𑀧𑁄𑀲𑀣𑀯𑀸𑀲𑀁 𑀯𑀲𑀲𑀺, 𑀲𑀻𑀮𑀁 𑀭𑀓𑁆𑀔𑀲𑀺. ‘‘𑀅𑀤𑁆𑀤𑀲𑀸𑀲𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀳𑀁 𑀏𑀓𑀸𑀬𑀦𑁂 𑀫𑀳𑀸𑀫𑀕𑁆𑀕𑁂 𑀢𑀁 𑀅𑀤𑁆𑀤𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀧𑀢𑁆𑀣𑀬𑀸𑀦𑁄𑀢𑀺 𑀧𑀢𑁆𑀣𑁂𑀦𑁆𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀦𑀼𑀲𑁆𑀲𑀬𑁄𑀦𑀺𑀁 𑀧𑀢𑁆𑀣𑁂𑀫𑀺, 𑀢𑀲𑁆𑀫𑀸 𑀯𑀻𑀭𑀺𑀬𑁂𑀦 𑀧𑀭𑀓𑁆𑀓𑀫𑀺𑀢𑁆𑀯𑀸 𑀢𑀧𑁄𑀓𑀫𑁆𑀫𑀁 𑀓𑀭𑁄𑀫𑀺.
𑀲𑀼𑀭𑁄𑀲𑀺𑀢𑁄𑀢𑀺 𑀲𑀼𑀝𑁆𑀞𑀼 𑀫𑀦𑀼𑀮𑀺𑀢𑁆𑀢𑁄. 𑀇𑀢𑁄𑀢𑀺 𑀇𑀫𑀫𑁆𑀳𑀸 𑀦𑀸𑀕𑀪𑀯𑀦𑀸 𑀫𑀦𑀼𑀲𑁆𑀲𑀮𑁄𑀓𑁄 𑀓𑁂𑀦 𑀉𑀢𑁆𑀢𑀭𑀺𑀢𑀭𑁄. 𑀲𑀼𑀤𑁆𑀥𑀻𑀢𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸 𑀯𑀺𑀲𑀼𑀤𑁆𑀥𑀺. 𑀲𑀁𑀬𑀫𑁄𑀢𑀺 𑀲𑀻𑀮𑀁. 𑀇𑀤𑀁 𑀲𑁄 𑀫𑀦𑀼𑀲𑁆𑀲𑀮𑁄𑀓𑁂𑀬𑁂𑀯 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀸𑀳𑀸𑀫𑀻𑀢𑀺 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑀁 𑀓𑀭𑁄𑀦𑁆𑀢𑁄 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁, 𑀫𑀳𑀸𑀭𑀸𑀚, 𑀲𑁄 𑀲𑀗𑁆𑀔𑀧𑀸𑀮𑁄 𑀫𑀦𑀼𑀲𑁆𑀲𑀮𑁄𑀓𑀁 𑀯𑀡𑁆𑀡𑁂𑀲𑀺. 𑀲𑀁𑀯𑀘𑁆𑀙𑀭𑁄 𑀫𑁂𑀢𑀺 𑀏𑀯𑀁, 𑀫𑀳𑀸𑀭𑀸𑀚, 𑀢𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑀁 𑀯𑀡𑁆𑀡𑁂𑀦𑁆𑀢𑁂 𑀅𑀳𑀁 𑀧𑀩𑁆𑀩𑀚𑁆𑀚𑀸𑀬 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀏𑀢𑀤𑀯𑁄𑀘𑀁. 𑀢𑀢𑁆𑀣 𑀉𑀧𑀝𑁆𑀞𑀺𑀢𑁄𑀲𑁆𑀫𑀻𑀢𑀺 𑀅𑀦𑁆𑀦𑀧𑀸𑀦𑁂𑀦 𑀘𑁂𑀯 𑀤𑀺𑀩𑁆𑀩𑁂𑀳𑀺 𑀘 𑀓𑀸𑀫𑀕𑀼𑀡𑁂𑀳𑀺 𑀧𑀭𑀺𑀘𑀺𑀡𑁆𑀡𑁄 𑀫𑀸𑀦𑀺𑀢𑁄 𑀅𑀲𑁆𑀫𑀺. 𑀧𑀮𑁂𑀫𑀻𑀢𑀺 𑀧𑀭𑁂𑀫𑀺 𑀕𑀘𑁆𑀙𑀸𑀫𑀺. 𑀘𑀺𑀭𑀧𑁆𑀧𑀯𑀼𑀝𑁆𑀞𑁄𑀲𑁆𑀫𑀻𑀢𑀺 𑀅𑀳𑀁 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀺𑀭𑀧𑁆𑀧𑀯𑀼𑀝𑁆𑀞𑁄 𑀅𑀲𑁆𑀫𑀺.
𑀦𑀸𑀪𑀺𑀲𑀧𑀺𑀢𑁆𑀣𑀸𑀢𑀺 𑀓𑀘𑁆𑀘𑀺 𑀦𑀼 𑀔𑁄 𑀫𑀫 𑀧𑀼𑀢𑁆𑀢𑀸𑀤𑀻𑀲𑀼 𑀓𑁄𑀘𑀺 𑀢𑀁 𑀦 𑀅𑀓𑁆𑀓𑁄𑀲𑀺 𑀦 𑀧𑀭𑀺𑀪𑀸𑀲𑀻𑀢𑀺 𑀧𑀼𑀘𑁆𑀙𑀢𑀺. ‘‘𑀦𑀸𑀪𑀺𑀲𑀚𑁆𑀚𑁂𑀣𑀸’’𑀢𑀺𑀧𑀺 𑀧𑀸𑀞𑁄, 𑀦 𑀓𑁄𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀯𑀺𑀳𑀺𑀢𑁄𑀢𑀺 𑀧𑀝𑀺𑀚𑀕𑁆𑀕𑀺𑀢𑁄. 𑀫𑀡𑀻 𑀫𑀫𑀦𑁆𑀢𑀺 𑀲𑀘𑁂, 𑀲𑀫𑁆𑀫 𑀆𑀴𑀸𑀭, 𑀕𑀘𑁆𑀙𑀲𑀺𑀬𑁂𑀯, 𑀏𑀯𑀁 𑀲𑀦𑁆𑀢𑁂 𑀫𑀫 𑀮𑁄𑀳𑀺𑀢𑀗𑁆𑀓𑁄 𑀥𑀦𑀳𑀸𑀭𑀓𑁄 𑀲𑀩𑁆𑀩𑀓𑀸𑀫𑀤𑀤𑁄 𑀫𑀡𑀺 𑀲𑀁𑀯𑀺𑀚𑁆𑀚𑀢𑀺, 𑀢𑀁 𑀉𑀴𑀸𑀭𑀁 𑀫𑀡𑀺𑀭𑀢𑀦𑀁 𑀆𑀤𑀸𑀬 𑀢𑀯 𑀕𑁂𑀳𑀁 𑀕𑀘𑁆𑀙, 𑀢𑀢𑁆𑀣 𑀇𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀬𑀸𑀯𑀤𑀺𑀘𑁆𑀙𑀓𑀁 𑀥𑀦𑀁 𑀮𑀤𑁆𑀥𑀸 𑀧𑀼𑀦 𑀇𑀫𑀁 𑀫𑀡𑀺𑀁 𑀑𑀲𑁆𑀲𑀚𑀲𑁆𑀲𑀼, 𑀑𑀲𑁆𑀲𑀚𑀦𑁆𑀢𑁄 𑀘 𑀅𑀜𑁆𑀜𑀢𑁆𑀣 𑀅𑀦𑁄𑀲𑁆𑀲𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀉𑀤𑀓𑀘𑀸𑀝𑀺𑀬𑀁 𑀑𑀲𑁆𑀲𑀚𑁂𑀬𑁆𑀬𑀸𑀲𑀻𑀢𑀺 𑀯𑀢𑁆𑀯𑀸 𑀫𑀬𑁆𑀳𑀁 𑀫𑀡𑀺𑀭𑀢𑀦𑀁 𑀉𑀧𑀦𑁂𑀲𑀻𑀢𑀺 𑀯𑀤𑀢𑀺.
𑀏𑀯𑀁 𑀯𑀢𑁆𑀯𑀸 𑀆𑀴𑀸𑀭𑁄 ‘‘𑀅𑀣𑀸𑀳𑀁, 𑀫𑀳𑀸𑀭𑀸𑀚, 𑀦𑀸𑀕𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀁 𑁋 ‘𑀲𑀫𑁆𑀫, 𑀦𑀸𑀳𑀁 𑀥𑀦𑁂𑀦𑀢𑁆𑀣𑀺𑀓𑁄, 𑀧𑀩𑁆𑀩𑀚𑀺𑀢𑀼𑀁 𑀧𑀦 𑀇𑀘𑁆𑀙𑀸𑀫𑀻’𑀢𑀺 ¶ 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀁 𑀬𑀸𑀘𑀺𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀦𑀸𑀕𑀪𑀯𑀦𑀸 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀤𑀺𑀝𑁆𑀞𑀸 𑀫𑀬𑀸 𑀫𑀸𑀦𑀼𑀲𑀓𑀸𑀧𑀺 𑀓𑀸𑀫𑀸, 𑀅𑀲𑀲𑁆𑀲𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸;
𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀲𑀤𑁆𑀥𑀸𑀬𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚.
‘‘𑀤𑀼𑀫𑀧𑁆𑀨𑀮𑀸𑀦𑀻𑀯 ¶ 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀤𑁆𑀥𑀸 𑀘 𑀲𑀭𑀻𑀭𑀪𑁂𑀤𑀸;
𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄’’𑀢𑀺.
𑀢𑀢𑁆𑀣 𑀲𑀤𑁆𑀥𑀸𑀬𑀸𑀢𑀺 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸. 𑀤𑀼𑀫𑀧𑁆𑀨𑀮𑀸𑀦𑀻𑀯 𑀧𑀢𑀦𑁆𑀢𑀻𑀢𑀺 𑀬𑀣𑀸 𑀭𑀼𑀓𑁆𑀔𑀨𑀮𑀸𑀦𑀺 𑀧𑀓𑁆𑀓𑀸𑀦𑀺𑀧𑀺 𑀅𑀧𑀓𑁆𑀓𑀸𑀦𑀺𑀧𑀺 𑀧𑀢𑀦𑁆𑀢𑀺, 𑀢𑀣𑀸 𑀫𑀸𑀡𑀯𑀸 𑀤𑀳𑀭𑀸 𑀘 𑀯𑀼𑀤𑁆𑀥𑀸 𑀘 𑀧𑀢𑀦𑁆𑀢𑀺. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀤𑁆𑀥𑀁 𑀦𑀺𑀬𑁆𑀬𑀸𑀦𑀺𑀓𑀁. 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄𑀢𑀺 𑀧𑀩𑁆𑀩𑀚𑁆𑀚𑀸𑀯 𑀉𑀢𑁆𑀢𑀫𑀸𑀢𑀺 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺, 𑀫𑀳𑀸𑀭𑀸𑀚𑀸𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;
𑀦𑀸𑀕𑀜𑁆𑀘 𑀲𑀼𑀢𑁆𑀯𑀸𑀦 𑀢𑀯𑀜𑁆𑀘𑀴𑀸𑀭, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.
𑀢𑀢𑁆𑀣 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄𑀢𑀺 𑀬𑁂 𑀩𑀳𑀽𑀦𑀺 𑀓𑀸𑀭𑀡𑀸𑀦𑀺 𑀚𑀸𑀦𑀦𑁆𑀢𑀺. 𑀦𑀸𑀕𑀜𑁆𑀘𑀸𑀢𑀺 𑀢𑀣𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀁 𑀦𑀸𑀕𑀭𑀸𑀚𑀸𑀦𑀜𑁆𑀘 𑀢𑀯 𑀘 𑀯𑀘𑀦𑀁 𑀲𑀼𑀢𑁆𑀯𑀸.
𑀅𑀣𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀢𑀸𑀧𑀲𑁄 𑀑𑀲𑀸𑀦𑀕𑀸𑀣𑀫𑀸𑀳 𑁋
‘‘𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;
𑀦𑀸𑀕𑀜𑁆𑀘 𑀲𑀼𑀢𑁆𑀯𑀸𑀦 𑀫𑀫𑀜𑁆𑀘 𑀭𑀸𑀚, 𑀓𑀭𑁄𑀳𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀻’’𑀢𑀺.
𑀏𑀯𑀁 ¶ 𑀲𑁄 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀢𑁆𑀣𑁂𑀯 𑀘𑀢𑁆𑀢𑀸𑀭𑁄 𑀯𑀲𑁆𑀲𑀸𑀦𑀫𑀸𑀲𑁂 𑀯𑀲𑀺𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀬𑀸𑀯𑀚𑀻𑀯𑀁 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺. 𑀲𑀗𑁆𑀔𑀧𑀸𑀮𑁄𑀧𑀺 𑀬𑀸𑀯𑀚𑀻𑀯𑀁 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀢𑁆𑀯𑀸 𑀭𑀸𑀚𑀸 𑀘 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀺𑀢𑀸 𑀢𑀸𑀧𑀲𑁄 𑀓𑀲𑁆𑀲𑀧𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀭𑀸𑀚𑀸 𑀆𑀦𑀦𑁆𑀤𑁄, 𑀆𑀴𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀲𑀗𑁆𑀔𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.
[𑁫𑁨𑁫] 𑁫. 𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑀯𑀡𑁆𑀡𑀦𑀸
𑀆𑀫𑀦𑁆𑀢𑀬𑀸𑀫𑀺 ¶ 𑀦𑀺𑀕𑀫𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀲𑀤𑀺𑀲𑀫𑁂𑀯 (𑀚𑀸. 𑁨.𑁨𑁨.𑁧𑁧𑁫𑁩 𑀆𑀤𑀬𑁄). 𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀻 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀢𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀚𑁆𑀛𑀸𑀯𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀧𑀦 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁 𑀅𑀳𑁄𑀲𑀺, 𑀢𑁂𑀦𑀲𑁆𑀲 ‘‘𑀲𑁄𑀫𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀼𑀢𑀯𑀺𑀢𑁆𑀢𑀓𑁄 𑀲𑀯𑀦𑀲𑀻𑀮𑁄 𑀅𑀳𑁄𑀲𑀺, 𑀢𑁂𑀦 𑀦𑀁 ‘‘𑀲𑀼𑀢𑀲𑁄𑀫𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀆𑀕𑀢𑁄 𑀧𑀺𑀢𑀼 𑀲𑀦𑁆𑀢𑀓𑀁 𑀲𑁂𑀢𑀘𑁆𑀙𑀢𑁆𑀢𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀅𑀳𑁄𑀲𑀺. 𑀢𑀲𑁆𑀲 𑀘𑀦𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀲𑁄𑀴𑀲 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀦𑁆𑀢𑁄 𑀖𑀭𑀸𑀯𑀸𑀲𑁂 𑀅𑀦𑀪𑀺𑀭𑀢𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺.
𑀲𑁄 𑀏𑀓𑀤𑀺𑀯𑀲𑀁 𑀓𑀧𑁆𑀧𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀤𑀸 𑀫𑁂, 𑀲𑀫𑁆𑀫, 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀁 𑀧𑀲𑁆𑀲𑁂𑀬𑁆𑀬𑀸𑀲𑀺, 𑀢𑀤𑀸 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀓𑀧𑁆𑀧𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀧𑀮𑀺𑀢𑀁 𑀤𑀺𑀲𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀦𑀁, 𑀲𑀫𑁆𑀫 𑀓𑀧𑁆𑀧𑀓, 𑀉𑀤𑁆𑀥𑀭𑀺𑀢𑁆𑀯𑀸 𑀫𑀫 𑀳𑀢𑁆𑀣𑁂 𑀧𑀢𑀺𑀝𑁆𑀞𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀼𑀯𑀡𑁆𑀡𑀲𑀡𑁆𑀟𑀸𑀲𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀭𑀜𑁆𑀜𑁄 𑀳𑀢𑁆𑀣𑁂 𑀞𑀧𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀚𑀭𑀸𑀬 𑀫𑁂 𑀲𑀭𑀻𑀭𑀁 𑀅𑀪𑀺𑀪𑀽𑀢’’𑀦𑁆𑀢𑀺 𑀪𑀻𑀢𑁄 𑀢𑀁 𑀧𑀮𑀺𑀢𑀁 𑀕𑀳𑁂𑀢𑁆𑀯𑀸𑀯 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 ¶ 𑀤𑀲𑁆𑀲𑀦𑀝𑁆𑀞𑀸𑀦𑁂 𑀧𑀜𑁆𑀜𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁂𑀦𑀸𑀧𑀢𑀺𑀧𑁆𑀧𑀫𑀼𑀔𑀸𑀦𑀺 𑀅𑀲𑀻𑀢𑀺𑀅𑀫𑀘𑁆𑀘𑀲𑀳𑀲𑁆𑀲𑀸𑀦𑀺 𑀧𑀼𑀭𑁄𑀳𑀺𑀢𑀧𑁆𑀧𑀫𑀼𑀔𑀸𑀦𑀺 𑀲𑀝𑁆𑀞𑀺𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀅𑀜𑁆𑀜𑁂 𑀘 𑀭𑀝𑁆𑀞𑀺𑀓𑀚𑀸𑀦𑀧𑀤𑀦𑁂𑀕𑀫𑀸𑀤𑀬𑁄 𑀩𑀳𑀽 𑀚𑀦𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀺𑀭𑀲𑁆𑀫𑀺𑀁 𑀫𑁂 𑀧𑀮𑀺𑀢𑀁 𑀚𑀸𑀢𑀁, 𑀅𑀳𑀁 𑀫𑀳𑀮𑁆𑀮𑀓𑁄𑀲𑁆𑀫𑀺, 𑀫𑀫 𑀧𑀩𑁆𑀩𑀚𑀺𑀢𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀆𑀫𑀦𑁆𑀢𑀬𑀸𑀫𑀺 𑀦𑀺𑀕𑀫𑀁, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀧𑀭𑀺𑀲𑁆𑀲𑀚𑁂;
𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀁 𑀚𑀸𑀢𑀁, 𑀧𑀩𑁆𑀩𑀚𑁆𑀚𑀁 𑀤𑀸𑀦𑀺 𑀭𑁄𑀘𑀳’’𑀦𑁆𑀢𑀺.
𑀢𑀢𑁆𑀣 ¶ 𑀆𑀫𑀦𑁆𑀢𑀬𑀸𑀫𑀻𑀢𑀺 𑀚𑀸𑀦𑀸𑀧𑁂𑀫𑀺. 𑀭𑁄𑀘𑀳𑀦𑁆𑀢𑀺 ‘‘𑀭𑁄𑀘𑁂𑀫𑀺 𑀅𑀳𑀁, 𑀢𑀲𑁆𑀲 𑀫𑁂, 𑀪𑁄𑀦𑁆𑀢𑁄! 𑀧𑀩𑁆𑀩𑀚𑀺𑀢𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺.
𑀢𑀁 ¶ 𑀲𑀼𑀢𑁆𑀯𑀸 𑀢𑁂𑀲𑀼 𑀏𑀓𑁄 𑀯𑀺𑀲𑀸𑀭𑀤𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀪𑀼𑀁 𑀫𑁂 𑀓𑀣𑀁 𑀦𑀼 𑀪𑀡𑀲𑀺, 𑀲𑀮𑁆𑀮𑀁 𑀫𑁂 𑀤𑁂𑀯 𑀉𑀭𑀲𑀺 𑀓𑀧𑁆𑀧𑁂𑀲𑀺;
𑀲𑀢𑁆𑀢𑀲𑀢𑀸 𑀢𑁂 𑀪𑀭𑀺𑀬𑀸, 𑀓𑀣𑀁 𑀦𑀼 𑀢𑁂 𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.
𑀢𑀢𑁆𑀣 𑀅𑀪𑀼𑀦𑁆𑀢𑀺 𑀅𑀯𑀟𑁆𑀠𑀺𑀁. 𑀉𑀭𑀲𑀺 𑀓𑀧𑁆𑀧𑁂𑀲𑀻𑀢𑀺 𑀉𑀭𑀲𑁆𑀫𑀺𑀁 𑀲𑀼𑀦𑀺𑀲𑀺𑀢𑀥𑁄𑀢𑀲𑀢𑁆𑀢𑀺𑀁 𑀘𑀸𑀭𑁂𑀲𑀺. 𑀲𑀢𑁆𑀢𑀲𑀢𑀸𑀢𑀺 𑀲𑀫𑀚𑀸𑀢𑀺𑀓𑀸 𑀔𑀢𑁆𑀢𑀺𑀬𑀓𑀜𑁆𑀜𑀸 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀣𑀁 𑀦𑀼 𑀢𑁂 𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀢𑀸 𑀢𑀯 𑀪𑀭𑀺𑀬𑀸 𑀢𑀬𑀺 𑀧𑀩𑁆𑀩𑀚𑀺𑀢𑁂 𑀅𑀦𑀸𑀣𑀸 𑀦𑀺𑀧𑁆𑀧𑀘𑁆𑀘𑀬𑀸 𑀓𑀣𑀁 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀢𑀸 𑀅𑀦𑀸𑀣𑀸 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀦 𑀬𑀼𑀢𑁆𑀢𑀸𑀢𑀺.
𑀢𑀢𑁄 𑀫𑀳𑀸𑀲𑀢𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀧𑀜𑁆𑀜𑀸𑀬𑀺𑀳𑀺𑀦𑁆𑀢𑀺 𑀏𑀢𑀸, 𑀤𑀳𑀭𑀸 𑀅𑀜𑁆𑀜𑀫𑁆𑀧𑀺 𑀢𑀸 𑀕𑀫𑀺𑀲𑁆𑀲𑀦𑁆𑀢𑀺;
𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄, 𑀢𑁂𑀦 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.
𑀢𑀢𑁆𑀣 𑀧𑀜𑁆𑀜𑀸𑀬𑀺𑀳𑀺𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀺. 𑀅𑀳𑀁 𑀏𑀢𑀸𑀲𑀁 𑀓𑀺𑀁 𑀳𑁄𑀫𑀺, 𑀲𑀩𑁆𑀩𑀸𑀧𑁂𑀢𑀸 𑀤𑀳𑀭𑀸, 𑀬𑁄 𑀅𑀜𑁆𑀜𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀢𑀁 𑀏𑀢𑀸 𑀕𑀫𑀺𑀲𑁆𑀲𑀦𑁆𑀢𑀻𑀢𑀺.
𑀅𑀫𑀘𑁆𑀘𑀸𑀤𑀬𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀲𑁆𑀲 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀸 𑀢𑀼𑀭𑀺𑀢𑀢𑀼𑀭𑀺𑀢𑀸 𑀆𑀕𑀦𑁆𑀢𑁆𑀯𑀸 ¶ ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀢𑀸𑀢, 𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀲𑀻’’𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀤𑀼𑀮𑁆𑀮𑀤𑁆𑀥𑀁 𑀫𑁂 𑀆𑀲𑀺 𑀲𑀼𑀢𑀲𑁄𑀫, 𑀬𑀲𑁆𑀲 𑀢𑁂 𑀳𑁄𑀫𑀳𑀁 𑀫𑀸𑀢𑀸;
𑀬𑀁 𑀫𑁂 𑀯𑀺𑀮𑀧𑀦𑁆𑀢𑀺𑀬𑀸, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.
‘‘𑀤𑀼𑀮𑁆𑀮𑀤𑁆𑀥𑀁 𑀫𑁂 𑀆𑀲𑀺 𑀲𑀼𑀢𑀲𑁄𑀫, 𑀬𑀁 𑀢𑀁 𑀅𑀳𑀁 𑀯𑀺𑀚𑀸𑀬𑀺𑀲𑁆𑀲𑀁;
𑀬𑀁 𑀫𑁂 𑀯𑀺𑀮𑀧𑀦𑁆𑀢𑀺𑀬𑀸, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯𑀸’’𑀢𑀺.
𑀢𑀢𑁆𑀣 ¶ ¶ 𑀤𑀼𑀮𑁆𑀮𑀤𑁆𑀥𑀦𑁆𑀢𑀺 𑀬𑀁 𑀏𑀢𑀁 𑀫𑀬𑀸 𑀮𑀪𑀦𑁆𑀢𑀺𑀬𑀸 𑀧𑀼𑀢𑁆𑀢𑀁 𑀚𑀫𑁆𑀫𑀁 𑀮𑀤𑁆𑀥𑀁 𑀤𑀼𑀮𑁆𑀮𑀤𑁆𑀥𑀁. 𑀬𑀁 𑀫𑁂𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀫𑀬𑀺 𑀦𑀸𑀦𑀧𑁆𑀧𑀓𑀸𑀭𑀓𑀁 𑀯𑀺𑀧𑀮𑀦𑁆𑀢𑀺𑀬𑀸 𑀢𑁆𑀯𑀁 𑀧𑀩𑁆𑀩𑀚𑀺𑀢𑀼𑀁 𑀇𑀘𑁆𑀙𑀲𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑀸𑀤𑀺𑀲𑀲𑁆𑀲 𑀧𑀼𑀢𑁆𑀢𑀲𑁆𑀲 𑀮𑀪𑀦𑀁 𑀫𑀫 𑀤𑀼𑀮𑁆𑀮𑀤𑁆𑀥𑀁 𑀦𑀸𑀫𑀸𑀢𑀺.
𑀩𑁄𑀥𑀺𑀲𑀢𑁆𑀢𑁄 𑀏𑀯𑀁 𑀧𑀭𑀺𑀤𑁂𑀯𑀫𑀸𑀦𑀸𑀬𑀧𑀺 𑀫𑀸𑀢𑀭𑀸 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺. 𑀲𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀲𑀬𑀫𑁂𑀯 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀼 𑀆𑀭𑁄𑀘𑁂𑀲𑀼𑀁. 𑀲𑁄 𑀆𑀕𑀦𑁆𑀢𑁆𑀯𑀸 𑀏𑀓𑀁 𑀢𑀸𑀯 𑀕𑀸𑀣𑀫𑀸𑀳 𑁋
‘‘𑀓𑁄 𑀦𑀸𑀫𑁂𑀲𑁄 𑀥𑀫𑁆𑀫𑁄, 𑀲𑀼𑀢𑀲𑁄𑀫 𑀓𑀸 𑀘 𑀦𑀸𑀫 𑀧𑀩𑁆𑀩𑀚𑁆𑀚𑀸;
𑀬𑀁 𑀦𑁄 𑀅𑀫𑁆𑀳𑁂 𑀚𑀺𑀡𑁆𑀡𑁂, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯𑀸’’𑀢𑀺.
𑀢𑀢𑁆𑀣 𑀬𑀁 𑀦𑁄 𑀅𑀫𑁆𑀳𑁂𑀢𑀺 𑀬𑀁 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀲𑀫𑀸𑀦𑁄 𑀅𑀫𑁆𑀳𑁂 𑀚𑀺𑀡𑁆𑀡𑁂 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀓𑀸𑀮𑁂 𑀅𑀧𑁆𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀧𑀸𑀢𑁂 𑀲𑀺𑀮𑀁 𑀧𑀯𑀝𑁆𑀝𑁂𑀦𑁆𑀢𑁄 𑀯𑀺𑀬 𑀙𑀟𑁆𑀟𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺, 𑀢𑁂𑀦 𑀢𑀁 𑀯𑀤𑀸𑀫𑀺 𑀓𑁄 𑀦𑀸𑀫𑁂𑀲𑁄 𑀢𑀯 𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀦𑀁 𑀧𑀺𑀢𑀸, ‘‘𑀢𑀸𑀢 𑀲𑀼𑀢𑀲𑁄𑀫, 𑀲𑀘𑁂𑀧𑀺 𑀢𑁂 𑀫𑀸𑀢𑀸𑀧𑀺𑀢𑀽𑀲𑀼 𑀲𑀺𑀦𑁂𑀳𑁄 𑀦𑀢𑁆𑀣𑀺, 𑀧𑀼𑀢𑁆𑀢𑀥𑀻𑀢𑀭𑁄 𑀢𑁂 𑀩𑀳𑀽 𑀢𑀭𑀼𑀡𑀸, 𑀢𑀬𑀸 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀓𑀸𑀮𑁂 𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋
‘‘𑀧𑀼𑀢𑁆𑀢𑀸𑀧𑀺 ¶ 𑀢𑀼𑀬𑁆𑀳𑀁 𑀩𑀳𑀯𑁄, 𑀤𑀳𑀭𑀸 𑀅𑀧𑁆𑀧𑀢𑁆𑀢𑀬𑁄𑀩𑁆𑀩𑀦𑀸;
𑀫𑀜𑁆𑀚𑀽 𑀢𑁂𑀧𑀺𑀢𑀁 𑀅𑀧𑀲𑁆𑀲𑀦𑁆𑀢𑀸, 𑀫𑀜𑁆𑀜𑁂 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀻’’𑀢𑀺.
𑀢𑀢𑁆𑀣 𑀫𑀜𑁆𑀚𑀽𑀢𑀺 𑀫𑀥𑀼𑀭𑀯𑀘𑀦𑀸. 𑀦𑀺𑀕𑀘𑁆𑀙𑀦𑁆𑀢𑀻𑀢𑀺 𑀦𑀺𑀕𑀘𑁆𑀙𑀺𑀲𑁆𑀲𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀫𑀜𑁆𑀜𑀸𑀫𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀧𑀼𑀢𑁆𑀢𑁂𑀳𑀺 𑀘 𑀫𑁂 𑀏𑀢𑁂𑀳𑀺, 𑀤𑀳𑀭𑁂𑀳𑀺 𑀅𑀧𑁆𑀧𑀢𑁆𑀢𑀬𑁄𑀩𑁆𑀩𑀦𑁂𑀳𑀺;
𑀫𑀜𑁆𑀚𑀽𑀳𑀺 𑀲𑀩𑁆𑀩𑁂𑀳𑀺𑀧𑀺 𑀢𑀼𑀫𑁆𑀳𑁂𑀳𑀺, 𑀘𑀺𑀭𑀫𑁆𑀧𑀺 𑀞𑀢𑁆𑀯𑀸 𑀯𑀺𑀦𑀸𑀲𑀪𑀸𑀯𑁄’’𑀢𑀺.
𑀢𑀢𑁆𑀣 ¶ ¶ 𑀲𑀩𑁆𑀩𑁂𑀳𑀺𑀧𑀺 𑀢𑀼𑀫𑁆𑀳𑁂𑀳𑀻𑀢𑀺, 𑀢𑀸𑀢, 𑀦 𑀓𑁂𑀯𑀮𑀁 𑀧𑀼𑀢𑁆𑀢𑁂𑀳𑁂𑀯, 𑀅𑀣 𑀔𑁄 𑀢𑀼𑀫𑁆𑀳𑁂𑀳𑀺𑀧𑀺 𑀅𑀜𑁆𑀜𑁂𑀳𑀺𑀧𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀘𑀺𑀭𑀁 𑀞𑀢𑁆𑀯𑀸𑀧𑀺 𑀤𑀻𑀖𑀫𑀤𑁆𑀥𑀸𑀦𑀁 𑀞𑀢𑁆𑀯𑀸𑀧𑀺 𑀯𑀺𑀦𑀸𑀲𑀪𑀸𑀯𑁄𑀯 𑀦𑀺𑀬𑀢𑁄. 𑀲𑀓𑀮𑀲𑁆𑀫𑀺𑀫𑁆𑀧𑀺 𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀏𑀓𑀲𑀗𑁆𑀔𑀸𑀭𑁄𑀧𑀺 𑀦𑀺𑀘𑁆𑀘𑁄 𑀦𑀸𑀫 𑀦𑀢𑁆𑀣𑀻𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀧𑀺𑀢𑀼 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑁄 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀢𑁆𑀢𑀲𑀢𑀸𑀦𑀁 𑀪𑀭𑀺𑀬𑀸𑀦𑀁 𑀆𑀭𑁄𑀘𑀬𑀺𑀁𑀲𑀼. 𑀢𑀸 𑀘 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀙𑀺𑀦𑁆𑀦𑀁 𑀦𑀼 𑀢𑀼𑀬𑁆𑀳𑀁 𑀳𑀤𑀬𑀁, 𑀅𑀤𑀼 𑀢𑁂 𑀓𑀭𑀼𑀡𑀸 𑀘 𑀦𑀢𑁆𑀣𑀺 𑀅𑀫𑁆𑀳𑁂𑀲𑀼;
𑀬𑀁 𑀦𑁄 𑀯𑀺𑀓𑀦𑁆𑀤𑀦𑁆𑀢𑀺𑀬𑁄, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯𑀸’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀲𑀸𑀫𑀺 𑀲𑀼𑀢𑀲𑁄𑀫, 𑀅𑀫𑁆𑀳𑁂 𑀯𑀺𑀥𑀯𑀸 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀧𑀺 𑀲𑀺𑀦𑁂𑀳𑀲𑁆𑀲 𑀅𑀪𑀸𑀯𑁂𑀦 𑀢𑀯 𑀳𑀤𑀬𑀁 𑀅𑀫𑁆𑀳𑁂𑀲𑀼 𑀙𑀺𑀦𑁆𑀦𑀁 𑀦𑀼, 𑀉𑀤𑀸𑀳𑀼 𑀓𑀭𑀼𑀡𑀸𑀬 𑀅𑀪𑀸𑀯𑁂𑀦 𑀓𑀸𑀭𑀼𑀜𑁆𑀜𑀁 𑀯𑀸 𑀦𑀢𑁆𑀣𑀺, 𑀬𑀁 𑀦𑁄 𑀏𑀯𑀁 𑀯𑀺𑀓𑀦𑁆𑀤𑀦𑁆𑀢𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀲𑀻𑀢𑀺.
𑀫𑀳𑀸𑀲𑀢𑁆𑀢𑁄 𑀢𑀸𑀲𑀁 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸𑀦𑀁 𑀧𑀭𑀺𑀤𑁂𑀯𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀦 ¶ 𑀘 𑀫𑀬𑁆𑀳𑀁 𑀙𑀺𑀦𑁆𑀦𑀁 𑀳𑀤𑀬𑀁, 𑀅𑀢𑁆𑀣𑀺 𑀓𑀭𑀼𑀡𑀸𑀧𑀺 𑀫𑀬𑁆𑀳𑀁 𑀢𑀼𑀫𑁆𑀳𑁂𑀲𑀼;
𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄, 𑀢𑁂𑀦 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.
𑀢𑀢𑁆𑀣 𑀲𑀕𑁆𑀕𑀜𑁆𑀘𑀸𑀢𑀺 𑀅𑀳𑀁 𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀦𑁆𑀢𑁄 𑀬𑀲𑁆𑀫𑀸 𑀅𑀬𑀁 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀸, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸𑀢𑀺 𑀢𑀸 𑀅𑀲𑁆𑀲𑀸𑀲𑁂𑀲𑀺.
𑀅𑀣𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀕𑀭𑀼𑀪𑀸𑀭𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸𑀧𑀺 𑀲𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀤𑀼𑀮𑁆𑀮𑀤𑁆𑀥𑀁 ¶ 𑀫𑁂 𑀆𑀲𑀺 𑀲𑀼𑀢𑀲𑁄𑀫, 𑀬𑀲𑁆𑀲 𑀢𑁂 𑀅𑀳𑀁 𑀪𑀭𑀺𑀬𑀸;
𑀬𑀁 𑀫𑁂 𑀯𑀺𑀮𑀧𑀦𑁆𑀢𑀺𑀬𑀸, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.
‘‘𑀤𑀼𑀮𑁆𑀮𑀤𑁆𑀥𑀁 ¶ 𑀫𑁂 𑀆𑀲𑀺 𑀲𑀼𑀢𑀲𑁄𑀫, 𑀬𑀲𑁆𑀲 𑀢𑁂 𑀅𑀳𑀁 𑀪𑀭𑀺𑀬𑀸;
𑀬𑀁 𑀫𑁂 𑀓𑀼𑀘𑁆𑀙𑀺𑀧𑀝𑀺𑀲𑀦𑁆𑀥𑀺𑀁, 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺 𑀤𑁂𑀯.
‘‘𑀧𑀭𑀺𑀧𑀓𑁆𑀓𑁄 𑀫𑁂 𑀕𑀩𑁆𑀪𑁄, 𑀓𑀼𑀘𑁆𑀙𑀺𑀕𑀢𑁄 𑀬𑀸𑀯 𑀦𑀁 𑀯𑀺𑀚𑀸𑀬𑀸𑀫𑀺;
𑀫𑀸𑀳𑀁 𑀏𑀓𑀸 𑀯𑀺𑀥𑀯𑀸, 𑀧𑀘𑁆𑀙𑀸 𑀤𑀼𑀓𑁆𑀔𑀸𑀦𑀺 𑀅𑀤𑁆𑀤𑀓𑁆𑀔𑀺’’𑀦𑁆𑀢𑀺.
𑀢𑀢𑁆𑀣 𑀬𑀁 𑀫𑁂𑀢𑀺 𑀬𑀲𑁆𑀫𑀸 𑀫𑀫 𑀯𑀺𑀮𑀧𑀦𑁆𑀢𑀺𑀬𑀸 𑀢𑁆𑀯𑀁 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺, 𑀢𑀲𑁆𑀫𑀸 𑀬𑀁 𑀫𑀬𑀸 𑀢𑀯 𑀲𑀦𑁆𑀢𑀺𑀓𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀮𑀤𑁆𑀥𑀁, 𑀢𑀁 𑀤𑀼𑀮𑁆𑀮𑀤𑁆𑀥𑀫𑁂𑀯 𑀆𑀲𑀺. 𑀤𑀼𑀢𑀺𑀬𑀕𑀸𑀣𑀸𑀬 𑀬𑀲𑁆𑀫𑀸 𑀫𑀁 𑀢𑁆𑀯𑀁 𑀓𑀼𑀘𑁆𑀙𑀺𑀧𑀝𑀺𑀲𑀦𑁆𑀥𑀺𑀁 𑀧𑀳𑀸𑀬 𑀅𑀦𑀧𑁂𑀓𑁆𑀔𑁄 𑀧𑀩𑁆𑀩𑀚𑀲𑀺, 𑀢𑀲𑁆𑀫𑀸 𑀬𑀁 𑀫𑀬𑀸 𑀢𑀯 𑀪𑀭𑀺𑀬𑀢𑁆𑀢𑀁 𑀮𑀤𑁆𑀥𑀁, 𑀢𑀁 𑀤𑀼𑀮𑁆𑀮𑀤𑁆𑀥𑀁 𑀫𑁂𑀢𑀺 𑀅𑀢𑁆𑀣𑁄. 𑀬𑀸𑀯 𑀦𑀦𑁆𑀢𑀺 𑀬𑀸𑀯𑀸𑀳𑀁 𑀢𑀁 𑀕𑀩𑁆𑀪𑀁 𑀯𑀺𑀚𑀸𑀬𑀸𑀫𑀺, 𑀢𑀸𑀯 𑀅𑀥𑀺𑀯𑀸𑀲𑁂𑀳𑀻𑀢𑀺.
𑀢𑀢𑁄 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀧𑀭𑀺𑀧𑀓𑁆𑀓𑁄 𑀢𑁂 𑀕𑀩𑁆𑀪𑁄, 𑀓𑀼𑀘𑁆𑀙𑀺𑀕𑀢𑁄 𑀇𑀗𑁆𑀖 𑀢𑁆𑀯𑀁 𑀯𑀺𑀚𑀸𑀬𑀲𑁆𑀲𑀼;
𑀧𑀼𑀢𑁆𑀢𑀁 ¶ 𑀅𑀦𑁄𑀫𑀯𑀡𑁆𑀡𑀁, 𑀢𑀁 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.
𑀢𑀢𑁆𑀣 𑀧𑀼𑀢𑁆𑀢𑀦𑁆𑀢𑀺, 𑀪𑀤𑁆𑀤𑁂, 𑀢𑀯 𑀕𑀩𑁆𑀪𑁄 𑀧𑀭𑀺𑀧𑀓𑁆𑀓𑁄𑀢𑀺 𑀚𑀸𑀦𑀸𑀫𑀺, 𑀢𑁆𑀯𑀁 𑀧𑀦 𑀯𑀺𑀚𑀸𑀬𑀫𑀸𑀦𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀲𑀺, 𑀦 𑀥𑀻𑀢𑀭𑀁, 𑀲𑀸 𑀢𑁆𑀯𑀁 𑀲𑁄𑀢𑁆𑀣𑀺𑀦𑀸 𑀯𑀺𑀚𑀸𑀬𑀲𑁆𑀲𑀼 𑀧𑀼𑀢𑁆𑀢𑀁, 𑀅𑀳𑀁 𑀧𑀦 𑀲𑀤𑁆𑀥𑀺𑀁 𑀢𑀬𑀸 𑀢𑀁 𑀧𑀼𑀢𑁆𑀢𑀁 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺𑀬𑁂𑀯𑀸𑀢𑀺.
𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬, 𑀤𑁂𑀯, 𑀅𑀫𑁆𑀳𑀸𑀓𑀁 𑀲𑀺𑀭𑀻 𑀦𑀸𑀫 𑀦𑀢𑁆𑀣𑀻’’𑀢𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀳𑀤𑀬𑀁 𑀥𑀸𑀭𑀬𑀫𑀸𑀦𑀸 𑀅𑀲𑁆𑀲𑀽𑀦𑀺 𑀫𑀼𑀜𑁆𑀘𑀦𑁆𑀢𑀻 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺. 𑀅𑀣 𑀦𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀫𑀸 ¶ 𑀢𑁆𑀯𑀁 𑀘𑀦𑁆𑀤𑁂 𑀭𑀼𑀤𑀺, 𑀫𑀸 𑀲𑁄𑀘𑀺 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀺;
𑀆𑀭𑁄𑀳 𑀯𑀭𑀧𑀸𑀲𑀸𑀤𑀁, 𑀅𑀦𑀧𑁂𑀓𑁆𑀔𑁄 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.
𑀢𑀢𑁆𑀣 𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑀼𑀤𑀻𑀢𑀺, 𑀪𑀤𑁆𑀤𑁂 𑀘𑀦𑁆𑀤𑀸𑀤𑁂𑀯𑀺, 𑀢𑁆𑀯𑀁 𑀫𑀸 𑀭𑁄𑀤𑀺 𑀫𑀸 𑀲𑁄𑀘𑀺. 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀻𑀢𑀺 𑀕𑀺𑀭𑀺𑀓𑀡𑁆𑀡𑀺𑀓𑀧𑀼𑀧𑁆𑀨𑀲𑀫𑀸𑀦𑀦𑁂𑀢𑁆𑀢𑁂. 𑀧𑀸𑀴𑀺𑀬𑀁 𑀧𑀦 ‘‘𑀓𑁄𑀯𑀺𑀴𑀸𑀭𑀢𑀫𑁆𑀩𑀓𑁆𑀔𑀻’’𑀢𑀺 𑀮𑀺𑀔𑀺𑀢𑀁, 𑀢𑀲𑁆𑀲𑀸 𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀁 𑀯𑀺𑀬 𑀢𑀫𑁆𑀩𑀦𑁂𑀢𑁆𑀢𑁂𑀢𑀺 𑀅𑀢𑁆𑀣𑁄.
𑀲𑀸 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀭𑁄𑀤𑀫𑀸𑀦𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑁂𑀝𑁆𑀞𑀧𑀼𑀢𑁆𑀢𑁄 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀫𑀸𑀢𑀸 𑀭𑁄𑀤𑀦𑁆𑀢𑀻 𑀦𑀺𑀲𑀺𑀦𑁆𑀦𑀸’’𑀢𑀺 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀓𑁄 𑀢𑀁 𑀅𑀫𑁆𑀫 𑀓𑁄𑀧𑁂𑀲𑀺, 𑀓𑀺𑀁 𑀭𑁄𑀤𑀲𑀺 𑀧𑁂𑀓𑁆𑀔𑀲𑀺 𑀘 𑀫𑀁 𑀩𑀸𑀴𑁆𑀳𑀁;
𑀓𑀁 𑀅𑀯𑀚𑁆𑀛𑀁 𑀖𑀸𑀢𑁂𑀫𑀺, 𑀜𑀸𑀢𑀻𑀦𑀁 𑀉𑀤𑀺𑀓𑁆𑀔𑀫𑀸𑀦𑀸𑀦’’𑀦𑁆𑀢𑀺.
𑀢𑀢𑁆𑀣 𑀓𑁄𑀧𑁂𑀲𑀻𑀢𑀺, 𑀅𑀫𑁆𑀫! 𑀓𑁄 𑀦𑀸𑀫 𑀢𑀁 𑀓𑁄𑀧𑁂𑀲𑀺, 𑀓𑁄 𑀢𑁂 𑀅𑀧𑁆𑀧𑀺𑀬𑀁 𑀅𑀓𑀸𑀲𑀺. 𑀧𑁂𑀓𑁆𑀔𑀲𑀺 𑀘𑀸𑀢𑀺 𑀫𑀁 𑀩𑀸𑀴𑁆𑀳𑀁 𑀧𑁂𑀓𑁆𑀔𑀦𑁆𑀢𑀻 𑀓𑀺𑀁𑀓𑀸𑀭𑀡𑀸 𑀭𑁄𑀤𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀁 𑀅𑀯𑀚𑁆𑀛𑀁 𑀖𑀸𑀢𑁂𑀫𑀻𑀢𑀺 𑀅𑀖𑀸𑀢𑁂𑀢𑀩𑁆𑀩𑀫𑁆𑀧𑀺 𑀓𑀁 𑀖𑀸𑀢𑁂𑀫𑀺 𑀅𑀢𑁆𑀢𑀦𑁄 𑀜𑀸𑀢𑀻𑀦𑀁 𑀉𑀤𑀺𑀓𑁆𑀔𑀫𑀸𑀦𑀸𑀦𑀜𑁆𑀜𑁂𑀯, 𑀅𑀓𑁆𑀔𑀸𑀳𑀺 𑀫𑁂𑀢𑀺 𑀧𑀼𑀘𑁆𑀙𑀢𑀺.
𑀢𑀢𑁄 𑀤𑁂𑀯𑀻 𑀕𑀸𑀣𑀫𑀸𑀳 𑁋
‘‘𑀦 𑀳𑀺 𑀲𑁄 𑀲𑀓𑁆𑀓𑀸 𑀳𑀦𑁆𑀢𑀼𑀁, 𑀯𑀺𑀚𑀺𑀢𑀸𑀯𑀻 𑀬𑁄 𑀫𑀁 𑀢𑀸𑀢 𑀓𑁄𑀧𑁂𑀲𑀺;
𑀧𑀺𑀢𑀸 ¶ 𑀢𑁂 𑀫𑀁 𑀢𑀸𑀢 𑀅𑀯𑀘, 𑀅𑀦𑀧𑁂𑀓𑁆𑀔𑁄 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.
𑀢𑀢𑁆𑀣 𑀯𑀺𑀚𑀺𑀢𑀸𑀯𑀻𑀢𑀺, 𑀢𑀸𑀢, 𑀬𑁄 𑀫𑀁 𑀇𑀫𑀺𑀲𑁆𑀲𑀸 𑀧𑀣𑀯𑀺𑀬𑀸 𑀯𑀺𑀚𑀺𑀢𑀸𑀯𑀻 𑀓𑁄𑀧𑁂𑀲𑀺, 𑀅𑀧𑁆𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦 𑀫𑁂 𑀳𑀤𑀬𑁂 𑀓𑁄𑀧𑀜𑁆𑀘 𑀲𑁄𑀓𑀜𑁆𑀘 𑀧𑀯𑁂𑀲𑁂𑀲𑀺, 𑀲𑁄 𑀢𑀬𑀸 𑀳𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀫𑀜𑁆𑀳𑀺, 𑀢𑀸𑀢, 𑀢𑀯 𑀧𑀺𑀢𑀸 ‘‘𑀅𑀳𑀁 𑀭𑀚𑁆𑀚𑀲𑀺𑀭𑀺𑀜𑁆𑀘 𑀢𑀜𑁆𑀘 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀘, 𑀇𑀤𑀁 𑀫𑁂 𑀭𑁄𑀤𑀦𑀓𑀸𑀭𑀡𑀦𑁆𑀢𑀺.
𑀲𑁄 ¶ 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀫! 𑀓𑀺𑀁 𑀦𑀸𑀫 𑀢𑁆𑀯𑀁 𑀓𑀣𑁂𑀲𑀺, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀫𑀬𑀁 𑀅𑀦𑀸𑀣𑀸 𑀦𑀸𑀫 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀬𑁄𑀳𑀁 𑀧𑀼𑀩𑁆𑀩𑁂 𑀦𑀺𑀬𑁆𑀬𑀸𑀫𑀺, 𑀉𑀬𑁆𑀬𑀸𑀦𑀁 𑀫𑀢𑁆𑀢𑀓𑀼𑀜𑁆𑀚𑀭𑁂 𑀘 𑀬𑁄𑀥𑁂𑀫𑀺;
𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂, 𑀓𑀣𑀁 𑀦𑀼 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀅𑀳𑀁 𑀧𑀼𑀩𑁆𑀩𑁂 𑀘𑀢𑀼𑀆𑀚𑀜𑁆𑀜𑀬𑀼𑀢𑁆𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀉𑀬𑁆𑀬𑀸𑀦𑀁 𑀕𑀘𑁆𑀙𑀸𑀫𑀺, 𑀫𑀢𑁆𑀢𑀓𑀼𑀜𑁆𑀚𑀭𑁂 𑀘 𑀬𑁄𑀥𑁂𑀫𑀺, 𑀅𑀜𑁆𑀜𑁂𑀳𑀺 𑀘 𑀅𑀲𑁆𑀲𑀓𑀻𑀴𑀸𑀤𑀻𑀳𑀺 𑀓𑀻𑀴𑀸𑀫𑀺, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂 𑀓𑀣𑀁 𑀓𑀭𑀺𑀲𑁆𑀲𑀸𑀫𑀻𑀢𑀺?
𑀅𑀣𑀲𑁆𑀲 ¶ 𑀓𑀦𑀺𑀝𑁆𑀞𑀪𑀸𑀢𑀸 𑀲𑀢𑁆𑀢𑀯𑀲𑁆𑀲𑀺𑀓𑁄 𑀢𑁂 𑀉𑀪𑁄𑀧𑀺 𑀭𑁄𑀤𑀦𑁆𑀢𑁂 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀅𑀫𑁆𑀫! 𑀓𑀺𑀁𑀓𑀸𑀭𑀡𑀸 𑀢𑀼𑀫𑁆𑀳𑁂 𑀭𑁄𑀤𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀫𑀸 𑀭𑁄𑀤𑀣, 𑀅𑀳𑀁 𑀢𑀸𑀢𑀲𑁆𑀲 𑀧𑀩𑁆𑀩𑀚𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀉𑀪𑁄𑀧𑀺 𑀢𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 𑀥𑀸𑀢𑀺𑀬𑀸 𑀲𑀤𑁆𑀥𑀺𑀁 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀓𑀺𑀭 𑀅𑀫𑁆𑀳𑁂 𑀅𑀓𑀸𑀫𑀓𑁂 𑀧𑀳𑀸𑀬 ‘𑀧𑀩𑁆𑀩𑀚𑀸𑀫𑀻’𑀢𑀺 𑀯𑀤𑀲𑀺, 𑀅𑀳𑀁 𑀢𑁂 𑀧𑀩𑁆𑀩𑀚𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀭𑀁 𑀕𑀻𑀯𑀸𑀬 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀫𑀸𑀢𑀼𑀘𑁆𑀘 𑀫𑁂 𑀭𑀼𑀤𑀦𑁆𑀢𑁆𑀬𑀸, 𑀚𑁂𑀝𑁆𑀞𑀲𑁆𑀲 𑀘 𑀪𑀸𑀢𑀼𑀦𑁄 𑀅𑀓𑀸𑀫𑀲𑁆𑀲;
𑀳𑀢𑁆𑀣𑁂𑀧𑀺 𑀢𑁂 𑀕𑀳𑁂𑀲𑁆𑀲𑀁, 𑀦 𑀳𑀺 𑀕𑀘𑁆𑀙𑀲𑀺 𑀦𑁄 𑀅𑀓𑀸𑀫𑀸𑀦’’𑀦𑁆𑀢𑀺.
𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑁂 𑀧𑀭𑀺𑀧𑀦𑁆𑀣𑀁 𑀓𑀭𑁄𑀢𑀺, 𑀓𑁂𑀦 𑀦𑀼 𑀔𑁄 𑀦𑀁 𑀉𑀧𑀸𑀬𑁂𑀦 𑀧𑀝𑀺𑀓𑁆𑀓𑀫𑀸𑀧𑁂𑀬𑁆𑀬’’𑀦𑁆𑀢𑀺. 𑀢𑀢𑁄 𑀥𑀸𑀢𑀺𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀫𑁆𑀫! 𑀥𑀸𑀢𑀺 𑀳𑀦𑁆𑀤𑀺𑀫𑀁 𑀫𑀡𑀺𑀓𑁆𑀔𑀦𑁆𑀥𑀧𑀺𑀴𑀦𑁆𑀥𑀦𑀁, 𑀢𑀯𑁂𑀲𑁄 𑀳𑁄𑀢𑀼 ¶ 𑀳𑀢𑁆𑀣𑁂, 𑀧𑀼𑀢𑁆𑀢𑀁 𑀅𑀧𑀦𑁂𑀳𑀺, 𑀫𑀸 𑀫𑁂 𑀅𑀦𑁆𑀢𑀭𑀸𑀬𑀁 𑀓𑀭𑀻’’𑀢𑀺 𑀲𑀬𑀁 𑀧𑀼𑀢𑁆𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀅𑀧𑀦𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀲𑀸 𑀮𑀜𑁆𑀚𑀁 𑀧𑀝𑀺𑀚𑀸𑀦𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀉𑀝𑁆𑀞𑁂𑀳𑀺 𑀢𑁆𑀯𑀁 𑀥𑀸𑀢𑀺, 𑀇𑀫𑀁 𑀓𑀼𑀫𑀸𑀭𑀁 𑀭𑀫𑁂𑀳𑀺 𑀅𑀜𑁆𑀜𑀢𑁆𑀣;
𑀫𑀸 𑀫𑁂 𑀧𑀭𑀺𑀧𑀦𑁆𑀣𑀫𑀓𑀸𑀲𑀺, 𑀲𑀕𑁆𑀕𑀁 𑀫𑀫 𑀧𑀢𑁆𑀣𑀬𑀸𑀦𑀲𑁆𑀲𑀸’’𑀢𑀺.
𑀢𑀢𑁆𑀣 ¶ 𑀇𑀫𑀁 𑀓𑀼𑀫𑀸𑀭𑀦𑁆𑀢𑀺, 𑀅𑀫𑁆𑀫! 𑀥𑀸𑀢𑀺 𑀢𑁆𑀯𑀁 𑀉𑀝𑁆𑀞𑁂𑀳𑀺, 𑀇𑀫𑀁 𑀓𑀼𑀫𑀸𑀭𑀁 𑀅𑀧𑀦𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀇𑀫𑀁 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦𑀁 𑀅𑀪𑀺𑀭𑀫𑁂𑀳𑀻𑀢𑀺.
𑀲𑀸 𑀮𑀜𑁆𑀚𑀁 𑀮𑀪𑀺𑀢𑁆𑀯𑀸 𑀓𑀼𑀫𑀸𑀭𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀆𑀤𑀸𑀬 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀕𑀸𑀣𑀫𑀸𑀳 𑁋
‘‘𑀬𑀁 𑀦𑀽𑀦𑀺𑀫𑀁 𑀤𑀤𑁂𑀬𑁆𑀬𑀁 𑀧𑀪𑀗𑁆𑀓𑀭𑀁, 𑀓𑁄 𑀦𑀼 𑀫𑁂 𑀇𑀫𑀺𑀦𑀸𑀢𑁆𑀣𑁄;
𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂, 𑀓𑀺𑀁 𑀦𑀼 𑀫𑁂𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀦𑀽𑀦 𑀅𑀳𑀁 𑀇𑀫𑀁 𑀮𑀜𑁆𑀚𑀢𑁆𑀣𑀸𑀬 𑀕𑀳𑀺𑀢𑀁 𑀧𑀪𑀗𑁆𑀓𑀭𑀁 𑀲𑀼𑀧𑁆𑀧𑀪𑀸𑀲𑀁 𑀫𑀡𑀺𑀁 𑀤𑀤𑁂𑀬𑁆𑀬𑀁, 𑀓𑁄 𑀦𑀼 𑀫𑀬𑁆𑀳𑀁 𑀲𑀼𑀢𑀲𑁄𑀫𑀦𑀭𑀺𑀦𑁆𑀤𑁂 𑀧𑀩𑁆𑀩𑀚𑀺𑀢𑁂 𑀇𑀫𑀺𑀦𑀸 𑀅𑀢𑁆𑀣𑁄, 𑀓𑀺𑀁 𑀦𑀼 𑀫𑁂𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀳𑀁 𑀢𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁂 𑀇𑀫𑀁 𑀮𑀪𑀺𑀲𑁆𑀲𑀸𑀫𑀺, 𑀮𑀪𑀦𑁆𑀢𑀻𑀧𑀺 𑀘 𑀓𑀺𑀁 𑀦𑀼 𑀔𑁄 𑀏𑀢𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀲𑁆𑀲𑀣 𑀫𑁂 𑀓𑀫𑁆𑀫𑀦𑁆𑀢𑀺.
𑀢𑀢𑁄 ¶ 𑀫𑀳𑀸𑀲𑁂𑀦𑀕𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 ‘‘𑀕𑁂𑀳𑁂 𑀫𑁂 𑀥𑀦𑀁 𑀫𑀦𑁆𑀤’𑀦𑁆𑀢𑀺 𑀲𑀜𑁆𑀜𑀁 𑀓𑀭𑁄𑀢𑀺 𑀫𑀜𑁆𑀜𑁂, 𑀩𑀳𑀼𑀪𑀸𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀉𑀝𑁆𑀞𑀸𑀬 𑀯𑀦𑁆𑀤𑀺𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀓𑁄𑀲𑁄 𑀘 𑀢𑀼𑀬𑁆𑀳𑀁 𑀯𑀺𑀧𑀼𑀮𑁄, 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀢𑀼𑀬𑁆𑀳𑀁 𑀧𑀭𑀺𑀧𑀽𑀭𑀁;
𑀧𑀣𑀯𑀻 𑀘 𑀢𑀼𑀬𑁆𑀳𑀁 𑀯𑀺𑀚𑀺𑀢𑀸, 𑀭𑀫𑀲𑁆𑀲𑀼 𑀫𑀸 𑀧𑀩𑁆𑀩𑀚𑀺 𑀤𑁂𑀯𑀸’’𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀓𑁄𑀲𑁄 𑀘 𑀫𑀬𑁆𑀳𑀁 𑀯𑀺𑀧𑀼𑀮𑁄, 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀫𑀬𑁆𑀳𑀁 𑀧𑀭𑀺𑀧𑀽𑀭𑀁;
𑀧𑀣𑀯𑀻 𑀘 𑀫𑀬𑁆𑀳𑀁 𑀯𑀺𑀚𑀺𑀢𑀸, 𑀢𑀁 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.
𑀢𑀁 ¶ 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁 𑀅𑀧𑀕𑀢𑁂 𑀓𑀼𑀮𑀯𑀟𑁆𑀠𑀦𑀲𑁂𑀝𑁆𑀞𑀺 𑀦𑀸𑀫 𑀉𑀝𑁆𑀞𑀸𑀬 𑀯𑀦𑁆𑀤𑀺𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀫𑀬𑁆𑀳𑀫𑁆𑀧𑀺 ¶ 𑀥𑀦𑀁 𑀧𑀳𑀽𑀢𑀁, 𑀲𑀗𑁆𑀔𑁆𑀬𑀸𑀢𑀼𑀁 𑀦𑁄𑀧𑀺 𑀤𑁂𑀯 𑀲𑀓𑁆𑀓𑁄𑀫𑀺;
𑀢𑀁 𑀢𑁂 𑀤𑀤𑀸𑀫𑀺 𑀲𑀩𑁆𑀩𑀫𑁆𑀧𑀺, 𑀭𑀫𑀲𑁆𑀲𑀼 𑀫𑀸 𑀧𑀩𑁆𑀩𑀚𑀺 𑀤𑁂𑀯𑀸’’𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀚𑀸𑀦𑀸𑀫𑀺 𑀥𑀦𑀁 𑀧𑀳𑀽𑀢𑀁, 𑀓𑀼𑀮𑀯𑀟𑁆𑀠𑀦 𑀧𑀽𑀚𑀺𑀢𑁄 𑀢𑀬𑀸 𑀘𑀲𑁆𑀫𑀺;
𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄, 𑀢𑁂𑀦 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.
𑀢𑀁 𑀲𑀼𑀢𑁆𑀯𑀸 𑀓𑀼𑀮𑀯𑀟𑁆𑀠𑀦𑁂 𑀅𑀧𑀕𑀢𑁂 𑀫𑀳𑀸𑀲𑀢𑁆𑀢𑁄 𑀲𑁄𑀫𑀤𑀢𑁆𑀢𑀁 𑀓𑀦𑀺𑀝𑁆𑀞𑀪𑀸𑀢𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀢𑀸𑀢, 𑀅𑀳𑀁 𑀧𑀜𑁆𑀚𑀭𑀧𑀓𑁆𑀔𑀺𑀢𑁆𑀢𑁄 𑀯𑀦𑀓𑀼𑀓𑁆𑀓𑀼𑀝𑁄 𑀯𑀺𑀬 𑀉𑀓𑁆𑀓𑀡𑁆𑀞𑀺𑀢𑁄, 𑀫𑀁 𑀖𑀭𑀸𑀯𑀸𑀲𑁂 𑀅𑀦𑀪𑀺𑀭𑀢𑀺 𑀅𑀪𑀺𑀪𑀯𑀢𑀺, 𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀫𑀁 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸’’𑀢𑀺 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀉𑀓𑁆𑀓𑀡𑁆𑀞𑀺𑀢𑁄𑀲𑁆𑀫𑀺 𑀩𑀸𑀴𑁆𑀳𑀁, 𑀅𑀭𑀢𑀺 𑀫𑀁 𑀲𑁄𑀫𑀤𑀢𑁆𑀢 𑀆𑀯𑀺𑀲𑀢𑀺;
𑀩𑀳𑀼𑀓𑀸𑀧𑀺 𑀫𑁂 𑀅𑀦𑁆𑀢𑀭𑀸𑀬𑀸, 𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑁄𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀢𑀁 𑀤𑀻𑀧𑁂𑀦𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀇𑀤𑀜𑁆𑀘 ¶ 𑀢𑀼𑀬𑁆𑀳𑀁 𑀭𑀼𑀘𑀺𑀢𑀁, 𑀲𑀼𑀢𑀲𑁄𑀫 𑀅𑀚𑁆𑀚𑁂𑀯 𑀤𑀸𑀦𑀺 𑀢𑁆𑀯𑀁 𑀧𑀩𑁆𑀩𑀚;
𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀉𑀲𑁆𑀲𑀳𑁂 𑀢𑀬𑀸 𑀯𑀺𑀦𑀸 𑀅𑀳𑀁 𑀞𑀸𑀢𑀼’’𑀦𑁆𑀢𑀺.
𑀅𑀣 𑀦𑀁 𑀲𑁄 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀟𑁆𑀠𑀁 𑀕𑀸𑀣𑀫𑀸𑀳 𑁋
‘‘𑀦 𑀳𑀺 𑀲𑀓𑁆𑀓𑀸 𑀧𑀩𑁆𑀩𑀚𑀺𑀢𑀼𑀁, 𑀦𑀕𑀭𑁂 𑀦 𑀳𑀺 𑀧𑀘𑁆𑀘𑀢𑀺 𑀚𑀦𑀧𑀤𑁂 𑀘𑀸’’𑀢𑀺.
𑀢𑀢𑁆𑀣 ¶ 𑀦 𑀳𑀺 𑀧𑀘𑁆𑀘𑀢𑀻𑀢𑀺 𑀇𑀤𑀸𑀦𑁂𑀯 𑀢𑀸𑀯 𑀫𑀫 𑀧𑀩𑁆𑀩𑀚𑁆𑀚𑀸𑀥𑀺𑀧𑁆𑀧𑀸𑀬𑀁 𑀲𑀼𑀢𑁆𑀯𑀸𑀯 𑀇𑀫𑀲𑁆𑀫𑀺𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀲𑀼𑀤𑀲𑁆𑀲𑀦𑀦𑀕𑀭𑁂 𑀘 𑀲𑀓𑀮𑀚𑀦𑀧𑀤𑁂 𑀘 𑀦 𑀧𑀘𑁆𑀘𑀢𑀺, 𑀓𑁄𑀘𑀺 𑀉𑀤𑁆𑀥𑀦𑁂 𑀅𑀕𑁆𑀕𑀺𑀁 𑀦 𑀚𑀸𑀮𑁂𑀢𑀺, 𑀅𑀫𑁆𑀳𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀩𑁆𑀩𑀚𑀺𑀢𑁂𑀲𑀼 𑀅𑀦𑀸𑀣𑀸𑀯 𑀭𑀝𑁆𑀞𑀯𑀸𑀲𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀦 𑀳𑀺 𑀲𑀓𑁆𑀓𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼𑀁, 𑀅𑀳𑀫𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀦𑁆𑀢𑁄 𑀉𑀧𑀟𑁆𑀠𑀕𑀸𑀣𑀫𑀸𑀳 𑁋
‘‘𑀲𑀼𑀢𑀲𑁄𑀫𑁂 𑀧𑀩𑁆𑀩𑀚𑀺𑀢𑁂, 𑀓𑀣𑀁 𑀦𑀼 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺.
𑀢𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀅𑀮𑀁 𑀫𑀸 𑀲𑁄𑀘𑀬𑀺𑀢𑁆𑀣, 𑀅𑀳𑀁 𑀘𑀺𑀭𑀫𑁆𑀧𑀺 𑀞𑀢𑁆𑀯𑀸 𑀢𑀼𑀫𑁆𑀳𑁂𑀳𑀺 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀺, 𑀉𑀧𑁆𑀧𑀦𑁆𑀦𑀲𑀗𑁆𑀔𑀸𑀭𑁄 𑀳𑀺 𑀦𑀺𑀘𑁆𑀘𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀆𑀳 𑁋
‘‘𑀉𑀧𑀦𑀻𑀬𑀢𑀺𑀤𑀁 ¶ 𑀫𑀜𑁆𑀜𑁂, 𑀧𑀭𑀺𑀢𑁆𑀢𑀁 𑀉𑀤𑀓𑀁𑀯 𑀘𑀗𑁆𑀓𑀯𑀸𑀭𑀫𑁆𑀳𑀺;
𑀏𑀯𑀁 𑀲𑀼𑀧𑀭𑀺𑀢𑁆𑀢𑀓𑁂 𑀚𑀻𑀯𑀺𑀢𑁂, 𑀦 𑀘 𑀧𑀫𑀚𑁆𑀚𑀺𑀢𑀼𑀁 𑀓𑀸𑀮𑁄.
‘‘𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂, 𑀧𑀭𑀺𑀢𑁆𑀢𑀁 𑀉𑀤𑀓𑀁𑀯 𑀘𑀗𑁆𑀓𑀯𑀸𑀭𑀫𑁆𑀳𑀺;
𑀏𑀯𑀁 𑀲𑀼𑀧𑀭𑀺𑀢𑁆𑀢𑀓𑁂 𑀚𑀻𑀯𑀺𑀢𑁂, 𑀅𑀦𑁆𑀥𑀩𑀸𑀮𑀸 𑀧𑀫𑀚𑁆𑀚𑀦𑁆𑀢𑀺.
‘‘𑀢𑁂 𑀯𑀟𑁆𑀠𑀬𑀦𑁆𑀢𑀺 𑀦𑀺𑀭𑀬𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀜𑁆𑀘 𑀧𑁂𑀢𑁆𑀢𑀺𑀯𑀺𑀲𑀬𑀜𑁆𑀘;
𑀢𑀡𑁆𑀳𑀸𑀬 𑀩𑀦𑁆𑀥𑀦𑀩𑀤𑁆𑀥𑀸, 𑀯𑀟𑁆𑀠𑁂𑀦𑁆𑀢𑀺 𑀅𑀲𑀼𑀭𑀓𑀸𑀬’’𑀦𑁆𑀢𑀺.
𑀢𑀢𑁆𑀣 𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂𑀢𑀺, 𑀢𑀸𑀢, ‘‘𑀇𑀤𑀁 𑀚𑀻𑀯𑀺𑀢𑀁 𑀉𑀧𑀦𑀻𑀬𑀢𑀻’’𑀢𑀺 𑀅𑀳𑀁 𑀫𑀜𑁆𑀜𑀸𑀫𑀺. 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑁂𑀲𑀼 𑀉𑀧𑀲𑀁𑀳𑀭𑀡𑀢𑁆𑀣𑁄 𑀉𑀧𑀦𑀺𑀬𑁆𑀬𑀦𑀢𑁆𑀣𑁄, 𑀇𑀥 𑀧𑀦 𑀧𑀭𑀺𑀬𑀸𑀤𑀸𑀦𑀢𑁆𑀣𑁄. 𑀢𑀲𑁆𑀫𑀸 𑀬𑀣𑀸 𑀧𑀭𑀺𑀢𑁆𑀢𑀁 𑀉𑀤𑀓𑀁 ¶ 𑀭𑀚𑀓𑀸𑀦𑀁 𑀔𑀸𑀭𑀘𑀗𑁆𑀓𑀯𑀸𑀭𑁂 𑀧𑀓𑁆𑀔𑀺𑀢𑁆𑀢𑀁 𑀲𑀻𑀖𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀢𑀣𑀸 𑀚𑀻𑀯𑀺𑀢𑀫𑁆𑀧𑀺. 𑀏𑀯𑀁 𑀲𑀼𑀧𑀭𑀺𑀢𑁆𑀢𑀓𑁂 𑀚𑀻𑀯𑀺𑀢𑁂 𑀢𑀁 𑀧𑀭𑀺𑀢𑁆𑀢𑀓𑀁 𑀆𑀬𑀼𑀲𑀗𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀦 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀧𑀫𑀚𑁆𑀚𑀺𑀢𑀼𑀁 𑀓𑀸𑀮𑁄, 𑀅𑀧𑁆𑀧𑀫𑀸𑀤𑁄𑀯 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀦𑁆𑀥𑀩𑀸𑀮𑀸 𑀧𑀫𑀚𑁆𑀚𑀦𑁆𑀢𑀻𑀢𑀺 𑀅𑀚𑀭𑀸𑀫𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀕𑀽𑀣𑀓𑀮𑀮𑁂 𑀲𑀽𑀓𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀓𑀸𑀫𑀧𑀗𑁆𑀓𑁂 𑀦𑀺𑀫𑀼𑀚𑁆𑀚𑀦𑁆𑀢𑀸 ¶ 𑀧𑀫𑀚𑁆𑀚𑀦𑁆𑀢𑀺. 𑀅𑀲𑀼𑀭𑀓𑀸𑀬𑀦𑁆𑀢𑀺 𑀓𑀸𑀴𑀓𑀜𑁆𑀚𑀺𑀓𑀅𑀲𑀼𑀭𑀬𑁄𑀦𑀺𑀜𑁆𑀘 𑀯𑀟𑁆𑀠𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀧𑀼𑀩𑁆𑀩𑀓𑀁 𑀦𑀸𑀫 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀢𑁆𑀢𑀫𑀸𑀬 𑀪𑀽𑀫𑀺𑀬𑀸 𑀞𑀺𑀢𑁄 𑀔𑀕𑁆𑀕𑁂𑀦 𑀘𑀽𑀴𑀁 𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀓𑀺𑀜𑁆𑀘𑀺 𑀦 𑀳𑁄𑀫𑀺, 𑀅𑀢𑁆𑀢𑀦𑁄 𑀭𑀸𑀚𑀸𑀦𑀁 𑀕𑀡𑁆𑀳𑀣𑀸’’𑀢𑀺 𑀲𑀯𑁂𑀞𑀦𑀁 𑀘𑀽𑀴𑀁 𑀫𑀳𑀸𑀚𑀦𑀲𑁆𑀲 𑀅𑀦𑁆𑀢𑀭𑁂 𑀔𑀺𑀧𑀺. 𑀢𑀁 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑁄 𑀪𑀽𑀫𑀺𑀬𑀁 𑀧𑀭𑀺𑀯𑀝𑁆𑀝𑁂𑀦𑁆𑀢𑁄 𑀧𑀭𑀺𑀯𑀝𑁆𑀝𑁂𑀦𑁆𑀢𑁄 𑀧𑀭𑀺𑀤𑁂𑀯𑀺. 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀦𑁆𑀢𑀁 𑀭𑀚𑀕𑁆𑀕𑀁 𑀉𑀝𑁆𑀞𑀳𑀺. 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀚𑀦𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀭𑀜𑁆𑀜𑀸 𑀘𑀽𑀴𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀯𑁂𑀞𑀦𑀸 𑀘𑀽𑀴𑀸 𑀫𑀳𑀸𑀚𑀦𑀲𑁆𑀲 𑀅𑀦𑁆𑀢𑀭𑁂 𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀢𑁂𑀦𑀸𑀬𑀁 𑀧𑀸𑀲𑀸𑀤𑀲𑁆𑀲 𑀅𑀯𑀺𑀤𑀽𑀭𑁂 𑀭𑀚𑀯𑀝𑁆𑀝𑀺 𑀉𑀕𑁆𑀕𑀢𑀸’’𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀊𑀳𑀜𑁆𑀜𑀢𑁂 𑀭𑀚𑀕𑁆𑀕𑀁 𑀅𑀯𑀺𑀤𑀽𑀭𑁂, 𑀧𑀼𑀩𑁆𑀩𑀓𑀫𑁆𑀳𑀺 𑀘 𑀧𑀸𑀲𑀸𑀤𑁂;
𑀫𑀜𑁆𑀜𑁂 𑀦𑁄 𑀓𑁂𑀲𑀸 𑀙𑀺𑀦𑁆𑀦𑀸, 𑀬𑀲𑀲𑁆𑀲𑀺𑀦𑁄 𑀥𑀫𑁆𑀫𑀭𑀸𑀚𑀲𑁆𑀲𑀸’’𑀢𑀺.
𑀢𑀢𑁆𑀣 𑀊𑀳𑀜𑁆𑀜𑀢𑁂𑀢𑀺 𑀉𑀝𑁆𑀞𑀳𑀢𑀺. 𑀭𑀚𑀕𑁆𑀕𑀦𑁆𑀢𑀺 𑀭𑀚𑀓𑁆𑀔𑀦𑁆𑀥𑁄. 𑀅𑀯𑀺𑀤𑀽𑀭𑁂𑀢𑀺 𑀇𑀢𑁄 𑀅𑀫𑁆𑀳𑀸𑀓𑀁 𑀞𑀺𑀢𑀝𑁆𑀞𑀸𑀦𑀢𑁄 𑀅𑀯𑀺𑀤𑀽𑀭𑁂. 𑀧𑀼𑀩𑁆𑀩𑀓𑀫𑁆𑀳𑀻𑀢𑀺 𑀧𑀼𑀩𑁆𑀩𑀓𑀧𑀸𑀲𑀸𑀤𑀲𑁆𑀲 𑀲𑀫𑀻𑀧𑁂. 𑀫𑀜𑁆𑀜𑁂 𑀦𑁄𑀢𑀺 𑀅𑀫𑁆𑀳𑀸𑀓𑀁 𑀥𑀫𑁆𑀫𑀭𑀸𑀚𑀲𑁆𑀲 𑀓𑁂𑀲𑀸 𑀙𑀺𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀫𑀜𑁆𑀜𑀸𑀫.
𑀫𑀳𑀸𑀲𑀢𑁆𑀢𑁄 ¶ 𑀧𑀭𑀺𑀘𑀸𑀭𑀺𑀓𑀁 𑀧𑁂𑀲𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀆𑀳𑀭𑀸𑀧𑁂𑀢𑁆𑀯𑀸 𑀓𑀧𑁆𑀧𑀓𑁂𑀦 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀸𑀭𑀁 𑀲𑀬𑀦𑀧𑀺𑀝𑁆𑀞𑁂 𑀧𑀸𑀢𑁂𑀢𑁆𑀯𑀸 𑀭𑀢𑁆𑀢𑀧𑀝𑀸𑀦𑀁 𑀤𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀯𑀸𑀫𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀓𑀢𑁆𑀢𑀭𑀤𑀡𑁆𑀟𑀁 𑀆𑀤𑀸𑀬 𑀫𑀳𑀸𑀢𑀮𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀕𑀘𑁆𑀙𑀦𑁆𑀢𑀁 𑀧𑀦 𑀦𑀁 𑀦 𑀓𑁄𑀘𑀺 𑀲𑀜𑁆𑀚𑀸𑀦𑀺. 𑀅𑀣𑀲𑁆𑀲 𑀲𑀢𑁆𑀢𑀲𑀢𑀸 𑀔𑀢𑁆𑀢𑀺𑀬𑀓𑀜𑁆𑀜𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 𑀆𑀪𑀭𑀡𑀪𑀡𑁆𑀟𑀫𑁂𑀯 𑀤𑀺𑀲𑁆𑀯𑀸 𑀑𑀢𑀭𑀺𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀲𑁄𑀴𑀲𑀲𑀳𑀲𑁆𑀲𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀺𑀬𑀲𑀸𑀫𑀺𑀓𑁄 𑀲𑀼𑀢𑀲𑁄𑀫𑀫𑀳𑀺𑀲𑁆𑀲𑀭𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀫𑀸𑀦𑀸𑀯 𑀩𑀳𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀚𑀦𑁄 ¶ 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀅𑀜𑁆𑀜𑀸𑀲𑀺, 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀦𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀭𑀸𑀚𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺, 𑀫𑀳𑀸𑀚𑀦𑁄 ‘‘𑀇𑀥 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀣 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀸𑀲𑀸𑀤𑀸𑀤𑀻𑀦𑀺 𑀭𑀜𑁆𑀜𑁄 𑀧𑀭𑀺𑀪𑁄𑀕𑀝𑁆𑀞𑀸𑀦𑀸𑀦𑀺 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀤𑀺𑀲𑁆𑀯𑀸 𑁋
‘‘𑀅𑀬𑀫𑀲𑁆𑀲 ¶ 𑀧𑀸𑀲𑀸𑀤𑁄, 𑀲𑁄𑀯𑀡𑁆𑀡𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑁄;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀅𑀬𑀫𑀲𑁆𑀲 𑀧𑀸𑀲𑀸𑀤𑁄, 𑀲𑁄𑀯𑀡𑁆𑀡𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑁄;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀇𑀤𑀫𑀲𑁆𑀲 𑀓𑀽𑀝𑀸𑀕𑀸𑀭𑀁, 𑀲𑁄𑀯𑀡𑁆𑀡𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀇𑀤𑀫𑀲𑁆𑀲 𑀓𑀽𑀝𑀸𑀕𑀸𑀭𑀁, 𑀲𑁄𑀯𑀡𑁆𑀡𑀧𑀼𑀧𑁆𑀨𑀫𑀸𑀮𑁆𑀬𑀯𑀻𑀢𑀺𑀓𑀺𑀡𑁆𑀡𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀅𑀬𑀫𑀲𑁆𑀲 𑀅𑀲𑁄𑀓𑀯𑀦𑀺𑀓𑀸, 𑀲𑀼𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑀓𑀸𑀮𑀺𑀓𑀸 𑀭𑀫𑁆𑀫𑀸;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀅𑀬𑀫𑀲𑁆𑀲 𑀅𑀲𑁄𑀓𑀯𑀦𑀺𑀓𑀸, 𑀲𑀼𑀧𑀼𑀧𑁆𑀨𑀺𑀢𑀸 𑀲𑀩𑁆𑀩𑀓𑀸𑀮𑀺𑀓𑀸 𑀭𑀫𑁆𑀫𑀸;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀇𑀤𑀫𑀲𑁆𑀲 𑀉𑀬𑁆𑀬𑀸𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 ¶ 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀇𑀤𑀫𑀲𑁆𑀲 ¶ 𑀉𑀬𑁆𑀬𑀸𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀇𑀤𑀫𑀲𑁆𑀲 𑀓𑀡𑀺𑀓𑀸𑀭𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀇𑀤𑀫𑀲𑁆𑀲 𑀓𑀡𑀺𑀓𑀸𑀭𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀇𑀤𑀫𑀲𑁆𑀲 ¶ 𑀧𑀸𑀝𑀮𑀺𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀇𑀤𑀫𑀲𑁆𑀲 𑀧𑀸𑀝𑀮𑀺𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀇𑀤𑀫𑀲𑁆𑀲 𑀅𑀫𑁆𑀩𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀇𑀤𑀫𑀲𑁆𑀲 𑀅𑀫𑁆𑀩𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦.
‘‘𑀅𑀬𑀫𑀲𑁆𑀲 𑀧𑁄𑀓𑁆𑀔𑀭𑀡𑀻, 𑀲𑀜𑁆𑀙𑀦𑁆𑀦𑀸 𑀅𑀡𑁆𑀟𑀚𑁂𑀳𑀺 𑀯𑀻𑀢𑀺𑀓𑀺𑀡𑁆𑀡𑀸;
𑀬𑀳𑀺𑀫𑀦𑀼𑀯𑀺𑀘𑀭𑀺 ¶ 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀇𑀢𑁆𑀣𑀸𑀕𑀸𑀭𑁂𑀳𑀺.
‘‘𑀅𑀬𑀫𑀲𑁆𑀲 𑀧𑁄𑀓𑁆𑀔𑀭𑀡𑀻, 𑀲𑀜𑁆𑀙𑀦𑁆𑀦𑀸 𑀅𑀡𑁆𑀟𑀚𑁂𑀳𑀺 𑀯𑀻𑀢𑀺𑀓𑀺𑀡𑁆𑀡𑀸;
𑀬𑀳𑀺𑀫𑀦𑀼𑀯𑀺𑀘𑀭𑀺 𑀭𑀸𑀚𑀸, 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀲𑀗𑁆𑀖𑁂𑀦𑀸’’𑀢𑀺. 𑁋
𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀦𑁆𑀢𑁄 𑀯𑀺𑀘𑀭𑀺.
𑀢𑀢𑁆𑀣 𑀯𑀻𑀢𑀺𑀓𑀺𑀡𑁆𑀡𑁄𑀢𑀺 𑀲𑁄𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀘 𑀦𑀸𑀦𑀸𑀫𑀸𑀮𑁆𑀬𑁂𑀳𑀺 𑀘 𑀲𑀫𑁄𑀓𑀺𑀡𑁆𑀡𑁄. 𑀧𑀭𑀺𑀓𑀺𑀡𑁆𑀡𑁄𑀢𑀺 𑀧𑀭𑀺𑀯𑀸𑀭𑀺𑀢𑁄. 𑀇𑀢𑁆𑀣𑀸𑀕𑀸𑀭𑁂𑀳𑀻𑀢𑀺 𑀤𑀸𑀲𑀺𑀬𑁄 𑀉𑀧𑀸𑀤𑀸𑀬 𑀇𑀢𑁆𑀣𑀺𑀬𑁄 𑀇𑀢𑁆𑀣𑀸𑀕𑀸𑀭𑀸 𑀦𑀸𑀫. 𑀜𑀸𑀢𑀺𑀲𑀗𑁆𑀖𑁂𑀦𑀸𑀢𑀺 𑀅𑀫𑀘𑁆𑀘𑀸𑀧𑀺 𑀇𑀥 𑀜𑀸𑀢𑀬𑁄 𑀏𑀯. 𑀓𑀽𑀝𑀸𑀕𑀸𑀭𑀦𑁆𑀢𑀺 𑀲𑀢𑁆𑀢𑀭𑀢𑀦𑀯𑀺𑀘𑀺𑀢𑁆𑀢𑁄 𑀲𑀬𑀦𑀓𑀽𑀝𑀸𑀕𑀸𑀭𑀕𑀩𑁆𑀪𑁄. 𑀅𑀲𑁄𑀓𑀯𑀦𑀺𑀓𑀸𑀢𑀺 𑀅𑀲𑁄𑀓𑀯𑀦𑀪𑀽𑀫𑀺. 𑀲𑀩𑁆𑀩𑀓𑀸𑀮𑀺𑀓𑀸𑀢𑀺 𑀲𑀩𑁆𑀩𑀓𑀸𑀮𑀧𑀭𑀺𑀪𑁄𑀕𑀓𑁆𑀔𑀫𑀸 𑀦𑀺𑀘𑁆𑀘𑀧𑀼𑀧𑁆𑀨𑀺𑀢𑀸 𑀯𑀸. 𑀉𑀬𑁆𑀬𑀸𑀦𑀦𑁆𑀢𑀺 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀲𑀤𑀺𑀲𑀁 𑀉𑀬𑁆𑀬𑀸𑀦𑀁 ¶ . 𑀲𑀩𑁆𑀩𑀓𑀸𑀮𑀺𑀓𑀦𑁆𑀢𑀺 𑀙𑀲𑀼𑀧𑀺 𑀉𑀢𑀽𑀲𑀼 𑀉𑀧𑁆𑀧𑀚𑁆𑀚𑀦𑀓𑀧𑀼𑀧𑁆𑀨𑀨𑀮𑀲𑀜𑁆𑀙𑀦𑁆𑀦𑀁. 𑀓𑀡𑀺𑀓𑀸𑀭𑀯𑀦𑀸𑀤𑀻𑀲𑀼 𑀲𑀩𑁆𑀩𑀓𑀸𑀮𑀺𑀓𑀦𑁆𑀢𑀺 𑀲𑀩𑁆𑀩𑀓𑀸𑀮𑁂 𑀲𑀼𑀧𑀼𑀧𑁆𑀨𑀺𑀢𑀨𑀮𑀺𑀢𑀫𑁂𑀯. 𑀲𑀜𑁆𑀙𑀦𑁆𑀦𑀸𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀚𑀮𑀚𑀣𑀮𑀚𑀓𑀼𑀲𑀼𑀫𑁂𑀳𑀺 𑀲𑀼𑀝𑁆𑀞𑀼 𑀲𑀜𑁆𑀙𑀦𑁆𑀦𑀸. 𑀅𑀡𑁆𑀟𑀚𑁂𑀳𑀺 𑀯𑀻𑀢𑀺𑀓𑀺𑀡𑁆𑀡𑀸𑀢𑀺 𑀲𑀓𑀼𑀡𑀲𑀗𑁆𑀖𑁂𑀳𑀺 𑀑𑀓𑀺𑀡𑁆𑀡𑀸.
𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀧𑀭𑀺𑀤𑁂𑀯𑀺𑀢𑁆𑀯𑀸 𑀫𑀳𑀸𑀚𑀦𑁄 𑀧𑀼𑀦 𑀭𑀸𑀚𑀗𑁆𑀕𑀡𑀁 𑀆𑀕𑀦𑁆𑀢𑁆𑀯𑀸 𑁋
‘‘𑀭𑀸𑀚𑀸 ¶ 𑀯𑁄 𑀔𑁄 𑀧𑀩𑁆𑀩𑀚𑀺𑀢𑁄, 𑀲𑀼𑀢𑀲𑁄𑀫𑁄 𑀭𑀚𑁆𑀚𑀁 𑀇𑀫𑀁 𑀧𑀳𑀢𑁆𑀯𑀸𑀦;
𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄, 𑀦𑀸𑀕𑁄𑀯 𑀏𑀓𑀓𑁄 𑀘𑀭𑀢𑀻’’𑀢𑀺. 𑁋
𑀕𑀸𑀣𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑁂 𑀯𑀺𑀪𑀯𑀁 𑀧𑀳𑀸𑀬 𑀧𑀼𑀢𑁆𑀢𑀥𑀻𑀢𑀭𑁄 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀢𑀣𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀤𑀸𑀭𑀸 𑀲𑁄𑀴𑀲𑀲𑀳𑀲𑁆𑀲𑀸 𑀘 𑀦𑀸𑀝𑀓𑀺𑀢𑁆𑀣𑀺𑀬𑁄. 𑀲𑀓𑀮𑀦𑀕𑀭𑀁 𑀢𑀼𑀘𑁆𑀙𑀁 𑀯𑀺𑀬 𑀅𑀳𑁄𑀲𑀺, 𑀚𑀦𑀧𑀤𑀯𑀸𑀲𑀺𑀦𑁄𑀧𑀺 𑀢𑁂𑀲𑀁 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀢𑀸𑀢 𑀯𑀺𑀲𑁆𑀲𑀓𑀫𑁆𑀫, 𑀲𑀼𑀢𑀲𑁄𑀫𑀫𑀳𑀸𑀭𑀸𑀚𑀸 𑀅𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀯𑀲𑀦𑀝𑁆𑀞𑀸𑀦𑀁 ¶ 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑀫𑀸𑀕𑀫𑁄 𑀘 𑀫𑀳𑀸 𑀪𑀯𑀺𑀲𑁆𑀲𑀢𑀺, 𑀕𑀘𑁆𑀙 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀕𑀗𑁆𑀕𑀸𑀢𑀻𑀭𑁂 𑀢𑀺𑀁𑀲𑀬𑁄𑀚𑀦𑀸𑀬𑀸𑀫𑀁 𑀧𑀜𑁆𑀘𑀤𑀲𑀬𑁄𑀚𑀦𑀯𑀺𑀢𑁆𑀣𑀢𑀁 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀅𑀲𑁆𑀲𑀫𑀧𑀤𑁂 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 𑀧𑀝𑀺𑀬𑀸𑀤𑁂𑀢𑁆𑀯𑀸 𑀏𑀓𑀧𑀤𑀺𑀓𑀫𑀕𑁆𑀕𑀁 𑀫𑀸𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄.
𑀫𑀳𑀸𑀲𑀢𑁆𑀢𑁄 𑀢𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀅𑀲𑁆𑀲𑀫𑀧𑀤𑀁 𑀧𑀯𑀺𑀲𑀺𑀢𑁆𑀯𑀸 𑀧𑀞𑀫𑀁 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀙𑀸 𑀲𑁂𑀲𑁂 𑀧𑀩𑁆𑀩𑀸𑀚𑁂𑀲𑀺, 𑀅𑀧𑀭𑀪𑀸𑀕𑁂 𑀩𑀳𑀽 𑀧𑀩𑁆𑀩𑀚𑀺𑀁𑀲𑀼. 𑀢𑀺𑀁𑀲𑀬𑁄𑀚𑀦𑀺𑀓𑀁 𑀞𑀸𑀦𑀁 𑀧𑀭𑀺𑀧𑀽𑀭𑀺. 𑀯𑀺𑀲𑁆𑀲𑀓𑀫𑁆𑀫𑁂𑀦 𑀧𑀦 𑀅𑀲𑁆𑀲𑀫𑀫𑀸𑀧𑀺𑀢𑀦𑀺𑀬𑀸𑀫𑁄 𑀘 𑀩𑀳𑀽𑀦𑀁 𑀧𑀩𑁆𑀩𑀚𑀺𑀢𑀦𑀺𑀬𑀸𑀫𑁄 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀲𑁆𑀲𑀫𑀧𑀤𑀲𑀁𑀯𑀺𑀤𑀳𑀺𑀢𑀦𑀺𑀬𑀸𑀫𑁄 𑀘 𑀳𑀢𑁆𑀣𑀺𑀧𑀸𑀮𑀚𑀸𑀢𑀓𑁂 (𑀚𑀸. 𑁧.𑁧𑁫.𑁩𑁩𑁭 𑀆𑀤𑀬𑁄) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀫𑀳𑀸𑀲𑀢𑁆𑀢𑁄 𑀬𑀲𑁆𑀲 𑀬𑀲𑁆𑀲𑁂𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑀁 𑀆𑀓𑀸𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀑𑀯𑀤𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀫𑀸𑀲𑁆𑀲𑀼 ¶ 𑀧𑀼𑀩𑁆𑀩𑁂 𑀭𑀢𑀺𑀓𑀻𑀴𑀺𑀢𑀸𑀦𑀺, 𑀳𑀲𑀺𑀢𑀸𑀦𑀺 𑀘 𑀅𑀦𑀼𑀲𑁆𑀲𑀭𑀺𑀢𑁆𑀣;
𑀫𑀸 𑀯𑁄 𑀓𑀸𑀫𑀸 𑀳𑀦𑀺𑀁𑀲𑀼, 𑀭𑀫𑁆𑀫𑀜𑁆𑀳𑀺 𑀲𑀼𑀤𑀲𑁆𑀲𑀦𑀁 𑀦𑀕𑀭𑀁.
‘‘𑀫𑁂𑀢𑁆𑀢𑀘𑀺𑀢𑁆𑀢𑀜𑁆𑀘 𑀪𑀸𑀯𑁂𑀣, 𑀅𑀧𑁆𑀧𑀫𑀸𑀡𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘;
𑀅𑀕𑀘𑁆𑀙𑀺𑀢𑁆𑀣 𑀤𑁂𑀯𑀧𑀼𑀭𑀁, 𑀆𑀯𑀸𑀲𑀁 𑀧𑀼𑀜𑁆𑀜𑀓𑀫𑁆𑀫𑀺𑀦’’𑀦𑁆𑀢𑀺.
𑀢𑀢𑁆𑀣 𑀭𑀢𑀺𑀓𑀻𑀴𑀺𑀢𑀸𑀦𑀻𑀢𑀺 𑀓𑀸𑀫𑀭𑀢𑀺𑀬𑁄 𑀘 𑀓𑀸𑀬𑀯𑀸𑀘𑀸𑀔𑀺𑀟𑁆𑀟𑀸𑀯𑀲𑁂𑀦 𑀧𑀯𑀢𑁆𑀢𑀓𑀻𑀴𑀺𑀢𑀸𑀦𑀺 𑀘. 𑀫𑀸 𑀯𑁄 𑀓𑀸𑀫𑀸 𑀳𑀦𑀺𑀁𑀲𑀽𑀢𑀺 𑀫𑀸 𑀢𑀼𑀫𑁆𑀳𑁂 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸 𑀳𑀦𑀺𑀁𑀲𑀼. 𑀭𑀫𑁆𑀫𑀁 𑀳𑀻𑀢𑀺 𑀲𑀼𑀤𑀲𑁆𑀲𑀦𑀦𑀕𑀭𑀁 𑀦𑀸𑀫 𑀭𑀫𑀡𑀻𑀬𑀁, 𑀢𑀁 𑀫𑀸 𑀅𑀦𑀼𑀲𑁆𑀲𑀭𑀺𑀢𑁆𑀣. 𑀫𑁂𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀇𑀤𑀁 𑀤𑁂𑀲𑀦𑀸𑀫𑀢𑁆𑀢𑀫𑁂𑀯, 𑀲𑁄 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 ¶ 𑀆𑀘𑀺𑀓𑁆𑀔𑀺. 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀁. 𑀅𑀕𑀘𑁆𑀙𑀺𑀢𑁆𑀣𑀸𑀢𑀺 𑀕𑀫𑀺𑀲𑁆𑀲𑀣. 𑀤𑁂𑀯𑀧𑀼𑀭𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑀁.
𑀲𑁄𑀧𑀺 ¶ 𑀇𑀲𑀺𑀕𑀡𑁄 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀳𑀢𑁆𑀣𑀺𑀧𑀸𑀮𑀚𑀸𑀢𑀓𑁂 𑀆𑀕𑀢𑀦𑀬𑁂𑀦𑁂𑀯 𑀓𑀣𑁂𑀢𑀩𑁆𑀩𑀁.
𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀘𑀦𑁆𑀤𑀸𑀤𑁂𑀯𑀻 𑀭𑀸𑀳𑀼𑀮𑀫𑀸𑀢𑀸, 𑀚𑁂𑀝𑁆𑀞𑀧𑀼𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀓𑀦𑀺𑀝𑁆𑀞𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀥𑀸𑀢𑀺 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀓𑀼𑀮𑀯𑀟𑁆𑀠𑀦𑀲𑁂𑀝𑁆𑀞𑀺 𑀓𑀲𑁆𑀲𑀧𑁄, 𑀫𑀳𑀸𑀲𑁂𑀦𑀕𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀲𑁄𑀫𑀤𑀢𑁆𑀢𑀓𑀼𑀫𑀸𑀭𑁄 𑀆𑀦𑀦𑁆𑀤𑁄, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀲𑀼𑀢𑀲𑁄𑀫𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀘𑀽𑀴𑀲𑀼𑀢𑀲𑁄𑀫𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.
𑀚𑀸𑀢𑀓𑀼𑀤𑁆𑀤𑀸𑀦𑀁 𑁋
𑀲𑀼𑀯𑀧𑀡𑁆𑀟𑀺𑀢𑀚𑀫𑁆𑀩𑀼𑀓𑀓𑀼𑀡𑁆𑀟𑀮𑀺𑀦𑁄, 𑀯𑀭𑀓𑀜𑁆𑀜𑀫𑀮𑀫𑁆𑀩𑀼𑀲𑀚𑀸𑀢𑀓𑀜𑁆𑀘;
𑀧𑀯𑀭𑀼𑀢𑁆𑀢𑀫𑀲𑀗𑁆𑀔𑀲𑀺𑀭𑀻𑀯𑁆𑀳𑀬𑀓𑁄, 𑀲𑀼𑀢𑀲𑁄𑀫𑀅𑀭𑀺𑀦𑁆𑀤𑀫𑀭𑀸𑀚𑀯𑀭𑁄.
𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁧𑁮. 𑀧𑀡𑁆𑀡𑀸𑀲𑀦𑀺𑀧𑀸𑀢𑁄
[𑁫𑁨𑁬] 𑁧. 𑀦𑀺𑀴𑀺𑀦𑀺𑀓𑀸𑀚𑀸𑀢𑀓𑀯𑀡𑁆𑀡𑀦𑀸
𑀉𑀤𑁆𑀤𑀬𑁆𑀳𑀢𑁂 ¶ ¶ ¶ 𑀚𑀦𑀧𑀤𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀩 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀘 𑀢𑀁 𑀪𑀺𑀓𑁆𑀔𑀼𑀁 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀏𑀲𑀸 𑀔𑁄, 𑀪𑀺𑀓𑁆𑀔𑀼, 𑀇𑀤𑀸𑀦𑁂𑀯 𑀢𑀯 𑀅𑀦𑀢𑁆𑀣𑀓𑀸𑀭𑀺𑀓𑀸, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀛𑀸𑀦𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀺𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀮𑀫𑁆𑀩𑀼𑀲𑀸𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀧𑀝𑀺𑀘𑁆𑀘 𑀏𑀓𑀸 𑀫𑀺𑀕𑀻 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀇𑀲𑀺𑀲𑀺𑀗𑁆𑀕𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀅𑀣 𑀦𑀁 𑀧𑀺𑀢𑀸 𑀯𑀬𑀧𑁆𑀧𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀦𑀘𑀺𑀭𑀲𑁆𑀲𑁂𑀯 𑀛𑀸𑀦𑀸𑀪𑀺𑀜𑁆𑀜𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀓𑀻𑀴𑀺, 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀓𑀫𑁆𑀧𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀉𑀧𑀸𑀬𑁂𑀦𑀲𑁆𑀲 𑀲𑀻𑀮𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀲𑀓𑀮𑀓𑀸𑀲𑀺𑀭𑀝𑁆𑀞𑁂 𑀯𑀼𑀝𑁆𑀞𑀺𑀁 𑀦𑀺𑀯𑀸𑀭𑁂𑀲𑀺, 𑀭𑀝𑁆𑀞𑀁 𑀅𑀕𑁆𑀕𑀺𑀤𑀟𑁆𑀠𑀁 𑀯𑀺𑀬 𑀅𑀳𑁄𑀲𑀺. 𑀲𑀲𑁆𑀲𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀤𑀼𑀩𑁆𑀪𑀺𑀓𑁆𑀔𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀅𑀣 𑀦𑁂 𑀭𑀸𑀚𑀸 𑀯𑀸𑀢𑀧𑀸𑀦𑁂 𑀞𑀺𑀢𑁄 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀢𑀻𑀡𑀺 ¶ 𑀲𑀁𑀯𑀘𑁆𑀙𑀭𑀸𑀦𑀺 𑀤𑁂𑀯𑀲𑁆𑀲 𑀅𑀯𑀲𑁆𑀲𑀦𑁆𑀢𑀢𑁆𑀢𑀸 𑀲𑀓𑀮𑀭𑀝𑁆𑀞𑀁 𑀉𑀤𑁆𑀤𑀬𑁆𑀳𑀢𑀺, 𑀫𑀦𑀼𑀲𑁆𑀲𑀸 𑀤𑀼𑀓𑁆𑀔𑀺𑀢𑀸, 𑀤𑁂𑀯𑀁 𑀯𑀲𑁆𑀲𑀸𑀧𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄𑀧𑀺 𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺.
𑀢𑀲𑁆𑀫𑀺𑀁 𑀓𑀸𑀮𑁂 𑀲𑀓𑁆𑀓𑁄 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀢𑀲𑁆𑀲 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀯𑁂𑀳𑀸𑀲𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀲𑀓𑁆𑀓𑁄𑀳𑀫𑀲𑁆𑀫𑀻’’𑀢𑀺. ‘‘𑀓𑁂𑀦𑀢𑁆𑀣𑁂𑀦𑀸𑀕𑀢𑁄𑀲𑀻’’𑀢𑀺? ‘‘𑀯𑀲𑁆𑀲𑀢𑀺 𑀢𑁂, 𑀫𑀳𑀸𑀭𑀸𑀚 ¶ , 𑀭𑀝𑁆𑀞𑁂 𑀤𑁂𑀯𑁄’’𑀢𑀺? ‘‘𑀦 𑀯𑀲𑁆𑀲𑀢𑀻’’𑀢𑀺. ‘‘𑀚𑀸𑀦𑀸𑀲𑀺 𑀧𑀦𑀲𑁆𑀲 𑀅𑀯𑀲𑁆𑀲𑀦𑀓𑀸𑀭𑀡’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀲𑀓𑁆𑀓𑀸’’𑀢𑀺. ‘‘𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 ¶ 𑀇𑀲𑀺𑀲𑀺𑀗𑁆𑀕𑁄 𑀦𑀸𑀫 𑀢𑀸𑀧𑀲𑁄 𑀧𑀝𑀺𑀯𑀲𑀢𑀺 𑀖𑁄𑀭𑀢𑀧𑁄 𑀧𑀭𑀫𑀥𑀺𑀢𑀺𑀦𑁆𑀤𑁆𑀭𑀺𑀬𑁄. 𑀲𑁄 𑀦𑀺𑀩𑀤𑁆𑀥𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 𑀆𑀓𑀸𑀲𑀁 𑀑𑀮𑁄𑀓𑁂𑀲𑀺, 𑀢𑀲𑁆𑀫𑀸 𑀤𑁂𑀯𑁄 𑀦 𑀯𑀲𑁆𑀲𑀢𑀻’’𑀢𑀺. ‘‘𑀇𑀤𑀸𑀦𑀺 𑀧𑀦𑁂𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀢𑀲𑁆𑀲 𑀢𑀧𑁂 𑀪𑀺𑀦𑁆𑀦𑁂 𑀤𑁂𑀯𑁄 𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺. ‘‘𑀓𑁄 𑀧𑀦𑀲𑁆𑀲 𑀢𑀧𑀁 𑀪𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺? ‘‘𑀥𑀻𑀢𑀸 𑀢𑁂, 𑀫𑀳𑀸𑀭𑀸𑀚, 𑀦𑀺𑀴𑀺𑀦𑀺𑀓𑀸 𑀲𑀫𑀢𑁆𑀣𑀸, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀦𑁆𑀢𑁆𑀯𑀸 𑀢𑀸𑀧𑀲𑀲𑁆𑀲 𑀢𑀧𑀁 𑀪𑀺𑀦𑁆𑀤𑀸𑀳𑀻’𑀢𑀺 𑀧𑁂𑀲𑁂𑀳𑀻’’𑀢𑀺. 𑀏𑀯𑀁 𑀲𑁄 𑀭𑀸𑀚𑀸𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀼𑀦𑀤𑀺𑀯𑀲𑁂 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀉𑀤𑁆𑀤𑀬𑁆𑀳𑀢𑁂 𑀚𑀦𑀧𑀤𑁄, 𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀺;
𑀏𑀳𑀺 𑀦𑀺𑀴𑀺𑀦𑀺𑀓𑁂 𑀕𑀘𑁆𑀙, 𑀢𑀁 𑀫𑁂 𑀩𑁆𑀭𑀸𑀳𑁆𑀫𑀡𑀫𑀸𑀦𑀬𑀸’’𑀢𑀺.
𑀢𑀢𑁆𑀣 𑀢𑀁 𑀫𑁂𑀢𑀺 𑀢𑀁 𑀫𑀫 𑀅𑀦𑀢𑁆𑀣𑀓𑀸𑀭𑀺𑀁 𑀩𑁆𑀭𑀸𑀳𑁆𑀫𑀡𑀁 𑀅𑀢𑁆𑀢𑀦𑁄 𑀯𑀲𑀁 𑀆𑀦𑁂𑀳𑀺, 𑀓𑀺𑀮𑁂𑀲𑀭𑀢𑀺𑀯𑀲𑁂𑀦𑀲𑁆𑀲 𑀲𑀻𑀮𑀁 𑀪𑀺𑀦𑁆𑀤𑀸𑀳𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀦𑀸𑀳𑀁 𑀤𑀼𑀓𑁆𑀔𑀓𑁆𑀔𑀫𑀸 𑀭𑀸𑀚, 𑀦𑀸𑀳𑀁 𑀅𑀤𑁆𑀥𑀸𑀦𑀓𑁄𑀯𑀺𑀤𑀸;
𑀓𑀣𑀁 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀯𑀦𑀁 𑀓𑀼𑀜𑁆𑀚𑀭𑀲𑁂𑀯𑀺𑀢’’𑀦𑁆𑀢𑀺.
𑀢𑀢𑁆𑀣 𑀤𑀼𑀓𑁆𑀔𑀓𑁆𑀔𑀫𑀸𑀢𑀺 𑀅𑀳𑀁, 𑀫𑀳𑀸𑀭𑀸𑀚, 𑀤𑀼𑀓𑁆𑀔𑀲𑁆𑀲 𑀔𑀫𑀸 𑀦 𑀳𑁄𑀫𑀺, 𑀅𑀤𑁆𑀥𑀸𑀦𑀫𑁆𑀧𑀺 𑀦 𑀚𑀸𑀦𑀸𑀫𑀺, 𑀲𑀸𑀳𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀻𑀢𑀺.
𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀨𑀻𑀢𑀁 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸, 𑀳𑀢𑁆𑀣𑀺𑀦𑀸 𑀘 𑀭𑀣𑁂𑀦 𑀘;
𑀤𑀸𑀭𑀼𑀲𑀗𑁆𑀖𑀸𑀝𑀬𑀸𑀦𑁂𑀦, 𑀏𑀯𑀁 𑀕𑀘𑁆𑀙 𑀦𑀺𑀴𑀺𑀦𑀺𑀓𑁂.
‘‘𑀳𑀢𑁆𑀣𑀺𑀅𑀲𑁆𑀲𑀭𑀣𑁂 ¶ 𑀧𑀢𑁆𑀢𑀻, 𑀕𑀘𑁆𑀙𑁂𑀯𑀸𑀤𑀸𑀬 𑀔𑀢𑁆𑀢𑀺𑀬𑁂;
𑀢𑀯𑁂𑀯 𑀯𑀡𑁆𑀡𑀭𑀽𑀧𑁂𑀦, 𑀯𑀲𑀁 𑀢𑀫𑀸𑀦𑀬𑀺𑀲𑁆𑀲𑀲𑀻’’𑀢𑀺.
𑀢𑀢𑁆𑀣 ¶ 𑀤𑀸𑀭𑀼𑀲𑀗𑁆𑀖𑀸𑀝𑀬𑀸𑀦𑁂𑀦𑀸𑀢𑀺, 𑀅𑀫𑁆𑀫, 𑀦𑀺𑀴𑀺𑀦𑀺𑀓𑁂 𑀦 𑀢𑁆𑀯𑀁 𑀧𑀤𑀲𑀸 𑀕𑀫𑀺𑀲𑁆𑀲𑀲𑀺, 𑀨𑀻𑀢𑀁 𑀧𑀦 𑀲𑀼𑀪𑀺𑀓𑁆𑀔𑀁 𑀔𑁂𑀫𑀁 𑀅𑀢𑁆𑀢𑀦𑁄 𑀚𑀦𑀧𑀤𑀁 𑀳𑀢𑁆𑀣𑀺𑀯𑀸𑀳𑀦𑁂𑀳𑀺 𑀘 𑀭𑀣𑀯𑀸𑀳𑀦𑁂𑀳𑀺 𑀘 ¶ 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀫𑁆𑀧𑀺 𑀅𑀚𑁆𑀛𑁄𑀓𑀸𑀲𑁂 𑀧𑀝𑀺𑀘𑁆𑀙𑀦𑁆𑀦𑁂𑀦 𑀯𑀬𑁆𑀳𑀸𑀤𑀺𑀦𑀸 𑀉𑀤𑀓𑀝𑁆𑀞𑀸𑀦𑁂 𑀦𑀸𑀯𑀸𑀲𑀗𑁆𑀔𑀸𑀢𑁂𑀦 𑀤𑀸𑀭𑀼𑀲𑀗𑁆𑀖𑀸𑀝𑀬𑀸𑀦𑁂𑀦 𑀕𑀘𑁆𑀙. 𑀯𑀡𑁆𑀡𑀭𑀽𑀧𑁂𑀦𑀸𑀢𑀺 𑀏𑀯𑀁 𑀅𑀓𑀺𑀮𑀫𑀫𑀸𑀦𑀸 𑀕𑀦𑁆𑀢𑁆𑀯𑀸 𑀢𑀯 𑀯𑀡𑁆𑀡𑁂𑀦 𑀘𑁂𑀯 𑀭𑀽𑀧𑀲𑀫𑁆𑀧𑀤𑀸𑀬 𑀘 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀅𑀢𑁆𑀢𑀦𑁄 𑀯𑀲𑀁 𑀆𑀦𑀬𑀺𑀲𑁆𑀲𑀲𑀻𑀢𑀺.
𑀏𑀯𑀁 𑀲𑁄 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀅𑀓𑀣𑁂𑀢𑀩𑁆𑀩𑀫𑁆𑀧𑀺 𑀭𑀝𑁆𑀞𑀧𑀭𑀺𑀧𑀸𑀮𑀦𑀁 𑀦𑀺𑀲𑁆𑀲𑀸𑀬 𑀓𑀣𑁂𑀲𑀺. 𑀲𑀸𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣𑀲𑁆𑀲𑀸 𑀲𑀩𑁆𑀩𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀢𑁆𑀯𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑁄𑀚𑁂𑀲𑀺. 𑀅𑀫𑀘𑁆𑀘𑀸 𑀢𑀁 𑀆𑀤𑀸𑀬 𑀧𑀘𑁆𑀘𑀦𑁆𑀢𑀁 𑀧𑀢𑁆𑀯𑀸 𑀢𑀢𑁆𑀣 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀯𑀦𑀘𑀭𑀓𑁂𑀦 𑀤𑁂𑀲𑀺𑀢𑁂𑀦 𑀫𑀕𑁆𑀕𑁂𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀢𑀲𑁆𑀲 𑀅𑀲𑁆𑀲𑀫𑀧𑀤𑀲𑁆𑀲 𑀲𑀫𑀻𑀧𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀁 𑀅𑀲𑁆𑀲𑀫𑀧𑀤𑁂 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀲𑀬𑀁 𑀨𑀮𑀸𑀨𑀮𑀢𑁆𑀣𑀸𑀬 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀯𑀦𑀘𑀭𑀓𑁄 𑀲𑀬𑀁 𑀅𑀲𑁆𑀲𑀫𑀁 𑀅𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀦 𑀤𑀲𑁆𑀲𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀦𑀺𑀴𑀺𑀦𑀺𑀓𑀸𑀬 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀓𑀤𑀮𑀻𑀥𑀚𑀧𑀜𑁆𑀜𑀸𑀡𑁄, 𑀆𑀪𑀼𑀚𑀻𑀧𑀭𑀺𑀯𑀸𑀭𑀺𑀢𑁄;
𑀏𑀲𑁄 𑀧𑀤𑀺𑀲𑁆𑀲𑀢𑀺 𑀭𑀫𑁆𑀫𑁄, 𑀇𑀲𑀺𑀲𑀺𑀗𑁆𑀕𑀲𑁆𑀲 𑀅𑀲𑁆𑀲𑀫𑁄.
‘‘𑀏𑀲𑁄 𑀅𑀕𑁆𑀕𑀺𑀲𑁆𑀲 𑀲𑀗𑁆𑀔𑀸𑀢𑁄, 𑀏𑀲𑁄 𑀥𑀽𑀫𑁄 𑀧𑀤𑀺𑀲𑁆𑀲𑀢𑀺;
𑀫𑀜𑁆𑀜𑁂 𑀦𑁄 𑀅𑀕𑁆𑀕𑀺𑀁 𑀳𑀸𑀧𑁂𑀢𑀺, 𑀇𑀲𑀺𑀲𑀺𑀗𑁆𑀕𑁄 𑀫𑀳𑀺𑀤𑁆𑀥𑀺𑀓𑁄’’𑀢𑀺.
𑀢𑀢𑁆𑀣 𑀓𑀤𑀮𑀻𑀲𑀗𑁆𑀔𑀸𑀢𑀸 𑀥𑀚𑀸 𑀧𑀜𑁆𑀜𑀸𑀡𑀁 𑀅𑀲𑁆𑀲𑀸𑀢𑀺 𑀓𑀤𑀮𑀻𑀥𑀚𑀧𑀜𑁆𑀜𑀸𑀡𑁄. 𑀆𑀪𑀼𑀚𑀻𑀧𑀭𑀺𑀯𑀸𑀭𑀺𑀢𑁄𑀢𑀺 𑀪𑀼𑀚𑀧𑀢𑁆𑀢𑀯𑀦𑀧𑀭𑀺𑀓𑁆𑀔𑀺𑀢𑁆𑀢𑁄. 𑀲𑀗𑁆𑀔𑀸𑀢𑁄𑀢𑀺 𑀏𑀲𑁄 𑀅𑀕𑁆𑀕𑀺 𑀅𑀲𑁆𑀲 𑀇𑀲𑀺𑀲𑀺𑀗𑁆𑀕𑀲𑁆𑀲 𑀛𑀸𑀦𑁂𑀦 𑀲𑀗𑁆𑀔𑀸𑀢𑁄 𑀧𑀘𑁆𑀘𑀓𑁆𑀔𑀕𑀢𑁄 𑀚𑀮𑀢𑀺. 𑀫𑀜𑁆𑀜𑁂 𑀦𑁄 𑀅𑀕𑁆𑀕𑀺𑀦𑁆𑀢𑀺 𑀅𑀕𑁆𑀕𑀺𑀁 𑀦𑁄 𑀳𑀸𑀧𑁂𑀢𑀺 𑀚𑀼𑀳𑀢𑀺 𑀧𑀭𑀺𑀘𑀭𑀢𑀻𑀢𑀺 𑀫𑀜𑁆𑀜𑀸𑀫𑀺.
𑀅𑀫𑀘𑁆𑀘𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀯𑁂𑀮𑀸𑀬 𑀅𑀲𑁆𑀲𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀇𑀲𑀺𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 ¶ 𑀲𑀼𑀯𑀡𑁆𑀡𑀘𑀻𑀭𑀓𑁂𑀦 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀦𑁆𑀢𑀼𑀩𑀤𑁆𑀥𑀁 𑀘𑀺𑀢𑁆𑀢𑀕𑁂𑀡𑁆𑀟𑀼𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀩𑀳𑀺 𑀭𑀓𑁆𑀔𑀦𑁆𑀢𑀸 𑀅𑀝𑁆𑀞𑀁𑀲𑀼. 𑀲𑀸 𑀢𑁂𑀦 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀦𑁆𑀢𑀻 𑀘𑀗𑁆𑀓𑀫𑀓𑁄𑀝𑀺𑀬𑀁 𑀑𑀢𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀇𑀲𑀺𑀲𑀺𑀗𑁆𑀕𑁄 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀪𑀻𑀢𑀢𑀲𑀺𑀢𑁄 𑀉𑀝𑁆𑀞𑀸𑀬 𑀧𑀡𑁆𑀡𑀲𑀸𑀮𑀁 ¶ 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 ¶ . 𑀲𑀸𑀧𑀺𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀓𑀻𑀴𑀺𑀬𑁂𑀯. 𑀲𑀢𑁆𑀣𑀸 𑀢𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺 𑀘 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀁;
𑀇𑀲𑀺𑀲𑀺𑀗𑁆𑀕𑁄 𑀧𑀸𑀯𑀺𑀲𑀺 𑀪𑀻𑀢𑁄, 𑀅𑀲𑁆𑀲𑀫𑀁 𑀧𑀡𑁆𑀡𑀙𑀸𑀤𑀦𑀁.
‘‘𑀅𑀲𑁆𑀲𑀫𑀲𑁆𑀲 𑀘 𑀲𑀸 𑀤𑁆𑀯𑀸𑀭𑁂, 𑀕𑁂𑀡𑁆𑀟𑀼𑀓𑁂𑀦𑀲𑁆𑀲 𑀓𑀻𑀴𑀢𑀺;
𑀯𑀺𑀤𑀁𑀲𑀬𑀦𑁆𑀢𑀻 𑀅𑀗𑁆𑀕𑀸𑀦𑀺, 𑀕𑀼𑀬𑁆𑀳𑀁 𑀧𑀓𑀸𑀲𑀺𑀢𑀸𑀦𑀺 𑀘.
‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀓𑀻𑀴𑀦𑁆𑀢𑀺𑀁, 𑀧𑀡𑁆𑀡𑀲𑀸𑀮𑀕𑀢𑁄 𑀚𑀝𑀻;
𑀅𑀲𑁆𑀲𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀻’’𑀢𑀺.
𑀢𑀢𑁆𑀣 𑀕𑁂𑀡𑁆𑀟𑀼𑀓𑁂𑀦𑀲𑁆𑀲𑀸𑀢𑀺 𑀅𑀲𑁆𑀲 𑀇𑀲𑀺𑀲𑀺𑀗𑁆𑀕𑀲𑁆𑀲 𑀅𑀲𑁆𑀲𑀫𑀤𑁆𑀯𑀸𑀭𑁂 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀢𑀺. 𑀯𑀺𑀤𑀁𑀲𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀻. 𑀕𑀼𑀬𑁆𑀳𑀁 𑀧𑀓𑀸𑀲𑀺𑀢𑀸𑀦𑀺 𑀘𑀸𑀢𑀺 𑀕𑀼𑀬𑁆𑀳𑀜𑁆𑀘 𑀭𑀳𑀲𑁆𑀲𑀗𑁆𑀕𑀁 𑀧𑀓𑀸𑀲𑀺𑀢𑀸𑀦𑀺 𑀘 𑀧𑀸𑀓𑀝𑀸𑀦𑀺 𑀫𑀼𑀔𑀳𑀢𑁆𑀣𑀸𑀤𑀻𑀦𑀺. 𑀅𑀩𑁆𑀭𑀯𑀻𑀢𑀺 𑀲𑁄 𑀓𑀺𑀭 𑀧𑀡𑁆𑀡𑀲𑀸𑀮𑀸𑀬 𑀞𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀬𑀁 𑀬𑀓𑁆𑀔𑁄 𑀪𑀯𑁂𑀬𑁆𑀬, 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀫𑀁 𑀫𑀼𑀭𑀼𑀫𑀼𑀭𑀸𑀧𑁂𑀢𑁆𑀯𑀸 𑀔𑀸𑀤𑁂𑀬𑁆𑀬, 𑀦𑀸𑀬𑀁 𑀬𑀓𑁆𑀔𑁄, 𑀢𑀸𑀧𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀲𑁆𑀲𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀫𑁆𑀪𑁄 𑀓𑁄 𑀦𑀸𑀫 𑀲𑁄 𑀭𑀼𑀓𑁆𑀔𑁄, 𑀬𑀲𑁆𑀲 𑀢𑁂𑀯𑀁𑀕𑀢𑀁 𑀨𑀮𑀁;
𑀤𑀽𑀭𑁂𑀧𑀺 𑀔𑀺𑀢𑁆𑀢𑀁 𑀧𑀘𑁆𑀘𑁂𑀢𑀺, 𑀦 𑀢𑀁 𑀑𑀳𑀸𑀬 𑀕𑀘𑁆𑀙𑀢𑀻’’𑀢𑀺.
𑀢𑀢𑁆𑀣 𑀬𑀲𑁆𑀲 𑀢𑁂𑀯𑀁𑀕𑀢𑀁 𑀨𑀮𑀦𑁆𑀢𑀺 𑀬𑀲𑁆𑀲 𑀢𑀯 𑀭𑀼𑀓𑁆𑀔𑀲𑁆𑀲 𑀏𑀯𑀁𑀕𑀢𑀺𑀓𑀁 𑀫𑀦𑁄𑀭𑀫𑀁 𑀨𑀮𑀁. 𑀓𑁄 𑀦𑀸𑀫 𑀲𑁄 𑀭𑀼𑀓𑁆𑀔𑁄𑀢𑀺 𑀘𑀺𑀢𑁆𑀭𑀕𑁂𑀡𑁆𑀟𑀼𑀓𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 ‘‘𑀭𑀼𑀓𑁆𑀔𑀨𑀮𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀁 𑀧𑀼𑀘𑁆𑀙𑀢𑀺.
𑀅𑀣𑀲𑁆𑀲 𑀲𑀸 𑀭𑀼𑀓𑁆𑀔𑀁 𑀆𑀘𑀺𑀓𑁆𑀔𑀦𑁆𑀢𑀻 𑀕𑀸𑀣𑀫𑀸𑀳 𑁋
‘‘𑀅𑀲𑁆𑀲𑀫𑀲𑁆𑀲 𑀫𑀫 𑀩𑁆𑀭𑀳𑁆𑀫𑁂, 𑀲𑀫𑀻𑀧𑁂 𑀕𑀦𑁆𑀥𑀫𑀸𑀤𑀦𑁂;
𑀩𑀳𑀯𑁄 𑀢𑀸𑀤𑀺𑀲𑀸 𑀭𑀼𑀓𑁆𑀔𑀸, 𑀬𑀲𑁆𑀲 𑀢𑁂𑀯𑀁𑀕𑀢𑀁 𑀨𑀮𑀁;
𑀤𑀽𑀭𑁂𑀧𑀺 𑀔𑀺𑀢𑁆𑀢𑀁 𑀧𑀘𑁆𑀘𑁂𑀢𑀺, 𑀦 𑀫𑀁 𑀑𑀳𑀸𑀬 𑀕𑀘𑁆𑀙𑀢𑀻’’𑀢𑀺.
𑀢𑀢𑁆𑀣 ¶ ¶ 𑀲𑀫𑀻𑀧𑁂 𑀕𑀦𑁆𑀥𑀫𑀸𑀤𑀦𑁂𑀢𑀺 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀫𑀫 𑀅𑀲𑁆𑀲𑀫𑀲𑁆𑀲 𑀲𑀫𑀻𑀧𑁂. 𑀬𑀲𑁆𑀲 𑀢𑁂𑀯𑀁𑀕𑀢𑀦𑁆𑀢𑀺 𑀬𑀲𑁆𑀲 𑀏𑀯𑀁𑀕𑀢𑀁, 𑀢-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀓𑀭𑁄𑀢𑀺.
𑀇𑀢𑀺 ¶ 𑀲𑀸 𑀫𑀼𑀲𑀸𑀯𑀸𑀤𑀁 𑀅𑀪𑀸𑀲𑀺. 𑀇𑀢𑀭𑁄𑀧𑀺 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀢𑀸𑀧𑀲𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀏𑀢𑀽 𑀪𑀯𑀁 𑀅𑀲𑁆𑀲𑀫𑀺𑀫𑀁 𑀅𑀤𑁂𑀢𑀼, 𑀧𑀚𑁆𑀚𑀜𑁆𑀘 𑀪𑀓𑁆𑀔𑀜𑁆𑀘 𑀧𑀝𑀺𑀘𑁆𑀙 𑀤𑀫𑁆𑀫𑀺;
𑀇𑀤𑀫𑀸𑀲𑀦𑀁 𑀅𑀢𑁆𑀭 𑀪𑀯𑀁 𑀦𑀺𑀲𑀻𑀤𑀢𑀼, 𑀇𑀢𑁄 𑀪𑀯𑀁 𑀫𑀽𑀮𑀨𑀮𑀸𑀦𑀺 𑀪𑀼𑀜𑁆𑀚𑀢𑀽’’𑀢𑀺.
𑀢𑀢𑁆𑀣 𑀅𑀲𑁆𑀲𑀫𑀺𑀫𑀦𑁆𑀢𑀺 𑀅𑀲𑁆𑀲𑀫𑀁 𑀇𑀫𑀁 𑀪𑀯𑀁 𑀧𑀯𑀺𑀲𑀢𑀼. 𑀅𑀤𑁂𑀢𑀽𑀢𑀺 𑀬𑀣𑀸𑀲𑀦𑁆𑀦𑀺𑀳𑀺𑀢𑀁 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀼. 𑀧𑀚𑁆𑀚𑀦𑁆𑀢𑀺 𑀧𑀸𑀤𑀩𑁆𑀪𑀜𑁆𑀚𑀦𑀁. 𑀪𑀓𑁆𑀔𑀦𑁆𑀢𑀺 𑀫𑀥𑀼𑀭𑀨𑀮𑀸𑀨𑀮𑀁. 𑀧𑀝𑀺𑀘𑁆𑀙𑀸𑀢𑀺 𑀧𑀝𑀺𑀕𑁆𑀕𑀡𑁆𑀳. 𑀇𑀤𑀫𑀸𑀲𑀦𑀦𑁆𑀢𑀺 𑀧𑀯𑀺𑀝𑁆𑀞𑀓𑀸𑀮𑁂 𑀏𑀯𑀫𑀸𑀳.
𑀢𑀲𑁆𑀲𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑁂 𑀦𑀺𑀲𑀻𑀤𑀦𑁆𑀢𑀺𑀬𑀸 𑀲𑀼𑀯𑀡𑁆𑀡𑀘𑀻𑀭𑀓𑁂 𑀤𑁆𑀯𑀺𑀥𑀸 𑀕𑀢𑁂 𑀲𑀭𑀻𑀭𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀅𑀳𑁄𑀲𑀺. 𑀢𑀸𑀧𑀲𑁄 𑀫𑀸𑀢𑀼𑀕𑀸𑀫𑀲𑀭𑀻𑀭𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀯𑀡𑁆𑀡𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 𑀏𑀯𑀫𑀸𑀳 𑁋
‘‘𑀓𑀺𑀁 𑀢𑁂 𑀇𑀤𑀁 𑀊𑀭𑀽𑀦𑀫𑀦𑁆𑀢𑀭𑀲𑁆𑀫𑀺𑀁, 𑀲𑀼𑀧𑀺𑀘𑁆𑀙𑀺𑀢𑀁 𑀓𑀡𑁆𑀳𑀭𑀺𑀯𑀧𑁆𑀧𑀓𑀸𑀲𑀢𑀺;
𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀓𑁄𑀲𑁂 𑀦𑀼 𑀢𑁂 𑀉𑀢𑁆𑀢𑀫𑀗𑁆𑀕𑀁 𑀧𑀯𑀺𑀝𑁆𑀞’’𑀦𑁆𑀢𑀺.
𑀢𑀢𑁆𑀣 𑀲𑀼𑀧𑀺𑀘𑁆𑀙𑀺𑀢𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀊𑀭𑀽𑀦𑀁 𑀲𑀫𑀸𑀕𑀫𑀓𑀸𑀮𑁂 𑀲𑀼𑀨𑀼𑀲𑀺𑀢𑀁 𑀲𑀺𑀧𑁆𑀧𑀺𑀧𑀼𑀝𑀫𑀼𑀔𑀲𑀡𑁆𑀞𑀸𑀦𑀁. 𑀲𑀼𑀪𑀮𑀓𑁆𑀔𑀡𑁂𑀦 𑀳𑀺 𑀅𑀲𑀫𑀦𑁆𑀦𑀸𑀕𑀢𑀸𑀬 𑀢𑀁 𑀞𑀸𑀦𑀁 𑀆𑀯𑀸𑀝𑀥𑀸𑀢𑀼𑀓𑀁 𑀳𑁄𑀢𑀺, 𑀲𑀫𑀦𑁆𑀦𑀸𑀕𑀢𑀸𑀬 𑀅𑀩𑁆𑀪𑀼𑀦𑁆𑀦𑀢𑀁 𑀲𑀺𑀧𑁆𑀧𑀺𑀧𑀼𑀝𑀫𑀼𑀔𑀲𑀡𑁆𑀞𑀸𑀦𑀁. 𑀓𑀡𑁆𑀳𑀭𑀺𑀯𑀧𑁆𑀧𑀓𑀸𑀲𑀢𑀻𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀸𑀴𑀓𑀁 𑀯𑀺𑀬 𑀔𑀸𑀬𑀢𑀺. 𑀓𑁄𑀲𑁂 𑀦𑀼 𑀢𑁂 𑀉𑀢𑁆𑀢𑀫𑀗𑁆𑀕𑀁 𑀧𑀯𑀺𑀝𑁆𑀞𑀦𑁆𑀢𑀺 𑀢𑀯 𑀉𑀢𑁆𑀢𑀫𑀗𑁆𑀕𑀁 𑀮𑀺𑀗𑁆𑀕𑀲𑀡𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀢𑀁 𑀢𑀯 𑀲𑀭𑀻𑀭𑀲𑀗𑁆𑀔𑀸𑀢𑁂 𑀓𑁄𑀲𑁂 𑀧𑀯𑀺𑀝𑁆𑀞𑀦𑁆𑀢𑀺 𑀧𑀼𑀘𑁆𑀙𑀢𑀺.
𑀅𑀣 𑀦𑀁 𑀲𑀸 𑀯𑀜𑁆𑀘𑀬𑀦𑁆𑀢𑀻 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀅𑀳𑀁 𑀯𑀦𑁂 𑀫𑀽𑀮𑀨𑀮𑁂𑀲𑀦𑀁 𑀘𑀭𑀁, 𑀆𑀲𑀸𑀤𑀬𑀺𑀁 𑀅𑀘𑁆𑀙𑀁 𑀲𑀼𑀖𑁄𑀭𑀭𑀽𑀧𑀁;
𑀲𑁄 ¶ 𑀫𑀁 𑀧𑀢𑀺𑀢𑁆𑀯𑀸 𑀲𑀳𑀲𑀸𑀚𑁆𑀛𑀧𑀢𑁆𑀢𑁄, 𑀧𑀦𑀼𑀚𑁆𑀚 𑀫𑀁 𑀅𑀩𑁆𑀩𑀳𑀺 𑀉𑀢𑁆𑀢𑀫𑀗𑁆𑀕𑀁.
‘‘𑀲𑁆𑀯𑀸𑀬𑀁 ¶ ¶ 𑀯𑀡𑁄 𑀔𑀚𑁆𑀚𑀢𑀺 𑀓𑀡𑁆𑀟𑀼𑀯𑀸𑀬𑀢𑀺, 𑀲𑀩𑁆𑀩𑀜𑁆𑀘 𑀓𑀸𑀮𑀁 𑀦 𑀮𑀪𑀸𑀫𑀺 𑀲𑀸𑀢𑀁;
𑀧𑀳𑁄 𑀪𑀯𑀁 𑀓𑀡𑁆𑀟𑀼𑀫𑀺𑀫𑀁 𑀯𑀺𑀦𑁂𑀢𑀼𑀁, 𑀓𑀼𑀭𑀼𑀢𑀁 𑀪𑀯𑀁 𑀬𑀸𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑀢𑁆𑀣’’𑀦𑁆𑀢𑀺.
𑀢𑀢𑁆𑀣 𑀆𑀲𑀸𑀤𑀬𑀺𑀦𑁆𑀢𑀺 𑀖𑀝𑁆𑀝𑁂𑀲𑀺𑀁, 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀮𑁂𑀟𑁆𑀟𑀼𑀦𑀸 𑀧𑀳𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀢𑀺𑀢𑁆𑀯𑀸𑀢𑀺 𑀉𑀧𑀥𑀸𑀯𑀺𑀢𑁆𑀯𑀸. 𑀲𑀳𑀲𑀸𑀚𑁆𑀛𑀧𑁆𑀧𑀢𑁆𑀢𑁄𑀢𑀺 𑀫𑀫𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑁄 𑀲𑀫𑁆𑀧𑀢𑁆𑀢𑁄. 𑀧𑀦𑀼𑀚𑁆𑀚𑀸𑀢𑀺 𑀅𑀣 𑀫𑀁 𑀧𑁄𑀢𑁂𑀢𑁆𑀯𑀸. 𑀅𑀩𑁆𑀩𑀳𑀻𑀢𑀺 𑀫𑀼𑀔𑁂𑀦 𑀫𑀫 𑀉𑀢𑁆𑀢𑀫𑀗𑁆𑀕𑀁 𑀮𑀼𑀜𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀢𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀡𑁄 𑀚𑀸𑀢𑁄. 𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀢𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀯𑀡𑁄 𑀔𑀚𑁆𑀚𑀢𑀺 𑀘𑁂𑀯 𑀓𑀡𑁆𑀟𑀼𑀯𑀜𑁆𑀘 𑀓𑀭𑁄𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀲𑀸𑀳𑀁 𑀲𑀩𑁆𑀩𑀓𑀸𑀮𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀦 𑀮𑀪𑀸𑀫𑀺. 𑀧𑀳𑁄𑀢𑀺 𑀧𑀳𑀼 𑀲𑀫𑀢𑁆𑀣𑁄. 𑀩𑁆𑀭𑀸𑀳𑁆𑀫𑀡𑀢𑁆𑀣𑀦𑁆𑀢𑀺 𑀪𑀯𑀁 𑀫𑀬𑀸 𑀬𑀸𑀘𑀺𑀢𑁄 𑀇𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀣𑀁 𑀓𑀭𑁄𑀢𑀼, 𑀇𑀤𑀁 𑀫𑁂 𑀤𑀼𑀓𑁆𑀔𑀁 𑀳𑀭𑀸𑀳𑀻𑀢𑀺 𑀯𑀤𑀢𑀺.
𑀲𑁄 𑀢𑀲𑁆𑀲𑀸 𑀫𑀼𑀲𑀸𑀯𑀸𑀤𑀁 ‘‘𑀲𑀪𑀸𑀯𑁄’’𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀲𑀘𑁂 𑀢𑁂 𑀏𑀯𑀁 𑀲𑀼𑀔𑀁 𑀳𑁄𑀢𑀺, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀤𑁂𑀲𑀁 𑀑𑀮𑁄𑀓𑁂𑀢𑁆𑀯𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀕𑀫𑁆𑀪𑀻𑀭𑀭𑀽𑀧𑁄 𑀢𑁂 𑀯𑀡𑁄 𑀲𑀮𑁄𑀳𑀺𑀢𑁄, 𑀅𑀧𑀽𑀢𑀺𑀓𑁄 𑀯𑀡𑀕𑀦𑁆𑀥𑁄 𑀫𑀳𑀸 𑀘;
𑀓𑀭𑁄𑀫𑀺 𑀢𑁂 𑀓𑀺𑀜𑁆𑀘𑀺 𑀓𑀲𑀸𑀬𑀬𑁄𑀕𑀁, 𑀬𑀣𑀸 𑀪𑀯𑀁 𑀧𑀭𑀫𑀲𑀼𑀔𑀻 𑀪𑀯𑁂𑀬𑁆𑀬𑀸’’𑀢𑀺.
𑀢𑀢𑁆𑀣 𑀲𑀮𑁄𑀳𑀺𑀢𑁄𑀢𑀺 𑀭𑀢𑁆𑀢𑁄𑀪𑀸𑀲𑁄. 𑀅𑀧𑀽𑀢𑀺𑀓𑁄𑀢𑀺 𑀧𑀽𑀢𑀺𑀫𑀁𑀲𑀭𑀳𑀺𑀢𑁄. 𑀯𑀡𑀕𑀦𑁆𑀥𑁄𑀢𑀺 𑀣𑁄𑀓𑀁 𑀤𑀼𑀕𑁆𑀕𑀦𑁆𑀥𑁄. 𑀓𑀲𑀸𑀬𑀬𑁄𑀕𑀦𑁆𑀢𑀺 𑀅𑀳𑀁 𑀓𑁂𑀘𑀺 𑀭𑀼𑀓𑁆𑀔𑀓𑀲𑀸𑀬𑁂 𑀕𑀳𑁂𑀢𑁆𑀯𑀸 𑀢𑀯 𑀏𑀓𑀁 𑀓𑀲𑀸𑀬𑀬𑁄𑀕𑀁 𑀓𑀭𑁄𑀫𑀻𑀢𑀺.
𑀢𑀢𑁄 𑀦𑀺𑀴𑀺𑀦𑀺𑀓𑀸 𑀕𑀸𑀣𑀫𑀸𑀳
‘‘𑀦 𑀫𑀦𑁆𑀢𑀬𑁄𑀕𑀸 𑀦 𑀓𑀲𑀸𑀬𑀬𑁄𑀕𑀸, 𑀦 𑀑𑀲𑀥𑀸 𑀩𑁆𑀭𑀳𑁆𑀫𑀘𑀸𑀭𑀺 𑀓𑀫𑀦𑁆𑀢𑀺;
𑀬𑀁 𑀢𑁂 𑀫𑀼𑀤𑀼 𑀢𑁂𑀦 𑀯𑀺𑀦𑁂𑀳𑀺 𑀓𑀡𑁆𑀟𑀼𑀁, 𑀬𑀣𑀸 𑀅𑀳𑀁 𑀧𑀭𑀫𑀲𑀼𑀔𑀻 𑀪𑀯𑁂𑀬𑁆𑀬’’𑀦𑁆𑀢𑀺.
𑀢𑀢𑁆𑀣 ¶ ¶ 𑀓𑀫𑀦𑁆𑀢𑀻𑀢𑀺, 𑀪𑁄 𑀩𑁆𑀭𑀳𑁆𑀫𑀘𑀸𑀭𑀺, 𑀇𑀫𑀲𑁆𑀫𑀺𑀁 𑀫𑀫 𑀯𑀡𑁂 𑀦𑁂𑀯 𑀫𑀦𑁆𑀢𑀬𑁄𑀕𑀸, 𑀦 𑀓𑀲𑀸𑀬𑀬𑁄𑀕𑀸, 𑀦 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀑𑀲𑀥𑀸𑀦𑀺 𑀓𑀫𑀦𑁆𑀢𑀺, 𑀅𑀦𑁂𑀓𑀯𑀸𑀭𑀁 𑀓𑀢𑁂𑀳𑀺𑀧𑀺 𑀢𑁂𑀳𑀺 𑀏𑀢𑀲𑁆𑀲 𑀨𑀸𑀲𑀼𑀓𑀪𑀸𑀯𑁄 𑀦 𑀪𑀽𑀢𑀧𑀼𑀩𑁆𑀩𑁄. 𑀬𑀁 𑀧𑀦 𑀢𑁂 𑀏𑀢𑀁 𑀫𑀼𑀤𑀼 𑀅𑀗𑁆𑀕𑀚𑀸𑀢𑀁, 𑀢𑁂𑀦 𑀖𑀝𑁆𑀝𑀺𑀬𑀫𑀸𑀦𑀲𑁆𑀲𑁂𑀯 𑀢𑀲𑁆𑀲 𑀓𑀡𑁆𑀟𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀦 𑀯𑀺𑀦𑁂𑀳𑀺 𑀓𑀡𑁆𑀟𑀼𑀦𑁆𑀢𑀺.
𑀲𑁄 ¶ ‘‘𑀲𑀘𑁆𑀘𑀁 𑀏𑀲𑁄 𑀪𑀡𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑁂𑀣𑀼𑀦𑀲𑀁𑀲𑀕𑁆𑀕𑁂𑀦 𑀲𑀻𑀮𑀁 𑀪𑀺𑀚𑁆𑀚𑀢𑀺, 𑀛𑀸𑀦𑀁 𑀅𑀦𑁆𑀢𑀭𑀥𑀸𑀬𑀢𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀘 𑀅𑀚𑀸𑀦𑀦𑀪𑀸𑀯𑁂𑀦 ‘‘𑀪𑁂𑀲𑀚𑁆𑀚’’𑀦𑁆𑀢𑀺 𑀯𑀤𑀦𑁆𑀢𑀺𑀬𑀸 𑀢𑀸𑀬 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺. 𑀢𑀸𑀯𑀤𑁂𑀯𑀲𑁆𑀲 𑀲𑀻𑀮𑀁 𑀪𑀺𑀚𑁆𑀚𑀺, 𑀛𑀸𑀦𑀁 𑀧𑀭𑀺𑀳𑀸𑀬𑀺. 𑀲𑁄 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀲𑀁𑀲𑀕𑁆𑀕𑀁 𑀓𑀢𑁆𑀯𑀸 𑀓𑀺𑀮𑀦𑁆𑀢𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀭𑀁 𑀑𑀭𑀼𑀬𑁆𑀳 𑀦𑁆𑀳𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀦𑀧𑀺 𑀢𑀁 ‘‘𑀢𑀸𑀧𑀲𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀇𑀢𑁄 𑀦𑀼 𑀪𑁄𑀢𑁄 𑀓𑀢𑀫𑁂𑀦 𑀅𑀲𑁆𑀲𑀫𑁄, 𑀓𑀘𑁆𑀘𑀺 𑀪𑀯𑀁 𑀅𑀪𑀺𑀭𑀫𑀲𑀺 𑀅𑀭𑀜𑁆𑀜𑁂;
𑀓𑀘𑁆𑀘𑀺 𑀦𑀼 𑀢𑁂 𑀫𑀽𑀮𑀨𑀮𑀁 𑀧𑀳𑀽𑀢𑀁, 𑀓𑀘𑁆𑀘𑀺 𑀪𑀯𑀦𑁆𑀢𑀁 𑀦 𑀯𑀺𑀳𑀺𑀁𑀲𑀦𑁆𑀢𑀺 𑀯𑀸𑀴𑀸’’𑀢𑀺.
𑀢𑀢𑁆𑀣 𑀓𑀢𑀫𑁂𑀦𑀸𑀢𑀺 𑀇𑀢𑁄 𑀓𑀢𑀫𑁂𑀦 𑀤𑀺𑀲𑀸𑀪𑀸𑀕𑁂𑀦 𑀪𑁄𑀢𑁄 𑀅𑀲𑁆𑀲𑀫𑁄. 𑀪𑀯𑀦𑁆𑀢𑀺 𑀆𑀮𑀧𑀦𑀫𑁂𑀢𑀁.
𑀢𑀢𑁄 𑀦𑀺𑀴𑀺𑀦𑀺𑀓𑀸 𑀘𑀢𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀇𑀢𑁄 𑀉𑀚𑀼𑀁 𑀉𑀢𑁆𑀢𑀭𑀸𑀬𑀁 𑀤𑀺𑀲𑀸𑀬𑀁, 𑀔𑁂𑀫𑀸 𑀦𑀤𑀻 𑀳𑀺𑀫𑀯𑀢𑀸 𑀧𑀪𑀸𑀯𑀻;
𑀢𑀲𑁆𑀲𑀸 𑀢𑀻𑀭𑁂 𑀅𑀲𑁆𑀲𑀫𑁄 𑀫𑀬𑁆𑀳 𑀭𑀫𑁆𑀫𑁄, 𑀅𑀳𑁄 𑀪𑀯𑀁 𑀅𑀲𑁆𑀲𑀫𑀁 𑀫𑀬𑁆𑀳𑀁 𑀧𑀲𑁆𑀲𑁂.
‘‘𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸;
𑀲𑀫𑀦𑁆𑀢𑀢𑁄 𑀓𑀺𑀫𑁆𑀧𑀼𑀭𑀺𑀲𑀸𑀪𑀺𑀕𑀻𑀢𑀁, 𑀅𑀳𑁄 𑀪𑀯𑀁 𑀅𑀲𑁆𑀲𑀫𑀁 𑀫𑀬𑁆𑀳𑀁 𑀧𑀲𑁆𑀲𑁂.
‘‘𑀢𑀸𑀮𑀸 ¶ 𑀘 𑀫𑀽𑀮𑀸 𑀘 𑀨𑀮𑀸 𑀘 𑀫𑁂𑀢𑁆𑀣, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀉𑀧𑁂𑀢𑀭𑀽𑀧𑀁;
𑀢𑀁 ¶ 𑀪𑀽𑀫𑀺𑀪𑀸𑀕𑁂𑀳𑀺 𑀉𑀧𑁂𑀢𑀭𑀽𑀧𑀁, 𑀅𑀳𑁄 𑀪𑀯𑀁 𑀅𑀲𑁆𑀲𑀫𑀁 𑀫𑀬𑁆𑀳𑀁 𑀧𑀲𑁆𑀲𑁂.
‘‘𑀨𑀮𑀸 𑀘 𑀫𑀽𑀮𑀸 𑀘 𑀧𑀳𑀽𑀢𑀫𑁂𑀢𑁆𑀣, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀭𑀲𑁂𑀦𑀼𑀧𑁂𑀢𑀸;
𑀆𑀬𑀦𑁆𑀢𑀺 𑀘 𑀮𑀼𑀤𑁆𑀤𑀓𑀸 𑀢𑀁 𑀧𑀤𑁂𑀲𑀁, 𑀫𑀸 𑀫𑁂 𑀢𑀢𑁄 𑀫𑀽𑀮𑀨𑀮𑀁 𑀅𑀳𑀸𑀲𑀼’’𑀦𑁆𑀢𑀺.
𑀢𑀢𑁆𑀣 𑀉𑀢𑁆𑀢𑀭𑀸𑀬𑀦𑁆𑀢𑀺 𑀉𑀢𑁆𑀢𑀭𑀸𑀬. 𑀔𑁂𑀫𑀸𑀢𑀺 𑀏𑀯𑀁𑀦𑀸𑀫𑀺𑀓𑀸 𑀦𑀤𑀻. 𑀳𑀺𑀫𑀯𑀢𑀸 𑀧𑀪𑀸𑀯𑀻𑀢𑀺 𑀳𑀺𑀫𑀯𑀦𑁆𑀢𑀢𑁄 𑀧𑀯𑀢𑁆𑀢𑀢𑀺. 𑀅𑀳𑁄𑀢𑀺 𑀧𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀤𑁆𑀤𑀸𑀮𑀓𑀸𑀢𑀺 𑀯𑀸𑀢𑀖𑀸𑀢𑀓𑀸. 𑀓𑀺𑀫𑁆𑀧𑀼𑀭𑀺𑀲𑀸𑀪𑀺𑀕𑀻𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀥𑀼𑀭𑀲𑀤𑁆𑀤𑁂𑀦 𑀕𑀸𑀬𑀦𑁆𑀢𑁂𑀳𑀺 𑀓𑀺𑀫𑁆𑀧𑀼𑀭𑀺𑀲𑁂𑀳𑀺 𑀅𑀪𑀺𑀕𑀻𑀢𑀁. 𑀢𑀸𑀮𑀸 𑀘 𑀫𑀽𑀮𑀸 𑀘 𑀨𑀮𑀸 𑀘 𑀫𑁂𑀢𑁆𑀣𑀸𑀢𑀺 𑀏𑀢𑁆𑀣 𑀫𑀫 𑀅𑀲𑁆𑀲𑀫𑁂 𑀧𑀸𑀲𑀸𑀤𑀺𑀓𑀸 𑀢𑀸𑀮𑀭𑀼𑀓𑁆𑀔𑀸 𑀘 𑀢𑁂𑀲𑀜𑁆𑀜𑁂𑀯 𑀯𑀡𑁆𑀡𑀕𑀦𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑀸 𑀓𑀦𑁆𑀤𑀲𑀗𑁆𑀔𑀸𑀢𑀸 ¶ 𑀫𑀽𑀮𑀸 𑀘 𑀨𑀮𑀸 𑀘. 𑀧𑀳𑀽𑀢𑀫𑁂𑀢𑁆𑀣𑀸𑀢𑀺 𑀦𑀸𑀦𑀸𑀭𑀼𑀓𑁆𑀔𑀨𑀮𑀸 𑀘 𑀭𑀼𑀓𑁆𑀔𑀯𑀮𑁆𑀮𑀺𑀫𑀽𑀮𑀸 𑀘 𑀧𑀳𑀽𑀢𑀸 𑀏𑀢𑁆𑀣. 𑀫𑀸 𑀫𑁂 𑀢𑀢𑁄𑀢𑀺 𑀢𑀁 𑀫𑀫 𑀅𑀲𑁆𑀲𑀫𑀧𑀤𑀁 𑀲𑀫𑁆𑀩𑀳𑀼𑀮𑀸 𑀮𑀼𑀤𑁆𑀤𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀫𑀬𑀸 𑀘𑁂𑀢𑁆𑀣 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑀁 𑀩𑀳𑀼 𑀫𑀥𑀼𑀭𑀲𑀫𑀽𑀮𑀨𑀮𑀸𑀨𑀮𑀁 𑀅𑀢𑁆𑀣𑀺, 𑀢𑁂 𑀫𑀬𑀺 𑀘𑀺𑀭𑀸𑀬𑀦𑁆𑀢𑁂 𑀫𑀽𑀮𑀨𑀮𑀸𑀨𑀮𑀁 𑀳𑀭𑁂𑀬𑁆𑀬𑀼𑀁. 𑀢𑁂 𑀢𑀢𑁄 𑀫𑀫 𑀫𑀽𑀮𑀨𑀮𑀸𑀨𑀮𑀁 𑀫𑀸 𑀳𑀭𑀺𑀁𑀲𑀼, 𑀢𑀲𑁆𑀫𑀸 𑀲𑀘𑁂𑀧𑀺 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀦𑁆𑀢𑀼𑀓𑀸𑀫𑁄, 𑀏𑀳𑀺, 𑀦𑁄 𑀘𑁂, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀳.
𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀬𑀸𑀯 𑀧𑀺𑀢𑀼 𑀆𑀕𑀫𑀦𑀸 𑀅𑀥𑀺𑀯𑀸𑀲𑀸𑀧𑁂𑀢𑀼𑀁 𑀕𑀸𑀣𑀫𑀸𑀳 𑁋
‘‘𑀧𑀺𑀢𑀸 𑀫𑀫𑀁 𑀫𑀽𑀮𑀨𑀮𑁂𑀲𑀦𑀁 𑀕𑀢𑁄, 𑀇𑀤𑀸𑀦𑀺 𑀆𑀕𑀘𑁆𑀙𑀢𑀺 𑀲𑀸𑀬𑀓𑀸𑀮𑁂;
𑀉𑀪𑁄𑀯 𑀕𑀘𑁆𑀙𑀸𑀫𑀲𑁂 𑀅𑀲𑁆𑀲𑀫𑀁 𑀢𑀁, 𑀬𑀸𑀯 𑀧𑀺𑀢𑀸 𑀫𑀽𑀮𑀨𑀮𑀢𑁄 𑀏𑀢𑀽’’𑀢𑀺.
𑀢𑀢𑁆𑀣 𑀉𑀪𑁄𑀯 𑀕𑀘𑁆𑀙𑀸𑀫𑀲𑁂𑀢𑀺 𑀫𑀫 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 𑀉𑀪𑁄𑀯 𑀕𑀫𑀺𑀲𑁆𑀲𑀸𑀫.
𑀢𑀢𑁄 ¶ 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀢𑀸𑀯 𑀅𑀭𑀜𑁆𑀜𑁂𑀯 𑀯𑀟𑁆𑀠𑀺𑀢𑀪𑀸𑀯𑁂𑀦 𑀫𑀫 𑀇𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀧𑀺𑀢𑀸 𑀧𑀦𑀲𑁆𑀲 𑀫𑀁 𑀤𑀺𑀲𑁆𑀯𑀸𑀯 𑀚𑀸𑀦𑀺𑀢𑁆𑀯𑀸 ‘𑀢𑁆𑀯𑀁 𑀇𑀥 𑀓𑀺𑀁 𑀓𑀭𑁄𑀲𑀻’𑀢𑀺 𑀓𑀸𑀚𑀓𑁄𑀝𑀺𑀬𑀸 𑀧𑀳𑀭𑀺𑀢𑁆𑀯𑀸 𑀲𑀻𑀲𑀫𑁆𑀧𑀺 𑀫𑁂 𑀪𑀺𑀦𑁆𑀤𑁂𑀬𑁆𑀬, 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀆𑀕𑀫𑀦𑀓𑀫𑁆𑀫𑀫𑁆𑀧𑀺 𑀫𑁂 𑀦𑀺𑀝𑁆𑀞𑀺𑀢’’𑀦𑁆𑀢𑀺. 𑀲𑀸 𑀢𑀲𑁆𑀲 𑀆𑀕𑀫𑀦𑀽𑀧𑀸𑀬𑀁 𑀆𑀘𑀺𑀓𑁆𑀔𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀅𑀜𑁆𑀜𑁂 ¶ 𑀩𑀳𑀽 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸, 𑀭𑀸𑀚𑀻𑀲𑀬𑁄 𑀅𑀦𑀼𑀫𑀕𑁆𑀕𑁂 𑀯𑀲𑀦𑁆𑀢𑀺;
𑀢𑁂𑀬𑁂𑀯 𑀧𑀼𑀘𑁆𑀙𑁂𑀲𑀺 𑀫𑀫𑀲𑁆𑀲𑀫𑀁 𑀢𑀁, 𑀢𑁂 𑀢𑀁 𑀦𑀬𑀺𑀲𑁆𑀲𑀦𑁆𑀢𑀺 𑀫𑀫𑀁 𑀲𑀓𑀸𑀲𑁂’’𑀢𑀺.
𑀢𑀢𑁆𑀣 𑀭𑀸𑀚𑀻𑀲𑀬𑁄𑀢𑀺, 𑀲𑀫𑁆𑀫, 𑀫𑀬𑀸 𑀦 𑀲𑀓𑁆𑀓𑀸 𑀘𑀺𑀭𑀸𑀬𑀺𑀢𑀼𑀁, 𑀅𑀜𑁆𑀜𑁂 𑀧𑀦 𑀲𑀸𑀥𑀼𑀲𑀪𑀸𑀯𑀸 𑀭𑀸𑀚𑀺𑀲𑀬𑁄 𑀘 𑀩𑁆𑀭𑀸𑀳𑁆𑀫𑀡𑀺𑀲𑀬𑁄 𑀘 𑀅𑀦𑀼𑀫𑀕𑁆𑀕𑁂 𑀫𑀫 𑀅𑀲𑁆𑀲𑀫𑀫𑀕𑁆𑀕𑀧𑀲𑁆𑀲𑁂 𑀯𑀲𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀢𑁂 𑀧𑀼𑀘𑁆𑀙𑁂𑀬𑁆𑀬𑀸𑀲𑀺, 𑀢𑁂 𑀢𑀁 𑀫𑀫 𑀲𑀦𑁆𑀢𑀺𑀓𑀁 𑀦𑀬𑀺𑀲𑁆𑀲𑀦𑁆𑀢𑀻𑀢𑀺.
𑀏𑀯𑀁 𑀲𑀸 𑀅𑀢𑁆𑀢𑀦𑁄 𑀧𑀮𑀸𑀬𑀦𑀽𑀧𑀸𑀬𑀁 𑀓𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀑𑀮𑁄𑀓𑁂𑀦𑁆𑀢𑀫𑁂𑀯 ‘‘𑀢𑁆𑀯𑀁 𑀦𑀺𑀯𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑁂𑀦𑁂𑀯 𑀅𑀫𑀘𑁆𑀘𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂 𑀢𑀁 𑀕𑀳𑁂𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀢𑀼𑀲𑁆𑀲𑀺𑀢𑁆𑀯𑀸 𑀲𑀓𑀮𑀭𑀝𑁆𑀞𑁂 𑀤𑁂𑀯𑀁 𑀯𑀲𑁆𑀲𑀸𑀧𑁂𑀲𑀺, 𑀢𑀢𑁄 𑀲𑀼𑀪𑀺𑀓𑁆𑀔𑀁 𑀚𑀦𑀧𑀤𑀁 𑀅𑀳𑁄𑀲𑀺. 𑀇𑀲𑀺𑀲𑀺𑀗𑁆𑀕𑀢𑀸𑀧𑀲𑀲𑁆𑀲𑀧𑀺 𑀢𑀸𑀬 𑀧𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀏𑀯 𑀓𑀸𑀬𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀓𑀫𑁆𑀧𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀓𑀘𑀻𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 ¶ 𑀲𑁄𑀘𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀦𑀼 𑀔𑁄 𑀕𑀢𑁄’’𑀢𑀺 𑀓𑀸𑀚𑀁 𑀑𑀢𑀸𑀭𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀦𑀺𑀧𑀦𑁆𑀦𑀓𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀦 𑀢𑁂 𑀉𑀤𑀓𑀫𑀸𑀪𑀢𑀁;
𑀅𑀕𑁆𑀕𑀻𑀧𑀺 𑀢𑁂 𑀦 𑀳𑀸𑀧𑀺𑀢𑁄, 𑀓𑀺𑀁 𑀦𑀼 𑀫𑀦𑁆𑀤𑁄𑀯 𑀛𑀸𑀬𑀲𑀺.
‘‘𑀪𑀺𑀦𑁆𑀦𑀸𑀦𑀺 𑀓𑀝𑁆𑀞𑀸𑀦𑀺 𑀳𑀼𑀢𑁄 𑀘 𑀅𑀕𑁆𑀕𑀺, 𑀢𑀧𑀦𑀻𑀧𑀺 𑀢𑁂 𑀲𑀫𑀺𑀢𑀸 𑀩𑁆𑀭𑀳𑁆𑀫𑀘𑀸𑀭𑀻;
𑀧𑀻𑀞𑀜𑁆𑀘 𑀫𑀬𑁆𑀳𑀁 𑀉𑀤𑀓𑀜𑁆𑀘 𑀳𑁄𑀢𑀺, 𑀭𑀫𑀲𑀺 𑀢𑀼𑀯𑀁 𑀩𑁆𑀭𑀳𑁆𑀫𑀪𑀽𑀢𑁄 𑀧𑀼𑀭𑀢𑁆𑀣𑀸.
‘‘𑀅𑀪𑀺𑀦𑁆𑀦𑀓𑀝𑁆𑀞𑁄𑀲𑀺 ¶ 𑀅𑀦𑀸𑀪𑀢𑁄𑀤𑀓𑁄, 𑀅𑀳𑀸𑀧𑀺𑀢𑀕𑁆𑀕𑀻𑀲𑀺 𑀅𑀲𑀺𑀤𑁆𑀥𑀪𑁄𑀚𑀦𑁄;
𑀦 𑀫𑁂 𑀢𑀼𑀯𑀁 𑀆𑀮𑀧𑀲𑀻 𑀫𑀫𑀚𑁆𑀚, 𑀦𑀝𑁆𑀞𑀁 𑀦𑀼 𑀓𑀺𑀁 𑀘𑁂𑀢𑀲𑀺𑀓𑀜𑁆𑀘 𑀤𑀼𑀓𑁆𑀔’’𑀦𑁆𑀢𑀺.
𑀢𑀢𑁆𑀣 ¶ 𑀪𑀺𑀦𑁆𑀦𑀸𑀦𑀻𑀢𑀺 𑀅𑀭𑀜𑁆𑀜𑀢𑁄 𑀉𑀤𑁆𑀥𑀝𑀸𑀦𑀺. 𑀦 𑀳𑀸𑀧𑀺𑀢𑁄𑀢𑀺 𑀦 𑀚𑀮𑀺𑀢𑁄. 𑀪𑀺𑀦𑁆𑀦𑀸𑀦𑀻𑀢𑀺 𑀧𑀼𑀩𑁆𑀩𑁂 𑀢𑀬𑀸 𑀫𑀫𑀸𑀕𑀫𑀦𑀯𑁂𑀮𑀸𑀬 𑀓𑀝𑁆𑀞𑀸𑀦𑀺 𑀉𑀤𑁆𑀥𑀝𑀸𑀦𑁂𑀯 𑀳𑁄𑀦𑁆𑀢𑀺. 𑀳𑀼𑀢𑁄 𑀘 𑀅𑀕𑁆𑀕𑀻𑀢𑀺 𑀅𑀕𑁆𑀕𑀺 𑀘 𑀳𑀼𑀢𑁄 𑀳𑁄𑀢𑀺. 𑀢𑀧𑀦𑀻𑀢𑀺 𑀯𑀺𑀲𑀺𑀩𑁆𑀩𑀦𑀅𑀕𑁆𑀕𑀺𑀲𑀗𑁆𑀔𑀸𑀢𑀸 𑀢𑀧𑀦𑀻𑀧𑀺 𑀢𑁂 𑀲𑀫𑀺𑀢𑀸𑀯 𑀲𑀬𑀫𑁂𑀯 𑀲𑀁𑀯𑀺𑀤𑀳𑀺𑀢𑀸𑀯 𑀳𑁄𑀢𑀺. 𑀧𑀻𑀞𑀦𑁆𑀢𑀺 𑀫𑀫 𑀆𑀲𑀦𑀢𑁆𑀣𑀸𑀬 𑀧𑀻𑀞𑀜𑁆𑀘 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀉𑀤𑀓𑀜𑁆𑀘𑀸𑀢𑀺 𑀧𑀸𑀤𑀥𑁄𑀯𑀦𑀉𑀤𑀓𑀫𑁆𑀧𑀺 𑀉𑀧𑀝𑁆𑀞𑀸𑀧𑀺𑀢𑀫𑁂𑀯 𑀳𑁄𑀢𑀺. 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀢𑀼𑀯𑀫𑁆𑀧𑀺 𑀇𑀢𑁄 𑀧𑀼𑀭𑀢𑁆𑀣𑀸 𑀲𑁂𑀝𑁆𑀞𑀪𑀽𑀢𑁄 𑀇𑀫𑀲𑁆𑀫𑀺𑀁 𑀅𑀲𑁆𑀲𑀫𑁂 𑀅𑀪𑀺𑀭𑀫𑀲𑀺. 𑀅𑀪𑀺𑀦𑁆𑀦𑀓𑀝𑁆𑀞𑁄𑀲𑀻𑀢𑀺 𑀲𑁄 𑀤𑀸𑀦𑀺 𑀅𑀚𑁆𑀚 𑀅𑀦𑀼𑀤𑁆𑀥𑀝𑀓𑀝𑁆𑀞𑁄𑀲𑀺. 𑀅𑀲𑀺𑀤𑁆𑀥𑀪𑁄𑀚𑀦𑁄𑀢𑀺 𑀦 𑀢𑁂 𑀓𑀺𑀜𑁆𑀘𑀺 𑀅𑀫𑁆𑀳𑀸𑀓𑀁 𑀓𑀦𑁆𑀤𑀫𑀽𑀮𑀁 𑀯𑀸 𑀧𑀡𑁆𑀡𑀁 𑀯𑀸 𑀲𑁂𑀤𑀺𑀢𑀁. 𑀫𑀫𑀚𑁆𑀚𑀸𑀢𑀺, 𑀫𑀫 𑀧𑀼𑀢𑁆𑀢, 𑀅𑀚𑁆𑀚 𑀦 𑀫𑁂 𑀢𑁆𑀯𑀁 𑀆𑀮𑀧𑀲𑀺. 𑀦𑀝𑁆𑀞𑀁 𑀦𑀼 𑀓𑀺𑀦𑁆𑀢𑀺 𑀓𑀺𑀁 𑀦𑀼 𑀢𑁂 𑀦𑀝𑁆𑀞𑀁 𑀯𑀸, 𑀓𑀺𑀁 𑀘𑁂𑀢𑀲𑀺𑀓𑀁 𑀯𑀸 𑀤𑀼𑀓𑁆𑀔𑀁, 𑀅𑀓𑁆𑀔𑀸𑀳𑀺 𑀫𑁂 𑀦𑀺𑀧𑀦𑁆𑀦𑀓𑀸𑀭𑀡𑀦𑁆𑀢𑀺 𑀧𑀼𑀘𑁆𑀙𑀢𑀺.
𑀲𑁄 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀆𑀳 𑁋
‘‘𑀇𑀥𑀸𑀕𑀫𑀸 𑀚𑀝𑀺𑀮𑁄 𑀩𑁆𑀭𑀳𑁆𑀫𑀘𑀸𑀭𑀻, 𑀲𑀼𑀤𑀲𑁆𑀲𑀦𑁂𑀬𑁆𑀬𑁄 𑀲𑀼𑀢𑀦𑀽 𑀯𑀺𑀦𑁂𑀢𑀺;
𑀦𑁂𑀯𑀸𑀢𑀺𑀤𑀻𑀖𑁄 𑀦 𑀧𑀦𑀸𑀢𑀺𑀭𑀲𑁆𑀲𑁄, 𑀲𑀼𑀓𑀡𑁆𑀳𑀓𑀡𑁆𑀳𑀘𑁆𑀙𑀤𑀦𑁂𑀳𑀺 𑀪𑁄𑀢𑁄.
‘‘𑀅𑀫𑀲𑁆𑀲𑀼𑀚𑀸𑀢𑁄 𑀅𑀧𑀼𑀭𑀸𑀡𑀯𑀡𑁆𑀡𑀻, 𑀆𑀥𑀸𑀭𑀭𑀽𑀧𑀜𑁆𑀘 𑀧𑀦𑀲𑁆𑀲 𑀓𑀡𑁆𑀞𑁂;
𑀤𑁆𑀯𑁂 𑀬𑀫𑀸 𑀕𑀡𑁆𑀟𑀸 𑀉𑀭𑁂 𑀲𑀼𑀚𑀸𑀢𑀸, 𑀲𑀼𑀯𑀡𑁆𑀡𑀢𑀺𑀦𑁆𑀤𑀼𑀓𑀦𑀺𑀪𑀸 𑀧𑀪𑀲𑁆𑀲𑀭𑀸.
‘‘𑀫𑀼𑀔𑀜𑁆𑀘 ¶ 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀁, 𑀓𑀡𑁆𑀡𑁂𑀲𑀼 𑀮𑀫𑁆𑀩𑀦𑁆𑀢𑀺 𑀘 𑀓𑀼𑀜𑁆𑀘𑀺𑀢𑀕𑁆𑀕𑀸;
𑀢𑁂 𑀚𑁄𑀢𑀭𑁂 𑀘𑀭𑀢𑁄 𑀫𑀸𑀡𑀯𑀲𑁆𑀲, 𑀲𑀼𑀢𑁆𑀢𑀜𑁆𑀘 𑀬𑀁 𑀲𑀁𑀬𑀫𑀦𑀁 𑀚𑀝𑀸𑀦𑀁.
‘‘𑀅𑀜𑁆𑀜𑀸 ¶ 𑀘 𑀢𑀲𑁆𑀲 𑀲𑀁𑀬𑀫𑀸𑀦𑀺 𑀘𑀢𑀲𑁆𑀲𑁄, 𑀦𑀻𑀮𑀸 𑀧𑀻𑀢𑀸 𑀮𑁄𑀳𑀺𑀢𑀺𑀓𑀸 𑀘 𑀲𑁂𑀢𑀸;
𑀢𑀸 𑀧𑀺𑀁𑀲𑀭𑁂 𑀘𑀭𑀢𑁄 𑀫𑀸𑀡𑀯𑀲𑁆𑀲, 𑀢𑀺𑀭𑀺𑀝𑀺𑀲𑀗𑁆𑀖𑀸𑀭𑀺𑀯 𑀧𑀸𑀯𑀼𑀲𑀫𑁆𑀳𑀺.
‘‘𑀦 𑀫𑀺𑀔𑀮𑀁 𑀫𑀼𑀜𑁆𑀚𑀫𑀬𑀁 𑀥𑀸𑀭𑁂𑀢𑀺, 𑀦 𑀲𑀦𑁆𑀣𑀭𑁂 𑀦𑁄 𑀧𑀦 𑀧𑀩𑁆𑀩𑀚𑀲𑁆𑀲;
𑀢𑀸 ¶ 𑀚𑁄𑀢𑀭𑁂 𑀚𑀖𑀦𑀦𑁆𑀢𑀭𑁂 𑀯𑀺𑀮𑀕𑁆𑀕𑀸, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.
‘‘𑀅𑀔𑀻𑀮𑀓𑀸𑀦𑀺 𑀘 𑀅𑀯𑀡𑁆𑀝𑀓𑀸𑀦𑀺, 𑀳𑁂𑀝𑁆𑀞𑀸 𑀦𑀪𑁆𑀬𑀸 𑀓𑀝𑀺𑀲𑀫𑁄𑀳𑀺𑀢𑀸𑀦𑀺;
𑀅𑀖𑀝𑁆𑀝𑀺𑀢𑀸 𑀦𑀺𑀘𑁆𑀘𑀓𑀻𑀴𑀁 𑀓𑀭𑁄𑀦𑁆𑀢𑀺, 𑀳𑀁 𑀢𑀸𑀢 𑀓𑀺𑀁𑀭𑀼𑀓𑁆𑀔𑀨𑀮𑀸𑀦𑀺 𑀢𑀸𑀦𑀺.
‘‘𑀚𑀝𑀸 𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀸, 𑀧𑀭𑁄𑀲𑀢𑀁 𑀯𑁂𑀮𑁆𑀮𑀺𑀢𑀕𑁆𑀕𑀸 𑀲𑀼𑀕𑀦𑁆𑀥𑀸;
𑀤𑁆𑀯𑁂𑀥𑀸 𑀲𑀺𑀭𑁄 𑀲𑀸𑀥𑀼 𑀯𑀺𑀪𑀢𑁆𑀢𑀭𑀽𑀧𑁄, 𑀅𑀳𑁄 𑀦𑀼 𑀔𑁄 𑀫𑀬𑁆𑀳 𑀢𑀣𑀸 𑀚𑀝𑀸𑀲𑁆𑀲𑀼.
‘‘𑀬𑀤𑀸 𑀘 𑀲𑁄 𑀧𑀓𑀺𑀭𑀢𑀺 𑀢𑀸 𑀚𑀝𑀸𑀬𑁄, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀉𑀧𑁂𑀢𑀭𑀽𑀧𑀸;
𑀦𑀻𑀮𑀼𑀧𑁆𑀧𑀮𑀁 𑀯𑀸𑀢𑀲𑀫𑁂𑀭𑀺𑀢𑀁𑀯, 𑀢𑀣𑁂𑀯 𑀲𑀁𑀯𑀸𑀢𑀺 𑀧𑀦𑀲𑁆𑀲𑀫𑁄 𑀅𑀬𑀁.
‘‘𑀧𑀗𑁆𑀓𑁄 𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑁄, 𑀦𑁂𑀢𑀸𑀤𑀺𑀲𑁄 𑀬𑀸𑀤𑀺𑀲𑁄 𑀫𑀬𑁆𑀳𑀁 𑀓𑀸𑀬𑁂;
𑀲𑁄 𑀯𑀸𑀬𑀢𑀺 𑀏𑀭𑀺𑀢𑁄 𑀫𑀸𑀮𑀼𑀢𑁂𑀦, 𑀯𑀦𑀁 𑀬𑀣𑀸 𑀅𑀕𑁆𑀕𑀕𑀺𑀫𑁆𑀳𑁂 𑀲𑀼𑀨𑀼𑀮𑁆𑀮𑀁.
‘‘𑀦𑀺𑀳𑀦𑁆𑀢𑀺 𑀲𑁄 𑀭𑀼𑀓𑁆𑀔𑀨𑀮𑀁 𑀧𑀣𑀩𑁆𑀬𑀸, 𑀲𑀼𑀘𑀺𑀢𑁆𑀢𑀭𑀽𑀧𑀁 𑀭𑀼𑀘𑀺𑀭𑀁 𑀤𑀲𑁆𑀲𑀦𑁂𑀬𑁆𑀬𑀁;
𑀔𑀺𑀢𑁆𑀢𑀜𑁆𑀘 𑀢𑀲𑁆𑀲 𑀧𑀼𑀦𑀭𑁂𑀳𑀺 𑀳𑀢𑁆𑀣𑀁, 𑀳𑀁 𑀢𑀸𑀢 𑀓𑀺𑀁𑀭𑀼𑀓𑁆𑀔𑀨𑀮𑀁 𑀦𑀼 𑀔𑁄 𑀢𑀁.
‘‘𑀤𑀦𑁆𑀢𑀸 ¶ 𑀘 𑀢𑀲𑁆𑀲 𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀸, 𑀲𑀼𑀤𑁆𑀥𑀸 𑀲𑀫𑀸 𑀲𑀗𑁆𑀔𑀯𑀭𑀽𑀧𑀧𑀦𑁆𑀦𑀸;
𑀫𑀦𑁄 𑀧𑀲𑀸𑀤𑁂𑀦𑁆𑀢𑀺 𑀯𑀺𑀯𑀭𑀺𑀬𑀫𑀸𑀦𑀸, 𑀦 𑀳𑀺 𑀦𑀽𑀦 𑀲𑁄 𑀲𑀸𑀓𑀫𑀔𑀸𑀤𑀺 𑀢𑁂𑀳𑀺.
‘‘𑀅𑀓𑀓𑁆𑀓𑀲𑀁 𑀅𑀕𑁆𑀕𑀴𑀺𑀢𑀁 𑀫𑀼𑀳𑀼𑀁 𑀫𑀼𑀤𑀼𑀁, 𑀉𑀚𑀼𑀁 𑀅𑀦𑀼𑀤𑁆𑀥𑀢𑀁 𑀅𑀘𑀧𑀮𑀫𑀲𑁆𑀲 𑀪𑀸𑀲𑀺𑀢𑀁;
𑀭𑀼𑀤𑀁 ¶ 𑀫𑀦𑀼𑀜𑁆𑀜𑀁 𑀓𑀭𑀯𑀻𑀓𑀲𑀼𑀲𑁆𑀲𑀭𑀁, 𑀳𑀤𑀬𑀗𑁆𑀕𑀫𑀁 𑀭𑀜𑁆𑀚𑀬𑀢𑁂𑀯 𑀫𑁂 𑀫𑀦𑁄.
‘‘𑀩𑀺𑀦𑁆𑀤𑀼𑀲𑁆𑀲𑀭𑁄 ¶ 𑀦𑀸𑀢𑀺𑀯𑀺𑀲𑀝𑁆𑀞𑀯𑀸𑀓𑁆𑀬𑁄, 𑀦 𑀦𑀽𑀦 𑀲𑀚𑁆𑀛𑀸𑀬𑀫𑀢𑀺𑀧𑁆𑀧𑀬𑀼𑀢𑁆𑀢𑁄;
𑀇𑀘𑁆𑀙𑀸𑀫𑀺 𑀪𑁄 𑀢𑀁 𑀧𑀼𑀦𑀤𑁂𑀯 𑀤𑀝𑁆𑀞𑀼𑀁, 𑀫𑀺𑀢𑁆𑀢𑁄 𑀳𑀺 𑀫𑁂 𑀫𑀸𑀡𑀯𑁄𑀳𑀼 𑀧𑀼𑀭𑀢𑁆𑀣𑀸.
‘‘𑀲𑀼𑀲𑀦𑁆𑀥𑀺 𑀲𑀩𑁆𑀩𑀢𑁆𑀣 𑀯𑀺𑀫𑀝𑁆𑀞𑀺𑀫𑀁 𑀯𑀡𑀁, 𑀧𑀼𑀣𑀽 𑀲𑀼𑀚𑀸𑀢𑀁 𑀔𑀭𑀧𑀢𑁆𑀢𑀲𑀦𑁆𑀦𑀺𑀪𑀁;
𑀢𑁂𑀦𑁂𑀯 𑀫𑀁 𑀉𑀢𑁆𑀢𑀭𑀺𑀬𑀸𑀦 𑀫𑀸𑀡𑀯𑁄, 𑀯𑀺𑀯𑀭𑀺𑀢𑀁 𑀊𑀭𑀼𑀁 𑀚𑀖𑀦𑁂𑀦 𑀧𑀺𑀴𑀬𑀺.
‘‘𑀢𑀧𑀦𑁆𑀢𑀺 𑀆𑀪𑀦𑁆𑀢𑀺 𑀯𑀺𑀭𑁄𑀘𑀭𑁂 𑀘, 𑀲𑀢𑁂𑀭𑀢𑀸 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂;
𑀩𑀸𑀳𑀸 𑀫𑀼𑀤𑀽 𑀅𑀜𑁆𑀚𑀦𑀮𑁄𑀫𑀲𑀸𑀤𑀺𑀲𑀸, 𑀯𑀺𑀘𑀺𑀢𑁆𑀭𑀯𑀝𑁆𑀝𑀗𑁆𑀕𑀼𑀮𑀺𑀓𑀸𑀲𑁆𑀲 𑀲𑁄𑀪𑀭𑁂.
‘‘𑀅𑀓𑀓𑁆𑀓𑀲𑀗𑁆𑀕𑁄 𑀦 𑀘 𑀤𑀻𑀖𑀮𑁄𑀫𑁄, 𑀦𑀔𑀸𑀲𑁆𑀲 𑀤𑀻𑀖𑀸 𑀅𑀧𑀺 𑀮𑁄𑀳𑀺𑀢𑀕𑁆𑀕𑀸;
𑀫𑀼𑀤𑀽𑀳𑀺 𑀩𑀸𑀳𑀸𑀳𑀺 𑀧𑀮𑀺𑀲𑁆𑀲𑀚𑀦𑁆𑀢𑁄, 𑀓𑀮𑁆𑀬𑀸𑀡𑀭𑀽𑀧𑁄 𑀭𑀫𑀬𑀁 𑀉𑀧𑀝𑁆𑀞𑀳𑀺.
‘‘𑀤𑀼𑀫𑀲𑁆𑀲 𑀢𑀽𑀮𑀽𑀧𑀦𑀺𑀪𑀸 𑀧𑀪𑀲𑁆𑀲𑀭𑀸, 𑀲𑀼𑀯𑀡𑁆𑀡𑀓𑀫𑁆𑀩𑀼𑀢𑀮𑀯𑀝𑁆𑀝𑀲𑀼𑀘𑁆𑀙𑀯𑀺;
𑀳𑀢𑁆𑀣𑀸 𑀫𑀼𑀤𑀽 𑀢𑁂𑀳𑀺 𑀫𑀁 𑀲𑀫𑁆𑀨𑀼𑀲𑀺𑀢𑁆𑀯𑀸, 𑀇𑀢𑁄 𑀕𑀢𑁄 𑀢𑁂𑀦 𑀫𑀁 𑀤𑀳𑀦𑁆𑀢𑀺 𑀢𑀸𑀢.
‘‘𑀦 ¶ 𑀦𑀽𑀦 𑀲𑁄 𑀔𑀸𑀭𑀺𑀯𑀺𑀥𑀁 𑀅𑀳𑀸𑀲𑀺, 𑀦 𑀦𑀽𑀦 𑀲𑁄 𑀓𑀝𑁆𑀞𑀸𑀦𑀺 𑀲𑀬𑀁 𑀅𑀪𑀜𑁆𑀚𑀺;
𑀦 𑀦𑀽𑀦 𑀲𑁄 𑀳𑀦𑁆𑀢𑀺 𑀤𑀼𑀫𑁂 𑀓𑀼𑀞𑀸𑀭𑀺𑀬𑀸, 𑀦 𑀳𑀺𑀲𑁆𑀲 𑀳𑀢𑁆𑀣𑁂𑀲𑀼 𑀔𑀺𑀮𑀸𑀦𑀺 𑀅𑀢𑁆𑀣𑀺.
‘‘𑀅𑀘𑁆𑀙𑁄 𑀘 𑀔𑁄 𑀢𑀲𑁆𑀲 𑀯𑀡𑀁 𑀅𑀓𑀸𑀲𑀺, 𑀲𑁄 𑀫𑀁𑀩𑁆𑀭𑀯𑀺 ‘𑀲𑀼𑀔𑀺𑀢𑀁 𑀫𑀁 𑀓𑀭𑁄𑀳𑀺’;
𑀢𑀸𑀳𑀁 ¶ 𑀓𑀭𑀺𑀁 𑀢𑁂𑀦 𑀫𑀫𑀸𑀲𑀺 𑀲𑁄𑀔𑁆𑀬𑀁, 𑀲𑁄 𑀘𑀩𑁆𑀭𑀯𑀺 ‘𑀲𑀼𑀔𑀺𑀢𑁄𑀲𑁆𑀫𑀻’𑀢𑀺 𑀩𑁆𑀭𑀳𑁆𑀫𑁂.
‘‘𑀅𑀬𑀜𑁆𑀘 𑀢𑁂 𑀫𑀸𑀮𑀼𑀯𑀧𑀡𑁆𑀡𑀲𑀦𑁆𑀣𑀢𑀸, 𑀯𑀺𑀓𑀺𑀡𑁆𑀡𑀭𑀽𑀧𑀸𑀯 𑀫𑀬𑀸 𑀘 𑀢𑁂𑀦 𑀘;
𑀓𑀺𑀮𑀦𑁆𑀢𑀭𑀽𑀧𑀸 𑀉𑀤𑀓𑁂 𑀭𑀫𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀧𑀡𑁆𑀡𑀓𑀼𑀝𑀺𑀁 𑀯𑀚𑀸𑀫.
‘‘𑀦 𑀫𑀚𑁆𑀚 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺 𑀢𑀸𑀢, 𑀦 𑀅𑀕𑁆𑀕𑀺𑀳𑀼𑀢𑁆𑀢𑀁 𑀦𑀧𑀺 𑀬𑀜𑁆𑀜𑀢𑀦𑁆𑀢𑀁;
𑀦 𑀘𑀸𑀧𑀺 𑀢𑁂 𑀫𑀽𑀮𑀨𑀮𑀸𑀦𑀺 𑀪𑀼𑀜𑁆𑀚𑁂, 𑀬𑀸𑀯 𑀦 𑀧𑀲𑁆𑀲𑀸𑀫𑀺 𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀁.
‘‘𑀅𑀤𑁆𑀥𑀸 𑀧𑀚𑀸𑀦𑀸𑀲𑀺 𑀢𑀼𑀯𑀫𑁆𑀧𑀺 𑀢𑀸𑀢, 𑀬𑀲𑁆𑀲𑀁 𑀤𑀺𑀲𑀁 𑀯𑀲𑀢𑁂 𑀩𑁆𑀭𑀳𑁆𑀫𑀘𑀸𑀭𑀻;
𑀢𑀁 𑀫𑀁 𑀤𑀺𑀲𑀁 𑀧𑀸𑀧𑀬 𑀢𑀸𑀢 𑀔𑀺𑀧𑁆𑀧𑀁, 𑀫𑀸 𑀢𑁂 𑀅𑀳𑀁 𑀅𑀫𑀭𑀺𑀫𑀲𑁆𑀲𑀫𑀫𑁆𑀳𑀺.
‘‘𑀯𑀺𑀘𑀺𑀢𑁆𑀭𑀨𑀼𑀮𑁆𑀮𑀜𑁆𑀳𑀺 ¶ 𑀯𑀦𑀁 𑀲𑀼𑀢𑀁 𑀫𑀬𑀸, 𑀤𑀺𑀚𑀸𑀪𑀺𑀖𑀼𑀝𑁆𑀞𑀁 𑀤𑀺𑀚𑀲𑀗𑁆𑀖𑀲𑁂𑀯𑀺𑀢𑀁;
𑀢𑀁 𑀫𑀁 𑀯𑀦𑀁 𑀧𑀸𑀧𑀬 𑀢𑀸𑀢 𑀔𑀺𑀧𑁆𑀧𑀁, 𑀧𑀼𑀭𑀸 𑀢𑁂 𑀧𑀸𑀡𑀁 𑀯𑀺𑀚𑀳𑀸𑀫𑀺 𑀅𑀲𑁆𑀲𑀫𑁂’’𑀢𑀺.
𑀢𑀢𑁆𑀣 𑀇𑀥𑀸𑀕𑀫𑀸𑀢𑀺, 𑀢𑀸𑀢, 𑀇𑀫𑀁 𑀅𑀲𑁆𑀲𑀫𑀧𑀤𑀁 𑀆𑀕𑀢𑁄. 𑀲𑀼𑀤𑀲𑁆𑀲𑀦𑁂𑀬𑁆𑀬𑁄𑀢𑀺 𑀲𑀼𑀝𑁆𑀞𑀼 𑀤𑀲𑁆𑀲𑀦𑁂𑀬𑁆𑀬𑁄. 𑀲𑀼𑀢𑀦𑀽𑀢𑀺 𑀲𑀼𑀝𑁆𑀞𑀼 𑀢𑀦𑀼𑀓𑁄 𑀦𑀸𑀢𑀺𑀓𑀺𑀲𑁄 𑀦𑀸𑀢𑀺𑀣𑀽𑀮𑁄 ¶ . 𑀯𑀺𑀦𑁂𑀢𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀅𑀲𑁆𑀲𑀫𑀧𑀤𑀁 𑀏𑀓𑁄𑀪𑀸𑀲𑀁 𑀯𑀺𑀬 𑀯𑀺𑀦𑁂𑀢𑀺 𑀧𑀽𑀭𑁂𑀢𑀺. 𑀲𑀼𑀓𑀡𑁆𑀳𑀓𑀡𑁆𑀳𑀘𑁆𑀙𑀤𑀦𑁂𑀳𑀺 𑀪𑁄𑀢𑁄𑀢𑀺, 𑀢𑀸𑀢, 𑀢𑀲𑁆𑀲 𑀪𑁄𑀢𑁄 𑀲𑀼𑀓𑀡𑁆𑀳𑁂𑀳𑀺 𑀓𑀡𑁆𑀳𑀘𑁆𑀙𑀤𑀦𑁂𑀳𑀺 𑀪𑀫𑀭𑀯𑀡𑁆𑀡𑁂𑀳𑀺 𑀓𑁂𑀲𑁂𑀳𑀺 𑀲𑀼𑀓𑀡𑁆𑀳𑀲𑀻𑀲𑀁 𑀲𑀼𑀫𑀚𑁆𑀚𑀺𑀢𑀫𑀡𑀺𑀫𑀬𑀁 𑀯𑀺𑀬 𑀔𑀸𑀬𑀢𑀺. 𑀅𑀫𑀲𑁆𑀲𑀽𑀚𑀸𑀢𑁄𑀢𑀺 𑀦 𑀢𑀸𑀯𑀲𑁆𑀲 𑀫𑀲𑁆𑀲𑀼 𑀚𑀸𑀬𑀢𑀺, 𑀢𑀭𑀼𑀡𑁄𑀬𑁂𑀯. 𑀅𑀧𑀼𑀭𑀸𑀡𑀯𑀡𑁆𑀡𑀻𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄. 𑀆𑀥𑀸𑀭𑀭𑀽𑀧𑀜𑁆𑀘 𑀧𑀦𑀲𑁆𑀲 𑀓𑀡𑁆𑀞𑁂𑀢𑀺 𑀓𑀡𑁆𑀞𑁂 𑀘 𑀧𑀦𑀲𑁆𑀲 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀸𑀪𑀸𑀚𑀦𑀝𑁆𑀞𑀧𑀦𑀁 𑀧𑀢𑁆𑀢𑀸𑀥𑀸𑀭𑀲𑀤𑀺𑀲𑀁 𑀧𑀺𑀴𑀦𑁆𑀥𑀦𑀁 𑀅𑀢𑁆𑀣𑀻𑀢𑀺 𑀫𑀼𑀢𑁆𑀢𑀸𑀳𑀸𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀕𑀡𑁆𑀟𑀸𑀢𑀺 𑀣𑀦𑁂 𑀲𑀦𑁆𑀥𑀸𑀬𑀸𑀳. 𑀉𑀭𑁂 𑀲𑀼𑀚𑀸𑀢𑀸𑀢𑀺 𑀉𑀭𑀫𑁆𑀳𑀺 𑀲𑀼𑀚𑀸𑀢𑀸. ‘‘𑀉𑀭𑀢𑁄’’𑀢𑀺𑀧𑀺 𑀧𑀸𑀞𑁄. 𑀧𑀪𑀲𑁆𑀲𑀭𑀸𑀢𑀺 𑀧𑀪𑀸𑀲𑀫𑁆𑀧𑀦𑁆𑀦𑀸. ‘‘𑀧𑀪𑀸𑀲𑀭𑁂’’𑀢𑀺𑀧𑀺 𑀧𑀸𑀞𑁄, 𑀑𑀪𑀸𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.
𑀪𑀼𑀲𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀅𑀢𑀺𑀯𑀺𑀬 𑀤𑀲𑁆𑀲𑀦𑀻𑀬𑀁. 𑀓𑀼𑀜𑁆𑀘𑀺𑀢𑀕𑁆𑀕𑀸𑀢𑀺 𑀲𑀻𑀳𑀓𑀼𑀡𑁆𑀟𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀼𑀢𑁆𑀢𑀜𑁆𑀘𑀸𑀢𑀺 𑀬𑀁 𑀢𑀲𑁆𑀲 𑀚𑀝𑀸𑀩𑀦𑁆𑀥𑀦𑀲𑀼𑀢𑁆𑀢𑀁, 𑀢𑀫𑁆𑀧𑀺 𑀚𑁄𑀢𑀢𑀺 𑀧𑀪𑀁 𑀫𑀼𑀜𑁆𑀘𑀢𑀺. ‘‘𑀲𑀁𑀬𑀫𑀸𑀦𑀺 𑀘𑀢𑀲𑁆𑀲𑁄’’𑀢𑀺 𑀇𑀫𑀺𑀦𑀸 𑀫𑀡𑀺𑀲𑀼𑀯𑀡𑁆𑀡𑀧𑀯𑀸𑀴𑀭𑀚𑀢𑀫𑀬𑀸𑀦𑀺 𑀘𑀢𑁆𑀢𑀸𑀭𑀺 𑀧𑀺𑀴𑀦𑁆𑀥𑀦𑀸𑀦𑀺 𑀤𑀲𑁆𑀲𑁂𑀢𑀺 ¶ . 𑀢𑀸 𑀧𑀺𑀁𑀲𑀭𑁂𑀢𑀺 𑀢𑀸𑀦𑀺 𑀧𑀺𑀴𑀦𑁆𑀥𑀦𑀸𑀦𑀺 𑀧𑀸𑀯𑀼𑀲𑀫𑁆𑀳𑀺 𑀧𑀯𑀼𑀝𑁆𑀞𑁂 𑀤𑁂𑀯𑁂 𑀢𑀺𑀭𑀺𑀝𑀺𑀲𑀗𑁆𑀖𑀸 𑀯𑀺𑀬 𑀯𑀺𑀭𑀯𑀦𑁆𑀢𑀺. 𑀫𑀺𑀔𑀮𑀦𑁆𑀢𑀺 𑀫𑁂𑀔𑀮𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀦𑀺𑀯𑀢𑁆𑀣𑀓𑀜𑁆𑀘𑀦𑀘𑀻𑀭𑀓𑀁 𑀲𑀦𑁆𑀥𑀸𑀬𑀸𑀳. 𑀦 𑀲𑀦𑁆𑀣𑀭𑁂𑀢𑀺 𑀦 𑀯𑀸𑀓𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀬𑀣𑀸 𑀫𑀬𑀁 𑀢𑀺𑀡𑀫𑀬𑀁 𑀯𑀸 𑀯𑀸𑀓𑀫𑀬𑀁 𑀯𑀸 𑀘𑀻𑀭𑀓𑀁 𑀥𑀸𑀭𑁂𑀫, 𑀦 𑀢𑀣𑀸 𑀲𑁄, 𑀲𑁄 𑀧𑀦 𑀲𑀼𑀯𑀡𑁆𑀡𑀘𑀻𑀭𑀓𑀁 𑀥𑀸𑀭𑁂𑀢𑀻𑀢𑀺. 𑀅𑀔𑀻𑀮𑀓𑀸𑀦𑀻𑀢𑀺 𑀅𑀢𑀘𑀸𑀦𑀺 𑀦𑀺𑀧𑁆𑀧𑀡𑁆𑀡𑀸𑀦𑀺. 𑀓𑀝𑀺𑀲𑀫𑁄𑀳𑀺𑀢𑀸𑀦𑀻𑀢𑀺 𑀓𑀝𑀺𑀬𑀁 𑀩𑀤𑁆𑀥𑀸𑀦𑀺. 𑀦𑀺𑀘𑁆𑀘𑀓𑀻𑀴𑀁 𑀓𑀭𑁄𑀦𑁆𑀢𑀻𑀢𑀺 𑀅𑀖𑀝𑁆𑀝𑀺𑀢𑀸𑀦𑀺𑀧𑀺 𑀦𑀺𑀘𑁆𑀘𑀓𑀸𑀮𑀁 𑀓𑀻𑀴𑀸𑀬𑀦𑁆𑀢𑀺. 𑀳𑀁, 𑀢𑀸𑀢𑀸𑀢𑀺 𑀳𑀫𑁆𑀪𑁄, 𑀢𑀸𑀢. 𑀓𑀺𑀁 𑀭𑀼𑀓𑁆𑀔𑀨𑀮𑀸𑀦𑀺 𑀢𑀸𑀦𑀻𑀢𑀺 𑀢𑀸𑀦𑀺 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀲𑀼𑀢𑁆𑀢𑀸𑀭𑀼𑀴𑁆𑀳𑀸𑀦𑀺 𑀓𑀝𑀺𑀬𑀁 𑀩𑀤𑁆𑀥𑀸𑀦𑀺 𑀓𑀢𑀭𑀭𑀼𑀓𑁆𑀔𑀨𑀮𑀸𑀦𑀺 𑀦𑀸𑀫𑀸𑀢𑀺 𑀫𑀡𑀺𑀲𑀗𑁆𑀖𑀸𑀝𑀺𑀁 𑀲𑀦𑁆𑀥𑀸𑀬𑀸𑀳.
𑀚𑀝𑀸𑀢𑀺 𑀚𑀝𑀸𑀫𑀡𑁆𑀟𑀮𑀸𑀓𑀸𑀭𑁂𑀦 𑀩𑀤𑁆𑀥𑀭𑀢𑀦𑀫𑀺𑀲𑁆𑀲𑀓𑀓𑁂𑀲𑀯𑀝𑁆𑀝𑀺𑀬𑁄 𑀲𑀦𑁆𑀥𑀸𑀬𑀸𑀳. 𑀯𑁂𑀮𑁆𑀮𑀺𑀢𑀕𑁆𑀕𑀸𑀢𑀺 𑀓𑀼𑀜𑁆𑀘𑀺𑀢𑀕𑁆𑀕𑀸. 𑀤𑁆𑀯𑁂𑀥𑀸𑀲𑀺𑀭𑁄𑀢𑀺 𑀢𑀲𑁆𑀲 𑀲𑀻𑀲𑀁 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀩𑀤𑁆𑀥𑀸𑀦𑀁 𑀚𑀝𑀸𑀦𑀁 𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀭𑀽𑀧𑀁. 𑀢𑀣𑀸𑀢𑀺 𑀬𑀣𑀸 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀚𑀝𑀸, 𑀢𑀣𑀸 𑀢𑀼𑀫𑁆𑀳𑁂𑀳𑀺 𑀫𑀫 𑀦 𑀩𑀤𑁆𑀥𑀸, 𑀅𑀳𑁄 𑀯𑀢 𑀫𑀫𑀧𑀺 𑀢𑀣𑀸 𑀅𑀲𑁆𑀲𑀽𑀢𑀺 𑀧𑀢𑁆𑀣𑁂𑀦𑁆𑀢𑁄 𑀆𑀳. 𑀉𑀧𑁂𑀢𑀭𑀽𑀧𑀸𑀢𑀺 𑀉𑀧𑁂𑀢𑀲𑀪𑀸𑀯𑀸. 𑀯𑀸𑀢𑀲𑀫𑁂𑀭𑀺𑀢𑀁𑀯𑀸𑀢𑀺 ¶ 𑀬𑀣𑀸 𑀦𑀸𑀫 𑀦𑀻𑀮𑀼𑀧𑁆𑀧𑀮𑀁 𑀯𑀸𑀢𑁂𑀦 𑀲𑀫𑀻𑀭𑀺𑀢𑀁, 𑀢𑀣𑁂𑀯 𑀅𑀬𑀁 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀲𑁆𑀲𑀫𑁄 𑀲𑀁𑀯𑀸𑀢𑀺. 𑀦𑁂𑀢𑀸𑀤𑀺𑀲𑁄𑀢𑀺, 𑀢𑀸𑀢, 𑀬𑀸𑀤𑀺𑀲𑁄 ¶ 𑀫𑀫 𑀓𑀸𑀬𑁂 𑀧𑀗𑁆𑀓𑁄, 𑀦𑁂𑀢𑀸𑀤𑀺𑀲𑁄 𑀢𑀲𑁆𑀲 𑀲𑀭𑀻𑀭𑁂. 𑀲𑁄 𑀳𑀺 𑀤𑀲𑁆𑀲𑀦𑀻𑀬𑁄 𑀘𑁂𑀯 𑀲𑀼𑀕𑀦𑁆𑀥𑁄 𑀘. 𑀅𑀕𑁆𑀕𑀕𑀺𑀫𑁆𑀳𑁂𑀢𑀺 𑀯𑀲𑀦𑁆𑀢𑀲𑀫𑀬𑁂.
𑀦𑀺𑀳𑀦𑁆𑀢𑀻𑀢𑀺 𑀧𑀳𑀭𑀢𑀺. 𑀓𑀺𑀁 𑀭𑀼𑀓𑁆𑀔𑀨𑀮𑀁 𑀦𑀼 𑀔𑁄 𑀢𑀦𑁆𑀢𑀺 𑀓𑀢𑀭𑀭𑀼𑀓𑁆𑀔𑀲𑁆𑀲 𑀦𑀼 𑀔𑁄 𑀢𑀁 𑀨𑀮𑀁. 𑀲𑀗𑁆𑀔𑀯𑀭𑀽𑀧𑀧𑀦𑁆𑀦𑀸𑀢𑀺 𑀲𑀼𑀥𑁄𑀢𑀲𑀗𑁆𑀔𑀧𑀝𑀺𑀪𑀸𑀕𑀸. 𑀦 𑀳𑀺 𑀦𑀽𑀦 𑀲𑁄 𑀲𑀸𑀓𑀫𑀔𑀸𑀤𑀺 𑀢𑁂𑀳𑀻𑀢𑀺 𑀦 𑀦𑀽𑀦 𑀲𑁄 𑀫𑀸𑀡𑀯𑁄 𑀫𑀬𑀁 𑀯𑀺𑀬 𑀢𑁂𑀳𑀺 𑀤𑀦𑁆𑀢𑁂𑀳𑀺 𑀭𑀼𑀓𑁆𑀔𑀧𑀡𑁆𑀡𑀸𑀦𑀺 𑀘𑁂𑀯 𑀫𑀽𑀮𑀨𑀮𑀸𑀨𑀮𑀸𑀦𑀺 𑀘 𑀔𑀸𑀤𑀺. 𑀅𑀫𑁆𑀳𑀸𑀓𑀜𑁆𑀳𑀺 𑀢𑀸𑀦𑀺 𑀔𑀸𑀤𑀦𑁆𑀢𑀸𑀦𑀁 𑀲𑀩𑀮𑀸 𑀧𑀡𑁆𑀡𑀯𑀡𑁆𑀡𑀸 𑀤𑀦𑁆𑀢𑀸𑀢𑀺 𑀤𑀻𑀧𑁂𑀢𑀺.
𑀅𑀓𑀓𑁆𑀓𑀲𑀦𑁆𑀢𑀺, 𑀢𑀸𑀢, 𑀢𑀲𑁆𑀲 𑀪𑀸𑀲𑀺𑀢𑀁 𑀅𑀨𑀭𑀼𑀲𑀁 𑀅𑀕𑀴𑀺𑀢𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑀲𑁆𑀲𑀸𑀧𑀺 𑀫𑀥𑀼𑀭𑀢𑀸𑀬 𑀫𑀼𑀳𑀼𑀁 𑀫𑀼𑀤𑀼𑀁, 𑀅𑀧𑀫𑀼𑀲𑁆𑀲𑀢𑀸𑀬 𑀉𑀚𑀼𑀁, 𑀅𑀯𑀺𑀓𑁆𑀔𑀺𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀝𑀁, 𑀧𑀢𑀺𑀝𑁆𑀞𑀺𑀢𑀢𑀸𑀬 𑀅𑀘𑀧𑀮𑀁. 𑀭𑀼𑀤𑀦𑁆𑀢𑀺 𑀪𑀸𑀲𑀫𑀸𑀦𑀲𑁆𑀲 𑀲𑀭𑀲𑀗𑁆𑀔𑀸𑀢𑀁 𑀭𑀼𑀤𑀫𑁆𑀧𑀺 𑀫𑀦𑁄𑀳𑀭𑀁 𑀓𑀭𑀯𑀻𑀓𑀲𑁆𑀲 𑀯𑀺𑀬 𑀲𑀼𑀲𑁆𑀲𑀭𑀁 𑀲𑀼𑀫𑀥𑀼𑀭𑀁. 𑀭𑀜𑁆𑀚𑀬𑀢𑁂𑀯𑀸𑀢𑀺 𑀫𑀫 𑀫𑀦𑁄 𑀭𑀜𑁆𑀚𑀢𑀺𑀬𑁂𑀯. 𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀧𑀺𑀡𑁆𑀟𑀺𑀢𑀲𑁆𑀲𑀭𑁄. 𑀫𑀸𑀡𑀯𑁄𑀳𑀽𑀢𑀺 𑀲𑁄 𑀳𑀺 𑀫𑀸𑀡𑀯𑁄 𑀧𑀼𑀭𑀢𑁆𑀣𑀸 𑀫𑀫 𑀫𑀺𑀢𑁆𑀢𑁄 𑀅𑀳𑀼.
𑀲𑀼𑀲𑀦𑁆𑀥𑀺 𑀲𑀩𑁆𑀩𑀢𑁆𑀣 𑀯𑀺𑀫𑀝𑁆𑀞𑀺𑀫𑀁 𑀯𑀡𑀦𑁆𑀢𑀺 𑀢𑀸𑀢 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀊𑀭𑀽𑀦𑀁 𑀅𑀦𑁆𑀢𑀭𑁂 𑀏𑀓𑀁 𑀯𑀡𑀁 𑀅𑀢𑁆𑀣𑀺, 𑀢𑀁 𑀲𑀼𑀲𑀦𑁆𑀥𑀺 𑀲𑀼𑀨𑀼𑀲𑀺𑀢𑀁 𑀲𑀺𑀧𑁆𑀧𑀺𑀧𑀼𑀝𑀫𑀼𑀔𑀲𑀤𑀺𑀲𑀁, 𑀲𑀩𑁆𑀩𑀢𑁆𑀣 𑀯𑀺𑀫𑀝𑁆𑀞𑀁 𑀲𑀫𑀦𑁆𑀢𑀢𑁄 𑀫𑀝𑁆𑀞𑀁. 𑀧𑀼𑀣𑀽𑀢𑀺 𑀫𑀳𑀦𑁆𑀢𑀁. 𑀲𑀼𑀚𑀸𑀢𑀦𑁆𑀢𑀺 𑀲𑀼𑀲𑀡𑁆𑀞𑀺𑀢𑀁. 𑀔𑀭𑀧𑀢𑁆𑀢𑀲𑀦𑁆𑀦𑀺𑀪𑀦𑁆𑀢𑀺 ¶ 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀫𑀓𑀼𑀴𑀲𑀦𑁆𑀦𑀺𑀪𑀁. 𑀉𑀢𑁆𑀢𑀭𑀺𑀬𑀸𑀦𑀸𑀢𑀺 𑀉𑀢𑁆𑀢𑀭𑀺𑀢𑁆𑀯𑀸 𑀅𑀯𑀢𑁆𑀣𑀭𑀺𑀢𑁆𑀯𑀸. 𑀧𑀺𑀴𑀬𑀻𑀢𑀺 𑀧𑀻𑀴𑁂𑀲𑀺. 𑀢𑀧𑀦𑁆𑀢𑀻𑀢𑀺 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀲𑀭𑀻𑀭𑀢𑁄 𑀦𑀺𑀘𑁆𑀙𑀭𑀦𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀭𑀁𑀲𑀺𑀬𑁄 𑀚𑀮𑀦𑁆𑀢𑀺 𑀑𑀪𑀸𑀲𑀦𑁆𑀢𑀺 𑀯𑀺𑀭𑁄𑀘𑀦𑁆𑀢𑀺 𑀘. 𑀩𑀸𑀳𑀸𑀢𑀺 𑀩𑀸𑀳𑀸𑀧𑀺𑀲𑁆𑀲 𑀫𑀼𑀤𑀽. 𑀅𑀜𑁆𑀚𑀦𑀮𑁄𑀫𑀲𑀸𑀤𑀺𑀲𑀸𑀢𑀺 𑀅𑀜𑁆𑀚𑀦𑀲𑀤𑀺𑀲𑁂𑀳𑀺 𑀮𑁄𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀯𑀺𑀘𑀺𑀢𑁆𑀭𑀯𑀝𑁆𑀝𑀗𑁆𑀕𑀼𑀮𑀺𑀓𑀸𑀲𑁆𑀲 𑀲𑁄𑀪𑀭𑁂𑀢𑀺 𑀳𑀢𑁆𑀣𑀸𑀧𑀺𑀲𑁆𑀲 𑀯𑀭𑀮𑀓𑁆𑀔𑀡𑀯𑀺𑀘𑀺𑀢𑁆𑀭𑀸𑀳𑀺 𑀧𑀯𑀸𑀮𑀗𑁆𑀓𑀼𑀭𑀲𑀤𑀺𑀲𑀸𑀳𑀺 𑀯𑀝𑁆𑀝𑀗𑁆𑀕𑀼𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑁄𑀪𑀦𑁆𑀢𑀺.
𑀅𑀓𑀓𑁆𑀓𑀲𑀗𑁆𑀕𑁄𑀢𑀺 𑀓𑀘𑁆𑀙𑀼𑀧𑀻𑀴𑀓𑀸𑀤𑀺𑀭𑀳𑀺𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑁄. 𑀭𑀫𑀬𑀁 𑀉𑀧𑀝𑁆𑀞𑀳𑀻𑀢𑀺 𑀫𑀁 𑀭𑀫𑀬𑀦𑁆𑀢𑁄 𑀉𑀧𑀝𑁆𑀞𑀳𑀺 𑀧𑀭𑀺𑀘𑀭𑀺. 𑀢𑀽𑀮𑀽𑀧𑀦𑀺𑀪𑀸𑀢𑀺 𑀫𑀼𑀤𑀼𑀪𑀸𑀯𑀲𑁆𑀲 𑀉𑀧𑀫𑀸. 𑀲𑀼𑀯𑀡𑁆𑀡𑀓𑀫𑁆𑀩𑀼𑀢𑀮𑀯𑀝𑁆𑀝𑀲𑀼𑀘𑁆𑀙𑀯𑀻𑀢𑀺 𑀲𑀼𑀯𑀡𑁆𑀡𑀫𑀬𑀁 𑀆𑀤𑀸𑀲𑀢𑀮𑀁 𑀯𑀺𑀬 𑀯𑀝𑁆𑀝𑀸 𑀘 𑀲𑀼𑀘𑁆𑀙𑀯𑀺 𑀘, 𑀧𑀭𑀺𑀫𑀡𑁆𑀟𑀮𑀢𑀮𑀸 𑀘𑁂𑀯 𑀲𑀼𑀦𑁆𑀤𑀭𑀘𑁆𑀙𑀯𑀺 𑀘𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀨𑀼𑀲𑀺𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀨𑀼𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀳𑀢𑁆𑀣𑀲𑀫𑁆𑀨𑀲𑁆𑀲𑀁 𑀫𑀫 𑀲𑀭𑀻𑀭𑁂 𑀨𑀭𑀸𑀧𑁂𑀢𑁆𑀯𑀸. 𑀇𑀢𑁄 𑀕𑀢𑁄𑀢𑀺 𑀫𑀫 ¶ 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀇𑀢𑁄 𑀕𑀢𑁄. 𑀢𑁂𑀦 𑀫𑀁 𑀤𑀳𑀦𑁆𑀢𑀻𑀢𑀺 𑀢𑁂𑀦 𑀢𑀲𑁆𑀲 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦 𑀇𑀤𑀸𑀦𑀺 𑀫𑀁 𑀤𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀫 𑀲𑀭𑀻𑀭𑁂 𑀟𑀸𑀳𑁄 𑀉𑀝𑁆𑀞𑀺𑀢𑁄, 𑀢𑁂𑀦𑀫𑁆𑀳𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀦𑀺𑀧𑀦𑁆𑀦𑁄𑀢𑀺.
𑀦 ¶ 𑀦𑀽𑀦 𑀲𑁄 𑀔𑀸𑀭𑀺𑀯𑀺𑀥𑀦𑁆𑀢𑀺, 𑀢𑀸𑀢, 𑀦𑀽𑀦 𑀲𑁄 𑀫𑀸𑀡𑀯𑁄 𑀦 𑀔𑀸𑀭𑀺𑀪𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀺. 𑀔𑀺𑀮𑀸𑀦𑀻𑀢𑀺 𑀓𑀺𑀮𑀸𑀦𑀺, ‘‘𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑁄𑀔𑁆𑀬𑀦𑁆𑀢𑀺 𑀲𑀼𑀔𑀁. 𑀫𑀸𑀮𑀼𑀯𑀧𑀡𑁆𑀡𑀲𑀦𑁆𑀣𑀢𑀸 𑀯𑀺𑀓𑀺𑀡𑁆𑀡𑀭𑀽𑀧𑀸𑀯𑀸𑀢𑀺, 𑀢𑀸𑀢, 𑀅𑀬𑀁 𑀢𑀯 𑀫𑀸𑀮𑀼𑀯𑀧𑀡𑁆𑀡𑀲𑀦𑁆𑀣𑀢𑀸 𑀅𑀚𑁆𑀚 𑀫𑀬𑀸 𑀘 𑀢𑁂𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀧𑀭𑀸𑀫𑀲𑀦𑀸𑀮𑀺𑀗𑁆𑀕𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑁂𑀳𑀺 𑀯𑀺𑀓𑀺𑀡𑁆𑀡𑀸 𑀯𑀺𑀬 𑀆𑀓𑀼𑀮𑀩𑁆𑀬𑀸𑀓𑀼𑀮𑀸 𑀚𑀸𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀧𑀡𑁆𑀡𑀓𑀼𑀝𑀺𑀁 𑀯𑀚𑀸𑀫𑀸𑀢𑀺, 𑀢𑀸𑀢, 𑀅𑀳𑀜𑁆𑀘 𑀲𑁄 𑀘 𑀅𑀪𑀺𑀭𑀫𑀺𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀭𑀫𑀺𑀢𑁆𑀯𑀸 𑀯𑀺𑀕𑀢𑀤𑀭𑀣𑀸 𑀧𑀼𑀦𑀧𑁆𑀧𑀼𑀦𑀁 𑀇𑀫𑀫𑁂𑀯 𑀓𑀼𑀝𑀺𑀁 𑀧𑀯𑀺𑀲𑀸𑀫𑀸𑀢𑀺 𑀯𑀤𑀢𑀺.
𑀦 𑀫𑀚𑁆𑀚 𑀫𑀦𑁆𑀢𑀸𑀢𑀺 𑀅𑀚𑁆𑀚 𑀫𑀫 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺 𑀦 𑀭𑀼𑀘𑁆𑀘𑀦𑁆𑀢𑀺. 𑀦 𑀅𑀕𑁆𑀕𑀺𑀳𑀼𑀢𑁆𑀢𑀁 𑀦𑀧𑀺 𑀬𑀜𑁆𑀜𑀢𑀦𑁆𑀢𑀦𑁆𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀆𑀭𑀸𑀥𑀦𑀢𑁆𑀣𑀸𑀬 𑀓𑀢𑁆𑀢𑀩𑁆𑀩𑀳𑁄𑀫𑀯𑀺𑀥𑀽𑀧𑀦𑀸𑀤𑀺𑀬𑀜𑁆𑀜𑀓𑀺𑀭𑀺𑀬𑀸𑀧𑀺 𑀫𑁂 𑀦 𑀧𑀝𑀺𑀪𑀸𑀢𑀺 𑀦 𑀉𑀧𑀝𑁆𑀞𑀸𑀢𑀺 𑀦 𑀭𑀼𑀘𑁆𑀘𑀢𑀺. 𑀦 𑀘𑀸𑀧𑀺 𑀢𑁂𑀢𑀺 𑀢𑀬𑀸 𑀆𑀪𑀢𑀫𑀽𑀮𑀨𑀮𑀸𑀨𑀮𑀸𑀦𑀺𑀧𑀺 𑀦 𑀪𑀼𑀜𑁆𑀚𑀸𑀫𑀺. 𑀬𑀲𑁆𑀲𑀁 𑀤𑀺𑀲𑀦𑁆𑀢𑀺 𑀬𑀲𑁆𑀲𑀁 𑀤𑀺𑀲𑀸𑀬𑀁. 𑀯𑀦𑀦𑁆𑀢𑀺 𑀢𑀲𑁆𑀲 𑀫𑀸𑀡𑀯𑀲𑁆𑀲 𑀅𑀲𑁆𑀲𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀯𑀦𑀦𑁆𑀢𑀺.
𑀢𑀲𑁆𑀲𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲 𑀢𑀁 𑀯𑀺𑀮𑀸𑀧𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀏𑀓𑀸𑀬 𑀇𑀢𑁆𑀣𑀺𑀬𑀸 𑀇𑀫𑀲𑁆𑀲 𑀲𑀻𑀮𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀑𑀯𑀤𑀦𑁆𑀢𑁄 𑀙 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀇𑀫𑀲𑁆𑀫𑀸𑀳𑀁 𑀚𑁄𑀢𑀺𑀭𑀲𑁂 𑀯𑀦𑀫𑁆𑀳𑀺, 𑀕𑀦𑁆𑀥𑀩𑁆𑀩𑀤𑁂𑀯𑀘𑁆𑀙𑀭𑀲𑀗𑁆𑀖𑀲𑁂𑀯𑀺𑀢𑁂;
𑀇𑀲𑀻𑀦𑀫𑀸𑀯𑀸𑀲𑁂 ¶ 𑀲𑀦𑀦𑁆𑀢𑀦𑀫𑁆𑀳𑀺, 𑀦𑁂𑀢𑀸𑀤𑀺𑀲𑀁 𑀅𑀭𑀢𑀺𑀁 𑀧𑀸𑀧𑀼𑀡𑁂𑀣.
‘‘𑀪𑀯𑀦𑁆𑀢𑀺 𑀫𑀺𑀢𑁆𑀢𑀸𑀦𑀺 𑀅𑀣𑁄 𑀦 𑀳𑁄𑀦𑁆𑀢𑀺, 𑀜𑀸𑀢𑀻𑀲𑀼 𑀫𑀺𑀢𑁆𑀢𑁂𑀲𑀼 𑀓𑀭𑁄𑀦𑁆𑀢𑀺 𑀧𑁂𑀫𑀁;
𑀅𑀬𑀜𑁆𑀘 𑀚𑀫𑁆𑀫𑁄 𑀓𑀺𑀲𑁆𑀲 𑀯𑀸 𑀦𑀺𑀯𑀺𑀝𑁆𑀞𑁄, 𑀬𑁄 𑀦𑁂𑀯 𑀚𑀸𑀦𑀸𑀢𑀺 ‘𑀓𑀼𑀢𑁄𑀫𑁆𑀳𑀺 𑀆𑀕𑀢𑁄’.
‘‘𑀲𑀁𑀯𑀸𑀲𑁂𑀦 ¶ 𑀳𑀺 𑀫𑀺𑀢𑁆𑀢𑀸𑀦𑀺, 𑀲𑀦𑁆𑀥𑀻𑀬𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁;
𑀲𑁆𑀯𑁂𑀯 𑀫𑀺𑀢𑁆𑀢𑁄 𑀅𑀲𑀁𑀕𑀦𑁆𑀢𑀼, 𑀅𑀲𑀁𑀯𑀸𑀲𑁂𑀦 𑀚𑀻𑀭𑀢𑀺.
‘‘𑀲𑀘𑁂 𑀢𑀼𑀯𑀁 𑀤𑀓𑁆𑀔𑀲𑀺 𑀩𑁆𑀭𑀳𑁆𑀫𑀘𑀸𑀭𑀺𑀁, 𑀲𑀘𑁂 𑀢𑀼𑀯𑀁 𑀲𑀮𑁆𑀮𑀧𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑀸;
𑀲𑀫𑁆𑀧𑀦𑁆𑀦𑀲𑀲𑁆𑀲𑀁𑀯 𑀫𑀳𑁄𑀤𑀓𑁂𑀦, 𑀢𑀧𑁄𑀕𑀼𑀡𑀁 𑀔𑀺𑀧𑁆𑀧𑀫𑀺𑀫𑀁 𑀧𑀳𑀺𑀲𑁆𑀲𑀲𑀺.
‘‘𑀧𑀼𑀦𑀧𑀺 𑀘𑁂 𑀤𑀓𑁆𑀔𑀲𑀺 𑀩𑁆𑀭𑀳𑁆𑀫𑀘𑀸𑀭𑀺𑀁, 𑀧𑀼𑀦𑀧𑀺 𑀘𑁂 𑀲𑀮𑁆𑀮𑀧𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑀸;
𑀲𑀫𑁆𑀧𑀦𑁆𑀦𑀲𑀲𑁆𑀲𑀁𑀯 𑀫𑀳𑁄𑀤𑀓𑁂𑀦, 𑀉𑀲𑁆𑀫𑀸𑀕𑀢𑀁 𑀔𑀺𑀧𑁆𑀧𑀫𑀺𑀫𑀁 𑀧𑀳𑀺𑀲𑁆𑀲𑀲𑀺.
‘‘𑀪𑀽𑀢𑀸𑀦𑀺 ¶ 𑀳𑁂𑀢𑀸𑀦𑀺 𑀘𑀭𑀦𑁆𑀢𑀺 𑀢𑀸𑀢, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀦𑀼𑀲𑁆𑀲𑀮𑁄𑀓𑁂;
𑀦 𑀢𑀸𑀦𑀺 𑀲𑁂𑀯𑁂𑀣 𑀦𑀭𑁄 𑀲𑀧𑀜𑁆𑀜𑁄, 𑀆𑀲𑀚𑁆𑀚 𑀦𑀁 𑀦𑀲𑁆𑀲𑀢𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺.
𑀢𑀢𑁆𑀣 𑀇𑀫𑀲𑁆𑀫𑀸𑀢𑀺 𑀇𑀫𑀲𑁆𑀫𑀺𑀁. 𑀳𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀚𑁄𑀢𑀺𑀭𑀲𑁂𑀢𑀺 𑀳𑀽𑀬𑀫𑀸𑀦𑀲𑁆𑀲 𑀚𑁄𑀢𑀺𑀦𑁄 𑀭𑀁𑀲𑀺𑀑𑀪𑀸𑀲𑀺𑀢𑁂. 𑀲𑀦𑀦𑁆𑀢𑀦𑀫𑁆𑀳𑀻𑀢𑀺 𑀧𑁄𑀭𑀸𑀡𑀓𑁂. 𑀧𑀸𑀧𑀼𑀡𑁂𑀣𑀸𑀢𑀺 𑀧𑀸𑀧𑀼𑀡𑁂𑀬𑁆𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀏𑀯𑀭𑀽𑀧𑁂 𑀯𑀦𑁂 𑀯𑀲𑀦𑁆𑀢𑁄 𑀬𑀁 𑀅𑀭𑀢𑀺𑀁 𑀢𑁆𑀯𑀁 𑀧𑀢𑁆𑀢𑁄, 𑀏𑀢𑀸𑀤𑀺𑀲𑀁 𑀦 𑀧𑀸𑀧𑀼𑀡𑁂𑀬𑁆𑀬 𑀧𑀡𑁆𑀟𑀺𑀢𑁄 𑀓𑀼𑀮𑀧𑀼𑀢𑁆𑀢𑁄, 𑀧𑀢𑁆𑀢𑀼𑀁 𑀦𑀸𑀭𑀳𑀢𑀻𑀢𑀺 𑀅𑀢𑁆𑀣𑁄.
‘‘𑀪𑀯𑀦𑁆𑀢𑀻’’𑀢𑀺 𑀇𑀫𑀁 𑀕𑀸𑀣𑀁 𑀫𑀳𑀸𑀲𑀢𑁆𑀢𑁄 𑀅𑀦𑁆𑀢𑁄𑀕𑀢𑀫𑁂𑀯 𑀪𑀸𑀲𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀮𑁄𑀓𑁂 𑀲𑀢𑁆𑀢𑀸𑀦𑀁 𑀫𑀺𑀢𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺𑀧𑀺 𑀦 𑀳𑁄𑀦𑁆𑀢𑀺𑀧𑀺 𑀢𑀢𑁆𑀣 𑀬𑁂𑀲𑀁 𑀳𑁄𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀜𑀸𑀢𑀻𑀲𑀼 𑀘 𑀫𑀺𑀢𑁆𑀢𑁂𑀲𑀼 𑀘 𑀧𑁂𑀫𑀁 𑀓𑀭𑁄𑀦𑁆𑀢𑀺. 𑀅𑀬𑀜𑁆𑀘 𑀚𑀫𑁆𑀫𑁄𑀢𑀺 𑀫𑀺𑀕𑀲𑀺𑀗𑁆𑀕𑁄 𑀮𑀸𑀫𑀓𑁄. 𑀓𑀺𑀲𑁆𑀲 𑀯𑀸 𑀦𑀺𑀯𑀺𑀝𑁆𑀞𑁄𑀢𑀺 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦 𑀢𑀲𑁆𑀫𑀺𑀁 𑀫𑀸𑀢𑀼𑀕𑀸𑀫𑁂 𑀫𑀺𑀢𑁆𑀢𑀲𑀜𑁆𑀜𑀸𑀬 𑀦𑀺𑀯𑀺𑀝𑁆𑀞𑁄, 𑀲𑁄 𑀫𑀺𑀕𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀟𑁆𑀠𑀺𑀢𑀢𑁆𑀢𑀸 ‘‘𑀓𑀼𑀢𑁄𑀫𑁆𑀳𑀺 𑀆𑀕𑀢𑁄’’𑀢𑀺 𑀅𑀢𑁆𑀢𑀦𑁄 𑀆𑀕𑀢𑀝𑁆𑀞𑀸𑀦𑀫𑀢𑁆𑀢𑀫𑁆𑀧𑀺 ¶ 𑀦 𑀚𑀸𑀦𑀸𑀢𑀺, 𑀧𑀕𑁂𑀯 𑀜𑀸𑀢𑀺𑀫𑀺𑀢𑁆𑀢𑁂𑀢𑀺.
𑀧𑀼𑀦𑀧𑁆𑀧𑀼𑀦𑀦𑁆𑀢𑀺, 𑀢𑀸𑀢, 𑀫𑀺𑀢𑁆𑀢𑀸𑀦𑀺 𑀦𑀸𑀫 𑀧𑀼𑀦𑀧𑁆𑀧𑀼𑀦𑀁 𑀲𑀁𑀯𑀸𑀲𑁂𑀦 𑀲𑀁𑀲𑁂𑀯𑀦𑁂𑀦 𑀲𑀦𑁆𑀥𑀻𑀬𑀦𑁆𑀢𑀺 𑀖𑀝𑀻𑀬𑀦𑁆𑀢𑀺. 𑀲𑁆𑀯𑁂𑀯 𑀫𑀺𑀢𑁆𑀢𑁄𑀢𑀺 𑀲𑁄 𑀏𑀯 𑀫𑀺𑀢𑁆𑀢𑁄 𑀅𑀲𑀁𑀕𑀦𑁆𑀢𑀼 𑀅𑀲𑀫𑀸𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑁂𑀦 𑀅𑀲𑀫𑀸𑀕𑀫𑀲𑀗𑁆𑀔𑀸𑀢𑁂𑀦 𑀅𑀲𑀁𑀯𑀸𑀲𑁂𑀦 𑀚𑀻𑀭𑀢𑀺 𑀯𑀺𑀦𑀲𑁆𑀲𑀢𑀺 ¶ . 𑀲𑀘𑁂𑀢𑀺 𑀢𑀲𑁆𑀫𑀸, 𑀢𑀸𑀢, 𑀲𑀘𑁂 𑀢𑁆𑀯𑀁 𑀧𑀼𑀦𑀧𑀺 𑀢𑀁 𑀤𑀓𑁆𑀔𑀲𑀺, 𑀢𑁂𑀦 𑀯𑀸 𑀲𑀮𑁆𑀮𑀧𑀺𑀲𑁆𑀲𑀲𑀺, 𑀅𑀣 𑀬𑀣𑀸 𑀦𑀸𑀫 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀁 𑀫𑀳𑁄𑀖𑁂𑀦 𑀳𑀭𑀻𑀬𑀢𑀺, 𑀏𑀯𑀁 𑀇𑀫𑀁 𑀅𑀢𑁆𑀢𑀦𑁄 𑀢𑀧𑁄𑀕𑀼𑀡𑀁 𑀧𑀳𑀺𑀲𑁆𑀲𑀲𑀺 𑀳𑀸𑀭𑁂𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀉𑀲𑁆𑀫𑀸𑀕𑀢𑀦𑁆𑀢𑀺 𑀲𑀫𑀡𑀢𑁂𑀚𑀁.
𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀯𑀺𑀥𑀭𑀽𑀧𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀫𑀦𑀼𑀲𑁆𑀲𑀮𑁄𑀓𑀲𑁆𑀫𑀺𑀜𑁆𑀳𑀺 𑀏𑀢𑀸𑀦𑀺 𑀬𑀓𑁆𑀔𑀺𑀦𑀺𑀲𑀗𑁆𑀔𑀸𑀢𑀸𑀦𑀺 𑀪𑀽𑀢𑀸𑀦𑀺 𑀯𑀺𑀯𑀺𑀥𑀭𑀽𑀧𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀅𑀢𑁆𑀢𑀦𑁄 𑀯𑀲𑀁 𑀕𑀢𑁂 𑀔𑀸𑀤𑀺𑀢𑀼𑀁 𑀘𑀭𑀦𑁆𑀢𑀺, 𑀢𑀸𑀦𑀺 𑀲𑀧𑀜𑁆𑀜𑁄 𑀦𑀭𑁄 𑀦 𑀲𑁂𑀯𑁂𑀣. 𑀢𑀸𑀤𑀺𑀲𑀜𑁆𑀳𑀺 𑀪𑀽𑀢𑀁 𑀆𑀲𑀚𑁆𑀚 𑀦𑀁 𑀧𑀢𑁆𑀯𑀸 𑀦𑀲𑁆𑀲𑀢𑀺 𑀩𑁆𑀭𑀳𑁆𑀫𑀘𑀸𑀭𑀻, 𑀤𑀺𑀝𑁆𑀞𑁄𑀲𑀺 𑀢𑀸𑀬 𑀬𑀓𑁆𑀔𑀺𑀦𑀺𑀬𑀸 𑀦 𑀔𑀸𑀤𑀺𑀢𑁄𑀢𑀺 𑀧𑀼𑀢𑁆𑀢𑀁 𑀑𑀯𑀤𑀺.
𑀲𑁄 𑀧𑀺𑀢𑀼 𑀓𑀣𑀁 𑀲𑀼𑀢𑁆𑀯𑀸 ‘‘𑀬𑀓𑁆𑀔𑀺𑀦𑀻 𑀓𑀺𑀭 𑀲𑀸’’𑀢𑀺 𑀪𑀻𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀏𑀢𑁆𑀢𑁄 𑀦 𑀕𑀫𑀺𑀲𑁆𑀲𑀸𑀫𑀺, 𑀔𑀫𑀣 𑀫𑁂’’𑀢𑀺 𑀔𑀫𑀸𑀧𑁂𑀲𑀺. 𑀲𑁄𑀧𑀺 𑀦𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 ‘‘𑀏𑀳𑀺 𑀢𑁆𑀯𑀁, 𑀫𑀸𑀡𑀯, 𑀫𑁂𑀢𑁆𑀢𑀁 𑀪𑀸𑀯𑁂𑀳𑀺, 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔’’𑀦𑁆𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀲𑀺.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀦𑀺𑀴𑀺𑀦𑀺𑀓𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀇𑀲𑀺𑀲𑀺𑀗𑁆𑀕𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼, 𑀧𑀺𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.
𑀦𑀺𑀴𑀺𑀦𑀺𑀓𑀸𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.
[𑁫𑁨𑁭] 𑁨. 𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑀯𑀡𑁆𑀡𑀦𑀸
𑀦𑀺𑀯𑁂𑀲𑀦𑀁 𑀓𑀲𑁆𑀲𑀦𑀼𑀤𑀁 𑀲𑀼𑀦𑀦𑁆𑀤𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑁂𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 𑀇𑀢𑁆𑀣𑀺𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀳𑀸𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀮𑁆𑀮𑀯𑀺𑀤𑁆𑀥𑁄 𑀯𑀺𑀬 𑀭𑀸𑀕𑀸𑀢𑀼𑀭𑁄 𑀪𑀦𑁆𑀢𑀫𑀺𑀕𑀧𑀝𑀺𑀪𑀸𑀕𑁄 𑀓𑀺𑀲𑁄 𑀥𑀫𑀦𑀻𑀲𑀦𑁆𑀣𑀢𑀕𑀢𑁆𑀢𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀅𑀦𑀪𑀺𑀭𑀢𑁄 𑀏𑀓𑀺𑀭𑀺𑀬𑀸𑀧𑀣𑁂𑀧𑀺 ¶ 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑁄 𑀆𑀘𑀭𑀺𑀬𑀯𑀢𑁆𑀢𑀸𑀤𑀻𑀦𑀺 𑀧𑀳𑀸𑀬 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀭𑀳𑀺𑀢𑁄 𑀯𑀺𑀳𑀸𑀲𑀺. 𑀲𑁄 𑀲𑀳𑀸𑀬𑀪𑀺𑀓𑁆𑀔𑀽𑀳𑀺 ‘‘𑀧𑀼𑀩𑁆𑀩𑁂 𑀢𑁆𑀯𑀁, 𑀆𑀯𑀼𑀲𑁄, 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄, 𑀇𑀤𑀸𑀦𑀺 𑀦𑁄 𑀢𑀣𑀸, 𑀓𑀺𑀁 ¶ 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀝𑁆𑀞𑁄, ‘‘𑀆𑀯𑀼𑀲𑁄, 𑀅𑀦𑀪𑀺𑀭𑀢𑁄𑀫𑁆𑀳𑀻’’𑀢𑀺 𑀆𑀳. 𑀅𑀣 𑀦𑀁 𑀢𑁂 ‘‘𑀅𑀪𑀺𑀭𑀫𑀸𑀯𑀼𑀲𑁄, 𑀲𑀸𑀲𑀦𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀦𑀸𑀫 𑀤𑀼𑀮𑁆𑀮𑀪𑁄, 𑀢𑀣𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄 𑀘, 𑀲𑁄 𑀢𑁆𑀯𑀁 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀧𑀢𑁆𑀣𑀬𑀫𑀸𑀦𑁄 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀚𑀦𑀁 𑀧𑀳𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀓𑀺𑀁𑀓𑀸𑀭𑀡𑀸 𑀓𑀺𑀮𑁂𑀲𑀯𑀲𑀁 𑀬𑀸𑀲𑀺, 𑀓𑀺𑀮𑁂𑀲𑀸 𑀦𑀸𑀫𑁂𑀢𑁂 𑀕𑀡𑁆𑀟𑀼𑀧𑁆𑀧𑀸𑀤𑀓𑀧𑀸𑀡𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀩𑀸𑀮𑀚𑀦𑀲𑀸𑀥𑀸𑀭𑀡𑀸, 𑀬𑁂 𑀢𑁂𑀲𑀁 𑀯𑀢𑁆𑀣𑀼𑀪𑀽𑀢𑀸, 𑀢𑁂𑀧𑀺 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸, 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸, 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸, 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸, 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸, 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸, 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸, 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸, 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸, 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸 𑀓𑀸𑀫𑀸, 𑀢𑁆𑀯𑀁 𑀦𑀸𑀫 𑀏𑀯𑀭𑀽𑀧𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀁 𑀅𑀦𑀢𑁆𑀣𑀓𑀸𑀭𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑀁 𑀕𑀢𑁄𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑀪𑀁 𑀦𑁂𑀢𑁆𑀯𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀙𑀫𑀸𑀦𑀓𑀁 𑀪𑀺𑀓𑁆𑀔𑀼𑀁 𑀆𑀦𑀬𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀦𑁆𑀢𑁂, 𑀅𑀬𑀁 𑀓𑀺𑀭 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀸𑀧𑀺 𑀓𑀺𑀮𑁂𑀲𑁂 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀯𑀲𑀁 𑀅𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑁆𑀯𑀸 𑀦 𑀅𑀬𑀼𑀢𑁆𑀢𑀓𑀁 𑀓𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 ¶ 𑀲𑀺𑀯𑀺𑀭𑀝𑁆𑀞𑁂 𑀅𑀭𑀺𑀝𑁆𑀞𑀧𑀼𑀭𑀦𑀕𑀭𑁂 𑀲𑀺𑀯𑀺 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺, ‘‘𑀲𑀺𑀯𑀺𑀓𑀼𑀫𑀸𑀭𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁂𑀦𑀸𑀧𑀢𑀺𑀲𑁆𑀲𑀧𑀺 𑀧𑀼𑀢𑁆𑀢𑁄 𑀚𑀸𑀬𑀺, ‘‘𑀅𑀪𑀺𑀧𑀸𑀭𑀓𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀲𑀳𑀸𑀬𑀸 𑀳𑀼𑀢𑁆𑀯𑀸 𑀅𑀪𑀺𑀯𑀟𑁆𑀠𑀦𑁆𑀢𑀸 𑀲𑁄𑀴𑀲𑀯𑀲𑁆𑀲𑀺𑀓𑀸 𑀳𑀼𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀫𑀺𑀁𑀲𑀼. 𑀭𑀸𑀚𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀅𑀤𑀸𑀲𑀺. 𑀲𑁄𑀧𑀺 𑀅𑀪𑀺𑀧𑀸𑀭𑀓𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀢𑀺𑀭𑀺𑀝𑀺𑀯𑀘𑁆𑀙𑀲𑁆𑀲 𑀦𑀸𑀫 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀦𑀺𑀩𑁆𑀩𑀢𑁆𑀢𑀺 𑀉𑀢𑁆𑀢𑀫𑀭𑀽𑀧𑀥𑀭𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀢𑀲𑁆𑀲𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀉𑀫𑁆𑀫𑀸𑀤𑀦𑁆𑀢𑀻’’𑀢𑀺 ¶ 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑀸 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀯𑀡𑁆𑀡𑀸 𑀤𑁂𑀯𑀘𑁆𑀙𑀭𑀸 𑀯𑀺𑀬 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀅𑀳𑁄𑀲𑀺. 𑀬𑁂 𑀬𑁂 𑀧𑀼𑀣𑀼𑀚𑁆𑀚𑀦𑀸 𑀢𑀁 𑀧𑀲𑁆𑀲𑀦𑁆𑀢𑀺, 𑀢𑁂 𑀢𑁂 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ¶ 𑀲𑀼𑀭𑀸𑀧𑀸𑀦𑀫𑀤𑀫𑀢𑁆𑀢𑀸 𑀯𑀺𑀬 𑀓𑀺𑀮𑁂𑀲𑀫𑀤𑁂𑀦 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀸𑀳𑁂𑀲𑀼𑀁.
𑀅𑀣𑀲𑁆𑀲𑀸 𑀧𑀺𑀢𑀸 𑀢𑀺𑀭𑀺𑀝𑀺𑀯𑀘𑁆𑀙𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯, 𑀫𑀫 𑀕𑁂𑀳𑁂 𑀇𑀢𑁆𑀣𑀺𑀭𑀢𑀦𑀁 𑀉𑀧𑁆𑀧𑀦𑁆𑀦𑀁, 𑀭𑀜𑁆𑀜𑁄𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀮𑀓𑁆𑀔𑀡𑀧𑀸𑀞𑀓𑁂 𑀩𑁆𑀭𑀸𑀳𑁆𑀫𑀡𑁂 𑀧𑁂𑀲𑁂𑀢𑁆𑀯𑀸 𑀢𑀁 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀬𑀣𑀸𑀭𑀼𑀘𑀺 𑀓𑀭𑁄𑀳𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑁂𑀲𑁂𑀲𑀺. 𑀢𑁂 𑀲𑁂𑀝𑁆𑀞𑀺𑀕𑁂𑀳𑀁 𑀕𑀦𑁆𑀢𑁆𑀯𑀸 𑀓𑀢𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀸 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀉𑀫𑁆𑀫𑀸𑀤𑀦𑁆𑀢𑀻 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂 𑀢𑀁 𑀤𑀺𑀲𑁆𑀯𑀸 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀺𑀮𑁂𑀲𑀫𑀤𑀫𑀢𑁆𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑁆𑀧𑀓𑀢𑀪𑁄𑀚𑀦𑀪𑀸𑀯𑀁 𑀦 𑀚𑀸𑀦𑀺𑀁𑀲𑀼. 𑀏𑀓𑀘𑁆𑀘𑁂 𑀆𑀮𑁄𑀧𑀁 𑀕𑀳𑁂𑀢𑁆𑀯𑀸 ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀲𑀜𑁆𑀜𑀸𑀬 𑀲𑀻𑀲𑁂 𑀞𑀧𑁂𑀲𑀼𑀁, 𑀏𑀓𑀘𑁆𑀘𑁂 𑀉𑀧𑀓𑀘𑁆𑀙𑀦𑁆𑀢𑀭𑁂 𑀔𑀺𑀧𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀢𑁆𑀢𑀺𑀁 𑀧𑀳𑀭𑀺𑀁𑀲𑀼, 𑀲𑀩𑁆𑀩𑁂𑀯 𑀉𑀫𑁆𑀫𑀢𑁆𑀢𑀓𑀸 𑀅𑀳𑁂𑀲𑀼𑀁. 𑀲𑀸 𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀺𑀭 𑀫𑀫 𑀮𑀓𑁆𑀔𑀡𑀁 𑀯𑀻𑀫𑀁𑀲𑀺𑀲𑁆𑀲𑀦𑁆𑀢𑀺, 𑀕𑀻𑀯𑀸𑀬𑀁 𑀦𑁂 𑀕𑀳𑁂𑀢𑁆𑀯𑀸 𑀦𑀻𑀳𑀭𑀣𑀸’’𑀢𑀺 𑀦𑀻𑀳𑀭𑀸𑀧𑁂𑀲𑀺. 𑀢𑁂 𑀫𑀗𑁆𑀓𑀼𑀪𑀽𑀢𑀸 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀉𑀫𑁆𑀫𑀸𑀤𑀦𑁆𑀢𑀺𑀬𑀸 𑀓𑀼𑀤𑁆𑀥𑀸 ‘‘𑀤𑁂𑀯, 𑀲𑀸 𑀇𑀢𑁆𑀣𑀻 𑀓𑀸𑀴𑀓𑀡𑁆𑀡𑀻, 𑀦 𑀢𑀼𑀫𑁆𑀳𑀸𑀓𑀁 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 ‘‘𑀓𑀸𑀴𑀓𑀡𑁆𑀡𑀻 𑀓𑀺𑀭𑀸’’𑀢𑀺 𑀦 𑀢𑀁 𑀆𑀡𑀸𑀧𑁂𑀲𑀺. 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀓𑀺𑀭 𑀓𑀸𑀴𑀓𑀡𑁆𑀡𑀻𑀢𑀺 𑀭𑀜𑁆𑀜𑀸 𑀦 𑀕𑀳𑀺𑀢𑀸, 𑀓𑀸𑀴𑀓𑀡𑁆𑀡𑀺𑀬𑁄 𑀦𑀸𑀫 𑀦 𑀏𑀯𑀭𑀽𑀧𑀸 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀳𑁄𑀢𑀼, 𑀲𑀘𑁂 𑀧𑀦 𑀢𑀁 𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁 𑀆𑀖𑀸𑀢𑀁 𑀩𑀦𑁆𑀥𑀺. 𑀅𑀣 𑀦𑀁 𑀧𑀺𑀢𑀸 𑀅𑀪𑀺𑀧𑀸𑀭𑀓𑀲𑁆𑀲 𑀅𑀤𑀸𑀲𑀺, 𑀲𑀸 𑀢𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸.
𑀓𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀸 𑀏𑀯𑀁 𑀅𑀪𑀺𑀭𑀽𑀧𑀸 𑀅𑀳𑁄𑀲𑀻𑀢𑀺? 𑀭𑀢𑁆𑀢𑀯𑀢𑁆𑀣𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦𑀸𑀢𑀺. 𑀲𑀸 𑀓𑀺𑀭 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀲𑁆𑀲𑀯𑀤𑀺𑀯𑀲𑁂 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑀸 𑀇𑀢𑁆𑀣𑀺𑀬𑁄 𑀓𑀼𑀲𑀼𑀫𑁆𑀪𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀮𑀗𑁆𑀓𑀢𑀸 𑀓𑀻𑀴𑀦𑁆𑀢𑀺𑀬𑁄 𑀤𑀺𑀲𑁆𑀯𑀸 𑀢𑀸𑀤𑀺𑀲𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 ¶ 𑀓𑀻𑀴𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀢𑁆𑀯𑀸 𑀢𑁂𑀳𑀺, ‘‘𑀅𑀫𑁆𑀫, 𑀫𑀬𑀁 𑀤𑀮𑀺𑀤𑁆𑀤𑀸, 𑀓𑀼𑀢𑁄 𑀦𑁄 𑀏𑀯𑀭𑀽𑀧𑀁 𑀯𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀁 𑀏𑀓𑀲𑁆𑀫𑀺𑀁 𑀅𑀟𑁆𑀠𑀓𑀼𑀮𑁂 𑀪𑀢𑀺𑀁 𑀓𑀸𑀢𑀼𑀁 𑀅𑀦𑀼𑀚𑀸𑀦𑀸𑀣 ¶ , 𑀢𑁂 𑀫𑀫 𑀕𑀼𑀡𑀁 𑀜𑀢𑁆𑀯𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 ¶ 𑀅𑀦𑀼𑀜𑁆𑀜𑀸𑀢𑀸 𑀏𑀓𑀁 𑀓𑀼𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀼𑀲𑀼𑀫𑁆𑀪𑀭𑀢𑁆𑀢𑀯𑀢𑁆𑀣𑁂𑀦 𑀪𑀢𑀺𑀁 𑀓𑀭𑁄𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀢𑁂 ‘‘𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀓𑀫𑁆𑀫𑁂 𑀓𑀢𑁂 𑀢𑀯 𑀕𑀼𑀡𑀁 𑀜𑀢𑁆𑀯𑀸 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑀫𑁆𑀫𑀁 𑀧𑀝𑀺𑀧𑀚𑁆𑀚𑀺. 𑀢𑁂 𑀢𑀲𑁆𑀲𑀸 𑀕𑀼𑀡𑀁 𑀜𑀢𑁆𑀯𑀸 𑀅𑀧𑀭𑀺𑀧𑀼𑀡𑁆𑀡𑁂𑀲𑀼𑀬𑁂𑀯 𑀢𑀻𑀲𑀼 𑀲𑀁𑀯𑀘𑁆𑀙𑀭𑁂𑀲𑀼 𑀢𑀲𑁆𑀲𑀸 𑀖𑀦𑀓𑀼𑀲𑀼𑀫𑁆𑀪𑀭𑀢𑁆𑀢𑀯𑀢𑁆𑀣𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀁 𑀤𑀢𑁆𑀯𑀸 ‘‘𑀢𑀯 𑀲𑀳𑀸𑀬𑀺𑀓𑀸𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀦𑀺𑀯𑀸𑀲𑁂𑀳𑀻’’𑀢𑀺 𑀢𑀁 𑀧𑁂𑀲𑀬𑀺𑀁𑀲𑀼. 𑀲𑀸 𑀲𑀳𑀸𑀬𑀺𑀓𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀭𑀢𑁆𑀢𑀯𑀢𑁆𑀣𑀁 𑀦𑀤𑀻𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑁆𑀳𑀸𑀬𑀺.
𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀯𑀓𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀲𑀸𑀔𑀸𑀪𑀗𑁆𑀕𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀢𑀁 𑀧𑀤𑁂𑀲𑀁 𑀧𑀸𑀧𑀼𑀡𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀪𑀤𑀦𑁆𑀢𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀪𑀯𑀺𑀲𑁆𑀲𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀤𑀺𑀦𑁆𑀦𑀪𑀸𑀯𑁂𑀦 𑀫𑁂 𑀦𑀺𑀯𑀸𑀲𑀦𑀁 𑀤𑀼𑀮𑁆𑀮𑀪𑀁 𑀚𑀸𑀢’’𑀦𑁆𑀢𑀺 𑀢𑀁 𑀯𑀢𑁆𑀣𑀁 𑀤𑁆𑀯𑀺𑀥𑀸 𑀨𑀸𑀮𑁂𑀢𑁆𑀯𑀸 ‘‘𑀏𑀓𑀁 𑀓𑁄𑀝𑁆𑀞𑀸𑀲𑀁 𑀅𑀬𑁆𑀬𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀢𑀺𑀝𑁆𑀞𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑀢𑁆𑀢𑀯𑀢𑁆𑀣𑀁 𑀫𑀚𑁆𑀛𑁂 𑀨𑀸𑀮𑁂𑀢𑁆𑀯𑀸 𑀢𑀲𑁆𑀲𑁂𑀓𑀁 𑀓𑁄𑀝𑁆𑀞𑀸𑀲𑀁 𑀅𑀤𑀸𑀲𑀺. 𑀲𑁄 𑀏𑀓𑀫𑀦𑁆𑀢𑁂 𑀧𑀝𑀺𑀘𑁆𑀙𑀦𑁆𑀦𑁂 𑀞𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑀁 𑀙𑀟𑁆𑀟𑁂𑀢𑁆𑀯𑀸 𑀢𑀲𑁆𑀲𑁂𑀓𑀁 𑀓𑀡𑁆𑀡𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀯𑀢𑁆𑀣𑁄𑀪𑀸𑀲𑁂𑀦 𑀲𑀓𑀮𑀲𑀭𑀻𑀭𑀁 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀏𑀓𑁄𑀪𑀸𑀲𑀁 𑀅𑀳𑁄𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀅𑀬𑁆𑀬𑁄 𑀧𑀞𑀫𑀁 𑀦 𑀲𑁄𑀪𑀢𑀺, 𑀇𑀤𑀸𑀦𑀺 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀯𑀺𑀭𑁄𑀘𑀢𑀺, 𑀇𑀤𑀫𑁆𑀧𑀺 𑀏𑀢𑀲𑁆𑀲𑁂𑀯 𑀤𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀤𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀳𑀁 𑀪𑀯𑁂 𑀪𑀯𑁂 𑀯𑀺𑀘𑀭𑀦𑁆𑀢𑀻 𑀉𑀢𑁆𑀢𑀫𑀭𑀽𑀧𑀥𑀭𑀸 𑀪𑀯𑁂𑀬𑁆𑀬𑀁, 𑀫𑀁 𑀤𑀺𑀲𑁆𑀯𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀫𑀸 𑀅𑀲𑀓𑁆𑀔𑀺, 𑀫𑀬𑀸 𑀅𑀪𑀺𑀭𑀽𑀧𑀢𑀭𑀸 𑀦𑀸𑀫 𑀅𑀜𑁆𑀜𑀸 𑀫𑀸 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀣𑁂𑀭𑁄𑀧𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.
𑀲𑀸 𑀤𑁂𑀯𑀮𑁄𑀓𑁂 𑀲𑀁𑀲𑀭𑀦𑁆𑀢𑀻 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀭𑀺𑀝𑁆𑀞𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀣𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺. 𑀅𑀣 𑀢𑀲𑁆𑀫𑀺𑀁 𑀦𑀕𑀭𑁂 𑀓𑀢𑁆𑀢𑀺𑀓𑀙𑀡𑀁 𑀖𑁄𑀲𑀬𑀺𑀁𑀲𑀼, 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀦𑀕𑀭𑀁 𑀲𑀚𑁆𑀚𑀬𑀺𑀁𑀲𑀼. 𑀅𑀪𑀺𑀧𑀸𑀭𑀓𑁄 𑀅𑀢𑁆𑀢𑀦𑁄 𑀆𑀭𑀓𑁆𑀔𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀉𑀫𑁆𑀫𑀸𑀤𑀦𑁆𑀢𑀺 ¶ 𑀅𑀚𑁆𑀚 𑀓𑀢𑁆𑀢𑀺𑀓𑀭𑀢𑁆𑀢𑀺𑀯𑀸𑀭𑁄 𑀙𑀡𑁄, 𑀭𑀸𑀚𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀇𑀫𑀁 𑀕𑁂𑀳𑀤𑁆𑀯𑀸𑀭𑀁 𑀆𑀕𑀫𑀺𑀲𑁆𑀲𑀢𑀺, 𑀫𑀸 𑀔𑁄 𑀢𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺, 𑀲𑁄𑀧𑀺 𑀢𑀁 𑀤𑀺𑀲𑁆𑀯𑀸 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑀸 ‘‘𑀕𑀘𑁆𑀙 𑀢𑁆𑀯𑀁, 𑀲𑀸𑀫𑀺, 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ¶ 𑀢𑀲𑁆𑀫𑀺𑀁 𑀕𑀢𑁂 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 ‘‘𑀭𑀜𑁆𑀜𑁄 𑀇𑀫𑀁 𑀕𑁂𑀳𑀤𑁆𑀯𑀸𑀭𑀁 𑀆𑀕𑀢𑀓𑀸𑀮𑁂 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀅𑀣 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀉𑀕𑁆𑀕𑀳𑁂 𑀧𑀼𑀡𑁆𑀡𑀘𑀦𑁆𑀤𑁂 𑀤𑁂𑀯𑀦𑀕𑀭𑁂 𑀯𑀺𑀬 𑀦𑀕𑀭𑁂 𑀅𑀮𑀗𑁆𑀓𑀢𑁂 𑀲𑀩𑁆𑀩𑀤𑀺𑀲𑀸𑀲𑀼 𑀤𑀻𑀧𑁂𑀲𑀼 𑀚𑀮𑀺𑀢𑁂𑀲𑀼 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀆𑀚𑀜𑁆𑀜𑀭𑀣𑀯𑀭𑀕𑀢𑁄 ¶ 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀞𑀫𑀫𑁂𑀯 𑀅𑀪𑀺𑀧𑀸𑀭𑀓𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀢𑀁 𑀧𑀦 𑀕𑁂𑀳𑀁 𑀫𑀦𑁄𑀲𑀺𑀮𑀸𑀯𑀡𑁆𑀡𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀮𑀗𑁆𑀓𑀢𑀤𑁆𑀯𑀸𑀭𑀝𑁆𑀝𑀸𑀮𑀓𑀁 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀧𑀸𑀲𑀸𑀤𑀺𑀓𑀁. 𑀢𑀲𑁆𑀫𑀺𑀁 𑀔𑀡𑁂 𑀤𑀸𑀲𑀻 𑀉𑀫𑁆𑀫𑀸𑀤𑀦𑁆𑀢𑀺𑀬𑀸 𑀆𑀭𑁄𑀘𑁂𑀲𑀺. 𑀲𑀸 𑀧𑀼𑀧𑁆𑀨𑀲𑀫𑀼𑀕𑁆𑀕𑀁 𑀕𑀸𑀳𑀸𑀧𑁂𑀢𑁆𑀯𑀸 𑀓𑀺𑀦𑁆𑀦𑀭𑀺𑀮𑀻𑀴𑀸𑀬 𑀯𑀸𑀢𑀧𑀸𑀦𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀭𑀜𑁆𑀜𑁄 𑀧𑀼𑀧𑁆𑀨𑀸𑀦𑀺 𑀔𑀺𑀧𑀺. 𑀲𑁄 𑀢𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀓𑀺𑀮𑁂𑀲𑀫𑀤𑀫𑀢𑁆𑀢𑁄 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀪𑀺𑀧𑀸𑀭𑀓𑀲𑁆𑀲𑁂𑀢𑀁 𑀕𑁂𑀳’’𑀦𑁆𑀢𑀺 𑀲𑀜𑁆𑀚𑀸𑀦𑀺𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺, 𑀅𑀣 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀦𑀺𑀯𑁂𑀲𑀦𑀁 𑀓𑀲𑁆𑀲 𑀦𑀼𑀤𑀁 𑀲𑀼𑀦𑀦𑁆𑀤, 𑀧𑀸𑀓𑀸𑀭𑁂𑀦 𑀧𑀡𑁆𑀟𑀼𑀫𑀬𑁂𑀦 𑀕𑀼𑀢𑁆𑀢𑀁;
𑀓𑀸 𑀤𑀺𑀲𑁆𑀲𑀢𑀺 𑀅𑀕𑁆𑀕𑀺𑀲𑀺𑀔𑀸𑀯 𑀤𑀽𑀭𑁂, 𑀯𑁂𑀳𑀸𑀬𑀲𑀁 𑀧𑀩𑁆𑀩𑀢𑀕𑁆𑀕𑁂𑀯 𑀅𑀘𑁆𑀘𑀺.
‘‘𑀥𑀻𑀢𑀸 𑀦𑁆𑀯𑀬𑀁 𑀓𑀲𑁆𑀲 𑀲𑀼𑀦𑀦𑁆𑀤 𑀳𑁄𑀢𑀺, 𑀲𑀼𑀡𑀺𑀲𑀸 𑀦𑁆𑀯𑀬𑀁 𑀓𑀲𑁆𑀲 𑀅𑀣𑁄𑀧𑀺 𑀪𑀭𑀺𑀬𑀸;
𑀅𑀓𑁆𑀔𑀸𑀳𑀺 𑀫𑁂 𑀔𑀺𑀧𑁆𑀧𑀫𑀺𑀥𑁂𑀯 𑀧𑀼𑀝𑁆𑀞𑁄, 𑀅𑀯𑀸𑀯𑀝𑀸 𑀬𑀤𑀺 𑀯𑀸 𑀅𑀢𑁆𑀣𑀺 𑀪𑀢𑁆𑀢𑀸’’𑀢𑀺.
𑀢𑀢𑁆𑀣 𑀓𑀲𑁆𑀲 𑀦𑀼𑀤𑀦𑁆𑀢𑀺 𑀓𑀲𑁆𑀲 𑀦𑀼 𑀇𑀤𑀁. 𑀧𑀡𑁆𑀟𑀼𑀫𑀬𑁂𑀦𑀸𑀢𑀺 𑀭𑀢𑁆𑀢𑀺𑀝𑁆𑀞𑀓𑀫𑀬𑁂𑀦. 𑀤𑀺𑀲𑁆𑀲𑀢𑀻𑀢𑀺 𑀯𑀸𑀢𑀧𑀸𑀦𑁂 𑀞𑀺𑀢𑀸 𑀧𑀜𑁆𑀜𑀸𑀬𑀢𑀺. 𑀅𑀘𑁆𑀘𑀻𑀢𑀺 𑀅𑀦𑀮𑀚𑀸𑀮𑀓𑁆𑀔𑀦𑁆𑀥𑁄. 𑀥𑀻𑀢𑀸 ¶ 𑀦𑁆𑀯𑀬𑀦𑁆𑀢𑀺 𑀥𑀻𑀢𑀸 𑀦𑀼 𑀅𑀬𑀁. 𑀅𑀯𑀸𑀯𑀝𑀸𑀢𑀺 𑀅𑀧𑁂𑀢𑀸𑀯𑀭𑀡𑀸 𑀅𑀧𑀭𑀺𑀕𑁆𑀕𑀳𑀸. 𑀪𑀢𑁆𑀢𑀸𑀢𑀺 𑀬𑀤𑀺 𑀯𑀸 𑀅𑀲𑁆𑀲𑀸 𑀲𑀸𑀫𑀺𑀓𑁄 𑀅𑀢𑁆𑀣𑀺, 𑀏𑀢𑀁 𑀫𑁂 𑀅𑀓𑁆𑀔𑀸𑀳𑀻𑀢𑀺.
𑀅𑀣𑀲𑁆𑀲 𑀲𑁄 𑀆𑀘𑀺𑀓𑁆𑀔𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀅𑀳𑀜𑁆𑀳𑀺 𑀚𑀸𑀦𑀸𑀫𑀺 𑀚𑀦𑀺𑀦𑁆𑀤 𑀏𑀢𑀁, 𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘 𑀅𑀣𑁄𑀧𑀺 𑀅𑀲𑁆𑀲𑀸;
𑀢𑀯𑁂𑀯 𑀲𑁄 𑀧𑀼𑀭𑀺𑀲𑁄 𑀪𑀽𑀫𑀺𑀧𑀸𑀮, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀧𑁆𑀧𑀫𑀢𑁆𑀢𑁄 𑀢𑀯𑀢𑁆𑀣𑁂.
‘‘𑀇𑀤𑁆𑀥𑁄 ¶ 𑀘 𑀨𑀻𑀢𑁄 𑀘 𑀲𑀼𑀯𑀟𑁆𑀠𑀺𑀢𑁄 𑀘, 𑀅𑀫𑀘𑁆𑀘𑁄 𑀘 𑀢𑁂 𑀅𑀜𑁆𑀜𑀢𑀭𑁄 𑀚𑀦𑀺𑀦𑁆𑀤;
𑀢𑀲𑁆𑀲𑁂𑀲𑀸 𑀪𑀭𑀺𑀬𑀸𑀪𑀺𑀧𑀸𑀭𑀓𑀲𑁆𑀲, 𑀉𑀫𑁆𑀫𑀸𑀤𑀦𑁆𑀢𑀻 𑀦𑀸𑀫𑀥𑁂𑀬𑁆𑀬𑁂𑀦 𑀭𑀸𑀚𑀸’’𑀢𑀺.
𑀢𑀢𑁆𑀣 𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘𑀸𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑁂𑀢𑀁 𑀚𑀸𑀦𑀸𑀫𑀺. 𑀅𑀣𑁄𑀧𑀺 𑀅𑀲𑁆𑀲𑀸𑀢𑀺 𑀅𑀣 𑀲𑀸𑀫𑀺𑀓𑀫𑁆𑀧𑀺 𑀅𑀲𑁆𑀲𑀸 𑀚𑀸𑀦𑀸𑀫𑀻𑀢𑀺 𑀯𑀤𑀢𑀺. 𑀇𑀤𑁆𑀥𑁄𑀢𑀺 𑀲𑀫𑀺𑀤𑁆𑀥𑁄. 𑀨𑀻𑀢𑁄𑀢𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀲𑀼𑀧𑀼𑀧𑁆𑀨𑀺𑀢𑁄. 𑀲𑀼𑀯𑀟𑁆𑀠𑀺𑀢𑁄𑀢𑀺 𑀲𑀼𑀝𑁆𑀞𑀼 𑀯𑀼𑀤𑁆𑀥𑁄. 𑀦𑀸𑀫𑀥𑁂𑀬𑁆𑀬𑁂𑀦𑀸𑀢𑀺 𑀦𑀸𑀫𑁂𑀦. 𑀅𑀬𑀜𑁆𑀳𑀺 𑀬𑁄 𑀦𑀁 𑀧𑀲𑁆𑀲𑀢𑀺, 𑀢𑀁 𑀉𑀫𑁆𑀫𑀸𑀤𑁂𑀢𑀺, 𑀲𑀢𑀺𑀫𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀦 𑀤𑁂𑀢𑀺, 𑀢𑀲𑁆𑀫𑀸 𑀉𑀫𑁆𑀫𑀸𑀤𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺.
𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀦𑀸𑀫𑀫𑀲𑁆𑀲𑀸 𑀣𑁄𑀫𑁂𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀅𑀫𑁆𑀪𑁄 𑀅𑀫𑁆𑀪𑁄 𑀦𑀸𑀫𑀫𑀺𑀤𑀁 𑀇𑀫𑀺𑀲𑁆𑀲𑀸, 𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘 𑀓𑀢𑀁 𑀲𑀼𑀲𑀸𑀥𑀼;
𑀢𑀤𑀸 𑀳𑀺 𑀫𑀬𑁆𑀳𑀁 𑀅𑀯𑀮𑁄𑀓𑀬𑀦𑁆𑀢𑀻, 𑀉𑀫𑁆𑀫𑀢𑁆𑀢𑀓𑀁 𑀉𑀫𑁆𑀫𑀤𑀦𑁆𑀢𑀻 𑀅𑀓𑀸𑀲𑀻’’𑀢𑀺.
𑀢𑀢𑁆𑀣 𑀫𑀢𑁆𑀬𑀸 𑀘 𑀧𑁂𑀢𑁆𑀬𑀸 𑀘𑀸𑀢𑀺 𑀫𑀸𑀢𑀭𑀸 𑀘 𑀧𑀺𑀢𑀭𑀸 𑀘. 𑀫𑀬𑁆𑀳𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀅𑀯𑀮𑁄𑀓𑀬𑀦𑁆𑀢𑀻𑀢𑀺 𑀫𑀬𑀸 𑀅𑀯𑀮𑁄𑀓𑀺𑀢𑀸 𑀲𑀬𑀫𑁆𑀧𑀺 𑀫𑀁 𑀅𑀯𑀮𑁄𑀓𑀬𑀦𑁆𑀢𑀻 𑀫𑀁 𑀉𑀫𑁆𑀫𑀢𑁆𑀢𑀓𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.
𑀲𑀸 𑀢𑀲𑁆𑀲 𑀓𑀫𑁆𑀧𑀺𑀢𑀪𑀸𑀯𑀁 𑀜𑀢𑁆𑀯𑀸 𑀯𑀸𑀢𑀧𑀸𑀦𑀁 𑀣𑀓𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀫𑁂𑀯 𑀅𑀕𑀫𑀸𑀲𑀺. 𑀭𑀜𑁆𑀜𑁄𑀧𑀺 𑀢𑀲𑁆𑀲𑀸 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀕𑀭𑀁 𑀧𑀤𑀓𑁆𑀔𑀺𑀡𑀓𑀭𑀡𑁂 𑀘𑀺𑀢𑁆𑀢𑀫𑁂𑀯 𑀦𑀸𑀳𑁄𑀲𑀺. 𑀲𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀲𑀫𑁆𑀫 𑀲𑀼𑀦𑀦𑁆𑀤, 𑀭𑀣𑀁 𑀦𑀺𑀯𑀢𑁆𑀢𑁂𑀳𑀺, 𑀅𑀬𑀁 𑀙𑀡𑁄 ¶ 𑀅𑀫𑁆𑀳𑀸𑀓𑀁 𑀦𑀸𑀦𑀼𑀘𑁆𑀙𑀯𑀺𑀓𑁄, 𑀅𑀪𑀺𑀧𑀸𑀭𑀓𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲𑁂𑀯𑀸𑀦𑀼𑀘𑁆𑀙𑀯𑀺𑀓𑁄, 𑀭𑀚𑁆𑀚𑀫𑁆𑀧𑀺 𑀢𑀲𑁆𑀲𑁂𑀯𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀭𑀣𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑁆𑀧𑀮𑀧𑀦𑁆𑀢𑁄 𑀆𑀳 𑁋
‘‘𑀬𑀸 𑀧𑀼𑀡𑁆𑀡𑀫𑀸𑀲𑁂 𑀫𑀺𑀕𑀫𑀦𑁆𑀤𑀮𑁄𑀘𑀦𑀸, 𑀉𑀧𑀸𑀯𑀺𑀲𑀺 𑀧𑀼𑀡𑁆𑀟𑀭𑀻𑀓𑀢𑁆𑀢𑀘𑀗𑁆𑀕𑀻;
𑀤𑁆𑀯𑁂 𑀧𑀼𑀡𑁆𑀡𑀫𑀸𑀬𑁄 𑀢𑀤𑀳𑀽 𑀅𑀫𑀜𑁆𑀜𑀳𑀁, 𑀤𑀺𑀲𑁆𑀯𑀸𑀦 𑀧𑀸𑀭𑀸𑀯𑀢𑀭𑀢𑁆𑀢𑀯𑀸𑀲𑀺𑀦𑀺𑀁.
‘‘𑀅𑀴𑀸𑀭𑀧𑀫𑁆𑀳𑁂𑀳𑀺 ¶ 𑀲𑀼𑀪𑁂𑀳𑀺 𑀯𑀕𑁆𑀕𑀼𑀪𑀺, 𑀧𑀮𑁄𑀪𑀬𑀦𑁆𑀢𑀻 𑀫𑀁 𑀬𑀤𑀸 𑀉𑀤𑀺𑀓𑁆𑀔𑀢𑀺;
𑀯𑀺𑀚𑀫𑁆𑀪𑀫𑀸𑀦𑀸 𑀳𑀭𑀢𑁂𑀯 𑀫𑁂 𑀫𑀦𑁄, 𑀚𑀸𑀢𑀸 𑀯𑀦𑁂 𑀓𑀺𑀫𑁆𑀧𑀼𑀭𑀺𑀲𑀻𑀯 𑀧𑀩𑁆𑀩𑀢𑁂.
‘‘𑀢𑀤𑀸 𑀳𑀺 𑀩𑁆𑀭𑀳𑀢𑀻 𑀲𑀸𑀫𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;
𑀏𑀓𑀘𑁆𑀘𑀯𑀲𑀦𑀸 𑀦𑀸𑀭𑀻, 𑀫𑀺𑀕𑀻 𑀪𑀦𑁆𑀢𑀸𑀯𑀼𑀤𑀺𑀓𑁆𑀔𑀢𑀺.
‘‘𑀓𑀤𑀸𑀲𑁆𑀲𑀼 𑀫𑀁 𑀢𑀫𑁆𑀩𑀦𑀔𑀸 𑀲𑀼𑀮𑁄𑀫𑀸, 𑀩𑀸𑀳𑀸 𑀫𑀼𑀤𑀽 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸;
𑀯𑀝𑁆𑀝𑀗𑁆𑀕𑀼𑀮𑀻 𑀲𑀦𑁆𑀦𑀢𑀥𑀻𑀭𑀓𑀼𑀢𑁆𑀢𑀺𑀬𑀸, 𑀦𑀸𑀭𑀻 𑀉𑀧𑀜𑁆𑀜𑀺𑀲𑁆𑀲𑀢𑀺 𑀲𑀻𑀲𑀢𑁄 𑀲𑀼𑀪𑀸.
‘‘𑀓𑀤𑀸𑀲𑁆𑀲𑀼 𑀫𑀁 𑀓𑀜𑁆𑀘𑀦𑀚𑀸𑀮𑀼𑀭𑀘𑁆𑀙𑀤𑀸, 𑀥𑀻𑀢𑀸 𑀢𑀺𑀭𑀻𑀝𑀺𑀲𑁆𑀲 𑀯𑀺𑀮𑀕𑁆𑀕𑀫𑀚𑁆𑀛𑀸;
𑀫𑀼𑀤𑀽𑀳𑀺 𑀩𑀸𑀳𑀸𑀳𑀺 𑀧𑀮𑀺𑀲𑁆𑀲𑀚𑀺𑀲𑁆𑀲𑀢𑀺, 𑀩𑁆𑀭𑀳𑀸𑀯𑀦𑁂 𑀚𑀸𑀢𑀤𑀼𑀫𑀁𑀯 𑀫𑀸𑀮𑀼𑀯𑀸.
‘‘𑀓𑀤𑀸𑀲𑁆𑀲𑀼 ¶ 𑀮𑀸𑀔𑀸𑀭𑀲𑀭𑀢𑁆𑀢𑀲𑀼𑀘𑁆𑀙𑀯𑀻, 𑀩𑀺𑀦𑁆𑀤𑀼𑀢𑁆𑀣𑀦𑀻 𑀧𑀼𑀡𑁆𑀟𑀭𑀻𑀓𑀢𑁆𑀢𑀘𑀗𑁆𑀕𑀻;
𑀫𑀼𑀔𑀁 𑀫𑀼𑀔𑁂𑀦 𑀉𑀧𑀦𑀸𑀫𑀬𑀺𑀲𑁆𑀲𑀢𑀺, 𑀲𑁄𑀡𑁆𑀟𑁄𑀯 𑀲𑁄𑀡𑁆𑀟𑀲𑁆𑀲 𑀲𑀼𑀭𑀸𑀬 𑀣𑀸𑀮𑀁.
‘‘𑀬𑀤𑀸𑀤𑁆𑀤𑀲𑀁 𑀢𑀁 𑀢𑀺𑀝𑁆𑀞𑀦𑁆𑀢𑀺𑀁, 𑀲𑀩𑁆𑀩𑀪𑀤𑁆𑀤𑀁 𑀫𑀦𑁄𑀭𑀫𑀁;
𑀢𑀢𑁄 𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀦𑀸𑀯𑀩𑁄𑀥𑀸𑀫𑀺 𑀓𑀜𑁆𑀘𑀺𑀦𑀁.
‘‘𑀉𑀫𑁆𑀫𑀸𑀤𑀦𑁆𑀢𑀺𑀫𑀳𑀁 𑀤𑀝𑁆𑀞𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀁;
𑀦 𑀲𑀼𑀧𑀸𑀫𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀳𑀲𑁆𑀲𑀁𑀯 𑀧𑀭𑀸𑀚𑀺𑀢𑁄.
‘‘𑀲𑀓𑁆𑀓𑁄 ¶ 𑀘𑁂 𑀫𑁂 𑀯𑀭𑀁 𑀤𑀚𑁆𑀚𑀸, 𑀲𑁄 𑀘 𑀮𑀩𑁆𑀪𑁂𑀣 𑀫𑁂 𑀯𑀭𑁄;
𑀏𑀓𑀭𑀢𑁆𑀢𑀁 𑀤𑀺𑀭𑀢𑁆𑀢𑀁 𑀯𑀸, 𑀪𑀯𑁂𑀬𑁆𑀬𑀁 𑀅𑀪𑀺𑀧𑀸𑀭𑀓𑁄;
𑀉𑀫𑁆𑀫𑀸𑀤𑀦𑁆𑀢𑁆𑀬𑀸 𑀭𑀫𑀺𑀢𑁆𑀯𑀸𑀦, 𑀲𑀺𑀯𑀺𑀭𑀸𑀚𑀸 𑀢𑀢𑁄 𑀲𑀺𑀬’’𑀦𑁆𑀢𑀺.
𑀢𑀢𑁆𑀣 𑀧𑀼𑀡𑁆𑀡𑀫𑀸𑀲𑁂𑀢𑀺 𑀧𑀼𑀡𑁆𑀡𑀘𑀦𑁆𑀤𑀸𑀬 𑀭𑀢𑁆𑀢𑀺𑀬𑀸. 𑀫𑀺𑀕𑀫𑀦𑁆𑀤𑀮𑁄𑀘𑀦𑀸𑀢𑀺 𑀓𑀡𑁆𑀟𑀲𑀦𑁆𑀢𑀸𑀲𑁂𑀦 𑀧𑀮𑀸𑀬𑀺𑀢𑁆𑀯𑀸 𑀯𑀦𑀦𑁆𑀢𑀭𑁂 𑀞𑀢𑁆𑀯𑀸 𑀮𑀼𑀤𑁆𑀤𑀁 𑀑𑀮𑁄𑀓𑁂𑀦𑁆𑀢𑀺𑀬𑀸 𑀫𑀺𑀕𑀺𑀬𑀸 𑀯𑀺𑀬 𑀫𑀦𑁆𑀤𑀸𑀦𑀺 ¶ 𑀮𑁄𑀘𑀦𑀸𑀦𑀺 𑀅𑀲𑁆𑀲𑀸𑀢𑀺 𑀫𑀺𑀕𑀫𑀦𑁆𑀤𑀮𑁄𑀘𑀦𑀸. 𑀉𑀧𑀸𑀯𑀺𑀲𑀻𑀢𑀺 𑀧𑀤𑀼𑀫𑀯𑀡𑁆𑀡𑁂𑀦 𑀓𑀭𑀢𑀮𑁂𑀦 𑀧𑀼𑀧𑁆𑀨𑀸𑀦𑀺 𑀔𑀺𑀧𑀺𑀢𑁆𑀯𑀸 𑀫𑀁 𑀑𑀮𑁄𑀓𑁂𑀦𑁆𑀢𑀻 𑀯𑀸𑀢𑀧𑀸𑀦𑁂 𑀦𑀺𑀲𑀻𑀤𑀺. 𑀧𑀼𑀡𑁆𑀟𑀭𑀻𑀓𑀢𑁆𑀢𑀘𑀗𑁆𑀕𑀻𑀢𑀺 𑀭𑀢𑁆𑀢𑀧𑀤𑀼𑀫𑀯𑀡𑁆𑀡𑀲𑀭𑀻𑀭𑀸. 𑀤𑁆𑀯𑁂 𑀧𑀼𑀡𑁆𑀡𑀫𑀸𑀬𑁄𑀢𑀺 𑀅𑀳𑀁 𑀢𑀤𑀳𑀼 𑀢𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀢𑀁 𑀧𑀸𑀭𑀸𑀯𑀢𑀧𑀸𑀤𑀲𑀫𑀸𑀦𑀯𑀡𑁆𑀡𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀫𑀼𑀔𑀲𑁄𑀪𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀲𑁆𑀲 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀏𑀓𑀲𑁆𑀲 𑀅𑀪𑀺𑀧𑀸𑀭𑀓𑀲𑁆𑀲 𑀲𑁂𑀦𑀸𑀧𑀢𑀺𑀦𑁄 𑀦𑀺𑀯𑁂𑀲𑀦𑁂𑀢𑀺 𑀤𑁆𑀯𑀺𑀦𑁆𑀦𑀁 𑀧𑀼𑀡𑁆𑀡𑀘𑀦𑁆𑀤𑀸𑀦𑀁 𑀉𑀕𑁆𑀕𑀢𑀢𑁆𑀢𑀸 𑀤𑁆𑀯𑁂 𑀧𑀼𑀡𑁆𑀡𑀫𑀸𑀬𑁄 𑀅𑀫𑀜𑁆𑀜𑀺𑀁. 𑀅𑀴𑀸𑀭𑀧𑀫𑁆𑀳𑁂𑀳𑀻𑀢𑀺 𑀯𑀺𑀲𑀸𑀮𑀧𑀔𑀼𑀫𑁂𑀳𑀺. 𑀲𑀼𑀪𑁂𑀳𑀻𑀢𑀺 𑀧𑀭𑀺𑀲𑀼𑀤𑁆𑀥𑁂𑀳𑀺. 𑀯𑀕𑁆𑀕𑀼𑀪𑀻𑀢𑀺 𑀫𑀥𑀼𑀭𑀸𑀓𑀸𑀭𑁂𑀳𑀺. 𑀉𑀤𑀺𑀓𑁆𑀔𑀢𑀻𑀢𑀺 𑀏𑀯𑀭𑀽𑀧𑁂𑀳𑀺 𑀦𑁂𑀢𑁆𑀢𑁂𑀳𑀺 𑀬𑀲𑁆𑀫𑀺𑀁 𑀔𑀡𑁂 𑀑𑀮𑁄𑀓𑁂𑀢𑀺. 𑀧𑀩𑁆𑀩𑀢𑁂𑀢𑀺 𑀬𑀣𑀸 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂 𑀲𑀼𑀧𑀼𑀧𑁆𑀨𑀺𑀢𑀯𑀦𑁂 𑀯𑀻𑀡𑀁 𑀆𑀤𑀸𑀬 𑀢𑀦𑁆𑀢𑀺𑀲𑁆𑀲𑀭𑁂𑀦 𑀅𑀢𑁆𑀢𑀦𑁄 𑀲𑀭𑀁 𑀲𑀁𑀲𑀦𑁆𑀤𑀦𑁆𑀢𑀻 𑀓𑀺𑀫𑁆𑀧𑀼𑀭𑀺𑀲𑀻 𑀓𑀺𑀫𑁆𑀧𑀼𑀭𑀺𑀲𑀲𑁆𑀲 𑀫𑀦𑀁 𑀳𑀭𑀢𑀺, 𑀏𑀯𑀁 𑀳𑀭𑀢𑁂𑀯 𑀫𑁂 𑀫𑀦𑁄𑀢𑀺 𑀯𑀺𑀧𑁆𑀧𑀮𑀧𑀢𑀺.
𑀩𑁆𑀭𑀳𑀢𑀻𑀢𑀺 𑀉𑀴𑀸𑀭𑀸. 𑀲𑀸𑀫𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀲𑀸𑀫𑀸. 𑀏𑀓𑀘𑁆𑀘𑀯𑀲𑀦𑀸𑀢𑀺 𑀏𑀓𑀘𑁆𑀘𑀺𑀓𑀯𑀲𑀦𑀸, 𑀏𑀓𑀯𑀢𑁆𑀣𑀦𑀺𑀯𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀪𑀦𑁆𑀢𑀸𑀯𑀼𑀤𑀺𑀓𑁆𑀔𑀢𑀻𑀢𑀺 𑀲𑀡𑁆𑀳𑀓𑁂𑀲𑀸 𑀧𑀼𑀣𑀼𑀦𑀮𑀸𑀝𑀸 𑀆𑀬𑀢𑀪𑀫𑀽 𑀯𑀺𑀲𑀸𑀮𑀓𑁆𑀔𑀻 𑀢𑀼𑀗𑁆𑀕𑀦𑀸𑀲𑀸 𑀭𑀢𑁆𑀢𑁄𑀝𑁆𑀞𑀸 𑀲𑁂𑀢𑀤𑀦𑁆𑀢𑀸 𑀢𑀺𑀔𑀺𑀡𑀤𑀸𑀞𑀸 𑀲𑀼𑀯𑀝𑁆𑀝𑀺𑀢𑀕𑀻𑀯𑀸 𑀲𑀼𑀢𑀦𑀼𑀩𑀸𑀳𑀼 𑀲𑀼𑀲𑀡𑁆𑀞𑀺𑀢𑀧𑀬𑁄𑀥𑀭𑀸 𑀓𑀭𑀫𑀺𑀢𑀫𑀚𑁆𑀛𑀸 𑀯𑀺𑀲𑀸𑀮𑀲𑁄𑀡𑀻 𑀲𑀼𑀯𑀡𑁆𑀡𑀓𑀤𑀮𑀺𑀲𑀫𑀸𑀦𑁄𑀭𑀼 𑀲𑀸 𑀉𑀢𑁆𑀢𑀫𑀺𑀢𑁆𑀣𑀻 𑀢𑀲𑁆𑀫𑀺𑀁 𑀔𑀡𑁂 𑀫𑀁 𑀉𑀤𑀺𑀓𑁆𑀔𑀦𑁆𑀢𑀻 𑀪𑀬𑁂𑀦 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀮𑀼𑀤𑁆𑀤𑀁 𑀉𑀤𑀺𑀓𑁆𑀔𑀦𑁆𑀢𑀻 𑀪𑀦𑁆𑀢𑀸 𑀫𑀺𑀕𑀻𑀯 𑀫𑀁 𑀉𑀤𑀺𑀓𑁆𑀔𑀢𑀻𑀢𑀺 𑀯𑀤𑀢𑀺. 𑀩𑀸𑀳𑀸𑀫𑀼𑀤𑀽𑀢𑀺 𑀫𑀼𑀤𑀼𑀩𑀸𑀳𑀸. 𑀲𑀦𑁆𑀦𑀢𑀥𑀻𑀭𑀓𑀼𑀢𑁆𑀢𑀺𑀬𑀸𑀢𑀺 𑀲𑀼𑀨𑀼𑀲𑀺𑀢𑀙𑁂𑀓𑀓𑀭𑀡𑀸. 𑀉𑀧𑀜𑁆𑀜𑀺𑀲𑁆𑀲𑀢𑀺 ¶ 𑀫𑀦𑁆𑀢𑀺 𑀲𑀸 𑀲𑀼𑀪𑀸 𑀦𑀸𑀭𑀻 𑀓𑀤𑀸 𑀦𑀼 𑀫𑀁 𑀢𑁂𑀳𑀺 𑀢𑀫𑁆𑀩𑀦𑀔𑁂𑀳𑀺 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀲𑀦𑁆𑀦𑀢𑁂𑀦 𑀥𑀻𑀭𑁂𑀦 𑀓𑀭𑀡𑁂𑀦 𑀧𑀭𑀺𑀢𑁄𑀲𑁂𑀲𑁆𑀲𑀢𑀻𑀢𑀺 𑀧𑀢𑁆𑀣𑁂𑀦𑁆𑀢𑁄 𑀯𑀺𑀮𑀧𑀢𑀺.
𑀓𑀜𑁆𑀘𑀦𑀚𑀸𑀮𑀼𑀭𑀘𑁆𑀙𑀤𑀸𑀢𑀺 𑀓𑀜𑁆𑀘𑀦𑀫𑀬𑀉𑀭𑀘𑁆𑀙𑀤𑀸𑀮𑀗𑁆𑀓𑀸𑀭𑀸. 𑀯𑀺𑀮𑀕𑁆𑀕𑀫𑀚𑁆𑀛𑀸𑀢𑀺 𑀯𑀺𑀮𑀕𑁆𑀕𑀲𑀭𑀻𑀭𑀸 𑀢𑀦𑀼𑀫𑀚𑁆𑀛𑀺𑀫𑀸. 𑀩𑁆𑀭𑀳𑀸𑀯𑀦𑁂𑀢𑀺 𑀫𑀳𑀸𑀯𑀦𑁂. 𑀮𑀸𑀔𑀸𑀭𑀲𑀭𑀢𑁆𑀢𑀲𑀼𑀘𑁆𑀙𑀯𑀻𑀢𑀺 𑀳𑀢𑁆𑀣𑀧𑀸𑀤𑀢𑀮𑀅𑀕𑁆𑀕𑀦𑀔𑀑𑀝𑁆𑀞𑀫𑀁𑀲𑁂𑀲𑀼 𑀮𑀸𑀔𑀸𑀭𑀲𑀭𑀢𑁆𑀢𑀫𑀡𑀺𑀧𑀯𑀸𑀮𑀯𑀡𑁆𑀡𑀸. 𑀩𑀺𑀦𑁆𑀤𑀼𑀢𑁆𑀣𑀦𑀻𑀢𑀺 𑀉𑀤𑀓𑀧𑀼𑀧𑁆𑀨𑀼𑀴𑀧𑀭𑀺𑀫𑀡𑁆𑀟𑀮𑀢𑁆𑀣𑀦𑀻. 𑀢𑀢𑁄𑀢𑀺 𑀬𑀤𑀸 𑀢𑀁 𑀢𑀺𑀝𑁆𑀞𑀦𑁆𑀢𑀺𑀁 𑀅𑀤𑁆𑀤𑀲𑀁, 𑀢𑀢𑁄 𑀧𑀝𑁆𑀞𑀸𑀬. 𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀅𑀦𑀺𑀲𑁆𑀲𑀭𑁄 𑀚𑀸𑀢𑁄𑀫𑁆𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀜𑁆𑀘𑀺𑀦𑀦𑁆𑀢𑀺 𑀓𑀜𑁆𑀘𑀺 ‘‘𑀅𑀬𑀁 𑀅𑀲𑀼𑀓𑁄 𑀦𑀸𑀫𑀸’’𑀢𑀺 𑀦 𑀚𑀸𑀦𑀸𑀫𑀺, 𑀉𑀫𑁆𑀫𑀢𑁆𑀢𑀓𑁄 𑀚𑀸𑀢𑁄𑀫𑁆𑀳𑀻𑀢𑀺 𑀯𑀤𑀢𑀺. 𑀤𑀝𑁆𑀞𑀸𑀢𑀺 𑀤𑀺𑀲𑁆𑀯𑀸. 𑀦 𑀲𑀼𑀧𑀸𑀫𑀻𑀢𑀺 𑀦𑁂𑀯 𑀭𑀢𑁆𑀢𑀺𑀁, 𑀦 𑀤𑀺𑀯𑀸 𑀦𑀺𑀤𑁆𑀤𑀁 𑀮𑀪𑀸𑀫𑀺. 𑀲𑁄 𑀘 𑀮𑀩𑁆𑀪𑁂𑀣𑀸𑀢𑀺 𑀬𑀁 𑀫𑁂 𑀲𑀓𑁆𑀓𑁄 𑀯𑀭𑀁 𑀤𑀤𑁂𑀬𑁆𑀬, 𑀲𑁄 𑀘 𑀫𑁂 𑀯𑀭𑁄 𑀮𑀩𑁆𑀪𑁂𑀣, 𑀮𑀪𑁂𑀬𑁆𑀬𑀸𑀳𑀁 𑀢𑀁 𑀯𑀭𑀦𑁆𑀢𑀺 𑀅𑀢𑁆𑀣𑁄.
𑀅𑀣 ¶ 𑀢𑁂 𑀅𑀫𑀘𑁆𑀘𑀸 𑀅𑀪𑀺𑀧𑀸𑀭𑀓𑀲𑁆𑀲𑀧𑀺 𑀆𑀭𑁄𑀘𑀬𑀺𑀁𑀲𑀼 𑁋 ‘‘𑀲𑀸𑀫𑀺 𑀭𑀸𑀚𑀸, 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑀁 𑀧𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 ¶ 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀻’’𑀢𑀺. 𑀲𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀉𑀫𑁆𑀫𑀸𑀤𑀦𑁆𑀢𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀓𑀘𑁆𑀘𑀺 𑀭𑀜𑁆𑀜𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀏𑀓𑁄 𑀫𑀳𑁄𑀤𑀭𑁄 𑀫𑀳𑀸𑀤𑀸𑀞𑀺𑀓𑁄 𑀭𑀣𑁂 𑀞𑀢𑁆𑀯𑀸 𑀆𑀕𑀢𑁄 𑀧𑀼𑀭𑀺𑀲𑁄 𑀅𑀢𑁆𑀣𑀺, 𑀅𑀳𑀁 𑀢𑀁 𑀭𑀸𑀚𑀸 𑀯𑀸 𑀅𑀭𑀸𑀚𑀸 𑀯𑀸𑀢𑀺 𑀦 𑀚𑀸𑀦𑀸𑀫𑀺, 𑀏𑀓𑁄 𑀇𑀲𑁆𑀲𑀭𑁄𑀢𑀺 𑀧𑀦 𑀯𑀼𑀢𑁆𑀢𑁂 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀔𑀺𑀧𑀺𑀁, 𑀲𑁄 𑀢𑀸𑀯𑀤𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁄’’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀦𑀸𑀲𑀺𑀢𑁄𑀫𑁆𑀳𑀺 𑀢𑀬𑀸’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀭𑀸𑀚𑀦𑀺𑀯𑁂𑀲𑀦𑀁 𑀆𑀭𑀼𑀬𑁆𑀳 𑀲𑀺𑀭𑀺𑀕𑀩𑁆𑀪𑀤𑁆𑀯𑀸𑀭𑁂 𑀞𑀢𑁆𑀯𑀸 𑀭𑀜𑁆𑀜𑁄 𑀉𑀫𑁆𑀫𑀸𑀤𑀦𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑁆𑀧𑀮𑀸𑀧𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀉𑀫𑁆𑀫𑀸𑀤𑀦𑁆𑀢𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀚𑀸𑀢𑁄, 𑀢𑀁 𑀅𑀮𑀪𑀦𑁆𑀢𑁄 𑀫𑀭𑀺𑀲𑁆𑀲𑀢𑀺, 𑀭𑀜𑁆𑀜𑁄 𑀘 𑀫𑀫 𑀘 𑀅𑀕𑀼𑀡𑀁 𑀫𑁄𑀘𑁂𑀢𑁆𑀯𑀸 𑀇𑀫𑀲𑁆𑀲 𑀫𑀬𑀸 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀤𑀴𑁆𑀳𑀫𑀦𑁆𑀢𑀁 𑀉𑀧𑀝𑁆𑀞𑀸𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀅𑀲𑀼𑀓𑀝𑁆𑀞𑀸𑀦𑁂 𑀲𑀼𑀲𑀺𑀭𑀘𑁂𑀢𑀺𑀬𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑁆𑀯𑀁 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀭𑀼𑀓𑁆𑀔𑁂 𑀦𑀺𑀲𑀻𑀤, 𑀅𑀳𑀁 𑀢𑀢𑁆𑀣 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀤𑁂𑀯𑀢𑀸 𑀦𑀫𑀲𑁆𑀲𑀦𑁆𑀢𑁄, ‘𑀲𑀸𑀫𑀺 𑀤𑁂𑀯𑀭𑀸𑀚, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀦𑀕𑀭𑀫𑁆𑀳𑀺 𑀙𑀡𑁂 𑀯𑀢𑁆𑀢𑀫𑀸𑀦𑁂 𑀅𑀓𑀻𑀴𑀺𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑁆𑀧𑀮𑀧𑀦𑁆𑀢𑁄𑀯 𑀦𑀺𑀧𑀦𑁆𑀦𑁄, 𑀫𑀬𑀁 𑀢𑀢𑁆𑀣 𑀓𑀸𑀭𑀡𑀁 𑀦 𑀚𑀸𑀦𑀸𑀫, 𑀭𑀸𑀚𑀸 𑀤𑁂𑀯𑀢𑀸𑀦𑀁 𑀩𑀳𑀽𑀧𑀓𑀸𑀭𑁄, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀭𑀸𑀚𑀸 𑀯𑀺𑀧𑁆𑀧𑀮𑀧𑀢𑀻𑀢𑀺 𑀆𑀘𑀺𑀓𑁆𑀔𑀣, 𑀭𑀜𑁆𑀜𑁄 𑀦𑁄 𑀚𑀻𑀯𑀺𑀢𑀤𑀸𑀦𑀁 𑀤𑁂𑀣𑀸’𑀢𑀺 𑀬𑀸𑀘𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀢𑀲𑁆𑀫𑀺𑀁 𑀔𑀡𑁂 𑀲𑀤𑁆𑀤𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸, ‘𑀲𑁂𑀦𑀸𑀧𑀢𑀺, 𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑁄 𑀩𑁆𑀬𑀸𑀥𑀺 𑀦𑀸𑀫 𑀦𑀢𑁆𑀣𑀺, 𑀲𑁄 𑀧𑀦 𑀢𑀯 𑀪𑀭𑀺𑀬𑀸𑀬 𑀉𑀫𑁆𑀫𑀸𑀤𑀦𑁆𑀢𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀲𑀘𑁂 𑀦𑀁 𑀮𑀪𑀺𑀲𑁆𑀲𑀢𑀺, 𑀚𑀻𑀯𑀺𑀲𑁆𑀲𑀢𑀺, 𑀦𑁄 𑀘𑁂, 𑀫𑀭𑀺𑀲𑁆𑀲𑀢𑀺. 𑀲𑀘𑁂 ¶ 𑀢𑀲𑁆𑀲 𑀚𑀻𑀯𑀺𑀢𑀁 𑀇𑀘𑁆𑀙𑀲𑀺, 𑀉𑀫𑁆𑀫𑀸𑀤𑀦𑁆𑀢𑀺𑀫𑀲𑁆𑀲 𑀤𑁂𑀳𑀻’𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀁 𑀢𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.
𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑁂𑀦𑀸𑀧𑀢𑀺𑀦𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁂𑀦 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀸𑀘𑀺𑀢𑁄 𑀢𑀣𑀸 𑀅𑀪𑀸𑀲𑀺. 𑀲𑁂𑀦𑀸𑀧𑀢𑀺 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀤𑁂𑀯𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀫𑀘𑁆𑀘𑁂 𑀚𑀸𑀦𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀆𑀭𑀼𑀬𑁆𑀳 𑀲𑀺𑀭𑀺𑀕𑀩𑁆𑀪𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀭𑀸𑀚𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 ¶ ‘‘𑀓𑁄 𑀏𑀲𑁄’’𑀢𑀺 𑀧𑀼𑀘𑁆𑀙𑀺. 𑀅𑀳𑀁, 𑀤𑁂𑀯, 𑀅𑀪𑀺𑀧𑀸𑀭𑀓𑁄𑀢𑀺. 𑀅𑀣𑀲𑁆𑀲 𑀭𑀸𑀚𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺. 𑀲𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀪𑀽𑀢𑀸𑀦𑀺 ¶ 𑀫𑁂 𑀪𑀽𑀢𑀧𑀢𑀻 𑀦𑀫𑀲𑁆𑀲𑀢𑁄, 𑀆𑀕𑀫𑁆𑀫 𑀬𑀓𑁆𑀔𑁄 𑀇𑀤𑀫𑁂𑀢𑀤𑀩𑁆𑀭𑀯𑀺;
𑀭𑀜𑁆𑀜𑁄 𑀫𑀦𑁄 𑀉𑀫𑁆𑀫𑀤𑀦𑁆𑀢𑁆𑀬𑀸 𑀦𑀺𑀯𑀺𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀢𑀁 𑀧𑀭𑀺𑀘𑀸𑀭𑀬𑀲𑁆𑀲𑀽’’𑀢𑀺.
𑀢𑀢𑁆𑀣 𑀦𑀫𑀲𑁆𑀲𑀢𑁄𑀢𑀺 𑀢𑀼𑀫𑁆𑀳𑀸𑀓𑀁 𑀯𑀺𑀧𑁆𑀧𑀮𑀸𑀧𑀓𑀸𑀭𑀡𑀚𑀸𑀦𑀦𑀢𑁆𑀣𑀁 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀫𑀲𑁆𑀲𑀦𑁆𑀢𑀲𑁆𑀲. 𑀢𑀦𑁆𑀢𑀺 𑀅𑀳𑀁 𑀢𑀁 𑀉𑀫𑁆𑀫𑀸𑀤𑀦𑁆𑀢𑀺𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀘𑀸𑀭𑀺𑀓𑀁 𑀓𑀢𑁆𑀯𑀸 𑀤𑀤𑀸𑀫𑀻𑀢𑀺.
𑀅𑀣 𑀦𑀁 𑀭𑀸𑀚𑀸, ‘‘𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀫𑀫 𑀉𑀫𑁆𑀫𑀸𑀤𑀦𑁆𑀢𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀯𑀺𑀧𑁆𑀧𑀮𑀧𑀺𑀢𑀪𑀸𑀯𑀁 𑀬𑀓𑁆𑀔𑀸𑀧𑀺 𑀚𑀸𑀦𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀤𑁂𑀯𑀸𑀢𑀺. 𑀲𑁄 ‘‘𑀲𑀩𑁆𑀩𑀮𑁄𑀓𑁂𑀦 𑀓𑀺𑀭 𑀫𑁂 𑀮𑀸𑀫𑀓𑀪𑀸𑀯𑁄 𑀜𑀸𑀢𑁄’’𑀢𑀺 𑀮𑀚𑁆𑀚𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀬 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀧𑀼𑀜𑁆𑀜𑀸 𑀘 𑀥𑀁𑀲𑁂 𑀅𑀫𑀭𑁄 𑀦 𑀘𑀫𑁆𑀳𑀺, 𑀚𑀦𑁄 𑀘 𑀫𑁂 𑀧𑀸𑀧𑀫𑀺𑀤𑀜𑁆𑀘 𑀚𑀜𑁆𑀜𑀸;
𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸’’𑀢𑀺.
𑀢𑀢𑁆𑀣 𑀥𑀁𑀲𑁂𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀅𑀳𑀁 𑀢𑀸𑀬 𑀲𑀤𑁆𑀥𑀺𑀁 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀘𑀸𑀭𑁂𑀦𑁆𑀢𑁄 𑀧𑀼𑀜𑁆𑀜𑀢𑁄 𑀘 𑀥𑀁𑀲𑁂𑀬𑁆𑀬𑀁, 𑀢𑀸𑀬 𑀲𑀤𑁆𑀥𑀺𑀁 𑀧𑀭𑀺𑀘𑀸𑀭𑀺𑀢𑀫𑀢𑁆𑀢𑁂𑀦 𑀅𑀫𑀭𑁄 𑀘 𑀦 𑀳𑁄𑀫𑀺, 𑀫𑀳𑀸𑀚𑀦𑁄 𑀘 𑀫𑁂 𑀇𑀫𑀁 𑀮𑀸𑀫𑀓𑀪𑀸𑀯𑀁 𑀚𑀸𑀦𑁂𑀬𑁆𑀬, 𑀢𑀢𑁄 ‘‘𑀅𑀬𑀼𑀢𑁆𑀢𑀁 𑀭𑀜𑁆𑀜𑀸 𑀓𑀢’’𑀦𑁆𑀢𑀺 𑀕𑀭𑀳𑁂𑀬𑁆𑀬, 𑀢𑀜𑁆𑀘 𑀫𑀫 𑀤𑀢𑁆𑀯𑀸 𑀧𑀘𑁆𑀙𑀸 𑀧𑀺𑀬𑀪𑀭𑀺𑀬𑀁 𑀅𑀤𑀝𑁆𑀞𑀸 𑀢𑀯 𑀫𑀦𑀲𑁄 𑀯𑀺𑀖𑀸𑀢𑁄 𑀘𑀲𑁆𑀲𑀸𑀢𑀺 𑀅𑀢𑁆𑀣𑁄.
𑀲𑁂𑀲𑀸 𑀉𑀪𑀺𑀦𑁆𑀦𑀫𑁆𑀧𑀺 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸 𑀳𑁄𑀦𑁆𑀢𑀺 𑁋
‘‘𑀚𑀦𑀺𑀦𑁆𑀤 ¶ 𑀦𑀸𑀜𑁆𑀜𑀢𑁆𑀭 𑀢𑀬𑀸 𑀫𑀬𑀸 𑀯𑀸, 𑀲𑀩𑁆𑀩𑀸𑀧𑀺 𑀓𑀫𑁆𑀫𑀲𑁆𑀲 𑀓𑀢𑀲𑁆𑀲 𑀚𑀜𑁆𑀜𑀸;
𑀬𑀁 𑀢𑁂 𑀫𑀬𑀸 𑀉𑀫𑁆𑀫𑀤𑀦𑁆𑀢𑀻 𑀧𑀤𑀺𑀦𑁆𑀦𑀸, 𑀪𑀼𑀲𑁂𑀳𑀺 𑀭𑀸𑀚𑀸 𑀯𑀦𑀣𑀁 𑀲𑀚𑀸𑀳𑀺.
‘‘𑀬𑁄 𑀧𑀸𑀧𑀓𑀁 𑀓𑀫𑁆𑀫𑀓𑀭𑀁 𑀫𑀦𑀼𑀲𑁆𑀲𑁄, 𑀲𑁄 𑀫𑀜𑁆𑀜𑀢𑀺 𑀫𑀸𑀬𑀺𑀤 𑀫𑀜𑁆𑀜𑀺𑀁𑀲𑀼 𑀅𑀜𑁆𑀜𑁂;
𑀧𑀲𑁆𑀲𑀦𑁆𑀢𑀺 ¶ 𑀪𑀽𑀢𑀸𑀦𑀺 𑀓𑀭𑁄𑀦𑁆𑀢𑀫𑁂𑀢𑀁, 𑀬𑀼𑀢𑁆𑀢𑀸 𑀘 𑀬𑁂 𑀳𑁄𑀦𑁆𑀢𑀺 𑀦𑀭𑀸 𑀧𑀣𑀩𑁆𑀬𑀸.
‘‘𑀅𑀜𑁆𑀜𑁄 ¶ 𑀦𑀼 𑀢𑁂 𑀓𑁄𑀘𑀺 𑀦𑀭𑁄 𑀧𑀣𑀩𑁆𑀬𑀸, 𑀲𑀤𑁆𑀥𑁂𑀬𑁆𑀬 𑀮𑁄𑀓𑀲𑁆𑀫𑀺 𑀦 𑀫𑁂 𑀧𑀺𑀬𑀸𑀢𑀺;
𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀼𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸.
‘‘𑀅𑀤𑁆𑀥𑀸 𑀧𑀺𑀬𑀸 𑀫𑀬𑁆𑀳 𑀚𑀦𑀺𑀦𑁆𑀤 𑀏𑀲𑀸, 𑀦 𑀲𑀸 𑀫𑀫𑀁 𑀅𑀧𑁆𑀧𑀺𑀬𑀸 𑀪𑀽𑀫𑀺𑀧𑀸𑀮;
𑀕𑀘𑁆𑀙𑁂𑀯 𑀢𑁆𑀯𑀁 𑀉𑀫𑁆𑀫𑀤𑀦𑁆𑀢𑀺𑀁 𑀪𑀤𑀦𑁆𑀢𑁂, 𑀲𑀻𑀳𑁄𑀯 𑀲𑁂𑀮𑀲𑁆𑀲 𑀕𑀼𑀳𑀁 𑀉𑀧𑁂𑀢𑀺.
‘‘𑀦 𑀧𑀻𑀴𑀺𑀢𑀸 𑀅𑀢𑁆𑀢𑀤𑀼𑀔𑁂𑀦 𑀥𑀻𑀭𑀸, 𑀲𑀼𑀔𑀧𑁆𑀨𑀮𑀁 𑀓𑀫𑁆𑀫 𑀧𑀭𑀺𑀘𑁆𑀘𑀚𑀦𑁆𑀢𑀺;
𑀲𑀫𑁆𑀫𑁄𑀳𑀺𑀢𑀸 𑀯𑀸𑀧𑀺 𑀲𑀼𑀔𑁂𑀦 𑀫𑀢𑁆𑀢𑀸, 𑀦 𑀧𑀸𑀧𑀓𑀫𑁆𑀫𑀜𑁆𑀘 𑀲𑀫𑀸𑀘𑀭𑀦𑁆𑀢𑀺.
‘‘𑀢𑀼𑀯𑀜𑁆𑀳𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀫𑀬𑁆𑀳𑀁, 𑀪𑀢𑁆𑀢𑀸 𑀧𑀢𑀻 𑀧𑁄𑀲𑀓𑁄 𑀤𑁂𑀯𑀢𑀸 𑀘;
𑀤𑀸𑀲𑁄 𑀅𑀳𑀁 𑀢𑀼𑀬𑁆𑀳 𑀲𑀧𑀼𑀢𑁆𑀢𑀤𑀸𑀭𑁄, 𑀬𑀣𑀸𑀲𑀼𑀔𑀁 𑀲𑀸𑀫𑀺 𑀓𑀭𑁄𑀳𑀺 𑀓𑀸𑀫𑀁.
‘‘𑀬𑁄 ‘𑀇𑀲𑁆𑀲𑀭𑁄𑀫𑁆𑀳𑀻’𑀢𑀺 𑀓𑀭𑁄𑀢𑀺 𑀧𑀸𑀧𑀁, 𑀓𑀢𑁆𑀯𑀸 𑀘 𑀲𑁄 𑀦𑀼𑀢𑁆𑀢𑀲𑀢𑁂 𑀧𑀭𑁂𑀲𑀁;
𑀦 𑀢𑁂𑀦 𑀲𑁄 𑀚𑀻𑀯𑀢𑀺 𑀤𑀻𑀖𑀫𑀸𑀬𑀼, 𑀤𑁂𑀯𑀸𑀧𑀺 𑀧𑀸𑀧𑁂𑀦 𑀲𑀫𑁂𑀓𑁆𑀔𑀭𑁂 𑀦𑀁.
‘‘𑀅𑀜𑁆𑀜𑀸𑀢𑀓𑀁 𑀲𑀸𑀫𑀺𑀓𑁂𑀳𑀻 𑀧𑀤𑀺𑀦𑁆𑀦𑀁, 𑀥𑀫𑁆𑀫𑁂 𑀞𑀺𑀢𑀸 𑀬𑁂 𑀧𑀝𑀺𑀘𑁆𑀙𑀦𑁆𑀢𑀺 𑀤𑀸𑀦𑀁;
𑀧𑀝𑀺𑀘𑁆𑀙𑀓𑀸 𑀤𑀸𑀬𑀓𑀸 𑀘𑀸𑀧𑀺 𑀢𑀢𑁆𑀣, 𑀲𑀼𑀔𑀧𑁆𑀨𑀮𑀜𑁆𑀜𑁂𑀯 𑀓𑀭𑁄𑀦𑁆𑀢𑀺 𑀓𑀫𑁆𑀫𑀁.
‘‘𑀅𑀜𑁆𑀜𑁄 𑀦𑀼 𑀢𑁂 𑀓𑁄𑀘𑀺 𑀦𑀭𑁄 𑀧𑀣𑀩𑁆𑀬𑀸, 𑀲𑀤𑁆𑀥𑁂𑀬𑁆𑀬 𑀮𑁄𑀓𑀲𑁆𑀫𑀺 𑀦 𑀫𑁂 𑀧𑀺𑀬𑀸𑀢𑀺;
𑀪𑀼𑀲𑁄 ¶ 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸.
‘‘𑀅𑀤𑁆𑀥𑀸 ¶ 𑀧𑀺𑀬𑀸 𑀫𑀬𑁆𑀳 𑀚𑀦𑀺𑀦𑁆𑀤 𑀏𑀲𑀸, 𑀦 𑀲𑀸 𑀫𑀫𑀁 𑀅𑀧𑁆𑀧𑀺𑀬𑀸 𑀪𑀽𑀫𑀺𑀧𑀸𑀮;
𑀬𑀁 𑀢𑁂 𑀫𑀬𑀸 𑀉𑀫𑁆𑀫𑀤𑀦𑁆𑀢𑀻 𑀧𑀤𑀺𑀦𑁆𑀦𑀸, 𑀪𑀼𑀲𑁂𑀳𑀺 𑀭𑀸𑀚𑀸 𑀯𑀦𑀣𑀁 𑀲𑀚𑀸𑀳𑀺.
‘‘𑀬𑁄 ¶ 𑀅𑀢𑁆𑀢𑀤𑀼𑀓𑁆𑀔𑁂𑀦 𑀧𑀭𑀲𑁆𑀲 𑀤𑀼𑀓𑁆𑀔𑀁, 𑀲𑀼𑀔𑁂𑀦 𑀯𑀸 𑀅𑀢𑁆𑀢𑀲𑀼𑀔𑀁 𑀤𑀳𑀸𑀢𑀺;
𑀬𑀣𑁂𑀯𑀺𑀤𑀁 𑀫𑀬𑁆𑀳 𑀢𑀣𑀸 𑀧𑀭𑁂𑀲𑀁, 𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀁.
‘‘𑀅𑀜𑁆𑀜𑁄 𑀦𑀼 𑀢𑁂 𑀓𑁄𑀘𑀺 𑀦𑀭𑁄 𑀧𑀣𑀩𑁆𑀬𑀸, 𑀲𑀤𑁆𑀥𑁂𑀬𑁆𑀬 𑀮𑁄𑀓𑀲𑁆𑀫𑀺 𑀦 𑀫𑁂 𑀧𑀺𑀬𑀸𑀢𑀺;
𑀪𑀼𑀲𑁄 𑀘 𑀢𑁆𑀬𑀲𑁆𑀲 𑀫𑀦𑀲𑁄 𑀯𑀺𑀖𑀸𑀢𑁄, 𑀤𑀢𑁆𑀯𑀸 𑀧𑀺𑀬𑀁 𑀉𑀫𑁆𑀫𑀤𑀦𑁆𑀢𑀺𑀁 𑀅𑀤𑀝𑁆𑀞𑀸.
‘‘𑀚𑀦𑀺𑀦𑁆𑀤 𑀚𑀸𑀦𑀸𑀲𑀺 𑀧𑀺𑀬𑀸 𑀫𑀫𑁂𑀲𑀸, 𑀦 𑀲𑀸 𑀫𑀫𑀁 𑀅𑀧𑁆𑀧𑀺𑀬𑀸 𑀪𑀽𑀫𑀺𑀧𑀸𑀮;
𑀧𑀺𑀬𑁂𑀦 𑀢𑁂 𑀤𑀫𑁆𑀫𑀺 𑀧𑀺𑀬𑀁 𑀚𑀦𑀺𑀦𑁆𑀤, 𑀧𑀺𑀬𑀤𑀸𑀬𑀺𑀦𑁄 𑀤𑁂𑀯 𑀧𑀺𑀬𑀁 𑀮𑀪𑀦𑁆𑀢𑀺.
‘‘𑀲𑁄 𑀦𑀽𑀦𑀸𑀳𑀁 𑀯𑀥𑀺𑀲𑁆𑀲𑀸𑀫𑀺, 𑀅𑀢𑁆𑀢𑀸𑀦𑀁 𑀓𑀸𑀫𑀳𑁂𑀢𑀼𑀓𑀁;
𑀦 𑀳𑀺 𑀥𑀫𑁆𑀫𑀁 𑀅𑀥𑀫𑁆𑀫𑁂𑀦, 𑀅𑀳𑀁 𑀯𑀥𑀺𑀢𑀼𑀫𑀼𑀲𑁆𑀲𑀳𑁂.
‘‘𑀲𑀘𑁂 𑀢𑀼𑀯𑀁 𑀫𑀬𑁆𑀳 𑀲𑀢𑀺𑀁 𑀚𑀦𑀺𑀦𑁆𑀤, 𑀦 𑀓𑀸𑀫𑀬𑀸𑀲𑀺 𑀦𑀭𑀯𑀻𑀭 𑀲𑁂𑀝𑁆𑀞;
𑀘𑀚𑀸𑀫𑀺 𑀦𑀁 𑀲𑀩𑁆𑀩𑀚𑀦𑀲𑁆𑀲 𑀲𑀺𑀩𑁆𑀬𑀸, 𑀫𑀬𑀸 𑀧𑀫𑀼𑀢𑁆𑀢𑀁 𑀢𑀢𑁄 𑀅𑀯𑁆𑀳𑀬𑁂𑀲𑀺 𑀦𑀁.
‘‘𑀅𑀤𑀽𑀲𑀺𑀬𑀁 𑀘𑁂 𑀅𑀪𑀺𑀧𑀸𑀭𑀓 𑀢𑁆𑀯𑀁, 𑀘𑀚𑀸𑀲𑀺 𑀓𑀢𑁆𑀢𑁂 𑀅𑀳𑀺𑀢𑀸𑀬 𑀢𑁆𑀬𑀲𑁆𑀲;
𑀫𑀳𑀸 𑀘 𑀢𑁂 𑀉𑀧𑀯𑀸𑀤𑁄𑀧𑀺 𑀅𑀲𑁆𑀲, 𑀦 𑀘𑀸𑀧𑀺 𑀢𑁆𑀬𑀲𑁆𑀲 𑀦𑀕𑀭𑀫𑁆𑀳𑀺 𑀧𑀓𑁆𑀔𑁄.
‘‘𑀅𑀳𑀁 ¶ 𑀲𑀳𑀺𑀲𑁆𑀲𑀁 𑀉𑀧𑀯𑀸𑀤𑀫𑁂𑀢𑀁, 𑀦𑀺𑀦𑁆𑀤𑀁 𑀧𑀲𑀁𑀲𑀁 𑀕𑀭𑀳𑀜𑁆𑀘 𑀲𑀩𑁆𑀩𑀁;
𑀫𑀫𑁂𑀢𑀫𑀸𑀕𑀘𑁆𑀙𑀢𑀼 𑀪𑀽𑀫𑀺𑀧𑀸𑀮, 𑀬𑀣𑀸𑀲𑀼𑀔𑀁 𑀲𑀺𑀯𑀺 𑀓𑀭𑁄𑀳𑀺 𑀓𑀸𑀫𑀁.
‘‘𑀬𑁄 ¶ 𑀦𑁂𑀯 𑀦𑀺𑀦𑁆𑀤𑀁 𑀦 𑀧𑀦𑀧𑁆𑀧𑀲𑀁𑀲𑀁, 𑀆𑀤𑀺𑀬𑀢𑀺 𑀕𑀭𑀳𑀁 𑀦𑁄𑀧𑀺 𑀧𑀽𑀚𑀁;
𑀲𑀺𑀭𑀻 𑀘 𑀮𑀓𑁆𑀔𑀻 𑀘 𑀅𑀧𑁂𑀢𑀺 𑀢𑀫𑁆𑀳𑀸, 𑀆𑀧𑁄 𑀲𑀼𑀯𑀼𑀝𑁆𑀞𑀻𑀯 𑀬𑀣𑀸 𑀣𑀮𑀫𑁆𑀳𑀸.
‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀜𑁆𑀘 𑀲𑀼𑀔𑀜𑁆𑀘 𑀏𑀢𑁆𑀢𑁄, 𑀥𑀫𑁆𑀫𑀸𑀢𑀺𑀲𑀸𑀭𑀜𑁆𑀘 𑀫𑀦𑁄𑀯𑀺𑀖𑀸𑀢𑀁;
𑀉𑀭𑀲𑀸 𑀅𑀳𑀁 𑀧𑀘𑁆𑀘𑀼𑀢𑁆𑀢𑀭𑀺𑀲𑁆𑀲𑀸𑀫𑀺 𑀲𑀩𑁆𑀩𑀁, 𑀧𑀣𑀯𑀻 𑀬𑀣𑀸 𑀣𑀸𑀯𑀭𑀸𑀦𑀁 𑀢𑀲𑀸𑀦𑀁.
‘‘𑀥𑀫𑁆𑀫𑀸𑀢𑀺𑀲𑀸𑀭𑀜𑁆𑀘 𑀫𑀦𑁄𑀯𑀺𑀖𑀸𑀢𑀁, 𑀤𑀼𑀓𑁆𑀔𑀜𑁆𑀘 𑀦𑀺𑀘𑁆𑀙𑀸𑀫𑀺 𑀅𑀳𑀁 𑀧𑀭𑁂𑀲𑀁;
𑀏𑀓𑁄𑀯𑀺𑀫𑀁 𑀳𑀸𑀭𑀬𑀺𑀲𑁆𑀲𑀸𑀫𑀺 𑀪𑀸𑀭𑀁, 𑀥𑀫𑁆𑀫𑁂 𑀞𑀺𑀢𑁄 𑀓𑀺𑀜𑁆𑀘𑀺 𑀅𑀳𑀸𑀧𑀬𑀦𑁆𑀢𑁄.
‘‘𑀲𑀕𑁆𑀕𑀽𑀧𑀕𑀁 ¶ 𑀧𑀼𑀜𑁆𑀜𑀓𑀫𑁆𑀫𑀁 𑀚𑀦𑀺𑀦𑁆𑀤, 𑀫𑀸 𑀫𑁂 𑀢𑀼𑀯𑀁 𑀅𑀦𑁆𑀢𑀭𑀸𑀬𑀁 𑀅𑀓𑀸𑀲𑀺;
𑀤𑀤𑀸𑀫𑀺 𑀢𑁂 𑀉𑀫𑁆𑀫𑀤𑀦𑁆𑀢𑀺𑀁 𑀧𑀲𑀦𑁆𑀦𑁄, 𑀭𑀸𑀚𑀸𑀯 𑀬𑀜𑁆𑀜𑁂 𑀥𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁.
‘‘𑀅𑀤𑁆𑀥𑀸 𑀢𑀼𑀯𑀁 𑀓𑀢𑁆𑀢𑁂 𑀳𑀺𑀢𑁂𑀲𑀺 𑀫𑀬𑁆𑀳𑀁, 𑀲𑀔𑀸 𑀫𑀫𑀁 𑀉𑀫𑁆𑀫𑀤𑀦𑁆𑀢𑀻 𑀢𑀼𑀯𑀜𑁆𑀘;
𑀦𑀺𑀦𑁆𑀤𑁂𑀬𑁆𑀬𑀼 𑀤𑁂𑀯𑀸 𑀧𑀺𑀢𑀭𑁄 𑀘 𑀲𑀩𑁆𑀩𑁂, 𑀧𑀸𑀧𑀜𑁆𑀘 𑀧𑀲𑁆𑀲𑀁 𑀅𑀪𑀺𑀲𑀫𑁆𑀧𑀭𑀸𑀬𑀁.
‘‘𑀦 𑀳𑁂𑀢𑀥𑀫𑁆𑀫𑀁 𑀲𑀺𑀯𑀺𑀭𑀸𑀚 𑀯𑀚𑁆𑀚𑀼𑀁, 𑀲𑀦𑁂𑀕𑀫𑀸 𑀚𑀸𑀦𑀧𑀤𑀸 𑀘 𑀲𑀩𑁆𑀩𑁂;
𑀬𑀁 𑀢𑁂 𑀫𑀬𑀸 𑀉𑀫𑁆𑀫𑀤𑀦𑁆𑀢𑀻 𑀧𑀤𑀺𑀦𑁆𑀦𑀸, 𑀪𑀼𑀲𑁂𑀳𑀺 𑀭𑀸𑀚𑀸 𑀯𑀦𑀣𑀁 𑀲𑀚𑀸𑀳𑀺.
‘‘𑀅𑀤𑁆𑀥𑀸 ¶ 𑀢𑀼𑀯𑀁 𑀓𑀢𑁆𑀢𑁂 𑀳𑀺𑀢𑁂𑀲𑀺 𑀫𑀬𑁆𑀳𑀁, 𑀲𑀔𑀸 𑀫𑀫𑀁 𑀉𑀫𑁆𑀫𑀤𑀦𑁆𑀢𑀻 𑀢𑀼𑀯𑀜𑁆𑀘;
𑀲𑀢𑀜𑁆𑀘 𑀥𑀫𑁆𑀫𑀸𑀦𑀺 𑀲𑀼𑀓𑀺𑀢𑁆𑀢𑀺𑀢𑀸𑀦𑀺, 𑀲𑀫𑀼𑀤𑁆𑀤𑀯𑁂𑀮𑀸𑀯 𑀤𑀼𑀭𑀘𑁆𑀘𑀬𑀸𑀦𑀺.
‘‘𑀆𑀳𑀼𑀦𑁂𑀬𑁆𑀬𑁄 𑀫𑁂𑀲𑀺 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀥𑀸𑀢𑀸 𑀯𑀺𑀥𑀸𑀢𑀸 𑀘𑀲𑀺 𑀓𑀸𑀫𑀧𑀸𑀮𑁄;
𑀢𑀬𑀻 ¶ 𑀳𑀼𑀢𑀸 𑀭𑀸𑀚 𑀫𑀳𑀧𑁆𑀨𑀮𑀸 𑀳𑀺, 𑀓𑀸𑀫𑁂𑀦 𑀫𑁂 𑀉𑀫𑁆𑀫𑀤𑀦𑁆𑀢𑀺𑀁 𑀧𑀝𑀺𑀘𑁆𑀙.
‘‘𑀅𑀤𑁆𑀥𑀸 𑀳𑀺 𑀲𑀩𑁆𑀩𑀁 𑀅𑀪𑀺𑀧𑀸𑀭𑀓 𑀢𑁆𑀯𑀁, 𑀥𑀫𑁆𑀫𑀁 𑀅𑀘𑀸𑀭𑀻 𑀫𑀫 𑀓𑀢𑁆𑀢𑀼𑀧𑀼𑀢𑁆𑀢;
𑀅𑀜𑁆𑀜𑁄 𑀦𑀼 𑀢𑁂 𑀓𑁄 𑀇𑀥 𑀲𑁄𑀢𑁆𑀣𑀺𑀓𑀢𑁆𑀢𑀸, 𑀤𑁆𑀯𑀺𑀧𑀤𑁄 𑀦𑀭𑁄 𑀅𑀭𑀼𑀡𑁂 𑀚𑀻𑀯𑀮𑁄𑀓𑁂.
‘‘𑀢𑀼𑀯𑀁 𑀦𑀼 𑀲𑁂𑀝𑁆𑀞𑁄 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀺, 𑀢𑁆𑀯𑀁 𑀥𑀫𑁆𑀫𑀕𑀼𑀢𑁆𑀢𑁄 𑀥𑀫𑁆𑀫𑀯𑀺𑀤𑀽 𑀲𑀼𑀫𑁂𑀥𑁄;
𑀲𑁄 𑀥𑀫𑁆𑀫𑀕𑀼𑀢𑁆𑀢𑁄 𑀘𑀺𑀭𑀫𑁂𑀯 𑀚𑀻𑀯, 𑀥𑀫𑁆𑀫𑀜𑁆𑀘 𑀫𑁂 𑀤𑁂𑀲𑀬 𑀥𑀫𑁆𑀫𑀧𑀸𑀮.
‘‘𑀢𑀤𑀺𑀗𑁆𑀖 𑀅𑀪𑀺𑀧𑀸𑀭𑀓, 𑀲𑀼𑀡𑁄𑀳𑀺 𑀯𑀘𑀦𑀁 𑀫𑀫;
𑀥𑀫𑁆𑀫𑀁 𑀢𑁂 𑀤𑁂𑀲𑀬𑀺𑀲𑁆𑀲𑀸𑀫𑀺, 𑀲𑀢𑀁 𑀆𑀲𑁂𑀯𑀺𑀢𑀁 𑀅𑀳𑀁.
‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀻 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;
𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔𑀁.
‘‘𑀅𑀓𑁆𑀓𑁄𑀥𑀦𑀲𑁆𑀲 𑀯𑀺𑀚𑀺𑀢𑁂, 𑀞𑀺𑀢𑀥𑀫𑁆𑀫𑀲𑁆𑀲 𑀭𑀸𑀚𑀺𑀦𑁄;
𑀲𑀼𑀔𑀁 𑀫𑀦𑀼𑀲𑁆𑀲𑀸 𑀆𑀲𑁂𑀣, 𑀲𑀻𑀢𑀘𑁆𑀙𑀸𑀬𑀸𑀬 𑀲𑀗𑁆𑀖𑀭𑁂.
‘‘𑀦 ¶ 𑀘𑀸𑀳𑀫𑁂𑀢𑀁 𑀅𑀪𑀺𑀭𑁄𑀘𑀬𑀸𑀫𑀺, 𑀓𑀫𑁆𑀫𑀁 𑀅𑀲𑀫𑁂𑀓𑁆𑀔𑀓𑀢𑀁 𑀅𑀲𑀸𑀥𑀼;
𑀬𑁂 𑀯𑀸𑀧𑀺 𑀜𑀢𑁆𑀯𑀸𑀦 𑀲𑀬𑀁 𑀓𑀭𑁄𑀦𑁆𑀢𑀺, 𑀉𑀧𑀫𑀸 𑀇𑀫𑀸 𑀫𑀬𑁆𑀳𑀁 𑀢𑀼𑀯𑀁 𑀲𑀼𑀡𑁄𑀳𑀺.
‘‘𑀕𑀯𑀁 ¶ 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;
𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.
‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;
𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;
𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.
‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;
𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.
‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;
𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;
𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄.
‘‘𑀦 ¶ 𑀘𑀸𑀧𑀸𑀳𑀁 𑀅𑀥𑀫𑁆𑀫𑁂𑀦, 𑀅𑀫𑀭𑀢𑁆𑀢𑀫𑀪𑀺𑀧𑀢𑁆𑀣𑀬𑁂;
𑀇𑀫𑀁 𑀯𑀸 𑀧𑀣𑀯𑀺𑀁 𑀲𑀩𑁆𑀩𑀁, 𑀯𑀺𑀚𑁂𑀢𑀼𑀁 𑀅𑀪𑀺𑀧𑀸𑀭𑀓.
‘‘𑀬𑀜𑁆𑀳𑀺 𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀭𑀢𑀦𑀁 𑀇𑀥 𑀯𑀺𑀚𑁆𑀚𑀢𑀺;
𑀕𑀸𑀯𑁄 𑀤𑀸𑀲𑁄 𑀳𑀺𑀭𑀜𑁆𑀜𑀜𑁆𑀘, 𑀯𑀢𑁆𑀣𑀺𑀬𑀁 𑀳𑀭𑀺𑀘𑀦𑁆𑀤𑀦𑀁.
‘‘𑀅𑀲𑁆𑀲𑀺𑀢𑁆𑀣𑀺𑀬𑁄 𑀭𑀢𑀦𑀁 𑀫𑀡𑀺𑀓𑀜𑁆𑀘, 𑀬𑀜𑁆𑀘𑀸𑀧𑀺 𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀅𑀪𑀺𑀧𑀸𑀮𑀬𑀦𑁆𑀢𑀺;
𑀦 𑀢𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀘𑀭𑁂𑀬𑁆𑀬𑀁, 𑀫𑀚𑁆𑀛𑁂 𑀲𑀺𑀯𑀻𑀦𑀁 𑀉𑀲𑀪𑁄𑀫𑁆𑀳𑀺 𑀚𑀸𑀢𑁄.
‘‘𑀦𑁂𑀢𑀸 𑀳𑀺𑀢𑀸 𑀉𑀕𑁆𑀕𑀢𑁄 𑀭𑀝𑁆𑀞𑀧𑀸𑀮𑁄, 𑀥𑀫𑁆𑀫𑀁 𑀲𑀺𑀯𑀻𑀦𑀁 𑀅𑀧𑀘𑀸𑀬𑀫𑀸𑀦𑁄;
𑀲𑁄 𑀥𑀫𑁆𑀫𑀫𑁂𑀯𑀸𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄, 𑀢𑀲𑁆𑀫𑀸 𑀲𑀓𑁂 𑀘𑀺𑀢𑁆𑀢𑀯𑀲𑁂 𑀦 𑀯𑀢𑁆𑀢𑁄.
‘‘𑀅𑀤𑁆𑀥𑀸 ¶ 𑀢𑀼𑀯𑀁 𑀫𑀳𑀸𑀭𑀸𑀚, 𑀦𑀺𑀘𑁆𑀘𑀁 𑀅𑀩𑁆𑀬𑀲𑀦𑀁 𑀲𑀺𑀯𑀁;
𑀓𑀭𑀺𑀲𑁆𑀲𑀲𑀺 𑀘𑀺𑀭𑀁 𑀭𑀚𑁆𑀚𑀁, 𑀧𑀜𑁆𑀜𑀸 𑀳𑀺 𑀢𑀯 𑀢𑀸𑀤𑀺𑀲𑀻.
‘‘𑀏𑀢𑀁 𑀢𑁂 𑀅𑀦𑀼𑀫𑁄𑀤𑀸𑀫, 𑀬𑀁 𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀲𑀺;
𑀥𑀫𑁆𑀫𑀁 𑀧𑀫𑀚𑁆𑀚 𑀔𑀢𑁆𑀢𑀺𑀬𑁄, 𑀭𑀝𑁆𑀞𑀸 𑀘𑀯𑀢𑀺 𑀇𑀲𑁆𑀲𑀭𑁄.
‘‘𑀥𑀫𑁆𑀫𑀁 ¶ 𑀘𑀭 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀽𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀧𑀼𑀢𑁆𑀢𑀤𑀸𑀭𑁂𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀯𑀸𑀳𑀦𑁂𑀲𑀼 𑀩𑀮𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀭𑀝𑁆𑀞𑁂𑀲𑀼 𑀚𑀦𑀧𑀤𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀘;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀫𑀺𑀕𑀧𑀓𑁆𑀔𑀻𑀲𑀼 𑀔𑀢𑁆𑀢𑀺𑀬;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 ¶ 𑀘𑀭 𑀫𑀳𑀸𑀭𑀸𑀚, 𑀥𑀫𑁆𑀫𑁄 𑀘𑀺𑀡𑁆𑀡𑁄 𑀲𑀼𑀔𑀸𑀯𑀳𑁄;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀭𑀸𑀚 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺.
‘‘𑀥𑀫𑁆𑀫𑀁 𑀘𑀭 𑀫𑀳𑀸𑀭𑀸𑀚, 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸;
𑀲𑀼𑀘𑀺𑀡𑁆𑀡𑁂𑀦 𑀤𑀺𑀯𑀁 𑀧𑀢𑁆𑀢𑀸, 𑀫𑀸 𑀥𑀫𑁆𑀫𑀁 𑀭𑀸𑀚 𑀧𑀸𑀫𑀤𑁄’’𑀢𑀺.
𑀢𑀢𑁆𑀣 ¶ 𑀲𑀩𑁆𑀩𑀸𑀧𑀻𑀢𑀺, 𑀚𑀦𑀺𑀦𑁆𑀤, 𑀅𑀳𑀫𑁂𑀢𑀁 𑀏𑀓𑀓𑁄𑀯 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀦𑁂𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀫𑀫𑀜𑁆𑀘 𑀢𑀼𑀯𑀜𑁆𑀘 𑀅𑀜𑁆𑀜𑀸 𑀲𑀩𑁆𑀩𑀸𑀧𑀺 𑀧𑀚𑀸 𑀇𑀫𑀲𑁆𑀲 𑀓𑀢𑀲𑁆𑀲 𑀆𑀓𑀸𑀭𑀫𑀢𑁆𑀢𑀫𑁆𑀧𑀺 𑀦 𑀚𑀜𑁆𑀜𑀸 𑀦 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀪𑀼𑀲𑁂𑀳𑀻𑀢𑀺 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀦𑁆𑀢𑁄 𑀅𑀢𑁆𑀢𑀦𑁄 𑀢𑀡𑁆𑀳𑀸𑀯𑀦𑀣𑀁 𑀪𑀼𑀲𑀁 𑀓𑀭𑁄𑀳𑀺 𑀯𑀟𑁆𑀠𑁂𑀳𑀺 𑀫𑀦𑁄𑀭𑀣𑀁 𑀧𑀽𑀭𑁂𑀳𑀺. 𑀲𑀚𑀸𑀳𑀻𑀢𑀺 𑀫𑀦𑁄𑀭𑀣𑀁 𑀧𑀦 𑀧𑀽𑀭𑁂𑀢𑁆𑀯𑀸 𑀲𑀘𑁂 𑀢𑁂 𑀦 𑀭𑀼𑀘𑁆𑀘𑀢𑀺, 𑀅𑀣 𑀦𑀁 𑀲𑀚𑀸𑀳𑀺 𑀫𑀬𑁆𑀳𑀫𑁂𑀯 𑀧𑀝𑀺𑀤𑁂𑀳𑀺. 𑀓𑀫𑁆𑀫𑀓𑀭𑀦𑁆𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀬𑁄 𑀫𑀦𑀼𑀲𑁆𑀲𑁄 𑀧𑀸𑀧𑀓𑀁 𑀓𑀫𑁆𑀫𑀁 ¶ 𑀓𑀭𑁄𑀦𑁆𑀢𑁄, 𑀲𑁄 𑀧𑀘𑁆𑀙𑀸 𑀫𑀸 𑀇𑀥 𑀅𑀜𑁆𑀜𑁂 𑀇𑀤𑀁 𑀧𑀸𑀧𑀓𑀫𑁆𑀫𑀁 𑀫𑀜𑁆𑀜𑀺𑀁𑀲𑀼 𑀫𑀸 𑀚𑀸𑀦𑀦𑁆𑀢𑀽𑀢𑀺 𑀫𑀜𑁆𑀜𑀢𑀺 𑀘𑀺𑀦𑁆𑀢𑁂𑀢𑀺, 𑀤𑀼𑀘𑀺𑀦𑁆𑀢𑀺𑀢𑀫𑁂𑀢𑀁 𑀢𑀲𑁆𑀲. 𑀓𑀺𑀁𑀓𑀸𑀭𑀡𑀸? 𑀧𑀲𑁆𑀲𑀦𑁆𑀢𑀺 𑀪𑀽𑀢𑀸𑀦𑀺 𑀓𑀭𑁄𑀦𑁆𑀢𑀫𑁂𑀢𑀦𑁆𑀢𑀺 𑀬𑁂 𑀘 𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀧𑀼𑀢𑁆𑀢𑀸 𑀇𑀤𑁆𑀥𑀺𑀬𑀸 𑀬𑀼𑀢𑁆𑀢𑀸, 𑀢𑁂 𑀘 𑀦𑀁 𑀧𑀲𑁆𑀲𑀦𑁆𑀢𑀺𑀬𑁂𑀯. 𑀦 𑀫𑁂 𑀧𑀺𑀬𑀸𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀅𑀜𑁆𑀜𑁄 𑀦𑀼 𑀢𑁂 𑀓𑁄𑀘𑀺 ‘‘𑀇𑀥 𑀮𑁄𑀓𑀲𑁆𑀫𑀺𑀁 𑀲𑀓𑀮𑀸𑀬𑀧𑀺 𑀧𑀣𑀯𑀺𑀬𑀸 𑀦 𑀫𑁂 𑀉𑀫𑁆𑀫𑀸𑀤𑀦𑁆𑀢𑀻 𑀧𑀺𑀬𑀸’’𑀢𑀺 𑀏𑀯𑀁 𑀲𑀤𑁆𑀤𑀳𑁂𑀬𑁆𑀬.
𑀲𑀻𑀳𑁄𑀯 𑀲𑁂𑀮𑀲𑁆𑀲 𑀕𑀼𑀳𑀦𑁆𑀢𑀺, 𑀫𑀳𑀸𑀭𑀸𑀚, 𑀲𑀘𑁂 𑀢𑁆𑀯𑀁 𑀢𑀁 𑀇𑀥 𑀦 𑀆𑀦𑁂𑀲𑀺, 𑀅𑀣 𑀬𑀣𑀸 𑀲𑀻𑀳𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑁂 𑀉𑀧𑁆𑀧𑀦𑁆𑀦𑁂 𑀲𑀻𑀳𑀧𑁄𑀢𑀺𑀓𑀸𑀬 𑀯𑀲𑀦𑀝𑁆𑀞𑀸𑀦𑀁 𑀫𑀡𑀺𑀕𑀼𑀳𑀁 𑀉𑀧𑁂𑀢𑀺, 𑀏𑀯𑀁 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙, 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀢𑁆𑀣𑀦𑀁 𑀧𑀽𑀭𑁂𑀳𑀻𑀢𑀺. 𑀲𑀼𑀔𑀧𑁆𑀨𑀮𑀦𑁆𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀧𑀡𑁆𑀟𑀺𑀢𑀸 𑀅𑀢𑁆𑀢𑀦𑁄 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀸 𑀲𑀫𑀸𑀦𑀸 𑀦 𑀲𑀼𑀔𑀯𑀺𑀧𑀸𑀓𑀤𑀸𑀬𑀓𑀓𑀫𑁆𑀫𑀁 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀲𑀫𑁆𑀫𑁄𑀳𑀺𑀢𑀸 𑀯𑀸𑀧𑀺 𑀳𑀼𑀢𑁆𑀯𑀸 𑀫𑁄𑀳𑁂𑀦 𑀫𑀽𑀴𑁆𑀳𑀸 𑀲𑀼𑀔𑁂𑀦 𑀫𑀢𑁆𑀢𑀸 𑀧𑀸𑀧𑀓𑀫𑁆𑀫𑀁 𑀦𑀸𑀫 𑀦 𑀲𑀫𑀸𑀘𑀭𑀦𑁆𑀢𑀺. 𑀬𑀣𑀸𑀲𑀼𑀔𑀁, 𑀲𑀸𑀫𑀺, 𑀓𑀭𑁄𑀳𑀺 𑀓𑀸𑀫𑀦𑁆𑀢𑀺, 𑀲𑀸𑀫𑀺 𑀲𑀺𑀯𑀺𑀭𑀸𑀚, 𑀅𑀢𑁆𑀢𑀦𑁄 𑀤𑀸𑀲𑀺𑀁 𑀧𑀭𑀺𑀘𑀸𑀭𑁂𑀦𑁆𑀢𑀲𑁆𑀲 𑀕𑀭𑀳𑀸 𑀦𑀸𑀫 𑀦𑀢𑁆𑀣𑀺, 𑀢𑁆𑀯𑀁 𑀬𑀣𑀸𑀲𑀼𑀔𑀁 𑀬𑀣𑀸𑀚𑁆𑀛𑀸𑀲𑀬𑀁 𑀓𑀸𑀫𑀁 𑀓𑀭𑁄𑀳𑀺, 𑀅𑀢𑁆𑀢𑀦𑁄 𑀇𑀘𑁆𑀙𑀁 𑀧𑀽𑀭𑁂𑀳𑀻𑀢𑀺. 𑀦 𑀢𑁂𑀦 𑀲𑁄 𑀚𑀻𑀯𑀢𑀻𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀬𑁄 ‘‘𑀇𑀲𑁆𑀲𑀭𑁄𑀫𑁆𑀳𑀻’’𑀢𑀺 𑀧𑀸𑀧𑀁 𑀓𑀭𑁄𑀢𑀺, 𑀓𑀢𑁆𑀯𑀸 𑀘 𑀓𑀺𑀁 𑀫𑀁 𑀤𑁂𑀯𑀫𑀦𑀼𑀲𑁆𑀲𑀸 𑀯𑀓𑁆𑀔𑀦𑁆𑀢𑀻𑀢𑀺 𑀦 𑀉𑀢𑁆𑀢𑀲𑀢𑀺 𑀦 𑀑𑀢𑁆𑀢𑀧𑁆𑀧𑀢𑀺, 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀦 𑀘 𑀤𑀻𑀖𑀓𑀸𑀮𑀁 𑀚𑀻𑀯𑀢𑀺, 𑀔𑀺𑀧𑁆𑀧𑀫𑁂𑀯 𑀫𑀭𑀢𑀺, 𑀤𑁂𑀯𑀢𑀸𑀧𑀺 𑀧𑀦 ‘‘𑀓𑀺𑀁 𑀇𑀫𑀲𑁆𑀲 𑀧𑀸𑀧𑀭𑀜𑁆𑀜𑁄 𑀭𑀚𑁆𑀚𑁂𑀦, 𑀯𑀭𑀫𑀲𑁆𑀲 𑀯𑀸𑀴𑀼𑀓𑀖𑀝𑀁 𑀕𑀮𑁂 𑀩𑀦𑁆𑀥𑀺𑀢𑁆𑀯𑀸 𑀫𑀭𑀡’’𑀦𑁆𑀢𑀺 𑀮𑀸𑀫𑀓𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑀺.
𑀅𑀜𑁆𑀜𑀸𑀢𑀓𑀦𑁆𑀢𑀺, 𑀫𑀳𑀸𑀭𑀸𑀚, 𑀅𑀜𑁆𑀜𑁂𑀲𑀁 𑀲𑀦𑁆𑀢𑀓𑀁 𑀢𑁂𑀳𑀺 𑀲𑀸𑀫𑀺𑀓𑁂𑀳𑀺 𑀧𑀤𑀺𑀦𑁆𑀦𑀁 𑀤𑀸𑀦𑀁 𑀬𑁂 𑀅𑀢𑁆𑀢𑀦𑁄 𑀥𑀫𑁆𑀫𑁂 ¶ 𑀞𑀺𑀢𑀸 𑀧𑀝𑀺𑀘𑁆𑀙𑀦𑁆𑀢𑀺, 𑀢𑁂 𑀢𑀢𑁆𑀣 𑀧𑀝𑀺𑀘𑁆𑀙𑀓𑀸 𑀘 𑀤𑀸𑀬𑀓𑀸 𑀘 𑀲𑀩𑁆𑀩𑁂𑀧𑀺 𑀲𑀼𑀔𑀧𑁆𑀨𑀮𑀫𑁂𑀯 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀧𑀝𑀺𑀕𑁆𑀕𑀸𑀳𑀓𑁂 𑀳𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂 𑀢𑀁 𑀤𑀸𑀦𑀁 𑀤𑀸𑀬𑀓𑀲𑁆𑀲 𑀫𑀳𑀦𑁆𑀢𑀁 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺. 𑀬𑁄 𑀅𑀢𑁆𑀢𑀤𑀼𑀓𑁆𑀔𑁂𑀦𑀸𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀬𑁄 𑀅𑀢𑁆𑀢𑀦𑁄 𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑁄 𑀢𑀁 𑀧𑀭𑀲𑁆𑀲 𑀤𑀳𑀢𑀺, 𑀅𑀢𑁆𑀢𑀦𑁄 𑀲𑀭𑀻𑀭𑀢𑁄 𑀅𑀧𑀦𑁂𑀢𑁆𑀯𑀸 𑀧𑀭𑀲𑁆𑀲 𑀲𑀭𑀻𑀭𑁂 𑀔𑀺𑀧𑀢𑀺, 𑀧𑀭𑀲𑁆𑀲 𑀯𑀸 𑀲𑀼𑀔𑁂𑀦 𑀅𑀢𑁆𑀢𑀦𑁄 𑀲𑀼𑀔𑀁 𑀤𑀳𑀢𑀺, 𑀧𑀭𑀲𑁆𑀲 𑀲𑀼𑀔𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀺 𑀧𑀓𑁆𑀔𑀺𑀧𑀢𑀺, ‘‘𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀺, ‘‘𑀅𑀢𑁆𑀢𑀸𑀦𑀁 𑀲𑀼𑀔𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀺, ‘‘𑀅𑀢𑁆𑀢𑀸𑀦𑀁 𑀲𑀼𑀔𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀲𑁆𑀲 𑀲𑀼𑀔𑀁 𑀦𑀸𑀲𑁂𑀢𑀺, 𑀦 𑀲𑁄 𑀥𑀫𑁆𑀫𑀁 𑀚𑀸𑀦𑀸𑀢𑀺. 𑀬𑁄 𑀧𑀦 𑀏𑀯𑀁 𑀚𑀸𑀦𑀸𑀢𑀺 ‘‘𑀬𑀣𑁂𑀯𑀺𑀤𑀁 𑀫𑀬𑁆𑀳𑀁 ¶ 𑀲𑀼𑀔𑀤𑀼𑀓𑁆𑀔𑀁, 𑀢𑀣𑀸 𑀧𑀭𑁂𑀲’’𑀦𑁆𑀢𑀺, 𑀲 𑀯𑁂𑀤𑀺 𑀥𑀫𑁆𑀫𑀁 𑀚𑀸𑀦𑀸𑀢𑀺 𑀦𑀸𑀫𑀸𑀢𑀺 𑀅𑀬𑀫𑁂𑀢𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄.
𑀧𑀺𑀬𑁂𑀦 𑀢𑁂 𑀤𑀫𑁆𑀫𑀻𑀢𑀺 𑀧𑀺𑀬𑁂𑀦 𑀓𑀸𑀭𑀡𑀪𑀽𑀢𑁂𑀦 𑀧𑀺𑀬𑀁 𑀨𑀮𑀁 𑀧𑀢𑁆𑀣𑁂𑀦𑁆𑀢𑁄 𑀤𑀫𑁆𑀫𑀻𑀢𑀺 𑀅𑀢𑁆𑀣𑁄. 𑀧𑀺𑀬𑀁 𑀮𑀪𑀦𑁆𑀢𑀻𑀢𑀺 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀸 𑀧𑀺𑀬𑀫𑁂𑀯 𑀮𑀪𑀦𑁆𑀢𑀺. 𑀓𑀸𑀫𑀳𑁂𑀢𑀼𑀓𑀦𑁆𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓 ¶ , 𑀓𑀸𑀫𑀳𑁂𑀢𑀼𑀓𑀁 𑀅𑀬𑀼𑀢𑁆𑀢𑀁 𑀓𑀢𑁆𑀯𑀸 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀲𑁆𑀲𑀸𑀫𑀻’’𑀢𑀺 𑀫𑁂 𑀧𑀭𑀺𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺. 𑀫𑀬𑁆𑀳 𑀲𑀢𑀺𑀦𑁆𑀢𑀺 𑀫𑀫 𑀲𑀦𑁆𑀢𑀓𑀁. ‘‘𑀫𑀬𑁆𑀳 𑀲𑀢𑀻’’𑀢𑀺𑀧𑀺 𑀧𑀸𑀞𑁄, 𑀫𑀫 𑀲𑀦𑁆𑀢𑀓𑀸𑀢𑀺 𑀏𑀯𑀁 𑀫𑀜𑁆𑀜𑀫𑀸𑀦𑁄 𑀲𑀘𑁂 𑀢𑁆𑀯𑀁 𑀢𑀁 𑀦 𑀓𑀸𑀫𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀚𑀦𑀲𑁆𑀲𑀸𑀢𑀺 𑀲𑀩𑁆𑀩𑀸 𑀲𑁂𑀦𑀺𑀬𑁄 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀩𑁆𑀩𑀚𑀦𑀲𑁆𑀲 𑀅𑀬𑀁 𑀫𑀬𑁆𑀳𑀁 𑀅𑀳𑀺𑀢𑀸𑀢𑀺 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀺. 𑀢𑀢𑁄 𑀅𑀯𑁆𑀳𑀬𑁂𑀲𑀻𑀢𑀺 𑀢𑀢𑁄 𑀢𑀁 𑀅𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀬𑁆𑀬𑀸𑀲𑀺. 𑀅𑀤𑀽𑀲𑀺𑀬𑀦𑁆𑀢𑀺 𑀅𑀦𑀧𑀭𑀸𑀥𑀁. 𑀓𑀢𑁆𑀢𑁂𑀢𑀺 𑀢𑀫𑁂𑀯 𑀅𑀧𑀭𑁂𑀦 𑀦𑀸𑀫𑁂𑀦 𑀆𑀮𑀧𑀢𑀺. 𑀲𑁄 𑀳𑀺 𑀭𑀜𑁆𑀜𑁄 𑀳𑀺𑀢𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀓𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀦 𑀘𑀸𑀧𑀺 𑀢𑁆𑀬𑀲𑁆𑀲𑀸𑀢𑀺 𑀏𑀯𑀁 𑀅𑀓𑀺𑀘𑁆𑀘𑀓𑀸𑀭𑀻𑀢𑀺 𑀦𑀕𑀭𑁂 𑀢𑀯 𑀓𑁄𑀘𑀺 𑀧𑀓𑁆𑀔𑁄𑀧𑀺 𑀦 𑀪𑀯𑁂𑀬𑁆𑀬.
