📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀚𑀸𑀢𑀓-𑀅𑀝𑁆𑀞𑀓𑀣𑀸

(𑀲𑀢𑁆𑀢𑀫𑁄 𑀪𑀸𑀕𑁄)

𑁨𑁨. 𑀫𑀳𑀸𑀦𑀺𑀧𑀸𑀢𑁄

[𑁫𑁪𑁩] 𑁬. 𑀪𑀽𑀭𑀺𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦𑀕𑀭𑀓𑀡𑁆𑀟𑀁

𑀬𑀁 ¶ ¶ ¶ 𑀓𑀺𑀜𑁆𑀘𑀺 𑀭𑀢𑀦𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁄𑀲𑀣𑀺𑀓𑁂 𑀉𑀧𑀸𑀲𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀯𑁂𑀮𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀆𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀆𑀤𑀻𑀲𑀼 ¶ 𑀧𑀦 𑀬𑁂 ¶ 𑀆𑀭𑀩𑁆𑀪 𑀥𑀫𑁆𑀫𑀓𑀣𑀸 𑀲𑀫𑀼𑀝𑁆𑀞𑀸𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀣𑀸𑀕𑀢𑀸 𑀲𑀮𑁆𑀮𑀧𑀦𑁆𑀢𑀺, 𑀢𑀲𑁆𑀫𑀸 𑀅𑀚𑁆𑀚 𑀉𑀧𑀸𑀲𑀓𑁂 𑀆𑀭𑀩𑁆𑀪 𑀧𑀼𑀩𑁆𑀩𑀘𑀭𑀺𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀓𑀣𑀸 𑀲𑀫𑀼𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 ‘‘𑀉𑀧𑁄𑀲𑀣𑀺𑀓𑀢𑁆𑀣, 𑀉𑀧𑀸𑀲𑀓𑀸’’𑀢𑀺 𑀉𑀧𑀸𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀉𑀧𑀸𑀲𑀓𑀸, 𑀓𑀮𑁆𑀬𑀸𑀡𑀁 𑀯𑁄 𑀓𑀢𑀁, 𑀅𑀧𑀺𑀘 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀬𑀁 𑀢𑀼𑀫𑁆𑀳𑁂 𑀫𑀸𑀤𑀺𑀲𑀁 𑀩𑀼𑀤𑁆𑀥𑀁 𑀑𑀯𑀸𑀤𑀤𑀸𑀬𑀓𑀁 𑀆𑀘𑀭𑀺𑀬𑀁 𑀮𑀪𑀦𑁆𑀢𑀸 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀣. 𑀧𑁄𑀭𑀸𑀡𑀧𑀡𑁆𑀟𑀺𑀢𑀸 𑀧𑀦 𑀅𑀦𑀸𑀘𑀭𑀺𑀬𑀓𑀸𑀧𑀺 𑀫𑀳𑀦𑁆𑀢𑀁 𑀬𑀲𑀁 𑀧𑀳𑀸𑀬 𑀉𑀧𑁄𑀲𑀣𑀁 𑀓𑀭𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 ¶ 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀧𑀼𑀢𑁆𑀢𑀲𑁆𑀲 𑀉𑀧𑀭𑀚𑁆𑀚𑀁 𑀤𑀢𑁆𑀯𑀸 𑀢𑀲𑁆𑀲 𑀫𑀳𑀦𑁆𑀢𑀁 𑀬𑀲𑀁 𑀤𑀺𑀲𑁆𑀯𑀸 ‘‘𑀭𑀚𑁆𑀚𑀫𑁆𑀧𑀺 𑀫𑁂 𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀉𑀧𑁆𑀧𑀦𑁆𑀦𑀸𑀲𑀗𑁆𑀓𑁄 ‘‘𑀢𑀸𑀢, 𑀢𑁆𑀯𑀁 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀢𑁆𑀣 𑀢𑁂 𑀭𑀼𑀘𑁆𑀘𑀢𑀺, 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀫𑀫 𑀅𑀘𑁆𑀘𑀬𑁂𑀦 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀬𑀫𑀼𑀦𑀁 𑀕𑀦𑁆𑀢𑁆𑀯𑀸 𑀬𑀫𑀼𑀦𑀸𑀬 𑀘 𑀲𑀫𑀼𑀤𑁆𑀤𑀲𑁆𑀲 𑀘 𑀧𑀩𑁆𑀩𑀢𑀲𑁆𑀲 𑀘 𑀅𑀦𑁆𑀢𑀭𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀧𑀝𑀺𑀯𑀲𑀢𑀺. 𑀢𑀤𑀸 𑀲𑀫𑀼𑀤𑁆𑀤𑀲𑁆𑀲 𑀳𑁂𑀝𑁆𑀞𑀺𑀫𑁂 𑀦𑀸𑀕𑀪𑀯𑀦𑁂 𑀏𑀓𑀸 𑀫𑀢𑀧𑀢𑀺𑀓𑀸 𑀦𑀸𑀕𑀫𑀸𑀡𑀯𑀺𑀓𑀸 𑀅𑀜𑁆𑀜𑀸𑀲𑀁 𑀲𑀧𑀢𑀺𑀓𑀸𑀦𑀁 𑀬𑀲𑀁 𑀑𑀮𑁄𑀓𑁂𑀢𑁆𑀯𑀸 𑀓𑀺𑀮𑁂𑀲𑀁 𑀦𑀺𑀲𑁆𑀲𑀸𑀬 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀼𑀤𑁆𑀤𑀢𑀻𑀭𑁂 𑀯𑀺𑀘𑀭𑀦𑁆𑀢𑀻 𑀭𑀸𑀚𑀧𑀼𑀢𑁆𑀢𑀲𑁆𑀲 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 𑀧𑀤𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀧𑀡𑁆𑀡𑀲𑀸𑀮𑀁 𑀅𑀤𑁆𑀤𑀲. 𑀢𑀤𑀸 𑀭𑀸𑀚𑀧𑀼𑀢𑁆𑀢𑁄 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁄 𑀳𑁄𑀢𑀺. 𑀲𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑀜𑁆𑀘𑁂𑀯 𑀲𑁂𑀲𑀧𑀭𑀺𑀓𑁆𑀔𑀸𑀭𑁂 𑀘 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀁 𑀏𑀓𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦𑀁 ‘𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄 𑀦𑀼 𑀔𑁄 𑀦𑁄’𑀢𑀺, 𑀲𑀘𑁂 𑀳𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄 𑀪𑀯𑀺𑀲𑁆𑀲𑀢𑀺 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄, 𑀦 𑀫𑁂 𑀅𑀮𑀗𑁆𑀓𑀢𑀲𑀬𑀦𑀁 𑀲𑀸𑀤𑀺𑀬𑀺𑀲𑁆𑀲𑀢𑀺. 𑀲𑀘𑁂 𑀓𑀸𑀫𑀸𑀪𑀺𑀭𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄, 𑀫𑀫 𑀲𑀬𑀦𑀲𑁆𑀫𑀺𑀁𑀬𑁂𑀯 𑀦𑀺𑀧𑀚𑁆𑀚𑀺𑀲𑁆𑀲𑀢𑀺. 𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀘𑁂𑀯 𑀤𑀺𑀩𑁆𑀩𑀕𑀦𑁆𑀥𑁂 𑀘 𑀆𑀳𑀭𑀺𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀲𑀬𑀦𑀁 𑀲𑀚𑁆𑀚𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬𑀁 𑀧𑀼𑀧𑁆𑀨𑀽𑀧𑀳𑀸𑀭𑀁 𑀓𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀁 𑀯𑀺𑀓𑀺𑀭𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀕𑀢𑀸.

𑀭𑀸𑀚𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀝𑁆𑀞𑁄 𑀢𑀁 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀇𑀫𑀁 𑀲𑀬𑀦𑀁 𑀲𑀚𑁆𑀚𑀺𑀢’’𑀦𑁆𑀢𑀺 ¶ 𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀅𑀳𑁄 𑀲𑀼𑀕𑀦𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀫𑀦𑀸𑀧𑀁 𑀯𑀢 𑀓𑀢𑁆𑀯𑀸 𑀲𑀬𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀦 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑁂𑀦 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀧𑁆𑀨𑀲𑀬𑀦𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀉𑀝𑁆𑀞𑀸𑀬 𑀧𑀡𑁆𑀡𑀲𑀸𑀮𑀁 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀨𑀮𑀸𑀨𑀮𑀢𑁆𑀣𑀸𑀬 𑀅𑀕𑀫𑀸𑀲𑀺. 𑀦𑀸𑀕𑀫𑀸𑀡𑀯𑀺𑀓𑀸 𑀢𑀲𑁆𑀫𑀺𑀁 𑀔𑀡𑁂 𑀆𑀕𑀦𑁆𑀢𑁆𑀯𑀸 𑀫𑀺𑀮𑀸𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀤𑀺𑀲𑁆𑀯𑀸 ‘‘𑀓𑀸𑀫𑀸𑀥𑀺𑀫𑀼𑀢𑁆𑀢𑁄 𑀏𑀲, 𑀦 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄, 𑀲𑀓𑁆𑀓𑀸 𑀦𑀁 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀭𑀸𑀡𑀧𑀼𑀧𑁆𑀨𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 ¶ 𑀅𑀜𑁆𑀜𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀣𑁂𑀯 𑀦𑀯𑀧𑀼𑀧𑁆𑀨𑀲𑀬𑀦𑀁 𑀲𑀚𑁆𑀚𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀘𑀗𑁆𑀓𑀫𑁂 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀕𑀢𑀸. 𑀲𑁄 𑀢𑀁 𑀤𑀺𑀯𑀲𑀫𑁆𑀧𑀺 𑀧𑀼𑀧𑁆𑀨𑀲𑀬𑀦𑁂 ¶ 𑀲𑀬𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀘𑀺𑀦𑁆𑀢𑁂𑀲𑀺 ‘‘𑀓𑁄 𑀦𑀼 𑀔𑁄 𑀇𑀫𑀁 𑀧𑀡𑁆𑀡𑀲𑀸𑀮𑀁 𑀅𑀮𑀗𑁆𑀓𑀭𑁄𑀢𑀻’’𑀢𑀺? 𑀲𑁄 𑀨𑀮𑀸𑀨𑀮𑀢𑁆𑀣𑀸𑀬 𑀅𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀅𑀯𑀺𑀤𑀽𑀭𑁂 𑀧𑀝𑀺𑀘𑁆𑀙𑀦𑁆𑀦𑁄 𑀅𑀝𑁆𑀞𑀸𑀲𑀺. 𑀇𑀢𑀭𑀸𑀧𑀺 𑀩𑀳𑀽 𑀕𑀦𑁆𑀥𑁂 𑀘𑁂𑀯 𑀧𑀼𑀧𑁆𑀨𑀸𑀦𑀺 𑀘 𑀆𑀤𑀸𑀬 𑀅𑀲𑁆𑀲𑀫𑀧𑀤𑀁 𑀅𑀕𑀫𑀸𑀲𑀺. 𑀭𑀸𑀚𑀧𑀼𑀢𑁆𑀢𑁄 𑀉𑀢𑁆𑀢𑀫𑀭𑀽𑀧𑀥𑀭𑀁 𑀦𑀸𑀕𑀫𑀸𑀡𑀯𑀺𑀓𑀁 𑀤𑀺𑀲𑁆𑀯𑀸𑀯 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑀁 𑀲𑀚𑁆𑀚𑀦𑀓𑀸𑀮𑁂 𑀧𑀯𑀺𑀲𑀺𑀢𑁆𑀯𑀸 ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀦𑀸𑀕𑀫𑀸𑀡𑀯𑀺𑀓𑀸, 𑀲𑀸𑀫𑀻’’𑀢𑀺. ‘‘𑀲𑀲𑀸𑀫𑀺𑀓𑀸 𑀅𑀲𑁆𑀲𑀸𑀫𑀺𑀓𑀸𑀲𑀻’’𑀢𑀺. ‘‘𑀲𑀸𑀫𑀺, 𑀅𑀳𑀁 𑀧𑀼𑀩𑁆𑀩𑁂 𑀲𑀲𑀸𑀫𑀺𑀓𑀸, 𑀇𑀤𑀸𑀦𑀺 𑀧𑀦 𑀅𑀲𑁆𑀲𑀸𑀫𑀺𑀓𑀸 𑀯𑀺𑀥𑀯𑀸’’. ‘‘𑀢𑁆𑀯𑀁 𑀧𑀦 𑀓𑀢𑁆𑀣 𑀯𑀸𑀲𑀺𑀓𑁄𑀲𑀻’’𑀢𑀺? ‘‘𑀅𑀳𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑀓𑀼𑀫𑀸𑀭𑁄 𑀦𑀸𑀫’’. ‘‘𑀢𑁆𑀯𑀁 𑀦𑀸𑀕𑀪𑀯𑀦𑀁 𑀧𑀳𑀸𑀬 𑀓𑀲𑁆𑀫𑀸 𑀇𑀥 𑀯𑀺𑀘𑀭𑀲𑀻’’𑀢𑀺? ‘‘𑀲𑀸𑀫𑀺, 𑀅𑀳𑀁 𑀢𑀢𑁆𑀣 𑀲𑀲𑀸𑀫𑀺𑀓𑀸𑀦𑀁 𑀦𑀸𑀕𑀫𑀸𑀡𑀯𑀺𑀓𑀸𑀦𑀁 𑀬𑀲𑀁 𑀑𑀮𑁄𑀓𑁂𑀢𑁆𑀯𑀸 𑀓𑀺𑀮𑁂𑀲𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀫𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀻 𑀯𑀺𑀘𑀭𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀪𑀤𑁆𑀤𑁂, 𑀲𑀸𑀥𑀼, 𑀅𑀳𑀫𑁆𑀧𑀺 𑀦 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄, 𑀧𑀺𑀢𑀭𑀸 𑀧𑀦 𑀫𑁂 𑀦𑀻𑀳𑀭𑀺𑀢𑀢𑁆𑀢𑀸 𑀇𑀥 𑀯𑀲𑀸𑀫𑀺, 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑁂 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀉𑀪𑁄𑀧𑀺 𑀇𑀥 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀉𑀪𑁄𑀧𑀺 𑀢𑀢𑁆𑀣𑁂𑀯 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼. 𑀲𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀳𑀸𑀭𑀳𑀁 𑀕𑁂𑀳𑀁 𑀫𑀸𑀧𑁂𑀢𑁆𑀯𑀸 𑀫𑀳𑀸𑀭𑀳𑀁 𑀧𑀮𑁆𑀮𑀗𑁆𑀓𑀁 𑀆𑀳𑀭𑀺𑀢𑁆𑀯𑀸 𑀲𑀬𑀦𑀁 𑀧𑀜𑁆𑀜𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀽𑀮𑀨𑀮𑀸𑀨𑀮𑀁 𑀦 𑀔𑀸𑀤𑀺, 𑀤𑀺𑀩𑁆𑀩𑀅𑀦𑁆𑀦𑀧𑀸𑀦𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺.

𑀅𑀧𑀭𑀪𑀸𑀕𑁂 𑀦𑀸𑀕𑀫𑀸𑀡𑀯𑀺𑀓𑀸 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀲𑀸𑀕𑀭𑀢𑀻𑀭𑁂 𑀚𑀸𑀢𑀢𑁆𑀢𑀸 𑀢𑀲𑁆𑀲 ‘‘𑀲𑀸𑀕𑀭𑀩𑁆𑀭𑀳𑁆𑀫𑀤𑀢𑁆𑀢𑁄’’𑀢𑀺 𑀦𑀸𑀫𑀁 ¶ 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀦𑀸𑀕𑀫𑀸𑀡𑀯𑀺𑀓𑀸 𑀥𑀻𑀢𑀭𑀁 𑀯𑀺𑀚𑀸𑀬𑀺, 𑀢𑀲𑁆𑀲𑀸 𑀲𑀫𑀼𑀤𑁆𑀤𑀢𑀻𑀭𑁂 𑀚𑀸𑀢𑀢𑁆𑀢𑀸 ‘‘𑀲𑀫𑀼𑀤𑁆𑀤𑀚𑀸’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀺𑀓𑁄 𑀯𑀦𑀘𑀭𑀓𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀭𑀸𑀚𑀧𑀼𑀢𑁆𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 ‘‘𑀤𑁂𑀯, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀇𑀥 𑀯𑀲𑀦𑀪𑀸𑀯𑀁 𑀭𑀸𑀚𑀓𑀼𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀕𑀭𑀁 𑀅𑀕𑀫𑀸𑀲𑀺. 𑀢𑀤𑀸 𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀅𑀫𑀘𑁆𑀘𑀸 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀭𑀸𑀚𑀓𑀁 𑀭𑀚𑁆𑀚𑀁 𑀦𑀸𑀫 𑀦 𑀲𑀡𑁆𑀞𑀸𑀢𑀺, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀫, 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀭𑀸𑀚𑀸𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀯𑀦𑀘𑀭𑀓𑁄 𑀦𑀕𑀭𑀁 𑀧𑀢𑁆𑀯𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀭𑀸𑀚𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀘𑀢𑁆𑀢𑀸𑀭𑁄 ¶ 𑀤𑀺𑀯𑀲𑁂 𑀯𑀲𑀺𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀅𑀫𑀘𑁆𑀘𑀸 𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀢𑁂𑀦 𑀫𑀕𑁆𑀕𑀦𑀸𑀬𑀓𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑀸 𑀭𑀜𑁆𑀜𑁄 𑀓𑀸𑀮𑀓𑀢𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀤𑁂𑀯, 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀆𑀳𑀁𑀲𑀼.

𑀲𑁄 ¶ ‘‘𑀦𑀸𑀕𑀫𑀸𑀡𑀯𑀺𑀓𑀸𑀬 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀤𑁆𑀤𑁂, 𑀧𑀺𑀢𑀸 𑀫𑁂 𑀓𑀸𑀮𑀓𑀢𑁄, 𑀅𑀫𑀘𑁆𑀘𑀸 𑀫𑀬𑁆𑀳𑀁 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼𑀁 𑀆𑀕𑀢𑀸, 𑀕𑀘𑁆𑀙𑀸𑀫, 𑀪𑀤𑁆𑀤𑁂, 𑀉𑀪𑁄𑀧𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀸𑀫, 𑀢𑁆𑀯𑀁 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀚𑁂𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀦 𑀲𑀓𑁆𑀓𑀸 𑀫𑀬𑀸 𑀕𑀦𑁆𑀢𑀼’’𑀦𑁆𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀫𑀬𑀁 𑀖𑁄𑀭𑀯𑀺𑀲𑀸 𑀔𑀺𑀧𑁆𑀧𑀓𑁄𑀧𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀓𑀼𑀚𑁆𑀛𑀸𑀫, 𑀲𑀧𑀢𑁆𑀢𑀺𑀭𑁄𑀲𑁄 𑀘 𑀦𑀸𑀫 𑀪𑀸𑀭𑀺𑀬𑁄. 𑀲𑀘𑀸𑀳𑀁 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀓𑀼𑀤𑁆𑀥𑀸 𑀑𑀮𑁄𑀓𑁂𑀲𑁆𑀲𑀸𑀫𑀺, 𑀪𑀲𑁆𑀫𑀸𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀲𑀓𑁆𑀓𑀸 𑀫𑀬𑀸 𑀕𑀦𑁆𑀢𑀼’’𑀦𑁆𑀢𑀺. 𑀭𑀸𑀚𑀧𑀼𑀢𑁆𑀢𑁄 𑀧𑀼𑀦𑀤𑀺𑀯𑀲𑁂𑀧𑀺 𑀬𑀸𑀘𑀢𑁂𑀯. 𑀅𑀣 𑀦𑀁 𑀲𑀸 𑀏𑀯𑀫𑀸𑀳 𑁋 ‘‘𑀅𑀳𑀁 𑀢𑀸𑀯 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀦 𑀕𑀫𑀺𑀲𑁆𑀲𑀸𑀫𑀺, 𑀇𑀫𑁂 𑀧𑀦 𑀫𑁂 𑀧𑀼𑀢𑁆𑀢𑀸 𑀦𑀸𑀕𑀓𑀼𑀫𑀸𑀭𑀸 𑀢𑀯 𑀲𑀫𑁆𑀪𑀯𑁂𑀦 𑀚𑀸𑀢𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸. 𑀲𑀘𑁂 𑀢𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀇𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑁄 𑀪𑀯. 𑀇𑀫𑁂 𑀔𑁄 𑀧𑀦 𑀉𑀤𑀓𑀩𑀻𑀚𑀓𑀸 𑀲𑀼𑀔𑀼𑀫𑀸𑀮𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀯𑀸𑀢𑀸𑀢𑀧𑁂𑀦 𑀓𑀺𑀮𑀫𑀺𑀢𑁆𑀯𑀸 𑀫𑀭𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀏𑀓𑀁 𑀦𑀸𑀯𑀁 𑀔𑀡𑀸𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀢𑀸𑀬 𑀤𑁆𑀯𑁂 𑀧𑀼𑀢𑁆𑀢𑀓𑁂 𑀉𑀤𑀓𑀓𑀻𑀴𑀁 𑀓𑀻𑀴𑀸𑀧𑁂𑀢𑁆𑀯𑀸 𑀦𑀕𑀭𑁂𑀧𑀺 𑀅𑀦𑁆𑀢𑁄𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 ¶ 𑀧𑁄𑀓𑁆𑀔𑀭𑀡𑀺𑀁𑀓𑀸𑀭𑁂𑀬𑁆𑀬𑀸𑀲𑀺, 𑀏𑀯𑀁 𑀢𑁂 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀻’’𑀢𑀺.