𑀦𑀺𑀦𑁆𑀤𑀦𑁆𑀢𑀺 𑀦 𑀓𑁂𑀯𑀮𑀁 𑀉𑀧𑀯𑀸𑀤𑀫𑁂𑀯, 𑀲𑀘𑁂𑀧𑀺 𑀫𑀁 𑀓𑁄𑀘𑀺 𑀲𑀫𑁆𑀫𑀼𑀔𑀸 𑀦𑀺𑀦𑁆𑀤𑀺𑀲𑁆𑀲𑀢𑀺 𑀯𑀸 𑀧𑀲𑀁𑀲𑀺𑀲𑁆𑀲𑀢𑀺 𑀯𑀸, 𑀤𑁄𑀲𑀁 𑀯𑀸 𑀧𑀦 𑀆𑀭𑁄𑀧𑁂𑀦𑁆𑀢𑁄 𑀕𑀭𑀳𑀺𑀲𑁆𑀲𑀢𑀺, 𑀢𑀫𑁆𑀧𑀸𑀳𑀁 𑀦𑀺𑀦𑁆𑀤𑀁 𑀧𑀲𑀁𑀲𑀁 𑀕𑀭𑀳𑀜𑁆𑀘 𑀲𑀩𑁆𑀩𑀁 𑀲𑀳𑀺𑀲𑁆𑀲𑀸𑀫𑀺, 𑀲𑀩𑁆𑀩𑀫𑁂𑀢𑀁 𑀫𑀫 𑀆𑀕𑀘𑁆𑀙𑀢𑀽𑀢𑀺 𑀯𑀤𑀢𑀺. 𑀢𑀫𑁆𑀳𑀸𑀢𑀺 𑀬𑁄 𑀏𑀢𑁂 𑀦𑀺𑀦𑁆𑀤𑀸𑀤𑀬𑁄 𑀦 𑀕𑀡𑁆𑀳𑀸𑀢𑀺, 𑀢𑀫𑁆𑀳𑀸 𑀧𑀼𑀭𑀺𑀲𑀸 𑀇𑀲𑁆𑀲𑀭𑀺𑀬𑀲𑀗𑁆𑀔𑀸𑀢𑀸 𑀲𑀺𑀭𑀻 𑀘 𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀮𑀓𑁆𑀔𑀻 𑀘 𑀣𑀮𑀝𑁆𑀞𑀸𑀦𑀢𑁄 𑀲𑀼𑀯𑀼𑀝𑁆𑀞𑀺𑀲𑀗𑁆𑀔𑀸𑀢𑁄 𑀆𑀧𑁄 𑀯𑀺𑀬 𑀅𑀧𑁂𑀢𑀺 𑀦 𑀧𑀢𑀺𑀝𑁆𑀞𑀸𑀢𑀻𑀢𑀺. 𑀏𑀢𑁆𑀢𑁄𑀢𑀺 𑀇𑀢𑁄 𑀫𑀫 𑀢𑀲𑁆𑀲𑀸 𑀧𑀭𑀺𑀘𑁆𑀘𑀢𑁆𑀢𑀓𑀸𑀭𑀡𑀸. 𑀥𑀫𑁆𑀫𑀸𑀢𑀺𑀲𑀸𑀭𑀜𑁆𑀘𑀸𑀢𑀺 𑀥𑀫𑁆𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀓𑀼𑀲𑀮𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀳𑁄𑀢𑀺. 𑀧𑀘𑁆𑀘𑀼𑀢𑁆𑀢𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀺 𑀥𑀸𑀭𑀬𑀺𑀲𑁆𑀲𑀸𑀫𑀺. 𑀣𑀸𑀯𑀭𑀸𑀦𑀁 𑀢𑀲𑀸𑀦𑀦𑁆𑀢𑀺 𑀬𑀣𑀸 𑀫𑀳𑀸𑀧𑀣𑀯𑀻 𑀔𑀻𑀡𑀸𑀲𑀯𑀸𑀦𑀜𑁆𑀘 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀓𑀺𑀜𑁆𑀘𑀺 𑀲𑀫𑁆𑀧𑀝𑀺𑀘𑁆𑀙𑀢𑀺 𑀲𑀩𑁆𑀩𑀁 𑀅𑀥𑀺𑀯𑀸𑀲𑁂𑀢𑀺, 𑀢𑀣𑁂𑀯𑀸𑀳𑀫𑁆𑀧𑀺 𑀲𑀩𑁆𑀩𑀫𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀺 𑀅𑀥𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀏𑀓𑁄𑀯𑀺𑀫𑀦𑁆𑀢𑀺 𑀅𑀳𑀁 𑀏𑀓𑁄𑀯 𑀇𑀫𑀫𑁆𑀧𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀪𑀸𑀭𑀁 𑀳𑀸𑀭𑀬𑀺𑀲𑁆𑀲𑀸𑀫𑀺 𑀥𑀸𑀭𑀬𑀺𑀲𑁆𑀲𑀸𑀫𑀺 𑀯𑀳𑀺𑀲𑁆𑀲𑀸𑀫𑀺. 𑀥𑀫𑁆𑀫𑁂 𑀞𑀺𑀢𑁄𑀢𑀺 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑁂 𑀧𑀯𑁂𑀡𑀺𑀥𑀫𑁆𑀫𑁂 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑁂 𑀘 𑀞𑀺𑀢𑁄 𑀳𑀼𑀢𑁆𑀯𑀸.
𑀲𑀕𑁆𑀕𑀽𑀧𑀕𑀦𑁆𑀢𑀺 ¶ , 𑀤𑁂𑀯, 𑀧𑀼𑀜𑁆𑀜𑀓𑀫𑁆𑀫𑀁 𑀦𑀸𑀫𑁂𑀢𑀁 𑀲𑀕𑁆𑀕𑀽𑀧𑀕𑀁 𑀳𑁄𑀢𑀺. 𑀬𑀜𑁆𑀜𑁂 𑀥𑀦𑀦𑁆𑀢𑀺 𑀬𑀜𑁆𑀜𑀥𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀔𑀸𑀢𑀺 𑀉𑀫𑁆𑀫𑀸𑀤𑀦𑁆𑀢𑀻𑀧𑀺 𑀫𑀫 𑀲𑀳𑀸𑀬𑀺𑀓𑀸, 𑀢𑁆𑀯𑀫𑁆𑀧𑀺 ¶ 𑀲𑀳𑀸𑀬𑀓𑁄. 𑀧𑀺𑀢𑀭𑁄𑀢𑀺 𑀩𑁆𑀭𑀳𑁆𑀫𑀸𑀦𑁄. 𑀲𑀩𑁆𑀩𑁂𑀢𑀺 𑀦 𑀓𑁂𑀯𑀮𑀁 𑀤𑁂𑀯𑀩𑁆𑀭𑀳𑁆𑀫𑀸𑀦𑁄𑀯, 𑀲𑀩𑁆𑀩𑁂 𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀫𑀁 𑀧𑀲𑁆𑀲𑀣, ‘‘𑀪𑁄, 𑀲𑀳𑀸𑀬𑀓𑀲𑁆𑀲 𑀪𑀭𑀺𑀬𑀸 𑀲𑀳𑀸𑀬𑀺𑀓𑀸 𑀇𑀫𑀺𑀦𑀸 𑀕𑁂𑀳𑁂 𑀓𑀢𑀸’’𑀢𑀺 𑀦𑀺𑀦𑁆𑀤𑁂𑀬𑁆𑀬𑀼𑀁. 𑀦 𑀳𑁂𑀢𑀥𑀫𑁆𑀫𑀦𑁆𑀢𑀺 𑀦 𑀳𑀺 𑀏𑀢𑀁 𑀅𑀥𑀫𑁆𑀫𑀺𑀓𑀁. 𑀬𑀁 𑀢𑁂 𑀫𑀬𑀸𑀢𑀺 𑀬𑀲𑁆𑀫𑀸 𑀫𑀬𑀸 𑀲𑀸 𑀢𑀼𑀬𑁆𑀳𑀁 𑀤𑀺𑀦𑁆𑀦𑀸, 𑀢𑀲𑁆𑀫𑀸 𑀏𑀢𑀁 𑀅𑀥𑀫𑁆𑀫𑁄𑀢𑀺 𑀦 𑀯𑀤𑀺𑀲𑁆𑀲𑀦𑁆𑀢𑀺. 𑀲𑀢𑀦𑁆𑀢𑀺 𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀪𑀸𑀯𑀦𑀸𑀲𑀻𑀮𑀸𑀘𑀸𑀭𑀲𑀗𑁆𑀔𑀸𑀢𑀸𑀦𑀺 𑀥𑀫𑁆𑀫𑀸𑀦𑀺 𑀲𑀼𑀯𑀡𑁆𑀡𑀺𑀢𑀸𑀦𑀺 𑀲𑀫𑀼𑀤𑁆𑀤𑀯𑁂𑀮𑀸𑀯 𑀤𑀼𑀭𑀘𑁆𑀘𑀬𑀸𑀦𑀺, 𑀢𑀲𑁆𑀫𑀸 𑀬𑀣𑀸 𑀲𑀫𑀼𑀤𑁆𑀤𑁄 𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀏𑀯𑀫𑀳𑀫𑁆𑀧𑀺 𑀲𑀻𑀮𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.
𑀆𑀳𑀼𑀦𑁂𑀬𑁆𑀬𑁄 𑀫𑁂𑀲𑀻𑀢𑀺, 𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀫 𑀆𑀳𑀼𑀦𑀧𑀸𑀳𑀼𑀦𑀲𑀓𑁆𑀓𑀸𑀭𑀲𑁆𑀲𑀸𑀦𑀼𑀘𑁆𑀙𑀯𑀺𑀓𑁄. 𑀥𑀸𑀢𑀸 𑀯𑀺𑀥𑀸𑀢𑀸 𑀘𑀲𑀺 𑀓𑀸𑀫𑀧𑀸𑀮𑁄𑀢𑀺 𑀢𑁆𑀯𑀁 𑀫𑀫, 𑀤𑁂𑀯, 𑀥𑀸𑀭𑀡𑀢𑁄 𑀥𑀸𑀢𑀸 𑀇𑀲𑁆𑀲𑀭𑀺𑀬𑀲𑀼𑀔𑀲𑁆𑀲 𑀯𑀺𑀤𑀳𑀦𑀢𑁄 𑀯𑀺𑀥𑀸𑀢𑀸 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀸𑀦𑀁 ¶ 𑀓𑀸𑀫𑀸𑀦𑀁 𑀧𑀸𑀮𑀦𑀢𑁄 𑀓𑀸𑀫𑀧𑀸𑀮𑁄. 𑀢𑀬𑀻 𑀳𑀼𑀢𑀸𑀢𑀺 𑀢𑀼𑀬𑁆𑀳𑀁 𑀤𑀺𑀦𑁆𑀦𑀸. 𑀓𑀸𑀫𑁂𑀦 𑀫𑁂𑀢𑀺 𑀫𑀫 𑀓𑀸𑀫𑁂𑀦 𑀫𑀫 𑀧𑀢𑁆𑀣𑀦𑀸𑀬 𑀉𑀫𑁆𑀫𑀸𑀤𑀦𑁆𑀢𑀺𑀁 𑀧𑀝𑀺𑀘𑁆𑀙𑀸𑀢𑀺 𑀏𑀯𑀁 𑀅𑀪𑀺𑀧𑀸𑀭𑀓𑁄 𑀭𑀜𑁆𑀜𑁄 𑀤𑁂𑀢𑀺. 𑀭𑀸𑀚𑀸 ‘‘𑀦 𑀫𑀬𑁆𑀳𑀁 𑀅𑀢𑁆𑀣𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀪𑀽𑀫𑀺𑀬𑀁 𑀧𑀢𑀺𑀢𑀁 𑀲𑀸𑀓𑀼𑀡𑀺𑀓𑀧𑀘𑁆𑀙𑀺𑀁 𑀧𑀺𑀝𑁆𑀞𑀺𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀅𑀝𑀯𑀺𑀬𑀁 𑀔𑀺𑀧𑀦𑁆𑀢𑀸 𑀯𑀺𑀬 𑀉𑀪𑁄𑀧𑀺 𑀦𑀁 𑀚𑀳𑀦𑁆𑀢𑁂𑀯. 𑀇𑀤𑀸𑀦𑀺 𑀭𑀸𑀚𑀸 𑀧𑀼𑀦 𑀅𑀓𑀣𑀦𑀢𑁆𑀣𑀸𑀬 𑀢𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 ‘‘𑀅𑀤𑁆𑀥𑀸 𑀳𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀢𑁆𑀢𑀼𑀧𑀼𑀢𑁆𑀢𑀸𑀢𑀺 𑀧𑀺𑀢𑀸𑀧𑀺𑀲𑁆𑀲 𑀓𑀢𑁆𑀢𑀸𑀯, 𑀢𑁂𑀦 𑀦𑀁 𑀏𑀯𑀁 𑀆𑀮𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀤𑁆𑀥𑀸 𑀢𑁆𑀯𑀁 𑀇𑀢𑁄 𑀧𑀼𑀩𑁆𑀩𑁂 𑀫𑀬𑁆𑀳𑀁 𑀲𑀩𑁆𑀩𑀥𑀫𑁆𑀫𑀁 𑀅𑀘𑀭𑀺, 𑀳𑀺𑀢𑀫𑁂𑀯 𑀯𑀼𑀟𑁆𑀠𑀺𑀫𑁂𑀯 𑀅𑀓𑀸𑀲𑀺, 𑀇𑀤𑀸𑀦𑀺 𑀧𑀦 𑀧𑀝𑀺𑀧𑀓𑁆𑀔𑁄 𑀳𑀼𑀢𑁆𑀯𑀸 𑀩𑀳𑀼𑀁 𑀓𑀣𑁂𑀲𑀺, ‘‘𑀫𑀸 𑀏𑀯𑀁 𑀯𑀺𑀧𑁆𑀧𑀮𑀧𑀲𑀺, 𑀅𑀜𑁆𑀜𑁄 𑀦𑀼 𑀢𑁂 𑀤𑁆𑀯𑀺𑀧𑀤𑁄 𑀦𑀭𑁄, 𑀓𑁄 𑀇𑀥 𑀚𑀻𑀯𑀮𑁄𑀓𑁂 𑀅𑀭𑀼𑀡𑁂𑀬𑁂𑀯 𑀲𑁄𑀢𑁆𑀣𑀺𑀓𑀢𑁆𑀢𑀸, 𑀲𑀘𑁂 𑀳𑀺 𑀅𑀳𑀁 𑀯𑀺𑀬 𑀅𑀜𑁆𑀜𑁄 𑀭𑀸𑀚𑀸 𑀢𑀯 𑀪𑀭𑀺𑀬𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀪𑀯𑀺𑀲𑁆𑀲, 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀢𑀯 𑀲𑀻𑀲𑀁 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀖𑀭𑁂 𑀓𑀭𑁂𑀬𑁆𑀬, 𑀅𑀳𑀁 𑀧𑀦 𑀅𑀓𑀼𑀲𑀮𑀪𑀬𑁂𑀦𑁂𑀯 𑀦 𑀓𑀭𑁄𑀫𑀺, 𑀢𑀼𑀡𑁆𑀳𑀻 𑀳𑁄𑀳𑀺, 𑀦 𑀫𑁂 𑀏𑀢𑀸𑀬 𑀅𑀢𑁆𑀣𑁄’’𑀢𑀺 𑀢𑀁 𑀲𑀦𑁆𑀢𑀚𑁆𑀚𑁂𑀲𑀺.
𑀲𑁄 𑀢𑀁 𑀲𑀼𑀢𑁆𑀯𑀸 𑀧𑀼𑀦 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀜𑁆𑀜𑁄 𑀣𑀼𑀢𑀺𑀯𑀲𑁂𑀦 ‘‘𑀢𑀼𑀯𑀁 𑀦𑀽’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀢𑁆𑀯𑀜𑁆𑀜𑁂𑀯 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑁂𑀲𑀁 𑀦𑀭𑀺𑀦𑁆𑀤𑀸𑀦𑀁 𑀲𑁂𑀝𑁆𑀞𑁄, 𑀢𑁆𑀯𑀁 𑀅𑀦𑀼𑀢𑁆𑀢𑀭𑁄, 𑀢𑁆𑀯𑀁 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑀧𑀯𑁂𑀡𑀺𑀥𑀫𑁆𑀫𑀲𑀼𑀘𑀭𑀺𑀢𑀥𑀫𑁆𑀫𑀸𑀦𑀁 𑀕𑁄𑀧𑀸𑀬𑀦𑁂𑀦 𑀥𑀫𑁆𑀫𑀕𑀼𑀢𑁆𑀢𑁄, 𑀢𑁂𑀲𑀁 𑀯𑀺𑀤𑀺𑀢𑀢𑁆𑀢𑀸 𑀥𑀫𑁆𑀫𑀯𑀺𑀤𑀽 𑀢𑁆𑀯𑀁 𑀲𑀼𑀫𑁂𑀥𑁄, 𑀲𑁄 𑀢𑁆𑀯𑀁 𑀬𑀁 𑀥𑀫𑁆𑀫𑀁 𑀕𑁄𑀧𑁂𑀲𑀺, 𑀢𑁂𑀦𑁂𑀯 𑀕𑀼𑀢𑁆𑀢𑁄 𑀘𑀻𑀭𑀁 𑀚𑀻𑀯, 𑀥𑀫𑁆𑀫𑀜𑁆𑀘 𑀫𑁂 𑀤𑁂𑀲𑁂𑀳𑀺 𑀥𑀫𑁆𑀫𑀧𑀸𑀮𑀓, 𑀥𑀫𑁆𑀫𑀕𑁄𑀧𑀓, 𑀭𑀸𑀚𑀯𑀭𑀸𑀢𑀺.
𑀅𑀣 ¶ 𑀭𑀸𑀚𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ‘‘𑀢𑀤𑀺𑀗𑁆𑀖𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀲𑁆𑀫𑀸 ¶ 𑀫𑀁 𑀢𑁆𑀯𑀁 𑀘𑁄𑀤𑁂𑀲𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀢𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀆𑀲𑁂𑀯𑀺𑀢𑀁. 𑀲𑀸𑀥𑀽𑀢𑀺 𑀲𑀼𑀦𑁆𑀤𑀭𑁄 𑀧𑀲𑀢𑁆𑀣𑁄. 𑀯𑀺𑀦𑀺𑀘𑁆𑀙𑀬𑀧𑀯𑁂𑀡𑀺𑀲𑀼𑀘𑀭𑀺𑀢𑀥𑀫𑁆𑀫𑁂 𑀭𑁄𑀘𑁂𑀢𑀻𑀢𑀺 𑀥𑀫𑁆𑀫𑀭𑀼𑀘𑀺. 𑀢𑀸𑀤𑀺𑀲𑁄 𑀳𑀺 𑀚𑀻𑀯𑀺𑀢𑀁 𑀚𑀳𑀦𑁆𑀢𑁄𑀧𑀺 𑀅𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀲𑀸𑀥𑀼. 𑀧𑀜𑁆𑀜𑀸𑀡𑀯𑀸𑀢𑀺 𑀜𑀸𑀡𑀲𑀫𑁆𑀧𑀦𑁆𑀦𑁄. 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄𑀢𑀺 𑀫𑀺𑀢𑁆𑀢𑀲𑁆𑀲 𑀅𑀤𑀼𑀲𑁆𑀲𑀦𑀪𑀸𑀯𑁄. 𑀞𑀺𑀢𑀥𑀫𑁆𑀫𑀲𑁆𑀲𑀸𑀢𑀺 𑀧𑀢𑀺𑀝𑁆𑀞𑀺𑀢𑀢𑀺𑀯𑀺𑀥𑀥𑀫𑁆𑀫𑀲𑁆𑀲. 𑀆𑀲𑁂𑀣𑀸𑀢𑀺 𑀆𑀲𑁂𑀬𑁆𑀬𑀼𑀁 𑀦𑀺𑀲𑀻𑀤𑁂𑀬𑁆𑀬𑀼𑀁. 𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢𑀁, 𑀘𑀢𑁆𑀢𑀸𑀭𑁄𑀧𑀺 𑀇𑀭𑀺𑀬𑀸𑀧𑀣𑁂 𑀲𑀼𑀔𑀁 𑀓𑀧𑁆𑀧𑁂𑀬𑁆𑀬𑀼𑀦𑁆𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀲𑀻𑀢𑀘𑁆𑀙𑀸𑀬𑀸𑀬𑀸𑀢𑀺 𑀧𑀼𑀢𑁆𑀢𑀤𑀸𑀭𑀜𑀸𑀢𑀺𑀫𑀺𑀢𑁆𑀢𑀸𑀦𑀁 𑀲𑀻𑀢𑀮𑀸𑀬 𑀙𑀸𑀬𑀸𑀬. 𑀲𑀗𑁆𑀖𑀭𑁂𑀢𑀺 𑀲𑀓𑀖𑀭𑁂, 𑀅𑀢𑁆𑀢𑀦𑁄 𑀕𑁂𑀳𑁂𑀢𑀺 𑀅𑀢𑁆𑀣𑁄. 𑀅𑀥𑀫𑁆𑀫𑀩𑀮𑀺𑀤𑀡𑁆𑀟𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀸 𑀲𑀼𑀔𑀁 𑀯𑀲𑁂𑀬𑁆𑀬𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀘𑀸𑀳𑀫𑁂𑀢𑀦𑁆𑀢𑀺, 𑀲𑀫𑁆𑀫 𑀅𑀪𑀺𑀧𑀸𑀭𑀓, 𑀬𑀫𑁂𑀢𑀁 𑀅𑀲𑀫𑁂𑀓𑁆𑀔𑀺𑀢𑁆𑀯𑀸 𑀓𑀢𑀁 𑀅𑀲𑀸𑀥𑀼𑀓𑀫𑁆𑀫𑀁, 𑀏𑀢𑀁 𑀅𑀳𑀁 𑀦 𑀭𑁄𑀘𑀬𑀸𑀫𑀺. 𑀬𑁂 𑀯𑀸𑀧𑀺 𑀜𑀢𑁆𑀯𑀸𑀦𑀸𑀢𑀺 𑀬𑁂 𑀯𑀸 𑀧𑀦 𑀭𑀸𑀚𑀸𑀦𑁄 𑀜𑀢𑁆𑀯𑀸 𑀢𑀼𑀮𑁂𑀢𑁆𑀯𑀸 𑀢𑀻𑀭𑁂𑀢𑁆𑀯𑀸 𑀲𑀬𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀸𑀳𑀁 𑀓𑀫𑁆𑀫𑀁 𑀭𑁄𑀘𑁂𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀫𑀸 𑀇𑀫𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀢𑁆𑀯𑀁 𑀫𑀬𑁆𑀳𑀁 𑀇𑀫𑀸 𑀤𑁆𑀯𑁂 𑀉𑀧𑀫𑀸 𑀲𑀼𑀡𑁄𑀳𑀺.
𑀚𑀺𑀫𑁆𑀳𑀦𑁆𑀢𑀺 𑀯𑀗𑁆𑀓𑀁. 𑀦𑁂𑀢𑁆𑀢𑁂𑀢𑀺 𑀬𑁄 𑀕𑀸𑀯𑀺𑀬𑁄 𑀦𑁂𑀢𑀺, 𑀢𑀲𑁆𑀫𑀺𑀁 𑀚𑁂𑀝𑁆𑀞𑀓𑀉𑀲𑀪𑁂. 𑀧𑀕𑁂𑀯𑀸𑀢𑀺 𑀢𑀲𑁆𑀫𑀺𑀁 𑀅𑀥𑀫𑁆𑀫𑀁 𑀘𑀭𑀦𑁆𑀢𑁂 𑀇𑀢𑀭𑀸 𑀧𑀚𑀸 𑀧𑀕𑁂𑀯 𑀘𑀭𑀢𑀺, 𑀅𑀢𑀺𑀯𑀺𑀬 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀺𑀓𑁄𑀢𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀧𑀳𑀸𑀬 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄. 𑀅𑀫𑀭𑀢𑁆𑀢𑀦𑁆𑀢𑀺 𑀤𑁂𑀯𑀢𑁆𑀢𑀁. 𑀭𑀢𑀦𑀦𑁆𑀢𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀭𑀢𑀦𑀁. 𑀯𑀢𑁆𑀣𑀺𑀬𑀦𑁆𑀢𑀺 𑀓𑀸𑀲𑀺𑀓𑀯𑀢𑁆𑀣𑀫𑁂𑀯. 𑀅𑀲𑁆𑀲𑀺𑀢𑁆𑀣𑀺𑀬𑁄𑀢𑀺 𑀯𑀸𑀢𑀲𑀫𑀕𑀢𑀺𑀅𑀲𑁆𑀲𑁂𑀧𑀺 𑀉𑀢𑁆𑀢𑀫𑀭𑀽𑀧𑀥𑀭𑀸 𑀇𑀢𑁆𑀣𑀺𑀬𑁄𑀧𑀺. 𑀭𑀢𑀦𑀁 𑀫𑀡𑀺𑀓𑀜𑁆𑀘𑀸𑀢𑀺 𑀲𑀢𑁆𑀢𑀯𑀺𑀥𑀭𑀢𑀦𑀜𑁆𑀘 𑀫𑀳𑀕𑁆𑀖𑀪𑀡𑁆𑀟𑀓𑀜𑁆𑀘. 𑀅𑀪𑀺𑀧𑀸𑀮𑀬𑀦𑁆𑀢𑀻𑀢𑀺 ¶ 𑀆𑀮𑁄𑀓𑀁 𑀓𑀭𑁄𑀦𑁆𑀢𑀸 𑀭𑀓𑁆𑀔𑀦𑁆𑀢𑀺. 𑀦 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑁆𑀲𑀧𑀺 𑀳𑁂𑀢𑀼 𑀦 𑀯𑀺𑀲𑀫𑀁 𑀘𑀭𑁂𑀬𑁆𑀬𑀁. 𑀉𑀲𑀪𑁄𑀫𑁆𑀳𑀻𑀢𑀺 𑀬𑀲𑁆𑀫𑀸 𑀅𑀳𑀁 𑀲𑀺𑀯𑀻𑀦𑀁 𑀫𑀚𑁆𑀛𑁂 𑀚𑁂𑀝𑁆𑀞𑀓𑀭𑀸𑀚𑀸 𑀳𑀼𑀢𑁆𑀯𑀸 𑀚𑀸𑀢𑁄, 𑀢𑀲𑁆𑀫𑀸 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀓𑀸𑀭𑀡𑀫𑁆𑀧𑀺 𑀦 𑀯𑀺𑀲𑀫𑀁 𑀘𑀭𑀸𑀫𑀻𑀢𑀺 𑀅𑀢𑁆𑀣𑁄. 𑀦𑁂𑀢𑀸𑀢𑀺 𑀫𑀳𑀸𑀚𑀦𑀁 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑁂𑀯𑀦𑀕𑀭𑀁 𑀦𑁂𑀢𑀸, 𑀳𑀺𑀢𑀓𑀭𑀡𑁂𑀦 𑀢𑀲𑁆𑀲 𑀳𑀺𑀢𑀸, ‘‘𑀲𑀺𑀯𑀺𑀭𑀸𑀚𑀸 𑀓𑀺𑀭 𑀥𑀫𑁆𑀫𑀘𑀸𑀭𑀻’’𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀜𑀸𑀢𑀢𑁆𑀢𑀸 𑀉𑀕𑁆𑀕𑀢𑁄, 𑀲𑀫𑁂𑀦 𑀭𑀝𑁆𑀞𑀧𑀸𑀮𑀦𑀢𑁄 𑀭𑀝𑁆𑀞𑀧𑀸𑀮𑁄. 𑀅𑀧𑀘𑀸𑀬𑀫𑀸𑀦𑁄𑀢𑀺 𑀲𑀺𑀯𑀻𑀦𑀁 𑀧𑁄𑀭𑀸𑀡𑀓𑀭𑀸𑀚𑀽𑀦𑀁 𑀧𑀯𑁂𑀡𑀺𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄. 𑀲𑁄𑀢𑀺 𑀲𑁄 𑀅𑀳𑀁 𑀢𑀫𑁂𑀯 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄 𑀢𑀲𑁆𑀫𑀸 𑀢𑁂𑀦 𑀓𑀸𑀭𑀡𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀦 𑀯𑀢𑁆𑀢𑀸𑀫𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀅𑀪𑀺𑀧𑀸𑀭𑀓𑁄 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 ‘‘𑀅𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀦𑀧𑁆𑀧𑀫𑀚𑁆𑀚𑀲𑀻𑀢𑀺 𑀅𑀢𑁆𑀢𑀦𑀸 𑀓𑀣𑀺𑀢𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀲𑀺 𑀢𑀢𑁆𑀣𑁂𑀯 𑀯𑀢𑁆𑀢𑁂𑀲𑀺. 𑀥𑀫𑁆𑀫𑀁 𑀧𑀫𑀚𑁆𑀚𑀸𑀢𑀺 𑀥𑀫𑁆𑀫𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀅𑀕𑀢𑀺𑀯𑀲𑁂𑀦 𑀕𑀦𑁆𑀢𑁆𑀯𑀸. 𑀏𑀯𑀁 𑀲𑁄 𑀢𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 ‘‘𑀥𑀫𑁆𑀫𑀁 𑀘𑀭𑀸’’𑀢𑀺 𑀥𑀫𑁆𑀫𑀘𑀭𑀺𑀬𑀸𑀬 𑀦𑀺𑀬𑁆𑀬𑁄𑀚𑁂𑀦𑁆𑀢𑁄 𑀉𑀢𑁆𑀢𑀭𑀺𑀧𑀺 𑀤𑀲 𑀑𑀯𑀸𑀤𑀕𑀸𑀣𑀸 𑀅𑀪𑀸𑀲𑀺. 𑀢𑀸𑀲𑀫𑀢𑁆𑀣𑁄 𑀳𑁂𑀝𑁆𑀞𑀸 𑀢𑁂𑀲𑀓𑀼𑀡𑀚𑀸𑀢𑀓𑁂 (𑀚𑀸. 𑁨.𑁧𑁭.𑁧 𑀆𑀤𑀬𑁄) 𑀯𑀡𑁆𑀡𑀺𑀢𑁄𑀯.
𑀏𑀯𑀁 ¶ 𑀅𑀪𑀺𑀧𑀸𑀭𑀓𑀲𑁂𑀦𑀸𑀧𑀢𑀺𑀦𑀸 𑀭𑀜𑁆𑀜𑁄 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀭𑀸𑀚𑀸 𑀉𑀫𑁆𑀫𑀸𑀤𑀦𑁆𑀢𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀯𑀺𑀦𑁄𑀤𑁂𑀲𑀺.
𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀤𑀸 𑀲𑀼𑀦𑀦𑁆𑀤𑀲𑀸𑀭𑀣𑀺 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀅𑀪𑀺𑀧𑀸𑀭𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀉𑀫𑁆𑀫𑀸𑀤𑀦𑁆𑀢𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀲𑀺𑀯𑀺𑀭𑀸𑀚𑀸 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.
𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.
[𑁫𑁨𑁮] 𑁩. 𑀫𑀳𑀸𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸
𑀓𑀺𑀁 𑀦𑀼 𑀤𑀡𑁆𑀟𑀁 𑀓𑀺𑀫𑀚𑀺𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸 𑀧𑀭𑀧𑁆𑀧𑀯𑀸𑀤𑀧𑁆𑀧𑀫𑀤𑁆𑀤𑀦𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑁆𑀲 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, ‘‘𑀩𑁄𑀥𑀺𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀅𑀧𑀭𑀪𑀸𑀕𑁂 𑀓𑀸𑀫𑁂 𑀧𑀳𑀸𑀬 𑀳𑀺𑀫𑀯𑀦𑁆𑀢𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 ¶ 𑀢𑀢𑁆𑀣𑁂𑀯 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀳𑀺𑀫𑀯𑀦𑁆𑀢𑀸 𑀑𑀭𑀼𑀬𑁆𑀳 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀭𑀺𑀩𑁆𑀩𑀸𑀚𑀓𑀲𑀸𑀭𑀼𑀧𑁆𑀧𑁂𑀦 𑀦𑀕𑀭𑁂 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀭𑀸𑀚𑀤𑁆𑀯𑀸𑀭𑀁 𑀧𑀸𑀧𑀼𑀡𑀺 ¶ 𑀢𑀫𑁂𑀦𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀭𑀸𑀚𑀸 𑀤𑀺𑀲𑁆𑀯𑀸 𑀢𑀲𑁆𑀲 𑀉𑀧𑀲𑀫𑁂 𑀧𑀲𑀻𑀤𑀺𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀯𑁂𑀲𑁂𑀢𑁆𑀯𑀸 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀤𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀭𑀸𑀚𑀓𑀼𑀮𑀁 𑀦𑀸𑀫 𑀩𑀳𑀼𑀤𑁄𑀲𑀁 𑀩𑀳𑀼𑀧𑀘𑁆𑀘𑀸𑀫𑀺𑀢𑁆𑀢𑀁 𑀳𑁄𑀢𑀺, 𑀓𑁄 𑀦𑀼 𑀔𑁄 𑀫𑀫 𑀉𑀧𑁆𑀧𑀦𑁆𑀦𑀁 𑀪𑀬𑀁 𑀦𑀺𑀢𑁆𑀣𑀭𑀺𑀲𑁆𑀲𑀢𑀻’’𑀢𑀺. 𑀲𑁄 𑀅𑀯𑀺𑀤𑀽𑀭𑁂 𑀞𑀺𑀢𑀁 𑀭𑀸𑀚𑀯𑀮𑁆𑀮𑀪𑀁 𑀏𑀓𑀁 𑀧𑀺𑀗𑁆𑀕𑀮𑀲𑀼𑀦𑀔𑀁 𑀤𑀺𑀲𑁆𑀯𑀸 𑀫𑀳𑀦𑁆𑀢𑀁 𑀪𑀢𑁆𑀢𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀤𑀸𑀢𑀼𑀓𑀸𑀫𑀢𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀜𑀢𑁆𑀯𑀸 𑀲𑀼𑀦𑀔𑀲𑁆𑀲 𑀪𑀸𑀚𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀪𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀢𑀲𑁆𑀲 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀧𑁂𑀲𑀺. 𑀭𑀸𑀚𑀸𑀧𑀺𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀭𑀸𑀚𑀼𑀬𑁆𑀬𑀸𑀦𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑁂 ¶ 𑀤𑀢𑁆𑀯𑀸 𑀢𑀁 𑀢𑀢𑁆𑀣 𑀯𑀸𑀲𑀸𑀧𑁂𑀲𑀺, 𑀤𑁂𑀯𑀲𑀺𑀓𑀜𑁆𑀘𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀪𑁄𑀚𑀦𑀓𑀸𑀮𑁂 𑀧𑀦 𑀫𑀳𑀸𑀲𑀢𑁆𑀢𑁄 𑀦𑀺𑀘𑁆𑀘𑀁 𑀭𑀸𑀚𑀧𑀮𑁆𑀮𑀗𑁆𑀓𑁂𑀬𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀭𑀸𑀚𑀪𑁄𑀚𑀦𑀫𑁂𑀯 𑀪𑀼𑀜𑁆𑀚𑀢𑀺. 𑀏𑀯𑀁 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀻𑀢𑀸𑀦𑀺.
𑀢𑀲𑁆𑀲 𑀧𑀦 𑀭𑀜𑁆𑀜𑁄 𑀧𑀜𑁆𑀘 𑀅𑀫𑀘𑁆𑀘𑀸 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀅𑀳𑁂𑀢𑀼𑀓𑀯𑀸𑀤𑀻, 𑀏𑀓𑁄 𑀇𑀲𑁆𑀲𑀭𑀓𑀢𑀯𑀸𑀤𑀻, 𑀏𑀓𑁄 𑀧𑀼𑀩𑁆𑀩𑁂𑀓𑀢𑀯𑀸𑀤𑀻, 𑀏𑀓𑁄 𑀉𑀘𑁆𑀙𑁂𑀤𑀯𑀸𑀤𑀻, 𑀏𑀓𑁄 𑀔𑀢𑁆𑀢𑀯𑀺𑀚𑁆𑀚𑀯𑀸𑀤𑀻. 𑀢𑁂𑀲𑀼 𑀅𑀳𑁂𑀢𑀼𑀓𑀯𑀸𑀤𑀻 ‘‘𑀇𑀫𑁂 𑀲𑀢𑁆𑀢𑀸 𑀲𑀁𑀲𑀸𑀭𑀲𑀼𑀤𑁆𑀥𑀺𑀓𑀸’’𑀢𑀺 𑀫𑀳𑀸𑀚𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀇𑀲𑁆𑀲𑀭𑀓𑀢𑀯𑀸𑀤𑀻 ‘‘𑀅𑀬𑀁 𑀮𑁄𑀓𑁄 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑁄’’𑀢𑀺 𑀫𑀳𑀸𑀚𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀧𑀼𑀩𑁆𑀩𑁂𑀓𑀢𑀯𑀸𑀤𑀻 ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀩𑁆𑀩𑁂𑀓𑀢𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀫𑀳𑀸𑀚𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀉𑀘𑁆𑀙𑁂𑀤𑀯𑀸𑀤𑀻 ‘‘𑀇𑀢𑁄 𑀧𑀭𑀮𑁄𑀓𑀁 𑀕𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀁 𑀮𑁄𑀓𑁄 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀫𑀳𑀸𑀚𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀔𑀢𑁆𑀢𑀯𑀺𑀚𑁆𑀚𑀯𑀸𑀤𑀻 ‘‘𑀫𑀸𑀢𑀸𑀧𑀺𑀢𑀭𑁄𑀧𑀺 𑀫𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄𑀯 𑀅𑀢𑁆𑀣𑁄 𑀓𑀸𑀢𑀩𑁆𑀩𑁄’’𑀢𑀺 𑀫𑀳𑀸𑀚𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀢𑁂 𑀭𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀼𑀢𑁆𑀢𑀸 𑀮𑀜𑁆𑀚𑀔𑀸𑀤𑀓𑀸 ¶ 𑀳𑀼𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁, 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀓𑀭𑁄𑀦𑁆𑀢𑀺.
𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀧𑀼𑀭𑀺𑀲𑁄 𑀓𑀽𑀝𑀝𑁆𑀝𑀧𑀭𑀸𑀚𑀺𑀢𑁄 𑀫𑀳𑀸𑀲𑀢𑁆𑀢𑀁 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀁 𑀭𑀸𑀚𑀕𑁂𑀳𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀭𑀸𑀚𑀕𑁂𑀳𑁂 𑀪𑀼𑀜𑁆𑀚𑀫𑀸𑀦𑀸 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀮𑁄𑀓𑀁 𑀯𑀺𑀦𑀸𑀲𑁂𑀦𑁆𑀢𑁂 𑀓𑀲𑁆𑀫𑀸 𑀅𑀚𑁆𑀛𑀼𑀧𑁂𑀓𑁆𑀔𑀣, 𑀇𑀤𑀸𑀦𑀺 𑀧𑀜𑁆𑀘𑀳𑀺 𑀅𑀫𑀘𑁆𑀘𑁂𑀳𑀺 𑀓𑀽𑀝𑀝𑁆𑀝𑀓𑀸𑀭𑀓𑀲𑁆𑀲 𑀳𑀢𑁆𑀣𑀢𑁄 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑁄𑀯 𑀲𑀫𑀸𑀦𑁄 𑀅𑀲𑁆𑀲𑀸𑀫𑀺𑀓𑁄 𑀓𑀢𑁄’’𑀢𑀺 𑀧𑀭𑀺𑀤𑁂𑀯𑀺. 𑀲𑁄 ¶ 𑀢𑀲𑁆𑀫𑀺𑀁 𑀓𑀸𑀭𑀼𑀜𑁆𑀜𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀸𑀫𑀺𑀓𑀜𑁆𑀜𑁂𑀯 𑀲𑀸𑀫𑀺𑀓𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁𑀲𑀤𑁆𑀤𑁄 𑀦𑀸𑀫𑀸𑀬’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀫𑀳𑀸𑀲𑀢𑁆𑀢𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀅𑀚𑁆𑀚 𑀓𑀺𑀭 𑀯𑁄 𑀅𑀝𑁆𑀝𑁄 𑀯𑀺𑀦𑀺𑀘𑁆𑀙𑀺𑀢𑁄’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀲𑀼 𑀫𑀳𑀸𑀚𑀦𑀲𑁆𑀲 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂𑀯 𑀯𑀺𑀦𑀺𑀘𑁆𑀙𑀺𑀦𑀣𑀸’’𑀢𑀺. ‘‘𑀫𑀳𑀸𑀭𑀸𑀚, 𑀫𑀬𑀁 𑀧𑀩𑁆𑀩𑀚𑀺𑀢𑀸 𑀦𑀸𑀫, 𑀦𑁂𑀢𑀁 𑀓𑀫𑁆𑀫𑀁 𑀅𑀫𑁆𑀳𑀸𑀓𑀁 𑀓𑀫𑁆𑀫’’𑀦𑁆𑀢𑀺. ‘‘𑀪𑀦𑁆𑀢𑁂, 𑀫𑀳𑀸𑀚𑀦𑁂 𑀓𑀸𑀭𑀼𑀜𑁆𑀜𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀼𑀫𑁆𑀳𑁂 𑀲𑀓𑀮𑀤𑀺𑀯𑀲𑀁 𑀫𑀸 𑀯𑀺𑀦𑀺𑀘𑁆𑀙𑀺𑀦𑀣, 𑀉𑀬𑁆𑀬𑀸𑀦𑀢𑁄 𑀧𑀦 𑀇𑀥𑀸𑀕𑀘𑁆𑀙𑀦𑁆𑀢𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀸𑀢𑁄𑀯 𑀘𑀢𑁆𑀢𑀸𑀭𑁄 𑀅𑀝𑁆𑀝𑁂 𑀯𑀺𑀦𑀺𑀘𑁆𑀙𑀺𑀦𑀣, 𑀪𑀼𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑀸 𑀘𑀢𑁆𑀢𑀸𑀭𑁄, 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀅𑀓𑀸𑀲𑀺.
𑀓𑀽𑀝𑀝𑁆𑀝𑀓𑀸𑀭𑀓𑀸 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼. 𑀢𑁂𑀧𑀺 𑀅𑀫𑀘𑁆𑀘𑀸 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀤𑀼𑀕𑁆𑀕𑀢𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 ¶ 𑁋 ‘‘𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀺𑀦𑀺𑀘𑁆𑀙𑀺𑀦𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀓𑀺𑀜𑁆𑀘𑀺 𑀦 𑀮𑀪𑀸𑀫, 𑀳𑀦𑁆𑀤 𑀦𑀁 ‘𑀭𑀸𑀚𑀯𑁂𑀭𑀺𑀓𑁄’𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀤𑀺𑀢𑁆𑀯𑀸 𑀫𑀸𑀭𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀢𑀼𑀫𑁆𑀳𑀸𑀓𑀁 𑀅𑀦𑀢𑁆𑀣𑀓𑀸𑀫𑁄’’𑀢𑀺 𑀯𑀢𑁆𑀯𑀸 𑀅𑀲𑀤𑁆𑀤𑀳𑀦𑁆𑀢𑁂𑀦 𑀭𑀜𑁆𑀜𑀸 ‘‘𑀲𑀻𑀮𑀯𑀸 𑀏𑀲 𑀜𑀸𑀡𑀲𑀫𑁆𑀧𑀦𑁆𑀦𑁄, 𑀦 𑀏𑀯𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀫𑀳𑀸𑀭𑀸𑀚, 𑀢𑁂𑀦 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀓𑀢𑁆𑀯𑀸 𑀓𑁂𑀯𑀮𑀁 𑀅𑀫𑁆𑀳𑁂𑀬𑁂𑀯 𑀧𑀜𑁆𑀘 ¶ 𑀚𑀦𑁂 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀲𑀘𑁂 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀦 𑀲𑀤𑁆𑀤𑀳𑀣, 𑀢𑀲𑁆𑀲 𑀇𑀥𑀸𑀕𑀫𑀦𑀓𑀸𑀮𑁂 𑀧𑀭𑀺𑀲𑀁 𑀑𑀮𑁄𑀓𑁂𑀣𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀅𑀜𑁆𑀜𑀸𑀡𑁂𑀦 𑀅𑀝𑁆𑀝𑀓𑀸𑀭𑀓𑀫𑀦𑀼𑀲𑁆𑀲𑁂 ‘‘𑀢𑀲𑁆𑀲 𑀧𑀭𑀺𑀯𑀸𑀭𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀺𑀚𑁆𑀚𑀺𑀢𑁆𑀯𑀸 𑀢𑁂 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀦𑁆𑀢𑀺 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀕𑀡𑁆𑀳𑀸𑀧𑁂𑀣 𑀦𑀁, 𑀤𑁂𑀯𑀸’’𑀢𑀺. ‘‘𑀑𑀴𑀸𑀭𑀺𑀓𑀁 𑀅𑀧𑀭𑀸𑀥𑀁 𑀅𑀧𑀲𑁆𑀲𑀦𑁆𑀢𑀸 𑀓𑀣𑀁 𑀕𑀡𑁆𑀳𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀧𑀓𑀢𑀺𑀧𑀭𑀺𑀳𑀸𑀭𑀫𑀲𑁆𑀲 𑀳𑀸𑀧𑁂𑀣, 𑀢𑀁 𑀧𑀭𑀺𑀳𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀧𑀡𑁆𑀟𑀺𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺.
𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀲 𑀧𑀭𑀺𑀳𑀸𑀭𑀁 𑀧𑀭𑀺𑀳𑀸𑀧𑁂𑀲𑀺. 𑀧𑀞𑀫𑀤𑀺𑀯𑀲𑀁 𑀢𑀸𑀯 𑀦𑀁 𑀢𑀼𑀘𑁆𑀙𑀧𑀮𑁆𑀮𑀗𑁆𑀓𑁂𑀬𑁂𑀯 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀲𑁄 𑀢𑀼𑀘𑁆𑀙𑀧𑀮𑁆𑀮𑀗𑁆𑀓𑀁 𑀤𑀺𑀲𑁆𑀯𑀸𑀯 ¶ 𑀭𑀜𑁆𑀜𑁄 𑀧𑀭𑀺𑀪𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀲𑀬𑀫𑁂𑀯 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀧𑀺 ‘‘𑀏𑀓𑀦𑁆𑀢𑁂𑀦 𑀜𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀦 𑀧𑀓𑁆𑀓𑀸𑀫𑀺. 𑀅𑀣𑀲𑁆𑀲 𑀧𑀼𑀦𑀤𑀺𑀯𑀲𑁂 𑀢𑀼𑀘𑁆𑀙𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀭𑀜𑁆𑀜𑁄𑀧𑀓𑀢𑀺𑀪𑀢𑁆𑀢𑀜𑁆𑀘 𑀅𑀜𑁆𑀜𑀜𑁆𑀘 𑀕𑀳𑁂𑀢𑁆𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑀁 𑀅𑀤𑀁𑀲𑀼. 𑀢𑀢𑀺𑀬𑀤𑀺𑀯𑀲𑁂 𑀫𑀳𑀸𑀢𑀮𑀁 𑀧𑀯𑀺𑀲𑀺𑀢𑀼𑀁 𑀅𑀤𑀢𑁆𑀯𑀸 𑀲𑁄𑀧𑀸𑀦𑀲𑀻𑀲𑁂𑀬𑁂𑀯 𑀞𑀧𑁂𑀢𑁆𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑀁 𑀅𑀤𑀁𑀲𑀼. 𑀲𑁄 𑀢𑀫𑁆𑀧𑀺 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀘𑀢𑀼𑀢𑁆𑀣𑀤𑀺𑀯𑀲𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀞𑀧𑁂𑀢𑁆𑀯𑀸 𑀓𑀡𑀸𑀚𑀓𑀪𑀢𑁆𑀢𑀁 𑀅𑀤𑀁𑀲𑀼. 𑀲𑁄 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀲𑀓𑁆𑀓𑀸𑀭𑁂 𑀧𑀭𑀺𑀳𑀸𑀧𑀺𑀢𑁂𑀧𑀺 𑀦 𑀧𑀓𑁆𑀓𑀫𑀢𑀺, 𑀓𑀺𑀦𑁆𑀢𑀺 𑀦𑀁 𑀓𑀭𑁄𑀫𑀸’’𑀢𑀺? ‘‘𑀤𑁂𑀯, 𑀦 𑀲𑁄 𑀪𑀢𑁆𑀢𑀢𑁆𑀣𑀸𑀬 𑀘𑀭𑀢𑀺, 𑀙𑀢𑁆𑀢𑀢𑁆𑀣𑀸𑀬 𑀧𑀦 𑀘𑀭𑀢𑀺. 𑀲𑀘𑁂 𑀪𑀢𑁆𑀢𑀢𑁆𑀣𑀸𑀬 𑀘𑀭𑁂𑀬𑁆𑀬, 𑀧𑀞𑀫𑀤𑀺𑀯𑀲𑀁𑀬𑁂𑀯 𑀧𑀮𑀸𑀬𑁂𑀬𑁆𑀬𑀸’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀲𑁆𑀯𑁂 𑀖𑀸𑀢𑀸𑀧𑁂𑀣 𑀦𑀁, 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀢𑁂𑀲𑀜𑁆𑀜𑁂𑀯 𑀳𑀢𑁆𑀣𑁂 𑀔𑀕𑁆𑀕𑁂 𑀞𑀧𑁂𑀢𑁆𑀯𑀸 ‘‘𑀲𑁆𑀯𑁂 𑀅𑀦𑁆𑀢𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀯𑀺𑀲𑀦𑁆𑀢𑀲𑁆𑀲𑁂𑀯𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀯𑀘𑁆𑀘𑀓𑀼𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀲𑁆𑀯𑁂 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 ¶ 𑀯𑀺𑀘𑀸𑀭𑁂𑀢𑁆𑀯𑀸 𑀏𑀯𑀁 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀅𑀕𑀫𑀁𑀲𑀼.
𑀭𑀸𑀚𑀸𑀧𑀺 𑀲𑀸𑀬𑀁 𑀪𑀼𑀢𑁆𑀢𑀪𑁄𑀚𑀦𑁄 𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺. 𑀅𑀣𑀲𑁆𑀲 𑀢𑀸𑀯𑀤𑁂𑀯 𑀲𑁄𑀓𑁄 𑀉𑀧𑁆𑀧𑀚𑁆𑀚𑀺, 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀲𑀬𑀦𑁂 𑀅𑀲𑁆𑀲𑀸𑀲𑀁 𑀅𑀮𑀪𑀦𑁆𑀢𑁄 𑀅𑀧𑀭𑀸𑀧𑀭𑀁 ¶ 𑀧𑀭𑀺𑀯𑀢𑁆𑀢𑀺. 𑀅𑀣𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀉𑀧𑀦𑀺𑀧𑀚𑁆𑀚𑀺, 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀦 𑀓𑀭𑀺. 𑀅𑀣 𑀦𑀁 𑀲𑀸 ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀣, 𑀅𑀧𑀺 𑀦𑀼 𑀔𑁄 𑀫𑁂 𑀓𑁄𑀘𑀺 𑀅𑀧𑀭𑀸𑀥𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀦𑀢𑁆𑀣𑀺 𑀤𑁂𑀯𑀺, 𑀅𑀧𑀺𑀘 𑀔𑁄 𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀓𑀺𑀭 𑀅𑀫𑁆𑀳𑀸𑀓𑀁 𑀧𑀘𑁆𑀘𑀢𑁆𑀣𑀺𑀓𑁄 𑀚𑀸𑀢𑁄𑀢𑀺 𑀢𑀲𑁆𑀲 𑀲𑁆𑀯𑁂 𑀖𑀸𑀢𑀦𑀢𑁆𑀣𑀸𑀬 𑀧𑀜𑁆𑀘 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺𑀁, 𑀢𑁂 𑀧𑀦 𑀦𑀁 𑀫𑀸𑀭𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 𑀯𑀘𑁆𑀘𑀓𑀽𑀧𑁂 𑀧𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀲𑁄 𑀧𑀦 𑀅𑀫𑁆𑀳𑀸𑀓𑀁 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀩𑀳𑀼𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀏𑀓𑀸𑀧𑀭𑀸𑀥𑁄𑀧𑀺𑀲𑁆𑀲 𑀫𑀬𑀸 𑀧𑀘𑁆𑀘𑀓𑁆𑀔𑀢𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀧𑀭𑀧𑀢𑁆𑀢𑀺𑀬𑁂𑀦 𑀳𑀼𑀢𑁆𑀯𑀸 𑀢𑀲𑁆𑀲 𑀫𑀬𑀸 𑀯𑀥𑁄 𑀆𑀡𑀢𑁆𑀢𑁄, 𑀢𑁂𑀦 𑀓𑀸𑀭𑀡𑁂𑀦 𑀲𑁄𑀘𑀸𑀫𑀻’’𑀢𑀺. 𑀅𑀣 𑀦𑀁 𑀲𑀸 ‘‘𑀲𑀘𑁂 𑀢𑁂 𑀤𑁂𑀯 𑀲𑁄 𑀧𑀘𑁆𑀘𑀢𑁆𑀣𑀺𑀓𑁄 𑀚𑀸𑀢𑁄, 𑀢𑀁 𑀖𑀸𑀢𑁂𑀦𑁆𑀢𑁄 𑀓𑀺𑀁 𑀲𑁄𑀘𑀲𑀺, 𑀧𑀘𑁆𑀘𑀢𑁆𑀣𑀺𑀓𑀁 𑀦𑀸𑀫 𑀧𑀼𑀢𑁆𑀢𑀫𑁆𑀧𑀺 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑁄𑀢𑁆𑀣𑀺𑀪𑀸𑀯𑁄 𑀓𑀸𑀢𑀩𑁆𑀩𑁄𑀯, 𑀫𑀸 𑀲𑁄𑀘𑀺𑀢𑁆𑀣𑀸’’𑀢𑀺 𑀅𑀲𑁆𑀲𑀸𑀲𑁂𑀲𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀸𑀲𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.
𑀢𑀲𑁆𑀫𑀺𑀁 ¶ 𑀔𑀡𑁂 𑀓𑁄𑀮𑁂𑀬𑁆𑀬𑀓𑁄 𑀧𑀺𑀗𑁆𑀕𑀮𑀲𑀼𑀦𑀔𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀲𑁆𑀯𑁂 𑀫𑀬𑀸 𑀅𑀢𑁆𑀢𑀦𑁄 𑀩𑀮𑁂𑀦𑀲𑁆𑀲 𑀚𑀻𑀯𑀺𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀫𑀳𑀸𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀉𑀫𑁆𑀫𑀸𑀭𑁂 𑀲𑀻𑀲𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄𑀯 𑀦𑀺𑀧𑀚𑁆𑀚𑀺. 𑀢𑁂𑀧𑀺 𑀅𑀫𑀘𑁆𑀘𑀸 𑀧𑀸𑀢𑁄𑀯 𑀔𑀕𑁆𑀕𑀳𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀦𑁆𑀢𑀭𑁂 𑀅𑀝𑁆𑀞𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑁆𑀫 𑀭𑀸𑀚𑀤𑁆𑀯𑀸𑀭𑀁 𑀆𑀕𑀜𑁆𑀙𑀺. 𑀅𑀣 𑀦𑀁 𑀲𑀼𑀦𑀔𑁄 𑀤𑀺𑀲𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀘𑀢𑀲𑁆𑀲𑁄 𑀤𑀸𑀞𑀸 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀺𑀁 𑀢𑁆𑀯𑀁, 𑀪𑀦𑁆𑀢𑁂, 𑀚𑀫𑁆𑀩𑀼𑀤𑀻𑀧𑀢𑀮𑁂 𑀅𑀜𑁆𑀜𑀢𑁆𑀣 𑀪𑀺𑀓𑁆𑀔𑀁 𑀦 𑀮𑀪𑀲𑀺, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀢𑀯 𑀫𑀸𑀭𑀡𑀢𑁆𑀣𑀸𑀬 𑀧𑀜𑁆𑀘 𑀅𑀫𑀘𑁆𑀘𑁂 𑀔𑀕𑁆𑀕𑀳𑀢𑁆𑀣𑁂 𑀤𑁆𑀯𑀸𑀭𑀦𑁆𑀢𑀭𑁂 𑀞𑀧𑁂𑀲𑀺, 𑀫𑀸 𑀢𑁆𑀯𑀁 𑀦𑀮𑀸𑀝𑁂𑀦 𑀫𑀘𑁆𑀘𑀼𑀁 𑀕𑀳𑁂𑀢𑁆𑀯𑀸 𑀆𑀕𑀫𑀺, 𑀲𑀻𑀖𑀁 𑀧𑀓𑁆𑀓𑀫𑀸’’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀯𑀺𑀭𑀯𑀺. 𑀲𑁄 𑀲𑀩𑁆𑀩𑀭𑀼𑀢𑀜𑁆𑀜𑀼𑀢𑀸𑀬 𑀢𑀫𑀢𑁆𑀣𑀁 𑀜𑀢𑁆𑀯𑀸 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 ¶ 𑀧𑀓𑁆𑀓𑀫𑀦𑀢𑁆𑀣𑀸𑀬 𑀧𑀭𑀺𑀓𑁆𑀔𑀸𑀭𑁂 𑀆𑀤𑀺𑀬𑀺. 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀕𑀘𑁆𑀙𑀦𑁆𑀢𑀜𑁆𑀘 𑀤𑀺𑀲𑁆𑀯𑀸 ‘‘𑀲𑀘𑁂 𑀅𑀬𑀁 𑀫𑀫 𑀧𑀘𑁆𑀘𑀢𑁆𑀣𑀺𑀓𑁄 𑀪𑀯𑁂𑀬𑁆𑀬, 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀩𑀮𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀓𑀫𑁆𑀫𑀲𑀚𑁆𑀚𑁄 𑀪𑀯𑀺𑀲𑁆𑀲𑀢𑀺. 𑀦𑁄 𑀘𑁂, 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀕𑀫𑀦𑀲𑀚𑁆𑀚𑁄 𑀪𑀯𑀺𑀲𑁆𑀲𑀢𑀺, 𑀚𑀸𑀦𑀺𑀲𑁆𑀲𑀸𑀫𑀺 𑀢𑀸𑀯𑀲𑁆𑀲 𑀓𑀺𑀭𑀺𑀬’’𑀦𑁆𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑁂 𑀆𑀤𑀸𑀬 ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀦𑁆𑀢𑀁 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀤𑀺𑀲𑁆𑀯𑀸𑀯 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀓𑀺𑀁 𑀦𑀼 𑀤𑀡𑁆𑀟𑀁 𑀓𑀺𑀫𑀚𑀺𑀦𑀁, 𑀓𑀺𑀁 𑀙𑀢𑁆𑀢𑀁 𑀓𑀺𑀫𑀼𑀧𑀸𑀳𑀦𑀁;
𑀓𑀺𑀫𑀗𑁆𑀓𑀼𑀲𑀜𑁆𑀘 𑀧𑀢𑁆𑀢𑀜𑁆𑀘, 𑀲𑀗𑁆𑀖𑀸𑀝𑀺𑀜𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡;
𑀢𑀭𑀫𑀸𑀦𑀭𑀽𑀧𑁄𑀳𑀸𑀲𑀺, 𑀓𑀺𑀁 𑀦𑀼 𑀧𑀢𑁆𑀣𑀬𑀲𑁂 𑀤𑀺𑀲’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 ¶ 𑁋 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀖𑀭𑀁 𑀆𑀕𑀘𑁆𑀙𑀦𑁆𑀢𑁄 𑀤𑀡𑁆𑀟𑀸𑀤𑀻𑀦𑀺 𑀦 𑀕𑀡𑁆𑀳𑀸𑀲𑀺, 𑀅𑀚𑁆𑀚 𑀧𑀦 𑀓𑁂𑀦 𑀓𑀸𑀭𑀡𑁂𑀦 𑀤𑀡𑁆𑀟𑀜𑁆𑀘 𑀅𑀚𑀺𑀦𑀜𑁆𑀘 𑀙𑀢𑁆𑀢𑀽𑀧𑀸𑀳𑀦𑀜𑁆𑀘 𑀫𑀢𑁆𑀢𑀺𑀓𑀧𑀲𑀺𑀩𑁆𑀩𑀓𑁄𑀮𑀫𑁆𑀩𑀦𑀅𑀗𑁆𑀓𑀼𑀲𑀜𑁆𑀘 𑀫𑀢𑁆𑀢𑀺𑀓𑀧𑀢𑁆𑀢𑀜𑁆𑀘 𑀲𑀗𑁆𑀖𑀸𑀝𑀺𑀜𑁆𑀘𑀸𑀢𑀺 𑀲𑀩𑁆𑀩𑁂𑀧𑀺𑀫𑁂 𑀧𑀭𑀺𑀓𑁆𑀔𑀸𑀭𑁂 𑀢𑀭𑀫𑀸𑀦𑀭𑀽𑀧𑁄 𑀕𑀡𑁆𑀳𑀸𑀲𑀺, 𑀓𑀢𑀭𑀁 𑀦𑀼 𑀤𑀺𑀲𑀁 𑀧𑀢𑁆𑀣𑁂𑀲𑀺, 𑀓𑀢𑁆𑀣 𑀕𑀦𑁆𑀢𑀼𑀓𑀸𑀫𑁄𑀲𑀻𑀢𑀺 𑀧𑀼𑀘𑁆𑀙𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀫𑀜𑁆𑀜𑀢𑀺, 𑀚𑀸𑀦𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀤𑁆𑀯𑀸𑀤𑀲𑁂𑀢𑀸𑀦𑀺 𑀯𑀲𑁆𑀲𑀸𑀦𑀺, 𑀯𑀼𑀲𑀺𑀢𑀸𑀦𑀺 𑀢𑀯𑀦𑁆𑀢𑀺𑀓𑁂;
𑀦𑀸𑀪𑀺𑀚𑀸𑀦𑀸𑀫𑀺 𑀲𑁄𑀡𑁂𑀦, 𑀧𑀺𑀗𑁆𑀕𑀮𑁂𑀦𑀸𑀪𑀺𑀓𑀽𑀚𑀺𑀢𑀁.
‘‘𑀲𑁆𑀯𑀸𑀬𑀁 ¶ 𑀤𑀺𑀢𑁆𑀢𑁄𑀯 𑀦𑀤𑀢𑀺, 𑀲𑀼𑀓𑁆𑀓𑀤𑀸𑀞𑀁 𑀯𑀺𑀤𑀁𑀲𑀬𑀁;
𑀢𑀯 𑀲𑀼𑀢𑁆𑀯𑀸 𑀲𑀪𑀭𑀺𑀬𑀲𑁆𑀲, 𑀯𑀻𑀢𑀲𑀤𑁆𑀥𑀲𑁆𑀲 𑀫𑀁 𑀧𑀢𑀻’’𑀢𑀺.
𑀢𑀢𑁆𑀣 𑀅𑀪𑀺𑀓𑀽𑀚𑀺𑀢𑀦𑁆𑀢𑀺 𑀏𑀢𑁂𑀦 𑀢𑀯 𑀲𑀼𑀦𑀔𑁂𑀦 𑀏𑀯𑀁 𑀫𑀳𑀸𑀯𑀺𑀭𑀯𑁂𑀦 𑀯𑀺𑀭𑀯𑀺𑀢𑀁 𑀦 𑀚𑀸𑀦𑀸𑀫𑀺. 𑀤𑀺𑀢𑁆𑀢𑁄 𑀯𑀸𑀢𑀺 𑀤𑀧𑁆𑀧𑀺𑀢𑁄 𑀯𑀺𑀬. 𑀲𑀪𑀭𑀺𑀬𑀲𑁆𑀲𑀸𑀢𑀺 𑀢𑀯 𑀲𑀪𑀭𑀺𑀬𑀲𑁆𑀲 𑀫𑀫 𑀫𑀸𑀭𑀡𑀢𑁆𑀣𑀸𑀬 𑀧𑀜𑁆𑀘𑀦𑁆𑀦𑀁 𑀅𑀫𑀘𑁆𑀘𑀸𑀦𑀁 𑀆𑀡𑀢𑁆𑀢𑀪𑀸𑀯𑀁 𑀓𑀣𑁂𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 ‘‘𑀓𑀺𑀁 𑀢𑁆𑀯𑀁 𑀅𑀜𑁆𑀜𑀢𑁆𑀣 𑀪𑀺𑀓𑁆𑀔𑀁 𑀦 𑀮𑀪𑀲𑀺, 𑀭𑀜𑁆𑀜𑀸 𑀢𑁂 𑀯𑀥𑁄 𑀆𑀡𑀢𑁆𑀢𑁄, 𑀇𑀥 𑀫𑀸𑀕𑀘𑁆𑀙𑀻’’𑀢𑀺 𑀤𑀺𑀢𑁆𑀢𑁄𑀯 𑀦𑀤𑀢𑀺. 𑀯𑀻𑀢𑀲𑀤𑁆𑀥𑀲𑁆𑀲 𑀫𑀁 𑀧𑀢𑀻𑀢𑀺 𑀫𑀫𑀦𑁆𑀢𑀭𑁂 𑀯𑀺𑀕𑀢𑀲𑀤𑁆𑀥𑀲𑁆𑀲 𑀢𑀯 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀯 𑀦𑀤𑀢𑀻𑀢𑀺 𑀆𑀳.
𑀢𑀢𑁄 𑀭𑀸𑀚𑀸 𑀅𑀢𑁆𑀢𑀦𑁄 𑀤𑁄𑀲𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀔𑀫𑀸𑀧𑁂𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳 𑁋
‘‘𑀅𑀳𑀼 ¶ 𑀏𑀲 𑀓𑀢𑁄 𑀤𑁄𑀲𑁄, 𑀬𑀣𑀸 𑀪𑀸𑀲𑀲𑀺 𑀩𑁆𑀭𑀸𑀳𑁆𑀫𑀡;
𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀯𑀲 𑀩𑁆𑀭𑀸𑀳𑁆𑀫𑀡 𑀫𑀸𑀕𑀫𑀸’’𑀢𑀺.
𑀢𑀢𑁆𑀣 𑀪𑀺𑀬𑁆𑀬𑁄𑀢𑀺 𑀲𑀘𑁆𑀘𑀁 𑀫𑀬𑀸 𑀏𑀯𑀁 𑀆𑀡𑀢𑁆𑀢𑀁, 𑀅𑀬𑀁 𑀫𑁂 𑀤𑁄𑀲𑁄, 𑀏𑀲 𑀧𑀦𑀸𑀳𑀁 𑀇𑀤𑀸𑀦𑀺 𑀅𑀥𑀺𑀓𑀢𑀭𑀁 𑀢𑀬𑀺 𑀧𑀲𑀻𑀤𑀸𑀫𑀺, 𑀇𑀥𑁂𑀯 𑀯𑀲, 𑀫𑀸 𑀅𑀜𑁆𑀜𑀢𑁆𑀣 𑀕𑀫𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄, ‘‘𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑀸 𑀦𑀸𑀫 𑀢𑀸𑀤𑀺𑀲𑁂𑀦 𑀧𑀭𑀧𑀢𑁆𑀢𑀺𑀬𑁂𑀦 𑀅𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀸 𑀲𑀤𑁆𑀥𑀺𑀁 𑀦 𑀯𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀦𑀸𑀘𑀸𑀭𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀲𑀩𑁆𑀩𑀲𑁂𑀢𑁄 ¶ 𑀧𑀼𑀭𑁂 𑀆𑀲𑀺, 𑀢𑀢𑁄𑀧𑀺 𑀲𑀩𑀮𑁄 𑀅𑀳𑀼;
𑀲𑀩𑁆𑀩𑀮𑁄𑀳𑀺𑀢𑀓𑁄 𑀤𑀸𑀦𑀺, 𑀓𑀸𑀮𑁄 𑀧𑀓𑁆𑀓𑀫𑀺𑀢𑀼𑀁 𑀫𑀫.
‘‘𑀅𑀩𑁆𑀪𑀦𑁆𑀢𑀭𑀁 𑀧𑀼𑀭𑁂 𑀆𑀲𑀺, 𑀢𑀢𑁄 𑀫𑀚𑁆𑀛𑁂 𑀢𑀢𑁄 𑀩𑀳𑀺;
𑀧𑀼𑀭𑀸 𑀦𑀺𑀤𑁆𑀥𑀫𑀦𑀸 𑀳𑁄𑀢𑀺, 𑀲𑀬𑀫𑁂𑀯 𑀯𑀚𑀸𑀫𑀳𑀁.
‘‘𑀯𑀻𑀢𑀲𑀤𑁆𑀥𑀁 𑀦 𑀲𑁂𑀯𑁂𑀬𑁆𑀬, 𑀉𑀧𑀤𑀸𑀦𑀁𑀯𑀦𑁄𑀤𑀓𑀁;
𑀲𑀘𑁂𑀧𑀺 𑀦𑀁 𑀅𑀦𑀼𑀔𑀡𑁂, 𑀯𑀸𑀭𑀺 𑀓𑀤𑁆𑀤𑀫𑀕𑀦𑁆𑀥𑀺𑀓𑀁.
‘‘𑀧𑀲𑀦𑁆𑀦𑀫𑁂𑀯 𑀲𑁂𑀯𑁂𑀬𑁆𑀬, 𑀅𑀧𑁆𑀧𑀲𑀦𑁆𑀦𑀁 𑀯𑀺𑀯𑀚𑁆𑀚𑀬𑁂;
𑀧𑀲𑀦𑁆𑀦𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀭𑀳𑀤𑀁𑀯𑀼𑀤𑀓𑀢𑁆𑀣𑀺𑀓𑁄.
‘‘𑀪𑀚𑁂 𑀪𑀚𑀦𑁆𑀢𑀁 𑀧𑀼𑀭𑀺𑀲𑀁, 𑀅𑀪𑀚𑀦𑁆𑀢𑀁 𑀦 𑀪𑀚𑁆𑀚𑀬𑁂;
𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁄 𑀲𑁄, 𑀬𑁄 𑀪𑀚𑀦𑁆𑀢𑀁 𑀦 𑀪𑀚𑁆𑀚𑀢𑀺.
‘‘𑀬𑁄 ¶ 𑀪𑀚𑀦𑁆𑀢𑀁 𑀦 𑀪𑀚𑀢𑀺, 𑀲𑁂𑀯𑀫𑀸𑀦𑀁 𑀦 𑀲𑁂𑀯𑀢𑀺;
𑀲 𑀯𑁂 𑀫𑀦𑀼𑀲𑁆𑀲𑀧𑀸𑀧𑀺𑀝𑁆𑀞𑁄, 𑀫𑀺𑀕𑁄 𑀲𑀸𑀔𑀲𑁆𑀲𑀺𑀢𑁄 𑀬𑀣𑀸.
‘‘𑀅𑀘𑁆𑀘𑀸𑀪𑀺𑀓𑁆𑀔𑀡𑀲𑀁𑀲𑀕𑁆𑀕𑀸, 𑀅𑀲𑀫𑁄𑀲𑀭𑀡𑁂𑀦 𑀘;
𑀏𑀢𑁂𑀦 𑀫𑀺𑀢𑁆𑀢𑀸 𑀚𑀻𑀭𑀦𑁆𑀢𑀺, 𑀅𑀓𑀸𑀮𑁂 𑀬𑀸𑀘𑀦𑀸𑀬 𑀘.
‘‘𑀢𑀲𑁆𑀫𑀸 𑀦𑀸𑀪𑀺𑀓𑁆𑀔𑀡𑀁 𑀕𑀘𑁆𑀙𑁂, 𑀦 𑀘 𑀕𑀘𑁆𑀙𑁂 𑀘𑀺𑀭𑀸𑀘𑀺𑀭𑀁;
𑀓𑀸𑀮𑁂𑀦 𑀬𑀸𑀘𑀁 𑀬𑀸𑀘𑁂𑀬𑁆𑀬, 𑀏𑀯𑀁 𑀫𑀺𑀢𑁆𑀢𑀸 𑀦 𑀚𑀻𑀬𑀭𑁂.
‘‘𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦, 𑀧𑀺𑀬𑁄 𑀪𑀯𑀢𑀺 𑀅𑀧𑁆𑀧𑀺𑀬𑁄;
𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫, 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸’’𑀢𑀺.
𑀢𑀢𑁆𑀣 𑀲𑀩𑁆𑀩𑀲𑁂𑀢𑁄𑀢𑀺, 𑀫𑀳𑀸𑀭𑀸𑀚, 𑀧𑀞𑀫𑀫𑁂𑀯 𑀢𑀯 𑀦𑀺𑀯𑁂𑀲𑀦𑁂 𑀫𑀫 𑀑𑀤𑀦𑁄 𑀲𑀩𑁆𑀩𑀲𑁂𑀢𑁄 𑀅𑀳𑁄𑀲𑀺, 𑀬𑀁 𑀢𑁆𑀯𑀁 𑀪𑀼𑀜𑁆𑀚𑀲𑀺, 𑀢𑀫𑁂𑀯 𑀤𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀢𑁄 𑀧𑀘𑁆𑀙𑀸 𑀧𑀭𑀺𑀪𑁂𑀤𑀓𑀸𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀢𑀯 𑀫𑀬𑀺 𑀯𑀺𑀭𑀢𑁆𑀢𑀓𑀸𑀮𑁂 𑀲𑀩𑀮𑁄 𑀫𑀺𑀲𑁆𑀲𑀓𑁄𑀤𑀦𑁄 𑀚𑀸𑀢𑁄. 𑀤𑀸𑀦𑀻𑀢𑀺 𑀇𑀤𑀸𑀦𑀺 𑀲𑀩𑁆𑀩𑀮𑁄𑀳𑀺𑀢𑀓𑁄 𑀚𑀸𑀢𑁄. 𑀓𑀸𑀮𑁄𑀢𑀺 𑀅𑀕𑀼𑀡𑀜𑁆𑀜𑀼𑀲𑁆𑀲 ¶ 𑀢𑀯 𑀲𑀦𑁆𑀢𑀺𑀓𑀸 𑀇𑀤𑀸𑀦𑀺 𑀫𑀫 𑀧𑀓𑁆𑀓𑀫𑀺𑀢𑀼𑀁 𑀓𑀸𑀮𑁄. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀧𑀞𑀫𑀁 𑀫𑀫 𑀅𑀩𑁆𑀪𑀦𑁆𑀢𑀭𑀁 ¶ 𑀆𑀲𑀦𑀁 𑀆𑀲𑀺, 𑀅𑀮𑀗𑁆𑀓𑀢𑀫𑀳𑀸𑀢𑀮𑀫𑁆𑀳𑀺 𑀉𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂𑀬𑁂𑀯 𑀫𑀁 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀫𑀚𑁆𑀛𑁂𑀢𑀺 𑀲𑁄𑀧𑀸𑀦𑀫𑀢𑁆𑀣𑀓𑁂. 𑀧𑀼𑀭𑀸 𑀦𑀺𑀤𑁆𑀥𑀫𑀦𑀸 𑀳𑁄𑀢𑀻𑀢𑀺 𑀬𑀸𑀯 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀦𑀸 𑀦 𑀳𑁄𑀢𑀺.
𑀅𑀦𑀼𑀔𑀡𑁂𑀢𑀺 𑀲𑀘𑁂𑀧𑀺 𑀅𑀦𑀼𑀤𑀓𑀁 𑀉𑀤𑀧𑀸𑀦𑀁 𑀧𑀢𑁆𑀢𑁄 𑀧𑀼𑀭𑀺𑀲𑁄 𑀉𑀤𑀓𑀁 𑀅𑀧𑀲𑁆𑀲𑀦𑁆𑀢𑁄 𑀓𑀮𑀮𑀁 𑀯𑀺𑀬𑀽𑀳𑀺𑀢𑁆𑀯𑀸 𑀅𑀦𑀼𑀔𑀡𑁂𑀬𑁆𑀬, 𑀢𑀣𑀸𑀧𑀺 𑀢𑀁 𑀯𑀸𑀭𑀺 𑀓𑀤𑁆𑀤𑀫𑀕𑀦𑁆𑀥𑀺𑀓𑀁 𑀪𑀯𑁂𑀬𑁆𑀬, 𑀅𑀫𑀦𑀼𑀜𑁆𑀜𑀢𑀸𑀬 𑀦 𑀧𑀺𑀯𑁂𑀬𑁆𑀬, 𑀢𑀣𑁂𑀯 𑀯𑀻𑀢𑀲𑀤𑁆𑀥𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑁂𑀦 𑀮𑀤𑁆𑀥𑀧𑀘𑁆𑀘𑀬𑀸𑀧𑀺 𑀧𑀭𑀺𑀢𑁆𑀢𑀸 𑀘𑁂𑀯 𑀮𑀽𑀔𑀸 𑀘, 𑀅𑀫𑀦𑀼𑀜𑁆𑀜𑀸 𑀅𑀧𑀭𑀺𑀪𑁄𑀕𑀸𑀭𑀳𑀸𑀢𑀺 𑀅𑀢𑁆𑀣𑁄. 𑀧𑀲𑀦𑁆𑀦𑀦𑁆𑀢𑀺 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑀁. 𑀭𑀳𑀤𑀦𑁆𑀢𑀺 𑀕𑀫𑁆𑀪𑀻𑀭𑀁 𑀫𑀳𑀸𑀭𑀳𑀤𑀁. 𑀪𑀚𑀦𑁆𑀢𑀦𑁆𑀢𑀺 𑀅𑀢𑁆𑀢𑀸𑀦𑀁 𑀪𑀚𑀦𑁆𑀢𑀫𑁂𑀯 𑀪𑀚𑁂𑀬𑁆𑀬. 𑀅𑀪𑀚𑀦𑁆𑀢𑀦𑁆𑀢𑀺 𑀧𑀘𑁆𑀘𑀢𑁆𑀣𑀺𑀓𑀁. 𑀦 𑀪𑀚𑁆𑀚𑀬𑁂𑀢𑀺 𑀦 𑀪𑀚𑁂𑀬𑁆𑀬. 𑀦 𑀪𑀚𑁆𑀚𑀢𑀻𑀢𑀺 𑀬𑁄 𑀧𑀼𑀭𑀺𑀲𑁄 𑀅𑀢𑁆𑀢𑀸𑀦𑀁 𑀪𑀚𑀦𑁆𑀢𑀁 𑀳𑀺𑀢𑀘𑀺𑀢𑁆𑀢𑀁 𑀧𑀼𑀕𑁆𑀕𑀮𑀁 𑀦 𑀪𑀚𑀢𑀺, 𑀲𑁄 𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁄 𑀦𑀸𑀫𑀸𑀢𑀺. 𑀫𑀦𑀼𑀲𑁆𑀲𑀧𑀸𑀧𑀺𑀝𑁆𑀞𑁄𑀢𑀺 𑀫𑀦𑀼𑀲𑁆𑀲𑀮𑀸𑀫𑀓𑁄 𑀧𑀢𑀺𑀓𑀼𑀝𑁆𑀞𑁄 𑀲𑀩𑁆𑀩𑀧𑀘𑁆𑀙𑀺𑀫𑀓𑁄. 𑀲𑀸𑀔𑀲𑁆𑀲𑀺𑀢𑁄𑀢𑀺 𑀫𑀓𑁆𑀓𑀝𑁄.
𑀅𑀘𑁆𑀘𑀸𑀪𑀺𑀓𑁆𑀔𑀡𑀲𑀁𑀲𑀕𑁆𑀕𑀸𑀢𑀺 ¶ 𑀅𑀢𑀺𑀯𑀺𑀬 𑀅𑀪𑀺𑀡𑁆𑀳𑀲𑀁𑀲𑀕𑁆𑀕𑁂𑀦. 𑀅𑀓𑀸𑀮𑁂𑀢𑀺 𑀅𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂 𑀧𑀭𑀲𑁆𑀲 𑀧𑀺𑀬𑀪𑀡𑁆𑀟𑀁 𑀬𑀸𑀘𑀦𑀸𑀬 𑀫𑀺𑀢𑁆𑀢𑀸 𑀚𑀻𑀭𑀦𑁆𑀢𑀺 𑀦𑀸𑀫, 𑀢𑁆𑀯𑀫𑁆𑀧𑀺 𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦 𑀫𑀬𑀺 𑀫𑀺𑀢𑁆𑀢𑀺𑀁 𑀪𑀺𑀦𑁆𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀘𑁆𑀘𑀸𑀪𑀺𑀓𑁆𑀔𑀡𑀲𑀁𑀲𑀕𑁆𑀕𑁂𑀦 𑀅𑀲𑀫𑁄𑀲𑀭𑀡𑁂𑀦 𑀘 𑀫𑀺𑀢𑁆𑀢𑀸 𑀚𑀻𑀭𑀦𑁆𑀢𑀺, 𑀢𑀲𑁆𑀫𑀸. 𑀘𑀺𑀭𑀸𑀘𑀺𑀭𑀦𑁆𑀢𑀺 𑀘𑀺𑀭𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀺𑀭𑀁 𑀦 𑀕𑀘𑁆𑀙𑁂 𑀦 𑀉𑀧𑀲𑀗𑁆𑀓𑀫𑁂𑀬𑁆𑀬. 𑀬𑀸𑀘𑀦𑁆𑀢𑀺 𑀬𑀸𑀘𑀺𑀢𑀩𑁆𑀩𑀁 𑀪𑀡𑁆𑀟𑀓𑀁 𑀬𑀼𑀢𑁆𑀢𑀓𑀸𑀮𑁂 𑀬𑀸𑀘𑁂𑀬𑁆𑀬. 𑀦 𑀚𑀻𑀬𑀭𑁂𑀢𑀺 𑀏𑀯𑀁 𑀫𑀺𑀢𑁆𑀢𑀸 𑀦 𑀚𑀻𑀭𑀦𑁆𑀢𑀺. 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸𑀢𑀺 𑀬𑀸𑀯 𑀢𑀯 𑀅𑀧𑁆𑀧𑀺𑀬𑀸 𑀦 𑀳𑁄𑀫, 𑀢𑀸𑀯 𑀆𑀫𑀦𑁆𑀢𑁂𑀢𑁆𑀯𑀸𑀯 𑀢𑀁 𑀕𑀘𑁆𑀙𑀸𑀫𑀸𑀢𑀺.
𑀭𑀸𑀚𑀸 𑀆𑀳 𑁋
‘‘𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀦𑀁, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺;
𑀧𑀭𑀺𑀘𑀸𑀭𑀓𑀸𑀦𑀁 𑀲𑀢𑀁, 𑀯𑀘𑀦𑀁 𑀦 𑀓𑀭𑁄𑀲𑀺 𑀦𑁄;
𑀏𑀯𑀁 𑀢𑀁 𑀅𑀪𑀺𑀬𑀸𑀘𑀸𑀫, 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬’’𑀦𑁆𑀢𑀺.
𑀢𑀢𑁆𑀣 𑀦𑀸𑀯𑀩𑀼𑀚𑁆𑀛𑀲𑀻𑀢𑀺 𑀲𑀘𑁂, 𑀪𑀦𑁆𑀢𑁂, 𑀏𑀯𑀁 𑀬𑀸𑀘𑀦𑁆𑀢𑁂𑀦 𑀫𑀬𑀸 𑀓𑀢𑀁 𑀅𑀜𑁆𑀚𑀮𑀺𑀁 𑀦 𑀚𑀸𑀦𑀸𑀲𑀺, 𑀦 𑀧𑀝𑀺𑀕𑁆𑀕𑀡𑁆𑀳𑀲𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀬𑀦𑁆𑀢𑀺 𑀧𑀼𑀦 𑀇𑀥𑀸𑀕𑀫𑀦𑀸𑀬 𑀏𑀓𑀯𑀸𑀭𑀁 𑀓𑀭𑁂𑀬𑁆𑀬𑀸𑀲𑀻𑀢𑀺 𑀬𑀸𑀘𑀢𑀺.
𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋
‘‘𑀏𑀯𑀁 ¶ 𑀘𑁂 𑀦𑁄 𑀯𑀺𑀳𑀭𑀢𑀁, 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺;
𑀢𑀼𑀬𑁆𑀳𑀁 𑀯𑀸𑀧𑀺 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀯𑀸 𑀭𑀝𑁆𑀞𑀯𑀤𑁆𑀥𑀦;
𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀫, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂’’𑀢𑀺.
𑀢𑀢𑁆𑀣 𑀏𑀯𑀁 𑀘𑁂 𑀦𑁄𑀢𑀺 𑀲𑀘𑁂, 𑀫𑀳𑀸𑀭𑀸𑀚, 𑀏𑀯𑀁 𑀦𑀸𑀦𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺, 𑀢𑀼𑀬𑁆𑀳𑀁 𑀯𑀸 𑀫𑀬𑁆𑀳𑀁 𑀯𑀸 𑀚𑀻𑀯𑀺𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀲𑁆𑀲𑁂𑀫𑀸𑀢𑀺 𑀅𑀧𑀺 𑀦𑀸𑀫 𑀧𑀲𑁆𑀲𑁂𑀬𑁆𑀬𑀸𑀫.
𑀏𑀯𑀁 ¶ 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀪𑀸𑀕𑀝𑁆𑀞𑀸𑀦𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀳𑀺𑀫𑀯𑀦𑁆𑀢𑁄𑀓𑀸𑀲𑀫𑁂𑀯 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀮𑀁 𑀯𑀲𑀺𑀢𑁆𑀯𑀸 𑀧𑀼𑀦 𑀑𑀢𑀭𑀺𑀢𑁆𑀯𑀸 𑀏𑀓𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑁂 𑀯𑀲𑀺. 𑀢𑀲𑁆𑀲 𑀧𑀦 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂 𑀅𑀫𑀘𑁆𑀘𑀸 𑀧𑀼𑀦 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀮𑁄𑀧𑀁 𑀓𑀭𑁄𑀦𑁆𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀘𑁂 𑀫𑀳𑀸𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀧𑀼𑀦𑀸𑀕𑀫𑀺𑀲𑁆𑀲𑀢𑀺, 𑀚𑀻𑀯𑀺𑀢𑀁 𑀦𑁄 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁆𑀯𑀲𑁆𑀲 𑀅𑀦𑀸𑀕𑀫𑀦𑀓𑀸𑀭𑀡𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺. 𑀅𑀣 ¶ 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀲𑀢𑁆𑀢𑀸 𑀧𑀝𑀺𑀩𑀤𑁆𑀥𑀝𑁆𑀞𑀸𑀦𑀁 𑀦𑀸𑀫 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀺𑀁 𑀦𑀼 𑀔𑁆𑀯𑀲𑁆𑀲 𑀇𑀥 𑀧𑀝𑀺𑀩𑀤𑁆𑀥𑀝𑁆𑀞𑀸𑀦’’𑀦𑁆𑀢𑀺. 𑀢𑀢𑁄 ‘‘𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻’’𑀢𑀺 𑀜𑀢𑁆𑀯𑀸 ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀇𑀫𑀁 𑀦𑀺𑀲𑁆𑀲𑀸𑀬 𑀆𑀕𑀘𑁆𑀙𑁂𑀬𑁆𑀬, 𑀧𑀝𑀺𑀓𑀘𑁆𑀘𑁂𑀯 𑀦𑀁 𑀫𑀸𑀭𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀢𑁂 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀯, 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂 𑀦𑀕𑀭𑁂 𑀏𑀓𑀸 𑀓𑀣𑀸 𑀲𑀽𑀬𑀢𑀻’’𑀢𑀺. ‘‘𑀓𑀺𑀁 𑀓𑀣𑀸 𑀦𑀸𑀫𑀸’’𑀢𑀺? ‘‘𑀫𑀳𑀸𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀘 𑀓𑀺𑀭 𑀤𑁂𑀯𑀻 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀸𑀲𑀦𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀻’’𑀢𑀺. ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸’’𑀢𑀺? 𑀢𑁂𑀦 𑀓𑀺𑀭 𑀤𑁂𑀯𑀺𑀬𑀸 𑀧𑁂𑀲𑀺𑀢𑀁 ‘‘𑀲𑀓𑁆𑀓𑀸 𑀦𑀼 𑀔𑁄 𑀅𑀢𑁆𑀢𑀦𑁄 𑀩𑀮𑁂𑀦 𑀭𑀸𑀚𑀸𑀦𑀁 𑀫𑀸𑀭𑀸𑀧𑁂𑀢𑁆𑀯𑀸 𑀫𑀫 𑀲𑁂𑀢𑀘𑁆𑀙𑀢𑁆𑀢𑀁 𑀤𑀸𑀢𑀼’’𑀦𑁆𑀢𑀺. 𑀢𑀸𑀬𑀧𑀺𑀲𑁆𑀲 𑀧𑁂𑀲𑀺𑀢𑀁 ‘‘𑀭𑀜𑁆𑀜𑁄 𑀫𑀸𑀭𑀡𑀁 𑀦𑀸𑀫 𑀫𑀫 𑀪𑀸𑀭𑁄, 𑀫𑀳𑀸𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀔𑀺𑀧𑁆𑀧𑀁 𑀆𑀕𑀘𑁆𑀙𑀢𑀽’’𑀢𑀺 𑀭𑀸𑀚𑀸 𑀢𑁂𑀲𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑁂𑀯𑀺𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 ‘‘𑀢𑁂𑀦 𑀳𑀺 𑀦𑀁 𑀢𑀼𑀫𑁆𑀳𑁂𑀯 𑀫𑀸𑀭𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀘𑁆𑀘𑀓𑀽𑀧𑁂 𑀔𑀺𑀧𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀢𑀲𑁆𑀲𑀸 𑀫𑀸𑀭𑀺𑀢𑀪𑀸𑀯𑁄 𑀲𑀓𑀮𑀦𑀕𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺.
𑀅𑀣𑀲𑁆𑀲𑀸 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 ‘‘𑀇𑀫𑀺𑀦𑀸 𑀦𑁄 𑀦𑀺𑀭𑀧𑀭𑀸𑀥𑀸 𑀫𑀸𑀢𑀸 𑀫𑀸𑀭𑀺𑀢𑀸’’𑀢𑀺 𑀭𑀜𑁆𑀜𑁄 𑀧𑀘𑁆𑀘𑀢𑁆𑀣𑀺𑀓𑀸 𑀅𑀳𑁂𑀲𑀼𑀁. 𑀭𑀸𑀚𑀸 𑀫𑀳𑀸𑀪𑀬𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 𑀧𑀭𑀫𑁆𑀧𑀭𑀸𑀬 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀢𑁂 𑀓𑀼𑀫𑀸𑀭𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀺𑀢𑀭𑀁 𑀔𑀫𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀭𑀜𑁆𑀜𑁄 𑀘 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀺, 𑀓𑀼𑀫𑀸𑀭𑁂 𑀘 𑀧𑀸𑀧𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑀦𑁆𑀢𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 ¶ 𑀫𑀦𑀼𑀲𑁆𑀲𑁂𑀳𑀺 𑀤𑀺𑀦𑁆𑀦𑀁 𑀫𑀓𑁆𑀓𑀝𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀢𑀲𑁆𑀲 ¶ 𑀘𑀫𑁆𑀫𑀁 𑀬𑀸𑀘𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀅𑀲𑁆𑀲𑀫𑀧𑀤𑁂 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀦𑀺𑀕𑁆𑀕𑀦𑁆𑀥𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀲𑀺𑀧𑀺 𑀧𑀸𑀭𑀼𑀧𑁂𑀲𑀺𑀧𑀺 𑀅𑀁𑀲𑁂𑀧𑀺 𑀞𑀧𑁂𑀲𑀺. 𑀓𑀺𑀁𑀓𑀸𑀭𑀡𑀸? ‘‘𑀩𑀳𑀽𑀧𑀓𑀸𑀭𑁄 𑀫𑁂’’𑀢𑀺 𑀯𑀘𑀦𑀢𑁆𑀣𑀸𑀬. 𑀲𑁄 𑀢𑀁 𑀘𑀫𑁆𑀫𑀁 𑀆𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀺𑀢𑀼𑀖𑀸𑀢𑀓𑀓𑀫𑁆𑀫𑀁 𑀦𑀸𑀫 𑀤𑀸𑀭𑀼𑀡𑀁, 𑀢𑀁 𑀯𑁄 𑀦 𑀓𑀸𑀢𑀩𑁆𑀩𑀁, 𑀅𑀚𑀭𑀸𑀫𑀭𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑀁 𑀢𑀼𑀫𑁆𑀳𑁂 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑁂 𑀓𑀭𑀺𑀲𑁆𑀲𑀸𑀫𑀺𑀘𑁆𑀘𑁂𑀯 𑀆𑀕𑀢𑁄, 𑀢𑀼𑀫𑁆𑀳𑁂 𑀫𑀬𑀸 𑀧𑀳𑀺𑀢𑁂 𑀲𑀸𑀲𑀦𑁂 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀓𑀼𑀫𑀸𑀭𑁂 𑀑𑀯𑀤𑀺𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀓𑁆𑀓𑀝𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺.
𑀅𑀣 𑀦𑀁 𑀉𑀬𑁆𑀬𑀸𑀦𑀧𑀸𑀮𑀓𑁄 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀼𑀢𑁆𑀯𑀸𑀯 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀳𑀼𑀢𑁆𑀯𑀸 𑀢𑁂 𑀅𑀫𑀘𑁆𑀘𑁂 𑀆𑀤𑀸𑀬 ¶ 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀸𑀢𑀼𑀁 𑀆𑀭𑀪𑀺. 𑀫𑀳𑀸𑀲𑀢𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀅𑀲𑀫𑁆𑀫𑁄𑀤𑀺𑀢𑁆𑀯𑀸 𑀫𑀓𑁆𑀓𑀝𑀘𑀫𑁆𑀫𑀫𑁂𑀯 𑀧𑀭𑀺𑀫𑀚𑁆𑀚𑀺. 𑀅𑀣 𑀦𑀁 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀁 𑀅𑀓𑀣𑁂𑀢𑁆𑀯𑀸 𑀫𑀓𑁆𑀓𑀝𑀘𑀫𑁆𑀫𑀫𑁂𑀯 𑀧𑀭𑀺𑀫𑀚𑁆𑀚𑀣, 𑀓𑀺𑀁 𑀯𑁄 𑀇𑀤𑀁 𑀫𑀬𑀸 𑀩𑀳𑀽𑀧𑀓𑀸𑀭𑀢𑀭’’𑀦𑁆𑀢𑀺? ‘‘𑀆𑀫 𑀫𑀳𑀸𑀭𑀸𑀚, 𑀩𑀳𑀽𑀧𑀓𑀸𑀭𑁄 𑀫𑁂 𑀏𑀲 𑀯𑀸𑀦𑀭𑁄, 𑀅𑀳𑀫𑀲𑁆𑀲 𑀧𑀺𑀝𑁆𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀘𑀭𑀺𑀁, 𑀅𑀬𑀁 𑀫𑁂 𑀧𑀸𑀦𑀻𑀬𑀖𑀝𑀁 𑀆𑀳𑀭𑀺, 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺, 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀫𑀫 𑀅𑀓𑀸𑀲𑀺, 𑀅𑀳𑀁 𑀧𑀦 𑀅𑀢𑁆𑀢𑀦𑁄 𑀤𑀼𑀩𑁆𑀩𑀮𑀘𑀺𑀢𑁆𑀢𑀢𑀸𑀬 𑀅𑀲𑁆𑀲 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀘𑀫𑁆𑀫𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀸𑀫𑀺 𑀘𑁂𑀯 𑀦𑀺𑀧𑀚𑁆𑀚𑀸𑀫𑀺 𑀘, 𑀏𑀯𑀁 𑀩𑀳𑀽𑀧𑀓𑀸𑀭𑁄 𑀏𑀲 𑀫𑀬𑁆𑀳’’𑀦𑁆𑀢𑀺. 𑀇𑀢𑀺 𑀲𑁄 𑀢𑁂𑀲𑀁 𑀯𑀸𑀤𑁂 𑀪𑀺𑀦𑁆𑀤𑀦𑀢𑁆𑀣𑀸𑀬 𑀯𑀸𑀦𑀭𑀘𑀫𑁆𑀫𑁂 𑀯𑀸𑀦𑀭𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀢𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀇𑀫𑀁 𑀓𑀣𑀁 𑀓𑀣𑁂𑀲𑀺. 𑀲𑁄 𑀳𑀺 𑀢𑀲𑁆𑀲 𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀢𑁆𑀢𑀸 ‘‘𑀧𑀺𑀝𑁆𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀘𑀭𑀺’’𑀦𑁆𑀢𑀺 𑀆𑀳; 𑀢𑀁 𑀅𑀁𑀲𑁂 𑀓𑀢𑁆𑀯𑀸 𑀧𑀸𑀦𑀻𑀬𑀖𑀝𑀲𑁆𑀲 𑀆𑀳𑀝𑀧𑀼𑀩𑁆𑀩𑀢𑁆𑀢𑀸 ‘‘𑀧𑀸𑀦𑀻𑀬𑀖𑀝𑀁 𑀆𑀳𑀭𑀻’’𑀢𑀺 𑀆𑀳; 𑀢𑁂𑀦 𑀘𑀫𑁆𑀫𑁂𑀦 𑀪𑀽𑀫𑀺𑀬𑀁 𑀲𑀫𑁆𑀫𑀝𑁆𑀞𑀧𑀼𑀩𑁆𑀩𑀢𑁆𑀢𑀸 ‘‘𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀻’’𑀢𑀺 𑀆𑀳; 𑀦𑀺𑀧𑀦𑁆𑀦𑀓𑀸𑀮𑁂 𑀢𑁂𑀦 𑀘𑀫𑁆𑀫𑁂𑀦 𑀧𑀺𑀝𑁆𑀞𑀺𑀬𑀸, 𑀅𑀓𑁆𑀓𑀦𑁆𑀢𑀓𑀸𑀮𑁂 𑀧𑀸𑀤𑀸𑀦𑀁 𑀨𑀼𑀝𑁆𑀞𑀧𑀼𑀩𑁆𑀩𑀢𑁆𑀢𑀸 ‘‘𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀫𑁂 𑀅𑀓𑀸𑀲𑀻’’𑀢𑀺 𑀆𑀳. 𑀙𑀸𑀢𑀓𑀸𑀮𑁂 𑀧𑀦 𑀢𑀲𑁆𑀲 𑀫𑀁𑀲𑀁 𑀮𑀪𑀺𑀢𑁆𑀯𑀸 𑀔𑀸𑀤𑀺𑀢𑀢𑁆𑀢𑀸 ‘‘𑀅𑀳𑀁 𑀧𑀦 ¶ 𑀅𑀢𑁆𑀢𑀦𑁄 𑀤𑀼𑀩𑁆𑀩𑀮𑀘𑀺𑀢𑁆𑀢𑀢𑀸𑀬 𑀢𑀲𑁆𑀲 𑀫𑀁𑀲𑀁 𑀔𑀸𑀤𑀺’’𑀦𑁆𑀢𑀺 𑀆𑀳.
𑀢𑀁 𑀲𑀼𑀢𑁆𑀯𑀸 𑀢𑁂 𑀅𑀫𑀘𑁆𑀘𑀸 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀢𑁂𑀦 𑀓𑀢𑁄’’𑀢𑀺 𑀲𑀜𑁆𑀜𑀸𑀬 ‘‘𑀧𑀲𑁆𑀲𑀣, 𑀪𑁄, 𑀧𑀩𑁆𑀩𑀚𑀺𑀢𑀲𑁆𑀲 𑀓𑀫𑁆𑀫𑀁, 𑀫𑀓𑁆𑀓𑀝𑀁 𑀓𑀺𑀭 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀢𑀻’’𑀢𑀺 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀳𑀸𑀲𑀫𑀓𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑁂 𑀢𑀣𑀸 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀢𑁆𑀢𑀦𑁄 𑀯𑀸𑀤𑀪𑁂𑀤𑀦𑀢𑁆𑀣𑀸𑀬 𑀫𑀫 𑀘𑀫𑁆𑀫𑀁 𑀆𑀤𑀸𑀬 𑀆𑀕𑀢𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀦𑀸𑀧𑁂𑀲𑁆𑀲𑀸𑀫𑀺 𑀦𑁂’’𑀢𑀺 𑀅𑀳𑁂𑀢𑀼𑀓𑀯𑀸𑀤𑀺𑀁 𑀢𑀸𑀯 𑀆𑀫𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀆𑀯𑀼𑀲𑁄, 𑀢𑁆𑀯𑀁 𑀓𑀲𑁆𑀫𑀸 𑀫𑀁 𑀧𑀭𑀺𑀳𑀲𑀲𑀻’’𑀢𑀺? ‘‘𑀫𑀺𑀢𑁆𑀢𑀤𑀼𑀩𑁆𑀪𑀺𑀓𑀫𑁆𑀫𑀲𑁆𑀲 𑀘𑁂𑀯 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 ¶ 𑀘 𑀓𑀢𑀢𑁆𑀢𑀸’’𑀢𑀺. 𑀢𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀬𑁄 𑀧𑀦 𑀕𑀢𑀺𑀬𑀸 𑀘𑁂𑀯 𑀤𑀺𑀝𑁆𑀞𑀺𑀬𑀸 𑀘 𑀢𑁂 𑀲𑀤𑁆𑀤𑀳𑀺𑀢𑁆𑀯𑀸 𑀏𑀯𑀁 𑀓𑀭𑁂𑀬𑁆𑀬, 𑀢𑁂𑀦 𑀓𑀺𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀢𑀲𑁆𑀲 𑀯𑀸𑀤𑀁 𑀪𑀺𑀦𑁆𑀤𑀦𑁆𑀢𑁄 𑀆𑀳 𑁋
‘‘𑀉𑀤𑀻𑀭𑀡𑀸 𑀘𑁂 𑀲𑀁𑀕𑀢𑁆𑀬𑀸, 𑀪𑀸𑀯𑀸𑀬𑀫𑀦𑀼𑀯𑀢𑁆𑀢𑀢𑀺;
𑀅𑀓𑀸𑀫𑀸 𑀅𑀓𑀭𑀡𑀻𑀬𑀁 𑀯𑀸, 𑀓𑀭𑀡𑀻𑀬𑀁 𑀯𑀸𑀧𑀺 𑀓𑀼𑀩𑁆𑀩𑀢𑀺;
𑀅𑀓𑀸𑀫𑀓𑀭𑀡𑀻𑀬𑀫𑁆𑀳𑀺, 𑀓𑁆𑀯𑀺𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺.
‘‘𑀲𑁄 ¶ 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;
𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;
𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’𑀢𑀺.
𑀢𑀢𑁆𑀣 𑀉𑀤𑀻𑀭𑀡𑀸𑀢𑀺 𑀓𑀣𑀸. 𑀲𑀁𑀕𑀢𑁆𑀬𑀸𑀢𑀺 𑀲𑀁𑀕𑀢𑀺𑀬𑀸 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀁 𑀢𑀁 𑀅𑀪𑀺𑀚𑀸𑀢𑀺𑀁 𑀉𑀧𑀕𑀫𑀦𑁂𑀦. 𑀪𑀸𑀯𑀸𑀬𑀫𑀦𑀼𑀯𑀢𑁆𑀢𑀢𑀻𑀢𑀺 𑀪𑀸𑀯𑁂𑀦 𑀅𑀦𑀼𑀯𑀢𑁆𑀢𑀢𑀺, 𑀓𑀭𑀡𑀢𑁆𑀣𑁂 𑀲𑀫𑁆𑀧𑀤𑀸𑀦𑀁. 𑀅𑀓𑀸𑀫𑀸𑀢𑀺 𑀅𑀓𑀸𑀫𑁂𑀦 𑀅𑀦𑀺𑀘𑁆𑀙𑀸𑀬. 𑀅𑀓𑀭𑀡𑀻𑀬𑀁 𑀯𑀸 𑀓𑀭𑀡𑀻𑀬𑀁 𑀯𑀸𑀧𑀻𑀢𑀺 𑀅𑀓𑀢𑁆𑀢𑀩𑁆𑀩𑀁 𑀧𑀸𑀧𑀁 𑀯𑀸 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀯𑀸. 𑀓𑀼𑀩𑁆𑀩𑀢𑀻𑀢𑀺 𑀓𑀭𑁄𑀢𑀺. 𑀓𑁆𑀯𑀺𑀥𑀸𑀢𑀺 𑀓𑁄 𑀇𑀥. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁆𑀯𑀁 𑀅𑀳𑁂𑀢𑀼𑀓𑀯𑀸𑀤𑀻 ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺𑀆𑀤𑀺𑀤𑀺𑀝𑁆𑀞𑀺𑀓𑁄, 𑀅𑀬𑀁 𑀮𑁄𑀓𑁄 𑀲𑀁𑀕𑀢𑀺𑀬𑀸 𑀘𑁂𑀯 𑀲𑀪𑀸𑀯𑁂𑀦 𑀘 𑀅𑀦𑀼𑀯𑀢𑁆𑀢𑀢𑀺 𑀧𑀭𑀺𑀡𑀫𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀓𑀸𑀫𑀓𑁄𑀯 𑀧𑀸𑀧𑀁 𑀯𑀸 𑀧𑀼𑀜𑁆𑀜𑀁 𑀯𑀸 𑀓𑀭𑁄𑀢𑀻𑀢𑀺 𑀯𑀤𑀲𑀺, 𑀅𑀬𑀁 𑀢𑀯 𑀉𑀤𑀻𑀭𑀡𑀸 𑀲𑀘𑁂 𑀢𑀣𑀸, 𑀏𑀯𑀁 𑀲𑀦𑁆𑀢𑁂 𑀅𑀓𑀸𑀫𑀓𑀭𑀡𑀻𑀬𑀲𑁆𑀫𑀺𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀯𑀢𑁆𑀢𑀫𑀸𑀦𑁂 𑀧𑀸𑀧𑁂 𑀓𑁄 𑀇𑀥 𑀲𑀢𑁆𑀢𑁄 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺, 𑀲𑀘𑁂 𑀳𑀺 𑀅𑀢𑁆𑀢𑀦𑀸 𑀅𑀓𑀢𑁂𑀦 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺, 𑀦 𑀓𑁄𑀘𑀺 𑀦 𑀮𑀺𑀧𑁆𑀧𑁂𑀬𑁆𑀬𑀸𑀢𑀺.
𑀲𑁄 𑀘𑁂𑀢𑀺 𑀲𑁄 𑀅𑀳𑁂𑀢𑀼𑀓𑀯𑀸𑀤𑀲𑀗𑁆𑀔𑀸𑀢𑁄 𑀢𑀯 𑀪𑀸𑀲𑀺𑀢𑀢𑁆𑀣𑁄 𑀘 𑀅𑀢𑁆𑀣𑀚𑁄𑀢𑀓𑁄 𑀥𑀫𑁆𑀫𑁄 𑀘 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄. ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀦𑁆𑀢𑀻’’𑀢𑀺 𑀇𑀤𑀁 𑀪𑁄𑀢𑁄 𑀯𑀘𑀦𑀁 ¶ 𑀲𑀘𑁆𑀘𑀁 𑀘𑁂, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸, 𑀓𑁄 𑀏𑀢𑁆𑀣 𑀫𑀫 𑀤𑁄𑀲𑁄𑀢𑀺 𑀅𑀢𑁆𑀣𑁄. 𑀯𑀺𑀚𑀸𑀦𑀺𑀬𑀸𑀢𑀺, 𑀲𑀫𑁆𑀫, 𑀲𑀘𑁂 𑀳𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀅𑀧𑀭𑀸𑀥𑀁 𑀚𑀸𑀦𑁂𑀬𑁆𑀬𑀸𑀲𑀺, 𑀦 𑀫𑀁 𑀕𑀭𑀳𑁂𑀬𑁆𑀬𑀸𑀲𑀺. 𑀓𑀺𑀁𑀓𑀸𑀭𑀡𑀸? 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄, 𑀢𑀲𑁆𑀫𑀸 𑀅𑀬𑀁 𑀫𑀫 𑀯𑀸𑀤𑀁 𑀓𑀭𑁄𑀢𑀻𑀢𑀺 𑀫𑀁 𑀧𑀲𑀁𑀲𑁂𑀬𑁆𑀬𑀸𑀲𑀺, 𑀅𑀢𑁆𑀢𑀦𑁄 𑀧𑀦 𑀯𑀸𑀤𑀁 𑀅𑀚𑀸𑀦𑀦𑁆𑀢𑁄 𑀫𑀁 𑀕𑀭𑀳𑀲𑀻𑀢𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀢𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀧𑁆𑀧𑀝𑀺𑀪𑀸𑀡𑀁 𑀅𑀓𑀸𑀲𑀺. 𑀲𑁄𑀧𑀺 𑀭𑀸𑀚𑀧𑀭𑀺𑀲𑀢𑀺 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀦𑀺𑀲𑀻𑀤𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀢𑀲𑁆𑀲 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀇𑀲𑁆𑀲𑀭𑀓𑀢𑀯𑀸𑀤𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑁆𑀯𑀁, 𑀆𑀯𑀼𑀲𑁄, 𑀫𑀁 𑀓𑀲𑁆𑀫𑀸 𑀧𑀭𑀺𑀳𑀲𑀲𑀺, 𑀬𑀤𑀺 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑀯𑀸𑀤𑀁 𑀲𑀸𑀭𑀢𑁄 𑀧𑀘𑁆𑀘𑁂𑀲𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀇𑀲𑁆𑀲𑀭𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀲𑀘𑁂 𑀓𑀧𑁆𑀧𑁂𑀢𑀺 𑀚𑀻𑀯𑀺𑀢𑀁;
𑀇𑀤𑁆𑀥𑀺𑀁 𑀩𑁆𑀬𑀲𑀦𑀪𑀸𑀯𑀜𑁆𑀘, 𑀓𑀫𑁆𑀫𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;
𑀦𑀺𑀤𑁆𑀤𑁂𑀲𑀓𑀸𑀭𑀻 𑀧𑀼𑀭𑀺𑀲𑁄, 𑀇𑀲𑁆𑀲𑀭𑁄 𑀢𑁂𑀦 𑀮𑀺𑀧𑁆𑀧𑀢𑀺.
‘‘𑀲𑁄 ¶ 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;
𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;
𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’𑀢𑀺.
𑀢𑀢𑁆𑀣 𑀓𑀧𑁆𑀧𑁂𑀢𑀺 𑀚𑀻𑀯𑀺𑀢𑀦𑁆𑀢𑀺 𑀲𑀘𑁂 𑀩𑁆𑀭𑀳𑁆𑀫𑀸 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀇𑀲𑁆𑀲𑀭𑁄 ‘‘𑀢𑁆𑀯𑀁 𑀓𑀲𑀺𑀬𑀸 𑀚𑀻𑀯, 𑀢𑁆𑀯𑀁 𑀕𑁄𑀭𑀓𑁆𑀔𑁂𑀦𑀸’’𑀢𑀺 𑀏𑀯𑀁 𑀲𑀩𑁆𑀩𑀮𑁄𑀓𑀲𑁆𑀲 𑀚𑀻𑀯𑀺𑀢𑀁 𑀲𑀁𑀯𑀺𑀤𑀳𑀢𑀺 𑀯𑀺𑀘𑀸𑀭𑁂𑀢𑀺. 𑀇𑀤𑁆𑀥𑀺𑀁 𑀩𑁆𑀬𑀲𑀦𑀪𑀸𑀯𑀜𑁆𑀘𑀸𑀢𑀺 𑀇𑀲𑁆𑀲𑀭𑀺𑀬𑀸𑀤𑀺𑀪𑁂𑀤𑀸 𑀇𑀤𑁆𑀥𑀺𑀬𑁄 𑀘 𑀜𑀸𑀢𑀺𑀯𑀺𑀦𑀸𑀲𑀸𑀤𑀺𑀓𑀁 𑀩𑁆𑀬𑀲𑀦𑀪𑀸𑀯𑀜𑁆𑀘 𑀲𑁂𑀲𑀜𑁆𑀘 𑀓𑀮𑁆𑀬𑀸𑀡𑀧𑀸𑀧𑀓𑀁 𑀓𑀫𑁆𑀫𑀁 𑀲𑀩𑁆𑀩𑀁 𑀬𑀤𑀺 𑀇𑀲𑁆𑀲𑀭𑁄𑀯 𑀓𑀧𑁆𑀧𑁂𑀢𑀺 𑀓𑀭𑁄𑀢𑀺. 𑀦𑀺𑀤𑁆𑀤𑁂𑀲𑀓𑀸𑀭𑀻𑀢𑀺 𑀬𑀤𑀺 𑀢𑀲𑁆𑀲 𑀦𑀺𑀤𑁆𑀤𑁂𑀲𑀁 𑀆𑀡𑀢𑁆𑀢𑀺𑀫𑁂𑀯 𑀲𑁂𑀲𑁄 𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀓𑀭𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀸𑀧𑀁 𑀓𑀭𑁄𑀢𑀺, 𑀢𑀲𑁆𑀲 𑀇𑀲𑁆𑀲𑀭𑁂𑀦 𑀓𑀢𑀢𑁆𑀢𑀸 𑀇𑀲𑁆𑀲𑀭𑁄𑀯 𑀢𑁂𑀦 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣.
𑀇𑀢𑀺 𑀲𑁄 𑀅𑀫𑁆𑀩𑀢𑁄𑀯 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀅𑀫𑁆𑀩𑀁 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀇𑀲𑁆𑀲𑀭𑀓𑀭𑀡𑁂𑀦𑁂𑀯 𑀇𑀲𑁆𑀲𑀭𑀓𑀢𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀼𑀩𑁆𑀩𑁂𑀓𑀢𑀯𑀸𑀤𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑁆𑀯𑀁, 𑀆𑀯𑀼𑀲𑁄, 𑀫𑀁 𑀓𑀺𑀁 𑀧𑀭𑀺𑀳𑀲𑀲𑀺, 𑀬𑀤𑀺 𑀧𑀼𑀩𑁆𑀩𑁂𑀓𑀢𑀯𑀸𑀤𑀁 𑀲𑀘𑁆𑀘𑀁 𑀫𑀜𑁆𑀜𑀲𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀲𑀘𑁂 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀲𑀼𑀔𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺;
𑀧𑁄𑀭𑀸𑀡𑀓𑀁 𑀓𑀢𑀁 𑀧𑀸𑀧𑀁, 𑀢𑀫𑁂𑀲𑁄 𑀫𑀼𑀘𑁆𑀘𑀢𑁂 𑀇𑀡𑀁;
𑀧𑁄𑀭𑀸𑀡𑀓 𑀇𑀡𑀫𑁄𑀓𑁆𑀔𑁄, 𑀓𑁆𑀯𑀺𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺.
‘‘𑀲𑁄 ¶ ¶ 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;
𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;
𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’𑀢𑀺.
𑀢𑀢𑁆𑀣 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀧𑀼𑀩𑁆𑀩𑀓𑀢𑀳𑁂𑀢𑀼 𑀧𑀼𑀭𑀺𑀫𑀪𑀯𑁂 𑀓𑀢𑀓𑀫𑁆𑀫𑀓𑀸𑀭𑀡𑁂𑀦𑁂𑀯. 𑀢𑀫𑁂𑀲𑁄 𑀫𑀼𑀘𑁆𑀘𑀢𑁂 𑀇𑀡𑀦𑁆𑀢𑀺 𑀬𑁄 𑀯𑀥𑀩𑀦𑁆𑀥𑀸𑀤𑀻𑀳𑀺 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺, 𑀬𑀤𑀺 𑀲𑁄 𑀬𑀁 𑀢𑁂𑀦 𑀧𑁄𑀭𑀸𑀡𑀓𑀁 𑀓𑀢𑀁 𑀧𑀸𑀧𑀁, 𑀢𑀁 𑀇𑀤𑀸𑀦𑀺 𑀇𑀡𑀁 𑀫𑀼𑀘𑁆𑀘𑀢𑀺, 𑀏𑀯𑀁 𑀲𑀦𑁆𑀢𑁂 𑀫𑀫𑀧𑀺 𑀏𑀲 𑀧𑁄𑀭𑀸𑀡𑀓𑀇𑀡𑀢𑁄 𑀫𑁄𑀓𑁆𑀔𑁄, 𑀅𑀦𑁂𑀦 𑀳𑀺 𑀫𑀓𑁆𑀓𑀝𑁂𑀦 𑀧𑀼𑀩𑁆𑀩𑁂 ¶ 𑀧𑀭𑀺𑀩𑁆𑀩𑀸𑀚𑀓𑁂𑀦 𑀳𑀼𑀢𑁆𑀯𑀸 𑀅𑀳𑀁 𑀫𑀓𑁆𑀓𑀝𑁄 𑀲𑀫𑀸𑀦𑁄 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺𑀢𑁄 𑀪𑀯𑀺𑀲𑁆𑀲𑀸𑀫𑀺, 𑀲𑁆𑀯𑀸𑀬𑀁 𑀇𑀥 𑀫𑀓𑁆𑀓𑀝𑀢𑁆𑀢𑀁 𑀧𑀢𑁆𑀢𑁄 𑀫𑀬𑀸 𑀧𑀭𑀺𑀩𑁆𑀩𑀸𑀚𑀓𑀢𑁆𑀢𑀁 𑀧𑀢𑁆𑀢𑁂𑀦 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀓𑁄 𑀇𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀻𑀢𑀺.
𑀇𑀢𑀺 𑀲𑁄 𑀢𑀲𑁆𑀲𑀧𑀺 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀘𑁆𑀙𑁂𑀤𑀯𑀸𑀤𑀺𑀁 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 ‘‘𑀢𑁆𑀯𑀁, 𑀆𑀯𑀼𑀲𑁄, ‘𑀇𑀢𑁆𑀣𑀺 𑀤𑀺𑀦𑁆𑀦’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 ‘𑀇𑀥𑁂𑀯 𑀲𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀧𑀭𑀮𑁄𑀓𑀁 𑀕𑀢𑀸 𑀦𑀸𑀫 𑀦𑀢𑁆𑀣𑀻’𑀢𑀺 𑀫𑀜𑁆𑀜𑀫𑀸𑀦𑁄 𑀓𑀲𑁆𑀫𑀸 𑀫𑀁 𑀧𑀭𑀺𑀳𑀲𑀲𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀆𑀳 𑁋
‘‘𑀘𑀢𑀼𑀦𑁆𑀦𑀁𑀬𑁂𑀯𑀼𑀧𑀸𑀤𑀸𑀬, 𑀭𑀽𑀧𑀁 𑀲𑀫𑁆𑀪𑁄𑀢𑀺 𑀧𑀸𑀡𑀺𑀦𑀁;
𑀬𑀢𑁄 𑀘 𑀭𑀽𑀧𑀁 𑀲𑀫𑁆𑀪𑁄𑀢𑀺, 𑀢𑀢𑁆𑀣𑁂𑀯𑀸𑀦𑀼𑀧𑀕𑀘𑁆𑀙𑀢𑀺;
𑀇𑀥𑁂𑀯 𑀚𑀻𑀯𑀢𑀺 𑀚𑀻𑀯𑁄, 𑀧𑁂𑀘𑁆𑀘 𑀧𑁂𑀘𑁆𑀘 𑀯𑀺𑀦𑀲𑁆𑀲𑀢𑀺.
‘‘𑀉𑀘𑁆𑀙𑀺𑀚𑁆𑀚𑀢𑀺 𑀅𑀬𑀁 𑀮𑁄𑀓𑁄, 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸;
𑀉𑀘𑁆𑀙𑀺𑀚𑁆𑀚𑀫𑀸𑀦𑁂 𑀮𑁄𑀓𑀫𑁆𑀳𑀺, 𑀓𑁆𑀯𑀺𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀺.
‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;
𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;
𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’𑀢𑀺.
𑀢𑀢𑁆𑀣 ¶ 𑀘𑀢𑀼𑀦𑁆𑀦𑀦𑁆𑀢𑀺 𑀧𑀣𑀯𑀻𑀆𑀤𑀻𑀦𑀁 𑀪𑀽𑀢𑀸𑀦𑀁. 𑀭𑀽𑀧𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑁄. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁄 𑀢𑀁 𑀭𑀽𑀧𑀁 𑀲𑀫𑁆𑀪𑁄𑀢𑀺, 𑀦𑀺𑀭𑀼𑀚𑁆𑀛𑀦𑀓𑀸𑀮𑁂𑀧𑀺 𑀢𑀢𑁆𑀣𑁂𑀯 𑀅𑀦𑀼𑀧𑀕𑀘𑁆𑀙𑀢𑀺. 𑀇𑀫𑀺𑀦𑀸 𑀢𑀲𑁆𑀲 ‘‘𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀅𑀬𑀁 𑀧𑀼𑀭𑀺𑀲𑁄 𑀬𑀤𑀸 𑀓𑀸𑀮𑀁 𑀓𑀭𑁄𑀢𑀺, 𑀢𑀤𑀸 𑀧𑀣𑀯𑀻 𑀧𑀣𑀯𑀻𑀓𑀸𑀬𑀁 𑀅𑀦𑀼𑀧𑁂𑀢𑀺 𑀅𑀦𑀼𑀧𑀕𑀘𑁆𑀙𑀢𑀺, 𑀆𑀧𑁄… 𑀢𑁂𑀚𑁄… 𑀯𑀸𑀬𑁄 𑀯𑀸𑀬𑁄𑀓𑀸𑀬𑀁 𑀅𑀦𑀼𑀧𑁂𑀢𑀺 𑀅𑀦𑀼𑀧𑀕𑀘𑁆𑀙𑀢𑀺, 𑀆𑀓𑀸𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀓𑀫𑀦𑁆𑀢𑀺, 𑀆𑀲𑀦𑁆𑀥𑀺𑀧𑀜𑁆𑀘𑀫𑀸 𑀧𑀼𑀭𑀺𑀲𑀸 𑀫𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀺, 𑀬𑀸𑀯 𑀆𑀴𑀸𑀳𑀦𑀸 𑀧𑀤𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀓𑀸𑀧𑁄𑀢𑀓𑀸𑀦𑀺 𑀅𑀝𑁆𑀞𑀻𑀦𑀺 𑀪𑀯𑀦𑁆𑀢𑀺, 𑀪𑀲𑁆𑀫𑀦𑁆𑀢𑀸 𑀆𑀳𑀼𑀢𑀺𑀬𑁄 ¶ , 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀬𑀤𑀺𑀤𑀁 𑀤𑀸𑀦𑀁, 𑀢𑁂𑀲𑀁 𑀢𑀼𑀘𑁆𑀙𑀸 𑀫𑀼𑀲𑀸 𑀯𑀺𑀮𑀸𑀧𑁄, 𑀬𑁂 𑀓𑁂𑀘𑀺 𑀅𑀢𑁆𑀣𑀺𑀓𑀯𑀸𑀤𑀁 𑀯𑀤𑀦𑁆𑀢𑀺, 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀭𑀁 𑀫𑀭𑀡𑀸’’𑀢𑀺 𑀇𑀫𑀁 𑀤𑀺𑀝𑁆𑀞𑀺𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀮𑁄𑀓𑁂 𑀚𑀻𑀯𑁄 𑀚𑀻𑀯𑀢𑀺. 𑀧𑁂𑀘𑁆𑀘 𑀧𑁂𑀘𑁆𑀘 𑀯𑀺𑀦𑀲𑁆𑀲𑀢𑀻𑀢𑀺 𑀧𑀭𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑁄 𑀕𑀢𑀺𑀯𑀲𑁂𑀦 𑀇𑀥 𑀅𑀦𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀮𑁄𑀓𑁂 𑀯𑀺𑀦𑀲𑁆𑀲𑀢𑀺 ¶ 𑀉𑀘𑁆𑀙𑀺𑀚𑁆𑀚𑀢𑀺. 𑀏𑀯𑀁 𑀉𑀘𑁆𑀙𑀺𑀚𑁆𑀚𑀫𑀸𑀦𑁂 𑀮𑁄𑀓𑀲𑁆𑀫𑀺𑀁 𑀓𑁄 𑀇𑀥 𑀧𑀸𑀧𑁂𑀦 𑀮𑀺𑀧𑁆𑀧𑀢𑀻𑀢𑀺.
𑀇𑀢𑀺 𑀲𑁄 𑀢𑀲𑁆𑀲𑀧𑀺 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀔𑀢𑁆𑀢𑀯𑀺𑀚𑁆𑀚𑀯𑀸𑀤𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑁆𑀯𑀁, 𑀆𑀯𑀼𑀲𑁄, ‘𑀫𑀸𑀢𑀸𑀧𑀺𑀢𑀭𑁄𑀧𑀺 𑀫𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑁄 𑀓𑀸𑀢𑀩𑁆𑀩𑁄’𑀢𑀺 𑀇𑀫𑀁 𑀮𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀓𑀲𑁆𑀫𑀸 𑀫𑀁 𑀧𑀭𑀺𑀳𑀲𑀲𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀆𑀳𑀼 𑀔𑀢𑁆𑀢𑀯𑀺𑀤𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;
𑀫𑀸𑀢𑀭𑀁 𑀧𑀺𑀢𑀭𑀁 𑀳𑀜𑁆𑀜𑁂, 𑀅𑀣𑁄 𑀚𑁂𑀝𑁆𑀞𑀫𑁆𑀧𑀺 𑀪𑀸𑀢𑀭𑀁;
𑀳𑀦𑁂𑀬𑁆𑀬 𑀧𑀼𑀢𑁆𑀢𑀤𑀸𑀭𑁂 𑀘, 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸’’𑀢𑀺.
𑀢𑀢𑁆𑀣 𑀔𑀢𑁆𑀢𑀯𑀺𑀤𑀸𑀢𑀺 𑀔𑀢𑁆𑀢𑀯𑀺𑀚𑁆𑀚𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀔𑀢𑁆𑀢𑀯𑀺𑀚𑁆𑀚𑀸𑀘𑀭𑀺𑀬𑀸𑀦𑀁 𑀏𑀢𑀁 𑀦𑀸𑀫𑀁. 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄𑀢𑀺 𑀩𑀸𑀮𑀸 𑀲𑀫𑀸𑀦𑀸𑀧𑀺 ‘‘𑀧𑀡𑁆𑀟𑀺𑀢𑀸 𑀫𑀬𑀁 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑀁 𑀧𑀓𑀸𑀲𑁂𑀫𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀳𑀼𑀢𑁆𑀯𑀸 𑀏𑀯𑀫𑀸𑀳𑀼. 𑀅𑀢𑁆𑀣𑁄 𑀘𑁂𑀢𑀺 𑀲𑀘𑁂 𑀅𑀢𑁆𑀢𑀦𑁄 𑀬𑀣𑀸𑀭𑀽𑀧𑁄 𑀓𑁄𑀘𑀺 𑀅𑀢𑁆𑀣𑁄 𑀲𑀺𑀬𑀸, 𑀦 𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀲𑀩𑁆𑀩𑀁 𑀳𑀦𑁂𑀬𑁆𑀬𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀢𑁆𑀯𑀫𑁆𑀧𑀺 𑀦𑁂𑀲𑀁 𑀅𑀜𑁆𑀜𑀢𑀭𑁄𑀢𑀺.
𑀏𑀯𑀁 𑀢𑀲𑁆𑀲 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;
𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄.
‘‘𑀅𑀣 ¶ 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀫𑀽𑀮𑀫𑀧𑀺 𑀅𑀩𑁆𑀩𑀳𑁂;
𑀅𑀢𑁆𑀣𑁄 𑀫𑁂 𑀲𑀫𑁆𑀩𑀮𑁂𑀦𑀸𑀧𑀺, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
‘‘𑀲𑁄 𑀘𑁂 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘, 𑀓𑀮𑁆𑀬𑀸𑀡𑁄 𑀦 𑀘 𑀧𑀸𑀧𑀓𑁄;
𑀪𑁄𑀢𑁄 𑀘𑁂 𑀯𑀘𑀦𑀁 𑀲𑀘𑁆𑀘𑀁, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
‘‘𑀅𑀢𑁆𑀢𑀦𑁄 𑀘𑁂 𑀳𑀺 𑀯𑀸𑀤𑀲𑁆𑀲, 𑀅𑀧𑀭𑀸𑀥𑀁 𑀯𑀺𑀚𑀸𑀦𑀺𑀬𑀸;
𑀦 𑀫𑀁 𑀢𑁆𑀯𑀁 𑀕𑀭𑀳𑁂𑀬𑁆𑀬𑀸𑀲𑀺, 𑀪𑁄𑀢𑁄 𑀯𑀸𑀤𑁄 𑀳𑀺 𑀢𑀸𑀤𑀺𑀲𑁄’’𑀢𑀺.
𑀢𑀢𑁆𑀣 𑀅𑀫𑁆𑀪𑁄 𑀔𑀢𑁆𑀢𑀯𑀺𑀤 𑀅𑀫𑁆𑀳𑀸𑀓𑀁 𑀧𑀦 𑀆𑀘𑀭𑀺𑀬𑀸 𑀏𑀯𑀁 𑀯𑀡𑁆𑀡𑀬𑀦𑁆𑀢𑀺. 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀘𑁆𑀙𑀸𑀬𑀲𑁆𑀲 𑀭𑀼𑀓𑁆𑀔𑀲𑁆𑀲𑀧𑀺 𑀲𑀸𑀔𑀁 𑀯𑀸 𑀧𑀡𑁆𑀡𑀁 𑀯𑀸 𑀦 𑀪𑀜𑁆𑀚𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸 ¶ ? 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄. 𑀢𑁆𑀯𑀁 𑀧𑀦 𑀏𑀯𑀁 𑀯𑀤𑁂𑀲𑀺 𑁋 ‘‘𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂 𑀲𑀫𑀽𑀮𑀫𑀧𑀺 ¶ 𑀅𑀩𑁆𑀩𑀳𑁂’’𑀢𑀺, 𑀫𑀫 𑀘 𑀧𑀸𑀣𑁂𑀬𑁆𑀬𑁂𑀦 𑀅𑀢𑁆𑀣𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑀘𑁂𑀧𑁂𑀲 𑀫𑀬𑀸 𑀳𑀢𑁄, 𑀢𑀣𑀸𑀧𑀺 𑀅𑀢𑁆𑀣𑁄 𑀫𑁂 𑀲𑀫𑁆𑀩𑀮𑁂𑀦𑀸𑀧𑀺, 𑀲𑀼𑀳𑀢𑁄 𑀯𑀸𑀦𑀭𑁄 𑀫𑀬𑀸.
𑀏𑀯𑀁 𑀲𑁄 𑀢𑀲𑁆𑀲𑀧𑀺 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀲𑀼 𑀢𑁂𑀲𑀼 𑀅𑀧𑀝𑀺𑀪𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀢𑁆𑀯𑀁 𑀇𑀫𑁂 𑀧𑀜𑁆𑀘 𑀭𑀝𑁆𑀞𑀯𑀺𑀮𑁄𑀧𑀓𑁂 𑀫𑀳𑀸𑀘𑁄𑀭𑁂 𑀕𑀳𑁂𑀢𑁆𑀯𑀸 𑀯𑀺𑀘𑀭𑀲𑀺, 𑀅𑀳𑁄 𑀩𑀸𑀮𑁄, 𑀏𑀯𑀭𑀽𑀧𑀸𑀦𑀜𑁆𑀳𑀺 𑀲𑀁𑀲𑀕𑁆𑀕𑁂𑀦 𑀧𑀼𑀭𑀺𑀲𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 𑁋
‘‘𑀅𑀳𑁂𑀢𑀼𑀯𑀸𑀤𑁄 𑀧𑀼𑀭𑀺𑀲𑁄, 𑀬𑁄 𑀘 𑀇𑀲𑁆𑀲𑀭𑀓𑀼𑀢𑁆𑀢𑀺𑀓𑁄;
𑀧𑀼𑀩𑁆𑀩𑁂𑀓𑀢𑀻 𑀘 𑀉𑀘𑁆𑀙𑁂𑀤𑀻, 𑀬𑁄 𑀘 𑀔𑀢𑁆𑀢𑀯𑀺𑀤𑁄 𑀦𑀭𑁄.
‘‘𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;
𑀓𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑀸𑀧𑀁, 𑀅𑀣𑁄 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂;
𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄, 𑀤𑀼𑀓𑁆𑀔𑀦𑁆𑀢𑁄 𑀓𑀝𑀼𑀓𑀼𑀤𑁆𑀭𑀬𑁄’’𑀢𑀺.
𑀢𑀢𑁆𑀣 𑀢𑀸𑀤𑀺𑀲𑁄𑀢𑀺, 𑀫𑀳𑀸𑀭𑀸𑀚, 𑀬𑀸𑀤𑀺𑀲𑀸 𑀏𑀢𑁂 𑀧𑀜𑁆𑀘 𑀤𑀺𑀝𑁆𑀞𑀺𑀕𑀢𑀺𑀓𑀸, 𑀢𑀸𑀤𑀺𑀲𑁄 𑀧𑀼𑀭𑀺𑀲𑁄 𑀲𑀬𑀫𑁆𑀧𑀺 𑀧𑀸𑀧𑀁 𑀓𑀭𑁂𑀬𑁆𑀬. 𑀬𑁆𑀯𑀸𑀲𑁆𑀲 𑀯𑀘𑀦𑀁 𑀲𑀼𑀡𑀸𑀢𑀺, 𑀢𑀁 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂. 𑀤𑀼𑀓𑁆𑀔𑀦𑁆𑀢𑁄𑀢𑀺 𑀏𑀯𑀭𑀽𑀧𑁂𑀳𑀺 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀇𑀥𑀮𑁄𑀓𑁂𑀧𑀺 𑀧𑀭𑀮𑁄𑀓𑁂𑀧𑀺 𑀤𑀼𑀓𑁆𑀔𑀦𑁆𑀢𑁄 𑀓𑀝𑀼𑀓𑀼𑀤𑁆𑀭𑀬𑁄𑀯 𑀳𑁄𑀢𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 ¶ 𑀧𑀓𑀸𑀲𑀦𑀢𑁆𑀣𑀁 ‘‘𑀬𑀸𑀦𑀺 𑀓𑀸𑀦𑀺𑀘𑀺, 𑀪𑀺𑀓𑁆𑀔𑀯𑁂, 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑀸𑀮𑀢𑁄’’𑀢𑀺 𑀲𑀼𑀢𑁆𑀢𑀁 (𑀅. 𑀦𑀺. 𑁩.𑁧) 𑀆𑀳𑀭𑀺𑀢𑀩𑁆𑀩𑀁. 𑀕𑁄𑀥𑀚𑀸𑀢𑀓- (𑀚𑀸. 𑁧.𑁧.𑁧𑁩𑁮) 𑀲𑀜𑁆𑀚𑀻𑀯𑀚𑀸𑀢𑀓- (𑀚𑀸. 𑁧.𑁧.𑁧𑁫𑁦) 𑀅𑀓𑀺𑀢𑁆𑀢𑀺𑀚𑀸𑀢𑀓𑀸𑀤𑀻𑀳𑀺 (𑀚𑀸. 𑁧.𑁧𑁩.𑁮𑁩 𑀆𑀤𑀬𑁄) 𑀘𑀸𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄.
𑀇𑀤𑀸𑀦𑀻 𑀑𑀧𑀫𑁆𑀫𑀤𑀲𑁆𑀲𑀦𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀆𑀳 𑁋
‘‘𑀉𑀭𑀩𑁆𑀪𑀭𑀽𑀧𑁂𑀦 𑀯𑀓𑀲𑁆𑀲𑀼 𑀧𑀼𑀩𑁆𑀩𑁂, 𑀅𑀲𑀁𑀓𑀺𑀢𑁄 𑀅𑀚𑀬𑀽𑀣𑀁 𑀉𑀧𑁂𑀢𑀺;
𑀳𑀦𑁆𑀢𑁆𑀯𑀸 𑀉𑀭𑀡𑀺𑀁 𑀅𑀚𑀺𑀓𑀁 𑀅𑀚𑀜𑁆𑀘, 𑀉𑀢𑁆𑀭𑀸𑀲𑀬𑀺𑀢𑁆𑀯𑀸 𑀬𑁂𑀦𑀓𑀸𑀫𑀁 𑀧𑀮𑁂𑀢𑀺.
‘‘𑀢𑀣𑀸𑀯𑀺𑀥𑁂𑀓𑁂 ¶ 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, 𑀙𑀤𑀦𑀁 𑀓𑀢𑁆𑀯𑀸 𑀯𑀜𑁆𑀘𑀬𑀦𑁆𑀢𑀺 𑀫𑀦𑀼𑀲𑁆𑀲𑁂;
𑀅𑀦𑀸𑀲𑀓𑀸 𑀣𑀡𑁆𑀟𑀺𑀮𑀲𑁂𑀬𑁆𑀬𑀓𑀸 𑀘, 𑀭𑀚𑁄𑀚𑀮𑁆𑀮𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀁;
𑀧𑀭𑀺𑀬𑀸𑀬𑀪𑀢𑁆𑀢𑀜𑁆𑀘 ¶ 𑀅𑀧𑀸𑀦𑀓𑀢𑁆𑀢𑀸, 𑀧𑀸𑀧𑀸𑀘𑀸𑀭𑀸 𑀅𑀭𑀳𑀦𑁆𑀢𑁄 𑀯𑀤𑀸𑀦𑀸.
‘‘𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;
𑀓𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑀸𑀧𑀁, 𑀅𑀣𑁄 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂;
𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄, 𑀤𑀼𑀓𑁆𑀔𑀦𑁆𑀢𑁄 𑀓𑀝𑀼𑀓𑀼𑀤𑁆𑀭𑀬𑁄.
‘‘𑀬𑀫𑀸𑀳𑀼 𑀦𑀢𑁆𑀣𑀺 𑀯𑀻𑀭𑀺𑀬𑀦𑁆𑀢𑀺, 𑀅𑀳𑁂𑀢𑀼𑀜𑁆𑀘 𑀧𑀯𑀤𑀦𑁆𑀢𑀺 𑀬𑁂;
𑀧𑀭𑀓𑀸𑀭𑀁 𑀅𑀢𑁆𑀢𑀓𑀸𑀭𑀜𑁆𑀘, 𑀬𑁂 𑀢𑀼𑀘𑁆𑀙𑀁 𑀲𑀫𑀯𑀡𑁆𑀡𑀬𑀼𑀁.
‘‘𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;
𑀓𑀭𑁂𑀬𑁆𑀬 𑀢𑀸𑀤𑀺𑀲𑁄 𑀧𑀸𑀧𑀁, 𑀅𑀣𑁄 𑀅𑀜𑁆𑀜𑀫𑁆𑀧𑀺 𑀓𑀸𑀭𑀬𑁂;
𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄, 𑀤𑀼𑀓𑁆𑀔𑀦𑁆𑀢𑁄 𑀓𑀝𑀼𑀓𑀼𑀤𑁆𑀭𑀬𑁄.
‘‘𑀲𑀘𑁂 𑀳𑀺 𑀯𑀻𑀭𑀺𑀬𑀁 𑀦𑀸𑀲𑁆𑀲, 𑀓𑀫𑁆𑀫𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;
𑀦 𑀪𑀭𑁂 𑀯𑀟𑁆𑀠𑀓𑀺𑀁 𑀭𑀸𑀚𑀸, 𑀦𑀧𑀺 𑀬𑀦𑁆𑀢𑀸𑀦𑀺 𑀓𑀸𑀭𑀬𑁂.
‘‘𑀬𑀲𑁆𑀫𑀸 𑀘 𑀯𑀻𑀭𑀺𑀬𑀁 𑀅𑀢𑁆𑀣𑀺, 𑀓𑀫𑁆𑀫𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;
𑀢𑀲𑁆𑀫𑀸 𑀬𑀦𑁆𑀢𑀸𑀦𑀺 𑀓𑀸𑀭𑁂𑀢𑀺, 𑀭𑀸𑀚𑀸 𑀪𑀭𑀢𑀺 𑀯𑀟𑁆𑀠𑀓𑀺𑀁.
‘‘𑀬𑀤𑀺 ¶ 𑀯𑀲𑁆𑀲𑀲𑀢𑀁 𑀤𑁂𑀯𑁄, 𑀦 𑀯𑀲𑁆𑀲𑁂 𑀦 𑀳𑀺𑀫𑀁 𑀧𑀢𑁂;
𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀅𑀬𑀁 𑀮𑁄𑀓𑁄, 𑀯𑀺𑀦𑀲𑁆𑀲𑁂𑀬𑁆𑀬 𑀅𑀬𑀁 𑀧𑀚𑀸.
‘‘𑀬𑀲𑁆𑀫𑀸 𑀘 𑀯𑀲𑁆𑀲𑀢𑀻 𑀤𑁂𑀯𑁄, 𑀳𑀺𑀫𑀜𑁆𑀘𑀸𑀦𑀼𑀨𑀼𑀲𑀸𑀬𑀢𑀺;
𑀢𑀲𑁆𑀫𑀸 𑀲𑀲𑁆𑀲𑀸𑀦𑀺 𑀧𑀘𑁆𑀘𑀦𑁆𑀢𑀺, 𑀭𑀝𑁆𑀞𑀜𑁆𑀘 𑀧𑀸𑀮𑀺𑀢𑁂 𑀘𑀺𑀭𑀁.
‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;
𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.
‘‘𑀏𑀯𑀫𑁂𑀯 ¶ 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;
𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;
𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.
‘‘𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;
𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.
‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;
𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;
𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄.
‘‘𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀆𑀫𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;
𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀩𑀻𑀚𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.
‘‘𑀫𑀳𑀸𑀭𑀼𑀓𑁆𑀔𑀽𑀧𑀫𑀁 𑀭𑀝𑁆𑀞𑀁, 𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;
𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.
‘‘𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀧𑀓𑁆𑀓𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;
𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀩𑀻𑀚𑀜𑁆𑀘𑀲𑁆𑀲 𑀦 𑀦𑀲𑁆𑀲𑀢𑀺.
‘‘𑀫𑀳𑀸𑀭𑀼𑀓𑁆𑀔𑀽𑀧𑀫𑀁 ¶ ¶ 𑀭𑀝𑁆𑀞𑀁, 𑀥𑀫𑁆𑀫𑁂𑀦 𑀬𑁄 𑀧𑀲𑀸𑀲𑀢𑀺;
𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀚𑀲𑁆𑀲 𑀦 𑀦𑀲𑁆𑀲𑀢𑀺.
‘‘𑀬𑁄 𑀘 𑀭𑀸𑀚𑀸 𑀚𑀦𑀧𑀤𑀁, 𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;
𑀲𑀩𑁆𑀩𑁄𑀲𑀥𑀻𑀳𑀺 𑀲𑁄 𑀭𑀸𑀚𑀸, 𑀯𑀺𑀭𑀼𑀤𑁆𑀥𑁄 𑀳𑁄𑀢𑀺 𑀔𑀢𑁆𑀢𑀺𑀬𑁄.
‘‘𑀢𑀣𑁂𑀯 𑀦𑁂𑀕𑀫𑁂 𑀳𑀺𑀁𑀲𑀁, 𑀬𑁂 𑀬𑀼𑀢𑁆𑀢𑀸 𑀓𑀬𑀯𑀺𑀓𑁆𑀓𑀬𑁂;
𑀑𑀚𑀤𑀸𑀦𑀩𑀮𑀻𑀓𑀸𑀭𑁂, 𑀲 𑀓𑁄𑀲𑁂𑀦 𑀯𑀺𑀭𑀼𑀚𑁆𑀛𑀢𑀺.
‘‘𑀧𑀳𑀸𑀭𑀯𑀭𑀔𑁂𑀢𑁆𑀢𑀜𑁆𑀜𑀽, 𑀲𑀗𑁆𑀕𑀸𑀫𑁂 𑀓𑀢𑀦𑀺𑀲𑁆𑀲𑀫𑁂;
𑀉𑀲𑁆𑀲𑀺𑀢𑁂 𑀳𑀺𑀁𑀲𑀬𑀁 𑀭𑀸𑀚𑀸, 𑀲 𑀩𑀮𑁂𑀦 𑀯𑀺𑀭𑀼𑀚𑁆𑀛𑀢𑀺.
‘‘𑀢𑀣𑁂𑀯 𑀇𑀲𑀬𑁄 𑀳𑀺𑀁𑀲𑀁, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑁄;
𑀅𑀥𑀫𑁆𑀫𑀘𑀸𑀭𑀻 𑀔𑀢𑁆𑀢𑀺𑀬𑁄, 𑀲𑁄 𑀲𑀕𑁆𑀕𑁂𑀦 𑀯𑀺𑀭𑀼𑀚𑁆𑀛𑀢𑀺.
‘‘𑀬𑁄 ¶ 𑀘 𑀭𑀸𑀚𑀸 𑀅𑀥𑀫𑁆𑀫𑀝𑁆𑀞𑁄, 𑀪𑀭𑀺𑀬𑀁 𑀳𑀦𑁆𑀢𑀺 𑀅𑀤𑀽𑀲𑀺𑀓𑀁;
𑀮𑀼𑀤𑁆𑀥𑀁 𑀧𑀲𑀯𑀢𑁂 𑀞𑀸𑀦𑀁, 𑀧𑀼𑀢𑁆𑀢𑁂𑀳𑀺 𑀘 𑀯𑀺𑀭𑀼𑀚𑁆𑀛𑀢𑀺.
‘‘𑀥𑀫𑁆𑀫𑀁 𑀘𑀭𑁂 𑀚𑀸𑀦𑀧𑀤𑁂, 𑀦𑁂𑀕𑀫𑁂𑀲𑀼 𑀩𑀮𑁂𑀲𑀼 𑀘;
𑀇𑀲𑀬𑁄 𑀘 𑀦 𑀳𑀺𑀁𑀲𑁂𑀬𑁆𑀬, 𑀧𑀼𑀢𑁆𑀢𑀤𑀸𑀭𑁂 𑀲𑀫𑀁 𑀘𑀭𑁂.
‘‘𑀲 𑀢𑀸𑀤𑀺𑀲𑁄 𑀪𑀽𑀫𑀺𑀧𑀢𑀺, 𑀭𑀝𑁆𑀞𑀧𑀸𑀮𑁄 𑀅𑀓𑁄𑀥𑀦𑁄;
𑀲𑀧𑀢𑁆𑀢𑁂 𑀲𑀫𑁆𑀧𑀓𑀫𑁆𑀧𑁂𑀢𑀺, 𑀇𑀦𑁆𑀤𑁄𑀯 𑀅𑀲𑀼𑀭𑀸𑀥𑀺𑀧𑁄’’𑀢𑀺.
𑀢𑀢𑁆𑀣 𑀯𑀓𑀲𑁆𑀲𑀽𑀢𑀺 𑀯𑀓𑁄 𑀅𑀲𑁆𑀲𑀼, 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀏𑀓𑁄 𑀉𑀭𑀩𑁆𑀪𑀭𑀽𑀧𑁄 𑀯𑀓𑁄 𑀅𑀳𑁄𑀲𑀺, 𑀢𑀲𑁆𑀲 𑀦𑀗𑁆𑀕𑀼𑀝𑁆𑀞𑀫𑀢𑁆𑀢𑀫𑁂𑀯 𑀤𑀻𑀖𑀁, 𑀢𑀁 𑀧𑀦 𑀲𑁄 𑀅𑀦𑁆𑀢𑀭𑀲𑀢𑁆𑀢𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀭𑀩𑁆𑀪𑀭𑀽𑀧𑁂𑀦 𑀅𑀲𑀁𑀓𑀺𑀢𑁄 𑀅𑀚𑀬𑀽𑀣𑀁 𑀉𑀧𑁂𑀢𑀺. 𑀢𑀢𑁆𑀣 𑀉𑀭𑀡𑀺𑀓𑀜𑁆𑀘 𑀅𑀚𑀺𑀓𑀜𑁆𑀘 𑀅𑀚𑀜𑁆𑀘 𑀳𑀦𑁆𑀢𑁆𑀯𑀸 𑀬𑁂𑀦𑀓𑀸𑀫𑀁 𑀧𑀮𑁂𑀢𑀺. 𑀢𑀣𑀸𑀯𑀺𑀥𑁂𑀓𑁂𑀢𑀺 𑀢𑀣𑀸𑀯𑀺𑀥𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑁂𑀦 𑀙𑀤𑀦𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀙𑀸𑀤𑁂𑀢𑁆𑀯𑀸 𑀫𑀥𑀼𑀭𑀯𑀘𑀦𑀸𑀤𑀻𑀳𑀺 𑀳𑀺𑀢𑀓𑀸𑀫𑀸 𑀯𑀺𑀬 𑀳𑀼𑀢𑁆𑀯𑀸 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑀺. ‘‘𑀅𑀦𑀸𑀲𑀓𑀸’’𑀢𑀺𑀆𑀤𑀺 𑀢𑁂𑀲𑀁 𑀙𑀤𑀦𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀓𑀘𑁆𑀘𑁂 𑀳𑀺 ‘‘𑀫𑀬𑀁 𑀅𑀦𑀸𑀲𑀓𑀸 𑀦 𑀓𑀺𑀜𑁆𑀘𑀺 ¶ 𑀆𑀳𑀸𑀭𑁂𑀫𑀸’’𑀢𑀺 𑀫𑀦𑀼𑀲𑁆𑀲𑁂 𑀯𑀜𑁆𑀘𑁂𑀦𑁆𑀢𑀺, 𑀅𑀧𑀭𑁂 ‘‘𑀫𑀬𑀁 𑀣𑀡𑁆𑀟𑀺𑀮𑀲𑁂𑀬𑁆𑀬𑀓𑀸’’𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀭𑀚𑁄𑀚𑀮𑁆𑀮𑀁 𑀙𑀤𑀦𑀁, 𑀅𑀜𑁆𑀜𑁂𑀲𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀁, 𑀢𑁂 𑀕𑀘𑁆𑀙𑀦𑁆𑀢𑀸𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀸𑀯 𑀕𑀘𑁆𑀙𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀳𑀤𑀲𑀸𑀳𑀸𑀤𑀺𑀯𑀸𑀭𑀪𑁄𑀚𑀦𑀲𑀗𑁆𑀔𑀸𑀢𑀁 ¶ 𑀧𑀭𑀺𑀬𑀸𑀬𑀪𑀢𑁆𑀢𑀙𑀤𑀦𑀁, 𑀅𑀧𑀭𑁂 𑀅𑀧𑀸𑀦𑀓𑀢𑁆𑀢𑀸 𑀳𑁄𑀦𑁆𑀢𑀺, ‘‘𑀫𑀬𑀁 𑀧𑀸𑀦𑀻𑀬𑀁 𑀦 𑀧𑀺𑀯𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀅𑀭𑀳𑀦𑁆𑀢𑁄 𑀯𑀤𑀸𑀦𑀸𑀢𑀺 𑀧𑀸𑀧𑀸𑀘𑀸𑀭𑀸 𑀳𑀼𑀢𑁆𑀯𑀸𑀧𑀺 ‘‘𑀫𑀬𑀁 𑀅𑀭𑀳𑀦𑁆𑀢𑁄’’𑀢𑀺 𑀯𑀤𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀏𑀢𑁂𑀢𑀺, 𑀫𑀳𑀸𑀭𑀸𑀚, 𑀇𑀫𑁂 𑀯𑀸 𑀧𑀜𑁆𑀘 𑀚𑀦𑀸 𑀳𑁄𑀦𑁆𑀢𑀼 𑀅𑀜𑁆𑀜𑁂 𑀯𑀸, 𑀬𑀸𑀯𑀦𑁆𑀢𑁄 𑀤𑀺𑀝𑁆𑀞𑀺𑀕𑀢𑀺𑀓𑀸 𑀦𑀸𑀫, 𑀲𑀩𑁆𑀩𑁂𑀧𑀺 𑀏𑀢𑁂 𑀅𑀲𑀧𑁆𑀧𑀼𑀭𑀺𑀲𑀸. 𑀬𑀫𑀸𑀳𑀽𑀢𑀺 𑀬𑁂 𑀆𑀳𑀼, 𑀬𑁂 𑀯𑀤𑀦𑁆𑀢𑀺.
𑀲𑀘𑁂 𑀳𑀺 𑀯𑀻𑀭𑀺𑀬𑀁 𑀦𑀸𑀲𑁆𑀲𑀸𑀢𑀺, 𑀫𑀳𑀸𑀭𑀸𑀚, 𑀲𑀘𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀦 𑀪𑀯𑁂𑀬𑁆𑀬. 𑀓𑀫𑁆𑀫𑀦𑁆𑀢𑀺 𑀓𑀮𑁆𑀬𑀸𑀡𑀧𑀸𑀧𑀓𑀁 𑀓𑀫𑁆𑀫𑀫𑁆𑀧𑀺 𑀬𑀤𑀺 𑀦 𑀪𑀯𑁂𑀬𑁆𑀬. 𑀦 𑀪𑀭𑁂𑀢𑀺 𑀏𑀯𑀁 𑀲𑀦𑁆𑀢𑁂 𑀯𑀟𑁆𑀠𑀓𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀓𑀸𑀭𑀓𑁂 𑀭𑀸𑀚𑀸 𑀦 𑀧𑁄𑀲𑁂𑀬𑁆𑀬, 𑀦𑀧𑀺 𑀬𑀦𑁆𑀢𑀸𑀦𑀻𑀢𑀺 𑀦𑀧𑀺 𑀢𑁂𑀳𑀺 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀸𑀤𑀻𑀦𑀺 𑀬𑀦𑁆𑀢𑀸𑀦𑀺 𑀓𑀸𑀭𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀯𑀻𑀭𑀺𑀬𑀲𑁆𑀲 𑀘𑁂𑀯 𑀓𑀫𑁆𑀫𑀲𑁆𑀲 𑀘 𑀅𑀪𑀸𑀯𑀸. 𑀉𑀘𑁆𑀙𑀺𑀚𑁆𑀚𑁂𑀬𑁆𑀬𑀸𑀢𑀺, 𑀫𑀳𑀸𑀭𑀸𑀚, 𑀬𑀤𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀦𑁂𑀯 𑀤𑁂𑀯𑁄 𑀯𑀲𑁆𑀲𑁂𑀬𑁆𑀬, 𑀦 𑀳𑀺𑀫𑀁 𑀧𑀢𑁂𑀬𑁆𑀬 ¶ , 𑀅𑀣 𑀓𑀧𑁆𑀧𑀼𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀅𑀬𑀁 𑀮𑁄𑀓𑁄 𑀉𑀘𑁆𑀙𑀺𑀚𑁆𑀚𑁂𑀬𑁆𑀬. 𑀉𑀘𑁆𑀙𑁂𑀤𑀯𑀸𑀤𑀺𑀦𑀸 𑀓𑀣𑀺𑀢𑀦𑀺𑀬𑀸𑀫𑁂𑀦 𑀧𑀦 𑀉𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺. 𑀧𑀸𑀮𑀺𑀢𑁂𑀢𑀺 𑀧𑀸𑀮𑀬𑀢𑀺.
‘‘𑀕𑀯𑀁 𑀘𑁂’’𑀢𑀺 𑀘𑀢𑀲𑁆𑀲𑁄 𑀕𑀸𑀣𑀸 𑀭𑀜𑁆𑀜𑁄 𑀥𑀫𑁆𑀫𑀤𑁂𑀲𑀦𑀸𑀬𑀫𑁂𑀯 𑀯𑀼𑀢𑁆𑀢𑀸, 𑀢𑀣𑀸 ‘‘𑀫𑀳𑀸𑀭𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺𑀓𑀸. 𑀢𑀢𑁆𑀣 𑀫𑀳𑀸𑀭𑀼𑀓𑁆𑀔𑀲𑁆𑀲𑀸𑀢𑀺 𑀫𑀥𑀼𑀭𑀅𑀫𑁆𑀩𑀭𑀼𑀓𑁆𑀔𑀲𑁆𑀲. 𑀅𑀥𑀫𑁆𑀫𑁂𑀦𑀸𑀢𑀺 𑀅𑀕𑀢𑀺𑀕𑀫𑀦𑁂𑀦. 𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀻𑀢𑀺 𑀅𑀥𑀫𑁆𑀫𑀺𑀓𑁄 𑀭𑀸𑀚𑀸 𑀭𑀝𑁆𑀞𑀲𑁆𑀲 𑀭𑀲𑀁 𑀑𑀚𑀁 𑀦 𑀚𑀸𑀦𑀸𑀢𑀺, 𑀆𑀬𑀲𑀫𑁆𑀧𑀢𑁆𑀢𑀺𑀁 𑀦 𑀮𑀪𑀢𑀺. 𑀯𑀺𑀦𑀲𑁆𑀲𑀢𑀻𑀢𑀺 𑀲𑀼𑀜𑁆𑀜𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀕𑀸𑀫𑀦𑀺𑀕𑀫𑁂 𑀙𑀟𑁆𑀟𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀧𑀩𑁆𑀩𑀢𑀯𑀺𑀲𑀫𑀁 𑀪𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀆𑀬𑀫𑀼𑀔𑀸𑀦𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺. 𑀲𑀩𑁆𑀩𑁄𑀲𑀥𑀻𑀳𑀻𑀢𑀺 𑀲𑀩𑁆𑀩𑁂𑀳𑀺 𑀫𑀽𑀮𑀢𑀘𑀧𑀢𑁆𑀢𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀘𑁂𑀯 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀳𑀺 𑀘 𑀑𑀲𑀥𑁂𑀳𑀺 𑀯𑀺𑀭𑀼𑀚𑁆𑀛𑀢𑀺, 𑀢𑀸𑀦𑀺 𑀦 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀥𑀫𑁆𑀫𑀺𑀓𑀭𑀜𑁆𑀜𑁄 𑀳𑀺 𑀧𑀣𑀯𑀻 𑀦𑀺𑀭𑁄𑀚𑀸 𑀳𑁄𑀢𑀺, 𑀢𑀲𑁆𑀲𑀸 𑀦𑀺𑀭𑁄𑀚𑀢𑀸𑀬 𑀑𑀲𑀥𑀸𑀦𑀁 𑀑𑀚𑀸 𑀦 𑀳𑁄𑀢𑀺, 𑀢𑀸𑀦𑀺 𑀭𑁄𑀕𑀜𑁆𑀘 𑀯𑀽𑀧𑀲𑀫𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀇𑀢𑀺 𑀲𑁄 𑀢𑁂𑀳𑀺 𑀯𑀺𑀭𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺.
𑀦𑁂𑀕𑀫𑁂𑀢𑀺 𑀦𑀺𑀕𑀫𑀯𑀸𑀲𑀺𑀓𑀼𑀝𑀼𑀫𑁆𑀩𑀺𑀓𑁂. 𑀳𑀺𑀁𑀲𑀦𑁆𑀢𑀺 𑀳𑀺𑀁𑀲𑀦𑁆𑀢𑁄 𑀧𑀻𑀴𑁂𑀦𑁆𑀢𑁄. 𑀬𑁂 𑀬𑀼𑀢𑁆𑀢𑀸𑀢𑀺 𑀬𑁂 𑀓𑀬𑀯𑀺𑀓𑁆𑀓𑀬𑁂 𑀬𑀼𑀢𑁆𑀢𑀸 𑀆𑀬𑀸𑀦𑀁 𑀫𑀼𑀔𑀸 𑀣𑀮𑀚𑀮𑀧𑀣𑀯𑀸𑀡𑀺𑀚𑀸, 𑀢𑁂 𑀘 𑀳𑀺𑀁𑀲𑀦𑁆𑀢𑁄. 𑀑𑀚𑀤𑀸𑀦𑀩𑀮𑀻𑀓𑀸𑀭𑁂𑀢𑀺 𑀢𑀢𑁄 𑀢𑀢𑁄 𑀪𑀡𑁆𑀟𑀸𑀳𑀭𑀡𑀲𑀼𑀗𑁆𑀓𑀤𑀸𑀦𑀯𑀲𑁂𑀦 𑀑𑀚𑀤𑀸𑀦𑀜𑁆𑀘𑁂𑀯 𑀙𑀪𑀸𑀕𑀤𑀲𑀪𑀸𑀕𑀸𑀤𑀺𑀪𑁂𑀤𑀁 𑀩𑀮𑀺𑀜𑁆𑀘 𑀓𑀭𑁄𑀦𑁆𑀢𑁂. 𑀲 𑀓𑁄𑀲𑁂𑀦𑀸𑀢𑀺 𑀲𑁄 𑀏𑀢𑁂 𑀳𑀺𑀁𑀲𑀦𑁆𑀢𑁄 𑀅𑀥𑀫𑁆𑀫𑀺𑀓𑀭𑀸𑀚𑀸 𑀥𑀦𑀥𑀜𑁆𑀜𑁂𑀳𑀺 𑀧𑀭𑀺𑀳𑀸𑀬𑀦𑁆𑀢𑁄 𑀓𑁄𑀲𑁂𑀦 𑀯𑀺𑀭𑀼𑀚𑁆𑀛𑀢𑀺 𑀦𑀸𑀫. 𑀧𑀳𑀸𑀭𑀯𑀭𑀔𑁂𑀢𑁆𑀢𑀜𑁆𑀜𑀽𑀢𑀺 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀧𑀳𑀸𑀭𑀯𑀭𑀸𑀦𑀁 𑀔𑁂𑀢𑁆𑀢𑀁 𑀚𑀸𑀦𑀦𑁆𑀢𑁂 𑀥𑀦𑀼𑀕𑁆𑀕𑀳𑁂. 𑀲𑀗𑁆𑀕𑀸𑀫𑁂 𑀓𑀢𑀦𑀺𑀲𑁆𑀲𑀫𑁂𑀢𑀺 𑀬𑀼𑀤𑁆𑀥𑁂 𑀲𑀼𑀓𑀢𑀓𑀫𑁆𑀫𑁂 𑀫𑀳𑀸𑀬𑁄𑀥𑁂. 𑀉𑀲𑁆𑀲𑀺𑀢𑁂𑀢𑀺 𑀉𑀕𑁆𑀕𑀢𑁂 𑀧𑀜𑁆𑀜𑀸𑀢𑁂 𑀫𑀳𑀸𑀫𑀢𑁆𑀢𑁂 ¶ . 𑀳𑀺 𑀲𑀬𑀦𑁆𑀢𑀺 𑀏𑀯𑀭𑀽𑀧𑁂 𑀲𑀬𑀁 𑀯𑀸 𑀳𑀺𑀁𑀲𑀦𑁆𑀢𑁄 𑀧𑀭𑁂𑀳𑀺 𑀯𑀸 𑀳𑀺𑀁𑀲𑀸𑀧𑁂𑀦𑁆𑀢𑁄. 𑀩𑀮𑁂𑀦𑀸𑀢𑀺 𑀩𑀮𑀓𑀸𑀬𑁂𑀦. 𑀢𑀣𑀸𑀯𑀺𑀥𑀜𑁆𑀳𑀺 𑀭𑀸𑀚𑀸𑀦𑀁 ‘‘𑀅𑀬𑀁 𑀩𑀳𑀼𑀓𑀸𑀭𑁂 𑀅𑀢𑁆𑀢𑀦𑁄 𑀭𑀚𑁆𑀚𑀤𑀸𑀬𑀓𑁂𑀧𑀺 𑀳𑀺𑀁𑀲𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀫𑁆𑀳𑁂’’𑀢𑀺 𑀅𑀯𑀲𑁂𑀲𑀸𑀧𑀺 𑀬𑁄𑀥𑀸 𑀯𑀺𑀚𑀳𑀦𑁆𑀢𑀺𑀬𑁂𑀯. 𑀇𑀢𑀺 𑀲𑁄 𑀩𑀮𑁂𑀦 𑀯𑀺𑀭𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺.
𑀢𑀣𑁂𑀯 𑀇𑀲𑀬𑁄 𑀳𑀺𑀁𑀲𑀦𑁆𑀢𑀺 𑀬𑀣𑀸 𑀘 𑀦𑁂𑀕𑀫𑀸𑀤𑀬𑁄, 𑀢𑀣𑁂𑀯 𑀏𑀲𑀺𑀢𑀕𑀼𑀡𑁂 𑀧𑀩𑁆𑀩𑀚𑀺𑀢𑁂 𑀅𑀓𑁆𑀓𑁄𑀲𑀦𑀧𑀳𑀭𑀡𑀸𑀤𑀻𑀳𑀺 ¶ 𑀳𑀺𑀁𑀲𑀦𑁆𑀢𑁄 𑀅𑀥𑀫𑁆𑀫𑀘𑀸𑀭𑀻 𑀭𑀸𑀚𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀅𑀧𑀸𑀬𑀫𑁂𑀯 𑀉𑀧𑁂𑀢𑀺, 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 ¶ 𑀲𑀕𑁆𑀕𑁂𑀦 𑀯𑀺𑀭𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺. 𑀪𑀭𑀺𑀬𑀁 𑀳𑀦𑁆𑀢𑀺 𑀅𑀤𑀽𑀲𑀺𑀓𑀦𑁆𑀢𑀺 𑀅𑀢𑁆𑀢𑀦𑁄 𑀩𑀸𑀳𑀼𑀘𑁆𑀙𑀸𑀬𑀸𑀬 𑀯𑀟𑁆𑀠𑀺𑀢𑀁 𑀧𑀼𑀢𑁆𑀢𑀥𑀻𑀢𑀸𑀳𑀺 𑀲𑀁𑀯𑀟𑁆𑀠𑀁 𑀲𑀻𑀮𑀯𑀢𑀺𑀁 𑀪𑀭𑀺𑀬𑀁 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀸𑀦𑀁 𑀘𑁄𑀭𑀸𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑀺. 𑀮𑀼𑀤𑁆𑀥𑀁 𑀧𑀲𑀯𑀢𑁂 𑀞𑀸𑀦𑀦𑁆𑀢𑀺 𑀲𑁄 𑀅𑀢𑁆𑀢𑀦𑁄 𑀦𑀺𑀭𑀬𑀽𑀧𑀧𑀢𑁆𑀢𑀺𑀁 𑀧𑀲𑀯𑀢𑀺 𑀦𑀺𑀧𑁆𑀨𑀸𑀤𑁂𑀢𑀺. 𑀧𑀼𑀢𑁆𑀢𑁂𑀳𑀺 𑀘𑀸𑀢𑀺 𑀇𑀫𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀭𑀼𑀚𑁆𑀛𑀢𑀻𑀢𑀺.
𑀏𑀯𑀫𑀲𑁆𑀲 𑀲𑁄 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀤𑁂𑀯𑀺𑀬𑀸 𑀫𑀸𑀭𑀺𑀢𑀪𑀸𑀯𑀜𑁆𑀘 𑀧𑀼𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀪𑀸𑀯𑀜𑁆𑀘 𑀲𑀦𑁆𑀥𑀺𑀫𑀼𑀔𑁂 𑀘𑁄𑀭𑀁 𑀘𑀽𑀴𑀸𑀬𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀓𑀣𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀳𑀺 𑀢𑁂𑀲𑀁 𑀅𑀫𑀘𑁆𑀘𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀜𑁆𑀘 𑀤𑁂𑀯𑀺𑀬𑀸 𑀢𑁂𑀳𑀺 𑀫𑀸𑀭𑀺𑀢𑀪𑀸𑀯𑀲𑁆𑀲 𑀆𑀯𑀺𑀓𑀭𑀡𑀢𑁆𑀣𑀜𑁆𑀘 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑁂𑀦 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀓𑀢𑁆𑀯𑀸 𑀏𑀢𑀫𑀢𑁆𑀣𑀁 𑀓𑀣𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀚𑀸𑀦𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀇𑀢𑁄 𑀧𑀝𑁆𑀞𑀸𑀬, 𑀫𑀳𑀸𑀭𑀸𑀚, 𑀏𑀯𑀭𑀽𑀧𑀸𑀦𑀁 𑀧𑀸𑀧𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀫𑀸 𑀧𑀼𑀦 𑀏𑀯𑀫𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀑𑀯𑀤𑀦𑁆𑀢𑁄 ‘‘𑀥𑀫𑁆𑀫𑀁 𑀘𑀭𑁂’’𑀢𑀺𑀆𑀤𑀺𑀫𑀸𑀳.
𑀢𑀢𑁆𑀣 𑀥𑀫𑁆𑀫𑀁 𑀘𑀭𑁂𑀢𑀺, 𑀫𑀳𑀸𑀭𑀸𑀚, 𑀭𑀸𑀚𑀸 𑀦𑀸𑀫 𑀚𑀦𑀧𑀤𑀁 𑀅𑀥𑀫𑁆𑀫𑀺𑀓𑁂𑀦 𑀩𑀮𑀺𑀦𑀸 𑀅𑀧𑀻𑀴𑁂𑀦𑁆𑀢𑁄 𑀚𑀦𑀧𑀤𑁂 𑀥𑀫𑁆𑀫𑀁 𑀘𑀭𑁂𑀬𑁆𑀬, 𑀲𑀸𑀫𑀺𑀓𑁂 𑀅𑀲𑀸𑀫𑀺𑀓𑁂 𑀅𑀓𑀭𑁄𑀦𑁆𑀢𑁄 𑀦𑁂𑀕𑀫𑁂𑀲𑀼 𑀥𑀫𑁆𑀫𑀁 𑀘𑀭𑁂𑀬𑁆𑀬, 𑀅𑀝𑁆𑀞𑀸𑀦𑁂 𑀅𑀓𑀺𑀮𑀫𑁂𑀦𑁆𑀢𑁄 𑀩𑀮𑁂𑀲𑀼 𑀥𑀫𑁆𑀫𑀁 𑀘𑀭𑁂𑀬𑁆𑀬. 𑀯𑀥𑀩𑀦𑁆𑀥𑀅𑀓𑁆𑀓𑁄𑀲𑀧𑀭𑀺𑀪𑀸𑀲𑁂 𑀧𑀭𑀺𑀳𑀭𑀦𑁆𑀢𑁄 𑀧𑀘𑁆𑀘𑀬𑁂 𑀘 𑀦𑁂𑀲𑀁 𑀤𑀤𑀦𑁆𑀢𑁄 𑀇𑀲𑀬𑁄 𑀦 𑀯𑀺𑀳𑀺𑀁𑀲𑁂𑀬𑁆𑀬, 𑀥𑀻𑀢𑀭𑁄 𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀧𑀼𑀢𑁆𑀢𑁂 𑀘 𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀲𑀫𑁆𑀫𑀸 𑀧𑀭𑀺𑀳𑀭𑀦𑁆𑀢𑁄 𑀪𑀭𑀺𑀬𑀁 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑀅𑀮𑀗𑁆𑀓𑀸𑀭𑀤𑀸𑀦𑀲𑀫𑁆𑀫𑀸𑀦𑀦𑀸𑀤𑀻𑀳𑀺 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀧𑀼𑀢𑁆𑀢𑀤𑀸𑀭𑁂 𑀲𑀫𑀁 𑀘𑀭𑁂𑀬𑁆𑀬. 𑀲 𑀢𑀸𑀤𑀺𑀲𑁄𑀢𑀺 𑀲𑁄 𑀢𑀸𑀤𑀺𑀲𑁄 𑀭𑀸𑀚𑀸 𑀧𑀯𑁂𑀡𑀺𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀭𑀸𑀚𑀸𑀡𑀸𑀬 𑀭𑀸𑀚𑀢𑁂𑀚𑁂𑀦 𑀲𑀧𑀢𑁆𑀢𑁂 𑀲𑀫𑁆𑀧𑀓𑀫𑁆𑀧𑁂𑀢𑀺 𑀢𑀸𑀲𑁂𑀢𑀺 𑀘𑀸𑀮𑁂𑀢𑀺. ‘‘𑀇𑀦𑁆𑀤𑁄𑀯𑀸’’𑀢𑀺 𑀇𑀤𑀁 𑀉𑀧𑀫𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸 𑀅𑀲𑀼𑀭𑁂 𑀚𑁂𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀲𑀼𑀭𑀸𑀥𑀺𑀧𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀇𑀦𑁆𑀤𑁄 𑀅𑀢𑁆𑀢𑀦𑁄 𑀲𑀧𑀢𑁆𑀢𑀪𑀽𑀢𑁂 𑀅𑀲𑀼𑀭𑁂 𑀓𑀫𑁆𑀧𑁂𑀲𑀺, 𑀢𑀣𑀸 𑀓𑀫𑁆𑀧𑁂𑀢𑀻𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀓𑀼𑀫𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀑𑀯𑀤𑀺𑀢𑁆𑀯𑀸 𑀭𑀜𑁆𑀜𑁄 𑀓𑀢𑀓𑀫𑁆𑀫𑀁 𑀧𑀓𑀸𑀲𑁂𑀢𑁆𑀯𑀸 𑀭𑀸𑀚𑀸𑀦𑀁 𑀔𑀫𑀸𑀧𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀇𑀢𑁄 𑀧𑀝𑁆𑀞𑀸𑀬 𑀅𑀢𑀼𑀮𑁂𑀢𑁆𑀯𑀸 𑀧𑀭𑀺𑀪𑁂𑀤𑀓𑀸𑀦𑀁 𑀓𑀣𑀁 𑀕𑀳𑁂𑀢𑁆𑀯𑀸 ¶ 𑀫𑀸 𑀏𑀯𑀭𑀽𑀧𑀁 𑀲𑀸𑀳𑀲𑀺𑀓𑀓𑀫𑁆𑀫𑀁 𑀅𑀓𑀸𑀲𑀺, 𑀢𑀼𑀫𑁆𑀳𑁂𑀧𑀺 𑀓𑀼𑀫𑀸𑀭𑀸 𑀫𑀸 𑀭𑀜𑁆𑀜𑁄 ¶ 𑀤𑀼𑀩𑁆𑀪𑀺𑀢𑁆𑀣𑀸’’𑀢𑀺 𑀲𑀩𑁆𑀩𑁂𑀲𑀁 𑀑𑀯𑀸𑀤𑀁 𑀅𑀤𑀸𑀲𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀘 𑀤𑁂𑀯𑀺𑀬𑀸 𑀘 𑀅𑀧𑀭𑀚𑁆𑀛𑀦𑁆𑀢𑁄 𑀇𑀫𑁂 𑀦𑀺𑀲𑁆𑀲𑀸𑀬 𑀏𑀢𑁂𑀲𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀓𑀭𑀺𑀁, 𑀇𑀫𑁂 𑀧𑀜𑁆𑀘𑀧𑀺 𑀫𑀸𑀭𑁂𑀫𑀻’’𑀢𑀺 ¶ . 𑀦 𑀮𑀩𑁆𑀪𑀸, 𑀫𑀳𑀸𑀭𑀸𑀚, 𑀏𑀯𑀁 𑀓𑀸𑀢𑀼𑀦𑁆𑀢𑀺. 𑀢𑁂𑀦 𑀳𑀺 𑀢𑁂𑀲𑀁 𑀳𑀢𑁆𑀣𑀧𑀸𑀤𑁂 𑀙𑁂𑀤𑀸𑀧𑁂𑀫𑀻𑀢𑀺. 𑀇𑀤𑀫𑁆𑀧𑀺 𑀦 𑀮𑀩𑁆𑀪𑀸 𑀓𑀸𑀢𑀼𑀦𑁆𑀢𑀺. 𑀭𑀸𑀚𑀸 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂 𑀲𑀩𑁆𑀩𑀲𑀁𑀳𑀭𑀡𑁂 𑀓𑀢𑁆𑀯𑀸 𑀧𑀜𑁆𑀘𑀘𑀽𑀴𑀸𑀓𑀭𑀡𑀕𑀤𑁆𑀤𑀽𑀮𑀩𑀦𑁆𑀥𑀦𑀕𑁄𑀫𑀬𑀸𑀲𑀺𑀜𑁆𑀘𑀦𑁂𑀳𑀺 𑀅𑀯𑀫𑀸𑀦𑁂𑀢𑁆𑀯𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁𑀬𑁂𑀯 𑀕𑀦𑁆𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.
𑀲𑀢𑁆𑀣𑀸 𑀇𑀫𑀁 𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸𑀬𑁂𑀯 𑀧𑀭𑀧𑁆𑀧𑀯𑀸𑀤𑀧𑁆𑀧𑀫𑀤𑁆𑀤𑀦𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀧𑀜𑁆𑀘 𑀤𑀺𑀝𑁆𑀞𑀺𑀕𑀢𑀺𑀓𑀸 𑀧𑀽𑀭𑀡𑀓𑀲𑁆𑀲𑀧𑀫𑀓𑁆𑀔𑀮𑀺𑀕𑁄𑀲𑀸𑀮𑀧𑀓𑀼𑀥𑀓𑀘𑁆𑀘𑀸𑀦𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀧𑀺𑀗𑁆𑀕𑀮𑀲𑀼𑀦𑀔𑁄 𑀆𑀦𑀦𑁆𑀤𑁄, 𑀫𑀳𑀸𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀫𑀳𑀸𑀩𑁄𑀥𑀺𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.
𑀚𑀸𑀢𑀓𑀼𑀤𑁆𑀤𑀸𑀦𑀁 𑁋
𑀲𑀦𑀺𑀴𑀻𑀦𑀺𑀓𑀫𑀯𑁆𑀳𑀬𑀦𑁄 𑀧𑀞𑀫𑁄, 𑀤𑀼𑀢𑀺𑀬𑁄 𑀧𑀦 𑀲𑀉𑀫𑁆𑀫𑀤𑀦𑁆𑀢𑀺𑀯𑀭𑁄;
𑀢𑀢𑀺𑀬𑁄 𑀧𑀦 𑀩𑁄𑀥𑀺𑀲𑀺𑀭𑀻𑀯𑁆𑀳𑀬𑀦𑁄, 𑀓𑀣𑀺𑀢𑀸 𑀧𑀦 𑀢𑀻𑀡𑀺 𑀚𑀺𑀦𑁂𑀦 𑀲𑀼𑀪𑀸𑀢𑀺.
𑀧𑀡𑁆𑀡𑀸𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁧𑁯. 𑀲𑀝𑁆𑀞𑀺𑀦𑀺𑀧𑀸𑀢𑁄
[𑁫𑁨𑁯] 𑁧. 𑀲𑁄𑀡𑀓𑀚𑀸𑀢𑀓𑀯𑀡𑁆𑀡𑀦𑀸
𑀓𑀲𑁆𑀲 ¶ ¶ ¶ 𑀲𑀼𑀢𑁆𑀯𑀸 𑀲𑀢𑀁 𑀤𑀫𑁆𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀪𑀕𑀯𑀸 𑀥𑀫𑁆𑀫𑀲𑀪𑀸𑀬𑀁 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀯𑀡𑁆𑀡𑀬𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀭𑀸𑀚𑀕𑀳𑁂 𑀫𑀕𑀥𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀘𑀲𑁆𑀲 ‘‘𑀅𑀭𑀺𑀦𑁆𑀤𑀫𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂𑀬𑁂𑀯 𑀧𑀼𑀭𑁄𑀳𑀺𑀢𑀲𑁆𑀲𑀧𑀺 𑀧𑀼𑀢𑁆𑀢𑁄 𑀚𑀸𑀬𑀺, ‘‘𑀲𑁄𑀡𑀓𑀓𑀼𑀫𑀸𑀭𑁄’’𑀢𑀺𑀲𑁆𑀲 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀏𑀓𑀢𑁄𑀯 𑀯𑀟𑁆𑀠𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀉𑀢𑁆𑀢𑀫𑀭𑀽𑀧𑀥𑀭𑀸 𑀭𑀽𑀧𑁂𑀦 𑀦𑀺𑀩𑁆𑀩𑀺𑀲𑁂𑀲𑀸 𑀳𑀼𑀢𑁆𑀯𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀲𑀩𑁆𑀩𑀲𑀫𑀬𑀲𑀺𑀧𑁆𑀧𑀜𑁆𑀘 𑀤𑁂𑀲𑀘𑀸𑀭𑀺𑀢𑁆𑀢𑀜𑁆𑀘 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀢𑀁 𑀤𑀺𑀯𑀲𑀜𑁆𑀘 𑀏𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 ‘‘𑀩𑁆𑀭𑀸𑀳𑁆𑀫𑀡𑀯𑀸𑀘𑀦𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀬𑀸𑀲𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂 𑀢𑁂 𑀓𑀼𑀫𑀸𑀭𑁂 𑀤𑀺𑀲𑁆𑀯𑀸 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀜𑁆𑀜𑀢𑁆𑀢𑀸𑀲𑀦𑁂 𑀲𑀼𑀤𑁆𑀥𑀯𑀢𑁆𑀣𑀁 𑀅𑀢𑁆𑀣𑀢𑀁 𑀅𑀳𑁄𑀲𑀺, 𑀲𑁄𑀡𑀓𑀲𑁆𑀲 𑀭𑀢𑁆𑀢𑀓𑀫𑁆𑀩𑀮𑀁. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸𑀯 ‘‘𑀅𑀚𑁆𑀚 𑀫𑁂 𑀧𑀺𑀬𑀲𑀳𑀸𑀬𑁄 𑀅𑀭𑀺𑀦𑁆𑀤𑀫𑀓𑀼𑀫𑀸𑀭𑁄 ¶ 𑀩𑀸𑀭𑀸𑀡𑀲𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀦 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀢𑁂 𑀉𑀪𑁄𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀉𑀬𑁆𑀬𑀸𑀦𑀫𑁂𑀯 𑀅𑀕𑀫𑀁𑀲𑀼.
𑀢𑀤𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀸𑀮𑀓𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺, 𑀅𑀧𑀼𑀢𑁆𑀢𑀓𑀁 𑀭𑀸𑀚𑀓𑀼𑀮𑀁. 𑀅𑀫𑀘𑁆𑀘𑀸𑀤𑀬𑁄 𑀧𑀸𑀢𑁄𑀯 𑀲𑀲𑀻𑀲𑀁 𑀦𑁆𑀳𑀸𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀭𑀚𑁆𑀚𑀸𑀭𑀳𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀨𑀼𑀲𑁆𑀲𑀭𑀣𑀁 𑀬𑁄𑀚𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀭𑁄𑀳𑀡𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 ¶ 𑀦𑀺𑀧𑀚𑁆𑀚𑀺, 𑀲𑁄𑀡𑀓𑀓𑀼𑀫𑀸𑀭𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀲𑁄 𑀢𑀽𑀭𑀺𑀬𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀭𑀺𑀦𑁆𑀤𑀫𑀲𑁆𑀲 𑀨𑀼𑀲𑁆𑀲𑀭𑀣𑁄 𑀆𑀕𑀘𑁆𑀙𑀢𑀺, 𑀅𑀚𑁆𑀚𑁂𑀲 𑀭𑀸𑀚𑀸 ¶ 𑀳𑀼𑀢𑁆𑀯𑀸 𑀫𑀫 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑀢𑀺, 𑀦 𑀔𑁄 𑀧𑀦 𑀫𑀬𑁆𑀳𑀁 𑀇𑀲𑁆𑀲𑀭𑀺𑀬𑁂𑀦𑀢𑁆𑀣𑁄, 𑀏𑀢𑀲𑁆𑀫𑀺𑀁 𑀕𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀝𑀺𑀘𑁆𑀙𑀦𑁆𑀦𑁂 𑀅𑀝𑁆𑀞𑀸𑀲𑀺. 𑀧𑀼𑀭𑁄𑀳𑀺𑀢𑁄 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀦𑀺𑀧𑀦𑁆𑀦𑀓𑀁 𑀤𑀺𑀲𑁆𑀯𑀸 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀣𑁄𑀓𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀺𑀮𑀸𑀧𑀝𑁆𑀝𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀣 𑀦𑀁 𑀧𑀼𑀭𑁄𑀳𑀺𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀳 𑁋 ‘‘𑀭𑀚𑁆𑀚𑀁 𑀢𑁂, 𑀤𑁂𑀯, 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀓𑀺𑀁 𑀅𑀧𑀼𑀢𑁆𑀢𑀓𑀁 𑀭𑀸𑀚𑀓𑀼𑀮’’𑀦𑁆𑀢𑀺? ‘‘𑀏𑀯𑀁, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀲𑀸𑀥𑀽’’𑀢𑀺. 𑀅𑀣 𑀦𑀁 𑀢𑁂 𑀢𑀢𑁆𑀣𑁂𑀯 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀕𑀭𑀁 𑀧𑀯𑁂𑀲𑁂𑀲𑀼𑀁. 𑀲𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺. 𑀲𑁄 𑀬𑀲𑀫𑀳𑀦𑁆𑀢𑀢𑀸𑀬 𑀲𑁄𑀡𑀓𑀓𑀼𑀫𑀸𑀭𑀁 𑀦 𑀲𑀭𑀺.
𑀲𑁄𑀧𑀺 𑀢𑀲𑁆𑀫𑀺𑀁 𑀦𑀕𑀭𑀁 𑀧𑀯𑀺𑀝𑁆𑀞𑁂 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀧𑀼𑀭𑀢𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀁 𑀲𑀸𑀮𑀭𑀼𑀓𑁆𑀔𑀢𑁄 𑀧𑀡𑁆𑀟𑀼𑀧𑀮𑀸𑀲𑀁 𑀧𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 ‘‘𑀬𑀣𑁂𑀯𑁂𑀢𑀁, 𑀢𑀣𑀸 𑀫𑀫𑀧𑀺 𑀲𑀭𑀻𑀭𑀁 𑀚𑀭𑀁 𑀧𑀢𑁆𑀯𑀸 𑀧𑀢𑀺𑀲𑁆𑀲𑀢𑀻’’𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀺. 𑀢𑀁𑀔𑀡𑀜𑁆𑀜𑁂𑀯𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 ‘‘𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀸𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀲𑀭𑀺𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀫𑁂 𑀲𑀳𑀸𑀬𑁄 𑀲𑁄𑀡𑀓𑁄’’𑀢𑀺 𑀲𑁄𑀡𑀓𑀁 𑀧𑀼𑀦𑀧𑁆𑀧𑀼𑀦𑀁 𑀲𑀭𑀦𑁆𑀢𑁄𑀧𑀺 ‘‘𑀫𑀬𑀸 𑀲𑀼𑀢𑁄 ¶ 𑀯𑀸 𑀤𑀺𑀝𑁆𑀞𑁄 𑀯𑀸’’𑀢𑀺 𑀯𑀢𑁆𑀢𑀸𑀭𑀁 𑀅𑀮𑀪𑀺𑀢𑁆𑀯𑀸 𑀅𑀮𑀗𑁆𑀓𑀢𑀫𑀳𑀸𑀢𑀮𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀕𑀦𑁆𑀥𑀩𑁆𑀩𑀦𑀸𑀝𑀓𑀦𑀘𑁆𑀘𑀕𑀻𑀢𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀦𑁆𑀢𑁄 ‘‘𑀬𑁄 𑀫𑁂 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀲𑀼𑀢𑁆𑀯𑀸 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀲𑁄𑀡𑀓𑁄 𑀯𑀲𑀢𑀻’𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀢𑀁 𑀤𑀲𑁆𑀲𑀸𑀫𑀺, 𑀬𑁄 𑀫𑁂 𑀲𑀸𑀫𑀁 𑀤𑀺𑀲𑁆𑀯𑀸 𑀆𑀭𑁄𑀘𑁂𑀲𑁆𑀲𑀢𑀺, 𑀢𑀲𑁆𑀲 𑀲𑀳𑀲𑁆𑀲’’𑀦𑁆𑀢𑀺 𑀏𑀓𑀁 𑀉𑀤𑀸𑀦𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀕𑀻𑀢𑀯𑀲𑁂𑀦 𑀉𑀤𑀸𑀦𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀓𑀲𑁆𑀲 𑀲𑀼𑀢𑁆𑀯𑀸 𑀲𑀢𑀁 𑀤𑀫𑁆𑀫𑀺, 𑀲𑀳𑀲𑁆𑀲𑀁 𑀤𑀺𑀝𑁆𑀞 𑀲𑁄𑀡𑀓𑀁;
𑀓𑁄 𑀫𑁂 𑀲𑁄𑀡𑀓𑀫𑀓𑁆𑀔𑀸𑀢𑀺, 𑀲𑀳𑀸𑀬𑀁 𑀧𑀁𑀲𑀼𑀓𑀻𑀴𑀺𑀢’’𑀦𑁆𑀢𑀺.
𑀅𑀣𑀲𑁆𑀲 𑀫𑀼𑀔𑀢𑁄 𑀮𑀼𑀜𑁆𑀘𑀦𑁆𑀢𑀻 𑀯𑀺𑀬 𑀕𑀳𑁂𑀢𑁆𑀯𑀸 𑀏𑀓𑀸 𑀦𑀸𑀝𑀓𑀻𑀢𑁆𑀣𑀻 𑀢𑀁 𑀕𑀸𑀬𑀺. 𑀅𑀣𑀜𑁆𑀜𑀸 𑀅𑀣𑀜𑁆𑀜𑀸𑀢𑀺 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀧𑀺𑀬𑀕𑀻𑀢’’𑀦𑁆𑀢𑀺 𑀲𑀩𑁆𑀩𑀸 𑀑𑀭𑁄𑀥𑀸 𑀕𑀸𑀬𑀺𑀁𑀲𑀼. 𑀅𑀦𑀼𑀓𑁆𑀓𑀫𑁂𑀦 𑀦𑀕𑀭𑀯𑀸𑀲𑀺𑀦𑁄𑀧𑀺 𑀚𑀸𑀦𑀧𑀤𑀸𑀧𑀺 𑀢𑀫𑁂𑀯 𑀕𑀻𑀢𑀁 𑀕𑀸𑀬𑀺𑀁𑀲𑀼. 𑀭𑀸𑀚𑀸𑀧𑀺 ¶ 𑀧𑀼𑀦𑀧𑁆𑀧𑀼𑀦𑀁 𑀢𑀫𑁂𑀯 𑀕𑀻𑀢𑀁 𑀕𑀸𑀬𑀢𑀺. 𑀧𑀡𑁆𑀡𑀸𑀲𑀫𑀢𑁆𑀢𑀸𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀧𑀦𑀲𑁆𑀲 𑀩𑀳𑀽 𑀧𑀼𑀢𑁆𑀢𑀥𑀻𑀢𑀭𑁄 𑀅𑀳𑁂𑀲𑀼𑀁, 𑀚𑁂𑀝𑁆𑀞𑀧𑀼𑀢𑁆𑀢𑁄 𑀤𑀻𑀖𑀸𑀯𑀼𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺. 𑀢𑀤𑀸 ¶ 𑀲𑁄𑀡𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀅𑀭𑀺𑀦𑁆𑀤𑀫𑀭𑀸𑀚𑀸 𑀫𑀁 𑀤𑀝𑁆𑀞𑀼𑀓𑀸𑀫𑁄, 𑀅𑀳𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘𑀸𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀦𑀸𑀓𑀸𑀭𑀁 𑀓𑀭𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀲𑀻𑀤𑀺. 𑀢𑀤𑀸 𑀏𑀓𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀧𑀜𑁆𑀘𑀘𑀽𑀴𑀓𑀓𑀼𑀫𑀸𑀭𑀓𑁄 𑀫𑀸𑀢𑀭𑀸 𑀧𑀳𑀺𑀢𑁄 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀯𑀦𑁂 𑀤𑀸𑀭𑀽𑀦𑀺 𑀉𑀤𑁆𑀥𑀭𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀢𑀫𑁂𑀯 𑀕𑀻𑀢𑀁 𑀕𑀸𑀬𑀺. 𑀅𑀣 𑀦𑀁 𑀲𑁄 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀓𑀼𑀫𑀸𑀭𑀓, 𑀢𑁆𑀯𑀁 𑀅𑀜𑁆𑀜𑀁 𑀅𑀕𑀸𑀬𑀺𑀢𑁆𑀯𑀸 𑀏𑀓𑀫𑁂𑀯 𑀕𑀻𑀢𑀁 𑀕𑀸𑀬𑀲𑀺, 𑀓𑀺𑀁 𑀅𑀜𑁆𑀜𑀁 𑀦 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀚𑀸𑀦𑀸𑀫𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀦 𑀭𑀜𑁆𑀜𑁄 𑀇𑀤𑀫𑁂𑀯 𑀧𑀺𑀬𑀁, 𑀢𑁂𑀦 𑀦𑀁 𑀧𑀼𑀦𑁆𑀦𑀧𑁆𑀧𑀼𑀦𑀁 𑀕𑀸𑀬𑀸𑀫𑀻’’𑀢𑀺. ‘‘𑀏𑀢𑀲𑁆𑀲 𑀧𑀦 𑀢𑁂 𑀕𑀻𑀢𑀲𑁆𑀲 𑀧𑀝𑀺𑀕𑀻𑀢𑀁 𑀕𑀸𑀬𑀦𑁆𑀢𑁄 𑀓𑁄𑀘𑀺 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. ‘‘𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁 𑀢𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺, 𑀲𑀓𑁆𑀔𑀺𑀲𑁆𑀲𑀲𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀕𑀻𑀢𑀁 𑀕𑀸𑀬𑀺𑀢𑀼’’𑀦𑁆𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀅𑀣𑀲𑁆𑀲 𑀲𑁄 𑀧𑀝𑀺𑀕𑀻𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀫𑀬𑁆𑀳𑀁 𑀲𑀼𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀘 𑀧𑀦 ¶ 𑀢𑀁 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀕𑀘𑁆𑀙, 𑀓𑀼𑀫𑀸𑀭𑀓, 𑀇𑀫𑀁 𑀧𑀝𑀺𑀕𑀻𑀢𑀁 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀸𑀬𑀸𑀳𑀺, 𑀭𑀸𑀚𑀸 𑀢𑁂 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀲𑁆𑀲𑀢𑀺, 𑀓𑀺𑀁 𑀢𑁂 𑀤𑀸𑀭𑀽𑀳𑀺, 𑀯𑁂𑀕𑁂𑀦 𑀬𑀸𑀳𑀻’’𑀢𑀺.
𑀲𑁄 ‘‘𑀲𑀸𑀥𑀽’’𑀢𑀺 𑀢𑀁 𑀧𑀝𑀺𑀕𑀻𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀸𑀯𑀸𑀳𑀁 𑀭𑀸𑀚𑀸𑀦𑀁 𑀆𑀦𑁂𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀯𑁂𑀕𑁂𑀦 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀫𑁆𑀫, 𑀔𑀺𑀧𑁆𑀧𑀁 𑀫𑀁 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑁄𑀣, 𑀅𑀚𑁆𑀚 𑀢𑀁 𑀤𑀮𑀺𑀤𑁆𑀤𑀪𑀸𑀯𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑁆𑀳𑀸𑀢𑀫𑀡𑁆𑀟𑀺𑀢𑁄 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀬𑁆𑀬 𑀤𑁄𑀯𑀸𑀭𑀺𑀓, ‘𑀏𑀓𑁄 𑀤𑀸𑀭𑀓𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀸𑀫𑀻𑀢𑀺 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑁄’𑀢𑀺 𑀭𑀜𑁆𑀜𑁄 𑀅𑀭𑁄𑀘𑁂𑀳𑀻’’𑀢𑀺 𑀆𑀳. 𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀆𑀕𑀘𑁆𑀙𑀢𑀽’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀕𑀸𑀬𑀲𑁆𑀲𑀽’’𑀢𑀺. ‘‘𑀤𑁂𑀯, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀕𑀸𑀬𑀸𑀫𑀺, 𑀦𑀕𑀭𑁂 𑀧𑀦 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀣, 𑀫𑀳𑀸𑀚𑀦𑀫𑀚𑁆𑀛𑁂 𑀕𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀧𑁂 𑀧𑀮𑁆𑀮𑀗𑁆𑀓𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸𑀦𑀼𑀭𑀽𑀧𑀁 𑀆𑀲𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀯 𑀕𑀻𑀢𑀁 𑀕𑀸𑀬𑀲𑁆𑀲𑀽’’𑀢𑀺 𑀆𑀳. ‘‘𑀤𑁂𑀯, 𑀢𑀼𑀫𑁆𑀳𑁂 𑀢𑀸𑀯 𑀕𑀸𑀬𑀣, 𑀅𑀣𑀸𑀳𑀁 𑀧𑀝𑀺𑀕𑀻𑀢𑀁 𑀕𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀭𑀸𑀚𑀸 𑀧𑀞𑀫𑀁 𑀕𑀸𑀬𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀓𑀲𑁆𑀲 ¶ 𑀲𑀼𑀢𑁆𑀯𑀸 𑀲𑀢𑀁 𑀤𑀫𑁆𑀫𑀺, 𑀲𑀳𑀲𑁆𑀲𑀁 𑀤𑀺𑀝𑁆𑀞 𑀲𑁄𑀡𑀓𑀁;
𑀲𑁄 𑀫𑁂 𑀲𑁄𑀡𑀓𑀫𑀓𑁆𑀔𑀸𑀢𑀺, 𑀲𑀳𑀸𑀬𑀁 𑀧𑀁𑀲𑀼𑀓𑀻𑀴𑀺𑀢’’𑀦𑁆𑀢𑀺.
𑀢𑀢𑁆𑀣 𑀲𑀼𑀢𑁆𑀯𑀸𑀢𑀺 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀢𑁂 𑀧𑀺𑀬𑀲𑀳𑀸𑀬𑁄 𑀲𑁄𑀡𑀓𑁄 𑀯𑀲𑀢𑀻’’𑀢𑀺 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀲𑀼𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀲𑁆𑀲 𑀲𑀢𑀁 𑀤𑀫𑁆𑀫𑀺. 𑀤𑀺𑀝𑁆𑀞𑀸𑀢𑀺 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀫𑀬𑀸 𑀤𑀺𑀝𑁆𑀞𑁄’’𑀢𑀺 𑀤𑀺𑀲𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀲𑁆𑀲 𑀲𑀳𑀲𑁆𑀲𑀁 𑀤𑀫𑁆𑀫𑀻𑀢𑀺.
𑀏𑀯𑀁 ¶ 𑀭𑀜𑁆𑀜𑀸 𑀧𑀞𑀫𑀁 𑀉𑀤𑀸𑀦𑀕𑀸𑀣𑀸𑀬 𑀕𑀻𑀢𑀸𑀬 𑀧𑀜𑁆𑀘𑀘𑀽𑀴𑀓𑀤𑀸𑀭𑀓𑁂𑀦 𑀧𑀝𑀺𑀕𑀻𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀻𑀬𑀟𑁆𑀠𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀅𑀣𑀩𑁆𑀭𑀯𑀻 𑀫𑀸𑀡𑀯𑀓𑁄, 𑀤𑀳𑀭𑁄 𑀧𑀜𑁆𑀘𑀘𑀽𑀴𑀓𑁄;
𑀫𑀬𑁆𑀳𑀁 𑀲𑀼𑀢𑁆𑀯𑀸 𑀲𑀢𑀁 𑀤𑁂𑀳𑀺, 𑀲𑀳𑀲𑁆𑀲𑀁 𑀤𑀺𑀝𑁆𑀞 𑀲𑁄𑀡𑀓𑀁;
𑀅𑀳𑀁 𑀢𑁂 𑀲𑁄𑀡𑀓𑀓𑁆𑀔𑀺𑀲𑁆𑀲𑀁, 𑀲𑀳𑀸𑀬𑀁 𑀧𑀁𑀲𑀼𑀓𑀻𑀴𑀺𑀢’’𑀦𑁆𑀢𑀺.
𑀢𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀧𑀦 𑀅𑀬𑀫𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀬𑀁 𑀢𑁆𑀯𑀁 ‘‘𑀲𑀼𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀲𑀢𑀁 𑀤𑀫𑁆𑀫𑀻’’𑀢𑀺 𑀯𑀤𑀲𑀺, 𑀢𑀫𑁆𑀧𑀺 𑀫𑀫𑁂𑀯 𑀤𑁂𑀳𑀺, 𑀬𑀁 ‘‘𑀤𑀺𑀲𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀲𑀳𑀲𑁆𑀲𑀁 ¶ 𑀤𑀫𑁆𑀫𑀻’’𑀢𑀺 𑀯𑀤𑀲𑀺, 𑀢𑀫𑁆𑀧𑀺 𑀫𑀬𑁆𑀳𑀫𑁂𑀯 𑀤𑁂𑀳𑀺, 𑀅𑀳𑀁 𑀢𑁂 𑀧𑀺𑀬𑀲𑀳𑀸𑀬𑀁 𑀇𑀤𑀸𑀦𑁂𑀯 𑀧𑀘𑁆𑀘𑀓𑁆𑀔𑀢𑁄𑀯 ‘‘𑀅𑀬𑀁 𑀲𑁄𑀡𑀓𑁄’’𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺.
𑀇𑀢𑁄 𑀧𑀭𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸 𑁋
‘‘𑀓𑀢𑀫𑀲𑁆𑀫𑀺𑀁 𑀲𑁄 𑀚𑀦𑀧𑀤𑁂, 𑀭𑀝𑁆𑀞𑁂𑀲𑀼 𑀦𑀺𑀕𑀫𑁂𑀲𑀼 𑀘;
𑀓𑀢𑁆𑀣 𑀲𑁄𑀡𑀓𑀫𑀤𑁆𑀤𑀓𑁆𑀔𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.
‘‘𑀢𑀯𑁂𑀯 𑀤𑁂𑀯 𑀯𑀺𑀚𑀺𑀢𑁂, 𑀢𑀯𑁂𑀯𑀼𑀬𑁆𑀬𑀸𑀦𑀪𑀽𑀫𑀺𑀬𑀁;
𑀉𑀚𑀼𑀯𑀁𑀲𑀸 𑀫𑀳𑀸𑀲𑀸𑀮𑀸, 𑀦𑀻𑀮𑁄𑀪𑀸𑀲𑀸 𑀫𑀦𑁄𑀭𑀫𑀸.
‘‘𑀢𑀺𑀝𑁆𑀞𑀦𑁆𑀢𑀺 𑀫𑁂𑀖𑀲𑀫𑀸𑀦𑀸, 𑀭𑀫𑁆𑀫𑀸 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸;
𑀢𑁂𑀲𑀁 𑀫𑀽𑀮𑀫𑁆𑀳𑀺 𑀲𑁄𑀡𑀓𑁄, 𑀛𑀸𑀬𑀢𑀻 𑀅𑀦𑀼𑀧𑀸𑀤𑀦𑁄;
𑀉𑀧𑀸𑀤𑀸𑀦𑁂𑀲𑀼 𑀮𑁄𑀓𑁂𑀲𑀼, 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀩𑁆𑀩𑀼𑀢𑁄.
‘‘𑀢𑀢𑁄 ¶ 𑀘 𑀭𑀸𑀚𑀸 𑀧𑀸𑀬𑀸𑀲𑀺, 𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀬𑀸;
𑀓𑀸𑀭𑀸𑀧𑁂𑀢𑁆𑀯𑀸 𑀲𑀫𑀁 𑀫𑀕𑁆𑀕𑀁, 𑀅𑀕𑀫𑀸 𑀬𑁂𑀦 𑀲𑁄𑀡𑀓𑁄.
‘‘𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀦𑁆𑀢𑁆𑀯𑀸𑀦, 𑀯𑀺𑀘𑀭𑀦𑁆𑀢𑁄 𑀩𑁆𑀭𑀳𑀸𑀯𑀦𑁂;
𑀆𑀲𑀻𑀦𑀁 𑀲𑁄𑀡𑀓𑀁 𑀤𑀓𑁆𑀔𑀺, 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀩𑁆𑀩𑀼𑀢’’𑀦𑁆𑀢𑀺.
𑀢𑀢𑁆𑀣 ¶ 𑀉𑀚𑀼𑀯𑀁𑀲𑀸𑀢𑀺 𑀉𑀚𑀼𑀓𑁆𑀔𑀦𑁆𑀥𑀸. 𑀫𑀳𑀸𑀲𑀸𑀮𑀸𑀢𑀺 𑀫𑀳𑀸𑀭𑀼𑀓𑁆𑀔𑀸. 𑀫𑁂𑀖𑀲𑀫𑀸𑀦𑀸𑀢𑀺 𑀦𑀻𑀮𑀫𑁂𑀖𑀲𑀤𑀺𑀲𑀸. 𑀭𑀫𑁆𑀫𑀸𑀢𑀺 𑀭𑀫𑀡𑀻𑀬𑀸. 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸𑀢𑀺 𑀲𑀸𑀔𑀸𑀳𑀺 𑀲𑀸𑀔𑀁, 𑀫𑀽𑀮𑁂𑀦 𑀫𑀽𑀮𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀏𑀯𑀭𑀽𑀧𑀸𑀦𑀁 𑀢𑀯 𑀉𑀬𑁆𑀬𑀸𑀦𑀯𑀦𑁂 𑀲𑀸𑀮𑀸𑀦𑀁 𑀳𑁂𑀝𑁆𑀞𑀸. 𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀲𑀗𑁆𑀔𑀸𑀢𑁂𑀳𑀺 𑀛𑀸𑀦𑁂𑀳𑀺 𑀛𑀸𑀬𑀢𑀺. 𑀅𑀦𑀼𑀧𑀸𑀤𑀦𑁄𑀢𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀯𑀺𑀭𑀳𑀺𑀢𑁄. 𑀟𑀬𑁆𑀳𑀫𑀸𑀦𑁂𑀲𑀽𑀢𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀟𑀬𑁆𑀳𑀫𑀸𑀦𑁂𑀲𑀼 𑀲𑀢𑁆𑀢𑁂𑀲𑀼. 𑀦𑀺𑀩𑁆𑀩𑀼𑀢𑁄𑀢𑀺 𑀢𑁂 𑀅𑀕𑁆𑀕𑀻 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀻𑀢𑀮𑁂𑀦 𑀳𑀤𑀬𑁂𑀦 𑀛𑀸𑀬𑀫𑀸𑀦𑁄 𑀢𑀯 𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀺𑀦𑁆𑀦𑁄 𑀏𑀲 𑀢𑁂 𑀲𑀳𑀸𑀬𑁄 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀲𑁄𑀪𑀫𑀸𑀦𑁄 𑀧𑀝𑀺𑀫𑀸𑀦𑁂𑀢𑀻𑀢𑀺. 𑀢𑀢𑁄 𑀘𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑀢𑁄 𑀲𑁄 𑀅𑀭𑀺𑀦𑁆𑀤𑀫𑁄 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀯 ‘‘𑀲𑁄𑀡𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀸𑀬𑀸𑀲𑀺 𑀦𑀺𑀓𑁆𑀔𑀫𑀺. 𑀯𑀺𑀘𑀭𑀦𑁆𑀢𑁄𑀢𑀺 𑀉𑀚𑀼𑀓𑀫𑁂𑀯 𑀅𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀫𑀳𑀦𑁆𑀢𑁂 𑀯𑀦𑀲𑀡𑁆𑀟𑁂 𑀯𑀺𑀘𑀭𑀦𑁆𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀲𑀻𑀦𑀁 𑀅𑀤𑁆𑀤𑀓𑁆𑀔𑀺.
𑀲𑁄 𑀢𑀁 𑀅𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀺𑀮𑁂𑀲𑀸𑀪𑀺𑀭𑀢𑀢𑁆𑀢𑀸 𑀢𑀁 ‘‘𑀓𑀧𑀡𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀓𑀧𑀡𑁄 𑀯𑀢𑀬𑀁 𑀪𑀺𑀓𑁆𑀔𑀼, 𑀫𑀼𑀡𑁆𑀟𑁄 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁄;
𑀅𑀫𑀸𑀢𑀺𑀓𑁄 𑀅𑀧𑀺𑀢𑀺𑀓𑁄, 𑀭𑀼𑀓𑁆𑀔𑀫𑀽𑀮𑀲𑁆𑀫𑀺 𑀛𑀸𑀬𑀢𑀻’’𑀢𑀺.
𑀢𑀢𑁆𑀣 𑀛𑀸𑀬𑀢𑀻𑀢𑀺 𑀦𑀺𑀫𑁆𑀫𑀸𑀢𑀺𑀓𑁄 𑀦𑀺𑀧𑁆𑀧𑀺𑀢𑀺𑀓𑁄 𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑁄 𑀛𑀸𑀬𑀢𑀺.
‘‘𑀇𑀫𑀁 𑀯𑀸𑀓𑁆𑀬𑀁 𑀦𑀺𑀲𑀸𑀫𑁂𑀢𑁆𑀯𑀸, 𑀲𑁄𑀡𑀓𑁄 𑀏𑀢𑀤𑀩𑁆𑀭𑀯𑀺;
𑀦 𑀭𑀸𑀚 𑀓𑀧𑀡𑁄 𑀳𑁄𑀢𑀺, 𑀥𑀫𑁆𑀫𑀁 𑀓𑀸𑀬𑁂𑀦 𑀨𑀲𑁆𑀲𑀬𑀁.
‘‘𑀬𑁄 ¶ 𑀘 𑀥𑀫𑁆𑀫𑀁 𑀦𑀺𑀭𑀁𑀓𑀢𑁆𑀯𑀸, 𑀅𑀥𑀫𑁆𑀫𑀫𑀦𑀼𑀯𑀢𑁆𑀢𑀢𑀺;
𑀲 𑀭𑀸𑀚 𑀓𑀧𑀡𑁄 𑀳𑁄𑀢𑀺, 𑀧𑀸𑀧𑁄 𑀧𑀸𑀧𑀧𑀭𑀸𑀬𑀡𑁄’’𑀢𑀺.
𑀢𑀢𑁆𑀣 ¶ 𑀇𑀫𑀦𑁆𑀢𑀺 𑀢𑀲𑁆𑀲 𑀓𑀺𑀮𑁂𑀲𑀸𑀪𑀺𑀭𑀢𑀲𑁆𑀲 𑀧𑀩𑁆𑀩𑀚𑁆𑀚𑀁 𑀅𑀭𑁄𑀘𑁂𑀦𑁆𑀢𑀲𑁆𑀲 𑀇𑀫𑀁 𑀧𑀩𑁆𑀩𑀚𑁆𑀚𑀸𑀕𑀭𑀳𑀯𑀘𑀦𑀁 𑀲𑀼𑀢𑁆𑀯𑀸. 𑀏𑀢𑀤𑀩𑁆𑀭𑀯𑀻𑀢𑀺 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀏𑀢𑀁 𑀅𑀩𑁆𑀭𑀯𑀺. 𑀨𑀲𑁆𑀲𑀬𑀦𑁆𑀢𑀺 𑀨𑀲𑁆𑀲𑀬𑀦𑁆𑀢𑁄 𑀬𑁂𑀦 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁄 𑀦𑀸𑀫𑀓𑀸𑀬𑁂𑀦 𑀨𑀲𑁆𑀲𑀺𑀢𑁄, 𑀲𑁄 𑀓𑀧𑀡𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀦𑀺𑀭𑀁𑀓𑀢𑁆𑀯𑀸𑀢𑀺 𑀅𑀢𑁆𑀢𑀪𑀸𑀯𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀧𑀸𑀧𑁄 𑀧𑀸𑀧𑀧𑀭𑀸𑀬𑀡𑁄𑀢𑀺 𑀲𑀬𑀁 𑀧𑀸𑀧𑀸𑀦𑀁 𑀓𑀭𑀡𑁂𑀦 𑀧𑀸𑀧𑁄, 𑀅𑀜𑁆𑀜𑁂𑀲𑀫𑁆𑀧𑀺 𑀓𑀭𑁄𑀦𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀧𑀸𑀧𑀧𑀭𑀸𑀬𑀡𑁄𑀢𑀺.
𑀏𑀯𑀁 ¶ 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀕𑀭𑀳𑀺. 𑀲𑁄 𑀅𑀢𑁆𑀢𑀦𑁄 𑀕𑀭𑀳𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀦𑀸𑀫𑀕𑁄𑀢𑁆𑀢𑀁 𑀓𑀣𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀭𑀺𑀦𑁆𑀤𑀫𑁄𑀢𑀺 𑀫𑁂 𑀦𑀸𑀫𑀁, 𑀓𑀸𑀲𑀺𑀭𑀸𑀚𑀸𑀢𑀺 𑀫𑀁 𑀯𑀺𑀤𑀽;
𑀓𑀘𑁆𑀘𑀺 𑀪𑁄𑀢𑁄 𑀲𑀼𑀔𑀲𑁆𑀲𑁂𑀬𑁆𑀬𑀸, 𑀇𑀥 𑀧𑀢𑁆𑀢𑀲𑁆𑀲 𑀲𑁄𑀡𑀓𑀸’’𑀢𑀺.
𑀢𑀢𑁆𑀣 𑀓𑀘𑁆𑀘𑀻𑀢𑀺 𑀅𑀫𑁆𑀳𑀸𑀓𑀁 𑀢𑀸𑀯 𑀦 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁, 𑀪𑁄𑀢𑁄 𑀧𑀦 𑀓𑀘𑁆𑀘𑀺 𑀇𑀥 𑀧𑀢𑁆𑀢𑀲𑁆𑀲 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀯𑀲𑀢𑁄 𑀲𑀼𑀔𑀯𑀺𑀳𑀸𑀭𑁄𑀢𑀺 𑀧𑀼𑀘𑁆𑀙𑀢𑀺.
𑀅𑀣 𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, ‘‘𑀫𑀳𑀸𑀭𑀸𑀚, 𑀦 𑀓𑁂𑀯𑀮𑀁 𑀇𑀥, 𑀅𑀜𑁆𑀜𑀢𑁆𑀭𑀸𑀧𑀺 𑀯𑀲𑀦𑁆𑀢𑀲𑁆𑀲 𑀫𑁂 𑀅𑀲𑀼𑀔𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀲𑀫𑀡𑀪𑀤𑁆𑀭𑀕𑀸𑀣𑀸𑀬𑁄 𑀦𑀸𑀫 𑀆𑀭𑀪𑀺 𑁋
‘‘𑀲𑀤𑀸𑀧𑀺 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀦 𑀢𑁂𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺, 𑀦 𑀓𑀼𑀫𑁆𑀪𑀺𑀁 𑀦 𑀓𑀴𑁄𑀧𑀺𑀬𑀁;
𑀧𑀭𑀦𑀺𑀝𑁆𑀞𑀺𑀢𑀫𑁂𑀲𑀸𑀦𑀸, 𑀢𑁂𑀦 𑀬𑀸𑀧𑁂𑀦𑁆𑀢𑀺 𑀲𑀼𑀩𑁆𑀩𑀢𑀸.
‘‘𑀤𑀼𑀢𑀺𑀬𑀫𑁆𑀧𑀺 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀅𑀦𑀯𑀚𑁆𑀚𑀧𑀺𑀡𑁆𑀟𑁄 𑀪𑁄𑀢𑁆𑀢𑀩𑁆𑀩𑁄, 𑀦 𑀘 𑀓𑁄𑀘𑀽𑀧𑀭𑁄𑀥𑀢𑀺.
‘‘𑀢𑀢𑀺𑀬𑀫𑁆𑀧𑀺 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀦𑀺𑀩𑁆𑀩𑀼𑀢𑁄 𑀧𑀺𑀡𑁆𑀟𑁄 𑀪𑁄𑀢𑁆𑀢𑀩𑁆𑀩𑁄, 𑀦 𑀘 𑀓𑁄𑀘𑀽𑀧𑀭𑁄𑀥𑀢𑀺.
‘‘𑀘𑀢𑀼𑀢𑁆𑀣𑀫𑁆𑀧𑀺 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀫𑀼𑀢𑁆𑀢𑀲𑁆𑀲 𑀭𑀝𑁆𑀞𑁂 𑀘𑀭𑀢𑁄, 𑀲𑀗𑁆𑀕𑁄 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.
‘‘𑀧𑀜𑁆𑀘𑀫𑀫𑁆𑀧𑀺 ¶ 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀦𑀕𑀭𑀫𑁆𑀳𑀺 𑀟𑀬𑁆𑀳𑀫𑀸𑀦𑀫𑁆𑀳𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀅𑀟𑀬𑁆𑀳𑀣.
‘‘𑀙𑀝𑁆𑀞𑀫𑁆𑀧𑀺 ¶ 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀭𑀝𑁆𑀞𑁂 𑀯𑀺𑀮𑀼𑀫𑁆𑀧𑀫𑀸𑀦𑀫𑁆𑀳𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀅𑀳𑀻𑀭𑀣.
‘‘𑀲𑀢𑁆𑀢𑀫𑀫𑁆𑀧𑀺 ¶ 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀘𑁄𑀭𑁂𑀳𑀺 𑀭𑀓𑁆𑀔𑀺𑀢𑀁 𑀫𑀕𑁆𑀕𑀁, 𑀬𑁂 𑀘𑀜𑁆𑀜𑁂 𑀧𑀭𑀺𑀧𑀦𑁆𑀣𑀺𑀓𑀸;
𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬, 𑀲𑁄𑀢𑁆𑀣𑀺𑀁 𑀕𑀘𑁆𑀙𑀢𑀺 𑀲𑀼𑀩𑁆𑀩𑀢𑁄.
‘‘𑀅𑀝𑁆𑀞𑀫𑀫𑁆𑀧𑀺 𑀪𑀤𑁆𑀭𑀫𑀥𑀦𑀲𑁆𑀲, 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄;
𑀬𑀁 𑀬𑀁 𑀤𑀺𑀲𑀁 𑀧𑀓𑁆𑀓𑀫𑀢𑀺, 𑀅𑀦𑀧𑁂𑀓𑁆𑀔𑁄𑀯 𑀕𑀘𑁆𑀙𑀢𑀻’’𑀢𑀺.
𑀢𑀢𑁆𑀣 𑀅𑀦𑀸𑀕𑀸𑀭𑀲𑁆𑀲𑀸𑀢𑀺, 𑀫𑀳𑀸𑀭𑀸𑀚, 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀅𑀦𑀸𑀕𑀸𑀭𑀺𑀬𑀪𑀸𑀯𑀁 𑀧𑀢𑁆𑀢𑀲𑁆𑀲 𑀅𑀥𑀦𑀲𑁆𑀲 𑀅𑀓𑀺𑀜𑁆𑀘𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀓𑀸𑀮𑀁 𑀪𑀤𑁆𑀭𑀫𑁂𑀯. 𑀦 𑀢𑁂𑀲𑀦𑁆𑀢𑀺, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀥𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦 𑀓𑁄𑀝𑁆𑀞𑀸𑀕𑀸𑀭𑁂 𑀥𑀦𑀥𑀜𑁆𑀜𑀸𑀦𑀺 𑀑𑀧𑁂𑀦𑁆𑀢𑀺, 𑀦 𑀓𑀼𑀫𑁆𑀪𑀺𑀬𑀁, 𑀦 𑀧𑀘𑁆𑀙𑀺𑀬𑀁, 𑀢𑁂 𑀧𑀦 𑀲𑀼𑀩𑁆𑀩𑀢𑀸 𑀧𑀭𑀦𑀺𑀝𑁆𑀞𑀺𑀢𑀁 𑀧𑀭𑁂𑀲𑀁 𑀖𑀭𑁂 𑀧𑀓𑁆𑀓𑀁 𑀆𑀳𑀸𑀭𑀁 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀧𑀸𑀮𑀫𑀸𑀤𑀸𑀬 𑀖𑀭𑀧𑀝𑀺𑀧𑀸𑀝𑀺𑀬𑀸 𑀏𑀲𑀸𑀦𑀸 𑀧𑀭𑀺𑀬𑁂𑀲𑀦𑁆𑀢𑀸 𑀢𑁂𑀦 𑀢𑀢𑁄 𑀮𑀤𑁆𑀥𑁂𑀦 𑀧𑀺𑀡𑁆𑀟𑁂𑀦 𑀢𑀁 𑀆𑀳𑀸𑀭𑀁 𑀦𑀯𑀦𑁆𑀦𑀁 𑀧𑀸𑀝𑀺𑀓𑀼𑀮𑁆𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀬𑀸𑀧𑁂𑀦𑁆𑀢𑀺.
𑀅𑀦𑀯𑀚𑁆𑀚𑀧𑀺𑀡𑁆𑀟𑁄 𑀪𑁄𑀢𑁆𑀢𑀩𑁆𑀩𑁄𑀢𑀺 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀓𑀸𑀬 𑀅𑀦𑁂𑀲𑀦𑀸𑀬 𑀯𑀸 𑀓𑀼𑀳𑀦𑀸 𑀮𑀧𑀦𑀸 𑀦𑁂𑀫𑀺𑀢𑁆𑀢𑀺𑀓𑀢𑀸 𑀦𑀺𑀧𑁆𑀧𑁂𑀲𑀺𑀓𑀢𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀢𑀺 𑀏𑀯𑀭𑀽𑀧𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀯𑀸 𑀉𑀧𑁆𑀧𑀸𑀤𑀺𑀢𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸, 𑀥𑀫𑁆𑀫𑁂𑀦 𑀉𑀧𑁆𑀧𑀸𑀤𑀺𑀢𑀸𑀧𑀺 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀸 𑀲𑀸𑀯𑀚𑁆𑀚𑀧𑀺𑀡𑁆𑀟𑁄 𑀦𑀸𑀫. 𑀅𑀦𑁂𑀲𑀦𑀁 𑀧𑀦 𑀧𑀳𑀸𑀬 𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀸𑀤𑀺𑀢𑀸 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀸𑀫𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀸 𑀅𑀦𑀯𑀚𑁆𑀚𑀧𑀺𑀡𑁆𑀟𑁄 𑀦𑀸𑀫. 𑀬𑁂𑀦 𑀏𑀯𑀭𑀽𑀧𑁄 𑀅𑀦𑀯𑀚𑁆𑀚𑀧𑀺𑀡𑁆𑀟𑁄 𑀪𑁄𑀢𑁆𑀢𑀩𑁆𑀩𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄, 𑀬𑀜𑁆𑀘 𑀏𑀯𑀭𑀽𑀧𑀁 𑀅𑀦𑀯𑀚𑁆𑀚𑀁 𑀧𑀺𑀡𑁆𑀟𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀧𑀘𑁆𑀘𑀬𑁂 𑀦𑀺𑀲𑁆𑀲𑀸𑀬 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀮𑁂𑀲𑁄 𑀦 𑀉𑀧𑀭𑁄𑀥𑀢𑀺 𑀦 𑀧𑀻𑀴𑁂𑀢𑀺, 𑀢𑀲𑁆𑀲 𑀤𑀼𑀢𑀺𑀬𑀫𑁆𑀧𑀺 𑀪𑀤𑁆𑀭𑀁 𑀅𑀥𑀦𑀲𑁆𑀲 𑀅𑀦𑀸𑀕𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄.
𑀦𑀺𑀩𑁆𑀩𑀼𑀢𑁄𑀢𑀺 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀧𑀺𑀡𑁆𑀟𑁄𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑁄 𑀦𑀺𑀩𑁆𑀩𑀼𑀢𑀧𑀺𑀡𑁆𑀟𑁄 𑀦𑀸𑀫, 𑀏𑀓𑀦𑁆𑀢𑀢𑁄 𑀧𑀦 𑀔𑀻𑀡𑀸𑀲𑀯𑀲𑁆𑀲 𑀧𑀺𑀡𑁆𑀟𑁄𑀯 𑀦𑀺𑀩𑁆𑀩𑀼𑀢𑀧𑀺𑀡𑁆𑀟𑁄 𑀦𑀸𑀫. 𑀓𑀺𑀁𑀓𑀸𑀭𑀡𑀸? 𑀲𑁄 𑀳𑀺 𑀣𑁂𑀬𑁆𑀬𑀧𑀭𑀺𑀪𑁄𑀕𑁄, 𑀇𑀡𑀧𑀭𑀺𑀪𑁄𑀕𑁄 ¶ , 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄, 𑀲𑀸𑀫𑀺𑀧𑀭𑀺𑀪𑁄𑀕𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀭𑀺𑀪𑁄𑀕𑁂𑀲𑀼 𑀲𑀸𑀫𑀺𑀧𑀭𑀺𑀪𑁄𑀕𑀯𑀲𑁂𑀦 𑀢𑀁 𑀪𑀼𑀜𑁆𑀚𑀢𑀺, 𑀢𑀡𑁆𑀳𑀸𑀤𑀸𑀲𑀩𑁆𑀬𑀁 𑀅𑀢𑀻𑀢𑁄 𑀲𑀸𑀫𑀻 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀦 𑀢𑀁 𑀢𑀧𑁆𑀧𑀘𑁆𑀘𑀬𑀸 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀮𑁂𑀲𑁄 𑀉𑀧𑀭𑁄𑀥𑀢𑀺.
𑀫𑀼𑀢𑁆𑀢𑀲𑁆𑀲 𑀭𑀝𑁆𑀞𑁂 𑀘𑀭𑀢𑁄𑀢𑀺 𑀉𑀧𑀝𑁆𑀞𑀸𑀓𑀓𑀼𑀮𑀸𑀤𑀻𑀲𑀼 𑀅𑀮𑀕𑁆𑀕𑀫𑀸𑀦𑀲𑀲𑁆𑀲 𑀙𑀺𑀦𑁆𑀦𑀯𑀮𑀸𑀳𑀓𑀲𑁆𑀲 𑀯𑀺𑀬 𑀭𑀸𑀳𑀼𑀫𑀼𑀔𑀸 ¶ 𑀧𑀫𑀼𑀢𑁆𑀢𑀲𑁆𑀲 𑀯𑀺𑀫𑀮𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀺𑀬 𑀘 𑀬𑀲𑁆𑀲 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀘𑀭𑀦𑁆𑀢𑀲𑁆𑀲 𑀭𑀸𑀕𑀲𑀗𑁆𑀕𑀸𑀤𑀻𑀲𑀼 𑀏𑀓𑁄𑀧𑀺 𑀲𑀗𑁆𑀕𑁄 𑀦𑀢𑁆𑀣𑀺. 𑀏𑀓𑀘𑁆𑀘𑁄 𑀳𑀺 𑀓𑀼𑀮𑁂𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀲𑁄𑀓𑀻 𑀲𑀳𑀦𑀦𑁆𑀤𑀻, 𑀏𑀓𑀘𑁆𑀘𑁄 𑀫𑀸𑀢𑀸𑀧𑀺𑀢𑀽𑀲𑀼𑀧𑀺 𑀅𑀮𑀕𑁆𑀕𑀫𑀸𑀦𑀲𑁄 𑀯𑀺𑀘𑀭𑀢𑀺 𑀓𑁄𑀭𑀼𑀦𑀕𑀭𑀕𑀸𑀫𑀯𑀸𑀲𑀻 𑀤𑀳𑀭𑁄 𑀯𑀺𑀬, 𑀏𑀯𑀭𑀽𑀧𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀪𑀤𑁆𑀭𑀫𑁂𑀯 ¶ .
𑀦𑀸𑀲𑁆𑀲 𑀓𑀺𑀜𑁆𑀘𑀻𑀢𑀺 𑀬𑁄 𑀳𑀺 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀲𑁄 ‘‘𑀫𑀸 𑀫𑁂 𑀘𑁄𑀭𑀸 𑀧𑀭𑀺𑀓𑁆𑀔𑀸𑀭𑁂 𑀳𑀭𑀺𑀁𑀲𑀽’’𑀢𑀺 𑀅𑀢𑀺𑀭𑁂𑀓𑀸𑀦𑀺 𑀘 𑀘𑀻𑀯𑀭𑀸𑀤𑀻𑀦𑀺 𑀅𑀦𑁆𑀢𑁄𑀦𑀕𑀭𑁂 𑀉𑀧𑀝𑁆𑀞𑀸𑀓𑀓𑀼𑀮𑁂 𑀦𑀺𑀓𑁆𑀔𑀺𑀧𑀢𑀺, 𑀅𑀣 𑀦𑀕𑀭𑀫𑁆𑀳𑀺 𑀟𑀬𑁆𑀳𑀫𑀸𑀦𑁂 ‘‘𑀅𑀲𑀼𑀓𑀓𑀼𑀮𑁂 𑀦𑀸𑀫 𑀅𑀕𑁆𑀕𑀺 𑀉𑀝𑁆𑀞𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑁄𑀘𑀢𑀺 𑀓𑀺𑀮𑀫𑀢𑀺, 𑀏𑀯𑀭𑀽𑀧𑀲𑁆𑀲 𑀪𑀤𑁆𑀭𑀁 𑀦𑀸𑀫 𑀦𑀢𑁆𑀣𑀺. 𑀬𑁄 𑀧𑀦, 𑀫𑀳𑀸𑀭𑀸𑀚, 𑀲𑀓𑀼𑀡𑀯𑀢𑁆𑀢𑀁 𑀧𑀽𑀭𑁂𑀢𑀺, 𑀓𑀸𑀬𑀧𑀝𑀺𑀩𑀤𑁆𑀥𑀧𑀭𑀺𑀓𑁆𑀔𑀸𑀭𑁄𑀯 𑀳𑁄𑀢𑀺, 𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀦 𑀓𑀺𑀜𑁆𑀘𑀺 𑀅𑀟𑀬𑁆𑀳𑀣, 𑀢𑁂𑀦𑀲𑁆𑀲 𑀧𑀜𑁆𑀘𑀫𑀫𑁆𑀧𑀺 𑀪𑀤𑁆𑀭𑀫𑁂𑀯.
𑀯𑀺𑀮𑀼𑀫𑁆𑀧𑀫𑀸𑀦𑀫𑁆𑀳𑀻𑀢𑀺 𑀯𑀺𑀮𑀼𑀧𑁆𑀧𑀫𑀸𑀦𑀫𑁆𑀳𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀳𑀻𑀭𑀣𑀸𑀢𑀺 𑀬𑀣𑀸 𑀧𑀩𑁆𑀩𑀢𑀕𑀳𑀦𑀸𑀤𑀻𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑁂𑀲𑀼 𑀘𑁄𑀭𑁂𑀲𑀼 𑀩𑀳𑀼𑀧𑀭𑀺𑀓𑁆𑀔𑀸𑀭𑀲𑁆𑀲 𑀅𑀦𑁆𑀢𑁄𑀕𑀸𑀫𑁂 𑀞𑀧𑀺𑀢𑀁 𑀯𑀺𑀮𑀼𑀫𑁆𑀧𑀢𑀺 𑀳𑀭𑀢𑀺, 𑀢𑀣𑀸 𑀬𑀲𑁆𑀲 𑀅𑀥𑀦𑀲𑁆𑀲 𑀓𑀸𑀬𑀧𑀝𑀺𑀩𑀤𑁆𑀥𑀧𑀭𑀺𑀓𑁆𑀔𑀸𑀭𑀲𑁆𑀲 𑀦 𑀓𑀺𑀜𑁆𑀘𑀺 𑀅𑀳𑀻𑀭𑀣 𑀢𑀲𑁆𑀲 𑀙𑀝𑁆𑀞𑀫𑁆𑀧𑀺 𑀪𑀤𑁆𑀭𑀫𑁂𑀯.
𑀬𑁂 𑀘𑀜𑁆𑀜𑁂 𑀧𑀭𑀺𑀧𑀦𑁆𑀣𑀺𑀓𑀸𑀢𑀺 𑀬𑁂 𑀘 𑀅𑀜𑁆𑀜𑁂𑀧𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀼𑀗𑁆𑀓𑀕𑀳𑀡𑀢𑁆𑀣𑀸𑀬 𑀞𑀧𑀺𑀢𑀸 𑀧𑀭𑀺𑀧𑀦𑁆𑀣𑀺𑀓𑀸, 𑀢𑁂𑀳𑀺 𑀘 𑀭𑀓𑁆𑀔𑀺𑀢𑀁. 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀘𑁄𑀭𑀸𑀦𑀁 𑀅𑀦𑀼𑀧𑀓𑀸𑀭𑀁 𑀲𑀼𑀗𑁆𑀓𑀺𑀓𑀸𑀦𑀁 𑀅𑀲𑀼𑀗𑁆𑀓𑀸𑀭𑀳𑀁 𑀫𑀢𑁆𑀢𑀺𑀓𑀸𑀧𑀢𑁆𑀢𑀜𑁆𑀘𑁂𑀯 𑀓𑀢𑀤𑀴𑁆𑀳𑀻𑀓𑀫𑁆𑀫𑀧𑀭𑀺𑀪𑀡𑁆𑀟𑀁 𑀧𑀁𑀲𑀼𑀓𑀽𑀮𑀘𑀻𑀯𑀭𑀜𑁆𑀘 𑀅𑀧𑁆𑀧𑀕𑁆𑀖𑀸𑀦𑀺 𑀓𑀸𑀬𑀩𑀦𑁆𑀥𑀦𑀧𑀭𑀺𑀲𑁆𑀲𑀸𑀯𑀦𑀲𑀽𑀘𑀺𑀯𑀸𑀲𑀺𑀧𑀢𑁆𑀢𑀢𑁆𑀣𑀯𑀺𑀓𑀸𑀦𑀺 𑀘𑀸𑀢𑀺 𑀲𑀩𑁆𑀩𑁂𑀧𑀺 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑁂 𑀓𑀸𑀬𑀧𑀝𑀺𑀩𑀤𑁆𑀥𑁂 𑀓𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀓𑁂𑀦𑀘𑀺 𑀅𑀯𑀺𑀳𑁂𑀞𑀺𑀬𑀫𑀸𑀦𑁄 𑀲𑁄𑀢𑁆𑀣𑀺𑀁 𑀕𑀘𑁆𑀙𑀢𑀺. 𑀲𑀼𑀩𑁆𑀩𑀢𑁄𑀢𑀺 𑀮𑁄𑀪𑀦𑀻𑀬𑀸𑀦𑀺 𑀳𑀺 𑀘𑀻𑀯𑀭𑀸𑀤𑀻𑀦𑀺 𑀤𑀺𑀲𑁆𑀯𑀸 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀼𑀗𑁆𑀓𑀺𑀓𑀸𑀧𑀺 ‘‘𑀓𑀺𑀁 𑀦𑀼 𑀔𑁄 𑀏𑀢𑀲𑁆𑀲 𑀳𑀢𑁆𑀣𑁂’’𑀢𑀺 ¶ 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀦𑀺 𑀲𑁄𑀥𑁂𑀦𑁆𑀢𑀺, 𑀲𑀼𑀩𑁆𑀩𑀢𑁄 𑀧𑀦 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀲𑁄𑀢𑁆𑀣𑀺𑀁 𑀕𑀘𑁆𑀙𑀢𑀺, 𑀢𑁂𑀦𑀲𑁆𑀲 𑀲𑀢𑁆𑀢𑀫𑀫𑁆𑀧𑀺 𑀪𑀤𑁆𑀭𑀫𑁂𑀯.
𑀅𑀦𑀧𑁂𑀓𑁆𑀔𑁄𑀯 𑀕𑀘𑁆𑀙𑀢𑀻𑀢𑀺 𑀓𑀸𑀬𑀧𑀝𑀺𑀩𑀤𑁆𑀥𑀢𑁄 𑀅𑀢𑀺𑀭𑁂𑀓𑀲𑁆𑀲 𑀯𑀺𑀳𑀸𑀭𑁂 𑀧𑀝𑀺𑀲𑀸𑀫𑀺𑀢𑀲𑁆𑀲 𑀓𑀲𑁆𑀲𑀘𑀺 𑀧𑀭𑀺𑀓𑁆𑀔𑀸𑀭𑀲𑁆𑀲 𑀅𑀪𑀸𑀯𑀸 𑀯𑀲𑀦𑀝𑁆𑀞𑀸𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀢𑀺. 𑀬𑀁 𑀬𑀁 𑀤𑀺𑀲𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀢𑀁 𑀕𑀘𑁆𑀙𑀦𑁆𑀢𑁄 𑀅𑀦𑀧𑁂𑀓𑁆𑀔𑁄𑀯 𑀕𑀘𑁆𑀙𑀢𑀺 𑀅𑀦𑀼𑀭𑀸𑀥𑀧𑀼𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑀽𑀧𑀸𑀭𑀸𑀫𑁂 𑀧𑀩𑁆𑀩𑀚𑀺𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀯𑀼𑀟𑁆𑀠𑀢𑀭𑁄 𑀯𑀺𑀬.
𑀇𑀢𑀺 𑀲𑁄𑀡𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀝𑁆𑀞 𑀲𑀫𑀡𑀪𑀤𑁆𑀭𑀓𑀸𑀦𑀺 𑀓𑀣𑁂𑀲𑀺. 𑀢𑀢𑁄 𑀉𑀢𑁆𑀢𑀭𑀺𑀁 𑀧𑀦 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 ¶ 𑀅𑀧𑀭𑀺𑀫𑀸𑀡𑀸𑀦𑀺 𑀲𑀫𑀡𑀪𑀤𑁆𑀭𑀓𑀸𑀦𑀺 𑀏𑀲 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄𑀬𑁂𑀯. 𑀭𑀸𑀚𑀸 𑀧𑀦 𑀓𑀸𑀫𑀸𑀪𑀺𑀭𑀢𑀢𑁆𑀢𑀸 𑀢𑀲𑁆𑀲 𑀓𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀫𑀡𑀪𑀤𑁆𑀭𑀓𑁂𑀳𑀺 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀅𑀢𑁆𑀢𑀦𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑀢𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀩𑀳𑀽𑀦𑀺 𑀲𑀫𑀡𑀪𑀤𑁆𑀭𑀸𑀦𑀺, 𑀬𑁂 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀲𑀁𑀲𑀲𑀺;
𑀅𑀳𑀜𑁆𑀘 𑀕𑀺𑀤𑁆𑀥𑁄 𑀓𑀸𑀫𑁂𑀲𑀼, 𑀓𑀣𑀁 𑀓𑀸𑀳𑀸𑀫𑀺 𑀲𑁄𑀡𑀓.
‘‘𑀧𑀺𑀬𑀸 𑀫𑁂 𑀫𑀸𑀦𑀼𑀲𑀸 𑀓𑀸𑀫𑀸, 𑀅𑀣𑁄 𑀤𑀺𑀩𑁆𑀬𑀸𑀧𑀺 𑀫𑁂 𑀧𑀺𑀬𑀸;
𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀉𑀪𑁄 𑀮𑁄𑀓𑁂 𑀮𑀪𑀸𑀫𑀲𑁂’’𑀢𑀺.
𑀢𑀢𑁆𑀣 ¶ 𑀯𑀡𑁆𑀡𑁂𑀦𑀸𑀢𑀺 𑀓𑀸𑀭𑀡𑁂𑀦.
𑀅𑀣 𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋
‘‘𑀓𑀸𑀫𑁂 𑀕𑀺𑀤𑁆𑀥𑀸 𑀓𑀸𑀫𑀭𑀢𑀸, 𑀓𑀸𑀫𑁂𑀲𑀼 𑀅𑀥𑀺𑀫𑀼𑀘𑁆𑀘𑀺𑀢𑀸;
𑀦𑀭𑀸 𑀧𑀸𑀧𑀸𑀦𑀺 𑀓𑀢𑁆𑀯𑀸𑀦, 𑀉𑀧𑀧𑀚𑁆𑀚𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.
‘‘𑀬𑁂 𑀘 𑀓𑀸𑀫𑁂 𑀧𑀳𑀦𑁆𑀢𑁆𑀯𑀸𑀦, 𑀦𑀺𑀓𑁆𑀔𑀦𑁆𑀢𑀸 𑀅𑀓𑀼𑀢𑁄𑀪𑀬𑀸;
𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑀸, 𑀦 𑀢𑁂 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.
‘‘𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑁄𑀳𑀺 𑀅𑀭𑀺𑀦𑁆𑀤𑀫;
𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂, 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.
‘‘𑀕𑀗𑁆𑀕𑀸𑀬 𑀓𑀼𑀡𑀧𑀁 𑀤𑀺𑀲𑁆𑀯𑀸, 𑀯𑀼𑀬𑁆𑀳𑀫𑀸𑀦𑀁 𑀫𑀳𑀡𑁆𑀡𑀯𑁂;
𑀯𑀸𑀬𑀲𑁄 𑀲𑀫𑀘𑀺𑀦𑁆𑀢𑁂𑀲𑀺, 𑀅𑀧𑁆𑀧𑀧𑀜𑁆𑀜𑁄 𑀅𑀘𑁂𑀢𑀲𑁄.
‘‘𑀬𑀸𑀦𑀜𑁆𑀘 ¶ 𑀯𑀢𑀺𑀤𑀁 𑀮𑀤𑁆𑀥𑀁, 𑀪𑀓𑁆𑀔𑁄 𑀘𑀸𑀬𑀁 𑀅𑀦𑀧𑁆𑀧𑀓𑁄;
𑀢𑀢𑁆𑀣 𑀭𑀢𑁆𑀢𑀺𑀁 𑀢𑀢𑁆𑀣 𑀤𑀺𑀯𑀸, 𑀢𑀢𑁆𑀣𑁂𑀯 𑀦𑀺𑀭𑀢𑁄 𑀫𑀦𑁄.
‘‘𑀔𑀸𑀤𑀁 ¶ 𑀦𑀸𑀕𑀲𑁆𑀲 𑀫𑀁𑀲𑀸𑀦𑀺, 𑀧𑀺𑀯𑀁 𑀪𑀸𑀕𑀻𑀭𑀣𑁄𑀤𑀓𑀁;
𑀲𑀫𑁆𑀧𑀲𑁆𑀲𑀁 𑀯𑀦𑀘𑁂𑀢𑁆𑀬𑀸𑀦𑀺, 𑀦 𑀧𑀮𑁂𑀢𑁆𑀣 𑀯𑀺𑀳𑀗𑁆𑀕𑀫𑁄.
‘‘𑀢𑀜𑁆𑀘 𑀑𑀢𑀭𑀡𑀻 𑀕𑀗𑁆𑀕𑀸, 𑀧𑀫𑀢𑁆𑀢𑀁 𑀓𑀼𑀡𑀧𑁂 𑀭𑀢𑀁;
𑀲𑀫𑀼𑀤𑁆𑀤𑀁 𑀅𑀚𑁆𑀛𑀕𑀸𑀳𑀸𑀲𑀺, 𑀅𑀕𑀢𑀻 𑀬𑀢𑁆𑀣 𑀧𑀓𑁆𑀔𑀺𑀦𑀁.
‘‘𑀲𑁄 𑀘 𑀪𑀓𑁆𑀔𑀧𑀭𑀺𑀓𑁆𑀔𑀻𑀡𑁄, 𑀉𑀤𑀧𑀢𑁆𑀯𑀸 𑀯𑀺𑀳𑀗𑁆𑀕𑀫𑁄;
𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀼𑀢𑁆𑀢𑀭𑀁 𑀦𑁄𑀧𑀺 𑀤𑀓𑁆𑀔𑀺𑀡𑀁.
‘‘𑀤𑀻𑀧𑀁 𑀲𑁄 𑀦𑀚𑁆𑀛𑀕𑀸𑀕𑀜𑁆𑀙𑀺, 𑀅𑀕𑀢𑀻 𑀬𑀢𑁆𑀣 𑀧𑀓𑁆𑀔𑀺𑀦𑀁;
𑀲𑁄 𑀘 𑀢𑀢𑁆𑀣𑁂𑀯 𑀧𑀸𑀧𑀢𑁆𑀣, 𑀬𑀣𑀸 𑀤𑀼𑀩𑁆𑀩𑀮𑀓𑁄 𑀢𑀣𑀸.
‘‘𑀢𑀜𑁆𑀘 𑀲𑀸𑀫𑀼𑀤𑁆𑀤𑀺𑀓𑀸 𑀫𑀘𑁆𑀙𑀸, 𑀓𑀼𑀫𑁆𑀪𑀻𑀮𑀸 𑀫𑀓𑀭𑀸 𑀲𑀼𑀲𑀽;
𑀧𑀲𑀬𑁆𑀳𑀓𑀸𑀭𑀸 𑀔𑀸𑀤𑀺𑀁𑀲𑀼, 𑀨𑀦𑁆𑀤𑀫𑀸𑀦𑀁 𑀯𑀺𑀧𑀓𑁆𑀔𑀓𑀁.
‘‘𑀏𑀯𑀫𑁂𑀯 𑀢𑀼𑀯𑀁 𑀭𑀸𑀚, 𑀬𑁂 𑀘𑀜𑁆𑀜𑁂 𑀓𑀸𑀫𑀪𑁄𑀕𑀺𑀦𑁄;
𑀕𑀺𑀤𑁆𑀥𑀸 𑀘𑁂 𑀦 𑀯𑀫𑀺𑀲𑁆𑀲𑀦𑁆𑀢𑀺, 𑀓𑀸𑀓𑀧𑀜𑁆𑀜𑀸𑀯 𑀢𑁂 𑀯𑀺𑀤𑀽.
‘‘𑀏𑀲𑀸 𑀢𑁂 𑀉𑀧𑀫𑀸 𑀭𑀸𑀚, 𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑀻 𑀓𑀢𑀸;
𑀢𑁆𑀯𑀜𑁆𑀘 𑀧𑀜𑁆𑀜𑀸𑀬𑀲𑁂 𑀢𑁂𑀦, 𑀬𑀤𑀺 𑀓𑀸𑀳𑀲𑀺 𑀯𑀸 𑀦 𑀯𑀸’’𑀢𑀺.
𑀢𑀢𑁆𑀣 ¶ 𑀧𑀸𑀧𑀸𑀦𑀻𑀢𑀺, 𑀫𑀳𑀸𑀭𑀸𑀚, 𑀢𑁆𑀯𑀁 𑀓𑀸𑀫𑀕𑀺𑀤𑁆𑀥𑁄, 𑀦𑀭𑀸 𑀘 𑀓𑀸𑀫𑁂 𑀦𑀺𑀲𑁆𑀲𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀧𑀸𑀧𑀸𑀦𑀺 𑀓𑀢𑁆𑀯𑀸 𑀬𑀢𑁆𑀣 𑀲𑀼𑀧𑀺𑀦𑀦𑁆𑀢𑁂𑀧𑀺 𑀤𑀺𑀩𑁆𑀩𑀸 𑀘 𑀫𑀸𑀦𑀼𑀲𑀺𑀓𑀸 𑀘 𑀓𑀸𑀫𑀸 𑀦 𑀮𑀩𑁆𑀪𑀦𑁆𑀢𑀺, 𑀢𑀁 𑀤𑀼𑀕𑁆𑀕𑀢𑀺𑀁 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀳𑀦𑁆𑀢𑁆𑀯𑀸𑀦𑀸𑀢𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀳𑀸𑀬. 𑀅𑀓𑀼𑀢𑁄𑀪𑀬𑀸𑀢𑀺 𑀭𑀸𑀕𑀸𑀤𑀻𑀲𑀼 𑀓𑀼𑀢𑁄𑀘𑀺 𑀅𑀦𑀸𑀕𑀢𑀪𑀬𑀸. 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑀸𑀢𑀺 𑀏𑀓𑁄𑀤𑀺𑀪𑀸𑀯𑀁 𑀏𑀓𑀯𑀺𑀳𑀸𑀭𑀺𑀓𑀢𑀁 𑀅𑀥𑀺𑀕𑀢𑀸. 𑀦 𑀢𑁂𑀢𑀺 𑀢𑁂 𑀏𑀯𑀭𑀽𑀧𑀸 𑀧𑀩𑁆𑀩𑀚𑀺𑀢𑀸 𑀤𑀼𑀕𑁆𑀕𑀢𑀺𑀁 𑀦 𑀕𑀘𑁆𑀙𑀦𑁆𑀢𑀺.
𑀉𑀧𑀫𑀁 𑀢𑁂𑀢𑀺, 𑀫𑀳𑀸𑀭𑀸𑀚, 𑀤𑀺𑀩𑁆𑀩𑀫𑀸𑀦𑀼𑀲𑀓𑁂 𑀓𑀸𑀫𑁂 𑀧𑀢𑁆𑀣𑁂𑀦𑁆𑀢𑀲𑁆𑀲 𑀳𑀢𑁆𑀣𑀺𑀓𑀼𑀡𑀧𑁂 𑀧𑀝𑀺𑀩𑀤𑁆𑀥𑀓𑀸𑀓𑀲𑀤𑀺𑀲𑀲𑁆𑀲 𑀢𑀯 𑀏𑀓𑀁 𑀉𑀧𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑁄𑀳𑀻𑀢𑀺 𑀅𑀢𑁆𑀣𑁄. 𑀓𑀼𑀡𑀧𑀦𑁆𑀢𑀺 𑀳𑀢𑁆𑀣𑀺𑀓𑀴𑁂𑀯𑀭𑀁. 𑀫𑀳𑀡𑁆𑀡𑀯𑁂𑀢𑀺 𑀕𑀫𑁆𑀪𑀻𑀭𑀧𑀼𑀣𑀼𑀮𑁂 𑀉𑀤𑀓𑁂 ¶ . 𑀏𑀓𑁄 𑀓𑀺𑀭 𑀫𑀳𑀸𑀯𑀸𑀭𑀡𑁄 𑀕𑀗𑁆𑀕𑀸𑀢𑀻𑀭𑁂 𑀘𑀭𑀦𑁆𑀢𑁄 𑀕𑀗𑁆𑀕𑀸𑀬𑀁 ¶ 𑀧𑀢𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁂𑀦𑁆𑀢𑁄 𑀢𑀢𑁆𑀣𑁂𑀯 𑀫𑀢𑁄 𑀕𑀗𑁆𑀕𑀸𑀬 𑀯𑀼𑀬𑁆𑀳𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀯𑀸𑀬𑀲𑁄𑀢𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑁄 𑀓𑀸𑀓𑁄. 𑀬𑀸𑀦𑀜𑁆𑀘 𑀯𑀢𑀺𑀤𑀦𑁆𑀢𑀺 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀦𑀺𑀮𑀻𑀬𑀺𑀢𑁆𑀯𑀸 ‘‘𑀇𑀤𑀁 𑀫𑀬𑀸 𑀳𑀢𑁆𑀣𑀺𑀬𑀸𑀦𑀁 𑀮𑀤𑁆𑀥𑀁, 𑀏𑀢𑁆𑀣 𑀦𑀺𑀮𑀻𑀦𑁄 𑀲𑀼𑀔𑀁 𑀘𑀭𑀺𑀲𑁆𑀲𑀸𑀫𑀺, 𑀅𑀬𑀫𑁂𑀯 𑀘 𑀫𑁂 𑀅𑀦𑀧𑁆𑀧𑀓𑁄 𑀪𑀓𑁆𑀔𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀫𑀬𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀢𑀢𑁆𑀣 𑀭𑀢𑁆𑀢𑀺𑀦𑁆𑀢𑀺 𑀢𑀢𑁆𑀣 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀢𑀢𑁆𑀣𑁂𑀯 𑀫𑀦𑁄 𑀅𑀪𑀺𑀭𑀢𑁄 𑀅𑀳𑁄𑀲𑀺. 𑀦 𑀧𑀮𑁂𑀢𑁆𑀣𑀸𑀢𑀺 𑀦 𑀉𑀧𑁆𑀧𑀢𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.
𑀑𑀢𑀭𑀡𑀻𑀢𑀺 𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑀻 𑀑𑀢𑀭𑀫𑀸𑀦𑀸. ‘‘𑀑𑀳𑀸𑀭𑀺𑀡𑀻’’𑀢𑀺𑀧𑀺 𑀧𑀸𑀞𑁄, 𑀲𑀸 𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑀻 𑀅𑀯𑀳𑀸𑀭𑀺𑀡𑀻𑀢𑀺 𑀅𑀢𑁆𑀣𑁄. 𑀅𑀕𑀢𑀻 𑀬𑀢𑁆𑀣𑀸𑀢𑀺 𑀲𑀫𑀼𑀤𑁆𑀤𑀫𑀚𑁆𑀛𑀁 𑀲𑀦𑁆𑀥𑀸𑀬𑀸𑀳. 𑀪𑀓𑁆𑀔𑀧𑀭𑀺𑀓𑁆𑀔𑀻𑀡𑁄𑀢𑀺 𑀧𑀭𑀺𑀓𑁆𑀔𑀻𑀡𑀪𑀓𑁆𑀔𑁄. 𑀉𑀤𑀧𑀢𑁆𑀯𑀸𑀢𑀺 𑀔𑀻𑀡𑁂 𑀘𑀫𑁆𑀫𑁂 𑀘 𑀫𑀁𑀲𑁂 𑀘 𑀅𑀝𑁆𑀞𑀺𑀲𑀗𑁆𑀖𑀸𑀢𑁄 𑀊𑀫𑀺𑀯𑁂𑀕𑁂𑀦 𑀪𑀺𑀦𑁆𑀦𑁄 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺. 𑀅𑀣 𑀲𑁄 𑀓𑀸𑀓𑁄 𑀉𑀤𑀓𑁂 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀧𑁆𑀧𑀢𑀺, 𑀏𑀯𑀁 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀕𑀢𑀻 𑀬𑀢𑁆𑀣 𑀧𑀓𑁆𑀔𑀺𑀦𑀦𑁆𑀢𑀺 𑀬𑀲𑁆𑀫𑀺𑀁 𑀲𑀫𑀼𑀤𑁆𑀤𑀫𑀚𑁆𑀛𑁂 𑀧𑀓𑁆𑀔𑀻𑀦𑀁 𑀅𑀕𑀢𑀺, 𑀢𑀢𑁆𑀣 𑀲𑁄 𑀏𑀯𑀁 𑀉𑀧𑁆𑀧𑀢𑀺𑀢𑁄 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀁 𑀅𑀮𑀪𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁, 𑀢𑀢𑁄 𑀉𑀢𑁆𑀢𑀭𑀁, 𑀢𑀢𑁄 𑀤𑀓𑁆𑀔𑀺𑀡𑀦𑁆𑀢𑀺 𑀘𑀢𑀲𑁆𑀲𑁄𑀧𑀺 𑀤𑀺𑀲𑀸 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀁 𑀦 𑀅𑀚𑁆𑀛𑀕𑀸 𑀦𑀸𑀕𑀜𑁆𑀙𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀸𑀬𑀲𑁄 𑀏𑀯𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀘𑁆𑀙𑀺𑀫𑀸𑀤𑀻𑀲𑀼 𑀏𑀓𑁂𑀓𑀁 𑀤𑀺𑀲𑀁 𑀆𑀕𑀜𑁆𑀙𑀺, 𑀤𑀻𑀧𑀁 𑀧𑀦 𑀦𑀚𑁆𑀛𑀸𑀕𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀸𑀧𑀢𑁆𑀣𑀸𑀢𑀺 𑀧𑀧𑀢𑀺𑀢𑁄. 𑀬𑀣𑀸 𑀤𑀼𑀩𑁆𑀩𑀮𑀓𑁄𑀢𑀺 𑀬𑀣𑀸 𑀤𑀼𑀩𑁆𑀩𑀮𑀓𑁄 𑀧𑀢𑁂𑀬𑁆𑀬, 𑀢𑀣𑁂𑀯 𑀧𑀢𑀺𑀢𑁄. 𑀲𑀼𑀲𑀽𑀢𑀺 𑀲𑀼𑀲𑀼𑀦𑀸𑀫𑀓𑀸 𑀘𑀡𑁆𑀟𑀫𑀘𑁆𑀙𑀸. 𑀧𑀲𑀬𑁆𑀳𑀓𑀸𑀭𑀸𑀢𑀺 𑀅𑀦𑀺𑀘𑁆𑀙𑀫𑀸𑀦𑀓𑀁𑀬𑁂𑀯 𑀩𑀮𑀓𑁆𑀓𑀸𑀭𑁂𑀦. 𑀯𑀺𑀧𑀓𑁆𑀔𑀓𑀦𑁆𑀢𑀺 𑀯𑀺𑀤𑁆𑀥𑀲𑁆𑀢𑀧𑀓𑁆𑀔𑀓𑀁.
𑀕𑀺𑀤𑁆𑀥𑀸 𑀘𑁂 𑀦 𑀯𑀫𑀺𑀲𑁆𑀲𑀦𑁆𑀢𑀻𑀢𑀺 𑀬𑀤𑀺 𑀕𑀺𑀤𑁆𑀥𑀸 𑀳𑀼𑀢𑁆𑀯𑀸 𑀓𑀸𑀫𑁂 𑀦 𑀯𑀫𑀺𑀲𑁆𑀲𑀦𑁆𑀢𑀺, 𑀦 𑀙𑀟𑁆𑀟𑁂𑀲𑁆𑀲𑀦𑁆𑀢𑀺. 𑀓𑀸𑀓𑀧𑀜𑁆𑀜𑀸𑀯 𑀢𑁂𑀢𑀺 𑀓𑀸𑀓𑀲𑁆𑀲 𑀲𑀫𑀸𑀦𑀧𑀜𑁆𑀜𑀸 𑀇𑀢𑀺 𑀢𑁂 𑀩𑀼𑀤𑁆𑀥𑀸𑀤𑀬𑁄 𑀧𑀡𑁆𑀟𑀺𑀢𑀸 𑀯𑀺𑀤𑀽 𑀯𑀺𑀤𑀦𑁆𑀢𑀺, 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑀻𑀢𑀺 𑀅𑀢𑁆𑀣𑀧𑁆𑀧𑀓𑀸𑀲𑀺𑀓𑀸. 𑀢𑁆𑀯𑀜𑁆𑀘 𑀧𑀜𑁆𑀜𑀸𑀬𑀲𑁂𑀢𑀺 𑀢𑁆𑀯𑀜𑁆𑀘 𑀧𑀜𑁆𑀜𑀸𑀬𑀺𑀲𑁆𑀲𑀲𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀫𑀬𑀸 𑀳𑀺𑀢𑀓𑀸𑀫𑁂𑀦 𑀢𑀯 𑀑𑀯𑀸𑀤𑁄 𑀤𑀺𑀦𑁆𑀦𑁄, 𑀢𑀁 𑀧𑀦 𑀢𑁆𑀯𑀁 𑀬𑀤𑀺 𑀓𑀸𑀳𑀲𑀺, 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺, 𑀬𑀤𑀺 𑀦 𑀓𑀸𑀳𑀲𑀺, 𑀓𑀸𑀫𑀧𑀗𑁆𑀓𑁂 𑀦𑀺𑀫𑀼𑀕𑁆𑀕𑁄 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀻𑀢𑀺 𑀏𑀯𑀁 𑀢𑁆𑀯𑀫𑁂𑀯 𑀢𑁂𑀦 ¶ 𑀓𑀸𑀭𑀡𑁂𑀦 𑀯𑀸 𑀅𑀓𑀸𑀭𑀡𑁂𑀦 ¶ 𑀯𑀸 𑀲𑀕𑁆𑀕𑁂 𑀯𑀸 𑀦𑀺𑀭𑀬𑁂 𑀯𑀸 𑀧𑀜𑁆𑀜𑀸𑀬𑀺𑀲𑁆𑀲𑀲𑀺. 𑀅𑀳𑀁 𑀧𑀦 𑀲𑀩𑁆𑀩𑀪𑀯𑁂𑀳𑀺 𑀫𑀼𑀢𑁆𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄𑀢𑀺.
𑀇𑀫𑀁 𑀧𑀦 𑀑𑀯𑀸𑀤𑀁 𑀤𑁂𑀦𑁆𑀢𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀦𑀤𑀻 𑀤𑀲𑁆𑀲𑀺𑀢𑀸, 𑀢𑀸𑀬 𑀯𑀼𑀬𑁆𑀳𑀫𑀸𑀦𑀁 𑀳𑀢𑁆𑀣𑀺𑀓𑀼𑀡𑀧𑀁 𑀤𑀲𑁆𑀲𑀺𑀢𑀁, 𑀓𑀼𑀡𑀧𑀔𑀸𑀤𑀓𑁄 𑀓𑀸𑀓𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀲 𑀓𑀼𑀡𑀧𑀁 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀧𑀺𑀯𑀦𑀓𑀸𑀮𑁄 𑀤𑀲𑁆𑀲𑀺𑀢𑁄, 𑀭𑀫𑀡𑀻𑀬𑀯𑀦𑀲𑀡𑁆𑀟𑀤𑀲𑁆𑀲𑀦𑀓𑀸𑀮𑁄 𑀤𑀲𑁆𑀲𑀺𑀢𑁄, 𑀓𑀼𑀡𑀧𑀲𑁆𑀲 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑀲𑁆𑀲 𑀲𑀫𑀼𑀤𑁆𑀤𑀧𑀯𑁂𑀲𑁄 𑀤𑀲𑁆𑀲𑀺𑀢𑁄, 𑀲𑀫𑀼𑀤𑁆𑀤𑀫𑀚𑁆𑀛𑁂 ¶ 𑀓𑀸𑀓𑀲𑁆𑀲 𑀳𑀢𑁆𑀣𑀺𑀓𑀼𑀡𑀧𑁂 𑀧𑀢𑀺𑀝𑁆𑀞𑀁 𑀅𑀮𑀪𑀺𑀢𑁆𑀯𑀸 𑀯𑀺𑀦𑀸𑀲𑀁 𑀧𑀢𑁆𑀢𑀓𑀸𑀮𑁄 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀦𑀤𑀻 𑀯𑀺𑀬 𑀅𑀦𑀫𑀢𑀕𑁆𑀕𑁄 𑀲𑀁𑀲𑀸𑀭𑁄 𑀤𑀝𑁆𑀞𑀩𑁆𑀩𑁄, 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑀁 𑀳𑀢𑁆𑀣𑀺𑀓𑀼𑀡𑀧𑀁 𑀯𑀺𑀬 𑀲𑀁𑀲𑀸𑀭𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀓𑀸𑀓𑁄 𑀯𑀺𑀬 𑀩𑀸𑀮𑀧𑀼𑀣𑀼𑀚𑁆𑀚𑀦𑁄, 𑀓𑀸𑀓𑀲𑁆𑀲 𑀓𑀼𑀡𑀧𑀁 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀧𑀺𑀯𑀦𑀓𑀸𑀮𑁄 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀺𑀓𑀓𑀸𑀮𑁄, 𑀓𑀸𑀓𑀲𑁆𑀲 𑀓𑀼𑀡𑀧𑁂 𑀮𑀕𑁆𑀕𑀲𑁆𑀲𑁂𑀯 𑀭𑀫𑀡𑀻𑀬𑀯𑀦𑀲𑀡𑁆𑀟𑀤𑀲𑁆𑀲𑀦𑀁 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀸𑀫𑀕𑀼𑀡𑁂𑀲𑀼 𑀮𑀕𑁆𑀕𑀲𑁆𑀲𑁂𑀯 𑀲𑀯𑀦𑀯𑀲𑁂𑀦 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀤𑀲𑁆𑀲𑀦𑀁, 𑀓𑀼𑀡𑀧𑁂 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑁂 𑀓𑀸𑀓𑀲𑁆𑀲 𑀧𑀢𑀺𑀝𑁆𑀞𑀁 𑀮𑀪𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑀺𑀦𑀸𑀲𑀁 𑀧𑀢𑁆𑀢𑀓𑀸𑀮𑁄 𑀯𑀺𑀬 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀸𑀫𑀕𑀼𑀡𑀕𑀺𑀤𑁆𑀥𑀲𑁆𑀲 𑀧𑀸𑀧𑀧𑀭𑀸𑀬𑀡𑀲𑁆𑀲 𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀁 𑀮𑀪𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀫𑀳𑀸𑀦𑀺𑀭𑀬𑁂 𑀫𑀳𑀸𑀯𑀺𑀦𑀸𑀲𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸𑀢𑀺.
𑀏𑀯𑀫𑀲𑁆𑀲 𑀲𑁄 𑀇𑀫𑀸𑀬 𑀉𑀧𑀫𑀸𑀬 𑀑𑀯𑀸𑀤𑀁 𑀤𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀑𑀯𑀸𑀤𑀁 𑀣𑀺𑀭𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀧𑁂𑀢𑀼𑀁 𑀕𑀸𑀣𑀫𑀸𑀳 𑁋
‘‘𑀏𑀓𑀯𑀸𑀘𑀫𑁆𑀧𑀺 𑀤𑁆𑀯𑀺𑀯𑀸𑀘𑀁, 𑀪𑀡𑁂𑀬𑁆𑀬 𑀅𑀦𑀼𑀓𑀫𑁆𑀧𑀓𑁄;
𑀢𑀢𑀼𑀢𑁆𑀢𑀭𑀺𑀁 𑀦 𑀪𑀸𑀲𑁂𑀬𑁆𑀬, 𑀤𑀸𑀲𑁄𑀯𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺.
𑀢𑀢𑁆𑀣 𑀦 𑀪𑀸𑀲𑁂𑀬𑁆𑀬𑀸𑀢𑀺 𑀯𑀘𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀳𑀺 𑀢𑀢𑁄 𑀉𑀢𑁆𑀢𑀭𑀺𑀁 𑀪𑀸𑀲𑀫𑀸𑀦𑁄 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑀸𑀲𑁄 𑀯𑀺𑀬 𑀳𑁄𑀢𑀺. 𑀤𑀸𑀲𑁄 𑀳𑀺 𑀲𑀸𑀫𑀺𑀓𑁂 𑀓𑀣𑀁 𑀕𑀡𑁆𑀳𑀦𑁆𑀢𑁂𑀧𑀺 𑀅𑀕𑁆𑀕𑀡𑁆𑀳𑀦𑁆𑀢𑁂𑀧𑀺 𑀓𑀣𑁂𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑀼𑀢𑁆𑀢𑀭𑀺𑀁 𑀦 𑀪𑀸𑀲𑁂𑀬𑁆𑀬𑀸’’𑀢𑀺.
‘‘𑀇𑀤𑀁 𑀯𑀢𑁆𑀯𑀸𑀦 𑀧𑀓𑁆𑀓𑀸𑀫𑀺, 𑀲𑁄𑀡𑀓𑁄 𑀅𑀫𑀺𑀢𑀩𑀼𑀤𑁆𑀥𑀺𑀫𑀸;
𑀯𑁂𑀳𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁, 𑀅𑀦𑀼𑀲𑀸𑀲𑀺𑀢𑁆𑀯𑀸𑀦 𑀔𑀢𑁆𑀢𑀺𑀬’’𑀦𑁆𑀢𑀺. 𑁋
𑀅𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸.
𑀢𑀢𑁆𑀣 ¶ 𑀇𑀤𑀁 𑀯𑀢𑁆𑀯𑀸𑀦𑀸𑀢𑀺, 𑀪𑀺𑀓𑁆𑀔𑀯𑁂, 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀫𑀺𑀢𑀸𑀬 𑀮𑁄𑀓𑀼𑀢𑁆𑀢𑀭𑀩𑀼𑀤𑁆𑀥𑀺𑀬𑀸 𑀅𑀫𑀺𑀢𑀩𑀼𑀤𑁆𑀥𑀺𑀫𑀸 𑀇𑀤𑀁 𑀯𑀢𑁆𑀯𑀸 𑀇𑀤𑁆𑀥𑀺𑀬𑀸 𑀉𑀧𑁆𑀧𑀢𑀺𑀢𑁆𑀯𑀸 ‘‘𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀲𑀺, 𑀢𑀯𑁂𑀯, 𑀦𑁄 𑀘𑁂 𑀧𑀩𑁆𑀩𑀚𑀺𑀲𑁆𑀲𑀲𑀺, 𑀢𑀯𑁂𑀯, 𑀤𑀺𑀦𑁆𑀦𑁄 𑀢𑁂 𑀫𑀬𑀸 𑀑𑀯𑀸𑀤𑁄, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀏𑀯𑀁 𑀅𑀦𑀼𑀲𑀸𑀲𑀺𑀢𑁆𑀯𑀸𑀦 𑀔𑀢𑁆𑀢𑀺𑀬𑀁 𑀧𑀓𑁆𑀓𑀸𑀫𑀺.
𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀬𑀸𑀯 𑀤𑀲𑁆𑀲𑀦𑀧𑀣𑀸 𑀑𑀮𑁄𑀓𑁂𑀦𑁆𑀢𑁄 𑀞𑀢𑁆𑀯𑀸 𑀢𑀲𑁆𑀫𑀺𑀁 𑀘𑀓𑁆𑀔𑀼𑀧𑀣𑁂 ¶ 𑀅𑀢𑀺𑀓𑁆𑀓𑀦𑁆𑀢𑁂 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀳𑀻𑀦𑀚𑀘𑁆𑀘𑁄 𑀲𑀫𑀸𑀦𑁄 𑀅𑀲𑀫𑁆𑀪𑀺𑀦𑁆𑀦𑁂 𑀔𑀢𑁆𑀢𑀺𑀬𑀯𑀁𑀲𑁂 𑀚𑀸𑀢𑀲𑁆𑀲 𑀫𑀫 𑀫𑀢𑁆𑀣𑀓𑁂 𑀅𑀢𑁆𑀢𑀦𑁄 𑀧𑀸𑀤𑀭𑀚𑀁 ¶ 𑀑𑀓𑀺𑀭𑀦𑁆𑀢𑁄 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀢𑁄, 𑀫𑀬𑀸𑀧𑀺 𑀅𑀚𑁆𑀚𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀓𑁄 𑀦𑀼𑀫𑁂 𑀭𑀸𑀚𑀓𑀢𑁆𑀢𑀸𑀭𑁄, 𑀲𑀼𑀤𑁆𑀤𑀸 𑀯𑁂𑀬𑁆𑀬𑀢𑁆𑀢𑀫𑀸𑀕𑀢𑀸;
𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀭𑀚𑁆𑀚𑁂𑀦 𑀫𑀢𑁆𑀣𑀺𑀓𑁄.
‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕’’𑀦𑁆𑀢𑀺.
𑀢𑀢𑁆𑀣 𑀓𑁄 𑀦𑀼𑀫𑁂𑀢𑀺 𑀓𑀼𑀳𑀺𑀁 𑀦𑀼 𑀇𑀫𑁂. 𑀭𑀸𑀚𑀓𑀢𑁆𑀢𑀸𑀭𑁄𑀢𑀺 𑀬𑁂 𑀭𑀸𑀚𑀸𑀭𑀳𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀓𑀭𑁄𑀦𑁆𑀢𑀺. 𑀲𑀼𑀤𑁆𑀤𑀸 𑀯𑁂𑀬𑁆𑀬𑀢𑁆𑀢𑀫𑀸𑀕𑀢𑀸𑀢𑀺 𑀲𑀼𑀤𑁆𑀤𑀸 𑀘 𑀬𑁂 𑀘 𑀅𑀜𑁆𑀜𑁂 𑀩𑁆𑀬𑀢𑁆𑀢𑀪𑀸𑀯𑀁 𑀆𑀕𑀢𑀸 𑀫𑀼𑀔𑀫𑀗𑁆𑀕𑀮𑀺𑀓𑀸. 𑀭𑀚𑁆𑀚𑁂𑀦 𑀫𑀢𑁆𑀣𑀺𑀓𑁄𑀢𑀺 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄. 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂𑀢𑀺 𑀫𑀭𑀡𑀁 𑀅𑀚𑁆𑀚 𑀯𑀸 𑀲𑀼𑀯𑁂 𑀯𑀸𑀢𑀺 𑀇𑀤𑀁 𑀓𑁄 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄.
𑀏𑀯𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋
‘‘𑀅𑀢𑁆𑀣𑀺 𑀢𑁂 𑀤𑀳𑀭𑁄 𑀧𑀼𑀢𑁆𑀢𑁄, 𑀤𑀻𑀖𑀸𑀯𑀼 𑀭𑀝𑁆𑀞𑀯𑀟𑁆𑀠𑀦𑁄;
𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀲𑁆𑀲𑀼, 𑀲𑁄 𑀦𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺.
𑀢𑀢𑁄 𑀧𑀭𑀁 𑀭𑀜𑁆𑀜𑀸 𑀯𑀼𑀢𑁆𑀢𑀕𑀸𑀣𑀫𑀸𑀤𑀺𑀁 𑀓𑀢𑁆𑀯𑀸 𑀉𑀤𑀸𑀦𑀲𑀫𑁆𑀩𑀦𑁆𑀥𑀕𑀸𑀣𑀸 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸 𑁋
‘‘𑀔𑀺𑀧𑁆𑀧𑀁 𑀓𑀼𑀫𑀸𑀭𑀫𑀸𑀦𑁂𑀣, 𑀤𑀻𑀖𑀸𑀯𑀼𑀁 𑀭𑀝𑁆𑀞𑀯𑀟𑁆𑀠𑀦𑀁;
𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀁, 𑀲𑁄 𑀯𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺.
‘‘𑀢𑀢𑁄 ¶ 𑀓𑀼𑀫𑀸𑀭𑀫𑀸𑀦𑁂𑀲𑀼𑀁, 𑀤𑀻𑀖𑀸𑀯𑀼𑀁 𑀭𑀝𑁆𑀞𑀯𑀟𑁆𑀠𑀦𑀁;
𑀢𑀁 𑀤𑀺𑀲𑁆𑀯𑀸 𑀆𑀮𑀧𑀻 𑀭𑀸𑀚𑀸, 𑀏𑀓𑀧𑀼𑀢𑁆𑀢𑀁 𑀫𑀦𑁄𑀭𑀫𑀁.
‘‘𑀲𑀝𑁆𑀞𑀺 ¶ 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;
𑀢𑁂 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚𑀲𑀼, 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀸𑀫𑀺 𑀢𑁂.
‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄 𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁.
‘‘𑀲𑀝𑁆𑀞𑀺 𑀦𑀸𑀕𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;
𑀲𑀼𑀯𑀡𑁆𑀡𑀓𑀘𑁆𑀙𑀸 𑀫𑀸𑀢𑀗𑁆𑀕𑀸, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸.
‘‘𑀆𑀭𑀽𑀴𑁆𑀳𑀸 𑀕𑀸𑀫𑀡𑀻𑀬𑁂𑀪𑀺, 𑀢𑁄𑀫𑀭𑀗𑁆𑀓𑀼𑀲𑀧𑀸𑀡𑀺𑀪𑀺;
𑀢𑁂 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀸𑀫𑀺 𑀢𑁂.
‘‘𑀅𑀚𑁆𑀚𑁂𑀯 ¶ 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁.
‘‘𑀲𑀝𑁆𑀞𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;
𑀆𑀚𑀸𑀦𑀻𑀬𑀸𑀯 𑀚𑀸𑀢𑀺𑀬𑀸, 𑀲𑀺𑀦𑁆𑀥𑀯𑀸 𑀲𑀻𑀖𑀯𑀸𑀳𑀺𑀦𑁄.
‘‘𑀆𑀭𑀽𑀴𑁆𑀳𑀸 𑀕𑀸𑀫𑀡𑀻𑀬𑁂𑀪𑀺, 𑀇𑀮𑁆𑀮𑀺𑀬𑀸𑀘𑀸𑀧𑀥𑀸𑀭𑀺𑀪𑀺;
𑀢𑁂 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀸𑀫𑀺 𑀢𑁂.
‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁.
‘‘𑀲𑀝𑁆𑀞𑀺 𑀭𑀣𑀲𑀳𑀲𑁆𑀲𑀸𑀦𑀺, 𑀲𑀦𑁆𑀦𑀤𑁆𑀥𑀸 𑀉𑀲𑁆𑀲𑀺𑀢𑀤𑁆𑀥𑀚𑀸;
𑀤𑀻𑀧𑀸 𑀅𑀣𑁄𑀧𑀺 𑀯𑁂𑀬𑁆𑀬𑀕𑁆𑀖𑀸, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸.
‘‘𑀆𑀭𑀽𑀴𑁆𑀳𑀸 𑀕𑀸𑀫𑀡𑀻𑀬𑁂𑀪𑀺, 𑀘𑀸𑀧𑀳𑀢𑁆𑀣𑁂𑀳𑀺 𑀯𑀫𑁆𑀫𑀺𑀪𑀺;
𑀢𑁂 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀸𑀫𑀺 𑀢𑁂.
‘‘𑀅𑀚𑁆𑀚𑁂𑀯 ¶ 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁.
‘‘𑀲𑀝𑁆𑀞𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺, 𑀭𑁄𑀳𑀜𑁆𑀜𑀸 𑀧𑀼𑀗𑁆𑀕𑀯𑀽𑀲𑀪𑀸;
𑀢𑀸 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀸𑀫𑀺 𑀢𑁂.
‘‘𑀅𑀚𑁆𑀚𑁂𑀯 ¶ 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁.
‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;
𑀯𑀺𑀘𑀺𑀢𑁆𑀭𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;
𑀢𑀸 𑀧𑀼𑀢𑁆𑀢 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑀬𑀸𑀫𑀺 𑀢𑁂.
‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;
𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁.
‘‘𑀤𑀳𑀭𑀲𑁆𑀲𑁂𑀯 𑀫𑁂 𑀢𑀸𑀢, 𑀫𑀸𑀢𑀸 𑀫𑀢𑀸𑀢𑀺 𑀫𑁂 𑀲𑀼𑀢𑀁;
𑀢𑀬𑀸 𑀯𑀺𑀦𑀸 𑀅𑀳𑀁 𑀢𑀸𑀢, 𑀚𑀻𑀯𑀺𑀢𑀼𑀫𑁆𑀧𑀺 𑀦 𑀉𑀲𑁆𑀲𑀳𑁂.
‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀧𑁄𑀢𑁄 𑀅𑀦𑁆𑀯𑁂𑀢𑀺 𑀧𑀘𑁆𑀙𑀢𑁄;
𑀚𑁂𑀲𑁆𑀲𑀦𑁆𑀢𑀁 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀲𑀫𑁂𑀲𑀼 𑀯𑀺𑀲𑀫𑁂𑀲𑀼 𑀘.
‘‘𑀏𑀯𑀁 𑀢𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀧𑀢𑁆𑀢𑀫𑀸𑀤𑀸𑀬 𑀧𑀘𑁆𑀙𑀢𑁄;
𑀲𑀼𑀪𑀭𑁄 𑀢𑁂 𑀪𑀯𑀺𑀲𑁆𑀲𑀸𑀫𑀺, 𑀦 𑀢𑁂 𑀳𑁂𑀲𑁆𑀲𑀸𑀫𑀺 𑀤𑀼𑀩𑁆𑀪𑀭𑁄.
‘‘𑀬𑀣𑀸 𑀲𑀸𑀫𑀼𑀤𑁆𑀤𑀺𑀓𑀁 𑀦𑀸𑀯𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;
𑀯𑁄𑀳𑀸𑀭𑁄 𑀢𑀢𑁆𑀣 𑀕𑀡𑁆𑀳𑁂𑀬𑁆𑀬, 𑀯𑀸𑀡𑀺𑀚𑀸 𑀩𑁆𑀬𑀲𑀦𑀻 𑀲𑀺𑀬𑀸.
‘‘𑀏𑀯𑀫𑁂𑀯𑀸𑀬𑀁 𑀧𑀼𑀢𑁆𑀢𑀓𑀮𑀺, 𑀅𑀦𑁆𑀢𑀭𑀸𑀬𑀓𑀭𑁄 𑀫𑀫;
𑀇𑀫𑀁 𑀓𑀼𑀫𑀸𑀭𑀁 𑀧𑀸𑀧𑁂𑀣, 𑀧𑀸𑀲𑀸𑀤𑀁 𑀭𑀢𑀺𑀯𑀟𑁆𑀠𑀦𑀁.
‘‘𑀢𑀢𑁆𑀣 ¶ ¶ 𑀓𑀫𑁆𑀩𑀼𑀲𑀳𑀢𑁆𑀣𑀸𑀬𑁄, 𑀬𑀣𑀸 𑀲𑀓𑁆𑀓𑀁𑀯 𑀅𑀘𑁆𑀙𑀭𑀸;
𑀢𑀸 𑀦𑀁 𑀢𑀢𑁆𑀣 𑀭𑀫𑁂𑀲𑁆𑀲𑀦𑁆𑀢𑀺, 𑀢𑀸𑀳𑀺 𑀘𑁂𑀲𑁄 𑀭𑀫𑀺𑀲𑁆𑀲𑀢𑀺.
‘‘𑀢𑀢𑁄 𑀓𑀼𑀫𑀸𑀭𑀁 𑀧𑀸𑀧𑁂𑀲𑀼𑀁, 𑀧𑀸𑀲𑀸𑀤𑀁 𑀭𑀢𑀺𑀯𑀟𑁆𑀠𑀦𑀁;
𑀢𑀁 𑀤𑀺𑀲𑁆𑀯𑀸 𑀅𑀯𑀘𑀼𑀁 𑀓𑀜𑁆𑀜𑀸, 𑀤𑀻𑀖𑀸𑀯𑀼𑀁 𑀭𑀝𑁆𑀞𑀯𑀟𑁆𑀠𑀦𑀁.
‘‘𑀤𑁂𑀯𑀢𑀸𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;
𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁.
‘‘𑀦𑀫𑁆𑀳𑀺 ¶ 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;
𑀓𑀸𑀲𑀺𑀭𑀜𑁆𑀜𑁄 𑀅𑀳𑀁 𑀧𑀼𑀢𑁆𑀢𑁄, 𑀤𑀻𑀖𑀸𑀯𑀼 𑀭𑀝𑁆𑀞𑀯𑀟𑁆𑀠𑀦𑁄;
𑀫𑀫𑀁 𑀪𑀭𑀣 𑀪𑀤𑁆𑀤𑀁 𑀯𑁄, 𑀅𑀳𑀁 𑀪𑀢𑁆𑀢𑀸 𑀪𑀯𑀸𑀫𑀺 𑀯𑁄.
‘‘𑀢𑀁 𑀢𑀢𑁆𑀣 𑀅𑀯𑀘𑀼𑀁 𑀓𑀜𑁆𑀜𑀸, 𑀤𑀻𑀖𑀸𑀯𑀼𑀁 𑀭𑀝𑁆𑀞𑀯𑀟𑁆𑀠𑀦𑀁;
𑀓𑀼𑀳𑀺𑀁 𑀭𑀸𑀚𑀸 𑀅𑀦𑀼𑀧𑁆𑀧𑀢𑁆𑀢𑁄, 𑀇𑀢𑁄 𑀭𑀸𑀚𑀸 𑀓𑀼𑀳𑀺𑀁 𑀕𑀢𑁄.
‘‘𑀧𑀗𑁆𑀓𑀁 𑀭𑀸𑀚𑀸 𑀅𑀢𑀺𑀓𑁆𑀓𑀦𑁆𑀢𑁄, 𑀣𑀮𑁂 𑀭𑀸𑀚𑀸 𑀧𑀢𑀺𑀝𑁆𑀞𑀺𑀢𑁄;
𑀅𑀓𑀡𑁆𑀟𑀓𑀁 𑀅𑀕𑀳𑀦𑀁, 𑀧𑀝𑀺𑀧𑀦𑁆𑀦𑁄 𑀫𑀳𑀸𑀧𑀣𑀁.
‘‘𑀅𑀳𑀜𑁆𑀘 𑀧𑀝𑀺𑀧𑀦𑁆𑀦𑁄𑀲𑁆𑀫𑀺, 𑀫𑀕𑁆𑀕𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑀁;
𑀲𑀓𑀡𑁆𑀝𑀓𑀁 𑀲𑀕𑀳𑀦𑀁, 𑀬𑁂𑀦 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.
‘‘𑀢𑀲𑁆𑀲 𑀢𑁂 𑀲𑁆𑀯𑀸𑀕𑀢𑀁 𑀭𑀸𑀚, 𑀲𑀻𑀳𑀲𑁆𑀲𑁂𑀯 𑀕𑀺𑀭𑀺𑀩𑁆𑀩𑀚𑀁;
𑀅𑀦𑀼𑀲𑀸𑀲 𑀫𑀳𑀸𑀭𑀸𑀚, 𑀢𑁆𑀯𑀁 𑀦𑁄 𑀲𑀩𑁆𑀩𑀸𑀲𑀫𑀺𑀲𑁆𑀲𑀭𑁄’’𑀢𑀺.
𑀢𑀢𑁆𑀣 𑀔𑀺𑀧𑁆𑀧𑀦𑁆𑀢𑀺 𑀢𑁂𑀦 𑀳𑀺 𑀦𑀁 𑀲𑀻𑀖𑀁 𑀆𑀦𑁂𑀣. 𑀆𑀮𑀧𑀻𑀢𑀺 ‘‘𑀲𑀝𑁆𑀞𑀺 𑀕𑀸𑀫𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀆𑀮𑀧𑀺. 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸𑀢𑀺 𑀢𑁂 𑀦𑀸𑀕𑀸 𑀲𑀩𑁆𑀩𑁂𑀳𑀺 𑀲𑀻𑀲𑀽𑀧𑀕𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀪𑀽𑀲𑀺𑀢𑀸. 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑁂𑀦 𑀓𑀧𑁆𑀧𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀲𑀭𑀻𑀭𑀸. 𑀕𑀸𑀫𑀡𑀻𑀬𑁂𑀪𑀻𑀢𑀺 𑀳𑀢𑁆𑀣𑀸𑀘𑀭𑀺𑀬𑁂𑀳𑀺. 𑀆𑀚𑀸𑀦𑀻𑀬𑀸𑀯𑀸𑀢𑀺 𑀓𑀸𑀭𑀡𑀸𑀓𑀸𑀭𑀡𑀯𑀺𑀚𑀸𑀦𑀦𑀓𑀸 𑀯. 𑀚𑀸𑀢𑀺𑀬𑀸𑀢𑀺 𑀲𑀺𑀦𑁆𑀥𑀯𑀚𑀸𑀢𑀺𑀬𑀸 𑀲𑀺𑀦𑁆𑀥𑀼𑀭𑀝𑁆𑀞𑁂 𑀲𑀺𑀦𑁆𑀥𑀼𑀦𑀤𑀻𑀢𑀻𑀭𑁂 𑀚𑀸𑀢𑀸. 𑀕𑀸𑀫𑀡𑀻𑀬𑁂𑀪𑀻𑀢𑀺 𑀅𑀲𑁆𑀲𑀸𑀘𑀭𑀺𑀬𑁂𑀳𑀺. 𑀇𑀮𑁆𑀮𑀺𑀬𑀸 𑀘𑀸𑀧𑀥𑀸𑀭𑀺𑀪𑀻𑀢𑀺 𑀇𑀮𑁆𑀮𑀺𑀬𑀸𑀯𑀼𑀥𑀜𑁆𑀘 𑀘𑀸𑀧𑀸𑀯𑀼𑀥𑀜𑁆𑀘 ¶ 𑀥𑀸𑀭𑁂𑀦𑁆𑀢𑁂𑀳𑀺. 𑀤𑀻𑀧𑀸 𑀅𑀣𑁄𑀧𑀺 𑀯𑁂𑀬𑁆𑀬𑀕𑁆𑀖𑀸𑀢𑀺 𑀤𑀻𑀧𑀺𑀘𑀫𑁆𑀫𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸. 𑀕𑀸𑀫𑀡𑀻𑀬𑁂𑀪𑀻𑀢𑀺 𑀭𑀣𑀺𑀓𑁂𑀳𑀺. 𑀯𑀫𑁆𑀫𑀺𑀪𑀻𑀢𑀺 𑀲𑀦𑁆𑀦𑀤𑁆𑀥𑀯𑀫𑁆𑀫𑁂𑀳𑀺. 𑀭𑁄𑀳𑀜𑁆𑀜𑀸𑀢𑀺 𑀭𑀢𑁆𑀢𑀯𑀡𑁆𑀡𑀸. 𑀧𑀼𑀗𑁆𑀕𑀯𑀽𑀲𑀪𑀸𑀢𑀺 𑀉𑀲𑀪𑀲𑀗𑁆𑀔𑀸𑀢𑁂𑀦 𑀚𑁂𑀝𑁆𑀞𑀓𑀧𑀼𑀗𑁆𑀕𑀯𑁂𑀦 𑀲𑀫𑀦𑁆𑀦𑀸𑀕𑀢𑀸.
𑀤𑀳𑀭𑀲𑁆𑀲𑁂𑀯 𑀫𑁂, 𑀢𑀸𑀢𑀸𑀢𑀺 𑀅𑀣 𑀦𑀁 𑀓𑀼𑀫𑀸𑀭𑁄, 𑀢𑀸𑀢, 𑀫𑀫 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀫𑀸𑀢𑀸 𑀫𑀢𑀸 𑀇𑀢𑀺 𑀫𑀬𑀸 𑀲𑀼𑀢𑀁, 𑀲𑁄𑀳𑀁 𑀢𑀬𑀸 𑀯𑀺𑀦𑀸 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀆𑀳. 𑀧𑁄𑀢𑁄𑀢𑀺 𑀢𑀭𑀼𑀡𑀧𑁄𑀢𑀓𑁄. 𑀚𑁂𑀲𑁆𑀲𑀦𑁆𑀢𑀦𑁆𑀢𑀺 𑀯𑀺𑀘𑀭𑀦𑁆𑀢𑀁. 𑀲𑀸𑀫𑀼𑀤𑁆𑀤𑀺𑀓𑀦𑁆𑀢𑀺 𑀲𑀫𑀼𑀤𑁆𑀤𑁂 𑀯𑀺𑀘𑀭𑀦𑁆𑀢𑀁. 𑀥𑀦𑁂𑀲𑀺𑀦𑀦𑁆𑀢𑀺 𑀥𑀦𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀁. 𑀯𑁄𑀳𑀸𑀭𑁄𑀢𑀺 𑀯𑀺𑀘𑀺𑀢𑁆𑀭𑀯𑁄𑀳𑀸𑀭𑁄 𑀳𑁂𑀝𑁆𑀞𑀸𑀓𑀟𑁆𑀠𑀦𑀓𑁄 𑀯𑀸𑀴𑀫𑀘𑁆𑀙𑁄 𑀯𑀸 ¶ 𑀉𑀤𑀓𑀭𑀓𑁆𑀔𑀲𑁄 𑀯𑀸 𑀆𑀯𑀝𑁆𑀝𑁄 𑀯𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀫𑀼𑀤𑁆𑀤𑁂. 𑀯𑀸𑀡𑀺𑀚𑀸 𑀩𑁆𑀬𑀲𑀦𑀻 𑀲𑀺𑀬𑀸𑀢𑀺 𑀅𑀣 𑀢𑁂 𑀯𑀸𑀡𑀺𑀚𑀸 𑀩𑁆𑀬𑀲𑀦𑀧𑁆𑀧𑀢𑁆𑀢𑀸 𑀪𑀯𑁂𑀬𑁆𑀬𑀼𑀁. ‘‘𑀲𑀺𑀬𑁆𑀬𑀼𑀦𑁆𑀢𑀺’’𑀧𑀺 𑀧𑀸𑀞𑁄 ¶ . 𑀧𑀼𑀢𑁆𑀢𑀓𑀮𑀻𑀢𑀺 𑀧𑀼𑀢𑁆𑀢𑀮𑀸𑀫𑀓𑁄 𑀧𑀼𑀢𑁆𑀢𑀓𑀸𑀴𑀓𑀡𑁆𑀡𑀻. 𑀓𑀼𑀫𑀸𑀭𑁄 𑀧𑀼𑀦 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀺. 𑀅𑀣 𑀭𑀸𑀚𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀦𑁆𑀢𑁄 ‘‘𑀇𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀩𑀼𑀲𑀳𑀢𑁆𑀣𑀸𑀬𑁄𑀢𑀺 𑀓𑀫𑁆𑀩𑀼𑀲𑀁 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀁, 𑀲𑀼𑀯𑀡𑁆𑀡𑀸𑀪𑀭𑀡𑀪𑀽𑀲𑀺𑀢𑀳𑀢𑁆𑀣𑀸𑀬𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀢𑀺 𑀬𑀣𑀸 𑀇𑀘𑁆𑀙𑀦𑁆𑀢𑀺, 𑀢𑀣𑀸 𑀓𑀭𑁄𑀦𑁆𑀢𑀺.
𑀏𑀯𑀁 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀢𑁆𑀣𑁂𑀯 𑀢𑀁 𑀅𑀪𑀺𑀲𑀺𑀜𑁆𑀘𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀸𑀳𑁂𑀲𑀺. 𑀲𑀬𑀁 𑀧𑀦 𑀏𑀓𑀓𑁄𑀯 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀲𑀺. 𑀫𑀳𑀸𑀚𑀦𑁄𑀧𑀺 𑀓𑀼𑀫𑀸𑀭𑀁 𑀩𑀸𑀭𑀸𑀡𑀲𑀺𑀁 𑀧𑀯𑁂𑀲𑁂𑀲𑀺. 𑀲𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀢𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀁 𑀤𑀺𑀲𑁆𑀯𑀸 𑀅𑀯𑀘𑀼𑀁 𑀓𑀜𑁆𑀜𑀸𑀢𑀺 𑀢𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫𑁂𑀲𑁄’’𑀢𑀺 𑀅𑀚𑀸𑀦𑀦𑁆𑀢𑀺𑀬𑁄𑀯 𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀕𑀦𑁆𑀢𑁆𑀯𑀸 𑀅𑀯𑁄𑀘𑀼𑀁. 𑀫𑀫𑀁 𑀪𑀭𑀣𑀸𑀢𑀺 𑀫𑀫𑀁 𑀇𑀘𑁆𑀙𑀣. 𑀧𑀗𑁆𑀓𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀧𑀗𑁆𑀓𑀁. 𑀣𑀮𑁂𑀢𑀺 𑀧𑀩𑁆𑀩𑀚𑁆𑀚𑀸𑀬. 𑀅𑀓𑀡𑁆𑀝𑀓𑀦𑁆𑀢𑀺 𑀭𑀸𑀕𑀓𑀡𑁆𑀝𑀓𑀸𑀤𑀺𑀯𑀺𑀭𑀳𑀺𑀢𑀁. 𑀢𑁂𑀳𑁂𑀯 𑀕𑀳𑀦𑁂𑀳𑀺 𑀅𑀕𑀳𑀦𑀁. 𑀫𑀳𑀸𑀧𑀣𑀦𑁆𑀢𑀺 𑀲𑀕𑁆𑀕𑀫𑁄𑀓𑁆𑀔𑀕𑀸𑀫𑀺𑀦𑀁 𑀫𑀳𑀸𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄. 𑀬𑁂𑀦𑀸𑀢𑀺 𑀬𑁂𑀦 𑀫𑀺𑀘𑁆𑀙𑀸𑀫𑀕𑁆𑀕𑁂𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀅𑀳𑀁 𑀧𑀝𑀺𑀧𑀦𑁆𑀦𑁄𑀢𑀺 𑀯𑀤𑀢𑀺. 𑀢𑀢𑁄 𑀢𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀭𑀸𑀚𑀸 𑀢𑀸𑀯 𑀅𑀫𑁆𑀳𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀬𑀫𑁆𑀧𑀺 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀭𑀽𑀧𑁄, 𑀲𑀘𑁂 𑀦𑀁 𑀦𑀸𑀪𑀺𑀭𑀫𑁂𑀲𑁆𑀲𑀸𑀫, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬, 𑀅𑀪𑀺𑀭𑀫𑀦𑀸𑀓𑀸𑀭𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀦𑀁 𑀅𑀪𑀺𑀦𑀦𑁆𑀤𑀦𑁆𑀢𑀺𑀬𑁄 𑀑𑀲𑀸𑀦𑀕𑀸𑀣𑀫𑀸𑀳𑀁𑀲𑀼. 𑀢𑀢𑁆𑀣 𑀕𑀺𑀭𑀺𑀩𑁆𑀩𑀚𑀦𑁆𑀢𑀺 𑀲𑀻𑀳𑀧𑁄𑀢𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀓𑀜𑁆𑀘𑀦𑀕𑀼𑀳𑀁 𑀓𑁂𑀲𑀭𑀲𑀻𑀳𑀲𑁆𑀲 𑀆𑀕𑀢𑀁 𑀯𑀺𑀬 𑀢𑀲𑁆𑀲 𑀢𑀯 𑀆𑀕𑀢𑀁 𑀲𑀼𑀆𑀕𑀢𑀁. 𑀢𑁆𑀯𑀁 𑀦𑁄𑀢𑀺 𑀢𑁆𑀯𑀁 𑀲𑀩𑁆𑀩𑀸𑀲𑀫𑁆𑀧𑀺 𑀅𑀫𑁆𑀳𑀸𑀓𑀁 𑀇𑀲𑁆𑀲𑀭𑁄, 𑀲𑀸𑀫𑀻𑀢𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀩𑁆𑀩𑀸 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀺𑀁𑀲𑀼, 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀦𑀘𑁆𑀘𑀕𑀻𑀢𑀸𑀦𑀺 𑀧𑀯𑀢𑁆𑀢𑀺𑀁𑀲𑀼 ¶ . 𑀬𑀲𑁄 𑀫𑀳𑀸 𑀅𑀳𑁄𑀲𑀺, 𑀲𑁄 𑀬𑀲𑀫𑀤𑀫𑀢𑁆𑀢𑁄 𑀧𑀺𑀢𑀭𑀁 𑀦 𑀲𑀭𑀺, 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.
𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑀣𑀸𑀕𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀧𑀼𑀢𑁆𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑁄 𑀅𑀳𑁄𑀲𑀺 ¶ , 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀅𑀭𑀺𑀦𑁆𑀤𑀫𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀲𑁄𑀡𑀓𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.
[𑁫𑁩𑁦] 𑁨. 𑀲𑀁𑀓𑀺𑀘𑁆𑀘𑀚𑀸𑀢𑀓𑀯𑀡𑁆𑀡𑀦𑀸
𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀁 𑀭𑀸𑀚𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑀻𑀯𑀓𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀤𑁂𑀯𑀤𑀢𑁆𑀢𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 ¶ 𑀯𑀘𑀦𑁂𑀦 𑀧𑀺𑀢𑀭𑀁 𑀖𑀸𑀢𑀸𑀧𑁂𑀢𑁆𑀯𑀸 𑀤𑁂𑀯𑀤𑀢𑁆𑀢𑀲𑁆𑀲 𑀲𑀗𑁆𑀖𑀪𑁂𑀤𑀸𑀯𑀲𑀸𑀦𑁂 𑀪𑀺𑀦𑁆𑀦𑀧𑀭𑀺𑀲𑀲𑁆𑀲 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 ‘‘𑀢𑀣𑀸𑀕𑀢𑀁 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀜𑁆𑀘𑀲𑀺𑀯𑀺𑀓𑀸𑀬 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀚𑁂𑀢𑀯𑀦𑀤𑁆𑀯𑀸𑀭𑁂 𑀧𑀣𑀯𑀺𑀁 𑀧𑀯𑀺𑀝𑁆𑀞𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀤𑁂𑀯𑀤𑀢𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀧𑀓𑁆𑀔𑁄 𑀳𑀼𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀯𑀻𑀘𑀺𑀧𑀭𑀸𑀬𑀡𑁄 𑀚𑀸𑀢𑁄, 𑀫𑀬𑀸𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀧𑀺𑀢𑀸 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀖𑀸𑀢𑀺𑀢𑁄, 𑀅𑀳𑀫𑁆𑀧𑀺 𑀦𑀼 𑀔𑁄 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀪𑀻𑀢𑁄 𑀭𑀚𑁆𑀚𑀲𑀺𑀭𑀺𑀬𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦 𑀮𑀪𑀺, ‘‘𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀤𑁆𑀤𑀁 𑀉𑀧𑀕𑀢𑀫𑀢𑁆𑀢𑁄𑀯 𑀦𑀯𑀬𑁄𑀚𑀦𑀩𑀳𑀮𑀸𑀬𑀁 𑀅𑀬𑀫𑀳𑀸𑀧𑀣𑀯𑀺𑀬𑀁 𑀧𑀸𑀢𑁂𑀢𑁆𑀯𑀸 𑀅𑀬𑀲𑀽𑀮𑁂𑀳𑀺 𑀓𑁄𑀝𑁆𑀝𑀺𑀬𑀫𑀸𑀦𑁄 𑀯𑀺𑀬 𑀲𑀼𑀦𑀔𑁂𑀳𑀺 𑀮𑀼𑀜𑁆𑀚𑀺𑀢𑁆𑀯𑀸 𑀔𑀚𑁆𑀚𑀫𑀸𑀦𑁄 𑀯𑀺𑀬 𑀪𑁂𑀭𑀯𑀭𑀯𑁂𑀦 𑀯𑀺𑀭𑀯𑀦𑁆𑀢𑁄 𑀉𑀝𑁆𑀞𑀸𑀢𑀺.
𑀅𑀣𑁂𑀓𑀤𑀺𑀯𑀲𑀁 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀅𑀢𑁆𑀢𑀦𑁄 𑀬𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀫 𑀧𑀺𑀢𑀼 𑀬𑀲𑁄 𑀇𑀢𑁄 𑀫𑀳𑀦𑁆𑀢𑀢𑀭𑁄, 𑀢𑀣𑀸𑀭𑀽𑀧𑀁 𑀦𑀸𑀫 𑀅𑀳𑀁 𑀥𑀫𑁆𑀫𑀭𑀸𑀚𑀸𑀦𑀁 𑀤𑁂𑀯𑀤𑀢𑁆𑀢𑀁 𑀦𑀺𑀲𑁆𑀲𑀸𑀬 𑀖𑀸𑀢𑁂𑀲𑀺’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑁂𑀯 𑀓𑀸𑀬𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀲𑀓𑀮𑀲𑀭𑀻𑀭𑀁 𑀲𑁂𑀤𑀢𑀺𑀦𑁆𑀢𑀁 𑀅𑀳𑁄𑀲𑀺. 𑀢𑀢𑁄 ‘‘𑀓𑁄 𑀦𑀼 𑀔𑁄 𑀫𑁂 𑀇𑀫𑀁 𑀪𑀬𑀁 𑀯𑀺𑀦𑁄𑀤𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀞𑀧𑁂𑀢𑁆𑀯𑀸 𑀤𑀲𑀩𑀮𑀁 𑀅𑀜𑁆𑀜𑁄 𑀦𑀢𑁆𑀣𑀻’’𑀢𑀺 𑀜𑀢𑁆𑀯𑀸 ‘‘𑀅𑀳𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀧𑀭𑀸𑀥𑁄, 𑀓𑁄 𑀦𑀼 𑀔𑁄 𑀫𑀁 𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀦 𑀅𑀜𑁆𑀜𑁄 𑀓𑁄𑀘𑀺 𑀅𑀜𑁆𑀜𑀢𑁆𑀭 𑀚𑀻𑀯𑀓𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀲 𑀕𑀳𑁂𑀢𑁆𑀯𑀸 𑀕𑀫𑀦𑀽𑀧𑀸𑀬𑀁 𑀓𑀭𑁄𑀦𑁆𑀢𑁄 ‘‘𑀭𑀫𑀡𑀻𑀬𑀸 𑀯𑀢, 𑀪𑁄, 𑀤𑁄𑀲𑀺𑀦𑀸 𑀭𑀢𑁆𑀢𑀻’’𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 ‘‘𑀓𑀁 𑀦𑀼 ¶ 𑀔𑁆𑀯𑀚𑁆𑀚 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀽𑀭𑀡𑀲𑀸𑀯𑀓𑀸𑀤𑀻𑀳𑀺 𑀧𑀽𑀭𑀡𑀸𑀤𑀻𑀦𑀁 𑀕𑀼𑀡𑁂 𑀓𑀣𑀺𑀢𑁂 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀓𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 ‘‘𑀢𑀁 𑀤𑁂𑀯𑁄 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀽’’𑀢𑀺 𑀯𑀼𑀢𑁆𑀢𑁄 𑀳𑀢𑁆𑀣𑀺𑀬𑀸𑀦𑀸𑀦𑀺 ¶ 𑀓𑀧𑁆𑀧𑀸𑀧𑁂𑀢𑁆𑀯𑀸 𑀚𑀻𑀯𑀓𑀫𑁆𑀩𑀯𑀦𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀥𑀼𑀭𑀁 𑀲𑀸𑀫𑀜𑁆𑀜𑀨𑀮𑀥𑀫𑁆𑀫𑀤𑁂𑀲𑀦𑀁 (𑀤𑀻. 𑀦𑀺. 𑁧.𑁧𑁫𑁦 𑀆𑀤𑀬𑁄) 𑀲𑀼𑀢𑁆𑀯𑀸 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑀺𑀢𑁆𑀯𑀸 𑀢𑀣𑀸𑀕𑀢𑀁 𑀔𑀫𑀸𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀤𑁂𑀦𑁆𑀢𑁄 𑀲𑀻𑀮𑀁 𑀭𑀓𑁆𑀔𑀦𑁆𑀢𑁄 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀁 𑀓𑀢𑁆𑀯𑀸 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀧𑀳𑀻𑀦𑀪𑀬𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀳𑀼𑀢𑁆𑀯𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑀼𑀔𑁂𑀦 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀲𑀺.
𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀚𑀸𑀢𑀲𑀢𑁆𑀢𑀼 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀓𑀢𑁆𑀯𑀸 𑀪𑀬𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀭𑀚𑁆𑀚𑀲𑀺𑀭𑀺𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑁄 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀲𑁄 𑀤𑀸𑀦𑀺 𑀢𑀣𑀸𑀕𑀢𑀁 𑀆𑀕𑀫𑁆𑀫 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀯𑀺𑀕𑀢𑀪𑀬𑁄 𑀇𑀲𑁆𑀲𑀭𑀺𑀬𑀲𑀼𑀔𑀁 𑀅𑀦𑀼𑀪𑁄𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 ¶ 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀓𑀢𑁆𑀯𑀸 𑀫𑀁 𑀦𑀺𑀲𑁆𑀲𑀸𑀬 𑀲𑀼𑀔𑀁 𑀲𑀬𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑀁 𑀦𑀸𑀫 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀼𑀭𑁄𑀳𑀺𑀢𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀚𑀸𑀢𑀲𑁆𑀲𑁂𑀯𑀲𑁆𑀲 ‘‘𑀲𑀁𑀓𑀺𑀘𑁆𑀘𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀉𑀪𑁄𑀧𑀺 𑀭𑀸𑀚𑀦𑀺𑀯𑁂𑀲𑀦𑁂 𑀏𑀓𑀢𑁄𑀯 𑀯𑀟𑁆𑀠𑀺𑀁𑀲𑀼. 𑀅𑀜𑁆𑀜𑀫𑀜𑁆𑀜𑀁 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀅𑀣 𑀭𑀸𑀚𑀸 𑀧𑀼𑀢𑁆𑀢𑀲𑁆𑀲 𑀉𑀧𑀭𑀚𑁆𑀚𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀉𑀧𑀭𑀸𑀚𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀉𑀧𑀭𑀸𑀚𑀸 𑀧𑀺𑀢𑀼 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀺𑀢𑀸 𑀫𑀫 𑀪𑀸𑀢𑀺𑀓𑀲𑀤𑀺𑀲𑁄, 𑀲𑀘𑁂 𑀏𑀢𑀲𑁆𑀲 𑀫𑀭𑀡𑀁 𑀑𑀮𑁄𑀓𑁂𑀲𑁆𑀲𑀸𑀫𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀭𑀚𑁆𑀚𑀁 𑀮𑀪𑀺𑀲𑁆𑀲𑀸𑀫𑀺, 𑀢𑀤𑀸 𑀮𑀤𑁆𑀥𑁂𑀦𑀧𑀺 𑀭𑀚𑁆𑀚𑁂𑀦 𑀓𑁄 𑀅𑀢𑁆𑀣𑁄, 𑀧𑀺𑀢𑀭𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄, ‘‘𑀲𑀫𑁆𑀫, 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀦𑀸𑀫 𑀪𑀸𑀭𑀺𑀬𑀁, 𑀦𑀺𑀭𑀬𑀫𑀕𑁆𑀕𑁄, 𑀦 𑀲𑀓𑁆𑀓𑀸 𑀏𑀢𑀁 𑀓𑀸𑀢𑀼𑀁, 𑀫𑀸 𑀓𑀭𑀻’’𑀢𑀺 𑀧𑀝𑀺𑀩𑀸𑀳𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀫𑁆𑀧𑀺 𑀓𑀣𑁂𑀢𑁆𑀯𑀸 𑀬𑀸𑀯𑀢𑀢𑀺𑀬𑀁 𑀢𑁂𑀦 𑀧𑀝𑀺𑀩𑀸𑀳𑀺𑀢𑁄 𑀧𑀸𑀤𑀫𑀽𑀮𑀺𑀓𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺. 𑀢𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑁄 ¶ 𑀫𑀸𑀭𑀡𑀽𑀧𑀸𑀬𑀁 𑀯𑀻𑀫𑀁𑀲𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀦𑀸𑀳𑀁 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀭𑁄 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀅𑀕𑁆𑀕𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀯𑀺𑀳𑀸𑀲𑀺.
𑀭𑀸𑀚𑀓𑀼𑀫𑀸𑀭𑁄𑀧𑀺 ¶ 𑀢𑀲𑁆𑀫𑀺𑀁 𑀕𑀢𑁂 𑀧𑀺𑀢𑀭𑀁 𑀫𑀸𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀪𑀯𑀺. ‘‘𑀲𑀁𑀓𑀺𑀘𑁆𑀘𑀓𑀼𑀫𑀸𑀭𑁄 𑀓𑀺𑀭 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀩𑀳𑀽 𑀓𑀼𑀮𑀧𑀼𑀢𑁆𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀫𑀳𑀢𑀸 𑀇𑀲𑀺𑀕𑀡𑁂𑀦 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀯𑀲𑀺. 𑀲𑀩𑁆𑀩𑁂𑀧𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀬𑁂𑀯. 𑀭𑀸𑀚𑀸𑀧𑀺 𑀧𑀺𑀢𑀭𑀁 𑀫𑀸𑀭𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑀁𑀬𑁂𑀯 𑀓𑀸𑀮𑀁 𑀭𑀚𑁆𑀚𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀪𑀻𑀢𑁄 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑁄 𑀦𑀺𑀭𑀬𑁂 𑀓𑀫𑁆𑀫𑀓𑀭𑀡𑀧𑁆𑀧𑀢𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀩𑁄𑀥𑀺𑀲𑀢𑁆𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀲𑀳𑀸𑀬𑁄 𑀫𑁂 ‘𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀪𑀸𑀭𑀺𑀬𑀁, 𑀫𑀸 𑀓𑀭𑀻’𑀢𑀺 𑀧𑀝𑀺𑀲𑁂𑀥𑁂𑀢𑁆𑀯𑀸 𑀫𑀁 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑁄𑀲𑀁 𑀓𑀢𑁆𑀯𑀸 𑀧𑀮𑀸𑀬𑀺. 𑀲𑀘𑁂 𑀲𑁄 𑀇𑀥 𑀅𑀪𑀯𑀺𑀲𑁆𑀲 ¶ , 𑀦 𑀫𑁂 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀓𑀸𑀢𑀼𑀁 𑀅𑀤𑀲𑁆𑀲, 𑀇𑀤𑀫𑁆𑀧𑀺 𑀫𑁂 𑀪𑀬𑀁 𑀳𑀭𑁂𑀬𑁆𑀬, 𑀓𑀳𑀁 𑀦𑀼 𑀔𑁄 𑀲𑁄 𑀏𑀢𑀭𑀳𑀺 𑀯𑀺𑀳𑀭𑀢𑀺. 𑀲𑀘𑁂 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀚𑀸𑀦𑁂𑀬𑁆𑀬𑀁, 𑀧𑀓𑁆𑀓𑁄𑀲𑀸𑀧𑁂𑀬𑁆𑀬𑀁, 𑀓𑁄 𑀦𑀼 𑀔𑁄 𑀫𑁂 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀆𑀭𑁄𑀘𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁂𑀧𑀼𑀭𑁂 𑀘 𑀭𑀸𑀚𑀲𑀪𑀸𑀬𑀜𑁆𑀘 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀯𑀡𑁆𑀡𑀁 𑀪𑀸𑀲𑀢𑀺.
𑀏𑀯𑀁 𑀅𑀤𑁆𑀥𑀸𑀦𑁂 𑀕𑀢𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀭𑀸𑀚𑀸 𑀫𑀁 𑀲𑀭𑀢𑀺, 𑀫𑀬𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀢𑀁 𑀦𑀺𑀩𑁆𑀪𑀬𑀁 𑀓𑀢𑁆𑀯𑀸 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀧𑀜𑁆𑀘𑀲𑀢𑀢𑀸𑀧𑀲𑀧𑀭𑀺𑀯𑀼𑀢𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀸𑀬𑀧𑀲𑁆𑀲𑁂 𑀦𑀸𑀫 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀢𑀁 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀕𑀡𑀲𑀢𑁆𑀣𑀸 𑀓𑁄𑀦𑀸𑀫𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀁𑀓𑀺𑀘𑁆𑀘𑀧𑀡𑁆𑀟𑀺𑀢𑁄 𑀦𑀸𑀫𑀸’’𑀢𑀺 𑀘 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀬𑀸𑀯𑀸𑀳𑀁 𑀭𑀸𑀚𑀸𑀦𑀁 𑀆𑀦𑁂𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀢𑀼𑀫𑁆𑀳𑁂 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀯𑀢𑁆𑀯𑀸 𑀯𑁂𑀕𑁂𑀦 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀉𑀧𑀳𑀸𑀭𑀁 𑀓𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀁 𑀭𑀸𑀚𑀸𑀦𑀁, 𑀩𑁆𑀭𑀳𑁆𑀫𑀤𑀢𑁆𑀢𑀁 𑀭𑀣𑁂𑀲𑀪𑀁;
𑀅𑀣𑀲𑁆𑀲 𑀧𑀝𑀺𑀯𑁂𑀤𑁂𑀲𑀺, 𑀬𑀲𑁆𑀲𑀸𑀲𑀺 𑀅𑀦𑀼𑀓𑀫𑁆𑀧𑀓𑁄.
‘‘𑀲𑀁𑀓𑀺𑀘𑁆𑀘𑀸𑀬𑀁 ¶ 𑀅𑀦𑀼𑀧𑁆𑀧𑀢𑁆𑀢𑁄, 𑀇𑀲𑀻𑀦𑀁 𑀲𑀸𑀥𑀼𑀲𑀫𑁆𑀫𑀢𑁄;
𑀢𑀭𑀫𑀸𑀦𑀭𑀽𑀧𑁄 𑀦𑀺𑀬𑁆𑀬𑀸𑀳𑀺, 𑀔𑀺𑀧𑁆𑀧𑀁 𑀧𑀲𑁆𑀲 𑀫𑀳𑁂𑀲𑀺𑀦𑀁.
‘‘𑀢𑀢𑁄 𑀘 𑀭𑀸𑀚𑀸 𑀢𑀭𑀫𑀸𑀦𑁄, 𑀬𑀼𑀢𑁆𑀢𑀫𑀸𑀭𑀼𑀬𑁆𑀳 𑀲𑀦𑁆𑀤𑀦𑀁;
𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀩𑁆𑀬𑀽𑀴𑁆𑀳𑁄, 𑀅𑀕𑀫𑀸𑀲𑀺 𑀭𑀣𑁂𑀲𑀪𑁄.
‘‘𑀦𑀺𑀓𑁆𑀔𑀺𑀧𑁆𑀧 ¶ 𑀧𑀜𑁆𑀘 𑀓𑀓𑀼𑀥𑀸𑀦𑀺, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;
𑀯𑀸𑀮𑀩𑀻𑀚𑀦𑀺𑀫𑀼𑀡𑁆𑀳𑀻𑀲𑀁, 𑀔𑀕𑁆𑀕𑀁 𑀙𑀢𑁆𑀢𑀜𑁆𑀘𑀼𑀧𑀸𑀳𑀦𑀁.
‘‘𑀑𑀭𑀼𑀬𑁆𑀳 𑀭𑀸𑀚𑀸 𑀬𑀸𑀦𑀫𑁆𑀳𑀸, 𑀞𑀧𑀬𑀺𑀢𑁆𑀯𑀸 𑀧𑀝𑀺𑀘𑁆𑀙𑀤𑀁;
𑀆𑀲𑀻𑀦𑀁 𑀤𑀸𑀬𑀧𑀲𑁆𑀲𑀲𑁆𑀫𑀺𑀁, 𑀲𑀁𑀓𑀺𑀘𑁆𑀘𑀫𑀼𑀧𑀲𑀗𑁆𑀓𑀫𑀺.
‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄 𑀭𑀸𑀚𑀸, 𑀲𑀫𑁆𑀫𑁄𑀤𑀺 𑀇𑀲𑀺𑀦𑀸 𑀲𑀳;
𑀢𑀁 𑀓𑀣𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺.
‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄𑀯, 𑀅𑀣 𑀓𑀸𑀮𑀁 𑀅𑀫𑀜𑁆𑀜𑀣;
𑀢𑀢𑁄 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀧𑀼𑀘𑁆𑀙𑀺𑀢𑀼𑀁 𑀧𑀝𑀺𑀧𑀚𑁆𑀚𑀣.
‘‘𑀇𑀲𑀺𑀁 𑀧𑀼𑀘𑁆𑀙𑀸𑀫 𑀲𑀁𑀓𑀺𑀘𑁆𑀘𑀁, 𑀇𑀲𑀻𑀦𑀁 𑀲𑀸𑀥𑀼𑀲𑀫𑁆𑀫𑀢𑀁;
𑀆𑀲𑀻𑀦𑀁 𑀤𑀸𑀬𑀧𑀲𑁆𑀲𑀲𑁆𑀫𑀺𑀁, 𑀇𑀲𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀁.
‘‘𑀓𑀁 ¶ 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀸𑀢𑀺𑀘𑀸𑀭𑀺𑀦𑁄;
𑀅𑀢𑀺𑀘𑀺𑀡𑁆𑀡𑁄 𑀫𑀬𑀸 𑀥𑀫𑁆𑀫𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.
𑀢𑀢𑁆𑀣 𑀤𑀺𑀲𑁆𑀯𑀸𑀢𑀺, 𑀪𑀺𑀓𑁆𑀔𑀯𑁂, 𑀲𑁄 𑀉𑀬𑁆𑀬𑀸𑀦𑀧𑀸𑀮𑁄 𑀭𑀸𑀚𑀸𑀦𑀁 𑀭𑀸𑀚𑀲𑀪𑀸𑀬𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀅𑀣𑀲𑁆𑀲 𑀧𑀝𑀺𑀯𑁂𑀤𑁂𑀲𑀺, ‘‘𑀬𑀲𑁆𑀲𑀸𑀲𑀻’’𑀢𑀺 𑀯𑀤𑀦𑁆𑀢𑁄 𑀆𑀭𑁄𑀘𑁂𑀲𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀲𑀸𑀲𑀻𑀢𑀺, 𑀫𑀳𑀸𑀭𑀸𑀚, 𑀬𑀲𑁆𑀲 𑀢𑁆𑀯𑀁 𑀅𑀦𑀼𑀓𑀫𑁆𑀧𑀓𑁄 𑀫𑀼𑀤𑀼𑀘𑀺𑀢𑁆𑀢𑁄 𑀅𑀳𑁄𑀲𑀺, 𑀬𑀲𑁆𑀲 𑀅𑀪𑀺𑀡𑁆𑀳𑀁 𑀯𑀡𑁆𑀡𑀁 𑀧𑀬𑀺𑀭𑀼𑀤𑀸𑀳𑀸𑀲𑀺, 𑀲𑁄 𑀅𑀬𑀁 𑀲𑀁𑀓𑀺𑀘𑁆𑀘𑁄 𑀇𑀲𑀻𑀦𑀁 𑀅𑀦𑁆𑀢𑀭𑁂 𑀲𑀸𑀥𑀼 𑀮𑀤𑁆𑀥𑀓𑁄𑀢𑀺 𑀲𑀫𑁆𑀫𑀢𑁄 𑀅𑀦𑀼𑀧𑁆𑀧𑀢𑁆𑀢𑁄 𑀢𑀯 𑀉𑀬𑁆𑀬𑀸𑀦𑁂 𑀲𑀺𑀮𑀸𑀧𑀝𑁆𑀝𑁂 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀦𑀺𑀲𑀺𑀦𑁆𑀦𑁄. 𑀢𑀭𑀫𑀸𑀦𑀭𑀽𑀧𑁄𑀢𑀺, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸 𑀢𑀼𑀫𑁆𑀳𑀸𑀓𑀁 𑀕𑀘𑁆𑀙𑀦𑁆𑀢𑀸𑀦𑀜𑁆𑀜𑁂𑀯 𑀧𑀓𑁆𑀓𑀫𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀢𑀭𑀫𑀸𑀦𑀭𑀽𑀧𑁄 𑀔𑀺𑀧𑁆𑀧𑀁 𑀦𑀺𑀬𑁆𑀬𑀸𑀳𑀺, 𑀫𑀳𑀦𑁆𑀢𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀏𑀲𑀺𑀢𑀢𑁆𑀢𑀸 𑀧𑀲𑁆𑀲 𑀫𑀳𑁂𑀲𑀺𑀦𑀁.
𑀢𑀢𑁄𑀢𑀺, 𑀪𑀺𑀓𑁆𑀔𑀯𑁂, 𑀲𑁄 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁄 𑀢𑀲𑁆𑀲 𑀯𑀘𑀦𑀢𑁄 𑀅𑀦𑀦𑁆𑀢𑀭𑀫𑁂𑀯. 𑀦𑀺𑀓𑁆𑀔𑀺𑀧𑁆𑀧𑀸𑀢𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀓𑀺𑀭 𑀉𑀬𑁆𑀬𑀸𑀦𑀤𑁆𑀯𑀸𑀭𑀁 ¶ 𑀧𑀢𑁆𑀯𑀸𑀯 𑀏𑀢𑀤𑀳𑁄𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀕𑀭𑀼𑀝𑁆𑀞𑀸𑀦𑀺𑀬𑀸, 𑀲𑀁𑀓𑀺𑀘𑁆𑀘𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀉𑀤𑁆𑀥𑀢𑀯𑁂𑀲𑁂𑀦 𑀕𑀦𑁆𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺. 𑀲𑁄 𑀫𑀡𑀺𑀘𑀺𑀢𑁆𑀢𑀲𑀼𑀯𑀡𑁆𑀡𑀤𑀡𑁆𑀟𑀁 𑀯𑀸𑀮𑀩𑀻𑀚𑀦𑀺𑀁, 𑀓𑀜𑁆𑀘𑀦𑀫𑀬𑀁 𑀉𑀡𑁆𑀳𑀻𑀲𑀧𑀝𑁆𑀝𑀁, 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁 𑀫𑀗𑁆𑀕𑀮𑀔𑀕𑁆𑀕𑀁, 𑀲𑁂𑀢𑀘𑁆𑀙𑀢𑁆𑀢𑀁 ¶ , 𑀲𑁄𑀯𑀡𑁆𑀡𑀧𑀸𑀤𑀼𑀓𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀅𑀧𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀓𑁆𑀔𑀺𑀧𑁆𑀧𑀸’’𑀢𑀺. 𑀧𑀝𑀺𑀘𑁆𑀙𑀤𑀦𑁆𑀢𑀺 𑀢𑀫𑁂𑀯 𑀭𑀸𑀚𑀓𑀓𑀼𑀥𑀪𑀡𑁆𑀟𑀁 𑀞𑀧𑀬𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸. 𑀤𑀸𑀬𑀧𑀲𑁆𑀲𑀲𑁆𑀫𑀺𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀉𑀬𑁆𑀬𑀸𑀦𑁂. 𑀅𑀣 𑀓𑀸𑀮𑀁 𑀅𑀫𑀜𑁆𑀜𑀣𑀸𑀢𑀺 𑀅𑀣 𑀲𑁄 𑀇𑀤𑀸𑀦𑀺 𑀫𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀓𑀸𑀮𑁄𑀢𑀺 𑀚𑀸𑀦𑀺. 𑀧𑀸𑀴𑀺𑀬𑀁 𑀧𑀦 ‘‘𑀬𑀣𑀸𑀓𑀸𑀮’’𑀦𑁆𑀢𑀺 𑀆𑀕𑀢𑀁, 𑀢𑀲𑁆𑀲 𑀓𑀸𑀮𑀸𑀦𑀼𑀭𑀽𑀧𑁂𑀦 𑀧𑀜𑁆𑀳𑀧𑀼𑀘𑁆𑀙𑀦𑀁 𑀅𑀫𑀜𑁆𑀜𑀣𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀚𑁆𑀚𑀣𑀸𑀢𑀺 𑀧𑀝𑀺𑀧𑀚𑁆𑀚𑀺. 𑀧𑁂𑀘𑁆𑀘𑀸𑀢𑀺 𑀧𑀝𑀺𑀕𑀦𑁆𑀢𑁆𑀯𑀸, 𑀧𑀭𑀮𑁄𑀓𑀲𑁆𑀲 𑀯𑀸 𑀦𑀸𑀫𑁂𑀢𑀁, 𑀢𑀲𑁆𑀫𑀸 𑀧𑀭𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀫𑀬𑀸𑀢𑀺, 𑀪𑀦𑁆𑀢𑁂, 𑀫𑀬𑀸 𑀲𑀼𑀘𑀭𑀺𑀢𑀥𑀫𑁆𑀫𑁄 𑀅𑀢𑀺𑀘𑀺𑀡𑁆𑀡𑁄 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀓𑀢𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺, 𑀓𑀁 𑀕𑀢𑀺𑀁 𑀧𑀺𑀢𑀼𑀖𑀸𑀢𑀓𑀸 𑀕𑀘𑁆𑀙𑀦𑁆𑀢𑀺, 𑀓𑀢𑀭𑀲𑁆𑀫𑀺𑀁 𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺.
𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀼𑀡𑁄𑀳𑀻’’𑀢𑀺 𑀯𑀢𑁆𑀯𑀸 𑀑𑀯𑀸𑀤𑀁 𑀢𑀸𑀯 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀇𑀲𑀻 𑀅𑀯𑀘 𑀲𑀁𑀓𑀺𑀘𑁆𑀘𑁄, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑀁;
𑀆𑀲𑀻𑀦𑀁 𑀤𑀸𑀬𑀧𑀲𑁆𑀲𑀲𑁆𑀫𑀺𑀁, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.
‘‘𑀉𑀧𑁆𑀧𑀣𑁂𑀦 𑀯𑀚𑀦𑁆𑀢𑀲𑁆𑀲, 𑀬𑁄 𑀫𑀕𑁆𑀕𑀫𑀦𑀼𑀲𑀸𑀲𑀢𑀺;
𑀢𑀲𑁆𑀲 𑀘𑁂 𑀯𑀘𑀦𑀁 𑀓𑀬𑀺𑀭𑀸, 𑀦𑀸𑀲𑁆𑀲 𑀫𑀕𑁆𑀕𑁂𑀬𑁆𑀬 𑀓𑀡𑁆𑀝𑀓𑁄.
‘‘𑀅𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀬𑁄 𑀥𑀫𑁆𑀫𑀫𑀦𑀼𑀲𑀸𑀲𑀢𑀺;
𑀢𑀲𑁆𑀲 𑀘𑁂 𑀯𑀘𑀦𑀁 𑀓𑀬𑀺𑀭𑀸, 𑀦 𑀲𑁄 𑀕𑀘𑁆𑀙𑁂𑀬𑁆𑀬 𑀤𑀼𑀕𑁆𑀕𑀢𑀺’’𑀦𑁆𑀢𑀺.
𑀢𑀢𑁆𑀣 𑀉𑀧𑁆𑀧𑀣𑁂𑀦𑀸𑀢𑀺 𑀘𑁄𑀭𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀫𑀕𑁆𑀕𑁂𑀦. 𑀫𑀕𑁆𑀕𑀫𑀦𑀼𑀲𑀸𑀲𑀢𑀻𑀢𑀺 𑀔𑁂𑀫𑀫𑀕𑁆𑀕𑀁 𑀅𑀓𑁆𑀔𑀸𑀢𑀺. 𑀦𑀸𑀲𑁆𑀲 𑀫𑀕𑁆𑀕𑁂𑀬𑁆𑀬 𑀓𑀡𑁆𑀝𑀓𑁄𑀢𑀺 𑀢𑀲𑁆𑀲 𑀑𑀯𑀸𑀤𑀓𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 ¶ 𑀫𑀼𑀔𑀁 𑀘𑁄𑀭𑀓𑀡𑁆𑀝𑀓𑁄 𑀦 𑀧𑀲𑁆𑀲𑁂𑀬𑁆𑀬. 𑀬𑁄 𑀥𑀫𑁆𑀫𑀦𑁆𑀢𑀺 𑀬𑁄 𑀲𑀼𑀘𑀭𑀺𑀢𑀥𑀫𑁆𑀫𑀁. 𑀦 𑀲𑁄𑀢𑀺 𑀲𑁄 𑀧𑀼𑀭𑀺𑀲𑁄 𑀦𑀺𑀭𑀬𑀸𑀤𑀺𑀪𑁂𑀤𑀁 𑀤𑀼𑀕𑁆𑀕𑀢𑀺𑀁 𑀦 𑀕𑀘𑁆𑀙𑁂𑀬𑁆𑀬. 𑀉𑀧𑁆𑀧𑀣𑀲𑀤𑀺𑀲𑁄 𑀳𑀺, 𑀫𑀳𑀸𑀭𑀸𑀚, 𑀅𑀥𑀫𑁆𑀫𑁄, 𑀔𑁂𑀫𑀫𑀕𑁆𑀕𑀲𑀤𑀺𑀲𑁄 𑀲𑀼𑀘𑀭𑀺𑀢𑀥𑀫𑁆𑀫𑁄, 𑀢𑁆𑀯𑀁 𑀧𑀦 𑀧𑀼𑀩𑁆𑀩𑁂 ‘‘𑀧𑀺𑀢𑀭𑀁 𑀖𑀸𑀢𑁂𑀢𑁆𑀯𑀸 𑀭𑀸𑀚𑀸 𑀳𑁄𑀫𑀻’’𑀢𑀺 𑀫𑀬𑁆𑀳𑀁 𑀓𑀣𑁂𑀢𑁆𑀯𑀸 𑀫𑀬𑀸 𑀧𑀝𑀺𑀩𑀸𑀳𑀺𑀢𑁄 𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀧𑀺𑀢𑀭𑀁 𑀖𑀸𑀢𑁂𑀢𑁆𑀯𑀸 𑀇𑀤𑀸𑀦𑀺 ¶ 𑀲𑁄𑀘𑀲𑀺, 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀁 𑀅𑀓𑀭𑁄𑀦𑁆𑀢𑁄 𑀦𑀸𑀫 𑀘𑁄𑀭𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀯𑀺𑀬 𑀫𑀳𑀸𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀻𑀢𑀺.
𑀏𑀯𑀫𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀉𑀧𑀭𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 𑁋
‘‘𑀥𑀫𑁆𑀫𑁄 ¶ 𑀧𑀣𑁄 𑀫𑀳𑀸𑀭𑀸𑀚, 𑀅𑀥𑀫𑁆𑀫𑁄 𑀧𑀦 𑀉𑀧𑁆𑀧𑀣𑁄;
𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺𑀁.
‘‘𑀅𑀥𑀫𑁆𑀫𑀘𑀸𑀭𑀺𑀦𑁄 𑀭𑀸𑀚, 𑀦𑀭𑀸 𑀯𑀺𑀲𑀫𑀚𑀻𑀯𑀺𑀦𑁄;
𑀬𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀦𑁆𑀢𑀺, 𑀦𑀺𑀭𑀬𑁂 𑀢𑁂 𑀲𑀼𑀡𑁄𑀳𑀺 𑀫𑁂.
‘‘𑀲𑀜𑁆𑀚𑀻𑀯𑁄 𑀓𑀸𑀴𑀲𑀼𑀢𑁆𑀢𑁄 𑀘, 𑀲𑀗𑁆𑀖𑀸𑀢𑁄 𑀤𑁆𑀯𑁂 𑀘 𑀭𑁄𑀭𑀼𑀯𑀸;
𑀅𑀣𑀸𑀧𑀭𑁄 𑀫𑀳𑀸𑀯𑀻𑀘𑀺, 𑀢𑀸𑀧𑀦𑁄 𑀘 𑀧𑀢𑀸𑀧𑀦𑁄.
‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀦𑀺𑀭𑀬𑀸, 𑀅𑀓𑁆𑀔𑀸𑀢𑀸 𑀤𑀼𑀭𑀢𑀺𑀓𑁆𑀓𑀫𑀸;
𑀆𑀓𑀺𑀡𑁆𑀡𑀸 𑀮𑀼𑀤𑁆𑀤𑀓𑀫𑁆𑀫𑁂𑀳𑀺, 𑀧𑀘𑁆𑀘𑁂𑀓𑀸 𑀲𑁄𑀴𑀲𑀼𑀲𑁆𑀲𑀤𑀸.
‘‘𑀓𑀤𑀭𑀺𑀬𑀢𑀸𑀧𑀦𑀸 𑀖𑁄𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 𑀫𑀳𑀩𑁆𑀪𑀬𑀸;
𑀮𑁄𑀫𑀳𑀁𑀲𑀦𑀭𑀽𑀧𑀸 𑀘, 𑀪𑁂𑀲𑁆𑀫𑀸 𑀧𑀝𑀺𑀪𑀬𑀸 𑀤𑀼𑀔𑀸.
‘‘𑀘𑀢𑀼𑀓𑁆𑀓𑀡𑁆𑀡𑀸 𑀘𑀢𑀼𑀤𑁆𑀯𑀸𑀭𑀸, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;
𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀸, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀸.
‘‘𑀢𑁂𑀲𑀁 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;
𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀼𑀝𑀸 𑀢𑀺𑀝𑁆𑀞𑀦𑁆𑀢𑀺 𑀲𑀩𑁆𑀩𑀤𑀸.
‘‘𑀏𑀢𑁂 𑀧𑀢𑀦𑁆𑀢𑀺 𑀦𑀺𑀭𑀬𑁂, 𑀉𑀤𑁆𑀥𑀁𑀧𑀸𑀤𑀸 𑀅𑀯𑀁𑀲𑀺𑀭𑀸;
𑀇𑀲𑀻𑀦𑀁 𑀅𑀢𑀺𑀯𑀢𑁆𑀢𑀸𑀭𑁄, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁.
‘‘𑀢𑁂 𑀪𑀽𑀦𑀳𑀼𑀦𑁄 𑀧𑀘𑁆𑀘𑀦𑁆𑀢𑀺, 𑀫𑀘𑁆𑀙𑀸 𑀩𑀺𑀮𑀓𑀢𑀸 𑀬𑀣𑀸;
𑀲𑀁𑀯𑀘𑁆𑀙𑀭𑁂 𑀅𑀲𑀗𑁆𑀔𑁂𑀬𑁆𑀬𑁂, 𑀦𑀭𑀸 𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄.
‘‘𑀟𑀬𑁆𑀳𑀫𑀸𑀦𑁂𑀦 𑀕𑀢𑁆𑀢𑁂𑀦, 𑀦𑀺𑀘𑁆𑀘𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;
𑀦𑀺𑀭𑀬𑀸 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀤𑁆𑀯𑀸𑀭𑀁 𑀦𑀺𑀓𑁆𑀔𑀫𑀦𑁂𑀲𑀺𑀦𑁄.
‘‘𑀧𑀼𑀭𑀢𑁆𑀣𑀺𑀫𑁂𑀦 ¶ 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀧𑀘𑁆𑀙𑀢𑁄;
𑀉𑀢𑁆𑀢𑀭𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀤𑀓𑁆𑀔𑀺𑀡𑀁;
𑀬𑀁 𑀬𑀜𑁆𑀳𑀺 𑀤𑁆𑀯𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀢𑀤𑁂𑀯 𑀧𑀺𑀥𑀻𑀬𑀭𑁂.
‘‘𑀩𑀳𑀽𑀦𑀺 ¶ ¶ 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀚𑀦𑀸 𑀦𑀺𑀭𑀬𑀕𑀸𑀫𑀺𑀦𑁄;
𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀧𑀢𑁆𑀯𑀸 𑀤𑀼𑀓𑁆𑀔𑀁 𑀅𑀦𑀧𑁆𑀧𑀓𑀁.
‘‘𑀆𑀲𑀻𑀯𑀺𑀲𑀁𑀯 𑀓𑀼𑀧𑀺𑀢𑀁, 𑀢𑁂𑀚𑀲𑁆𑀲𑀺𑀁 𑀤𑀼𑀭𑀢𑀺𑀓𑁆𑀓𑀫𑀁;
𑀦 𑀲𑀸𑀥𑀼𑀭𑀽𑀧𑁂 𑀆𑀲𑀻𑀤𑁂, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁.
‘‘𑀅𑀢𑀺𑀓𑀸𑀬𑁄 𑀫𑀳𑀺𑀲𑁆𑀲𑀸𑀲𑁄, 𑀅𑀚𑁆𑀚𑀼𑀦𑁄 𑀓𑁂𑀓𑀓𑀸𑀥𑀺𑀧𑁄;
𑀲𑀳𑀲𑁆𑀲𑀩𑀸𑀳𑀼 𑀉𑀘𑁆𑀙𑀺𑀦𑁆𑀦𑁄, 𑀇𑀲𑀺𑀫𑀸𑀲𑀚𑁆𑀚 𑀕𑁄𑀢𑀫𑀁.
‘‘𑀅𑀭𑀚𑀁 𑀭𑀚𑀲𑀸 𑀯𑀘𑁆𑀙𑀁, 𑀓𑀺𑀲𑀁 𑀅𑀯𑀓𑀺𑀭𑀺𑀬 𑀤𑀡𑁆𑀟𑀓𑀻;
𑀢𑀸𑀮𑁄𑀯 𑀫𑀽𑀮𑀢𑁄 𑀙𑀺𑀦𑁆𑀦𑁄, 𑀲 𑀭𑀸𑀚𑀸 𑀯𑀺𑀪𑀯𑀗𑁆𑀕𑀢𑁄.
‘‘𑀉𑀧𑀳𑀘𑁆𑀘 𑀫𑀦𑀁 𑀫𑀚𑁆𑀛𑁄, 𑀫𑀸𑀢𑀗𑁆𑀕𑀲𑁆𑀫𑀺𑀁 𑀬𑀲𑀲𑁆𑀲𑀺𑀦𑁂;
𑀲𑀧𑀸𑀭𑀺𑀲𑀚𑁆𑀚𑁄 𑀉𑀘𑁆𑀙𑀺𑀦𑁆𑀦𑁄, 𑀫𑀚𑁆𑀛𑀸𑀭𑀜𑁆𑀜𑀁 𑀢𑀤𑀸 𑀅𑀳𑀼.
‘‘𑀓𑀡𑁆𑀳𑀤𑀻𑀧𑀸𑀬𑀦𑀸𑀲𑀚𑁆𑀚, 𑀇𑀲𑀺𑀁 𑀅𑀦𑁆𑀥𑀓𑀯𑁂𑀡𑁆𑀟𑀬𑁄;
𑀅𑀜𑁆𑀜𑁄𑀜𑁆𑀜𑀁 𑀫𑀼𑀲𑀮𑀸 𑀳𑀦𑁆𑀢𑁆𑀯𑀸, 𑀲𑀫𑁆𑀧𑀢𑁆𑀢𑀸 𑀬𑀫𑀲𑀸𑀥𑀦𑀁.
‘‘𑀅𑀣𑀸𑀬𑀁 𑀇𑀲𑀺𑀦𑀸 𑀲𑀢𑁆𑀢𑁄, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀼𑀭𑁂;
𑀧𑀸𑀯𑁂𑀓𑁆𑀔𑀺 𑀧𑀣𑀯𑀺𑀁 𑀘𑁂𑀘𑁆𑀘𑁄, 𑀳𑀻𑀦𑀢𑁆𑀢𑁄 𑀧𑀢𑁆𑀢𑀧𑀭𑀺𑀬𑀸𑀬𑀁.
‘‘𑀢𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀁, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;
𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀕𑀺𑀭𑀁 𑀲𑀘𑁆𑀘𑀽𑀧𑀲𑀁𑀳𑀺𑀢𑀁.
‘‘𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀬𑁄 𑀦𑀭𑁄 𑀧𑁂𑀓𑁆𑀔𑀢𑁂 𑀫𑀼𑀦𑀺𑀁;
𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀕𑀦𑁆𑀢𑀸 𑀲𑁄 𑀦𑀺𑀭𑀬𑀁 𑀅𑀥𑁄.
‘‘𑀬𑁂 ¶ 𑀯𑀼𑀟𑁆𑀠𑁂 𑀧𑀭𑀺𑀪𑀸𑀲𑀦𑁆𑀢𑀺, 𑀨𑀭𑀼𑀲𑀽𑀧𑀓𑁆𑀓𑀫𑀸 𑀚𑀦𑀸;
𑀅𑀦𑀧𑀘𑁆𑀘𑀸 𑀅𑀤𑀸𑀬𑀸𑀤𑀸, 𑀢𑀸𑀮𑀯𑀢𑁆𑀣𑀼 𑀪𑀯𑀦𑁆𑀢𑀺 𑀢𑁂.
‘‘𑀬𑁄 𑀘 𑀧𑀩𑁆𑀩𑀚𑀺𑀢𑀁 𑀳𑀦𑁆𑀢𑀺, 𑀓𑀢𑀓𑀺𑀘𑁆𑀘𑀁 𑀫𑀳𑁂𑀲𑀺𑀦𑀁;
𑀲 𑀓𑀸𑀴𑀲𑀼𑀢𑁆𑀢𑁂 𑀦𑀺𑀭𑀬𑁂, 𑀘𑀺𑀭𑀭𑀢𑁆𑀢𑀸𑀬 𑀧𑀘𑁆𑀘𑀢𑀺.
‘‘𑀬𑁄 𑀘 𑀭𑀸𑀚𑀸 𑀅𑀥𑀫𑁆𑀫𑀝𑁆𑀞𑁄, 𑀭𑀝𑁆𑀞𑀯𑀺𑀤𑁆𑀥𑀁𑀲𑀦𑁄 𑀫𑀕𑁄;
𑀢𑀸𑀧𑀬𑀺𑀢𑁆𑀯𑀸 𑀚𑀦𑀧𑀤𑀁, 𑀢𑀸𑀧𑀦𑁂 𑀧𑁂𑀘𑁆𑀘 𑀧𑀘𑁆𑀘𑀢𑀺.
‘‘𑀲𑁄 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀢𑀁 𑀤𑀺𑀩𑁆𑀩𑀸𑀦𑀺 𑀧𑀘𑁆𑀘𑀢𑀺;
𑀅𑀘𑁆𑀘𑀺𑀲𑀗𑁆𑀖𑀧𑀭𑁂𑀢𑁄 𑀲𑁄, 𑀤𑀼𑀓𑁆𑀔𑀁 𑀯𑁂𑀤𑁂𑀢𑀺 𑀯𑁂𑀤𑀦𑀁.
‘‘𑀢𑀲𑁆𑀲 ¶ ¶ 𑀅𑀕𑁆𑀕𑀺𑀲𑀺𑀔𑀸 𑀓𑀸𑀬𑀸, 𑀦𑀺𑀘𑁆𑀙𑀭𑀦𑁆𑀢𑀺 𑀧𑀪𑀲𑁆𑀲𑀭𑀸;
𑀢𑁂𑀚𑁄𑀪𑀓𑁆𑀔𑀲𑁆𑀲 𑀕𑀢𑁆𑀢𑀸𑀦𑀺, 𑀮𑁄𑀫𑁂𑀳𑀺 𑀘 𑀦𑀔𑁂𑀳𑀺 𑀘.
‘‘𑀟𑀬𑁆𑀳𑀫𑀸𑀦𑁂𑀦 𑀕𑀢𑁆𑀢𑁂𑀦, 𑀦𑀺𑀘𑁆𑀘𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;
𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑁄 𑀦𑀤𑀢𑀺, 𑀦𑀸𑀕𑁄 𑀢𑀼𑀢𑁆𑀢𑀝𑁆𑀝𑀺𑀢𑁄 𑀬𑀣𑀸.
‘‘𑀬𑁄 𑀮𑁄𑀪𑀸 𑀧𑀺𑀢𑀭𑀁 𑀳𑀦𑁆𑀢𑀺, 𑀤𑁄𑀲𑀸 𑀯𑀸 𑀧𑀼𑀭𑀺𑀲𑀸𑀥𑀫𑁄;
𑀲 𑀓𑀸𑀴𑀲𑀼𑀢𑁆𑀢𑁂 𑀦𑀺𑀭𑀬𑁂, 𑀘𑀺𑀭𑀭𑀢𑁆𑀢𑀸𑀬 𑀧𑀘𑁆𑀘𑀢𑀺.
‘‘𑀲 𑀢𑀸𑀤𑀺𑀲𑁄 𑀧𑀘𑁆𑀘𑀢𑀺 𑀮𑁄𑀳𑀓𑀼𑀫𑁆𑀪𑀺𑀬𑀁, 𑀧𑀓𑁆𑀓𑀜𑁆𑀘 𑀲𑀢𑁆𑀢𑀻𑀳𑀺 𑀳𑀦𑀦𑁆𑀢𑀺 𑀦𑀺𑀢𑁆𑀢𑀘𑀁;
𑀅𑀦𑁆𑀥𑀁 𑀓𑀭𑀺𑀢𑁆𑀯𑀸 𑀫𑀼𑀢𑁆𑀢𑀓𑀭𑀻𑀲𑀪𑀓𑁆𑀔𑀁, 𑀔𑀸𑀭𑁂 𑀦𑀺𑀫𑀼𑀚𑁆𑀚𑀦𑁆𑀢𑀺 𑀢𑀣𑀸𑀯𑀺𑀥𑀁 𑀦𑀭𑀁.
‘‘𑀢𑀢𑁆𑀢𑀁 𑀧𑀓𑁆𑀓𑀼𑀣𑀺𑀢𑀫𑀬𑁄𑀕𑀼𑀴𑀜𑁆𑀘, 𑀤𑀻𑀖𑁂 𑀘 𑀨𑀸𑀮𑁂 𑀘𑀺𑀭𑀭𑀢𑁆𑀢𑀢𑀸𑀧𑀺𑀢𑁂;
𑀯𑀺𑀓𑁆𑀔𑀫𑁆𑀪𑀫𑀸𑀤𑀸𑀬 𑀯𑀺𑀩𑀦𑁆𑀥𑀭𑀚𑁆𑀚𑀼𑀪𑀺, 𑀯𑀺𑀯𑀝𑁂 𑀫𑀼𑀔𑁂 𑀲𑀫𑁆𑀧𑀯𑀺𑀲𑀦𑁆𑀢𑀺 𑀭𑀓𑁆𑀔𑀲𑀸.
‘‘𑀲𑀸𑀫𑀸 𑀘 𑀲𑁄𑀡𑀸 𑀲𑀩𑀮𑀸 𑀘 𑀕𑀺𑀚𑁆𑀛𑀸, 𑀓𑀸𑀓𑁄𑀮𑀲𑀗𑁆𑀖𑀸 𑀘 𑀤𑀺𑀚𑀸 𑀅𑀬𑁄𑀫𑀼𑀔𑀸;
𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀫𑀸𑀦𑀁, 𑀚𑀺𑀯𑁆𑀳𑀁 𑀯𑀺𑀪𑀚𑁆𑀚 𑀯𑀺𑀖𑀸𑀲𑀁 𑀲𑀮𑁄𑀳𑀺𑀢𑀁.
‘‘𑀢𑀁 ¶ 𑀤𑀟𑁆𑀠𑀢𑀸𑀮𑀁 𑀧𑀭𑀺𑀪𑀺𑀦𑁆𑀦𑀕𑀢𑁆𑀢𑀁, 𑀦𑀺𑀧𑁆𑀧𑁄𑀣𑀬𑀦𑁆𑀢𑀸 𑀅𑀦𑀼𑀯𑀺𑀘𑀭𑀦𑁆𑀢𑀺 𑀭𑀓𑁆𑀔𑀲𑀸;
𑀭𑀢𑀻 𑀳𑀺 𑀢𑁂𑀲𑀁 𑀤𑀼𑀔𑀺𑀦𑁄 𑀧𑀦𑀻𑀢𑀭𑁂, 𑀏𑀢𑀸𑀤𑀺𑀲𑀲𑁆𑀫𑀺𑀁 𑀦𑀺𑀭𑀬𑁂 𑀯𑀲𑀦𑁆𑀢𑀺;
𑀬𑁂 𑀓𑁂𑀘𑀺 𑀮𑁄𑀓𑁂 𑀇𑀥 𑀧𑁂𑀢𑁆𑀢𑀺𑀖𑀸𑀢𑀺𑀦𑁄.
‘‘𑀧𑀼𑀢𑁆𑀢𑁄 𑀘 𑀫𑀸𑀢𑀭𑀁 𑀳𑀦𑁆𑀢𑁆𑀯𑀸, 𑀇𑀢𑁄 𑀕𑀦𑁆𑀢𑁆𑀯𑀸 𑀬𑀫𑀓𑁆𑀔𑀬𑀁;
𑀪𑀼𑀲𑀫𑀸𑀧𑀚𑁆𑀚𑀢𑁂 𑀤𑀼𑀓𑁆𑀔𑀁, 𑀅𑀢𑁆𑀢𑀓𑀫𑁆𑀫𑀨𑀮𑀽𑀧𑀕𑁄.
‘‘𑀅𑀫𑀦𑀼𑀲𑁆𑀲𑀸 𑀅𑀢𑀺𑀩𑀮𑀸, 𑀳𑀦𑁆𑀢𑀸𑀭𑀁 𑀚𑀦𑀬𑀦𑁆𑀢𑀺𑀬𑀸;
𑀅𑀬𑁄𑀫𑀬𑁂𑀳𑀺 𑀯𑀸𑀮𑁂𑀳𑀺, 𑀧𑀻𑀴𑀬𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁.
‘‘𑀢𑀫𑀲𑁆𑀲𑀯𑀁 ¶ ¶ 𑀲𑀓𑀸 𑀕𑀢𑁆𑀢𑀸, 𑀭𑀼𑀥𑀺𑀭𑀁 𑀅𑀢𑁆𑀢𑀲𑀫𑁆𑀪𑀯𑀁;
𑀢𑀫𑁆𑀩𑀮𑁄𑀳𑀯𑀺𑀮𑀻𑀦𑀁𑀯, 𑀢𑀢𑁆𑀢𑀁 𑀧𑀸𑀬𑁂𑀦𑁆𑀢𑀺 𑀫𑀢𑁆𑀢𑀺𑀖𑀁.
‘‘𑀚𑀺𑀕𑀼𑀘𑁆𑀙𑀁 𑀓𑀼𑀡𑀧𑀁 𑀧𑀽𑀢𑀺𑀁, 𑀤𑀼𑀕𑁆𑀕𑀦𑁆𑀥𑀁 𑀕𑀽𑀣𑀓𑀤𑁆𑀤𑀫𑀁;
𑀧𑀼𑀩𑁆𑀩𑀮𑁄𑀳𑀺𑀢𑀲𑀗𑁆𑀓𑀸𑀲𑀁, 𑀭𑀳𑀤𑀫𑁄𑀕𑀬𑁆𑀳 𑀢𑀺𑀝𑁆𑀞𑀢𑀺.
‘‘𑀢𑀫𑁂𑀦𑀁 𑀓𑀺𑀫𑀬𑁄 𑀢𑀢𑁆𑀣, 𑀅𑀢𑀺𑀓𑀸𑀬𑀸 𑀅𑀬𑁄𑀫𑀼𑀔𑀸;
𑀙𑀯𑀺𑀁 𑀪𑁂𑀢𑁆𑀯𑀸𑀦 𑀔𑀸𑀤𑀦𑁆𑀢𑀺, 𑀲𑀁𑀕𑀺𑀤𑁆𑀥𑀸 𑀫𑀁𑀲𑀮𑁄𑀳𑀺𑀢𑁂.
‘‘𑀲𑁄 𑀘 𑀢𑀁 𑀦𑀺𑀭𑀬𑀁 𑀧𑀢𑁆𑀢𑁄, 𑀦𑀺𑀫𑀼𑀕𑁆𑀕𑁄 𑀲𑀢𑀧𑁄𑀭𑀺𑀲𑀁;
𑀧𑀽𑀢𑀺𑀓𑀁 𑀓𑀼𑀡𑀧𑀁 𑀯𑀸𑀢𑀺, 𑀲𑀫𑀦𑁆𑀢𑀸 𑀲𑀢𑀬𑁄𑀚𑀦𑀁.
‘‘𑀘𑀓𑁆𑀔𑀼𑀫𑀸𑀧𑀺 𑀳𑀺 𑀘𑀓𑁆𑀔𑀽𑀳𑀺, 𑀢𑁂𑀦 𑀕𑀦𑁆𑀥𑁂𑀦 𑀚𑀻𑀬𑀢𑀺;
𑀏𑀢𑀸𑀤𑀺𑀲𑀁 𑀩𑁆𑀭𑀳𑁆𑀫𑀤𑀢𑁆𑀢, 𑀫𑀸𑀢𑀼𑀖𑁄 𑀮𑀪𑀢𑁂 𑀤𑀼𑀔𑀁.
‘‘𑀔𑀼𑀭𑀥𑀸𑀭𑀫𑀦𑀼𑀓𑁆𑀓𑀫𑁆𑀫, 𑀢𑀺𑀓𑁆𑀔𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;
𑀧𑀢𑀦𑁆𑀢𑀺 𑀕𑀩𑁆𑀪𑀧𑀸𑀢𑀺𑀬𑁄, 𑀤𑀼𑀕𑁆𑀕𑀁 𑀯𑁂𑀢𑀭𑀡𑀺𑀁 𑀦𑀤𑀺𑀁.
‘‘𑀅𑀬𑁄𑀫𑀬𑀸 𑀲𑀺𑀫𑁆𑀩𑀮𑀺𑀬𑁄, 𑀲𑁄𑀴𑀲𑀗𑁆𑀕𑀼𑀮𑀓𑀡𑁆𑀝𑀓𑀸;
𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀺, 𑀤𑀼𑀕𑁆𑀕𑀁 𑀯𑁂𑀢𑀭𑀡𑀺𑀁 𑀦𑀤𑀺𑀁.
‘‘𑀢𑁂 ¶ 𑀅𑀘𑁆𑀘𑀺𑀫𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀺, 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯 𑀆𑀭𑀓𑀸;
𑀆𑀤𑀺𑀢𑁆𑀢𑀸 𑀚𑀸𑀢𑀯𑁂𑀤𑁂𑀦, 𑀉𑀤𑁆𑀥𑀁 𑀬𑁄𑀚𑀦𑀫𑀼𑀕𑁆𑀕𑀢𑀸.
‘‘𑀏𑀢𑁂 𑀯𑀚𑀦𑁆𑀢𑀺 𑀦𑀺𑀭𑀬𑁂, 𑀢𑀢𑁆𑀢𑁂 𑀢𑀺𑀔𑀺𑀡𑀓𑀡𑁆𑀝𑀓𑁂;
𑀦𑀸𑀭𑀺𑀬𑁄 𑀘 𑀅𑀢𑀺𑀘𑀸𑀭𑀸, 𑀦𑀭𑀸 𑀘 𑀧𑀭𑀤𑀸𑀭𑀕𑀽.
‘‘𑀢𑁂 𑀧𑀢𑀦𑁆𑀢𑀺 𑀅𑀥𑁄𑀓𑁆𑀔𑀦𑁆𑀥𑀸, 𑀯𑀺𑀯𑀢𑁆𑀢𑀸 𑀯𑀺𑀳𑀢𑀸 𑀧𑀼𑀣𑀽;
𑀲𑀬𑀦𑁆𑀢𑀺 𑀯𑀺𑀦𑀺𑀯𑀺𑀤𑁆𑀥𑀗𑁆𑀕𑀸, 𑀤𑀻𑀖𑀁 𑀚𑀕𑁆𑀕𑀦𑁆𑀢𑀺 𑀲𑀩𑁆𑀩𑀤𑀸.
‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀫𑀳𑀢𑀺𑀁 𑀧𑀩𑁆𑀩𑀢𑀽𑀧𑀫𑀁;
𑀮𑁄𑀳𑀓𑀼𑀫𑁆𑀪𑀺𑀁 𑀧𑀯𑀚𑁆𑀚𑀦𑁆𑀢𑀺, 𑀢𑀢𑁆𑀢𑀁 𑀅𑀕𑁆𑀕𑀺𑀲𑀫𑀽𑀤𑀓𑀁.
‘‘𑀏𑀯𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀤𑀼𑀲𑁆𑀲𑀻𑀮𑀸 𑀫𑁄𑀳𑀧𑀸𑀭𑀼𑀢𑀸;
𑀅𑀦𑀼𑀪𑁄𑀦𑁆𑀢𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀤𑀼𑀓𑁆𑀓𑀝𑀫𑀢𑁆𑀢𑀦𑁄.
‘‘𑀬𑀸 𑀘 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸, 𑀲𑀸𑀫𑀺𑀓𑀁 𑀅𑀢𑀺𑀫𑀜𑁆𑀜𑀢𑀺;
𑀲𑀲𑁆𑀲𑀼𑀁 𑀯𑀸 𑀲𑀲𑀼𑀭𑀁 𑀯𑀸𑀧𑀺, 𑀚𑁂𑀝𑁆𑀞𑀁 𑀯𑀸𑀧𑀺 𑀦𑀦𑀦𑁆𑀤𑀭𑀁.
‘‘𑀢𑀲𑁆𑀲𑀸 ¶ 𑀯𑀗𑁆𑀓𑁂𑀦 𑀚𑀺𑀯𑁆𑀳𑀕𑁆𑀕𑀁, 𑀦𑀺𑀩𑁆𑀩𑀳𑀦𑁆𑀢𑀺 𑀲𑀩𑀦𑁆𑀥𑀦𑀁;
𑀲 ¶ 𑀩𑁆𑀬𑀸𑀫𑀫𑀢𑁆𑀢𑀁 𑀓𑀺𑀫𑀺𑀦𑀁, 𑀚𑀺𑀯𑁆𑀳𑀁 𑀧𑀲𑁆𑀲𑀢𑀺 𑀅𑀢𑁆𑀢𑀦𑀺;
𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀧𑀦𑁂 𑀧𑁂𑀘𑁆𑀘 𑀧𑀘𑁆𑀘𑀢𑀺.
‘‘𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸, 𑀫𑀘𑁆𑀙𑀺𑀓𑀸 𑀫𑀺𑀕𑀩𑀦𑁆𑀥𑀓𑀸;
𑀘𑁄𑀭𑀸 𑀕𑁄𑀖𑀸𑀢𑀓𑀸 𑀮𑀼𑀤𑁆𑀤𑀸, 𑀅𑀯𑀡𑁆𑀡𑁂 𑀯𑀡𑁆𑀡𑀓𑀸𑀭𑀓𑀸.
‘‘𑀲𑀢𑁆𑀢𑀻𑀳𑀺 𑀮𑁄𑀳𑀓𑀽𑀝𑁂𑀳𑀺, 𑀦𑁂𑀢𑁆𑀢𑀺𑀁𑀲𑁂𑀳𑀺 𑀉𑀲𑀽𑀳𑀺 𑀘;
𑀳𑀜𑁆𑀜𑀫𑀸𑀦𑀸 𑀔𑀸𑀭𑀦𑀤𑀺𑀁, 𑀧𑀧𑀢𑀦𑁆𑀢𑀺 𑀅𑀯𑀁𑀲𑀺𑀭𑀸.
‘‘𑀲𑀸𑀬𑀁 𑀧𑀸𑀢𑁄 𑀓𑀽𑀝𑀓𑀸𑀭𑀻, 𑀅𑀬𑁄𑀓𑀽𑀝𑁂𑀳𑀺 𑀳𑀜𑁆𑀜𑀢𑀺;
𑀢𑀢𑁄 𑀯𑀦𑁆𑀢𑀁 𑀤𑀼𑀭𑀢𑁆𑀢𑀸𑀦𑀁, 𑀧𑀭𑁂𑀲𑀁 𑀪𑀼𑀜𑁆𑀚𑀭𑁂 𑀲𑀤𑀸.
‘‘𑀥𑀗𑁆𑀓𑀸 ¶ 𑀪𑁂𑀭𑀡𑁆𑀟𑀓𑀸 𑀕𑀺𑀚𑁆𑀛𑀸, 𑀓𑀸𑀓𑁄𑀮𑀸 𑀘 𑀅𑀬𑁄𑀫𑀼𑀔𑀸;
𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀔𑀸𑀤𑀦𑁆𑀢𑀺, 𑀦𑀭𑀁 𑀓𑀺𑀩𑁆𑀩𑀺𑀲𑀓𑀸𑀭𑀓𑀁.
‘‘𑀬𑁂 𑀫𑀺𑀕𑁂𑀦 𑀫𑀺𑀕𑀁 𑀳𑀦𑁆𑀢𑀺, 𑀧𑀓𑁆𑀔𑀺𑀁 𑀯𑀸 𑀧𑀦 𑀧𑀓𑁆𑀔𑀺𑀦𑀸;
𑀅𑀲𑀦𑁆𑀢𑁄 𑀭𑀚𑀲𑀸 𑀙𑀦𑁆𑀦𑀸, 𑀕𑀦𑁆𑀢𑀸 𑀢𑁂 𑀦𑀺𑀭𑀬𑀼𑀲𑁆𑀲𑀤’’𑀦𑁆𑀢𑀺.
𑀢𑀢𑁆𑀣 𑀥𑀫𑁆𑀫𑁄 𑀧𑀣𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄 𑀔𑁂𑀫𑁄 𑀅𑀧𑁆𑀧𑀝𑀺𑀪𑀬𑁄 𑀲𑀼𑀕𑀢𑀺𑀫𑀕𑁆𑀕𑁄. 𑀯𑀺𑀲𑀫𑀚𑀻𑀯𑀺𑀦𑁄𑀢𑀺 𑀅𑀥𑀫𑁆𑀫𑁂𑀦 𑀓𑀧𑁆𑀧𑀺𑀢𑀚𑀻𑀯𑀺𑀓𑀸. 𑀦𑀺𑀭𑀬𑁂 𑀢𑁂𑀢𑀺 𑀢𑁂 𑀏𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀦𑀺𑀭𑀬𑁂 𑀓𑀣𑁂𑀫𑀺. 𑀲𑀼𑀡𑁄𑀳𑀺 𑀫𑁂𑀢𑀺 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑀸 𑀧𑀺𑀢𑀼𑀖𑀸𑀢𑀓𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀺𑀭𑀬𑀁 𑀧𑀼𑀘𑁆𑀙𑀺𑀢𑁄𑀧𑀺 𑀧𑀣𑀫𑀁 𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀅𑀝𑁆𑀞 𑀫𑀳𑀸𑀦𑀺𑀭𑀬𑁂 𑀲𑁄𑀴𑀲 𑀘 𑀉𑀲𑁆𑀲𑀤𑀦𑀺𑀭𑀬𑁂 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳. 𑀓𑀺𑀁𑀓𑀸𑀭𑀡𑀸? 𑀧𑀞𑀫𑀜𑁆𑀳𑀺 𑀢𑀲𑁆𑀫𑀺𑀁 𑀤𑀲𑁆𑀲𑀺𑀬𑀫𑀸𑀦𑁂 𑀭𑀸𑀚𑀸 𑀨𑀮𑀺𑀢𑁂𑀦 𑀳𑀤𑀬𑁂𑀦 𑀢𑀢𑁆𑀣𑁂𑀯 𑀫𑀭𑁂𑀬𑁆𑀬, 𑀇𑀫𑁂𑀲𑀼 𑀧𑀦 𑀦𑀺𑀭𑀬𑁂𑀲𑀼 𑀧𑀘𑁆𑀘𑀫𑀸𑀦𑀲𑀢𑁆𑀢𑁂 𑀤𑀺𑀲𑁆𑀯𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀓𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀯𑀺𑀬 𑀅𑀜𑁆𑀜𑁂𑀧𑀺 𑀩𑀳𑀽 𑀧𑀸𑀧𑀓𑀫𑁆𑀫𑀺𑀦𑁄 𑀅𑀢𑁆𑀣𑀺, 𑀅𑀳𑀁 𑀏𑀢𑁂𑀲𑀁 𑀅𑀦𑁆𑀢𑀭𑁂 𑀧𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀚𑀸𑀢𑀼𑀧𑀢𑁆𑀣𑀫𑁆𑀪𑁄 𑀅𑀭𑁄𑀕𑁄 𑀪𑀯𑀺𑀲𑁆𑀲𑀢𑀻𑀢𑀺 𑀢𑁂 𑀧𑀦 𑀦𑀺𑀭𑀬𑁂 𑀤𑀲𑁆𑀲𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀧𑀞𑀫𑀁 𑀇𑀤𑁆𑀥𑀺𑀩𑀮𑁂𑀦 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀧𑀘𑁆𑀙𑀸 𑀤𑀲𑁆𑀲𑁂𑀲𑀺.
𑀢𑁂𑀲𑀁 𑀯𑀘𑀦𑀢𑁆𑀣𑁄 𑁋 𑀦𑀺𑀭𑀬𑀧𑀸𑀮𑁂𑀳𑀺 𑀧𑀚𑁆𑀚𑀮𑀺𑀢𑀸𑀦𑀺 𑀦𑀸𑀦𑀸𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀦𑀸 𑀳𑀻𑀭𑀁 𑀳𑀻𑀭𑀁 𑀓𑀢𑀸 𑀦𑁂𑀭𑀬𑀺𑀓𑀲𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀜𑁆𑀚𑀻𑀯𑁄. 𑀦𑀺𑀭𑀬𑀧𑀸𑀮𑀸 𑀧𑀼𑀦𑀧𑁆𑀧𑀼𑀦𑀁 𑀦𑀤𑀦𑁆𑀢𑀸 𑀯𑀕𑁆𑀕𑀦𑁆𑀢𑀸 𑀧𑀚𑁆𑀚𑀮𑀺𑀢𑀸𑀦𑀺 𑀦𑀸𑀦𑀸𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀁 𑀦𑁂𑀭𑀬𑀺𑀓𑁂 𑀲𑀢𑁆𑀢𑁂 𑀅𑀧𑀭𑀸𑀧𑀭𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀧𑀳𑀭𑀺𑀢𑁆𑀯𑀸 𑀚𑀮𑀺𑀢𑀧𑀣𑀯𑀺𑀬𑀁 𑀧𑀢𑀺𑀢𑁂 𑀚𑀮𑀺𑀢𑀓𑀸𑀴𑀲𑀼𑀢𑁆𑀢𑀁 𑀧𑀸𑀢𑁂𑀢𑁆𑀯𑀸 𑀚𑀮𑀺𑀢𑀨𑀭𑀲𑀼𑀁 ¶ 𑀕𑀳𑁂𑀢𑁆𑀯𑀸 𑀲𑀬𑀁 𑀉𑀦𑁆𑀦𑀤𑀦𑁆𑀢𑀸 𑀫𑀳𑀦𑁆𑀢𑁂𑀦 𑀅𑀝𑁆𑀝𑀲𑁆𑀲𑀭𑁂𑀦 𑀯𑀺𑀭𑀯𑀦𑁆𑀢𑁂 𑀅𑀝𑁆𑀞𑀁𑀲𑁂 𑀲𑁄𑀴𑀲𑀁𑀲𑁂 𑀓𑀭𑁄𑀦𑁆𑀢𑀸 𑀏𑀢𑁆𑀣 𑀢𑀘𑁆𑀙𑀦𑁆𑀢𑀻𑀢𑀺 𑀓𑀸𑀴𑀲𑀼𑀢𑁆𑀢𑁄. 𑀫𑀳𑀦𑁆𑀢𑀸 𑀚𑀮𑀺𑀢𑀅𑀬𑀧𑀩𑁆𑀩𑀢𑀸 𑀖𑀸𑀢𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀖𑀸𑀢𑁄. 𑀢𑀢𑁆𑀣 𑀓𑀺𑀭 𑀲𑀢𑁆𑀢𑁂 𑀦𑀯𑀬𑁄𑀚𑀦𑀸𑀬 𑀚𑀮𑀺𑀢𑀸𑀬 𑀅𑀬𑀧𑀣𑀯𑀺𑀬𑀸 𑀬𑀸𑀯 𑀓𑀝𑀺𑀢𑁄 ¶ 𑀧𑀯𑁂𑀲𑁂𑀢𑁆𑀯𑀸 𑀦𑀺𑀘𑁆𑀘𑀮𑁂 𑀓𑀭𑁄𑀦𑁆𑀢𑀺. 𑀅𑀣 𑀧𑀼𑀭𑀢𑁆𑀣𑀺𑀫𑀢𑁄 𑀚𑀮𑀺𑀢𑁄 𑀅𑀬𑀧𑀩𑁆𑀩𑀢𑁄 𑀲𑀫𑀼𑀝𑁆𑀞𑀸𑀬 𑀅𑀲𑀦𑀺 𑀯𑀺𑀬 𑀯𑀺𑀭𑀯𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀢𑁂 𑀲𑀢𑁆𑀢𑁂 𑀲𑀡𑁆𑀳𑀓𑀭𑀡𑀺𑀬𑀁 𑀢𑀺𑀮𑁂 𑀧𑀺𑀲𑀦𑁆𑀢𑁄 𑀯𑀺𑀬 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀤𑀺𑀲𑀸𑀬 𑀢𑀺𑀝𑁆𑀞𑀢𑀺, 𑀧𑀘𑁆𑀙𑀺𑀫𑀤𑀺𑀲𑀢𑁄 𑀲𑀫𑀼𑀝𑁆𑀞𑀺𑀢𑁄𑀧𑀺 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀢𑀺𑀝𑁆𑀞𑀢𑀺. 𑀤𑁆𑀯𑁂 𑀧𑀦 𑀏𑀓𑀢𑁄 𑀲𑀫𑀸𑀕𑀦𑁆𑀢𑁆𑀯𑀸 𑀉𑀘𑁆𑀙𑀼𑀬𑀦𑁆𑀢𑁂 𑀉𑀘𑁆𑀙𑀼𑀔𑀡𑁆𑀟𑀸𑀦𑀺 𑀯𑀺𑀬 𑀧𑀻𑀴𑁂𑀦𑁆𑀢𑀺. 𑀏𑀯𑀁 𑀢𑀢𑁆𑀣 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀼𑀓𑁆𑀔𑀁 𑀅𑀦𑀼𑀪𑁄𑀦𑁆𑀢𑀺.
𑀤𑁆𑀯𑁂 𑀘 𑀭𑁄𑀭𑀼𑀯𑀸𑀢𑀺 𑀚𑀸𑀮𑀭𑁄𑀭𑀼𑀯𑁄, 𑀥𑀽𑀫𑀭𑁄𑀭𑀼𑀯𑁄 𑀘𑀸𑀢𑀺 𑀤𑁆𑀯𑁂. 𑀢𑀢𑁆𑀣 𑀚𑀸𑀮𑀭𑁄𑀭𑀼𑀯𑁄 𑀓𑀧𑁆𑀧𑁂𑀦 𑀲𑀡𑁆𑀞𑀺𑀢𑀸𑀳𑀺 𑀭𑀢𑁆𑀢𑀮𑁄𑀳𑀚𑀸𑀮𑀸𑀳𑀺 𑀧𑀼𑀡𑁆𑀡𑁄, 𑀥𑀽𑀫𑀭𑁄𑀭𑀼𑀯𑁄 𑀔𑀸𑀭𑀥𑀽𑀫𑁂𑀦 𑀧𑀼𑀡𑁆𑀡𑁄. 𑀢𑁂𑀲𑀼 𑀚𑀸𑀮𑀭𑁄𑀭𑀼𑀯𑁂 𑀧𑀘𑁆𑀘𑀦𑁆𑀢𑀸𑀦𑀁 𑀦𑀯𑀳𑀺 𑀯𑀡𑁆𑀡𑀫𑀼𑀔𑁂𑀳𑀺 𑀚𑀸𑀮𑀸 𑀧𑀯𑀺𑀲𑀺𑀢𑁆𑀯𑀸 𑀲𑀭𑀻𑀭𑀁 𑀤𑀳𑀦𑁆𑀢𑀺, 𑀥𑀽𑀫𑀭𑁄𑀭𑀼𑀯𑁂 𑀧𑀘𑁆𑀘𑀦𑁆𑀢𑀸𑀦𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀔𑀸𑀭𑀥𑀽𑀫𑁄 ¶ 𑀧𑀯𑀺𑀲𑀺𑀢𑁆𑀯𑀸 𑀧𑀺𑀝𑁆𑀞𑀁 𑀯𑀺𑀬 𑀲𑀭𑀻𑀭𑀁 𑀲𑁂𑀤𑁂𑀢𑀺. 𑀉𑀪𑀬𑀢𑁆𑀣𑀧𑀺 𑀧𑀘𑁆𑀘𑀦𑁆𑀢𑀸 𑀲𑀢𑁆𑀢𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀻𑀢𑀺 𑀤𑁆𑀯𑁂𑀧𑀺 ‘‘𑀭𑁄𑀭𑀼𑀯𑀸’’𑀢𑀺 𑀯𑀼𑀢𑁆𑀢𑀸. 𑀚𑀸𑀮𑀸𑀦𑀁 𑀯𑀸 𑀧𑀘𑁆𑀘𑀦𑀲𑀢𑁆𑀢𑀸𑀦𑀁 𑀯𑀸 𑀢𑁂𑀲𑀁 𑀤𑀼𑀓𑁆𑀔𑀲𑁆𑀲 𑀯𑀸 𑀯𑀻𑀘𑀺 𑀅𑀦𑁆𑀢𑀭𑀁 𑀦𑀢𑁆𑀣𑀺 𑀏𑀢𑁆𑀣𑀸𑀢𑀺 𑀅𑀯𑀻𑀘𑀺, 𑀫𑀳𑀦𑁆𑀢𑁄 𑀅𑀯𑀻𑀘𑀺 𑀫𑀳𑀸𑀯𑀻𑀘𑀺. 𑀢𑀢𑁆𑀣 𑀳𑀺 𑀧𑀼𑀭𑀢𑁆𑀣𑀺𑀫𑀸𑀤𑀻𑀳𑀺 𑀪𑀺𑀢𑁆𑀢𑀻𑀳𑀺 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀙𑀺𑀫𑀸𑀤𑀻𑀲𑀼 𑀧𑀝𑀺𑀳𑀜𑁆𑀜𑀢𑀺, 𑀢𑀸 𑀘 𑀪𑀺𑀢𑁆𑀢𑀺𑀬𑁄 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀼𑀭𑀢𑁄 𑀬𑁄𑀚𑀦𑀲𑀢𑀁 𑀕𑀡𑁆𑀳𑀸𑀢𑀺. 𑀳𑁂𑀝𑁆𑀞𑀸 𑀉𑀝𑁆𑀞𑀺𑀢𑀸 𑀚𑀸𑀮𑀸 𑀉𑀧𑀭𑀺 𑀧𑀝𑀺𑀳𑀜𑁆𑀜𑀢𑀺, 𑀉𑀧𑀭𑀺 𑀉𑀝𑁆𑀞𑀺𑀢𑀸 𑀳𑁂𑀝𑁆𑀞𑀸 𑀧𑀝𑀺𑀳𑀜𑁆𑀜𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀚𑀸𑀮𑀸𑀦𑀁 𑀯𑀻𑀘𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀧𑀦 𑀅𑀦𑁆𑀢𑁄 𑀬𑁄𑀚𑀦𑀲𑀢𑀁 𑀞𑀸𑀦𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀲𑁆𑀲 𑀧𑀽𑀭𑀺𑀢𑀦𑀸𑀴𑀺 𑀯𑀺𑀬 𑀲𑀢𑁆𑀢𑁂𑀳𑀺 𑀦𑀺𑀭𑀦𑁆𑀢𑀭𑀁 𑀧𑀽𑀭𑀺𑀢𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀘𑁆𑀘𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀺, 𑀲𑀓𑀝𑁆𑀞𑀸𑀦𑁂𑀬𑁂𑀯 𑀧𑀘𑁆𑀘𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀲𑀢𑁆𑀢𑀸𑀦𑀁 𑀯𑀻𑀘𑀺 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀚𑀺𑀯𑁆𑀳𑀕𑁆𑀕𑁂 𑀙 𑀫𑀥𑀼𑀩𑀺𑀦𑁆𑀤𑀽𑀦𑀺 𑀲𑀢𑁆𑀢𑀫𑀲𑁆𑀲 𑀢𑀫𑁆𑀩𑀮𑁄𑀳𑀩𑀺𑀦𑁆𑀤𑀼𑀦𑁄 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀢𑀢𑁆𑀣 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀲𑁂𑀲𑀸 𑀙 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁂𑀓𑁆𑀔𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀤𑀼𑀓𑁆𑀔𑀫𑁂𑀯 𑀦𑀺𑀭𑀦𑁆𑀢𑀭𑀁 𑀧𑀜𑁆𑀜𑀸𑀬𑀢𑀺. 𑀏𑀯𑀫𑁂𑀢𑁆𑀣 𑀤𑀼𑀓𑁆𑀔𑀲𑁆𑀲 𑀯𑀻𑀘𑀺 𑀦𑀸𑀫 𑀦𑀢𑁆𑀣𑀺. 𑀲𑁆𑀯𑀸𑀬𑀁 𑀲𑀳 𑀪𑀺𑀢𑁆𑀢𑀻𑀳𑀺 𑀯𑀺𑀓𑁆𑀔𑀫𑁆𑀪𑀢𑁄 𑀅𑀝𑁆𑀞𑀸𑀭𑀲𑀸𑀥𑀺𑀓𑀢𑀺𑀬𑁄𑀚𑀦𑀲𑀢𑁄, 𑀆𑀯𑀝𑁆𑀝𑀢𑁄 𑀧𑀦 𑀘𑀢𑀼𑀧𑀡𑁆𑀡𑀸𑀲𑀸𑀥𑀺𑀓𑀦𑀯𑀬𑁄𑀚𑀦𑀲𑀢𑁄, 𑀲𑀳 𑀉𑀲𑁆𑀲𑀤𑁂𑀳𑀺 𑀤𑀲 𑀬𑁄𑀚𑀦𑀲𑀳𑀲𑁆𑀲𑀸𑀦𑀺. 𑀏𑀯𑀫𑀲𑁆𑀲 𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.
𑀦𑀺𑀘𑁆𑀘𑀮𑁂 ¶ 𑀲𑀢𑁆𑀢𑁂 𑀢𑀧𑀢𑀻𑀢𑀺 𑀢𑀸𑀧𑀦𑁄. 𑀅𑀢𑀺𑀯𑀺𑀬 𑀢𑀸𑀧𑁂𑀢𑀻𑀢𑀺 𑀧𑀢𑀸𑀧𑀦𑁄. 𑀢𑀢𑁆𑀣 𑀢𑀸𑀧𑀦𑀲𑁆𑀫𑀺𑀁 𑀢𑀸𑀯 𑀲𑀢𑁆𑀢𑁂 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑁂 𑀚𑀮𑀺𑀢𑀅𑀬𑀲𑀽𑀮𑁂 𑀦𑀺𑀲𑀻𑀤𑀸𑀧𑁂𑀦𑁆𑀢𑀺. 𑀢𑀢𑁄 𑀳𑁂𑀝𑁆𑀞𑀸 𑀧𑀣𑀯𑀻 𑀚𑀮𑀢𑀺, 𑀲𑀽𑀮𑀸𑀦𑀺 𑀚𑀮𑀦𑁆𑀢𑀺, 𑀲𑀢𑁆𑀢𑀸 𑀚𑀮𑀦𑁆𑀢𑀺. 𑀏𑀯𑀁 𑀲𑁄 𑀦𑀺𑀭𑀬𑁄 𑀦𑀺𑀘𑁆𑀘𑀮𑁂 𑀲𑀢𑁆𑀢𑁂 𑀢𑀧𑀢𑀺. 𑀇𑀢𑀭𑀲𑁆𑀫𑀺𑀁 𑀧𑀦 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁂 𑀚𑀮𑀦𑁆𑀢𑁂𑀳𑀺 𑀆𑀯𑀼𑀥𑁂𑀳𑀺 𑀧𑀳𑀭𑀺𑀢𑁆𑀯𑀸 𑀚𑀮𑀺𑀢𑀁 𑀅𑀬𑀧𑀩𑁆𑀩𑀢𑀁 𑀆𑀭𑁄𑀧𑁂𑀦𑁆𑀢𑀺. 𑀢𑁂𑀲𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑀓𑀸𑀮𑁂 𑀓𑀫𑁆𑀫𑀧𑀘𑁆𑀘𑀬𑁄 𑀯𑀸𑀢𑁄 𑀧𑀳𑀭𑀢𑀺. 𑀢𑁂 𑀢𑀢𑁆𑀣 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀉𑀤𑁆𑀥𑀁𑀧𑀸𑀤𑀸 𑀅𑀥𑁄𑀲𑀺𑀭𑀸 𑀧𑀢𑀦𑁆𑀢𑀺. 𑀅𑀣 𑀳𑁂𑀝𑁆𑀞𑀸 𑀅𑀬𑀧𑀣𑀯𑀺𑀢𑁄 𑀚𑀮𑀺𑀢𑀸𑀦𑀺 𑀅𑀬𑀲𑀽𑀮𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀢𑁂 𑀢𑀸𑀦𑀺 𑀫𑀢𑁆𑀣𑀓𑁂𑀦𑁂𑀯 𑀧𑀳𑀭𑀺𑀢𑁆𑀯𑀸 𑀢𑁂𑀲𑀼 𑀯𑀺𑀦𑀺𑀯𑀺𑀤𑁆𑀥𑀲𑀭𑀻𑀭𑀸 ¶ 𑀚𑀮𑀦𑁆𑀢𑀸 𑀧𑀘𑁆𑀘𑀦𑁆𑀢𑀺. 𑀏𑀯𑀫𑁂𑀲 𑀅𑀢𑀺𑀯𑀺𑀬 𑀢𑀸𑀧𑁂𑀢𑀻𑀢𑀺.
𑀩𑁄𑀥𑀺𑀲𑀢𑁆𑀢𑁄 𑀧𑀦 𑀏𑀢𑁂 𑀦𑀺𑀭𑀬𑁂 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀲𑀜𑁆𑀚𑀻𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀧𑀘𑁆𑀘𑀦𑁆𑀢𑁂 𑀦𑁂𑀭𑀬𑀺𑀓𑀲𑀢𑁆𑀢𑁂 𑀤𑀺𑀲𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀳𑀸𑀪𑀬𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀧𑀼𑀦 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀓𑀸𑀴𑀲𑀼𑀢𑁆𑀢𑀁 𑀤𑀲𑁆𑀲𑁂𑀲𑀺, 𑀢𑀢𑁆𑀣𑀧𑀺 𑀧𑀘𑁆𑀘𑀫𑀸𑀦𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀳𑀸𑀪𑀬𑁂 𑀉𑀧𑁆𑀧𑀦𑁆𑀦𑁂 𑀢𑀫𑁆𑀧𑀺 𑀅𑀦𑁆𑀢𑀭𑀥𑀸𑀧𑁂𑀲𑀻𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀲𑀺. 𑀢𑀢𑁄 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀢𑀬𑀸 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀧𑀘𑁆𑀘𑀫𑀸𑀦𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀅𑀧𑁆𑀧𑀫𑀸𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂𑀲𑀜𑁆𑀜𑁂𑀯 𑀫𑀳𑀸𑀦𑀺𑀭𑀬𑀸𑀦𑀁 𑀓𑀺𑀘𑁆𑀘𑀁 𑀓𑀣𑁂𑀢𑀼𑀁 ‘‘𑀇𑀘𑁆𑀘𑁂𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀓𑁆𑀔𑀸𑀢𑀸𑀢𑀺 𑀫𑀬𑀸 𑀘 𑀢𑀼𑀬𑁆𑀳𑀁 𑀓𑀣𑀺𑀢𑀸, 𑀧𑁄𑀭𑀸𑀡𑀓𑁂𑀳𑀺 𑀘 𑀓𑀣𑀺𑀢𑀸𑀬𑁂𑀯. 𑀆𑀓𑀺𑀡𑁆𑀡𑀸𑀢𑀺 𑀧𑀭𑀺𑀧𑀼𑀡𑁆𑀡𑀸. 𑀧𑀘𑁆𑀘𑁂𑀓𑀸 𑀲𑁄𑀴𑀲𑀼𑀲𑁆𑀲𑀤𑀸𑀢𑀺 𑀏𑀢𑁂𑀲𑀁 ¶ 𑀦𑀺𑀭𑀬𑀸𑀦𑀁 𑀏𑀓𑁂𑀓𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀲𑁄𑀴𑀲 𑀲𑁄𑀴𑀲 𑀉𑀲𑁆𑀲𑀤𑀦𑀺𑀭𑀬𑀸𑀢𑀺 𑀲𑀩𑁆𑀩𑁂𑀧𑀺 𑀲𑀢𑀁 𑀅𑀝𑁆𑀞𑀯𑀻𑀲𑀢𑀺 𑀘 𑀉𑀲𑁆𑀲𑀤𑀦𑀺𑀭𑀬𑀸 𑀅𑀝𑁆𑀞 𑀘 𑀫𑀳𑀸𑀦𑀺𑀭𑀬𑀸𑀢𑀺 𑀙𑀢𑁆𑀢𑀺𑀁𑀲𑀦𑀺𑀭𑀬𑀲𑀢𑀁. 𑀓𑀤𑀭𑀺𑀬𑀢𑀸𑀧𑀦𑀸𑀢𑀺 𑀲𑀩𑁆𑀩𑁂𑀢𑁂 𑀓𑀤𑀭𑀺𑀬𑀸𑀦𑀁 𑀢𑀸𑀧𑀦𑀸. 𑀩𑀮𑀯𑀤𑀼𑀓𑁆𑀔𑀢𑀸𑀬 𑀖𑁄𑀭𑀸. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀅𑀘𑁆𑀘𑀻𑀦𑀁 𑀅𑀢𑁆𑀣𑀺𑀢𑀸𑀬 𑀅𑀘𑁆𑀘𑀺𑀫𑀦𑁆𑀢𑁄. 𑀪𑀬𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀩𑁆𑀪𑀬𑀸. 𑀤𑀺𑀝𑁆𑀞𑀫𑀢𑁆𑀢𑀸 𑀯𑀸 𑀲𑀼𑀢𑀫𑀢𑁆𑀢𑀸 𑀯𑀸 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀻𑀢𑀺 𑀮𑁄𑀫𑀳𑀁𑀲𑀦𑀭𑀽𑀧𑀸 𑀘. 𑀪𑀻𑀲𑀦𑀢𑀸𑀬 𑀪𑁂𑀲𑁆𑀫𑀸. 𑀪𑀬𑀚𑀦𑀦𑀢𑀸𑀬 𑀧𑀝𑀺𑀪𑀬𑀸. 𑀲𑀼𑀔𑀸𑀪𑀸𑀯𑁂𑀦 𑀤𑀼𑀔𑀸. 𑀘𑀢𑀼𑀓𑁆𑀓𑀡𑁆𑀡𑀸𑀢𑀺 𑀲𑀩𑁆𑀩𑁂𑀧𑀺 𑀘𑀢𑀼𑀭𑀲𑁆𑀲𑀫𑀜𑁆𑀚𑀽𑀲𑀲𑀤𑀺𑀲𑀸. 𑀯𑀺𑀪𑀢𑁆𑀢𑀸𑀢𑀺 𑀘𑀢𑀼𑀤𑁆𑀯𑀸𑀭𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀪𑀸𑀕𑀲𑁄 𑀫𑀺𑀢𑀸𑀢𑀺 𑀤𑁆𑀯𑀸𑀭𑀯𑀻𑀣𑀻𑀦𑀁 𑀯𑀲𑁂𑀦 𑀓𑁄𑀝𑁆𑀞𑀸𑀲𑁂 𑀞𑀧𑁂𑀢𑁆𑀯𑀸 𑀫𑀺𑀢𑀸. 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀲𑀩𑁆𑀩𑁂𑀧𑀺 ¶ 𑀦𑀯𑀬𑁄𑀚𑀦𑀺𑀓𑁂𑀦 𑀅𑀬𑀓𑀧𑀸𑀮𑁂𑀦 𑀧𑀝𑀺𑀘𑁆𑀙𑀦𑁆𑀦𑀸. 𑀨𑀼𑀝𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀏𑀢𑁆𑀢𑀓𑀁 𑀞𑀸𑀦𑀁 𑀅𑀦𑀼𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺.
𑀉𑀤𑁆𑀥𑀁𑀧𑀸𑀤𑀸 𑀅𑀯𑀁𑀲𑀺𑀭𑀸𑀢𑀺 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀦𑀺𑀭𑀬𑁂𑀲𑀼 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀢𑀫𑀸𑀦𑁂 𑀲𑀦𑁆𑀥𑀸𑀬𑀸𑀳. 𑀅𑀢𑀺𑀯𑀢𑁆𑀢𑀸𑀭𑁄𑀢𑀺 𑀨𑀭𑀼𑀲𑀯𑀸𑀘𑀸𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀸𑀭𑁄. 𑀫𑀳𑀸𑀦𑀺𑀭𑀬𑁂𑀲𑀼 𑀓𑀺𑀭 𑀬𑁂𑀪𑀼𑀬𑁆𑀬𑁂𑀦 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀓𑀢𑀸𑀧𑀭𑀸𑀥𑀸𑀯 𑀧𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀢𑁂 𑀪𑀽𑀦𑀳𑀼𑀦𑁄𑀢𑀺 𑀢𑁂 𑀇𑀲𑀻𑀦𑀁 𑀅𑀢𑀺𑀯𑀢𑁆𑀢𑀸𑀭𑁄 𑀅𑀢𑁆𑀢𑀦𑁄 𑀯𑀼𑀟𑁆𑀠𑀺𑀬𑀸 𑀳𑀢𑀢𑁆𑀢𑀸 𑀪𑀽𑀦𑀳𑀼𑀦𑁄 𑀓𑁄𑀝𑁆𑀞𑀸𑀲𑀓𑀢𑀸 𑀫𑀘𑁆𑀙𑀸 𑀯𑀺𑀬 𑀧𑀘𑁆𑀘𑀦𑁆𑀢𑀺. 𑀅𑀲𑀗𑁆𑀔𑁂𑀬𑁆𑀬𑁂𑀢𑀺 𑀕𑀡𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂. 𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄𑀢𑀺 𑀤𑀸𑀭𑀼𑀡𑀓𑀫𑁆𑀫𑀓𑀸𑀭𑀺𑀦𑁄. 𑀦𑀺𑀓𑁆𑀔𑀫𑀦𑁂𑀲𑀺𑀦𑁄𑀢𑀺 𑀦𑀺𑀭𑀬𑀸 𑀦𑀺𑀓𑁆𑀔𑀫𑀦𑀁 𑀏𑀲𑀦𑁆𑀢𑀸𑀧𑀺 𑀕𑀯𑁂𑀲𑀦𑁆𑀢𑀸𑀧𑀺 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺. 𑀧𑀼𑀭𑀢𑁆𑀣𑀺𑀫𑁂𑀦𑀸𑀢𑀺 𑀬𑀤𑀸 𑀢𑀁 𑀤𑁆𑀯𑀸𑀭𑀁 𑀅𑀧𑀸𑀭𑀼𑀢𑀁 𑀳𑁄𑀢𑀺, 𑀅𑀣 𑀢𑀤𑀪𑀺𑀫𑀼𑀔𑀸 𑀥𑀸𑀯𑀦𑁆𑀢𑀺, 𑀢𑁂𑀲𑀁 𑀢𑀢𑁆𑀣 𑀙𑀯𑀺𑀆𑀤𑀻𑀦𑀺 𑀛𑀸𑀬𑀦𑁆𑀢𑀺. 𑀤𑁆𑀯𑀸𑀭𑀲𑀫𑀻𑀧𑀁 𑀧𑀢𑁆𑀢𑀸𑀦𑀜𑁆𑀘 𑀢𑁂𑀲𑀁 𑀢𑀁 𑀧𑀺𑀥𑀻𑀬𑀢𑀺, 𑀧𑀘𑁆𑀙𑀺𑀫𑀤𑁆𑀯𑀸𑀭𑀁 𑀅𑀧𑀸𑀭𑀼𑀢𑀁 𑀯𑀺𑀬 𑀔𑀸𑀬𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀦 𑀲𑀸𑀥𑀼𑀭𑀽𑀧𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀧𑁆𑀧𑀁 𑀯𑀺𑀬 𑀲𑀸𑀥𑀼𑀭𑀽𑀧𑁂 𑀇𑀲𑀬𑁄 𑀦 𑀆𑀲𑀻𑀤𑁂, 𑀦 𑀨𑀭𑀼𑀲𑀯𑀘𑀦𑁂𑀦 𑀓𑀸𑀬𑀓𑀫𑁆𑀫𑁂𑀦 𑀯𑀸 𑀖𑀝𑁆𑀝𑁂𑀦𑁆𑀢𑁄 𑀉𑀧𑀕𑀘𑁆𑀙𑁂𑀬𑁆𑀬. 𑀓𑀺𑀁𑀓𑀸𑀭𑀡𑀸? 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀻𑀦𑀁 𑀆𑀲𑀸𑀤𑀺𑀢𑀢𑁆𑀢𑀸 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀫𑀳𑀸𑀤𑀼𑀓𑁆𑀔𑀲𑁆𑀲 𑀅𑀦𑀼𑀪𑀯𑀺𑀢𑀩𑁆𑀩𑀢𑁆𑀢𑀸.
𑀇𑀤𑀸𑀦𑀺 𑀬𑁂 𑀭𑀸𑀚𑀸𑀦𑁄 𑀢𑀣𑀸𑀭𑀽𑀧𑁂 𑀆𑀲𑀸𑀤𑁂𑀢𑁆𑀯𑀸 𑀢𑀁 𑀤𑀼𑀓𑁆𑀔𑀁 𑀧𑀢𑁆𑀢𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀺𑀓𑀸𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑀺𑀓𑀸𑀬𑁄𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀫𑀳𑀸𑀓𑀸𑀬𑁄. 𑀫𑀳𑀺𑀲𑁆𑀲𑀸𑀲𑁄𑀢𑀺 ¶ 𑀫𑀳𑀸𑀥𑀦𑀼𑀕𑁆𑀕𑀳𑁄. 𑀓𑁂𑀓𑀓𑀸𑀥𑀺𑀧𑁄𑀢𑀺 𑀓𑁂𑀓𑀓𑀭𑀝𑁆𑀞𑀸𑀥𑀺𑀧𑀢𑀺. 𑀲𑀳𑀲𑁆𑀲𑀩𑀸𑀳𑀽𑀢𑀺 𑀧𑀜𑁆𑀘𑀳𑀺 𑀥𑀦𑀼𑀕𑁆𑀕𑀳𑀲𑀢𑁂𑀳𑀺 𑀩𑀸𑀳𑀼𑀲𑀳𑀲𑁆𑀲𑁂𑀦 𑀆𑀭𑁄𑀧𑁂𑀢𑀩𑁆𑀩𑀁 𑀥𑀦𑀼𑀁 𑀆𑀭𑁄𑀧𑀦𑀲𑀫𑀢𑁆𑀣𑀢𑀸𑀬 𑀲𑀳𑀲𑁆𑀲𑀩𑀸𑀳𑀼. 𑀯𑀺𑀪𑀯𑀗𑁆𑀕𑀢𑁄𑀢𑀺 𑀯𑀺𑀦𑀸𑀲𑀁 𑀧𑀢𑁆𑀢𑁄. 𑀯𑀢𑁆𑀣𑀽𑀦𑀺 𑀧𑀦 𑀲𑀭𑀪𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁧𑁭.𑁫𑁦 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀉𑀧𑀳𑀘𑁆𑀘 𑀫𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀤𑀽𑀲𑁂𑀢𑁆𑀯𑀸. 𑀫𑀸𑀢𑀗𑁆𑀕𑀲𑁆𑀫𑀺𑀦𑁆𑀢𑀺 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑁂. 𑀯𑀢𑁆𑀣𑀼 𑀫𑀸𑀢𑀗𑁆𑀕𑀚𑀸𑀢𑀓𑁂 (𑀚𑀸. 𑁧.𑁧𑁫.𑁧 𑀆𑀤𑀬𑁄) 𑀯𑀡𑁆𑀡𑀺𑀢𑀁. 𑀓𑀡𑁆𑀳𑀤𑀻𑀧𑀸𑀬𑀦𑀸𑀲𑀚𑁆𑀚𑀸𑀢𑀺 𑀓𑀡𑁆𑀳𑀤𑀻𑀧𑀸𑀬𑀦𑀁 𑀆𑀲𑀚𑁆𑀚. 𑀬𑀫𑀲𑀸𑀥𑀦𑀦𑁆𑀢𑀺 𑀦𑀺𑀭𑀬𑀧𑀸𑀮𑀓𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀝𑁆𑀞𑀸𑀦𑀁. 𑀯𑀢𑁆𑀣𑀼 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑁂 (𑀚𑀸. 𑁧.𑁧𑁦.𑁧𑁬𑁫 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀁 ¶ . 𑀇𑀲𑀺𑀦𑀸𑀢𑀺 𑀓𑀧𑀺𑀮𑀢𑀸𑀧𑀲𑁂𑀦. 𑀧𑀸𑀯𑁂𑀓𑁆𑀔𑀻𑀢𑀺 𑀧𑀯𑀺𑀝𑁆𑀞𑁄. 𑀘𑁂𑀘𑁆𑀘𑁄𑀢𑀺 𑀘𑁂𑀢𑀺𑀬𑀭𑀸𑀚𑀸. 𑀳𑀻𑀦𑀢𑁆𑀢𑁄𑀢𑀺 𑀧𑀭𑀺𑀳𑀻𑀦𑀢𑁆𑀢𑀪𑀸𑀯𑁄 𑀅𑀦𑁆𑀢𑀭𑀳𑀺𑀢𑀇𑀤𑁆𑀥𑀺. 𑀧𑀢𑁆𑀢𑀧𑀭𑀺𑀬𑀸𑀬𑀦𑁆𑀢𑀺 𑀧𑀭𑀺𑀬𑀸𑀬𑀁 𑀫𑀭𑀡𑀓𑀸𑀮𑀁 𑀧𑀢𑁆𑀯𑀸. 𑀯𑀢𑁆𑀣𑀼 𑀘𑁂𑀢𑀺𑀬𑀚𑀸𑀢𑀓𑁂 (𑀚𑀸. 𑁧.𑁮.𑁪𑁫 𑀆𑀤𑀬𑁄) 𑀓𑀣𑀺𑀢𑀁.
𑀢𑀲𑁆𑀫𑀸 ¶ 𑀳𑀻𑀢𑀺 𑀬𑀲𑁆𑀫𑀸 𑀘𑀺𑀢𑁆𑀢𑀯𑀲𑀺𑀓𑁄 𑀳𑀼𑀢𑁆𑀯𑀸 𑀇𑀲𑀻𑀲𑀼 𑀅𑀧𑀭𑀚𑁆𑀛𑀺𑀢𑁆𑀯𑀸 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀳𑀺. 𑀙𑀦𑁆𑀤𑀸𑀕𑀫𑀦𑀦𑁆𑀢𑀺 𑀙𑀦𑁆𑀤𑀸𑀤𑀺𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀕𑀢𑀺𑀕𑀫𑀦𑀁. 𑀧𑀤𑀼𑀝𑁆𑀞𑁂𑀦𑀸𑀢𑀺 𑀓𑀼𑀤𑁆𑀥𑁂𑀦. 𑀕𑀦𑁆𑀢𑀸 𑀲𑁄 𑀦𑀺𑀭𑀬𑀁 𑀅𑀥𑁄𑀢𑀺 𑀲𑁄 𑀢𑁂𑀦 𑀅𑀥𑁄𑀕𑀫𑀦𑀺𑀬𑁂𑀦 𑀓𑀫𑁆𑀫𑁂𑀦 𑀅𑀥𑁄𑀦𑀺𑀭𑀬𑀫𑁂𑀯 𑀕𑀘𑁆𑀙𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀦𑀺𑀭𑀬𑀼𑀲𑁆𑀲𑀤’’𑀦𑁆𑀢𑀺 𑀮𑀺𑀔𑀺𑀢𑀁, 𑀢𑀲𑁆𑀲 𑀉𑀲𑁆𑀲𑀤𑀦𑀺𑀭𑀬𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀟𑁆𑀠𑁂𑀢𑀺 𑀯𑀬𑁄𑀯𑀼𑀟𑁆𑀠𑁂 𑀘 𑀕𑀼𑀡𑀯𑀼𑀟𑁆𑀠𑁂 𑀘. 𑀅𑀦𑀧𑀘𑁆𑀘𑀸𑀢𑀺 𑀪𑀯𑀦𑁆𑀢𑀭𑁂𑀧𑀺 𑀅𑀧𑀘𑁆𑀘𑀁 𑀯𑀸 𑀤𑀸𑀬𑀸𑀤𑀁 𑀯𑀸 𑀦 𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀮𑀯𑀢𑁆𑀣𑀽𑀢𑀺 𑀤𑀺𑀝𑁆𑀞𑀥𑀫𑁆𑀫𑁂𑀧𑀺 𑀙𑀺𑀦𑁆𑀦𑀫𑀽𑀮𑀢𑀸𑀮𑁄 𑀯𑀺𑀬 𑀫𑀳𑀸𑀯𑀺𑀦𑀸𑀲𑀁 𑀧𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁄 𑀘 𑀧𑀩𑁆𑀩𑀚𑀺𑀢𑀁 𑀳𑀦𑁆𑀢𑀻𑀢𑀺 𑀬𑁄 𑀩𑀸𑀮𑀚𑀦𑁄 𑀲𑀫𑀡𑀁 𑀳𑀦𑀢𑀺. 𑀘𑀺𑀭𑀭𑀢𑁆𑀢𑀸𑀬𑀸𑀢𑀺 𑀘𑀺𑀭𑀁 𑀓𑀸𑀮𑀁.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀇𑀲𑀺𑀯𑀺𑀳𑁂𑀞𑀓𑀸𑀦𑀁 𑀧𑀘𑁆𑀘𑀦𑀦𑀺𑀭𑀬𑁂 𑀤𑀲𑁆𑀲𑁂𑀢𑁆𑀯𑀸 𑀉𑀧𑀭𑀺 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀧𑀘𑁆𑀘𑀦𑀦𑀺𑀭𑀬𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀝𑁆𑀞𑀯𑀺𑀤𑁆𑀥𑀁𑀲𑀦𑁄𑀢𑀺 𑀙𑀦𑁆𑀤𑀸𑀤𑀺𑀯𑀲𑁂𑀦 𑀕𑀦𑁆𑀢𑁆𑀯𑀸 𑀭𑀝𑁆𑀞𑀲𑁆𑀲 𑀯𑀺𑀤𑁆𑀥𑀁𑀲𑀦𑁄. 𑀅𑀘𑁆𑀘𑀺𑀲𑀗𑁆𑀖𑀧𑀭𑁂𑀢𑁄𑀢𑀺 𑀅𑀘𑁆𑀘𑀺𑀲𑀫𑀽𑀳𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑁂𑀚𑁄𑀪𑀓𑁆𑀔𑀲𑁆𑀲𑀸𑀢𑀺 𑀅𑀕𑁆𑀕𑀺𑀫𑁂𑀯 𑀔𑀸𑀤𑀦𑁆𑀢𑀲𑁆𑀲. 𑀕𑀢𑁆𑀢𑀸𑀦𑀻𑀢𑀺 𑀢𑀺𑀕𑀸𑀯𑀼𑀢𑁂 𑀲𑀭𑀻𑀭𑁂 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺. 𑀮𑁄𑀫𑁂𑀳𑀺 𑀘 𑀦𑀔𑁂𑀳𑀺 𑀘𑀸𑀢𑀺 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑀸𑀦𑀺 𑀏𑀓𑀚𑀸𑀮𑀸𑀦𑀺 𑀳𑁄𑀦𑁆𑀢𑀺. 𑀢𑀼𑀢𑁆𑀢𑀝𑁆𑀝𑀻𑀢𑁄𑀢𑀺 𑀆𑀦𑁂𑀜𑁆𑀚𑀓𑀸𑀭𑀡𑀁 𑀓𑀸𑀭𑀺𑀬𑀫𑀸𑀦𑁄 𑀢𑀼𑀢𑁆𑀢𑁂𑀳𑀺 𑀯𑀺𑀤𑁆𑀥𑁄 𑀦𑀸𑀕𑁄 𑀬𑀣𑀸 𑀦𑀤𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀧𑀘𑁆𑀘𑀦𑀦𑀺𑀭𑀬𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀺𑀢𑀼𑀖𑀸𑀢𑀓𑀸𑀤𑀻𑀦𑀁 𑀧𑀘𑁆𑀘𑀦𑀦𑀺𑀭𑀬𑁂 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀮𑁄𑀪𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑁄𑀪𑀸𑀢𑀺 𑀬𑀲𑀥𑀦𑀮𑁄𑀪𑁂𑀦. 𑀤𑁄𑀲𑀸 𑀯𑀸𑀢𑀺 𑀤𑀼𑀝𑁆𑀞𑀘𑀺𑀢𑁆𑀢𑀢𑀸𑀬 𑀯𑀸. 𑀦𑀺𑀢𑁆𑀢𑀘𑀦𑁆𑀢𑀺 𑀮𑁄𑀳𑀓𑀼𑀫𑁆𑀪𑀺𑀬𑀁 𑀩𑀳𑀽𑀦𑀺 𑀯𑀲𑀲𑀳𑀲𑁆𑀲𑀸𑀦𑀺 𑀧𑀓𑁆𑀓𑀁 𑀦𑀻𑀳𑀭𑀺𑀢𑁆𑀯𑀸 𑀢𑀺𑀕𑀸𑀯𑀼𑀢𑀫𑀲𑁆𑀲 𑀲𑀭𑀻𑀭𑀁 𑀦𑀺𑀢𑁆𑀢𑀘𑀁 𑀓𑀢𑁆𑀯𑀸 𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀁 𑀧𑀸𑀢𑁂𑀢𑁆𑀯𑀸 𑀢𑀺𑀡𑁆𑀳𑁂𑀳𑀺 𑀅𑀬𑀲𑀽𑀮𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀘𑀼𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀅𑀦𑁆𑀥𑀁 𑀓𑀭𑀺𑀢𑁆𑀯𑀸𑀢𑀺, 𑀫𑀳𑀸𑀭𑀸𑀚, 𑀢𑀁 𑀧𑀺𑀢𑀼𑀖𑀸𑀢𑀓𑀁 𑀦𑀺𑀭𑀬𑀧𑀸𑀮𑀸 𑀚𑀮𑀺𑀢𑀮𑁄𑀳𑀧𑀣𑀯𑀺𑀬𑀁 𑀉𑀢𑁆𑀢𑀸𑀦𑀁 𑀧𑀸𑀢𑁂𑀢𑁆𑀯𑀸 𑀚𑀮𑀺𑀢𑁂𑀳𑀺 𑀅𑀬𑀲𑀽𑀮𑁂𑀳𑀺 𑀅𑀓𑁆𑀔𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀥𑀁 𑀓𑀭𑀺𑀢𑁆𑀯𑀸 𑀫𑀼𑀔𑁂 𑀉𑀡𑁆𑀳𑀁 𑀫𑀼𑀢𑁆𑀢𑀓𑀭𑀻𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀮𑀧𑀻𑀞𑀁 𑀯𑀺𑀬 𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀧𑁆𑀧𑁂𑀦 𑀲𑀡𑁆𑀞𑀺𑀢𑁂 𑀔𑀸𑀭𑁂 𑀮𑁄𑀳𑀉𑀤𑀓𑁂 𑀦𑀺𑀫𑀼𑀚𑁆𑀚𑀸𑀧𑁂𑀦𑁆𑀢𑀺. 𑀢𑀢𑁆𑀢𑀁 𑀧𑀓𑁆𑀓𑀼𑀣𑀺𑀢𑀫𑀬𑁄𑀕𑀼𑀴𑀜𑁆𑀘𑀸𑀢𑀺 𑀧𑀼𑀦 𑀧𑀓𑁆𑀓𑀼𑀣𑀺𑀢𑀁 𑀕𑀽𑀣𑀓𑀮𑀮𑀜𑁆𑀘𑁂𑀯 𑀚𑀮𑀺𑀢𑀅𑀬𑁄𑀕𑀼𑀴𑀜𑁆𑀘 𑀔𑀸𑀤𑀸𑀧𑁂𑀦𑁆𑀢𑀺. 𑀲𑁄 𑀧𑀦 𑀢𑀁 𑀆𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀫𑀼𑀔𑀁 𑀧𑀺𑀥𑁂𑀢𑀺. 𑀅𑀣𑀲𑁆𑀲 𑀤𑀻𑀖𑁂 𑀘𑀺𑀭𑀢𑀸𑀧𑀺𑀢𑁂 𑀚𑀮𑀫𑀸𑀦𑁂 𑀨𑀸𑀮𑁂 𑀆𑀤𑀸𑀬 𑀫𑀼𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀭𑀚𑁆𑀚𑀼𑀩𑀤𑁆𑀥𑀁 𑀅𑀬𑀩𑀮𑀺𑀲𑀁 ¶ 𑀔𑀺𑀧𑀺𑀢𑁆𑀯𑀸 ¶ 𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸 ¶ 𑀢𑀲𑁆𑀫𑀺𑀁 𑀯𑀺𑀯𑀝𑁂 𑀫𑀼𑀔𑁂 𑀢𑀁 𑀅𑀬𑁄𑀕𑀼𑀴𑀁 𑀲𑀫𑁆𑀧𑀯𑀺𑀲𑀦𑁆𑀢𑀺 𑀧𑀓𑁆𑀔𑀺𑀧𑀦𑁆𑀢𑀺. 𑀭𑀓𑁆𑀔𑀲𑀸𑀢𑀺 𑀦𑀺𑀭𑀬𑀧𑀸𑀮𑀸.
𑀲𑀸𑀫𑀸 𑀘𑀸𑀢𑀺, 𑀫𑀳𑀸𑀭𑀸𑀚, 𑀢𑀲𑁆𑀲 𑀧𑀺𑀢𑀼𑀖𑀸𑀢𑀓𑀲𑁆𑀲 𑀚𑀺𑀯𑁆𑀳𑀁 𑀩𑀮𑀺𑀲𑁂𑀦 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀅𑀬𑀲𑀗𑁆𑀓𑀽𑀳𑀺 𑀧𑀣𑀯𑀺𑀬𑀁 𑀦𑀻𑀳𑀢𑀁 𑀚𑀺𑀯𑁆𑀳𑀁 𑀲𑀸𑀫𑀸 𑀲𑁄𑀡𑀸 𑀲𑀩𑀮𑀯𑀡𑁆𑀡𑀸 𑀲𑀼𑀦𑀔𑀸 𑀘 𑀮𑁄𑀳𑀢𑀼𑀡𑁆𑀟𑀸 𑀕𑀺𑀚𑁆𑀛𑀸 𑀘 𑀓𑀸𑀓𑁄𑀮𑀲𑀗𑁆𑀖𑀸 𑀘 𑀅𑀜𑁆𑀜𑁂 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀲𑀓𑀼𑀡𑀸 𑀲𑀫𑀸𑀕𑀦𑁆𑀢𑁆𑀯𑀸 𑀆𑀯𑀼𑀥𑁂𑀳𑀺 𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀯𑀺𑀪𑀚𑁆𑀚 𑀓𑀸𑀓𑀧𑀤𑀸𑀓𑀸𑀭𑁂𑀦 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀲𑀮𑁄𑀳𑀺𑀢𑀁 𑀯𑀺𑀖𑀸𑀲𑀁 𑀔𑀸𑀤𑀦𑁆𑀢𑀸 𑀯𑀺𑀬 𑀲𑀢𑁆𑀢𑁂 𑀪𑀓𑁆𑀔𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀤𑀟𑁆𑀠𑀢𑀸𑀮𑀦𑁆𑀢𑀺 𑀢𑀁 𑀧𑀺𑀢𑀼𑀖𑀸𑀢𑀓𑀁 𑀛𑀸𑀬𑀫𑀸𑀦𑀢𑀸𑀮𑀁 𑀯𑀺𑀬 𑀚𑀮𑀺𑀢𑀲𑀭𑀻𑀭𑀁. 𑀧𑀭𑀺𑀪𑀺𑀦𑁆𑀦𑀕𑀢𑁆𑀢𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀪𑀺𑀦𑁆𑀦𑀕𑀢𑁆𑀢𑀁. 𑀦𑀺𑀧𑁆𑀧𑁄𑀣𑀬𑀦𑁆𑀢𑀸𑀢𑀺 𑀚𑀮𑀺𑀢𑁂𑀳𑀺 𑀅𑀬𑀫𑀼𑀕𑁆𑀕𑀭𑁂𑀳𑀺 𑀧𑀳𑀭𑀦𑁆𑀢𑀸. 𑀭𑀢𑀻 𑀳𑀺 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀦𑀺𑀭𑀬𑀧𑀸𑀮𑀸𑀦𑀁 𑀲𑀸 𑀭𑀢𑀺 𑀓𑀻𑀴𑀸 𑀳𑁄𑀢𑀺. 𑀤𑀼𑀔𑀺𑀦𑁄 𑀧𑀦𑀻𑀢𑀭𑁂𑀢𑀺 𑀇𑀢𑀭𑁂 𑀧𑀦 𑀦𑁂𑀭𑀬𑀺𑀓𑀲𑀢𑁆𑀢𑀸 𑀤𑀼𑀓𑁆𑀔𑀺𑀢𑀸 𑀳𑁄𑀦𑁆𑀢𑀺. 𑀧𑁂𑀢𑁆𑀢𑀺𑀖𑀸𑀢𑀺𑀦𑁄𑀢𑀺 𑀧𑀺𑀢𑀼𑀖𑀸𑀢𑀓𑀸. 𑀇𑀢𑀺 𑀇𑀫𑀁 𑀧𑀺𑀢𑀼𑀖𑀸𑀢𑀓𑀸𑀦𑀁 𑀧𑀘𑁆𑀘𑀦𑀦𑀺𑀭𑀬𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀪𑀻𑀢𑀢𑀲𑀺𑀢𑁄 𑀅𑀳𑁄𑀲𑀺.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀫𑀸𑀢𑀼𑀖𑀸𑀢𑀓𑀸𑀦𑀁 𑀧𑀘𑁆𑀘𑀦𑀦𑀺𑀭𑀬𑀁 𑀤𑀲𑁆𑀲𑁂𑀲𑀺. 𑀬𑀫𑀓𑁆𑀔𑀬𑀦𑁆𑀢𑀺 𑀬𑀫𑀦𑀺𑀯𑁂𑀲𑀦𑀁, 𑀦𑀺𑀭𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀫𑁆𑀫𑀨𑀮𑀽𑀧𑀕𑁄𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀨𑀮𑁂𑀦 𑀉𑀧𑀕𑀢𑁄. 𑀅𑀫𑀦𑀼𑀲𑁆𑀲𑀸𑀢𑀺 𑀦𑀺𑀭𑀬𑀧𑀸𑀮𑀸. 𑀳𑀦𑁆𑀢𑀸𑀭𑀁 𑀚𑀦𑀬𑀦𑁆𑀢𑀺𑀬𑀸𑀢𑀺 𑀫𑀸𑀢𑀼𑀖𑀸𑀢𑀓𑀁. 𑀯𑀸𑀮𑁂𑀳𑀻𑀢𑀺 𑀅𑀬𑀫𑀓𑀘𑀺𑀯𑀸𑀮𑁂𑀳𑀺 𑀯𑁂𑀞𑁂𑀢𑁆𑀯𑀸 𑀅𑀬𑀬𑀦𑁆𑀢𑁂𑀦 𑀧𑀻𑀴𑀬𑀦𑁆𑀢𑀺. 𑀢𑀦𑁆𑀢𑀺 𑀢𑀁 𑀫𑀸𑀢𑀼𑀖𑀸𑀢𑀓𑀁. 𑀧𑀸𑀬𑁂𑀦𑁆𑀢𑀻𑀢𑀺 𑀢𑀲𑁆𑀲 𑀧𑀻𑀴𑀺𑀬𑀫𑀸𑀦𑀲𑁆𑀲 𑀭𑀼𑀳𑀺𑀭𑀁 𑀕𑀴𑀺𑀢𑁆𑀯𑀸 𑀅𑀬𑀓𑀧𑀮𑁆𑀮𑀁 𑀧𑀽𑀭𑁂𑀢𑀺. 𑀅𑀣 𑀦𑀁 𑀬𑀦𑁆𑀢𑀢𑁄 𑀦𑀻𑀳𑀭𑀦𑁆𑀢𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀭𑀻𑀭𑀁 𑀧𑀸𑀓𑀢𑀺𑀓𑀁 𑀳𑁄𑀢𑀺. 𑀢𑀁 𑀧𑀣𑀯𑀺𑀬𑀁 𑀉𑀢𑁆𑀢𑀸𑀦𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀯𑀺𑀮𑀻𑀦𑀁 𑀢𑀫𑁆𑀩𑀮𑁄𑀳𑀁 𑀯𑀺𑀬 𑀧𑀓𑁆𑀓𑀼𑀣𑀺𑀢𑀁 𑀮𑁄𑀳𑀺𑀢𑀁 𑀧𑀸𑀬𑁂𑀦𑁆𑀢𑀺. 𑀑𑀕𑀬𑁆𑀳 𑀢𑀺𑀝𑁆𑀞𑀢𑀻𑀢𑀺 𑀢𑀁 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀬𑀬𑀦𑁆𑀢𑁂𑀳𑀺 𑀧𑀻𑀴𑁂𑀢𑁆𑀯𑀸 𑀚𑁂𑀕𑀼𑀘𑁆𑀙𑁂 𑀤𑀼𑀕𑁆𑀕𑀦𑁆𑀥𑁂 𑀧𑀝𑀺𑀓𑀽𑀮𑁂 𑀫𑀳𑀦𑁆𑀢𑁂 𑀕𑀽𑀣𑀓𑀮𑀮𑀆𑀯𑀸𑀝𑁂 𑀔𑀺𑀧𑀦𑁆𑀢𑀺, 𑀲𑁄 𑀢𑀁 𑀭𑀳𑀤𑀁 𑀑𑀕𑀬𑁆𑀳 𑀑𑀕𑀸𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀢𑀺𑀓𑀸𑀬𑀸𑀢𑀺 𑀏𑀓𑀤𑁄𑀡𑀺𑀓𑀦𑀸𑀯𑀧𑁆𑀧𑀫𑀸𑀡𑀲𑀭𑀻𑀭𑀸. 𑀅𑀬𑁄𑀫𑀼𑀔𑀸𑀢𑀺 𑀅𑀬𑀲𑀽𑀘𑀺𑀫𑀼𑀔𑀸. 𑀙𑀯𑀺𑀁 𑀪𑁂𑀢𑁆𑀯𑀸𑀦𑀸𑀢𑀺 𑀙𑀯𑀺𑀫𑀸𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀝𑁆𑀞𑀺𑀫𑁆𑀧𑀺 𑀪𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀫𑁆𑀧𑀺 𑀔𑀸𑀤𑀦𑁆𑀢𑀺. 𑀲𑀁𑀕𑀺𑀤𑁆𑀥𑀸𑀢𑀺 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸. 𑀦 𑀓𑁂𑀯𑀮𑀜𑁆𑀘 𑀔𑀸𑀤𑀦𑁆𑀢𑁂𑀯, 𑀅𑀥𑁄𑀫𑀕𑁆𑀕𑀸𑀤𑀻𑀳𑀺 𑀧𑀦 𑀧𑀯𑀺𑀲𑀺𑀢𑁆𑀯𑀸 𑀫𑀼𑀔𑀸𑀤𑀻𑀳𑀺 ¶ 𑀦𑀺𑀓𑁆𑀔𑀫𑀦𑁆𑀢𑀺, 𑀯𑀸𑀫𑀧𑀲𑁆𑀲𑀸𑀤𑀻𑀳𑀺 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀸𑀤𑀻𑀳𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀲𑀓𑀮𑀫𑁆𑀧𑀺 𑀲𑀭𑀻𑀭𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀲𑁄 𑀢𑀢𑁆𑀣 𑀅𑀢𑀺𑀤𑀼𑀓𑁆𑀔𑀧𑀭𑁂𑀢𑁄 𑀯𑀺𑀭𑀯𑀦𑁆𑀢𑁄 𑀧𑀘𑁆𑀘𑀢𑀺. 𑀲𑁄 𑀘𑀸𑀢𑀺 𑀲𑁄 𑀫𑀸𑀢𑀼𑀖𑀸𑀢𑀓𑁄 𑀘 𑀢𑀁 𑀲𑀢𑀧𑁄𑀭𑀺𑀲𑀁 𑀦𑀺𑀭𑀬𑀁 𑀧𑀢𑁆𑀢𑁄 𑀲𑀲𑀻𑀲𑀓𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺, 𑀢𑀜𑁆𑀘 𑀓𑀼𑀡𑀧𑀁 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁 𑀧𑀽𑀢𑀺𑀓𑀁 𑀳𑀼𑀢𑁆𑀯𑀸 𑀯𑀸𑀬𑀢𑀺. 𑀫𑀸𑀢𑀼𑀖𑁄𑀢𑀺 𑀫𑀸𑀢𑀼𑀖𑀸𑀢𑀓𑁄.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀫𑀸𑀢𑀼𑀖𑀸𑀢𑀓𑀸𑀦𑀁 𑀧𑀘𑁆𑀘𑀦𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀕𑀩𑁆𑀪𑀧𑀸𑀢𑀓𑀸𑀦𑀁 𑀧𑀘𑁆𑀘𑀦𑀦𑀺𑀭𑀬𑀁 𑀤𑀲𑁆𑀲𑁂𑀦𑁆𑀢𑁄 ¶ 𑀕𑀸𑀣𑀫𑀸𑀳. 𑀔𑀼𑀭𑀥𑀸𑀭𑀫𑀦𑀼𑀓𑁆𑀓𑀫𑁆𑀫𑀸𑀢𑀺 𑀔𑀼𑀭𑀥𑀸𑀭𑀦𑀺𑀭𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀢𑀢𑁆𑀣 𑀓𑀺𑀭 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀫𑀳𑀦𑁆𑀢𑁂 𑀔𑀼𑀭𑁂 𑀉𑀧𑀭𑀺 𑀥𑀸𑀭𑁂 𑀓𑀢𑁆𑀯𑀸 𑀲𑀦𑁆𑀣𑀭𑀦𑁆𑀢𑀺, 𑀢𑀢𑁄 𑀬𑀸𑀳𑀺 𑀕𑀩𑁆𑀪𑀧𑀸𑀢𑀦𑀔𑀭𑀪𑁂𑀲𑀚𑁆𑀚𑀸𑀦𑀺 ¶ 𑀧𑀺𑀯𑀺𑀢𑁆𑀯𑀸 𑀕𑀩𑁆𑀪𑀸 𑀧𑀸𑀢𑀺𑀢𑀸, 𑀢𑀸 𑀕𑀩𑁆𑀪𑀧𑀸𑀢𑀺𑀦𑀺𑀬𑁄 𑀇𑀢𑁆𑀣𑀺𑀬𑁄 𑀚𑀮𑀺𑀢𑁂𑀳𑀺 𑀆𑀯𑀼𑀥𑁂𑀳𑀺 𑀧𑁄𑀣𑁂𑀦𑁆𑀢𑀸 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀢𑀸 𑀢𑀺𑀔𑀺𑀡𑀔𑀼𑀭𑀥𑀸𑀭𑀸𑀲𑀼 𑀔𑀡𑁆𑀟𑀸𑀔𑀡𑁆𑀟𑀺𑀓𑀸 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀉𑀝𑁆𑀞𑀸𑀬 𑀢𑀁 𑀤𑀼𑀭𑀪𑀺𑀲𑀫𑁆𑀪𑀯𑀁 𑀔𑀼𑀭𑀥𑀸𑀭𑀦𑀺𑀭𑀬𑀁 𑀅𑀓𑁆𑀓𑀫𑀦𑁆𑀢𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀭𑀬𑀧𑀸𑀮𑁂𑀳𑀺 𑀅𑀦𑀼𑀩𑀤𑁆𑀥𑀸 𑀤𑀼𑀕𑁆𑀕𑀁 𑀤𑀼𑀭𑀢𑀺𑀓𑁆𑀓𑀫𑀁 𑀯𑀺𑀲𑀫𑀁 𑀯𑁂𑀢𑀭𑀡𑀺𑀁 𑀦𑀤𑀺𑀁 𑀧𑀢𑀦𑁆𑀢𑀺. 𑀢𑀢𑁆𑀣 𑀓𑀫𑁆𑀫𑀓𑀸𑀭𑀡𑀁 𑀦𑀺𑀫𑀺𑀚𑀸𑀢𑀓𑁂 (𑀚𑀸. 𑁨.𑁨𑁨.𑁪𑁨𑁧 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺.
𑀏𑀯𑀁 𑀕𑀩𑁆𑀪𑀧𑀸𑀢𑀺𑀦𑀻𑀦𑀁 𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀬𑀢𑁆𑀣 𑀧𑀭𑀤𑀸𑀭𑀺𑀓𑀸 𑀘 𑀅𑀢𑀺𑀘𑀸𑀭𑀺𑀦𑀺𑀬𑁄 𑀘 𑀧𑀢𑀦𑁆𑀢𑀸 𑀧𑀘𑁆𑀘𑀦𑁆𑀢𑀺, 𑀢𑀁 𑀓𑀡𑁆𑀝𑀓𑀲𑀺𑀫𑁆𑀩𑀮𑀺𑀦𑀺𑀭𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑁄𑀫𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀻𑀢𑀺 𑀯𑁂𑀢𑀭𑀡𑀺𑀬𑀸 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀢𑀸𑀲𑀁 𑀲𑀺𑀫𑁆𑀩𑀮𑀻𑀦𑀁 𑀲𑀸𑀔𑀸 𑀑𑀮𑀫𑁆𑀩𑀦𑁆𑀢𑀺. 𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀢𑀺 𑀢𑁂 𑀧𑀚𑁆𑀚𑀮𑀺𑀢𑀲𑀭𑀻𑀭𑀸 𑀲𑀢𑁆𑀢𑀸 𑀅𑀘𑁆𑀘𑀺𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀬𑁄𑀚𑀦𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀢𑁂𑀲𑀁 𑀲𑀭𑀻𑀭𑀁, 𑀢𑀢𑁄 𑀉𑀝𑁆𑀞𑀺𑀢𑀚𑀸𑀮𑀸𑀬 𑀧𑀦 𑀲𑀤𑁆𑀥𑀺𑀁 𑀬𑁄𑀚𑀦𑀉𑀩𑁆𑀩𑁂𑀥𑀸 𑀳𑁄𑀦𑁆𑀢𑀺. 𑀏𑀢𑁂 𑀯𑀚𑀦𑁆𑀢𑀻𑀢𑀺 𑀢𑁂 𑀧𑀭𑀤𑀸𑀭𑀺𑀓𑀸 𑀲𑀢𑁆𑀢𑀸 𑀦𑀸𑀦𑀸𑀯𑀺𑀥𑁂𑀳𑀺 𑀆𑀯𑀼𑀥𑁂𑀳𑀺 𑀓𑁄𑀝𑁆𑀝𑀺𑀬𑀫𑀸𑀦𑀸 𑀏𑀢𑁂 𑀲𑀺𑀫𑁆𑀩𑀮𑀺𑀦𑀺𑀭𑀬𑁂 𑀅𑀪𑀺𑀭𑀼𑀳𑀦𑁆𑀢𑀺. 𑀢𑁂 𑀧𑀢𑀦𑁆𑀢𑀻𑀢𑀺 𑀢𑁂 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀼𑀓𑁆𑀔𑀯𑀺𑀝𑀧𑁂𑀲𑀼 𑀮𑀕𑁆𑀕𑀸 𑀛𑀸𑀬𑀺𑀢𑁆𑀯𑀸 𑀧𑀼𑀦 𑀦𑀺𑀭𑀬𑀧𑀸𑀮𑁂𑀳𑀺 𑀆𑀯𑀼𑀥𑁂𑀳𑀺 𑀯𑀺𑀳𑀢𑀸 𑀯𑀺𑀯𑀢𑁆𑀢𑀸 𑀳𑀼𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀥𑁄𑀲𑀻𑀲𑀓𑀸 𑀧𑀢𑀦𑁆𑀢𑀺. 𑀧𑀼𑀣𑀽𑀢𑀺 𑀩𑀳𑀽. 𑀯𑀺𑀦𑀺𑀯𑀺𑀤𑁆𑀥𑀗𑁆𑀕𑀸𑀢𑀺 𑀢𑁂𑀲𑀁 𑀢𑀢𑁄 𑀧𑀢𑀦𑀓𑀸𑀮𑁂 𑀳𑁂𑀝𑁆𑀞𑀸 𑀅𑀬𑀧𑀣𑀯𑀺𑀢𑁄 𑀲𑀽𑀮𑀸𑀦𑀺 𑀉𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀁 𑀫𑀢𑁆𑀣𑀓𑀁 𑀧𑀝𑀺𑀘𑁆𑀙𑀦𑁆𑀢𑀺, 𑀢𑀸𑀦𑀺 𑀢𑁂𑀲𑀁 𑀅𑀥𑁄𑀫𑀕𑁆𑀕𑁂𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀢𑁂 𑀏𑀯𑀁 𑀲𑀽𑀮𑁂𑀲𑀼 𑀯𑀺𑀤𑁆𑀥𑀲𑀭𑀻𑀭𑀸 𑀘𑀺𑀭𑀭𑀢𑁆𑀢𑀸 𑀲𑀬𑀦𑁆𑀢𑀺. 𑀤𑀻𑀖𑀦𑁆𑀢𑀺 𑀲𑀼𑀧𑀺𑀦𑁂𑀧𑀺 𑀦𑀺𑀤𑁆𑀤𑀁 𑀅𑀮𑀪𑀦𑁆𑀢𑀸 𑀤𑀻𑀖𑀭𑀢𑁆𑀢𑀁 𑀚𑀕𑁆𑀕𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂𑀢𑀺 𑀭𑀢𑁆𑀢𑀻𑀦𑀁 𑀅𑀘𑁆𑀘𑀬𑁂𑀦, 𑀘𑀺𑀭𑀓𑀸𑀮𑀸𑀢𑀺𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀣𑁄 ¶ . 𑀧𑀯𑀚𑁆𑀚𑀦𑁆𑀢𑀻𑀢𑀺 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀚𑀮𑀺𑀢𑀁 𑀮𑁄𑀳𑀓𑀼𑀫𑁆𑀪𑀺𑀁 𑀓𑀧𑁆𑀧𑁂𑀦 𑀲𑀡𑁆𑀞𑀺𑀢𑀁 𑀚𑀮𑀺𑀢𑀢𑀫𑁆𑀩𑀮𑁄𑀳𑀭𑀲𑀧𑀼𑀡𑁆𑀡𑀁 𑀮𑁄𑀳𑀓𑀼𑀫𑁆𑀪𑀺𑀁 𑀦𑀺𑀭𑀬𑀧𑀸𑀮𑁂𑀳𑀺 𑀔𑀺𑀢𑁆𑀢𑀸 𑀧𑀘𑁆𑀘𑀦𑁆𑀢𑀺. 𑀤𑀼𑀲𑁆𑀲𑀻𑀮𑀸𑀢𑀺 𑀧𑀭𑀤𑀸𑀭𑀺𑀓𑀸.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀧𑀭𑀤𑀸𑀭𑀺𑀓𑀅𑀢𑀺𑀘𑀸𑀭𑀺𑀓𑀸𑀦𑀁 𑀧𑀘𑁆𑀘𑀦𑀲𑀺𑀫𑁆𑀩𑀮𑀺𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑁄 𑀧𑀭𑀁 𑀲𑀸𑀫𑀺𑀓𑀯𑀢𑁆𑀢𑀲𑀲𑁆𑀲𑀼𑀲𑀲𑀼𑀭𑀯𑀢𑁆𑀢𑀸𑀤𑀻𑀦𑀺 𑀅𑀧𑀽𑀭𑁂𑀦𑁆𑀢𑀻𑀦𑀁 𑀧𑀘𑁆𑀘𑀦𑀝𑁆𑀞𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑀺𑀫𑀜𑁆𑀜𑀢𑀻𑀢𑀺 𑀪𑀺𑀲𑀚𑀸𑀢𑀓𑁂 (𑀚𑀸. 𑁧.𑁧𑁪.𑁭𑁮 𑀆𑀤𑀬𑁄) 𑀯𑀼𑀢𑁆𑀢𑀁 𑀲𑀸𑀫𑀺𑀓𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑀻 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺. 𑀚𑁂𑀝𑁆𑀞𑀁 𑀯𑀸𑀢𑀺 𑀲𑀸𑀫𑀺𑀓𑀲𑁆𑀲 𑀚𑁂𑀝𑁆𑀞𑀪𑀸𑀢𑀭𑀁. 𑀦𑀦𑀦𑁆𑀤𑀭𑀦𑁆𑀢𑀺 𑀲𑀸𑀫𑀺𑀓𑀲𑁆𑀲 𑀪𑀕𑀺𑀦𑀺𑀁. 𑀏𑀢𑁂𑀲𑀫𑁆𑀧𑀺 𑀳𑀺 𑀅𑀜𑁆𑀜𑀢𑀭𑀲𑁆𑀲 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀦𑁆𑀳𑀸𑀧𑀦𑀪𑁄𑀚𑀦𑀸𑀤𑀺𑀪𑁂𑀤𑀁 𑀯𑀢𑁆𑀢𑀁 𑀅𑀧𑀽𑀭𑁂𑀦𑁆𑀢𑀻 𑀢𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀦𑀼𑀧𑀝𑁆𑀞𑀧𑁂𑀦𑁆𑀢𑀻 𑀢𑁂 𑀅𑀢𑀺𑀫𑀜𑁆𑀜𑀢𑀺 𑀦𑀸𑀫, 𑀲𑀸𑀧𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀯𑀗𑁆𑀓𑁂𑀦𑀸𑀢𑀺 𑀢𑀲𑁆𑀲𑀸 𑀲𑀸𑀫𑀺𑀓𑀯𑀢𑁆𑀢𑀸𑀤𑀻𑀦𑀁 𑀅𑀧𑀭𑀺𑀧𑀽𑀭𑀺𑀓𑀸𑀬 𑀲𑀸𑀫𑀺𑀓𑀸𑀤𑀬𑁄 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀬 𑀮𑁄𑀳𑀧𑀣𑀯𑀺𑀬𑀁 ¶ 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀬𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀩𑀮𑀺𑀲𑁂𑀦 𑀚𑀺𑀯𑁆𑀳𑀕𑁆𑀕𑀁 𑀦𑀺𑀩𑁆𑀩𑀳𑀦𑁆𑀢𑀺, 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀲𑀩𑀦𑁆𑀥𑀦𑀁 𑀓𑀟𑁆𑀠𑀦𑁆𑀢𑀺. 𑀓𑀺𑀫𑀺𑀦𑀦𑁆𑀢𑀺 𑀓𑀺𑀫𑀺𑀪𑀭𑀺𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀲𑁄 𑀦𑁂𑀭𑀬𑀺𑀓𑀲𑀢𑁆𑀢𑁄 𑀏𑀯𑀁 𑀦𑀺𑀓𑁆𑀓𑀟𑁆𑀠𑀺𑀢𑀁 𑀅𑀢𑁆𑀢𑀦𑁄 𑀩𑁆𑀬𑀸𑀫𑁂𑀦 𑀩𑁆𑀬𑀸𑀫𑀫𑀢𑁆𑀢𑀁 𑀚𑀺𑀯𑁆𑀳𑀁 𑀆𑀯𑀼𑀥𑁂𑀳𑀺 𑀓𑁄𑀝𑁆𑀝𑀺𑀢𑀓𑁄𑀝𑁆𑀝𑀺𑀢𑀝𑁆𑀞𑀸𑀦𑁂 𑀲𑀜𑁆𑀚𑀸𑀢𑁂𑀳𑀺 𑀫𑀳𑀸𑀤𑁄𑀡𑀺𑀧𑁆𑀧𑀫𑀸𑀡𑁂𑀳𑀺 𑀓𑀺𑀫𑀻𑀳𑀺 𑀪𑀭𑀺𑀢𑀁 𑀧𑀲𑁆𑀲𑀢𑀺. 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀦𑀺𑀭𑀬𑀧𑀸𑀮𑁂 𑀬𑀸𑀘𑀺𑀢𑀼𑀓𑀸𑀫𑁄𑀧𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀸𑀧𑀦𑁂𑀢𑀺 𑀏𑀯𑀁 𑀲𑀸 𑀢𑀢𑁆𑀣 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀧𑀼𑀦 𑀢𑀸𑀧𑀦𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀢𑀺.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀲𑀸𑀫𑀺𑀓𑀯𑀢𑁆𑀢𑀲𑀲𑁆𑀲𑀼𑀲𑀲𑀼𑀭𑀯𑀢𑁆𑀢𑀸𑀤𑀻𑀦𑀺 𑀅𑀧𑀽𑀭𑁂𑀦𑁆𑀢𑀻𑀦𑀁 𑀧𑀘𑁆𑀘𑀦𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀽𑀓𑀭𑀺𑀓𑀸𑀤𑀻𑀦𑀁 𑀧𑀘𑁆𑀘𑀦𑀦𑀺𑀭𑀬𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀭𑀩𑁆𑀪𑀺𑀓𑀸’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀅𑀯𑀡𑁆𑀡𑁂 𑀯𑀡𑁆𑀡𑀓𑀸𑀭𑀓𑀸𑀢𑀺 𑀧𑁂𑀲𑀼𑀜𑁆𑀜𑀓𑀸𑀭𑀓𑀸. 𑀔𑀸𑀭𑀦𑀤𑀺𑀦𑁆𑀢𑀺 𑀏𑀢𑁂 𑀑𑀭𑀩𑁆𑀪𑀺𑀓𑀸𑀤𑀬𑁄 𑀏𑀢𑁂𑀳𑀺 𑀲𑀢𑁆𑀢𑀺𑀆𑀤𑀻𑀳𑀺 𑀳𑀜𑁆𑀜𑀫𑀸𑀦𑀸 𑀯𑁂𑀢𑀭𑀡𑀺𑀁 𑀦𑀤𑀺𑀁 𑀧𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀺 𑀑𑀭𑀩𑁆𑀪𑀺𑀓𑀸𑀤𑀻𑀦𑀁 𑀧𑀘𑁆𑀘𑀦𑀝𑁆𑀞𑀸𑀦𑀸𑀦𑀺 𑀦𑀺𑀫𑀺𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀓𑀼𑀝𑀓𑀸𑀭𑀻𑀢𑀺 𑀓𑀽𑀝𑀯𑀺𑀦𑀺𑀘𑁆𑀙𑀬𑀲𑁆𑀲 𑀘𑁂𑀯 𑀢𑀼𑀮𑀸𑀓𑀽𑀝𑀸𑀤𑀻𑀦𑀜𑁆𑀘 𑀓𑀸𑀭𑀓𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀽𑀝𑀯𑀺𑀦𑀺𑀘𑁆𑀙𑀬𑀓𑀽𑀝𑀝𑁆𑀝𑀓𑀸𑀭𑀓𑀓𑀽𑀝𑀅𑀕𑁆𑀖𑀸𑀧𑀦𑀺𑀓𑀸𑀦𑀁 𑀧𑀘𑁆𑀘𑀦𑀦𑀺𑀭𑀬𑀸 𑀦𑀺𑀫𑀺𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀯𑀦𑁆𑀢𑀦𑁆𑀢𑀺 𑀯𑀫𑀺𑀢𑀓𑀁. 𑀤𑀼𑀭𑀢𑁆𑀢𑀸𑀦𑀦𑁆𑀢𑀺 𑀤𑀼𑀕𑁆𑀕𑀢𑀢𑁆𑀢𑀪𑀸𑀯𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀢𑁂 𑀤𑀼𑀭𑀢𑁆𑀢𑀪𑀸𑀯𑀸 𑀲𑀢𑁆𑀢𑀸 𑀅𑀬𑀓𑀽𑀝𑁂𑀳𑀺 𑀫𑀢𑁆𑀣𑀓𑁂 𑀪𑀺𑀚𑁆𑀚𑀫𑀸𑀦𑁂 𑀯𑀫𑀦𑁆𑀢𑀺, 𑀢𑀢𑁄 𑀢𑀁 𑀯𑀦𑁆𑀢𑀁 𑀚𑀮𑀺𑀢𑀅𑀬𑀓𑀧𑀮𑁆𑀮𑁂𑀳𑀺 𑀢𑁂𑀲𑀼 𑀏𑀓𑀘𑁆𑀘𑀸𑀦𑀁 𑀫𑀼𑀔𑁂 𑀔𑀺𑀧𑀦𑁆𑀢𑀺 ¶ , 𑀇𑀢𑀺 𑀢𑁂 𑀧𑀭𑁂𑀲𑀁 𑀯𑀦𑁆𑀢𑀁 𑀪𑀼𑀜𑁆𑀚𑀦𑁆𑀢𑀺 𑀦𑀸𑀫. 𑀪𑁂𑀭𑀡𑁆𑀟𑀓𑀸𑀢𑀺 𑀲𑀺𑀗𑁆𑀕𑀸𑀮𑀸. 𑀯𑀺𑀧𑁆𑀨𑀦𑁆𑀤𑀫𑀸𑀦𑀦𑁆𑀢𑀺 𑀅𑀥𑁄𑀫𑀼𑀔𑀁 𑀦𑀺𑀧𑀚𑁆𑀚𑀸𑀧𑀺𑀢𑀁 𑀦𑀺𑀓𑁆𑀓𑀟𑁆𑀠𑀺𑀢𑀚𑀺𑀯𑁆𑀳𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀫𑀸𑀦𑀁. 𑀫𑀺𑀕𑁂𑀦𑀸𑀢𑀺 𑀑𑀓𑀘𑀸𑀭𑀓𑀫𑀺𑀕𑁂𑀦. 𑀧𑀓𑁆𑀔𑀺𑀦𑀸𑀢𑀺 𑀢𑀣𑀸𑀭𑀽𑀧𑁂𑀦𑁂𑀯. 𑀕𑀦𑁆𑀢𑀸 𑀢𑁂𑀢𑀺 𑀕𑀦𑁆𑀢𑀸𑀭𑁄 𑀢𑁂. 𑀦𑀺𑀭𑀬𑀼𑀲𑁆𑀲𑀤𑀦𑁆𑀢𑀺 𑀉𑀲𑁆𑀲𑀤𑀦𑀺𑀭𑀬𑀁. 𑀧𑀸𑀴𑀺𑀬𑀁 𑀧𑀦 ‘‘𑀦𑀺𑀭𑀬𑀁 𑀅𑀥𑁄’’𑀢𑀺 𑀮𑀺𑀔𑀺𑀢𑀁. 𑀅𑀬𑀁 𑀧𑀦 𑀦𑀺𑀭𑀬𑁄 𑀦𑀺𑀫𑀺𑀚𑀸𑀢𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺.
𑀇𑀢𑀺 𑀫𑀳𑀸𑀲𑀢𑁆𑀢𑁄 𑀏𑀢𑁆𑀢𑀓𑁂 𑀦𑀺𑀭𑀬𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁂𑀯𑀮𑁄𑀓𑀯𑀺𑀯𑀭𑀡𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀤𑁂𑀯𑀮𑁄𑀓𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋
‘‘𑀲𑀦𑁆𑀢𑁄 𑀘 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀺, 𑀲𑀼𑀘𑀺𑀡𑁆𑀡𑁂𑀦𑀺𑀥 𑀓𑀫𑁆𑀫𑀼𑀦𑀸;
𑀲𑀼𑀘𑀺𑀡𑁆𑀡𑀲𑁆𑀲 𑀨𑀮𑀁 𑀧𑀲𑁆𑀲, 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸.
‘‘𑀢𑀁 𑀢𑀁 𑀩𑁆𑀭𑀽𑀫𑀺 𑀫𑀳𑀸𑀭𑀸𑀚, 𑀥𑀫𑁆𑀫𑀁 𑀭𑀝𑁆𑀞𑀧𑀢𑀻 𑀘𑀭;
𑀢𑀣𑀸 𑀭𑀸𑀚 𑀘𑀭𑀸𑀳𑀺 𑀥𑀫𑁆𑀫𑀁, 𑀬𑀣𑀸 𑀢𑀁 𑀲𑀼𑀘𑀺𑀡𑁆𑀡𑀁 𑀦𑀸𑀦𑀼𑀢𑀧𑁆𑀧𑁂𑀬𑁆𑀬 𑀧𑀘𑁆𑀙𑀸’’𑀢𑀺.
𑀢𑀢𑁆𑀣 ¶ 𑀲𑀦𑁆𑀢𑁄𑀢𑀺 𑀓𑀸𑀬𑀸𑀤𑀻𑀳𑀺 𑀉𑀧𑀲𑀦𑁆𑀢𑀸. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑀁. 𑀲𑀇𑀦𑁆𑀤𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀇𑀦𑁆𑀤𑁂𑀳𑀺 𑀲𑀤𑁆𑀥𑀺𑀁. 𑀫𑀳𑀸𑀲𑀢𑁆𑀢𑁄 𑀳𑀺𑀲𑁆𑀲 𑀘𑀸𑀢𑀼𑀫𑀳𑀸𑀭𑀸𑀚𑀸𑀤𑀺𑀓𑁂 𑀤𑁂𑀯𑁂 𑀤𑀲𑁆𑀲𑁂𑀦𑁆𑀢𑁄, ‘‘𑀫𑀳𑀸𑀭𑀸𑀚, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀤𑁂𑀯𑁂 𑀧𑀲𑁆𑀲, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀧𑀲𑁆𑀲, 𑀢𑀸𑀯𑀢𑀺𑀁𑀲𑁂 𑀧𑀲𑁆𑀲, 𑀲𑀓𑁆𑀓𑀁 𑀧𑀲𑁆𑀲𑀸’’𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀲𑀇𑀦𑁆𑀤𑀓𑁂 𑀲𑀩𑁆𑀭𑀳𑁆𑀫𑀓𑁂 𑀘 𑀤𑁂𑀯𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀫𑁆𑀧𑀺 𑀲𑀼𑀘𑀺𑀡𑁆𑀡𑀲𑁆𑀲 𑀨𑀮𑀁 𑀇𑀤𑀫𑁆𑀧𑀺 𑀨𑀮’’𑀦𑁆𑀢𑀺 𑀤𑀲𑁆𑀲𑁂𑀲𑀺. 𑀢𑀁 𑀢𑀁 𑀩𑁆𑀭𑀽𑀫𑀻𑀢𑀺 𑀢𑀲𑁆𑀫𑀸 𑀢𑀁 𑀪𑀡𑀸𑀫𑀺. 𑀥𑀫𑁆𑀫𑀦𑁆𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀜𑁆𑀘 𑀯𑁂𑀭𑀸𑀦𑀺 𑀧𑀳𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀳𑀻𑀢𑀺. 𑀬𑀣𑀸 𑀢𑀁 𑀲𑀼𑀘𑀺𑀡𑁆𑀡𑀁 𑀦𑀸𑀦𑀼𑀢𑀧𑁆𑀧𑁂𑀬𑁆𑀬𑀸𑀢𑀺 𑀬𑀣𑀸 𑀢𑀁 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀁 𑀲𑀼𑀘𑀺𑀡𑁆𑀡𑀁 𑀧𑀺𑀢𑀼𑀖𑀸𑀢𑀓𑀫𑁆𑀫𑀧𑀘𑁆𑀘𑀬𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀢𑀁 𑀦𑀸𑀦𑀼𑀢𑀧𑁆𑀧𑁂𑀬𑁆𑀬, 𑀢𑀣𑀸 𑀢𑀁 𑀲𑀼𑀘𑀺𑀡𑁆𑀡𑀁 𑀘𑀭, 𑀩𑀳𑀼𑀁 𑀧𑀼𑀜𑁆𑀜𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄.
𑀲𑁄 ¶ 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀲𑁆𑀲𑀸𑀲𑀁 𑀧𑀝𑀺𑀮𑀪𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀓𑀺𑀜𑁆𑀘𑀺 𑀓𑀸𑀮𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀜𑁆𑀜𑁂𑀯 𑀕𑀢𑁄.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀅𑀲𑁆𑀲𑀸𑀲𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀳𑁄𑀲𑀺, 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀲𑀁𑀓𑀺𑀘𑁆𑀘𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀲𑀁𑀓𑀺𑀘𑁆𑀘𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.
𑀚𑀸𑀢𑀓𑀼𑀤𑁆𑀤𑀸𑀦𑀁 𑁋
𑀅𑀣 𑀲𑀝𑁆𑀞𑀺𑀦𑀺𑀧𑀸𑀢𑀫𑁆𑀳𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀺𑀢𑀁;
𑀚𑀸𑀢𑀓𑀲𑀯𑁆𑀳𑀬𑀦𑁄 𑀧𑀯𑀭𑁄, 𑀲𑁄𑀡𑀓𑀅𑀭𑀺𑀦𑁆𑀤𑀫𑀲𑀯𑁆𑀳𑀬𑀦𑁄;
𑀢𑀣𑀸 𑀯𑀼𑀢𑁆𑀢𑀭𑀣𑁂𑀲𑀪𑀓𑀺𑀘𑁆𑀘𑀯𑀭𑁄𑀢𑀺.
𑀲𑀝𑁆𑀞𑀺𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁨𑁦. 𑀲𑀢𑁆𑀢𑀢𑀺𑀦𑀺𑀧𑀸𑀢𑁄
[𑁫𑁩𑁧] 𑁧. 𑀓𑀼𑀲𑀚𑀸𑀢𑀓𑀯𑀡𑁆𑀡𑀦𑀸
𑀇𑀤𑀁 ¶ ¶ 𑀢𑁂 𑀭𑀝𑁆𑀞𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀁 𑀅𑀮𑀗𑁆𑀓𑀢𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀑𑀮𑁄𑀓𑁂𑀢𑁆𑀯𑀸 𑀓𑀺𑀮𑁂𑀲𑀸𑀪𑀺𑀪𑀽𑀢𑁄 𑀅𑀦𑀪𑀺𑀭𑀢𑁄 𑀯𑀺𑀳𑀸𑀲𑀺 𑀤𑀻𑀖𑀓𑁂𑀲𑀦𑀔𑁄 𑀓𑀺𑀮𑀺𑀝𑁆𑀞𑀘𑀻𑀯𑀭𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀻𑀲𑀦𑁆𑀣𑀢𑀕𑀢𑁆𑀢𑁄. 𑀬𑀣𑀸 𑀳𑀺 𑀤𑁂𑀯𑀮𑁄𑀓𑀸 𑀘𑀯𑀦𑀥𑀫𑁆𑀫𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀲𑀭𑀻𑀭𑁂 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀉𑀪𑁄𑀳𑀺 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦𑀸𑀪𑀺𑀭𑀫𑀢𑀺, 𑀏𑀯𑀫𑁂𑀯 𑀲𑀸𑀲𑀦𑀸 𑀘𑀯𑀦𑀥𑀫𑁆𑀫𑀸𑀦𑀁 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀲𑀤𑁆𑀥𑀸𑀧𑀼𑀧𑁆𑀨𑀸𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀲𑀻𑀮𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀲𑀭𑀻𑀭𑁂 𑀫𑀗𑁆𑀓𑀼𑀢𑀸𑀬 𑀘𑁂𑀯 𑀅𑀬𑀲𑀯𑀲𑁂𑀦 𑀘 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀓𑀺𑀮𑁂𑀲𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀦𑀸𑀪𑀺𑀭𑀫𑀦𑁆𑀢𑀺. 𑀢𑀲𑁆𑀲𑀧𑀺 𑀢𑀸𑀦𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀅𑀣 𑀦𑀁 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀤𑀲𑁆𑀲𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀫𑀸, 𑀪𑀺𑀓𑁆𑀔𑀼, 𑀓𑀺𑀮𑁂𑀲𑀯𑀲𑀺𑀓𑁄 𑀳𑁄𑀳𑀺, 𑀫𑀸𑀢𑀼𑀕𑀸𑀫𑁄 𑀦𑀸𑀫𑁂𑀲 𑀧𑀸𑀧𑁄, 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀁 𑀯𑀺𑀦𑁄𑀤𑁂𑀳𑀺, 𑀲𑀸𑀲𑀦𑁂 𑀅𑀪𑀺𑀭𑀫, 𑀫𑀸𑀢𑀼𑀕𑀸𑀫𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀳𑀺 𑀢𑁂𑀚𑀯𑀦𑁆𑀢𑁄𑀧𑀺 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀦𑀺𑀢𑁆𑀢𑁂𑀚𑀸 𑀳𑀼𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀫𑀮𑁆𑀮𑀭𑀝𑁆𑀞𑁂 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀬𑀁 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀺𑀓𑀸 ¶ ¶ 𑀲𑀻𑀮𑀯𑀢𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺, 𑀲𑀸 𑀦𑁂𑀯 𑀧𑀼𑀢𑁆𑀢𑀁, 𑀦 𑀥𑀻𑀢𑀭𑀁 𑀮𑀪𑀺. 𑀅𑀣𑀲𑁆𑀲 𑀦𑀸𑀕𑀭𑀸 𑀘𑁂𑀯 𑀭𑀝𑁆𑀞𑀯𑀸𑀲𑀺𑀦𑁄 𑀘 𑀭𑀸𑀚𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀭𑀝𑁆𑀞𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀭𑀝𑁆𑀞𑀁 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 ‘‘𑀫𑀬𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀅𑀥𑀫𑁆𑀫𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀓𑀲𑁆𑀫𑀸 𑀉𑀧𑀓𑁆𑀓𑁄𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀤𑁂𑀯, 𑀅𑀥𑀫𑁆𑀫𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑀺𑀘 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 ¶ 𑀧𑀦 𑀯𑁄 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀜𑁆𑀜𑁄 ¶ 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀭𑀝𑁆𑀞𑀁 𑀦𑀸𑀲𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀲𑀫𑀢𑁆𑀣𑀁 𑀧𑀼𑀢𑁆𑀢𑀁 𑀧𑀢𑁆𑀣𑁂𑀣𑀸’’𑀢𑀺. ‘‘𑀧𑀼𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁄 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀧𑀞𑀫𑀁 𑀢𑀸𑀯 𑀏𑀓𑀁 𑀲𑀢𑁆𑀢𑀸𑀳𑀁 𑀘𑀼𑀮𑁆𑀮𑀦𑀸𑀝𑀓𑀁 𑀥𑀫𑁆𑀫𑀦𑀸𑀝𑀓𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣, 𑀲𑀘𑁂 𑀲𑀸 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀲𑀸𑀥𑀼, 𑀦𑁄 𑀘𑁂, 𑀅𑀣 𑀫𑀚𑁆𑀛𑀺𑀫𑀦𑀸𑀝𑀓𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀢𑀢𑁄 𑀚𑁂𑀝𑁆𑀞𑀦𑀸𑀝𑀓𑀁, 𑀅𑀯𑀲𑁆𑀲𑀁 𑀏𑀢𑁆𑀢𑀓𑀸𑀲𑀼 𑀇𑀢𑁆𑀣𑀻𑀲𑀼 𑀏𑀓𑀸 𑀧𑀼𑀜𑁆𑀜𑀯𑀢𑀻 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 𑀢𑁂𑀲𑀁 𑀯𑀘𑀦𑁂𑀦 𑀢𑀣𑀸 𑀓𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑁂 𑀬𑀣𑀸𑀲𑀼𑀔𑀁 𑀅𑀪𑀺𑀭𑀫𑀺𑀢𑁆𑀯𑀸 𑀆𑀕𑀢𑀸𑀕𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀘𑁆𑀘𑀺 𑀯𑁄 𑀧𑀼𑀢𑁆𑀢𑁄 𑀮𑀤𑁆𑀥𑁄’’𑀢𑀺? 𑀲𑀩𑁆𑀩𑀸 ‘‘𑀦 𑀮𑀪𑀸𑀫, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀦 𑀫𑁂 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀦𑀸𑀕𑀭𑀸 𑀧𑀼𑀦 𑀢𑀣𑁂𑀯 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀉𑀧𑀓𑁆𑀓𑁄𑀲𑀣, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀘𑀦𑁂𑀦 𑀦𑀸𑀝𑀓𑀸𑀦𑀺 𑀯𑀺𑀲𑁆𑀲𑀝𑁆𑀞𑀸𑀦𑀺, 𑀏𑀓𑀸𑀧𑀺 𑀧𑀼𑀢𑁆𑀢𑀁 𑀦 𑀮𑀪𑀢𑀺, 𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀸’’𑀢𑀺 𑀆𑀳. ‘‘𑀤𑁂𑀯, 𑀏𑀢𑀸 𑀤𑀼𑀲𑁆𑀲𑀻𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦𑀺𑀧𑁆𑀧𑀼𑀜𑁆𑀜𑀸, 𑀦𑀢𑁆𑀣𑀺 𑀏𑀢𑀸𑀲𑀁 𑀧𑀼𑀢𑁆𑀢𑀮𑀸𑀪𑀸𑀬 𑀧𑀼𑀜𑁆𑀜𑀁, 𑀢𑀼𑀫𑁆𑀳𑁂 𑀏𑀢𑀸𑀲𑀼 𑀧𑀼𑀢𑁆𑀢𑀁 𑀅𑀮𑀪𑀦𑁆𑀢𑀻𑀲𑀼𑀧𑀺 𑀫𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀣, 𑀅𑀕𑁆𑀕𑀫𑀳𑁂𑀲𑀻 𑀯𑁄 𑀲𑀻𑀮𑀯𑀢𑀻 𑀤𑁂𑀯𑀻 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀢𑀁 𑀯𑀺𑀲𑁆𑀲𑀚𑁆𑀚𑁂𑀣, 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺.
𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀇𑀢𑁄 𑀓𑀺𑀭 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀸 𑀲𑀻𑀮𑀯𑀢𑀺𑀁 𑀤𑁂𑀯𑀺𑀁 𑀥𑀫𑁆𑀫𑀦𑀸𑀝𑀓𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀧𑀼𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑁂𑀯𑀺𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀑𑀢𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀲𑁆𑀲𑀸 𑀲𑀻𑀮𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑁂𑀯𑀺𑀬𑀸 𑀧𑀼𑀢𑁆𑀢𑀧𑀢𑁆𑀣𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀏𑀢𑀺𑀲𑁆𑀲𑀸 𑀫𑀬𑀸 𑀧𑀼𑀢𑁆𑀢𑀁 ¶ 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀤𑁂𑀯𑀮𑁄𑀓𑁂 𑀏𑀢𑀺𑀲𑁆𑀲𑀸 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀢𑁆𑀢𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀅𑀤𑁆𑀤𑀲. 𑀲𑁄 𑀓𑀺𑀭 𑀢𑀤𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀆𑀬𑀼𑀁 𑀔𑁂𑀧𑁂𑀢𑁆𑀯𑀸 𑀉𑀧𑀭𑀺𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀯𑀺𑀫𑀸𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀫𑀸𑀭𑀺𑀲, 𑀢𑀬𑀸 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀑𑀓𑁆𑀓𑀸𑀓𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑀁 ‘‘𑀢𑁆𑀯𑀫𑁆𑀧𑀺 𑀏𑀢𑀺𑀲𑁆𑀲𑀸 𑀏𑀯 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀫𑀸 𑀔𑁄 𑀧𑀦𑀲𑁆𑀲𑀸 𑀓𑁄𑀘𑀺 𑀲𑀻𑀮𑀁 𑀪𑀺𑀦𑁆𑀤𑀢𑀽’’𑀢𑀺 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀅𑀕𑀫𑀸𑀲𑀺.
𑀫𑀳𑀸𑀚𑀦𑁄𑀧𑀺 𑀦𑁆𑀳𑀸𑀢𑁄 𑀅𑀮𑀗𑁆𑀓𑀢𑁄 ‘‘𑀅𑀳𑀁 𑀤𑁂𑀯𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀤𑁂𑀯𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀓𑁆𑀓𑀜𑁆𑀘 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 ¶ 𑀧𑀭𑀺𑀳𑀸𑀲𑀫𑀓𑀸𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀫𑀁 𑀢𑀼𑀫𑁆𑀳𑁂 𑀕𑀭𑀳𑀣, 𑀲𑀘𑁂𑀧𑀺 𑀫𑁂 𑀲𑀭𑀻𑀭𑀁 𑀚𑀺𑀡𑁆𑀡𑀁, 𑀭𑀸𑀕𑁄 𑀧𑀦 𑀦 𑀚𑀻𑀭𑀢𑀺, 𑀲𑀘𑁂 𑀲𑀻𑀮𑀯𑀢𑀺𑀁 𑀮𑀪𑀺𑀲𑁆𑀲𑀸𑀫𑀺, 𑀆𑀤𑀸𑀬 𑀦𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑁂𑀲𑀁 𑀧𑀼𑀭𑀢𑁄𑀯 𑀅𑀝𑁆𑀞𑀸𑀲𑀺. 𑀅𑀜𑁆𑀜𑁄 𑀓𑁄𑀘𑀺 𑀢𑀲𑁆𑀲 𑀢𑁂𑀚𑁂𑀦 𑀧𑀼𑀭𑀢𑁄 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀦𑁆𑀢𑀺𑀜𑁆𑀜𑁂𑀯 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸 ¶ 𑀕𑀭𑀳𑀺𑀁𑀲𑀼 ‘‘𑀧𑀲𑁆𑀲𑀣, 𑀪𑁄, 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄 𑀏𑀯𑀁 𑀉𑀢𑁆𑀢𑀫𑀭𑀽𑀧𑀥𑀭𑀁 𑀤𑁂𑀯𑀺𑀁 𑀆𑀤𑀸𑀬 𑀕𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀬𑀼𑀢𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺. 𑀤𑁂𑀯𑀻𑀧𑀺 ‘‘𑀫𑀳𑀮𑁆𑀮𑀓𑁄 𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀦 𑀅𑀝𑁆𑀝𑀻𑀬𑀢𑀺 𑀦 𑀳𑀭𑀸𑀬𑀢𑀺. 𑀭𑀸𑀚𑀸𑀧𑀺 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺.
𑀲𑀓𑁆𑀓𑁄 𑀢𑀁 𑀆𑀤𑀸𑀬 𑀦𑀕𑀭𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑀲𑀫𑀻𑀧𑁂 𑀏𑀓𑀁 𑀖𑀭𑀁 𑀫𑀸𑀧𑁂𑀲𑀺 𑀯𑀺𑀯𑀝𑀤𑁆𑀯𑀸𑀭𑀁 𑀧𑀜𑁆𑀜𑀢𑁆𑀢𑀓𑀝𑁆𑀞𑀢𑁆𑀣𑀭𑀺𑀓𑀁. 𑀅𑀣 𑀦𑀁 𑀲𑀸 ‘‘𑀇𑀤𑀁 𑀢𑁂 𑀦𑀺𑀯𑁂𑀲𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀆𑀫, 𑀪𑀤𑁆𑀤𑁂, 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀏𑀓𑁄, 𑀇𑀤𑀸𑀦𑀺𑀫𑁆𑀳𑀸 𑀫𑀬𑀁 𑀤𑁆𑀯𑁂 𑀚𑀦𑀸, 𑀅𑀳𑀁 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀫𑀺𑀲𑁆𑀲𑀸 𑀓𑀝𑁆𑀞𑀢𑁆𑀣𑀭𑀺𑀓𑀸𑀬 𑀦𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀫𑀼𑀤𑀼𑀦𑀸 𑀳𑀢𑁆𑀣𑁂𑀦 𑀧𑀭𑀸𑀫𑀲𑀦𑁆𑀢𑁄 ¶ 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑀁 𑀨𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑀸 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑀨𑀭𑀡𑁂𑀦 𑀲𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀣 𑀦𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀦𑁂𑀢𑁆𑀯𑀸 𑀅𑀮𑀗𑁆𑀓𑀢𑀯𑀺𑀫𑀸𑀦𑁂 𑀤𑀺𑀩𑁆𑀩𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀦 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀫𑀦𑀼𑀲𑁆𑀲𑁄, 𑀲𑀓𑁆𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀲𑀓𑁆𑀓𑁄𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀤𑀺𑀩𑁆𑀩𑀦𑀸𑀝𑀓𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀅𑀳𑁄𑀲𑀺. 𑀲𑀸 𑀲𑀬𑀦𑀸 𑀉𑀝𑁆𑀞𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀓𑁆𑀓𑁄 ‘‘𑀯𑀭𑀁 𑀢𑁂, 𑀤𑁂𑀯𑀺, 𑀤𑀤𑀸𑀫𑀺, 𑀕𑀡𑁆𑀳𑀸𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺, 𑀤𑁂𑀯, 𑀏𑀓𑀁 𑀧𑀼𑀢𑁆𑀢𑀁 𑀫𑁂 𑀤𑁂𑀳𑀻’’𑀢𑀺. ‘‘𑀤𑁂𑀯𑀺, 𑀢𑀺𑀝𑁆𑀞𑀢𑀼 𑀏𑀓𑁄 𑀧𑀼𑀢𑁆𑀢𑁄, 𑀅𑀳𑀁 𑀢𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀤𑀲𑁆𑀲𑀸𑀫𑀺. 𑀢𑁂𑀲𑀼 𑀧𑀦 𑀏𑀓𑁄 𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺 𑀯𑀺𑀭𑀽𑀧𑀯𑀸, 𑀏𑀓𑁄 𑀭𑀽𑀧𑀯𑀸 𑀦 𑀧𑀜𑁆𑀜𑀯𑀸. 𑀢𑁂𑀲𑀼 𑀓𑀢𑀭𑀁 𑀧𑀞𑀫𑀁 𑀇𑀘𑁆𑀙𑀲𑀻’’𑀢𑀺? ‘‘𑀧𑀜𑁆𑀜𑀯𑀦𑁆𑀢𑀁, 𑀤𑁂𑀯𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀓𑀼𑀲𑀢𑀺𑀡𑀁 𑀤𑀺𑀩𑁆𑀩𑀯𑀢𑁆𑀣𑀁 𑀤𑀺𑀩𑁆𑀩𑀘𑀦𑁆𑀤𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀓𑁄𑀓𑀦𑀼𑀤𑀜𑁆𑀘 𑀦𑀸𑀫 𑀯𑀻𑀡𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀭𑀜𑁆𑀜𑁄 𑀲𑀬𑀦𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀏𑀓𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀗𑁆𑀕𑀼𑀝𑁆𑀞𑀓𑁂𑀦 𑀢𑀲𑁆𑀲𑀸 𑀦𑀸𑀪𑀺𑀁 𑀧𑀭𑀸𑀫𑀲𑀺. 𑀢𑀲𑁆𑀫𑀺𑀁 𑀔𑀡𑁂 ¶ 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀓𑁆𑀓𑁄𑀧𑀺 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀧𑀡𑁆𑀟𑀺𑀢𑀸 𑀤𑁂𑀯𑀻 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀚𑀸𑀦𑀺.
𑀅𑀣 𑀦𑀁 𑀧𑀩𑀼𑀤𑁆𑀥𑁄 𑀭𑀸𑀚𑀸 𑀤𑀺𑀲𑁆𑀯𑀸, ‘‘𑀤𑁂𑀯𑀺, 𑀓𑁂𑀦 𑀦𑀻𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀓𑁆𑀓𑁂𑀦, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀧𑀘𑁆𑀘𑀓𑁆𑀔𑀢𑁄 𑀏𑀓𑀁 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀁 𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀁 𑀅𑀤𑁆𑀤𑀲𑀁, 𑀓𑀲𑁆𑀫𑀸 𑀫𑀁 𑀯𑀜𑁆𑀘𑁂𑀲𑀻’’𑀢𑀺? ‘‘𑀲𑀤𑁆𑀤𑀳𑀣, 𑀤𑁂𑀯, 𑀲𑀓𑁆𑀓𑁄 𑀫𑀁 𑀕𑀳𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀦𑁂𑀲𑀻’’𑀢𑀺. ‘‘𑀦 𑀲𑀤𑁆𑀤𑀳𑀸𑀫𑀺, 𑀤𑁂𑀯𑀻’’𑀢𑀺. 𑀅𑀣𑀲𑁆𑀲 𑀲𑀸 𑀲𑀓𑁆𑀓𑀤𑀢𑁆𑀢𑀺𑀬𑀁 𑀓𑀼𑀲𑀢𑀺𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀤𑁆𑀤𑀳𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀓𑀼𑀲𑀢𑀺𑀡𑀁 𑀦𑀸𑀫 𑀬𑀢𑁄 𑀓𑀼𑀢𑁄𑀘𑀺 𑀮𑀩𑁆𑀪𑀢𑀻’’𑀢𑀺 𑀦 𑀲𑀤𑁆𑀤𑀳𑀺. 𑀅𑀣𑀲𑁆𑀲 𑀲𑀸 𑀤𑀺𑀩𑁆𑀩𑀯𑀢𑁆𑀣𑀸𑀤𑀻𑀦𑀺 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀸𑀦𑀺 𑀤𑀺𑀲𑁆𑀯𑀸 𑀲𑀤𑁆𑀤𑀳𑀺𑀢𑁆𑀯𑀸, ‘‘𑀪𑀤𑁆𑀤𑁂, 𑀲𑀓𑁆𑀓𑁄 𑀢𑀸𑀯 𑀢𑀁 𑀦𑁂𑀢𑀼, 𑀧𑀼𑀢𑁆𑀢𑁄 𑀧𑀦 𑀢𑁂 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺. ‘‘𑀮𑀤𑁆𑀥𑁄 𑀫𑀳𑀸𑀭𑀸𑀚, 𑀕𑀩𑁆𑀪𑁄 𑀫𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺. 𑀲𑁄 𑀢𑀼𑀝𑁆𑀞𑁄 𑀢𑀲𑁆𑀲𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺 ¶ . 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 𑀅𑀜𑁆𑀜𑀁 𑀦𑀸𑀫𑀁 𑀅𑀓𑀢𑁆𑀯𑀸 𑀓𑀼𑀲𑀢𑀺𑀡𑀦𑀸𑀫𑀫𑁂𑀯 ¶ 𑀅𑀓𑀁𑀲𑀼. 𑀓𑀼𑀲𑀓𑀼𑀫𑀸𑀭𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀇𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀤𑀲𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀚𑀬𑀫𑁆𑀧𑀢𑀻’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀯𑀟𑁆𑀠𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀜𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄𑀯 𑀧𑀜𑁆𑀜𑀸𑀬 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺.
𑀅𑀣𑀲𑁆𑀲 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀭𑀸𑀚𑀸 𑀭𑀚𑁆𑀚𑀁 𑀤𑀸𑀢𑀼𑀓𑀸𑀫𑁄 𑀤𑁂𑀯𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀧𑀼𑀢𑁆𑀢𑀲𑁆𑀲 𑀢𑁂 𑀭𑀚𑁆𑀚𑀁 𑀤𑀢𑁆𑀯𑀸 𑀦𑀸𑀝𑀓𑀸𑀦𑀺 𑀉𑀧𑀝𑁆𑀞𑀧𑁂𑀲𑁆𑀲𑀸𑀫, 𑀫𑀬𑀁 𑀚𑀻𑀯𑀦𑁆𑀢𑀸𑀬𑁂𑀯 𑀦𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀔𑁄 𑀧𑀦 𑀬𑀲𑁆𑀲 𑀭𑀜𑁆𑀜𑁄 𑀥𑀻𑀢𑀭𑀁 𑀇𑀘𑁆𑀙𑀢𑀺, 𑀢𑀫𑀲𑁆𑀲 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑀺𑀲𑁆𑀲𑀸𑀫, 𑀘𑀺𑀢𑁆𑀢𑀫𑀲𑁆𑀲 𑀚𑀸𑀦𑀸𑀳𑀺, 𑀓𑀢𑀭𑀁 𑀭𑀸𑀚𑀥𑀻𑀢𑀭𑀁 𑀭𑁄𑀘𑁂𑀲𑀻’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀓𑀼𑀫𑀸𑀭𑀲𑁆𑀲 𑀇𑀫𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀘𑀺𑀢𑁆𑀢𑀁 𑀚𑀸𑀦𑀸𑀳𑀻’’𑀢𑀺 𑀏𑀓𑀁 𑀧𑀭𑀺𑀘𑀸𑀭𑀺𑀓𑀁 𑀧𑁂𑀲𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀦 𑀭𑀽𑀧𑀯𑀸, 𑀭𑀽𑀧𑀲𑀫𑁆𑀧𑀦𑁆𑀦𑀸 𑀭𑀸𑀚𑀥𑀻𑀢𑀸 𑀆𑀦𑀻𑀢𑀸𑀧𑀺 𑀫𑀁 𑀤𑀺𑀲𑁆𑀯𑀸 ‘𑀓𑀺𑀁 𑀫𑁂 𑀇𑀫𑀺𑀦𑀸 𑀯𑀺𑀭𑀽𑀧𑁂𑀦𑀸’𑀢𑀺 𑀧𑀮𑀸𑀬𑀺𑀲𑁆𑀲𑀢𑀺 𑀇𑀢𑀺 𑀦𑁄 𑀮𑀚𑁆𑀚𑀺𑀢𑀩𑁆𑀩𑀓𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀥𑀭𑀫𑀸𑀦𑁂 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀫𑀬𑁆𑀳𑀁 𑀦𑁂𑀯 𑀭𑀚𑁆𑀚𑁂𑀦𑀢𑁆𑀣𑁄, 𑀦 𑀦𑀸𑀝𑀓𑁂𑀳𑀺, 𑀅𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀣𑀁 𑀤𑁂𑀯𑀺𑀬𑀸 𑀆𑀭𑁄𑀘𑁂𑀲𑀺, 𑀤𑁂𑀯𑀻𑀧𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑁄𑀧𑀺 ¶ 𑀧𑀝𑀺𑀩𑀸𑀳𑀢𑀺𑀬𑁂𑀯. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀏𑀓𑀦𑁆𑀢𑁂𑀦 𑀧𑀝𑀺𑀧𑀓𑁆𑀔𑀪𑀸𑀯𑁄 𑀦𑀸𑀫 𑀦 𑀬𑀼𑀢𑁆𑀢𑁄, 𑀏𑀓𑀁 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.
𑀲𑁄 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀩𑀳𑀼𑀁 𑀲𑀼𑀯𑀡𑁆𑀡𑀁 𑀤𑀢𑁆𑀯𑀸 ‘‘𑀏𑀓𑀁 𑀇𑀢𑁆𑀣𑀺𑀭𑀽𑀧𑀓𑀁 𑀓𑀭𑁄𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀅𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀲𑀬𑀫𑁆𑀧𑀺 𑀇𑀢𑁆𑀣𑀺𑀭𑀽𑀧𑀓𑀁 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀲𑀫𑀺𑀚𑁆𑀛𑀢𑀺. 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀚𑀺𑀯𑁆𑀳𑀸𑀬 𑀅𑀯𑀡𑁆𑀡𑀦𑀻𑀬𑀲𑁄𑀪𑀁 𑀅𑀳𑁄𑀲𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀔𑁄𑀫𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑁂 𑀞𑀧𑀸𑀧𑁂𑀲𑀺. 𑀲𑁄 𑀓𑀫𑁆𑀫𑀸𑀭𑀚𑁂𑀝𑁆𑀞𑀓𑁂𑀦 𑀆𑀪𑀢𑀭𑀽𑀧𑀓𑀁 𑀤𑀺𑀲𑁆𑀯𑀸 𑀢𑀁 𑀕𑀭𑀳𑀺𑀢𑁆𑀯𑀸 ‘‘𑀕𑀘𑁆𑀙 𑀅𑀫𑁆𑀳𑀸𑀓𑀁 𑀲𑀺𑀭𑀺𑀕𑀩𑁆𑀪𑁂 𑀞𑀧𑀺𑀢𑀭𑀽𑀧𑀓𑀁 𑀆𑀳𑀭𑀸’’𑀢𑀺 𑀆𑀳. 𑀲𑁄 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀝𑁆𑀞𑁄 ¶ 𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑀼𑀁 𑀏𑀓𑀸 𑀤𑁂𑀯𑀘𑁆𑀙𑀭𑀸, 𑀆𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀤𑁂𑀯, 𑀲𑀺𑀭𑀺𑀕𑀩𑁆𑀪𑁂 𑀅𑀬𑁆𑀬𑀸 𑀏𑀓𑀺𑀓𑀸𑀯 𑀞𑀺𑀢𑀸, 𑀉𑀧𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. ‘‘𑀢𑀸𑀢, 𑀕𑀘𑁆𑀙, 𑀲𑀼𑀯𑀡𑁆𑀡𑀭𑀽𑀧𑀓𑀁 𑀏𑀢𑀁, 𑀆𑀳𑀭𑀸’’𑀢𑀺 𑀧𑀼𑀦 𑀧𑁂𑀲𑀺𑀢𑁄 𑀆𑀳𑀭𑀺. 𑀓𑀼𑀫𑀸𑀭𑁄 𑀓𑀫𑁆𑀫𑀸𑀭𑁂𑀦 𑀓𑀢𑀁 𑀭𑀽𑀧𑀓𑀁 𑀲𑀼𑀯𑀡𑁆𑀡𑀕𑀩𑁆𑀪𑁂 𑀦𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 ¶ 𑀓𑀢𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀣𑁂 𑀞𑀧𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀮𑀪𑀦𑁆𑀢𑁄 𑀕𑀡𑁆𑀳𑀸𑀫𑀻’’𑀢𑀺 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺.
𑀲𑀸 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀫𑀳𑀸𑀧𑀼𑀜𑁆𑀜𑁄 𑀲𑀓𑁆𑀓𑀤𑀢𑁆𑀢𑀺𑀬𑁄 𑀅𑀦𑀼𑀘𑁆𑀙𑀯𑀺𑀓𑀁 𑀓𑀼𑀫𑀸𑀭𑀺𑀓𑀁 𑀮𑀪𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀏𑀯𑀭𑀽𑀧𑀁 𑀮𑀪𑀦𑁆𑀢𑀸 𑀕𑀡𑁆𑀳𑀺𑀲𑁆𑀲𑀣, 𑀇𑀫𑀁 𑀭𑀽𑀧𑀓𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀞𑀧𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀘𑀭𑀦𑁆𑀢𑀸 𑀬𑀲𑁆𑀲 𑀭𑀜𑁆𑀜𑁄 𑀏𑀯𑀭𑀽𑀧𑀁 𑀥𑀻𑀢𑀭𑀁 𑀧𑀲𑁆𑀲𑀣, 𑀢𑀲𑁆𑀲𑁂𑀢𑀁 𑀤𑀢𑁆𑀯𑀸 ‘𑀑𑀓𑁆𑀓𑀸𑀓𑀭𑀸𑀚𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀯𑀸𑀳𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀢𑀁 𑀆𑀤𑀸𑀬 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀬𑀁 𑀭𑀸𑀚𑀥𑀸𑀦𑀺𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀣 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀚𑀦𑀲𑁆𑀲 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀢𑀁 𑀭𑀽𑀧𑀓𑀁 𑀯𑀢𑁆𑀣𑀧𑀼𑀧𑁆𑀨𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀲𑀺𑀯𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀢𑀺𑀢𑁆𑀣𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 𑀅𑀫𑀘𑁆𑀘𑀸 𑀲𑀬𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀓𑀣𑀸𑀲𑀯𑀦𑀢𑁆𑀣𑀁 𑀏𑀓𑀫𑀦𑁆𑀢𑁂 𑀢𑀺𑀝𑁆𑀞𑀦𑁆𑀢𑀺. 𑀫𑀳𑀸𑀚𑀦𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀼𑀯𑀡𑁆𑀡𑀭𑀽𑀧𑀓’’𑀦𑁆𑀢𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 ‘‘𑀅𑀬𑀁 𑀫𑀦𑀼𑀲𑁆𑀲𑀺𑀢𑁆𑀣𑀻 𑀲𑀫𑀸𑀦𑀸𑀧𑀺 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀞𑀺𑀢𑀸, 𑀓𑀼𑀢𑁄 𑀯𑀸 𑀆𑀕𑀢𑀸, 𑀅𑀫𑁆𑀳𑀸𑀓𑀁 𑀦𑀕𑀭𑁂 𑀏𑀯𑀭𑀽𑀧𑀸 𑀦𑀢𑁆𑀣𑀻’’𑀢𑀺 𑀯𑀡𑁆𑀡𑁂𑀦𑁆𑀢𑁄 𑀧𑀓𑁆𑀓𑀫𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸 ‘‘𑀲𑀘𑁂 𑀇𑀥 𑀏𑀯𑀭𑀽𑀧𑀸 𑀤𑀸𑀭𑀺𑀓𑀸 𑀪𑀯𑁂𑀬𑁆𑀬, ‘𑀅𑀲𑀼𑀓𑀸 𑀭𑀸𑀚𑀥𑀻𑀢𑀸 𑀯𑀺𑀬 ¶ 𑀅𑀲𑀼𑀓𑀸 𑀅𑀫𑀘𑁆𑀘𑀥𑀻𑀢𑀸 𑀯𑀺𑀬𑀸’𑀢𑀺 𑀯𑀤𑁂𑀬𑁆𑀬𑀼𑀁, 𑀅𑀤𑁆𑀥𑀸 𑀇𑀥 𑀏𑀯𑀭𑀽𑀧𑀸 𑀦𑀢𑁆𑀣𑀻’’𑀢𑀺 𑀢𑀁 𑀆𑀤𑀸𑀬 𑀅𑀜𑁆𑀜𑀁 𑀦𑀕𑀭𑀁 𑀕𑀘𑁆𑀙𑀦𑁆𑀢𑀺.
𑀢𑁂 𑀏𑀯𑀁 𑀯𑀺𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀣 𑀫𑀤𑁆𑀤𑀭𑀜𑁆𑀜𑁄 𑀅𑀝𑁆𑀞 𑀥𑀻𑀢𑀭𑁄 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸, 𑀢𑀸𑀲𑀁 𑀲𑀩𑁆𑀩𑀚𑁂𑀝𑁆𑀞𑀺𑀓𑀸 𑀧𑀪𑀸𑀯𑀢𑀻 𑀦𑀸𑀫. 𑀢𑀲𑁆𑀲𑀸 𑀲𑀭𑀻𑀭𑀢𑁄 ¶ 𑀩𑀸𑀮𑀲𑀽𑀭𑀺𑀬𑀲𑁆𑀲 𑀧𑀪𑀸 𑀯𑀺𑀬 𑀧𑀪𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀅𑀦𑁆𑀥𑀓𑀸𑀭𑁂𑀧𑀺 𑀘𑀢𑀼𑀳𑀢𑁆𑀣𑁂 𑀅𑀦𑁆𑀢𑁄𑀕𑀩𑁆𑀪𑁂 𑀧𑀤𑀻𑀧𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀩𑁆𑀩𑁄 𑀕𑀩𑁆𑀪𑁄 𑀏𑀓𑁄𑀪𑀸𑀲𑁄𑀯 𑀳𑁄𑀢𑀺. 𑀥𑀸𑀢𑀻 𑀧𑀦𑀲𑁆𑀲𑀸 𑀔𑀼𑀚𑁆𑀚𑀸, 𑀲𑀸 𑀧𑀪𑀸𑀯𑀢𑀺𑀁 𑀪𑁄𑀚𑁂𑀢𑁆𑀯𑀸 𑀢𑀲𑁆𑀲𑀸 𑀲𑀻𑀲𑀦𑁆𑀳𑀸𑀧𑀦𑀢𑁆𑀣𑀁 𑀅𑀝𑁆𑀞𑀳𑀺 𑀯𑀡𑁆𑀡𑀤𑀸𑀲𑀻𑀳𑀺 𑀅𑀝𑁆𑀞 𑀖𑀝𑁂 𑀕𑀸𑀳𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀉𑀤𑀓𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀻 𑀢𑀺𑀢𑁆𑀣𑀫𑀕𑁆𑀕𑁂 𑀞𑀺𑀢𑀁 𑀢𑀁 𑀭𑀽𑀧𑀓𑀁 𑀤𑀺𑀲𑁆𑀯𑀸 ‘‘𑀧𑀪𑀸𑀯𑀢𑀻’’𑀢𑀺 𑀲𑀜𑁆𑀜𑀸𑀬 ‘‘𑀅𑀬𑀁 𑀤𑀼𑀩𑁆𑀩𑀺𑀦𑀻𑀢𑀸 ‘𑀲𑀻𑀲𑀁 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’𑀢𑀺 𑀅𑀫𑁆𑀳𑁂 𑀉𑀤𑀓𑀢𑁆𑀣𑀸𑀬 𑀧𑁂𑀲𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀢𑀺𑀢𑁆𑀣𑀫𑀕𑁆𑀕𑁂 𑀞𑀺𑀢𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀭𑁂 𑀓𑀼𑀮𑀮𑀚𑁆𑀚𑀸𑀧𑀦𑀺𑀓𑁂 𑀅𑀫𑁆𑀳𑁂𑀳𑀺 𑀧𑀼𑀭𑀺𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀓𑀲𑁆𑀫𑀸 𑀇𑀥 𑀞𑀺𑀢𑀸𑀲𑀺, 𑀲𑀘𑁂 𑀭𑀸𑀚𑀸 𑀚𑀸𑀦𑀺𑀲𑁆𑀲𑀢𑀺, 𑀦𑀸𑀲𑁂𑀲𑁆𑀲𑀢𑀺 𑀦𑁄’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂𑀦 𑀕𑀡𑁆𑀟𑀧𑀲𑁆𑀲𑁂 𑀧𑀳𑀭𑀺, 𑀳𑀢𑁆𑀣𑀢𑀮𑀁 𑀪𑀺𑀚𑁆𑀚𑀫𑀸𑀦𑀁 𑀯𑀺𑀬 𑀚𑀸𑀢𑀁. 𑀢𑀢𑁄 ‘‘𑀲𑀼𑀯𑀡𑁆𑀡𑀭𑀽𑀧𑀓’’𑀦𑁆𑀢𑀺 𑀜𑀢𑁆𑀯𑀸 𑀳𑀲𑀫𑀸𑀦𑀸 𑀢𑀸𑀲𑀁 𑀯𑀡𑁆𑀡𑀤𑀸𑀲𑀻𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀻 ‘‘𑀧𑀲𑁆𑀲𑀣𑁂𑀢𑀁 𑀫𑁂 𑀓𑀫𑁆𑀫𑀁, 𑀫𑀫 𑀥𑀻𑀢𑀸𑀢𑀺𑀲𑀜𑁆𑀜𑀸𑀬 𑀧𑀳𑀸𑀭𑀁 𑀅𑀤𑀸𑀲𑀺𑀁, 𑀅𑀬𑀁 𑀫𑀫 𑀥𑀻𑀢𑀼 𑀲𑀦𑁆𑀢𑀺𑀓𑁂 𑀓𑀺𑀫𑀕𑁆𑀖𑀢𑀺, 𑀓𑁂𑀯𑀮𑀁 𑀫𑁂 𑀳𑀢𑁆𑀣𑁄 𑀤𑀼𑀓𑁆𑀔𑀸𑀧𑀺𑀢𑁄’’𑀢𑀺 𑀆𑀳.
𑀅𑀣 𑀦𑀁 𑀭𑀸𑀚𑀤𑀽𑀢𑀸 𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 ‘𑀫𑀫 𑀥𑀻𑀢𑀸 𑀇𑀢𑁄 𑀅𑀪𑀺𑀭𑀽𑀧𑀢𑀭𑀸’𑀢𑀺 𑀯𑀤𑀦𑁆𑀢𑀻 𑀓𑀁 𑀦𑀸𑀫 𑀓𑀣𑁂𑀲𑀻’’𑀢𑀺 ¶ 𑀆𑀳𑀁𑀲𑀼. ‘‘𑀫𑀤𑁆𑀤𑀭𑀜𑁆𑀜𑁄 𑀥𑀻𑀢𑀭𑀁 𑀧𑀪𑀸𑀯𑀢𑀺𑀁, 𑀇𑀤𑀁 𑀭𑀽𑀧𑀓𑀁 𑀢𑀲𑁆𑀲𑀸 𑀲𑁄𑀴𑀲𑀺𑀫𑁆𑀧𑀺 𑀓𑀮𑀁 𑀦 𑀅𑀕𑁆𑀖𑀢𑀻’’𑀢𑀺. 𑀢𑁂 𑀢𑀼𑀝𑁆𑀞𑀫𑀸𑀦𑀲𑀸 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀑𑀓𑁆𑀓𑀸𑀓𑀭𑀜𑁆𑀜𑁄 𑀤𑀽𑀢𑀸 𑀤𑁆𑀯𑀸𑀭𑁂 𑀞𑀺𑀢𑀸’’𑀢𑀺 𑀧𑀝𑀺𑀳𑀸𑀭𑁂𑀲𑀼𑀁. 𑀭𑀸𑀚𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀞𑀺𑀢𑀓𑁄𑀯 ‘‘𑀧𑀓𑁆𑀓𑁄𑀲𑀣𑀸’’𑀢𑀺 𑀆𑀳. 𑀢𑁂 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀢𑀼𑀫𑁆𑀳𑀸𑀓𑀁 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀓𑀢𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀸 ‘‘𑀓𑀺𑀫𑀢𑁆𑀣𑀁 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀝𑁆𑀞𑀸 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀲𑀻𑀳𑀲𑁆𑀲𑀭𑁄 𑀧𑀼𑀢𑁆𑀢𑁄 𑀓𑀼𑀲𑀓𑀼𑀫𑀸𑀭𑁄 𑀦𑀸𑀫, 𑀭𑀸𑀚𑀸 𑀢𑀲𑁆𑀲 𑀭𑀚𑁆𑀚𑀁 𑀤𑀸𑀢𑀼𑀓𑀸𑀫𑁄 𑀅𑀫𑁆𑀳𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀥𑀻𑀢𑀸 𑀧𑀪𑀸𑀯𑀢𑀻, 𑀢𑀁 𑀢𑀲𑁆𑀲 𑀤𑁂𑀣, 𑀇𑀫𑀜𑁆𑀘 𑀲𑀼𑀯𑀡𑁆𑀡𑀭𑀽𑀧𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀕𑀡𑁆𑀳𑀣𑀸’’𑀢𑀺 𑀢𑀁 𑀭𑀽𑀧𑀓𑀁 𑀢𑀲𑁆𑀲 𑀅𑀤𑀁𑀲𑀼. 𑀲𑁄𑀧𑀺 ‘‘𑀏𑀯𑀭𑀽𑀧𑁂𑀦 𑀫𑀳𑀸𑀭𑀸𑀚𑁂𑀦 𑀲𑀤𑁆𑀥𑀺𑀁 𑀯𑀺𑀯𑀸𑀳𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺 ¶ . 𑀅𑀣 𑀦𑀁 𑀤𑀽𑀢𑀸 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀳𑀺 ¶ 𑀦 𑀲𑀓𑁆𑀓𑀸 𑀧𑀧𑀜𑁆𑀘𑀁 𑀓𑀸𑀢𑀼𑀁, 𑀓𑀼𑀫𑀸𑀭𑀺𑀓𑀸𑀬 𑀮𑀤𑁆𑀥𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫, 𑀅𑀣 𑀦𑀁 𑀲𑁄 𑀆𑀕𑀦𑁆𑀢𑁆𑀯𑀸 𑀆𑀤𑀸𑀬 𑀕𑀫𑀺𑀲𑁆𑀲𑀢𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀘 𑀤𑁂𑀯𑀺𑀬𑀸 𑀘 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀓𑀼𑀲𑀸𑀯𑀢𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀕𑀮𑀦𑀕𑀭𑀁 𑀧𑀸𑀧𑀼𑀡𑀺. 𑀫𑀤𑁆𑀤𑀭𑀸𑀚𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑀁 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀫𑀓𑀸𑀲𑀺.
𑀲𑀻𑀮𑀯𑀢𑀻 𑀤𑁂𑀯𑀻 𑀧𑀡𑁆𑀟𑀺𑀢𑀢𑁆𑀢𑀸 ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀸𑀳𑀤𑁆𑀯𑀻𑀳𑀘𑁆𑀘𑀬𑁂𑀦 𑀫𑀤𑁆𑀤𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀲𑀼𑀡𑀺𑀲𑀁 𑀤𑀝𑁆𑀞𑀼𑀓𑀸𑀫𑀸𑀫𑁆𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀧𑀪𑀸𑀯𑀢𑀻 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀆𑀕𑀦𑁆𑀢𑁆𑀯𑀸 𑀲𑀲𑁆𑀲𑀼𑀁 𑀯𑀦𑁆𑀤𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀓𑀼𑀫𑀸𑀭𑀺𑀓𑀸 𑀅𑀪𑀺𑀭𑀽𑀧𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀯𑀺𑀭𑀽𑀧𑁄. 𑀲𑀘𑁂 𑀏𑀲𑀸 𑀢𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀏𑀓𑀸𑀳𑀫𑁆𑀧𑀺 𑀅𑀯𑀲𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀢𑀺, 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀫𑀤𑁆𑀤𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀲𑀼𑀡𑀺𑀲𑀸 𑀫𑁂 𑀧𑀼𑀢𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸, 𑀅𑀧𑀺𑀘 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑀓𑀼𑀮𑀧𑀯𑁂𑀡𑀺𑀬𑀸 𑀆𑀕𑀢𑀁 𑀘𑀸𑀭𑀺𑀢𑁆𑀢𑀁 𑀅𑀢𑁆𑀣𑀺, 𑀲𑀘𑁂 𑀅𑀬𑀁 𑀢𑀲𑁆𑀫𑀺𑀁 𑀘𑀸𑀭𑀺𑀢𑁆𑀢𑁂 𑀯𑀢𑁆𑀢𑀺𑀲𑁆𑀲𑀢𑀺, 𑀦𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳. ‘‘𑀓𑀺𑀁 𑀧𑀦 𑀯𑁄 𑀘𑀸𑀭𑀺𑀢𑁆𑀢’’𑀦𑁆𑀢𑀺. ‘‘𑀅𑀫𑁆𑀳𑀸𑀓𑀁 𑀯𑀁𑀲𑁂 𑀬𑀸𑀯 𑀏𑀓𑀲𑁆𑀲 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀸𑀯 𑀤𑀺𑀯𑀸 𑀲𑀸𑀫𑀺𑀓𑀁 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀏𑀲𑀸 𑀢𑀣𑀸 𑀓𑀭𑀺𑀲𑁆𑀲𑀢𑀺, 𑀦𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀭𑀸𑀚𑀸 ‘‘𑀓𑀺𑀁, 𑀅𑀫𑁆𑀫, 𑀲𑀓𑁆𑀔𑀺𑀲𑁆𑀲𑀲𑀺 𑀏𑀯𑀁 𑀯𑀢𑁆𑀢𑀺𑀢𑀼’’𑀦𑁆𑀢𑀺 𑀥𑀻𑀢𑀭𑀁 𑀧𑀼𑀘𑁆𑀙𑀺. 𑀲𑀸 ‘‘𑀆𑀫 𑀢𑀸𑀢𑀸’’𑀢𑀺 𑀆𑀳. 𑀢𑀢𑁄 𑀑𑀓𑁆𑀓𑀸𑀓𑀭𑀸𑀚𑀸 𑀫𑀤𑁆𑀤𑀭𑀜𑁆𑀜𑁄 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀫𑀤𑁆𑀤𑀭𑀸𑀚𑀸𑀧𑀺 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀥𑀻𑀢𑀭𑀁 𑀉𑀬𑁆𑀬𑁄𑀚𑁂𑀲𑀺.
𑀑𑀓𑁆𑀓𑀸𑀓𑁄 𑀓𑀼𑀲𑀸𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀩𑀦𑁆𑀥𑀦𑀸𑀦𑀺 𑀫𑁄𑀘𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀤𑀢𑁆𑀯𑀸 𑀧𑀪𑀸𑀯𑀢𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀸𑀭𑁂𑀢𑁆𑀯𑀸 𑀦𑀕𑀭𑁂 ‘‘𑀓𑀼𑀲𑀭𑀸𑀚𑀲𑁆𑀲 𑀆𑀡𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑁂 𑀭𑀸𑀚𑀸𑀦𑁄 𑀬𑁂𑀲𑀁 𑀥𑀻𑀢𑀭𑁄 𑀅𑀢𑁆𑀣𑀺, 𑀢𑁂 𑀓𑀼𑀲𑀭𑀜𑁆𑀜𑁄 𑀥𑀻𑀢𑀭𑁄 𑀧𑀳𑀺𑀡𑀺𑀁𑀲𑀼 ¶ . 𑀬𑁂𑀲𑀁 𑀧𑀼𑀢𑁆𑀢𑀸 ¶ 𑀅𑀢𑁆𑀣𑀺, 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀆𑀓𑀗𑁆𑀔𑀦𑁆𑀢𑀸 𑀧𑀼𑀢𑁆𑀢𑁂 𑀉𑀧𑀝𑁆𑀞𑀸𑀓𑁂 𑀓𑀢𑁆𑀯𑀸 𑀧𑀳𑀺𑀡𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀸𑀝𑀓𑀧𑀭𑀺𑀯𑀸𑀭𑁄 𑀫𑀳𑀸 𑀅𑀳𑁄𑀲𑀺, 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀧𑀪𑀸𑀯𑀢𑀺𑀁 𑀤𑀺𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺, 𑀲𑀸𑀧𑀺 𑀢𑀁 𑀤𑀺𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺, 𑀉𑀪𑀺𑀦𑁆𑀦𑀁 𑀭𑀢𑁆𑀢𑀺𑀤𑀲𑁆𑀲𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀧𑀪𑀸𑀯𑀢𑀺𑀬𑀸 𑀲𑀭𑀻𑀭𑀧𑁆𑀧𑀪𑀸𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀺𑀭𑀺𑀕𑀩𑁆𑀪𑀢𑁄 𑀭𑀢𑁆𑀢𑀺𑀁𑀬𑁂𑀯 𑀦𑀺𑀓𑁆𑀔𑀫𑀢𑀺.
𑀲𑁄 ¶ 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀪𑀸𑀯𑀢𑀺𑀁 𑀤𑀺𑀯𑀸 𑀤𑀝𑁆𑀞𑀼𑀓𑀸𑀫𑁄 𑀫𑀸𑀢𑀼𑀬𑀸 𑀆𑀭𑁄𑀘𑁂𑀲𑀺. 𑀲𑀸 ‘‘𑀫𑀸 𑀢𑁂 𑀢𑀸𑀢, 𑀭𑀼𑀘𑁆𑀘𑀺, 𑀬𑀸𑀯 𑀏𑀓𑀁 𑀧𑀼𑀢𑁆𑀢𑀁 𑀮𑀪𑀲𑀺, 𑀢𑀸𑀯 𑀆𑀕𑀫𑁂𑀳𑀻’’𑀢𑀺, 𑀧𑀝𑀺𑀓𑁆𑀔𑀺𑀧𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑁂𑀯. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀢𑁂𑀦 𑀳𑀺 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀫𑁂𑀡𑁆𑀟𑀯𑁂𑀲𑁂𑀦 𑀢𑀺𑀝𑁆𑀞, 𑀅𑀳𑀁 𑀢𑀁 𑀢𑀢𑁆𑀣 𑀆𑀦𑁂𑀲𑁆𑀲𑀸𑀫𑀺, 𑀅𑀣 𑀦𑀁 𑀅𑀓𑁆𑀔𑀻𑀦𑀺 𑀧𑀽𑀭𑁂𑀢𑁆𑀯𑀸 𑀑𑀮𑁄𑀓𑁂𑀬𑁆𑀬𑀸𑀲𑀺, 𑀫𑀸 𑀘 𑀅𑀢𑁆𑀢𑀸𑀦𑀁 𑀚𑀸𑀦𑀸𑀧𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀳𑀢𑁆𑀣𑀺𑀲𑀸𑀮𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀧𑀪𑀸𑀯𑀢𑀺𑀁 ‘‘𑀏𑀳𑀺 𑀲𑀸𑀫𑀺𑀓𑀲𑁆𑀲 𑀳𑀢𑁆𑀣𑀺𑀦𑁄 𑀧𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀅𑀬𑀁 𑀳𑀢𑁆𑀣𑀻 𑀅𑀲𑀼𑀓𑁄 𑀦𑀸𑀫, 𑀅𑀬𑀁 𑀳𑀢𑁆𑀣𑀻 𑀅𑀲𑀼𑀓𑁄 𑀦𑀸𑀫𑀸’’𑀢𑀺 𑀢𑀲𑁆𑀲𑀸 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀢𑀁 𑀭𑀸𑀚𑀸 𑀫𑀸𑀢𑀼 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑀯𑁂𑀲𑁂𑀦 𑀳𑀢𑁆𑀣𑀺𑀙𑀓𑀡𑀧𑀺𑀡𑁆𑀟𑁂𑀦 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺. 𑀲𑀸 𑀓𑀼𑀤𑁆𑀥𑀸 ‘‘𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀢𑁂 𑀳𑀢𑁆𑀣𑀁 𑀙𑀺𑀦𑁆𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀤𑁂𑀯𑀺𑀁 𑀉𑀚𑁆𑀛𑀸𑀧𑁂𑀲𑀺. 𑀭𑀸𑀚𑀫𑀸𑀢𑀸 ‘‘𑀫𑀸 𑀅𑀫𑁆𑀫 𑀓𑀼𑀚𑁆𑀛𑀻’’𑀢𑀺 𑀲𑀼𑀡𑀺𑀲𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺. 𑀧𑀼𑀦𑀧𑀺 𑀭𑀸𑀚𑀸 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀲𑁆𑀲𑀲𑀸𑀮𑀸𑀬 𑀅𑀲𑁆𑀲𑀕𑁄𑀧𑀓𑀯𑁂𑀲𑁂𑀦 𑀢𑀁 𑀤𑀺𑀲𑁆𑀯𑀸 𑀢𑀣𑁂𑀯 𑀅𑀲𑁆𑀲𑀙𑀓𑀡𑀧𑀺𑀡𑁆𑀟𑁂𑀦 𑀧𑀳𑀭𑀺. 𑀢𑀤𑀸𑀧𑀺 𑀢𑀁 𑀓𑀼𑀤𑁆𑀥𑀁 𑀲𑀲𑁆𑀲𑀼 𑀲𑀜𑁆𑀜𑀸𑀧𑁂𑀲𑀺.
𑀧𑀼𑀦𑁂𑀓𑀤𑀺𑀯𑀲𑁂 𑀧𑀪𑀸𑀯𑀢𑀻 𑀫𑀳𑀸𑀲𑀢𑁆𑀢𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑀲𑁆𑀲𑀼𑀬𑀸 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀮𑀁 𑀫𑀸 𑀢𑁂 𑀭𑀼𑀘𑁆𑀘𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀢𑁂𑀦 𑀳𑀺 𑀲𑁆𑀯𑁂 𑀫𑀫 𑀧𑀼𑀢𑁆𑀢𑁄 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑀺𑀲𑁆𑀲𑀢𑀺, 𑀢𑁆𑀯𑀁 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀧𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀚𑀬𑀫𑁆𑀧𑀢𑀺𑀓𑀼𑀫𑀸𑀭𑀁 𑀭𑀸𑀚𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑀸𑀧𑁂𑀲𑀺. 𑀲𑀸 𑀧𑀪𑀸𑀯𑀢𑀺𑀁 𑀆𑀤𑀸𑀬 𑀲𑀻𑀳𑀧𑀜𑁆𑀚𑀭𑁂 𑀞𑀢𑁆𑀯𑀸 ‘‘𑀧𑀲𑁆𑀲 𑀢𑀯 𑀲𑀸𑀫𑀺𑀓𑀲𑁆𑀲 𑀲𑀺𑀭𑀺𑀲𑁄𑀪𑀕𑁆𑀕’’𑀦𑁆𑀢𑀺 𑀆𑀳. 𑀲𑀸 ‘‘𑀅𑀦𑀼𑀘𑁆𑀙𑀯𑀺𑀓𑁄 ¶ 𑀫𑁂 𑀲𑀸𑀫𑀺𑀓𑁄 𑀮𑀤𑁆𑀥𑁄’’𑀢𑀺 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀁 𑀧𑀦 𑀫𑀳𑀸𑀲𑀢𑁆𑀢𑁄 𑀳𑀢𑁆𑀣𑀺𑀫𑁂𑀡𑁆𑀟𑀯𑁂𑀲𑁂𑀦 𑀚𑀬𑀫𑁆𑀧𑀢𑀺𑀲𑁆𑀲 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑀸𑀬𑁂𑀦 𑀧𑀪𑀸𑀯𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀭𑀼𑀘𑀺𑀬𑀸 𑀓𑁂𑀴𑀺𑀁 𑀤𑀲𑁆𑀲𑁂𑀲𑀺. 𑀳𑀢𑁆𑀣𑀺𑀫𑁆𑀳𑀺 𑀅𑀢𑀺𑀓𑁆𑀓𑀦𑁆𑀢𑁂 𑀭𑀸𑀚𑀫𑀸𑀢𑀸 𑀧𑀪𑀸𑀯𑀢𑀺𑀁 𑀧𑀼𑀘𑁆𑀙𑀺 𑁋 ‘‘𑀤𑀺𑀝𑁆𑀞𑁄 𑀢𑁂, 𑀅𑀫𑁆𑀫, 𑀲𑀸𑀫𑀺𑀓𑁄’’𑀢𑀺. ‘‘𑀆𑀫 𑀅𑀬𑁆𑀬𑁂, 𑀧𑀘𑁆𑀙𑀺𑀫𑀸𑀲𑀦𑁂 𑀧𑀦𑀲𑁆𑀲 𑀦𑀺𑀲𑀺𑀦𑁆𑀦𑁄 𑀳𑀢𑁆𑀣𑀺𑀫𑁂𑀡𑁆𑀟𑁄 𑀅𑀢𑀺𑀯𑀺𑀬 𑀤𑀼𑀩𑁆𑀩𑀺𑀦𑀻𑀢𑁄, 𑀫𑀬𑁆𑀳𑀁 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀦𑀺 𑀤𑀲𑁆𑀲𑁂𑀲𑀺, 𑀓𑀲𑁆𑀫𑀸 𑀏𑀯𑀭𑀽𑀧𑀁 ¶ 𑀅𑀮𑀓𑁆𑀔𑀺𑀓𑀁 ¶ 𑀭𑀜𑁆𑀜𑁄 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀲𑀼𑀁, 𑀦𑀻𑀳𑀭𑀸𑀧𑁂𑀳𑀺 𑀦’’𑀦𑁆𑀢𑀺? ‘‘𑀅𑀫𑁆𑀫, 𑀭𑀜𑁆𑀜𑁄 𑀧𑀘𑁆𑀙𑀺𑀫𑀸𑀲𑀦𑁂 𑀭𑀓𑁆𑀔𑀸 𑀦𑀸𑀫 𑀇𑀘𑁆𑀙𑀺𑀢𑀩𑁆𑀩𑀸’’𑀢𑀺.
𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀳𑀢𑁆𑀣𑀺𑀫𑁂𑀡𑁆𑀟𑁄 𑀅𑀢𑀺𑀯𑀺𑀬 𑀦𑀺𑀩𑁆𑀪𑀬𑁄, 𑀭𑀸𑀚𑀸𑀦𑀁 ‘𑀭𑀸𑀚𑀸’𑀢𑀺𑀧𑀺 𑀦 𑀫𑀜𑁆𑀜𑀢𑀺, 𑀓𑀺𑀁 𑀦𑀼 𑀔𑁄 𑀏𑀲𑁄𑀯 𑀓𑀼𑀲𑀭𑀸𑀚𑀸, 𑀅𑀤𑁆𑀥𑀸 𑀳𑀺 𑀏𑀲𑁄 𑀅𑀢𑀺𑀯𑀺𑀬 𑀯𑀺𑀭𑀽𑀧𑁄 𑀏𑀯 𑀪𑀯𑀺𑀲𑁆𑀲𑀢𑀺, 𑀢𑁂𑀦𑁂𑀯 𑀫𑀁 𑀦 𑀤𑀲𑁆𑀲𑁂𑀦𑁆𑀢𑀻’’𑀢𑀺. 𑀲𑀸 𑀔𑀼𑀚𑁆𑀚𑀁 𑀓𑀡𑁆𑀡𑀫𑀽𑀮𑁂 𑀆𑀳 𑁋 ‘‘𑀅𑀫𑁆𑀫, 𑀕𑀘𑁆𑀙 𑀢𑀸𑀯 𑀚𑀸𑀦𑀸𑀳𑀺, 𑀓𑀺𑀁 𑀧𑀼𑀭𑀺𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑀓𑁄 𑀭𑀸𑀚𑀸, 𑀉𑀤𑀸𑀳𑀼 𑀧𑀘𑁆𑀙𑀺𑀫𑀸𑀲𑀦𑁂’’𑀢𑀺? ‘‘𑀓𑀣𑀁 𑀧𑀦𑀸𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀳𑀺 𑀲𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀧𑀞𑀫𑀢𑀭𑀁 𑀳𑀢𑁆𑀣𑀺𑀧𑀺𑀝𑁆𑀞𑀺𑀢𑁄 𑀑𑀢𑀭𑀺𑀲𑁆𑀲𑀢𑀺, 𑀇𑀫𑀸𑀬 𑀲𑀜𑁆𑀜𑀸𑀬 𑀚𑀸𑀦𑀸𑀳𑀻’’𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀺𑀢𑀸 𑀧𑀞𑀫𑀁 𑀫𑀳𑀸𑀲𑀢𑁆𑀢𑀁 𑀑𑀢𑀭𑀦𑁆𑀢𑀁 𑀅𑀤𑁆𑀤𑀲, 𑀧𑀘𑁆𑀙𑀸 𑀚𑀬𑀫𑁆𑀧𑀢𑀺𑀓𑀼𑀫𑀸𑀭𑀁. 𑀫𑀳𑀸𑀲𑀢𑁆𑀢𑁄𑀧𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀔𑀼𑀚𑁆𑀚𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀏𑀲𑀸 𑀆𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀅𑀦𑁆𑀢𑀭𑀁 𑀧𑀪𑀸𑀯𑀢𑀺𑀬𑀸 𑀫𑀸 𑀓𑀣𑁂𑀳𑀻’’𑀢𑀺 𑀤𑀴𑁆𑀳𑀁 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀸 𑀕𑀦𑁆𑀢𑁆𑀯𑀸 ‘‘𑀧𑀼𑀭𑀺𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀧𑀞𑀫𑀁 𑀑𑀢𑀭𑀻’’𑀢𑀺 𑀆𑀳. 𑀧𑀪𑀸𑀯𑀢𑀻 𑀢𑀲𑁆𑀲𑀸 𑀯𑀘𑀦𑀁 𑀲𑀤𑁆𑀤𑀳𑀺.
𑀫𑀳𑀸𑀲𑀢𑁆𑀢𑁄𑀧𑀺 𑀧𑀼𑀦 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀸𑀢𑀭𑀁 𑀬𑀸𑀘𑀺. 𑀲𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀢𑁂𑀦 𑀳𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀉𑀬𑁆𑀬𑀸𑀦𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑀁 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀦 𑀲𑀻𑀲𑀁 𑀙𑀸𑀤𑁂𑀢𑁆𑀯𑀸 𑀧𑀼𑀧𑁆𑀨𑀺𑀢𑀧𑀤𑀼𑀫𑁂𑀦 𑀫𑀼𑀔𑀁 𑀆𑀯𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀸𑀢𑀸𑀧𑀺𑀲𑁆𑀲 𑀧𑀪𑀸𑀯𑀢𑀺𑀁 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 ‘‘𑀇𑀫𑁂 𑀭𑀼𑀓𑁆𑀔𑁂 𑀧𑀲𑁆𑀲, 𑀲𑀓𑀼𑀡𑁂 𑀧𑀲𑁆𑀲, 𑀫𑀺𑀕𑁂 𑀧𑀲𑁆𑀲𑀸’’𑀢𑀺 𑀧𑀮𑁄𑀪𑀬𑀫𑀸𑀦𑀸 𑀧𑁄𑀓𑁆𑀔𑀭𑀡𑀻𑀢𑀻𑀭𑀁 𑀧𑀸𑀬𑀸𑀲𑀺. 𑀲𑀸 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀧𑁄𑀓𑁆𑀔𑀭𑀡𑀺𑀁 ¶ 𑀤𑀺𑀲𑁆𑀯𑀸 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀧𑀭𑀺𑀘𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀓𑀻𑀴𑀦𑁆𑀢𑀻 𑀢𑀁 𑀧𑀤𑀼𑀫𑀁 𑀤𑀺𑀲𑁆𑀯𑀸 𑀯𑀺𑀘𑀺𑀦𑀺𑀢𑀼𑀓𑀸𑀫𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 ‘‘𑀅𑀳𑀁 𑀓𑀼𑀲𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂 𑀕𑀡𑁆𑀳𑀺. 𑀲𑀸 𑀢𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸 ‘‘𑀬𑀓𑁆𑀔𑁄 𑀫𑀁 𑀕𑀡𑁆𑀳𑀻’’𑀢𑀺 𑀯𑀺𑀭𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀺𑀲𑀜𑁆𑀜𑀺𑀢𑀁 𑀧𑀢𑁆𑀢𑀸. 𑀅𑀣𑀲𑁆𑀲𑀸 𑀭𑀸𑀚𑀸 𑀳𑀢𑁆𑀣𑀁 𑀫𑀼𑀜𑁆𑀘𑀺. 𑀲𑀸 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀓𑀼𑀲𑀭𑀸𑀚𑀸 𑀓𑀺𑀭 𑀫𑀁 𑀳𑀢𑁆𑀣𑁂 𑀕𑀡𑁆𑀳𑀺, 𑀇𑀫𑀺𑀦𑀸𑀯𑀸𑀳𑀁 𑀳𑀢𑁆𑀣𑀺𑀲𑀸𑀮𑀸𑀬 𑀳𑀢𑁆𑀣𑀺𑀙𑀓𑀡𑀧𑀺𑀡𑁆𑀟𑁂𑀦, 𑀅𑀲𑁆𑀲𑀲𑀸𑀮𑀸𑀬 𑀅𑀲𑁆𑀲𑀙𑀓𑀡𑀧𑀺𑀡𑁆𑀟𑁂𑀦 𑀧𑀳𑀝𑀸, 𑀅𑀬𑀫𑁂𑀯 𑀫𑀁 𑀳𑀢𑁆𑀣𑀺𑀲𑁆𑀲 𑀧𑀘𑁆𑀙𑀺𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑁆𑀧𑀡𑁆𑀟𑁂𑀲𑀺, 𑀓𑀺𑀁 𑀫𑁂 𑀏𑀯𑀭𑀽𑀧𑁂𑀦 𑀤𑀼𑀫𑁆𑀫𑀼𑀔𑁂𑀦 𑀧𑀢𑀺𑀦𑀸, 𑀇𑀫𑀁 𑀚𑀳𑀺𑀢𑁆𑀯𑀸 𑀅𑀳𑀁 𑀚𑀻𑀯𑀦𑁆𑀢𑀻 𑀅𑀜𑁆𑀜𑀁 𑀧𑀢𑀺𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀢𑁂 𑀅𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀫 𑀬𑀸𑀦𑀯𑀸𑀳𑀦𑀁 𑀲𑀚𑁆𑀚𑀁 𑀓𑀭𑁄𑀣, 𑀅𑀚𑁆𑀚𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀁 ¶ . 𑀢𑁂 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀕𑀦𑁆𑀢𑀼𑀁 𑀦 𑀮𑀪𑀺𑀲𑁆𑀲𑀢𑀺, 𑀳𑀤𑀬𑀫𑀲𑁆𑀲𑀸 𑀨𑀮𑀺𑀲𑁆𑀲𑀢𑀺, 𑀕𑀘𑁆𑀙𑀢𑀼 𑀧𑀼𑀦 𑀢𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀣𑀲𑁆𑀲𑀸 𑀕𑀫𑀦𑀁 𑀅𑀦𑀼𑀚𑀸𑀦𑀺. 𑀲𑀸 𑀧𑀺𑀢𑀼𑀦𑀕𑀭𑀫𑁂𑀯 𑀅𑀕𑀫𑀸𑀲𑀺.
𑀫𑀳𑀸𑀲𑀢𑁆𑀢𑁄𑀧𑀺 ¶ 𑀉𑀬𑁆𑀬𑀸𑀦𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀩𑁄𑀥𑀺𑀲𑀢𑁆𑀢𑀜𑁆𑀳𑀺 𑀲𑀸 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀦 𑀇𑀘𑁆𑀙𑀺, 𑀲𑁄𑀧𑀺 𑀧𑀼𑀩𑁆𑀩𑀓𑀫𑁆𑀫𑀯𑀲𑁂𑀦𑁂𑀯 𑀯𑀺𑀭𑀽𑀧𑁄 𑀅𑀳𑁄𑀲𑀺. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀤𑁆𑀯𑀸𑀭𑀕𑀸𑀫𑁂 𑀉𑀧𑀭𑀺𑀫𑀯𑀻𑀣𑀺𑀬𑀸 𑀘 𑀳𑁂𑀝𑁆𑀞𑀺𑀫𑀯𑀻𑀣𑀺𑀬𑀸 𑀘 𑀤𑁆𑀯𑁂 𑀓𑀼𑀮𑀸𑀦𑀺 𑀯𑀲𑀺𑀁𑀲𑀼. 𑀏𑀓𑀲𑁆𑀲 𑀓𑀼𑀮𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀏𑀓𑀲𑁆𑀲 𑀏𑀓𑀸𑀯 𑀥𑀻𑀢𑀸 𑀅𑀳𑁄𑀲𑀺. 𑀤𑁆𑀯𑀻𑀲𑀼 𑀧𑀼𑀢𑁆𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑁄 𑀓𑀦𑀺𑀝𑁆𑀞𑁄. 𑀢𑀁 𑀓𑀼𑀫𑀸𑀭𑀺𑀓𑀁 𑀚𑁂𑀝𑁆𑀞𑀓𑀲𑁆𑀲 𑀅𑀤𑀁𑀲𑀼. 𑀓𑀦𑀺𑀝𑁆𑀞𑁄 𑀅𑀤𑀸𑀭𑀪𑀭𑀡𑁄 𑀪𑀸𑀢𑀼 𑀲𑀦𑁆𑀢𑀺𑀓𑁂𑀬𑁂𑀯 𑀯𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀖𑀭𑁂 𑀅𑀢𑀺𑀭𑀲𑀓𑀧𑀽𑀯𑁂 𑀧𑀘𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀁 𑀕𑀢𑁄 𑀳𑁄𑀢𑀺. 𑀢𑀲𑁆𑀲 𑀧𑀽𑀯𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀺𑀓𑁆𑀔𑀸𑀬 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀸𑀢𑀼𑀚𑀸𑀬𑀸 ‘‘𑀘𑀽𑀴𑀧𑀢𑀺𑀦𑁄 𑀅𑀜𑁆𑀜𑀁 𑀧𑀽𑀯𑀁 𑀧𑀘𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀺. 𑀲𑁄𑀧𑀺 𑀢𑀁 𑀔𑀡𑀜𑁆𑀜𑁂𑀯 𑀅𑀭𑀜𑁆𑀜𑀢𑁄 𑀆𑀕𑀘𑁆𑀙𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀲𑀸𑀫𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀢𑀯 𑀓𑁄𑀝𑁆𑀞𑀸𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑁄’’𑀢𑀺. 𑀲𑁄 ¶ ‘‘𑀢𑀯 𑀓𑁄𑀝𑁆𑀞𑀸𑀲𑀁 𑀔𑀸𑀤𑀺𑀢𑁆𑀯𑀸 𑀫𑀫 𑀓𑁄𑀝𑁆𑀞𑀸𑀲𑀁 𑀤𑁂𑀲𑀺, 𑀅𑀳𑀁 𑀓𑀺𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀢𑁆𑀢𑀢𑁄 𑀧𑀽𑀯𑀁 𑀕𑀡𑁆𑀳𑀺. 𑀲𑀸 𑀫𑀸𑀢𑀼 𑀖𑀭𑀁 𑀕𑀦𑁆𑀢𑁆𑀯𑀸 𑀦𑀯𑀯𑀺𑀮𑀻𑀦𑀁 𑀘𑀫𑁆𑀧𑀓𑀧𑀼𑀧𑁆𑀨𑀯𑀡𑁆𑀡𑀁 𑀲𑀧𑁆𑀧𑀺𑀁 𑀆𑀳𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀲𑀺, 𑀢𑀁 𑀑𑀪𑀸𑀲𑀁 𑀫𑀼𑀜𑁆𑀘𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺 𑁋 ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀤𑀸𑀦𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀲𑀭𑀻𑀭𑀁 𑀑𑀪𑀸𑀲𑀚𑀸𑀢𑀁 𑀳𑁄𑀢𑀼, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀘 𑀪𑀯𑁂𑀬𑁆𑀬𑀁, 𑀇𑀫𑀺𑀦𑀸 𑀘 𑀫𑁂 𑀅𑀲𑀧𑁆𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀸𑀲𑁄 𑀫𑀸 𑀅𑀳𑁄𑀲𑀻’’𑀢𑀺. 𑀇𑀢𑀺 𑀲𑀸 𑀇𑀫𑀺𑀲𑁆𑀲𑀸 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀯𑀲𑁂𑀦 𑀢𑀁 𑀦 𑀇𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀧𑀽𑀯 𑀢𑀲𑁆𑀫𑀺𑀁 𑀲𑀧𑁆𑀧𑀺𑀧𑀢𑁆𑀢𑁂 𑀑𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺 𑁋 ‘‘𑀪𑀦𑁆𑀢𑁂, 𑀇𑀫𑀁 𑀬𑁄𑀚𑀦𑀲𑀢𑁂 𑀯𑀲𑀦𑁆𑀢𑀺𑀫𑁆𑀧𑀺 𑀆𑀦𑁂𑀢𑁆𑀯𑀸 𑀫𑀫 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀢𑀢𑁆𑀣 𑀬𑀁 𑀲𑁄 𑀓𑀼𑀤𑁆𑀥𑁄 𑀕𑀦𑁆𑀢𑁆𑀯𑀸 𑀧𑀽𑀯𑀁 𑀕𑀡𑁆𑀳𑀺, 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀲𑁆𑀲 𑀯𑀲𑁂𑀦 𑀯𑀺𑀭𑀽𑀧𑁄 𑀅𑀳𑁄𑀲𑀺, 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀲𑀸 𑀘 𑀢𑀁 𑀦 𑀇𑀘𑁆𑀙𑀻𑀢𑀺.
𑀲𑁄 𑀧𑀪𑀸𑀯𑀢𑀺𑀬𑀸 𑀕𑀢𑀸𑀬 𑀲𑁄𑀓𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀦𑀸𑀦𑀸𑀓𑀸𑀭𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑀸𑀧𑀺 𑀦𑀁 𑀲𑁂𑀲𑀺𑀢𑁆𑀣𑀺𑀬𑁄 𑀑𑀮𑁄𑀓𑀸𑀧𑁂𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺𑀁𑀲𑀼, ¶ , 𑀧𑀪𑀸𑀯𑀢𑀺𑀭𑀳𑀺𑀢𑀫𑀲𑁆𑀲 𑀲𑀓𑀮𑀫𑁆𑀧𑀺 𑀦𑀺𑀯𑁂𑀲𑀦𑀁 𑀢𑀼𑀘𑁆𑀙𑀁 𑀯𑀺𑀬 𑀔𑀸𑀬𑀺. 𑀲𑁄 ‘‘𑀇𑀤𑀸𑀦𑀺 𑀲𑀸𑀕𑀮𑀦𑀕𑀭𑀁 𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀽𑀲𑀲𑀫𑀬𑁂 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀫𑁆𑀫, 𑀅𑀳𑀁 𑀧𑀪𑀸𑀯𑀢𑀺𑀁 𑀆𑀦𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀣𑀸’’𑀢𑀺 𑀯𑀤𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀇𑀤𑀁 𑀢𑁂 𑀭𑀝𑁆𑀞𑀁 𑀲𑀥𑀦𑀁 𑀲𑀬𑁄𑀕𑁆𑀕𑀁, 𑀲𑀓𑀸𑀬𑀼𑀭𑀁 𑀲𑀩𑁆𑀩𑀓𑀸𑀫𑀽𑀧𑀧𑀦𑁆𑀦𑀁;
𑀇𑀤𑀁 𑀢𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲 𑀅𑀫𑁆𑀫, 𑀕𑀘𑁆𑀙𑀸𑀫𑀳𑀁 𑀬𑀢𑁆𑀣 𑀧𑀺𑀬𑀸 𑀧𑀪𑀸𑀯𑀢𑀻’’𑀢𑀺.
𑀢𑀢𑁆𑀣 𑀲𑀬𑁄𑀕𑁆𑀕𑀦𑁆𑀢𑀺 𑀳𑀢𑁆𑀣𑀺𑀬𑁄𑀕𑁆𑀕𑀸𑀤𑀺𑀲𑀳𑀺𑀢𑀁. 𑀲𑀓𑀸𑀬𑀼𑀭𑀦𑁆𑀢𑀺 𑀲𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀁. 𑀅𑀦𑀼𑀲𑀸𑀲, 𑀅𑀫𑁆𑀫𑀸𑀢𑀺 ¶ 𑀲𑁄 𑀓𑀺𑀭 𑀧𑀼𑀭𑀺𑀲𑀲𑁆𑀲 𑀭𑀚𑁆𑀚𑀁 𑀤𑀢𑁆𑀯𑀸 𑀧𑀼𑀦 𑀕𑀡𑁆𑀳𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀦𑁆𑀢𑀺 𑀧𑀺𑀢𑀼 𑀯𑀸 𑀪𑀸𑀢𑀼 𑀯𑀸 𑀅𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀫𑀸𑀢𑀼 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀏𑀯𑀫𑀸𑀳.
𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀢𑁂𑀦 𑀳𑀺, 𑀢𑀸𑀢, 𑀅𑀧𑁆𑀧𑀫𑀢𑁆𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀧𑀭𑀺𑀲𑀼𑀤𑁆𑀥𑀳𑀤𑀬𑁄’’𑀢𑀺 𑀯𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀲𑀼𑀯𑀡𑁆𑀡𑀓𑀭𑁄𑀝𑀺𑀁 𑀧𑀽𑀭𑁂𑀢𑁆𑀯𑀸 ‘‘𑀇𑀤𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀼𑀜𑁆𑀚𑁂𑀬𑁆𑀬𑀸𑀲𑀻’’𑀢𑀺 ¶ 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀁 𑀆𑀤𑀸𑀬 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 ‘‘𑀚𑀻𑀯𑀦𑁆𑀢𑁄 𑀧𑀼𑀦 𑀢𑀼𑀫𑁆𑀳𑁂 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀘𑀸𑀯𑀼𑀥𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀪𑀢𑁆𑀢𑀓𑀭𑁄𑀝𑀺𑀬𑀸 𑀲𑀤𑁆𑀥𑀺𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀧𑀲𑀺𑀩𑁆𑀩𑀓𑁂 𑀓𑀢𑁆𑀯𑀸 𑀓𑁄𑀓𑀦𑀼𑀤𑀜𑁆𑀘 𑀯𑀻𑀡𑀁 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀫𑀳𑀩𑁆𑀩𑀮𑁄 𑀫𑀳𑀸𑀣𑀸𑀫𑁄 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀤𑀺𑀯𑀲𑀪𑀸𑀕𑁂𑀦 𑀧𑀼𑀦 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀏𑀓𑀸𑀳𑁂𑀦𑁂𑀯 𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀔𑁂𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑁆𑀳𑀢𑁆𑀯𑀸 𑀲𑀸𑀕𑀮𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀧𑀯𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀢𑀲𑁆𑀲 𑀢𑁂𑀚𑁂𑀦 𑀧𑀪𑀸𑀯𑀢𑀻 𑀲𑀬𑀦𑀧𑀺𑀝𑁆𑀞𑁂 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺. 𑀩𑁄𑀥𑀺𑀲𑀢𑁆𑀢𑀁 𑀓𑀺𑀮𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑀁 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀸𑀧𑁂𑀢𑁆𑀯𑀸 𑀲𑀬𑀦𑀁 𑀤𑀸𑀧𑁂𑀲𑀺. 𑀲𑁄 𑀓𑀺𑀮𑀦𑁆𑀢𑀓𑀸𑀬𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.
𑀅𑀣 𑀲𑀸 𑀢𑀲𑁆𑀫𑀺𑀁 𑀦𑀺𑀤𑁆𑀤𑀫𑀼𑀧𑀕𑀢𑁂 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀩𑁄𑀥𑁂𑀢𑁆𑀯𑀸 𑀪𑀢𑁆𑀢𑀁 𑀪𑁄𑀚𑁂𑀲𑀺. 𑀲𑁄 𑀢𑀼𑀝𑁆𑀞𑁄 𑀢𑀲𑁆𑀲𑀸 𑀲𑀤𑁆𑀥𑀺𑀁 𑀪𑀢𑁆𑀢𑀓𑀭𑁄𑀝𑀺𑀬𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 ¶ 𑀅𑀤𑀸𑀲𑀺. 𑀲𑁄 𑀧𑀜𑁆𑀘𑀸𑀯𑀼𑀥𑀁 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 ‘‘𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀫𑁂 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀯𑀻𑀡𑀁 𑀆𑀤𑀸𑀬 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 ‘‘𑀅𑀚𑁆𑀚 𑀫𑁂 𑀇𑀥 𑀯𑀲𑀺𑀢𑀼𑀁 𑀤𑁂𑀣, 𑀕𑀦𑁆𑀥𑀩𑁆𑀩𑀁 𑀯𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑁂𑀳𑀺 𑀅𑀦𑀼𑀜𑁆𑀜𑀸𑀢𑁄 𑀏𑀓𑀫𑀦𑁆𑀢𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀉𑀝𑁆𑀞𑀸𑀬 𑀯𑀻𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀲𑀸𑀕𑀮𑀦𑀕𑀭𑀯𑀸𑀲𑀺𑀦𑁄 𑀇𑀫𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀽’’𑀢𑀺 𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀕𑀸𑀬𑀺. 𑀧𑀪𑀸𑀯𑀢𑀻 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 ‘‘𑀅𑀬𑀁 𑀦 𑀅𑀜𑁆𑀜𑀲𑁆𑀲 𑀯𑀻𑀡𑀸𑀲𑀤𑁆𑀤𑁄, 𑀦𑀺𑀲𑁆𑀲𑀁𑀲𑀬𑀁 𑀓𑀼𑀲𑀭𑀸𑀚𑀸 𑀫𑀫𑀢𑁆𑀣𑀸𑀬 𑀆𑀕𑀢𑁄’’𑀢𑀺 𑀅𑀜𑁆𑀜𑀸𑀲𑀺. 𑀫𑀤𑁆𑀤𑀭𑀸𑀚𑀸𑀧𑀺 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀢𑀺𑀯𑀺𑀬 𑀫𑀥𑀼𑀭𑀁 𑀯𑀸𑀤𑁂𑀢𑀺, 𑀲𑁆𑀯𑁂 𑀏𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀫 𑀕𑀦𑁆𑀥𑀩𑁆𑀩𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.
𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀲𑀓𑁆𑀓𑀸 𑀇𑀥 𑀯𑀲𑀫𑀸𑀦𑁂𑀦 𑀧𑀪𑀸𑀯𑀢𑀻 𑀤𑀝𑁆𑀞𑀼𑀁, 𑀅𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀬𑀁 𑀪𑀼𑀢𑁆𑀢𑀕𑁂𑀳𑁂𑀬𑁂𑀯 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀡𑀁 𑀞𑀧𑁂𑀢𑁆𑀯𑀸 𑀭𑀸𑀚𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀖𑀭𑀁 𑀫𑀢𑁆𑀢𑀺𑀓𑀸𑀬 𑀧𑀽𑀭𑁂𑀢𑁆𑀯𑀸 ¶ ‘‘𑀪𑀸𑀚𑀦𑀸𑀦𑀺 𑀓𑀭𑁄𑀫𑀺 𑀆𑀘𑀭𑀺𑀬𑀸’’𑀢𑀺 𑀯𑀢𑁆𑀯𑀸, ‘‘𑀆𑀫, 𑀓𑀸𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀁 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀘𑀓𑁆𑀓𑁂 𑀞𑀧𑁂𑀢𑁆𑀯𑀸 𑀘𑀓𑁆𑀓𑀁 ¶ 𑀆𑀯𑀺𑀜𑁆𑀙𑀺, 𑀲𑀓𑀺𑀁 𑀆𑀯𑀺𑀤𑁆𑀥𑀫𑁂𑀯 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸𑀢𑀺𑀓𑁆𑀓𑀫𑀸 𑀪𑀫𑀺𑀬𑁂𑀯. 𑀲𑁄 𑀦𑀸𑀦𑀸𑀯𑀡𑁆𑀡𑀸𑀦𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀸𑀦𑀺 𑀪𑀸𑀚𑀦𑀸𑀦𑀺 𑀓𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀪𑀸𑀚𑀦𑀁 𑀓𑀭𑁄𑀦𑁆𑀢𑁄 𑀦𑀸𑀦𑀸𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀲𑀫𑀺𑀚𑁆𑀛𑀢𑀺, ‘‘𑀢𑀸𑀦𑀺 𑀭𑀽𑀧𑀸𑀦𑀺 𑀧𑀪𑀸𑀯𑀢𑀻𑀬𑁂𑀯 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑁄 𑀲𑀩𑁆𑀩𑀪𑀸𑀚𑀦𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀕𑁂𑀳𑀁 𑀧𑀽𑀭𑁂𑀲𑀺. 𑀓𑀼𑀫𑁆𑀪𑀓𑀸𑀭𑁄 𑀦𑀸𑀦𑀸𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀫𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀸, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀢𑀬𑀸 𑀓𑀢𑀸𑀦𑀺 𑀚𑀸𑀦𑀸𑀫𑀺, 𑀓𑀣𑁂𑀳𑀺, 𑀓𑁂𑀦 𑀓𑀢𑀸𑀦𑀻’’𑀢𑀺? ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀫𑁂 𑀤𑁂𑀯𑀸’’𑀢𑀺. ‘‘𑀦 𑀢𑁂 𑀲𑁄 𑀅𑀦𑁆𑀢𑁂𑀯𑀸𑀲𑀻, 𑀆𑀘𑀭𑀺𑀬𑁄 𑀢𑁂 𑀲𑁄, 𑀢𑁆𑀯𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔, 𑀇𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀫𑀫 𑀥𑀻𑀢𑀸𑀦𑀁 𑀪𑀸𑀚𑀦𑀸𑀦𑀺 𑀓𑀭𑁄𑀢𑀼, 𑀇𑀫𑀜𑁆𑀘𑀲𑁆𑀲 𑀲𑀳𑀲𑁆𑀲𑀁 𑀤𑁂𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 ‘‘𑀦𑀸𑀦𑀸𑀯𑀡𑁆𑀡𑀸𑀦𑀺 𑀇𑀫𑀸𑀦𑀺 𑀔𑀼𑀤𑁆𑀤𑀓𑀪𑀸𑀚𑀦𑀸𑀦𑀺 𑀫𑀫 𑀥𑀻𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳.
𑀲𑁄 𑀢𑀸𑀦𑀺 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀇𑀫𑀸𑀦𑀺 𑀯𑁄 𑀓𑀻𑀴𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀪𑀸𑀚𑀦𑀸𑀦𑀻’’𑀢𑀺 𑀆𑀳. 𑀢𑀸 𑀲𑀩𑁆𑀩𑀸 𑀆𑀕𑀫𑀺𑀁𑀲𑀼. 𑀓𑀼𑀫𑁆𑀪𑀓𑀸𑀭𑁄 𑀫𑀳𑀸𑀲𑀢𑁆𑀢𑁂𑀦 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀓𑀢𑀪𑀸𑀚𑀦𑀫𑁂𑀯 𑀢𑀲𑁆𑀲𑀸 𑀅𑀤𑀸𑀲𑀺. 𑀲𑀸 𑀘 𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 ¶ 𑀢𑀢𑁆𑀣 𑀅𑀢𑁆𑀢𑀦𑁄 𑀘 𑀫𑀳𑀸𑀲𑀢𑁆𑀢𑀲𑁆𑀲 𑀘 𑀔𑀼𑀚𑁆𑀚𑀸𑀬 𑀘 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀇𑀤𑀁 𑀦 𑀅𑀜𑁆𑀜𑁂𑀦 𑀓𑀢𑀁, 𑀓𑀼𑀲𑀭𑀸𑀚𑁂𑀦𑁂𑀯 𑀓𑀢’’𑀦𑁆𑀢𑀺 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀇𑀘𑁆𑀙𑀦𑁆𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳. 𑀅𑀣𑀲𑁆𑀲𑀸 𑀪𑀕𑀺𑀦𑀺𑀬𑁄 𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 ‘‘𑀔𑀼𑀤𑁆𑀤𑀓𑀪𑀸𑀚𑀦𑀁 𑀓𑀼𑀲𑀭𑀜𑁆𑀜𑀸 𑀓𑀢𑀦𑁆𑀢𑀺 𑀫𑀜𑁆𑀜𑀲𑀺, 𑀇𑀤𑀁 𑀢𑁂𑀦 𑀦 𑀓𑀢𑀁, 𑀓𑀼𑀫𑁆𑀪𑀓𑀸𑀭𑁂𑀦𑁂𑀯 𑀓𑀢𑀁, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺 𑀅𑀯𑀳𑀲𑀺𑀁𑀲𑀼. 𑀲𑀸 𑀢𑁂𑀦 𑀓𑀢𑀪𑀸𑀯𑀁 𑀢𑀲𑁆𑀲 𑀘 𑀆𑀕𑀢𑀪𑀸𑀯𑀁 𑀢𑀸𑀲𑀁 𑀦 𑀓𑀣𑁂𑀲𑀺. 𑀓𑀼𑀫𑁆𑀪𑀓𑀸𑀭𑁄 𑀲𑀳𑀲𑁆𑀲𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 ‘‘𑀢𑀸𑀢, 𑀭𑀸𑀚𑀸 𑀢𑁂 𑀢𑀼𑀝𑁆𑀞𑁄, 𑀇𑀢𑁄 𑀓𑀺𑀭 𑀧𑀝𑁆𑀞𑀸𑀬 𑀭𑀸𑀚𑀥𑀻𑀢𑀸𑀦𑀁 𑀪𑀸𑀚𑀦𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀅𑀳𑀁 𑀢𑀸𑀲𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳.
𑀲𑁄 ‘‘𑀇𑀥𑀸𑀧𑀺 𑀯𑀲𑀦𑁆𑀢𑁂𑀦 𑀦 𑀲𑀓𑁆𑀓𑀸 𑀧𑀪𑀸𑀯𑀢𑀻 𑀤𑀝𑁆𑀞𑀼’’𑀦𑁆𑀢𑀺 𑀢𑀁 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀓𑀲𑁆𑀲 𑀦𑀴𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀢𑀸𑀮𑀯𑀡𑁆𑀝𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀆𑀧𑀸𑀦𑀪𑀽𑀫𑀺𑀜𑁆𑀘 ¶ 𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀧𑀪𑀸𑀯𑀢𑀺𑀜𑁆𑀘𑀸𑀢𑀺 𑀦𑀸𑀦𑀸𑀭𑀽𑀧𑀸𑀦𑀺 𑀤𑀲𑁆𑀲𑁂𑀲𑀺. 𑀦𑀴𑀓𑀸𑀭𑁄 𑀢𑀜𑁆𑀘 𑀅𑀜𑁆𑀜𑀜𑁆𑀘 𑀢𑁂𑀦 𑀓𑀢𑀪𑀡𑁆𑀟𑀓𑀁 𑀆𑀤𑀸𑀬 𑀭𑀸𑀚𑀓𑀼𑀮𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀫𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀫𑀸𑀦𑀺 𑀦𑀴𑀓𑀸𑀭𑀪𑀡𑁆𑀟𑀸𑀦𑀺 𑀫𑀫 𑀥𑀻𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄𑀧𑀺 𑀩𑁄𑀥𑀺𑀲𑀢𑁆𑀢𑁂𑀦 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀓𑀢𑀁 𑀢𑀸𑀮𑀯𑀡𑁆𑀝𑀁 𑀢𑀲𑁆𑀲𑀸𑀬𑁂𑀯 𑀅𑀤𑀸𑀲𑀺. 𑀢𑀢𑁆𑀭𑀧𑀺 𑀭𑀽𑀧𑀸𑀦𑀺 𑀅𑀜𑁆𑀜𑁄 𑀚𑀦𑁄 𑀦 𑀧𑀲𑁆𑀲𑀢𑀺, 𑀧𑀪𑀸𑀯𑀢𑀻 𑀧𑀦 𑀤𑀺𑀲𑁆𑀯𑀸 𑀓𑀼𑀲𑀭𑀜𑁆𑀜𑀸 𑀓𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀕𑀡𑁆𑀳𑀺𑀢𑀼𑀓𑀸𑀫𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀓𑀼𑀤𑁆𑀥𑀸 𑀪𑀽𑀫𑀺𑀬𑀁 𑀔𑀺𑀧𑀺 ¶ . 𑀅𑀣 𑀦𑀁 𑀲𑁂𑀲𑀸 𑀅𑀯𑀳𑀲𑀺𑀁𑀲𑀼. 𑀦𑀴𑀓𑀸𑀭𑁄 𑀲𑀳𑀲𑁆𑀲𑀁 𑀆𑀳𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.
𑀲𑁄 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁 𑀅𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀭𑀸𑀚𑀫𑀸𑀮𑀸𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀸𑀦𑀸𑀯𑀺𑀥𑀁 𑀫𑀸𑀮𑀸𑀯𑀺𑀓𑀢𑀺𑀁 𑀕𑀦𑁆𑀣𑀺𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀦𑀸𑀦𑀸𑀭𑀽𑀧𑀯𑀺𑀘𑀺𑀢𑁆𑀭𑀁 𑀏𑀓𑀁 𑀘𑀼𑀫𑁆𑀩𑀝𑀓𑀁 𑀅𑀓𑀸𑀲𑀺. 𑀫𑀸𑀮𑀸𑀓𑀸𑀭𑁄 𑀢𑀁 𑀲𑀩𑁆𑀩𑀁 𑀆𑀤𑀸𑀬 𑀭𑀸𑀚𑀓𑀼𑀮𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀫𑀸𑀦𑀺 𑀕𑀦𑁆𑀣𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀬𑀸, 𑀤𑁂𑀯𑀸’’𑀢𑀺. ‘‘𑀅𑀳𑀁 𑀢𑀬𑀸 𑀕𑀦𑁆𑀣𑀺𑀢𑀸𑀦𑀺 𑀚𑀸𑀦𑀸𑀫𑀺, 𑀓𑀣𑁂𑀳𑀺, 𑀓𑁂𑀦 𑀕𑀦𑁆𑀣𑀺𑀢𑀸𑀦𑀻’’𑀢𑀺? ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀫𑁂 ¶ , 𑀤𑁂𑀯𑀸’’𑀢𑀺. ‘‘𑀦 𑀲𑁄 𑀅𑀦𑁆𑀢𑁂𑀯𑀸𑀲𑀻, 𑀆𑀘𑀭𑀺𑀬𑁄 𑀢𑁂 𑀲𑁄, 𑀢𑁆𑀯𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔, 𑀇𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀫𑀫 𑀥𑀻𑀢𑀸𑀦𑀁 𑀧𑀼𑀧𑁆𑀨𑀸𑀦𑀺 𑀕𑀦𑁆𑀣𑀢𑀼, 𑀇𑀫𑀜𑁆𑀘𑀲𑁆𑀲 𑀲𑀳𑀲𑁆𑀲𑀁 𑀤𑁂𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀫𑀫 𑀥𑀻𑀢𑀸𑀦𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄𑀧𑀺 𑀩𑁄𑀥𑀺𑀲𑀢𑁆𑀢𑁂𑀦 𑀧𑀪𑀸𑀯𑀢𑀺𑀬𑀸 𑀅𑀢𑁆𑀣𑀸𑀬 𑀓𑀢𑀁 𑀘𑀼𑀫𑁆𑀩𑀝𑀓𑀁 𑀢𑀲𑁆𑀲𑀸𑀬𑁂𑀯 𑀅𑀤𑀸𑀲𑀺. 𑀲𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀘 𑀭𑀜𑁆𑀜𑁄 𑀘 𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀦𑀸𑀦𑀸𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑁂𑀦 𑀓𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀪𑀽𑀫𑀺𑀬𑀁 𑀔𑀺𑀧𑀺. 𑀲𑁂𑀲𑀸 𑀪𑀕𑀺𑀦𑀺𑀬𑁄 𑀢𑀁 𑀢𑀣𑁂𑀯 𑀅𑀯𑀳𑀲𑀺𑀁𑀲𑀼. 𑀫𑀸𑀮𑀸𑀓𑀸𑀭𑁄𑀧𑀺 𑀲𑀳𑀲𑁆𑀲𑀁 𑀆𑀳𑀭𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.
𑀲𑁄 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁 𑀅𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀽𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀘𑁆𑀙𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀽𑀤𑁄 𑀭𑀜𑁆𑀜𑁄 𑀪𑁄𑀚𑀦𑀯𑀺𑀓𑀢𑀺𑀁 𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀘𑀺𑀢𑀼𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀝𑁆𑀞𑀺𑀫𑀁𑀲𑀁 𑀅𑀤𑀸𑀲𑀺. 𑀲𑁄 𑀢𑀁 𑀢𑀣𑀸 𑀲𑀫𑁆𑀧𑀸𑀤𑁂𑀲𑀺, 𑀬𑀣𑀸𑀲𑁆𑀲 𑀕𑀦𑁆𑀥𑁄 𑀲𑀓𑀮𑀦𑀕𑀭𑀁 𑀅𑀯𑀢𑁆𑀣𑀭𑀺. 𑀭𑀸𑀚𑀸 ¶ 𑀢𑀁 𑀖𑀸𑀬𑀺𑀢𑁆𑀯𑀸 ‘‘𑀓𑀺𑀁 𑀢𑁂 𑀫𑀳𑀸𑀦𑀲𑁂 𑀅𑀜𑁆𑀜𑀫𑁆𑀧𑀺 𑀫𑀁𑀲𑀁 𑀧𑀘𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀦𑀢𑁆𑀣𑀺, 𑀤𑁂𑀯, 𑀅𑀧𑀺𑀘 𑀔𑁄 𑀧𑀦 𑀫𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀅𑀝𑁆𑀞𑀺𑀫𑀁𑀲𑀁 𑀧𑀘𑀦𑀢𑁆𑀣𑀸𑀬 𑀤𑀺𑀦𑁆𑀦𑀁, 𑀢𑀲𑁆𑀲𑁂𑀯 𑀲𑁄 𑀕𑀦𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 𑀆𑀳𑀭𑀸𑀧𑁂𑀢𑁆𑀯𑀸 𑀢𑀢𑁄 𑀣𑁄𑀓𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀲𑀺, 𑀢𑀸𑀯𑀤𑁂𑀯 𑀲𑀢𑁆𑀢 𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀔𑁄𑀪𑁂𑀦𑁆𑀢𑀁 𑀨𑀭𑀺. 𑀭𑀸𑀚𑀸 𑀭𑀲𑀢𑀡𑁆𑀳𑀸𑀬 𑀩𑀚𑁆𑀛𑀺𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀢𑀯 𑀅𑀦𑁆𑀢𑁂𑀯𑀸𑀲𑀺𑀦𑀸 𑀫𑀫 𑀘 𑀥𑀻𑀢𑀸𑀦𑀜𑁆𑀘 𑀫𑁂 𑀪𑀢𑁆𑀢𑀁 𑀧𑀘𑀸𑀧𑁂𑀢𑁆𑀯𑀸 𑀢𑁆𑀯𑀁 𑀫𑀬𑁆𑀳𑀁 𑀆𑀳𑀭, 𑀲𑁄 𑀫𑁂 𑀥𑀻𑀢𑀸𑀦𑀁 𑀳𑀭𑀢𑀽’’𑀢𑀺 𑀆𑀳. 𑀲𑀽𑀤𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀇𑀤𑀸𑀦𑀺 𑀧𑀦𑀸𑀳𑀁 𑀧𑀪𑀸𑀯𑀢𑀺𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑁄 𑀢𑀁 𑀲𑀳𑀲𑁆𑀲𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀪𑀢𑁆𑀢𑀪𑀸𑀚𑀦𑀸𑀦𑀺 𑀧𑁂𑀲𑁂𑀢𑁆𑀯𑀸 𑀭𑀸𑀚𑀥𑀻𑀢𑀸𑀦𑀁 𑀪𑀢𑁆𑀢𑀓𑀸𑀚𑀁 𑀲𑀬𑀁 𑀕𑀳𑁂𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀯𑀲𑀦𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀲𑀸 𑀢𑀁 𑀪𑀢𑁆𑀢𑀓𑀸𑀚𑀁 𑀆𑀤𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀁 𑀤𑀸𑀲𑀓𑀫𑁆𑀫𑀓𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺. 𑀲𑀘𑁂 𑀧𑀦𑀸𑀳𑀁 𑀓𑀢𑀺𑀧𑀸𑀳𑀁 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀸𑀫𑀺, ‘𑀇𑀤𑀸𑀦𑀺 𑀫𑀁 𑀏𑀲𑀸 𑀭𑁄𑀘𑀢𑀻’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀫𑀁 𑀑𑀮𑁄𑀓𑁂𑀦𑁆𑀢𑁄 𑀇𑀥𑁂𑀯 𑀯𑀲𑀺𑀲𑁆𑀲𑀢𑀺, 𑀇𑀤𑀸𑀦𑁂𑀯 𑀢𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀇𑀥 𑀯𑀲𑀺𑀢𑀼𑀁 ¶ 𑀅𑀤𑀢𑁆𑀯𑀸 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑀸 𑀤𑁆𑀯𑀸𑀭𑀁 𑀅𑀟𑁆𑀠𑀯𑀺𑀯𑀝𑀁 𑀓𑀢𑁆𑀯𑀸 𑀏𑀓𑀁 𑀳𑀢𑁆𑀣𑀁 𑀓𑀯𑀸𑀝𑁂 𑀮𑀕𑁆𑀕𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀕𑁆𑀕𑀴𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀅𑀦𑀼𑀚𑁆𑀚𑀼𑀪𑀽𑀢𑁂𑀦 ¶ 𑀳𑀭𑀁 𑀫𑀳𑀦𑁆𑀢𑀁, 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀦𑀺𑀲𑀻𑀣𑀓𑀸𑀮𑁂;
𑀧𑀝𑀺𑀕𑀘𑁆𑀙 𑀢𑁆𑀯𑀁 𑀔𑀺𑀧𑁆𑀧𑀁 𑀓𑀼𑀲𑀸𑀯𑀢𑀺𑀁 𑀓𑀼𑀲, 𑀦𑀺𑀘𑁆𑀙𑀸𑀫𑀺 𑀤𑀼𑀩𑁆𑀩𑀡𑁆𑀡𑀫𑀳𑀁 𑀯𑀲𑀦𑁆𑀢’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀢𑁆𑀯𑀁 𑀪𑀢𑁆𑀢𑀓𑀸𑀭𑀓𑁄 𑀳𑀼𑀢𑁆𑀯𑀸 𑀉𑀚𑀼𑀓𑁂𑀦 𑀘𑀺𑀢𑁆𑀢𑁂𑀦 𑀬𑁄𑀧𑀺 𑀢𑁂 𑀲𑀻𑀲𑀁 𑀪𑀺𑀦𑁆𑀤𑁂𑀬𑁆𑀬, 𑀢𑀲𑁆𑀲𑀧𑁂𑀢𑀁 𑀓𑀫𑁆𑀫𑀁 𑀦 𑀓𑀭𑁄𑀲𑀺, 𑀅𑀦𑀼𑀚𑀼𑀪𑀽𑀢𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀫𑀫𑀢𑁆𑀣𑀸𑀬 𑀏𑀢𑀁 𑀫𑀳𑀦𑁆𑀢𑀁 𑀓𑀸𑀚𑀁 𑀳𑀭𑀦𑁆𑀢𑁄 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀦𑀺𑀲𑀻𑀣𑀓𑀸𑀮𑁂 𑀘 𑀫𑀳𑀦𑁆𑀢𑀁 ¶ 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀲𑀺, 𑀓𑀺𑀁 𑀢𑁂 𑀢𑁂𑀦 𑀅𑀦𑀼𑀪𑀽𑀢𑁂𑀦 𑀤𑀼𑀓𑁆𑀔𑁂𑀦, 𑀢𑁆𑀯𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀓𑀼𑀲𑀸𑀯𑀢𑀺𑀫𑁂𑀯 𑀧𑀝𑀺𑀕𑀘𑁆𑀙, 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀤𑀺𑀲𑀺𑀁 𑀅𑀢𑀺𑀭𑀲𑀓𑀧𑀽𑀯𑀲𑀡𑁆𑀞𑀸𑀦𑀫𑀼𑀔𑀺𑀁 𑀬𑀓𑁆𑀔𑀺𑀦𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀳𑀻𑀢𑀺. 𑀦𑀺𑀘𑁆𑀙𑀸𑀫𑀺 𑀤𑀼𑀩𑁆𑀩𑀡𑁆𑀡𑀫𑀳𑀁 𑀯𑀲𑀦𑁆𑀢𑀦𑁆𑀢𑀺 𑀅𑀳𑀁 𑀧𑀦 𑀢𑀁 𑀤𑀼𑀩𑁆𑀩𑀡𑁆𑀡𑀁 𑀤𑀼𑀲𑁆𑀲𑀡𑁆𑀞𑀺𑀢𑀁 𑀇𑀥 𑀯𑀲𑀦𑁆𑀢𑀁 𑀦 𑀇𑀘𑁆𑀙𑀸𑀫𑀻𑀢𑀺.
𑀲𑁄 ‘‘𑀧𑀪𑀸𑀯𑀢𑀺𑀬𑀸 𑀫𑁂 𑀲𑀦𑁆𑀢𑀺𑀓𑀸 𑀓𑀣𑀸 𑀮𑀤𑁆𑀥𑀸’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀺 𑀇𑀢𑁄 𑀓𑀼𑀲𑀸𑀯𑀢𑀺𑀁, 𑀧𑀪𑀸𑀯𑀢𑀻 𑀯𑀡𑁆𑀡𑀧𑀮𑁄𑀪𑀺𑀢𑁄 𑀢𑀯;
𑀭𑀫𑀸𑀫𑀺 𑀫𑀤𑁆𑀤𑀲𑁆𑀲 𑀦𑀺𑀓𑁂𑀢𑀭𑀫𑁆𑀫𑁂, 𑀳𑀺𑀢𑁆𑀯𑀸𑀦 𑀭𑀝𑁆𑀞𑀁 𑀢𑀯 𑀤𑀲𑁆𑀲𑀦𑁂 𑀭𑀢𑁄.
‘‘𑀧𑀪𑀸𑀯𑀢𑀻 𑀯𑀡𑁆𑀡𑀧𑀮𑁄𑀪𑀺𑀢𑁄 𑀢𑀯, 𑀲𑀫𑁆𑀫𑀽𑀴𑁆𑀳𑀭𑀽𑀧𑁄 𑀯𑀺𑀘𑀭𑀸𑀫𑀺 𑀫𑁂𑀤𑀺𑀦𑀺𑀁;
𑀤𑀺𑀲𑀁 𑀦 𑀚𑀸𑀦𑀸𑀫𑀺 𑀓𑀼𑀢𑁄𑀫𑁆𑀳𑀺 𑀆𑀕𑀢𑁄, 𑀢𑀬𑀫𑁆𑀳𑀺 𑀫𑀢𑁆𑀢𑁄 𑀫𑀺𑀕𑀫𑀦𑁆𑀤𑀮𑁄𑀘𑀦𑁂.
‘‘𑀲𑀼𑀯𑀡𑁆𑀡𑀘𑀻𑀭𑀯𑀲𑀦𑁂, 𑀚𑀸𑀢𑀭𑀽𑀧𑀲𑀼𑀫𑁂𑀔𑀮𑁂;
𑀲𑀼𑀲𑁆𑀲𑁄𑀡𑀺 𑀢𑀯 𑀓𑀸𑀫𑀸 𑀳𑀺, 𑀦𑀸𑀳𑀁 𑀭𑀚𑁆𑀚𑁂𑀦 𑀫𑀢𑁆𑀣𑀺𑀓𑁄’’𑀢𑀺.
𑀢𑀢𑁆𑀣 𑀭𑀫𑀸𑀫𑀻𑀢𑀺 𑀅𑀪𑀺𑀭𑀫𑀸𑀫𑀺 𑀦 𑀉𑀓𑁆𑀓𑀡𑁆𑀞𑀸𑀫𑀺. 𑀲𑀫𑁆𑀫𑀽𑀴𑁆𑀳𑀭𑀽𑀧𑁄𑀢𑀺 𑀓𑀺𑀮𑁂𑀲𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸. 𑀢𑀬𑀫𑁆𑀳𑀺 𑀫𑀢𑁆𑀢𑁄𑀢𑀺 𑀢𑀬𑀺 𑀫𑀢𑁆𑀢𑁄𑀫𑁆𑀳𑀺, 𑀢𑀬𑀸 𑀯𑀸 𑀫𑀢𑁆𑀢𑁄𑀫𑁆𑀳𑀺. 𑀲𑀼𑀯𑀡𑁆𑀡𑀘𑀻𑀭𑀯𑀲𑀦𑁂𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀯𑀢𑁆𑀣𑀯𑀲𑀦𑁂. 𑀦𑀸𑀳𑀁 𑀭𑀚𑁆𑀚𑁂𑀦 𑀫𑀢𑁆𑀣𑀺𑀓𑁄𑀢𑀺 𑀦 𑀅𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄.
𑀏𑀯𑀁 ¶ 𑀯𑀼𑀢𑁆𑀢𑁂 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑀁 ‘𑀯𑀺𑀧𑁆𑀧𑀝𑀺𑀲𑀸𑀭𑀻 𑀪𑀯𑀺𑀲𑁆𑀲𑀢𑀻’𑀢𑀺 𑀧𑀭𑀺𑀪𑀸𑀲𑀸𑀫𑀺, 𑀅𑀬𑀁 𑀧𑀦 𑀭𑀚𑁆𑀚𑀺𑀢𑁆𑀯𑀸𑀯 𑀓𑀣𑁂𑀢𑀺, 𑀲𑀘𑁂 𑀔𑁄 𑀧𑀦 𑀫𑀁 ‘𑀅𑀳𑀁 𑀓𑀼𑀲𑀭𑀸𑀚𑀸’𑀢𑀺 𑀯𑀢𑁆𑀯𑀸 𑀳𑀢𑁆𑀣𑁂 𑀕𑀡𑁆𑀳𑁂𑀬𑁆𑀬, 𑀓𑁄 ¶ 𑀢𑀁 𑀦𑀺𑀯𑀸𑀭𑁂𑀬𑁆𑀬, 𑀓𑁄𑀘𑀺 𑀦𑁄 𑀇𑀫𑀁 𑀓𑀣𑀁 𑀲𑀼𑀡𑁂𑀬𑁆𑀬𑀸’’𑀢𑀺 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀲𑀽𑀘𑀺𑀁 𑀤𑀢𑁆𑀯𑀸 𑀅𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑁄𑀧𑀺 𑀪𑀢𑁆𑀢𑀓𑀸𑀚𑀁 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑁄 𑀪𑁄𑀚𑁂𑀲𑀺. 𑀧𑀪𑀸𑀯𑀢𑀻 ‘‘𑀕𑀘𑁆𑀙 𑀓𑀼𑀲𑀭𑀸𑀚𑁂𑀦 𑀧𑀓𑁆𑀓𑀪𑀢𑁆𑀢𑀁 𑀆𑀳𑀭𑀸’’𑀢𑀺 𑀔𑀼𑀚𑁆𑀚𑀁 𑀧𑁂𑀲𑁂𑀲𑀺. 𑀲𑀸 𑀆𑀳𑀭𑀺𑀢𑁆𑀯𑀸 ‘‘𑀪𑀼𑀜𑁆𑀚𑀸𑀳𑀻’’𑀢𑀺 𑀆𑀳. 𑀦𑀸𑀳𑀁 𑀢𑁂𑀦 𑀧𑀓𑁆𑀓𑀪𑀢𑁆𑀢𑀁 𑀪𑀼𑀜𑁆𑀚𑀸𑀫𑀺, 𑀢𑁆𑀯𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀦𑀺𑀯𑀸𑀧𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀆𑀳𑀭, 𑀓𑀼𑀲𑀭𑀜𑁆𑀜𑁄 𑀆𑀕𑀢𑀪𑀸𑀯𑀜𑁆𑀘 𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑀻𑀢𑀺. 𑀔𑀼𑀚𑁆𑀚𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀓𑁄𑀝𑁆𑀞𑀸𑀲𑀁 𑀆𑀳𑀭𑀺𑀢𑁆𑀯𑀸 𑀲𑀬𑀁 𑀪𑀼𑀜𑁆𑀚𑀢𑀺, 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀢𑀲𑁆𑀲𑀸 𑀉𑀧𑀦𑁂𑀢𑀺. 𑀓𑀼𑀲𑀭𑀸𑀚𑀸𑀧𑀺 ¶ 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀲𑁆𑀲𑀺𑀢𑀼𑀁 𑀅𑀮𑀪𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀧𑀪𑀸𑀯𑀢𑀺𑀬𑀸 𑀫𑀬𑀺 𑀲𑀺𑀦𑁂𑀳𑁄, 𑀉𑀤𑀸𑀳𑀼 𑀦𑀢𑁆𑀣𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀲𑁄 𑀧𑀦 𑀭𑀸𑀚𑀥𑀻𑀢𑀭𑁄 𑀪𑁄𑀚𑁂𑀢𑁆𑀯𑀸 𑀪𑀢𑁆𑀢𑀓𑀸𑀚𑀁 𑀆𑀤𑀸𑀬 𑀦𑀺𑀓𑁆𑀔𑀦𑁆𑀢𑁄 𑀢𑀲𑁆𑀲𑀸 𑀕𑀩𑁆𑀪𑀤𑁆𑀯𑀸𑀭𑁂 𑀧𑀸𑀲𑀸𑀤𑀢𑀮𑀁 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀪𑀸𑀚𑀦𑀸𑀦𑀺 𑀖𑀝𑁆𑀝𑁂𑀢𑁆𑀯𑀸 𑀦𑀺𑀢𑁆𑀣𑀼𑀦𑀺𑀢𑁆𑀯𑀸 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀯𑀺𑀬 𑀅𑀯𑀓𑀼𑀚𑁆𑀚𑁄 𑀧𑀢𑀺. 𑀲𑀸 𑀢𑀲𑁆𑀲 𑀦𑀺𑀢𑁆𑀣𑀼𑀦𑀺𑀢𑀲𑀤𑁆𑀤𑁂𑀦 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀪𑀢𑁆𑀢𑀓𑀸𑀚𑁂𑀦 𑀑𑀢𑁆𑀣𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸 𑀫𑀁 𑀦𑀺𑀲𑁆𑀲𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀲𑀼𑀔𑀼𑀫𑀸𑀮𑀢𑀸𑀬 𑀪𑀢𑁆𑀢𑀓𑀸𑀚𑁂𑀦 𑀅𑀯𑀢𑁆𑀣𑀢𑁄 𑀧𑀢𑀢𑀺, 𑀚𑀻𑀯𑀢𑀺 𑀦𑀼 𑀔𑁄, 𑀦𑁄 𑀯𑀸’’𑀢𑀺. 𑀲𑀸 𑀕𑀩𑁆𑀪𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲 𑀦𑀸𑀲𑀯𑀸𑀢𑀁 𑀉𑀧𑀥𑀸𑀭𑁂𑀢𑀼𑀁 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀲𑁄 𑀫𑀼𑀔𑀧𑀽𑀭𑀁 𑀔𑁂𑀴𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀲𑀭𑀻𑀭𑁂 𑀧𑀸𑀢𑁂𑀲𑀺. 𑀲𑀸 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀅𑀟𑁆𑀠𑀯𑀺𑀯𑀝𑀁 𑀣𑀓𑁂𑀢𑁆𑀯𑀸 𑀞𑀺𑀢𑀸 𑀕𑀸𑀣𑀫𑀸𑀳 𑁋
‘‘𑀅𑀩𑁆𑀪𑀽𑀢𑀺 𑀢𑀲𑁆𑀲 𑀪𑁄 𑀳𑁄𑀢𑀺, 𑀬𑁄 𑀅𑀦𑀺𑀘𑁆𑀙𑀦𑁆𑀢𑀫𑀺𑀘𑁆𑀙𑀢𑀺;
𑀅𑀓𑀸𑀫𑀁 𑀭𑀸𑀚 𑀓𑀸𑀫𑁂𑀲𑀺, 𑀅𑀓𑀦𑁆𑀢𑀁 𑀓𑀦𑁆𑀢𑀼𑀫𑀺𑀘𑁆𑀙𑀲𑀻’’𑀢𑀺.
𑀢𑀢𑁆𑀣 𑀅𑀩𑁆𑀪𑀽𑀢𑀻𑀢𑀺 𑀅𑀪𑀽𑀢𑀺, 𑀅𑀯𑀼𑀟𑁆𑀠𑀻𑀢𑀺 𑀅𑀢𑁆𑀣𑁄.
𑀲𑁄 𑀧𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀅𑀓𑁆𑀓𑁄𑀲𑀺𑀬𑀫𑀸𑀦𑁄𑀧𑀺 𑀧𑀭𑀺𑀪𑀸𑀲𑀺𑀬𑀫𑀸𑀦𑁄𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀯 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀅𑀓𑀸𑀫𑀁 𑀯𑀸 𑀲𑀓𑀸𑀫𑀁 𑀯𑀸, 𑀬𑁄 𑀦𑀭𑁄 𑀮𑀪𑀢𑁂 𑀧𑀺𑀬𑀁;
𑀮𑀸𑀪𑀫𑁂𑀢𑁆𑀣 𑀧𑀲𑀁𑀲𑀸𑀫, 𑀅𑀮𑀸𑀪𑁄 𑀢𑀢𑁆𑀣 𑀧𑀸𑀧𑀓𑁄’’𑀢𑀺.
𑀲𑀸𑀧𑀺 ¶ 𑀢𑀲𑁆𑀫𑀺𑀁 𑀏𑀯𑀁 𑀓𑀣𑁂𑀦𑁆𑀢𑁂𑀧𑀺 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀣𑀤𑁆𑀥𑀢𑀭𑀯𑀘𑀦𑀁 𑀯𑀢𑁆𑀯𑀸 𑀧𑀮𑀸𑀧𑁂𑀢𑀼𑀓𑀸𑀫𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀧𑀸𑀲𑀸𑀡𑀲𑀸𑀭𑀁 ¶ 𑀔𑀡𑀲𑀺, 𑀓𑀡𑀺𑀓𑀸𑀭𑀲𑁆𑀲 𑀤𑀸𑀭𑀼𑀦𑀸;
𑀯𑀸𑀢𑀁 𑀚𑀸𑀮𑁂𑀦 𑀩𑀸𑀥𑁂𑀲𑀺, 𑀬𑁄 𑀅𑀦𑀺𑀘𑁆𑀙𑀦𑁆𑀢𑀫𑀺𑀘𑁆𑀙𑀲𑀻’’𑀢𑀺.
𑀢𑀢𑁆𑀣 𑀓𑀡𑀺𑀓𑀸𑀭𑀲𑁆𑀲 𑀤𑀸𑀭𑀼𑀦𑀸𑀢𑀺 𑀓𑀡𑀺𑀓𑀸𑀭𑀓𑀝𑁆𑀞𑁂𑀦. 𑀩𑀸𑀥𑁂𑀲𑀻𑀢𑀺 𑀩𑀦𑁆𑀥𑀲𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀧𑀸𑀲𑀸𑀡𑁄 𑀦𑀽𑀦 𑀢𑁂 𑀳𑀤𑀬𑁂, 𑀑𑀳𑀺𑀢𑁄 𑀫𑀼𑀤𑀼𑀮𑀓𑁆𑀔𑀡𑁂;
𑀬𑁄 𑀢𑁂 𑀲𑀸𑀢𑀁 𑀦 𑀯𑀺𑀦𑁆𑀤𑀸𑀫𑀺, 𑀢𑀺𑀭𑁄𑀚𑀦𑀧𑀤𑀸𑀕𑀢𑁄.
‘‘𑀬𑀤𑀸 ¶ 𑀫𑀁 𑀪𑀓𑀼𑀝𑀺𑀁 𑀓𑀢𑁆𑀯𑀸, 𑀭𑀸𑀚𑀧𑀼𑀢𑁆𑀢𑀻 𑀉𑀤𑀺𑀓𑁆𑀔𑀢𑀺;
𑀆𑀴𑀸𑀭𑀺𑀓𑁄 𑀢𑀤𑀸 𑀳𑁄𑀫𑀺, 𑀭𑀜𑁆𑀜𑁄 𑀫𑀤𑁆𑀤𑀲𑁆𑀲𑀦𑁆𑀢𑁂𑀧𑀼𑀭𑁂.
‘‘𑀬𑀤𑀸 𑀉𑀫𑁆𑀳𑀬𑀫𑀸𑀦𑀸 𑀫𑀁, 𑀭𑀸𑀚𑀧𑀼𑀢𑁆𑀢𑀻 𑀉𑀤𑀺𑀓𑁆𑀔𑀢𑀺;
𑀦𑀸𑀴𑀸𑀭𑀺𑀓𑁄 𑀢𑀤𑀸 𑀳𑁄𑀫𑀺, 𑀭𑀸𑀚𑀸 𑀳𑁄𑀫𑀺 𑀢𑀤𑀸 𑀓𑀼𑀲𑁄’’𑀢𑀺.
𑀢𑀢𑁆𑀣 𑀫𑀼𑀤𑀼𑀮𑀓𑁆𑀔𑀡𑁂𑀢𑀺 𑀫𑀼𑀤𑀼𑀦𑀸 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀬𑁄𑀢𑀺 𑀬𑁄 𑀅𑀳𑀁 𑀢𑀺𑀭𑁄𑀭𑀝𑁆𑀞𑀸 𑀆𑀕𑀢𑁄 𑀢𑀯 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀲𑀸𑀢𑀁 𑀦 𑀮𑀪𑀸𑀫𑀺, 𑀲𑁄 𑀏𑀯𑀁 𑀫𑀜𑁆𑀜𑀸𑀫𑀺, 𑀫𑀬𑀺 𑀲𑀺𑀦𑁂𑀳𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀸𑀬 𑀦𑀽𑀦 𑀢𑀯 𑀳𑀤𑀬𑁂 𑀧𑀸𑀲𑀸𑀡𑁄 𑀞𑀧𑀺𑀢𑁄. 𑀪𑀓𑀼𑀝𑀺𑀁 𑀓𑀢𑁆𑀯𑀸𑀢𑀺 𑀓𑁄𑀥𑀯𑀲𑁂𑀦 𑀯𑀮𑀺𑀯𑀺𑀲𑀫𑀁 𑀦𑀮𑀸𑀝𑀁 𑀓𑀢𑁆𑀯𑀸. 𑀆𑀴𑀸𑀭𑀺𑀓𑁄𑀢𑀺 𑀪𑀢𑁆𑀢𑀓𑀸𑀭𑀓𑁄. 𑀢𑀲𑁆𑀫𑀺𑀁 𑀔𑀡𑁂 𑀅𑀳𑀁 𑀫𑀤𑁆𑀤𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀪𑀢𑁆𑀢𑀓𑀸𑀭𑀓𑀤𑀸𑀲𑁄 𑀯𑀺𑀬 𑀳𑁄𑀫𑀻𑀢𑀺 𑀯𑀤𑀢𑀺. 𑀉𑀫𑁆𑀳𑀬𑀫𑀸𑀦𑀸𑀢𑀺 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀫𑀸𑀦𑀸. 𑀭𑀸𑀚𑀸 𑀳𑁄𑀫𑀻𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀅𑀳𑀁 𑀓𑀼𑀲𑀸𑀯𑀢𑀻𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀭𑀸𑀚𑀸 𑀯𑀺𑀬 𑀳𑁄𑀫𑀺, 𑀓𑀲𑁆𑀫𑀸𑀲𑀺 𑀏𑀯𑀁 𑀨𑀭𑀼𑀲𑀸, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀏𑀯𑀭𑀽𑀧𑀁 𑀓𑀭𑀺, 𑀪𑀤𑁆𑀤𑁂𑀢𑀺.
𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀢𑀺𑀯𑀺𑀬 𑀅𑀮𑁆𑀮𑀻𑀬𑀺𑀢𑁆𑀯𑀸 𑀓𑀣𑁂𑀢𑀺, 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀉𑀧𑀸𑀬𑁂𑀦 𑀦𑀁 𑀇𑀢𑁄 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀸𑀣𑀫𑀸𑀳 𑁋
‘‘𑀲𑀘𑁂 ¶ 𑀳𑀺 𑀯𑀘𑀦𑀁 𑀲𑀘𑁆𑀘𑀁, 𑀦𑁂𑀫𑀺𑀢𑁆𑀢𑀸𑀦𑀁 𑀪𑀯𑀺𑀲𑁆𑀲𑀢𑀺;
𑀦𑁂𑀯 𑀫𑁂 𑀢𑁆𑀯𑀁 𑀧𑀢𑀻 𑀅𑀲𑁆𑀲, 𑀓𑀸𑀫𑀁 𑀙𑀺𑀦𑁆𑀤𑀦𑁆𑀢𑀼 𑀲𑀢𑁆𑀢𑀥𑀸’’𑀢𑀺.
𑀢𑀲𑁆𑀲𑀢𑁆𑀣𑁄 ¶ 𑁋 𑀫𑀳𑀸𑀭𑀸𑀚, 𑀫𑀬𑀸 ‘‘𑀅𑀬𑀁 𑀓𑀼𑀲𑀭𑀸𑀚𑀸 𑀫𑀬𑁆𑀳𑀁 𑀧𑀢𑀺 𑀪𑀯𑀺𑀲𑁆𑀲𑀢𑀺, 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑀳𑀽 𑀦𑀺𑀫𑀺𑀢𑁆𑀢𑀧𑀸𑀞𑀓𑀸 𑀧𑀼𑀘𑁆𑀙𑀺𑀢𑀸, 𑀢𑁂 ‘‘𑀓𑀸𑀫𑀁 𑀓𑀺𑀭 𑀫𑀁 𑀲𑀢𑁆𑀢𑀥𑀸 𑀙𑀺𑀦𑁆𑀤𑀦𑁆𑀢𑀼, 𑀦𑁂𑀯 𑀫𑁂 𑀢𑁆𑀯𑀁 𑀧𑀢𑀺 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀤𑀺𑀁𑀲𑀽𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀁 𑀧𑀝𑀺𑀩𑀸𑀳𑀦𑁆𑀢𑁄 ‘‘𑀪𑀤𑁆𑀤𑁂, 𑀫𑀬𑀸𑀧𑀺 𑀅𑀢𑁆𑀢𑀦𑁄 𑀭𑀝𑁆𑀞𑁂 𑀦𑁂𑀫𑀺𑀢𑁆𑀢𑀓𑀸 𑀧𑀼𑀘𑁆𑀙𑀺𑀢𑀸, 𑀢𑁂 ‘𑀅𑀜𑁆𑀜𑀢𑁆𑀭 𑀲𑀻𑀳𑀲𑁆𑀲𑀭𑀓𑀼𑀲𑀭𑀸𑀚𑀢𑁄 𑀢𑀯 𑀧𑀢𑀺 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀻’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼, 𑀅𑀳𑀫𑁆𑀧𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑀦𑀺𑀫𑀺𑀢𑁆𑀢𑁂𑀦 𑀏𑀯𑀫𑁂𑀯 𑀓𑀣𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀲𑀘𑁂 𑀳𑀺 𑀯𑀘𑀦𑀁 𑀲𑀘𑁆𑀘𑀁, 𑀅𑀜𑁆𑀜𑁂𑀲𑀁 𑀬𑀤𑀺 𑀯𑀸 𑀫𑀫;
𑀦𑁂𑀯 𑀢𑀼𑀬𑁆𑀳𑀁 𑀧𑀢𑀻 𑀅𑀢𑁆𑀣𑀺, 𑀅𑀜𑁆𑀜𑁄 𑀲𑀻𑀳𑀲𑁆𑀲𑀭𑀸 𑀓𑀼𑀲𑀸’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀳𑀺 𑀅𑀜𑁆𑀜𑁂𑀲𑀁 𑀦𑁂𑀫𑀺𑀢𑁆𑀢𑀸𑀦𑀁 𑀯𑀘𑀦𑀁 𑀲𑀘𑁆𑀘𑀁, 𑀬𑀤𑀺 𑀯𑀸 𑀫𑀫 𑀯𑀘𑀦𑀁 𑀲𑀘𑁆𑀘𑀁, 𑀢𑀯 𑀅𑀜𑁆𑀜𑁄 𑀧𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺.
𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀇𑀫𑀁 𑀮𑀚𑁆𑀚𑀸𑀧𑁂𑀢𑀼𑀁 𑀯𑀸 𑀧𑀮𑀸𑀧𑁂𑀢𑀼𑀁 𑀯𑀸, 𑀓𑀺𑀁 𑀫𑁂 𑀇𑀫𑀺𑀦𑀸’’𑀢𑀺 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀲𑀺. 𑀲𑁄𑀧𑀺 𑀓𑀸𑀚𑀁 𑀕𑀳𑁂𑀢𑁆𑀯𑀸 𑀑𑀢𑀭𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀢𑀺, 𑀪𑀢𑁆𑀢𑀓𑀸𑀭𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑀺𑀯𑀺𑀬 𑀓𑀺𑀮𑀫𑀢𑀺 ¶ , 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀤𑀸𑀭𑀽𑀦𑀺 𑀨𑀸𑀮𑁂𑀢𑀺, 𑀪𑀸𑀚𑀦𑀸𑀦𑀺 𑀥𑁄𑀯𑀢𑀺, 𑀓𑀸𑀚𑁂𑀦 𑀉𑀤𑀓𑀁 𑀆𑀳𑀭𑀢𑀺, 𑀲𑀬𑀦𑁆𑀢𑁄 𑀅𑀫𑁆𑀩𑀡𑀧𑀺𑀝𑁆𑀞𑁂 𑀲𑀬𑀢𑀺, 𑀧𑀸𑀢𑁄 𑀯𑀼𑀝𑁆𑀞𑀸𑀬 𑀬𑀸𑀕𑀼𑀆𑀤𑀻𑀦𑀺 𑀧𑀘𑀢𑀺 𑀳𑀭𑀢𑀺 𑀪𑁄𑀚𑁂𑀢𑀺, 𑀦𑀦𑁆𑀤𑀺𑀭𑀸𑀕𑀁 𑀦𑀺𑀲𑁆𑀲𑀸𑀬 𑀅𑀢𑀺𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀢𑁆𑀢𑀕𑁂𑀳𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀺𑀁 𑀔𑀼𑀚𑁆𑀚𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀺. 𑀲𑀸 𑀧𑀪𑀸𑀯𑀢𑀺𑀬𑀸 𑀪𑀬𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀢𑀼𑀭𑀺𑀢𑀢𑀼𑀭𑀺𑀢𑀸 𑀯𑀺𑀬 𑀕𑀘𑁆𑀙𑀢𑀺. 𑀅𑀣 𑀦𑀁 𑀯𑁂𑀕𑁂𑀦 𑀉𑀧𑀕𑀦𑁆𑀢𑁆𑀯𑀸 ‘‘𑀔𑀼𑀚𑁆𑀚𑁂’’𑀢𑀺 𑀆𑀳.
𑀲𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀸 ‘‘𑀓𑁄 𑀏𑀲𑁄’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀤𑁆𑀤𑀁 𑀦 𑀲𑀼𑀡𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 ‘‘𑀔𑀼𑀚𑁆𑀚𑁂 𑀢𑁆𑀯𑀫𑁆𑀧𑀺 𑀲𑀸𑀫𑀺𑀦𑀻𑀧𑀺 𑀢𑁂 𑀉𑀪𑁄𑀧𑀺 𑀅𑀢𑀺𑀯𑀺𑀬 𑀣𑀤𑁆𑀥𑀸, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀆𑀭𑁄𑀕𑁆𑀬𑀲𑀸𑀲𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀧𑀦 𑀓𑀺𑀁 𑀤𑀲𑁆𑀲𑀣, 𑀢𑀺𑀝𑁆𑀞𑀢𑀼 𑀢𑀸𑀯𑁂𑀢𑀁, 𑀅𑀧𑀺 𑀫𑁂 𑀧𑀪𑀸𑀯𑀢𑀺𑀁 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳 ¶ . 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀦𑀁 ‘‘𑀲𑀘𑁂 𑀫𑁂 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀔𑀼𑀚𑁆𑀚𑀪𑀸𑀯𑀁 𑀢𑁂 𑀉𑀚𑀼𑀓𑀁 𑀓𑀢𑁆𑀯𑀸 𑀕𑀻𑀯𑁂𑀬𑁆𑀬𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀮𑁄𑀪𑁂𑀦𑁆𑀢𑁄 𑀧𑀜𑁆𑀘 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀦𑁂𑀓𑁆𑀔𑀁 ¶ 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;
𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀑𑀮𑁄𑀓𑁂𑀬𑁆𑀬 𑀧𑀪𑀸𑀯𑀢𑀻.
‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;
𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀆𑀮𑀧𑁂𑀬𑁆𑀬 𑀧𑀪𑀸𑀯𑀢𑀻.
‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;
𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀉𑀫𑁆𑀳𑀸𑀬𑁂𑀬𑁆𑀬 𑀧𑀪𑀸𑀯𑀢𑀻.
‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;
𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀧𑀫𑁆𑀳𑀸𑀬𑁂𑀬𑁆𑀬 𑀧𑀪𑀸𑀯𑀢𑀻.
‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀸𑀭𑁂𑀲𑁆𑀲𑀁, 𑀧𑀢𑁆𑀯𑀸 𑀔𑀼𑀚𑁆𑀚𑁂 𑀓𑀼𑀲𑀸𑀯𑀢𑀺𑀁;
𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀧𑀸𑀡𑀻𑀳𑀺 𑀉𑀧𑀲𑀫𑁆𑀨𑀼𑀲𑁂’’𑀢𑀺.
𑀢𑀢𑁆𑀣 𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂𑀢𑀺 𑀢𑀯 𑀕𑀻𑀯𑁂𑀬𑁆𑀬𑀁 𑀲𑀩𑁆𑀩𑀲𑀼𑀯𑀡𑁆𑀡𑀫𑀬𑀫𑁂𑀯 𑀓𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀦𑁂𑀓𑁆𑀔𑀁 𑀕𑀻𑀯𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺𑀧𑀺 𑀧𑀸𑀞𑁄, 𑀢𑀯 𑀕𑀻𑀯𑀸𑀬 𑀦𑁂𑀓𑁆𑀔𑀫𑀬𑀁 𑀧𑀺𑀴𑀦𑁆𑀥𑀦𑀁 𑀧𑀺𑀴𑀦𑁆𑀥𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀑𑀮𑁄𑀓𑁂𑀬𑁆𑀬𑀸𑀢𑀺 𑀲𑀘𑁂 𑀢𑀯 𑀯𑀘𑀦𑁂𑀦 𑀫𑀁 𑀧𑀪𑀸𑀯𑀢𑀻 𑀑𑀮𑁄𑀓𑁂𑀬𑁆𑀬, 𑀲𑀘𑁂 𑀫𑀁 𑀢𑀸𑀬 𑀑𑀮𑁄𑀓𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. ‘‘𑀆𑀮𑀧𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀉𑀫𑁆𑀳𑀸𑀬𑁂𑀬𑁆𑀬𑀸𑀢𑀺 𑀫𑀦𑁆𑀤𑀳𑀲𑀺𑀢𑀯𑀲𑁂𑀦 𑀧𑀭𑀺𑀳𑀸𑀲𑁂𑀬𑁆𑀬. 𑀧𑀫𑁆𑀳𑀸𑀬𑁂𑀬𑁆𑀬𑀸𑀢𑀺 𑀫𑀳𑀸𑀳𑀲𑀺𑀢𑀯𑀲𑁂𑀦 𑀧𑀭𑀺𑀳𑀸𑀲𑁂𑀬𑁆𑀬.
𑀲𑀸 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀤𑁂𑀯, 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀦𑀁 𑀢𑀼𑀫𑁆𑀳𑀸𑀓𑀁 𑀯𑀲𑁂 𑀓𑀭𑀺𑀲𑁆𑀲𑀸𑀫𑀺, 𑀧𑀲𑁆𑀲𑀣 𑀫𑁂 𑀧𑀭𑀓𑁆𑀓𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀯𑀲𑀦𑀕𑀩𑁆𑀪𑀁 𑀲𑁄𑀥𑁂𑀦𑁆𑀢𑀻 𑀯𑀺𑀬 𑀧𑀳𑀭𑀡𑀬𑁄𑀕𑁆𑀕𑀁 𑀮𑁂𑀟𑁆𑀟𑀼𑀔𑀡𑁆𑀟𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀧𑀸𑀤𑀼𑀓𑀸𑀧𑀺 𑀦𑀻𑀳𑀭𑀺𑀢𑁆𑀯𑀸 𑀲𑀓𑀮𑀕𑀩𑁆𑀪𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑁂 𑀉𑀫𑁆𑀫𑀸𑀭𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀉𑀘𑁆𑀘𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀏𑀓𑀁 𑀦𑀻𑀘𑀧𑀻𑀞𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 ‘‘𑀏𑀳𑀺, 𑀅𑀫𑁆𑀫, 𑀲𑀻𑀲𑁂 𑀢𑁂 ¶ 𑀊𑀓𑀸 𑀯𑀺𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀢𑀢𑁆𑀣 𑀧𑀻𑀞𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀊𑀭𑀼𑀅𑀦𑁆𑀢𑀭𑁂 𑀢𑀲𑁆𑀲𑀸 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀣𑁄𑀓𑀁 𑀓𑀡𑁆𑀟𑀼𑀬𑀺𑀢𑁆𑀯𑀸 ‘‘𑀅𑀳𑁄 𑀇𑀫𑀺𑀲𑁆𑀲𑀸 𑀲𑀻𑀲𑁂 𑀩𑀳𑀽 𑀊𑀓𑀸’’𑀢𑀺 𑀲𑀓𑀲𑀻𑀲𑀢𑁄 𑀊𑀓𑀸 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀧𑀲𑁆𑀲 𑀓𑀺𑀢𑁆𑀢𑀓𑀸 𑀢𑁂 𑀲𑀻𑀲𑁂 𑀊𑀓𑀸’’𑀢𑀺 𑀧𑀺𑀬𑀓𑀣𑀁 𑀓𑀣𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀻 𑀕𑀸𑀣𑀫𑀸𑀳 𑁋
‘‘𑀦 ¶ 𑀳𑀺 𑀦𑀽𑀦𑀸𑀬𑀁 𑀭𑀸𑀚𑀧𑀼𑀢𑁆𑀢𑀻, 𑀓𑀼𑀲𑁂 𑀲𑀸𑀢𑀫𑁆𑀧𑀺 𑀯𑀺𑀦𑁆𑀤𑀢𑀺;
𑀆𑀴𑀸𑀭𑀺𑀓𑁂 𑀪𑀢𑁂 𑀧𑁄𑀲𑁂, 𑀯𑁂𑀢𑀦𑁂𑀦 𑀅𑀦𑀢𑁆𑀣𑀺𑀓𑁂’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀏𑀓𑀁𑀲𑁂𑀦 𑀅𑀬𑀁 𑀭𑀸𑀚𑀧𑀼𑀢𑁆𑀢𑀻 𑀧𑀼𑀩𑁆𑀩𑁂 𑀓𑀼𑀲𑀸𑀯𑀢𑀻𑀦𑀕𑀭𑁂 𑀓𑀼𑀲𑀦𑀭𑀺𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑀯𑀲𑁂𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑀸𑀢𑀁 𑀦 𑀯𑀺𑀦𑁆𑀤𑀢𑀺 𑀦 𑀮𑀪𑀢𑀺, 𑀢𑀫𑁆𑀩𑀽𑀮𑀫𑀢𑁆𑀢𑀫𑁆𑀧𑀺 𑀏𑀢𑁂𑀦 𑀏𑀢𑀺𑀲𑁆𑀲𑀸 𑀤𑀺𑀦𑁆𑀦𑀧𑀼𑀩𑁆𑀩𑀁 𑀦 𑀪𑀯𑀺𑀲𑁆𑀲𑀢𑀺. 𑀓𑀺𑀁𑀓𑀸𑀭𑀡𑀸? 𑀇𑀢𑁆𑀣𑀺𑀬𑁄 𑀦𑀸𑀫 𑀏𑀓𑀤𑀺𑀯𑀲𑀫𑁆𑀧𑀺 𑀅𑀗𑁆𑀓𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑀸𑀫𑀺𑀓𑀫𑁆𑀳𑀺 𑀳𑀤𑀬𑀁 𑀪𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀁 𑀧𑀦 𑀆𑀴𑀸𑀭𑀺𑀓𑁂 𑀪𑀢𑁂 𑀧𑁄𑀲𑁂 𑀆𑀴𑀸𑀭𑀺𑀓𑀢𑁆𑀢𑀜𑁆𑀘 𑀪𑀢𑀓𑀢𑁆𑀢𑀜𑁆𑀘 𑀉𑀧𑀕𑀢𑁂 𑀏𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀫𑀽𑀮𑁂𑀦𑀧𑀺 𑀅𑀦𑀢𑁆𑀣𑀺𑀓𑁂 𑀓𑁂𑀯𑀮𑀁 𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀭𑀚𑁆𑀚𑀁 𑀧𑀳𑀸𑀬 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀲𑀘𑁂𑀧𑀺 𑀢𑁂, 𑀅𑀫𑁆𑀫, 𑀢𑀲𑁆𑀫𑀺𑀁 𑀲𑀺𑀦𑁂𑀳𑁄 𑀦𑀢𑁆𑀣𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸 𑀫𑀁 𑀦𑀺𑀲𑁆𑀲𑀸𑀬 𑀓𑀺𑀮𑀫𑀢𑀻𑀢𑀺 𑀢𑀲𑁆𑀲 𑀓𑀺𑀜𑁆𑀘𑀺𑀤𑁂𑀯 𑀤𑀸𑀢𑀼𑀁 𑀅𑀭𑀳𑀲𑀻𑀢𑀺.
𑀲𑀸 𑀢𑀁 𑀲𑀼𑀢𑁆𑀯𑀸 𑀔𑀼𑀚𑁆𑀚𑀸𑀬 𑀓𑀼𑀚𑁆𑀛𑀺. 𑀅𑀣 𑀦𑀁 𑀔𑀼𑀚𑁆𑀚𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂 𑀔𑀺𑀧𑀺𑀢𑁆𑀯𑀸 𑀲𑀬𑀁 𑀩𑀳𑀺 𑀳𑀼𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀫𑁆𑀳𑀺 𑀑𑀮𑀫𑁆𑀩𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀧𑀪𑀸𑀯𑀢𑀻 𑀢𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑁆𑀯𑀸𑀭𑀫𑀽𑀮𑁂 𑀞𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑀻 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀦 ¶ 𑀳𑀺 𑀦𑀽𑀦𑀸𑀬𑀁 𑀲𑀸 𑀔𑀼𑀚𑁆𑀚𑀸, 𑀮𑀪𑀢𑀺 𑀚𑀺𑀯𑁆𑀳𑀸𑀬 𑀙𑁂𑀤𑀦𑀁;
𑀲𑀼𑀦𑀺𑀲𑀺𑀢𑁂𑀦 𑀲𑀢𑁆𑀣𑁂𑀦, 𑀏𑀯𑀁 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡’’𑀦𑁆𑀢𑀺.
𑀢𑀢𑁆𑀣 𑀲𑀼𑀦𑀺𑀲𑀺𑀢𑁂𑀦𑀸𑀢𑀺 𑀲𑀼𑀝𑁆𑀞𑀼 𑀦𑀺𑀲𑀺𑀢𑁂𑀦 𑀢𑀺𑀔𑀺𑀡𑀲𑀢𑁆𑀣𑁂𑀦. 𑀏𑀯𑀁 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀏𑀯𑀁 𑀅𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀦𑁆𑀢𑀻.
𑀅𑀣 𑀔𑀼𑀚𑁆𑀚𑀸 𑀆𑀯𑀺𑀜𑁆𑀘𑀦𑀭𑀚𑁆𑀚𑀼𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸𑀯 ‘‘𑀦𑀺𑀧𑁆𑀧𑀜𑁆𑀜𑁂 𑀤𑀼𑀩𑁆𑀩𑀺𑀦𑀻𑀢𑁂 𑀢𑀯 𑀭𑀽𑀧𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀫𑀬𑀁 𑀢𑀯 𑀭𑀽𑀧𑀁 𑀔𑀸𑀤𑀺𑀢𑁆𑀯𑀸 𑀬𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀭𑀲𑀳𑀺 ¶ 𑀕𑀸𑀣𑀸𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑀻 𑀔𑀼𑀚𑁆𑀚𑀸𑀕𑀚𑁆𑀚𑀺𑀢𑀁 𑀦𑀸𑀫 𑀕𑀚𑁆𑀚𑀺 𑁋
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀳𑀸𑀬𑀲𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 ¶ 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀳𑀤𑁆𑀥𑀦𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀳𑀩𑁆𑀩𑀮𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀳𑀸𑀭𑀝𑁆𑀞𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀳𑀸𑀭𑀸𑀚𑀸𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀲𑀻𑀳𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀯𑀕𑁆𑀕𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀫𑀥𑀼𑀲𑁆𑀲𑀭𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀲𑀢𑀲𑀺𑀧𑁆𑀧𑁄𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀔𑀢𑁆𑀢𑀺𑀬𑁄𑀢𑀺𑀧𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬𑀁.
‘‘𑀫𑀸 ¶ ¶ 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦 𑀧𑀪𑀸𑀯𑀢𑀺;
𑀓𑀼𑀲𑀭𑀸𑀚𑀸𑀢𑀺 𑀓𑀢𑁆𑀯𑀸𑀦, 𑀓𑀭𑀲𑁆𑀲𑀼 𑀭𑀼𑀘𑀺𑀭𑁂 𑀧𑀺𑀬’’𑀦𑁆𑀢𑀺.
𑀢𑀢𑁆𑀣 𑀫𑀸 𑀦𑀁 𑀭𑀽𑀧𑁂𑀦 𑀧𑀸𑀫𑁂𑀲𑀺, 𑀆𑀭𑁄𑀳𑁂𑀦, 𑀧𑀪𑀸𑀯𑀢𑀻𑀢𑀺 𑀅𑀭𑁂 𑀧𑀪𑀸𑀯𑀢𑀺, 𑀫𑀸 𑀢𑁆𑀯𑀁 𑀏𑀢𑀁 𑀓𑀼𑀲𑀦𑀭𑀺𑀦𑁆𑀤𑀁 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀆𑀭𑁄𑀳𑀧𑀭𑀺𑀡𑀸𑀳𑁂𑀦 𑀧𑀫𑀺𑀦𑀺, 𑀏𑀯𑀁 𑀧𑀫𑀸𑀡𑀁 𑀕𑀡𑁆𑀳𑀺. 𑀫𑀳𑀸𑀬𑀲𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀲𑁄𑀢𑀺 𑀏𑀯𑀁 𑀳𑀤𑀬𑁂 𑀓𑀢𑁆𑀯𑀸𑀦 𑀭𑀼𑀘𑀺𑀭𑁂 𑀧𑀺𑀬𑀤𑀲𑁆𑀲𑀦𑁂 𑀓𑀭𑀲𑁆𑀲𑀼 𑀢𑀲𑁆𑀲 𑀧𑀺𑀬𑀁. 𑀆𑀦𑀼𑀪𑀸𑀯𑁄𑀬𑁂𑀯 𑀳𑀺𑀲𑁆𑀲 𑀭𑀽𑀧𑀦𑁆𑀢𑀺 𑀯𑀤𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑀺 𑀘 𑀫𑀳𑀸𑀬𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄. 𑀫𑀳𑀤𑁆𑀥𑀦𑁄𑀢𑀺 𑀫𑀳𑀸𑀪𑁄𑀕𑁄. 𑀫𑀳𑀩𑁆𑀩𑀮𑁄𑀢𑀺 ¶ 𑀫𑀳𑀸𑀣𑀸𑀫𑁄. 𑀫𑀳𑀸𑀭𑀝𑁆𑀞𑁄𑀢𑀺 𑀯𑀺𑀧𑀼𑀮𑀭𑀝𑁆𑀞𑁄. 𑀫𑀳𑀸𑀭𑀸𑀚𑀸𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸. 𑀲𑀻𑀳𑀲𑁆𑀲𑀭𑁄𑀢𑀺 𑀲𑀻𑀳𑀲𑀤𑁆𑀤𑀲𑀫𑀸𑀦𑀲𑀤𑁆𑀤𑁄. 𑀯𑀕𑁆𑀕𑀼𑀲𑁆𑀲𑀭𑁄𑀢𑀺 𑀮𑀻𑀮𑀸𑀬𑀼𑀢𑁆𑀢𑀲𑁆𑀲𑀭𑁄. 𑀩𑀺𑀦𑁆𑀤𑀼𑀲𑁆𑀲𑀭𑁄𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀖𑀦𑀲𑁆𑀲𑀭𑁄. 𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀲𑀼𑀦𑁆𑀤𑀭𑀲𑁆𑀲𑀭𑁄. 𑀫𑀥𑀼𑀲𑁆𑀲𑀭𑁄𑀢𑀺 𑀫𑀥𑀼𑀭𑀬𑀼𑀢𑁆𑀢𑀲𑁆𑀲𑀭𑁄. 𑀲𑀢𑀲𑀺𑀧𑁆𑀧𑁄𑀢𑀺 𑀧𑀭𑁂𑀲𑀁 𑀲𑀦𑁆𑀢𑀺𑀓𑁂 𑀅𑀲𑀺𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀦𑀺𑀧𑁆𑀨𑀦𑁆𑀦𑀅𑀦𑁂𑀓𑀲𑀢𑀲𑀺𑀧𑁆𑀧𑁄. 𑀔𑀢𑁆𑀢𑀺𑀬𑁄𑀢𑀺 𑀑𑀓𑁆𑀓𑀸𑀓𑀧𑀯𑁂𑀡𑀺𑀬𑀁 𑀚𑀸𑀢𑁄 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑁄. 𑀓𑀼𑀲𑀭𑀸𑀚𑀸𑀢𑀺 𑀲𑀓𑁆𑀓𑀤𑀢𑁆𑀢𑀺𑀬𑀓𑀼𑀲𑀢𑀺𑀡𑀲𑀫𑀸𑀦𑀦𑀸𑀫𑁄 𑀭𑀸𑀚𑀸. 𑀏𑀯𑀭𑀽𑀧𑁄 𑀳𑀺 𑀅𑀜𑁆𑀜𑁄 𑀭𑀸𑀚𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀚𑀸𑀦𑀺𑀢𑁆𑀯𑀸 𑀏𑀢𑀲𑁆𑀲 𑀧𑀺𑀬𑀁 𑀓𑀭𑁄𑀳𑀻𑀢𑀺 𑀔𑀼𑀚𑁆𑀚𑀸 𑀏𑀢𑁆𑀢𑀓𑀸𑀳𑀺 𑀕𑀸𑀣𑀸𑀳𑀺 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.
𑀧𑀪𑀸𑀯𑀢𑀻 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀔𑀼𑀚𑁆𑀚𑁂 𑀅𑀢𑀺𑀯𑀺𑀬 𑀕𑀚𑁆𑀚𑀲𑀺, 𑀳𑀢𑁆𑀣𑁂𑀦 𑀧𑀸𑀧𑀼𑀡𑀦𑁆𑀢𑀻 𑀲𑀲𑀸𑀫𑀺𑀓𑀪𑀸𑀯𑀁 𑀢𑁂 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀔𑀼𑀚𑁆𑀚𑀁 𑀢𑀚𑁆𑀚𑁂𑀲𑀺. 𑀲𑀸𑀧𑀺 𑀢𑀁 ‘‘𑀅𑀳𑀁 𑀢𑀁 𑀭𑀓𑁆𑀔𑀫𑀸𑀦𑀸 𑀧𑀺𑀢𑀼𑀦𑁄 𑀢𑁂 𑀓𑀼𑀲𑀭𑀸𑀚𑀲𑁆𑀲 𑀆𑀕𑀢𑀪𑀸𑀯𑀁 𑀦𑀸𑀭𑁄𑀘𑁂𑀲𑀺𑀁, 𑀳𑁄𑀢𑀼, 𑀅𑀚𑁆𑀚 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀪𑀸𑀬𑀸𑀧𑁂𑀲𑀺. 𑀲𑀸𑀧𑀺 ‘‘𑀓𑁄𑀘𑀺𑀤𑁂𑀯 𑀲𑀼𑀡𑁂𑀬𑁆𑀬𑀸’’𑀢𑀺 𑀔𑀼𑀚𑁆𑀚𑀁 𑀲𑀜𑁆𑀜𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀁 𑀧𑀲𑁆𑀲𑀺𑀢𑀼𑀁 𑀅𑀮𑀪𑀦𑁆𑀢𑁄 𑀲𑀢𑁆𑀢 𑀫𑀸𑀲𑁂 𑀤𑀼𑀩𑁆𑀪𑁄𑀚𑀦𑁂𑀦 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀓𑀺𑀮𑀫𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑁄 𑀫𑁂 𑀏𑀢𑀸𑀬 𑀅𑀢𑁆𑀣𑁄, 𑀲𑀢𑁆𑀢 𑀫𑀸𑀲𑁂 𑀯𑀲𑀦𑁆𑀢𑁄 𑀏𑀢𑀁 𑀧𑀲𑁆𑀲𑀺𑀢𑀼𑀫𑁆𑀧𑀺 𑀦 𑀮𑀪𑀸𑀫𑀺, 𑀅𑀢𑀺𑀯𑀺𑀬 𑀓𑀓𑁆𑀔𑀴𑀸 𑀲𑀸𑀳𑀲𑀺𑀓𑀸, 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀲𑁆𑀲 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀭𑀸𑀚𑀸 𑀲𑀢𑁆𑀢 𑀫𑀸𑀲𑁂 𑀧𑀪𑀸𑀯𑀢𑀺𑀁 𑀤𑀝𑁆𑀞𑀼𑀫𑁆𑀧𑀺 𑀦 𑀮𑀪𑀺, 𑀮𑀪𑀦𑀸𑀓𑀸𑀭𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀤𑁆𑀤𑀭𑀜𑁆𑀜𑁄 𑀤𑀽𑀢𑁂 𑀓𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 ¶ 𑀭𑀸𑀚𑀽𑀦𑀁 𑀤𑀽𑀢𑀁 𑀧𑀸𑀳𑁂𑀦𑁆𑀢𑁄 ‘‘𑀧𑀪𑀸𑀯𑀢𑀻, 𑀓𑀼𑀲𑀭𑀸𑀚𑀁 𑀙𑀟𑁆𑀟𑁂𑀢𑁆𑀯𑀸 𑀆𑀕𑀢𑀸, 𑀆𑀕𑀘𑁆𑀙𑀦𑁆𑀢𑀼 𑀧𑀪𑀸𑀯𑀢𑀺𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀓𑁂𑀓𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀸𑀲𑀦𑀁 𑀧𑀳𑀺𑀡𑀺. 𑀢𑁂 𑀫𑀳𑀸𑀧𑀭𑀺𑀯𑀸𑀭𑁂𑀦 𑀕𑀦𑁆𑀢𑁆𑀯𑀸 𑀦𑀕𑀭𑀁 𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀕𑀢𑀓𑀸𑀭𑀡𑀁 𑀦 𑀚𑀸𑀦𑀦𑁆𑀢𑀺. 𑀢𑁂 ‘‘𑀢𑁆𑀯𑀁 𑀓𑀲𑁆𑀫𑀸 𑀆𑀕𑀢𑁄, 𑀢𑁆𑀯𑀁 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀜𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀓𑀁 𑀓𑀺𑀭 𑀥𑀻𑀢𑀭𑀁 𑀲𑀢𑁆𑀢𑀦𑁆𑀦𑀁 𑀤𑀲𑁆𑀲𑀢𑀺, 𑀧𑀲𑁆𑀲𑀣𑀲𑁆𑀲 𑀅𑀦𑀸𑀘𑀸𑀭𑀁, 𑀉𑀧𑁆𑀧𑀡𑁆𑀟𑁂𑀢𑀺 𑀦𑁄, 𑀕𑀡𑁆𑀳𑀣 𑀦’’𑀦𑁆𑀢𑀺 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀅𑀫𑁆𑀳𑀸𑀓𑀁 𑀧𑀪𑀸𑀯𑀢𑀺𑀁 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺 𑀲𑀸𑀲𑀦𑀸𑀦𑀺 𑀧𑀳𑀺𑀡𑀺𑀢𑁆𑀯𑀸 𑀦𑀕𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀫𑀤𑁆𑀤𑀭𑀸𑀚𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀪𑀻𑀢𑀢𑀲𑀺𑀢𑁄 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀅𑀫𑀘𑁆𑀘𑀸 ‘‘𑀤𑁂𑀯 ¶ ¶ , 𑀲𑀢𑁆𑀢𑀧𑀺 𑀭𑀸𑀚𑀸𑀦𑁄 𑀧𑀪𑀸𑀯𑀢𑀺𑀁 𑀦𑀺𑀲𑁆𑀲𑀸𑀬 𑀆𑀕𑀢𑀸, ‘𑀲𑀘𑁂 𑀦 𑀤𑀲𑁆𑀲𑀢𑀺, 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’𑀢𑀺 𑀯𑀤𑀦𑁆𑀢𑀺, 𑀧𑀸𑀓𑀸𑀭𑁂 𑀅𑀪𑀺𑀦𑁆𑀦𑁂𑀬𑁂𑀯 𑀢𑁂𑀲𑀁 𑀧𑀪𑀸𑀯𑀢𑀺𑀁 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀏𑀢𑁂 𑀦𑀸𑀕𑀸 𑀉𑀧𑀢𑁆𑀣𑀤𑁆𑀥𑀸, 𑀲𑀩𑁆𑀩𑁂 𑀢𑀺𑀝𑁆𑀞𑀦𑁆𑀢𑀺 𑀯𑀫𑁆𑀫𑀺𑀢𑀸;
𑀧𑀼𑀭𑀸 𑀫𑀤𑁆𑀤𑀦𑁆𑀢𑀺 𑀧𑀸𑀓𑀸𑀭𑀁, 𑀆𑀦𑁂𑀦𑁆𑀢𑁂𑀢𑀁 𑀧𑀪𑀸𑀯𑀢𑀺’’𑀦𑁆𑀢𑀺.
𑀢𑀢𑁆𑀣 𑀉𑀧𑀢𑁆𑀣𑀤𑁆𑀥𑀸𑀢𑀺 𑀅𑀢𑀺𑀣𑀤𑁆𑀥𑀸 𑀤𑀧𑁆𑀧𑀺𑀢𑀸. 𑀆𑀦𑁂𑀦𑁆𑀢𑁂𑀢𑀁 𑀧𑀪𑀸𑀯𑀢𑀺𑀦𑁆𑀢𑀺 𑀆𑀦𑁂𑀦𑁆𑀢𑀼 𑀏𑀢𑀁 𑀧𑀪𑀸𑀯𑀢𑀺𑀦𑁆𑀢𑀺 𑀲𑀸𑀲𑀦𑀸𑀦𑀺 𑀧𑀳𑀺𑀡𑀺𑀁𑀲𑀼. 𑀢𑀲𑁆𑀫𑀸 𑀬𑀸𑀯 𑀏𑀢𑁂 𑀦𑀸𑀕𑀸 𑀧𑀸𑀓𑀸𑀭𑀁 𑀦 𑀫𑀤𑁆𑀤𑀦𑁆𑀢𑀺, 𑀢𑀸𑀯 𑀦𑁂𑀲𑀁 𑀧𑀪𑀸𑀯𑀢𑀺𑀁 𑀧𑁂𑀲𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀲𑀘𑀸𑀳𑀁 𑀏𑀓𑀲𑁆𑀲 𑀧𑀪𑀸𑀯𑀢𑀺𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀲𑁂𑀲𑀸 𑀬𑀼𑀤𑁆𑀥𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀦 𑀲𑀓𑁆𑀓𑀸 𑀏𑀓𑀲𑁆𑀲 𑀤𑀸𑀢𑀼𑀁, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸𑀦𑀁 ‘𑀯𑀺𑀭𑀽𑀧𑁄’𑀢𑀺 𑀙𑀟𑁆𑀟𑁂𑀢𑁆𑀯𑀸 𑀆𑀕𑀢𑀸 𑀆𑀕𑀫𑀦𑀲𑁆𑀲 𑀨𑀮𑀁 𑀮𑀪𑀢𑀼, 𑀯𑀥𑀺𑀢𑁆𑀯𑀸𑀦 𑀦𑀁 𑀲𑀢𑁆𑀢 𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀲𑀢𑁆𑀢 𑀩𑀺𑀮𑁂 𑀓𑀭𑀺𑀢𑁆𑀯𑀸𑀦, 𑀅𑀳𑀫𑁂𑀢𑀁 𑀧𑀪𑀸𑀯𑀢𑀺𑀁;
𑀔𑀢𑁆𑀢𑀺𑀬𑀸𑀦𑀁 𑀧𑀤𑀲𑁆𑀲𑀸𑀫𑀺, 𑀬𑁂 𑀫𑀁 𑀳𑀦𑁆𑀢𑀼𑀁 𑀇𑀥𑀸𑀕𑀢𑀸’’𑀢𑀺.
𑀢𑀲𑁆𑀲 𑀲𑀸 𑀓𑀣𑀸 𑀲𑀓𑀮𑀦𑀺𑀯𑁂𑀲𑀦𑁂 𑀧𑀸𑀓𑀝𑀸 𑀅𑀳𑁄𑀲𑀺. 𑀧𑀭𑀺𑀘𑀸𑀭𑀺𑀓𑀸 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀓𑀺𑀭 𑀢𑀁 𑀲𑀢𑁆𑀢 𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀧𑁂𑀲𑁂𑀲𑁆𑀲𑀢𑀻’’𑀢𑀺 𑀧𑀪𑀸𑀯𑀢𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀫𑀭𑀡𑀪𑀬𑀪𑀻𑀢𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀪𑀕𑀺𑀦𑀻𑀳𑀺 𑀧𑀭𑀺𑀯𑀼𑀢𑀸 𑀫𑀸𑀢𑀼 𑀲𑀺𑀭𑀺𑀕𑀩𑁆𑀪𑀁 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀅𑀯𑀼𑀝𑁆𑀞𑀳𑀺 ¶ 𑀭𑀸𑀚𑀧𑀼𑀢𑁆𑀢𑀻, 𑀲𑀸𑀫𑀸 𑀓𑁄𑀲𑁂𑀬𑁆𑀬𑀯𑀸𑀲𑀺𑀦𑀻;
𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸’’𑀢𑀺.
𑀢𑀢𑁆𑀣 𑀲𑀸𑀫𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀸. 𑀓𑁄𑀲𑁂𑀬𑁆𑀬𑀯𑀸𑀲𑀺𑀦𑀻𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀓𑁄𑀲𑁂𑀬𑁆𑀬𑀦𑀺𑀯𑀲𑀦𑀸.
𑀲𑀸 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀆𑀳 𑁋
‘‘𑀢𑀁 ¶ ¶ 𑀦𑀽𑀦 𑀓𑀓𑁆𑀓𑀽𑀧𑀦𑀺𑀲𑁂𑀯𑀺𑀢𑀁 𑀫𑀼𑀔𑀁, 𑀆𑀤𑀸𑀲𑀤𑀦𑁆𑀢𑀸𑀣𑀭𑀼𑀧𑀘𑁆𑀘𑀯𑁂𑀓𑁆𑀔𑀺𑀢𑀁;
𑀲𑀼𑀪𑀁 𑀲𑀼𑀦𑁂𑀢𑁆𑀢𑀁 𑀯𑀺𑀭𑀚𑀁 𑀅𑀦𑀗𑁆𑀕𑀡𑀁, 𑀙𑀼𑀤𑁆𑀥𑀁 𑀯𑀦𑁂 𑀞𑀲𑁆𑀲𑀢𑀺 𑀔𑀢𑁆𑀢𑀺𑀬𑁂𑀳𑀺.
‘‘𑀢𑁂 𑀦𑀽𑀦 𑀫𑁂 𑀅𑀲𑀺𑀢𑁂 𑀯𑁂𑀮𑁆𑀮𑀺𑀢𑀕𑁆𑀕𑁂, 𑀓𑁂𑀲𑁂 𑀫𑀼𑀤𑀽 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑁂;
𑀲𑀫𑀸𑀓𑀼𑀮𑁂 𑀲𑀻𑀯𑀣𑀺𑀓𑀸𑀬 𑀫𑀚𑁆𑀛𑁂, 𑀧𑀸𑀤𑁂𑀳𑀺 𑀕𑀺𑀚𑁆𑀛𑀸 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀺.
‘‘𑀢𑀸 𑀦𑀽𑀦 𑀫𑁂 𑀢𑀫𑁆𑀩𑀦𑀔𑀸 𑀲𑀼𑀮𑁄𑀫𑀸, 𑀩𑀸𑀳𑀸 𑀫𑀼𑀤𑀽 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑀸;
𑀙𑀺𑀦𑁆𑀦𑀸 𑀯𑀦𑁂 𑀉𑀚𑁆𑀛𑀺𑀢𑀸 𑀔𑀢𑁆𑀢𑀺𑀬𑁂𑀳𑀺, 𑀕𑀬𑁆𑀳 𑀥𑀗𑁆𑀓𑁄 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁.
‘‘𑀢𑁂 𑀦𑀽𑀦 𑀢𑀸𑀮𑀽𑀧𑀦𑀺𑀪𑁂 𑀅𑀮𑀫𑁆𑀩𑁂, 𑀦𑀺𑀲𑁂𑀯𑀺𑀢𑁂 𑀓𑀸𑀲𑀺𑀓𑀘𑀦𑁆𑀤𑀦𑁂𑀦;
𑀣𑀦𑁂𑀲𑀼 𑀫𑁂 𑀮𑀫𑁆𑀩𑀺𑀲𑁆𑀲𑀢𑀺 𑀲𑀺𑀗𑁆𑀕𑀸𑀮𑁄, 𑀫𑀸𑀢𑀽𑀯 𑀧𑀼𑀢𑁆𑀢𑁄 𑀢𑀭𑀼𑀡𑁄 𑀢𑀦𑀽𑀚𑁄.
‘‘𑀢𑀁 𑀦𑀽𑀦 𑀲𑁄𑀡𑀺𑀁 𑀧𑀼𑀣𑀼𑀮𑀁 𑀲𑀼𑀓𑁄𑀝𑁆𑀝𑀺𑀢𑀁, 𑀦𑀺𑀲𑁂𑀯𑀺𑀢𑀁 𑀓𑀜𑁆𑀘𑀦𑀫𑁂𑀔𑀮𑀸𑀳𑀺;
𑀙𑀺𑀦𑁆𑀦𑀁 𑀯𑀦𑁂 𑀔𑀢𑁆𑀢𑀺𑀬𑁂𑀳𑀻 𑀅𑀯𑀢𑁆𑀣𑀁, 𑀲𑀺𑀗𑁆𑀕𑀸𑀮𑀲𑀗𑁆𑀖𑀸 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀺.
‘‘𑀲𑁄𑀡𑀸 𑀥𑀗𑁆𑀓𑀸 𑀲𑀺𑀗𑁆𑀕𑀸𑀮𑀸 𑀘, 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀤𑀸𑀞𑀺𑀦𑁄;
𑀅𑀚𑀭𑀸 𑀦𑀽𑀦 𑀳𑁂𑀲𑁆𑀲𑀦𑁆𑀢𑀺, 𑀪𑀓𑁆𑀔𑀬𑀺𑀢𑁆𑀯𑀸 𑀧𑀪𑀸𑀯𑀢𑀺𑀁.
‘‘𑀲𑀘𑁂 ¶ 𑀫𑀁𑀲𑀸𑀦𑀺 𑀳𑀭𑀺𑀁𑀲𑀼, 𑀔𑀢𑁆𑀢𑀺𑀬𑀸 𑀤𑀽𑀭𑀕𑀸𑀫𑀺𑀦𑁄;
𑀅𑀝𑁆𑀞𑀻𑀦𑀺 𑀅𑀫𑁆𑀫 𑀬𑀸𑀘𑀺𑀢𑁆𑀯𑀸, 𑀅𑀦𑀼𑀧𑀣𑁂 𑀤𑀳𑀸𑀣 𑀦𑀁.
‘‘𑀔𑁂𑀢𑁆𑀢𑀸𑀦𑀺 𑀅𑀫𑁆𑀫 𑀓𑀸𑀭𑁂𑀢𑁆𑀯𑀸, 𑀓𑀡𑀺𑀓𑀸𑀭𑁂𑀢𑁆𑀣 𑀭𑁄𑀧𑀬;
𑀬𑀤𑀸 𑀢𑁂 𑀧𑀼𑀧𑁆𑀨𑀺𑀢𑀸 𑀅𑀲𑁆𑀲𑀼, 𑀳𑁂𑀫𑀦𑁆𑀢𑀸𑀦𑀁 𑀳𑀺𑀫𑀘𑁆𑀘𑀬𑁂;
𑀲𑀭𑁂𑀬𑁆𑀬𑀸𑀣 𑀫𑀫𑀁 𑀅𑀫𑁆𑀫, 𑀏𑀯𑀁𑀯𑀡𑁆𑀡𑀸 𑀧𑀪𑀸𑀯𑀢𑀻’’𑀢𑀺.
𑀢𑀢𑁆𑀣 𑀓𑀓𑁆𑀓𑀽𑀧𑀦𑀺𑀲𑁂𑀯𑀺𑀢𑀦𑁆𑀢𑀺𑀮 𑀓𑀓𑁆𑀓𑀽𑀧𑀦𑀺𑀲𑁂𑀯𑀺𑀢𑀦𑁆𑀢𑀺 𑀲𑀸𑀲𑀧𑀓𑀓𑁆𑀓𑀮𑁄𑀡𑀓𑀓𑁆𑀓𑀫𑀢𑁆𑀢𑀺𑀓𑀓𑀓𑁆𑀓𑀢𑀺𑀮𑀓𑀓𑁆𑀓𑀳𑀮𑀺𑀤𑁆𑀤𑀺𑀓𑀓𑁆𑀓𑀫𑀼𑀔𑀘𑀼𑀡𑁆𑀡𑀓𑁂𑀳𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀓𑁆𑀓𑁂𑀳𑀺 𑀉𑀧𑀦𑀺𑀲𑁂𑀯𑀺𑀢𑀁. 𑀆𑀤𑀸𑀲𑀤𑀦𑁆𑀢𑀸𑀣𑀭𑀼𑀧𑀘𑁆𑀘𑀯𑁂𑀓𑁆𑀔𑀺𑀢𑀦𑁆𑀢𑀺 ¶ 𑀤𑀦𑁆𑀢𑀫𑀬𑀣𑀭𑀼𑀫𑁆𑀳𑀺 𑀆𑀤𑀸𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑀁 𑀢𑀢𑁆𑀣 𑀑𑀮𑁄𑀓𑁂𑀢𑁆𑀯𑀸 𑀫𑀡𑁆𑀟𑀺𑀢𑀁. 𑀲𑀼𑀪𑀦𑁆𑀢𑀺 𑀲𑀼𑀪𑀫𑀼𑀔𑀁. 𑀯𑀺𑀭𑀚𑀦𑁆𑀢𑀺 𑀯𑀺𑀕𑀢𑀭𑀚𑀁 𑀦𑀺𑀫𑁆𑀫𑀮𑀁. 𑀅𑀦𑀗𑁆𑀕𑀡𑀦𑁆𑀢𑀺 𑀕𑀡𑁆𑀟𑀧𑀺𑀴𑀓𑀸𑀤𑀺𑀤𑁄𑀲𑀭𑀳𑀺𑀢𑀁. 𑀙𑀼𑀤𑁆𑀥𑀦𑁆𑀢𑀺 𑀅𑀫𑁆𑀫 𑀏𑀯𑀭𑀽𑀧𑀁 𑀫𑀫 𑀫𑀼𑀔𑀁 𑀅𑀤𑁆𑀥𑀸 𑀇𑀤𑀸𑀦𑀺 𑀔𑀢𑁆𑀢𑀺𑀬𑁂𑀳𑀺 𑀙𑀟𑁆𑀟𑀺𑀢𑀁 𑀯𑀦𑁂 ¶ 𑀅𑀭𑀜𑁆𑀜𑁂 𑀞𑀲𑁆𑀲𑀢𑀻𑀢𑀺 𑀧𑀭𑀺𑀤𑁂𑀯𑀢𑀺. 𑀅𑀲𑀺𑀢𑁂𑀢𑀺 𑀓𑀸𑀴𑀓𑁂. 𑀯𑁂𑀮𑁆𑀮𑀺𑀢𑀕𑁆𑀕𑁂𑀢𑀺 𑀉𑀦𑁆𑀦𑀢𑀕𑁆𑀕𑁂. 𑀲𑀻𑀯𑀣𑀺𑀓𑀸𑀬𑀸𑀢𑀺 𑀲𑀼𑀲𑀸𑀦𑀫𑁆𑀳𑀺. 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀭𑀽𑀧𑁂 𑀫𑀫 𑀓𑁂𑀲𑁂 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀓𑀸 𑀕𑀺𑀚𑁆𑀛𑀸 𑀧𑀸𑀤𑁂𑀳𑀺 𑀧𑀳𑀭𑀺𑀢𑁆𑀯𑀸 𑀦𑀽𑀦 𑀧𑀭𑀺𑀓𑀟𑁆𑀠𑀺𑀲𑁆𑀲𑀦𑁆𑀢𑀺. 𑀕𑀬𑁆𑀳 𑀥𑀗𑁆𑀓𑁄 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀦𑁆𑀢𑀺 𑀅𑀫𑁆𑀫 𑀫𑀫 𑀏𑀯𑀭𑀽𑀧𑀁 𑀩𑀸𑀳𑀁 𑀦𑀽𑀦 𑀥𑀗𑁆𑀓𑁄 𑀕𑀳𑁂𑀢𑁆𑀯𑀸 𑀮𑀼𑀜𑁆𑀚𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 𑀬𑁂𑀦𑀓𑀸𑀫𑀁 𑀕𑀘𑁆𑀙𑀺𑀲𑁆𑀲𑀢𑀺.
𑀢𑀸𑀮𑀽𑀧𑀦𑀺𑀪𑁂𑀢𑀺 𑀲𑀼𑀯𑀡𑁆𑀡𑀢𑀸𑀮𑀨𑀮𑀲𑀤𑀺𑀲𑁂. 𑀓𑀸𑀲𑀺𑀓𑀘𑀦𑁆𑀤𑀦𑁂𑀦𑀸𑀢𑀺 𑀲𑀼𑀔𑀼𑀫𑀘𑀦𑁆𑀤𑀦𑁂𑀦 𑀦𑀺𑀲𑁂𑀯𑀺𑀢𑁂. 𑀣𑀦𑁂𑀲𑀼 𑀫𑁂𑀢𑀺 𑀅𑀫𑁆𑀫 𑀫𑀫 𑀲𑀼𑀲𑀸𑀦𑁂 𑀧𑀢𑀺𑀢𑀸𑀬 𑀏𑀯𑀭𑀽𑀧𑁂 𑀣𑀦𑁂 𑀤𑀺𑀲𑁆𑀯𑀸 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑁂𑀲𑀼 𑀫𑁂 𑀣𑀦𑁂𑀲𑀼 𑀅𑀢𑁆𑀢𑀦𑁄 𑀢𑀦𑀼𑀚𑁄 𑀫𑀸𑀢𑀼 𑀢𑀭𑀼𑀡𑀧𑀼𑀢𑁆𑀢𑁄 𑀯𑀺𑀬 𑀦𑀽𑀦 𑀲𑀺𑀗𑁆𑀕𑀸𑀮𑁄 𑀮𑀫𑁆𑀩𑀺𑀲𑁆𑀲𑀢𑀺. 𑀲𑁄𑀡𑀺𑀦𑁆𑀢𑀺 𑀓𑀝𑀺𑀁. 𑀲𑀼𑀓𑁄𑀝𑁆𑀝𑀺𑀢𑀦𑁆𑀢𑀺 𑀕𑁄𑀳𑀦𑀼𑀓𑁂𑀦 𑀧𑀳𑀭𑀺𑀢𑁆𑀯𑀸 𑀲𑀼𑀯𑀟𑁆𑀠𑀺𑀢𑀁. 𑀅𑀯𑀢𑁆𑀣𑀦𑁆𑀢𑀺 𑀙𑀟𑁆𑀟𑀺𑀢𑀁. 𑀪𑀓𑁆𑀔𑀬𑀺𑀢𑁆𑀯𑀸𑀢𑀺 𑀅𑀫𑁆𑀫 𑀏𑀢𑁂 𑀏𑀢𑁆𑀢𑀓𑀸 𑀦𑀽𑀦 𑀫𑀫 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀚𑀭𑀸 𑀪𑀯𑀺𑀲𑁆𑀲𑀦𑁆𑀢𑀺.
𑀲𑀘𑁂 𑀫𑀁𑀲𑀸𑀦𑀺 𑀳𑀭𑀺𑀁𑀲𑀽𑀢𑀺 𑀅𑀫𑁆𑀫 𑀲𑀘𑁂 𑀢𑁂 𑀔𑀢𑁆𑀢𑀺𑀬𑀸 𑀫𑀬𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀫𑀫 𑀫𑀁𑀲𑀸𑀦𑀺 𑀳𑀭𑁂𑀬𑁆𑀬𑀼𑀁, 𑀅𑀣 𑀢𑀼𑀫𑁆𑀳𑁂 𑀅𑀝𑁆𑀞𑀻𑀦𑀺 𑀬𑀸𑀘𑀺𑀢𑁆𑀯𑀸 𑀅𑀦𑀼𑀧𑀣𑁂 𑀤𑀳𑀸𑀣𑀦𑀁, 𑀚𑀗𑁆𑀖𑀫𑀕𑁆𑀕𑀫𑀳𑀸𑀫𑀕𑁆𑀕𑀸𑀦𑀁 𑀅𑀦𑁆𑀢𑀭𑁂 𑀤𑀳𑁂𑀬𑁆𑀬𑀸𑀣𑀸𑀢𑀺 𑀯𑀤𑀢𑀺. 𑀔𑁂𑀢𑁆𑀢𑀸𑀦𑀻𑀢𑀺 𑀅𑀫𑁆𑀫 𑀫𑀫 𑀛𑀸𑀧𑀺𑀢𑀝𑁆𑀞𑀸𑀦𑁂 𑀫𑀸𑀮𑀸𑀤𑀺𑀯𑀢𑁆𑀣𑀽𑀦𑀺 𑀓𑀸𑀭𑁂𑀢𑁆𑀯𑀸 𑀏𑀢𑁆𑀣 𑀏𑀢𑁂𑀲𑀼 𑀔𑁂𑀢𑁆𑀢𑁂𑀲𑀼 𑀓𑀡𑀺𑀓𑀸𑀭𑀭𑀼𑀓𑁆𑀔𑁂 𑀭𑁄𑀧𑀬. 𑀳𑀺𑀫𑀘𑁆𑀘𑀬𑁂𑀢𑀺 𑀳𑀺𑀫𑀧𑀸𑀢𑀸𑀢𑀺𑀓𑁆𑀓𑀫𑁂 𑀨𑀕𑁆𑀕𑀼𑀡𑀫𑀸𑀲𑁂. 𑀲𑀭𑁂𑀬𑁆𑀬𑀸𑀣𑀸𑀢𑀺 𑀢𑁂𑀲𑀁 𑀧𑀼𑀧𑁆𑀨𑀸𑀦𑀁 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀁 𑀧𑀽𑀭𑁂𑀢𑁆𑀯𑀸 𑀊𑀭𑀽𑀲𑀼 𑀞𑀧𑁂𑀢𑁆𑀯𑀸 𑀫𑀫 𑀥𑀻𑀢𑀸 𑀧𑀪𑀸𑀯𑀢𑀻 𑀏𑀯𑀁𑀯𑀡𑁆𑀡𑀸𑀢𑀺 𑀲𑀭𑁂𑀬𑁆𑀬𑀸𑀣.
𑀇𑀢𑀺 ¶ 𑀲𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀫𑀸𑀢𑀼 𑀲𑀦𑁆𑀢𑀺𑀓𑁂 𑀯𑀺𑀮𑀧𑀺. 𑀫𑀤𑁆𑀤𑀭𑀸𑀚𑀸𑀧𑀺 ‘‘𑀨𑀭𑀲𑀼𑀜𑁆𑀘 𑀕𑀡𑁆𑀟𑀺𑀓𑀜𑁆𑀘 𑀕𑀳𑁂𑀢𑁆𑀯𑀸 𑀘𑁄𑀭𑀖𑀸𑀢𑀓𑁄 𑀇𑀥𑁂𑀯 𑀆𑀕𑀘𑁆𑀙𑀢𑀽’’𑀢𑀺 𑀆𑀡𑀸𑀧𑁂𑀲𑀺. 𑀢𑀲𑁆𑀲 𑀆𑀕𑀫𑀦𑀁 𑀲𑀓𑀮𑀭𑀸𑀚𑀕𑁂𑀳𑁂 𑀧𑀸𑀓𑀝𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀧𑀪𑀸𑀯𑀢𑀺𑀬𑀸 𑀫𑀸𑀢𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑁄𑀓𑀲𑀫𑀧𑁆𑀧𑀺𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀲𑁆𑀲𑀸 𑀫𑀸𑀢𑀸 𑀉𑀤𑀝𑁆𑀞𑀸𑀲𑀺, 𑀔𑀢𑁆𑀢𑀺𑀬𑀸 𑀤𑁂𑀯𑀯𑀡𑁆𑀡𑀺𑀦𑀻;
𑀤𑀺𑀲𑁆𑀯𑀸 𑀅𑀲𑀺𑀜𑁆𑀘 𑀲𑀽𑀦𑀜𑁆𑀘, 𑀭𑀜𑁆𑀜𑁄 𑀫𑀤𑁆𑀤𑀲𑁆𑀲𑀦𑁆𑀢𑁂𑀧𑀼𑀭𑁂’’𑀢𑀺.
𑀢𑀢𑁆𑀣 ¶ 𑀉𑀤𑀝𑁆𑀞𑀸𑀲𑀻𑀢𑀺 𑀆𑀲𑀦𑀸 𑀉𑀝𑁆𑀞𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀺𑀲𑁆𑀯𑀸 𑀅𑀲𑀺𑀜𑁆𑀘 𑀲𑀽𑀦𑀜𑁆𑀘𑀸𑀢𑀺 𑀅𑀦𑁆𑀢𑁂𑀧𑀼𑀭𑀫𑁆𑀳𑀺 𑀅𑀮𑀗𑁆𑀓𑀢𑀫𑀳𑀸𑀢𑀮𑁂 𑀭𑀜𑁆𑀜𑁄 𑀧𑀼𑀭𑀢𑁄 𑀦𑀺𑀓𑁆𑀔𑀺𑀢𑁆𑀢𑀁 𑀨𑀭𑀲𑀼𑀜𑁆𑀘 𑀕𑀡𑁆𑀟𑀺𑀓𑀜𑁆𑀘 𑀤𑀺𑀲𑁆𑀯𑀸 𑀯𑀺𑀮𑀧𑀦𑁆𑀢𑀻 𑀕𑀸𑀣𑀫𑀸𑀳 𑁋
‘‘𑀇𑀫𑀺𑀦𑀸 ¶ 𑀦𑀽𑀦 𑀅𑀲𑀺𑀦𑀸, 𑀲𑀼𑀲𑀜𑁆𑀜𑀁 𑀢𑀦𑀼𑀫𑀚𑁆𑀛𑀺𑀫𑀁;
𑀥𑀻𑀢𑀭𑀁 𑀫𑀤𑁆𑀤 𑀳𑀦𑁆𑀢𑁆𑀯𑀸𑀦, 𑀔𑀢𑁆𑀢𑀺𑀬𑀸𑀦𑀁 𑀧𑀤𑀲𑁆𑀲𑀲𑀻’’𑀢𑀺.
𑀢𑀢𑁆𑀣 𑀅𑀲𑀺𑀦𑀸𑀢𑀺 𑀨𑀭𑀲𑀼𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀲𑀺 𑀦𑀸𑀫 𑀚𑀸𑀢𑁄. 𑀲𑀼𑀲𑀜𑁆𑀜𑀁 𑀢𑀦𑀼𑀫𑀚𑁆𑀛𑀺𑀫𑀦𑁆𑀢𑀺 𑀲𑀼𑀝𑁆𑀞𑀼 𑀲𑀜𑁆𑀜𑀸𑀢𑀁 𑀢𑀦𑀼𑀫𑀚𑁆𑀛𑀺𑀫𑀁.
𑀅𑀣 𑀦𑀁 𑀭𑀸𑀚𑀸 𑀲𑀜𑁆𑀜𑀸𑀧𑁂𑀦𑁆𑀢𑁄 𑀆𑀳 𑁋 ‘‘𑀤𑁂𑀯𑀺, 𑀓𑀺𑀁 𑀓𑀣𑁂𑀲𑀺, 𑀢𑀯 𑀥𑀻𑀢𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸𑀦𑀁 ‘𑀯𑀺𑀭𑀽𑀧𑁄’𑀢𑀺 𑀙𑀟𑁆𑀟𑁂𑀢𑁆𑀯𑀸 𑀕𑀢𑀫𑀕𑁆𑀕𑁂 𑀧𑀤𑀯𑀮𑀜𑁆𑀚𑁂 𑀅𑀯𑀺𑀦𑀝𑁆𑀞𑁂𑀬𑁂𑀯 𑀫𑀘𑁆𑀘𑀼𑀁 𑀦𑀮𑀸𑀝𑁂𑀦𑀸𑀤𑀸𑀬 𑀆𑀕𑀢𑀸, 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀈𑀤𑀺𑀲𑀁 𑀨𑀮𑀁 𑀮𑀪𑀢𑀽’’𑀢𑀺. 𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀥𑀻𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀺𑀮𑀧𑀦𑁆𑀢𑀻 𑀆𑀳 𑁋
‘‘𑀦 𑀫𑁂 𑀅𑀓𑀸𑀲𑀺 𑀯𑀘𑀦𑀁, 𑀅𑀢𑁆𑀣𑀓𑀸𑀫𑀸𑀬 𑀧𑀼𑀢𑁆𑀢𑀺𑀓𑁂;
𑀲𑀸𑀚𑁆𑀚 𑀮𑁄𑀳𑀺𑀢𑀲𑀜𑁆𑀙𑀦𑁆𑀦𑀸, 𑀕𑀘𑁆𑀙𑀲𑀺 𑀬𑀫𑀲𑀸𑀥𑀦𑀁.
‘‘𑀏𑀯𑀫𑀸𑀧𑀚𑁆𑀚𑀢𑀻 𑀧𑁄𑀲𑁄, 𑀧𑀸𑀧𑀺𑀬𑀜𑁆𑀘 𑀦𑀺𑀕𑀘𑁆𑀙𑀢𑀺;
𑀬𑁄 𑀯𑁂 𑀳𑀺𑀢𑀸𑀦𑀁 𑀯𑀘𑀦𑀁, 𑀦 𑀓𑀭𑁄𑀢𑀺 𑀅𑀢𑁆𑀣𑀤𑀲𑁆𑀲𑀺𑀦𑀁.
‘‘𑀲𑀘𑁂 𑀘 𑀅𑀚𑁆𑀚 𑀥𑀸𑀭𑁂𑀲𑀺, 𑀓𑀼𑀫𑀸𑀭𑀁 𑀘𑀸𑀭𑀼𑀤𑀲𑁆𑀲𑀦𑀁;
𑀓𑀼𑀲𑁂𑀦 𑀚𑀸𑀢𑀁 𑀔𑀢𑁆𑀢𑀺𑀬𑀁, 𑀲𑀼𑀯𑀡𑁆𑀡𑀫𑀡𑀺𑀫𑁂𑀔𑀮𑀁;
𑀧𑀽𑀚𑀺𑀢𑀁 𑀜𑀸𑀢𑀺𑀲𑀗𑁆𑀖𑁂𑀳𑀺, 𑀦 𑀕𑀘𑁆𑀙𑀲𑀺 𑀬𑀫𑀓𑁆𑀔𑀬𑀁.
‘‘𑀬𑀢𑁆𑀣𑀲𑁆𑀲𑀼 ¶ 𑀪𑁂𑀭𑀻 𑀦𑀤𑀢𑀺, 𑀓𑀼𑀜𑁆𑀚𑀭𑁄 𑀘 𑀦𑀺𑀓𑀽𑀚𑀢𑀺;
𑀔𑀢𑁆𑀢𑀺𑀬𑀸𑀦𑀁 𑀓𑀼𑀮𑁂 𑀪𑀤𑁆𑀤𑁂, 𑀓𑀺𑀦𑁆𑀦𑀼 𑀲𑀼𑀔𑀢𑀭𑀁 𑀢𑀢𑁄.
‘‘𑀅𑀲𑁆𑀲𑁄 𑀘 𑀲𑀺𑀲𑀢𑀺 𑀤𑁆𑀯𑀸𑀭𑁂, 𑀓𑀼𑀫𑀸𑀭𑁄 𑀉𑀧𑀭𑁄𑀤𑀢𑀺;
𑀔𑀢𑁆𑀢𑀺𑀬𑀸𑀦𑀁 𑀓𑀼𑀮𑁂 𑀪𑀤𑁆𑀤𑁂, 𑀓𑀺𑀦𑁆𑀦𑀼 𑀲𑀼𑀔𑀢𑀭𑀁 𑀢𑀢𑁄.
‘‘𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑁂, 𑀓𑁄𑀓𑀺𑀮𑀸𑀪𑀺𑀦𑀺𑀓𑀽𑀚𑀺𑀢𑁂;
𑀔𑀢𑁆𑀢𑀺𑀬𑀸𑀦𑀁 𑀓𑀼𑀮𑁂 𑀪𑀤𑁆𑀤𑁂, 𑀓𑀺𑀦𑁆𑀦𑀼 𑀲𑀼𑀔𑀢𑀭𑀁 𑀢𑀢𑁄’’𑀢𑀺.
𑀢𑀢𑁆𑀣 ¶ 𑀧𑀼𑀢𑁆𑀢𑀺𑀓𑁂𑀢𑀺 𑀢𑀁 𑀆𑀮𑀧𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀫, 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙, 𑀫𑀸 𑀭𑀽𑀧𑀫𑀤𑁂𑀦 𑀫𑀚𑁆𑀚𑀻𑀢𑀺 𑀏𑀯𑀁 𑀬𑀸𑀘𑀦𑁆𑀢𑀺𑀬𑀸𑀧𑀺 𑀫𑁂 𑀯𑀘𑀦𑀁 𑀦 𑀅𑀓𑀸𑀲𑀺, 𑀲𑀸 𑀢𑁆𑀯𑀁 𑀅𑀚𑁆𑀚 𑀮𑁄𑀳𑀺𑀢𑀲𑀜𑁆𑀙𑀦𑁆𑀦𑀸 𑀕𑀘𑁆𑀙𑀲𑀺 𑀬𑀫𑀲𑀸𑀥𑀦𑀁, 𑀫𑀘𑁆𑀘𑀼𑀭𑀸𑀚𑀲𑁆𑀲 𑀪𑀯𑀦𑀁 ¶ 𑀕𑀫𑀺𑀲𑁆𑀲𑀲𑀻𑀢𑀺. 𑀧𑀸𑀧𑀺𑀬𑀜𑁆𑀘𑀸𑀢𑀺 𑀇𑀢𑁄 𑀧𑀸𑀧𑀢𑀭𑀜𑁆𑀘 𑀦𑀺𑀕𑀘𑁆𑀙𑀢𑀺. 𑀲𑀘𑁂 𑀘 𑀅𑀚𑁆𑀚 𑀥𑀸𑀭𑁂𑀲𑀻𑀢𑀺, 𑀅𑀫𑁆𑀫, 𑀲𑀘𑁂 𑀢𑁆𑀯𑀁 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀅𑀕𑀦𑁆𑀢𑁆𑀯𑀸 𑀓𑀼𑀲𑀦𑀭𑀺𑀦𑁆𑀤𑀁 𑀧𑀝𑀺𑀘𑁆𑀘 𑀮𑀤𑁆𑀥𑀁 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀲𑀤𑀺𑀲𑀁 𑀘𑀸𑀭𑀼𑀤𑀲𑁆𑀲𑀦𑀁 𑀓𑀼𑀫𑀸𑀭𑀁 𑀅𑀚𑁆𑀚 𑀥𑀸𑀭𑀬𑀺𑀲𑁆𑀲𑀲𑀺. 𑀬𑀫𑀓𑁆𑀔𑀬𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀬𑀫𑀦𑀺𑀯𑁂𑀲𑀦𑀁 𑀦 𑀕𑀘𑁆𑀙𑁂𑀬𑁆𑀬𑀸𑀲𑀺. 𑀢𑀢𑁄 𑀬𑀫𑁆𑀳𑀺 𑀔𑀢𑁆𑀢𑀺𑀬𑀓𑀼𑀮𑁂 𑀅𑀬𑀁 𑀯𑀺𑀪𑀽𑀢𑀺, 𑀢𑀫𑁆𑀳𑀸 𑀦𑀸𑀦𑀸𑀪𑁂𑀭𑀺𑀲𑀤𑁆𑀤𑁂𑀦 𑀘𑁂𑀯 𑀫𑀢𑁆𑀢𑀯𑀸𑀭𑀡𑀓𑁄𑀜𑁆𑀘𑀦𑀸𑀤𑁂𑀦 𑀘 𑀦𑀺𑀦𑁆𑀦𑀸𑀤𑀺𑀢𑀸 𑀓𑀼𑀲𑀸𑀯𑀢𑀻𑀭𑀸𑀚𑀓𑀼𑀮𑀸 𑀓𑀺𑀁 𑀦𑀼 𑀲𑀼𑀔𑀢𑀭𑀁 𑀤𑀺𑀲𑁆𑀯𑀸 𑀇𑀥𑀸𑀕𑀢𑀸𑀲𑀻𑀢𑀺 𑀅𑀢𑁆𑀣𑁄. 𑀲𑀺𑀲𑀢𑀻𑀢𑀺 𑀳𑀲𑀢𑀺. 𑀓𑀼𑀫𑀸𑀭𑁄𑀢𑀺 𑀲𑀼𑀲𑀺𑀓𑁆𑀔𑀺𑀢𑁄 𑀕𑀦𑁆𑀥𑀩𑁆𑀩𑀓𑀼𑀫𑀸𑀭𑁄. 𑀉𑀧𑀭𑁄𑀤𑀢𑀻𑀢𑀺 𑀦𑀸𑀦𑀸𑀢𑀽𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀉𑀧𑀳𑀸𑀭𑀁 𑀓𑀭𑁄𑀢𑀺. 𑀓𑁄𑀓𑀺𑀮𑀸𑀪𑀺𑀦𑀺𑀓𑀽𑀚𑀺𑀢𑁂𑀢𑀺 𑀓𑀼𑀲𑀭𑀸𑀚𑀓𑀼𑀮𑁂 𑀲𑀸𑀬𑀁 𑀧𑀸𑀢𑁄 𑀧𑀯𑀢𑁆𑀢𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀽𑀧𑀳𑀸𑀭𑀁 𑀧𑀝𑀺𑀧𑁆𑀨𑀭𑀦𑁆𑀢𑀻 𑀯𑀺𑀬 𑀓𑁄𑀓𑀺𑀮𑁂𑀳𑀺 𑀅𑀪𑀺𑀦𑀺𑀓𑀽𑀚𑀺𑀢𑁂.
𑀇𑀢𑀺 𑀲𑀸𑀧𑀺 𑀏𑀢𑁆𑀢𑀓𑀸𑀳𑀺 𑀕𑀸𑀣𑀸𑀳𑀺 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑁆𑀯𑀸 ‘‘𑀲𑀘𑁂 𑀅𑀚𑁆𑀚 𑀓𑀼𑀲𑀦𑀭𑀺𑀦𑁆𑀤𑁄 𑀇𑀥 𑀅𑀲𑁆𑀲, 𑀇𑀫𑁂 𑀲𑀢𑁆𑀢 𑀭𑀸𑀚𑀸𑀦𑁄 𑀧𑀮𑀸𑀧𑁂𑀢𑁆𑀯𑀸 𑀫𑀫 𑀥𑀻𑀢𑀭𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀓𑀳𑀁 𑀦𑀼 𑀔𑁄 𑀲𑀢𑁆𑀢𑀼𑀫𑀤𑁆𑀤𑀦𑁄, 𑀧𑀭𑀭𑀝𑁆𑀞𑀧𑁆𑀧𑀫𑀤𑁆𑀤𑀦𑁄;
𑀓𑀼𑀲𑁄 𑀲𑁄𑀴𑀸𑀭𑀧𑀜𑁆𑀜𑀸𑀡𑁄, 𑀬𑁄 𑀦𑁄 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂’’𑀢𑀺.
𑀢𑀢𑁆𑀣 𑀲𑁄𑀴𑀸𑀭𑀧𑀜𑁆𑀜𑀸𑀡𑁄𑀢𑀺 𑀉𑀴𑀸𑀭𑀧𑀜𑁆𑀜𑁄.
𑀢𑀢𑁄 ¶ 𑀧𑀪𑀸𑀯𑀢𑀻 ‘‘𑀫𑀫 𑀫𑀸𑀢𑀼 𑀓𑀼𑀲𑀲𑁆𑀲 𑀯𑀡𑁆𑀡𑀁 𑀪𑀡𑀦𑁆𑀢𑀺𑀬𑀸 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀢𑀸𑀯𑀲𑁆𑀲𑀸 𑀢𑀲𑁆𑀲 𑀇𑀥𑁂𑀯 𑀆𑀴𑀸𑀭𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀯𑀲𑀦𑀪𑀸𑀯’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀇𑀥𑁂𑀯 𑀲𑁄 𑀲𑀢𑁆𑀢𑀼𑀫𑀤𑁆𑀤𑀦𑁄, 𑀧𑀭𑀭𑀝𑁆𑀞𑀧𑁆𑀧𑀫𑀤𑁆𑀤𑀦𑁄;
𑀓𑀼𑀲𑁄 𑀲𑁄𑀴𑀸𑀭𑀧𑀜𑁆𑀜𑀸𑀡𑁄, 𑀬𑁄 𑀢𑁂 𑀲𑀩𑁆𑀩𑁂 𑀯𑀥𑀺𑀲𑁆𑀲𑀢𑀻’’𑀢𑀺.
𑀅𑀣𑀲𑁆𑀲𑀸 𑀫𑀸𑀢𑀸 ‘‘𑀅𑀬𑀁 𑀫𑀭𑀡𑀪𑀬𑀪𑀻𑀢𑀸 𑀯𑀺𑀧𑁆𑀧𑀮𑀧𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀉𑀫𑁆𑀫𑀢𑁆𑀢𑀺𑀓𑀸 ¶ 𑀦𑀼 𑀪𑀡𑀲𑀺, 𑀅𑀦𑁆𑀥𑀩𑀸𑀮𑀸 𑀧𑀪𑀸𑀲𑀲𑀺;
𑀓𑀼𑀲𑁄 𑀘𑁂 𑀆𑀕𑀢𑁄 𑀅𑀲𑁆𑀲, 𑀓𑀺𑀁 𑀦 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.
𑀢𑀢𑁆𑀣 𑀅𑀦𑁆𑀥𑀩𑀸𑀮𑀸𑀢𑀺 𑀲𑀫𑁆𑀫𑀽𑀴𑁆𑀳𑀸 𑀅𑀜𑁆𑀜𑀸𑀡𑀸 𑀳𑀼𑀢𑁆𑀯𑀸. 𑀓𑀺𑀁 𑀦 𑀚𑀸𑀦𑁂𑀫𑀽𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀁 𑀦 𑀚𑀸𑀦𑁂𑀬𑁆𑀬𑀸𑀫. 𑀲𑁄 𑀳𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀞𑀺𑀢𑁄𑀯 𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀧𑁂𑀲𑁂𑀬𑁆𑀬, 𑀲𑀫𑀼𑀲𑁆𑀲𑀺𑀢𑀤𑁆𑀥𑀚𑀸 𑀘𑀢𑀼𑀭𑀗𑁆𑀕𑀺𑀦𑀻𑀲𑁂𑀦𑀸 𑀧𑀜𑁆𑀜𑀸𑀬𑁂𑀣, 𑀢𑁆𑀯𑀁 𑀧𑀦 𑀫𑀭𑀡𑀪𑀬𑁂𑀦 𑀓𑀣𑁂𑀲𑀻𑀢𑀺.
𑀲𑀸 ¶ 𑀏𑀯𑀁 𑀯𑀼𑀢𑁆𑀢𑁂 ‘‘𑀦 𑀫𑁂 𑀫𑀸𑀢𑀸 𑀲𑀤𑁆𑀤𑀳𑀢𑀺, 𑀢𑀲𑁆𑀲 𑀇𑀥𑀸𑀕𑀦𑁆𑀢𑁆𑀯𑀸 𑀲𑀢𑁆𑀢 𑀫𑀸𑀲𑁂 𑀯𑀲𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀤𑀲𑁆𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸𑀢𑀭𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 𑀕𑀸𑀣𑀫𑀸𑀳 𑁋
‘‘𑀏𑀲𑁄 𑀆𑀴𑀸𑀭𑀺𑀓𑁄 𑀧𑁄𑀲𑁄, 𑀓𑀼𑀫𑀸𑀭𑀻𑀧𑀼𑀭𑀫𑀦𑁆𑀢𑀭𑁂;
𑀤𑀴𑁆𑀳𑀁 𑀓𑀢𑁆𑀯𑀸𑀦 𑀲𑀁𑀯𑁂𑀮𑁆𑀮𑀺𑀁, 𑀓𑀼𑀫𑁆𑀪𑀺𑀁 𑀥𑁄𑀯𑀢𑀺 𑀑𑀡𑀢𑁄’’𑀢𑀺.
𑀢𑀢𑁆𑀣 𑀓𑀼𑀫𑀸𑀭𑀻𑀧𑀼𑀭𑀫𑀦𑁆𑀢𑀭𑁂𑀢𑀺 𑀯𑀸𑀢𑀧𑀸𑀦𑁂 𑀞𑀺𑀢𑀸 𑀢𑀯 𑀥𑀻𑀢𑀸𑀦𑀁 𑀓𑀼𑀫𑀸𑀭𑀻𑀦𑀁 𑀯𑀲𑀦𑀝𑁆𑀞𑀸𑀦𑀦𑁆𑀢𑀭𑁂 𑀦𑀁 𑀑𑀮𑁄𑀓𑁂𑀳𑀺. 𑀲𑀁𑀯𑁂𑀮𑁆𑀮𑀺𑀦𑁆𑀢𑀺 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀓𑀼𑀫𑁆𑀪𑀺𑀁 𑀥𑁄𑀯𑀢𑀺.
𑀲𑁄 𑀓𑀺𑀭 𑀢𑀤𑀸 ‘‘𑀅𑀚𑁆𑀚 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸, 𑀧𑀪𑀸𑀯𑀢𑀻, 𑀫𑀫 𑀆𑀕𑀢𑀪𑀸𑀯𑀁 𑀓𑀣𑁂𑀲𑁆𑀲𑀢𑀺, 𑀪𑀸𑀚𑀦𑀸𑀦𑀺 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀪𑀸𑀚𑀦𑀸𑀦𑀺 𑀥𑁄𑀯𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀫𑀸𑀢𑀸 𑀧𑀭𑀺𑀪𑀸𑀲𑀦𑁆𑀢𑀻 𑀕𑀸𑀣𑀫𑀸𑀳 𑁋
‘‘𑀯𑁂𑀡𑀻 𑀢𑁆𑀯𑀫𑀲𑀺 𑀘𑀡𑁆𑀟𑀸𑀮𑀻, 𑀅𑀤𑀽𑀲𑀺 𑀓𑀼𑀮𑀕𑀦𑁆𑀥𑀺𑀦𑀻;
𑀓𑀣𑀁 𑀫𑀤𑁆𑀤𑀓𑀼𑀮𑁂 𑀚𑀸𑀢𑀸, 𑀤𑀸𑀲𑀁 𑀓𑀬𑀺𑀭𑀸𑀲𑀺 𑀓𑀸𑀫𑀼𑀓’’𑀦𑁆𑀢𑀺.
𑀢𑀢𑁆𑀣 ¶ 𑀯𑁂𑀡𑀻𑀢𑀺 𑀢𑀘𑁆𑀙𑀺𑀓𑀸. 𑀅𑀤𑀽𑀲𑀺 𑀓𑀼𑀮𑀕𑀦𑁆𑀥𑀺𑀦𑀻𑀢𑀺 𑀉𑀤𑀸𑀳𑀼 𑀢𑁆𑀯𑀁 𑀓𑀼𑀮𑀤𑀽𑀲𑀺𑀓𑀸. 𑀓𑀸𑀫𑀼𑀓𑀦𑁆𑀢𑀺 𑀓𑀣𑀁 𑀦𑀸𑀫 𑀢𑁆𑀯𑀁 𑀏𑀯𑀭𑀽𑀧𑁂 𑀓𑀼𑀮𑁂 𑀚𑀸𑀢𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀤𑀸𑀲𑀁 𑀓𑀭𑁂𑀬𑁆𑀬𑀸𑀲𑀻𑀢𑀺.
𑀢𑀢𑁄 𑀧𑀪𑀸𑀯𑀢𑀻 ‘‘𑀫𑀫 𑀫𑀸𑀢𑀸 𑀇𑀫𑀲𑁆𑀲 𑀫𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀯𑀲𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀦𑀫𑁆𑀳𑀺 ¶ 𑀯𑁂𑀡𑀻 𑀦 𑀘𑀡𑁆𑀟𑀸𑀮𑀻, 𑀦 𑀘𑀫𑁆𑀳𑀺 𑀓𑀼𑀮𑀕𑀦𑁆𑀥𑀺𑀦𑀻;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀻’’𑀢𑀺.
𑀢𑀢𑁆𑀣 𑀑𑀓𑁆𑀓𑀸𑀓𑀧𑀼𑀢𑁆𑀢𑁄𑀢𑀺, 𑀅𑀫𑁆𑀫, 𑀏𑀲 𑀑𑀓𑁆𑀓𑀸𑀓𑀧𑀼𑀢𑁆𑀢𑁄, 𑀢𑁆𑀯𑀁 𑀧𑀦 ‘‘𑀤𑀸𑀲𑁄’’𑀢𑀺 𑀫𑀜𑁆𑀜𑀲𑀺, 𑀓𑀲𑁆𑀫𑀸 𑀦𑀁 𑀅𑀳𑀁 ‘‘𑀤𑀸𑀲𑁄’’𑀢𑀺 𑀓𑀣𑁂𑀲𑁆𑀲𑀸𑀫𑀻𑀢𑀺.
𑀇𑀤𑀸𑀦𑀺𑀲𑁆𑀲 𑀬𑀲𑀁 𑀯𑀡𑁆𑀡𑁂𑀦𑁆𑀢𑀻 𑀆𑀳 𑁋
‘‘𑀬𑁄 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺, 𑀲𑀤𑀸 𑀪𑁄𑀚𑁂𑀢𑀺 𑀯𑀻𑀲𑀢𑀺𑀁;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀺.
𑀬𑀲𑁆𑀲 ¶ 𑀦𑀸𑀕𑀲𑀳𑀲𑁆𑀲𑀸𑀦𑀺, 𑀲𑀤𑀸 𑀬𑁄𑀚𑁂𑀦𑁆𑀢𑀺 𑀯𑀻𑀲𑀢𑀺𑀁;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀺.
‘‘𑀬𑀲𑁆𑀲 𑀅𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀤𑀸 𑀬𑁄𑀚𑁂𑀦𑁆𑀢𑀺 𑀯𑀻𑀲𑀢𑀺𑀁;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀺.
‘‘𑀬𑀲𑁆𑀲 𑀭𑀣𑀲𑀳𑀲𑁆𑀲𑀸𑀦𑀺, 𑀲𑀤𑀸 𑀬𑁄𑀚𑁂𑀦𑁆𑀢𑀺 𑀯𑀻𑀲𑀢𑀺𑀁;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀺;
𑀬𑀲𑁆𑀲 𑀉𑀲𑀪𑀲𑀳𑀲𑁆𑀲𑀸𑀦𑀺, 𑀲𑀤𑀸 𑀬𑁄𑀚𑁂𑀦𑁆𑀢𑀺 𑀯𑀻𑀲𑀢𑀺𑀁;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀺.
‘‘𑀬𑀲𑁆𑀲 𑀥𑁂𑀦𑀼𑀲𑀳𑀲𑁆𑀲𑀸𑀦𑀺, 𑀲𑀤𑀸 𑀤𑀼𑀳𑀦𑁆𑀢𑀺 𑀯𑀻𑀲𑀢𑀺𑀁;
𑀑𑀓𑁆𑀓𑀸𑀓𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀁 𑀦𑀼 𑀤𑀸𑀲𑁄𑀢𑀺 𑀫𑀜𑁆𑀜𑀲𑀻’’𑀢𑀺.
𑀏𑀯𑀁 𑀢𑀸𑀬 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀫𑀳𑀸𑀲𑀢𑁆𑀢𑀲𑁆𑀲 𑀬𑀲𑁄 𑀯𑀡𑁆𑀡𑀺𑀢𑁄. 𑀅𑀣𑀲𑁆𑀲𑀸 𑀫𑀸𑀢𑀸 ‘‘𑀅𑀬𑀁 𑀅𑀲𑀫𑁆𑀪𑀺𑀢𑀸 𑀓𑀣𑀁 𑀓𑀣𑁂𑀢𑀺, 𑀅𑀤𑁆𑀥𑀸 𑀏𑀯𑀫𑁂𑀢’’𑀦𑁆𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑁄 𑀯𑁂𑀕𑁂𑀦 𑀧𑀪𑀸𑀯𑀢𑀺𑀬𑀸 𑀲𑀦𑁆𑀢𑀺𑀓𑀁 ¶ 𑀕𑀦𑁆𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭, 𑀅𑀫𑁆𑀫, 𑀓𑀼𑀲𑀭𑀸𑀚𑀸 𑀇𑀥𑀸𑀕𑀢𑁄’’𑀢𑀺. ‘‘𑀆𑀫 𑀢𑀸𑀢, 𑀅𑀚𑁆𑀚𑀲𑁆𑀲 𑀲𑀢𑁆𑀢 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸 𑀢𑀯 𑀥𑀻𑀢𑀸𑀦𑀁 𑀆𑀴𑀸𑀭𑀺𑀓𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺. 𑀲𑁄 𑀢𑀲𑁆𑀲𑀸 𑀅𑀲𑀤𑁆𑀤𑀳𑀦𑁆𑀢𑁄 𑀔𑀼𑀚𑁆𑀚𑀁 𑀧𑀼𑀘𑁆𑀙𑀺𑀢𑁆𑀯𑀸 𑀬𑀣𑀸𑀪𑀽𑀢𑀁 𑀲𑀼𑀢𑁆𑀯𑀸 𑀥𑀻𑀢𑀭𑀁 𑀕𑀭𑀳𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀢𑀕𑁆𑀖 ¶ 𑀢𑁂 𑀤𑀼𑀓𑁆𑀓𑀝𑀁 𑀩𑀸𑀮𑁂, 𑀬𑀁 𑀔𑀢𑁆𑀢𑀺𑀬𑀁 𑀫𑀳𑀩𑁆𑀩𑀮𑀁;
𑀦𑀸𑀕𑀁 𑀫𑀡𑁆𑀟𑀽𑀓𑀯𑀡𑁆𑀡𑁂𑀦, 𑀦 𑀢𑀁 𑀅𑀓𑁆𑀔𑀸𑀲𑀺𑀥𑀸𑀕𑀢’’𑀦𑁆𑀢𑀺.
𑀢𑀢𑁆𑀣 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂𑀦𑁂𑀯.
𑀲𑁄 𑀥𑀻𑀢𑀭𑀁 𑀕𑀭𑀳𑀺𑀢𑁆𑀯𑀸 𑀯𑁂𑀕𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀢𑁆𑀢𑀦𑁄 𑀅𑀘𑁆𑀘𑀬𑀁 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀧𑀭𑀸𑀥𑀁 𑀫𑀳𑀸𑀭𑀸𑀚, 𑀢𑁆𑀯𑀁 𑀦𑁄 𑀔𑀫 𑀭𑀣𑁂𑀲𑀪;
𑀬𑀁 𑀢𑀁 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀦𑀸𑀜𑁆𑀜𑀸𑀲𑀺𑀫𑁆𑀳𑀸 𑀇𑀥𑀸𑀕𑀢’’𑀦𑁆𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀲𑀘𑀸𑀳𑀁 𑀨𑀭𑀼𑀲𑀁 𑀯𑀓𑁆𑀔𑀸𑀫𑀺, 𑀇𑀥𑁂𑀯𑀲𑁆𑀲 𑀳𑀤𑀬𑀁 𑀨𑀮𑀺𑀲𑁆𑀲𑀢𑀺, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀸𑀚𑀦𑀦𑁆𑀢𑀭𑁂 𑀞𑀺𑀢𑁄𑀯 𑀇𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀫𑀸𑀤𑀺𑀲𑀲𑁆𑀲 𑀦 𑀢𑀁 𑀙𑀦𑁆𑀦𑀁, 𑀬𑁄𑀳𑀁 𑀆𑀴𑀸𑀭𑀺𑀓𑁄 𑀪𑀯𑁂;
𑀢𑁆𑀯𑀜𑁆𑀜𑁂𑀯 𑀫𑁂 𑀧𑀲𑀻𑀤𑀲𑁆𑀲𑀼, 𑀦𑀢𑁆𑀣𑀺 𑀢𑁂 𑀤𑁂𑀯 𑀤𑀼𑀓𑁆𑀓𑀝’’𑀦𑁆𑀢𑀺.
𑀭𑀸𑀚𑀸 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀧𑀝𑀺𑀲𑀦𑁆𑀣𑀸𑀭𑀁 𑀮𑀪𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀪𑀸𑀯𑀢𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀔𑀫𑀸𑀧𑀦𑀢𑁆𑀣𑀸𑀬 𑀧𑁂𑀲𑁂𑀢𑀼𑀁 𑀕𑀸𑀣𑀫𑀸𑀳 𑁋
‘‘𑀕𑀘𑁆𑀙 ¶ 𑀩𑀸𑀮𑁂 𑀔𑀫𑀸𑀧𑁂𑀳𑀺, 𑀓𑀼𑀲𑀭𑀸𑀚𑀁 𑀫𑀳𑀩𑁆𑀩𑀮𑀁;
𑀔𑀫𑀸𑀧𑀺𑀢𑁄 𑀓𑀼𑀲𑁄 𑀭𑀸𑀚𑀸, 𑀲𑁄 𑀢𑁂 𑀤𑀲𑁆𑀲𑀢𑀺 𑀚𑀻𑀯𑀺𑀢’’𑀦𑁆𑀢𑀺.
𑀲𑀸 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀺𑀦𑀻𑀳𑀺 𑀘𑁂𑀯 𑀧𑀭𑀺𑀘𑀸𑀭𑀺𑀓𑀸𑀳𑀺 𑀘 𑀧𑀭𑀺𑀯𑀼𑀢𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄𑀧𑀺 𑀓𑀫𑁆𑀫𑀓𑀸𑀭𑀯𑁂𑀲𑁂𑀦 𑀞𑀺𑀢𑁄𑀯 𑀢𑀲𑁆𑀲𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀅𑀚𑁆𑀚 𑀧𑀪𑀸𑀯𑀢𑀺𑀬𑀸 𑀫𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀁 𑀓𑀮𑀮𑁂 𑀦𑀺𑀧𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀆𑀪𑀢𑀁 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀔𑀮𑀫𑀡𑁆𑀟𑀮𑀫𑀢𑁆𑀢𑀁 𑀞𑀸𑀦𑀁 𑀫𑀤𑁆𑀤𑀺𑀢𑁆𑀯𑀸 𑀏𑀓𑀓𑀮𑀮𑀁 𑀅𑀓𑀸𑀲𑀺. 𑀲𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀓𑀮𑀮𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀸 𑀢𑀁 𑀔𑀫𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀧𑀺𑀢𑀼𑀲𑁆𑀲 ¶ ¶ 𑀯𑀘𑀦𑀁 𑀲𑀼𑀢𑁆𑀯𑀸, 𑀤𑁂𑀯𑀯𑀡𑁆𑀡𑀻 𑀧𑀪𑀸𑀯𑀢𑀻;
𑀲𑀺𑀭𑀲𑀸 𑀅𑀕𑁆𑀕𑀳𑀻 𑀧𑀸𑀤𑁂, 𑀓𑀼𑀲𑀭𑀸𑀚𑀁 𑀫𑀳𑀩𑁆𑀩𑀮’’𑀦𑁆𑀢𑀺.
𑀢𑀢𑁆𑀣 𑀲𑀺𑀭𑀲𑀸𑀢𑀺 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀓𑀼𑀲𑀭𑀸𑀚𑀸𑀦𑀁 𑀧𑀸𑀤𑁂 𑀅𑀕𑁆𑀕𑀳𑁂𑀲𑀻𑀢𑀺.
𑀕𑀳𑁂𑀢𑁆𑀯𑀸 𑀘 𑀧𑀦 𑀦𑀁 𑀔𑀫𑀸𑀧𑁂𑀦𑁆𑀢𑀻 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀬𑀸𑀫𑀸 𑀭𑀢𑁆𑀬𑁄 𑀅𑀢𑀺𑀓𑁆𑀓𑀦𑁆𑀢𑀸, 𑀢𑀸𑀫𑀸 𑀤𑁂𑀯 𑀢𑀬𑀸 𑀯𑀺𑀦𑀸;
𑀯𑀦𑁆𑀤𑁂 𑀢𑁂 𑀲𑀺𑀭𑀲𑀸 𑀧𑀸𑀤𑁂, 𑀫𑀸 𑀫𑁂 𑀓𑀼𑀚𑁆𑀛 𑀭𑀣𑁂𑀲𑀪.
‘‘𑀲𑀩𑁆𑀩𑀁 𑀢𑁂 𑀧𑀝𑀺𑀚𑀸𑀦𑀸𑀫𑀺, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂;
𑀦 𑀘𑀸𑀧𑀺 𑀅𑀧𑁆𑀧𑀺𑀬𑀁 𑀢𑀼𑀬𑁆𑀳𑀁, 𑀓𑀭𑁂𑀬𑁆𑀬𑀸𑀫𑀺 𑀅𑀳𑀁 𑀧𑀼𑀦.
‘‘𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀬, 𑀯𑀘𑀦𑀁 𑀫𑁂 𑀦 𑀓𑀸𑀳𑀲𑀺;
𑀇𑀤𑀸𑀦𑀺 𑀫𑀁 𑀢𑀸𑀢𑁄 𑀳𑀦𑁆𑀢𑁆𑀯𑀸, 𑀔𑀢𑁆𑀢𑀺𑀬𑀸𑀦𑀁 𑀧𑀤𑀲𑁆𑀲𑀢𑀻’’𑀢𑀺.
𑀢𑀢𑁆𑀣 𑀭𑀢𑁆𑀬𑁄𑀢𑀺 𑀭𑀢𑁆𑀢𑀺𑀬𑁄. 𑀢𑀸𑀫𑀸𑀢𑀺 𑀢𑀸 𑀇𑀫𑀸 𑀲𑀩𑁆𑀩𑀸𑀧𑀺 𑀢𑀬𑀸 𑀯𑀺𑀦𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀲𑀩𑁆𑀩𑀁 𑀢𑁂 𑀧𑀝𑀺𑀚𑀸𑀦𑀸𑀫𑀻𑀢𑀺, 𑀫𑀳𑀸𑀭𑀸𑀚, 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑀸 𑀢𑀯 𑀅𑀧𑁆𑀧𑀺𑀬𑀫𑁂𑀯 𑀓𑀢𑀁, 𑀇𑀤𑀁 𑀢𑁂 𑀅𑀳𑀁 𑀲𑀩𑁆𑀩𑀁 𑀧𑀝𑀺𑀚𑀸𑀦𑀸𑀫𑀺, 𑀅𑀧𑀭𑀫𑁆𑀧𑀺 𑀲𑀼𑀡𑁄𑀳𑀺 𑀫𑁂, 𑀇𑀢𑁄 𑀧𑀝𑁆𑀞𑀸𑀬𑀸𑀳𑀁 𑀧𑀼𑀦 𑀢𑀼𑀬𑁆𑀳𑀁 𑀅𑀧𑁆𑀧𑀺𑀬𑀁 𑀦 𑀓𑀭𑀺𑀲𑁆𑀲𑀸𑀫𑀺. 𑀏𑀯𑀁 𑀘𑁂𑀢𑀺 𑀲𑀘𑁂 𑀏𑀯𑀁 𑀬𑀸𑀘𑀫𑀸𑀦𑀸𑀬 𑀫𑀫 𑀢𑁆𑀯𑀁 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀲𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀲𑀘𑀸𑀳𑀁 ‘𑀇𑀫𑀁 𑀢𑁆𑀯𑀜𑁆𑀘𑁂𑀯 𑀚𑀸𑀦𑀺𑀲𑁆𑀲𑀲𑀻’𑀢𑀺 𑀯𑀓𑁆𑀔𑀸𑀫𑀺, 𑀳𑀤𑀬𑀫𑀲𑁆𑀲𑀸 𑀨𑀮𑀺𑀲𑁆𑀲𑀢𑀺, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀏𑀯𑀁 𑀢𑁂 𑀬𑀸𑀘𑀫𑀸𑀦𑀸𑀬, 𑀓𑀺𑀁 𑀦 𑀓𑀸𑀳𑀸𑀫𑀺 𑀢𑁂 𑀯𑀘𑁄;
𑀯𑀺𑀓𑀼𑀤𑁆𑀥𑁄 𑀢𑁆𑀬𑀲𑁆𑀫𑀺 𑀓𑀮𑁆𑀬𑀸𑀡𑀺, 𑀫𑀸 𑀢𑁆𑀯𑀁 𑀪𑀸𑀬𑀺 𑀧𑀪𑀸𑀯𑀢𑀺.
‘‘𑀲𑀩𑁆𑀩𑀁 ¶ 𑀢𑁂 𑀧𑀝𑀺𑀚𑀸𑀦𑀸𑀫𑀺, 𑀭𑀸𑀚𑀧𑀼𑀢𑁆𑀢𑀺 𑀲𑀼𑀡𑁄𑀳𑀺 𑀫𑁂;
𑀦 𑀘𑀸𑀧𑀺 𑀅𑀧𑁆𑀧𑀺𑀬𑀁 𑀢𑀼𑀬𑁆𑀳𑀁, 𑀓𑀭𑁂𑀬𑁆𑀬𑀸𑀫𑀺 𑀅𑀳𑀁 𑀧𑀼𑀦.
‘‘𑀢𑀯 ¶ 𑀓𑀸𑀫𑀸 𑀳𑀺 𑀲𑀼𑀲𑁆𑀲𑁄𑀡𑀺, 𑀧𑀳𑀼 𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀺𑀲𑀁;
𑀩𑀳𑀼𑀁 𑀫𑀤𑁆𑀤𑀓𑀼𑀮𑀁 𑀳𑀦𑁆𑀢𑁆𑀯𑀸, 𑀦𑀬𑀺𑀢𑀼𑀁 𑀢𑀁 𑀧𑀪𑀸𑀯𑀢𑀻’’𑀢𑀺.
𑀢𑀢𑁆𑀣 𑀓𑀺𑀁 𑀦 𑀓𑀸𑀳𑀸𑀫𑀻𑀢𑀺 𑀓𑀺𑀁𑀓𑀸𑀭𑀡𑀸 𑀢𑀯 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀸𑀫𑀺. 𑀯𑀺𑀓𑀼𑀤𑁆𑀥𑁄 𑀢𑁆𑀬𑀲𑁆𑀫𑀻𑀢𑀺 𑀯𑀺𑀓𑀼𑀤𑁆𑀥𑁄 𑀦𑀺𑀓𑁆𑀓𑁄𑀧𑁄 𑀢𑁂 𑀅𑀲𑁆𑀫𑀺𑀁. 𑀲𑀩𑁆𑀩𑀁 𑀢𑁂𑀢𑀺 𑀯𑀺𑀓𑀼𑀤𑁆𑀥𑀪𑀸𑀯𑀜𑁆𑀘 𑀇𑀤𑀸𑀦𑀺 𑀅𑀧𑁆𑀧𑀺𑀬𑀓𑀭𑀡𑀜𑁆𑀘 𑀉𑀪𑀬𑀁 𑀢𑁂 𑀇𑀤𑀁 𑀲𑀩𑁆𑀩𑀫𑁂𑀯 𑀧𑀝𑀺𑀚𑀸𑀦𑀸𑀫𑀺. 𑀢𑀯 𑀓𑀸𑀫𑀸𑀢𑀺 𑀢𑀯 ¶ 𑀓𑀸𑀫𑁂𑀦 𑀢𑀁 𑀇𑀘𑁆𑀙𑀫𑀸𑀦𑁄. 𑀢𑀺𑀢𑀺𑀓𑁆𑀔𑀺𑀲𑀦𑁆𑀢𑀺 𑀅𑀥𑀺𑀯𑀸𑀲𑁂𑀫𑀺. 𑀩𑀳𑀼𑀁 𑀫𑀤𑁆𑀤𑀓𑀼𑀮𑀁 𑀳𑀦𑁆𑀢𑁆𑀯𑀸 𑀦𑀬𑀺𑀢𑀼𑀁 𑀢𑀦𑁆𑀢𑀺 𑀩𑀳𑀼𑀫𑀤𑁆𑀤𑀭𑀸𑀚𑀓𑀼𑀮𑀁 𑀳𑀦𑀺𑀢𑁆𑀯𑀸 𑀩𑀮𑀓𑁆𑀓𑀸𑀭𑁂𑀦 𑀢𑀁 𑀦𑁂𑀢𑀼𑀁 𑀲𑀫𑀢𑁆𑀣𑁄𑀢𑀺.
𑀅𑀣 𑀲𑁄 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀁 𑀯𑀺𑀬 𑀢𑀁 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀁 𑀤𑀺𑀲𑁆𑀯𑀸 𑀔𑀢𑁆𑀢𑀺𑀬𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀫𑀬𑀺 𑀓𑀺𑀭 𑀥𑀭𑀫𑀸𑀦𑁂𑀬𑁂𑀯 𑀫𑀫 𑀪𑀭𑀺𑀬𑀁 𑀅𑀜𑁆𑀜𑁂 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀻𑀳𑁄 𑀯𑀺𑀬 𑀭𑀸𑀚𑀗𑁆𑀕𑀡𑁂 𑀯𑀺𑀚𑀫𑁆𑀪𑀫𑀸𑀦𑁄 ‘‘𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀫𑁂 𑀆𑀕𑀢𑀪𑀸𑀯𑀁 𑀚𑀸𑀦𑀦𑁆𑀢𑀽’’𑀢𑀺 𑀯𑀕𑁆𑀕𑀦𑁆𑀢𑁄 𑀦𑀤𑀦𑁆𑀢𑁄 𑀲𑁂𑀴𑁂𑀦𑁆𑀢𑁄 𑀅𑀧𑁆𑀨𑁄𑀝𑁂𑀦𑁆𑀢𑁄 ‘‘𑀇𑀤𑀸𑀦𑀺 𑀢𑁂 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀲𑁆𑀲𑀸𑀫𑀺, 𑀭𑀣𑀸𑀤𑀬𑁄 𑀫𑁂 𑀬𑁄𑀚𑁂𑀦𑁆𑀢𑀽’’𑀢𑀺 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀬𑁄𑀚𑀬𑀦𑁆𑀢𑀼 𑀭𑀣𑁂 𑀅𑀲𑁆𑀲𑁂, 𑀦𑀸𑀦𑀸𑀘𑀺𑀢𑁆𑀢𑁂 𑀲𑀫𑀸𑀳𑀺𑀢𑁂;
𑀅𑀣 𑀤𑀓𑁆𑀔𑀣 𑀫𑁂 𑀯𑁂𑀕𑀁, 𑀯𑀺𑀥𑀫𑀦𑁆𑀢𑀲𑁆𑀲 𑀲𑀢𑁆𑀢𑀯𑁄’’𑀢𑀺.
𑀢𑀢𑁆𑀣 𑀦𑀸𑀦𑀸𑀘𑀺𑀢𑁆𑀢𑁂𑀢𑀺 𑀦𑀸𑀦𑀸𑀮𑀗𑁆𑀓𑀸𑀭𑀯𑀺𑀘𑀺𑀢𑁆𑀢𑁂. 𑀲𑀫𑀸𑀳𑀺𑀢𑁂𑀢𑀺 𑀅𑀲𑁆𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀼𑀲𑀺𑀓𑁆𑀔𑀺𑀢𑁂 𑀦𑀺𑀩𑁆𑀩𑀺𑀲𑁂𑀯𑀦𑁂𑀢𑀺 𑀅𑀢𑁆𑀣𑁄. 𑀅𑀣 𑀤𑀓𑁆𑀔𑀣 𑀫𑁂 𑀯𑁂𑀕𑀦𑁆𑀢𑀺 𑀅𑀣 𑀫𑁂 𑀧𑀭𑀓𑁆𑀓𑀫𑀁 𑀧𑀲𑁆𑀲𑀺𑀲𑁆𑀲𑀣𑀸𑀢𑀺.
𑀲𑀢𑁆𑀢𑀽𑀦𑀁 𑀕𑀡𑁆𑀳𑀦𑀁 𑀦𑀸𑀫 𑀫𑀬𑁆𑀳𑀁 𑀪𑀸𑀭𑁄, 𑀕𑀘𑁆𑀙 𑀢𑁆𑀯𑀁 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀳𑀸𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀫𑀤𑁆𑀤𑀭𑀸𑀚𑀸𑀧𑀺𑀲𑁆𑀲 𑀧𑀭𑀺𑀳𑀸𑀭𑀓𑀭𑀡𑀢𑁆𑀣𑀁 𑀅𑀫𑀘𑁆𑀘𑁂 𑀧𑀳𑀺𑀡𑀺. 𑀢𑁂 𑀢𑀲𑁆𑀲 𑀫𑀳𑀸𑀦𑀲𑀤𑁆𑀯𑀸𑀭𑁂𑀬𑁂𑀯 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀧𑁆𑀧𑀓𑁂 𑀉𑀧𑀝𑁆𑀞𑀧𑁂𑀲𑀼𑀁. 𑀲𑁄 𑀓𑀢𑀫𑀲𑁆𑀲𑀼𑀓𑀫𑁆𑀫𑁄 𑀲𑀻𑀲𑀁𑀦𑁆𑀳𑀸𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀅𑀫𑀘𑁆𑀘𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 ‘‘𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸 𑀅𑀧𑁆𑀨𑁄𑀝𑁂𑀲𑀺. 𑀑𑀮𑁄𑀓𑀺𑀢𑀑𑀮𑁄𑀓𑀺𑀢𑀝𑁆𑀞𑀸𑀦𑀁 𑀯𑀺𑀓𑀫𑁆𑀧𑀺. 𑀲𑁄 ‘‘𑀇𑀤𑀸𑀦𑀺 𑀫𑁂 𑀧𑀭𑀓𑁆𑀓𑀫𑀁 𑀧𑀲𑁆𑀲𑀺𑀲𑁆𑀲𑀣𑀸’’𑀢𑀺 𑀆𑀳. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀢𑀜𑁆𑀘 𑀢𑀢𑁆𑀣 𑀉𑀤𑀺𑀓𑁆𑀔𑀺𑀁𑀲𑀼, 𑀭𑀜𑁆𑀜𑁄 𑀫𑀤𑁆𑀤𑀲𑁆𑀲𑀦𑁆𑀢𑁂𑀧𑀼𑀭𑁂;
𑀯𑀺𑀚𑀫𑁆𑀪𑀫𑀸𑀦𑀁 𑀲𑀻𑀳𑀁𑀯, 𑀨𑁄𑀝𑁂𑀦𑁆𑀢𑀁 𑀤𑀺𑀕𑀼𑀡𑀁 𑀪𑀼𑀚’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 ¶ ¶ 𑁋 𑀢𑀜𑁆𑀘 𑀢𑀢𑁆𑀣 𑀯𑀺𑀚𑀫𑁆𑀪𑀦𑁆𑀢𑀁 𑀅𑀧𑁆𑀨𑁄𑀝𑁂𑀦𑁆𑀢𑀁 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀯𑀸𑀢𑀧𑀸𑀦𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀇𑀢𑁆𑀣𑀺𑀬𑁄 𑀉𑀤𑀺𑀓𑁆𑀔𑀺𑀁𑀲𑀽𑀢𑀺.
𑀅𑀣𑀲𑁆𑀲 𑀫𑀤𑁆𑀤𑀭𑀸𑀚𑀸 𑀓𑀢𑀆𑀦𑁂𑀜𑁆𑀚𑀓𑀸𑀭𑀡𑀁 𑀅𑀮𑀗𑁆𑀓𑀢𑀯𑀭𑀯𑀸𑀭𑀡𑀁 𑀧𑁂𑀲𑁂𑀲𑀺. 𑀲𑁄 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑀼𑀬𑁆𑀳 ‘‘𑀧𑀪𑀸𑀯𑀢𑀺𑀁 𑀆𑀦𑁂𑀣𑀸’’𑀢𑀺 𑀢𑀫𑁆𑀧𑀺 𑀧𑀘𑁆𑀙𑀢𑁄 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀭𑀲𑁂𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀳𑀁 𑀓𑀼𑀲𑀭𑀸𑀚𑀸, 𑀚𑀻𑀯𑀺𑀢𑀢𑁆𑀣𑀺𑀓𑀸 𑀉𑀭𑁂𑀦 𑀦𑀺𑀧𑀚𑁆𑀚𑀦𑁆𑀢𑀽’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀢𑁆𑀢𑀼𑀫𑀤𑁆𑀤𑀦𑀁 𑀅𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀜𑁆𑀘 𑀆𑀭𑀼𑀬𑁆𑀳, 𑀆𑀭𑁄𑀧𑁂𑀢𑁆𑀯𑀸 𑀧𑀪𑀸𑀯𑀢𑀺𑀁;
𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑁆𑀯𑀸𑀦, 𑀲𑀻𑀳𑀦𑀸𑀤𑀁 𑀦𑀤𑀻 𑀓𑀼𑀲𑁄.
‘‘𑀢𑀲𑁆𑀲 𑀢𑀁 𑀦𑀤𑀢𑁄 𑀲𑀼𑀢𑁆𑀯𑀸, 𑀲𑀻𑀳𑀲𑁆𑀲𑁂𑀯𑀺𑀢𑀭𑁂 𑀫𑀺𑀕𑀸;
𑀔𑀢𑁆𑀢𑀺𑀬𑀸 𑀯𑀺𑀧𑀮𑀸𑀬𑀺𑀁𑀲𑀼, 𑀓𑀼𑀲𑀲𑀤𑁆𑀤𑀪𑀬𑀝𑁆𑀝𑀺𑀢𑀸.
‘‘𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;
𑀅𑀜𑁆𑀜𑀫𑀜𑁆𑀜𑀲𑁆𑀲 𑀙𑀺𑀦𑁆𑀤𑀦𑁆𑀢𑀺, 𑀓𑀼𑀲𑀲𑀤𑁆𑀤𑀪𑀬𑀝𑁆𑀝𑀺𑀢𑀸.
‘‘𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑀲𑀻𑀲𑀲𑁆𑀫𑀺𑀁, 𑀧𑀲𑁆𑀲𑀺𑀢𑁆𑀯𑀸 𑀳𑀝𑁆𑀞𑀫𑀸𑀦𑀲𑁄;
𑀓𑀼𑀲𑀲𑁆𑀲 𑀭𑀜𑁆𑀜𑁄 𑀤𑁂𑀯𑀺𑀦𑁆𑀤𑁄, 𑀅𑀤𑀸 𑀯𑁂𑀭𑁄𑀘𑀦𑀁 𑀫𑀡𑀺𑀁.
‘‘𑀲𑁄 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀲𑀗𑁆𑀕𑀸𑀫𑀁, 𑀮𑀤𑁆𑀥𑀸 𑀯𑁂𑀭𑁄𑀘𑀦𑀁 𑀫𑀡𑀺𑀁;
𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀭𑀸𑀚𑀸, 𑀧𑀸𑀯𑁂𑀓𑁆𑀔𑀺 𑀦𑀕𑀭𑀁 𑀧𑀼𑀭𑀁.
‘‘𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸𑀦, 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀢 𑀔𑀢𑁆𑀢𑀺𑀬𑁂;
𑀲𑀲𑀼𑀭𑀲𑁆𑀲𑀽𑀧𑀦𑀸𑀫𑁂𑀲𑀺, 𑀇𑀫𑁂 𑀢𑁂 𑀤𑁂𑀯 𑀲𑀢𑁆𑀢𑀯𑁄.
‘‘𑀲𑀩𑁆𑀩𑁂𑀯 𑀢𑁂 𑀯𑀲𑀁 𑀕𑀢𑀸, 𑀅𑀫𑀺𑀢𑁆𑀢𑀸 𑀯𑀺𑀳𑀢𑀸 𑀢𑀯;
𑀓𑀸𑀫𑀁 𑀓𑀭𑁄𑀳𑀺 𑀢𑁂 𑀢𑀬𑀸, 𑀫𑀼𑀜𑁆𑀘 𑀯𑀸 𑀢𑁂 𑀳𑀦𑀲𑁆𑀲𑀼 𑀯𑀸’’𑀢𑀺.
𑀢𑀢𑁆𑀣 ¶ 𑀯𑀺𑀧𑀮𑀸𑀬𑀺𑀁𑀲𑀽𑀢𑀺 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀸 𑀪𑀺𑀚𑁆𑀚𑀺𑀁𑀲𑀼. 𑀓𑀼𑀲𑀲𑀤𑁆𑀤𑀪𑀬𑀝𑁆𑀝𑀺𑀢𑀸𑀢𑀺 𑀓𑀼𑀲𑀭𑀜𑁆𑀜𑁄 𑀲𑀤𑁆𑀤𑀁 𑀦𑀺𑀲𑁆𑀲𑀸𑀬 𑀚𑀸𑀢𑁂𑀦 𑀪𑀬𑁂𑀦 𑀉𑀧𑀤𑁆𑀤𑀼𑀢𑀸 𑀫𑀽𑀴𑁆𑀳𑀘𑀺𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀙𑀺𑀦𑁆𑀤𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀙𑀺𑀦𑁆𑀤𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. ‘‘𑀪𑀺𑀦𑁆𑀤𑀺𑀁𑀲𑀽’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀫𑀺𑀦𑁆𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀤𑁆𑀤𑀲𑀯𑀦𑁂𑀦𑁂𑀯 𑀲𑀗𑁆𑀕𑀸𑀫𑁂 𑀪𑀺𑀦𑁆𑀦𑁂 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑀲𑀻𑀲𑁂 𑀢𑀁 𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑀓𑁆𑀓𑀫𑀁 𑀧𑀲𑁆𑀲𑀺𑀢𑁆𑀯𑀸 𑀢𑀼𑀝𑁆𑀞𑀳𑀤𑀬𑁄 𑀲𑀓𑁆𑀓𑁄 𑀯𑁂𑀭𑁄𑀘𑀦𑀁 𑀦𑀸𑀫 𑀫𑀡𑀺𑀓𑁆𑀔𑀦𑁆𑀥𑀁 𑀢𑀲𑁆𑀲 𑀅𑀤𑀸𑀲𑀺. 𑀦𑀕𑀭𑀁 𑀧𑀼𑀭𑀦𑁆𑀢𑀺 𑀦𑀕𑀭𑀲𑀗𑁆𑀔𑀸𑀢𑀁 𑀧𑀼𑀭𑀁. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀢𑁂𑀲𑀜𑁆𑀜𑁂𑀯 𑀉𑀢𑁆𑀢𑀭𑀺 𑀲𑀸𑀝𑀓𑁂𑀦 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸. 𑀓𑀸𑀫𑀁 𑀓𑀭𑁄𑀳𑀺 𑀢𑁂 𑀢𑀬𑀸𑀢𑀺 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀸𑀫𑀁 𑀇𑀘𑁆𑀙𑀁 𑀭𑀼𑀘𑀺𑀁 𑀓𑀭𑁄𑀳𑀺, 𑀏𑀢𑁂 𑀳𑀺 𑀢𑀬𑀸 𑀤𑀸𑀲𑀸 𑀓𑀢𑀸𑀬𑁂𑀯𑀸𑀢𑀺.
‘‘𑀢𑀼𑀬𑁆𑀳𑁂𑀯 𑀲𑀢𑁆𑀢𑀯𑁄 𑀏𑀢𑁂, 𑀦 𑀳𑀺 𑀢𑁂 𑀫𑀬𑁆𑀳 𑀲𑀢𑁆𑀢𑀯𑁄;
𑀢𑁆𑀯𑀜𑁆𑀜𑁂𑀯 𑀦𑁄 𑀫𑀳𑀸𑀭𑀸𑀚, 𑀫𑀼𑀜𑁆𑀘 𑀯𑀸 𑀢𑁂 𑀳𑀦𑀲𑁆𑀲𑀼 𑀯𑀸’’𑀢𑀺.
𑀢𑀢𑁆𑀣 𑀢𑁆𑀯𑀜𑁆𑀜𑁂𑀯 𑀦𑁄𑀢𑀺, 𑀫𑀳𑀸𑀭𑀸𑀚, 𑀢𑁆𑀯𑀁𑀬𑁂𑀯 𑀅𑀫𑁆𑀳𑀸𑀓𑀁 𑀇𑀲𑁆𑀲𑀭𑁄𑀢𑀺.
𑀏𑀯𑀁 ¶ 𑀯𑀼𑀢𑁆𑀢𑁂 𑀫𑀳𑀸𑀲𑀢𑁆𑀢𑁄 ‘‘𑀓𑀺𑀁 𑀇𑀫𑁂𑀳𑀺 𑀫𑀸𑀭𑀺𑀢𑁂𑀳𑀺, 𑀫𑀸 𑀢𑁂𑀲𑀁 𑀆𑀕𑀫𑀦𑀁 𑀦𑀺𑀭𑀢𑁆𑀣𑀓𑀁 𑀳𑁄𑀢𑀼, 𑀧𑀪𑀸𑀯𑀢𑀺𑀬𑀸 𑀓𑀦𑀺𑀝𑁆𑀞𑀸 𑀲𑀢𑁆𑀢 𑀫𑀤𑁆𑀤𑀭𑀸𑀚𑀥𑀻𑀢𑀭𑁄 𑀅𑀢𑁆𑀣𑀺, 𑀢𑀸 𑀦𑁂𑀲𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀇𑀫𑀸 𑀢𑁂 𑀥𑀻𑀢𑀭𑁄 𑀲𑀢𑁆𑀢, 𑀤𑁂𑀯𑀓𑀜𑁆𑀜𑀽𑀧𑀫𑀸 𑀲𑀼𑀪𑀸;
𑀤𑀤𑀸𑀳𑀺 𑀦𑁂𑀲𑀁 𑀏𑀓𑁂𑀓𑀁, 𑀳𑁄𑀦𑁆𑀢𑀼 𑀚𑀸𑀫𑀸𑀢𑀭𑁄 𑀢𑀯𑀸’’𑀢𑀺.
𑀅𑀣 𑀦𑀁 𑀭𑀸𑀚𑀸 𑀆𑀳 𑁋
‘‘𑀅𑀫𑁆𑀳𑀸𑀓𑀜𑁆𑀘𑁂𑀯 𑀢𑀸𑀲𑀜𑁆𑀘, 𑀢𑁆𑀯𑀁 𑀦𑁄 𑀲𑀩𑁆𑀩𑁂𑀲𑀫𑀺𑀲𑁆𑀲𑀭𑁄;
𑀢𑁆𑀯𑀜𑁆𑀜𑁂𑀯 𑀦𑁄 𑀫𑀳𑀸𑀭𑀸𑀚, 𑀤𑁂𑀳𑀺 𑀦𑁂𑀲𑀁 𑀬𑀤𑀺𑀘𑁆𑀙𑀲𑀻’’𑀢𑀺.
𑀢𑀢𑁆𑀣 𑀢𑁆𑀯𑀁 𑀦𑁄 𑀲𑀩𑁆𑀩𑁂𑀲𑀦𑁆𑀢𑀺, 𑀫𑀳𑀸𑀭𑀸𑀚 𑀓𑀼𑀲𑀦𑀭𑀺𑀦𑁆𑀤, 𑀓𑀺𑀁 𑀯𑀤𑁂𑀲𑀺, 𑀢𑁆𑀯𑀜𑁆𑀜𑁂𑀯 𑀏𑀢𑁂𑀲𑀜𑁆𑀘 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀫𑀫𑀜𑁆𑀘 𑀇𑀫𑀸𑀲𑀜𑁆𑀘 𑀲𑀩𑁆𑀩𑁂𑀲𑀁 𑀦𑁄 𑀇𑀲𑁆𑀲𑀭𑁄. 𑀬𑀤𑀺𑀘𑁆𑀙𑀲𑀻𑀢𑀺 𑀬𑀤𑀺 𑀇𑀘𑁆𑀙𑀲𑀺, 𑀬𑀲𑁆𑀲 𑀯𑀸 𑀬𑀁 𑀤𑀸𑀢𑀼𑀁 𑀇𑀘𑁆𑀙𑀲𑀺, 𑀢𑀲𑁆𑀲 𑀢𑀁 𑀤𑁂𑀳𑀻𑀢𑀺.
𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀢𑀸 𑀲𑀩𑁆𑀩𑀸𑀧𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀲 𑀭𑀜𑁆𑀜𑁄 𑀏𑀓𑁂𑀓𑀁 𑀅𑀤𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀧𑀜𑁆𑀘 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋
‘‘𑀏𑀓𑀫𑁂𑀓𑀲𑁆𑀲 𑀏𑀓𑁂𑀓𑀁, 𑀅𑀤𑀸 𑀲𑀻𑀳𑀲𑁆𑀲𑀭𑁄 𑀓𑀼𑀲𑁄;
𑀔𑀢𑁆𑀢𑀺𑀬𑀸𑀦𑀁 𑀢𑀤𑀸 𑀢𑁂𑀲𑀁, 𑀭𑀜𑁆𑀜𑁄 𑀫𑀤𑁆𑀤𑀲𑁆𑀲 𑀥𑀻𑀢𑀭𑁄.
‘‘𑀧𑀻𑀡𑀺𑀢𑀸 𑀢𑁂𑀦 𑀮𑀸𑀪𑁂𑀦, 𑀢𑀼𑀝𑁆𑀞𑀸 𑀲𑀻𑀳𑀲𑁆𑀲𑀭𑁂 𑀓𑀼𑀲𑁂;
𑀲𑀓𑀭𑀝𑁆𑀞𑀸𑀦𑀺 𑀧𑀸𑀬𑀺𑀁𑀲𑀼, 𑀔𑀢𑁆𑀢𑀺𑀬𑀸 𑀲𑀢𑁆𑀢 𑀢𑀸𑀯𑀤𑁂.
‘‘𑀧𑀪𑀸𑀯𑀢𑀺𑀜𑁆𑀘 𑀆𑀤𑀸𑀬, 𑀫𑀡𑀺𑀁 𑀯𑁂𑀭𑁄𑀘𑀦𑀁 𑀲𑀼𑀪𑀁;
𑀓𑀼𑀲𑀸𑀯𑀢𑀺𑀁 𑀓𑀼𑀲𑁄 𑀭𑀸𑀚𑀸, 𑀅𑀕𑀫𑀸𑀲𑀺 𑀫𑀳𑀩𑁆𑀩𑀮𑁄.
‘‘𑀢𑁆𑀬𑀲𑁆𑀲𑀼 𑀏𑀓𑀭𑀣𑁂 𑀬𑀦𑁆𑀢𑀸, 𑀧𑀯𑀺𑀲𑀦𑁆𑀢𑀸 𑀓𑀼𑀲𑀸𑀯𑀢𑀺𑀁;
𑀲𑀫𑀸𑀦𑀸 𑀯𑀡𑁆𑀡𑀭𑀽𑀧𑁂𑀦, 𑀦𑀸𑀜𑁆𑀜𑀫𑀜𑁆𑀜𑀸𑀢𑀺𑀭𑁄𑀘𑀺𑀲𑀼𑀁.