𑀲𑀸 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀢𑁆𑀢𑀓𑁂 𑀆𑀮𑀺𑀗𑁆𑀕𑀺𑀢𑁆𑀯𑀸 𑀣𑀦𑀦𑁆𑀢𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀧𑀼𑀢𑁆𑀢𑁄𑀧𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀦𑀺𑀯𑁂𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀅𑀫𑀘𑁆𑀘𑁂 𑀉𑀧𑀲𑀗𑁆𑀓𑀫𑀺. 𑀢𑁂 𑀢𑀁 𑀢𑀢𑁆𑀣𑁂𑀯 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀢𑁂𑀦 𑀳𑀺 𑀲𑀻𑀖𑀁 𑀦𑀸𑀯𑀁 𑀔𑀡𑀺𑀢𑁆𑀯𑀸 𑀲𑀓𑀝𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀣, 𑀫𑀫 𑀧𑀼𑀢𑁆𑀢𑀸 𑀉𑀤𑀓𑀩𑀻𑀚𑀓𑀸, 𑀢𑁂 𑀢𑀢𑁆𑀣 𑀓𑀻𑀴𑀦𑁆𑀢𑀸 𑀲𑀼𑀔𑀁 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀫𑀘𑁆𑀘𑀸 𑀢𑀣𑀸 𑀓𑀭𑀺𑀁𑀲𑀼. 𑀭𑀸𑀚𑀸 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀅𑀮𑀗𑁆𑀓𑀢𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑁄𑀴𑀲𑀲𑀳𑀲𑁆𑀲𑀸𑀳𑀺 𑀦𑀸𑀝𑀓𑀺𑀢𑁆𑀣𑀻𑀳𑀺 𑀅𑀫𑀘𑁆𑀘𑀸𑀤𑀻𑀳𑀺 ¶ 𑀘 𑀧𑀭𑀺𑀯𑀼𑀢𑁄 𑀫𑀳𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀧𑁄𑀓𑁆𑀔𑀭𑀡𑀺𑀁 𑀓𑀸𑀭𑁂𑀲𑀺. 𑀢𑁂 𑀦𑀺𑀩𑀤𑁆𑀥𑀁 𑀢𑀢𑁆𑀣 𑀓𑀻𑀴𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀧𑁄𑀓𑁆𑀔𑀭𑀡𑀺𑀬𑀁 𑀉𑀤𑀓𑁂 𑀧𑀯𑁂𑀲𑀺𑀬𑀫𑀸𑀦𑁂 𑀏𑀓𑁄 𑀓𑀘𑁆𑀙𑀧𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀧𑁄𑀓𑁆𑀔𑀭𑀡𑀺𑀢𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑀸𑀭𑀓𑀸𑀦𑀁 𑀓𑀻𑀴𑀦𑀓𑀸𑀮𑁂 𑀉𑀤𑀓𑀢𑁄 𑀉𑀝𑁆𑀞𑀸𑀬 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀢𑁂 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺. 𑀢𑁂 𑀢𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀢, 𑀧𑁄𑀓𑁆𑀔𑀭𑀡𑀺𑀬𑀁 𑀏𑀓𑁄 𑀬𑀓𑁆𑀔𑁄 𑀅𑀫𑁆𑀳𑁂 𑀢𑀸𑀲𑁂𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀕𑀘𑁆𑀙𑀣 𑀦𑀁 𑀕𑀡𑁆𑀳𑀣𑀸’’𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺. 𑀢𑁂 𑀚𑀸𑀮𑀁 𑀔𑀺𑀧𑀺𑀢𑁆𑀯𑀸 𑀓𑀘𑁆𑀙𑀧𑀁 𑀆𑀤𑀸𑀬 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀓𑀼𑀫𑀸𑀭𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀲, 𑀢𑀸𑀢, 𑀧𑀺𑀲𑀸𑀘𑁄’’𑀢𑀺 𑀯𑀺𑀭𑀯𑀺𑀁𑀲𑀼. 𑀭𑀸𑀚𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀓𑀘𑁆𑀙𑀧𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀕𑀘𑁆𑀙𑀣𑀲𑁆𑀲 ¶ 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑀢𑁆𑀭 𑀏𑀓𑀘𑁆𑀘𑁂 ‘‘𑀅𑀬𑀁 𑀭𑀸𑀚𑀯𑁂𑀭𑀺𑀓𑁄, 𑀏𑀢𑀁 𑀉𑀤𑀼𑀓𑁆𑀔𑀮𑁂 𑀫𑀼𑀲𑀮𑁂𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼, 𑀏𑀓𑀘𑁆𑀘𑁂 ‘‘𑀢𑀻𑀳𑀺 𑀧𑀸𑀓𑁂𑀳𑀺 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑀼𑀁’’, 𑀏𑀓𑀘𑁆𑀘𑁂 ‘‘𑀅𑀗𑁆𑀕𑀸𑀭𑁂𑀲𑀼 𑀉𑀢𑁆𑀢𑀸𑀧𑁂𑀢𑀼𑀁,’’ 𑀏𑀓𑀘𑁆𑀘𑁂 ‘‘𑀅𑀦𑁆𑀢𑁄𑀓𑀝𑀸𑀳𑁂𑀬𑁂𑀯 𑀦𑀁 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀏𑀓𑁄 𑀧𑀦 𑀉𑀤𑀓𑀪𑀻𑀭𑀼𑀓𑁄 𑀅𑀫𑀘𑁆𑀘𑁄 ‘‘𑀇𑀫𑀁 𑀬𑀫𑀼𑀦𑀸𑀬 𑀆𑀯𑀝𑁆𑀝𑁂 𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺, 𑀲𑁄 𑀢𑀢𑁆𑀣 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀏𑀯𑀭𑀽𑀧𑀸 𑀳𑀺𑀲𑁆𑀲 𑀓𑀫𑁆𑀫𑀓𑀸𑀭𑀡𑀸 𑀦𑀢𑁆𑀣𑀻’’𑀢𑀺 𑀆𑀳. 𑀓𑀘𑁆𑀙𑀧𑁄 𑀢𑀲𑁆𑀲 𑀓𑀣𑀁 ¶ 𑀲𑀼𑀢𑁆𑀯𑀸 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀪𑁄, 𑀓𑀺𑀁 𑀢𑁂 𑀫𑀬𑀸 𑀅𑀧𑀭𑀸𑀥𑁄 𑀓𑀢𑁄, 𑀓𑁂𑀦 𑀫𑀁 𑀏𑀯𑀭𑀽𑀧𑀁 𑀓𑀫𑁆𑀫𑀓𑀸𑀭𑀡𑀁 𑀯𑀺𑀘𑀸𑀭𑁂𑀲𑀺. 𑀫𑀬𑀸 𑀳𑀺 𑀲𑀓𑁆𑀓𑀸 𑀇𑀢𑀭𑀸 𑀓𑀫𑁆𑀫𑀓𑀸𑀭𑀡𑀸 𑀲𑀳𑀺𑀢𑀼𑀁, 𑀅𑀬𑀁 𑀧𑀦 𑀅𑀢𑀺𑀓𑀓𑁆𑀔𑀴𑁄, 𑀫𑀸 𑀏𑀯𑀁 𑀅𑀯𑀘𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀇𑀫𑀁 𑀏𑀢𑀤𑁂𑀯 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀬𑀫𑀼𑀦𑀸𑀬 𑀆𑀯𑀝𑁆𑀝𑁂 𑀔𑀺𑀧𑀸𑀧𑁂𑀲𑀺. 𑀧𑀼𑀭𑀺𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑁄 𑀏𑀓𑀁 𑀦𑀸𑀕𑀪𑀯𑀦𑀕𑀸𑀫𑀺𑀁 𑀉𑀤𑀓𑀯𑀸𑀳𑀁 𑀧𑀢𑁆𑀯𑀸 𑀦𑀸𑀕𑀪𑀯𑀦𑀁 𑀅𑀕𑀫𑀸𑀲𑀺.

𑀅𑀣 𑀦𑀁 𑀢𑀲𑁆𑀫𑀺𑀁 𑀉𑀤𑀓𑀯𑀸𑀳𑁂 𑀓𑀻𑀴𑀦𑁆𑀢𑀸 𑀥𑀢𑀭𑀝𑁆𑀞𑀦𑀸𑀕𑀭𑀜𑁆𑀜𑁄 𑀧𑀼𑀢𑁆𑀢𑀸 𑀦𑀸𑀕𑀫𑀸𑀡𑀯𑀓𑀸 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀣 𑀦𑀁 𑀤𑀸𑀲’’𑀦𑁆𑀢𑀺 𑀆𑀳𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀳𑀢𑁆𑀣𑀸 𑀫𑀼𑀘𑁆𑀘𑀺𑀢𑁆𑀯𑀸 𑀏𑀯𑀭𑀽𑀧𑀸𑀦𑀁 𑀨𑀭𑀼𑀲𑀸𑀦𑀁 𑀦𑀸𑀕𑀸𑀦𑀁 𑀳𑀢𑁆𑀣𑀁 𑀧𑀢𑁆𑀢𑁄, 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀫𑀼𑀘𑁆𑀘𑁂𑀬𑁆𑀬’’𑀦𑁆𑀢𑀺. 𑀲𑁄 ‘‘𑀅𑀢𑁆𑀣𑁂𑀲𑁄 𑀉𑀧𑀸𑀬𑁄’’𑀢𑀺 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀥𑀢𑀭𑀝𑁆𑀞𑀲𑁆𑀲 𑀦𑀸𑀕𑀭𑀜𑁆𑀜𑁄 𑀲𑀦𑁆𑀢𑀓𑀸 𑀳𑀼𑀢𑁆𑀯𑀸 𑀓𑀲𑁆𑀫𑀸 𑀏𑀯𑀁 𑀯𑀤𑁂𑀣, 𑀅𑀳𑀁 𑀘𑀺𑀢𑁆𑀢𑀘𑀽𑀴𑁄 𑀦𑀸𑀫 𑀓𑀘𑁆𑀙𑀧𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀤𑀽𑀢𑁄, 𑀥𑀢𑀭𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀥𑀢𑀭𑀝𑁆𑀞𑀲𑁆𑀲 𑀥𑀻𑀢𑀭𑀁 𑀤𑀸𑀢𑀼𑀓𑀸𑀫𑁄 𑀫𑀁 𑀧𑀳𑀺𑀡𑀺, 𑀢𑀲𑁆𑀲 𑀫𑀁 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀢𑁂 𑀲𑁄𑀫𑀦𑀲𑁆𑀲𑀚𑀸𑀢𑀸 𑀢𑀁 ¶ 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀆𑀦𑁂𑀣 𑀦’’𑀦𑁆𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀤𑀺𑀲𑁆𑀯𑀸𑀯 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀏𑀯𑀁 𑀮𑀸𑀫𑀓𑀲𑀭𑀻𑀭𑁄 𑀤𑀽𑀢𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀓𑀘𑁆𑀙𑀧𑁄 ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀤𑀽𑀢𑁂𑀳𑀺 𑀦𑀸𑀫 𑀢𑀸𑀮𑀧𑁆𑀧𑀫𑀸𑀡𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀲𑀭𑀻𑀭𑀜𑁆𑀳𑀺 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀅𑀧𑁆𑀧𑀫𑀸𑀡𑀁, 𑀕𑀢𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀦𑀺𑀧𑁆𑀨𑀸𑀤𑀦𑀫𑁂𑀯 𑀧𑀫𑀸𑀡𑀁. 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀩𑀳𑀽 𑀤𑀽𑀢𑀸. 𑀣𑀮𑁂 𑀓𑀫𑁆𑀫𑀁 𑀫𑀦𑀼𑀲𑁆𑀲𑀸 𑀓𑀭𑁄𑀦𑁆𑀢𑀺, 𑀆𑀓𑀸𑀲𑁂 𑀧𑀓𑁆𑀔𑀺𑀦𑁄, 𑀉𑀤𑀓𑁂 𑀅𑀳𑀫𑁂𑀯. 𑀅𑀳𑀜𑁆𑀳𑀺 𑀘𑀺𑀢𑁆𑀢𑀘𑀽𑀴𑁄 𑀦𑀸𑀫 𑀓𑀘𑁆𑀙𑀧𑁄 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑁄 𑀭𑀸𑀚𑀯𑀮𑁆𑀮𑀪𑁄, 𑀫𑀸 𑀫𑀁 𑀧𑀭𑀺𑀪𑀸𑀲𑀣𑀸’’𑀢𑀺 𑀅𑀢𑁆𑀢𑀦𑁄 𑀕𑀼𑀡𑀁 𑀯𑀡𑁆𑀡𑁂𑀲𑀺. 𑀅𑀣 𑀦𑀁 𑀥𑀢𑀭𑀝𑁆𑀞𑁄 𑀧𑀼𑀘𑁆𑀙𑀺 ‘‘𑀓𑁂𑀦 𑀧𑀦𑀢𑁆𑀣𑁂𑀦 𑀭𑀜𑁆𑀜𑀸 𑀧𑁂𑀲𑀺𑀢𑁄𑀲𑀻’’𑀢𑀺. 𑀫𑀳𑀸𑀭𑀸𑀚, 𑀭𑀸𑀚𑀸 𑀫𑀁 𑀏𑀯𑀫𑀸𑀳 ‘‘𑀫𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀥𑀫𑁆𑀫𑁄 𑀓𑀢𑁄, 𑀇𑀤𑀸𑀦𑀺 𑀥𑀢𑀭𑀝𑁆𑀞𑁂𑀦 𑀦𑀸𑀕𑀭𑀜𑁆𑀜𑀸 𑀲𑀤𑁆𑀥𑀺𑀁 𑀫𑀺𑀢𑁆𑀢𑀥𑀫𑁆𑀫𑀁 𑀓𑀸𑀢𑀼𑀁 𑀫𑀫 𑀥𑀻𑀢𑀭𑀁 𑀲𑀫𑀼𑀤𑁆𑀤𑀚𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀫𑀁 𑀧𑀳𑀺𑀡𑀺. ‘‘𑀢𑀼𑀫𑁆𑀳𑁂 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀧𑀼𑀭𑀺𑀲𑀁 𑀧𑁂𑀲𑁂𑀢𑁆𑀯𑀸 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀤𑀸𑀭𑀺𑀓𑀁 𑀕𑀡𑁆𑀳𑀣𑀸’’𑀢𑀺. 𑀲𑁄 𑀢𑀼𑀲𑁆𑀲𑀺𑀢𑁆𑀯𑀸 𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ¶ 𑀢𑁂𑀦 𑀲𑀤𑁆𑀥𑀺𑀁 𑀘𑀢𑁆𑀢𑀸𑀭𑁄 𑀦𑀸𑀕𑀫𑀸𑀡𑀯𑀓𑁂 𑀧𑁂𑀲𑁂𑀲𑀺 ‘‘𑀕𑀘𑁆𑀙𑀣, 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀏𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀓𑀘𑁆𑀙𑀧𑀁 𑀕𑀳𑁂𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀓𑀘𑁆𑀙𑀧𑁄 ¶ 𑀬𑀫𑀼𑀦𑀸𑀬 𑀩𑀸𑀭𑀸𑀡𑀲𑀺𑀬𑀸 𑀘 𑀅𑀦𑁆𑀢𑀭𑁂 𑀏𑀓𑀁 𑀧𑀤𑀼𑀫𑀲𑀭𑀁 𑀤𑀺𑀲𑁆𑀯𑀸 𑀏𑀓𑁂𑀦𑀼𑀧𑀸𑀬𑁂𑀦 𑀧𑀮𑀸𑀬𑀺𑀢𑀼𑀓𑀸𑀫𑁄 𑀏𑀯𑀫𑀸𑀳 𑁋 ‘‘𑀪𑁄 𑀦𑀸𑀕𑀫𑀸𑀡𑀯𑀓𑀸, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀧𑀼𑀢𑁆𑀢𑀤𑀸𑀭𑀸 𑀘𑀲𑁆𑀲 𑀫𑀁 𑀉𑀤𑀓𑁂 𑀕𑁄𑀘𑀭𑀢𑁆𑀢𑀸 𑀭𑀸𑀚𑀦𑀺𑀯𑁂𑀲𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸𑀯 𑀧𑀤𑀼𑀫𑀸𑀦𑀺 𑀦𑁄 𑀤𑁂𑀳𑀺, 𑀪𑀺𑀲𑀫𑀽𑀮𑀸𑀦𑀺 𑀤𑁂𑀳𑀻𑀢𑀺 𑀬𑀸𑀘𑀦𑁆𑀢𑀺. 𑀅𑀳𑀁 𑀢𑁂𑀲𑀁 𑀅𑀢𑁆𑀣𑀸𑀬 𑀢𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀁 𑀅𑀧𑀲𑁆𑀲𑀦𑁆𑀢𑀸𑀧𑀺 𑀧𑀼𑀭𑁂𑀢𑀭𑀁 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣, 𑀅𑀳𑀁 𑀯𑁄 𑀢𑀢𑁆𑀣𑁂𑀯 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀢𑀢𑁆𑀣 𑀏𑀓𑀫𑀦𑁆𑀢𑁂 𑀦𑀺𑀮𑀻𑀬𑀺. 𑀇𑀢𑀭𑁂𑀧𑀺 𑀦𑀁 𑀅𑀤𑀺𑀲𑁆𑀯𑀸 ‘‘𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀸𑀡𑀯𑀓𑀯𑀡𑁆𑀡𑁂𑀦 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀭𑀸𑀚𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀥𑀢𑀭𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸 𑀇𑀥𑀸𑀕𑀢𑀸’’𑀢𑀺? ‘‘𑀫𑀳𑀸𑀭𑀸𑀚, 𑀫𑀬𑀁 𑀢𑀲𑁆𑀲 𑀤𑀽𑀢𑀸, 𑀥𑀢𑀭𑀝𑁆𑀞𑁄 𑀯𑁄 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀢𑀺. 𑀲𑀘𑁂 𑀬𑀁 𑀯𑁄 𑀇𑀘𑁆𑀙𑀣, 𑀢𑀁 𑀦𑁄 𑀯𑀤𑁂𑀣. 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀥𑀻𑀢𑀭𑀁 𑀲𑀫𑀼𑀤𑁆𑀤𑀚𑀁 ¶ 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀢𑁆𑀯𑀸 𑀤𑁂𑀣𑀸’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀸 𑀧𑀞𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

𑁭𑁮𑁪.