‘‘𑀫𑀸𑀢𑀸 ¶ 𑀧𑀼𑀢𑁆𑀢𑁂𑀦 𑀲𑀁𑀕𑀘𑁆𑀙𑀺, 𑀉𑀪𑀬𑁄 𑀘 𑀚𑀬𑀫𑁆𑀧𑀢𑀻;
𑀲𑀫𑀕𑁆𑀕𑀸 𑀢𑁂 𑀢𑀤𑀸 𑀆𑀲𑀼𑀁, 𑀨𑀻𑀢𑀁 𑀥𑀭𑀡𑀺𑀫𑀸𑀯𑀲𑀼’’𑀦𑁆𑀢𑀺.
𑀢𑀢𑁆𑀣 𑀧𑀻𑀡𑀺𑀢𑀸𑀢𑀺 𑀲𑀦𑁆𑀢𑀧𑁆𑀧𑀺𑀢𑀸. 𑀧𑀸𑀬𑀺𑀁𑀲𑀽𑀢𑀺 𑀇𑀤𑀸𑀦𑀺 𑀅𑀧𑁆𑀧𑀫𑀢𑁆𑀢𑀸 𑀪𑀯𑁂𑀬𑁆𑀬𑀸𑀣𑀸𑀢𑀺 𑀓𑀼𑀲𑀦𑀭𑀺𑀦𑁆𑀤𑁂𑀦 𑀑𑀯𑀤𑀺𑀢𑀸 𑀅𑀕𑀫𑀁𑀲𑀼. 𑀅𑀕𑀫𑀸𑀲𑀻𑀢𑀺 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀭𑀝𑁆𑀞𑀁 ¶ 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀲𑀼𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀢𑁄. 𑀏𑀓𑀭𑀣𑁂 𑀬𑀦𑁆𑀢𑀸𑀢𑀺 𑀤𑁆𑀯𑁂𑀧𑀺 𑀏𑀓𑀭𑀣𑀁 𑀅𑀪𑀺𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑀸. 𑀲𑀫𑀸𑀦𑀸 𑀯𑀡𑁆𑀡𑀭𑀽𑀧𑁂𑀦𑀸𑀢𑀺 𑀯𑀡𑁆𑀡𑁂𑀦 𑀘 𑀭𑀽𑀧𑁂𑀦 𑀘 𑀲𑀫𑀸𑀦𑀸 𑀳𑀼𑀢𑁆𑀯𑀸. 𑀦𑀸𑀜𑁆𑀜𑀫𑀜𑁆𑀜𑀸𑀢𑀺𑀭𑁄𑀘𑀺𑀲𑀼𑀦𑁆𑀢𑀺 𑀏𑀓𑁄 𑀏𑀓𑀁 𑀦𑀸𑀢𑀺𑀓𑁆𑀓𑀫𑀺. 𑀫𑀡𑀺𑀭𑀢𑀦𑀸𑀦𑀼𑀪𑀸𑀯𑁂𑀦 𑀓𑀺𑀭 𑀫𑀳𑀸𑀲𑀢𑁆𑀢𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄, 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑀦𑀺𑀲𑁆𑀲𑀦𑁆𑀤𑁂𑀦 𑀩𑀼𑀤𑁆𑀥𑀧𑀝𑀺𑀫𑀸𑀓𑀭𑀡𑀦𑀺𑀲𑁆𑀲𑀦𑁆𑀤𑁂𑀦 𑀘 𑀏𑀯𑀁 𑀢𑁂𑀚𑀯𑀦𑁆𑀢𑁄 𑀅𑀳𑁄𑀲𑀺. 𑀲𑀁𑀕𑀘𑁆𑀙𑀻𑀢𑀺 𑀅𑀣𑀲𑁆𑀲 𑀫𑀸𑀢𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀩𑀳𑀼𑀁 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀲𑀫𑀸𑀕𑀘𑁆𑀙𑀺. 𑀲𑁄𑀧𑀺 𑀫𑀸𑀢𑀭𑀸 𑀲𑀤𑁆𑀥𑀺𑀁𑀬𑁂𑀯 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀢𑁆𑀢𑀸𑀳𑀁 𑀙𑀡𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀸𑀲𑀸𑀤𑀢𑀮𑀁 𑀅𑀪𑀺𑀭𑀼𑀳𑀺. 𑀢𑁂𑀧𑀺 𑀉𑀪𑁄 𑀚𑀬𑀫𑁆𑀧𑀢𑀺𑀓𑀸 𑀲𑀫𑀕𑁆𑀕𑀸 𑀅𑀳𑁂𑀲𑀼𑀁, 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀨𑀻𑀢𑀁 𑀥𑀭𑀡𑀺𑀁 𑀅𑀚𑁆𑀛𑀸𑀯𑀲𑀺𑀁𑀲𑀽𑀢𑀺.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀓𑀦𑀺𑀝𑁆𑀞𑁄 𑀆𑀦𑀦𑁆𑀤𑁄, 𑀔𑀼𑀚𑁆𑀚𑀸 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀧𑀪𑀸𑀯𑀢𑀻 𑀭𑀸𑀳𑀼𑀮𑀫𑀸𑀢𑀸, 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀓𑀼𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.
𑀓𑀼𑀲𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.
[𑁫𑁩𑁨] 𑁨. 𑀲𑁄𑀡𑀦𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸
𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀯𑀢𑁆𑀣𑀼𑀲𑀤𑀺𑀲𑀁. 𑀢𑀤𑀸 𑀧𑀦 𑀲𑀢𑁆𑀣𑀸 ‘‘𑀫𑀸, 𑀪𑀺𑀓𑁆𑀔𑀯𑁂, 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀚𑁆𑀛𑀸𑀬𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀮𑀪𑀫𑀸𑀦𑀸𑀧𑀺 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀻 𑀩𑁆𑀭𑀳𑁆𑀫𑀯𑀟𑁆𑀠𑀦𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀫𑀦𑁄𑀚𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀅𑀧𑀼𑀢𑁆𑀢𑀓𑁄 𑀅𑀳𑁄𑀲𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀢𑁂𑀦𑁂𑀯 ‘‘𑀪𑁄𑀢𑀺 𑀧𑀼𑀢𑁆𑀢𑀁 𑀧𑀢𑁆𑀣𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀧𑀢𑁆𑀣𑁂𑀲𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀚𑀸𑀢𑀲𑁆𑀲 𑀘𑀲𑁆𑀲 ‘‘𑀲𑁄𑀡𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀅𑀜𑁆𑀜𑁄𑀧𑀺 𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀚𑀸𑀢𑀲𑁆𑀲 ‘‘𑀦𑀦𑁆𑀤𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂𑀲𑀁 𑀉𑀕𑁆𑀕𑀳𑀺𑀢𑀯𑁂𑀤𑀸𑀦𑀁 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑀸𑀦𑀁 𑀯𑀬𑀧𑁆𑀧𑀢𑁆𑀢𑀸𑀦𑀁 𑀭𑀽𑀧𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑁄𑀢𑀺 𑀧𑀼𑀢𑁆𑀢𑀁 𑀲𑁄𑀡𑀓𑀼𑀫𑀸𑀭𑀁 𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺 ¶ . 𑀲𑁄 ‘‘𑀅𑀮𑀁, 𑀅𑀫𑁆𑀫, 𑀫𑀬𑁆𑀳𑀁 𑀖𑀭𑀸𑀯𑀸𑀲𑁂𑀦, 𑀅𑀳𑀁 𑀬𑀸𑀯𑀚𑀻𑀯𑀁 𑀢𑀼𑀫𑁆𑀳𑁂 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.
𑀢𑁂 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀸𑀧𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀸𑀢, 𑀢𑁂𑀦 𑀳𑀺 𑀢𑁆𑀯𑀁 𑀓𑀼𑀝𑀼𑀫𑁆𑀩𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀢𑁆𑀯𑀸 ‘‘𑀦𑀸𑀳𑀁 𑀪𑀸𑀢𑀭𑀸 𑀙𑀟𑁆𑀟𑀺𑀢𑀔𑁂𑀴𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀸𑀫𑀺, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀪𑀸𑀢𑀭𑀸𑀯 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀤𑁆𑀯𑁂 𑀏𑀯𑀁 𑀢𑀭𑀼𑀡𑀸𑀯 𑀓𑀸𑀫𑁂 𑀧𑀚𑀳𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑀁, 𑀲𑀩𑁆𑀩𑁂𑀬𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀢𑀸𑀢𑀸 ¶ , 𑀓𑀺𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀧𑀩𑁆𑀩𑀚𑁆𑀚𑀸𑀬, 𑀇𑀤𑀸𑀦𑁂𑀯 𑀲𑀩𑁆𑀩𑁂 𑀫𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀲𑀩𑁆𑀩𑀁 𑀥𑀦𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀲𑀚𑀦𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀜𑀸𑀢𑀻𑀦𑀁 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁 𑀤𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀧𑀜𑁆𑀘𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀯𑀲𑀺𑀁𑀲𑀼. 𑀉𑀪𑁄𑀧𑀺 𑀪𑀸𑀢𑀭𑁄 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀁𑀲𑀼, 𑀢𑁂𑀲𑀁 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑀥𑁄𑀯𑀦𑀜𑁆𑀘 𑀤𑀢𑁆𑀯𑀸 𑀧𑀡𑁆𑀡𑀲𑀸𑀮𑀜𑁆𑀘 𑀧𑀭𑀺𑀯𑁂𑀡𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀜𑁆𑀜𑀢𑁄 𑀫𑀥𑀼𑀭𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀔𑀸𑀤𑀸𑀧𑁂𑀦𑁆𑀢𑀺, 𑀉𑀡𑁆𑀳𑁂𑀦 𑀯𑀸 𑀲𑀻𑀢𑁂𑀦 𑀯𑀸 𑀯𑀸𑀭𑀺𑀦𑀸 𑀦𑁆𑀳𑀸𑀧𑁂𑀦𑁆𑀢𑀺, 𑀚𑀝𑀸 𑀲𑁄𑀥𑁂𑀦𑁆𑀢𑀺, 𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀢𑁂𑀲𑀁 𑀓𑀭𑁄𑀦𑁆𑀢𑀺.
𑀏𑀯𑀁 ¶ 𑀅𑀤𑁆𑀥𑀸𑀦𑁂 𑀕𑀢𑁂 𑀦𑀦𑁆𑀤𑀧𑀡𑁆𑀟𑀺𑀢𑁄 ‘‘𑀫𑀬𑀸 𑀆𑀪𑀢𑀨𑀮𑀸𑀨𑀮𑀸𑀦𑁂𑀯 𑀧𑀞𑀫𑀁 𑀫𑀸𑀢𑀸𑀧𑀺𑀢𑀭𑁄 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀳𑀺𑀬𑁆𑀬𑁄 𑀘 𑀧𑀭𑀳𑀺𑀬𑁆𑀬𑁄 𑀘 𑀕𑀳𑀺𑀢𑀝𑁆𑀞𑀸𑀦𑀢𑁄 𑀬𑀸𑀦𑀺 𑀯𑀸 𑀢𑀸𑀦𑀺 𑀯𑀸 𑀧𑀸𑀢𑁄𑀯 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀔𑀸𑀤𑀸𑀧𑁂𑀲𑀺. 𑀢𑁂 𑀢𑀸𑀦𑀺 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀪𑀯𑀦𑁆𑀢𑀺. 𑀲𑁄𑀡𑀧𑀡𑁆𑀟𑀺𑀢𑁄 𑀧𑀦 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀫𑀥𑀼𑀭𑀫𑀥𑀼𑀭𑀸𑀦𑀺 𑀲𑀼𑀧𑀓𑁆𑀓𑀲𑀼𑀧𑀓𑁆𑀓𑀸𑀦𑀺 𑀆𑀳𑀭𑀺𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀅𑀣 𑀦𑀁, ‘‘𑀢𑀸𑀢, 𑀓𑀦𑀺𑀝𑁆𑀞𑁂𑀦 𑀢𑁂 𑀆𑀪𑀢𑀸𑀦𑀺 𑀫𑀬𑀁 𑀧𑀸𑀢𑁄𑀯 𑀔𑀸𑀤𑀺𑀢𑁆𑀯𑀸 𑀉𑀧𑁄𑀲𑀣𑀺𑀓𑀸 𑀚𑀸𑀢𑀸, 𑀦 𑀇𑀤𑀸𑀦𑀺 𑀦𑁄 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀢𑀲𑁆𑀲 𑀨𑀮𑀸𑀨𑀮𑀸𑀦𑀺 𑀧𑀭𑀺𑀪𑁄𑀕𑀁 𑀦 𑀮𑀪𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀧𑀼𑀦𑀤𑀺𑀯𑀲𑁂𑀲𑀼𑀧𑀺 𑀢𑀣𑁂𑀯𑀸𑀢𑀺 ¶ . 𑀏𑀯𑀁 𑀲𑁄 𑀧𑀜𑁆𑀘𑀸𑀪𑀺𑀜𑁆𑀜𑀢𑀸𑀬 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺 𑀆𑀳𑀭𑀢𑀺, 𑀢𑁂 𑀧𑀦 𑀦 𑀔𑀸𑀤𑀦𑁆𑀢𑀺.
𑀅𑀣 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀸𑀢𑀸𑀧𑀺𑀢𑀭𑁄 𑀫𑁂 𑀲𑀼𑀔𑀼𑀫𑀸𑀮𑀸, 𑀦𑀦𑁆𑀤𑁄 𑀘 𑀬𑀸𑀦𑀺 𑀯𑀸 𑀢𑀸𑀦𑀺 𑀯𑀸 𑀅𑀧𑀓𑁆𑀓𑀤𑀼𑀧𑁆𑀧𑀓𑁆𑀓𑀸𑀦𑀺 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀸𑀧𑁂𑀢𑀺, 𑀏𑀯𑀁 𑀲𑀦𑁆𑀢𑁂 𑀇𑀫𑁂 𑀦 𑀘𑀻𑀭𑀁 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀯𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀅𑀣 𑀦𑀁 𑀲𑁄 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀦𑀦𑁆𑀤, 𑀇𑀢𑁄 𑀧𑀝𑁆𑀞𑀸𑀬 𑀨𑀮𑀸𑀨𑀮𑀁 𑀆𑀳𑀭𑀺𑀢𑁆𑀯𑀸 𑀫𑀫𑀸𑀕𑀫𑀦𑀁 𑀧𑀝𑀺𑀫𑀸𑀦𑁂𑀳𑀺, 𑀉𑀪𑁄𑀧𑀺 𑀏𑀓𑀢𑁄𑀯 𑀔𑀸𑀤𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀆𑀳. 𑀲𑁄 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀦 𑀢𑀲𑁆𑀲 𑀯𑀘𑀦𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 ‘‘𑀦𑀦𑁆𑀤𑁄 𑀫𑀫 𑀯𑀘𑀦𑀁 𑀅𑀓𑀭𑁄𑀦𑁆𑀢𑁄 𑀅𑀬𑀼𑀢𑁆𑀢𑀁 𑀓𑀭𑁄𑀢𑀺, 𑀧𑀮𑀸𑀧𑁂𑀲𑁆𑀲𑀸𑀫𑀺 𑀦𑀁, 𑀢𑀢𑁄 𑀏𑀓𑀓𑁄𑀯 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀦𑁆𑀤, 𑀢𑁆𑀯𑀁 𑀅𑀦𑁄𑀯𑀸𑀤𑀓𑁄 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀦 𑀓𑀭𑁄𑀲𑀺, 𑀅𑀳𑀁 𑀚𑁂𑀝𑁆𑀞𑁄, 𑀫𑀸𑀢𑀸𑀧𑀺𑀢𑀭𑁄 𑀫𑀫𑁂𑀯 𑀪𑀸𑀭𑁄, 𑀅𑀳𑀫𑁂𑀯 𑀦𑁂𑀲𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀥 𑀯𑀲𑀺𑀢𑀼𑀁 𑀦 𑀮𑀘𑁆𑀙𑀲𑀺, 𑀅𑀜𑁆𑀜𑀢𑁆𑀣 𑀬𑀸𑀳𑀻’’𑀢𑀺 𑀢𑀲𑁆𑀲 𑀅𑀘𑁆𑀙𑀭𑀁 𑀧𑀳𑀭𑀺.
𑀲𑁄 𑀢𑁂𑀦 𑀧𑀮𑀸𑀧𑀺𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀲𑀺𑀡𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 ¶ 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀻𑀦𑁂𑀭𑀼𑀧𑀸𑀤𑀢𑁄 𑀭𑀢𑀦𑀯𑀸𑀮𑀼𑀓𑀸 𑀆𑀳𑀭𑀺𑀢𑁆𑀯𑀸 𑀫𑀫 𑀪𑀸𑀢𑀼 𑀧𑀡𑁆𑀡𑀲𑀸𑀮𑀸𑀬 𑀧𑀭𑀺𑀯𑁂𑀡𑁂 𑀑𑀓𑀺𑀭𑀺𑀢𑁆𑀯𑀸 𑀪𑀸𑀢𑀭𑀁 𑀔𑀫𑀸𑀧𑁂𑀢𑀼𑀁 𑀧𑀳𑁄𑀫𑀺, 𑀏𑀯𑀫𑁆𑀧𑀺 𑀦 𑀲𑁄𑀪𑀺𑀲𑁆𑀲𑀢𑀺, 𑀅𑀦𑁄𑀢𑀢𑁆𑀢𑀢𑁄 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀫𑀫 𑀪𑀸𑀢𑀼 𑀧𑀡𑁆𑀡𑀲𑀸𑀮𑀸𑀬 𑀧𑀭𑀺𑀯𑁂𑀡𑁂 𑀑𑀲𑀺𑀜𑁆𑀘𑀺𑀢𑁆𑀯𑀸 𑀪𑀸𑀢𑀭𑀁 𑀔𑀫𑀸𑀧𑁂𑀢𑀼𑀁 𑀧𑀳𑁄𑀫𑀺, 𑀏𑀯𑀫𑁆𑀧𑀺 𑀦 𑀲𑁄𑀪𑀺𑀲𑁆𑀲𑀢𑀺, 𑀲𑀘𑁂 𑀫𑁂 𑀪𑀸𑀢𑀭𑀁 𑀤𑁂𑀯𑀢𑀸𑀦𑀁 𑀯𑀲𑁂𑀦 𑀔𑀫𑀸𑀧𑁂𑀬𑁆𑀬𑀁, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑀜𑁆𑀘 𑀆𑀦𑁂𑀢𑁆𑀯𑀸 𑀪𑀸𑀢𑀭𑀁 𑀔𑀫𑀸𑀧𑁂𑀢𑀼𑀁 𑀧𑀳𑁄𑀫𑀺, 𑀏𑀯𑀫𑁆𑀧𑀺 𑀦 𑀲𑁄𑀪𑀺𑀲𑁆𑀲𑀢𑀺 ¶ , 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑁄𑀚𑀁 𑀅𑀕𑁆𑀕𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀭𑀸𑀚𑀸𑀦𑁄 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀏𑀯𑀁 𑀲𑀦𑁆𑀢𑁂 𑀫𑀫 𑀪𑀸𑀢𑀼 𑀕𑀼𑀡𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑁄 𑀯𑀺𑀬 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀸𑀯𑀤𑁂𑀯 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑁂 𑀢𑀲𑁆𑀲 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀞𑀺𑀢𑁄 ‘‘𑀏𑀓𑁄 𑀓𑀺𑀭 ¶ 𑀯𑁄 𑀢𑀸𑀧𑀲𑁄 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 ‘‘𑀓𑀺𑀁 𑀧𑀩𑁆𑀩𑀚𑀺𑀢𑀲𑁆𑀲 𑀫𑀬𑀸 𑀤𑀺𑀝𑁆𑀞𑁂𑀦, 𑀆𑀳𑀸𑀭𑀢𑁆𑀣𑀸𑀬 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀢𑁆𑀢𑀁 𑀧𑀳𑀺𑀡𑀺, 𑀲𑁄 𑀪𑀢𑁆𑀢𑀁 𑀦 𑀇𑀘𑁆𑀙𑀺. 𑀢𑀡𑁆𑀟𑀼𑀮𑀁 𑀧𑀳𑀺𑀡𑀺, 𑀢𑀡𑁆𑀟𑀼𑀮𑀁 𑀦 𑀇𑀘𑁆𑀙𑀺. 𑀯𑀢𑁆𑀣𑀸𑀦𑀺 𑀧𑀳𑀺𑀡𑀺, 𑀯𑀢𑁆𑀣𑀸𑀦𑀺 𑀦 𑀇𑀘𑁆𑀙𑀺. 𑀢𑀫𑁆𑀩𑀽𑀮𑀁 𑀧𑀳𑀺𑀡𑀺, 𑀢𑀫𑁆𑀩𑀽𑀮𑀁 𑀦 𑀇𑀘𑁆𑀙𑀺. 𑀅𑀣𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑁂𑀲𑁂𑀲𑀺, ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺. 𑀲𑁄 𑀤𑀽𑀢𑁂𑀦 𑀧𑀼𑀝𑁆𑀞𑁄 ‘‘𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺𑀢𑀼𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀩𑀳𑀽 𑀫𑀫 𑀉𑀧𑀝𑁆𑀞𑀸𑀓𑀸, 𑀅𑀢𑁆𑀢𑀦𑁄𑀯 𑀢𑀸𑀧𑀲𑀥𑀫𑁆𑀫𑀁 𑀓𑀭𑁄𑀢𑀽’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀆𑀳.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀧𑀡𑁆𑀟𑀺𑀢𑀸, 𑀓𑀺𑀜𑁆𑀘𑀺 𑀉𑀧𑀸𑀬𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀓𑀺𑀭 𑀫𑀬𑁆𑀳𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀣𑀁 𑀕𑀡𑁆𑀳𑀺𑀲𑁆𑀲𑀣𑀸’’𑀢𑀺? ‘‘𑀫𑀳𑀸𑀭𑀸𑀚, 𑀅𑀦𑁆𑀢𑀫𑀲𑁄 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀓𑀲𑁆𑀲𑀘𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀢𑀯 𑀥𑀦𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸𑀯 𑀕𑀳𑁂𑀢𑁆𑀯𑀸 𑀤𑀲𑁆𑀲𑀸𑀫𑀺, 𑀅𑀧𑀺𑀘 𑀓𑁂𑀯𑀮𑀁 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀅𑀚𑁆𑀚𑁂𑀯 𑀦𑀺𑀓𑁆𑀔𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀲𑀘𑁂 𑀲𑁂𑀦𑀸𑀬 𑀉𑀡𑁆𑀳𑀁 𑀳𑁄𑀢𑀺, 𑀦𑀦𑁆𑀤𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸 𑀙𑀸𑀬𑀁 𑀓𑀢𑁆𑀯𑀸 𑀲𑀻𑀢𑀁 𑀓𑀭𑁄𑀢𑀺, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑁂𑀦𑀸𑀬 𑀉𑀧𑀭𑀺 𑀯𑀲𑁆𑀲𑀺𑀢𑀼𑀁 𑀦 𑀤𑁂𑀢𑀺, 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀯𑀸𑀭𑁂𑀢𑀺, 𑀫𑀕𑁆𑀕𑁂 𑀔𑀸𑀡𑀼𑀓𑀡𑁆𑀝𑀓𑀸𑀤𑀬𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑁂 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀫𑀕𑁆𑀕𑀁 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀬 𑀲𑀫𑀁 𑀓𑀢𑁆𑀯𑀸 𑀲𑀬𑀁 𑀆𑀓𑀸𑀲𑁂 𑀘𑀫𑁆𑀫𑀔𑀡𑁆𑀟𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀕𑀘𑁆𑀙𑀢𑀺.
𑀏𑀯𑀁 𑀲𑁂𑀦𑀁 𑀆𑀤𑀸𑀬 𑀧𑀞𑀫𑀁 𑀓𑁄𑀲𑀮𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀦𑀕𑀭𑀲𑁆𑀲𑀸𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 ‘‘𑀬𑀼𑀤𑁆𑀥𑀁 𑀯𑀸 𑀦𑁄 𑀤𑁂𑀢𑀼 𑀲𑁂𑀢𑀘𑁆𑀙𑀢𑁆𑀢𑀁 𑀯𑀸’’𑀢𑀺 𑀓𑁄𑀲𑀮𑀭𑀜𑁆𑀜𑁄 𑀤𑀽𑀢𑀁 𑀧𑀸𑀳𑁂𑀲𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑀺𑀁 𑀅𑀳𑀁 𑀦 𑀭𑀸𑀚𑀸’’𑀢𑀺 ‘‘𑀬𑀼𑀤𑁆𑀥𑀁 𑀤𑀫𑁆𑀫𑀻’’𑀢𑀺 𑀲𑁂𑀦𑀸𑀬 𑀧𑀼𑀭𑀓𑁆𑀔𑀢𑁄 𑀦𑀺𑀓𑁆𑀔𑀫𑀺. 𑀤𑁆𑀯𑁂 ¶ 𑀲𑁂𑀦𑀸 𑀬𑀼𑀚𑁆𑀛𑀺𑀢𑀼𑀁 𑀆𑀭𑀪𑀺𑀁𑀲𑀼 ¶ . 𑀦𑀦𑁆𑀤𑀧𑀡𑁆𑀟𑀺𑀢𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑁂 𑀅𑀢𑁆𑀢𑀦𑁄 𑀦𑀺𑀲𑀻𑀤𑀦𑀁 𑀅𑀚𑀺𑀦𑀘𑀫𑁆𑀫𑀁 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀧𑀲𑀸𑀭𑁂𑀢𑁆𑀯𑀸 𑀤𑁆𑀯𑀻𑀳𑀺𑀧𑀺 ¶ 𑀲𑁂𑀦𑀸𑀳𑀺 𑀔𑀺𑀢𑁆𑀢𑀲𑀭𑁂 𑀘𑀫𑁆𑀫𑁂𑀦𑁂𑀯 𑀲𑀫𑁆𑀧𑀝𑀺𑀘𑁆𑀙𑀺. 𑀏𑀓𑀲𑁂𑀦𑀸𑀬𑀧𑀺 𑀓𑁄𑀘𑀺 𑀓𑀡𑁆𑀟𑁂𑀦 𑀯𑀺𑀤𑁆𑀥𑁄 𑀦𑀸𑀫 𑀦𑀢𑁆𑀣𑀺, 𑀳𑀢𑁆𑀣𑀕𑀢𑀸𑀦𑀁 𑀧𑀦 𑀓𑀡𑁆𑀟𑀸𑀦𑀁 𑀔𑀬𑁂𑀦 𑀤𑁆𑀯𑁂𑀧𑀺 𑀲𑁂𑀦𑀸 𑀦𑀺𑀭𑀼𑀲𑁆𑀲𑀸𑀳𑀸 𑀅𑀝𑁆𑀞𑀁𑀲𑀼. 𑀦𑀦𑁆𑀤𑀧𑀡𑁆𑀟𑀺𑀢𑁄 𑀫𑀦𑁄𑀚𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚𑀸’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀓𑁄𑀲𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺, 𑀦𑀢𑁆𑀣𑀺 𑀢𑁂 𑀧𑀭𑀺𑀧𑀦𑁆𑀣𑁄, 𑀢𑀯 𑀭𑀚𑁆𑀚𑀁 𑀢𑀯𑁂𑀯 𑀪𑀯𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀫𑀦𑁄𑀚𑀭𑀜𑁆𑀜𑁄 𑀯𑀲𑀯𑀢𑁆𑀢𑀻 𑀳𑁄𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀦𑀁 𑀫𑀦𑁄𑀚𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀓𑁄𑀲𑀮𑀭𑀸𑀚𑀸 𑀢𑁂 𑀯𑀲𑁂 𑀯𑀢𑁆𑀢𑀢𑀺, 𑀇𑀫𑀲𑁆𑀲 𑀭𑀚𑁆𑀚𑀁 𑀇𑀫𑀲𑁆𑀲𑁂𑀯 𑀳𑁄𑀢𑀽’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀤𑁆𑀯𑁂 𑀲𑁂𑀦𑀸 𑀆𑀤𑀸𑀬 𑀅𑀗𑁆𑀕𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀅𑀗𑁆𑀕𑀁 𑀕𑀳𑁂𑀢𑁆𑀯𑀸 𑀢𑀢𑁄 𑀫𑀕𑀥𑀭𑀝𑁆𑀞𑀦𑁆𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀩𑁆𑀭𑀳𑁆𑀫𑀯𑀟𑁆𑀠𑀦𑀦𑀕𑀭𑀫𑁂𑀯 𑀕𑀢𑁄. 𑀭𑀚𑁆𑀚𑀁 𑀕𑀡𑁆𑀳𑀦𑁆𑀢𑁄 𑀧𑀦𑁂𑀲 𑀲𑀢𑁆𑀢𑀦𑁆𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀉𑀧𑀭𑀺 𑀲𑀢𑁆𑀢𑀤𑀺𑀯𑀲𑀸𑀥𑀺𑀓𑁂𑀳𑀺 𑀲𑀢𑁆𑀢𑀫𑀸𑀲𑁂𑀳𑀺 𑀕𑀡𑁆𑀳𑀺. 𑀲𑁄 𑀏𑀓𑁂𑀓𑀭𑀸𑀚𑀥𑀸𑀦𑀺𑀢𑁄 𑀦𑀸𑀦𑀧𑁆𑀧𑀓𑀸𑀭𑀁 𑀔𑀚𑁆𑀚𑀪𑁄𑀚𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀲𑀢𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀸𑀳𑀁 𑀫𑀳𑀸𑀧𑀸𑀦𑀁 𑀧𑀺𑀯𑀺.
𑀦𑀦𑁆𑀤𑀧𑀡𑁆𑀟𑀺𑀢𑁄 ‘‘𑀬𑀸𑀯 𑀭𑀸𑀚𑀸 𑀲𑀢𑁆𑀢𑀸𑀳𑀁 𑀇𑀲𑁆𑀲𑀭𑀺𑀬𑀲𑀼𑀔𑀁 𑀅𑀦𑀼𑀪𑁄𑀢𑀺, 𑀢𑀸𑀯𑀲𑁆𑀲 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑁂 𑀓𑀜𑁆𑀘𑀦𑀕𑀼𑀳𑀸𑀤𑁆𑀯𑀸𑀭𑁂 𑀲𑀢𑁆𑀢𑀸𑀳𑀁 𑀯𑀲𑀺. 𑀫𑀦𑁄𑀚𑁄𑀧𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀢𑁆𑀢𑀦𑁄 𑀫𑀳𑀦𑁆𑀢𑀁 𑀲𑀺𑀭𑀺𑀯𑀺𑀪𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀬𑀲𑁄 𑀦 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀽𑀳𑀺, 𑀦 𑀅𑀜𑁆𑀜𑁂𑀳𑀺 𑀤𑀺𑀦𑁆𑀦𑁄, 𑀦𑀦𑁆𑀤𑀢𑀸𑀧𑀲𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄, 𑀢𑀁 𑀔𑁄 𑀧𑀦 𑀫𑁂 𑀅𑀧𑀲𑁆𑀲𑀦𑁆𑀢𑀲𑁆𑀲 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄, 𑀓𑀳𑀁 𑀦𑀼 𑀔𑁄 𑀫𑁂 𑀬𑀲𑀤𑀸𑀬𑀓𑁄’’𑀢𑀺 𑀦𑀦𑁆𑀤𑀧𑀡𑁆𑀟𑀺𑀢𑀁 𑀲𑀭𑀺. 𑀲𑁄 𑀢𑀲𑁆𑀲 𑀅𑀦𑀼𑀲𑁆𑀲𑀭𑀡𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑀲𑁆𑀲 𑀢𑀸𑀧𑀲𑀲𑁆𑀲 𑀤𑁂𑀯𑀢𑀸𑀪𑀸𑀯𑀁 𑀯𑀸 𑀫𑀦𑀼𑀲𑁆𑀲𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀫𑀺, 𑀲𑀘𑁂 𑀏𑀲 ¶ 𑀫𑀦𑀼𑀲𑁆𑀲𑁄 𑀪𑀯𑁂𑀬𑁆𑀬, 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀁 𑀏𑀢𑀲𑁆𑀲𑁂𑀯 𑀤𑀲𑁆𑀲𑀸𑀫𑀺. 𑀅𑀣 𑀤𑁂𑀯𑁄, 𑀲𑀓𑁆𑀓𑀸𑀭𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀯𑀻𑀫𑀁𑀲𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀤𑁂𑀯𑀢𑀸 𑀦𑀼𑀢𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;
𑀫𑀦𑀼𑀲𑁆𑀲𑀪𑀽𑀢𑁄 𑀇𑀤𑁆𑀥𑀺𑀫𑀸, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.
𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀪𑀸𑀯𑀫𑁂𑀯 𑀓𑀣𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋
‘‘𑀦𑀸𑀧𑀺 ¶ ¶ 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;
𑀫𑀦𑀼𑀲𑁆𑀲𑀪𑀽𑀢𑁄 𑀇𑀤𑁆𑀥𑀺𑀫𑀸, 𑀏𑀯𑀁 𑀚𑀸𑀦𑀸𑀳𑀺 𑀪𑀸𑀭𑀥𑀸’’𑀢𑀺.
𑀢𑀢𑁆𑀣 𑀪𑀸𑀭𑀥𑀸𑀢𑀺 𑀭𑀝𑁆𑀞𑀪𑀸𑀭𑀥𑀸𑀭𑀺𑀢𑀸𑀬 𑀦𑀁 𑀏𑀯𑀁 𑀆𑀮𑀧𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀫𑀦𑀼𑀲𑁆𑀲𑀪𑀽𑀢𑁄 𑀓𑀺𑀭𑀸𑀬𑀁 𑀫𑀬𑁆𑀳𑀁 𑀏𑀯𑀁 𑀩𑀳𑀼𑀧𑀓𑀸𑀭𑁄, 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀦𑀁 𑀲𑀦𑁆𑀢𑀧𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀓𑀢𑀭𑀽𑀧𑀫𑀺𑀤𑀁 𑀪𑁄𑀢𑁄, 𑀯𑁂𑀬𑁆𑀬𑀸𑀯𑀘𑁆𑀘𑀁 𑀅𑀦𑀧𑁆𑀧𑀓𑀁;
𑀤𑁂𑀯𑀫𑁆𑀳𑀺 𑀯𑀲𑁆𑀲𑀫𑀸𑀦𑀫𑁆𑀳𑀺, 𑀅𑀦𑁄𑀯𑀲𑁆𑀲𑀁 𑀪𑀯𑀁 𑀅𑀓𑀸.
‘‘𑀢𑀢𑁄 𑀯𑀸𑀢𑀸𑀢𑀧𑁂 𑀖𑁄𑀭𑁂, 𑀲𑀻𑀢𑀘𑁆𑀙𑀸𑀬𑀁 𑀪𑀯𑀁 𑀅𑀓𑀸;
𑀢𑀢𑁄 𑀅𑀫𑀺𑀢𑁆𑀢𑀫𑀚𑁆𑀛𑁂𑀲𑀼, 𑀲𑀭𑀢𑀸𑀡𑀁 𑀪𑀯𑀁 𑀅𑀓𑀸.
‘‘𑀢𑀢𑁄 𑀨𑀻𑀢𑀸𑀦𑀺 𑀭𑀝𑁆𑀞𑀸𑀦𑀺, 𑀯𑀲𑀺𑀦𑁄 𑀢𑁂 𑀪𑀯𑀁 𑀅𑀓𑀸;
𑀢𑀢𑁄 𑀏𑀓𑀲𑀢𑀁 𑀔𑀢𑁆𑀬𑁂, 𑀅𑀦𑀼𑀬𑀦𑁆𑀢𑁂 𑀪𑀯𑀁 𑀅𑀓𑀸.
‘‘𑀧𑀢𑀻𑀢𑀸𑀲𑁆𑀲𑀼 𑀫𑀬𑀁 𑀪𑁄𑀢𑁄, 𑀯𑀤 𑀢𑀁 𑀪𑀜𑁆𑀚𑀫𑀺𑀘𑁆𑀙𑀲𑀺;
𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀭𑀣𑀁, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;
𑀦𑀺𑀯𑁂𑀲𑀦𑀸𑀦𑀺 𑀭𑀫𑁆𑀫𑀸𑀦𑀺, 𑀫𑀬𑀁 𑀪𑁄𑀢𑁄 𑀤𑀤𑀸𑀫𑀲𑁂.
‘‘𑀅𑀣 𑀯𑀗𑁆𑀕𑁂 𑀯𑀸 𑀫𑀕𑀥𑁂, 𑀫𑀬𑀁 𑀪𑁄𑀢𑁄 𑀤𑀤𑀸𑀫𑀲𑁂;
𑀅𑀣 𑀯𑀸 𑀅𑀲𑁆𑀲𑀓𑀸𑀯𑀦𑁆𑀢𑀻, 𑀲𑀼𑀫𑀦𑀸 𑀤𑀫𑁆𑀫 𑀢𑁂 𑀫𑀬𑀁.
‘‘𑀉𑀧𑀟𑁆𑀠𑀁 𑀯𑀸𑀧𑀺 𑀭𑀚𑁆𑀚𑀲𑁆𑀲, 𑀫𑀬𑀁 𑀪𑁄𑀢𑁄 𑀤𑀤𑀸𑀫𑀲𑁂;
𑀲𑀘𑁂 𑀢𑁂 𑀅𑀢𑁆𑀣𑁄 𑀭𑀚𑁆𑀚𑁂𑀦, 𑀅𑀦𑀼𑀲𑀸𑀲 𑀬𑀤𑀺𑀘𑁆𑀙𑀲𑀻’’𑀢𑀺.
𑀢𑀢𑁆𑀣 𑀓𑀢𑀭𑀽𑀧𑀫𑀺𑀤𑀦𑁆𑀢𑀺 𑀓𑀢𑀲𑀪𑀸𑀯𑀁. 𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀓𑀸𑀬𑀯𑁂𑀬𑁆𑀬𑀸𑀯𑀢𑀺𑀓𑀓𑀫𑁆𑀫𑀁. 𑀅𑀦𑁄𑀯𑀲𑁆𑀲𑀦𑁆𑀢𑀺 𑀅𑀯𑀲𑁆𑀲𑀁, 𑀬𑀣𑀸 𑀤𑁂𑀯𑁄 𑀦 𑀯𑀲𑁆𑀲𑀢𑀺 ¶ , 𑀢𑀣𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀢𑀘𑁆𑀙𑀸𑀬𑀦𑁆𑀢𑀺 𑀲𑀻𑀢𑀮𑀁 𑀙𑀸𑀬𑀁. 𑀯𑀲𑀺𑀦𑁄 𑀢𑁂𑀢𑀺 𑀢𑁂 𑀭𑀝𑁆𑀞𑀯𑀸𑀲𑀺𑀦𑁄 𑀅𑀫𑁆𑀳𑀸𑀓𑀁 𑀯𑀲𑀯𑀢𑁆𑀢𑀺𑀦𑁄. 𑀔𑀢𑁆𑀬𑁂𑀢𑀺 𑀔𑀢𑁆𑀢𑀺𑀬𑁂, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀬𑀫𑁂𑀯 𑀧𑀸𑀞𑁄. 𑀧𑀢𑀻𑀢𑀸𑀲𑁆𑀲𑀼 ¶ 𑀫𑀬𑀦𑁆𑀢𑀺 𑀢𑀼𑀝𑁆𑀞𑀸 𑀫𑀬𑀁. 𑀯𑀤 𑀢𑀁 𑀪𑀜𑁆𑀚𑀫𑀺𑀘𑁆𑀙𑀲𑀻𑀢𑀺 𑀪𑀜𑁆𑀚𑀦𑁆𑀢𑀺 𑀭𑀢𑀦𑀲𑁆𑀲𑁂𑀢𑀁 𑀦𑀸𑀫𑀁, 𑀯𑀭𑀁 𑀢𑁂 𑀤𑀤𑀸𑀫𑀺, 𑀬𑀁 𑀭𑀢𑀦𑀁 𑀇𑀘𑁆𑀙𑀲𑀺, 𑀢𑀁 𑀯𑀤𑁂𑀳𑀻𑀢𑀺 𑀅𑀢𑁆𑀣𑁄. ‘‘𑀳𑀢𑁆𑀣𑀺𑀬𑀸𑀦’’𑀦𑁆𑀢𑀺𑀆𑀤𑀻𑀳𑀺 𑀲𑀭𑀽𑀧𑀢𑁄 𑀢𑀁 𑀢𑀁 𑀭𑀢𑀦𑀁 𑀤𑀲𑁆𑀲𑁂𑀢𑀺 ¶ . 𑀅𑀲𑁆𑀲𑀓𑀸𑀯𑀦𑁆𑀢𑀻𑀅𑀲𑁆𑀲𑀓𑀭𑀝𑁆𑀞𑀁 𑀯𑀸 𑀅𑀯𑀦𑁆𑀢𑀺𑀭𑀝𑁆𑀞𑀁 𑀯𑀸. 𑀭𑀚𑁆𑀚𑁂𑀦𑀸𑀢𑀺 𑀲𑀘𑁂𑀧𑀺 𑀢𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀅𑀢𑁆𑀣𑁄, 𑀢𑀫𑁆𑀧𑀺 𑀢𑁂 𑀤𑀢𑁆𑀯𑀸 𑀅𑀳𑀁 𑀨𑀮𑀓𑀸𑀯𑀼𑀥𑀳𑀢𑁆𑀣𑁄 𑀢𑀼𑀫𑁆𑀳𑀸𑀓𑀁 𑀭𑀣𑀲𑁆𑀲 𑀧𑀼𑀭𑀢𑁄 𑀕𑀫𑀺𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀬𑀤𑀺𑀘𑁆𑀙𑀲𑀻𑀢𑀺 𑀏𑀢𑁂𑀲𑀼 𑀫𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀬𑀁 𑀇𑀘𑁆𑀙𑀲𑀺, 𑀢𑀁 𑀅𑀦𑀼𑀲𑀸𑀲 𑀆𑀡𑀸𑀧𑁂𑀳𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀦𑀦𑁆𑀤𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 𑁋
‘‘𑀦 𑀫𑁂 𑀅𑀢𑁆𑀣𑁄𑀧𑀺 𑀭𑀚𑁆𑀚𑁂𑀦, 𑀦𑀕𑀭𑁂𑀦 𑀥𑀦𑁂𑀦 𑀯𑀸;
𑀅𑀣𑁄𑀧𑀺 𑀚𑀦𑀧𑀤𑁂𑀦, 𑀅𑀢𑁆𑀣𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀻’’𑀢𑀺.
‘‘𑀲𑀘𑁂 𑀢𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀏𑀓𑀁 𑀫𑁂 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀪𑁄𑀢𑁄𑀯 𑀭𑀝𑁆𑀞𑁂 𑀯𑀺𑀚𑀺𑀢𑁂, 𑀅𑀭𑀜𑁆𑀜𑁂 𑀅𑀢𑁆𑀣𑀺 𑀅𑀲𑁆𑀲𑀫𑁄;
𑀧𑀺𑀢𑀸 𑀫𑀬𑁆𑀳𑀁 𑀚𑀦𑁂𑀢𑁆𑀢𑀻 𑀘, 𑀉𑀪𑁄 𑀲𑀫𑁆𑀫𑀦𑁆𑀢𑀺 𑀅𑀲𑁆𑀲𑀫𑁂.
‘‘𑀢𑁂𑀲𑀸𑀳𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀲𑀼, 𑀧𑀼𑀜𑁆𑀜𑀁 𑀦 𑀮𑀪𑀸𑀫𑀺 𑀓𑀸𑀢𑀯𑁂;
𑀪𑀯𑀦𑁆𑀢𑀁 𑀅𑀚𑁆𑀛𑀸𑀯𑀭𑀁 𑀓𑀢𑁆𑀯𑀸, 𑀲𑁄𑀡𑀁 𑀬𑀸𑀘𑁂𑀫𑀼 𑀲𑀁𑀯𑀭’’𑀦𑁆𑀢𑀺.
𑀢𑀢𑁆𑀣 𑀭𑀝𑁆𑀞𑁂𑀢𑀺 𑀭𑀚𑁆𑀚𑁂. 𑀯𑀺𑀚𑀺𑀢𑁂𑀢𑀺 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂. 𑀅𑀲𑁆𑀲𑀫𑁄𑀢𑀺 𑀳𑀺𑀫𑀯𑀦𑁆𑀢𑀸𑀭𑀜𑁆𑀜𑁂 𑀏𑀓𑁄 𑀅𑀲𑁆𑀲𑀫𑁄 𑀅𑀢𑁆𑀣𑀺. 𑀲𑀫𑁆𑀫𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀅𑀲𑁆𑀲𑀫𑁂 𑀯𑀲𑀦𑁆𑀢𑀺. 𑀢𑁂𑀲𑀸𑀳𑀦𑁆𑀢𑀺 𑀢𑁂𑀲𑀼 𑀅𑀳𑀁. 𑀓𑀸𑀢𑀯𑁂𑀢𑀺 𑀯𑀢𑁆𑀢𑀧𑀝𑀺𑀯𑀢𑁆𑀢𑀨𑀮𑀸𑀨𑀮𑀸𑀳𑀭𑀡𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀦 𑀮𑀪𑀸𑀫𑀺, 𑀪𑀸𑀢𑀸 𑀫𑁂 𑀲𑁄𑀡𑀧𑀡𑁆𑀟𑀺𑀢𑁄 𑀦𑀸𑀫 𑀫𑀫𑁂𑀓𑀲𑁆𑀫𑀺𑀁 𑀅𑀧𑀭𑀸𑀥𑁂 𑀫𑀸 𑀇𑀥 𑀯𑀲𑀻𑀢𑀺 𑀫𑀁 𑀧𑀮𑀸𑀧𑁂𑀲𑀺. 𑀅𑀚𑁆𑀛𑀸𑀯𑀭𑀦𑁆𑀢𑀺 𑀅𑀥𑀺𑀆𑀯𑀭𑀁 𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀲𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀲𑁄𑀡𑀧𑀡𑁆𑀟𑀺𑀢𑀁 𑀲𑀁𑀯𑀭𑀁 𑀬𑀸𑀘𑁂𑀫𑀼, 𑀆𑀬𑀢𑀺𑀁 𑀲𑀁𑀯𑀭𑀁 𑀬𑀸𑀘𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀬𑀸𑀘𑁂𑀫𑀺𑀫𑀁 𑀯𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀫𑀬𑀁 𑀢𑀬𑀸 𑀲𑀤𑁆𑀥𑀺𑀁 𑀲𑁄𑀡𑀁 𑀬𑀸𑀘𑁂𑀬𑁆𑀬𑀸𑀫 𑀔𑀫𑀸𑀧𑁂𑀬𑁆𑀬𑀸𑀫, 𑀇𑀫𑀁 𑀯𑀭𑀁 𑀢𑀯 𑀲𑀦𑁆𑀢𑀺𑀓𑀸 𑀕𑀡𑁆𑀳𑀸𑀫𑀻𑀢𑀺 𑀅𑀢𑁆𑀣𑁄.
𑀅𑀣 𑀦𑀁 𑀭𑀸𑀚𑀸 𑀆𑀳 𑁋
‘‘𑀓𑀭𑁄𑀫𑀺 ¶ 𑀢𑁂 𑀢𑀁 𑀯𑀘𑀦𑀁, 𑀬𑀁 𑀫𑀁 𑀪𑀡𑀲𑀺 𑀩𑁆𑀭𑀸𑀳𑁆𑀫𑀡;
𑀏𑀢𑀜𑁆𑀘 𑀔𑁄 𑀦𑁄 𑀅𑀓𑁆𑀔𑀸𑀳𑀺, 𑀓𑀻𑀯𑀦𑁆𑀢𑁄 𑀳𑁄𑀦𑁆𑀢𑀼 𑀬𑀸𑀘𑀓𑀸’’𑀢𑀺.
𑀢𑀢𑁆𑀣 ¶ ¶ 𑀓𑀭𑁄𑀫𑀻𑀢𑀺 𑀅𑀳𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀁 𑀤𑀤𑀫𑀸𑀦𑁄 𑀏𑀢𑁆𑀢𑀓𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀓𑀭𑁄𑀫𑀻𑀢𑀺 𑀯𑀤𑀢𑀺. 𑀓𑀻𑀯𑀦𑁆𑀢𑁄𑀢𑀺 𑀓𑀺𑀢𑁆𑀢𑀓𑀸.
𑀦𑀦𑁆𑀤𑀧𑀡𑁆𑀟𑀺𑀢𑁄 𑀆𑀳 𑁋
‘‘𑀧𑀭𑁄𑀲𑀢𑀁 𑀚𑀸𑀦𑀧𑀤𑀸, 𑀫𑀳𑀸𑀲𑀸𑀮𑀸 𑀘 𑀩𑁆𑀭𑀸𑀳𑁆𑀫𑀡𑀸;
𑀇𑀫𑁂 𑀘 𑀔𑀢𑁆𑀢𑀺𑀬𑀸 𑀲𑀩𑁆𑀩𑁂, 𑀅𑀪𑀺𑀚𑀸𑀢𑀸 𑀬𑀲𑀲𑁆𑀲𑀺𑀦𑁄;
𑀪𑀯𑀜𑁆𑀘 𑀭𑀸𑀚𑀸 𑀫𑀦𑁄𑀚𑁄, 𑀅𑀮𑀁 𑀳𑁂𑀲𑁆𑀲𑀦𑁆𑀢𑀺 𑀬𑀸𑀘𑀓𑀸’’𑀢𑀺.
𑀢𑀢𑁆𑀣 𑀚𑀸𑀦𑀧𑀤𑀸𑀢𑀺 𑀕𑀳𑀧𑀢𑀻. 𑀫𑀳𑀸𑀲𑀸𑀮𑀸 𑀘 𑀩𑁆𑀭𑀸𑀳𑁆𑀫𑀡𑀸𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀘 𑀧𑀭𑁄𑀲𑀢𑀸𑀬𑁂𑀯. 𑀅𑀮𑀁 𑀳𑁂𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀬𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀬𑀸𑀘𑀓𑀸𑀢𑀺 𑀫𑀫𑀢𑁆𑀣𑀸𑀬 𑀲𑁄𑀡𑀧𑀡𑁆𑀟𑀺𑀢𑀲𑁆𑀲 𑀔𑀫𑀸𑀧𑀓𑀸.
𑀅𑀣 𑀦𑀁 𑀭𑀸𑀚𑀸 𑀆𑀳 𑁋
‘‘𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀬𑁄𑀚𑁂𑀦𑁆𑀢𑀼, 𑀭𑀣𑀁 𑀲𑀦𑁆𑀦𑀬𑁆𑀳 𑀲𑀸𑀭𑀣𑀺;
𑀆𑀩𑀦𑁆𑀥𑀦𑀸𑀦𑀺 𑀕𑀡𑁆𑀳𑀸𑀣, 𑀧𑀸𑀤𑀸𑀲𑀼𑀲𑁆𑀲𑀸𑀭𑀬𑀤𑁆𑀥𑀚𑁂;
𑀅𑀲𑁆𑀲𑀫𑀁 𑀢𑀁 𑀕𑀫𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀲𑀫𑁆𑀫𑀢𑀺 𑀓𑁄𑀲𑀺𑀬𑁄’’𑀢𑀺.
𑀢𑀢𑁆𑀣 𑀬𑁄𑀚𑁂𑀦𑁆𑀢𑀽𑀢𑀺 𑀳𑀢𑁆𑀣𑀸𑀭𑁄𑀳𑀸 𑀳𑀢𑁆𑀣𑀻, 𑀅𑀲𑁆𑀲𑀸𑀭𑁄𑀳𑀸 𑀘 𑀅𑀲𑁆𑀲𑁂 𑀓𑀧𑁆𑀧𑁂𑀦𑁆𑀢𑀼. 𑀭𑀣𑀁 𑀲𑀦𑁆𑀦𑀬𑁆𑀳 𑀲𑀸𑀭𑀣𑀻𑀢𑀺 𑀲𑀫𑁆𑀫𑀲𑀸𑀭𑀣𑀺 𑀢𑁆𑀯𑀫𑁆𑀧𑀺 𑀭𑀣𑀁 𑀲𑀦𑁆𑀦𑀬𑁆𑀳. 𑀆𑀩𑀦𑁆𑀥𑀦𑀸𑀦𑀻𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑁂𑀲𑀼 𑀆𑀩𑀦𑁆𑀥𑀺𑀢𑀩𑁆𑀩𑀸𑀦𑀺 𑀪𑀡𑁆𑀟𑀸𑀦𑀺 𑀘 𑀕𑀡𑁆𑀳𑀣. 𑀧𑀸𑀤𑀸𑀲𑀼𑀲𑁆𑀲𑀸𑀭𑀬𑀤𑁆𑀥𑀚𑁂𑀢𑀺 𑀭𑀣𑁂 𑀞𑀧𑀺𑀢𑀥𑀚𑀧𑀸𑀤𑀸𑀲𑀼 𑀥𑀚𑁂 𑀉𑀲𑁆𑀲𑀸𑀭𑀬𑀦𑁆𑀢𑀼 𑀉𑀲𑁆𑀲𑀸𑀧𑁂𑀦𑁆𑀢𑀼. 𑀓𑁄𑀲𑀺𑀬𑁄𑀢𑀺 𑀬𑀲𑁆𑀫𑀺𑀁 𑀅𑀲𑁆𑀲𑀫𑁂 𑀓𑁄𑀲𑀺𑀬𑀕𑁄𑀢𑁆𑀢𑁄 𑀯𑀲𑀢𑀻𑀢𑀺.
‘‘𑀢𑀢𑁄 𑀘 𑀭𑀸𑀚𑀸 𑀧𑀸𑀬𑀸𑀲𑀺, 𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀦𑀻;
𑀅𑀕𑀫𑀸 𑀅𑀲𑁆𑀲𑀫𑀁 𑀭𑀫𑁆𑀫𑀁, 𑀬𑀢𑁆𑀣 𑀲𑀫𑁆𑀫𑀢𑀺 𑀓𑁄𑀲𑀺𑀬𑁄’’𑀢𑀺. 𑁋 𑀅𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸;
𑀢𑀢𑁆𑀣 ¶ 𑀢𑀢𑁄 𑀘𑀸𑀢𑀺, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀢𑁆𑀯𑀸 𑀢𑀢𑁄 𑀲𑁄 𑀭𑀸𑀚𑀸 𑀏𑀓𑀲𑀢𑀔𑀢𑁆𑀢𑀺𑀬𑁂 𑀕𑀳𑁂𑀢𑁆𑀯𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀦𑀦𑁆𑀤𑀧𑀡𑁆𑀟𑀺𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀘𑀢𑀼𑀭𑀗𑁆𑀕𑀻𑀦𑀻𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀅𑀕𑀫𑀸𑀲𑀺, 𑀅𑀦𑁆𑀢𑀭𑀫𑀕𑁆𑀕𑁂 𑀯𑀢𑁆𑀢𑀫𑀸𑀦𑁄𑀧𑀺 𑀅𑀯𑀲𑁆𑀲𑀁 𑀕𑀸𑀫𑀺𑀢𑀸𑀬 𑀏𑀯𑀁 𑀯𑀼𑀢𑁆𑀢𑁄. 𑀘𑀢𑀼𑀯𑀻𑀲𑀢𑀺𑀅𑀓𑁆𑀔𑁄𑀪𑀡𑀺𑀲𑀗𑁆𑀔𑀸𑀢𑁂𑀦 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲 𑀢𑀲𑁆𑀲 𑀦𑀦𑁆𑀤𑀧𑀡𑁆𑀟𑀺𑀢𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀝𑁆𑀞𑀼𑀲𑀪𑀯𑀺𑀢𑁆𑀣𑀢𑀁 𑀫𑀕𑁆𑀕𑀁 𑀲𑀫𑀁 𑀫𑀸𑀧𑁂𑀢𑁆𑀯𑀸 ¶ 𑀆𑀓𑀸𑀲𑁂 𑀘𑀫𑁆𑀫𑀔𑀡𑁆𑀟𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀥𑀫𑁆𑀫𑀬𑀼𑀢𑁆𑀢𑀓𑀣𑀁 𑀓𑀣𑁂𑀦𑁆𑀢𑁄 𑀲𑀻𑀢𑀉𑀡𑁆𑀳𑀸𑀤𑀺𑀧𑀭𑀺𑀲𑁆𑀲𑀬𑁂 𑀯𑀸𑀭𑁂𑀦𑁆𑀢𑁄 𑀅𑀕𑀫𑀸𑀲𑀺.
𑀅𑀣𑀲𑁆𑀲 𑀅𑀲𑁆𑀲𑀫𑀁 𑀧𑀸𑀧𑀼𑀡𑀦𑀤𑀺𑀯𑀲𑁂 𑀲𑁄𑀡𑀧𑀡𑁆𑀟𑀺𑀢𑁄 ‘‘𑀫𑀫 𑀓𑀦𑀺𑀝𑁆𑀞𑀲𑁆𑀲 𑀅𑀢𑀺𑀭𑁂𑀓𑀲𑀢𑁆𑀢𑀫𑀸𑀲𑀲𑀢𑁆𑀢𑀤𑀺𑀯𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 ¶ 𑀦𑀺𑀓𑁆𑀔𑀦𑁆𑀢𑀲𑁆𑀲𑀸’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀲𑁄 𑀏𑀢𑀭𑀳𑀻’’𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀘𑀢𑀼𑀯𑀻𑀲𑀢𑀺𑀅𑀓𑁆𑀔𑁄𑀪𑀡𑀺𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀲𑀢𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀫𑀫𑀜𑁆𑀜𑁂𑀯 𑀔𑀫𑀸𑀧𑁂𑀢𑀼𑀁 𑀆𑀕𑀘𑁆𑀙𑀢𑀻’’𑀢𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀳𑀺 𑀭𑀸𑀚𑀽𑀳𑀺 𑀘𑁂𑀯 𑀧𑀭𑀺𑀲𑀸𑀳𑀺 𑀘 𑀫𑀫 𑀓𑀦𑀺𑀝𑁆𑀞𑀲𑁆𑀲 𑀩𑀳𑀽𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀫𑀫𑀸𑀦𑀼𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘𑀅𑀬𑀁 𑀓𑀽𑀝𑀚𑀝𑀺𑀮𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀢𑀺, 𑀅𑀫𑁆𑀳𑀸𑀓𑀁 𑀅𑀬𑁆𑀬𑁂𑀦 𑀲𑀤𑁆𑀥𑀺𑀁 𑀧𑀬𑁄𑀚𑁂𑀲𑀻’𑀢𑀺 𑀫𑀁 𑀯𑀫𑁆𑀪𑁂𑀦𑁆𑀢𑀸 𑀓𑀣𑁂𑀦𑁆𑀢𑀸 𑀅𑀯𑀻𑀘𑀺𑀧𑀭𑀸𑀬𑀡𑀸 𑀪𑀯𑁂𑀬𑁆𑀬𑀼𑀁, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀦𑁂𑀲𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁂𑀦 𑀅𑀁𑀲𑀁 𑀅𑀨𑀼𑀲𑀦𑁆𑀢𑀁 𑀆𑀓𑀸𑀲𑁂 𑀓𑀸𑀚𑀁 𑀞𑀧𑁂𑀢𑁆𑀯𑀸 𑀅𑀦𑁄𑀢𑀢𑁆𑀢𑀢𑁄 𑀉𑀤𑀓𑀁 𑀆𑀳𑀭𑀺𑀢𑀼𑀁 𑀭𑀜𑁆𑀜𑁄 𑀅𑀯𑀺𑀤𑀽𑀭𑁂 𑀆𑀓𑀸𑀲𑁂𑀦 𑀧𑀸𑀬𑀸𑀲𑀺. 𑀦𑀦𑁆𑀤𑀧𑀡𑁆𑀟𑀺𑀢𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀸𑀯𑀺𑀲𑀺. 𑀫𑀦𑁄𑀚𑀭𑀸𑀚𑀸 𑀧𑀦 𑀢𑀁 𑀭𑀫𑀡𑀻𑀬𑁂𑀦 𑀇𑀲𑀺𑀯𑁂𑀲𑁂𑀦 𑀢𑀣𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀓𑀲𑁆𑀲 𑀓𑀸𑀤𑀫𑁆𑀩𑀬𑁄 𑀓𑀸𑀚𑁄, 𑀯𑁂𑀳𑀸𑀲𑀁 𑀘𑀢𑀼𑀭𑀗𑁆𑀕𑀼𑀮𑀁;
𑀅𑀁𑀲𑀁 𑀅𑀲𑀫𑁆𑀨𑀼𑀲𑀁 𑀏𑀢𑀺, 𑀉𑀤𑀳𑀸𑀭𑀸𑀬 𑀕𑀘𑁆𑀙𑀢𑁄’’𑀢𑀺.
𑀢𑀢𑁆𑀣 𑀓𑀸𑀤𑀫𑁆𑀩𑀬𑁄𑀢𑀺 𑀓𑀤𑀫𑁆𑀩𑀭𑀼𑀓𑁆𑀔𑀫𑀬𑁄. 𑀅𑀁𑀲𑀁 𑀅𑀲𑀫𑁆𑀨𑀼𑀲𑀁 𑀏𑀢𑀻𑀢𑀺 𑀅𑀁𑀲𑀁 𑀅𑀲𑀫𑁆𑀨𑀼𑀲𑀦𑁆𑀢𑁄 𑀲𑀬𑀫𑁂𑀯 𑀆𑀕𑀘𑁆𑀙𑀢𑀺. 𑀉𑀤𑀳𑀸𑀭𑀸𑀬𑀸𑀢𑀺 𑀉𑀤𑀓𑀁 𑀆𑀳𑀭𑀺𑀢𑀼𑀁 𑀕𑀘𑁆𑀙𑀦𑁆𑀢𑀲𑁆𑀲 𑀓𑀲𑁆𑀲 𑀏𑀲 𑀓𑀸𑀚𑁄 𑀏𑀯𑀁 𑀏𑀢𑀺, 𑀓𑁄 𑀦𑀸𑀫 𑀢𑁆𑀯𑀁, 𑀓𑀼𑀢𑁄 𑀯𑀸 𑀆𑀕𑀘𑁆𑀙𑀲𑀻𑀢𑀺.
𑀏𑀯𑀁 𑀯𑀼𑀢𑁆𑀢𑁂 𑀫𑀳𑀸𑀲𑀢𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀅𑀳𑀁 ¶ 𑀲𑁄𑀡𑁄 𑀫𑀳𑀸𑀭𑀸𑀚, 𑀢𑀸𑀧𑀲𑁄 𑀲𑀳𑀺𑀢𑀩𑁆𑀩𑀢𑁄;
𑀪𑀭𑀸𑀫𑀺 𑀫𑀸𑀢𑀸𑀧𑀺𑀢𑀭𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.
‘‘𑀯𑀦𑁂 𑀨𑀮𑀜𑁆𑀘 𑀫𑀽𑀮𑀜𑁆𑀘, 𑀆𑀳𑀭𑀺𑀢𑁆𑀯𑀸 𑀤𑀺𑀲𑀫𑁆𑀧𑀢𑀺;
𑀧𑁄𑀲𑁂𑀫𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭’’𑀦𑁆𑀢𑀺.
𑀢𑀢𑁆𑀣 ¶ 𑀲𑀳𑀺𑀢𑀩𑁆𑀩𑀢𑁄𑀢𑀺 𑀲𑀳𑀺𑀢𑀯𑀢𑁄 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄 𑀏𑀓𑁄 𑀢𑀸𑀧𑀲𑁄 𑀅𑀳𑀦𑁆𑀢𑀺 𑀯𑀤𑀢𑀺. 𑀪𑀭𑀸𑀫𑀻𑀢𑀺 𑀧𑁄𑀲𑁂𑀫𑀺. 𑀅𑀢𑀦𑁆𑀤𑀺𑀢𑁄𑀢𑀺 𑀅𑀦𑀮𑀲𑁄 𑀳𑀼𑀢𑁆𑀯𑀸. 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀦𑁆𑀢𑀺 𑀢𑁂𑀳𑀺 𑀧𑀼𑀩𑁆𑀩𑁂 𑀓𑀢𑀁 𑀫𑀬𑁆𑀳𑀁 𑀕𑀼𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀢𑁆𑀢𑀼𑀓𑀸𑀫𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀇𑀘𑁆𑀙𑀸𑀫 ¶ 𑀅𑀲𑁆𑀲𑀫𑀁 𑀕𑀦𑁆𑀢𑀼𑀁, 𑀬𑀢𑁆𑀣 𑀲𑀫𑁆𑀫𑀢𑀺 𑀓𑁄𑀲𑀺𑀬𑁄;
𑀫𑀕𑁆𑀕𑀁 𑀦𑁄 𑀲𑁄𑀡 𑀅𑀓𑁆𑀔𑀸𑀳𑀺, 𑀬𑁂𑀦 𑀕𑀘𑁆𑀙𑁂𑀫𑀼 𑀅𑀲𑁆𑀲𑀫’’𑀦𑁆𑀢𑀺.
𑀢𑀢𑁆𑀣 𑀅𑀲𑁆𑀲𑀫𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀅𑀲𑁆𑀲𑀫𑀧𑀤𑀁.
𑀅𑀣 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀲𑁆𑀲𑀫𑀧𑀤𑀕𑀸𑀫𑀺𑀫𑀕𑁆𑀕𑀁 𑀫𑀸𑀧𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀬𑀁 𑀏𑀓𑀧𑀤𑀻 𑀭𑀸𑀚, 𑀬𑁂𑀦𑁂𑀢𑀁 𑀫𑁂𑀖𑀲𑀦𑁆𑀦𑀺𑀪𑀁;
𑀓𑁄𑀯𑀺𑀴𑀸𑀭𑁂𑀳𑀺 𑀲𑀜𑁆𑀙𑀦𑁆𑀦𑀁, 𑀏𑀢𑁆𑀣 𑀲𑀫𑁆𑀫𑀢𑀺 𑀓𑁄𑀲𑀺𑀬𑁄’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀅𑀬𑀁 𑀏𑀓𑀧𑀤𑀺𑀓𑁄 𑀚𑀗𑁆𑀖𑀫𑀕𑁆𑀕𑁄, 𑀇𑀫𑀺𑀦𑀸 𑀕𑀘𑁆𑀙𑀣, 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀏𑀢𑀁 𑀫𑁂𑀖𑀯𑀡𑁆𑀡𑀁 𑀲𑀼𑀧𑀼𑀧𑁆𑀨𑀺𑀢𑀓𑁄𑀯𑀺𑀴𑀸𑀭𑀲𑀜𑁆𑀙𑀦𑁆𑀦𑀁 𑀯𑀦𑀁 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀫𑀫 𑀧𑀺𑀢𑀸 𑀓𑁄𑀲𑀺𑀬𑀕𑁄𑀢𑁆𑀢𑁄 𑀯𑀲𑀢𑀺, 𑀏𑀢𑀲𑁆𑀲 𑀲𑁄 𑀅𑀲𑁆𑀲𑀫𑁄𑀢𑀺.
‘‘𑀇𑀤𑀁 𑀯𑀢𑁆𑀯𑀸𑀦 𑀧𑀓𑁆𑀓𑀸𑀫𑀺, 𑀢𑀭𑀫𑀸𑀦𑁄 𑀫𑀳𑀸𑀇𑀲𑀺;
𑀯𑁂𑀳𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁, 𑀅𑀦𑀼𑀲𑀸𑀲𑀺𑀢𑁆𑀯𑀸𑀦 𑀔𑀢𑁆𑀢𑀺𑀬𑁂.
‘‘𑀅𑀲𑁆𑀲𑀫𑀁 ¶ 𑀧𑀭𑀺𑀫𑀚𑁆𑀚𑀺𑀢𑁆𑀯𑀸, 𑀧𑀜𑁆𑀜𑀸𑀧𑁂𑀢𑁆𑀯𑀸𑀦 𑀆𑀲𑀦𑀁;
𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸, 𑀧𑀺𑀢𑀭𑀁 𑀧𑀢𑀺𑀩𑁄𑀥𑀬𑀺.
‘‘𑀇𑀫𑁂 𑀆𑀬𑀦𑁆𑀢𑀺 𑀭𑀸𑀚𑀸𑀦𑁄, 𑀅𑀪𑀺𑀚𑀸𑀢𑀸 𑀬𑀲𑀲𑁆𑀲𑀺𑀦𑁄;
𑀅𑀲𑁆𑀲𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀦𑀺𑀲𑀻𑀤 𑀢𑁆𑀯𑀁 𑀫𑀳𑀸𑀇𑀲𑁂.
‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀢𑀭𑀫𑀸𑀦𑁄 𑀫𑀳𑀸𑀇𑀲𑀺;
𑀅𑀲𑁆𑀲𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀲𑀤𑁆𑀯𑀸𑀭𑀫𑁆𑀳𑀺 𑀉𑀧𑀸𑀯𑀺𑀲𑀻’’𑀢𑀺. 𑁋 𑀇𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸;
𑀢𑀢𑁆𑀣 ¶ 𑀧𑀓𑁆𑀓𑀸𑀫𑀻𑀢𑀺 𑀅𑀦𑁄𑀢𑀢𑁆𑀢𑀁 𑀅𑀕𑀫𑀸𑀲𑀺. 𑀅𑀲𑁆𑀲𑀫𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸𑀢𑀺, 𑀪𑀺𑀓𑁆𑀔𑀯𑁂, 𑀲𑁄 𑀇𑀲𑀺 𑀯𑁂𑀕𑁂𑀦 𑀅𑀦𑁄𑀢𑀢𑁆𑀢𑀁 𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀆𑀤𑀸𑀬 𑀢𑁂𑀲𑀼 𑀭𑀸𑀚𑀽𑀲𑀼 𑀅𑀲𑁆𑀲𑀫𑀁 𑀅𑀲𑀫𑁆𑀧𑀢𑁆𑀢𑁂𑀲𑀼𑀬𑁂𑀯 𑀆𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀖𑀝𑁂 𑀧𑀸𑀦𑀻𑀬𑀫𑀸𑀴𑀓𑁂 𑀞𑀧𑁂𑀢𑁆𑀯𑀸 ‘‘𑀫𑀳𑀸𑀚𑀦𑁄 𑀧𑀺𑀯𑀺𑀲𑁆𑀲𑀢𑀻’’𑀢𑀺 𑀯𑀦𑀓𑀼𑀲𑀼𑀫𑁂𑀳𑀺 𑀯𑀸𑀲𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀦𑀺𑀁 𑀆𑀤𑀸𑀬 𑀅𑀲𑁆𑀲𑀫𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀧𑀺𑀢𑀼 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀧𑀺𑀢𑀭𑀁 𑀚𑀸𑀦𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀉𑀧𑀸𑀯𑀺𑀲𑀻𑀢𑀺 𑀉𑀘𑁆𑀘𑀸𑀲𑀦𑁂 𑀦𑀺𑀲𑀻𑀤𑀺.
𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 𑀧𑀦 𑀢𑀲𑁆𑀲 𑀧𑀘𑁆𑀙𑀢𑁄 𑀦𑀻𑀘𑀝𑁆𑀞𑀸𑀦𑁂 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀫𑀳𑀸𑀲𑀢𑁆𑀢𑁄 𑀦𑀻𑀘𑀸𑀲𑀦𑁂 𑀦𑀺𑀲𑀻𑀤𑀺. 𑀦𑀦𑁆𑀤𑀧𑀡𑁆𑀟𑀺𑀢𑁄𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀦𑁄𑀢𑀢𑁆𑀢𑀢𑁄 𑀧𑀸𑀦𑀻𑀬𑀁 𑀆𑀤𑀸𑀬 𑀅𑀲𑁆𑀲𑀫𑀁 𑀆𑀕𑀢𑀓𑀸𑀮𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀲𑀺. 𑀅𑀣 𑀭𑀸𑀚𑀸 𑀦𑁆𑀳𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀏𑀓𑀲𑀢𑀭𑀸𑀚𑀧𑀭𑀺𑀯𑀼𑀢𑁄 𑀦𑀦𑁆𑀤𑀧𑀡𑁆𑀟𑀺𑀢𑀁 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀩𑁄𑀥𑀺𑀲𑀢𑁆𑀢𑀁 𑀔𑀫𑀸𑀧𑁂𑀢𑀼𑀁 𑀅𑀲𑁆𑀲𑀫𑀁 𑀧𑀸𑀯𑀺𑀲𑀺. 𑀅𑀣 𑀦𑀁 𑀢𑀣𑀸 𑀆𑀕𑀘𑁆𑀙𑀦𑁆𑀢𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀸 𑀤𑀺𑀲𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺, 𑀲𑁄𑀧𑀺𑀲𑁆𑀲 𑀆𑀘𑀺𑀓𑁆𑀔𑀺. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀁, 𑀚𑀮𑀦𑁆𑀢𑀁𑀭𑀺𑀯 𑀢𑁂𑀚𑀲𑀸;
𑀔𑀢𑁆𑀬𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑀁, 𑀓𑁄𑀲𑀺𑀬𑁄 𑀏𑀢𑀤𑀩𑁆𑀭𑀯𑀺.
‘‘𑀓𑀲𑁆𑀲 𑀪𑁂𑀭𑀻 𑀫𑀼𑀤𑀺𑀗𑁆𑀕𑀸 𑀘, 𑀲𑀗𑁆𑀔𑀸 𑀧𑀡𑀯𑀤𑀺𑀦𑁆𑀤𑀺𑀫𑀸;
𑀧𑀼𑀭𑀢𑁄 𑀧𑀝𑀺𑀧𑀦𑁆𑀦𑀸𑀦𑀺, 𑀳𑀸𑀲𑀬𑀦𑁆𑀢𑀸 𑀭𑀣𑁂𑀲𑀪𑀁.
‘‘𑀓𑀲𑁆𑀲 𑀓𑀜𑁆𑀘𑀦𑀧𑀝𑁆𑀝𑁂𑀦, 𑀧𑀼𑀣𑀼𑀦𑀸 𑀯𑀺𑀚𑁆𑀚𑀼𑀯𑀡𑁆𑀡𑀺𑀦𑀸;
𑀬𑀼𑀯𑀸 𑀓𑀮𑀸𑀧𑀲𑀦𑁆𑀦𑀤𑁆𑀥𑁄, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.
‘‘𑀉𑀓𑁆𑀓𑀸𑀫𑀼𑀔𑀧𑀳𑀝𑁆𑀞𑀁𑀯 ¶ , 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑀁;
𑀫𑀼𑀔𑀜𑁆𑀘 𑀭𑀼𑀘𑀺𑀭𑀸 𑀪𑀸𑀢𑀺, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.
‘‘𑀓𑀲𑁆𑀲 𑀧𑀕𑁆𑀕𑀳𑀺𑀢𑀁 𑀙𑀢𑁆𑀢𑀁, 𑀲𑀲𑀮𑀸𑀓𑀁 𑀫𑀦𑁄𑀭𑀫𑀁;
𑀆𑀤𑀺𑀘𑁆𑀘𑀭𑀁𑀲𑀸𑀯𑀭𑀡𑀁, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.
‘‘𑀓𑀲𑁆𑀲 𑀅𑀗𑁆𑀕𑀁 𑀧𑀭𑀺𑀕𑁆𑀕𑀬𑁆𑀳, 𑀯𑀸𑀮𑀩𑀻𑀚𑀦𑀺𑀫𑀼𑀢𑁆𑀢𑀫𑀁;
𑀘𑀭𑀦𑁆𑀢𑀺 𑀯𑀭𑀧𑀼𑀜𑁆𑀜𑀲𑁆𑀲, 𑀳𑀢𑁆𑀣𑀺𑀓𑁆𑀔𑀦𑁆𑀥𑁂𑀦 𑀆𑀬𑀢𑁄.
‘‘𑀓𑀲𑁆𑀲 ¶ 𑀲𑁂𑀢𑀸𑀦𑀺 𑀙𑀢𑁆𑀢𑀸𑀦𑀺, 𑀆𑀚𑀸𑀦𑀻𑀬𑀸 𑀘 𑀯𑀫𑁆𑀫𑀺𑀢𑀸;
𑀲𑀫𑀦𑁆𑀢𑀸 𑀧𑀭𑀺𑀓𑀻𑀭𑁂𑀦𑁆𑀢𑀺, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.
‘‘𑀓𑀲𑁆𑀲 𑀏𑀓𑀲𑀢𑀁 𑀔𑀢𑁆𑀬𑀸, 𑀅𑀦𑀼𑀬𑀦𑁆𑀢𑀸 𑀬𑀲𑀲𑁆𑀲𑀺𑀦𑁄;
𑀲𑀫𑀦𑁆𑀢𑀸𑀦𑀼𑀧𑀭𑀺𑀬𑀦𑁆𑀢𑀺, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.
‘‘𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺, 𑀲𑁂𑀦𑀸 𑀘 𑀘𑀢𑀼𑀭𑀗𑁆𑀕𑀺𑀦𑀻;
𑀲𑀫𑀦𑁆𑀢𑀸𑀦𑀼𑀧𑀭𑀺𑀬𑀦𑁆𑀢𑀺, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.
‘‘𑀓𑀲𑁆𑀲𑁂𑀲𑀸 𑀫𑀳𑀢𑀻 𑀲𑁂𑀦𑀸, 𑀧𑀺𑀝𑁆𑀞𑀺𑀢𑁄 𑀅𑀦𑀼𑀯𑀢𑁆𑀢𑀢𑀺;
𑀅𑀓𑁆𑀔𑁄𑀪𑀡𑀻 𑀅𑀧𑀭𑀺𑀬𑀦𑁆𑀢𑀸, 𑀲𑀸𑀕𑀭𑀲𑁆𑀲𑁂𑀯 𑀊𑀫𑀺𑀬𑁄.
‘‘𑀭𑀸𑀚𑀸𑀪𑀺𑀭𑀸𑀚𑀸 𑀫𑀦𑁄𑀚𑁄, 𑀇𑀦𑁆𑀤𑁄𑀯 𑀚𑀬𑀢𑀁 𑀧𑀢𑀺;
𑀦𑀦𑁆𑀤𑀲𑁆𑀲𑀚𑁆𑀛𑀸𑀯𑀭𑀁 𑀏𑀢𑀺, 𑀅𑀲𑁆𑀲𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁.
‘‘𑀢𑀲𑁆𑀲𑁂𑀲𑀸 𑀫𑀳𑀢𑀻 𑀲𑁂𑀦𑀸, 𑀧𑀺𑀝𑁆𑀞𑀺𑀢𑁄 𑀅𑀦𑀼𑀯𑀢𑁆𑀢𑀢𑀺;
𑀅𑀓𑁆𑀔𑁄𑀪𑀡𑀻 𑀅𑀧𑀭𑀺𑀬𑀦𑁆𑀢𑀸, 𑀲𑀸𑀕𑀭𑀲𑁆𑀲𑁂𑀯 𑀊𑀫𑀺𑀬𑁄’’𑀢𑀺.
𑀢𑀢𑁆𑀣 𑀚𑀮𑀦𑁆𑀢𑀁𑀭𑀺𑀯𑀸𑀢𑀺 𑀚𑀮𑀦𑁆𑀢𑀁 𑀯𑀺𑀬. 𑀧𑀝𑀺𑀧𑀦𑁆𑀦𑀸𑀦𑀻𑀢𑀺 𑀏𑀢𑀸𑀦𑀺 𑀢𑀽𑀭𑀺𑀬𑀸𑀦𑀺 𑀓𑀲𑁆𑀲 𑀧𑀼𑀭𑀢𑁄 𑀆𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀳𑀸𑀲𑀬𑀦𑁆𑀢𑀸𑀢𑀺 𑀢𑁄𑀲𑁂𑀦𑁆𑀢𑀸. 𑀓𑀜𑁆𑀘𑀦𑀧𑀝𑁆𑀝𑁂𑀦𑀸𑀢𑀺, 𑀢𑀸𑀢, 𑀓𑀲𑁆𑀲 𑀓𑀜𑁆𑀘𑀦𑀫𑀬𑁂𑀦 𑀯𑀺𑀚𑁆𑀚𑀼𑀯𑀡𑁆𑀡𑁂𑀦 𑀉𑀡𑁆𑀳𑀻𑀲𑀧𑀝𑁆𑀝𑁂𑀦 𑀦𑀮𑀸𑀝𑀦𑁆𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀧𑀼𑀘𑁆𑀙𑀢𑀺. 𑀬𑀼𑀯𑀸𑀢𑀺 𑀢𑀭𑀼𑀡𑁄. 𑀓𑀮𑀸𑀧𑀲𑀦𑁆𑀦𑀤𑁆𑀥𑁄𑀢𑀺 ¶ 𑀲𑀦𑁆𑀦𑀤𑁆𑀥𑀲𑀭𑀢𑀽𑀡𑀻𑀭𑁄. 𑀉𑀓𑁆𑀓𑀸𑀫𑀼𑀔𑀧𑀳𑀝𑁆𑀞𑀁 𑀯𑀸𑀢𑀺 𑀓𑀫𑁆𑀫𑀸𑀭𑀸𑀦𑀁 𑀉𑀤𑁆𑀥𑀦𑁂 𑀧𑀳𑀝𑁆𑀞𑀁 𑀲𑀼𑀯𑀡𑁆𑀡𑀁 𑀯𑀺𑀬. 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑀦𑁆𑀢𑀺 𑀯𑀻𑀢𑀘𑁆𑀘𑀺𑀢𑀔𑀤𑀺𑀭𑀗𑁆𑀕𑀸𑀭𑀯𑀡𑁆𑀡𑀁. 𑀆𑀤𑀺𑀘𑁆𑀘𑀭𑀁𑀲𑀸𑀯𑀭𑀡𑀦𑁆𑀢𑀺𑀆𑀤𑀺𑀘𑁆𑀘𑀭𑀁𑀲𑀻𑀦𑀁 𑀆𑀯𑀭𑀡𑀁. 𑀅𑀗𑁆𑀕𑀁 𑀧𑀭𑀺𑀕𑁆𑀕𑀬𑁆𑀳𑀸𑀢𑀺 𑀅𑀗𑁆𑀕𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀲𑀭𑀻𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀸𑀮𑀩𑀻𑀚𑀦𑀺𑀫𑀼𑀢𑁆𑀢𑀫𑀦𑁆𑀢𑀺 𑀯𑀸𑀮𑀩𑀻𑀚𑀦𑀺𑀁 𑀉𑀢𑁆𑀢𑀫𑀁 ¶ . 𑀘𑀭𑀦𑁆𑀢𑀻𑀢𑀺 𑀲𑀜𑁆𑀘𑀭𑀦𑁆𑀢𑀺. 𑀙𑀢𑁆𑀢𑀸𑀦𑀻𑀢𑀺 𑀆𑀚𑀸𑀦𑀻𑀬𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀸𑀦𑀁 𑀥𑀸𑀭𑀺𑀢𑀙𑀢𑁆𑀢𑀸𑀦𑀺. 𑀧𑀭𑀺𑀓𑀻𑀭𑁂𑀦𑁆𑀢𑀻𑀢𑀺 𑀢𑀲𑁆𑀲 𑀲𑀫𑀦𑁆𑀢𑀸 𑀲𑀩𑁆𑀩𑀤𑀺𑀲𑀸𑀪𑀸𑀕𑁂𑀲𑀼 𑀧𑀭𑀺𑀓𑀻𑀭𑀬𑀦𑁆𑀢𑀺. 𑀘𑀢𑀼𑀭𑀗𑁆𑀕𑀺𑀦𑀻𑀢𑀺 𑀏𑀢𑁂𑀳𑀺 𑀳𑀢𑁆𑀣𑀺𑀆𑀤𑀻𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀅𑀓𑁆𑀔𑁄𑀪𑀡𑀻𑀢𑀺 𑀔𑁄𑀪𑁂𑀢𑀼𑀁 𑀦 𑀲𑀓𑁆𑀓𑀸. 𑀲𑀸𑀕𑀭𑀲𑁆𑀲𑁂𑀯𑀸𑀢𑀺 𑀲𑀸𑀕𑀭𑀲𑁆𑀲 𑀊𑀫𑀺𑀬𑁄 𑀯𑀺𑀬 𑀅𑀧𑀭𑀺𑀬𑀦𑁆𑀢𑀸. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀏𑀓𑀲𑀢𑀭𑀸𑀚𑀽𑀦𑀁 𑀧𑀽𑀚𑀺𑀢𑁄, 𑀢𑁂𑀲𑀁 𑀯𑀸 𑀅𑀥𑀺𑀓𑁄 𑀭𑀸𑀚𑀸𑀢𑀺 𑀭𑀸𑀚𑀸𑀪𑀺𑀭𑀸𑀚𑀸. 𑀚𑀬𑀢𑀁 𑀧𑀢𑀻𑀢𑀺 𑀚𑀬𑀧𑁆𑀧𑀢𑁆𑀢𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀚𑁂𑀝𑁆𑀞𑀓𑁄. 𑀅𑀚𑁆𑀛𑀸𑀯𑀭𑀦𑁆𑀢𑀺 𑀫𑀫𑀁 𑀔𑀫𑀸𑀧𑀦𑀢𑁆𑀣𑀸𑀬 𑀦𑀦𑁆𑀤𑀲𑁆𑀲 𑀧𑀭𑀺𑀲𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀢𑀺.
𑀲𑀢𑁆𑀣𑀸 ¶ 𑀆𑀳 𑁋
‘‘𑀅𑀦𑀼𑀮𑀺𑀢𑁆𑀢𑀸 𑀘𑀦𑁆𑀤𑀦𑁂𑀦, 𑀓𑀸𑀲𑀺𑀓𑀼𑀢𑁆𑀢𑀫𑀥𑀸𑀭𑀺𑀦𑁄;
𑀲𑀩𑁆𑀩𑁂 𑀧𑀜𑁆𑀚𑀮𑀺𑀓𑀸 𑀳𑀼𑀢𑁆𑀯𑀸, 𑀇𑀲𑀻𑀦𑀁 𑀅𑀚𑁆𑀛𑀼𑀧𑀸𑀕𑀫𑀼’’𑀦𑁆𑀢𑀺.
𑀢𑀢𑁆𑀣 𑀇𑀲𑀻𑀦𑀁 𑀅𑀚𑁆𑀛𑀼𑀧𑀸𑀕𑀫𑀼𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀸𑀦𑁄 𑀲𑀼𑀭𑀪𑀺𑀘𑀦𑁆𑀤𑀦𑁂𑀦 𑀅𑀦𑀼𑀮𑀺𑀢𑁆𑀢𑀸 𑀉𑀢𑁆𑀢𑀫𑀓𑀸𑀲𑀺𑀓𑀯𑀢𑁆𑀣𑀥𑀸𑀭𑀺𑀦𑁄 𑀲𑀺𑀭𑀲𑀺 𑀧𑀢𑀺𑀝𑁆𑀞𑀸𑀧𑀺𑀢𑀅𑀜𑁆𑀚𑀮𑀻 𑀳𑀼𑀢𑁆𑀯𑀸 𑀇𑀲𑀻𑀦𑀁 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸.
𑀢𑀢𑁄 𑀫𑀦𑁄𑀚𑁄 𑀭𑀸𑀚𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁;
𑀓𑀘𑁆𑀘𑀺 𑀉𑀜𑁆𑀙𑁂𑀦 𑀬𑀸𑀧𑁂𑀣, 𑀓𑀘𑁆𑀘𑀺 𑀫𑀽𑀮𑀨𑀮𑀸 𑀩𑀳𑀽.
‘‘𑀓𑀘𑁆𑀘𑀺 𑀟𑀁𑀲𑀸 𑀫𑀓𑀲𑀸 𑀘, 𑀅𑀧𑁆𑀧𑀫𑁂𑀯 𑀲𑀭𑀻𑀲𑀧𑀸;
𑀯𑀦𑁂 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑁂, 𑀓𑀘𑁆𑀘𑀺 𑀳𑀺𑀁𑀲𑀸 𑀦 𑀯𑀺𑀚𑁆𑀚𑀢𑀻’’𑀢𑀺.
𑀢𑀢𑁄 𑀧𑀭𑀁 𑀉𑀪𑀺𑀦𑁆𑀦𑀁 𑀢𑁂𑀲𑀁 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀓𑀣𑀺𑀢𑀕𑀸𑀣𑀸 𑀳𑁄𑀦𑁆𑀢𑀺 𑁋
‘‘𑀓𑀼𑀲𑀮𑀜𑁆𑀘𑁂𑀯 ¶ 𑀦𑁄 𑀭𑀸𑀚, 𑀅𑀣𑁄 𑀭𑀸𑀚 𑀅𑀦𑀸𑀫𑀬𑀁;
𑀅𑀣𑁄 𑀉𑀜𑁆𑀙𑁂𑀦 𑀬𑀸𑀧𑁂𑀫, 𑀅𑀣𑁄 𑀫𑀽𑀮𑀨𑀮𑀸 𑀩𑀳𑀽.
‘‘𑀅𑀣𑁄 𑀟𑀁𑀲𑀸 𑀫𑀓𑀲𑀸 𑀘, 𑀅𑀧𑁆𑀧𑀫𑁂𑀯 𑀲𑀭𑀻𑀲𑀧𑀸;
𑀯𑀦𑁂 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑁂, 𑀳𑀺𑀁𑀲𑀸 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺.
‘‘𑀩𑀳𑀽𑀦𑀺 𑀯𑀲𑁆𑀲𑀧𑀽𑀕𑀸𑀦𑀺, 𑀅𑀲𑁆𑀲𑀫𑁂 𑀲𑀫𑁆𑀫𑀢𑀁 𑀇𑀥;
𑀦𑀸𑀪𑀺𑀚𑀸𑀦𑀸𑀫𑀺 𑀉𑀧𑁆𑀧𑀦𑁆𑀦𑀁, 𑀆𑀩𑀸𑀥𑀁 𑀅𑀫𑀦𑁄𑀭𑀫𑀁.
‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;
𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀁 𑀇𑀥𑀢𑁆𑀣𑀺 𑀧𑀯𑁂𑀤𑀬.
‘‘𑀢𑀺𑀦𑁆𑀤𑀼𑀓𑀸𑀦𑀺 ¶ 𑀧𑀺𑀬𑀸𑀮𑀸𑀦𑀺, 𑀫𑀥𑀼𑀓𑁂 𑀓𑀸𑀲𑀼𑀫𑀸𑀭𑀺𑀬𑁄;
𑀨𑀮𑀸𑀦𑀺 𑀔𑀼𑀤𑁆𑀤𑀓𑀧𑁆𑀧𑀸𑀦𑀺, 𑀪𑀼𑀜𑁆𑀚 𑀭𑀸𑀚 𑀯𑀭𑀁 𑀯𑀭𑀁.
‘‘𑀇𑀤𑀫𑁆𑀧𑀺 𑀧𑀸𑀦𑀻𑀬𑀁 𑀲𑀻𑀢𑀁, 𑀆𑀪𑀢𑀁 𑀕𑀺𑀭𑀺𑀕𑀩𑁆𑀪𑀭𑀸;
𑀢𑀢𑁄 𑀧𑀺𑀯 𑀫𑀳𑀸𑀭𑀸𑀚, 𑀲𑀘𑁂 𑀢𑁆𑀯𑀁 𑀅𑀪𑀺𑀓𑀗𑁆𑀔𑀲𑀺.
‘‘𑀧𑀝𑀺𑀕𑁆𑀕𑀳𑀺𑀢𑀁 ¶ 𑀬𑀁 𑀤𑀺𑀦𑁆𑀦𑀁, 𑀲𑀩𑁆𑀩𑀲𑁆𑀲 𑀅𑀕𑁆𑀖𑀺𑀬𑀁 𑀓𑀢𑀁;
𑀦𑀦𑁆𑀤𑀲𑁆𑀲𑀸𑀧𑀺 𑀦𑀺𑀲𑀸𑀫𑁂𑀣, 𑀯𑀘𑀦𑀁 𑀲𑁄 𑀧𑀯𑀓𑁆𑀔𑀢𑀺.
‘‘𑀅𑀚𑁆𑀛𑀸𑀯𑀭𑀫𑁆𑀳𑀸 𑀦𑀦𑁆𑀤𑀲𑁆𑀲, 𑀪𑁄𑀢𑁄 𑀲𑀦𑁆𑀢𑀺𑀓𑀫𑀸𑀕𑀢𑀸;
𑀲𑀼𑀡𑀸𑀢𑀼 𑀪𑀯𑀁 𑀯𑀘𑀦𑀁, 𑀦𑀦𑁆𑀤𑀲𑁆𑀲 𑀧𑀭𑀺𑀲𑀸𑀬 𑀘𑀸’’𑀢𑀺.
𑀇𑀫𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀲𑀫𑁆𑀩𑀦𑁆𑀥𑀸𑀬𑁂𑀯, 𑀬𑀁 𑀧𑀦𑁂𑀢𑁆𑀣 𑀅𑀧𑀸𑀓𑀝𑀁, 𑀢𑀤𑁂𑀯 𑀯𑀓𑁆𑀔𑀸𑀫. 𑀧𑀯𑁂𑀤𑀬𑀸𑀢𑀺 𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀯 𑀅𑀪𑀺𑀭𑀼𑀘𑀺𑀢𑀁 𑀅𑀢𑁆𑀣𑀺, 𑀢𑀁 𑀦𑁄 𑀓𑀣𑁂𑀳𑀻𑀢𑀺 𑀯𑀤𑀢𑀺. 𑀔𑀼𑀤𑁆𑀤𑀓𑀧𑁆𑀧𑀸𑀦𑀻𑀢𑀺 𑀏𑀢𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀨𑀮𑀸𑀦𑀺 𑀔𑀼𑀤𑁆𑀤𑀓𑀫𑀥𑀼𑀧𑀝𑀺𑀪𑀸𑀕𑀸𑀦𑀺 𑀫𑀥𑀼𑀭𑀸𑀦𑀺. 𑀯𑀭𑀁 𑀯𑀭𑀦𑁆𑀢𑀺 𑀇𑀢𑁄 𑀉𑀢𑁆𑀢𑀫𑀼𑀢𑁆𑀢𑀫𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚. 𑀕𑀺𑀭𑀺𑀕𑀩𑁆𑀪𑀭𑀸𑀢𑀺 𑀅𑀦𑁄𑀢𑀢𑁆𑀢𑀢𑁄. 𑀲𑀩𑁆𑀩𑀲𑁆𑀲 𑀅𑀕𑁆𑀖𑀺𑀬𑀦𑁆𑀢𑀺 𑀬𑁂𑀦 𑀫𑀬𑀁 𑀆𑀧𑀼𑀘𑁆𑀙𑀺𑀢𑀸, 𑀢𑀁 𑀅𑀫𑁆𑀳𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀘 𑀤𑀺𑀦𑁆𑀦𑀫𑁂𑀯 𑀦𑀸𑀫, 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀲 𑀚𑀦𑀲𑁆𑀲 𑀲𑀩𑁆𑀩𑀲𑁆𑀲 𑀅𑀕𑁆𑀖𑀺𑀬𑀁 𑀢𑀼𑀫𑁆𑀳𑁂𑀳𑀺 𑀓𑀢𑀁. 𑀦𑀦𑁆𑀤𑀲𑁆𑀲𑀸𑀧𑀻𑀢𑀺 𑀅𑀫𑁆𑀳𑀸𑀓𑀁 𑀢𑀸𑀯 𑀲𑀩𑁆𑀩𑀁 𑀓𑀢𑀁, 𑀇𑀤𑀸𑀦𑀺 𑀧𑀦 𑀦𑀦𑁆𑀤𑀧𑀡𑁆𑀟𑀺𑀢𑁄 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑁄 ¶ , 𑀢𑀲𑁆𑀲𑀧𑀺 𑀢𑀸𑀯 𑀯𑀘𑀦𑀁 𑀲𑀼𑀡𑀸𑀣. 𑀅𑀚𑁆𑀛𑀸𑀯𑀭𑀫𑁆𑀳𑀸𑀢𑀺 𑀫𑀬𑀜𑁆𑀳𑀺 𑀦 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀆𑀕𑀢𑀸, 𑀦𑀦𑁆𑀤𑀲𑁆𑀲 𑀧𑀦 𑀧𑀭𑀺𑀲𑀸 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀔𑀫𑀸𑀧𑀦𑀢𑁆𑀣𑀸𑀬 𑀆𑀕𑀢𑀸𑀢𑀺 𑀯𑀤𑀢𑀺. 𑀪𑀯𑀦𑁆𑀢𑀺 𑀪𑀯𑀁 𑀲𑁄𑀡𑀧𑀡𑁆𑀟𑀺𑀢𑁄 𑀲𑀼𑀡𑀸𑀢𑀼.
𑀏𑀯𑀁 𑀯𑀼𑀢𑁆𑀢𑁂 𑀦𑀦𑁆𑀤𑀧𑀡𑁆𑀟𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀫𑀸𑀢𑀸𑀧𑀺𑀢𑀭𑁄 𑀘 𑀪𑀸𑀢𑀭𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀲𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳 𑁋
‘‘𑀧𑀭𑁄𑀲𑀢𑀁 𑀚𑀸𑀦𑀧𑀤𑀸, 𑀫𑀳𑀸𑀲𑀸𑀮𑀸 𑀘 𑀩𑁆𑀭𑀸𑀳𑁆𑀫𑀡𑀸;
𑀇𑀫𑁂 𑀘 𑀔𑀢𑁆𑀢𑀺𑀬𑀸 𑀲𑀩𑁆𑀩𑁂, 𑀅𑀪𑀺𑀚𑀸𑀢𑀸 𑀬𑀲𑀲𑁆𑀲𑀺𑀦𑁄;
𑀪𑀯𑀜𑁆𑀘 𑀭𑀸𑀚𑀸 𑀫𑀦𑁄𑀚𑁄, 𑀅𑀦𑀼𑀫𑀜𑁆𑀜𑀦𑁆𑀢𑀼 𑀫𑁂 𑀯𑀘𑁄.
‘‘𑀬𑁂 𑀘 𑀲𑀦𑁆𑀢𑀺 𑀲𑀫𑀻𑀢𑀸𑀭𑁄, 𑀬𑀓𑁆𑀔𑀸𑀦𑀺 𑀇𑀥 𑀫𑀲𑁆𑀲𑀫𑁂;
𑀅𑀭𑀜𑁆𑀜𑁂 𑀪𑀽𑀢𑀪𑀩𑁆𑀬𑀸𑀦𑀺, 𑀲𑀼𑀡𑀦𑁆𑀢𑀼 𑀯𑀘𑀦𑀁 𑀫𑀫.
‘‘𑀦𑀫𑁄 𑀓𑀢𑁆𑀯𑀸𑀦 𑀪𑀽𑀢𑀸𑀦𑀁, 𑀇𑀲𑀺𑀁 𑀯𑀓𑁆𑀔𑀸𑀫𑀺 𑀲𑀼𑀩𑁆𑀩𑀢𑀁;
𑀲𑁄 𑀢𑁆𑀬𑀸𑀳𑀁 𑀤𑀓𑁆𑀔𑀺𑀡𑀸 𑀩𑀸𑀳𑀼, 𑀢𑀯 𑀓𑁄𑀲𑀺𑀬 𑀲𑀫𑁆𑀫𑀢𑁄.
‘‘𑀧𑀺𑀢𑀭𑀁 𑀫𑁂 𑀚𑀦𑁂𑀢𑁆𑀢𑀺𑀜𑁆𑀘, 𑀪𑀢𑁆𑀢𑀼𑀓𑀸𑀫𑀲𑁆𑀲 𑀫𑁂 𑀲𑀢𑁄;
𑀯𑀻𑀭 𑀧𑀼𑀜𑁆𑀜𑀫𑀺𑀤𑀁 𑀞𑀸𑀦𑀁, 𑀫𑀸 𑀫𑀁 𑀓𑁄𑀲𑀺𑀬 𑀯𑀸𑀭𑀬.
‘‘𑀲𑀩𑁆𑀪𑀺 ¶ ¶ 𑀳𑁂𑀢𑀁 𑀉𑀧𑀜𑁆𑀜𑀸𑀢𑀁, 𑀫𑀫𑁂𑀢𑀁 𑀉𑀧𑀦𑀺𑀲𑁆𑀲𑀚;
𑀉𑀝𑁆𑀞𑀸𑀦𑀧𑀸𑀭𑀺𑀘𑀭𑀺𑀬𑀸𑀬, 𑀤𑀻𑀖𑀭𑀢𑁆𑀢𑀁 𑀢𑀬𑀸 𑀓𑀢𑀁;
𑀥𑀸𑀢𑀸𑀧𑀺𑀢𑀽𑀲𑀼 𑀧𑀼𑀜𑁆𑀜𑀸𑀦𑀺, 𑀫𑀫 𑀮𑁄𑀓𑀤𑀤𑁄 𑀪𑀯.
‘‘𑀢𑀣𑁂𑀯 𑀲𑀦𑁆𑀢𑀺 𑀫𑀦𑀼𑀚𑀸, 𑀥𑀫𑁆𑀫𑁂 𑀥𑀫𑁆𑀫𑀧𑀤𑀁 𑀯𑀺𑀤𑀽;
𑀫𑀕𑁆𑀕𑁄 𑀲𑀕𑁆𑀕𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀚𑀸𑀦𑀸𑀲𑀺 𑀢𑁆𑀯𑀁 𑀇𑀲𑁂.
‘‘𑀉𑀝𑁆𑀞𑀸𑀦𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀼𑀲𑀼𑀔𑀸𑀯𑀳𑀁;
𑀢𑀁 𑀫𑀁 𑀧𑀼𑀜𑁆𑀜𑀸 𑀦𑀺𑀯𑀸𑀭𑁂𑀢𑀺, 𑀅𑀭𑀺𑀬𑀫𑀕𑁆𑀕𑀸𑀯𑀭𑁄 𑀦𑀭𑁄’’𑀢𑀺.
𑀢𑀢𑁆𑀣 ¶ 𑀅𑀦𑀼𑀫𑀜𑁆𑀜𑀦𑁆𑀢𑀽𑀢𑀺 𑀅𑀦𑀼𑀩𑀼𑀚𑁆𑀛𑀦𑁆𑀢𑀼, 𑀲𑀸𑀥𑀼𑀓𑀁 𑀲𑀼𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑀫𑀻𑀢𑀸𑀭𑁄𑀢𑀺 𑀲𑀫𑀸𑀕𑀢𑀸. 𑀅𑀭𑀜𑁆𑀜𑁂 𑀪𑀽𑀢𑀪𑀩𑁆𑀬𑀸𑀦𑀻𑀢𑀺 𑀅𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑀸𑀭𑀜𑁆𑀜𑁂 𑀬𑀸𑀦𑀺 𑀪𑀽𑀢𑀸𑀦𑀺 𑀘𑁂𑀯 𑀯𑀼𑀟𑁆𑀠𑀺𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑀸𑀦𑀺 𑀪𑀩𑁆𑀬𑀸𑀦𑀺 𑀘 𑀢𑀭𑀼𑀡𑀤𑁂𑀯𑀢𑀸𑀦𑀺, 𑀢𑀸𑀦𑀺𑀧𑀺 𑀲𑀩𑁆𑀩𑀸𑀦𑀺 𑀫𑀫 𑀯𑀘𑀦𑀁 𑀲𑀼𑀡𑀦𑁆𑀢𑀽𑀢𑀺 𑀅𑀢𑁆𑀣𑁄. ‘‘𑀦𑀫𑁄 𑀓𑀢𑁆𑀯𑀸𑀦𑀸’’𑀢𑀺 𑀇𑀤𑀁 𑀲𑁄 𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸𑀦𑀁 𑀦𑀫𑀓𑁆𑀓𑀸𑀭𑀁 𑀓𑀢𑁆𑀯𑀸 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀚𑁆𑀚 𑀩𑀳𑀽𑀳𑀺 𑀤𑁂𑀯𑀢𑀸𑀳𑀺 𑀫𑀫 𑀪𑀸𑀢𑀺𑀓𑀲𑁆𑀲 𑀥𑀫𑁆𑀫𑀓𑀣𑀸𑀲𑀯𑀦𑀢𑁆𑀣𑀁 𑀆𑀕𑀢𑀸𑀳𑀺 𑀪𑀯𑀺𑀢𑀩𑁆𑀩𑀁, 𑀅𑀳𑀁 𑀯𑁄 𑀦𑀫𑀓𑁆𑀓𑀸𑀭𑁄, 𑀢𑀼𑀫𑁆𑀳𑁂𑀧𑀺 𑀫𑀬𑁆𑀳𑀁 𑀲𑀳𑀸𑀬𑀸 𑀳𑁄𑀣𑀸𑀢𑀺. 𑀲𑁄 𑀤𑁂𑀯𑀢𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀲𑀁 𑀚𑀸𑀦𑀸𑀧𑁂𑀢𑁆𑀯𑀸 ‘‘𑀇𑀲𑀺𑀁 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀲𑀺𑀦𑁆𑀢𑀺 𑀲𑁄𑀡𑀧𑀡𑁆𑀟𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀫𑁆𑀫𑀢𑁄𑀢𑀺 𑀪𑀸𑀢𑀭𑁄 𑀦𑀸𑀫 𑀅𑀗𑁆𑀕𑀲𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀢𑁂 𑀅𑀳𑀁 𑀤𑀓𑁆𑀔𑀺𑀡𑀸 𑀩𑀸𑀳𑀽𑀢𑀺 𑀲𑀫𑁆𑀫𑀢𑁄. 𑀢𑁂𑀦 𑀫𑁂 𑀔𑀫𑀺𑀢𑀼𑀁 𑀅𑀭𑀳𑀣𑀸𑀢𑀺 𑀤𑀻𑀧𑁂𑀢𑀺.
𑀯𑀻𑀭𑀸𑀢𑀺 𑀯𑀻𑀭𑀺𑀬𑀯𑀦𑁆𑀢 𑀫𑀳𑀸𑀧𑀭𑀓𑁆𑀓𑀫. 𑀧𑀼𑀜𑁆𑀜𑀫𑀺𑀤𑀁 𑀞𑀸𑀦𑀦𑁆𑀢𑀺 𑀇𑀤𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀦𑀸𑀫 𑀧𑀼𑀜𑁆𑀜𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀓𑀸𑀭𑀡𑀁, 𑀢𑀁 𑀓𑀭𑁄𑀦𑁆𑀢𑀁 𑀫𑀁 𑀫𑀸 𑀯𑀸𑀭𑀬𑀸𑀢𑀺 𑀯𑀤𑀢𑀺. 𑀲𑀩𑁆𑀪𑀺 𑀳𑁂𑀢𑀦𑁆𑀢𑀺 𑀏𑀢𑀜𑁆𑀳𑀺 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀦𑀸𑀫 𑀧𑀡𑁆𑀟𑀺𑀢𑁂𑀳𑀺 𑀉𑀧𑀜𑁆𑀜𑀸𑀢𑀁 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑀜𑁆𑀘𑁂𑀯 𑀯𑀡𑁆𑀡𑀺𑀢𑀜𑁆𑀘. 𑀫𑀫𑁂𑀢𑀁 𑀉𑀧𑀦𑀺𑀲𑁆𑀲𑀚𑀸𑀢𑀺 𑀇𑀤𑀁 𑀢𑁆𑀯𑀁 𑀫𑀬𑁆𑀳𑀁 𑀦𑀺𑀲𑁆𑀲𑀚 𑀯𑀺𑀲𑁆𑀲𑀚𑁆𑀚𑁂𑀳𑀺 𑀤𑁂𑀳𑀺. 𑀉𑀝𑁆𑀞𑀸𑀦𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀉𑀝𑁆𑀞𑀸𑀦𑁂𑀦 𑀘 𑀧𑀸𑀭𑀺𑀘𑀭𑀺𑀬𑀸𑀬 𑀘. 𑀓𑀢𑀦𑁆𑀢𑀺 𑀤𑀻𑀖𑀭𑀢𑁆𑀢𑀁 𑀢𑀬𑀸 𑀓𑀼𑀲𑀮𑀁 𑀓𑀢𑀁. 𑀧𑀼𑀜𑁆𑀜𑀸𑀦𑀻𑀢𑀺 𑀇𑀤𑀸𑀦𑀺 𑀅𑀳𑀁 𑀫𑀸𑀢𑀸𑀧𑀺𑀢𑀽𑀲𑀼 𑀧𑀼𑀜𑁆𑀜𑀸𑀦𑀺 𑀓𑀢𑁆𑀢𑀼𑀓𑀸𑀫𑁄. 𑀫𑀫 𑀮𑁄𑀓𑀤𑀤𑁄𑀢𑀺 𑀢𑀲𑁆𑀲 𑀫𑀫 𑀢𑁆𑀯𑀁 𑀲𑀕𑁆𑀕𑀮𑁄𑀓𑀤𑀤𑁄 𑀳𑁄𑀢𑀺, 𑀅𑀳𑀜𑁆𑀳𑀺 𑀢𑁂𑀲𑀁 𑀯𑀢𑁆𑀢𑀁 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀅𑀧𑀭𑀺𑀫𑀸𑀡𑀁 𑀬𑀲𑀁 𑀮𑀪𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀫𑁂 𑀢𑁆𑀯𑀁 𑀤𑀸𑀬𑀓𑁄 𑀳𑁄𑀳𑀻𑀢𑀺 𑀯𑀤𑀢𑀺.
𑀢𑀣𑁂𑀯𑀸𑀢𑀺 ¶ 𑀬𑀣𑀸 𑀢𑁆𑀯𑀁 𑀚𑀸𑀦𑀸𑀲𑀺, 𑀢𑀣𑁂𑀯 𑀅𑀜𑁆𑀜𑁂𑀧𑀺 𑀫𑀦𑀼𑀚𑀸 𑀇𑀫𑀺𑀲𑁆𑀲𑀁 𑀧𑀭𑀺𑀲𑀸𑀬𑀁 𑀲𑀦𑁆𑀢𑀺, 𑀢𑁂 𑀦𑀸𑀦𑀧𑁆𑀧𑀓𑀸𑀭𑁂 𑀥𑀫𑁆𑀫𑁂 𑀇𑀤𑀁 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀪𑀸𑀯𑀲𑀗𑁆𑀔𑀸𑀢𑀁 𑀥𑀫𑁆𑀫𑀓𑁄𑀝𑁆𑀞𑀸𑀲𑀁 𑀯𑀤𑀦𑁆𑀢𑀺. 𑀓𑀺𑀦𑁆𑀢𑀺? 𑀫𑀕𑁆𑀕𑁄 𑀲𑀕𑁆𑀕𑀲𑁆𑀲 𑀮𑁄𑀓𑀲𑁆𑀲𑀸𑀢𑀺. 𑀲𑀼𑀔𑀸𑀯𑀳𑀦𑁆𑀢𑀺 𑀉𑀝𑁆𑀞𑀸𑀦𑁂𑀦 𑀘 𑀧𑀸𑀭𑀺𑀘𑀭𑀺𑀬𑀸𑀬 𑀘 𑀫𑀸𑀢𑀸𑀧𑀺𑀢𑀽𑀦𑀁 𑀲𑀼𑀔𑀸𑀯𑀳𑀁. 𑀢𑀁 𑀫𑀦𑁆𑀢𑀺 𑀢𑀁 𑀫𑀁 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀫𑁆𑀧𑀺 𑀪𑀸𑀢𑀸 𑀲𑁄𑀡𑀧𑀡𑁆𑀟𑀺𑀢𑁄 𑀢𑀫𑁆𑀳𑀸 𑀧𑀼𑀜𑁆𑀜𑀸 𑀅𑀪𑀺𑀯𑀸𑀭𑁂𑀢𑀺. 𑀅𑀭𑀺𑀬𑀫𑀕𑁆𑀕𑀸𑀯𑀭𑁄𑀢𑀺 𑀲𑁄 𑀏𑀯𑀁 𑀯𑀸𑀭𑁂𑀦𑁆𑀢𑁄 𑀅𑀬𑀁 𑀦𑀭𑁄 𑀫𑀫 𑀧𑀺𑀬𑀤𑀲𑁆𑀲𑀦𑀢𑀸𑀬 𑀅𑀭𑀺𑀬𑀲𑀗𑁆𑀔𑀸𑀢𑀲𑁆𑀲 𑀯𑁂𑀤𑀮𑁄𑀓𑀲𑁆𑀲 𑀫𑀕𑁆𑀕𑀸𑀯𑀭𑀡𑁄 𑀦𑀸𑀫 𑀳𑁄𑀢𑀻𑀢𑀺.
𑀏𑀯𑀁 ¶ 𑀦𑀦𑁆𑀤𑀧𑀡𑁆𑀟𑀺𑀢𑁂𑀦 𑀯𑀼𑀢𑁆𑀢𑁂 𑀫𑀳𑀸𑀲𑀢𑁆𑀢𑁄 ‘‘𑀇𑀫𑀲𑁆𑀲 𑀢𑀸𑀯 𑀢𑀼𑀫𑁆𑀳𑁂𑀳𑀺 𑀯𑀘𑀦𑀁 𑀲𑀼𑀢𑀁, 𑀇𑀤𑀸𑀦𑀺 𑀫𑀫𑀧𑀺 𑀲𑀼𑀡𑀸𑀣𑀸’’𑀢𑀺 𑀲𑀸𑀯𑁂𑀦𑁆𑀢𑁄 𑀆𑀳 𑁋
‘‘𑀲𑀼𑀡𑀦𑁆𑀢𑀼 ¶ 𑀪𑁄𑀦𑁆𑀢𑁄 𑀯𑀘𑀦𑀁, 𑀪𑀸𑀢𑀼𑀭𑀚𑁆𑀛𑀸𑀯𑀭𑀸 𑀫𑀫;
𑀓𑀼𑀮𑀯𑀁𑀲𑀁 𑀫𑀳𑀸𑀭𑀸𑀚, 𑀧𑁄𑀭𑀸𑀡𑀁 𑀧𑀭𑀺𑀳𑀸𑀧𑀬𑀁;
𑀅𑀥𑀫𑁆𑀫𑀘𑀸𑀭𑀻 𑀚𑁂𑀝𑁆𑀞𑁂𑀲𑀼, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.
‘‘𑀬𑁂 𑀘 𑀥𑀫𑁆𑀫𑀲𑁆𑀲 𑀓𑀼𑀲𑀮𑀸, 𑀧𑁄𑀭𑀸𑀡𑀲𑁆𑀲 𑀤𑀺𑀲𑀫𑁆𑀧𑀢𑀺;
𑀘𑀸𑀭𑀺𑀢𑁆𑀢𑁂𑀦 𑀘 𑀲𑀫𑁆𑀧𑀦𑁆𑀦𑀸, 𑀦 𑀢𑁂 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.
‘‘𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸 𑀘, 𑀪𑀕𑀺𑀦𑀻 𑀜𑀸𑀢𑀺 𑀩𑀦𑁆𑀥𑀯𑀸;
𑀲𑀩𑁆𑀩𑁂 𑀚𑁂𑀝𑁆𑀞𑀲𑁆𑀲 𑀢𑁂 𑀪𑀸𑀭𑀸, 𑀏𑀯𑀁 𑀚𑀸𑀦𑀸𑀳𑀺 𑀪𑀸𑀭𑀥.
‘‘𑀆𑀤𑀺𑀬𑀺𑀢𑁆𑀯𑀸 𑀕𑀭𑀼𑀁 𑀪𑀸𑀭𑀁, 𑀦𑀸𑀯𑀺𑀓𑁄 𑀯𑀺𑀬 𑀉𑀲𑁆𑀲𑀳𑁂;
𑀥𑀫𑁆𑀫𑀜𑁆𑀘 𑀦𑀧𑁆𑀧𑀫𑀚𑁆𑀚𑀸𑀫𑀺, 𑀚𑁂𑀝𑁆𑀞𑁄 𑀘𑀲𑁆𑀫𑀺 𑀭𑀣𑁂𑀲𑀪𑀸’’𑀢𑀺.
𑀢𑀢𑁆𑀣 𑀪𑀸𑀢𑀼𑀭𑀚𑁆𑀛𑀸𑀯𑀭𑀸𑀢𑀺 𑀫𑀫 𑀪𑀸𑀢𑀼 𑀧𑀭𑀺𑀲𑀸 𑀳𑀼𑀢𑁆𑀯𑀸 𑀆𑀕𑀢𑀸 𑀪𑁄𑀦𑁆𑀢𑁄 𑀲𑀩𑁆𑀩𑁂𑀧𑀺 𑀭𑀸𑀚𑀸𑀦𑁄 𑀫𑀫𑀧𑀺 𑀢𑀸𑀯 𑀯𑀘𑀦𑀁 𑀲𑀼𑀡𑀦𑁆𑀢𑀼. 𑀧𑀭𑀺𑀳𑀸𑀧𑀬𑀦𑁆𑀢𑀺 𑀧𑀭𑀺𑀳𑀸𑀧𑁂𑀦𑁆𑀢𑁄. 𑀥𑀫𑁆𑀫𑀲𑁆𑀲𑀸𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑀲𑁆𑀲 𑀧𑀯𑁂𑀡𑀻𑀥𑀫𑁆𑀫𑀲𑁆𑀲. 𑀓𑀼𑀲𑀮𑀸𑀢𑀺 𑀙𑁂𑀓𑀸. 𑀘𑀸𑀭𑀺𑀢𑁆𑀢𑁂𑀦 𑀘𑀸𑀢𑀺 𑀆𑀘𑀸𑀭𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸. 𑀪𑀸𑀭𑀸𑀢𑀺 𑀲𑀩𑁆𑀩𑁂 𑀏𑀢𑁂 𑀚𑁂𑀝𑁆𑀞𑁂𑀦 𑀯𑀳𑀺𑀢𑀩𑁆𑀩𑀸 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀢𑀺 𑀢𑀲𑁆𑀲 𑀪𑀸𑀭𑀸 𑀦𑀸𑀫. 𑀦𑀸𑀯𑀺𑀓𑁄 𑀯𑀺𑀬𑀸𑀢𑀺 𑀬𑀣𑀸 𑀦𑀸𑀯𑀸𑀬 𑀕𑀭𑀼𑀁 𑀪𑀸𑀭𑀁 𑀆𑀤𑀺𑀬𑀺𑀢𑁆𑀯𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑀸𑀯𑀁 𑀲𑁄𑀢𑁆𑀣𑀺𑀦𑀸 𑀦𑁂𑀢𑀼𑀁 𑀦𑀸𑀯𑀺𑀓𑁄 𑀉𑀲𑁆𑀲𑀳𑁂𑀢𑀺 𑀯𑀸𑀬𑀫𑀢𑀺, 𑀲𑀳 𑀦𑀸𑀯𑀸𑀬 𑀲𑀩𑁆𑀩𑀪𑀡𑁆𑀟𑀜𑁆𑀘 𑀚𑀦𑁄 𑀘 𑀢𑀲𑁆𑀲𑁂𑀯 𑀪𑀸𑀭𑁄 𑀳𑁄𑀢𑀺, 𑀢𑀣𑀸 𑀫𑀫𑁂𑀯 𑀲𑀩𑁆𑀩𑁂 𑀜𑀸𑀢𑀓𑀸 𑀪𑀸𑀭𑁄𑀢𑀺 ¶ , 𑀅𑀳𑀜𑁆𑀘 𑀢𑁂 𑀉𑀲𑁆𑀲𑀳𑀸𑀫𑀺 𑀧𑀝𑀺𑀚𑀕𑁆𑀕𑀺𑀢𑀼𑀁 𑀲𑀓𑁆𑀓𑁄𑀫𑀺, 𑀢𑀜𑁆𑀘 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀸𑀫𑀺, 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀲𑀜𑁆𑀜𑁂𑀯, 𑀲𑀓𑀮𑀲𑁆𑀲𑀧𑀺 𑀮𑁄𑀓𑀲𑁆𑀲 𑀚𑁂𑀝𑁆𑀞𑁄 𑀘 𑀅𑀲𑁆𑀫𑀺, 𑀢𑀲𑁆𑀫𑀸 𑀅𑀳𑀫𑁂𑀯 𑀲𑀤𑁆𑀥𑀺𑀁 𑀦𑀦𑁆𑀤𑁂𑀦 𑀧𑀝𑀺𑀚𑀕𑁆𑀕𑀺𑀢𑀼𑀁 𑀬𑀼𑀢𑁆𑀢𑁄𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀸𑀦𑁄 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 ‘‘𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀓𑀺𑀭 𑀅𑀯𑀲𑁂𑀲𑀸 𑀪𑀸𑀭𑀸𑀢𑀺 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀜𑀸𑀢’’𑀦𑁆𑀢𑀺 𑀦𑀦𑁆𑀤𑀧𑀡𑁆𑀟𑀺𑀢𑀁 𑀧𑀳𑀸𑀬 𑀫𑀳𑀸𑀲𑀢𑁆𑀢𑀁 𑀲𑀦𑁆𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀣𑀼𑀢𑀺𑀁 𑀓𑀭𑁄𑀦𑁆𑀢𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼 𑁋
‘‘𑀅𑀥𑀺𑀕𑀫𑀸 𑀢𑀫𑁂 𑀜𑀸𑀡𑀁, 𑀚𑀸𑀮𑀁𑀯 𑀚𑀸𑀢𑀯𑁂𑀤𑀢𑁄;
𑀏𑀯𑀫𑁂𑀯 𑀦𑁄 𑀪𑀯𑀁 𑀥𑀫𑁆𑀫𑀁, 𑀓𑁄𑀲𑀺𑀬𑁄 𑀧𑀯𑀺𑀤𑀁𑀲𑀬𑀺.
‘‘𑀬𑀣𑀸 ¶ 𑀉𑀤𑀬𑀫𑀸𑀤𑀺𑀘𑁆𑀘𑁄, 𑀯𑀸𑀲𑀼𑀤𑁂𑀯𑁄 𑀧𑀪𑀗𑁆𑀓𑀭𑁄;
𑀧𑀸𑀡𑀻𑀦𑀁 𑀧𑀯𑀺𑀤𑀁𑀲𑁂𑀢𑀺, 𑀭𑀽𑀧𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;
𑀏𑀯𑀫𑁂𑀯 𑀦𑁄 𑀪𑀯𑀁 𑀥𑀫𑁆𑀫𑀁, 𑀓𑁄𑀲𑀺𑀬𑁄 𑀧𑀯𑀺𑀤𑀁𑀲𑀬𑀻’’𑀢𑀺.
𑀢𑀢𑁆𑀣 ¶ 𑀅𑀥𑀺𑀕𑀫𑀸𑀢𑀺 𑀫𑀬𑀁 𑀇𑀢𑁄 𑀧𑀼𑀩𑁆𑀩𑁂 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑀧𑀝𑀺𑀘𑁆𑀙𑀸𑀤𑀓𑁂 𑀢𑀫𑁂 𑀯𑀢𑁆𑀢𑀫𑀸𑀦𑀸 𑀦 𑀚𑀸𑀦𑀸𑀫, 𑀅𑀚𑁆𑀚 𑀚𑀸𑀢𑀯𑁂𑀤𑀢𑁄 𑀚𑀸𑀮𑀁𑀯 𑀜𑀸𑀡𑀁 𑀅𑀥𑀺𑀕𑀢𑀸. 𑀏𑀯𑀫𑁂𑀯 𑀦𑁄𑀢𑀺 𑀬𑀣𑀸 𑀫𑀳𑀦𑁆𑀥𑀓𑀸𑀭𑁂 𑀧𑀩𑁆𑀩𑀢𑀫𑀢𑁆𑀣𑀓𑁂 𑀚𑀮𑀺𑀢𑁄 𑀚𑀸𑀢𑀯𑁂𑀤𑁄 𑀲𑀫𑀦𑁆𑀢𑀸 𑀆𑀮𑁄𑀓𑀁 𑀨𑀭𑀦𑁆𑀢𑁄 𑀭𑀽𑀧𑀸𑀦𑀺 𑀤𑀲𑁆𑀲𑁂𑀢𑀺, 𑀢𑀣𑀸 𑀦𑁄 𑀪𑀯𑀁 𑀓𑁄𑀲𑀺𑀬𑀕𑁄𑀢𑁆𑀢𑁄 𑀥𑀫𑁆𑀫𑀁 𑀧𑀯𑀺𑀤𑀁𑀲𑀬𑀻𑀢𑀺 𑀅𑀢𑁆𑀣𑁄. 𑀯𑀸𑀲𑀼𑀤𑁂𑀯𑁄𑀢𑀺 𑀯𑀲𑀼𑀤𑁂𑀯𑁄 𑀯𑀲𑀼𑀚𑁄𑀢𑀦𑁄, 𑀥𑀦𑀧𑀓𑀸𑀲𑀦𑁄𑀢𑀺 𑀅𑀢𑁆𑀣𑁄.
𑀇𑀢𑀺 𑀫𑀳𑀸𑀲𑀢𑁆𑀢𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀦𑁆𑀤𑀧𑀡𑁆𑀟𑀺𑀢𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀧𑀲𑀦𑁆𑀦𑀘𑀺𑀢𑁆𑀢𑁂 𑀢𑁂 𑀭𑀸𑀚𑀸𑀦𑁄 𑀜𑀸𑀡𑀩𑀮𑁂𑀦 𑀢𑀲𑁆𑀫𑀺𑀁 𑀧𑀲𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀯 𑀅𑀢𑁆𑀢𑀦𑁄 𑀫𑀼𑀔𑀁 𑀉𑀮𑁆𑀮𑁄𑀓𑀺𑀢𑁂 𑀅𑀓𑀸𑀲𑀺. 𑀅𑀣 𑀦𑀦𑁆𑀤𑀧𑀡𑁆𑀟𑀺𑀢𑁄 ‘‘𑀪𑀸𑀢𑀸 𑀫𑁂 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀲𑀩𑁆𑀩𑁂𑀧𑀺𑀫𑁂 𑀭𑀸𑀚𑀸𑀦𑁄 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀓𑀭𑀺, 𑀞𑀧𑁂𑀢𑁆𑀯𑀸 𑀇𑀫𑀁 𑀅𑀜𑁆𑀜𑁄 𑀫𑀬𑁆𑀳𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀇𑀫𑀫𑁂𑀯 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀏𑀯𑀁 𑀫𑁂 𑀬𑀸𑀘𑀫𑀸𑀦𑀲𑁆𑀲, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀣;
𑀢𑀯 𑀩𑀤𑁆𑀥𑀘𑀭𑁄 𑀳𑁂𑀲𑁆𑀲𑀁, 𑀯𑀼𑀝𑁆𑀞𑀺𑀢𑁄 𑀧𑀭𑀺𑀘𑀸𑀭𑀓𑁄’’𑀢𑀺.
𑀢𑀲𑁆𑀲𑀢𑁆𑀣𑀸 ¶ 𑁋 𑀲𑀘𑁂 𑀢𑀼𑀫𑁆𑀳𑁂 𑀫𑀫 𑀏𑀯𑀁 𑀬𑀸𑀘𑀫𑀸𑀦𑀲𑁆𑀲 𑀔𑀫𑀸𑀧𑀦𑀢𑁆𑀣𑀸𑀬 𑀧𑀕𑁆𑀕𑀳𑀺𑀢𑀁 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀣 𑀦 𑀧𑀝𑀺𑀕𑁆𑀕𑀡𑁆𑀳𑀣, 𑀢𑀼𑀫𑁆𑀳𑁂𑀯 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀣, 𑀅𑀳𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀩𑀤𑁆𑀥𑀘𑀭𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀳𑁂𑀲𑁆𑀲𑀁, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀦𑀮𑀲𑀪𑀸𑀯𑁂𑀦 𑀯𑀼𑀝𑁆𑀞𑀺𑀢𑁄 𑀧𑀭𑀺𑀘𑀸𑀭𑀓𑁄 𑀅𑀳𑀁 𑀢𑀼𑀫𑁆𑀳𑁂 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻𑀢𑀺.
𑀫𑀳𑀸𑀲𑀢𑁆𑀢𑀲𑁆𑀲 𑀧𑀓𑀢𑀺𑀬𑀸𑀧𑀺 𑀦𑀦𑁆𑀤𑀧𑀡𑁆𑀟𑀺𑀢𑁂 𑀤𑁄𑀲𑁄 𑀯𑀸 𑀯𑁂𑀭𑀁 𑀯𑀸 𑀦𑀢𑁆𑀣𑀺, 𑀅𑀢𑀺𑀣𑀤𑁆𑀥𑀁 𑀯𑀘𑀦𑀁 𑀓𑀣𑁂𑀦𑁆𑀢𑀲𑁆𑀲 𑀧𑀦𑀲𑁆𑀲 𑀫𑀸𑀦𑀳𑀸𑀧𑀦𑀢𑁆𑀣𑀁 𑀦𑀺𑀕𑁆𑀕𑀳𑀯𑀲𑁂𑀦 𑀢𑀣𑀸 𑀓𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀲𑁆𑀫𑀺𑀁 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀢𑁂 𑀔𑀫𑀸𑀫𑀺, 𑀫𑀸𑀢𑀸𑀧𑀺𑀢𑀭𑁄 𑀘 𑀧𑀝𑀺𑀚𑀕𑁆𑀕𑀺𑀢𑀼𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀢𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀅𑀤𑁆𑀥𑀸 ¶ 𑀦𑀦𑁆𑀤 𑀯𑀺𑀚𑀸𑀦𑀸𑀲𑀺, 𑀲𑀤𑁆𑀥𑀫𑁆𑀫𑀁 𑀲𑀩𑁆𑀪𑀺 𑀤𑁂𑀲𑀺𑀢𑀁;
𑀅𑀭𑀺𑀬𑁄 𑀅𑀭𑀺𑀬𑀲𑀫𑀸𑀘𑀸𑀭𑁄, 𑀩𑀸𑀴𑁆𑀳𑀁 𑀢𑁆𑀯𑀁 𑀫𑀫 𑀭𑀼𑀘𑁆𑀘𑀲𑀺.
‘‘𑀪𑀯𑀦𑁆𑀢𑀁 𑀯𑀤𑀸𑀫𑀺 𑀪𑁄𑀢𑀺𑀜𑁆𑀘, 𑀲𑀼𑀡𑀸𑀣 𑀯𑀘𑀦𑀁 𑀫𑀫;
𑀦𑀸𑀬𑀁 𑀪𑀸𑀭𑁄 𑀪𑀸𑀭𑀫𑀢𑁄, 𑀅𑀳𑀼 𑀫𑀬𑁆𑀳𑀁 𑀓𑀼𑀤𑀸𑀘𑀦𑀁.
‘‘𑀢𑀁 𑀫𑀁 𑀉𑀧𑀝𑁆𑀞𑀺𑀢𑀁 𑀲𑀦𑁆𑀢𑀁, 𑀫𑀸𑀢𑀸𑀧𑀺𑀢𑀼 𑀲𑀼𑀔𑀸𑀯𑀳𑀁;
𑀦𑀦𑁆𑀤𑁄 𑀅𑀚𑁆𑀛𑀸𑀯𑀭𑀁 𑀓𑀢𑁆𑀯𑀸, 𑀉𑀧𑀝𑁆𑀞𑀸𑀦𑀸𑀬 𑀬𑀸𑀘𑀢𑀺.
‘‘𑀬𑁄 ¶ 𑀯𑁂 𑀇𑀘𑁆𑀙𑀢𑀺 𑀓𑀸𑀫𑁂𑀦, 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;
𑀦𑀦𑁆𑀤𑀁 𑀯𑁄 𑀯𑀭𑀣 𑀏𑀓𑁄, 𑀓𑀁 𑀦𑀦𑁆𑀤𑁄 𑀉𑀧𑀢𑀺𑀝𑁆𑀞𑀢𑀽’’𑀢𑀺.
𑀢𑀢𑁆𑀣 𑀅𑀭𑀺𑀬𑁄𑀢𑀺 𑀲𑀼𑀦𑁆𑀤𑀭𑁄. 𑀅𑀭𑀺𑀬𑀲𑀫𑀸𑀘𑀸𑀭𑁄𑀢𑀺 𑀲𑀼𑀦𑁆𑀤𑀭𑀲𑀫𑀸𑀘𑀸𑀭𑁄𑀧𑀺 𑀚𑀸𑀢𑁄. 𑀩𑀸𑀴𑁆𑀳𑀦𑁆𑀢𑀺 𑀇𑀤𑀸𑀦𑀺 𑀢𑁆𑀯𑀁 𑀫𑀫 𑀅𑀢𑀺𑀯𑀺𑀬 𑀭𑀼𑀘𑁆𑀘𑀲𑀺. 𑀲𑀼𑀡𑀸𑀣𑀸𑀢𑀺 𑀅𑀫𑁆𑀫 𑀢𑀸𑀢𑀸 𑀢𑀼𑀫𑁆𑀳𑁂 𑀫𑀫 𑀯𑀘𑀦𑀁 𑀲𑀼𑀡𑀸𑀣. 𑀦𑀸𑀬𑀁 𑀪𑀸𑀭𑁄𑀢𑀺 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀧𑀝𑀺𑀚𑀕𑁆𑀕𑀦𑀪𑀸𑀭𑁄 𑀦 𑀓𑀤𑀸𑀘𑀺 𑀫𑀫 𑀪𑀸𑀭𑀫𑀢𑁄 𑀅𑀳𑀼. 𑀢𑀁 𑀫𑀦𑁆𑀢𑀺 𑀢𑀁 𑀪𑀸𑀭𑁄𑀢𑀺 𑀅𑀫𑀜𑁆𑀜𑀺𑀢𑁆𑀯𑀸𑀯 𑀫𑀁 𑀢𑀼𑀫𑁆𑀳𑁂 𑀉𑀧𑀝𑁆𑀞𑀺𑀢𑀁 𑀲𑀫𑀸𑀦𑀁. 𑀉𑀧𑀝𑁆𑀞𑀸𑀦𑀸𑀬 𑀬𑀸𑀘𑀢𑀻𑀢𑀺 𑀢𑀼𑀫𑁆𑀳𑁂 𑀉𑀧𑀝𑁆𑀞𑀸𑀢𑀼𑀁 𑀫𑀁 𑀬𑀸𑀘𑀢𑀺. 𑀬𑁄 𑀯𑁂 𑀇𑀘𑁆𑀙𑀢𑀻𑀢𑀺 𑀫𑀬𑁆𑀳𑀜𑁆𑀳𑀺 𑀢𑁆𑀯𑀁 𑀫𑁂 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀉𑀧𑀝𑁆𑀞𑀳𑀸𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀢𑁆𑀢𑀁, 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀬𑁄 𑀏𑀓𑁄 𑀇𑀘𑁆𑀙𑀢𑀺, 𑀢𑀁 𑀯𑀤𑀸𑀫𑀺 𑀓𑀸𑀫𑁂𑀦 𑀦𑀦𑁆𑀤𑀁 𑀯𑁄 𑀯𑀭𑀣, 𑀢𑀁 𑀫𑀫 𑀓𑀦𑀺𑀝𑁆𑀞𑀁 𑀦𑀦𑁆𑀤𑀁 𑀭𑁄𑀘𑁂𑀣, 𑀢𑀼𑀫𑁆𑀳𑁂𑀲𑀼 𑀓𑀁 𑀏𑀲 𑀉𑀧𑀝𑁆𑀞𑀸𑀢𑀼, 𑀉𑀪𑁄𑀧𑀺 𑀳𑀺 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑀸𑀬𑁂𑀯𑀸𑀢𑀺.
𑀅𑀣𑀲𑁆𑀲 ¶ 𑀫𑀸𑀢𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬, ‘‘𑀢𑀸𑀢 𑀲𑁄𑀡𑀧𑀡𑁆𑀟𑀺𑀢, 𑀘𑀺𑀭𑀧𑁆𑀧𑀯𑀼𑀢𑁆𑀣𑁄 𑀢𑁂 𑀓𑀦𑀺𑀝𑁆𑀞𑁄, 𑀏𑀯𑀁 𑀘𑀺𑀭𑀸𑀕𑀢𑀫𑁆𑀧𑀺 𑀢𑀁 𑀬𑀸𑀘𑀺𑀢𑀼𑀁 𑀦 𑀯𑀺𑀲𑀳𑀸𑀫𑀺, 𑀫𑀬𑀜𑁆𑀳𑀺 𑀢𑀁 𑀦𑀺𑀲𑁆𑀲𑀺𑀢𑀸, 𑀇𑀤𑀸𑀦𑀺 𑀧𑀦 𑀢𑀬𑀸 𑀅𑀦𑀼𑀜𑁆𑀜𑀸𑀢𑀸 𑀅𑀳𑀁 𑀏𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁 𑀩𑀸𑀳𑀸𑀳𑀺 𑀉𑀧𑀕𑀽𑀳𑀺𑀢𑁆𑀯𑀸 𑀲𑀻𑀲𑁂 𑀉𑀧𑀲𑀺𑀗𑁆𑀖𑀸𑀬𑀺𑀢𑀼𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑀕𑀸𑀣𑀫𑀸𑀳 𑁋
‘‘𑀢𑀬𑀸 𑀢𑀸𑀢 𑀅𑀦𑀼𑀜𑁆𑀜𑀸𑀢𑀸, 𑀲𑁄𑀡 𑀢𑀁 𑀦𑀺𑀲𑁆𑀲𑀺𑀢𑀸 𑀫𑀬𑀁;
𑀉𑀧𑀖𑀸𑀢𑀼𑀁 𑀮𑀪𑁂 𑀦𑀦𑁆𑀤𑀁, 𑀫𑀼𑀤𑁆𑀥𑀦𑀺 𑀩𑁆𑀭𑀳𑁆𑀫𑀘𑀸𑀭𑀺𑀦’’𑀦𑁆𑀢𑀺.
𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀢𑁂𑀦 𑀳𑀺, 𑀅𑀫𑁆𑀫, 𑀅𑀦𑀼𑀚𑀸𑀦𑀸𑀫𑀺, 𑀢𑁆𑀯𑀁 𑀕𑀘𑁆𑀙, 𑀧𑀼𑀢𑁆𑀢𑀁 𑀦𑀦𑁆𑀤𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀻𑀲𑁂 𑀖𑀸𑀬𑀺𑀢𑁆𑀯𑀸 𑀘𑀼𑀫𑁆𑀩𑀺𑀢𑁆𑀯𑀸 𑀢𑀯 𑀳𑀤𑀬𑁂 𑀲𑁄𑀓𑀁 𑀦𑀺𑀩𑁆𑀩𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀦𑁆𑀤𑀧𑀡𑁆𑀟𑀺𑀢𑀁 ¶ 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀻𑀲𑀁 𑀖𑀸𑀬𑀺𑀢𑁆𑀯𑀸 𑀘𑀼𑀫𑁆𑀩𑀺𑀢𑁆𑀯𑀸 𑀳𑀤𑀬𑁂 𑀲𑁄𑀓𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀆𑀳 𑁋
‘‘𑀅𑀲𑁆𑀲𑀢𑁆𑀣𑀲𑁆𑀲𑁂𑀯 𑀢𑀭𑀼𑀡𑀁, 𑀧𑀯𑀸𑀴𑀁 𑀫𑀸𑀮𑀼𑀢𑁂𑀭𑀺𑀢𑀁;
𑀘𑀺𑀭𑀲𑁆𑀲𑀁 𑀦𑀦𑁆𑀤𑀁 𑀤𑀺𑀲𑁆𑀯𑀸𑀦, 𑀳𑀤𑀬𑀁 𑀫𑁂 𑀧𑀯𑁂𑀥𑀢𑀺.
‘‘𑀬𑀤𑀸 𑀲𑀼𑀢𑁆𑀢𑀸𑀧𑀺 𑀲𑀼𑀧𑀺𑀦𑁂, 𑀦𑀦𑁆𑀤𑀁 𑀧𑀲𑁆𑀲𑀸𑀫𑀺 𑀆𑀕𑀢𑀁;
𑀉𑀤𑀕𑁆𑀕𑀸 𑀲𑀼𑀫𑀦𑀸 𑀳𑁄𑀫𑀺, 𑀦𑀦𑁆𑀤𑁄 𑀦𑁄 𑀆𑀕𑀢𑁄 𑀅𑀬𑀁.
‘‘𑀬𑀤𑀸 𑀘 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸, 𑀦𑀦𑁆𑀤𑀁 𑀧𑀲𑁆𑀲𑀸𑀫𑀺 𑀦𑀸𑀕𑀢𑀁;
𑀪𑀺𑀬𑁆𑀬𑁄 𑀆𑀯𑀺𑀲𑀢𑀻 𑀲𑁄𑀓𑁄, 𑀤𑁄𑀫𑀦𑀲𑁆𑀲𑀜𑁆𑀘𑀦𑀧𑁆𑀧𑀓𑀁.
‘‘𑀲𑀸𑀳𑀁 ¶ 𑀅𑀚𑁆𑀚 𑀘𑀺𑀭𑀲𑁆𑀲𑀫𑁆𑀧𑀺, 𑀦𑀦𑁆𑀤𑀁 𑀧𑀲𑁆𑀲𑀸𑀫𑀺 𑀆𑀕𑀢𑀁;
𑀪𑀢𑁆𑀢𑀼𑀘𑁆𑀘 𑀫𑀬𑁆𑀳𑀜𑁆𑀘 𑀧𑀺𑀬𑁄, 𑀦𑀦𑁆𑀤𑁄 𑀦𑁄 𑀧𑀸𑀯𑀺𑀲𑀻 𑀖𑀭𑀁.
‘‘𑀧𑀺𑀢𑀼𑀧𑀺 𑀦𑀦𑁆𑀤𑁄 𑀲𑀼𑀧𑁆𑀧𑀺𑀬𑁄, 𑀬𑀁 𑀦𑀦𑁆𑀤𑁄 𑀦𑀧𑁆𑀧𑀯𑀲𑁂 𑀖𑀭𑀸;
𑀮𑀪𑀢𑀽 𑀢𑀸𑀢 𑀦𑀦𑁆𑀤𑁄 𑀢𑀁, 𑀫𑀁 𑀦𑀦𑁆𑀤𑁄 𑀉𑀧𑀢𑀺𑀝𑁆𑀞𑀢𑀽’’𑀢𑀺.
𑀢𑀢𑁆𑀣 𑀫𑀸𑀮𑀼𑀢𑁂𑀭𑀺𑀢𑀦𑁆𑀢𑀺 𑀬𑀣𑀸 𑀯𑀸𑀢𑀸𑀳𑀢𑀁 𑀅𑀲𑁆𑀲𑀢𑁆𑀣𑀲𑁆𑀲 𑀧𑀮𑁆𑀮𑀯𑀁 𑀓𑀫𑁆𑀧𑀢𑀺, 𑀏𑀯𑀁 𑀘𑀺𑀭𑀲𑁆𑀲𑀁 𑀦𑀦𑁆𑀤𑀁 𑀤𑀺𑀲𑁆𑀯𑀸 𑀅𑀚𑁆𑀚 𑀫𑀫 𑀳𑀤𑀬𑀁 𑀓𑀫𑁆𑀧𑀢𑀻𑀢𑀺 𑀯𑀤𑀢𑀺. 𑀲𑀼𑀢𑁆𑀢𑀸𑀢𑀺, 𑀢𑀸𑀢 𑀲𑁄𑀡, 𑀬𑀤𑀸𑀳𑀁 𑀲𑀼𑀢𑁆𑀢𑀸𑀧𑀺 𑀲𑀼𑀧𑀺𑀦𑁂 𑀦𑀦𑁆𑀤𑀁 𑀆𑀕𑀢𑀁 𑀧𑀲𑁆𑀲𑀸𑀫𑀺, 𑀢𑀤𑀸𑀧𑀺 𑀉𑀤𑀕𑁆𑀕𑀸 𑀳𑁄𑀫𑀺. 𑀪𑀢𑁆𑀢𑀼𑀘𑁆𑀘𑀸𑀢𑀺 𑀲𑀸𑀫𑀺𑀓𑀲𑁆𑀲 𑀘 𑀫𑁂 𑀫𑀬𑁆𑀳𑀜𑁆𑀘 𑀧𑀺𑀬𑁄. 𑀦𑀦𑁆𑀤𑁄 𑀦𑁄 𑀧𑀸𑀯𑀺𑀲𑀻 𑀖𑀭𑀦𑁆𑀢𑀺, 𑀢𑀸𑀢, 𑀧𑀼𑀢𑁆𑀢𑁄 𑀦𑁄 𑀦𑀦𑁆𑀤𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀢𑀼. 𑀬𑀦𑁆𑀢𑀺 𑀬𑀲𑁆𑀫𑀸 𑀧𑀺𑀢𑀼𑀧𑀺 𑀲𑀼𑀝𑁆𑀞𑀼 𑀧𑀺𑀬𑁄, 𑀢𑀲𑁆𑀫𑀸 𑀧𑀼𑀦 𑀇𑀫𑀫𑁆𑀳𑀸 𑀖𑀭𑀸 𑀦 𑀯𑀺𑀧𑁆𑀧𑀯𑀲𑁂𑀬𑁆𑀬. 𑀦𑀦𑁆𑀤𑁄 ¶ 𑀢𑀦𑁆𑀢𑀺, 𑀢𑀸𑀢, 𑀦𑀦𑁆𑀤𑁄 𑀬𑀁 𑀇𑀘𑁆𑀙𑀢𑀺, 𑀢𑀁 𑀮𑀪𑀢𑀼. 𑀫𑀁 𑀦𑀦𑁆𑀤𑁄𑀢𑀺, 𑀢𑀸𑀢 𑀲𑁄𑀡, 𑀢𑀯 𑀧𑀺𑀢𑀭𑀁 𑀢𑁆𑀯𑀁 𑀉𑀧𑀝𑁆𑀞𑀳, 𑀫𑀁 𑀦𑀦𑁆𑀤𑁄 𑀉𑀧𑀝𑁆𑀞𑀸𑀢𑀼.
𑀫𑀳𑀸𑀲𑀢𑁆𑀢𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀫𑀸𑀢𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀦𑀦𑁆𑀤, 𑀢𑀬𑀸 𑀚𑁂𑀝𑁆𑀞𑀓𑀓𑁄𑀝𑁆𑀞𑀸𑀲𑁄 𑀮𑀤𑁆𑀥𑁄, 𑀫𑀸𑀢𑀸 𑀦𑀸𑀫 𑀅𑀢𑀺𑀕𑀼𑀡𑀓𑀸𑀭𑀺𑀓𑀸, 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀧𑀝𑀺𑀚𑀕𑁆𑀕𑁂𑀬𑁆𑀬𑀸𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀫𑀸𑀢𑀼 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀅𑀦𑀼𑀓𑀫𑁆𑀧𑀺𑀓𑀸 ¶ 𑀧𑀢𑀺𑀝𑁆𑀞𑀸 𑀘, 𑀧𑀼𑀩𑁆𑀩𑁂 𑀭𑀲𑀤𑀤𑀻 𑀘 𑀦𑁄;
𑀫𑀕𑁆𑀕𑁄 𑀲𑀕𑁆𑀕𑀲𑁆𑀲 𑀮𑁄𑀓𑀲𑁆𑀲, 𑀫𑀸𑀢𑀸 𑀢𑀁 𑀯𑀭𑀢𑁂 𑀇𑀲𑁂.
‘‘𑀧𑀼𑀩𑁆𑀩𑁂 𑀭𑀲𑀤𑀤𑀻 𑀕𑁄𑀢𑁆𑀢𑀻, 𑀫𑀸𑀢𑀸 𑀧𑀼𑀜𑁆𑀜𑀽𑀧𑀲𑀁𑀳𑀺𑀢𑀸;
𑀫𑀕𑁆𑀕𑁄 𑀲𑀕𑁆𑀕𑀲𑁆𑀲 𑀮𑁄𑀓𑀲𑁆𑀲, 𑀫𑀸𑀢𑀸 𑀢𑀁 𑀯𑀭𑀢𑁂 𑀇𑀲𑁂’’𑀢𑀺.
𑀢𑀢𑁆𑀣 𑀅𑀦𑀼𑀓𑀫𑁆𑀧𑀺𑀓𑀸𑀢𑀺 𑀫𑀼𑀤𑀼𑀳𑀤𑀬𑀸. 𑀧𑀼𑀩𑁆𑀩𑁂 𑀭𑀲𑀤𑀤𑀻𑀢𑀺 𑀧𑀞𑀫𑀫𑁂𑀯 𑀅𑀢𑁆𑀢𑀦𑁄 𑀔𑀻𑀭𑀲𑀗𑁆𑀔𑀸𑀢𑀲𑁆𑀲 𑀭𑀲𑀲𑁆𑀲 𑀤𑀸𑀬𑀺𑀓𑀸. 𑀫𑀸𑀢𑀸 𑀢𑀦𑁆𑀢𑀺 𑀫𑀫 𑀫𑀸𑀢𑀸 𑀫𑀁 𑀦 𑀇𑀘𑁆𑀙𑀢𑀺, 𑀢𑀁 𑀯𑀭𑀢𑀺 𑀇𑀘𑁆𑀙𑀢𑀺. 𑀕𑁄𑀢𑁆𑀢𑀻𑀢𑀺 𑀕𑁄𑀧𑀸𑀬𑀺𑀓𑀸. 𑀧𑀼𑀜𑁆𑀜𑀽𑀧𑀲𑀁𑀳𑀺𑀢𑀸𑀢𑀺 𑀧𑀼𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸 𑀧𑀼𑀜𑁆𑀜𑀤𑀸𑀬𑀺𑀓𑀸.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀫𑀸𑀢𑀼 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀧𑀼𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 ‘‘𑀦𑀦𑁆𑀤, 𑀢𑁆𑀯𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀫𑀸𑀢𑀭𑀁 𑀮𑀪𑀲𑀺, 𑀉𑀪𑁄𑀧𑀺 𑀫𑀬𑀁 𑀫𑀸𑀢𑀭𑀸 𑀤𑀼𑀓𑁆𑀔𑁂𑀦 𑀲𑀁𑀯𑀟𑁆𑀠𑀺𑀢𑀸, 𑀢𑀁 𑀇𑀤𑀸𑀦𑀺 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀧𑀝𑀺𑀚𑀕𑁆𑀕𑀸𑀳𑀺, 𑀅𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀫𑀸 𑀔𑀸𑀤𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀫𑀸𑀢𑀼 𑀤𑀼𑀓𑁆𑀓𑀭𑀓𑀸𑀭𑀺𑀓𑀢𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀆𑀓𑀗𑁆𑀔𑀫𑀸𑀦𑀸 ¶ 𑀧𑀼𑀢𑁆𑀢𑀨𑀮𑀁, 𑀤𑁂𑀯𑀢𑀸𑀬 𑀦𑀫𑀲𑁆𑀲𑀢𑀺;
𑀦𑀓𑁆𑀔𑀢𑁆𑀢𑀸𑀦𑀺 𑀘 𑀧𑀼𑀘𑁆𑀙𑀢𑀺, 𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀺 𑀘.
‘‘𑀢𑀲𑁆𑀲𑀸 𑀉𑀢𑀼𑀫𑁆𑀳𑀺 𑀦𑁆𑀳𑀸𑀢𑀸𑀬, 𑀳𑁄𑀢𑀺 𑀕𑀩𑁆𑀪𑀲𑁆𑀲 𑀯𑁄𑀓𑁆𑀓𑀫𑁄;
𑀢𑁂𑀦 𑀤𑁄𑀳𑀴𑀺𑀦𑀻 𑀳𑁄𑀢𑀺, 𑀲𑀼𑀳𑀤𑀸 𑀢𑁂𑀦 𑀯𑀼𑀘𑁆𑀘𑀢𑀺.
‘‘𑀲𑀁𑀯𑀘𑁆𑀙𑀭𑀁 𑀯𑀸 𑀊𑀦𑀁 𑀯𑀸, 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀢𑀺;
𑀢𑁂𑀦 𑀲𑀸 𑀚𑀦𑀬𑀦𑁆𑀢𑀻𑀢𑀺, 𑀚𑀦𑁂𑀢𑁆𑀢𑀺 𑀢𑁂𑀦 𑀯𑀼𑀘𑁆𑀘𑀢𑀺.
‘‘𑀣𑀦𑀔𑀻𑀭𑁂𑀦 𑀕𑀻𑀢𑁂𑀦, 𑀅𑀗𑁆𑀕𑀧𑀸𑀯𑀼𑀭𑀡𑁂𑀦 𑀘;
𑀭𑁄𑀤𑀦𑁆𑀢𑀁 𑀧𑀼𑀢𑁆𑀢𑀁 𑀢𑁄𑀲𑁂𑀢𑀺, 𑀢𑁄𑀲𑁂𑀦𑁆𑀢𑀻 𑀢𑁂𑀦 𑀯𑀼𑀘𑁆𑀘𑀢𑀺.
‘‘𑀢𑀢𑁄 ¶ 𑀯𑀸𑀢𑀸𑀢𑀧𑁂 𑀖𑁄𑀭𑁂, 𑀫𑀫𑀁 𑀓𑀢𑁆𑀯𑀸 𑀉𑀤𑀺𑀓𑁆𑀔𑀢𑀺;
𑀤𑀸𑀭𑀓𑀁 𑀅𑀧𑁆𑀧𑀚𑀸𑀦𑀦𑁆𑀢𑀁, 𑀧𑁄𑀲𑁂𑀦𑁆𑀢𑀻 𑀢𑁂𑀦 𑀯𑀼𑀘𑁆𑀘𑀢𑀺.
‘‘𑀬𑀜𑁆𑀘 ¶ 𑀫𑀸𑀢𑀼𑀥𑀦𑀁 𑀳𑁄𑀢𑀺, 𑀬𑀜𑁆𑀘 𑀳𑁄𑀢𑀺 𑀧𑀺𑀢𑀼𑀤𑁆𑀥𑀦𑀁;
𑀉𑀪𑀬𑀫𑁆𑀧𑁂𑀢𑀲𑁆𑀲 𑀕𑁄𑀧𑁂𑀢𑀺, 𑀅𑀧𑀺 𑀧𑀼𑀢𑁆𑀢𑀲𑁆𑀲 𑀦𑁄 𑀲𑀺𑀬𑀸.
‘‘𑀏𑀯𑀁 𑀧𑀼𑀢𑁆𑀢 𑀅𑀤𑀼𑀁 𑀧𑀼𑀢𑁆𑀢, 𑀇𑀢𑀺 𑀫𑀸𑀢𑀸 𑀯𑀺𑀳𑀜𑁆𑀜𑀢𑀺;
𑀧𑀫𑀢𑁆𑀢𑀁 𑀧𑀭𑀤𑀸𑀭𑁂𑀲𑀼, 𑀦𑀺𑀲𑀻𑀣𑁂 𑀧𑀢𑁆𑀢𑀬𑁄𑀩𑁆𑀩𑀦𑁂;
𑀲𑀸𑀬𑀁 𑀧𑀼𑀢𑁆𑀢𑀁 𑀅𑀦𑀸𑀬𑀦𑁆𑀢𑀁, 𑀇𑀢𑀺 𑀫𑀸𑀢𑀸 𑀯𑀺𑀳𑀜𑁆𑀜𑀢𑀺.
‘‘𑀏𑀯𑀁 𑀓𑀺𑀘𑁆𑀙𑀸 𑀪𑀢𑁄 𑀧𑁄𑀲𑁄, 𑀫𑀸𑀢𑀼 𑀅𑀧𑀭𑀺𑀘𑀸𑀭𑀓𑁄;
𑀫𑀸𑀢𑀭𑀺 𑀫𑀺𑀘𑁆𑀙𑀸 𑀘𑀭𑀺𑀢𑁆𑀯𑀸𑀦, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.
‘‘𑀏𑀯𑀁 𑀓𑀺𑀘𑁆𑀙𑀸 𑀪𑀢𑁄 𑀧𑁄𑀲𑁄, 𑀧𑀺𑀢𑀼 𑀅𑀧𑀭𑀺𑀘𑀸𑀭𑀓𑁄;
𑀧𑀺𑀢𑀭𑀺 𑀫𑀺𑀘𑁆𑀙𑀸 𑀘𑀭𑀺𑀢𑁆𑀯𑀸𑀦, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.
‘‘𑀥𑀦𑀸𑀧𑀺 𑀥𑀦𑀓𑀸𑀫𑀸𑀦𑀁, 𑀦𑀲𑁆𑀲𑀢𑀺 𑀇𑀢𑀺 𑀫𑁂 𑀲𑀼𑀢𑀁;
𑀫𑀸𑀢𑀭𑀁 𑀅𑀧𑀭𑀺𑀘𑀭𑀺𑀢𑁆𑀯𑀸𑀦, 𑀓𑀺𑀘𑁆𑀙𑀁 𑀯𑀸 𑀲𑁄 𑀦𑀺𑀕𑀘𑁆𑀙𑀢𑀺.
‘‘𑀥𑀦𑀸𑀧𑀺 𑀥𑀦𑀓𑀸𑀫𑀸𑀦𑀁, 𑀦𑀲𑁆𑀲𑀢𑀺 𑀇𑀢𑀺 𑀫𑁂 𑀲𑀼𑀢𑀁;
𑀧𑀺𑀢𑀭𑀁 𑀅𑀧𑀭𑀺𑀘𑀭𑀺𑀢𑁆𑀯𑀸𑀦, 𑀓𑀺𑀘𑁆𑀙𑀁 𑀯𑀸 𑀲𑁄 𑀦𑀺𑀕𑀘𑁆𑀙𑀢𑀺.
‘‘𑀆𑀦𑀦𑁆𑀤𑁄 𑀘 𑀧𑀫𑁄𑀤𑁄 𑀘, 𑀲𑀤𑀸 𑀳𑀲𑀺𑀢𑀓𑀻𑀴𑀺𑀢𑀁;
𑀫𑀸𑀢𑀭𑀁 𑀧𑀭𑀺𑀘𑀭𑀺𑀢𑁆𑀯𑀸𑀦, 𑀮𑀩𑁆𑀪𑀫𑁂𑀢𑀁 𑀯𑀺𑀚𑀸𑀦𑀢𑁄.
‘‘𑀆𑀦𑀦𑁆𑀤𑁄 𑀘 𑀧𑀫𑁄𑀤𑁄 𑀘, 𑀲𑀤𑀸 𑀳𑀲𑀺𑀢𑀓𑀻𑀴𑀺𑀢𑀁;
𑀧𑀺𑀢𑀭𑀁 𑀧𑀭𑀺𑀘𑀭𑀺𑀢𑁆𑀯𑀸𑀦, 𑀮𑀩𑁆𑀪𑀫𑁂𑀢𑀁 𑀯𑀺𑀚𑀸𑀦𑀢𑁄.
‘‘𑀤𑀸𑀦𑀜𑁆𑀘 𑀧𑀺𑀬𑀯𑀸𑀘𑀸 𑀘, 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;
𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;
𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.
‘‘𑀏𑀢𑁂 ¶ 𑀘 𑀲𑀗𑁆𑀕𑀳𑀸 𑀦𑀸𑀲𑁆𑀲𑀼, 𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸;
𑀮𑀪𑁂𑀣 ¶ 𑀫𑀸𑀦𑀁 𑀧𑀽𑀚𑀁 𑀯𑀸, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀓𑀸𑀭𑀡𑀸.
‘‘𑀬𑀲𑁆𑀫𑀸 𑀘 𑀲𑀗𑁆𑀕𑀳𑀸 𑀏𑀢𑁂, 𑀲𑀫𑁆𑀫𑀧𑁂𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸;
𑀢𑀲𑁆𑀫𑀸 𑀫𑀳𑀢𑁆𑀢𑀁 𑀧𑀧𑁆𑀧𑁄𑀦𑁆𑀢𑀺, 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀺 𑀢𑁂.
‘‘𑀩𑁆𑀭𑀳𑁆𑀫𑀸𑀢𑀺 ¶ 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂;
𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀁, 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸.
‘‘𑀢𑀲𑁆𑀫𑀸 𑀳𑀺 𑀦𑁂 𑀦𑀫𑀲𑁆𑀲𑁂𑀬𑁆𑀬, 𑀲𑀓𑁆𑀓𑀭𑁂𑀬𑁆𑀬 𑀘 𑀧𑀡𑁆𑀟𑀺𑀢𑁄;
𑀅𑀦𑁆𑀦𑁂𑀦 𑀅𑀣𑁄 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;
𑀉𑀘𑁆𑀙𑀸𑀤𑀦𑁂𑀦 𑀦𑁆𑀳𑀸𑀧𑀦𑁂𑀦, 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘.
‘‘𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;
𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺.
𑀢𑀢𑁆𑀣 𑀧𑀼𑀢𑁆𑀢𑀨𑀮𑀦𑁆𑀢𑀺 𑀧𑀼𑀢𑁆𑀢𑀲𑀗𑁆𑀔𑀸𑀢𑀁 𑀨𑀮𑀁. 𑀤𑁂𑀯𑀢𑀸𑀬 𑀦𑀫𑀲𑁆𑀲𑀢𑀻𑀢𑀺 ‘‘𑀧𑀼𑀢𑁆𑀢𑁄 𑀫𑁂 𑀉𑀧𑁆𑀧𑀚𑁆𑀚𑀢𑀽’’𑀢𑀺 𑀤𑁂𑀯𑀢𑀸𑀬 𑀦𑀫𑀓𑁆𑀓𑀸𑀭𑀁 𑀓𑀭𑁄𑀢𑀺 𑀆𑀬𑀸𑀘𑀢𑀺. 𑀧𑀼𑀘𑁆𑀙𑀢𑀻𑀢𑀺 ‘‘𑀓𑀢𑀭𑁂𑀦 𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄 𑀧𑀼𑀢𑁆𑀢𑁄 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺, 𑀓𑀢𑀭𑁂𑀦 𑀅𑀧𑁆𑀧𑀸𑀬𑀼𑀓𑁄’’𑀢𑀺 𑀏𑀯𑀁 𑀦𑀓𑁆𑀔𑀢𑁆𑀢𑀸𑀦𑀺 𑀘 𑀧𑀼𑀘𑁆𑀙𑀢𑀺. 𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀺 𑀘𑀸𑀢𑀺 ‘‘𑀙𑀦𑁆𑀦𑀁 𑀉𑀢𑀽𑀦𑀁 𑀓𑀢𑀭𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀚𑀸𑀢𑁄 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺, 𑀓𑀢𑀭𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀅𑀧𑁆𑀧𑀸𑀬𑀼𑀓𑁄, 𑀓𑀢𑀺𑀯𑀲𑁆𑀲𑀸𑀬 𑀯𑀸 𑀫𑀸𑀢𑀼𑀬𑀸 𑀚𑀸𑀢𑁄 𑀧𑀼𑀢𑁆𑀢𑁄 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺, 𑀓𑀢𑀺𑀯𑀲𑁆𑀲𑀸𑀬 𑀅𑀧𑁆𑀧𑀸𑀬𑀼𑀓𑁄’’𑀢𑀺 𑀏𑀯𑀁 𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀺 𑀘 𑀧𑀼𑀘𑁆𑀙𑀢𑀺. 𑀉𑀢𑀼𑀫𑁆𑀳𑀺 𑀦𑁆𑀳𑀸𑀢𑀸𑀬𑀸𑀢𑀺 𑀧𑀼𑀧𑁆𑀨𑁂 𑀉𑀧𑁆𑀧𑀦𑁆𑀦𑁂 𑀉𑀢𑀼𑀫𑁆𑀳𑀺 𑀦𑁆𑀳𑀸𑀢𑀸𑀬. 𑀯𑁄𑀓𑁆𑀓𑀫𑁄𑀢𑀺 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀕𑀩𑁆𑀪𑁂𑀦 𑀲𑀸 𑀤𑁄𑀳𑀴𑀺𑀦𑀻 𑀳𑁄𑀢𑀺. 𑀢𑁂𑀦𑀸𑀢𑀺 𑀢𑀤𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀧𑀚𑀸𑀬 𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀓𑀸𑀭𑀡𑁂𑀦 ‘‘𑀲𑀼𑀳𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀲𑀸 ‘‘𑀚𑀦𑀬𑀦𑁆𑀢𑀻’’𑀢𑀺 𑀘 ‘‘𑀚𑀦𑁂𑀢𑁆𑀢𑀻’’𑀢𑀺 𑀘 𑀯𑀼𑀘𑁆𑀘𑀢𑀺.
𑀅𑀗𑁆𑀕𑀧𑀸𑀯𑀼𑀭𑀡𑁂𑀦 𑀘𑀸𑀢𑀺 𑀣𑀦𑀦𑁆𑀢𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑀁 𑀨𑀭𑀸𑀧𑁂𑀦𑁆𑀢𑀻 𑀅𑀗𑁆𑀕𑀲𑀗𑁆𑀔𑀸𑀢𑁂𑀦𑁂𑀯 𑀧𑀸𑀯𑀼𑀭𑀡𑁂𑀦. 𑀢𑁄𑀲𑁂𑀦𑁆𑀢𑀻𑀢𑀺 𑀲𑀜𑁆𑀜𑀸𑀧𑁂𑀦𑁆𑀢𑀻 𑀳𑀸𑀲𑁂𑀦𑁆𑀢𑀻. 𑀫𑀫𑀁 𑀓𑀢𑁆𑀯𑀸 𑀉𑀤𑀺𑀓𑁆𑀔𑀢𑀻𑀢𑀺 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀉𑀧𑀭𑀺 𑀯𑀸𑀢𑁄 𑀧𑀳𑀭𑀢𑀺, 𑀆𑀢𑀧𑁄 𑀨𑀭𑀢𑀻’’𑀢𑀺 𑀏𑀯𑀁 𑀫𑀫𑀁𑀓𑀸𑀭𑀁 𑀓𑀢𑁆𑀯𑀸 𑀲𑀺𑀦𑀺𑀤𑁆𑀥𑁂𑀦 𑀳𑀤𑀬𑁂𑀦 𑀉𑀤𑀺𑀓𑁆𑀔𑀢𑀺. 𑀉𑀪𑀬𑀫𑁆𑀧𑁂𑀢𑀲𑁆𑀲𑀸𑀢𑀺 ¶ 𑀉𑀪𑀬𑀫𑁆𑀧𑀺 𑀏𑀢𑀁 𑀥𑀦𑀁 𑀏𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀅𑀜𑁆𑀜𑁂𑀲𑀁 𑀅𑀤𑀲𑁆𑀲𑁂𑀢𑁆𑀯𑀸 𑀲𑀸𑀭𑀕𑀩𑁆𑀪𑀸𑀤𑀻𑀲𑀼 𑀫𑀸𑀢𑀸 𑀕𑁄𑀧𑁂𑀢𑀺. 𑀏𑀯𑀁 𑀧𑀼𑀢𑁆𑀢, 𑀅𑀤𑀼𑀁 𑀧𑀼𑀢𑁆𑀢𑀸𑀢𑀺 ‘‘𑀅𑀦𑁆𑀥𑀩𑀸𑀮 𑀧𑀼𑀢𑁆𑀢, 𑀏𑀯𑀁 𑀭𑀸𑀚𑀓𑀼𑀮𑀸𑀤𑀻𑀲𑀼 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀅𑀤𑀼𑀜𑁆𑀘 𑀓𑀫𑁆𑀫𑀁 𑀫𑀸 𑀓𑀭𑁄𑀳𑀻’’𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀻 𑀇𑀢𑀺 𑀫𑀸𑀢𑀸 𑀯𑀺𑀳𑀜𑁆𑀜𑀢𑀺 𑀓𑀺𑀮𑀫𑀢𑀺. 𑀧𑀢𑁆𑀢𑀬𑁄𑀩𑁆𑀩𑀦𑁂𑀢𑀺 ¶ 𑀧𑀼𑀢𑁆𑀢𑁂 𑀧𑀢𑁆𑀢𑀬𑁄𑀩𑁆𑀩𑀦𑁂 𑀢𑀁 𑀧𑀼𑀢𑁆𑀢𑀁 𑀦𑀺𑀲𑀻𑀣𑁂 𑀧𑀭𑀤𑀸𑀭𑁂𑀲𑀼 𑀧𑀫𑀢𑁆𑀢𑀁 𑀲𑀸𑀬𑀁 𑀅𑀦𑀸𑀕𑀘𑁆𑀙𑀦𑁆𑀢𑀁 𑀜𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀻 𑀯𑀺𑀳𑀜𑁆𑀜𑀢𑀺 𑀓𑀺𑀮𑀫𑀢𑀺.
𑀓𑀺𑀘𑁆𑀙𑀸 𑀪𑀢𑁄𑀢𑀺 𑀓𑀺𑀘𑁆𑀙𑁂𑀦 𑀪𑀢𑁄 𑀧𑀝𑀺𑀚𑀕𑁆𑀕𑀺𑀢𑁄. 𑀫𑀺𑀘𑁆𑀙𑀸 𑀘𑀭𑀺𑀢𑁆𑀯𑀸𑀦𑀸𑀢𑀺 𑀫𑀸𑀢𑀭𑀁 𑀅𑀧𑀝𑀺𑀚𑀕𑁆𑀕𑀺𑀢𑁆𑀯𑀸. 𑀥𑀦𑀸𑀧𑀻𑀢𑀺 𑀥𑀦𑀫𑁆𑀧𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀥𑀦𑀓𑀸𑀫𑀸𑀦𑀁 ¶ 𑀉𑀧𑁆𑀧𑀦𑁆𑀦𑀁 𑀥𑀦𑀫𑁆𑀧𑀺 𑀫𑀸𑀢𑀭𑀁 𑀅𑀧𑀝𑀺𑀚𑀕𑁆𑀕𑀦𑁆𑀢𑀸𑀦𑀁 𑀦𑀲𑁆𑀲𑀢𑀻𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀓𑀺𑀘𑁆𑀙𑀁 𑀯𑀸 𑀲𑁄𑀢𑀺 𑀇𑀢𑀺 𑀥𑀦𑀁 𑀯𑀸 𑀢𑀲𑁆𑀲 𑀦𑀲𑁆𑀲𑀢𑀺, 𑀤𑀼𑀓𑁆𑀔𑀁 𑀯𑀸𑀲𑁄 𑀧𑀼𑀭𑀺𑀲𑁄 𑀦𑀺𑀕𑀘𑁆𑀙𑀢𑀺. 𑀮𑀩𑁆𑀪𑀫𑁂𑀢𑀦𑁆𑀢𑀺 𑀏𑀢𑀁 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀆𑀦𑀦𑁆𑀤𑀸𑀤𑀺𑀲𑀼𑀔𑀁 𑀫𑀸𑀢𑀭𑀁 𑀧𑀭𑀺𑀘𑀭𑀺𑀢𑁆𑀯𑀸 𑀯𑀺𑀚𑀸𑀦𑀢𑁄 𑀧𑀡𑁆𑀟𑀺𑀢𑀲𑁆𑀲 𑀮𑀩𑁆𑀪𑀁, 𑀲𑀓𑁆𑀓𑀸 𑀮𑀤𑁆𑀥𑀼𑀁 𑀢𑀸𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄.
𑀤𑀸𑀦𑀜𑁆𑀘𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀧𑀺𑀬𑀯𑀘𑀦𑀁 𑀪𑀡𑀺𑀢𑀩𑁆𑀩𑀁, 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑁄 𑀘𑀭𑀺𑀢𑀩𑁆𑀩𑁄. 𑀥𑀫𑁆𑀫𑁂𑀲𑀽𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀲𑀫𑀚𑁆𑀛𑁂 𑀯𑀸 𑀭𑀳𑁄𑀕𑀢𑀸𑀦𑀁 𑀯𑀸 𑀅𑀪𑀺𑀯𑀸𑀤𑀦𑀸𑀤𑀺𑀯𑀲𑁂𑀦 𑀲𑀫𑀸𑀦𑀢𑁆𑀢𑀢𑀸 𑀓𑀸𑀢𑀩𑁆𑀩𑀸, 𑀦 𑀭𑀳𑁄 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀧𑀭𑀺𑀲𑀢𑀺 𑀦 𑀓𑀸𑀢𑀩𑁆𑀩𑀸𑀦𑀺, 𑀲𑀩𑁆𑀩𑀢𑁆𑀣 𑀲𑀫𑀸𑀦𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀏𑀢𑁂 𑀘 𑀲𑀗𑁆𑀕𑀳𑀸 𑀦𑀸𑀲𑁆𑀲𑀽𑀢𑀺 𑀲𑀘𑁂 𑀏𑀢𑁂 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸 𑀦 𑀪𑀯𑁂𑀬𑁆𑀬𑀼𑀁. 𑀲𑀫𑁆𑀫𑀧𑁂𑀓𑁆𑀔𑀦𑁆𑀢𑀻𑀢𑀺 𑀲𑀫𑁆𑀫𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀧𑁂𑀓𑁆𑀔𑀦𑁆𑀢𑀺. 𑀫𑀳𑀢𑁆𑀢𑀦𑁆𑀢𑀺 𑀲𑁂𑀝𑁆𑀞𑀢𑁆𑀢𑀁. 𑀩𑁆𑀭𑀳𑁆𑀫𑀸𑀢𑀺 𑀧𑀼𑀢𑁆𑀢𑀸𑀦𑀁 𑀩𑁆𑀭𑀳𑁆𑀫𑀲𑀫𑀸 𑀉𑀢𑁆𑀢𑀫𑀸 𑀲𑁂𑀝𑁆𑀞𑀸. 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀧𑀞𑀫𑀸𑀘𑀭𑀺𑀬𑀸. 𑀆𑀳𑀼𑀦𑁂𑀬𑁆𑀬𑀸𑀢𑀺 𑀆𑀳𑀼𑀦𑀧𑀝𑀺𑀕𑁆𑀕𑀸𑀳𑀓𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀓𑁆𑀓𑀸𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸. 𑀅𑀦𑁆𑀦𑁂𑀦 𑀅𑀣𑁄𑀢𑀺 𑀅𑀦𑁆𑀦𑁂𑀦 𑀘𑁂𑀯 𑀅𑀢𑁆𑀣𑁄 𑀧𑀸𑀦𑁂𑀦 𑀘. 𑀧𑁂𑀘𑁆𑀘𑀸𑀢𑀺 𑀓𑀸𑀮𑀓𑀺𑀭𑀺𑀬𑀸𑀬 𑀧𑀭𑀺𑀬𑁄𑀲𑀸𑀦𑁂 𑀇𑀢𑁄 𑀕𑀦𑁆𑀢𑁆𑀯𑀸 𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺.
𑀏𑀯𑀁 𑀫𑀳𑀲𑀢𑁆𑀢𑁄 𑀲𑀺𑀦𑁂𑀭𑀼𑀁 𑀧𑀯𑀝𑁆𑀝𑁂𑀦𑁆𑀢𑁄 𑀯𑀺𑀬 𑀥𑀫𑁆𑀫𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀸𑀦𑁄 𑀩𑀮𑀓𑀸𑀬𑀸 𑀘 𑀧𑀲𑀻𑀤𑀺𑀁𑀲𑀼. 𑀅𑀣 𑀦𑁂 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀤𑀸𑀦𑀸𑀤𑀻𑀲𑀼 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀲𑀩𑁆𑀩𑁂𑀧𑀺 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀦𑀕𑀭𑀁 𑀧𑀽𑀭𑀬𑀺𑀁𑀲𑀼. 𑀲𑁄𑀡𑀧𑀡𑁆𑀟𑀺𑀢𑀦𑀦𑁆𑀤𑀧𑀡𑁆𑀟𑀺𑀢𑀸𑀧𑀺 𑀬𑀸𑀯𑀢𑀸𑀬𑀼𑀓𑀁 𑀫𑀸𑀢𑀸𑀧𑀺𑀢𑀭𑁄 𑀧𑀭𑀺𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.
𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀳𑀸𑀭𑀸𑀚𑀓𑀼𑀮𑀸𑀦𑀺 ¶ 𑀅𑀳𑁂𑀲𑀼𑀁, 𑀦𑀦𑁆𑀤𑀧𑀡𑁆𑀟𑀺𑀢𑁄 𑀆𑀦𑀦𑁆𑀤𑁄 ¶ , 𑀫𑀦𑁄𑀚𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀏𑀓𑀲𑀢𑀭𑀸𑀚𑀸𑀦𑁄 𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀘𑁂𑀯 𑀅𑀜𑁆𑀜𑀢𑀭𑀣𑁂𑀭𑀸 𑀘, 𑀘𑀢𑀼𑀯𑀻𑀲𑀢𑀺 𑀅𑀓𑁆𑀔𑁄𑀪𑀡𑀺𑀬𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀲𑁄𑀡𑀧𑀡𑁆𑀟𑀺𑀢𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺𑀦𑁆𑀢𑀺.
𑀲𑁄𑀡𑀦𑀦𑁆𑀤𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.
𑀚𑀸𑀢𑀓𑀼𑀤𑁆𑀤𑀸𑀦𑀁 𑁋
𑀅𑀣 𑀲𑀢𑁆𑀢𑀢𑀺𑀫𑀫𑁆𑀳𑀺 𑀦𑀺𑀧𑀸𑀢𑀯𑀭𑁂, 𑀲𑀪𑀸𑀯𑀦𑁆𑀢𑀼 𑀓𑀼𑀲𑀸𑀯𑀢𑀺𑀭𑀸𑀚𑀯𑀭𑁄;
𑀅𑀣 𑀲𑁄𑀡𑀲𑀼𑀦𑀦𑁆𑀤𑀯𑀭𑁄 𑀘 𑀧𑀼𑀦, 𑀅𑀪𑀺𑀯𑀸𑀲𑀺𑀢𑀲𑀢𑁆𑀢𑀢𑀺𑀫𑀫𑁆𑀳𑀺 𑀲𑀼𑀢𑁂𑀢𑀺.
𑀲𑀢𑁆𑀢𑀢𑀺𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁨𑁧. 𑀅𑀲𑀻𑀢𑀺𑀦𑀺𑀧𑀸𑀢𑁄
[𑁫𑁩𑁩] 𑁧. 𑀘𑀽𑀴𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸
𑀲𑀼𑀫𑀼𑀔𑀸𑀢𑀺 ¶ ¶ ¶ 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑁂𑀦 𑀳𑀺 𑀢𑀣𑀸𑀕𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀧𑀬𑁄𑀚𑀺𑀢𑁂𑀲𑀼 𑀥𑀦𑀼𑀕𑁆𑀕𑀳𑁂𑀲𑀼 𑀲𑀩𑁆𑀩𑀧𑀞𑀫𑀁 𑀧𑁂𑀲𑀺𑀢𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀦𑀸𑀳𑀁, 𑀪𑀦𑁆𑀢𑁂, 𑀲𑀓𑁆𑀓𑁄𑀫𑀺 𑀢𑀁 𑀪𑀕𑀯𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁, 𑀫𑀳𑀺𑀤𑁆𑀥𑀺𑀓𑁄 𑀲𑁄 𑀪𑀕𑀯𑀸 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀯𑀼𑀢𑁆𑀢𑁂 𑀤𑁂𑀯𑀤𑀢𑁆𑀢𑁄 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀢𑁆𑀯𑀁 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺, 𑀅𑀳𑀫𑁂𑀯 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑀸𑀕𑀢𑁂 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀲𑁆𑀲 𑀧𑀘𑁆𑀙𑀺𑀫𑀙𑀸𑀬𑀸𑀬 𑀘𑀗𑁆𑀓𑀫𑀦𑁆𑀢𑁂 𑀲𑀬𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑀦𑁆𑀢𑀯𑁂𑀕𑁂𑀦 𑀫𑀳𑀢𑀺𑀁 𑀲𑀺𑀮𑀁 𑀧𑀯𑀺𑀚𑁆𑀛𑀺, ‘‘𑀇𑀫𑀸𑀬 𑀲𑀺𑀮𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑀤𑀸 𑀤𑁆𑀯𑁂 𑀧𑀩𑁆𑀩𑀢𑀓𑀽𑀝𑀸 𑀲𑀫𑀸𑀕𑀦𑁆𑀢𑁆𑀯𑀸 𑀢𑀁 𑀲𑀺𑀮𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀢𑀢𑁄 𑀧𑀧𑀝𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀁 𑀧𑀳𑀭𑀺𑀢𑁆𑀯𑀸 𑀭𑀼𑀳𑀺𑀭𑀁 𑀉𑀧𑁆𑀧𑀸𑀤𑁂𑀲𑀺, 𑀩𑀮𑀯𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼. 𑀚𑀻𑀯𑀓𑁄 𑀢𑀣𑀸𑀕𑀢𑀲𑁆𑀲 𑀧𑀸𑀤𑀁 𑀲𑀢𑁆𑀣𑀓𑁂𑀦 𑀨𑀸𑀮𑁂𑀢𑁆𑀯𑀸 𑀤𑀼𑀝𑁆𑀞𑀮𑁄𑀳𑀺𑀢𑀁 𑀯𑀫𑁂𑀢𑁆𑀯𑀸 𑀧𑀽𑀢𑀺𑀫𑀁𑀲𑀁 𑀅𑀧𑀦𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀆𑀮𑀺𑀫𑁆𑀧𑀺𑀢𑁆𑀯𑀸 𑀦𑀺𑀭𑁄𑀕𑀫𑀓𑀸𑀲𑀺. 𑀲𑀢𑁆𑀣𑀸 𑀧𑀼𑀭𑀺𑀫𑀲𑀤𑀺𑀲𑀫𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀫𑀳𑀢𑀺𑀬𑀸 𑀩𑀼𑀤𑁆𑀥𑀮𑀻𑀮𑀸𑀬 𑀯𑀺𑀘𑀭𑀺.
𑀅𑀣 𑀦𑀁 𑀤𑀺𑀲𑁆𑀯𑀸 𑀤𑁂𑀯𑀤𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀓𑁄𑀘𑀺 𑀫𑀦𑀼𑀲𑁆𑀲𑀪𑀽𑀢𑁄 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀭𑀜𑁆𑀜𑁄 𑀔𑁄 𑀧𑀦 𑀦𑀸𑀴𑀸𑀕𑀺𑀭𑀺 𑀦𑀸𑀫 𑀳𑀢𑁆𑀣𑀻 𑀘𑀡𑁆𑀟𑁄 𑀨𑀭𑀼𑀲𑁄 ¶ 𑀫𑀦𑀼𑀲𑁆𑀲𑀖𑀸𑀢𑀓𑁄 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀦 𑀚𑀸𑀦𑀸𑀢𑀺, 𑀲𑁄 𑀢𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫, 𑀲𑁆𑀯𑁂 𑀦𑀸𑀴𑀸𑀕𑀺𑀭𑀺𑀁 𑀫𑀢𑁆𑀢𑀁 𑀓𑀢𑁆𑀯𑀸 𑀧𑀸𑀢𑁄𑀯 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀆𑀳. 𑀤𑁂𑀯𑀤𑀢𑁆𑀢𑁄𑀧𑀺 𑀦𑀁 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀳𑀢𑁆𑀣𑀻 𑀓𑀺𑀢𑁆𑀢𑀓𑀁 𑀲𑀼𑀭𑀁 𑀧𑀺𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀝𑁆𑀞 𑀖𑀝𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀲𑁆𑀯𑁂 𑀢𑁆𑀯𑀁 𑀢𑀁 𑀲𑁄𑀴𑀲 𑀖𑀝𑁂 ¶ 𑀧𑀸𑀬𑁂𑀢𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀅𑀪𑀺𑀫𑀼𑀔𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀲𑁆𑀯𑁂 𑀦𑀸𑀴𑀸𑀕𑀺𑀭𑀺𑀁 𑀫𑀢𑁆𑀢𑀁 𑀓𑀢𑁆𑀯𑀸 𑀦𑀕𑀭𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀦𑀸𑀕𑀭𑀸 𑀧𑀸𑀢𑁄𑀯 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀫𑀸 𑀧𑀝𑀺𑀧𑀚𑁆𑀚𑀺𑀁𑀲𑀽’’𑀢𑀺. 𑀤𑁂𑀯𑀤𑀢𑁆𑀢𑁄𑀧𑀺 ¶ 𑀭𑀸𑀚𑀦𑀺𑀯𑁂𑀲𑀦𑀸 𑀑𑀭𑀼𑀬𑁆𑀳 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀫𑀬𑀁 𑀪𑀡𑁂 𑀉𑀘𑁆𑀘𑀝𑁆𑀞𑀸𑀦𑀺𑀬𑀁 𑀦𑀻𑀘𑀝𑁆𑀞𑀸𑀦𑁂, 𑀦𑀻𑀘𑀝𑁆𑀞𑀸𑀦𑀺𑀬𑀁 𑀯𑀸 𑀉𑀘𑁆𑀘𑀝𑁆𑀞𑀸𑀦𑁂 𑀓𑀸𑀢𑀼𑀁 𑀲𑀫𑀢𑁆𑀣𑀸, 𑀲𑀘𑁂 𑀯𑁄 𑀬𑀲𑁂𑀦 𑀅𑀢𑁆𑀣𑁄, 𑀲𑁆𑀯𑁂 𑀧𑀸𑀢𑁄𑀯 𑀦𑀸𑀴𑀸𑀕𑀺𑀭𑀺𑀁 𑀢𑀺𑀔𑀺𑀡𑀲𑀼𑀭𑀸𑀬 𑀲𑁄𑀴𑀲 𑀖𑀝𑁂 𑀧𑀸𑀬𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀆𑀕𑀫𑀦𑀯𑁂𑀮𑀸𑀬 𑀢𑀼𑀢𑁆𑀢𑀢𑁄𑀫𑀭𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀓𑀼𑀚𑁆𑀛𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.
𑀲𑀸 𑀧𑀯𑀢𑁆𑀢𑀺 𑀲𑀓𑀮𑀦𑀕𑀭𑁂 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀫𑀸𑀫𑀓𑀸 𑀉𑀧𑀸𑀲𑀓𑀸 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑁆𑀯𑁂 𑀢𑀼𑀫𑁆𑀳𑁂𑀳𑀺 𑀧𑀝𑀺𑀧𑀦𑁆𑀦𑀯𑀻𑀣𑀺𑀬𑀁 𑀦𑀸𑀴𑀸𑀕𑀺𑀭𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀢𑀺, 𑀲𑁆𑀯𑁂 𑀧𑀺𑀡𑁆𑀟𑀸𑀬 𑀅𑀧𑀯𑀺𑀲𑀺𑀢𑁆𑀯𑀸 𑀇𑀥𑁂𑀯 𑀳𑁄𑀣, 𑀫𑀬𑀁 𑀯𑀺𑀳𑀸𑀭𑁂𑀬𑁂𑀯 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀲𑀢𑁆𑀣𑀸𑀧𑀺 ‘‘𑀲𑁆𑀯𑁂 𑀧𑀺𑀡𑁆𑀟𑀸𑀬 𑀦 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸𑀯 ‘‘𑀅𑀳𑀁 𑀲𑁆𑀯𑁂 𑀦𑀸𑀴𑀸𑀕𑀺𑀭𑀺𑀁 𑀤𑀫𑁂𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀅𑀘𑀭𑀺𑀢𑁆𑀯𑀸𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯 𑀆𑀕𑀫𑀺𑀲𑁆𑀲𑀸𑀫𑀺, 𑀭𑀸𑀚𑀕𑀳𑀯𑀸𑀲𑀺𑀦𑁄𑀧𑀺 𑀩𑀳𑀽𑀦𑀺 𑀪𑀢𑁆𑀢𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀲𑁆𑀯𑁂 𑀯𑀺𑀳𑀸𑀭𑁂𑀬𑁂𑀯 𑀪𑀢𑁆𑀢𑀕𑁆𑀕𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑁂𑀲𑀁 𑀅𑀥𑀺𑀯𑀸𑀲𑁂𑀲𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀪𑀢𑁆𑀢𑀪𑀸𑀚𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀯𑀺𑀳𑀸𑀭𑁂𑀬𑁂𑀯 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀧𑀓𑁆𑀓𑀫𑀺𑀁𑀲𑀼.
𑀲𑀢𑁆𑀣𑀸𑀧𑀺 𑀧𑀞𑀫𑀬𑀸𑀫𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀲𑁆𑀲 𑀧𑀞𑀫𑀓𑁄𑀝𑁆𑀞𑀸𑀲𑁂 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 ¶ 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀦𑀸𑀴𑀸𑀕𑀺𑀭𑀺𑀤𑀫𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀤𑀺𑀲𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀳𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀢𑁆𑀯𑀸 ¶ , ‘‘𑀆𑀦𑀦𑁆𑀤, 𑀅𑀚𑁆𑀚 𑀭𑀸𑀚𑀕𑀳𑀧𑀭𑀺𑀯𑀢𑁆𑀢𑀓𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀫𑀬𑀸𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀧𑀯𑀺𑀲𑀺𑀢𑀼𑀁 𑀆𑀭𑁄𑀘𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀯𑁂𑀴𑀼𑀯𑀦𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀅𑀣 𑀳𑀢𑁆𑀣𑀺𑀫𑁂𑀡𑁆𑀟𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀫𑀳𑀦𑁆𑀢𑁄 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀫𑀦𑀼𑀲𑁆𑀲𑀸 ‘‘𑀅𑀚𑁆𑀚 𑀓𑀺𑀭 𑀩𑀼𑀤𑁆𑀥𑀦𑀸𑀕𑀲𑁆𑀲 𑀢𑀺𑀭𑀘𑁆𑀙𑀸𑀦𑀦𑀸𑀕𑁂𑀦 𑀲𑀗𑁆𑀕𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀽𑀧𑀫𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀦𑀸𑀴𑀸𑀕𑀺𑀭𑀺𑀤𑀫𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀲𑀸𑀤𑀳𑀫𑁆𑀫𑀺𑀬𑀕𑁂𑀳𑀘𑁆𑀙𑀤𑀦𑀸𑀤𑀻𑀦𑀺 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀲𑀤𑁆𑀥𑀸 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 ‘‘𑀅𑀬𑀁 𑀦𑀸𑀴𑀸𑀕𑀺𑀭𑀺 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀲𑁄 𑀅𑀚𑁆𑀚 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 ¶ 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀅𑀚𑁆𑀚 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀲𑀸𑀤𑀸𑀤𑀻𑀲𑀼 𑀅𑀝𑁆𑀞𑀁𑀲𑀼.
𑀳𑀢𑁆𑀣𑀻𑀧𑀺 𑀪𑀕𑀯𑀦𑁆𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂 𑀢𑀸𑀲𑁂𑀦𑁆𑀢𑁄 𑀕𑁂𑀳𑀸𑀦𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀲𑀓𑀝𑀸𑀦𑀺 𑀲𑀁𑀘𑀼𑀡𑁆𑀡𑁂𑀦𑁆𑀢𑁄 𑀲𑁄𑀡𑁆𑀟𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀳𑀝𑁆𑀞𑀓𑀡𑁆𑀡𑀯𑀸𑀮𑁄 𑀧𑀩𑁆𑀩𑀢𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀸𑀪𑀺𑀥𑀸𑀯𑀺. 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀦𑀸𑀴𑀸𑀕𑀺𑀭𑀺 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀇𑀫𑀁 𑀭𑀘𑁆𑀙𑀁 𑀧𑀝𑀺𑀧𑀦𑁆𑀦𑁄, 𑀦 𑀔𑁄 𑀧𑀦𑀸𑀬𑀁 𑀩𑀼𑀤𑁆𑀥𑀸𑀤𑀺𑀕𑀼𑀡𑀁 𑀚𑀸𑀦𑀸𑀢𑀺, 𑀧𑀝𑀺𑀓𑁆𑀓𑀫𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀧𑀝𑀺𑀓𑁆𑀓𑀫𑀢𑀼 𑀲𑀼𑀕𑀢𑁄’’𑀢𑀺. 𑀫𑀸, 𑀪𑀺𑀓𑁆𑀔𑀯𑁂, 𑀪𑀸𑀬𑀺𑀢𑁆𑀣, 𑀧𑀝𑀺𑀩𑀮𑁄 𑀅𑀳𑀁 𑀦𑀸𑀴𑀸𑀕𑀺𑀭𑀺𑀁 𑀤𑀫𑁂𑀢𑀼𑀦𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀬𑀸𑀘𑀺 𑁋 ‘‘𑀪𑀦𑁆𑀢𑁂, 𑀧𑀺𑀢𑀼 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀦𑀸𑀫 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀪𑀸𑀭𑁄, 𑀅𑀳𑀫𑁂𑀯 𑀢𑀁 𑀤𑀫𑁂𑀫𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀲𑀸𑀭𑀺𑀧𑀼𑀢𑁆𑀢, 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀅𑀜𑁆𑀜𑀁, 𑀲𑀸𑀯𑀓𑀩𑀮𑀁 𑀅𑀜𑁆𑀜𑀁, 𑀢𑀺𑀝𑁆𑀞 𑀢𑁆𑀯’’𑀦𑁆𑀢𑀺 𑀧𑀝𑀺𑀩𑀸𑀳𑀺. 𑀏𑀯𑀁 𑀬𑁂𑀪𑀼𑀬𑁆𑀬𑁂𑀦 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 𑀲𑀩𑁆𑀩𑁂𑀧𑀺 𑀧𑀝𑀺𑀩𑀸𑀳𑀺. 𑀅𑀣 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀭𑀺 𑀩𑀮𑀯𑀲𑀺𑀦𑁂𑀳𑁂𑀦 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀬𑀁 𑀳𑀢𑁆𑀣𑀻 𑀧𑀞𑀫𑀁 𑀫𑀁 𑀫𑀸𑀭𑁂𑀢𑀽’’𑀢𑀺 𑀢𑀣𑀸𑀕𑀢𑀲𑁆𑀲𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀧𑁂𑀳𑀺, 𑀆𑀦𑀦𑁆𑀤, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀅𑀬𑀁 𑀳𑀢𑁆𑀣𑀻 𑀘𑀡𑁆𑀟𑁄 ¶ 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺𑀲𑀤𑀺𑀲𑁄 𑀧𑀞𑀫𑀁 𑀫𑀁 𑀫𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀽’’𑀢𑀺 𑀣𑁂𑀭𑁄 𑀅𑀯𑀘. 𑀬𑀸𑀯𑀢𑀢𑀺𑀬𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀣𑁂𑀯 𑀅𑀝𑁆𑀞𑀸𑀲𑀺 𑀦 𑀧𑀝𑀺𑀓𑁆𑀓𑀫𑀺. 𑀅𑀣 𑀦𑀁 𑀪𑀕𑀯𑀸 𑀇𑀤𑁆𑀥𑀺𑀩𑀮𑁂𑀦 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀞𑀧𑁂𑀲𑀺.
𑀢𑀲𑁆𑀫𑀺𑀁 ¶ 𑀔𑀡𑁂 𑀏𑀓𑀸 𑀇𑀢𑁆𑀣𑀻 𑀦𑀸𑀴𑀸𑀕𑀺𑀭𑀺𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀪𑀻𑀢𑀸 𑀧𑀮𑀸𑀬𑀫𑀸𑀦𑀸 𑀅𑀗𑁆𑀓𑁂𑀦 𑀕𑀳𑀺𑀢𑀁 𑀤𑀸𑀭𑀓𑀁 𑀳𑀢𑁆𑀣𑀺𑀦𑁄 𑀘 𑀢𑀣𑀸𑀕𑀢𑀲𑁆𑀲 𑀘 𑀅𑀦𑁆𑀢𑀭𑁂 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀳𑀢𑁆𑀣𑀻 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑀸𑀭𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀤𑀸 𑀤𑀸𑀭𑀓𑁄 𑀫𑀳𑀸𑀭𑀯𑀁 𑀭𑀯𑀺. 𑀲𑀢𑁆𑀣𑀸 𑀦𑀸𑀴𑀸𑀕𑀺𑀭𑀺𑀁 𑀑𑀤𑀺𑀲𑁆𑀲𑀓𑀫𑁂𑀢𑁆𑀢𑀸𑀬 𑀨𑀭𑀺𑀢𑁆𑀯𑀸 𑀲𑀼𑀫𑀥𑀼𑀭𑀁 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 ‘‘𑀅𑀫𑁆𑀪𑁄 𑀦𑀸𑀴𑀸𑀕𑀺𑀭𑀺 𑀢𑀁 𑀲𑁄𑀴𑀲 𑀲𑀼𑀭𑀸𑀖𑀝𑁂 𑀧𑀸𑀬𑁂𑀢𑁆𑀯𑀸 𑀫𑀢𑁆𑀢𑀁 𑀓𑀭𑁄𑀦𑁆𑀢𑀸 𑀦 ‘𑀅𑀜𑁆𑀜𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 𑀓𑀭𑀺𑀁𑀲𑀼, ‘𑀫𑀁 𑀕𑀡𑁆𑀳𑀺𑀲𑁆𑀲𑀢𑀻’𑀢𑀺 𑀧𑀦 𑀓𑀭𑀺𑀁𑀲𑀼, 𑀫𑀸 𑀅𑀓𑀸𑀭𑀡𑁂𑀦 𑀚𑀗𑁆𑀖𑀸𑀬𑁄 𑀓𑀺𑀮𑀫𑁂𑀦𑁆𑀢𑁄 𑀯𑀺𑀘𑀭𑀺, 𑀇𑀢𑁄 𑀏𑀳𑀻’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀪𑀕𑀯𑀢𑁄 𑀭𑀽𑀧𑀲𑀺𑀭𑀺𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀁𑀯𑁂𑀕𑁄 𑀩𑀼𑀤𑁆𑀥𑀢𑁂𑀚𑁂𑀦 𑀧𑀘𑁆𑀙𑀺𑀦𑁆𑀦𑀲𑀼𑀭𑀸𑀫𑀤𑁄 𑀲𑁄𑀡𑁆𑀟𑀁 𑀑𑀮𑀫𑁆𑀩𑁂𑀦𑁆𑀢𑁄 𑀓𑀡𑁆𑀡𑁂 𑀘𑀸𑀮𑁂𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀦𑀸𑀴𑀸𑀕𑀺𑀭𑀺, 𑀢𑁆𑀯𑀁 𑀢𑀺𑀭𑀘𑁆𑀙𑀸𑀦𑀳𑀢𑁆𑀣𑀻, 𑀅𑀳𑀁 𑀩𑀼𑀤𑁆𑀥𑀯𑀸𑀭𑀡𑁄, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀘𑀡𑁆𑀟𑁄 𑀨𑀭𑀼𑀲𑁄 𑀫𑀦𑀼𑀲𑁆𑀲𑀖𑀸𑀢𑀓𑁄 𑀪𑀯, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀸’’𑀢𑀺 𑀯𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀓𑀼𑀫𑁆𑀪𑁂 𑀧𑀭𑀸𑀫𑀲𑀺𑀢𑁆𑀯𑀸 𑁋
‘‘𑀫𑀸 ¶ 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄, 𑀤𑀼𑀓𑁆𑀔𑁄 𑀳𑀺 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄;
𑀦 𑀳𑀺 𑀦𑀸𑀕𑀳𑀢𑀲𑁆𑀲 𑀓𑀼𑀜𑁆𑀚𑀭, 𑀲𑀼𑀕𑀢𑀺 𑀳𑁄𑀢𑀺 𑀇𑀢𑁄 𑀧𑀭𑀁 𑀬𑀢𑁄.
‘‘𑀫𑀸 𑀘 𑀫𑀤𑁄 𑀫𑀸 𑀘 𑀧𑀫𑀸𑀤𑁄, 𑀦 𑀳𑀺 𑀧𑀫𑀢𑁆𑀢𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑁂;
𑀢𑁆𑀯𑀜𑁆𑀜𑁂𑀯 𑀢𑀣𑀸 𑀓𑀭𑀺𑀲𑁆𑀲𑀲𑀺, 𑀬𑁂𑀦 𑀢𑁆𑀯𑀁 𑀲𑀼𑀕𑀢𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺. (𑀘𑀽𑀴𑀯. 𑁩𑁪𑁨) 𑁋
𑀥𑀫𑁆𑀫𑀁 𑀤𑁂𑀲𑁂𑀲𑀺.
𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺. 𑀲𑀘𑁂 𑀓𑀺𑀭 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀸𑀪𑀯𑀺𑀲𑁆𑀲𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀅𑀥𑀺𑀕𑀫𑀺𑀲𑁆𑀲𑀸. 𑀫𑀦𑀼𑀲𑁆𑀲𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀉𑀦𑁆𑀦𑀤𑀺𑀁𑀲𑀼 𑀅𑀧𑁆𑀨𑁄𑀝𑀺𑀁𑀲𑀼, 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸 𑀦𑀸𑀦𑀸𑀪𑀭𑀡𑀸𑀦𑀺 𑀔𑀺𑀧𑀺𑀁𑀲𑀼, 𑀢𑀸𑀦𑀺 𑀳𑀢𑁆𑀣𑀺𑀲𑁆𑀲 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑀬𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 ¶ 𑀦𑀸𑀴𑀸𑀕𑀺𑀭𑀺 𑀥𑀦𑀧𑀸𑀮𑀓𑁄 𑀦𑀸𑀫 𑀚𑀸𑀢𑁄. 𑀢𑀲𑁆𑀫𑀺𑀁 𑀔𑁄 𑀧𑀦 𑀥𑀦𑀧𑀸𑀮𑀓𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀁 𑀧𑀺𑀯𑀺𑀁𑀲𑀼. 𑀲𑀢𑁆𑀣𑀸 𑀥𑀦𑀧𑀸𑀮𑀓𑀁 𑀧𑀜𑁆𑀘𑀲𑀼 ¶ 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀤𑁂 𑀧𑀁𑀲𑀽𑀦𑀺 𑀕𑀳𑁂𑀢𑁆𑀯𑀸 𑀉𑀧𑀭𑀺 𑀫𑀼𑀤𑁆𑀥𑀦𑀺 𑀆𑀓𑀺𑀭𑀺𑀢𑁆𑀯𑀸 𑀧𑀝𑀺𑀓𑀼𑀝𑀺𑀢𑁄𑀯 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀤𑀲𑁆𑀲𑀦𑀽𑀧𑀘𑀸𑀭𑁂 𑀞𑀺𑀢𑁄 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀧𑀸𑀯𑀺𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑀦𑁆𑀢𑀲𑀼𑀤𑀦𑁆𑀢𑁄 𑀳𑀼𑀢𑁆𑀯𑀸 𑀦 𑀓𑀜𑁆𑀘𑀺 𑀯𑀺𑀳𑁂𑀞𑁂𑀢𑀺. 𑀲𑀢𑁆𑀣𑀸 𑀦𑀺𑀧𑁆𑀨𑀦𑁆𑀦𑀫𑀦𑁄𑀭𑀣𑁄 ‘‘𑀬𑁂𑀳𑀺 𑀬𑀁 𑀥𑀦𑀁 𑀔𑀺𑀢𑁆𑀢𑀁, 𑀢𑁂𑀲𑀜𑁆𑀜𑁂𑀯 𑀢𑀁 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 ‘‘𑀅𑀚𑁆𑀚 𑀫𑀬𑀸 𑀫𑀳𑀦𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑀁, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀅𑀧𑁆𑀧𑀝𑀺𑀭𑀽𑀧’’𑀦𑁆𑀢𑀺 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀬𑀧𑁆𑀧𑀢𑁆𑀢𑁄 𑀯𑀺𑀬 𑀔𑀢𑁆𑀢𑀺𑀬𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀴𑀼𑀯𑀦𑀫𑁂𑀯 𑀕𑀢𑁄. 𑀦𑀕𑀭𑀯𑀸𑀲𑀺𑀦𑁄 𑀩𑀳𑀼𑀁 𑀅𑀦𑁆𑀦𑀧𑀸𑀦𑀔𑀸𑀤𑀦𑀻𑀬𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼.
𑀢𑀁 𑀤𑀺𑀯𑀲𑀁 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀁 𑀧𑀽𑀭𑁂𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀢𑀣𑀸𑀕𑀢𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀦𑁆𑀢𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀦𑀸𑀴𑀸𑀕𑀺𑀭𑀺𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀩𑀸𑀳𑀺𑀬𑀫𑀸𑀦𑁄𑀧𑀺 𑀦𑀸𑀧𑀕𑀢𑁄, 𑀅𑀳𑁄 𑀤𑀼𑀓𑁆𑀓𑀭𑀓𑀸𑀭𑀓𑁄, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄’’𑀢𑀺. 𑀲𑀢𑁆𑀣𑀸 ‘‘𑀆𑀦𑀦𑁆𑀤𑀲𑁆𑀲 𑀕𑀼𑀡𑀓𑀣𑀸 𑀧𑀯𑀢𑁆𑀢𑀢𑀺, 𑀕𑀦𑁆𑀢𑀩𑁆𑀩𑀁 𑀫𑀬𑀸 𑀏𑀢𑁆𑀣𑀸’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀆𑀦𑀦𑁆𑀤𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀫𑀫𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 ¶ 𑀫𑀳𑀺𑀁𑀲𑀓𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀲𑀸𑀕𑀮𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀦𑁂𑀲𑀸𑀤𑀕𑀸𑀫𑀓𑁂 𑀅𑀜𑁆𑀜𑀢𑀭𑁄 𑀦𑁂𑀲𑀸𑀤𑁄 𑀧𑀸𑀲𑁂𑀳𑀺 𑀲𑀓𑀼𑀡𑁂 𑀩𑀦𑁆𑀥𑀺𑀢𑁆𑀯𑀸 𑀦𑀕𑀭𑁂 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀦𑀕𑀭𑀢𑁄 𑀘 𑀅𑀯𑀺𑀤𑀽𑀭𑁂 𑀆𑀯𑀝𑁆𑀝𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑁄 𑀫𑀸𑀦𑀼𑀲𑀺𑀬𑁄 𑀦𑀸𑀫 𑀧𑀤𑀼𑀫𑀲𑀭𑁄 𑀅𑀳𑁄𑀲𑀺 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑁄. 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑁄 𑀲𑀓𑀼𑀡𑀲𑀗𑁆𑀖𑁄 𑀑𑀢𑀭𑀺. 𑀲𑁄 𑀦𑁂𑀲𑀸𑀤𑁄 𑀢𑀢𑁆𑀣 𑀅𑀦𑀺𑀬𑀸𑀫𑁂𑀦 𑀧𑀸𑀲𑁂 𑀑𑀟𑁆𑀟𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸 𑀙𑀦𑁆𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀲𑀼𑀯𑀡𑁆𑀡𑀕𑀼𑀳𑀸𑀬𑀁 𑀯𑀲𑀢𑀺, 𑀲𑀼𑀫𑀼𑀔𑁄 𑀦𑀸𑀫𑀲𑁆𑀲 𑀲𑁂𑀦𑀸𑀧𑀢𑀺 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀢𑁄 𑀳𑀁𑀲𑀬𑀽𑀣𑀸 𑀓𑀢𑀺𑀧𑀬𑀸 ¶ 𑀲𑀼𑀯𑀡𑁆𑀡𑀳𑀁𑀲𑀸 𑀫𑀸𑀦𑀼𑀲𑀺𑀬𑀁 𑀲𑀭𑀁 𑀕𑀦𑁆𑀢𑁆𑀯𑀸 𑀧𑀳𑀽𑀢𑀕𑁄𑀘𑀭𑁂 𑀢𑀲𑁆𑀫𑀺𑀁 𑀬𑀣𑀸𑀲𑀼𑀔𑀁 𑀯𑀺𑀘𑀭𑀺𑀢𑁆𑀯𑀸 𑀲𑀼𑀳𑀺𑀢𑀸 𑀘𑀺𑀢𑁆𑀢𑀓𑀽𑀝𑀁 𑀆𑀕𑀦𑁆𑀢𑁆𑀯𑀸 𑀥𑀢𑀭𑀝𑁆𑀞𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀧𑀣𑁂 ¶ 𑀫𑀸𑀦𑀼𑀲𑀺𑀬𑁄 𑀦𑀸𑀫 𑀧𑀤𑀼𑀫𑀲𑀭𑁄 𑀲𑀫𑁆𑀧𑀦𑁆𑀦𑀕𑁄𑀘𑀭𑁄, 𑀢𑀢𑁆𑀣 𑀕𑁄𑀘𑀭𑀁 𑀕𑀡𑁆𑀳𑀺𑀢𑀼𑀁 𑀕𑀘𑁆𑀙𑀸𑀫𑀸’’𑀢𑀺. 𑀲𑁄 ‘‘𑀫𑀦𑀼𑀲𑁆𑀲𑀧𑀣𑁄 𑀦𑀸𑀫 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄, 𑀫𑀸 𑀯𑁄 𑀭𑀼𑀘𑁆𑀘𑀺𑀢𑁆𑀣𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀘𑁂 𑀢𑀼𑀫𑁆𑀳𑀸𑀓𑀁 𑀭𑀼𑀘𑁆𑀘𑀢𑀺, 𑀕𑀘𑁆𑀙𑀸𑀫𑀸’’𑀢𑀺 𑀲𑀧𑀭𑀺𑀯𑀸𑀭𑁄 𑀢𑀁 𑀲𑀭𑀁 𑀅𑀕𑀫𑀸𑀲𑀺. 𑀲𑁄 𑀆𑀓𑀸𑀲𑀸 𑀑𑀢𑀭𑀦𑁆𑀢𑁄 𑀧𑀸𑀤𑀁 𑀧𑀸𑀲𑁂 𑀧𑀯𑁂𑀲𑁂𑀦𑁆𑀢𑁄𑀬𑁂𑀯 𑀑𑀢𑀭𑀺. 𑀅𑀣𑀲𑁆𑀲 𑀧𑀸𑀲𑁄 𑀧𑀸𑀤𑀁 𑀅𑀬𑀧𑀝𑁆𑀝𑀓𑁂𑀦 𑀓𑀟𑁆𑀠𑀦𑁆𑀢𑁄 𑀯𑀺𑀬 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺. 𑀅𑀣𑀲𑁆𑀲 ‘‘𑀙𑀺𑀦𑁆𑀤𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀞𑀫𑀯𑀸𑀭𑁂 𑀘𑀫𑁆𑀫𑀁 𑀙𑀺𑀚𑁆𑀚𑀺, 𑀤𑀼𑀢𑀺𑀬𑀯𑀸𑀭𑁂 𑀫𑀁𑀲𑀁 𑀙𑀺𑀚𑁆𑀚𑀺, 𑀢𑀢𑀺𑀬𑀯𑀸𑀭𑁂 𑀦𑁆𑀳𑀸𑀭𑀼 𑀙𑀺𑀚𑁆𑀚𑀺, 𑀧𑀸𑀲𑁄 𑀅𑀝𑁆𑀞𑀺𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺, 𑀩𑀮𑀯𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼.
𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀩𑀤𑁆𑀥𑀭𑀯𑀁 𑀭𑀯𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸 𑀫𑁂 𑀉𑀢𑁆𑀭𑀲𑁆𑀢𑀸 𑀳𑀼𑀢𑁆𑀯𑀸 𑀕𑁄𑀘𑀭𑀁 𑀅𑀕𑁆𑀕𑀡𑁆𑀳𑀺𑀢𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑀸𑀯 𑀧𑀮𑀸𑀬𑀦𑁆𑀢𑀸 𑀤𑀼𑀩𑁆𑀩𑀮𑀢𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀜𑀸𑀢𑀻𑀦𑀁 𑀬𑀸𑀯𑀤𑀢𑁆𑀣𑀁 𑀘𑀭𑀺𑀢𑁆𑀯𑀸 𑀳𑀁𑀲𑀸𑀦𑀁 𑀓𑀻𑀴𑀦𑀓𑀸𑀮𑁂 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀩𑀤𑁆𑀥𑀭𑀯𑀁 𑀭𑀯𑀺. 𑀢𑀁 𑀲𑀼𑀢𑁆𑀯𑀸 𑀢𑁂 𑀳𑀁𑀲𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀸𑀪𑀺𑀫𑀼𑀔𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀲𑀼𑀫𑀼𑀔𑁄 𑀳𑀁𑀲𑀲𑁂𑀦𑀸𑀧𑀢𑀺 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀤𑀁 𑀪𑀬𑀁 𑀫𑀳𑀸𑀭𑀸𑀚𑀲𑁆𑀲 𑀉𑀧𑁆𑀧𑀦𑁆𑀦𑀁, 𑀚𑀸𑀦𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀳𑀁𑀲𑀕𑀡𑀲𑁆𑀲 𑀅𑀦𑁆𑀢𑀭𑁂 𑀫𑀳𑀸𑀲𑀢𑁆𑀢𑀁 𑀅𑀤𑀺𑀲𑁆𑀯𑀸 𑀫𑀚𑁆𑀛𑀺𑀫𑀳𑀁𑀲𑀕𑀡𑀁 𑀯𑀺𑀘𑀺𑀦𑀺, 𑀢𑀢𑁆𑀣𑀧𑀺 𑀅𑀤𑀺𑀲𑁆𑀯𑀸 𑀧𑀘𑁆𑀙𑀺𑀫𑀳𑀁𑀲𑀕𑀡𑀁 𑀯𑀺𑀘𑀺𑀦𑀺, 𑀢𑀢𑁆𑀣𑀧𑀺 𑀅𑀤𑀺𑀲𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀢𑀲𑁆𑀲𑁂𑀯𑁂𑀤𑀁 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 ¶ 𑀆𑀕𑀘𑁆𑀙𑀦𑁆𑀢𑁄 𑀫𑀳𑀸𑀲𑀢𑁆𑀢𑀁 𑀧𑀸𑀲𑁂 𑀩𑀤𑁆𑀥𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀤𑀼𑀓𑁆𑀔𑀸𑀢𑀼𑀭𑀁 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀅𑀳𑀁 𑀫𑀫 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀼𑀫𑁆𑀳𑁂 𑀧𑀸𑀲𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀑𑀢𑀭𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑁄𑀯 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀯𑀻𑀫𑀁𑀲𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀲𑀼𑀫𑀼𑀔 𑀅𑀦𑀼𑀧𑀘𑀺𑀦𑀦𑁆𑀢𑀸, 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;
𑀕𑀘𑁆𑀙 𑀢𑀼𑀯𑀫𑁆𑀧𑀺 𑀫𑀸 𑀓𑀗𑁆𑀔𑀺, 𑀦𑀢𑁆𑀣𑀺 𑀩𑀤𑁆𑀥𑁂 𑀲𑀳𑀸𑀬𑀢𑀸’’𑀢𑀺.
𑀢𑀢𑁆𑀣 ¶ 𑀅𑀦𑀼𑀧𑀘𑀺𑀦𑀦𑁆𑀢𑀸𑀢𑀺 𑀲𑀺𑀦𑁂𑀳𑁂𑀦 𑀆𑀮𑀬𑀯𑀲𑁂𑀦 𑀅𑀦𑁄𑀮𑁄𑀓𑁂𑀦𑁆𑀢𑀸. 𑀧𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁂 𑀙𑀦𑁆𑀦𑀯𑀼𑀢𑀺 𑀳𑀁𑀲𑀲𑀳𑀲𑁆𑀲𑀸 𑀜𑀸𑀢𑀺𑀯𑀺𑀳𑀗𑁆𑀕𑀫𑀸 𑀫𑀁 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁆𑀯𑀫𑁆𑀧𑀺 𑀕𑀘𑁆𑀙, 𑀫𑀸 𑀇𑀥 𑀯𑀸𑀲𑀁 𑀆𑀓𑀗𑁆𑀔𑀺, 𑀏𑀯𑀜𑁆𑀳𑀺 𑀧𑀸𑀲𑁂𑀦 𑀩𑀤𑁆𑀥𑁂 𑀫𑀬𑀺 𑀲𑀳𑀸𑀬𑀢𑀸 𑀦𑀸𑀫 𑀦𑀢𑁆𑀣𑀺, 𑀦 𑀳𑀺 𑀢𑁂 𑀅𑀳𑀁 𑀇𑀤𑀸𑀦𑀺 𑀓𑀺𑀜𑁆𑀘𑀺 𑀲𑀳𑀸𑀬𑀓𑀺𑀘𑁆𑀘𑀁 𑀓𑀸𑀢𑀼𑀁 ¶ 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀓𑀺𑀁 𑀢𑁂 𑀫𑀬𑀸 𑀦𑀺𑀭𑀽𑀧𑀓𑀸𑀭𑁂𑀦, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀕𑀘𑁆𑀙𑁂𑀯𑀸𑀢𑀺 𑀯𑀤𑀢𑀺.
𑀇𑀢𑁄 𑀧𑀭𑀁 𑁋
‘‘𑀕𑀘𑁆𑀙𑁂 𑀯𑀸𑀳𑀁 𑀦 𑀯𑀸 𑀕𑀘𑁆𑀙𑁂, 𑀦 𑀢𑁂𑀦 𑀅𑀫𑀭𑁄 𑀲𑀺𑀬𑀁;
𑀲𑀼𑀔𑀺𑀢𑀁 𑀢𑀁 𑀉𑀧𑀸𑀲𑀺𑀢𑁆𑀯𑀸, 𑀤𑀼𑀓𑁆𑀔𑀺𑀢𑀁 𑀢𑀁 𑀓𑀣𑀁 𑀚𑀳𑁂.
‘‘𑀫𑀭𑀡𑀁 𑀯𑀸 𑀢𑀬𑀸 𑀲𑀤𑁆𑀥𑀺𑀁, 𑀚𑀻𑀯𑀺𑀢𑀁 𑀯𑀸 𑀢𑀬𑀸 𑀯𑀺𑀦𑀸;
𑀢𑀤𑁂𑀯 𑀫𑀭𑀡𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀢𑀬𑀸 𑀯𑀺𑀦𑀸.
‘‘𑀦𑁂𑀲 𑀥𑀫𑁆𑀫𑁄 𑀫𑀳𑀸𑀭𑀸𑀚, 𑀬𑀁 𑀢𑀁 𑀏𑀯𑀁 𑀕𑀢𑀁 𑀚𑀳𑁂;
𑀬𑀸 𑀕𑀢𑀺 𑀢𑀼𑀬𑁆𑀳𑀁 𑀲𑀸 𑀫𑀬𑁆𑀳𑀁, 𑀭𑀼𑀘𑁆𑀘𑀢𑁂 𑀯𑀺𑀳𑀕𑀸𑀥𑀺𑀧.
‘‘𑀓𑀸 𑀦𑀼 𑀧𑀸𑀲𑁂𑀦 𑀩𑀤𑁆𑀥𑀲𑁆𑀲, 𑀕𑀢𑀺 𑀅𑀜𑁆𑀜𑀸 𑀫𑀳𑀸𑀦𑀲𑀸;
𑀲𑀸 𑀓𑀣𑀁 𑀘𑁂𑀢𑀬𑀸𑀦𑀲𑁆𑀲, 𑀫𑀼𑀢𑁆𑀢𑀲𑁆𑀲 𑀢𑀯 𑀭𑀼𑀘𑁆𑀘𑀢𑀺.
‘‘𑀓𑀁 𑀯𑀸 𑀢𑁆𑀯𑀁 𑀧𑀲𑁆𑀲𑀲𑁂 𑀅𑀢𑁆𑀣𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀧𑀓𑁆𑀔𑀺𑀫;
𑀜𑀸𑀢𑀻𑀦𑀁 𑀯𑀸𑀯𑀲𑀺𑀝𑁆𑀞𑀸𑀦𑀁, 𑀉𑀪𑀺𑀦𑁆𑀦𑀁 𑀚𑀻𑀯𑀺𑀢𑀓𑁆𑀔𑀬𑁂.
‘‘𑀬𑀁 𑀦 𑀓𑀜𑁆𑀘𑀦𑀤𑁂𑀧𑀺𑀜𑁆𑀙, 𑀅𑀦𑁆𑀥𑁂𑀦 𑀢𑀫𑀲𑀸 𑀕𑀢𑀁;
𑀢𑀸𑀤𑀺𑀲𑁂 𑀲𑀜𑁆𑀘𑀚𑀁 𑀧𑀸𑀡𑀁, 𑀓𑀫𑀢𑁆𑀣𑀫𑀪𑀺𑀚𑁄𑀢𑀬𑁂.
‘‘𑀓𑀣𑀁 𑀦𑀼 𑀧𑀢𑀢𑀁 𑀲𑁂𑀝𑁆𑀞, 𑀥𑀫𑁆𑀫𑁂 𑀅𑀢𑁆𑀣𑀁 𑀦 𑀩𑀼𑀚𑁆𑀛𑀲𑀺;
𑀥𑀫𑁆𑀫𑁄 𑀅𑀧𑀘𑀺𑀢𑁄 𑀲𑀦𑁆𑀢𑁄, 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 𑀧𑀸𑀡𑀺𑀦𑀁.
‘‘𑀲𑁄𑀳𑀁 ¶ ¶ 𑀥𑀫𑁆𑀫𑀁 𑀅𑀧𑁂𑀓𑁆𑀔𑀸𑀦𑁄, 𑀥𑀫𑁆𑀫𑀸 𑀘𑀢𑁆𑀣𑀁 𑀲𑀫𑀼𑀝𑁆𑀞𑀺𑀢𑀁;
𑀪𑀢𑁆𑀢𑀺𑀜𑁆𑀘 𑀢𑀬𑀺 𑀲𑀫𑁆𑀧𑀲𑁆𑀲𑀁, 𑀦𑀸𑀯𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁.
𑁧𑁦. ‘‘𑀅𑀤𑁆𑀥𑀸 𑀏𑀲𑁄 𑀲𑀢𑀁 𑀥𑀫𑁆𑀫𑁄, 𑀬𑁄 𑀫𑀺𑀢𑁆𑀢𑁄 𑀫𑀺𑀢𑁆𑀢𑀫𑀸𑀧𑀤𑁂.
𑀦 𑀘𑀚𑁂 𑀚𑀻𑀯𑀺𑀢𑀲𑁆𑀲𑀸𑀧𑀺, 𑀳𑁂𑀢𑀼𑀥𑀫𑁆𑀫𑀫𑀦𑀼𑀲𑁆𑀲𑀭𑀁.
‘‘𑀲𑁆𑀯𑀸𑀬𑀁 𑀥𑀫𑁆𑀫𑁄 𑀘 𑀢𑁂 𑀘𑀺𑀡𑁆𑀡𑁄, 𑀪𑀢𑁆𑀢𑀺 𑀘 𑀯𑀺𑀤𑀺𑀢𑀸 𑀫𑀬𑀺;
𑀓𑀸𑀫𑀁 𑀓𑀭𑀲𑁆𑀲𑀼 𑀫𑀬𑁆𑀳𑁂𑀢𑀁, 𑀕𑀘𑁆𑀙𑁂𑀯𑀸𑀦𑀼𑀫𑀢𑁄 𑀫𑀬𑀸.
‘‘𑀅𑀧𑀺 𑀢𑁆𑀯𑁂𑀯𑀁 𑀕𑀢𑁂 𑀓𑀸𑀮𑁂, 𑀬𑀁 𑀔𑀡𑁆𑀟𑀁 𑀜𑀸𑀢𑀺𑀦𑀁 𑀫𑀬𑀸;
𑀢𑀬𑀸 𑀢𑀁 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀁, 𑀅𑀲𑁆𑀲 𑀧𑀭𑀫𑀲𑀁𑀯𑀼𑀢𑀁.
‘‘𑀇𑀘𑁆𑀘𑁂𑀯𑀁 ¶ 𑀫𑀦𑁆𑀢𑀬𑀦𑁆𑀢𑀸𑀦𑀁, 𑀅𑀭𑀺𑀬𑀸𑀦𑀁 𑀅𑀭𑀺𑀬𑀯𑀼𑀢𑁆𑀢𑀺𑀦𑀁;
𑀧𑀘𑁆𑀘𑀤𑀺𑀲𑁆𑀲𑀣 𑀦𑁂𑀲𑀸𑀤𑁄, 𑀆𑀢𑀼𑀭𑀸𑀦𑀫𑀺𑀯𑀦𑁆𑀢𑀓𑁄.
‘‘𑀢𑁂 𑀲𑀢𑁆𑀢𑀼𑀫𑀪𑀺𑀲𑀜𑁆𑀘𑀺𑀓𑁆𑀔, 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸 𑀤𑀺𑀚𑀸;
𑀢𑀼𑀡𑁆𑀳𑀻𑀫𑀸𑀲𑀺𑀢𑁆𑀣 𑀉𑀪𑀬𑁄, 𑀦 𑀲𑀜𑁆𑀘𑀮𑁂𑀲𑀼𑀫𑀸𑀲𑀦𑀸.
‘‘𑀥𑀢𑀭𑀝𑁆𑀞𑁂 𑀘 𑀤𑀺𑀲𑁆𑀯𑀸𑀦, 𑀲𑀫𑀼𑀟𑁆𑀟𑁂𑀦𑁆𑀢𑁂 𑀢𑀢𑁄 𑀢𑀢𑁄;
𑀅𑀪𑀺𑀓𑁆𑀔𑀫𑀣 𑀯𑁂𑀕𑁂𑀦, 𑀤𑀺𑀚𑀲𑀢𑁆𑀢𑀼 𑀤𑀺𑀚𑀸𑀥𑀺𑀧𑁂.
‘‘𑀲𑁄 𑀘 𑀯𑁂𑀕𑁂𑀦𑀪𑀺𑀓𑁆𑀓𑀫𑁆𑀫, 𑀆𑀲𑀚𑁆𑀚 𑀧𑀭𑀫𑁂 𑀤𑀺𑀚𑁂;
𑀧𑀘𑁆𑀘𑀓𑀫𑀺𑀢𑁆𑀣 𑀦𑁂𑀲𑀸𑀤𑁄, 𑀩𑀤𑁆𑀥𑀸 𑀇𑀢𑀺 𑀯𑀺𑀘𑀺𑀦𑁆𑀢𑀬𑀁.
‘‘𑀏𑀓𑀁𑀯 𑀩𑀤𑁆𑀥𑀫𑀸𑀲𑀻𑀦𑀁, 𑀅𑀩𑀤𑁆𑀥𑀜𑁆𑀘 𑀧𑀼𑀦𑀸𑀧𑀭𑀁;
𑀆𑀲𑀚𑁆𑀚 𑀩𑀤𑁆𑀥𑀫𑀸𑀲𑀻𑀦𑀁, 𑀧𑁂𑀓𑁆𑀔𑀫𑀸𑀦𑀫𑀤𑀻𑀦𑀯𑀁.
‘‘𑀢𑀢𑁄 𑀲𑁄 𑀯𑀺𑀫𑀢𑁄𑀬𑁂𑀯, 𑀧𑀡𑁆𑀟𑀭𑁂 𑀅𑀚𑁆𑀛𑀪𑀸𑀲𑀣;
𑀧𑀯𑀟𑁆𑀠𑀓𑀸𑀬𑁂 𑀆𑀲𑀻𑀦𑁂, 𑀤𑀺𑀚𑀲𑀗𑁆𑀖𑀕𑀡𑀸𑀥𑀺𑀧𑁂.
‘‘𑀬𑀁 ¶ 𑀦𑀼 𑀧𑀸𑀲𑁂𑀦 𑀫𑀳𑀢𑀸, 𑀩𑀤𑁆𑀥𑁄 𑀦 𑀓𑀼𑀭𑀼𑀢𑁂 𑀤𑀺𑀲𑀁;
𑀅𑀣 𑀓𑀲𑁆𑀫𑀸 𑀅𑀩𑀤𑁆𑀥𑁄 𑀢𑁆𑀯𑀁, 𑀩𑀮𑀻 𑀧𑀓𑁆𑀔𑀺 𑀦 𑀕𑀘𑁆𑀙𑀲𑀺.
‘‘𑀓𑀺𑀁 𑀦𑀼 𑀢𑁆𑀬𑀸𑀬𑀁 𑀤𑀺𑀚𑁄 𑀳𑁄𑀢𑀺, 𑀫𑀼𑀢𑁆𑀢𑁄 𑀩𑀤𑁆𑀥𑀁 𑀉𑀧𑀸𑀲𑀲𑀺;
𑀑𑀳𑀸𑀬 𑀲𑀓𑀼𑀡𑀸 𑀬𑀦𑁆𑀢𑀺, 𑀓𑀺𑀁 𑀏𑀓𑁄 𑀅𑀯𑀳𑀻𑀬𑀲𑀺.
‘‘𑀭𑀸𑀚𑀸 𑀫𑁂 𑀲𑁄 𑀤𑀺𑀚𑀸𑀫𑀺𑀢𑁆𑀢, 𑀲𑀔𑀸 𑀧𑀸𑀡𑀲𑀫𑁄 𑀘 𑀫𑁂;
𑀦𑁂𑀯 𑀦𑀁 𑀯𑀺𑀚𑀳𑀺𑀲𑁆𑀲𑀸𑀫𑀺, 𑀬𑀸𑀯 𑀓𑀸𑀮𑀲𑁆𑀲 𑀧𑀭𑀺𑀬𑀸𑀬𑀁.
‘‘𑀓𑀣𑀁 ¶ 𑀧𑀦𑀸𑀬𑀁 𑀯𑀺𑀳𑀗𑁆𑀕𑁄, 𑀦𑀸𑀤𑁆𑀤𑀲 𑀧𑀸𑀲𑀫𑁄𑀟𑁆𑀟𑀺𑀢𑀁;
𑀧𑀤𑀜𑁆𑀳𑁂𑀢𑀁 𑀫𑀳𑀦𑁆𑀢𑀸𑀦𑀁, 𑀩𑁄𑀤𑁆𑀥𑀼𑀫𑀭𑀳𑀦𑁆𑀢𑀺 𑀆𑀧𑀤𑀁.
‘‘𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;
𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀺.
‘‘𑀅𑀧𑀺 𑀢𑁆𑀯𑁂𑀯 𑀫𑀳𑀸𑀧𑀜𑁆𑀜, 𑀧𑀸𑀲𑀸 𑀩𑀳𑀼𑀯𑀺𑀥𑀸 𑀢𑀢𑀸;
𑀕𑀼𑀬𑁆𑀳𑀫𑀸𑀲𑀚𑁆𑀚 𑀩𑀚𑁆𑀛𑀦𑁆𑀢𑀺, 𑀅𑀣𑁂𑀯𑀁 𑀚𑀻𑀯𑀺𑀢𑀓𑁆𑀔𑀬𑁂’’𑀢𑀺. 𑁋
𑀇𑀫𑀸𑀲𑀁 𑀕𑀸𑀣𑀸𑀦𑀁 𑀲𑀫𑁆𑀩𑀦𑁆𑀥𑁄 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.
𑀢𑀢𑁆𑀣 ¶ 𑀕𑀘𑁆𑀙𑁂 𑀯𑀸𑀢𑀺, 𑀫𑀳𑀸𑀭𑀸𑀚, 𑀅𑀳𑀁 𑀇𑀢𑁄 𑀕𑀘𑁆𑀙𑁂𑀬𑁆𑀬𑀁 𑀯𑀸 𑀦 𑀯𑀸, 𑀦𑀸𑀳𑀁 𑀢𑁂𑀦 𑀕𑀫𑀦𑁂𑀦 𑀯𑀸 𑀅𑀕𑀫𑀦𑁂𑀦 𑀯𑀸 𑀅𑀫𑀭𑁄 𑀲𑀺𑀬𑀁, 𑀅𑀳𑀜𑁆𑀳𑀺 𑀇𑀢𑁄 𑀕𑀢𑁄𑀧𑀺 𑀅𑀕𑀢𑁄𑀧𑀺 𑀫𑀭𑀡𑀢𑁄 𑀅𑀫𑀼𑀢𑁆𑀢𑁄𑀯, 𑀇𑀢𑁄 𑀧𑀼𑀩𑁆𑀩𑁂 𑀧𑀦 𑀲𑀼𑀔𑀺𑀢𑀁 𑀢𑀁 𑀉𑀧𑀸𑀲𑀺𑀢𑁆𑀯𑀸 𑀇𑀤𑀸𑀦𑀺 𑀤𑀼𑀓𑁆𑀔𑀺𑀢𑀁 𑀢𑀁 𑀓𑀣𑀁 𑀚𑀳𑁂𑀬𑁆𑀬𑀦𑁆𑀢𑀺 𑀯𑀤𑀢𑀺. 𑀫𑀭𑀡𑀁 𑀯𑀸𑀢𑀺 𑀫𑀫 𑀅𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀢𑀬𑀸 𑀲𑀤𑁆𑀥𑀺𑀁 𑀫𑀭𑀡𑀁 𑀪𑀯𑁂𑀬𑁆𑀬, 𑀕𑀘𑁆𑀙𑀦𑁆𑀢𑀲𑁆𑀲 𑀯𑀸 𑀢𑀬𑀸 𑀯𑀺𑀦𑀸 𑀚𑀻𑀯𑀺𑀢𑀁. 𑀢𑁂𑀲𑀼 𑀤𑁆𑀯𑀻𑀲𑀼 𑀬𑀁 𑀢𑀬𑀸 𑀲𑀤𑁆𑀥𑀺𑀁 𑀫𑀭𑀡𑀁, 𑀢𑀤𑁂𑀯 𑀫𑁂 𑀯𑀭𑀁, 𑀬𑀁 𑀢𑀬𑀸 𑀯𑀺𑀦𑀸 𑀚𑀻𑀯𑁂𑀬𑁆𑀬𑀁, 𑀦 𑀫𑁂 𑀢𑀁 𑀯𑀭𑀦𑁆𑀢𑀺 𑀅𑀢𑁆𑀣𑁄. 𑀭𑀼𑀘𑁆𑀘𑀢𑁂𑀢𑀺 𑀬𑀸 𑀢𑀯 𑀕𑀢𑀺 𑀦𑀺𑀧𑁆𑀨𑀢𑁆𑀢𑀺, 𑀲𑀸𑀯 𑀫𑀬𑁆𑀳𑀁 𑀭𑀼𑀘𑁆𑀘𑀢𑀺. 𑀲𑀸 𑀓𑀣𑀦𑁆𑀢𑀺 𑀲𑀫𑁆𑀫 𑀲𑀼𑀫𑀼𑀔 𑀫𑀫 𑀢𑀸𑀯 𑀤𑀴𑁆𑀳𑁂𑀦 𑀯𑀸𑀮𑀧𑀸𑀲𑁂𑀦 𑀩𑀤𑁆𑀥𑀲𑁆𑀲 𑀧𑀭𑀳𑀢𑁆𑀣𑀁 𑀕𑀢𑀲𑁆𑀲 𑀲𑀸 𑀕𑀢𑀺 𑀭𑀼𑀘𑁆𑀘𑀢𑀼, 𑀢𑀯 𑀧𑀦 𑀘𑁂𑀢𑀬𑀸𑀦𑀲𑁆𑀲 𑀲𑀘𑁂𑀢𑀦𑀲𑁆𑀲 𑀧𑀜𑁆𑀜𑀯𑀢𑁄 𑀫𑀼𑀢𑁆𑀢𑀲𑁆𑀲 𑀓𑀣𑀁 𑀭𑀼𑀘𑁆𑀘𑀢𑀺.
𑀧𑀓𑁆𑀔𑀺𑀫𑀸𑀢𑀺 𑀧𑀓𑁆𑀔𑀲𑀫𑁆𑀧𑀦𑁆𑀦. 𑀉𑀪𑀺𑀦𑁆𑀦𑀦𑁆𑀢𑀺 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀚𑀻𑀯𑀺𑀢𑀓𑁆𑀔𑀬𑁂 𑀲𑀢𑀺 𑀢𑁆𑀯𑀁 𑀫𑀫 𑀯𑀸 𑀢𑀯 ¶ 𑀯𑀸 𑀅𑀯𑀲𑀺𑀝𑁆𑀞𑀜𑀸𑀢𑀻𑀦𑀁 𑀯𑀸 𑀓𑀁 𑀅𑀢𑁆𑀣𑀁 𑀧𑀲𑁆𑀲𑀲𑀺. 𑀬𑀁 𑀦𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀉𑀧𑀫𑀸𑀦𑁂. 𑀓𑀜𑁆𑀘𑀦𑀤𑁂𑀧𑀺𑀜𑁆𑀙𑀸𑀢𑀺 𑀓𑀜𑁆𑀘𑀦𑀤𑁆𑀯𑁂𑀧𑀺𑀜𑁆𑀙, 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀓𑀜𑁆𑀘𑀦𑀲𑀤𑀺𑀲𑀉𑀪𑀬𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀢𑀫𑀲𑀸𑀢𑀺 𑀢𑀫𑀲𑀺. 𑀕𑀢𑀦𑁆𑀢𑀺 𑀓𑀢𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀧𑀼𑀭𑀺𑀫𑀲𑁆𑀲 𑀦-𑀓𑀸𑀭𑀲𑁆𑀲 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, ‘‘𑀦 𑀓𑀢’’𑀦𑁆𑀢𑀺 𑀓𑀢𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀬𑀺 𑀧𑀸𑀡𑀁 𑀘𑀚𑀦𑁆𑀢𑁂𑀧𑀺 𑀅𑀘𑀚𑀦𑁆𑀢𑁂𑀧𑀺 𑀫𑀫 𑀚𑀻𑀯𑀺𑀢𑀲𑁆𑀲 𑀅𑀪𑀸𑀯𑀸 𑀬𑀁 𑀢𑀯 𑀧𑀸𑀡𑀲𑀜𑁆𑀘𑀚𑀦𑀁, 𑀢𑀁 𑀅𑀦𑁆𑀥𑁂𑀦 𑀢𑀫𑀲𑀺 𑀓𑀢𑀁 𑀯𑀺𑀬 𑀓𑀺𑀜𑁆𑀘𑀺𑀤𑁂𑀯 𑀭𑀽𑀧𑀓𑀫𑁆𑀫𑀁 𑀅𑀧𑀘𑁆𑀘𑀓𑁆𑀔𑀕𑀼𑀡𑀁, 𑀢𑀸𑀤𑀺𑀲𑁂 𑀢𑀯 𑀅𑀧𑀘𑁆𑀘𑀓𑁆𑀔𑀕𑀼𑀡𑁂 𑀧𑀸𑀡𑀲𑀜𑁆𑀘𑀚𑀦𑁂 𑀢𑁆𑀯𑀁 𑀧𑀸𑀡𑀁 𑀲𑀜𑁆𑀘𑀚𑀦𑁆𑀢𑁄 𑀓𑀫𑀢𑁆𑀣𑀁 𑀚𑁄𑀢𑁂𑀬𑁆𑀬𑀸𑀲𑀻𑀢𑀺.
𑀥𑀫𑁆𑀫𑁄 𑀅𑀧𑀘𑀺𑀢𑁄 𑀲𑀦𑁆𑀢𑁄𑀢𑀺 𑀥𑀫𑁆𑀫𑁄 𑀧𑀽𑀚𑀺𑀢𑁄 𑀫𑀸𑀦𑀺𑀢𑁄 𑀲𑀫𑀸𑀦𑁄. 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀧𑁂𑀓𑁆𑀔𑀸𑀦𑁄𑀢𑀺 𑀅𑀧𑁂𑀓𑁆𑀔𑀦𑁆𑀢𑁄. 𑀥𑀫𑁆𑀫𑀸 𑀘𑀢𑁆𑀣𑀦𑁆𑀢𑀺 𑀥𑀫𑁆𑀫𑀢𑁄 𑀘 𑀅𑀢𑁆𑀣𑀁 𑀲𑀫𑀼𑀝𑁆𑀞𑀺𑀢𑀁 𑀧𑀲𑁆𑀲𑀦𑁆𑀢𑁄 ¶ . 𑀪𑀢𑁆𑀢𑀺𑀦𑁆𑀢𑀺 𑀲𑀺𑀦𑁂𑀳𑀁. 𑀲𑀢𑀁 𑀥𑀫𑁆𑀫𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀲𑀪𑀸𑀯𑁄. 𑀬𑁄 𑀫𑀺𑀢𑁆𑀢𑁄𑀢𑀺 𑀬𑁄 𑀫𑀺𑀢𑁆𑀢𑁄 𑀆𑀧𑀤𑀸𑀲𑀼 𑀫𑀺𑀢𑁆𑀢𑀁 𑀦 𑀘𑀚𑁂, 𑀢𑀲𑁆𑀲 𑀅𑀘𑀚𑀦𑁆𑀢𑀲𑁆𑀲 𑀫𑀺𑀢𑁆𑀢𑀲𑁆𑀲 𑀏𑀲 𑀲𑀪𑀸𑀯𑁄 𑀦𑀸𑀫 𑀅𑀤𑁆𑀥𑀸 𑀲𑀢𑀁 𑀥𑀫𑁆𑀫𑁄. 𑀯𑀺𑀤𑀺𑀢𑀸𑀢𑀺 𑀧𑀸𑀓𑀝𑀸 𑀚𑀸𑀢𑀸. 𑀓𑀸𑀫𑀁 𑀓𑀭𑀲𑁆𑀲𑀽𑀢𑀺 𑀏𑀢𑀁 𑀫𑀫 𑀓𑀸𑀫𑀁 𑀫𑀬𑀸 𑀇𑀘𑁆𑀙𑀺𑀢𑀁 𑀫𑀫 𑀯𑀘𑀦𑀁 𑀓𑀭𑀲𑁆𑀲𑀼. 𑀅𑀧𑀺 𑀢𑁆𑀯𑁂𑀯𑀁 𑀕𑀢𑁂 𑀓𑀸𑀮𑁂𑀢𑀺 𑀅𑀧𑀺 𑀢𑀼 𑀏𑀯𑀁 𑀕𑀢𑁂 𑀓𑀸𑀮𑁂 𑀫𑀬𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀲𑁂𑀦 𑀩𑀤𑁆𑀥𑁂. 𑀧𑀭𑀫𑀲𑀁𑀯𑀼𑀢𑀦𑁆𑀢𑀺 𑀧𑀭𑀫𑀧𑀭𑀺𑀧𑀼𑀡𑁆𑀡𑀁.
𑀇𑀘𑁆𑀘𑁂𑀯𑀁 𑀫𑀦𑁆𑀢𑀬𑀦𑁆𑀢𑀸𑀦𑀦𑁆𑀢𑀺 ‘‘𑀕𑀘𑁆𑀙, 𑀦 𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀓𑀣𑁂𑀦𑁆𑀢𑀸𑀦𑀁 𑀅𑀭𑀺𑀬𑀸𑀦𑀦𑁆𑀢𑀺 𑀆𑀘𑀸𑀭𑀅𑀭𑀺𑀬𑀸𑀦𑀁. 𑀧𑀘𑁆𑀘𑀤𑀺𑀲𑁆𑀲𑀣𑀸𑀢𑀺 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀭𑀢𑁆𑀢𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 ¶ 𑀫𑀼𑀕𑁆𑀕𑀭𑀁 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑁄 𑀅𑀤𑀺𑀲𑁆𑀲𑀣. 𑀆𑀢𑀼𑀭𑀸𑀦𑀦𑁆𑀢𑀺 𑀕𑀺𑀮𑀸𑀦𑀸𑀦𑀁 𑀫𑀘𑁆𑀘𑀼 𑀯𑀺𑀬. 𑀅𑀪𑀺𑀲𑀜𑁆𑀘𑀺𑀓𑁆𑀔𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑁂 𑀉𑀪𑁄𑀧𑀺 𑀲𑀢𑁆𑀢𑀼𑀁 𑀆𑀬𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸. 𑀳𑀺𑀢𑀸𑀢𑀺 𑀤𑀻𑀖𑀭𑀢𑁆𑀢𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀸 𑀫𑀼𑀤𑀼𑀘𑀺𑀢𑁆𑀢𑀸. 𑀦 𑀲𑀜𑁆𑀘𑀮𑁂𑀲𑀼𑀫𑀸𑀲𑀦𑀸𑀢𑀺 𑀆𑀲𑀦𑀢𑁄 𑀦 𑀘𑀮𑀺𑀁𑀲𑀼, 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀅𑀳𑁂𑀲𑀼𑀁. 𑀲𑀼𑀫𑀼𑀔𑁄 𑀧𑀦 ‘‘𑀅𑀬𑀁 𑀦𑁂𑀲𑀸𑀤𑁄 𑀆𑀕𑀦𑁆𑀢𑁆𑀯𑀸 𑀧𑀳𑀭𑀦𑁆𑀢𑁄 𑀫𑀁 𑀧𑀞𑀫𑀁 𑀧𑀳𑀭𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀧𑀘𑁆𑀙𑀢𑁄 𑀓𑀢𑁆𑀯𑀸 𑀦𑀺𑀲𑀻𑀤𑀺.
𑀥𑀢𑀭𑀝𑁆𑀞𑁂𑀢𑀺 𑀳𑀁𑀲𑁂. 𑀲𑀫𑀼𑀟𑁆𑀟𑁂𑀦𑁆𑀢𑁂𑀢𑀺 𑀫𑀭𑀡𑀪𑀬𑁂𑀦 𑀇𑀢𑁄 𑀘𑀺𑀢𑁄 𑀘 𑀉𑀧𑁆𑀧𑀢𑀦𑁆𑀢𑁂 𑀤𑀺𑀲𑁆𑀯𑀸. 𑀆𑀲𑀚𑁆𑀚𑀸𑀢𑀺 𑀇𑀢𑀭𑁂 𑀤𑁆𑀯𑁂 𑀚𑀦𑁂 𑀉𑀧𑀕𑀦𑁆𑀢𑁆𑀯𑀸. 𑀧𑀘𑁆𑀘𑀓𑀫𑀺𑀢𑁆𑀣𑀸𑀢𑀺 ‘‘𑀩𑀤𑁆𑀥𑀸, 𑀦 𑀩𑀤𑁆𑀥𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀧𑀥𑀸𑀭𑁂𑀦𑁆𑀢𑁄 𑀅𑀓𑀫𑀺𑀢𑁆𑀣, 𑀯𑁂𑀕𑀁 𑀳𑀸𑀧𑁂𑀢𑁆𑀯𑀸 𑀲𑀡𑀺𑀓𑀁 𑀅𑀕𑀫𑀸𑀲𑀺. 𑀆𑀲𑀚𑁆𑀚 𑀩𑀤𑁆𑀥𑀫𑀸𑀲𑀻𑀦𑀦𑁆𑀢𑀺 𑀩𑀤𑁆𑀥𑀁 𑀫𑀳𑀸𑀲𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀲𑀼𑀫𑀼𑀔𑀁. 𑀅𑀤𑀻𑀦𑀯𑀦𑁆𑀢𑀺𑀆𑀤𑀻𑀦𑀯𑀫𑁂𑀯 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑀁 𑀤𑀺𑀲𑁆𑀯𑀸. 𑀯𑀺𑀫𑀢𑁄𑀢𑀺 𑀓𑀺𑀁 𑀦𑀼 𑀔𑁄 𑀅𑀩𑀤𑁆𑀥𑁄 𑀩𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄, 𑀓𑀸𑀭𑀡𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀯𑀺𑀫𑀢𑀺𑀚𑀸𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀭𑁂𑀢𑀺 𑀳𑀁𑀲𑁂, 𑀅𑀣 𑀯𑀸 𑀧𑀭𑀺𑀲𑀼𑀤𑁆𑀥𑁂 𑀦𑀺𑀫𑁆𑀫𑀮𑁂, 𑀲𑀫𑁆𑀧𑀳𑀝𑁆𑀞𑀓𑀜𑁆𑀘𑀦𑀯𑀡𑁆𑀡𑁂𑀢𑀺 𑀅𑀢𑁆𑀣𑁄. 𑀧𑀯𑀟𑁆𑀠𑀓𑀸𑀬𑁂𑀢𑀺 𑀯𑀟𑁆𑀠𑀺𑀢𑀓𑀸𑀬𑁂 ¶ 𑀫𑀳𑀸𑀲𑀭𑀻𑀭𑁂. 𑀬𑀁 𑀦𑀽𑀢𑀺 𑀬𑀁 𑀢𑀸𑀯 𑀏𑀲𑁄 𑀫𑀳𑀸𑀧𑀸𑀲𑁂𑀦 𑀩𑀤𑁆𑀥𑁄. 𑀦 𑀓𑀼𑀭𑀼𑀢𑁂 𑀤𑀺𑀲𑀦𑁆𑀢𑀺 𑀧𑀮𑀸𑀬𑀦𑀢𑁆𑀣𑀸𑀬 𑀏𑀓𑀁 𑀤𑀺𑀲𑀁 𑀦 𑀪𑀚𑀢𑀺, 𑀢𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀮𑀻𑀢𑀺 𑀩𑀮𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺. 𑀧𑀓𑁆𑀔𑀻𑀢𑀺 𑀢𑀁 𑀆𑀮𑀧𑀢𑀺. 𑀑𑀳𑀸𑀬𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀬𑀦𑁆𑀢𑀻𑀢𑀺 𑀲𑁂𑀲𑀲𑀓𑀼𑀡𑀸 𑀕𑀘𑁆𑀙𑀦𑁆𑀢𑀺. 𑀅𑀯𑀳𑀻𑀬𑀲𑀻𑀢𑀺 𑀑𑀳𑀻𑀬𑀲𑀺.
𑀤𑀺𑀚𑀸𑀫𑀺𑀢𑁆𑀢𑀸𑀢𑀺 𑀤𑀺𑀚𑀸𑀦𑀁 𑀅𑀫𑀺𑀢𑁆𑀢. 𑀬𑀸𑀯 𑀓𑀸𑀮𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀺 𑀬𑀸𑀯 𑀫𑀭𑀡𑀲𑁆𑀲 𑀯𑀸𑀭𑁄 𑀆𑀕𑀘𑁆𑀙𑀢𑀺. 𑀓𑀣𑀁 𑀧𑀦𑀸𑀬𑀦𑁆𑀢𑀺 𑀢𑁆𑀯𑀁 𑀭𑀸𑀚𑀸 𑀫𑁂 𑀲𑁄𑀢𑀺 𑀯𑀤𑀲𑀺, 𑀭𑀸𑀚𑀸𑀦𑁄 𑀘 𑀦𑀸𑀫 𑀧𑀡𑁆𑀟𑀺𑀢𑀸 𑀳𑁄𑀦𑁆𑀢𑀺, 𑀇𑀢𑀺𑀧𑀺 𑀧𑀡𑁆𑀟𑀺𑀢𑁄 𑀲𑀫𑀸𑀦𑁄 𑀓𑁂𑀦 𑀓𑀸𑀭𑀡𑁂𑀦 𑀑𑀟𑁆𑀟𑀺𑀢𑀁 𑀧𑀸𑀲𑀁 𑀦 𑀅𑀤𑁆𑀤𑀲. 𑀧𑀤𑀁 𑀳𑁂𑀢𑀦𑁆𑀢𑀺 𑀬𑀲𑀫𑀳𑀢𑁆𑀢𑀁 𑀯𑀸 𑀜𑀸𑀡𑀫𑀳𑀢𑁆𑀢𑀁 𑀯𑀸 𑀧𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀆𑀧𑀤𑀩𑀼𑀚𑁆𑀛𑀦𑀁 𑀦𑀸𑀫 𑀧𑀤𑀁 𑀓𑀸𑀭𑀡𑀁, 𑀢𑀲𑁆𑀫𑀸 𑀢𑁂 𑀆𑀧𑀤𑀁 𑀩𑁄𑀤𑁆𑀥𑀼𑀫𑀭𑀳𑀦𑁆𑀢𑀺. 𑀧𑀭𑀸𑀪𑀯𑁄𑀢𑀺 𑀅𑀯𑀟𑁆𑀠𑀺. 𑀆𑀲𑀚𑁆𑀚𑀸𑀧𑀻𑀢𑀺 𑀉𑀧𑀕𑀦𑁆𑀢𑁆𑀯𑀸𑀧𑀺 𑀦 𑀩𑀼𑀚𑁆𑀛𑀢𑀺. 𑀢𑀢𑀸𑀢𑀺 𑀯𑀺𑀢𑀢𑀸 𑀑𑀟𑁆𑀟𑀺𑀢𑀸. 𑀕𑀼𑀬𑁆𑀳𑀫𑀸𑀲𑀚𑁆𑀚𑀸𑀢𑀺 𑀢𑁂𑀲𑀼 𑀧𑀸𑀲𑁂𑀲𑀼 𑀬𑁄 𑀕𑀼𑀴𑁆𑀳𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀸𑀲𑁄, 𑀢𑀁 𑀆𑀲𑀚𑁆𑀚 𑀩𑀚𑁆𑀛𑀦𑁆𑀢𑀺. 𑀅𑀣𑁂𑀯𑀦𑁆𑀢𑀺 𑀅𑀣 𑀏𑀯𑀁 𑀚𑀻𑀯𑀺𑀢𑀓𑁆𑀔𑀬𑁂 𑀩𑀚𑁆𑀛𑀦𑁆𑀢𑁂𑀯𑀸𑀢𑀺 𑀅𑀢𑁆𑀣𑁄.
𑀇𑀢𑀺 ¶ 𑀦𑀁 𑀲𑁄 𑀓𑀣𑀸𑀲𑀮𑁆𑀮𑀸𑀧𑁂𑀦 𑀫𑀼𑀤𑀼𑀳𑀤𑀬𑀁 𑀓𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀚𑀻𑀯𑀺𑀢𑀁 𑀬𑀸𑀘𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀧𑀺 ¶ 𑀦𑀸𑀬𑀁 𑀢𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀲𑁆𑀲 𑀲𑀼𑀔𑀼𑀤𑁆𑀭𑀬𑁄;
𑀅𑀧𑀺 𑀦𑁄 𑀅𑀦𑀼𑀫𑀜𑁆𑀜𑀸𑀲𑀺, 𑀅𑀧𑀺 𑀦𑁄 𑀚𑀻𑀯𑀺𑀢𑀁 𑀤𑀤𑁂’’𑀢𑀺.
𑀢𑀢𑁆𑀣 𑀅𑀧𑀺 𑀦𑀸𑀬𑀦𑁆𑀢𑀺 𑀅𑀧𑀺 𑀦𑀼 𑀅𑀬𑀁. 𑀲𑀼𑀔𑀼𑀤𑁆𑀭𑀬𑁄𑀢𑀺 𑀲𑀼𑀔𑀨𑀮𑁄. 𑀅𑀧𑀺 𑀦𑁄 𑀅𑀦𑀼𑀫𑀜𑁆𑀜𑀸𑀲𑀻𑀢𑀺 𑀘𑀺𑀢𑁆𑀢𑀓𑀽𑀝𑀁 𑀕𑀦𑁆𑀢𑁆𑀯𑀸 𑀜𑀸𑀢𑀓𑁂 𑀧𑀲𑁆𑀲𑀺𑀢𑀼𑀁 𑀢𑁆𑀯𑀁 𑀅𑀧𑀺 𑀦𑁄 𑀅𑀦𑀼𑀚𑀸𑀦𑁂𑀬𑁆𑀬𑀸𑀲𑀺. 𑀅𑀧𑀺 𑀦𑁄 𑀚𑀻𑀯𑀺𑀢𑀁 𑀤𑀤𑁂𑀢𑀺 𑀅𑀧𑀺 𑀦𑁄 𑀇𑀫𑀸𑀬 𑀓𑀣𑀸𑀬 𑀉𑀧𑁆𑀧𑀦𑁆𑀦𑀯𑀺𑀲𑁆𑀲𑀸𑀲𑁄 𑀦 𑀫𑀸𑀭𑁂𑀬𑁆𑀬𑀸𑀲𑀻𑀢𑀺.
𑀲𑁄 𑀢𑀲𑁆𑀲 𑀫𑀥𑀼𑀭𑀓𑀣𑀸𑀬 𑀩𑀚𑁆𑀛𑀺𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀦 𑀘𑁂𑀯 𑀫𑁂 𑀢𑁆𑀯𑀁 𑀩𑀤𑁆𑀥𑁄𑀲𑀺, 𑀦𑀧𑀺 𑀇𑀘𑁆𑀙𑀸𑀫𑀺 𑀢𑁂 𑀯𑀥𑀁;
𑀓𑀸𑀫𑀁 𑀔𑀺𑀧𑁆𑀧𑀫𑀺𑀢𑁄 𑀕𑀦𑁆𑀢𑁆𑀯𑀸, 𑀚𑀻𑀯 𑀢𑁆𑀯𑀁 𑀅𑀦𑀺𑀖𑁄 𑀘𑀺𑀭’’𑀦𑁆𑀢𑀺.
𑀢𑀢𑁄 𑀲𑀼𑀫𑀼𑀔𑁄 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀦𑁂𑀯𑀸𑀳𑀫𑁂𑀢𑀫𑀺𑀘𑁆𑀙𑀸𑀫𑀺 ¶ , 𑀅𑀜𑁆𑀜𑀢𑁆𑀭𑁂𑀢𑀲𑁆𑀲 𑀚𑀻𑀯𑀺𑀢𑀸;
𑀲𑀘𑁂 𑀏𑀓𑁂𑀦 𑀢𑀼𑀝𑁆𑀞𑁄𑀲𑀺, 𑀫𑀼𑀜𑁆𑀘𑁂𑀢𑀁 𑀫𑀜𑁆𑀘 𑀪𑀓𑁆𑀔𑀬.
‘‘𑀆𑀭𑁄𑀳𑀧𑀭𑀺𑀡𑀸𑀳𑁂𑀦, 𑀢𑀼𑀮𑁆𑀬𑀸𑀲𑁆𑀫𑀸 𑀯𑀬𑀲𑀸 𑀉𑀪𑁄;
𑀦 𑀢𑁂 𑀮𑀸𑀪𑁂𑀦 𑀚𑀻𑀯𑀢𑁆𑀣𑀺, 𑀏𑀢𑁂𑀦 𑀦𑀺𑀫𑀺𑀦𑀸 𑀢𑀼𑀯𑀁.
‘‘𑀢𑀤𑀺𑀗𑁆𑀖 𑀲𑀫𑀧𑁂𑀓𑁆𑀔𑀲𑁆𑀲𑀼, 𑀳𑁄𑀢𑀼 𑀕𑀺𑀤𑁆𑀥𑀺 𑀢𑀯𑀫𑁆𑀳𑀲𑀼;
𑀫𑀁 𑀧𑀼𑀩𑁆𑀩𑁂 𑀩𑀦𑁆𑀥 𑀧𑀸𑀲𑁂𑀦, 𑀧𑀘𑁆𑀙𑀸 𑀫𑀼𑀜𑁆𑀘 𑀤𑀺𑀚𑀸𑀥𑀺𑀧𑀁.
‘‘𑀢𑀸𑀯𑀤𑁂𑀯 𑀘 𑀢𑁂 𑀮𑀸𑀪𑁄, 𑀓𑀢𑀸𑀲𑁆𑀲 𑀬𑀸𑀘𑀦𑀸𑀬 𑀘;
𑀫𑀺𑀢𑁆𑀢𑀺 𑀘 𑀥𑀢𑀭𑀝𑁆𑀞𑁂𑀳𑀺, 𑀬𑀸𑀯𑀚𑀻𑀯𑀸𑀬 𑀢𑁂 𑀲𑀺𑀬𑀸’’𑀢𑀺.
𑀢𑀢𑁆𑀣 𑀏𑀢𑀦𑁆𑀢𑀺 𑀬𑀁 𑀅𑀜𑁆𑀜𑀢𑁆𑀭 𑀏𑀢𑀲𑁆𑀲 𑀚𑀻𑀯𑀺𑀢𑀸 𑀫𑀫 𑀚𑀻𑀯𑀺𑀢𑀁, 𑀏𑀢𑀁 𑀅𑀳𑀁 𑀦𑁂𑀯 𑀇𑀘𑁆𑀙𑀸𑀫𑀺. 𑀢𑀼𑀮𑁆𑀬𑀸𑀲𑁆𑀫𑀸𑀢𑀺 𑀲𑀫𑀸𑀦𑀸 𑀳𑁄𑀫. 𑀦𑀺𑀫𑀺𑀦𑀸 𑀢𑀼𑀯𑀦𑁆𑀢𑀺 𑀧𑀭𑀺𑀯𑀢𑁆𑀢𑁂𑀳𑀺 𑀢𑁆𑀯𑀁. 𑀢𑀯𑀫𑁆𑀳𑀲𑀽𑀢𑀺 𑀢𑀯 𑀅𑀫𑁆𑀳𑁂𑀲𑀼 𑀕𑀺𑀤𑁆𑀥𑀺 𑀳𑁄𑀢𑀼, 𑀓𑀺𑀁 𑀢𑁂 𑀏𑀢𑁂𑀦, 𑀫𑀬𑀺 𑀮𑁄𑀪𑀁 𑀉𑀧𑁆𑀧𑀸𑀤𑁂𑀳𑀻𑀢𑀺 𑀯𑀤𑀢𑀺. 𑀢𑀸𑀯𑀤𑁂𑀯𑀸𑀢𑀺 𑀢𑀢𑁆𑀢𑀓𑁄𑀬𑁂𑀯. 𑀬𑀸𑀘𑀦𑀸𑀬 𑀘𑀸𑀢𑀺 𑀬𑀸 𑀫𑀫 𑀬𑀸𑀘𑀦𑀸, 𑀲𑀸𑀯 𑀓𑀢𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄.
𑀇𑀢𑀺 ¶ 𑀲𑁄 𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀢𑁂𑀮𑁂 𑀧𑀓𑁆𑀔𑀺𑀢𑁆𑀢𑀓𑀧𑁆𑀧𑀸𑀲𑀧𑀺𑀘𑀼 𑀯𑀺𑀬 𑀫𑀼𑀤𑀼𑀕𑀢𑀳𑀤𑀬𑁄 𑀫𑀳𑀸𑀲𑀢𑁆𑀢𑀁 𑀢𑀲𑁆𑀲 𑀤𑀸𑀬𑀁 𑀓𑀢𑁆𑀯𑀸 𑀤𑀤𑀦𑁆𑀢𑁄 𑀆𑀳 𑁋
‘‘𑀧𑀲𑁆𑀲𑀦𑁆𑀢𑀼 𑀦𑁄 𑀫𑀳𑀸𑀲𑀗𑁆𑀖𑀸, 𑀢𑀬𑀸 𑀫𑀼𑀢𑁆𑀢𑀁 𑀇𑀢𑁄 𑀕𑀢𑀁;
𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀪𑀘𑁆𑀘𑀸 𑀘, 𑀧𑀼𑀢𑁆𑀢𑀤𑀸𑀭𑀸 𑀘 𑀩𑀦𑁆𑀥𑀯𑀸.
‘‘𑀦 𑀘 𑀢𑁂 𑀢𑀸𑀤𑀺𑀲𑀸 𑀫𑀺𑀢𑁆𑀢𑀸, 𑀩𑀳𑀽𑀦𑀁 𑀇𑀥 𑀯𑀺𑀚𑁆𑀚𑀢𑀺;
𑀬𑀣𑀸 𑀢𑁆𑀯𑀁 𑀥𑀢𑀭𑀝𑁆𑀞𑀲𑁆𑀲, 𑀧𑀸𑀡𑀲𑀸𑀥𑀸𑀭𑀡𑁄 𑀲𑀔𑀸.
‘‘𑀲𑁄 𑀢𑁂 𑀲𑀳𑀸𑀬𑀁 𑀫𑀼𑀜𑁆𑀘𑀸𑀫𑀺, 𑀳𑁄𑀢𑀼 𑀭𑀸𑀚𑀸 𑀢𑀯𑀸𑀦𑀼𑀕𑁄;
𑀓𑀸𑀫𑀁 𑀔𑀺𑀧𑁆𑀧𑀫𑀺𑀢𑁄 𑀕𑀦𑁆𑀢𑁆𑀯𑀸, 𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀣𑀸’’𑀢𑀺.
𑀢𑀢𑁆𑀣 ¶ 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀬𑀸 𑀫𑀼𑀢𑁆𑀢𑀦𑁆𑀢𑀺 𑀇𑀫𑀜𑁆𑀳𑀺 𑀢𑁆𑀯𑀜𑁆𑀜𑁂𑀯 𑀫𑀼𑀜𑁆𑀘𑀲𑀺 𑀦𑀸𑀫, 𑀢𑀲𑁆𑀫𑀸 𑀇𑀫𑀁 𑀢𑀬𑀸 ¶ 𑀫𑀼𑀢𑁆𑀢𑀁 𑀇𑀢𑁄 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀁 𑀕𑀢𑀁 𑀫𑀳𑀦𑁆𑀢𑀸 𑀜𑀸𑀢𑀺𑀲𑀗𑁆𑀖𑀸 𑀏𑀢𑁂 𑀘 𑀫𑀺𑀢𑁆𑀢𑀸𑀤𑀬𑁄 𑀧𑀲𑁆𑀲𑀦𑁆𑀢𑀼. 𑀏𑀢𑁆𑀣 𑀘 𑀩𑀦𑁆𑀥𑀯𑀸𑀢𑀺 𑀏𑀓𑀮𑁄𑀳𑀺𑀢𑀲𑀫𑁆𑀩𑀦𑁆𑀥𑀸. 𑀯𑀺𑀚𑁆𑀚𑀢𑀻𑀢𑀺 𑀯𑀺𑀚𑁆𑀚𑀦𑁆𑀢𑀺. 𑀧𑀸𑀡𑀲𑀸𑀥𑀸𑀭𑀡𑁄𑀢𑀺 𑀲𑀸𑀥𑀸𑀭𑀡𑀧𑀸𑀡𑁄 𑀅𑀯𑀺𑀪𑀢𑁆𑀢𑀚𑀻𑀯𑀺𑀓𑁄, 𑀬𑀣𑀸 𑀢𑁆𑀯𑀁 𑀏𑀢𑀲𑁆𑀲 𑀲𑀔𑀸, 𑀏𑀢𑀸𑀤𑀺𑀲𑀸 𑀅𑀜𑁆𑀜𑁂𑀲𑀁 𑀩𑀳𑀽𑀦𑀁 𑀫𑀺𑀢𑁆𑀢𑀸 𑀦𑀸𑀫 𑀦 𑀯𑀺𑀚𑁆𑀚𑀦𑁆𑀢𑀺. 𑀢𑀯𑀸𑀦𑀼𑀕𑁄𑀢𑀺 𑀏𑀢𑀁 𑀤𑀼𑀓𑁆𑀔𑀺𑀢𑀁 𑀆𑀤𑀸𑀬 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀢𑀯 𑀅𑀬𑀁 𑀅𑀦𑀼𑀕𑁄 𑀳𑁄𑀢𑀽𑀢𑀺.
𑀏𑀯𑀁 𑀯𑀢𑁆𑀯𑀸 𑀧𑀦 𑀦𑁂𑀲𑀸𑀤𑀧𑀼𑀢𑁆𑀢𑁄 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀭𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀲𑀭𑀢𑀻𑀭𑁂 𑀢𑀭𑀼𑀡𑀤𑀩𑁆𑀩𑀢𑀺𑀡𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑁂 𑀩𑀦𑁆𑀥𑀦𑀧𑀸𑀲𑀁 𑀫𑀼𑀤𑀼𑀘𑀺𑀢𑁆𑀢𑁂𑀦 𑀲𑀡𑀺𑀓𑀁 𑀫𑁄𑀘𑁂𑀢𑁆𑀯𑀸 𑀤𑀽𑀭𑁂 𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑁂 𑀩𑀮𑀯𑀲𑀺𑀦𑁂𑀳𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀉𑀤𑀓𑀁 𑀆𑀤𑀸𑀬 𑀮𑁄𑀳𑀺𑀢𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀺. 𑀢𑀲𑁆𑀲 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑁂 𑀲𑀺𑀭𑀸 𑀲𑀺𑀭𑀸𑀳𑀺, 𑀫𑀁𑀲𑀁 𑀫𑀁𑀲𑁂𑀦, 𑀘𑀫𑁆𑀫𑀁 𑀘𑀫𑁆𑀫𑁂𑀦 𑀖𑀝𑀺𑀢𑀁, 𑀢𑀸𑀯𑀤𑁂𑀯 𑀧𑀸𑀤𑁄 𑀲𑀁𑀭𑀼𑀴𑁆𑀳𑁄 𑀲𑀜𑁆𑀚𑀸𑀢𑀙𑀯𑀺𑀲𑀜𑁆𑀚𑀸𑀢𑀮𑁄𑀫𑁄 𑀅𑀳𑁄𑀲𑀺 𑀅𑀩𑀤𑁆𑀥𑀧𑀸𑀤𑁂𑀦 𑀦𑀺𑀩𑁆𑀩𑀺𑀲𑁂𑀲𑁄. 𑀩𑁄𑀥𑀺𑀲𑀢𑁆𑀢𑁄 𑀲𑀼𑀔𑀺𑀢𑁄 𑀧𑀓𑀢𑀺𑀪𑀸𑀯𑁂𑀦𑁂𑀯 𑀦𑀺𑀲𑀻𑀤𑀺. 𑀅𑀣 𑀲𑀼𑀫𑀼𑀔𑁄 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀢𑁆𑀢𑀲𑁆𑀲 𑀲𑀼𑀔𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀦𑁂𑀲𑀸𑀤𑀲𑁆𑀲 𑀣𑀼𑀢𑀺𑀫𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀲𑁄 ¶ 𑀧𑀢𑀻𑀢𑁄 𑀧𑀫𑀼𑀢𑁆𑀢𑁂𑀦, 𑀪𑀢𑁆𑀢𑀼𑀦𑀸 𑀪𑀢𑁆𑀢𑀼𑀕𑀸𑀭𑀯𑁄;
𑀅𑀚𑁆𑀛𑀪𑀸𑀲𑀣 𑀯𑀓𑁆𑀓𑀗𑁆𑀕𑁄, 𑀯𑀸𑀘𑀁 𑀓𑀡𑁆𑀡𑀲𑀼𑀔𑀁 𑀪𑀡𑀁.
‘‘𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;
𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀤𑀺𑀚𑀸𑀥𑀺𑀧’’𑀦𑁆𑀢𑀺.
𑀢𑀢𑁆𑀣 𑀯𑀓𑁆𑀓𑀗𑁆𑀕𑁄𑀢𑀺 𑀯𑀗𑁆𑀓𑀕𑀻𑀯𑁄.
𑀏𑀯𑀁 𑀮𑀼𑀤𑁆𑀤𑀲𑁆𑀲 𑀣𑀼𑀢𑀺𑀁 𑀓𑀢𑁆𑀯𑀸 𑀲𑀼𑀫𑀼𑀔𑁄 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀫𑀳𑀸𑀉𑀧𑀓𑀸𑀭𑁄 𑀓𑀢𑁄, 𑀅𑀬𑀜𑁆𑀳𑀺 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀓𑀻𑀴𑀸𑀳𑀁𑀲𑁂 𑀦𑁄 𑀓𑀢𑁆𑀯𑀸 𑀇𑀲𑁆𑀲𑀭𑀸𑀦𑀁 𑀤𑁂𑀦𑁆𑀢𑁄 𑀩𑀳𑀼𑀁 𑀥𑀦𑀁 𑀮𑀪𑁂𑀬𑁆𑀬, 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀫𑀽𑀮𑀫𑁆𑀧𑀺 𑀮𑀪𑁂𑀣, 𑀅𑀢𑁆𑀢𑀦𑁄 𑀧𑀦 𑀚𑀻𑀯𑀺𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀅𑀓𑀭𑀺 ¶ , 𑀇𑀫𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀲𑀼𑀔𑀚𑀻𑀯𑀺𑀢𑀁 𑀓𑀭𑁄𑀫𑀸’’𑀢𑀺. 𑀫𑀳𑀸𑀲𑀢𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀼𑀫𑀼𑀔𑁄 𑀅𑀢𑁆𑀢𑀦𑁄 𑀪𑀸𑀲𑀸𑀬 𑀫𑀳𑀸𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑀪𑀸𑀲𑀸𑀬 𑀮𑀼𑀤𑁆𑀤𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑁆𑀯𑀁 𑀓𑀺𑀫𑀢𑁆𑀣𑀁 𑀧𑀸𑀲𑁂 𑀑𑀟𑁆𑀟𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀥𑀦𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑁂 𑀆𑀤𑀸𑀬 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺, 𑀩𑀳𑀼𑀁 𑀢𑁂 𑀥𑀦𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀏𑀳𑀺 ¶ 𑀢𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀬𑀣𑀸 𑀢𑁆𑀯𑀫𑀧𑀺 𑀮𑀘𑁆𑀙𑀲𑁂;
𑀮𑀸𑀪𑀁 𑀢𑀯𑀸𑀬𑀁 𑀥𑀢𑀭𑀝𑁆𑀞𑁄, 𑀧𑀸𑀧𑀁 𑀓𑀺𑀜𑁆𑀘𑀺 𑀦 𑀤𑀓𑁆𑀔𑀢𑀺.
‘‘𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸, 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺 𑀦𑁄 𑀉𑀪𑁄;
𑀅𑀩𑀤𑁆𑀥𑁂 𑀧𑀓𑀢𑀺𑀪𑀽𑀢𑁂, 𑀓𑀸𑀚𑁂 𑀉𑀪𑀬𑀢𑁄 𑀞𑀺𑀢𑁂.
‘‘𑀥𑀢𑀭𑀝𑁆𑀞𑀸 𑀫𑀳𑀸𑀭𑀸𑀚, 𑀳𑀁𑀲𑀸𑀥𑀺𑀧𑀢𑀺𑀦𑁄 𑀇𑀫𑁂;
𑀅𑀬𑀜𑁆𑀳𑀺 𑀭𑀸𑀚𑀸 𑀳𑀁𑀲𑀸𑀦𑀁, 𑀅𑀬𑀁 𑀲𑁂𑀦𑀸𑀧𑀢𑀻𑀢𑀭𑁄.
𑁩𑁯. ‘‘𑀅𑀲𑀁𑀲𑀬𑀁 𑀇𑀫𑀁 𑀤𑀺𑀲𑁆𑀯𑀸, 𑀳𑀁𑀲𑀭𑀸𑀚𑀁 𑀦𑀭𑀸𑀥𑀺𑀧𑁄.
𑀧𑀢𑀻𑀢𑁄 𑀲𑀼𑀫𑀦𑁄 𑀯𑀺𑀢𑁆𑀢𑁄, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦’’𑀦𑁆𑀢𑀺.
𑀢𑀢𑁆𑀣 𑀅𑀦𑀼𑀲𑀺𑀓𑁆𑀔𑀸𑀫𑀻𑀢𑀺 𑀅𑀦𑀼𑀲𑀸𑀲𑀸𑀫𑀺. 𑀧𑀸𑀧𑀦𑁆𑀢𑀺 𑀮𑀸𑀫𑀓𑀁. 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺 𑀦𑁄 𑀉𑀪𑁄𑀢𑀺 𑀅𑀫𑁆𑀳𑁂 𑀉𑀪𑁄𑀧𑀺 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺. 𑀅𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀜𑁆𑀜𑀸𑀧𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀢𑁆𑀢𑀦𑁄 𑀫𑀺𑀢𑁆𑀢𑀥𑀫𑁆𑀫𑀲𑁆𑀲 𑀆𑀯𑀺𑀪𑀸𑀯𑀦𑀢𑁆𑀣𑀁, 𑀮𑀼𑀤𑁆𑀤𑀲𑁆𑀲 𑀥𑀦𑀮𑀸𑀪𑀢𑁆𑀣𑀁, 𑀭𑀜𑁆𑀜𑁄 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀜𑁆𑀘𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 ¶ 𑀏𑀯𑀫𑀸𑀳. 𑀥𑀢𑀭𑀝𑁆𑀞𑀸𑀢𑀺 𑀦𑁂𑀢𑁆𑀯𑀸 𑀘 𑀧𑀦 𑀭𑀜𑁆𑀜𑁄 𑀏𑀯𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺, ‘‘𑀫𑀳𑀸𑀭𑀸𑀚, 𑀇𑀫𑁂 𑀥𑀢𑀭𑀝𑁆𑀞𑀓𑀼𑀮𑁂 𑀚𑀸𑀢𑀸 𑀤𑁆𑀯𑁂 𑀳𑀁𑀲𑀸𑀥𑀺𑀧𑀢𑀺𑀦𑁄, 𑀏𑀢𑁂𑀲𑀼 𑀅𑀬𑀁 𑀭𑀸𑀚𑀸, 𑀇𑀢𑀭𑁄 𑀲𑁂𑀦𑀸𑀧𑀢𑀻’’𑀢𑀺. 𑀇𑀢𑀺 𑀦𑀁 𑀲𑀺𑀓𑁆𑀔𑀸𑀧𑁂𑀲𑀺. ‘‘𑀧𑀢𑀻𑀢𑁄’’𑀢𑀺𑀆𑀤𑀻𑀦𑀺 𑀢𑀻𑀡𑀺𑀧𑀺 𑀢𑀼𑀝𑁆𑀞𑀸𑀓𑀸𑀭𑀯𑁂𑀯𑀘𑀦𑀸𑀦𑁂𑀯.
𑀏𑀯𑀁 𑀯𑀼𑀢𑁆𑀢𑁂 𑀮𑀼𑀤𑁆𑀤𑁄, ‘‘𑀲𑀸𑀫𑀺, 𑀫𑀸 𑀯𑁄 𑀭𑀸𑀚𑀤𑀲𑁆𑀲𑀦𑀁 𑀭𑀼𑀘𑁆𑀘𑀺, 𑀭𑀸𑀚𑀸𑀦𑁄 𑀦𑀸𑀫 𑀘𑀮𑀘𑀺𑀢𑁆𑀢𑀸, 𑀓𑀻𑀴𑀸𑀳𑀁𑀲𑁂 𑀯𑀸 𑀯𑁄 𑀓𑀭𑁂𑀬𑁆𑀬𑀼𑀁 𑀫𑀸𑀭𑀸𑀧𑁂𑀬𑁆𑀬𑀼𑀁 𑀯𑀸’’𑀢𑀺 𑀯𑀢𑁆𑀯𑀸, ‘‘𑀲𑀫𑁆𑀫, 𑀫𑀸 𑀪𑀸𑀬𑀺, 𑀅𑀳𑀁 𑀢𑀸𑀤𑀺𑀲𑀁 𑀓𑀓𑁆𑀔𑀴𑀁 𑀮𑀼𑀤𑁆𑀤𑀁 𑀮𑁄𑀳𑀺𑀢𑀧𑀸𑀡𑀺𑀁 𑀥𑀫𑁆𑀫𑀓𑀣𑀸𑀬 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀫𑀫 𑀧𑀸𑀤𑁂𑀲𑀼 𑀧𑀸𑀢𑁂𑀲𑀺𑀁, 𑀭𑀸𑀚𑀸𑀦𑁄 𑀦𑀸𑀫 𑀧𑀼𑀜𑁆𑀜𑀯𑀦𑁆𑀢𑁄 𑀧𑀜𑁆𑀜𑀯𑀦𑁆𑀢𑁄 𑀘 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀜𑁆𑀜𑀽 𑀘, 𑀔𑀺𑀧𑁆𑀧𑀁 𑀅𑀫𑁆𑀳𑁂 𑀭𑀜𑁆𑀜𑁄 𑀤𑀲𑁆𑀲𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀫𑀸 𑀫𑀬𑁆𑀳𑀁 𑀓𑀼𑀚𑁆𑀛𑀺𑀢𑁆𑀣, 𑀅𑀳𑀁 𑀅𑀯𑀲𑁆𑀲𑀁 𑀢𑀼𑀫𑁆𑀳𑀸𑀓𑀁 ¶ 𑀭𑀼𑀘𑀺𑀬𑀸 𑀦𑁂𑀫𑀻’’𑀢𑀺 𑀯𑀢𑁆𑀯𑀸 𑀉𑀪𑁄𑀧𑀺 𑀓𑀸𑀚𑀁 𑀆𑀭𑁄𑀧𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀬𑀣𑀸𑀪𑀽𑀢𑀁 𑀆𑀭𑁄𑀘𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀓𑀫𑁆𑀫𑀼𑀦𑀸 𑀉𑀧𑀧𑀸𑀤𑀬𑀺;
𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀳𑀁𑀲𑁂 𑀅𑀤𑀲𑁆𑀲𑀬𑀺;
𑀅𑀩𑀤𑁆𑀥𑁂 𑀧𑀓𑀢𑀺𑀪𑀽𑀢𑁂, 𑀓𑀸𑀚𑁂 𑀉𑀪𑀬𑀢𑁄 𑀞𑀺𑀢𑁂.
‘‘𑀥𑀢𑀭𑀝𑁆𑀞𑀸 ¶ 𑀫𑀳𑀸𑀭𑀸𑀚, 𑀳𑀁𑀲𑀸𑀥𑀺𑀧𑀢𑀺𑀦𑁄 𑀇𑀫𑁂;
𑀅𑀬𑀜𑁆𑀳𑀺 𑀭𑀸𑀚𑀸 𑀳𑀁𑀲𑀸𑀦𑀁, 𑀅𑀬𑀁 𑀲𑁂𑀦𑀸𑀧𑀢𑀻𑀢𑀭𑁄;
‘‘𑀓𑀣𑀁 𑀧𑀦𑀺𑀫𑁂 𑀯𑀺𑀳𑀗𑁆𑀕𑀸, 𑀢𑀯 𑀳𑀢𑁆𑀣𑀢𑁆𑀢𑀫𑀸𑀕𑀢𑀸;
𑀓𑀣𑀁 𑀮𑀼𑀤𑁆𑀤𑁄 𑀫𑀳𑀦𑁆𑀢𑀸𑀦𑀁, 𑀇𑀲𑁆𑀲𑀭𑁂 𑀇𑀥 𑀅𑀚𑁆𑀛𑀕𑀸.
‘‘𑀯𑀺𑀳𑀺𑀢𑀸 𑀲𑀦𑁆𑀢𑀺𑀫𑁂 𑀧𑀸𑀲𑀸, 𑀧𑀮𑁆𑀮𑀮𑁂𑀲𑀼 𑀚𑀦𑀸𑀥𑀺𑀧;
𑀬𑀁 𑀬𑀤𑀸𑀬𑀢𑀦𑀁 𑀫𑀜𑁆𑀜𑁂, 𑀤𑀺𑀚𑀸𑀦𑀁 𑀧𑀸𑀡𑀭𑁄𑀥𑀦𑀁.
‘‘𑀢𑀸𑀤𑀺𑀲𑀁 𑀧𑀸𑀲𑀫𑀸𑀲𑀚𑁆𑀚, 𑀳𑀁𑀲𑀭𑀸𑀚𑀸 𑀅𑀩𑀚𑁆𑀛𑀣;
𑀢𑀁 𑀅𑀩𑀤𑁆𑀥𑁄 𑀉𑀧𑀸𑀲𑀺𑀦𑁄, 𑀫𑀫𑀸𑀬𑀁 𑀅𑀚𑁆𑀛𑀪𑀸𑀲𑀣.
‘‘𑀲𑀼𑀤𑀼𑀓𑁆𑀓𑀭𑀁 𑀅𑀦𑀭𑀺𑀬𑁂𑀪𑀺, 𑀤𑀳𑀢𑁂 𑀪𑀸𑀯𑀫𑀼𑀢𑁆𑀢𑀫𑀁;
𑀪𑀢𑁆𑀢𑀼𑀭𑀢𑁆𑀣𑁂 𑀧𑀭𑀓𑁆𑀓𑀦𑁆𑀢𑁄, 𑀥𑀫𑁆𑀫𑀬𑀼𑀢𑁆𑀢𑁄 𑀯𑀺𑀳𑀗𑁆𑀕𑀫𑁄.
‘‘𑀅𑀢𑁆𑀢𑀦𑀸𑀬𑀁 𑀘𑀚𑀺𑀢𑁆𑀯𑀸𑀦, 𑀚𑀻𑀯𑀺𑀢𑀁 𑀚𑀻𑀯𑀺𑀢𑀸𑀭𑀳𑁄;
𑀅𑀦𑀼𑀢𑁆𑀣𑀼𑀦𑀦𑁆𑀢𑁄 𑀆𑀲𑀻𑀦𑁄, 𑀪𑀢𑁆𑀢𑀼 𑀬𑀸𑀘𑀺𑀢𑁆𑀣 𑀚𑀻𑀯𑀺𑀢𑀁.
‘‘𑀢𑀲𑁆𑀲 ¶ 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀲𑀸𑀤𑀫𑀳𑀫𑀚𑁆𑀛𑀕𑀸;
𑀢𑀢𑁄 𑀦𑀁 𑀧𑀸𑀫𑀼𑀘𑀺𑀁 𑀧𑀸𑀲𑀸, 𑀅𑀦𑀼𑀜𑁆𑀜𑀸𑀲𑀺𑀁 𑀲𑀼𑀔𑁂𑀦 𑀘.
‘‘𑀲𑁄 𑀧𑀢𑀻𑀢𑁄 𑀧𑀫𑀼𑀢𑁆𑀢𑁂𑀦, 𑀪𑀢𑁆𑀢𑀼𑀦𑀸 𑀪𑀢𑁆𑀢𑀼𑀕𑀸𑀭𑀯𑁄;
𑀅𑀚𑁆𑀛𑀪𑀸𑀲𑀣 𑀯𑀓𑁆𑀓𑀗𑁆𑀕𑁄, 𑀯𑀸𑀘𑀁 𑀓𑀡𑁆𑀡𑀲𑀼𑀔𑀁 𑀪𑀡𑀁.
‘‘𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;
𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀤𑀺𑀚𑀸𑀥𑀺𑀧𑀁.
‘‘𑀏𑀳𑀺 𑀢𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀬𑀣𑀸 𑀢𑁆𑀯𑀫𑀧𑀺 𑀮𑀘𑁆𑀙𑀲𑁂;
𑀮𑀸𑀪𑀁 𑀢𑀯𑀸𑀬𑀁 𑀥𑀢𑀭𑀝𑁆𑀞𑁄, 𑀧𑀸𑀧𑀁 𑀓𑀺𑀜𑁆𑀘𑀺 𑀦 𑀤𑀓𑁆𑀔𑀢𑀺.
‘‘𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 ¶ 𑀦𑁂𑀢𑁆𑀯𑀸, 𑀭𑀜𑁆𑀜𑁄 𑀤𑀲𑁆𑀲𑁂𑀳𑀺 𑀦𑁄 𑀉𑀪𑁄;
𑀅𑀩𑀤𑁆𑀥𑁂 𑀧𑀓𑀢𑀺𑀪𑀽𑀢𑁂, 𑀓𑀸𑀚𑁂 𑀉𑀪𑀬𑀢𑁄 𑀞𑀺𑀢𑁂.
‘‘𑀥𑀢𑀭𑀝𑁆𑀞𑀸 𑀫𑀳𑀸𑀭𑀸𑀚, 𑀳𑀁𑀲𑀸𑀥𑀺𑀧𑀢𑀺𑀦𑁄 𑀇𑀫𑁂;
𑀅𑀬𑀜𑁆𑀳𑀺 𑀭𑀸𑀚𑀸 𑀳𑀁𑀲𑀸𑀦𑀁, 𑀅𑀬𑀁 𑀲𑁂𑀦𑀸𑀧𑀢𑀻𑀢𑀭𑁄.
‘‘𑀅𑀲𑀁𑀲𑀬𑀁 𑀇𑀫𑀁 𑀤𑀺𑀲𑁆𑀯𑀸, 𑀳𑀁𑀲𑀭𑀸𑀚𑀁 𑀦𑀭𑀸𑀥𑀺𑀧𑁄;
𑀧𑀢𑀻𑀢𑁄 𑀲𑀼𑀫𑀦𑁄 𑀯𑀺𑀢𑁆𑀢𑁄, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦𑀁.
‘‘𑀏𑀯𑀫𑁂𑀢𑀲𑁆𑀲 ¶ 𑀯𑀘𑀦𑀸, 𑀆𑀦𑀻𑀢𑀸𑀫𑁂 𑀉𑀪𑁄 𑀫𑀬𑀸;
𑀏𑀢𑁆𑀣𑁂𑀯 𑀳𑀺 𑀇𑀫𑁂 𑀆𑀲𑀼𑀁, 𑀉𑀪𑁄 𑀅𑀦𑀼𑀫𑀢𑀸 𑀫𑀬𑀸.
‘‘𑀲𑁄𑀬𑀁 𑀏𑀯𑀁 𑀕𑀢𑁄 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;
𑀫𑀸𑀤𑀺𑀲𑀲𑁆𑀲 𑀳𑀺 𑀮𑀼𑀤𑁆𑀤𑀲𑁆𑀲, 𑀚𑀦𑀬𑁂𑀬𑁆𑀬𑀸𑀣 𑀫𑀤𑁆𑀤𑀯𑀁.
‘‘𑀉𑀧𑀸𑀬𑀦𑀜𑁆𑀘 𑀢𑁂 𑀤𑁂𑀯, 𑀦𑀸𑀜𑁆𑀜𑀁 𑀧𑀲𑁆𑀲𑀸𑀫𑀺 𑀏𑀤𑀺𑀲𑀁;
𑀲𑀩𑁆𑀩𑀲𑀸𑀓𑀼𑀡𑀺𑀓𑀸𑀕𑀸𑀫𑁂, 𑀢𑀁 𑀧𑀲𑁆𑀲 𑀫𑀦𑀼𑀚𑀸𑀥𑀺𑀧𑀸’’𑀢𑀺.
𑀢𑀢𑁆𑀣 𑀓𑀫𑁆𑀫𑀼𑀦𑀸 𑀉𑀧𑀧𑀸𑀤𑀬𑀻𑀢𑀺 𑀬𑀁 𑀲𑁄 𑀅𑀯𑀘, 𑀢𑀁 𑀓𑀭𑁄𑀦𑁆𑀢𑁄 𑀓𑀸𑀬𑀓𑀫𑁆𑀫𑁂𑀦 𑀲𑀫𑁆𑀧𑀸𑀤𑁂𑀲𑀺. 𑀕𑀦𑁆𑀢𑁆𑀯𑀸𑀢𑀺 𑀳𑀁𑀲𑀭𑀸𑀚𑁂𑀦 𑀦𑀺𑀲𑀺𑀦𑁆𑀦𑀓𑀸𑀚𑀓𑁄𑀝𑀺𑀁 𑀉𑀘𑁆𑀘𑀢𑀭𑀁, 𑀲𑁂𑀦𑀸𑀧𑀢𑀺𑀦𑀸 𑀦𑀺𑀲𑀺𑀦𑁆𑀦𑀓𑀸𑀚𑀓𑁄𑀝𑀺𑀁 𑀣𑁄𑀓𑀁 𑀦𑀻𑀘𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀳𑀁𑀲𑀭𑀸𑀚𑀸 𑀘 𑀲𑁂𑀦𑀸𑀧𑀢𑀺 𑀘 𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑀼𑀁 𑀕𑀘𑁆𑀙𑀦𑁆𑀢𑀺, 𑀉𑀲𑁆𑀲𑀭𑀣 𑀉𑀲𑁆𑀲𑀭𑀣𑀸’’𑀢𑀺 𑀚𑀦𑀁 𑀉𑀲𑁆𑀲𑀸𑀭𑁂𑀦𑁆𑀢𑁄 ‘‘𑀏𑀯𑀭𑀽𑀧𑀸 𑀦𑀸𑀫 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑀁𑀲𑀭𑀸𑀚𑀸𑀦𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺 𑀫𑀼𑀤𑀼𑀳𑀤𑀬𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀧𑀲𑀁𑀲𑀦𑁆𑀢𑁂𑀲𑀼 ¶ 𑀔𑀺𑀧𑁆𑀧𑀫𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸. 𑀅𑀤𑀲𑁆𑀲𑀬𑀻𑀢𑀺 ‘‘𑀳𑀁𑀲𑀭𑀸𑀚𑀸𑀦𑁄 𑀢𑀼𑀫𑁆𑀳𑁂 𑀤𑀝𑁆𑀞𑀼𑀁 𑀆𑀕𑀢𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀢𑁆𑀯𑀸 𑀢𑁂𑀦 𑀢𑀼𑀝𑁆𑀞𑀘𑀺𑀢𑁆𑀢𑁂𑀦 ‘‘𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀧𑀓𑁆𑀓𑁄𑀲𑀸𑀧𑀺𑀢𑁄 𑀅𑀪𑀺𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀳𑀢𑁆𑀣𑀢𑁆𑀢𑀦𑁆𑀢𑀺 𑀳𑀢𑁆𑀣𑁂𑀲𑀼 𑀆𑀕𑀢𑀁, 𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀦𑁆𑀢𑀸𑀦𑀦𑁆𑀢𑀺 𑀬𑀲𑀫𑀳𑀦𑁆𑀢𑀧𑁆𑀧𑀢𑁆𑀢𑀸𑀦𑀁 𑀲𑀼𑀯𑀡𑁆𑀡𑀯𑀡𑁆𑀡𑀸𑀦𑀁 𑀥𑀢𑀭𑀝𑁆𑀞𑀳𑀁𑀲𑀸𑀦𑀁 𑀇𑀲𑁆𑀲𑀭𑁂 𑀲𑀸𑀫𑀺𑀦𑁄 𑀓𑀣𑀁 𑀢𑁆𑀯𑀁 𑀮𑀼𑀤𑁆𑀤𑁄 𑀳𑀼𑀢𑁆𑀯𑀸 𑀅𑀥𑀺𑀕𑀢𑁄𑀢𑀺 𑀧𑀼𑀘𑁆𑀙𑀢𑀺. ‘‘𑀇𑀲𑁆𑀲𑀭𑀫𑀺𑀥𑀫𑀚𑁆𑀛𑀕𑀸’’𑀢𑀺𑀧𑀺 𑀧𑀸𑀞𑁄, 𑀏𑀢𑁂𑀲𑀁 𑀇𑀲𑁆𑀲𑀭𑀺𑀬𑀁 𑀢𑁆𑀯𑀁 𑀓𑀣𑀁 𑀅𑀚𑁆𑀛𑀕𑀸𑀢𑀺 𑀅𑀢𑁆𑀣𑁄.
𑀯𑀺𑀳𑀺𑀢𑀸𑀢𑀺 𑀬𑁄𑀚𑀺𑀢𑀸. 𑀬𑀁 𑀬𑀤𑀸𑀬𑀢𑀦𑀁 𑀫𑀜𑁆𑀜𑁂𑀢𑀺, 𑀫𑀳𑀸𑀭𑀸𑀚, 𑀬𑀁 𑀬𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁 𑀤𑀺𑀚𑀸𑀦𑀁 𑀧𑀸𑀡𑀭𑁄𑀥𑀦𑀁 ¶ 𑀚𑀻𑀯𑀺𑀢𑀓𑁆𑀔𑀬𑀓𑀭𑀁 𑀫𑀜𑁆𑀜𑀸𑀫𑀺, 𑀢𑀢𑁆𑀣 𑀢𑀢𑁆𑀣 𑀫𑀬𑀸 𑀧𑀮𑁆𑀮𑀮𑁂𑀲𑀼 𑀧𑀸𑀲𑀸 𑀯𑀺𑀳𑀺𑀢𑀸. 𑀢𑀸𑀤𑀺𑀲𑀦𑁆𑀢𑀺 𑀫𑀸𑀦𑀼𑀲𑀺𑀬𑀲𑀭𑁂 𑀢𑀣𑀸𑀯𑀺𑀥𑀁 𑀧𑀸𑀡𑀭𑁄𑀥𑀦𑀁 𑀫𑀬𑀸 𑀯𑀺𑀳𑀺𑀢𑀁 𑀧𑀸𑀲𑀁. 𑀢𑀦𑁆𑀢𑀺 𑀢𑀁 𑀏𑀢𑀁 𑀢𑀢𑁆𑀣 𑀩𑀤𑁆𑀥𑀁. 𑀉𑀧𑀸𑀲𑀺𑀦𑁄𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀅𑀕𑀡𑁂𑀢𑁆𑀯𑀸 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀫𑀫𑀸𑀬𑀦𑁆𑀢𑀺 𑀫𑀁 𑀅𑀬𑀁 𑀲𑁂𑀦𑀸𑀧𑀢𑀺 𑀅𑀚𑁆𑀛𑀪𑀸𑀲𑀣, 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀲𑀺. 𑀲𑀼𑀤𑀼𑀓𑁆𑀓𑀭𑀦𑁆𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀏𑀲 𑀅𑀫𑁆𑀳𑀸𑀤𑀺𑀲𑁂𑀳𑀺 𑀅𑀦𑀭𑀺𑀬𑁂𑀳𑀺 𑀲𑀼𑀤𑀼𑀓𑁆𑀓𑀭𑀁 𑀅𑀓𑀸𑀲𑀺. 𑀓𑀺𑀁 𑀢𑀦𑁆𑀢𑀺? 𑀤𑀳𑀢𑁂 𑀪𑀸𑀯𑀫𑀼𑀢𑁆𑀢𑀫𑀁, 𑀅𑀢𑁆𑀢𑀦𑁄 𑀉𑀢𑁆𑀢𑀫𑀁 𑀅𑀚𑁆𑀛𑀸𑀲𑀬𑀁 𑀤𑀳𑀢𑀺 𑀯𑀺𑀤𑀳𑀢𑀺 𑀧𑀓𑀸𑀲𑁂𑀢𑀺. 𑀅𑀢𑁆𑀢𑀦𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀅𑀬𑀁. 𑀅𑀦𑀼𑀢𑁆𑀣𑀼𑀦𑀦𑁆𑀢𑁄𑀢𑀺 𑀪𑀢𑁆𑀢𑀼𑀕𑀼𑀡𑁂 𑀯𑀡𑁆𑀡𑁂𑀦𑁆𑀢𑁄 𑀢𑀲𑁆𑀲 𑀚𑀻𑀯𑀺𑀢𑀁 𑀫𑀼𑀜𑁆𑀘𑀸𑀢𑀺 𑀫𑀁 𑀬𑀸𑀘𑀺.
𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑀣𑀸 𑀬𑀸𑀘𑀦𑁆𑀢𑀲𑁆𑀲. 𑀲𑀼𑀔𑁂𑀦 𑀘𑀸𑀢𑀺 𑀬𑀣𑀸𑀲𑀼𑀔𑁂𑀦 𑀘𑀺𑀢𑁆𑀢𑀓𑀽𑀝𑀁 𑀕𑀦𑁆𑀢𑁆𑀯𑀸 𑀜𑀸𑀢𑀺𑀲𑀗𑁆𑀖𑀁 𑀧𑀲𑁆𑀲𑀣𑀸𑀢𑀺 𑀘 𑀅𑀦𑀼𑀚𑀸𑀦𑀺𑀁. 𑀏𑀢𑁆𑀣𑁂𑀯 𑀳𑀻𑀢𑀺 𑀫𑀬𑀸 𑀧𑀦 𑀇𑀫𑁂 𑀤𑁆𑀯𑁂 𑀏𑀢𑁆𑀣 𑀫𑀸𑀦𑀼𑀲𑀺𑀬𑀲𑀭𑁂𑀬𑁂𑀯 𑀘𑀺𑀢𑁆𑀢𑀓𑀽𑀝𑀕𑀫𑀦𑀸𑀬 𑀅𑀦𑀼𑀫𑀢𑀸 𑀅𑀳𑁂𑀲𑀼𑀁. 𑀏𑀯𑀁 𑀕𑀢𑁄𑀢𑀺 𑀏𑀯𑀁 𑀲𑀢𑁆𑀢𑀼 𑀳𑀢𑁆𑀣𑀕𑀢𑁄. 𑀚𑀦𑀬𑁂𑀬𑁆𑀬𑀸𑀣 𑀫𑀤𑁆𑀤𑀯𑀦𑁆𑀢𑀺 𑀅𑀢𑁆𑀢𑀦𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀚𑀦𑁂𑀲𑀺. 𑀉𑀧𑀸𑀬𑀦𑀦𑁆𑀢𑀺 𑀧𑀡𑁆𑀡𑀸𑀓𑀸𑀭𑀁. 𑀲𑀩𑁆𑀩𑀲𑀸𑀓𑀼𑀡𑀺𑀓𑀸𑀕𑀸𑀫𑁂𑀢𑀺 ¶ 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀲𑀸𑀓𑀼𑀡𑀺𑀓𑀕𑀸𑀫𑁂 𑀦𑀸𑀳𑀁 𑀅𑀜𑁆𑀜𑀁 𑀢𑀯 𑀏𑀯𑀭𑀽𑀧𑀁 𑀓𑁂𑀦𑀘𑀺 𑀲𑀸𑀓𑀼𑀡𑀺𑀓𑁂𑀦 𑀆𑀪𑀢𑀧𑀼𑀩𑁆𑀩𑀁 𑀉𑀧𑀸𑀬𑀦𑀁 𑀧𑀲𑁆𑀲𑀸𑀫𑀺. 𑀢𑀁 𑀧𑀲𑁆𑀲𑀸𑀢𑀺 𑀢𑀁 𑀫𑀬𑀸 𑀆𑀪𑀢𑀁 𑀉𑀧𑀸𑀬𑀦𑀁 𑀧𑀲𑁆𑀲 𑀫𑀦𑀼𑀚𑀸𑀥𑀺𑀧𑀸𑀢𑀺.
𑀏𑀯𑀁 𑀲𑁄 𑀞𑀺𑀢𑀓𑁄𑀯 𑀲𑀼𑀫𑀼𑀔𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺. 𑀢𑀢𑁄 𑀭𑀸𑀚𑀸 𑀳𑀁𑀲𑀭𑀜𑁆𑀜𑁄 𑀫𑀳𑀸𑀭𑀳𑀁 𑀆𑀲𑀦𑀁, 𑀲𑀼𑀫𑀼𑀔𑀲𑁆𑀲 𑀘 𑀲𑀼𑀯𑀡𑁆𑀡𑀪𑀤𑁆𑀤𑀧𑀻𑀞𑀓𑀁 𑀤𑀸𑀧𑁂𑀢𑁆𑀯𑀸 𑀢𑁂𑀲𑀁 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀲𑀼𑀯𑀡𑁆𑀡𑀪𑀸𑀚𑀦𑁂𑀳𑀺 𑀮𑀸𑀚𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀤𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀧𑀸𑀦𑀪𑁄𑀚𑀦𑀓𑀺𑀘𑁆𑀘𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀫𑀳𑀸𑀲𑀢𑁆𑀢𑀁 𑀥𑀫𑁆𑀫𑀓𑀣𑀁 𑀬𑀸𑀘𑀺𑀢𑁆𑀯𑀸 ¶ 𑀲𑀼𑀯𑀡𑁆𑀡𑀧𑀻𑀞𑀓𑁂 𑀦𑀺𑀲𑀻𑀤𑀺. 𑀲𑁄 𑀢𑁂𑀦 𑀬𑀸𑀘𑀺𑀢𑁄 𑀧𑀝𑀺𑀲𑀦𑁆𑀣𑀸𑀭𑀁 𑀢𑀸𑀯 𑀅𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀁 𑀭𑀸𑀚𑀸𑀦𑀁, 𑀧𑀻𑀞𑁂 𑀲𑁄𑀯𑀡𑁆𑀡𑀬𑁂 𑀲𑀼𑀪𑁂;
𑀅𑀚𑁆𑀛𑀪𑀸𑀲𑀣 𑀯𑀓𑁆𑀓𑀗𑁆𑀕𑁄, 𑀯𑀸𑀘𑀁 𑀓𑀡𑁆𑀡𑀲𑀼𑀔𑀁 𑀪𑀡𑀁.
‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁;
𑀓𑀘𑁆𑀘𑀺 𑀭𑀝𑁆𑀞𑀫𑀺𑀤𑀁 𑀨𑀻𑀢𑀁, 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀲𑀺.
‘‘𑀓𑀼𑀲𑀮𑀜𑁆𑀘𑁂𑀯 𑀫𑁂 𑀳𑀁𑀲, 𑀅𑀣𑁄 𑀳𑀁𑀲 𑀅𑀦𑀸𑀫𑀬𑀁;
𑀅𑀣𑁄 𑀭𑀝𑁆𑀞𑀫𑀺𑀤𑀁 𑀨𑀻𑀢𑀁, 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀳𑀁.
‘‘𑀓𑀘𑁆𑀘𑀺 ¶ 𑀪𑁄𑀢𑁄 𑀅𑀫𑀘𑁆𑀘𑁂𑀲𑀼, 𑀤𑁄𑀲𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;
𑀓𑀘𑁆𑀘𑀺 𑀘 𑀢𑁂 𑀢𑀯𑀢𑁆𑀣𑁂𑀲𑀼, 𑀦𑀸𑀯𑀓𑀗𑁆𑀔𑀦𑁆𑀢𑀺 𑀚𑀻𑀯𑀺𑀢𑀁.
‘‘𑀅𑀣𑁄𑀧𑀺 𑀫𑁂 𑀅𑀫𑀘𑁆𑀘𑁂𑀲𑀼, 𑀤𑁄𑀲𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;
𑀅𑀣𑁄𑀧𑀺 𑀢𑁂 𑀫𑀫𑀢𑁆𑀣𑁂𑀲𑀼, 𑀦𑀸𑀯𑀓𑀗𑁆𑀔𑀦𑁆𑀢𑀺 𑀚𑀻𑀯𑀺𑀢𑀁.
‘‘𑀓𑀘𑁆𑀘𑀺 𑀢𑁂 𑀲𑀸𑀤𑀺𑀲𑀻 𑀪𑀭𑀺𑀬𑀸, 𑀅𑀲𑁆𑀲𑀯𑀸 𑀧𑀺𑀬𑀪𑀸𑀡𑀺𑀦𑀻;
𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀢𑀯 𑀙𑀦𑁆𑀤𑀯𑀲𑀸𑀦𑀼𑀕𑀸.
‘‘𑀅𑀣𑁄 𑀫𑁂 𑀲𑀸𑀤𑀺𑀲𑀻 𑀪𑀭𑀺𑀬𑀸, 𑀅𑀲𑁆𑀲𑀯𑀸 𑀧𑀺𑀬𑀪𑀸𑀡𑀺𑀦𑀻;
𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀫𑀫 𑀙𑀦𑁆𑀤𑀯𑀲𑀸𑀦𑀼𑀕𑀸’’𑀢𑀺.
𑀢𑀢𑁆𑀣 𑀭𑀸𑀚𑀸𑀦𑀦𑁆𑀢𑀺 𑀲𑀸𑀕𑀮𑀭𑀸𑀚𑀸𑀦𑀁. 𑀯𑀓𑁆𑀓𑀗𑁆𑀕𑁄𑀢𑀺 𑀳𑀁𑀲𑀭𑀸𑀚𑀸. 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀲𑀻𑀢𑀺 𑀥𑀫𑁆𑀫𑁂𑀦 𑀅𑀦𑀼𑀲𑀸𑀲𑀲𑀺. 𑀤𑁄𑀲𑁄𑀢𑀺 𑀅𑀧𑀭𑀸𑀥𑁄. 𑀢𑀯𑀢𑁆𑀣𑁂𑀲𑀽𑀢𑀺 𑀉𑀧𑁆𑀧𑀦𑁆𑀦𑁂𑀲𑀼 𑀢𑀯 𑀬𑀼𑀤𑁆𑀥𑀸𑀤𑀻𑀲𑀼 𑀅𑀢𑁆𑀣𑁂𑀲𑀼. 𑀦𑀸𑀯𑀓𑀗𑁆𑀔𑀦𑁆𑀢𑀻𑀢𑀺 𑀉𑀭𑀁 𑀤𑀢𑁆𑀯𑀸 𑀧𑀭𑀺𑀘𑁆𑀘𑀚𑀦𑁆𑀢𑀸 𑀓𑀺𑀘𑁆𑀘𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀦 𑀧𑀢𑁆𑀣𑁂𑀦𑁆𑀢𑀺, 𑀚𑀻𑀯𑀺𑀢𑀜𑁆𑀘 𑀘𑀚𑀺𑀢𑁆𑀯𑀸 𑀢𑀯𑁂𑀯𑀢𑁆𑀣𑀁 𑀓𑀭𑁄𑀦𑁆𑀢𑀺. 𑀲𑀸𑀤𑀺𑀲𑀻𑀢𑀺 𑀲𑀫𑀸𑀦𑀚𑀸𑀢𑀺𑀓𑀸. 𑀅𑀲𑁆𑀲𑀯𑀸𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀺𑀓𑀸. 𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸𑀢𑀺 ¶ 𑀧𑀼𑀢𑁆𑀢𑁂𑀳𑀺 𑀘 𑀭𑀽𑀧𑁂𑀦 𑀘 𑀬𑀲𑁂𑀦 𑀘 𑀉𑀧𑁂𑀢𑀸. 𑀢𑀯 𑀙𑀦𑁆𑀤𑀯𑀲𑀸𑀦𑀼𑀕𑀸𑀢𑀺 𑀓𑀘𑁆𑀘𑀺 𑀢𑀯 𑀅𑀚𑁆𑀛𑀸𑀲𑀬𑀁 𑀢𑀯 𑀯𑀲𑀁 𑀅𑀦𑀼𑀯𑀢𑁆𑀢𑀢𑀺, 𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑀯𑀲𑁂𑀦 𑀯𑀢𑁆𑀢𑀢𑀻𑀢𑀺 𑀧𑀼𑀘𑁆𑀙𑀢𑀺.
𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦 𑀧𑀝𑀺𑀲𑀦𑁆𑀣𑀸𑀭𑁂 𑀓𑀢𑁂 𑀧𑀼𑀦 𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀆𑀳 𑁋
‘‘𑀪𑀯𑀦𑁆𑀢𑀁 ¶ 𑀓𑀘𑁆𑀘𑀺 𑀦𑀼 𑀫𑀳𑀸-𑀲𑀢𑁆𑀢𑀼𑀳𑀢𑁆𑀣𑀢𑁆𑀢𑀢𑀁 𑀕𑀢𑁄;
𑀤𑀼𑀓𑁆𑀔𑀫𑀸𑀧𑀚𑁆𑀚𑀺 𑀯𑀺𑀧𑀼𑀮𑀁, 𑀢𑀲𑁆𑀫𑀺𑀁 𑀧𑀞𑀫𑀫𑀸𑀧𑀤𑁂.
‘‘𑀓𑀘𑁆𑀘𑀺 𑀬𑀦𑁆𑀢𑀸𑀧𑀢𑀺𑀢𑁆𑀯𑀸𑀦, 𑀤𑀡𑁆𑀟𑁂𑀦 𑀲𑀫𑀧𑁄𑀣𑀬𑀺;
𑀏𑀯𑀫𑁂𑀢𑁂𑀲𑀁 𑀚𑀫𑁆𑀫𑀸𑀦𑀁, 𑀧𑀸𑀢𑀺𑀓𑀁 𑀪𑀯𑀢𑀺 𑀢𑀸𑀯𑀤𑁂.
‘‘𑀔𑁂𑀫𑀫𑀸𑀲𑀺 𑀫𑀳𑀸𑀭𑀸𑀚, 𑀏𑀯𑀫𑀸𑀧𑀤𑀺𑀬𑀸 𑀲𑀢𑀺;
𑀦 𑀘𑀸𑀬𑀁 𑀓𑀺𑀜𑁆𑀘𑀺 𑀭𑀲𑁆𑀫𑀸𑀲𑀼, 𑀲𑀢𑁆𑀢𑀽𑀯 𑀲𑀫𑀧𑀚𑁆𑀚𑀣.
‘‘𑀧𑀘𑁆𑀘𑀕𑀫𑀺𑀢𑁆𑀣 ¶ 𑀦𑁂𑀲𑀸𑀤𑁄, 𑀧𑀼𑀩𑁆𑀩𑁂𑀯 𑀅𑀚𑁆𑀛𑀪𑀸𑀲𑀣;
𑀢𑀤𑀸𑀬𑀁 𑀲𑀼𑀫𑀼𑀔𑁄𑀬𑁂𑀯, 𑀧𑀡𑁆𑀟𑀺𑀢𑁄 𑀧𑀘𑁆𑀘𑀪𑀸𑀲𑀣.
‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀧𑀲𑀸𑀤𑀫𑀬𑀫𑀚𑁆𑀛𑀕𑀸;
𑀢𑀢𑁄 𑀫𑀁 𑀧𑀸𑀫𑀼𑀘𑀻 𑀧𑀸𑀲𑀸, 𑀅𑀦𑀼𑀜𑁆𑀜𑀸𑀲𑀺 𑀲𑀼𑀔𑁂𑀦 𑀘.
‘‘𑀇𑀤𑀜𑁆𑀘 𑀲𑀼𑀫𑀼𑀔𑁂𑀦𑁂𑀯, 𑀏𑀢𑀤𑀢𑁆𑀣𑀸𑀬 𑀘𑀺𑀦𑁆𑀢𑀺𑀢𑀁;
𑀪𑁄𑀢𑁄 𑀲𑀓𑀸𑀲𑁂𑀕𑀫𑀦𑀁, 𑀏𑀢𑀲𑁆𑀲 𑀥𑀦𑀫𑀺𑀘𑁆𑀙𑀢𑀸.
‘‘𑀲𑁆𑀯𑀸𑀕𑀢𑀜𑁆𑀘𑁂𑀯𑀺𑀤𑀁 𑀪𑀯𑀢𑀁, 𑀧𑀢𑀻𑀢𑁄 𑀘𑀲𑁆𑀫𑀺 𑀤𑀲𑁆𑀲𑀦𑀸;
𑀏𑀲𑁄 𑀘𑀸𑀧𑀺 𑀩𑀳𑀼𑀁 𑀯𑀺𑀢𑁆𑀢𑀁, 𑀮𑀪𑀢𑀁 𑀬𑀸𑀯𑀤𑀺𑀘𑁆𑀙𑀢𑀻’’𑀢𑀺.
𑀢𑀢𑁆𑀣 𑀫𑀳𑀸𑀲𑀢𑁆𑀢𑀼𑀳𑀢𑁆𑀣𑀢𑁆𑀢𑀢𑀁 𑀕𑀢𑁄𑀢𑀺 𑀫𑀳𑀦𑁆𑀢𑀲𑁆𑀲 𑀲𑀢𑁆𑀢𑀼𑀦𑁄 𑀳𑀢𑁆𑀣𑀢𑁆𑀢𑀁 𑀕𑀢𑁄. 𑀆𑀧𑀢𑀺𑀢𑁆𑀯𑀸𑀦𑀸𑀢𑀺 𑀉𑀧𑀥𑀸𑀯𑀺𑀢𑁆𑀯𑀸. 𑀧𑀸𑀢𑀺𑀓𑀦𑁆𑀢𑀺 𑀧𑀸𑀓𑀢𑀺𑀓𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀢𑁂𑀲𑀜𑁆𑀳𑀺 𑀚𑀫𑁆𑀫𑀸𑀦𑀁 𑀢𑀸𑀯𑀤𑁂𑀯 𑀏𑀯𑀁 𑀧𑀸𑀓𑀢𑀺𑀓𑀁 𑀳𑁄𑀢𑀺, 𑀲𑀓𑀼𑀡𑁂 𑀤𑀡𑁆𑀟𑁂𑀦 𑀧𑁄𑀣𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑁄 𑀥𑀦𑀯𑁂𑀢𑀦𑀁 𑀮𑀪𑀢𑀻𑀢𑀺. 𑀓𑀺𑀜𑁆𑀘𑀺 𑀭𑀲𑁆𑀫𑀸𑀲𑀽𑀢𑀺 𑀓𑀺𑀜𑁆𑀘𑀺 𑀅𑀫𑁆𑀳𑁂𑀲𑀼. 𑀲𑀢𑁆𑀢𑀽𑀯𑀸𑀢𑀺 𑀲𑀢𑁆𑀢𑀼 𑀯𑀺𑀬. 𑀧𑀘𑁆𑀘𑀕𑀫𑀺𑀢𑁆𑀣𑀸𑀢𑀺, 𑀫𑀳𑀸𑀭𑀸𑀚, 𑀏𑀲 𑀅𑀫𑁆𑀳𑁂 𑀤𑀺𑀲𑁆𑀯𑀸 𑀩𑀤𑁆𑀥𑀸𑀢𑀺 𑀲𑀜𑁆𑀜𑀸𑀬 𑀣𑁄𑀓𑀁 𑀑𑀲𑀓𑁆𑀓𑀺𑀢𑁆𑀣. 𑀧𑀼𑀩𑁆𑀩𑁂𑀯𑀸𑀢𑀺 𑀅𑀬𑀫𑁂𑀯 𑀧𑀞𑀫𑀁 𑀅𑀚𑁆𑀛𑀪𑀸𑀲𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀏𑀢𑀤𑀢𑁆𑀣𑀸𑀬𑀸𑀢𑀺 𑀏𑀢𑀲𑁆𑀲 𑀦𑁂𑀲𑀸𑀤𑀧𑀼𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀘𑀺𑀦𑁆𑀢𑀺𑀢𑀁. 𑀥𑀦𑀫𑀺𑀘𑁆𑀙𑀢𑀸𑀢𑀺 𑀏𑀢𑀲𑁆𑀲 𑀥𑀦𑀁 𑀇𑀘𑁆𑀙𑀦𑁆𑀢𑁂𑀦 ¶ 𑀢𑀯 𑀲𑀦𑁆𑀢𑀺𑀓𑀁 𑀅𑀫𑁆𑀳𑀸𑀓𑀁 𑀆𑀕𑀫𑀦𑀁 𑀘𑀺𑀦𑁆𑀢𑀺𑀢𑀁. 𑀲𑁆𑀯𑀸𑀕𑀢𑀜𑁆𑀘𑁂𑀯𑀺𑀤𑀦𑁆𑀢𑀺 𑀫𑀸 𑀪𑁄𑀦𑁆𑀢𑁄 𑀘𑀺𑀦𑁆𑀢𑀬𑀦𑁆𑀢𑀼, 𑀪𑀯𑀢𑀁 𑀇𑀤𑀁 𑀇𑀥𑀸𑀕𑀫𑀦𑀁 𑀲𑁆𑀯𑀸𑀕𑀢𑀫𑁂𑀯. 𑀮𑀪𑀢𑀦𑁆𑀢𑀺 𑀮𑀪𑀢𑀼.
𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀭𑀸𑀚𑀸 𑀅𑀜𑁆𑀜𑀢𑀭𑀁 𑀅𑀫𑀘𑁆𑀘𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀺 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀫𑀁 𑀦𑁂𑀲𑀸𑀤𑀁 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼𑀁 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀸𑀭𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀢𑀣𑀸 𑀓𑀢𑁆𑀯𑀸 𑀆𑀦𑀻𑀢𑀲𑁆𑀲 𑀢𑀲𑁆𑀲 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀕𑀸𑀫𑀁, 𑀤𑁆𑀯𑁂 𑀯𑀻𑀣𑀺𑀬𑁄 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀫𑀳𑀦𑁆𑀢𑀁 𑀕𑁂𑀳𑀁, 𑀭𑀣𑀯𑀭𑀜𑁆𑀘, 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀅𑀤𑀸𑀲𑀺. 𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀲𑀦𑁆𑀢𑀧𑁆𑀧𑀬𑀺𑀢𑁆𑀯𑀸 𑀦𑁂𑀲𑀸𑀤𑀁, 𑀪𑁄𑀕𑁂𑀳𑀺 𑀫𑀦𑀼𑀚𑀸𑀥𑀺𑀧𑁄;
𑀅𑀚𑁆𑀛𑀪𑀸𑀲𑀣 𑀯𑀓𑁆𑀓𑀗𑁆𑀕𑀁, 𑀯𑀸𑀘𑀁 𑀓𑀡𑁆𑀡𑀲𑀼𑀔𑀁 𑀪𑀡’’𑀦𑁆𑀢𑀺.
𑀅𑀣 ¶ 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀳𑀤𑀬𑁄 ‘‘𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀢𑀘𑁆𑀙𑀢𑁆𑀢𑀁 𑀤𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑁄 𑀆𑀳 𑁋
‘‘𑀬𑀁 𑀔𑀮𑀼 𑀥𑀫𑁆𑀫𑀫𑀸𑀥𑀻𑀦𑀁, 𑀯𑀲𑁄 𑀯𑀢𑁆𑀢𑀢𑀺 𑀓𑀺𑀜𑁆𑀘𑀦𑀁;
𑀲𑀩𑁆𑀩𑀢𑁆𑀣𑀺𑀲𑁆𑀲𑀭𑀺𑀬𑀁 𑀪𑀯𑀢𑀁, 𑀧𑀲𑀸𑀲𑀣 𑀬𑀤𑀺𑀘𑁆𑀙𑀣.
‘‘𑀤𑀸𑀦𑀢𑁆𑀣𑀁 𑀉𑀧𑀪𑁄𑀢𑁆𑀢𑀼𑀁 𑀯𑀸, 𑀬𑀁 𑀘𑀜𑁆𑀜𑀁 𑀉𑀧𑀓𑀧𑁆𑀧𑀢𑀺;
𑀏𑀢𑀁 𑀤𑀤𑀸𑀫𑀺 𑀯𑁄 𑀯𑀺𑀢𑁆𑀢𑀁, 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀚𑀸𑀫𑀺 𑀯𑁄’’𑀢𑀺.
𑀢𑀢𑁆𑀣 𑀯𑀲𑁄 𑀯𑀢𑁆𑀢𑀢𑀻𑀢𑀺 𑀬𑀢𑁆𑀣 𑀫𑀫 𑀯𑀲𑁄 𑀯𑀢𑁆𑀢𑀢𑀺. 𑀓𑀺𑀜𑁆𑀘𑀦𑀦𑁆𑀢𑀺 𑀢𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀲𑀩𑁆𑀩𑀢𑁆𑀣𑀺𑀲𑁆𑀲𑀭𑀺𑀬𑀦𑁆𑀢𑀺 𑀲𑀩𑁆𑀩𑀁 𑀪𑀯𑀢𑀁𑀬𑁂𑀯 𑀇𑀲𑁆𑀲𑀭𑀺𑀬𑀁 𑀅𑀢𑁆𑀣𑀼. 𑀬𑀁 𑀘𑀜𑁆𑀜𑀁 𑀉𑀧𑀓𑀧𑁆𑀧𑀢𑀻𑀢𑀺 𑀧𑀼𑀜𑁆𑀜𑀓𑀸𑀫𑀢𑀸𑀬 𑀤𑀸𑀦𑀢𑁆𑀣𑀁 𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀫𑁂𑀯 𑀉𑀧𑀪𑁄𑀢𑁆𑀢𑀼𑀁 𑀯𑀸 𑀬𑀁 𑀯𑀸 𑀅𑀜𑁆𑀜𑀁 𑀢𑀼𑀫𑁆𑀳𑀸𑀓𑀁 𑀭𑀼𑀘𑁆𑀘𑀢𑀺, 𑀢𑀁 𑀓𑀭𑁄𑀣, 𑀏𑀢𑀁 𑀤𑀤𑀸𑀫𑀺 𑀯𑁄 𑀯𑀺𑀢𑁆𑀢𑀁, 𑀲𑀤𑁆𑀥𑀺𑀁𑀬𑁂𑀯 𑀲𑁂𑀢𑀘𑁆𑀙𑀢𑁆𑀢𑁂𑀦 𑀫𑀫 𑀲𑀦𑁆𑀢𑀓𑀁 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑀸𑀫𑀺 𑀯𑁄𑀢𑀺.
𑀅𑀣 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑀸 𑀤𑀺𑀦𑁆𑀦𑀁 𑀲𑁂𑀢𑀘𑁆𑀙𑀢𑁆𑀢𑀁 𑀧𑀼𑀦 𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀭𑀸𑀚𑀸𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀳𑀁𑀲𑀭𑀜𑁆𑀜𑁄 𑀢𑀸𑀯 𑀫𑁂 𑀥𑀫𑁆𑀫𑀓𑀣𑀸 𑀲𑀼𑀢𑀸, 𑀮𑀼𑀤𑁆𑀤𑀧𑀼𑀢𑁆𑀢𑁂𑀦 𑀧𑀦 ‘𑀅𑀬𑀁 𑀲𑀼𑀫𑀼𑀔𑁄 𑀫𑀼𑀥𑀼𑀭𑀓𑀣𑁄’𑀢𑀺 𑀅𑀢𑀺𑀯𑀺𑀬 ¶ 𑀯𑀡𑁆𑀡𑀺𑀢𑁄, 𑀇𑀫𑀲𑁆𑀲𑀧𑀺 𑀥𑀫𑁆𑀫𑀓𑀣𑀁 𑀲𑁄𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀬𑀣𑀸 𑀘 𑀫𑁆𑀬𑀸𑀬𑀁 𑀲𑀼𑀫𑀼𑀔𑁄, 𑀅𑀚𑁆𑀛𑀪𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄;
𑀓𑀸𑀫𑀲𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄, 𑀢𑀁 𑀫𑁆𑀬𑀸𑀲𑁆𑀲 𑀧𑀭𑀫𑀧𑁆𑀧𑀺𑀬’’𑀦𑁆𑀢𑀺.
𑀢𑀢𑁆𑀣 ¶ 𑀬𑀣𑀸𑀢𑀺 𑀬𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀘 𑀫𑁂 𑀅𑀬𑀁 𑀲𑀼𑀫𑀼𑀔𑁄 𑀧𑀡𑁆𑀟𑀺𑀢𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀓𑀸𑀫𑀲𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀅𑀚𑁆𑀛𑀪𑀸𑀲𑁂𑀬𑁆𑀬, 𑀢𑀁 𑀫𑁂 𑀧𑀭𑀫𑀧𑁆𑀧𑀺𑀬𑀁 𑀅𑀲𑁆𑀲𑀸𑀢𑀺.
𑀢𑀢𑁄 𑀲𑀼𑀫𑀼𑀔𑁄 𑀆𑀳 𑁋
‘‘𑀅𑀳𑀁 𑀔𑀮𑀼 𑀫𑀳𑀸𑀭𑀸𑀚, 𑀦𑀸𑀕𑀭𑀸𑀚𑀸𑀭𑀺𑀯𑀦𑁆𑀢𑀭𑀁;
𑀧𑀝𑀺𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀦 𑀫𑁂 𑀲𑁄 𑀯𑀺𑀦𑀬𑁄 𑀲𑀺𑀬𑀸.
‘‘𑀅𑀫𑁆𑀳𑀸𑀓𑀜𑁆𑀘𑁂𑀯 ¶ 𑀲𑁄 𑀲𑁂𑀝𑁆𑀞𑁄, 𑀢𑁆𑀯𑀜𑁆𑀘 𑀉𑀢𑁆𑀢𑀫𑀲𑀢𑁆𑀢𑀯𑁄;
𑀪𑀽𑀫𑀺𑀧𑀸𑀮𑁄 𑀫𑀦𑀼𑀲𑁆𑀲𑀺𑀦𑁆𑀤𑁄, 𑀧𑀽𑀚𑀸 𑀩𑀳𑀽𑀳𑀺 𑀳𑁂𑀢𑀼𑀪𑀺.
‘‘𑀢𑁂𑀲𑀁 𑀉𑀪𑀺𑀦𑁆𑀦𑀁 𑀪𑀡𑀢𑀁, 𑀯𑀢𑁆𑀢𑀫𑀸𑀦𑁂 𑀯𑀺𑀦𑀺𑀘𑁆𑀙𑀬𑁂;
𑀦𑀦𑁆𑀢𑀭𑀁 𑀧𑀢𑀺𑀯𑀢𑁆𑀢𑀩𑁆𑀩𑀁, 𑀧𑁂𑀲𑁆𑀲𑁂𑀦 𑀫𑀦𑀼𑀚𑀸𑀥𑀺𑀧𑀸’’𑀢𑀺.
𑀢𑀢𑁆𑀣 𑀦𑀸𑀕𑀭𑀸𑀚𑀸𑀭𑀺𑀯𑀦𑁆𑀢𑀭𑀦𑁆𑀢𑀺 𑀧𑁂𑀴𑀸𑀬 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀝𑁆𑀞𑁄 𑀦𑀸𑀕𑀭𑀸𑀚𑀸 𑀯𑀺𑀬. 𑀧𑀝𑀺𑀯𑀢𑁆𑀢𑀼𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑁂 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀦 𑀫𑁂 𑀲𑁄𑀢𑀺 𑀲𑀘𑁂 𑀯𑀤𑁂𑀬𑁆𑀬𑀁, 𑀦 𑀫𑁂 𑀲𑁄 𑀯𑀺𑀦𑀬𑁄 𑀪𑀯𑁂𑀬𑁆𑀬. 𑀅𑀫𑁆𑀳𑀸𑀓𑀜𑁆𑀘𑁂𑀯𑀸𑀢𑀺 𑀙𑀦𑁆𑀦𑀯𑀼𑀢𑀺𑀬𑀸 𑀳𑀁𑀲𑀲𑀳𑀲𑁆𑀲𑀸𑀦𑀁. 𑀉𑀢𑁆𑀢𑀫𑀲𑀢𑁆𑀢𑀯𑁄𑀢𑀺 𑀉𑀢𑁆𑀢𑀫𑀲𑀢𑁆𑀢𑁄. 𑀧𑀽𑀚𑀸𑀢𑀺 𑀉𑀪𑁄 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀧𑀽𑀚𑀸𑀭𑀳𑀸 𑀘𑁂𑀯 𑀧𑀲𑀁𑀲𑀸𑀭𑀳𑀸 𑀘. 𑀧𑁂𑀲𑁆𑀲𑁂𑀦𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀦 𑀲𑁂𑀯𑀓𑁂𑀦.
𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀳𑀤𑀬𑁄 ‘‘𑀦𑁂𑀲𑀸𑀤𑀧𑀼𑀢𑁆𑀢𑁄 𑀢𑀁 𑀯𑀡𑁆𑀡𑁂𑀢𑀺, 𑀦 𑀅𑀜𑁆𑀜𑁂𑀦 𑀢𑀼𑀫𑁆𑀳𑀸𑀤𑀺𑀲𑁂𑀦 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁂𑀦 𑀦𑀸𑀫 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀥𑀫𑁆𑀫𑁂𑀦 𑀓𑀺𑀭 𑀦𑁂𑀲𑀸𑀤𑁄, 𑀧𑀡𑁆𑀟𑀺𑀢𑁄 𑀅𑀡𑁆𑀟𑀚𑁄 𑀇𑀢𑀺;
𑀦𑀳𑁂𑀯 𑀅𑀓𑀢𑀢𑁆𑀢𑀲𑁆𑀲, 𑀦𑀬𑁄 𑀏𑀢𑀸𑀤𑀺𑀲𑁄 𑀲𑀺𑀬𑀸.
‘‘𑀏𑀯𑀁 𑀅𑀕𑁆𑀕𑀧𑀓𑀢𑀺𑀫𑀸, 𑀏𑀯𑀁 𑀉𑀢𑁆𑀢𑀫𑀲𑀢𑁆𑀢𑀯𑁄;
𑀬𑀸𑀯𑀢𑀢𑁆𑀣𑀺 𑀫𑀬𑀸 𑀤𑀺𑀝𑁆𑀞𑀸, 𑀦𑀸𑀜𑁆𑀜𑀁 𑀧𑀲𑁆𑀲𑀸𑀫𑀺 𑀏𑀤𑀺𑀲𑀁.
‘‘𑀢𑀼𑀝𑁆𑀞𑁄𑀲𑁆𑀫𑀺 𑀯𑁄 𑀧𑀓𑀢𑀺𑀬𑀸, 𑀯𑀸𑀓𑁆𑀬𑁂𑀦 𑀫𑀥𑀼𑀭𑁂𑀦 𑀘;
𑀏𑀲𑁄 𑀘𑀸𑀧𑀺 𑀫𑀫𑀘𑁆𑀙𑀦𑁆𑀤𑁄, 𑀘𑀺𑀭𑀁 𑀧𑀲𑁆𑀲𑁂𑀬𑁆𑀬 𑀯𑁄 𑀉𑀪𑁄’’𑀢𑀺.
𑀢𑀢𑁆𑀣 ¶ ¶ 𑀥𑀫𑁆𑀫𑁂𑀦𑀸𑀢𑀺 𑀲𑀪𑀸𑀯𑁂𑀦 𑀓𑀸𑀭𑀡𑁂𑀦. 𑀅𑀓𑀢𑀢𑁆𑀢𑀲𑁆𑀲𑀸𑀢𑀺 𑀅𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀪𑀸𑀯𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀺𑀲𑁆𑀲. 𑀦𑀬𑁄𑀢𑀺 𑀧𑀜𑁆𑀜𑀸. 𑀅𑀕𑁆𑀕𑀧𑀓𑀢𑀺𑀫𑀸𑀢𑀺 𑀅𑀕𑁆𑀕𑀲𑀪𑀸𑀯𑁄. 𑀉𑀢𑁆𑀢𑀫𑀲𑀢𑁆𑀢𑀯𑁄𑀢𑀺 𑀉𑀢𑁆𑀢𑀫𑀲𑀢𑁆𑀢𑁄. 𑀬𑀸𑀯𑀢𑀢𑁆𑀣𑀻𑀢𑀺 𑀬𑀸𑀯𑀢𑀸 𑀫𑀬𑀸 𑀤𑀺𑀝𑁆𑀞𑀸 𑀦𑀸𑀫 𑀅𑀢𑁆𑀣𑀺. 𑀦𑀸𑀜𑁆𑀜𑀦𑁆𑀢𑀺 𑀢𑀲𑁆𑀫𑀺𑀁 𑀫𑀬𑀸 𑀤𑀺𑀝𑁆𑀞𑀝𑁆𑀞𑀸𑀦𑁂 𑀅𑀜𑁆𑀜𑀁 𑀏𑀯𑀭𑀽𑀧𑀁 𑀦 𑀧𑀲𑁆𑀲𑀸𑀫𑀺. 𑀢𑀼𑀝𑁆𑀞𑁄𑀲𑁆𑀫𑀺 𑀯𑁄 𑀧𑀓𑀢𑀺𑀬𑀸𑀢𑀺 𑀲𑀫𑁆𑀫 𑀳𑀁𑀲𑀭𑀸𑀚 𑀅𑀳𑀁 𑀧𑀓𑀢𑀺𑀬𑀸 𑀧𑀞𑀫𑀫𑁂𑀯 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑁂𑀦 𑀢𑀼𑀝𑁆𑀞𑁄. 𑀯𑀸𑀓𑁆𑀬𑁂𑀦𑀸𑀢𑀺 𑀇𑀤𑀸𑀦𑀺 𑀧𑀦 𑀯𑁄 𑀫𑀥𑀼𑀭𑀯𑀘𑀦𑁂𑀦 𑀢𑀼𑀝𑁆𑀞𑁄𑀲𑁆𑀫𑀺. 𑀘𑀺𑀭𑀁 𑀧𑀲𑁆𑀲𑁂𑀬𑁆𑀬 𑀯𑁄𑀢𑀺 𑀇𑀥𑁂𑀯 𑀯𑀲𑀸𑀧𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀯𑀺𑀧𑁆𑀧𑀯𑀸𑀲𑀦𑁆𑀢𑁄 𑀘𑀺𑀭𑀁 𑀢𑀼𑀫𑁆𑀳𑁂 𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀏𑀲 𑀫𑁂 𑀙𑀦𑁆𑀤𑁄𑀢𑀺 𑀯𑀤𑀢𑀺.
𑀢𑀢𑁄 ¶ 𑀫𑀳𑀸𑀲𑀢𑁆𑀢𑁄 𑀭𑀸𑀚𑀸𑀦𑀁 𑀧𑀲𑀁𑀲𑀦𑁆𑀢𑁄 𑀆𑀳 𑁋
‘‘𑀬𑀁 𑀓𑀺𑀘𑁆𑀘𑀁 𑀧𑀭𑀫𑁂 𑀫𑀺𑀢𑁆𑀢𑁂, 𑀓𑀢𑀫𑀲𑁆𑀫𑀸𑀲𑀼 𑀢𑀁 𑀢𑀬𑀸;
𑀧𑀢𑁆𑀢𑀸 𑀦𑀺𑀲𑁆𑀲𑀁𑀲𑀬𑀁 𑀢𑁆𑀬𑀸𑀫𑁆𑀳𑀸, 𑀪𑀢𑁆𑀢𑀺𑀭𑀲𑁆𑀫𑀸𑀲𑀼 𑀬𑀸 𑀢𑀯.
‘‘𑀅𑀤𑀼𑀜𑁆𑀘 𑀦𑀽𑀦 𑀲𑀼𑀫𑀳𑀸, 𑀜𑀸𑀢𑀺𑀲𑀗𑁆𑀖𑀲𑁆𑀲 𑀫𑀦𑁆𑀢𑀭𑀁;
𑀅𑀤𑀲𑁆𑀲𑀦𑁂𑀦 𑀅𑀲𑁆𑀫𑀸𑀓𑀁, 𑀤𑀼𑀓𑁆𑀔𑀁 𑀩𑀳𑀽𑀲𑀼 𑀧𑀓𑁆𑀔𑀺𑀲𑀼.
‘‘𑀢𑁂𑀲𑀁 𑀲𑁄𑀓𑀯𑀺𑀖𑀸𑀢𑀸𑀬, 𑀢𑀬𑀸 𑀅𑀦𑀼𑀫𑀢𑀸 𑀫𑀬𑀁;
𑀢𑀁 𑀧𑀤𑀓𑁆𑀔𑀺𑀡𑀢𑁄 𑀓𑀢𑁆𑀯𑀸, 𑀜𑀸𑀢𑀺𑀁 𑀧𑀲𑁆𑀲𑁂𑀫𑀼𑀭𑀺𑀦𑁆𑀤𑀫.
‘‘𑀅𑀤𑁆𑀥𑀸𑀳𑀁 𑀯𑀺𑀧𑀼𑀮𑀁 𑀧𑀻𑀢𑀺𑀁, 𑀪𑀯𑀢𑀁 𑀯𑀺𑀦𑁆𑀤𑀸𑀫𑀺 𑀤𑀲𑁆𑀲𑀦𑀸;
𑀏𑀲𑁄 𑀘𑀸𑀧𑀺 𑀫𑀳𑀸 𑀅𑀢𑁆𑀣𑁄, 𑀜𑀸𑀢𑀺𑀯𑀺𑀲𑁆𑀲𑀸𑀲𑀦𑀸 𑀲𑀺𑀬𑀸’’𑀢𑀺.
𑀢𑀢𑁆𑀣 𑀓𑀢𑀫𑀲𑁆𑀫𑀸𑀲𑀽𑀢𑀺 𑀓𑀢𑀁 𑀅𑀫𑁆𑀳𑁂𑀲𑀼. 𑀧𑀢𑁆𑀢𑀸 𑀦𑀺𑀲𑁆𑀲𑀁𑀲𑀬𑀁 𑀢𑁆𑀬𑀸𑀫𑁆𑀳𑀸𑀢𑀺 𑀫𑀬𑀁 𑀦𑀺𑀲𑁆𑀲𑀁𑀲𑀬𑁂𑀦 𑀢𑀬𑀸 𑀧𑀢𑁆𑀢𑀸𑀬𑁂𑀯. 𑀪𑀢𑁆𑀢𑀺𑀭𑀲𑁆𑀫𑀸𑀲𑀼 𑀬𑀸 𑀢𑀯𑀸𑀢𑀺 𑀬𑀸 𑀢𑀯 𑀅𑀫𑁆𑀳𑁂𑀲𑀼 𑀪𑀢𑁆𑀢𑀺, 𑀢𑀸𑀬 𑀪𑀢𑁆𑀢𑀺𑀬𑀸 𑀫𑀬𑀁 𑀢𑀬𑀸 𑀅𑀲𑀁𑀲𑀬𑁂𑀦 𑀧𑀢𑁆𑀢𑀸𑀬𑁂𑀯, 𑀦 𑀘 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀯𑀺𑀧𑁆𑀧𑀯𑀼𑀝𑁆𑀞𑀸𑀧𑀺 𑀲𑀳𑀯𑀸𑀲𑀺𑀦𑁄𑀬𑁂𑀯 𑀦𑀸𑀫 𑀫𑀬𑀦𑁆𑀢𑀺 𑀤𑀻𑀧𑁂𑀢𑀺. 𑀅𑀤𑀼𑀜𑁆𑀘 𑀦𑀽𑀦 𑀲𑀼𑀫𑀳𑀸𑀢𑀺 𑀏𑀢𑀜𑁆𑀘 𑀏𑀓𑀁𑀲𑁂𑀦𑁂𑀯 𑀲𑀼𑀫𑀳𑀦𑁆𑀢𑀁. 𑀜𑀸𑀢𑀺𑀲𑀗𑁆𑀖𑀲𑁆𑀲 𑀫𑀦𑁆𑀢𑀭𑀦𑁆𑀢𑀺 𑀅𑀫𑁆𑀳𑁂𑀳𑀺 𑀤𑁆𑀯𑀻𑀳𑀺 𑀚𑀦𑁂𑀳𑀺 𑀯𑀺𑀭𑀳𑀺𑀢𑀲𑁆𑀲 𑀫𑀫 𑀜𑀸𑀢𑀺𑀲𑀗𑁆𑀖𑀲𑁆𑀲 𑀅𑀦𑁆𑀢𑀭𑀁 𑀙𑀺𑀤𑁆𑀤𑀁. 𑀅𑀲𑁆𑀫𑀸𑀓𑀦𑁆𑀢𑀺 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀅𑀤𑀲𑁆𑀲𑀦𑁂𑀦 𑀩𑀳𑀽𑀲𑀼 𑀧𑀓𑁆𑀔𑀻𑀲𑀼 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁. 𑀧𑀲𑁆𑀲𑁂𑀫𑀼𑀭𑀺𑀦𑁆𑀤𑀫𑀸𑀢𑀺 𑀧𑀲𑁆𑀲𑁂𑀬𑁆𑀬𑀸𑀫 𑀅𑀭𑀺𑀦𑁆𑀤𑀫. 𑀪𑀯𑀢𑀦𑁆𑀢𑀺 𑀪𑁄𑀢𑁄 𑀤𑀲𑁆𑀲𑀦𑁂𑀦. 𑀏𑀲𑁄 𑀘𑀸𑀧𑀺 𑀫𑀳𑀸 𑀅𑀢𑁆𑀣𑁄𑀢𑀺 𑀬𑀸 𑀏𑀲𑀸 𑀜𑀸𑀢𑀺𑀲𑀗𑁆𑀖𑀲𑀗𑁆𑀔𑀸𑀢𑀸 𑀜𑀸𑀢𑀺𑀯𑀺𑀲𑁆𑀲𑀸𑀲𑀦𑀸 𑀲𑀺𑀬𑀸, 𑀏𑀲𑁄 𑀘𑀸𑀧𑀺 𑀫𑀳𑀦𑁆𑀢𑁄 𑀅𑀢𑁆𑀣𑁄𑀧𑀺.
𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀢𑁂𑀲𑀁 𑀕𑀫𑀦𑀁 𑀅𑀦𑀼𑀚𑀸𑀦𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀭𑀜𑁆𑀜𑁄 𑀧𑀜𑁆𑀘𑀯𑀺𑀥𑁂 𑀤𑀼𑀲𑁆𑀲𑀻𑀮𑁆𑀬𑁂 𑀆𑀤𑀻𑀦𑀯𑀁, 𑀲𑀻𑀮𑁂 𑀘 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 ‘‘𑀇𑀫𑀁 𑀲𑀻𑀮𑀁 𑀭𑀓𑁆𑀔, 𑀥𑀫𑁆𑀫𑁂𑀦 ¶ 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀲𑀗𑁆𑀕𑀡𑁆𑀳𑀸𑀳𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀁 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀇𑀤𑀁 𑀯𑀢𑁆𑀯𑀸 𑀥𑀢𑀭𑀝𑁆𑀞𑁄, 𑀳𑀁𑀲𑀭𑀸𑀚𑀸 𑀦𑀭𑀸𑀥𑀺𑀧𑀁;
𑀉𑀢𑁆𑀢𑀫𑀁 𑀚𑀯𑀫𑀦𑁆𑀯𑀸𑀬, 𑀜𑀸𑀢𑀺𑀲𑀗𑁆𑀖𑀁 𑀉𑀧𑀸𑀕𑀫𑀼𑀁.
‘‘𑀢𑁂 ¶ 𑀅𑀭𑁄𑀕𑁂 𑀅𑀦𑀼𑀧𑁆𑀧𑀢𑁆𑀢𑁂, 𑀤𑀺𑀲𑁆𑀯𑀸𑀦 𑀧𑀭𑀫𑁂 𑀤𑀺𑀚𑁂;
𑀓𑁂𑀓𑀸𑀢𑀺 𑀫𑀓𑀭𑀼𑀁 𑀳𑀁𑀲𑀸, 𑀧𑀼𑀣𑀼𑀲𑀤𑁆𑀤𑁄 𑀅𑀚𑀸𑀬𑀣.
‘‘𑀢𑁂 𑀧𑀢𑀻𑀢𑀸 𑀧𑀫𑀼𑀢𑁆𑀢𑁂𑀦, 𑀪𑀢𑁆𑀢𑀼𑀦𑀸 𑀪𑀢𑁆𑀢𑀼𑀕𑀸𑀭𑀯𑀸;
𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑀺𑀁𑀲𑀼, 𑀅𑀡𑁆𑀟𑀚𑀸 𑀮𑀤𑁆𑀥𑀧𑀘𑁆𑀘𑀬𑀸’’𑀢𑀺.
𑀢𑀢𑁆𑀣 𑀉𑀧𑀸𑀕𑀫𑀼𑀦𑁆𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀫𑁂𑀯 𑀮𑀸𑀚𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀭𑀜𑁆𑀜𑀸 𑀘 𑀤𑁂𑀯𑀺𑀬𑀸 𑀘 𑀤𑁆𑀯𑀻𑀳𑀺 𑀲𑀼𑀯𑀡𑁆𑀡𑀢𑀸𑀮𑀯𑀡𑁆𑀝𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀓𑀢𑀲𑀓𑁆𑀓𑀸𑀭𑀸 𑀢𑀸𑀮𑀯𑀡𑁆𑀝𑁂𑀳𑀺 𑀑𑀢𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀭𑀜𑁆𑀜𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀕𑀘𑁆𑀙𑀣 𑀲𑀸𑀫𑀺𑀦𑁄’’𑀢𑀺 𑀯𑀼𑀢𑁆𑀢𑁂 𑀲𑀻𑀳𑀧𑀜𑁆𑀚𑀭𑁂𑀦 𑀦𑀺𑀓𑁆𑀔𑀦𑁆𑀢𑀸 𑀉𑀢𑁆𑀢𑀫𑁂𑀦 𑀚𑀯𑁂𑀦 𑀕𑀦𑁆𑀢𑁆𑀯𑀸 𑀜𑀸𑀢𑀺𑀕𑀡𑀁 𑀉𑀧𑀸𑀕𑀫𑀺𑀁𑀲𑀼. 𑀧𑀭𑀫𑁂𑀢𑀺 𑀉𑀢𑁆𑀢𑀫𑁂. 𑀓𑁂𑀓𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 ‘‘𑀓𑁂𑀓𑀸’’𑀢𑀺 𑀲𑀤𑁆𑀤𑀫𑀓𑀁𑀲𑀼. 𑀪𑀢𑁆𑀢𑀼𑀕𑀸𑀭𑀯𑀸𑀢𑀺 𑀪𑀢𑁆𑀢𑀭𑀺 𑀲𑀕𑀸𑀭𑀯𑀸. 𑀧𑀭𑀺𑀓𑀺𑀭𑀺𑀁𑀲𑀽𑀢𑀺 𑀪𑀢𑁆𑀢𑀼𑀦𑁄 𑀫𑀼𑀢𑁆𑀢𑀪𑀸𑀯𑁂𑀦 𑀢𑀼𑀝𑁆𑀞𑀸 𑀢𑀁 𑀪𑀢𑁆𑀢𑀸𑀭𑀁 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀮𑀤𑁆𑀥𑀧𑀘𑁆𑀘𑀬𑀸𑀢𑀺 𑀮𑀤𑁆𑀥𑀧𑀢𑀺𑀝𑁆𑀞𑀸.