‘‘𑀬𑀁 𑀓𑀺𑀜𑁆𑀘𑀺 𑀭𑀢𑀦𑀁 𑀅𑀢𑁆𑀣𑀺, 𑀥𑀢𑀭𑀝𑁆𑀞𑀦𑀺𑀯𑁂𑀲𑀦𑁂;

𑀲𑀩𑁆𑀩𑀸𑀦𑀺 𑀢𑁂 𑀉𑀧𑀬𑀦𑁆𑀢𑀼, 𑀥𑀻𑀢𑀭𑀁 𑀤𑁂𑀳𑀺 𑀭𑀸𑀚𑀺𑀦𑁄’’𑀢𑀺.

𑀢𑀢𑁆𑀣 𑀲𑀩𑁆𑀩𑀸𑀦𑀺 𑀢𑁂 𑀉𑀧𑀬𑀦𑁆𑀢𑀽𑀢𑀺 𑀢𑀲𑁆𑀲 𑀦𑀺𑀯𑁂𑀲𑀦𑁂 𑀲𑀩𑁆𑀩𑀸𑀦𑀺 𑀭𑀢𑀦𑀸𑀦𑀺 𑀢𑀯 𑀦𑀺𑀯𑁂𑀲𑀦𑀁 𑀉𑀧𑀕𑀘𑁆𑀙𑀦𑁆𑀢𑀼.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁭𑁮𑁫.

‘‘𑀦 𑀦𑁄 𑀯𑀺𑀯𑀸𑀳𑁄 𑀦𑀸𑀕𑁂𑀳𑀺, 𑀓𑀢𑀧𑀼𑀩𑁆𑀩𑁄 𑀓𑀼𑀤𑀸𑀘𑀦𑀁;

𑀢𑀁 𑀯𑀺𑀯𑀸𑀳𑀁 𑀅𑀲𑀁𑀬𑀼𑀢𑁆𑀢𑀁, 𑀓𑀣𑀁 𑀅𑀫𑁆𑀳𑁂 𑀓𑀭𑁄𑀫𑀲𑁂’’𑀢𑀺.

𑀢𑀢𑁆𑀣 𑀅𑀲𑀁𑀬𑀼𑀢𑁆𑀢𑀦𑁆𑀢𑀺 𑀅𑀬𑀼𑀢𑁆𑀢𑀁 𑀢𑀺𑀭𑀘𑁆𑀙𑀸𑀦𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀁 𑀅𑀦𑀦𑀼𑀘𑁆𑀙𑀯𑀺𑀓𑀁. 𑀅𑀫𑁆𑀳𑁂𑀢𑀺 𑀅𑀫𑁆𑀳𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑀸 𑀲𑀫𑀸𑀦𑀸 𑀓𑀣𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑀫𑁆𑀩𑀦𑁆𑀥𑀁 𑀓𑀭𑁄𑀫𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀦𑀸𑀕𑀫𑀸𑀡𑀯𑀓𑀸 ‘‘𑀲𑀘𑁂 𑀢𑁂 𑀥𑀢𑀭𑀝𑁆𑀞𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀅𑀦𑀦𑀼𑀘𑁆𑀙𑀯𑀺𑀓𑁄, 𑀅𑀣 𑀓𑀲𑁆𑀫𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀁 𑀘𑀺𑀢𑁆𑀢𑀘𑀽𑀴𑀁 𑀦𑀸𑀫 𑀓𑀘𑁆𑀙𑀧𑀁 ‘𑀲𑀫𑀼𑀤𑁆𑀤𑀚𑀁 𑀦𑀸𑀫 𑀢𑁂 𑀥𑀻𑀢𑀭𑀁 𑀤𑀫𑁆𑀫𑀻’𑀢𑀺 𑀅𑀫𑁆𑀳𑀸𑀓𑀁 ¶ 𑀭𑀜𑁆𑀜𑁄 𑀧𑁂𑀲𑁂𑀲𑀺? 𑀏𑀯𑀁 𑀧𑁂𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂 𑀅𑀫𑁆𑀳𑀸𑀓𑀁 𑀭𑀸𑀚𑀸𑀦𑀁 𑀧𑀭𑀺𑀪𑀯𑀁 𑀓𑀭𑁄𑀦𑁆𑀢𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 ¶ 𑀫𑀬𑀁 𑀚𑀸𑀦𑀺𑀲𑁆𑀲𑀸𑀫. 𑀫𑀬𑀜𑁆𑀳𑀺 𑀦𑀸𑀕𑀫𑀸𑀡𑀯𑀓𑀸’’𑀢𑀺 𑀯𑀢𑁆𑀯𑀸 𑀭𑀸𑀚𑀸𑀦𑀁 𑀢𑀚𑁆𑀚𑁂𑀦𑁆𑀢𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺𑀁𑀲𑀼 𑁋

𑁭𑁮𑁬.

‘‘𑀚𑀻𑀯𑀺𑀢𑀁 𑀦𑀽𑀦 𑀢𑁂 𑀘𑀢𑁆𑀢𑀁, 𑀭𑀝𑁆𑀞𑀁 𑀯𑀸 𑀫𑀦𑀼𑀚𑀸𑀥𑀺𑀧;

𑀦 𑀳𑀺 𑀦𑀸𑀕𑁂 𑀓𑀼𑀧𑀺𑀢𑀫𑁆𑀳𑀺, 𑀘𑀺𑀭𑀁 𑀚𑀻𑀯𑀦𑁆𑀢𑀺 𑀢𑀸𑀤𑀺𑀲𑀸.

𑁭𑁮𑁭.

‘‘𑀬𑁄 𑀢𑁆𑀯𑀁 𑀤𑁂𑀯 𑀫𑀦𑀼𑀲𑁆𑀲𑁄𑀲𑀺, 𑀇𑀤𑁆𑀥𑀺𑀫𑀦𑁆𑀢𑀁 𑀅𑀦𑀺𑀤𑁆𑀥𑀺𑀫𑀸;

𑀯𑀭𑀼𑀡𑀲𑁆𑀲 𑀦𑀺𑀬𑀁 𑀧𑀼𑀢𑁆𑀢𑀁, 𑀬𑀸𑀫𑀼𑀦𑀁 𑀅𑀢𑀺𑀫𑀜𑁆𑀜𑀲𑀻’’𑀢𑀺.

𑀢𑀢𑁆𑀣 𑀭𑀝𑁆𑀞𑀁 𑀯𑀸𑀢𑀺 𑀏𑀓𑀁𑀲𑁂𑀦 𑀢𑀬𑀸 𑀚𑀻𑀯𑀺𑀢𑀁 𑀯𑀸 𑀭𑀝𑁆𑀞𑀁 𑀯𑀸 𑀘𑀢𑁆𑀢𑀁. 𑀢𑀸𑀤𑀺𑀲𑀸𑀢𑀺 𑀢𑀼𑀫𑁆𑀳𑀸𑀤𑀺𑀲𑀸 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀦𑀸𑀕𑁂 𑀓𑀼𑀧𑀺𑀢𑁂 𑀘𑀺𑀭𑀁 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀦𑁆𑀢𑀭𑀸𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀬𑁄 𑀢𑁆𑀯𑀁, 𑀤𑁂𑀯, 𑀫𑀦𑀼𑀲𑁆𑀲𑁄𑀲𑀻𑀢𑀺 𑀤𑁂𑀯, 𑀬𑁄 𑀢𑁆𑀯𑀁 𑀫𑀦𑀼𑀲𑁆𑀲𑁄 ¶ 𑀲𑀫𑀸𑀦𑁄. 𑀯𑀭𑀼𑀡𑀲𑁆𑀲𑀸𑀢𑀺 𑀯𑀭𑀼𑀡𑀦𑀸𑀕𑀭𑀸𑀚𑀲𑁆𑀲. 𑀦𑀺𑀬𑀁 𑀧𑀼𑀢𑁆𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀧𑀼𑀢𑁆𑀢𑀁. 𑀬𑀸𑀫𑀼𑀦𑀦𑁆𑀢𑀺 𑀬𑀫𑀼𑀦𑀸𑀬 𑀳𑁂𑀝𑁆𑀞𑀸 𑀚𑀸𑀢𑀁.

𑀢𑀢𑁄 𑀭𑀸𑀚𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁮𑁮.

‘‘𑀦𑀸𑀢𑀺𑀫𑀜𑁆𑀜𑀸𑀫𑀺 𑀭𑀸𑀚𑀸𑀦𑀁, 𑀥𑀢𑀭𑀝𑁆𑀞𑀁 𑀬𑀲𑀲𑁆𑀲𑀺𑀦𑀁;

𑀥𑀢𑀭𑀝𑁆𑀞𑁄 𑀳𑀺 𑀦𑀸𑀕𑀸𑀦𑀁, 𑀩𑀳𑀽𑀦𑀫𑀧𑀺 𑀇𑀲𑁆𑀲𑀭𑁄.

𑁭𑁮𑁯.

‘‘𑀅𑀳𑀺 𑀫𑀳𑀸𑀦𑀼𑀪𑀸𑀯𑁄𑀧𑀺, 𑀦 𑀫𑁂 𑀥𑀻𑀢𑀭𑀫𑀸𑀭𑀳𑁄;

𑀔𑀢𑁆𑀢𑀺𑀬𑁄 𑀘 𑀯𑀺𑀤𑁂𑀳𑀸𑀦𑀁, 𑀅𑀪𑀺𑀚𑀸𑀢𑀸 𑀲𑀫𑀼𑀤𑁆𑀤𑀚𑀸’’𑀢𑀺.

𑀢𑀢𑁆𑀣 𑀩𑀳𑀽𑀦𑀫𑀧𑀻𑀢𑀺 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀲𑁆𑀲 𑀦𑀸𑀕𑀪𑀯𑀦𑀲𑁆𑀲 𑀇𑀲𑁆𑀲𑀭𑀪𑀸𑀯𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀦 𑀫𑁂 𑀥𑀻𑀢𑀭𑀫𑀸𑀭𑀳𑁄𑀢𑀺 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀧𑀺 𑀧𑀦 𑀲𑁄 𑀅𑀳𑀺𑀚𑀸𑀢𑀺𑀓𑀢𑁆𑀢𑀸 𑀫𑀫 𑀥𑀻𑀢𑀭𑀁 𑀅𑀭𑀳𑁄 𑀦 𑀳𑁄𑀢𑀺. ‘‘𑀔𑀢𑁆𑀢𑀺𑀬𑁄 𑀘 𑀯𑀺𑀤𑁂𑀳𑀸𑀦’’𑀦𑁆𑀢𑀺 𑀇𑀤𑀁 𑀫𑀸𑀢𑀺𑀧𑀓𑁆𑀔𑁂 𑀜𑀸𑀢𑀓𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀲𑀫𑀼𑀤𑁆𑀤𑀚𑀸𑀢𑀺 𑀲𑁄 𑀘 𑀯𑀺𑀤𑁂𑀳𑀭𑀸𑀚𑀧𑀼𑀢𑁆𑀢𑁄 𑀫𑀫 𑀥𑀻𑀢𑀸 𑀲𑀫𑀼𑀤𑁆𑀤𑀚𑀸 𑀘𑀸𑀢𑀺 𑀉𑀪𑁄𑀧𑀺 𑀅𑀪𑀺𑀚𑀸𑀢𑀸. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀁𑀯𑀸𑀲𑀁 𑀅𑀭𑀳𑀦𑁆𑀢𑀺. 𑀦 𑀳𑁂𑀲𑀸 𑀫𑀡𑁆𑀟𑀽𑀓𑀪𑀓𑁆𑀔𑀲𑁆𑀲 𑀲𑀧𑁆𑀧𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀢𑀺 𑀆𑀳.