𑀏𑀯𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀦 𑀢𑁂 𑀳𑀁𑀲𑀸 ‘‘𑀓𑀣𑀁 𑀫𑀼𑀢𑁆𑀢𑁄𑀲𑀺, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀲𑀼𑀫𑀼𑀔𑀁 𑀦𑀺𑀲𑁆𑀲𑀸𑀬 𑀫𑀼𑀢𑁆𑀢𑀪𑀸𑀯𑀁, 𑀲𑀸𑀕𑀮𑀭𑀸𑀚𑀮𑀼𑀤𑁆𑀤𑀧𑀼𑀢𑁆𑀢𑁂𑀳𑀺 𑀓𑀢𑀓𑀫𑁆𑀫𑀜𑁆𑀘 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀳𑀁𑀲𑀕𑀡𑁄 ‘‘𑀲𑀼𑀫𑀼𑀔𑀲𑁂𑀦𑀸𑀧𑀢𑀺 𑀘 𑀭𑀸𑀚𑀸 𑀘 𑀮𑀼𑀤𑁆𑀤𑀧𑀼𑀢𑁆𑀢𑁄 𑀘 𑀲𑀼𑀔𑀺𑀢𑀸 𑀦𑀺𑀤𑁆𑀤𑀼𑀓𑁆𑀔𑀸 𑀘𑀺𑀭𑀁 𑀚𑀻𑀯𑀦𑁆𑀢𑀽’’𑀢𑀺 𑀣𑀼𑀢𑀺𑀫𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋
‘‘𑀏𑀯𑀁 𑀫𑀺𑀢𑁆𑀢𑀯𑀢𑀁 𑀅𑀢𑁆𑀣𑀸, 𑀲𑀩𑁆𑀩𑁂 𑀳𑁄𑀦𑁆𑀢𑀺 𑀧𑀤𑀓𑁆𑀔𑀺𑀡𑀸;
𑀳𑀁𑀲𑀸 𑀬𑀣𑀸 𑀥𑀢𑀭𑀝𑁆𑀞𑀸, 𑀜𑀸𑀢𑀺𑀲𑀗𑁆𑀖𑀁 𑀉𑀧𑀸𑀕𑀫𑀼’’𑀦𑁆𑀢𑀺.
𑀢𑀢𑁆𑀣 𑀫𑀺𑀢𑁆𑀢𑀯𑀢𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀫𑁆𑀧𑀦𑁆𑀦𑀸𑀦𑀁. 𑀧𑀤𑀓𑁆𑀔𑀺𑀡𑀸𑀢𑀺 𑀲𑀼𑀔𑀦𑀺𑀧𑁆𑀨𑀢𑁆𑀢𑀺𑀦𑁄 𑀯𑀼𑀟𑁆𑀠𑀺𑀬𑀼𑀢𑁆𑀢𑀸. 𑀥𑀢𑀭𑀝𑁆𑀞𑀸𑀢𑀺 𑀳𑀁𑀲𑀭𑀸𑀚𑀸 𑀲𑀼𑀫𑀼𑀔𑁄 𑀭𑀜𑁆𑀜𑀸 𑀘𑁂𑀯 𑀮𑀼𑀤𑁆𑀤𑀧𑀼𑀢𑁆𑀢𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀏𑀯𑀁 𑀉𑀪𑁄𑀧𑀺 𑀢𑁂 𑀥𑀢𑀭𑀝𑁆𑀞𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀫𑁆𑀧𑀦𑁆𑀦𑀸 𑀬𑀣𑀸 𑀜𑀸𑀢𑀺𑀲𑀗𑁆𑀖𑀁 𑀉𑀧𑀸𑀕𑀫𑀼𑀁 ¶ , 𑀜𑀸𑀢𑀺𑀲𑀗𑁆𑀖𑀉𑀧𑀕𑀫𑀦𑀲𑀗𑁆𑀔𑀸𑀢𑁄 𑀦𑁂𑀲𑀁 𑀅𑀢𑁆𑀣𑁄 𑀧𑀤𑀓𑁆𑀔𑀺𑀡𑁄 𑀚𑀸𑀢𑁄, 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀫𑀺𑀢𑁆𑀢𑀯𑀢𑀁 𑀅𑀢𑁆𑀣𑀸 𑀧𑀤𑀓𑁆𑀔𑀺𑀡𑀸 𑀳𑁄𑀦𑁆𑀢𑀻𑀢𑀺.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦 𑀪𑀺𑀓𑁆𑀔𑀯𑁂 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀦𑀦𑁆𑀤𑁄 𑀫𑀫𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀦𑁂𑀲𑀸𑀤𑁄 𑀙𑀦𑁆𑀦𑁄 𑀅𑀳𑁄𑀲𑀺, 𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄 ¶ , 𑀲𑀼𑀫𑀼𑀔𑁄 𑀆𑀦𑀦𑁆𑀤𑁄, 𑀙𑀦𑁆𑀦𑀯𑀼𑀢𑀺 𑀳𑀁𑀲𑀲𑀳𑀲𑁆𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀳𑀁𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀘𑀽𑀴𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.
[𑁫𑁩𑁪] 𑁨. 𑀫𑀳𑀸𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸
𑀏𑀢𑁂 𑀳𑀁𑀲𑀸 𑀧𑀓𑁆𑀓𑀫𑀦𑁆𑀢𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀣𑁂𑀭𑀲𑁆𑀲 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀫𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯, 𑀇𑀥 𑀧𑀦 𑀲𑀢𑁆𑀣𑀸 𑀅𑀢𑀻𑀢𑀁 𑀆𑀳𑀭𑀦𑁆𑀢𑁄 𑀇𑀤𑀫𑀸𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀲𑀁𑀬𑀫𑀲𑁆𑀲 𑀦𑀸𑀫 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀔𑁂𑀫𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀘𑀺𑀢𑁆𑀢𑀓𑀽𑀝𑁂 𑀯𑀺𑀳𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀔𑁂𑀫𑀸 𑀤𑁂𑀯𑀻 𑀧𑀘𑁆𑀘𑀽𑀲𑀲𑀫𑀬𑁂 𑀲𑀼𑀧𑀺𑀦𑀁 𑀅𑀤𑁆𑀤𑀲. 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑀁𑀲𑀸 𑀆𑀕𑀦𑁆𑀢𑁆𑀯𑀸 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀲𑀼𑀁. 𑀤𑁂𑀯𑀺𑀬𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺𑀬𑀸 𑀥𑀫𑁆𑀫𑀲𑁆𑀲𑀯𑀦𑁂𑀦 𑀅𑀢𑀺𑀢𑁆𑀢𑀸𑀬 𑀏𑀯 𑀭𑀢𑁆𑀢𑀺 𑀯𑀺𑀪𑀸𑀬𑀺. 𑀳𑀁𑀲𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀲𑀸 𑀯𑁂𑀕𑁂𑀦𑀼𑀝𑁆𑀞𑀸𑀬 ‘‘𑀧𑀮𑀸𑀬𑀫𑀸𑀦𑁂 𑀳𑀁𑀲𑁂 𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑀻𑀬𑁂𑀯 𑀧𑀩𑀼𑀚𑁆𑀛𑀺. 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀧𑀭𑀺𑀘𑀸𑀭𑀺𑀓𑀸𑀬𑁄 ‘‘𑀓𑀼𑀳𑀺𑀁 𑀳𑀁𑀲𑀸’’𑀢𑀺 𑀣𑁄𑀓𑀁 𑀅𑀯𑀳𑀲𑀺𑀁𑀲𑀼. 𑀲𑀸 𑀢𑀲𑁆𑀫𑀺𑀁 𑀔𑀡𑁂 𑀲𑀼𑀧𑀺𑀦𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀪𑀽𑀢𑀁 𑀦 𑀧𑀲𑁆𑀲𑀸𑀫𑀺, 𑀅𑀤𑁆𑀥𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑀁𑀲𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀘𑁂 𑀔𑁄 𑀧𑀦 ‘𑀲𑀼𑀯𑀡𑁆𑀡𑀳𑀁𑀲𑀸𑀦𑀁 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸𑀫𑁆𑀳𑀻’𑀢𑀺 𑀭𑀸𑀚𑀸𑀦𑀁 𑀯𑀓𑁆𑀔𑀸𑀫𑀺, ‘𑀅𑀫𑁆𑀳𑁂𑀳𑀺 𑀲𑀼𑀯𑀡𑁆𑀡𑀳𑀁𑀲𑀸 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀳𑀁𑀲𑀸𑀦𑀜𑁆𑀘 𑀓𑀣𑀸 𑀦𑀸𑀫 𑀅𑀪𑀽𑀢𑀸𑀬𑁂𑀯𑀸’𑀢𑀺 𑀯𑀢𑁆𑀯𑀸 𑀦𑀺𑀭𑀼𑀲𑁆𑀲𑀼𑀓𑁆𑀓𑁄 𑀪𑀯𑀺𑀲𑁆𑀲𑀢𑀺, ‘𑀤𑁄𑀳𑀴𑁄’𑀢𑀺 𑀯𑀼𑀢𑁆𑀢𑁂 𑀧𑀦 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀧𑀭𑀺𑀬𑁂𑀲𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀫𑀦𑁄𑀭𑀣𑁄 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺. 𑀲𑀸 𑀕𑀺𑀮𑀸𑀦𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀘𑀸𑀭𑀺𑀓𑀸𑀦𑀁 ¶ 𑀲𑀜𑁆𑀜𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺.
𑀭𑀸𑀚𑀸 ¶ 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀤𑀲𑁆𑀲𑀦𑀯𑁂𑀮𑀸𑀬 𑀢𑀁 𑀅𑀤𑀺𑀲𑁆𑀯𑀸 ‘‘𑀓𑀳𑀁, 𑀔𑁂𑀫𑀸 𑀤𑁂𑀯𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀺𑀮𑀸𑀦𑀸’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀬𑀦𑁂𑀓𑀤𑁂𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀓𑀺𑀁 𑀢𑁂 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯 𑀅𑀜𑁆𑀜𑀁 𑀅𑀨𑀸𑀲𑀼𑀓𑀁 𑀦𑀢𑁆𑀣𑀺, 𑀤𑁄𑀳𑀴𑁄 𑀧𑀦 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺. 𑀢𑁂𑀦 𑀳𑀺 ‘‘𑀪𑀡, 𑀤𑁂𑀯𑀺, 𑀬𑀁 𑀇𑀘𑁆𑀙𑀲𑀺, 𑀢𑀁 𑀲𑀻𑀖𑀁 𑀢𑁂 𑀉𑀧𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀅𑀳𑀫𑁂𑀓𑀲𑁆𑀲 𑀲𑀼𑀯𑀡𑁆𑀡𑀳𑀁𑀲𑀲𑁆𑀲 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀥𑀫𑁆𑀫𑀓𑀣𑀁 𑀲𑁄𑀢𑀼𑀫𑀺𑀘𑁆𑀙𑀸𑀫𑀺, 𑀲𑀘𑁂 𑀮𑀪𑀸𑀫𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀻’’𑀢𑀺. 𑀅𑀣 𑀦𑀁 𑀭𑀸𑀚𑀸 ‘‘𑀲𑀘𑁂 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀣𑀺, 𑀮𑀪𑀺𑀲𑁆𑀲𑀲𑀺 ¶ , 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀢𑁄 𑀦𑀺𑀓𑁆𑀔𑀫𑁆𑀫 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀪𑁄, 𑀔𑁂𑀫𑀸 𑀤𑁂𑀯𑀻, ‘𑀲𑀼𑀯𑀡𑁆𑀡𑀳𑀁𑀲𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀮𑀪𑀦𑁆𑀢𑀻 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑀺𑀬𑀸 𑀫𑁂 𑀚𑀻𑀯𑀺𑀢𑀁 𑀦𑀢𑁆𑀣𑀻’𑀢𑀺 𑀯𑀤𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑀁𑀲𑀸’’𑀢𑀺. ‘‘𑀤𑁂𑀯 𑀅𑀫𑁆𑀳𑁂𑀳𑀺 𑀦𑁂𑀯 𑀤𑀺𑀝𑁆𑀞𑀧𑀼𑀩𑁆𑀩𑀸 𑀦 𑀲𑀼𑀢𑀧𑀼𑀩𑁆𑀩𑀸’’𑀢𑀺. ‘‘𑀓𑁂 𑀧𑀦 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺? ‘‘𑀩𑁆𑀭𑀸𑀳𑁆𑀫𑀡𑀸, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀳𑁄𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑀁𑀲𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚 𑀅𑀫𑁆𑀳𑀸𑀓𑀁 𑀫𑀦𑁆𑀢𑁂𑀲𑀼𑀫𑀘𑁆𑀙𑀸, 𑀓𑀓𑁆𑀓𑀝𑀓𑀸, 𑀓𑀘𑁆𑀙𑀧𑀸, 𑀫𑀺𑀕𑀸, 𑀫𑁄𑀭𑀸, 𑀳𑀁𑀲𑀸𑀢𑀺 𑀙 𑀏𑀢𑁂 𑀢𑀺𑀭𑀘𑁆𑀙𑀸𑀦𑀕𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 𑀆𑀕𑀢𑀸, 𑀢𑀢𑁆𑀣 𑀥𑀢𑀭𑀝𑁆𑀞𑀓𑀼𑀮𑀳𑀁𑀲𑀸 𑀦𑀸𑀫 𑀧𑀡𑁆𑀟𑀺𑀢𑀸 𑀜𑀸𑀡𑀲𑀫𑁆𑀧𑀦𑁆𑀦𑀸, 𑀇𑀢𑀺 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁄𑀦𑁆𑀢𑀻’’𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀆𑀘𑀭𑀺𑀬𑀸 𑀥𑀢𑀭𑀝𑁆𑀞𑀳𑀁𑀲𑀸 𑀯𑀲𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀚𑀸𑀦𑀸𑀫, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀣 𑀓𑁂 𑀧𑀦 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀮𑀼𑀤𑁆𑀤𑀧𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀮𑀼𑀤𑁆𑀤𑀓𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀸𑀢𑀸, 𑀲𑀼𑀯𑀡𑁆𑀡𑀯𑀡𑁆𑀡𑀸 𑀥𑀢𑀭𑀝𑁆𑀞𑀓𑀼𑀮𑀳𑀁𑀲𑀸 𑀦𑀸𑀫 𑀓𑀳𑀁 𑀯𑀲𑀦𑁆𑀢𑀻’’𑀢𑀺? 𑀅𑀣𑁂𑀓𑁄 𑀮𑀼𑀤𑁆𑀤𑁄 ‘‘𑀳𑀺𑀫𑀯𑀦𑁆𑀢𑁂 𑀓𑀺𑀭, 𑀤𑁂𑀯, 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂𑀢𑀺 𑀦𑁄 𑀓𑀼𑀮𑀧𑀭𑀫𑁆𑀧𑀭𑀸𑀬 𑀓𑀣𑁂𑀦𑁆𑀢𑀻’’𑀢𑀺 𑀆𑀳. ‘‘𑀚𑀸𑀦𑀸𑀲𑀺 𑀧𑀦 𑀦𑁂𑀲𑀁 𑀕𑀳𑀡𑀽𑀧𑀸𑀬’’𑀦𑁆𑀢𑀺? ‘‘𑀦 𑀚𑀸𑀦𑀸𑀫𑀺, 𑀤𑁂𑀯𑀸’’𑀢𑀺. ‘‘𑀓𑁂 𑀧𑀦 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺? 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ¶ 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀲𑀼𑀯𑀡𑁆𑀡𑀯𑀡𑁆𑀡𑀸𑀦𑀁 𑀳𑀁𑀲𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀚𑀸𑀦𑀸𑀣 𑀦𑀼 𑀔𑁄 𑀢𑁂𑀲𑀁 𑀕𑀳𑀡𑀽𑀧𑀸𑀬’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀓𑀺𑀁 𑀢𑁂𑀳𑀺 𑀕𑀦𑁆𑀢𑁆𑀯𑀸 𑀕𑀳𑀺𑀢𑁂𑀳𑀺, 𑀉𑀧𑀸𑀬𑁂𑀦 𑀢𑁂 𑀦𑀕𑀭𑀲𑀫𑀻𑀧𑀁 𑀆𑀦𑁂𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀸’’𑀢𑀺. ‘‘𑀓𑁄 𑀧𑀦 𑀉𑀧𑀸𑀬𑁄’’𑀢𑀺? ‘‘𑀫𑀳𑀸𑀭𑀸𑀚, 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀉𑀢𑁆𑀢𑀭𑁂𑀦 𑀢𑀺𑀕𑀸𑀯𑀼𑀢𑀫𑀢𑁆𑀢𑁂 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀔𑁂𑀫𑀁 𑀦𑀸𑀫 𑀲𑀭𑀁 ¶ 𑀓𑀸𑀭𑀸𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀸𑀦𑀸𑀥𑀜𑁆𑀜𑀸𑀦𑀺 𑀭𑁄𑀧𑁂𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀏𑀓𑀁 𑀧𑀡𑁆𑀟𑀺𑀢𑀁 𑀦𑁂𑀲𑀸𑀤𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀉𑀧𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀞𑀺𑀢𑁂𑀳𑀺 𑀅𑀪𑀬𑀁 𑀖𑁄𑀲𑀸𑀧𑁂𑀣, 𑀢𑀁 𑀲𑀼𑀢𑁆𑀯𑀸 𑀦𑀸𑀦𑀸𑀲𑀓𑀼𑀡𑀸 𑀤𑀲 𑀤𑀺𑀲𑀸 𑀑𑀢𑀭𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀳𑀁𑀲𑀸 𑀧𑀭𑀫𑁆𑀧𑀭𑀸𑀬 𑀢𑀲𑁆𑀲 𑀲𑀭𑀲𑁆𑀲 𑀔𑁂𑀫𑀪𑀸𑀯𑀁 𑀲𑀼𑀢𑁆𑀯𑀸 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀅𑀣 𑀦𑁂 𑀯𑀸𑀮𑀧𑀸𑀲𑁂𑀳𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀬𑁆𑀬𑀸𑀣𑀸’’𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑁂𑀳𑀺 𑀯𑀼𑀢𑁆𑀢𑀧𑀤𑁂𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀙𑁂𑀓𑀁 𑀦𑁂𑀲𑀸𑀤𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀫𑀸 𑀓𑀭𑀺, 𑀧𑀼𑀢𑁆𑀢𑀤𑀸𑀭𑀁 𑀢𑁂 𑀅𑀳𑀁 𑀧𑁄𑀲𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀔𑁂𑀫𑀁 𑀲𑀭𑀁 𑀭𑀓𑁆𑀔𑀦𑁆𑀢𑁄 𑀫𑀦𑀼𑀲𑁆𑀲𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀅𑀪𑀬𑀁 𑀖𑁄𑀲𑀸𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑁂 𑀲𑀓𑀼𑀡𑁂 𑀫𑀫 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺, 𑀲𑀼𑀯𑀡𑁆𑀡𑀳𑀁𑀲𑁂𑀲𑀼 𑀆𑀕𑀢𑁂𑀲𑀼 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀢𑀫𑀲𑁆𑀲𑀸𑀲𑁂𑀢𑁆𑀯𑀸 𑀔𑁂𑀫𑀁 𑀲𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀭𑀜𑁆𑀜𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀢𑁆𑀣 𑀧𑀝𑀺𑀧𑀚𑁆𑀚𑀺, ‘‘𑀔𑁂𑀫𑀁 𑀲𑀭𑀁 𑀭𑀓𑁆𑀔𑀢𑀻’’𑀢𑀺 𑀘𑀲𑁆𑀲 ‘‘𑀔𑁂𑀫𑀦𑁂𑀲𑀸𑀤𑁄’’𑀢𑁆𑀯𑁂𑀯 𑀦𑀸𑀫𑀁 𑀉𑀤𑀧𑀸𑀤𑀺 ¶ . 𑀢𑀢𑁄 𑀧𑀝𑁆𑀞𑀸𑀬 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀲𑀓𑀼𑀡𑀸 𑀑𑀢𑀭𑀺𑀁𑀲𑀼, ‘‘𑀔𑁂𑀫𑀁 𑀦𑀺𑀩𑁆𑀪𑀬𑀁 𑀲𑀭’’𑀦𑁆𑀢𑀺 𑀧𑀭𑀫𑁆𑀧𑀭𑀸𑀖𑁄𑀲𑁂𑀦 𑀦𑀸𑀦𑀸𑀳𑀁𑀲𑀸 𑀆𑀕𑀫𑀺𑀁𑀲𑀼. 𑀧𑀞𑀫𑀁 𑀢𑀸𑀯 𑀢𑀺𑀡𑀳𑀁𑀲𑀸 𑀆𑀕𑀫𑀺𑀁𑀲𑀼, 𑀢𑁂𑀲𑀁 𑀖𑁄𑀲𑁂𑀦 𑀧𑀡𑁆𑀟𑀼𑀳𑀁𑀲𑀸, 𑀢𑁂𑀲𑀁 𑀖𑁄𑀲𑁂𑀦 𑀫𑀦𑁄𑀲𑀺𑀮𑀸𑀯𑀡𑁆𑀡𑀸 𑀳𑀁𑀲𑀸, 𑀢𑁂𑀲𑀁 𑀖𑁄𑀲𑁂𑀦 𑀲𑁂𑀢𑀳𑀁𑀲𑀸, 𑀢𑁂𑀲𑀁 𑀖𑁄𑀲𑁂𑀦 𑀧𑀸𑀓𑀳𑀁𑀲𑀸 𑀆𑀕𑀫𑀺𑀁𑀲𑀼. 𑀢𑁂𑀲𑀼 𑀆𑀕𑀢𑁂𑀲𑀼 𑀔𑁂𑀫𑀓𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀤𑁂𑀯, 𑀧𑀜𑁆𑀘𑀯𑀡𑁆𑀡𑀸 𑀳𑀁𑀲𑀸 𑀆𑀕𑀦𑁆𑀢𑁆𑀯𑀸 𑀲𑀭𑁂 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺, 𑀧𑀸𑀓𑀳𑀁𑀲𑀸𑀦𑀁 𑀆𑀕𑀢𑀢𑁆𑀢𑀸 𑀇𑀤𑀸𑀦𑀺 𑀓𑀢𑀺𑀧𑀸𑀳𑁂𑀦𑁂𑀯 𑀲𑀼𑀯𑀡𑁆𑀡𑀳𑀁𑀲𑀸 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀫𑀸 ¶ 𑀘𑀺𑀦𑁆𑀢𑀬𑀺𑀢𑁆𑀣, 𑀤𑁂𑀯𑀸’’𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀜𑁆𑀜𑁂𑀦 𑀢𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁, 𑀬𑁄 𑀕𑀘𑁆𑀙𑀺𑀲𑁆𑀲𑀢𑀺, 𑀳𑀢𑁆𑀣𑀧𑀸𑀤𑀙𑁂𑀤𑀦𑀜𑁆𑀘 𑀖𑀭𑀯𑀺𑀮𑁄𑀧𑀜𑁆𑀘 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀦𑀕𑀭 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀢𑁆𑀣 𑀓𑁄𑀘𑀺 𑀦 𑀕𑀘𑁆𑀙𑀢𑀺. 𑀘𑀺𑀢𑁆𑀢𑀓𑀽𑀝𑀲𑁆𑀲 𑀧𑀦𑀸𑀯𑀺𑀤𑀽𑀭𑁂 𑀓𑀜𑁆𑀘𑀦𑀕𑀼𑀳𑀸𑀬𑀁𑀧𑀸𑀓𑀳𑀁𑀲𑀸 𑀯𑀲𑀦𑁆𑀢𑀺, 𑀢𑁂𑀧𑀺 𑀫𑀳𑀩𑁆𑀩𑀮𑀸. 𑀥𑀢𑀭𑀝𑁆𑀞𑀓𑀼𑀮𑁂𑀦 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀭𑀻𑀭𑀯𑀡𑁆𑀡𑁄𑀯 𑀯𑀺𑀲𑁂𑀲𑁄. 𑀧𑀸𑀓𑀳𑀁𑀲𑀭𑀜𑁆𑀜𑁄 𑀧𑀦 𑀥𑀻𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀳𑁄𑀲𑀺. 𑀲𑁄 𑀢𑀁 𑀥𑀢𑀭𑀝𑁆𑀞𑀫𑀳𑀺𑀲𑁆𑀲𑀭𑀲𑁆𑀲 𑀅𑀦𑀼𑀭𑀽𑀧𑀸𑀢𑀺 𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀢𑁆𑀯𑀸 𑀧𑁂𑀲𑁂𑀲𑀺. 𑀲𑀸 𑀢𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀢𑀸𑀦𑀺 𑀤𑁆𑀯𑁂 𑀳𑀁𑀲𑀓𑀼𑀮𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀸𑀲𑀺𑀓𑀸𑀦𑀺 𑀚𑀸𑀢𑀸𑀦𑀺.
𑀅𑀣𑁂𑀓𑀤𑀺𑀯𑀲𑀁 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑀳𑀁𑀲𑀸 𑀧𑀸𑀓𑀳𑀁𑀲𑁂 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂 𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀓𑀳𑀁 𑀕𑁄𑀘𑀭𑀁 𑀕𑀡𑁆𑀳𑀣𑀸’’𑀢𑀺? ‘‘𑀫𑀬𑀁 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀔𑁂𑀫𑀲𑀭𑁂 𑀕𑁄𑀘𑀭𑀁 𑀕𑀡𑁆𑀳𑀸𑀫, 𑀢𑀼𑀫𑁆𑀳𑁂 𑀧𑀦 𑀓𑀼𑀳𑀺𑀁 𑀆𑀳𑀺𑀡𑁆𑀟𑀣𑀸’’𑀢𑀺. ‘‘𑀅𑀲𑀼𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀔𑁂𑀫𑀲𑀭𑀁 𑀦 𑀕𑀘𑁆𑀙𑀣, 𑀲𑁄 𑀳𑀺 𑀲𑀭𑁄 𑀭𑀫𑀡𑀻𑀬𑁄 𑀦𑀸𑀦𑀸𑀲𑀓𑀼𑀡𑀲𑀫𑀸𑀓𑀺𑀡𑁆𑀡𑁄 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑁄 𑀦𑀸𑀦𑀸𑀥𑀜𑁆𑀜𑀨𑀮𑀲𑀫𑁆𑀧𑀦𑁆𑀦𑁄 𑀦𑀸𑀦𑀧𑁆𑀧𑀓𑀸𑀭𑀪𑀫𑀭𑀕𑀡𑀦𑀺𑀓𑀽𑀚𑀺𑀢𑁄 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀦𑀺𑀘𑁆𑀘𑀁 𑀧𑀯𑀢𑁆𑀢𑀅𑀪𑀬𑀖𑁄𑀲𑀦𑁄, 𑀓𑁄𑀘𑀺 𑀦𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀧𑀕𑁂𑀯 𑀅𑀜𑁆𑀜𑀁 𑀉𑀧𑀤𑁆𑀤𑀯𑀁 𑀓𑀸𑀢𑀼𑀁, 𑀏𑀯𑀭𑀽𑀧𑁄 𑀲𑁄 𑀲𑀭𑁄’’𑀢𑀺 𑀔𑁂𑀫𑀲𑀭𑀁 𑀯𑀡𑁆𑀡𑀬𑀺𑀁𑀲𑀼. 𑀢𑁂 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀬𑀸 𑀲𑀫𑀻𑀧𑁂 𑀓𑀺𑀭 𑀏𑀯𑀭𑀽𑀧𑁄 𑀔𑁂𑀫𑁄 𑀦𑀸𑀫 𑀲𑀭𑁄 𑀅𑀢𑁆𑀣𑀺, 𑀧𑀸𑀓𑀳𑀁𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺, 𑀢𑀼𑀫𑁆𑀳𑁂𑀧𑀺 𑀥𑀢𑀭𑀝𑁆𑀞𑀫𑀳𑀺𑀲𑁆𑀲𑀭𑀲𑁆𑀲 𑀆𑀭𑁄𑀘𑁂𑀣, 𑀲𑀘𑁂 𑀅𑀦𑀼𑀚𑀸𑀦𑀸𑀢𑀺, 𑀫𑀬𑀫𑁆𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑁂𑀬𑁆𑀬𑀸𑀫𑀸’’𑀢𑀺 𑀲𑀼𑀫𑀼𑀔𑀲𑁆𑀲 𑀓𑀣𑁂𑀲𑀼𑀁. 𑀲𑀼𑀫𑀼𑀔𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀼𑀫𑀸𑀬𑀸 𑀔𑀭𑀫𑀦𑁆𑀢𑀸 𑀉𑀧𑀸𑀬𑀓𑀼𑀲𑀮𑀸, 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑁂𑀦, 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀲𑁄 𑀲𑀭𑁄 𑀦𑀢𑁆𑀣𑀺, 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀕𑀳𑀡𑀢𑁆𑀣𑀸𑀬 𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀲𑀼𑀫𑀼𑀔𑀁 𑀆𑀳 𑁋 ‘‘𑀫𑀸 𑀯𑁄 𑀢𑀢𑁆𑀣 𑀕𑀫𑀦𑀁 𑀭𑀼𑀘𑁆𑀘𑀣, 𑀦 𑀲𑁄 𑀲𑀭𑁄 𑀢𑁂𑀳𑀺 𑀲𑀼𑀥𑀫𑁆𑀫𑀢𑀸𑀬 𑀓𑀢𑁄, 𑀅𑀫𑁆𑀳𑀸𑀓𑀁 𑀕𑀳𑀡𑀢𑁆𑀣𑀸𑀬𑁂𑀯 𑀓𑀢𑁄, 𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀼𑀫𑀸𑀬𑀸 𑀔𑀭𑀫𑀦𑁆𑀢𑀸 𑀉𑀧𑀸𑀬𑀓𑀼𑀲𑀮𑀸, 𑀢𑀼𑀫𑁆𑀳𑁂 𑀲𑀓𑁂𑀬𑁂𑀯 𑀕𑁄𑀘𑀭𑁂 𑀘𑀭𑀣𑀸’’𑀢𑀺 ¶ .
𑀲𑀼𑀯𑀡𑁆𑀡𑀳𑀁𑀲𑀸 ‘‘𑀔𑁂𑀫𑀁 𑀲𑀭𑀁 𑀕𑀦𑁆𑀢𑀼𑀓𑀸𑀫𑀫𑁆𑀳𑀸’’𑀢𑀺 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀲𑀼𑀫𑀼𑀔𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 ¶ 𑀢𑁂𑀲𑀁 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑀢𑀁 𑀫𑀳𑀸𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀫𑀫 𑀜𑀸𑀢𑀓𑀸 𑀫𑀁 𑀦𑀺𑀲𑁆𑀲𑀸𑀬 𑀫𑀸 𑀓𑀺𑀮𑀫𑀦𑁆𑀢𑀼, 𑀢𑁂𑀦 𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀳𑀁𑀲𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀫𑁂𑀯 𑀧𑀘𑁆𑀘𑀸𑀕𑀫𑀺. 𑀔𑁂𑀫𑀓𑁄 𑀢𑁂𑀲𑀁 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸 𑀕𑀢𑀓𑀸𑀮𑁂 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀆𑀕𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸, ‘‘𑀲𑀫𑁆𑀫 𑀔𑁂𑀫𑀓, 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀳𑀁𑀲𑁂 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫, 𑀫𑀳𑀦𑁆𑀢𑀁 𑀢𑁂 𑀬𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀘𑀸𑀝𑀺𑀧𑀜𑁆𑀚𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀳𑀁𑀲𑀸𑀦𑀁 𑀘𑀭𑀡𑀝𑁆𑀞𑀸𑀦𑀁 𑀯𑀻𑀫𑀁𑀲𑀺. 𑀩𑁄𑀥𑀺𑀲𑀢𑁆𑀢𑀸 𑀦𑀸𑀫 𑀦𑀺𑀮𑁆𑀮𑁄𑀮𑀼𑀧𑁆𑀧𑀘𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀫𑀳𑀸𑀲𑀢𑁆𑀢𑁄 𑀑𑀢𑀺𑀡𑁆𑀡𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀲𑀧𑀤𑀸𑀦𑀁 𑀲𑀸𑀮𑀺𑀁 𑀔𑀸𑀤𑀦𑁆𑀢𑁄 𑀅𑀕𑀫𑀸𑀲𑀺. 𑀲𑁂𑀲𑀸 𑀇𑀢𑁄 𑀘𑀺𑀢𑁄 𑀘 𑀔𑀸𑀤𑀦𑁆𑀢𑀸 𑀯𑀺𑀘𑀭𑀺𑀁𑀲𑀼.
𑀅𑀣 ¶ 𑀮𑀼𑀤𑁆𑀤𑀧𑀼𑀢𑁆𑀢𑁄 ‘‘𑀅𑀬𑀁 𑀳𑀁𑀲𑁄 𑀦𑀺𑀮𑁆𑀮𑁄𑀮𑀼𑀧𑁆𑀧𑀘𑀸𑀭𑀻, 𑀇𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀳𑀁𑀲𑁂𑀲𑀼 𑀲𑀭𑀁 𑀅𑀦𑁄𑀢𑀺𑀡𑁆𑀡𑁂𑀲𑀼𑀬𑁂𑀯 𑀘𑀸𑀝𑀺𑀧𑀜𑁆𑀚𑀭𑁂 𑀦𑀺𑀲𑀺𑀦𑁆𑀦𑁄 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀧𑀜𑁆𑀚𑀭𑁂 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀙𑀺𑀤𑁆𑀤𑁂𑀦 𑀑𑀮𑁄𑀓𑁂𑀦𑁆𑀢𑁄 𑀅𑀘𑁆𑀙𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀲𑀢𑁆𑀢𑁄 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀼𑀭𑀓𑁆𑀔𑀢𑁄 𑀳𑀺𑀬𑁆𑀬𑁄 𑀑𑀢𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀑𑀢𑀭𑀺𑀢𑁆𑀯𑀸 𑀑𑀥𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀮𑀺𑀁 𑀔𑀸𑀤𑀦𑁆𑀢𑁄 𑀧𑀸𑀬𑀸𑀲𑀺. 𑀦𑁂𑀲𑀸𑀤𑁄 𑀧𑀜𑁆𑀚𑀭𑀙𑀺𑀤𑁆𑀤𑁂𑀦 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀳𑀁𑀲𑁄 𑀲𑀓𑀝𑀦𑀸𑀪𑀺𑀧𑁆𑀧𑀫𑀸𑀡𑀲𑀭𑀻𑀭𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀢𑀻𑀳𑀺 𑀭𑀢𑁆𑀢𑀭𑀸𑀚𑀻𑀳𑀺 𑀕𑀻𑀯𑀸𑀬𑀁 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀢𑀺𑀲𑁆𑀲𑁄 𑀭𑀸𑀚𑀺𑀬𑁄 𑀕𑀮𑁂𑀦 𑀑𑀢𑀭𑀺𑀢𑁆𑀯𑀸 𑀉𑀭𑀦𑁆𑀢𑀭𑁂𑀦 𑀕𑀢𑀸, 𑀢𑀺𑀲𑁆𑀲𑁄 𑀧𑀘𑁆𑀙𑀸𑀪𑀸𑀕𑁂𑀦 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀕𑀢𑀸, 𑀭𑀢𑁆𑀢𑀓𑀫𑁆𑀩𑀮𑀲𑀼𑀢𑁆𑀢𑀲𑀺𑀓𑁆𑀓𑀸𑀬 𑀞𑀧𑀺𑀢𑀓𑀜𑁆𑀘𑀦𑀓𑁆𑀔𑀦𑁆𑀥𑁄 𑀯𑀺𑀬 𑀅𑀢𑀺𑀭𑁄𑀘𑀢𑀺, 𑀇𑀫𑀺𑀦𑀸 𑀏𑀢𑁂𑀲𑀁 𑀭𑀜𑁆𑀜𑀸 𑀪𑀯𑀺𑀢𑀩𑁆𑀩𑀁, 𑀇𑀫𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀳𑀁𑀲𑀭𑀸𑀚𑀸𑀧𑀺 𑀩𑀳𑀼𑀁 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸 𑀚𑀮𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀳𑀁𑀲𑀕𑀡𑀧𑀭𑀺𑀯𑀼𑀢𑁄 𑀘𑀺𑀢𑁆𑀢𑀓𑀽𑀝𑀫𑁂𑀯 𑀅𑀕𑀫𑀸𑀲𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀘 𑀤𑀺𑀯𑀲𑁂 𑀕𑁄𑀘𑀭𑀁 𑀕𑀡𑁆𑀳𑀺. 𑀙𑀝𑁆𑀞𑁂 𑀤𑀺𑀯𑀲𑁂 𑀔𑁂𑀫𑀓𑁄 𑀓𑀸𑀴𑀅𑀲𑁆𑀲𑀯𑀸𑀮𑀫𑀬𑀁 𑀤𑀴𑁆𑀳𑀁 𑀫𑀳𑀸𑀭𑀚𑁆𑀚𑀼𑀁 𑀯𑀝𑁆𑀝𑀺𑀢𑁆𑀯𑀸 𑀬𑀝𑁆𑀞𑀺𑀬𑀸 𑀧𑀸𑀲𑀁 𑀓𑀢𑁆𑀯𑀸 ‘‘𑀲𑁆𑀯𑁂 𑀳𑀁𑀲𑀭𑀸𑀚𑀸 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 ¶ 𑀑𑀢𑀭𑀺𑀲𑁆𑀲𑀢𑀻’’𑀢𑀺 𑀢𑀣𑀢𑁄 𑀜𑀢𑁆𑀯𑀸 𑀅𑀦𑁆𑀢𑁄𑀉𑀤𑀓𑁂 𑀬𑀝𑁆𑀞𑀺𑀧𑀸𑀲𑀁 𑀑𑀟𑁆𑀟𑀺.
𑀧𑀼𑀦𑀤𑀺𑀯𑀲𑁂 𑀳𑀁𑀲𑀭𑀸𑀚𑀸 𑀑𑀢𑀭𑀦𑁆𑀢𑁄 𑀧𑀸𑀤𑀁 𑀧𑀸𑀲𑁂 𑀧𑀯𑁂𑀲𑀦𑁆𑀢𑁄𑀬𑁂𑀯 𑀑𑀢𑀭𑀺. 𑀅𑀣𑀲𑁆𑀲 𑀧𑀸𑀲𑁄 𑀧𑀸𑀤𑀁 𑀅𑀬𑀧𑀝𑁆𑀝𑀓𑁂𑀦 𑀓𑀟𑁆𑀠𑀦𑁆𑀢𑁄 𑀯𑀺𑀬 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺. 𑀲𑁄 ‘‘𑀙𑀺𑀦𑁆𑀤𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑁂𑀕𑀁 𑀚𑀦𑁂𑀢𑁆𑀯𑀸 𑀓𑀟𑁆𑀠𑀺𑀢𑁆𑀯𑀸 𑀧𑀸𑀢𑁂𑀲𑀺. 𑀧𑀞𑀫𑀯𑀸𑀭𑁂 𑀲𑀼𑀯𑀡𑁆𑀡𑀯𑀡𑁆𑀡𑀁 𑀘𑀫𑁆𑀫𑀁 𑀙𑀺𑀚𑁆𑀚𑀺, 𑀤𑀼𑀢𑀺𑀬𑀯𑀸𑀭𑁂 𑀓𑀫𑁆𑀩𑀮𑀯𑀡𑁆𑀡𑀁 𑀫𑀁𑀲𑀁 𑀙𑀺𑀚𑁆𑀚𑀺, 𑀢𑀢𑀺𑀬𑀯𑀸𑀭𑁂 𑀦𑁆𑀳𑀸𑀭𑀼 𑀙𑀺𑀚𑁆𑀚𑀺, 𑀘𑀢𑀼𑀢𑁆𑀣𑀯𑀸𑀭𑁂 𑀧𑀦 ‘‘𑀧𑀸𑀤𑀸 𑀙𑀺𑀚𑁆𑀚𑁂𑀬𑁆𑀬𑀼𑀁, 𑀭𑀜𑁆𑀜𑁄 𑀧𑀦 𑀳𑀻𑀦𑀗𑁆𑀕𑀢𑀸 𑀦𑀸𑀫 𑀅𑀦𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀦 𑀯𑀸𑀬𑀸𑀫𑀁 𑀅𑀓𑀸𑀲𑀺, 𑀩𑀮𑀯𑀯𑁂𑀤𑀦𑀸 𑀘 𑀧𑀯𑀢𑁆𑀢𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀩𑀤𑁆𑀥𑀭𑀯𑀁 𑀭𑀯𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸 𑀫𑁂 𑀜𑀢𑁆𑀭𑀲𑁆𑀢𑀸 𑀳𑀼𑀢𑁆𑀯𑀸 𑀕𑁄𑀘𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑀸𑀯 𑀧𑀮𑀸𑀬𑀦𑁆𑀢𑀸 𑀤𑀼𑀩𑁆𑀩𑀮𑀢𑁆𑀢𑀸 𑀲𑀫𑀼𑀤𑁆𑀤𑁂 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀸𑀲𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀸𑀮𑀺𑀁 𑀔𑀸𑀤𑀦𑁆𑀢𑁄 ¶ 𑀯𑀺𑀬 𑀳𑀼𑀢𑁆𑀯𑀸 𑀢𑁂𑀲𑀁 𑀬𑀸𑀯𑀤𑀢𑁆𑀣𑀁 𑀘𑀭𑀺𑀢𑁆𑀯𑀸 𑀳𑀁𑀲𑀓𑀻𑀴𑀁 𑀓𑀻𑀴𑀦𑀓𑀸𑀮𑁂 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀩𑀤𑁆𑀥𑀭𑀯𑀁 𑀭𑀯𑀺. 𑀢𑀁 𑀲𑀼𑀢𑁆𑀯𑀸 𑀳𑀁𑀲𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀯𑀕𑁆𑀕𑀯𑀕𑁆𑀕𑀸 𑀘𑀺𑀢𑁆𑀢𑀓𑀽𑀝𑀸𑀪𑀺𑀫𑀼𑀔𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀓𑁆𑀓𑀫𑀺𑀁𑀲𑀼.
𑀲𑀼𑀫𑀼𑀔𑁄𑀧𑀺 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀢𑀻𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀼 𑀫𑀳𑀸𑀲𑀢𑁆𑀢𑀁 𑀅𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀢𑀲𑁆𑀲𑁂𑀯𑁂𑀤𑀁 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑁄 𑀫𑀳𑀸𑀲𑀢𑁆𑀢𑀁 𑀧𑀸𑀲𑁂𑀦 𑀩𑀤𑁆𑀥𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀤𑀼𑀓𑁆𑀔𑀸𑀢𑀼𑀭𑀁 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀅𑀳𑀁 𑀫𑀫 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀼𑀫𑁆𑀳𑁂 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀑𑀢𑀭𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑁄 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀲𑀻𑀤𑀺. 𑀫𑀳𑀸𑀲𑀢𑁆𑀢𑁄 ‘‘𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑁂𑀲𑀼 𑀫𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑁂𑀲𑀼 𑀅𑀬𑀁 𑀲𑀼𑀫𑀼𑀔𑁄 𑀏𑀓𑀓𑁄𑀯 𑀆𑀕𑀢𑁄, 𑀓𑀺𑀁 𑀦𑀼 𑀔𑁄 𑀮𑀼𑀤𑁆𑀤𑀧𑀼𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀫𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀦𑁄’’𑀢𑀺 𑀯𑀻𑀫𑀁𑀲𑀦𑀯𑀲𑁂𑀦 𑀮𑁄𑀳𑀺𑀢𑀫𑀓𑁆𑀔𑀺𑀢𑁄 𑀧𑀸𑀲𑀬𑀝𑁆𑀞𑀺𑀬𑀁 𑀑𑀮𑀫𑁆𑀩𑀦𑁆𑀢𑁄𑀬𑁂𑀯 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀏𑀢𑁂 𑀳𑀁𑀲𑀸 𑀧𑀓𑁆𑀓𑀫𑀦𑁆𑀢𑀺, 𑀯𑀓𑁆𑀓𑀗𑁆𑀕𑀸 𑀪𑀬𑀫𑁂𑀭𑀺𑀢𑀸;
𑀳𑀭𑀺𑀢𑁆𑀢𑀘 𑀳𑁂𑀫𑀯𑀡𑁆𑀡, 𑀓𑀸𑀫𑀁 𑀲𑀼𑀫𑀼𑀔 𑀧𑀓𑁆𑀓𑀫.
‘‘𑀑𑀳𑀸𑀬 𑀫𑀁 𑀜𑀸𑀢𑀺𑀕𑀡𑀸, 𑀏𑀓𑀁 𑀧𑀸𑀲𑀯𑀲𑀁 𑀕𑀢𑀁;
𑀅𑀦𑀧𑁂𑀓𑁆𑀔𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀓𑀺𑀁 𑀏𑀓𑁄 𑀅𑀯𑀳𑀻𑀬𑀲𑀺.
‘‘𑀧𑀢𑁂𑀯 𑀧𑀢𑀢𑀁 𑀲𑁂𑀝𑁆𑀞, 𑀦𑀢𑁆𑀣𑀺 𑀩𑀤𑁆𑀥𑁂 𑀲𑀳𑀸𑀬𑀢𑀸;
𑀫𑀸 𑀅𑀦𑀻𑀖𑀸𑀬 𑀳𑀸𑀧𑁂𑀲𑀺, 𑀓𑀸𑀫𑀁 𑀲𑀼𑀫𑀼𑀔 𑀧𑀓𑁆𑀓𑀫𑀸’’𑀢𑀺.
𑀢𑀢𑁆𑀣 ¶ 𑀪𑀬𑀫𑁂𑀭𑀺𑀢𑀸𑀢𑀺 𑀪𑀬𑁂𑀦 𑀏𑀭𑀺𑀢𑀸 𑀪𑀬𑀝𑁆𑀝𑀺𑀢𑀸 𑀪𑀬𑀘𑀮𑀺𑀢𑀸. 𑀢𑀢𑀺𑀬𑀧𑀤𑁂 ‘‘𑀳𑀭𑀻’’𑀢𑀺𑀧𑀺 ‘‘𑀳𑁂𑀫’’𑀦𑁆𑀢𑀺𑀧𑀺 𑀲𑀼𑀯𑀡𑁆𑀡𑀲𑁆𑀲𑁂𑀯 𑀦𑀸𑀫𑀁. 𑀲𑁄 𑀘 𑀳𑀭𑀺𑀢𑁆𑀢𑀘𑀢𑀸𑀬 𑀳𑁂𑀫𑀯𑀡𑁆𑀡𑁄, 𑀢𑁂𑀦 𑀢𑀁 𑀏𑀯𑀁 𑀆𑀮𑀧𑀢𑀺. 𑀲𑀼𑀫𑀼𑀔𑀸𑀢𑀺 𑀲𑀼𑀦𑁆𑀤𑀭𑀫𑀼𑀔. 𑀅𑀦𑀧𑁂𑀓𑁆𑀔𑀫𑀸𑀦𑀸𑀢𑀺 𑀢𑀯 𑀜𑀸𑀢𑀓𑀸 𑀫𑀁 𑀅𑀦𑁄𑀮𑁄𑀓𑁂𑀦𑁆𑀢𑀸 𑀦𑀺𑀭𑀸𑀮𑀬𑀸 𑀳𑀼𑀢𑁆𑀯𑀸. 𑀧𑀢𑁂𑀯𑀸𑀢𑀺 𑀉𑀧𑁆𑀧𑀢𑀸𑀳𑀺𑀬𑁂𑀯. 𑀫𑀸 𑀅𑀦𑀻𑀖𑀸𑀬𑀸𑀢𑀺 𑀇𑀢𑁄 𑀕𑀦𑁆𑀢𑁆𑀯𑀸 𑀧𑀢𑁆𑀢𑀩𑁆𑀩𑀸𑀬 𑀦𑀺𑀤𑀼𑀓𑁆𑀔𑀪𑀸𑀯𑀸𑀬 𑀯𑀻𑀭𑀺𑀬𑀁 𑀫𑀸 𑀳𑀸𑀧𑁂𑀲𑀺.
𑀢𑀁 𑀲𑀼𑀢𑁆𑀯𑀸 𑀲𑀼𑀫𑀼𑀔𑁄 ‘‘𑀅𑀬𑀁 𑀳𑀁𑀲𑀭𑀸𑀚𑀸 𑀫𑀫 𑀧𑀺𑀬𑀫𑀺𑀢𑁆𑀢𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀅𑀦𑀼𑀧𑁆𑀧𑀺𑀬𑀪𑀸𑀡𑀻 𑀫𑀺𑀢𑁆𑀢𑁄𑀢𑀺 𑀫𑀁 𑀲𑀮𑁆𑀮𑀓𑁆𑀔𑁂𑀢𑀺, 𑀲𑀺𑀦𑁂𑀳𑀪𑀸𑀯𑀫𑀲𑁆𑀲 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀦𑀸𑀳𑀁 ¶ 𑀤𑀼𑀓𑁆𑀔𑀧𑀭𑁂𑀢𑁄𑀧𑀺, 𑀥𑀢𑀭𑀝𑁆𑀞 𑀢𑀼𑀯𑀁 𑀚𑀳𑁂;
𑀚𑀻𑀯𑀺𑀢𑀁 𑀫𑀭𑀡𑀁 𑀯𑀸 𑀫𑁂, 𑀢𑀬𑀸 𑀲𑀤𑁆𑀥𑀺𑀁 𑀪𑀯𑀺𑀲𑁆𑀲𑀢𑀺.
‘‘𑀦𑀸𑀳𑀁 ¶ 𑀤𑀼𑀓𑁆𑀔𑀧𑀭𑁂𑀢𑁄𑀧𑀺, 𑀥𑀢𑀭𑀝𑁆𑀞 𑀢𑀼𑀯𑀁 𑀚𑀳𑁂;
𑀦 𑀫𑀁 𑀅𑀦𑀭𑀺𑀬𑀲𑀁𑀬𑀼𑀢𑁆𑀢𑁂, 𑀓𑀫𑁆𑀫𑁂 𑀬𑁄𑀚𑁂𑀢𑀼𑀫𑀭𑀳𑀲𑀺.
‘‘𑀲𑀓𑀼𑀫𑀸𑀭𑁄 𑀲𑀔𑀸𑀢𑁆𑀬𑀲𑁆𑀫𑀺, 𑀲𑀘𑀺𑀢𑁆𑀢𑁂 𑀘𑀲𑁆𑀫𑀺 𑀢𑁂 𑀞𑀺𑀢𑁄;
𑀜𑀸𑀢𑁄 𑀲𑁂𑀦𑀸𑀧𑀢𑀻 𑀢𑁆𑀬𑀸𑀳𑀁, 𑀳𑀁𑀲𑀸𑀦𑀁 𑀧𑀯𑀭𑀼𑀢𑁆𑀢𑀫.
‘‘𑀓𑀣𑀁 𑀅𑀳𑀁 𑀯𑀺𑀓𑀢𑁆𑀢𑀺𑀲𑁆𑀲𑀁, 𑀜𑀸𑀢𑀺𑀫𑀚𑁆𑀛𑁂 𑀇𑀢𑁄 𑀕𑀢𑁄;
𑀢𑀁 𑀳𑀺𑀢𑁆𑀯𑀸 𑀧𑀢𑀢𑀁 𑀲𑁂𑀝𑁆𑀞, 𑀓𑀺𑀁 𑀢𑁂 𑀯𑀓𑁆𑀔𑀸𑀫𑀺𑀢𑁄 𑀕𑀢𑁄;
𑀇𑀥 𑀧𑀸𑀡𑀁 𑀘𑀚𑀺𑀲𑁆𑀲𑀸𑀫𑀺, 𑀦𑀸𑀦𑀭𑀺𑀬𑀁 𑀓𑀢𑁆𑀢𑀼𑀫𑀼𑀲𑁆𑀲𑀳𑁂’’𑀢𑀺.
𑀢𑀢𑁆𑀣 𑀦𑀸𑀳𑀦𑁆𑀢𑀺 𑀅𑀳𑀁, 𑀫𑀳𑀸𑀭𑀸𑀚, 𑀓𑀸𑀬𑀺𑀓𑀘𑁂𑀢𑀲𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑁄𑀧𑀺 𑀢𑀁 𑀦 𑀚𑀳𑀸𑀫𑀺. 𑀅𑀦𑀭𑀺𑀬𑀲𑀁𑀬𑀼𑀢𑁆𑀢𑁂𑀢𑀺 𑀫𑀺𑀢𑁆𑀢𑀤𑀼𑀩𑁆𑀪𑀻𑀳𑀺 𑀅𑀳𑀺𑀭𑀺𑀓𑁂𑀳𑀺 𑀓𑀢𑁆𑀢𑀩𑁆𑀩𑀢𑀸𑀬 𑀅𑀦𑀭𑀺𑀬𑀪𑀸𑀯𑁂𑀦 𑀲𑀁𑀬𑀼𑀢𑁆𑀢𑁂. 𑀓𑀫𑁆𑀫𑁂𑀢𑀺 𑀢𑀁 𑀚𑀳𑀺𑀢𑁆𑀯𑀸 𑀧𑀓𑁆𑀓𑀫𑀦𑀓𑀫𑁆𑀫𑁂. 𑀲𑀓𑀼𑀫𑀸𑀭𑁄𑀢𑀺 𑀲𑀫𑀸𑀦𑀓𑀼𑀫𑀸𑀭𑁄, 𑀏𑀓𑀤𑀺𑀯𑀲𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀏𑀓𑀤𑀺𑀯𑀲𑁂 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀏𑀓𑀢𑁄 𑀯𑀟𑁆𑀠𑀺𑀢𑀓𑀼𑀫𑀸𑀭𑁄𑀢𑀺 𑀅𑀢𑁆𑀣𑁄. 𑀲𑀔𑀸𑀢𑁆𑀬𑀲𑁆𑀫𑀻𑀢𑀺 𑀅𑀳𑀁 𑀢𑁂 𑀤𑀓𑁆𑀔𑀺𑀡𑀓𑁆𑀔𑀺𑀲𑀫𑁄 𑀧𑀺𑀬𑀲𑀳𑀸𑀬𑁄. 𑀲𑀘𑀺𑀢𑁆𑀢𑁂𑀢𑀺 𑀢𑀯 𑀲𑀓𑁂 𑀘𑀺𑀢𑁆𑀢𑁂 𑀅𑀳𑀁 𑀞𑀺𑀢𑁄 𑀢𑀯 𑀯𑀲𑁂 𑀯𑀢𑁆𑀢𑀸𑀫𑀺, 𑀢𑀬𑀺 𑀚𑀻𑀯𑀦𑁆𑀢𑁂 𑀚𑀻𑀯𑀸𑀫𑀺, 𑀦 𑀚𑀻𑀯𑀦𑁆𑀢𑁂 𑀦 𑀚𑀻𑀯𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀲𑀁𑀘𑀺𑀢𑁆𑀢𑁂’’𑀢𑀺𑀧𑀺 𑀧𑀸𑀞𑁄, 𑀢𑀯 𑀘𑀺𑀢𑁆𑀢𑁂 𑀅𑀳𑀁 𑀲𑀡𑁆𑀞𑀺𑀢𑁄 𑀲𑀼𑀝𑁆𑀞𑀼 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀜𑀸𑀢𑁄𑀢𑀺 𑀲𑀩𑁆𑀩𑀳𑀁𑀲𑀸𑀦𑀁 𑀅𑀦𑁆𑀢𑀭𑁂 𑀧𑀜𑁆𑀜𑀸𑀢𑁄. 𑀯𑀺𑀓𑀢𑁆𑀢𑀺𑀲𑁆𑀲𑀦𑁆𑀢𑀺 ‘‘𑀓𑀼𑀳𑀺𑀁 𑀳𑀁𑀲𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺𑀢𑁄 𑀅𑀳𑀁 𑀓𑀺𑀦𑁆𑀢𑀺 𑀓𑀣𑁂𑀲𑁆𑀲𑀸𑀫𑀺. 𑀓𑀺𑀁 𑀢𑁂 𑀯𑀓𑁆𑀔𑀸𑀫𑀻𑀢𑀺 𑀢𑁂 𑀢𑀯 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁂 𑀳𑀁𑀲𑀕𑀡𑁂 𑀓𑀺𑀁 𑀯𑀓𑁆𑀔𑀸𑀫𑀺.
𑀏𑀯𑀁 𑀲𑀼𑀫𑀼𑀔𑁂𑀦 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀲𑀻𑀳𑀦𑀸𑀤𑁂 𑀦𑀤𑀺𑀢𑁂 𑀢𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀆𑀳 𑁋
‘‘𑀏𑀲𑁄 𑀳𑀺 𑀥𑀫𑁆𑀫𑁄 𑀲𑀼𑀫𑀼𑀔, 𑀬𑀁 𑀢𑁆𑀯𑀁 𑀅𑀭𑀺𑀬𑀧𑀣𑁂 𑀞𑀺𑀢𑁄;
𑀬𑁄 𑀪𑀢𑁆𑀢𑀸𑀭𑀁 𑀲𑀔𑀸𑀭𑀁 𑀫𑀁, 𑀦 𑀧𑀭𑀺𑀘𑁆𑀘𑀢𑁆𑀢𑀼𑀫𑀼𑀲𑁆𑀲𑀳𑁂.
‘‘𑀢𑀜𑁆𑀳𑀺 ¶ ¶ 𑀫𑁂 𑀧𑁂𑀓𑁆𑀔𑀫𑀸𑀦𑀲𑁆𑀲, 𑀪𑀬𑀁 𑀦 𑀢𑁆𑀯𑁂𑀯 𑀚𑀸𑀬𑀢𑀺;
𑀅𑀥𑀺𑀕𑀘𑁆𑀙𑀲𑀺 𑀢𑁆𑀯𑀁 𑀫𑀬𑁆𑀳𑀁, 𑀏𑀯𑀁𑀪𑀽𑀢𑀲𑁆𑀲 𑀚𑀻𑀯𑀺𑀢’’𑀦𑁆𑀢𑀺.
𑀢𑀢𑁆𑀣 𑀏𑀲𑁄 𑀥𑀫𑁆𑀫𑁄𑀢𑀺 𑀏𑀲 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀲𑀪𑀸𑀯𑁄. 𑀪𑀢𑁆𑀢𑀸𑀭𑀁 𑀲𑀔𑀸𑀭𑀁 𑀫𑀦𑁆𑀢𑀺 𑀲𑀸𑀫𑀺𑀓𑀜𑁆𑀘 𑀲𑀳𑀸𑀬𑀜𑁆𑀘 𑀫𑀁. 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀫𑀬𑁆𑀳𑀁 𑀦 𑀚𑀸𑀬𑀢𑀺, 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂 𑀳𑀁𑀲𑀕𑀡𑀫𑀚𑁆𑀛𑁂 𑀞𑀺𑀢𑁄 𑀯𑀺𑀬 𑀳𑁄𑀫𑀺. 𑀫𑀬𑁆𑀳𑀦𑁆𑀢𑀺 𑀫𑀫 𑀚𑀻𑀯𑀺𑀢𑀁 𑀢𑁆𑀯𑀁 𑀮𑀪𑀸𑀧𑁂𑀲𑁆𑀲𑀲𑀺.
𑀏𑀯𑀁 ¶ 𑀢𑁂𑀲𑀁 𑀓𑀣𑁂𑀦𑁆𑀢𑀸𑀦𑀜𑁆𑀜𑁂𑀯 𑀮𑀼𑀤𑁆𑀤𑀧𑀼𑀢𑁆𑀢𑁄 𑀲𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀳𑀁𑀲𑁂 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀧𑀮𑀸𑀬𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀧𑀸𑀲𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀧𑀸𑀲𑀬𑀝𑁆𑀞𑀺𑀬𑀁 𑀑𑀮𑀫𑁆𑀩𑀦𑁆𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀓𑀘𑁆𑀙𑀁 𑀤𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀕𑁆𑀕𑀭𑀁 𑀕𑀳𑁂𑀢𑁆𑀯𑀸 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺 𑀯𑀺𑀬 𑀅𑀯𑀢𑁆𑀣𑀭𑀫𑀸𑀦𑁄 𑀧𑀡𑁆𑀳𑀺𑀬𑀸 𑀅𑀓𑁆𑀓𑀦𑁆𑀢𑀓𑀮𑀮𑁂 𑀉𑀧𑀭𑀺𑀲𑀻𑀲𑁂𑀦 𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀧𑀢𑀦𑁆𑀢𑁂 𑀯𑁂𑀕𑁂𑀦 𑀉𑀧𑀲𑀗𑁆𑀓𑀫𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀇𑀘𑁆𑀘𑁂𑀯𑀁 𑀫𑀦𑁆𑀢𑀬𑀦𑁆𑀢𑀸𑀦𑀁, 𑀅𑀭𑀺𑀬𑀸𑀦𑀁 𑀅𑀭𑀺𑀬𑀯𑀼𑀢𑁆𑀢𑀺𑀦𑀁;
𑀤𑀡𑁆𑀟𑀫𑀸𑀤𑀸𑀬 𑀦𑁂𑀲𑀸𑀤𑁄, 𑀆𑀧𑀢𑀻 𑀢𑀼𑀭𑀺𑀢𑁄 𑀪𑀼𑀲𑀁.
‘‘𑀢𑀫𑀸𑀧𑀢𑀦𑁆𑀢𑀁 𑀤𑀺𑀲𑁆𑀯𑀸𑀦, 𑀲𑀼𑀫𑀼𑀔𑁄 𑀅𑀢𑀺𑀩𑁆𑀭𑀽𑀳𑀬𑀺;
𑀅𑀝𑁆𑀞𑀸𑀲𑀺 𑀧𑀼𑀭𑀢𑁄 𑀭𑀜𑁆𑀜𑁄, 𑀳𑀁𑀲𑁄 𑀯𑀺𑀲𑁆𑀲𑀸𑀲𑀬𑀁 𑀩𑁆𑀬𑀣𑀁.
‘‘𑀫𑀸 𑀪𑀸𑀬𑀺 𑀧𑀢𑀢𑀁 𑀲𑁂𑀝𑁆𑀞, 𑀦 𑀳𑀺 𑀪𑀸𑀬𑀦𑁆𑀢𑀺 𑀢𑀸𑀤𑀺𑀲𑀸;
𑀅𑀳𑀁 𑀬𑁄𑀕𑀁 𑀧𑀬𑀼𑀜𑁆𑀚𑀺𑀲𑁆𑀲𑀁, 𑀬𑀼𑀢𑁆𑀢𑀁 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁;
𑀢𑁂𑀦 𑀧𑀭𑀺𑀬𑀸𑀧𑀤𑀸𑀦𑁂𑀦, 𑀔𑀺𑀧𑁆𑀧𑀁 𑀧𑀸𑀲𑀸 𑀧𑀫𑁄𑀓𑁆𑀔𑀲𑀻’’𑀢𑀺.
𑀢𑀢𑁆𑀣 𑀅𑀭𑀺𑀬𑀯𑀼𑀢𑁆𑀢𑀺𑀦𑀦𑁆𑀢𑀺 𑀅𑀭𑀺𑀬𑀸𑀘𑀸𑀭𑁂 𑀯𑀢𑁆𑀢𑀫𑀸𑀦𑀸𑀦𑀁. 𑀪𑀼𑀲𑀦𑁆𑀢𑀺 𑀤𑀴𑁆𑀳𑀁 𑀩𑀮𑀯𑀁. 𑀅𑀢𑀺𑀩𑁆𑀭𑀽𑀳𑀬𑀻𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀆𑀕𑀢𑀁 ‘‘𑀫𑀸 𑀪𑀸𑀬𑀻’’𑀢𑀺 𑀯𑀘𑀦𑀁 𑀯𑀤𑀦𑁆𑀢𑁄 𑀅𑀢𑀺𑀩𑁆𑀭𑀽𑀳𑁂𑀲𑀺 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀝𑁆𑀞𑀸𑀲𑀻𑀢𑀺 𑀲𑀘𑁂 𑀦𑁂𑀲𑀸𑀤𑁄 𑀭𑀸𑀚𑀸𑀦𑀁 𑀧𑀳𑀭𑀺𑀲𑁆𑀲𑀢𑀺, 𑀅𑀳𑀁 𑀧𑀳𑀸𑀭𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀯𑀺𑀲𑁆𑀲𑀸𑀲𑀬𑀦𑁆𑀢𑀺 𑀯𑀺𑀲𑁆𑀲𑀸𑀲𑁂𑀦𑁆𑀢𑁄 𑀅𑀲𑁆𑀲𑀸𑀲𑁂𑀦𑁆𑀢𑁄. 𑀩𑁆𑀬𑀣𑀦𑁆𑀢𑀺 𑀩𑁆𑀬𑀣𑀺𑀢𑀁 𑀪𑀻𑀢𑀁 𑀭𑀸𑀚𑀸𑀦𑀁 ‘‘𑀫𑀸 𑀪𑀸𑀬𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀺𑀲𑁆𑀲𑀸𑀲𑁂𑀦𑁆𑀢𑁄. 𑀢𑀸𑀤𑀺𑀲𑀸𑀢𑀺 𑀢𑀼𑀫𑁆𑀳𑀸𑀤𑀺𑀲𑀸 𑀜𑀸𑀡𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀸. 𑀬𑁄𑀕𑀦𑁆𑀢𑀺 𑀜𑀸𑀡𑀯𑀻𑀭𑀺𑀬𑀬𑁄𑀕𑀁. 𑀬𑀼𑀢𑁆𑀢𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀁. 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁. 𑀢𑁂𑀦 𑀧𑀭𑀺𑀬𑀸𑀧𑀤𑀸𑀦𑁂𑀦𑀸𑀢𑀺 𑀢𑁂𑀦 𑀫𑀬𑀸 𑀧𑀬𑀼𑀢𑁆𑀢𑁂𑀦 𑀬𑁄𑀕𑁂𑀦 𑀧𑀭𑀺𑀲𑀼𑀤𑁆𑀥𑁂𑀦. 𑀧𑀫𑁄𑀓𑁆𑀔𑀲𑀻𑀢𑀺 𑀫𑀼𑀘𑁆𑀘𑀺𑀲𑁆𑀲𑀲𑀺.
𑀏𑀯𑀁 ¶ 𑀲𑀼𑀫𑀼𑀔𑁄 𑀫𑀳𑀸𑀲𑀢𑁆𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀮𑀼𑀤𑁆𑀤𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀥𑀼𑀭𑀁 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄, ‘‘𑀲𑀫𑁆𑀫, 𑀢𑁆𑀯𑀁 𑀓𑁄𑀦𑀸𑀫𑁄𑀲𑀻’’𑀢𑀺 ¶ 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀼𑀯𑀡𑁆𑀡𑀯𑀡𑁆𑀡𑀳𑀁𑀲𑀭𑀸𑀚, 𑀅𑀳𑀁 𑀔𑁂𑀫𑀓𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀲𑀫𑁆𑀫 𑀔𑁂𑀫𑀓, ‘𑀢𑀬𑀸 𑀑𑀟𑁆𑀟𑀺𑀢𑀯𑀸𑀮𑀧𑀸𑀲𑁂 𑀬𑁄 𑀯𑀸 𑀲𑁄 𑀯𑀸 𑀳𑀁𑀲𑁄 𑀩𑀤𑁆𑀥𑁄’𑀢𑀺 𑀲𑀜𑁆𑀜𑀁 𑀫𑀸 𑀓𑀭𑀺, 𑀦𑀯𑀼𑀢𑀺𑀬𑀸 𑀳𑀁𑀲𑀲𑀳𑀲𑁆𑀲𑀸𑀦𑀁 𑀧𑀯𑀭𑁄 𑀥𑀢𑀭𑀝𑁆𑀞𑀳𑀁𑀲𑀭𑀸𑀚𑀸 𑀢𑁂 𑀧𑀸𑀲𑁂 ¶ 𑀩𑀤𑁆𑀥𑁄, 𑀜𑀸𑀡𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑁄 𑀲𑀗𑁆𑀕𑀸𑀳𑀓𑀧𑀓𑁆𑀔𑁂 𑀞𑀺𑀢𑁄, 𑀦 𑀢𑀁 𑀫𑀸𑀭𑁂𑀢𑀼𑀁 𑀬𑀼𑀢𑁆𑀢𑁄, 𑀅𑀳𑀁 𑀢𑀯 𑀇𑀫𑀺𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀬𑀫𑁆𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀅𑀳𑀫𑁆𑀧𑀺 𑀢𑀣𑁂𑀯, 𑀅𑀳𑀁 𑀏𑀢𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀺, 𑀲𑀘𑁂 𑀢𑁆𑀯𑀁 𑀏𑀢𑀲𑁆𑀲 𑀧𑀢𑁆𑀢𑀸𑀦𑀺 𑀕𑀡𑁆𑀳𑀺𑀢𑀼𑀓𑀸𑀫𑁄𑀲𑀺, 𑀫𑀫 𑀧𑀢𑁆𑀢𑀸𑀦𑀺 𑀕𑀡𑁆𑀳, 𑀅𑀣𑁄𑀧𑀺 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀼𑀅𑀝𑁆𑀞𑀻𑀦𑀫𑀜𑁆𑀜𑀢𑀭𑀁 𑀕𑀡𑁆𑀳𑀺𑀢𑀼𑀓𑀸𑀫𑁄𑀲𑀺, 𑀫𑀫𑁂𑀯 𑀲𑀭𑀻𑀭𑀢𑁄 𑀕𑀡𑁆𑀳, 𑀅𑀣 𑀦𑀁 𑀓𑀻𑀴𑀸𑀳𑀁𑀲𑀁 𑀓𑀸𑀢𑀼𑀓𑀸𑀫𑁄𑀲𑀺, 𑀫𑀜𑁆𑀜𑁂𑀯 𑀓𑀭, 𑀚𑀻𑀯𑀦𑁆𑀢𑀫𑁂𑀯 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀲𑀘𑁂 𑀥𑀦𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄𑀲𑀺, 𑀫𑀁 𑀚𑀻𑀯𑀦𑁆𑀢𑀫𑁂𑀯 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀥𑀦𑀁 𑀉𑀧𑁆𑀧𑀸𑀤𑁂𑀳𑀺, 𑀫𑀸 𑀏𑀢𑀁 𑀜𑀸𑀡𑀸𑀤𑀺𑀕𑀼𑀡𑀲𑀁𑀬𑀼𑀢𑁆𑀢𑀁 𑀳𑀁𑀲𑀭𑀸𑀚𑀸𑀦𑀁 𑀅𑀯𑀥𑀺, 𑀲𑀘𑁂 𑀳𑀺 𑀦𑀁 𑀯𑀥𑀺𑀲𑁆𑀲𑀲𑀺, 𑀦𑀺𑀭𑀬𑀸𑀤𑀻𑀳𑀺 𑀦 𑀫𑀼𑀘𑁆𑀘𑀺𑀲𑁆𑀲𑀲𑀻’’𑀢𑀺 𑀢𑀁 𑀦𑀺𑀭𑀬𑀸𑀤𑀺𑀪𑀬𑁂𑀦 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀥𑀼𑀭𑀓𑀣𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀧𑀼𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀦𑁂𑀲𑀸𑀤𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑁄 𑀲𑀫𑀸𑀦𑁄 𑀫𑀦𑀼𑀲𑁆𑀲𑁂𑀳𑀺𑀧𑀺 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀏𑀯𑀭𑀽𑀧𑀁 𑀫𑀺𑀢𑁆𑀢𑀥𑀫𑁆𑀫𑀁 𑀓𑀭𑁄𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀏𑀯𑀁 𑀫𑀺𑀢𑁆𑀢𑀥𑀫𑁆𑀫𑁂 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀳𑁄 𑀏𑀲 𑀜𑀸𑀡𑀲𑀫𑁆𑀧𑀦𑁆𑀦𑁄 𑀫𑀥𑀼𑀭𑀓𑀣𑁄 𑀥𑀫𑁆𑀫𑀺𑀓𑁄’’𑀢𑀺 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀳𑀝𑁆𑀞𑀮𑁄𑀫𑁄 𑀤𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀽𑀭𑀺𑀬𑀁 𑀦𑀫𑀲𑁆𑀲𑀦𑁆𑀢𑁄 𑀯𑀺𑀬 𑀲𑀼𑀫𑀼𑀔𑀲𑁆𑀲 𑀕𑀼𑀡𑀁 𑀓𑀺𑀢𑁆𑀢𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀼𑀫𑀼𑀔𑀲𑁆𑀲 𑀲𑀼𑀪𑀸𑀲𑀺𑀢𑀁;
𑀧𑀳𑀝𑁆𑀞𑀮𑁄𑀫𑁄 𑀦𑁂𑀲𑀸𑀤𑁄, 𑀅𑀜𑁆𑀚𑀮𑀺𑀲𑁆𑀲 𑀧𑀡𑀸𑀫𑀬𑀺.
‘‘𑀦 𑀫𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀪𑀸𑀲𑀦𑁆𑀢𑁄 𑀫𑀸𑀦𑀼𑀲𑀺𑀁 𑀤𑀺𑀚𑁄;
𑀅𑀭𑀺𑀬𑀁 𑀩𑁆𑀭𑀼𑀯𑀸𑀦𑁄 𑀯𑀓𑁆𑀓𑀗𑁆𑀕𑁄, 𑀘𑀚𑀦𑁆𑀢𑁄 𑀫𑀸𑀦𑀼𑀲𑀺𑀁 𑀕𑀺𑀭𑀁.
‘‘𑀓𑀺𑀁 𑀦𑀼 𑀢𑀸𑀬𑀁 𑀤𑀺𑀚𑁄 𑀳𑁄𑀢𑀺, 𑀫𑀼𑀢𑁆𑀢𑁄 𑀩𑀤𑁆𑀥𑀁 𑀉𑀧𑀸𑀲𑀲𑀺;
𑀑𑀳𑀸𑀬 𑀲𑀓𑀼𑀡𑀸 𑀬𑀦𑁆𑀢𑀺, 𑀓𑀺𑀁 𑀏𑀓𑁄 𑀅𑀯𑀳𑀻𑀬𑀲𑀻’’𑀢𑀺.
𑀢𑀢𑁆𑀣 ¶ 𑀅𑀜𑁆𑀚𑀮𑀺𑀲𑁆𑀲 𑀧𑀡𑀸𑀫𑀬𑀻𑀢𑀺 𑀅𑀜𑁆𑀚𑀮𑀺𑀁 𑀅𑀲𑁆𑀲 𑀉𑀧𑀦𑀸𑀫𑀬𑀺, ‘‘𑀦 𑀫𑁂’’𑀢𑀺 𑀕𑀸𑀣𑀸𑀬𑀲𑁆𑀲 𑀣𑀼𑀢𑀺𑀁 𑀓𑀭𑁄𑀢𑀺. 𑀢𑀢𑁆𑀣 𑀫𑀸𑀦𑀼𑀲𑀺𑀦𑁆𑀢𑀺 𑀫𑀦𑀼𑀲𑁆𑀲𑀯𑀸𑀘𑀁. 𑀅𑀭𑀺𑀬𑀦𑁆𑀢𑀺 𑀲𑀼𑀦𑁆𑀤𑀭𑀁 𑀦𑀺𑀤𑁆𑀤𑁄𑀲𑀁. 𑀘𑀚𑀦𑁆𑀢𑁄𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫, 𑀢𑁆𑀯𑀁 𑀤𑀺𑀚𑁄 𑀲𑀫𑀸𑀦𑁄 𑀅𑀚𑁆𑀚 𑀫𑀬𑀸 𑀲𑀤𑁆𑀥𑀺𑀁 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀦𑀺𑀤𑁆𑀤𑁄𑀲𑀁 ¶ 𑀩𑁆𑀭𑀼𑀯𑀸𑀦𑁄 𑀫𑀸𑀦𑀼𑀲𑀺𑀁 𑀕𑀺𑀭𑀁 𑀘𑀚𑀦𑁆𑀢𑁄 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑁄, 𑀇𑀢𑁄 𑀧𑀼𑀩𑁆𑀩𑁂 𑀧𑀦 𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑀸 ¶ 𑀦𑁂𑀯 𑀲𑀼𑀢𑀁 𑀦 𑀤𑀺𑀝𑁆𑀞𑀦𑁆𑀢𑀺. 𑀓𑀺𑀁 𑀦𑀼 𑀢𑀸𑀬𑀦𑁆𑀢𑀺 𑀬𑀁 𑀏𑀢𑀁 𑀢𑁆𑀯𑀁 𑀉𑀧𑀸𑀲𑀲𑀺, 𑀓𑀺𑀁 𑀦𑀼 𑀢𑁂 𑀅𑀬𑀁 𑀳𑁄𑀢𑀺.
𑀏𑀯𑀁 𑀢𑀼𑀝𑁆𑀞𑀘𑀺𑀢𑁆𑀢𑁂𑀦 𑀦𑁂𑀲𑀸𑀤𑁂𑀦 𑀧𑀼𑀝𑁆𑀞𑁄 𑀲𑀼𑀫𑀼𑀔𑁄 ‘‘𑀅𑀬𑀁 𑀫𑀼𑀤𑀼𑀓𑁄 𑀚𑀸𑀢𑁄, 𑀇𑀤𑀸𑀦𑀺𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀫𑀼𑀤𑀼𑀪𑀸𑀯𑀢𑁆𑀣𑀁 𑀫𑀫 𑀕𑀼𑀡𑀁 𑀤𑀲𑁆𑀲𑁂𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀭𑀸𑀚𑀸 𑀫𑁂 𑀲𑁄 𑀤𑀺𑀚𑀸𑀫𑀺𑀢𑁆𑀢, 𑀲𑁂𑀦𑀸𑀧𑀘𑁆𑀘𑀲𑁆𑀲 𑀓𑀸𑀭𑀬𑀺𑀁;
𑀢𑀫𑀸𑀧𑀤𑁂 𑀧𑀭𑀺𑀘𑁆𑀘𑀢𑀼𑀁, 𑀦𑀼𑀲𑁆𑀲𑀳𑁂 𑀯𑀺𑀳𑀕𑀸𑀥𑀺𑀧𑀁.
‘‘𑀫𑀳𑀸𑀕𑀡𑀸𑀬 𑀪𑀢𑁆𑀢𑀸 𑀫𑁂, 𑀫𑀸 𑀏𑀓𑁄 𑀩𑁆𑀬𑀲𑀦𑀁 𑀅𑀕𑀸;
𑀢𑀣𑀸 𑀢𑀁 𑀲𑀫𑁆𑀫 𑀦𑁂𑀲𑀸𑀤, 𑀪𑀢𑁆𑀢𑀸𑀬𑀁 𑀅𑀪𑀺𑀢𑁄 𑀭𑀫𑁂’’𑀢𑀺.
𑀢𑀢𑁆𑀣 𑀦𑀼𑀲𑁆𑀲𑀳𑁂𑀢𑀺 𑀦 𑀲𑀫𑀢𑁆𑀣𑁄𑀫𑁆𑀳𑀺. 𑀫𑀳𑀸𑀕𑀡𑀸𑀬𑀸𑀢𑀺 𑀫𑀳𑀢𑁄 𑀳𑀁𑀲𑀕𑀡𑀲𑁆𑀲. 𑀫𑀸 𑀏𑀓𑁄𑀢𑀺 𑀫𑀸𑀤𑀺𑀲𑁂 𑀲𑁂𑀯𑀓𑁂 𑀯𑀺𑀚𑁆𑀚𑀫𑀸𑀦𑁂 𑀫𑀸 𑀏𑀓𑀓𑁄 𑀩𑁆𑀬𑀲𑀦𑀁 𑀅𑀕𑀸. 𑀢𑀣𑀸 𑀢𑀦𑁆𑀢𑀺 𑀬𑀣𑀸 𑀅𑀳𑀁 𑀯𑀤𑀸𑀫𑀺, 𑀢𑀣𑁂𑀯 𑀢𑀁. 𑀲𑀫𑁆𑀫𑀸𑀢𑀺 𑀯𑀬𑀲𑁆𑀲. 𑀪𑀢𑁆𑀢𑀸𑀬𑀁 𑀅𑀪𑀺𑀢𑁄 𑀭𑀫𑁂𑀢𑀺 𑀪𑀢𑁆𑀢𑀸 𑀅𑀬𑀁 𑀫𑀫, 𑀅𑀳𑀫𑀲𑁆𑀲 𑀅𑀪𑀺𑀢𑁄 𑀭𑀫𑁂 𑀲𑀦𑁆𑀢𑀺𑀓𑁂 𑀭𑀫𑀸𑀫𑀺 𑀦 𑀉𑀓𑁆𑀓𑀡𑁆𑀞𑀸𑀫𑀻𑀢𑀺.
𑀦𑁂𑀲𑀸𑀤𑁄 𑀢𑀁 𑀢𑀲𑁆𑀲 𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀫𑀥𑀼𑀭𑀓𑀣𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀧𑀳𑀝𑁆𑀞𑀮𑁄𑀫𑁄 ‘‘𑀲𑀘𑀸𑀳𑀁 𑀏𑀢𑀁 𑀲𑀻𑀮𑀸𑀤𑀺𑀕𑀼𑀡𑀲𑀁𑀬𑀼𑀢𑁆𑀢𑀁 𑀳𑀁𑀲𑀭𑀸𑀚𑀸𑀦𑀁 𑀯𑀥𑀺𑀲𑁆𑀲𑀸𑀫𑀺, 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀦 𑀫𑀼𑀘𑁆𑀘𑀺𑀲𑁆𑀲𑀸𑀫𑀺, 𑀭𑀸𑀚𑀸 𑀫𑀁 𑀬𑀤𑀺𑀘𑁆𑀙𑀢𑀺, 𑀢𑀁 𑀓𑀭𑁄𑀢𑀼, 𑀅𑀳𑀫𑁂𑀢𑀁 𑀲𑀼𑀫𑀼𑀔𑀲𑁆𑀲 𑀤𑀸𑀬𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀭𑀺𑀬𑀯𑀢𑁆𑀢𑀲𑀺 𑀯𑀓𑁆𑀓𑀗𑁆𑀕, 𑀬𑁄 𑀧𑀺𑀡𑁆𑀟𑀫𑀧𑀘𑀸𑀬𑀲𑀺;
𑀘𑀚𑀸𑀫𑀺 𑀢𑁂 𑀢𑀁 𑀪𑀢𑁆𑀢𑀸𑀭𑀁, 𑀕𑀘𑁆𑀙𑀣𑀽𑀪𑁄 𑀬𑀣𑀸𑀲𑀼𑀔’’𑀦𑁆𑀢𑀺.
𑀢𑀢𑁆𑀣 𑀅𑀭𑀺𑀬𑀯𑀢𑁆𑀢𑀲𑀻𑀢𑀺 𑀫𑀺𑀢𑁆𑀢𑀥𑀫𑁆𑀫𑀭𑀓𑁆𑀔𑀡𑀲𑀗𑁆𑀔𑀸𑀢𑁂𑀦 𑀆𑀘𑀸𑀭𑀅𑀭𑀺𑀬𑀸𑀦𑀁 𑀯𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀲𑀺. 𑀧𑀺𑀡𑁆𑀟𑀫𑀧𑀘𑀸𑀬𑀲𑀻𑀢𑀺 𑀪𑀢𑁆𑀢𑀼 𑀲𑀦𑁆𑀢𑀺𑀓𑀸 𑀮𑀤𑁆𑀥𑀁 𑀧𑀺𑀡𑁆𑀟𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀧𑀽𑀚𑁂𑀲𑀺. 𑀕𑀘𑁆𑀙𑀣𑀽𑀪𑁄𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀅𑀲𑁆𑀲𑀼𑀫𑀼𑀔𑁂 𑀜𑀸𑀢𑀺𑀲𑀗𑁆𑀖𑁂 𑀳𑀸𑀲𑀬𑀫𑀸𑀦𑀸 𑀬𑀣𑀸𑀲𑀼𑀔𑀁 𑀕𑀘𑁆𑀙𑀣𑀸𑀢𑀺.
𑀏𑀯𑀁 ¶ ¶ 𑀯𑀢𑁆𑀯𑀸 𑀦𑁂𑀲𑀸𑀤𑁄 𑀫𑀼𑀤𑀼𑀘𑀺𑀢𑁆𑀢𑁂𑀦 𑀫𑀳𑀸𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀝𑁆𑀞𑀺𑀁 𑀑𑀦𑀸𑀫𑁂𑀢𑁆𑀯𑀸 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀲𑀬𑀝𑁆𑀞𑀺𑀬𑀸 𑀫𑁄𑀘𑁂𑀢𑁆𑀯𑀸 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀢𑀭𑀼𑀡𑀤𑀩𑁆𑀩𑀢𑀺𑀡𑀧𑀺𑀝𑁆𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑁂 𑀩𑀤𑁆𑀥𑀧𑀸𑀲𑀁 ¶ 𑀲𑀡𑀺𑀓𑀁 𑀫𑁄𑀘𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑁂 𑀩𑀮𑀯𑀲𑀺𑀦𑁂𑀳𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀉𑀤𑀓𑀁 𑀆𑀤𑀸𑀬 𑀮𑁄𑀳𑀺𑀢𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀺, 𑀅𑀣𑀲𑁆𑀲 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦 𑀲𑀺𑀭𑀸𑀬 𑀲𑀺𑀭𑀸, 𑀫𑀁𑀲𑁂𑀦 𑀫𑀁𑀲𑀁, 𑀘𑀫𑁆𑀫𑁂𑀦 𑀘𑀫𑁆𑀫𑀁 𑀖𑀝𑀺𑀢𑀁, 𑀧𑀸𑀤𑁄 𑀧𑀸𑀓𑀢𑀺𑀓𑁄 𑀅𑀳𑁄𑀲𑀺, 𑀇𑀢𑀭𑁂𑀦 𑀦𑀺𑀩𑁆𑀩𑀺𑀲𑁂𑀲𑁄. 𑀩𑁄𑀥𑀺𑀲𑀢𑁆𑀢𑁄 𑀲𑀼𑀔𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀧𑀓𑀢𑀺𑀪𑀸𑀯𑁂𑀦 𑀦𑀺𑀲𑀻𑀤𑀺. 𑀲𑀼𑀫𑀼𑀔𑁄 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀭𑀜𑁆𑀜𑁄 𑀲𑀼𑀔𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀫𑀳𑀸𑀉𑀧𑀓𑀸𑀭𑁄 𑀓𑀢𑁄, 𑀅𑀫𑁆𑀳𑁂𑀳𑀺 𑀏𑀢𑀲𑁆𑀲 𑀓𑀢𑁄 𑀉𑀧𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀲𑀘𑁂 𑀏𑀲 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀅𑀫𑁆𑀳𑁂 𑀕𑀡𑁆𑀳𑀺, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀮𑀪𑀺𑀲𑁆𑀲𑀢𑀺, 𑀲𑀘𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀡𑁆𑀳𑀺, 𑀅𑀫𑁆𑀳𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀥𑀦𑀁 𑀮𑀪𑀺𑀲𑁆𑀲𑀢𑁂𑀯, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺. 𑀅𑀣 𑀦𑀁 𑀉𑀧𑀓𑀸𑀭𑀁 𑀓𑀸𑀢𑀼𑀓𑀸𑀫𑀢𑀸𑀬 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋
‘‘𑀲𑀘𑁂 𑀅𑀢𑁆𑀢𑀧𑁆𑀧𑀬𑁄𑀕𑁂𑀦, 𑀑𑀳𑀺𑀢𑁄 𑀳𑀁𑀲𑀧𑀓𑁆𑀔𑀺𑀦𑀁;
𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀲𑀫𑁆𑀫, 𑀏𑀢𑀁 𑀅𑀪𑀬𑀤𑀓𑁆𑀔𑀺𑀡𑀁.
‘‘𑀦𑁄 𑀘𑁂 𑀅𑀢𑁆𑀢𑀧𑁆𑀧𑀬𑁄𑀕𑁂𑀦, 𑀑𑀳𑀺𑀢𑁄 𑀳𑀁𑀲𑀧𑀓𑁆𑀔𑀺𑀦𑀁;
𑀅𑀦𑀺𑀲𑁆𑀲𑀭𑁄 𑀫𑀼𑀜𑁆𑀘𑀫𑀫𑁆𑀳𑁂, 𑀣𑁂𑀬𑁆𑀬𑀁 𑀓𑀬𑀺𑀭𑀸𑀲𑀺 𑀮𑀼𑀤𑁆𑀤𑀓𑀸’’𑀢𑀺.
𑀢𑀢𑁆𑀣 𑀲𑀘𑁂𑀢𑀺, 𑀲𑀫𑁆𑀫 𑀦𑁂𑀲𑀸𑀤, 𑀲𑀘𑁂 𑀢𑀬𑀸 𑀅𑀢𑁆𑀢𑀦𑁄 𑀧𑀬𑁄𑀕𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀳𑀁𑀲𑀸𑀦𑀜𑁆𑀘𑁂𑀯 𑀲𑁂𑀲𑀧𑀓𑁆𑀔𑀻𑀦𑀜𑁆𑀘 𑀧𑀸𑀲𑁄 𑀑𑀳𑀺𑀢𑁄. 𑀅𑀦𑀺𑀲𑁆𑀲𑀭𑁄𑀢𑀺 𑀅𑀦𑀺𑀲𑁆𑀲𑀭𑁄 𑀳𑀼𑀢𑁆𑀯𑀸 𑀅𑀫𑁆𑀳𑁂 𑀫𑀼𑀜𑁆𑀘𑀦𑁆𑀢𑁄 𑀬𑁂𑀦𑀸𑀲𑀺 𑀆𑀡𑀢𑁆𑀢𑁄, 𑀢𑀲𑁆𑀲𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁄 𑀣𑁂𑀬𑁆𑀬𑀁 𑀓𑀬𑀺𑀭𑀸𑀲𑀺.
𑀢𑀁 𑀲𑀼𑀢𑁆𑀯𑀸 𑀦𑁂𑀲𑀸𑀤𑁄 ‘‘𑀦𑀸𑀳𑀁 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀡𑁆𑀳𑀺𑀁, 𑀩𑀸𑀭𑀸𑀡𑀲𑀺𑀭𑀜𑁆𑀜𑀸 𑀧𑀦 𑀲𑀁𑀬𑀫𑁂𑀦 𑀕𑀡𑁆𑀳𑀸𑀧𑀺𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀤𑁂𑀯𑀺𑀬𑀸 𑀤𑀺𑀝𑁆𑀞𑀲𑀼𑀧𑀺𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀭𑀜𑁆𑀜𑀸 𑀢𑁂𑀲𑀁 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸, ‘‘𑀲𑀫𑁆𑀫 𑀔𑁂𑀫𑀓, 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀳𑀁𑀲𑁂 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫, 𑀫𑀳𑀦𑁆𑀢𑀁 𑀢𑁂 𑀬𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑀺𑀢𑀪𑀸𑀯𑁄, 𑀢𑀸𑀯 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀼𑀫𑀼𑀔𑁄 ‘‘𑀇𑀫𑀺𑀦𑀸 𑀦𑁂𑀲𑀸𑀤𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀅𑀕𑀡𑁂𑀢𑁆𑀯𑀸 𑀅𑀫𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 ¶ 𑀤𑀼𑀓𑁆𑀓𑀭𑀁 𑀓𑀢𑀁, 𑀲𑀘𑁂 𑀫𑀬𑀁 𑀇𑀢𑁄 𑀘𑀺𑀢𑁆𑀢𑀓𑀽𑀝𑀁 𑀕𑀫𑀺𑀲𑁆𑀲𑀸𑀫, 𑀦𑁂𑀯 𑀥𑀢𑀭𑀝𑁆𑀞𑀭𑀜𑁆𑀜𑁄 𑀧𑀜𑁆𑀜𑀸𑀦𑀼𑀪𑀸𑀯𑁄, 𑀦 𑀫𑀬𑁆𑀳𑀁 𑀫𑀺𑀢𑁆𑀢𑀥𑀫𑁆𑀫𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺, 𑀦 𑀮𑀼𑀤𑁆𑀤𑀧𑀼𑀢𑁆𑀢𑁄 𑀫𑀳𑀦𑁆𑀢𑀁 𑀬𑀲𑀁 𑀮𑀘𑁆𑀙𑀢𑀺, 𑀦 𑀭𑀸𑀚𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀦 𑀤𑁂𑀯𑀺𑀬𑀸 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ¶ , ‘‘𑀲𑀫𑁆𑀫, 𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 ¶ 𑀮𑀪𑀲𑀺, 𑀭𑀜𑁆𑀜𑁄 𑀦𑁄 𑀤𑀲𑁆𑀲𑁂𑀳𑀺, 𑀲𑁄 𑀅𑀫𑁆𑀳𑁂 𑀬𑀣𑀸𑀭𑀼𑀘𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀬𑀲𑁆𑀲 𑀢𑁆𑀯𑀁 𑀪𑀢𑀓𑁄 𑀭𑀜𑁆𑀜𑁄, 𑀓𑀸𑀫𑀁 𑀢𑀲𑁆𑀲𑁂𑀯 𑀧𑀸𑀧𑀬;
𑀢𑀢𑁆𑀣 𑀲𑀁𑀬𑀫𑀦𑁄 𑀭𑀸𑀚𑀸, 𑀬𑀣𑀸𑀪𑀺𑀜𑁆𑀜𑀁 𑀓𑀭𑀺𑀲𑁆𑀲𑀢𑀻’’𑀢𑀺.
𑀢𑀢𑁆𑀣 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀦𑁂𑀳𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀭𑀸𑀚𑀦𑀺𑀯𑁂𑀲𑀦𑁂. 𑀬𑀣𑀸𑀪𑀺𑀜𑁆𑀜𑀦𑁆𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀬𑀣𑀸𑀭𑀼𑀘𑀺𑀁.
𑀢𑀁 𑀲𑀼𑀢𑁆𑀯𑀸 𑀦𑁂𑀲𑀸𑀤𑁄 ‘‘𑀫𑀸 𑀯𑁄 𑀪𑀤𑁆𑀤𑀦𑁆𑀢𑁂 𑀭𑀸𑀚𑀤𑀲𑁆𑀲𑀦𑀁 𑀭𑀼𑀘𑁆𑀘𑀺𑀢𑁆𑀣, 𑀭𑀸𑀚𑀸𑀦𑁄 𑀦𑀸𑀫 𑀲𑀧𑁆𑀧𑀝𑀺𑀪𑀬𑀸, 𑀓𑀻𑀴𑀸𑀳𑀁𑀲𑁂 𑀯𑀸 𑀯𑁄 𑀓𑀭𑁂𑀬𑁆𑀬𑀼𑀁 𑀫𑀸𑀭𑁂𑀬𑁆𑀬𑀼𑀁 𑀯𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀼𑀫𑀼𑀔𑁄, ‘‘𑀲𑀫𑁆𑀫 𑀮𑀼𑀤𑁆𑀤𑀓 𑀫𑀸 𑀅𑀫𑁆𑀳𑀸𑀓𑀁 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑀸𑀤𑀺𑀲𑀲𑁆𑀲 𑀓𑀓𑁆𑀔𑀴𑀲𑁆𑀲 𑀥𑀫𑁆𑀫𑀓𑀣𑀸𑀬 𑀫𑀤𑁆𑀤𑀯𑀁 𑀚𑀦𑁂𑀲𑀺𑀁, 𑀭𑀜𑁆𑀜𑁄 𑀓𑀺𑀁 𑀦 𑀚𑀦𑁂𑀲𑁆𑀲𑀸𑀫𑀺, 𑀭𑀸𑀚𑀸𑀦𑁄 𑀳𑀺 𑀧𑀡𑁆𑀟𑀺𑀢𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀜𑁆𑀜𑀼, 𑀔𑀺𑀧𑁆𑀧𑀁 𑀦𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀳𑀺, 𑀦𑀬𑀦𑁆𑀢𑁄 𑀘 𑀫𑀸 𑀩𑀦𑁆𑀥𑀦𑁂𑀦 𑀦𑀬𑀺, 𑀧𑀼𑀧𑁆𑀨𑀧𑀜𑁆𑀚𑀭𑁂 𑀧𑀦 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑁂𑀳𑀺, 𑀧𑀼𑀧𑁆𑀨𑀧𑀜𑁆𑀚𑀭𑀁 𑀓𑀭𑁄𑀦𑁆𑀢𑁄 𑀥𑀢𑀭𑀝𑁆𑀞𑀲𑁆𑀲 𑀫𑀳𑀦𑁆𑀢𑀁 𑀲𑁂𑀢𑀧𑀤𑀼𑀫𑀲𑀜𑁆𑀙𑀦𑁆𑀦𑀁, 𑀫𑀫 𑀔𑀼𑀤𑁆𑀤𑀓𑀁 𑀭𑀢𑁆𑀢𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀓𑀢𑁆𑀯𑀸 𑀥𑀢𑀭𑀝𑁆𑀞𑀁 𑀧𑀼𑀭𑀢𑁄, 𑀫𑀫𑀁 𑀧𑀘𑁆𑀙𑀢𑁄 𑀦𑀻𑀘𑀢𑀭𑀁 𑀓𑀢𑁆𑀯𑀸 𑀆𑀤𑀸𑀬 𑀔𑀺𑀧𑁆𑀧𑀁 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀼𑀫𑀼𑀔𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀫𑀫 𑀫𑀳𑀦𑁆𑀢𑀁 𑀬𑀲𑀁 𑀤𑀸𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀫𑀼𑀤𑀽𑀳𑀺 𑀮𑀢𑀸𑀳𑀺 𑀧𑀜𑁆𑀚𑀭𑁂 𑀓𑀢𑁆𑀯𑀸 𑀧𑀤𑀼𑀫𑁂𑀳𑀺 𑀙𑀸𑀤𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀇𑀘𑁆𑀘𑁂𑀯𑀁 𑀯𑀼𑀢𑁆𑀢𑁄 𑀦𑁂𑀲𑀸𑀤𑁄, 𑀳𑁂𑀫𑀯𑀡𑁆𑀡𑁂 𑀳𑀭𑀺𑀢𑁆𑀢𑀘𑁂;
𑀉𑀪𑁄 𑀳𑀢𑁆𑀣𑁂𑀳𑀺 𑀲𑀗𑁆𑀕𑀬𑁆𑀳, 𑀧𑀜𑁆𑀚𑀭𑁂 𑀅𑀚𑁆𑀛𑀯𑁄𑀤𑀳𑀺.
‘‘𑀢𑁂 ¶ 𑀧𑀜𑁆𑀚𑀭𑀕𑀢𑁂 𑀧𑀓𑁆𑀔𑀻, 𑀉𑀪𑁄 𑀪𑀲𑁆𑀲𑀭𑀯𑀡𑁆𑀡𑀺𑀦𑁂;
𑀲𑀼𑀫𑀼𑀔𑀁 𑀥𑀢𑀭𑀝𑁆𑀞𑀜𑁆𑀘, 𑀮𑀼𑀤𑁆𑀤𑁄 𑀆𑀤𑀸𑀬 𑀧𑀓𑁆𑀓𑀫𑀻’’𑀢𑀺.
𑀢𑀢𑁆𑀣 𑀅𑀚𑁆𑀛𑀯𑁄𑀤𑀳𑀻𑀢𑀺 𑀑𑀤𑀳𑀺 𑀞𑀧𑁂𑀲𑀺. 𑀪𑀲𑁆𑀲𑀭𑀯𑀡𑁆𑀡𑀺𑀦𑁂𑀢𑀺 𑀧𑀪𑀸𑀲𑀫𑁆𑀧𑀦𑁆𑀦𑀯𑀡𑁆𑀡𑁂.
𑀏𑀯𑀁 ¶ 𑀮𑀼𑀤𑁆𑀤𑀲𑁆𑀲 𑀢𑁂 𑀆𑀤𑀸𑀬 𑀧𑀓𑁆𑀓𑀫𑀦𑀓𑀸𑀮𑁂 𑀥𑀢𑀭𑀝𑁆𑀞𑁄 𑀧𑀸𑀓𑀳𑀁𑀲𑀭𑀸𑀚𑀥𑀻𑀢𑀭𑀁 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀲𑀭𑀺𑀢𑁆𑀯𑀸 𑀲𑀼𑀫𑀼𑀔𑀁 𑀆𑀫𑀦𑁆𑀢𑁂𑀢𑁆𑀯𑀸 𑀓𑀺𑀮𑁂𑀲𑀯𑀲𑁂𑀦 𑀯𑀺𑀮𑀧𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀳𑀭𑀻𑀬𑀫𑀸𑀦𑁄 ¶ 𑀥𑀢𑀭𑀝𑁆𑀞𑁄, 𑀲𑀼𑀫𑀼𑀔𑀁 𑀏𑀢𑀤𑀩𑁆𑀭𑀯𑀺;
𑀩𑀸𑀴𑁆𑀳𑀁 𑀪𑀸𑀬𑀸𑀫𑀺 𑀲𑀼𑀫𑀼𑀔, 𑀲𑀸𑀫𑀸𑀬 𑀮𑀓𑁆𑀔𑀡𑀽𑀭𑀼𑀬𑀸;
𑀅𑀲𑁆𑀫𑀸𑀓𑀁 𑀯𑀥𑀫𑀜𑁆𑀜𑀸𑀬, 𑀅𑀣𑀢𑁆𑀢𑀸𑀦𑀁 𑀯𑀥𑀺𑀲𑁆𑀲𑀢𑀺.
‘‘𑀧𑀸𑀓𑀳𑀁𑀲𑀸 𑀘 𑀲𑀼𑀫𑀼𑀔, 𑀲𑀼𑀳𑁂𑀫𑀸 𑀳𑁂𑀫𑀲𑀼𑀢𑁆𑀢𑀘𑀸;
𑀓𑁄𑀜𑁆𑀘𑀻 𑀲𑀫𑀼𑀤𑁆𑀤𑀢𑀻𑀭𑁂𑀯, 𑀓𑀧𑀡𑀸 𑀦𑀽𑀦 𑀭𑀼𑀘𑁆𑀙𑀢𑀻’’𑀢𑀺.
𑀢𑀢𑁆𑀣 𑀪𑀸𑀬𑀸𑀫𑀻𑀢𑀺 𑀫𑀭𑀡𑀢𑁄 𑀪𑀸𑀬𑀸𑀫𑀺. 𑀲𑀸𑀫𑀸𑀬𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀸𑀬. 𑀮𑀓𑁆𑀔𑀡𑀽𑀭𑀼𑀬𑀸𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀊𑀭𑀼𑀬𑀸. 𑀯𑀘𑀫𑀜𑁆𑀜𑀸𑀬𑀸𑀢𑀺 𑀯𑀥𑀁 𑀚𑀸𑀦𑀺𑀢𑁆𑀯𑀸 ‘‘𑀫𑀫 𑀧𑀺𑀬𑀲𑀸𑀫𑀺𑀓𑁄 𑀫𑀸𑀭𑀺𑀢𑁄’’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸. 𑀯𑀥𑀺𑀲𑁆𑀲𑀢𑀻𑀢𑀺 𑀓𑀺𑀁 𑀫𑁂 𑀧𑀺𑀬𑀲𑀸𑀫𑀺𑀓𑁂 𑀫𑀢𑁂 𑀚𑀻𑀯𑀺𑀢𑁂𑀦𑀸𑀢𑀺 𑀫𑀭𑀺𑀲𑁆𑀲𑀢𑀺. 𑀧𑀸𑀓𑀳𑀁𑀲𑀸𑀢𑀺 𑀧𑀸𑀓𑀳𑀁𑀲𑀭𑀸𑀚𑀥𑀻𑀢𑀸. 𑀲𑀼𑀳𑁂𑀫𑀸𑀢𑀺 𑀏𑀯𑀁𑀦𑀸𑀫𑀺𑀓𑀸. 𑀳𑁂𑀫𑀲𑀼𑀢𑁆𑀢𑀘𑀸𑀢𑀺 𑀳𑁂𑀫𑀲𑀤𑀺𑀲𑀲𑀼𑀦𑁆𑀤𑀭𑀢𑀘𑀸. 𑀭𑀼𑀘𑁆𑀙𑀢𑀻𑀢𑀺 𑀬𑀣𑀸 𑀮𑁄𑀡𑀺𑀲𑀗𑁆𑀔𑀸𑀢𑀁 𑀲𑀫𑀼𑀤𑁆𑀤𑀁 𑀑𑀢𑀭𑀺𑀢𑁆𑀯𑀸 𑀫𑀢𑁂 𑀧𑀢𑀺𑀫𑁆𑀳𑀺 𑀓𑁄𑀜𑁆𑀘𑀻 𑀲𑀓𑀼𑀡𑀺𑀓𑀸 𑀓𑀧𑀡𑀸 𑀭𑁄𑀤𑀢𑀺, 𑀏𑀯𑀁 𑀦𑀽𑀦 𑀲𑀸 𑀭𑁄𑀤𑀺𑀲𑁆𑀲𑀢𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑀼𑀫𑀼𑀔𑁄 ‘‘𑀅𑀬𑀁 𑀳𑀁𑀲𑀭𑀸𑀚𑀸 𑀅𑀜𑁆𑀜𑁂 𑀑𑀯𑀤𑀺𑀢𑀼𑀁 𑀬𑀼𑀢𑁆𑀢𑁄 𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀓𑀺𑀮𑁂𑀲𑀯𑀲𑁂𑀦 𑀯𑀺𑀮𑀧𑀢𑀺, 𑀉𑀤𑀓𑀲𑁆𑀲 𑀆𑀤𑀺𑀢𑁆𑀢𑀓𑀸𑀮𑁄 𑀯𑀺𑀬 𑀯𑀢𑀺𑀬𑀸 𑀉𑀝𑁆𑀞𑀸𑀬 𑀓𑁂𑀤𑀸𑀭𑀔𑀸𑀤𑀦𑀓𑀸𑀮𑁄 𑀯𑀺𑀬 𑀘 𑀚𑀸𑀢𑁄, 𑀬𑀁𑀦𑀽𑀦𑀸𑀳𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀤𑁄𑀲𑀁 𑀧𑀓𑀸𑀲𑁂𑀢𑁆𑀯𑀸 𑀏𑀢𑀁 𑀲𑀜𑁆𑀜𑀸𑀧𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀏𑀯𑀁 𑀫𑀳𑀦𑁆𑀢𑁄 𑀮𑁄𑀓𑀲𑁆𑀲, 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀕𑀡𑀻;
𑀏𑀓𑀺𑀢𑁆𑀣𑀺𑀫𑀦𑀼𑀲𑁄𑀘𑁂𑀬𑁆𑀬, 𑀦𑀬𑀺𑀤𑀁 𑀧𑀜𑁆𑀜𑀯𑀢𑀸𑀫𑀺𑀯.
‘‘𑀯𑀸𑀢𑁄𑀯 𑀕𑀦𑁆𑀥𑀫𑀸𑀤𑁂𑀢𑀺, 𑀉𑀪𑀬𑀁 𑀙𑁂𑀓𑀧𑀸𑀧𑀓𑀁;
𑀩𑀸𑀮𑁄 𑀆𑀫𑀓𑀧𑀓𑁆𑀓𑀁𑀯, 𑀮𑁄𑀮𑁄 𑀅𑀦𑁆𑀥𑁄𑀯 𑀆𑀫𑀺𑀲𑀁.
‘‘𑀅𑀯𑀺𑀦𑀺𑀘𑁆𑀙𑀬𑀜𑁆𑀜𑀼 ¶ 𑀅𑀢𑁆𑀣𑁂𑀲𑀼, 𑀫𑀦𑁆𑀤𑁄𑀯 𑀧𑀝𑀺𑀪𑀸𑀲𑀺 𑀫𑀁;
𑀓𑀺𑀘𑁆𑀘𑀸𑀓𑀺𑀘𑁆𑀘𑀁 𑀦 𑀚𑀸𑀦𑀸𑀲𑀺, 𑀲𑀫𑁆𑀧𑀢𑁆𑀢𑁄 𑀓𑀸𑀮𑀧𑀭𑀺𑀬𑀸𑀬𑀁.
‘‘𑀅𑀟𑁆𑀠𑀼𑀫𑁆𑀫𑀢𑁆𑀢𑁄 ¶ 𑀉𑀤𑀻𑀭𑁂𑀲𑀺, 𑀬𑁄 𑀲𑁂𑀬𑁆𑀬𑀸 𑀫𑀜𑁆𑀜𑀲𑀺𑀢𑁆𑀣𑀺𑀬𑁄;
𑀩𑀳𑀼𑀲𑀸𑀥𑀸𑀭𑀡𑀸 𑀳𑁂𑀢𑀸, 𑀲𑁄𑀡𑁆𑀟𑀸𑀦𑀁𑀯 𑀲𑀼𑀭𑀸𑀖𑀭𑀁.
‘‘𑀫𑀸𑀬𑀸 ¶ 𑀘𑁂𑀢𑀸 𑀫𑀭𑀻𑀘𑀻 𑀘, 𑀲𑁄𑀓𑀸 𑀭𑁄𑀕𑀸 𑀘𑀼𑀧𑀤𑁆𑀤𑀯𑀸;
𑀔𑀭𑀸 𑀘 𑀩𑀦𑁆𑀥𑀦𑀸 𑀘𑁂𑀢𑀸, 𑀫𑀘𑁆𑀘𑀼𑀧𑀸𑀲𑀸 𑀕𑀼𑀳𑀸𑀲𑀬𑀸;
𑀢𑀸𑀲𑀼 𑀬𑁄 𑀯𑀺𑀲𑁆𑀲𑀲𑁂 𑀧𑁄𑀲𑁄, 𑀲𑁄 𑀦𑀭𑁂𑀲𑀼 𑀦𑀭𑀸𑀥𑀫𑁄’’𑀢𑀺.
𑀢𑀢𑁆𑀣 𑀫𑀳𑀦𑁆𑀢𑁄𑀢𑀺 𑀫𑀳𑀦𑁆𑀢𑁄 𑀲𑀫𑀸𑀦𑁄. 𑀮𑁄𑀓𑀲𑁆𑀲𑀸𑀢𑀺 𑀳𑀁𑀲𑀮𑁄𑀓𑀲𑁆𑀲. 𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀕𑀼𑀡𑁂𑀳𑀺 𑀧𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀫𑀳𑀸𑀕𑀡𑀻𑀢𑀺 𑀫𑀳𑀦𑁆𑀢𑁂𑀦 𑀕𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀕𑀡𑀲𑀢𑁆𑀣𑀸. 𑀏𑀓𑀺𑀢𑁆𑀣𑀺𑀦𑁆𑀢𑀺 𑀬𑀁 𑀏𑀯𑀭𑀽𑀧𑁄 𑀪𑀯𑀁 𑀏𑀓𑀁 𑀇𑀢𑁆𑀣𑀺𑀁 𑀅𑀦𑀼𑀲𑁄𑀘𑁂𑀬𑁆𑀬, 𑀇𑀤𑀁 𑀅𑀦𑀼𑀲𑁄𑀘𑀦𑀁 𑀦 𑀧𑀜𑁆𑀜𑀯𑀢𑀁 𑀇𑀯, 𑀢𑁂𑀦𑀸𑀳𑀁 𑀅𑀚𑁆𑀚 𑀢𑀁 𑀩𑀸𑀮𑁄𑀢𑀺 𑀫𑀜𑁆𑀜𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳.
𑀆𑀤𑁂𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀙𑁂𑀓𑀧𑀸𑀧𑀓𑀦𑁆𑀢𑀺 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀁. 𑀆𑀫𑀓𑀧𑀓𑁆𑀓𑀢𑀺 𑀆𑀫𑀓𑀜𑁆𑀘 𑀧𑀓𑁆𑀓𑀜𑁆𑀘. 𑀮𑁄𑀮𑁄𑀢𑀺 𑀭𑀲𑀮𑁄𑀮𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀬𑀣𑀸 𑀦𑀸𑀫 𑀯𑀸𑀢𑁄 𑀧𑀤𑀼𑀫𑀲𑀭𑀸𑀤𑀻𑀦𑀺 𑀧𑀳𑀭𑀺𑀢𑁆𑀯𑀸 𑀲𑀼𑀕𑀦𑁆𑀥𑀫𑁆𑀧𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀤𑀻𑀦𑀺 𑀧𑀳𑀭𑀺𑀢𑁆𑀯𑀸 𑀤𑀼𑀕𑁆𑀕𑀦𑁆𑀥𑀫𑁆𑀧𑀻𑀢𑀺 𑀉𑀪𑀬𑀁 𑀙𑁂𑀓𑀧𑀸𑀧𑀓𑀁 𑀕𑀦𑁆𑀥𑀁 𑀆𑀤𑀺𑀬𑀢𑀺, 𑀬𑀣𑀸 𑀘 𑀩𑀸𑀮𑁄 𑀓𑀼𑀫𑀸𑀭𑀓𑁄 𑀅𑀫𑁆𑀩𑀚𑀫𑁆𑀩𑀽𑀦𑀁 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀧𑀢𑀺𑀢𑀧𑀢𑀺𑀢𑀁 𑀆𑀫𑀓𑀫𑁆𑀧𑀺 𑀧𑀓𑁆𑀓𑀫𑁆𑀧𑀺 𑀨𑀮𑀁 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺, 𑀬𑀣𑀸 𑀘 𑀭𑀲𑀮𑁄𑀮𑁄 𑀅𑀦𑁆𑀥𑁄 𑀪𑀢𑁆𑀢𑁂 𑀉𑀧𑀦𑀻𑀢𑁂 𑀬𑀁𑀓𑀺𑀜𑁆𑀘𑀺 𑀲𑀫𑀓𑁆𑀔𑀺𑀓𑀫𑁆𑀧𑀺 𑀦𑀺𑀫𑁆𑀫𑀓𑁆𑀔𑀺𑀓𑀫𑁆𑀧𑀺 𑀆𑀫𑀺𑀲𑀁 𑀆𑀤𑀺𑀬𑀢𑀺, 𑀏𑀯𑀁 𑀇𑀢𑁆𑀣𑀺𑀬𑁄 𑀦𑀸𑀫 𑀓𑀺𑀮𑁂𑀲𑀯𑀲𑁂𑀦 𑀅𑀟𑁆𑀠𑀫𑁆𑀧𑀺 𑀤𑀼𑀕𑁆𑀕𑀢𑀫𑁆𑀧𑀺 𑀓𑀼𑀮𑀻𑀦𑀫𑁆𑀧𑀺 𑀅𑀓𑀼𑀮𑀻𑀦𑀫𑁆𑀧𑀺 𑀅𑀪𑀺𑀭𑀽𑀧𑀫𑁆𑀧𑀺 𑀯𑀺𑀭𑀽𑀧𑀫𑁆𑀧𑀺 𑀕𑀡𑁆𑀳𑀦𑁆𑀢𑀺 𑀪𑀚𑀦𑁆𑀢𑀺, 𑀢𑀸𑀤𑀺𑀲𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀇𑀢𑁆𑀣𑀻𑀦𑀁 𑀓𑀺𑀁𑀓𑀸𑀭𑀡𑀸 𑀯𑀺𑀧𑁆𑀧𑀮𑀧𑀲𑀺, 𑀫𑀳𑀸𑀭𑀸𑀚𑀸𑀢𑀺.
𑀅𑀢𑁆𑀣𑁂𑀲𑀽𑀢𑀺 𑀓𑀸𑀭𑀡𑀸𑀓𑀸𑀭𑀡𑁂𑀲𑀼. 𑀫𑀦𑁆𑀤𑁄𑀢𑀺 𑀅𑀦𑁆𑀥𑀩𑀸𑀮𑁄. 𑀧𑀝𑀺𑀪𑀸𑀲𑀺 𑀫𑀦𑁆𑀢𑀺 𑀫𑀫 𑀉𑀧𑀝𑁆𑀞𑀸𑀲𑀺. 𑀓𑀸𑀮𑀧𑀭𑀺𑀬𑀸𑀬𑀦𑁆𑀢𑀺 𑀏𑀯𑀭𑀽𑀧𑀁 𑀫𑀭𑀡𑀓𑀸𑀮𑀁 𑀧𑀢𑁆𑀢𑁄 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀤𑀁 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀦𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀯𑀢𑁆𑀢𑀩𑁆𑀩𑀁, 𑀇𑀤𑀁 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀦 𑀚𑀸𑀦𑀸𑀲𑀺 𑀤𑁂𑀯𑀸𑀢𑀺. 𑀅𑀟𑁆𑀠𑀼𑀫𑁆𑀫𑀢𑁆𑀢𑁄𑀢𑀺 𑀅𑀟𑁆𑀠𑀼𑀫𑁆𑀫𑀢𑁆𑀢𑀓𑁄 𑀫𑀜𑁆𑀜𑁂 𑀳𑀼𑀢𑁆𑀯𑀸. 𑀉𑀤𑀻𑀭𑁂𑀲𑀻𑀢𑀺 𑀬𑀣𑀸 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀦𑀸𑀢𑀺𑀫𑀢𑁆𑀢𑁄 𑀧𑀼𑀭𑀺𑀲𑁄 𑀬𑀁 𑀯𑀸 𑀢𑀁 𑀯𑀸 𑀧𑀮𑀧𑀢𑀺, 𑀏𑀯𑀁 𑀧𑀮𑀧𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀸𑀢𑀺 𑀯𑀭𑀸 𑀉𑀢𑁆𑀢𑀫𑀸.
‘‘𑀫𑀸𑀬𑀸 𑀘𑀸’’𑀢𑀺𑀆𑀤𑀻𑀲𑀼, 𑀤𑁂𑀯, 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀯𑀜𑁆𑀘𑀦𑀝𑁆𑀞𑁂𑀦 𑀫𑀸𑀬𑀸, 𑀅𑀕𑀬𑁆𑀳𑀼𑀧𑀕𑀝𑁆𑀞𑁂𑀦 𑀫𑀭𑀻𑀘𑀻, 𑀲𑁄𑀓𑀸𑀤𑀻𑀦𑀁 𑀧𑀘𑁆𑀘𑀬𑀢𑁆𑀢𑀸 𑀲𑁄𑀓𑀸, 𑀭𑁄𑀕𑀸, 𑀅𑀦𑁂𑀓𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸, 𑀓𑁄𑀥𑀸𑀤𑀻𑀳𑀺 𑀣𑀤𑁆𑀥𑀪𑀸𑀯𑁂𑀦𑁂𑀯 𑀔𑀭𑀸. 𑀢𑀸 𑀳𑀺 𑀦𑀺𑀲𑁆𑀲𑀸𑀬 ¶ 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑀦𑀢𑁄 𑀩𑀦𑁆𑀥𑀦𑀸 𑀘𑁂𑀢𑀸, 𑀇𑀢𑁆𑀣𑀺𑀬𑁄 𑀦𑀸𑀫 𑀲𑀭𑀻𑀭𑀕𑀼𑀳𑀸𑀲𑀬𑀯𑀲𑁂𑀦𑁂𑀯 𑀫𑀘𑁆𑀘𑀼 𑀦𑀸𑀫 𑀏𑀢𑀸, 𑀤𑁂𑀯𑀸𑀢𑀺. ‘‘𑀓𑀸𑀫𑀳𑁂𑀢𑀼, 𑀓𑀸𑀫𑀦𑀺𑀤𑀸𑀦𑀁, 𑀓𑀸𑀫𑀸𑀥𑀺𑀓𑀭𑀡𑀁, 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀭𑀸𑀚𑀸𑀦𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸’’𑀢𑀺 (𑀫. 𑀦𑀺. 𑁧.𑁧𑁬𑁮-𑁧𑁬𑁯) 𑀲𑀼𑀢𑁆𑀢𑁂𑀦𑀧𑁂𑀲 𑀅𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄.
𑀢𑀢𑁄 ¶ ¶ 𑀥𑀢𑀭𑀝𑁆𑀞𑁄 𑀫𑀸𑀢𑀼𑀕𑀸𑀫𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 ‘‘𑀢𑁆𑀯𑀁 𑀫𑀸𑀢𑀼𑀕𑀸𑀫𑀲𑁆𑀲 𑀕𑀼𑀡𑀁 𑀦 𑀚𑀸𑀦𑀸𑀲𑀺, 𑀧𑀡𑁆𑀟𑀺𑀢𑀸 𑀏𑀯 𑀏𑀢𑀁 𑀚𑀸𑀦𑀦𑁆𑀢𑀺, 𑀦 𑀳𑁂𑀢𑀸 𑀕𑀭𑀳𑀺𑀢𑀩𑁆𑀩𑀸’’𑀢𑀺 𑀤𑀻𑀧𑁂𑀦𑁆𑀢𑁄 𑀆𑀳 𑁋
‘‘𑀬𑀁 𑀯𑀼𑀤𑁆𑀥𑁂𑀳𑀺 𑀉𑀧𑀜𑁆𑀜𑀸𑀢𑀁, 𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀺;
𑀫𑀳𑀸𑀪𑀽𑀢𑀺𑀢𑁆𑀣𑀺𑀬𑁄 𑀦𑀸𑀫, 𑀮𑁄𑀓𑀲𑁆𑀫𑀺𑀁 𑀉𑀤𑀧𑀚𑁆𑀚𑀺𑀲𑀼𑀁.
‘‘𑀔𑀺𑀟𑁆𑀟𑀸 𑀧𑀡𑀺𑀳𑀺𑀢𑀸 𑀢𑁆𑀬𑀸𑀲𑀼, 𑀭𑀢𑀺 𑀢𑁆𑀬𑀸𑀲𑀼 𑀧𑀢𑀺𑀝𑁆𑀞𑀺𑀢𑀸;
𑀩𑀻𑀚𑀸𑀦𑀺 𑀢𑁆𑀬𑀸𑀲𑀼 𑀭𑀽𑀳𑀦𑁆𑀢𑀺, 𑀬𑀤𑀺𑀤𑀁 𑀲𑀢𑁆𑀢𑀸 𑀧𑀚𑀸𑀬𑀭𑁂;
𑀢𑀸𑀲𑀼 𑀓𑁄 𑀦𑀺𑀩𑁆𑀩𑀺𑀤𑁂 𑀧𑁄𑀲𑁄, 𑀧𑀸𑀡𑀫𑀸𑀲𑀚𑁆𑀚 𑀧𑀸𑀡𑀺𑀪𑀺.
‘‘𑀢𑁆𑀯𑀫𑁂𑀯 𑀦𑀜𑁆𑀜𑁄 𑀲𑀼𑀫𑀼𑀔, 𑀣𑀻𑀦𑀁 𑀅𑀢𑁆𑀣𑁂𑀲𑀼 𑀬𑀼𑀜𑁆𑀚𑀲𑀺;
𑀢𑀲𑁆𑀲 𑀢𑁆𑀬𑀚𑁆𑀚 𑀪𑀬𑁂 𑀚𑀸𑀢𑁂, 𑀪𑀻𑀢𑁂 𑀦 𑀚𑀸𑀬𑀢𑁂 𑀫𑀢𑀺.
‘‘𑀲𑀩𑁆𑀩𑁄 𑀳𑀺 𑀲𑀁𑀲𑀬𑀁 𑀧𑀢𑁆𑀢𑁄, 𑀪𑀬𑀁 𑀪𑀻𑀭𑀽 𑀢𑀺𑀢𑀺𑀓𑁆𑀔𑀢𑀺;
𑀧𑀡𑁆𑀟𑀺𑀢𑀸 𑀘 𑀫𑀳𑀦𑁆𑀢𑀸𑀦𑁄, 𑀅𑀢𑁆𑀣𑁂 𑀬𑀼𑀜𑁆𑀚𑀦𑁆𑀢𑀺 𑀤𑀼𑀬𑁆𑀬𑀼𑀚𑁂.
‘‘𑀏𑀢𑀤𑀢𑁆𑀣𑀸𑀬 𑀭𑀸𑀚𑀸𑀦𑁄, 𑀲𑀽𑀭𑀫𑀺𑀘𑁆𑀙𑀦𑁆𑀢𑀺 𑀫𑀦𑁆𑀢𑀺𑀦𑀁;
𑀧𑀝𑀺𑀩𑀸𑀳𑀢𑀺 𑀬𑀁 𑀲𑀽𑀭𑁄, 𑀆𑀧𑀤𑀁 𑀅𑀢𑁆𑀢𑀧𑀭𑀺𑀬𑀸𑀬𑀁.
‘‘𑀫𑀸 𑀦𑁄 𑀅𑀚𑁆𑀚 𑀯𑀺𑀓𑀦𑁆𑀢𑀺𑀁𑀲𑀼, 𑀭𑀜𑁆𑀜𑁄 𑀲𑀽𑀤𑀸 𑀫𑀳𑀸𑀦𑀲𑁂;
𑀢𑀣𑀸 𑀳𑀺 𑀯𑀡𑁆𑀡𑁄 𑀧𑀢𑁆𑀢𑀸𑀦𑀁, 𑀨𑀮𑀁 𑀯𑁂𑀴𑀼𑀁𑀯 𑀢𑀁 𑀯𑀥𑀺.
‘‘𑀫𑀼𑀢𑁆𑀢𑁄𑀧𑀺 𑀦 𑀇𑀘𑁆𑀙𑀺 𑀉𑀟𑁆𑀟𑁂𑀢𑀼𑀁, 𑀲𑀬𑀁 𑀩𑀦𑁆𑀥𑀁 𑀉𑀧𑀸𑀕𑀫𑀺;
𑀲𑁄𑀧𑀚𑁆𑀚 𑀲𑀁𑀲𑀬𑀁 𑀧𑀢𑁆𑀢𑁄, 𑀅𑀢𑁆𑀣𑀁 𑀕𑀡𑁆𑀳𑀸𑀳𑀺 𑀫𑀸 𑀫𑀼𑀔’’𑀦𑁆𑀢𑀺.
𑀢𑀢𑁆𑀣 𑀬𑀦𑁆𑀢𑀺 𑀬𑀁 𑀫𑀸𑀢𑀼𑀕𑀸𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼 𑀧𑀜𑁆𑀜𑀸𑀯𑀼𑀤𑁆𑀥𑁂𑀳𑀺 𑀜𑀸𑀢𑀁, 𑀢𑁂𑀲𑀫𑁂𑀯 𑀧𑀸𑀓𑀝𑀁, 𑀦 𑀩𑀸𑀮𑀸𑀦𑀁. 𑀫𑀳𑀸𑀪𑀽𑀢𑀸𑀢𑀺 𑀫𑀳𑀸𑀕𑀼𑀡𑀸 𑀫𑀳𑀸𑀦𑀺𑀲𑀁𑀲𑀸. 𑀉𑀤𑀧𑀚𑁆𑀚𑀺𑀲𑀼𑀦𑁆𑀢𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 ¶ 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯 𑀧𑀞𑀫𑀁 𑀧𑀸𑀢𑀼𑀪𑀽𑀢𑀢𑁆𑀢𑀸 𑀧𑀞𑀫𑀁 𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁆𑀬𑀸𑀲𑀽𑀢𑀺 𑀲𑀼𑀫𑀼𑀔 𑀢𑀸𑀲𑀼 𑀇𑀢𑁆𑀣𑀻𑀲𑀼 𑀓𑀸𑀬𑀯𑀘𑀻𑀔𑀺𑀟𑁆𑀟𑀸 𑀘 𑀧𑀡𑀺𑀳𑀺𑀢𑀸 𑀑𑀳𑀺𑀢𑀸 𑀞𑀧𑀺𑀢𑀸, 𑀓𑀸𑀫𑀕𑀼𑀡𑀭𑀢𑀺 𑀘 𑀧𑀢𑀺𑀝𑁆𑀞𑀺𑀢𑀸. 𑀩𑀻𑀚𑀸𑀦𑀻𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀩𑀻𑀚𑀸𑀦𑀺 ¶ 𑀢𑀸𑀲𑀼 𑀭𑀼𑀳𑀦𑁆𑀢𑀺. 𑀬𑀤𑀺𑀤𑀦𑁆𑀢𑀺 𑀬𑁂 𑀏𑀢𑁂 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸. 𑀧𑀚𑀸𑀬𑀭𑁂𑀢𑀺 𑀲𑀩𑁆𑀩𑁂 𑀢𑀸𑀲𑀜𑁆𑀜𑁂𑀯 𑀓𑀼𑀘𑁆𑀙𑀺𑀫𑁆𑀳𑀺 𑀲𑀁𑀯𑀤𑁆𑀥𑀸𑀢𑀺 𑀤𑀻𑀧𑁂𑀢𑀺. 𑀦𑀺𑀩𑁆𑀩𑀺𑀤𑁂𑀢𑀺 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬. 𑀧𑀸𑀡𑀫𑀸𑀲𑀚𑁆𑀚 𑀧𑀸𑀡𑀺𑀪𑀻𑀢𑀺 𑀅𑀢𑁆𑀢𑀦𑁄 𑀧𑀸𑀡𑁂𑀳𑀺𑀧𑀺 𑀢𑀸𑀲𑀁 𑀧𑀸𑀡𑀁 𑀆𑀲𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀘𑀚𑀦𑁆𑀢𑁄𑀧𑀺 𑀢𑀸 𑀮𑀪𑀺𑀢𑁆𑀯𑀸 𑀓𑁄 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.
𑀦𑀜𑁆𑀜𑁄𑀢𑀺 𑀦 𑀅𑀜𑁆𑀜𑁄, 𑀲𑀼𑀫𑀼𑀔, 𑀫𑀬𑀸 𑀘𑀺𑀢𑁆𑀢𑀓𑀽𑀝𑀢𑀮𑁂 𑀳𑀁𑀲𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁂𑀦 𑀢𑀁 𑀅𑀤𑀺𑀲𑁆𑀯𑀸 ‘‘𑀓𑀳𑀁 𑀦𑀼 𑀲𑀼𑀫𑀼𑀔𑁄’’𑀢𑀺 𑀯𑀼𑀢𑁆𑀢𑁂 ‘‘𑀏𑀲 𑀫𑀸𑀢𑀼𑀕𑀸𑀫𑀁 𑀕𑀳𑁂𑀢𑁆𑀯𑀸 𑀓𑀜𑁆𑀘𑀦𑀕𑀼𑀳𑀸𑀬𑀁 𑀉𑀢𑁆𑀢𑀫𑀭𑀢𑀺𑀁 𑀅𑀦𑀼𑀪𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀢𑁆𑀯𑀫𑁂𑀯 𑀣𑀻𑀦𑀁 𑀅𑀢𑁆𑀣𑁂𑀲𑀼 𑀬𑀼𑀜𑁆𑀚𑀲𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑁄 𑀳𑁄𑀲𑀺, 𑀦 ¶ 𑀅𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑁆𑀬𑀚𑁆𑀚𑀸𑀢𑀺 𑀢𑀲𑁆𑀲 𑀢𑁂 𑀅𑀚𑁆𑀚 𑀫𑀭𑀡𑀪𑀬𑁂 𑀚𑀸𑀢𑁂 𑀇𑀫𑀺𑀦𑀸 𑀪𑀻𑀢𑁂𑀦 𑀫𑀭𑀡𑀪𑀬𑁂𑀦 𑀪𑀻𑀢𑁄 𑀫𑀜𑁆𑀜𑁂, 𑀅𑀬𑀁 𑀫𑀸𑀢𑀼𑀕𑀸𑀫𑀲𑁆𑀲 𑀤𑁄𑀲𑀤𑀲𑁆𑀲𑀦𑁂 𑀦𑀺𑀧𑀼𑀡𑀸 𑀫𑀢𑀺 𑀚𑀸𑀬𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳.
𑀲𑀩𑁆𑀩𑁄 𑀳𑀻𑀢𑀺 𑀬𑁄 𑀳𑀺 𑀓𑁄𑀘𑀺. 𑀲𑀁𑀲𑀬𑀁 𑀧𑀢𑁆𑀢𑁄𑀢𑀺 𑀚𑀻𑀯𑀺𑀢𑀲𑀁𑀲𑀬𑀧𑁆𑀧𑀢𑁆𑀢𑁄. 𑀪𑀻𑀭𑀽𑀢𑀺 𑀪𑀻𑀭𑀽 𑀳𑀼𑀢𑁆𑀯𑀸𑀧𑀺 𑀪𑀬𑀁 𑀅𑀥𑀺𑀯𑀸𑀲𑁂𑀢𑀺. 𑀫𑀳𑀦𑁆𑀢𑀸𑀦𑁄𑀢𑀺 𑀬𑁂 𑀧𑀦 𑀧𑀡𑁆𑀟𑀺𑀢𑀸 𑀘 𑀳𑁄𑀦𑁆𑀢𑀺 𑀫𑀳𑀦𑁆𑀢𑁂 𑀘 𑀞𑀸𑀦𑁂 𑀞𑀺𑀢𑀸 𑀫𑀳𑀦𑁆𑀢𑀸𑀦𑁄, 𑀢𑁂 𑀤𑀼𑀬𑁆𑀬𑀼𑀚𑁂 𑀅𑀢𑁆𑀣𑁂 𑀬𑀼𑀜𑁆𑀚𑀦𑁆𑀢𑀺 𑀖𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑀸 𑀪𑀸𑀬𑀺, 𑀥𑀻𑀭𑁄 𑀳𑁄𑀳𑀻’’𑀢𑀺 𑀢𑀁 𑀉𑀲𑁆𑀲𑀸𑀳𑁂𑀦𑁆𑀢𑁄 𑀏𑀯𑀫𑀸𑀳. 𑀆𑀧𑀤𑀦𑁆𑀢𑀺 𑀲𑀸𑀫𑀺𑀦𑁄 𑀆𑀕𑀢𑀁 𑀆𑀧𑀤𑀁 𑀏𑀲 𑀲𑀽𑀭𑁄 𑀧𑀝𑀺𑀩𑀸𑀳𑀢𑀺, 𑀏𑀢𑀤𑀢𑁆𑀣𑀸𑀬 𑀲𑀽𑀭𑀁 𑀫𑀦𑁆𑀢𑀺𑀦𑀁 𑀇𑀘𑁆𑀙𑀦𑁆𑀢𑀺. 𑀅𑀢𑁆𑀢𑀧𑀭𑀺𑀬𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀸𑀡𑀫𑁆𑀧𑀺 𑀘 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀯𑀺𑀓𑀦𑁆𑀢𑀺𑀁𑀲𑀽𑀢𑀺 𑀙𑀺𑀦𑁆𑀤𑀺𑀁𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀲𑀼𑀫𑀼𑀔, 𑀢𑁆𑀯𑀁 𑀫𑀬𑀸 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀞𑀸𑀦𑁂 𑀞𑀧𑀺𑀢𑁄, 𑀢𑀲𑁆𑀫𑀸 𑀬𑀣𑀸 𑀅𑀚𑁆𑀚 𑀭𑀜𑁆𑀜𑁄 𑀲𑀽𑀤𑀸 𑀅𑀫𑁆𑀳𑁂 𑀫𑀁𑀲𑀢𑁆𑀣𑀸𑀬 𑀦 𑀯𑀺𑀓𑀦𑁆𑀢𑀺𑀁𑀲𑀼, 𑀢𑀣𑀸 𑀓𑀭𑁄𑀳𑀺, 𑀢𑀸𑀤𑀺𑀲𑁄 𑀳𑀺 𑀅𑀫𑁆𑀳𑀸𑀓𑀁 𑀧𑀢𑁆𑀢𑀯𑀡𑁆𑀡𑁄. 𑀢𑀁 𑀯𑀥𑀻𑀢𑀺 𑀲𑁆𑀯𑀸𑀬𑀁 𑀯𑀡𑁆𑀡𑁄 𑀬𑀣𑀸 𑀦𑀸𑀫 𑀯𑁂𑀴𑀼𑀁 𑀦𑀺𑀲𑁆𑀲𑀸𑀬 𑀚𑀸𑀢𑀁 𑀨𑀮𑀁 𑀯𑁂𑀴𑀼𑀫𑁂𑀯 𑀯𑀥𑀢𑀺, 𑀢𑀣𑀸 𑀫𑀸 𑀢𑀁 𑀯𑀥𑀺, 𑀢𑀜𑁆𑀘 𑀫𑀜𑁆𑀘 𑀫𑀸 𑀯𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳.
𑀫𑀼𑀢𑁆𑀢𑁄𑀧𑀻𑀢𑀺 ¶ 𑀬𑀣𑀸𑀲𑀼𑀔𑀁 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀁 𑀕𑀘𑁆𑀙𑀸𑀢𑀺 𑀏𑀯𑀁 𑀮𑀼𑀤𑁆𑀤𑀧𑀼𑀢𑁆𑀢𑁂𑀦 𑀫𑀬𑀸 𑀲𑀤𑁆𑀥𑀺𑀁 𑀫𑀼𑀢𑁆𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀲𑀫𑀸𑀦𑁄𑀧𑀺 𑀉𑀟𑁆𑀟𑀺𑀢𑀼𑀁 𑀦 𑀇𑀘𑁆𑀙𑀺. 𑀲𑀬𑀦𑁆𑀢𑀺 𑀭𑀸𑀚𑀸𑀦𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀩𑀦𑁆𑀥𑀁 𑀉𑀧𑀕𑀢𑁄𑀢𑀺 𑀏𑀯𑀫𑀺𑀤𑀁 𑀅𑀫𑁆𑀳𑀸𑀓𑀁 𑀪𑀬𑀁 𑀢𑀁 𑀦𑀺𑀲𑁆𑀲𑀸𑀬 𑀆𑀕𑀢𑀁. 𑀲𑁄𑀧𑀚𑁆𑀚𑀸𑀢𑀺 𑀲𑁄𑀧𑀺 𑀅𑀚𑁆𑀚 𑀚𑀻𑀯𑀺𑀢𑀲𑀁𑀲𑀬𑀁 𑀧𑀢𑁆𑀢𑁄. 𑀅𑀢𑁆𑀣𑀁 𑀕𑀡𑁆𑀳𑀸𑀳𑀺 𑀫𑀸 𑀫𑀼𑀔𑀦𑁆𑀢𑀺 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀫𑀼𑀜𑁆𑀘𑀦𑀓𑀸𑀭𑀡𑀁 𑀕𑀡𑁆𑀳, 𑀬𑀣𑀸 𑀫𑀼𑀘𑁆𑀘𑀸𑀫, 𑀢𑀣𑀸 𑀯𑀸𑀬𑀫, ‘‘𑀯𑀸𑀢𑁄𑀯 𑀕𑀦𑁆𑀥𑀫𑀸𑀤𑁂𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀇𑀢𑁆𑀣𑀺𑀕𑀭𑀳𑀢𑁆𑀣𑀸𑀬 𑀫𑀼𑀔𑀁 𑀫𑀸 𑀧𑀲𑀸𑀭𑀬𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀫𑀸𑀢𑀼𑀕𑀸𑀫𑀁 𑀯𑀡𑁆𑀡𑁂𑀢𑁆𑀯𑀸 𑀲𑀼𑀫𑀼𑀔𑀁 𑀅𑀧𑁆𑀧𑀝𑀺𑀪𑀸𑀡𑀁 𑀓𑀢𑁆𑀯𑀸 𑀢𑀲𑁆𑀲 𑀅𑀦𑀢𑁆𑀢𑀫𑀦𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 𑀇𑀤𑀸𑀦𑀺 𑀦𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀲𑁄 𑀢𑀁 𑀬𑁄𑀕𑀁 𑀧𑀬𑀼𑀜𑁆𑀚𑀲𑁆𑀲𑀼, 𑀬𑀼𑀢𑁆𑀢𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁;
𑀢𑀯 𑀧𑀭𑀺𑀬𑀸𑀧𑀤𑀸𑀦𑁂𑀦, 𑀫𑀫 𑀧𑀸𑀡𑁂𑀲𑀦𑀁 𑀘𑀭𑀸’’𑀢𑀺.
𑀢𑀢𑁆𑀣 𑀲𑁄𑀢𑀺, 𑀲𑀫𑁆𑀫 𑀲𑀼𑀫𑀼𑀔, 𑀲𑁄 𑀢𑁆𑀯𑀁. 𑀢𑀁 𑀬𑁄𑀕𑀦𑁆𑀢𑀺 𑀬𑀁 𑀧𑀼𑀩𑁆𑀩𑁂 ‘‘𑀅𑀳𑀁 𑀬𑁄𑀕𑀁 𑀧𑀬𑀼𑀜𑁆𑀚𑀺𑀲𑁆𑀲𑀁, 𑀬𑀼𑀢𑁆𑀢𑀁 𑀥𑀫𑁆𑀫𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀅𑀯𑀘𑀸𑀲𑀺, 𑀢𑀁 𑀇𑀤𑀸𑀦𑀺 𑀧𑀬𑀼𑀜𑁆𑀚𑀲𑁆𑀲𑀼. 𑀢𑀯 𑀧𑀭𑀺𑀬𑀸𑀧𑀤𑀸𑀦𑁂𑀦𑀸𑀢𑀺 𑀢𑀯 𑀢𑁂𑀦 𑀬𑁄𑀕𑁂𑀦 𑀧𑀭𑀺𑀲𑀼𑀤𑁆𑀥𑁂𑀦. ‘‘𑀧𑀭𑀺𑀬𑁄𑀤𑀸𑀢𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀧𑀭𑀺𑀢𑁆𑀢𑀸𑀡𑁂𑀦𑀸𑀢𑀺 𑀅𑀢𑁆𑀣𑁄, 𑀢𑀬𑀸 𑀓𑀢𑀢𑁆𑀢𑀸 𑀢𑀯 𑀲𑀦𑁆𑀢𑀓𑁂𑀦 𑀧𑀭𑀺𑀢𑁆𑀢𑀸𑀡𑁂𑀦 𑀫𑀫 𑀚𑀻𑀯𑀺𑀢𑀧𑀭𑀺𑀬𑁂𑀲𑀦𑀁 𑀘𑀭𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀅𑀣 ¶ 𑀲𑀼𑀫𑀼𑀔𑁄 ‘‘𑀅𑀬𑀁 𑀅𑀢𑀺𑀯𑀺𑀬 𑀫𑀭𑀡𑀪𑀬𑀪𑀻𑀢𑁄 𑀫𑀫 𑀜𑀸𑀡𑀩𑀮𑀁 𑀦 𑀚𑀸𑀦𑀸𑀢𑀺, 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀣𑁄𑀓𑀁 𑀓𑀣𑀁 𑀮𑀪𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀺, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀫𑀸 𑀪𑀸𑀬𑀺 𑀧𑀢𑀢𑀁 𑀲𑁂𑀝𑁆𑀞, 𑀦 𑀳𑀺 𑀪𑀸𑀬𑀦𑁆𑀢𑀺 𑀢𑀸𑀤𑀺𑀲𑀸;
𑀅𑀳𑀁 𑀬𑁄𑀕𑀁 𑀧𑀬𑀼𑀜𑁆𑀚𑀺𑀲𑁆𑀲𑀁, 𑀬𑀼𑀢𑁆𑀢𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁;
𑀫𑀫 𑀧𑀭𑀺𑀬𑀸𑀧𑀤𑀸𑀦𑁂𑀦, 𑀔𑀺𑀧𑁆𑀧𑀁 𑀧𑀸𑀲𑀸 𑀧𑀫𑁄𑀓𑁆𑀔𑀲𑀻’’𑀢𑀺.
𑀢𑀢𑁆𑀣 𑀧𑀸𑀲𑀸𑀢𑀺 𑀤𑀼𑀓𑁆𑀔𑀧𑀸𑀲𑀢𑁄.
𑀇𑀢𑀺 𑀢𑁂𑀲𑀁 𑀲𑀓𑀼𑀡𑀪𑀸𑀲𑀸𑀬 𑀓𑀣𑁂𑀦𑁆𑀢𑀸𑀦𑀁 𑀮𑀼𑀤𑁆𑀤𑀧𑀼𑀢𑁆𑀢𑁄 𑀦 𑀓𑀺𑀜𑁆𑀘𑀺 𑀅𑀜𑁆𑀜𑀸𑀲𑀺, 𑀓𑁂𑀯𑀮𑀁 𑀧𑀦 𑀢𑁂 𑀓𑀸𑀚𑁂𑀦𑀸𑀤𑀸𑀬 𑀩𑀸𑀭𑀸𑀡𑀲𑀺𑀁 𑀧𑀸𑀯𑀺𑀲𑀺. 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁂𑀦 𑀅𑀜𑁆𑀚𑀮𑀺𑀦𑀸 𑀫𑀳𑀸𑀚𑀦𑁂𑀦 𑀅𑀦𑀼𑀕𑁆𑀕𑀘𑁆𑀙𑀫𑀸𑀦𑁄 𑀲𑁄 𑀭𑀸𑀚𑀤𑁆𑀯𑀸𑀭𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀲𑁄 ¶ 𑀮𑀼𑀤𑁆𑀤𑁄 𑀳𑀁𑀲𑀓𑀸𑀚𑁂𑀦, 𑀭𑀸𑀚𑀤𑁆𑀯𑀸𑀭𑀁 𑀉𑀧𑀸𑀕𑀫𑀺;
𑀧𑀝𑀺𑀯𑁂𑀤𑁂𑀣 𑀫𑀁 𑀭𑀜𑁆𑀜𑁄, 𑀥𑀢𑀭𑀝𑁆𑀞𑀸𑀬𑀫𑀸𑀕𑀢𑁄’’𑀢𑀺.
𑀢𑀢𑁆𑀣 𑀧𑀝𑀺𑀯𑁂𑀤𑁂𑀣 𑀫𑀦𑁆𑀢𑀺 𑀔𑁂𑀫𑀓𑁄 𑀆𑀕𑀢𑁄𑀢𑀺 𑀏𑀯𑀁 𑀫𑀁 𑀭𑀜𑁆𑀜𑁄 𑀦𑀺𑀯𑁂𑀤𑁂𑀣. 𑀥𑀢𑀭𑀝𑁆𑀞𑀸𑀬𑀦𑁆𑀢𑀺 𑀅𑀬𑀁 𑀥𑀢𑀭𑀝𑁆𑀞𑁄 𑀆𑀕𑀢𑁄𑀢𑀺 𑀧𑀝𑀺𑀯𑁂𑀤𑁂𑀣.
𑀤𑁄𑀯𑀸𑀭𑀺𑀓𑁄 ¶ 𑀕𑀦𑁆𑀢𑁆𑀯𑀸 𑀧𑀝𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 ‘‘𑀔𑀺𑀧𑁆𑀧𑀁 𑀆𑀕𑀘𑁆𑀙𑀢𑀽’’𑀢𑀺 𑀯𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀔𑁂𑀫𑀓𑀁 𑀳𑀁𑀲𑀓𑀸𑀚𑀁 𑀆𑀤𑀸𑀬 𑀫𑀳𑀸𑀢𑀮𑀁 𑀅𑀪𑀺𑀭𑀼𑀴𑁆𑀳𑀁 𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑁂 𑀳𑀁𑀲𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀫𑁆𑀧𑀼𑀡𑁆𑀡𑁄 𑀫𑁂 𑀫𑀦𑁄𑀭𑀣𑁄’’𑀢𑀺 𑀢𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑁂 𑀤𑀺𑀲𑁆𑀯𑀸 𑀧𑀼𑀜𑁆𑀜𑀲𑀗𑁆𑀓𑀸𑀲𑁂, 𑀉𑀪𑁄 𑀮𑀓𑁆𑀔𑀡𑀲𑀫𑁆𑀫𑀢𑁂;
𑀔𑀮𑀼 𑀲𑀁𑀬𑀫𑀦𑁄 𑀭𑀸𑀚𑀸, 𑀅𑀫𑀘𑁆𑀘𑁂 𑀅𑀚𑁆𑀛𑀪𑀸𑀲𑀣.
‘‘𑀤𑁂𑀣 𑀮𑀼𑀤𑁆𑀤𑀲𑁆𑀲 𑀯𑀢𑁆𑀣𑀸𑀦𑀺, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;
𑀓𑀸𑀫𑀁𑀓𑀭𑁄 𑀳𑀺𑀭𑀜𑁆𑀜𑀲𑁆𑀲, 𑀬𑀸𑀯𑀦𑁆𑀢𑁄 𑀏𑀲 𑀇𑀘𑁆𑀙𑀢𑀻’’𑀢𑀺.
𑀢𑀢𑁆𑀣 𑀧𑀼𑀜𑁆𑀜𑀲𑀗𑁆𑀓𑀸𑀲𑁂𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀲𑀤𑀺𑀲𑁂. 𑀮𑀓𑁆𑀔𑀡𑀲𑀫𑁆𑀫𑀢𑁂𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁂 𑀅𑀪𑀺𑀜𑁆𑀜𑀸𑀢𑁂. 𑀔𑀮𑀽𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 ‘‘𑀢𑁂 𑀔𑀮𑀼 𑀤𑀺𑀲𑁆𑀯𑀸’’𑀢𑀺 𑀧𑀼𑀭𑀺𑀫𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. ‘‘𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀭𑀸𑀚𑀸 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀆𑀳. 𑀢𑀢𑁆𑀣 𑀓𑀸𑀫𑀁𑀓𑀭𑁄 𑀳𑀺𑀭𑀜𑁆𑀜𑀲𑁆𑀲𑀸𑀢𑀺 ¶ 𑀳𑀺𑀭𑀜𑁆𑀜𑀁 𑀅𑀲𑁆𑀲 𑀓𑀸𑀫𑀓𑀺𑀭𑀺𑀬𑀸 𑀅𑀢𑁆𑀣𑀼. 𑀬𑀸𑀯𑀦𑁆𑀢𑁄𑀢𑀺 𑀬𑀢𑁆𑀢𑀓𑀁 𑀏𑀲 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀳𑀺𑀭𑀜𑁆𑀜𑀫𑀲𑁆𑀲 𑀤𑁂𑀣𑀸𑀢𑀺 𑀅𑀢𑁆𑀣𑁄.
𑀏𑀯𑀁 𑀧𑀲𑀦𑁆𑀦𑀸𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀲𑀫𑀼𑀲𑁆𑀲𑀳𑀺𑀢𑁄 ‘‘𑀕𑀘𑁆𑀙𑀣 𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀦𑁂𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀅𑀫𑀘𑁆𑀘𑀸 𑀭𑀸𑀚𑀦𑀺𑀯𑁂𑀲𑀦𑀸 𑀑𑀢𑀸𑀭𑁂𑀢𑁆𑀯𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼𑀁 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀅𑀣𑀲𑁆𑀲 𑀭𑀸𑀚𑀸 𑀲𑀁𑀯𑀘𑁆𑀙𑀭𑁂 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑁂 𑀤𑁆𑀯𑀸𑀤𑀲 𑀕𑀸𑀫𑁂 𑀆𑀚𑀜𑁆𑀜𑀬𑀼𑀢𑁆𑀢𑀁 𑀭𑀣𑀁 𑀅𑀮𑀗𑁆𑀓𑀢𑀫𑀳𑀸𑀕𑁂𑀳𑀜𑁆𑀘𑀸𑀢𑀺 𑀫𑀳𑀦𑁆𑀢𑀁 𑀬𑀲𑀁 𑀤𑀸𑀧𑁂𑀲𑀺. 𑀲𑁄 𑀫𑀳𑀦𑁆𑀢𑀁 𑀬𑀲𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀓𑀸𑀲𑁂𑀢𑀼𑀁 ‘‘𑀦 𑀢𑁂, 𑀤𑁂𑀯, 𑀫𑀬𑀸 𑀬𑁄 𑀯𑀸 𑀲𑁄 𑀯𑀸 𑀳𑀁𑀲𑁄 𑀆𑀦𑀻𑀢𑁄, 𑀅𑀬𑀁 𑀧𑀦 𑀦𑀯𑀼𑀢𑀺𑀬𑀸 𑀳𑀁𑀲𑀲𑀳𑀲𑁆𑀲𑀸𑀦𑀁 𑀭𑀸𑀚𑀸 𑀥𑀢𑀭𑀝𑁆𑀞𑁄 𑀦𑀸𑀫, 𑀅𑀬𑀁 𑀲𑁂𑀦𑀸𑀧𑀢𑀺 𑀲𑀼𑀫𑀼𑀔𑁄 𑀦𑀸𑀫𑀸’’𑀢𑀺 𑀆𑀳 ¶ . 𑀅𑀣 𑀦𑀁 𑀭𑀸𑀚𑀸 ‘‘𑀓𑀣𑀁 𑀢𑁂, 𑀲𑀫𑁆𑀫, 𑀏𑀢𑁂 𑀕𑀳𑀺𑀢𑀸’’𑀢𑀺 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀤𑀺𑀲𑁆𑀯𑀸 𑀮𑀼𑀤𑁆𑀤𑀁 𑀧𑀲𑀦𑁆𑀦𑀢𑁆𑀢𑀁, 𑀓𑀸𑀲𑀺𑀭𑀸𑀚𑀸 𑀢𑀤𑀩𑁆𑀭𑀯𑀺;
𑀬𑀤𑁆𑀬𑀸𑀬𑀁 𑀲𑀫𑁆𑀫 𑀔𑁂𑀫𑀓, 𑀧𑀼𑀡𑁆𑀡𑀸 𑀳𑀁𑀲𑁂𑀳𑀺 𑀢𑀺𑀝𑁆𑀞𑀢𑀺.
‘‘𑀓𑀣𑀁 𑀭𑀼𑀘𑀺𑀫𑀚𑁆𑀛𑀕𑀢𑀁, 𑀧𑀸𑀲𑀳𑀢𑁆𑀣𑁄 𑀉𑀧𑀸𑀕𑀫𑀺;
𑀑𑀓𑀺𑀡𑁆𑀡𑀁 𑀜𑀸𑀢𑀺𑀲𑀗𑁆𑀖𑁂𑀳𑀺, 𑀦𑀺𑀫𑁆𑀫𑀚𑁆𑀛𑀺𑀫𑀁 𑀓𑀣𑀁 𑀕𑀳𑀻’’𑀢𑀺.
𑀢𑀢𑁆𑀣 ¶ 𑀧𑀲𑀦𑁆𑀦𑀢𑁆𑀢𑀦𑁆𑀢𑀺 𑀧𑀲𑀦𑁆𑀦𑀪𑀸𑀯𑀁 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀁. 𑀬𑀤𑁆𑀬𑀸𑀬𑀦𑁆𑀢𑀺, 𑀲𑀫𑁆𑀫 𑀔𑁂𑀫𑀓, 𑀬𑀤𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀧𑁄𑀓𑁆𑀔𑀭𑀡𑀻 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑁂𑀳𑀺 𑀧𑀼𑀡𑁆𑀡𑀸 𑀢𑀺𑀝𑁆𑀞𑀢𑀺. 𑀓𑀣𑀁 𑀭𑀼𑀘𑀺𑀫𑀚𑁆𑀛𑀕𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀢𑁂𑀲𑀁 𑀭𑀼𑀘𑀻𑀦𑀁 𑀧𑀺𑀬𑀤𑀲𑁆𑀲𑀦𑀸𑀦𑀁 𑀳𑀁𑀲𑀸𑀦𑀁 𑀫𑀚𑁆𑀛𑀕𑀢𑀁 𑀏𑀢𑀁 𑀜𑀸𑀢𑀺𑀲𑀗𑁆𑀖𑁂𑀳𑀺 𑀑𑀓𑀺𑀡𑁆𑀡𑀁. 𑀦𑀺𑀫𑁆𑀫𑀚𑁆𑀛𑀺𑀫𑀦𑁆𑀢𑀺 𑀦𑁂𑀯 𑀫𑀚𑁆𑀛𑀺𑀫𑀁 𑀦𑁂𑀯 𑀓𑀦𑀺𑀝𑁆𑀞𑀁 𑀉𑀢𑁆𑀢𑀫𑀁 𑀳𑀁𑀲𑀭𑀸𑀚𑀸𑀦𑀁 𑀓𑀣𑀁 𑀧𑀸𑀲𑀳𑀢𑁆𑀣𑁄 𑀉𑀧𑀸𑀕𑀫𑀺 𑀓𑀣𑀁 𑀕𑀡𑁆𑀳𑀻𑀢𑀺.
𑀲𑁄 𑀢𑀲𑁆𑀲 𑀓𑀣𑁂𑀦𑁆𑀢𑁄 𑀆𑀳 𑁋
‘‘𑀅𑀚𑁆𑀚 𑀫𑁂 𑀲𑀢𑁆𑀢𑀫𑀸 𑀭𑀢𑁆𑀢𑀺, 𑀅𑀤𑀦𑀸𑀦𑀺 𑀉𑀧𑀸𑀲𑀢𑁄;
𑀧𑀤𑀫𑁂𑀢𑀲𑁆𑀲 𑀅𑀦𑁆𑀯𑁂𑀲𑀁, 𑀅𑀧𑁆𑀧𑀫𑀢𑁆𑀢𑁄 𑀖𑀝𑀲𑁆𑀲𑀺𑀢𑁄.
‘‘𑀅𑀣𑀲𑁆𑀲 𑀧𑀤𑀫𑀤𑁆𑀤𑀓𑁆𑀔𑀺𑀁, 𑀘𑀭𑀢𑁄 𑀅𑀤𑀦𑁂𑀲𑀦𑀁;
𑀢𑀢𑁆𑀣𑀸𑀳𑀁 𑀑𑀤𑀳𑀺𑀁 𑀧𑀸𑀲𑀁, 𑀏𑀯𑀁 𑀢𑀁 𑀤𑀺𑀚𑀫𑀕𑁆𑀕𑀳𑀺’’𑀦𑁆𑀢𑀺.
𑀢𑀢𑁆𑀣 ¶ 𑀅𑀤𑀦𑀸𑀦𑀻𑀢𑀺 𑀆𑀤𑀸𑀦𑀸𑀦𑀺, 𑀕𑁄𑀘𑀭𑀕𑁆𑀕𑀳𑀡𑀝𑁆𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀉𑀧𑀸𑀲𑀢𑁄𑀢𑀺 𑀉𑀧𑀕𑀘𑁆𑀙𑀦𑁆𑀢𑀲𑁆𑀲. 𑀧𑀤𑀦𑁆𑀢𑀺 𑀕𑁄𑀘𑀭𑀪𑀽𑀫𑀺𑀬𑀁 𑀅𑀓𑁆𑀓𑀦𑁆𑀢𑀧𑀤𑀁. 𑀖𑀝𑀲𑁆𑀲𑀺𑀢𑁄𑀢𑀺 𑀘𑀸𑀝𑀺𑀧𑀜𑁆𑀚𑀭𑁂 𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸. 𑀅𑀣𑀲𑁆𑀲𑀸𑀢𑀺 𑀅𑀣 𑀙𑀝𑁆𑀞𑁂 𑀤𑀺𑀯𑀲𑁂 𑀏𑀢𑀲𑁆𑀲 𑀅𑀤𑀦𑁂𑀲𑀦𑀁 𑀘𑀭𑀦𑁆𑀢𑀲𑁆𑀲 𑀧𑀤𑀁 𑀅𑀤𑁆𑀤𑀓𑁆𑀔𑀺𑀁. 𑀏𑀯𑀁 𑀢𑀦𑁆𑀢𑀺 𑀏𑀯𑀁 𑀢𑀁 𑀤𑀺𑀚𑀁 𑀅𑀕𑁆𑀕𑀳𑀺𑀦𑁆𑀢𑀺 𑀲𑀩𑁆𑀩𑀁 𑀕𑀳𑀺𑀢𑁄𑀧𑀸𑀬𑀁 𑀆𑀘𑀺𑀓𑁆𑀔𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀬𑀁 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀝𑀺𑀯𑁂𑀤𑁂𑀦𑁆𑀢𑁄𑀧𑀺 𑀥𑀢𑀭𑀝𑁆𑀞𑀲𑁆𑀲𑁂𑀯𑀸𑀕𑀫𑀦𑀁 𑀧𑀝𑀺𑀯𑁂𑀤𑁂𑀲𑀺, 𑀇𑀤𑀸𑀦𑀺𑀧𑀺 𑀏𑀢𑀁 𑀏𑀓𑀫𑁂𑀯 𑀕𑀡𑁆𑀳𑀺𑀦𑁆𑀢𑀺 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀮𑀼𑀤𑁆𑀤 𑀤𑁆𑀯𑁂 𑀇𑀫𑁂 𑀲𑀓𑀼𑀡𑀸, 𑀅𑀣 𑀏𑀓𑁄𑀢𑀺 𑀪𑀸𑀲𑀲𑀺;
𑀘𑀺𑀢𑁆𑀢𑀁 𑀦𑀼 𑀢𑁂 𑀯𑀺𑀧𑀭𑀺𑀬𑀢𑁆𑀢𑀁, 𑀅𑀤𑀼 𑀓𑀺𑀁 𑀦𑀼 𑀚𑀺𑀕𑀻𑀲𑀲𑀻’’𑀢𑀺.
𑀢𑀢𑁆𑀣 ¶ 𑀯𑀺𑀧𑀭𑀺𑀬𑀢𑁆𑀢𑀦𑁆𑀢𑀺 𑀯𑀺𑀧𑀮𑁆𑀮𑀢𑁆𑀣𑀁. 𑀅𑀤𑀼 𑀓𑀺𑀁 𑀦𑀼 𑀚𑀺𑀕𑀻𑀲𑀲𑀻𑀢𑀺 𑀉𑀤𑀸𑀳𑀼 𑀓𑀺𑀁 𑀦𑀼 𑀘𑀺𑀦𑁆𑀢𑁂𑀲𑀺, 𑀓𑀺𑀁 𑀇𑀢𑀭𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀻𑀢𑀺 𑀧𑀼𑀘𑁆𑀙𑀢𑀺.
𑀢𑀢𑁄 𑀮𑀼𑀤𑁆𑀤𑁄 ‘‘𑀦 𑀫𑁂, 𑀤𑁂𑀯, 𑀘𑀺𑀢𑁆𑀢𑀁 𑀯𑀺𑀧𑀮𑁆𑀮𑀢𑁆𑀣𑀁, 𑀦𑀸𑀧𑀺 𑀅𑀳𑀁 𑀇𑀢𑀭𑀁 𑀅𑀜𑁆𑀜𑀲𑁆𑀲 𑀤𑀸𑀢𑀼𑀓𑀸𑀫𑁄, 𑀅𑀧𑀺𑀘 𑀔𑁄 𑀧𑀦 𑀫𑀬𑀸 𑀑𑀳𑀺𑀢𑁂 𑀧𑀸𑀲𑁂 𑀏𑀓𑁄𑀯 𑀩𑀤𑁆𑀥𑁄’’𑀢𑀺 𑀆𑀯𑀺 𑀓𑀭𑁄𑀦𑁆𑀢𑁄 𑀆𑀳 𑁋
‘‘𑀬𑀲𑁆𑀲 ¶ 𑀮𑁄𑀳𑀺𑀢𑀓𑀸 𑀢𑀸𑀮𑀸, 𑀢𑀧𑀦𑀻𑀬𑀦𑀺𑀪𑀸 𑀲𑀼𑀪𑀸;
𑀉𑀭𑀁 𑀲𑀁𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀲𑁄 𑀫𑁂 𑀩𑀦𑁆𑀥𑀁 𑀉𑀧𑀸𑀕𑀫𑀺.
‘‘𑀅𑀣𑀸𑀬𑀁 𑀪𑀲𑁆𑀲𑀭𑁄 𑀧𑀓𑁆𑀔𑀻, 𑀅𑀩𑀤𑁆𑀥𑁄 𑀩𑀤𑁆𑀥𑀫𑀸𑀢𑀼𑀭𑀁;
𑀅𑀭𑀺𑀬𑀁 𑀩𑁆𑀭𑀼𑀯𑀸𑀦𑁄 𑀅𑀝𑁆𑀞𑀸𑀲𑀺, 𑀘𑀚𑀦𑁆𑀢𑁄 𑀫𑀸𑀦𑀼𑀲𑀺𑀁 𑀕𑀺𑀭’’𑀦𑁆𑀢𑀺.
𑀢𑀢𑁆𑀣 𑀮𑁄𑀳𑀺𑀢𑀓𑀸𑀢𑀺 𑀭𑀢𑁆𑀢𑀯𑀡𑁆𑀡𑀸. 𑀮𑀸𑀢𑀸𑀢𑀺 𑀭𑀸𑀚𑀺𑀬𑁄. 𑀉𑀭𑀁 𑀲𑀁𑀳𑀘𑁆𑀘𑀸𑀢𑀺 𑀉𑀭𑀁 𑀆𑀳𑀘𑁆𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀬𑀲𑁆𑀲𑁂𑀢𑀸 𑀭𑀢𑁆𑀢𑀲𑀼𑀯𑀡𑁆𑀡𑀲𑀧𑁆𑀧𑀝𑀺𑀪𑀸𑀕𑀸 𑀢𑀺𑀲𑁆𑀲𑁄 𑀮𑁄𑀳𑀺𑀢𑀓𑀸 𑀭𑀸𑀚𑀺𑀬𑁄 𑀕𑀻𑀯𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀲𑁄 𑀏𑀓𑁄𑀯 𑀫𑀫 𑀧𑀸𑀲𑁂 𑀩𑀦𑁆𑀥𑀁 𑀉𑀧𑀸𑀕𑀢𑁄𑀢𑀺. 𑀪𑀲𑁆𑀲𑀭𑁄𑀢𑀺 𑀧𑀭𑀺𑀲𑀼𑀤𑁆𑀥𑁄 𑀧𑀪𑀸𑀲𑀫𑁆𑀧𑀦𑁆𑀦𑁄. 𑀆𑀢𑀼𑀭𑀦𑁆𑀢𑀺 𑀕𑀺𑀮𑀸𑀦𑀁 𑀤𑀼𑀓𑁆𑀔𑀺𑀢𑀁 𑀅𑀝𑁆𑀞𑀸𑀲𑀻𑀢𑀺.
𑀅𑀣 𑀥𑀢𑀭𑀝𑁆𑀞𑀲𑁆𑀲 𑀩𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀏𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀫𑀫𑀸𑀕𑀫𑀦𑀓𑀸𑀮𑁂 𑀘 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀫𑀬𑀸 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀪𑀸𑀲𑀸𑀬 𑀥𑀢𑀭𑀝𑁆𑀞𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑁄 𑀅𑀝𑁆𑀞𑀸𑀲𑀺, 𑀫𑀫 𑀳𑀤𑀬𑀁 𑀫𑀼𑀤𑀼𑀓𑀁 ¶ 𑀓𑀢𑁆𑀯𑀸 𑀧𑀼𑀦 𑀏𑀢𑀲𑁆𑀲𑁂𑀯 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣𑀸𑀳𑀁, 𑀤𑁂𑀯, 𑀲𑀼𑀫𑀼𑀔𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀥𑀢𑀭𑀝𑁆𑀞𑀁 𑀯𑀺𑀲𑁆𑀲𑀚𑁆𑀚𑁂𑀲𑀺𑀁, 𑀇𑀢𑀺 𑀥𑀢𑀭𑀝𑁆𑀞𑀲𑁆𑀲 𑀧𑀸𑀲𑀢𑁄 𑀫𑁄𑀓𑁆𑀔𑁄, 𑀇𑀫𑁂 𑀳𑀁𑀲𑁂 𑀆𑀤𑀸𑀬 𑀫𑀫 𑀇𑀥𑀸𑀕𑀫𑀦𑀜𑁆𑀘 𑀲𑀼𑀫𑀼𑀔𑁂𑀦𑁂𑀯 𑀓𑀢𑀦𑁆𑀢𑀺. 𑀏𑀯𑀁 𑀲𑁄 𑀲𑀼𑀫𑀼𑀔𑀲𑁆𑀲 𑀕𑀼𑀡𑀓𑀣𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀼𑀫𑀼𑀔𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀮𑀼𑀤𑁆𑀤𑀧𑀼𑀢𑁆𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄, 𑀤𑀻𑀧𑀸 𑀧𑀚𑁆𑀚𑀮𑀺𑀢𑀸, 𑀩𑀳𑀽 𑀔𑀢𑁆𑀢𑀺𑀬𑀸𑀤𑀬𑁄 𑀲𑀦𑁆𑀦𑀺𑀧𑀢𑀺𑀢𑀸, 𑀔𑁂𑀫𑀸 𑀤𑁂𑀯𑀻𑀧𑀺 𑀯𑀺𑀯𑀺𑀥𑀦𑀸𑀝𑀓𑀧𑀭𑀺𑀯𑀸𑀭𑀸 𑀭𑀜𑁆𑀜𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀲𑀼𑀫𑀼𑀔𑀁 𑀓𑀣𑀸𑀧𑁂𑀢𑀼𑀓𑀸𑀫𑁄 𑀕𑀸𑀣𑀫𑀸𑀳 𑁋
‘‘𑀅𑀣 𑀓𑀺𑀁 𑀤𑀸𑀦𑀺 𑀲𑀼𑀫𑀼𑀔, 𑀳𑀦𑀼𑀁 𑀲𑀁𑀳𑀘𑁆𑀘 𑀢𑀺𑀝𑁆𑀞𑀲𑀺;
𑀅𑀤𑀼 𑀫𑁂 𑀧𑀭𑀺𑀲𑀁 𑀧𑀢𑁆𑀢𑁄, 𑀪𑀬𑀸 𑀪𑀻𑀢𑁄 𑀦 𑀪𑀸𑀲𑀲𑀻’’𑀢𑀺.
𑀢𑀢𑁆𑀣 ¶ 𑀳𑀦𑀼𑀁 𑀲𑀁𑀳𑀘𑁆𑀘𑀸𑀢𑀺 𑀫𑀥𑀼𑀭𑀓𑀣𑁄 𑀓𑀺𑀭 𑀢𑁆𑀯𑀁, 𑀅𑀣 𑀓𑀲𑁆𑀫𑀸 𑀇𑀤𑀸𑀦𑀺 𑀫𑀼𑀔𑀁 𑀧𑀺𑀥𑀸𑀬 𑀢𑀺𑀝𑁆𑀞𑀲𑀺. 𑀅𑀤𑀽𑀢𑀺 𑀓𑀘𑁆𑀘𑀺. 𑀪𑀬𑀸 𑀪𑀻𑀢𑁄𑀢𑀺 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑁂𑀦 𑀪𑀻𑀢𑁄 𑀳𑀼𑀢𑁆𑀯𑀸.
𑀢𑀁 𑀲𑀼𑀢𑁆𑀯𑀸 𑀲𑀼𑀫𑀼𑀔𑁄 𑀅𑀪𑀻𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀦𑀸𑀳𑀁 ¶ 𑀓𑀸𑀲𑀺𑀧𑀢𑀺 𑀪𑀻𑀢𑁄, 𑀑𑀕𑀬𑁆𑀳 𑀧𑀭𑀺𑀲𑀁 𑀢𑀯;
𑀦𑀸𑀳𑀁 𑀪𑀬𑀸 𑀦 𑀪𑀸𑀲𑀺𑀲𑁆𑀲𑀁, 𑀯𑀸𑀓𑁆𑀬𑀁 𑀅𑀢𑁆𑀣𑀲𑁆𑀫𑀺𑀁 𑀢𑀸𑀤𑀺𑀲𑁂’’𑀢𑀺.
𑀢𑀢𑁆𑀣 𑀢𑀸𑀤𑀺𑀲𑁂𑀢𑀺 𑀅𑀧𑀺𑀘 𑀔𑁄 𑀧𑀦 𑀢𑀣𑀸𑀭𑀽𑀧𑁂 𑀅𑀢𑁆𑀣𑁂 𑀉𑀧𑁆𑀧𑀦𑁆𑀦𑁂 𑀯𑀸𑀓𑁆𑀬𑀁 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀯𑀘𑀦𑁄𑀓𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀻𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀯𑀟𑁆𑀠𑁂𑀢𑀼𑀓𑀸𑀫𑀢𑀸𑀬 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 𑀆𑀳 𑁋
‘‘𑀦 𑀢𑁂 𑀅𑀪𑀺𑀲𑀭𑀁 𑀧𑀲𑁆𑀲𑁂, 𑀦 𑀭𑀣𑁂 𑀦𑀧𑀺 𑀧𑀢𑁆𑀢𑀺𑀓𑁂;
𑀦𑀸𑀲𑁆𑀲 𑀘𑀫𑁆𑀫𑀁𑀯 𑀓𑀻𑀝𑀁 𑀯𑀸, 𑀯𑀫𑁆𑀫𑀺𑀢𑁂 𑀘 𑀥𑀦𑀼𑀕𑁆𑀕𑀳𑁂.
‘‘𑀦 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀯𑀸, 𑀦𑀕𑀭𑀁 𑀯𑀸 𑀲𑀼𑀫𑀸𑀧𑀺𑀢𑀁;
𑀑𑀓𑀺𑀡𑁆𑀡𑀧𑀭𑀺𑀔𑀁 𑀤𑀼𑀕𑁆𑀕𑀁, 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀁;
𑀬𑀢𑁆𑀣 𑀧𑀯𑀺𑀝𑁆𑀞𑁄 𑀲𑀼𑀫𑀼𑀔, 𑀪𑀸𑀬𑀺𑀢𑀩𑁆𑀩𑀁 𑀦 𑀪𑀸𑀬𑀲𑀻’’𑀢𑀺.
𑀢𑀢𑁆𑀣 ¶ 𑀅𑀪𑀺𑀲𑀭𑀦𑁆𑀢𑀺 𑀭𑀓𑁆𑀔𑀡𑀢𑁆𑀣𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁 𑀆𑀯𑀼𑀥𑀳𑀢𑁆𑀣𑀁 𑀧𑀭𑀺𑀲𑀁 𑀢𑁂 𑀦 𑀧𑀲𑁆𑀲𑀸𑀫𑀺. 𑀦𑀸𑀲𑁆𑀲𑀸𑀢𑀺 𑀏𑀢𑁆𑀣 𑀅𑀲𑁆𑀲𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑀫𑁆𑀫𑀦𑁆𑀢𑀺 𑀲𑀭𑀧𑀭𑀺𑀢𑁆𑀢𑀸𑀡𑀘𑀫𑁆𑀫𑀁. 𑀓𑀻𑀝𑀦𑁆𑀢𑀺 𑀓𑀻𑀝𑀁 𑀘𑀸𑀝𑀺𑀓𑀧𑀸𑀮𑀸𑀤𑀺 𑀯𑀼𑀘𑁆𑀘𑀢𑀺. 𑀘𑀸𑀝𑀺𑀓𑀧𑀸𑀮𑀳𑀢𑁆𑀣𑀸𑀧𑀺 𑀢𑁂 𑀲𑀦𑁆𑀢𑀺𑀓𑁂 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀯𑀫𑁆𑀫𑀺𑀢𑁂𑀢𑀺 𑀘𑀫𑁆𑀫𑀲𑀦𑁆𑀦𑀤𑁆𑀥𑁂. 𑀦 𑀳𑀺𑀭𑀜𑁆𑀜𑀦𑁆𑀢𑀺 𑀬𑀁 𑀦𑀺𑀲𑁆𑀲𑀸𑀬 𑀦 𑀪𑀸𑀬𑀲𑀺, 𑀢𑀁 𑀳𑀺𑀭𑀜𑁆𑀜𑀫𑁆𑀧𑀺 𑀢𑁂 𑀦 𑀧𑀲𑁆𑀲𑀸𑀫𑀺.
𑀏𑀯𑀁 ¶ 𑀭𑀜𑁆𑀜𑀸 ‘‘𑀓𑀺𑀁 𑀢𑁂 𑀅𑀪𑀸𑀬𑀦𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀁 𑀓𑀣𑁂𑀦𑁆𑀢𑁄 𑀆𑀳 𑁋
‘‘𑀦 𑀫𑁂 𑀅𑀪𑀺𑀲𑀭𑁂𑀦𑀢𑁆𑀣𑁄, 𑀦𑀕𑀭𑁂𑀦 𑀥𑀦𑁂𑀦 𑀯𑀸;
𑀅𑀧𑀣𑁂𑀦 𑀧𑀣𑀁 𑀬𑀸𑀫, 𑀅𑀦𑁆𑀢𑀮𑀺𑀓𑁆𑀔𑁂𑀘𑀭𑀸 𑀫𑀬𑀁.
‘‘𑀲𑀼𑀢𑀸 𑀘 𑀧𑀡𑁆𑀟𑀺𑀢𑀸 𑀢𑁆𑀬𑀫𑁆𑀳𑀸, 𑀦𑀺𑀧𑀼𑀡𑀸 𑀘𑀢𑁆𑀣𑀘𑀺𑀦𑁆𑀢𑀓𑀸;
𑀪𑀸𑀲𑁂𑀫𑀢𑁆𑀣𑀯𑀢𑀺𑀁 𑀯𑀸𑀘𑀁, 𑀲𑀘𑁆𑀘𑁂 𑀘𑀲𑁆𑀲 𑀧𑀢𑀺𑀝𑁆𑀞𑀺𑀢𑁄.
‘‘𑀓𑀺𑀜𑁆𑀘 ¶ 𑀢𑀼𑀬𑁆𑀳𑀁 𑀅𑀲𑀘𑁆𑀘𑀲𑁆𑀲, 𑀅𑀦𑀭𑀺𑀬𑀲𑁆𑀲 𑀓𑀭𑀺𑀲𑁆𑀲𑀢𑀺;
𑀫𑀼𑀲𑀸𑀯𑀸𑀤𑀺𑀲𑁆𑀲 𑀮𑀼𑀤𑁆𑀤𑀲𑁆𑀲, 𑀪𑀡𑀺𑀢𑀫𑁆𑀧𑀺 𑀲𑀼𑀪𑀸𑀲𑀺𑀢’’𑀦𑁆𑀢𑀺.
𑀢𑀢𑁆𑀣 𑀅𑀪𑀺𑀲𑀭𑁂𑀦𑀸𑀢𑀺 𑀆𑀭𑀓𑁆𑀔𑀧𑀭𑀺𑀯𑀸𑀭𑁂𑀦. 𑀅𑀢𑁆𑀣𑁄𑀢𑀺 𑀏𑀢𑁂𑀦 𑀫𑀫 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀧𑀣𑁂𑀦 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀅𑀫𑀕𑁆𑀕𑁂𑀦 𑀧𑀣𑀁 𑀫𑀸𑀧𑁂𑀢𑁆𑀯𑀸 𑀬𑀸𑀫, 𑀆𑀓𑀸𑀲𑀘𑀸𑀭𑀺𑀦𑁄 𑀫𑀬𑀦𑁆𑀢𑀺. 𑀧𑀡𑁆𑀟𑀺𑀢𑀸 𑀢𑁆𑀬𑀫𑁆𑀳𑀸𑀢𑀺 𑀧𑀡𑁆𑀟𑀺𑀢𑀸𑀢𑀺 𑀢𑀬𑀸 𑀲𑀼𑀢𑀸𑀫𑁆𑀳𑀸, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀓𑀺𑀭 𑀦𑁄 𑀕𑀸𑀳𑀸𑀧𑁂𑀲𑀺. 𑀲𑀘𑁆𑀘𑁂 𑀘𑀲𑁆𑀲𑀸𑀢𑀺 𑀲𑀘𑁂 𑀧𑀦 𑀢𑁆𑀯𑀁 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑁄 𑀅𑀲𑁆𑀲, 𑀅𑀢𑁆𑀣𑀯𑀢𑀺𑀁 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀯𑀸𑀘𑀁 𑀪𑀸𑀲𑁂𑀬𑁆𑀬𑀸𑀫. 𑀅𑀲𑀘𑁆𑀘𑀲𑁆𑀲𑀸𑀢𑀺 𑀯𑀘𑀻𑀲𑀘𑁆𑀘𑀭𑀳𑀺𑀢𑀲𑁆𑀲 𑀢𑀯 𑀲𑀼𑀪𑀸𑀲𑀺𑀢𑀁 𑀫𑀼𑀡𑁆𑀟𑀲𑁆𑀲 𑀤𑀦𑁆𑀢𑀲𑀽𑀘𑀺 𑀯𑀺𑀬 𑀓𑀺𑀁 𑀓𑀭𑀺𑀲𑁆𑀲𑀢𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀓𑀲𑁆𑀫𑀸 𑀫𑀁 𑀫𑀼𑀲𑀸𑀯𑀸𑀤𑀻 𑀅𑀦𑀭𑀺𑀬𑁄𑀢𑀺 𑀯𑀤𑀲𑀺, 𑀓𑀺𑀁 𑀫𑀬𑀸 𑀓𑀢’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀼𑀫𑀼𑀔𑁄 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀸, 𑀇𑀫𑀁 𑀔𑁂𑀫𑀫𑀓𑀸𑀭𑀬𑀺;
𑀅𑀪𑀬𑀜𑁆𑀘 𑀢𑀬𑀸 𑀖𑀼𑀝𑁆𑀞𑀁, 𑀇𑀫𑀸𑀬𑁄 𑀤𑀲𑀥𑀸 𑀤𑀺𑀲𑀸.
‘‘𑀑𑀕𑀬𑁆𑀳 𑀢𑁂 𑀧𑁄𑀓𑁆𑀔𑀭𑀡𑀺𑀁, 𑀯𑀺𑀧𑁆𑀧𑀲𑀦𑁆𑀦𑁄𑀤𑀓𑀁 𑀲𑀼𑀘𑀺𑀁;
𑀧𑀳𑀽𑀢𑀁 𑀘𑀸𑀤𑀦𑀁 𑀢𑀢𑁆𑀣, 𑀅𑀳𑀺𑀁𑀲𑀸 𑀘𑁂𑀢𑁆𑀣 𑀧𑀓𑁆𑀔𑀺𑀦𑀁.
‘‘𑀇𑀤𑀁 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀆𑀕𑀢𑀫𑁆𑀳 𑀢𑀯𑀦𑁆𑀢𑀺𑀓𑁂;
𑀢𑁂 𑀢𑁂 𑀩𑀤𑁆𑀥𑀲𑁆𑀫 𑀧𑀸𑀲𑁂𑀦, 𑀏𑀢𑀁 𑀢𑁂 𑀪𑀸𑀲𑀺𑀢𑀁 𑀫𑀼𑀲𑀸.
‘‘𑀫𑀼𑀲𑀸𑀯𑀸𑀤𑀁 𑀧𑀼𑀭𑀓𑁆𑀔𑀢𑁆𑀯𑀸, 𑀇𑀘𑁆𑀙𑀸𑀮𑁄𑀪𑀜𑁆𑀘 𑀧𑀸𑀧𑀓𑀁;
𑀉𑀪𑁄𑀲𑀦𑁆𑀥𑀺𑀫𑀢𑀺𑀓𑁆𑀓𑀫𑁆𑀫, 𑀅𑀲𑀸𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺.
𑀢𑀢𑁆𑀣 𑀢𑀦𑁆𑀢𑀺 𑀢𑁆𑀯𑀁. 𑀔𑁂𑀫𑀦𑁆𑀢𑀺 𑀏𑀯𑀁𑀦𑀸𑀫𑀺𑀓𑀁 𑀧𑁄𑀓𑁆𑀔𑀭𑀡𑀺𑀁. 𑀖𑀼𑀝𑁆𑀞𑀦𑁆𑀢𑀺 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀞𑀢𑁆𑀯𑀸 𑀖𑁄𑀲𑀸𑀧𑀺𑀢𑀁. 𑀤𑀲𑀥𑀸𑀢𑀺 𑀇𑀫𑀸𑀲𑀼 𑀤𑀲𑀥𑀸 𑀞𑀺𑀢𑀸𑀲𑀼 𑀤𑀺𑀲𑀸𑀲𑀼 𑀢𑀬𑀸 𑀅𑀪𑀬𑀁 𑀖𑀼𑀝𑁆𑀞𑀁. 𑀑𑀕𑀬𑁆𑀳𑀸𑀢𑀺 𑀑𑀕𑀸𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀲𑀦𑁆𑀢𑀺𑀓𑀸. 𑀧𑀳𑀽𑀢𑀁 𑀘𑀸𑀤𑀦𑀦𑁆𑀢𑀺 𑀧𑀳𑀽𑀢𑀜𑁆𑀘 𑀧𑀤𑀼𑀫𑀧𑀼𑀧𑁆𑀨𑀲𑀸𑀮𑀺𑀆𑀤𑀺𑀓𑀁 𑀅𑀤𑀦𑀁. 𑀇𑀤𑀁 𑀲𑀼𑀢𑁆𑀯𑀸𑀦𑀸𑀢𑀺 ¶ 𑀢𑁂𑀲𑀁 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀆𑀕𑀢𑀸𑀦𑀁 𑀲𑀦𑁆𑀢𑀺𑀓𑀸 𑀇𑀤𑀁 𑀅𑀪𑀬𑀁 𑀲𑀼𑀢𑁆𑀯𑀸 𑀢𑀯𑀦𑁆𑀢𑀺𑀓𑁂 𑀢𑀯 𑀲𑀫𑀻𑀧𑁂 𑀢𑀬𑀸 𑀓𑀸𑀭𑀺𑀢𑀧𑁄𑀓𑁆𑀔𑀭𑀡𑀺𑀁 𑀆𑀕𑀢𑀸𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀢𑁂 𑀢𑁂𑀢𑀺 𑀢𑁂 𑀫𑀬𑀁 𑀢𑀯 𑀧𑀸𑀲𑁂𑀦 𑀩𑀤𑁆𑀥𑀸. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀼𑀭𑀢𑁄 𑀓𑀢𑁆𑀯𑀸 ¶ . 𑀇𑀘𑁆𑀙𑀸𑀮𑁄𑀪𑀦𑁆𑀢𑀺 𑀇𑀘𑁆𑀙𑀸𑀲𑀗𑁆𑀔𑀸𑀢𑀁 𑀧𑀸𑀧𑀓𑀁 𑀮𑁄𑀪𑀁. 𑀉𑀪𑁄𑀲𑀦𑁆𑀥𑀺𑀦𑁆𑀢𑀺 𑀉𑀪𑀬𑀁 𑀤𑁂𑀯𑀮𑁄𑀓𑁂 𑀘 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀧𑀝𑀺𑀲𑀦𑁆𑀥𑀺𑀁 𑀇𑀫𑁂 𑀧𑀸𑀧𑀥𑀫𑁆𑀫𑁂 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀦𑁆𑀢𑁄 𑀧𑀼𑀕𑁆𑀕𑀮𑁄 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀲𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻𑀢𑀺.
𑀏𑀯𑀁 ¶ 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀭𑀸𑀚𑀸𑀦𑀁 𑀮𑀚𑁆𑀚𑀸𑀧𑁂𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀦𑀸𑀳𑀁, 𑀲𑀼𑀫𑀼𑀔, 𑀢𑀼𑀫𑁆𑀳𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀕𑀡𑁆𑀳𑀸𑀧𑁂𑀲𑀺𑀁, 𑀧𑀡𑁆𑀟𑀺𑀢𑀪𑀸𑀯𑀁 𑀧𑀦 𑀯𑁄 𑀲𑀼𑀢𑁆𑀯𑀸 𑀲𑀼𑀪𑀸𑀲𑀺𑀢𑀁 𑀲𑁄𑀢𑀼𑀓𑀸𑀫𑁄 𑀕𑀡𑁆𑀳𑀸𑀧𑁂𑀲𑀺’’𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋
‘‘𑀦𑀸𑀧𑀭𑀚𑁆𑀛𑀸𑀫 𑀲𑀼𑀫𑀼𑀔, 𑀦𑀧𑀺 𑀮𑁄𑀪𑀸𑀯 𑀫𑀕𑁆𑀕𑀳𑀺𑀁;
𑀲𑀼𑀢𑀸 𑀘 𑀧𑀡𑁆𑀟𑀺𑀢𑀸𑀢𑁆𑀬𑀢𑁆𑀣, 𑀦𑀺𑀧𑀼𑀡𑀸 𑀅𑀢𑁆𑀣𑀘𑀺𑀦𑁆𑀢𑀓𑀸.
‘‘𑀅𑀧𑁆𑀧𑁂𑀯𑀢𑁆𑀣𑀯𑀢𑀺𑀁 𑀯𑀸𑀘𑀁, 𑀩𑁆𑀬𑀸𑀳𑀭𑁂𑀬𑁆𑀬𑀼𑀁 𑀇𑀥𑀸𑀕𑀢𑀸;
𑀢𑀣𑀸 𑀢𑀁 𑀲𑀫𑁆𑀫 𑀦𑁂𑀲𑀸𑀤𑁄, 𑀯𑀼𑀢𑁆𑀢𑁄 𑀲𑀼𑀫𑀼𑀔 𑀫𑀕𑁆𑀕𑀳𑀻’’𑀢𑀺.
𑀢𑀢𑁆𑀣 𑀦𑀸𑀧𑀭𑀚𑁆𑀛𑀸𑀫𑀸𑀢𑀺 𑀫𑀸𑀭𑁂𑀦𑁆𑀢𑁄 𑀅𑀧𑀭𑀚𑁆𑀛𑀢𑀺 𑀦𑀸𑀫, 𑀫𑀬𑀁 𑀦 𑀫𑀸𑀭𑁂𑀫. 𑀮𑁄𑀪𑀸𑀯 𑀫𑀕𑁆𑀕𑀳𑀺𑀦𑁆𑀢𑀺 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀮𑁄𑀪𑀸𑀯 𑀢𑀼𑀫𑁆𑀳𑁂 𑀦𑀸𑀳𑀁 𑀅𑀕𑁆𑀕𑀳𑀺𑀁. 𑀧𑀡𑁆𑀟𑀺𑀢𑀸𑀢𑁆𑀬𑀢𑁆𑀣𑀸𑀢𑀺 𑀧𑀡𑁆𑀟𑀺𑀢𑀸𑀢𑀺 𑀲𑀼𑀢𑀸 𑀅𑀢𑁆𑀣. 𑀅𑀢𑁆𑀣𑀘𑀺𑀦𑁆𑀢𑀓𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀅𑀢𑁆𑀣𑀸𑀦𑀁 𑀘𑀺𑀦𑁆𑀢𑀓𑀸. 𑀅𑀢𑁆𑀣𑀯𑀢𑀺𑀦𑁆𑀢𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁. 𑀢𑀣𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀯𑀼𑀢𑁆𑀢𑁄𑀢𑀺 𑀫𑀬𑀸 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸. 𑀲𑀼𑀫𑀼𑀔, 𑀫𑀕𑁆𑀕𑀳𑀻𑀢𑀺, 𑀲𑀼𑀫𑀼𑀔𑀸𑀢𑀺 𑀆𑀮𑀧𑀢𑀺, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀕𑁆𑀕𑀳𑀻𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀢𑀼𑀫𑁆𑀳𑁂 𑀕𑀡𑁆𑀳𑀺.
𑀢𑀁 𑀲𑀼𑀢𑁆𑀯𑀸 𑀲𑀼𑀫𑀼𑀔𑁄 ‘‘𑀲𑀼𑀪𑀸𑀲𑀺𑀢𑀁 𑀲𑁄𑀢𑀼𑀓𑀸𑀫𑁂𑀦 𑀅𑀬𑀼𑀢𑁆𑀢𑀁 𑀢𑁂 𑀓𑀢𑀁, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀦𑁂𑀯 𑀪𑀻𑀢𑀸 𑀓𑀸𑀲𑀺𑀧𑀢𑀺, 𑀉𑀧𑀦𑀻𑀢𑀲𑁆𑀫𑀺𑀁 𑀚𑀻𑀯𑀺𑀢𑁂;
𑀪𑀸𑀲𑁂𑀫𑀢𑁆𑀣𑀯𑀢𑀺𑀁 𑀯𑀸𑀘𑀁, 𑀲𑀫𑁆𑀧𑀢𑁆𑀢𑀸 𑀓𑀸𑀮𑀧𑀭𑀺𑀬𑀸𑀬𑀁.
‘‘𑀬𑁄 𑀫𑀺𑀕𑁂𑀦 𑀫𑀺𑀕𑀁 𑀳𑀦𑁆𑀢𑀺, 𑀧𑀓𑁆𑀔𑀺𑀁 𑀯𑀸 𑀧𑀦 𑀧𑀓𑁆𑀔𑀺𑀦𑀸;
𑀲𑀼𑀢𑁂𑀦 𑀯𑀸 𑀲𑀼𑀢𑀁 𑀓𑀺𑀡𑁆𑀬𑀸, 𑀓𑀺𑀁 𑀅𑀦𑀭𑀺𑀬𑀢𑀭𑀁 𑀢𑀢𑁄.
‘‘𑀬𑁄 𑀘𑀸𑀭𑀺𑀬𑀭𑀼𑀤𑀁 𑀪𑀸𑀲𑁂, 𑀅𑀦𑀭𑀺𑀬𑀥𑀫𑁆𑀫𑀯𑀲𑁆𑀲𑀺𑀢𑁄;
𑀉𑀪𑁄 𑀲𑁄 𑀥𑀁𑀲𑀢𑁂 𑀮𑁄𑀓𑀸, 𑀇𑀥 𑀘𑁂𑀯 𑀧𑀭𑀢𑁆𑀣 𑀘.
‘‘𑀦 ¶ 𑀫𑀚𑁆𑀚𑁂𑀣 𑀬𑀲𑀁 𑀧𑀢𑁆𑀢𑁄, 𑀦 𑀩𑁆𑀬𑀸𑀥𑁂 𑀧𑀢𑁆𑀢𑀲𑀁𑀲𑀬𑀁;
𑀯𑀸𑀬𑀫𑁂𑀣𑁂𑀯 𑀓𑀺𑀘𑁆𑀘𑁂𑀲𑀼, 𑀲𑀁𑀯𑀭𑁂 𑀯𑀺𑀯𑀭𑀸𑀦𑀺 𑀘.
¶ ‘‘𑀬𑁂 ¶ 𑀯𑀼𑀤𑁆𑀥𑀸 𑀅𑀩𑁆𑀪𑀢𑀺𑀓𑁆𑀓𑀦𑁆𑀢𑀸, 𑀲𑀫𑁆𑀧𑀢𑁆𑀢𑀸 𑀓𑀸𑀮𑀧𑀭𑀺𑀬𑀸𑀬𑀁;
𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀏𑀯𑀁𑀢𑁂 𑀢𑀺𑀤𑀺𑀯𑀁 𑀕𑀢𑀸.
‘‘𑀇𑀤𑀁 𑀲𑀼𑀢𑁆𑀯𑀸 𑀓𑀸𑀲𑀺𑀧𑀢𑀺, 𑀥𑀫𑁆𑀫𑀫𑀢𑁆𑀢𑀦𑀺 𑀧𑀸𑀮𑀬;
𑀥𑀢𑀭𑀝𑁆𑀞𑀜𑁆𑀘 𑀫𑀼𑀜𑁆𑀘𑀸𑀳𑀺, 𑀳𑀁𑀲𑀸𑀦𑀁 𑀧𑀯𑀭𑀼𑀢𑁆𑀢𑀫’’𑀦𑁆𑀢𑀺.
𑀢𑀢𑁆𑀣 𑀉𑀧𑀦𑀻𑀢𑀲𑁆𑀫𑀺𑀦𑁆𑀢𑀺 𑀫𑀭𑀡𑀲𑀦𑁆𑀢𑀺𑀓𑀁 𑀉𑀧𑀦𑀻𑀢𑁂. 𑀓𑀸𑀮𑀧𑀭𑀺𑀬𑀸𑀬𑀦𑁆𑀢𑀺 𑀫𑀭𑀡𑀓𑀸𑀮𑀯𑀸𑀭𑀁 𑀲𑀫𑁆𑀧𑀢𑁆𑀢𑀸 𑀲𑀫𑀸𑀦𑀸 𑀦 𑀪𑀸𑀲𑀺𑀲𑁆𑀲𑀸𑀫. 𑀦 𑀳𑀺 𑀥𑀫𑁆𑀫𑀓𑀣𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀫𑀭𑀡𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺, 𑀅𑀬𑀼𑀢𑁆𑀢𑀁 𑀢𑁂 𑀓𑀢𑀦𑁆𑀢𑀺. 𑀫𑀺𑀕𑁂𑀦𑀸𑀢𑀺 𑀲𑀼𑀝𑁆𑀞𑀼 𑀲𑀺𑀓𑁆𑀔𑀸𑀧𑀺𑀢𑁂𑀦 𑀤𑀻𑀧𑀓𑀫𑀺𑀕𑁂𑀦. 𑀳𑀦𑁆𑀢𑀻𑀢𑀺 𑀳𑀦𑀢𑀺. 𑀧𑀓𑁆𑀔𑀺𑀦𑀸𑀢𑀺 𑀤𑀻𑀧𑀓𑀧𑀓𑁆𑀔𑀺𑀦𑀸. 𑀲𑀼𑀢𑁂𑀦𑀸𑀢𑀺 𑀔𑁂𑀫𑀁 𑀦𑀺𑀩𑁆𑀪𑀬𑀦𑁆𑀢𑀺 𑀯𑀺𑀲𑁆𑀲𑀼𑀢𑁂𑀦 𑀤𑀻𑀧𑀓𑀫𑀺𑀕𑀧𑀓𑁆𑀔𑀺𑀲𑀤𑀺𑀲𑁂𑀦 𑀧𑀤𑀼𑀫𑀲𑀭𑁂𑀦. 𑀲𑀼𑀢𑀦𑁆𑀢𑀺 ‘‘𑀧𑀡𑁆𑀟𑀺𑀢𑁄 𑀘𑀺𑀢𑁆𑀭𑀓𑀣𑀻’’𑀢𑀺 𑀏𑀯𑀁 𑀲𑀼𑀢𑀁 𑀥𑀫𑁆𑀫𑀓𑀣𑀺𑀓𑀁. 𑀓𑀺𑀡𑁆𑀬𑀸𑀢𑀺 ‘‘𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀩𑀦𑁆𑀥𑀦𑁂𑀦 𑀬𑁄 𑀓𑀺𑀡𑁂𑀬𑁆𑀬 𑀳𑀺𑀁𑀲𑁂𑀬𑁆𑀬 𑀩𑀸𑀥𑁂𑀬𑁆𑀬. 𑀢𑀢𑁄𑀢𑀺 𑀢𑁂𑀲𑀁 𑀓𑀺𑀭𑀺𑀬𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀅𑀦𑀭𑀺𑀬𑀢𑀭𑀁 𑀦𑀸𑀫 𑀓𑀺𑀫𑀢𑁆𑀣𑀺.
𑀅𑀭𑀺𑀬𑀭𑀼𑀤𑀦𑁆𑀢𑀺 𑀫𑀼𑀔𑁂𑀦 𑀅𑀭𑀺𑀬𑀯𑀘𑀦𑀁 𑀲𑀼𑀦𑁆𑀤𑀭𑀯𑀘𑀦𑀁 𑀪𑀸𑀲𑀢𑀺. 𑀅𑀦𑀭𑀺𑀬𑀥𑀫𑁆𑀫𑀯𑀲𑁆𑀲𑀺𑀢𑁄𑀢𑀺 𑀓𑀫𑁆𑀫𑁂𑀦 𑀅𑀦𑀭𑀺𑀬𑀥𑀫𑁆𑀫𑀁 𑀅𑀯𑀲𑁆𑀲𑀺𑀢𑁄. 𑀉𑀪𑁄𑀢𑀺 𑀤𑁂𑀯𑀮𑁄𑀓𑀸 𑀘 𑀫𑀦𑀼𑀲𑁆𑀲𑀮𑁄𑀓𑀸 𑀘𑀸𑀢𑀺 𑀉𑀪𑀬𑀫𑁆𑀳𑀸. 𑀇𑀥 𑀘𑁂𑀯𑀸𑀢𑀺 𑀇𑀥 𑀉𑀧𑁆𑀧𑀦𑁆𑀦𑁄𑀧𑀺 𑀧𑀭𑀢𑁆𑀣 𑀉𑀧𑁆𑀧𑀦𑁆𑀦𑁄𑀧𑀺 𑀏𑀯𑀭𑀽𑀧𑁄 𑀤𑁆𑀯𑀻𑀳𑀺 𑀲𑀼𑀕𑀢𑀺𑀮𑁄𑀓𑁂𑀳𑀺 𑀥𑀁𑀲𑀺𑀢𑁆𑀯𑀸 𑀦𑀺𑀭𑀬𑀫𑁂𑀯 𑀉𑀧𑀧𑀚𑁆𑀚𑀢𑀺. 𑀧𑀢𑁆𑀢𑀲𑀁𑀲𑀬𑀦𑁆𑀢𑀺 𑀚𑀻𑀯𑀺𑀢𑀲𑀁𑀲𑀬𑀫𑀸𑀧𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀁 𑀧𑀢𑁆𑀯𑀸 𑀦 𑀓𑀺𑀮𑀫𑁂𑀬𑁆𑀬. 𑀲𑀁𑀯𑀭𑁂 𑀯𑀺𑀯𑀭𑀸𑀦𑀺 𑀘𑀸𑀢𑀺 𑀅𑀢𑁆𑀢𑀦𑁄 𑀙𑀺𑀤𑁆𑀤𑀸𑀦𑀺 𑀤𑁆𑀯𑀸𑀭𑀸𑀦𑀺 𑀲𑀁𑀯𑀭𑁂𑀬𑁆𑀬 𑀧𑀺𑀤𑀳𑁂𑀬𑁆𑀬. 𑀯𑀼𑀤𑁆𑀥𑀸𑀢𑀺 𑀕𑀼𑀡𑀯𑀼𑀤𑁆𑀥𑀸 𑀧𑀡𑁆𑀟𑀺𑀢𑀸. 𑀅𑀩𑁆𑀪𑀢𑀺𑀓𑁆𑀓𑀦𑁆𑀢𑀸𑀢𑀺 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀁 𑀅𑀢𑀺𑀓𑁆𑀓𑀦𑁆𑀢𑀸. 𑀓𑀸𑀮𑀧𑀭𑀺𑀬𑀸𑀬𑀦𑁆𑀢𑀺 𑀫𑀭𑀡𑀓𑀸𑀮𑀧𑀭𑀺𑀬𑀸𑀬𑀁 𑀧𑀢𑁆𑀢𑀸 𑀳𑀼𑀢𑁆𑀯𑀸. 𑀏𑀯𑀁𑀢𑁂𑀢𑀺 𑀏𑀯𑀁 𑀏𑀢𑁂. 𑀇𑀤𑀦𑁆𑀢𑀺 𑀇𑀤𑀁 𑀫𑀬𑀸 𑀯𑀼𑀢𑁆𑀢𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀯𑀘𑀦𑀁. 𑀥𑀫𑁆𑀫𑀦𑁆𑀢𑀺 𑀧𑀯𑁂𑀡𑀺𑀬𑀥𑀫𑁆𑀫𑀫𑁆𑀧𑀺 𑀲𑀼𑀘𑀭𑀺𑀢𑀥𑀫𑁆𑀫𑀫𑁆𑀧𑀺.
𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀆𑀳 𑁋
‘‘𑀆𑀳𑀭𑀦𑁆𑀢𑀼𑀤𑀓𑀁 𑀧𑀚𑁆𑀚𑀁, 𑀆𑀲𑀦𑀜𑁆𑀘 𑀫𑀳𑀸𑀭𑀳𑀁;
𑀧𑀜𑁆𑀚𑀭𑀢𑁄 𑀧𑀫𑁄𑀓𑁆𑀔𑀸𑀫𑀺, 𑀥𑀢𑀭𑀝𑁆𑀞𑀁 𑀬𑀲𑀲𑁆𑀲𑀺𑀦𑀁.
‘‘𑀢𑀜𑁆𑀘 ¶ 𑀲𑁂𑀦𑀸𑀧𑀢𑀺𑀁 𑀥𑀻𑀭𑀁, 𑀦𑀺𑀧𑀼𑀡𑀁 𑀅𑀢𑁆𑀣𑀘𑀺𑀦𑁆𑀢𑀓𑀁;
𑀬𑁄 𑀲𑀼𑀔𑁂 𑀲𑀼𑀔𑀺𑀢𑁄 𑀭𑀜𑁆𑀜𑁄, 𑀤𑀼𑀓𑁆𑀔𑀺𑀢𑁂 𑀳𑁄𑀢𑀺 𑀤𑀼𑀓𑁆𑀔𑀺𑀢𑁄.
‘‘𑀏𑀤𑀺𑀲𑁄 ¶ 𑀔𑁄 𑀅𑀭𑀳𑀢𑀺, 𑀧𑀺𑀡𑁆𑀟𑀫𑀲𑁆𑀦𑀸𑀢𑀼 𑀪𑀢𑁆𑀢𑀼𑀦𑁄;
𑀬𑀣𑀸𑀬𑀁 𑀲𑀼𑀫𑀼𑀔𑁄 𑀭𑀜𑁆𑀜𑁄, 𑀧𑀸𑀡𑀲𑀸𑀥𑀸𑀭𑀡𑁄 𑀲𑀔𑀸’’𑀢𑀺.
𑀢𑀢𑁆𑀣 𑀉𑀤𑀓𑀦𑁆𑀢𑀺 𑀧𑀸𑀤𑀥𑁄𑀯𑀦𑀁. 𑀧𑀚𑁆𑀚𑀦𑁆𑀢𑀺 𑀧𑀸𑀤𑀩𑁆𑀪𑀜𑁆𑀚𑀦𑀁. 𑀲𑀼𑀔𑁂𑀢𑀺 𑀲𑀼𑀔𑀫𑁆𑀳𑀺 𑀲𑀢𑀺.
𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀆𑀲𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀕𑀦𑁆𑀥𑁄𑀤𑀓𑁂𑀦 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀢𑀧𑀸𑀓𑁂𑀦 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀁𑀲𑀼. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀧𑀻𑀞𑀜𑁆𑀘 𑀲𑀩𑁆𑀩𑀲𑁄𑀯𑀡𑁆𑀡𑀁, 𑀅𑀝𑁆𑀞𑀧𑀸𑀤𑀁 𑀫𑀦𑁄𑀭𑀫𑀁;
𑀫𑀝𑁆𑀞𑀁 𑀓𑀸𑀲𑀺𑀓𑀫𑀢𑁆𑀣𑀦𑁆𑀦𑀁, 𑀥𑀢𑀭𑀝𑁆𑀞𑁄 𑀉𑀧𑀸𑀯𑀺𑀲𑀺.
‘‘𑀓𑁄𑀘𑁆𑀙𑀜𑁆𑀘 𑀲𑀩𑁆𑀩𑀲𑁄𑀯𑀡𑁆𑀡𑀁, 𑀯𑁂𑀬𑁆𑀬𑀕𑁆𑀖𑀧𑀭𑀺𑀲𑀺𑀩𑁆𑀩𑀺𑀢𑀁;
𑀲𑀼𑀫𑀼𑀔𑁄 𑀅𑀚𑁆𑀛𑀼𑀧𑀸𑀯𑁂𑀓𑁆𑀔𑀺, 𑀥𑀢𑀭𑀝𑁆𑀞𑀲𑁆𑀲𑀦𑀦𑁆𑀢𑀭𑀸.
‘‘𑀢𑁂𑀲𑀁 𑀓𑀜𑁆𑀘𑀦𑀧𑀢𑁆𑀢𑀳𑀺, 𑀧𑀼𑀣𑀽 𑀆𑀤𑀸𑀬 𑀓𑀸𑀲𑀺𑀬𑁄;
𑀳𑀁𑀲𑀸𑀦𑀁 𑀅𑀪𑀺𑀳𑀸𑀭𑁂𑀲𑀼, 𑀅𑀕𑁆𑀕𑀭𑀜𑁆𑀜𑁄 𑀧𑀯𑀸𑀲𑀺𑀢’’𑀦𑁆𑀢𑀺.
𑀢𑀢𑁆𑀣 𑀫𑀝𑁆𑀞𑀦𑁆𑀢𑀺 𑀓𑀭𑀡𑀧𑀭𑀺𑀦𑀺𑀝𑁆𑀞𑀺𑀢𑀁. 𑀓𑀸𑀲𑀺𑀓𑀫𑀢𑁆𑀣𑀦𑁆𑀦𑀦𑁆𑀢𑀺 𑀓𑀸𑀲𑀺𑀓𑀯𑀢𑁆𑀣𑁂𑀦 𑀅𑀢𑁆𑀣𑀢𑀁. 𑀓𑁄𑀘𑁆𑀙𑀦𑁆𑀢𑀺 𑀫𑀚𑁆𑀛𑁂 𑀲𑀁𑀔𑀺𑀢𑁆𑀢𑀁. 𑀯𑁂𑀬𑁆𑀬𑀕𑁆𑀖𑀧𑀭𑀺𑀲𑀺𑀩𑁆𑀩𑀺𑀢𑀦𑁆𑀢𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀲𑀺𑀩𑁆𑀩𑀺𑀢𑀁 𑀫𑀗𑁆𑀕𑀮𑀤𑀺𑀯𑀲𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀦𑀺𑀲𑀺𑀦𑁆𑀦𑀧𑀻𑀞𑀁. 𑀓𑀜𑁆𑀘𑀦𑀧𑀢𑁆𑀢𑁂𑀳𑀻𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂𑀳𑀺. 𑀧𑀼𑀣𑀽𑀢𑀺 𑀩𑀳𑀽 𑀚𑀦𑀸. 𑀓𑀸𑀲𑀺𑀬𑁄𑀢𑀺 𑀓𑀸𑀲𑀺𑀭𑀝𑁆𑀞𑀯𑀸𑀲𑀺𑀦𑁄. 𑀅𑀪𑀺𑀳𑀸𑀭𑁂𑀲𑀼𑀦𑁆𑀢𑀺 𑀉𑀧𑀦𑀸𑀫𑁂𑀲𑀼𑀁. 𑀅𑀕𑁆𑀕𑀭𑀜𑁆𑀜𑁄 𑀧𑀯𑀸𑀲𑀺𑀢𑀦𑁆𑀢𑀺 𑀅𑀝𑁆𑀞𑀲𑀢𑀧𑀮𑀲𑀼𑀯𑀡𑁆𑀡𑀧𑀸𑀢𑀺𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑀁𑀲𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀓𑀸𑀲𑀺𑀭𑀜𑁆𑀜𑀸 𑀧𑁂𑀲𑀺𑀢𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁.
𑀏𑀯𑀁 𑀉𑀧𑀦𑀻𑀢𑁂 𑀧𑀦 𑀢𑀲𑁆𑀫𑀺𑀁 𑀓𑀸𑀲𑀺𑀭𑀸𑀚𑀸 𑀢𑁂𑀲𑀁 𑀲𑀫𑁆𑀧𑀕𑁆𑀕𑀳𑀢𑁆𑀣𑀁 𑀲𑀬𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀉𑀧𑀦𑀸𑀫𑁂𑀲𑀺. 𑀢𑁂 𑀢𑀢𑁄 𑀫𑀥𑀼𑀮𑀸𑀚𑁂 𑀔𑀸𑀤𑀺𑀢𑁆𑀯𑀸 𑀫𑀥𑀼𑀭𑁄𑀤𑀓𑀜𑁆𑀘 𑀧𑀺𑀯𑀺𑀁𑀲𑀼. 𑀅𑀣 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀅𑀪𑀺𑀳𑀸𑀭𑀜𑁆𑀘 𑀧𑀲𑀸𑀤𑀜𑁆𑀘 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀤𑀺𑀲𑁆𑀯𑀸 𑀅𑀪𑀺𑀳𑀝𑀁 𑀅𑀕𑁆𑀕𑀁, 𑀓𑀸𑀲𑀺𑀭𑀸𑀚𑁂𑀦 𑀧𑁂𑀲𑀺𑀢𑀁;
𑀓𑀼𑀲𑀮𑁄 𑀔𑀢𑁆𑀢𑀥𑀫𑁆𑀫𑀸𑀦𑀁, 𑀢𑀢𑁄 𑀧𑀼𑀘𑁆𑀙𑀺 𑀅𑀦𑀦𑁆𑀢𑀭𑀸.
‘‘𑀓𑀘𑁆𑀘𑀺𑀦𑁆𑀦𑀼 ¶ ¶ 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁;
𑀓𑀘𑁆𑀘𑀺 𑀭𑀝𑁆𑀞𑀫𑀺𑀤𑀁 𑀨𑀻𑀢𑀁, 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀲𑀺.
‘‘𑀓𑀼𑀲𑀮𑀜𑁆𑀘𑁂𑀯 𑀫𑁂 𑀳𑀁𑀲, 𑀅𑀣𑁄 𑀳𑀁𑀲 𑀅𑀦𑀸𑀫𑀬𑀁;
𑀅𑀣𑁄 𑀭𑀝𑁆𑀞𑀫𑀺𑀤𑀁 𑀨𑀻𑀢𑀁, 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀳𑀁.
‘‘𑀓𑀘𑁆𑀘𑀺 𑀪𑁄𑀢𑁄 𑀅𑀫𑀘𑁆𑀘𑁂𑀲𑀼, 𑀤𑁄𑀲𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;
𑀓𑀘𑁆𑀘𑀺 𑀘 𑀢𑁂 𑀢𑀯𑀢𑁆𑀣𑁂𑀲𑀼, 𑀦𑀸𑀯𑀓𑀗𑁆𑀔𑀦𑁆𑀢𑀺 𑀚𑀻𑀯𑀺𑀢𑀁.
‘‘𑀅𑀣𑁄𑀧𑀺 𑀫𑁂 𑀅𑀫𑀘𑁆𑀘𑁂𑀲𑀼, 𑀤𑁄𑀲𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;
𑀅𑀣𑁄𑀧𑀺 𑀢𑁂 𑀫𑀫𑀢𑁆𑀣𑁂𑀲𑀼, 𑀦𑀸𑀯𑀓𑀗𑁆𑀔𑀦𑁆𑀢𑀺 𑀚𑀻𑀯𑀺𑀢𑀁.
‘‘𑀓𑀘𑁆𑀘𑀺 𑀢𑁂 𑀲𑀸𑀤𑀺𑀲𑀻 𑀪𑀭𑀺𑀬𑀸, 𑀅𑀲𑁆𑀲𑀯𑀸 𑀧𑀺𑀬𑀪𑀸𑀡𑀺𑀦𑀻;
𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀢𑀯 𑀙𑀦𑁆𑀤𑀯𑀲𑀸𑀦𑀼𑀕𑀸.
‘‘𑀅𑀣𑁄 𑀫𑁂 𑀲𑀸𑀤𑀺𑀲𑀻 𑀪𑀭𑀺𑀬𑀸, 𑀅𑀲𑁆𑀲𑀯𑀸 𑀧𑀺𑀬𑀪𑀸𑀡𑀺𑀦𑀻;
𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀫𑀫 𑀙𑀦𑁆𑀤𑀯𑀲𑀸𑀦𑀼𑀕𑀸.
‘‘𑀓𑀘𑁆𑀘𑀺 ¶ 𑀭𑀝𑁆𑀞𑀁 𑀅𑀦𑀼𑀧𑁆𑀧𑀻𑀴𑀁, 𑀅𑀓𑀼𑀢𑁄𑀘𑀺𑀉𑀧𑀤𑁆𑀤𑀯𑀁;
𑀅𑀲𑀸𑀳𑀲𑁂𑀦 𑀥𑀫𑁆𑀫𑁂𑀦, 𑀲𑀫𑁂𑀦 𑀫𑀦𑀼𑀲𑀸𑀲𑀲𑀺.
‘‘𑀅𑀣𑁄 𑀭𑀝𑁆𑀞𑀁 𑀅𑀦𑀼𑀧𑁆𑀧𑀻𑀴𑀁, 𑀅𑀓𑀼𑀢𑁄𑀘𑀺𑀉𑀧𑀤𑁆𑀤𑀯𑀁;
𑀅𑀲𑀸𑀳𑀲𑁂𑀦 𑀥𑀫𑁆𑀫𑁂𑀦, 𑀲𑀫𑁂𑀦 𑀫𑀦𑀼𑀲𑀸𑀲𑀳𑀁.
‘‘𑀓𑀘𑁆𑀘𑀺 𑀲𑀦𑁆𑀢𑁄 𑀅𑀧𑀘𑀺𑀢𑀸, 𑀅𑀲𑀦𑁆𑀢𑁄 𑀧𑀭𑀺𑀯𑀚𑁆𑀚𑀺𑀢𑀸;
𑀦𑁄 𑀘𑁂 𑀥𑀫𑁆𑀫𑀁 𑀦𑀺𑀭𑀁𑀓𑀢𑁆𑀯𑀸, 𑀅𑀥𑀫𑁆𑀫𑀫𑀦𑀼𑀯𑀢𑁆𑀢𑀲𑀺.
‘‘𑀲𑀦𑁆𑀢𑁄 𑀘 𑀫𑁂 𑀅𑀧𑀘𑀺𑀢𑀸, 𑀅𑀲𑀦𑁆𑀢𑁄 𑀧𑀭𑀺𑀯𑀚𑁆𑀚𑀺𑀢𑀸;
𑀥𑀫𑁆𑀫𑀫𑁂𑀯𑀸𑀦𑀼𑀯𑀢𑁆𑀢𑀸𑀫𑀺, 𑀅𑀥𑀫𑁆𑀫𑁄 𑀫𑁂 𑀦𑀺𑀭𑀁𑀓𑀢𑁄.
‘‘𑀓𑀘𑁆𑀘𑀺 ¶ 𑀦𑀸𑀦𑀸𑀕𑀢𑀁 𑀤𑀻𑀖𑀁, 𑀲𑀫𑀯𑁂𑀓𑁆𑀔𑀲𑀺 𑀔𑀢𑁆𑀢𑀺𑀬;
𑀓𑀘𑁆𑀘𑀺𑀫𑀢𑁆𑀢𑁄 𑀫𑀤𑀦𑀻𑀬𑁂, 𑀧𑀭𑀮𑁄𑀓𑀁 𑀦 𑀲𑀦𑁆𑀢𑀲𑀺.
‘‘𑀦𑀸𑀳𑀁 𑀅𑀦𑀸𑀕𑀢𑀁 𑀤𑀻𑀖𑀁, 𑀲𑀫𑀯𑁂𑀓𑁆𑀔𑀸𑀫𑀺 𑀧𑀓𑁆𑀔𑀺𑀫;
𑀞𑀺𑀢𑁄 𑀤𑀲𑀲𑀼 𑀥𑀫𑁆𑀫𑁂𑀲𑀼, 𑀧𑀭𑀮𑁄𑀓𑀁 𑀦 𑀲𑀦𑁆𑀢𑀲𑁂.
‘‘𑀤𑀸𑀦𑀁 ¶ 𑀲𑀻𑀮𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;
𑀅𑀓𑁆𑀓𑁄𑀥𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀺𑀜𑁆𑀘 𑀅𑀯𑀺𑀭𑁄𑀥𑀦𑀁.
‘‘𑀇𑀘𑁆𑀘𑁂𑀢𑁂 𑀓𑀼𑀲𑀮𑁂 𑀥𑀫𑁆𑀫𑁂, 𑀞𑀺𑀢𑁂 𑀧𑀲𑁆𑀲𑀸𑀫𑀺 𑀅𑀢𑁆𑀢𑀦𑀺;
𑀢𑀢𑁄 𑀫𑁂 𑀚𑀸𑀬𑀢𑁂 𑀧𑀻𑀢𑀺, 𑀲𑀸𑀫𑀦𑀲𑁆𑀲𑀜𑁆𑀘𑀦𑀧𑁆𑀧𑀓𑀁.
‘‘𑀲𑀼𑀫𑀼𑀔𑁄 𑀘 𑀅𑀘𑀺𑀦𑁆𑀢𑁂𑀢𑁆𑀯𑀸, 𑀯𑀺𑀲𑀚𑁆𑀚𑀺 𑀨𑀭𑀼𑀲𑀁 𑀕𑀺𑀭𑀁;
𑀪𑀸𑀯𑀤𑁄𑀲𑀫𑀦𑀜𑁆𑀜𑀸𑀬, 𑀅𑀲𑁆𑀫𑀸𑀓𑀸𑀬𑀁 𑀯𑀺𑀳𑀗𑁆𑀕𑀫𑁄.
‘‘𑀲𑁄 𑀓𑀼𑀤𑁆𑀥𑁄 𑀨𑀭𑀼𑀲𑀁 𑀯𑀸𑀘𑀁, 𑀦𑀺𑀘𑁆𑀙𑀸𑀭𑁂𑀲𑀺 𑀅𑀬𑁄𑀦𑀺𑀲𑁄;
𑀬𑀸𑀦𑀲𑁆𑀫𑁂𑀲𑀼 𑀦 𑀯𑀺𑀚𑁆𑀚𑀦𑁆𑀢𑀺, 𑀦𑀬𑀺𑀤𑀁 𑀧𑀜𑁆𑀜𑀯𑀢𑀸𑀫𑀺𑀯𑀸’’𑀢𑀺.
𑀢𑀢𑁆𑀣 𑀤𑀺𑀲𑁆𑀯𑀸𑀢𑀺 𑀢𑀁 𑀩𑀳𑀼𑀁 𑀅𑀕𑁆𑀕𑀧𑀸𑀦𑀪𑁄𑀚𑀦𑀁 𑀤𑀺𑀲𑁆𑀯𑀸. 𑀧𑁂𑀲𑀺𑀢𑀦𑁆𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀉𑀧𑀦𑀻𑀢𑀁. 𑀔𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀧𑀞𑀫𑀓𑀸𑀭𑀡𑁂𑀲𑀼 𑀧𑀝𑀺𑀲𑀦𑁆𑀣𑀸𑀭𑀥𑀫𑁆𑀫𑀸𑀦𑀁. 𑀢𑀢𑁄 𑀧𑀼𑀘𑁆𑀙𑀺 𑀅𑀦𑀦𑁆𑀢𑀭𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀓𑀘𑁆𑀘𑀺 𑀦𑀼, 𑀪𑁄𑀢𑁄’’𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺. 𑀢𑀸 𑀧𑀦𑁂𑀢𑀸 𑀙 𑀕𑀸𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀅𑀦𑀼𑀧𑁆𑀧𑀻𑀴𑀦𑁆𑀢𑀺 𑀓𑀘𑁆𑀘𑀺 𑀭𑀝𑁆𑀞𑀯𑀸𑀲𑀺𑀦𑁄 𑀬𑀦𑁆𑀢𑁂 𑀉𑀘𑁆𑀙𑀼𑀁 𑀯𑀺𑀬 𑀦 𑀧𑀻𑀴𑁂𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀓𑀼𑀢𑁄𑀘𑀺𑀉𑀧𑀤𑁆𑀤𑀯𑀦𑁆𑀢𑀺 𑀓𑀼𑀢𑁄𑀘𑀺 𑀅𑀦𑀼𑀧𑀤𑁆𑀤𑀯𑀁. 𑀥𑀫𑁆𑀫𑁂𑀦 𑀲𑀫𑁂𑀦 𑀫𑀦𑀼𑀲𑀸𑀲𑀲𑀻𑀢𑀺 𑀓𑀘𑁆𑀘𑀺 𑀢𑀯 𑀭𑀝𑁆𑀞𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀦𑀼𑀲𑀸𑀲𑀲𑀺. 𑀲𑀦𑁆𑀢𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀁𑀬𑀼𑀢𑁆𑀢𑀸 𑀲𑀧𑁆𑀧𑀼𑀭𑀺𑀲𑀸. 𑀦𑀺𑀭𑀁𑀓𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀦𑀸𑀦𑀸𑀕𑀢𑀁 𑀤𑀻𑀖𑀦𑁆𑀢𑀺 𑀅𑀦𑀸𑀕𑀢𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀯𑀢𑁆𑀢𑀺𑀁 ‘‘𑀓𑀘𑁆𑀘𑀺 𑀤𑀻𑀖’’𑀦𑁆𑀢𑀺 𑀦 𑀲𑀫𑀯𑁂𑀓𑁆𑀔𑀲𑀺, 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀢𑁆𑀢𑀪𑀸𑀯𑀁 𑀚𑀸𑀦𑀸𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀫𑀤𑀦𑀻𑀬𑁂𑀢𑀺 𑀫𑀤𑀸𑀭𑀳𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂. 𑀦 𑀲𑀦𑁆𑀢𑀲𑀻𑀢𑀺 𑀦 𑀪𑀸𑀬𑀲𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀘𑁆𑀘𑀺 𑀭𑀽𑀧𑀸𑀤𑀻𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀫𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀁 𑀓𑀼𑀲𑀮𑀸𑀦𑀁 𑀓𑀢𑀢𑁆𑀢𑀸 𑀧𑀭𑀮𑁄𑀓𑀁 𑀦 𑀪𑀸𑀬𑀲𑀻𑀢𑀺.
𑀤𑀲𑀲𑀽𑀢𑀺 𑀤𑀲𑀲𑀼 𑀭𑀸𑀚𑀥𑀫𑁆𑀫𑁂𑀲𑀼. 𑀤𑀸𑀦𑀸𑀤𑀻𑀲𑀼 𑀤𑀲𑀯𑀢𑁆𑀣𑀼𑀓𑀸 𑀘𑁂𑀢𑀦𑀸 𑀤𑀸𑀦𑀁, 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀸𑀦𑀺 𑀲𑀻𑀮𑀁 ¶ , 𑀤𑁂𑀬𑁆𑀬𑀥𑀫𑁆𑀫𑀘𑀸𑀕𑁄 ¶ 𑀧𑀭𑀺𑀘𑁆𑀘𑀸𑀕𑁄, 𑀉𑀚𑀼𑀪𑀸𑀯𑁄 𑀅𑀚𑁆𑀚𑀯𑀁, 𑀫𑀼𑀤𑀼𑀪𑀸𑀯𑁄 𑀫𑀤𑁆𑀤𑀯𑀁, 𑀉𑀧𑁄𑀲𑀣𑀓𑀫𑁆𑀫𑀁 𑀢𑀧𑁄, 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀅𑀓𑁆𑀓𑁄𑀥𑁄, 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀅𑀯𑀺𑀳𑀺𑀁𑀲𑀸, 𑀅𑀥𑀺𑀯𑀸𑀲𑀦𑀸 𑀔𑀦𑁆𑀢𑀺, 𑀅𑀯𑀺𑀭𑁄𑀥𑁄 𑀅𑀯𑀺𑀭𑁄𑀥𑀦𑀁. 𑀅𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀫𑀫 𑀇𑀫𑀁 𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀅𑀘𑀺𑀦𑁆𑀢𑁂𑀢𑁆𑀯𑀸. 𑀪𑀸𑀯𑀤𑁄𑀲𑀦𑁆𑀢𑀺 𑀘𑀺𑀢𑁆𑀢𑀤𑁄𑀲𑀁. 𑀅𑀦𑀜𑁆𑀜𑀸𑀬𑀸𑀢𑀺 𑀅𑀚𑀸𑀦𑀺𑀢𑁆𑀯𑀸. 𑀅𑀲𑁆𑀫𑀸𑀓𑀜𑁆𑀳𑀺 𑀘𑀺𑀢𑁆𑀢𑀤𑁄𑀲𑁄 ¶ 𑀦𑀸𑀫 𑀦𑀢𑁆𑀣𑀺, 𑀬𑀫𑁂𑀲 𑀚𑀸𑀦𑁂𑀬𑁆𑀬, 𑀢𑀁 𑀅𑀚𑀸𑀦𑀺𑀢𑁆𑀯𑀸𑀯 𑀨𑀭𑀼𑀲𑀁 𑀓𑀓𑁆𑀔𑀴𑀁 𑀕𑀺𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀬𑁄𑀦𑀺𑀲𑁄𑀢𑀺 𑀅𑀦𑀼𑀧𑀸𑀬𑁂𑀦. 𑀬𑀸𑀦𑀲𑁆𑀫𑁂𑀲𑀽𑀢𑀺 𑀬𑀸𑀦𑀺 𑀯𑀚𑁆𑀚𑀸𑀦𑀺 𑀅𑀫𑁆𑀳𑁂𑀲𑀼 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀯𑀤𑀢𑀺. 𑀦𑀬𑀺𑀤𑀦𑁆𑀢𑀺 𑀢𑀲𑁆𑀫𑀸𑀲𑁆𑀲 𑀇𑀤𑀁 𑀯𑀘𑀦𑀁 𑀧𑀜𑁆𑀜𑀯𑀢𑀁 𑀇𑀯 𑀦 𑀳𑁄𑀢𑀺, 𑀢𑁂𑀦𑁂𑀲 𑀫𑀫 𑀦 𑀧𑀡𑁆𑀟𑀺𑀢𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑀼𑀫𑀼𑀔𑁄 ‘‘𑀫𑀬𑀸 𑀕𑀼𑀡𑀲𑀫𑁆𑀧𑀦𑁆𑀦𑁄𑀯 𑀭𑀸𑀚𑀸 𑀅𑀧𑀲𑀸𑀤𑀺𑀢𑁄, 𑀲𑁄 𑀫𑁂 𑀓𑀼𑀤𑁆𑀥𑁄, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀅𑀢𑁆𑀣𑀺 𑀫𑁂 𑀢𑀁 𑀅𑀢𑀺𑀲𑀸𑀭𑀁, 𑀯𑁂𑀕𑁂𑀦 𑀫𑀦𑀼𑀚𑀸𑀥𑀺𑀧;
𑀥𑀢𑀭𑀝𑁆𑀞𑁂 𑀘 𑀩𑀤𑁆𑀥𑀲𑁆𑀫𑀺𑀁, 𑀤𑀼𑀓𑁆𑀔𑀁 𑀫𑁂 𑀯𑀺𑀧𑀼𑀮𑀁 𑀅𑀳𑀼.
‘‘𑀢𑁆𑀯𑀁 𑀦𑁄 𑀧𑀺𑀢𑀸𑀯 𑀧𑀼𑀢𑁆𑀢𑀸𑀦𑀁, 𑀪𑀽𑀢𑀸𑀦𑀁 𑀥𑀭𑀡𑀻𑀭𑀺𑀯;
𑀅𑀲𑁆𑀫𑀸𑀓𑀁 𑀅𑀥𑀺𑀧𑀦𑁆𑀦𑀸𑀦𑀁, 𑀔𑀫𑀲𑁆𑀲𑀼 𑀭𑀸𑀚𑀓𑀼𑀜𑁆𑀚𑀭𑀸’’𑀢𑀺.
𑀢𑀢𑁆𑀣 𑀅𑀢𑀺𑀲𑀸𑀭𑀦𑁆𑀢𑀺 𑀧𑀓𑁆𑀔𑀮𑀺𑀢𑀁. 𑀯𑁂𑀕𑁂𑀦𑀸𑀢𑀺 𑀅𑀳𑀁 𑀏𑀢𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀯𑁂𑀕𑁂𑀦 𑀲𑀳𑀲𑀸 𑀓𑀣𑁂𑀲𑀺𑀁. 𑀤𑀼𑀓𑁆𑀔𑀦𑁆𑀢𑀺 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀫𑀫 𑀯𑀺𑀧𑀼𑀮𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀓𑁄𑀥𑀯𑀲𑁂𑀦 𑀬𑀁 𑀫𑀬𑀸 𑀯𑀼𑀢𑁆𑀢𑀁, 𑀢𑀁 𑀫𑁂 𑀔𑀫𑀣, 𑀫𑀳𑀸𑀭𑀸𑀚𑀸𑀢𑀺. 𑀧𑀼𑀢𑁆𑀢𑀸𑀦𑀦𑁆𑀢𑀺 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀸𑀦𑀁 𑀧𑀺𑀢𑀸 𑀯𑀺𑀬. 𑀥𑀭𑀡𑀻𑀭𑀺𑀯𑀸𑀢𑀺 𑀧𑀸𑀡𑀪𑀽𑀢𑀸𑀦𑀁 𑀧𑀢𑀺𑀝𑁆𑀞𑀸 𑀧𑀣𑀯𑀻 𑀯𑀺𑀬 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑁄. 𑀅𑀥𑀺𑀧𑀦𑁆𑀦𑀸𑀦𑀦𑁆𑀢𑀺 𑀤𑁄𑀲𑁂𑀦 𑀅𑀧𑀭𑀸𑀥𑁂𑀦 𑀅𑀚𑁆𑀛𑁄𑀢𑁆𑀣𑀝𑀸𑀦𑀁 𑀔𑀫𑀲𑁆𑀲𑀽𑀢𑀺 𑀇𑀤𑀁 𑀲𑁄 𑀆𑀲𑀦𑀸 𑀑𑀭𑀼𑀬𑁆𑀳 𑀧𑀓𑁆𑀔𑁂𑀳𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀆𑀳.
𑀅𑀣 𑀦𑀁 𑀭𑀸𑀚𑀸 𑀆𑀮𑀺𑀗𑁆𑀕𑀺𑀢𑁆𑀯𑀸 𑀆𑀤𑀸𑀬 𑀲𑀼𑀯𑀡𑁆𑀡𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀘𑁆𑀘𑀬𑀤𑁂𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀳 𑁋
‘‘𑀏𑀢𑀁 𑀢𑁂 𑀅𑀦𑀼𑀫𑁄𑀤𑀸𑀫, 𑀬𑀁 𑀪𑀸𑀯𑀁 𑀦 𑀦𑀺𑀕𑀽𑀳𑀲𑀺;
𑀔𑀺𑀮𑀁 𑀧𑀪𑀺𑀦𑁆𑀤𑀲𑀺 𑀧𑀓𑁆𑀔𑀺, 𑀉𑀚𑀼𑀓𑁄𑀲𑀺 𑀯𑀺𑀳𑀗𑁆𑀕𑀫𑀸’’𑀢𑀺.
𑀢𑀢𑁆𑀣 ¶ 𑀅𑀦𑀼𑀫𑁄𑀤𑀸𑀫𑀸𑀢𑀺 𑀏𑀢𑀁 𑀢𑁂 𑀤𑁄𑀲𑀁 𑀔𑀫𑀸𑀫. 𑀬𑀦𑁆𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀦 𑀦𑀺𑀕𑀽𑀳𑀲𑀺. 𑀔𑀺𑀮𑀦𑁆𑀢𑀺 𑀘𑀺𑀢𑁆𑀢𑀔𑀺𑀮𑀁 𑀘𑀺𑀢𑁆𑀢𑀔𑀸𑀡𑀼𑀓𑀁.
𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀸𑀬 𑀲𑀼𑀫𑀼𑀔𑀲𑁆𑀲 𑀘 𑀉𑀚𑀼𑀪𑀸𑀯𑁂 𑀧𑀲𑀻𑀤𑀺𑀢𑁆𑀯𑀸 ‘‘𑀧𑀲𑀦𑁆𑀦𑁂𑀦 𑀦𑀸𑀫 𑀧𑀲𑀦𑁆𑀦𑀸𑀓𑀸𑀭𑁄 𑀓𑀸𑀢𑀩𑁆𑀩𑁄’’𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀭𑀚𑁆𑀚𑀲𑀺𑀭𑀺𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀆𑀳 𑁋
‘‘𑀬𑀁 𑀓𑀺𑀜𑁆𑀘𑀺 𑀭𑀢𑀦𑀁 𑀅𑀢𑁆𑀣𑀺, 𑀓𑀸𑀲𑀺𑀭𑀸𑀚𑀦𑀺𑀯𑁂𑀲𑀦𑁂;
𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.
‘‘𑀫𑀡𑀬𑁄 ¶ ¶ 𑀲𑀗𑁆𑀔𑀫𑀼𑀢𑁆𑀢𑀸 𑀘, 𑀯𑀢𑁆𑀣𑀓𑀁 𑀳𑀭𑀺𑀘𑀦𑁆𑀤𑀦𑀁;
𑀅𑀚𑀺𑀦𑀁 𑀤𑀦𑁆𑀢𑀪𑀡𑁆𑀟𑀜𑁆𑀘, 𑀮𑁄𑀳𑀁 𑀓𑀸𑀴𑀸𑀬𑀲𑀁 𑀩𑀳𑀼𑀁;
𑀏𑀢𑀁 𑀤𑀤𑀸𑀫𑀺 𑀯𑁄 𑀯𑀺𑀢𑁆𑀢𑀁, 𑀇𑀲𑁆𑀲𑀭𑀁 𑀯𑀺𑀲𑁆𑀲𑀚𑀸𑀫𑀺 𑀯𑁄’’𑀢𑀺.
𑀢𑀢𑁆𑀣 𑀫𑀼𑀢𑁆𑀢𑀸𑀢𑀺 𑀯𑀺𑀤𑁆𑀥𑀸𑀯𑀺𑀤𑁆𑀥𑀫𑀼𑀢𑁆𑀢𑀸. 𑀫𑀡𑀬𑁄𑀢𑀺 𑀫𑀡𑀺𑀪𑀡𑁆𑀟𑀓𑀸𑀦𑀺. 𑀲𑀗𑁆𑀔𑀫𑀼𑀢𑁆𑀢𑀸 𑀘𑀸𑀢𑀺 𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑀭𑀢𑀦𑀜𑁆𑀘 𑀆𑀫𑀮𑀓𑀯𑀝𑁆𑀝𑀫𑀼𑀢𑁆𑀢𑀭𑀢𑀦𑀜𑁆𑀘. 𑀯𑀢𑁆𑀣𑀓𑀦𑁆𑀢𑀺 𑀲𑀼𑀔𑀼𑀫𑀓𑀸𑀲𑀺𑀓𑀯𑀢𑁆𑀣𑀸𑀦𑀺. 𑀅𑀚𑀺𑀦𑀦𑁆𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀮𑁄𑀳𑀁 𑀓𑀸𑀴𑀸𑀬𑀲𑀦𑁆𑀢𑀺 𑀢𑀫𑁆𑀩𑀮𑁄𑀳𑀜𑁆𑀘 𑀓𑀸𑀴𑀮𑁄𑀳𑀜𑁆𑀘. 𑀇𑀲𑁆𑀲𑀭𑀦𑁆𑀢𑀺 𑀓𑀜𑁆𑀘𑀦𑀫𑀸𑀮𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀚𑁆𑀚𑀁.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑁂𑀢𑁆𑀯𑀸 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳 𑁋
‘‘𑀅𑀤𑁆𑀥𑀸 𑀅𑀧𑀘𑀺𑀢𑀸 𑀢𑁆𑀬𑀫𑁆𑀳𑀸, 𑀲𑀓𑁆𑀓𑀢𑀸 𑀘 𑀭𑀣𑁂𑀲𑀪;
𑀥𑀫𑁆𑀫𑁂𑀲𑀼 𑀯𑀢𑁆𑀢𑀫𑀸𑀦𑀸𑀦𑀁, 𑀢𑁆𑀯𑀁 𑀦𑁄 𑀆𑀘𑀭𑀺𑀬𑁄 𑀪𑀯.
‘‘𑀆𑀘𑀭𑀺𑀬 𑀫𑀦𑀼𑀜𑁆𑀜𑀸𑀢𑀸, 𑀢𑀬𑀸 𑀅𑀦𑀼𑀫𑀢𑀸 𑀫𑀬𑀁;
𑀢𑀁 𑀧𑀤𑀓𑁆𑀔𑀺𑀡𑀢𑁄 𑀓𑀢𑁆𑀯𑀸, 𑀜𑀸𑀢𑀺𑀁 𑀧𑀲𑁆𑀲𑁂𑀫𑀼𑀭𑀺𑀦𑁆𑀤𑀫𑀸’’𑀢𑀺.
𑀢𑀢𑁆𑀣 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂𑀲𑀼. 𑀆𑀘𑀭𑀺𑀬𑁄𑀢𑀺 𑀢𑁆𑀯𑀁 𑀅𑀫𑁆𑀳𑁂𑀳𑀺 𑀩𑁆𑀬𑀢𑁆𑀢𑀢𑀭𑁄, 𑀢𑀲𑁆𑀫𑀸 𑀦𑁄 𑀆𑀘𑀭𑀺𑀬𑁄 𑀳𑁄𑀢𑀺, 𑀅𑀧𑀺𑀘 𑀤𑀲𑀦𑁆𑀦𑀁 𑀭𑀸𑀚𑀥𑀫𑁆𑀫𑀸𑀦𑀁 𑀓𑀣𑀺𑀢𑀢𑁆𑀢𑀸 𑀲𑀼𑀫𑀼𑀔𑀲𑁆𑀲 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀘𑁆𑀘𑀬𑀧𑀝𑀺𑀕𑁆𑀕𑀳𑀡𑀲𑁆𑀲 ¶ 𑀓𑀢𑀢𑁆𑀢𑀸𑀧𑀺 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄𑀯, 𑀢𑀲𑁆𑀫𑀸 𑀇𑀤𑀸𑀦𑀺𑀧𑀺 𑀦𑁄 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀆𑀘𑀭𑀺𑀬𑁄 𑀪𑀯𑀸𑀢𑀺 𑀆𑀳. 𑀧𑀲𑁆𑀲𑁂𑀫𑀼𑀭𑀺𑀦𑁆𑀤𑀫𑀸𑀢𑀺 𑀧𑀲𑁆𑀲𑁂𑀫𑀼 𑀅𑀭𑀺𑀦𑁆𑀤𑀫.
𑀲𑁄 𑀢𑁂𑀲𑀁 𑀕𑀫𑀦𑀁 𑀅𑀦𑀼𑀚𑀸𑀦𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲𑁂𑀯 𑀅𑀭𑀼𑀡𑀁 𑀉𑀝𑁆𑀞𑀳𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀲𑀩𑁆𑀩𑀭𑀢𑁆𑀢𑀺𑀁 𑀘𑀺𑀦𑁆𑀢𑀬𑀺𑀢𑁆𑀯𑀸, 𑀫𑀦𑁆𑀢𑀬𑀺𑀢𑁆𑀯𑀸 𑀬𑀣𑀸𑀓𑀣𑀁;
𑀓𑀸𑀲𑀺𑀭𑀸𑀚𑀸 𑀅𑀦𑀼𑀜𑁆𑀜𑀸𑀲𑀺, 𑀳𑀁𑀲𑀸𑀦𑀁 𑀧𑀯𑀭𑀼𑀢𑁆𑀢𑀫’’𑀦𑁆𑀢𑀺.
𑀢𑀢𑁆𑀣 𑀬𑀣𑀸𑀓𑀣𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀅𑀢𑁆𑀣𑀁 𑀢𑁂𑀳𑀺 𑀲𑀤𑁆𑀥𑀺𑀁 𑀘𑀺𑀦𑁆𑀢𑁂𑀢𑀩𑁆𑀩𑀁 𑀫𑀦𑁆𑀢𑁂𑀢𑀩𑁆𑀩𑀜𑁆𑀘, 𑀲𑀩𑁆𑀩𑀁 𑀢𑀁 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀫𑀦𑁆𑀢𑁂𑀢𑁆𑀯𑀸 𑀘𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀜𑁆𑀜𑀸𑀲𑀻𑀢𑀺 𑀕𑀘𑁆𑀙𑀣𑀸𑀢𑀺 𑀅𑀦𑀼𑀜𑁆𑀜𑀸𑀲𑀺.
𑀏𑀯𑀁 ¶ 𑀢𑁂𑀦 𑀅𑀦𑀼𑀜𑁆𑀜𑀸𑀢𑁄 𑀩𑁄𑀥𑀺𑀲𑀢𑁆𑀢𑁄 𑀭𑀸𑀚𑀸𑀦𑀁 ‘‘𑀅𑀧𑁆𑀧𑀫𑀢𑁆𑀢𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸 𑀢𑁂𑀲𑀁 𑀓𑀜𑁆𑀘𑀦𑀪𑀸𑀚𑀦𑁂𑀳𑀺 ¶ 𑀫𑀥𑀼𑀮𑀸𑀚𑀜𑁆𑀘 𑀫𑀥𑀼𑀭𑁄𑀤𑀓𑀜𑁆𑀘 𑀉𑀧𑀦𑀸𑀫𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑀸𑀳𑀸𑀭𑀓𑀺𑀘𑁆𑀘𑁂 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂𑀦 𑀲𑀬𑀁 𑀉𑀓𑁆𑀔𑀺𑀧𑀺, 𑀔𑁂𑀫𑀸 𑀤𑁂𑀯𑀻 𑀲𑀼𑀫𑀼𑀔𑀁 𑀉𑀓𑁆𑀔𑀺𑀧𑀺. 𑀅𑀣 𑀦𑁂 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬 ‘‘𑀕𑀘𑁆𑀙𑀣 𑀲𑀸𑀫𑀺𑀦𑁄’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;
𑀧𑁂𑀓𑁆𑀔𑀢𑁄 𑀓𑀸𑀲𑀺𑀭𑀸𑀚𑀲𑁆𑀲, 𑀪𑀯𑀦𑀸 𑀢𑁂 𑀯𑀺𑀕𑀸𑀳𑀺𑀲𑀼’’𑀦𑁆𑀢𑀺.
𑀢𑀢𑁆𑀣 𑀯𑀺𑀕𑀸𑀳𑀺𑀲𑀼𑀦𑁆𑀢𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼.
𑀢𑁂𑀲𑀼 𑀫𑀳𑀸𑀲𑀢𑁆𑀢𑁄 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀫𑀸 𑀘𑀺𑀦𑁆𑀤𑀬𑀺, 𑀫𑀳𑀸𑀭𑀸𑀚, 𑀅𑀧𑁆𑀧𑀫𑀢𑁆𑀢𑁄 𑀅𑀫𑁆𑀳𑀸𑀓𑀁 𑀑𑀯𑀸𑀤𑁂 𑀯𑀢𑁆𑀢𑁂𑀬𑁆𑀬𑀸𑀲𑀻’’𑀢𑀺 𑀭𑀸𑀚𑀸𑀦𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀲𑀼𑀫𑀼𑀔𑀁 𑀆𑀤𑀸𑀬 𑀘𑀺𑀢𑁆𑀢𑀓𑀽𑀝𑀫𑁂𑀯 𑀕𑀢𑁄. 𑀢𑀸𑀦𑀺𑀧𑀺 𑀔𑁄 𑀦𑀯𑀼𑀢𑀺 𑀳𑀁𑀲𑀲𑀳𑀲𑁆𑀲𑀸𑀦𑀺 𑀓𑀜𑁆𑀘𑀦𑀕𑀼𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀢𑀢𑀮𑁂 𑀦𑀺𑀲𑀺𑀦𑁆𑀦𑀸𑀦𑀺 𑀢𑁂 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑁂𑀲𑀼𑀁. 𑀢𑁂 𑀜𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀘𑀺𑀢𑁆𑀢𑀓𑀽𑀝𑀢𑀮𑀁 𑀧𑀯𑀺𑀲𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑁂 ¶ 𑀅𑀭𑁄𑀕𑁂 𑀅𑀦𑀼𑀧𑁆𑀧𑀢𑁆𑀢𑁂, 𑀤𑀺𑀲𑁆𑀯𑀸𑀦 𑀧𑀭𑀫𑁂 𑀤𑀺𑀚𑁂;
𑀓𑁂𑀓𑀸𑀢𑀺 𑀫𑀓𑀭𑀼𑀁 𑀳𑀁𑀲𑀸, 𑀧𑀼𑀣𑀼𑀲𑀤𑁆𑀤𑁄 𑀅𑀚𑀸𑀬𑀣.
‘‘𑀢𑁂 𑀧𑀢𑀻𑀢𑀸 𑀧𑀫𑀼𑀢𑁆𑀢𑁂𑀦, 𑀪𑀢𑁆𑀢𑀼𑀦𑀸 𑀪𑀢𑁆𑀢𑀼𑀕𑀸𑀭𑀯𑀸;
𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑀺𑀁𑀲𑀼, 𑀅𑀡𑁆𑀟𑀚𑀸 𑀮𑀤𑁆𑀥𑀧𑀘𑁆𑀘𑀬𑀸’’𑀢𑀺.
𑀏𑀯𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘 𑀧𑀦 𑀢𑁂 𑀳𑀁𑀲𑀸 ‘‘𑀓𑀣𑀁 𑀫𑀼𑀢𑁆𑀢𑁄𑀲𑀺, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀲𑀼𑀫𑀼𑀔𑀁 𑀦𑀺𑀲𑁆𑀲𑀸𑀬 𑀫𑀼𑀢𑁆𑀢𑀪𑀸𑀯𑀁 𑀲𑀁𑀬𑀫𑀭𑀸𑀚𑀮𑀼𑀤𑁆𑀤𑀧𑀼𑀢𑁆𑀢𑁂𑀳𑀺 𑀓𑀢𑀓𑀫𑁆𑀫𑀜𑁆𑀘 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀸 𑀳𑀁𑀲𑀕𑀡𑀸 ‘‘𑀲𑀼𑀫𑀼𑀔𑁄 𑀲𑁂𑀦𑀸𑀧𑀢𑀺 𑀘 𑀭𑀸𑀚𑀸 𑀘 𑀮𑀼𑀤𑁆𑀤𑀧𑀼𑀢𑁆𑀢𑁄 𑀘 𑀲𑀼𑀔𑀺𑀢𑀸 𑀦𑀺𑀤𑁆𑀤𑀼𑀓𑁆𑀔𑀸 𑀘𑀺𑀭𑀁 𑀚𑀻𑀯𑀦𑁆𑀢𑀽’’𑀢𑀺 𑀆𑀳𑀁𑀲𑀼. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀏𑀯𑀁 𑀫𑀺𑀢𑁆𑀢𑀯𑀢𑀁 𑀅𑀢𑁆𑀣𑀸, 𑀲𑀩𑁆𑀩𑁂 𑀳𑁄𑀦𑁆𑀢𑀺 𑀧𑀤𑀓𑁆𑀔𑀺𑀡𑀸;
𑀳𑀁𑀲𑀸 𑀬𑀣𑀸 𑀥𑀢𑀭𑀝𑁆𑀞𑀸, 𑀜𑀸𑀢𑀺𑀲𑀗𑁆𑀖𑀫𑀼𑀧𑀸𑀕𑀫𑀼’’𑀦𑁆𑀢𑀺.
𑀢𑀁 𑀘𑀽𑀴𑀳𑀁𑀲𑀚𑀸𑀢𑀓𑁂 𑀯𑀼𑀢𑁆𑀢𑀢𑁆𑀣𑀫𑁂𑀯.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀆𑀦𑀦𑁆𑀤𑁄 𑀫𑀫𑀢𑁆𑀣𑀸𑀬 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀮𑀼𑀤𑁆𑀤𑀧𑀼𑀢𑁆𑀢𑁄 𑀙𑀦𑁆𑀦𑁄 𑀅𑀳𑁄𑀲𑀺, 𑀔𑁂𑀫𑀸 𑀤𑁂𑀯𑀻, 𑀔𑁂𑀫𑀸 𑀪𑀺𑀓𑁆𑀔𑀼𑀦𑀻, 𑀭𑀸𑀚𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀼𑀫𑀼𑀔𑁄 𑀆𑀦𑀦𑁆𑀤𑁄, 𑀲𑁂𑀲𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀥𑀢𑀭𑀝𑁆𑀞𑀳𑀁𑀲𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀫𑀳𑀸𑀳𑀁𑀲𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.
[𑁫𑁩𑁫] 𑁩. 𑀲𑀼𑀥𑀸𑀪𑁄𑀚𑀦𑀚𑀸𑀢𑀓𑀯𑀡𑁆𑀡𑀦𑀸
𑀦𑁂𑀯 𑀓𑀺𑀡𑀸𑀫𑀺 𑀦𑀧𑀺 𑀯𑀺𑀓𑁆𑀓𑀺𑀡𑀸𑀫𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀸𑀦𑀚𑁆𑀛𑀸𑀲𑀬𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀥𑀼𑀢𑀗𑁆𑀕𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀧𑀯𑀢𑁆𑀢𑀫𑁂𑀢𑁆𑀢𑀘𑀺𑀢𑁆𑀢𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀼𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀤𑀸𑀦𑀚𑁆𑀛𑀸𑀲𑀬𑁄 𑀅𑀳𑁄𑀲𑀺. 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀙𑀺𑀦𑁆𑀦𑀪𑀢𑁆𑀢𑁄 𑀳𑀼𑀢𑁆𑀯𑀸𑀧𑀺 𑀤𑁂𑀢𑀺𑀬𑁂𑀯, 𑀢𑀲𑁆𑀫𑀸 ¶ 𑀢𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀤𑀸𑀦𑀸𑀪𑀺𑀭𑀢𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀤𑀸𑀦𑀚𑁆𑀛𑀸𑀲𑀬𑁄 𑀤𑀸𑀦𑀸𑀪𑀺𑀭𑀢𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀲𑀢𑀫𑀢𑁆𑀢𑀧𑀸𑀦𑀻𑀬𑀫𑁆𑀧𑀺 𑀮𑁄𑀪𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑁂𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯𑀲𑁆𑀲 𑀅𑀚𑁆𑀛𑀸𑀲𑀬𑁄’’𑀢𑀺. 𑀲𑀢𑁆𑀣𑀸 𑀢𑀁 𑀓𑀣𑀁 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀼𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀅𑀤𑀸𑀦𑀲𑀻𑀮𑁄 𑀫𑀘𑁆𑀙𑀭𑀻 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀅𑀤𑀸𑀢𑀸 𑀅𑀳𑁄𑀲𑀺, 𑀅𑀣 𑀦𑀁 𑀅𑀳𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀤𑀸𑀦𑀨𑀮𑀁 𑀯𑀡𑁆𑀡𑁂𑀢𑁆𑀯𑀸 𑀤𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀲𑀺𑀁, 𑀲𑁄 ‘𑀧𑀲𑀢𑀫𑀢𑁆𑀢𑀁 𑀉𑀤𑀓𑀫𑁆𑀧𑀺 𑀮𑀪𑀺𑀢𑁆𑀯𑀸 𑀅𑀤𑀢𑁆𑀯𑀸 𑀦 𑀧𑀺𑀯𑀺𑀲𑁆𑀲𑀸𑀫𑀻’𑀢𑀺 𑀫𑀫 𑀲𑀦𑁆𑀢𑀺𑀓𑁂 𑀯𑀭𑀁 𑀅𑀕𑁆𑀕𑀳𑁂𑀲𑀺, 𑀢𑀲𑁆𑀲 𑀨𑀮𑁂𑀦 𑀤𑀸𑀦𑀚𑁆𑀛𑀸𑀲𑀬𑁄 𑀤𑀸𑀦𑀸𑀪𑀺𑀭𑀢𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀓𑁄 𑀕𑀳𑀧𑀢𑀺 𑀅𑀟𑁆𑀠𑁄 𑀅𑀳𑁄𑀲𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄. 𑀅𑀣𑀲𑁆𑀲 𑀭𑀸𑀚𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺 ¶ . 𑀲𑁄 𑀭𑀸𑀚𑀧𑀽𑀚𑀺𑀢𑁄 𑀦𑀸𑀕𑀭𑀚𑀸𑀦𑀧𑀤𑀧𑀽𑀚𑀺𑀢𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀬𑀲𑁄 𑀫𑀬𑀸 𑀅𑀢𑀻𑀢𑀪𑀯𑁂 𑀦𑁂𑀯 𑀦𑀺𑀤𑁆𑀤𑀸𑀬𑀦𑁆𑀢𑁂𑀦, 𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀦 𑀮𑀤𑁆𑀥𑁄, 𑀲𑀼𑀘𑀭𑀺𑀢𑀸𑀦𑀺 𑀧𑀦 ¶ 𑀧𑀽𑀭𑁂𑀢𑁆𑀯𑀸 𑀮𑀤𑁆𑀥𑁄, 𑀅𑀦𑀸𑀕𑀢𑁂𑀧𑀺 𑀫𑀬𑀸 𑀫𑀫 𑀧𑀢𑀺𑀝𑁆𑀞𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀫𑀫 𑀖𑀭𑁂 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀅𑀢𑁆𑀣𑀺, 𑀢𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 ‘‘𑀦 𑀫𑀬𑁆𑀳𑀁 𑀢𑀯 𑀥𑀦𑁂𑀦𑀢𑁆𑀣𑁄, 𑀩𑀳𑀼𑀁 𑀫𑁂 𑀥𑀦𑀁, 𑀇𑀢𑁄𑀧𑀺 𑀬𑀤𑀺𑀘𑁆𑀙𑀲𑀺, 𑀢𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀦𑀼, 𑀤𑁂𑀯, 𑀫𑀫 𑀥𑀦𑀁 𑀤𑀸𑀢𑀼𑀁 𑀮𑀪𑀸𑀫𑀻’’𑀢𑀺 𑀆𑀳. 𑀅𑀣 𑀭𑀜𑁆𑀜𑀸 ‘‘𑀬𑀣𑀸𑀭𑀼𑀘𑀺 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀘𑀸𑀢𑀺 𑀙 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀙𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑀁 𑀓𑀭𑁄𑀦𑁆𑀢𑁄 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀢𑁆𑀯𑀸 ‘‘𑀇𑀫𑀁 𑀫𑀫 𑀤𑀸𑀦𑀯𑀁𑀲𑀁 𑀫𑀸 𑀉𑀧𑀘𑁆𑀙𑀺𑀦𑁆𑀤𑀣𑀸’’𑀢𑀺 𑀧𑀼𑀢𑁆𑀢𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀧𑀼𑀢𑁆𑀢𑁄𑀧𑀺𑀲𑁆𑀲 𑀢𑀣𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀘𑀦𑁆𑀤𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀽𑀭𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀸𑀢𑀮𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀧𑀜𑁆𑀘𑀲𑀺𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀦 𑀧𑀼𑀢𑁆𑀢𑁄 𑀙𑀝𑁆𑀞𑁄 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀤𑁆𑀥𑀸 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄 𑀦𑀸𑀫 𑀅𑀳𑁄𑀲𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄𑀬𑁂𑀯. 𑀲𑁄 ‘‘𑀫𑀫 𑀧𑀺𑀢𑀼𑀧𑀺𑀢𑀸𑀫𑀳𑀸 𑀩𑀸𑀮𑀸 𑀅𑀳𑁂𑀲𑀼𑀁, 𑀤𑀼𑀓𑁆𑀔𑁂𑀦 𑀲𑀫𑁆𑀪𑀢𑀁 𑀥𑀦𑀁 𑀙𑀟𑁆𑀟𑁂𑀲𑀼𑀁, 𑀅𑀳𑀁 𑀧𑀦 𑀥𑀦𑀁 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀸𑀦𑀲𑀸𑀮𑀸 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀅𑀕𑁆𑀕𑀺𑀦𑀸 𑀛𑀸𑀧𑁂𑀢𑁆𑀯𑀸 𑀣𑀤𑁆𑀥𑀫𑀘𑁆𑀙𑀭𑀻 𑀅𑀳𑁄𑀲𑀺.
𑀅𑀣𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀬𑀸𑀘𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑀸𑀳𑀸 𑀧𑀕𑁆𑀕𑀬𑁆𑀳, ‘‘𑀫𑀳𑀸𑀲𑁂𑀝𑁆𑀞𑀺, 𑀫𑀸 𑀅𑀢𑁆𑀢𑀦𑁄 𑀧𑀺𑀢𑀼𑀧𑀺𑀢𑀸𑀫𑀳𑀸𑀦𑀁 𑀤𑀸𑀦𑀯𑀁𑀲𑀁 𑀦𑀸𑀲𑀬𑀺, 𑀤𑀸𑀦𑀁 𑀤𑁂𑀳𑀻’’𑀢𑀺 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 ‘‘𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁂𑀦 ¶ 𑀅𑀢𑁆𑀢𑀦𑁄 𑀤𑀸𑀦𑀯𑀁𑀲𑁄 𑀉𑀧𑀘𑁆𑀙𑀺𑀦𑁆𑀦𑁄’’𑀢𑀺 𑀢𑀁 𑀕𑀭𑀳𑀺. 𑀲𑁄 𑀮𑀚𑁆𑀚𑀺𑀢𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀬𑀸𑀘𑀓𑀸𑀦𑀁 𑀆𑀕𑀢𑀸𑀕𑀢𑀝𑁆𑀞𑀸𑀦𑀁 𑀦𑀺𑀯𑀸𑀭𑁂𑀢𑀼𑀁 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀢𑁂 𑀦𑀺𑀧𑁆𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀦 𑀑𑀮𑁄𑀓𑁂𑀲𑀼𑀁. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀥𑀦𑀫𑁂𑀯 𑀲𑀁𑀳𑀭𑀢𑀺, 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀦 𑀧𑀼𑀢𑁆𑀢𑀤𑀸𑀭𑀸𑀤𑀻𑀦𑀁 𑀤𑁂𑀢𑀺, 𑀓𑀜𑁆𑀚𑀺𑀓𑀩𑀺𑀮𑀗𑁆𑀕𑀤𑀼𑀢𑀺𑀬𑀁 𑀲𑀓𑀼𑀡𑁆𑀟𑀓𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀫𑀽𑀮𑀨𑀮𑀫𑀢𑁆𑀢𑀢𑀦𑁆𑀢𑀸𑀦𑀺 𑀣𑀽𑀮𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑀺, 𑀧𑀡𑁆𑀡𑀙𑀢𑁆𑀢𑀁 𑀫𑀢𑁆𑀣𑀓𑁂 𑀥𑀸𑀭𑁂𑀢𑁆𑀯𑀸 𑀚𑀭𑀕𑁆𑀕𑁄𑀡𑀬𑀼𑀢𑁆𑀢𑁂𑀦 𑀚𑀚𑁆𑀚𑀭𑀭𑀣𑀓𑁂𑀦 𑀬𑀸𑀢𑀺. 𑀇𑀢𑀺 𑀢𑀲𑁆𑀲 𑀅𑀲𑀧𑁆𑀧𑀼𑀭𑀺𑀲𑀲𑁆𑀲 𑀢𑀢𑁆𑀢𑀓𑀁 ¶ 𑀥𑀦𑀁 𑀲𑀼𑀦𑀔𑁂𑀦 𑀮𑀤𑁆𑀥𑀁 𑀦𑀸𑀴𑀺𑀓𑁂𑀭𑀁 𑀯𑀺𑀬 𑀅𑀳𑁄𑀲𑀺.
𑀲𑁄 ¶ 𑀏𑀓𑀤𑀺𑀯𑀲𑀁 𑀭𑀸𑀚𑀽𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 ‘‘𑀅𑀦𑀼𑀲𑁂𑀝𑁆𑀞𑀺𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑀼𑀲𑁂𑀝𑁆𑀞𑀺 𑀧𑀼𑀢𑁆𑀢𑀥𑀻𑀢𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 𑀦𑀯𑀲𑀧𑁆𑀧𑀺𑀧𑀓𑁆𑀓𑀫𑀥𑀼𑀲𑀓𑁆𑀔𑀭𑀘𑀼𑀡𑁆𑀡𑁂𑀳𑀺 𑀲𑀗𑁆𑀔𑀢𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 ‘‘𑀏𑀳𑀺, 𑀫𑀳𑀸𑀲𑁂𑀝𑁆𑀞𑀺, 𑀇𑀫𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤, 𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀢𑀲𑁆𑀲 𑀧𑀸𑀬𑀸𑀲𑀁 𑀤𑀺𑀲𑁆𑀯𑀸𑀯 𑀫𑀼𑀔𑁂 𑀔𑁂𑀴𑀸 𑀉𑀧𑁆𑀧𑀚𑁆𑀚𑀺, 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀅𑀦𑀼𑀲𑁂𑀝𑁆𑀞𑀺𑀦𑁄 𑀫𑀫 𑀕𑁂𑀳𑀁 𑀆𑀕𑀢𑀓𑀸𑀮𑁂 𑀧𑀝𑀺𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀥𑀦𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 ‘‘𑀇𑀤𑀸𑀦𑀺 𑀫𑁂 𑀪𑀼𑀢𑁆𑀢𑀁, 𑀲𑀼𑀳𑀺𑀢𑁄𑀲𑁆𑀫𑀻’’𑀢𑀺 𑀦 𑀇𑀘𑁆𑀙𑀺. 𑀅𑀦𑀼𑀲𑁂𑀝𑁆𑀞𑀺𑀫𑁆𑀳𑀺 𑀪𑀼𑀜𑁆𑀚𑀦𑁆𑀢𑁂 𑀧𑀦 𑀑𑀮𑁄𑀓𑁂𑀦𑁆𑀢𑁄 𑀫𑀼𑀔𑁂 𑀲𑀜𑁆𑀚𑀸𑀬𑀫𑀸𑀦𑁂𑀦 𑀔𑁂𑀴𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀢𑁂𑀦 𑀲𑀤𑁆𑀥𑀺𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀢𑁄 𑀑𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀦𑀼𑀧𑁆𑀧𑀢𑁆𑀢𑁄 𑀧𑀸𑀬𑀸𑀲𑀢𑀡𑁆𑀳𑀸𑀬 𑀧𑀻𑀴𑀺𑀬𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 ‘𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑁄𑀫𑁆𑀳𑀻’𑀢𑀺 𑀯𑀓𑁆𑀔𑀸𑀫𑀺, 𑀫𑀳𑀸𑀚𑀦𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀩𑀳𑀽 𑀢𑀡𑁆𑀟𑀼𑀮𑀸𑀤𑀬𑁄 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀦 𑀓𑀲𑁆𑀲𑀘𑀺 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀭𑀢𑁆𑀢𑀺𑀦𑁆𑀤𑀺𑀯𑀁 𑀧𑀸𑀬𑀸𑀲𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄 𑀯𑀻𑀢𑀺𑀦𑀸𑀫𑁂𑀢𑁆𑀯𑀸𑀧𑀺 𑀥𑀦𑀦𑀸𑀲𑀦𑀪𑀬𑁂𑀦 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸𑀯 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑁂𑀲𑀺, 𑀅𑀦𑀼𑀓𑁆𑀓𑀫𑁂𑀦 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀅𑀳𑁄𑀲𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀥𑀦𑀦𑀸𑀲𑀦𑀪𑀬𑁂𑀦 𑀅𑀓𑀣𑁂𑀦𑁆𑀢𑁄 𑀅𑀧𑀭𑀪𑀸𑀕𑁂 𑀤𑀼𑀩𑁆𑀩𑀮𑁄 𑀳𑀼𑀢𑁆𑀯𑀸 𑀲𑀬𑀦𑀁 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺.
𑀅𑀣 𑀦𑀁 𑀪𑀭𑀺𑀬𑀸 𑀉𑀧𑀕𑀦𑁆𑀢𑁆𑀯𑀸 𑀳𑀢𑁆𑀣𑁂𑀦 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀫𑀸𑀦𑀸 ‘‘𑀓𑀺𑀁 𑀢𑁂, 𑀲𑀸𑀫𑀺, 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀢𑀯𑁂𑀯 𑀲𑀭𑀻𑀭𑁂 𑀅𑀨𑀸𑀲𑀼𑀓𑀁 𑀓𑀭𑁄𑀳𑀺, 𑀫𑀫 𑀅𑀨𑀸𑀲𑀼𑀓𑀁 𑀦𑀢𑁆𑀣𑀻’’𑀢𑀺. ‘‘𑀲𑀸𑀫𑀺, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄𑀲𑀺, 𑀓𑀺𑀁 𑀦𑀼 𑀢𑁂 𑀓𑀸𑀘𑀺 𑀘𑀺𑀦𑁆𑀢𑀸 𑀅𑀢𑁆𑀣𑀺, 𑀉𑀤𑀸𑀳𑀼 𑀭𑀸𑀚𑀸 𑀢𑁂 𑀓𑀼𑀧𑀺𑀢𑁄, 𑀅𑀤𑀼 𑀧𑀼𑀢𑁆𑀢𑁂𑀳𑀺 𑀅𑀯𑀫𑀸𑀦𑁄 𑀓𑀢𑁄, 𑀅𑀣 𑀯𑀸 𑀧𑀦 𑀓𑀸𑀘𑀺 𑀢𑀡𑁆𑀳𑀸 𑀉𑀧𑁆𑀧𑀦𑁆𑀦𑀸’’𑀢𑀺? ‘‘𑀆𑀫, 𑀢𑀡𑁆𑀳𑀸 𑀫𑁂 𑀉𑀧𑁆𑀧𑀦𑁆𑀦𑀸’’𑀢𑀺. ‘‘𑀓𑀣𑁂𑀳𑀺, 𑀲𑀸𑀫𑀻’’𑀢𑀺? ‘‘𑀓𑀣𑁂𑀲𑁆𑀲𑀸𑀫𑀺, 𑀲𑀓𑁆𑀔𑀺𑀲𑁆𑀲𑀲𑀺 𑀦𑀁 𑀭𑀓𑁆𑀔𑀺𑀢𑀼’’𑀦𑁆𑀢𑀺. ‘‘𑀭𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀸 𑀘𑁂, 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀫𑁆𑀧𑀺 ¶ 𑀥𑀦𑀦𑀸𑀲𑀦𑀪𑀬𑁂𑀦 𑀓𑀣𑁂𑀢𑀼𑀁 𑀦 𑀉𑀲𑁆𑀲𑀳𑀺. 𑀢𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀻𑀴𑀺𑀬𑀫𑀸𑀦𑁄 𑀓𑀣𑁂𑀲𑀺 𑁋 ‘‘𑀪𑀤𑁆𑀤𑁂, 𑀅𑀳𑀁 𑀏𑀓𑀤𑀺𑀯𑀲𑀁 𑀅𑀦𑀼𑀲𑁂𑀝𑁆𑀞𑀺𑀁 𑀦𑀯𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀘𑀼𑀡𑁆𑀡𑁂𑀳𑀺 𑀲𑀗𑁆𑀔𑀢𑀁 ¶ 𑀧𑀸𑀬𑀸𑀲𑀁 𑀪𑀼𑀜𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀸𑀤𑀺𑀲𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺. ‘‘𑀅𑀲𑀧𑁆𑀧𑀼𑀭𑀺𑀲, 𑀓𑀺𑀁 𑀢𑁆𑀯𑀁 𑀤𑀼𑀕𑁆𑀕𑀢𑁄, 𑀲𑀓𑀮𑀫𑀸𑀭𑀸𑀡𑀲𑀺𑀯𑀸𑀲𑀻𑀦𑀁 𑀧𑀳𑁄𑀦𑀓𑀁 𑀧𑀸𑀬𑀸𑀲𑀁 𑀧𑀘𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀲𑀻𑀲𑁂 𑀤𑀡𑁆𑀟𑁂𑀦 𑀧𑀳𑀭𑀡𑀓𑀸𑀮𑁄 ¶ 𑀯𑀺𑀬 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀚𑀸𑀦𑀸𑀫𑀳𑀁 𑀢𑀯 𑀫𑀳𑀤𑁆𑀥𑀦𑀪𑀸𑀯𑀁, 𑀲𑀘𑁂 𑀢𑁂 𑀓𑀼𑀮𑀖𑀭𑀸 𑀆𑀪𑀢𑀁 𑀅𑀢𑁆𑀣𑀺, 𑀧𑀸𑀬𑀸𑀲𑀁 𑀧𑀘𑀺𑀢𑁆𑀯𑀸 𑀦𑀸𑀕𑀭𑀸𑀦𑀁 𑀤𑁂𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀏𑀓𑀯𑀻𑀣𑀺𑀯𑀸𑀲𑀻𑀦𑀁 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀳𑀺, 𑀅𑀢𑁆𑀢𑀦𑁄 𑀧𑀦 𑀲𑀦𑁆𑀢𑀓𑀁 𑀔𑀸𑀤𑀦𑁆𑀢𑀽’’𑀢𑀺? ‘‘𑀢𑁂𑀦 𑀳𑀺 𑀇𑀢𑁄 𑀘𑀺𑀢𑁄 𑀘 𑀲𑀢𑁆𑀢𑀲𑀢𑁆𑀢𑀖𑀭𑀯𑀸𑀲𑀻𑀦𑀁 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀳𑀻’’𑀢𑀺. ‘‘𑀢𑁂𑀦 𑀳𑀺 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀧𑀭𑀺𑀚𑀦𑀲𑁆𑀲𑀸’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀦𑀸’’𑀢𑀺? ‘‘𑀢𑁂𑀦 𑀳𑀺 𑀩𑀦𑁆𑀥𑀼𑀚𑀦𑀲𑁆𑀲𑁂𑀯 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀦𑀸’’𑀢𑀺? ‘‘𑀢𑁂𑀦 𑀳𑀺 𑀢𑀼𑀬𑁆𑀳𑀜𑁆𑀘 𑀫𑀬𑁆𑀳𑀜𑁆𑀘 𑀧𑀘𑀸𑀫𑀺 𑀲𑀸𑀫𑀻’’𑀢𑀺. ‘‘𑀓𑀸𑀲𑀺 𑀢𑁆𑀯𑀁, 𑀦 𑀢𑀼𑀬𑁆𑀳𑀁 𑀯𑀝𑁆𑀝𑀢𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀲𑁆𑀲𑁂𑀯 𑀢𑁂 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀫𑀬𑁆𑀳𑀜𑁆𑀘 𑀢𑁆𑀯𑀁 𑀫𑀸 𑀧𑀘𑀺, 𑀕𑁂𑀳𑁂 𑀧𑀦 𑀧𑀘𑀦𑁆𑀢𑁂 𑀩𑀳𑀽 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀧𑀢𑁆𑀣𑀁 𑀢𑀡𑁆𑀟𑀼𑀮𑀸𑀦𑀁 𑀘𑀢𑀼𑀪𑀸𑀕𑀁 𑀔𑀻𑀭𑀲𑁆𑀲 𑀅𑀘𑁆𑀙𑀭𑀁 𑀲𑀓𑁆𑀔𑀭𑀸𑀬 𑀓𑀭𑀡𑁆𑀟𑀓𑀁 𑀲𑀧𑁆𑀧𑀺𑀲𑁆𑀲 𑀓𑀭𑀡𑁆𑀟𑀓𑀁 𑀫𑀥𑀼𑀲𑁆𑀲 𑀏𑀓𑀜𑁆𑀘 𑀧𑀘𑀦𑀪𑀸𑀚𑀦𑀁 𑀤𑁂𑀳𑀺, 𑀅𑀳𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀘𑀺𑀢𑁆𑀯𑀸 𑀪𑀼𑀜𑁆𑀚𑀸𑀫𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀲𑁄 𑀢𑀁 𑀲𑀩𑁆𑀩𑀁 𑀘𑁂𑀝𑀓𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙 𑀅𑀲𑀼𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀸𑀳𑀻’’𑀢𑀺 𑀢𑀁 𑀧𑀼𑀭𑀢𑁄 𑀧𑁂𑀲𑁂𑀢𑁆𑀯𑀸 𑀏𑀓𑀓𑁄𑀯 𑀑𑀕𑀼𑀡𑁆𑀞𑀺𑀓𑀁 𑀓𑀢𑁆𑀯𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀤𑀻𑀢𑀻𑀭𑁂 𑀏𑀓𑀲𑁆𑀫𑀺𑀁 𑀕𑀘𑁆𑀙𑀫𑀽𑀮𑁂 𑀉𑀤𑁆𑀥𑀦𑀁 𑀓𑀸𑀭𑁂𑀢𑁆𑀯𑀸 𑀤𑀸𑀭𑀼𑀤𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀢𑁆𑀯𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀕𑁆𑀕𑁂 𑀞𑀢𑁆𑀯𑀸 𑀓𑀜𑁆𑀘𑀺𑀤𑁂𑀯 𑀤𑀺𑀲𑁆𑀯𑀸 𑀫𑀫 𑀲𑀜𑁆𑀜𑀁 𑀤𑀤𑁂𑀬𑁆𑀬𑀸𑀲𑀺, 𑀫𑀬𑀸 𑀧𑀓𑁆𑀓𑁄𑀲𑀺𑀢𑀓𑀸𑀮𑁂𑀯 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀢𑀁 𑀧𑁂𑀲𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀧𑀸𑀬𑀸𑀲𑀁 𑀧𑀘𑀺.
𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀲𑀲𑀳𑀲𑁆𑀲𑀬𑁄𑀚𑀦𑀁 𑀅𑀮𑀗𑁆𑀓𑀢𑀤𑁂𑀯𑀦𑀕𑀭𑀁, 𑀲𑀝𑁆𑀞𑀺𑀬𑁄𑀚𑀦𑀁 ¶ 𑀲𑀼𑀯𑀡𑁆𑀡𑀯𑀻𑀣𑀺𑀁, 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀯𑁂𑀚𑀬𑀦𑁆𑀢𑀁, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀲𑀼𑀥𑀫𑁆𑀫𑀲𑀪𑀁, 𑀲𑀝𑁆𑀞𑀺𑀬𑁄𑀚𑀦𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁, 𑀧𑀜𑁆𑀘𑀬𑁄𑀚𑀦𑀸𑀯𑀝𑁆𑀝𑀁 𑀓𑀜𑁆𑀘𑀦𑀫𑀸𑀮𑀲𑁂𑀢𑀘𑁆𑀙𑀢𑁆𑀢𑀁, 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀲𑀗𑁆𑀔𑀸 𑀤𑁂𑀯𑀘𑁆𑀙𑀭𑀸, 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀅𑀢𑁆𑀢𑀪𑀸𑀯𑀦𑁆𑀢𑀺 𑀇𑀫𑀁 𑀅𑀢𑁆𑀢𑀦𑁄 𑀲𑀺𑀭𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀫𑀬𑀸 𑀅𑀬𑀁 𑀬𑀲𑁄 𑀮𑀤𑁆𑀥𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀺𑀪𑀽𑀢𑁂𑀦 𑀧𑀯𑀢𑁆𑀢𑀺𑀢𑀁 𑀤𑀸𑀦𑀁 𑀅𑀤𑁆𑀤𑀲. 𑀢𑀢𑁄 ‘‘𑀫𑀫 𑀧𑀼𑀢𑁆𑀢𑀸𑀤𑀬𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀧𑀼𑀢𑁆𑀢𑁄 𑀫𑁂 𑀘𑀦𑁆𑀤𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀽𑀭𑀺𑀬𑁄, 𑀢𑀲𑁆𑀲 𑀧𑀼𑀢𑁆𑀢𑁄, 𑀫𑀸𑀢𑀮𑀺, 𑀢𑀲𑁆𑀲 𑀧𑀼𑀢𑁆𑀢𑁄, 𑀧𑀜𑁆𑀘𑀲𑀺𑀔𑁄’’𑀢𑀺 𑀲𑀩𑁆𑀩𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀧𑀜𑁆𑀘𑀲𑀺𑀔𑀲𑁆𑀲 𑀧𑀼𑀢𑁆𑀢𑁄 𑀓𑀻𑀤𑀺𑀲𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀁𑀲𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀪𑀸𑀯𑀁 𑀧𑀲𑁆𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀫𑀘𑁆𑀙𑀭𑀻 𑀳𑀼𑀢𑁆𑀯𑀸 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺 ¶ , 𑀦 𑀧𑀭𑁂𑀲𑀁 𑀤𑁂𑀢𑀺, 𑀫𑀫 𑀯𑀁𑀲𑁄 𑀢𑁂𑀦 𑀉𑀧𑀘𑁆𑀙𑀺𑀦𑁆𑀦𑁄, 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀑𑀯𑀸𑀤𑀫𑀲𑁆𑀲 𑀤𑀢𑁆𑀯𑀸 𑀫𑀫 𑀯𑀁𑀲𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀢𑀲𑁆𑀲 𑀇𑀫𑀲𑁆𑀫𑀺𑀁 𑀤𑁂𑀯𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑀦𑀸𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀘𑀦𑁆𑀤𑀸𑀤𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀣 𑀫𑀦𑀼𑀲𑁆𑀲𑀧𑀣𑀁 𑀕𑀫𑀺𑀲𑁆𑀲𑀸𑀫, 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁂𑀦 𑀅𑀫𑁆𑀳𑀸𑀓𑀁 𑀯𑀁𑀲𑁄 𑀉𑀧𑀘𑁆𑀙𑀺𑀦𑁆𑀦𑁄 ¶ , 𑀤𑀸𑀦𑀲𑀸𑀮𑀸 𑀛𑀸𑀧𑀺𑀢𑀸, 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀦 𑀧𑀭𑁂𑀲𑀁 𑀤𑁂𑀢𑀺, 𑀇𑀤𑀸𑀦𑀺 𑀧𑀦 𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘𑀖𑀭𑁂 𑀧𑀘𑁆𑀘𑀦𑁆𑀢𑁂 𑀅𑀜𑁆𑀜𑀲𑁆𑀲𑀧𑀺 𑀧𑀸𑀬𑀸𑀲𑁄 𑀤𑀸𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀓𑁄𑀯 𑀧𑀘𑀢𑀺, 𑀏𑀢𑀁 𑀤𑀫𑁂𑀢𑁆𑀯𑀸 𑀤𑀸𑀦𑀨𑀮𑀁 𑀚𑀸𑀦𑀸𑀧𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫, 𑀅𑀧𑀺𑀘 𑀔𑁄 𑀧𑀦 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑀺 𑀏𑀓𑀢𑁄 𑀬𑀸𑀘𑀺𑀬𑀫𑀸𑀦𑁄 𑀢𑀢𑁆𑀣𑁂𑀯 𑀫𑀭𑁂𑀬𑁆𑀬. 𑀫𑀫 𑀧𑀞𑀫𑀁 𑀕𑀦𑁆𑀢𑁆𑀯𑀸 𑀧𑀸𑀬𑀸𑀲𑀁 𑀬𑀸𑀘𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀢𑀼𑀫𑁆𑀳𑁂 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀧𑀝𑀺𑀧𑀸𑀝𑀺𑀬𑀸 𑀆𑀕𑀦𑁆𑀢𑁆𑀯𑀸 𑀬𑀸𑀘𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀲𑀬𑀁 𑀢𑀸𑀯 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑁄, 𑀓𑀢𑀭𑁄 𑀩𑀸𑀭𑀸𑀡𑀲𑀺𑀕𑀫𑀦𑀫𑀕𑁆𑀕𑁄’’𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄 ‘‘𑀓𑀺𑀁 𑀉𑀫𑁆𑀫𑀢𑁆𑀢𑀓𑁄𑀲𑀺, 𑀩𑀸𑀭𑀸𑀡𑀲𑀺𑀫𑀕𑁆𑀕𑀫𑁆𑀧𑀺 𑀦 𑀚𑀸𑀦𑀸𑀲𑀺, 𑀓𑀺𑀁 𑀇𑀢𑁄 𑀏𑀲𑀺, 𑀏𑀢𑁆𑀢𑁄 𑀬𑀸𑀳𑀻’’𑀢𑀺 𑀆𑀳.
𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀲𑀼𑀡𑀦𑁆𑀢𑁄 𑀯𑀺𑀬 ‘‘𑀓𑀺𑀁 𑀓𑀣𑁂𑀲𑀻’’𑀢𑀺 𑀢𑀁 𑀉𑀧𑀕𑀘𑁆𑀙𑀢𑁂𑀯. 𑀲𑁄𑀧𑀺, ‘‘𑀅𑀭𑁂 ¶ , 𑀩𑀥𑀺𑀭 𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀇𑀢𑁄 𑀏𑀲𑀺, 𑀧𑀼𑀭𑀢𑁄 𑀬𑀸𑀳𑀻’’𑀢𑀺 𑀯𑀺𑀭𑀯𑀺. 𑀅𑀣 𑀦𑀁 𑀲𑀓𑁆𑀓𑁄, ‘‘𑀪𑁄, 𑀓𑀲𑁆𑀫𑀸 𑀯𑀺𑀭𑀯𑀲𑀺, 𑀥𑀽𑀫𑁄 𑀧𑀜𑁆𑀜𑀸𑀬𑀢𑀺, 𑀅𑀕𑁆𑀕𑀺 𑀧𑀜𑁆𑀜𑀸𑀬𑀢𑀺, 𑀧𑀸𑀬𑀸𑀲𑁄 𑀧𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀳𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀚𑀦𑀓𑀸𑀮𑁂 𑀣𑁄𑀓𑀁 𑀮𑀪𑀺𑀲𑁆𑀲𑀸𑀫𑀺, 𑀓𑀺𑀁 𑀫𑀁 𑀦𑀺𑀘𑁆𑀙𑀼𑀪𑀲𑀻’’𑀢𑀺 𑀯𑀢𑁆𑀯𑀸 ‘‘𑀦𑀢𑁆𑀣𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀫𑀦𑁆𑀢𑀦𑀁, 𑀧𑀼𑀭𑀢𑁄 𑀬𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀓𑀲𑁆𑀫𑀸 𑀓𑀼𑀚𑁆𑀛𑀲𑀺, 𑀢𑀯 𑀪𑁄𑀚𑀦𑀓𑀸𑀮𑁂 𑀣𑁄𑀓𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀲𑁄 ‘‘𑀅𑀳𑀁 𑀢𑁂 𑀏𑀓𑀲𑀺𑀢𑁆𑀣𑀫𑁆𑀧𑀺 𑀦 𑀤𑀲𑁆𑀲𑀸𑀫𑀺, 𑀣𑁄𑀓𑀁 𑀇𑀤𑀁 𑀫𑀫 𑀬𑀸𑀧𑀦𑀫𑀢𑁆𑀢𑀫𑁂𑀯, 𑀫𑀬𑀸𑀧𑀺 𑀘𑁂𑀢𑀁 𑀬𑀸𑀘𑀺𑀢𑁆𑀯𑀸𑀯 𑀮𑀤𑁆𑀥𑀁, 𑀢𑁆𑀯𑀁 𑀅𑀜𑁆𑀜𑀢𑁄 𑀆𑀳𑀸𑀭𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀪𑀭𑀺𑀬𑀁 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀪𑀸𑀯𑀁 𑀲𑀦𑁆𑀥𑀸𑀬𑁂𑀯 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀦𑁂𑀯 𑀓𑀺𑀡𑀸𑀫𑀺 𑀦𑀧𑀺 𑀯𑀺𑀓𑁆𑀓𑀺𑀡𑀸𑀫𑀺, 𑀦 𑀘𑀸𑀧𑀺 𑀫𑁂 𑀲𑀦𑁆𑀦𑀺𑀘𑀬𑁄 𑀘 𑀅𑀢𑁆𑀣𑀺;
𑀲𑀼𑀓𑀺𑀘𑁆𑀙𑀭𑀽𑀧𑀁 𑀯𑀢𑀺𑀤𑀁 𑀧𑀭𑀺𑀢𑁆𑀢𑀁, 𑀧𑀢𑁆𑀣𑁄𑀤𑀦𑁄 𑀦𑀸𑀮𑀫𑀬𑀁 𑀤𑀼𑀯𑀺𑀦𑁆𑀦’’𑀦𑁆𑀢𑀺.
𑀢𑀁 ¶ 𑀲𑀼𑀢𑁆𑀯𑀸 𑀲𑀓𑁆𑀓𑁄 ‘‘𑀅𑀳𑀫𑁆𑀧𑀺 𑀢𑁂 𑀫𑀥𑀼𑀭𑀲𑀤𑁆𑀤𑁂𑀦 𑀏𑀓𑀁 𑀲𑀺𑀮𑁄𑀓𑀁 𑀓𑀣𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 ‘‘𑀦 𑀫𑁂 𑀢𑀯 𑀲𑀺𑀮𑁄𑀓𑁂𑀦 𑀅𑀢𑁆𑀣𑁄’’𑀢𑀺 𑀢𑀲𑁆𑀲 𑀯𑀸𑀭𑁂𑀦𑁆𑀢𑀲𑁆𑀲𑁂𑀯 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀅𑀧𑁆𑀧𑀫𑁆𑀳𑀸 𑀅𑀧𑁆𑀧𑀓𑀁 𑀤𑀚𑁆𑀚𑀸, 𑀅𑀦𑀼𑀫𑀚𑁆𑀛𑀢𑁄 𑀫𑀚𑁆𑀛𑀓𑀁;
𑀩𑀳𑀼𑀫𑁆𑀳𑀸 𑀩𑀳𑀼𑀓𑀁 𑀤𑀚𑁆𑀚𑀸, 𑀅𑀤𑀸𑀦𑀁 𑀦𑀽𑀧𑀧𑀚𑁆𑀚𑀢𑀺.
‘‘𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;
𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀼𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔’’𑀦𑁆𑀢𑀺.
𑀢𑀢𑁆𑀣 ¶ 𑀅𑀦𑀼𑀫𑀚𑁆𑀛𑀢𑁄 𑀫𑀚𑁆𑀛𑀓𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀫𑀚𑁆𑀛𑁂 𑀙𑁂𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀭𑀺𑀢𑁆𑀯𑀸 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀤𑀢𑁆𑀯𑀸 𑀢𑀢𑁄 𑀅𑀯𑀲𑁂𑀲𑀢𑁄 𑀅𑀦𑀼𑀫𑀚𑁆𑀛𑀢𑁄𑀧𑀺 𑀧𑀼𑀦 𑀫𑀚𑁆𑀛𑁂 𑀙𑁂𑀢𑁆𑀯𑀸 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀤𑀸𑀢𑀩𑁆𑀩𑁄𑀬𑁂𑀯. 𑀅𑀤𑀸𑀦𑀁 𑀦𑀽𑀧𑀧𑀚𑁆𑀚𑀢𑀻𑀢𑀺 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑀺𑀦𑁆𑀦𑀁 𑀳𑁄𑀢𑀼, 𑀅𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀢𑀫𑁆𑀧𑀺 𑀤𑀸𑀦𑀫𑁂𑀯 𑀫𑀳𑀧𑁆𑀨𑀮𑀫𑁂𑀯.
𑀲𑁄 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀦𑀸𑀧𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀓𑀣𑀺𑀢𑀁, 𑀧𑀸𑀬𑀸𑀲𑁂 𑀧𑀓𑁆𑀓𑁂 𑀣𑁄𑀓𑀁 𑀮𑀪𑀺𑀲𑁆𑀲𑀲𑀺, 𑀦𑀺𑀲𑀻𑀤𑀸𑀳𑀻’’𑀢𑀺 𑀆𑀳. 𑀲𑀓𑁆𑀓𑁄 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀘𑀦𑁆𑀤𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀓𑀣𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀲𑁆𑀲 𑀯𑀸𑀭𑁂𑀦𑁆𑀢𑀲𑁆𑀲𑁂𑀯 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀫𑁄𑀖𑀜𑁆𑀘𑀲𑁆𑀲 𑀳𑀼𑀢𑀁 𑀳𑁄𑀢𑀺, 𑀫𑁄𑀖𑀜𑁆𑀘𑀸𑀧𑀺 𑀲𑀫𑀻𑀳𑀺𑀢𑀁;
𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀏𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.
𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;
𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀼𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔’’𑀦𑁆𑀢𑀺.
𑀢𑀢𑁆𑀣 𑀲𑀫𑀻𑀳𑀺𑀢𑀦𑁆𑀢𑀺 𑀥𑀦𑀼𑀧𑁆𑀧𑀸𑀤𑀦𑀯𑀻𑀭𑀺𑀬𑀁.
𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 ‘‘𑀢𑁂𑀦 𑀳𑀺 𑀦𑀺𑀲𑀻𑀤, 𑀣𑁄𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 𑀕𑀦𑁆𑀢𑁆𑀯𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀢𑁄 𑀲𑀽𑀭𑀺𑀬𑁄 𑀢𑁂𑀦𑁂𑀯 𑀦𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀓𑀣𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀲𑁆𑀲 𑀯𑀸𑀭𑁂𑀦𑁆𑀢𑀲𑁆𑀲𑁂𑀯 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀲𑀘𑁆𑀘𑀜𑁆𑀘𑀲𑁆𑀲 𑀳𑀼𑀢𑀁 𑀳𑁄𑀢𑀺, 𑀲𑀘𑁆𑀘𑀜𑁆𑀘𑀸𑀧𑀺 𑀲𑀫𑀻𑀳𑀺𑀢𑀁;
𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀦𑁂𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.
‘‘𑀢𑀁 ¶ 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;
𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀼𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔’’𑀦𑁆𑀢𑀺.
𑀢𑀲𑁆𑀲𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 ‘‘𑀢𑁂𑀦 𑀳𑀺 𑀦𑀺𑀲𑀻𑀤, 𑀣𑁄𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 𑀕𑀦𑁆𑀢𑁆𑀯𑀸 𑀘𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀫𑀸𑀢𑀮𑀺 𑀢𑁂𑀦𑁂𑀯 𑀦𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀓𑀣𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀲𑁆𑀲 𑀯𑀸𑀭𑁂𑀦𑁆𑀢𑀲𑁆𑀲𑁂𑀯 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀲𑀭𑀜𑁆𑀘 ¶ 𑀚𑀼𑀳𑀢𑀺 𑀧𑁄𑀲𑁄, 𑀩𑀳𑀼𑀓𑀸𑀬 𑀕𑀬𑀸𑀬 𑀘;
𑀤𑁄𑀡𑁂 𑀢𑀺𑀫𑁆𑀩𑀭𑀼𑀢𑀺𑀢𑁆𑀣𑀲𑁆𑀫𑀺𑀁, 𑀲𑀻𑀖𑀲𑁄𑀢𑁂 𑀫𑀳𑀸𑀯𑀳𑁂.
‘‘𑀅𑀢𑁆𑀭 𑀘𑀲𑁆𑀲 𑀳𑀼𑀢𑀁 𑀳𑁄𑀢𑀺, 𑀅𑀢𑁆𑀭 𑀘𑀲𑁆𑀲 𑀲𑀫𑀻𑀳𑀺𑀢𑀁;
𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀦𑁂𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.
‘‘𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;
𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀼𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔’’𑀦𑁆𑀢𑀺.
𑀢𑀸𑀲𑀁 𑀅𑀢𑁆𑀣𑁄 𑁋 𑀬𑁄 𑀧𑀼𑀭𑀺𑀲𑁄 ‘‘𑀦𑀸𑀕𑀬𑀓𑁆𑀔𑀸𑀤𑀻𑀦𑀁 𑀩𑀮𑀺𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀲𑀫𑀼𑀤𑁆𑀤𑀲𑁄𑀡𑁆𑀟𑀺𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀲𑀭𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀚𑀼𑀳𑀢𑀺, 𑀢𑀢𑁆𑀣 𑀩𑀮𑀺𑀓𑀫𑁆𑀫𑀁 𑀓𑀭𑁄𑀢𑀺 ¶ , 𑀢𑀣𑀸 𑀩𑀳𑀼𑀓𑀸𑀬 𑀦𑀤𑀺𑀬𑀸 𑀕𑀬𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀤𑁄𑀡𑀦𑀸𑀫𑀓𑁂 𑀘 𑀢𑀺𑀫𑁆𑀩𑀭𑀼𑀦𑀸𑀫𑀓𑁂 𑀘 𑀢𑀺𑀢𑁆𑀣𑁂 𑀲𑀻𑀖𑀲𑁄𑀢𑁂 𑀫𑀳𑀦𑁆𑀢𑁂 𑀯𑀸𑀭𑀺𑀯𑀳𑁂. 𑀅𑀢𑁆𑀭 𑀘𑀲𑁆𑀲𑀸𑀢𑀺 𑀬𑀤𑀺 𑀅𑀢𑁆𑀭𑀸𑀧𑀺 𑀏𑀢𑁂𑀲𑀼 𑀲𑀭𑀸𑀤𑀻𑀲𑀼 𑀅𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀼𑀢𑀜𑁆𑀘𑁂𑀯 𑀲𑀫𑀻𑀳𑀺𑀢𑀜𑁆𑀘 𑀳𑁄𑀢𑀺, 𑀲𑀨𑀮𑀁 𑀲𑀼𑀔𑀼𑀤𑁆𑀭𑀬𑀁 𑀲𑀫𑁆𑀧𑀚𑁆𑀚𑀢𑀺. 𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁 𑀦𑁂𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁, 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑁂𑀦 𑀢𑀁 𑀯𑀤𑀸𑀫𑀺 𑁋 𑀓𑁄𑀲𑀺𑀬, 𑀤𑀸𑀦𑀸𑀦𑀺 𑀘 𑀤𑁂𑀳𑀺, 𑀲𑀬𑀜𑁆𑀘 𑀪𑀼𑀜𑁆𑀚, 𑀅𑀭𑀺𑀬𑀸𑀦𑀁 𑀤𑀸𑀦𑀸𑀪𑀺𑀭𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀫𑀕𑁆𑀕𑀁 𑀅𑀪𑀺𑀭𑀼𑀳. 𑀦 𑀳𑀺 𑀏𑀓𑀸𑀲𑀻 𑀏𑀓𑁄𑀯 𑀪𑀼𑀜𑁆𑀚𑀫𑀸𑀦𑁄 𑀲𑀼𑀔𑀁 𑀦𑀸𑀫 𑀮𑀪𑀢𑀻𑀢𑀺.
𑀲𑁄 𑀢𑀲𑁆𑀲𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀢𑀓𑀽𑀝𑁂𑀦 𑀑𑀢𑁆𑀣𑀝𑁄 𑀯𑀺𑀬 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 ‘‘𑀢𑁂𑀦 𑀳𑀺 𑀦𑀺𑀲𑀻𑀤, 𑀣𑁄𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀫𑀸𑀢𑀮𑀺 𑀕𑀦𑁆𑀢𑁆𑀯𑀸 𑀲𑀽𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀢𑁄 𑀧𑀜𑁆𑀘𑀲𑀺𑀔𑁄 𑀢𑁂𑀦𑁂𑀯 𑀦𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑁂𑀯 𑀓𑀣𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑀲𑁆𑀲 𑀯𑀸𑀭𑁂𑀦𑁆𑀢𑀲𑁆𑀲𑁂𑀯 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀩𑀴𑀺𑀲𑀜𑁆𑀳𑀺 ¶ 𑀲𑁄 𑀦𑀺𑀕𑀺𑀮𑀢𑀺, 𑀤𑀻𑀖𑀲𑀼𑀢𑁆𑀢𑀁 𑀲𑀩𑀦𑁆𑀥𑀦𑀁;
𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀏𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.
‘‘𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;
𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀼𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔’’𑀦𑁆𑀢𑀺.
𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄 𑀢𑀁 𑀲𑀼𑀢𑁆𑀯𑀸 𑀤𑀼𑀓𑁆𑀔𑀯𑁂𑀤𑀦𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 ‘‘𑀢𑁂𑀦 𑀳𑀺 𑀦𑀺𑀲𑀻𑀤, 𑀣𑁄𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀧𑀜𑁆𑀘𑀲𑀺𑀔𑁄 𑀕𑀦𑁆𑀢𑁆𑀯𑀸 𑀫𑀸𑀢𑀮𑀺𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀇𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 ¶ 𑀦𑀺𑀲𑀺𑀦𑁆𑀦𑀫𑀢𑁆𑀢𑁂𑀲𑁆𑀯𑁂𑀯 𑀧𑀸𑀬𑀸𑀲𑁄 𑀧𑀘𑁆𑀘𑀺. 𑀅𑀣 𑀦𑀁 𑀓𑁄𑀲𑀺𑀬𑁄 𑀉𑀤𑁆𑀥𑀦𑀸 𑀑𑀢𑀸𑀭𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀸𑀦𑀺 𑀆𑀳𑀭𑀣𑀸’’𑀢𑀺 𑀆𑀳. 𑀢𑁂 𑀅𑀦𑀼𑀝𑁆𑀞𑀸𑀬 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀢𑁄 𑀫𑀸𑀮𑀼𑀯𑀧𑀢𑁆𑀢𑀸𑀦𑀺 𑀆𑀳𑀭𑀺𑀁𑀲𑀼. 𑀓𑁄𑀲𑀺𑀬𑁄 𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀏𑀢𑁂𑀲𑀼 𑀧𑀢𑁆𑀢𑁂𑀲𑀼 𑀤𑀸𑀢𑀩𑁆𑀩𑀧𑀸𑀬𑀸𑀲𑁄 𑀦𑀢𑁆𑀣𑀺, 𑀔𑀤𑀺𑀭𑀸𑀤𑀻𑀦𑀁 𑀧𑀢𑁆𑀢𑀸𑀦𑀺 𑀆𑀳𑀭𑀣𑀸’’𑀢𑀺 𑀆𑀳. 𑀢𑁂 𑀢𑀸𑀦𑀺𑀧𑀺 𑀆𑀳𑀭𑀺𑀁𑀲𑀼. 𑀏𑀓𑁂𑀓𑀁 𑀧𑀢𑁆𑀢𑀁 𑀬𑁄𑀥𑀨𑀮𑀓𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀲𑁄 𑀲𑀩𑁆𑀩𑁂𑀲𑀁 𑀤𑀩𑁆𑀩𑀺𑀬𑀸 𑀧𑀸𑀬𑀸𑀲𑀁 𑀅𑀤𑀸𑀲𑀺, 𑀲𑀩𑁆𑀩𑀦𑁆𑀢𑀺𑀫𑀲𑁆𑀲 𑀤𑀸𑀦𑀓𑀸𑀮𑁂𑀧𑀺 𑀉𑀓𑁆𑀔𑀮𑀺𑀬𑀸 𑀊𑀦𑀁 𑀦 𑀧𑀜𑁆𑀜𑀸𑀬𑀺, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀤𑀢𑁆𑀯𑀸 𑀲𑀬𑀁 𑀉𑀓𑁆𑀔𑀮𑀺𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀧𑀜𑁆𑀘𑀲𑀺𑀔𑁄 𑀉𑀝𑁆𑀞𑀸𑀬 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀧𑀼𑀭𑀢𑁄 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑁄 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀧𑀸𑀬𑀸𑀲𑀁 𑀧𑀢𑁆𑀢𑁂𑀦 𑀧𑀺𑀤𑀳𑀺𑀁𑀲𑀼. 𑀓𑁄𑀲𑀺𑀬𑀲𑁆𑀲 𑀳𑀢𑁆𑀣𑀧𑀺𑀝𑁆𑀞𑁂 𑀧𑀲𑁆𑀲𑀸𑀯𑀩𑀺𑀦𑁆𑀤𑀼 𑀧𑀢𑀺. 𑀩𑁆𑀭𑀸𑀳𑁆𑀫𑀡𑀸 ¶ 𑀓𑀼𑀡𑁆𑀟𑀺𑀓𑀸𑀳𑀺 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑀁 𑀅𑀩𑁆𑀪𑀼𑀓𑀺𑀭𑀺𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀸 𑀯𑀺𑀬 𑀅𑀳𑁂𑀲𑀼𑀁. 𑀓𑁄𑀲𑀺𑀬𑁄 ‘‘𑀫𑀬𑁆𑀳𑀫𑁆𑀧𑀺 𑀉𑀤𑀓𑀁 𑀤𑁂𑀣, 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑀯 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀸’’𑀢𑀺. ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀧𑀸𑀬𑀸𑀲𑁄 𑀤𑀺𑀦𑁆𑀦𑁄, 𑀫𑀬𑁆𑀳𑀁 𑀣𑁄𑀓𑀁 𑀉𑀤𑀓𑀁 𑀤𑁂𑀣𑀸’’𑀢𑀺. ‘‘𑀫𑀬𑀁 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑀫𑁆𑀫𑀁 𑀦𑀸𑀫 𑀦 𑀓𑀭𑁄𑀫𑀸’’𑀢𑀺. ‘‘𑀢𑁂𑀦 𑀳𑀺 𑀇𑀫𑀁 𑀉𑀓𑁆𑀔𑀮𑀺𑀁 𑀑𑀮𑁄𑀓𑁂𑀣, 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀺𑀁 𑀑𑀢𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀼𑀦𑀔𑁄 𑀉𑀓𑁆𑀔𑀮𑀺𑀁 𑀧𑀲𑁆𑀲𑀸𑀯𑀲𑁆𑀲 𑀧𑀽𑀭𑁂𑀲𑀺. 𑀲𑁄 𑀢𑀁 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀦𑁆𑀢𑀁 𑀤𑀡𑁆𑀟𑀫𑀸𑀤𑀸𑀬 𑀢𑀁 𑀢𑀚𑁆𑀚𑁂𑀦𑁆𑀢𑁄 𑀆𑀕𑀘𑁆𑀙𑀺. 𑀲𑁄 𑀅𑀲𑁆𑀲𑀸𑀚𑀸𑀦𑀻𑀬𑀫𑀢𑁆𑀢𑁄 𑀳𑀼𑀢𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀸𑀦𑀸𑀯𑀡𑁆𑀡𑁄 𑀅𑀳𑁄𑀲𑀺, 𑀓𑀸𑀴𑁄𑀧𑀺 𑀳𑁄𑀢𑀺 𑀲𑁂𑀢𑁄𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀩𑀭𑁄𑀧𑀺 𑀉𑀘𑁆𑀘𑁄𑀧𑀺 𑀦𑀻𑀘𑁄𑀧𑀺, 𑀏𑀯𑀁 𑀦𑀸𑀦𑀸𑀯𑀡𑁆𑀡𑁄 𑀳𑀼𑀢𑁆𑀯𑀸 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀁 𑀅𑀦𑀼𑀩𑀦𑁆𑀥𑀺. 𑀲𑁄 𑀫𑀭𑀡𑀪𑀬𑀪𑀻𑀢𑁄 𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺. 𑀢𑁂𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑀸. 𑀲𑁄 𑀢𑁂𑀲𑀁 𑀢𑀁 𑀇𑀤𑁆𑀥𑀺𑀁 𑀤𑀺𑀲𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀉𑀴𑀸𑀭𑀯𑀡𑁆𑀡𑀸 ¶ 𑀯𑀢 𑀩𑁆𑀭𑀸𑀳𑁆𑀫𑀡𑀸 𑀇𑀫𑁂, 𑀅𑀬𑀜𑁆𑀘 𑀯𑁄 𑀲𑀼𑀦𑀔𑁄 𑀓𑀺𑀲𑁆𑀲 𑀳𑁂𑀢𑀼;
𑀉𑀘𑁆𑀘𑀸𑀯𑀘𑀁 𑀯𑀡𑁆𑀡𑀦𑀺𑀪𑀁 𑀯𑀺𑀓𑀼𑀩𑁆𑀩𑀢𑀺, 𑀅𑀓𑁆𑀔𑀸𑀣 𑀦𑁄 𑀩𑁆𑀭𑀸𑀳𑁆𑀫𑀡𑀸 𑀓𑁂 𑀦𑀼 𑀢𑀼𑀫𑁆𑀳𑁂’’𑀢𑀺.
𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑁋
‘‘𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀉𑀪𑁄 𑀇𑀥𑀸𑀕𑀢𑀸, 𑀅𑀬𑀁 𑀧𑀦 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;
𑀲𑀓𑁆𑀓𑁄𑀳𑀫𑀲𑁆𑀫𑀺 𑀢𑀺𑀤𑀲𑀸𑀦𑀫𑀺𑀦𑁆𑀤𑁄; 𑀏𑀲𑁄 𑀘 𑀔𑁄 𑀧𑀜𑁆𑀘𑀲𑀺𑀔𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.
𑀕𑀸𑀣𑀁 𑀯𑀢𑁆𑀯𑀸 𑀢𑀲𑁆𑀲 𑀬𑀲𑀁 𑀯𑀡𑁆𑀡𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀧𑀸𑀡𑀺𑀲𑁆𑀲𑀭𑀸 ¶ 𑀫𑀼𑀤𑀺𑀗𑁆𑀕𑀸 𑀘, 𑀫𑀼𑀭𑀚𑀸𑀮𑀫𑁆𑀩𑀭𑀸𑀦𑀺 𑀘;
𑀲𑀼𑀢𑁆𑀢𑀫𑁂𑀦𑀁 𑀧𑀩𑁄𑀥𑁂𑀦𑁆𑀢𑀺, 𑀧𑀝𑀺𑀩𑀼𑀤𑁆𑀥𑁄 𑀘 𑀦𑀦𑁆𑀤𑀢𑀻’’𑀢𑀺.
𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀓𑁆𑀓, 𑀏𑀯𑀭𑀽𑀧𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀮𑀪𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑀓𑁆𑀓𑁄 ‘‘𑀅𑀤𑀸𑀦𑀲𑀻𑀮𑀸 𑀢𑀸𑀯 𑀧𑀸𑀧𑀥𑀫𑁆𑀫𑀸 𑀫𑀘𑁆𑀙𑀭𑀺𑀦𑁄 𑀤𑁂𑀯𑀮𑁄𑀓𑀁 𑀦 𑀕𑀘𑁆𑀙𑀦𑁆𑀢𑀺, 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋
‘‘𑀬𑁂 ¶ 𑀓𑁂𑀘𑀺𑀫𑁂 𑀫𑀘𑁆𑀙𑀭𑀺𑀦𑁄 𑀓𑀤𑀭𑀺𑀬𑀸, 𑀧𑀭𑀺𑀪𑀸𑀲𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;
𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀻’’𑀢𑀺. 𑁋
𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀥𑀫𑁆𑀫𑁂 𑀞𑀺𑀢𑀸𑀦𑀁 𑀤𑁂𑀯𑀮𑁄𑀓𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳 𑁋
‘‘𑀬𑁂 𑀓𑁂𑀘𑀺𑀫𑁂 𑀲𑀼𑀕𑁆𑀕𑀢𑀺𑀫𑀸𑀲𑀫𑀸𑀦𑀸, 𑀥𑀫𑁆𑀫𑁂 𑀞𑀺𑀢𑀸 𑀲𑀁𑀬𑀫𑁂 𑀲𑀁𑀯𑀺𑀪𑀸𑀕𑁂;
𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀻’’𑀢𑀺.
𑀢𑀢𑁆𑀣 𑀆𑀲𑀫𑀸𑀦𑀸𑀢𑀺 𑀆𑀲𑀻𑀲𑀦𑁆𑀢𑀸. 𑀬𑁂 𑀓𑁂𑀘𑀺 𑀲𑀼𑀕𑀢𑀺𑀁 𑀆𑀲𑀻𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀲𑀁𑀬𑀫𑀲𑀗𑁆𑀔𑀸𑀢𑁂 𑀤𑀲𑀲𑀻𑀮𑀥𑀫𑁆𑀫𑁂 𑀲𑀁𑀯𑀺𑀪𑀸𑀕𑀲𑀗𑁆𑀔𑀸𑀢𑁂 𑀤𑀸𑀦𑀥𑀫𑁆𑀫𑁂 𑀘 𑀞𑀺𑀢𑀸 ¶ 𑀳𑀼𑀢𑁆𑀯𑀸 𑀇𑀥 𑀲𑀭𑀻𑀭𑀲𑀗𑁆𑀔𑀸𑀢𑀁 𑀤𑁂𑀳𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.
𑀏𑀯𑀁 𑀯𑀢𑁆𑀯𑀸 𑀘 𑀧𑀦, ‘‘𑀓𑁄𑀲𑀺𑀬, 𑀦 𑀫𑀬𑀁 𑀢𑀯 𑀲𑀦𑁆𑀢𑀺𑀓𑁂 𑀧𑀸𑀬𑀸𑀲𑀢𑁆𑀣𑀸𑀬 𑀆𑀕𑀢𑀸, 𑀓𑀸𑀭𑀼𑀜𑁆𑀜𑁂𑀦 𑀧𑀦 𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑀸 𑀆𑀕𑀢𑀸𑀫𑁆𑀳𑀸’’𑀢𑀺 𑀢𑀲𑁆𑀲 𑀧𑀓𑀸𑀲𑁂𑀢𑀼𑀁 𑀆𑀳 𑁋
‘‘𑀢𑁆𑀯𑀁 𑀦𑁄𑀲𑀺 𑀜𑀸𑀢𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀺𑀲𑀼, 𑀲𑁄 𑀫𑀘𑁆𑀙𑀭𑀻 𑀭𑁄𑀲𑀓𑁄 𑀧𑀸𑀧𑀥𑀫𑁆𑀫𑁄;
𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀫𑁆𑀳𑀸, 𑀫𑀸 𑀧𑀸𑀧𑀥𑀫𑁆𑀫𑁄 𑀦𑀺𑀭𑀬𑀁 𑀕𑀫𑀺𑀢𑁆𑀣𑀸’’𑀢𑀺.
𑀢𑀢𑁆𑀣 𑀲𑁄𑀢𑀺 𑀲𑁄 𑀢𑁆𑀯𑀁. 𑀫𑀸 𑀧𑀸𑀧𑀥𑀫𑁆𑀫𑁄𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀜𑀸𑀢𑀺 𑀧𑀸𑀧𑀥𑀫𑁆𑀫𑁄 𑀫𑀸 𑀦𑀺𑀭𑀬𑀁 𑀅𑀕𑀫𑀸𑀢𑀺 𑀏𑀢𑀤𑀢𑁆𑀣𑀁 𑀆𑀕𑀢𑀫𑁆𑀳𑀸𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀓𑁄𑀲𑀺𑀬𑁄 ‘‘𑀅𑀢𑁆𑀣𑀓𑀸𑀫𑀸 𑀓𑀺𑀭 𑀫𑁂, 𑀏𑀢𑁂 𑀫𑀁 𑀦𑀺𑀭𑀬𑀸 𑀉𑀤𑁆𑀥𑀭𑀺𑀢𑁆𑀯𑀸 𑀲𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀸’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀆𑀳 𑁋
‘‘𑀅𑀤𑁆𑀥𑀸 ¶ 𑀫𑀁 𑀯𑁄 𑀳𑀺𑀢𑀓𑀸𑀫𑀸, 𑀬𑀁 𑀫𑀁 𑀲𑀫𑀦𑀼𑀲𑀸𑀲𑀣;
𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀲𑀩𑁆𑀩𑀁 𑀯𑀼𑀢𑁆𑀢𑀁 𑀳𑀺𑀢𑁂𑀲𑀺𑀪𑀺.
‘‘𑀏𑀲𑀸𑀳𑀫𑀚𑁆𑀚𑁂𑀯 𑀉𑀧𑀭𑀫𑀸𑀫𑀺, 𑀦 𑀘𑀸𑀳𑀁 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬 𑀧𑀸𑀧𑀁;
𑀦 ¶ 𑀘𑀸𑀧𑀺 𑀫𑁂 𑀓𑀺𑀜𑁆𑀘𑀺 𑀅𑀤𑁂𑀬𑁆𑀬𑀫𑀢𑁆𑀣𑀺, 𑀦 𑀘𑀸𑀧𑀺𑀤𑀢𑁆𑀯𑀸 𑀉𑀤𑀓𑀁 𑀧𑀺𑀯𑀸𑀫𑀺.
‘‘𑀏𑀯𑀜𑁆𑀘 𑀫𑁂 𑀤𑀤𑀢𑁄 𑀲𑀩𑁆𑀩𑀓𑀸𑀮𑀁, 𑀪𑁄𑀕𑀸 𑀇𑀫𑁂 𑀯𑀸𑀲𑀯 𑀔𑀻𑀬𑀺𑀲𑁆𑀲𑀦𑁆𑀢𑀺;
𑀢𑀢𑁄 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀲𑀓𑁆𑀓, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀻’’𑀢𑀺.
𑀢𑀢𑁆𑀣 𑀫𑀦𑁆𑀢𑀺 𑀫𑀫. 𑀯𑁄𑀢𑀺 𑀢𑀼𑀫𑁆𑀳𑁂. 𑀬𑀁 𑀫𑀦𑁆𑀢𑀺 𑀬𑁂𑀦 𑀫𑀁 𑀲𑀫𑀦𑀼𑀲𑀸𑀲𑀣, 𑀢𑁂𑀦 𑀫𑁂 𑀢𑀼𑀫𑁆𑀳𑁂 𑀳𑀺𑀢𑀓𑀸𑀫𑀸. 𑀢𑀣𑀸𑀢𑀺 𑀬𑀣𑀸 𑀯𑀤𑀣, 𑀢𑀣𑁂𑀯 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀭𑀫𑀸𑀫𑀻𑀢𑀺 𑀫𑀘𑁆𑀙𑀭𑀺𑀪𑀸𑀯𑀢𑁄 𑀉𑀧𑀭𑀫𑀸𑀫𑀺. 𑀅𑀤𑁂𑀬𑁆𑀬𑀫𑀢𑁆𑀣𑀻𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀘 𑀫𑀫 𑀆𑀮𑁄𑀧𑀢𑁄 𑀉𑀧𑀟𑁆𑀠𑀫𑁆𑀧𑀺 𑀅𑀤𑁂𑀬𑁆𑀬𑀁 𑀦𑀸𑀫 𑀦𑀢𑁆𑀣𑀺, 𑀦 𑀘𑀸𑀧𑀺𑀤𑀢𑁆𑀯𑀸𑀢𑀺 𑀉𑀤𑀓𑀧𑀲𑀢𑀫𑁆𑀧𑀺 ¶ 𑀘𑀸𑀳𑀁 𑀮𑀪𑀺𑀢𑁆𑀯𑀸 𑀅𑀤𑀢𑁆𑀯𑀸 𑀦 𑀧𑀺𑀯𑀺𑀲𑁆𑀲𑀸𑀫𑀺. 𑀔𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀓𑁆𑀔𑀻𑀬𑀺𑀲𑁆𑀲𑀦𑁆𑀢𑀺. 𑀬𑀣𑁄𑀥𑀺𑀓𑀸𑀦𑀻𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀬𑀣𑀸𑀞𑀺𑀢𑀓𑁄𑀝𑁆𑀞𑀸𑀲𑀸𑀦𑀺𑀬𑁂𑀯.
𑀲𑀓𑁆𑀓𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀤𑀸𑀦𑀨𑀮𑀁 𑀚𑀸𑀦𑀸𑀧𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀢𑁂𑀳𑀺 𑀤𑁂𑀯𑀦𑀕𑀭𑀫𑁂𑀯 𑀕𑀢𑁄. 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄𑀧𑀺 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 ‘‘𑀕𑀳𑀺𑀢𑀕𑀳𑀺𑀢𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀬𑀸𑀘𑀓𑀸𑀦𑀁 𑀥𑀦𑀁 𑀤𑀢𑁆𑀯𑀸 𑀢𑀲𑁆𑀫𑀺𑀁 𑀔𑀻𑀡𑁂 𑀦𑀺𑀓𑁆𑀔𑀫𑁆𑀫 𑀳𑀺𑀫𑀯𑀦𑁆𑀢𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀕𑀗𑁆𑀕𑀸𑀬 𑀘𑁂𑀯 𑀏𑀓𑀲𑁆𑀲 𑀘 𑀚𑀸𑀢𑀲𑁆𑀲𑀭𑀲𑁆𑀲 𑀅𑀦𑁆𑀢𑀭𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀢𑀢𑁆𑀣 𑀘𑀺𑀭𑀁 𑀯𑀺𑀳𑀸𑀲𑀺, 𑀚𑀭𑀁 𑀧𑀸𑀧𑀼𑀡𑀺. 𑀢𑀤𑀸 𑀲𑀓𑁆𑀓𑀲𑁆𑀲 𑀆𑀲𑀸 𑀲𑀤𑁆𑀥𑀸 𑀲𑀺𑀭𑀻 𑀳𑀺𑀭𑀻𑀢𑀺 𑀘𑀢𑀲𑁆𑀲𑁄 𑀥𑀻𑀢𑀭𑁄 𑀳𑁄𑀦𑁆𑀢𑀺. 𑀢𑀸 𑀩𑀳𑀼𑀁 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀉𑀤𑀓𑀓𑀻𑀴𑀦𑀢𑁆𑀣𑀸𑀬 𑀅𑀦𑁄𑀢𑀢𑁆𑀢𑀤𑀳𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀓𑀻𑀴𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀦𑀸𑀭𑀤𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀢𑀸𑀧𑀲𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑁂𑀲𑀼 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀙𑀢𑁆𑀢𑀁 𑀯𑀺𑀬 𑀙𑀸𑀬𑀢𑁆𑀣𑀸𑀬 𑀥𑀸𑀭𑀬𑀫𑀸𑀦𑁄 𑀫𑀦𑁄𑀲𑀺𑀮𑀸𑀢𑀮𑀫𑀢𑁆𑀣𑀓𑁂𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀓𑀜𑁆𑀘𑀦𑀕𑀼𑀳𑀁 𑀕𑀘𑁆𑀙𑀢𑀺. 𑀅𑀣 𑀢𑀸 𑀢𑀲𑁆𑀲 𑀳𑀢𑁆𑀣𑁂 𑀢𑀁 𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀬𑀸𑀘𑀺𑀁𑀲𑀼. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀦𑀕𑀼𑀢𑁆𑀢𑀫𑁂 𑀕𑀺𑀭𑀺𑀯𑀭𑁂 𑀕𑀦𑁆𑀥𑀫𑀸𑀤𑀦𑁂, 𑀫𑁄𑀤𑀦𑁆𑀢𑀺 𑀢𑀸 𑀤𑁂𑀯𑀯𑀭𑀸𑀪𑀺𑀧𑀸𑀮𑀺𑀢𑀸;
𑀅𑀣𑀸𑀕𑀫𑀸 𑀇𑀲𑀺𑀯𑀭𑁄 𑀲𑀩𑁆𑀩𑀮𑁄𑀓𑀕𑀽, 𑀲𑀼𑀧𑀼𑀧𑁆𑀨𑀺𑀢𑀁 𑀤𑀼𑀫𑀯𑀭𑀲𑀸𑀔𑀫𑀸𑀤𑀺𑀬.
‘‘𑀲𑀼𑀘𑀺𑀁 ¶ 𑀲𑀼𑀕𑀦𑁆𑀥𑀁 𑀢𑀺𑀤𑀲𑁂𑀳𑀺 𑀲𑀓𑁆𑀓𑀢𑀁, 𑀧𑀼𑀧𑁆𑀨𑀼𑀢𑁆𑀢𑀫𑀁 𑀅𑀫𑀭𑀯𑀭𑁂𑀳𑀺 𑀲𑁂𑀯𑀺𑀢𑀁;
𑀅𑀮𑀤𑁆𑀥 𑀫𑀘𑁆𑀘𑁂𑀳𑀺𑀯 𑀤𑀸𑀦𑀯𑁂𑀳𑀺 𑀯𑀸, 𑀅𑀜𑁆𑀜𑀢𑁆𑀭 𑀤𑁂𑀯𑁂𑀳𑀺 𑀢𑀤𑀸𑀭𑀳𑀁 𑀳𑀺𑀤𑀁.
‘‘𑀢𑀢𑁄 ¶ 𑀘𑀢𑀲𑁆𑀲𑁄 𑀓𑀦𑀓𑀢𑁆𑀢𑀘𑀽𑀧𑀫𑀸, 𑀉𑀝𑁆𑀞𑀸𑀬 𑀦𑀸𑀭𑀺𑀬𑁄 𑀧𑀫𑀤𑀸𑀥𑀺𑀧𑀸 𑀫𑀼𑀦𑀺𑀁;
𑀆𑀲𑀸 𑀘 𑀲𑀤𑁆𑀥𑀸 𑀘 𑀲𑀺𑀭𑀻 𑀢𑀢𑁄 𑀳𑀺𑀭𑀻, 𑀇𑀘𑁆𑀘𑀩𑁆𑀭𑀯𑀼𑀁 𑀦𑀸𑀭𑀤𑀤𑁂𑀯 𑀩𑁆𑀭𑀸𑀳𑁆𑀫𑀡𑀁.
‘‘𑀲𑀘𑁂 𑀅𑀦𑀼𑀤𑁆𑀤𑀺𑀝𑁆𑀞𑀁 𑀢𑀬𑀸 𑀫𑀳𑀸𑀫𑀼𑀦𑀺, 𑀧𑀼𑀧𑁆𑀨𑀁 𑀇𑀫𑀁 𑀧𑀸𑀭𑀺𑀙𑀢𑁆𑀢𑀲𑁆𑀲 𑀩𑁆𑀭𑀫𑁆𑀳𑁂;
𑀤𑀤𑀸𑀳𑀺 𑀦𑁄 𑀲𑀩𑁆𑀩𑀸 𑀕𑀢𑀺 𑀢𑁂 𑀇𑀚𑁆𑀛𑀢𑀼, 𑀢𑀼𑀯𑀫𑁆𑀧𑀺 𑀦𑁄 𑀳𑁄𑀳𑀺 𑀬𑀣𑁂𑀯 𑀯𑀸𑀲𑀯𑁄.
‘‘𑀢𑀁 𑀬𑀸𑀘𑀫𑀸𑀦𑀸𑀪𑀺𑀲𑀫𑁂𑀓𑁆𑀔 𑀦𑀸𑀭𑀤𑁄, 𑀇𑀘𑁆𑀘𑀩𑁆𑀭𑀯𑀻 𑀲𑀁𑀓𑀮𑀳𑀁 𑀉𑀤𑀻𑀭𑀬𑀺;
𑀦 𑀫𑀬𑁆𑀳𑀫𑀢𑁆𑀣𑀢𑁆𑀣𑀺 𑀇𑀫𑁂𑀳𑀺 𑀓𑁄𑀘𑀺 𑀦𑀁, 𑀬𑀸𑀬𑁂𑀯 𑀯𑁄 𑀲𑁂𑀬𑁆𑀬𑀲𑀺 𑀲𑀸 𑀧𑀺𑀴𑀦𑁆𑀥𑀣𑀸’’𑀢𑀺.
𑀢𑀢𑁆𑀣 𑀕𑀺𑀭𑀺𑀯𑀭𑁂𑀢𑀺 𑀧𑀼𑀭𑀺𑀫𑀲𑁆𑀲 𑀯𑁂𑀯𑀘𑀦𑀁. 𑀤𑁂𑀯𑀯𑀭𑀸𑀪𑀺𑀧𑀸𑀮𑀺𑀢𑀸𑀢𑀺 𑀲𑀓𑁆𑀓𑁂𑀦 𑀭𑀓𑁆𑀔𑀺𑀢𑀸. 𑀲𑀩𑁆𑀩𑀮𑁄𑀓𑀕𑀽𑀢𑀺 𑀤𑁂𑀯𑀮𑁄𑀓𑁂 𑀘 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀲𑀩𑁆𑀩𑀢𑁆𑀣 𑀕𑀫𑀦𑀲𑀫𑀢𑁆𑀣𑁄. 𑀤𑀼𑀫𑀯𑀭𑀲𑀸𑀔𑀫𑀸𑀤𑀺𑀬𑀸𑀢𑀺 𑀲𑀸𑀔𑀸𑀬 𑀚𑀸𑀢𑀢𑁆𑀢𑀸 𑀤𑀼𑀫𑀯𑀭𑀲𑀸𑀔𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸. 𑀲𑀓𑁆𑀓𑀢𑀦𑁆𑀢𑀺 𑀓𑀢𑀲𑀓𑁆𑀓𑀸𑀭𑀁. 𑀅𑀫𑀭𑀯𑀭𑁂𑀳𑀻𑀢𑀺 𑀲𑀓𑁆𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀭 𑀤𑁂𑀯𑁂𑀳𑀻𑀢𑀺 𑀞𑀧𑁂𑀢𑁆𑀯𑀸 𑀤𑁂𑀯𑁂 𑀘 𑀇𑀤𑁆𑀥𑀺𑀫𑀦𑁆𑀢𑁂 𑀘 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀯𑀸 𑀬𑀓𑁆𑀔𑀸𑀤𑀻𑀳𑀺 𑀯𑀸 𑀅𑀮𑀤𑁆𑀥𑀁. 𑀢𑀤𑀸𑀭𑀳𑀁 𑀳𑀺𑀤𑀦𑁆𑀢𑀺 𑀢𑁂𑀲𑀁𑀬𑁂𑀯 𑀳𑀺 𑀢𑀁 𑀅𑀭𑀳𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀓𑀦𑀓𑀢𑁆𑀢𑀘𑀽𑀧𑀫𑀸𑀢𑀺 𑀓𑀦𑀓𑀽𑀧𑀫𑀸 𑀢𑀘𑀸. 𑀉𑀝𑁆𑀞𑀸𑀬𑀸𑀢𑀺 𑀅𑀬𑁆𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀧𑀝𑀺𑀯𑀺𑀭𑀢𑁄 𑀧𑀼𑀧𑁆𑀨𑀁 𑀦 𑀧𑀺𑀴𑀦𑁆𑀥𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀙𑀟𑁆𑀟𑁂𑀲𑁆𑀲𑀢𑀺, 𑀏𑀣 𑀢𑀁 𑀬𑀸𑀘𑀺𑀢𑁆𑀯𑀸 𑀧𑀼𑀧𑁆𑀨𑀁 𑀧𑀺𑀴𑀦𑁆𑀥𑀺𑀲𑁆𑀲𑀸𑀫𑀸𑀢𑀺 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀬𑀸𑀘𑀫𑀸𑀦𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀉𑀝𑁆𑀞𑀳𑀺𑀢𑁆𑀯𑀸. 𑀧𑀫𑀤𑀸𑀥𑀺𑀧𑀸𑀢𑀺 𑀧𑀫𑀤𑀸𑀦𑀁 𑀉𑀢𑁆𑀢𑀫𑀸. 𑀫𑀼𑀦𑀺𑀦𑁆𑀢𑀺 𑀇𑀲𑀺𑀁.
𑀅𑀦𑀼𑀤𑁆𑀤𑀺𑀝𑁆𑀞𑀦𑁆𑀢𑀺 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀤𑀲𑁆𑀲𑀸𑀫𑀻’’𑀢𑀺 𑀦 𑀉𑀤𑁆𑀤𑀺𑀝𑁆𑀞𑀁. 𑀲𑀩𑁆𑀩𑀸 𑀕𑀢𑀺 𑀢𑁂 𑀇𑀚𑁆𑀛𑀢𑀽𑀢𑀺 𑀲𑀩𑁆𑀩𑀸 𑀢𑁂 𑀘𑀺𑀢𑁆𑀢𑀕𑀢𑀺 𑀇𑀚𑁆𑀛𑀢𑀼, 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀲𑁆𑀲 ¶ 𑀮𑀸𑀪𑀻 𑀳𑁄𑀳𑀻𑀢𑀺 𑀢𑀲𑁆𑀲 𑀣𑀼𑀮𑀺𑀫𑀗𑁆𑀕𑀮𑀁 𑀯𑀤𑀦𑁆𑀢𑀺. 𑀬𑀣𑁂𑀯 𑀯𑀸𑀲𑀯𑁄𑀢𑀺 𑀬𑀣𑀸 𑀅𑀫𑁆𑀳𑀸𑀓𑀁 𑀧𑀺𑀢𑀸 𑀯𑀸𑀲𑀯𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀤𑁂𑀢𑀺, 𑀢𑀣𑁂𑀯 𑀦𑁄 𑀢𑁆𑀯𑀫𑁆𑀧𑀺 𑀳𑁄𑀳𑀻𑀢𑀺. 𑀢𑀦𑁆𑀢𑀺 𑀢𑀁 𑀧𑀼𑀧𑁆𑀨𑀁. 𑀅𑀪𑀺𑀲𑀫𑁂𑀓𑁆𑀔𑀸𑀢𑀺 𑀤𑀺𑀲𑁆𑀯𑀸. 𑀲𑀁𑀓𑀮𑀳𑀦𑁆𑀢𑀺 𑀦𑀸𑀦𑀸𑀕𑀸𑀳𑀁 𑀓𑀮𑀳𑀯𑀟𑁆𑀠𑀦𑀁 𑀓𑀣𑀁 𑀉𑀤𑀻𑀭𑀬𑀺. 𑀇𑀫𑁂𑀳𑀻𑀢𑀺 𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀦𑀸𑀫 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀧𑀝𑀺𑀯𑀺𑀭𑀢𑁄 𑀅𑀳𑀁 ¶ 𑀫𑀸𑀮𑀸𑀥𑀸𑀭𑀡𑀢𑁄𑀢𑀺 𑀤𑀻𑀧𑁂𑀢𑀺. 𑀬𑀸𑀬𑁂𑀯 𑀯𑁄 𑀲𑁂𑀬𑁆𑀬𑀲𑀻𑀢𑀺 𑀬𑀸 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀚𑁂𑀝𑁆𑀞𑀺𑀓𑀸. 𑀲𑀸 𑀧𑀺𑀴𑀦𑁆𑀥𑀣𑀸𑀢𑀺 𑀲𑀸 𑀏𑀢𑀁 𑀧𑀺𑀴𑀦𑁆𑀥𑀢𑀽𑀢𑀺 𑀅𑀢𑁆𑀣𑁄.
𑀢𑀸 ¶ 𑀘𑀢𑀲𑁆𑀲𑁄𑀧𑀺 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀢𑁆𑀯𑀁 𑀦𑁄𑀢𑁆𑀢𑀫𑁂𑀯𑀸𑀪𑀺𑀲𑀫𑁂𑀓𑁆𑀔 𑀦𑀸𑀭𑀤, 𑀬𑀲𑁆𑀲𑀺𑀘𑁆𑀙𑀲𑀺 𑀢𑀲𑁆𑀲𑀸 𑀅𑀦𑀼𑀧𑁆𑀧𑀯𑁂𑀘𑁆𑀙𑀲𑀼;
𑀬𑀲𑁆𑀲𑀸 𑀳𑀺 𑀦𑁄 𑀦𑀸𑀭𑀤 𑀢𑁆𑀯𑀁 𑀧𑀤𑀲𑁆𑀲𑀲𑀺, 𑀲𑀸𑀬𑁂𑀯 𑀦𑁄 𑀳𑁂𑀳𑀺𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑀸’’𑀢𑀺.
𑀢𑀢𑁆𑀣 𑀢𑁆𑀯𑀁 𑀦𑁄𑀢𑁆𑀢𑀫𑁂𑀯𑀸𑀢𑀺 𑀉𑀢𑁆𑀢𑀫𑀫𑀳𑀸𑀫𑀼𑀦𑀺 𑀢𑁆𑀯𑀫𑁂𑀯 𑀦𑁄 𑀉𑀧𑀥𑀸𑀭𑁂𑀳𑀺. 𑀢𑀸𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀸𑀭𑀤𑁄 𑀢𑀸 𑀆𑀮𑀧𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀓𑀮𑁆𑀮𑀫𑁂𑀢𑀁 𑀯𑀘𑀦𑀁 𑀲𑀼𑀕𑀢𑁆𑀢𑁂, 𑀓𑁄 𑀩𑁆𑀭𑀸𑀳𑁆𑀫𑀡𑁄 𑀲𑀁𑀓𑀮𑀳𑀁 𑀉𑀤𑀻𑀭𑀬𑁂;
𑀕𑀦𑁆𑀢𑁆𑀯𑀸𑀦 𑀪𑀽𑀢𑀸𑀥𑀺𑀧𑀫𑁂𑀯 𑀧𑀼𑀘𑁆𑀙𑀣, 𑀲𑀘𑁂 𑀦 𑀚𑀸𑀦𑀸𑀣 𑀇𑀥𑀼𑀢𑁆𑀢𑀫𑀸𑀥𑀫𑁂’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀪𑀤𑁆𑀤𑁂 𑀲𑀼𑀕𑀢𑁆𑀢𑁂, 𑀇𑀤𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀯𑀘𑀦𑀁 𑀫𑀫 𑀅𑀬𑀼𑀢𑁆𑀢𑀁, 𑀏𑀯𑀜𑁆𑀳𑀺 𑀲𑀢𑀺 𑀫𑀬𑀸 𑀢𑀼𑀫𑁆𑀳𑁂𑀲𑀼 𑀏𑀓𑀁 𑀲𑁂𑀝𑁆𑀞𑀁, 𑀲𑁂𑀲𑀸 𑀳𑀻𑀦𑀸 𑀓𑀭𑁄𑀦𑁆𑀢𑁂𑀦 𑀓𑀮𑀳𑁄 𑀯𑀟𑁆𑀠𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀓𑁄 𑀩𑀸𑀳𑀺𑀢𑀧𑀸𑀧𑁄 𑀩𑁆𑀭𑀸𑀳𑁆𑀫𑀡𑁄 𑀓𑀮𑀳𑀁 𑀉𑀤𑀻𑀭𑀬𑁂 𑀯𑀟𑁆𑀠𑁂𑀬𑁆𑀬. 𑀏𑀯𑀭𑀽𑀧𑀲𑁆𑀲 𑀳𑀺 𑀓𑀮𑀳𑀯𑀟𑁆𑀠𑀦𑀁 𑀦𑀸𑀫 𑀅𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀢𑁄 𑀕𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀪𑀽𑀢𑀸𑀥𑀺𑀧𑀁 𑀲𑀓𑁆𑀓𑀫𑁂𑀯 𑀧𑀼𑀘𑁆𑀙𑀣, 𑀲𑀘𑁂 𑀅𑀢𑁆𑀢𑀦𑁄 𑀉𑀢𑁆𑀢𑀫𑀁 𑀅𑀥𑀫𑀜𑁆𑀘 𑀦 𑀚𑀸𑀦𑀸𑀣𑀸𑀢𑀺.
𑀢𑀢𑁄 𑀲𑀢𑁆𑀣𑀸 𑀕𑀸𑀣𑀫𑀸𑀳 𑁋
‘‘𑀢𑀸 𑀦𑀸𑀭𑀤𑁂𑀦 𑀧𑀭𑀫𑀧𑁆𑀧𑀓𑁄𑀧𑀺𑀢𑀸, 𑀉𑀤𑀻𑀭𑀺𑀢𑀸 𑀯𑀡𑁆𑀡𑀫𑀤𑁂𑀦 𑀫𑀢𑁆𑀢𑀸;
𑀲𑀓𑀸𑀲𑁂 𑀕𑀦𑁆𑀢𑁆𑀯𑀸𑀦 𑀲𑀳𑀲𑁆𑀲𑀘𑀓𑁆𑀔𑀼𑀦𑁄, 𑀧𑀼𑀘𑁆𑀙𑀺𑀁𑀲𑀼 𑀪𑀽𑀢𑀸𑀥𑀺𑀧𑀁 𑀓𑀸 𑀦𑀼 𑀲𑁂𑀬𑁆𑀬𑀲𑀻’’𑀢𑀺.
𑀢𑀢𑁆𑀣 ¶ 𑀧𑀭𑀫𑀧𑁆𑀧𑀓𑁄𑀧𑀺𑀢𑀸𑀢𑀺 𑀧𑀼𑀧𑁆𑀨𑀁 𑀅𑀤𑀤𑀦𑁆𑀢𑁂𑀦 𑀅𑀢𑀺𑀯𑀺𑀬 𑀓𑁄𑀧𑀺𑀢𑀸 𑀢𑀲𑁆𑀲 𑀓𑀼𑀧𑀺𑀢𑀸 𑀳𑀼𑀢𑁆𑀯𑀸. 𑀉𑀤𑀻𑀭𑀺𑀢𑀸𑀢𑀺 ‘‘𑀪𑀽𑀢𑀸𑀥𑀺𑀧𑀫𑁂𑀯 𑀧𑀼𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑀸. 𑀲𑀳𑀲𑁆𑀲𑀘𑀓𑁆𑀔𑀼𑀦𑁄𑀢𑀺 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸. 𑀓𑀸 𑀦𑀽𑀢𑀺 𑀅𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀓𑀢𑀫𑀸 𑀉𑀢𑁆𑀢𑀫𑀸𑀢𑀺 𑀧𑀼𑀘𑁆𑀙𑀺𑀁𑀲𑀼.
𑀏𑀯𑀁 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀞𑀺𑀢𑀸 𑁋
‘‘𑀢𑀸 𑀤𑀺𑀲𑁆𑀯𑀸 𑀆𑀬𑀢𑁆𑀢𑀫𑀦𑀸 𑀧𑀼𑀭𑀺𑀦𑁆𑀤𑀤𑁄, 𑀇𑀘𑁆𑀘𑀩𑁆𑀭𑀯𑀻 𑀤𑁂𑀯𑀯𑀭𑁄 𑀓𑀢𑀜𑁆𑀚𑀮𑀻;
𑀲𑀩𑁆𑀩𑀸𑀯 𑀯𑁄 𑀳𑁄𑀣 𑀲𑀼𑀕𑀢𑁆𑀢𑁂 𑀲𑀸𑀤𑀺𑀲𑀻, 𑀓𑁄𑀦𑁂𑀯 𑀪𑀤𑁆𑀤𑁂 𑀓𑀮𑀳𑀁 𑀉𑀤𑀻𑀭𑀬𑀻’’𑀢𑀺.
𑀢𑀢𑁆𑀣 ¶ 𑀢𑀸 𑀤𑀺𑀲𑁆𑀯𑀸𑀢𑀺, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸 𑀤𑀺𑀲𑁆𑀯𑀸. 𑀆𑀬𑀢𑁆𑀢𑀫𑀦𑀸𑀢𑀺 𑀉𑀲𑁆𑀲𑀼𑀓𑁆𑀓𑀫𑀦𑀸 𑀩𑁆𑀬𑀸𑀯𑀝𑀘𑀺𑀢𑁆𑀢𑀸. 𑀓𑀢𑀜𑁆𑀚𑀮𑀻𑀢𑀺 𑀦𑀫𑀲𑁆𑀲𑀫𑀸𑀦𑀸𑀳𑀺 𑀤𑁂𑀯𑀢𑀸𑀳𑀺 𑀧𑀕𑁆𑀕𑀳𑀺𑀢𑀜𑁆𑀚𑀮𑀻. 𑀲𑀸𑀤𑀺𑀲𑀻𑀢𑀺 𑀲𑀩𑁆𑀩𑀸𑀯 𑀢𑀼𑀫𑁆𑀳𑁂 𑀲𑀸𑀤𑀺𑀲𑀺𑀬𑁄. 𑀓𑁄 𑀦𑁂𑀯𑀸𑀢𑀺 𑀓𑁄 𑀦𑀼 𑀏𑀯𑀁. 𑀓𑀮𑀳𑀁 𑀉𑀤𑀻𑀭𑀬𑀻𑀢𑀺 𑀇𑀤𑀁 𑀦𑀸𑀦𑀸𑀕𑀸𑀳𑀁 𑀯𑀺𑀕𑁆𑀕𑀳𑀁 𑀓𑀣𑁂𑀲𑀺 𑀯𑀟𑁆𑀠𑁂𑀲𑀺.
𑀅𑀣𑀲𑁆𑀲 𑀢𑀸 𑀓𑀣𑀬𑀫𑀸𑀦𑀸 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀬𑁄 𑀲𑀩𑁆𑀩𑀮𑁄𑀓𑀘𑁆𑀘𑀭𑀺𑀢𑁄 𑀫𑀳𑀸𑀫𑀼𑀦𑀺, 𑀥𑀫𑁆𑀫𑁂 𑀞𑀺𑀢𑁄 𑀦𑀸𑀭𑀤𑁄 𑀲𑀘𑁆𑀘𑀦𑀺𑀓𑁆𑀓𑀫𑁄;
𑀲𑁄 𑀦𑁄𑀩𑁆𑀭𑀯𑀺 𑀕𑀺𑀭𑀺𑀯𑀭𑁂 𑀕𑀦𑁆𑀥𑀫𑀸𑀤𑀦𑁂, 𑀕𑀦𑁆𑀢𑁆𑀯𑀸𑀦 𑀪𑀽𑀢𑀸𑀥𑀺𑀧𑀫𑁂𑀯 𑀧𑀼𑀘𑁆𑀙𑀣;
𑀲𑀘𑁂 𑀦 𑀚𑀸𑀦𑀸𑀣 𑀇𑀥𑀼𑀢𑁆𑀢𑀫𑀸𑀥𑀫’’𑀦𑁆𑀢𑀺.
𑀢𑀢𑁆𑀣 𑀲𑀘𑁆𑀘𑀦𑀺𑀓𑁆𑀓𑀫𑁄𑀢𑀺 𑀢𑀣𑀧𑀭𑀓𑁆𑀓𑀫𑁄.
𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 ‘‘𑀇𑀫𑀸 𑀘𑀢𑀲𑁆𑀲𑁄𑀧𑀺 𑀫𑀬𑁆𑀳𑀁 𑀥𑀻𑀢𑀭𑁄𑀯, 𑀲𑀘𑀸𑀳𑀁 ‘𑀏𑀢𑀸𑀲𑀼 𑀏𑀓𑀸 𑀕𑀼𑀡𑀲𑀫𑁆𑀧𑀦𑁆𑀦𑀸 𑀉𑀢𑁆𑀢𑀫𑀸’𑀢𑀺 𑀯𑀓𑁆𑀔𑀸𑀫𑀺, 𑀲𑁂𑀲𑀸 𑀓𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀦 𑀲𑀓𑁆𑀓𑀸 𑀅𑀬𑀁 𑀅𑀟𑁆𑀟𑁄 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁, 𑀇𑀫𑀸 𑀳𑀺𑀫𑀯𑀦𑁆𑀢𑁂 𑀓𑁄𑀲𑀺𑀬𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀸𑀫𑀺, 𑀲𑁄 𑀏𑀢𑀸𑀲𑀁 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀟𑁆𑀟𑀁 𑀦 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀺, 𑀳𑀺𑀫𑀯𑀦𑁆𑀢𑁂 𑀓𑁄𑀲𑀺𑀬𑁄 𑀦𑀸𑀫 𑀢𑀸𑀧𑀲𑁄 𑀅𑀢𑁆𑀣𑀺, 𑀢𑀲𑁆𑀲𑀸𑀳𑀁 𑀅𑀢𑁆𑀢𑀦𑁄 𑀲𑀼𑀥𑀸𑀪𑁄𑀚𑀦𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀲𑁄 𑀧𑀭𑀲𑁆𑀲 𑀅𑀤𑀢𑁆𑀯𑀸 𑀦 𑀪𑀼𑀜𑁆𑀚𑀢𑀺, 𑀤𑀤𑀦𑁆𑀢𑁄 ¶ 𑀘 𑀯𑀺𑀘𑀺𑀦𑀺𑀢𑁆𑀯𑀸 𑀕𑀼𑀡𑀯𑀦𑁆𑀢𑀸𑀦𑀁 𑀤𑁂𑀢𑀺, 𑀬𑀸 𑀢𑀼𑀫𑁆𑀳𑁂𑀲𑀼 𑀢𑀲𑁆𑀲 𑀳𑀢𑁆𑀣𑀢𑁄 𑀪𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀲𑀸 𑀉𑀢𑁆𑀢𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀘𑀺𑀓𑁆𑀔𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀅𑀲𑀼 𑀩𑁆𑀭𑀳𑀸𑀭𑀜𑁆𑀜𑀘𑀭𑁄 𑀫𑀳𑀸𑀫𑀼𑀦𑀺, 𑀦𑀸𑀤𑀢𑁆𑀯𑀸 𑀪𑀢𑁆𑀢𑀁 𑀯𑀭𑀕𑀢𑁆𑀢𑁂 𑀪𑀼𑀜𑁆𑀚𑀢𑀺;
𑀯𑀺𑀘𑁂𑀬𑁆𑀬 𑀤𑀸𑀦𑀸𑀦𑀺 𑀤𑀤𑀸𑀢𑀺 𑀓𑁄𑀲𑀺𑀬𑁄,
𑀬𑀲𑁆𑀲𑀸 𑀳𑀺 𑀲𑁄 𑀤𑀲𑁆𑀲𑀢𑀺 𑀲𑀸𑀯 𑀲𑁂𑀬𑁆𑀬𑀲𑀻’’𑀢𑀺.
𑀢𑀢𑁆𑀣 ¶ 𑀩𑁆𑀭𑀳𑀸𑀭𑀜𑁆𑀜𑀥𑀭𑁄𑀢𑀺 𑀫𑀳𑀸𑀅𑀭𑀜𑁆𑀜𑀯𑀸𑀲𑀻.
𑀇𑀢𑀺 𑀲𑁄 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀫𑀸𑀢𑀮𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳 𑁋
‘‘𑀅𑀲𑀽 ¶ 𑀳𑀺 𑀬𑁄 𑀲𑀫𑁆𑀫𑀢𑀺 𑀤𑀓𑁆𑀔𑀺𑀡𑀁 𑀤𑀺𑀲𑀁, 𑀕𑀗𑁆𑀕𑀸𑀬 𑀢𑀻𑀭𑁂 𑀳𑀺𑀫𑀯𑀦𑁆𑀢𑀧𑀲𑁆𑀲𑀦𑀺;
𑀲 𑀓𑁄𑀲𑀺𑀬𑁄 𑀤𑀼𑀮𑁆𑀮𑀪𑀧𑀸𑀦𑀪𑁄𑀚𑀦𑁄, 𑀢𑀲𑁆𑀲 𑀲𑀼𑀥𑀁 𑀧𑀸𑀧𑀬 𑀤𑁂𑀯𑀲𑀸𑀭𑀣𑀻’’𑀢𑀺.
𑀢𑀢𑁆𑀣 𑀲𑀫𑁆𑀫𑀢𑀻𑀢𑀺 𑀯𑀲𑀢𑀺. 𑀤𑀓𑁆𑀔𑀺𑀡𑀦𑁆𑀢𑀺 𑀳𑀺𑀫𑀯𑀦𑁆𑀢𑀲𑁆𑀲 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬. 𑀧𑀲𑁆𑀲𑀦𑀻𑀢𑀺 𑀧𑀲𑁆𑀲𑁂.
𑀢𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀲 𑀫𑀸𑀢𑀮𑀻 𑀤𑁂𑀯𑀯𑀭𑁂𑀦 𑀧𑁂𑀲𑀺𑀢𑁄, 𑀲𑀳𑀲𑁆𑀲𑀬𑀼𑀢𑁆𑀢𑀁 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦𑀁;
𑀲𑀼𑀔𑀺𑀧𑁆𑀧𑀫𑁂𑀯 𑀉𑀧𑀕𑀫𑁆𑀫 𑀅𑀲𑁆𑀲𑀫𑀁, 𑀅𑀤𑀺𑀲𑁆𑀲𑀫𑀸𑀦𑁄 𑀫𑀼𑀦𑀺𑀦𑁄 𑀲𑀼𑀥𑀁 𑀅𑀤𑀸’’𑀢𑀺.
𑀢𑀢𑁆𑀣 𑀅𑀤𑀺𑀲𑁆𑀲𑀫𑀸𑀦𑁄𑀢𑀺, 𑀪𑀺𑀓𑁆𑀔𑀯𑁂, 𑀲𑁄 𑀫𑀸𑀢𑀮𑀺 𑀤𑁂𑀯𑀭𑀸𑀚𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀼𑀥𑀁 𑀅𑀤𑀸𑀲𑀺, 𑀤𑀤𑀫𑀸𑀦𑁄 𑀘 𑀭𑀢𑁆𑀢𑀺𑀁 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀉𑀤𑁂𑀦𑁆𑀢𑀁 𑀲𑀽𑀭𑀺𑀬𑀁 𑀦𑀫𑀲𑁆𑀲𑀫𑀸𑀦𑀲𑁆𑀲 𑀞𑀺𑀢𑀲𑁆𑀲 𑀢𑀲𑁆𑀲 𑀳𑀢𑁆𑀣𑁂 𑀲𑀼𑀥𑀸𑀪𑁄𑀚𑀦𑀧𑀸𑀢𑀺𑀁 𑀞𑀧𑁂𑀲𑀺.
𑀓𑁄𑀲𑀺𑀬𑁄 ¶ 𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑀓𑁄𑀯 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀉𑀤𑀕𑁆𑀕𑀺𑀳𑀼𑀢𑁆𑀢𑀁 𑀉𑀧𑀢𑀺𑀝𑁆𑀞𑀢𑁄 𑀳𑀺 𑀫𑁂, 𑀧𑀪𑀗𑁆𑀓𑀭𑀁 𑀮𑁄𑀓𑀢𑀫𑁄𑀦𑀼𑀤𑀼𑀢𑁆𑀢𑀫𑀁;
𑀲𑀩𑁆𑀩𑀸𑀦𑀺 𑀪𑀽𑀢𑀸𑀦𑀺 𑀅𑀥𑀺𑀘𑁆𑀘 𑀯𑀸𑀲𑀯𑁄;
𑀓𑁄 𑀦𑁂𑀯 𑀫𑁂 𑀧𑀸𑀡𑀺𑀲𑀼 𑀓𑀺𑀁 𑀲𑀼𑀥𑁄𑀤𑀳𑀺.
‘‘𑀲𑀗𑁆𑀔𑀽𑀧𑀫𑀁 𑀲𑁂𑀢𑀫𑀢𑀼𑀮𑁆𑀬𑀤𑀲𑁆𑀲𑀦𑀁, 𑀲𑀼𑀘𑀺𑀁 𑀲𑀼𑀕𑀦𑁆𑀥𑀁 𑀧𑀺𑀬𑀭𑀽𑀧𑀫𑀩𑁆𑀪𑀼𑀢𑀁;
𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀫𑀫 𑀚𑀸𑀢𑀼 𑀘𑀓𑁆𑀔𑀼𑀪𑀺, 𑀓𑀸 𑀤𑁂𑀯𑀢𑀸 𑀧𑀸𑀡𑀺𑀲𑀼 𑀓𑀺𑀁 𑀲𑀼𑀥𑁄𑀤𑀳𑀻’’𑀢𑀺.
𑀢𑀢𑁆𑀣 𑀉𑀤𑀕𑁆𑀕𑀺𑀳𑀼𑀢𑁆𑀢𑀦𑁆𑀢𑀺 𑀉𑀤𑀓𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀺𑀢𑁆𑀯𑀸 𑀅𑀕𑁆𑀕𑀺𑀲𑀸𑀮𑀢𑁄 𑀦𑀺𑀓𑁆𑀔𑀫𑁆𑀫 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀪𑀗𑁆𑀓𑀭𑀁 𑀮𑁄𑀓𑀢𑀫𑁄𑀦𑀼𑀤𑀁 𑀉𑀢𑁆𑀢𑀫𑀁 𑀆𑀤𑀺𑀘𑁆𑀘𑀁 𑀉𑀧𑀢𑀺𑀝𑁆𑀞𑀢𑁄 𑀫𑀫 𑀲𑀩𑁆𑀩𑀸𑀦𑀺 𑀪𑀽𑀢𑀸𑀦𑀺 𑀅𑀥𑀺𑀘𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑁄 𑀯𑀸𑀲𑀯𑁄 𑀦𑀼 𑀔𑁄 𑀏𑀯𑀁 𑀫𑀫 𑀧𑀸𑀡𑀻𑀲𑀼 𑀓𑀺𑀁 𑀲𑀼𑀥𑀁 𑀓𑀺𑀁 𑀦𑀸𑀫𑁂𑀢𑀁 𑀑𑀤𑀳𑀺. ‘‘𑀲𑀗𑁆𑀔𑀽𑀧𑀫’’𑀦𑁆𑀢𑀺𑀆𑀤𑀻𑀳𑀺 𑀞𑀺𑀢𑀓𑁄𑀯 𑀲𑀼𑀥𑀁 𑀯𑀡𑁆𑀡𑁂𑀢𑀺.
𑀢𑀢𑁄 ¶ 𑀫𑀸𑀢𑀮𑀺 𑀆𑀳 𑁋
‘‘𑀅𑀳𑀁 ¶ 𑀫𑀳𑀺𑀦𑁆𑀤𑁂𑀦 𑀫𑀳𑁂𑀲𑀺 𑀧𑁂𑀲𑀺𑀢𑁄, 𑀲𑀼𑀥𑀸𑀪𑀺𑀳𑀸𑀲𑀺𑀁 𑀢𑀼𑀭𑀺𑀢𑁄 𑀫𑀳𑀸𑀫𑀼𑀦𑀺;
𑀚𑀸𑀦𑀸𑀲𑀺 𑀫𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺, 𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀼𑀢𑁆𑀢𑀫 𑀫𑀸𑀪𑀺𑀯𑀸𑀭𑀬𑀺.
‘‘𑀪𑀼𑀢𑁆𑀢𑀸 𑀘 𑀲𑀸 𑀤𑁆𑀯𑀸𑀤𑀲 𑀳𑀦𑁆𑀢𑀺 𑀧𑀸𑀧𑀓𑁂, 𑀔𑀼𑀤𑀁 𑀧𑀺𑀧𑀸𑀲𑀁 𑀅𑀭𑀢𑀺𑀁 𑀤𑀭𑀓𑁆𑀮𑀫𑀁;
𑀓𑁄𑀥𑀽𑀧𑀦𑀸𑀳𑀜𑁆𑀘 𑀯𑀺𑀯𑀸𑀤𑀧𑁂𑀲𑀼𑀡𑀁, 𑀲𑀻𑀢𑀼𑀡𑁆𑀳 𑀢𑀦𑁆𑀤𑀺𑀜𑁆𑀘 𑀭𑀲𑀼𑀢𑁆𑀢𑀫𑀁 𑀇𑀤’’𑀦𑁆𑀢𑀺.
𑀢𑀢𑁆𑀣 𑀲𑀼𑀥𑀸𑀪𑀺𑀳𑀸𑀲𑀺𑀦𑁆𑀢𑀺 𑀇𑀫𑀁 𑀲𑀼𑀥𑀸𑀪𑁄𑀚𑀦𑀁 𑀢𑀼𑀬𑁆𑀳𑀁 𑀅𑀪𑀺𑀳𑀭𑀺𑀁. 𑀚𑀸𑀦𑀸𑀲𑀻𑀢𑀺 𑀚𑀸𑀦𑀸𑀳𑀺 𑀫𑀁 𑀢𑁆𑀯𑀁, 𑀅𑀳𑀁 𑀫𑀸𑀢𑀮𑀺 𑀦𑀸𑀫 𑀤𑁂𑀯𑀲𑀸𑀭𑀣𑀻𑀢𑀺 𑀅𑀢𑁆𑀣𑁄. 𑀫𑀸𑀪𑀺𑀯𑀸𑀭𑀬𑀻𑀢𑀺 𑀦 𑀪𑀼𑀜𑁆𑀚𑀸𑀫𑀻𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀼𑀜𑁆𑀚 𑀫𑀸 𑀧𑀧𑀜𑁆𑀘 𑀓𑀭𑀺. 𑀧𑀸𑀧𑀓𑁂𑀢𑀺 𑀅𑀬𑀜𑁆𑀳𑀺 ¶ 𑀲𑀼𑀥𑀸 𑀪𑀼𑀢𑁆𑀢𑀸 𑀤𑁆𑀯𑀸𑀤𑀲 𑀧𑀸𑀧𑀥𑀫𑁆𑀫𑁂 𑀳𑀦𑀢𑀺. 𑀔𑀼𑀤𑀦𑁆𑀢𑀺 𑀧𑀞𑀫𑀁 𑀢𑀸𑀯 𑀙𑀸𑀢𑀪𑀸𑀯𑀁 𑀳𑀦𑀢𑀺, 𑀤𑀼𑀢𑀺𑀬𑀁 𑀧𑀸𑀦𑀻𑀬𑀧𑀺𑀧𑀸𑀲𑀁, 𑀢𑀢𑀺𑀬𑀁 𑀉𑀓𑁆𑀓𑀡𑁆𑀞𑀺𑀢𑀁, 𑀘𑀢𑀼𑀢𑁆𑀣𑀁 𑀓𑀸𑀬𑀤𑀭𑀣𑀁, 𑀧𑀜𑁆𑀘𑀫𑀁 𑀓𑀺𑀮𑀦𑁆𑀢𑀪𑀸𑀯𑀁, 𑀙𑀝𑁆𑀞𑀁 𑀓𑁄𑀥𑀁, 𑀲𑀢𑁆𑀢𑀫𑀁 𑀉𑀧𑀦𑀸𑀳𑀁, 𑀅𑀝𑁆𑀞𑀫𑀁 𑀯𑀺𑀯𑀸𑀤𑀁, 𑀦𑀯𑀫𑀁 𑀧𑁂𑀲𑀼𑀡𑀁, 𑀤𑀲𑀫𑀁 𑀲𑀻𑀢𑀁, 𑀏𑀓𑀸𑀤𑀲𑀫𑀁 𑀉𑀡𑁆𑀳𑀁, 𑀤𑁆𑀯𑀸𑀤𑀲𑀫𑀁 𑀢𑀦𑁆𑀤𑀺𑀁 𑀆𑀮𑀲𑀺𑀬𑀪𑀸𑀯𑀁, 𑀇𑀤𑀁 𑀭𑀲𑀼𑀢𑁆𑀢𑀫𑀁 𑀉𑀢𑁆𑀢𑀫𑀭𑀲𑀁 𑀲𑀼𑀥𑀸𑀪𑁄𑀚𑀦𑀁 𑀇𑀫𑁂 𑀤𑁆𑀯𑀸𑀤𑀲 𑀧𑀸𑀧𑀥𑀫𑁆𑀫𑁂 𑀳𑀦𑀢𑀺.
𑀢𑀁 𑀲𑀼𑀢𑁆𑀯𑀸 𑀓𑁄𑀲𑀺𑀬𑁄 𑀅𑀢𑁆𑀢𑀦𑁄 𑀯𑀢𑀲𑀫𑀸𑀤𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑁄 𑁋
‘‘𑀦 𑀓𑀧𑁆𑀧𑀢𑀻 𑀫𑀸𑀢𑀮𑀺 𑀫𑀬𑁆𑀳 𑀪𑀼𑀜𑁆𑀚𑀺𑀢𑀼𑀁, 𑀧𑀼𑀩𑁆𑀩𑁂 𑀅𑀤𑀢𑁆𑀯𑀸 𑀇𑀢𑀺 𑀫𑁂 𑀯𑀢𑀼𑀢𑁆𑀢𑀫𑀁;
𑀦 𑀘𑀸𑀧𑀺 𑀏𑀓𑀸𑀲𑁆𑀦𑀫𑀭𑀺𑀬𑀧𑀽𑀚𑀺𑀢𑀁, 𑀅𑀲𑀁𑀯𑀺𑀪𑀸𑀕𑀻 𑀘 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀻’’𑀢𑀺. 𑁋
𑀕𑀸𑀣𑀁 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀧𑀭𑀲𑁆𑀲 𑀅𑀤𑀢𑁆𑀯𑀸 𑀪𑁄𑀚𑀦𑁂 𑀓𑀁 𑀤𑁄𑀲𑀁 𑀤𑀺𑀲𑁆𑀯𑀸 𑀇𑀤𑀁 𑀯𑀢𑀁 𑀲𑀫𑀸𑀤𑀺𑀦𑁆𑀦’’𑀦𑁆𑀢𑀺 𑀫𑀸𑀢𑀮𑀺𑀦𑀸 𑀧𑀼𑀝𑁆𑀞𑁄 𑀆𑀳 𑁋
‘‘𑀣𑀻𑀖𑀸𑀢𑀓𑀸 𑀬𑁂 𑀘𑀺𑀫𑁂 𑀧𑀸𑀭𑀤𑀸𑀭𑀺𑀓𑀸, 𑀫𑀺𑀢𑁆𑀢𑀤𑁆𑀤𑀼𑀦𑁄 𑀬𑁂 𑀘 𑀲𑀧𑀦𑁆𑀢𑀺 𑀲𑀼𑀩𑁆𑀩𑀢𑁂;
𑀲𑀩𑁆𑀩𑁂 𑀘 𑀢𑁂 𑀫𑀘𑁆𑀙𑀭𑀺𑀧𑀜𑁆𑀘𑀫𑀸𑀥𑀫𑀸, 𑀢𑀲𑁆𑀫𑀸 𑀅𑀤𑀢𑁆𑀯𑀸 𑀉𑀤𑀓𑀫𑁆𑀧𑀺 𑀦𑀸𑀲𑁆𑀦𑀺𑀬𑁂.
‘‘𑀲𑁄𑀳𑀺𑀢𑁆𑀣𑀺𑀬𑀸 ¶ 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀧𑀦, 𑀤𑀲𑁆𑀲𑀸𑀫𑀺 𑀤𑀸𑀦𑀁 𑀯𑀺𑀤𑀼𑀲𑀫𑁆𑀧𑀯𑀡𑁆𑀡𑀺𑀢𑀁;
𑀲𑀤𑁆𑀥𑀸 𑀯𑀤𑀜𑁆𑀜𑀽 𑀇𑀥 𑀯𑀻𑀢𑀫𑀘𑁆𑀙𑀭𑀸, 𑀪𑀯𑀦𑁆𑀢𑀺 𑀳𑁂𑀢𑁂 𑀲𑀼𑀘𑀺𑀲𑀘𑁆𑀘𑀲𑀫𑁆𑀫𑀢𑀸’’𑀢𑀺.
𑀢𑀢𑁆𑀣 𑀧𑀼𑀩𑁆𑀩𑁂𑀢𑀺 𑀧𑀞𑀫𑀁 𑀅𑀤𑀢𑁆𑀯𑀸, 𑀅𑀣 𑀯𑀸 𑀇𑀢𑀺 𑀫𑁂 𑀧𑀼𑀩𑁆𑀩𑁂 𑀯𑀢𑀼𑀢𑁆𑀢𑀫𑀁 𑀇𑀤𑀁 𑀧𑀼𑀩𑁆𑀩𑁂𑀯 𑀫𑀬𑀸 𑀯𑀢𑀁 𑀲𑀫𑀸𑀤𑀺𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀘𑀸𑀧𑀺 𑀏𑀓𑀸𑀲𑁆𑀦𑀫𑀭𑀺𑀬𑀧𑀽𑀚𑀺𑀢𑀦𑁆𑀢𑀺 𑀏𑀓𑀓𑀲𑁆𑀲 𑀅𑀲𑀦𑀁 𑀦 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 ¶ 𑀧𑀽𑀚𑀺𑀢𑀁. 𑀲𑀼𑀔𑀦𑁆𑀢𑀺 𑀤𑀺𑀩𑁆𑀩𑀫𑀸𑀦𑀼𑀲𑀺𑀓𑀁 𑀲𑀼𑀔𑀁 𑀦 𑀮𑀪𑀢𑀺. 𑀣𑀻𑀖𑀸𑀢𑀓𑀸𑀢𑀺 𑀇𑀢𑁆𑀣𑀺𑀖𑀸𑀢𑀓𑀸. 𑀬𑁂 𑀘𑀺𑀫𑁂𑀢𑀺 𑀬𑁂 𑀘 𑀇𑀫𑁂. 𑀲𑀧𑀦𑁆𑀢𑀻𑀢𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀲𑀼𑀩𑁆𑀩𑀢𑁂𑀢𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂. 𑀫𑀘𑁆𑀙𑀭𑀺𑀧𑀜𑁆𑀘𑀫𑀸𑀢𑀺 𑀫𑀘𑁆𑀙𑀭𑀻 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀫𑀘𑁆𑀙𑀭𑀺𑀧𑀜𑁆𑀘𑀫𑀸. 𑀅𑀥𑀫𑀸𑀢𑀺 𑀇𑀫𑁂 𑀧𑀜𑁆𑀘 𑀅𑀥𑀫𑀸 𑀦𑀸𑀫. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀳𑀁 𑀧𑀜𑁆𑀘𑀫𑀅𑀥𑀫𑀪𑀸𑀯𑀪𑀬𑁂𑀦 𑀅𑀤𑀢𑁆𑀯𑀸 𑀉𑀤𑀓𑀫𑁆𑀧𑀺 𑀦𑀸𑀲𑁆𑀦𑀺𑀬𑁂 𑀦 ¶ 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀇𑀫𑀁 𑀯𑀢𑀁 𑀲𑀫𑀸𑀤𑀺𑀬𑀺𑀁. 𑀲𑁄𑀳𑀺𑀢𑁆𑀣𑀺𑀬𑀸 𑀯𑀸𑀢𑀺 𑀲𑁄 𑀅𑀳𑀁 𑀇𑀢𑁆𑀣𑀺𑀬𑀸 𑀯𑀸. 𑀯𑀺𑀤𑀼𑀲𑀫𑁆𑀧𑀯𑀡𑁆𑀡𑀺𑀢𑀦𑁆𑀢𑀺 𑀯𑀺𑀤𑀽𑀳𑀺 𑀧𑀡𑁆𑀟𑀺𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀁. 𑀲𑀼𑀘𑀺𑀲𑀘𑁆𑀘𑀲𑀫𑁆𑀫𑀢𑀸𑀢𑀺 𑀏𑀢𑁂 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀸 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸 𑀧𑀼𑀭𑀺𑀲𑀸 𑀲𑀼𑀘𑀻 𑀘𑁂𑀯 𑀉𑀢𑁆𑀢𑀫𑀲𑀫𑁆𑀫𑀢𑀸 𑀘 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀫𑀸𑀢𑀮𑀺 𑀤𑀺𑀲𑁆𑀲𑀫𑀸𑀦𑀓𑀸𑀬𑁂𑀦 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀸 𑀘𑀢𑀲𑁆𑀲𑁄 𑀤𑁂𑀯𑀓𑀜𑁆𑀜𑀸𑀬𑁄 𑀘𑀢𑀼𑀤𑁆𑀤𑀺𑀲𑀁 𑀅𑀝𑁆𑀞𑀁𑀲𑀼, 𑀲𑀺𑀭𑀻 𑀧𑀸𑀘𑀻𑀦𑀤𑀺𑀲𑀸𑀬 𑀅𑀝𑁆𑀞𑀸𑀲𑀺, 𑀆𑀲𑀸 𑀤𑀓𑁆𑀔𑀺𑀡𑀤𑀺𑀲𑀸𑀬, 𑀲𑀤𑁆𑀥𑀸 𑀧𑀘𑁆𑀙𑀺𑀫𑀤𑀺𑀲𑀸𑀬, 𑀳𑀺𑀭𑀻 𑀉𑀢𑁆𑀢𑀭𑀤𑀺𑀲𑀸𑀬. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀅𑀢𑁄 𑀫𑀢𑀸 𑀤𑁂𑀯𑀯𑀭𑁂𑀦 𑀧𑁂𑀲𑀺𑀢𑀸, 𑀓𑀜𑁆𑀜𑀸 𑀘𑀢𑀲𑁆𑀲𑁄 𑀓𑀦𑀓𑀢𑁆𑀢𑀘𑀽𑀧𑀫𑀸;
𑀆𑀲𑀸 𑀘 𑀲𑀤𑁆𑀥𑀸 𑀘 𑀲𑀺𑀭𑀻 𑀢𑀢𑁄 𑀳𑀺𑀭𑀻, 𑀢𑀁 𑀅𑀲𑁆𑀲𑀫𑀁 𑀆𑀕𑀫𑀼 𑀬𑀢𑁆𑀣 𑀓𑁄𑀲𑀺𑀬𑁄.
‘‘𑀢𑀸 𑀤𑀺𑀲𑁆𑀯𑀸 𑀲𑀩𑁆𑀩𑁄 𑀧𑀭𑀫𑀧𑁆𑀧𑀫𑁄𑀤𑀺𑀢𑁄, 𑀲𑀼𑀪𑁂𑀦 𑀯𑀡𑁆𑀡𑁂𑀦 𑀲𑀺𑀔𑀸𑀭𑀺𑀯𑀕𑁆𑀕𑀺𑀦𑁄;
𑀓𑀜𑁆𑀜𑀸 𑀘𑀢𑀲𑁆𑀲𑁄 𑀘𑀢𑀼𑀭𑁄 𑀘𑀢𑀼𑀤𑁆𑀤𑀺𑀲𑀸, 𑀇𑀘𑁆𑀘𑀩𑁆𑀭𑀯𑀻 𑀫𑀸𑀢𑀮𑀺𑀦𑁄 𑀘 𑀲𑀫𑁆𑀫𑀼𑀔𑀸.
‘‘𑀧𑀼𑀭𑀺𑀫𑀁 𑀤𑀺𑀲𑀁 𑀓𑀸 𑀢𑁆𑀯𑀁 𑀧𑀪𑀸𑀲𑀺 𑀤𑁂𑀯𑀢𑁂, 𑀅𑀮𑀗𑁆𑀓𑀢𑀸 𑀢𑀸𑀭𑀯𑀭𑀸𑀯 𑀑𑀲𑀥𑀻;
𑀧𑀼𑀘𑁆𑀙𑀸𑀫𑀺 𑀢𑀁 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑁂, 𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀓𑀢𑀫𑀸𑀲𑀺 𑀤𑁂𑀯𑀢𑀸.
‘‘𑀲𑀺𑀭𑀸𑀳 ¶ 𑀤𑁂𑀯𑀻 𑀫𑀦𑀼𑀚𑁂𑀳𑀺 𑀧𑀽𑀚𑀺𑀢𑀸, 𑀅𑀧𑀸𑀧𑀲𑀢𑁆𑀢𑀽𑀧𑀦𑀺𑀲𑁂𑀯𑀺𑀦𑀻 𑀲𑀤𑀸;
𑀲𑀼𑀥𑀸𑀯𑀺𑀯𑀸𑀤𑁂𑀦 𑀢𑀯𑀦𑁆𑀢𑀺𑀫𑀸𑀕𑀢𑀸, 𑀢𑀁 𑀫𑀁 𑀲𑀼𑀥𑀸𑀬 𑀯𑀭𑀧𑀜𑁆𑀜 𑀪𑀸𑀚𑀬.
‘‘𑀬𑀲𑁆𑀲𑀸𑀳𑀫𑀺𑀘𑁆𑀙𑀸𑀫𑀺 𑀲𑀼𑀥𑀁 𑀫𑀳𑀸𑀫𑀼𑀦𑀺, 𑀲𑁄 𑀲𑀩𑁆𑀩𑀓𑀸𑀫𑁂𑀳𑀺 𑀦𑀭𑁄 𑀧𑀫𑁄𑀤𑀢𑀺;
𑀲𑀺𑀭𑀻𑀢𑀺 𑀫𑀁 𑀚𑀸𑀦𑀳𑀺 𑀚𑀽𑀳𑀢𑀼𑀢𑁆𑀢𑀫, 𑀢𑀁 𑀫𑀁 𑀲𑀼𑀥𑀸𑀬 𑀯𑀭𑀧𑀜𑁆𑀜 𑀪𑀸𑀚𑀬𑀸’’𑀢𑀺.
𑀢𑀢𑁆𑀣 ¶ 𑀅𑀢𑁄𑀢𑀺 𑀢𑀢𑁄. 𑀫𑀢𑀸𑀢𑀺 𑀅𑀦𑀼𑀫𑀢𑀸, 𑀅𑀣 𑀤𑁂𑀯𑀯𑀭𑁂𑀦 𑀅𑀦𑀼𑀫𑀢𑀸 𑀘𑁂𑀯 𑀧𑁂𑀲𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁄 𑀧𑀭𑀫𑀧𑁆𑀧𑀫𑁄𑀤𑀺𑀢𑁄𑀢𑀺 𑀅𑀦𑀯𑀲𑁂𑀲𑁄 𑀳𑀼𑀢𑁆𑀯𑀸 𑀅𑀢𑀺𑀧𑀫𑁄𑀤𑀺𑀢𑁄. ‘‘𑀲𑀸𑀫’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀸 𑀤𑁂𑀯𑀢𑀸 ¶ 𑀲𑀸𑀫𑀁 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀭𑁄𑀢𑀺 𑀘𑀢𑀼𑀭𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀘𑀸𑀢𑀼𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀢𑀸𑀭𑀯𑀭𑀸𑀢𑀺 𑀢𑀸𑀭𑀓𑀸𑀦𑀁 𑀯𑀭𑀸. 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑁂𑀢𑀺 𑀓𑀜𑁆𑀘𑀦𑀭𑀽𑀧𑀲𑀤𑀺𑀲𑀲𑀭𑀻𑀭𑁂. 𑀲𑀺𑀭𑀸𑀳𑀸𑀢𑀺 𑀲𑀺𑀭𑀻 𑀅𑀳𑀁. 𑀢𑀯𑀦𑁆𑀢𑀺𑀫𑀸𑀕𑀢𑀸𑀢𑀺 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑀸. 𑀪𑀸𑀚𑀬𑀸𑀢𑀺 𑀬𑀣𑀸 𑀫𑀁 𑀲𑀼𑀥𑀸 𑀪𑀚𑀢𑀺, 𑀢𑀣𑀸 𑀓𑀭𑁄𑀳𑀺, 𑀲𑀼𑀥𑀁 𑀫𑁂 𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀳𑀻𑀢𑀺 𑀚𑀸𑀦. 𑀚𑀽𑀳𑀢𑀼𑀢𑁆𑀢𑀫𑀸𑀢𑀺 𑀅𑀕𑁆𑀕𑀺𑀁 𑀚𑀼𑀳𑀦𑁆𑀢𑀸𑀦𑀁 𑀉𑀢𑁆𑀢𑀫.
𑀢𑀁 𑀲𑀼𑀢𑁆𑀯𑀸 𑀓𑁄𑀲𑀺𑀬𑁄 𑀆𑀳 𑁋
‘‘𑀲𑀺𑀧𑁆𑀧𑁂𑀦 𑀯𑀺𑀚𑁆𑀚𑀸𑀘𑀭𑀡𑁂𑀦 𑀩𑀼𑀤𑁆𑀥𑀺𑀬𑀸, 𑀦𑀭𑀸 𑀉𑀧𑁂𑀢𑀸 𑀧𑀕𑀼𑀡𑀸 𑀲𑀓𑀫𑁆𑀫𑀼𑀦𑀸;
𑀢𑀬𑀸 𑀯𑀺𑀳𑀻𑀦𑀸 𑀦 𑀮𑀪𑀦𑁆𑀢𑀺 𑀓𑀺𑀜𑁆𑀘𑀦𑀁, 𑀢𑀬𑀺𑀤𑀁 𑀦 𑀲𑀸𑀥𑀼 𑀬𑀤𑀺𑀤𑀁 𑀢𑀬𑀸 𑀓𑀢𑀁.
‘‘𑀧𑀲𑁆𑀲𑀸𑀫𑀺 𑀧𑁄𑀲𑀁 𑀅𑀮𑀲𑀁 𑀫𑀳𑀕𑁆𑀖𑀲𑀁, 𑀲𑀼𑀤𑀼𑀓𑁆𑀓𑀼𑀮𑀻𑀦𑀫𑁆𑀧𑀺 𑀅𑀭𑀽𑀧𑀺𑀫𑀁 𑀦𑀭𑀁;
𑀢𑀬𑀸𑀦𑀼𑀕𑀼𑀢𑁆𑀢𑁄 𑀲𑀺𑀭𑀺 𑀚𑀸𑀢𑀺𑀫𑀸𑀫𑀧𑀺, 𑀧𑁂𑀲𑁂𑀢𑀺 𑀤𑀸𑀲𑀁 𑀯𑀺𑀬 𑀪𑁄𑀕𑀯𑀸 𑀲𑀼𑀔𑀻.
‘‘𑀢𑀁 𑀢𑀁 𑀅𑀲𑀘𑁆𑀘𑀁 𑀅𑀯𑀺𑀪𑀚𑁆𑀚𑀲𑁂𑀯𑀺𑀦𑀺𑀁, 𑀚𑀸𑀦𑀸𑀫𑀺 𑀫𑀽𑀴𑁆𑀳𑀁 𑀯𑀺𑀤𑀼𑀭𑀸𑀦𑀼𑀧𑀸𑀢𑀺𑀦𑀺𑀁;
𑀦 𑀢𑀸𑀤𑀺𑀲𑀻 𑀅𑀭𑀳𑀢𑀺 𑀆𑀲𑀦𑀽𑀤𑀓𑀁, 𑀓𑀼𑀢𑁄 𑀲𑀼𑀥𑀸 𑀕𑀘𑁆𑀙 𑀦 𑀫𑀬𑁆𑀳 𑀭𑀼𑀘𑁆𑀘𑀲𑀻’’𑀢𑀺.
𑀢𑀢𑁆𑀣 𑀲𑀺𑀧𑁆𑀧𑁂𑀦𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀥𑀦𑀼𑀲𑀺𑀧𑁆𑀧𑀸𑀤𑀺𑀦𑀸. 𑀯𑀺𑀚𑁆𑀚𑀸𑀘𑀭𑀡𑁂𑀦𑀸𑀢𑀺 𑀯𑁂𑀤𑀢𑁆𑀢𑀬𑀲𑀗𑁆𑀔𑀸𑀢𑀸𑀬 𑀯𑀺𑀚𑁆𑀚𑀸𑀬 𑀘𑁂𑀯 𑀲𑀻𑀮𑁂𑀦 𑀘. 𑀧𑀕𑀼𑀡𑀸 𑀲𑀓𑀫𑁆𑀫𑀼𑀦𑀸𑀢𑀺 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑁂𑀦 𑀧𑀥𑀸𑀦𑀕𑀼𑀡𑀲𑀫𑀦𑁆𑀦𑀸𑀕𑀢𑀸. 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀬𑀲𑀁 𑀯𑀸 𑀲𑀼𑀔𑀁 𑀯𑀸 𑀦 𑀮𑀪𑀦𑁆𑀢𑀺. 𑀬𑀤𑀺𑀤𑀦𑁆𑀢𑀺 𑀬𑀁 𑀏𑀢𑀁 𑀇𑀲𑁆𑀲𑀭𑀺𑀬𑀢𑁆𑀣𑀸𑀬 𑀲𑀺𑀧𑁆𑀧𑀸𑀦𑀺 ¶ 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀭𑀦𑁆𑀢𑀸𑀦𑀁 ¶ 𑀢𑀬𑀸 𑀯𑁂𑀓𑀮𑁆𑀮𑀁 𑀓𑀢𑀁, 𑀢𑀁 𑀢𑁂 𑀦 𑀲𑀸𑀥𑀼. 𑀅𑀭𑀽𑀧𑀺𑀫𑀦𑁆𑀢𑀺 𑀯𑀺𑀭𑀽𑀧𑀁. 𑀢𑀬𑀸𑀦𑀼𑀕𑀼𑀢𑁆𑀢𑁄𑀢𑀺 𑀢𑀬𑀸 𑀅𑀦𑀼𑀭𑀓𑁆𑀔𑀺𑀢𑁄. 𑀚𑀸𑀢𑀺𑀫𑀸𑀫𑀧𑀻𑀢𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀫𑁆𑀧𑀺 𑀲𑀺𑀧𑁆𑀧𑀯𑀺𑀚𑁆𑀚𑀸𑀘𑀭𑀡𑀩𑀼𑀤𑁆𑀥𑀺𑀓𑀫𑁆𑀫𑁂𑀳𑀺 𑀲𑀫𑁆𑀧𑀦𑁆𑀦𑀫𑁆𑀧𑀺. 𑀧𑁂𑀲𑁂𑀢𑀻𑀢𑀺 𑀧𑁂𑀲𑀦𑀓𑀸𑀭𑀓𑀁 𑀓𑀭𑁄𑀢𑀺. 𑀢𑀁 𑀢𑀦𑁆𑀢𑀺 𑀢𑀲𑁆𑀫𑀸 𑀢𑀁. 𑀅𑀲𑀘𑁆𑀘𑀦𑁆𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑁂 𑀲𑀘𑁆𑀘𑁂 𑀅𑀯𑀢𑁆𑀢𑀦𑀢𑀸𑀬 𑀅𑀲𑀘𑁆𑀘𑀁 𑀉𑀢𑁆𑀢𑀫𑀪𑀸𑀯𑀭𑀳𑀺𑀢𑀁. 𑀅𑀯𑀺𑀪𑀚𑁆𑀚𑀲𑁂𑀯𑀺𑀦𑀺𑀦𑁆𑀢𑀺 𑀅𑀯𑀺𑀪𑀚𑀺𑀢𑁆𑀯𑀸 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀅𑀚𑀸𑀦𑀺𑀢𑁆𑀯𑀸 𑀲𑀺𑀧𑁆𑀧𑀸𑀤𑀺𑀲𑀫𑁆𑀧𑀦𑁆𑀦𑁂𑀧𑀺 𑀇𑀢𑀭𑁂𑀧𑀺 𑀲𑁂𑀯𑀫𑀸𑀦𑀁. 𑀯𑀺𑀤𑀼𑀭𑀸𑀦𑀼𑀧𑀸𑀢𑀺𑀦𑀺𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀼𑀧𑀸𑀢𑀺𑀦𑀺𑀁 𑀧𑀡𑁆𑀟𑀺𑀢𑁂 𑀧𑀸𑀢𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀘𑀭𑀫𑀸𑀦𑀁. 𑀓𑀼𑀢𑁄 𑀲𑀼𑀥𑀸𑀢𑀺 𑀢𑀸𑀤𑀺𑀲𑀸𑀬 𑀦𑀺𑀕𑁆𑀕𑀼𑀡𑀸𑀬 𑀓𑀼𑀢𑁄 𑀲𑀼𑀥𑀸𑀪𑁄𑀚𑀦𑀁, 𑀦 𑀫𑁂 𑀭𑀼𑀘𑁆𑀘𑀲𑀺, 𑀕𑀘𑁆𑀙 𑀫𑀸 𑀇𑀥 𑀢𑀺𑀝𑁆𑀞𑀸𑀢𑀺.
𑀲𑀸 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀢𑀢𑁄 𑀲𑁄 𑀆𑀲𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳 𑁋
‘‘𑀓𑀸 ¶ 𑀲𑀼𑀓𑁆𑀓𑀤𑀸𑀞𑀸 𑀧𑀝𑀺𑀫𑀼𑀓𑁆𑀓𑀓𑀼𑀡𑁆𑀟𑀮𑀸, 𑀘𑀺𑀢𑁆𑀢𑀗𑁆𑀕𑀤𑀸 𑀓𑀫𑁆𑀩𑀼𑀯𑀺𑀫𑀝𑁆𑀞𑀥𑀸𑀭𑀺𑀦𑀻;
𑀑𑀲𑀺𑀢𑁆𑀢𑀯𑀡𑁆𑀡𑀁 𑀧𑀭𑀺𑀤𑀬𑁆𑀳 𑀲𑁄𑀪𑀲𑀺, 𑀓𑀼𑀲𑀕𑁆𑀕𑀺𑀭𑀢𑁆𑀢𑀁 𑀅𑀧𑀺𑀴𑀬𑁆𑀳 𑀫𑀜𑁆𑀚𑀭𑀺𑀁.
‘‘𑀫𑀺𑀕𑀻𑀯 𑀪𑀦𑁆𑀢𑀸 𑀲𑀭𑀘𑀸𑀧𑀥𑀸𑀭𑀺𑀦𑀸, 𑀯𑀺𑀭𑀸𑀥𑀺𑀢𑀸 𑀫𑀦𑁆𑀤𑀫𑀺𑀯 𑀉𑀤𑀺𑀓𑁆𑀔𑀲𑀺;
𑀓𑁄 𑀢𑁂 𑀤𑀼𑀢𑀻𑀬𑁄 𑀇𑀤 𑀫𑀦𑁆𑀤𑀮𑁄𑀘𑀦𑁂, 𑀦 𑀪𑀸𑀬𑀲𑀺 𑀏𑀓𑀺𑀓𑀸 𑀓𑀸𑀦𑀦𑁂 𑀯𑀦𑁂’’𑀢𑀺.
𑀢𑀢𑁆𑀣 𑀘𑀺𑀢𑁆𑀢𑀗𑁆𑀕𑀤𑀸𑀢𑀺 𑀘𑀺𑀢𑁆𑀭𑁂𑀳𑀺 𑀅𑀗𑁆𑀕𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀓𑀫𑁆𑀩𑀼𑀯𑀺𑀫𑀝𑁆𑀞𑀥𑀸𑀭𑀺𑀦𑀻𑀢𑀺 𑀓𑀭𑀡𑀧𑀭𑀺𑀦𑀺𑀝𑁆𑀞𑀺𑀢𑁂𑀦 𑀯𑀺𑀫𑀝𑁆𑀞𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀥𑀸𑀭𑀺𑀦𑀻. 𑀑𑀲𑀺𑀢𑁆𑀢𑀯𑀡𑁆𑀡𑀦𑁆𑀢𑀺 𑀅𑀯𑀲𑀺𑀢𑁆𑀢𑀉𑀤𑀓𑀥𑀸𑀭𑀯𑀡𑁆𑀡𑀁 𑀤𑀺𑀩𑁆𑀩𑀤𑀼𑀓𑀽𑀮𑀁. 𑀧𑀭𑀺𑀤𑀬𑁆𑀳𑀸𑀢𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀓𑀼𑀲𑀕𑁆𑀕𑀺𑀭𑀢𑁆𑀢𑀦𑁆𑀢𑀺 𑀓𑀼𑀲𑀢𑀺𑀡𑀕𑁆𑀕𑀺𑀲𑀺𑀔𑀸𑀯𑀡𑁆𑀡𑀁. 𑀅𑀧𑀺𑀴𑀬𑁆𑀳 𑀫𑀜𑁆𑀚𑀭𑀺𑀦𑁆𑀢𑀺 𑀲𑀧𑀮𑁆𑀮𑀯𑀁 𑀅𑀲𑁄𑀓𑀓𑀡𑁆𑀡𑀺𑀓𑀁 𑀓𑀡𑁆𑀡𑁂 𑀧𑀺𑀴𑀦𑁆𑀥𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀭𑀘𑀸𑀧𑀥𑀸𑀭𑀺𑀦𑀸𑀢𑀺 𑀮𑀼𑀤𑁆𑀤𑁂𑀦. 𑀯𑀺𑀭𑀸𑀥𑀺𑀢𑀸𑀢𑀺 𑀯𑀺𑀭𑀤𑁆𑀥𑀧𑀳𑀸𑀭𑀸. 𑀫𑀦𑁆𑀤𑀫𑀺𑀯𑀸𑀢𑀺 𑀬𑀣𑀸 𑀲𑀸 𑀫𑀺𑀕𑀻 𑀪𑀻𑀢𑀸 𑀯𑀦𑀦𑁆𑀢𑀭𑁂 𑀞𑀢𑁆𑀯𑀸 𑀢𑀁 𑀫𑀦𑁆𑀤𑀁 𑀫𑀦𑁆𑀤𑀁 𑀑𑀮𑁄𑀓𑁂𑀢𑀺, 𑀏𑀯𑀁 𑀑𑀮𑁄𑀓𑁂𑀲𑀺.
𑀢𑀢𑁄 ¶ 𑀆𑀲𑀸 𑀆𑀳 𑁋
‘‘𑀦 𑀫𑁂 𑀤𑀼𑀢𑀻𑀬𑁄 𑀇𑀥 𑀫𑀢𑁆𑀣𑀺 𑀓𑁄𑀲𑀺𑀬, 𑀫𑀲𑀓𑁆𑀓𑀲𑀸𑀭𑀧𑁆𑀧𑀪𑀯𑀫𑁆𑀳𑀺 𑀤𑁂𑀯𑀢𑀸;
𑀆𑀲𑀸 𑀲𑀼𑀥𑀸𑀲𑀸𑀬 𑀢𑀯𑀦𑁆𑀢𑀺𑀫𑀸𑀕𑀢𑀸, 𑀢𑀁 𑀫𑀁 𑀲𑀼𑀥𑀸𑀬 𑀯𑀭𑀧𑀜𑁆𑀜 𑀪𑀸𑀚𑀬𑀸’’𑀢𑀺.
𑀢𑀢𑁆𑀣 𑀫𑀲𑀓𑁆𑀓𑀲𑀸𑀭𑀧𑁆𑀧𑀪𑀯𑀸𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀫𑁆𑀪𑀯𑀸.
𑀢𑀁 ¶ 𑀲𑀼𑀢𑁆𑀯𑀸 𑀓𑁄𑀲𑀺𑀬𑁄 ‘‘𑀢𑁆𑀯𑀁 𑀓𑀺𑀭 𑀬𑁄 𑀢𑁂 𑀭𑀼𑀘𑁆𑀘𑀢𑀺, 𑀢𑀲𑁆𑀲 𑀆𑀲𑀸𑀨𑀮𑀦𑀺𑀧𑁆𑀨𑀸𑀤𑀦𑁂𑀦 𑀆𑀲𑀁 𑀤𑁂𑀲𑀺, 𑀬𑁄 𑀢𑁂 𑀦 𑀭𑀼𑀘𑁆𑀘𑀢𑀺, 𑀢𑀲𑁆𑀲 𑀦 𑀤𑁂𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀫𑀸 𑀧𑀢𑁆𑀣𑀺𑀢𑀢𑁆𑀣𑀯𑀺𑀦𑀸𑀲𑀺𑀓𑀸’’𑀢𑀺 𑀤𑀻𑀧𑁂𑀦𑁆𑀢𑁄 𑀆𑀳 𑁋
‘‘𑀆𑀲𑀸𑀬 𑀬𑀦𑁆𑀢𑀺 𑀯𑀸𑀡𑀺𑀚𑀸 𑀥𑀦𑁂𑀲𑀺𑀦𑁄, 𑀦𑀸𑀯𑀁 𑀲𑀫𑀸𑀭𑀼𑀬𑁆𑀳 𑀧𑀭𑁂𑀦𑁆𑀢𑀺 𑀅𑀡𑁆𑀡𑀯𑁂;
𑀢𑁂 𑀢𑀢𑁆𑀣 𑀲𑀻𑀤𑀦𑁆𑀢𑀺 𑀅𑀣𑁄𑀧𑀺 𑀏𑀓𑀤𑀸, 𑀚𑀻𑀦𑀸𑀥𑀦𑀸 𑀏𑀦𑁆𑀢𑀺 𑀯𑀺𑀦𑀝𑁆𑀞𑀧𑀸𑀪𑀢𑀸.
‘‘𑀆𑀲𑀸𑀬 𑀔𑁂𑀢𑁆𑀢𑀸𑀦𑀺 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀯𑀧𑀦𑁆𑀢𑀺 𑀩𑀻𑀚𑀸𑀦𑀺 𑀓𑀭𑁄𑀦𑁆𑀢𑀼𑀧𑀸𑀬𑀲𑁄;
𑀈𑀢𑀻𑀦𑀺𑀧𑀸𑀢𑁂𑀦 𑀅𑀯𑀼𑀝𑁆𑀞𑀺𑀢𑀸𑀬 𑀯𑀸, 𑀦 𑀓𑀺𑀜𑁆𑀘𑀺 𑀯𑀺𑀦𑁆𑀤𑀦𑁆𑀢𑀺 𑀢𑀢𑁄 𑀨𑀮𑀸𑀕𑀫𑀁.
‘‘𑀅𑀣𑀢𑁆𑀢𑀓𑀸𑀭𑀸𑀦𑀺 ¶ 𑀓𑀭𑁄𑀦𑁆𑀢𑀺 𑀪𑀢𑁆𑀢𑀼𑀲𑀼, 𑀆𑀲𑀁 𑀧𑀼𑀭𑀓𑁆𑀔𑀢𑁆𑀯𑀸 𑀦𑀭𑀸 𑀲𑀼𑀔𑁂𑀲𑀺𑀦𑁄;
𑀢𑁂 𑀪𑀢𑁆𑀢𑀼𑀭𑀢𑁆𑀣𑀸 𑀅𑀢𑀺𑀕𑀸𑀴𑁆𑀳𑀺𑀢𑀸 𑀧𑀼𑀦, 𑀤𑀺𑀲𑀸 𑀧𑀦𑀲𑁆𑀲𑀦𑁆𑀢𑀺 𑀅𑀮𑀤𑁆𑀥 𑀓𑀺𑀜𑁆𑀘𑀦𑀁.
‘‘𑀳𑀺𑀢𑁆𑀯𑀸𑀦 𑀥𑀜𑁆𑀜𑀜𑁆𑀘 𑀥𑀦𑀜𑁆𑀘 𑀜𑀸𑀢𑀓𑁂, 𑀆𑀲𑀸𑀬 𑀲𑀕𑁆𑀕𑀸𑀥𑀺𑀫𑀦𑀸 𑀲𑀼𑀔𑁂𑀲𑀺𑀦𑁄;
𑀢𑀧𑀦𑁆𑀢𑀺 𑀮𑀽𑀔𑀫𑁆𑀧𑀺 𑀢𑀧𑀁 𑀘𑀺𑀭𑀦𑁆𑀢𑀭𑀁, 𑀓𑀼𑀫𑀕𑁆𑀕𑀫𑀸𑀭𑀼𑀬𑁆𑀳 𑀧𑀭𑁂𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.
‘‘𑀆𑀲𑀸 ¶ 𑀯𑀺𑀲𑀁𑀯𑀸𑀤𑀺𑀓𑀲𑀫𑁆𑀫𑀢𑀸 𑀇𑀫𑁂, 𑀆𑀲𑁂 𑀲𑀼𑀥𑀸𑀲𑀁 𑀯𑀺𑀦𑀬𑀲𑁆𑀲𑀼 𑀅𑀢𑁆𑀢𑀦𑀺;
𑀦 𑀢𑀸𑀤𑀺𑀲𑀻 𑀅𑀭𑀳𑀢𑀺 𑀆𑀲𑀦𑀽𑀤𑀓𑀁, 𑀓𑀼𑀢𑁄 𑀲𑀼𑀥𑀸 𑀕𑀘𑁆𑀙 𑀦 𑀫𑀬𑁆𑀳 𑀭𑀼𑀘𑁆𑀘𑀲𑀻’’𑀢𑀺.
𑀢𑀢𑁆𑀣 𑀧𑀭𑁂𑀦𑁆𑀢𑀻𑀢𑀺 𑀧𑀓𑁆𑀔𑀦𑁆𑀤𑀦𑁆𑀢𑀺. 𑀚𑀻𑀦𑀸𑀥𑀦𑀸𑀢𑀺 𑀚𑀻𑀦𑀥𑀦𑀸. 𑀇𑀢𑀺 𑀢𑀯 𑀯𑀲𑁂𑀦 𑀏𑀓𑁂 𑀲𑀫𑁆𑀧𑀚𑁆𑀚𑀦𑁆𑀢𑀺 𑀏𑀓𑁂 𑀯𑀺𑀧𑀚𑁆𑀚𑀦𑁆𑀢𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑀺𑀲𑀸 𑀧𑀸𑀧𑀥𑀫𑁆𑀫𑀸𑀢𑀺 𑀯𑀤𑀢𑀺. 𑀓𑀭𑁄𑀦𑁆𑀢𑀼𑀧𑀸𑀬𑀲𑁄𑀢𑀺 𑀢𑀁 𑀢𑀁 𑀓𑀺𑀘𑁆𑀘𑀁 𑀉𑀧𑀸𑀬𑁂𑀦 𑀓𑀭𑁄𑀦𑁆𑀢𑀺. 𑀈𑀢𑀻𑀦𑀺𑀧𑀸𑀢𑁂𑀦𑀸𑀢𑀺 𑀯𑀺𑀲𑀫𑀯𑀸𑀢𑀫𑀽𑀲𑀺𑀓𑀲𑀮𑀪𑀲𑀼𑀓𑀧𑀸𑀡𑀓𑀲𑁂𑀢𑀝𑁆𑀞𑀺𑀓𑀭𑁄𑀕𑀸𑀤𑀻𑀦𑀁 𑀲𑀲𑁆𑀲𑀼𑀧𑀤𑁆𑀤𑀯𑀸𑀦𑀁 𑀅𑀜𑁆𑀜𑀢𑀭𑀦𑀺𑀧𑀸𑀢𑁂𑀦 𑀯𑀸. 𑀢𑀢𑁄𑀢𑀺 𑀢𑀢𑁄 𑀲𑀲𑁆𑀲𑀢𑁄 𑀢𑁂 𑀓𑀺𑀜𑁆𑀘𑀺 𑀨𑀮𑀁 𑀦 𑀯𑀺𑀦𑁆𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀲𑀘𑁆𑀙𑁂𑀤𑀦𑀓𑀫𑁆𑀫𑀁 𑀢𑁆𑀯𑀫𑁂𑀯 𑀓𑀭𑁄𑀲𑀻𑀢𑀺 𑀯𑀤𑀢𑀺. 𑀅𑀣𑀢𑁆𑀢𑀓𑀸𑀭𑀸𑀦𑀻𑀢𑀺 𑀬𑀼𑀤𑁆𑀥𑀪𑀽𑀫𑀻𑀲𑀼 𑀧𑀼𑀭𑀺𑀲𑀓𑀸𑀭𑁂. 𑀆𑀲𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀇𑀲𑁆𑀲𑀭𑀺𑀬𑀸𑀲𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀪𑀢𑁆𑀢𑀼𑀭𑀢𑁆𑀣𑀸𑀢𑀺 𑀲𑀸𑀫𑀺𑀦𑁄 𑀅𑀢𑁆𑀣𑀸𑀬. 𑀅𑀢𑀺𑀕𑀸𑀴𑀺𑀢𑀸𑀢𑀺 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀢𑀺𑀧𑀻𑀴𑀺𑀢𑀸 𑀯𑀺𑀮𑀼𑀢𑁆𑀢𑀲𑀸𑀧𑀢𑁂𑀬𑁆𑀬𑀸 𑀤𑁆𑀥𑀲𑁆𑀢𑀲𑁂𑀦𑀯𑀸𑀳𑀦𑀸 𑀳𑀼𑀢𑁆𑀯𑀸. 𑀧𑀦𑀲𑁆𑀲𑀦𑁆𑀢𑀻𑀢𑀺 𑀧𑀮𑀸𑀬𑀦𑁆𑀢𑀺. 𑀅𑀮𑀤𑁆𑀥 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺 𑀇𑀲𑁆𑀲𑀭𑀺𑀬𑀁 𑀅𑀮𑀪𑀺𑀢𑁆𑀯𑀸 ¶ . 𑀇𑀢𑀺 𑀏𑀢𑁂𑀲𑀫𑁆𑀧𑀺 𑀇𑀲𑁆𑀲𑀭𑀺𑀬𑀸𑀮𑀸𑀪𑀁 𑀢𑁆𑀯𑀫𑁂𑀯 𑀓𑀭𑁄𑀲𑀻𑀢𑀺 𑀯𑀤𑀢𑀺. 𑀲𑀕𑁆𑀕𑀸𑀥𑀺𑀫𑀦𑀸𑀢𑀺 𑀲𑀕𑁆𑀕𑀁 𑀅𑀥𑀺𑀕𑀦𑁆𑀢𑀼𑀫𑀦𑀸. 𑀮𑀽𑀔𑀦𑁆𑀢𑀺 𑀦𑀺𑀭𑁄𑀚𑀁 𑀧𑀜𑁆𑀘𑀢𑀧𑀸𑀤𑀺𑀓𑀁 𑀓𑀸𑀬𑀓𑀺𑀮𑀫𑀣𑀁. 𑀘𑀺𑀭𑀦𑁆𑀢𑀭𑀦𑁆𑀢𑀺 𑀘𑀺𑀭𑀓𑀸𑀮𑀁. 𑀆𑀲𑀸 𑀯𑀺𑀲𑀁𑀯𑀸𑀤𑀺𑀓𑀲𑀫𑁆𑀫𑀢𑀸 𑀇𑀫𑁂𑀢𑀺 𑀏𑀯𑀁 𑀇𑀫𑁂 𑀲𑀢𑁆𑀢𑀸 𑀲𑀕𑁆𑀕𑀸𑀲𑀸𑀬 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀆𑀲𑀸 𑀦𑀸𑀫 𑀯𑀺𑀲𑀁𑀯𑀸𑀤𑀺𑀓𑀲𑀫𑁆𑀫𑀢𑀸 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀲𑀗𑁆𑀔𑀁 𑀕𑀢𑀸. 𑀆𑀲𑁂𑀢𑀺 𑀢𑀁 𑀆𑀮𑀧𑀢𑀺.
𑀲𑀸𑀧𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸 𑀅𑀦𑁆𑀢𑀭𑀥𑀸𑀬𑀺. 𑀢𑀢𑁄 𑀲𑀤𑁆𑀥𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀬𑀲𑀲𑀸 𑀬𑀲𑀲𑁆𑀲𑀺𑀦𑀻, 𑀚𑀺𑀖𑀜𑁆𑀜𑀦𑀸𑀫𑀯𑁆𑀳𑀬𑀦𑀁 𑀤𑀺𑀲𑀁 𑀧𑀢𑀺;
𑀧𑀼𑀘𑁆𑀙𑀸𑀫𑀺 𑀢𑀁 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑁂, 𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀓𑀢𑀫𑀸𑀲𑀺 𑀤𑁂𑀯𑀢𑁂’’𑀢𑀺.
𑀢𑀢𑁆𑀣 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀚𑀮𑀫𑀸𑀦𑀸. 𑀚𑀺𑀖𑀜𑁆𑀜𑀦𑀸𑀫𑀯𑁆𑀳𑀬𑀦𑀦𑁆𑀢𑀺 𑀅𑀧𑀭𑀸𑀢𑀺 𑀘 𑀧𑀘𑁆𑀙𑀺𑀫𑀸𑀢𑀺 𑀘 𑀏𑀯𑀁 𑀚𑀺𑀖𑀜𑁆𑀜𑁂𑀦 𑀮𑀸𑀫𑀓𑁂𑀦 𑀦𑀸𑀫𑁂𑀦 𑀯𑀼𑀘𑁆𑀘𑀫𑀸𑀦𑀁 𑀤𑀺𑀲𑀁 𑀧𑀢𑀺 𑀤𑀤𑁆𑀤𑀮𑁆𑀮𑀫𑀸𑀦𑀸 𑀢𑀺𑀝𑁆𑀞𑀲𑀺.
‘‘𑀲𑀤𑁆𑀥𑀸𑀳 𑀤𑁂𑀯𑀻 𑀫𑀦𑀼𑀚𑁂𑀳𑀺 𑀧𑀽𑀚𑀺𑀢𑀸, 𑀅𑀧𑀸𑀧𑀲𑀢𑁆𑀢𑀽𑀧𑀦𑀺𑀲𑁂𑀯𑀺𑀦𑀻 𑀲𑀤𑀸;
𑀲𑀼𑀥𑀸𑀯𑀺𑀯𑀸𑀤𑁂𑀦 𑀢𑀯𑀦𑁆𑀢𑀺 𑀫𑀸𑀕𑀢𑀸, 𑀢𑀁 𑀫𑀁 𑀲𑀼𑀥𑀸𑀬 𑀯𑀭𑀧𑀜𑁆𑀜 𑀪𑀸𑀚𑀬𑀸’’𑀢𑀺.
𑀢𑀢𑁆𑀣 𑀲𑀤𑁆𑀥𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀘𑀦𑀧𑀢𑁆𑀢𑀺𑀬𑀸𑀬𑀦𑀸 𑀲𑀸𑀯𑀚𑁆𑀚𑀸𑀧𑀺 𑀳𑁄𑀢𑀺 𑀅𑀦𑀯𑀚𑁆𑀚𑀸𑀧𑀺. 𑀧𑀽𑀚𑀺𑀢𑀸𑀢𑀺 𑀅𑀦𑀯𑀚𑁆𑀚𑀓𑁄𑀝𑁆𑀞𑀸𑀲𑀯𑀲𑁂𑀦 𑀧𑀽𑀚𑀺𑀢𑀸. 𑀅𑀧𑀸𑀧𑀲𑀢𑁆𑀢𑀽𑀧𑀦𑀺𑀲𑁂𑀯𑀺𑀦𑀻𑀢𑀺 𑀅𑀦𑀯𑀚𑁆𑀚𑀲𑀤𑁆𑀥𑀸𑀬 𑀘 𑀏𑀓𑀦𑁆𑀢𑀧𑀢𑁆𑀢𑀺𑀬𑀸𑀬𑀦𑀼𑀲𑀪𑀸𑀯𑀸𑀭 𑀧𑀭𑁂𑀲𑀼𑀧𑀺 𑀧𑀢𑁆𑀢𑀺𑀬𑀸𑀬𑀦𑀯𑀺𑀤𑀳𑀦𑀲𑀫𑀢𑁆𑀣𑀸𑀬 𑀤𑁂𑀯𑀢𑀸𑀬𑁂𑀢𑀁 𑀦𑀸𑀫𑀁.
𑀅𑀣𑀁 𑀦𑀁 𑀓𑁄𑀲𑀺𑀬𑁄 ‘‘𑀇𑀫𑁂 𑀲𑀢𑁆𑀢𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀢𑀁 𑀢𑀁 𑀓𑀭𑁄𑀦𑁆𑀢𑀸 𑀓𑀢𑁆𑀢𑀩𑁆𑀩𑀢𑁄 𑀅𑀓𑀢𑁆𑀢𑀩𑁆𑀩𑀫𑁂𑀯 𑀩𑀳𑀼𑀢𑀭𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀢𑀬𑀸 𑀓𑀸𑀭𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀏𑀯𑀫𑀸𑀳 𑁋
‘‘𑀤𑀸𑀦𑀁 𑀤𑀫𑀁 𑀘𑀸𑀕𑀫𑀣𑁄𑀧𑀺 𑀲𑀁𑀬𑀫𑀁, 𑀆𑀤𑀸𑀬 𑀲𑀤𑁆𑀥𑀸𑀬 𑀓𑀭𑁄𑀦𑁆𑀢𑀺 𑀳𑁂𑀓𑀤𑀸;
𑀣𑁂𑀬𑁆𑀬𑀁 ¶ 𑀫𑀼𑀲𑀸 𑀓𑀽𑀝𑀫𑀣𑁄𑀧𑀺 𑀧𑁂𑀲𑀼𑀡𑀁, 𑀓𑀭𑁄𑀦𑁆𑀢𑀺 𑀳𑁂𑀓𑁂 𑀧𑀼𑀦 𑀯𑀺𑀘𑁆𑀘𑀼𑀢𑀸 𑀢𑀬𑀸.
‘‘𑀪𑀭𑀺𑀬𑀸𑀲𑀼 𑀧𑁄𑀲𑁄 𑀲𑀤𑀺𑀲𑀻𑀲𑀼 𑀧𑁂𑀓𑁆𑀔𑀯𑀸, 𑀲𑀻𑀮𑀽𑀧𑀧𑀦𑁆𑀦𑀸𑀲𑀼 𑀧𑀢𑀺𑀩𑁆𑀩𑀢𑀸𑀲𑀼𑀧𑀺;
𑀯𑀺𑀦𑁂𑀢𑁆𑀯𑀸𑀦 𑀙𑀦𑁆𑀤𑀁 𑀓𑀼𑀮𑀺𑀢𑁆𑀣𑀺𑀭𑀸𑀲𑀼𑀧𑀺, 𑀓𑀭𑁄𑀢𑀺 𑀲𑀤𑁆𑀥𑀁 𑀧𑀼𑀦 𑀓𑀼𑀫𑁆𑀪𑀤𑀸𑀲𑀺𑀬𑀸.
‘‘𑀢𑁆𑀯𑀫𑁂𑀯 𑀲𑀤𑁆𑀥𑁂 𑀧𑀭𑀤𑀸𑀭𑀲𑁂𑀯𑀺𑀦𑀻, 𑀧𑀸𑀧𑀁 𑀓𑀭𑁄𑀲𑀺 𑀓𑀼𑀲𑀮𑀫𑁆𑀧𑀺 𑀭𑀺𑀜𑁆𑀘𑀲𑀺;
𑀦 𑀢𑀸𑀤𑀺𑀲𑀻 𑀅𑀭𑀳𑀢𑀺 𑀆𑀲𑀦𑀽𑀤𑀓𑀁, 𑀓𑀼𑀢𑁄 𑀲𑀼𑀥𑀸 𑀕𑀘𑁆𑀙 𑀦 𑀫𑀬𑁆𑀳 𑀭𑀼𑀘𑁆𑀘𑀲𑀻’’𑀢𑀺.
𑀢𑀢𑁆𑀣 𑀤𑀸𑀦𑀦𑁆𑀢𑀺 𑀤𑀲𑀯𑀢𑁆𑀣𑀼𑀓𑀁 𑀧𑀼𑀜𑁆𑀜𑀘𑁂𑀢𑀦𑀁. 𑀤𑀫𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑀁. 𑀘𑀸𑀕𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀁. 𑀲𑀁𑀬𑀫𑀦𑁆𑀢𑀺 𑀲𑀻𑀮𑀁. 𑀆𑀤𑀸𑀬 𑀲𑀤𑁆𑀥𑀸𑀬𑀸𑀢𑀺 ‘‘𑀏𑀢𑀸𑀦𑀺 𑀤𑀸𑀦𑀸𑀤𑀻𑀦𑀺 𑀫𑀳𑀸𑀦𑀺𑀲𑀁𑀲𑀸𑀦𑀺 𑀓𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀯𑀤𑀢𑀁 𑀯𑀘𑀦𑀁 𑀲𑀤𑁆𑀥𑀸𑀬 𑀆𑀤𑀺𑀬𑀺𑀢𑁆𑀯𑀸𑀧𑀺 ¶ 𑀓𑀭𑁄𑀦𑁆𑀢𑀺 𑀏𑀓𑀤𑀸. 𑀓𑀽𑀝𑀦𑁆𑀢𑀺 𑀢𑀼𑀮𑀸𑀓𑀽𑀝𑀸𑀤𑀺𑀓𑀁 𑀯𑀸 𑀕𑀸𑀫𑀓𑀽𑀝𑀸𑀤𑀺𑀓𑀁 𑀓𑀫𑁆𑀫𑀁 𑀯𑀸. 𑀓𑀭𑁄𑀦𑁆𑀢𑀺 𑀳𑁂𑀓𑁂𑀢𑀺 𑀏𑀓𑁂 𑀫𑀦𑀼𑀲𑁆𑀲𑀸 𑀏𑀯𑀭𑀽𑀧𑁂𑀲𑀼 𑀦𑀸𑀫 𑀓𑀸𑀮𑁂𑀲𑀼 𑀇𑀫𑁂𑀲𑀜𑁆𑀘 𑀅𑀢𑁆𑀣𑀸𑀬 𑀣𑁂𑀬𑁆𑀬𑀸𑀤𑀻𑀦𑀺 𑀓𑀢𑁆𑀢𑀩𑁆𑀩𑀸𑀦𑀻𑀢𑀺 𑀓𑁂𑀲𑀜𑁆𑀘𑀺 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀏𑀢𑀸𑀦𑀺𑀧𑀺 𑀓𑀭𑁄𑀦𑁆𑀢𑀺. 𑀧𑀼𑀦 𑀯𑀺𑀘𑁆𑀘𑀼𑀢𑀸 𑀢𑀬𑀸𑀢𑀺 𑀧𑀼𑀦 𑀢𑀬𑀸 𑀯𑀺𑀲𑀼𑀢𑁆𑀢𑀸 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑁂𑀢𑀸𑀦𑀺 𑀦 𑀓𑀢𑁆𑀢𑀩𑁆𑀩𑀸𑀦𑀻𑀢𑀺 𑀯𑀤𑀢𑀁 𑀯𑀘𑀦𑀁 𑀅𑀧𑀢𑁆𑀢𑀺𑀬𑀸𑀬𑀺𑀢𑁆𑀯𑀸𑀧𑀺 𑀓𑀭𑁄𑀦𑁆𑀢𑀺. 𑀇𑀢𑀺 𑀢𑀯 𑀯𑀲𑁂𑀦 𑀲𑀸𑀯𑀚𑁆𑀚𑀫𑁆𑀧𑀺 𑀅𑀦𑀯𑀚𑁆𑀚𑀫𑁆𑀧𑀺 𑀓𑀭𑁂𑀬𑁆𑀬𑀸𑀲𑀺 𑀯𑀤𑀢𑀺.
𑀲𑀤𑀺𑀲𑀻𑀲𑀽𑀢𑀺 ¶ 𑀚𑀸𑀢𑀺𑀕𑁄𑀢𑁆𑀢𑀲𑀻𑀮𑀸𑀤𑀻𑀳𑀺 𑀲𑀤𑀺𑀲𑀻𑀲𑀼. 𑀧𑁂𑀓𑁆𑀔𑀯𑀸𑀢𑀺 𑀧𑁂𑀓𑁆𑀔𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀲𑀢𑀡𑁆𑀳𑁄𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀦𑁆𑀢𑀺 𑀙𑀦𑁆𑀤𑀭𑀸𑀕𑀁. 𑀓𑀭𑁄𑀢𑀺 𑀲𑀤𑁆𑀥𑀦𑁆𑀢𑀺 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑀯𑀘𑀦𑁂 𑀲𑀤𑁆𑀥𑀁 𑀓𑀭𑁄𑀢𑀺, 𑀢𑀲𑁆𑀲𑀸 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀦𑀸𑀫 𑀉𑀧𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑀺𑀬𑀸 𑀧𑀢𑁆𑀢𑀺𑀬𑀸𑀬𑀺𑀢𑁆𑀯𑀸 𑀓𑀼𑀮𑀺𑀢𑁆𑀣𑀺𑀬𑁄𑀧𑀺 𑀙𑀟𑁆𑀟𑁂𑀢𑁆𑀯𑀸 𑀢𑀫𑁂𑀯 𑀧𑀝𑀺𑀲𑁂𑀯𑀢𑀺, 𑀅𑀲𑀼𑀓𑀸 𑀦𑀸𑀫 𑀢𑀼𑀫𑁆𑀳𑁂𑀲𑀼 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀢𑀺 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑀯𑀘𑀦𑁂 𑀲𑀤𑁆𑀥𑀁 𑀓𑀢𑁆𑀯𑀸𑀯 𑀧𑀭𑀤𑀸𑀭𑀁 𑀲𑁂𑀯𑀢𑀺. 𑀢𑁆𑀯𑀫𑁂𑀯 𑀲𑀤𑁆𑀥𑁂 𑀧𑀭𑀤𑀸𑀭𑀲𑁂𑀯𑀺𑀦𑀻𑀢𑀺 𑀬𑀲𑁆𑀫𑀸 𑀢𑀁 𑀢𑀁 𑀧𑀢𑁆𑀢𑀺𑀬𑀸𑀬𑀺𑀢𑁆𑀯𑀸 𑀢𑀯 𑀯𑀲𑁂𑀦 𑀧𑀭𑀤𑀸𑀭𑀁 𑀲𑁂𑀯𑀦𑁆𑀢𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺 𑀓𑀼𑀲𑀮𑀁 𑀚𑀳𑀦𑁆𑀢𑀺, 𑀢𑀲𑁆𑀫𑀸 𑀢𑁆𑀯𑀫𑁂𑀯 𑀧𑀭𑀤𑀸𑀭𑀲𑁂𑀯𑀺𑀦𑀻 𑀢𑁆𑀯𑀁 𑀧𑀸𑀧𑀸𑀦𑀺 𑀓𑀭𑁄𑀲𑀺, 𑀓𑀼𑀲𑀮𑀫𑁆𑀧𑀺 𑀭𑀺𑀜𑁆𑀘𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀫𑀸 𑀮𑁄𑀓𑀯𑀺𑀦𑀸𑀲𑀺𑀓𑀸 𑀧𑀸𑀧𑀥𑀫𑁆𑀫𑀸, 𑀕𑀘𑁆𑀙 𑀦 𑀫𑁂 𑀭𑀼𑀘𑁆𑀘𑀲𑀻𑀢𑀺.
𑀲𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀓𑁄𑀲𑀺𑀬𑁄𑀧𑀺 𑀉𑀢𑁆𑀢𑀭𑀢𑁄 𑀞𑀺𑀢𑀸𑀬 𑀳𑀺𑀭𑀺𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀚𑀺𑀖𑀜𑁆𑀜𑀭𑀢𑁆𑀢𑀺𑀁 𑀅𑀭𑀼𑀡𑀲𑁆𑀫𑀺𑀫𑀽𑀳𑀢𑁂, 𑀬𑀸 𑀤𑀺𑀲𑁆𑀲𑀢𑀺 𑀉𑀢𑁆𑀢𑀫𑀭𑀽𑀧𑀯𑀡𑁆𑀡𑀺𑀦𑀻;
𑀢𑀣𑀽𑀧𑀫𑀸 ¶ 𑀫𑀁 𑀧𑀝𑀺𑀪𑀸𑀲𑀺 𑀤𑁂𑀯𑀢𑁂, 𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀓𑀢𑀫𑀸𑀲𑀺 𑀅𑀘𑁆𑀙𑀭𑀸.
‘‘𑀓𑀸𑀴𑀸 𑀦𑀺𑀤𑀸𑀖𑁂𑀭𑀺𑀯 𑀅𑀕𑁆𑀕𑀺𑀚𑀸𑀭𑀺𑀯, 𑀅𑀦𑀺𑀮𑁂𑀭𑀺𑀢𑀸 𑀮𑁄𑀳𑀺𑀢𑀧𑀢𑁆𑀢𑀫𑀸𑀮𑀺𑀦𑀻;
𑀓𑀸 𑀢𑀺𑀝𑁆𑀞𑀲𑀺 𑀫𑀦𑁆𑀤𑀫𑀺𑀕𑀸𑀯𑀮𑁄𑀓𑀬𑀁, 𑀪𑀸𑀲𑁂𑀲𑀫𑀸𑀦𑀸𑀯 𑀕𑀺𑀭𑀁 𑀦 𑀫𑀼𑀜𑁆𑀘𑀲𑀻’’𑀢𑀺.
𑀢𑀢𑁆𑀣 𑀚𑀺𑀖𑀜𑁆𑀜𑀭𑀢𑁆𑀢𑀺𑀦𑁆𑀢𑀺 𑀧𑀘𑁆𑀙𑀺𑀫𑀭𑀢𑁆𑀢𑀺𑀁, 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀢𑁆𑀣𑁄. 𑀊𑀳𑀢𑁂𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂. 𑀬𑀸𑀢𑀺 𑀬𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀭𑀢𑁆𑀢𑀲𑀼𑀯𑀡𑁆𑀡𑀢𑀸𑀬 𑀉𑀧𑁆𑀧𑀫𑀭𑀽𑀧𑀥𑀭𑀸 ¶ 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀓𑀸𑀴𑀸 𑀦𑀺𑀤𑀸𑀖𑁂𑀭𑀺𑀯𑀸𑀢𑀺 𑀦𑀺𑀤𑀸𑀖𑀲𑀫𑀬𑁂 𑀓𑀸𑀴𑀯𑀮𑁆𑀮𑀺 𑀯𑀺𑀬. 𑀅𑀕𑁆𑀕𑀺𑀚𑀸𑀭𑀺𑀯𑀸𑀢𑀺 𑀅𑀕𑁆𑀕𑀺𑀚𑀸𑀮𑀸 𑀇𑀯, 𑀲𑀸𑀧𑀺 𑀦𑀺𑀚𑁆𑀛𑀸𑀫𑀔𑁂𑀢𑁆𑀢𑁂𑀲𑀼 𑀢𑀭𑀼𑀡𑀉𑀝𑁆𑀞𑀺𑀢𑀓𑀸𑀴𑀯𑀮𑁆𑀮𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀮𑁄𑀳𑀺𑀢𑀧𑀢𑁆𑀢𑀫𑀸𑀮𑀺𑀦𑀻𑀢𑀺 𑀮𑁄𑀳𑀺𑀢𑀯𑀡𑁆𑀡𑁂𑀳𑀺 𑀧𑀢𑁆𑀢𑁂𑀳𑀺 𑀧𑀭𑀺𑀯𑀼𑀢𑀸. 𑀓𑀸 𑀢𑀺𑀝𑁆𑀞𑀲𑀻𑀢𑀺 𑀬𑀣𑀸 𑀲𑀸 𑀢𑀭𑀼𑀡𑀓𑀸𑀴𑀯𑀮𑁆𑀮𑀺 𑀯𑀸𑀢𑁂𑀭𑀺𑀢𑀸 𑀯𑀺𑀮𑀸𑀲𑀫𑀸𑀦𑀸 𑀲𑁄𑀪𑀫𑀸𑀦𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀓𑀸 𑀦𑀸𑀫 𑀢𑁆𑀯𑀁 𑀢𑀺𑀝𑁆𑀞𑀲𑀺. 𑀪𑀸𑀲𑁂𑀲𑀫𑀸𑀦𑀸𑀯𑀸𑀢𑀺 𑀫𑀬𑀸 𑀲𑀤𑁆𑀥𑀺𑀁 𑀪𑀸𑀲𑀺𑀢𑀼𑀓𑀸𑀫𑀸 𑀯𑀺𑀬 𑀳𑁄𑀲𑀺, 𑀦 𑀘 𑀕𑀺𑀭𑀁 𑀫𑀼𑀜𑁆𑀘𑀲𑀺.
𑀢𑀢𑁄 𑀲𑀸 𑀕𑀸𑀣𑀫𑀸𑀳 𑁋
‘‘𑀳𑀺𑀭𑀸𑀳 ¶ 𑀤𑁂𑀯𑀻 𑀫𑀦𑀼𑀚𑁂𑀳𑀺 𑀧𑀽𑀚𑀺𑀢𑀸, 𑀅𑀧𑀸𑀧𑀲𑀢𑁆𑀢𑀽𑀧𑀦𑀺𑀲𑁂𑀯𑀺𑀦𑀻 𑀲𑀤𑀸;
𑀲𑀼𑀥𑀸𑀯𑀺𑀯𑀸𑀤𑁂𑀦 𑀢𑀯𑀦𑁆𑀢𑀺𑀫𑀸𑀕𑀢𑀸, 𑀲𑀸𑀳𑀁 𑀦 𑀲𑀓𑁆𑀓𑁄𑀫𑀺 𑀲𑀼𑀥𑀫𑁆𑀧𑀺 𑀬𑀸𑀘𑀺𑀢𑀼𑀁;
𑀓𑁄𑀧𑀻𑀦𑀭𑀽𑀧𑀸 𑀯𑀺𑀬 𑀬𑀸𑀘𑀦𑀺𑀢𑁆𑀣𑀺𑀬𑀸’’𑀢𑀺.
𑀢𑀢𑁆𑀣 𑀳𑀺𑀭𑀸𑀳𑀦𑁆𑀢𑀺 𑀳𑀺𑀭𑀻 𑀅𑀳𑀁. 𑀲𑀼𑀥𑀫𑁆𑀧𑀻𑀢𑀺 𑀲𑀸 𑀅𑀳𑀁 𑀲𑀼𑀥𑀸𑀪𑁄𑀚𑀦𑀁 𑀢𑀁 𑀬𑀸𑀘𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀫𑀺. 𑀓𑀺𑀁𑀓𑀸𑀭𑀡𑀸? 𑀓𑁄𑀧𑀻𑀦𑀭𑀽𑀧𑀸 𑀯𑀺𑀬 𑀬𑀸𑀘𑀦𑀺𑀢𑁆𑀣𑀺𑀬𑀸, 𑀬𑀲𑁆𑀫𑀸 𑀇𑀢𑁆𑀣𑀺𑀬𑀸 𑀬𑀸𑀘𑀦𑀸 𑀦𑀸𑀫 𑀓𑁄𑀧𑀻𑀦𑀭𑀽𑀧𑀸 𑀯𑀺𑀬 𑀭𑀳𑀲𑁆𑀲𑀗𑁆𑀕𑀯𑀺𑀯𑀭𑀡𑀲𑀤𑀺𑀲𑀸 𑀳𑁄𑀢𑀺, 𑀦𑀺𑀮𑁆𑀮𑀚𑁆𑀚𑀸 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀢𑀸𑀧𑀲𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀥𑀫𑁆𑀫𑁂𑀦 𑀜𑀸𑀬𑁂𑀦 𑀲𑀼𑀕𑀢𑁆𑀢𑁂 𑀮𑀘𑁆𑀙𑀲𑀺, 𑀏𑀲𑁄 𑀳𑀺 𑀥𑀫𑁆𑀫𑁄 𑀦 𑀳𑀺 𑀬𑀸𑀘𑀦𑀸 𑀲𑀼𑀥𑀸.
𑀢𑀁 𑀢𑀁 𑀅𑀬𑀸𑀘𑀦𑁆𑀢𑀺𑀫𑀳𑀁 𑀦𑀺𑀫𑀦𑁆𑀢𑀬𑁂, 𑀲𑀼𑀥𑀸𑀬 𑀬𑀜𑁆𑀘𑀺𑀘𑁆𑀙𑀲𑀺 𑀢𑀫𑁆𑀧𑀺 𑀤𑀫𑁆𑀫𑀺 𑀢𑁂.
‘‘𑀲𑀸 ¶ 𑀢𑁆𑀯𑀁 𑀫𑀬𑀸 𑀅𑀚𑁆𑀚 𑀲𑀓𑀫𑁆𑀳𑀺 𑀅𑀲𑁆𑀲𑀫𑁂, 𑀦𑀺𑀫𑀦𑁆𑀢𑀺𑀢𑀸 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑁂;
𑀢𑀼𑀯𑀜𑁆𑀳𑀺 𑀫𑁂 𑀲𑀩𑁆𑀩𑀭𑀲𑁂𑀳𑀺 𑀧𑀽𑀚𑀺𑀬𑀸, 𑀢𑀁 𑀧𑀽𑀚𑀬𑀺𑀢𑁆𑀯𑀸𑀦 𑀲𑀼𑀥𑀫𑁆𑀧𑀺 𑀅𑀲𑁆𑀦𑀺𑀬𑁂’’𑀢𑀺.
𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀲𑀪𑀸𑀯𑁂𑀦. 𑀜𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀦 𑀳𑀺 𑀬𑀸𑀘𑀦𑀸 𑀲𑀼𑀥𑀸𑀢𑀺 𑀦 𑀳𑀺 𑀬𑀸𑀘𑀦𑀸𑀬 𑀲𑀼𑀥𑀸 𑀮𑀩𑁆𑀪𑀢𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀇𑀢𑀭𑀸 𑀢𑀺𑀲𑁆𑀲𑁄 ¶ 𑀦𑀮𑀪𑀺𑀁𑀲𑀼. 𑀢𑀁 𑀢𑀦𑁆𑀢𑀺 𑀢𑀲𑁆𑀫𑀸 𑀢𑀁. 𑀬𑀜𑁆𑀘𑀺𑀘𑁆𑀙𑀲𑀻𑀢𑀺 𑀦 𑀓𑁂𑀯𑀮𑀁 𑀦𑀺𑀫𑀦𑁆𑀢𑁂𑀫𑀺𑀬𑁂𑀯, 𑀬𑀜𑁆𑀘 𑀲𑀼𑀥𑀁 𑀇𑀘𑁆𑀙𑀲𑀺, 𑀢𑀫𑁆𑀧𑀺 𑀤𑀫𑁆𑀫𑀺 𑀢𑁂. 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑁂𑀢𑀺 𑀓𑀜𑁆𑀘𑀦𑀭𑀸𑀲𑀺𑀲𑀲𑁆𑀲𑀺𑀭𑀺𑀓𑀲𑀭𑀻𑀭𑁂. 𑀧𑀽𑀚𑀺𑀬𑀸𑀢𑀺 𑀦 𑀓𑁂𑀯𑀮𑀁 𑀲𑀼𑀥𑀸𑀬, 𑀅𑀜𑁆𑀜𑁂𑀳𑀺𑀧𑀺 𑀲𑀩𑁆𑀩𑀭𑀲𑁂𑀳𑀺 𑀢𑁆𑀯𑀁 𑀫𑀬𑀸 𑀧𑀽𑀚𑁂𑀢𑀩𑁆𑀩𑀬𑀼𑀢𑁆𑀢𑀓𑀸𑀯. 𑀅𑀲𑁆𑀦𑀺𑀬𑁂𑀢𑀺 𑀢𑀁 𑀧𑀽𑀚𑁂𑀢𑁆𑀯𑀸 𑀲𑀘𑁂 𑀲𑀼𑀥𑀸𑀬 𑀅𑀯𑀲𑁂𑀲𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀺.
𑀢𑀢𑁄 𑀅𑀧𑀭𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀕𑀸𑀣𑀸 𑁋
‘‘𑀲𑀸 𑀓𑁄𑀲𑀺𑀬𑁂𑀦𑀸𑀦𑀼𑀫𑀢𑀸 𑀚𑀼𑀢𑀻𑀫𑀢𑀸, 𑀅𑀤𑁆𑀥𑀸 𑀳𑀺𑀭𑀺 𑀭𑀫𑁆𑀫𑀁 𑀧𑀸𑀯𑀺𑀲𑀺 𑀬𑀲𑁆𑀲𑀫𑀁;
𑀉𑀤𑀓𑀯𑀦𑁆𑀢𑀁 𑀨𑀮𑀫𑀭𑀺𑀬𑀧𑀽𑀚𑀺𑀢𑀁, 𑀅𑀧𑀸𑀧𑀲𑀢𑁆𑀢𑀽𑀧𑀦𑀺𑀲𑁂𑀯𑀺𑀢𑀁 𑀲𑀤𑀸.
‘‘𑀭𑀼𑀓𑁆𑀔𑀕𑁆𑀕𑀳𑀸𑀦𑀸 𑀩𑀳𑀼𑀓𑁂𑀢𑁆𑀣 𑀧𑀼𑀧𑁆𑀨𑀺𑀢𑀸, 𑀅𑀫𑁆𑀩𑀸 𑀧𑀺𑀬𑀸𑀮𑀸 𑀧𑀦𑀲𑀸 𑀘 𑀓𑀺𑀁𑀲𑀼𑀓𑀸;
𑀲𑁄𑀪𑀜𑁆𑀚𑀦𑀸 𑀮𑁄𑀤𑁆𑀤𑀫𑀣𑁄𑀧𑀺 𑀧𑀤𑁆𑀥𑀓𑀸, 𑀓𑁂𑀓𑀸 𑀘 𑀪𑀗𑁆𑀕𑀸 𑀢𑀺𑀮𑀓𑀸 𑀲𑀼𑀧𑀼𑀧𑁆𑀨𑀺𑀢𑀸.
‘‘𑀲𑀸𑀮𑀸 ¶ 𑀓𑀭𑁂𑀭𑀻 𑀩𑀳𑀼𑀓𑁂𑀢𑁆𑀣 𑀚𑀫𑁆𑀩𑀼𑀬𑁄, 𑀅𑀲𑁆𑀲𑀢𑁆𑀣𑀦𑀺𑀕𑁆𑀭𑁄𑀥𑀫𑀥𑀼𑀓𑀯𑁂𑀢𑀲𑀸;
𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺 𑀲𑀺𑀦𑁆𑀤𑀼𑀯𑀸𑀭𑀓𑀸, 𑀫𑀦𑀼𑀜𑁆𑀜𑀕𑀦𑁆𑀥𑀸 𑀫𑀼𑀘𑀮𑀺𑀦𑁆𑀤𑀓𑁂𑀢𑀓𑀸.
‘‘𑀳𑀭𑁂𑀡𑀼𑀓𑀸 𑀯𑁂𑀴𑀼𑀓𑀸 𑀓𑁂𑀡𑀼 𑀢𑀺𑀦𑁆𑀤𑀼𑀓𑀸, 𑀲𑀸𑀫𑀸𑀓𑀦𑀻𑀯𑀸𑀭𑀫𑀣𑁄𑀧𑀺 𑀘𑀻𑀦𑀓𑀸;
𑀫𑁄𑀘𑀸 𑀓𑀤𑀮𑀻 𑀩𑀳𑀼𑀓𑁂𑀢𑁆𑀣 𑀲𑀸𑀮𑀺𑀬𑁄, 𑀧𑀯𑀻𑀳𑀬𑁄 𑀆𑀪𑀽𑀚𑀺𑀦𑁄 𑀘 𑀢𑀡𑁆𑀟𑀼𑀮𑀸.
‘‘𑀢𑀲𑁆𑀲𑁂𑀯𑀼𑀢𑁆𑀢𑀭𑀧𑀲𑁆𑀲𑁂𑀦, 𑀚𑀸𑀢𑀸 𑀧𑁄𑀓𑁆𑀔𑀭𑀡𑀻 𑀲𑀺𑀯𑀸;
𑀅𑀓𑀓𑁆𑀓𑀲𑀸 𑀅𑀧𑀩𑁆𑀪𑀸𑀭𑀸, 𑀲𑀸𑀥𑀼 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸.
‘‘𑀢𑀢𑁆𑀣 𑀫𑀘𑁆𑀙𑀸 𑀲𑀦𑁆𑀦𑀺𑀭𑀢𑀸, 𑀔𑁂𑀫𑀺𑀦𑁄 𑀩𑀳𑀼𑀪𑁄𑀚𑀦𑀸;
𑀲𑀺𑀗𑁆𑀕𑀽 𑀲𑀯𑀗𑁆𑀓𑀸 𑀲𑀁𑀓𑀼𑀮𑀸, 𑀲𑀢𑀯𑀗𑁆𑀓𑀸 𑀘 𑀭𑁄𑀳𑀺𑀢𑀸;
𑀆𑀴𑀺𑀕𑀕𑁆𑀕𑀭𑀓𑀸𑀓𑀺𑀡𑁆𑀡𑀸, 𑀧𑀸𑀞𑀻𑀦𑀸 𑀓𑀸𑀓𑀫𑀘𑁆𑀙𑀓𑀸.
‘‘𑀢𑀢𑁆𑀣 ¶ ¶ 𑀧𑀓𑁆𑀔𑀻 𑀲𑀦𑁆𑀦𑀺𑀭𑀢𑀸, 𑀔𑁂𑀫𑀺𑀦𑁄 𑀩𑀳𑀼𑀪𑁄𑀚𑀦𑀸;
𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀘𑀓𑁆𑀓𑀯𑀸𑀓𑀸 𑀘 𑀓𑀼𑀓𑁆𑀓𑀼𑀳𑀸;
𑀓𑀼𑀡𑀸𑀮𑀓𑀸 𑀩𑀳𑀽 𑀘𑀺𑀢𑁆𑀭𑀸, 𑀲𑀺𑀔𑀡𑁆𑀟𑀻 𑀚𑀻𑀯𑀚𑀻𑀯𑀓𑀸.
‘‘𑀢𑀢𑁆𑀣 𑀧𑀸𑀦𑀸𑀬 𑀫𑀸𑀬𑀦𑁆𑀢𑀺, 𑀦𑀸𑀦𑀸 𑀫𑀺𑀕𑀕𑀡𑀸 𑀩𑀳𑀽;
𑀲𑀻𑀳𑀸 𑀩𑁆𑀬𑀕𑁆𑀖𑀸 𑀯𑀭𑀸𑀳𑀸 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀬𑁄.
‘‘𑀧𑀮𑀸𑀲𑀸𑀤𑀸 𑀕𑀯𑀚𑀸 𑀘, 𑀫𑀳𑀺𑀁𑀲𑀸 𑀭𑁄𑀳𑀺𑀢𑀸 𑀭𑀼𑀭𑀽;
𑀏𑀡𑁂𑀬𑁆𑀬𑀸 𑀘 𑀯𑀭𑀸𑀳𑀸 𑀘, 𑀕𑀡𑀺𑀦𑁄 𑀦𑀻𑀓𑀲𑀽𑀓𑀭𑀸;
𑀓𑀤𑀮𑀺𑀫𑀺𑀕𑀸 𑀩𑀳𑀼𑀓𑁂𑀢𑁆𑀣, 𑀩𑀺𑀴𑀸𑀭𑀸 𑀲𑀲𑀓𑀡𑁆𑀡𑀺𑀓𑀸.
‘‘𑀙𑀫𑀸𑀕𑀺𑀭𑀻 𑀧𑀼𑀧𑁆𑀨𑀯𑀺𑀘𑀺𑀢𑁆𑀭𑀲𑀦𑁆𑀣𑀢𑀸, 𑀤𑀺𑀚𑀸𑀪𑀺𑀖𑀼𑀝𑁆𑀞𑀸 𑀤𑀺𑀚𑀲𑀗𑁆𑀖𑀲𑁂𑀯𑀺𑀢𑀸’’𑀢𑀺.
𑀢𑀢𑁆𑀣 𑀚𑀼𑀢𑀻𑀫𑀢𑀸𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁂𑀦. 𑀧𑀸𑀯𑀺𑀲𑀺 𑀬𑀲𑁆𑀲𑀫𑀦𑁆𑀢𑀺 𑀧𑀸𑀯𑀺𑀲𑀺 𑀅𑀲𑁆𑀲𑀫𑀁, 𑀬-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀓𑀭𑁄. 𑀉𑀤𑀓𑀯𑀦𑁆𑀢𑀦𑁆𑀢𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀉𑀤𑀓𑀲𑀫𑁆𑀧𑀦𑁆𑀦𑀁. 𑀨𑀮𑀦𑁆𑀢𑀺 𑀅𑀦𑁂𑀓𑀨𑀮𑀲𑀫𑁆𑀧𑀦𑁆𑀦𑀁. 𑀅𑀭𑀺𑀬𑀧𑀽𑀚𑀺𑀢𑀦𑁆𑀢𑀺 𑀦𑀻𑀯𑀭𑀡𑀤𑁄𑀲𑀭𑀳𑀺𑀢𑁂𑀳𑀺 𑀛𑀸𑀦𑀮𑀸𑀪𑀻𑀳𑀺 𑀅𑀭𑀺𑀬𑁂𑀳𑀺 𑀧𑀽𑀚𑀺𑀢𑀁 𑀧𑀲𑀢𑁆𑀣𑀁. 𑀭𑀼𑀓𑁆𑀔𑀕𑁆𑀕𑀳𑀸𑀦𑀸𑀢𑀺 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀕𑀳𑀦𑀸. 𑀲𑁄𑀪𑀜𑁆𑀚𑀦𑀸𑀢𑀺 𑀲𑀺𑀕𑁆𑀕𑀼𑀭𑀼𑀓𑁆𑀔𑀸. 𑀮𑁄𑀤𑁆𑀤𑀫𑀣𑁄𑀧𑀺 𑀧𑀤𑁆𑀥𑀓𑀸𑀢𑀺 𑀮𑁄𑀤𑁆𑀤𑀭𑀼𑀓𑁆𑀔𑀸 𑀘 𑀧𑀤𑀼𑀫𑀭𑀼𑀓𑁆𑀔𑀸 ¶ 𑀘. 𑀓𑁂𑀓𑀸 𑀘 𑀪𑀗𑁆𑀕𑀸𑀢𑀺 𑀏𑀯𑀁𑀦𑀸𑀫𑀓𑀸 𑀭𑀼𑀓𑁆𑀔𑀸 𑀏𑀯. 𑀓𑀭𑁂𑀭𑀻𑀢𑀺 𑀓𑀭𑁂𑀭𑀺𑀭𑀼𑀓𑁆𑀔𑀸. 𑀉𑀤𑁆𑀤𑀸𑀮𑀓𑀸𑀢𑀺 𑀯𑀸𑀢𑀖𑀸𑀢𑀓𑀸. 𑀫𑀼𑀘𑀮𑀺𑀦𑁆𑀤𑀓𑁂𑀢𑀓𑀸𑀢𑀺 𑀫𑀼𑀘𑀮𑀺𑀦𑁆𑀤𑀸 𑀘 𑀧𑀜𑁆𑀘𑀯𑀺𑀥𑀓𑁂𑀢𑀓𑀸 𑀘. 𑀳𑀭𑁂𑀡𑀼𑀓𑀸𑀢𑀺 𑀅𑀧𑀭𑀡𑁆𑀡𑀚𑀸𑀢𑀺. 𑀯𑁂𑀴𑀼𑀓𑀸𑀢𑀺 𑀯𑀁𑀲𑀪𑁂𑀤𑀓𑀸. 𑀓𑁂𑀡𑀽𑀢𑀺 𑀅𑀭𑀜𑁆𑀜𑀫𑀸𑀲𑀸. 𑀢𑀺𑀦𑁆𑀤𑀼𑀓𑀸𑀢𑀺 𑀢𑀺𑀫𑁆𑀩𑀭𑀼𑀭𑀼𑀓𑁆𑀔𑀸. 𑀘𑀻𑀦𑀓𑀸𑀢𑀺 𑀔𑀼𑀤𑁆𑀤𑀓𑀭𑀸𑀚𑀫𑀸𑀲𑀸. 𑀫𑁄𑀘𑀸𑀢𑀺 𑀅𑀝𑁆𑀞𑀺𑀓𑀓𑀤𑀮𑀺𑀬𑁄. 𑀲𑀸𑀮𑀺𑀬𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀸 𑀚𑀸𑀢𑀲𑁆𑀲𑀭𑀁 𑀉𑀧𑀦𑀺𑀲𑁆𑀲𑀸𑀬 𑀚𑀸𑀢𑀸 𑀲𑀸𑀮𑀺𑀬𑁄. 𑀧𑀯𑀻𑀳𑀬𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀸 𑀯𑀻𑀳𑀬𑁄. 𑀆𑀪𑀽𑀚𑀺𑀦𑁄𑀢𑀺 𑀪𑀼𑀚𑀧𑀢𑁆𑀢𑀸. 𑀢𑀡𑁆𑀟𑀼𑀮𑀸𑀢𑀺 𑀦𑀺𑀓𑁆𑀓𑀼𑀡𑁆𑀟𑀓𑀣𑀼𑀲𑀸𑀦𑀺 𑀲𑀬𑀁𑀚𑀸𑀢𑀢𑀡𑁆𑀟𑀼𑀮𑀲𑀻𑀲𑀸𑀦𑀺.
𑀢𑀲𑁆𑀲𑁂𑀯𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀅𑀲𑁆𑀲𑀫𑀲𑁆𑀲 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁂. 𑀧𑁄𑀓𑁆𑀔𑀭𑀡𑀻𑀢𑀺 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀸 𑀚𑀸𑀢𑀲𑁆𑀲𑀭𑀧𑁄𑀓𑁆𑀔𑀭𑀡𑀻. 𑀅𑀓𑀓𑁆𑀓𑀲𑀸𑀢𑀺 𑀫𑀘𑁆𑀙𑀲𑀺𑀧𑁆𑀧𑀺𑀓𑀲𑁂𑀯𑀸𑀮𑀸𑀤𑀺𑀓𑀓𑁆𑀓𑀲𑀭𑀳𑀺𑀢𑀸. 𑀅𑀧𑀩𑁆𑀪𑀸𑀭𑀸𑀢𑀺 𑀅𑀘𑁆𑀙𑀺𑀦𑁆𑀦𑀢𑀝𑀸 𑀲𑀫𑀢𑀺𑀢𑁆𑀣𑀸. 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸𑀢𑀺 𑀅𑀧𑀝𑀺𑀓𑁆𑀓𑀽𑀮𑀕𑀦𑁆𑀥𑁂𑀦 𑀉𑀤𑀓𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸. 𑀔𑁂𑀫𑀺𑀦𑁄𑀢𑀺 𑀅𑀪𑀬𑀸. ‘‘𑀲𑀺𑀗𑁆𑀕𑀽’’𑀢𑀺𑀆𑀤𑀻𑀦𑀺 𑀢𑁂𑀲𑀁 𑀫𑀘𑁆𑀙𑀸𑀦𑀁 ¶ 𑀦𑀸𑀫𑀸𑀦𑀺. 𑀓𑀼𑀡𑀸𑀮𑀓𑀸𑀢𑀺 𑀓𑁄𑀓𑀺𑀮𑀸. 𑀘𑀺𑀢𑁆𑀭𑀸𑀢𑀺 𑀘𑀺𑀢𑁆𑀭𑀧𑀢𑁆𑀢𑀸. 𑀲𑀺𑀔𑀡𑁆𑀟𑀻𑀢𑀺 𑀉𑀝𑁆𑀞𑀺𑀢𑀲𑀺𑀔𑀸 𑀫𑁄𑀭𑀸, 𑀅𑀜𑁆𑀜𑁂𑀧𑀺 𑀯𑀸 𑀫𑀢𑁆𑀣𑀓𑁂 𑀚𑀸𑀢𑀲𑀺𑀔𑀸 𑀧𑀓𑁆𑀔𑀺𑀦𑁄. 𑀧𑀸𑀦𑀸𑀬 𑀫𑀸𑀬𑀦𑁆𑀢𑀻𑀢𑀺 𑀧𑀸𑀦𑀸𑀬 𑀆𑀬𑀦𑁆𑀢𑀺. 𑀧𑀮𑀸𑀲𑀸𑀤𑀸𑀢𑀺 𑀔𑀕𑁆𑀕𑀸. 𑀕𑀯𑀚𑀸𑀢𑀺 𑀕𑀯𑀬𑀸. 𑀕𑀡𑀺𑀦𑁄𑀢𑀺 𑀕𑁄𑀓𑀡𑁆𑀡𑀸. 𑀓𑀡𑁆𑀡𑀺𑀓𑀸𑀢𑀺 𑀓𑀡𑁆𑀡𑀺𑀓𑀫𑀺𑀕𑀸. 𑀙𑀫𑀸𑀕𑀺𑀭𑀻𑀢𑀺 𑀪𑀽𑀫𑀺𑀲𑀫𑀧𑀢𑁆𑀣𑀝𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑀸. 𑀧𑀼𑀧𑁆𑀨𑀯𑀺𑀘𑀺𑀢𑁆𑀭𑀲𑀦𑁆𑀣𑀢𑀸𑀢𑀺 𑀯𑀺𑀘𑀺𑀢𑁆𑀭𑀧𑀼𑀧𑁆𑀨𑀲𑀦𑁆𑀣𑀢𑀸. 𑀤𑀺𑀚𑀸𑀪𑀺𑀖𑀼𑀝𑁆𑀞𑀸𑀢𑀺 𑀫𑀥𑀼𑀭𑀲𑁆𑀲𑀭𑁂𑀳𑀺 𑀤𑀺𑀚𑁂𑀳𑀺 𑀅𑀪𑀺𑀖𑀼𑀝𑁆𑀞𑀸. 𑀏𑀯𑀭𑀽𑀧𑀸 𑀢𑀢𑁆𑀣 𑀪𑀽𑀫𑀺𑀧𑀩𑁆𑀩𑀢𑀸𑀢𑀺 𑀏𑀯𑀁 𑀪𑀕𑀯𑀸 𑀓𑁄𑀲𑀺𑀬𑀲𑁆𑀲 𑀅𑀲𑁆𑀲𑀫𑀁 𑀯𑀡𑁆𑀡𑁂𑀢𑀺.
𑀇𑀤𑀸𑀦𑀺 𑀳𑀺𑀭𑀺𑀤𑁂𑀯𑀺𑀬𑀸 𑀢𑀢𑁆𑀣 𑀧𑀯𑀺𑀲𑀦𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀁 𑀆𑀳 𑁋
‘‘𑀲𑀸 ¶ 𑀲𑀼𑀢𑁆𑀢𑀘𑀸 𑀦𑀻𑀮𑀤𑀼𑀫𑀸𑀪𑀺𑀮𑀫𑁆𑀩𑀺𑀢𑀸, 𑀯𑀺𑀚𑁆𑀚𑀽 𑀫𑀳𑀸𑀫𑁂𑀖𑀭𑀺𑀯𑀸𑀦𑀼𑀧𑀚𑁆𑀚𑀣;
𑀢𑀲𑁆𑀲𑀸 𑀲𑀼𑀲𑀫𑁆𑀩𑀦𑁆𑀥𑀲𑀺𑀭𑀁 𑀓𑀼𑀲𑀸𑀫𑀬𑀁, 𑀲𑀼𑀘𑀺𑀁 𑀲𑀼𑀕𑀦𑁆𑀥𑀁 𑀅𑀚𑀺𑀦𑀽𑀧𑀲𑁂𑀯𑀺𑀢𑀁;
𑀅𑀢𑁆𑀭𑀺𑀘𑁆𑀘 𑀓𑁄𑀘𑁆𑀙𑀁 𑀳𑀺𑀭𑀺𑀫𑁂𑀢𑀤𑀩𑁆𑀭𑀯𑀺, 𑀦𑀺𑀲𑀻𑀤 𑀓𑀮𑁆𑀬𑀸𑀡𑀺 𑀲𑀼𑀔𑀬𑀺𑀤𑀫𑀸𑀲𑀦𑀁.
‘‘𑀢𑀲𑁆𑀲𑀸 𑀢𑀤𑀸 𑀓𑁄𑀘𑁆𑀙𑀕𑀢𑀸𑀬 𑀓𑁄𑀲𑀺𑀬𑁄, 𑀬𑀤𑀺𑀘𑁆𑀙𑀫𑀸𑀦𑀸𑀬 𑀚𑀝𑀸𑀚𑀺𑀦𑀦𑁆𑀥𑀭𑁄;
𑀦𑀯𑁂𑀳𑀺 𑀧𑀢𑁆𑀢𑁂𑀳𑀺 𑀲𑀬𑀁 𑀲𑀳𑀽𑀤𑀓𑀁, 𑀲𑀼𑀥𑀸𑀪𑀺𑀳𑀸𑀲𑀻 𑀢𑀼𑀭𑀺𑀢𑁄 𑀫𑀳𑀸𑀫𑀼𑀦𑀺.
‘‘𑀲𑀸 𑀢𑀁 𑀧𑀝𑀺𑀕𑁆𑀕𑀬𑁆𑀳 𑀉𑀪𑁄𑀳𑀺 𑀧𑀸𑀡𑀺𑀪𑀺, 𑀇𑀘𑁆𑀘𑀩𑁆𑀭𑀯𑀺 𑀅𑀢𑁆𑀢𑀫𑀦𑀸 𑀚𑀝𑀸𑀥𑀭𑀁;
𑀳𑀦𑁆𑀤𑀸𑀳𑀁 𑀏𑀢𑀭𑀳𑀺 𑀧𑀽𑀚𑀺𑀢𑀸 𑀢𑀬𑀸, 𑀕𑀘𑁆𑀙𑁂𑀬𑁆𑀬𑀁 𑀩𑁆𑀭𑀳𑁆𑀫𑁂 𑀢𑀺𑀤𑀺𑀯𑀁 𑀚𑀺𑀢𑀸𑀯𑀺𑀦𑀻.
‘‘𑀲𑀸 ¶ 𑀓𑁄𑀲𑀺𑀬𑁂𑀦𑀸𑀦𑀼𑀫𑀢𑀸 𑀚𑀼𑀢𑀻𑀫𑀢𑀸, 𑀉𑀤𑀻𑀭𑀺𑀢𑀸 𑀯𑀡𑁆𑀡𑀫𑀤𑁂𑀦 𑀫𑀢𑁆𑀢𑀸;
𑀲𑀓𑀸𑀲𑁂 𑀕𑀦𑁆𑀢𑁆𑀯𑀸𑀦 𑀲𑀳𑀲𑁆𑀲𑀘𑀓𑁆𑀔𑀼𑀦𑁄, 𑀅𑀬𑀁 𑀲𑀼𑀥𑀸 𑀯𑀸𑀲𑀯 𑀤𑁂𑀳𑀺 𑀫𑁂 𑀚𑀬𑀁.
‘‘𑀢𑀫𑁂𑀦 ¶ 𑀲𑀓𑁆𑀓𑁄𑀧𑀺 𑀢𑀤𑀸 𑀅𑀧𑀽𑀚𑀬𑀺, 𑀲𑀳𑀺𑀦𑁆𑀤𑀤𑁂𑀯𑀸 𑀲𑀼𑀭𑀓𑀜𑁆𑀜𑀫𑀼𑀢𑁆𑀢𑀫𑀁;
𑀲𑀸 𑀧𑀜𑁆𑀚𑀮𑀻 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀸, 𑀦𑀯𑀫𑁆𑀳𑀺 𑀓𑁄𑀘𑁆𑀙𑀫𑁆𑀳𑀺 𑀬𑀤𑀸 𑀉𑀧𑀸𑀯𑀺𑀲𑀻’’𑀢𑀺.
𑀢𑀢𑁆𑀣 𑀲𑀼𑀢𑁆𑀢𑀘𑀸𑀢𑀺 𑀲𑀼𑀘𑁆𑀙𑀯𑀻. 𑀦𑀻𑀮𑀤𑀼𑀫𑀸𑀪𑀺𑀮𑀫𑁆𑀩𑀺𑀢𑀸𑀢𑀺 𑀦𑀻𑀮𑁂𑀲𑀼 𑀤𑀼𑀫𑁂𑀲𑀼 𑀅𑀪𑀺𑀮𑀫𑁆𑀩𑀺𑀢𑀸 𑀳𑀼𑀢𑁆𑀯𑀸, 𑀢𑀁 𑀢𑀁 𑀦𑀻𑀮𑀤𑀼𑀫𑀲𑀸𑀔𑀁 𑀧𑀭𑀸𑀫𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀸𑀫𑁂𑀖𑀭𑀺𑀯𑀸𑀢𑀺 𑀢𑁂𑀦 𑀦𑀺𑀫𑀦𑁆𑀢𑀺𑀢𑀸 𑀫𑀳𑀸𑀫𑁂𑀖𑀯𑀺𑀚𑁆𑀚𑀼 𑀯𑀺𑀬 𑀢𑀲𑁆𑀲 𑀢𑀁 𑀅𑀲𑁆𑀲𑀫𑀁 𑀧𑀸𑀯𑀺𑀲𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸 𑀳𑀺𑀭𑀺𑀬𑀸. 𑀲𑀼𑀲𑀫𑁆𑀩𑀦𑁆𑀥𑀲𑀺𑀭𑀦𑁆𑀢𑀺 𑀲𑀼𑀝𑁆𑀞𑀼 𑀲𑀫𑁆𑀩𑀦𑁆𑀥𑀲𑀻𑀲𑀁. 𑀓𑀼𑀲𑀸𑀫𑀬𑀦𑁆𑀢𑀺 𑀉𑀲𑀻𑀭𑀸𑀤𑀺𑀫𑀺𑀲𑁆𑀲𑀓𑀓𑀼𑀲𑀢𑀺𑀡𑀫𑀬𑀁. 𑀲𑀼𑀕𑀦𑁆𑀥𑀦𑁆𑀢𑀺 𑀉𑀲𑀻𑀭𑁂𑀦 𑀘𑁂𑀯 𑀅𑀜𑁆𑀜𑁂𑀦 𑀲𑀼𑀕𑀦𑁆𑀥𑀢𑀺𑀡𑁂𑀦 𑀘 𑀫𑀺𑀲𑁆𑀲𑀓𑀢𑁆𑀢𑀸 𑀲𑀼𑀕𑀦𑁆𑀥𑀁. 𑀅𑀚𑀺𑀦𑀽𑀧𑀲𑁂𑀯𑀺𑀢𑀦𑁆𑀢𑀺 𑀉𑀧𑀭𑀺𑀅𑀢𑁆𑀣𑀢𑁂𑀦 𑀅𑀚𑀺𑀦𑀘𑀫𑁆𑀫𑁂𑀦 𑀉𑀧𑀲𑁂𑀯𑀺𑀢𑀁. 𑀅𑀢𑁆𑀭𑀺𑀘𑁆𑀘 𑀓𑁄𑀘𑁆𑀙𑀦𑁆𑀢𑀺 𑀏𑀯𑀭𑀽𑀧𑀁 𑀓𑁄𑀘𑁆𑀙𑀸𑀲𑀦𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀅𑀢𑁆𑀣𑀭𑀺𑀢𑁆𑀯𑀸. 𑀲𑀼𑀔𑀬𑀺𑀤𑀫𑀸𑀲𑀦𑀦𑁆𑀢𑀺 𑀲𑀼𑀔𑀁 𑀦𑀺𑀲𑀻𑀤 𑀇𑀤𑀫𑀸𑀲𑀦𑀁.
𑀬𑀦𑁆𑀢𑀺 𑀬𑀸𑀯𑀤𑀢𑁆𑀣𑀁. 𑀇𑀘𑁆𑀙𑀫𑀸𑀦𑀸𑀬𑀸𑀢𑀺 𑀲𑀼𑀥𑀁 𑀇𑀘𑁆𑀙𑀦𑁆𑀢𑀺𑀬𑀸. 𑀦𑀯𑁂𑀳𑀺 𑀧𑀢𑁆𑀢𑁂𑀳𑀻𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀧𑁄𑀓𑁆𑀔𑀭𑀡𑀺𑀢𑁄 𑀆𑀪𑀢𑁂𑀳𑀺 𑀅𑀮𑁆𑀮𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀳𑀺. 𑀲𑀬𑀦𑁆𑀢𑀺 𑀲𑀳𑀢𑁆𑀣𑁂𑀦. 𑀲𑀳𑀽𑀤𑀓𑀦𑁆𑀢𑀺 ¶ 𑀤𑀓𑁆𑀔𑀺𑀡𑁄𑀤𑀓𑀲𑀳𑀺𑀢𑀁. 𑀲𑀼𑀥𑀸𑀪𑀺𑀳𑀸𑀲𑀻𑀢𑀺 𑀲𑀼𑀥𑀁 𑀅𑀪𑀺𑀳𑀭𑀺. 𑀢𑀼𑀭𑀺𑀢𑁄𑀢𑀺 𑀲𑁄𑀫𑀦𑀲𑁆𑀲𑀯𑁂𑀕𑁂𑀦 𑀢𑀼𑀭𑀺𑀢𑁄. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀚𑀺𑀢𑀸𑀯𑀺𑀦𑀻𑀢𑀺 𑀯𑀺𑀚𑀬𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸.
𑀅𑀦𑀼𑀫𑀢𑀸𑀢𑀺 𑀇𑀤𑀸𑀦𑀺 𑀬𑀣𑀸𑀭𑀼𑀘𑀺𑀁 𑀕𑀘𑁆𑀙𑀸𑀢𑀺 𑀅𑀦𑀼𑀜𑁆𑀜𑀸𑀢𑀸. 𑀉𑀤𑀻𑀭𑀺𑀢𑀸𑀢𑀺 𑀢𑀺𑀤𑀲𑀧𑀼𑀭𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀬𑀁 𑀲𑀼𑀥𑀸𑀢𑀺 𑀉𑀤𑀻𑀭𑀬𑀺. 𑀲𑀼𑀭𑀓𑀜𑁆𑀜𑀦𑁆𑀢𑀺 𑀤𑁂𑀯𑀥𑀻𑀢𑀭𑀁. 𑀉𑀢𑁆𑀢𑀫𑀦𑁆𑀢𑀺 𑀧𑀯𑀭𑀁. 𑀲𑀸 𑀧𑀜𑁆𑀚𑀮𑀻 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀸𑀢𑀺 𑀧𑀜𑁆𑀚𑀮𑀻 𑀤𑁂𑀯𑁂𑀳𑀺 𑀘 𑀫𑀦𑀼𑀲𑁆𑀲𑁂𑀳𑀺 𑀘 𑀧𑀽𑀚𑀺𑀢𑀸. 𑀬𑀤𑀸𑀢𑀺 𑀬𑀤𑀸 𑀦𑀺𑀲𑀻𑀤𑀦𑀢𑁆𑀣𑀸𑀬 𑀲𑀓𑁆𑀓𑁂𑀦 𑀤𑀸𑀧𑀺𑀢𑁂 𑀦𑀯𑁂 𑀓𑀜𑁆𑀘𑀦𑀧𑀻𑀞𑀲𑀗𑁆𑀔𑀸𑀢𑁂 𑀓𑁄𑀘𑁆𑀙𑁂 𑀲𑀸 𑀉𑀧𑀸𑀯𑀺𑀲𑀺, 𑀢𑀤𑀸 𑀦𑀁 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀲𑀓𑁆𑀓𑁄 𑀘 𑀲𑁂𑀲𑀤𑁂𑀯𑀢𑀸 𑀘 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀺𑀁𑀲𑀼.
𑀏𑀯𑀁 𑀲𑀓𑁆𑀓𑁄 𑀢𑀁 𑀧𑀽𑀚𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀓𑁄𑀲𑀺𑀬𑁄 𑀲𑁂𑀲𑀸𑀦𑀁 𑀅𑀤𑀢𑁆𑀯𑀸 𑀇𑀫𑀺𑀲𑁆𑀲𑀸𑀯 𑀲𑀼𑀥𑀁 𑀅𑀤𑀸𑀲𑀻’’𑀢𑀺. 𑀲𑁄 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀚𑀸𑀦𑀦𑀢𑁆𑀣𑀸𑀬 𑀧𑀼𑀦 𑀫𑀸𑀢𑀮𑀺𑀁 𑀧𑁂𑀲𑁂𑀲𑀺. 𑀢𑀫𑀢𑁆𑀣𑀁 𑀆𑀯𑀺 𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀫𑁂𑀯 ¶ ¶ 𑀲𑀁𑀲𑀻 𑀧𑀼𑀦𑀤𑁂𑀯 𑀫𑀸𑀢𑀮𑀺𑀁, 𑀲𑀳𑀲𑁆𑀲𑀦𑁂𑀢𑁆𑀢𑁄 𑀢𑀺𑀤𑀲𑀸𑀦𑀫𑀺𑀦𑁆𑀤𑁄;
𑀕𑀦𑁆𑀢𑁆𑀯𑀸𑀦 𑀯𑀸𑀓𑁆𑀬𑀁 𑀫𑀫 𑀩𑁆𑀭𑀽𑀳𑀺 𑀓𑁄𑀲𑀺𑀬𑀁, 𑀆𑀲𑀸𑀬 𑀲𑀤𑁆𑀥𑀸 𑀲𑀺𑀭𑀺𑀬𑀸 𑀘 𑀓𑁄𑀲𑀺𑀬;
𑀳𑀺𑀭𑀻 𑀲𑀼𑀥𑀁 𑀓𑁂𑀦 𑀫𑀮𑀢𑁆𑀣 𑀳𑁂𑀢𑀼𑀦𑀸’’𑀢𑀺.
𑀢𑀢𑁆𑀣 𑀲𑀁𑀲𑀻𑀢𑀺 𑀅𑀪𑀸𑀲𑀺. 𑀯𑀸𑀓𑁆𑀬𑀁 𑀫𑀫𑀸𑀢𑀺 𑀫𑀫 𑀯𑀸𑀓𑁆𑀬𑀁 𑀓𑁄𑀲𑀺𑀬𑀁 𑀩𑁆𑀭𑀽𑀳𑀺. 𑀆𑀲𑀸𑀬 𑀲𑀤𑁆𑀥𑀸 𑀲𑀺𑀭𑀺𑀬𑀸 𑀘𑀸𑀢𑀺 𑀆𑀲𑀸𑀢𑁄 𑀘 𑀲𑀤𑁆𑀥𑀸𑀢𑁄 𑀘 𑀲𑀺𑀭𑀺𑀢𑁄 𑀘 𑀳𑀺𑀭𑀻𑀬𑁂𑀯 𑀓𑁂𑀦 𑀳𑁂𑀢𑀼𑀦𑀸 𑀲𑀼𑀥𑀫𑀮𑀢𑁆𑀣𑀸𑀢𑀺.
𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑁂𑀚𑀬𑀦𑁆𑀢𑀭𑀣𑀫𑀸𑀭𑀼𑀬𑁆𑀳 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀁 𑀲𑀼𑀧𑁆𑀮𑀯𑀢𑁆𑀣𑀁 𑀉𑀤𑀢𑀸𑀭𑀬𑀻 𑀭𑀣𑀁, 𑀤𑀤𑁆𑀤𑀮𑁆𑀮𑀫𑀸𑀦𑀁 𑀉𑀧𑀓𑀸𑀭𑀺𑀬𑀲𑀸𑀤𑀺𑀲𑀁;
𑀚𑀫𑁆𑀩𑁄𑀦𑀤𑀻𑀲𑀁 𑀢𑀧𑀦𑁂𑀬𑁆𑀬𑀲𑀦𑁆𑀦𑀺𑀪𑀁, 𑀅𑀮𑀗𑁆𑀓𑀢𑀁 𑀓𑀜𑁆𑀘𑀦𑀘𑀺𑀢𑁆𑀢𑀲𑀦𑁆𑀦𑀺𑀪𑀁.
‘‘𑀲𑀼𑀯𑀡𑁆𑀡𑀘𑀦𑁆𑀤𑁂𑀢𑁆𑀣 𑀩𑀳𑀽 𑀦𑀺𑀧𑀸𑀢𑀺𑀢𑀸, 𑀳𑀢𑁆𑀣𑀻 𑀕𑀯𑀸𑀲𑁆𑀲𑀸 𑀓𑀺𑀓𑀺𑀩𑁆𑀬𑀕𑁆𑀖𑀤𑀻𑀧𑀺𑀬𑁄;
𑀏𑀡𑁂𑀬𑁆𑀬𑀓𑀸 𑀮𑀗𑁆𑀖𑀫𑀬𑁂𑀢𑁆𑀣 𑀧𑀓𑁆𑀔𑀺𑀦𑁄, 𑀫𑀺𑀕𑁂𑀢𑁆𑀣 𑀯𑁂𑀴𑀼𑀭𑀺𑀬𑀫𑀬𑀸 𑀬𑀼𑀥𑀸 𑀬𑀼𑀢𑀸.
‘‘𑀢𑀢𑁆𑀣𑀲𑁆𑀲𑀭𑀸𑀚𑀳𑀭𑀬𑁄 𑀅𑀬𑁄𑀚𑀬𑀼𑀁, 𑀤𑀲𑀲𑀢𑀸𑀦𑀺 𑀲𑀼𑀲𑀼𑀦𑀸𑀕𑀲𑀸𑀤𑀺𑀲𑁂;
𑀅𑀮𑀗𑁆𑀓𑀢𑁂 ¶ 𑀓𑀜𑁆𑀘𑀦𑀚𑀸𑀮𑀼𑀭𑀘𑁆𑀙𑀤𑁂, 𑀆𑀯𑁂𑀴𑀺𑀦𑁂 𑀲𑀤𑁆𑀤𑀕𑀫𑁂 𑀅𑀲𑀗𑁆𑀕𑀺𑀢𑁂.
‘‘𑀢𑀁 𑀬𑀸𑀦𑀲𑁂𑀝𑁆𑀞𑀁 𑀅𑀪𑀺𑀭𑀼𑀬𑁆𑀳 𑀫𑀸𑀢𑀮𑀺, 𑀤𑀺𑀲𑀸 𑀇𑀫𑀸𑀬𑁄 𑀅𑀪𑀺𑀦𑀸𑀤𑀬𑀺𑀢𑁆𑀣;
𑀦𑀪𑀜𑁆𑀘 𑀲𑁂𑀮𑀜𑁆𑀘 𑀯𑀦𑀧𑁆𑀧𑀢𑀺𑀦𑀺𑀜𑁆𑀘, 𑀲𑀲𑀸𑀕𑀭𑀁 𑀧𑀩𑁆𑀬𑀣𑀬𑀺𑀢𑁆𑀣 𑀫𑁂𑀤𑀺𑀦𑀺𑀁.
‘‘𑀲 ¶ 𑀔𑀺𑀧𑁆𑀧𑀫𑁂𑀯 𑀉𑀧𑀕𑀫𑁆𑀫 𑀅𑀲𑁆𑀲𑀫𑀁, 𑀧𑀸𑀯𑀸𑀭𑀫𑁂𑀓𑀁𑀲𑀓𑀢𑁄 𑀓𑀢𑀜𑁆𑀚𑀮𑀻;
𑀩𑀳𑀼𑀲𑁆𑀲𑀼𑀢𑀁 𑀯𑀼𑀤𑁆𑀥𑀁 𑀯𑀺𑀦𑀻𑀢𑀯𑀦𑁆𑀢𑀁, 𑀇𑀘𑁆𑀘𑀩𑁆𑀭𑀯𑀺 𑀫𑀸𑀢𑀮𑀺 𑀤𑁂𑀯𑀩𑁆𑀭𑀸𑀳𑁆𑀫𑀡𑀁.
‘‘𑀇𑀦𑁆𑀤𑀲𑁆𑀲 𑀯𑀸𑀓𑁆𑀬𑀁 𑀦𑀺𑀲𑀸𑀫𑁂𑀳𑀺 𑀓𑁄𑀲𑀺𑀬, 𑀤𑀽𑀢𑁄 𑀅𑀳𑀁 𑀧𑀼𑀘𑁆𑀙𑀢𑀺 𑀢𑀁 𑀧𑀼𑀭𑀺𑀦𑁆𑀤𑀤𑁄;
𑀆𑀲𑀸𑀬 𑀲𑀤𑁆𑀥𑀸 𑀲𑀺𑀭𑀺𑀬𑀸 𑀘 𑀓𑁄𑀲𑀺𑀬, 𑀳𑀺𑀭𑀻 𑀲𑀼𑀥𑀁 𑀓𑁂𑀦 𑀫𑀮𑀢𑁆𑀣 𑀳𑁂𑀢𑀼𑀦𑀸’’𑀢𑀺.
𑀢𑀢𑁆𑀣 𑀢𑀁 𑀲𑀼𑀧𑁆𑀮𑀯𑀢𑁆𑀣𑀦𑁆𑀢𑀺 𑀢𑀁 𑀯𑁂𑀚𑀬𑀦𑁆𑀢𑀭𑀣𑀁 𑀲𑀼𑀔𑁂𑀦 𑀧𑁆𑀮𑀯𑀦𑀢𑁆𑀣𑀁. 𑀉𑀤𑀢𑀸𑀭𑀬𑀻𑀢𑀺 𑀉𑀢𑁆𑀢𑀸𑀭𑁂𑀲𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀫𑀦𑀲𑀚𑁆𑀚𑀫𑀓𑀸𑀲𑀺. 𑀉𑀧𑀓𑀸𑀭𑀺𑀬𑀲𑀸𑀤𑀺𑀲𑀦𑁆𑀢𑀺 𑀉𑀧𑀓𑀭𑀡𑀪𑀡𑁆𑀟𑁂𑀳𑀺 𑀲𑀤𑀺𑀲𑀁, 𑀬𑀣𑀸 𑀢𑀲𑁆𑀲 𑀅𑀕𑁆𑀕𑀺𑀲𑀺𑀔𑀸𑀬 ¶ 𑀲𑀫𑀸𑀦𑀯𑀡𑁆𑀡𑀸𑀦𑀺 𑀉𑀧𑀓𑀭𑀡𑀸𑀦𑀺 𑀚𑀮𑀦𑁆𑀢𑀺, 𑀢𑀣𑁂𑀯 𑀚𑀮𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀚𑀫𑁆𑀩𑁄𑀦𑀤𑀻𑀲𑀦𑁆𑀢𑀺 𑀚𑀫𑁆𑀩𑀼𑀦𑀤𑀲𑀗𑁆𑀔𑀸𑀢𑀁 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀁 𑀈𑀲𑀁. 𑀓𑀜𑁆𑀘𑀦𑀘𑀺𑀢𑁆𑀢𑀲𑀦𑁆𑀦𑀺𑀪𑀦𑁆𑀢𑀺, 𑀓𑀜𑁆𑀘𑀦𑀫𑀬𑁂𑀦 𑀲𑀢𑁆𑀢𑀭𑀢𑀦𑀯𑀺𑀘𑀺𑀢𑁆𑀢𑁂𑀦 𑀅𑀝𑁆𑀞𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀲𑀼𑀯𑀡𑁆𑀡𑀘𑀦𑁆𑀤𑁂𑀢𑁆𑀣𑀸𑀢𑀺 𑀲𑀼𑀯𑀡𑁆𑀡𑀫𑀬𑀸 𑀘𑀦𑁆𑀤𑀓𑀸 𑀏𑀢𑁆𑀣 𑀭𑀣𑁂. 𑀳𑀢𑁆𑀣𑀻𑀢𑀺 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑀸 𑀳𑀢𑁆𑀣𑀻. 𑀕𑀯𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑀗𑁆𑀖𑀫𑀬𑁂𑀢𑁆𑀣 𑀧𑀓𑁆𑀔𑀺𑀦𑁄𑀢𑀺 𑀏𑀢𑁆𑀣 𑀭𑀣𑁂 𑀮𑀗𑁆𑀖𑀫𑀬𑀸 𑀦𑀸𑀦𑀸𑀭𑀢𑀦𑀫𑀬𑀸 𑀧𑀓𑁆𑀔𑀺𑀕𑀡𑀸𑀧𑀺 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸. 𑀬𑀼𑀥𑀸 𑀬𑀼𑀢𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀬𑀼𑀥𑁂𑀦 𑀲𑀤𑁆𑀥𑀺𑀁 𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀤𑀲𑁆𑀲𑀺𑀢𑀸.
𑀅𑀲𑁆𑀲𑀭𑀸𑀚𑀳𑀭𑀬𑁄𑀢𑀺 𑀳𑀭𑀺𑀯𑀡𑁆𑀡𑀫𑀦𑁄𑀫𑀬𑀅𑀲𑁆𑀲𑀭𑀸𑀚𑀸𑀦𑁄. 𑀲𑀼𑀲𑀼𑀦𑀸𑀕𑀲𑀸𑀤𑀺𑀲𑁂𑀢𑀺 𑀩𑀮𑀲𑀫𑁆𑀧𑀢𑁆𑀢𑀺𑀬𑀸 𑀢𑀭𑀼𑀡𑀦𑀸𑀕𑀲𑀤𑀺𑀲𑁂. 𑀓𑀜𑁆𑀘𑀦𑀚𑀸𑀮𑀼𑀭𑀘𑁆𑀙𑀤𑁂𑀢𑀺 𑀓𑀜𑁆𑀘𑀦𑀚𑀸𑀮𑀫𑀬𑁂𑀦 𑀉𑀭𑀘𑁆𑀙𑀤𑀸𑀮𑀗𑁆𑀓𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀆𑀯𑁂𑀴𑀺𑀦𑁂𑀢𑀺 𑀆𑀯𑁂𑀴𑀲𑀗𑁆𑀔𑀸𑀢𑁂𑀳𑀺 𑀓𑀡𑁆𑀡𑀸𑀮𑀗𑁆𑀓𑀸𑀭𑁂𑀳𑀺 𑀬𑀼𑀢𑁆𑀢𑁂. 𑀲𑀤𑁆𑀤𑀕𑀫𑁂𑀢𑀺 𑀧𑀢𑁄𑀤𑀧𑁆𑀧𑀳𑀸𑀭𑀁 𑀯𑀺𑀦𑀸 𑀲𑀤𑁆𑀤𑀫𑀢𑁆𑀢𑁂𑀦𑁂𑀯 𑀕𑀫𑀦𑀲𑀻𑀮𑁂. 𑀅𑀲𑀗𑁆𑀕𑀻𑀢𑁂𑀢𑀺 𑀦𑀺𑀲𑁆𑀲𑀗𑁆𑀕𑁂 𑀲𑀻𑀖𑀚𑀯𑁂 𑀏𑀯𑀭𑀽𑀧𑁂 𑀅𑀲𑁆𑀲𑀭𑀸𑀚𑁂 𑀢𑀢𑁆𑀣 𑀬𑁄𑀚𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.
𑀅𑀪𑀺𑀦𑀸𑀤𑀬𑀺𑀢𑁆𑀣𑀸𑀢𑀺 𑀬𑀸𑀦𑀲𑀤𑁆𑀤𑁂𑀦 𑀏𑀓𑀦𑀺𑀦𑁆𑀦𑀸𑀤𑀁 𑀅𑀓𑀸𑀲𑀺. 𑀯𑀦𑀧𑁆𑀧𑀢𑀺𑀦𑀺𑀜𑁆𑀘𑀸𑀢𑀺 𑀯𑀦𑀧𑁆𑀧𑀢𑀺𑀦𑀻 𑀘 𑀯𑀦𑀲𑀡𑁆𑀟𑁂 𑀘𑀸𑀢𑀺 𑀅𑀢𑁆𑀣𑁄. 𑀧𑀩𑁆𑀬𑀣𑀬𑀺𑀢𑁆𑀣𑀸𑀢𑀺 𑀓𑀫𑁆𑀧𑀬𑀺𑀢𑁆𑀣. 𑀢𑀢𑁆𑀣 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀓𑀫𑁆𑀧𑀦𑁂𑀦 𑀦𑀪𑀓𑀫𑁆𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀯𑀸𑀭𑀫𑁂𑀓𑀁𑀲𑀓𑀢𑁄𑀢𑀺 𑀏𑀓𑀁𑀲𑀓𑀢𑀧𑀸𑀯𑀸𑀭𑀤𑀺𑀩𑁆𑀩𑀯𑀢𑁆𑀣𑁄. 𑀯𑀼𑀤𑁆𑀥𑀦𑁆𑀢𑀺 𑀕𑀼𑀡𑀯𑀼𑀤𑁆𑀥𑀁. 𑀯𑀺𑀦𑀻𑀢𑀯𑀦𑁆𑀢𑀦𑁆𑀢𑀺 𑀯𑀺𑀦𑀻𑀢𑁂𑀦 ¶ 𑀆𑀘𑀸𑀭𑀯𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀇𑀘𑁆𑀘𑀩𑁆𑀭𑀯𑀻𑀢𑀺 𑀭𑀣𑀁 𑀆𑀓𑀸𑀲𑁂 𑀞𑀧𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀏𑀯𑀁 𑀅𑀩𑁆𑀭𑀯𑀺. 𑀤𑁂𑀯𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀤𑁂𑀯𑀲𑀫𑀁 𑀩𑁆𑀭𑀸𑀳𑁆𑀫𑀡𑀁.
𑀲𑁄 ¶ 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀦𑁆𑀥𑀸 𑀲𑀺𑀭𑀻 𑀫𑀁 𑀧𑀝𑀺𑀪𑀸𑀢𑀺 𑀫𑀸𑀢𑀮𑀺, 𑀲𑀤𑁆𑀥𑀸 𑀅𑀦𑀺𑀘𑁆𑀘𑀸 𑀧𑀦 𑀤𑁂𑀯𑀲𑀸𑀭𑀣𑀺.
𑀆𑀲𑀸 𑀯𑀺𑀲𑀁𑀯𑀸𑀤𑀺𑀓𑀲𑀫𑁆𑀫𑀢𑀸 𑀳𑀺 𑀫𑁂, 𑀳𑀺𑀭𑀻 𑀘 𑀅𑀭𑀺𑀬𑀫𑁆𑀳𑀺 𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺.
𑀢𑀢𑁆𑀣 𑀅𑀦𑁆𑀥𑀸𑀢𑀺 𑀲𑀺𑀧𑁆𑀧𑀸𑀤𑀺𑀲𑀫𑁆𑀧𑀦𑁆𑀦𑁂𑀧𑀺 𑀅𑀲𑀫𑁆𑀧𑀦𑁆𑀦𑁂𑀧𑀺 𑀪𑀚𑀦𑀢𑁄 ‘‘𑀅𑀦𑁆𑀥𑀸’’𑀢𑀺 𑀫𑀁 𑀧𑀝𑀺𑀪𑀸𑀢𑀺. 𑀅𑀦𑀺𑀘𑁆𑀘𑀸𑀢𑀺 𑀲𑀤𑁆𑀥𑀸 𑀧𑀦 𑀢𑀁 𑀢𑀁 𑀯𑀢𑁆𑀣𑀼𑀁 𑀧𑀳𑀸𑀬 𑀅𑀜𑁆𑀜𑀲𑁆𑀫𑀺𑀁 𑀅𑀜𑁆𑀜𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀢𑁄 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 ‘‘𑀅𑀦𑀺𑀘𑁆𑀘𑀸’’𑀢𑀺 𑀫𑀁 𑀧𑀝𑀺𑀪𑀸𑀢𑀺. 𑀯𑀺𑀲𑀁𑀯𑀸𑀤𑀺𑀓𑀲𑀫𑁆𑀫𑀢𑀸𑀢𑀺 𑀆𑀲𑀸 𑀧𑀦 𑀬𑀲𑁆𑀫𑀸 𑀥𑀦𑀢𑁆𑀣𑀺𑀓𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑀺𑀦𑀝𑁆𑀞𑀧𑀸𑀪𑀢𑀸 𑀏𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑀺𑀲𑀁𑀯𑀸𑀤𑀺𑀓𑀸’’𑀢𑀺 𑀫𑀁 𑀧𑀝𑀺𑀪𑀸𑀢𑀺. 𑀅𑀭𑀺𑀬𑀫𑁆𑀳𑀺 𑀕𑀼𑀡𑁂𑀢𑀺 𑀳𑀺𑀭𑀻 𑀧𑀦 𑀳𑀺𑀭𑁄𑀢𑁆𑀢𑀧𑁆𑀧𑀲𑀪𑀸𑀯𑀲𑀗𑁆𑀔𑀸𑀢𑁂 𑀧𑀭𑀺𑀲𑀼𑀤𑁆𑀥𑁂 𑀅𑀭𑀺𑀬𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸𑀢𑀺.
𑀇𑀤𑀸𑀦𑀺 ¶ 𑀢𑀲𑁆𑀲𑀸 𑀕𑀼𑀡𑀁 𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋
‘‘𑀓𑀼𑀫𑀸𑀭𑀺𑀬𑁄 𑀬𑀸𑀘𑀺𑀫𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸, 𑀚𑀺𑀡𑁆𑀡𑀸 𑀘 𑀬𑀸 𑀬𑀸 𑀘 𑀲𑀪𑀢𑁆𑀢𑀼𑀇𑀢𑁆𑀣𑀺𑀬𑁄;
𑀢𑀸 𑀙𑀦𑁆𑀤𑀭𑀸𑀕𑀁 𑀧𑀼𑀭𑀺𑀲𑁂𑀲𑀼 𑀉𑀕𑁆𑀕𑀢𑀁, 𑀳𑀺𑀭𑀺𑀬𑀸 𑀦𑀺𑀯𑀸𑀭𑁂𑀦𑁆𑀢𑀺 𑀲𑀘𑀺𑀢𑁆𑀢𑀫𑀢𑁆𑀢𑀦𑁄.
‘‘𑀲𑀗𑁆𑀕𑀸𑀫𑀲𑀻𑀲𑁂 𑀲𑀭𑀲𑀢𑁆𑀢𑀺𑀲𑀁𑀬𑀼𑀢𑁂, 𑀧𑀭𑀸𑀚𑀺𑀢𑀸𑀦𑀁 𑀧𑀢𑀢𑀁 𑀧𑀮𑀸𑀬𑀺𑀦𑀁;
𑀳𑀺𑀭𑀺𑀬𑀸 𑀦𑀺𑀯𑀢𑁆𑀢𑀦𑁆𑀢𑀺 𑀚𑀳𑀺𑀢𑁆𑀯 𑀚𑀻𑀯𑀺𑀢𑀁, 𑀢𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 𑀧𑀼𑀦𑀸 𑀳𑀺𑀭𑀻𑀫𑀦𑀸.
‘‘𑀯𑁂𑀮𑀸 𑀬𑀣𑀸 𑀲𑀸𑀕𑀭𑀯𑁂𑀕𑀯𑀸𑀭𑀺𑀦𑀻, 𑀳𑀺𑀭𑀸𑀬 𑀳𑀺 𑀧𑀸𑀧𑀚𑀦𑀁 𑀦𑀺𑀯𑀸𑀭𑀺𑀦𑀻;
𑀢𑀁 𑀲𑀩𑁆𑀩𑀮𑁄𑀓𑁂 𑀳𑀺𑀭𑀺𑀫𑀭𑀺𑀬𑀧𑀽𑀚𑀺𑀢𑀁, 𑀇𑀦𑁆𑀤𑀲𑁆𑀲 𑀢𑀁 𑀯𑁂𑀤𑀬 𑀤𑁂𑀯𑀲𑀸𑀭𑀣𑀻’’𑀢𑀺.
𑀢𑀢𑁆𑀣 ¶ 𑀚𑀺𑀡𑁆𑀡𑀸𑀢𑀺 𑀯𑀺𑀥𑀯𑀸. 𑀲𑀪𑀢𑁆𑀢𑀽𑀢𑀺 𑀲𑀲𑀸𑀫𑀺𑀓𑀸 𑀢𑀭𑀼𑀡𑀺𑀢𑁆𑀣𑀺𑀬𑁄. 𑀅𑀢𑁆𑀢𑀦𑁄𑀢𑀺 𑀢𑀸 𑀲𑀩𑁆𑀩𑀸𑀧𑀺 𑀧𑀭𑀧𑀼𑀭𑀺𑀲𑁂𑀲𑀼 𑀅𑀢𑁆𑀢𑀦𑁄 𑀙𑀦𑁆𑀤𑀭𑀸𑀕𑀁 𑀉𑀕𑁆𑀕𑀢𑀁 𑀯𑀺𑀤𑀺𑀢𑁆𑀯𑀸 ‘‘𑀅𑀬𑀼𑀢𑁆𑀢𑀫𑁂𑀢𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀳𑀺𑀭𑀺𑀬𑀸 𑀲𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺. 𑀧𑀢𑀢𑀁 𑀧𑀮𑀸𑀬𑀺𑀦𑀦𑁆𑀢𑀺 𑀧𑀢𑀦𑁆𑀢𑀸𑀦𑀜𑁆𑀘 𑀧𑀮𑀸𑀬𑀦𑁆𑀢𑀸𑀦𑀜𑁆𑀘 𑀅𑀦𑁆𑀢𑀭𑁂. 𑀚𑀳𑀺𑀢𑁆𑀯 𑀚𑀻𑀯𑀺𑀢𑀦𑁆𑀢𑀺 𑀬𑁂 𑀳𑀺𑀭𑀺𑀫𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀘𑀚𑀺𑀢𑁆𑀯𑀸 𑀳𑀺𑀭𑀺𑀬𑀸 𑀦𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀦𑀺𑀯𑀢𑁆𑀢𑀸 𑀘 𑀧𑀦 𑀢𑁂 𑀳𑀺𑀭𑀻𑀫𑀦𑀸 𑀧𑀼𑀦 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀅𑀫𑀺𑀢𑁆𑀢𑀳𑀢𑁆𑀣𑀢𑁄 𑀫𑁄𑀘𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀧𑀸𑀧𑀚𑀦𑀁 𑀦𑀺𑀯𑀸𑀭𑀺𑀦𑀻𑀢𑀺 𑀧𑀸𑀧𑀢𑁄 𑀚𑀦𑀁 𑀦𑀺𑀯𑀸𑀭𑀺𑀦𑀻, 𑀅𑀬𑀫𑁂𑀯 𑀯𑀸 𑀧𑀸𑀞𑁄 ¶ . 𑀢𑀦𑁆𑀢𑀺 𑀢𑀁 𑀳𑀺𑀭𑀺𑀁. 𑀅𑀭𑀺𑀬𑀧𑀽𑀚𑀺𑀢𑀦𑁆𑀢𑀺 𑀅𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀽𑀚𑀺𑀢𑀁. 𑀇𑀦𑁆𑀤𑀲𑁆𑀲 𑀢𑀁 𑀯𑁂𑀤𑀬𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀫𑀳𑀸𑀕𑀼𑀡𑀸 𑀅𑀭𑀺𑀬𑀧𑀽𑀚𑀺𑀢𑀸𑀯𑁂𑀲𑀸, 𑀢𑀲𑁆𑀫𑀸 𑀢𑀁 𑀏𑀯𑀁 𑀉𑀢𑁆𑀢𑀫𑀸 𑀦𑀸𑀫𑁂𑀲𑀸𑀢𑀺 𑀇𑀦𑁆𑀤𑀲𑁆𑀲 𑀓𑀣𑁂𑀳𑀻𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀸𑀢𑀮𑀺 𑀕𑀸𑀣𑀫𑀸𑀳 𑁋
‘‘𑀓𑁄 𑀢𑁂 𑀇𑀫𑀁 𑀓𑁄𑀲𑀺𑀬 𑀤𑀺𑀝𑁆𑀞𑀺𑀫𑁄𑀤𑀳𑀺, 𑀩𑁆𑀭𑀳𑁆𑀫𑀸 𑀫𑀳𑀺𑀦𑁆𑀤𑁄 𑀅𑀣 𑀯𑀸 𑀧𑀚𑀸𑀧𑀢𑀺;
𑀳𑀺𑀭𑀸𑀬 𑀤𑁂𑀯𑁂𑀲𑀼 𑀳𑀺 𑀲𑁂𑀝𑁆𑀞𑀲𑀫𑁆𑀫𑀢𑀸, 𑀥𑀻𑀢𑀸 𑀫𑀳𑀺𑀦𑁆𑀤𑀲𑁆𑀲 𑀫𑀳𑁂𑀲𑀺 𑀚𑀸𑀬𑀣𑀸’’𑀢𑀺.
𑀢𑀢𑁆𑀣 𑀤𑀺𑀝𑁆𑀞𑀺𑀦𑁆𑀢𑀺 ‘‘𑀳𑀺𑀭𑀻 𑀦𑀸𑀫 𑀫𑀳𑀸𑀕𑀼𑀡𑀸 𑀅𑀭𑀺𑀬𑀧𑀽𑀚𑀺𑀢𑀸’’𑀢𑀺 𑀮𑀤𑁆𑀥𑀺𑀁. 𑀑𑀤𑀳𑀻𑀢𑀺 𑀳𑀤𑀬𑁂 𑀧𑀯𑁂𑀲𑁂𑀲𑀺. 𑀲𑁂𑀝𑁆𑀞𑀲𑀫𑁆𑀫𑀢𑀸𑀢𑀺 𑀢𑀯 𑀲𑀦𑁆𑀢𑀺𑀓𑁂 𑀲𑀼𑀥𑀸𑀬 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀇𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀓𑀜𑁆𑀘𑀦𑀸𑀲𑀦𑀁 𑀮𑀪𑀺𑀢𑁆𑀯𑀸 𑀲𑀩𑁆𑀩𑀤𑁂𑀯𑀢𑀸𑀳𑀺 𑀧𑀽𑀚𑀺𑀬𑀫𑀸𑀦𑀸 𑀉𑀢𑁆𑀢𑀫𑀲𑀫𑁆𑀫𑀢𑀸 𑀚𑀸𑀬𑀣.
𑀏𑀯𑀁 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀓𑁄𑀲𑀺𑀬𑀲𑁆𑀲 𑀢𑀗𑁆𑀔𑀡𑀜𑁆𑀜𑁂𑀯 𑀘𑀯𑀦𑀥𑀫𑁆𑀫𑁄 𑀚𑀸𑀢𑁄. 𑀅𑀣 𑀦𑀁, 𑀫𑀸𑀢𑀮𑀺, ‘‘𑀓𑁄𑀲𑀺𑀬 ¶ 𑀆𑀬𑀼𑀲𑀗𑁆𑀔𑀸𑀭𑁄 𑀢𑁂 𑀑𑀲𑁆𑀲𑀝𑁆𑀞𑁄, 𑀘𑀯𑀦𑀥𑀫𑁆𑀫𑁄𑀧𑀺 𑀢𑁂 𑀲𑀫𑁆𑀧𑀢𑁆𑀢𑁄, 𑀓𑀺𑀁 𑀢𑁂 𑀫𑀦𑀼𑀲𑁆𑀲𑀮𑁄𑀓𑁂𑀦, 𑀤𑁂𑀯𑀮𑁄𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀢𑀢𑁆𑀣 𑀦𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀳𑀦𑁆𑀤𑁂𑀳𑀺 𑀤𑀸𑀦𑀺 𑀢𑀺𑀤𑀺𑀯𑀁 𑀅𑀧𑀓𑁆𑀓𑀫, 𑀭𑀣𑀁 𑀲𑀫𑀸𑀭𑀼𑀬𑁆𑀳 𑀫𑀫𑀸𑀬𑀺𑀢𑀁 𑀇𑀫𑀁;
𑀇𑀦𑁆𑀤𑁄 𑀘 𑀢𑀁 𑀇𑀦𑁆𑀤𑀲𑀕𑁄𑀢𑁆𑀢 𑀓𑀗𑁆𑀔𑀢𑀺, 𑀅𑀚𑁆𑀚𑁂𑀯 𑀢𑁆𑀯𑀁 𑀇𑀦𑁆𑀤𑀲𑀳𑀩𑁆𑀬𑀢𑀁 𑀯𑀚𑀸’’𑀢𑀺.
𑀢𑀢𑁆𑀣 ¶ 𑀫𑀫𑀸𑀬𑀺𑀢𑀦𑁆𑀢𑀺 𑀧𑀺𑀬𑀁 𑀫𑀦𑀸𑀧𑀁. 𑀇𑀦𑁆𑀤𑀲𑀕𑁄𑀢𑁆𑀢𑀸𑀢𑀺 𑀧𑀼𑀭𑀺𑀫𑀪𑀯𑁂 𑀇𑀦𑁆𑀤𑁂𑀦 𑀲𑀫𑀸𑀦𑀕𑁄𑀢𑁆𑀢. 𑀓𑀗𑁆𑀔𑀢𑀻𑀢𑀺 𑀢𑀯𑀸𑀕𑀫𑀦𑀁 𑀇𑀘𑁆𑀙𑀦𑁆𑀢𑁄 𑀓𑀗𑁆𑀔𑀢𑀺.
𑀇𑀢𑀺 𑀢𑀲𑁆𑀫𑀺𑀁 𑀓𑁄𑀲𑀺𑀬𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀓𑁄𑀲𑀺𑀬𑁄 𑀘𑀯𑀺𑀢𑁆𑀯𑀸 𑀑𑀧𑀧𑀸𑀢𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀆𑀭𑀼𑀬𑁆𑀳 𑀤𑀺𑀩𑁆𑀩𑀭𑀣𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁, 𑀫𑀸𑀢𑀮𑀺, 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀲𑀺. 𑀲𑀓𑁆𑀓𑁄 𑀢𑀁 𑀤𑀺𑀲𑁆𑀯𑀸𑀯 𑀢𑀼𑀝𑁆𑀞𑀫𑀸𑀦𑀲𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀳𑀺𑀭𑀺𑀤𑁂𑀯𑀺𑀁 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺, 𑀅𑀧𑀭𑀺𑀫𑀸𑀡𑀫𑀲𑁆𑀲 𑀇𑀲𑁆𑀲𑀭𑀺𑀬𑀁 𑀅𑀳𑁄𑀲𑀺. 𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 ‘‘𑀅𑀦𑁄𑀫𑀲𑀢𑁆𑀢𑀸𑀦𑀁 𑀓𑀫𑁆𑀫𑀁 𑀦𑀸𑀫 𑀏𑀯𑀁 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀲𑀢𑁆𑀣𑀸 𑀑𑀲𑀸𑀦𑀕𑀸𑀣𑀫𑀸𑀳 𑁋
‘‘𑀏𑀯𑀁 𑀯𑀺𑀲𑀼𑀚𑁆𑀛𑀦𑁆𑀢𑀺 𑀅𑀧𑀸𑀧𑀓𑀫𑁆𑀫𑀺𑀦𑁄, 𑀅𑀣𑁄 𑀲𑀼𑀘𑀺𑀡𑁆𑀡𑀲𑁆𑀲 𑀨𑀮𑀁 𑀦 𑀦𑀲𑁆𑀲𑀢𑀺;
𑀬𑁂 ¶ 𑀓𑁂𑀘𑀺 𑀫𑀤𑁆𑀤𑀓𑁆𑀔𑀼 𑀲𑀼𑀥𑀸𑀬 𑀪𑁄𑀚𑀦𑀁, 𑀲𑀩𑁆𑀩𑁂𑀯 𑀢𑁂 𑀇𑀦𑁆𑀤𑀲𑀳𑀩𑁆𑀬𑀢𑀁 𑀕𑀢𑀸’’𑀢𑀺.
𑀢𑀢𑁆𑀣 𑀅𑀧𑀸𑀧𑀓𑀫𑁆𑀫𑀺𑀦𑁄𑀢𑀺 𑀅𑀧𑀸𑀧𑀓𑀫𑁆𑀫𑀸 𑀲𑀢𑁆𑀢𑀸 𑀏𑀯𑀁 𑀯𑀺𑀲𑀼𑀚𑁆𑀛𑀦𑁆𑀢𑀺 𑀬𑁂 𑀓𑁂𑀘𑀺 𑀫𑀤𑁆𑀤𑀓𑁆𑀔𑀽𑀢𑀺 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀢𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀢𑀤𑀸 𑀓𑁄𑀲𑀺𑀬𑁂𑀦 𑀳𑀺𑀭𑀺𑀬𑀸 𑀤𑀻𑀬𑀫𑀸𑀦𑀁 𑀲𑀼𑀥𑀸𑀪𑁄𑀚𑀦𑀁 𑀅𑀤𑁆𑀤𑀲𑀁𑀲𑀼. 𑀲𑀩𑁆𑀩𑁂𑀯 𑀢𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀢𑀁 𑀤𑀸𑀦𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀇𑀦𑁆𑀤𑀲𑀳𑀩𑁆𑀬𑀢𑀁 𑀕𑀢𑀸𑀢𑀺.
𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀢𑀁 𑀅𑀤𑀸𑀦𑀸𑀪𑀺𑀭𑀢𑀁 𑀣𑀤𑁆𑀥𑀫𑀘𑁆𑀙𑀭𑀺𑀬𑀁 𑀲𑀫𑀸𑀦𑀁 𑀅𑀳𑀁 𑀤𑀫𑁂𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀳𑀺𑀭𑀻 𑀤𑁂𑀯𑀢𑀸 𑀉𑀧𑁆𑀧𑀮𑀯𑀡𑁆𑀡𑀸 𑀅𑀳𑁄𑀲𑀺, 𑀓𑁄𑀲𑀺𑀬𑁄 𑀤𑀸𑀦𑀧𑀢𑀺 𑀪𑀺𑀓𑁆𑀔𑀼, 𑀧𑀜𑁆𑀘𑀲𑀺𑀔𑁄 𑀅𑀦𑀼𑀭𑀼𑀤𑁆𑀥𑁄, 𑀫𑀸𑀢𑀮𑀺 𑀆𑀦𑀦𑁆𑀤𑁄, 𑀲𑀽𑀭𑀺𑀬𑁄 𑀓𑀲𑁆𑀲𑀧𑁄, 𑀘𑀦𑁆𑀤𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀦𑀸𑀭𑀤𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀲𑀼𑀥𑀸𑀪𑁄𑀚𑀦𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.
[𑁫𑁩𑁬] 𑁪. 𑀓𑀼𑀡𑀸𑀮𑀚𑀸𑀢𑀓𑀯𑀡𑁆𑀡𑀦𑀸
𑀏𑀯𑀫𑀓𑁆𑀔𑀸𑀬𑀢𑀻𑀢𑀺 ¶ 𑀇𑀤𑀁 𑀲𑀢𑁆𑀣𑀸 𑀓𑀼𑀡𑀸𑀮𑀤𑀳𑁂 𑀯𑀺𑀳𑀭𑀦𑁆𑀢𑁄 𑀅𑀦𑀪𑀺𑀭𑀢𑀺𑀧𑀻𑀴𑀺𑀢𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀸𑀓𑀺𑀬𑀓𑁄𑀮𑀺𑀬𑀸 ¶ 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀘 𑀓𑁄𑀮𑀺𑀬𑀦𑀕𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀭𑁄𑀳𑀺𑀡𑀺𑀁 𑀦𑀸𑀫 𑀦𑀤𑀺𑀁 𑀏𑀓𑁂𑀦𑁂𑀯𑀸𑀯𑀭𑀡𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀸𑀭𑁂𑀦𑁆𑀢𑀺. 𑀅𑀣 𑀚𑁂𑀝𑁆𑀞𑀫𑀽𑀮𑀫𑀸𑀲𑁂 𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀉𑀪𑀬𑀦𑀕𑀭𑀯𑀸𑀲𑀻𑀦𑀫𑁆𑀧𑀺 𑀓𑀫𑁆𑀫𑀓𑀸𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀯𑀤𑀺𑀁𑀲𑀼 𑁋 ‘‘𑀇𑀤𑀁 𑀉𑀤𑀓𑀁 𑀉𑀪𑀬𑀢𑁄 𑀦𑀻𑀳𑀭𑀺𑀬𑀫𑀸𑀦𑀁 𑀦𑁂𑀯 𑀢𑀼𑀫𑁆𑀳𑀸𑀓𑀁, 𑀦 𑀅𑀫𑁆𑀳𑀸𑀓𑀁 𑀧𑀳𑁄𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀲𑁆𑀲𑀁 𑀏𑀓𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀯𑀤𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀲𑀼 𑀓𑁄𑀝𑁆𑀞𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀫𑀬𑀁 𑀭𑀢𑁆𑀢𑀲𑀼𑀯𑀡𑁆𑀡𑀦𑀻𑀮𑀫𑀡𑀺𑀓𑀸𑀴𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀺𑀳𑀢𑁆𑀣𑀸 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑁂 𑀯𑀺𑀘𑀭𑀺𑀢𑀼𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀲𑁆𑀲𑀁 𑀏𑀓𑁂𑀦𑁂𑀯 𑀉𑀤𑀓𑁂𑀦 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. ‘‘𑀦 𑀫𑀬𑀁 𑀤𑀲𑁆𑀲𑀸𑀫𑀸’’𑀢𑀺? ‘‘𑀫𑀬𑀫𑁆𑀧𑀺 𑀦 𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀮𑀳𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑁄 𑀉𑀝𑁆𑀞𑀸𑀬 𑀏𑀓𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀭𑀸𑀚𑀓𑀼𑀮𑀸𑀦𑀁 𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀧𑀯𑀢𑁆𑀢𑁂𑀲𑀼𑀁.
𑀓𑁄𑀮𑀺𑀬𑀓𑀫𑁆𑀫𑀓𑀸𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀓𑁂 𑀲𑀸𑀓𑀺𑀬𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣 ¶ , 𑀬𑁂 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀨𑀮𑀓𑀸𑀯𑀼𑀥𑀸𑀦𑀺 𑀯𑀸 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀲𑀸𑀓𑀺𑀬𑀓𑀫𑁆𑀫𑀓𑀸𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀤𑀸𑀦𑀺 𑀓𑀼𑀝𑁆𑀞𑀺𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀅𑀦𑀸𑀣𑀸 𑀦𑀺𑀕𑁆𑀕𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸 𑀯𑀺𑀬 𑀓𑁄𑀮𑀭𑀼𑀓𑁆𑀔𑁂 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀨𑀮𑀓𑀸𑀯𑀼𑀥𑀸𑀦𑀺 𑀯𑀸 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀅𑀫𑀘𑁆𑀘𑀸𑀦𑀁 𑀓𑀣𑁂𑀲𑀼𑀁, 𑀅𑀫𑀘𑁆𑀘𑀸 𑀭𑀸𑀚𑀓𑀼𑀮𑀸𑀦𑀁 𑀓𑀣𑁂𑀲𑀼𑀁. 𑀢𑀢𑁄 𑀲𑀸𑀓𑀺𑀬𑀸 ‘‘𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀺𑀓𑀸𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀮𑀺𑀬𑀸𑀧𑀺 ‘‘𑀓𑁄𑀮𑀭𑀼𑀓𑁆𑀔𑀯𑀸𑀲𑀻𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀅𑀧𑀭𑁂 𑀧𑀦𑀸𑀘𑀭𑀺𑀬𑀸 ‘‘𑀲𑀸𑀓𑀺𑀬𑀓𑁄𑀮𑀺𑀬𑀸𑀦𑀁 𑀤𑀸𑀲𑀻𑀲𑀼 𑀉𑀤𑀓𑀢𑁆𑀣𑀸𑀬 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀘𑀼𑀫𑁆𑀩𑀝𑀸𑀦𑀺 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀔𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸𑀲𑀼 𑀏𑀓𑀺𑀲𑁆𑀲𑀸 𑀘𑀼𑀫𑁆𑀩𑀝𑀁 𑀏𑀓𑀸 𑀲𑀓𑀲𑀜𑁆𑀜𑀸𑀬 𑀕𑀡𑁆𑀳𑀺, 𑀢𑀁 𑀦𑀺𑀲𑁆𑀲𑀸𑀬 ‘𑀫𑀫 𑀘𑀼𑀫𑁆𑀩𑀝𑀁, 𑀢𑀯 𑀘𑀼𑀫𑁆𑀩𑀝’𑀦𑁆𑀢𑀺 𑀓𑀮𑀳𑁂 𑀧𑀯𑀢𑁆𑀢𑁂 𑀓𑀫𑁂𑀦 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀤𑀸𑀲𑀓𑀫𑁆𑀫𑀓𑀸𑀭𑀸 𑀘𑁂𑀯 𑀲𑁂𑀯𑀓𑀕𑀸𑀫𑀪𑁄𑀚𑀓𑀸𑀫𑀘𑁆𑀘𑀉𑀧𑀭𑀸𑀚𑀸𑀦𑁄 𑀘𑀸𑀢𑀺 𑀲𑀩𑁆𑀩𑁂 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀽’’𑀢𑀺 𑀯𑀤𑀦𑁆𑀢𑀺. 𑀇𑀫𑀫𑁆𑀳𑀸 𑀧𑀦 𑀦𑀬𑀸 𑀧𑀼𑀭𑀺𑀫𑀦𑀬𑁄𑀯 𑀩𑀳𑀽𑀲𑀼 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑁄, 𑀬𑀼𑀢𑁆𑀢𑀭𑀽𑀧𑁄 𑀘𑀸𑀢𑀺 𑀲𑁆𑀯𑁂𑀯 𑀕𑀳𑁂𑀢𑀩𑁆𑀩𑁄.
𑀢𑁂 ¶ ¶ 𑀧𑀦 𑀲𑀸𑀬𑀦𑁆𑀳𑀲𑀫𑀬𑁂 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀲𑁆𑀲𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑁂 𑀏𑀯𑀁 𑀬𑀼𑀤𑁆𑀥𑀲𑀚𑁆𑀚𑁂 𑀦𑀺𑀓𑁆𑀔𑀦𑁆𑀢𑁂 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 ‘‘𑀫𑀬𑀺 𑀕𑀢𑁂 𑀏𑀲 𑀓𑀮𑀳𑁄 𑀯𑀽𑀧𑀲𑀫𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀅𑀳𑀫𑁂𑀢𑁆𑀣 𑀕𑀦𑁆𑀢𑁆𑀯𑀸 𑀓𑀮𑀳𑀯𑀽𑀧𑀲𑀫𑀢𑁆𑀣𑀁 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀲𑁆𑀲𑀸𑀫𑀺, 𑀢𑀢𑁄 𑀓𑀮𑀳𑁄 𑀯𑀽𑀧𑀲𑀫𑀺𑀲𑁆𑀲𑀢𑀺, 𑀅𑀣 𑀲𑀸𑀫𑀕𑁆𑀕𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄) 𑀤𑁂𑀲𑁂𑀲𑁆𑀲𑀸𑀫𑀺, 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀤𑀲𑁆𑀲𑀦𑁆𑀢𑀺, 𑀅𑀳𑀁 𑀢𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀺, 𑀫𑀳𑀦𑁆𑀢𑁄 𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑁂 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀅𑀦𑁆𑀢𑀭𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀢𑁂𑀲𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀤𑀺𑀯𑀸 𑀅𑀦𑁆𑀥𑀓𑀸𑀭𑀁 𑀓𑀸𑀢𑀼𑀁 𑀓𑁂𑀲𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀦𑁂𑀲𑀁 𑀲𑀁𑀯𑀺𑀕𑁆𑀕𑀫𑀸𑀦𑀲𑀸𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄𑀧𑀺 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑁄 𑀲𑀢𑁆𑀣𑀸 𑀆𑀕𑀢𑁄, 𑀤𑀺𑀝𑁆𑀞𑁄 𑀦𑀼 𑀔𑁄 𑀢𑁂𑀦 𑀅𑀫𑁆𑀳𑀸𑀓𑀁 𑀓𑀮𑀳𑀓𑀭𑀡𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀔𑁄 𑀧𑀦 𑀲𑀓𑁆𑀓𑀸 𑀲𑀢𑁆𑀣𑀭𑀺 𑀆𑀕𑀢𑁂 𑀅𑀫𑁆𑀳𑁂𑀳𑀺 𑀧𑀭𑀲𑁆𑀲 𑀲𑀭𑀻𑀭𑁂 𑀲𑀢𑁆𑀣𑀁 𑀧𑀸𑀢𑁂𑀢𑀼𑀁, 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀅𑀫𑁆𑀳𑁂 𑀳𑀦𑀦𑁆𑀢𑀼 ¶ 𑀯𑀸 𑀩𑀚𑁆𑀛𑀦𑁆𑀢𑀼 𑀯𑀸’’𑀢𑀺 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀲𑀼𑀁. 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀢𑀣𑁂𑀯 𑀅𑀓𑀁𑀲𑀼.
𑀅𑀣 𑀪𑀕𑀯𑀸 𑀑𑀢𑀭𑀺𑀢𑁆𑀯𑀸 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀯𑀸𑀮𑀼𑀓𑀧𑀼𑀮𑀺𑀦𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑁄. 𑀢𑁂𑀧𑀺 𑀭𑀸𑀚𑀸𑀦𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂 𑀲𑀢𑁆𑀣𑀸 𑀚𑀸𑀦𑀦𑁆𑀢𑁄𑀯 ‘‘𑀓𑀲𑁆𑀫𑀸 𑀆𑀕𑀢𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺. ‘‘𑀦𑁂𑀯, 𑀪𑀦𑁆𑀢𑁂, 𑀦𑀤𑀺𑀤𑀲𑁆𑀲𑀦𑀢𑁆𑀣𑀸𑀬, 𑀦 𑀓𑀻𑀴𑀦𑀢𑁆𑀣𑀸𑀬, 𑀅𑀧𑀺𑀘 𑀔𑁄 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀗𑁆𑀕𑀸𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀆𑀕𑀢𑀫𑁆𑀳𑀸’’𑀢𑀺. ‘‘𑀓𑀺𑀁 𑀦𑀺𑀲𑁆𑀲𑀸𑀬 𑀯𑁄 𑀓𑀮𑀳𑁄, 𑀫𑀳𑀸𑀭𑀸𑀚𑀸’’𑀢𑀺? ‘‘𑀉𑀤𑀓𑀁 𑀦𑀺𑀲𑁆𑀲𑀸𑀬 𑀪𑀦𑁆𑀢𑁂’’𑀢𑀺. ‘‘𑀉𑀤𑀓𑀁 𑀓𑀺𑀁 𑀅𑀕𑁆𑀖𑀢𑀺 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀧𑁆𑀧𑀕𑁆𑀖𑀁, 𑀪𑀦𑁆𑀢𑁂’’𑀢𑀺. ‘‘𑀧𑀣𑀯𑀻 𑀦𑀸𑀫 𑀓𑀺𑀁 𑀅𑀕𑁆𑀖𑀢𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀦𑀕𑁆𑀖𑀸, 𑀪𑀦𑁆𑀢𑁂’’𑀢𑀺. ‘‘𑀔𑀢𑁆𑀢𑀺𑀬𑀸 𑀓𑀺𑀁 𑀅𑀕𑁆𑀖𑀦𑁆𑀢𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀔𑀢𑁆𑀢𑀺𑀬𑀸 𑀦𑀸𑀫 𑀅𑀦𑀕𑁆𑀖𑀸, 𑀪𑀦𑁆𑀢𑁂’’𑀢𑀺. ‘‘𑀅𑀧𑁆𑀧𑀕𑁆𑀖𑀁 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀓𑀲𑁆𑀫𑀸 𑀅𑀦𑀕𑁆𑀖𑁂 𑀔𑀢𑁆𑀢𑀺𑀬𑁂 𑀦𑀸𑀲𑁂𑀣, 𑀫𑀳𑀸𑀭𑀸𑀚, 𑀓𑀮𑀳𑀲𑁆𑀫𑀺𑀜𑁆𑀳𑀺 𑀅𑀲𑁆𑀲𑀸𑀤𑁄 ¶ 𑀦𑀸𑀫 𑀦𑀢𑁆𑀣𑀺, 𑀓𑀮𑀳𑀯𑀲𑁂𑀦 𑀳𑀺 𑀫𑀳𑀸𑀭𑀸𑀚𑀸 𑀏𑀓𑀸𑀬 𑀭𑀼𑀓𑁆𑀔𑀤𑁂𑀯𑀢𑀸𑀬 𑀓𑀸𑀴𑀲𑀻𑀳𑁂𑀦 𑀲𑀤𑁆𑀥𑀺𑀁 𑀩𑀤𑁆𑀥𑀸𑀖𑀸𑀢𑁄 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀨𑀦𑁆𑀤𑀦𑀚𑀸𑀢𑀓𑀁 (𑀚𑀸. 𑁧.𑁧𑁩.𑁧𑁪 𑀆𑀤𑀬𑁄) 𑀓𑀣𑁂𑀲𑀺. 𑀢𑀢𑁄 ‘‘𑀧𑀭𑀧𑀢𑁆𑀢𑀺𑀬𑁂𑀦 𑀦𑀸𑀫 𑀫𑀳𑀸𑀭𑀸𑀚𑀸 𑀦 𑀪𑀯𑀺𑀢𑀩𑁆𑀩𑀁, 𑀧𑀭𑀧𑀢𑁆𑀢𑀺𑀬𑀸 𑀳𑀺 𑀳𑀼𑀢𑁆𑀯𑀸 𑀏𑀓𑀲𑁆𑀲 𑀲𑀲𑀲𑁆𑀲 𑀓𑀣𑀸𑀬 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂 𑀘𑀢𑀼𑀧𑁆𑀧𑀤𑀕𑀡𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀦𑁄 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀧𑀭𑀧𑀢𑁆𑀢𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀤𑀤𑁆𑀤𑀭𑀚𑀸𑀢𑀓𑀁 (𑀚𑀸. 𑁧.𑁨𑁪𑁩-𑁪𑁪; 𑁧.𑁪.𑁧𑁩-𑁧𑁬; 𑁧.𑁯.𑁧𑁦𑁫 𑀆𑀤𑀬𑁄) 𑀓𑀣𑁂𑀲𑀺. 𑀢𑀢𑁄 ‘‘𑀓𑀤𑀸𑀘𑀺 𑀫𑀳𑀸𑀭𑀸𑀚𑀸 𑀤𑀼𑀩𑁆𑀩𑀮𑁄𑀧𑀺 ¶ 𑀫𑀳𑀩𑁆𑀩𑀮𑀲𑁆𑀲 𑀭𑀦𑁆𑀥𑀁 𑀧𑀲𑁆𑀲𑀢𑀺, 𑀓𑀤𑀸𑀘𑀺 𑀫𑀳𑀩𑁆𑀩𑀮𑁄𑀧𑀺 𑀤𑀼𑀩𑁆𑀩𑀮𑀲𑁆𑀲 𑀭𑀦𑁆𑀥𑀁 𑀧𑀲𑁆𑀲𑀢𑀺, 𑀮𑀝𑀼𑀓𑀺𑀓𑀸𑀧𑀺 𑀳𑀺 𑀲𑀓𑀼𑀡𑀺𑀓𑀸 𑀳𑀢𑁆𑀣𑀺𑀦𑀸𑀕𑀁 𑀖𑀸𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀮𑀝𑀼𑀓𑀺𑀓𑀚𑀸𑀢𑀓𑀁 (𑀚𑀸. 𑁧.𑁫.𑁩𑁯 𑀆𑀤𑀬𑁄) 𑀓𑀣𑁂𑀲𑀺. 𑀏𑀯𑀁 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀸𑀬 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀧𑀭𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. ‘‘𑀲𑀫𑀕𑁆𑀕𑀸𑀦𑀜𑁆𑀳𑀺 𑀫𑀳𑀸𑀭𑀸𑀚𑀸 𑀓𑁄𑀘𑀺 𑀑𑀢𑀸𑀭𑀁 𑀦𑀸𑀫 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀢𑁆𑀯𑀸 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 (𑀚𑀸. 𑁧.𑁧.𑁭𑁪) 𑀓𑀣𑁂𑀲𑀺. 𑀢𑀢𑁄 ‘‘𑀲𑀫𑀕𑁆𑀕𑀸𑀦𑀁 𑀫𑀳𑀸𑀭𑀸𑀚𑀸 𑀓𑁄𑀘𑀺 𑀯𑀺𑀯𑀭𑀁 𑀧𑀲𑁆𑀲𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀬𑀤𑀸 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀫𑀓𑀁𑀲𑀼, 𑀅𑀣 𑀦𑁂 𑀏𑀓𑁄 𑀦𑁂𑀲𑀸𑀤𑀧𑀼𑀢𑁆𑀢𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀆𑀤𑀸𑀬 𑀕𑀢𑁄, 𑀯𑀺𑀯𑀸𑀤𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀯𑀝𑁆𑀝𑀓𑀚𑀸𑀢𑀓𑀁 (𑀚𑀸. 𑁧.𑁧.𑁩𑁫, 𑁧𑁧𑁮; 𑁧.𑁬.𑁧𑁨𑁮-𑁧𑁩𑁩) 𑀓𑀣𑁂𑀲𑀺. 𑀏𑀯𑀁 𑀇𑀫𑀸𑀦𑀺 𑀧𑀜𑁆𑀘 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀯𑀲𑀸𑀦𑁂 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄) 𑀓𑀣𑁂𑀲𑀺.
𑀅𑀣 𑀭𑀸𑀚𑀸𑀦𑁄 𑀧𑀲𑀦𑁆𑀦𑀸 ‘‘𑀲𑀘𑁂 𑀲𑀢𑁆𑀣𑀸 𑀦𑀸𑀕𑀫𑀺𑀲𑁆𑀲, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀯𑀥𑀺𑀢𑁆𑀯𑀸 𑀮𑁄𑀳𑀺𑀢𑀦𑀤𑀺𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫, 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀦𑁄 𑀚𑀻𑀯𑀺𑀢𑀁 𑀮𑀤𑁆𑀥𑀁. 𑀲𑀘𑁂 𑀧𑀦 𑀲𑀢𑁆𑀣𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀁 𑀘𑀢𑀼𑀫𑀳𑀸𑀤𑀻𑀧𑀭𑀚𑁆𑀚𑀁 𑀳𑀢𑁆𑀣𑀕𑀢𑀁 𑀅𑀪𑀯𑀺𑀲𑁆𑀲, 𑀅𑀢𑀺𑀭𑁂𑀓𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀢𑀢𑁄 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀯 𑀅𑀯𑀺𑀘𑀭𑀺𑀲𑁆𑀲, 𑀢𑀁 𑀔𑁄 𑀧𑀦𑁂𑀲 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄, 𑀇𑀤𑀸𑀦𑀺𑀧𑀺 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀯 𑀯𑀺𑀘𑀭𑀢𑀽’’𑀢𑀺 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀅𑀤𑀁𑀲𑀼. 𑀪𑀕𑀯𑀸 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀳𑀸𑀯𑀦𑀁 𑀅𑀕𑀫𑀸𑀲𑀺. 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀏𑀓𑀤𑀸 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀏𑀓𑀤𑀸 𑀓𑁄𑀮𑀺𑀬𑀦𑀕𑀭𑁂𑀢𑀺 𑀤𑁆𑀯𑀻𑀲𑀼 𑀦𑀕𑀭𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀢𑁂𑀲𑀁 𑀕𑀭𑀼𑀕𑀸𑀭𑀯𑁂𑀦 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄𑀧𑀺 𑀦𑁂𑀲𑀁 𑀅𑀦𑀪𑀺𑀭𑀢𑀺𑀚𑀦𑀦𑀢𑁆𑀣𑀸𑀬 ¶ 𑀢𑀁 𑀢𑀁 𑀯𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀢𑁂 𑀅𑀢𑀺𑀭𑁂𑀓𑀢𑀭𑀁 𑀉𑀓𑁆𑀓𑀡𑁆𑀞𑀺𑀁𑀲𑀼. 𑀪𑀕𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀢𑁂𑀲𑀁 𑀅𑀦𑀪𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀤𑀺𑀲𑁂𑀦 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀺, 𑀓𑀣𑀁 𑀭𑀽𑀧𑀸 𑀦𑀼 𑀔𑁄 𑀢𑁂𑀲𑀁 𑀥𑀫𑁆𑀫𑀓𑀣𑀸 𑀲𑀧𑁆𑀧𑀸𑀬𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀓𑀼𑀡𑀸𑀮𑀥𑀫𑁆𑀫𑀤𑁂𑀲𑀦𑀁 𑀧𑀲𑁆𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀇𑀫𑁂 𑀪𑀺𑀓𑁆𑀔𑀽 𑀳𑀺𑀫𑀯𑀦𑁆𑀢𑀁 𑀦𑁂𑀢𑁆𑀯𑀸 𑀓𑀼𑀡𑀸𑀮𑀓𑀣𑀸𑀬 𑀦𑁂𑀲𑀁 𑀫𑀸𑀢𑀼𑀕𑀸𑀫𑀤𑁄𑀲𑀁 𑀧𑀓𑀸𑀲𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀳𑀭𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀤𑀲𑁆𑀲𑀸𑀫𑀻’’𑀢𑀺.
𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀧𑀺𑀮𑀯𑀢𑁆𑀣𑀼𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀢𑁆𑀢𑀓𑀺𑀘𑁆𑀘𑀯𑁂𑀮𑀸𑀬𑀫𑁂𑀯 𑀢𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀤𑀺𑀝𑁆𑀞𑀧𑀼𑀩𑁆𑀩𑁄 𑀯𑁄, 𑀪𑀺𑀓𑁆𑀔𑀯𑁂, 𑀭𑀫𑀡𑀻𑀬𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀦𑁄𑀳𑁂𑀢𑀁, 𑀪𑀦𑁆𑀢𑁂’’𑀢𑀺. ‘‘𑀕𑀘𑁆𑀙𑀺𑀲𑁆𑀲𑀣 𑀧𑀦 𑀳𑀺𑀫𑀯𑀦𑁆𑀢𑀘𑀸𑀭𑀺𑀓’’𑀦𑁆𑀢𑀺? ‘‘𑀪𑀦𑁆𑀢𑁂, 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀫𑀬𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀘𑁂 𑀧𑀦 𑀯𑁄 𑀓𑁄𑀘𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸 ¶ 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀕𑀕𑀦𑀢𑀮𑁂 𑀞𑀺𑀢𑁄𑀯 𑀭𑀫𑀡𑀻𑀬𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀓𑀜𑁆𑀘𑀦𑀧𑀩𑁆𑀩𑀢𑀁 𑀭𑀚𑀢𑀧𑀩𑁆𑀩𑀢𑀁 𑀫𑀡𑀺𑀧𑀩𑁆𑀩𑀢𑀁 𑀳𑀺𑀗𑁆𑀕𑀼𑀮𑀺𑀓𑀧𑀩𑁆𑀩𑀢𑀁 𑀅𑀜𑁆𑀚𑀦𑀧𑀩𑁆𑀩𑀢𑀁 𑀲𑀸𑀦𑀼𑀧𑀩𑁆𑀩𑀢𑀁 𑀨𑀮𑀺𑀓𑀧𑀩𑁆𑀩𑀢𑀦𑁆𑀢𑀺 𑀦𑀸𑀦𑀸𑀯𑀺𑀥𑁂 𑀧𑀩𑁆𑀩𑀢𑁂, 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄, 𑀓𑀡𑁆𑀡𑀫𑀼𑀡𑁆𑀟𑀓𑀁 𑀭𑀣𑀓𑀸𑀭𑀁 𑀲𑀻𑀳𑀧𑀧𑀸𑀢𑀁 𑀙𑀤𑁆𑀤𑀦𑁆𑀢𑀁 𑀢𑀺𑀬𑀕𑁆𑀕𑀴𑀁 𑀅𑀦𑁄𑀢𑀢𑁆𑀢𑀁 𑀓𑀼𑀡𑀸𑀮𑀤𑀳𑀦𑁆𑀢𑀺 𑀲𑀢𑁆𑀢 𑀤𑀳𑁂 𑀤𑀲𑁆𑀲𑁂𑀲𑀺. 𑀳𑀺𑀫𑀯𑀦𑁆𑀢𑁄 𑀘 𑀦𑀸𑀫 𑀫𑀳𑀸 𑀧𑀜𑁆𑀘𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁄, 𑀢𑀲𑁆𑀲 𑀇𑀫𑀁 𑀭𑀫𑀡𑀻𑀬𑀁 𑀏𑀓𑀤𑁂𑀲𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀓𑀢𑀦𑀺𑀯𑀸𑀲𑀸𑀦𑀺 𑀲𑀻𑀳𑀩𑁆𑀬𑀕𑁆𑀖𑀳𑀢𑁆𑀣𑀺𑀓𑀼𑀮𑀸𑀤𑀻𑀦𑀺 𑀘𑀢𑀼𑀧𑁆𑀧𑀤𑀸𑀦𑀺𑀧𑀺 𑀏𑀓𑀤𑁂𑀲𑀢𑁄 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀻𑀦𑀺 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑁂 𑀭𑀼𑀓𑁆𑀔𑁂 𑀦𑀸𑀦𑀸𑀯𑀺𑀥𑁂 𑀲𑀓𑀼𑀡𑀲𑀗𑁆𑀖𑁂 𑀚𑀮𑀚𑀣𑀮𑀚𑀧𑀼𑀧𑁆𑀨𑀸𑀦𑀺 𑀳𑀺𑀫𑀯𑀦𑁆𑀢𑀲𑁆𑀲 𑀧𑀼𑀭𑀢𑁆𑀣𑀺𑀫𑀧𑀲𑁆𑀲𑁂 𑀲𑀼𑀯𑀡𑁆𑀡𑀢𑀮𑀁, 𑀧𑀼𑀘𑁆𑀙𑀺𑀫𑀧𑀲𑁆𑀲𑁂 𑀳𑀺𑀗𑁆𑀕𑀼𑀮𑀢𑀮𑀁 𑀤𑀲𑁆𑀲𑁂𑀲𑀺. 𑀇𑀫𑁂𑀲𑀁 𑀭𑀸𑀫𑀡𑁂𑀬𑁆𑀬𑀓𑀸𑀦𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀲𑀼 𑀙𑀦𑁆𑀤𑀭𑀸𑀕𑁄 𑀧𑀳𑀻𑀦𑁄.
𑀅𑀣 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀓𑀸𑀲𑀢𑁄 ¶ 𑀑𑀢𑀭𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀘𑁆𑀙𑀺𑀫𑀧𑀲𑁆𑀲𑁂 𑀲𑀝𑁆𑀞𑀺𑀬𑁄𑀚𑀦𑀺𑀓𑁂 𑀫𑀦𑁄𑀲𑀺𑀮𑀸𑀢𑀮𑁂 𑀲𑀢𑁆𑀢𑀬𑁄𑀚𑀦𑀺𑀓𑀲𑁆𑀲 𑀓𑀧𑁆𑀧𑀝𑁆𑀞𑀺𑀓𑀲𑀸𑀮𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀢𑀺𑀬𑁄𑀚𑀦𑀺𑀓𑀸𑀬 𑀫𑀦𑁄𑀲𑀺𑀮𑀸𑀢𑀮𑀸𑀬 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀡𑁆𑀡𑀯𑀓𑀼𑀘𑁆𑀙𑀺𑀁 𑀔𑁄𑀪𑁂𑀢𑁆𑀯𑀸 𑀚𑀮𑀫𑀸𑀦𑁄 𑀲𑀽𑀭𑀺𑀬𑁄 𑀯𑀺𑀬 𑀦𑀺𑀲𑀻𑀤𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ¶ 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑁂 𑀢𑀼𑀫𑁆𑀳𑁂𑀳𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀧𑀼𑀘𑁆𑀙𑀣𑀸’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑁆𑀯𑁂 𑀘𑀺𑀢𑁆𑀭𑀓𑁄𑀓𑀺𑀮𑀸 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀤𑀡𑁆𑀟𑀓𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀝𑁆𑀞 𑀘𑀺𑀢𑁆𑀭𑀓𑁄𑀓𑀺𑀮𑀸 𑀧𑀼𑀭𑀢𑁄, 𑀅𑀝𑁆𑀞 𑀧𑀘𑁆𑀙𑀢𑁄, 𑀅𑀝𑁆𑀞 𑀯𑀸𑀫𑀢𑁄, 𑀅𑀝𑁆𑀞 𑀤𑀓𑁆𑀔𑀺𑀡𑀢𑁄, 𑀅𑀝𑁆𑀞 𑀳𑁂𑀝𑁆𑀞𑀸, 𑀅𑀝𑁆𑀞 𑀉𑀧𑀭𑀺 𑀙𑀸𑀬𑀁 𑀓𑀢𑁆𑀯𑀸 𑀏𑀯𑀁 𑀘𑀺𑀢𑁆𑀭𑀓𑁄𑀓𑀺𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀘𑁆𑀙𑀦𑁆𑀢𑀺. 𑀅𑀣 𑀢𑁂 𑀪𑀺𑀓𑁆𑀔𑀽 𑀢𑀁 𑀲𑀓𑀼𑀡𑀲𑀗𑁆𑀖𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑁂 𑀦𑀸𑀫𑁂𑀢𑁂, 𑀪𑀦𑁆𑀢𑁂 𑀲𑀓𑀼𑀡𑀸’’𑀢𑀺? ‘‘𑀪𑀺𑀓𑁆𑀔𑀯𑁂, 𑀏𑀲 𑀫𑀫 𑀧𑁄𑀭𑀸𑀡𑀓𑁄 𑀯𑀁𑀲𑁄, 𑀫𑀬𑀸 𑀞𑀧𑀺𑀢𑀸 𑀧𑀯𑁂𑀡𑀻, 𑀫𑀁 𑀢𑀸𑀯 𑀧𑀼𑀩𑁆𑀩𑁂 𑀏𑀯𑀁 𑀧𑀭𑀺𑀘𑀭𑀺𑀁𑀲𑀼, 𑀢𑀤𑀸 𑀧𑀦𑁂𑀲 𑀲𑀓𑀼𑀡𑀕𑀡𑁄 𑀫𑀳𑀸 𑀅𑀳𑁄𑀲𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀤𑀺𑀚𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺 𑀫𑀁 𑀧𑀭𑀺𑀘𑀭𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀇𑀤𑀸𑀦𑀺 𑀏𑀢𑁆𑀢𑀓𑁄 𑀚𑀸𑀢𑁄’’𑀢𑀺. ‘‘𑀓𑀣𑀁 𑀏𑀯𑀭𑀽𑀧𑁂 𑀧𑀦, 𑀪𑀦𑁆𑀢𑁂, 𑀯𑀦𑀲𑀡𑁆𑀟𑁂 𑀏𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀢𑀼𑀫𑁆𑀳𑁂 𑀧𑀭𑀺𑀘𑀭𑀺𑀁𑀲𑀽’’𑀢𑀺? 𑀅𑀣 𑀦𑁂𑀲𑀁 𑀲𑀢𑁆𑀣𑀸 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣𑀸’’𑀢𑀺 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋
‘‘𑀏𑀯𑀫𑀓𑁆𑀔𑀸𑀬𑀢𑀺 𑀏𑀯𑀫𑀦𑀼𑀲𑀽𑀬𑀢𑀺, 𑀲𑀩𑁆𑀩𑁄𑀲𑀥𑀥𑀭𑀡𑀺𑀥𑀭𑁂 𑀦𑁂𑀓𑀧𑀼𑀧𑁆𑀨𑀫𑀸𑀮𑁆𑀬𑀯𑀺𑀢𑀢𑁂 𑀕𑀚𑀕𑀯𑀚𑀫𑀳𑀺𑀁𑀲𑀭𑀼𑀭𑀼𑀘𑀫𑀭𑀧𑀲𑀤𑀔𑀕𑁆𑀕𑀕𑁄𑀓𑀡𑁆𑀡𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀉𑀤𑁆𑀤𑀸𑀭𑀓𑀤𑀮𑀺- 𑀫𑀺𑀕𑀩𑀺𑀴𑀸𑀭𑀲𑀲𑀓𑀡𑁆𑀡𑀺𑀓𑀸𑀦𑀼𑀘𑀭𑀺𑀢𑁂 𑀆𑀓𑀺𑀡𑁆𑀡𑀦𑁂𑀮𑀫𑀡𑁆𑀟𑀮𑀫𑀳𑀸𑀯𑀭𑀸𑀳𑀦𑀸𑀕𑀓𑀼𑀮𑀓𑀭𑁂𑀡𑀼𑀲𑀗𑁆𑀖𑀸𑀥𑀺𑀯𑀼𑀝𑁆𑀞𑁂 𑀇𑀲𑁆𑀲𑀫𑀺𑀕𑀲𑀸𑀔𑀫𑀺𑀕𑀲𑀭𑀪𑀫𑀺𑀕𑀏𑀡𑀻𑀫𑀺𑀕𑀯𑀸𑀢𑀫𑀺𑀕𑀧𑀲𑀤𑀫𑀺𑀕𑀧𑀼𑀭𑀺𑀲𑀸𑀮𑀼𑀓𑀺𑀫𑁆𑀧𑀼𑀭𑀺𑀲𑀬𑀓𑁆𑀔𑀭𑀓𑁆𑀔- 𑀲𑀦𑀺𑀲𑁂𑀯𑀺𑀢𑁂 𑀅𑀫𑀚𑁆𑀚𑀯𑀫𑀜𑁆𑀚𑀭𑀻𑀥𑀭𑀧𑀳𑀝𑁆𑀞𑀧𑀼𑀧𑁆𑀨𑀨𑀼𑀲𑀺𑀢𑀕𑁆𑀕𑀸𑀦𑁂𑀓𑀧𑀸𑀤𑀧𑀕𑀡𑀯𑀺𑀢𑀓𑁂 ¶ 𑀓𑀼𑀭𑀭𑀘𑀓𑁄𑀭𑀯𑀸𑀭𑀡𑀫𑀬𑀽𑀭𑀧𑀭𑀪𑀢𑀚𑀻𑀯𑀜𑁆𑀚𑀻𑀯𑀓𑀘𑁂𑀮𑀸𑀯𑀓𑀪𑀺𑀗𑁆𑀓𑀸𑀭𑀓𑀭𑀯𑀻𑀓𑀫𑀢𑁆𑀢𑀯𑀺𑀳𑀗𑁆𑀕𑀕𑀡𑀲𑀢𑀢𑀲𑀫𑁆𑀧𑀖𑀼𑀝𑁆𑀞𑁂 𑀅𑀜𑁆𑀚𑀦𑀫𑀦𑁄𑀲𑀺𑀮𑀸𑀳𑀭𑀺𑀢𑀸𑀮𑀳𑀺𑀗𑁆𑀕𑀼𑀮𑀓𑀳𑁂𑀫𑀭𑀚𑀢𑀓𑀦𑀓𑀸𑀦𑁂𑀓𑀥𑀸𑀢𑀼- 𑀲𑀢𑀯𑀺𑀦𑀤𑁆𑀥𑀧𑀝𑀺𑀫𑀡𑁆𑀟𑀺𑀢𑀧𑀤𑁂𑀲𑁂 𑀏𑀯𑀭𑀽𑀧𑁂 𑀔𑀮𑀼, 𑀪𑁄, 𑀭𑀫𑁆𑀫𑁂 𑀯𑀦𑀲𑀡𑁆𑀟𑁂 𑀓𑀼𑀡𑀸𑀮𑁄 𑀦𑀸𑀫 𑀲𑀓𑀼𑀡𑁄 𑀧𑀝𑀺𑀯𑀲𑀢𑀺 𑀅𑀢𑀺𑀯𑀺𑀬 ¶ 𑀘𑀺𑀢𑁆𑀢𑁄 𑀅𑀢𑀺𑀯𑀺𑀬 𑀘𑀺𑀢𑁆𑀢𑀧𑀢𑁆𑀢𑀘𑁆𑀙𑀤𑀦𑁄’’.
‘‘𑀢𑀲𑁆𑀲𑁂𑀯 𑀔𑀮𑀼, 𑀪𑁄, 𑀓𑀼𑀡𑀸𑀮𑀲𑁆𑀲 𑀲𑀓𑀼𑀡𑀲𑁆𑀲 𑀅𑀟𑁆𑀠𑀼𑀟𑁆𑀠𑀸𑀦𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀭𑀺𑀘𑀸𑀭𑀺𑀓𑀸 𑀤𑀺𑀚𑀓𑀜𑁆𑀜𑀸𑀬𑁄, 𑀅𑀣 𑀔𑀮𑀼, 𑀪𑁄, 𑀤𑁆𑀯𑁂 𑀤𑀺𑀚𑀓𑀜𑁆𑀜𑀸𑀬𑁄 𑀓𑀝𑁆𑀞𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀫𑀚𑁆𑀛𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀟𑁆𑀟𑁂𑀦𑁆𑀢𑀺𑀫𑀸 𑀦𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀅𑀤𑁆𑀥𑀸𑀦𑀧𑀭𑀺𑀬𑀸𑀬𑀧𑀣𑁂 𑀓𑀺𑀮𑀫𑀣𑁄 𑀉𑀩𑁆𑀩𑀸𑀳𑁂𑀢𑁆𑀣𑀸’’𑀢𑀺.
‘‘𑀧𑀜𑁆𑀘𑀲𑀢𑀸 ¶ 𑀤𑀺𑀚𑀓𑀜𑁆𑀜𑀸𑀬𑁄 𑀳𑁂𑀝𑁆𑀞𑀢𑁄 𑀳𑁂𑀝𑁆𑀞𑀢𑁄 𑀉𑀟𑁆𑀟𑁂𑀦𑁆𑀢𑀺 ‘𑀲𑀘𑀸𑀬𑀁 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀆𑀲𑀦𑀸 𑀧𑀭𑀺𑀧𑀢𑀺𑀲𑁆𑀲𑀢𑀺, 𑀫𑀬𑀁 𑀢𑀁 𑀧𑀓𑁆𑀔𑁂𑀳𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀸’𑀢𑀺.
‘‘𑀧𑀜𑁆𑀘𑀲𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀉𑀧𑀭𑀽𑀧𑀭𑀺 𑀉𑀟𑁆𑀟𑁂𑀦𑁆𑀢𑀺 ‘𑀫𑀸 𑀦𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀆𑀢𑀧𑁄 𑀧𑀭𑀺𑀢𑀸𑀧𑁂𑀲𑀻’𑀢𑀺.
‘‘𑀧𑀜𑁆𑀘𑀲𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀉𑀪𑀢𑁄𑀧𑀲𑁆𑀲𑁂𑀦 𑀉𑀟𑁆𑀟𑁂𑀦𑁆𑀢𑀺 ‘𑀫𑀸 𑀦𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀢𑀺𑀡𑀁 𑀯𑀸 𑀭𑀚𑁄 𑀯𑀸 𑀯𑀸𑀢𑁄 𑀯𑀸 𑀉𑀲𑁆𑀲𑀸𑀯𑁄 𑀯𑀸 𑀉𑀧𑀧𑁆𑀨𑀼𑀲𑀻’𑀢𑀺.
‘‘𑀧𑀜𑁆𑀘𑀲𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀧𑀼𑀭𑀢𑁄 𑀧𑀼𑀭𑀢𑁄 𑀉𑀟𑁆𑀟𑁂𑀦𑁆𑀢𑀺 ‘𑀫𑀸 𑀦𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀕𑁄𑀧𑀸𑀮𑀓𑀸 𑀯𑀸 𑀧𑀲𑀼𑀧𑀸𑀮𑀓𑀸 𑀯𑀸 𑀢𑀺𑀡𑀳𑀸𑀭𑀓𑀸 𑀯𑀸 𑀓𑀝𑁆𑀞𑀳𑀸𑀭𑀓𑀸 𑀯𑀸 𑀯𑀦𑀓𑀫𑁆𑀫𑀺𑀓𑀸 𑀯𑀸 𑀓𑀝𑁆𑀞𑁂𑀦 𑀯𑀸 𑀓𑀞𑀮𑁂𑀦 𑀯𑀸 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀲𑀓𑁆𑀔𑀭𑀸𑀳𑀺 𑀯𑀸 𑀧𑀳𑀸𑀭𑀁 𑀅𑀤𑀁𑀲𑀼, 𑀫𑀸𑀬𑀁 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀕𑀘𑁆𑀙𑁂𑀳𑀺 𑀯𑀸 𑀮𑀢𑀸𑀳𑀺 𑀯𑀸 𑀭𑀼𑀓𑁆𑀔𑁂𑀳𑀺 𑀯𑀸 𑀲𑀸𑀔𑀸𑀳𑀺 𑀯𑀸 𑀣𑀫𑁆𑀪𑁂𑀳𑀺 𑀯𑀸 𑀧𑀸𑀲𑀸𑀡𑁂𑀳𑀺 𑀯𑀸 𑀩𑀮𑀯𑀦𑁆𑀢𑁂𑀳𑀺 𑀯𑀸 𑀧𑀓𑁆𑀔𑀻𑀳𑀺 𑀲𑀗𑁆𑀕𑀫𑁂𑀲𑀻’𑀢𑀺.
‘‘𑀧𑀜𑁆𑀘𑀲𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀉𑀟𑁆𑀟𑁂𑀦𑁆𑀢𑀺 𑀲𑀡𑁆𑀳𑀸𑀳𑀺 𑀲𑀔𑀺𑀮𑀸𑀳𑀺 𑀫𑀜𑁆𑀚𑀽𑀳𑀺 𑀫𑀥𑀼𑀭𑀸𑀳𑀺 𑀯𑀸𑀘𑀸𑀳𑀺 𑀲𑀫𑀼𑀤𑀸𑀘𑀭𑀦𑁆𑀢𑀺𑀬𑁄 ‘𑀫𑀸𑀬𑀁 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀆𑀲𑀦𑁂 𑀧𑀭𑀺𑀬𑀼𑀓𑁆𑀓𑀡𑁆𑀞𑀻’𑀢𑀺.
‘‘𑀧𑀜𑁆𑀘𑀲𑀢𑀸 ¶ 𑀤𑀺𑀚𑀓𑀜𑁆𑀜𑀸𑀬𑁄 𑀤𑀺𑀲𑁄𑀤𑀺𑀲𑀁 𑀉𑀟𑁆𑀟𑁂𑀦𑁆𑀢𑀺 𑀅𑀦𑁂𑀓𑀭𑀼𑀓𑁆𑀔𑀯𑀺𑀯𑀺𑀥𑀯𑀺𑀓𑀢𑀺𑀨𑀮𑀫𑀸𑀳𑀭𑀦𑁆𑀢𑀺𑀬𑁄 ‘𑀫𑀸𑀬𑀁 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀔𑀼𑀤𑀸𑀬 𑀧𑀭𑀺𑀓𑀺𑀮𑀫𑀺𑀢𑁆𑀣𑀸’𑀢𑀺.
‘‘𑀅𑀣 𑀔𑀮𑀼, 𑀪𑁄, 𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀢𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀆𑀭𑀸𑀫𑁂𑀦𑁂𑀯 𑀆𑀭𑀸𑀫𑀁, 𑀉𑀬𑁆𑀬𑀸𑀦𑁂𑀦𑁂𑀯 𑀉𑀬𑁆𑀬𑀸𑀦𑀁, 𑀦𑀤𑀻𑀢𑀺𑀢𑁆𑀣𑁂𑀦𑁂𑀯 𑀦𑀤𑀻𑀢𑀺𑀢𑁆𑀣𑀁, 𑀧𑀩𑁆𑀩𑀢𑀲𑀺𑀔𑀭𑁂𑀦𑁂𑀯 𑀧𑀩𑁆𑀩𑀢𑀲𑀺𑀔𑀭𑀁, 𑀅𑀫𑁆𑀩𑀯𑀦𑁂𑀦𑁂𑀯 𑀅𑀫𑁆𑀩𑀯𑀦𑀁, 𑀚𑀫𑁆𑀩𑀼𑀯𑀦𑁂𑀦𑁂𑀯 𑀚𑀫𑁆𑀩𑀼𑀯𑀦𑀁, 𑀮𑀩𑀼𑀚𑀯𑀦𑁂𑀦𑁂𑀯 𑀮𑀩𑀼𑀚𑀯𑀦𑀁, 𑀦𑀸𑀴𑀺𑀓𑁂𑀭𑀲𑀜𑁆𑀘𑀸𑀭𑀺𑀬𑁂𑀦𑁂𑀯 𑀦𑀸𑀴𑀺𑀓𑁂𑀭𑀲𑀜𑁆𑀘𑀸𑀭𑀺𑀬𑀁 𑀔𑀺𑀧𑁆𑀧𑀫𑁂𑀯 𑀅𑀪𑀺𑀲𑀫𑁆𑀪𑁄𑀦𑁆𑀢𑀺 𑀭𑀢𑀺𑀢𑁆𑀣𑀸𑀬.
‘‘𑀅𑀣 ¶ 𑀔𑀮𑀼, 𑀪𑁄, 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑀸𑀳𑀺 𑀤𑀺𑀚𑀓𑀜𑁆𑀜𑀸𑀳𑀺 𑀤𑀺𑀯𑀲𑀁 𑀧𑀭𑀺𑀩𑁆𑀬𑀽𑀴𑁆𑀳𑁄 𑀏𑀯𑀁 𑀅𑀧𑀲𑀸𑀤𑁂𑀢𑀺 ¶ ‘𑀦𑀲𑁆𑀲𑀣 𑀢𑀼𑀫𑁆𑀳𑁂 𑀯𑀲𑀮𑀺𑀬𑁄, 𑀯𑀺𑀦𑀲𑁆𑀲𑀣 𑀢𑀼𑀫𑁆𑀳𑁂 𑀯𑀲𑀺𑀮𑀺𑀬𑁄 𑀘𑁄𑀭𑀺𑀬𑁄 𑀥𑀼𑀢𑁆𑀢𑀺𑀬𑁄 𑀅𑀲𑀢𑀺𑀬𑁄 𑀮𑀳𑀼𑀘𑀺𑀢𑁆𑀢𑀸𑀬𑁄 𑀓𑀢𑀲𑁆𑀲 𑀅𑀧𑁆𑀧𑀝𑀺𑀓𑀸𑀭𑀺𑀓𑀸𑀬𑁄 𑀅𑀦𑀺𑀮𑁄 𑀯𑀺𑀬 𑀬𑁂𑀦𑀓𑀸𑀫𑀁𑀕𑀫𑀸𑀬𑁄’’’ 𑀢𑀺.
𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀪𑀺𑀓𑁆𑀔𑀯𑁂, 𑀲𑁄 𑀯𑀦𑀲𑀡𑁆𑀟𑁄 𑀏𑀯𑀁 𑀅𑀓𑁆𑀔𑀸𑀬𑀢𑀺 𑀏𑀯𑀜𑁆𑀘 𑀅𑀦𑀼𑀲𑀽𑀬𑀢𑀺. 𑀓𑀺𑀦𑁆𑀢𑀺? 𑀲𑀩𑁆𑀩𑁄𑀲𑀥𑀥𑀭𑀡𑀺𑀥𑀭𑁂𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀢𑁆𑀣 𑀲𑀩𑁆𑀩𑁄𑀲𑀥𑀥𑀭𑀡𑀺𑀥𑀭𑁂𑀢𑀺 𑀫𑀽𑀮𑀢𑀘𑀧𑀢𑁆𑀢𑀧𑀼𑀧𑁆𑀨𑀸𑀤𑀺𑀲𑀩𑁆𑀩𑁄𑀲𑀥𑀥𑀭𑀸𑀬 𑀥𑀭𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁂𑀢𑀺 𑀅𑀢𑁆𑀣𑁄, 𑀲𑀩𑁆𑀩𑁄𑀲𑀥𑀬𑀼𑀢𑁆𑀢𑁄 𑀯𑀸 𑀥𑀭𑀡𑀺𑀥𑀭𑁄. 𑀲𑁄 𑀳𑀺 𑀧𑀤𑁂𑀲𑁄 𑀲𑀩𑁆𑀩𑁄𑀲𑀥𑀥𑀭𑀡𑀺𑀥𑀭𑁄𑀢𑀺 𑀏𑀯𑀫𑀓𑁆𑀔𑀸𑀬𑀢𑀺 𑀏𑀯𑀜𑁆𑀘 𑀅𑀦𑀼𑀲𑀽𑀬𑀢𑀺, 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀧𑀤𑀬𑁄𑀚𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀦𑁂𑀓𑀧𑀼𑀧𑁆𑀨𑀫𑀸𑀮𑁆𑀬𑀯𑀺𑀢𑀢𑁂𑀢𑀺 𑀅𑀦𑁂𑀓𑁂𑀳𑀺 𑀨𑀮𑀢𑁆𑀣𑀸𑀬 𑀉𑀧𑁆𑀧𑀦𑁆𑀦𑀧𑀼𑀧𑁆𑀨𑁂𑀳𑀺 𑀘𑁂𑀯 𑀧𑀺𑀴𑀦𑁆𑀥𑀦𑀫𑀸𑀮𑁆𑀬𑁂𑀳𑀺 𑀘 𑀯𑀺𑀢𑀢𑁂. 𑀭𑀼𑀭𑀽𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀸 𑀫𑀺𑀕𑀸. 𑀉𑀤𑁆𑀤𑀸𑀭𑀸𑀢𑀺 𑀉𑀤𑁆𑀤𑀸. 𑀩𑀺𑀴𑀸𑀭𑀸𑀢𑀺 𑀫𑀳𑀸𑀩𑀺𑀴𑀸𑀭𑀸. 𑀦𑁂𑀮𑀫𑀡𑁆𑀟𑀮𑀁 𑀯𑀼𑀘𑁆𑀘𑀢𑀺 𑀢𑀭𑀼𑀡𑀪𑀺𑀗𑁆𑀓𑀘𑁆𑀙𑀸𑀧𑀫𑀡𑁆𑀟𑀮𑀁. 𑀫𑀳𑀸𑀯𑀭𑀸𑀳𑀸𑀢𑀺 𑀫𑀳𑀸𑀳𑀢𑁆𑀣𑀺𑀦𑁄, 𑀆𑀓𑀺𑀡𑁆𑀡𑀦𑁂𑀮𑀫𑀡𑁆𑀟𑀮𑀫𑀳𑀸𑀯𑀭𑀸𑀳𑁂𑀦 𑀕𑁄𑀘𑀭𑀺𑀬𑀸𑀤𑀺𑀪𑁂𑀤𑁂𑀦 𑀤𑀲𑀯𑀺𑀥𑁂𑀦 𑀦𑀸𑀕𑀓𑀼𑀮𑁂𑀦 𑀘𑁂𑀯 𑀓𑀭𑁂𑀡𑀼𑀲𑀗𑁆𑀖𑁂𑀦 𑀘 𑀅𑀥𑀺𑀯𑀼𑀝𑁆𑀞𑁂𑀢𑀺 𑀅𑀢𑁆𑀣𑁄. 𑀇𑀲𑁆𑀲𑀫𑀺𑀕𑀸𑀢𑀺 𑀓𑀸𑀴𑀲𑀻𑀳𑀸. 𑀯𑀸𑀢𑀫𑀺𑀕𑀸𑀢𑀺 𑀫𑀳𑀸𑀯𑀸𑀢𑀫𑀺𑀕𑀸. 𑀧𑀲𑀤𑀫𑀺𑀕𑀸𑀢𑀺 𑀘𑀺𑀢𑁆𑀭𑀫𑀺𑀕𑀸. 𑀧𑀼𑀭𑀺𑀲𑀸𑀮𑀽𑀢𑀺 𑀯𑀴𑀯𑀸𑀫𑀼𑀔𑀬𑀓𑁆𑀔𑀺𑀦𑀺𑀬𑁄. 𑀓𑀺𑀫𑁆𑀧𑀼𑀭𑀺𑀲𑀸𑀢𑀺 𑀤𑁂𑀯𑀓𑀺𑀦𑁆𑀦𑀭𑀘𑀦𑁆𑀤𑀓𑀺𑀦𑁆𑀦𑀭𑀤𑀼𑀫𑀓𑀺𑀦𑁆𑀦𑀭𑀤𑀡𑁆𑀟𑀫𑀸𑀡𑀯𑀓𑀓𑁄𑀦𑁆𑀢𑀺- 𑀲𑀓𑀼𑀡𑀓𑀡𑁆𑀡𑀧𑀸𑀯𑀼𑀭𑀡𑀸𑀤𑀺𑀪𑁂𑀤𑀸 𑀓𑀺𑀦𑁆𑀦𑀭𑀸. 𑀅𑀫𑀚𑁆𑀚𑀯𑀫𑀜𑁆𑀚𑀭𑀻𑀥𑀭𑀧𑀳𑀝𑁆𑀞𑀧𑀼𑀧𑁆𑀨𑀨𑀼𑀲𑀺𑀢𑀕𑁆𑀕𑀸𑀦𑁂𑀓𑀧𑀸𑀤𑀧𑀕𑀡𑀯𑀺𑀢𑀢𑁂𑀢𑀺 𑀫𑀓𑀼𑀮𑀥𑀭𑁂𑀳𑀺 𑀘𑁂𑀯 𑀫𑀜𑁆𑀚𑀭𑀻𑀥𑀭𑁂𑀳𑀺 𑀘 𑀲𑀼𑀧𑀼𑀧𑁆𑀨𑀺𑀢𑁂𑀳𑀺 𑀘 𑀅𑀕𑁆𑀕𑀫𑀢𑁆𑀢𑀧𑀼𑀧𑁆𑀨𑀺𑀢𑁂𑀳𑀺 𑀘 𑀅𑀦𑁂𑀓𑁂𑀳𑀺 𑀧𑀸𑀤𑀧𑀕𑀡𑁂𑀳𑀺 𑀯𑀺𑀢𑀢𑁂. 𑀯𑀸𑀭𑀡𑀸 𑀦𑀸𑀫 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑀸. 𑀘𑁂𑀮𑀸𑀯𑀓𑀸𑀢𑀺𑀧𑀺 𑀏𑀢𑁂 𑀲𑀓𑀼𑀡𑀸𑀬𑁂𑀯. 𑀳𑁂𑀫𑀜𑁆𑀘 𑀓𑀦𑀓𑀜𑁆𑀘𑀸𑀢𑀺 𑀤𑁆𑀯𑁂 𑀲𑀼𑀯𑀡𑁆𑀡𑀚𑀸𑀢𑀺𑀬𑁄. 𑀏𑀢𑁂𑀳𑀺 𑀅𑀜𑁆𑀚𑀦𑀸𑀤𑀻𑀳𑀺 𑀅𑀦𑁂𑀓𑀥𑀸𑀢𑀼𑀲𑀢𑁂𑀳𑀺 𑀅𑀦𑁂𑀓𑁂𑀳𑀺 𑀯𑀡𑁆𑀡𑀥𑀸𑀢𑀼𑀭𑀸𑀲𑀻𑀳𑀺 𑀯𑀺𑀦𑀤𑁆𑀥𑀧𑀝𑀺𑀫𑀡𑁆𑀟𑀺𑀢𑀧𑀤𑁂𑀲𑁂. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀫𑀢𑁆𑀢𑀫𑁂𑀢𑀁. 𑀘𑀺𑀢𑁆𑀢𑁄𑀢𑀺 𑀫𑀼𑀔𑀢𑀼𑀡𑁆𑀟𑀓𑁂𑀧𑀺 𑀳𑁂𑀝𑁆𑀞𑀸𑀉𑀤𑀭𑀪𑀸𑀕𑁂𑀧𑀺 𑀘𑀺𑀢𑁆𑀭𑁄𑀯.
𑀅𑀟𑁆𑀠𑀼𑀟𑁆𑀠𑀸𑀦𑀻𑀢𑀺 ¶ 𑀅𑀟𑁆𑀠𑀘𑀢𑀼𑀢𑁆𑀣𑀸𑀦𑀺, 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀧𑀜𑁆𑀘𑁂𑀯 𑀲𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀤𑁆𑀥𑀸𑀦𑀧𑀭𑀺𑀬𑀸𑀬𑀧𑀣𑁂𑀢𑀺 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀕𑀫𑀦𑀫𑀕𑁆𑀕𑁂. 𑀉𑀩𑁆𑀩𑀸𑀳𑁂𑀢𑁆𑀣𑀸𑀢𑀺 ¶ 𑀩𑀸𑀥𑀬𑀺𑀢𑁆𑀣. 𑀉𑀧𑀧𑁆𑀨𑀼𑀲𑀻𑀢𑀺 𑀉𑀧𑀕𑀦𑁆𑀢𑁆𑀯𑀸 𑀨𑀼𑀲𑀺. 𑀧𑀳𑀸𑀭𑀁 𑀅𑀤𑀁𑀲𑀽𑀢𑀺 𑀏𑀢𑁆𑀣 ‘‘𑀫𑀸 𑀦’’𑀦𑁆𑀢𑀺 𑀧𑀤𑀲𑁆𑀲 𑀲𑀸𑀫𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀕𑀫𑁂𑀲𑀻𑀢𑀺 𑀲𑀫𑀸𑀕𑀘𑁆𑀙𑀺. 𑀲𑀡𑁆𑀳𑀸𑀳𑀻𑀢𑀺 𑀫𑀝𑁆𑀞𑀸𑀳𑀺. 𑀲𑀔𑀺𑀮𑀸𑀳𑀻𑀢𑀺 𑀧𑀺𑀬𑀸𑀳𑀺. 𑀫𑀜𑁆𑀚𑀽𑀳𑀻𑀢𑀺 𑀲𑀔𑀺𑀮𑀸𑀳𑀺. 𑀫𑀥𑀼𑀭𑀸𑀳𑀻𑀢𑀺 𑀫𑀥𑀼𑀭𑀲𑁆𑀲𑀭𑀸𑀳𑀺. 𑀲𑀫𑀼𑀤𑀸𑀘𑀭𑀦𑁆𑀢𑀺𑀬𑁄𑀢𑀺 𑀕𑀦𑁆𑀥𑀩𑁆𑀩𑀓𑀭𑀡𑀯𑀲𑁂𑀦 𑀧𑀭𑀺𑀘𑀭𑀦𑁆𑀢𑀺𑀬𑁄. 𑀅𑀦𑁂𑀓𑀭𑀼𑀓𑁆𑀔𑀯𑀺𑀯𑀺𑀥𑀯𑀺𑀓𑀢𑀺𑀨𑀮𑀦𑁆𑀢𑀺 𑀅𑀦𑁂𑀓𑁂𑀳𑀺 𑀭𑀼𑀓𑁆𑀔𑁂𑀳𑀺 𑀯𑀺𑀯𑀺𑀥𑀯𑀺𑀓𑀢𑀺𑀨𑀮𑀁. 𑀆𑀭𑀸𑀫𑁂𑀦𑁂𑀯 𑀆𑀭𑀸𑀫𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀆𑀭𑀸𑀫𑁂𑀦𑁂𑀯 𑀅𑀜𑁆𑀜𑀢𑀭𑀁 𑀆𑀭𑀸𑀫𑀁 𑀦𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀬𑁆𑀬𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀸𑀴𑀺𑀓𑁂𑀭𑀲𑀜𑁆𑀘𑀸𑀭𑀺𑀬𑁂𑀦𑁂𑀯𑀸𑀢𑀺 𑀦𑀸𑀴𑀺𑀓𑁂𑀭𑀯𑀦𑁂𑀦𑁂𑀯 𑀅𑀜𑁆𑀜𑀁 𑀦𑀸𑀴𑀺𑀓𑁂𑀭𑀯𑀦𑀁. 𑀅𑀢𑀺𑀲𑀫𑁆𑀪𑁄𑀦𑁆𑀢𑀻𑀢𑀺 𑀏𑀯𑀁 𑀦𑁂𑀢𑁆𑀯𑀸 𑀢𑀢𑁆𑀣 𑀦𑀁 𑀔𑀺𑀧𑁆𑀧𑀜𑁆𑀜𑁂𑀯 ¶ 𑀭𑀢𑀺𑀢𑁆𑀣𑀸𑀬 𑀧𑀸𑀧𑀼𑀡𑀦𑁆𑀢𑀺.
𑀤𑀺𑀯𑀲𑀁 𑀧𑀭𑀺𑀩𑁆𑀬𑀽𑀴𑁆𑀳𑁄𑀢𑀺 𑀲𑀓𑀮𑀤𑀺𑀯𑀲𑀁 𑀧𑀭𑀺𑀩𑁆𑀬𑀽𑀴𑁆𑀳𑁄. 𑀅𑀧𑀲𑀸𑀤𑁂𑀢𑀻𑀢𑀺 𑀢𑀸 𑀓𑀺𑀭 𑀢𑀁 𑀏𑀯𑀁 𑀤𑀺𑀯𑀲𑀁 𑀧𑀭𑀺𑀘𑀭𑀺𑀢𑁆𑀯𑀸 𑀦𑀺𑀯𑀸𑀲𑀭𑀼𑀓𑁆𑀔𑁂 𑀑𑀢𑀸𑀭𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀼𑀓𑁆𑀔𑀲𑀸𑀔𑀸𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀧𑁆𑀧𑁂𑀯 𑀦𑀸𑀫 𑀫𑀥𑀼𑀭𑀯𑀘𑀦𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀬𑀦𑁆𑀢𑀺𑀬𑁄 𑀇𑀫𑀺𑀦𑀸 𑀉𑀬𑁆𑀬𑁄𑀚𑀺𑀢𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀯𑀲𑀦𑁆𑀢𑀺. 𑀓𑀼𑀡𑀸𑀮𑀭𑀸𑀚𑀸 𑀧𑀦 𑀢𑀸 𑀉𑀬𑁆𑀬𑁄𑀚𑁂𑀦𑁆𑀢𑁄 ‘‘𑀦𑀲𑁆𑀲𑀣𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀅𑀧𑀲𑀸𑀤𑁂𑀢𑀺. 𑀢𑀢𑁆𑀣 𑀦𑀲𑁆𑀲𑀣𑀸𑀢𑀺 𑀕𑀘𑁆𑀙𑀣. 𑀯𑀺𑀦𑀲𑁆𑀲𑀣𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀦𑀲𑁆𑀲𑀣. 𑀕𑁂𑀳𑁂 𑀥𑀦𑀥𑀜𑁆𑀜𑀸𑀤𑀻𑀦𑀁 𑀦𑀸𑀲𑀦𑁂𑀦 𑀘𑁄𑀭𑀺𑀬𑁄, 𑀩𑀳𑀼𑀫𑀸𑀬𑀢𑀸𑀬 𑀥𑀼𑀢𑁆𑀢𑀺𑀬𑁄, 𑀦𑀝𑁆𑀞𑀲𑁆𑀲𑀢𑀺𑀢𑀸𑀬 𑀅𑀲𑀢𑀺𑀬𑁄, 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀮𑀳𑀼𑀘𑀺𑀢𑁆𑀢𑀸𑀬𑁄, 𑀓𑀢𑀯𑀺𑀦𑀸𑀲𑀦𑁂𑀦 𑀫𑀺𑀢𑁆𑀢𑀤𑀼𑀩𑁆𑀪𑀺𑀢𑀸𑀬 𑀓𑀢𑀲𑁆𑀲 𑀅𑀧𑁆𑀧𑀝𑀺𑀓𑀸𑀭𑀺𑀓𑀸𑀬𑁄𑀢𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀳𑀁 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀇𑀢𑁆𑀣𑀻𑀦𑀁 𑀅𑀓𑀢𑀜𑁆𑀜𑀼𑀢𑀁 𑀩𑀳𑀼𑀫𑀸𑀬𑀢𑀁 𑀅𑀦𑀸𑀘𑀸𑀭𑀢𑀁 𑀤𑀼𑀲𑁆𑀲𑀻𑀮𑀢𑀜𑁆𑀘 𑀚𑀸𑀦𑀸𑀫𑀺, 𑀢𑀤𑀸𑀧𑀸𑀳𑀁 𑀢𑀸𑀲𑀁 𑀯𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀢𑀸 𑀏𑀯 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀫𑀻’’𑀢𑀺 𑀇𑀫𑀸𑀬 𑀓𑀣𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀪𑀺𑀭𑀢𑀺𑀁 𑀳𑀭𑀺𑀢𑁆𑀯𑀸 𑀲𑀢𑁆𑀣𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑁆𑀯𑁂 𑀓𑀸𑀴𑀓𑁄𑀓𑀺𑀮𑀸 𑀲𑀸𑀫𑀺𑀓𑀁 𑀤𑀡𑁆𑀟𑀓𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸𑀪𑀸𑀕𑀸𑀤𑀻𑀲𑀼 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀳𑀼𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀆𑀕𑀫𑀺𑀁𑀲𑀼. 𑀢𑁂 𑀪𑀺𑀓𑁆𑀔𑀽 𑀢𑀸𑀧𑀺 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂, 𑀪𑀺𑀓𑁆𑀔𑀯𑁂, 𑀫𑀫 𑀲𑀳𑀸𑀬𑁄 𑀧𑀼𑀡𑁆𑀡𑀫𑀼𑀔𑁄 𑀦𑀸𑀫 𑀨𑀼𑀲𑁆𑀲𑀓𑁄𑀓𑀺𑀮𑁄 𑀅𑀳𑁄𑀲𑀺, 𑀢𑀲𑁆𑀲𑀸𑀬𑀁 𑀯𑀁𑀲𑁄’’𑀢𑀺 𑀯𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀼𑀘𑁆𑀙𑀺𑀢𑁄 𑀆𑀳 𑁋
‘‘𑀢𑀲𑁆𑀲𑁂𑀯 ¶ 𑀔𑀮𑀼, 𑀪𑁄, 𑀳𑀺𑀫𑀯𑀢𑁄 𑀧𑀩𑁆𑀩𑀢𑀭𑀸𑀚𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀲𑀼𑀲𑀼𑀔𑀼𑀫𑀲𑀼𑀦𑀺𑀧𑀼𑀡𑀕𑀺𑀭𑀺𑀧𑁆𑀧𑀪𑀯𑀳𑀭𑀺𑀢𑀼𑀧𑀬𑀦𑁆𑀢𑀺𑀬𑁄’’𑀢𑀺.
𑀢𑀢𑁆𑀣 𑀲𑀼𑀝𑁆𑀞𑀼 𑀲𑀼𑀔𑀼𑀫𑀲𑀡𑁆𑀳𑀲𑀮𑀺𑀮𑀢𑀸𑀬 𑀲𑀼𑀲𑀼𑀔𑀼𑀫𑀲𑀼𑀦𑀺𑀧𑀼𑀡𑀸, 𑀕𑀺𑀭𑀺 𑀏𑀢𑀸𑀲𑀁 𑀧𑀪𑀯𑁄𑀢𑀺 𑀕𑀺𑀭𑀺𑀧𑁆𑀧𑀪𑀯𑀸 ¶ , 𑀳𑀺𑀫𑀯𑀦𑁆𑀢𑀢𑁄 𑀲𑀦𑁆𑀤𑀫𑀸𑀦𑀳𑀭𑀺𑀢𑀢𑀺𑀡𑀫𑀺𑀲𑁆𑀲𑀑𑀖𑀢𑀸𑀬 𑀳𑀭𑀺𑀢𑀸, 𑀓𑀼𑀡𑀸𑀮𑀤𑀳𑀁 𑀉𑀧𑀕𑀫𑀦𑁂𑀦 𑀉𑀧𑀬𑀦𑁆𑀢𑀺𑀬𑁄𑀢𑀺 𑀲𑀼𑀲𑀼𑀔𑀼𑀫𑀲𑀼𑀦𑀺𑀧𑀼𑀡𑀕𑀺𑀭𑀺𑀧𑁆𑀧𑀪𑀯𑀳𑀭𑀺𑀢𑀼𑀧𑀬𑀦𑁆𑀢𑀺𑀬𑁄, 𑀏𑀯𑀭𑀽𑀧𑀸 𑀦𑀤𑀺𑀬𑁄 𑀬𑀲𑁆𑀫𑀺𑀁 𑀲𑀦𑁆𑀤𑀦𑁆𑀢𑀻𑀢𑀺 𑀅𑀢𑁆𑀣𑁄.
𑀇𑀤𑀸𑀦𑀺 𑀬𑀁 𑀓𑀼𑀡𑀸𑀮𑀤𑀳𑀁 𑀢𑀸 𑀉𑀧𑀬𑀦𑁆𑀢𑀺, 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋
‘‘𑀉𑀧𑁆𑀧𑀮𑀧𑀤𑀼𑀫𑀓𑀼𑀫𑀼𑀤𑀦𑀮𑀺𑀦𑀲𑀢𑀧𑀢𑁆𑀢𑀲𑁄𑀕𑀦𑁆𑀥𑀺𑀓𑀫𑀦𑁆𑀤𑀸𑀮𑀓𑀲𑀫𑁆𑀧𑀢𑀺𑀯𑀺𑀭𑀼𑀴𑁆𑀳𑀲𑀼𑀘𑀺𑀕𑀦𑁆𑀥𑀫𑀦𑀼𑀜𑁆𑀜𑀫𑀸𑀯𑀓𑀧𑁆𑀧𑀤𑁂𑀲𑁂’’𑀢𑀺.
𑀢𑀢𑁆𑀣 𑀉𑀧𑁆𑀧𑀮𑀦𑁆𑀢𑀺 𑀦𑀻𑀮𑀼𑀧𑁆𑀧𑀮𑀁. 𑀦𑀮𑀺𑀦𑀦𑁆𑀢𑀺 𑀲𑁂𑀢𑀧𑀤𑀼𑀫𑀁. 𑀲𑀢𑀧𑀢𑁆𑀢𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀲𑀢𑀧𑀢𑁆𑀢𑀧𑀤𑀼𑀫𑀁. 𑀲𑀫𑁆𑀧𑀢𑀻𑀢𑀺 𑀏𑀢𑁂𑀳𑀺 𑀲𑀫𑁆𑀧𑀢𑀺𑀯𑀺𑀭𑀼𑀴𑁆𑀳𑁂𑀳𑀺 𑀅𑀪𑀺𑀦𑀯𑀚𑀸𑀢𑁂𑀳𑀺 𑀲𑀼𑀘𑀺𑀕𑀦𑁆𑀥𑁂𑀦 𑀘𑁂𑀯 𑀫𑀦𑀼𑀜𑁆𑀜𑁂𑀦 𑀘 𑀳𑀤𑀬𑀩𑀦𑁆𑀥𑀦𑀲𑀫𑀢𑁆𑀣𑀢𑀸𑀬 𑀫𑀸𑀯𑀓𑁂𑀦 𑀘 𑀧𑀤𑁂𑀲𑁂𑀦 𑀲𑀫𑀦𑁆𑀦𑀸𑀕𑀢𑁂𑀢𑀺 𑀅𑀢𑁆𑀣𑁄.
𑀇𑀤𑀸𑀦𑀺 𑀢𑀲𑁆𑀫𑀺𑀁 𑀤𑀳𑁂 𑀭𑀼𑀓𑁆𑀔𑀸𑀤𑀬𑁄 𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋
‘‘𑀓𑀼𑀭𑀯𑀓𑀫𑀼𑀘𑀮𑀺𑀦𑁆𑀤𑀓𑁂𑀢𑀓𑀯𑁂𑀤𑀺𑀲𑀯𑀜𑁆𑀚𑀼𑀮𑀧𑀼𑀦𑁆𑀦𑀸𑀕𑀩𑀓𑀼𑀮𑀢𑀺𑀮𑀓𑀧𑀺𑀬𑀓𑀳𑀲𑀦𑀲𑀸𑀮𑀲𑀴𑀮- 𑀘𑀫𑁆𑀧𑀓𑀅𑀲𑁄𑀓𑀦𑀸𑀕𑀭𑀼𑀓𑁆𑀔𑀢𑀺𑀭𑀻𑀝𑀺𑀪𑀼𑀚𑀧𑀢𑁆𑀢𑀮𑁄𑀤𑁆𑀤𑀘𑀦𑁆𑀤𑀦𑁄𑀖𑀯𑀦𑁂 ¶ 𑀓𑀸𑀴𑀸𑀕𑀭𑀼𑀧𑀤𑁆𑀫𑀓𑀧𑀺𑀬𑀗𑁆𑀕𑀼𑀤𑁂𑀯𑀤𑀸𑀭𑀼𑀓𑀘𑁄𑀘𑀕𑀳𑀦𑁂 𑀓𑀓𑀼𑀥𑀓𑀼𑀝𑀚𑀅𑀗𑁆𑀓𑁄𑀮𑀓𑀘𑁆𑀘𑀺𑀓𑀸𑀭𑀓𑀡𑀺𑀓𑀸𑀭𑀓𑀡𑁆𑀡𑀺𑀓𑀸𑀭- 𑀓𑀦𑀯𑁂𑀭𑀓𑁄𑀭𑀡𑁆𑀟𑀓𑀓𑁄𑀯𑀺𑀴𑀸𑀭𑀓𑀺𑀁𑀲𑀼𑀓𑀬𑁄𑀥𑀺𑀓𑀯𑀦𑀫𑀮𑁆𑀮𑀺𑀓𑀫𑀦𑀗𑁆𑀕𑀡𑀫𑀦𑀯𑀚𑁆𑀚𑀪𑀡𑁆𑀟𑀺𑀲𑀼𑀭𑀼𑀘𑀺𑀭- 𑀪𑀕𑀺𑀦𑀺𑀫𑀸𑀮𑀸𑀫𑀮𑁆𑀬𑀥𑀭𑁂 𑀚𑀸𑀢𑀺𑀲𑀼𑀫𑀦𑀫𑀥𑀼𑀕𑀦𑁆𑀥𑀺𑀓𑀥𑀦𑀼𑀢𑀓𑁆𑀓𑀸𑀭𑀺𑀢𑀸𑀮𑀻𑀲𑀢𑀕𑀭𑀫𑀼𑀲𑀻𑀭𑀓𑁄𑀝𑁆𑀞𑀓𑀘𑁆𑀙𑀯𑀺𑀢𑀢𑁂 𑀅𑀢𑀺𑀫𑀼𑀢𑁆𑀢𑀓𑀲𑀁𑀓𑀼𑀲𑀼𑀫𑀺𑀢𑀮𑀢𑀸𑀯𑀺𑀢𑀢𑀧𑀝𑀺𑀫𑀡𑁆𑀟𑀺𑀢𑀧𑁆𑀧𑀤𑁂𑀲𑁂 𑀳𑀁𑀲𑀧𑀺𑀮𑀯𑀓𑀸𑀤𑀫𑁆𑀩𑀓𑀸𑀭𑀡𑁆𑀟𑀯𑀸𑀪𑀺𑀦𑀤𑀺𑀢𑁂 𑀯𑀺𑀚𑁆𑀚𑀸𑀥𑀭𑀲𑀺𑀤𑁆𑀥𑀲𑀫𑀡𑀢𑀸𑀧𑀲𑀕𑀡𑀸𑀥𑀺𑀯𑀼𑀝𑁆𑀞𑁂 𑀯𑀭𑀤𑁂𑀯𑀬𑀓𑁆𑀔𑀭𑀓𑁆𑀔𑀲𑀤𑀸𑀦𑀯𑀕𑀦𑁆𑀥𑀩𑁆𑀩𑀓𑀺𑀦𑁆𑀦𑀭𑀫𑀳𑁄𑀭𑀕𑀸𑀦𑀼𑀘𑀺𑀡𑁆𑀡𑀧𑁆𑀧𑀤𑁂𑀲𑁂 𑁋 𑀏𑀯𑀭𑀽𑀧𑁂 𑀔𑀮𑀼, 𑀪𑁄, 𑀭𑀫𑁆𑀫𑁂 𑀯𑀦𑀲𑀡𑁆𑀟𑁂 𑀧𑀼𑀡𑁆𑀡𑀫𑀼𑀔𑁄 𑀦𑀸𑀫 𑀨𑀼𑀲𑁆𑀲𑀓𑁄𑀓𑀺𑀮𑁄 𑀧𑀢𑀺𑀯𑀲𑀢𑀺 𑀅𑀢𑀺𑀯𑀺𑀬 𑀫𑀥𑀼𑀭𑀕𑀺𑀭𑁄 𑀯𑀺𑀮𑀸𑀲𑀺𑀢𑀦𑀬𑀦𑁄 𑀫𑀢𑁆𑀢𑀓𑁆𑀔𑁄.
‘‘𑀢𑀲𑁆𑀲𑁂𑀯 ¶ 𑀔𑀮𑀼, 𑀪𑁄, 𑀧𑀼𑀡𑁆𑀡𑀫𑀼𑀔𑀲𑁆𑀲 𑀨𑀼𑀲𑁆𑀲𑀓𑁄𑀓𑀺𑀮𑀲𑁆𑀲 𑀅𑀟𑁆𑀠𑀼𑀟𑁆𑀠𑀸𑀦𑀺 𑀇𑀢𑁆𑀣𑀺𑀲𑀢𑀸𑀦𑀺 𑀧𑀭𑀺𑀘𑀸𑀭𑀺𑀓𑀸 𑀤𑀺𑀚𑀓𑀜𑁆𑀜𑀸𑀬𑁄. 𑀅𑀣 𑀔𑀮𑀼, 𑀪𑁄, 𑀤𑁆𑀯𑁂 𑀤𑀺𑀚𑀓𑀜𑁆𑀜𑀸𑀬𑁄 𑀓𑀝𑁆𑀞𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀫𑀚𑁆𑀛𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀟𑁆𑀟𑁂𑀦𑁆𑀢𑀺 ‘𑀫𑀸 𑀦𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀅𑀤𑁆𑀥𑀸𑀦𑀧𑀭𑀺𑀬𑀸𑀬𑀧𑀣𑁂 𑀓𑀺𑀮𑀫𑀣𑁄 𑀉𑀩𑁆𑀩𑀸𑀳𑁂𑀢𑁆𑀣𑀸’𑀢𑀺.
‘‘𑀧𑀜𑁆𑀜𑀸𑀲 ¶ 𑀤𑀺𑀚𑀓𑀜𑁆𑀜𑀸𑀬𑁄 𑀳𑁂𑀝𑁆𑀞𑀢𑁄 𑀳𑁂𑀝𑁆𑀞𑀢𑁄 𑀉𑀟𑁆𑀟𑁂𑀦𑁆𑀢𑀺 ‘𑀲𑀘𑀸𑀬𑀁 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀲𑀓𑀼𑀡𑁄 𑀆𑀲𑀦𑀸 𑀧𑀭𑀺𑀧𑀢𑀺𑀲𑁆𑀲𑀢𑀺, 𑀫𑀬𑀁 𑀢𑀁 𑀧𑀓𑁆𑀔𑁂𑀳𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀸’𑀢𑀺.
‘‘𑀧𑀜𑁆𑀜𑀸𑀲 𑀤𑀺𑀚𑀓𑀜𑁆𑀜𑀸𑀬𑁄 𑀉𑀧𑀭𑀽𑀧𑀭𑀺 𑀉𑀟𑁆𑀟𑁂𑀦𑁆𑀢𑀺 ‘𑀫𑀸 𑀦𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀆𑀢𑀧𑁄 𑀧𑀭𑀺𑀢𑀸𑀧𑁂𑀲𑀻’𑀢𑀺.
‘‘𑀧𑀜𑁆𑀜𑀸𑀲 𑀧𑀜𑁆𑀜𑀸𑀲 𑀤𑀺𑀚𑀓𑀜𑁆𑀜𑀸𑀬𑁄 𑀉𑀪𑀢𑁄𑀧𑀲𑁆𑀲𑁂𑀦 𑀉𑀟𑁆𑀟𑁂𑀦𑁆𑀢𑀺 ‘𑀫𑀸𑀦𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀢𑀺𑀡𑀁 𑀯𑀸 𑀭𑀚𑁄 𑀯𑀸 𑀯𑀸𑀢𑁄 𑀯𑀸 𑀉𑀲𑁆𑀲𑀸𑀯𑁄 𑀯𑀸 𑀉𑀧𑀧𑁆𑀨𑀼𑀲𑀻’𑀢𑀺.
‘‘𑀧𑀜𑁆𑀜𑀸𑀲 𑀤𑀺𑀚𑀓𑀜𑁆𑀜𑀸𑀬𑁄 𑀧𑀼𑀭𑀢𑁄 𑀧𑀼𑀭𑀢𑁄 𑀉𑀟𑁆𑀟𑁂𑀦𑁆𑀢𑀺 ‘𑀫𑀸 𑀦𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀕𑁄𑀧𑀸𑀮𑀓𑀸 𑀯𑀸 𑀧𑀲𑀼𑀧𑀸𑀮𑀓𑀸 𑀯𑀸 𑀢𑀺𑀡𑀳𑀸𑀭𑀓𑀸 𑀯𑀸 𑀓𑀝𑁆𑀞𑀳𑀸𑀭𑀓𑀸 𑀯𑀸 𑀯𑀦𑀓𑀫𑁆𑀫𑀺𑀓𑀸 𑀯𑀸 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 𑀯𑀸 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀲𑀓𑁆𑀔𑀭𑀸𑀳𑀺 𑀯𑀸 𑀧𑀳𑀸𑀭𑀫𑀤𑀁𑀲𑀼, 𑀫𑀸𑀬𑀁 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀕𑀘𑁆𑀙𑁂𑀳𑀺 𑀯𑀸 𑀮𑀢𑀸𑀳𑀺 𑀯𑀸 𑀭𑀼𑀓𑁆𑀔𑁂𑀳𑀺 𑀯𑀸 𑀲𑀸𑀔𑀸𑀳𑀺 𑀯𑀸 𑀣𑀫𑁆𑀪𑁂𑀳𑀺 𑀯𑀸 𑀧𑀸𑀲𑀸𑀡𑁂𑀳𑀺 𑀯𑀸 𑀩𑀮𑀯𑀦𑁆𑀢𑁂𑀳𑀺 𑀯𑀸 𑀧𑀓𑁆𑀔𑀻𑀳𑀺 𑀲𑀗𑁆𑀕𑀫𑁂𑀲𑀻’𑀢𑀺.
‘‘𑀧𑀜𑁆𑀜𑀸𑀲 𑀤𑀺𑀚𑀓𑀜𑁆𑀜𑀸𑀬𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀉𑀟𑁆𑀟𑁂𑀦𑁆𑀢𑀺 𑀲𑀡𑁆𑀳𑀸𑀳𑀺 𑀲𑀔𑀺𑀮𑀸𑀳𑀺 ¶ 𑀫𑀜𑁆𑀚𑀽𑀳𑀺 𑀫𑀥𑀼𑀭𑀸𑀳𑀺 𑀯𑀸𑀘𑀸𑀳𑀺 𑀲𑀫𑀼𑀤𑀸𑀘𑀭𑀦𑁆𑀢𑀺𑀬𑁄 ‘𑀫𑀸𑀬𑀁 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀆𑀲𑀦𑁂 𑀧𑀭𑀺𑀬𑀼𑀓𑁆𑀓𑀡𑁆𑀞𑀻’𑀢𑀺.
‘‘𑀧𑀜𑁆𑀜𑀸𑀲 𑀤𑀺𑀚𑀓𑀜𑁆𑀜𑀸𑀬𑁄 𑀤𑀺𑀲𑁄𑀤𑀺𑀲𑀁 𑀉𑀟𑁆𑀟𑁂𑀦𑁆𑀢𑀺 𑀅𑀦𑁂𑀓𑀭𑀼𑀓𑁆𑀔𑀯𑀺𑀯𑀺𑀥𑀯𑀺𑀓𑀢𑀺𑀨𑀮𑀫𑀸𑀳𑀭𑀦𑁆𑀢𑀺𑀬𑁄 ‘𑀫𑀸𑀬𑀁 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀔𑀼𑀤𑀸𑀬 𑀧𑀭𑀺𑀓𑀺𑀮𑀫𑀺𑀢𑁆𑀣𑀸’𑀢𑀺.
‘‘𑀅𑀣 𑀔𑀮𑀼, 𑀪𑁄, 𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀆𑀭𑀸𑀫𑁂𑀦𑁂𑀯 𑀆𑀭𑀸𑀫𑀁, 𑀉𑀬𑁆𑀬𑀸𑀦𑁂𑀦𑁂𑀯 𑀉𑀬𑁆𑀬𑀸𑀦𑀁, 𑀦𑀤𑀻𑀢𑀺𑀢𑁆𑀣𑁂𑀦𑁂𑀯 ¶ 𑀦𑀤𑀻𑀢𑀺𑀢𑁆𑀣𑀁, 𑀧𑀩𑁆𑀩𑀢𑀲𑀺𑀔𑀭𑁂𑀦𑁂𑀯 𑀧𑀩𑁆𑀩𑀢𑀲𑀺𑀔𑀭𑀁, 𑀅𑀫𑁆𑀩𑀯𑀦𑁂𑀦𑁂𑀯 𑀅𑀫𑁆𑀩𑀯𑀦𑀁, 𑀚𑀫𑁆𑀩𑀼𑀯𑀦𑁂𑀦𑁂𑀯 𑀚𑀫𑁆𑀩𑀼𑀯𑀦𑀁, 𑀮𑀩𑀼𑀚𑀯𑀦𑁂𑀦𑁂𑀯 𑀮𑀩𑀼𑀚𑀯𑀦𑀁, 𑀦𑀸𑀴𑀺𑀓𑁂𑀭𑀲𑀜𑁆𑀘𑀸𑀭𑀺𑀬𑁂𑀦𑁂𑀯 𑀦𑀸𑀴𑀺𑀓𑁂𑀭𑀲𑀜𑁆𑀘𑀸𑀭𑀺𑀬𑀁 𑀔𑀺𑀧𑁆𑀧𑀫𑁂𑀯 𑀅𑀪𑀺𑀲𑀫𑁆𑀪𑁄𑀦𑁆𑀢𑀺 𑀭𑀢𑀺𑀢𑁆𑀣𑀸𑀬.
‘‘𑀅𑀣 𑀔𑀮𑀼, 𑀪𑁄, 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀢𑀸𑀳𑀺 𑀤𑀺𑀚𑀓𑀜𑁆𑀜𑀸𑀳𑀺 𑀤𑀺𑀯𑀲𑀁 𑀧𑀭𑀺𑀩𑁆𑀬𑀽𑀴𑁆𑀳𑁄 ¶ 𑀏𑀯𑀁 𑀧𑀲𑀁𑀲𑀢𑀺 ‘𑀲𑀸𑀥𑀼 𑀲𑀸𑀥𑀼, 𑀪𑀕𑀺𑀦𑀺𑀬𑁄, 𑀏𑀢𑀁 𑀔𑁄 𑀪𑀕𑀺𑀦𑀺𑀬𑁄 𑀢𑀼𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁 𑀓𑀼𑀮𑀥𑀻𑀢𑀸𑀦𑀁, 𑀬𑀁 𑀢𑀼𑀫𑁆𑀳𑁂 𑀪𑀢𑁆𑀢𑀸𑀭𑀁 𑀧𑀭𑀺𑀘𑀭𑁂𑀬𑁆𑀬𑀸𑀣𑀸’𑀢𑀺.
‘‘𑀅𑀣 𑀔𑀮𑀼, 𑀪𑁄, 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀬𑁂𑀦 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀓𑀼𑀡𑀸𑀮𑀲𑁆𑀲 𑀲𑀓𑀼𑀡𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀤𑀺𑀚𑀓𑀜𑁆𑀜𑀸𑀬𑁄 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀬𑁂𑀦 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀬𑀁, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀅𑀢𑀺𑀯𑀺𑀬 𑀨𑀭𑀼𑀲𑁄 𑀅𑀢𑀺𑀯𑀺𑀬 𑀨𑀭𑀼𑀲𑀯𑀸𑀘𑁄, 𑀅𑀧𑁆𑀧𑁂𑀯 𑀦𑀸𑀫 𑀢𑀯𑀫𑁆𑀧𑀺 𑀆𑀕𑀫𑁆𑀫 𑀧𑀺𑀬𑀯𑀸𑀘𑀁 𑀮𑀪𑁂𑀬𑁆𑀬𑀸𑀫𑀸’𑀢𑀺. ‘𑀅𑀧𑁆𑀧𑁂𑀯 𑀦𑀸𑀫 𑀪𑀕𑀺𑀦𑀺𑀬𑁄’𑀢𑀺 𑀯𑀢𑁆𑀯𑀸 𑀬𑁂𑀦 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀼𑀡𑀸𑀮𑁂𑀦 𑀲𑀓𑀼𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀢𑀁 𑀓𑀼𑀡𑀸𑀮𑀁 𑀲𑀓𑀼𑀡𑀁 𑀏𑀢𑀤𑀯𑁄𑀘 𑁋 ‘𑀓𑀺𑀲𑁆𑀲 𑀢𑁆𑀯𑀁, 𑀲𑀫𑁆𑀫 𑀓𑀼𑀡𑀸𑀮, 𑀇𑀢𑁆𑀣𑀻𑀦𑀁 𑀲𑀼𑀚𑀸𑀢𑀸𑀦𑀁 𑀓𑀼𑀮𑀥𑀻𑀢𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄𑀲𑀺, 𑀅𑀫𑀦𑀸𑀧𑀪𑀸𑀡𑀻𑀦𑀫𑁆𑀧𑀺 𑀓𑀺𑀭, 𑀲𑀫𑁆𑀫 𑀓𑀼𑀡𑀸𑀮, 𑀇𑀢𑁆𑀣𑀻𑀦𑀁 𑀫𑀦𑀸𑀧𑀪𑀸𑀡𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀓𑀺𑀫𑀗𑁆𑀕𑀁 𑀧𑀦 𑀫𑀦𑀸𑀧𑀪𑀸𑀡𑀻𑀦’𑀦𑁆𑀢𑀺.
‘‘𑀏𑀯𑀁 𑀯𑀼𑀢𑁆𑀢𑁂 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀏𑀯𑀁 𑀅𑀧𑀲𑀸𑀤𑁂𑀲𑀺 𑁋 ‘𑀦𑀲𑁆𑀲 𑀢𑁆𑀯𑀁, 𑀲𑀫𑁆𑀫 𑀚𑀫𑁆𑀫 𑀯𑀲𑀮, 𑀯𑀺𑀦𑀲𑁆𑀲 𑀢𑁆𑀯𑀁, 𑀲𑀫𑁆𑀫 𑀚𑀫𑁆𑀫 𑀯𑀲𑀮, 𑀓𑁄 𑀦𑀼 𑀢𑀬𑀸 𑀯𑀺𑀬𑀢𑁆𑀢𑁄 𑀚𑀸𑀬𑀸𑀚𑀺𑀦𑁂𑀦𑀸’𑀢𑀺. 𑀏𑀯𑀁 𑀅𑀧𑀲𑀸𑀤𑀺𑀢𑁄 𑀘 𑀧𑀦 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀢𑀢𑁄𑀬𑁂𑀯 ¶ 𑀧𑀝𑀺𑀦𑀺𑀯𑀢𑁆𑀢𑀺.
‘‘𑀅𑀣 ¶ 𑀔𑀮𑀼, 𑀪𑁄, 𑀧𑀼𑀡𑁆𑀡𑀫𑀼𑀔𑀲𑁆𑀲 𑀨𑀼𑀲𑁆𑀲𑀓𑁄𑀓𑀺𑀮𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀦𑀘𑀺𑀭𑀲𑁆𑀲𑁂𑀯 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀫𑀸𑀭𑀡𑀦𑁆𑀢𑀺𑀓𑀸. 𑀅𑀣 𑀔𑀮𑀼, 𑀪𑁄, 𑀧𑀼𑀡𑁆𑀡𑀫𑀼𑀔𑀲𑁆𑀲 𑀨𑀼𑀲𑁆𑀲𑀓𑁄𑀓𑀺𑀮𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀦𑀁 𑀤𑀺𑀚𑀓𑀜𑁆𑀜𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀆𑀩𑀸𑀥𑀺𑀓𑁄 𑀔𑁄 𑀅𑀬𑀁 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄, 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬𑀸’𑀢𑀺 𑀏𑀓𑀁 𑀅𑀤𑀼𑀢𑀺𑀬𑀁 𑀑𑀳𑀸𑀬 𑀬𑁂𑀦 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀺𑀬𑁄, 𑀤𑀺𑀲𑁆𑀯𑀸𑀦 𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀏𑀢𑀤𑀯𑁄𑀘 𑁋 ‘𑀓𑀳𑀁 𑀧𑀦 𑀢𑀼𑀫𑁆𑀳𑀁 𑀯𑀲𑀮𑀺𑀬𑁄 𑀪𑀢𑁆𑀢𑀸’𑀢𑀺. ‘𑀆𑀩𑀸𑀥𑀺𑀓𑁄 𑀔𑁄, 𑀲𑀫𑁆𑀫 𑀓𑀼𑀡𑀸𑀮, 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀅𑀧𑁆𑀧𑁂𑀯 𑀦𑀸𑀫 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑀸 𑀤𑀺𑀚𑀓𑀜𑁆𑀜𑀸𑀬𑁄 𑀏𑀯𑀁 𑀅𑀧𑀲𑀸𑀤𑁂𑀲𑀺 𑁋 ‘𑀦𑀲𑁆𑀲𑀣 𑀢𑀼𑀫𑁆𑀳𑁂 𑀯𑀲𑀮𑀺𑀬𑁄, 𑀯𑀺𑀦𑀲𑁆𑀲𑀣 𑀢𑀼𑀫𑁆𑀳𑁂 𑀯𑀲𑀮𑀺𑀬𑁄 𑀘𑁄𑀭𑀺𑀬𑁄 𑀥𑀼𑀢𑁆𑀢𑀺𑀬𑁄 𑀅𑀲𑀢𑀺𑀬𑁄 𑀮𑀳𑀼𑀘𑀺𑀢𑁆𑀢𑀸𑀬𑁄 𑀓𑀢𑀲𑁆𑀲 𑀅𑀧𑁆𑀧𑀝𑀺𑀓𑀸𑀭𑀺𑀓𑀸𑀬𑁄 ¶ 𑀅𑀦𑀺𑀮𑁄 𑀯𑀺𑀬 𑀬𑁂𑀦𑀓𑀸𑀫𑀁𑀕𑀫𑀸𑀬𑁄’𑀢𑀺 𑀯𑀢𑁆𑀯𑀸 𑀬𑁂𑀦 𑀧𑀼𑀡𑁆𑀡𑀫𑀼𑀔𑁄 𑀨𑀼𑀲𑁆𑀲𑀓𑁄𑀓𑀺𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀏𑀢𑀤𑀯𑁄𑀘 𑁋 ‘𑀳𑀁, 𑀲𑀫𑁆𑀫, 𑀧𑀼𑀡𑁆𑀡𑀫𑀼𑀔𑀸’𑀢𑀺. ‘𑀳𑀁, 𑀲𑀫𑁆𑀫, 𑀓𑀼𑀡𑀸𑀮𑀸’𑀢𑀺.
‘‘𑀅𑀣 𑀔𑀮𑀼, 𑀪𑁄, 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀧𑀓𑁆𑀔𑁂𑀳𑀺 𑀘 𑀫𑀼𑀔𑀢𑀼𑀡𑁆𑀟𑀓𑁂𑀦 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑀸𑀦𑀸𑀪𑁂𑀲𑀚𑁆𑀚𑀸𑀦𑀺 𑀧𑀸𑀬𑀸𑀧𑁂𑀲𑀺. 𑀅𑀣 𑀔𑀮𑀼, 𑀪𑁄, 𑀧𑀼𑀡𑁆𑀡𑀫𑀼𑀔𑀲𑁆𑀲 𑀨𑀼𑀲𑁆𑀲𑀓𑁄𑀓𑀺𑀮𑀲𑁆𑀲 𑀲𑁄 𑀆𑀩𑀸𑀥𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀻’’𑀢𑀺.
𑀢𑀢𑁆𑀣 𑀧𑀺𑀬𑀓𑀸𑀢𑀺 𑀲𑁂𑀢𑀧𑀼𑀧𑁆𑀨𑀸. 𑀳𑀲𑀦𑀸𑀢𑀺 𑀳-𑀓𑀸𑀭𑁄 𑀲𑀦𑁆𑀥𑀺𑀓𑀭𑁄, 𑀅𑀲𑀦𑀸𑀬𑁂𑀯. 𑀢𑀺𑀭𑀻𑀝𑀻𑀢𑀺 𑀏𑀓𑀸 𑀭𑀼𑀓𑁆𑀔𑀚𑀸𑀢𑀺. 𑀘𑀦𑁆𑀤𑀦𑀸𑀢𑀺 𑀭𑀢𑁆𑀢𑀲𑀼𑀭𑀪𑀺𑀘𑀦𑁆𑀤𑀦𑀸. 𑀑𑀖𑀯𑀦𑁂𑀢𑀺 𑀏𑀢𑁂𑀲𑀁 𑀑𑀖𑁂𑀦 𑀖𑀝𑀸𑀬 𑀲𑀫𑀦𑁆𑀦𑀸𑀕𑀢𑀯𑀦𑁂. 𑀤𑁂𑀯𑀤𑀸𑀭𑀼𑀓𑀘𑁄𑀘𑀕𑀳𑀦𑁂𑀢𑀺 𑀤𑁂𑀯𑀤𑀸𑀭𑀼𑀭𑀼𑀓𑁆𑀔𑁂𑀳𑀺 𑀘𑁂𑀯 𑀓𑀤𑀮𑀻𑀳𑀺 𑀘 𑀕𑀳𑀦𑁂. 𑀓𑀘𑁆𑀘𑀺𑀓𑀸𑀭𑀸𑀢𑀺 𑀏𑀓𑀸 𑀭𑀼𑀓𑁆𑀔𑀚𑀸𑀢𑀺. 𑀓𑀡𑀺𑀓𑀸𑀭𑀸𑀢𑀺 𑀫𑀳𑀸𑀧𑀼𑀧𑁆𑀨𑀸. 𑀓𑀡𑁆𑀡𑀺𑀓𑀸𑀭𑀸𑀢𑀺 𑀔𑀼𑀤𑁆𑀤𑀓𑀧𑀼𑀧𑁆𑀨𑀸. 𑀓𑀺𑀁𑀲𑀼𑀓𑀸𑀢𑀺 𑀯𑀸𑀢𑀖𑀸𑀢𑀓𑀸. 𑀬𑁄𑀥𑀺𑀓𑀸𑀢𑀺 𑀬𑀽𑀣𑀺𑀓𑀸. 𑀯𑀦𑀫𑀮𑁆𑀮𑀺𑀓𑀫𑀦𑀗𑁆𑀕𑀡𑀫𑀦𑀯𑀚𑁆𑀚𑀪𑀡𑁆𑀟𑀺𑀲𑀼𑀭𑀼𑀘𑀺𑀭𑀪𑀕𑀺𑀦𑀺𑀫𑀸𑀮𑀸𑀫𑀮𑁆𑀬𑀥𑀭𑁂𑀢𑀺 𑀫𑀮𑁆𑀮𑀺𑀓𑀸𑀦𑀜𑁆𑀘 𑀅𑀦𑀗𑁆𑀕𑀡𑀸𑀦𑀁 ¶ 𑀅𑀦𑀯𑀚𑁆𑀚𑀸𑀦𑀜𑁆𑀘 𑀪𑀡𑁆𑀟𑀻𑀦𑀁 𑀲𑀼𑀭𑀼𑀘𑀺𑀭𑀸𑀦𑀜𑁆𑀘 𑀪𑀕𑀺𑀦𑀻𑀦𑀁 𑀧𑀼𑀧𑁆𑀨𑁂𑀳𑀺 𑀫𑀸𑀮𑁆𑀬𑀥𑀸𑀭𑀬𑀫𑀸𑀦𑁂. 𑀥𑀦𑀼𑀢𑀓𑁆𑀓𑀸𑀭𑀻𑀢𑀺 𑀥𑀦𑀼𑀧𑀸𑀝𑀮𑀺. 𑀢𑀸𑀮𑀻𑀲𑀸𑀢𑀺 𑀢𑀸𑀮𑀻𑀲𑀧𑀢𑁆𑀢𑀭𑀼𑀓𑁆𑀔𑀸. 𑀓𑀘𑁆𑀙𑀯𑀺𑀢𑀢𑁂𑀢𑀺 𑀏𑀢𑁂𑀳𑀺 𑀚𑀸𑀢𑀺𑀲𑀼𑀫𑀦𑀸𑀤𑀻𑀳𑀺 𑀯𑀺𑀢𑀢𑁂 𑀦𑀤𑀺𑀓𑀘𑁆𑀙𑀧𑀩𑁆𑀩𑀢𑀓𑀘𑁆𑀙𑁂. 𑀲𑀁𑀓𑀼𑀲𑀼𑀫𑀺𑀢𑀮𑀢𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀓𑀼𑀲𑀼𑀫𑀺𑀢𑀅𑀢𑀺𑀫𑀼𑀢𑁆𑀢𑀓𑁂𑀳𑀺 𑀘𑁂𑀯 𑀦𑀸𑀦𑀸𑀯𑀺𑀥𑀮𑀢𑀸𑀳𑀺 𑀘 𑀯𑀺𑀢𑀢𑀧𑀝𑀺𑀫𑀡𑁆𑀟𑀺𑀢𑀧𑀤𑁂𑀲𑁂. 𑀕𑀡𑀸𑀥𑀺𑀯𑀼𑀝𑁆𑀞𑁂𑀢𑀺 𑀏𑀢𑁂𑀲𑀁 𑀯𑀺𑀚𑁆𑀚𑀸𑀥𑀭𑀸𑀤𑀻𑀦𑀁 𑀕𑀡𑁂𑀳𑀺 𑀅𑀥𑀺𑀯𑀼𑀝𑁆𑀞𑁂. 𑀧𑀼𑀡𑁆𑀡𑀫𑀼𑀔𑁄𑀢𑀺 𑀫𑀼𑀔𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀡𑁆𑀡𑀫𑀼𑀔𑁄. 𑀧𑀭𑁂𑀳𑀺 ¶ 𑀨𑀼𑀝𑁆𑀞𑀢𑀸𑀬 𑀨𑀼𑀲𑁆𑀲𑀓𑁄𑀓𑀺𑀮𑁄. 𑀯𑀺𑀮𑀸𑀲𑀺𑀢𑀦𑀬𑀦𑁄𑀢𑀺 𑀯𑀺𑀮𑀸𑀲𑀺𑀢𑀦𑁂𑀢𑁆𑀢𑁄. 𑀫𑀢𑁆𑀢𑀓𑁆𑀔𑁄𑀢𑀺 𑀬𑀣𑀸 𑀫𑀢𑁆𑀢𑀸𑀦𑀁 𑀅𑀓𑁆𑀔𑀻𑀦𑀺 𑀭𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀭𑀢𑁆𑀢𑀓𑁆𑀔𑁄, 𑀧𑀫𑀸𑀡𑀬𑀼𑀢𑁆𑀢𑀦𑁂𑀢𑁆𑀢𑁄 𑀯𑀸.
𑀪𑀕𑀺𑀦𑀺𑀬𑁄𑀢𑀺 𑀅𑀭𑀺𑀬𑀯𑁄𑀳𑀸𑀭𑁂𑀦 𑀆𑀮𑀧𑀦𑀁. 𑀧𑀭𑀺𑀘𑀭𑁂𑀬𑁆𑀬𑀸𑀣𑀸𑀢𑀺 𑀲𑀓𑀮𑀤𑀺𑀯𑀲𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑁂𑀬𑁆𑀬𑀸𑀣. 𑀇𑀢𑀺 𑀲𑁄 𑀧𑀺𑀬𑀓𑀣𑀁 𑀓𑀣𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀺. 𑀓𑀤𑀸𑀘𑀺 𑀧𑀦 𑀓𑀼𑀡𑀸𑀮𑁄 𑀲𑀧𑀭𑀺𑀯𑀸𑀭𑁄 𑀧𑀼𑀡𑁆𑀡𑀫𑀼𑀔𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀓𑀤𑀸𑀘𑀺 𑀧𑀼𑀡𑁆𑀡𑀫𑀼𑀔𑁄 𑀓𑀼𑀡𑀸𑀮𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀅𑀣 𑀔𑀮𑀼, 𑀪𑁄’’𑀢𑀺. 𑀲𑀫𑁆𑀫𑀸𑀢𑀺 𑀯𑀬𑀲𑁆𑀲. 𑀆𑀕𑀫𑁆𑀫𑀸𑀢𑀺 𑀧𑀝𑀺𑀘𑁆𑀘 𑀉𑀧𑀦𑀺𑀲𑁆𑀲𑀸𑀬. 𑀮𑀪𑁂𑀬𑁆𑀬𑀸𑀫𑀸𑀢𑀺 𑀓𑀼𑀡𑀸𑀮𑀲𑁆𑀲 𑀲𑀦𑁆𑀢𑀺𑀓𑀸 𑀧𑀺𑀬𑀯𑀘𑀦𑀁 𑀮𑀪𑁂𑀬𑁆𑀬𑀸𑀫. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀅𑀧𑀺 𑀦𑀸𑀫 𑀮𑀪𑁂𑀬𑁆𑀬𑀸𑀣, 𑀯𑀓𑁆𑀔𑀸𑀫𑀺 𑀦𑀦𑁆𑀢𑀺. 𑀲𑀼𑀚𑀸𑀢𑀸𑀦𑀦𑁆𑀢𑀺 𑀲𑀫𑀚𑀸𑀢𑀺𑀓𑀸𑀦𑀁.
𑀦𑀲𑁆𑀲𑀸𑀢𑀺 𑀧𑀮𑀸𑀬. 𑀚𑀫𑁆𑀫𑀸𑀢𑀺 𑀮𑀸𑀫𑀓. 𑀯𑀺𑀬𑀢𑁆𑀢𑁄𑀢𑀺 𑀓𑁄 𑀦𑀼 𑀢𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀩𑁆𑀬𑀢𑁆𑀢𑁄 𑀦𑀸𑀫 𑀅𑀢𑁆𑀣𑀺. 𑀚𑀸𑀬𑀸𑀚𑀺𑀦𑁂𑀦𑀸𑀢𑀺 𑀚𑀸𑀬𑀸𑀚𑀺𑀢𑁂𑀦, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀏𑀯𑀁 𑀇𑀢𑁆𑀣𑀺𑀧𑀭𑀸𑀚𑀺𑀢𑁂𑀦 𑀢𑀬𑀸 𑀲𑀤𑀺𑀲𑁄 ¶ 𑀓𑁄 𑀦𑀸𑀫 𑀩𑁆𑀬𑀢𑁆𑀢𑁄 𑀅𑀢𑁆𑀣𑀻𑀢𑀺 𑀢𑀁 𑀧𑀼𑀦 𑀏𑀯𑀭𑀽𑀧𑀲𑁆𑀲 𑀯𑀘𑀦𑀲𑁆𑀲 𑀅𑀪𑀡𑀦𑀢𑁆𑀣𑀸𑀬 𑀅𑀧𑀲𑀸𑀤𑁂𑀢𑀺. 𑀢𑀢𑁄𑀬𑁂𑀯𑀸𑀢𑀺 ‘‘𑀓𑀼𑀤𑁆𑀥𑁄 𑀫𑁂 𑀓𑀼𑀡𑀸𑀮𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁄𑀬𑁂𑀯 𑀧𑀝𑀺𑀦𑀺𑀯𑀢𑁆𑀢𑀺, 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺.
𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑁄, 𑀇𑀫𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬 𑀯𑀸 𑀦𑁄 𑀯𑀸𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀑𑀳𑀸𑀬 𑀧𑀓𑁆𑀓𑀫𑀺𑀁𑀲𑀼. 𑀢𑀼𑀫𑁆𑀳𑀦𑁆𑀢𑀺 𑀢𑀼𑀫𑁆𑀳𑀸𑀓𑀁. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬 𑀯𑀸 𑀦𑁄 𑀯𑀸, 𑀅𑀫𑁆𑀳𑀸𑀓𑀁 𑀆𑀕𑀢𑀓𑀸𑀮𑁂 𑀫𑀢𑁄 𑀪𑀯𑀺𑀲𑁆𑀲𑀢𑀺. 𑀫𑀬𑀜𑁆𑀳𑀺 𑀇𑀤𑀸𑀦𑁂𑀯 𑀲𑁄 𑀫𑀭𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀪𑀯𑀺𑀢𑀼𑀁 𑀆𑀕𑀢𑀸. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀇𑀫𑀸 𑀇𑀢𑁆𑀣𑀺𑀬𑁄 𑀲𑀸𑀫𑀺𑀓𑀲𑁆𑀲 ¶ 𑀫𑀢𑀓𑀸𑀮𑁂 𑀆𑀕𑀢𑀸 𑀧𑀝𑀺𑀓𑁆𑀓𑀽𑀮𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀢𑀁 𑀧𑀳𑀸𑀬 𑀆𑀕𑀢𑀸, 𑀅𑀳𑀁 𑀕𑀦𑁆𑀢𑁆𑀯𑀸 𑀫𑀫 𑀲𑀳𑀸𑀬𑀓𑀁 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀦𑀸𑀦𑀸𑀪𑁂𑀲𑀚𑁆𑀚𑀸𑀦𑀺 𑀲𑀁𑀳𑀭𑀺𑀢𑁆𑀯𑀸 𑀅𑀭𑁄𑀕𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀸𑀕𑀩𑀮𑁄 𑀫𑀳𑀸𑀲𑀢𑁆𑀢𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀬𑁂𑀦 𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀳𑀦𑁆𑀢𑀺 𑀦𑀺𑀧𑀸𑀢𑁄, ‘‘𑀚𑀻𑀯𑀲𑀺, 𑀲𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀇𑀢𑀭𑁄𑀧𑀺𑀲𑁆𑀲 ‘‘𑀚𑀻𑀯𑀸𑀫𑀻’’𑀢𑀺 𑀯𑀤𑀦𑁆𑀢𑁄 ‘‘𑀳𑀁 𑀲𑀫𑁆𑀫𑀸’’𑀢𑀺 𑀆𑀳. 𑀧𑀸𑀬𑀸𑀧𑁂𑀲𑀻𑀢𑀺 𑀧𑀸𑀬𑁂𑀲𑀺. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀻𑀢𑀺 𑀯𑀽𑀧𑀲𑀫𑀻𑀢𑀺.
𑀢𑀸𑀧𑀺 𑀤𑀺𑀚𑀓𑀜𑁆𑀜𑀸𑀬𑁄 𑀅𑀲𑁆𑀫𑀺𑀁 𑀅𑀭𑁄𑀕𑁂 𑀚𑀸𑀢𑁂 𑀆𑀕𑀢𑀸. 𑀓𑀼𑀡𑀸𑀮𑁄𑀧𑀺 𑀧𑀼𑀡𑁆𑀡𑀫𑀼𑀔𑀁 𑀓𑀢𑀺𑀧𑀸𑀳𑀁 𑀨𑀮𑀸𑀨𑀮𑀸𑀦𑀺 𑀔𑀸𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀩𑀮𑀧𑁆𑀧𑀢𑁆𑀢𑀓𑀸𑀮𑁂, ‘‘𑀲𑀫𑁆𑀫, 𑀇𑀤𑀸𑀦𑀺 𑀢𑁆𑀯𑀁 𑀅𑀭𑁄𑀕𑁄, 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀯𑀲, 𑀅𑀳𑀫𑁆𑀧𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀲𑁄 ‘‘𑀇𑀫𑀸, 𑀲𑀫𑁆𑀫, 𑀫𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀧𑀳𑀸𑀬 𑀧𑀮𑀸𑀬𑀦𑁆𑀢𑀺, 𑀦 𑀫𑁂 𑀏𑀢𑀸𑀳𑀺 𑀥𑀼𑀢𑁆𑀢𑀻𑀳𑀺 𑀅𑀢𑁆𑀣𑁄’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀢𑁂, 𑀲𑀫𑁆𑀫, 𑀇𑀢𑁆𑀣𑀻𑀦𑀁 𑀧𑀸𑀧𑀪𑀸𑀯𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀡𑁆𑀡𑀫𑀼𑀔𑀁 𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀫𑀦𑁄𑀲𑀺𑀮𑀸𑀢𑀮𑀁 𑀦𑁂𑀢𑁆𑀯𑀸 𑀲𑀢𑁆𑀢𑀬𑁄𑀚𑀦𑀺𑀓𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀫𑀦𑁄𑀲𑀺𑀮𑀸𑀲𑀦𑁂 𑀦𑀺𑀲𑀻𑀤𑀺. 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀧𑀼𑀡𑁆𑀡𑀫𑀼𑀔𑁄 𑀲𑀧𑀭𑀺𑀯𑀸𑀭𑁄 𑀦𑀺𑀲𑀻𑀤𑀺. 𑀲𑀓𑀮𑀳𑀺𑀫𑀯𑀦𑁆𑀢𑁂 𑀤𑁂𑀯𑀖𑁄𑀲𑀦𑀸 𑀘𑀭𑀺 𑁋 ‘‘𑀅𑀚𑁆𑀚 𑀓𑀼𑀡𑀸𑀮𑁄 𑀲𑀓𑀼𑀡𑀭𑀸𑀚𑀸 𑀳𑀺𑀫𑀯𑀦𑁆𑀢𑁂 𑀫𑀦𑁄𑀲𑀺𑀮𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀢𑀁 𑀲𑀼𑀡𑀸𑀣𑀸’’𑀢𑀺. 𑀧𑀭𑀫𑁆𑀧𑀭𑀖𑁄𑀲𑁂𑀦 ¶ 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀩𑀳𑀼𑀦𑀸𑀕𑀲𑀼𑀧𑀡𑁆𑀡𑀓𑀺𑀦𑁆𑀦𑀭𑀯𑀺𑀚𑁆𑀚𑀸𑀥𑀭𑀸𑀤𑀻𑀦𑀫𑁆𑀧𑀺 𑀤𑁂𑀯𑀢𑀸 𑀢𑀫𑀢𑁆𑀣𑀁 𑀉𑀕𑁆𑀖𑁄𑀲𑁂𑀲𑀼𑀁. 𑀢𑀤𑀸 𑀆𑀦𑀦𑁆𑀤𑁄 𑀦𑀸𑀫 𑀕𑀺𑀚𑁆𑀛𑀭𑀸𑀚𑀸 𑀤𑀲𑀲𑀳𑀲𑁆𑀲𑀕𑀺𑀚𑁆𑀛𑀧𑀭𑀺𑀯𑀸𑀭𑁄 𑀕𑀺𑀚𑁆𑀛𑀧𑀩𑁆𑀩𑀢𑁂 𑀧𑀝𑀺𑀯𑀲𑀢𑀺. 𑀲𑁄𑀧𑀺 𑀢𑀁 𑀓𑁄𑀮𑀸𑀳𑀮𑀁 𑀲𑀼𑀢𑁆𑀯𑀸 ‘‘𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀧𑀭𑀺𑀯𑀸𑀭𑁄 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀦𑀸𑀭𑀤𑁄𑀧𑀺 𑀧𑀜𑁆𑀘𑀸𑀪𑀺𑀜𑁆𑀜𑁄 𑀢𑀸𑀧𑀲𑁄 𑀤𑀲𑀲𑀳𑀲𑁆𑀲𑀢𑀸𑀧𑀲𑀧𑀭𑀺𑀯𑀼𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑁄 𑀢𑀁 𑀤𑁂𑀯𑀖𑁄𑀲𑀦𑀁 𑀲𑀼𑀢𑁆𑀯𑀸 ‘‘𑀲𑀳𑀸𑀬𑁄 𑀓𑀺𑀭 𑀫𑁂 𑀓𑀼𑀡𑀸𑀮𑁄 𑀇𑀢𑁆𑀣𑀻𑀦𑀁 𑀅𑀕𑀼𑀡𑀁 𑀓𑀣𑁂𑀲𑁆𑀲𑀢𑀺, 𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀺, 𑀫𑀬𑀸𑀧𑀺 𑀢𑀁 𑀤𑁂𑀲𑀦𑀁 𑀲𑁄𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀸𑀧𑀲𑀤𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀇𑀤𑁆𑀥𑀺𑀬𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀲𑀦𑁆𑀦𑀺𑀧𑀸𑀢𑀲𑀤𑀺𑀲𑁄 𑀫𑀳𑀸𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 𑀚𑀸𑀢𑀺𑀲𑁆𑀲𑀭𑀜𑀸𑀡𑁂𑀦 𑀇𑀢𑁆𑀣𑀺𑀤𑁄𑀲𑀧𑀝𑀺𑀲𑀁𑀬𑀼𑀢𑁆𑀢𑀁 ¶ 𑀅𑀢𑀻𑀢𑀪𑀯𑁂 𑀤𑀺𑀝𑁆𑀞𑀓𑀸𑀭𑀡𑀁 ¶ 𑀧𑀼𑀡𑁆𑀡𑀫𑀼𑀔𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀅𑀣 𑀔𑀮𑀼, 𑀪𑁄, 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀢𑀁 𑀧𑀼𑀡𑁆𑀡𑀫𑀼𑀔𑀁 𑀨𑀼𑀲𑁆𑀲𑀓𑁄𑀓𑀺𑀮𑀁 𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑀁 𑀅𑀘𑀺𑀭𑀯𑀼𑀝𑁆𑀞𑀺𑀢𑀁 𑀕𑁂𑀮𑀜𑁆𑀜𑀸 𑀏𑀢𑀤𑀯𑁄𑀘 𑁋
‘‘‘𑀤𑀺𑀝𑁆𑀞𑀸 𑀫𑀬𑀸, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀓𑀡𑁆𑀳𑀸 𑀤𑁆𑀯𑁂𑀧𑀺𑀢𑀺𑀓𑀸 𑀧𑀜𑁆𑀘𑀧𑀢𑀺𑀓𑀸𑀬 𑀙𑀝𑁆𑀞𑁂 𑀧𑀼𑀭𑀺𑀲𑁂 𑀘𑀺𑀢𑁆𑀢𑀁 𑀧𑀝𑀺𑀩𑀦𑁆𑀥𑀦𑁆𑀢𑀺𑀬𑀸, 𑀬𑀤𑀺𑀤𑀁 𑀓𑀩𑀦𑁆𑀥𑁂 𑀧𑀻𑀞𑀲𑀧𑁆𑀧𑀺𑀫𑁆𑀳𑀻’’’𑀢𑀺. 𑀪𑀯𑀢𑀺 𑀘 𑀧𑀦𑀼𑀢𑁆𑀢𑀭𑁂𑀢𑁆𑀣 𑀯𑀸𑀓𑁆𑀬𑀁 𑁋
‘‘𑀅𑀣𑀚𑁆𑀚𑀼𑀦𑁄 𑀦𑀓𑀼𑀮𑁄 𑀪𑀻𑀫𑀲𑁂𑀦𑁄, 𑀬𑀼𑀥𑀺𑀝𑁆𑀞𑀺𑀮𑁄 𑀲𑀳𑀤𑁂𑀯𑁄 𑀘 𑀭𑀸𑀚𑀸;
𑀏𑀢𑁂 𑀧𑀢𑀻 𑀧𑀜𑁆𑀘 𑀫𑀢𑀺𑀘𑁆𑀘 𑀦𑀸𑀭𑀻, 𑀅𑀓𑀸𑀲𑀺 𑀔𑀼𑀚𑁆𑀚𑀯𑀸𑀫𑀦𑀓𑁂𑀦 𑀧𑀸𑀧’𑀦𑁆𑀢𑀺.
‘‘𑀤𑀺𑀝𑁆𑀞𑀸 𑀫𑀬𑀸, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀲𑀘𑁆𑀘𑀢𑀧𑀸𑀧𑀻 𑀦𑀸𑀫 𑀲𑀫𑀡𑀻 𑀲𑀼𑀲𑀸𑀦𑀫𑀚𑁆𑀛𑁂 𑀯𑀲𑀦𑁆𑀢𑀻 𑀘𑀢𑀼𑀢𑁆𑀣𑀪𑀢𑁆𑀢𑀁 𑀧𑀭𑀺𑀡𑀸𑀫𑀬𑀫𑀸𑀦𑀸 𑀲𑀼𑀭𑀸𑀥𑀼𑀢𑁆𑀢𑀓𑁂𑀦 𑀧𑀸𑀧𑀫𑀓𑀸𑀲𑀺.
‘‘𑀤𑀺𑀝𑁆𑀞𑀸 𑀫𑀬𑀸, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀓𑀸𑀓𑀯𑀢𑀻 𑀦𑀸𑀫 𑀤𑁂𑀯𑀻 𑀲𑀫𑀼𑀤𑁆𑀤𑀫𑀚𑁆𑀛𑁂 𑀯𑀲𑀦𑁆𑀢𑀻 𑀪𑀭𑀺𑀬𑀸 𑀯𑁂𑀦𑀢𑁂𑀬𑁆𑀬𑀲𑁆𑀲 𑀦𑀝𑀓𑀼𑀯𑁂𑀭𑁂𑀦 𑀧𑀸𑀧𑀫𑀓𑀸𑀲𑀺.
‘‘𑀤𑀺𑀝𑁆𑀞𑀸 𑀫𑀬𑀸, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀓𑀼𑀭𑀼𑀗𑁆𑀕𑀤𑁂𑀯𑀻 𑀦𑀸𑀫 𑀮𑁄𑀫𑀲𑀼𑀤𑁆𑀤𑀭𑀻 𑀏𑀴𑀺𑀓𑀓𑀼𑀫𑀸𑀭𑀁 ¶ 𑀓𑀸𑀫𑀬𑀫𑀸𑀦𑀸 𑀙𑀴𑀗𑁆𑀕𑀓𑀼𑀫𑀸𑀭𑀥𑀦𑀦𑁆𑀢𑁂𑀯𑀸𑀲𑀺𑀦𑀸 𑀧𑀸𑀧𑀫𑀓𑀸𑀲𑀺.
‘‘𑀏𑀯𑀜𑁆𑀳𑁂𑀢𑀁 𑀫𑀬𑀸 𑀜𑀸𑀢𑀁, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀫𑀸𑀢𑀭𑀁;
𑀑𑀳𑀸𑀬 𑀓𑁄𑀲𑀮𑀭𑀸𑀚𑀁, 𑀧𑀜𑁆𑀘𑀸𑀮𑀘𑀡𑁆𑀟𑁂𑀦 𑀧𑀸𑀧𑀫𑀓𑀸𑀲𑀺.
‘‘𑀏𑀢𑀸 𑀘 𑀅𑀜𑁆𑀜𑀸 𑀘 𑀅𑀓𑀁𑀲𑀼 𑀧𑀸𑀧𑀁, 𑀢𑀲𑁆𑀫𑀸𑀳𑀫𑀺𑀢𑁆𑀣𑀻𑀦𑀁 𑀦 𑀯𑀺𑀲𑁆𑀲𑀲𑁂 𑀦𑀧𑁆𑀧𑀲𑀁𑀲𑁂;
𑀫𑀳𑀻 𑀬𑀣𑀸 𑀚𑀕𑀢𑀺 𑀲𑀫𑀸𑀦𑀭𑀢𑁆𑀢𑀸, 𑀯𑀲𑀼𑀦𑁆𑀥𑀭𑀸 𑀇𑀢𑀭𑀻𑀢𑀭𑀸𑀧𑀢𑀺𑀝𑁆𑀞𑀸;
𑀲𑀩𑁆𑀩𑀲𑀳𑀸 𑀅𑀨𑀦𑁆𑀤𑀦𑀸 𑀅𑀓𑀼𑀧𑁆𑀧𑀸, 𑀢𑀣𑀺𑀢𑁆𑀣𑀺𑀬𑁄 𑀢𑀸𑀬𑁄 𑀦 𑀯𑀺𑀲𑁆𑀲𑀲𑁂 𑀦𑀭𑁄.
‘‘𑀲𑀻𑀳𑁄 ¶ ¶ 𑀬𑀣𑀸 𑀮𑁄𑀳𑀺𑀢𑀫𑀁𑀲𑀪𑁄𑀚𑀦𑁄, 𑀯𑀸𑀴𑀫𑀺𑀕𑁄 𑀧𑀜𑁆𑀘𑀸𑀯𑀼𑀥𑁄 𑀲𑀼𑀭𑀼𑀤𑁆𑀥𑁄;
𑀧𑀲𑀬𑁆𑀳𑀔𑀸𑀤𑀻 𑀧𑀭𑀳𑀺𑀁𑀲𑀦𑁂 𑀭𑀢𑁄, 𑀢𑀣𑀺𑀢𑁆𑀣𑀺𑀬𑁄 𑀢𑀸𑀬𑁄 𑀦 𑀯𑀺𑀲𑁆𑀲𑀲𑁂 𑀦𑀭𑁄.
‘‘𑀦 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀯𑁂𑀲𑀺𑀬𑁄 𑀦𑀸𑀭𑀺𑀬𑁄 𑀕𑀫𑀦𑀺𑀬𑁄, 𑀦 𑀳𑁂𑀢𑀸 𑀩𑀦𑁆𑀥𑀓𑀺𑀬𑁄 𑀦𑀸𑀫, 𑀯𑀥𑀺𑀓𑀸𑀬𑁄 𑀦𑀸𑀫 𑀏𑀢𑀸𑀬𑁄, 𑀬𑀤𑀺𑀤𑀁 𑀯𑁂𑀲𑀺𑀬𑁄 𑀦𑀸𑀭𑀺𑀬𑁄 𑀕𑀫𑀦𑀺𑀬𑁄’’𑀢𑀺.
‘‘𑀘𑁄𑀭𑁄 𑀯𑀺𑀬 𑀯𑁂𑀡𑀺𑀓𑀢𑀸 𑀫𑀤𑀺𑀭𑀸𑀯 𑀤𑀺𑀤𑁆𑀥𑀸 𑀯𑀸𑀡𑀺𑀚𑁄 𑀯𑀺𑀬 𑀯𑀸𑀘𑀸𑀲𑀦𑁆𑀣𑀼𑀢𑀺𑀬𑁄 𑀇𑀲𑁆𑀲𑀲𑀺𑀗𑁆𑀕𑀫𑀺𑀯 𑀯𑀺𑀧𑀭𑀺𑀯𑀢𑁆𑀢𑀸𑀬𑁄 𑀉𑀭𑀕𑀫𑀺𑀯 𑀤𑀼𑀚𑀺𑀯𑁆𑀳𑀸𑀬𑁄. 𑀲𑁄𑀩𑁆𑀪𑀫𑀺𑀯 𑀧𑀝𑀺𑀘𑁆𑀙𑀦𑁆𑀦𑀸 𑀧𑀸𑀢𑀸𑀮𑀫𑀺𑀯 𑀤𑀼𑀧𑁆𑀧𑀽𑀭𑀸 𑀭𑀓𑁆𑀔𑀲𑀻 𑀯𑀺𑀬 𑀤𑀼𑀢𑁆𑀢𑁄𑀲𑀸 𑀬𑀫𑁄𑀯𑁂𑀓𑀦𑁆𑀢𑀳𑀸𑀭𑀺𑀬𑁄. 𑀲𑀺𑀔𑀻𑀭𑀺𑀯 𑀲𑀩𑁆𑀩𑀪𑀓𑁆𑀔𑀸 𑀦𑀤𑀻𑀭𑀺𑀯 𑀲𑀩𑁆𑀩𑀯𑀸𑀳𑀻 𑀅𑀦𑀺𑀮𑁄 𑀯𑀺𑀬 𑀬𑁂𑀦𑀓𑀸𑀫𑀁𑀘𑀭𑀸 𑀦𑁂𑀭𑀼 𑀯𑀺𑀬 𑀅𑀯𑀺𑀲𑁂𑀲𑀓𑀭𑀸 𑀯𑀺𑀲𑀭𑀼𑀓𑁆𑀔𑁄 𑀯𑀺𑀬 𑀦𑀺𑀘𑁆𑀘𑀨𑀮𑀺𑀢𑀸𑀬𑁄𑀢𑀺. 𑀪𑀯𑀢𑀺 𑀘 𑀧𑀦𑀼𑀢𑁆𑀢𑀭𑁂𑀢𑁆𑀣 𑀯𑀸𑀓𑁆𑀬𑀁 𑁋
‘‘‘𑀬𑀣𑀸 𑀘𑁄𑀭𑁄 𑀬𑀣𑀸 𑀤𑀺𑀤𑁆𑀥𑁄, 𑀯𑀸𑀡𑀺𑀚𑁄𑀯 𑀯𑀺𑀓𑀢𑁆𑀣𑀦𑀻;
𑀇𑀲𑁆𑀲𑀲𑀺𑀗𑁆𑀕𑀫𑀺𑀯 𑀧𑀭𑀺𑀯𑀢𑁆𑀢𑀸, 𑀤𑀼𑀚𑀺𑀯𑁆𑀳𑀸 𑀉𑀭𑀕𑁄 𑀯𑀺𑀬.
‘‘‘𑀲𑁄𑀩𑁆𑀪𑀫𑀺𑀯 𑀧𑀝𑀺𑀘𑁆𑀙𑀦𑁆𑀦𑀸, 𑀧𑀸𑀢𑀸𑀮𑀫𑀺𑀯 𑀤𑀼𑀧𑁆𑀧𑀼𑀭𑀸;
𑀭𑀓𑁆𑀔𑀲𑀻 𑀯𑀺𑀬 𑀤𑀼𑀢𑁆𑀢𑁄𑀲𑀸, 𑀬𑀫𑁄𑀯𑁂𑀓𑀦𑁆𑀢𑀳𑀸𑀭𑀺𑀬𑁄.
‘‘𑀬𑀣𑀸 𑀲𑀺𑀔𑀻 𑀦𑀤𑀻 𑀯𑀸𑀢𑁄, 𑀦𑁂𑀭𑀼𑀦𑀸𑀯 𑀲𑀫𑀸𑀕𑀢𑀸;
𑀯𑀺𑀲𑀭𑀼𑀓𑁆𑀔𑁄 𑀯𑀺𑀬 𑀦𑀺𑀘𑁆𑀘𑀨𑀮𑀸, 𑀦𑀸𑀲𑀬𑀦𑁆𑀢𑀺 𑀖𑀭𑁂 𑀪𑁄𑀕𑀁;
𑀭𑀢𑀦𑀦𑁆𑀢𑀓𑀭𑀺𑀢𑁆𑀣𑀺𑀬𑁄’’’𑀢𑀺.
𑀢𑀢𑁆𑀣 𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑀦𑁆𑀢𑀺 𑀧𑀞𑀫𑀁 𑀕𑀺𑀮𑀸𑀦𑀁 𑀧𑀘𑁆𑀙𑀸 𑀯𑀼𑀝𑁆𑀞𑀺𑀢𑀁. 𑀤𑀺𑀝𑁆𑀞𑀸 𑀫𑀬𑀸𑀢𑀺 𑀅𑀢𑀻𑀢𑁂 𑀓𑀺𑀭 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀲𑀫𑁆𑀧𑀦𑁆𑀦𑀩𑀮𑀯𑀸𑀳𑀦𑀢𑀸𑀬 𑀓𑁄𑀲𑀮𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀓𑁄𑀲𑀮𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀲𑀕𑀩𑁆𑀪𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 ¶ 𑀕𑀦𑁆𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀥𑀻𑀢𑀭𑀁 𑀯𑀺𑀚𑀸𑀬𑀺. 𑀭𑀜𑁆𑀜𑁄 𑀧𑀦 𑀧𑀓𑀢𑀺𑀬𑀸 𑀥𑀻𑀢𑀸 𑀯𑀸 𑀧𑀼𑀢𑁆𑀢𑁄 𑀯𑀸 𑀦𑀢𑁆𑀣𑀺, 𑀲𑁄 𑀢𑀼𑀲𑁆𑀲𑀺𑀢𑁆𑀯𑀸, ‘‘𑀪𑀤𑁆𑀤𑁂, 𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑀸 𑀕𑀳𑀺𑀢𑀓𑀁 𑀓𑀢𑁆𑀯𑀸 ¶ 𑀞𑀧𑁂𑀲𑀺. 𑀢𑀲𑁆𑀲𑀸 𑀧𑀦 𑀓𑀼𑀫𑀸𑀭𑀺𑀓𑀸𑀬 ‘‘𑀓𑀡𑁆𑀳𑀸’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀣𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀸𑀬 𑀫𑀸𑀢𑀸 𑀢𑀁 𑀆𑀳 𑁋 ‘‘𑀅𑀫𑁆𑀫, 𑀧𑀺𑀢𑀭𑀸 𑀢𑀯 𑀯𑀭𑁄 𑀤𑀺𑀦𑁆𑀦𑁄, 𑀢𑀫𑀳𑀁 𑀕𑀳𑁂𑀢𑁆𑀯𑀸 𑀞𑀧𑁂𑀲𑀺𑀁, 𑀢𑀯 𑀭𑀼𑀘𑁆𑀘𑀦𑀓𑀁 𑀯𑀭𑀁 𑀕𑀡𑁆𑀳𑀸’’𑀢𑀺. 𑀲𑀸 ‘‘𑀅𑀫𑁆𑀫, 𑀫𑀬𑁆𑀳𑀁 𑀅𑀜𑁆𑀜𑀁 𑀅𑀯𑀺𑀚𑁆𑀚𑀫𑀸𑀦𑀁 𑀦𑀢𑁆𑀣𑀺, 𑀧𑀢𑀺𑀕𑁆𑀕𑀳𑀡𑀢𑁆𑀣𑀸𑀬 𑀫𑁂 𑀲𑀬𑀁 𑀯𑀭𑀁 𑀓𑀸𑀭𑁂𑀳𑀻’’𑀢𑀺 𑀓𑀺𑀮𑁂𑀲𑀩𑀳𑀼𑀮𑀢𑀸𑀬 𑀳𑀺𑀭𑁄𑀢𑁆𑀢𑀧𑁆𑀧𑀁 ¶ 𑀪𑀺𑀦𑁆𑀤𑀺𑀢𑁆𑀯𑀸 𑀫𑀸𑀢𑀭𑀁 𑀆𑀳. 𑀲𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀬𑀣𑀸𑀭𑀼𑀘𑀺𑀢𑀁 𑀧𑀢𑀺𑀁 𑀕𑀡𑁆𑀳𑀢𑀽’’𑀢𑀺 𑀯𑀢𑁆𑀯𑀸 𑀲𑀬𑀁 𑀯𑀭𑀁 𑀖𑁄𑀲𑀸𑀧𑁂𑀲𑀺. 𑀭𑀸𑀚𑀗𑁆𑀕𑀡𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀩𑀳𑀽 𑀧𑀼𑀭𑀺𑀲𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀓𑀡𑁆𑀳𑀸 𑀧𑀼𑀧𑁆𑀨𑀲𑀫𑀼𑀕𑁆𑀕𑀁 𑀆𑀤𑀸𑀬 𑀉𑀢𑁆𑀢𑀭𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑀸 𑀑𑀮𑁄𑀓𑁂𑀦𑁆𑀢𑀻 𑀏𑀓𑀫𑁆𑀧𑀺 𑀦 𑀭𑁄𑀘𑁂𑀲𑀺.
𑀢𑀤𑀸 𑀧𑀡𑁆𑀟𑀼𑀭𑀸𑀚𑀕𑁄𑀢𑁆𑀢𑀢𑁄 𑀅𑀚𑁆𑀚𑀼𑀦𑁄 𑀦𑀓𑀼𑀮𑁄 𑀪𑀻𑀫𑀲𑁂𑀦𑁄 𑀬𑀼𑀥𑀺𑀝𑁆𑀞𑀺𑀮𑁄 𑀲𑀳𑀤𑁂𑀯𑁄𑀢𑀺 𑀇𑀫𑁂 𑀧𑀜𑁆𑀘 𑀧𑀡𑁆𑀟𑀼𑀭𑀸𑀚𑀧𑀼𑀢𑁆𑀢𑀸 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑁆𑀯𑀸 ‘‘𑀤𑁂𑀲𑀘𑀸𑀭𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀘𑀭𑀦𑁆𑀢𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀓𑁄𑀮𑀸𑀳𑀮𑀁 𑀲𑀼𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀜𑀢𑁆𑀯𑀸 ‘‘𑀫𑀬𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀓𑀜𑁆𑀘𑀦𑀭𑀽𑀧𑀲𑀫𑀸𑀦𑀭𑀽𑀧𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀁𑀲𑀼. 𑀓𑀡𑁆𑀳𑀸 𑀢𑁂 𑀤𑀺𑀲𑁆𑀯𑀸 𑀧𑀜𑁆𑀘𑀲𑀼𑀧𑀺 𑀢𑁂𑀲𑀼 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀻𑀲𑁂𑀲𑀼 𑀫𑀸𑀮𑀸𑀘𑀼𑀫𑁆𑀩𑀝𑀓𑀸𑀦𑀺 𑀔𑀺𑀧𑀺𑀢𑁆𑀯𑀸, ‘‘𑀅𑀫𑁆𑀫, 𑀇𑀫𑁂 𑀧𑀜𑁆𑀘 𑀚𑀦𑁂 𑀯𑀭𑁂𑀫𑀻’’𑀢𑀺 𑀆𑀳. 𑀲𑀸𑀧𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀯𑀭𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 ‘‘𑀦 𑀮𑀪𑀺𑀲𑁆𑀲𑀢𑀻’’𑀢𑀺 𑀅𑀯𑀢𑁆𑀯𑀸 𑀅𑀦𑀢𑁆𑀢𑀫𑀦𑁄𑀯 ‘‘𑀓𑀺𑀁𑀚𑀸𑀢𑀺𑀓𑀸 𑀓𑀲𑁆𑀲 𑀧𑀼𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀡𑁆𑀟𑀼𑀭𑀸𑀚𑀧𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀢𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀅𑀤𑀸𑀲𑀺.
𑀲𑀸 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑁂 𑀢𑁂 𑀓𑀺𑀮𑁂𑀲𑀯𑀲𑁂𑀦 𑀲𑀗𑁆𑀕𑀡𑁆𑀳𑀺. 𑀏𑀓𑁄 𑀧𑀦𑀲𑁆𑀲𑀸 𑀧𑀭𑀺𑀘𑀸𑀭𑀓𑁄 𑀔𑀼𑀚𑁆𑀚𑁄 𑀧𑀻𑀞𑀲𑀧𑁆𑀧𑀻 𑀅𑀢𑁆𑀣𑀺. 𑀲𑀸 𑀧𑀜𑁆𑀘 𑀭𑀸𑀚𑀧𑀼𑀢𑁆𑀢𑁂 𑀓𑀺𑀮𑁂𑀲𑀯𑀲𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀲𑀁 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀓𑀺𑀮𑁂𑀲𑁂𑀦 𑀅𑀦𑀼𑀟𑀬𑁆𑀳𑀫𑀸𑀦𑀸 𑀔𑀼𑀚𑁆𑀚𑁂𑀦 𑀲𑀤𑁆𑀥𑀺𑀁 𑀧𑀸𑀧𑀁 𑀓𑀭𑁄𑀢𑀺, 𑀢𑁂𑀦 𑀘 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀻 𑁋 ‘‘𑀫𑀬𑁆𑀳𑀁 𑀢𑀬𑀸 𑀲𑀤𑀺𑀲𑁄 𑀧𑀺𑀬𑁄 𑀦𑀢𑁆𑀣𑀺, 𑀭𑀸𑀚𑀧𑀼𑀢𑁆𑀢𑁂 𑀫𑀸𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀢𑀯 𑀧𑀸𑀤𑁂 𑀫𑀓𑁆𑀔𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀇𑀢𑀭𑁂𑀲𑀼𑀧𑀺 𑀚𑁂𑀝𑁆𑀞𑀪𑀸𑀢𑀺𑀓𑁂𑀦 𑀫𑀺𑀲𑁆𑀲𑀻𑀪𑀽𑀢𑀓𑀸𑀮𑁂 𑁋 ‘‘𑀇𑀫𑁂𑀳𑀺 𑀘𑀢𑀽𑀳𑀺 𑀢𑁆𑀯𑀫𑁂𑀯 𑀫𑀬𑁆𑀳𑀁 𑀧𑀺𑀬𑀢𑀭𑁄, 𑀫𑀬𑀸 𑀚𑀻𑀯𑀺𑀢𑀫𑁆𑀧𑀺 𑀢𑀯𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁, 𑀫𑀫 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀢𑀼𑀬𑁆𑀳𑀜𑁆𑀜𑁂𑀯 𑀭𑀚𑁆𑀚𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀇𑀢𑀭𑁂𑀳𑀺 𑀲𑀤𑁆𑀥𑀺𑀁 𑀫𑀺𑀲𑁆𑀲𑀻𑀪𑀽𑀢𑀓𑀸𑀮𑁂𑀧𑀺 𑀏𑀲𑁂𑀯 ¶ 𑀦𑀬𑁄. 𑀢𑁂 ‘‘𑀅𑀬𑀁 𑀅𑀫𑁆𑀳𑁂 𑀧𑀺𑀬𑀸𑀬𑀢𑀺, 𑀇𑀲𑁆𑀲𑀭𑀺𑀬𑀜𑁆𑀘 𑀦𑁄 𑀏𑀢𑀁 𑀦𑀺𑀲𑁆𑀲𑀸𑀬 𑀚𑀸𑀢’’𑀦𑁆𑀢𑀺 𑀢𑀲𑁆𑀲𑀸 𑀅𑀢𑀺𑀯𑀺𑀬 𑀢𑀼𑀲𑁆𑀲𑀦𑁆𑀢𑀺.
𑀲𑀸 𑀏𑀓𑀤𑀺𑀯𑀲𑀁 𑀆𑀩𑀸𑀥𑀺𑀓𑀸 𑀅𑀳𑁄𑀲𑀺. 𑀅𑀣 𑀦𑀁 𑀢𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀏𑀓𑁄 𑀲𑀻𑀲𑀁 𑀲𑀫𑁆𑀩𑀸𑀳𑀦𑁆𑀢𑁄 𑀦𑀺𑀲𑀻𑀤𑀺, 𑀲𑁂𑀲𑀸 𑀏𑀓𑁂𑀓𑀁 𑀳𑀢𑁆𑀣𑀜𑁆𑀘 𑀧𑀸𑀤𑀜𑁆𑀘. 𑀔𑀼𑀚𑁆𑀚𑁄 𑀧𑀦 𑀧𑀸𑀤𑀫𑀽𑀮𑁂 𑀦𑀺𑀲𑀻𑀤𑀺. 𑀲𑀸 𑀲𑀻𑀲𑀁 𑀲𑀫𑁆𑀩𑀸𑀳𑀫𑀸𑀦𑀲𑁆𑀲 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀅𑀚𑁆𑀚𑀼𑀦𑀓𑀼𑀫𑀸𑀭𑀲𑁆𑀲 𑁋 ‘‘𑀫𑀬𑁆𑀳𑀁 𑀢𑀬𑀸 𑀧𑀺𑀬𑀢𑀭𑁄 𑀦𑀢𑁆𑀣𑀺, 𑀚𑀻𑀯𑀫𑀸𑀦𑀸 𑀢𑀼𑀬𑁆𑀳𑀁 𑀚𑀻𑀯𑀺𑀲𑁆𑀲𑀸𑀫𑀺, 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀢𑀼𑀬𑁆𑀳𑀁 𑀭𑀚𑁆𑀚𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀻𑀲𑁂𑀦 𑀲𑀜𑁆𑀜𑀁 𑀤𑀤𑀫𑀸𑀦𑀸 𑀢𑀁 𑀲𑀗𑁆𑀕𑀡𑁆𑀳𑀺, 𑀇𑀢𑀭𑁂𑀲𑀫𑁆𑀧𑀺 𑀳𑀢𑁆𑀣𑀧𑀸𑀤𑁂𑀳𑀺 𑀢𑀣𑁂𑀯 𑀲𑀜𑁆𑀜𑀁 𑀅𑀤𑀸𑀲𑀺. 𑀔𑀼𑀚𑁆𑀚𑀲𑁆𑀲 𑀧𑀦 𑁋 ‘‘𑀢𑁆𑀯𑀜𑁆𑀜𑁂𑀯 𑀫𑀫 𑀧𑀺𑀬𑁄, 𑀢𑀯𑀢𑁆𑀣𑀸𑀬 𑀅𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀚𑀺𑀯𑁆𑀳𑀸𑀬 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑁂 𑀓𑀣𑀺𑀢𑀪𑀸𑀯𑁂𑀦 ¶ 𑀢𑀸𑀬 𑀲𑀜𑁆𑀜𑀸𑀬 𑀢𑀫𑀢𑁆𑀣𑀁 𑀚𑀸𑀦𑀺𑀁𑀲𑀼. 𑀢𑁂𑀲𑀼 𑀲𑁂𑀲𑀸 𑀅𑀢𑁆𑀢𑀦𑁄 𑀤𑀺𑀦𑁆𑀦𑀲𑀜𑁆𑀜𑀸𑀬𑁂𑀯 𑀚𑀸𑀦𑀺𑀁𑀲𑀼. 𑀅𑀚𑁆𑀚𑀼𑀦𑀓𑀼𑀫𑀸𑀭𑁄 𑀧𑀦 𑀢𑀲𑁆𑀲𑀸 𑀳𑀢𑁆𑀣𑀧𑀸𑀤𑀚𑀺𑀯𑁆𑀳𑀸𑀯𑀺𑀓𑀸𑀭𑁂 ¶ 𑀤𑀺𑀲𑁆𑀯𑀸 𑁋 ‘‘𑀬𑀣𑀸 𑀫𑀬𑁆𑀳𑀁, 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀇𑀫𑀸𑀬 𑀲𑀜𑁆𑀜𑀸 𑀤𑀺𑀦𑁆𑀦𑀸 𑀪𑀯𑀺𑀲𑁆𑀲𑀢𑀺, 𑀔𑀼𑀚𑁆𑀚𑁂𑀦 𑀘𑀸𑀧𑀺 𑀲𑀤𑁆𑀥𑀺𑀁 𑀏𑀢𑀺𑀲𑁆𑀲𑀸𑀬 𑀲𑀦𑁆𑀣𑀯𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀸𑀢𑀭𑁄 𑀕𑀳𑁂𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀤𑀺𑀝𑁆𑀞𑀸 𑀯𑁄 𑀧𑀜𑁆𑀘𑀧𑀢𑀺𑀓𑀸 𑀫𑀫 𑀲𑀻𑀲𑀯𑀺𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀻’’𑀢𑀺? ‘‘𑀆𑀫, 𑀤𑀺𑀝𑁆𑀞𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀁 𑀚𑀸𑀦𑀸𑀣𑀸’’𑀢𑀺? ‘‘𑀦 𑀚𑀸𑀦𑀸𑀫𑀸’’𑀢𑀺. ‘‘𑀇𑀤𑀁 𑀦𑀸𑀫𑁂𑀢𑁆𑀣 𑀓𑀸𑀭𑀡𑀁, 𑀢𑀼𑀫𑁆𑀳𑀸𑀓𑀁 𑀧𑀦 𑀳𑀢𑁆𑀣𑀧𑀸𑀤𑁂𑀳𑀺 𑀤𑀺𑀦𑁆𑀦𑀲𑀜𑁆𑀜𑀸𑀬 𑀓𑀸𑀭𑀡𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀚𑀸𑀦𑀸𑀫𑀸’’𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀤𑀸𑀲𑀺, 𑀔𑀼𑀚𑁆𑀚𑀲𑁆𑀲 𑀚𑀺𑀯𑁆𑀳𑀸𑀯𑀺𑀓𑀸𑀭𑁂𑀦 𑀲𑀜𑁆𑀜𑀸𑀤𑀸𑀦𑀲𑁆𑀲 𑀓𑀸𑀭𑀡𑀁 𑀚𑀸𑀦𑀸𑀣𑀸’’𑀢𑀺? ‘‘𑀦 𑀚𑀸𑀦𑀸𑀫𑀸’’𑀢𑀺. 𑀅𑀣 𑀦𑁂𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀺𑀦𑀸𑀧𑀺 𑀲𑀤𑁆𑀥𑀺𑀁 𑀏𑀢𑀸𑀬 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀲𑀼 𑀅𑀲𑀤𑁆𑀤𑀳𑀦𑁆𑀢𑁂𑀲𑀼 𑀔𑀼𑀚𑁆𑀚𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀲𑁄 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺.
𑀢𑁂 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑀸 𑀳𑀼𑀢𑁆𑀯𑀸 𑁋 ‘‘𑀅𑀳𑁄 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀧𑀸𑀧𑁄 𑀤𑀼𑀲𑁆𑀲𑀻𑀮𑁄, 𑀫𑀸𑀤𑀺𑀲𑁂 𑀦𑀸𑀫 𑀚𑀸𑀢𑀺𑀲𑀫𑁆𑀧𑀦𑁆𑀦𑁂 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁂 𑀧𑀳𑀸𑀬 𑀏𑀯𑀭𑀽𑀧𑁂𑀦 𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑁂𑀦 𑀔𑀼𑀚𑁆𑀚𑁂𑀦 𑀲𑀤𑁆𑀥𑀺𑀁 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀓𑁄 𑀦𑀸𑀫 𑀧𑀡𑁆𑀟𑀺𑀢𑀚𑀸𑀢𑀺𑀓𑁄 𑀏𑀯𑀁 𑀦𑀺𑀮𑁆𑀮𑀚𑁆𑀚𑀸𑀳𑀺 𑀧𑀸𑀧𑀥𑀫𑁆𑀫𑀸𑀳𑀺 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀭𑀫𑀺𑀲𑁆𑀲𑀢𑀻’’𑀢𑀺 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀸𑀢𑀼𑀕𑀸𑀫𑀁 𑀕𑀭𑀳𑀺𑀢𑁆𑀯𑀸 ‘‘𑀅𑀮𑀁 𑀦𑁄 𑀖𑀭𑀸𑀯𑀸𑀲𑁂𑀦𑀸’’𑀢𑀺 𑀧𑀜𑁆𑀘 𑀚𑀦𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑀸. 𑀓𑀼𑀡𑀸𑀮𑁄 𑀧𑀦 𑀲𑀓𑀼𑀡𑀭𑀸𑀚𑀸 𑀢𑀤𑀸 𑀅𑀚𑁆𑀚𑀼𑀦𑀓𑀼𑀫𑀸𑀭𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀸 𑀫𑀬𑀸’’𑀢𑀺𑀆𑀤𑀺𑀫𑀸𑀳.
𑀢𑀢𑁆𑀣 ¶ 𑀤𑁆𑀯𑁂𑀧𑀺𑀢𑀺𑀓𑀸𑀢𑀺 𑀓𑁄𑀲𑀮𑀭𑀜𑁆𑀜𑁄 𑀘 𑀓𑀸𑀲𑀺𑀭𑀜𑁆𑀜𑁄 𑀘 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀧𑀜𑁆𑀘𑀧𑀢𑀺𑀓𑀸𑀬𑀸𑀢𑀺 𑀧𑀜𑁆𑀘𑀧𑀢𑀺𑀓𑀸, 𑀬-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄. 𑀧𑀝𑀺𑀩𑀦𑁆𑀥𑀦𑁆𑀢𑀺𑀬𑀸𑀢𑀺 𑀧𑀝𑀺𑀩𑀦𑁆𑀥𑀫𑀸𑀦𑀸. 𑀓𑀩𑀦𑁆𑀥𑁂𑀢𑀺 𑀢𑀲𑁆𑀲 𑀓𑀺𑀭 𑀕𑀻𑀯𑀸 𑀑𑀦𑀫𑀺𑀢𑁆𑀯𑀸 𑀉𑀭𑀁 𑀅𑀮𑁆𑀮𑀻𑀦𑀸, 𑀢𑀲𑁆𑀫𑀸 𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀔𑀸𑀬𑀢𑀺. 𑀧𑀜𑁆𑀘 𑀫𑀢𑀺𑀘𑁆𑀘𑀸𑀢𑀺 𑀏𑀢𑁂 𑀧𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀔𑀼𑀚𑁆𑀚𑀯𑀸𑀫𑀦𑀓𑁂𑀦𑀸𑀢𑀺 𑀔𑀼𑀚𑁆𑀚𑁂𑀦 𑀯𑀸𑀫𑀦𑀓𑁂𑀦.
𑀇𑀤𑀁 𑀯𑀢𑁆𑀯𑀸 𑀅𑀧𑀭𑀸𑀦𑀺𑀧𑀺 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 ‘‘𑀤𑀺𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀢𑀸𑀯 𑀅𑀬𑀁 𑀯𑀺𑀪𑀸𑀯𑀦𑀸 𑁋 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀁 𑀦𑀺𑀲𑁆𑀲𑀸𑀬 𑀲𑀘𑁆𑀘𑀢𑀧𑀸𑀧𑀻 𑀦𑀸𑀫 𑀲𑁂𑀢𑀲𑀫𑀡𑀻 𑀲𑀼𑀲𑀸𑀦𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀯𑀲𑀫𑀸𑀦𑀸 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀲𑀓𑀮𑀦𑀕𑀭𑁂 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀸𑀓𑀝𑀸 𑀅𑀳𑁄𑀲𑀺. 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀔𑀺𑀧𑀺𑀢𑁆𑀯𑀸𑀧𑀺 𑀔𑀮𑀺𑀢𑁆𑀯𑀸𑀧𑀺 ‘‘𑀦𑀫𑁄 𑀲𑀘𑁆𑀘𑀢𑀧𑀸𑀧𑀺𑀬𑀸’’𑀢𑀺 𑀯𑀤𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀙𑀡𑀓𑀸𑀮𑁂 𑀧𑀞𑀫𑀤𑀺𑀯𑀲𑁂 𑀢𑀸𑀯 𑀲𑀼𑀯𑀡𑁆𑀡𑀓𑀸𑀭𑀸 𑀕𑀡𑀩𑀦𑁆𑀥𑁂𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀫𑀘𑁆𑀙𑀫𑀁𑀲𑀲𑀼𑀭𑀸𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 ¶ 𑀲𑀼𑀭𑀸𑀧𑀸𑀦𑀁 𑀆𑀭𑀪𑀺𑀁𑀲𑀼. 𑀅𑀣𑁂𑀓𑁄 𑀲𑀼𑀯𑀡𑁆𑀡𑀓𑀸𑀭𑁄 𑀲𑀼𑀭𑀸𑀧𑀺𑀝𑁆𑀞𑀓𑀁 𑀙𑀟𑁆𑀟𑁂𑀦𑁆𑀢𑁄 𑁋 ‘‘𑀦𑀫𑁄 𑀲𑀘𑁆𑀘𑀢𑀧𑀸𑀧𑀺𑀬𑀸’’𑀢𑀺 𑀯𑀢𑁆𑀯𑀸 𑀏𑀓𑁂𑀦 𑀧𑀡𑁆𑀟𑀺𑀢𑁂𑀦 𑁋 ‘‘𑀅𑀫𑁆𑀪𑁄 𑀅𑀦𑁆𑀥𑀩𑀸𑀮, 𑀘𑀮𑀘𑀺𑀢𑁆𑀢𑀸𑀬 𑀇𑀢𑁆𑀣𑀺𑀬𑀸 𑀦𑀫𑁄 𑀓𑀭𑁄𑀲𑀺, 𑀅𑀳𑁄 𑀩𑀸𑀮𑁄’’𑀢𑀺 𑀯𑀼𑀢𑁆𑀢𑁂 𑁋 ‘‘𑀲𑀫𑁆𑀫, 𑀫𑀸 𑀏𑀯𑀁 𑀅𑀯𑀘, 𑀫𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁 𑀓𑀭𑀻’’𑀢𑀺 𑀆𑀳. 𑀅𑀣 𑀦𑀁 𑀲𑁄 ‘‘𑀤𑀼𑀩𑁆𑀩𑀼𑀤𑁆𑀥𑀺 𑀢𑀼𑀡𑁆𑀳𑀻 𑀳𑁄𑀳𑀺, 𑀲𑀳𑀲𑁆𑀲𑁂𑀦 𑀅𑀩𑁆𑀪𑀼𑀢𑀁 𑀓𑀭𑁄𑀳𑀺, 𑀅𑀳𑀁 𑀢𑁂 𑀲𑀘𑁆𑀘𑀢𑀧𑀸𑀧𑀺𑀁 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀲𑀼𑀭𑀸𑀧𑀺𑀝𑁆𑀞𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺𑀲𑁆𑀲𑀸𑀫𑀺 ¶ , 𑀫𑀸𑀢𑀼𑀕𑀸𑀫𑁄 𑀥𑀼𑀯𑀲𑀻𑀮𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀲𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀳𑀲𑁆𑀲𑁂𑀦 𑀅𑀩𑁆𑀪𑀼𑀢𑀫𑀓𑀸𑀲𑀺. 𑀲𑁄 𑀢𑀁 𑀅𑀜𑁆𑀜𑁂𑀲𑀁 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀢𑀸𑀧𑀲𑀯𑁂𑀲𑁂𑀦 𑀲𑀼𑀲𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀲𑀽𑀭𑀺𑀬𑀁 𑀦𑀫𑀲𑁆𑀲𑀦𑁆𑀢𑁄 𑀅𑀝𑁆𑀞𑀸𑀲𑀺.
𑀲𑀸 𑀪𑀺𑀓𑁆𑀔𑀸𑀬 𑀕𑀘𑁆𑀙𑀫𑀸𑀦𑀸 𑀦𑀁 𑀤𑀺𑀲𑁆𑀯𑀸 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀢𑀸𑀧𑀲𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀢𑀸𑀯 𑀲𑀼𑀲𑀸𑀦𑀧𑀲𑁆𑀲𑁂 𑀯𑀲𑀸𑀫𑀺, 𑀅𑀬𑀁 𑀫𑀚𑁆𑀛𑁂 𑀲𑀼𑀲𑀸𑀦𑀲𑁆𑀲 𑀯𑀲𑀢𑀺, 𑀪𑀯𑀺𑀢𑀩𑁆𑀩𑀫𑀲𑁆𑀲𑀩𑁆𑀪𑀦𑁆𑀢𑀭𑁂 𑀲𑀦𑁆𑀢𑀥𑀫𑁆𑀫𑁂𑀦, 𑀯𑀦𑁆𑀤𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺. 𑀲𑁄 𑀦𑁂𑀯 𑀑𑀮𑁄𑀓𑁂𑀲𑀺 𑀦 𑀆𑀮𑀧𑀺. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀢𑀢𑀺𑀬𑀤𑀺𑀯𑀲𑁂 𑀧𑀦 𑀯𑀦𑁆𑀤𑀺𑀢𑀓𑀸𑀮𑁂 𑀅𑀥𑁄𑀫𑀼𑀔𑁄𑀯 ‘‘𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀘𑀢𑀼𑀢𑁆𑀣𑀤𑀺𑀯𑀲𑁂 ¶ ‘‘𑀓𑀘𑁆𑀘𑀺 𑀪𑀺𑀓𑁆𑀔𑀸𑀬 𑀦 𑀓𑀺𑀮𑀫𑀲𑀻’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀲𑀸 ‘‘𑀧𑀝𑀺𑀲𑀦𑁆𑀣𑀸𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀸 𑀧𑀓𑁆𑀓𑀸𑀫𑀺. 𑀧𑀜𑁆𑀘𑀫𑀤𑀺𑀯𑀲𑁂 𑀩𑀳𑀼𑀢𑀭𑀁 𑀧𑀝𑀺𑀲𑀦𑁆𑀣𑀸𑀭𑀁 𑀮𑀪𑀺𑀢𑁆𑀯𑀸 𑀣𑁄𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀕𑀢𑀸. 𑀙𑀝𑁆𑀞𑁂 𑀤𑀺𑀯𑀲𑁂 𑀧𑀦 𑀢𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑁋 ‘‘𑀪𑀕𑀺𑀦𑀺, 𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁄’’𑀢𑀺 𑀯𑀢𑁆𑀯𑀸 𑁋 ‘‘𑀅𑀬𑁆𑀬, 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣, 𑀦𑀕𑀭𑁂 𑀙𑀡𑁄 𑀖𑀼𑀝𑁆𑀞𑁄, 𑀢𑀢𑁆𑀣 𑀓𑀻𑀴𑀦𑁆𑀢𑀸𑀦𑀁 𑀏𑀲 𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑁂 𑁋 ‘‘𑀏𑀢𑁆𑀣 𑀦𑀸𑀫𑁂𑀲𑁄 𑀲𑀤𑁆𑀤𑁄’’𑀢𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑁋 ‘‘𑀪𑀕𑀺𑀦𑀺, 𑀓𑀢𑀺 𑀪𑀢𑁆𑀢𑀸𑀦𑀺 𑀅𑀢𑀺𑀓𑁆𑀓𑀫𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀘𑀢𑁆𑀢𑀸𑀭𑀺, 𑀅𑀬𑁆𑀬, 𑀢𑀼𑀫𑁆𑀳𑁂 𑀧𑀦 𑀓𑀢𑀺 𑀅𑀢𑀺𑀓𑁆𑀓𑀫𑁂𑀣𑀸’’𑀢𑀺? ‘‘𑀲𑀢𑁆𑀢 𑀪𑀕𑀺𑀦𑀻’’𑀢𑀺. 𑀇𑀤𑀁 𑀲𑁄 𑀫𑀼𑀲𑀸 𑀅𑀪𑀸𑀲𑀺. 𑀤𑁂𑀯𑀲𑀺𑀓𑀁 𑀳𑁂𑀲 𑀭𑀢𑁆𑀢𑀺𑀁 𑀪𑀼𑀜𑁆𑀚𑀢𑀺. 𑀲𑁄 𑀢𑀁 ‘‘𑀓𑀢𑀺 𑀢𑁂 𑀪𑀕𑀺𑀦𑀺 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀸𑀬𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀸𑀬 ‘‘𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀻’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀓𑀢𑀺 𑀯𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑁄 ‘‘𑀇𑀤𑀁 𑀫𑁂 𑀙𑀝𑁆𑀞𑀁 𑀯𑀲𑁆𑀲’’𑀦𑁆𑀢𑀺 𑀆𑀳. 𑀅𑀣 𑀦𑀁 ‘‘𑀅𑀢𑁆𑀣𑀺 𑀧𑀦 𑀢𑁂 𑀪𑀕𑀺𑀦𑀺 𑀲𑀦𑁆𑀢𑀥𑀫𑁆𑀫𑀸𑀥𑀺𑀕𑀫𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀢𑁆𑀣𑀺, 𑀅𑀬𑁆𑀬, 𑀢𑀼𑀫𑁆𑀳𑀸𑀓𑀁 𑀧𑀦 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑁋 ‘‘𑀪𑀕𑀺𑀦𑀺, 𑀫𑀬𑀁 𑀦𑁂𑀯 𑀓𑀸𑀫𑀲𑀼𑀔𑀁 𑀮𑀪𑀸𑀫, 𑀦 𑀦𑁂𑀓𑁆𑀔𑀫𑁆𑀫𑀲𑀼𑀔𑀁, 𑀓𑀺𑀁 𑀅𑀫𑁆𑀳𑀸𑀓𑀁𑀬𑁂𑀯 𑀉𑀡𑁆𑀳𑁄 𑀦𑀺𑀭𑀬𑁄, 𑀫𑀳𑀸𑀚𑀦𑀲𑁆𑀲 𑀓𑀺𑀭𑀺𑀬𑀁 𑀓𑀭𑁄𑀫, 𑀅𑀳𑀁 𑀕𑀺𑀳𑀻 𑀪𑀯𑀺𑀲𑁆𑀲𑀸𑀫𑀺, 𑀅𑀢𑁆𑀣𑀺 𑀫𑁂 𑀫𑀸𑀢𑀼 𑀲𑀦𑁆𑀢𑀓𑀁 𑀥𑀦𑀁, 𑀦 𑀲𑀓𑁆𑀓𑁄𑀫𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼’’𑀦𑁆𑀢𑀺 𑀆𑀳. 𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀘𑀮𑀘𑀺𑀢𑁆𑀢𑀢𑀸𑀬 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑁋 ‘‘𑀅𑀬𑁆𑀬, 𑀅𑀳𑀫𑁆𑀧𑀺 𑀉𑀓𑁆𑀓𑀡𑁆𑀞𑀺𑀢𑀸, 𑀲𑀘𑁂 𑀧𑀦 𑀫𑀁 𑀦 𑀙𑀟𑁆𑀟𑁂𑀲𑁆𑀲𑀣, 𑀅𑀳𑀫𑁆𑀧𑀺 𑀕𑀺𑀳𑀺𑀦𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀲𑁄 ‘‘𑀏𑀳𑀺 𑀢𑀁 𑀦 𑀙𑀟𑁆𑀟𑁂𑀲𑁆𑀲𑀸𑀫𑀺, 𑀪𑀭𑀺𑀬𑀸 𑀫𑁂 𑀪𑀯𑀺𑀲𑁆𑀲𑀲𑀻’’𑀢𑀺 𑀢𑀁 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀲𑀁𑀯𑀲𑀺𑀢𑁆𑀯𑀸 𑀲𑀼𑀭𑀸𑀧𑀸𑀦𑀫𑀡𑁆𑀟𑀧𑀁 ¶ 𑀕𑀦𑁆𑀢𑁆𑀯𑀸 𑀢𑀸𑀬 𑀲𑀼𑀭𑀸𑀧𑀺𑀝𑁆𑀞𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀼𑀭𑀁 𑀧𑀺𑀯𑀺. 𑀇𑀢𑀭𑁄 𑀲𑀳𑀲𑁆𑀲𑀁 𑀚𑀺𑀢𑁄. 𑀲𑀸 𑀢𑀁 𑀧𑀝𑀺𑀘𑁆𑀘 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺. 𑀢𑀤𑀸 𑀓𑀼𑀡𑀸𑀮𑁄 𑀲𑀼𑀭𑀸𑀥𑀼𑀢𑁆𑀢𑀓𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀸 𑀫𑀬𑀸’’𑀢𑀺𑀆𑀤𑀺𑀫𑀸𑀳.
𑀢𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀢𑀻𑀢𑀓𑀣𑀸 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀓𑀸𑀓𑀯𑀢𑀻𑀚𑀸𑀢𑀓𑀯𑀡𑁆𑀡𑀦𑀸𑀬𑀁 (𑀚𑀸. 𑀅𑀝𑁆𑀞. 𑁩.𑁪.𑀓𑀸𑀓𑀯𑀢𑀻𑀚𑀸𑀢𑀓𑀯𑀡𑁆𑀡𑀦𑀸) 𑀯𑀺𑀢𑁆𑀣𑀸𑀭𑀺𑀢𑀸. 𑀢𑀤𑀸 𑀧𑀦 𑀓𑀼𑀡𑀸𑀮𑁄 𑀕𑀭𑀼𑀴𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀸 𑀫𑀬𑀸’’𑀢𑀺𑀆𑀤𑀺𑀫𑀸𑀳.
𑀘𑀢𑀼𑀢𑁆𑀣𑀯𑀢𑁆𑀣𑀼𑀲𑁆𑀫𑀺𑀁 𑀅𑀢𑀻𑀢𑁂 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑁄𑀲𑀮𑀭𑀸𑀚𑀸𑀦𑀁 𑀯𑀥𑀺𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀕𑀩𑁆𑀪𑀺𑀦𑀺𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀕𑀩𑁆𑀪𑀺𑀦𑀺𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀢𑀁 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀲𑀸 𑀧𑀭𑀺𑀧𑀓𑁆𑀓𑀕𑀩𑁆𑀪𑀸 𑀲𑀼𑀯𑀡𑁆𑀡𑀭𑀽𑀧𑀓𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑁋 ‘‘𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀫𑁆𑀧𑀺 𑀦𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 ‘𑀏𑀲 ¶ 𑀫𑁂 ¶ 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀼𑀢𑁆𑀢𑁄, 𑀓𑀺𑀁 𑀇𑀫𑀺𑀦𑀸’𑀢𑀺 𑀫𑀸𑀭𑀸𑀧𑁂𑀲𑁆𑀲𑀢𑀺, 𑀫𑀸 𑀫𑁂 𑀧𑀼𑀢𑁆𑀢𑁄 𑀧𑀭𑀳𑀢𑁆𑀣𑁂 𑀫𑀭𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀥𑀸𑀢𑀺𑀁 𑀆𑀳 𑁋 ‘‘𑀅𑀫𑁆𑀫, 𑀇𑀫𑀁 𑀤𑀸𑀭𑀓𑀁 𑀧𑀺𑀮𑁄𑀢𑀺𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀏𑀳𑀻’’𑀢𑀺. 𑀥𑀸𑀢𑀻 𑀢𑀣𑀸 𑀓𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀸𑀕𑀫𑀺. 𑀓𑁄𑀲𑀮𑀭𑀸𑀚𑀸𑀧𑀺 𑀫𑀭𑀺𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀏𑀓𑀲𑁆𑀲 𑀏𑀴𑀓𑀧𑀸𑀮𑀓𑀲𑁆𑀲 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀏𑀴𑀓𑁂 𑀘𑀸𑀭𑁂𑀦𑁆𑀢𑀲𑁆𑀲 𑀏𑀓𑀸 𑀏𑀴𑀺𑀓𑀸 𑀢𑀁 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀔𑀻𑀭𑀁 𑀧𑀸𑀬𑁂𑀢𑁆𑀯𑀸 𑀣𑁄𑀓𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀯𑀸𑀭𑁂 𑀧𑀸𑀬𑁂𑀲𑀺. 𑀏𑀴𑀓𑀧𑀸𑀮𑀓𑁄 𑀢𑀲𑁆𑀲𑀸 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀅𑀤𑀸𑀲𑀺. 𑀲𑀸 𑀧𑀦 𑀅𑀧𑀼𑀢𑁆𑀢𑀺𑀓𑀸, 𑀢𑁂𑀦𑀲𑁆𑀲𑀸 𑀣𑀜𑁆𑀜𑀁 𑀦𑀢𑁆𑀣𑀺, 𑀅𑀣 𑀦𑀁 𑀏𑀴𑀺𑀓𑀔𑀻𑀭𑀫𑁂𑀯 𑀧𑀸𑀬𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀤𑁂𑀯𑀲𑀺𑀓𑀁 𑀤𑁆𑀯𑁂 𑀢𑀺𑀲𑁆𑀲𑁄 𑀏𑀴𑀺𑀓𑀸 𑀫𑀭𑀦𑁆𑀢𑀺. 𑀏𑀴𑀓𑀧𑀸𑀮𑁄 𑁋 ‘‘𑀇𑀫𑀲𑁆𑀫𑀺𑀁 𑀧𑀝𑀺𑀚𑀕𑁆𑀕𑀺𑀬𑀫𑀸𑀦𑁂 𑀲𑀩𑁆𑀩𑀸 𑀏𑀴𑀺𑀓𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀓𑀺𑀁 𑀦𑁄 𑀇𑀫𑀺𑀦𑀸’’𑀢𑀺 𑀢𑀁 𑀏𑀓𑀲𑁆𑀫𑀺𑀁 𑀫𑀢𑁆𑀢𑀺𑀓𑀸𑀪𑀸𑀚𑀦𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀧𑀭𑁂𑀦 𑀧𑀺𑀤𑀳𑀺𑀢𑁆𑀯𑀸 𑀫𑀸𑀲𑀘𑀼𑀡𑁆𑀡𑁂𑀦 𑀫𑀼𑀔𑀁 𑀦𑀺𑀩𑁆𑀩𑀺𑀯𑀭𑀁 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀦𑀤𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀫𑁂𑀦𑀁 𑀯𑀼𑀬𑁆𑀳𑀫𑀸𑀦𑀁 𑀳𑁂𑀝𑁆𑀞𑀸𑀢𑀺𑀢𑁆𑀣𑁂 𑀭𑀸𑀚𑀦𑀺𑀯𑁂𑀲𑀦𑁂 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀸𑀭𑀓𑁄 𑀏𑀓𑁄 𑀘𑀡𑁆𑀟𑀸𑀮𑁄 𑀲𑀧𑀚𑀸𑀧𑀢𑀺𑀓𑁄 𑀫𑀓𑀘𑀺𑀁 𑀥𑁄𑀯𑀦𑁆𑀢𑁄 𑀤𑀺𑀲𑁆𑀯𑀸𑀯 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀢𑀻𑀭𑁂 𑀞𑀧𑁂𑀢𑁆𑀯𑀸 ‘‘𑀓𑀺𑀫𑁂𑀢𑁆𑀣𑀸’’𑀢𑀺 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀤𑀸𑀭𑀓𑀁 𑀧𑀲𑁆𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀅𑀧𑀼𑀢𑁆𑀢𑀺𑀓𑀸, 𑀢𑀲𑁆𑀲𑀸 𑀢𑀲𑁆𑀫𑀺𑀁 𑀧𑀼𑀢𑁆𑀢𑀲𑀺𑀦𑁂𑀳𑁄 𑀦𑀺𑀩𑁆𑀩𑀢𑁆𑀢𑀺, 𑀅𑀣 𑀦𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀢𑀁 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀭𑁄 𑀭𑀸𑀚𑀓𑀼𑀮𑀁 𑀕𑀘𑁆𑀙𑀦𑁆𑀢𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑀺. 𑀲𑁄𑀴𑀲𑀯𑀲𑁆𑀲𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀲𑁆𑀯𑁂𑀯 𑀩𑀳𑀼𑀮𑀁 𑀕𑀦𑁆𑀢𑁆𑀯𑀸 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀢𑀺.
𑀭𑀜𑁆𑀜𑁄 𑀘 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀭𑀼𑀗𑁆𑀕𑀤𑁂𑀯𑀻 𑀦𑀸𑀫 𑀥𑀻𑀢𑀸 𑀅𑀳𑁄𑀲𑀺 𑀉𑀢𑁆𑀢𑀫𑀭𑀽𑀧𑀥𑀭𑀸. 𑀲𑀸 𑀢𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀪𑀺𑀭𑀢𑀸 𑀢𑀲𑁆𑀲 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀫𑁂𑀯 𑀆𑀕𑀘𑁆𑀙𑀢𑀺. 𑀢𑁂𑀲𑀁 𑀅𑀪𑀺𑀡𑁆𑀳𑀤𑀲𑁆𑀲𑀦𑁂𑀦 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀭𑀸𑀚𑀓𑀼𑀮𑁂𑀬𑁂𑀯 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀅𑀚𑁆𑀛𑀸𑀘𑀸𑀭𑁄 𑀧𑀯𑀢𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀭𑀺𑀘𑀸𑀭𑀺𑀓𑀸𑀬𑁄 𑀜𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀓𑀼𑀚𑁆𑀛𑀺𑀢𑁆𑀯𑀸 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑁋 ‘‘𑀇𑀫𑀺𑀦𑀸 𑀘𑀡𑁆𑀟𑀸𑀮𑀧𑀼𑀢𑁆𑀢𑁂𑀦 𑀇𑀤𑀁 𑀦𑀸𑀫 𑀓𑀢𑀁, 𑀇𑀫𑀲𑁆𑀲 𑀓𑀢𑁆𑀢𑀩𑁆𑀩𑀁 𑀚𑀸𑀦𑀸𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 ‘‘𑀫𑀳𑀸𑀧𑀭𑀸𑀥𑁄 𑀏𑀲, 𑀦𑀸𑀦𑀸𑀯𑀺𑀥𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀓𑀼𑀫𑀸𑀭𑀲𑁆𑀲 𑀧𑀺𑀢𑀸 𑀆𑀭𑀓𑁆𑀔𑀤𑁂𑀯𑀢𑀸 ¶ 𑀢𑀲𑁆𑀲𑁂𑀯 𑀓𑀼𑀫𑀸𑀭𑀲𑁆𑀲 𑀫𑀸𑀢𑀼 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺. 𑀲𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀫𑀳𑀸𑀭𑀸𑀚, 𑀦𑀸𑀬𑀁 𑀓𑀼𑀫𑀸𑀭𑁄 𑀘𑀡𑁆𑀟𑀸𑀮𑁄, 𑀏𑀲 𑀓𑀼𑀫𑀸𑀭𑁄 𑀫𑀫 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀅𑀳𑀁 ‘𑀧𑀼𑀢𑁆𑀢𑁄 𑀫𑁂 𑀫𑀢𑁄’𑀢𑀺 𑀢𑀼𑀫𑁆𑀳𑀸𑀓𑀁 𑀫𑀼𑀲𑀸 𑀅𑀯𑀘𑀁, 𑀅𑀳𑀫𑁂𑀢𑀁 ‘𑀢𑀼𑀫𑁆𑀳𑀸𑀓𑀁 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀼𑀢𑁆𑀢𑁄’𑀢𑀺 𑀥𑀸𑀢𑀺𑀬𑀸 𑀤𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀸𑀧𑁂𑀲𑀺𑀁, 𑀅𑀣 𑀦𑀁 𑀏𑀓𑁄 𑀏𑀴𑀓𑀧𑀸𑀮𑀓𑁄 𑀧𑀝𑀺𑀚𑀕𑁆𑀕𑀺, 𑀲𑁄 𑀅𑀢𑁆𑀢𑀦𑁄 𑀏𑀴𑀺𑀓𑀸𑀲𑀼 𑀫𑀭𑀦𑁆𑀢𑀻𑀲𑀼 𑀦𑀤𑀺𑀬𑀸 𑀧𑀯𑀸𑀳𑁂𑀲𑀺, 𑀅𑀣 𑀦𑀁 𑀯𑀼𑀬𑁆𑀳𑀫𑀸𑀦𑀁 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀸𑀭𑀓𑁄 𑀘𑀡𑁆𑀟𑀸𑀮𑁄 𑀤𑀺𑀲𑁆𑀯𑀸 𑀧𑁄𑀲𑁂𑀲𑀺, 𑀲𑀘𑁂 𑀦 𑀲𑀤𑁆𑀤𑀳𑀣, 𑀢𑁂 𑀲𑀩𑁆𑀩𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀣𑀸’’𑀢𑀺.
𑀭𑀸𑀚𑀸 𑀥𑀸𑀢𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀣𑁂𑀯 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀚𑀸𑀢𑀺𑀲𑀫𑁆𑀧𑀦𑁆𑀦𑁄𑀬𑀁 𑀓𑀼𑀫𑀸𑀭𑁄’’𑀢𑀺 𑀢𑀼𑀝𑁆𑀞𑁄 𑀢𑀁 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀲𑁂𑀯 𑀥𑀻𑀢𑀭𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀦 𑀏𑀴𑀺𑀓𑀸𑀦𑀁 𑀫𑀸𑀭𑀺𑀢𑀢𑁆𑀢𑀸 ¶ ‘‘𑀏𑀴𑀺𑀓𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀲𑁆𑀲 𑀭𑀸𑀚𑀸 𑀲𑀲𑁂𑀦𑀯𑀸𑀳𑀦𑀁 𑀤𑀢𑁆𑀯𑀸 𑁋 ‘‘𑀕𑀘𑁆𑀙 𑀅𑀢𑁆𑀢𑀦𑁄 𑀧𑀺𑀢𑀼 𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀡𑁆𑀳𑀸’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀓𑀼𑀭𑀼𑀗𑁆𑀕𑀤𑁂𑀯𑀺𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀩𑀸𑀭𑀸𑀡𑀲𑀺𑀭𑀸𑀚𑀸 ‘‘𑀅𑀦𑀼𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀅𑀬’’𑀦𑁆𑀢𑀺 𑀲𑀺𑀧𑁆𑀧𑀲𑀺𑀓𑁆𑀔𑀸𑀧𑀦𑀢𑁆𑀣𑀁 𑀙𑀴𑀗𑁆𑀕𑀓𑀼𑀫𑀸𑀭𑀁 𑀦𑀸𑀫 𑀆𑀘𑀭𑀺𑀬𑀁 𑀧𑁂𑀲𑁂𑀲𑀺. 𑀲𑁄 𑀢𑀲𑁆𑀲 ‘‘𑀆𑀘𑀭𑀺𑀬𑁄 𑀫𑁂’’𑀢𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀅𑀧𑀭𑀪𑀸𑀕𑁂 𑀓𑀼𑀭𑀼𑀗𑁆𑀕𑀤𑁂𑀯𑀻 𑀢𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀫𑀓𑀸𑀲𑀺. 𑀲𑁂𑀦𑀸𑀧𑀢𑀺𑀦𑁄𑀧𑀺 𑀧𑀭𑀺𑀘𑀸𑀭𑀓𑁄 𑀥𑀦𑀦𑁆𑀢𑁂𑀯𑀸𑀲𑀻 𑀦𑀸𑀫 𑀅𑀢𑁆𑀣𑀺. 𑀲𑁄 𑀢𑀲𑁆𑀲 𑀳𑀢𑁆𑀣𑁂 𑀓𑀼𑀭𑀼𑀗𑁆𑀕𑀤𑁂𑀯𑀺𑀬𑀸 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀧𑁂𑀲𑁂𑀲𑀺. 𑀲𑀸 𑀢𑁂𑀦𑀧𑀺 𑀲𑀤𑁆𑀥𑀺𑀁 𑀧𑀸𑀧𑀫𑀓𑀸𑀲𑀺. 𑀓𑀼𑀡𑀸𑀮𑁄 𑀢𑀁 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀸 𑀫𑀬𑀸’’𑀢𑀺𑀆𑀤𑀺𑀫𑀸𑀳.
𑀢𑀢𑁆𑀣 𑀮𑁄𑀫𑀲𑀼𑀤𑁆𑀤𑀭𑀻𑀢𑀺 𑀮𑁄𑀫𑀭𑀸𑀚𑀺𑀬𑀸 𑀫𑀡𑁆𑀟𑀺𑀢𑀉𑀤𑀭𑀸. 𑀙𑀴𑀗𑁆𑀕𑀓𑀼𑀫𑀸𑀭𑀥𑀦𑀦𑁆𑀢𑁂𑀯𑀸𑀲𑀺𑀦𑀸𑀢𑀺 𑀏𑀴𑀺𑀓𑀓𑀼𑀫𑀸𑀭𑀓𑀁 𑀧𑀢𑁆𑀣𑀬𑀫𑀸𑀦𑀸𑀧𑀺 𑀙𑀴𑀗𑁆𑀕𑀓𑀼𑀫𑀸𑀭𑀲𑁂𑀦𑀸𑀧𑀢𑀺𑀦𑀸 𑀘 𑀢𑀲𑁆𑀲𑁂𑀯 𑀧𑀭𑀺𑀘𑀸𑀭𑀓𑁂𑀦 𑀥𑀦𑀦𑁆𑀢𑁂𑀯𑀸𑀲𑀺𑀦𑀸 𑀘 𑀲𑀤𑁆𑀥𑀺𑀁 𑀧𑀸𑀧𑀫𑀓𑀸𑀲𑀺. 𑀏𑀯𑀁 𑀅𑀦𑀸𑀘𑀸𑀭𑀸 𑀇𑀢𑁆𑀣𑀺𑀬𑁄 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸, 𑀢𑁂𑀦𑀸𑀳𑀁 𑀢𑀸 𑀦𑀧𑁆𑀧𑀲𑀁𑀲𑀸𑀫𑀻𑀢𑀺 𑀇𑀤𑀁 𑀫𑀳𑀸𑀲𑀢𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑁄 𑀳𑀺 𑀢𑀤𑀸 𑀙𑀴𑀗𑁆𑀕𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀆𑀳𑀭𑀺.
𑀧𑀜𑁆𑀘𑀫𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 ¶ 𑀅𑀢𑀻𑀢𑁂 𑀓𑁄𑀲𑀮𑀭𑀸𑀚𑀸 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀁 𑀕𑀩𑁆𑀪𑀺𑀦𑀺𑀫𑁆𑀧𑀺 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀲𑀓𑀦𑀕𑀭𑀫𑁂𑀯 𑀕𑀢𑁄 ¶ . 𑀲𑀸 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀭𑀸𑀚𑀸 𑀅𑀧𑀼𑀢𑁆𑀢𑀓𑀢𑁆𑀢𑀸 𑀢𑀁 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑁄𑀲𑁂𑀢𑁆𑀯𑀸 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀺𑀢𑀼 𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀡𑁆𑀳𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀧𑀼𑀢𑁆𑀢𑀁 𑀧𑀲𑁆𑀲𑀺𑀢𑀼𑀓𑀸𑀫𑀸𑀫𑁆𑀳𑀻’’𑀢𑀺 𑀓𑁄𑀲𑀮𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀸𑀧𑀭𑀺𑀯𑀸𑀭𑀸 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑀻 𑀤𑁆𑀯𑀺𑀦𑁆𑀦𑀁 𑀭𑀝𑁆𑀞𑀸𑀦𑀁 𑀅𑀦𑁆𑀢𑀭𑁂 𑀏𑀓𑀲𑁆𑀫𑀺𑀁 𑀦𑀺𑀕𑀫𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀢𑀢𑁆𑀣𑁂𑀯𑁂𑀓𑁄 𑀧𑀜𑁆𑀘𑀸𑀮𑀘𑀡𑁆𑀟𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀅𑀢𑁆𑀣𑀺 𑀅𑀪𑀺𑀭𑀽𑀧𑁄. 𑀲𑁄 𑀢𑀲𑁆𑀲𑀸 𑀧𑀡𑁆𑀡𑀸𑀓𑀸𑀭𑀁 𑀉𑀧𑀦𑀸𑀫𑁂𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀔𑀺𑀧𑁆𑀧𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀦𑀺𑀕𑀫𑁂 𑀦𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀘𑀭𑀺𑀢𑁆𑀯𑀸 𑀓𑁄𑀲𑀮𑀦𑀕𑀭𑀁 𑀕𑀢𑀸. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀦𑀘𑀺𑀭𑀲𑁆𑀲𑁂𑀯 𑀢𑀁 𑀢𑀁 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻 𑀘 𑀆𑀕𑀘𑁆𑀙𑀦𑁆𑀢𑀻 𑀘 𑀢𑀲𑁆𑀫𑀺𑀁 𑀦𑀺𑀕𑀫𑁂 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀢𑁂𑀦 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀘𑀭𑀺. 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀇𑀢𑁆𑀣𑀺𑀬𑁄 𑀦𑀸𑀫𑁂𑀢𑀸 𑀤𑀼𑀲𑁆𑀲𑀻𑀮𑀸 𑀫𑀼𑀲𑀸𑀯𑀸𑀤𑀺𑀦𑀺𑀬𑁄𑀢𑀺 𑀇𑀤𑀫𑁆𑀧𑀺 𑀅𑀢𑀻𑀢𑀁 𑀤𑀲𑁆𑀲𑁂𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 ‘‘𑀏𑀯𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.
𑀢𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀫𑀸𑀢𑀭𑀦𑁆𑀢𑀺 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑀲𑁆𑀲 𑀫𑀸𑀢𑀭𑀁. 𑀢𑀤𑀸 𑀓𑀺𑀭 𑀓𑀼𑀡𑀸𑀮𑁄 𑀧𑀜𑁆𑀘𑀸𑀮𑀘𑀡𑁆𑀟𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀁 𑀅𑀢𑁆𑀢𑀦𑀸 𑀜𑀸𑀢𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.
𑀏𑀢𑀸 𑀘𑀸𑀢𑀺, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀏𑀢𑀸𑀯 𑀧𑀜𑁆𑀘 𑀇𑀢𑁆𑀣𑀺𑀬𑁄 𑀧𑀸𑀧𑀫𑀓𑀁𑀲𑀼, 𑀦 𑀅𑀜𑁆𑀜𑀸𑀢𑀺 𑀲𑀜𑁆𑀜𑀁 𑀫𑀸 𑀓𑀭𑀺, 𑀅𑀣 𑀔𑁄 𑀏𑀢𑀸 𑀘 𑀅𑀜𑁆𑀜𑀸 𑀘 𑀩𑀳𑀽 𑀧𑀸𑀧𑀓𑀫𑁆𑀫𑀓𑀸𑀭𑀺𑀓𑀸𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀮𑁄𑀓𑁂 𑀅𑀢𑀺𑀘𑀸𑀭𑀺𑀦𑀻𑀦𑀁 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺. 𑀚𑀕𑀢𑀻𑀢𑀺 𑀬𑀣𑀸 𑀚𑀕𑀢𑀺𑀲𑀗𑁆𑀔𑀸𑀢𑀸 𑀫𑀳𑀻 𑀲𑀫𑀸𑀦𑀭𑀢𑁆𑀢𑀸 𑀧𑀝𑀺𑀖𑀸𑀪𑀸𑀯𑁂𑀦 𑀲𑀩𑁆𑀩𑁂𑀲𑀼 𑀲𑀫𑀸𑀦𑀭𑀢𑁆𑀢𑀸 𑀳𑀼𑀢𑁆𑀯𑀸 𑀲𑀸 𑀯𑀲𑀼𑀦𑁆𑀥𑀭𑀸 𑀇𑀢𑀭𑀻𑀢𑀭𑀸𑀧𑀢𑀺𑀝𑁆𑀞𑀸 ¶ 𑀉𑀢𑁆𑀢𑀫𑀸𑀦𑀜𑁆𑀘 𑀅𑀥𑀫𑀸𑀦𑀜𑁆𑀘 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑀣𑀸 𑀇𑀢𑁆𑀣𑀺𑀬𑁄𑀧𑀺 𑀓𑀺𑀮𑁂𑀲𑀯𑀲𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀉𑀢𑁆𑀢𑀫𑀸𑀥𑀫𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀇𑀢𑁆𑀣𑀺𑀬𑁄 𑀳𑀺 𑀑𑀓𑀸𑀲𑀁 𑀮𑀪𑀫𑀸𑀦𑀸 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀧𑀸𑀧𑀓𑀁 𑀓𑀭𑁄𑀦𑁆𑀢𑀺 𑀦𑀸𑀫. 𑀲𑀩𑁆𑀩𑀲𑀳𑀸𑀢𑀺 𑀬𑀣𑀸 𑀘 𑀲𑀸 𑀲𑀩𑁆𑀩𑀫𑁂𑀯 𑀲𑀳𑀢𑀺 𑀦 𑀨𑀦𑁆𑀤𑀢𑀺 𑀦 𑀓𑀼𑀧𑁆𑀧𑀢𑀺 𑀦 𑀘𑀮𑀢𑀺, 𑀢𑀣𑀸 𑀇𑀢𑁆𑀣𑀺𑀬𑁄 𑀲𑀩𑁆𑀩𑁂𑀧𑀺 𑀧𑀼𑀭𑀺𑀲𑁂 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀲𑀳𑀦𑁆𑀢𑀺. 𑀲𑀘𑁂 𑀢𑀸𑀲𑀁 𑀓𑁄𑀘𑀺 𑀧𑀼𑀭𑀺𑀲𑁄 𑀘𑀺𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀭𑀓𑁆𑀔𑀡𑀢𑁆𑀣𑀁 𑀦 𑀨𑀦𑁆𑀤𑀦𑁆𑀢𑀺 𑀦 𑀘𑀮𑀦𑁆𑀢𑀺 𑀦 𑀓𑁄𑀮𑀸𑀳𑀮𑀁 𑀓𑀭𑁄𑀦𑁆𑀢𑀺 ¶ . 𑀬𑀣𑀸 𑀘 𑀲𑀸 𑀦 𑀓𑀼𑀧𑁆𑀧𑀢𑀺 𑀦 𑀘𑀮𑀢𑀺, 𑀏𑀯𑀁 𑀇𑀢𑁆𑀣𑀺𑀬𑁄𑀧𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀦 𑀓𑀼𑀧𑁆𑀧𑀦𑁆𑀢𑀺 𑀦 𑀘𑀮𑀦𑁆𑀢𑀺, 𑀦 𑀲𑀓𑁆𑀓𑀸 𑀢𑁂𑀦 𑀧𑀽𑀭𑁂𑀢𑀼𑀁.