𑀦𑀸𑀕𑀫𑀸𑀡𑀯𑀓𑀸 𑀢𑀁 𑀢𑀢𑁆𑀣𑁂𑀯 𑀦𑀸𑀲𑀸𑀯𑀸𑀢𑁂𑀦 𑀫𑀸𑀭𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀧𑀺 ‘‘𑀅𑀫𑁆𑀳𑀸𑀓𑀁 𑀤𑀺𑀯𑀲𑀁 𑀯𑀯𑀢𑁆𑀣𑀸𑀧𑀦𑀢𑁆𑀣𑀸𑀬 𑀧𑁂𑀲𑀺𑀢𑀸, 𑀇𑀫𑀁 𑀫𑀸𑀭𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀬𑀼𑀢𑁆𑀢𑀁, 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 ¶ 𑀢𑀢𑁆𑀣𑁂𑀯 𑀅𑀦𑁆𑀢𑀭𑀳𑀺𑀢𑀸 ‘‘𑀓𑀺𑀁, 𑀢𑀸𑀢𑀸, 𑀮𑀤𑁆𑀥𑀸 𑀯𑁄 𑀭𑀸𑀚𑀥𑀻𑀢𑀸’’𑀢𑀺 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑀺𑀁, 𑀤𑁂𑀯, 𑀅𑀫𑁆𑀳𑁂 𑀅𑀓𑀸𑀭𑀡𑀸 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀧𑁂𑀲𑁂𑀲𑀺. 𑀲𑀘𑁂𑀧𑀺 𑀫𑀸𑀭𑁂𑀢𑀼𑀓𑀸𑀫𑁄, 𑀇𑀥𑁂𑀯 𑀦𑁄 𑀫𑀸𑀭𑁂𑀳𑀺. 𑀲𑁄 𑀢𑀼𑀫𑁆𑀳𑁂 ¶ 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀚𑀸𑀢𑀺𑀫𑀸𑀦𑁂𑀦 𑀉𑀓𑁆𑀔𑀺𑀧𑀢𑀻’’𑀢𑀺 𑀢𑁂𑀦 𑀯𑀼𑀢𑁆𑀢𑀜𑁆𑀘 𑀅𑀯𑀼𑀢𑁆𑀢𑀜𑁆𑀘 𑀯𑀢𑁆𑀯𑀸 𑀭𑀜𑁆𑀜𑁄 𑀓𑁄𑀥𑀁 𑀉𑀧𑁆𑀧𑀸𑀤𑀬𑀺𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀲𑀦𑁆𑀦𑀺𑀧𑀸𑀢𑁂𑀢𑀼𑀁 𑀆𑀡𑀸𑀧𑁂𑀦𑁆𑀢𑁄 𑀆𑀳 𑁋

𑁭𑁯𑁦.

‘‘𑀓𑀫𑁆𑀩𑀮𑀲𑁆𑀲𑀢𑀭𑀸 𑀉𑀝𑁆𑀞𑁂𑀦𑁆𑀢𑀼, 𑀲𑀩𑁆𑀩𑁂 𑀦𑀸𑀕𑁂 𑀦𑀺𑀯𑁂𑀤𑀬;

𑀩𑀸𑀭𑀸𑀡𑀲𑀺𑀁 𑀧𑀯𑀚𑁆𑀚𑀦𑁆𑀢𑀼, 𑀫𑀸 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀼’’𑀦𑁆𑀢𑀺.

𑀢𑀢𑁆𑀣 𑀓𑀫𑁆𑀩𑀮𑀲𑁆𑀲𑀢𑀭𑀸 𑀉𑀝𑁆𑀞𑁂𑀦𑁆𑀢𑀽𑀢𑀺 𑀓𑀫𑁆𑀩𑀮𑀲𑁆𑀲𑀢𑀭𑀸 𑀦𑀸𑀫 𑀢𑀲𑁆𑀲 𑀫𑀸𑀢𑀼𑀧𑀓𑁆𑀔𑀺𑀓𑀸 𑀲𑀺𑀦𑁂𑀭𑀼𑀧𑀸𑀤𑁂 𑀯𑀲𑀦𑀦𑀸𑀕𑀸, 𑀢𑁂 𑀘 𑀉𑀝𑁆𑀞𑀳𑀦𑁆𑀢𑀼. 𑀅𑀜𑁆𑀜𑁂 𑀘 𑀘𑀢𑀽𑀲𑀼 𑀤𑀺𑀲𑀸𑀲𑀼 ¶ 𑀅𑀦𑀼𑀤𑀺𑀲𑀸𑀲𑀼 𑀬𑀢𑁆𑀢𑀓𑀸 𑀯𑀸 𑀫𑀬𑁆𑀳𑀁 𑀯𑀘𑀦𑀓𑀭𑀸, 𑀢𑁂 𑀲𑀩𑁆𑀩𑁂 𑀦𑀸𑀕𑁂 𑀦𑀺𑀯𑁂𑀤𑀬, 𑀕𑀦𑁆𑀢𑁆𑀯𑀸 𑀚𑀸𑀦𑀸𑀧𑁂𑀣, 𑀔𑀺𑀧𑁆𑀧𑀁 𑀓𑀺𑀭 𑀲𑀦𑁆𑀦𑀺𑀧𑀸𑀢𑁂𑀣𑀸𑀢𑀺 𑀆𑀡𑀸𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁄 𑀲𑀩𑁆𑀩𑁂𑀳𑁂𑀯 𑀲𑀻𑀖𑀁 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 ‘‘𑀓𑀺𑀁 𑀓𑀭𑁄𑀫, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀩𑁆𑀩𑁂𑀧𑀺 𑀢𑁂 𑀦𑀸𑀕𑀸 𑀩𑀸𑀭𑀸𑀡𑀲𑀺𑀁 𑀧𑀯𑀚𑁆𑀚𑀦𑁆𑀢𑀽’’𑀢𑀺 𑀆𑀳. ‘‘𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀸𑀢𑀩𑁆𑀩𑀁, 𑀤𑁂𑀯, 𑀢𑀁 𑀦𑀸𑀲𑀸𑀯𑀸𑀢𑀧𑁆𑀧𑀳𑀸𑀭𑁂𑀦 𑀪𑀲𑁆𑀫𑀁 𑀓𑀭𑁄𑀫𑀸’’𑀢𑀺 𑀘 𑀯𑀼𑀢𑁆𑀢𑁂 𑀭𑀸𑀚𑀥𑀻𑀢𑀭𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀢𑀲𑁆𑀲𑀸 𑀯𑀺𑀦𑀸𑀲𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀫𑀸 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀼’’𑀦𑁆𑀢𑀺 𑀆𑀳, 𑀢𑀼𑀫𑁆𑀳𑁂𑀲𑀼 𑀓𑁄𑀘𑀺 𑀓𑀜𑁆𑀘𑀺 𑀫𑀸 𑀯𑀺𑀳𑁂𑀞𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀅𑀣 𑀦𑀁 𑀦𑀸𑀕𑀸 ‘‘𑀲𑀘𑁂 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀦 𑀯𑀺𑀳𑁂𑀞𑁂𑀢𑀩𑁆𑀩𑁄, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀦𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀣, 𑀅𑀳𑀫𑁆𑀧𑀺 𑀇𑀤𑀁 𑀦𑀸𑀫 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀺𑀓𑁆𑀔𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁭𑁯𑁧.

‘‘𑀦𑀺𑀯𑁂𑀲𑀦𑁂𑀲𑀼 𑀲𑁄𑀩𑁆𑀪𑁂𑀲𑀼, 𑀭𑀣𑀺𑀬𑀸 𑀘𑀘𑁆𑀘𑀭𑁂𑀲𑀼 𑀘;

𑀭𑀼𑀓𑁆𑀔𑀕𑁆𑀕𑁂𑀲𑀼 𑀘 𑀮𑀫𑁆𑀩𑀦𑁆𑀢𑀼, 𑀯𑀺𑀢𑀢𑀸 𑀢𑁄𑀭𑀡𑁂𑀲𑀼 𑀘.

𑁭𑁯𑁨.

‘‘𑀅𑀳𑀫𑁆𑀧𑀺 𑀲𑀩𑁆𑀩𑀲𑁂𑀢𑁂𑀦, 𑀫𑀳𑀢𑀸 𑀲𑀼𑀫𑀳𑀁 𑀧𑀼𑀭𑀁;

𑀧𑀭𑀺𑀓𑁆𑀔𑀺𑀧𑀺𑀲𑁆𑀲𑀁 𑀪𑁄𑀕𑁂𑀳𑀺, 𑀓𑀸𑀲𑀻𑀦𑀁 𑀚𑀦𑀬𑀁 𑀪𑀬’’𑀦𑁆𑀢𑀺.

𑀢𑀢𑁆𑀣 𑀲𑁄𑀩𑁆𑀪𑁂𑀲𑀽𑀢𑀺 𑀧𑁄𑀓𑁆𑀔𑀭𑀡𑀻𑀲𑀼. 𑀭𑀣𑀺𑀬𑀸𑀢𑀺 𑀭𑀣𑀺𑀓𑀸𑀬. 𑀯𑀺𑀢𑀢𑀸𑀢𑀺 𑀯𑀺𑀢𑀢𑀲𑀭𑀻𑀭𑀸 𑀫𑀳𑀸𑀲𑀭𑀻𑀭𑀸 𑀳𑀼𑀢𑁆𑀯𑀸 𑀏𑀢𑁂𑀲𑀼 𑀘𑁂𑀯 𑀦𑀺𑀯𑁂𑀲𑀦𑀸𑀤𑀻𑀲𑀼 𑀤𑁆𑀯𑀸𑀭𑀢𑁄𑀭𑀡𑁂𑀲𑀼 𑀘 𑀑𑀮𑀫𑁆𑀩𑀦𑁆𑀢𑀼, 𑀏𑀢𑁆𑀢𑀓𑀁 𑀦𑀸𑀕𑀸 𑀓𑀭𑁄𑀦𑁆𑀢𑀼, 𑀓𑀭𑁄𑀦𑁆𑀢𑀸 𑀘 ¶ 𑀦𑀺𑀯𑁂𑀲𑀦𑁂 𑀢𑀸𑀯 𑀫𑀜𑁆𑀘𑀧𑀻𑀞𑀸𑀦𑀁 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀅𑀦𑁆𑀢𑁄𑀕𑀩𑁆𑀪𑀩𑀳𑀺𑀕𑀩𑁆𑀪𑀸𑀤𑀻𑀲𑀼 𑀘 𑀧𑁄𑀓𑁆𑀔𑀭𑀡𑀺𑀬𑀁 𑀉𑀤𑀓𑀧𑀺𑀝𑁆𑀞𑁂 𑀭𑀣𑀺𑀓𑀸𑀤𑀻𑀦𑀁 𑀧𑀲𑁆𑀲𑁂𑀲𑀼 𑀘𑁂𑀯 𑀣𑀮𑁂𑀲𑀼 𑀘 𑀫𑀳𑀦𑁆𑀢𑀸𑀦𑀺 𑀲𑀭𑀻𑀭𑀸𑀦𑀺 𑀫𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂 𑀨𑀡𑁂 𑀓𑀢𑁆𑀯𑀸 𑀓𑀫𑁆𑀫𑀸𑀭𑀕𑀕𑁆𑀕𑀭𑀻 𑀯𑀺𑀬 𑀥𑀫𑀫𑀸𑀦𑀸 ‘‘𑀲𑀼𑀲𑀽’’𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀸 𑀑𑀮𑀫𑁆𑀩𑀣 𑀘 𑀦𑀺𑀧𑀚𑁆𑀚𑀣 𑀘. 𑀅𑀢𑁆𑀢𑀸𑀦𑀁 𑀧𑀦 𑀢𑀭𑀼𑀡𑀤𑀸𑀭𑀓𑀸𑀦𑀁 𑀚𑀭𑀸𑀚𑀺𑀡𑁆𑀡𑀸𑀦𑀁 𑀕𑀩𑁆𑀪𑀺𑀦𑀺𑀢𑁆𑀣𑀻𑀦𑀁 𑀲𑀫𑀼𑀤𑁆𑀤𑀚𑀸𑀬 𑀘𑀸𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀫𑀸 𑀤𑀲𑁆𑀲𑀬𑀺𑀢𑁆𑀣. 𑀅𑀳𑀫𑁆𑀧𑀺 𑀲𑀩𑁆𑀩𑀲𑁂𑀢𑁂𑀦 𑀫𑀳𑀦𑁆𑀢𑁂𑀦 𑀲𑀭𑀻𑀭𑁂𑀦 𑀕𑀦𑁆𑀢𑁆𑀯𑀸 𑀲𑀼𑀫𑀳𑀦𑁆𑀢𑀁 𑀓𑀸𑀲𑀺𑀧𑀼𑀭𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀲𑁆𑀲𑀁, 𑀫𑀳𑀦𑁆𑀢𑁂𑀦 𑀨𑀡𑁂𑀦 𑀦𑀁 𑀙𑀸𑀤𑁂𑀢𑁆𑀯𑀸 𑀏𑀓𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀓𑀸𑀲𑀻𑀦𑀁 𑀪𑀬𑀁 𑀚𑀦𑀬𑀦𑁆𑀢𑁄 ‘‘𑀲𑀼𑀲𑀽’’𑀢𑀺 𑀲𑀤𑁆𑀤𑀁 𑀫𑀼𑀜𑁆𑀘𑀺𑀲𑁆𑀲𑀸𑀫𑀻𑀢𑀺.