𑀯𑀸𑀴𑀫𑀺𑀕𑁄𑀢𑀺 𑀤𑀼𑀝𑁆𑀞𑀫𑀺𑀕𑁄. 𑀧𑀜𑁆𑀘𑀸𑀯𑀼𑀥𑁄𑀢𑀺 𑀫𑀼𑀔𑀲𑁆𑀲 𑀘𑁂𑀯 𑀘𑀢𑀼𑀦𑁆𑀦𑀜𑁆𑀘 𑀘𑀭𑀡𑀸𑀦𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀼𑀭𑀼𑀤𑁆𑀥𑁄𑀢𑀺 𑀲𑀼𑀮𑀼𑀤𑁆𑀥𑁄 𑀲𑀼𑀨𑀭𑀼𑀲𑁄. 𑀢𑀣𑀺𑀢𑁆𑀣𑀺𑀬𑁄𑀢𑀺 𑀬𑀣𑀸 𑀳𑀺 𑀲𑀻𑀳𑀲𑁆𑀲 𑀫𑀼𑀔𑀜𑁆𑀘𑁂𑀯 𑀘𑀢𑁆𑀢𑀸𑀭𑁄 𑀘 𑀳𑀢𑁆𑀣𑀧𑀸𑀤𑀸𑀢𑀺 ¶ 𑀧𑀜𑁆𑀘𑀸𑀯𑀼𑀥𑀸𑀦𑀺, 𑀢𑀣𑀸 𑀇𑀢𑁆𑀣𑀻𑀦𑀫𑁆𑀧𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀺 𑀧𑀜𑁆𑀘𑀸𑀯𑀼𑀥𑀸𑀦𑀺. 𑀬𑀣𑀸 𑀲𑁄 𑀅𑀢𑁆𑀢𑀦𑁄 𑀪𑀓𑁆𑀔𑀁 𑀕𑀡𑁆𑀳𑀦𑁆𑀢𑁄 𑀢𑁂𑀳𑀺𑀧𑀺 𑀧𑀜𑁆𑀘𑀳𑀺 𑀕𑀡𑁆𑀳𑀸𑀢𑀺, 𑀢𑀣𑀸 𑀢𑀸𑀧𑀺 𑀓𑀺𑀮𑁂𑀲𑀪𑀓𑁆𑀔𑀁 𑀕𑀡𑁆𑀳𑀫𑀸𑀦𑀸 𑀭𑀽𑀧𑀸𑀤𑀻𑀳𑀺 𑀆𑀯𑀼𑀥𑁂𑀳𑀺 𑀧𑀳𑀭𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀬𑀣𑀸 𑀲𑁄 𑀓𑀓𑁆𑀔𑀴𑁄 𑀧𑀲𑀬𑁆𑀳 𑀔𑀸𑀤𑀢𑀺, 𑀏𑀯𑀁 𑀏𑀢𑀸𑀧𑀺 𑀓𑀓𑁆𑀔𑀴𑀸 𑀧𑀲𑀬𑁆𑀳 𑀔𑀸𑀤𑀺𑀓𑀸. 𑀢𑀣𑀸 𑀳𑁂𑀢𑀸 𑀣𑀺𑀭𑀲𑀻𑀮𑁂𑀧𑀺 𑀧𑀼𑀭𑀺𑀲𑁂 𑀅𑀢𑁆𑀢𑀦𑁄 𑀩𑀮𑁂𑀦 𑀧𑀲𑀬𑁆𑀳𑀓𑀸𑀭𑀁 𑀓𑀢𑁆𑀯𑀸 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺. 𑀬𑀣𑀸 𑀲𑁄 𑀧𑀭𑀳𑀺𑀁𑀲𑀦𑁂 𑀭𑀢𑁄, 𑀏𑀯𑀫𑁂𑀢𑀸𑀧𑀺 𑀓𑀺𑀮𑁂𑀲𑀯𑀲𑁂𑀦 𑀧𑀭𑀳𑀺𑀁𑀲𑀦𑁂 𑀭𑀢𑀸. 𑀢𑀸𑀬𑁄𑀢𑀺 𑀢𑀸 𑀏𑀯𑀁 𑀅𑀕𑀼𑀡𑀲𑀫𑁆𑀫𑀦𑁆𑀦𑀸𑀕𑀢𑀸 𑀦 𑀯𑀺𑀲𑁆𑀲𑀲𑁂 𑀦𑀭𑁄.
𑀕𑀫𑀦𑀺𑀬𑁄𑀢𑀺 𑀕𑀡𑀺𑀓𑀸𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀬𑀸𑀦𑁂𑀢𑀸𑀦𑀺 𑀇𑀢𑁆𑀣𑀻𑀦𑀁 ‘‘𑀯𑁂𑀲𑀺𑀬𑁄’’𑀢𑀺𑀆𑀤𑀻𑀦𑀺 𑀦𑀸𑀫𑀸𑀦𑀺, 𑀦 𑀏𑀢𑀸𑀦𑀺 𑀢𑀸𑀲𑀁 𑀲𑀪𑀸𑀯𑀦𑀸𑀫𑀸𑀦𑀺. 𑀦 𑀳𑁂𑀢𑀸 𑀯𑁂𑀲𑀺𑀬𑁄 𑀦𑀸𑀫 𑀕𑀫𑀦𑀺𑀬𑁄 𑀦𑀸𑀫 𑀩𑀦𑁆𑀥𑀓𑀺𑀬𑁄 𑀦𑀸𑀫, 𑀲𑀪𑀸𑀯𑀦𑀸𑀫𑀢𑁄 𑀧𑀦 𑀯𑀥𑀺𑀓𑀸𑀬𑁄 𑀦𑀸𑀫 𑀏𑀢𑀸𑀬𑁄, 𑀬𑀸 𑀏𑀢𑀸 𑀯𑁂𑀲𑀺𑀬𑁄 𑀦𑀸𑀭𑀺𑀬𑁄 𑀕𑀫𑀦𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀥𑀺𑀓𑀸𑀬𑁄𑀢𑀺 𑀲𑀸𑀫𑀺𑀓𑀖𑀸𑀢𑀺𑀓𑀸𑀬𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀫𑀳𑀸𑀳𑀁𑀲𑀚𑀸𑀢𑀓𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀫𑀸𑀬𑀸 𑀘𑁂𑀢𑀸 𑀫𑀭𑀻𑀘𑀻 𑀘, 𑀲𑁄𑀓𑀸 𑀭𑁄𑀕𑀸 𑀘𑀼𑀧𑀤𑁆𑀤𑀯𑀸;
𑀔𑀭𑀸 𑀘 𑀩𑀦𑁆𑀥𑀦𑀸 𑀘𑁂𑀢𑀸, 𑀫𑀘𑁆𑀘𑀼𑀧𑀸𑀲𑀸 𑀕𑀼𑀳𑀸𑀲𑀬𑀸;
𑀢𑀸𑀲𑀼 𑀬𑁄 𑀯𑀺𑀲𑁆𑀲𑀲𑁂 𑀧𑁄𑀲𑁄, 𑀲𑁄 𑀦𑀭𑁂𑀲𑀼 𑀦𑀭𑀸𑀥𑀫𑁄’’𑀢𑀺. (𑀚𑀸. 𑁨.𑁨𑁧.𑁧𑁧𑁮);
𑀯𑁂𑀡𑀺𑀓𑀢𑀸𑀢𑀺 𑀓𑀢𑀯𑁂𑀡𑀺𑀬𑁄. 𑀬𑀣𑀸 𑀳𑀺 𑀫𑁄𑀴𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀝𑀯𑀺𑀬𑀁 𑀞𑀺𑀢𑀘𑁄𑀭𑁄 𑀥𑀦𑀁 𑀯𑀺𑀮𑀼𑀫𑁆𑀧𑀢𑀺, 𑀏𑀯𑀫𑁂𑀢𑀸𑀧𑀺 𑀓𑀺𑀮𑁂𑀲𑀯𑀲𑀁 𑀦𑁂𑀢𑁆𑀯𑀸 𑀥𑀦𑀁 𑀯𑀺𑀮𑀼𑀫𑁆𑀧𑀦𑁆𑀢𑀺. 𑀫𑀤𑀺𑀭𑀸𑀯 𑀤𑀺𑀤𑁆𑀥𑀸𑀢𑀺 𑀯𑀺𑀲𑀫𑀺𑀲𑁆𑀲𑀓𑀸 𑀲𑀼𑀭𑀸 𑀯𑀺𑀬. 𑀬𑀣𑀸 𑀲𑀸 𑀯𑀺𑀓𑀸𑀭𑀁 𑀤𑀲𑁆𑀲𑁂𑀢𑀺, 𑀏𑀯𑀫𑁂𑀢𑀸𑀧𑀺 𑀅𑀜𑁆𑀜𑁂𑀲𑀼 𑀧𑀼𑀭𑀺𑀲𑁂𑀲𑀼 𑀲𑀸𑀭𑀢𑁆𑀢𑀸 𑀓𑀺𑀘𑁆𑀘𑀸𑀓𑀺𑀘𑁆𑀘𑀁 𑀅𑀚𑀸𑀦𑀦𑁆𑀢𑀺𑀬𑁄 𑀅𑀜𑁆𑀜𑀲𑁆𑀫𑀺𑀁 𑀓𑀢𑁆𑀢𑀩𑁆𑀩𑁂 𑀅𑀜𑁆𑀜𑀫𑁂𑀯 𑀓𑀭𑁄𑀦𑁆𑀢𑀺𑀬𑁄 𑀯𑀺𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀯𑀸𑀘𑀸𑀲𑀦𑁆𑀣𑀼𑀢𑀺𑀬𑁄𑀢𑀺 𑀬𑀣𑀸 𑀯𑀸𑀡𑀺𑀚𑁄 𑀅𑀢𑁆𑀢𑀦𑁄 𑀪𑀡𑁆𑀟𑀲𑁆𑀲 𑀯𑀡𑁆𑀡𑀫𑁂𑀯 𑀪𑀡𑀢𑀺, 𑀏𑀯𑀫𑁂𑀢𑀸𑀧𑀺 ¶ 𑀅𑀢𑁆𑀢𑀦𑁄 𑀅𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀼𑀡𑀫𑁂𑀯 𑀧𑀓𑀸𑀲𑁂𑀦𑁆𑀢𑀺. 𑀯𑀺𑀧𑀭𑀺𑀯𑀢𑁆𑀢𑀸𑀬𑁄𑀢𑀺 𑀬𑀣𑀸 𑀇𑀲𑁆𑀲𑀫𑀺𑀕𑀲𑁆𑀲 𑀲𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁, 𑀏𑀯𑀁 𑀮𑀳𑀼𑀘𑀺𑀢𑁆𑀢𑀢𑀸𑀬 𑀯𑀺𑀧𑀭𑀺𑀯𑀢𑁆𑀢𑀸𑀬𑁄𑀯 𑀳𑁄𑀦𑁆𑀢𑀺. 𑀉𑀭𑀕𑀫𑀺𑀯𑀸𑀢𑀺 𑀉𑀭𑀕𑁄 𑀯𑀺𑀬 ¶ 𑀫𑀼𑀲𑀸𑀯𑀸𑀤𑀺𑀢𑀸𑀬 𑀤𑀼𑀚𑀺𑀯𑁆𑀳𑀸 𑀦𑀸𑀫. 𑀲𑁄𑀩𑁆𑀪𑀫𑀺𑀯𑀸𑀢𑀺 𑀬𑀣𑀸 𑀧𑀤𑀭𑀧𑀝𑀺𑀘𑁆𑀙𑀦𑁆𑀦𑁄 𑀕𑀽𑀣𑀓𑀽𑀧𑁄, 𑀏𑀯𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀬𑀣𑀸 𑀘 𑀓𑀘𑀯𑀭𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑁄 𑀆𑀯𑀸𑀝𑁄 𑀅𑀓𑁆𑀓𑀦𑁆𑀢𑁄 𑀧𑀸𑀤𑀤𑀼𑀓𑁆𑀔𑀁 𑀚𑀦𑁂𑀢𑀺, 𑀏𑀯𑀫𑁂𑀢𑀸𑀧𑀺 𑀯𑀺𑀲𑁆𑀲𑀸𑀲𑁂𑀦 𑀉𑀧𑀲𑁂𑀯𑀺𑀬𑀫𑀸𑀦𑀸. 𑀧𑀸𑀢𑀸𑀮𑀫𑀺𑀯𑀸𑀢𑀺 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁂 𑀧𑀸𑀢𑀸𑀮𑀁 𑀤𑀼𑀧𑁆𑀧𑀽𑀭𑀁, 𑀏𑀯𑀫𑁂𑀢𑀸𑀧𑀺 𑀫𑁂𑀣𑀼𑀦𑁂𑀦 𑀯𑀺𑀚𑀸𑀬𑀦𑁂𑀦 𑀅𑀮𑀗𑁆𑀓𑀸𑀭𑁂𑀦𑀸𑀢𑀺 𑀢𑀻𑀳𑀺 𑀤𑀼𑀧𑁆𑀧𑀽𑀭𑀸. 𑀢𑁂𑀦𑁂𑀯𑀸𑀳 𑁋 ‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀅𑀢𑀺𑀢𑁆𑀢𑁄 𑀫𑀸𑀢𑀼𑀕𑀸𑀫𑁄’’𑀢𑀺𑀆𑀤𑀺.
𑀭𑀓𑁆𑀔𑀲𑀻 ¶ 𑀯𑀺𑀬𑀸𑀢𑀺 𑀬𑀣𑀸 𑀭𑀓𑁆𑀔𑀲𑀻 𑀦𑀸𑀫 𑀫𑀁𑀲𑀕𑀺𑀤𑁆𑀥𑀢𑀸𑀬 𑀥𑀦𑁂𑀦 𑀦 𑀲𑀓𑁆𑀓𑀸 𑀢𑁄𑀲𑁂𑀢𑀼𑀁, 𑀩𑀳𑀼𑀫𑁆𑀧𑀺 𑀥𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀁𑀲𑀫𑁂𑀯 𑀧𑀢𑁆𑀣𑁂𑀢𑀺, 𑀏𑀯𑀫𑁂𑀢𑀸𑀧𑀺 𑀫𑁂𑀣𑀼𑀦𑀕𑀺𑀤𑁆𑀥𑀢𑀸𑀬 𑀩𑀳𑀼𑀦𑀸𑀧𑀺 𑀥𑀦𑁂𑀦 𑀦 𑀢𑀼𑀲𑁆𑀲𑀦𑁆𑀢𑀺, 𑀥𑀦𑀁 𑀅𑀕𑀡𑁂𑀢𑁆𑀯𑀸 𑀫𑁂𑀣𑀼𑀦𑀫𑁂𑀯 𑀧𑀢𑁆𑀣𑁂𑀦𑁆𑀢𑀺. 𑀬𑀫𑁄𑀯𑀸𑀢𑀺 𑀬𑀣𑀸 𑀬𑀫𑁄 𑀏𑀓𑀦𑁆𑀢𑀳𑀭𑁄 𑀦 𑀓𑀺𑀜𑁆𑀘𑀺 𑀧𑀭𑀺𑀳𑀭𑀢𑀺, 𑀏𑀯𑀫𑁂𑀢𑀸𑀧𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀤𑀻𑀲𑀼 𑀦 𑀓𑀜𑁆𑀘𑀺 𑀧𑀭𑀺𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀓𑀺𑀮𑁂𑀲𑀯𑀲𑁂𑀦 𑀲𑀻𑀮𑀸𑀤𑀺𑀯𑀺𑀦𑀸𑀲𑀁 𑀧𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀦𑀺𑀭𑀬𑀁 𑀉𑀧𑀦𑁂𑀦𑁆𑀢𑀺. 𑀲𑀺𑀔𑀻𑀭𑀺𑀯𑀸𑀢𑀺 𑀬𑀣𑀸 𑀲𑀺𑀔𑀻 𑀲𑀼𑀘𑀺𑀫𑁆𑀧𑀺 𑀅𑀲𑀼𑀘𑀺𑀫𑁆𑀧𑀺 𑀲𑀩𑁆𑀩𑀁 𑀪𑀓𑁆𑀔𑀬𑀢𑀺, 𑀢𑀣𑁂𑀢𑀸𑀧𑀺 𑀳𑀻𑀦𑀼𑀢𑁆𑀢𑀫𑁂 𑀲𑀩𑁆𑀩𑁂 𑀲𑁂𑀯𑀦𑁆𑀢𑀺. 𑀦𑀤𑀻𑀉𑀧𑀫𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦𑀓𑀸 𑀫𑀁𑀘𑀭𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀬𑀢𑁆𑀣 𑀏𑀢𑀸𑀲𑀁 𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣𑁂𑀯 𑀥𑀸𑀯𑀦𑁆𑀢𑀺. 𑀦𑁂𑀭𑀽𑀢𑀺 𑀳𑀺𑀫𑀯𑀢𑀺 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀢𑀁 𑀉𑀧𑀕𑀢𑀸 𑀓𑀸𑀓𑀸𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀳𑁄𑀦𑁆𑀢𑀺. 𑀬𑀣𑀸 𑀲𑁄, 𑀏𑀯𑀁 𑀏𑀢𑀸𑀧𑀺 𑀦𑀺𑀩𑁆𑀩𑀺𑀲𑁂𑀲𑀓𑀭𑀸 𑀅𑀢𑁆𑀢𑀸𑀦𑀁 𑀉𑀧𑀕𑀢𑀁 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀺.
𑀯𑀺𑀲𑀭𑀼𑀓𑁆𑀔𑁄𑀢𑀺 𑀅𑀫𑁆𑀩𑀲𑀤𑀺𑀲𑁄 𑀓𑀺𑀁𑀧𑀓𑁆𑀓𑀭𑀼𑀓𑁆𑀔𑁄. 𑀲𑁄 𑀦𑀺𑀘𑁆𑀘𑀫𑁂𑀯 𑀨𑀮𑀢𑀺, 𑀯𑀡𑁆𑀡𑀸𑀤𑀺𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺, 𑀢𑁂𑀦 𑀦𑀁 𑀦𑀺𑀭𑀸𑀲𑀗𑁆𑀓𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀭𑀦𑁆𑀢𑀺, 𑀏𑀯𑀫𑁂𑀯 𑀢𑀸𑀧𑀺 𑀭𑀽𑀧𑀸𑀤𑀺𑀯𑀲𑁂𑀦 𑀦𑀺𑀘𑁆𑀘𑀨𑀮𑀺𑀢𑀸 𑀭𑀫𑀡𑀻𑀬𑀸 𑀯𑀺𑀬 𑀔𑀸𑀬𑀦𑁆𑀢𑀺. 𑀲𑁂𑀯𑀺𑀬𑀫𑀸𑀦𑀸 𑀧𑀦 𑀧𑀫𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀸𑀬𑁂𑀲𑀼 𑀧𑀸𑀢𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋
‘‘𑀆𑀬𑀢𑀺𑀁 𑀤𑁄𑀲𑀁 𑀦𑀜𑁆𑀜𑀸𑀬, 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺;
𑀯𑀺𑀧𑀸𑀓𑀦𑁆𑀢𑁂 𑀳𑀦𑀦𑁆𑀢𑀺 𑀦𑀁, 𑀓𑀺𑀁𑀧𑀓𑁆𑀓𑀫𑀺𑀯 𑀪𑀓𑁆𑀔𑀺𑀢’’𑀦𑁆𑀢𑀺. (𑀚𑀸. 𑁧.𑁧.𑁮𑁫);
𑀬𑀣𑀸 𑀯𑀸 𑀯𑀺𑀲𑀭𑀼𑀓𑁆𑀔𑁄 𑀦𑀺𑀘𑁆𑀘𑀨𑀮𑀺𑀢𑁄 𑀲𑀤𑀸 𑀅𑀦𑀢𑁆𑀣𑀸𑀯𑀳𑁄 𑀳𑁄𑀢𑀺, 𑀏𑀯𑀫𑁂𑀢𑀸𑀧𑀺 𑀲𑀻𑀮𑀸𑀤𑀺𑀯𑀺𑀦𑀸𑀲𑀦𑀯𑀲𑁂𑀦. 𑀬𑀣𑀸 𑀯𑀺𑀲𑀭𑀼𑀓𑁆𑀔𑀲𑁆𑀲 𑀫𑀽𑀮𑀫𑁆𑀧𑀺 𑀢𑀘𑁄𑀧𑀺 𑀧𑀢𑁆𑀢𑀫𑁆𑀧𑀺 𑀧𑀼𑀧𑁆𑀨𑀫𑁆𑀧𑀺 ¶ 𑀨𑀮𑀫𑁆𑀧𑀺 𑀯𑀺𑀲𑀫𑁂𑀯𑀸𑀢𑀺 𑀦𑀺𑀘𑁆𑀘𑀨𑀮𑁄, 𑀢𑀣𑁂𑀯 𑀢𑀸𑀲𑀁 𑀭𑀽𑀧𑀫𑁆𑀧𑀺…𑀧𑁂… 𑀨𑁄𑀝𑁆𑀞𑀩𑁆𑀩𑀫𑁆𑀧𑀺 𑀯𑀺𑀲𑀫𑁂𑀯𑀸𑀢𑀺 𑀯𑀺𑀲𑀭𑀼𑀓𑁆𑀔𑁄 𑀯𑀺𑀬 𑀦𑀺𑀘𑁆𑀘𑀨𑀮𑀺𑀢𑀸𑀬𑁄𑀢𑀺.
‘‘𑀧𑀦𑀼𑀢𑁆𑀢𑀭𑁂𑀢𑁆𑀣𑀸’’𑀢𑀺 𑀕𑀸𑀣𑀸𑀩𑀦𑁆𑀥𑁂𑀦 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀏𑀯𑀫𑀸𑀳. 𑀢𑀢𑁆𑀣 𑀭𑀢𑀦𑀦𑁆𑀢𑀓𑀭𑀺𑀢𑁆𑀣𑀺𑀬𑁄𑀢𑀺 𑀲𑀸𑀫𑀺𑀓𑁂𑀳𑀺 𑀤𑀼𑀓𑁆𑀔𑀲𑀫𑁆𑀪𑀢𑀸𑀦𑀁 𑀭𑀢𑀦𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀸 𑀇𑀢𑁆𑀣𑀺𑀬𑁄 𑀏𑀢𑀸𑀦𑀺 𑀧𑀭𑁂𑀲𑀁 𑀤𑀢𑁆𑀯𑀸 𑀅𑀦𑀸𑀘𑀸𑀭𑀁 𑀘𑀭𑀦𑁆𑀢𑀺.
𑀇𑀢𑁄 𑀧𑀭𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀅𑀢𑁆𑀢𑀦𑁄 𑀥𑀫𑁆𑀫𑀓𑀣𑀸𑀯𑀺𑀮𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋
‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀬𑀸𑀦𑀺 𑀯𑀢𑁆𑀣𑀽𑀦𑀺 𑀓𑀺𑀘𑁆𑀘𑁂 𑀚𑀸𑀢𑁂 𑀅𑀦𑀢𑁆𑀣𑀘𑀭𑀸𑀦𑀺 𑀪𑀯𑀦𑁆𑀢𑀺 ¶ , 𑀢𑀸𑀦𑀺 𑀧𑀭𑀓𑀼𑀮𑁂 𑀦 𑀯𑀸𑀲𑁂𑀢𑀩𑁆𑀩𑀸𑀦𑀺, 𑀕𑁄𑀡𑀁 𑀥𑁂𑀦𑀼𑀁 𑀬𑀸𑀦𑀁 𑀪𑀭𑀺𑀬𑀸. 𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀧𑀡𑁆𑀟𑀺𑀢𑁄 𑀥𑀦𑀸𑀦𑀺 𑀖𑀭𑀸 𑀦 𑀯𑀺𑀧𑁆𑀧𑀯𑀸𑀲𑀬𑁂. 𑀪𑀯𑀢𑀺 𑀘 𑀧𑀦𑀼𑀢𑁆𑀢𑀭𑁂𑀢𑁆𑀣 𑀯𑀸𑀓𑁆𑀬𑀁 𑁋
‘𑀕𑁄𑀡𑀁 ¶ 𑀥𑁂𑀦𑀼𑀜𑁆𑀘 𑀬𑀸𑀦𑀜𑁆𑀘, 𑀪𑀭𑀺𑀬𑀁 𑀜𑀸𑀢𑀺𑀓𑀼𑀮𑁂 𑀦 𑀯𑀸𑀲𑀬𑁂;
𑀪𑀜𑁆𑀚𑀦𑁆𑀢𑀺 𑀭𑀣𑀁 𑀅𑀬𑀸𑀦𑀓𑀸, 𑀅𑀢𑀺𑀯𑀸𑀳𑁂𑀦 𑀳𑀦𑀦𑁆𑀢𑀺 𑀧𑀼𑀗𑁆𑀕𑀯𑀁;
𑀤𑁄𑀳𑁂𑀦 𑀳𑀦𑀦𑁆𑀢𑀺 𑀯𑀘𑁆𑀙𑀓𑀁, 𑀪𑀭𑀺𑀬𑀸 𑀜𑀸𑀢𑀺𑀓𑀼𑀮𑁂 𑀧𑀤𑀼𑀲𑁆𑀲𑀢𑀻’’’𑀢𑀺.
‘‘𑀙 𑀇𑀫𑀸𑀦𑀺, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀬𑀸𑀦𑀺 𑀯𑀢𑁆𑀣𑀽𑀦𑀺 𑀓𑀺𑀘𑁆𑀘𑁂 𑀚𑀸𑀢𑁂 𑀅𑀦𑀢𑁆𑀣𑀘𑀭𑀸𑀦𑀺 𑀪𑀯𑀦𑁆𑀢𑀺 𑁋
‘𑀅𑀕𑀼𑀡𑀁 𑀥𑀦𑀼 𑀜𑀸𑀢𑀺𑀓𑀼𑀮𑁂 𑀘 𑀪𑀭𑀺𑀬𑀸, 𑀧𑀸𑀭𑀁 𑀦𑀸𑀯𑀸 𑀅𑀓𑁆𑀔𑀪𑀕𑁆𑀕𑀜𑁆𑀘 𑀬𑀸𑀦𑀁;
𑀤𑀽𑀭𑁂 𑀫𑀺𑀢𑁆𑀢𑁄 𑀧𑀸𑀧𑀲𑀳𑀸𑀬𑀓𑁄 𑀘, 𑀓𑀺𑀘𑁆𑀘𑁂 𑀚𑀸𑀢𑁂 𑀅𑀦𑀢𑁆𑀣𑀘𑀭𑀸𑀦𑀺 𑀪𑀯𑀦𑁆𑀢𑀻’’’𑀢𑀺.
‘‘𑀅𑀝𑁆𑀞𑀳𑀺 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀲𑀸𑀫𑀺𑀓𑀁 𑀅𑀯𑀚𑀸𑀦𑀸𑀢𑀺 𑁋 𑀤𑀮𑀺𑀤𑁆𑀤𑀢𑀸, 𑀆𑀢𑀼𑀭𑀢𑀸, 𑀚𑀺𑀡𑁆𑀡𑀢𑀸, 𑀲𑀼𑀭𑀸𑀲𑁄𑀡𑁆𑀟𑀢𑀸, 𑀫𑀼𑀤𑁆𑀥𑀢𑀸, 𑀧𑀫𑀢𑁆𑀢𑀢𑀸, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀅𑀦𑀼𑀯𑀢𑁆𑀢𑀦𑀢𑀸, 𑀲𑀩𑁆𑀩𑀥𑀦𑀅𑀦𑀼𑀧𑁆𑀧𑀤𑀸𑀦𑁂𑀦. 𑀇𑀫𑁂𑀳𑀺 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀅𑀝𑁆𑀞𑀳𑀺 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀲𑀸𑀫𑀺𑀓𑀁 𑀅𑀯𑀚𑀸𑀦𑀸𑀢𑀺. 𑀪𑀯𑀢𑀺 𑀘 𑀧𑀦𑀼𑀢𑁆𑀢𑀭𑁂𑀢𑁆𑀣 𑀯𑀸𑀓𑁆𑀬𑀁 𑁋
‘‘‘𑀤𑀮𑀺𑀤𑁆𑀤𑀁 ¶ 𑀆𑀢𑀼𑀭𑀜𑁆𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀲𑀼𑀭𑀲𑁄𑀡𑁆𑀟𑀓𑀁;
𑀧𑀫𑀢𑁆𑀢𑀁 𑀫𑀼𑀤𑁆𑀥𑀧𑀢𑁆𑀢𑀜𑁆𑀘, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀳𑀸𑀧𑀦𑀁;
𑀲𑀩𑁆𑀩𑀓𑀸𑀫𑀧𑁆𑀧𑀤𑀸𑀦𑁂𑀦, 𑀅𑀯𑀚𑀸𑀦𑀸𑀢𑀺 𑀲𑀸𑀫𑀺𑀓’’’𑀦𑁆𑀢𑀺.
‘‘𑀦𑀯𑀳𑀺 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀤𑁄𑀲𑀫𑀸𑀳𑀭𑀢𑀺 𑁋 𑀆𑀭𑀸𑀫𑀕𑀫𑀦𑀲𑀻𑀮𑀸 𑀘 𑀳𑁄𑀢𑀺, 𑀉𑀬𑁆𑀬𑀸𑀦𑀕𑀫𑀦𑀲𑀻𑀮𑀸 𑀘 𑀳𑁄𑀢𑀺, 𑀦𑀤𑀻𑀢𑀺𑀢𑁆𑀣𑀕𑀫𑀦𑀲𑀻𑀮𑀸 𑀘 𑀳𑁄𑀢𑀺, 𑀜𑀸𑀢𑀺𑀓𑀼𑀮𑀕𑀫𑀦𑀲𑀻𑀮𑀸 𑀘 𑀳𑁄𑀢𑀺, 𑀧𑀭𑀓𑀼𑀮𑀕𑀫𑀦𑀲𑀻𑀮𑀸 𑀘 𑀳𑁄𑀢𑀺, 𑀆𑀤𑀸𑀲𑀤𑀼𑀲𑁆𑀲𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀲𑀻𑀮𑀸 𑀘 𑀳𑁄𑀢𑀺, 𑀫𑀚𑁆𑀚𑀧𑀸𑀬𑀺𑀦𑀻 𑀘 𑀳𑁄𑀢𑀺, 𑀦𑀺𑀮𑁆𑀮𑁄𑀓𑀦𑀲𑀻𑀮𑀸 𑀘 𑀳𑁄𑀢𑀺, 𑀲𑀤𑁆𑀯𑀸𑀭𑀝𑁆𑀞𑀸𑀬𑀺𑀦𑀻 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀦𑀯𑀳𑀺 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀤𑁄𑀲𑀫𑀸𑀳𑀭𑀢𑀺. 𑀪𑀯𑀢𑀺 𑀘 𑀧𑀦𑀼𑀢𑁆𑀢𑀭𑁂𑀢𑁆𑀣 𑀯𑀸𑀓𑁆𑀬𑀁 𑁋
‘𑀆𑀭𑀸𑀫𑀲𑀻𑀮𑀸 ¶ 𑀘 𑀉𑀬𑁆𑀬𑀸𑀦𑀁, 𑀦𑀤𑀻 𑀜𑀸𑀢𑀺 𑀧𑀭𑀓𑀼𑀮𑀁;
𑀆𑀤𑀸𑀲𑀤𑀼𑀲𑁆𑀲𑀫𑀡𑁆𑀟𑀦𑀫𑀦𑀼𑀬𑀼𑀢𑁆𑀢𑀸, 𑀬𑀸 𑀘𑀺𑀢𑁆𑀣𑀻 𑀫𑀚𑁆𑀚𑀧𑀸𑀬𑀺𑀦𑀻.
‘‘‘𑀬𑀸 𑀘 𑀦𑀺𑀮𑁆𑀮𑁄𑀓𑀦𑀲𑀻𑀮𑀸, 𑀬𑀸 𑀘 𑀲𑀤𑁆𑀯𑀸𑀭𑀞𑀸𑀬𑀺𑀦𑀻;
𑀦𑀯𑀳𑁂𑀢𑁂𑀳𑀺 𑀞𑀸𑀦𑁂𑀳𑀺, 𑀧𑀤𑁄𑀲𑀫𑀸𑀳𑀭𑀦𑁆𑀢𑀺 𑀇𑀢𑁆𑀣𑀺𑀬𑁄’’’𑀢𑀺.
‘‘𑀘𑀢𑁆𑀢𑀸𑀮𑀻𑀲𑀸𑀬 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀼𑀭𑀺𑀲𑀁 𑀅𑀘𑁆𑀘𑀸𑀘𑀭𑀢𑀺 𑁋 𑀯𑀺𑀚𑀫𑁆𑀪𑀢𑀺, 𑀯𑀺𑀦𑀫𑀢𑀺, 𑀯𑀺𑀮𑀲𑀢𑀺, 𑀯𑀺𑀮𑀚𑁆𑀚𑀢𑀺, 𑀦𑀔𑁂𑀦 𑀦𑀔𑀁 𑀖𑀝𑁆𑀝𑁂𑀢𑀺, 𑀧𑀸𑀤𑁂𑀦 𑀧𑀸𑀤𑀁 𑀅𑀓𑁆𑀓𑀫𑀢𑀺, 𑀓𑀝𑁆𑀞𑁂𑀦 𑀧𑀣𑀯𑀺𑀁 𑀯𑀺𑀮𑀺𑀔𑀢𑀺, 𑀤𑀸𑀭𑀓𑀁 𑀉𑀮𑁆𑀮𑀗𑁆𑀖𑀢𑀺 𑀉𑀮𑁆𑀮𑀗𑁆𑀖𑀸𑀧𑁂𑀢𑀺 ¶ , 𑀓𑀻𑀴𑀢𑀺 𑀓𑀻𑀴𑀸𑀧𑁂𑀢𑀺, 𑀘𑀼𑀫𑁆𑀩𑀢𑀺 𑀘𑀼𑀫𑁆𑀩𑀸𑀧𑁂𑀢𑀺, 𑀪𑀼𑀜𑁆𑀚𑀢𑀺 𑀪𑀼𑀜𑁆𑀚𑀸𑀧𑁂𑀢𑀺, 𑀤𑀤𑀸𑀢𑀺, 𑀬𑀸𑀘𑀢𑀺, 𑀓𑀢𑀫𑀦𑀼𑀓𑀭𑁄𑀢𑀺, 𑀉𑀘𑁆𑀘𑀁 𑀪𑀸𑀲𑀢𑀺, 𑀦𑀻𑀘𑀁 𑀪𑀸𑀲𑀢𑀺, 𑀅𑀯𑀺𑀘𑁆𑀘𑀁 𑀪𑀸𑀲𑀢𑀺, 𑀯𑀺𑀯𑀺𑀘𑁆𑀘𑀁 𑀪𑀸𑀲𑀢𑀺, 𑀦𑀘𑁆𑀘𑁂𑀦 𑀕𑀻𑀢𑁂𑀦 𑀯𑀸𑀤𑀺𑀢𑁂𑀦 𑀭𑁄𑀤𑀦𑁂𑀦 𑀯𑀺𑀮𑀲𑀺𑀢𑁂𑀦 𑀯𑀺𑀪𑀽𑀲𑀺𑀢𑁂𑀦 𑀚𑀕𑁆𑀖𑀢𑀺, 𑀧𑁂𑀓𑁆𑀔𑀢𑀺, 𑀓𑀝𑀺𑀁 𑀘𑀸𑀮𑁂𑀢𑀺, 𑀕𑀼𑀬𑁆𑀳𑀪𑀡𑁆𑀟𑀓𑀁 𑀲𑀜𑁆𑀘𑀸𑀮𑁂𑀢𑀺, 𑀊𑀭𑀼𑀁 𑀯𑀺𑀯𑀭𑀢𑀺, 𑀊𑀭𑀼𑀁 𑀧𑀺𑀤𑀳𑀢𑀺, 𑀣𑀦𑀁 𑀤𑀲𑁆𑀲𑁂𑀢𑀺, 𑀓𑀘𑁆𑀙𑀁 𑀤𑀲𑁆𑀲𑁂𑀢𑀺, 𑀦𑀸𑀪𑀺𑀁 𑀤𑀲𑁆𑀲𑁂𑀢𑀺, 𑀅𑀓𑁆𑀔𑀺𑀁 𑀦𑀺𑀔𑀦𑀢𑀺, 𑀪𑀫𑀼𑀓𑀁 𑀉𑀓𑁆𑀔𑀺𑀧𑀢𑀺, 𑀑𑀝𑁆𑀞𑀁 𑀉𑀧𑀮𑀺𑀔𑀢𑀺, 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑀺, 𑀤𑀼𑀲𑁆𑀲𑀁 𑀫𑀼𑀜𑁆𑀘𑀢𑀺, 𑀤𑀼𑀲𑁆𑀲𑀁 𑀧𑀝𑀺𑀩𑀦𑁆𑀥𑀢𑀺, 𑀲𑀺𑀭𑀲𑀁 𑀫𑀼𑀜𑁆𑀘𑀢𑀺, 𑀲𑀺𑀭𑀲𑀁 𑀩𑀦𑁆𑀥𑀢𑀺. 𑀇𑀫𑁂𑀳𑀺 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀘𑀢𑁆𑀢𑀸𑀮𑀻𑀲𑀸𑀬 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀼𑀭𑀺𑀲𑀁 𑀅𑀘𑁆𑀘𑀸𑀘𑀭𑀢𑀺.
‘‘𑀧𑀜𑁆𑀘𑀯𑀻𑀲𑀸𑀬 ¶ 𑀔𑀮𑀼, 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀤𑀼𑀝𑁆𑀞𑀸 𑀯𑁂𑀤𑀺𑀢𑀩𑁆𑀩𑀸 𑀪𑀯𑀢𑀺 𑁋 𑀲𑀸𑀫𑀺𑀓𑀲𑁆𑀲 𑀧𑀯𑀸𑀲𑀁 𑀯𑀡𑁆𑀡𑁂𑀢𑀺, 𑀧𑀯𑀼𑀝𑁆𑀞𑀁 𑀦 𑀲𑀭𑀢𑀺, 𑀆𑀕𑀢𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀅𑀯𑀡𑁆𑀡𑀁 𑀢𑀲𑁆𑀲 𑀪𑀡𑀢𑀺, 𑀯𑀡𑁆𑀡𑀁 𑀢𑀲𑁆𑀲 𑀦 𑀪𑀡𑀢𑀺, 𑀅𑀦𑀢𑁆𑀣𑀁 𑀢𑀲𑁆𑀲 𑀘𑀭𑀢𑀺, 𑀅𑀢𑁆𑀣𑀁 𑀢𑀲𑁆𑀲 𑀦 𑀘𑀭𑀢𑀺, 𑀅𑀓𑀺𑀘𑁆𑀘𑀁 𑀢𑀲𑁆𑀲 𑀓𑀭𑁄𑀢𑀺, 𑀓𑀺𑀘𑁆𑀘𑀁 𑀢𑀲𑁆𑀲 𑀦 𑀓𑀭𑁄𑀢𑀺, 𑀧𑀭𑀺𑀤𑀳𑀺𑀢𑁆𑀯𑀸 𑀲𑀬𑀢𑀺, 𑀧𑀭𑀫𑁆𑀫𑀼𑀔𑀻 𑀦𑀺𑀧𑀚𑁆𑀚𑀢𑀺, 𑀧𑀭𑀺𑀯𑀢𑁆𑀢𑀓𑀚𑀸𑀢𑀸 𑀔𑁄 𑀧𑀦 𑀳𑁄𑀢𑀺 𑀓𑀼𑀗𑁆𑀓𑀼𑀫𑀺𑀬𑀚𑀸𑀢𑀸, 𑀤𑀻𑀖𑀁 𑀅𑀲𑁆𑀲𑀲𑀢𑀺, 𑀤𑀼𑀓𑁆𑀔𑀁 𑀯𑁂𑀤𑀬𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀅𑀪𑀺𑀡𑁆𑀳𑀁 𑀕𑀘𑁆𑀙𑀢𑀺, 𑀯𑀺𑀮𑁄𑀫𑀫𑀸𑀘𑀭𑀢𑀺, 𑀧𑀭𑀧𑀼𑀭𑀺𑀲𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀡𑁆𑀡𑀲𑁄𑀢𑀁 𑀯𑀺𑀯𑀭𑀫𑁄𑀤𑀳𑀢𑀺, 𑀦𑀺𑀳𑀢𑀪𑁄𑀕𑀸 𑀔𑁄 𑀧𑀦 𑀳𑁄𑀢𑀺, 𑀧𑀝𑀺𑀯𑀺𑀲𑁆𑀲𑀓𑁂𑀳𑀺 𑀲𑀦𑁆𑀣𑀯𑀁 𑀓𑀭𑁄𑀢𑀺, 𑀦𑀺𑀓𑁆𑀔𑀦𑁆𑀢𑀧𑀸𑀤𑀸 𑀔𑁄 𑀧𑀦 𑀳𑁄𑀢𑀺 𑀯𑀺𑀲𑀺𑀔𑀸𑀦𑀼𑀘𑀸𑀭𑀺𑀦𑀻, 𑀅𑀢𑀺𑀘𑀸𑀭𑀺𑀦𑀻 𑀔𑁄 𑀧𑀦 𑀳𑁄𑀢𑀺 𑀦𑀺𑀘𑁆𑀘𑀁 𑀲𑀸𑀫𑀺𑀓𑁂 𑀅𑀕𑀸𑀭𑀯𑀸 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀸, 𑀅𑀪𑀺𑀡𑁆𑀳𑀁 𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀺, 𑀓𑀘𑁆𑀙𑀸𑀦𑀺 𑀅𑀗𑁆𑀕𑀸𑀦𑀺 𑀣𑀦𑀸𑀦𑀺 𑀤𑀲𑁆𑀲𑁂𑀢𑀺, 𑀤𑀺𑀲𑁄𑀤𑀺𑀲𑀁 𑀕𑀦𑁆𑀢𑁆𑀯𑀸 𑀧𑁂𑀓𑁆𑀔𑀢𑀺. 𑀇𑀫𑁂𑀳𑀺 𑀔𑀮𑀼 𑀲𑀫𑁆𑀫 𑀧𑀼𑀡𑁆𑀡𑀫𑀼𑀔, 𑀧𑀜𑁆𑀘𑀯𑀻𑀲𑀸𑀬 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀤𑀼𑀝𑁆𑀞𑀸 𑀯𑁂𑀤𑀺𑀢𑀩𑁆𑀩𑀸 𑀪𑀯𑀢𑀺. 𑀪𑀯𑀢𑀺 𑀘 𑀧𑀦𑀼𑀢𑁆𑀢𑀭𑁂𑀢𑁆𑀣 𑀯𑀸𑀓𑁆𑀬𑀁 𑁋
‘𑀧𑀯𑀸𑀲𑀁 ¶ 𑀢𑀲𑁆𑀲 𑀯𑀡𑁆𑀡𑁂𑀢𑀺, 𑀕𑀢𑀁 𑀢𑀲𑁆𑀲 𑀦 𑀲𑁄𑀘𑀢𑀺;
𑀤𑀺𑀲𑁆𑀯𑀸𑀦 𑀧𑀢𑀺𑀫𑀸𑀕𑀢𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀪𑀢𑁆𑀢𑀸𑀭𑀯𑀡𑁆𑀡𑀁 𑀦 𑀓𑀤𑀸𑀘𑀺 𑀪𑀸𑀲𑀢𑀺;
𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀅𑀦𑀢𑁆𑀣𑀁 𑀢𑀲𑁆𑀲 𑀘𑀭𑀢𑀺 𑀅𑀲𑀜𑁆𑀜𑀢𑀸, 𑀅𑀢𑁆𑀣𑀜𑁆𑀘 𑀳𑀸𑀧𑁂𑀢𑀺 𑀅𑀓𑀺𑀘𑁆𑀘𑀓𑀸𑀭𑀺𑀦𑀻;
𑀧𑀭𑀺𑀤𑀳𑀺𑀢𑁆𑀯𑀸 𑀲𑀬𑀢𑀺 𑀧𑀭𑀫𑁆𑀫𑀼𑀔𑀻, 𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀧𑀭𑀺𑀯𑀢𑁆𑀢𑀚𑀸𑀢𑀸 ¶ 𑀘 𑀪𑀯𑀢𑀺 𑀓𑀼𑀗𑁆𑀓𑀼𑀫𑀻, 𑀤𑀻𑀖𑀜𑁆𑀘 𑀅𑀲𑁆𑀲𑀲𑀢𑀺 𑀤𑀼𑀓𑁆𑀔𑀯𑁂𑀤𑀺𑀦𑀻;
𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀫𑀪𑀺𑀡𑁆𑀳𑀁 𑀕𑀘𑁆𑀙𑀢𑀺, 𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀯𑀺𑀮𑁄𑀫𑀫𑀸𑀘𑀭𑀢𑀺 ¶ 𑀅𑀓𑀺𑀘𑁆𑀘𑀓𑀸𑀭𑀺𑀦𑀻, 𑀲𑀤𑁆𑀤𑀁 𑀦𑀺𑀲𑀸𑀫𑁂𑀢𑀺 𑀧𑀭𑀲𑁆𑀲 𑀪𑀸𑀲𑀢𑁄;
𑀦𑀺𑀳𑀢𑀪𑁄𑀕𑀸 𑀘 𑀓𑀭𑁄𑀢𑀺 𑀲𑀦𑁆𑀣𑀯𑀁, 𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀓𑀺𑀘𑁆𑀙𑁂𑀦 𑀮𑀤𑁆𑀥𑀁 𑀓𑀲𑀺𑀭𑀸𑀪𑀢𑀁 𑀥𑀦𑀁, 𑀯𑀺𑀢𑁆𑀢𑀁 𑀯𑀺𑀦𑀸𑀲𑁂𑀢𑀺 𑀤𑀼𑀓𑁆𑀔𑁂𑀦 𑀲𑀫𑁆𑀪𑀢𑀁;
𑀧𑀝𑀺𑀯𑀺𑀲𑁆𑀲𑀓𑁂𑀳𑀺 𑀘 𑀓𑀭𑁄𑀢𑀺 𑀲𑀦𑁆𑀣𑀯𑀁, 𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀦𑀺𑀓𑁆𑀔𑀦𑁆𑀢𑀧𑀸𑀤𑀸 𑀯𑀺𑀲𑀺𑀔𑀸𑀦𑀼𑀘𑀸𑀭𑀺𑀦𑀻, 𑀦𑀺𑀘𑁆𑀘𑀜𑁆𑀘 𑀲𑀸𑀫𑀺𑀫𑁆𑀳𑀺 𑀧𑀤𑀼𑀝𑁆𑀞𑀫𑀸𑀦𑀲𑀸;
𑀅𑀢𑀺𑀘𑀸𑀭𑀺𑀦𑀻 𑀳𑁄𑀢𑀺 𑀅𑀧𑁂𑀢𑀕𑀸𑀭𑀯𑀸, 𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀅𑀪𑀺𑀓𑁆𑀔𑀡𑀁 𑀢𑀺𑀝𑁆𑀞𑀢𑀺 𑀤𑁆𑀯𑀸𑀭𑀫𑀽𑀮𑁂, 𑀣𑀦𑀸𑀦𑀺 𑀓𑀘𑁆𑀙𑀸𑀦𑀺 𑀘 𑀤𑀲𑁆𑀲𑀬𑀦𑁆𑀢𑀻;
𑀤𑀺𑀲𑁄𑀤𑀺𑀲𑀁 𑀧𑁂𑀓𑁆𑀔𑀢𑀺 𑀪𑀦𑁆𑀢𑀘𑀺𑀢𑁆𑀢𑀸, 𑀏𑀢𑁂 𑀧𑀤𑀼𑀝𑁆𑀞𑀸𑀬 𑀪𑀯𑀦𑁆𑀢𑀺 𑀮𑀓𑁆𑀔𑀡𑀸.
‘𑀲𑀩𑁆𑀩𑀸 𑀦𑀤𑀻 𑀯𑀗𑁆𑀓𑀕𑀢𑀻, 𑀲𑀩𑁆𑀩𑁂 𑀓𑀝𑁆𑀞𑀫𑀬𑀸 𑀯𑀦𑀸;
𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀭𑁂 𑀧𑀸𑀧𑀁, 𑀮𑀪𑀫𑀸𑀦𑁂 𑀦𑀺𑀯𑀸𑀢𑀓𑁂.
‘𑀲𑀘𑁂 𑀮𑀪𑁂𑀣 𑀔𑀡𑀁 𑀯𑀸 𑀭𑀳𑁄 𑀯𑀸, 𑀦𑀺𑀯𑀸𑀢𑀓𑀁 𑀯𑀸𑀧𑀺 𑀮𑀪𑁂𑀣 𑀢𑀸𑀤𑀺𑀲𑀁;
𑀲𑀩𑁆𑀩𑀸𑀯 𑀇𑀢𑁆𑀣𑀻 𑀓𑀬𑀺𑀭𑀼𑀁 𑀦𑀼 𑀧𑀸𑀧𑀁, 𑀅𑀜𑁆𑀜𑀁 𑀅𑀮𑀢𑁆𑀣 𑀧𑀻𑀞𑀲𑀧𑁆𑀧𑀺𑀦𑀸𑀧𑀺 𑀲𑀤𑁆𑀥𑀺𑀁.
‘𑀦𑀭𑀸𑀦𑀫𑀸𑀭𑀸𑀫𑀓𑀭𑀸𑀲𑀼 𑀦𑀸𑀭𑀺𑀲𑀼, 𑀅𑀦𑁂𑀓𑀘𑀺𑀢𑁆𑀢𑀸𑀲𑀼 𑀅𑀦𑀺𑀕𑁆𑀕𑀳𑀸𑀲𑀼 𑀘;
𑀲𑀩𑁆𑀩𑀢𑁆𑀣 𑀦𑀸𑀧𑀻𑀢𑀺𑀓𑀭𑀸𑀧𑀺 𑀘𑁂 𑀲𑀺𑀬𑀸, 𑀦 𑀯𑀺𑀲𑁆𑀲𑀲𑁂 𑀢𑀺𑀢𑁆𑀣𑀲𑀫𑀸 𑀳𑀺 𑀦𑀸𑀭𑀺𑀬𑁄’’’𑀢𑀺.
𑀢𑀢𑁆𑀣 ¶ 𑀕𑁄𑀡𑀁 𑀥𑁂𑀦𑀼𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀜𑀸𑀢𑀺𑀓𑀼𑀮𑁂 𑀧𑀤𑀼𑀲𑁆𑀲𑀢𑀻𑀢𑀺 𑀢𑀢𑁆𑀣 𑀲𑀸 𑀦𑀺𑀩𑁆𑀪𑀬𑀸 𑀳𑀼𑀢𑁆𑀯𑀸 𑀢𑀭𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀲𑁆𑀲𑀸𑀲𑀓𑁂𑀳𑀺 𑀤𑀸𑀲𑀸𑀤𑀻𑀳𑀺𑀧𑀺 ¶ 𑀲𑀤𑁆𑀥𑀺𑀁 𑀅𑀦𑀸𑀘𑀸𑀭𑀁 𑀘𑀭𑀢𑀺, 𑀜𑀸𑀢𑀓𑀸 𑀜𑀢𑁆𑀯𑀸𑀧𑀺 𑀦𑀺𑀕𑁆𑀕𑀳𑀁 𑀦 𑀓𑀭𑁄𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀓𑀺𑀢𑁆𑀢𑀺𑀁 𑀧𑀭𑀺𑀳𑀭𑀫𑀸𑀦𑀸 𑀅𑀚𑀸𑀦𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀅𑀦𑀢𑁆𑀣𑀘𑀭𑀸𑀦𑀻𑀢𑀺 𑀅𑀘𑀭𑀺𑀢𑀩𑁆𑀩𑀸𑀦𑀺 𑀅𑀢𑁆𑀣𑀸𑀦𑀺, 𑀅𑀓𑀺𑀘𑁆𑀘𑀓𑀸𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀕𑀼𑀡𑀦𑁆𑀢𑀺 𑀚𑀺𑀬𑀸𑀭𑀳𑀺𑀢𑀁. 𑀧𑀸𑀧𑀲𑀳𑀸𑀬𑀓𑁄𑀢𑀺 𑀤𑀼𑀫𑁆𑀫𑀺𑀢𑁆𑀢𑁄.
𑀤𑀮𑀺𑀤𑁆𑀤𑀢𑀸𑀢𑀺 𑀤𑀮𑀺𑀤𑁆𑀤𑀢𑀸𑀬. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀤𑀮𑀺𑀤𑁆𑀤𑁄 𑀅𑀮𑀗𑁆𑀓𑀸𑀭𑀸𑀤𑀻𑀦𑀁 𑀅𑀪𑀸𑀯𑀢𑁄 𑀓𑀺𑀮𑁂𑀲𑁂𑀦 𑀲𑀗𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀢𑀁 𑀅𑀯𑀚𑀸𑀦𑀸𑀢𑀺. 𑀕𑀺𑀮𑀸𑀦𑁄 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺 𑀲𑀗𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀚𑀭𑀸𑀚𑀺𑀡𑁆𑀡𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑀔𑀺𑀟𑁆𑀟𑀸𑀭𑀢𑀺𑀲𑀫𑀢𑁆𑀣𑁄 𑀦 𑀳𑁄𑀢𑀺. 𑀲𑀼𑀭𑀸𑀲𑁄𑀡𑁆𑀟𑁄 ¶ 𑀢𑀲𑁆𑀲𑀸 𑀳𑀢𑁆𑀣𑀧𑀺𑀴𑀦𑁆𑀥𑀦𑀸𑀤𑀻𑀦𑀺𑀧𑀺 𑀲𑀼𑀭𑀸𑀖𑀭𑀜𑁆𑀜𑁂𑀯 𑀧𑀯𑁂𑀲𑁂𑀢𑀺. 𑀫𑀼𑀤𑁆𑀥𑁄 𑀅𑀦𑁆𑀥𑀩𑀸𑀮𑁄 𑀭𑀢𑀺𑀓𑀼𑀲𑀮𑁄 𑀦 𑀳𑁄𑀢𑀺. 𑀧𑀫𑀢𑁆𑀢𑁄 𑀤𑀸𑀲𑀺𑀲𑁄𑀡𑁆𑀟𑁄 𑀳𑀼𑀢𑁆𑀯𑀸 𑀖𑀭𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺, 𑀪𑀭𑀺𑀬𑀁 𑀧𑀦 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀢𑁂𑀦 𑀦𑀁 𑀅𑀯𑀚𑀸𑀦𑀸𑀢𑀺. 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀅𑀦𑀼𑀯𑀢𑁆𑀢𑀦𑁆𑀢𑀁 ‘‘𑀅𑀬𑀁 𑀦𑀺𑀢𑁆𑀢𑁂𑀚𑁄, 𑀫𑀫𑁂𑀯 𑀅𑀦𑀼𑀯𑀢𑁆𑀢𑀢𑀻’’𑀢𑀺 𑀢𑀁 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀬𑁄 𑀧𑀦 𑀲𑀩𑁆𑀩𑀁 𑀥𑀦𑀁 𑀅𑀦𑀼𑀧𑁆𑀧𑀤𑁂𑀢𑀺 𑀓𑀼𑀝𑀼𑀫𑁆𑀩𑀁 𑀧𑀝𑀺𑀘𑁆𑀙𑀸𑀧𑁂𑀢𑀺, 𑀢𑀲𑁆𑀲 𑀪𑀭𑀺𑀬𑀸 𑀲𑀩𑁆𑀩𑀁 𑀥𑀦𑀲𑀸𑀭𑀁 𑀳𑀢𑁆𑀣𑁂 𑀓𑀢𑁆𑀯𑀸 𑀢𑀁 𑀤𑀸𑀲𑀁 𑀯𑀺𑀬 𑀅𑀯𑀚𑀸𑀦𑀸𑀢𑀺, 𑀇𑀘𑁆𑀙𑀫𑀸𑀦𑀸 ‘‘𑀓𑁄 𑀢𑀬𑀸 𑀅𑀢𑁆𑀣𑁄’’𑀢𑀺 𑀖𑀭𑀢𑁄𑀧𑀺 𑀦𑀁 𑀦𑀺𑀓𑁆𑀓𑀟𑁆𑀠𑀢𑀺. 𑀫𑀼𑀤𑁆𑀥𑀧𑀢𑁆𑀢𑀦𑁆𑀢𑀺 𑀫𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀁.
𑀧𑀤𑁄𑀲𑀫𑀸𑀳𑀭𑀢𑀻𑀢𑀺 𑀲𑀸𑀫𑀺𑀓𑁂 𑀧𑀤𑁄𑀲𑀁 𑀆𑀳𑀭𑀢𑀺 𑀤𑀼𑀲𑁆𑀲𑀢𑀺, 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀸𑀫𑀕𑀫𑀦𑀲𑀻𑀮𑀸𑀢𑀺 𑀲𑀸𑀫𑀺𑀓𑀁 𑀆𑀧𑀼𑀘𑁆𑀙𑀸 𑀯𑀸 𑀅𑀦𑀸𑀧𑀼𑀘𑁆𑀙𑀸 𑀯𑀸 𑀅𑀪𑀺𑀡𑁆𑀳𑀁 𑀧𑀼𑀧𑁆𑀨𑀸𑀭𑀸𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀅𑀦𑀸𑀘𑀸𑀭𑀁 𑀘𑀭𑀺𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀆𑀭𑀸𑀫𑁂 𑀭𑀼𑀓𑁆𑀔𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀩𑀸𑀮𑀲𑀸𑀫𑀺𑀓𑀁 𑀲𑀜𑁆𑀜𑀸𑀧𑁂𑀢𑀺. 𑀧𑀡𑁆𑀟𑀺𑀢𑁄 𑀧𑀦 ‘‘𑀅𑀤𑁆𑀥𑀸 𑀏𑀲𑀸 𑀢𑀢𑁆𑀣 𑀅𑀦𑀸𑀘𑀸𑀭𑀁 𑀘𑀭𑀢𑀻’’𑀢𑀺 𑀧𑀼𑀦 𑀢𑀲𑁆𑀲𑀸 𑀕𑀦𑁆𑀢𑀼𑀁 𑀦 𑀤𑁂𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀓𑀼𑀮𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀤𑀻𑀦𑀁 𑀕𑁂𑀳𑀁. 𑀢𑀁 𑀲𑀸 ‘‘𑀅𑀲𑀼𑀓𑀓𑀼𑀮𑁂 𑀫𑁂 𑀯𑀟𑁆𑀠𑀺 𑀧𑀬𑁄𑀚𑀺𑀢𑀸 𑀅𑀢𑁆𑀣𑀺, 𑀢𑀸𑀯𑀓𑀸𑀮𑀺𑀓𑀁 𑀤𑀺𑀦𑁆𑀦𑀓𑀁 𑀅𑀢𑁆𑀣𑀺, 𑀢𑀁 𑀲𑀸𑀥𑁂𑀫𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺. 𑀦𑀺𑀮𑁆𑀮𑁄𑀓𑀦𑀲𑀻𑀮𑀸𑀢𑀺 𑀯𑀸𑀢𑀧𑀸𑀦𑀦𑁆𑀢𑀭𑀸𑀤𑀻𑀳𑀺 𑀑𑀮𑁄𑀓𑀦𑀲𑀻𑀮𑀸. 𑀲𑀤𑁆𑀯𑀸𑀭𑀝𑁆𑀞𑀸𑀬𑀺𑀦𑀻𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀤𑀲𑁆𑀲𑁂𑀦𑁆𑀢𑀻 𑀲𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀺.
𑀅𑀘𑁆𑀘𑀸𑀘𑀭𑀢𑀻𑀢𑀺 𑀅𑀢𑀺𑀓𑁆𑀓𑀫𑁆𑀫 𑀘𑀭𑀢𑀺, 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸𑀯 𑀅𑀜𑁆𑀜𑀲𑁆𑀲 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀚𑀫𑁆𑀪𑀢𑀻𑀢𑀺 ‘‘𑀅𑀳𑀁 𑀢𑀁 𑀤𑀺𑀲𑁆𑀯𑀸 𑀯𑀺𑀚𑀫𑁆𑀪𑀺𑀲𑁆𑀲𑀸𑀫𑀺, 𑀢𑀸𑀬 ¶ 𑀲𑀜𑁆𑀜𑀸𑀬 𑀑𑀓𑀸𑀲𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀚𑀸𑀦𑁂𑀬𑁆𑀬𑀸𑀲𑀻’’𑀢𑀺 𑀧𑀞𑀫𑀫𑁂𑀯 𑀓𑀢𑀲𑀗𑁆𑀓𑁂𑀢𑀸 𑀯𑀸 𑀳𑀼𑀢𑁆𑀯𑀸 𑀅𑀓𑀢𑀲𑀗𑁆𑀓𑁂𑀢𑀸 𑀯𑀸𑀧𑀺 ‘‘𑀏𑀯𑀁 𑀏𑀲 𑀫𑀬𑀺 𑀩𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑀸𑀫𑀺𑀓𑀲𑁆𑀲 𑀧𑀲𑁆𑀲𑁂 𑀞𑀺𑀢𑀸𑀯 𑀯𑀺𑀚𑀫𑁆𑀪𑀢𑀺 𑀯𑀺𑀚𑀫𑁆𑀪𑀦𑀁 ¶ 𑀤𑀲𑁆𑀲𑁂𑀢𑀺. 𑀯𑀺𑀦𑀫𑀢𑀻𑀢𑀺 𑀓𑀺𑀜𑁆𑀘𑀺𑀤𑁂𑀯 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀢𑀁 𑀉𑀓𑁆𑀔𑀺𑀧𑀦𑁆𑀢𑀻 𑀯𑀺𑀬 𑀑𑀦𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑀺. 𑀯𑀺𑀮𑀲𑀢𑀻𑀢𑀺 𑀕𑀫𑀦𑀸𑀤𑀻𑀳𑀺 𑀯𑀸 𑀇𑀭𑀺𑀬𑀸𑀧𑀣𑁂𑀳𑀺 𑀅𑀮𑀗𑁆𑀓𑀸𑀭𑁂𑀦 𑀯𑀸 𑀯𑀺𑀮𑀸𑀲𑀁 𑀤𑀲𑁆𑀲𑁂𑀢𑀺. 𑀯𑀺𑀮𑀚𑁆𑀚𑀢𑀻𑀢𑀺 𑀮𑀚𑁆𑀚𑀦𑁆𑀢𑀻 𑀯𑀺𑀬 𑀯𑀢𑁆𑀣𑁂𑀦 𑀲𑀭𑀻𑀭𑀁 𑀙𑀸𑀤𑁂𑀢𑀺, 𑀓𑀯𑀸𑀝𑀁 𑀯𑀸 𑀪𑀺𑀢𑁆𑀢𑀺𑀁 𑀯𑀸 𑀅𑀮𑁆𑀮𑀻𑀬𑀢𑀺. 𑀦𑀔𑁂𑀦𑀸𑀢𑀺 𑀧𑀸𑀤𑀦𑀔𑁂𑀦 𑀧𑀸𑀤𑀦𑀔𑀁, 𑀳𑀢𑁆𑀣𑀦𑀔𑁂𑀦 𑀳𑀢𑁆𑀣𑀦𑀔𑀁 𑀖𑀝𑁆𑀝𑁂𑀢𑀺. 𑀓𑀝𑁆𑀞𑁂𑀦𑀸𑀢𑀺 𑀤𑀡𑁆𑀟𑀓𑁂𑀦. 𑀤𑀸𑀭𑀓𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀼𑀢𑁆𑀢𑀁 𑀅𑀜𑁆𑀜𑀲𑁆𑀲 𑀯𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀢𑀺 𑀯𑀸 𑀉𑀓𑁆𑀔𑀺𑀧𑀸𑀧𑁂𑀢𑀺 𑀯𑀸. 𑀓𑀻𑀴𑀢𑀻𑀢𑀺 𑀲𑀬𑀁 𑀯𑀸 𑀓𑀻𑀴𑀢𑀺, 𑀤𑀸𑀭𑀓𑀁 𑀯𑀸 𑀓𑀻𑀴𑀸𑀧𑁂𑀢𑀺. 𑀘𑀼𑀫𑁆𑀩𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀤𑀸𑀢𑀻𑀢𑀺 𑀢𑀲𑁆𑀲 𑀓𑀺𑀜𑁆𑀘𑀺𑀤𑁂𑀯 𑀨𑀮𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀤𑁂𑀢𑀺. 𑀬𑀸𑀘𑀢𑀻𑀢𑀺 𑀢𑀫𑁂𑀯 𑀧𑀝𑀺𑀬𑀸𑀘𑀢𑀺. 𑀅𑀦𑀼𑀓𑀭𑁄𑀢𑀻𑀢𑀺 𑀤𑀸𑀭𑀓𑁂𑀦 𑀓𑀢𑀁 𑀓𑀢𑀁 𑀅𑀦𑀼𑀓𑀭𑁄𑀢𑀺. 𑀉𑀘𑁆𑀘𑀦𑁆𑀢𑀺 𑀫𑀳𑀸𑀲𑀤𑁆𑀤𑀯𑀲𑁂𑀦 𑀯𑀸 𑀣𑁄𑀫𑀦𑀯𑀲𑁂𑀦 𑀯𑀸 𑀉𑀘𑁆𑀘𑀁. 𑀦𑀻𑀘𑀦𑁆𑀢𑀺 𑀫𑀦𑁆𑀤𑀲𑀤𑁆𑀤𑀯𑀲𑁂𑀦 𑀯𑀸 𑀅𑀫𑀦𑀸𑀧𑀯𑀘𑀦𑁂𑀦 𑀯𑀸 𑀧𑀭𑀺𑀪𑀯𑀯𑀘𑀦𑁂𑀦 𑀯𑀸 𑀦𑀻𑀘𑀁. 𑀅𑀯𑀺𑀘𑁆𑀘𑀦𑁆𑀢𑀺 𑀩𑀳𑀼𑀚𑀦𑀫𑀚𑁆𑀛𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀯𑀺𑀯𑀺𑀘𑁆𑀘𑀦𑁆𑀢𑀺 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑀁. 𑀦𑀘𑁆𑀘𑁂𑀦𑀸𑀢𑀺 𑀏𑀢𑁂𑀳𑀺 𑀦𑀘𑁆𑀘𑀸𑀤𑀻𑀳𑀺 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺. 𑀢𑀢𑁆𑀣 𑀭𑁄𑀤𑀺𑀢𑁂𑀦 𑀦𑀺𑀫𑀺𑀢𑁆𑀢𑀓𑀭𑀡𑁂𑀦 𑀭𑀢𑁆𑀢𑀺𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀯𑀸𑀢𑀧𑀸𑀦𑁂𑀦 𑀳𑀢𑁆𑀣𑀺𑀁 𑀆𑀭𑁄𑀧𑁂𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀦 𑀦𑀻𑀢𑀸𑀬 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀺𑀬𑀸 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀚𑀕𑁆𑀖𑀢𑀻𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀢𑀺, 𑀏𑀯𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 ¶ . 𑀓𑀘𑁆𑀙𑀦𑁆𑀢𑀺 𑀉𑀧𑀓𑀘𑁆𑀙𑀓𑀁. 𑀉𑀧𑀮𑀺𑀔𑀢𑀻𑀢𑀺 𑀤𑀦𑁆𑀢𑁂𑀳𑀺 𑀉𑀧𑀮𑀺𑀔𑀢𑀺. 𑀲𑀺𑀭𑀲𑀦𑁆𑀢𑀺 𑀓𑁂𑀲𑀯𑀝𑁆𑀝𑀺𑀁. 𑀏𑀯𑀁 𑀓𑁂𑀲𑀸𑀦𑀁 𑀫𑁄𑀘𑀦𑀩𑀦𑁆𑀥𑀦𑁂𑀳𑀺𑀧𑀺 𑀧𑀭𑀧𑀼𑀭𑀺𑀲𑀸𑀦𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺, 𑀦𑀺𑀬𑀸𑀫𑁂𑀢𑁆𑀯𑀸 𑀯𑀸 𑀅𑀦𑀺𑀬𑀸𑀫𑁂𑀢𑁆𑀯𑀸 𑀯𑀸 𑀓𑁄𑀘𑀺𑀤𑁂𑀯 𑀲𑀸𑀭𑀚𑁆𑀚𑀺𑀲𑁆𑀲𑀢𑀻𑀢𑀺𑀧𑀺 𑀓𑀭𑁄𑀢𑀺𑀬𑁂𑀯.
𑀧𑀤𑀼𑀝𑁆𑀞𑀸 𑀯𑁂𑀤𑀺𑀢𑀩𑁆𑀩𑀸 𑀪𑀯𑀢𑀻𑀢𑀺 𑀅𑀬𑀁 𑀫𑀬𑀺 𑀧𑀤𑀼𑀝𑁆𑀞𑀸 𑀓𑀼𑀤𑁆𑀥𑀸, 𑀓𑀼𑀚𑁆𑀛𑀺𑀢𑁆𑀯𑀸 𑀘 𑀧𑀦 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑀻𑀢𑀺 𑀧𑀡𑁆𑀟𑀺𑀢𑁂𑀦 𑀯𑁂𑀤𑀺𑀢𑀩𑁆𑀩𑀸 𑀪𑀯𑀢𑀺. 𑀧𑀯𑀸𑀲𑀦𑁆𑀢𑀺 ‘‘𑀅𑀲𑀼𑀓𑀕𑀸𑀫𑁂 𑀧𑀬𑀼𑀢𑁆𑀢𑀁 𑀥𑀦𑀁 𑀦𑀲𑁆𑀲𑀢𑀺, 𑀕𑀘𑁆𑀙 𑀢𑀁 𑀲𑀸𑀥𑁂𑀳𑀺, 𑀯𑁄𑀳𑀸𑀭𑀁 𑀓𑀭𑁄𑀳𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀅𑀦𑀸𑀘𑀸𑀭𑀁 𑀘𑀭𑀺𑀢𑀼𑀓𑀸𑀫𑀸 𑀧𑀯𑀸𑀲𑀁 𑀯𑀡𑁆𑀡𑁂𑀢𑀺. 𑀅𑀦𑀢𑁆𑀣𑀦𑁆𑀢𑀺 𑀅𑀯𑀟𑁆𑀠𑀺𑀁. 𑀅𑀓𑀺𑀘𑁆𑀘𑀦𑁆𑀢𑀺 𑀅𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁. 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀕𑀸𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀧𑀭𑀺𑀯𑀢𑁆𑀢𑀓𑀚𑀸𑀢𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀫𑀸𑀦𑀸. 𑀓𑀼𑀗𑁆𑀓𑀼𑀫𑀺𑀬𑀚𑀸𑀢𑀸𑀢𑀺 𑀓𑁄𑀮𑀸𑀳𑀮𑀚𑀸𑀢𑀸 𑀧𑀸𑀤𑀫𑀽𑀮𑁂 𑀦𑀺𑀧𑀦𑁆𑀦𑀸 𑀧𑀭𑀺𑀘𑀸𑀭𑀺𑀓𑀸 𑀉𑀝𑁆𑀞𑀸𑀧𑁂𑀢𑀺, 𑀤𑀻𑀧𑀁 𑀚𑀸𑀮𑀸𑀧𑁂𑀢𑀺, 𑀦𑀸𑀦𑀧𑁆𑀧𑀓𑀸𑀭𑀁 𑀓𑁄𑀮𑀸𑀳𑀮𑀁 𑀓𑀭𑁄𑀢𑀺, 𑀢𑀲𑁆𑀲 𑀓𑀺𑀮𑁂𑀲𑀭𑀢𑀺𑀁 𑀦𑀸𑀲𑁂𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀬𑀢𑀻𑀢𑀺 𑀲𑀻𑀲𑀁 𑀫𑁂 𑀭𑀼𑀚𑁆𑀚𑀢𑀻𑀢𑀺𑀆𑀤𑀻𑀦𑀺 𑀯𑀤𑀢𑀺. 𑀯𑀺𑀮𑁄𑀫𑀫𑀸𑀘𑀭𑀢𑀻𑀢𑀺 𑀆𑀳𑀸𑀭𑀁 ¶ 𑀲𑀻𑀢𑀮𑀁 𑀇𑀘𑁆𑀙𑀦𑁆𑀢𑀲𑁆𑀲 𑀉𑀡𑁆𑀳𑀁 𑀤𑁂𑀢𑀻𑀢𑀺𑀆𑀤𑀻𑀦𑀁 𑀯𑀲𑁂𑀦 𑀧𑀘𑁆𑀘𑀦𑀻𑀓𑀯𑀼𑀢𑁆𑀢𑀺 𑀳𑁄𑀢𑀺. 𑀦𑀺𑀳𑀢𑀪𑁄𑀕𑀸𑀢𑀺 𑀲𑀸𑀫𑀺𑀓𑁂𑀦 𑀤𑀼𑀓𑁆𑀔𑀲𑀫𑁆𑀪𑀢𑀸𑀦𑀁 𑀪𑁄𑀕𑀸𑀦𑀁 𑀲𑀼𑀭𑀸𑀮𑁄𑀮𑀢𑀸𑀤𑀻𑀳𑀺 𑀯𑀺𑀦𑀸𑀲𑀺𑀓𑀸. 𑀲𑀦𑁆𑀣𑀯𑀦𑁆𑀢𑀺 𑀓𑀺𑀮𑁂𑀲𑀯𑀲𑁂𑀦 𑀲𑀦𑁆𑀣𑀯𑀁 𑀓𑀭𑁄𑀢𑀺. 𑀦𑀺𑀓𑁆𑀔𑀦𑁆𑀢𑀧𑀸𑀤𑀸𑀢𑀺 𑀚𑀸𑀭𑀲𑁆𑀲 𑀉𑀧𑀥𑀸𑀭𑀡𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑀧𑀸𑀤𑀸. 𑀲𑀸𑀫𑀺𑀓𑁂𑀢𑀺 𑀧𑀢𑀺𑀫𑁆𑀳𑀺 𑀅𑀕𑀸𑀭𑀯𑁂𑀦 𑀘 𑀧𑀤𑀼𑀝𑁆𑀞𑀫𑀸𑀦𑀲𑀸𑀬 𑀘 𑀅𑀢𑀺𑀘𑀸𑀭𑀺𑀦𑀻 𑀳𑁄𑀢𑀺.
𑀲𑀩𑁆𑀩𑀺𑀢𑁆𑀣𑀺𑀬𑁄𑀢𑀺 𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀢𑀦𑀼𑀓𑀢𑀓𑀺𑀮𑁂𑀲𑀸 𑀲𑁂𑀲𑀸 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀧𑀸𑀧𑀁 𑀓𑀭𑁂𑀬𑁆𑀬𑀼𑀁. 𑀮𑀪𑀫𑀸𑀦𑁂𑀢𑀺 𑀮𑀩𑁆𑀪𑀫𑀸𑀦𑁂, 𑀲𑀁𑀯𑀺𑀚𑁆𑀚𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀦𑀺𑀯𑀸𑀢𑀓𑁂𑀢𑀺 𑀭𑀳𑁄𑀫𑀦𑁆𑀢𑀦𑀓𑁂 𑀧𑀭𑀺𑀪𑁂𑀤𑀓𑁂. 𑀔𑀡𑀁 𑀯𑀸 𑀭𑀳𑁄 ¶ 𑀯𑀸𑀢𑀺 𑀧𑀸𑀧𑀓𑀭𑀡𑀢𑁆𑀣𑀸𑀬 𑀑𑀓𑀸𑀲𑀁 𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀯𑀸. 𑀓𑀬𑀺𑀭𑀼𑀁 𑀦𑀽𑀢𑀺 𑀏𑀢𑁆𑀣 𑀦𑀽-𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀮𑀢𑁆𑀣𑀸𑀢𑀺 𑀅𑀮𑀤𑁆𑀥𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀅𑀜𑁆𑀜𑀁 𑀲𑀫𑁆𑀧𑀦𑁆𑀦𑀧𑀼𑀭𑀺𑀲𑀁 𑀅𑀮𑀪𑀺𑀢𑁆𑀯𑀸 𑀧𑀻𑀞𑀲𑀧𑁆𑀧𑀺𑀦𑀸𑀧𑀺 𑀢𑀢𑁄 𑀧𑀝𑀺𑀓𑁆𑀓𑀽𑀮𑀢𑀭𑁂𑀦𑀸𑀧𑀺 𑀧𑀸𑀧𑀁 𑀓𑀭𑁂𑀬𑁆𑀬𑀼𑀁. 𑀆𑀭𑀸𑀫𑀓𑀭𑀸𑀲𑀽𑀢𑀺 𑀅𑀪𑀺𑀭𑀢𑀺𑀓𑀸𑀭𑀺𑀓𑀸𑀲𑀼. 𑀅𑀦𑀺𑀕𑁆𑀕𑀳𑀸𑀲𑀽𑀢𑀺 𑀦𑀺𑀕𑁆𑀕𑀳𑁂𑀦 𑀯𑀺𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀼. 𑀢𑀺𑀢𑁆𑀣𑀲𑀫𑀸𑀢𑀺 𑀬𑀣𑀸 𑀢𑀺𑀢𑁆𑀣𑀁 𑀉𑀢𑁆𑀢𑀫𑀸𑀥𑀫𑁂𑀲𑀼 𑀦 𑀓𑀜𑁆𑀘𑀺 𑀦𑁆𑀳𑀸𑀬𑀦𑁆𑀢𑀁 𑀯𑀸𑀭𑁂𑀢𑀺, 𑀢𑀣𑀸 𑀏𑀢𑀸𑀧𑀺 𑀭𑀳𑁄 𑀯𑀸 𑀔𑀡𑁂 𑀯𑀸 𑀦𑀺𑀯𑀸𑀢𑀓𑁂 𑀯𑀸 𑀲𑀢𑀺 𑀦 𑀓𑀜𑁆𑀘𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺.
𑀢𑀣𑀸 𑀳𑀺 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀓𑀡𑁆𑀟𑀭𑀻 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 𑀉𑀢𑁆𑀢𑀫𑀭𑀽𑀧𑀥𑀭𑁄. 𑀢𑀲𑁆𑀲 𑀤𑁂𑀯𑀲𑀺𑀓𑀁 𑀅𑀫𑀘𑁆𑀘𑀸 𑀕𑀦𑁆𑀥𑀓𑀭𑀡𑁆𑀟𑀓𑀲𑀳𑀲𑁆𑀲𑀁 𑀆𑀳𑀭𑀦𑁆𑀢𑀺. 𑀢𑁂𑀦𑀲𑁆𑀲 𑀦𑀺𑀯𑁂𑀲𑀦𑁂 𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸 𑀕𑀦𑁆𑀥𑀓𑀭𑀡𑁆𑀟𑀓𑁂 𑀨𑀸𑀮𑁂𑀢𑁆𑀯𑀸 𑀕𑀦𑁆𑀥𑀤𑀸𑀭𑀽𑀦𑀺 𑀓𑀢𑁆𑀯𑀸 𑀆𑀳𑀸𑀭𑀁 𑀧𑀘𑀦𑁆𑀢𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀦𑀸𑀫𑁂𑀦 𑀓𑀺𑀦𑁆𑀦𑀭𑀸 𑀦𑀸𑀫. 𑀧𑀼𑀭𑁄𑀳𑀺𑀢𑁄𑀧𑀺𑀲𑁆𑀲 𑀲𑀫𑀯𑀬𑁄 𑀧𑀜𑁆𑀘𑀸𑀮𑀘𑀡𑁆𑀟𑁄 𑀦𑀸𑀫 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀭𑀜𑁆𑀜𑁄 𑀧𑀦 𑀧𑀸𑀲𑀸𑀤𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑁄𑀧𑀸𑀓𑀸𑀭𑁂 𑀚𑀫𑁆𑀩𑀼𑀭𑀼𑀓𑁆𑀔𑁄 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀲𑀸𑀔𑀸 𑀧𑀸𑀓𑀸𑀭𑀫𑀢𑁆𑀣𑀓𑁂 𑀑𑀮𑀫𑁆𑀩𑀢𑀺. 𑀢𑀲𑁆𑀲 𑀙𑀸𑀬𑀸𑀬 𑀚𑁂𑀕𑀼𑀘𑁆𑀙𑁄 𑀤𑀼𑀲𑁆𑀲𑀡𑁆𑀞𑀸𑀦𑁄 𑀧𑀻𑀞𑀲𑀧𑁆𑀧𑀻 𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀓𑀺𑀦𑁆𑀦𑀭𑀸 𑀤𑁂𑀯𑀻 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀤𑀺𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 ¶ 𑀳𑀼𑀢𑁆𑀯𑀸 𑀭𑀢𑁆𑀢𑀺𑀁 𑀭𑀸𑀚𑀸𑀦𑀁 𑀭𑀢𑀺𑀬𑀸 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁂 𑀲𑀡𑀺𑀓𑀁 𑀉𑀝𑁆𑀞𑀸𑀬𑀸𑀲𑀦𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀲𑀼𑀯𑀡𑁆𑀡𑀲𑀭𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀲𑀸𑀝𑀓𑀭𑀚𑁆𑀚𑀼𑀬𑀸 𑀯𑀸𑀢𑀧𑀸𑀦𑁂𑀦 𑀑𑀢𑀭𑀺𑀢𑁆𑀯𑀸 𑀚𑀫𑁆𑀩𑀼𑀁 𑀆𑀭𑀼𑀬𑁆𑀳 𑀲𑀸𑀔𑀸𑀬 𑀑𑀭𑀼𑀬𑁆𑀳 𑀧𑀻𑀞𑀲𑀧𑁆𑀧𑀺𑀁 𑀪𑁄𑀚𑁂𑀢𑁆𑀯𑀸 𑀧𑀸𑀧𑀁 𑀓𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀕𑀦𑁆𑀥𑁂𑀳𑀺 𑀲𑀭𑀻𑀭𑀁 ¶ 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀦𑀺𑀩𑀤𑁆𑀥𑀁 𑀢𑁂𑀦 𑀲𑀤𑁆𑀥𑀺𑀁 𑀧𑀸𑀧𑀁 𑀓𑀭𑁄𑀢𑀺. 𑀭𑀸𑀚𑀸 𑀧𑀦 𑀦 𑀚𑀸𑀦𑀸𑀢𑀺.
𑀲𑁄 𑀏𑀓𑀤𑀺𑀯𑀲𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀦𑀺𑀯𑁂𑀲𑀦𑀁 𑀧𑀯𑁂𑀲𑀦𑁆𑀢𑁄 𑀚𑀫𑁆𑀩𑀼𑀙𑀸𑀬𑀸𑀬 𑀲𑀬𑀺𑀢𑀁 𑀧𑀭𑀫𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑀁 𑀧𑀻𑀞𑀲𑀧𑁆𑀧𑀺𑀁 𑀤𑀺𑀲𑁆𑀯𑀸 𑀧𑀼𑀭𑁄𑀳𑀺𑀢𑀁 𑀆𑀳 𑁋 ‘‘𑀧𑀲𑁆𑀲𑁂𑀢𑀁 𑀫𑀦𑀼𑀲𑁆𑀲𑀧𑁂𑀢’’𑀦𑁆𑀢𑀺. ‘‘𑀆𑀫, 𑀧𑀲𑁆𑀲𑀸𑀫𑀺 𑀤𑁂𑀯𑀸’’𑀢𑀺. ‘‘𑀅𑀧𑀺 𑀦𑀼 𑀔𑁄, 𑀲𑀫𑁆𑀫, 𑀏𑀯𑀭𑀽𑀧𑀁 𑀧𑀝𑀺𑀓𑁆𑀓𑀽𑀮𑀁 𑀓𑀸𑀘𑀺 𑀇𑀢𑁆𑀣𑀻 𑀙𑀦𑁆𑀤𑀭𑀸𑀕𑀯𑀲𑁂𑀦 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀻𑀞𑀲𑀧𑁆𑀧𑀻 𑀫𑀸𑀦𑀁 𑀚𑀦𑁂𑀢𑁆𑀯𑀸 ‘‘𑀅𑀬𑀁 𑀭𑀸𑀚𑀸 𑀓𑀺𑀁 𑀓𑀣𑁂𑀢𑀺, 𑀅𑀢𑁆𑀢𑀦𑁄 𑀤𑁂𑀯𑀺𑀬𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀦𑀁 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂’’𑀢𑀺 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀲𑀼𑀡 𑀲𑀸𑀫𑀺, 𑀚𑀫𑁆𑀩𑀼𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑁂, 𑀞𑀧𑁂𑀢𑁆𑀯𑀸 𑀢𑀁 𑀅𑀜𑁆𑀜𑁄 𑀏𑀢𑀁 𑀓𑀸𑀭𑀡𑀁 𑀦 𑀚𑀸𑀦𑀸𑀢𑀻’’𑀢𑀺 𑀆𑀳. 𑀧𑀼𑀭𑁄𑀳𑀺𑀢𑁄 𑀢𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀤𑁆𑀥𑀸 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀚𑀫𑁆𑀩𑀼𑀭𑀼𑀓𑁆𑀔𑁂𑀦 𑀕𑀦𑁆𑀢𑁆𑀯𑀸 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀸𑀧𑀁 𑀓𑀭𑁄𑀢𑀻’’𑀢𑀺. 𑀲𑁄 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺 𑁋 ‘‘𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀢𑁂 𑀭𑀢𑁆𑀢𑀺𑀪𑀸𑀕𑁂 𑀲𑀭𑀻𑀭𑀲𑀫𑁆𑀨𑀲𑁆𑀲𑁄 𑀓𑀻𑀤𑀺𑀲𑁄 𑀳𑁄𑀢𑀻’’𑀢𑀺? ‘‘𑀲𑀫𑁆𑀫, 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀫𑀚𑁆𑀛𑀺𑀫𑀬𑀸𑀫𑁂 𑀧𑀦𑀲𑁆𑀲𑀸 𑀲𑀭𑀻𑀭𑀁 𑀲𑀻𑀢𑀮𑀁 𑀳𑁄𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀢𑀺𑀝𑁆𑀞𑀢𑀼 𑀅𑀜𑁆𑀜𑀸 𑀇𑀢𑁆𑀣𑀻, 𑀅𑀕𑁆𑀕𑀫𑀳𑁂𑀲𑀻 𑀢𑁂 𑀓𑀺𑀦𑁆𑀦𑀭𑀸𑀤𑁂𑀯𑀻 ¶ 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀸𑀧𑀁 𑀓𑀭𑁄𑀢𑀻’’𑀢𑀺. ‘‘𑀲𑀫𑁆𑀫, 𑀓𑀺𑀁 𑀯𑀤𑁂𑀲𑀺, 𑀏𑀯𑀭𑀽𑀧𑀸 𑀧𑀭𑀫𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀸 𑀓𑀺𑀁 𑀇𑀫𑀺𑀦𑀸 𑀧𑀭𑀫𑀚𑁂𑀕𑀼𑀘𑁆𑀙𑁂𑀦 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀲𑁆𑀲𑀢𑀻’’𑀢𑀺? ‘‘𑀢𑁂𑀦 𑀳𑀺 𑀦𑀁, 𑀤𑁂𑀯, 𑀧𑀭𑀺𑀕𑁆𑀕𑀡𑁆𑀳𑀸𑀳𑀻’’𑀢𑀺.
𑀲𑁄 ‘‘𑀲𑀸𑀥𑀽’’𑀢𑀺 𑀭𑀢𑁆𑀢𑀺𑀁 𑀪𑀼𑀢𑁆𑀢𑀲𑀸𑀬𑀫𑀸𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀦𑀺𑀧𑁆𑀧𑀚𑁆𑀚𑀺𑀢𑁆𑀯𑀸 ‘‘𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀧𑀓𑀢𑀺𑀬𑀸 𑀦𑀺𑀤𑁆𑀤𑀼𑀧𑀕𑀫𑀦𑀯𑁂𑀮𑀸𑀬 𑀦𑀺𑀤𑁆𑀤𑀼𑀧𑀕𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑀸𑀧𑀺 𑀉𑀝𑁆𑀞𑀸𑀬 𑀢𑀣𑁂𑀯 𑀅𑀓𑀸𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀅𑀦𑀼𑀧𑀤𑀜𑁆𑀜𑁂𑀯 𑀕𑀦𑁆𑀢𑁆𑀯𑀸 𑀚𑀫𑁆𑀩𑀼𑀙𑀸𑀬𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀲𑀺. 𑀧𑀻𑀞𑀲𑀧𑁆𑀧𑀻 𑀤𑁂𑀯𑀺𑀬𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀢𑁆𑀯𑀁 𑀅𑀚𑁆𑀚 𑀅𑀢𑀺𑀘𑀺𑀭𑀸𑀬𑀺𑀢𑁆𑀯𑀸 𑀆𑀕𑀢𑀸’’𑀢𑀺 𑀳𑀢𑁆𑀣𑁂𑀦 𑀓𑀡𑁆𑀡𑀲𑀗𑁆𑀔𑀮𑀺𑀓𑀁 𑀧𑀳𑀭𑀺. 𑀅𑀣 𑀦𑀁 ‘‘𑀫𑀸 𑀫𑀁 𑀓𑀼𑀚𑁆𑀛𑀺, 𑀲𑀸𑀫𑀺, 𑀭𑀜𑁆𑀜𑁄 𑀦𑀺𑀤𑁆𑀤𑀼𑀧𑀕𑀫𑀦𑀁 𑀑𑀮𑁄𑀓𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀕𑁂𑀳𑁂 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀯𑀺𑀬 𑀅𑀳𑁄𑀲𑀺. 𑀢𑁂𑀦 𑀧𑀦𑀲𑁆𑀲𑀸 𑀧𑀳𑀸𑀭𑁂𑀦 𑀲𑀻𑀳𑀫𑀼𑀔𑀓𑀼𑀡𑁆𑀟𑀮𑀁 𑀓𑀡𑁆𑀡𑀢𑁄 𑀕𑀴𑀺𑀢𑁆𑀯𑀸 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀧𑀢𑀺. 𑀭𑀸𑀚𑀸 ‘‘𑀯𑀝𑁆𑀝𑀺𑀲𑁆𑀲𑀢𑀺 𑀏𑀢𑁆𑀢𑀓’’𑀦𑁆𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀲𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀢𑀺𑀘𑀭𑀺𑀢𑁆𑀯𑀸 𑀧𑀼𑀭𑀺𑀫𑀦𑀺𑀬𑀸𑀫𑁂𑀦𑁂𑀯 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀺𑀢𑀼𑀁 𑀆𑀭𑀪𑀺. 𑀭𑀸𑀚𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 ‘‘𑀓𑀺𑀦𑁆𑀦𑀭𑀸𑀤𑁂𑀯𑀻 𑀫𑀬𑀸 𑀤𑀺𑀦𑁆𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀏𑀢𑀽’’𑀢𑀺 𑀆𑀡𑀸𑀧𑁂𑀲𑀺. 𑀲𑀸 ‘‘𑀲𑀻𑀳𑀫𑀼𑀔𑀓𑀼𑀡𑁆𑀟𑀮𑀁 𑀫𑁂 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺 𑀯𑀢𑁆𑀯𑀸 𑀦𑀸𑀕𑀫𑀺, 𑀧𑀼𑀦 𑀧𑁂𑀲𑀺𑀢𑁂 𑀘 𑀧𑀦 𑀏𑀓𑀓𑀼𑀡𑁆𑀟𑀮𑀸𑀯 𑀆𑀕𑀫𑀸𑀲𑀺 ¶ . 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀢𑁂 𑀓𑀼𑀡𑁆𑀟𑀮’’𑀦𑁆𑀢𑀺? ‘‘𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺 ¶ . 𑀲𑀼𑀯𑀡𑁆𑀡𑀓𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀇𑀫𑀺𑀲𑁆𑀲𑀸 𑀓𑀼𑀡𑁆𑀟𑀮𑀁 𑀦 𑀤𑁂𑀲𑀻’’𑀢𑀺 𑀆𑀳. ‘‘𑀦𑀸𑀳𑀁 𑀕𑀡𑁆𑀳𑀸𑀫𑀺 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀧𑀸𑀧𑁂 𑀘𑀡𑁆𑀟𑀸𑀮𑀺 𑀫𑀸𑀤𑀺𑀲𑁂𑀦 𑀢𑁂 𑀲𑀼𑀯𑀡𑁆𑀡𑀓𑀸𑀭𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀓𑀼𑀡𑁆𑀟𑀮𑀁 𑀢𑀲𑁆𑀲𑀸 𑀧𑀼𑀭𑀣𑁄 𑀔𑀺𑀧𑀺𑀢𑁆𑀯𑀸 𑀧𑀼𑀭𑁄𑀳𑀺𑀢𑀁 𑀆𑀳 𑁋 ‘‘𑀲𑀫𑁆𑀫, 𑀲𑀘𑁆𑀘𑀁 𑀢𑀬𑀸 𑀯𑀼𑀢𑁆𑀢𑀁, 𑀕𑀘𑁆𑀙 𑀲𑀻𑀲𑀫𑀲𑁆𑀲𑀸 𑀙𑁂𑀤𑀸𑀧𑁂𑀳𑀻’’𑀢𑀺. 𑀲𑁄 𑀢𑀁 𑀭𑀸𑀚𑀕𑁂𑀳𑁂𑀬𑁂𑀯 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀞𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀤𑁂𑀯, 𑀫𑀸 𑀓𑀺𑀦𑁆𑀦𑀭𑀸𑀤𑁂𑀯𑀺𑀬𑀸 𑀓𑀼𑀚𑁆𑀛𑀺𑀢𑁆𑀣, 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀏𑀯𑀭𑀽𑀧𑀸𑀬𑁂𑀯. 𑀲𑀘𑁂𑀧𑀺 𑀇𑀢𑁆𑀣𑀻𑀦𑀁 𑀤𑀼𑀲𑁆𑀲𑀻𑀮𑀪𑀸𑀯𑀁 𑀜𑀸𑀢𑀼𑀓𑀸𑀫𑁄𑀲𑀺, 𑀤𑀲𑁆𑀲𑁂𑀲𑁆𑀲𑀸𑀫𑀺 𑀢𑁂 𑀏𑀢𑀸𑀲𑀁 𑀧𑀸𑀧𑀓𑀜𑁆𑀘𑁂𑀯 𑀩𑀳𑀼𑀫𑀸𑀬𑀸𑀪𑀸𑀯𑀜𑁆𑀘, 𑀏𑀳𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀚𑀦𑀧𑀤𑀁 𑀘𑀭𑀸𑀫𑀸’’𑀢𑀺 𑀆𑀳.
𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀫𑀸𑀢𑀭𑀁 𑀭𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀢𑁂𑀲𑀁 𑀬𑁄𑀚𑀦𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀫𑀳𑀸𑀫𑀕𑁆𑀕𑁂 𑀦𑀺𑀲𑀺𑀦𑁆𑀦𑀸𑀦𑀁𑀬𑁂𑀯 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀧𑀼𑀢𑁆𑀢𑀲𑁆𑀲𑀢𑁆𑀣𑀸𑀬 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀏𑀓𑀁 𑀓𑀼𑀫𑀸𑀭𑀺𑀓𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀧𑀼𑀭𑁄𑀳𑀺𑀢𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀲𑀘𑁂 𑀇𑀘𑁆𑀙𑀲𑀺, 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀢𑀬𑀸 𑀲𑀤𑁆𑀥𑀺𑀁 𑀧𑀸𑀧𑀁 𑀓𑀸𑀭𑁂𑀢𑀼𑀁 𑀲𑀓𑁆𑀓𑀸 𑀤𑁂𑀯𑀸’’𑀢𑀺. ‘‘𑀓𑀺𑀁 𑀓𑀣𑁂𑀲𑀺, 𑀫𑀳𑀸𑀧𑀭𑀺𑀯𑀸𑀭𑀸 𑀏𑀲𑀸, 𑀦 𑀲𑀓𑁆𑀓𑀸 𑀲𑀫𑁆𑀫𑀸’’𑀢𑀺? 𑀧𑀼𑀭𑁄𑀳𑀺𑀢𑁄 ‘‘𑀢𑁂𑀦 𑀳𑀺 𑀧𑀲𑁆𑀲, 𑀤𑁂𑀯𑀸’’𑀢𑀺 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀕𑁆𑀕𑀢𑁄 𑀅𑀯𑀺𑀤𑀽𑀭𑁂 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀦𑁆𑀢𑁄𑀲𑀸𑀡𑀺𑀬𑀁 𑀓𑀢𑁆𑀯𑀸 𑀲𑀬𑀁 𑀫𑀕𑁆𑀕𑀧𑀲𑁆𑀲𑁂 𑀭𑁄𑀤𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑁄 𑀓𑀼𑀝𑀼𑀫𑁆𑀩𑀺𑀓𑁄 𑀤𑀺𑀲𑁆𑀯𑀸 ‘‘𑀢𑀸𑀢, 𑀓𑀲𑁆𑀫𑀸 𑀭𑁄𑀤𑀲𑀻’’𑀢𑀺 ¶ 𑀧𑀼𑀘𑁆𑀙𑀺. ‘‘𑀪𑀭𑀺𑀬𑀸 𑀫𑁂 𑀕𑀭𑀼𑀪𑀸𑀭𑀸, 𑀢𑀁 𑀓𑀼𑀮𑀖𑀭𑀁 𑀦𑁂𑀢𑀼𑀁 𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀲𑁆𑀫𑀺, 𑀢𑀲𑁆𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀕𑀩𑁆𑀪𑁄 𑀘𑀮𑀺, 𑀏𑀲𑀸 𑀅𑀦𑁆𑀢𑁄𑀲𑀸𑀡𑀺𑀬𑀁 𑀓𑀺𑀮𑀫𑀢𑀺, 𑀓𑀸𑀘𑀺𑀲𑁆𑀲𑀸 𑀇𑀢𑁆𑀣𑀻 𑀲𑀦𑁆𑀢𑀺𑀓𑁂 𑀦𑀢𑁆𑀣𑀺, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀦 𑀚𑀸𑀦𑀸𑀫𑀺 ‘𑀓𑀺𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀏𑀓𑀁 𑀇𑀢𑁆𑀣𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀫𑀸 𑀭𑁄𑀤𑀺, 𑀩𑀳𑀽 𑀫𑁂 𑀇𑀢𑁆𑀣𑀺𑀬𑁄, 𑀏𑀓𑀸 𑀕𑀫𑀺𑀲𑁆𑀲𑀢𑀻’’𑀢𑀺. ‘‘𑀢𑁂𑀦 𑀳𑀺 𑀅𑀬𑀫𑁂𑀯 𑀓𑀼𑀫𑀸𑀭𑀺𑀓𑀸 𑀕𑀘𑁆𑀙𑀢𑀼, 𑀏𑀢𑀺𑀲𑁆𑀲𑀸𑀧𑀺 𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁆𑀘𑀁 𑀯𑀤𑀢𑀺, 𑀲𑀼𑀡𑀺𑀲𑀸𑀬𑀧𑀺 𑀫𑁂 𑀫𑀗𑁆𑀕𑀮𑀫𑁂𑀯, 𑀇𑀫𑀺𑀦𑀸 𑀳𑀺 𑀦𑀺𑀫𑀺𑀢𑁆𑀢𑁂𑀦 𑀲𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀢𑀫𑁂𑀯 𑀧𑁂𑀲𑁂𑀲𑀺. 𑀲𑀸 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀯 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀧𑀸𑀧𑀫𑀓𑀸𑀲𑀺. 𑀭𑀸𑀚𑀸𑀧𑀺𑀲𑁆𑀲𑀸 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁 𑀅𑀤𑀸𑀲𑀺. 𑀅𑀣 𑀦𑀁 𑀓𑀢𑀓𑀺𑀘𑁆𑀘𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀯𑀺𑀚𑀸𑀢𑀸’’𑀢𑀺? ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀼𑀢𑁆𑀢’’𑀦𑁆𑀢𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀁 𑀆𑀤𑀸𑀬 𑀧𑀸𑀬𑀸𑀲𑀺 ¶ . 𑀧𑀼𑀭𑁄𑀳𑀺𑀢𑁄𑀧𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑀺𑀝𑁆𑀞𑀸 𑀢𑁂, 𑀤𑁂𑀯, 𑀓𑀼𑀫𑀸𑀭𑀺𑀓𑀸𑀧𑀺 𑀏𑀯𑀁 𑀧𑀸𑀧𑀸, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑀸, 𑀅𑀧𑀺 𑀧𑀦 𑀢𑁂 𑀓𑀺𑀜𑁆𑀘𑀺 𑀤𑀺𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸 𑀤𑀺𑀦𑁆𑀦𑀸’’𑀢𑀺. ‘‘𑀦𑀸𑀲𑁆𑀲𑀸 𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀓𑀁 𑀕𑀡𑁆𑀳𑀺𑀢𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁 𑀫𑁂 𑀩𑁆𑀭𑀸𑀳𑁆𑀫𑀡𑀺𑀬𑀸 𑀉𑀲𑁆𑀲𑀻𑀲𑀓𑁂 𑀞𑀧𑀺𑀢𑀁 𑀫𑀼𑀤𑁆𑀤𑀺𑀓𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸, 𑀤𑁂𑀳𑀺, 𑀅𑀫𑁆𑀫, 𑀫𑀼𑀤𑁆𑀤𑀺𑀓’’𑀦𑁆𑀢𑀺 𑀆𑀳. 𑀲𑀸 𑀢𑀁 𑀤𑀤𑀫𑀸𑀦𑀸 ¶ 𑀩𑁆𑀭𑀸𑀳𑁆𑀫𑀡𑀁 𑀳𑀢𑁆𑀣𑁂 𑀦𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 ‘‘𑀕𑀡𑁆𑀳 𑀘𑁄𑀭𑀸’’𑀢𑀺 𑀅𑀤𑀸𑀲𑀺.
𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀅𑀜𑁆𑀜𑀸𑀧𑀺 𑀩𑀳𑀽 𑀅𑀢𑀺𑀘𑀸𑀭𑀺𑀦𑀺𑀬𑁄 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀥 𑀢𑀸𑀯 𑀏𑀢𑁆𑀢𑀓𑀁 𑀳𑁄𑀢𑀼, 𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲𑀸𑀫, 𑀤𑁂𑀯𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀭𑀺𑀢𑁂𑀧𑀺 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀏𑀯𑀭𑀽𑀧𑀸𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀺𑀁 𑀦𑁄 𑀏𑀢𑀸𑀳𑀺, 𑀦𑀺𑀯𑀢𑁆𑀢𑀸𑀫𑀸’’𑀢𑀺 𑀩𑀸𑀭𑀸𑀡𑀲𑀺𑀫𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑁋 ‘‘𑀫𑀳𑀸𑀭𑀸𑀚, 𑀇𑀢𑁆𑀣𑀺𑀬𑁄 𑀦𑀸𑀫 𑀏𑀯𑀁 𑀧𑀸𑀧𑀥𑀫𑁆𑀫𑀸, 𑀧𑀓𑀢𑀺 𑀏𑀲𑀸 𑀏𑀢𑀸𑀲𑀁, 𑀔𑀫𑀣, 𑀤𑁂𑀯, 𑀓𑀺𑀦𑁆𑀦𑀭𑀸𑀤𑁂𑀯𑀺𑀬𑀸’’𑀢𑀺 𑀧𑀼𑀭𑁄𑀳𑀺𑀢𑁂𑀦 𑀬𑀸𑀘𑀺𑀢𑁄 𑀔𑀫𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀢𑁄 𑀦𑀁 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺, 𑀞𑀸𑀦𑀢𑁄 𑀧𑀦 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀢𑀜𑁆𑀘 𑀧𑀻𑀞𑀲𑀧𑁆𑀧𑀺𑀁 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑁆𑀯𑀸 𑀚𑀫𑁆𑀩𑀼𑀲𑀸𑀔𑀁 𑀙𑁂𑀤𑀸𑀧𑁂𑀲𑀺. 𑀢𑀤𑀸 𑀓𑀼𑀡𑀸𑀮𑁄 𑀧𑀜𑁆𑀘𑀸𑀮𑀘𑀡𑁆𑀟𑁄 𑀅𑀳𑁄𑀲𑀺. 𑀇𑀢𑀺 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀫𑁂𑀯 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀬𑀁 𑀯𑁂 𑀤𑀺𑀲𑁆𑀯𑀸 𑀓𑀡𑁆𑀟𑀭𑀻𑀓𑀺𑀦𑁆𑀦𑀭𑀸𑀦𑀁, 𑀲𑀩𑁆𑀩𑀺𑀢𑁆𑀣𑀺𑀬𑁄 𑀦 𑀭𑀫𑀦𑁆𑀢𑀺 𑀅𑀕𑀸𑀭𑁂;
𑀢𑀁 𑀢𑀸𑀤𑀺𑀲𑀁 𑀫𑀘𑁆𑀘𑀁 𑀘𑀚𑀺𑀢𑁆𑀯𑀸 𑀪𑀭𑀺𑀬𑀸, 𑀅𑀜𑁆𑀜𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀁 𑀧𑀻𑀞𑀲𑀧𑁆𑀧𑀺’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀯𑁂 𑀓𑀡𑁆𑀟𑀭𑀺𑀲𑁆𑀲 𑀭𑀜𑁆𑀜𑁄 𑀓𑀺𑀦𑁆𑀦𑀭𑀸𑀬 𑀤𑁂𑀯𑀺𑀬𑀸 𑀘𑀸𑀢𑀺 𑀇𑀫𑁂𑀲𑀁 𑀓𑀡𑁆𑀟𑀭𑀺𑀓𑀺𑀦𑁆𑀦𑀭𑀸𑀦𑀁 𑀯𑀺𑀭𑀸𑀕𑀓𑀸𑀭𑀡𑀁 𑀅𑀳𑁄𑀲𑀺, 𑀢𑀁 𑀤𑀺𑀲𑁆𑀯𑀸 𑀚𑀸𑀦𑀺𑀢𑀩𑁆𑀩𑀁 𑁋 𑀲𑀩𑁆𑀩𑀺𑀢𑁆𑀣𑀺𑀬𑁄 𑀅𑀢𑁆𑀢𑀦𑁄 𑀲𑀸𑀫𑀺𑀓𑀸𑀦𑀁 𑀦 𑀭𑀫𑀦𑁆𑀢𑀺 𑀅𑀕𑀸𑀭𑁂 ¶ . 𑀢𑀣𑀸 𑀳𑀺 𑀅𑀜𑁆𑀜𑀁 𑀧𑀻𑀞𑀲𑀧𑁆𑀧𑀺𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀢𑀸𑀤𑀺𑀲𑀁 𑀭𑀢𑀺𑀓𑀼𑀲𑀮𑀁 𑀫𑀘𑁆𑀘𑀁 𑀘𑀚𑀺𑀢𑁆𑀯𑀸 𑀪𑀭𑀺𑀬𑀸 𑀢𑁂𑀦 𑀫𑀦𑀼𑀲𑁆𑀲𑀧𑁂𑀢𑁂𑀦 𑀲𑀤𑁆𑀥𑀺𑀁 𑀧𑀸𑀧𑀫𑀓𑀸𑀲𑀻𑀢𑀺.
𑀅𑀧𑀭𑁄𑀧𑀺 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑀓𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀸 𑀧𑀸𑀘𑀻𑀦𑀤𑁆𑀯𑀸𑀭𑀯𑀸𑀲𑀺𑀦𑁄 𑀏𑀓𑀲𑁆𑀲 𑀤𑀮𑀺𑀤𑁆𑀤𑀲𑁆𑀲 𑀧𑀜𑁆𑀘𑀧𑀸𑀧𑀻 𑀦𑀸𑀫 𑀥𑀻𑀢𑀸 𑀅𑀳𑁄𑀲𑀺. 𑀲𑀸 𑀓𑀺𑀭 𑀧𑀼𑀩𑁆𑀩𑁂𑀧𑀺 𑀏𑀓𑀸 𑀤𑀮𑀺𑀤𑁆𑀤𑀥𑀻𑀢𑀸 𑀫𑀢𑁆𑀢𑀺𑀓𑀁 𑀫𑀤𑁆𑀤𑀺𑀢𑁆𑀯𑀸 𑀕𑁂𑀳𑁂 𑀪𑀺𑀢𑁆𑀢𑀺𑀁 𑀯𑀺𑀮𑀺𑀫𑁆𑀧𑀢𑀺. 𑀅𑀣𑁂𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀢𑁆𑀢𑀦𑁄 𑀧𑀩𑁆𑀪𑀸𑀭𑀧𑀭𑀺𑀪𑀡𑁆𑀟𑀓𑀭𑀡𑀢𑁆𑀣𑀁 ¶ ‘‘𑀓𑀳𑀁 𑀫𑀢𑁆𑀢𑀺𑀓𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀬𑀁 𑀮𑀤𑁆𑀥𑀼𑀁 𑀲𑀓𑁆𑀓𑀸’’𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀳𑀢𑁆𑀣𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑀉𑀮𑁆𑀮𑁄𑀓𑁂𑀦𑁆𑀢𑀻 𑀧𑀤𑀼𑀝𑁆𑀞𑁂𑀦 𑀫𑀦𑀲𑀸 ‘‘𑀫𑀢𑁆𑀢𑀺𑀓𑀫𑁆𑀧𑀺 𑀪𑀺𑀓𑁆𑀔𑀢𑀻’’𑀢𑀺 𑀅𑀯𑁄𑀘. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀺𑀘𑁆𑀘𑀮𑁄𑀯 𑀅𑀳𑁄𑀲𑀺. 𑀅𑀣 𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀺𑀘𑁆𑀘𑀮𑀺𑀢𑀁 𑀤𑀺𑀲𑁆𑀯𑀸 𑀧𑀼𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, ‘‘𑀲𑀫𑀡, 𑀫𑀢𑁆𑀢𑀺𑀓𑀫𑁆𑀧𑀺 𑀦 𑀮𑀪𑀲𑀻’’𑀢𑀺 𑀯𑀢𑁆𑀯𑀸 𑀫𑀳𑀦𑁆𑀢𑀁 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀆𑀳𑀭𑀺𑀢𑁆𑀯𑀸 𑀧𑀢𑁆𑀢𑁂 𑀞𑀧𑁂𑀲𑀺. 𑀲𑁄 𑀢𑀸𑀬 𑀫𑀢𑁆𑀢𑀺𑀓𑀸𑀬 𑀧𑀩𑁆𑀪𑀸𑀭𑁂 𑀧𑀭𑀺𑀪𑀡𑁆𑀟𑀫𑀓𑀸𑀲𑀺. 𑀲𑀸 𑀦𑀘𑀺𑀭𑀲𑁆𑀲𑁂𑀯 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀩𑀳𑀺𑀤𑁆𑀯𑀸𑀭𑀕𑀸𑀫𑁂 𑀤𑀼𑀕𑁆𑀕𑀢𑀺𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀨𑀮𑁂𑀦 ¶ 𑀲𑀭𑀻𑀭𑀁 𑀨𑀲𑁆𑀲𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀉𑀮𑁆𑀮𑁄𑀓𑀺𑀢𑀢𑁆𑀢𑀸 𑀧𑀦 𑀳𑀢𑁆𑀣𑀧𑀸𑀤𑀫𑀼𑀔𑀅𑀓𑁆𑀔𑀺𑀦𑀸𑀲𑀸𑀦𑀺 𑀧𑀸𑀧𑀸𑀦𑀺 𑀯𑀺𑀭𑀽𑀧𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀦 𑀢𑀁 ‘‘𑀧𑀜𑁆𑀘𑀧𑀸𑀧𑀻’’𑀢𑁆𑀯𑁂𑀯 𑀲𑀜𑁆𑀚𑀸𑀦𑀺𑀁𑀲𑀼.
𑀅𑀣𑁂𑀓𑀤𑀺𑀯𑀲𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 𑀭𑀢𑁆𑀢𑀺𑀁 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀕𑀭𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀕𑀢𑁄. 𑀲𑀸𑀧𑀺 𑀕𑀸𑀫𑀤𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑀻 𑀅𑀚𑀸𑀦𑀺𑀢𑁆𑀯𑀸𑀯 𑀭𑀸𑀚𑀸𑀦𑀁 𑀳𑀢𑁆𑀣𑁂 𑀕𑀡𑁆𑀳𑀺. 𑀲𑁄 𑀢𑀲𑁆𑀲𑀸 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀤𑀺𑀩𑁆𑀩𑀲𑀫𑁆𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀨𑀲𑁆𑀲𑀭𑀸𑀕𑀭𑀢𑁆𑀢𑁄 𑀢𑀣𑀸𑀯𑀺𑀭𑀽𑀧𑀫𑁆𑀧𑀺 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀓𑀲𑁆𑀲 𑀥𑀻𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑁆𑀯𑀸𑀭𑀯𑀸𑀲𑀺𑀦𑁄’’𑀢𑀺 𑀯𑀼𑀢𑁆𑀢𑁂 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀢𑁂 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀕𑀘𑁆𑀙 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀫𑀸𑀢𑀸𑀧𑀺𑀢𑀭𑁄 𑀉𑀧𑀕𑀦𑁆𑀢𑁆𑀯𑀸 ‘‘𑀏𑀓𑁄, 𑀅𑀫𑁆𑀫, 𑀧𑀼𑀭𑀺𑀲𑁄 𑀫𑀁 𑀇𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 ‘‘𑀲𑁄𑀧𑀺 𑀤𑀼𑀕𑁆𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀢𑀸𑀤𑀺𑀲𑀫𑁆𑀧𑀺 𑀇𑀘𑁆𑀙𑀢𑀺, 𑀲𑀸𑀥𑀽’’𑀢𑀺 𑀯𑀼𑀢𑁆𑀢𑁂 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀼𑀜𑁆𑀜𑀸𑀢𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀢𑀸𑀬 𑀲𑀤𑁆𑀥𑀺𑀁 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 𑀭𑀸𑀚𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀢𑀢𑁄 𑀧𑀝𑁆𑀞𑀸𑀬𑁂𑀯 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀩𑀤𑁆𑀥𑀁 𑀢𑀢𑁆𑀣 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀇𑀢𑁆𑀣𑀺𑀁 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺.
𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲𑀸 𑀧𑀺𑀢𑀼 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀉𑀧𑁆𑀧𑀚𑁆𑀚𑀺. 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀬𑀼𑀢𑁆𑀢𑀧𑀸𑀬𑀸𑀲𑁄𑀯 𑀏𑀢𑀲𑁆𑀲 𑀪𑁂𑀲𑀚𑁆𑀚𑀁, 𑀢𑀁 𑀢𑁂 𑀤𑀮𑀺𑀤𑁆𑀤𑀢𑀸𑀬 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 ¶ . 𑀢𑀢𑁄 𑀧𑀜𑁆𑀘𑀧𑀸𑀧𑀺𑀫𑀸𑀢𑀸 𑀥𑀻𑀢𑀭𑀁 𑀆𑀳 𑁋 ‘‘𑀓𑀺𑀁, 𑀅𑀫𑁆𑀫, 𑀢𑀯 𑀲𑀸𑀫𑀺𑀓𑁄 𑀧𑀸𑀬𑀸𑀲𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺? ‘‘𑀅𑀫𑁆𑀫, 𑀫𑀫 𑀲𑀸𑀫𑀺𑀓𑁂𑀦 𑀅𑀫𑁆𑀳𑁂𑀳𑀺𑀧𑀺 𑀤𑀼𑀕𑁆𑀕𑀢𑀢𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦𑀁, 𑀫𑀸 ¶ 𑀘𑀺𑀦𑁆𑀢𑀬𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀕𑀫𑀦𑀯𑁂𑀮𑀸𑀬𑀁 𑀤𑀼𑀫𑁆𑀫𑀦𑀸 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀤𑀼𑀫𑁆𑀫𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀪𑀤𑁆𑀤𑁂 𑀇𑀤𑀁 𑀅𑀢𑀺𑀭𑀲𑀪𑁂𑀲𑀚𑁆𑀚𑀁, 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀲𑀓𑁆𑀓𑀸 𑀫𑀬𑀸 𑀦𑀺𑀘𑁆𑀘𑀓𑀸𑀮𑀁 𑀏𑀯𑀁 𑀘𑀭𑀺𑀢𑀼𑀁, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀭𑀺𑀲𑁆𑀲𑀬𑁄𑀧𑀺 𑀤𑀝𑁆𑀞𑀩𑁆𑀩𑁄, 𑀲𑀘𑁂 𑀔𑁄 𑀧𑀦 𑀏𑀢𑀁 𑀅𑀦𑁆𑀢𑁂𑀧𑀼𑀭𑀁 𑀦𑁂𑀲𑁆𑀲𑀸𑀫𑀺, 𑀏𑀢𑀺𑀲𑁆𑀲𑀸 𑀨𑀲𑁆𑀲𑀲𑀫𑁆𑀧𑀤𑀁 𑀅𑀚𑀸𑀦𑀦𑁆𑀢𑀸 ‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀬𑀓𑁆𑀔𑀺𑀦𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’𑀢𑀺 𑀓𑁂𑀴𑀺𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀏𑀢𑀺𑀲𑁆𑀲𑀸 𑀲𑀫𑁆𑀨𑀲𑁆𑀲𑀁 𑀚𑀸𑀦𑀸𑀧𑁂𑀢𑁆𑀯𑀸 𑀕𑀭𑀳𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀭𑀸𑀚𑀸 𑁋 ‘‘𑀪𑀤𑁆𑀤𑁂, 𑀫𑀸 𑀘𑀺𑀦𑁆𑀢𑀬𑀺, 𑀆𑀳𑀭𑀺𑀲𑁆𑀲𑀸𑀫𑀺 𑀢𑁂 𑀧𑀺𑀢𑀼 𑀧𑀸𑀬𑀸𑀲’’𑀦𑁆𑀢𑀺 𑀯𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀸𑀤𑀺𑀲𑀁 𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀧𑀡𑁆𑀡𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀤𑁆𑀯𑁂 𑀧𑀼𑀝𑁂 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀸𑀬𑀸𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀽𑀴𑀸𑀫𑀡𑀺𑀁 𑀞𑀧𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀕𑀦𑁆𑀢𑁆𑀯𑀸, ‘‘𑀪𑀤𑁆𑀤𑁂, 𑀫𑀬𑀁 𑀤𑀮𑀺𑀤𑁆𑀤𑀸, 𑀓𑀺𑀘𑁆𑀙𑁂𑀦 𑀲𑀫𑁆𑀧𑀸𑀤𑀺𑀢𑀁, 𑀢𑀯 𑀧𑀺𑀢𑀭𑀁 ‘𑀅𑀚𑁆𑀚 𑀇𑀫𑀫𑁆𑀳𑀸 𑀧𑀼𑀝𑀸 𑀧𑀸𑀬𑀸𑀲𑀁 𑀪𑀼𑀜𑁆𑀚, 𑀲𑁆𑀯𑁂 𑀇𑀫𑀫𑁆𑀳𑀸’𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑀸 𑀢𑀣𑀸 𑀅𑀓𑀸𑀲𑀺. 𑀅𑀣𑀲𑁆𑀲𑀸 𑀧𑀺𑀢𑀸 𑀑𑀚𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀸𑀬𑀸𑀲𑀲𑁆𑀲 𑀣𑁄𑀓𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀳𑀺𑀢𑁄 𑀚𑀸𑀢𑁄. 𑀲𑁂𑀲𑀁 𑀫𑀸𑀢𑀼 𑀤𑀢𑁆𑀯𑀸 𑀲𑀬𑀫𑁆𑀧𑀺 ¶ 𑀪𑀼𑀜𑁆𑀚𑀺. 𑀢𑀬𑁄𑀧𑀺 𑀲𑀼𑀳𑀺𑀢𑀸 𑀅𑀳𑁂𑀲𑀼𑀁. 𑀘𑀽𑀴𑀸𑀫𑀡𑀺𑀧𑀼𑀝𑀁 𑀧𑀦 𑀧𑀼𑀦𑀤𑀺𑀯𑀲𑀢𑁆𑀣𑀸𑀬 𑀞𑀧𑁂𑀲𑀼𑀁.
𑀭𑀸𑀚𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸𑀯 ‘‘𑀘𑀽𑀴𑀸𑀫𑀡𑀺𑀁 𑀫𑁂 𑀆𑀳𑀭𑀣𑀸’’𑀢𑀺 𑀯𑀢𑁆𑀯𑀸 ‘‘𑀦 𑀧𑀲𑁆𑀲𑀸𑀫, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀓𑀮𑀦𑀕𑀭𑀁 𑀯𑀺𑀘𑀺𑀦𑀣𑀸’’𑀢𑀺 𑀆𑀳. 𑀢𑁂 𑀯𑀺𑀘𑀺𑀦𑀺𑀢𑁆𑀯𑀸𑀧𑀺 𑀦 𑀧𑀲𑁆𑀲𑀺𑀁𑀲𑀼. 𑀢𑁂𑀦 𑀳𑀺 𑀩𑀳𑀺𑀦𑀕𑀭𑁂 𑀤𑀮𑀺𑀤𑁆𑀤𑀕𑁂𑀳𑁂𑀲𑀼 𑀪𑀢𑁆𑀢𑀧𑀡𑁆𑀡𑀧𑀼𑀝𑁂 𑀉𑀧𑀸𑀤𑀸𑀬 𑀯𑀺𑀘𑀺𑀦𑀣𑀸𑀢𑀺. 𑀯𑀺𑀘𑀺𑀦𑀦𑁆𑀢𑀸 𑀢𑀲𑁆𑀫𑀺𑀁 𑀖𑀝𑁂 𑀘𑀽𑀴𑀸𑀫𑀡𑀺𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 ‘‘𑀘𑁄𑀭𑀸’’𑀢𑀺 𑀩𑀦𑁆𑀥𑀺𑀢𑁆𑀯𑀸 𑀦𑀬𑀺𑀁𑀲𑀼. 𑀅𑀣𑀲𑁆𑀲𑀸 𑀧𑀺𑀢𑀸, ‘‘𑀲𑀸𑀫𑀺, 𑀦 𑀫𑀬𑀁 𑀘𑁄𑀭𑀸, 𑀅𑀜𑁆𑀜𑁂𑀦𑀸𑀬𑀁 𑀫𑀡𑀺 𑀆𑀪𑀢𑁄’’𑀢𑀺 𑀯𑀢𑁆𑀯𑀸 ‘‘𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀚𑀸𑀫𑀸𑀢𑀭𑀸 𑀫𑁂’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀓𑀳𑀁 𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀥𑀻𑀢𑀸 𑀫𑁂 𑀚𑀸𑀦𑀸𑀢𑀻’’𑀢𑀺 𑀆𑀳. 𑀢𑀢𑁄 𑀥𑀻𑀢𑀸𑀬 𑀲𑀤𑁆𑀥𑀺𑀁 𑀓𑀣𑁂𑀲𑀺 𑁋 ‘‘𑀅𑀫𑁆𑀫, 𑀲𑀸𑀫𑀺𑀓𑀁 𑀢𑁂 𑀚𑀸𑀦𑀸𑀲𑀻’’𑀢𑀺? ‘‘𑀦 𑀚𑀸𑀦𑀸𑀫𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺. ‘‘𑀢𑀸𑀢, 𑀲𑁄 𑀅𑀦𑁆𑀥𑀓𑀸𑀭𑁂 𑀆𑀕𑀦𑁆𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀏𑀯 𑀬𑀸𑀢𑀺, 𑀢𑁂𑀦𑀲𑁆𑀲 𑀭𑀽𑀧𑀁 𑀦 𑀚𑀸𑀦𑀸𑀫𑀺, 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦 𑀧𑀦 𑀦𑀁 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺. 𑀲𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂𑀧𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ¶ 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀢𑁂𑀦 𑀳𑀺 𑀢𑀁 𑀇𑀢𑁆𑀣𑀺𑀁 𑀭𑀸𑀚𑀗𑁆𑀕𑀡𑁂 𑀅𑀦𑁆𑀢𑁄𑀲𑀸𑀡𑀺𑀬𑀁 𑀞𑀧𑁂𑀢𑁆𑀯𑀸 𑀲𑀸𑀡𑀺𑀬𑀸 𑀳𑀢𑁆𑀣𑀧𑁆𑀧𑀫𑀸𑀡𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀦𑀕𑀭𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦 𑀘𑁄𑀭𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀭𑀸𑀚𑀧𑀼𑀭𑀺𑀲𑀸 𑀢𑀣𑀸 𑀓𑀸𑀢𑀼𑀁 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀽𑀧𑀁 𑀤𑀺𑀲𑁆𑀯𑀸𑀯 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑀼𑀢𑁆𑀯𑀸 𑁋 ‘‘𑀥𑀻, 𑀥𑀻 𑀧𑀺𑀲𑀸𑀘𑀻’’𑀢𑀺 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀨𑀼𑀲𑀺𑀢𑀼𑀁 𑀦 𑀉𑀲𑁆𑀲𑀳𑀺𑀁𑀲𑀼, 𑀆𑀦𑁂𑀢𑁆𑀯𑀸 𑀧𑀦 ¶ 𑀦𑀁 𑀭𑀸𑀚𑀗𑁆𑀕𑀡𑁂 𑀅𑀦𑁆𑀢𑁄𑀲𑀸𑀡𑀺𑀬𑀁 𑀞𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀸𑀢𑁂𑀲𑀼𑀁. 𑀲𑀸 𑀆𑀕𑀢𑀸𑀕𑀢𑀲𑁆𑀲 𑀙𑀺𑀤𑁆𑀤𑁂𑀦 𑀧𑀲𑀸𑀭𑀺𑀢𑀳𑀢𑁆𑀣𑀁 𑀕𑀳𑁂𑀢𑁆𑀯𑀸𑀯 ‘‘𑀦𑁄 𑀏𑀲𑁄’’𑀢𑀺 𑀯𑀤𑀢𑀺. 𑀧𑀼𑀭𑀺𑀲𑀸 𑀢𑀲𑁆𑀲𑀸 𑀤𑀺𑀩𑁆𑀩𑀨𑀲𑁆𑀲𑀲𑀤𑀺𑀲𑁂 𑀨𑀲𑁆𑀲𑁂 𑀩𑀚𑁆𑀛𑀺𑀢𑁆𑀯𑀸 𑀅𑀧𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, ‘‘𑀲𑀘𑀸𑀬𑀁 𑀤𑀡𑁆𑀟𑀸𑀭𑀳𑀸, 𑀤𑀡𑁆𑀟𑀁 𑀤𑀢𑁆𑀯𑀸𑀧𑀺 𑀤𑀸𑀲𑀓𑀫𑁆𑀫𑀓𑀸𑀭𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸𑀧𑀺 𑀏𑀢𑀁 𑀖𑀭𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀅𑀣 𑀦𑁂 𑀭𑀸𑀚𑀧𑀼𑀭𑀺𑀲𑀸 𑀤𑀡𑁆𑀟𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀧𑀮𑀸𑀧𑁂𑀲𑀼𑀁. 𑀉𑀧𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀉𑀫𑁆𑀫𑀢𑁆𑀢𑀓𑀸 𑀯𑀺𑀬 𑀅𑀳𑁂𑀲𑀼𑀁.
𑀅𑀣 𑀭𑀸𑀚𑀸 𑁋 ‘‘𑀓𑀘𑁆𑀘𑀺 𑀅𑀳𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀯 ‘‘𑀘𑁄𑀭𑁄 𑀫𑁂 𑀕𑀳𑀺𑀢𑁄’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑀺. 𑀭𑀸𑀚𑀸 𑀢𑁂𑀧𑀺 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀏𑀢𑀸𑀬 𑀳𑀢𑁆𑀣𑁂 𑀕𑀳𑀺𑀢𑀸 𑀓𑀺𑀁 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺. 𑀢𑁂 𑀬𑀣𑀸𑀪𑀽𑀢𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀦𑁂 𑀭𑀸𑀚𑀸 𑀆𑀳 𑁋 ‘‘𑀅𑀳𑀁 𑀏𑀢𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀦𑁂𑀢𑀼𑀁 𑀏𑀯𑀁 𑀓𑀸𑀭𑁂𑀲𑀺𑀁 ‘𑀏𑀢𑀺𑀲𑁆𑀲𑀸 𑀨𑀲𑁆𑀲𑀁 𑀅𑀚𑀸𑀦𑀦𑁆𑀢𑀸 𑀫𑀁 𑀧𑀭𑀺𑀪𑀯𑁂𑀬𑁆𑀬𑀼’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀢𑀲𑁆𑀫𑀸 𑀫𑀬𑀸 𑀲𑀩𑁆𑀩𑁂 𑀢𑀼𑀫𑁆𑀳𑁂 𑀚𑀸𑀦𑀸𑀧𑀺𑀢𑀸, 𑀯𑀤𑀣, 𑀪𑁄 𑀤𑀸𑀦𑀺, 𑀲𑀸 𑀓𑀲𑁆𑀲 𑀕𑁂𑀳𑁂 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀤𑁂𑀯𑀸’’𑀢𑀺. 𑀅𑀣 𑀦𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺𑀲𑁆𑀲𑀸 ¶ 𑀇𑀲𑁆𑀲𑀭𑀺𑀬𑀁 𑀤𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀢𑀸𑀬 𑀲𑀫𑁆𑀫𑀢𑁆𑀢𑁄 𑀦𑁂𑀯 𑀯𑀺𑀦𑀺𑀘𑁆𑀙𑀬𑀁 𑀧𑀝𑁆𑀞𑀧𑁂𑀲𑀺, 𑀦 𑀅𑀜𑁆𑀜𑀁 𑀇𑀢𑁆𑀣𑀺𑀁 𑀑𑀮𑁄𑀓𑁂𑀲𑀺. 𑀢𑀸 𑀢𑀲𑁆𑀲𑀸 𑀅𑀦𑁆𑀢𑀭𑀁 𑀧𑀭𑀺𑀬𑁂𑀲𑀺𑀁𑀲𑀼. 𑀲𑀸 𑀏𑀓𑀤𑀺𑀯𑀲𑀁 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑀲𑁆𑀲 𑀲𑀼𑀧𑀺𑀦𑁂 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀲𑀼𑀧𑀺𑀦𑀧𑀸𑀞𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑁂 𑀲𑀼𑀧𑀺𑀦𑁂 𑀤𑀺𑀝𑁆𑀞𑁂 𑀓𑀺𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺. 𑀢𑁂 𑀇𑀢𑀭𑀸𑀲𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑁋 ‘‘𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀲𑀩𑁆𑀩𑀲𑁂𑀢𑀲𑁆𑀲 𑀳𑀢𑁆𑀣𑀺𑀦𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀪𑀸𑀯𑁄 𑀢𑀼𑀫𑁆𑀳𑀸𑀓𑀁 𑀫𑀭𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀳𑀢𑁆𑀣𑀺𑀔𑀦𑁆𑀥𑀕𑀢𑀸𑀬 𑀧𑀦 𑀘𑀦𑁆𑀤𑀧𑀭𑀸𑀫𑀲𑀦𑀁 𑀢𑀼𑀫𑁆𑀳𑀸𑀓𑀁 𑀧𑀘𑁆𑀘𑀸𑀫𑀺𑀢𑁆𑀢𑀭𑀸𑀚𑀸𑀦𑀬𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯 𑀇𑀫𑀁 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀦𑀸𑀯𑀸𑀬 𑀧𑀦 𑀦𑀁 𑀞𑀧𑁂𑀢𑁆𑀯𑀸 𑀦𑀤𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀺𑀁𑀲𑀼. 𑀭𑀸𑀚𑀸 𑀆𑀳𑀸𑀭𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀭𑀢𑁆𑀢𑀺𑀪𑀸𑀕𑁂 𑀦𑀁 𑀦𑀸𑀯𑀸𑀬 𑀞𑀧𑁂𑀢𑁆𑀯𑀸 𑀦𑀤𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.
𑀲𑀸 ¶ 𑀦𑀤𑀺𑀬𑀸 𑀯𑀼𑀬𑁆𑀳𑀫𑀸𑀦𑀸 𑀳𑁂𑀝𑁆𑀞𑀸𑀦𑀤𑀺𑀬𑀸 𑀦𑀸𑀯𑀸𑀬 𑀉𑀤𑀓𑀁 𑀓𑀻𑀴𑀦𑁆𑀢𑀲𑁆𑀲 𑀩𑀸𑀯𑀭𑀺𑀓𑀭𑀜𑁆𑀜𑁄 𑀅𑀪𑀺𑀫𑀼𑀔𑀝𑁆𑀞𑀸𑀦𑀁 𑀧𑀢𑁆𑀢𑀸. 𑀢𑀲𑁆𑀲 𑀲𑁂𑀦𑀸𑀧𑀢𑀺 𑀦𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀦𑀸𑀯𑀸 𑀫𑀬𑁆𑀳’’𑀦𑁆𑀢𑀺 𑀆𑀳. 𑀭𑀸𑀚𑀸 ‘‘𑀦𑀸𑀯𑀸𑀬 𑀪𑀡𑁆𑀟𑀁 𑀫𑀬𑁆𑀳’’𑀦𑁆𑀢𑀺 𑀯𑀢𑁆𑀯𑀸 𑀆𑀕𑀢𑀸𑀬 𑀦𑀸𑀯𑀸𑀬 𑀢𑀁 𑀤𑀺𑀲𑁆𑀯𑀸 ‘‘𑀓𑀸 𑀦𑀸𑀫 𑀢𑁆𑀯𑀁 𑀧𑀺𑀲𑀸𑀘𑀻𑀲𑀤𑀺𑀲𑀸’’𑀢𑀺 𑀧𑀼𑀘𑁆𑀙𑀺. 𑀲𑀸 𑀲𑀺𑀢𑀁 𑀓𑀢𑁆𑀯𑀸 𑀩𑀓𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑀁 𑀓𑀣𑁂𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀢𑀲𑁆𑀲 𑀓𑀣𑁂𑀲𑀺. 𑀲𑀸 𑀧𑀦 𑀧𑀜𑁆𑀘𑀧𑀸𑀧𑀻𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀸. 𑀅𑀣 𑀦𑀁 𑀭𑀸𑀚𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀺, 𑀲𑀳 𑀕𑀳𑀡𑁂𑀦𑁂𑀯 𑀨𑀲𑁆𑀲𑀭𑀸𑀕𑀭𑀢𑁆𑀢𑁄 𑀅𑀜𑁆𑀜𑀸𑀲𑀼 𑀇𑀢𑁆𑀣𑀻𑀲𑀼 𑀇𑀢𑁆𑀣𑀺𑀲𑀜𑁆𑀜𑀁 𑀅𑀓𑀢𑁆𑀯𑀸 𑀢𑀁 ¶ 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀢𑀲𑁆𑀲 𑀧𑀸𑀡𑀲𑀫𑀸 𑀅𑀳𑁄𑀲𑀺. 𑀩𑀓𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀦𑀸𑀳𑀁 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀓𑀸𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀢𑀲𑁆𑀲 𑀧𑀝𑀺𑀢𑀺𑀢𑁆𑀣𑁂 𑀦𑀺𑀯𑁂𑀲𑀦𑀁 𑀓𑀢𑁆𑀯𑀸 𑀧𑀡𑁆𑀡𑀁 𑀧𑁂𑀲𑁂𑀲𑀺 𑁋 ‘‘𑀪𑀭𑀺𑀬𑀁 𑀯𑀸 𑀫𑁂 𑀤𑁂𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀲𑁄 ‘‘𑀬𑀼𑀤𑁆𑀥𑀁 𑀤𑀲𑁆𑀲𑀸𑀫𑀺, 𑀦 𑀪𑀭𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑁄 𑀅𑀳𑁄𑀲𑀺. 𑀉𑀪𑀺𑀦𑁆𑀦𑀁 𑀅𑀫𑀘𑁆𑀘𑀸 ‘‘𑀫𑀸𑀢𑀼𑀕𑀸𑀫𑀁 𑀦𑀺𑀲𑁆𑀲𑀸𑀬 𑀫𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀼𑀭𑀺𑀫𑀲𑀸𑀫𑀺𑀓𑀢𑁆𑀢𑀸 𑀏𑀲𑀸 𑀩𑀓𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀦𑀸𑀯𑀸𑀬 𑀮𑀤𑁆𑀥𑀢𑁆𑀢𑀸 𑀩𑀸𑀯𑀭𑀺𑀓𑀲𑁆𑀲, 𑀢𑀲𑁆𑀫𑀸 𑀏𑀓𑁂𑀓𑀲𑁆𑀲 𑀕𑁂𑀳𑁂 𑀲𑀢𑁆𑀢 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀳𑁄𑀢𑀽’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀤𑁆𑀯𑁂𑀧𑀺 𑀭𑀸𑀚𑀸𑀦𑁄 𑀲𑀜𑁆𑀜𑀸𑀧𑁂𑀲𑀼𑀁. 𑀢𑁂 𑀉𑀪𑁄𑀧𑀺 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀢𑀺𑀢𑁆𑀣𑀧𑀝𑀺𑀢𑀺𑀢𑁆𑀣𑁂 𑀦𑀕𑀭𑀸𑀦𑀺 𑀫𑀸𑀧𑁂𑀢𑁆𑀯𑀸 𑀯𑀲𑀺𑀁𑀲𑀼. 𑀲𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀅𑀕𑁆𑀕𑀫𑀳𑁂𑀲𑀺𑀢𑁆𑀢𑀁 𑀓𑀸𑀭𑁂𑀲𑀺. 𑀤𑁆𑀯𑁂𑀧𑀺 𑀢𑀲𑁆𑀲𑀸 𑀲𑀫𑁆𑀫𑀢𑁆𑀢𑀸 𑀅𑀳𑁂𑀲𑀼𑀁. 𑀲𑀸 𑀧𑀦 𑀏𑀓𑀲𑁆𑀲 𑀖𑀭𑁂 𑀲𑀢𑁆𑀢𑀸𑀳𑀁 𑀯𑀲𑀺𑀢𑁆𑀯𑀸 𑀦𑀸𑀯𑀸𑀬 𑀇𑀢𑀭𑀲𑁆𑀲 𑀖𑀭𑀁 𑀕𑀘𑁆𑀙𑀦𑁆𑀢𑀻 𑀦𑀸𑀯𑀁 𑀧𑀸𑀚𑁂𑀢𑁆𑀯𑀸 𑀦𑁂𑀦𑁆𑀢𑁂𑀦 𑀏𑀓𑁂𑀦 𑀫𑀳𑀮𑁆𑀮𑀓𑀔𑀼𑀚𑁆𑀚𑀓𑁂𑀯𑀝𑁆𑀝𑁂𑀦 𑀲𑀤𑁆𑀥𑀺𑀁 𑀦𑀤𑀻𑀫𑀚𑁆𑀛𑁂 𑀧𑀸𑀧𑀁 𑀓𑀭𑁄𑀢𑀺. 𑀢𑀤𑀸 𑀓𑀼𑀡𑀸𑀮𑁄 𑀲𑀓𑀼𑀡𑀭𑀸𑀚𑀸 ¶ 𑀩𑀓𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀇𑀤𑀁 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀩𑀓𑀲𑁆𑀲 𑀘 𑀩𑀸𑀯𑀭𑀺𑀓𑀲𑁆𑀲 𑀘 𑀭𑀜𑁆𑀜𑁄, 𑀅𑀘𑁆𑀘𑀦𑁆𑀢𑀓𑀸𑀫𑀸𑀦𑀼𑀕𑀢𑀲𑁆𑀲 𑀪𑀭𑀺𑀬𑀸;
𑀅𑀯𑀸𑀘𑀭𑀻 𑀧𑀝𑁆𑀞𑀯𑀲𑀸𑀦𑀼𑀕𑀲𑁆𑀲, 𑀓𑀁 𑀯𑀸𑀧𑀺 𑀇𑀢𑁆𑀣𑀻 𑀦𑀸𑀢𑀺𑀘𑀭𑁂 𑀢𑀤𑀜𑁆𑀜’’𑀦𑁆𑀢𑀺.
𑀢𑀢𑁆𑀣 𑀅𑀘𑁆𑀘𑀦𑁆𑀢𑀓𑀸𑀫𑀸𑀦𑀼𑀕𑀢𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀁 𑀓𑀸𑀫𑀁 𑀅𑀦𑀼𑀕𑀢𑀲𑁆𑀲. 𑀅𑀯𑀸𑀘𑀭𑀻𑀢𑀺 𑀅𑀦𑀸𑀘𑀸𑀭𑀁 𑀘𑀭𑀺. 𑀧𑀝𑁆𑀞𑀯𑀲𑀸𑀦𑀼𑀕𑀲𑁆𑀲𑀸𑀢𑀺 𑀧𑀝𑁆𑀞𑀲𑁆𑀲 𑀅𑀢𑁆𑀢𑀦𑁄 𑀯𑀲𑀸𑀦𑀼𑀕𑀢𑀲𑁆𑀲, 𑀅𑀢𑁆𑀢𑀦𑁄 𑀧𑁂𑀲𑀦𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁 ¶ , 𑀢𑁂𑀦 𑀲𑀤𑁆𑀥𑀺𑀁 𑀧𑀸𑀧𑀫𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑀜𑁆𑀜𑀦𑁆𑀢𑀺 𑀓𑀢𑀭𑀁 𑀢𑀁 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀦𑀸𑀢𑀺𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.
𑀅𑀧𑀭𑀸𑀧𑀺 𑀅𑀢𑀻𑀢𑁂 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀭𑀺𑀬𑀸 𑀧𑀺𑀗𑁆𑀕𑀺𑀬𑀸𑀦𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 𑀫𑀗𑁆𑀕𑀮𑀅𑀲𑁆𑀲𑀕𑁄𑀧𑀓𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀦𑀺𑀤𑁆𑀤𑀼𑀧𑀕𑀫𑀦𑀓𑀸𑀮𑁂 𑀯𑀸𑀢𑀧𑀸𑀦𑁂𑀦 𑀑𑀭𑀼𑀬𑁆𑀳 𑀢𑁂𑀦 𑀲𑀤𑁆𑀥𑀺𑀁 𑀅𑀢𑀺𑀘𑀭𑀺𑀢𑁆𑀯𑀸 𑀧𑀼𑀦 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀕𑀦𑁆𑀥𑁂𑀳𑀺 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 ‘‘𑀓𑀺𑀁 𑀦𑀼 𑀔𑁄 𑀤𑁂𑀯𑀺𑀬𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀦𑀺𑀘𑁆𑀘𑀁 𑀲𑀭𑀻𑀭𑀁 𑀲𑀻𑀢𑀁 𑀳𑁄𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀏𑀓𑀤𑀺𑀯𑀲𑀁 𑀦𑀺𑀤𑁆𑀤𑀼𑀧𑀕𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀁 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀅𑀲𑁆𑀲𑀩𑀦𑁆𑀥𑁂𑀦 𑀲𑀤𑁆𑀥𑀺𑀁 𑀅𑀢𑀺𑀘𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀬𑀦𑀁 𑀅𑀪𑀺𑀭𑀼𑀳𑀺. 𑀲𑀸𑀧𑀺 𑀅𑀢𑀺𑀘𑀭𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀘𑀽𑀴𑀲𑀬𑀦𑀓𑁂 𑀦𑀺𑀧𑀚𑁆𑀚𑀺. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀅𑀫𑀘𑁆𑀘𑀕𑀡𑀫𑀚𑁆𑀛𑁂𑀬𑁂𑀯 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀁 𑀓𑀺𑀘𑁆𑀘𑀁 𑀆𑀯𑀺𑀓𑀢𑁆𑀯𑀸 ‘‘𑀲𑀩𑁆𑀩𑀸𑀯 𑀇𑀢𑁆𑀣𑀺𑀬𑁄 𑀧𑀸𑀧𑀥𑀫𑁆𑀫𑀸’’𑀢𑀺 𑀢𑀲𑁆𑀲𑀸 𑀯𑀥𑀩𑀦𑁆𑀥𑀙𑁂𑀚𑁆𑀚𑀪𑁂𑀚𑁆𑀚𑀸𑀭𑀳𑀁 𑀤𑁄𑀲𑀁 𑀔𑀫𑀺𑀢𑁆𑀯𑀸 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺. 𑀢𑀤𑀸 𑀓𑀼𑀡𑀸𑀮𑁄 𑀭𑀸𑀚𑀸 𑀩𑁆𑀭𑀳𑁆𑀫𑀤𑀢𑁆𑀢𑁄 𑀅𑀳𑁄𑀲𑀺, 𑀢𑁂𑀦 𑀢𑀁 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀧𑀺𑀗𑁆𑀕𑀺𑀬𑀸𑀦𑀻 ¶ 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀲𑁆𑀲, 𑀭𑀜𑁆𑀜𑁄 𑀧𑀺𑀬𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀭𑀺𑀬𑀸;
𑀅𑀯𑀸𑀘𑀭𑀻 𑀧𑀝𑁆𑀞𑀯𑀲𑀸𑀦𑀼𑀕𑀲𑁆𑀲, 𑀢𑀁 𑀯𑀸𑀧𑀺 𑀲𑀸 𑀦𑀸𑀚𑁆𑀛𑀕𑀸 𑀓𑀸𑀫𑀓𑀸𑀫𑀺𑀦𑀻’’𑀢𑀺.
𑀢𑀢𑁆𑀣 𑀢𑀁 𑀯𑀸𑀢𑀺 𑀲𑀸 𑀏𑀯𑀁 𑀅𑀢𑀺𑀘𑀭𑀦𑁆𑀢𑀻 𑀢𑀁 𑀯𑀸 𑀅𑀲𑁆𑀲𑀩𑀦𑁆𑀥𑀁 𑀢𑀁 𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀦𑁆𑀢𑀺 𑀉𑀪𑀬𑀫𑁆𑀧𑀺 𑀦𑀸𑀚𑁆𑀛𑀕𑀸, 𑀉𑀪𑀢𑁄 𑀪𑀝𑁆𑀞𑀸 𑀅𑀳𑁄𑀲𑀺. 𑀓𑀸𑀫𑀓𑀸𑀫𑀺𑀦𑀻𑀢𑀺 𑀓𑀸𑀫𑁂 𑀧𑀢𑁆𑀣𑀬𑀫𑀸𑀦𑀸.
𑀏𑀯𑀁 𑀧𑀸𑀧𑀥𑀫𑁆𑀫𑀸 𑀇𑀢𑁆𑀣𑀺𑀬𑁄𑀢𑀺 𑀅𑀢𑀻𑀢𑀯𑀢𑁆𑀣𑀽𑀳𑀺 ¶ 𑀇𑀢𑁆𑀣𑀻𑀦𑀁 𑀤𑁄𑀲𑀁 𑀓𑀣𑁂𑀢𑁆𑀯𑀸 𑀅𑀧𑀭𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀢𑀸𑀲𑀁 𑀤𑁄𑀲𑀫𑁂𑀯 𑀓𑀣𑁂𑀦𑁆𑀢𑁄 𑀆𑀳 𑁋
‘‘𑀮𑀼𑀤𑁆𑀥𑀸𑀦𑀁 𑀮𑀳𑀼𑀘𑀺𑀢𑁆𑀢𑀸𑀦𑀁, 𑀅𑀓𑀢𑀜𑁆𑀜𑀽𑀦 𑀤𑀼𑀩𑁆𑀪𑀺𑀦𑀁;
𑀦𑀸𑀤𑁂𑀯𑀲𑀢𑁆𑀢𑁄 𑀧𑀼𑀭𑀺𑀲𑁄, 𑀣𑀻𑀦𑀁 𑀲𑀤𑁆𑀥𑀸𑀢𑀼𑀫𑀭𑀳𑀢𑀺.
‘‘𑀦 𑀢𑀸 𑀧𑀚𑀸𑀦𑀦𑁆𑀢𑀺 𑀓𑀢𑀁 𑀦 𑀓𑀺𑀘𑁆𑀘𑀁, 𑀦 𑀫𑀸𑀢𑀭𑀁 𑀧𑀺𑀢𑀭𑀁 𑀪𑀸𑀢𑀭𑀁 𑀯𑀸;
𑀅𑀦𑀭𑀺𑀬𑀸 𑀲𑀫𑀢𑀺𑀓𑁆𑀓𑀦𑁆𑀢𑀥𑀫𑁆𑀫𑀸, 𑀲𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀯𑀚𑀦𑁆𑀢𑀺.
‘‘𑀘𑀺𑀭𑀸𑀦𑀼𑀯𑀼𑀝𑁆𑀞𑀫𑁆𑀧𑀺 ¶ 𑀧𑀺𑀬𑀁 𑀫𑀦𑀸𑀧𑀁, 𑀅𑀦𑀼𑀓𑀫𑁆𑀧𑀓𑀁 𑀧𑀸𑀡𑀲𑀫𑀫𑁆𑀧𑀺 𑀪𑀢𑁆𑀢𑀼𑀁;
𑀆𑀯𑀸𑀲𑀼 𑀓𑀺𑀘𑁆𑀘𑁂𑀲𑀼 𑀘 𑀦𑀁 𑀚𑀳𑀦𑁆𑀢𑀺, 𑀢𑀲𑁆𑀫𑀸𑀳𑀫𑀺𑀢𑁆𑀣𑀻𑀦𑀁 𑀦 𑀯𑀺𑀲𑁆𑀲𑀲𑀸𑀫𑀺.
‘‘𑀣𑀻𑀦𑀜𑁆𑀳𑀺 𑀘𑀺𑀢𑁆𑀢𑀁 𑀬𑀣𑀸 𑀯𑀸𑀦𑀭𑀲𑁆𑀲, 𑀓𑀦𑁆𑀦𑀧𑁆𑀧𑀓𑀦𑁆𑀦𑀁 𑀬𑀣𑀸 𑀭𑀼𑀓𑁆𑀔𑀙𑀸𑀬𑀸;
𑀘𑀮𑀸𑀘𑀮𑀁 𑀳𑀤𑀬𑀫𑀺𑀢𑁆𑀣𑀺𑀬𑀸𑀦𑀁, 𑀘𑀓𑁆𑀓𑀲𑁆𑀲 𑀦𑁂𑀫𑀺 𑀯𑀺𑀬 𑀧𑀭𑀺𑀯𑀢𑁆𑀢𑀢𑀺.
‘‘𑀬𑀤𑀸 𑀢𑀸 𑀧𑀲𑁆𑀲𑀦𑁆𑀢𑀺 𑀲𑀫𑁂𑀓𑁆𑀔𑀫𑀸𑀦𑀸, 𑀆𑀤𑁂𑀬𑁆𑀬𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀁;
𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺 𑀦𑀬𑀦𑁆𑀢𑀺 𑀫𑁂𑀦𑀁, 𑀓𑀫𑁆𑀩𑁄𑀚𑀓𑀸 𑀚𑀮𑀚𑁂𑀦𑁂𑀯 𑀅𑀲𑁆𑀲𑀁.
‘‘𑀬𑀤𑀸 𑀦 𑀧𑀲𑁆𑀲𑀦𑁆𑀢𑀺 𑀲𑀫𑁂𑀓𑁆𑀔𑀫𑀸𑀦𑀸, 𑀆𑀤𑁂𑀬𑁆𑀬𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀁;
𑀲𑀫𑀦𑁆𑀢𑀢𑁄 𑀦𑀁 𑀧𑀭𑀺𑀯𑀚𑁆𑀚𑀬𑀦𑁆𑀢𑀺, 𑀢𑀺𑀡𑁆𑀡𑁄 𑀦𑀤𑀻𑀧𑀸𑀭𑀕𑀢𑁄𑀯 𑀓𑀼𑀮𑁆𑀮𑀁.
‘‘𑀲𑀺𑀮𑁂𑀲𑀽𑀧𑀫𑀸 𑀲𑀺𑀔𑀺𑀭𑀺𑀯 𑀲𑀩𑁆𑀩𑀪𑀓𑁆𑀔𑀸, 𑀢𑀺𑀓𑁆𑀔𑀫𑀸𑀬𑀸 𑀦𑀤𑀻𑀭𑀺𑀯 𑀲𑀻𑀖𑀲𑁄𑀢𑀸;
𑀲𑁂𑀯𑀦𑁆𑀢𑀺 𑀳𑁂𑀢𑀸 𑀧𑀺𑀬𑀫𑀧𑁆𑀧𑀺𑀬𑀜𑁆𑀘, 𑀦𑀸𑀯𑀸 𑀬𑀣𑀸 𑀑𑀭𑀓𑀼𑀮𑀁 𑀧𑀭𑀜𑁆𑀘.
‘‘𑀦 ¶ 𑀢𑀸 𑀏𑀓𑀲𑁆𑀲 𑀦 𑀤𑁆𑀯𑀺𑀦𑁆𑀦𑀁, 𑀆𑀧𑀡𑁄𑀯 𑀧𑀲𑀸𑀭𑀺𑀢𑁄;
𑀬𑁄 𑀢𑀸 𑀫𑀬𑁆𑀳𑀦𑁆𑀢𑀺 𑀫𑀜𑁆𑀜𑁂𑀬𑁆𑀬, 𑀯𑀸𑀢𑀁 𑀚𑀸𑀮𑁂𑀦 𑀩𑀸𑀥𑀬𑁂.
‘‘𑀬𑀣𑀸 ¶ 𑀦𑀤𑀻 𑀘 𑀧𑀦𑁆𑀣𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;
𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺.
‘‘𑀖𑀢𑀸𑀲𑀦𑀲𑀫𑀸 𑀏𑀢𑀸, 𑀓𑀡𑁆𑀳𑀲𑀧𑁆𑀧𑀲𑀺𑀭𑀽𑀧𑀫𑀸;
𑀕𑀸𑀯𑁄 𑀩𑀳𑀺 𑀢𑀺𑀡𑀲𑁆𑀲𑁂𑀯, 𑀑𑀫𑀲𑀦𑁆𑀢𑀺 𑀯𑀭𑀁 𑀯𑀭𑀁.
‘‘𑀖𑀢𑀸𑀲𑀦𑀁 ¶ 𑀓𑀼𑀜𑁆𑀚𑀭𑀁 𑀓𑀡𑁆𑀳𑀲𑀧𑁆𑀧𑀁, 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀁 𑀧𑀫𑀤𑀸 𑀘 𑀲𑀩𑁆𑀩𑀸;
𑀏𑀢𑁂 𑀦𑀭𑁄 𑀦𑀺𑀘𑁆𑀘𑀬𑀢𑁄 𑀪𑀚𑁂𑀣, 𑀢𑁂𑀲𑀁 𑀳𑀯𑁂 𑀤𑀼𑀩𑁆𑀩𑀺𑀤𑀼 𑀲𑀩𑁆𑀩𑀪𑀸𑀯𑁄.
‘‘𑀦𑀘𑁆𑀘𑀦𑁆𑀢𑀯𑀡𑁆𑀡𑀸 𑀦 𑀩𑀳𑀽𑀦 𑀓𑀦𑁆𑀢𑀸, 𑀦 𑀤𑀓𑁆𑀔𑀺𑀡𑀸 𑀧𑀫𑀤𑀸 𑀲𑁂𑀯𑀺𑀢𑀩𑁆𑀩𑀸;
𑀦 𑀧𑀭𑀲𑁆𑀲 𑀪𑀭𑀺𑀬𑀸 𑀦 𑀥𑀦𑀲𑁆𑀲 𑀳𑁂𑀢𑀼, 𑀏𑀢𑀺𑀢𑁆𑀣𑀺𑀬𑁄 𑀧𑀜𑁆𑀘 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺.
𑀢𑀢𑁆𑀣 𑀮𑀼𑀤𑁆𑀥𑀸𑀦𑀦𑁆𑀢𑀺 𑀮𑀼𑀩𑁆𑀪𑀸𑀦𑀁. 𑀓𑀡𑀯𑁂𑀭𑀚𑀸𑀢𑀓𑁂 (𑀚𑀸. 𑁧.𑁪.𑁬𑁯-𑁭𑁨) 𑀯𑀺𑀬 𑀩𑀤𑁆𑀥𑀘𑁄𑀭𑁂𑀧𑀺 𑀲𑀸𑀭𑀚𑁆𑀚𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀮𑀳𑀼𑀘𑀺𑀢𑁆𑀢𑀸𑀦𑀦𑁆𑀢𑀺 𑀫𑀼𑀳𑀼𑀢𑁆𑀢𑀫𑁂𑀯 𑀧𑀭𑀺𑀯𑀢𑁆𑀢𑀦𑀘𑀺𑀢𑁆𑀢𑀸𑀦𑀁. 𑀘𑀽𑀴𑀥𑀦𑀼𑀕𑁆𑀕𑀳𑀚𑀸𑀢𑀓𑁂𑀦 (𑀚𑀸. 𑁧.𑁫.𑁧𑁨𑁮 𑀆𑀤𑀬𑁄) 𑀏𑀢𑀁 𑀤𑀻𑀧𑁂𑀢𑀩𑁆𑀩𑀁. 𑀅𑀓𑀢𑀜𑁆𑀜𑀼𑀢𑀸 𑀧𑀦 𑀏𑀢𑀸𑀲𑀁 𑀏𑀓𑀓𑀦𑀺𑀧𑀸𑀢𑁂 𑀢𑀓𑁆𑀓𑀸𑀭𑀺𑀬𑀚𑀸𑀢𑀓𑁂𑀦 (𑀚𑀸. 𑁧.𑁧𑁩.𑁧𑁦𑁪 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀸. 𑀦𑀸𑀤𑁂𑀯𑀲𑀢𑁆𑀢𑁄𑀢𑀺 𑀦 𑀅𑀤𑁂𑀯𑀲𑀢𑁆𑀢𑁄 𑀤𑁂𑀯𑁂𑀦 𑀅𑀦𑀸𑀲𑀢𑁆𑀢𑁄 𑀅𑀬𑀓𑁆𑀔𑀕𑀳𑀺𑀢𑀓𑁄 𑀅𑀪𑀽𑀢𑀯𑀺𑀝𑁆𑀞𑁄 𑀧𑀼𑀭𑀺𑀲𑁄 𑀣𑀻𑀦𑀁 𑀲𑀻𑀮𑀯𑀦𑁆𑀢𑀢𑀁 𑀲𑀤𑁆𑀥𑀸𑀢𑀼𑀁 𑀦𑀸𑀭𑀳𑀢𑀺, 𑀪𑀽𑀢𑀯𑀺𑀝𑁆𑀞𑁄 𑀧𑀦 𑀲𑀤𑁆𑀤𑀳𑁂𑀬𑁆𑀬. 𑀓𑀢𑀦𑁆𑀢𑀺 𑀅𑀢𑁆𑀢𑀦𑁄 𑀓𑀢𑀁 𑀉𑀧𑀓𑀸𑀭𑀁. 𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁. 𑀦 𑀫𑀸𑀢𑀭𑀦𑁆𑀢𑀺 𑀲𑀩𑁆𑀩𑁂𑀧𑀺 𑀜𑀸𑀢𑀓𑁂 𑀙𑀟𑁆𑀟𑁂𑀢𑁆𑀯𑀸 𑀬𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀜𑁆𑀜𑁂𑀯 𑀅𑀦𑀼𑀩𑀦𑁆𑀥𑀦𑀢𑁄 𑀏𑀢𑁂 𑀫𑀸𑀢𑀸𑀤𑀬𑁄 𑀦 𑀚𑀸𑀦𑀦𑁆𑀢𑀺 𑀦𑀸𑀫 𑀫𑀳𑀸𑀧𑀦𑁆𑀣𑀓𑀫𑀸𑀢𑀸 𑀯𑀺𑀬. 𑀅𑀦𑀭𑀺𑀬𑀸𑀢𑀺 𑀦𑀺𑀮𑁆𑀮𑀚𑁆𑀚𑀸. 𑀲𑀲𑁆𑀲𑁂𑀯𑀸𑀢𑀺 𑀲𑀓𑀲𑁆𑀲. 𑀆𑀯𑀸𑀲𑀽𑀢𑀺 𑀆𑀧𑀤𑀸𑀲𑀼. 𑀓𑀺𑀘𑁆𑀘𑁂𑀲𑀽𑀢𑀺 𑀢𑁂𑀲𑀼 𑀢𑁂𑀲𑀼 𑀓𑀭𑀡𑀻𑀬𑁂𑀲𑀼.
𑀓𑀦𑁆𑀦𑀧𑁆𑀧𑀓𑀦𑁆𑀦𑀦𑁆𑀢𑀺 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑀁. 𑀬𑀣𑀸 𑀳𑀺 𑀯𑀺𑀲𑀫𑁂 𑀧𑀤𑁂𑀲𑁂 𑀭𑀼𑀓𑁆𑀔𑀙𑀸𑀬𑀸 𑀦𑀺𑀦𑁆𑀦𑀫𑁆𑀧𑀺𑀑𑀭𑁄𑀳𑀢𑀺, 𑀣𑀮𑀫𑁆𑀧𑀺 𑀅𑀪𑀺𑀭𑀼𑀳𑀢𑀺, 𑀢𑀣𑀸 𑀏𑀢𑀸𑀲𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀓𑀜𑁆𑀘𑀺 𑀉𑀢𑁆𑀢𑀫𑀸𑀥𑀫𑀁 𑀯𑀚𑁆𑀚𑁂𑀢𑀺. 𑀘𑀮𑀸𑀘𑀮𑀦𑁆𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀧𑀢𑀺𑀝𑁆𑀞𑀺𑀢𑀁. 𑀦𑁂𑀫𑀺 𑀯𑀺𑀬𑀸𑀢𑀺 𑀲𑀓𑀝𑀲𑁆𑀲 𑀕𑀘𑁆𑀙𑀢𑁄 𑀘𑀓𑁆𑀓𑀦𑁂𑀫𑀺 𑀯𑀺𑀬. 𑀆𑀤𑁂𑀬𑁆𑀬𑀭𑀽𑀧𑀦𑁆𑀢𑀺 𑀕𑀳𑁂𑀢𑀩𑁆𑀩𑀚𑀸𑀢𑀺𑀓𑀁. 𑀯𑀺𑀢𑁆𑀢𑀦𑁆𑀢𑀺 𑀥𑀦𑀁. 𑀦𑀬𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀲𑀁 𑀦𑁂𑀦𑁆𑀢𑀺. 𑀚𑀮𑀚𑁂𑀦𑀸𑀢𑀺 𑀚𑀮𑀚𑀸𑀢𑀲𑁂𑀯𑀸𑀮𑁂𑀦. 𑀓𑀫𑁆𑀩𑁄𑀚𑀭𑀝𑁆𑀞𑀯𑀸𑀲𑀺𑀦𑁄 𑀓𑀺𑀭 𑀬𑀤𑀸 𑀅𑀝𑀯𑀺𑀢𑁄 𑀅𑀲𑁆𑀲𑁂 𑀕𑀡𑁆𑀳𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀤𑀸 𑀏𑀓𑀲𑁆𑀫𑀺𑀁 ¶ 𑀞𑀸𑀦𑁂 𑀯𑀢𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀅𑀲𑁆𑀲𑀸𑀦𑀁 𑀉𑀤𑀓𑀧𑀸𑀦𑀢𑀺𑀢𑁆𑀣𑁂 𑀲𑁂𑀯𑀸𑀮𑀁 𑀫𑀥𑀼𑀦𑀸 𑀫𑀓𑁆𑀔𑁂𑀢𑁆𑀯𑀸 𑀲𑁂𑀯𑀸𑀮𑀲𑀫𑁆𑀩𑀦𑁆𑀥𑀸𑀦𑀺 𑀢𑀻𑀭𑁂 𑀢𑀺𑀡𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑀭𑀺𑀓𑁆𑀔𑁂𑀧𑀤𑁆𑀯𑀸𑀭𑀸 𑀫𑀓𑁆𑀔𑁂𑀦𑁆𑀢𑀺, 𑀅𑀲𑁆𑀲𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 ¶ 𑀭𑀲𑀕𑀺𑀤𑁆𑀥𑁂𑀦 𑀫𑀥𑀼𑀦𑀸 𑀫𑀓𑁆𑀔𑀺𑀢𑀸𑀦𑀺 𑀢𑀸𑀦𑀺 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀞𑀸𑀦𑀁 𑀧𑀯𑀺𑀲𑀦𑁆𑀢𑀺. 𑀇𑀢𑀺 𑀬𑀣𑀸 𑀢𑁂 𑀚𑀮𑀚𑁂𑀦 𑀧𑀮𑁄𑀪𑁂𑀢𑁆𑀯𑀸 ¶ 𑀅𑀲𑁆𑀲𑁂 𑀯𑀲𑀁 𑀦𑁂𑀦𑁆𑀢𑀺, 𑀢𑀣𑀸 𑀏𑀢𑀸𑀧𑀺 𑀥𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀕𑀳𑀡𑀢𑁆𑀣𑀸𑀬 𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺𑀧𑀺 𑀧𑀼𑀭𑀺𑀲𑀁 𑀯𑀲𑀁 𑀦𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀮𑁆𑀮𑀦𑁆𑀢𑀺 𑀢𑀭𑀡𑀢𑁆𑀣𑀸𑀬 𑀕𑀳𑀺𑀢𑀁 𑀬𑀁 𑀓𑀺𑀜𑁆𑀘𑀺.
𑀲𑀺𑀮𑁂𑀲𑀽𑀧𑀫𑀸𑀢𑀺 𑀧𑀼𑀭𑀺𑀲𑀸𑀦𑀁 𑀘𑀺𑀢𑁆𑀢𑀩𑀦𑁆𑀥𑀦𑁂𑀦 𑀲𑀺𑀮𑁂𑀲𑀲𑀤𑀺𑀲𑀸. 𑀢𑀺𑀓𑁆𑀔𑀫𑀸𑀬𑀸𑀢𑀺 𑀢𑀺𑀔𑀺𑀡𑀫𑀸𑀬𑀸 𑀲𑀻𑀖𑀫𑀸𑀬𑀸. 𑀦𑀤𑀻𑀭𑀺𑀯𑀸𑀢𑀺 𑀬𑀣𑀸 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻 𑀲𑀻𑀖𑀲𑁄𑀢𑀸, 𑀏𑀯𑀁 𑀲𑀻𑀖𑀫𑀸𑀬𑀸𑀢𑀺 𑀅𑀢𑁆𑀣𑁄. 𑀆𑀧𑀡𑁄𑀯𑀸𑀢𑀺 𑀬𑀣𑀸 𑀘 𑀧𑀲𑀸𑀭𑀺𑀢𑀸𑀧𑀡𑁄 𑀬𑁂𑀲𑀁 𑀫𑀽𑀮𑀁 𑀅𑀢𑁆𑀣𑀺, 𑀢𑁂𑀲𑀜𑁆𑀜𑁂𑀯 𑀉𑀧𑀓𑀸𑀭𑁄, 𑀢𑀣𑁂𑀯 𑀢𑀸𑀧𑀺. 𑀬𑁄 𑀢𑀸𑀢𑀺 𑀬𑁄 𑀧𑀼𑀭𑀺𑀲𑁄 𑀢𑀸 𑀇𑀢𑁆𑀣𑀺𑀬𑁄. 𑀩𑀸𑀥𑀬𑁂𑀢𑀺 𑀲𑁄 𑀯𑀸𑀢𑀁 𑀚𑀸𑀮𑁂𑀦 𑀩𑀸𑀥𑁂𑀬𑁆𑀬. 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀬𑀣𑀸 𑀏𑀢𑁂𑀲𑀁 𑀦𑀤𑀻𑀆𑀤𑀻𑀦𑀁 ‘‘𑀅𑀲𑀼𑀓𑀯𑁂𑀮𑀸𑀬𑀫𑁂𑀯 𑀏𑀢𑁆𑀣 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑁂𑀮𑀸 𑀦𑀢𑁆𑀣𑀺, 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀉𑀧𑀕𑀦𑁆𑀢𑀩𑁆𑀩𑀸𑀦𑁂𑀯, 𑀅𑀲𑀼𑀓𑁂𑀦𑁂𑀯𑀸𑀢𑀺𑀧𑀺 𑀫𑀭𑀺𑀬𑀸𑀤𑀸 𑀦𑀢𑁆𑀣𑀺, 𑀅𑀢𑁆𑀣𑀺𑀓𑁂𑀦 𑀉𑀧𑀕𑀦𑁆𑀢𑀩𑁆𑀩𑀸𑀦𑁂𑀯, 𑀢𑀣𑀸 𑀢𑀸𑀲𑀫𑁆𑀧𑀻𑀢𑀺 𑀅𑀢𑁆𑀣𑁄.
𑀖𑀢𑀸𑀲𑀦𑀲𑀫𑀸 𑀏𑀢𑀸𑀢𑀺 𑀬𑀣𑀸 𑀅𑀕𑁆𑀕𑀺 𑀇𑀦𑁆𑀥𑀦𑁂𑀦 𑀦 𑀢𑀧𑁆𑀧𑀢𑀺, 𑀏𑀯𑀫𑁂𑀢𑀸𑀧𑀺 𑀓𑀺𑀮𑁂𑀲𑀭𑀢𑀺𑀬𑀸. 𑀓𑀡𑁆𑀳𑀲𑀧𑁆𑀧𑀲𑀺𑀭𑀽𑀧𑀫𑀸𑀢𑀺 𑀓𑁄𑀥𑀦𑀢𑀸𑀬 𑀉𑀧𑀦𑀸𑀳𑀺𑀢𑀸𑀬 𑀖𑁄𑀭𑀯𑀺𑀲𑀢𑀸𑀬 𑀤𑀼𑀚𑀺𑀯𑁆𑀳𑀢𑀸𑀬 𑀫𑀺𑀢𑁆𑀢𑀤𑀼𑀩𑁆𑀪𑀺𑀢𑀸𑀬𑀸𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀓𑀡𑁆𑀳𑀲𑀧𑁆𑀧𑀲𑀺𑀭𑀲𑀤𑀺𑀲𑀸. 𑀢𑀢𑁆𑀣 𑀩𑀳𑀼𑀮𑀭𑀸𑀕𑀢𑀸𑀬 𑀖𑁄𑀭𑀯𑀺𑀲𑀢𑀸, 𑀧𑀺𑀲𑀼𑀡𑀢𑀸𑀬 𑀤𑀼𑀚𑀺𑀯𑁆𑀳𑀢𑀸, 𑀅𑀢𑀺𑀘𑀸𑀭𑀺𑀢𑀸𑀬 𑀫𑀺𑀢𑁆𑀢𑀤𑀼𑀩𑁆𑀪𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀸𑀯𑁄 𑀩𑀳𑀺 𑀢𑀺𑀡𑀲𑁆𑀲𑁂𑀯𑀸𑀢𑀺 𑀬𑀣𑀸 𑀕𑀸𑀯𑁄 𑀔𑀸𑀤𑀺𑀢𑀝𑁆𑀞𑀸𑀦𑀁 𑀙𑀟𑁆𑀟𑁂𑀢𑁆𑀯𑀸 𑀩𑀳𑀺 𑀫𑀦𑀸𑀧𑀫𑀦𑀸𑀧𑀲𑁆𑀲 𑀢𑀺𑀡𑀲𑁆𑀲 𑀯𑀭𑀁 𑀯𑀭𑀁 𑀑𑀫𑀲𑀦𑁆𑀢𑀺 𑀔𑀸𑀤𑀦𑁆𑀢𑀺, 𑀏𑀯𑀫𑁂𑀢𑀸𑀧𑀺 𑀦𑀺𑀤𑁆𑀥𑀦𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀲𑀥𑀦𑀫𑁂𑀯 𑀪𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀦𑁆𑀢𑀺 𑀭𑀸𑀚𑀸𑀦𑀁. 𑀧𑀫𑀤𑀸 𑀘 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸 𑀘 𑀇𑀢𑁆𑀣𑀺𑀬𑁄. 𑀏𑀢𑁂𑀢𑀺 𑀏𑀢𑁂 𑀧𑀜𑁆𑀘 𑀚𑀦𑁂. 𑀦𑀺𑀘𑁆𑀘𑀬𑀢𑁄𑀢𑀺 𑀦𑀺𑀘𑁆𑀘𑀲𑀜𑁆𑀜𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀅𑀧𑁆𑀧𑀫𑀢𑁆𑀢𑁄𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀼𑀩𑁆𑀩𑀺𑀤𑀽𑀢𑀺 𑀤𑀼𑀚𑁆𑀚𑀸𑀦𑁄. 𑀲𑀩𑁆𑀩𑀪𑀸𑀯𑁄𑀢𑀺 𑀅𑀚𑁆𑀛𑀸𑀲𑀬𑁄. 𑀘𑀺𑀭𑀧𑀭𑀺𑀘𑀺𑀡𑁆𑀡𑁄𑀧𑀺 𑀳𑀺 𑀅𑀕𑁆𑀕𑀺 𑀤𑀳𑀢𑀺, 𑀘𑀺𑀭𑀯𑀺𑀲𑁆𑀲𑀸𑀲𑀺𑀓𑁄𑀧𑀺 𑀓𑀼𑀜𑁆𑀚𑀭𑁄 𑀖𑀸𑀢𑁂𑀢𑀺, 𑀘𑀺𑀭𑀧𑀭𑀺𑀘𑀺𑀢𑁄𑀧𑀺 𑀲𑀧𑁆𑀧𑁄 𑀟𑀁𑀲𑀢𑀺, 𑀘𑀺𑀭𑀯𑀺𑀲𑁆𑀲𑀸𑀲𑀺𑀓𑁄𑀧𑀺 𑀭𑀸𑀚𑀸 𑀅𑀦𑀢𑁆𑀣𑀓𑀭𑁄 𑀳𑁄𑀢𑀺, 𑀏𑀯𑀁 𑀘𑀺𑀭𑀸𑀘𑀺𑀡𑁆𑀡𑀸𑀧𑀺 𑀇𑀢𑁆𑀣𑀺𑀬𑁄 𑀯𑀺𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀻𑀢𑀺.
𑀦𑀘𑁆𑀘𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀭𑀽𑀧𑀯𑀢𑀻. 𑀦 𑀩𑀳𑀽𑀦 𑀓𑀦𑁆𑀢𑀸𑀢𑀺 𑀅𑀟𑁆𑀠𑀓𑀸𑀲𑀺𑀕𑀡𑀺𑀓𑀸 𑀯𑀺𑀬 𑀩𑀳𑀽𑀦𑀁 𑀧𑀺𑀬𑀸 𑀫𑀦𑀸𑀧𑀸. 𑀦 𑀤𑀓𑁆𑀔𑀺𑀡𑀸𑀢𑀺 𑀦𑀘𑁆𑀘𑀕𑀻𑀢𑀓𑀼𑀲𑀮𑀸. 𑀢𑀣𑀸𑀭𑀽𑀧𑀸 𑀳𑀺 ¶ 𑀩𑀳𑀼𑀧𑀢𑁆𑀣𑀺𑀢𑀸 𑀩𑀳𑀼𑀫𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦 ¶ 𑀲𑁂𑀯𑀺𑀢𑀩𑁆𑀩𑀸. 𑀦 𑀥𑀦𑀲𑁆𑀲 𑀳𑁂𑀢𑀽𑀢𑀺 𑀬𑀸 𑀥𑀦𑀳𑁂𑀢𑀼𑀬𑁂𑀯 𑀪𑀚𑀢𑀺, 𑀲𑀸 𑀅𑀧𑀭𑀺𑀕𑁆𑀕𑀳𑀸𑀧𑀺 𑀦 𑀲𑁂𑀯𑀺𑀢𑀩𑁆𑀩𑀸. 𑀲𑀸 𑀳𑀺 𑀥𑀦𑀁 𑀅𑀮𑀪𑀫𑀸𑀦𑀸 𑀓𑀼𑀚𑁆𑀛𑀢𑀻𑀢𑀺.
𑀏𑀯𑀁 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀫𑀳𑀸𑀲𑀢𑁆𑀢𑀲𑁆𑀲 ‘‘𑀅𑀳𑁄 𑀲𑀼𑀓𑀣𑀺𑀢’’𑀦𑁆𑀢𑀺 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀲𑁄𑀧𑀺 𑀏𑀢𑁆𑀢𑀓𑁂𑀳𑀺 𑀓𑀸𑀭𑀡𑁂𑀳𑀺 𑀇𑀢𑁆𑀣𑀻𑀦𑀁 𑀅𑀕𑀼𑀡𑀁 𑀓𑀣𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀆𑀦𑀦𑁆𑀤𑁄 𑀕𑀺𑀚𑁆𑀛𑀭𑀸𑀚𑀸, ‘‘𑀲𑀫𑁆𑀫 𑀓𑀼𑀡𑀸𑀮, 𑀅𑀳𑀫𑁆𑀧𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀇𑀢𑁆𑀣𑀻𑀦𑀁 𑀅𑀕𑀼𑀡𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀕𑀼𑀡𑀓𑀣𑀁 𑀆𑀭𑀪𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀅𑀣 𑀔𑀮𑀼, 𑀪𑁄, 𑀆𑀦𑀦𑁆𑀤𑁄 𑀕𑀺𑀚𑁆𑀛𑀭𑀸𑀚𑀸 𑀓𑀼𑀡𑀸𑀮𑀲𑁆𑀲 𑀆𑀤𑀺𑀫𑀚𑁆𑀛𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀧𑀼𑀡𑁆𑀡𑀫𑁆𑀧𑀺 ¶ 𑀘𑁂𑀫𑀁 𑀧𑀣𑀯𑀺𑀁 𑀥𑀦𑁂𑀦, 𑀤𑀚𑁆𑀚𑀺𑀢𑁆𑀣𑀺𑀬𑀸 𑀧𑀼𑀭𑀺𑀲𑁄 𑀲𑀫𑁆𑀫𑀢𑀸𑀬;
𑀮𑀤𑁆𑀥𑀸 𑀔𑀡𑀁 𑀅𑀢𑀺𑀫𑀜𑁆𑀜𑁂𑀬𑁆𑀬 𑀢𑀫𑁆𑀧𑀺, 𑀢𑀸𑀲𑀁 𑀯𑀲𑀁 𑀅𑀲𑀢𑀻𑀦𑀁 𑀦 𑀕𑀘𑁆𑀙𑁂.
‘‘𑀉𑀝𑁆𑀞𑀸𑀳𑀓𑀁 𑀘𑁂𑀧𑀺 𑀅𑀮𑀻𑀦𑀯𑀼𑀢𑁆𑀢𑀺𑀁, 𑀓𑁄𑀫𑀸𑀭𑀪𑀢𑁆𑀢𑀸𑀭𑀁 𑀧𑀺𑀬𑀁 𑀫𑀦𑀸𑀧𑀁;
𑀆𑀯𑀸𑀲𑀼 𑀓𑀺𑀘𑁆𑀘𑁂𑀲𑀼 𑀘 𑀦𑀁 𑀚𑀳𑀦𑁆𑀢𑀺, 𑀢𑀲𑁆𑀫𑀸𑀳𑀫𑀺𑀢𑁆𑀣𑀻𑀦𑀁 𑀦 𑀯𑀺𑀲𑁆𑀲𑀲𑀸𑀫𑀺.
‘‘𑀦 𑀯𑀺𑀲𑁆𑀲𑀲𑁂 ‘𑀇𑀘𑁆𑀙𑀢𑀺 𑀫’𑀦𑁆𑀢𑀺 𑀧𑁄𑀲𑁄, 𑀦 𑀯𑀺𑀲𑁆𑀲𑀲𑁂 ‘𑀭𑁄𑀤𑀢𑀺 𑀫𑁂 𑀲𑀓𑀸𑀲𑁂’;
𑀲𑁂𑀯𑀦𑁆𑀢𑀺 𑀳𑁂𑀢𑀸 𑀧𑀺𑀬𑀫𑀧𑁆𑀧𑀺𑀬𑀜𑁆𑀘, 𑀦𑀸𑀯𑀸 𑀬𑀣𑀸 𑀑𑀭𑀓𑀽𑀮𑀁 𑀧𑀭𑀜𑁆𑀘.
‘‘𑀦 𑀯𑀺𑀲𑁆𑀲𑀲𑁂 𑀲𑀸𑀔𑀧𑀼𑀭𑀸𑀡𑀲𑀦𑁆𑀣𑀢𑀁, 𑀦 𑀯𑀺𑀲𑁆𑀲𑀲𑁂 𑀫𑀺𑀢𑁆𑀢𑀧𑀼𑀭𑀸𑀡𑀘𑁄𑀭𑀁;
𑀦 𑀯𑀺𑀲𑁆𑀲𑀲𑁂 𑀭𑀸𑀚𑀸𑀦𑀁 ‘𑀲𑀔𑀸 𑀫𑀫’𑀦𑁆𑀢𑀺, 𑀦 𑀯𑀺𑀲𑁆𑀲𑀲𑁂 𑀇𑀢𑁆𑀣𑀺 𑀤𑀲𑀦𑁆𑀦 𑀫𑀸𑀢𑀭𑀁.
‘‘𑀦 ¶ 𑀯𑀺𑀲𑁆𑀲𑀲𑁂 𑀭𑀸𑀫𑀓𑀭𑀸𑀲𑀼 𑀦𑀸𑀭𑀺𑀲𑀼, 𑀅𑀘𑁆𑀘𑀦𑁆𑀢𑀲𑀻𑀮𑀸𑀲𑀼 𑀅𑀲𑀜𑁆𑀜𑀢𑀸𑀲𑀼;
𑀅𑀘𑁆𑀘𑀦𑁆𑀢𑀧𑁂𑀫𑀸𑀦𑀼𑀕𑀢𑀲𑁆𑀲 𑀪𑀭𑀺𑀬𑀸, 𑀦 𑀯𑀺𑀲𑁆𑀲𑀲𑁂 𑀢𑀺𑀢𑁆𑀣𑀲𑀫𑀸 𑀳𑀺 𑀦𑀸𑀭𑀺𑀬𑁄.
‘‘𑀳𑀦𑁂𑀬𑁆𑀬𑀼𑀁 𑀙𑀺𑀦𑁆𑀤𑁂𑀬𑁆𑀬𑀼𑀁 𑀙𑁂𑀤𑀸𑀧𑁂𑀬𑁆𑀬𑀼𑀫𑁆𑀧𑀺, 𑀓𑀡𑁆𑀞𑁂𑀧𑀺 𑀙𑁂𑀢𑁆𑀯𑀸 𑀭𑀼𑀥𑀺𑀭𑀁 𑀧𑀺𑀯𑁂𑀬𑁆𑀬𑀼𑀁;
𑀫𑀸 𑀤𑀻𑀦𑀓𑀸𑀫𑀸𑀲𑀼 𑀅𑀲𑀜𑁆𑀜𑀢𑀸𑀲𑀼, 𑀪𑀸𑀯𑀁 𑀓𑀭𑁂 𑀕𑀗𑁆𑀕𑀢𑀺𑀢𑁆𑀣𑀽𑀧𑀫𑀸𑀲𑀼.
‘‘𑀫𑀼𑀲𑀸 ¶ 𑀢𑀸𑀲𑀁 𑀬𑀣𑀸 𑀲𑀘𑁆𑀘𑀁, 𑀲𑀘𑁆𑀘𑀁 𑀢𑀸𑀲𑀁 𑀬𑀣𑀸 𑀫𑀼𑀲𑀸;
𑀕𑀸𑀯𑁄 𑀩𑀳𑀺 𑀢𑀺𑀡𑀲𑁆𑀲𑁂𑀯, 𑀑𑀫𑀲𑀦𑁆𑀢𑀺 𑀯𑀭𑀁 𑀯𑀭𑀁.
‘‘𑀕𑀢𑁂𑀦𑁂𑀢𑀸 𑀧𑀮𑁄𑀪𑁂𑀦𑁆𑀢𑀺, 𑀧𑁂𑀓𑁆𑀔𑀺𑀢𑁂𑀦 𑀫𑁆𑀳𑀺𑀢𑁂𑀦 𑀘;
𑀅𑀣𑁄𑀧𑀺 𑀤𑀼𑀦𑁆𑀦𑀺𑀯𑀢𑁆𑀣𑁂𑀦, 𑀫𑀜𑁆𑀚𑀼𑀦𑀸 𑀪𑀡𑀺𑀢𑁂𑀦 𑀘.
‘‘𑀘𑁄𑀭𑀺𑀬𑁄 𑀓𑀣𑀺𑀦𑀸 𑀳𑁂𑀢𑀸, 𑀯𑀸𑀴𑀸 𑀘 𑀮𑀧𑀲𑀓𑁆𑀔𑀭𑀸;
𑀦 𑀢𑀸 𑀓𑀺𑀜𑁆𑀘𑀺 𑀦 𑀚𑀸𑀦𑀦𑁆𑀢𑀺, 𑀬𑀁 𑀫𑀦𑀼𑀲𑁆𑀲𑁂𑀲𑀼 𑀯𑀜𑁆𑀘𑀦𑀁.
‘‘𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺;
𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀪𑀸 𑀘, 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸.
‘‘𑀦𑀢𑁆𑀣𑀺𑀢𑁆𑀣𑀻𑀦𑀁 𑀧𑀺𑀬𑁄 𑀦𑀸𑀫, 𑀅𑀧𑁆𑀧𑀺𑀬𑁄𑀧𑀺 𑀦 𑀯𑀺𑀚𑁆𑀚𑀢𑀺;
𑀲𑁂𑀯𑀦𑁆𑀢𑀺 𑀳𑁂𑀢𑀸 𑀧𑀺𑀬𑀫𑀧𑁆𑀧𑀺𑀬𑀜𑁆𑀘, 𑀦𑀸𑀯𑀸 𑀬𑀣𑀸 𑀑𑀭𑀓𑀽𑀮𑀁 𑀧𑀭𑀜𑁆𑀘.
‘‘𑀦𑀢𑁆𑀣𑀺𑀢𑁆𑀣𑀻𑀦𑀁 ¶ 𑀧𑀺𑀬𑁄 𑀦𑀸𑀫, 𑀅𑀧𑁆𑀧𑀺𑀬𑁄𑀧𑀺 𑀦 𑀯𑀺𑀚𑁆𑀚𑀢𑀺;
𑀥𑀦𑀢𑁆𑀢𑀸 𑀧𑀝𑀺𑀯𑀮𑁆𑀮𑀦𑁆𑀢𑀺, 𑀮𑀢𑀸𑀯 𑀤𑀼𑀫𑀦𑀺𑀲𑁆𑀲𑀺𑀢𑀸.
‘‘𑀳𑀢𑁆𑀣𑀺𑀩𑀦𑁆𑀥𑀁 𑀅𑀲𑁆𑀲𑀩𑀦𑁆𑀥𑀁, 𑀕𑁄𑀧𑀼𑀭𑀺𑀲𑀜𑁆𑀘 𑀫𑀡𑁆𑀟𑀮𑀁;
𑀙𑀯𑀟𑀸𑀳𑀓𑀁 𑀧𑀼𑀧𑁆𑀨𑀙𑀟𑁆𑀟𑀓𑀁, 𑀲𑀥𑀦𑀫𑀦𑀼𑀧𑀢𑀦𑁆𑀢𑀺 𑀦𑀸𑀭𑀺𑀬𑁄.
‘‘𑀓𑀼𑀮𑀧𑀼𑀢𑁆𑀢𑀫𑁆𑀧𑀺 𑀚𑀳𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀙𑀯𑀓𑀲𑀫𑀲𑀤𑀺𑀲𑀫𑁆𑀧𑀺;
𑀅𑀦𑀼𑀕𑀘𑁆𑀙𑀦𑁆𑀢𑀺 𑀅𑀦𑀼𑀧𑀢𑀦𑁆𑀢𑀺, 𑀥𑀦𑀳𑁂𑀢𑀼 𑀳𑀺 𑀦𑀸𑀭𑀺𑀬𑁄’’𑀢𑀺.
𑀢𑀢𑁆𑀣 ¶ 𑀆𑀤𑀺𑀫𑀚𑁆𑀛𑀓𑀣𑀸𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀓𑀣𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁. 𑀮𑀤𑁆𑀥𑀸 𑀔𑀡𑀦𑁆𑀢𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸. 𑀇𑀘𑁆𑀙𑀢𑀺 𑀫𑀦𑁆𑀢𑀺 𑀫𑀁 𑀏𑀲𑀸 𑀇𑀘𑁆𑀙𑀢𑀻𑀢𑀺 𑀧𑀼𑀭𑀺𑀲𑁄 𑀇𑀢𑁆𑀣𑀺𑀁 𑀦 𑀯𑀺𑀲𑁆𑀲𑀲𑁂𑀬𑁆𑀬. 𑀲𑀸𑀔𑀧𑀼𑀭𑀸𑀡𑀲𑀦𑁆𑀣𑀢𑀦𑁆𑀢𑀺 𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀲𑀦𑁆𑀣𑀢𑀁 𑀧𑀼𑀭𑀸𑀡𑀲𑀸𑀔𑀸𑀲𑀦𑁆𑀣𑀢𑀁 𑀦 𑀯𑀺𑀲𑁆𑀲𑀲𑁂, 𑀅𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑁂𑀬𑁆𑀬. 𑀢𑀢𑁆𑀭 𑀳𑀺 𑀤𑀻𑀖𑀚𑀸𑀢𑀺𑀓𑁄 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬𑁂, 𑀧𑀘𑁆𑀘𑀸𑀫𑀺𑀢𑁆𑀢𑁄 𑀯𑀸 𑀲𑀢𑁆𑀣𑀁 𑀦𑀺𑀓𑁆𑀔𑀺𑀧𑁂𑀬𑁆𑀬. 𑀫𑀺𑀢𑁆𑀢𑀧𑀼𑀭𑀸𑀡𑀘𑁄𑀭𑀦𑁆𑀢𑀺 𑀧𑀦𑁆𑀣𑀤𑀽𑀳𑀦𑀝𑁆𑀞𑀸𑀦𑁂 𑀞𑀺𑀢𑀁 𑀘𑁄𑀭𑀁 ‘‘𑀧𑀼𑀭𑀸𑀡𑀫𑀺𑀢𑁆𑀢𑁄 𑀫𑁂’’𑀢𑀺 𑀦 𑀯𑀺𑀲𑁆𑀲𑀲𑁂𑀬𑁆𑀬. 𑀘𑁄𑀭𑀸 𑀳𑀺 𑀬𑁂 𑀲𑀜𑁆𑀚𑀸𑀦𑀦𑁆𑀢𑀺 𑀢𑁂𑀬𑁂𑀯 𑀫𑀸𑀭𑁂𑀦𑁆𑀢𑀺. 𑀲𑀔𑀸 𑀫𑀫𑀦𑁆𑀢𑀺 𑀲𑁄 𑀳𑀺 𑀔𑀺𑀧𑁆𑀧𑀫𑁂𑀯 ¶ 𑀓𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀭𑀸𑀚𑀸𑀦𑀁 ‘‘𑀲𑀔𑀸 𑀫𑁂’’𑀢𑀺 𑀦 𑀯𑀺𑀲𑁆𑀲𑀲𑁂. 𑀤𑀲𑀦𑁆𑀦𑀫𑀸𑀢𑀭𑀦𑁆𑀢𑀺 ‘‘𑀅𑀬𑀁 𑀫𑀳𑀮𑁆𑀮𑀺𑀓𑀸 𑀇𑀤𑀸𑀦𑀺 𑀫𑀁 𑀦 𑀅𑀢𑀺𑀘𑀭𑀺𑀲𑁆𑀲𑀢𑀺, 𑀅𑀢𑁆𑀢𑀸𑀦𑀁 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀦 𑀯𑀺𑀲𑁆𑀲𑀲𑁂𑀢𑀩𑁆𑀩𑀸. 𑀭𑀸𑀫𑀓𑀭𑀸𑀲𑀽𑀢𑀺 𑀩𑀸𑀮𑀸𑀦𑀁 𑀭𑀢𑀺𑀓𑀭𑀸𑀲𑀼. 𑀅𑀘𑁆𑀘𑀦𑁆𑀢𑀲𑀻𑀮𑀸𑀲𑀽𑀢𑀺 𑀅𑀢𑀺𑀓𑁆𑀓𑀦𑁆𑀢𑀲𑀻𑀮𑀸𑀲𑀼. 𑀅𑀘𑁆𑀘𑀦𑁆𑀢𑀧𑁂𑀫𑀸𑀦𑀼𑀕𑀢𑀲𑁆𑀲𑀸𑀢𑀺 𑀲𑀘𑁂𑀧𑀺 𑀅𑀘𑁆𑀘𑀦𑁆𑀢𑀁 𑀅𑀦𑀼𑀕𑀢𑀧𑁂𑀫𑀸 𑀅𑀲𑁆𑀲, 𑀢𑀣𑀸𑀧𑀺 𑀢𑀁 𑀦 𑀯𑀺𑀲𑁆𑀲𑀲𑁂. 𑀓𑀺𑀁𑀓𑀸𑀭𑀡𑀸? 𑀢𑀺𑀢𑁆𑀣𑀲𑀫𑀸 𑀳𑀺 𑀦𑀸𑀭𑀺𑀬𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀺𑀢𑁆𑀣𑀁 𑀯𑀺𑀬 𑀲𑀩𑁆𑀩𑀲𑀸𑀥𑀸𑀭𑀡𑀸𑀢𑀺 𑀅𑀢𑁆𑀣𑁄.
𑀳𑀦𑁂𑀬𑁆𑀬𑀼𑀦𑁆𑀢𑀺 𑀓𑀼𑀤𑁆𑀥𑀸 𑀯𑀸 𑀅𑀜𑁆𑀜𑀧𑀼𑀭𑀺𑀲𑀲𑀸𑀭𑀢𑁆𑀢𑀸 𑀯𑀸 𑀳𑀼𑀢𑁆𑀯𑀸 𑀲𑀩𑁆𑀩𑀫𑁂𑀢𑀁 𑀳𑀦𑀦𑀸𑀤𑀺𑀁 𑀓𑀭𑁂𑀬𑁆𑀬𑀼𑀁. 𑀫𑀸 𑀤𑀻𑀦𑀓𑀸𑀫𑀸𑀲𑀽𑀢𑀺 𑀳𑀻𑀦𑀚𑁆𑀛𑀸𑀲𑀬𑀸𑀲𑀼 𑀲𑀁𑀓𑀺𑀮𑀺𑀝𑁆𑀞𑀆𑀲𑀬𑀸𑀲𑀼. 𑀪𑀸𑀯𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀲𑀺𑀦𑁂𑀳𑀁 𑀫𑀸 𑀓𑀭𑁂. 𑀕𑀗𑁆𑀕𑀢𑀺𑀢𑁆𑀣𑀽𑀧𑀫𑀸𑀲𑀽𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑁂𑀦 𑀕𑀗𑁆𑀕𑀸𑀢𑀺𑀢𑁆𑀣𑀲𑀤𑀺𑀲𑀸𑀲𑀼. 𑀫𑀼𑀲𑀸𑀢𑀺 𑀫𑀼𑀲𑀸𑀯𑀸𑀤𑁄 𑀢𑀸𑀲𑀁 𑀲𑀘𑁆𑀘𑀲𑀤𑀺𑀲𑁄𑀯. 𑀕𑀢𑁂𑀦𑀸𑀢𑀺𑀆𑀤𑀻𑀲𑀼 𑀧𑁂𑀓𑁆𑀔𑀺𑀢𑁂𑀦 𑀧𑀮𑁄𑀪𑀦𑁂 𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑀁, (𑀚𑀸. 𑁨.𑁧𑁮.𑁫𑁭 𑀆𑀤𑀬𑁄) 𑀤𑀼𑀦𑁆𑀦𑀺𑀯𑀢𑁆𑀣𑁂𑀦 𑀦𑀺𑀴𑀺𑀦𑀺𑀓𑀸𑀚𑀸𑀢𑀓𑀁, (𑀚𑀸. 𑁨.𑁧𑁮.𑁧 𑀆𑀤𑀬𑁄) 𑀫𑀜𑁆𑀚𑀼𑀦𑀸 𑀪𑀡𑀺𑀢𑁂𑀦 ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 (𑀉𑀤𑀸. 𑁨𑁨) 𑀓𑀣𑁂𑀢𑀩𑁆𑀩𑀁. 𑀘𑁄𑀭𑀺𑀬𑁄𑀢𑀺 𑀲𑀫𑁆𑀪𑀢𑀲𑁆𑀲 𑀥𑀦𑀲𑁆𑀲 𑀯𑀺𑀦𑀸𑀲𑀦𑁂𑀦 𑀘𑁄𑀭𑀺𑀬𑁄. 𑀓𑀣𑀺𑀦𑀸𑀢𑀺 𑀣𑀤𑁆𑀥𑀳𑀤𑀬𑀸. 𑀯𑀸𑀴𑀸𑀢𑀺 𑀤𑀼𑀝𑁆𑀞𑀸 𑀅𑀧𑁆𑀧𑀓𑁂𑀦𑁂𑀯 𑀓𑀼𑀚𑁆𑀛𑀦𑀲𑀻𑀮𑀸. 𑀮𑀧𑀲𑀓𑁆𑀔𑀭𑀸𑀢𑀺 𑀦𑀺𑀭𑀢𑁆𑀣𑀓𑀮𑀧𑀦𑁂𑀦 𑀲𑀓𑁆𑀔𑀭𑀸 𑀯𑀺𑀬 𑀫𑀥𑀼𑀭𑀸. 𑀅𑀲𑀸𑀢𑀺 𑀅𑀲𑀢𑀺𑀬𑁄 𑀮𑀸𑀫𑀓𑀸. 𑀲𑀸𑀭𑀢𑁆𑀢𑀸𑀢𑀺 𑀲𑀩𑁆𑀩𑀤𑀸 𑀲𑀸𑀭𑀢𑁆𑀢𑀸. 𑀧𑀕𑀩𑁆𑀪𑀸𑀢𑀺 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀳𑀺 𑀧𑀕𑀩𑁆𑀪𑀸. 𑀬𑀣𑀸𑀢𑀺 𑀬𑀣𑀸 𑀲𑀺𑀔𑀻 𑀲𑀩𑁆𑀩𑀖𑀲𑁄, 𑀏𑀯𑀫𑁂𑀢𑀸𑀧𑀺 𑀲𑀩𑁆𑀩𑀖𑀲𑀸. 𑀧𑀝𑀺𑀯𑀮𑁆𑀮𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀚𑀦𑁆𑀢𑀺 𑀉𑀧𑀕𑀽𑀳𑀦𑁆𑀢𑀺 𑀯𑁂𑀞𑁂𑀦𑁆𑀢𑀺. 𑀮𑀢𑀸𑀯𑀸𑀢𑀺 𑀬𑀣𑀸 𑀮𑀢𑀸 𑀭𑀼𑀓𑁆𑀔𑀦𑀺𑀲𑁆𑀲𑀺𑀢𑀸 𑀭𑀼𑀓𑁆𑀔𑀁 𑀯𑁂𑀞𑁂𑀦𑁆𑀢𑀺, 𑀏𑀯𑀫𑁂𑀢𑀸 𑀧𑀼𑀭𑀺𑀲𑀁 𑀧𑀭𑀺𑀲𑁆𑀲𑀚𑀦𑁆𑀢𑀺 𑀦𑀸𑀫.
𑀳𑀢𑁆𑀣𑀺𑀩𑀦𑁆𑀥𑀦𑁆𑀢𑀺𑀆𑀤𑀻𑀲𑀼 ¶ 𑀕𑁄𑀧𑀼𑀭𑀺𑀲𑁄 𑀯𑀼𑀘𑁆𑀘𑀢𑀺 𑀕𑁄𑀧𑀸𑀮𑀓𑁄. 𑀙𑀯𑀟𑀸𑀳𑀓𑀦𑁆𑀢𑀺 𑀙𑀯𑀸𑀦𑀁 𑀟𑀸𑀳𑀓𑀁, 𑀲𑀼𑀲𑀸𑀦𑀧𑀸𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀧𑁆𑀨𑀙𑀟𑁆𑀟𑀓𑀦𑁆𑀢𑀺 𑀯𑀘𑁆𑀘𑀝𑁆𑀞𑀸𑀦𑀲𑁄𑀥𑀓𑀁. 𑀲𑀥𑀦𑀦𑁆𑀢𑀺 𑀏𑀢𑁂𑀲𑀼𑀧𑀺 𑀲𑀥𑀦𑀁 𑀅𑀦𑀼𑀕𑀘𑁆𑀙𑀦𑁆𑀢𑀺𑀬𑁂𑀯 ¶ . 𑀅𑀓𑀺𑀜𑁆𑀘𑀦𑀦𑁆𑀢𑀺 𑀅𑀥𑀦𑀁. 𑀙𑀯𑀓𑀲𑀫𑀲𑀤𑀺𑀲𑀦𑁆𑀢𑀺 𑀲𑀼𑀦𑀔𑀫𑀁𑀲𑀔𑀸𑀤𑀘𑀡𑁆𑀟𑀸𑀮𑁂𑀦 𑀲𑀫𑀁 𑀲𑀤𑀺𑀲𑀁, 𑀢𑁂𑀦 𑀦𑀺𑀩𑁆𑀩𑀺𑀲𑁂𑀲𑀫𑁆𑀧𑀺 𑀧𑀼𑀭𑀺𑀲𑀁 𑀕𑀘𑁆𑀙𑀦𑁆𑀢𑀺 𑀪𑀚𑀦𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀦𑀼𑀧𑀢𑀦𑁆𑀢𑀺 𑀥𑀦𑀳𑁂𑀢𑀼 𑀦𑀸𑀭𑀺𑀬𑁄𑀢𑀺.
𑀏𑀯𑀁 𑀅𑀢𑁆𑀢𑀦𑁄 𑀜𑀸𑀡𑁂 𑀞𑀢𑁆𑀯𑀸 𑀆𑀦𑀦𑁆𑀤𑁄 𑀕𑀺𑀚𑁆𑀛𑀭𑀸𑀚𑀸 𑀇𑀢𑁆𑀣𑀻𑀦𑀁 𑀅𑀕𑀼𑀡𑀁 𑀓𑀣𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀸𑀭𑀤𑁄𑀧𑀺 𑀅𑀢𑁆𑀢𑀦𑁄 𑀜𑀸𑀡𑁂 𑀞𑀢𑁆𑀯𑀸 𑀢𑀸𑀲𑀁 𑀅𑀕𑀼𑀡𑀁 𑀓𑀣𑁂𑀲𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀅𑀣 𑀔𑀮𑀼, 𑀪𑁄, 𑀦𑀸𑀭𑀤𑁄 𑀤𑁂𑀯𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑀲𑁆𑀲 𑀕𑀺𑀚𑁆𑀛𑀭𑀸𑀚𑀲𑁆𑀲 𑀆𑀤𑀺𑀫𑀚𑁆𑀛𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋
‘‘‘𑀘𑀢𑁆𑀢𑀸𑀭𑁄𑀫𑁂 ¶ 𑀦 𑀧𑀽𑀭𑁂𑀦𑁆𑀢𑀺, 𑀢𑁂 𑀫𑁂 𑀲𑀼𑀡𑀸𑀣 𑀪𑀸𑀲𑀢𑁄;
𑀲𑀫𑀼𑀤𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀸, 𑀇𑀢𑁆𑀣𑀻 𑀘𑀸𑀧𑀺 𑀤𑀺𑀚𑀫𑁆𑀧𑀢𑀺.
‘‘𑀲𑀭𑀺𑀢𑀸 𑀲𑀸𑀕𑀭𑀁 𑀬𑀦𑁆𑀢𑀺, 𑀬𑀸 𑀓𑀸𑀘𑀺 𑀧𑀣𑀯𑀺𑀲𑁆𑀲𑀺𑀢𑀸;
𑀢𑀸 𑀲𑀫𑀼𑀤𑁆𑀤𑀁 𑀦 𑀧𑀽𑀭𑁂𑀦𑁆𑀢𑀺, 𑀊𑀦𑀢𑁆𑀢𑀸 𑀳𑀺 𑀦 𑀧𑀽𑀭𑀢𑀺.
‘‘𑀩𑁆𑀭𑀸𑀳𑁆𑀫𑀡𑁄 𑀘 𑀅𑀥𑀻𑀬𑀸𑀦, 𑀯𑁂𑀤𑀫𑀓𑁆𑀔𑀸𑀦𑀧𑀜𑁆𑀘𑀫𑀁;
𑀪𑀺𑀬𑁆𑀬𑁄𑀧𑀺 𑀲𑀼𑀢𑀫𑀺𑀘𑁆𑀙𑁂𑀬𑁆𑀬, 𑀊𑀦𑀢𑁆𑀢𑀸 𑀳𑀺 𑀦 𑀧𑀽𑀭𑀢𑀺.
‘‘𑀭𑀸𑀚𑀸 𑀘 𑀧𑀣𑀯𑀺𑀁 𑀲𑀩𑁆𑀩𑀁, 𑀲𑀲𑀫𑀼𑀤𑁆𑀤𑀁 𑀲𑀧𑀩𑁆𑀩𑀢𑀁;
𑀅𑀚𑁆𑀛𑀸𑀯𑀲𑀁 𑀯𑀺𑀚𑀺𑀦𑀺𑀢𑁆𑀯𑀸, 𑀅𑀦𑀦𑁆𑀢𑀭𑀢𑀦𑁄𑀘𑀺𑀢𑀁;
𑀧𑀸𑀭𑀁 𑀲𑀫𑀼𑀤𑁆𑀤𑀁 𑀧𑀢𑁆𑀣𑁂𑀢𑀺 𑀊𑀦𑀢𑁆𑀢𑀸 𑀳𑀺 𑀦 𑀧𑀽𑀭𑀢𑀺.
‘‘𑀏𑀓𑀫𑁂𑀓𑀸𑀬 𑀇𑀢𑁆𑀣𑀺𑀬𑀸, 𑀅𑀝𑁆𑀞𑀝𑁆𑀞 𑀧𑀢𑀺𑀦𑁄 𑀲𑀺𑀬𑀸;
𑀲𑀽𑀭𑀸 𑀘 𑀩𑀮𑀯𑀦𑁆𑀢𑁄 𑀘, 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑀸;
𑀓𑀭𑁂𑀬𑁆𑀬 𑀦𑀯𑀫𑁂 𑀙𑀦𑁆𑀤𑀁, 𑀊𑀦𑀢𑁆𑀢𑀸 𑀳𑀺 𑀦 𑀧𑀽𑀭𑀢𑀺.
‘‘𑀲𑀩𑁆𑀩𑀺𑀢𑁆𑀣𑀺𑀬𑁄 𑀲𑀺𑀔𑀻𑀭𑀺𑀯 𑀲𑀩𑁆𑀩𑀪𑀓𑁆𑀔𑀸, 𑀲𑀩𑁆𑀩𑀺𑀢𑁆𑀣𑀺𑀬𑁄 𑀦𑀤𑀻𑀭𑀺𑀯 𑀲𑀩𑁆𑀩𑀯𑀸𑀳𑀻;
𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀡𑁆𑀝𑀓𑀸𑀦𑀁𑀯 𑀲𑀸𑀔𑀸, 𑀲𑀩𑁆𑀩𑀺𑀢𑁆𑀣𑀺𑀬𑁄 𑀥𑀦𑀳𑁂𑀢𑀼 𑀯𑀚𑀦𑁆𑀢𑀺.
‘‘𑀯𑀸𑀢𑀜𑁆𑀘 ¶ 𑀚𑀸𑀮𑁂𑀦 𑀦𑀭𑁄 𑀧𑀭𑀸𑀫𑀲𑁂, 𑀑𑀲𑀺𑀜𑁆𑀘𑀬𑁂 𑀲𑀸𑀕𑀭𑀫𑁂𑀓𑀧𑀸𑀡𑀺𑀦𑀸;
𑀲𑀓𑁂𑀦 𑀳𑀢𑁆𑀣𑁂𑀦 𑀓𑀭𑁂𑀬𑁆𑀬 𑀖𑁄𑀲𑀁, 𑀬𑁄 𑀲𑀩𑁆𑀩𑀪𑀸𑀯𑀁 𑀧𑀫𑀤𑀸𑀲𑀼 𑀑𑀲𑁆𑀲𑀚𑁂.
‘‘𑀘𑁄𑀭𑀻𑀦𑀁 𑀩𑀳𑀼𑀩𑀼𑀤𑁆𑀥𑀻𑀦𑀁, 𑀬𑀸𑀲𑀼 𑀲𑀘𑁆𑀘𑀁 𑀲𑀼𑀤𑀼𑀮𑁆𑀮𑀪𑀁;
𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄, 𑀫𑀘𑁆𑀙𑀲𑁆𑀲𑁂𑀯𑁄𑀤𑀓𑁂 𑀕𑀢𑀁.
‘‘𑀅𑀦𑀮𑀸 ¶ 𑀫𑀼𑀤𑀼𑀲𑀫𑁆𑀪𑀸𑀲𑀸, 𑀤𑀼𑀧𑁆𑀧𑀽𑀭𑀸 𑀢𑀸 𑀦𑀤𑀻𑀲𑀫𑀸;
𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.
‘‘𑀆𑀯𑀝𑁆𑀝𑀦𑀻 ¶ 𑀫𑀳𑀸𑀫𑀸𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑀸;
𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.
‘‘𑀬𑀁 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸;
𑀚𑀸𑀢𑀯𑁂𑀤𑁄𑀯 𑀲𑀁𑀞𑀸𑀦𑀁, 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀦’’’𑀦𑁆𑀢𑀺.
𑀢𑀢𑁆𑀣 𑀤𑀺𑀚𑀫𑁆𑀧𑀢𑀻𑀢𑀺 𑀤𑀺𑀚𑀚𑁂𑀝𑁆𑀞𑀓𑀁 𑀓𑀼𑀡𑀸𑀮𑀁 𑀆𑀮𑀧𑀢𑀺. ‘‘𑀲𑀭𑀺𑀢𑀸’’𑀢𑀺𑀆𑀤𑀺 𑀞𑀧𑀺𑀢𑀫𑀸𑀢𑀺𑀓𑀸𑀬 𑀪𑀸𑀚𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀊𑀦𑀢𑁆𑀢𑀸𑀢𑀺 𑀉𑀤𑀓𑀧𑀢𑀺𑀝𑁆𑀞𑀸𑀦𑀲𑁆𑀲 𑀫𑀳𑀦𑁆𑀢𑀢𑀸𑀬 𑀊𑀦𑀸 𑀏𑀯. 𑀅𑀥𑀻𑀬𑀸𑀦𑀸𑀢𑀺 𑀲𑀚𑁆𑀛𑀸𑀬𑀺𑀢𑁆𑀯𑀸. 𑀯𑁂𑀤𑀫𑀓𑁆𑀔𑀸𑀦𑀧𑀜𑁆𑀘𑀫𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀁 𑀯𑁂𑀤𑀘𑀢𑀼𑀓𑁆𑀓𑀁. 𑀊𑀦𑀢𑁆𑀢𑀸𑀢𑀺 𑀲𑁄 𑀳𑀺 𑀅𑀚𑁆𑀛𑀸𑀲𑀬𑀫𑀳𑀦𑁆𑀢𑀢𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀲𑁆𑀲 𑀦 𑀧𑀽𑀭𑀢𑀺. 𑀅𑀦𑀦𑁆𑀢𑀭𑀢𑀦𑁄𑀘𑀺𑀢𑀦𑁆𑀢𑀺 𑀦𑀸𑀦𑀸𑀭𑀢𑀦𑁂𑀳𑀺 𑀑𑀘𑀺𑀢𑀁 𑀧𑀭𑀺𑀧𑀼𑀡𑁆𑀡𑀁. 𑀊𑀦𑀢𑁆𑀢𑀸𑀢𑀺 𑀲𑁄 𑀳𑀺 𑀢𑀡𑁆𑀳𑀸𑀫𑀳𑀦𑁆𑀢𑀢𑀸𑀬 𑀦 𑀧𑀽𑀭𑀢𑀺. 𑀲𑀺𑀬𑀸𑀢𑀺 𑀲𑀺𑀬𑀼𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑀸𑀢𑀺 𑀲𑀩𑁆𑀩𑁂𑀲𑀁 𑀓𑀸𑀫𑀭𑀲𑀸𑀦𑀁 𑀆𑀳𑀭𑀓𑀸. ‘‘𑀦𑀯𑀫𑁂’’𑀢𑀺 𑀅𑀝𑁆𑀞𑀳𑀺 𑀅𑀢𑀺𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀸 𑀧𑀦 𑀤𑀲𑀫𑁂𑀧𑀺 𑀯𑀻𑀲𑀢𑀺𑀫𑁂𑀧𑀺 𑀢𑀢𑁄 𑀉𑀢𑁆𑀢𑀭𑀺𑀢𑀭𑁂𑀧𑀺 𑀙𑀦𑁆𑀤𑀁 𑀓𑀭𑁄𑀢𑁂𑀯. 𑀊𑀦𑀢𑁆𑀢𑀸𑀢𑀺 𑀲𑀸 𑀳𑀺 𑀓𑀸𑀫𑀢𑀡𑁆𑀳𑀸𑀬 𑀫𑀳𑀦𑁆𑀢𑀢𑀸𑀬 𑀦 𑀧𑀽𑀭𑀢𑀺. 𑀓𑀡𑁆𑀟𑀓𑀸𑀦𑀁𑀯 𑀲𑀸𑀔𑀸𑀢𑀺 𑀲𑀫𑁆𑀩𑀸𑀥𑀫𑀕𑁆𑀕𑁂 𑀓𑀡𑁆𑀝𑀓𑀲𑀸𑀔𑀲𑀤𑀺𑀲𑀸. 𑀬𑀣𑀸 𑀳𑀺 𑀲𑀸𑀔𑀸 𑀮𑀕𑁆𑀕𑀺𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀏𑀯𑀁 𑀏𑀢𑀸𑀧𑀺 𑀭𑀽𑀧𑀸𑀤𑀻𑀳𑀺 𑀓𑀟𑁆𑀠𑀦𑁆𑀢𑀺. 𑀬𑀣𑀸 𑀲𑀸𑀔𑀸 𑀳𑀢𑁆𑀣𑀸𑀤𑀻𑀲𑀼 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀏𑀢𑀸𑀧𑀺 𑀨𑀼𑀝𑁆𑀞𑀫𑀢𑁆𑀢𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺. 𑀯𑀚𑀦𑁆𑀢𑀻𑀢𑀺 𑀧𑀭𑀧𑀼𑀭𑀺𑀲𑀁 𑀯𑀚𑀦𑁆𑀢𑀺.
𑀧𑀭𑀸𑀫𑀲𑁂𑀢𑀺 𑀕𑀡𑁆𑀳𑁂𑀬𑁆𑀬. 𑀑𑀲𑀺𑀜𑁆𑀘𑀬𑁂𑀢𑀺 𑀦𑁆𑀳𑀸𑀬𑀺𑀢𑀼𑀁 𑀑𑀢𑀺𑀡𑁆𑀡𑁄 𑀏𑀓𑁂𑀦 𑀧𑀸𑀡𑀺𑀦𑀸 𑀲𑀓𑀮𑀲𑀫𑀼𑀤𑁆𑀤𑀉𑀤𑀓𑀁 𑀑𑀲𑀺𑀜𑁆𑀘𑁂𑀬𑁆𑀬 𑀕𑀳𑁂𑀢𑁆𑀯𑀸 𑀙𑀟𑁆𑀟𑁂𑀬𑁆𑀬. 𑀲𑀓𑁂𑀦𑀸𑀢𑀺 𑀏𑀓𑁂𑀦 ¶ 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀢𑀫𑁂𑀯 𑀳𑀢𑁆𑀣𑀁 𑀳𑀭𑀺𑀢𑁆𑀯𑀸 𑀖𑁄𑀲𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀲𑀩𑁆𑀩𑀪𑀸𑀯𑀦𑁆𑀢𑀺 ‘‘𑀢𑁆𑀯𑀫𑁂𑀯 𑀇𑀝𑁆𑀞𑁄 𑀓𑀦𑁆𑀢𑁄 𑀧𑀺𑀬𑁄 𑀫𑀦𑀸𑀧𑁄’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀬𑁄 𑀧𑀼𑀭𑀺𑀲𑁄 ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀤𑁆𑀤𑀳𑀦𑁆𑀢𑁄 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀫𑀤𑀸𑀲𑀼 𑀑𑀲𑁆𑀲𑀚𑁂𑀬𑁆𑀬, 𑀲𑁄 𑀚𑀸𑀮𑀸𑀤𑀻𑀳𑀺 𑀯𑀸𑀢𑀕𑁆𑀕𑀳𑀡𑀸𑀤𑀻𑀦𑀺 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀕𑀢𑀦𑁆𑀢𑀺 𑀕𑀫𑀦𑀁. 𑀅𑀦𑀮𑀸𑀢𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀅𑀮𑀦𑁆𑀢𑀺 𑀯𑀘𑀦𑀯𑀺𑀭𑀳𑀺𑀢𑀸. 𑀤𑀼𑀧𑁆𑀧𑀼𑀭𑀸 𑀢𑀸𑀢𑀺 𑀬𑀣𑀸 𑀫𑀳𑀸𑀦𑀤𑀻 𑀉𑀤𑀓𑁂𑀦, 𑀏𑀯𑀁 𑀓𑀺𑀮𑁂𑀲𑀭𑀢𑀺𑀬𑀸 𑀢𑀸 𑀤𑀼𑀧𑁆𑀧𑀽𑀭𑀸. 𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀢𑁆𑀣𑀺𑀬𑁄 𑀅𑀮𑁆𑀮𑀻𑀦𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀻𑀤𑀦𑁆𑀢𑀻𑀢𑀺 𑀯𑀺𑀤𑀺𑀢𑁆𑀯𑀸. 𑀆𑀯𑀝𑁆𑀝𑀦𑀻𑀢𑀺 𑀬𑀣𑀸 𑀆𑀯𑀝𑁆𑀝𑀦𑀻 𑀫𑀳𑀸𑀚𑀦𑀲𑁆𑀲 𑀳𑀤𑀬𑀁 𑀫𑁄𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺, 𑀏𑀯𑀫𑁂𑀢𑀸𑀧𑀻𑀢𑀺 𑀅𑀢𑁆𑀣𑁄. 𑀯𑀺𑀓𑁄𑀧𑀦𑀸𑀢𑀺 𑀦𑀸𑀲𑀦𑀢𑁆𑀣𑁂𑀦 𑀘 𑀕𑀭𑀳𑀢𑁆𑀣𑁂𑀦 𑀘 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁄𑀧𑀺𑀓𑀸. 𑀙𑀦𑁆𑀤𑀲𑀸 𑀯𑀸𑀢𑀺 𑀧𑀺𑀬𑀲𑀁𑀯𑀸𑀲𑁂𑀦 𑀯𑀸. 𑀥𑀦𑁂𑀦 𑀯𑀸𑀢𑀺 𑀥𑀦𑀳𑁂𑀢𑀼 𑀯𑀸. 𑀲𑀁𑀞𑀸𑀦𑀦𑁆𑀢𑀺 𑀬𑀣𑀸 𑀚𑀸𑀢𑀯𑁂𑀤𑁄 𑀅𑀢𑁆𑀢𑀦𑁄 𑀞𑀸𑀦𑀁 𑀬𑀁 𑀬𑀁 𑀧𑀤𑁂𑀲𑀁 𑀅𑀮𑁆𑀮𑀻𑀬𑀢𑀺, 𑀢𑀁 𑀢𑀁 𑀤𑀳𑀢𑀺, 𑀢𑀣𑀸 𑀏𑀢𑀸𑀧𑀺 𑀬𑀁 𑀬𑀁 𑀧𑀼𑀭𑀺𑀲𑀁 𑀓𑀺𑀮𑁂𑀲𑀯𑀲𑁂𑀦 𑀅𑀮𑁆𑀮𑀻𑀬𑀦𑁆𑀢𑀺, 𑀢𑀁 𑀢𑀁 𑀅𑀦𑀼𑀤𑀳𑀦𑁆𑀢𑀺 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀺.
𑀏𑀯𑀁 ¶ 𑀦𑀸𑀭𑀤𑁂𑀦 𑀇𑀢𑁆𑀣𑀻𑀦𑀁 𑀅𑀕𑀼𑀡𑁂 𑀧𑀓𑀸𑀲𑀺𑀢𑁂 𑀧𑀼𑀦 𑀫𑀳𑀸𑀲𑀢𑁆𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀢𑀸𑀲𑀁 𑀅𑀕𑀼𑀡𑀁 𑀧𑀓𑀸𑀲𑁂𑀢𑀺. 𑀢𑀁 ¶ 𑀤𑀲𑁆𑀲𑁂𑀢𑀼𑀁 𑀲𑀢𑁆𑀣𑀸 𑀆𑀳 𑁋
‘‘𑀅𑀣 𑀔𑀮𑀼, 𑀪𑁄, 𑀓𑀼𑀡𑀸𑀮𑁄 𑀲𑀓𑀼𑀡𑁄 𑀦𑀸𑀭𑀤𑀲𑁆𑀲 𑀤𑁂𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀤𑀺𑀫𑀚𑁆𑀛𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀚𑁆𑀛𑀪𑀸𑀲𑀺 𑁋
‘‘‘𑀲𑀮𑁆𑀮𑀧𑁂 𑀦𑀺𑀲𑀺𑀢𑀔𑀕𑁆𑀕𑀧𑀸𑀡𑀺𑀦𑀸, 𑀧𑀡𑁆𑀟𑀺𑀢𑁄 𑀅𑀧𑀺 𑀧𑀺𑀲𑀸𑀘𑀤𑁄𑀲𑀺𑀦𑀸;
𑀉𑀕𑁆𑀕𑀢𑁂𑀚𑀫𑀼𑀭𑀕𑀫𑁆𑀧𑀺 𑀆𑀲𑀺𑀤𑁂, 𑀏𑀓𑁄 𑀏𑀓𑀸𑀬 𑀧𑀫𑀤𑀸𑀬 𑀦𑀸𑀮𑀧𑁂.
‘‘𑀮𑁄𑀓𑀘𑀺𑀢𑁆𑀢𑀫𑀣𑀦𑀸 𑀳𑀺 𑀦𑀸𑀭𑀺𑀬𑁄, 𑀦𑀘𑁆𑀘𑀕𑀻𑀢𑀪𑀡𑀺𑀢𑀫𑁆𑀳𑀺𑀢𑀸𑀯𑀼𑀥𑀸;
𑀩𑀸𑀥𑀬𑀦𑁆𑀢𑀺 𑀅𑀦𑀼𑀧𑀝𑁆𑀞𑀺𑀢𑀲𑁆𑀲𑀢𑀺𑀁, 𑀤𑀻𑀧𑁂 𑀭𑀓𑁆𑀔𑀲𑀺𑀕𑀡𑁄𑀯 𑀯𑀸𑀡𑀺𑀚𑁂.
‘‘𑀦𑀢𑁆𑀣𑀺 ¶ 𑀢𑀸𑀲𑀁 𑀯𑀺𑀦𑀬𑁄 𑀦 𑀲𑀁𑀯𑀭𑁄, 𑀫𑀚𑁆𑀚𑀫𑀁𑀲𑀦𑀺𑀭𑀢𑀸 𑀅𑀲𑀜𑁆𑀜𑀢𑀸;
𑀢𑀸 𑀕𑀺𑀮𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀧𑀸𑀪𑀢𑀁, 𑀲𑀸𑀕𑀭𑁂𑀯 𑀫𑀓𑀭𑀁 𑀢𑀺𑀫𑀺𑀗𑁆𑀕𑀮𑁄.
‘‘𑀧𑀜𑁆𑀘𑀓𑀸𑀫𑀕𑀼𑀡𑀲𑀸𑀢𑀕𑁄𑀘𑀭𑀸, 𑀉𑀤𑁆𑀥𑀢𑀸 𑀅𑀦𑀺𑀬𑀢𑀸 𑀅𑀲𑀜𑁆𑀜𑀢𑀸;
𑀑𑀲𑀭𑀦𑁆𑀢𑀺 𑀧𑀫𑀤𑀸 𑀧𑀫𑀸𑀤𑀺𑀦𑀁, 𑀮𑁄𑀡𑀢𑁄𑀬𑀯𑀢𑀺𑀬𑀁𑀯 𑀆𑀧𑀓𑀸.
‘‘𑀬𑀁 𑀦𑀭𑀁 𑀉𑀧𑀮𑀧𑁂𑀦𑁆𑀢𑀺 𑀦𑀸𑀭𑀺𑀬𑁄, 𑀙𑀦𑁆𑀤𑀲𑀸 𑀯𑀸 𑀭𑀢𑀺𑀬𑀸 𑀥𑀦𑁂𑀦 𑀯𑀸;
𑀚𑀸𑀢𑀯𑁂𑀤𑀲𑀤𑀺𑀲𑀫𑁆𑀧𑀺 𑀢𑀸𑀤𑀺𑀲𑀁, 𑀭𑀸𑀕𑀤𑁄𑀲𑀯𑀥𑀺𑀬𑁄 𑀤𑀳𑀦𑁆𑀢𑀺 𑀦𑀁.
‘‘𑀅𑀟𑁆𑀠𑀁 𑀜𑀢𑁆𑀯𑀸 𑀧𑀼𑀭𑀺𑀲𑀁 𑀫𑀳𑀤𑁆𑀥𑀦𑀁, 𑀑𑀲𑀭𑀦𑁆𑀢𑀺 𑀲𑀥𑀦𑀁 𑀲𑀳𑀢𑁆𑀢𑀦𑀸;
𑀭𑀢𑁆𑀢𑀘𑀺𑀢𑁆𑀢𑀫𑀢𑀺𑀯𑁂𑀞𑀬𑀦𑁆𑀢𑀺 𑀦𑀁, 𑀲𑀸𑀮 𑀫𑀸𑀮𑀼𑀯𑀮𑀢𑀸𑀯 𑀓𑀸𑀦𑀦𑁂.
‘‘𑀢𑀸 𑀉𑀧𑁂𑀦𑁆𑀢𑀺 𑀯𑀺𑀯𑀺𑀥𑁂𑀦 𑀙𑀦𑁆𑀤𑀲𑀸, 𑀘𑀺𑀢𑁆𑀭𑀩𑀺𑀫𑁆𑀩𑀫𑀼𑀔𑀺𑀬𑁄 𑀅𑀮𑀗𑁆𑀓𑀢𑀸;
𑀉𑀳𑀲𑀦𑁆𑀢𑀺 𑀧𑀳𑀲𑀦𑁆𑀢𑀺 𑀦𑀸𑀭𑀺𑀬𑁄, 𑀲𑀫𑁆𑀩𑀭𑁄𑀯 𑀲𑀢𑀫𑀸𑀬𑀓𑁄𑀯𑀺𑀤𑀸.
‘‘𑀚𑀸𑀢𑀭𑀽𑀧𑀫𑀡𑀺𑀫𑀼𑀢𑁆𑀢𑀪𑀽𑀲𑀺𑀢𑀸, 𑀲𑀓𑁆𑀓𑀢𑀸 𑀧𑀢𑀺𑀓𑀼𑀮𑁂𑀲𑀼 𑀦𑀸𑀭𑀺𑀬𑁄;
𑀭𑀓𑁆𑀔𑀺𑀢𑀸 ¶ 𑀅𑀢𑀺𑀘𑀭𑀦𑁆𑀢𑀺 𑀲𑀸𑀫𑀺𑀓𑀁, 𑀤𑀸𑀦𑀯𑀁𑀯 𑀳𑀤𑀬𑀦𑁆𑀢𑀭𑀲𑁆𑀲𑀺𑀢𑀸.
‘‘𑀢𑁂𑀚𑀯𑀸𑀧𑀺 ¶ 𑀳𑀺 𑀦𑀭𑁄 𑀯𑀺𑀘𑀓𑁆𑀔𑀡𑁄, 𑀲𑀓𑁆𑀓𑀢𑁄 𑀩𑀳𑀼𑀚𑀦𑀲𑁆𑀲 𑀧𑀽𑀚𑀺𑀢𑁄;
𑀦𑀸𑀭𑀺𑀦𑀁 𑀯𑀲𑀕𑀢𑁄 𑀦 𑀪𑀸𑀲𑀢𑀺, 𑀭𑀸𑀳𑀼𑀦𑀸 𑀉𑀧𑀳𑀢𑁄𑀯 𑀘𑀦𑁆𑀤𑀺𑀫𑀸.
‘‘𑀬𑀁 ¶ 𑀓𑀭𑁂𑀬𑁆𑀬 𑀓𑀼𑀧𑀺𑀢𑁄 𑀤𑀺𑀲𑁄 𑀤𑀺𑀲𑀁, 𑀤𑀼𑀝𑁆𑀞𑀘𑀺𑀢𑁆𑀢𑁄 𑀯𑀲𑀫𑀸𑀕𑀢𑀁 𑀅𑀭𑀺𑀁;
𑀢𑁂𑀦 𑀪𑀺𑀬𑁆𑀬𑁄 𑀩𑁆𑀬𑀲𑀦𑀁 𑀦𑀺𑀕𑀘𑁆𑀙𑀢𑀺, 𑀦𑀸𑀭𑀺𑀦𑀁 𑀯𑀲𑀕𑀢𑁄 𑀅𑀧𑁂𑀓𑁆𑀔𑀯𑀸.
‘‘𑀓𑁂𑀲𑀮𑀽𑀦𑀦𑀔𑀙𑀺𑀦𑁆𑀦𑀢𑀚𑁆𑀚𑀺𑀢𑀸, 𑀧𑀸𑀤𑀧𑀸𑀡𑀺𑀓𑀲𑀤𑀡𑁆𑀟𑀢𑀸𑀴𑀺𑀢𑀸;
𑀳𑀻𑀦𑀫𑁂𑀯𑀼𑀧𑀕𑀢𑀸 𑀳𑀺 𑀦𑀸𑀭𑀺𑀬𑁄, 𑀢𑀸 𑀭𑀫𑀦𑁆𑀢𑀺 𑀓𑀼𑀡𑀧𑁂𑀯 𑀫𑀓𑁆𑀔𑀺𑀓𑀸.
‘‘𑀢𑀸 𑀓𑀼𑀮𑁂𑀲𑀼 𑀯𑀺𑀲𑀺𑀔𑀦𑁆𑀢𑀭𑁂𑀲𑀼 𑀯𑀸, 𑀭𑀸𑀚𑀥𑀸𑀦𑀺𑀦𑀺𑀕𑀫𑁂𑀲𑀼 𑀯𑀸 𑀧𑀼𑀦;
𑀑𑀟𑁆𑀟𑀺𑀢𑀁 𑀦𑀫𑀼𑀘𑀺𑀧𑀸𑀲𑀯𑀸𑀓𑀭𑀁, 𑀘𑀓𑁆𑀔𑀼𑀫𑀸 𑀧𑀭𑀺𑀯𑀚𑁆𑀚𑁂 𑀲𑀼𑀔𑀢𑁆𑀣𑀺𑀓𑁄.
‘‘𑀑𑀲𑁆𑀲𑀚𑀺𑀢𑁆𑀯 𑀓𑀼𑀲𑀮𑀁 𑀢𑀧𑁄𑀕𑀼𑀡𑀁, 𑀬𑁄 𑀅𑀦𑀭𑀺𑀬𑀘𑀭𑀺𑀢𑀸𑀦𑀺 𑀫𑀸𑀘𑀭𑀺;
𑀤𑁂𑀯𑀢𑀸𑀳𑀺 𑀦𑀺𑀭𑀬𑀁 𑀦𑀺𑀫𑀺𑀲𑁆𑀲𑀢𑀺, 𑀙𑁂𑀤𑀕𑀸𑀫𑀺𑀫𑀡𑀺𑀬𑀁𑀯 𑀯𑀸𑀡𑀺𑀚𑁄.
‘‘𑀲𑁄 𑀇𑀥 𑀕𑀭𑀳𑀺𑀢𑁄 𑀧𑀭𑀢𑁆𑀣 𑀘, 𑀤𑀼𑀫𑁆𑀫𑀢𑀻 𑀉𑀧𑀳𑀢𑁄 𑀲𑀓𑀫𑁆𑀫𑀼𑀦𑀸;
𑀕𑀘𑁆𑀙𑀢𑀻 𑀅𑀦𑀺𑀬𑀢𑁄 𑀕𑀴𑀸𑀕𑀴𑀁, 𑀤𑀼𑀝𑁆𑀞𑀕𑀤𑁆𑀭𑀪𑀭𑀣𑁄𑀯 𑀉𑀧𑁆𑀧𑀣𑁂.
‘‘𑀲𑁄 𑀉𑀧𑁂𑀢𑀺 𑀦𑀺𑀭𑀬𑀁 𑀧𑀢𑀸𑀧𑀦𑀁, 𑀲𑀢𑁆𑀢𑀺𑀲𑀺𑀫𑁆𑀩𑀮𑀺𑀯𑀦𑀜𑁆𑀘 𑀆𑀬𑀲𑀁;
𑀆𑀯𑀲𑀺𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀧𑁂𑀢𑀭𑀸𑀚𑀯𑀺𑀲𑀬𑀁 𑀦 𑀫𑀼𑀜𑁆𑀘𑀢𑀺.
‘‘𑀤𑀺𑀩𑁆𑀬𑀔𑀺𑀟𑁆𑀟𑀭𑀢𑀺𑀬𑁄 𑀘 𑀦𑀦𑁆𑀤𑀦𑁂, 𑀘𑀓𑁆𑀓𑀯𑀢𑁆𑀢𑀺𑀘𑀭𑀺𑀢𑀜𑁆𑀘 𑀫𑀸𑀦𑀼𑀲𑁂;
𑀦𑀸𑀲𑀬𑀦𑁆𑀢𑀺 𑀧𑀫𑀤𑀸 𑀧𑀫𑀸𑀤𑀺𑀦𑀁, 𑀤𑀼𑀕𑁆𑀕𑀢𑀺𑀜𑁆𑀘 𑀧𑀝𑀺𑀧𑀸𑀤𑀬𑀦𑁆𑀢𑀺 𑀦𑀁.
‘‘𑀤𑀺𑀩𑁆𑀬𑀔𑀺𑀟𑁆𑀟𑀭𑀢𑀺𑀬𑁄 ¶ ¶ 𑀦 𑀤𑀼𑀮𑁆𑀮𑀪𑀸, 𑀘𑀓𑁆𑀓𑀯𑀢𑁆𑀢𑀺𑀘𑀭𑀺𑀢𑀜𑁆𑀘 𑀫𑀸𑀦𑀼𑀲𑁂;
𑀲𑁄𑀡𑁆𑀡𑀩𑁆𑀬𑀫𑁆𑀳𑀦𑀺𑀮𑀬𑀸 𑀘 𑀅𑀘𑁆𑀙𑀭𑀸, 𑀬𑁂 𑀘𑀭𑀦𑁆𑀢𑀺 𑀧𑀫𑀤𑀸𑀳𑀦𑀢𑁆𑀣𑀺𑀓𑀸.
‘‘𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀸 𑀕𑀢𑀺, 𑀭𑀽𑀧𑀥𑀸𑀢𑀼𑀬𑀸 𑀪𑀸𑀯𑁄 𑀦 𑀤𑀼𑀮𑁆𑀮𑀪𑁄;
𑀯𑀻𑀢𑀭𑀸𑀕𑀯𑀺𑀲𑀬𑀽𑀧𑀧𑀢𑁆𑀢𑀺 𑀬𑀸, 𑀬𑁂 𑀘𑀭𑀦𑁆𑀢𑀺 𑀧𑀫𑀤𑀸𑀳𑀦𑀢𑁆𑀣𑀺𑀓𑀸.
‘‘𑀲𑀩𑁆𑀩𑀤𑀼𑀓𑁆𑀔𑀲𑀫𑀢𑁆𑀢𑀺𑀓𑁆𑀓𑀫𑀁 ¶ 𑀲𑀺𑀯𑀁, 𑀅𑀘𑁆𑀘𑀦𑁆𑀢𑀫𑀘𑀮𑀺𑀢𑀁 𑀅𑀲𑀗𑁆𑀔𑀢𑀁;
𑀦𑀺𑀩𑁆𑀩𑀼𑀢𑁂𑀳𑀺 𑀲𑀼𑀘𑀺𑀳𑀻 𑀦 𑀤𑀼𑀮𑁆𑀮𑀪𑀁, 𑀬𑁂 𑀘𑀭𑀦𑁆𑀢𑀺 𑀧𑀫𑀤𑀸𑀳𑀦𑀢𑁆𑀣𑀺𑀓𑀸’’’𑀢𑀺.
𑀢𑀢𑁆𑀣 𑀲𑀮𑁆𑀮𑀧𑁂𑀢𑀺 ‘‘𑀲𑀘𑁂 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑁂𑀲𑁆𑀲𑀲𑀺, 𑀲𑀻𑀲𑀁 𑀢𑁂 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀔𑀕𑁆𑀕𑀁 𑀆𑀤𑀸𑀬 𑀞𑀺𑀢𑁂𑀦𑀸𑀧𑀺, ‘‘𑀲𑀮𑁆𑀮𑀧𑀺𑀢𑀫𑀢𑁆𑀢𑁂𑀬𑁂𑀯 𑀢𑀁 𑀔𑀸𑀤𑀺𑀢𑁆𑀯𑀸 𑀚𑀻𑀯𑀺𑀢𑀯𑀺𑀦𑀸𑀲𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀤𑁄𑀲𑀺𑀦𑀸 𑀳𑀼𑀢𑁆𑀯𑀸 𑀞𑀺𑀢𑁂𑀦𑀸𑀧𑀺 𑀧𑀺𑀲𑀸𑀘𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑁂. ‘‘𑀉𑀧𑀕𑀢𑀁 𑀟𑀁𑀲𑀺𑀢𑁆𑀯𑀸 𑀦𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀞𑀺𑀢𑀁 𑀉𑀕𑁆𑀕𑀢𑁂𑀚𑀁 𑀉𑀭𑀕𑀫𑁆𑀧𑀺 𑀆𑀲𑀺𑀤𑁂. 𑀏𑀓𑁄 𑀧𑀦 𑀳𑀼𑀢𑁆𑀯𑀸 𑀭𑀳𑁄 𑀏𑀓𑀸𑀬 𑀧𑀫𑀤𑀸𑀬 𑀦 𑀳𑀺 𑀆𑀮𑀧𑁂. 𑀮𑁄𑀓𑀘𑀺𑀢𑁆𑀢𑀫𑀣𑀦𑀸𑀢𑀺 𑀮𑁄𑀓𑀲𑁆𑀲 𑀘𑀺𑀢𑁆𑀢𑀖𑀸𑀢𑀺𑀓𑀸. 𑀤𑀻𑀧𑁂 𑀭𑀓𑁆𑀔𑀲𑀺𑀕𑀡𑁄𑀢𑀺 𑀬𑀣𑀸 𑀤𑀻𑀧𑁂 𑀭𑀓𑁆𑀔𑀲𑀺𑀕𑀡𑁄 𑀫𑀦𑀼𑀲𑁆𑀲𑀯𑁂𑀲𑁂𑀦 𑀯𑀸𑀡𑀺𑀚𑁂 𑀉𑀧𑀮𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀕𑀢𑁂 𑀓𑀢𑁆𑀯𑀸 𑀔𑀸𑀤𑀢𑀺, 𑀏𑀯𑀁 𑀇𑀫𑀸𑀧𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀲𑀢𑁆𑀢𑁂 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀦𑀬𑁄𑀢𑀺 𑀆𑀘𑀸𑀭𑁄. 𑀲𑀁𑀯𑀭𑁄𑀢𑀺 𑀫𑀭𑀺𑀬𑀸𑀤𑁄. 𑀧𑀼𑀭𑀺𑀲𑀲𑁆𑀲 𑀧𑀸𑀪𑀢𑀦𑁆𑀢𑀺 𑀤𑀼𑀓𑁆𑀔𑀲𑀫𑁆𑀪𑀢𑀁 𑀥𑀦𑀁 𑀕𑀺𑀮𑀦𑁆𑀢𑀺 𑀦𑀸𑀲𑁂𑀦𑁆𑀢𑀺.
𑀅𑀦𑀺𑀬𑀢𑀸𑀢𑀺 𑀅𑀦𑀺𑀬𑀢𑀘𑀺𑀢𑁆𑀢𑀸. 𑀮𑁄𑀡𑀢𑁄𑀬𑀯𑀢𑀺𑀬𑀦𑁆𑀢𑀺 𑀮𑁄𑀡𑀢𑁄𑀬𑀯𑀦𑁆𑀢𑀁 𑀲𑀫𑀼𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀆𑀧𑀓𑀸𑀢𑀺 𑀆𑀧𑀕𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑀣𑀸 𑀲𑀫𑀼𑀤𑁆𑀤𑀁 𑀦𑀤𑀺𑀬𑁄 𑀑𑀲𑀭𑀦𑁆𑀢𑀺, 𑀏𑀯𑀁 𑀧𑀫𑀸𑀤𑀺𑀦𑀁 𑀧𑀫𑀤𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀲𑀸𑀢𑀺 𑀧𑁂𑀫𑁂𑀦. 𑀭𑀢𑀺𑀬𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺𑀬𑀸. 𑀥𑀦𑁂𑀦 𑀯𑀸𑀢𑀺 𑀥𑀦𑀳𑁂𑀢𑀼 𑀯𑀸. 𑀚𑀸𑀢𑀯𑁂𑀤𑀲𑀤𑀺𑀲𑀦𑁆𑀢𑀺 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀕𑁆𑀕𑀺𑀫𑀺𑀯 𑀚𑀮𑀺𑀢𑀫𑁆𑀧𑀺. 𑀭𑀸𑀕𑀤𑁄𑀲𑀯𑀥𑀺𑀬𑁄𑀢𑀺 ¶ 𑀓𑀸𑀫𑀭𑀸𑀕𑀤𑁄𑀲𑁂𑀳𑀺 𑀯𑀥𑀺𑀓𑀸. 𑀭𑀸𑀕𑀤𑁄𑀲𑀕𑀢𑀺𑀬𑁄𑀢𑀺𑀧𑀺 𑀧𑀸𑀞𑁄. 𑀑𑀲𑀭𑀦𑁆𑀢𑀻𑀢𑀺 𑀥𑀦𑀕𑀳𑀡𑀢𑁆𑀣𑀸𑀬 𑀫𑀥𑀼𑀭𑀯𑀘𑀦𑁂𑀦 𑀢𑀁 𑀩𑀦𑁆𑀥𑀦𑁆𑀢𑀺𑀬𑁄 𑀉𑀧𑀕𑀘𑁆𑀙𑀦𑁆𑀢𑀺. 𑀲𑀥𑀦𑀦𑁆𑀢𑀺 𑀲𑀥𑀦𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀯𑀢𑁆𑀣𑀸𑀮𑀗𑁆𑀓𑀸𑀭𑀢𑁆𑀣𑀸𑀬 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀥𑀦𑀁 𑀤𑀢𑁆𑀯𑀸𑀧𑀺 𑀑𑀲𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀳𑀢𑁆𑀢𑀦𑀸𑀢𑀺 𑀅𑀢𑁆𑀢𑀪𑀸𑀯𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀪𑀸𑀯𑀫𑁆𑀧𑀺 𑀢𑀲𑁆𑀲𑁂𑀯 𑀧𑀭𑀺𑀘𑁆𑀘𑀚𑀦𑁆𑀢𑀺𑀬𑁄 𑀯𑀺𑀬 𑀳𑁄𑀦𑁆𑀢𑀺. 𑀅𑀢𑀺𑀯𑁂𑀞𑀬𑀦𑁆𑀢𑀻𑀢𑀺 𑀥𑀦𑀕𑀳𑀡𑀢𑁆𑀣𑀸𑀬 𑀅𑀢𑀺𑀯𑀺𑀬 𑀯𑁂𑀞𑁂𑀦𑁆𑀢𑀺 𑀧𑀻𑀴𑁂𑀦𑁆𑀢𑀺.
𑀯𑀺𑀯𑀺𑀥𑁂𑀦 𑀙𑀦𑁆𑀤𑀲𑀸𑀢𑀺 𑀦𑀸𑀦𑀸𑀯𑀺𑀥𑁂𑀦 𑀆𑀓𑀸𑀭𑁂𑀦. 𑀘𑀺𑀢𑁆𑀭𑀩𑀺𑀫𑁆𑀩𑀫𑀼𑀔𑀺𑀬𑁄𑀢𑀺 𑀅𑀮𑀗𑁆𑀓𑀸𑀭𑀯𑀲𑁂𑀦 𑀘𑀺𑀢𑁆𑀭𑀲𑀭𑀻𑀭𑀸 𑀘𑀺𑀢𑁆𑀭𑀫𑀼𑀔𑀺𑀬𑁄 𑀳𑀼𑀢𑁆𑀯𑀸. 𑀉𑀳𑀲𑀦𑁆𑀢𑀻𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀺. 𑀧𑀳𑀲𑀦𑁆𑀢𑀻𑀢𑀺 𑀫𑀦𑁆𑀤𑀳𑀲𑀺𑀢𑀁 𑀳𑀲𑀦𑁆𑀢𑀺. 𑀲𑀫𑁆𑀩𑀭𑁄𑀯𑀸𑀢𑀺 𑀫𑀸𑀬𑀸𑀓𑀸𑀭𑀧𑀼𑀭𑀺𑀲𑁄 𑀯𑀺𑀬 𑀅𑀲𑀼𑀭𑀺𑀦𑁆𑀤𑁄 𑀯𑀺𑀬 𑀘 ¶ . 𑀤𑀸𑀦𑀯𑀁𑀯 𑀳𑀤𑀬𑀦𑁆𑀢𑀭𑀲𑁆𑀲𑀺𑀢𑀸𑀢𑀺 𑀬𑀣𑀸 ‘‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀣, 𑀪𑁄, 𑀢𑀬𑁄 𑀚𑀦𑀸’’𑀢𑀺 𑀓𑀭𑀡𑁆𑀟𑀓𑀚𑀸𑀢𑀓𑁂 (𑀚𑀸. 𑁧.𑁯.𑁮𑁭 𑀆𑀤𑀬𑁄) 𑀳𑀤𑀬𑀦𑁆𑀢𑀭𑀦𑀺𑀲𑁆𑀲𑀺𑀢𑀸 𑀅𑀦𑁆𑀢𑁄𑀉𑀤𑀭𑀕𑀢𑀸𑀧𑀺 𑀤𑀸𑀦𑀯𑀁 𑀅𑀢𑀺𑀘𑀭𑀺, 𑀏𑀯𑀁 𑀅𑀢𑀺𑀘𑀭𑀦𑁆𑀢𑀺. 𑀅𑀭𑀓𑁆𑀔𑀺𑀢𑀸 𑀳𑁂𑀢𑀸𑀢𑀺 𑀤𑀻𑀧𑁂𑀢𑀺. 𑀦 𑀪𑀸𑀲𑀢𑀻𑀢𑀺 𑀦 𑀯𑀺𑀭𑁄𑀘𑀢𑀺 𑀳𑀭𑀺𑀢𑀘𑀮𑁄𑀫𑀲𑀓𑀲𑁆𑀲𑀧𑀓𑀼𑀲𑀭𑀸𑀚𑀸𑀦𑁄 𑀯𑀺𑀬. 𑀢𑁂𑀦𑀸𑀢𑀺 𑀢𑀫𑁆𑀳𑀸 𑀅𑀫𑀺𑀢𑁆𑀢𑁂𑀦 𑀓𑀢𑀸 𑀩𑁆𑀬𑀲𑀦𑀸 𑀅𑀢𑀺𑀭𑁂𑀓𑀢𑀭𑀁 𑀩𑁆𑀬𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁂𑀓𑁆𑀔𑀯𑀸𑀢𑀺 𑀲𑀢𑀡𑁆𑀳𑁄.
𑀓𑁂𑀲𑀮𑀽𑀦𑀦𑀔𑀙𑀺𑀦𑁆𑀦𑀢𑀚𑁆𑀚𑀺𑀢𑀸𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀮𑀽𑀦𑀓𑁂𑀲𑀸 𑀦𑀔𑁂𑀳𑀺 𑀙𑀺𑀦𑁆𑀦𑀕𑀢𑁆𑀢𑀸 𑀢𑀚𑁆𑀚𑀺𑀢𑀸 𑀧𑀸𑀤𑀸𑀤𑀻𑀳𑀺 𑀘 ¶ 𑀢𑀸𑀴𑀺𑀢𑀸𑀯 𑀳𑀼𑀢𑁆𑀯𑀸. 𑀬𑁄 𑀓𑀺𑀮𑁂𑀲𑀯𑀲𑁂𑀦 𑀏𑀢𑁂𑀧𑀺 𑀯𑀺𑀧𑁆𑀧𑀓𑀸𑀭𑁂 𑀓𑀭𑁄𑀢𑀺, 𑀢𑀸𑀤𑀺𑀲𑀁 𑀳𑀻𑀦𑀫𑁂𑀯 𑀉𑀧𑀕𑀢𑀸 𑀦𑀸𑀭𑀺𑀬𑁄 𑀭𑀫𑀦𑁆𑀢𑀺, 𑀦 𑀏𑀢𑁂 𑀯𑀺𑀧𑁆𑀧𑀓𑀸𑀭𑁂 𑀧𑀭𑀺𑀳𑀭𑀦𑁆𑀢𑀺, 𑀫𑀥𑀼𑀭𑀲𑀫𑀸𑀘𑀸𑀭𑁂 𑀓𑀺𑀁𑀓𑀸𑀭𑀡𑀸 𑀢𑀸 𑀦 𑀭𑀫𑀦𑁆𑀢𑀺. 𑀓𑀼𑀡𑀧𑁂𑀯 𑀫𑀓𑁆𑀔𑀺𑀓𑀸𑀢𑀺 𑀬𑀲𑁆𑀫𑀸 𑀚𑁂𑀕𑀼𑀘𑁆𑀙𑀳𑀢𑁆𑀣𑀺𑀓𑀼𑀡𑀧𑀸𑀤𑀺𑀫𑁆𑀳𑀺 𑀫𑀓𑁆𑀔𑀺𑀓𑀸 𑀯𑀺𑀬 𑀢𑀸 𑀳𑀻𑀦𑁂𑀬𑁂𑀯 𑀭𑀫𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀑𑀟𑁆𑀟𑀺𑀢𑀦𑁆𑀢𑀺 𑀦 𑀏𑀢𑀸 𑀇𑀢𑁆𑀣𑀺𑀬𑁄 𑀦𑀸𑀫, 𑀅𑀣 𑀔𑁄 𑀇𑀫𑁂𑀲𑀼 𑀞𑀸𑀦𑁂𑀲𑀼 𑀦𑀫𑀼𑀘𑀺𑀦𑁄 𑀓𑀺𑀮𑁂𑀲𑀫𑀸𑀭𑀲𑁆𑀲 𑀫𑀺𑀕𑀧𑀓𑁆𑀔𑀺𑀕𑀳𑀡𑀢𑁆𑀣𑀁 𑀮𑀼𑀤𑁆𑀤𑀓𑁂𑀳𑀺 𑀑𑀟𑁆𑀟𑀺𑀢𑀁 𑀧𑀸𑀲𑀜𑁆𑀘 𑀯𑀸𑀓𑀭𑀜𑁆𑀘𑀸𑀢𑀺 𑀫𑀜𑁆𑀜𑀫𑀸𑀦𑁄 𑀧𑀜𑁆𑀜𑀸𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀤𑀺𑀩𑁆𑀩𑀫𑀸𑀦𑀼𑀲𑀺𑀓𑁂𑀦 𑀲𑀼𑀔𑁂𑀦 𑀅𑀢𑁆𑀣𑀺𑀓𑁄 𑀧𑀭𑀺𑀯𑀚𑁆𑀚𑁂𑀬𑁆𑀬.
𑀑𑀲𑁆𑀲𑀚𑀺𑀢𑁆𑀯𑀸𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀫𑀳𑀸𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁 𑀢𑀧𑁄𑀕𑀼𑀡𑀁 𑀙𑀟𑁆𑀟𑁂𑀢𑁆𑀯𑀸. 𑀬𑁄𑀢𑀺 𑀬𑁄 𑀧𑀼𑀭𑀺𑀲𑁄 𑀅𑀦𑀭𑀺𑀬𑁂𑀲𑀼 𑀅𑀧𑀭𑀺𑀲𑀼𑀤𑁆𑀥𑁂𑀲𑀼 𑀓𑀸𑀫𑀕𑀼𑀡𑁂𑀲𑀼 𑀓𑀸𑀫𑀭𑀢𑀺𑀘𑀭𑀺𑀢𑀸𑀦𑀺 𑀆𑀘𑀭𑀢𑀺. 𑀤𑁂𑀯𑀢𑀸𑀳𑀺 𑀦𑀺𑀭𑀬𑀁 𑀦𑀺𑀫𑀺𑀲𑁆𑀲𑀢𑀻𑀢𑀺 𑀲𑁄 𑀤𑁂𑀯𑀮𑁄𑀓𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀬𑀁 𑀕𑀡𑁆𑀳𑀺𑀲𑁆𑀲𑀢𑀺. 𑀙𑁂𑀤𑀕𑀸𑀫𑀺𑀫𑀡𑀺𑀬𑀁𑀯 𑀯𑀸𑀡𑀺𑀚𑁄𑀢𑀺 ¶ 𑀬𑀣𑀸 𑀩𑀸𑀮𑀯𑀸𑀡𑀺𑀚𑁄 𑀲𑀢𑀲𑀳𑀲𑁆𑀲𑀕𑁆𑀖𑀪𑀡𑁆𑀟𑀁 𑀤𑀢𑁆𑀯𑀸 𑀙𑁂𑀤𑀕𑀸𑀫𑀺𑀫𑀡𑀺𑀓𑀁 𑀕𑀡𑁆𑀳𑀸𑀢𑀺, 𑀢𑀣𑀸𑀭𑀽𑀧𑁄 𑀅𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀲𑁄 𑀇𑀢𑁆𑀣𑀻𑀦𑀁 𑀯𑀲𑀁 𑀕𑀢𑁄. 𑀅𑀦𑀺𑀬𑀢𑁄𑀢𑀺 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀧𑀸𑀬𑁂𑀲𑀼 𑀧𑀘𑁆𑀘𑀺𑀲𑁆𑀲𑀢𑀻𑀢𑀺 𑀅𑀦𑀺𑀬𑀢𑁄. 𑀕𑀴𑀸𑀕𑀴𑀦𑁆𑀢𑀺 𑀤𑁂𑀯𑀮𑁄𑀓𑀸 𑀯𑀸 𑀫𑀦𑀼𑀲𑁆𑀲𑀮𑁄𑀓𑀸 𑀯𑀸 𑀕𑀴𑀺𑀢𑁆𑀯𑀸 𑀅𑀧𑀸𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀺𑀁? 𑀤𑀼𑀝𑁆𑀞𑀕𑀤𑁆𑀭𑀪𑀭𑀣𑁄𑀯 𑀉𑀧𑁆𑀧𑀣𑁂𑀢𑀺, 𑀬𑀣𑀸 𑀓𑀽𑀝𑀕𑀤𑁆𑀭𑀪𑀬𑀼𑀢𑁆𑀢𑀭𑀣𑁄 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀉𑀧𑁆𑀧𑀣𑁂𑀬𑁂𑀯 𑀕𑀘𑁆𑀙𑀢𑀺, 𑀢𑀣𑀸. 𑀲𑀢𑁆𑀢𑀺𑀲𑀺𑀫𑁆𑀩𑀮𑀺𑀯𑀦𑀦𑁆𑀢𑀺 𑀲𑀢𑁆𑀢𑀺𑀲𑀤𑀺𑀲𑁂𑀳𑀺 𑀓𑀡𑁆𑀝𑀓𑁂𑀳𑀺 𑀬𑀼𑀢𑁆𑀢𑀁 𑀆𑀬𑀲𑀁 𑀲𑀺𑀫𑁆𑀩𑀮𑀺𑀯𑀦𑀁. 𑀧𑁂𑀢𑀭𑀸𑀚𑀯𑀺𑀲𑀬𑀦𑁆𑀢𑀺 𑀧𑁂𑀢𑀯𑀺𑀲𑀬𑀜𑁆𑀘 𑀓𑀸𑀮𑀓𑀜𑁆𑀘𑀺𑀓𑀅𑀲𑀼𑀭𑀯𑀺𑀲𑀬𑀜𑁆𑀘.
𑀧𑀫𑀸𑀤𑀺𑀦𑀦𑁆𑀢𑀺 𑀧𑀫𑀢𑁆𑀢𑀸𑀦𑀁. 𑀢𑁂 𑀳𑀺 𑀧𑀫𑀤𑀸𑀲𑀼 𑀧𑀫𑀢𑁆𑀢𑀸 𑀢𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀪𑀽𑀢𑀁 𑀓𑀼𑀲𑀮𑀁 𑀦 𑀓𑀭𑁄𑀦𑁆𑀢𑀺, 𑀇𑀢𑀺 𑀢𑁂𑀲𑀁 𑀧𑀫𑀤𑀸 𑀲𑀩𑁆𑀩𑀸 𑀢𑀸 𑀦𑀸𑀲𑁂𑀦𑁆𑀢𑀺 𑀦𑀸𑀫. 𑀧𑀝𑀺𑀧𑀸𑀤𑀬𑀦𑁆𑀢𑀻𑀢𑀺 𑀢𑀣𑀸𑀯𑀺𑀥𑀁 𑀧𑀼𑀭𑀺𑀲𑀁 𑀢𑀸 𑀧𑀫𑀸𑀤𑀯𑀲𑁂𑀦𑁂𑀯 𑀅𑀓𑀼𑀲𑀮𑀁 𑀓𑀸𑀭𑁂𑀢𑁆𑀯𑀸 𑀤𑀼𑀕𑁆𑀕𑀢𑀺𑀁 𑀧𑀝𑀺𑀧𑀸𑀤𑁂𑀦𑁆𑀢𑀺 𑀦𑀸𑀫. 𑀲𑁄𑀡𑁆𑀡𑀩𑁆𑀬𑀫𑁆𑀳𑀦𑀺𑀮𑀬𑀸𑀢𑀺 𑀲𑀼𑀯𑀡𑁆𑀡𑀫𑀬𑀯𑀺𑀫𑀸𑀦𑀯𑀸𑀲𑀺𑀦𑀺𑀬𑁄. 𑀧𑀫𑀤𑀸𑀳𑀦𑀢𑁆𑀣𑀺𑀓𑀸𑀢𑀺 𑀬𑁂 𑀧𑀼𑀭𑀺𑀲𑀸 𑀧𑀫𑀤𑀸𑀳𑀺 𑀅𑀦𑀢𑁆𑀣𑀺𑀓𑀸 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀸𑀢𑀺 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀸 𑀬𑀸 𑀕𑀢𑀺. 𑀭𑀽𑀧𑀥𑀸𑀢𑀼𑀬𑀸 𑀪𑀸𑀯𑁄𑀢𑀺 𑀬𑁄 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀕𑀢𑀺𑀲𑀗𑁆𑀔𑀸𑀢𑁄 𑀭𑀽𑀧𑀥𑀸𑀢𑀼𑀬𑀸 𑀪𑀸𑀯𑁄, 𑀲𑁄 𑀢𑁂𑀲𑀁 𑀦 𑀤𑀼𑀮𑁆𑀮𑀪𑁄. 𑀯𑀻𑀢𑀭𑀸𑀕𑀯𑀺𑀲𑀬𑀽𑀧𑀧𑀢𑁆𑀢𑀺 𑀬𑀸𑀢𑀺 𑀬𑀸 𑀯𑀻𑀢𑀭𑀸𑀕𑀯𑀺𑀲𑀬𑁂 𑀲𑀼𑀤𑁆𑀥𑀸𑀯𑀸𑀲𑀮𑁄𑀓𑁂 𑀉𑀧𑀧𑀢𑁆𑀢𑀺, 𑀲𑀸𑀧𑀺 𑀢𑁂𑀲𑀁 𑀦 𑀤𑀼𑀮𑁆𑀮𑀪𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀦𑁆𑀢𑀺 𑀅𑀦𑁆𑀢𑀸𑀢𑀻𑀢𑀁 𑀅𑀯𑀺𑀦𑀸𑀲𑀥𑀫𑁆𑀫𑀁. 𑀅𑀘𑀮𑀺𑀢𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀅𑀓𑀫𑁆𑀧𑀺𑀢𑀁. 𑀦𑀺𑀩𑁆𑀩𑀼𑀢𑁂𑀳𑀻𑀢𑀺 𑀦𑀺𑀩𑁆𑀩𑀼𑀢𑀓𑀺𑀮𑁂𑀲𑁂𑀳𑀺. 𑀲𑀼𑀘𑀺𑀳𑀻𑀢𑀺 𑀲𑀼𑀘𑀻𑀳𑀺 𑀧𑀭𑀺𑀲𑀼𑀤𑁆𑀥𑁂𑀳𑀺 𑀏𑀯𑀭𑀽𑀧𑀁 𑀦𑀺𑀩𑁆𑀩𑀸𑀦𑀁 𑀦 𑀤𑀼𑀮𑁆𑀮𑀪𑀦𑁆𑀢𑀺.
𑀏𑀯𑀁 ¶ 𑀫𑀳𑀸𑀲𑀢𑁆𑀢𑁄 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀳𑀺𑀫𑀯𑀦𑁆𑀢𑁂 𑀓𑀺𑀦𑁆𑀦𑀭𑀫𑀳𑁄𑀭𑀕𑀸𑀤𑀬𑁄 𑀆𑀓𑀸𑀲𑁂 𑀞𑀺𑀢𑀸 𑀤𑁂𑀯𑀢𑀸 𑀘 ‘‘𑀅𑀳𑁄 𑀩𑀼𑀤𑁆𑀥𑀮𑀻𑀮𑀸𑀬 𑀓𑀣𑀺𑀢𑀸’’𑀢𑀺 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼 ¶ . 𑀆𑀦𑀦𑁆𑀤𑁄 𑀕𑀺𑀚𑁆𑀛𑀭𑀸𑀚𑀸 𑀦𑀸𑀭𑀤𑁄 𑀤𑁂𑀯𑀩𑁆𑀭𑀸𑀳𑁆𑀫𑀡𑁄 𑀧𑀼𑀡𑁆𑀡𑀫𑀼𑀔𑁄 𑀘 𑀨𑀼𑀲𑁆𑀲𑀓𑁄𑀓𑀺𑀮𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀤𑀸𑀬 𑀬𑀣𑀸𑀞𑀸𑀦𑀫𑁂𑀯 𑀕𑀫𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄𑀧𑀺 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀇𑀢𑀭𑁂 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.
𑀲𑀢𑁆𑀣𑀸 ¶ 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀦𑁆𑀢𑁄 𑀑𑀲𑀸𑀦𑀕𑀸𑀣𑀸 𑀅𑀪𑀸𑀲𑀺 𑁋
‘‘𑀓𑀼𑀡𑀸𑀮𑁄𑀳𑀁 𑀢𑀤𑀸 𑀆𑀲𑀺𑀁, 𑀉𑀤𑀸𑀬𑀻 𑀨𑀼𑀲𑁆𑀲𑀓𑁄𑀓𑀺𑀮𑁄;
𑀆𑀦𑀦𑁆𑀤𑁄 𑀕𑀺𑀚𑁆𑀛𑀭𑀸𑀚𑀸𑀲𑀺, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀦𑀸𑀭𑀤𑁄;
𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺.
𑀢𑁂 𑀧𑀦 𑀪𑀺𑀓𑁆𑀔𑀽 𑀕𑀫𑀦𑀓𑀸𑀮𑁂 𑀲𑀢𑁆𑀣𑀸𑀦𑀼𑀪𑀸𑀯𑁂𑀦 𑀕𑀦𑁆𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀯 𑀆𑀦𑀼𑀪𑀸𑀯𑁂𑀦 𑀆𑀕𑀢𑀸. 𑀢𑁂𑀲𑀁 𑀲𑀢𑁆𑀣𑀸 𑀫𑀳𑀸𑀯𑀦𑁂𑀬𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀲𑀩𑁆𑀩𑁂𑀧𑀺 𑀢𑁂 𑀢𑀁 𑀤𑀺𑀯𑀲𑀫𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀫𑀳𑀸𑀤𑁂𑀯𑀢𑀸𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁩𑁩𑁧 𑀆𑀤𑀬𑁄) 𑀓𑀣𑁂𑀲𑀺.
𑀓𑀼𑀡𑀸𑀮𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.
[𑁫𑁩𑁭] 𑁫. 𑀫𑀳𑀸𑀲𑀼𑀢𑀲𑁄𑀫𑀚𑀸𑀢𑀓𑀯𑀡𑁆𑀡𑀦𑀸
𑀓𑀲𑁆𑀫𑀸 𑀢𑀼𑀯𑀁 𑀭𑀲𑀓 𑀏𑀤𑀺𑀲𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀤𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀘 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁩𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀲𑁄 𑀧𑀦 𑀲𑀘𑁆𑀘𑀓𑀺𑀭𑀺𑀬𑀸𑀬 𑀫𑀽𑀴𑁆𑀳𑀕𑀩𑁆𑀪𑀸𑀬 𑀇𑀢𑁆𑀣𑀺𑀬𑀸 𑀲𑁄𑀢𑁆𑀣𑀺𑀪𑀸𑀯𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀮𑀪𑀧𑀺𑀡𑁆𑀟𑁄 𑀳𑀼𑀢𑁆𑀯𑀸 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑁄 𑀅𑀧𑀭𑀪𑀸𑀕𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀪𑀺𑀜𑁆𑀜𑀸𑀢𑁄𑀯 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀳𑁄 𑀯𑀢 𑀪𑀕𑀯𑀢𑀸 𑀢𑀣𑀸𑀭𑀽𑀧𑀁 𑀮𑀼𑀤𑁆𑀤𑀁 𑀮𑁄𑀳𑀺𑀢𑀧𑀸𑀡𑀺𑀁 𑀫𑀳𑀸𑀘𑁄𑀭𑀁 𑀅𑀗𑁆𑀕𑀼𑀮𑀺𑀫𑀸𑀮𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀭𑁄𑀦𑁆𑀢𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀤𑀼𑀓𑁆𑀓𑀭𑀓𑀸𑀭𑀺𑀦𑁄’’𑀢𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀞𑀺𑀢𑁄𑀯 𑀤𑀺𑀩𑁆𑀩𑀲𑁄𑀢𑁂𑀦 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀚𑁆𑀚 𑀫𑀫 𑀕𑀫𑀦𑀁 𑀩𑀳𑀼𑀧𑀓𑀸𑀭𑀁 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀥𑀫𑁆𑀫𑀤𑁂𑀲𑀦𑀸 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀮𑀸𑀬 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀯𑀭𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 ¶ 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 ¶ 𑀧𑀢𑁆𑀢𑁂𑀦 𑀫𑀬𑀸 𑀏𑀢𑀲𑁆𑀲 𑀤𑀫𑀦𑀁, 𑀲𑁆𑀯𑀸𑀳𑀁 𑀧𑀼𑀩𑁆𑀩𑀘𑀭𑀺𑀬𑀁 ¶ 𑀘𑀭𑀦𑁆𑀢𑁄 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄𑀧𑀺 𑀏𑀢𑀁 𑀤𑀫𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.
𑀅𑀢𑀻𑀢𑁂 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀓𑁄𑀭𑀩𑁆𑀬𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀤𑀲𑀫𑀸𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀲𑀼𑀢𑀯𑀺𑀢𑁆𑀢𑀢𑀸𑀬 𑀧𑀦 𑀦𑀁 ‘‘𑀲𑀼𑀢𑀲𑁄𑀫𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀢𑀫𑁂𑀦𑀁 𑀭𑀸𑀚𑀸 𑀯𑀬𑀧𑁆𑀧𑀢𑁆𑀢𑀁 𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀢𑁆𑀯𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀢𑀓𑁆𑀓𑀲𑀺𑀮𑀁 𑀧𑁂𑀲𑁂𑀲𑀺. 𑀲𑁄 𑀆𑀘𑀭𑀺𑀬𑀪𑀸𑀕𑀁 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀓𑀸𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀧𑀺𑀢𑀭𑀸 𑀧𑁂𑀲𑀺𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀣 𑀲𑀼𑀢𑀲𑁄𑀫𑁄 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀸𑀬 𑀨𑀮𑀓𑁂 𑀯𑀺𑀲𑁆𑀲𑀫𑀢𑁆𑀣𑀸𑀬 𑀦𑀺𑀲𑀻𑀤𑀺. 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄𑀧𑀺 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀨𑀮𑀓𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀼𑀢𑀲𑁄𑀫𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀲𑀫𑁆𑀫, 𑀫𑀕𑁆𑀕𑀓𑀺𑀮𑀦𑁆𑀢𑁄𑀲𑀺, 𑀓𑀼𑀢𑁄 𑀆𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀩𑀸𑀭𑀸𑀡𑀲𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀲 𑀧𑀼𑀢𑁆𑀢𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀓𑀸𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀦𑀸𑀫𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀳𑀁 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀓𑀸𑀭𑀡𑁂𑀦 𑀇𑀥𑀸𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀫𑁆𑀧𑀺 𑀫𑀕𑁆𑀕𑀓𑀺𑀮𑀦𑁆𑀢𑁄𑀲𑀺, 𑀓𑀼𑀢𑁄 𑀆𑀕𑀘𑁆𑀙𑀲𑀻’’𑀢𑀺 𑀢𑁂𑀦𑁂𑀯 𑀦𑀬𑁂𑀦 𑀇𑀢𑀭𑀁 𑀧𑀼𑀘𑁆𑀙𑀺. 𑀲𑁄𑀧𑀺 𑀢𑀲𑁆𑀲 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀢𑁂 𑀉𑀪𑁄𑀧𑀺 ‘‘𑀫𑀬𑀁 𑀔𑀢𑁆𑀢𑀺𑀬𑀸, 𑀏𑀓𑀸𑀘𑀭𑀺𑀬𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀕𑀘𑁆𑀙𑀸𑀫𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀫𑀺𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀆𑀘𑀭𑀺𑀬𑀓𑀼𑀮𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀚𑀸𑀢𑀺𑀆𑀤𑀺𑀁 𑀓𑀣𑁂𑀢𑁆𑀯𑀸 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀆𑀕𑀢𑀪𑀸𑀯𑀁 𑀓𑀣𑁂𑀲𑀼𑀁. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂 𑀆𑀘𑀭𑀺𑀬𑀪𑀸𑀕𑀁 𑀤𑀢𑁆𑀯𑀸 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀲𑀼𑀁.
𑀦 𑀓𑁂𑀯𑀮𑀜𑁆𑀘 𑀢𑁂 𑀤𑁆𑀯𑁂𑀯, 𑀅𑀜𑁆𑀜𑁂𑀧𑀺 𑀢𑀤𑀸 𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀫𑀢𑁆𑀢𑀸 𑀭𑀸𑀚𑀧𑀼𑀢𑁆𑀢𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀲𑀼𑀢𑀲𑁄𑀫𑁄 𑀢𑁂𑀲𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀲𑀺𑀧𑁆𑀧𑀁 𑀉𑀧𑀤𑀺𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺. 𑀲𑁄 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 ‘‘𑀲𑀳𑀸𑀬𑁄 ¶ 𑀫𑁂’’𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀼𑀫𑀸𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀲𑀺. 𑀇𑀢𑀭𑁂𑀲𑀫𑁆𑀧𑀺 𑀅𑀦𑀼𑀓𑁆𑀓𑀫𑁂𑀦 𑀲𑀺𑀧𑁆𑀧𑀁 𑀦𑀺𑀝𑁆𑀞𑀺𑀢𑀁. 𑀢𑁂 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀲𑀼𑀢𑀲𑁄𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀅𑀣 𑀦𑁂 𑀲𑀼𑀢𑀲𑁄𑀫𑁄 𑀫𑀕𑁆𑀕𑀦𑁆𑀢𑀭𑁂 𑀞𑀢𑁆𑀯𑀸 𑀉𑀬𑁆𑀬𑁄𑀚𑁂𑀦𑁆𑀢𑁄 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀺𑀢𑀽𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀭𑀚𑁆𑀚𑁂𑀲𑀼 ¶ 𑀧𑀢𑀺𑀝𑁆𑀞𑀳𑀺𑀲𑁆𑀲𑀣, 𑀧𑀢𑀺𑀝𑁆𑀞𑀺𑀢𑀸 𑀘 𑀧𑀦 𑀫𑀫𑁄𑀯𑀸𑀤𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳. ‘‘𑀓𑀺𑀁 ¶ , 𑀆𑀘𑀭𑀺𑀬𑀸’’𑀢𑀺? ‘‘𑀧𑀓𑁆𑀔𑀤𑀺𑀯𑀲𑁂𑀲𑀼 𑀉𑀧𑁄𑀲𑀣𑀺𑀓𑀸 𑀳𑀼𑀢𑁆𑀯𑀸 𑀫𑀸 𑀖𑀸𑀢𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑀢𑁆𑀢𑀸 ‘‘𑀅𑀦𑀸𑀕𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑀁 𑀦𑀺𑀲𑁆𑀲𑀸𑀬 𑀫𑀳𑀸𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑁂 𑀏𑀯𑀁 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀧𑀺𑀢𑀽𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀭𑀚𑁆𑀚𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀺𑀢𑀪𑀸𑀯𑀜𑁆𑀘𑁂𑀯 𑀑𑀯𑀸𑀤𑁂 𑀯𑀢𑁆𑀢𑀦𑀪𑀸𑀯𑀜𑁆𑀘 𑀚𑀸𑀦𑀸𑀧𑁂𑀢𑀼𑀁 𑀧𑀡𑁆𑀡𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀧𑀡𑁆𑀡𑀸𑀦𑀺 𑀧𑀳𑀺𑀡𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸𑀯 𑀳𑁄𑀣𑀸’’𑀢𑀺 𑀧𑀡𑁆𑀡𑀸𑀦𑀺 𑀧𑀝𑀺𑀧𑁂𑀲𑁂𑀲𑀺.
𑀢𑁂𑀲𑀼 𑀩𑀸𑀭𑀸𑀡𑀲𑀺𑀭𑀸𑀚𑀸 𑀯𑀺𑀦𑀸 𑀫𑀁𑀲𑁂𑀦 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺. 𑀉𑀧𑁄𑀲𑀣𑀤𑀺𑀯𑀲𑀢𑁆𑀣𑀸𑀬𑀧𑀺𑀲𑁆𑀲 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀞𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀯𑀁 𑀞𑀧𑀺𑀢𑀫𑀁𑀲𑀁 𑀪𑀢𑁆𑀢𑀓𑀸𑀭𑀓𑀲𑁆𑀲 𑀧𑀫𑀸𑀤𑁂𑀦 𑀭𑀸𑀚𑀕𑁂𑀳𑁂 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑀸 𑀔𑀸𑀤𑀺𑀁𑀲𑀼. 𑀪𑀢𑁆𑀢𑀓𑀸𑀭𑀓𑁄 𑀢𑀁 𑀫𑀁𑀲𑀁 𑀅𑀤𑀺𑀢𑁆𑀯𑀸 𑀓𑀳𑀸𑀧𑀡𑀫𑀼𑀝𑁆𑀞𑀺𑀁 𑀆𑀤𑀸𑀬 𑀘𑀭𑀦𑁆𑀢𑁄𑀧𑀺 𑀫𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀘𑁂 𑀅𑀫𑀁𑀲𑀓𑀪𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀯𑀺𑀓𑀸𑀮𑁂 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀊𑀭𑀼𑀫𑀁𑀲𑀁 𑀆𑀳𑀭𑀺𑀢𑁆𑀯𑀸 𑀲𑀼𑀧𑀓𑁆𑀓𑀁 𑀧𑀘𑀺𑀢𑁆𑀯𑀸 𑀪𑀢𑁆𑀢𑀁 𑀉𑀧𑀦𑀸𑀫𑁂𑀲𑀺. 𑀭𑀜𑁆𑀜𑁄 𑀫𑀁𑀲𑀔𑀡𑁆𑀟𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑀫𑀢𑁆𑀢𑀫𑁂𑀯 𑀲𑀢𑁆𑀢 𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀨𑀭𑀺, 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀓𑀺𑀁𑀓𑀸𑀭𑀡𑀸? 𑀧𑀼𑀩𑁆𑀩𑁂 𑀘𑀲𑁆𑀲 𑀲𑁂𑀯𑀦𑀢𑀸𑀬. 𑀲𑁄 𑀓𑀺𑀭 𑀅𑀢𑀻𑀢𑀸𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀩𑀳𑀼𑀁 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑀧𑀼𑀩𑁆𑀩𑁄, 𑀢𑁂𑀦𑀲𑁆𑀲 𑀢𑀁 𑀧𑀺𑀬𑀁 𑀅𑀳𑁄𑀲𑀺 ¶ . 𑀲𑁄 ‘‘𑀲𑀘𑀸𑀳𑀁 𑀢𑀼𑀡𑁆𑀳𑀻𑀬𑁂𑀯 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀦 𑀫𑁂 𑀅𑀬𑀁 𑀇𑀫𑀁 𑀫𑀁𑀲𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀳 𑀔𑁂𑀴𑁂𑀦 𑀪𑀽𑀫𑀺𑀬𑀁 𑀧𑀸𑀢𑁂𑀲𑀺. ‘‘𑀦𑀺𑀤𑁆𑀤𑁄𑀲𑀁, 𑀤𑁂𑀯, 𑀔𑀸𑀤𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀫𑀦𑀼𑀲𑁆𑀲𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 ‘‘𑀅𑀳𑀫𑁂𑀢𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀁 𑀚𑀸𑀦𑀸𑀫𑀺, 𑀓𑀺𑀁 𑀦𑀸𑀫𑁂𑀢𑀁 𑀫𑀁𑀲’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀧𑀭𑀺𑀪𑁄𑀕𑀫𑀁𑀲𑀫𑁂𑀯, 𑀤𑁂𑀯𑀸’’𑀢𑀺. ‘‘𑀦𑀦𑀼 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀬𑀁 𑀭𑀲𑁄 𑀦𑀢𑁆𑀣𑀻’’𑀢𑀺? ‘‘𑀅𑀚𑁆𑀚 𑀲𑀼𑀧𑀓𑁆𑀓𑀁, 𑀤𑁂𑀯𑀸’’𑀢𑀺. ‘‘𑀦𑀦𑀼 𑀧𑀼𑀩𑁆𑀩𑁂𑀧𑀺 𑀏𑀯𑀫𑁂𑀯 𑀧𑀘𑀲𑀻’’𑀢𑀺. 𑀅𑀣 𑀦𑀁 𑀢𑀼𑀡𑁆𑀳𑀻𑀪𑀽𑀢𑀁 𑀜𑀢𑁆𑀯𑀸 ‘‘𑀲𑀪𑀸𑀯𑀁 𑀓𑀣𑁂𑀳𑀺, 𑀦𑁄 𑀘𑁂 𑀓𑀣𑁂𑀲𑀺, 𑀚𑀻𑀯𑀺𑀢𑀁 𑀢𑁂 𑀦𑀢𑁆𑀣𑀻’’𑀢𑀺 𑀆𑀳. 𑀲𑁄 𑀅𑀪𑀬𑀁 𑀬𑀸𑀘𑀺𑀢𑁆𑀯𑀸 𑀬𑀣𑀸𑀪𑀽𑀢𑀁 𑀓𑀣𑁂𑀲𑀺. 𑀭𑀸𑀚𑀸 ‘‘𑀫𑀸 𑀲𑀤𑁆𑀤𑀫𑀓𑀸𑀲𑀺, 𑀧𑀓𑀢𑀺𑀬𑀸 𑀧𑀘𑀦𑀓𑀫𑀁𑀲𑀁 𑀢𑁆𑀯𑀁 𑀔𑀸𑀤𑀺𑀢𑁆𑀯𑀸 𑀫𑀬𑁆𑀳𑀁 𑀫𑀦𑀼𑀲𑁆𑀲𑀫𑀁𑀲𑀫𑁂𑀯 𑀧𑀘𑀸𑀳𑀻’’𑀢𑀺 𑀆𑀳. ‘‘𑀦𑀦𑀼 𑀤𑀼𑀓𑁆𑀓𑀭𑀁, 𑀤𑁂𑀯𑀸’’𑀢𑀺? ‘‘𑀫𑀸 𑀪𑀸𑀬𑀺, 𑀦 𑀤𑀼𑀓𑁆𑀓𑀭’’𑀦𑁆𑀢𑀺. ‘‘𑀦𑀺𑀩𑀤𑁆𑀥𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺? ‘‘𑀦𑀦𑀼 𑀩𑀦𑁆𑀥𑀦𑀸𑀕𑀸𑀭𑁂 𑀩𑀳𑀽 𑀫𑀦𑀼𑀲𑁆𑀲𑀸’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀅𑀓𑀸𑀲𑀺.
𑀅𑀧𑀭𑀪𑀸𑀕𑁂 ¶ 𑀩𑀦𑁆𑀥𑀦𑀸𑀕𑀸𑀭𑁂 𑀫𑀦𑀼𑀲𑁆𑀲𑁂𑀲𑀼 𑀔𑀻𑀡𑁂𑀲𑀼 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺 𑀆𑀳. ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀔𑀺𑀧𑀺𑀢𑁆𑀯𑀸 𑀬𑁄 𑀢𑀁 𑀕𑀡𑁆𑀳𑀸𑀢𑀺, 𑀢𑀁 ‘𑀘𑁄𑀭𑁄’𑀢𑀺 𑀕𑀳𑁂𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀪𑀬𑁂𑀦 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀑𑀮𑁄𑀓𑁂𑀦𑁆𑀢𑀫𑁆𑀧𑀺 𑀅𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀬𑀤𑀸 𑀪𑁂𑀭𑀺𑀯𑁂𑀮𑀸𑀬 𑀦𑀕𑀭𑀁 𑀆𑀓𑀼𑀮𑀁 𑀳𑁄𑀢𑀺, 𑀢𑀤𑀸 𑀢𑁆𑀯𑀁 𑀧𑀦 𑀏𑀓𑀲𑁆𑀫𑀺𑀁 ¶ 𑀖𑀭𑀲𑀦𑁆𑀥𑀺𑀫𑁆𑀳𑀺 𑀯𑀸 𑀯𑀻𑀣𑀺𑀬𑀁 𑀯𑀸 𑀘𑀢𑀼𑀓𑁆𑀓𑁂 𑀯𑀸 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀓𑀢𑁆𑀯𑀸 𑀣𑀽𑀮𑀫𑀁𑀲𑀁 𑀆𑀤𑀸𑀬 𑀕𑀘𑁆𑀙𑀢𑀺. 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑀴𑁂𑀯𑀭𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀫𑀫 𑀫𑀸𑀢𑀸 𑀦 𑀧𑀜𑁆𑀜𑀸𑀬𑀢𑀺, 𑀫𑀫 𑀧𑀺𑀢𑀸 𑀦 𑀧𑀜𑁆𑀜𑀸𑀬𑀢𑀺, 𑀫𑀫 𑀪𑀸𑀢𑀸 𑀪𑀕𑀺𑀦𑀻 𑀘 𑀦 𑀧𑀜𑁆𑀜𑀸𑀬𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀤𑁂𑀯𑀦𑀲𑀤𑁆𑀤𑁄 𑀲𑀽𑀬𑀢𑀺. 𑀦𑀸𑀕𑀭𑀸 𑀪𑀻𑀢𑀢𑀲𑀺𑀢𑀸 ‘‘𑀇𑀫𑁂 𑀫𑀦𑀼𑀲𑁆𑀲𑁂 𑀲𑀻𑀳𑁄 𑀦𑀼 𑀔𑁄 𑀔𑀸𑀤𑀢𑀺, 𑀩𑁆𑀬𑀕𑁆𑀖𑁄 𑀦𑀼 𑀔𑁄 𑀔𑀸𑀤𑀢𑀺, 𑀬𑀓𑁆𑀔𑁄 𑀦𑀼 𑀔𑁄 𑀔𑀸𑀤𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀸 𑀧𑀳𑀸𑀭𑀫𑀼𑀔𑀁 𑀤𑀺𑀲𑁆𑀯𑀸 ‘‘𑀏𑀓𑁄 𑀫𑀦𑀼𑀲𑁆𑀲𑀔𑀸𑀤𑀓𑁄 𑀘𑁄𑀭𑁄 𑀇𑀫𑁂 𑀔𑀸𑀤𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀺. 𑀫𑀳𑀸𑀚𑀦𑀸 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑀓𑁆𑀓𑁄𑀲𑀺𑀁𑀲𑀼. 𑀭𑀸𑀚𑀸 ‘‘𑀓𑀺𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀫𑀦𑀼𑀲𑁆𑀲𑀔𑀸𑀤𑀓𑁄 𑀘𑁄𑀭𑁄 𑀅𑀢𑁆𑀣𑀺, 𑀢𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 𑀆𑀳𑀁𑀲𑀼. ‘‘𑀅𑀳𑀁 𑀓𑀣𑀁 𑀢𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀓𑀺𑀁 𑀅𑀳𑀁 𑀦𑀕𑀭𑀁 𑀭𑀓𑁆𑀔𑀦𑁆𑀢𑁄𑀧𑀺 𑀘𑀭𑀸𑀫𑀻’’𑀢𑀺.
𑀫𑀳𑀸𑀚𑀦𑀸 ‘‘𑀭𑀸𑀚𑀸 𑀦𑀕𑀭𑁂𑀦 ¶ 𑀅𑀦𑀢𑁆𑀣𑀺𑀓𑁄, 𑀓𑀸𑀴𑀳𑀢𑁆𑀣𑀺𑀲𑁂𑀦𑀸𑀧𑀢𑀺𑀲𑁆𑀲 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀢𑀁 𑀓𑀣𑁂𑀢𑁆𑀯𑀸 ‘‘𑀘𑁄𑀭𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀲𑀸𑀥𑀼 𑀲𑀢𑁆𑀢𑀸𑀳𑀁 𑀆𑀕𑀫𑁂𑀣, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀘𑁄𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀚𑀦𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺, ‘‘𑀢𑀸𑀢𑀸, 𑀦𑀕𑀭𑁂 𑀓𑀺𑀭 𑀫𑀦𑀼𑀲𑁆𑀲𑀔𑀸𑀤𑀓𑁄 𑀘𑁄𑀭𑁄 𑀅𑀢𑁆𑀣𑀺, 𑀢𑀼𑀫𑁆𑀳𑁂 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀦𑀺𑀮𑀻𑀬𑀺𑀢𑁆𑀯𑀸 𑀢𑀁 𑀕𑀡𑁆𑀳𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀦𑀕𑀭𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀪𑀢𑁆𑀢𑀓𑀸𑀭𑀓𑁄𑀧𑀺 𑀏𑀓𑀲𑁆𑀫𑀺𑀁 𑀖𑀭𑀲𑀦𑁆𑀥𑀺𑀫𑁆𑀳𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀏𑀓𑀁 𑀇𑀢𑁆𑀣𑀺𑀁 𑀫𑀸𑀭𑁂𑀢𑁆𑀯𑀸 𑀖𑀦𑀖𑀦𑀫𑀁𑀲𑀁 𑀆𑀤𑀸𑀬 𑀧𑀘𑁆𑀙𑀺𑀬𑀁 𑀧𑀽𑀭𑁂𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀢𑁂 𑀧𑀼𑀭𑀺𑀲𑀸 𑀕𑀳𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀕𑀳𑀺𑀢𑁄 𑀫𑀦𑀼𑀲𑁆𑀲𑀔𑀸𑀤𑀓𑁄 𑀘𑁄𑀭𑁄’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑀺𑀁𑀲𑀼. 𑀫𑀳𑀸𑀚𑀦𑁄 𑀢𑀁 𑀧𑀭𑀺𑀯𑀸𑀭𑁂𑀲𑀺. 𑀅𑀣 𑀦𑀁 𑀲𑀼𑀝𑁆𑀞𑀼 𑀩𑀦𑁆𑀥𑀺𑀢𑁆𑀯𑀸 𑀫𑀁𑀲𑀧𑀘𑁆𑀙𑀺𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀲𑁂𑀦𑀸𑀧𑀢𑀺𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀲𑁂𑀦𑀸𑀧𑀢𑀺 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀲 𑀇𑀫𑀁 𑀫𑀁𑀲𑀁 𑀔𑀸𑀤𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀦 𑀫𑀁𑀲𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀸𑀢𑀺, 𑀉𑀤𑀸𑀳𑀼 ¶ 𑀅𑀜𑁆𑀜𑀲𑁆𑀲 𑀯𑀘𑀦𑁂𑀦 𑀫𑀸𑀭𑁂𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋
‘‘𑀓𑀲𑁆𑀫𑀸 𑀢𑀼𑀯𑀁 𑀭𑀲𑀓 𑀏𑀤𑀺𑀲𑀸𑀦𑀺, 𑀓𑀭𑁄𑀲𑀺 𑀓𑀫𑁆𑀫𑀸𑀦𑀺 𑀲𑀼𑀤𑀸𑀭𑀼𑀡𑀸𑀦𑀺;
𑀳𑀦𑀸𑀲𑀺 𑀇𑀢𑁆𑀣𑀻 𑀧𑀼𑀭𑀺𑀲𑁂 𑀘 𑀫𑀽𑀴𑁆𑀳𑁄, 𑀫𑀁𑀲𑀲𑁆𑀲 𑀳𑁂𑀢𑀼 𑀅𑀤𑀼 𑀥𑀦𑀲𑁆𑀲 𑀓𑀸𑀭𑀡𑀸’’𑀢𑀺.
𑀢𑀢𑁆𑀣 𑀭𑀲𑀓𑀸𑀢𑀺 𑀪𑀢𑁆𑀢𑀓𑀸𑀭𑀡𑀁 𑀆𑀮𑀧𑀢𑀺.
𑀇𑀢𑁄 𑀧𑀭𑀁 𑀉𑀢𑁆𑀢𑀸𑀦𑀲𑀫𑁆𑀩𑀦𑁆𑀥𑀸𑀦𑀺 𑀯𑀘𑀦𑀧𑀝𑀺𑀯𑀘𑀦𑀸𑀦𑀺 𑀧𑀸𑀴𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋
‘‘𑀦 ¶ 𑀅𑀢𑁆𑀢𑀳𑁂𑀢𑀽 𑀦 𑀥𑀦𑀲𑁆𑀲 𑀓𑀸𑀭𑀡𑀸, 𑀦 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀳𑀸𑀬𑀜𑀸𑀢𑀺𑀦𑀁;
𑀪𑀢𑁆𑀢𑀸 𑀘 𑀫𑁂 𑀪𑀕𑀯𑀸 𑀪𑀽𑀫𑀺𑀧𑀸𑀮𑁄, 𑀲𑁄 𑀔𑀸𑀤𑀢𑀺 𑀫𑀁𑀲𑀁 𑀪𑀤𑀦𑁆𑀢𑁂𑀤𑀺𑀲𑀁.
‘‘𑀲𑀘𑁂 𑀢𑀼𑀯𑀁 𑀪𑀢𑁆𑀢𑀼𑀭𑀢𑁆𑀣𑁂 𑀧𑀬𑀼𑀢𑁆𑀢𑁄, 𑀓𑀭𑁄𑀲𑀺 𑀓𑀫𑁆𑀫𑀸𑀦𑀺 𑀲𑀼𑀤𑀸𑀭𑀼𑀡𑀸𑀦𑀺;
𑀧𑀸𑀢𑁄𑀯 ¶ 𑀅𑀦𑁆𑀢𑁂𑀧𑀼𑀭𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀮𑀧𑁂𑀬𑁆𑀬𑀸𑀲𑀺 𑀫𑁂 𑀭𑀸𑀚𑀺𑀦𑁄 𑀲𑀫𑁆𑀫𑀼𑀔𑁂 𑀢𑀁.
‘‘𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀅𑀳𑀁 𑀪𑀤𑀦𑁆𑀢𑁂, 𑀬𑀣𑀸 𑀢𑀼𑀯𑀁 𑀪𑀸𑀲𑀲𑀺 𑀓𑀸𑀴𑀳𑀢𑁆𑀣𑀺;
𑀧𑀸𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀯𑀓𑁆𑀔𑀸𑀫𑀺 𑀢𑁂 𑀭𑀸𑀚𑀺𑀦𑁄 𑀲𑀫𑁆𑀫𑀼𑀔𑁂 𑀢’’𑀦𑁆𑀢𑀺.
𑀢𑀢𑁆𑀣 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀲𑀘𑁂 𑀢𑀼𑀯𑀦𑁆𑀢𑀺 ‘‘𑀲𑀘𑁆𑀘𑀁 𑀦𑀼 𑀔𑁄 𑀪𑀡𑀢𑀺, 𑀉𑀤𑀸𑀳𑀼 𑀫𑀭𑀡𑀪𑀬𑁂𑀦 𑀫𑀼𑀲𑀸 𑀪𑀡𑀢𑀻’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀲𑀼𑀤𑀸𑀭𑀼𑀡𑀸𑀦𑀻𑀢𑀺 𑀫𑀦𑀼𑀲𑁆𑀲𑀖𑀸𑀢𑀓𑀫𑁆𑀫𑀸𑀦𑀺. 𑀲𑀫𑁆𑀫𑀼𑀔𑁂 𑀢𑀦𑁆𑀢𑀺 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬𑀸𑀲𑀻𑀢𑀺. 𑀲𑁄 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳.
𑀅𑀣 𑀦𑀁 𑀲𑁂𑀦𑀸𑀧𑀢𑀺 𑀕𑀸𑀴𑁆𑀳𑀩𑀦𑁆𑀥𑀦𑀫𑁂𑀯 𑀲𑀬𑀸𑀧𑁂𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀅𑀫𑀘𑁆𑀘𑁂𑀳𑀺 𑀘 𑀦𑀸𑀕𑀭𑁂𑀳𑀺 𑀘 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑁂𑀲𑀼 𑀏𑀓𑀘𑁆𑀙𑀦𑁆𑀤𑁂𑀲𑀼 𑀚𑀸𑀢𑁂𑀲𑀼 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀦𑀕𑀭𑀁 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀭𑀲𑀓𑀲𑁆𑀲 𑀕𑀻𑀯𑀸𑀬𑀁 𑀫𑀁𑀲𑀧𑀘𑁆𑀙𑀺𑀁 ¶ 𑀩𑀦𑁆𑀥𑀺𑀢𑁆𑀯𑀸 𑀆𑀤𑀸𑀬 𑀭𑀸𑀚𑀦𑀺𑀯𑁂𑀲𑀦𑀁 𑀧𑀸𑀬𑀸𑀲𑀺. 𑀲𑀓𑀮𑀦𑀕𑀭𑀁 𑀯𑀺𑀭𑀯𑀺. 𑀭𑀸𑀚𑀸 𑀳𑀺𑀬𑁆𑀬𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀲𑀸𑀬𑀫𑀸𑀲𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 ‘‘𑀭𑀲𑀓𑁄 𑀇𑀤𑀸𑀦𑀺 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀘𑁆𑀙𑀲𑁆𑀲𑀢𑀻’’𑀢𑀺 𑀦𑀺𑀲𑀺𑀦𑁆𑀦𑁄𑀯 𑀢𑀁 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘‘𑀅𑀚𑁆𑀚𑀧𑀺 𑀭𑀲𑀓𑁄 𑀦𑀸𑀕𑀘𑁆𑀙𑀢𑀺, 𑀦𑀸𑀕𑀭𑀸𑀦𑀜𑁆𑀘 𑀫𑀳𑀸𑀲𑀤𑁆𑀤𑁄 𑀲𑀽𑀬𑀢𑀺, 𑀓𑀺𑀁 𑀦𑀽 𑀔𑁄 𑀏𑀢’’𑀦𑁆𑀢𑀺 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀢𑀣𑀸 𑀆𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀧𑀸𑀓𑀝𑀁 𑀇𑀤𑀁 𑀓𑀸𑀭𑀡𑀁 𑀚𑀸𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀬𑁂𑀯 𑀦𑀺𑀲𑀻𑀤𑀺. 𑀓𑀸𑀴𑀳𑀢𑁆𑀣𑀺𑀧𑀺 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀺, 𑀲𑁄𑀧𑀺𑀲𑁆𑀲 𑀓𑀣𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;
𑀓𑀸𑀴𑁄 𑀭𑀲𑀓𑀫𑀸𑀤𑀸𑀬, 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺;
𑀉𑀧𑀲𑀗𑁆𑀓𑀫𑁆𑀫 𑀭𑀸𑀚𑀸𑀦𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.
‘‘𑀲𑀘𑁆𑀘𑀁 𑀓𑀺𑀭 𑀫𑀳𑀸𑀭𑀸𑀚, 𑀭𑀲𑀓𑁄 𑀧𑁂𑀲𑀺𑀢𑁄 𑀢𑀬𑀸.
𑀳𑀦𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑁂, 𑀢𑀼𑀯𑀁 𑀫𑀁𑀲𑀸𑀦𑀺 𑀔𑀸𑀤𑀲𑀺.
‘‘𑀏𑀯𑀫𑁂𑀯 ¶ ¶ 𑀢𑀣𑀸 𑀓𑀸𑀴, 𑀭𑀲𑀓𑁄 𑀧𑁂𑀲𑀺𑀢𑁄 𑀫𑀬𑀸;
𑀫𑀫 𑀅𑀢𑁆𑀣𑀁 𑀓𑀭𑁄𑀦𑁆𑀢𑀲𑁆𑀲, 𑀓𑀺𑀫𑁂𑀢𑀁 𑀧𑀭𑀺𑀪𑀸𑀲𑀲𑀻’’𑀢𑀺.
𑀢𑀢𑁆𑀣 𑀓𑀸𑀴𑀸𑀢𑀺 𑀓𑀸𑀴𑀳𑀢𑁆𑀣𑀺. 𑀏𑀯𑀫𑁂𑀯𑀸𑀢𑀺 𑀢𑁂𑀦 𑀲𑁂𑀦𑀸𑀧𑀢𑀺𑀦𑀸 𑀢𑁂𑀚𑀯𑀦𑁆𑀢𑁂𑀦 𑀅𑀦𑀼𑀬𑀼𑀢𑁆𑀢𑁄 𑀭𑀸𑀚𑀸 𑀫𑀼𑀲𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀢𑀣𑀸𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲 𑀯𑁂𑀯𑀘𑀦𑀁. 𑀫𑀫 𑀅𑀢𑁆𑀣𑀦𑁆𑀢𑀺 𑀫𑀫 𑀯𑀼𑀟𑁆𑀠𑀺𑀁. 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀓𑀭𑁄𑀦𑁆𑀢𑀁. 𑀓𑀺𑀫𑁂𑀢𑀦𑁆𑀢𑀺 𑀓𑀲𑁆𑀫𑀸 𑀏𑀢𑀁. 𑀧𑀭𑀺𑀪𑀸𑀲𑀲𑀻𑀢𑀺 𑀅𑀳𑁄 𑀤𑀼𑀓𑁆𑀓𑀭𑀁 𑀓𑀭𑁄𑀲𑀺, 𑀓𑀸𑀴𑀳𑀢𑁆𑀣𑀺 𑀢𑁆𑀯𑀁 𑀦𑀸𑀫 𑀅𑀜𑁆𑀜𑀁 𑀘𑁄𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀫 𑀧𑁂𑀲𑀦𑀓𑀸𑀭𑀓𑀁 𑀕𑀡𑁆𑀳𑀸𑀲𑀻𑀢𑀺 𑀢𑀲𑁆𑀲 𑀪𑀬𑀁 𑀚𑀦𑁂𑀦𑁆𑀢𑁄 𑀓𑀣𑁂𑀲𑀺.
𑀢𑀁 𑀲𑀼𑀢𑁆𑀯𑀸 𑀲𑁂𑀦𑀸𑀧𑀢𑀺 ‘‘𑀅𑀬𑀁 𑀲𑀓𑁂𑀦𑁂𑀯 𑀫𑀼𑀔𑁂𑀦 𑀧𑀝𑀺𑀚𑀸𑀦𑀸𑀢𑀺, 𑀅𑀳𑁄 𑀲𑀸𑀳𑀲𑀺𑀓𑁄, 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀇𑀫𑁂 𑀫𑀦𑀼𑀲𑁆𑀲𑀸 𑀏𑀢𑁂𑀦 𑀔𑀸𑀤𑀺𑀢𑀸, 𑀯𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀫𑀳𑀸𑀭𑀸𑀚, 𑀫𑀸 𑀏𑀯𑀁 𑀓𑀭𑀺, 𑀫𑀸 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀲𑀻’’𑀢𑀺. ‘‘𑀓𑀸𑀴𑀳𑀢𑁆𑀣𑀺 𑀓𑀺𑀁 𑀓𑀣𑁂𑀲𑀺, 𑀦𑀸𑀳𑀁 𑀯𑀺𑀭𑀫𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀲𑀘𑁂 𑀦 𑀯𑀺𑀭𑀫𑀺𑀲𑁆𑀲𑀲𑀺, 𑀅𑀢𑁆𑀢𑀸𑀦𑀜𑁆𑀘 𑀭𑀝𑁆𑀞𑀜𑁆𑀘 𑀦𑀸𑀲𑁂𑀲𑁆𑀲𑀲𑀻’’𑀢𑀺. ‘‘𑀏𑀯𑀁 𑀦𑀲𑁆𑀲𑀦𑁆𑀢𑁂𑀧𑀺 𑀅𑀳𑀁 𑀦𑁂𑀯 𑀢𑀢𑁄 𑀯𑀺𑀭𑀫𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺. 𑀢𑀢𑁄 𑀲𑁂𑀦𑀸𑀧𑀢𑀺 𑀢𑀲𑁆𑀲 𑀲𑀜𑁆𑀜𑀸𑀧𑀦𑀢𑁆𑀣𑀸𑀬 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺 𑁋 𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀫𑀳𑀸𑀲𑀫𑀼𑀤𑁆𑀤𑁂 𑀙 𑀫𑀳𑀸𑀫𑀘𑁆𑀙𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀆𑀦𑀦𑁆𑀤𑁄 𑀢𑀺𑀫𑀺𑀦𑀦𑁆𑀤𑁄 𑀅𑀚𑁆𑀛𑀸𑀭𑁄𑀳𑁄𑀢𑀺 ¶ 𑀇𑀫𑁂 𑀢𑀬𑁄 𑀫𑀘𑁆𑀙𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸, 𑀢𑀺𑀫𑀺𑀗𑁆𑀕𑀮𑁄 𑀢𑀺𑀫𑀺𑀭𑀧𑀺𑀗𑁆𑀕𑀮𑁄 𑀫𑀳𑀸𑀢𑀺𑀫𑀺𑀭𑀧𑀺𑀗𑁆𑀕𑀮𑁄𑀢𑀺 𑀇𑀫𑁂 𑀢𑀬𑁄 𑀫𑀘𑁆𑀙𑀸 𑀲𑀳𑀲𑁆𑀲𑀬𑁄𑀚𑀦𑀺𑀓𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀧𑀸𑀲𑀸𑀡𑀲𑁂𑀯𑀸𑀮𑀪𑀓𑁆𑀔𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀆𑀦𑀦𑁆𑀤𑁄 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀏𑀓𑀧𑀲𑁆𑀲𑁂 𑀯𑀲𑀢𑀺. 𑀢𑀁 𑀩𑀳𑀽 𑀫𑀘𑁆𑀙𑀸 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀏𑀓𑀤𑀺𑀯𑀲𑀁 ‘‘𑀲𑀩𑁆𑀩𑁂𑀲𑀁 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀲𑀢𑁆𑀢𑀸𑀦𑀁 𑀭𑀸𑀚𑀸 𑀧𑀜𑁆𑀜𑀸𑀬𑀢𑀺, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀦𑀢𑁆𑀣𑀺, 𑀫𑀬𑀫𑁆𑀧𑁂𑀢𑀁 𑀭𑀸𑀚𑀸𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀆𑀦𑀦𑁆𑀤𑀁 𑀭𑀸𑀚𑀸𑀦𑀁 𑀓𑀭𑀺𑀁𑀲𑀼. 𑀢𑁂 𑀫𑀘𑁆𑀙𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀲𑀸𑀬𑀁 𑀧𑀸𑀢𑁄𑀯 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺.
𑀅𑀣𑁂𑀓𑀤𑀺𑀯𑀲𑀁 𑀆𑀦𑀦𑁆𑀤𑁄 𑀏𑀓𑀲𑁆𑀫𑀺𑀁 𑀧𑀩𑁆𑀩𑀢𑁂 𑀧𑀸𑀲𑀸𑀡𑀲𑁂𑀯𑀸𑀮𑀁 𑀔𑀸𑀤𑀦𑁆𑀢𑁄 𑀅𑀚𑀸𑀦𑀺𑀢𑁆𑀯𑀸 ‘‘𑀲𑁂𑀯𑀸𑀮𑁄’’𑀢𑀺 𑀲𑀜𑁆𑀜𑀸𑀬 𑀏𑀓𑀁 𑀫𑀘𑁆𑀙𑀁 ¶ 𑀔𑀸𑀤𑀺. 𑀢𑀲𑁆𑀲 𑀢𑀁 𑀫𑀁𑀲𑀁 𑀔𑀸𑀤𑀦𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀲𑀗𑁆𑀔𑁄𑀪𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀇𑀤𑀁 𑀅𑀢𑀺𑀯𑀺𑀬 𑀫𑀥𑀼𑀭’’𑀦𑁆𑀢𑀺 𑀦𑀻𑀳𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀫𑀘𑁆𑀙𑀫𑀁𑀲𑀔𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀚𑀸𑀦𑀺𑀢𑁆𑀯𑀸 𑀦 𑀔𑀸𑀤𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀸𑀬𑀁 𑀧𑀸𑀢𑁄𑀧𑀺 𑀫𑀘𑁆𑀙𑀸𑀦𑀁 𑀆𑀕𑀦𑁆𑀢𑁆𑀯𑀸 𑀕𑀫𑀦𑀓𑀸𑀮𑁂 𑀏𑀓𑀁 𑀤𑁆𑀯𑁂 𑀫𑀘𑁆𑀙𑁂 𑀔𑀸𑀤𑀺𑀲𑁆𑀲𑀸𑀫𑀺, 𑀧𑀸𑀓𑀝𑀁 𑀓𑀢𑁆𑀯𑀸 𑀔𑀸𑀤𑀺𑀬𑀫𑀸𑀦𑁂 𑀏𑀓𑁄𑀧𑀺 𑀫𑀁 𑀦 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺, 𑀲𑀩𑁆𑀩𑁂 𑀧𑀮𑀸𑀬𑀺𑀲𑁆𑀲𑀦𑁆𑀢𑀺, 𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀑𑀲𑀓𑁆𑀓𑀺𑀢𑁄𑀲𑀓𑁆𑀓𑀺𑀢𑀁 𑀧𑀳𑀭𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀣𑀸 𑀓𑀢𑁆𑀯𑀸 𑀔𑀸𑀤𑀺. 𑀫𑀘𑁆𑀙𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀸 𑀘𑀺𑀦𑁆𑀢𑀬𑀺𑀁𑀲𑀼. ‘‘𑀓𑀼𑀢𑁄 𑀦𑀼 𑀔𑁄 𑀜𑀸𑀢𑀻𑀦𑀁 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀅𑀣𑁂𑀓𑁄 𑀧𑀡𑁆𑀟𑀺𑀢𑁄 𑀫𑀘𑁆𑀙𑁄 ‘‘𑀫𑀬𑁆𑀳𑀁 𑀆𑀦𑀦𑁆𑀤𑀲𑁆𑀲 𑀓𑀺𑀭𑀺𑀬𑀸 ¶ 𑀦 𑀭𑀼𑀘𑁆𑀘𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀘𑁆𑀙𑁂𑀲𑀼 𑀉𑀧𑀝𑁆𑀞𑀸𑀦𑀁 𑀕𑀢𑁂𑀲𑀼 𑀆𑀦𑀦𑁆𑀤𑀲𑁆𑀲 𑀓𑀡𑁆𑀡𑀧𑀢𑁆𑀢𑁂 𑀧𑀝𑀺𑀘𑁆𑀙𑀦𑁆𑀦𑁄 𑀅𑀝𑁆𑀞𑀸𑀲𑀺. 𑀆𑀦𑀦𑁆𑀤𑁄 𑀫𑀘𑁆𑀙𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀁 𑀫𑀘𑁆𑀙𑀁 𑀔𑀸𑀤𑀺. 𑀲𑁄 𑀧𑀡𑁆𑀟𑀺𑀢𑀫𑀘𑁆𑀙𑁄 𑀢𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀇𑀢𑀭𑁂𑀲𑀁 𑀆𑀭𑁄𑀘𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀪𑀻𑀢𑀢𑀲𑀺𑀢𑀸 𑀧𑀮𑀸𑀬𑀺𑀁𑀲𑀼.
𑀆𑀦𑀦𑁆𑀤𑁄 𑀢𑀢𑁄 𑀧𑀝𑁆𑀞𑀸𑀬 𑀫𑀘𑁆𑀙𑀫𑀁𑀲𑀕𑀺𑀤𑁆𑀥𑁂𑀦 𑀅𑀜𑁆𑀜𑀁 𑀕𑁄𑀘𑀭𑀁 𑀦 𑀕𑀡𑁆𑀳𑀺. 𑀲𑁄 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀢𑁄 𑀓𑀺𑀮𑀦𑁆𑀢𑁄 ‘‘𑀓𑀳𑀁 𑀦𑀼 𑀔𑁄 𑀇𑀫𑁂 𑀕𑀢𑀸’’𑀢𑀺 𑀢𑁂 𑀫𑀘𑁆𑀙𑁂 𑀧𑀭𑀺𑀬𑁂𑀲𑀦𑁆𑀢𑁄 𑀏𑀓𑀁 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 ‘‘𑀫𑀫 𑀪𑀬𑁂𑀦 𑀇𑀫𑀁 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀺 𑀫𑀜𑁆𑀜𑁂, 𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀦𑀗𑁆𑀕𑀼𑀝𑁆𑀞𑁂𑀦 𑀘 𑀲𑀻𑀲𑁂𑀦 𑀘 𑀉𑀪𑁄 𑀧𑀲𑁆𑀲𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀺. 𑀢𑀢𑁄 ‘‘𑀲𑀘𑁂 𑀇𑀥 𑀯𑀲𑀦𑁆𑀢𑀺, 𑀧𑀮𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀁 𑀅𑀢𑁆𑀢𑀦𑁄 𑀦𑀗𑁆𑀕𑀼𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀘𑁆𑀙𑁄 𑀫𑀁 𑀯𑀜𑁆𑀘𑁂𑀢𑁆𑀯𑀸 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀯𑀲𑀢𑀻’’𑀢𑀺 𑀓𑀼𑀤𑁆𑀥𑁄 𑀧𑀡𑁆𑀡𑀸𑀲𑀬𑁄𑀚𑀦𑀫𑀢𑁆𑀢𑀁 𑀲𑀓𑀦𑀗𑁆𑀕𑀼𑀝𑁆𑀞𑀔𑀡𑁆𑀟𑀁 𑀅𑀜𑁆𑀜𑀫𑀘𑁆𑀙𑀲𑀜𑁆𑀜𑀸𑀬 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀫𑀼𑀭𑀼𑀫𑀼𑀭𑀸𑀬𑀦𑁆𑀢𑁄 ¶ 𑀔𑀸𑀤𑀺, 𑀤𑀼𑀓𑁆𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀮𑁄𑀳𑀺𑀢𑀕𑀦𑁆𑀥𑁂𑀦 𑀫𑀘𑁆𑀙𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀮𑀼𑀜𑁆𑀚𑀺𑀢𑁆𑀯𑀸 𑀔𑀸𑀤𑀦𑁆𑀢𑀸 𑀬𑀸𑀯 𑀲𑀻𑀲𑀸 𑀆𑀕𑀫𑀁𑀲𑀼. 𑀫𑀳𑀸𑀲𑀭𑀻𑀭𑀢𑀸𑀬 ¶ 𑀧𑀭𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺, 𑀧𑀩𑁆𑀩𑀢𑀭𑀸𑀲𑀺 𑀯𑀺𑀬 𑀅𑀝𑁆𑀞𑀺𑀭𑀸𑀲𑀺 𑀅𑀳𑁄𑀲𑀺. 𑀆𑀓𑀸𑀲𑀘𑀸𑀭𑀺𑀦𑁄 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸 𑀫𑀦𑀼𑀲𑁆𑀲𑀸𑀦𑀁 𑀓𑀣𑀬𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸 𑀚𑀸𑀦𑀺𑀁𑀲𑀼. 𑀢𑀁 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀓𑀸𑀴𑀳𑀢𑁆𑀣𑀺 𑀆𑀳 𑁋
‘‘𑀆𑀦𑀦𑁆𑀤𑁄 𑀲𑀩𑁆𑀩𑀫𑀘𑁆𑀙𑀸𑀦𑀁, 𑀔𑀸𑀤𑀺𑀢𑁆𑀯𑀸 𑀭𑀲𑀕𑀺𑀤𑁆𑀥𑀺𑀫𑀸;
𑀧𑀭𑀺𑀓𑁆𑀔𑀻𑀡𑀸𑀬 𑀧𑀭𑀺𑀲𑀸𑀬, 𑀅𑀢𑁆𑀢𑀸𑀦𑀁 𑀔𑀸𑀤𑀺𑀬𑀸 𑀫𑀢𑁄.
‘‘𑀏𑀯𑀁 𑀧𑀫𑀢𑁆𑀢𑁄 𑀭𑀲𑀕𑀸𑀭𑀯𑁂 𑀭𑀢𑁆𑀢𑁄, 𑀩𑀸𑀮𑁄 𑀬𑀤𑀻 𑀆𑀬𑀢𑀺 𑀦𑀸𑀯𑀩𑀼𑀚𑁆𑀛𑀢𑀺;
𑀯𑀺𑀥𑀫𑁆𑀫 𑀧𑀼𑀢𑁆𑀢𑁂 𑀘𑀚𑀺 𑀜𑀸𑀢𑀓𑁂 𑀘, 𑀧𑀭𑀺𑀯𑀢𑁆𑀢𑀺𑀬 𑀅𑀢𑁆𑀢𑀸𑀦𑀜𑁆𑀜𑁂𑀯 𑀔𑀸𑀤𑀢𑀺.
‘‘𑀇𑀤𑀁 𑀢𑁂 𑀲𑀼𑀢𑁆𑀯𑀸𑀦 𑀯𑀺𑀕𑁂𑀢𑀼 𑀙𑀦𑁆𑀤𑁄, 𑀫𑀸 𑀪𑀓𑁆𑀔𑀬𑀻 𑀭𑀸𑀚 𑀫𑀦𑀼𑀲𑁆𑀲𑀫𑀁𑀲𑀁;
𑀫𑀸 𑀢𑁆𑀯𑀁 𑀇𑀫𑀁 𑀓𑁂𑀯𑀮𑀁 𑀯𑀸𑀭𑀺𑀚𑁄𑀯, 𑀤𑁆𑀯𑀺𑀧𑀤𑀸𑀥𑀺𑀧 𑀲𑀼𑀜𑁆𑀜𑀫𑀓𑀸𑀲𑀺 𑀭𑀝𑁆𑀞’’𑀦𑁆𑀢𑀺.
𑀢𑀢𑁆𑀣 𑀆𑀦𑀦𑁆𑀤𑁄𑀢𑀺, 𑀫𑀳𑀸𑀭𑀸𑀚, 𑀅𑀢𑀻𑀢𑀲𑁆𑀫𑀺𑀁 𑀓𑀸𑀮𑁂 𑀫𑀳𑀸𑀲𑀫𑀼𑀤𑁆𑀤𑁂 𑀧𑀜𑁆𑀘𑀲𑀢𑀬𑁄𑀚𑀦𑀺𑀓𑁄 𑀆𑀦𑀦𑁆𑀤𑁄 𑀦𑀸𑀫 𑀫𑀳𑀸𑀫𑀘𑁆𑀙𑁄 𑀲𑀩𑁆𑀩𑁂𑀲𑀁 𑀫𑀘𑁆𑀙𑀸𑀦𑀁 𑀭𑀸𑀚𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀏𑀓𑀧𑀲𑁆𑀲𑁂 𑀞𑀺𑀢𑁄. 𑀔𑀸𑀤𑀺𑀢𑁆𑀯𑀸𑀢𑀺 𑀲𑀓𑀚𑀸𑀢𑀺𑀓𑀸𑀦𑀁 𑀫𑀘𑁆𑀙𑀸𑀦𑀁 𑀭𑀲𑀕𑀺𑀤𑁆𑀥𑀺𑀫𑀸 𑀫𑀘𑁆𑀙𑁂 𑀔𑀸𑀤𑀺𑀢𑁆𑀯𑀸. 𑀧𑀭𑀺𑀓𑁆𑀔𑀻𑀡𑀸𑀬𑀸𑀢𑀺 𑀫𑀘𑁆𑀙𑀧𑀭𑀺𑀲𑀸𑀬 𑀔𑀬𑀧𑁆𑀧𑀢𑁆𑀢𑀸𑀬. 𑀅𑀢𑁆𑀢𑀸𑀦𑀦𑁆𑀢𑀺 𑀅𑀜𑁆𑀜𑀁 𑀕𑁄𑀘𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀧𑀡𑁆𑀡𑀸𑀲𑀬𑁄𑀚𑀦𑀫𑀢𑁆𑀢𑀁 𑀅𑀢𑁆𑀢𑀦𑁄 𑀦𑀗𑁆𑀕𑀼𑀝𑁆𑀞𑀔𑀡𑁆𑀟𑀁 𑀅𑀜𑁆𑀜𑀫𑀘𑁆𑀙𑀲𑀜𑁆𑀜𑀸𑀬 𑀔𑀸𑀤𑀺𑀢𑁆𑀯𑀸 𑀫𑀢𑁄 𑀫𑀭𑀡𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑁂 𑀧𑀩𑁆𑀩𑀢𑀫𑀢𑁆𑀢𑁄 ¶ 𑀅𑀝𑁆𑀞𑀺𑀭𑀸𑀲𑀺 𑀅𑀳𑁄𑀲𑀺. 𑀏𑀯𑀁 𑀧𑀫𑀢𑁆𑀢𑁄𑀢𑀺 𑀬𑀣𑀸 𑀫𑀳𑀸𑀫𑀘𑁆𑀙𑁄 𑀆𑀦𑀦𑁆𑀤𑁄, 𑀏𑀯𑀫𑁆𑀧𑀺 𑀢𑀣𑀸 𑀢𑁆𑀯𑀁 𑀢𑀡𑁆𑀳𑀸𑀭𑀲𑀕𑀺𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 𑀧𑀫𑀢𑁆𑀢𑁄 𑀧𑀫𑀸𑀤𑀪𑀸𑀯𑀧𑁆𑀧𑀢𑁆𑀢𑁄.
𑀭𑀲𑀕𑀸𑀭𑀯𑁂 𑀭𑀢𑁆𑀢𑁄𑀢𑀺 𑀫𑀦𑀼𑀲𑁆𑀲𑀫𑀁𑀲𑀲𑁆𑀲 𑀭𑀲𑀕𑀸𑀭𑀯𑁂 𑀭𑀢𑁆𑀢𑁄 𑀅𑀢𑀺𑀭𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀩𑀸𑀮𑁄𑀢𑀺 𑀬𑀤𑀺 𑀩𑀸𑀮𑁄 𑀤𑀼𑀧𑁆𑀧𑀜𑁆𑀜𑁄 𑀆𑀬𑀢𑀺𑀁 𑀅𑀦𑀸𑀕𑀢𑁂 𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀁 𑀦𑀸𑀯𑀩𑀼𑀚𑁆𑀛𑀢𑀺 𑀦 𑀚𑀸𑀦𑀸𑀢𑀺. 𑀯𑀺𑀥𑀫𑁆𑀫𑀸𑀢𑀺 𑀯𑀺𑀥𑀫𑁂𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸 ¶ . 𑀧𑀼𑀢𑁆𑀢𑁂𑀢𑀺 𑀧𑀼𑀢𑁆𑀢𑀥𑀻𑀢𑀭𑁄 𑀘. 𑀜𑀸𑀢𑀓𑁂 𑀘𑀸𑀢𑀺 𑀲𑁂𑀲𑀜𑀸𑀢𑀓𑁂 𑀘 𑀲𑀳𑀸𑀬𑁂 𑀘, 𑀯𑀺𑀥𑀫𑁆𑀫 𑀧𑀼𑀢𑁆𑀢𑁂 𑀘 𑀘𑀚𑀺𑀢𑁆𑀯𑀸 𑀜𑀸𑀢𑀓𑁂 𑀘𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀢𑁆𑀢𑀺𑀬𑀸𑀢𑀺 𑀅𑀜𑁆𑀜𑀁 𑀆𑀳𑀸𑀭𑀁 𑀅𑀮𑀪𑀺𑀢𑁆𑀯𑀸 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀢𑁄 𑀲𑀓𑀮𑀦𑀕𑀭𑀁 𑀧𑀭𑀺𑀯𑀢𑁆𑀢𑀺𑀬 𑀯𑀺𑀘𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀫𑀁𑀲𑀁 𑀅𑀮𑀪𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀔𑀸𑀤𑀦𑁆𑀢𑁄 𑀆𑀦𑀦𑁆𑀤𑁄 𑀫𑀘𑁆𑀙𑁄 𑀯𑀺𑀬 𑀅𑀢𑁆𑀢𑀸𑀦𑀜𑁆𑀜𑁂𑀯 𑀔𑀸𑀤𑀢𑀺.
𑀇𑀤𑀁 𑀢𑁂 𑀲𑀼𑀢𑁆𑀯𑀸𑀦𑀸𑀢𑀺, 𑀫𑀳𑀸𑀭𑀸𑀚, 𑀢𑁂 𑀢𑀼𑀬𑁆𑀳𑀁 𑀫𑀬𑀸 𑀆𑀦𑀻𑀢𑀁 𑀇𑀤𑀁 𑀉𑀤𑀸𑀳𑀭𑀡𑀁 𑀲𑀼𑀢𑁆𑀯𑀸 𑀙𑀦𑁆𑀤𑁄 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀦𑀘𑁆𑀙𑀦𑁆𑀤𑁄 𑀯𑀺𑀕𑁂𑀢𑀼 𑀯𑀺𑀕𑀘𑁆𑀙𑀢𑀼 𑀯𑀺𑀭𑀫𑀢𑀼. 𑀫𑀸 𑀪𑀓𑁆𑀔𑀬𑀻𑀢𑀺 𑀭𑀸𑀚 𑀫𑀦𑀼𑀲𑁆𑀲𑀫𑀁𑀲𑀁 𑀫𑀸 𑀪𑀓𑁆𑀔𑀬𑀺 𑀫𑀸 𑀔𑀸𑀤𑀺. 𑀫𑀸 𑀢𑁆𑀯𑀁 𑀇𑀫𑀁 𑀓𑁂𑀯𑀮𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑀁 𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑁄 𑀯𑀸𑀭𑀺𑀚𑁄 𑀆𑀦𑀦𑁆𑀤𑁄 𑀫𑀘𑁆𑀙𑁄 𑀇𑀯, 𑀪𑁄 𑀤𑁆𑀯𑀺𑀧𑀤𑀸𑀥𑀺𑀧, 𑀤𑁆𑀯𑀺𑀧𑀤𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀇𑀲𑁆𑀲𑀭 𑀫𑀳𑀸𑀭𑀸𑀚, 𑀢𑁆𑀯𑀁 𑀓𑁂𑀯𑀮𑀁 𑀲𑀘𑁆𑀘𑀢𑁄 𑀇𑀫𑀁 𑀢𑀯 𑀓𑀸𑀲𑀺𑀭𑀝𑁆𑀞𑀁 𑀦𑀕𑀭𑀁 𑀲𑀼𑀜𑁆𑀜𑀁 𑀫𑀸 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.
𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸, ‘‘𑀪𑁄 𑀓𑀸𑀴𑀳𑀢𑁆𑀣𑀺, 𑀦 𑀢𑁆𑀯𑀫𑁂𑀯 𑀉𑀧𑀫𑀁 𑀚𑀸𑀦𑀸𑀲𑀺, 𑀅𑀳𑀫𑁆𑀧𑀺 𑀚𑀸𑀦𑀸𑀫𑀻’’𑀢𑀺 𑀫𑀦𑀼𑀲𑁆𑀲𑀫𑀁𑀲𑀕𑀺𑀤𑁆𑀥𑀢𑀸𑀬 𑀧𑁄𑀭𑀸𑀡𑀓𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋
‘‘𑀲𑀼𑀚𑀸𑀢𑁄 𑀦𑀸𑀫 𑀦𑀸𑀫𑁂𑀦, 𑀑𑀭𑀲𑁄 𑀢𑀲𑁆𑀲 𑀅𑀢𑁆𑀭𑀚𑁄;
𑀚𑀫𑁆𑀩𑀼𑀧𑁂𑀲𑀺𑀫𑀮𑀤𑁆𑀥𑀸𑀦, 𑀫𑀢𑁄 𑀲𑁄 𑀢𑀲𑁆𑀲 𑀲𑀗𑁆𑀔𑀬𑁂.
‘‘𑀏𑀯𑀫𑁂𑀯 𑀅𑀳𑀁 𑀓𑀸𑀴, 𑀪𑀼𑀢𑁆𑀯𑀸 𑀪𑀓𑁆𑀔𑀁 𑀭𑀲𑀼𑀢𑁆𑀢𑀫𑀁;
𑀅𑀮𑀤𑁆𑀥𑀸 𑀫𑀸𑀦𑀼𑀲𑀁 𑀫𑀁𑀲𑀁, 𑀫𑀜𑁆𑀜𑁂 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺.
𑀢𑀢𑁆𑀣 𑀲𑀼𑀚𑀸𑀢𑁄 𑀦𑀸𑀫𑀸𑀢𑀺 𑀓𑀸𑀴𑀳𑀢𑁆𑀣𑀺 𑀓𑀼𑀝𑀼𑀫𑁆𑀩𑀺𑀓𑁄 𑀦𑀸𑀫𑁂𑀦 𑀲𑀼𑀚𑀸𑀢𑁄 𑀦𑀸𑀫, 𑀢𑀲𑁆𑀲 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄 𑀑𑀭𑀲𑁄 𑀚𑀫𑁆𑀩𑀼𑀧𑁂𑀲𑀺𑀁 𑀅𑀮𑀤𑁆𑀥𑀸𑀦 𑀅𑀮𑀪𑀺𑀢𑁆𑀯𑀸𑀦. 𑀫𑀢𑁄𑀢𑀺 𑀬𑀣𑀸 𑀢𑀲𑁆𑀲𑀸 𑀚𑀫𑁆𑀩𑀼𑀧𑁂𑀲𑀺𑀬𑀸 𑀲𑀗𑁆𑀔𑀬𑁂 𑀲𑁄 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑁄 𑀫𑀢𑁄, 𑀏𑀯𑀫𑁂𑀯 𑀅𑀳𑀁 𑀭𑀲𑀼𑀢𑁆𑀢𑀫𑀁 𑀅𑀜𑁆𑀜𑀭𑀲𑀸𑀦𑀁 𑀉𑀢𑁆𑀢𑀫𑀁 𑀫𑀦𑀼𑀲𑁆𑀲𑀸𑀦𑀁 𑀫𑀁𑀲𑀁 𑀪𑀼𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀤𑁆𑀥𑀸 𑀫𑀦𑀼𑀲𑁆𑀲𑀫𑀁𑀲𑀁 𑀚𑀻𑀯𑀺𑀢𑀁 𑀳𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑁂 𑀫𑀜𑁆𑀜𑀸𑀫𑀺.
𑀅𑀢𑀻𑀢𑁂 ¶ ¶ 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀲𑀼𑀚𑀸𑀢𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀢𑁄 𑀆𑀕𑀢𑀸𑀦𑀺 𑀧𑀜𑁆𑀘 𑀇𑀲𑀺𑀲𑀢𑀸𑀦𑀺 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀯𑀲𑀸𑀧𑁂𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀖𑀭𑁂 𑀘𑀲𑁆𑀲 𑀦𑀺𑀩𑀤𑁆𑀥𑀁 𑀧𑀜𑁆𑀘𑀲𑀢𑀫𑀢𑁆𑀢𑀸 𑀪𑀺𑀓𑁆𑀔𑀸 𑀅𑀳𑁄𑀲𑀺. 𑀢𑁂 𑀧𑀦 𑀢𑀸𑀧𑀲𑀸 𑀓𑀤𑀸𑀘𑀺 𑀚𑀦𑀧𑀤𑁂𑀧𑀺 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀺, 𑀓𑀤𑀸𑀘𑀺 𑀫𑀳𑀸𑀚𑀫𑁆𑀩𑀼𑀧𑁂𑀲𑀺𑀁 𑀆𑀳𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀢𑁂𑀲𑀁 𑀚𑀫𑁆𑀩𑀼𑀧𑁂𑀲𑀺𑀁 𑀆𑀳𑀭𑀺𑀢𑁆𑀯𑀸 𑀔𑀸𑀤𑀦𑀓𑀸𑀮𑁂 𑀲𑀼𑀚𑀸𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀪𑀤𑁆𑀤𑀦𑁆𑀢𑀸𑀦𑀁 𑀢𑀬𑁄 𑀘𑀢𑁆𑀢𑀸𑀭𑁄 𑀤𑀺𑀯𑀲𑀸 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁, 𑀓𑀳𑀁 𑀦𑀼 𑀔𑁄 𑀕𑀢𑀸’’𑀢𑀺. 𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑀁 𑀅𑀗𑁆𑀕𑀼𑀮𑀺𑀬𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑁂𑀲𑀁 𑀪𑀢𑁆𑀢𑀓𑀺𑀘𑁆𑀘𑀓𑀸𑀮𑁂 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀮𑁆𑀮𑀓𑀸𑀦𑀁 𑀫𑀼𑀔𑀯𑀺𑀓𑁆𑀔𑀸𑀮𑀦𑀓𑀸𑀮𑁂 𑀉𑀤𑀓𑀁 𑀤𑀢𑁆𑀯𑀸 𑀲𑀩𑁆𑀩𑀦𑀯𑀓𑁄 𑀚𑀫𑁆𑀩𑀼𑀧𑁂𑀲𑀺𑀁 𑀔𑀸𑀤𑀢𑀺. 𑀲𑀼𑀚𑀸𑀢𑁄 𑀢𑀸𑀧𑀲𑁂 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀔𑀸𑀤𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀚𑀫𑁆𑀩𑀼𑀧𑁂𑀲𑀺𑀁, 𑀆𑀯𑀼𑀲𑁄’’𑀢𑀺. 𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑁄 𑀧𑀺𑀧𑀸𑀲𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣𑀲𑁆𑀲 𑀕𑀡𑀚𑁂𑀝𑁆𑀞𑀓𑁄 𑀢𑀸𑀧𑀲𑁄 𑀣𑁄𑀓𑀁 𑀤𑀸𑀧𑁂𑀲𑀺. 𑀲𑁄 𑀢𑀁 𑀔𑀸𑀤𑀺𑀢𑁆𑀯𑀸 𑀫𑀥𑀼𑀭𑀭𑀲𑁂 𑀩𑀚𑁆𑀛𑀺𑀢𑁆𑀯𑀸 𑁋 ‘‘𑀚𑀫𑁆𑀩𑀼𑀧𑁂𑀲𑀺𑀁 𑀫𑁂 𑀤𑁂𑀣𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄, ‘‘𑀧𑀼𑀢𑁆𑀢𑀓, 𑀫𑀸 𑀯𑀺𑀭𑀯𑀺, 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀔𑀸𑀤𑀺𑀲𑁆𑀲𑀲𑀻’’𑀢𑀺 𑀢𑀁 𑀯𑀜𑁆𑀘𑁂𑀢𑁆𑀯𑀸 ‘‘𑀇𑀫𑀁 𑀦𑀺𑀲𑁆𑀲𑀸𑀬 𑀪𑀤𑀦𑁆𑀢𑀸 𑀉𑀓𑁆𑀓𑀡𑁆𑀞𑁂𑀬𑁆𑀬𑀼’’𑀦𑁆𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀇𑀲𑀺𑀕𑀡𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀕𑁂𑀳𑀁 𑀕𑀢𑁄. 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲 𑀧𑀼𑀢𑁆𑀢𑁄 ‘‘𑀚𑀫𑁆𑀩𑀼𑀧𑁂𑀲𑀺𑀁 𑀫𑁂 𑀤𑁂𑀣𑀸’’𑀢𑀺 𑀧𑀭𑀺𑀤𑁂𑀯𑀺. 𑀲𑀼𑀚𑀸𑀢𑁄 ‘‘𑀇𑀲𑀬𑁄𑀧𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀢𑁄. 𑀢𑁂 𑀇𑀲𑀬𑁄𑀧𑀺 ‘‘𑀇𑀥 𑀘𑀺𑀭𑀁 𑀯𑀲𑀺𑀫𑁆𑀳𑀸’’𑀢𑀺 𑀳𑀺𑀫𑀯𑀦𑁆𑀢𑀫𑁂𑀯 𑀕𑀢𑀸. 𑀆𑀭𑀸𑀫𑁂 𑀇𑀲𑀬𑁄 𑀅𑀧𑀲𑁆𑀲𑀦𑁆𑀢𑁄 𑀢𑀲𑁆𑀲 𑀚𑀫𑁆𑀩𑀼𑀅𑀫𑁆𑀩𑀧𑀦𑀲𑀫𑁄𑀘𑀸𑀤𑀻𑀦𑀁 𑀧𑁂𑀲𑀺𑀬𑁄 𑀫𑀥𑀼𑀲𑀓𑁆𑀔𑀭𑀘𑀼𑀡𑁆𑀡𑀲𑀁𑀬𑀼𑀢𑁆𑀢𑀸 𑀅𑀤𑀸𑀲𑀺. 𑀢𑀸 𑀢𑀲𑁆𑀲 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑀫𑀢𑁆𑀢𑀸 𑀳𑀮𑀸𑀳𑀮𑀯𑀺𑀲𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀲𑁄 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀳𑀼𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀭𑀸𑀚𑀸 𑀇𑀤𑀁 𑀓𑀸𑀭𑀡𑀁 ¶ 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.
𑀢𑀢𑁄 𑀓𑀸𑀴𑀳𑀢𑁆𑀣𑀺 ‘‘𑀅𑀬𑀁 𑀭𑀸𑀚𑀸 𑀅𑀢𑀺𑀯𑀺𑀬 𑀭𑀲𑀕𑀺𑀤𑁆𑀥𑁄, 𑀅𑀧𑀭𑀸𑀦𑀺𑀧𑀺𑀲𑁆𑀲 𑀉𑀤𑀸𑀳𑀭𑀡𑀸𑀦𑀺 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀯𑀺𑀭𑀫𑀸𑀳𑀻’’𑀢𑀺 𑀆𑀳. ‘‘𑀅𑀳𑀁 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. 𑀤𑁂𑀯, 𑀲𑀘𑁂 𑀦 𑀯𑀺𑀭𑀫𑀺𑀲𑁆𑀲𑀲𑀺, 𑀢𑀼𑀯𑀁 𑀜𑀸𑀢𑀺𑀫𑀡𑁆𑀟𑀮𑀢𑁄 𑀘𑁂𑀯 𑀭𑀚𑁆𑀚𑀲𑀺𑀭𑀺𑀢𑁄 𑀘 𑀧𑀭𑀺𑀳𑀸𑀬𑀺𑀲𑁆𑀲𑀲𑀺. 𑀅𑀢𑀻𑀢𑀲𑁆𑀫𑀺𑀜𑁆𑀳𑀺, 𑀫𑀳𑀸𑀭𑀸𑀚, 𑀇𑀥𑁂𑀯 𑀩𑀸𑀭𑀸𑀡𑀲𑀺𑀬𑀁 𑀧𑀜𑁆𑀘𑀲𑀻𑀮𑀭𑀓𑁆𑀔𑀓𑀁 𑀲𑁄𑀢𑁆𑀣𑀺𑀬𑀓𑀼𑀮𑀁 𑀅𑀳𑁄𑀲𑀺 ¶ . 𑀢𑀲𑁆𑀲 𑀓𑀼𑀮𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺. 𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀧𑀺𑀬𑁄 𑀫𑀦𑀸𑀧𑁄 𑀅𑀳𑁄𑀲𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽. 𑀲𑁄 𑀲𑀫𑀯𑀬𑁂𑀳𑀺 𑀢𑀭𑀼𑀡𑁂𑀳𑀺 𑀲𑀤𑁆𑀥𑀺𑀁 𑀕𑀡𑀩𑀦𑁆𑀥𑀦𑁂𑀦 𑀯𑀺𑀘𑀭𑀺. 𑀲𑁂𑀲𑀸 𑀕𑀡𑀩𑀦𑁆𑀥𑀸 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀔𑀸𑀤𑀦𑁆𑀢𑀸 𑀲𑀼𑀭𑀁 𑀧𑀺𑀯𑀦𑁆𑀢𑀺. 𑀫𑀸𑀡𑀯𑁄 𑀫𑀁𑀲𑀸𑀤𑀻𑀦𑀺 𑀦 𑀔𑀸𑀤𑀢𑀺, 𑀲𑀼𑀭𑀁 𑀦 𑀧𑀺𑀯𑀢𑀺. 𑀢𑁂 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀬𑀁 𑀲𑀼𑀭𑀸𑀬 𑀅𑀧𑀺𑀯𑀦𑀢𑁄 𑀅𑀫𑁆𑀳𑀸𑀓𑀁 𑀫𑀽𑀮𑀁 𑀦 𑀤𑁂𑀢𑀺, 𑀉𑀧𑀸𑀬𑁂𑀦 𑀦𑀁 𑀲𑀼𑀭𑀁 𑀧𑀸𑀬𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, ‘‘𑀲𑀫𑁆𑀫, 𑀙𑀡𑀓𑀻𑀴𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀲𑀫𑁆𑀫, 𑀢𑀼𑀫𑁆𑀳𑁂 𑀲𑀼𑀭𑀁 𑀧𑀺𑀯𑀣, 𑀅𑀳𑀁 𑀲𑀼𑀭𑀁 𑀦 𑀧𑀺𑀯𑀸𑀫𑀺, 𑀢𑀼𑀫𑁆𑀳𑁂𑀯 𑀕𑀘𑁆𑀙𑀣𑀸’’𑀢𑀺. ‘‘𑀲𑀫𑁆𑀫, 𑀢𑀯 𑀧𑀺𑀯𑀦𑀢𑁆𑀣𑀸𑀬 𑀔𑀻𑀭𑀁 𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀥𑀼𑀢𑁆𑀢𑀸 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀲𑀼 𑀢𑀺𑀔𑀺𑀡𑀲𑀼𑀭𑀁 ¶ 𑀩𑀦𑁆𑀥𑀸𑀧𑁂𑀢𑁆𑀯𑀸 𑀞𑀧𑀬𑀺𑀁𑀲𑀼. 𑀅𑀣 𑀦𑁂𑀲𑀁 𑀧𑀸𑀦𑀓𑀸𑀮𑁂 𑀫𑀸𑀡𑀯𑀲𑁆𑀲 𑀔𑀻𑀭𑀁 𑀉𑀧𑀦𑀬𑀺𑀁𑀲𑀼. 𑀅𑀣 𑀏𑀓𑁄 𑀥𑀼𑀢𑁆𑀢𑁄 ‘‘𑀧𑁄𑀓𑁆𑀔𑀭𑀫𑀥𑀼𑀁, 𑀪𑁄, 𑀆𑀳𑀭𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑀧𑀼𑀝𑀁 𑀳𑁂𑀝𑁆𑀞𑀸 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀅𑀗𑁆𑀕𑀼𑀮𑀻𑀳𑀺 𑀫𑀼𑀔𑁂 𑀞𑀧𑁂𑀢𑁆𑀯𑀸 𑀆𑀓𑀟𑁆𑀠𑀺. 𑀏𑀯𑀁 𑀇𑀢𑀭𑁂𑀧𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀯𑀺𑀁𑀲𑀼. 𑀫𑀸𑀡𑀯𑁄 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀧𑁄𑀓𑁆𑀔𑀭𑀫𑀥𑀼𑀦𑀸𑀫𑀸’’𑀢𑀺. ‘‘𑀅𑀳𑀫𑁆𑀧𑀺 𑀣𑁄𑀓𑀁 𑀮𑀪𑀺𑀲𑁆𑀲𑀸𑀫𑀺, 𑀤𑁂𑀣 𑀪𑁄𑀦𑁆𑀢𑁄’’𑀢𑀺. 𑀢𑀲𑁆𑀲𑀧𑀺 𑀤𑀸𑀧𑀬𑀺𑀁𑀲𑀼. 𑀲𑁄 𑀧𑁄𑀓𑁆𑀔𑀭𑀫𑀥𑀼𑀲𑀜𑁆𑀜𑀸𑀬 𑀲𑀼𑀭𑀁 𑀧𑀺𑀯𑀺. 𑀅𑀣𑀲𑁆𑀲 𑀅𑀗𑁆𑀕𑀸𑀭𑀧𑀓𑁆𑀓𑀫𑀁𑀲𑀁 𑀅𑀤𑀁𑀲𑀼, 𑀢𑀫𑁆𑀧𑀺 𑀔𑀸𑀤𑀺.
𑀏𑀯𑀫𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀧𑀺𑀯𑀦𑁆𑀢𑀲𑁆𑀲 𑀫𑀢𑁆𑀢𑀓𑀸𑀮𑁂 ‘‘𑀦 𑀏𑀢𑀁 𑀧𑁄𑀓𑁆𑀔𑀭𑀫𑀥𑀼, 𑀲𑀼𑀭𑀸 𑀏𑀲𑀸’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀁 𑀫𑀥𑀼𑀭𑀭𑀲𑀁 𑀦 𑀚𑀸𑀦𑀺𑀁, 𑀆𑀳𑀭𑀣, 𑀪𑁄, 𑀲𑀼𑀭’’𑀦𑁆𑀢𑀺 𑀆𑀳. 𑀢𑁂 𑀆𑀳𑀭𑀺𑀢𑁆𑀯𑀸 𑀧𑀼𑀦𑀧𑀺 𑀅𑀤𑀁𑀲𑀼. 𑀧𑀺𑀧𑀸𑀲𑀸 𑀫𑀳𑀢𑀻 𑀅𑀳𑁄𑀲𑀺. 𑀅𑀣𑀲𑁆𑀲 ¶ 𑀧𑀼𑀦𑀧𑀺 𑀬𑀸𑀘𑀦𑁆𑀢𑀲𑁆𑀲 ‘‘𑀔𑀻𑀡𑀸’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀳𑀦𑁆𑀤 𑀢𑀁, 𑀪𑁄, 𑀆𑀳𑀭𑀸𑀧𑁂𑀣𑀸’’𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁 𑀅𑀤𑀸𑀲𑀺, 𑀲𑁄 𑀲𑀓𑀮𑀤𑀺𑀯𑀲𑀁 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑁄 𑀭𑀢𑁆𑀢𑀓𑁆𑀔𑁄 𑀓𑀫𑁆𑀧𑀦𑁆𑀢𑁄 𑀯𑀺𑀮𑀧𑀦𑁆𑀢𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀧𑀺𑀢𑀸 𑀲𑀼𑀭𑀸𑀬 𑀧𑀺𑀯𑀺𑀢𑀪𑀸𑀯𑀁 𑀜𑀢𑁆𑀯𑀸 𑀯𑀺𑀕𑀢𑁂 𑀫𑀢𑁆𑀢𑁂, ‘‘𑀢𑀸𑀢, 𑀅𑀬𑀼𑀢𑁆𑀢𑀁 𑀢𑁂 𑀓𑀢𑀁 𑀲𑁄𑀢𑁆𑀢𑀺𑀬𑀓𑀼𑀮𑁂 𑀚𑀸𑀢𑁂𑀦 𑀲𑀼𑀭𑀁 𑀧𑀺𑀯𑀦𑁆𑀢𑁂𑀦, 𑀫𑀸 𑀧𑀼𑀦 𑀏𑀯𑀁 𑀅𑀓𑀸𑀲𑀻’’𑀢𑀺 𑀆𑀳. ‘‘𑀢𑀸𑀢, 𑀓𑁄 𑀫𑀬𑁆𑀳𑀁 𑀤𑁄𑀲𑁄’’𑀢𑀺. ‘‘𑀲𑀼𑀭𑀸𑀬 𑀧𑀺𑀯𑀺𑀢𑀪𑀸𑀯𑁄’’𑀢𑀺. ‘‘𑀢𑀸𑀢, 𑀓𑀺𑀁 𑀓𑀣𑁂𑀲𑀺, 𑀫𑀬𑀸 𑀏𑀯𑀭𑀽𑀧𑀁 𑀫𑀥𑀼𑀭𑀭𑀲𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀮𑀤𑁆𑀥𑀧𑀼𑀩𑁆𑀩’’𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀲𑁄𑀧𑀺 ‘‘𑀦 𑀲𑀓𑁆𑀓𑁄𑀫𑀺 𑀯𑀺𑀭𑀫𑀺𑀢𑀼’’𑀦𑁆𑀢𑀺 𑀆𑀳. 𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀏𑀯𑀁 𑀲𑀦𑁆𑀢𑁂 𑀅𑀫𑁆𑀳𑀸𑀓𑀁 𑀓𑀼𑀮𑀯𑀁𑀲𑁄 𑀘 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀥𑀦𑀜𑁆𑀘 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀫𑀸𑀡𑀯 𑀅𑀪𑀺𑀭𑀽𑀧𑁄𑀲𑀺, 𑀓𑀼𑀮𑁂 𑀚𑀸𑀢𑁄𑀲𑀺 𑀲𑁄𑀢𑁆𑀣𑀺𑀬𑁂;
𑀦 𑀢𑁆𑀯𑀁 𑀅𑀭𑀳𑀲𑀺 𑀢𑀸𑀢, 𑀅𑀪𑀓𑁆𑀔𑀁 𑀪𑀓𑁆𑀔𑀬𑁂𑀢𑀯𑁂’’𑀢𑀺.
𑀢𑀢𑁆𑀣 ¶ , 𑀫𑀸𑀡𑀯𑀸𑀢𑀺, 𑀫𑀸𑀡𑀯, 𑀢𑁆𑀯𑀁 𑀅𑀪𑀺𑀭𑀽𑀧𑁄 𑀅𑀲𑀺, 𑀲𑁄𑀢𑁆𑀣𑀺𑀬𑁂 𑀓𑀼𑀮𑁂 𑀚𑀸𑀢𑁄𑀧𑀺 𑀅𑀲𑀺. 𑀅𑀪𑀓𑁆𑀔𑀁 𑀪𑀓𑁆𑀔𑀬𑁂𑀢𑀯𑁂𑀢𑀺, 𑀢𑀸𑀢, 𑀢𑁆𑀯𑀁 𑀅𑀪𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀪𑀓𑁆𑀔𑀬𑀺𑀢𑀼𑀁 𑀦 𑀅𑀭𑀳𑀲𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸, ‘‘𑀢𑀸𑀢, 𑀯𑀺𑀭𑀫, 𑀲𑀘𑁂 𑀦 𑀯𑀺𑀭𑀫𑀲𑀺, 𑀅𑀳𑀁 𑀢𑀁 𑀇𑀢𑁄 𑀕𑁂𑀳𑀸 𑀦𑀺𑀓𑁆𑀔𑀸𑀫𑁂𑀲𑁆𑀲𑀸𑀫𑀺, 𑀢𑀯 𑀭𑀝𑁆𑀞𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀸𑀡𑀯𑁄 ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀅𑀳𑀁 𑀲𑀼𑀭𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀭𑀲𑀸𑀦𑀁 ¶ 𑀅𑀜𑁆𑀜𑀢𑀭𑀁 𑀏𑀢𑀁, 𑀓𑀲𑁆𑀫𑀸 𑀫𑀁 𑀢𑁆𑀯𑀁 𑀦𑀺𑀯𑀸𑀭𑀬𑁂;
𑀲𑁄𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀮𑀘𑁆𑀙𑀸𑀫𑀺 𑀏𑀤𑀺𑀲𑀁.
‘‘𑀲𑁄𑀯𑀸𑀳𑀁 𑀦𑀺𑀧𑁆𑀧𑀢𑀺𑀲𑁆𑀲𑀸𑀫𑀺, 𑀦𑀢𑁂 𑀯𑀘𑁆𑀙𑀸𑀫𑀺 𑀲𑀦𑁆𑀢𑀺𑀓𑁂;
𑀬𑀲𑁆𑀲 𑀫𑁂 𑀤𑀲𑁆𑀲𑀦𑁂𑀦 𑀢𑁆𑀯𑀁, 𑀦𑀸𑀪𑀺𑀦𑀦𑁆𑀤𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.
𑀢𑀢𑁆𑀣 𑀭𑀲𑀸𑀦𑀦𑁆𑀢𑀺 𑀮𑁄𑀡𑀫𑁆𑀩𑀺𑀮𑀢𑀺𑀢𑁆𑀢𑀓𑀓𑀝𑀼𑀓𑀔𑀸𑀭𑀺𑀓𑀫𑀥𑀼𑀭𑀓𑀲𑀸𑀯𑀲𑀗𑁆𑀔𑀸𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀭𑀲𑀸𑀦𑀁 𑀅𑀜𑁆𑀜𑀢𑀭𑀁 𑀉𑀢𑁆𑀢𑀫𑀭𑀲𑀫𑁂𑀢𑀁 𑀫𑀚𑁆𑀚𑀁 𑀦𑀸𑀫. 𑀲𑁄𑀯𑀸𑀳𑀦𑁆𑀢𑀺 𑀲𑁄 𑀅𑀳𑀁 𑀏𑀯. 𑀦𑀺𑀧𑁆𑀧𑀢𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀦𑀸𑀳𑀁 𑀲𑀼𑀭𑀸𑀧𑀸𑀦𑀸 𑀯𑀺𑀭𑀫𑀺𑀲𑁆𑀲𑀸𑀫𑀺, 𑀬𑀁 𑀢𑁂 𑀭𑀼𑀘𑁆𑀘𑀢𑀺, 𑀢𑀁 𑀓𑀭𑁄𑀳𑀻’’𑀢𑀺 𑀆𑀳. 𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀢𑀬𑀺 𑀅𑀫𑁆𑀳𑁂 𑀧𑀭𑀺𑀘𑁆𑀘𑀚𑀦𑁆𑀢𑁂 𑀫𑀬𑀫𑁆𑀧𑀺 𑀢𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀤𑁆𑀥𑀸 ¶ 𑀅𑀜𑁆𑀜𑁂𑀧𑀺 𑀤𑀸𑀬𑀸𑀤𑁂, 𑀧𑀼𑀢𑁆𑀢𑁂 𑀮𑀘𑁆𑀙𑀸𑀫 𑀫𑀸𑀡𑀯;
𑀢𑁆𑀯𑀜𑁆𑀘 𑀚𑀫𑁆𑀫 𑀯𑀺𑀦𑀲𑁆𑀲𑀲𑀼, 𑀬𑀢𑁆𑀣 𑀧𑀢𑁆𑀢𑀁 𑀦 𑀢𑀁 𑀲𑀼𑀡𑁂’’𑀢𑀺.
𑀢𑀢𑁆𑀣 𑀬𑀢𑁆𑀣 𑀧𑀢𑁆𑀢𑀦𑁆𑀢𑀺 𑀬𑀢𑁆𑀣 𑀕𑀢𑀁 𑀢𑀁 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀯𑀲𑀢𑀻’’𑀢𑀺 𑀦 𑀲𑀼𑀡𑁄𑀫, 𑀢𑀢𑁆𑀣 𑀕𑀘𑁆𑀙𑀸𑀳𑀻𑀢𑀺 𑀅𑀢𑁆𑀣𑁄.
𑀅𑀣 𑀦𑀁 𑀯𑀺𑀦𑀺𑀘𑁆𑀙𑀬𑀁 𑀦𑁂𑀢𑁆𑀯𑀸 𑀅𑀧𑀼𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀦𑀺𑀧𑁆𑀧𑀘𑁆𑀘𑀬𑁄 𑀓𑀧𑀡𑁄 𑀚𑀺𑀡𑁆𑀡𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀧𑀸𑀮𑀳𑀢𑁆𑀣𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀁 𑀦𑀺𑀲𑁆𑀲𑀸𑀬 𑀓𑀸𑀮𑀫𑀓𑀸𑀲𑀺. 𑀇𑀤𑀁 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀓𑀸𑀴𑀳𑀢𑁆𑀣𑀺 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀲𑀘𑁂 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀲𑀺, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀢𑁂 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀏𑀯𑀫𑁂𑀯 ¶ 𑀢𑀼𑀯𑀁 𑀭𑀸𑀚, 𑀤𑁆𑀯𑀺𑀧𑀤𑀺𑀦𑁆𑀤 𑀲𑀼𑀡𑁄𑀳𑀺 𑀫𑁂;
𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀺 𑀢𑀁 𑀭𑀝𑁆𑀞𑀸, 𑀲𑁄𑀡𑁆𑀟𑀁 𑀫𑀸𑀡𑀯𑀓𑀁 𑀬𑀣𑀸’’𑀢𑀺.
𑀢𑀢𑁆𑀣 𑀤𑁆𑀯𑀺𑀧𑀤𑀺𑀦𑁆𑀤𑀸𑀢𑀺 𑀤𑁆𑀯𑀺𑀧𑀤𑀸𑀦𑀁 𑀇𑀦𑁆𑀤, 𑀪𑁄 𑀫𑀳𑀸𑀭𑀸𑀚, 𑀫𑁂 𑀫𑀫 𑀯𑀘𑀦𑀁 𑀲𑀼𑀡𑁄𑀳𑀺 𑀢𑀼𑀯𑀁, 𑀏𑀯𑀫𑁂𑀯 𑀲𑁄𑀡𑁆𑀟𑀁 𑀫𑀸𑀡𑀯𑀓𑀁 𑀬𑀣𑀸 𑀢𑀁 𑀪𑀯𑀦𑁆𑀢𑀁 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀺.
𑀏𑀯𑀁 ¶ 𑀓𑀸𑀴𑀳𑀢𑁆𑀣𑀺𑀦𑀸 𑀉𑀧𑀫𑀸𑀬 𑀆𑀳𑀝𑀸𑀬𑀧𑀺 𑀭𑀸𑀚𑀸 𑀢𑀢𑁄 𑀯𑀺𑀭𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀧𑀭𑀫𑁆𑀧𑀺 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑀼𑀁 𑀆𑀳 𑁋
‘‘𑀲𑀼𑀚𑀸𑀢𑁄 𑀦𑀸𑀫 𑀦𑀸𑀫𑁂𑀦, 𑀪𑀸𑀯𑀺𑀢𑀢𑁆𑀢𑀸𑀦 𑀲𑀸𑀯𑀓𑁄;
𑀅𑀘𑁆𑀙𑀭𑀁 𑀓𑀸𑀫𑀬𑀦𑁆𑀢𑁄𑀯, 𑀦 𑀲𑁄 𑀪𑀼𑀜𑁆𑀚𑀺 𑀦 𑀲𑁄 𑀧𑀺𑀯𑀺.
‘‘𑀓𑀼𑀲𑀕𑁆𑀕𑁂𑀦𑀼𑀤𑀓𑀫𑀸𑀤𑀸𑀬, 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀫𑀺𑀦𑁂;
𑀏𑀯𑀁 𑀫𑀸𑀦𑀼𑀲𑀓𑀸 𑀓𑀸𑀫𑀸, 𑀤𑀺𑀩𑁆𑀩𑀓𑀸𑀫𑀸𑀦 𑀲𑀦𑁆𑀢𑀺𑀓𑁂.
‘‘𑀏𑀯𑀫𑁂𑀯 𑀅𑀳𑀁 𑀓𑀸𑀴, 𑀪𑀼𑀢𑁆𑀯𑀸 𑀪𑀓𑁆𑀔𑀁 𑀭𑀲𑀼𑀢𑁆𑀢𑀫𑀁;
𑀅𑀮𑀤𑁆𑀥𑀸 𑀫𑀸𑀦𑀼𑀲𑀁 𑀫𑀁𑀲𑀁, 𑀫𑀜𑁆𑀜𑁂 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺.
𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.
𑀢𑀢𑁆𑀣 𑀪𑀸𑀯𑀺𑀢𑀢𑁆𑀢𑀸𑀦𑀸𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑀸𑀦𑀁 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀲𑀺𑀲𑀢𑀸𑀦𑀁. 𑀅𑀘𑁆𑀙𑀭𑀁 𑀓𑀸𑀫𑀬𑀦𑁆𑀢𑁄𑀯𑀸𑀢𑀺 𑀲𑁄 𑀓𑀺𑀭 𑀢𑁂𑀲𑀁 𑀇𑀲𑀻𑀦𑀁 𑀫𑀳𑀸𑀚𑀫𑁆𑀩𑀼𑀧𑁂𑀲𑀺𑀬𑀸 𑀔𑀸𑀤𑀦𑀓𑀸𑀮𑁂 𑀅𑀦𑀸𑀕𑀫𑀦𑀁 𑀯𑀺𑀤𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀸 𑀦 𑀆𑀕𑀘𑁆𑀙𑀦𑁆𑀢𑀺, 𑀲𑀘𑁂 𑀓𑀢𑁆𑀣𑀘𑀺 𑀕𑀢𑀸, 𑀚𑀸𑀦𑀺𑀲𑁆𑀲𑀸𑀫𑀺, 𑀦𑁄 𑀘𑁂, 𑀅𑀣 𑀦𑁂𑀲𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀇𑀲𑀺𑀕𑀡𑁂 𑀯𑀦𑁆𑀤𑀺𑀢𑁆𑀯𑀸 𑀕𑀡𑀚𑁂𑀝𑁆𑀞𑀓𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀯 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀉𑀬𑁆𑀬𑁄𑀚𑀺𑀬𑀫𑀸𑀦𑁄𑀧𑀺 ‘‘𑀅𑀚𑁆𑀚 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀭𑀢𑁆𑀢𑀺𑀪𑀸𑀕𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀸𑀳𑀺 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑀼𑀁 𑀆𑀕𑀢𑁄, 𑀲𑀓𑀮𑀸𑀭𑀸𑀫𑁄 𑀏𑀓𑁄𑀪𑀸𑀲𑁄 𑀅𑀳𑁄𑀲𑀺. 𑀲𑀼𑀚𑀸𑀢𑁄 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀉𑀝𑁆𑀞𑀸𑀬 𑀧𑀡𑁆𑀡𑀲𑀸𑀮𑀙𑀺𑀤𑁆𑀤𑁂𑀦 𑀑𑀮𑁄𑀓𑁂𑀦𑁆𑀢𑁄 𑀲𑀓𑁆𑀓𑀁 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑀼𑀁 𑀆𑀕𑀢𑀁 𑀤𑁂𑀯𑀘𑁆𑀙𑀭𑀸𑀧𑀭𑀺𑀯𑀼𑀢𑀁 ¶ 𑀤𑀺𑀲𑁆𑀯𑀸 𑀅𑀘𑁆𑀙𑀭𑀸𑀦𑀁 𑀲𑀳 𑀤𑀲𑁆𑀲𑀦𑁂𑀦 𑀭𑀸𑀕𑀭𑀢𑁆𑀢𑁄 𑀅𑀳𑁄𑀲𑀺. 𑀲𑀓𑁆𑀓𑁄 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀓𑀼𑀝𑀼𑀫𑁆𑀩𑀺𑀓𑁄𑀧𑀺 𑀧𑀼𑀦𑀤𑀺𑀯𑀲𑁂 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑁄 𑀦𑀸𑀫𑁂𑀲 𑀭𑀢𑁆𑀢𑀺𑀪𑀸𑀕𑁂 𑀢𑀼𑀫𑁆𑀳𑀸𑀓𑀁 𑀯𑀦𑁆𑀤𑀦𑀢𑁆𑀣𑀸𑀬 𑀆𑀕𑀢𑁄’’𑀢𑀺? ‘‘𑀲𑀓𑁆𑀓𑁄, 𑀆𑀯𑀼𑀲𑁄’’𑀢𑀺. ‘‘𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀓𑀸 𑀦𑀸𑀫𑁂𑀢𑀸’’𑀢𑀺? ‘‘𑀤𑁂𑀯𑀘𑁆𑀙𑀭𑀸 𑀦𑀸𑀫𑁂𑀢𑀸’’𑀢𑀺. 𑀲𑁄 𑀇𑀲𑀺𑀕𑀡𑀁 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀅𑀘𑁆𑀙𑀭𑀁 𑀫𑁂 𑀤𑁂𑀣, 𑀅𑀘𑁆𑀙𑀭𑀁 𑀫𑁂 𑀤𑁂𑀣𑀸’’𑀢𑀺 𑀯𑀺𑀮𑀧𑀺. 𑀜𑀸𑀢𑀓𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀪𑀽𑀢𑀸𑀯𑀺𑀝𑁆𑀞𑁄 𑀦𑀼 𑀔𑁄’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺𑀁𑀲𑀼. 𑀲𑁄 ‘‘𑀦𑀸𑀳𑀁 𑀏𑀢𑀁 𑀅𑀘𑁆𑀙𑀭𑀁 𑀓𑀣𑁂𑀫𑀺, 𑀤𑁂𑀯𑀘𑁆𑀙𑀭𑀁 𑀓𑀣𑁂𑀫𑀻’’𑀢𑀺 𑀯𑀢𑁆𑀯𑀸 ‘‘𑀅𑀬𑀁 𑀅𑀘𑁆𑀙𑀭𑀸’’𑀢𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀦𑀻𑀢𑀁 𑀪𑀭𑀺𑀬𑀫𑁆𑀧𑀺 ¶ 𑀕𑀡𑀺𑀓𑀫𑁆𑀧𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀦𑀸𑀬𑀁 𑀅𑀘𑁆𑀙𑀭𑀸, 𑀬𑀓𑁆𑀔𑀺𑀦𑀻 𑀏𑀲𑀸, 𑀤𑁂𑀯𑀘𑁆𑀙𑀭𑀁 𑀫𑁂 𑀤𑁂𑀣𑀸’’𑀢𑀺 𑀯𑀺𑀮𑀧𑀦𑁆𑀢𑁄 𑀦𑀺𑀭𑀸𑀳𑀸𑀭𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋
‘‘𑀅𑀘𑁆𑀙𑀭𑀁 𑀓𑀸𑀫𑀬𑀦𑁆𑀢𑁄𑀯, 𑀦 𑀲𑁄 𑀪𑀼𑀜𑁆𑀚𑀺 𑀦 𑀲𑁄 𑀧𑀺𑀯𑀻’’𑀢𑀺.
𑀓𑀼𑀲𑀕𑁆𑀕𑁂𑀦𑀼𑀤𑀓𑀫𑀸𑀤𑀸𑀬, 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀫𑀺𑀦𑁂𑀢𑀺, 𑀲𑀫𑁆𑀫 𑀓𑀸𑀴𑀳𑀢𑁆𑀣𑀺, 𑀬𑁄 𑀓𑀼𑀲𑀕𑁆𑀕𑁂𑀦𑁂𑀯 𑀉𑀤𑀓𑀁 𑀕𑀳𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀲𑀺𑀬𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓’’𑀦𑁆𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀉𑀧𑀫𑀸𑀬 𑀫𑀺𑀦𑁂𑀬𑁆𑀬, 𑀲𑁄 𑀓𑁂𑀯𑀮𑀁 𑀫𑀺𑀦𑁂𑀬𑁆𑀬𑁂𑀯, 𑀓𑀼𑀲𑀕𑁆𑀕𑁂 𑀧𑀦 𑀉𑀤𑀓𑀁 𑀅𑀢𑀺𑀧𑀭𑀺𑀢𑁆𑀢𑀓𑀫𑁂𑀯. 𑀬𑀣𑀸 𑀢𑀁, 𑀏𑀯𑀁 𑀫𑀸𑀦𑀼𑀲𑀓𑀸 𑀓𑀸𑀫𑀸 𑀤𑀺𑀩𑁆𑀩𑀓𑀸𑀫𑀸𑀦𑀁 𑀲𑀦𑁆𑀢𑀺𑀓𑁂, 𑀢𑀲𑁆𑀫𑀸 𑀲𑁄 𑀲𑀼𑀚𑀸𑀢𑁄 𑀅𑀜𑁆𑀜𑀁 𑀇𑀢𑁆𑀣𑀺𑀁 𑀦 𑀑𑀮𑁄𑀓𑁂𑀲𑀺, 𑀅𑀘𑁆𑀙𑀭𑀫𑁂𑀯 𑀧𑀢𑁆𑀣𑁂𑀦𑁆𑀢𑁄 𑀫𑀢𑁄. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀲𑁄 𑀤𑀺𑀩𑁆𑀩𑀓𑀸𑀫𑀁 𑀅𑀮𑀪𑀦𑁆𑀢𑁄 𑀚𑀻𑀯𑀺𑀢𑀁 𑀚𑀳𑀺, 𑀏𑀯𑀁 𑀅𑀳𑀫𑁆𑀧𑀺 𑀉𑀢𑁆𑀢𑀫𑀭𑀲𑀁 𑀫𑀦𑀼𑀲𑁆𑀲𑀫𑀁𑀲𑀁 𑀅𑀮𑀪𑀦𑁆𑀢𑁄 𑀚𑀻𑀯𑀺𑀢𑀁 𑀚𑀳𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.
𑀢𑀁 𑀲𑀼𑀢𑁆𑀯𑀸 𑀓𑀸𑀴𑀳𑀢𑁆𑀣𑀺 ‘‘𑀅𑀬𑀁 𑀭𑀸𑀚𑀸 𑀅𑀢𑀺𑀯𑀺𑀬 𑀭𑀲𑀕𑀺𑀤𑁆𑀥𑁄, 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀓𑀚𑀸𑀢𑀺𑀓𑀸𑀦𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀆𑀓𑀸𑀲𑀘𑀭𑀸 𑀲𑀼𑀯𑀡𑁆𑀡𑀳𑀁𑀲𑀸𑀧𑀺 𑀢𑀸𑀯 𑀯𑀺𑀦𑀝𑁆𑀞𑀸𑀢𑀺 𑀤𑀲𑁆𑀲𑁂𑀢𑀼𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀬𑀣𑀸𑀧𑀺 𑀢𑁂 𑀥𑀢𑀭𑀝𑁆𑀞𑀸, 𑀳𑀁𑀲𑀸 𑀯𑁂𑀳𑀸𑀬𑀲𑀗𑁆𑀕𑀫𑀸;
𑀅𑀪𑀼𑀢𑁆𑀢𑀧𑀭𑀺𑀪𑁄𑀕𑁂𑀦, 𑀲𑀩𑁆𑀩𑁂 𑀅𑀩𑁆𑀪𑀢𑁆𑀣𑀢𑀁 𑀕𑀢𑀸.
‘‘𑀏𑀯𑀫𑁂𑀯 𑀢𑀼𑀯𑀁 𑀭𑀸𑀚, 𑀤𑁆𑀯𑀺𑀧𑀤𑀺𑀦𑁆𑀤 𑀲𑀼𑀡𑁄𑀳𑀺 𑀫𑁂;
𑀅𑀪𑀓𑁆𑀔𑀁 𑀭𑀸𑀚 𑀪𑀓𑁆𑀔𑁂𑀲𑀺, 𑀢𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀢’’𑀦𑁆𑀢𑀺.
𑀢𑀢𑁆𑀣 𑀅𑀪𑀼𑀢𑁆𑀢𑀧𑀭𑀺𑀪𑁄𑀕𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀧𑀭𑀺𑀪𑁄𑀕𑁂𑀦. 𑀅𑀩𑁆𑀪𑀢𑁆𑀣𑀢𑀁 𑀕𑀢𑀸𑀢𑀺 𑀲𑀩𑁆𑀩𑁂 𑀫𑀭𑀡𑀫𑁂𑀯 𑀧𑀢𑁆𑀢𑀸. 𑀅𑀢𑀻𑀢𑁂 𑀓𑀺𑀭 𑀘𑀺𑀢𑁆𑀢𑀓𑀽𑀝𑁂 𑀲𑀼𑀯𑀡𑁆𑀡𑀕𑀼𑀳𑀸𑀬𑀁 𑀦𑀯𑀼𑀢𑀺 𑀳𑀁𑀲𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀺. 𑀢𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀲𑀘𑁂 𑀦𑀺𑀓𑁆𑀔𑀫𑁂𑀬𑁆𑀬𑀼𑀁, 𑀉𑀤𑀓𑀧𑀼𑀡𑁆𑀡𑁂𑀳𑀺 𑀧𑀢𑁆𑀢𑁂𑀳𑀺 𑀉𑀧𑁆𑀧𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ¶ 𑀫𑀳𑀸𑀲𑀫𑀼𑀤𑁆𑀤𑁂𑀬𑁂𑀯 𑀧𑀢𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦 𑀘 𑀦𑀺𑀓𑁆𑀔𑀫𑀦𑁆𑀢𑀺. 𑀉𑀧𑀓𑀝𑁆𑀞𑁂 𑀧𑀦 𑀯𑀲𑁆𑀲𑀓𑀸𑀮𑁂 𑀚𑀸𑀢𑀲𑁆𑀲𑀭𑀢𑁄 𑀲𑀬𑀁𑀚𑀸𑀢𑀲𑀸𑀮𑀺𑀬𑁄 𑀆𑀳𑀭𑀺𑀢𑁆𑀯𑀸 𑀕𑀼𑀳𑀁 𑀧𑀽𑀭𑁂𑀢𑁆𑀯𑀸 𑀲𑀸𑀮𑀺𑀁 𑀔𑀸𑀤𑀦𑁆𑀢𑀸 𑀯𑀲𑀦𑁆𑀢𑀺. 𑀢𑁂𑀲𑀁 𑀧𑀦 𑀕𑀼𑀳𑀁 𑀧𑀯𑀺𑀝𑁆𑀞𑀓𑀸𑀮𑁂 𑀕𑀼𑀳𑀤𑁆𑀯𑀸𑀭𑁂 𑀏𑀓𑁄 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑁄 𑀉𑀡𑁆𑀡𑀦𑀸𑀪𑀺 𑀦𑀸𑀫 𑀫𑀓𑁆𑀓𑀝𑀓𑁄 𑀏𑀓𑁂𑀓𑀲𑁆𑀫𑀺𑀁 𑀫𑀸𑀲𑁂 𑀏𑀓𑁂𑀓𑀁 𑀚𑀸𑀮𑀁 𑀯𑀺𑀦𑀦𑁆𑀥𑀢𑀺. 𑀢𑀲𑁆𑀲 𑀏𑀓𑁂𑀓𑀁 𑀲𑀼𑀢𑁆𑀢𑀁 𑀕𑁄𑀭𑀚𑁆𑀚𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀳𑀁𑀲𑀸 ‘‘𑀢𑀁 𑀚𑀸𑀮𑀁 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀏𑀓𑀲𑁆𑀲 𑀢𑀭𑀼𑀡𑀳𑀁𑀲𑀲𑁆𑀲 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 ¶ 𑀤𑁂𑀦𑁆𑀢𑀺. 𑀲𑁄 𑀯𑀺𑀕𑀢𑁂 𑀤𑁂𑀯𑁂 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀢𑀁 ¶ 𑀚𑀸𑀮𑀁 𑀪𑀺𑀦𑁆𑀤𑀢𑀺. 𑀢𑁂𑀦 𑀫𑀕𑁆𑀕𑁂𑀦 𑀲𑁂𑀲𑀸 𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀓𑀸𑀮𑁂 𑀧𑀜𑁆𑀘 𑀫𑀸𑀲𑁂 𑀯𑀲𑁆𑀲𑁄 𑀯𑀼𑀝𑁆𑀞𑁄 𑀅𑀳𑁄𑀲𑀺. 𑀳𑀁𑀲𑀸 𑀔𑀻𑀡𑀕𑁄𑀘𑀭𑀸 ‘‘𑀓𑀺𑀁 𑀦𑀼 𑀔𑁄 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀫𑀦𑁆𑀢𑁂𑀢𑁆𑀯𑀸 ‘‘𑀫𑀬𑀁 𑀚𑀻𑀯𑀦𑁆𑀢𑀸 𑀅𑀡𑁆𑀟𑀸𑀦𑀺 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀧𑀞𑀫𑀁 𑀅𑀡𑁆𑀟𑀸𑀦𑀺 𑀔𑀸𑀤𑀺𑀁𑀲𑀼, 𑀢𑀢𑁄 𑀧𑁄𑀢𑀓𑁂, 𑀢𑀢𑁄 𑀚𑀺𑀡𑁆𑀡𑀳𑀁𑀲𑁂. 𑀧𑀜𑁆𑀘𑀫𑀸𑀲𑀘𑁆𑀘𑀬𑁂𑀦 𑀯𑀲𑁆𑀲𑀁 𑀅𑀧𑀕𑀢𑀁. 𑀫𑀓𑁆𑀓𑀝𑀓𑁄 𑀧𑀜𑁆𑀘 𑀚𑀸𑀮𑀸𑀦𑀺 𑀯𑀺𑀦𑀦𑁆𑀥𑀺. 𑀳𑀁𑀲𑀸 𑀲𑀓𑀚𑀸𑀢𑀺𑀓𑀸𑀦𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀅𑀧𑁆𑀧𑀣𑀸𑀫𑀸 𑀚𑀸𑀢𑀸. 𑀤𑁆𑀯𑀺𑀕𑀼𑀡𑀓𑁄𑀝𑁆𑀞𑀸𑀲𑀮𑀸𑀪𑀻 𑀳𑀁𑀲𑀢𑀭𑀼𑀡𑁄 𑀚𑀸𑀮𑁂 𑀧𑀳𑀭𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀪𑀺𑀦𑁆𑀤𑀺, 𑀧𑀜𑁆𑀘𑀫𑀁 𑀙𑀺𑀦𑁆𑀤𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀢𑀢𑁆𑀣𑁂𑀯 𑀮𑀕𑁆𑀕𑀺. 𑀅𑀣𑀲𑁆𑀲 𑀲𑀻𑀲𑀁 𑀯𑀺𑀚𑁆𑀛𑀺𑀢𑁆𑀯𑀸 𑀫𑀓𑁆𑀓𑀝𑀓𑁄 𑀮𑁄𑀳𑀺𑀢𑀁 𑀧𑀺𑀯𑀺. 𑀅𑀜𑁆𑀜𑁄𑀧𑀺 𑀆𑀕𑀦𑁆𑀢𑁆𑀯𑀸 𑀚𑀸𑀮𑀁 𑀧𑀳𑀭𑀺, 𑀲𑁄𑀧𑀺 𑀢𑀢𑁆𑀣𑁂𑀯 𑀮𑀕𑁆𑀕𑀻𑀢𑀺 𑀏𑀯𑀁 𑀲𑀩𑁆𑀩𑁂𑀲𑀁 𑀫𑀓𑁆𑀓𑀝𑀓𑁄 𑀮𑁄𑀳𑀺𑀢𑀁 𑀧𑀺𑀯𑀺. 𑀢𑀤𑀸 𑀥𑀢𑀭𑀝𑁆𑀞𑀓𑀼𑀮𑀁 𑀉𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀅𑀩𑁆𑀪𑀢𑁆𑀣𑀢𑀁𑀕𑀢𑀸’’𑀢𑀺.
𑀏𑀯𑀫𑁂𑀯 𑀢𑀼𑀯𑀦𑁆𑀢𑀺 𑀬𑀣𑀸 𑀏𑀢𑁂 𑀳𑀁𑀲𑀸 𑀅𑀪𑀓𑁆𑀔𑀁 𑀲𑀓𑀚𑀸𑀢𑀺𑀓𑀫𑀁𑀲𑀁 𑀔𑀸𑀤𑀺𑀁𑀲𑀼, 𑀢𑀣𑀸 𑀢𑁆𑀯𑀫𑁆𑀧𑀺 𑀔𑀸𑀤𑀲𑀺, 𑀲𑀓𑀮𑀦𑀕𑀭𑀁 𑀪𑀬𑀧𑁆𑀧𑀢𑁆𑀢𑀁, 𑀯𑀺𑀭𑀫, 𑀫𑀳𑀸𑀭𑀸𑀚𑀸𑀢𑀺. 𑀢𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀢𑀦𑁆𑀢𑀺 𑀬𑀲𑁆𑀫𑀸 𑀅𑀪𑀓𑁆𑀔𑀁 𑀲𑀓𑀚𑀸𑀢𑀺𑀓𑀫𑀁𑀲𑀁 𑀪𑀓𑁆𑀔𑁂𑀲𑀺, 𑀢𑀲𑁆𑀫𑀸 𑀇𑀫𑁂 𑀦𑀕𑀭𑀯𑀸𑀲𑀺𑀦𑁄 𑀢𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀺.
𑀭𑀸𑀚𑀸 𑀅𑀜𑁆𑀜𑀫𑁆𑀧𑀺 𑀉𑀧𑀫𑀁 𑀯𑀢𑁆𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀦𑀸𑀕𑀭𑀸 𑀧𑀦 𑀉𑀝𑁆𑀞𑀸𑀬, ‘‘𑀲𑀸𑀫𑀺 𑀲𑁂𑀦𑀸𑀧𑀢𑀺, 𑀓𑀺𑀁 𑀓𑀭𑁄𑀲𑀺, 𑀓𑀺𑀁 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀓𑀁 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀲𑀺, 𑀲𑀘𑁂 𑀦 𑀯𑀺𑀭𑀫𑀺𑀲𑁆𑀲𑀢𑀺, 𑀭𑀝𑁆𑀞𑀢𑁄 𑀦𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺 𑀯𑀢𑁆𑀯𑀸 𑀦𑀸𑀲𑁆𑀲 𑀓𑀣𑁂𑀢𑀼𑀁 𑀅𑀤𑀁𑀲𑀼. 𑀭𑀸𑀚𑀸 𑀩𑀳𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀪𑀻𑀢𑁄 𑀧𑀼𑀦 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀼𑀦𑀧𑀺 𑀦𑀁 𑀲𑁂𑀦𑀸𑀧𑀢𑀺 ‘‘𑀓𑀺𑀁 𑀫𑀳𑀸𑀭𑀸𑀚 𑀯𑀺𑀭𑀫𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀑𑀭𑁄𑀥𑀕𑀡𑀜𑁆𑀘 𑀧𑀼𑀢𑁆𑀢𑀥𑀻𑀢𑀭𑁄 𑀘 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂 𑀧𑀲𑁆𑀲𑁂 𑀞𑀧𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀇𑀫𑁂 𑀜𑀸𑀢𑀺𑀫𑀡𑁆𑀟𑀮𑁂 𑀘𑁂𑀯 𑀅𑀫𑀘𑁆𑀘𑀕𑀡𑀜𑁆𑀘 𑀭𑀚𑁆𑀚𑀲𑀺𑀭𑀺𑀜𑁆𑀘 𑀑𑀮𑁄𑀓𑁂𑀳𑀺, 𑀫𑀸 𑀯𑀺𑀦𑀲𑁆𑀲𑀺, 𑀯𑀺𑀭𑀫 𑀫𑀦𑀼𑀲𑁆𑀲𑀫𑀁𑀲𑀢𑁄’’𑀢𑀺 𑀆𑀳. 𑀭𑀸𑀚𑀸 ‘‘𑀦 ¶ 𑀫𑀬𑁆𑀳𑀁 𑀏𑀢𑁂 𑀫𑀦𑀼𑀲𑁆𑀲𑀫𑀁𑀲𑀢𑁄 𑀧𑀺𑀬𑀢𑀭𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀇𑀫𑀫𑁆𑀳𑀸 𑀦𑀕𑀭𑀸 𑀘 𑀭𑀝𑁆𑀞𑀸 𑀘 𑀦𑀺𑀓𑁆𑀔𑀫𑀣𑀸’’𑀢𑀺 𑀯𑀼𑀢𑁆𑀢𑁂, ‘‘𑀓𑀸𑀴𑀳𑀢𑁆𑀣𑀺, 𑀦 𑀫𑁂 𑀭𑀚𑁆𑀚𑁂𑀦𑀢𑁆𑀣𑁄, 𑀦𑀕𑀭𑀸 𑀦𑀺𑀓𑁆𑀔𑀫𑀸𑀫𑀺, 𑀏𑀓𑀁 𑀧𑀦 𑀫𑁂 𑀔𑀕𑁆𑀕𑀜𑁆𑀘 𑀭𑀲𑀓𑀜𑁆𑀘 𑀪𑀸𑀚𑀦𑀜𑁆𑀘 𑀤𑁂𑀳𑀻’’𑀢𑀺 𑀆𑀳. 𑀅𑀣𑀲𑁆𑀲 𑀔𑀕𑁆𑀕𑀜𑁆𑀘 𑀫𑀁𑀲𑀧𑀘𑀦𑀪𑀸𑀚𑀦𑀜𑁆𑀘 𑀧𑀘𑁆𑀙𑀺𑀜𑁆𑀘 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀭𑀲𑀓𑀜𑁆𑀘 𑀤𑀢𑁆𑀯𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑀺𑀁𑀲𑀼.
𑀲𑁄 𑀔𑀕𑁆𑀕𑀜𑁆𑀘 𑀭𑀲𑀓𑀜𑁆𑀘 ¶ 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀫𑀽𑀮𑁂 𑀯𑀲𑀦𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑁄 𑀅𑀝𑀯𑀺𑀫𑀕𑁆𑀕𑁂 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀭𑀲𑀓𑀲𑁆𑀲 𑀤𑁂𑀢𑀺. 𑀲𑁄𑀧𑀺𑀲𑁆𑀲 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀉𑀧𑀦𑀸𑀫𑁂𑀢𑀺. 𑀏𑀯𑀁 𑀉𑀪𑁄𑀧𑀺 𑀚𑀻𑀯𑀦𑁆𑀢𑀺. 𑀫𑀦𑀼𑀲𑁆𑀲𑀕𑀳𑀡𑀓𑀸𑀮𑁂 ‘‘𑀅𑀳𑀁 𑀅𑀭𑁂 𑀫𑀦𑀼𑀲𑁆𑀲𑀘𑁄𑀭𑁄 𑀧𑁄𑀭𑀺𑀲𑀸𑀤𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀧𑀓𑁆𑀔𑀦𑁆𑀢𑁂 𑀓𑁄𑀘𑀺 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀩𑁆𑀩𑁂 𑀪𑀽𑀫𑀺𑀬𑀁 𑀧𑀢𑀦𑁆𑀢𑀺. 𑀢𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀻𑀲𑀁 ¶ 𑀓𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀭𑀲𑀓𑀲𑁆𑀲 𑀤𑁂𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀓𑀜𑁆𑀘𑀺 𑀫𑀦𑀼𑀲𑁆𑀲𑀁 𑀅𑀮𑀪𑀺𑀢𑁆𑀯𑀸 𑀆𑀕𑀢𑁄 𑀭𑀲𑀓𑁂𑀦 ‘‘𑀓𑀺𑀁 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀉𑀤𑁆𑀥𑀦𑁂 𑀉𑀓𑁆𑀔𑀮𑀺𑀁 𑀆𑀭𑁄𑀧𑁂𑀳𑀻’’𑀢𑀺 𑀆𑀳. ‘‘𑀫𑀁𑀲𑀁 𑀓𑀳𑀁, 𑀤𑁂𑀯𑀸’’𑀢𑀺? ‘‘𑀮𑀪𑀺𑀲𑁆𑀲𑀸𑀫𑀳𑀁 𑀫𑀁𑀲’’𑀦𑁆𑀢𑀺. 𑀲𑁄 ‘‘𑀦𑀢𑁆𑀣𑀺 𑀫𑁂 𑀤𑀸𑀦𑀺 𑀚𑀻𑀯𑀺𑀢’’𑀦𑁆𑀢𑀺 𑀓𑀫𑁆𑀧𑀫𑀸𑀦𑁄 𑀉𑀤𑁆𑀥𑀦𑁂 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀉𑀓𑁆𑀔𑀮𑀺𑀁 𑀆𑀭𑁄𑀧𑁂𑀲𑀺. 𑀅𑀣 𑀦𑀁 𑀧𑁄𑀭𑀺𑀲𑀸𑀤𑁄 𑀅𑀲𑀺𑀦𑀸 𑀫𑀸𑀭𑁂𑀢𑁆𑀯𑀸 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀔𑀸𑀤𑀺. 𑀢𑀢𑁄 𑀧𑀝𑁆𑀞𑀸𑀬 𑀏𑀓𑀓𑁄𑀯 𑀚𑀸𑀢𑁄 𑀲𑀬𑀫𑁂𑀯 𑀧𑀘𑀺𑀢𑁆𑀯𑀸 𑀔𑀸𑀤𑀢𑀺. ‘‘𑀧𑁄𑀭𑀺𑀲𑀸𑀤𑁄 𑀫𑀕𑁆𑀕𑁂 𑀫𑀕𑁆𑀕𑀧𑀝𑀺𑀧𑀦𑁆𑀦𑁂 𑀳𑀦𑀢𑀻’’𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺.
𑀢𑀤𑀸 𑀏𑀓𑁄 𑀲𑀫𑁆𑀧𑀦𑁆𑀦𑀯𑀺𑀪𑀯𑁄 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁄 𑀧𑀼𑀩𑁆𑀩𑀦𑁆𑀢𑀢𑁄 𑀅𑀧𑀭𑀦𑁆𑀢𑀁 𑀲𑀜𑁆𑀘𑀭𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑁄𑀭𑀺𑀲𑀸𑀤𑁄 𑀦𑀸𑀫 𑀓𑀺𑀭 𑀘𑁄𑀭𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑀼𑀲𑁆𑀲𑁂 𑀫𑀸𑀭𑁂𑀲𑀺, 𑀥𑀦𑀁 𑀤𑀢𑁆𑀯𑀸 𑀢𑀁 𑀅𑀝𑀯𑀺𑀁 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀅𑀝𑀯𑀺𑀫𑀼𑀔𑀯𑀸𑀲𑀻𑀦𑀁 𑀫𑀦𑀼𑀲𑁆𑀲𑀸𑀦𑀁 ‘‘𑀢𑀼𑀫𑁆𑀳𑁂 𑀫𑀁 𑀅𑀝𑀯𑀺𑀢𑁄 𑀅𑀢𑀺𑀓𑁆𑀓𑀸𑀫𑁂𑀣𑀸’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀕𑀘𑁆𑀙𑀦𑁆𑀢𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑀲𑀢𑁆𑀣𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀬𑀁 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀲𑁂𑀢𑀕𑁄𑀡𑀬𑀼𑀢𑁆𑀢𑁂 𑀲𑀼𑀔𑀬𑀸𑀦𑀓𑁂 𑀦𑀺𑀲𑀺𑀦𑁆𑀦𑁄 𑀢𑁂𑀳𑀺 𑀅𑀝𑀯𑀺𑀯𑀸𑀲𑀺𑀓𑀧𑀼𑀭𑀺𑀲𑁂𑀳𑀺 𑀧𑀭𑀺𑀯𑀼𑀢𑁄 𑀲𑀩𑁆𑀩𑀧𑀘𑁆𑀙𑀢𑁄 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀧𑁄𑀭𑀺𑀲𑀸𑀤𑁄 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀧𑀼𑀭𑀺𑀲𑁂 𑀉𑀧𑀥𑀸𑀭𑁂𑀦𑁆𑀢𑁄 𑀲𑁂𑀲𑀫𑀦𑀼𑀲𑁆𑀲𑁂𑀲𑀼 ‘‘𑀓𑀺𑀁 𑀇𑀫𑁂𑀲𑀼 𑀫𑀬𑀸 𑀔𑀸𑀤𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑁄 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀁 𑀔𑀸𑀤𑀺𑀢𑀼𑀓𑀸𑀫𑀢𑀸𑀬 𑀧𑀕𑁆𑀖𑀭𑀺𑀢𑀔𑁂𑀴𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑁂 𑀭𑀼𑀓𑁆𑀔𑀢𑁄 ¶ 𑀑𑀭𑀼𑀬𑁆𑀳 ‘‘𑀅𑀳𑀁 ¶ 𑀅𑀭𑁂 𑀧𑁄𑀭𑀺𑀲𑀸𑀤𑁄’’𑀢𑀺 𑀦𑀸𑀫𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀔𑀕𑁆𑀕𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀯𑀸𑀮𑀼𑀓𑀸𑀬 𑀢𑁂𑀲𑀁 𑀅𑀓𑁆𑀔𑀻𑀦𑀺 𑀧𑀽𑀭𑁂𑀦𑁆𑀢𑁄 𑀯𑀺𑀬 𑀧𑀓𑁆𑀔𑀦𑁆𑀤𑀺. 𑀏𑀓𑁄𑀧𑀺 𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀪𑀽𑀫𑀺𑀬𑀁 𑀉𑀭𑁂𑀦 𑀦𑀺𑀧𑀚𑁆𑀚𑀺𑀁𑀲𑀼. 𑀲𑁄 𑀲𑀼𑀔𑀬𑀸𑀦𑀓𑁂 𑀦𑀺𑀲𑀺𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀅𑀥𑁄𑀲𑀻𑀲𑀓𑀁 𑀑𑀮𑀫𑁆𑀩𑁂𑀢𑁆𑀯𑀸 𑀲𑀻𑀲𑀁 𑀕𑁄𑀧𑁆𑀨𑀓𑁂𑀳𑀺 𑀧𑀳𑀭𑀦𑁆𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀬𑀸𑀲𑀺.
𑀢𑀤𑀸 𑀢𑁂 𑀧𑀼𑀭𑀺𑀲𑀸 𑀉𑀝𑁆𑀞𑀸𑀬, ‘‘𑀪𑁄, 𑀧𑀼𑀭𑀺𑀲𑀸 𑀫𑀬𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑀢𑁄 𑀓𑀳𑀸𑀧𑀡𑀲𑀳𑀲𑁆𑀲𑀁 𑀕𑀡𑁆𑀳𑀺𑀫𑁆𑀳𑀸, 𑀓𑁄 𑀦𑀸𑀫 𑀅𑀫𑁆𑀳𑀸𑀓𑀁 𑀧𑀼𑀭𑀺𑀲𑀓𑀸𑀭𑁄, 𑀲𑀓𑁆𑀓𑁄𑀦𑁆𑀢𑀸 𑀯𑀸 𑀅𑀲𑀓𑁆𑀓𑁄𑀦𑁆𑀢𑀸 𑀯𑀸 𑀣𑁄𑀓𑀁 𑀅𑀦𑀼𑀩𑀦𑁆𑀥𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀧𑁄𑀭𑀺𑀲𑀸𑀤𑁄𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀜𑁆𑀘𑀺 𑀅𑀤𑀺𑀢𑁆𑀯𑀸 𑀲𑀡𑀺𑀓𑀁 𑀧𑀸𑀬𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑀸𑀫𑀲𑀫𑁆𑀧𑀦𑁆𑀦𑁄 𑀏𑀓𑁄 𑀲𑀽𑀭𑀧𑀼𑀭𑀺𑀲𑁄 𑀯𑁂𑀕𑁂𑀦 𑀢𑀁 𑀧𑀸𑀧𑀼𑀡𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀏𑀓𑀁 𑀯𑀢𑀺𑀁 𑀮𑀗𑁆𑀖𑀦𑁆𑀢𑁄 𑀔𑀤𑀺𑀭𑀔𑀸𑀡𑀼𑀓𑀁 𑀅𑀓𑁆𑀓𑀫𑀺, 𑀔𑀸𑀡𑀼𑀓𑁄 𑀧𑀺𑀝𑁆𑀞𑀺𑀧𑀸𑀤𑁂𑀦 𑀦𑀺𑀓𑁆𑀔𑀫𑀺. 𑀮𑁄𑀳𑀺𑀢𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀮𑀗𑁆𑀖𑀫𑀸𑀦𑁄 𑀬𑀸𑀢𑀺. 𑀅𑀣 𑀦𑀁 𑀲𑁄 𑀤𑀺𑀲𑁆𑀯𑀸, ‘‘𑀪𑁄, 𑀫𑀬𑀸 𑀏𑀲 𑀯𑀺𑀤𑁆𑀥𑁄, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀧𑀘𑁆𑀙𑀢𑁄 𑀏𑀣, 𑀕𑀡𑁆𑀳𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳. 𑀢𑁂 𑀤𑀼𑀩𑁆𑀩𑀮𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑁄 𑀢𑁂𑀳𑀺 𑀅𑀦𑀼𑀩𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑁄𑀢𑁆𑀣𑀺𑀫𑀓𑀸𑀲𑀺. 𑀅𑀣 𑀅𑀝𑀯𑀺𑀯𑀸𑀲𑀺𑀓𑀧𑀼𑀭𑀺𑀲𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀘𑁄𑀭𑁂𑀦𑀸’’𑀢𑀺 𑀢𑀢𑁄 𑀦𑀺𑀯𑀢𑁆𑀢𑀺𑀁𑀲𑀼.
𑀧𑁄𑀭𑀺𑀲𑀸𑀤𑁄𑀧𑀺 ¶ 𑀅𑀢𑁆𑀢𑀦𑁄 𑀦𑀺𑀕𑁆𑀭𑁄𑀥𑀫𑀽𑀮𑀁 𑀕𑀦𑁆𑀢𑁆𑀯𑀸 𑀧𑀸𑀭𑁄𑀳𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁄, ‘‘𑀅𑀬𑁆𑀬𑁂 𑀭𑀼𑀓𑁆𑀔𑀤𑁂𑀯𑀢𑁂, 𑀲𑀘𑁂 𑀫𑁂 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀯𑀡𑀁 𑀨𑀸𑀲𑀼𑀓𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀔𑀢𑁆𑀢𑀺𑀬𑀸𑀦𑀁 𑀕𑀮𑀮𑁄𑀳𑀺𑀢𑁂𑀦 𑀢𑀯 𑀔𑀦𑁆𑀥𑀁 𑀥𑁄𑀯𑀺𑀢𑁆𑀯𑀸 𑀅𑀦𑁆𑀢𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀘𑀫𑀥𑀼𑀭𑀫𑀁𑀲𑁂𑀦 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀬𑀸𑀘𑀦𑀁 𑀓𑀭𑀺. 𑀢𑀲𑁆𑀲 𑀅𑀦𑁆𑀦𑀧𑀸𑀦𑀫𑀁𑀲𑀁 𑀅𑀮𑀪𑀦𑁆𑀢𑀲𑁆𑀲 𑀲𑀭𑀻𑀭𑀁 𑀲𑀼𑀲𑁆𑀲𑀺𑀢𑁆𑀯𑀸 𑀅𑀦𑁆𑀢𑁄𑀲𑀢𑁆𑀢𑀸𑀳𑁂𑀬𑁂𑀯 𑀯𑀡𑁄 𑀨𑀸𑀲𑀼𑀓𑁄 𑀅𑀳𑁄𑀲𑀺. 𑀲𑁄 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀢𑀲𑁆𑀲 𑀨𑀸𑀲𑀼𑀓𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀲𑀺. 𑀲𑁄 𑀓𑀢𑀺𑀧𑀸𑀳𑀁 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀩𑀮𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀳𑀼𑀧𑀓𑀸𑀭𑀸 𑀫𑁂 𑀤𑁂𑀯𑀢𑀸, 𑀆𑀬𑀸𑀘𑀦𑀸 𑀅𑀲𑁆𑀲𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀔𑀕𑁆𑀕𑀁 𑀆𑀤𑀸𑀬 𑀭𑀼𑀓𑁆𑀔𑀫𑀽𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ ‘‘𑀭𑀸𑀚𑀸𑀦𑁄 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀬𑀸𑀲𑀺. 𑀅𑀣 𑀦𑀁 𑀧𑀼𑀭𑀺𑀫𑀪𑀯𑁂 𑀬𑀓𑁆𑀔𑀓𑀸𑀮𑁂 𑀏𑀓𑀢𑁄 𑀫𑀦𑀼𑀲𑁆𑀲𑀫𑀁𑀲𑀔𑀸𑀤𑀓𑁄 𑀲𑀳𑀸𑀬𑀓𑀬𑀓𑁆𑀔𑁄 𑀅𑀦𑀼𑀯𑀺𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀫 𑀅𑀢𑀻𑀢𑀪𑀯𑁂 𑀲𑀳𑀸𑀬𑁄’’𑀢𑀺 𑀜𑀢𑁆𑀯𑀸, ‘‘𑀲𑀫𑁆𑀫, 𑀫𑀁 𑀲𑀜𑁆𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀲𑀜𑁆𑀚𑀸𑀦𑀸𑀫𑀻’’𑀢𑀺. 𑀅𑀣𑀲𑁆𑀲 𑀧𑀼𑀭𑀺𑀫𑀪𑀯𑁂 𑀓𑀢𑀓𑀸𑀭𑀡𑀁 ¶ 𑀓𑀣𑁂𑀲𑀺. 𑀲𑁄 𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. ‘‘𑀓𑀳𑀁 𑀦𑀺𑀩𑁆𑀩𑀢𑁆𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀜𑁆𑀘 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀓𑀸𑀭𑀡𑀜𑁆𑀘 𑀇𑀤𑀸𑀦𑀺 𑀯𑀲𑀦𑀝𑁆𑀞𑀸𑀦𑀜𑁆𑀘 𑀔𑀸𑀡𑀼𑀦𑀸 𑀯𑀺𑀤𑁆𑀥𑀓𑀸𑀭𑀡𑀜𑁆𑀘 𑀤𑁂𑀯𑀢𑀸𑀬 𑀆𑀬𑀸𑀘𑀦𑀸𑀫𑁄𑀘𑀦𑀢𑁆𑀣𑀁 𑀕𑀫𑀦𑀓𑀸𑀭𑀡𑀜𑁆𑀘 𑀲𑀩𑁆𑀩𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀬𑀸𑀧𑀺 𑀫𑀫𑁂𑀢𑀁 𑀓𑀺𑀘𑁆𑀘𑀁 𑀦𑀺𑀢𑁆𑀣𑀭𑀺𑀢𑀩𑁆𑀩𑀁, 𑀉𑀪𑁄𑀧𑀺 𑀕𑀘𑁆𑀙𑀸𑀫, 𑀲𑀫𑁆𑀫𑀸’’𑀢𑀺 𑀆𑀳. ‘‘𑀲𑀫𑁆𑀫 𑀦 𑀕𑀘𑁆𑀙𑁂𑀬𑁆𑀬𑀸𑀳𑀁, 𑀏𑀓𑀁 𑀧𑀦 𑀫𑁂 𑀓𑀫𑁆𑀫𑀁 𑀅𑀢𑁆𑀣𑀺, 𑀅𑀳𑀁 𑀔𑁄 𑀧𑀦 𑀅𑀦𑀕𑁆𑀖𑀁 𑀧𑀤𑀮𑀓𑁆𑀔𑀡𑀁 𑀦𑀸𑀫 𑀏𑀓𑀁 𑀫𑀦𑁆𑀢𑀁 𑀚𑀸𑀦𑀸𑀫𑀺, 𑀲𑁄 𑀩𑀮𑀜𑁆𑀘 𑀚𑀯𑀜𑁆𑀘 𑀲𑀤𑁆𑀤𑀜𑁆𑀘 𑀓𑀭𑁄𑀢𑀺, 𑀢𑀁 𑀫𑀦𑁆𑀢𑀁 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀬𑀓𑁆𑀔𑁄𑀧𑀺𑀲𑁆𑀲 𑀢𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺.
𑀧𑁄𑀭𑀺𑀲𑀸𑀤𑁄 𑀫𑀦𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀸𑀢𑀚𑀯𑁄 𑀅𑀢𑀺𑀲𑀽𑀭𑁄 𑀅𑀳𑁄𑀲𑀺. 𑀲𑁄 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯 𑀏𑀓𑀲𑀢𑀭𑀸𑀚𑀸𑀦𑁄 𑀉𑀬𑁆𑀬𑀸𑀦𑀸𑀤𑀻𑀦𑀺 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀯𑀸𑀢𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀅𑀭𑁂 𑀫𑀦𑀼𑀲𑁆𑀲𑀘𑁄𑀭𑁄 𑀧𑁄𑀭𑀺𑀲𑀸𑀤𑁄’’𑀢𑀺 𑀦𑀸𑀫𑀁 𑀲𑀸𑀯𑁂𑀢𑁆𑀯𑀸 𑀯𑀕𑁆𑀕𑀦𑁆𑀢𑁄 𑀦𑀤𑀦𑁆𑀢𑁄 𑀪𑀬𑀧𑁆𑀧𑀢𑁆𑀢𑁂 𑀓𑀢𑁆𑀯𑀸 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀥𑁄𑀲𑀻𑀲𑀓𑁂 𑀓𑀢𑁆𑀯𑀸 𑀧𑀡𑁆𑀳𑀺𑀬𑀸 𑀲𑀻𑀲𑀁 𑀧𑀳𑀭𑀦𑁆𑀢𑁄 𑀯𑀸𑀢𑀯𑁂𑀕𑁂𑀦 𑀦𑁂𑀢𑁆𑀯𑀸 𑀳𑀢𑁆𑀣𑀢𑀮𑁂𑀲𑀼 𑀙𑀺𑀤𑁆𑀤𑀸𑀦𑀺 𑀓𑀢𑁆𑀯𑀸 𑀭𑀚𑁆𑀚𑀼𑀬𑀸 𑀆𑀯𑀼𑀦𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀑𑀮𑀫𑁆𑀩𑁂𑀲𑀺 𑀅𑀕𑁆𑀕𑀧𑀸𑀤𑀗𑁆𑀕𑀼𑀮𑀻𑀳𑀺 𑀪𑀽𑀫𑀺𑀬𑀁 𑀨𑀼𑀲𑀫𑀸𑀦𑀸𑀳𑀺. 𑀢𑁂 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀫𑀺𑀮𑀸𑀢𑀓𑀼𑀭𑀡𑁆𑀟𑀓𑀤𑀸𑀫𑀸𑀦𑀺 𑀯𑀺𑀬 𑀧𑀭𑀺𑀯𑀢𑁆𑀢𑀦𑁆𑀢𑀸 𑀑𑀮𑀫𑁆𑀩𑀺𑀁𑀲𑀼. ‘‘𑀲𑀼𑀢𑀲𑁄𑀫𑁄 𑀧𑀦 𑀫𑁂 𑀧𑀺𑀝𑁆𑀞𑀺𑀆𑀘𑀭𑀺𑀬𑁄 𑀳𑁄𑀢𑀺, 𑀲𑀘𑁂 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀢𑀼𑀘𑁆𑀙𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀦 𑀦𑁂𑀲𑀺. 𑀲𑁄 ‘‘𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀲𑀽𑀮𑁂 𑀢𑀘𑁆𑀙𑀦𑁆𑀢𑁄 𑀦𑀺𑀲𑀻𑀤𑀺. 𑀭𑀼𑀓𑁆𑀔𑀤𑁂𑀯𑀢𑀸 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀓𑀺𑀭𑁂𑀲 𑀩𑀮𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀡𑀫𑁆𑀧𑀺𑀲𑁆𑀲 𑀫𑀬𑀸 𑀓𑀺𑀜𑁆𑀘𑀺 𑀨𑀸𑀲𑀼𑀓𑀁 𑀓𑀢𑀁 𑀦𑀢𑁆𑀣𑀺, 𑀇𑀤𑀸𑀦𑀺 𑀇𑀫𑁂𑀲𑀁 𑀫𑀳𑀸𑀯𑀺𑀦𑀸𑀲𑀁 ¶ 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀳𑀁 𑀏𑀢𑀁 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀓𑀣𑁂𑀢𑁆𑀯𑀸 ‘‘𑀦𑀺𑀯𑀸𑀭𑁂𑀣 𑀦’’𑀦𑁆𑀢𑀺 𑀆𑀳. 𑀢𑁂𑀳𑀺𑀧𑀺 ‘‘𑀦 𑀫𑀬𑀁 𑀧𑁄𑀭𑀺𑀲𑀸𑀤𑀲𑁆𑀲 𑀓𑀫𑁆𑀫𑀁 𑀦𑀺𑀯𑀸𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀓𑁆𑀓𑁄, 𑀤𑁂𑀯𑀭𑀸𑀚𑀸’’𑀢𑀺 𑀲𑀼𑀢𑁆𑀯𑀸 ¶ 𑀲𑀓𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀓𑀣𑁂𑀢𑁆𑀯𑀸 ‘‘𑀦𑀺𑀯𑀸𑀭𑁂𑀣 𑀦’’𑀦𑁆𑀢𑀺 𑀆𑀳. 𑀲𑁄𑀧𑀺 ‘‘𑀦𑀸𑀳𑀁 𑀲𑀓𑁆𑀓𑁄𑀫𑀺 𑀦𑀺𑀯𑀸𑀭𑁂𑀢𑀼𑀁, 𑀲𑀫𑀢𑁆𑀣𑀁 𑀧𑀦 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑁄𑀦𑀸𑀫𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀅𑀜𑁆𑀜𑁄 𑀦𑀢𑁆𑀣𑀺, 𑀓𑀼𑀭𑀼𑀭𑀝𑁆𑀞𑁂 𑀧𑀦 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀓𑁄𑀭𑀩𑁆𑀬𑀭𑀸𑀚𑀧𑀼𑀢𑁆𑀢𑁄 𑀲𑀼𑀢𑀲𑁄𑀫𑁄 𑀦𑀸𑀫 𑀢𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀤𑀫𑁂𑀲𑁆𑀲𑀢𑀺, 𑀭𑀸𑀚𑀽𑀦𑀜𑁆𑀘 𑀚𑀻𑀯𑀺𑀢𑀁 𑀤𑀲𑁆𑀲𑀢𑀺, 𑀢𑀜𑁆𑀘 𑀫𑀦𑀼𑀲𑁆𑀲𑀫𑀁𑀲𑀸 𑀑𑀭𑀫𑀸𑀧𑁂𑀲𑁆𑀲𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀫𑀢𑀁 𑀯𑀺𑀬 𑀥𑀫𑁆𑀫𑀁 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀢𑀺, 𑀲𑀘𑁂𑀧𑀺 𑀭𑀸𑀚𑀽𑀦𑀁 ¶ 𑀚𑀻𑀯𑀺𑀢𑀁 𑀤𑀸𑀢𑀼𑀓𑀸𑀫𑁄, ‘𑀲𑀼𑀢𑀲𑁄𑀫𑀁 𑀆𑀦𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀯𑀤𑁂𑀳𑀻’’𑀢𑀺 𑀆𑀳.
𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀔𑀺𑀧𑁆𑀧𑀁 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑀯𑁂𑀲𑁂𑀦 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀧𑀸𑀬𑀸𑀲𑀺. 𑀲𑁄 𑀧𑀤𑀲𑀤𑁆𑀤𑁂𑀦 ‘‘𑀭𑀸𑀚𑀸 𑀦𑀼 𑀔𑁄 𑀓𑁄𑀘𑀺 𑀧𑀮𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀔𑀢𑁆𑀢𑀺𑀬𑀸𑀯, 𑀇𑀫𑀁 𑀕𑀳𑁂𑀢𑁆𑀯𑀸 𑀏𑀓𑀲𑀢𑀁 𑀧𑀽𑀭𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀅𑀲𑀺𑀳𑀢𑁆𑀣𑁄 𑀅𑀦𑀼𑀩𑀦𑁆𑀥𑀺, 𑀢𑀺𑀬𑁄𑀚𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸𑀧𑀺 𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀕𑀢𑁆𑀢𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀳𑀢𑁆𑀣𑀺𑀫𑁆𑀧𑀺 𑀅𑀲𑁆𑀲𑀫𑁆𑀧𑀺 𑀭𑀣𑀫𑁆𑀧𑀺 𑀥𑀸𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀫𑀺, 𑀅𑀚𑁆𑀚 𑀇𑀫𑀁 𑀧𑀩𑁆𑀩𑀚𑀺𑀢𑀁 𑀲𑀓𑀸𑀬 𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀁 𑀲𑀩𑁆𑀩𑀣𑀸𑀫𑁂𑀦 𑀥𑀸𑀯𑀦𑁆𑀢𑁄𑀧𑀺 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺. 𑀢𑀢𑁄 𑀲𑁄 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀯𑀘𑀦𑀓𑀭𑀸 𑀳𑁄𑀦𑁆𑀢𑀺, ‘𑀢𑀺𑀝𑁆𑀞𑀸’𑀢𑀺 𑀦𑀁 𑀯𑀢𑁆𑀯𑀸 𑀞𑀺𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀺𑀝𑁆𑀞, 𑀲𑀫𑀡𑀸’’𑀢𑀺 𑀆𑀳. ‘‘𑀅𑀳𑀁 𑀢𑀸𑀯 𑀞𑀺𑀢𑁄, 𑀢𑁆𑀯𑀁 𑀧𑀦 𑀥𑀸𑀯𑀺𑀢𑀼𑀁 𑀯𑀸𑀬𑀸𑀫𑀫𑀓𑀸𑀲𑀻’’𑀢𑀺. 𑀅𑀣 𑀦𑀁, ‘‘𑀪𑁄, 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀚𑀻𑀯𑀺𑀢𑀳𑁂𑀢𑀼𑀧𑀺 𑀅𑀮𑀺𑀓𑀁 𑀦 𑀪𑀡𑀦𑁆𑀢𑀺, 𑀢𑁆𑀯𑀁 𑀧𑀦 𑀫𑀼𑀲𑀸𑀯𑀸𑀤𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀢𑀺𑀝𑁆𑀞𑀸𑀳𑀻𑀢𑀺 ¶ 𑀫𑀬𑀸 𑀯𑀼𑀢𑁆𑀢𑁄, 𑀲𑁄 𑀢𑁆𑀯𑀁 𑀕𑀘𑁆𑀙𑀲𑀺 𑀧𑀫𑁆𑀫𑀼𑀔𑁄;
𑀅𑀝𑁆𑀞𑀺𑀢𑁄 𑀢𑁆𑀯𑀁 𑀞𑀺𑀢𑁄𑀫𑁆𑀳𑀻𑀢𑀺, 𑀮𑀧𑀲𑀺 𑀩𑁆𑀭𑀳𑁆𑀫𑀘𑀸𑀭𑀺𑀦𑀺;
𑀇𑀤𑀁 𑀢𑁂 𑀲𑀫𑀡𑀸𑀬𑀼𑀢𑁆𑀢𑀁, 𑀅𑀲𑀺𑀜𑁆𑀘 𑀫𑁂 𑀫𑀜𑁆𑀜𑀲𑀺 𑀓𑀗𑁆𑀓𑀧𑀢𑁆𑀢’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀲𑀫𑀡, 𑀢𑀺𑀝𑁆𑀞𑀸𑀳𑀺 𑀇𑀢𑀺 𑀯𑀘𑀦𑀁 𑀫𑀬𑀸 𑀯𑀼𑀢𑁆𑀢𑁄 𑀲𑁄 𑀢𑁆𑀯𑀁 𑀧𑀫𑁆𑀫𑀼𑀔𑁄 𑀧𑀭𑀫𑁆𑀫𑀼𑀔𑁄 𑀳𑀼𑀢𑁆𑀯𑀸 𑀕𑀘𑁆𑀙𑀲𑀺, 𑀩𑁆𑀭𑀳𑁆𑀫𑀘𑀸𑀭𑀺𑀦𑀺 𑀅𑀝𑁆𑀞𑀺𑀢𑁄 𑀲𑀫𑀸𑀦𑁄 𑀢𑁆𑀯𑀁 𑀞𑀺𑀢𑁄 𑀅𑀫𑁆𑀳𑀺 𑀇𑀢𑀺 𑀮𑀧𑀲𑀺, 𑀅𑀲𑀺𑀜𑁆𑀘 𑀫𑁂 𑀓𑀗𑁆𑀓𑀧𑀢𑁆𑀢𑀁 𑀫𑀜𑁆𑀜𑀲𑀻𑀢𑀺.
𑀢𑀢𑁄 𑀤𑁂𑀯𑀢𑀸 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋
‘‘𑀞𑀺𑀢𑁄𑀳𑀫𑀲𑁆𑀫𑀻 𑀲𑀥𑀫𑁆𑀫𑁂𑀲𑀼 𑀭𑀸𑀚, 𑀦 𑀦𑀸𑀫𑀕𑁄𑀢𑁆𑀢𑀁 𑀧𑀭𑀺𑀯𑀢𑁆𑀢𑀬𑀸𑀫𑀺;
𑀘𑁄𑀭𑀜𑁆𑀘 𑀮𑁄𑀓𑁂 𑀅𑀞𑀺𑀢𑀁 𑀯𑀤𑀦𑁆𑀢𑀺;
𑀆𑀧𑀸𑀬𑀺𑀓𑀁 𑀦𑁂𑀭𑀬𑀺𑀓𑀁 𑀇𑀢𑁄 𑀘𑀼𑀢𑀁.
‘‘𑀲𑀘𑁂 ¶ 𑀢𑁆𑀯𑀁 𑀲𑀤𑁆𑀤𑀳𑀲𑀺 𑀭𑀸𑀚, 𑀲𑀼𑀢𑀁 𑀕𑀡𑁆𑀳𑀸𑀳𑀺 𑀔𑀢𑁆𑀢𑀺𑀬;
𑀢𑁂𑀦 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀏𑀯𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀻’’𑀢𑀺.
𑀢𑀢𑁆𑀣 ¶ 𑀲𑀥𑀫𑁆𑀫𑁂𑀲𑀽𑀢𑀺, 𑀫𑀳𑀸𑀭𑀸𑀚, 𑀅𑀳𑀁 𑀲𑀓𑁂𑀲𑀼 𑀤𑀲𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂𑀲𑀼 𑀞𑀺𑀢𑁄 𑀅𑀲𑁆𑀫𑀺 𑀪𑀯𑀸𑀫𑀺. 𑀦 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 𑀢𑁆𑀯𑀁 𑀧𑀼𑀩𑁆𑀩𑁂 𑀤𑀳𑀭𑀓𑀸𑀮𑁂 𑀩𑁆𑀭𑀳𑁆𑀫𑀤𑀢𑁆𑀢𑁄 𑀳𑀼𑀢𑁆𑀯𑀸 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀩𑀸𑀭𑀸𑀡𑀲𑀺𑀁 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀚𑀸𑀢𑁄, 𑀢𑀁 𑀦𑀸𑀫𑀁 𑀚𑀳𑀺𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 𑀳𑀼𑀢𑁆𑀯𑀸 𑀇𑀤𑀸𑀦𑀺 𑀓𑀫𑁆𑀫𑀸𑀲𑀧𑀸𑀤𑁄 𑀚𑀸𑀢𑁄, 𑀔𑀢𑁆𑀢𑀺𑀬𑀓𑀼𑀮𑁂 𑀚𑀸𑀢𑁄𑀧𑀺 𑀅𑀪𑀓𑁆𑀔𑀁 𑀫𑀦𑀼𑀲𑁆𑀲𑀫𑀁𑀲𑀁 𑀬𑀲𑁆𑀫𑀸 𑀪𑀓𑁆𑀔𑁂𑀲𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀦𑀸𑀫𑀕𑁄𑀢𑁆𑀢𑀁 𑀬𑀣𑀸 𑀧𑀭𑀺𑀯𑀢𑁆𑀢𑁂𑀲𑀺, 𑀢𑀣𑀸 𑀅𑀳𑀁 𑀅𑀢𑁆𑀢𑀦𑁄 𑀦𑀸𑀫𑀕𑁄𑀢𑁆𑀢𑀁 𑀦 𑀧𑀭𑀺𑀯𑀢𑁆𑀢𑀬𑀸𑀫𑀺. 𑀘𑁄𑀭𑀜𑁆𑀘𑀸𑀢𑀺 𑀮𑁄𑀓𑁂 𑀘𑁄𑀭𑀜𑁆𑀘 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀅𑀞𑀺𑀢𑀁 𑀦𑀸𑀫 𑀯𑀤𑀦𑁆𑀢𑀺. 𑀇𑀢𑁄 𑀘𑀼𑀢𑀦𑁆𑀢𑀺 𑀇𑀢𑁄 𑀘𑀼𑀢𑀁 𑀳𑀼𑀢𑁆𑀯𑀸 𑀅𑀧𑀸𑀬𑁂 𑀦𑀺𑀭𑀬𑁂 𑀧𑀢𑀺𑀝𑁆𑀞𑀺𑀢𑀁. 𑀔𑀢𑁆𑀢𑀺𑀬, 𑀪𑀽𑀫𑀺𑀧𑀸𑀮 𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀫 𑀯𑀘𑀦𑀁 𑀲𑀘𑁂 𑀲𑀤𑁆𑀤𑀳𑀲𑀺, 𑀲𑀼𑀢𑀲𑁄𑀫𑀁 𑀕𑀡𑁆𑀳𑀸𑀳𑀺, 𑀢𑁂𑀦 𑀲𑀼𑀢𑀲𑁄𑀫𑁂𑀦 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦 𑀏𑀯𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀲𑀺. 𑀪𑁄, 𑀧𑁄𑀭𑀺𑀲𑀸𑀤 𑀫𑀼𑀲𑀸𑀯𑀸𑀤𑀺 𑀢𑀬𑀸 𑀫𑀬𑁆𑀳𑀁 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀆𑀦𑁂𑀢𑁆𑀯𑀸 𑀩𑀳𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀲𑁆𑀲𑀼𑀢𑀁, 𑀇𑀤𑀸𑀦𑀺 𑀬𑁂 𑀯𑀸 𑀢𑁂 𑀯𑀸 𑀤𑀼𑀩𑁆𑀩𑀮𑀭𑀸𑀚𑀸𑀦𑁄 𑀆𑀦𑁂𑀲𑀺, 𑀚𑀫𑁆𑀩𑀼𑀤𑀻𑀧𑀢𑀮𑁂 𑀚𑁂𑀝𑁆𑀞𑀓𑀁 𑀲𑀼𑀢𑀲𑁄𑀫𑀭𑀸𑀚𑀸𑀦𑀁 𑀲𑀘𑁂 𑀢𑁆𑀯𑀁 𑀦 𑀆𑀦𑁂𑀲𑁆𑀲𑀲𑀺, 𑀯𑀘𑀦𑀁 𑀢𑁂 𑀫𑀼𑀲𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑀲𑁄𑀫𑀁 𑀕𑀡𑁆𑀳𑀸𑀳𑀻𑀢𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀤𑁂𑀯𑀢𑀸 𑀧𑀩𑁆𑀩𑀚𑀺𑀢𑀯𑁂𑀲𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀲𑀓𑁂𑀦 𑀯𑀡𑁆𑀡𑁂𑀦 𑀆𑀓𑀸𑀲𑁂 𑀢𑀭𑀼𑀡𑀲𑀽𑀭𑀺𑀬𑁄 𑀯𑀺𑀬 𑀚𑀮𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀭𑀽𑀧𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺 𑀆𑀳. 𑀇𑀫𑀲𑁆𑀫𑀺𑀁 ‘‘𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸’’𑀢𑀺. 𑀲𑁄 ‘‘𑀤𑀺𑀝𑁆𑀞𑀸 𑀫𑁂 𑀅𑀢𑁆𑀢𑀦𑁄, 𑀤𑁂𑀯𑀢𑀸’’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸, ‘‘𑀲𑀸𑀫𑀺 𑀤𑁂𑀯𑀭𑀸𑀚, 𑀫𑀸 𑀲𑀼𑀢𑀲𑁄𑀫𑀲𑁆𑀲 𑀓𑀸𑀭𑀡𑀸 𑀘𑀺𑀦𑁆𑀢𑀬𑀺, 𑀅𑀢𑁆𑀢𑀦𑁄 𑀭𑀼𑀓𑁆𑀔𑀁 ¶ 𑀧𑀯𑀺𑀲𑀸’’𑀢𑀺 𑀆𑀳. 𑀤𑁂𑀯𑀢𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀭𑀼𑀓𑁆𑀔𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄, 𑀘𑀦𑁆𑀤𑁄 𑀉𑀕𑁆𑀕𑀢𑁄. 𑀧𑁄𑀭𑀺𑀲𑀸𑀤𑁄 𑀯𑁂𑀤𑀗𑁆𑀕𑀓𑀼𑀲𑀮𑁄 𑀦𑀓𑁆𑀔𑀢𑁆𑀢𑀘𑀸𑀭𑀁 𑀚𑀸𑀦𑀸𑀢𑀺. 𑀲𑁄 𑀦𑀪𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑁆𑀯𑁂 𑀨𑀼𑀲𑁆𑀲𑀦𑀓𑁆𑀔𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑀲𑁄𑀫𑁄 𑀦𑁆𑀳𑀸𑀬𑀺𑀢𑀼𑀁 𑀉𑀬𑁆𑀬𑀸𑀦𑀁 𑀕𑀫𑀺𑀲𑁆𑀲𑀢𑀺, 𑀢𑀢𑁆𑀣 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀆𑀭𑀓𑁆𑀔𑁄 𑀧𑀦𑀲𑁆𑀲 𑀫𑀳𑀸 𑀪𑀯𑀺𑀲𑁆𑀲𑀢𑀺, 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀁 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀭𑀓𑁆𑀔𑀦𑁆𑀢𑀸 𑀘𑀭𑀺𑀲𑁆𑀲𑀦𑁆𑀢𑀺, 𑀅𑀲𑀁𑀯𑀺𑀳𑀺𑀢𑁂 𑀆𑀭𑀓𑁆𑀔𑁂 𑀧𑀞𑀫𑀬𑀸𑀫𑁂𑀬𑁂𑀯 ¶ 𑀫𑀺𑀕𑀸𑀚𑀺𑀦𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀞𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀑𑀭𑀼𑀬𑁆𑀳 𑀧𑀤𑀼𑀫𑀧𑀢𑁆𑀢𑁂𑀦 𑀲𑀻𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀢𑁂𑀚𑁂𑀦 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄 𑀑𑀲𑀓𑁆𑀓𑀺𑀢𑁆𑀯𑀸 𑀉𑀤𑀓𑀧𑀭𑀺𑀬𑀦𑁆𑀢𑁂 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀯𑀺𑀘𑀭𑀺𑀁𑀲𑀼.
𑀓𑀼𑀢𑁄 𑀧𑀦 𑀮𑀤𑁆𑀥𑁄𑀬𑀁 𑀢𑁂𑀚𑁄𑀢𑀺? 𑀧𑀼𑀩𑁆𑀩𑀬𑁄𑀕𑀯𑀲𑁂𑀦. 𑀲𑁄 𑀳𑀺 𑀓𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀔𑀻𑀭𑀲𑀮𑀸𑀓𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺, 𑀢𑁂𑀦 𑀫𑀳𑀸𑀣𑀸𑀫𑁄 𑀅𑀳𑁄𑀲𑀺. 𑀅𑀕𑁆𑀕𑀺𑀲𑀸𑀮𑀜𑁆𑀘 𑀓𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀻𑀢𑀯𑀺𑀦𑁄𑀤𑀦𑀢𑁆𑀣𑀁 ¶ 𑀅𑀕𑁆𑀕𑀺𑀜𑁆𑀘 𑀤𑀸𑀭𑀽𑀦𑀺 𑀘 𑀤𑀸𑀭𑀼𑀘𑁆𑀙𑁂𑀤𑀦𑀯𑀸𑀲𑀺𑀜𑁆𑀘 𑀨𑀭𑀲𑀼𑀜𑁆𑀘 𑀅𑀤𑀸𑀲𑀺, 𑀢𑁂𑀦 𑀢𑁂𑀚𑀯𑀸 𑀅𑀳𑁄𑀲𑀺.
𑀏𑀯𑀁 𑀢𑀲𑁆𑀫𑀺𑀁 𑀅𑀦𑁆𑀢𑁄𑀉𑀬𑁆𑀬𑀸𑀦𑀁 𑀕𑀢𑁂𑀬𑁂𑀯 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀭𑀸𑀚𑀸𑀧𑀺 𑀧𑀸𑀢𑁄𑀯 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺. 𑀢𑀤𑀸 𑀢𑀓𑁆𑀓𑀲𑀺𑀮𑀢𑁄 𑀦𑀦𑁆𑀤𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸𑀬𑁄 𑀆𑀤𑀸𑀬 𑀯𑀻𑀲𑀢𑀺𑀬𑁄𑀦𑀚𑀲𑀢𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀁 𑀦𑀕𑀭𑀁 𑀧𑀢𑁆𑀯𑀸 𑀤𑁆𑀯𑀸𑀭𑀕𑀸𑀫𑁂 𑀯𑀲𑀺𑀢𑁆𑀯𑀸 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀭𑀸𑀚𑀸𑀦𑀁 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀚𑀬𑀸𑀧𑁂𑀲𑀺. 𑀭𑀸𑀚𑀸 𑀤𑀺𑀲𑀸𑀘𑀓𑁆𑀔𑀼𑀓𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀞𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀲𑀸𑀭𑀺𑀢𑀳𑀢𑁆𑀣𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀦𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋
‘‘𑀓𑀺𑀲𑁆𑀫𑀺𑀁 𑀦𑀼 𑀭𑀝𑁆𑀞𑁂 𑀢𑀯 𑀚𑀸𑀢𑀺𑀪𑀽𑀫𑀺, 𑀅𑀣 𑀓𑁂𑀦 𑀅𑀢𑁆𑀣𑁂𑀦 𑀇𑀥𑀸𑀦𑀼𑀧𑀢𑁆𑀢𑁄;
𑀅𑀓𑁆𑀔𑀸𑀳𑀺 ¶ 𑀫𑁂 𑀩𑁆𑀭𑀸𑀳𑁆𑀫𑀡 𑀏𑀢𑀫𑀢𑁆𑀣𑀁, 𑀓𑀺𑀫𑀺𑀘𑁆𑀙𑀲𑀻 𑀤𑁂𑀫𑀺 𑀢𑀬𑀚𑁆𑀚 𑀧𑀢𑁆𑀣𑀺𑀢’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀪𑁄 𑀩𑁆𑀭𑀸𑀳𑁆𑀫𑀡, 𑀢𑀯 𑀚𑀸𑀢𑀺𑀪𑀽𑀫𑀺 𑀓𑀺𑀲𑁆𑀫𑀺𑀁 𑀭𑀝𑁆𑀞𑁂 𑀅𑀢𑁆𑀣𑀺 𑀦𑀼, 𑀓𑁂𑀦 𑀅𑀢𑁆𑀣𑁂𑀦 𑀧𑀬𑁄𑀚𑀦𑁂𑀦 𑀳𑁂𑀢𑀼𑀪𑀽𑀢𑁂𑀦 𑀇𑀤 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀦𑀼𑀧𑁆𑀧𑀢𑁆𑀢𑁄, 𑀪𑁄 𑀩𑁆𑀭𑀸𑀳𑁆𑀫𑀡, 𑀫𑀬𑀸 𑀧𑀼𑀘𑁆𑀙𑀺𑀢𑁄 𑀲𑁄 𑀢𑁆𑀯𑀁 𑀏𑀢𑀫𑀢𑁆𑀣𑀁 𑀏𑀢𑀁 𑀧𑀬𑁄𑀚𑀦𑀁 𑀫𑁂 𑀫𑀬𑁆𑀳𑀁 𑀅𑀓𑁆𑀔𑀸𑀳𑀺 𑀓𑀣𑁂𑀳𑀺, 𑀢𑀬𑀸 𑀧𑀢𑁆𑀣𑀺𑀢𑀯𑀢𑁆𑀣𑀼𑀁 𑀢𑁂 𑀢𑀼𑀬𑁆𑀳𑀁 𑀅𑀚𑁆𑀚 𑀇𑀤𑀸𑀦𑀺 𑀤𑀤𑀸𑀫𑀺, 𑀓𑀺𑀁 𑀯𑀢𑁆𑀣𑀼𑀁 𑀇𑀘𑁆𑀙𑀲𑀻𑀢𑀺.
𑀅𑀣 ¶ 𑀦𑀁 𑀲𑁄 𑀕𑀸𑀣𑀫𑀸𑀳 𑁋
‘‘𑀕𑀸𑀣𑀸 𑀘𑀢𑀲𑁆𑀲𑁄 𑀥𑀭𑀡𑀻𑀫𑀳𑀺𑀲𑁆𑀲𑀭, 𑀲𑀼𑀕𑀫𑁆𑀪𑀻𑀭𑀢𑁆𑀣𑀸 𑀯𑀭𑀲𑀸𑀕𑀭𑀽𑀧𑀫𑀸;
𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑁄𑀲𑁆𑀫𑀺, 𑀲𑀼𑀡𑁄𑀳𑀺 𑀕𑀸𑀣𑀸 𑀧𑀭𑀫𑀢𑁆𑀣𑀲𑀁𑀳𑀺𑀢𑀸’’𑀢𑀺.
𑀢𑀢𑁆𑀣 𑀥𑀭𑀡𑀻𑀫𑀳𑀺𑀲𑁆𑀲𑀭𑀸𑀢𑀺 𑀪𑀽𑀫𑀺𑀧𑀸𑀮 𑀘𑀢𑀲𑁆𑀲𑁄 𑀕𑀸𑀣𑀸 𑀓𑀺𑀁 𑀪𑀽𑀢𑀸?. 𑀲𑀼𑀕𑀫𑁆𑀪𑀻𑀭𑀢𑁆𑀣𑀸 𑀯𑀭𑀲𑀸𑀕𑀭𑀽𑀧𑀫𑀸, 𑀢𑀯𑁂𑀯 𑀢𑀯 𑀏𑀯 𑀅𑀢𑁆𑀣𑀸𑀬 𑀇𑀥 𑀞𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑁄 𑀅𑀲𑁆𑀫𑀺 𑀪𑀯𑀸𑀫𑀺. 𑀲𑀼𑀡𑁄𑀳𑀻𑀢𑀺 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀧𑀭𑀫𑀢𑁆𑀣𑀲𑀁𑀳𑀺𑀢𑀸 𑀇𑀫𑀸 𑀲𑀢𑀸𑀭𑀳𑀸 𑀕𑀸𑀣𑀸𑀬𑁄 𑀲𑀼𑀡𑁄𑀳𑀻𑀢𑀺 𑀅𑀢𑁆𑀣𑁄.
𑀇𑀢𑀺 𑀯𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀇𑀫𑀸 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸𑀬𑁄 ‘‘𑀢𑀼𑀫𑁆𑀳𑁂 𑀲𑀼𑀢𑀯𑀺𑀢𑁆𑀢𑀓𑀸’𑀢𑀺 𑀲𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂𑀢𑀼𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸, ‘‘𑀆𑀘𑀭𑀺𑀬 ¶ , 𑀲𑀼𑀝𑁆𑀞𑀼 𑀢𑁂 𑀆𑀕𑀢𑀁, 𑀫𑀬𑀸 𑀧𑀦 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑀸, 𑀅𑀚𑁆𑀚 𑀨𑀼𑀲𑁆𑀲𑀦𑀓𑁆𑀔𑀢𑁆𑀢𑀬𑁄𑀕𑁂𑀦 𑀲𑀻𑀲𑀁 𑀦𑁆𑀳𑀸𑀬𑀺𑀢𑀼𑀁 𑀆𑀕𑀢𑁄𑀫𑁆𑀳𑀺, 𑀅𑀳𑀁 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀲𑁄𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀸 𑀉𑀓𑁆𑀓𑀡𑁆𑀞𑀻’’𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙𑀣 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑀼𑀓𑀕𑁂𑀳𑁂 𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀖𑀸𑀲𑀘𑁆𑀙𑀸𑀤𑀦𑀁 𑀲𑀁𑀯𑀺𑀤𑀳𑀣𑀸’’𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀢𑀁 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑀸 𑀲𑀫𑀦𑁆𑀢𑀸 𑀳𑀢𑁆𑀣𑀺𑀦𑁄 𑀧𑀭𑀺𑀓𑁆𑀔𑀺𑀧𑀺𑀁𑀲𑀼, 𑀢𑀢𑁄 𑀅𑀲𑁆𑀲𑀸, 𑀢𑀢𑁄 𑀭𑀣𑀸, 𑀢𑀢𑁄 𑀥𑀦𑀼𑀕𑁆𑀕𑀳𑀸, 𑀢𑀢𑁄 𑀧𑀢𑁆𑀢𑀻𑀢𑀺, 𑀲𑀗𑁆𑀔𑀼𑀪𑀺𑀢𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀉𑀦𑁆𑀦𑀸𑀤𑁂𑀦𑁆𑀢𑁄 𑀩𑀮𑀓𑀸𑀬𑁄 𑀅𑀳𑁄𑀲𑀺. 𑀅𑀣 𑀭𑀸𑀚𑀸 𑀑𑀴𑀸𑀭𑀺𑀓𑀸𑀦𑀺 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀫𑀲𑁆𑀲𑀼𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀉𑀩𑁆𑀩𑀝𑁆𑀝𑀺𑀢𑀲𑀭𑀻𑀭𑁄 𑀧𑁄𑀓𑁆𑀔𑀭𑀡𑀺𑀬𑀸 𑀅𑀦𑁆𑀢𑁄 𑀭𑀸𑀚𑀯𑀺𑀪𑀯𑁂𑀦 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀉𑀤𑀓𑀕𑁆𑀕𑀳𑀡𑀲𑀸𑀝𑀓𑁂𑀦 𑀦𑀺𑀯𑀸𑀲𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀤𑀼𑀲𑁆𑀲𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑁂 𑀉𑀧𑀦𑀬𑀺𑀁𑀲𑀼. 𑀧𑁄𑀭𑀺𑀲𑀸𑀤𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀅𑀮𑀗𑁆𑀓𑀢𑀓𑀸𑀮𑁂 𑀪𑀸𑀭𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀮𑁆𑀮𑀳𑀼𑀓𑀓𑀸𑀮𑁂𑀬𑁂𑀯 𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 ¶ 𑀦𑀤𑀦𑁆𑀢𑁄 𑀯𑀕𑁆𑀕𑀦𑁆𑀢𑁄 𑀉𑀤𑀓𑁂 𑀫𑀘𑁆𑀙𑀁 𑀆𑀮𑀼𑀴𑁂𑀦𑁆𑀢𑁄 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀫𑀢𑁆𑀣𑀓𑁂 𑀔𑀕𑁆𑀕𑀁 𑀧𑀭𑀺𑀩𑁆𑀪𑀫𑁂𑀦𑁆𑀢𑁄 ‘‘𑀅𑀳𑀁 𑀅𑀭𑁂 𑀫𑀦𑀼𑀲𑁆𑀲𑀘𑁄𑀭𑁄 𑀧𑁄𑀭𑀺𑀲𑀸𑀤𑁄’’𑀢𑀺 𑀦𑀸𑀫𑀁 𑀲𑀸𑀯𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀁 𑀦𑀮𑀸𑀝𑁂 𑀞𑀧𑁂𑀢𑁆𑀯𑀸 𑀉𑀤𑀓𑀸 𑀉𑀢𑁆𑀢𑀭𑀺. 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀳𑀢𑁆𑀣𑀸𑀭𑁄𑀳𑀸 𑀳𑀢𑁆𑀣𑀻𑀳𑀺, 𑀅𑀲𑁆𑀲𑀸𑀭𑁄𑀳𑀸 ¶ 𑀅𑀲𑁆𑀲𑁂𑀳𑀺, 𑀭𑀣𑀸𑀭𑁄𑀳𑀸 𑀭𑀣𑁂𑀳𑀺 𑀪𑀲𑁆𑀲𑀺𑀁𑀲𑀼. 𑀩𑀮𑀓𑀸𑀬𑁄 𑀕𑀳𑀺𑀢𑀕𑀳𑀺𑀢𑀸𑀦𑀺 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀉𑀭𑁂𑀦 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺.
𑀧𑁄𑀭𑀺𑀲𑀸𑀤𑁄 𑀲𑀼𑀢𑀲𑁄𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀺, 𑀲𑁂𑀲𑀭𑀸𑀚𑀸𑀦𑁄 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀥𑁄𑀲𑀻𑀲𑀓𑁂 𑀓𑀢𑁆𑀯𑀸 𑀧𑀡𑁆𑀳𑀺𑀬𑀸 𑀲𑀻𑀲𑀁 𑀧𑀳𑀭𑀦𑁆𑀢𑁄 𑀕𑀘𑁆𑀙𑀢𑀺. 𑀩𑁄𑀥𑀺𑀲𑀢𑁆𑀢𑀁 𑀧𑀦 𑀉𑀧𑀕𑀦𑁆𑀢𑁆𑀯𑀸 𑀑𑀦𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀲𑁄 ‘‘𑀤𑁆𑀯𑀸𑀭𑁂𑀦 𑀕𑀫𑀦𑀁 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀧𑀸𑀓𑀸𑀭𑀁 𑀮𑀗𑁆𑀖𑀺𑀢𑁆𑀯𑀸 𑀧𑀼𑀭𑀢𑁄 𑀕𑀮𑀺𑀢𑀫𑀤𑀫𑀢𑁆𑀢𑀯𑀸𑀭𑀡𑀓𑀼𑀫𑁆𑀪𑁂 𑀅𑀓𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀯𑀸𑀢𑀚𑀯𑀸𑀦𑀁 𑀅𑀲𑁆𑀲𑀢𑀭𑀸𑀦𑀁 𑀧𑀺𑀝𑁆𑀞𑁂 𑀅𑀓𑁆𑀓𑀫𑀦𑁆𑀢𑁄 𑀧𑀸𑀢𑁂𑀢𑁆𑀯𑀸 𑀭𑀣𑀥𑀼𑀭𑀭𑀣𑀲𑀻𑀲𑁂𑀲𑀼 𑀅𑀓𑁆𑀓𑀫𑀺𑀢𑁆𑀯𑀸 𑀪𑀫𑀺𑀓𑀁 𑀪𑀫𑀦𑁆𑀢𑁄 𑀯𑀺𑀬 𑀦𑀻𑀮𑀨𑀮𑀓𑀸𑀦𑀺 𑀦𑀺𑀕𑁆𑀭𑁄𑀥𑀧𑀢𑁆𑀢𑀸𑀦𑀺 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀏𑀓𑀯𑁂𑀕𑁂𑀦𑁂𑀯 𑀢𑀺𑀬𑁄𑀚𑀦𑀫𑀢𑁆𑀢𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀼𑀢𑀲𑁄𑀫𑀲𑁆𑀲𑀢𑁆𑀣𑀸𑀬 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀓𑀜𑁆𑀘𑀺 𑀅𑀤𑀺𑀢𑁆𑀯𑀸 𑀲𑀡𑀺𑀓𑀁 𑀕𑀘𑁆𑀙𑀦𑁆𑀢𑁄 𑀲𑀼𑀢𑀲𑁄𑀫𑀲𑁆𑀲 𑀓𑁂𑀲𑁂𑀳𑀺 𑀉𑀤𑀓𑀩𑀺𑀦𑁆𑀤𑀽𑀦𑀺 𑀅𑀢𑁆𑀢𑀦𑁄 𑀉𑀭𑁂 𑀧𑀢𑀺𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀫𑀭𑀡𑀲𑁆𑀲 𑀅𑀪𑀸𑀬𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀼𑀢𑀲𑁄𑀫𑁄𑀧𑀺 𑀫𑀭𑀡𑀪𑀬𑁂𑀦 𑀭𑁄𑀤𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀦 𑀯𑁂 𑀭𑀼𑀤𑀦𑁆𑀢𑀺 𑀫𑀢𑀺𑀫𑀦𑁆𑀢𑁄 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;
𑀤𑀻𑀧𑀜𑁆𑀳𑀺 𑀏𑀢𑀁 𑀧𑀭𑀫𑀁 𑀦𑀭𑀸𑀦𑀁, 𑀬𑀁 𑀧𑀡𑁆𑀟𑀺𑀢𑀸 𑀲𑁄𑀓𑀦𑀼𑀤𑀸 𑀪𑀯𑀦𑁆𑀢𑀺.
‘‘𑀅𑀢𑁆𑀢𑀸𑀦𑀁 ¶ 𑀜𑀸𑀢𑀻 𑀉𑀤𑀸𑀳𑀼 𑀧𑀼𑀢𑁆𑀢𑀤𑀸𑀭𑀁, 𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁;
𑀓𑀺𑀫𑁂𑀯 ¶ 𑀢𑁆𑀯𑀁 𑀲𑀼𑀢𑀲𑁄𑀫𑀸𑀦𑀼𑀢𑀧𑁆𑀧𑁂, 𑀓𑁄𑀭𑀩𑁆𑀬𑀲𑁂𑀝𑁆𑀞 𑀯𑀘𑀦𑀁 𑀲𑀼𑀡𑁄𑀫 𑀢𑁂𑀢’’𑀦𑁆𑀢𑀺.
𑀢𑀢𑁆𑀣, 𑀪𑁄 𑀲𑀼𑀢𑀲𑁄𑀫 𑀫𑀳𑀸𑀭𑀸𑀚, 𑀬𑁂 𑀧𑀡𑁆𑀟𑀺𑀢𑀸 𑀓𑀺𑀁 𑀪𑀽𑀢𑀸? 𑀫𑀢𑀺𑀫𑀦𑁆𑀢𑁄 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀦𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀲𑀧𑁆𑀧𑀜𑁆𑀜𑀸 𑀯𑀺𑀘𑀭𑀡𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀩𑀳𑀼𑀲𑁆𑀲𑀼𑀢𑀸 𑀩𑀳𑀼𑀲𑁆𑀲𑀼𑀢𑀥𑀭𑀸 𑀩𑀳𑀼𑀝𑁆𑀞𑀸𑀦𑀘𑀺𑀦𑁆𑀢𑀺𑀦𑁄 𑀩𑀳𑀼𑀓𑀸𑀭𑀡𑀘𑀺𑀦𑁆𑀢𑀦𑀲𑀻𑀮𑀸, 𑀢𑁂 𑀧𑀡𑁆𑀟𑀺𑀢𑀸 𑀫𑀭𑀡𑀪𑀬𑁂 𑀉𑀧𑁆𑀧𑀦𑁆𑀦𑁂 𑀲𑀢𑀺 𑀪𑀻𑀢𑀸 𑀳𑀼𑀢𑁆𑀯𑀸 𑀯𑁂 𑀏𑀓𑀦𑁆𑀢𑁂𑀦 𑀦 𑀭𑀼𑀤𑀦𑁆𑀢𑀺 𑀦 𑀧𑀭𑀺𑀤𑁂𑀯𑀦𑁆𑀢𑀺. 𑀤𑀻𑀧𑀁 𑀳𑀻𑀢𑀺, 𑀪𑁄 𑀲𑀼𑀢𑀲𑁄𑀫 ¶ 𑀫𑀳𑀸𑀭𑀸𑀚 𑀳𑀺 𑀓𑀲𑁆𑀫𑀸 𑀧𑀦 𑀯𑀤𑀸𑀫𑀺, 𑀫𑀳𑀸𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀦𑀸𑀯𑀸𑀦𑀁 𑀯𑀸𑀡𑀺𑀚𑀓𑀸𑀦𑀁 𑀚𑀦𑀸𑀦𑀁 𑀧𑀢𑀺𑀝𑁆𑀞𑀸𑀪𑀽𑀢𑀁 𑀫𑀳𑀸𑀤𑀻𑀧𑀁 𑀇𑀯, 𑀏𑀯𑀫𑁆𑀧𑀺 𑀢𑀣𑀸 𑀏𑀢𑀁 𑀧𑀡𑁆𑀟𑀺𑀢𑀁 𑀅𑀧𑁆𑀧𑀝𑀺𑀲𑀭𑀡𑀸𑀦𑀁 𑀦𑀭𑀸𑀦𑀁 𑀧𑀭𑀫𑀁. 𑀬𑀁 𑀬𑁂𑀦 𑀓𑀸𑀭𑀡𑁂𑀦 𑀬𑁂 𑀧𑀡𑁆𑀟𑀺𑀢𑀸 𑀲𑁄𑀓𑀻𑀦𑀁 𑀚𑀦𑀸𑀦𑀁 𑀲𑁄𑀓𑀦𑀼𑀤𑀸 𑀪𑀯𑀦𑁆𑀢𑀺, 𑀪𑁄 𑀲𑀼𑀢𑀲𑁄𑀫 𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀭𑀡𑀪𑀬𑁂𑀦 𑀧𑀭𑀺𑀤𑁂𑀯𑀻𑀢𑀺 𑀫𑀜𑁆𑀜𑁂 𑀫𑀜𑁆𑀜𑀸𑀫𑀺. 𑀅𑀢𑁆𑀢𑀸𑀦𑀦𑁆𑀢𑀺, 𑀪𑁄 𑀲𑀼𑀢𑀲𑁄𑀫 𑀫𑀳𑀸𑀭𑀸𑀚, 𑀅𑀢𑁆𑀢𑀳𑁂𑀢𑀼 𑀉𑀤𑀸𑀳𑀼 𑀜𑀸𑀢𑀺𑀳𑁂𑀢𑀼 𑀧𑀼𑀢𑁆𑀢𑀤𑀸𑀭𑀳𑁂𑀢𑀼 𑀉𑀤𑀸𑀳𑀼 𑀥𑀜𑁆𑀜𑀥𑀦𑀭𑀚𑀢𑀚𑀸𑀢𑀭𑀽𑀧𑀳𑁂𑀢𑀼 𑀓𑀺𑀫𑁂𑀯 𑀢𑁆𑀯𑀁 𑀓𑀺𑀫𑁂𑀯 𑀥𑀫𑁆𑀫𑀚𑀸𑀢𑀁 𑀢𑁆𑀯𑀁 𑀅𑀦𑀼𑀢𑀧𑁆𑀧𑁂 𑀅𑀦𑀼𑀢𑀧𑁆𑀧𑁂𑀬𑁆𑀬𑀸𑀲𑀺. 𑀓𑁄𑀭𑀩𑁆𑀬𑀲𑁂𑀝𑁆𑀞 𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦𑀁 𑀲𑁂𑀝𑁆𑀞 𑀉𑀢𑁆𑀢𑀫, 𑀪𑁄 𑀫𑀳𑀸𑀭𑀸𑀚, 𑀏𑀢𑀁 𑀢𑀯 𑀯𑀘𑀦𑀁 𑀲𑀼𑀡𑁄𑀫𑀸𑀢𑀺.
𑀲𑀼𑀢𑀲𑁄𑀫𑁄 𑀆𑀳 𑁋
‘‘𑀦𑁂𑀯𑀸𑀳𑀫𑀢𑁆𑀢𑀸𑀦𑀫𑀦𑀼𑀢𑁆𑀣𑀼𑀦𑀸𑀫𑀺, 𑀦 𑀧𑀼𑀢𑁆𑀢𑀤𑀸𑀭𑀁 𑀦 𑀥𑀦𑀁 𑀦 𑀭𑀝𑁆𑀞𑀁;
𑀲𑀢𑀜𑁆𑀘 𑀥𑀫𑁆𑀫𑁄 𑀘𑀭𑀺𑀢𑁄 𑀧𑀼𑀭𑀸𑀡𑁄, 𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀦𑀼𑀢𑀧𑁆𑀧𑁂.
‘‘𑀓𑀢𑁄 𑀫𑀬𑀸 𑀲𑀗𑁆𑀕𑀭𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀭𑀝𑁆𑀞𑁂 𑀲𑀓𑁂 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂𑀦;
𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲’’𑀦𑁆𑀢𑀺.
𑀢𑀢𑁆𑀣 𑀦𑁂𑀯𑀸𑀳𑀫𑀢𑁆𑀢𑀸𑀦𑀫𑀦𑀼𑀢𑁆𑀣𑀼𑀦𑀸𑀫𑀻𑀢𑀺 𑀅𑀳𑀁 𑀢𑀸𑀯 𑀅𑀢𑁆𑀢𑀢𑁆𑀣𑀸𑀬 𑀦𑁂𑀯 𑀭𑁄𑀤𑀸𑀫𑀺 𑀦 𑀲𑁄𑀘𑀸𑀫𑀺, 𑀇𑀫𑁂𑀲𑀫𑁆𑀧𑀺 𑀧𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀦 𑀭𑁄𑀤𑀸𑀫𑀺 𑀦 𑀲𑁄𑀘𑀸𑀫𑀺, 𑀅𑀧𑀺𑀘 𑀔𑁄 𑀧𑀦 𑀲𑀢𑀁 𑀧𑀡𑁆𑀟𑀺𑀢𑀸𑀦𑀁 𑀘𑀭𑀺𑀢𑁄 𑀧𑀼𑀭𑀸𑀡𑀥𑀫𑁆𑀫𑁄 𑀅𑀢𑁆𑀣𑀺, 𑀬𑀁 𑀲𑀗𑁆𑀕𑀭𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀦𑀁 𑀦𑀸𑀫, 𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀳𑀁 𑀅𑀦𑀼𑀲𑁄𑀘𑀸𑀫𑀻𑀢𑀺 𑀅𑀢𑁆𑀣𑁄 ¶ . 𑀲𑀘𑁆𑀘𑀸𑀦𑀼𑀭𑀓𑁆𑀔𑀻𑀢𑀺 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄. 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄 𑀢𑀓𑁆𑀓𑀲𑀺𑀮𑀢𑁄 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸𑀬𑁄 𑀆𑀤𑀸𑀬 𑀆𑀕𑀢𑁄, 𑀢𑀲𑁆𑀲𑀸𑀳𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 ‘‘𑀦𑁆𑀳𑀢𑁆𑀯𑀸 𑀆𑀕𑀢𑁄 𑀲𑀼𑀡𑀺𑀲𑁆𑀲𑀸𑀫𑀺, 𑀬𑀸𑀯 𑀫𑀫𑀸𑀕𑀫𑀦𑀸 𑀆𑀕𑀫𑁂𑀳𑀻’’𑀢𑀺 𑀲𑀗𑁆𑀕𑀭𑀁 𑀓𑀢𑁆𑀯𑀸 𑀆𑀕𑀢𑁄, 𑀢𑁆𑀯𑀁 𑀢𑀸 𑀕𑀸𑀣𑀸𑀬𑁄 𑀲𑁄𑀢𑀼𑀁 𑀅𑀤𑀢𑁆𑀯𑀸𑀯 𑀫𑀁 𑀕𑀡𑁆𑀳𑀺. 𑀲𑀘𑁂 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.
𑀅𑀣 ¶ 𑀦𑀁 𑀧𑁄𑀭𑀺𑀲𑀸𑀤𑁄 𑀆𑀳 𑁋
‘‘𑀦𑁂𑀯𑀸𑀳𑀫𑁂𑀢𑀁 𑀅𑀪𑀺𑀲𑀤𑁆𑀤𑀳𑀸𑀫𑀺, 𑀲𑀼𑀔𑀻 𑀦𑀭𑁄 𑀫𑀘𑁆𑀘𑀼𑀫𑀼𑀔𑀸 𑀧𑀫𑀼𑀢𑁆𑀢𑁄;
𑀅𑀫𑀺𑀢𑁆𑀢𑀳𑀢𑁆𑀣𑀁 𑀧𑀼𑀦𑀭𑀸𑀯𑀚𑁂𑀬𑁆𑀬, 𑀓𑁄𑀭𑀩𑁆𑀬𑀲𑁂𑀝𑁆𑀞 𑀦 𑀳𑀺 𑀫𑀁 𑀉𑀧𑁂𑀲𑀺.
‘‘𑀫𑀼𑀢𑁆𑀢𑁄 ¶ 𑀢𑀼𑀯𑀁 𑀧𑁄𑀭𑀺𑀲𑀸𑀤𑀲𑁆𑀲 𑀳𑀢𑁆𑀣𑀸, 𑀕𑀦𑁆𑀢𑁆𑀯𑀸 𑀲𑀓𑀁 𑀫𑀦𑁆𑀤𑀺𑀭𑀁 𑀓𑀸𑀫𑀓𑀸𑀫𑀻;
𑀫𑀥𑀼𑀭𑀁 𑀧𑀺𑀬𑀁 𑀚𑀻𑀯𑀺𑀢𑀁 𑀮𑀤𑁆𑀥 𑀭𑀸𑀚, 𑀓𑀼𑀢𑁄 𑀢𑀼𑀯𑀁 𑀏𑀳𑀺𑀲𑀺 𑀫𑁂 𑀲𑀓𑀸𑀲’’𑀦𑁆𑀢𑀺.
𑀢𑀢𑁆𑀣 𑀲𑀼𑀔𑀻𑀢𑀺 𑀲𑀼𑀔𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸. 𑀫𑀘𑁆𑀘𑀼𑀫𑀼𑀔𑀸 𑀧𑀫𑀼𑀢𑁆𑀢𑁄𑀢𑀺 𑀫𑀸𑀤𑀺𑀲𑀲𑁆𑀲 𑀘𑁄𑀭𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀢𑀸𑀬 𑀫𑀭𑀡𑀫𑀼𑀔𑀸 𑀫𑀼𑀢𑁆𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀅𑀫𑀺𑀢𑁆𑀢𑀳𑀢𑁆𑀣𑀁 𑀧𑀼𑀦𑀭𑀸𑀯𑀚𑁂𑀬𑁆𑀬 𑀆𑀕𑀘𑁆𑀙𑁂𑀬𑁆𑀬, 𑀅𑀳𑀁 𑀏𑀢𑀁 𑀯𑀘𑀦𑀁 𑀦𑁂𑀯 𑀅𑀪𑀺𑀲𑀤𑁆𑀤𑀳𑀸𑀫𑀺, 𑀓𑁄𑀭𑀩𑁆𑀬𑀲𑁂𑀝𑁆𑀞 𑀢𑁆𑀯𑀁 𑀫𑀫 𑀲𑀦𑁆𑀢𑀺𑀓𑀁 𑀦 𑀳𑀺 𑀉𑀧𑁂𑀲𑀺. 𑀫𑀼𑀢𑁆𑀢𑁄𑀢𑀺 𑀲𑀼𑀢𑀲𑁄𑀫 𑀢𑀼𑀯𑀁 𑀧𑁄𑀭𑀺𑀲𑀸𑀤𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑁄. 𑀲𑀓𑀁 𑀫𑀦𑁆𑀤𑀺𑀭𑀦𑁆𑀢𑀺 𑀭𑀸𑀚𑀥𑀸𑀦𑀺𑀕𑁂𑀳𑀁 𑀕𑀦𑁆𑀢𑁆𑀯𑀸. 𑀓𑀸𑀫𑀓𑀸𑀫𑀻𑀢𑀺 𑀓𑀸𑀫𑀁 𑀓𑀸𑀫𑀬𑀫𑀸𑀦𑁄. 𑀮𑀤𑁆𑀥𑀸𑀢𑀺 𑀅𑀢𑀺𑀯𑀺𑀬 𑀧𑀺𑀬𑀁 𑀚𑀻𑀯𑀺𑀢𑀁 𑀮𑀪𑀺𑀢𑁆𑀯𑀸 𑀢𑀼𑀯𑀁 𑀫𑁂 𑀫𑀫 𑀲𑀦𑁆𑀢𑀺𑀓𑁂 𑀓𑀼𑀢𑁄 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦 𑀏𑀳𑀺𑀲𑀺.
𑀢𑀁 ¶ 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀲𑀻𑀳𑁄 𑀯𑀺𑀬 𑀅𑀲𑀫𑁆𑀪𑀺𑀢𑁄 𑀆𑀳 𑁋
‘‘𑀫𑀢𑀁 𑀯𑀭𑁂𑀬𑁆𑀬 𑀧𑀭𑀺𑀲𑀼𑀤𑁆𑀥𑀲𑀻𑀮𑁄, 𑀦 𑀚𑀻𑀯𑀺𑀢𑀁 𑀕𑀭𑀳𑀺𑀢𑁄 𑀧𑀸𑀧𑀥𑀫𑁆𑀫𑁄;
𑀦 𑀳𑀺 𑀢𑀁 𑀦𑀭𑀁 𑀢𑀸𑀬𑀢𑀺 𑀤𑀼𑀕𑁆𑀕𑀢𑀻𑀳𑀺, 𑀬𑀲𑁆𑀲𑀸𑀧𑀺 𑀳𑁂𑀢𑀼 𑀅𑀮𑀺𑀓𑀁 𑀪𑀡𑁂𑀬𑁆𑀬.
‘‘𑀲𑀘𑁂𑀧𑀺 𑀯𑀸𑀢𑁄 𑀕𑀺𑀭𑀺𑀫𑀸𑀯𑀳𑁂𑀬𑁆𑀬, 𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀙𑀫𑀸 𑀧𑀢𑁂𑀬𑁆𑀬𑀼𑀁;
𑀲𑀩𑁆𑀩𑀸 𑀘 𑀦𑀚𑁆𑀚𑁄 𑀧𑀝𑀺𑀲𑁄𑀢𑀁 𑀯𑀚𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯𑀳𑀁 𑀭𑀸𑀚 𑀫𑀼𑀲𑀸 𑀪𑀡𑁂𑀬𑁆𑀬𑀁.
‘‘𑀦𑀪𑀁 𑀨𑀮𑁂𑀬𑁆𑀬 𑀉𑀤𑀥𑀻𑀧𑀺 𑀲𑀼𑀲𑁆𑀲𑁂, 𑀲𑀁𑀯𑀢𑁆𑀢𑀬𑁂 𑀪𑀽𑀢𑀥𑀭𑀸 𑀯𑀲𑀼𑀦𑁆𑀥𑀭𑀸;
𑀲𑀺𑀮𑀼𑀘𑁆𑀘𑀬𑁄 𑀫𑁂𑀭𑀼 𑀲𑀫𑀽𑀮𑀫𑀼𑀧𑁆𑀧𑀢𑁂, 𑀦 𑀢𑁆𑀯𑁂𑀯𑀳𑀁 𑀭𑀸𑀚 𑀫𑀼𑀲𑀸 𑀪𑀡𑁂𑀬𑁆𑀬’’𑀦𑁆𑀢𑀺.
𑀢𑀢𑁆𑀣 𑀫𑀢𑀁 𑀯𑀭𑁂𑀬𑁆𑀬𑀸𑀢𑀺 𑀧𑁄𑀭𑀺𑀲𑀸𑀤 𑀬𑁄 𑀦𑀭𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀚𑀻𑀯𑀺𑀢𑀳𑁂𑀢𑀼 𑀅𑀡𑀼𑀫𑀢𑁆𑀢𑀫𑁆𑀧𑀺 𑀧𑀸𑀧𑀁 𑀦 𑀓𑀭𑁄𑀢𑀺, 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀯𑀭𑁂𑀬𑁆𑀬 𑀢𑀁 𑀫𑀭𑀡𑀁 𑀇𑀘𑁆𑀙𑁂𑀬𑁆𑀬, 𑀕𑀭𑀳𑀺𑀢𑁄 𑀧𑀸𑀧𑀥𑀫𑁆𑀫𑁄 𑀢𑀁 𑀚𑀻𑀯𑀺𑀢𑀁 𑀦 𑀲𑁂𑀬𑁆𑀬𑁄, 𑀤𑀼𑀲𑁆𑀲𑀻𑀮𑁄 𑀧𑀼𑀕𑁆𑀕𑀮𑁄 𑀬𑀲𑁆𑀲𑀸𑀧𑀺 𑀳𑁂𑀢𑀼 𑀅𑀢𑁆𑀢𑀸𑀤𑀺𑀦𑁄𑀧𑀺 𑀳𑁂𑀢𑀼 𑀅𑀮𑀺𑀓𑀁 𑀯𑀘𑀦𑀁 𑀪𑀡𑁂𑀬𑁆𑀬, 𑀢𑀁 𑀦𑀭𑀁 𑀏𑀯𑀭𑀽𑀧𑀁 𑀤𑀼𑀕𑁆𑀕𑀢𑀻𑀳𑀺 𑀢𑀁 𑀅𑀮𑀺𑀓𑀁 𑀦 𑀢𑀸𑀬𑀢𑁂. 𑀲𑀘𑁂𑀧𑀺 𑀯𑀸𑀢𑁄 𑀕𑀺𑀭𑀺𑀫𑀸𑀯𑀳𑁂𑀬𑁆𑀬𑀸𑀢𑀺, 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀢𑀬𑀸 𑀲𑀤𑁆𑀥𑀺𑀁 𑀏𑀓𑀸𑀘𑀭𑀺𑀬𑀓𑀼𑀮𑁂 ¶ 𑀲𑀺𑀓𑁆𑀔𑀺𑀢𑁄 𑀏𑀯𑀭𑀽𑀧𑁄 𑀲𑀳𑀸𑀬𑀓𑁄 𑀳𑀼𑀢𑁆𑀯𑀸 𑀅𑀳𑀁 𑀚𑀻𑀯𑀺𑀢𑀳𑁂𑀢𑀼 𑀫𑀼𑀲𑀸 𑀦 𑀓𑀣𑁂𑀫𑀺, 𑀓𑀺𑀁 𑀦 𑀲𑀤𑁆𑀤𑀳𑀲𑀺. 𑀲𑀘𑁂 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑁄 𑀯𑀸𑀢𑁄 𑀉𑀝𑁆𑀞𑀸𑀬 𑀫𑀳𑀦𑁆𑀢𑀁 𑀕𑀺𑀭𑀺𑀁 𑀢𑀽𑀮𑀧𑀺𑀘𑀼𑀁 𑀯𑀺𑀬 𑀆𑀓𑀸𑀲𑁂 𑀆𑀯𑀳𑁂𑀬𑁆𑀬, 𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑁂𑀦 𑀲𑀤𑁆𑀥𑀺𑀁 𑀙𑀫𑀸 𑀧𑀣𑀯𑀺𑀬𑀁 𑀧𑀢𑁂𑀬𑁆𑀬𑀼𑀁, 𑀲𑀩𑁆𑀩𑀸𑀧𑀺 𑀦𑀚𑁆𑀚𑁄 𑀧𑀢𑀺𑀲𑁄𑀢𑀁 𑀯𑀚𑁂𑀬𑁆𑀬𑀼𑀁, 𑀪𑁄 𑀧𑁄𑀭𑀺𑀲𑀸𑀤 ¶ , 𑀏𑀯𑀭𑀽𑀧𑀁 𑀯𑀘𑀦𑀁 𑀲𑀘𑁂 𑀪𑀡𑁂𑀬𑁆𑀬, 𑀢𑀁 𑀲𑀤𑁆𑀤𑀳𑀺𑀢𑀩𑁆𑀩𑀁, 𑀅𑀳𑀁 𑀫𑀼𑀲𑀸 𑀪𑀡𑁂𑀬𑁆𑀬𑀁 𑀇𑀢𑀺 𑀯𑀘𑀦𑀁 𑀢𑀼𑀬𑁆𑀳𑀁 𑀚𑀦𑁂𑀳𑀺 𑀯𑀼𑀢𑁆𑀢𑀁, 𑀦 𑀢𑁆𑀯𑁂𑀯 𑀢𑀁 𑀲𑀤𑁆𑀤𑀳𑀺𑀢𑀩𑁆𑀩𑀁.
𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀦 𑀲𑀤𑁆𑀤𑀳𑀺𑀬𑁂𑀯. 𑀅𑀣 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀬𑀁 𑀫𑀬𑁆𑀳𑀁 𑀦 𑀲𑀤𑁆𑀤𑀳𑀢𑀺, 𑀲𑀧𑀣𑁂𑀦𑀧𑀺 𑀦𑀁 𑀲𑀤𑁆𑀤𑀳𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀔𑀦𑁆𑀥𑀢𑁄 𑀢𑀸𑀯 𑀫𑀁 𑀑𑀢𑀸𑀭𑁂𑀳𑀺, 𑀲𑀧𑀣𑀁 𑀓𑀢𑁆𑀯𑀸 𑀢𑀁 𑀲𑀤𑁆𑀤𑀳𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀑𑀢𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑁄 𑀲𑀧𑀣𑀁 𑀓𑀭𑁄𑀦𑁆𑀢𑁄 𑀆𑀳 𑁋
‘‘𑀅𑀲𑀺𑀜𑁆𑀘 ¶ 𑀲𑀢𑁆𑀢𑀺𑀜𑁆𑀘 𑀧𑀭𑀸𑀫𑀲𑀸𑀫𑀺, 𑀲𑀧𑀣𑀫𑁆𑀧𑀺 𑀢𑁂 𑀲𑀫𑁆𑀫 𑀅𑀳𑀁 𑀓𑀭𑁄𑀫𑀺;
𑀢𑀬𑀸 𑀧𑀫𑀼𑀢𑁆𑀢𑁄 𑀅𑀦𑀡𑁄 𑀪𑀯𑀺𑀢𑁆𑀯𑀸, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀲𑀘𑁂 𑀇𑀘𑁆𑀙𑀲𑀺, 𑀏𑀯𑀭𑀽𑀧𑁂𑀳𑀺 𑀆𑀯𑀼𑀥𑁂𑀳𑀺 𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁂 𑀔𑀢𑁆𑀢𑀺𑀬𑀓𑀼𑀮𑁂 𑀫𑁂 𑀦𑀺𑀩𑁆𑀩𑀢𑁆𑀢𑀺 𑀦𑀸𑀫 𑀫𑀸 𑀳𑁄𑀢𑀽𑀢𑀺 𑀅𑀲𑀺𑀜𑁆𑀘 𑀲𑀢𑁆𑀢𑀺𑀜𑁆𑀘 𑀧𑀭𑀸𑀫𑀲𑀸𑀫𑀺. 𑀲𑀘𑁂 𑀅𑀜𑁆𑀜𑁂𑀳𑀺 𑀭𑀸𑀚𑀽𑀳𑀺 𑀅𑀓𑀢𑁆𑀢𑀩𑁆𑀩𑀁 𑀅𑀜𑁆𑀜𑀁 𑀯𑀸 𑀬𑀁 𑀇𑀘𑁆𑀙𑀲𑀺, 𑀢𑀁 𑀲𑀧𑀣𑀫𑁆𑀧𑀺 𑀢𑁂, 𑀲𑀫𑁆𑀫, 𑀅𑀳𑀁 𑀓𑀭𑁄𑀫𑀺. 𑀬𑀣𑀸𑀳𑀁 𑀢𑀬𑀸 𑀧𑀫𑀼𑀢𑁆𑀢𑁄 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀡𑁄 𑀳𑀼𑀢𑁆𑀯𑀸 𑀲𑀘𑁆𑀘𑀫𑀦𑀼𑀭𑀓𑁆𑀔𑀦𑁆𑀢𑁄 𑀧𑀼𑀦𑀭𑀸𑀕𑀫𑀺𑀲𑁆𑀲𑀸𑀫𑀻𑀢𑀺.
𑀢𑀢𑁄 𑀧𑁄𑀭𑀺𑀲𑀸𑀤𑁄 ‘‘𑀅𑀬𑀁 𑀲𑀼𑀢𑀲𑁄𑀫𑁄 𑀔𑀢𑁆𑀢𑀺𑀬𑁂𑀳𑀺 𑀅𑀓𑀢𑁆𑀢𑀩𑁆𑀩𑀁 𑀲𑀧𑀣𑀁 𑀓𑀭𑁄𑀢𑀺, 𑀓𑀺𑀁 𑀫𑁂 𑀇𑀫𑀺𑀦𑀸, 𑀏𑀲 𑀏𑀢𑀼 𑀯𑀸 𑀫𑀸 𑀯𑀸, 𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑀭𑀸𑀚𑀸, 𑀫𑀫𑁂𑀯 𑀩𑀸𑀳𑀼𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀬𑀁 𑀅𑀢𑀺𑀯𑀺𑀬 𑀓𑀺𑀮𑀫𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋
‘‘𑀬𑁄 𑀢𑁂 𑀓𑀢𑁄 𑀲𑀗𑁆𑀕𑀭𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀭𑀝𑁆𑀞𑁂 𑀲𑀓𑁂 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂𑀦;
𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀲𑁆𑀲𑀽’’𑀢𑀺.
𑀢𑀢𑁆𑀣 𑀧𑀼𑀦𑀭𑀸𑀯𑀚𑀲𑁆𑀲𑀽𑀢𑀺 𑀧𑀼𑀦 𑀆𑀕𑀘𑁆𑀙𑁂𑀬𑁆𑀬𑀸𑀲𑀺.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄, ‘‘𑀲𑀫𑁆𑀫, 𑀫𑀸 𑀘𑀺𑀦𑁆𑀢𑀬𑀺, 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀧𑀽𑀚𑀁 𑀓𑀢𑁆𑀯𑀸 𑀧𑀸𑀢𑁄𑀯𑀸𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀬𑁄 ¶ ¶ 𑀫𑁂 𑀓𑀢𑁄 𑀲𑀗𑁆𑀕𑀭𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀭𑀝𑁆𑀞𑁂 𑀲𑀓𑁂 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂𑀦;
𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲’’𑀦𑁆𑀢𑀺.
𑀅𑀣 𑀦𑀁 𑀧𑁄𑀭𑀺𑀲𑀸𑀤𑁄, ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀔𑀢𑁆𑀢𑀺𑀬𑁂𑀳𑀺 𑀅𑀓𑀢𑁆𑀢𑀩𑁆𑀩𑀁 𑀲𑀧𑀣𑀁 𑀓𑀭𑀺𑀢𑁆𑀣, 𑀢𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸, ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀢𑁆𑀯𑀁 𑀫𑀁 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀲𑀺, 𑀳𑀸𑀲𑁂𑀦𑀧𑀺 𑀫𑁂 𑀫𑀼𑀲𑀸 𑀦 𑀓𑀣𑀺𑀢𑀧𑀼𑀩𑁆𑀩𑀸, 𑀲𑁄𑀳𑀁 𑀇𑀤𑀸𑀦𑀺 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄 𑀥𑀫𑁆𑀫𑀸𑀥𑀫𑁆𑀫𑀁 𑀚𑀸𑀦𑀦𑁆𑀢𑁄 𑀓𑀺𑀁 𑀫𑀼𑀲𑀸 𑀓𑀣𑁂𑀲𑁆𑀲𑀸𑀫𑀺, 𑀲𑀤𑁆𑀤𑀳𑀲𑀺 𑀫𑀬𑁆𑀳𑀁 ¶ , 𑀅𑀳𑀁 𑀢𑁂 𑀲𑁆𑀯𑁂 𑀩𑀮𑀺𑀓𑀫𑁆𑀫𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀤𑁆𑀤𑀳𑀸𑀧𑀺𑀢𑁄 ‘‘𑀢𑁂𑀦 𑀳𑀺 𑀕𑀘𑁆𑀙, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂𑀲𑀼 𑀅𑀦𑀸𑀕𑀢𑁂𑀲𑀼 𑀩𑀮𑀺𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀢𑀸𑀧𑀺 𑀢𑀼𑀫𑁆𑀳𑁂𑀳𑀺 𑀯𑀺𑀦𑀸 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀫𑀸 𑀫𑁂 𑀩𑀮𑀺𑀓𑀫𑁆𑀫𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑀺𑀢𑁆𑀣𑀸’’𑀢𑀺 𑀫𑀳𑀸𑀲𑀢𑁆𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀭𑀸𑀳𑀼𑀫𑀼𑀔𑀸 𑀫𑀼𑀢𑁆𑀢𑀘𑀦𑁆𑀤𑁄 𑀯𑀺𑀬 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀔𑀺𑀧𑁆𑀧𑀫𑁂𑀯 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀲𑁂𑀦𑀸𑀧𑀺𑀲𑁆𑀲 ‘‘𑀲𑀼𑀢𑀲𑁄𑀫𑁄 𑀭𑀸𑀚𑀸 𑀧𑀡𑁆𑀟𑀺𑀢𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄 𑀏𑀓𑀁 𑀤𑁆𑀯𑁂 𑀓𑀣𑀸 𑀓𑀣𑁂𑀢𑀼𑀁 𑀮𑀪𑀦𑁆𑀢𑁄 𑀧𑁄𑀭𑀺𑀲𑀸𑀤𑀁 𑀤𑀫𑁂𑀢𑁆𑀯𑀸 𑀲𑀻𑀳𑀫𑀼𑀔𑀸 𑀫𑀼𑀢𑁆𑀢𑀫𑀢𑁆𑀢𑀯𑀸𑀭𑀡𑁄 𑀯𑀺𑀬 𑀆𑀕𑀫𑀺𑀲𑁆𑀲𑀢𑀺, ‘𑀇𑀫𑁂 𑀭𑀸𑀚𑀸𑀦𑀁 𑀧𑁄𑀭𑀺𑀲𑀸𑀤𑀲𑁆𑀲 𑀤𑀢𑁆𑀯𑀸 𑀆𑀕𑀢𑀸’𑀢𑀺 𑀫𑀳𑀸𑀚𑀦𑁄 𑀕𑀭𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀳𑀺𑀦𑀕𑀭𑁂𑀬𑁂𑀯 𑀔𑀦𑁆𑀥𑀸𑀯𑀸𑀭𑀁 𑀓𑀢𑁆𑀯𑀸 𑀞𑀺𑀢𑀸 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀘𑁆𑀘𑀺, 𑀫𑀳𑀸𑀭𑀸𑀚, 𑀧𑁄𑀭𑀺𑀲𑀸𑀤𑁂𑀦 𑀓𑀺𑀮𑀫𑀺𑀢𑁄’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀧𑁄𑀭𑀺𑀲𑀸𑀤𑁂𑀦 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀤𑀼𑀓𑁆𑀓𑀭𑀁 𑀓𑀢𑀁, 𑀢𑀣𑀸𑀭𑀽𑀧𑁄 𑀦𑀸𑀫 𑀘𑀡𑁆𑀟𑁄 𑀲𑀸𑀳𑀲𑀺𑀓𑁄 𑀧𑁄𑀭𑀺𑀲𑀸𑀤𑁄 𑀫𑀫 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑁄𑀧𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀦𑀸𑀕𑀭𑀸 𑀢𑀼𑀲𑁆𑀲𑀺𑀁𑀲𑀼.
𑀲𑁄𑀧𑀺 𑀥𑀫𑁆𑀫𑀕𑀭𑀼𑀢𑀸𑀬 𑀥𑀫𑁆𑀫𑀲𑁄𑀡𑁆𑀟𑀢𑀸𑀬 𑀫𑀸𑀢𑀸𑀧𑀺𑀢𑀭𑁄 𑀅𑀤𑀺𑀲𑁆𑀯𑀸𑀯 ‘‘𑀧𑀘𑁆𑀙𑀸𑀧𑀺 𑀦𑁂 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀲𑁆𑀲𑀼𑀓𑀫𑁆𑀫𑀸𑀤𑀻𑀦𑀺𑀲𑁆𑀲 𑀆𑀡𑀸𑀧𑁂𑀢𑁆𑀯𑀸 𑀢𑀁 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼𑀁 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀢𑁆𑀯𑀸 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑀓𑀸𑀮𑁂 𑀲𑀬𑀁 𑀧𑀘𑁆𑀙𑀸 𑀦𑁆𑀳𑀢𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀪𑁄𑀚𑀦𑀁 𑀤𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀪𑀼𑀢𑁆𑀢𑁂 𑀲𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀁 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀥𑀫𑁆𑀫𑀕𑀭𑀼𑀓𑀢𑀸𑀬 𑀅𑀲𑁆𑀲 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀬𑀁 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ¶ ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀆𑀪𑀢𑀸 𑀲𑀢𑀸𑀭𑀳𑀸 𑀕𑀸𑀣𑀸 𑀲𑀼𑀡𑁄𑀫 𑀆𑀘𑀭𑀺𑀬𑀸’’𑀢𑀺 𑀬𑀸𑀘𑀺. 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀲𑀢𑁆𑀣𑀸 𑀕𑀸𑀣𑀫𑀸𑀳 𑁋
‘‘𑀫𑀼𑀢𑁆𑀢𑁄 𑀘 𑀲𑁄 𑀧𑁄𑀭𑀺𑀲𑀸𑀤𑀲𑁆𑀲 𑀳𑀢𑁆𑀣𑀸, 𑀕𑀦𑁆𑀢𑁆𑀯𑀸𑀦 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘;
𑀲𑀼𑀡𑁄𑀫𑀺 ¶ 𑀕𑀸𑀣𑀸𑀬𑁄 𑀲𑀢𑀸𑀭𑀳𑀸𑀬𑁄, 𑀬𑀸 𑀫𑁂 𑀲𑀼𑀢𑀸 𑀅𑀲𑁆𑀲𑀼 𑀳𑀺𑀢𑀸𑀬 𑀩𑁆𑀭𑀳𑁆𑀫𑁂’’𑀢𑀺.
𑀢𑀢𑁆𑀣 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀅𑀯𑁄𑀘.
𑀅𑀣 ¶ 𑀩𑁆𑀭𑀸𑀳𑁆𑀫𑀡𑁄 𑀩𑁄𑀥𑀺𑀲𑀢𑁆𑀢𑁂𑀦 𑀬𑀸𑀘𑀺𑀢𑀓𑀸𑀮𑁂 𑀕𑀦𑁆𑀥𑁂𑀳𑀺 𑀳𑀢𑁆𑀣𑁂 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑀸 𑀫𑀦𑁄𑀭𑀫𑀁 𑀧𑁄𑀢𑁆𑀣𑀓𑀁 𑀦𑀻𑀳𑀭𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀭𑀸𑀕𑀫𑀤𑀸𑀤𑀺𑀦𑀺𑀫𑁆𑀫𑀤𑀦𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀺𑀓𑀸 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸𑀬𑁄 𑀲𑀼𑀡𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑁄𑀢𑁆𑀣𑀓𑀁 𑀑𑀮𑁄𑀓𑁂𑀦𑁆𑀢𑁄 𑀆𑀳 𑁋
‘‘𑀲𑀓𑀺𑀤𑁂𑀯 𑀲𑀼𑀢𑀲𑁄𑀫, 𑀲𑀩𑁆𑀪𑀺 𑀳𑁄𑀢𑀺 𑀲𑀫𑀸𑀕𑀫𑁄;
𑀲𑀸 𑀦𑀁 𑀲𑀗𑁆𑀕𑀢𑀺 𑀧𑀸𑀮𑁂𑀢𑀺, 𑀦𑀸𑀲𑀩𑁆𑀪𑀺 𑀩𑀳𑀼 𑀲𑀗𑁆𑀕𑀫𑁄.
‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;
𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.
‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸, 𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;
𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺, 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺.
‘‘𑀦𑀪𑀜𑁆𑀘 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;
𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀲𑀢𑀜𑁆𑀘 𑀥𑀫𑁆𑀫𑁄 𑀅𑀲𑀢𑀜𑁆𑀘 𑀭𑀸𑀚𑀸’’𑀢𑀺.
𑀢𑀢𑁆𑀣 𑀲𑀓𑀺𑀤𑁂𑀯𑀸𑀢𑀺 𑀏𑀓𑀯𑀸𑀭𑀫𑁂𑀯. 𑀲𑀩𑁆𑀪𑀻𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺. 𑀲𑀸 𑀦𑀦𑁆𑀢𑀺 𑀲𑀸 𑀲𑀩𑁆𑀪𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀏𑀓𑀯𑀸𑀭𑀁 𑀧𑀯𑀢𑁆𑀢𑁄𑀧𑀺 𑀢𑀁 ¶ 𑀧𑀼𑀕𑁆𑀕𑀮𑀁 𑀧𑀸𑀮𑁂𑀢𑀺 𑀭𑀓𑁆𑀔𑀢𑀺. 𑀦𑀸𑀲𑀩𑁆𑀪𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑀦 𑀩𑀳𑀼 𑀲𑀼𑀘𑀺𑀭𑀫𑁆𑀧𑀺 𑀓𑀢𑁄 𑀲𑀗𑁆𑀕𑀫𑁄 𑀏𑀓𑀝𑁆𑀞𑀸𑀦𑁂 𑀦𑀺𑀯𑀸𑀲𑁄 𑀦 𑀧𑀸𑀮𑁂𑀢𑀺, 𑀦 𑀣𑀸𑀯𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀲𑁂𑀣𑀸𑀢𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑁂𑀬𑁆𑀬, 𑀲𑀩𑁆𑀩𑁂𑀧𑀺 𑀇𑀭𑀺𑀬𑀸𑀧𑀣𑁂 𑀧𑀡𑁆𑀟𑀺𑀢𑁂𑀳𑁂𑀯 𑀲𑀤𑁆𑀥𑀺𑀁 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀣𑀯𑀦𑁆𑀢𑀺 𑀫𑀺𑀢𑁆𑀢𑀲𑀦𑁆𑀣𑀯𑀁. 𑀲𑀢𑀁 𑀲𑀤𑁆𑀥𑀫𑁆𑀫𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀤𑁆𑀥𑀫𑁆𑀫𑀁. 𑀲𑁂𑀬𑁆𑀬𑁄𑀢𑀺 𑀏𑀢𑀁 𑀥𑀫𑁆𑀫𑀁 𑀜𑀢𑁆𑀯𑀸 𑀯𑀟𑁆𑀠𑀺𑀬𑁂𑀯 𑀳𑁄𑀢𑀺, 𑀳𑀸𑀦𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀭𑀸𑀚𑀭𑀣𑀸𑀢𑀺 𑀭𑀸𑀚𑀽𑀦𑀁 ¶ 𑀆𑀭𑁄𑀳𑀦𑀻𑀬𑀭𑀣𑀸. 𑀲𑀼𑀘𑀺𑀢𑁆𑀢𑀸𑀢𑀺 𑀲𑀼𑀧𑀭𑀺𑀓𑀫𑁆𑀫𑀓𑀢𑀸. 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻𑀢𑀺 𑀩𑀼𑀤𑁆𑀥𑀸𑀤𑀬𑁄 𑀲𑀦𑁆𑀢𑁄 ‘‘𑀲𑀩𑁆𑀪𑀻’’𑀢𑀺 𑀲𑀗𑁆𑀔𑀁 𑀕𑀢𑀁 𑀲𑁄𑀪𑀦𑀁 𑀉𑀢𑁆𑀢𑀫𑀁 𑀦𑀺𑀩𑁆𑀩𑀸𑀦𑀁 𑀧𑀯𑁂𑀤𑁂𑀦𑁆𑀢𑀺 𑀣𑁄𑀫𑁂𑀦𑁆𑀢𑀺, 𑀲𑁄 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀲𑀢𑀁 𑀥𑀫𑁆𑀫𑁄 𑀚𑀭𑀁 𑀦 𑀉𑀧𑁂𑀢𑀺 𑀦 𑀚𑀻𑀭𑀢𑀺. 𑀦𑀪𑀦𑁆𑀢𑀺 𑀆𑀓𑀸𑀲𑁄. 𑀤𑀽𑀭𑁂𑀢𑀺 𑀧𑀣𑀯𑀻 𑀳𑀺 𑀲𑀧𑁆𑀧𑀢𑀺𑀝𑁆𑀞𑀸 𑀲𑀕𑀳𑀡𑀸, 𑀆𑀓𑀸𑀲𑁄 𑀦𑀺𑀭𑀸𑀮𑀫𑁆𑀩𑁄 𑀅𑀧𑁆𑀧𑀢𑀺𑀝𑁆𑀞𑁄, 𑀇𑀢𑀺 𑀉𑀪𑁄 𑀏𑀢𑁂 𑀏𑀓𑀸𑀩𑀤𑁆𑀥𑀸𑀧𑀺 𑀯𑀺𑀲𑀁𑀬𑁄𑀕𑀝𑁆𑀞𑁂𑀦 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦 𑀘 𑀤𑀽𑀭𑁂 𑀦𑀸𑀫 𑀳𑁄𑀦𑁆𑀢𑀺. 𑀧𑀸𑀭𑀦𑁆𑀢𑀺 𑀑𑀭𑀺𑀫𑀢𑀻𑀭𑀢𑁄 𑀧𑀭𑀢𑀻𑀭𑀁. 𑀢𑀤𑀸𑀳𑀽𑀢𑀺 𑀢𑀁 𑀆𑀳𑀼.
𑀇𑀢𑀺 𑀩𑁆𑀭𑀸𑀳𑁆𑀫𑀡𑁄 𑀘𑀢𑀲𑁆𑀲𑁄 𑀲𑀢𑀸𑀭𑀳𑀸 𑀕𑀸𑀣𑀸 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀦𑀺𑀬𑀸𑀫𑁂𑀦 𑀤𑁂𑀲𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺 ¶ . 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀲𑀧𑁆𑀨𑀮𑀁 𑀯𑀢 𑀫𑁂 𑀆𑀕𑀫𑀦’’𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀇𑀫𑀸 𑀕𑀸𑀣𑀸 𑀦𑁂𑀯 𑀲𑀸𑀯𑀓𑀪𑀸𑀲𑀺𑀢𑀸, 𑀦 𑀇𑀲𑀺𑀪𑀸𑀲𑀺𑀢𑀸, 𑀦 𑀓𑁂𑀦𑀘𑀺 𑀪𑀸𑀲𑀺𑀢𑀸, 𑀲𑀩𑁆𑀩𑀜𑁆𑀜𑀼𑀦𑀸𑀯 𑀪𑀸𑀲𑀺𑀢𑀸, 𑀓𑀺𑀁 𑀦𑀼 𑀔𑁄 𑀅𑀕𑁆𑀖𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑀸𑀲𑀁 𑀲𑀓𑀮𑀫𑁆𑀧𑀺 𑀘𑀓𑁆𑀓𑀯𑀸𑀴𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀢𑁆𑀢𑀭𑀢𑀦𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀤𑀫𑀸𑀦𑁄𑀧𑀺 𑀦𑁂𑀯 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀳𑀁 𑀔𑁄 𑀧𑀦𑀲𑁆𑀲 𑀢𑀺𑀬𑁄𑀚𑀦𑀲𑀢𑁂 𑀓𑀼𑀭𑀼𑀭𑀝𑁆𑀞𑁂 𑀲𑀢𑁆𑀢𑀬𑁄𑀚𑀦𑀺𑀓𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀭𑀚𑁆𑀚𑀁 𑀤𑀸𑀢𑀼𑀁 𑀧𑀳𑁄𑀫𑀺, 𑀅𑀢𑁆𑀣𑀺 𑀦𑀼 𑀔𑁆𑀯𑀲𑁆𑀲 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀪𑀸𑀕𑁆𑀬’’𑀦𑁆𑀢𑀺 𑀅𑀗𑁆𑀕𑀯𑀺𑀚𑁆𑀚𑀸𑀦𑀼𑀪𑀸𑀯𑁂𑀦 𑀑𑀮𑁄𑀓𑁂𑀦𑁆𑀢𑁄 𑀦𑀸𑀤𑁆𑀤𑀲. 𑀢𑀢𑁄 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀑𑀮𑁄𑀓𑁂𑀦𑁆𑀢𑁄 𑀏𑀓𑀕𑀸𑀫𑀪𑁄𑀚𑀓𑀫𑀢𑁆𑀢𑀲𑁆𑀲𑀧𑀺 𑀪𑀸𑀕𑁆𑀬𑀁 𑀅𑀤𑀺𑀲𑁆𑀯𑀸 𑀥𑀦𑀮𑀸𑀪𑀲𑁆𑀲 𑀑𑀮𑁄𑀓𑁂𑀦𑁆𑀢𑁄 𑀓𑁄𑀝𑀺𑀥𑀦𑀢𑁄 𑀧𑀝𑁆𑀞𑀸𑀬 𑀑𑀮𑁄𑀓𑁂𑀢𑁆𑀯𑀸 𑀘𑀢𑀼𑀦𑁆𑀦𑀁𑀬𑁂𑀯 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀁 𑀪𑀸𑀕𑁆𑀬𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑁂𑀦 𑀦𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀢𑀲𑁆𑀲𑁄 𑀲𑀳𑀲𑁆𑀲𑀢𑁆𑀣𑀯𑀺𑀓𑀸 𑀤𑀸𑀧𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑀼𑀫𑁆𑀳𑁂 𑀅𑀜𑁆𑀜𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀇𑀫𑀸 𑀕𑀸𑀣𑀸 𑀤𑁂𑀲𑁂𑀢𑁆𑀯𑀸 𑀓𑀺𑀢𑁆𑀢𑀓𑀁 𑀥𑀦𑀁 𑀮𑀪𑀣𑀸’’𑀢𑀺 𑀧𑀼𑀘𑁆𑀙𑀢𑀺. ‘‘𑀏𑀓𑁂𑀓𑀸𑀬 𑀕𑀸𑀣𑀸𑀬 𑀲𑀢𑀁 𑀲𑀢𑀁, 𑀫𑀳𑀸𑀭𑀸𑀚, 𑀢𑁂𑀦𑁂𑀯 𑀢𑀸 𑀲𑀢𑀸𑀭𑀳𑀸 𑀦𑀸𑀫 𑀚𑀸𑀢𑀸’’𑀢𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄, ‘‘𑀆𑀘𑀭𑀺𑀬, 𑀢𑁆𑀯𑀁 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑁂𑀬𑁆𑀬𑀪𑀡𑁆𑀟𑀲𑁆𑀲 𑀅𑀕𑁆𑀖𑀫𑁆𑀧𑀺 𑀦 𑀚𑀸𑀦𑀸𑀲𑀺 ¶ , 𑀇𑀢𑁄 𑀧𑀝𑁆𑀞𑀸𑀬 𑀏𑀓𑁂𑀓𑀸 𑀕𑀸𑀣𑀸 𑀲𑀳𑀲𑁆𑀲𑀸𑀭𑀳𑀸 𑀦𑀸𑀫 𑀳𑁄𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀲𑀳𑀲𑁆𑀲𑀺𑀬𑀸 𑀇𑀫𑀸 𑀕𑀸𑀣𑀸, 𑀦𑀳𑀺𑀫𑀸 𑀕𑀸𑀣𑀸 𑀲𑀢𑀸𑀭𑀳𑀸;
𑀘𑀢𑁆𑀢𑀸𑀭𑀺 𑀢𑁆𑀯𑀁 𑀲𑀳𑀲𑁆𑀲𑀸𑀦𑀺, 𑀔𑀺𑀧𑁆𑀧𑀁 𑀕𑀡𑁆𑀳𑀸𑀳𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀩𑁆𑀭𑀸𑀳𑁆𑀫𑀡, 𑀇𑀫𑀸 𑀕𑀸𑀣𑀸 𑀲𑀳𑀲𑁆𑀲𑀺𑀬𑀸 𑀲𑀳𑀲𑁆𑀲𑀸𑀭𑀳𑀸, 𑀇𑀫𑀸 𑀕𑀸𑀣𑀸 𑀲𑀢𑀸𑀭𑀳𑀸 𑀦 𑀳𑀺 𑀳𑁄𑀦𑁆𑀢𑀼, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀔𑀺𑀧𑁆𑀧𑀁 𑀕𑀡𑁆𑀳𑀸𑀢𑀺.
𑀅𑀣𑀲𑁆𑀲 𑀏𑀓𑀁 𑀲𑀼𑀔𑀬𑀸𑀦𑀓𑀁 𑀤𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑀁 𑀲𑁄𑀢𑁆𑀣𑀺𑀦𑀸 𑀕𑁂𑀳𑀁 ¶ 𑀲𑀫𑁆𑀧𑀸𑀧𑁂𑀣𑀸’’𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 ‘‘𑀲𑀼𑀢𑀲𑁄𑀫𑀭𑀜𑁆𑀜𑀸 𑀲𑀢𑀸𑀭𑀳𑀸 𑀕𑀸𑀣𑀸 𑀲𑀳𑀲𑁆𑀲𑀸𑀭𑀳𑀸 𑀓𑀢𑁆𑀯𑀸 𑀧𑀽𑀚𑀺𑀢𑀸 𑀲𑀸𑀥𑀼 𑀲𑀸𑀥𑀽’’𑀢𑀺 𑀫𑀳𑀸𑀲𑀸𑀥𑀼𑀓𑀸𑀭𑀲𑀤𑁆𑀤𑁄 𑀅𑀳𑁄𑀲𑀺. 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀲𑀤𑁆𑀤𑁄 𑀦𑀸𑀫𑁂𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀬𑀣𑀸𑀪𑀽𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀥𑀦𑀮𑁄𑀪𑀢𑀸𑀬 𑀫𑀳𑀸𑀲𑀢𑁆𑀢𑀲𑁆𑀲 𑀓𑀼𑀚𑁆𑀛𑀺𑀁𑀲𑀼. 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸 ‘‘𑀓𑀣𑀁, 𑀢𑀸𑀢, 𑀏𑀯𑀭𑀽𑀧𑀲𑁆𑀲 𑀲𑀸𑀳𑀲𑀺𑀓𑀲𑁆𑀲 𑀘𑁄𑀭𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑁄𑀲𑀻’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀥𑀦𑀮𑁄𑀪𑀢𑀸𑀬 ‘‘𑀲𑀘𑁆𑀘𑀁 𑀓𑀺𑀭, 𑀢𑀸𑀢, 𑀢𑀬𑀸 𑀘𑀢𑀲𑁆𑀲𑁄 𑀕𑀸𑀣𑀸 𑀲𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀤𑀺𑀦𑁆𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 𑀕𑀸𑀣𑀫𑀸𑀳 𑁋
‘‘𑀆𑀲𑀻𑀢𑀺𑀬𑀸 𑀦𑀸𑀯𑀼𑀢𑀺𑀬𑀸 𑀘 𑀕𑀸𑀣𑀸, 𑀲𑀢𑀸𑀭𑀳𑀸 𑀘𑀸𑀧𑀺 𑀪𑀯𑁂𑀬𑁆𑀬 𑀕𑀸𑀣𑀸;
𑀧𑀘𑁆𑀘𑀢𑁆𑀢𑀫𑁂𑀯 𑀲𑀼𑀢𑀲𑁄𑀫 𑀚𑀸𑀦𑀳𑀺, 𑀲𑀳𑀲𑁆𑀲𑀺𑀬𑀸 𑀦𑀸𑀫 𑀓𑀸 𑀅𑀢𑁆𑀣𑀺 𑀕𑀸𑀣𑀸’’𑀢𑀺.
𑀢𑀲𑁆𑀲𑀢𑁆𑀣𑁄 ¶ 𑁋 𑀕𑀸𑀣𑀸 𑀦𑀸𑀫, 𑀢𑀸𑀢, 𑀆𑀲𑀻𑀢𑀺𑀬𑀸 𑀘 𑀦𑀸𑀯𑀼𑀢𑀺𑀬𑀸 𑀘 𑀲𑀢𑀸𑀭𑀳𑀸 𑀘𑀸𑀧𑀺 𑀪𑀯𑁂𑀬𑁆𑀬, 𑀧𑀘𑁆𑀘𑀢𑁆𑀢𑀫𑁂𑀯 𑀅𑀢𑁆𑀢𑀦𑀸𑀯 𑀚𑀸𑀦𑀸𑀳𑀺, 𑀲𑀳𑀲𑁆𑀲𑀸𑀭𑀳𑀸 𑀦𑀸𑀫 𑀕𑀸𑀣𑀸 𑀓𑀸 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀣𑀻𑀢𑀺.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀦𑀸𑀳𑀁, 𑀢𑀸𑀢, 𑀥𑀦𑁂𑀦 𑀯𑀼𑀤𑁆𑀥𑀺𑀁 𑀇𑀘𑁆𑀙𑀸𑀫𑀺, 𑀲𑀼𑀢𑁂𑀦 𑀧𑀦 𑀇𑀘𑁆𑀙𑀸𑀫𑀻’’𑀢𑀺 𑀲𑀜𑁆𑀜𑀸𑀧𑁂𑀦𑁆𑀢𑁄 𑀆𑀳 𑁋
‘‘𑀇𑀘𑁆𑀙𑀸𑀫𑀺 ¶ 𑀯𑁄𑀳𑀁 𑀲𑀼𑀢𑀯𑀼𑀤𑁆𑀥𑀺𑀫𑀢𑁆𑀢𑀦𑁄, 𑀲𑀦𑁆𑀢𑁄𑀢𑀺 𑀫𑀁 𑀲𑀧𑁆𑀧𑀼𑀭𑀺𑀲𑀸 𑀪𑀚𑁂𑀬𑁆𑀬𑀼𑀁;
𑀅𑀳𑀁 𑀲𑀯𑀦𑁆𑀢𑀻𑀳𑀺 𑀫𑀳𑁄𑀤𑀥𑀻𑀯, 𑀦 𑀳𑀺 𑀢𑀸𑀢 𑀢𑀧𑁆𑀧𑀸𑀫𑀺 𑀲𑀼𑀪𑀸𑀲𑀺𑀢𑁂𑀦.
‘‘𑀅𑀕𑁆𑀕𑀺 𑀬𑀣𑀸 𑀢𑀺𑀡𑀓𑀝𑁆𑀞𑀁 𑀤𑀳𑀦𑁆𑀢𑁄, 𑀦 𑀓𑀧𑁆𑀧𑀢𑀻 𑀲𑀸𑀕𑀭𑁄𑀯 𑀦𑀤𑀻𑀪𑀺;
𑀏𑀯𑀫𑁆𑀧𑀺 𑀢𑁂 𑀧𑀡𑁆𑀟𑀺𑀢𑀸 𑀭𑀸𑀚𑀲𑁂𑀝𑁆𑀞, 𑀲𑀼𑀢𑁆𑀯𑀸 𑀦 𑀢𑀧𑁆𑀧𑀦𑁆𑀢𑀺 𑀲𑀼𑀪𑀸𑀲𑀺𑀢𑁂𑀦.
‘‘𑀲𑀓𑀲𑁆𑀲 𑀤𑀸𑀲𑀲𑁆𑀲 𑀬𑀤𑀸 𑀲𑀼𑀡𑁄𑀫𑀺, 𑀕𑀸𑀣𑀁 𑀅𑀳𑀁 𑀅𑀢𑁆𑀣𑀯𑀢𑀺𑀁 𑀚𑀦𑀺𑀦𑁆𑀤;
𑀢𑀫𑁂𑀯 ¶ 𑀲𑀓𑁆𑀓𑀘𑁆𑀘 𑀦𑀺𑀲𑀸𑀫𑀬𑀸𑀫𑀺, 𑀦 𑀳𑀺 𑀢𑀸𑀢 𑀥𑀫𑁆𑀫𑁂𑀲𑀼 𑀫𑀫𑀢𑁆𑀣𑀺 𑀢𑀺𑀢𑁆𑀢𑀻’’𑀢𑀺.
𑀢𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀲𑀦𑁆𑀢𑁄’’𑀢𑀺 𑀏𑀢𑁂 𑀘 𑀫𑀁 𑀪𑀚𑁂𑀬𑁆𑀬𑀼𑀁 𑀇𑀢𑀺 𑀇𑀘𑁆𑀙𑀸𑀫𑀺. 𑀲𑀯𑀦𑁆𑀢𑀻𑀳𑀻𑀢𑀺 𑀦𑀤𑀻𑀳𑀺. 𑀲𑀓𑀲𑁆𑀲𑀸𑀢𑀺 𑀢𑀺𑀝𑁆𑀞𑀢𑀼, 𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑁄, 𑀬𑀤𑀸 𑀅𑀳𑀁 𑀅𑀢𑁆𑀢𑀦𑁄 𑀤𑀸𑀲𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀼𑀡𑁄𑀫𑀺, 𑀢𑀸𑀢, 𑀥𑀫𑁆𑀫𑁂𑀲𑀼 𑀫𑀫 𑀢𑀺𑀢𑁆𑀢𑀺 𑀦 𑀳𑀺 𑀅𑀢𑁆𑀣𑀻𑀢𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀫𑀸 𑀫𑀁, 𑀢𑀸𑀢, 𑀥𑀦𑀳𑁂𑀢𑀼 𑀧𑀭𑀺𑀪𑀸𑀲𑀲𑀺, 𑀅𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀧𑀣𑀁 𑀓𑀢𑁆𑀯𑀸 𑀆𑀕𑀢𑁄, 𑀇𑀤𑀸𑀦𑀸𑀳𑀁 𑀧𑁄𑀭𑀺𑀲𑀸𑀤𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀺, 𑀇𑀤𑀁 𑀢𑁂 𑀭𑀚𑁆𑀚𑀁 𑀕𑀡𑁆𑀳𑀣𑀸’’𑀢𑀺 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀇𑀤𑀁 𑀢𑁂 𑀭𑀝𑁆𑀞𑀁 𑀲𑀥𑀦𑀁 𑀲𑀬𑁄𑀕𑁆𑀕𑀁, 𑀲𑀓𑀸𑀬𑀼𑀭𑀁 𑀲𑀩𑁆𑀩𑀓𑀸𑀫𑀽𑀧𑀧𑀦𑁆𑀦𑀁;
𑀓𑀺𑀁 𑀓𑀸𑀫𑀳𑁂𑀢𑀼 𑀧𑀭𑀺𑀪𑀸𑀲𑀲𑀺 𑀫𑀁, 𑀕𑀘𑁆𑀙𑀸𑀫𑀳𑀁 𑀧𑁄𑀭𑀺𑀲𑀸𑀤𑀲𑁆𑀲 𑀜𑀢𑁆𑀢𑁂’’𑀢𑀺.
𑀢𑀢𑁆𑀣 𑀜𑀢𑁆𑀢𑁂𑀢𑀺 𑀲𑀦𑁆𑀢𑀺𑀓𑁂.
𑀢𑀲𑁆𑀫𑀺𑀁 𑀲𑀫𑀬𑁂 𑀧𑀺𑀢𑀼𑀭𑀜𑁆𑀜𑁄 𑀳𑀤𑀬𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑁄, ‘‘𑀢𑀸𑀢 𑀲𑀼𑀢𑀲𑁄𑀫, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀺, 𑀫𑀬𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀘𑁄𑀭𑀁 𑀕𑀳𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀢𑁆𑀢𑀸𑀦𑀼𑀭𑀓𑁆𑀔𑀸𑀬 ¶ ¶ 𑀪𑀯𑀦𑁆𑀢𑀺 𑀳𑁂𑀢𑁂, 𑀳𑀢𑁆𑀣𑀸𑀭𑁄𑀳𑀸 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸 𑀘;
𑀅𑀲𑁆𑀲𑀸𑀭𑁄𑀳𑀸 𑀬𑁂 𑀘 𑀥𑀦𑀼𑀕𑁆𑀕𑀳𑀸𑀲𑁂, 𑀲𑁂𑀦𑀁 𑀧𑀬𑀼𑀜𑁆𑀚𑀸𑀫 𑀳𑀦𑀸𑀫 𑀲𑀢𑁆𑀢𑀼’’𑀦𑁆𑀢𑀺.
𑀢𑀢𑁆𑀣 𑀳𑀦𑀸𑀫𑀸𑀢𑀺 𑀲𑀘𑁂 𑀏𑀯𑀁 𑀧𑀬𑁄𑀚𑀺𑀢𑀸 𑀲𑁂𑀦𑀸 𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀣 𑀦𑀁 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀳𑀦𑀸𑀫 𑀲𑀢𑁆𑀢𑀼𑀁, 𑀫𑀸𑀭𑁂𑀫 𑀢𑀁 𑀅𑀫𑁆𑀳𑀸𑀓𑀁 𑀧𑀘𑁆𑀘𑀸𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.
𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀲𑁆𑀲𑀼𑀧𑀼𑀡𑁆𑀡𑀫𑀼𑀔𑀸 𑀭𑁄𑀤𑀫𑀸𑀦𑀸 𑀯𑀺𑀮𑀧𑀦𑁆𑀢𑀸, ‘‘𑀢𑀸𑀢, 𑀫𑀸 𑀕𑀘𑁆𑀙, 𑀕𑀦𑁆𑀢𑀼𑀁 𑀦 𑀮𑀩𑁆𑀪𑀸’’𑀢𑀺 𑀬𑀸𑀘𑀺𑀁𑀲𑀼. 𑀲𑁄𑀴𑀲𑀲𑀳𑀲𑁆𑀲𑀸 𑀦𑀸𑀝𑀓𑀺𑀢𑁆𑀣𑀺𑀬𑁄𑀧𑀺 𑀲𑁂𑀲𑀧𑀭𑀺𑀚𑀦𑁄𑀧𑀺 ‘‘𑀅𑀫𑁆𑀳𑁂 𑀅𑀦𑀸𑀣𑁂 𑀓𑀢𑁆𑀯𑀸 𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀤𑁂𑀯𑀸’’𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. 𑀲𑀓𑀮𑀦𑀕𑀭𑁂 𑀓𑁄𑀘𑀺 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀼𑀢𑀲𑁄𑀫𑁄 𑀧𑁄𑀭𑀺𑀲𑀸𑀤𑀲𑁆𑀲 𑀓𑀺𑀭 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀆𑀕𑀢𑁄, 𑀇𑀤𑀸𑀦𑀺 𑀘𑀢𑀲𑁆𑀲𑁄 ¶ 𑀲𑀢𑀸𑀭𑀳𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀧𑀺 𑀓𑀺𑀭 𑀘𑁄𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀓𑀮𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀲𑁄𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀲𑀼𑀤𑀼𑀓𑁆𑀓𑀭𑀁 𑀧𑁄𑀭𑀺𑀲𑀸𑀤𑁄 𑀅𑀓𑀸𑀲𑀺, 𑀚𑀻𑀯𑀁 𑀕𑀳𑁂𑀢𑁆𑀯𑀸𑀦 𑀅𑀯𑀲𑁆𑀲𑀚𑀻 𑀫𑀁;
𑀢𑀁 𑀢𑀸𑀤𑀺𑀲𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀭𑀦𑁆𑀢𑁄, 𑀤𑀼𑀩𑁆𑀪𑁂 𑀅𑀳𑀁 𑀢𑀲𑁆𑀲 𑀓𑀣𑀁 𑀚𑀦𑀺𑀦𑁆𑀤𑀸’’𑀢𑀺.
𑀢𑀢𑁆𑀣 𑀚𑀻𑀯𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸. 𑀢𑀁 𑀢𑀸𑀤𑀺𑀲𑀦𑁆𑀢𑀺 𑀢𑀁 𑀢𑁂𑀦 𑀓𑀢𑀁 𑀢𑀣𑀸𑀭𑀽𑀧𑀁. 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀧𑀼𑀭𑀺𑀫𑀁 𑀉𑀧𑀓𑀸𑀭𑀁. 𑀚𑀦𑀺𑀦𑁆𑀤𑀸𑀢𑀺 𑀧𑀺𑀢𑀭𑀁 𑀆𑀮𑀧𑀢𑀺.
𑀲𑁄 𑀫𑀸𑀢𑀸𑀧𑀺𑀢𑀭𑁄 𑀅𑀲𑁆𑀲𑀸𑀲𑁂𑀢𑁆𑀯𑀸, ‘‘𑀅𑀫𑁆𑀫 𑀢𑀸𑀢𑀸, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀓𑀢𑀓𑀮𑁆𑀬𑀸𑀡𑁄 𑀅𑀳𑀁, 𑀫𑀫 𑀙𑀓𑀸𑀫𑀲𑁆𑀲𑀕𑁆𑀕𑀺𑀲𑁆𑀲𑀭𑀺𑀬𑀁 𑀦 𑀤𑀼𑀮𑁆𑀮𑀪’’𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑁂𑀲𑀚𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋
‘‘𑀯𑀦𑁆𑀤𑀺𑀢𑁆𑀯𑀸 ¶ 𑀲𑁄 𑀧𑀺𑀢𑀭𑀁 𑀫𑀸𑀢𑀭𑀜𑁆𑀘, 𑀅𑀦𑀼𑀲𑀸𑀲𑀺𑀢𑁆𑀯𑀸 𑀦𑁂𑀕𑀫𑀜𑁆𑀘 𑀩𑀮𑀜𑁆𑀘;
𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀸𑀦𑀼𑀭𑀓𑁆𑀔𑀫𑀸𑀦𑁄, 𑀅𑀕𑀫𑀸𑀲𑀺 𑀲𑁄 𑀬𑀢𑁆𑀣 𑀧𑁄𑀭𑀺𑀲𑀸𑀤𑁄’’𑀢𑀺.
𑀢𑀢𑁆𑀣 𑀲𑀘𑁆𑀘𑀸𑀦𑀼𑀭𑀓𑁆𑀔𑀫𑀸𑀦𑁄𑀢𑀺 𑀲𑀘𑁆𑀘𑀁 𑀅𑀦𑀼𑀭𑀓𑁆𑀔𑀫𑀸𑀦𑁄. 𑀅𑀕𑀫𑀸𑀲𑀻𑀢𑀺 𑀢𑀁 𑀭𑀢𑁆𑀢𑀺𑀁 𑀦𑀺𑀯𑁂𑀲𑀦𑁂𑀬𑁂𑀯 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑁂𑀲𑀚𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀦𑁆𑀢𑁂𑀦 𑀇𑀢𑁆𑀣𑀸𑀕𑀸𑀭𑀸𑀤𑀺𑀦𑀸 𑀫𑀳𑀸𑀚𑀦𑁂𑀦 𑀅𑀦𑀼𑀕𑀢𑁄 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 ¶ 𑀢𑀁 𑀚𑀦𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀸𑀫𑀕𑁆𑀕𑁂 𑀤𑀡𑁆𑀟𑀓𑁂𑀦 𑀢𑀺𑀭𑀺𑀬𑀁 𑀮𑁂𑀔𑀁 𑀓𑀟𑁆𑀠𑀺𑀢𑁆𑀯𑀸 ‘‘𑀲𑀘𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀇𑀫𑀁 𑀫𑀸 𑀅𑀢𑀺𑀓𑁆𑀓𑀫𑀺𑀁𑀲𑀽’’𑀢𑀺 𑀆𑀳. 𑀫𑀳𑀸𑀚𑀦𑁄 𑀲𑀻𑀮𑀯𑀢𑁄 𑀢𑁂𑀚𑀯𑀦𑁆𑀢𑀲𑁆𑀲 𑀆𑀡𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀫𑀸𑀦𑁄 𑀢𑀁 𑀲𑀻𑀳𑀯𑀺𑀚𑀫𑁆𑀪𑀺𑀢𑁂𑀦 𑀕𑀘𑁆𑀙𑀦𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀫𑀺𑀁 𑀤𑀲𑁆𑀲𑀦𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀦𑁆𑀢𑁂 𑀏𑀓𑀭𑀯𑀁 𑀭𑀯𑀦𑁆𑀢𑁄 𑀦𑀕𑀭𑀁 𑀧𑀸𑀯𑀺𑀲𑀺. 𑀲𑁄𑀧𑀺 𑀆𑀕𑀢𑀫𑀕𑁆𑀕𑁂𑀦𑁂𑀯 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀕𑀫𑀸𑀲𑀺 𑀲𑁄 𑀬𑀢𑁆𑀣 𑀧𑁄𑀭𑀺𑀲𑀸𑀤𑁄’’𑀢𑀺.
𑀢𑀢𑁄 𑀧𑁄𑀭𑀺𑀲𑀸𑀤𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀫𑀫 𑀲𑀳𑀸𑀬𑁄 𑀲𑀼𑀢𑀲𑁄𑀫𑁄 𑀆𑀕𑀦𑁆𑀢𑀼𑀓𑀸𑀫𑁄, 𑀆𑀕𑀘𑁆𑀙𑀢𑀼, 𑀅𑀦𑀸𑀕𑀦𑁆𑀢𑀼𑀓𑀸𑀫𑁄, 𑀅𑀦𑀸𑀕𑀘𑁆𑀙𑀢𑀼, 𑀭𑀼𑀓𑁆𑀔𑀤𑁂𑀯𑀢𑀸 𑀬𑀁 𑀫𑀬𑁆𑀳𑀁 𑀇𑀘𑁆𑀙𑀢𑀺 ¶ , 𑀢𑀁 𑀓𑀭𑁄𑀢𑀼, 𑀇𑀫𑁂 𑀭𑀸𑀚𑀸𑀦𑁄 𑀫𑀸𑀭𑁂𑀢𑁆𑀯𑀸 𑀧𑀜𑁆𑀘𑀫𑀥𑀼𑀭𑀫𑀁𑀲𑁂𑀦 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑀓𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 ‘‘𑀅𑀗𑁆𑀕𑀸𑀭𑀭𑀸𑀲𑀺 𑀢𑀸𑀯 𑀳𑁄𑀢𑀽’’𑀢𑀺 𑀢𑀲𑁆𑀲 𑀲𑀽𑀮𑁂 𑀢𑀘𑁆𑀙𑀦𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁂 𑀲𑀼𑀢𑀲𑁄𑀫𑁄 𑀆𑀕𑀢𑁄. 𑀅𑀣 𑀦𑀁 𑀧𑁄𑀭𑀺𑀲𑀸𑀤𑁄 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄, ‘‘𑀲𑀫𑁆𑀫, 𑀕𑀦𑁆𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀢𑁂 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀲𑀢𑁆𑀢𑁄, ‘‘𑀆𑀫 𑀫𑀳𑀸𑀭𑀸𑀚, 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀕𑀸𑀣𑀸 𑀫𑁂 𑀲𑀼𑀢𑀸, 𑀥𑀫𑁆𑀫𑀓𑀣𑀺𑀓𑀲𑁆𑀲 𑀘 𑀲𑀓𑁆𑀓𑀸𑀭𑁄 𑀓𑀢𑁄, 𑀢𑀲𑁆𑀫𑀸 𑀕𑀦𑁆𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳 𑁋
‘‘𑀓𑀢𑁄 𑀫𑀬𑀸 𑀲𑀗𑁆𑀕𑀭𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀭𑀝𑁆𑀞𑁂 𑀲𑀓𑁂 𑀇𑀲𑁆𑀲𑀭𑀺𑀬𑁂 𑀞𑀺𑀢𑁂𑀦;
𑀢𑀁 𑀲𑀗𑁆𑀕𑀭𑀁 𑀩𑁆𑀭𑀸𑀳𑁆𑀫𑀡𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀕𑀢𑁄𑀲𑁆𑀫𑀺;
𑀬𑀚𑀲𑁆𑀲𑀼 𑀬𑀜𑁆𑀜𑀁 𑀔𑀸𑀤 𑀫𑀁 𑀧𑁄𑀭𑀺𑀲𑀸𑀤𑀸’’𑀢𑀺.
𑀢𑀢𑁆𑀣 ¶ 𑀬𑀚𑀲𑁆𑀲𑀽𑀢𑀺 𑀫𑀁 𑀫𑀸𑀭𑁂𑀢𑁆𑀯𑀸 𑀤𑁂𑀯𑀢𑀸𑀬 𑀯𑀸 𑀬𑀜𑁆𑀜𑀁 𑀬𑀚𑀲𑁆𑀲𑀼, 𑀫𑀁𑀲𑀁 𑀯𑀸 𑀫𑁂 𑀔𑀸𑀤𑀸𑀳𑀻𑀢𑀺 𑀅𑀢𑁆𑀣𑁄.
𑀢𑀁 𑀲𑀼𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 ‘‘𑀅𑀬𑀁 𑀭𑀸𑀚𑀸 𑀦 𑀪𑀸𑀬𑀢𑀺, 𑀯𑀺𑀕𑀢𑀫𑀭𑀡𑀪𑀬𑁄 𑀳𑀼𑀢𑁆𑀯𑀸 𑀓𑀣𑁂𑀢𑀺, 𑀓𑀺𑀲𑁆𑀲 𑀦𑀼 𑀔𑁄 𑀏𑀲 𑀆𑀦𑀼𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀜𑁆𑀜𑀁 𑀦𑀢𑁆𑀣𑀺, 𑀅𑀬𑀁 ‘𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸 𑀕𑀸𑀣𑀸 𑀫𑁂 𑀲𑀼𑀢𑀸’𑀢𑀺 𑀯𑀤𑀢𑀺, 𑀢𑀸𑀲𑀁 𑀏𑀢𑁂𑀦 𑀆𑀲𑀼𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀳𑀫𑁆𑀧𑀺 𑀢𑀁 𑀓𑀣𑀸𑀧𑁂𑀢𑁆𑀯𑀸 𑀢𑀸 𑀕𑀸𑀣𑀸𑀬𑁄 𑀲𑁄𑀲𑁆𑀲𑀸𑀫𑀺, 𑀏𑀯𑀁 𑀅𑀳𑀫𑁆𑀧𑀺 𑀦𑀺𑀩𑁆𑀪𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀦 𑀳𑀸𑀬𑀢𑁂 𑀔𑀸𑀤𑀺𑀢𑀁 𑀫𑀬𑁆𑀳𑀁 𑀧𑀘𑁆𑀙𑀸, 𑀘𑀺𑀢𑀓𑀸 𑀅𑀬𑀁 𑀢𑀸𑀯 𑀲𑀥𑀽𑀫𑀺𑀓𑀸𑀯;
𑀦𑀺𑀤𑁆𑀥𑀽𑀫𑀓𑁂 𑀧𑀘𑀺𑀢𑀁 𑀲𑀸𑀥𑀼𑀧𑀓𑁆𑀓𑀁, 𑀲𑀼𑀡𑁄𑀫𑀺 𑀕𑀸𑀣𑀸𑀬𑁄 𑀲𑀢𑀸𑀭𑀳𑀸𑀬𑁄’’𑀢𑀺.
𑀢𑀢𑁆𑀣 𑀔𑀸𑀤𑀺𑀢𑀦𑁆𑀢𑀺 𑀔𑀸𑀤𑀦𑀁. 𑀢𑀁 𑀔𑀸𑀤𑀦𑀁 𑀫𑀬𑁆𑀳𑀁 𑀧𑀘𑁆𑀙𑀸 𑀯𑀸 𑀧𑀼𑀭𑁂 𑀯𑀸 𑀦 𑀧𑀭𑀺𑀳𑀸𑀬𑀢𑀺, 𑀧𑀘𑁆𑀙𑀸𑀧𑀺 𑀳𑀺 ¶ 𑀢𑁆𑀯𑀁 𑀫𑀬𑀸 𑀔𑀸𑀤𑀺𑀢𑀩𑁆𑀩𑁄𑀯. 𑀦𑀺𑀤𑁆𑀥𑀽𑀫𑀓𑁂 𑀧𑀘𑀺𑀢𑀦𑁆𑀢𑀺 𑀦𑀺𑀤𑁆𑀥𑀽𑀫𑁂 𑀦𑀺𑀚𑁆𑀛𑀸𑀮𑁂 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀓𑀫𑀁𑀲𑀁 𑀲𑀸𑀥𑀼𑀧𑀓𑁆𑀓𑀁 𑀦𑀸𑀫 𑀳𑁄𑀢𑀺.
𑀢𑀁 ¶ 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀧𑁄𑀭𑀺𑀲𑀸𑀤𑁄 𑀧𑀸𑀧𑀥𑀫𑁆𑀫𑁄, 𑀇𑀫𑀁 𑀣𑁄𑀓𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀮𑀚𑁆𑀚𑀸𑀧𑁂𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀅𑀥𑀫𑁆𑀫𑀺𑀓𑁄 𑀢𑁆𑀯𑀁 𑀧𑁄𑀭𑀺𑀲𑀸𑀤𑀓𑀸𑀲𑀺, 𑀭𑀝𑁆𑀞𑀸 𑀘 𑀪𑀝𑁆𑀞𑁄 𑀉𑀤𑀭𑀲𑁆𑀲 𑀳𑁂𑀢𑀼;
𑀥𑀫𑁆𑀫𑀜𑁆𑀘𑀺𑀫𑀸 𑀅𑀪𑀺𑀯𑀤𑀦𑁆𑀢𑀺 𑀕𑀸𑀣𑀸, 𑀥𑀫𑁆𑀫𑁄 𑀘 𑀅𑀥𑀫𑁆𑀫𑁄 𑀘 𑀓𑀼𑀳𑀺𑀁 𑀲𑀫𑁂𑀢𑀺.
‘‘𑀅𑀥𑀫𑁆𑀫𑀺𑀓𑀲𑁆𑀲 𑀮𑀼𑀤𑁆𑀤𑀲𑁆𑀲, 𑀦𑀺𑀘𑁆𑀘𑀁 𑀮𑁄𑀳𑀺𑀢𑀧𑀸𑀡𑀺𑀦𑁄;
𑀦𑀢𑁆𑀣𑀺 𑀲𑀘𑁆𑀘𑀁 𑀓𑀼𑀢𑁄 𑀥𑀫𑁆𑀫𑁄, 𑀓𑀺𑀁 𑀲𑀼𑀢𑁂𑀦 𑀓𑀭𑀺𑀲𑁆𑀲𑀲𑀻’’𑀢𑀺.
𑀢𑀢𑁆𑀣 𑀥𑀫𑁆𑀫𑀜𑁆𑀘𑀺𑀫𑀸𑀢𑀺 𑀇𑀫𑀸 𑀘 𑀕𑀸𑀣𑀸 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀪𑀺𑀯𑀤𑀦𑁆𑀢𑀺. 𑀓𑀼𑀳𑀺𑀁 𑀲𑀫𑁂𑀢𑀻𑀢𑀺 𑀓𑀢𑁆𑀣 𑀲𑀫𑀸𑀕𑀘𑁆𑀙𑀢𑀺. 𑀥𑀫𑁆𑀫𑁄 𑀳𑀺 𑀲𑀼𑀕𑀢𑀺𑀁 𑀧𑀸𑀧𑁂𑀢𑀺 𑀦𑀺𑀩𑁆𑀩𑀸𑀦𑀁 𑀯𑀸, 𑀅𑀥𑀫𑁆𑀫𑁄 𑀤𑀼𑀕𑁆𑀕𑀢𑀺𑀁. 𑀓𑀼𑀢𑁄 𑀥𑀫𑁆𑀫𑁄𑀢𑀺 𑀯𑀘𑀻𑀲𑀘𑁆𑀘𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀥𑀫𑁆𑀫𑁄. 𑀓𑀺𑀁 𑀲𑀼𑀢𑁂𑀦𑀸𑀢𑀺 𑀢𑁆𑀯𑀁 𑀏𑀢𑁂𑀦 𑀲𑀼𑀢𑁂𑀦 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀫𑀢𑁆𑀢𑀺𑀓𑀸𑀪𑀸𑀚𑀦𑀁 𑀯𑀺𑀬 𑀳𑀺 𑀲𑀻𑀳𑀯𑀲𑀸𑀬 𑀅𑀪𑀸𑀚𑀦𑀁 𑀢𑁆𑀯𑀁 𑀥𑀫𑁆𑀫𑀲𑁆𑀲.
𑀲𑁄 ¶ 𑀏𑀯𑀁 𑀓𑀣𑀺𑀢𑁂𑀧𑀺 𑀦𑁂𑀯 𑀓𑀼𑀚𑁆𑀛𑀺. 𑀓𑀲𑁆𑀫𑀸? 𑀫𑀳𑀸𑀲𑀢𑁆𑀢𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀳𑀢𑁆𑀢𑁂𑀦. 𑀅𑀣 𑀦𑀁 ‘‘𑀓𑀺𑀁 𑀧𑀦 𑀲𑀫𑁆𑀫 𑀲𑀼𑀢𑀲𑁄𑀫 𑀅𑀳𑀫𑁂𑀯 𑀅𑀥𑀫𑁆𑀫𑀺𑀓𑁄’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀬𑁄 𑀫𑀁𑀲𑀳𑁂𑀢𑀼 𑀫𑀺𑀕𑀯𑀁 𑀘𑀭𑁂𑀬𑁆𑀬, 𑀬𑁄 𑀯𑀸 𑀳𑀦𑁂 𑀧𑀼𑀭𑀺𑀲𑀫𑀢𑁆𑀢𑀳𑁂𑀢𑀼;
𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺, 𑀓𑀲𑁆𑀫𑀸 𑀦𑁄 𑀅𑀥𑀫𑁆𑀫𑀺𑀓𑀁 𑀩𑁆𑀭𑀽𑀲𑀺 𑀫𑀁 𑀢𑁆𑀯’’𑀦𑁆𑀢𑀺.
𑀢𑀢𑁆𑀣 𑀓𑀲𑁆𑀫𑀸 𑀦𑁄𑀢𑀺 𑀬𑁂 𑀚𑀫𑁆𑀩𑀼𑀤𑀻𑀧𑀢𑀮𑁂 𑀭𑀸𑀚𑀸𑀦𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀫𑀳𑀸𑀩𑀮𑀧𑀭𑀺𑀯𑀸𑀭𑀸 𑀭𑀣𑀯𑀭𑀕𑀢𑀸 𑀫𑀺𑀕𑀯𑀁 𑀘𑀭𑀦𑁆𑀢𑀸 𑀢𑀺𑀔𑀺𑀡𑁂𑀳𑀺 𑀲𑀭𑁂𑀳𑀺 𑀫𑀺𑀕𑁂 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀢𑁂 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀢𑁆𑀯𑀁 𑀫𑀜𑁆𑀜𑁂𑀯 𑀅𑀥𑀫𑁆𑀫𑀺𑀓𑀦𑁆𑀢𑀺 𑀯𑀤𑀢𑀺. 𑀬𑀤𑀺 𑀢𑁂 𑀦𑀺𑀤𑁆𑀤𑁄𑀲𑀸, 𑀅𑀳𑀫𑁆𑀧𑀺 𑀦𑀺𑀤𑁆𑀤𑁄𑀲𑁄 𑀏𑀯𑀸𑀢𑀺 𑀤𑀻𑀧𑁂𑀢𑀺.
𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀮𑀤𑁆𑀥𑀺𑀁 𑀪𑀺𑀦𑁆𑀤𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀧𑀜𑁆𑀘 ¶ 𑀧𑀜𑁆𑀘 𑀦 𑀔𑀸 𑀪𑀓𑁆𑀔𑀸, 𑀔𑀢𑁆𑀢𑀺𑀬𑁂𑀦 𑀧𑀚𑀸𑀦𑀢𑀸;
𑀅𑀪𑀓𑁆𑀔𑀁 𑀭𑀸𑀚 𑀪𑀓𑁆𑀔𑁂𑀲𑀺, 𑀢𑀲𑁆𑀫𑀸 𑀅𑀥𑀫𑁆𑀫𑀺𑀓𑁄 𑀢𑀼𑀯’’𑀦𑁆𑀢𑀺.
𑀢𑀲𑁆𑀲𑀢𑁆𑀣𑁄 𑁋 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀔𑀢𑁆𑀢𑀺𑀬𑁂𑀦 𑀦𑀸𑀫 𑀔𑀢𑁆𑀢𑀺𑀬𑀥𑀫𑁆𑀫𑀁 𑀚𑀸𑀦𑀦𑁆𑀢𑁂𑀦 𑀧𑀜𑁆𑀘 𑀧𑀜𑁆𑀘 𑀳𑀢𑁆𑀣𑀺𑀆𑀤𑀬𑁄 𑀤𑀲𑁂𑀯 𑀲𑀢𑁆𑀢𑀸 𑀫𑀁𑀲𑀯𑀲𑁂𑀦 𑀦 𑀔𑀸 𑀪𑀓𑁆𑀔𑀸 𑀦 𑀔𑁄 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀸. ‘‘𑀦 𑀔𑁄’’𑀢𑁆𑀯𑁂𑀯 𑀯𑀸 𑀧𑀸𑀞𑁄. 𑀅𑀧𑀭𑁄 𑀦𑀬𑁄 𑀔𑀢𑁆𑀢𑀺𑀬𑁂𑀦 𑀔𑀢𑁆𑀢𑀺𑀬𑀥𑀫𑁆𑀫𑀁 𑀚𑀸𑀦𑀦𑁆𑀢𑁂𑀦 𑀧𑀜𑁆𑀘𑀦𑀔𑁂𑀲𑀼 𑀲𑀢𑁆𑀢𑁂𑀲𑀼 𑀲𑀲𑀓𑁄, 𑀲𑀮𑁆𑀮𑀓𑁄, 𑀕𑁄𑀥𑀸, 𑀓𑀧𑀺 𑀓𑀼𑀫𑁆𑀫𑁄𑀢𑀺 ¶ 𑀇𑀫𑁂 𑀧𑀜𑁆𑀘𑁂𑀯 𑀲𑀢𑁆𑀢𑀸 𑀪𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑀸, 𑀦 𑀅𑀜𑁆𑀜𑁂, 𑀢𑁆𑀯𑀁 𑀧𑀦 𑀅𑀪𑀓𑁆𑀔𑀁 𑀫𑀦𑀼𑀲𑁆𑀲𑀫𑀁𑀲𑀁 𑀪𑀓𑁆𑀔𑁂𑀲𑀺, 𑀢𑁂𑀦 𑀅𑀥𑀫𑁆𑀫𑀺𑀓𑁄𑀢𑀺.
𑀇𑀢𑀺 𑀲𑁄 𑀦𑀺𑀕𑁆𑀕𑀳𑀁 𑀧𑀢𑁆𑀯𑀸 𑀅𑀜𑁆𑀜𑀁 𑀦𑀺𑀲𑁆𑀲𑀭𑀡𑀁 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀸𑀧𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀫𑀼𑀢𑁆𑀢𑁄 𑀢𑀼𑀯𑀁 𑀧𑁄𑀭𑀺𑀲𑀸𑀤𑀲𑁆𑀲 𑀳𑀢𑁆𑀣𑀸, 𑀕𑀦𑁆𑀢𑁆𑀯𑀸 𑀲𑀓𑀁 𑀫𑀦𑁆𑀤𑀺𑀭𑀁 𑀓𑀸𑀫𑀓𑀸𑀫𑀻;
𑀅𑀫𑀺𑀢𑁆𑀢𑀳𑀢𑁆𑀣𑀁 𑀧𑀼𑀦𑀭𑀸𑀕𑀢𑁄𑀲𑀺, 𑀦 𑀔𑀢𑁆𑀢𑀥𑀫𑁆𑀫𑁂 𑀓𑀼𑀲𑀮𑁄𑀲𑀺 𑀭𑀸𑀚𑀸’’𑀢𑀺.
𑀢𑀢𑁆𑀣 ¶ 𑀦 𑀔𑀢𑁆𑀢𑀥𑀫𑁆𑀫𑁂𑀢𑀺 𑀢𑁆𑀯𑀁 𑀔𑀢𑁆𑀢𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑁂 𑀦𑀻𑀢𑀺𑀲𑀢𑁆𑀣𑁂 𑀦 𑀓𑀼𑀲𑀮𑁄𑀲𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀦𑀢𑁆𑀣𑀁 𑀦 𑀚𑀸𑀦𑀸𑀲𑀺, 𑀅𑀓𑀸𑀭𑀡𑁂𑀦𑁂𑀯 𑀢𑁂 𑀮𑁄𑀓𑁂 𑀧𑀡𑁆𑀟𑀺𑀢𑁄𑀢𑀺 𑀓𑀺𑀢𑁆𑀢𑀺 𑀧𑀢𑁆𑀣𑀝𑀸, 𑀅𑀳𑀁 𑀧𑀦 𑀢𑁂 𑀧𑀡𑁆𑀟𑀺𑀢𑀪𑀸𑀯𑀁 𑀦 𑀧𑀲𑁆𑀲𑀸𑀫𑀺 𑀦 𑀚𑀸𑀦𑀸𑀫𑀺, 𑀅𑀢𑀺𑀩𑀸𑀮𑁄𑀲𑀻𑀳𑀺 𑀯𑀤𑀢𑀺.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄, ‘‘𑀲𑀫𑁆𑀫, 𑀔𑀢𑁆𑀢𑀺𑀬𑀥𑀫𑁆𑀫𑁂 𑀓𑀼𑀲𑀮𑁂𑀦 𑀦𑀸𑀫 𑀫𑀸𑀤𑀺𑀲𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀅𑀳𑀜𑁆𑀳𑀺 𑀢𑀁 𑀚𑀸𑀦𑀸𑀫𑀺, 𑀦 𑀧𑀦 𑀢𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀬𑁂 𑀔𑀢𑁆𑀢𑀥𑀫𑁆𑀫𑁂 𑀓𑀼𑀲𑀮𑀸 𑀪𑀯𑀦𑁆𑀢𑀺, 𑀧𑀸𑀬𑁂𑀦 𑀢𑁂 𑀦𑁂𑀭𑀬𑀺𑀓𑀸 𑀪𑀯𑀦𑁆𑀢𑀺;
𑀢𑀲𑁆𑀫𑀸 𑀅𑀳𑀁 𑀔𑀢𑁆𑀢𑀥𑀫𑁆𑀫𑀁 𑀧𑀳𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀕𑀢𑁄𑀲𑁆𑀫𑀺;
𑀬𑀚𑀲𑁆𑀲𑀼 𑀬𑀜𑁆𑀜𑀁 𑀔𑀸𑀤 𑀫𑀁 𑀧𑁄𑀭𑀺𑀲𑀸𑀤𑀸’’𑀢𑀺.
𑀢𑀢𑁆𑀣 𑀓𑀼𑀲𑀮𑀸𑀢𑀺 𑀢𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑀓𑀼𑀲𑀮𑀸. 𑀧𑀸𑀬𑁂𑀦𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀦𑁂𑀭𑀬𑀺𑀓𑀸. 𑀬𑁂 𑀧𑀦 𑀢𑀢𑁆𑀣 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑁂 𑀲𑁂𑀲𑀸𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.
𑀧𑁄𑀭𑀺𑀲𑀸𑀤𑁄 𑀆𑀳 𑁋
‘‘𑀧𑀸𑀲𑀸𑀤𑀯𑀸𑀲𑀸 ¶ 𑀧𑀣𑀯𑀻𑀕𑀯𑀸𑀲𑁆𑀲𑀸, 𑀓𑀸𑀫𑀺𑀢𑁆𑀣𑀺𑀬𑁄 𑀓𑀸𑀲𑀺𑀓𑀘𑀦𑁆𑀤𑀦𑀜𑁆𑀘;
𑀲𑀩𑁆𑀩𑀁 𑀢𑀳𑀺𑀁 𑀮𑀪𑀲𑀺 𑀲𑀸𑀫𑀺𑀢𑀸𑀬, 𑀲𑀘𑁆𑀘𑁂𑀦 𑀓𑀺𑀁 𑀧𑀲𑁆𑀲𑀲𑀺 𑀆𑀦𑀺𑀲𑀁𑀲’’𑀦𑁆𑀢𑀺.
𑀢𑀢𑁆𑀣 𑀧𑀸𑀲𑀸𑀤𑀯𑀸𑀲𑀸𑀢𑀺, 𑀲𑀫𑁆𑀫 𑀲𑀼𑀢𑀲𑁄𑀫, 𑀢𑀯 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀤𑀺𑀩𑁆𑀩𑀯𑀺𑀫𑀸𑀦𑀓𑀧𑁆𑀧𑀸 𑀢𑀬𑁄 𑀦𑀺𑀯𑀸𑀲𑀧𑀸𑀲𑀸𑀤𑀸. 𑀧𑀣𑀯𑀻𑀕𑀯𑀸𑀲𑁆𑀲𑀸𑀢𑀺 𑀧𑀣𑀯𑀻 𑀘 𑀕𑀸𑀯𑁄 𑀘 𑀅𑀲𑁆𑀲𑀸 𑀘 𑀩𑀳𑀽. 𑀓𑀸𑀫𑀺𑀢𑁆𑀣𑀺𑀬𑁄𑀢𑀺 𑀓𑀸𑀫𑀯𑀢𑁆𑀣𑀼𑀪𑀽𑀢𑀸 𑀇𑀢𑁆𑀣𑀺𑀬𑁄. 𑀓𑀸𑀲𑀺𑀓𑀘𑀦𑁆𑀤𑀦𑀜𑁆𑀘𑀸𑀢𑀺 ¶ 𑀓𑀸𑀲𑀺𑀓𑀯𑀢𑁆𑀣𑀜𑁆𑀘 𑀮𑁄𑀳𑀺𑀢𑀘𑀦𑁆𑀤𑀦𑀜𑁆𑀘. 𑀲𑀩𑁆𑀩𑀁 𑀢𑀳𑀺𑀦𑁆𑀢𑀺 𑀏𑀢𑀜𑁆𑀘 𑀅𑀜𑁆𑀜𑀜𑁆𑀘 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀲𑀩𑁆𑀩𑀁 𑀢𑁆𑀯𑀁 𑀢𑀳𑀺𑀁 𑀅𑀢𑁆𑀢𑀦𑁄 𑀦𑀕𑀭𑁂 𑀲𑀸𑀫𑀺𑀢𑀸𑀬 𑀮𑀪𑀲𑀺, 𑀲𑀸𑀫𑀻 𑀳𑀼𑀢𑁆𑀯𑀸 𑀬𑀣𑀸 𑀇𑀘𑁆𑀙𑀲𑀺, 𑀢𑀣𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺, 𑀲𑁄 𑀢𑁆𑀯𑀁 𑀲𑀩𑁆𑀩𑀫𑁂𑀢𑀁 𑀧𑀳𑀸𑀬 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀇𑀥𑀸𑀕𑀘𑁆𑀙𑀦𑁆𑀢𑁄 𑀲𑀘𑁆𑀘𑁂𑀦 𑀓𑀺𑀁 𑀆𑀦𑀺𑀲𑀁𑀲𑀁 𑀧𑀲𑁆𑀲𑀲𑀻𑀢𑀺.
𑀩𑁄𑀥𑀺𑀲𑀢𑁆𑀢𑁄 ¶ 𑀆𑀳 𑁋
‘‘𑀬𑁂 𑀓𑁂𑀘𑀺𑀫𑁂 𑀅𑀢𑁆𑀣𑀺 𑀭𑀲𑀸 𑀧𑀣𑀩𑁆𑀬𑀸, 𑀲𑀘𑁆𑀘𑀁 𑀢𑁂𑀲𑀁 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁;
𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀢𑀭𑀦𑁆𑀢𑀺 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭’’𑀦𑁆𑀢𑀺.
𑀢𑀢𑁆𑀣 𑀲𑀸𑀤𑀼𑀢𑀭𑀦𑁆𑀢𑀺 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀭𑀲𑀸 𑀲𑀢𑁆𑀢𑀸𑀦𑀁 𑀲𑀘𑁆𑀘𑀓𑀸𑀮𑁂𑀬𑁂𑀯 𑀧𑀡𑀻𑀢𑀸 𑀫𑀥𑀼𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀘𑁆𑀘𑀁 𑀢𑁂𑀲𑀁 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁, 𑀬𑀲𑁆𑀫𑀸 𑀯𑀸 𑀯𑀺𑀭𑀢𑀺𑀲𑀘𑁆𑀘𑀯𑀘𑀻𑀲𑀘𑁆𑀘𑁂 𑀞𑀺𑀢𑀸 𑀚𑀸𑀢𑀺𑀫𑀭𑀡𑀲𑀗𑁆𑀔𑀸𑀢𑀲𑁆𑀲 𑀢𑁂𑀪𑀽𑀫𑀓𑀯𑀝𑁆𑀝𑀲𑁆𑀲 𑀧𑀸𑀭𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀢𑀭𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸𑀧𑀺 𑀢𑀁 𑀲𑀸𑀤𑀼𑀢𑀭𑀦𑁆𑀢𑀺.
𑀏𑀯𑀫𑀲𑁆𑀲 𑀫𑀳𑀸𑀲𑀢𑁆𑀢𑁄 𑀲𑀘𑁆𑀘𑁂 𑀆𑀦𑀺𑀲𑀁𑀲𑀁 𑀓𑀣𑁂𑀲𑀺. 𑀢𑀢𑁄 𑀧𑁄𑀭𑀺𑀲𑀸𑀤𑁄 𑀯𑀺𑀓𑀲𑀺𑀢𑀧𑀤𑀼𑀫𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀫𑁂𑀯𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀲𑀼𑀢𑀲𑁄𑀫𑁄 𑀅𑀗𑁆𑀕𑀸𑀭𑀘𑀺𑀢𑀓𑀁 𑀫𑀜𑁆𑀘 𑀲𑀽𑀮𑀁 𑀢𑀘𑁆𑀙𑀦𑁆𑀢𑀁 𑀧𑀲𑁆𑀲𑀢𑀺, 𑀘𑀺𑀢𑁆𑀢𑀼𑀢𑁆𑀭𑀸𑀲𑀫𑀢𑁆𑀢𑀫𑁆𑀧𑀺𑀲𑁆𑀲 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀏𑀲 𑀲𑀢𑀸𑀭𑀳𑀕𑀸𑀣𑀸𑀦𑀁 𑀆𑀦𑀼𑀪𑀸𑀯𑁄, 𑀉𑀤𑀸𑀳𑀼 𑀲𑀘𑁆𑀘𑀲𑁆𑀲, 𑀅𑀜𑁆𑀜𑀲𑁆𑀲𑁂𑀯 𑀯𑀸 𑀓𑀲𑁆𑀲𑀘𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀫𑀼𑀢𑁆𑀢𑁄 𑀢𑀼𑀯𑀁 𑀧𑁄𑀭𑀺𑀲𑀸𑀤𑀲𑁆𑀲 𑀳𑀢𑁆𑀣𑀸, 𑀕𑀦𑁆𑀢𑁆𑀯𑀸 𑀲𑀓𑀁 𑀫𑀦𑁆𑀤𑀺𑀭𑀁 𑀓𑀸𑀫𑀓𑀸𑀫𑀻;
𑀅𑀫𑀺𑀢𑁆𑀢𑀳𑀢𑁆𑀣𑀁 𑀧𑀼𑀦𑀭𑀸𑀕𑀢𑁄𑀲𑀺, 𑀦 𑀳𑀺 𑀦𑀽𑀦 𑀢𑁂 𑀫𑀭𑀡𑀪𑀬𑀁 𑀚𑀦𑀺𑀦𑁆𑀤;
𑀅𑀮𑀻𑀦𑀘𑀺𑀢𑁆𑀢𑁄 𑀅𑀲𑀺 𑀲𑀘𑁆𑀘𑀯𑀸𑀤𑀻’’𑀢𑀺.
𑀫𑀳𑀸𑀲𑀢𑁆𑀢𑁄𑀧𑀺𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋
‘‘𑀓𑀢𑀸 ¶ 𑀫𑁂 𑀓𑀮𑁆𑀬𑀸𑀡𑀸 𑀅𑀦𑁂𑀓𑀭𑀽𑀧𑀸, 𑀬𑀜𑁆𑀜𑀸 𑀬𑀺𑀝𑁆𑀞𑀸 𑀬𑁂 𑀯𑀺𑀧𑀼𑀮𑀸 𑀧𑀲𑀢𑁆𑀣𑀸;
𑀯𑀺𑀲𑁄𑀥𑀺𑀢𑁄 𑀧𑀭𑀮𑁄𑀓𑀲𑁆𑀲 𑀫𑀕𑁆𑀕𑁄, 𑀥𑀫𑁆𑀫𑁂 𑀞𑀺𑀢𑁄 𑀓𑁄 𑀫𑀭𑀡𑀲𑁆𑀲 𑀪𑀸𑀬𑁂.
‘‘𑀓𑀢𑀸 ¶ 𑀫𑁂 𑀓𑀮𑁆𑀬𑀸𑀡𑀸 𑀅𑀦𑁂𑀓𑀭𑀽𑀧𑀸, 𑀬𑀜𑁆𑀜𑀸 𑀬𑀺𑀝𑁆𑀞𑀸 𑀬𑁂 𑀯𑀺𑀧𑀼𑀮𑀸 𑀧𑀲𑀢𑁆𑀣𑀸;
𑀅𑀦𑀸𑀦𑀼𑀢𑀧𑁆𑀧𑀁 ¶ 𑀧𑀭𑀮𑁄𑀓𑀁 𑀕𑀫𑀺𑀲𑁆𑀲𑀁, 𑀬𑀚𑀲𑁆𑀲𑀼 𑀬𑀜𑁆𑀜𑀁 𑀅𑀤 𑀫𑀁 𑀧𑁄𑀭𑀺𑀲𑀸𑀤.
‘‘𑀧𑀺𑀢𑀸 𑀘 𑀫𑀸𑀢𑀸 𑀘 𑀉𑀧𑀝𑁆𑀞𑀺𑀢𑀸 𑀫𑁂, 𑀥𑀫𑁆𑀫𑁂𑀦 𑀫𑁂 𑀇𑀲𑁆𑀲𑀭𑀺𑀬𑀁 𑀧𑀲𑀢𑁆𑀣𑀁;
𑀯𑀺𑀲𑁄𑀥𑀺𑀢𑁄 𑀧𑀭𑀮𑁄𑀓𑀲𑁆𑀲 𑀫𑀕𑁆𑀕𑁄, 𑀥𑀫𑁆𑀫𑁂 𑀞𑀺𑀢𑁄 𑀓𑁄 𑀫𑀭𑀡𑀲𑁆𑀲 𑀪𑀸𑀬𑁂.
‘‘𑀧𑀺𑀢𑀸 𑀘 𑀫𑀸𑀢𑀸 𑀘 𑀉𑀧𑀝𑁆𑀞𑀺𑀢𑀸 𑀫𑁂, 𑀥𑀫𑁆𑀫𑁂𑀦 𑀫𑁂 𑀇𑀲𑁆𑀲𑀭𑀺𑀬𑀁 𑀧𑀲𑀢𑁆𑀣𑀁;
𑀅𑀦𑀸𑀦𑀼𑀢𑀧𑁆𑀧𑀁 𑀧𑀭𑀮𑁄𑀓𑀁 𑀕𑀫𑀺𑀲𑁆𑀲𑀁, 𑀬𑀚𑀲𑁆𑀲𑀼 𑀬𑀜𑁆𑀜𑀁 𑀅𑀤 𑀫𑀁 𑀧𑁄𑀭𑀺𑀲𑀸𑀤.
‘‘𑀜𑀸𑀢𑀻𑀲𑀼 𑀫𑀺𑀢𑁆𑀢𑁂𑀲𑀼 𑀓𑀢𑀸 𑀫𑁂 𑀓𑀸𑀭𑀸, 𑀥𑀫𑁆𑀫𑁂𑀦 𑀫𑁂 𑀇𑀲𑁆𑀲𑀭𑀺𑀬𑀁 𑀧𑀲𑀢𑁆𑀣𑀁;
𑀯𑀺𑀲𑁄𑀥𑀺𑀢𑁄 𑀧𑀭𑀮𑁄𑀓𑀲𑁆𑀲 𑀫𑀕𑁆𑀕𑁄, 𑀥𑀫𑁆𑀫𑁂 𑀞𑀺𑀢𑁄 𑀓𑁄 𑀫𑀭𑀡𑀲𑁆𑀲 𑀪𑀸𑀬𑁂.
‘‘𑀜𑀸𑀢𑀻𑀲𑀼 𑀫𑀺𑀢𑁆𑀢𑁂𑀲𑀼 𑀓𑀢𑀸 𑀫𑁂 𑀓𑀸𑀭𑀸, 𑀥𑀫𑁆𑀫𑁂𑀦 𑀫𑁂 𑀇𑀲𑁆𑀲𑀭𑀺𑀬𑀁 𑀧𑀲𑀢𑁆𑀣𑀁;
𑀅𑀦𑀸𑀦𑀼𑀢𑀧𑁆𑀧𑀁 𑀧𑀭𑀮𑁄𑀓𑀁 𑀕𑀫𑀺𑀲𑁆𑀲𑀁, 𑀬𑀚𑀲𑁆𑀲𑀼 𑀬𑀜𑁆𑀜𑀁 𑀅𑀤 𑀫𑀁 𑀧𑁄𑀭𑀺𑀲𑀸𑀤.
‘‘𑀤𑀺𑀦𑁆𑀦𑀁 𑀫𑁂 𑀤𑀸𑀦𑀁 𑀩𑀳𑀼𑀥𑀸 𑀩𑀳𑀽𑀦𑀁, 𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;
𑀯𑀺𑀲𑁄𑀥𑀺𑀢𑁄 𑀧𑀭𑀮𑁄𑀓𑀲𑁆𑀲 𑀫𑀕𑁆𑀕𑁄, 𑀥𑀫𑁆𑀫𑁂 𑀞𑀺𑀢𑁄 𑀓𑁄 𑀫𑀭𑀡𑀲𑁆𑀲 𑀪𑀸𑀬𑁂.
‘‘𑀤𑀺𑀦𑁆𑀦𑀁 𑀫𑁂 𑀤𑀸𑀦𑀁 𑀩𑀳𑀼𑀥𑀸 𑀩𑀳𑀽𑀦𑀁, 𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;
𑀅𑀦𑀸𑀦𑀼𑀢𑀧𑁆𑀧𑀁 𑀧𑀭𑀮𑁄𑀓𑀁 𑀕𑀫𑀺𑀲𑁆𑀲𑀁, 𑀬𑀚𑀲𑁆𑀲𑀼 𑀬𑀜𑁆𑀜𑀁 𑀅𑀤 𑀫𑀁 𑀧𑁄𑀭𑀺𑀲𑀸𑀤𑀸’’𑀢𑀺.
𑀢𑀢𑁆𑀣 ¶ 𑀓𑀮𑁆𑀬𑀸𑀡𑀸𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀸. 𑀅𑀦𑁂𑀓𑀭𑀽𑀧𑀸𑀢𑀺 𑀤𑀸𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀸. 𑀬𑀜𑁆𑀜𑀸𑀢𑀺 𑀤𑀲𑀯𑀺𑀥𑀤𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀅𑀢𑀺𑀯𑀺𑀧𑀼𑀮𑀸 𑀧𑀡𑁆𑀟𑀺𑀢𑁂𑀳𑀺 𑀧𑀲𑀢𑁆𑀣𑀸 𑀬𑀜𑁆𑀜𑀸𑀧𑀺 𑀬𑀺𑀝𑁆𑀞𑀸 𑀧𑀯𑀢𑁆𑀢𑀺𑀢𑀸. 𑀥𑀫𑁆𑀫𑁂 𑀞𑀺𑀢𑁄𑀢𑀺 𑀏𑀯𑀁 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄 𑀫𑀸𑀤𑀺𑀲𑁄 𑀓𑁄 𑀦𑀸𑀫 𑀫𑀭𑀡𑀲𑁆𑀲 𑀪𑀸𑀬𑁂𑀬𑁆𑀬. 𑀅𑀦𑀸𑀦𑀼𑀢𑀧𑁆𑀧𑀦𑁆𑀢𑀺 𑀅𑀦𑀸𑀦𑀼𑀢𑀧𑁆𑀧𑀫𑀸𑀦𑁄. 𑀥𑀫𑁆𑀫𑁂𑀦 𑀫𑁂 𑀇𑀲𑁆𑀲𑀭𑀺𑀬𑀁 𑀧𑀲𑀢𑁆𑀣𑀦𑁆𑀢𑀺 𑀤𑀲𑀯𑀺𑀥𑀁 𑀭𑀸𑀚𑀥𑀫𑁆𑀫𑀁 𑀅𑀓𑁄𑀧𑁂𑀢𑁆𑀯𑀸 𑀥𑀫𑁆𑀫𑁂𑀦𑁂𑀯 𑀫𑀬𑀸 𑀭𑀚𑁆𑀚𑀁 𑀧𑀲𑀸𑀲𑀺𑀢𑀁. 𑀓𑀸𑀭𑀸𑀢𑀺 𑀜𑀸𑀢𑀻𑀲𑀼 𑀜𑀸𑀢𑀺𑀓𑀺𑀘𑁆𑀘𑀸𑀦𑀺, 𑀫𑀺𑀢𑁆𑀢𑁂𑀲𑀼 𑀘 𑀫𑀺𑀢𑁆𑀢𑀓𑀺𑀘𑁆𑀘𑀸𑀦𑀺. 𑀤𑀸𑀦𑀦𑁆𑀢𑀺 𑀲𑀯𑀢𑁆𑀣𑀼𑀓𑀘𑁂𑀢𑀦𑀸. 𑀩𑀳𑀼𑀥𑀸𑀢𑀺 𑀩𑀳𑀽𑀳𑀺 𑀆𑀓𑀸𑀭𑁂𑀳𑀺. 𑀩𑀳𑀽𑀦𑀦𑁆𑀢𑀺 𑀦 𑀧𑀜𑁆𑀘𑀦𑁆𑀦𑀁, 𑀦 𑀤𑀲𑀦𑁆𑀦𑀁, 𑀲𑀢𑀲𑁆𑀲𑀧𑀺 𑀲𑀳𑀲𑁆𑀲𑀲𑁆𑀲𑀧𑀺 ¶ 𑀲𑀢𑀲𑀳𑀲𑁆𑀲𑀲𑁆𑀲𑀧𑀺 𑀤𑀺𑀦𑁆𑀦𑀫𑁂𑀯. 𑀲𑀦𑁆𑀢𑀧𑁆𑀧𑀺𑀢𑀸𑀢𑀺 𑀕𑀳𑀺𑀢𑀕𑀳𑀺𑀢𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀼𑀝𑁆𑀞𑀼 𑀢𑀧𑁆𑀧𑀺𑀢𑀸.
𑀢𑀁 ¶ 𑀲𑀼𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 ‘‘𑀅𑀬𑀁 𑀲𑀼𑀢𑀲𑁄𑀫𑀫𑀳𑀸𑀭𑀸𑀚𑀸 𑀲𑀧𑁆𑀧𑀼𑀭𑀺𑀲𑁄 𑀜𑀸𑀡𑀲𑀫𑁆𑀧𑀦𑁆𑀦𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄, 𑀲𑀘𑀸𑀳𑀁 𑀏𑀢𑀁 𑀔𑀸𑀤𑁂𑀬𑁆𑀬𑀁, 𑀫𑀼𑀤𑁆𑀥𑀸 𑀫𑁂 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬, 𑀧𑀣𑀯𑀻 𑀯𑀸 𑀧𑀦 𑀫𑁂 𑀯𑀺𑀯𑀭𑀁 𑀤𑀤𑁂𑀬𑁆𑀬𑀸’’𑀢𑀺 𑀪𑀻𑀢𑀢𑀲𑀺𑀢𑁄 𑀳𑀼𑀢𑁆𑀯𑀸, ‘‘𑀲𑀫𑁆𑀫, 𑀦 𑀢𑁆𑀯𑀁 𑀫𑀬𑀸 𑀔𑀸𑀤𑀺𑀢𑀩𑁆𑀩𑀭𑀽𑀧𑁄’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀯𑀺𑀲𑀁 𑀧𑀚𑀸𑀦𑀁 𑀧𑀼𑀭𑀺𑀲𑁄 𑀅𑀤𑁂𑀬𑁆𑀬, 𑀆𑀲𑀻𑀯𑀺𑀲𑀁 𑀚𑀮𑀺𑀢𑀫𑀼𑀕𑁆𑀕𑀢𑁂𑀚𑀁;
𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀨𑀮𑁂𑀬𑁆𑀬 𑀲𑀢𑁆𑀢𑀥𑀸, 𑀬𑁄 𑀢𑀸𑀤𑀺𑀲𑀁 𑀲𑀘𑁆𑀘𑀯𑀸𑀤𑀺𑀁 𑀅𑀤𑁂𑀬𑁆𑀬𑀸’’𑀢𑀺.
𑀢𑀢𑁆𑀣 𑀯𑀺𑀲𑀦𑁆𑀢𑀺 𑀢𑀢𑁆𑀣𑁂𑀯 𑀫𑀸𑀭𑀡𑀲𑀫𑀢𑁆𑀣𑀁 𑀳𑀮𑀸𑀳𑀮𑀯𑀺𑀲𑀁. 𑀚𑀮𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀲𑀢𑁂𑀚𑁂𑀦 𑀚𑀮𑀺𑀢𑀁 𑀢𑁂𑀦𑁂𑀯 𑀉𑀕𑁆𑀕𑀢𑁂𑀚𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘𑀭𑀦𑁆𑀢𑀁 𑀆𑀲𑀻𑀯𑀺𑀲𑀁 𑀯𑀸 𑀧𑀦 𑀲𑁄 𑀕𑀻𑀯𑀸𑀬 𑀕𑀡𑁆𑀳𑁂𑀬𑁆𑀬.
𑀇𑀢𑀺 𑀲𑁄 𑀫𑀳𑀸𑀲𑀢𑁆𑀢𑀁 ‘‘𑀳𑀮𑀸𑀳𑀮𑀯𑀺𑀲𑀲𑀤𑀺𑀲𑁄 𑀢𑁆𑀯𑀁, 𑀓𑁄 𑀢𑀁 𑀔𑀸𑀤𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸 𑀲𑁄𑀢𑀼𑀓𑀸𑀫𑁄 𑀢𑀁 𑀬𑀸𑀘𑀺𑀢𑁆𑀯𑀸 𑀢𑁂𑀦 𑀥𑀫𑁆𑀫𑀕𑀸𑀭𑀯𑀚𑀦𑀦𑀢𑁆𑀣𑀁 ‘‘𑀏𑀯𑀭𑀽𑀧𑀸𑀦𑀁 𑀅𑀦𑀯𑀚𑁆𑀚𑀕𑀸𑀣𑀸𑀦𑀁 𑀢𑁆𑀯𑀁 𑀅𑀪𑀸𑀚𑀦’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁄𑀧𑀺 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀇𑀫𑀺𑀦𑀸 𑀲𑀤𑀺𑀲𑁄 𑀧𑀡𑁆𑀟𑀺𑀢𑁄 𑀦𑀢𑁆𑀣𑀺, 𑀅𑀬𑀁 𑀫𑀫 𑀳𑀢𑁆𑀣𑀸 𑀫𑀼𑀘𑁆𑀘𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀦𑀮𑀸𑀝𑁂𑀦 𑀫𑀘𑁆𑀘𑀼𑀁 𑀆𑀤𑀸𑀬 𑀧𑀼𑀦𑀸𑀕𑀢𑁄, 𑀅𑀢𑀺𑀯𑀺𑀬 𑀲𑀸𑀥𑀼𑀭𑀽𑀧𑀸 𑀕𑀸𑀣𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀼𑀝𑁆𑀞𑀼𑀢𑀭𑀁 𑀲𑀜𑁆𑀚𑀸𑀢𑀥𑀫𑁆𑀫𑀲𑁆𑀲𑀯𑀦𑀸𑀤𑀭𑁄 𑀳𑀼𑀢𑁆𑀯𑀸 𑀢𑀁 𑀬𑀸𑀘𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀲𑀼𑀢𑁆𑀯𑀸 ¶ 𑀥𑀫𑁆𑀫𑀁 𑀯𑀺𑀚𑀸𑀦𑀦𑁆𑀢𑀺, 𑀦𑀭𑀸 𑀓𑀮𑁆𑀬𑀸𑀡𑀧𑀸𑀧𑀓𑀁;
𑀅𑀧𑀺 𑀕𑀸𑀣𑀸 𑀲𑀼𑀡𑀺𑀢𑁆𑀯𑀸𑀦, 𑀥𑀫𑁆𑀫𑁂 𑀫𑁂 𑀭𑀫𑀢𑁂 𑀫𑀦𑁄’’𑀢𑀺.
𑀢𑀲𑁆𑀲𑀢𑁆𑀣𑁄 𑁋 ‘‘𑀲𑀫𑁆𑀫 𑀲𑀼𑀢𑀲𑁄𑀫, 𑀦𑀭𑀸 𑀦𑀸𑀫 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀓𑀮𑁆𑀬𑀸𑀡𑀫𑁆𑀧𑀺 𑀧𑀸𑀧𑀓𑀫𑁆𑀧𑀺 𑀚𑀸𑀦𑀦𑁆𑀢𑀺, 𑀅𑀧𑁆𑀧𑁂𑀯 𑀦𑀸𑀫 𑀢𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀫𑀫𑀧𑀺 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀫𑀦𑁄 𑀭𑀫𑁂𑀬𑁆𑀬𑀸’’𑀢𑀺.
𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀲𑁄𑀢𑀼𑀓𑀸𑀫𑁄 𑀤𑀸𑀦𑀺 𑀧𑁄𑀭𑀺𑀲𑀸𑀤𑁄, 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀺, 𑀲𑀫𑁆𑀫, 𑀲𑀸𑀥𑀼𑀓𑀁 𑀲𑀼𑀡𑀸𑀳𑀻’’𑀢𑀺 𑀢𑀁 𑀑𑀳𑀺𑀢𑀲𑁄𑀢𑀁 𑀓𑀢𑁆𑀯𑀸 𑀦𑀦𑁆𑀤𑀩𑁆𑀭𑀸𑀳𑁆𑀫𑀡𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀕𑀸𑀣𑀸𑀦𑀁 𑀣𑀼𑀢𑀺𑀁 𑀓𑀢𑁆𑀯𑀸 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀏𑀓𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 ¶ 𑀤𑁂𑀯𑀢𑀸𑀲𑀼 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸𑀲𑀼 𑀧𑁄𑀭𑀺𑀲𑀸𑀤𑀲𑁆𑀲 𑀥𑀫𑁆𑀫𑀁 𑀓𑀣𑁂𑀲𑀺 𑁋
‘‘𑀲𑀓𑀺𑀤𑁂𑀯 ¶ 𑀫𑀳𑀸𑀭𑀸𑀚, 𑀲𑀩𑁆𑀪𑀺 𑀳𑁄𑀢𑀺 𑀲𑀫𑀸𑀕𑀫𑁄;
𑀲𑀸 𑀦𑀁 𑀲𑀗𑁆𑀕𑀢𑀺 𑀧𑀸𑀮𑁂𑀢𑀺, 𑀦𑀸𑀲𑀩𑁆𑀪𑀺 𑀩𑀳𑀼 𑀲𑀗𑁆𑀕𑀫𑁄.
‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;
𑀲𑀢𑀁 𑀲𑀦𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.
‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸, 𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;
𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺, 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺.
‘‘𑀦𑀪𑀜𑁆𑀘 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;
𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀲𑀢𑀜𑁆𑀘 𑀥𑀫𑁆𑀫𑁄 𑀅𑀲𑀢𑀜𑁆𑀘 𑀭𑀸𑀚𑀸’’𑀢𑀺.
𑀢𑀲𑁆𑀲 𑀢𑁂𑀦 𑀲𑀼𑀓𑀣𑀺𑀢𑀢𑁆𑀢𑀸 𑀘𑁂𑀯 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑁂𑀦 𑀘 𑀢𑀸 𑀕𑀸𑀣𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀓𑀣𑀺𑀢𑀸 𑀯𑀺𑀬𑀸𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀧𑀭𑀺𑀧𑀽𑀭𑀺, 𑀩𑁄𑀥𑀺𑀲𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑀁 𑀅𑀳𑁄𑀲𑀺, 𑀲𑁂𑀢𑀘𑁆𑀙𑀢𑁆𑀢𑀤𑀸𑀬𑀓𑀁 𑀧𑀺𑀢𑀭𑀁 𑀯𑀺𑀬 𑀦𑀁 𑀅𑀫𑀜𑁆𑀜𑀺. 𑀲𑁄 ‘‘𑀅𑀳𑀁 𑀲𑀼𑀢𑀲𑁄𑀫𑀲𑁆𑀲 𑀤𑀸𑀢𑀩𑁆𑀩𑀁 𑀓𑀺𑀜𑁆𑀘𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀦 𑀧𑀲𑁆𑀲𑀸𑀫𑀺, 𑀏𑀓𑁂𑀓𑀸𑀬 𑀧𑀦𑀲𑁆𑀲 𑀕𑀸𑀣𑀸𑀬 𑀏𑀓𑁂𑀓𑀁 𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀕𑀸𑀣𑀸 ¶ 𑀇𑀫𑀸 𑀅𑀢𑁆𑀣𑀯𑀢𑀻 𑀲𑀼𑀩𑁆𑀬𑀜𑁆𑀚𑀦𑀸, 𑀲𑀼𑀪𑀸𑀲𑀺𑀢𑀸 𑀢𑀼𑀬𑁆𑀳 𑀚𑀦𑀺𑀦𑁆𑀤 𑀲𑀼𑀢𑁆𑀯𑀸;
𑀆𑀦𑀦𑁆𑀤𑀺 𑀯𑀺𑀢𑁆𑀢𑁄 𑀲𑀼𑀫𑀦𑁄 𑀧𑀢𑀻𑀢𑁄, 𑀘𑀢𑁆𑀢𑀸𑀭𑀺 𑀢𑁂 𑀲𑀫𑁆𑀫 𑀯𑀭𑁂 𑀤𑀤𑀸𑀫𑀻’’𑀢𑀺.
𑀢𑀢𑁆𑀣 𑀆𑀦𑀦𑁆𑀤𑀻𑀢𑀺 𑀆𑀦𑀦𑁆𑀤𑀚𑀸𑀢𑁄. 𑀲𑁂𑀲𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀘𑀢𑁆𑀢𑀸𑀭𑁄𑀧𑀺 𑀳𑁂𑀢𑁂 𑀢𑀼𑀝𑁆𑀞𑀸𑀓𑀸𑀭𑀸 𑀏𑀯.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀓𑀺𑀁 𑀦𑀸𑀫 𑀢𑁆𑀯𑀁 𑀯𑀭𑀁 𑀤𑀲𑁆𑀲𑀲𑀻’’𑀢𑀺 𑀅𑀧𑀲𑀸𑀤𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀬𑁄 ¶ 𑀦𑀢𑁆𑀢𑀦𑁄 𑀫𑀭𑀡𑀁 𑀩𑀼𑀚𑁆𑀛𑀲𑀺 𑀢𑀼𑀯𑀁, 𑀳𑀺𑀢𑀸𑀳𑀺𑀢𑀁 𑀯𑀺𑀦𑀺𑀧𑀸𑀢𑀜𑁆𑀘 𑀲𑀕𑁆𑀕𑀁;
𑀕𑀺𑀤𑁆𑀥𑁄 𑀭𑀲𑁂 𑀤𑀼𑀘𑁆𑀘𑀭𑀺𑀢𑁂 𑀦𑀺𑀯𑀺𑀝𑁆𑀞𑁄, 𑀓𑀺𑀁 𑀢𑁆𑀯𑀁 𑀯𑀭𑀁 𑀤𑀲𑁆𑀲𑀲𑀺 𑀧𑀸𑀧𑀥𑀫𑁆𑀫.
‘‘𑀅𑀳𑀜𑁆𑀘 𑀢𑀁 ‘𑀤𑁂𑀳𑀺 𑀯𑀭’𑀦𑁆𑀢𑀺 𑀯𑀚𑁆𑀚𑀁, 𑀢𑁆𑀯𑀁 𑀘𑀸𑀧𑀺 𑀤𑀢𑁆𑀯𑀸 𑀦 𑀅𑀯𑀸𑀓𑀭𑁂𑀬𑁆𑀬;
𑀲𑀦𑁆𑀤𑀺𑀝𑁆𑀞𑀺𑀓𑀁 𑀓𑀮𑀳𑀫𑀺𑀫𑀁 𑀯𑀺𑀯𑀸𑀤𑀁, 𑀓𑁄 𑀧𑀡𑁆𑀟𑀺𑀢𑁄 𑀚𑀸𑀦𑀫𑀼𑀧𑀩𑁆𑀩𑀚𑁂𑀬𑁆𑀬𑀸’’𑀢𑀺.
𑀢𑀢𑁆𑀣 ¶ 𑀬𑁄𑀢𑀺 𑀬𑁄 𑀢𑁆𑀯𑀁 ‘‘𑀫𑀭𑀡𑀥𑀫𑁆𑀫𑁄𑀳𑀫𑀲𑁆𑀫𑀻’’𑀢𑀺 𑀅𑀢𑁆𑀢𑀦𑁄𑀧𑀺 𑀫𑀭𑀡𑀁 𑀦 𑀩𑀼𑀚𑁆𑀛𑀲𑀺 𑀦 𑀚𑀸𑀦𑀸𑀲𑀺, 𑀧𑀸𑀧𑀓𑀫𑁆𑀫𑀫𑁂𑀯 𑀓𑀭𑁄𑀲𑀺. 𑀳𑀺𑀢𑀸𑀳𑀺𑀢𑀦𑁆𑀢𑀺 ‘‘𑀇𑀤𑀁 𑀫𑁂 𑀓𑀫𑁆𑀫𑀁 𑀳𑀺𑀢𑀁, 𑀇𑀤𑀁 𑀅𑀳𑀺𑀢𑀁, 𑀇𑀤𑀁 𑀯𑀺𑀦𑀺𑀧𑀸𑀢𑀁 𑀦𑁂𑀲𑁆𑀲𑀢𑀺, 𑀇𑀤𑀁 𑀲𑀕𑁆𑀕’’𑀦𑁆𑀢𑀺 𑀦 𑀚𑀸𑀦𑀸𑀲𑀺. 𑀭𑀲𑁂𑀢𑀺 𑀫𑀦𑀼𑀲𑁆𑀲𑀫𑀁𑀲𑀭𑀲𑁂. 𑀯𑀚𑁆𑀚𑀦𑁆𑀢𑀺 𑀯𑀤𑁂𑀬𑁆𑀬𑀁. 𑀦 𑀅𑀯𑀸𑀓𑀭𑁂𑀬𑁆𑀬𑀸𑀢𑀺 𑀯𑀸𑀘𑀸𑀬 𑀤𑀢𑁆𑀯𑀸 ‘‘𑀤𑁂𑀳𑀺 𑀫𑁂 𑀯𑀭’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦 𑀅𑀯𑀸𑀓𑀭𑁂𑀬𑁆𑀬𑀸𑀲𑀺 𑀦 𑀤𑀤𑁂𑀬𑁆𑀬𑀸𑀲𑀺. 𑀉𑀧𑀩𑁆𑀩𑀚𑁂𑀬𑁆𑀬𑀸𑀢𑀺 𑀓𑁄 𑀇𑀫𑀁 𑀓𑀮𑀳𑀁 𑀧𑀡𑁆𑀟𑀺𑀢𑁄 𑀉𑀧𑀕𑀘𑁆𑀙𑁂𑀬𑁆𑀬.
𑀢𑀢𑁄 𑀧𑁄𑀭𑀺𑀲𑀸𑀤𑁄 ‘‘𑀦𑀸𑀬𑀁 𑀫𑀬𑁆𑀳𑀁 𑀲𑀤𑁆𑀤𑀳𑀢𑀺, 𑀲𑀤𑁆𑀤𑀳𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀕𑀸𑀣𑀫𑀸𑀳 𑁋
‘‘𑀦 𑀢𑀁 𑀯𑀭𑀁 𑀅𑀭𑀳𑀢𑀺 𑀚𑀦𑁆𑀢𑀼 𑀤𑀸𑀢𑀼𑀁, 𑀬𑀁 𑀯𑀸𑀧𑀺 𑀤𑀢𑁆𑀯𑀸 𑀦 𑀅𑀯𑀸𑀓𑀭𑁂𑀬𑁆𑀬;
𑀯𑀭𑀲𑁆𑀲𑀼 𑀲𑀫𑁆𑀫 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀧𑀸𑀡𑀁 𑀘𑀚𑀺𑀢𑁆𑀯𑀸𑀦𑀧𑀺 𑀤𑀲𑁆𑀲𑀫𑁂𑀯𑀸’’𑀢𑀺.
𑀢𑀢𑁆𑀣 𑀅𑀯𑀺𑀓𑀫𑁆𑀧𑀫𑀸𑀦𑁄𑀢𑀺 𑀅𑀦𑁄𑀮𑀻𑀬𑀫𑀸𑀦𑁄.
𑀅𑀣 ¶ 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀅𑀢𑀺𑀯𑀺𑀬 𑀲𑀽𑀭𑁄 𑀳𑀼𑀢𑁆𑀯𑀸 𑀓𑀣𑁂𑀢𑀺, 𑀓𑀭𑀺𑀲𑁆𑀲𑀢𑀺 𑀫𑁂 𑀯𑀘𑀦𑀁, 𑀯𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀧𑀦 ‘‘𑀫𑀦𑀼𑀲𑁆𑀲𑀫𑀁𑀲𑀁 𑀦 𑀔𑀸𑀤𑀺𑀢𑀩𑁆𑀩’𑀦𑁆𑀢𑀺 𑀧𑀞𑀫𑀫𑁂𑀯 𑀯𑀭𑀁 𑀯𑀸𑀭𑀬𑀺𑀲𑁆𑀲𑀁, 𑀅𑀢𑀺𑀯𑀺𑀬 𑀓𑀺𑀮𑀫𑀺𑀲𑁆𑀲𑀢𑀺, 𑀧𑀞𑀫𑀁 𑀅𑀜𑁆𑀜𑁂 𑀢𑀬𑁄 𑀯𑀭𑁂 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀏𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋
‘‘𑀅𑀭𑀺𑀬𑀲𑁆𑀲 𑀅𑀭𑀺𑀬𑁂𑀦 𑀲𑀫𑁂𑀢𑀺 𑀲𑀔𑁆𑀬𑀁, 𑀧𑀜𑁆𑀜𑀲𑁆𑀲 𑀧𑀜𑁆𑀜𑀸𑀡𑀯𑀢𑀸 𑀲𑀫𑁂𑀢𑀺;
𑀧𑀲𑁆𑀲𑁂𑀬𑁆𑀬 𑀢𑀁 𑀯𑀲𑁆𑀲𑀲𑀢𑀁 𑀅𑀭𑁄𑀕𑀁, 𑀏𑀢𑀁 𑀯𑀭𑀸𑀦𑀁 𑀧𑀞𑀫𑀁 𑀯𑀭𑀸𑀫𑀻’’𑀢𑀺.
𑀢𑀢𑁆𑀣 ¶ 𑀅𑀭𑀺𑀬𑀲𑁆𑀲𑀸𑀢𑀺 𑀆𑀘𑀸𑀭𑀅𑀭𑀺𑀬𑀲𑁆𑀲. 𑀲𑀔𑁆𑀬𑀦𑁆𑀢𑀺 𑀲𑀔𑀺𑀥𑀫𑁆𑀫𑁄 𑀫𑀺𑀢𑁆𑀢𑀥𑀫𑁆𑀫𑁄. 𑀧𑀜𑁆𑀜𑀸𑀡𑀯𑀢𑀸𑀢𑀺 𑀜𑀸𑀡𑀲𑀫𑁆𑀧𑀦𑁆𑀦𑁂𑀦. 𑀲𑀫𑁂𑀢𑀻𑀢𑀺 𑀕𑀗𑁆𑀕𑁄𑀤𑀓𑀁 𑀯𑀺𑀬 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺. 𑀥𑀸𑀢𑀼𑀲𑁄 𑀳𑀺 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀺. 𑀧𑀲𑁆𑀲𑁂𑀬𑁆𑀬 𑀢𑀦𑁆𑀢𑀺 𑀲𑀼𑀢𑀲𑁄𑀫𑁄 𑀧𑁄𑀭𑀺𑀲𑀸𑀤𑀲𑁆𑀲 𑀘𑀺𑀭𑀁 𑀚𑀻𑀯𑀺𑀢𑀁 𑀇𑀘𑁆𑀙𑀦𑁆𑀢𑁄 𑀯𑀺𑀬 𑀧𑀞𑀫𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀯𑀭𑀁 𑀬𑀸𑀘𑀢𑀺. 𑀧𑀡𑁆𑀟𑀺𑀢𑀲𑁆𑀲 𑀳𑀺 ‘‘𑀫𑀫 𑀚𑀻𑀯𑀺𑀢𑀁 𑀤𑁂𑀳𑀻’’𑀢𑀺 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢𑀁, 𑀅𑀧𑀺𑀘 𑀲𑁄 ‘𑀫𑀬𑁆𑀳𑀫𑁂𑀯 𑀏𑀲 𑀆𑀭𑁄𑀕𑁆𑀬𑀁 𑀇𑀘𑁆𑀙𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀲𑁆𑀲𑀺𑀲𑁆𑀲𑀢𑀻𑀢𑀺 𑀏𑀯𑀫𑀸𑀳.
𑀲𑁄𑀧𑀺 𑀢𑀁 𑀲𑀼𑀢𑁆𑀯𑀸𑀯 ‘‘𑀅𑀬𑀁 𑀇𑀲𑁆𑀲𑀭𑀺𑀬𑀸 𑀥𑀁𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑀲𑁆𑀲 𑀏𑀯𑀁 𑀫𑀳𑀸𑀅𑀦𑀢𑁆𑀣𑀓𑀭𑀲𑁆𑀲 𑀫𑀳𑀸𑀘𑁄𑀭𑀲𑁆𑀲 𑀫𑀬𑁆𑀳𑀫𑁂𑀯 𑀚𑀻𑀯𑀺𑀢𑀁 𑀇𑀘𑁆𑀙𑀢𑀺, 𑀅𑀳𑁄 𑀫𑀫 𑀳𑀺𑀢𑀓𑀸𑀫𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀯𑀜𑁆𑀘𑁂𑀢𑁆𑀯𑀸 𑀯𑀭𑀲𑁆𑀲 𑀕𑀳𑀺𑀢𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀢𑀁 𑀯𑀭𑀁 𑀤𑀤𑀫𑀸𑀦𑁄 𑀕𑀸𑀣𑀫𑀸𑀳 𑁋
‘‘𑀅𑀭𑀺𑀬𑀲𑁆𑀲 ¶ 𑀅𑀭𑀺𑀬𑁂𑀦 𑀲𑀫𑁂𑀢𑀺 𑀲𑀔𑁆𑀬𑀁, 𑀧𑀜𑁆𑀜𑀲𑁆𑀲 𑀧𑀜𑁆𑀜𑀸𑀡𑀯𑀢𑀸 𑀲𑀫𑁂𑀢𑀺;
𑀧𑀲𑁆𑀲𑀸𑀲𑀺 𑀫𑀁 𑀯𑀲𑁆𑀲𑀲𑀢𑀁 𑀅𑀭𑁄𑀕𑀁, 𑀏𑀢𑀁 𑀯𑀭𑀸𑀦𑀁 𑀧𑀞𑀫𑀁 𑀤𑀤𑀸𑀫𑀻’’𑀢𑀺.
𑀢𑀢𑁆𑀣 𑀯𑀭𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀯𑀭𑀸𑀦𑀁 𑀧𑀞𑀫𑀁.
𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋
‘‘𑀬𑁂 𑀔𑀢𑁆𑀢𑀺𑀬𑀸𑀲𑁂 𑀇𑀥 𑀪𑀽𑀫𑀺𑀧𑀸𑀮𑀸, 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀸 𑀓𑀢𑀦𑀸𑀫𑀥𑁂𑀬𑁆𑀬𑀸;
𑀦 𑀢𑀸𑀤𑀺𑀲𑁂 𑀪𑀽𑀫𑀺𑀧𑀢𑀻 𑀅𑀤𑁂𑀲𑀺, 𑀏𑀢𑀁 𑀯𑀭𑀸𑀦𑀁 𑀤𑀼𑀢𑀺𑀬𑀁 𑀯𑀭𑀸𑀫𑀻’’𑀢𑀺.
𑀢𑀢𑁆𑀣 ¶ 𑀓𑀢𑀦𑀸𑀫𑀥𑁂𑀬𑁆𑀬𑀸𑀢𑀺 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑀢𑁆𑀢𑀸𑀯 ‘‘𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀸’’𑀢𑀺 𑀓𑀢𑀦𑀸𑀫𑀥𑁂𑀬𑁆𑀬𑀸. 𑀦 𑀢𑀸𑀤𑀺𑀲𑁂𑀢𑀺 𑀢𑀸𑀤𑀺𑀲𑁂 𑀔𑀢𑁆𑀢𑀺𑀬𑁂 𑀦 𑀅𑀤𑁂𑀲𑀺 𑀫𑀸 𑀔𑀸𑀤𑀺.
𑀇𑀢𑀺 𑀲𑁄 𑀤𑀼𑀢𑀺𑀬𑀁 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀧𑀭𑁄𑀲𑀢𑀸𑀦𑀁 𑀔𑀢𑁆𑀢𑀺𑀬𑀸𑀦𑀁 𑀚𑀻𑀯𑀺𑀢𑀯𑀭𑀁 𑀕𑀡𑁆𑀳𑀺. 𑀧𑁄𑀭𑀺𑀲𑀸𑀤𑁄𑀧𑀺𑀲𑁆𑀲 𑀤𑀤𑀫𑀸𑀦𑁄 𑀆𑀳 𑁋
‘‘𑀬𑁂 𑀔𑀢𑁆𑀢𑀺𑀬𑀸𑀲𑁂 𑀇𑀥 𑀪𑀽𑀫𑀺𑀧𑀸𑀮𑀸, 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀸 𑀓𑀢𑀦𑀸𑀫𑀥𑁂𑀬𑁆𑀬𑀸;
𑀦 𑀢𑀸𑀤𑀺𑀲𑁂 𑀪𑀽𑀫𑀺𑀧𑀢𑀻 𑀅𑀤𑁂𑀫𑀺, 𑀏𑀢𑀁 𑀯𑀭𑀸𑀦𑀁 𑀤𑀼𑀢𑀺𑀬𑀁 𑀤𑀤𑀸𑀫𑀻’’𑀢𑀺.
𑀓𑀺𑀁 ¶ 𑀧𑀦 𑀢𑁂 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺, 𑀦 𑀲𑀼𑀡𑀦𑁆𑀢𑀻𑀢𑀺? 𑀦 𑀲𑀩𑁆𑀩𑀁 𑀲𑀼𑀡𑀦𑁆𑀢𑀺. 𑀧𑁄𑀭𑀺𑀲𑀸𑀤𑁂𑀦 𑀳𑀺 𑀭𑀼𑀓𑁆𑀔𑀲𑁆𑀲 𑀥𑀽𑀫𑀚𑀸𑀮𑀉𑀧𑀤𑁆𑀤𑀯𑀪𑀬𑁂𑀦 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀅𑀕𑁆𑀕𑀺 𑀓𑀢𑁄, 𑀅𑀕𑁆𑀕𑀺𑀦𑁄 𑀘 𑀭𑀼𑀓𑁆𑀔𑀲𑁆𑀲 𑀘 𑀅𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺, 𑀢𑀲𑁆𑀫𑀸 𑀲𑀩𑁆𑀩𑀁 𑀅𑀲𑀼𑀢𑁆𑀯𑀸 𑀉𑀧𑀟𑁆𑀠𑀼𑀧𑀟𑁆𑀠𑀁 𑀲𑀼𑀡𑀺𑀁𑀲𑀼. 𑀢𑁂 ‘‘𑀇𑀤𑀸𑀦𑀺 𑀲𑀼𑀢𑀲𑁄𑀫𑁄 𑀧𑁄𑀭𑀺𑀲𑀸𑀤𑀁 𑀤𑀫𑁂𑀲𑁆𑀲𑀢𑀺, 𑀫𑀸 𑀪𑀸𑀬𑀣𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀲𑁆𑀲𑀸𑀲𑁂𑀲𑀼𑀁. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀧𑀭𑁄𑀲𑀢𑀁 𑀔𑀢𑁆𑀢𑀺𑀬𑀸 𑀢𑁂 𑀕𑀳𑀻𑀢𑀸, 𑀢𑀮𑀸𑀯𑀼𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀦𑁆𑀢𑀸;
𑀲𑀓𑁂 𑀢𑁂 𑀭𑀝𑁆𑀞𑁂 𑀧𑀝𑀺𑀧𑀸𑀤𑀬𑀸𑀳𑀺, 𑀏𑀢𑀁 𑀯𑀭𑀸𑀦𑀁 𑀢𑀢𑀺𑀬𑀁 𑀯𑀭𑀸𑀫𑀻’’𑀢𑀺.
𑀢𑀢𑁆𑀣 𑀧𑀭𑁄𑀲𑀢𑀦𑁆𑀢𑀺 𑀅𑀢𑀺𑀭𑁂𑀓𑀲𑀢𑀁. 𑀢𑁂 𑀕𑀳𑀻𑀢𑀸𑀢𑀺 𑀢𑀬𑀸 𑀕𑀳𑀺𑀢𑀸. 𑀢𑀮𑀸𑀯𑀼𑀢𑀸𑀢𑀺 𑀳𑀢𑁆𑀣𑀢𑀮𑁂𑀲𑀼 𑀆𑀯𑀼𑀢𑀸.
𑀇𑀢𑀺 ¶ 𑀫𑀳𑀸𑀲𑀢𑁆𑀢𑁄 𑀢𑀢𑀺𑀬𑀁 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀢𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀲𑀓𑀭𑀝𑁆𑀞𑀦𑀺𑀬𑁆𑀬𑀸𑀢𑀦𑀯𑀭𑀁 𑀕𑀡𑁆𑀳𑀺. 𑀓𑀺𑀁𑀓𑀸𑀭𑀡𑀸? 𑀲𑁄 𑀅𑀔𑀸𑀤𑀦𑁆𑀢𑁄𑀧𑀺 𑀯𑁂𑀭𑀪𑀬𑁂𑀦 𑀲𑀩𑁆𑀩𑁂 𑀢𑁂 𑀤𑀸𑀲𑁂 𑀓𑀢𑁆𑀯𑀸 𑀅𑀭𑀜𑁆𑀜𑁂𑀬𑁂𑀯 𑀯𑀸𑀲𑁂𑀬𑁆𑀬, 𑀫𑀸𑀭𑁂𑀢𑁆𑀯𑀸 𑀯𑀸 𑀙𑀟𑁆𑀟𑁂𑀬𑁆𑀬, 𑀧𑀘𑁆𑀘𑀦𑁆𑀢𑀁 𑀦𑁂𑀢𑁆𑀯𑀸 𑀯𑀸 𑀯𑀺𑀓𑁆𑀓𑀺𑀡𑁂𑀬𑁆𑀬, 𑀢𑀲𑁆𑀫𑀸 𑀢𑁂𑀲𑀁 𑀲𑀓𑀭𑀝𑁆𑀞𑀦𑀺𑀬𑁆𑀬𑀸𑀢𑀦𑀯𑀭𑀁 𑀕𑀡𑁆𑀳𑀺. 𑀇𑀢𑀭𑁄𑀧𑀺𑀲𑁆𑀲 𑀤𑀤𑀫𑀸𑀦𑁄 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀧𑀭𑁄𑀲𑀢𑀁 𑀔𑀢𑁆𑀢𑀺𑀬𑀸 𑀫𑁂 𑀕𑀳𑀻𑀢𑀸, 𑀢𑀮𑀸𑀯𑀼𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀦𑁆𑀢𑀸;
𑀲𑀓𑁂 𑀢𑁂 𑀭𑀝𑁆𑀞𑁂 𑀧𑀝𑀺𑀧𑀸𑀤𑀬𑀸𑀫𑀺, 𑀏𑀢𑀁 𑀯𑀭𑀸𑀦𑀁 𑀢𑀢𑀺𑀬𑀁 𑀤𑀤𑀸𑀫𑀻’’𑀢𑀺.
𑀘𑀢𑀼𑀢𑁆𑀣𑀁 ¶ 𑀧𑀦 𑀯𑀭𑀁 𑀕𑀡𑁆𑀳𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀙𑀺𑀤𑁆𑀤𑀁 𑀢𑁂 𑀭𑀝𑁆𑀞𑀁 𑀩𑁆𑀬𑀣𑀺𑀢𑀸 𑀪𑀬𑀸 𑀳𑀺, 𑀧𑀼𑀣𑀽 𑀦𑀭𑀸 𑀮𑁂𑀡𑀫𑀦𑀼𑀧𑁆𑀧𑀯𑀺𑀝𑁆𑀞𑀸;
𑀫𑀦𑀼𑀲𑁆𑀲𑀫𑀁𑀲𑀁 𑀯𑀺𑀭𑀫𑁂𑀳𑀺 𑀭𑀸𑀚, 𑀏𑀢𑀁 𑀯𑀭𑀸𑀦𑀁 𑀘𑀢𑀼𑀢𑁆𑀣𑀁 𑀯𑀭𑀸𑀫𑀻’’𑀢𑀺.
𑀢𑀢𑁆𑀣 ¶ 𑀙𑀺𑀤𑁆𑀤𑀦𑁆𑀢𑀺 𑀦 𑀖𑀦𑀯𑀸𑀲𑀁 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀸𑀤𑀻𑀦𑀁 𑀉𑀝𑁆𑀞𑀺𑀢𑀢𑁆𑀢𑀸 𑀲𑀯𑀺𑀯𑀭𑀁. 𑀩𑁆𑀬𑀣𑀺𑀢𑀸 𑀪𑀬𑀸𑀳𑀻𑀢𑀺 ‘‘𑀧𑁄𑀭𑀺𑀲𑀸𑀤𑁄 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀢𑀯 𑀪𑀬𑁂𑀦 𑀓𑀫𑁆𑀧𑀺𑀢𑀸. 𑀮𑁂𑀡𑀫𑀦𑀼𑀧𑁆𑀧𑀯𑀺𑀝𑁆𑀞𑀸𑀢𑀺 𑀤𑀸𑀭𑀓𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀢𑀺𑀡𑀕𑀳𑀦𑀸𑀤𑀺𑀦𑀺𑀮𑀻𑀬𑀦𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸. 𑀫𑀦𑀼𑀲𑁆𑀲𑀫𑀁𑀲𑀦𑁆𑀢𑀺 𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑁆𑀓𑀽𑀮𑀁 𑀫𑀦𑀼𑀲𑁆𑀲𑀫𑀁𑀲𑀁 𑀧𑀚𑀳. 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀯𑀸 𑀉𑀧𑀬𑁄𑀕𑀁, 𑀫𑀦𑀼𑀲𑁆𑀲𑀫𑀁𑀲𑀢𑁄 𑀯𑀺𑀭𑀫𑀸𑀳𑀻𑀢𑀺 𑀅𑀢𑁆𑀣𑁄.
𑀏𑀯𑀁 𑀯𑀼𑀢𑁆𑀢𑁂 𑀧𑁄𑀭𑀺𑀲𑀸𑀤𑁄 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑀦𑁆𑀢𑁄 ‘‘𑀲𑀫𑁆𑀫 𑀲𑀼𑀢𑀲𑁄𑀫 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀺, 𑀓𑀣𑀸𑀳𑀁 𑀢𑀼𑀫𑁆𑀳𑀸𑀓𑀁 𑀏𑀢𑀁 𑀯𑀭𑀁 𑀤𑀲𑁆𑀲𑀸𑀫𑀺, 𑀲𑀘𑁂 𑀕𑀡𑁆𑀳𑀺𑀢𑀼𑀓𑀸𑀫𑁄, 𑀅𑀜𑁆𑀜𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀅𑀤𑁆𑀥𑀸 𑀳𑀺 𑀲𑁄 𑀪𑀓𑁆𑀔𑁄 𑀫𑀫 𑀫𑀦𑀸𑀧𑁄, 𑀏𑀢𑀲𑁆𑀲 𑀳𑁂𑀢𑀼𑀫𑁆𑀳𑀺 𑀯𑀦𑀁 𑀧𑀯𑀺𑀝𑁆𑀞𑁄;
𑀲𑁄𑀳𑀁 𑀓𑀣𑀁 𑀏𑀢𑁆𑀢𑁄 𑀉𑀧𑀸𑀭𑀫𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀭𑀸𑀦𑀁 𑀘𑀢𑀼𑀢𑁆𑀣𑀁 𑀯𑀭𑀲𑁆𑀲𑀽’’𑀢𑀺.
𑀢𑀢𑁆𑀣 𑀯𑀦𑀦𑁆𑀢𑀺 𑀭𑀚𑁆𑀚𑀁 𑀧𑀳𑀸𑀬 𑀇𑀫𑀁 𑀯𑀦𑀁 𑀧𑀯𑀺𑀝𑁆𑀞𑁄.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀢𑁆𑀯𑀁 ‘𑀫𑀦𑀼𑀲𑁆𑀲𑀫𑀁𑀲𑀲𑁆𑀲 𑀧𑀺𑀬𑀢𑀭𑀢𑁆𑀢𑀸 𑀢𑀢𑁄 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀲𑀺. 𑀬𑁄 𑀳𑀺 𑀧𑀺𑀬𑀁 𑀦𑀺𑀲𑁆𑀲𑀸𑀬 𑀧𑀸𑀧𑀁 𑀓𑀭𑁄𑀢𑀺, 𑀅𑀬𑀁 𑀩𑀸𑀮𑁄’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀦 ¶ 𑀯𑁂 ‘𑀧𑀺𑀬𑀁 𑀫𑁂’𑀢𑀺 𑀚𑀦𑀺𑀦𑁆𑀤 𑀢𑀸𑀤𑀺𑀲𑁄, 𑀅𑀢𑁆𑀢𑀁 𑀦𑀺𑀭𑀁𑀓𑀘𑁆𑀘 𑀧𑀺𑀬𑀸𑀦𑀺 𑀲𑁂𑀯𑀢𑀺;
𑀅𑀢𑁆𑀢𑀸𑀯 𑀲𑁂𑀬𑁆𑀬𑁄 𑀧𑀭𑀫𑀸 𑀘 𑀲𑁂𑀬𑁆𑀬𑁄, 𑀮𑀩𑁆𑀪𑀸 𑀧𑀺𑀬𑀸 𑀑𑀘𑀺𑀢𑀢𑁆𑀣𑁂𑀦 𑀧𑀘𑁆𑀙𑀸’’𑀢𑀺.
𑀢𑀢𑁆𑀣 ¶ 𑀢𑀸𑀤𑀺𑀲𑁄𑀢𑀺 𑀚𑀦𑀺𑀦𑁆𑀤 𑀢𑀸𑀤𑀺𑀲𑁄 𑀬𑀼𑀯𑀸 𑀅𑀪𑀺𑀭𑀽𑀧𑁄 𑀫𑀳𑀸𑀬𑀲𑁄 ‘‘𑀇𑀤𑀁 𑀦𑀸𑀫 𑀫𑁂 𑀧𑀺𑀬’’𑀦𑁆𑀢𑀺 𑀧𑀺𑀬𑀯𑀢𑁆𑀣𑀼𑀮𑁄𑀪𑁂𑀦 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀦𑀺𑀭𑀁𑀓𑀢𑁆𑀯𑀸 𑀲𑀩𑁆𑀩𑀲𑀼𑀕𑀢𑀻𑀳𑀺 𑀘𑁂𑀯 𑀲𑀼𑀔𑀯𑀺𑀲𑁂𑀲𑁂𑀳𑀺 𑀘 𑀘𑀯𑀺𑀢𑁆𑀯𑀸 𑀦𑀺𑀭𑀬𑁂 𑀧𑀸𑀢𑁂𑀢𑁆𑀯𑀸 𑀦 𑀯𑁂 𑀧𑀺𑀬𑀸𑀦𑀺 𑀲𑁂𑀯𑀢𑀺. 𑀧𑀭𑀫𑀸 𑀘 𑀲𑁂𑀬𑁆𑀬𑁄𑀢𑀺 𑀧𑀼𑀭𑀺𑀲𑀲𑁆𑀲 𑀳𑀺 𑀧𑀭𑀫𑀸 𑀧𑀺𑀬𑀯𑀢𑁆𑀣𑀼𑀫𑁆𑀳𑀸 𑀅𑀢𑁆𑀢𑀸𑀯 𑀯𑀭𑀢𑀭𑁄. 𑀓𑀺𑀁𑀓𑀸𑀭𑀡𑀸? 𑀮𑀩𑁆𑀪𑀸 𑀧𑀺𑀬𑀸𑀢𑀺, 𑀧𑀺𑀬𑀸 𑀦𑀸𑀫 𑀯𑀺𑀲𑀬𑀯𑀲𑁂𑀦 𑀘𑁂𑀯 𑀧𑀼𑀜𑁆𑀜𑁂𑀦 𑀘 𑀑𑀘𑀺𑀢𑀢𑁆𑀣𑁂𑀦 𑀯𑀟𑁆𑀠𑀺𑀢𑀢𑁆𑀣𑁂𑀦 𑀤𑀺𑀝𑁆𑀞𑀥𑀫𑁆𑀫𑁂 𑀘𑁂𑀯 𑀧𑀭𑀢𑁆𑀣 𑀘 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀯𑀸 𑀲𑀓𑁆𑀓𑀸 𑀮𑀤𑁆𑀥𑀼𑀁.
𑀏𑀯𑀁 𑀯𑀼𑀢𑁆𑀢𑁂 𑀧𑁄𑀭𑀺𑀲𑀸𑀤𑁄 𑀪𑀬𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀲𑀼𑀢𑀲𑁄𑀫𑁂𑀦 𑀕𑀳𑀺𑀢𑀁 𑀯𑀭𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀫𑁆𑀧𑀺 𑀫𑀦𑀼𑀲𑁆𑀲𑀫𑀁𑀲𑀢𑁄 𑀯𑀺𑀭𑀫𑀺𑀢𑀼𑀫𑁆𑀧𑀺 ¶ 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀕𑀸𑀣𑀫𑀸𑀳 𑁋
‘‘𑀧𑀺𑀬𑀁 𑀫𑁂 𑀫𑀸𑀦𑀼𑀲𑀁 𑀫𑀁𑀲𑀁, 𑀲𑀼𑀢𑀲𑁄𑀫 𑀯𑀺𑀚𑀸𑀦𑀳𑀺;
𑀦𑀫𑁆𑀳𑀺 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁, 𑀅𑀜𑁆𑀜𑀁 𑀯𑀭𑀁 𑀲𑀫𑁆𑀫 𑀯𑀭𑀲𑁆𑀲𑀽’’𑀢𑀺.
𑀢𑀢𑁆𑀣 𑀯𑀺𑀚𑀸𑀦𑀳𑀻𑀢𑀺 𑀢𑁆𑀯𑀫𑁆𑀧𑀺 𑀚𑀸𑀦𑀸𑀳𑀺.
𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋
‘‘𑀬𑁄 𑀯𑁂 ‘𑀧𑀺𑀬𑀁 𑀫𑁂’𑀢𑀺 𑀧𑀺𑀬𑀸𑀦𑀼𑀭𑀓𑁆𑀔𑀻, 𑀅𑀢𑁆𑀢𑀁 𑀦𑀺𑀭𑀁𑀓𑀘𑁆𑀘 𑀧𑀺𑀬𑀸𑀦𑀺 𑀲𑁂𑀯𑀢𑀺;
𑀲𑁄𑀡𑁆𑀟𑁄𑀯 𑀧𑀺𑀢𑁆𑀯𑀸 𑀯𑀺𑀲𑀫𑀺𑀲𑁆𑀲𑀧𑀸𑀦𑀁, 𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀤𑀼𑀓𑁆𑀔𑀻 𑀧𑀭𑀢𑁆𑀣.
‘‘𑀬𑁄 𑀘𑀻𑀥 𑀲𑀗𑁆𑀔𑀸𑀬 𑀧𑀺𑀬𑀸𑀦𑀺 𑀳𑀺𑀢𑁆𑀯𑀸, 𑀓𑀺𑀘𑁆𑀙𑁂𑀦𑀧𑀺 𑀲𑁂𑀯𑀢𑀺 𑀅𑀭𑀺𑀬𑀥𑀫𑁆𑀫𑁂;
𑀤𑀼𑀓𑁆𑀔𑀺𑀢𑁄𑀯 𑀧𑀺𑀢𑁆𑀯𑀸𑀦 𑀬𑀣𑁄𑀲𑀥𑀸𑀦𑀺, 𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺.
𑀢𑀢𑁆𑀣 𑀬𑁄 𑀯𑁂𑀢𑀺, 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀬𑁄 𑀧𑀼𑀭𑀺𑀲𑁄 ‘‘𑀇𑀤𑀁 𑀫𑁂 𑀧𑀺𑀬’’𑀦𑁆𑀢𑀺 𑀧𑀸𑀧𑀓𑀺𑀭𑀺𑀬𑀸𑀬 𑀅𑀢𑁆𑀢𑀸𑀦𑀁 𑀦𑀺𑀭𑀁𑀓𑀢𑁆𑀯𑀸 𑀧𑀺𑀬𑀸𑀦𑀺 𑀯𑀢𑁆𑀣𑀽𑀦𑀺 𑀲𑁂𑀯𑀢𑀺, 𑀲𑁄 𑀲𑀼𑀭𑀸𑀧𑁂𑀫𑁂𑀦 𑀯𑀺𑀲𑀫𑀺𑀲𑁆𑀲𑀁 𑀲𑀼𑀭𑀁 𑀧𑀺𑀢𑁆𑀯𑀸 𑀲𑁄𑀡𑁆𑀟𑁄 𑀯𑀺𑀬 ¶ 𑀢𑁂𑀦 𑀧𑀸𑀧𑀓𑀫𑁆𑀫𑁂𑀦 𑀧𑀭𑀢𑁆𑀣 𑀦𑀺𑀭𑀬𑀸𑀤𑀻𑀲𑀼 𑀤𑀼𑀓𑁆𑀔𑀻 𑀳𑁄𑀢𑀺. 𑀲𑀗𑁆𑀔𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸 𑀢𑀼𑀮𑁂𑀢𑁆𑀯𑀸. 𑀧𑀺𑀬𑀸𑀦𑀺 𑀳𑀺𑀢𑁆𑀯𑀸𑀢𑀺 𑀅𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀺𑀬𑀸𑀦𑀺 𑀙𑀟𑁆𑀟𑁂𑀢𑁆𑀯𑀸.
𑀏𑀯𑀁 ¶ 𑀯𑀼𑀢𑁆𑀢𑁂 𑀧𑁄𑀭𑀺𑀲𑀸𑀤𑁄 𑀓𑀮𑀽𑀦𑀁 𑀧𑀭𑀺𑀤𑁂𑀯𑀦𑁆𑀢𑁄 𑀕𑀸𑀣𑀫𑀸𑀳 𑁋
‘‘𑀑𑀳𑀸𑀬𑀳𑀁 𑀧𑀺𑀢𑀭𑀁 𑀫𑀸𑀢𑀭𑀜𑁆𑀘, 𑀫𑀦𑀸𑀧𑀺𑀬𑁂 𑀓𑀸𑀫𑀕𑀼𑀡𑁂 𑀘 𑀧𑀜𑁆𑀘;
𑀏𑀢𑀲𑁆𑀲 𑀳𑁂𑀢𑀼𑀫𑁆𑀳𑀺 𑀯𑀦𑀁 𑀧𑀯𑀺𑀝𑁆𑀞𑁄, 𑀢𑀁 𑀢𑁂 𑀯𑀭𑀁 𑀓𑀺𑀦𑁆𑀢𑀺 𑀫𑀳𑀁 𑀤𑀤𑀸𑀫𑀻’’𑀢𑀺.
𑀢𑀢𑁆𑀣 𑀏𑀢𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀫𑀁𑀲𑀲𑁆𑀲. 𑀓𑀺𑀦𑁆𑀢𑀺 𑀫𑀳𑀦𑁆𑀢𑀺 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀅𑀳𑀁 𑀢𑀁 𑀯𑀭𑀁 𑀤𑁂𑀫𑀺.
𑀢𑀢𑁄 𑀫𑀳𑀸𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀦 𑀧𑀡𑁆𑀟𑀺𑀢𑀸 𑀤𑀺𑀕𑀼𑀡𑀫𑀸𑀳𑀼 𑀯𑀸𑀓𑁆𑀬𑀁, 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀸𑀯 𑀪𑀯𑀦𑁆𑀢𑀺 𑀲𑀦𑁆𑀢𑁄;
‘𑀯𑀭𑀲𑁆𑀲𑀼 ¶ 𑀲𑀫𑁆𑀫’ 𑀇𑀢𑀺 𑀫𑀁 𑀅𑀯𑁄𑀘, 𑀇𑀘𑁆𑀘𑀩𑁆𑀭𑀯𑀻 𑀢𑁆𑀯𑀁 𑀦 𑀳𑀺 𑀢𑁂 𑀲𑀫𑁂𑀢𑀻’’𑀢𑀺.
𑀢𑀢𑁆𑀣 𑀤𑀺𑀕𑀼𑀡𑀦𑁆𑀢𑀺, 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀧𑀡𑁆𑀟𑀺𑀢𑀸 𑀦𑀸𑀫 𑀏𑀓𑀁 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀺𑀲𑀁𑀯𑀸𑀤𑁂𑀦𑁆𑀢𑀸 𑀤𑀼𑀢𑀺𑀬𑀁 𑀯𑀘𑀦𑀁 𑀦 𑀓𑀣𑁂𑀦𑁆𑀢𑀺. 𑀇𑀢𑀺 𑀫𑀁 𑀅𑀯𑁄𑀘𑀸𑀢𑀺, ‘‘𑀲𑀫𑁆𑀫 𑀲𑀼𑀢𑀲𑁄𑀫 𑀯𑀭𑀲𑁆𑀲𑀼 𑀯𑀭’’𑀦𑁆𑀢𑀺 𑀏𑀯𑀁 𑀫𑀁 𑀅𑀪𑀸𑀲𑀲𑀺. 𑀇𑀘𑁆𑀘𑀩𑁆𑀭𑀯𑀻𑀢𑀺 𑀢𑀲𑁆𑀫𑀸 𑀬𑀁 𑀢𑁆𑀯𑀁 𑀇𑀢𑀺 𑀅𑀩𑁆𑀭𑀯𑀺, 𑀢𑀁 𑀢𑁂 𑀇𑀤𑀸𑀦𑀺 𑀦 𑀲𑀫𑁂𑀢𑀺.
𑀲𑁄 𑀧𑀼𑀦 𑀭𑁄𑀤𑀦𑁆𑀢𑁄 𑀏𑀯 𑀕𑀸𑀣𑀫𑀸𑀳 𑁋
‘‘𑀅𑀧𑀼𑀜𑁆𑀜𑀮𑀸𑀪𑀁 𑀅𑀬𑀲𑀁 𑀅𑀓𑀺𑀢𑁆𑀢𑀺𑀁, 𑀧𑀸𑀧𑀁 𑀩𑀳𑀼𑀁 𑀤𑀼𑀘𑁆𑀘𑀭𑀺𑀢𑀁 𑀓𑀺𑀮𑁂𑀲𑀁;
𑀫𑀦𑀼𑀲𑁆𑀲𑀫𑀁𑀲𑀲𑁆𑀲 𑀓𑀢𑁂 𑀉𑀧𑀸𑀕𑀸, 𑀢𑀁 𑀢𑁂 𑀯𑀭𑀁 𑀓𑀺𑀦𑁆𑀢𑀺 𑀫𑀳𑀁 𑀤𑀤𑁂𑀬𑁆𑀬’’𑀦𑁆𑀢𑀺.
𑀢𑀢𑁆𑀣 𑀧𑀸𑀧𑀦𑁆𑀢𑀺 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀁. 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀁. 𑀓𑀺𑀮𑁂𑀲𑀦𑁆𑀢𑀺 𑀤𑀼𑀓𑁆𑀔𑀁. 𑀫𑀦𑀼𑀲𑁆𑀲𑀫𑀁𑀲𑀲𑁆𑀲 𑀓𑀢𑁂𑀢𑀺 𑀫𑀦𑀼𑀲𑁆𑀲𑀫𑀁𑀲𑀲𑁆𑀲 𑀳𑁂𑀢𑀼. 𑀉𑀧𑀸𑀕𑀸𑀢𑀺 𑀉𑀧𑀕𑀢𑁄𑀫𑁆𑀳𑀺. 𑀢𑀁 𑀢𑁂𑀢𑀺 𑀢𑀁 𑀢𑀼𑀬𑁆𑀳𑀁 𑀓𑀣𑀸𑀳𑀁 𑀯𑀭𑀁 𑀤𑁂𑀫𑀺, 𑀫𑀸 𑀫𑀁 𑀯𑀸𑀭𑀬𑀺, 𑀅𑀦𑀼𑀓𑀫𑁆𑀧𑀁 𑀓𑀸𑀭𑀼𑀜𑁆𑀜𑀁 𑀫𑀬𑀺 𑀓𑀭𑁄𑀳𑀺, 𑀅𑀜𑁆𑀜𑀁 𑀯𑀭𑀁 𑀕𑀡𑁆𑀳𑀸𑀳𑀻𑀢𑀺 𑀆𑀳.
𑀅𑀣 ¶ 𑀫𑀳𑀸𑀲𑀢𑁆𑀢𑁄 𑀆𑀳 𑁋
‘‘𑀦 ¶ 𑀢𑀁 𑀯𑀭𑀁 𑀅𑀭𑀳𑀢𑀺 𑀚𑀦𑁆𑀢𑀼 𑀤𑀸𑀢𑀼𑀁, 𑀬𑀁 𑀯𑀸𑀧𑀺 𑀤𑀢𑁆𑀯𑀸 𑀦 𑀅𑀯𑀸𑀓𑀭𑁂𑀬𑁆𑀬;
𑀯𑀭𑀲𑁆𑀲𑀼 𑀲𑀫𑁆𑀫 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀧𑀸𑀡𑀁 𑀘𑀚𑀺𑀢𑁆𑀯𑀸𑀦𑀧𑀺 𑀤𑀲𑁆𑀲𑀫𑁂𑀯𑀸’’𑀢𑀺.
𑀏𑀯𑀁 𑀢𑁂𑀦 𑀧𑀞𑀫𑀁 𑀯𑀼𑀢𑁆𑀢𑀕𑀸𑀣𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑁆𑀯𑀸 𑀯𑀭𑀤𑀸𑀦𑁂 𑀉𑀲𑁆𑀲𑀸𑀳𑁂𑀦𑁆𑀢𑁄 𑀕𑀸𑀣𑀸 𑀆𑀳 𑁋
‘‘𑀧𑀸𑀡𑀁 𑀘𑀚𑀦𑁆𑀢𑀺 𑀲𑀦𑁆𑀢𑁄 𑀦𑀸𑀧𑀺 𑀥𑀫𑁆𑀫𑀁, 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀸𑀯 𑀪𑀯𑀦𑁆𑀢𑀺 𑀲𑀦𑁆𑀢𑁄;
𑀤𑀢𑁆𑀯𑀸 𑀯𑀭𑀁 𑀔𑀺𑀧𑁆𑀧𑀫𑀯𑀸𑀓𑀭𑁄𑀳𑀺, 𑀏𑀢𑁂𑀦 𑀲𑀫𑁆𑀧𑀚𑁆𑀚 𑀲𑀼𑀭𑀸𑀚𑀲𑁂𑀝𑁆𑀞.
‘‘𑀘𑀚𑁂 𑀥𑀦𑀁 𑀅𑀗𑁆𑀕𑀯𑀭𑀲𑁆𑀲 𑀳𑁂𑀢𑀼, 𑀅𑀗𑁆𑀕𑀁 𑀘𑀚𑁂 𑀚𑀻𑀯𑀺𑀢𑀁 𑀭𑀓𑁆𑀔𑀫𑀸𑀦𑁄;
𑀅𑀗𑁆𑀕𑀁 ¶ 𑀥𑀦𑀁 𑀚𑀻𑀯𑀺𑀢𑀜𑁆𑀘𑀸𑀧𑀺 𑀲𑀩𑁆𑀩𑀁, 𑀘𑀚𑁂 𑀦𑀭𑁄 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑁄’’𑀢𑀺.
𑀢𑀢𑁆𑀣 𑀧𑀸𑀡𑀦𑁆𑀢𑀺 𑀚𑀻𑀯𑀺𑀢𑀁. 𑀲𑀦𑁆𑀢𑁄 𑀦𑀸𑀫 𑀅𑀧𑀺 𑀚𑀻𑀯𑀺𑀢𑀁 𑀘𑀚𑀦𑁆𑀢𑀺, 𑀦 𑀥𑀫𑁆𑀫𑀁. 𑀔𑀺𑀧𑁆𑀧𑀫𑀯𑀸𑀓𑀭𑁄𑀳𑀻𑀢𑀺 𑀇𑀥 𑀔𑀺𑀧𑁆𑀧𑀁 𑀫𑀬𑁆𑀳𑀁 𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀸𑀢𑀺 𑀏𑀢𑁂𑀦 𑀥𑀫𑁆𑀫𑁂𑀦 𑀘𑁂𑀯 𑀲𑀘𑁆𑀘𑁂𑀦 𑀘 𑀲𑀫𑁆𑀧𑀚𑁆𑀚 𑀲𑀫𑁆𑀧𑀦𑁆𑀦𑁄 𑀉𑀧𑀧𑀦𑁆𑀦𑁄 𑀳𑁄𑀳𑀺. 𑀲𑀼𑀭𑀸𑀚𑀲𑁂𑀝𑁆𑀞𑀸𑀢𑀺 𑀢𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀆𑀮𑀧𑀢𑀺. 𑀘𑀚𑁂 𑀥𑀦𑀦𑁆𑀢𑀺, 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀳𑀢𑁆𑀣𑀧𑀸𑀤𑀸𑀤𑀺𑀫𑁆𑀳𑀺 𑀅𑀗𑁆𑀕𑁂 𑀙𑀺𑀚𑁆𑀚𑀫𑀸𑀦𑁂 𑀢𑀲𑁆𑀲 𑀭𑀓𑁆𑀔𑀡𑀢𑁆𑀣𑀸𑀬 𑀩𑀳𑀼𑀫𑁆𑀧𑀺 𑀥𑀦𑀁 𑀘𑀚𑁂𑀬𑁆𑀬. 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀅𑀗𑁆𑀕𑀥𑀦𑀚𑀻𑀯𑀺𑀢𑀸𑀦𑀺 𑀧𑀭𑀺𑀘𑁆𑀘𑀚𑀦𑁆𑀢𑁄𑀧𑀺 ‘‘𑀲𑀢𑀁 𑀥𑀫𑁆𑀫𑀁 𑀦 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄.
𑀏𑀯𑀁 𑀫𑀳𑀸𑀲𑀢𑁆𑀢𑁄 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀢𑀁 𑀲𑀘𑁆𑀘𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀕𑀼𑀭𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳 𑁋
‘‘𑀬𑀲𑁆𑀫𑀸 𑀳𑀺 𑀥𑀫𑁆𑀫𑀁 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸, 𑀬𑁂 𑀘𑀲𑁆𑀲 𑀓𑀗𑁆𑀔𑀁 𑀯𑀺𑀦𑀬𑀦𑁆𑀢𑀺 𑀲𑀦𑁆𑀢𑁄;
𑀢𑀁 𑀳𑀺𑀲𑁆𑀲 𑀤𑀻𑀧𑀜𑁆𑀘 𑀧𑀭𑀸𑀬𑀡𑀜𑁆𑀘, 𑀦 𑀢𑁂𑀦 𑀫𑀺𑀢𑁆𑀢𑀺𑀁 𑀚𑀺𑀭𑀬𑁂𑀣 𑀧𑀜𑁆𑀜𑁄’’𑀢𑀺.
𑀢𑀢𑁆𑀣 ¶ 𑀬𑀲𑁆𑀫𑀸𑀢𑀺 𑀬𑀫𑁆𑀳𑀸 𑀧𑀼𑀭𑀺𑀲𑀸. 𑀥𑀫𑁆𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀚𑁄𑀢𑀓𑀁 𑀓𑀸𑀭𑀡𑀁. 𑀯𑀺𑀚𑀜𑁆𑀜𑀸𑀢𑀺 𑀯𑀺𑀚𑀸𑀦𑁂𑀬𑁆𑀬. 𑀢𑀁 𑀳𑀺𑀲𑁆𑀲𑀸𑀢𑀺 𑀢𑀁 𑀆𑀘𑀭𑀺𑀬𑀓𑀼𑀮𑀁 𑀏𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀤𑀻𑀧𑀁, 𑀉𑀧𑁆𑀧𑀦𑁆𑀦𑁂 𑀪𑀬𑁂 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀝𑁆𑀞𑁂𑀦 𑀧𑀭𑀸𑀬𑀡𑀜𑁆𑀘. 𑀦 𑀢𑁂𑀦 𑀫𑀺𑀢𑁆𑀢𑀺𑀦𑁆𑀢𑀺 𑀢𑁂𑀦 𑀆𑀘𑀭𑀺𑀬𑀧𑀼𑀕𑁆𑀕𑀮𑁂𑀦 𑀲𑀳 𑀲𑁄 𑀧𑀡𑁆𑀟𑀺𑀢𑁄 𑀓𑁂𑀦𑀘𑀺𑀧𑀺 𑀓𑀸𑀭𑀡𑁂𑀦 𑀫𑀺𑀢𑁆𑀢𑀺𑀁 𑀦 𑀚𑀻𑀭𑀬𑁂𑀣 𑀦 𑀯𑀺𑀦𑀸𑀲𑁂𑀬𑁆𑀬.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸, ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀕𑀼𑀡𑀯𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁 𑀦𑀸𑀫 𑀪𑀺𑀦𑁆𑀤𑀺𑀢𑀼𑀁 𑀦 ¶ 𑀯𑀝𑁆𑀝𑀢𑀺, 𑀅𑀳𑀜𑁆𑀘 𑀢𑀭𑀼𑀡𑀓𑀸𑀮𑁂𑀧𑀺 𑀢𑀯 𑀧𑀺𑀝𑁆𑀞𑀺𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀩𑀳𑀼𑀁 𑀲𑀺𑀓𑁆𑀔𑀁 𑀲𑀺𑀓𑁆𑀔𑀸𑀧𑁂𑀲𑀺𑀁, 𑀇𑀤𑀸𑀦𑀺𑀧𑀺 𑀩𑀼𑀤𑁆𑀥𑀮𑀻𑀮𑀸𑀬 𑀲𑀢𑀸𑀭𑀳𑀸 𑀕𑀸𑀣𑀸 𑀢𑁂 𑀓𑀣𑁂𑀲𑀺𑀁, 𑀢𑁂𑀦 𑀫𑁂 𑀯𑀘𑀦𑀁 𑀓𑀸𑀢𑀼𑀁 𑀅𑀭𑀳𑀲𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀧𑁄𑀭𑀺𑀲𑀸𑀤𑁄 ‘‘𑀅𑀬𑀁 𑀲𑀼𑀢𑀲𑁄𑀫𑁄 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀘𑁂𑀯 𑀧𑀡𑁆𑀟𑀺𑀢𑁄 𑀘, 𑀯𑀭𑁄 𑀘𑀲𑁆𑀲 𑀫𑀬𑀸 𑀤𑀺𑀦𑁆𑀦𑁄, 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀁, 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀭𑀡𑀁 𑀦𑀸𑀫 𑀥𑀼𑀯𑀁, 𑀫𑀦𑀼𑀲𑁆𑀲𑀫𑀁𑀲𑀁 𑀦 𑀔𑀸𑀤𑀺𑀲𑁆𑀲𑀸𑀫𑀺, 𑀤𑀲𑁆𑀲𑀸𑀫𑀺𑀲𑁆𑀲 𑀯𑀭’’𑀦𑁆𑀢𑀺 𑀅𑀲𑁆𑀲𑀼𑀥𑀸𑀭𑀸𑀳𑀺 𑀧𑀯𑀢𑁆𑀢𑀫𑀸𑀦𑀸𑀳𑀺 𑀉𑀝𑁆𑀞𑀸𑀬 𑀲𑀼𑀢𑀲𑁄𑀫𑀦𑀭𑀺𑀦𑁆𑀤𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀯𑀭𑀁 𑀤𑀤𑀫𑀸𑀦𑁄 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀅𑀤𑁆𑀥𑀸 ¶ 𑀳𑀺 𑀲𑁄 𑀪𑀓𑁆𑀔𑁄 𑀫𑀫 𑀫𑀦𑀸𑀧𑁄, 𑀏𑀢𑀲𑁆𑀲 𑀳𑁂𑀢𑀼𑀫𑁆𑀳𑀺 𑀯𑀦𑀁 𑀧𑀯𑀺𑀝𑁆𑀞𑁄;
𑀲𑀘𑁂 𑀘 𑀫𑀁 𑀬𑀸𑀘𑀲𑀺 𑀏𑀢𑀫𑀢𑁆𑀣𑀁, 𑀏𑀢𑀫𑁆𑀧𑀺 𑀢𑁂 𑀲𑀫𑁆𑀫 𑀯𑀭𑀁 𑀤𑀤𑀸𑀫𑀻’’𑀢𑀺.
𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀏𑀯𑀫𑀸𑀳 𑁋 ‘‘𑀲𑀫𑁆𑀫, 𑀲𑀻𑀮𑁂 𑀞𑀺𑀢𑀲𑁆𑀲 𑀫𑀭𑀡𑀫𑁆𑀧𑀺 𑀯𑀭𑀁, 𑀕𑀡𑁆𑀳𑀸𑀫𑀺, 𑀫𑀳𑀸𑀭𑀸𑀚, 𑀢𑀬𑀸 𑀤𑀺𑀦𑁆𑀦𑀁 𑀯𑀭𑀁, 𑀅𑀚𑁆𑀚 𑀧𑀝𑁆𑀞𑀸𑀬 𑀅𑀭𑀺𑀬𑀧𑀣𑁂 𑀧𑀢𑀺𑀝𑁆𑀞𑀺𑀢𑁄𑀲𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀬𑀸𑀘𑀸𑀫𑀺, 𑀲𑀘𑁂 𑀢𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀧𑀜𑁆𑀘 𑀲𑀻𑀮𑀸𑀦𑀺 𑀕𑀡𑁆𑀳, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀲𑀫𑁆𑀫, 𑀤𑁂𑀳𑀺 𑀫𑁂 𑀲𑀻𑀮𑀸𑀦𑀻’’𑀢𑀺. ‘‘𑀕𑀡𑁆𑀳 𑀫𑀳𑀸𑀭𑀸𑀚𑀸’’𑀢𑀺. 𑀲𑁄 𑀫𑀳𑀸𑀲𑀢𑁆𑀢𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀦𑀁 𑀧𑀜𑁆𑀘𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀪𑀼𑀫𑁆𑀫𑀸 𑀤𑁂𑀯𑀸 𑀫𑀳𑀸𑀲𑀢𑁆𑀢𑁂 𑀧𑀻𑀢𑀺𑀁 𑀚𑀦𑁂𑀢𑁆𑀯𑀸 ‘‘𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀅𑀜𑁆𑀜𑁄 𑀧𑁄𑀭𑀺𑀲𑀸𑀤𑀁 𑀫𑀦𑀼𑀲𑁆𑀲𑀫𑀁𑀲𑀢𑁄 𑀦𑀺𑀯𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑁄 𑀲𑀼𑀢𑀲𑁄𑀫𑁂𑀦 𑀤𑀼𑀓𑁆𑀓𑀭𑀢𑀭𑀁 𑀓𑀢’’𑀦𑁆𑀢𑀺 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀯𑀦𑀁 𑀉𑀦𑁆𑀦𑀸𑀤𑁂𑀦𑁆𑀢𑀸 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀏𑀯𑀁 𑀬𑀸𑀯 ¶ 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀭𑀼𑀓𑁆𑀔𑁂 𑀮𑀕𑁆𑀕𑀺𑀢𑀭𑀸𑀚𑀸𑀦𑁄𑀧𑀺 𑀢𑀁 𑀤𑁂𑀯𑀢𑀸𑀦𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑀁 𑀲𑀼𑀡𑀺𑀁𑀲𑀼. 𑀭𑀼𑀓𑁆𑀔𑀤𑁂𑀯𑀢𑀸𑀧𑀺 𑀲𑀓𑀯𑀺𑀫𑀸𑀦𑁂 𑀞𑀺𑀢𑀸𑀯 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀇𑀢𑀺 𑀤𑁂𑀯𑀢𑀸𑀦𑀁 𑀲𑀤𑁆𑀤𑁄𑀯 𑀲𑀽𑀬𑀢𑀺, 𑀭𑀽𑀧𑀁 𑀦 𑀤𑀺𑀲𑁆𑀲𑀢𑀺. 𑀤𑁂𑀯𑀢𑀸𑀦𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀸𑀚𑀸𑀦𑁄 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀼𑀢𑀲𑁄𑀫𑀁 𑀦𑀺𑀲𑁆𑀲𑀸𑀬 𑀦𑁄 𑀚𑀻𑀯𑀺𑀢𑀁 𑀮𑀤𑁆𑀥𑀁, 𑀤𑀼𑀓𑁆𑀓𑀭𑀁 𑀓𑀢𑀁 𑀲𑀼𑀢𑀲𑁄𑀫𑁂𑀦 𑀧𑁄𑀭𑀺𑀲𑀸𑀤𑀁 𑀤𑀫𑁂𑀦𑁆𑀢𑁂𑀦𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀼𑀢𑀺𑀁 𑀓𑀭𑀺𑀁𑀲𑀼. 𑀧𑁄𑀭𑀺𑀲𑀸𑀤𑁄 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀲𑀫𑁆𑀫, 𑀔𑀢𑁆𑀢𑀺𑀬𑁂 𑀫𑁄𑀘𑁂𑀳𑀻’’𑀢𑀺 𑀆𑀳. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀏𑀢𑁂𑀲𑀁 𑀧𑀘𑁆𑀘𑀸𑀫𑀺𑀢𑁆𑀢𑁄, 𑀏𑀢𑁂 𑀫𑀬𑀸 𑀫𑁄𑀘𑀺𑀢𑀸 ‘𑀕𑀡𑁆𑀳𑀣 𑀦𑁄 𑀧𑀘𑁆𑀘𑀸𑀫𑀺𑀢𑁆𑀢’𑀦𑁆𑀢𑀺 𑀫𑀁 𑀳𑀺𑀁𑀲𑁂𑀬𑁆𑀬𑀼𑀁, 𑀫𑀬𑀸 𑀚𑀻𑀯𑀺𑀢𑀁 𑀘𑀚𑀦𑁆𑀢𑁂𑀦𑀧𑀺 𑀦 𑀲𑀓𑁆𑀓𑀸 𑀲𑀼𑀢𑀲𑁄𑀫𑀲𑁆𑀲 𑀲𑀦𑁆𑀢𑀺𑀓𑀸 𑀕𑀳𑀺𑀢𑀁 𑀲𑀻𑀮𑀁 𑀪𑀺𑀦𑁆𑀤𑀺𑀢𑀼𑀁, 𑀇𑀫𑀺𑀦𑀸 𑀲𑀤𑁆𑀥𑀺𑀬𑁂𑀯 𑀕𑀦𑁆𑀢𑁆𑀯𑀸 𑀫𑁄𑀘𑁂𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀪𑀬𑀁 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀲𑀼𑀢𑀲𑁄𑀫, 𑀉𑀪𑁄𑀧𑀺 𑀕𑀦𑁆𑀢𑁆𑀯𑀸 𑀔𑀢𑁆𑀢𑀺𑀬𑁂 𑀫𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀲𑀢𑁆𑀣𑀸 ¶ ¶ 𑀘 𑀫𑁂 𑀳𑁄𑀲𑀺 𑀲𑀔𑀸 𑀘 𑀫𑁂𑀲𑀺, 𑀯𑀘𑀦𑀫𑁆𑀧𑀺 𑀢𑁂 𑀲𑀫𑁆𑀫 𑀅𑀳𑀁 𑀅𑀓𑀸𑀲𑀺𑀁;
𑀢𑀼𑀯𑀫𑁆𑀧𑀺 𑀫𑁂 𑀲𑀫𑁆𑀫 𑀓𑀭𑁄𑀳𑀺 𑀯𑀸𑀓𑁆𑀬𑀁, 𑀉𑀪𑁄𑀧𑀺 𑀕𑀦𑁆𑀢𑁆𑀯𑀸𑀦 𑀧𑀫𑁄𑀘𑀬𑀸𑀫𑀸’’𑀢𑀺.
𑀢𑀢𑁆𑀣 𑀲𑀢𑁆𑀣𑀸𑀢𑀺 𑀲𑀕𑁆𑀕𑀫𑀕𑁆𑀕𑀲𑁆𑀲 𑀤𑁂𑀲𑀺𑀢𑀢𑁆𑀢𑀸 𑀲𑀢𑁆𑀣𑀸 𑀘, 𑀢𑀭𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀔𑀸 𑀘.
𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋
‘‘𑀲𑀢𑁆𑀣𑀸 𑀘 𑀢𑁂 𑀳𑁄𑀫𑀺 𑀲𑀔𑀸 𑀘 𑀢𑁆𑀬𑀫𑁆𑀳𑀺, 𑀯𑀘𑀦𑀫𑁆𑀧𑀺 𑀫𑁂 𑀲𑀫𑁆𑀫 𑀢𑀼𑀯𑀁 𑀅𑀓𑀸𑀲𑀺;
𑀅𑀳𑀫𑁆𑀧𑀺 𑀢𑁂 𑀲𑀫𑁆𑀫 𑀓𑀭𑁄𑀫𑀺 𑀯𑀸𑀓𑁆𑀬𑀁, 𑀉𑀪𑁄𑀧𑀺 𑀕𑀦𑁆𑀢𑁆𑀯𑀸𑀦 𑀧𑀫𑁄𑀘𑀬𑀸𑀫𑀸’’𑀢𑀺.
𑀏𑀯𑀁 𑀯𑀢𑁆𑀯𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋
‘‘𑀓𑀫𑁆𑀫𑀸𑀲𑀧𑀸𑀤𑁂𑀦 𑀯𑀺𑀳𑁂𑀞𑀺𑀢𑀢𑁆𑀣, 𑀢𑀮𑀸𑀯𑀼𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀦𑁆𑀢𑀸;
𑀦 𑀚𑀸𑀢𑀼 𑀤𑀼𑀩𑁆𑀪𑁂𑀣 𑀇𑀫𑀲𑁆𑀲 𑀭𑀜𑁆𑀜𑁄, 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀁 𑀫𑁂 𑀧𑀝𑀺𑀲𑁆𑀲𑀼𑀡𑀸𑀣𑀸’’𑀢𑀺.
𑀢𑀢𑁆𑀣 ¶ 𑀓𑀫𑁆𑀫𑀸𑀲𑀧𑀸𑀤𑁂𑀦𑀸𑀢𑀺 𑀇𑀤𑀁 𑀫𑀳𑀸𑀲𑀢𑁆𑀢𑁄 ‘‘𑀉𑀪𑁄𑀧𑀺 𑀕𑀦𑁆𑀢𑁆𑀯𑀸𑀦 𑀧𑀫𑁄𑀘𑀬𑀸𑀫𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀔𑀢𑁆𑀢𑀺𑀬𑀸 𑀦𑀸𑀫 𑀫𑀸𑀦𑀣𑀤𑁆𑀥𑀸 𑀳𑁄𑀦𑁆𑀢𑀺, 𑀫𑀼𑀢𑁆𑀢𑀫𑀢𑁆𑀢𑀸𑀯 ‘𑀇𑀫𑀺𑀦𑀸 𑀫𑀬𑀁 𑀯𑀺𑀳𑁂𑀞𑀺𑀢𑀫𑁆𑀳𑀸’𑀢𑀺 𑀧𑁄𑀭𑀺𑀲𑀸𑀤𑀁 𑀧𑁄𑀣𑁂𑀬𑁆𑀬𑀼𑀫𑁆𑀧𑀺 𑀳𑀦𑁂𑀬𑁆𑀬𑀼𑀫𑁆𑀧𑀺, 𑀦 𑀔𑁄 𑀧𑀦𑁂𑀲 𑀢𑁂𑀲𑀼 𑀤𑀼𑀩𑁆𑀪𑀺𑀲𑁆𑀲𑀢𑀺, 𑀅𑀳𑀁 𑀏𑀓𑀓𑁄𑀯 𑀕𑀦𑁆𑀢𑁆𑀯𑀸 𑀧𑀝𑀺𑀜𑁆𑀜𑀁 𑀢𑀸𑀯 𑀦𑁂𑀲𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂 𑀳𑀢𑁆𑀣𑀢𑀮𑁂 𑀆𑀯𑀼𑀦𑀺𑀢𑁆𑀯𑀸 𑀅𑀕𑁆𑀕𑀧𑀸𑀤𑀗𑁆𑀕𑀼𑀮𑀻𑀳𑀺 𑀪𑀽𑀫𑀺𑀁 𑀨𑀼𑀲𑀫𑀸𑀦𑀸𑀳𑀺 𑀭𑀼𑀓𑁆𑀔𑀲𑀸𑀔𑀸𑀲𑀼 𑀑𑀮𑀕𑁆𑀕𑀺𑀢𑁂 𑀯𑀸𑀢𑀧𑁆𑀧𑀳𑀭𑀡𑀓𑀸𑀮𑁂 𑀦𑀸𑀕𑀤𑀦𑁆𑀢𑁂𑀲𑀼 𑀑𑀮𑀕𑁆𑀕𑀺𑀢𑀓𑀼𑀭𑀡𑁆𑀟𑀓𑀤𑀸𑀫𑀸𑀦𑀺 𑀯𑀺𑀬 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑁂 𑀅𑀤𑁆𑀤𑀲. 𑀢𑁂𑀧𑀺 𑀢𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺𑀫𑁆𑀳𑀸 𑀫𑀬𑀁 𑀅𑀭𑁄𑀕𑀸’’𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀭𑀯𑀺𑀁𑀲𑀼. 𑀅𑀣 𑀦𑁂 𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀺𑀢𑁆𑀣𑀸’’𑀢𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀫𑀬𑀸 𑀧𑁄𑀭𑀺𑀲𑀸𑀤𑁄 𑀤𑀫𑀺𑀢𑁄, 𑀢𑀼𑀫𑁆𑀳𑀸𑀓𑀁 𑀅𑀪𑀬𑀁 𑀕𑀳𑀺𑀢𑀁, 𑀢𑀼𑀫𑁆𑀳𑁂 𑀧𑀦 𑀫𑁂 𑀯𑀘𑀦𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀦 𑀚𑀸𑀢𑀽𑀢𑀺 𑀏𑀓𑀁𑀲𑁂𑀦𑁂𑀯 𑀦 𑀤𑀼𑀩𑁆𑀪𑁂𑀣.
𑀢𑁂 𑀆𑀳𑀁𑀲𑀼 𑁋
‘‘𑀓𑀫𑁆𑀫𑀸𑀲𑀧𑀸𑀤𑁂𑀦 𑀯𑀺𑀳𑁂𑀞𑀺𑀢𑀫𑁆𑀳𑀸, 𑀢𑀮𑀸𑀯𑀼𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀦𑁆𑀢𑀸;
𑀦 𑀚𑀸𑀢𑀼 𑀤𑀼𑀩𑁆𑀪𑁂𑀫 𑀇𑀫𑀲𑁆𑀲 𑀭𑀜𑁆𑀜𑁄, 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀁 𑀢𑁂 𑀧𑀝𑀺𑀲𑁆𑀲𑀼𑀡𑀸𑀫𑀸’’𑀢𑀺.
𑀢𑀢𑁆𑀣 ¶ ¶ 𑀧𑀝𑀺𑀲𑁆𑀲𑀼𑀡𑀸𑀫𑀸𑀢𑀺 ‘‘𑀏𑀯𑀁 𑀧𑀝𑀺𑀜𑁆𑀜𑀁 𑀅𑀥𑀺𑀯𑀸𑀲𑁂𑀫 𑀲𑀫𑁆𑀧𑀝𑀺𑀘𑁆𑀙𑀸𑀫, 𑀅𑀧𑀺𑀘 𑀔𑁄 𑀧𑀦 𑀫𑀬𑀁 𑀓𑀺𑀮𑀦𑁆𑀢𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀫, 𑀢𑀼𑀫𑁆𑀳𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀭𑀡𑀁, 𑀢𑀼𑀫𑁆𑀳𑁂𑀯 𑀓𑀣𑁂𑀣, 𑀫𑀬𑀁 𑀯𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀝𑀺𑀜𑁆𑀜𑀁 𑀤𑀲𑁆𑀲𑀸𑀫𑀸’’𑀢𑀺.
𑀅𑀣 𑀦𑁂 𑀩𑁄𑀥𑀺𑀲𑀢𑁆𑀢𑁄 ‘‘𑀢𑁂𑀦 𑀳𑀺 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋
‘‘𑀬𑀣𑀸 𑀧𑀺𑀢𑀸 𑀯𑀸 𑀅𑀣 𑀯𑀸𑀧𑀺 𑀫𑀸𑀢𑀸, 𑀅𑀦𑀼𑀓𑀫𑁆𑀧𑀓𑀸 𑀅𑀢𑁆𑀣𑀓𑀸𑀫𑀸 𑀧𑀚𑀸𑀦𑀁,.
𑀏𑀯𑀫𑁂𑀯 𑀯𑁄 𑀳𑁄𑀢𑀼 𑀅𑀬𑀜𑁆𑀘 𑀭𑀸𑀚𑀸, 𑀢𑀼𑀫𑁆𑀳𑁂 𑀘 𑀯𑁄 𑀳𑁄𑀣 𑀬𑀣𑁂𑀯 𑀧𑀼𑀢𑁆𑀢𑀸’’𑀢𑀺.
𑀅𑀣 ¶ 𑀦𑀁 𑀢𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸 𑀇𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋
‘‘𑀬𑀣𑀸 𑀧𑀺𑀢𑀸 𑀯𑀸 𑀅𑀣 𑀯𑀸𑀧𑀺 𑀫𑀸𑀢𑀸, 𑀅𑀦𑀼𑀓𑀫𑁆𑀧𑀓𑀸 𑀅𑀢𑁆𑀣𑀓𑀸𑀫𑀸 𑀧𑀚𑀸𑀦𑀁;
𑀏𑀯𑀫𑁂𑀯 𑀦𑁄 𑀳𑁄𑀢𑀼 𑀅𑀬𑀜𑁆𑀘 𑀭𑀸𑀚𑀸, 𑀫𑀬𑀫𑁆𑀧𑀺 𑀳𑁂𑀲𑁆𑀲𑀸𑀫 𑀬𑀣𑁂𑀯 𑀧𑀼𑀢𑁆𑀢𑀸’’𑀢𑀺.
𑀢𑀢𑁆𑀣 𑀢𑀼𑀫𑁆𑀳𑁂 𑀘 𑀯𑁄𑀢𑀺 𑀯𑁄-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁.
𑀇𑀢𑀺 𑀫𑀳𑀸𑀲𑀢𑁆𑀢𑁄 𑀢𑁂𑀲𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑁄𑀭𑀺𑀲𑀸𑀤𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀏𑀳𑀺, 𑀲𑀫𑁆𑀫, 𑀔𑀢𑁆𑀢𑀺𑀬𑁂 𑀫𑁄𑀘𑁂𑀳𑀻’’𑀢𑀺 𑀆𑀳. 𑀲𑁄 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺. 𑀭𑀸𑀚𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀯𑁂𑀤𑀦𑀧𑁆𑀧𑀢𑁆𑀢𑁄 𑀲𑀳 𑀩𑀦𑁆𑀥𑀦𑀙𑁂𑀤𑀸 𑀫𑀼𑀘𑁆𑀙𑀺𑀢𑁄 𑀪𑀽𑀫𑀺𑀬𑀁 𑀧𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑁄 𑀓𑀸𑀭𑀼𑀜𑁆𑀜𑀁 𑀓𑀢𑁆𑀯𑀸, ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀫𑀸 𑀏𑀯𑀁 𑀙𑀺𑀦𑁆𑀤𑀻’’𑀢𑀺 𑀏𑀓𑀁 𑀭𑀸𑀚𑀸𑀦𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀉𑀭𑁂 𑀓𑀢𑁆𑀯𑀸 ‘‘𑀇𑀤𑀸𑀦𑀺 𑀩𑀦𑁆𑀥𑀦𑀁 𑀙𑀺𑀦𑁆𑀤𑀸𑀳𑀻’’𑀢𑀺 𑀆𑀳. 𑀧𑁄𑀭𑀺𑀲𑀸𑀤𑁄 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺. 𑀫𑀳𑀸𑀲𑀢𑁆𑀢𑁄 𑀣𑀸𑀫𑀲𑀫𑁆𑀧𑀦𑁆𑀦𑀢𑀸𑀬 𑀦𑀁 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀑𑀭𑀲𑀧𑀼𑀢𑁆𑀢𑀁 𑀯𑀺𑀬 𑀫𑀼𑀤𑀼𑀘𑀺𑀢𑁆𑀢𑁂𑀦 𑀑𑀢𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀏𑀯𑀁 𑀲𑀩𑁆𑀩𑁂𑀧𑀺 𑀢𑁂 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀯𑀡𑁂 𑀥𑁄𑀯𑀺𑀢𑁆𑀯𑀸 𑀤𑀸𑀭𑀓𑀸𑀦𑀁 𑀓𑀡𑁆𑀡𑀢𑁄 𑀲𑀼𑀢𑁆𑀢𑀓𑀁 𑀯𑀺𑀬 𑀲𑀡𑀺𑀓𑀁 𑀭𑀚𑁆𑀚𑀼𑀬𑁄 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀩𑁆𑀩𑀮𑁄𑀳𑀺𑀢𑀁 𑀥𑁄𑀯𑀺𑀢𑁆𑀯𑀸 𑀯𑀡𑁂 𑀦𑀺𑀤𑁆𑀤𑁄𑀲𑁂 𑀓𑀢𑁆𑀯𑀸, ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀏𑀓𑀁 𑀭𑀼𑀓𑁆𑀔𑀢𑀘𑀁 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀆𑀳𑀭𑀸’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑀢𑀮𑀸𑀦𑀺 𑀫𑀓𑁆𑀔𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀯𑀡𑁄 𑀨𑀸𑀲𑀼𑀓𑀁 𑀅𑀳𑁄𑀲𑀺. 𑀧𑁄𑀭𑀺𑀲𑀸𑀤𑁄 𑀢𑀡𑁆𑀟𑀼𑀮𑀁 𑀕𑀳𑁂𑀢𑁆𑀯𑀸 𑀢𑀭𑀮𑀁 𑀧𑀘𑀺 ¶ , 𑀉𑀪𑁄 𑀚𑀦𑀸 𑀧𑀭𑁄𑀲𑀢𑀁 𑀔𑀢𑁆𑀢𑀺𑀬𑁂 𑀧𑀸𑀬𑁂𑀲𑀼𑀁. 𑀇𑀢𑀺 𑀢𑁂 𑀲𑀩𑁆𑀩𑁂𑀯 𑀲𑀦𑁆𑀢𑀧𑁆𑀧𑀺𑀢𑀸, 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄. 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄 𑀘 𑀫𑀚𑁆𑀛𑀦𑁆𑀳𑀺𑀓𑁂 𑀘 𑀲𑀸𑀬𑀜𑁆𑀘 𑀢𑀭𑀮𑀫𑁂𑀯 𑀧𑀸𑀬𑁂𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀲𑀲𑀺𑀢𑁆𑀣𑀓𑀬𑀸𑀕𑀼𑀁 𑀧𑀸𑀬𑁂𑀲𑀼𑀁, 𑀢𑀸𑀯𑀢𑀸 𑀢𑁂 𑀅𑀭𑁄𑀕𑀸 𑀅𑀳𑁂𑀲𑀼𑀁.
𑀅𑀣 ¶ 𑀦𑁂 𑀫𑀳𑀸𑀲𑀢𑁆𑀢𑁄 ‘‘𑀕𑀦𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀏𑀳𑀺, 𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀲𑀓𑀁 𑀭𑀝𑁆𑀞𑀁 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀲𑁄 𑀭𑁄𑀤𑀫𑀸𑀦𑁄 𑀢𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀢𑁆𑀯𑀁, 𑀲𑀫𑁆𑀫, 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙, 𑀅𑀳𑀁 𑀇𑀥𑁂𑀯 𑀯𑀦𑀫𑀽𑀮𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀲𑀫𑁆𑀫, 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀭𑀫𑀡𑀻𑀬𑀁 𑀢𑁂 𑀭𑀝𑁆𑀞𑀁, 𑀩𑀸𑀭𑀸𑀡𑀲𑀺𑀬𑀁 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺. ‘‘𑀲𑀫𑁆𑀫 𑀓𑀺𑀁 𑀓𑀣𑁂𑀲𑀺, 𑀦 𑀲𑀓𑁆𑀓𑀸 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁, 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀳𑀺 ¶ 𑀫𑁂 𑀯𑁂𑀭𑀺𑀦𑁄, 𑀢𑁂 ‘𑀇𑀫𑀺𑀦𑀸 𑀫𑀬𑁆𑀳𑀁 𑀫𑀸𑀢𑀸 𑀔𑀸𑀤𑀺𑀢𑀸, 𑀫𑀬𑁆𑀳𑀁 𑀧𑀺𑀢𑀸, 𑀫𑀬𑁆𑀳𑀁 𑀪𑀸𑀢𑀸’𑀢𑀺 𑀫𑀁 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺, ‘𑀕𑀡𑁆𑀳𑀣 𑀇𑀫𑀁 𑀘𑁄𑀭’𑀦𑁆𑀢𑀺 𑀏𑀓𑁂𑀓𑀤𑀡𑁆𑀟𑁂𑀦 𑀯𑀸 𑀏𑀓𑁂𑀓𑀮𑁂𑀟𑁆𑀟𑀼𑀦𑀸 𑀯𑀸 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀺, 𑀅𑀳𑀜𑁆𑀘 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦 𑀲𑀓𑁆𑀓𑀸 𑀫𑀬𑀸 𑀧𑀭𑀁 𑀫𑀸𑀭𑁂𑀢𑀼𑀁, 𑀢𑀲𑁆𑀫𑀸 𑀦𑀸𑀳𑀁 𑀕𑀘𑁆𑀙𑀸𑀫𑀺, 𑀅𑀳𑀁 𑀫𑀦𑀼𑀲𑁆𑀲𑀫𑀁𑀲𑀢𑁄 𑀯𑀺𑀭𑀢𑀢𑁆𑀢𑀸 𑀓𑀺𑀢𑁆𑀢𑀓𑀁 𑀚𑀻𑀯𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀫𑀫 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀦𑀢𑁆𑀣𑀻’’𑀢𑀺 𑀭𑁄𑀤𑀺𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀆𑀳. 𑀅𑀣 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸, ‘‘𑀲𑀫𑁆𑀫 𑀧𑁄𑀭𑀺𑀲𑀸𑀤, 𑀫𑀸 𑀘𑀺𑀦𑁆𑀢𑀬𑀺, 𑀲𑀼𑀢𑀲𑁄𑀫𑁄 𑀦𑀸𑀫𑀸𑀳𑀁, 𑀫𑀬𑀸 𑀢𑀸𑀤𑀺𑀲𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀯𑀺𑀦𑀻𑀢𑁄, 𑀩𑀸𑀭𑀸𑀡𑀲𑀺𑀯𑀸𑀲𑀺𑀓𑁂𑀲𑀼 𑀓𑀺𑀁 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀅𑀳𑀁 𑀢𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀺, 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀫𑁆𑀧𑀺 𑀦𑀕𑀭𑁂 𑀫𑀫 𑀯𑁂𑀭𑀺𑀦𑁄 𑀅𑀢𑁆𑀣𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀫𑀺𑀦𑀸 𑀫𑀫 𑀯𑀘𑀦𑀁 𑀓𑀭𑁄𑀦𑁆𑀢𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀧𑁄𑀭𑀸𑀡𑀓𑀬𑀲𑁂 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑁄 𑀏𑀲 𑀫𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀮𑁄𑀪𑀦𑀢𑁆𑀣𑀸𑀬 𑀦𑀕𑀭𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋
‘‘𑀘𑀢𑀼𑀧𑁆𑀧𑀤𑀁 𑀲𑀓𑀼𑀡𑀜𑁆𑀘𑀸𑀧𑀺 𑀫𑀁𑀲𑀁, 𑀲𑀽𑀤𑁂𑀳𑀺 𑀭𑀦𑁆𑀥𑀁 𑀲𑀼𑀓𑀢𑀁 𑀲𑀼𑀦𑀺𑀝𑁆𑀞𑀺𑀢𑀁;
𑀲𑀼𑀥𑀁𑀯 𑀇𑀦𑁆𑀤𑁄 𑀧𑀭𑀺𑀪𑀼𑀜𑁆𑀚𑀺𑀬𑀸𑀦, 𑀳𑀺𑀢𑁆𑀯𑀸 𑀓𑀣𑁂𑀓𑁄 𑀭𑀫𑀲𑀻 𑀅𑀭𑀜𑁆𑀜𑁂.
‘‘𑀢𑀸 ¶ 𑀔𑀢𑁆𑀢𑀺𑀬𑀸 𑀯𑁂𑀮𑁆𑀮𑀺𑀯𑀺𑀮𑀸𑀓𑀫𑀚𑁆𑀛𑀸, 𑀅𑀮𑀗𑁆𑀓𑀢𑀸 𑀲𑀫𑁆𑀧𑀭𑀺𑀯𑀸𑀭𑀬𑀺𑀢𑁆𑀯𑀸;
𑀇𑀦𑁆𑀤𑀁𑀯 𑀤𑁂𑀯𑁂𑀲𑀼 𑀧𑀫𑁄𑀤𑀬𑀺𑀁𑀲𑀼, 𑀳𑀺𑀢𑁆𑀯𑀸 𑀓𑀣𑁂𑀓𑁄 𑀭𑀫𑀲𑀻 𑀅𑀭𑀜𑁆𑀜𑁂.
‘‘𑀢𑀫𑁆𑀩𑀽𑀧𑀥𑀸𑀦𑁂 𑀩𑀳𑀼𑀕𑁄𑀡𑀓𑀫𑁆𑀳𑀺, 𑀲𑀼𑀪𑀫𑁆𑀳𑀺 𑀲𑀩𑁆𑀩𑀲𑁆𑀲𑀬𑀦𑀫𑁆𑀳𑀺 𑀲𑀗𑁆𑀕𑁂;
𑀲𑁂𑀬𑁆𑀬𑀲𑁆𑀲 𑀫𑀚𑁆𑀛𑀫𑁆𑀳𑀺 𑀲𑀼𑀔𑀁 𑀲𑀬𑀺𑀢𑁆𑀯𑀸
𑀳𑀺𑀢𑁆𑀯𑀸 𑀓𑀣𑁂𑀓𑁄 𑀭𑀫𑀲𑀻 𑀅𑀭𑀜𑁆𑀜𑁂.
‘‘𑀧𑀸𑀡𑀺𑀲𑁆𑀲𑀭𑀁 𑀓𑀼𑀫𑁆𑀪𑀣𑀽𑀡𑀁 𑀦𑀺𑀲𑀻𑀣𑁂, 𑀅𑀣𑁄𑀧𑀺 𑀯𑁂 𑀦𑀺𑀧𑁆𑀧𑀼𑀭𑀺𑀲𑀫𑁆𑀧𑀺 𑀢𑀽𑀭𑀺𑀬𑀁;
𑀩𑀳𑀼𑀁 𑀲𑀼𑀕𑀻𑀢𑀜𑁆𑀘 𑀲𑀼𑀯𑀸𑀤𑀺𑀢𑀜𑁆𑀘, 𑀳𑀺𑀢𑁆𑀯𑀸 𑀓𑀣𑁂𑀓𑁄 𑀭𑀫𑀲𑀻 𑀅𑀭𑀜𑁆𑀜𑁂.
‘‘𑀉𑀬𑁆𑀬𑀸𑀦𑀲𑀫𑁆𑀧𑀦𑁆𑀦𑀁 ¶ 𑀧𑀳𑀽𑀢𑀫𑀸𑀮𑁆𑀬𑀁, 𑀫𑀺𑀕𑀸𑀚𑀺𑀦𑀽𑀧𑁂𑀢𑀁 𑀧𑀼𑀭𑀁 𑀲𑀼𑀭𑀫𑁆𑀫𑀁;
𑀳𑀬𑁂𑀳𑀺 𑀦𑀸𑀕𑁂𑀳𑀺 𑀭𑀣𑁂𑀳𑀼𑀧𑁂𑀢𑀁, 𑀳𑀺𑀢𑁆𑀯𑀸 𑀓𑀣𑁂𑀓𑁄 𑀭𑀫𑀲𑀻 𑀅𑀭𑀜𑁆𑀜𑁂’’𑀢𑀺.
𑀢𑀢𑁆𑀣 ¶ 𑀲𑀼𑀓𑀢𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀲𑀼𑀝𑁆𑀞𑀼 𑀓𑀢𑀁. 𑀲𑀼𑀦𑀺𑀝𑁆𑀞𑀺𑀢𑀦𑁆𑀢𑀺 𑀦𑀸𑀦𑀸𑀲𑀫𑁆𑀪𑀸𑀭𑀬𑁄𑀚𑀦𑁂𑀦 𑀲𑀼𑀝𑁆𑀞𑀼 𑀦𑀺𑀝𑁆𑀞𑀺𑀢𑀁. 𑀓𑀣𑁂𑀓𑁄𑀢𑀺 𑀓𑀣𑀁 𑀏𑀓𑁄. 𑀭𑀫𑀲𑀻𑀢𑀺 𑀫𑀽𑀮𑀨𑀮𑀸𑀤𑀻𑀦𑀺 𑀔𑀸𑀤𑀦𑁆𑀢𑁄 𑀓𑀣𑀁 𑀭𑀫𑀺𑀲𑁆𑀲𑀲𑀺, ‘‘𑀏𑀳𑀺, 𑀫𑀳𑀸𑀭𑀸𑀚, 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀯𑁂𑀮𑁆𑀮𑀺𑀯𑀺𑀮𑀸𑀓𑀫𑀚𑁆𑀛𑀸𑀢𑀺 𑀏𑀢𑁆𑀣 𑀯𑁂𑀮𑁆𑀮𑀻𑀢𑀺 𑀭𑀸𑀲𑀺, 𑀯𑀺𑀮𑀸𑀓𑀫𑀚𑁆𑀛𑀸𑀢𑀺 𑀯𑀺𑀮𑀕𑁆𑀕𑀫𑀚𑁆𑀛𑀸. 𑀉𑀢𑁆𑀢𑀢𑁆𑀢𑀖𑀦𑀲𑀼𑀯𑀡𑁆𑀡𑀭𑀸𑀲𑀺𑀧𑀪𑀸 𑀘𑁂𑀯 𑀢𑀦𑀼𑀤𑀻𑀖𑀫𑀚𑁆𑀛𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺. 𑀤𑁂𑀯𑁂𑀲𑀽𑀢𑀺 𑀤𑁂𑀯𑀮𑁄𑀓𑁂𑀲𑀼 𑀅𑀘𑁆𑀙𑀭𑀸 𑀇𑀦𑁆𑀤𑀁 𑀯𑀺𑀬 𑀭𑀫𑀡𑀻𑀬𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀧𑀼𑀩𑁆𑀩𑁂 𑀢𑀁 𑀧𑀫𑁄𑀤𑀬𑀺𑀁𑀲𑀼, 𑀢𑀸 𑀳𑀺𑀢𑁆𑀯𑀸 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀲𑀺, ‘‘𑀏𑀳𑀺, 𑀲𑀫𑁆𑀫, 𑀕𑀘𑁆𑀙𑀸𑀫𑀸’’𑀢𑀺. 𑀢𑀫𑁆𑀩𑀽𑀧𑀥𑀸𑀦𑁂𑀢𑀺 𑀭𑀢𑁆𑀢𑀽𑀧𑀥𑀸𑀦𑁂. 𑀲𑀩𑁆𑀩𑀲𑁆𑀲𑀬𑀦𑀫𑁆𑀳𑀻𑀢𑀺 𑀲𑀩𑁆𑀩𑀢𑁆𑀣𑀭𑀡𑀢𑁆𑀣𑀢𑁂 𑀲𑀬𑀦𑁂. 𑀲𑀗𑁆𑀕𑁂𑀢𑀺 𑀅𑀦𑁂𑀓𑀪𑀽𑀫𑀺𑀓𑁂 𑀤𑀲𑁆𑀲𑁂𑀢𑁆𑀯𑀸 𑀅𑀤𑁆𑀥𑀭𑀢𑁆𑀢𑀅𑀗𑁆𑀕𑀬𑀼𑀢𑁆𑀢𑁂 𑀢𑀢𑁆𑀣 𑀢𑁆𑀯𑀁 𑀧𑀼𑀩𑁆𑀩𑁂 𑀲𑀬𑀻𑀢𑀺 𑀅𑀢𑁆𑀣𑁄. 𑀲𑀼𑀔𑀦𑁆𑀢𑀺 𑀢𑀸𑀤𑀺𑀲𑀲𑁆𑀲 𑀲𑀬𑀦𑀲𑁆𑀲 𑀫𑀚𑁆𑀛𑀫𑁆𑀳𑀺 𑀲𑀼𑀔𑀁 𑀲𑀬𑀺𑀢𑁆𑀯𑀸𑀦 𑀇𑀤𑀸𑀦𑀺 𑀓𑀣𑀁 𑀅𑀭𑀜𑁆𑀜𑁂 𑀭𑀫𑀺𑀲𑁆𑀲𑀲𑀺, ‘‘𑀏𑀳𑀺 𑀕𑀘𑁆𑀙𑀸𑀫, 𑀲𑀫𑁆𑀫𑀸’’𑀢𑀺. 𑀦𑀺𑀲𑀻𑀣𑁂𑀢𑀺 𑀭𑀢𑁆𑀢𑀺𑀪𑀸𑀕𑁂. 𑀳𑀺𑀢𑁆𑀯𑀸𑀢𑀺 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀙𑀟𑁆𑀟𑁂𑀢𑁆𑀯𑀸. 𑀉𑀬𑁆𑀬𑀸𑀦𑀲𑀫𑁆𑀧𑀦𑁆𑀦𑀁 𑀧𑀳𑀽𑀢𑀫𑀸𑀮𑁆𑀬𑀦𑁆𑀢𑀺, 𑀫𑀳𑀸𑀭𑀸𑀚, 𑀢𑀯 𑀉𑀬𑁆𑀬𑀸𑀦𑀲𑀫𑁆𑀧𑀦𑁆𑀦𑀁 𑀦𑀸𑀦𑀸𑀯𑀺𑀥𑀧𑀼𑀧𑁆𑀨𑀁. 𑀫𑀺𑀕𑀸𑀚𑀺𑀦𑀽𑀧𑁂𑀢𑀁 𑀧𑀼𑀭𑀁 𑀲𑀼𑀭𑀫𑁆𑀫𑀦𑁆𑀢𑀺 ¶ 𑀢𑀁 𑀉𑀬𑁆𑀬𑀸𑀦𑀁 𑀫𑀺𑀕𑀸𑀚𑀺𑀦𑀁 𑀦𑀸𑀫 𑀦𑀸𑀫𑁂𑀦, 𑀢𑁂𑀦 𑀉𑀧𑁂𑀢𑀁 𑀧𑀼𑀭𑀫𑁆𑀧𑀺 𑀢𑁂 𑀲𑀼𑀝𑁆𑀞𑀼 𑀭𑀫𑁆𑀫𑀁. 𑀳𑀺𑀢𑁆𑀯𑀸𑀢𑀺 𑀏𑀯𑀭𑀽𑀧𑀁 𑀫𑀦𑁄𑀭𑀫𑀁 𑀦𑀕𑀭𑀁 𑀙𑀟𑁆𑀟𑁂𑀢𑁆𑀯𑀸.
𑀇𑀢𑀺 𑀫𑀳𑀸𑀲𑀢𑁆𑀢𑁄 ‘‘𑀅𑀧𑁆𑀧𑁂𑀯 𑀦𑀸𑀫𑁂𑀲 𑀧𑀼𑀩𑁆𑀩𑁂 𑀉𑀧𑀪𑀼𑀢𑁆𑀢𑀧𑀭𑀺𑀪𑁄𑀕𑀭𑀲𑀁 𑀲𑀭𑀺𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀪𑀯𑁂𑀬𑁆𑀬𑀸’’𑀢𑀺 𑀧𑀞𑀫𑀁 𑀪𑁄𑀚𑀦𑁂𑀦 𑀧𑀮𑁄𑀪𑁂𑀲𑀺, 𑀤𑀼𑀢𑀺𑀬𑀁 𑀓𑀺𑀮𑁂𑀲𑁂𑀦, 𑀢𑀢𑀺𑀬𑀁 𑀲𑀬𑀦𑁂𑀦, 𑀘𑀢𑀼𑀢𑁆𑀣𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂𑀦, 𑀧𑀜𑁆𑀘𑀫𑀁 𑀉𑀬𑁆𑀬𑀸𑀦𑁂𑀦 𑀘𑁂𑀯 𑀦𑀕𑀭𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀏𑀢𑁆𑀢𑀓𑁂𑀳𑀺 𑀧𑀮𑁄𑀪𑁂𑀢𑁆𑀯𑀸 ‘‘𑀏𑀳𑀺, 𑀫𑀳𑀸𑀭𑀸𑀚, 𑀅𑀳𑀁 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀲𑀓𑀭𑀝𑁆𑀞𑀁 𑀕𑀫𑀺𑀲𑁆𑀲𑀸𑀫𑀺, 𑀲𑀘𑁂 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦 𑀮𑀪𑀺𑀲𑁆𑀲𑀲𑀺, 𑀉𑀧𑀟𑁆𑀠𑀭𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀺, 𑀓𑀺𑀁 𑀢𑁂 𑀅𑀭𑀜𑁆𑀜𑀯𑀸𑀲𑁂𑀦, 𑀫𑀫 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀲𑀼𑀢𑀲𑁄𑀫𑁄 𑀫𑀬𑁆𑀳𑀁 𑀅𑀢𑁆𑀣𑀓𑀸𑀫𑁄 𑀅𑀦𑀼𑀓𑀫𑁆𑀧𑀓𑁄, 𑀧𑀞𑀫𑀁 𑀫𑀁 𑀓𑀮𑁆𑀬𑀸𑀡𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘𑀇𑀤𑀸𑀦𑀺 𑀧𑁄𑀭𑀸𑀡𑀓𑀬𑀲𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀲𑀓𑁆𑀔𑀺𑀲𑁆𑀲𑀢𑀺 𑀘𑁂𑀲 𑀧𑀢𑀺𑀝𑁆𑀞𑀸𑀧𑁂𑀢𑀼𑀁, 𑀇𑀫𑀺𑀦𑀸 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀫𑁂 𑀅𑀭𑀜𑁆𑀜𑀯𑀸𑀲𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ¶ 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑀲𑁆𑀲 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀯𑀡𑁆𑀡𑀁 𑀓𑀣𑁂𑀢𑀼𑀓𑀸𑀫𑁄 ‘‘𑀲𑀫𑁆𑀫, 𑀲𑀼𑀢𑀲𑁄𑀫, 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀢𑁄 𑀲𑀸𑀥𑀼𑀢𑀭𑀁, 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑀢𑁄 𑀯𑀸 𑀧𑀸𑀧𑀢𑀭𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀆𑀳 𑁋
‘‘𑀓𑀸𑀴𑀧𑀓𑁆𑀔𑁂 𑀬𑀣𑀸 𑀘𑀦𑁆𑀤𑁄, 𑀳𑀸𑀬𑀢𑁂𑀯 𑀲𑀼𑀯𑁂 𑀲𑀼𑀯𑁂;
𑀓𑀸𑀴𑀧𑀓𑁆𑀔𑀽𑀧𑀫𑁄 𑀭𑀸𑀚, 𑀅𑀲𑀢𑀁 𑀳𑁄𑀢𑀺 𑀲𑀫𑀸𑀕𑀫𑁄.
‘‘𑀬𑀣𑀸𑀳𑀁 𑀭𑀲𑀓𑀫𑀸𑀕𑀫𑁆𑀫, 𑀲𑀽𑀤𑀁 𑀓𑀸𑀧𑀼𑀭𑀺𑀲𑀸𑀥𑀫𑀁;
𑀅𑀓𑀸𑀲𑀺𑀁 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑁂𑀦 𑀕𑀘𑁆𑀙𑀸𑀫𑀺 𑀤𑀼𑀕𑁆𑀕𑀢𑀺𑀁.
‘‘𑀲𑀼𑀓𑁆𑀓𑀧𑀓𑁆𑀔𑁂 ¶ 𑀬𑀣𑀸 𑀘𑀦𑁆𑀤𑁄, 𑀯𑀟𑁆𑀠𑀢𑁂𑀯 𑀲𑀼𑀯𑁂 𑀲𑀼𑀯𑁂;
𑀲𑀼𑀓𑁆𑀓𑀧𑀓𑁆𑀔𑀽𑀧𑀫𑁄 𑀭𑀸𑀚, 𑀲𑀢𑀁 𑀳𑁄𑀢𑀺 𑀲𑀫𑀸𑀕𑀫𑁄.
‘‘𑀬𑀣𑀸𑀳𑀁 𑀢𑀼𑀯𑀫𑀸𑀕𑀫𑁆𑀫, 𑀲𑀼𑀢𑀲𑁄𑀫 𑀯𑀺𑀚𑀸𑀦𑀳𑀺;
𑀓𑀸𑀳𑀸𑀫𑀺 𑀓𑀼𑀲𑀮𑀁 𑀓𑀫𑁆𑀫𑀁, 𑀬𑁂𑀦 𑀕𑀘𑁆𑀙𑀸𑀫𑀺 𑀲𑀼𑀕𑁆𑀕𑀢𑀺𑀁.
‘‘𑀣𑀮𑁂 𑀬𑀣𑀸 𑀯𑀸𑀭𑀺 𑀚𑀦𑀺𑀦𑁆𑀤 𑀯𑀼𑀝𑁆𑀞𑀁, 𑀅𑀦𑀤𑁆𑀥𑀦𑁂𑀬𑁆𑀬𑀁 𑀦 𑀘𑀺𑀭𑀝𑁆𑀞𑀺𑀢𑀻𑀓𑀁;
𑀏𑀯𑀫𑁆𑀧𑀺 ¶ 𑀳𑁄𑀢𑀺 𑀅𑀲𑀢𑀁 𑀲𑀫𑀸𑀕𑀫𑁄, 𑀅𑀦𑀤𑁆𑀥𑀦𑁂𑀬𑁆𑀬𑁄 𑀉𑀤𑀓𑀁 𑀣𑀮𑁂𑀯.
‘‘𑀲𑀭𑁂 𑀬𑀣𑀸 𑀯𑀸𑀭𑀺 𑀚𑀦𑀺𑀦𑁆𑀤 𑀯𑀼𑀝𑁆𑀞𑀁, 𑀘𑀺𑀭𑀝𑁆𑀞𑀺𑀢𑀻𑀓𑀁 𑀦𑀭𑀯𑀻𑀭𑀲𑁂𑀝𑁆𑀞;
𑀏𑀯𑀫𑁆𑀧𑀺 𑀯𑁂 𑀳𑁄𑀢𑀺 𑀲𑀢𑀁 𑀲𑀫𑀸𑀕𑀫𑁄, 𑀘𑀺𑀭𑀝𑁆𑀞𑀺𑀢𑀻𑀓𑁄 𑀉𑀤𑀓𑀁 𑀲𑀭𑁂𑀯.
‘‘𑀅𑀩𑁆𑀬𑀸𑀬𑀺𑀓𑁄 𑀳𑁄𑀢𑀺 𑀲𑀢𑀁 𑀲𑀫𑀸𑀕𑀫𑁄, 𑀬𑀸𑀯𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬 𑀢𑀣𑁂𑀯 𑀳𑁄𑀢𑀺;
𑀔𑀺𑀧𑁆𑀧𑀜𑁆𑀳𑀺 𑀯𑁂𑀢𑀺 𑀅𑀲𑀢𑀁 𑀲𑀫𑀸𑀕𑀫𑁄, 𑀢𑀲𑁆𑀫𑀸 𑀲𑀢𑀁 𑀥𑀫𑁆𑀫𑁄 𑀅𑀲𑀩𑁆𑀪𑀺 𑀆𑀭𑀓𑀸’’𑀢𑀺.
𑀢𑀢𑁆𑀣 𑀲𑀼𑀯𑁂 𑀲𑀼𑀯𑁂𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂. 𑀅𑀦𑀤𑁆𑀥𑀦𑁂𑀬𑁆𑀬𑀦𑁆𑀢𑀺 𑀦 𑀅𑀤𑁆𑀥𑀸𑀦𑀓𑁆𑀔𑀫𑀁. 𑀲𑀭𑁂𑀢𑀺 𑀲𑀫𑀼𑀤𑁆𑀤𑁂. 𑀦𑀭𑀯𑀻𑀭𑀲𑁂𑀝𑁆𑀞𑀸𑀢𑀺 𑀦𑀭𑁂𑀲𑀼 𑀯𑀻𑀭𑀺𑀬𑁂𑀦 𑀲𑁂𑀝𑁆𑀞. 𑀉𑀤𑀓𑀁 𑀲𑀭𑁂𑀯𑀸𑀢𑀺 𑀲𑀫𑀼𑀤𑁆𑀤𑁂 𑀯𑀼𑀝𑁆𑀞𑀉𑀤𑀓𑀁 𑀯𑀺𑀬. 𑀅𑀩𑁆𑀬𑀸𑀬𑀺𑀓𑁄𑀢𑀺 𑀅𑀯𑀺𑀕𑀘𑁆𑀙𑀦𑀓𑁄. 𑀬𑀸𑀯𑀫𑁆𑀧𑀺 ¶ 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀚𑀻𑀯𑀺𑀢𑀁 𑀢𑀺𑀝𑁆𑀞𑁂𑀬𑁆𑀬, 𑀢𑀢𑁆𑀢𑀓𑀁 𑀓𑀸𑀮𑀁 𑀢𑀣𑁂𑀯 𑀳𑁄𑀢𑀺, 𑀦 𑀚𑀻𑀭𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀫𑀺𑀢𑁆𑀢𑀪𑀸𑀯𑁄𑀢𑀺.
𑀇𑀢𑀺 𑀧𑁄𑀭𑀺𑀲𑀸𑀤𑁄 𑀲𑀢𑁆𑀢𑀳𑀺 𑀕𑀸𑀣𑀸𑀳𑀺 𑀫𑀳𑀸𑀲𑀢𑁆𑀢𑀲𑁆𑀲𑁂𑀯 𑀯𑀡𑁆𑀡𑀁 𑀓𑀣𑁂𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀧𑁄𑀭𑀺𑀲𑀸𑀤𑀜𑁆𑀘 𑀢𑁂 𑀘 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀦𑁆𑀢𑀕𑀸𑀫𑀁 𑀅𑀕𑀫𑀸𑀲𑀺. 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀺𑀦𑁄 𑀫𑀳𑀸𑀲𑀢𑁆𑀢𑀁 𑀤𑀺𑀲𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀅𑀫𑀘𑁆𑀘𑀸 𑀩𑀮𑀓𑀸𑀬𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀢𑁂𑀦 𑀧𑀭𑀺𑀯𑀸𑀭𑁂𑀦 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀅𑀕𑀫𑀸𑀲𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀚𑀦𑀧𑀤𑀯𑀸𑀲𑀺𑀦𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀅𑀦𑀼𑀕𑀘𑁆𑀙𑀺𑀁𑀲𑀼, 𑀫𑀳𑀦𑁆𑀢𑁄 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺, 𑀢𑁂𑀦 𑀲𑀤𑁆𑀥𑀺𑀁 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀢𑀤𑀸 𑀧𑁄𑀭𑀺𑀲𑀸𑀤𑀲𑁆𑀲 𑀧𑀼𑀢𑁆𑀢𑁄 𑀭𑀸𑀚𑀸 𑀳𑁄𑀢𑀺, 𑀲𑁂𑀦𑀸𑀧𑀢𑀺 𑀓𑀸𑀴𑀳𑀢𑁆𑀣𑀺𑀬𑁂𑀯. 𑀦𑀸𑀕𑀭𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀲𑀼𑀢𑀲𑁄𑀫𑁄 𑀓𑀺𑀭 𑀧𑁄𑀭𑀺𑀲𑀸𑀤𑀁 𑀤𑀫𑁂𑀢𑁆𑀯𑀸 𑀆𑀤𑀸𑀬 𑀇𑀥𑀸𑀕𑀘𑁆𑀙𑀢𑀺, 𑀦𑀕𑀭𑀫𑀲𑁆𑀲 𑀧𑀯𑀺𑀲𑀺𑀢𑀼𑀁 𑀦 𑀤𑀲𑁆𑀲𑀸𑀫𑀸’’𑀢𑀺 𑀲𑀻𑀖𑀁 𑀦𑀕𑀭𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀆𑀯𑀼𑀥𑀳𑀢𑁆𑀣𑀸 𑀅𑀝𑁆𑀞𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀤𑁆𑀯𑀸𑀭𑀸𑀦𑀁 𑀧𑀺𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑁄𑀭𑀺𑀲𑀸𑀤𑀜𑁆𑀘 𑀧𑀭𑁄𑀲𑀢𑀜𑁆𑀘 𑀭𑀸𑀚𑀸𑀦𑁄 𑀑𑀳𑀸𑀬 𑀓𑀢𑀺𑀧𑀬𑁂𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀲𑀼𑀢𑀲𑁄𑀫𑀭𑀸𑀚𑀸, 𑀤𑁆𑀯𑀸𑀭𑀁 𑀯𑀺𑀯𑀭𑀣𑀸’’𑀢𑀺 𑀆𑀳. 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 ‘‘𑀔𑀺𑀧𑁆𑀧𑀁 ¶ 𑀯𑀺𑀯𑀭𑀣𑀸’’𑀢𑀺 𑀯𑀺𑀯𑀭𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀦𑀕𑀭𑀁 𑀧𑀸𑀯𑀺𑀲𑀺. 𑀭𑀸𑀚𑀸 𑀘 𑀓𑀸𑀴𑀳𑀢𑁆𑀣𑀺 𑀘𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 ¶ 𑀓𑀢𑁆𑀯𑀸 𑀆𑀤𑀸𑀬 𑀧𑀸𑀲𑀸𑀤𑀁 𑀆𑀭𑁄𑀧𑀬𑀺𑀁𑀲𑀼.
𑀲𑁄 𑀭𑀸𑀚𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑁄𑀭𑀺𑀲𑀸𑀤𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀲𑁂𑀲𑀸𑀫𑀘𑁆𑀘𑁂 𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀸𑀴𑀳𑀢𑁆𑀣𑀺𑀁 𑀆𑀳 𑁋 ‘‘𑀓𑀸𑀴𑀳𑀢𑁆𑀣𑀺, 𑀓𑀲𑁆𑀫𑀸 𑀭𑀜𑁆𑀜𑁄 𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀦 𑀤𑁂𑀣𑀸’’𑀢𑀺? ‘‘𑀲𑁄 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀩𑀳𑀽 𑀫𑀦𑀼𑀲𑁆𑀲𑁂 𑀔𑀸𑀤𑀺, 𑀔𑀢𑁆𑀢𑀺𑀬𑁂𑀳𑀺 𑀅𑀓𑀢𑁆𑀢𑀩𑁆𑀩𑀁 𑀓𑀭𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀙𑀺𑀤𑁆𑀤𑀫𑀓𑀸𑀲𑀺, 𑀏𑀯𑀭𑀽𑀧𑁄 𑀧𑀸𑀧𑀥𑀫𑁆𑀫𑁄, 𑀢𑁂𑀦 𑀓𑀸𑀭𑀡𑁂𑀦𑀸’’𑀢𑀺. ‘‘𑀇𑀤𑀸𑀦𑀺 ‘𑀲𑁄 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀢𑀁 𑀤𑀫𑁂𑀢𑁆𑀯𑀸 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺𑀁, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀓𑀜𑁆𑀘𑀺 𑀦 𑀯𑀺𑀳𑁂𑀞𑁂𑀲𑁆𑀲𑀢𑀺, 𑀦𑀢𑁆𑀣𑀺 𑀯𑁄 𑀢𑀢𑁄 𑀪𑀬𑀁, 𑀏𑀯𑀁 𑀫𑀸 𑀓𑀭𑀺𑀢𑁆𑀣, 𑀧𑀼𑀢𑁆𑀢𑁂𑀳𑀺 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸, 𑀫𑀸𑀢𑀸𑀧𑀺𑀢𑀼𑀧𑁄𑀲𑀓𑀸 𑀳𑀺 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺, 𑀇𑀢𑀭𑁂 𑀦𑀺𑀭𑀬’’𑀦𑁆𑀢𑀺 𑀏𑀯𑀁 𑀲𑁄 𑀦𑀺𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀢𑁆𑀢𑀭𑀸𑀚𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸, ‘‘𑀓𑀸𑀴𑀳𑀢𑁆𑀣𑀺, 𑀢𑁆𑀯𑀁 𑀭𑀜𑁆𑀜𑁄 𑀲𑀳𑀸𑀬𑁄 𑀘𑁂𑀯 𑀲𑁂𑀯𑀓𑁄 𑀘, 𑀭𑀜𑁆𑀜𑀸𑀧𑀺 𑀫𑀳𑀦𑁆𑀢𑁂 𑀇𑀲𑁆𑀲𑀭𑀺𑀬𑁂 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑀬𑀸𑀧𑀺 𑀭𑀜𑁆𑀜𑁄 𑀅𑀢𑁆𑀣𑀁 𑀘𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑁂𑀦𑀸𑀧𑀢𑀺𑀫𑁆𑀧𑀺 𑀅𑀦𑀼𑀲𑀸𑀲𑀺𑀢𑁆𑀯𑀸, ‘‘𑀤𑁂𑀯𑀺, 𑀢𑁆𑀯𑀫𑁆𑀧𑀺 𑀓𑀼𑀮𑀕𑁂𑀳𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀧𑁆𑀧𑀢𑁆𑀢𑀸, 𑀢𑀬𑀸𑀧𑀺 𑀢𑀲𑁆𑀲 𑀅𑀢𑁆𑀣𑀁 𑀘𑀭𑀺𑀢𑀼𑀁 ¶ 𑀯𑀝𑁆𑀝𑀢𑀻’’𑀢𑀺 𑀤𑁂𑀯𑀺𑀬𑀸𑀧𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀕𑀸𑀣𑀸 𑀆𑀳 𑁋
‘‘𑀦 𑀲𑁄 𑀭𑀸𑀚𑀸 𑀬𑁄 𑀅𑀚𑁂𑀬𑁆𑀬𑀁 𑀚𑀺𑀦𑀸𑀢𑀺, 𑀦 𑀲𑁄 𑀲𑀔𑀸 𑀬𑁄 𑀲𑀔𑀸𑀭𑀁 𑀚𑀺𑀦𑀸𑀢𑀺;
𑀦 𑀲𑀸 𑀪𑀭𑀺𑀬𑀸 𑀬𑀸 𑀧𑀢𑀺𑀦𑁄 𑀦 𑀯𑀺𑀪𑁂𑀢𑀺, 𑀦 𑀢𑁂 𑀧𑀼𑀢𑁆𑀢𑀸 𑀬𑁂 𑀦 𑀪𑀭𑀦𑁆𑀢𑀺 𑀚𑀺𑀡𑁆𑀡𑀁.
‘‘𑀦 𑀲𑀸 𑀲𑀪𑀸 𑀬𑀢𑁆𑀣 𑀦 𑀲𑀦𑁆𑀢𑀺 𑀲𑀦𑁆𑀢𑁄, 𑀦 𑀢𑁂 𑀲𑀦𑁆𑀢𑁄 𑀬𑁂 𑀦 𑀪𑀡𑀦𑁆𑀢𑀺 𑀥𑀫𑁆𑀫𑀁;
𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀥𑀫𑁆𑀫𑀁 𑀪𑀡𑀦𑁆𑀢𑀸𑀯 𑀪𑀯𑀦𑁆𑀢𑀺 𑀲𑀦𑁆𑀢𑁄.
‘‘𑀦𑀸𑀪𑀸𑀲𑀫𑀸𑀦𑀁 𑀚𑀸𑀦𑀦𑁆𑀢𑀺, 𑀫𑀺𑀲𑁆𑀲𑀁 𑀩𑀸𑀮𑁂𑀳𑀺 𑀧𑀡𑁆𑀟𑀺𑀢𑀁;
𑀪𑀸𑀲𑀫𑀸𑀦𑀜𑁆𑀘 𑀚𑀸𑀦𑀦𑁆𑀢𑀺, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁.
‘‘𑀪𑀸𑀲𑀬𑁂 𑀚𑁄𑀢𑀬𑁂 𑀥𑀫𑁆𑀫𑀁, 𑀧𑀕𑁆𑀕𑀡𑁆𑀳𑁂 𑀇𑀲𑀺𑀦𑀁 𑀥𑀚𑀁;
𑀲𑀼𑀪𑀸𑀲𑀺𑀢𑀤𑁆𑀥𑀚𑀸 𑀇𑀲𑀬𑁄, 𑀥𑀫𑁆𑀫𑁄 𑀳𑀺 𑀇𑀲𑀺𑀦𑀁 𑀥𑀚𑁄’’𑀢𑀺.
𑀢𑀢𑁆𑀣 ¶ 𑀅𑀚𑁂𑀬𑁆𑀬𑀦𑁆𑀢𑀺 𑀅𑀚𑁂𑀬𑁆𑀬𑀸 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄, 𑀢𑁂 𑀚𑀺𑀦𑀦𑁆𑀢𑁄 𑀭𑀸𑀚𑀸 𑀦𑀸𑀫 𑀦 𑀳𑁄𑀢𑀺. 𑀲𑀘𑁂 𑀢𑁆𑀯𑀫𑁆𑀧𑀺 𑀧𑀺𑀢𑀼 𑀲𑀦𑁆𑀢𑀓𑀁 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀢𑀲𑁆𑀲 𑀧𑀝𑀺𑀲𑀢𑁆𑀢𑀼 𑀳𑁄𑀲𑀺, 𑀅𑀓𑀺𑀘𑁆𑀘𑀓𑀸𑀭𑀻 𑀦𑀸𑀫 𑀪𑀯𑀺𑀲𑁆𑀲𑀲𑀺 ¶ . 𑀲𑀔𑀸𑀭𑀁 𑀚𑀺𑀦𑀸𑀢𑀻𑀢𑀺 𑀓𑀽𑀝𑀟𑁆𑀟𑁂𑀦 𑀚𑀺𑀦𑀸𑀢𑀺. 𑀲𑀘𑁂 𑀢𑁆𑀯𑀁, 𑀓𑀸𑀴𑀳𑀢𑁆𑀣𑀺, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀥𑀫𑁆𑀫𑀁 𑀦 𑀧𑀽𑀭𑁂𑀲𑀺, 𑀅𑀥𑀫𑁆𑀫𑀝𑁆𑀞𑁄 𑀳𑀼𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺. 𑀦 𑀯𑀺𑀪𑁂𑀢𑀻𑀢𑀺 𑀦 𑀪𑀸𑀬𑀢𑀺. 𑀲𑀘𑁂 𑀢𑁆𑀯𑀁 𑀭𑀜𑁆𑀜𑁄 𑀦 𑀪𑀸𑀬𑀲𑀺, 𑀪𑀭𑀺𑀬𑀸𑀥𑀫𑁆𑀫𑁂 𑀞𑀺𑀢𑀸 𑀦𑀸𑀫 𑀦 𑀳𑁄𑀲𑀺, 𑀅𑀓𑀺𑀘𑁆𑀘𑀓𑀸𑀭𑀻 𑀦𑀸𑀫 𑀪𑀯𑀺𑀲𑁆𑀲𑀲𑀺. 𑀚𑀺𑀡𑁆𑀡𑀦𑁆𑀢𑀺 𑀫𑀳𑀮𑁆𑀮𑀓𑀁. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀅𑀪𑀭𑀦𑁆𑀢𑀸 𑀧𑀼𑀢𑁆𑀢𑀸 𑀧𑀼𑀢𑁆𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺.
𑀲𑀦𑁆𑀢𑁄𑀢𑀺 𑀧𑀡𑁆𑀟𑀺𑀢𑀸. 𑀬𑁂 𑀦 𑀪𑀡𑀦𑁆𑀢𑀺 𑀥𑀫𑁆𑀫𑀦𑁆𑀢𑀺 𑀬𑁂 𑀧𑀼𑀘𑁆𑀙𑀺𑀢𑀸 𑀲𑀘𑁆𑀘𑀲𑀪𑀸𑀯𑀁 𑀦 𑀯𑀤𑀦𑁆𑀢𑀺, 𑀦 𑀢𑁂 𑀧𑀡𑁆𑀟𑀺𑀢𑀸 𑀦𑀸𑀫. 𑀥𑀫𑁆𑀫𑀁 𑀪𑀡𑀦𑁆𑀢𑀸𑀯𑀸𑀢𑀺 𑀏𑀢𑁂 𑀭𑀸𑀕𑀸𑀤𑀬𑁄 𑀧𑀳𑀸𑀬 𑀧𑀭𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀓𑀸 𑀳𑀼𑀢𑁆𑀯𑀸 𑀲𑀪𑀸𑀯𑀁 𑀪𑀡𑀦𑁆𑀢𑀸𑀯 𑀧𑀡𑁆𑀟𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀦𑀸𑀪𑀸𑀲𑀫𑀸𑀦𑀦𑁆𑀢𑀺 𑀦 𑀅𑀪𑀸𑀲𑀫𑀸𑀦𑀁. 𑀅𑀫𑀢𑀁 𑀧𑀤𑀦𑁆𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀤𑁂𑀲𑁂𑀦𑁆𑀢𑀁 ‘‘𑀧𑀡𑁆𑀟𑀺𑀢𑁄’’𑀢𑀺 𑀚𑀸𑀦𑀦𑁆𑀢𑀺, 𑀢𑁂𑀦𑁂𑀯 𑀧𑁄𑀭𑀺𑀲𑀸𑀤𑁄 𑀫𑀁 𑀜𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑀢𑁆𑀢𑀸𑀭𑁄 𑀯𑀭𑁂 𑀤𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑁄. 𑀪𑀸𑀲𑀬𑁂𑀢𑀺 ¶ 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀥𑀫𑁆𑀫𑀁 𑀪𑀸𑀲𑁂𑀬𑁆𑀬 𑀚𑁄𑀢𑁂𑀬𑁆𑀬, 𑀩𑀼𑀤𑁆𑀥𑀸𑀤𑀬𑁄 𑀇𑀲𑀬𑁄 𑀬𑀲𑁆𑀫𑀸 𑀥𑀫𑁆𑀫𑁄 𑀏𑀢𑁂𑀲𑀁 𑀥𑀚𑁄, 𑀢𑀲𑁆𑀫𑀸 𑀲𑀼𑀪𑀸𑀲𑀺𑀢𑀤𑁆𑀥𑀚𑀸 𑀦𑀸𑀫 𑀲𑀼𑀪𑀸𑀲𑀺𑀢𑀁 𑀧𑀕𑁆𑀕𑀡𑁆𑀳𑀦𑁆𑀢𑀺, 𑀩𑀸𑀮𑀸 𑀧𑀦 𑀲𑀼𑀪𑀸𑀲𑀺𑀢𑀁 𑀧𑀕𑁆𑀕𑀡𑁆𑀳𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺.
𑀇𑀫𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘 𑀲𑁂𑀦𑀸𑀧𑀢𑀺 𑀘 𑀤𑁂𑀯𑀻 𑀘 𑀢𑀼𑀝𑁆𑀞𑀸 ‘‘𑀕𑀘𑁆𑀙𑀸𑀫, 𑀫𑀳𑀸𑀭𑀸𑀚, 𑀆𑀦𑁂𑀫𑀸’’𑀢𑀺 𑀯𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀸𑀕𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣, 𑀭𑀸𑀚𑀸 𑀓𑀺𑀭 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄, 𑀏𑀣 𑀦𑀁 𑀆𑀦𑁂𑀫𑀸’’𑀢𑀺 𑀫𑀳𑀸𑀚𑀦𑀁 𑀆𑀤𑀸𑀬 𑀫𑀳𑀸𑀲𑀢𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀓𑁂 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼𑀁 𑀦𑁆𑀳𑀸𑀢𑀸𑀦𑀼𑀮𑀺𑀢𑁆𑀢𑀧𑀲𑀸𑀥𑀺𑀢𑀁 𑀭𑀸𑀚𑀸𑀦𑀁 𑀭𑀢𑀦𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀲𑀼𑀁. 𑀧𑁄𑀭𑀺𑀲𑀸𑀤𑁄 𑀭𑀸𑀚𑀸 𑀳𑀼𑀢𑁆𑀯𑀸 𑀧𑀭𑁄𑀲𑀢𑀸𑀦𑀁 𑀔𑀢𑁆𑀢𑀺𑀬𑀸𑀦𑀁 𑀫𑀳𑀸𑀲𑀢𑁆𑀢𑀲𑁆𑀲 𑀘 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. ‘‘𑀲𑀼𑀢𑀲𑁄𑀫𑀦𑀭𑀺𑀦𑁆𑀤𑁂𑀦 𑀓𑀺𑀭 𑀧𑁄𑀭𑀺𑀲𑀸𑀤𑀁 𑀤𑀫𑁂𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑀺𑀢𑁄’’𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀳𑀸𑀓𑁄𑀮𑀸𑀳𑀮𑀁 𑀉𑀤𑀧𑀸𑀤𑀺. 𑀇𑀦𑁆𑀤𑀧𑀢𑁆𑀣𑀦𑀕𑀭𑀯𑀸𑀲𑀺𑀦𑁄𑀧𑀺 ‘‘𑀭𑀸𑀚𑀸 𑀦𑁄 𑀆𑀕𑀘𑁆𑀙𑀢𑀽’’𑀢𑀺 𑀤𑀽𑀢𑀁 𑀧𑀳𑀺𑀡𑀺𑀁𑀲𑀼. 𑀲𑁄 𑀢𑀢𑁆𑀣 𑀫𑀸𑀲𑀫𑀢𑁆𑀢𑀁 𑀯𑀲𑀺𑀢𑁆𑀯𑀸, ‘‘𑀲𑀫𑁆𑀫, 𑀕𑀘𑁆𑀙𑀸𑀫𑀳𑀁, 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀺, 𑀦𑀕𑀭𑀤𑁆𑀯𑀸𑀭𑁂𑀲𑀼 𑀘 𑀫𑀚𑁆𑀛𑁂 𑀘𑀸𑀢𑀺 𑀧𑀜𑁆𑀘 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀳𑀺, 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀅𑀕𑀢𑀺𑀕𑀫𑀦𑀁 𑀧𑀭𑀺𑀳𑀭𑀸’’𑀢𑀺 𑀧𑁄𑀭𑀺𑀲𑀸𑀤𑀁 𑀑𑀯𑀤𑀺. 𑀧𑀭𑁄𑀲𑀢𑀸𑀳𑀺 𑀭𑀸𑀚𑀥𑀸𑀦𑀻𑀳𑀺 𑀩𑀮𑀓𑀸𑀬𑁄 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺 ¶ . 𑀲𑁄 𑀢𑁂𑀦 𑀩𑀮𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀩𑀸𑀭𑀸𑀡𑀲𑀺𑀢𑁄 𑀦𑀺𑀓𑁆𑀔𑀫𑀺. 𑀧𑁄𑀭𑀺𑀲𑀸𑀤𑁄𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀧𑀟𑁆𑀠𑀧𑀣𑀸 𑀦𑀺𑀯𑀢𑁆𑀢𑀺. 𑀫𑀳𑀸𑀲𑀢𑁆𑀢𑁄 𑀅𑀯𑀸𑀳𑀦𑀸𑀦𑀁 𑀭𑀸𑀚𑀽𑀦𑀁 𑀯𑀸𑀳𑀦𑀸𑀦𑀺 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀧𑀺 𑀭𑀸𑀚𑀸𑀦𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀯𑀦𑁆𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀦𑀧𑀤𑀁 𑀅𑀕𑀫𑀺𑀁𑀲𑀼.
𑀫𑀳𑀸𑀲𑀢𑁆𑀢𑁄𑀧𑀺 𑀦𑀕𑀭𑀁 𑀧𑀢𑁆𑀯𑀸 𑀇𑀦𑁆𑀤𑀧𑀢𑁆𑀣𑀦𑀕𑀭𑀯𑀸𑀲𑀻𑀳𑀺 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀢𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀫𑀳𑀸𑀢𑀮𑀁 𑀅𑀪𑀺𑀭𑀼𑀳𑀺. 𑀲𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 ¶ 𑁋 ‘‘𑀭𑀼𑀓𑁆𑀔𑀤𑁂𑀯𑀢𑀸 𑀫𑀬𑁆𑀳𑀁 𑀩𑀳𑀽𑀧𑀓𑀸𑀭𑀸, 𑀩𑀮𑀺𑀓𑀫𑁆𑀫𑀮𑀸𑀪𑀫𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀢𑀴𑀸𑀓𑀁 𑀓𑀸𑀭𑁂𑀢𑁆𑀯𑀸 𑀩𑀳𑀽𑀦𑀺 𑀓𑀼𑀮𑀸𑀦𑀺 𑀧𑁂𑀲𑁂𑀢𑁆𑀯𑀸 ¶ 𑀕𑀸𑀫𑀁 𑀦𑀺𑀯𑁂𑀲𑁂𑀲𑀺. 𑀕𑀸𑀫𑁄 𑀫𑀳𑀸 𑀅𑀳𑁄𑀲𑀺 𑀅𑀲𑀻𑀢𑀺𑀫𑀢𑁆𑀢𑀆𑀧𑀡𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑁄. 𑀢𑀫𑁆𑀧𑀺 𑀭𑀼𑀓𑁆𑀔𑀫𑀽𑀮𑀁 𑀲𑀸𑀔𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀯𑁂𑀤𑀺𑀓𑀢𑁄𑀭𑀡𑀤𑁆𑀯𑀸𑀭𑀬𑀼𑀢𑁆𑀢𑀁 𑀅𑀓𑀸𑀲𑀺, 𑀤𑁂𑀯𑀢𑀸 𑀅𑀪𑀺𑀧𑁆𑀧𑀲𑀻𑀤𑀺. 𑀓𑀫𑁆𑀫𑀸𑀲𑀧𑀸𑀤𑀲𑁆𑀲 𑀤𑀫𑀺𑀢𑀝𑁆𑀞𑀸𑀦𑁂 𑀦𑀺𑀯𑀼𑀝𑁆𑀞𑀢𑁆𑀢𑀸 𑀧𑀦 𑀲𑁄 𑀕𑀸𑀫𑁄 𑀓𑀫𑁆𑀫𑀸𑀲𑀤𑀫𑁆𑀫𑀦𑀺𑀕𑀫𑁄 𑀦𑀸𑀫 𑀚𑀸𑀢𑁄. 𑀢𑁂𑀧𑀺 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀫𑀳𑀸𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀁 𑀧𑀽𑀭𑀬𑀺𑀁𑀲𑀼.
𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑀸𑀳𑀁 𑀅𑀗𑁆𑀕𑀼𑀮𑀺𑀫𑀸𑀮𑀁 𑀤𑀫𑁂𑀫𑀺, 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀤𑀫𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 ‘‘𑀢𑀤𑀸 𑀧𑁄𑀭𑀺𑀲𑀸𑀤𑁄 𑀭𑀸𑀚𑀸 𑀅𑀗𑁆𑀕𑀼𑀮𑀺𑀫𑀸𑀮𑁄 𑀅𑀳𑁄𑀲𑀺, 𑀓𑀸𑀴𑀳𑀢𑁆𑀣𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀦𑀦𑁆𑀤𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁄, 𑀭𑀼𑀓𑁆𑀔𑀤𑁂𑀯𑀢𑀸 𑀓𑀲𑁆𑀲𑀧𑁄, 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄, 𑀲𑁂𑀲𑀭𑀸𑀚𑀸𑀦𑁄 𑀩𑀼𑀤𑁆𑀥𑀧𑀭𑀺𑀲𑀸, 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺, 𑀲𑀼𑀢𑀲𑁄𑀫𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.
𑀫𑀳𑀸𑀲𑀼𑀢𑀲𑁄𑀫𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.
𑀚𑀸𑀢𑀓𑀼𑀤𑁆𑀤𑀸𑀦𑀁 𑁋
𑀲𑀼𑀫𑀼𑀔𑁄 𑀧𑀦 𑀳𑀁𑀲𑀯𑀭𑁄 𑀘 𑀫𑀳𑀸, 𑀲𑀼𑀥𑀪𑁄𑀚𑀦𑀺𑀓𑁄 𑀘 𑀧𑀭𑁄 𑀧𑀯𑀭𑁄;
𑀲𑀓𑀼𑀡𑀸𑀮𑀤𑀺𑀚𑀸𑀥𑀺𑀧𑀢𑀺𑀯𑁆𑀳𑀬𑀦𑁄, 𑀲𑀼𑀢𑀲𑁄𑀫𑀯𑀭𑀼𑀢𑁆𑀢𑀫𑀲𑀯𑁆𑀳𑀬𑀦𑁄𑀢𑀺.
𑀅𑀲𑀻𑀢𑀺𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀧𑀜𑁆𑀘𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.