𑀅𑀣 𑀲𑀩𑁆𑀩𑁂 𑀦𑀸𑀕𑀸 𑀢𑀣𑀸 𑀅𑀓𑀁𑀲𑀼. 𑀢𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁭𑁯𑁩.

‘‘𑀢𑀲𑁆𑀲 ¶ 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀭𑀕𑀸𑀦𑁂𑀓𑀯𑀡𑁆𑀡𑀺𑀦𑁄;

𑀩𑀸𑀭𑀸𑀡𑀲𑀺𑀁 𑀧𑀯𑀚𑁆𑀚𑀺𑀁𑀲𑀼, 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀼𑀁.

𑁭𑁯𑁪.

‘‘𑀦𑀺𑀯𑁂𑀲𑀦𑁂𑀲𑀼 𑀲𑁄𑀩𑁆𑀪𑁂𑀲𑀼, 𑀭𑀣𑀺𑀬𑀸 𑀘𑀘𑁆𑀘𑀭𑁂𑀲𑀼 𑀘;

𑀭𑀼𑀓𑁆𑀔𑀕𑁆𑀕𑁂𑀲𑀼 𑀘 𑀮𑀫𑁆𑀩𑀺𑀁𑀲𑀼, 𑀯𑀺𑀢𑀢𑀸 𑀢𑁄𑀭𑀡𑁂𑀲𑀼 𑀘.

𑁭𑁯𑁫.

‘‘𑀢𑁂𑀲𑀼 𑀤𑀺𑀲𑁆𑀯𑀸𑀦 𑀮𑀫𑁆𑀩𑀦𑁆𑀢𑁂, 𑀧𑀼𑀣𑀽 𑀓𑀦𑁆𑀤𑀺𑀁𑀲𑀼 𑀦𑀸𑀭𑀺𑀬𑁄;

𑀦𑀸𑀕𑁂 𑀲𑁄𑀡𑁆𑀟𑀺𑀓𑀢𑁂 𑀤𑀺𑀲𑁆𑀯𑀸, 𑀧𑀲𑁆𑀲𑀲𑀦𑁆𑀢𑁂 𑀫𑀼𑀳𑀼𑀁 𑀫𑀼𑀳𑀼𑀁.

𑁭𑁯𑁬.

‘‘𑀩𑀸𑀭𑀸𑀡𑀲𑀻 𑀧𑀩𑁆𑀬𑀣𑀺𑀢𑀸, 𑀆𑀢𑀼𑀭𑀸 𑀲𑀫𑀧𑀚𑁆𑀚𑀣;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁, 𑀥𑀻𑀢𑀭𑀁 𑀤𑁂𑀳𑀺 𑀭𑀸𑀚𑀺𑀦𑁄’’𑀢𑀺.

𑀢𑀢𑁆𑀣 𑀅𑀦𑁂𑀓𑀯𑀡𑁆𑀡𑀺𑀦𑁄𑀢𑀺 𑀦𑀻𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀡𑁆𑀡𑀸. 𑀏𑀯𑀭𑀽𑀧𑀸𑀦𑀺 𑀳𑀺 𑀢𑁂 𑀭𑀽𑀧𑀸𑀦𑀺 𑀫𑀸𑀧𑀬𑀺𑀁𑀲𑀼. 𑀧𑀯𑀚𑁆𑀚𑀺𑀁𑀲𑀽𑀢𑀺 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀧𑀯𑀺𑀲𑀺𑀁𑀲𑀼. 𑀮𑀫𑁆𑀩𑀺𑀁𑀲𑀽𑀢𑀺 𑀥𑀢𑀭𑀝𑁆𑀞𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀢𑁂 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀲𑀜𑁆𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀑𑀮𑀫𑁆𑀩𑀺𑀁𑀲𑀼. 𑀤𑀽𑀢𑀸 𑀳𑀼𑀢𑁆𑀯𑀸 𑀆𑀕𑀢𑀸 𑀧𑀦 𑀘𑀢𑁆𑀢𑀸𑀭𑁄 𑀦𑀸𑀕𑀫𑀸𑀡𑀯𑀓𑀸 𑀭𑀜𑁄 𑀲𑀬𑀦𑀲𑁆𑀲 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀲𑀻𑀲𑁂 𑀫𑀳𑀦𑁆𑀢𑁂 𑀨𑀡𑁂 𑀓𑀢𑁆𑀯𑀸 𑀢𑀼𑀡𑁆𑀟𑁂𑀳𑀺 𑀲𑀻𑀲𑀁 𑀧𑀳𑀭𑀦𑁆𑀢𑀸 𑀯𑀺𑀬 𑀤𑀸𑀞𑀸 𑀯𑀺𑀯𑀭𑀺𑀢𑁆𑀯𑀸 𑀧𑀲𑁆𑀲𑀲𑀦𑁆𑀢𑀸 𑀅𑀝𑁆𑀞𑀁𑀲𑀼. 𑀥𑀢𑀭𑀝𑁆𑀞𑁄𑀧𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀦𑀕𑀭𑀁 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀧𑀩𑀼𑀚𑁆𑀛𑀫𑀸𑀦𑀸 𑀧𑀼𑀭𑀺𑀲𑀸 𑀬𑀢𑁄 𑀬𑀢𑁄 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀧𑀲𑀸𑀭𑁂𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀧𑁆𑀧𑁂 𑀙𑀼𑀧𑀺𑀢𑁆𑀯𑀸 ‘‘𑀲𑀧𑁆𑀧𑁄, 𑀲𑀧𑁆𑀧𑁄’’𑀢𑀺 𑀯𑀺𑀭𑀯𑀦𑁆𑀢𑀺. 𑀧𑀼𑀣𑀽 𑀓𑀦𑁆𑀤𑀺𑀁𑀲𑀽𑀢𑀺 𑀬𑁂𑀲𑀼 𑀕𑁂𑀳𑁂𑀲𑀼 𑀤𑀻𑀧𑀸 𑀚𑀮𑀦𑁆𑀢𑀺, 𑀢𑁂𑀲𑀼 𑀇𑀢𑁆𑀣𑀺𑀬𑁄 𑀧𑀩𑀼𑀤𑁆𑀥𑀸 𑀤𑁆𑀯𑀸𑀭𑀢𑁄𑀭𑀡𑀕𑁄𑀧𑀸𑀦𑀲𑀺𑀬𑁄 𑀑𑀮𑁄𑀓𑁂𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑁂 𑀦𑀸𑀕𑁂 ¶ 𑀤𑀺𑀲𑁆𑀯𑀸 𑀩𑀳𑀽 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀓𑀦𑁆𑀤𑀺𑀁𑀲𑀼. 𑀏𑀯𑀁 𑀲𑀓𑀮𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀲𑁄𑀡𑁆𑀟𑀺𑀓𑀢𑁂𑀢𑀺 𑀓𑀢𑀨𑀡𑁂.

𑀧𑀓𑁆𑀓𑀦𑁆𑀤𑀼𑀦𑁆𑀢𑀺 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀦𑀸𑀕𑀸𑀦𑀁 𑀅𑀲𑁆𑀲𑀸𑀲𑀯𑀸𑀢𑁂𑀦 𑀲𑀓𑀮𑀦𑀕𑀭𑁂 𑀭𑀸𑀚𑀦𑀺𑀯𑁂𑀲𑀦𑁂 𑀘 𑀉𑀧𑁆𑀧𑀸𑀢𑀺𑀬𑀫𑀸𑀦𑁂 𑀯𑀺𑀬 𑀪𑀻𑀢𑀸 𑀫𑀦𑀼𑀲𑁆𑀲𑀸 ‘‘𑀦𑀸𑀕𑀭𑀸𑀚𑀸𑀦𑁄 𑀓𑀺𑀲𑁆𑀲 𑀦𑁄 𑀯𑀺𑀳𑁂𑀞𑀣𑀸’’𑀢𑀺 𑀯𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 ‘‘𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀥𑀢𑀭𑀝𑁆𑀞𑀲𑁆𑀲 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀤𑀽𑀢𑁂𑀳𑀺 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀅𑀫𑁆𑀳𑀸𑀓𑀁 𑀭𑀸𑀚𑀸𑀦𑀁 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. ‘‘𑀲𑀘𑁂 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀥𑀻𑀢𑀭𑀁 𑀦 𑀤𑀲𑁆𑀲𑀢𑀺, 𑀲𑀓𑀮𑀦𑀕𑀭𑀲𑁆𑀲 𑀚𑀻𑀯𑀺𑀢𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀦𑁄 ¶ , 𑀲𑀸𑀫𑀺, 𑀑𑀓𑀸𑀲𑀁 𑀤𑁂𑀣, 𑀫𑀬𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀬𑀸𑀘𑀺𑀲𑁆𑀲𑀸𑀫𑀸’’𑀢𑀺 𑀬𑀸𑀘𑀦𑁆𑀢𑀸 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀫𑀳𑀦𑁆𑀢𑁂𑀦 𑀭𑀯𑁂𑀦 𑀧𑀓𑁆𑀓𑀦𑁆𑀢𑀺𑀁𑀲𑀼. 𑀪𑀭𑀺𑀬𑀸𑀬𑁄𑀧𑀺𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀩𑁆𑀪𑁂𑀲𑀼 𑀦𑀺𑀧𑀦𑁆𑀦𑀓𑀸𑀯 ‘‘𑀤𑁂𑀯, 𑀥𑀻𑀢𑀭𑀁 𑀥𑀢𑀭𑀝𑁆𑀞𑀭𑀜𑁆𑀜𑁄 𑀤𑁂𑀳𑀻’’𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀓𑀦𑁆𑀤𑀺𑀁𑀲𑀼. 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀦𑀸𑀕𑀫𑀸𑀡𑀯𑀓𑀸 ‘‘𑀤𑁂𑀳𑀻’’𑀢𑀺 𑀢𑀼𑀡𑁆𑀳𑁂𑀳𑀺 𑀲𑀻𑀲𑀁 𑀧𑀳𑀭𑀦𑁆𑀢𑀸 𑀯𑀺𑀬 𑀤𑀸𑀞𑀸 𑀯𑀺𑀯𑀭𑀺𑀢𑁆𑀯𑀸 𑀧𑀲𑁆𑀲𑀲𑀦𑁆𑀢𑀸 𑀅𑀝𑁆𑀞𑀁𑀲𑀼.

𑀲𑁄 𑀦𑀺𑀧𑀦𑁆𑀦𑀓𑁄𑀯 𑀦𑀕𑀭𑀯𑀸𑀲𑀻𑀦𑀜𑁆𑀘 𑀅𑀢𑁆𑀢𑀦𑁄 𑀘 𑀪𑀭𑀺𑀬𑀸𑀦𑀁 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀢𑀽𑀳𑀺 𑀘 𑀦𑀸𑀕𑀫𑀸𑀡𑀯𑀓𑁂𑀳𑀺 𑀢𑀚𑁆𑀚𑀺𑀢𑀢𑁆𑀢𑀸 𑀫𑀭𑀡𑀪𑀬𑀪𑀻𑀢𑁄 ‘‘𑀫𑀫 𑀥𑀻𑀢𑀭𑀁 𑀲𑀫𑀼𑀤𑁆𑀤𑀚𑀁 𑀥𑀢𑀭𑀝𑁆𑀞𑀲𑁆𑀲 𑀤𑀫𑁆𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀅𑀯𑀘. 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀦𑀸𑀕𑀭𑀸𑀚𑀸𑀦𑁄 𑀢𑀺𑀕𑀸𑀯𑀼𑀢𑀫𑀢𑁆𑀢𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀤𑁂𑀯𑀦𑀕𑀭𑀁 𑀯𑀺𑀬 𑀏𑀓𑀁 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀞𑀺𑀢𑀸 ‘‘𑀥𑀻𑀢𑀭𑀁 𑀓𑀺𑀭 𑀦𑁄 𑀧𑁂𑀲𑁂𑀢𑀽’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 𑀢𑁂𑀳𑀺 ¶ 𑀆𑀪𑀢𑀁 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀅𑀳𑀁 𑀥𑀻𑀢𑀭𑀁 𑀅𑀫𑀘𑁆𑀘𑀸𑀦𑀁 𑀳𑀢𑁆𑀣𑁂 𑀧𑀳𑀺𑀡𑀺𑀲𑁆𑀲𑀸𑀫𑀻’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀅𑀫𑁆𑀫, 𑀧𑀲𑁆𑀲𑁂𑀢𑀁 𑀅𑀮𑀗𑁆𑀓𑀢𑀦𑀕𑀭𑀁, 𑀢𑁆𑀯𑀁 𑀏𑀢𑁆𑀣 𑀏𑀢𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀲𑀺, 𑀦 𑀤𑀽𑀭𑁂 𑀇𑀢𑁄 𑀢𑀁 𑀦𑀕𑀭𑀁, 𑀉𑀓𑁆𑀓𑀡𑁆𑀞𑀺𑀢𑀓𑀸𑀮𑁂𑀬𑁂𑀯 𑀇𑀥 𑀆𑀕𑀦𑁆𑀢𑀼𑀁 𑀲𑀓𑁆𑀓𑀸, 𑀏𑀢𑁆𑀣 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀬𑁄𑀕𑁆𑀕𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀸𑀳𑁂𑀲𑀺. 𑀦𑀸𑀕𑀭𑀸𑀚𑀸𑀦𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀅𑀫𑀘𑁆𑀘𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀢𑀲𑁆𑀲 𑀤𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀆𑀤𑀸𑀬 𑀦𑀺𑀯𑀢𑁆𑀢𑀺𑀁𑀲𑀼. 𑀢𑁂 𑀭𑀸𑀚𑀥𑀻𑀢𑀭𑀁 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀤𑀺𑀩𑁆𑀩𑀲𑀬𑀦𑁂 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀢𑀗𑁆𑀔𑀡𑀜𑁆𑀜𑁂𑀯 𑀦𑀁 𑀦𑀸𑀕𑀫𑀸𑀡𑀯𑀺𑀓𑀸 𑀔𑀼𑀚𑁆𑀚𑀸𑀤𑀺𑀯𑁂𑀲𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀧𑀭𑀺𑀘𑀸𑀭𑀺𑀓𑀸 𑀯𑀺𑀬 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀲𑀸 𑀤𑀺𑀩𑁆𑀩𑀲𑀬𑀦𑁂 𑀦𑀺𑀧𑀦𑁆𑀦𑀫𑀢𑁆𑀢𑀸𑀯 𑀤𑀺𑀩𑁆𑀩𑀨𑀲𑁆𑀲𑀁 𑀨𑀼𑀲𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀥𑀢𑀭𑀝𑁆𑀞𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀤𑁆𑀥𑀺𑀁 𑀦𑀸𑀕𑀧𑀭𑀺𑀲𑀸𑀬 𑀢𑀢𑁆𑀣 𑀅𑀦𑁆𑀢𑀭𑀳𑀺𑀢𑁄 𑀦𑀸𑀕𑀪𑀯𑀦𑁂𑀬𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀭𑀸𑀚𑀥𑀻𑀢𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀮𑀗𑁆𑀓𑀢𑀤𑀺𑀩𑁆𑀩𑀲𑀬𑀦𑀁 𑀅𑀜𑁆𑀜𑁂 𑀘 𑀲𑀼𑀯𑀡𑁆𑀡𑀧𑀸𑀲𑀸𑀤𑀫𑀡𑀺𑀧𑀸𑀲𑀸𑀤𑀸𑀤𑀬𑁄 𑀉𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀺𑀬𑁄 ¶ 𑀅𑀮𑀗𑁆𑀓𑀢𑀤𑁂𑀯𑀦𑀕𑀭𑀁 𑀯𑀺𑀬 𑀦𑀸𑀕𑀪𑀯𑀦𑀁 𑀤𑀺𑀲𑁆𑀯𑀸 𑀔𑀼𑀚𑁆𑀚𑀸𑀤𑀺𑀧𑀭𑀺𑀘𑀸𑀭𑀺𑀓𑀸𑀬𑁄 𑀧𑀼𑀘𑁆𑀙𑀺 ‘‘𑀇𑀤𑀁 𑀦𑀕𑀭𑀁 𑀅𑀢𑀺𑀯𑀺𑀬 𑀅𑀮𑀗𑁆𑀓𑀢𑀁, 𑀦 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀯𑀺𑀬, 𑀓𑀲𑁆𑀲𑁂𑀢’’𑀦𑁆𑀢𑀺. ‘‘𑀲𑀸𑀫𑀺𑀓𑀲𑁆𑀲 ¶ 𑀢𑁂 𑀲𑀦𑁆𑀢𑀓𑀁, 𑀤𑁂𑀯𑀺, 𑀦 𑀅𑀧𑁆𑀧𑀧𑀼𑀜𑁆𑀜𑀸 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑀦𑁆𑀢𑀺, 𑀫𑀳𑀸𑀧𑀼𑀜𑁆𑀜𑀢𑀸𑀬 𑀢𑁂 𑀅𑀬𑀁 𑀮𑀤𑁆𑀥𑀸’’𑀢𑀺. 𑀥𑀢𑀭𑀝𑁆𑀞𑁄𑀧𑀺 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁂 𑀦𑀸𑀕𑀪𑀯𑀦𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀬𑁄 𑀲𑀫𑀼𑀤𑁆𑀤𑀚𑀸𑀬 𑀲𑀧𑁆𑀧𑀯𑀡𑁆𑀡𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀲 𑀭𑀸𑀚𑀤𑀡𑁆𑀟𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀏𑀓𑁄𑀧𑀺 𑀢𑀲𑁆𑀲𑀸 𑀲𑀧𑁆𑀧𑀯𑀡𑁆𑀡𑀁 𑀤𑀲𑁆𑀲𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀲𑀸 𑀫𑀦𑀼𑀲𑁆𑀲𑀮𑁄𑀓𑀲𑀜𑁆𑀜𑀸𑀬 𑀏𑀯 𑀢𑀢𑁆𑀣 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑀸 𑀧𑀺𑀬𑀲𑀁𑀯𑀸𑀲𑀁 𑀯𑀲𑀺.

𑀦𑀕𑀭𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀉𑀧𑁄𑀲𑀣𑀓𑀡𑁆𑀟𑀁

𑀲𑀸 𑀅𑀧𑀭𑀪𑀸𑀕𑁂 𑀥𑀢𑀭𑀝𑁆𑀞𑀁 𑀧𑀝𑀺𑀘𑁆𑀘 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 𑀧𑀺𑀬𑀤𑀲𑁆𑀲𑀦𑀢𑁆𑀢𑀸 ‘‘𑀲𑀼𑀤𑀲𑁆𑀲𑀦𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀧𑀼𑀦𑀸𑀧𑀭𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀤𑀢𑁆𑀢𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 ¶ 𑀧𑀦 𑀩𑁄𑀥𑀺𑀲𑀢𑁆𑀢𑁄. 𑀧𑀼𑀦𑁂𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀲𑀼𑀪𑁄𑀕𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀅𑀧𑀭𑀫𑁆𑀧𑀺 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 ‘‘𑀅𑀭𑀺𑀝𑁆𑀞𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀇𑀢𑀺 𑀲𑀸 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸𑀧𑀺 𑀦𑀸𑀕𑀪𑀯𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀭𑀼𑀡𑀦𑀸𑀕𑀸 𑀅𑀭𑀺𑀝𑁆𑀞𑀲𑁆𑀲 𑀆𑀘𑀺𑀓𑁆𑀔𑀺𑀁𑀲𑀼 ‘‘𑀢𑀯 𑀫𑀸𑀢𑀸 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀦𑀸𑀕𑀺𑀦𑀻’’𑀢𑀺. 𑀅𑀭𑀺𑀝𑁆𑀞𑁄 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀏𑀓𑀤𑀺𑀯𑀲𑀁 𑀣𑀦𑀁 𑀧𑀺𑀯𑀦𑁆𑀢𑁄𑀯 𑀲𑀧𑁆𑀧𑀲𑀭𑀻𑀭𑀁 𑀫𑀸𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀔𑀡𑁆𑀟𑁂𑀦 𑀫𑀸𑀢𑀼 𑀧𑀺𑀝𑁆𑀞𑀺𑀧𑀸𑀤𑁂 𑀖𑀝𑁆𑀝𑁂𑀲𑀺. 𑀲𑀸 𑀢𑀲𑁆𑀲 𑀲𑀧𑁆𑀧𑀲𑀭𑀻𑀭𑀁 𑀤𑀺𑀲𑁆𑀯𑀸 𑀪𑀻𑀢𑀢𑀲𑀺𑀢𑀸 𑀫𑀳𑀸𑀭𑀯𑀁 𑀭𑀯𑀺𑀢𑁆𑀯𑀸 𑀢𑀁 𑀪𑀽𑀫𑀺𑀬𑀁 𑀔𑀺𑀧𑀦𑁆𑀢𑀻 𑀦𑀔𑁂𑀦 𑀢𑀲𑁆𑀲 𑀅𑀓𑁆𑀔𑀺𑀁 𑀪𑀺𑀦𑁆𑀤𑀺. 𑀢𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺. 𑀭𑀸𑀚𑀸 𑀢𑀲𑁆𑀲𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀲𑁆𑀲𑁂𑀲𑀸 𑀯𑀺𑀭𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀅𑀭𑀺𑀝𑁆𑀞𑁂𑀦 𑀓𑀢𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 ‘‘𑀕𑀡𑁆𑀳𑀣, 𑀦𑀁 𑀤𑀸𑀲𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀣𑀸’’𑀢𑀺 𑀢𑀚𑁆𑀚𑁂𑀦𑁆𑀢𑁄 𑀆𑀕𑀘𑁆𑀙𑀺. 𑀭𑀸𑀚𑀥𑀻𑀢𑀸 𑀢𑀲𑁆𑀲 𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 ‘‘𑀤𑁂𑀯, 𑀧𑀼𑀢𑁆𑀢𑀲𑁆𑀲 𑀫𑁂 𑀅𑀓𑁆𑀔𑀺 𑀪𑀺𑀦𑁆𑀦𑀁, 𑀔𑀫𑀣𑁂𑀢𑀲𑁆𑀲𑀸𑀧𑀭𑀸𑀥’’𑀦𑁆𑀢𑀺 𑀆𑀳. 𑀭𑀸𑀚𑀸 𑀏𑀢𑀸𑀬 𑀏𑀯𑀁 𑀯𑀤𑀦𑁆𑀢𑀺𑀬𑀸 ‘‘𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀔𑀫𑀺. 𑀢𑀁 𑀤𑀺𑀯𑀲𑀁 𑀲𑀸 ‘‘𑀇𑀤𑀁 𑀦𑀸𑀕𑀪𑀯𑀦’’𑀦𑁆𑀢𑀺 𑀅𑀜𑁆𑀜𑀸𑀲𑀺. 𑀢𑀢𑁄 𑀘 𑀧𑀝𑁆𑀞𑀸𑀬 𑀅𑀭𑀺𑀝𑁆𑀞𑁄 𑀓𑀸𑀡𑀸𑀭𑀺𑀝𑁆𑀞𑁄 𑀦𑀸𑀫 𑀚𑀸𑀢𑁄. 𑀘𑀢𑁆𑀢𑀸𑀭𑁄𑀧𑀺 𑀧𑀼𑀢𑁆𑀢𑀸 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀅𑀣 𑀦𑁂𑀲𑀁 𑀧𑀺𑀢𑀸 𑀬𑁄𑀚𑀦𑀲𑀢𑀺𑀓𑀁 𑀬𑁄𑀚𑀦𑀲𑀢𑀺𑀓𑀁 𑀓𑀢𑁆𑀯𑀸 𑀭𑀚𑁆𑀚𑀫𑀤𑀸𑀲𑀺, 𑀫𑀳𑀦𑁆𑀢𑁄 𑀬𑀲𑁄 𑀅𑀳𑁄𑀲𑀺. 𑀲𑁄𑀴𑀲 𑀲𑁄𑀴𑀲 𑀦𑀸𑀕𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀧𑀺𑀢𑀼 𑀏𑀓𑀬𑁄𑀚𑀦𑀲𑀢𑀺𑀓𑀫𑁂𑀯 𑀭𑀚𑁆𑀚𑀁 𑀅𑀳𑁄𑀲𑀺. 𑀢𑀬𑁄 𑀧𑀼𑀢𑁆𑀢𑀸 𑀫𑀸𑀲𑁂 ¶ 𑀫𑀸𑀲𑁂 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀦𑁆𑀯𑀤𑁆𑀥𑀫𑀸𑀲𑀁 𑀆𑀕𑀘𑁆𑀙𑀢𑀺. 𑀦𑀸𑀕𑀪𑀯𑀦𑁂 𑀲𑀫𑀼𑀝𑁆𑀞𑀺𑀢𑀁 𑀧𑀜𑁆𑀳𑀁 𑀩𑁄𑀥𑀺𑀲𑀢𑁆𑀢𑁄𑀯 𑀓𑀣𑁂𑀢𑀺. 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀯𑀺𑀭𑀽𑀧𑀓𑁆𑀔𑀫𑀳𑀸𑀭𑀸𑀚𑀲𑁆𑀲𑀧𑀺 ¶ 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀫𑀼𑀝𑁆𑀞𑀺𑀢𑀁 𑀧𑀜𑁆𑀳𑀫𑁆𑀧𑀺 𑀲𑁄𑀯 𑀓𑀣𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀯𑀺𑀭𑀽𑀧𑀓𑁆𑀔𑁂 𑀦𑀸𑀕𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀺𑀤𑀲𑀧𑀼𑀭𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀤𑁂𑀯𑀸𑀦𑀁 𑀅𑀦𑁆𑀢𑀭𑁂 𑀧𑀜𑁆𑀳𑁄 𑀲𑀫𑀼𑀝𑁆𑀞𑀸𑀲𑀺. 𑀢𑀁 𑀓𑁄𑀘𑀺 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀧𑀮𑁆𑀮𑀗𑁆𑀓𑀯𑀭𑀕𑀢𑁄 𑀧𑀦 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄𑀯 𑀓𑀣𑁂𑀲𑀺. 𑀅𑀣 𑀦𑀁 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 ‘‘𑀤𑀢𑁆𑀢, 𑀢𑁆𑀯𑀁 𑀧𑀣𑀯𑀺𑀲𑀫𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀇𑀢𑁄 𑀧𑀝𑁆𑀞𑀸𑀬 𑀪𑀽𑀭𑀺𑀤𑀢𑁆𑀢𑁄 𑀦𑀸𑀫 𑀳𑁄𑀳𑀻’’𑀢𑀺 ‘‘𑀪𑀽𑀭𑀺𑀤𑀢𑁆𑀢𑁄’’ 𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀲𑁄 ¶ 𑀢𑀢𑁄 𑀧𑀝𑁆𑀞𑀸𑀬 𑀲𑀓𑁆𑀓𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀮𑀗𑁆𑀓𑀢𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀁 𑀤𑁂𑀯𑀘𑁆𑀙𑀭𑀸𑀳𑀺 𑀆𑀓𑀺𑀡𑁆𑀡𑀁 𑀅𑀢𑀺𑀫𑀦𑁄𑀳𑀭𑀁 𑀲𑀓𑁆𑀓𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀤𑁂𑀯𑀮𑁄𑀓𑁂 𑀧𑀺𑀬𑀁 𑀓𑀢𑁆𑀯𑀸 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀫𑀡𑁆𑀟𑀽𑀓𑀪𑀓𑁆𑀔𑁂𑀦 𑀅𑀢𑁆𑀢𑀪𑀸𑀯𑁂𑀦, 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀯𑀸𑀲𑀁 𑀯𑀲𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺 ‘‘𑀅𑀫𑁆𑀫𑀢𑀸𑀢𑀸, 𑀅𑀳𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀓𑀭𑁄𑀳𑀺, 𑀓𑀭𑁄𑀦𑁆𑀢𑁄 𑀧𑀦 𑀩𑀳𑀺 𑀅𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀜𑁆𑀜𑁂𑀯 𑀦𑀸𑀕𑀪𑀯𑀦𑁂 𑀏𑀓𑀲𑁆𑀫𑀺𑀁 𑀲𑀼𑀜𑁆𑀜𑀯𑀺𑀫𑀸𑀦𑁂 𑀓𑀭𑁄𑀳𑀺, 𑀩𑀳𑀺𑀕𑀢𑀸𑀦𑀁 𑀧𑀦 𑀦𑀸𑀕𑀸𑀦𑀁 𑀫𑀳𑀦𑁆𑀢𑀁 𑀪𑀬’’𑀦𑁆𑀢𑀺.

𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀼𑀜𑁆𑀜𑀯𑀺𑀫𑀸𑀦𑁂 𑀭𑀸𑀚𑀼𑀬𑁆𑀬𑀸𑀦𑁂 𑀉𑀧𑁄𑀲𑀣𑀯𑀸𑀲𑀁 𑀯𑀲𑀢𑀺. 𑀅𑀣 𑀦𑀁 𑀦𑀸𑀦𑀸𑀢𑀽𑀭𑀺𑀬𑀳𑀢𑁆𑀣𑀸 𑀦𑀸𑀕𑀓𑀜𑁆𑀜𑀸 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄 ‘‘𑀦 𑀫𑀬𑁆𑀳𑀁 𑀇𑀥 𑀯𑀲𑀦𑁆𑀢𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀁 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀯𑀸𑀭𑀡𑀪𑀬𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬𑁄 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀅𑀳𑀁 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀬𑀫𑀼𑀦𑀸𑀢𑀻𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀲𑁆𑀲𑀸𑀯𑀺𑀤𑀽𑀭𑁂 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀪𑁄𑀕𑁂 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺. 𑀫𑀬𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑁂 𑀓𑀢𑁂 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀫𑁂𑀯 𑀢𑀼𑀫𑁆𑀳𑁂 𑀤𑀲 𑀤𑀲 𑀇𑀢𑁆𑀣𑀺𑀬𑁄 𑀆𑀤𑀸𑀬 𑀯𑀸𑀭𑁂𑀦 𑀯𑀸𑀭𑁂𑀦 𑀢𑀽𑀭𑀺𑀬𑀳𑀢𑁆𑀣𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀫𑀁 𑀕𑀦𑁆𑀥𑁂𑀳𑀺 𑀘 𑀧𑀼𑀧𑁆𑀨𑁂𑀳𑀺 𑀘 𑀧𑀽𑀚𑁂𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀦𑀘𑁆𑀘𑀺𑀢𑁆𑀯𑀸 𑀫𑀁 𑀆𑀤𑀸𑀬 𑀦𑀸𑀕𑀪𑀯𑀦𑀫𑁂𑀯 𑀆𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀪𑁄𑀕𑁂 𑀆𑀪𑀼𑀚𑀺𑀢𑁆𑀯𑀸 ‘‘𑀬𑁄 𑀫𑀫 𑀘𑀫𑁆𑀫𑀁 𑀯𑀸 𑀦𑁆𑀳𑀸𑀭𑀼𑀁 𑀯𑀸 𑀅𑀝𑁆𑀞𑀺𑀁 𑀯𑀸 𑀭𑀼𑀳𑀺𑀭𑀁 𑀯𑀸 𑀇𑀘𑁆𑀙𑀢𑀺, 𑀲𑁄 𑀆𑀳𑀭𑀢𑀽’’𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀦𑀗𑁆𑀕𑀮𑀲𑀻𑀲𑀧𑁆𑀧𑀫𑀸𑀡𑀁 ¶ 𑀲𑀭𑀻𑀭𑀁 𑀫𑀸𑀧𑁂𑀢𑁆𑀯𑀸 𑀦𑀺𑀧𑀦𑁆𑀦𑁄 𑀉𑀧𑁄𑀲𑀣𑀓𑀫𑁆𑀫𑀫𑀓𑀸𑀲𑀺. 𑀅𑀭𑀼𑀡𑁂 𑀉𑀝𑁆𑀞𑀳𑀦𑁆𑀢𑁂𑀬𑁂𑀯 𑀢𑀁 𑀦𑀸𑀕𑀫𑀸𑀡𑀯𑀺𑀓𑀸 𑀆𑀕𑀦𑁆𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀆𑀦𑁂𑀦𑁆𑀢𑀺. 𑀢𑀲𑁆𑀲 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀲𑁆𑀲 ¶ 𑀤𑀻𑀖𑁄 𑀅𑀤𑁆𑀥𑀸 𑀯𑀻𑀢𑀺𑀯𑀢𑁆𑀢𑁄.

𑀉𑀧𑁄𑀲𑀣𑀔𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀕𑀭𑀼𑀴𑀔𑀡𑁆𑀟𑀁

𑀢𑀤𑀸 ¶ 𑀏𑀓𑁄 𑀩𑀸𑀭𑀸𑀡𑀲𑀺𑀤𑁆𑀯𑀸𑀭𑀕𑀸𑀫𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀲𑁄𑀫𑀤𑀢𑁆𑀢𑁂𑀦 𑀦𑀸𑀫 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀲𑀽𑀮𑀬𑀦𑁆𑀢𑀧𑀸𑀲𑀯𑀸𑀕𑀼𑀭𑀸𑀤𑀻𑀳𑀺 𑀑𑀟𑁆𑀟𑁂𑀢𑁆𑀯𑀸 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀓𑀸𑀚𑁂𑀦𑀸𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀦𑁆𑀢𑀫𑀲𑁄 𑀕𑁄𑀥𑀸𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 ‘‘𑀢𑀸𑀢 𑀲𑁄𑀫𑀤𑀢𑁆𑀢, 𑀲𑀘𑁂 𑀢𑀼𑀘𑁆𑀙𑀳𑀢𑁆𑀣𑀸 𑀕𑀫𑀺𑀲𑁆𑀲𑀸𑀫, 𑀫𑀸𑀢𑀸 𑀢𑁂 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀬𑀁 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀺𑀧𑀦𑁆𑀦𑀯𑀫𑁆𑀫𑀺𑀓𑀝𑁆𑀞𑀸𑀦𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀬𑀫𑀼𑀦𑀁 𑀑𑀢𑀭𑀦𑁆𑀢𑀸𑀦𑀁 𑀫𑀺𑀕𑀸𑀦𑀁 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀫𑀺𑀕𑀫𑀕𑁆𑀕𑁄 𑀧𑀜𑁆𑀜𑀸𑀬𑀢𑀺, 𑀢𑁆𑀯𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀸𑀳𑀺, 𑀅𑀳𑀁 𑀧𑀸𑀦𑀻𑀬𑀢𑁆𑀣𑀸𑀬 𑀆𑀕𑀢𑀁 𑀫𑀺𑀕𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀥𑀦𑀼𑀁 𑀆𑀤𑀸𑀬 𑀫𑀺𑀕𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀅𑀣𑁂𑀓𑁄 𑀫𑀺𑀕𑁄 𑀲𑀸𑀬𑀦𑁆𑀳𑀲𑀫𑀬𑁂 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀆𑀕𑀢𑁄. 𑀲𑁄 𑀢𑀁 𑀯𑀺𑀚𑁆𑀛𑀺. 𑀫𑀺𑀕𑁄 𑀢𑀢𑁆𑀣 𑀅𑀧𑀢𑀺𑀢𑁆𑀯𑀸 𑀲𑀭𑀯𑁂𑀕𑁂𑀦 𑀢𑀚𑁆𑀚𑀺𑀢𑁄 𑀮𑁄𑀳𑀺𑀢𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀧𑀮𑀸𑀬𑀺. 𑀧𑀺𑀢𑀸𑀧𑀼𑀢𑁆𑀢𑀸 𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀧𑀢𑀺𑀢𑀝𑁆𑀞𑀸𑀦𑁂 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀢𑀁 𑀦𑀺𑀕𑁆𑀭𑁄𑀥𑀁 𑀧𑀢𑁆𑀯𑀸 ‘‘𑀇𑀤𑀸𑀦𑀺 𑀅𑀓𑀸𑀮𑁄, 𑀦 𑀲𑀓𑁆𑀓𑀸 𑀕𑀦𑁆𑀢𑀼𑀁, 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀁𑀲𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀯𑀺𑀝𑀧𑀦𑁆𑀢𑀭𑁂 𑀦𑀺𑀧𑀚𑁆𑀚𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀧𑀘𑁆𑀘𑀽𑀲𑀲𑀫𑀬𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀫𑀺𑀕𑀲𑀤𑁆𑀤𑀲𑀯𑀦𑀸𑀬 𑀲𑁄𑀢𑀁 𑀑𑀤𑀳𑀺.

𑀢𑀲𑁆𑀫𑀺𑀁 𑀔𑀡𑁂 𑀦𑀸𑀕𑀫𑀸𑀡𑀯𑀺𑀓𑀸𑀬𑁄 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀲𑁄 𑀅𑀳𑀺𑀲𑀭𑀻𑀭𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀤𑀺𑀩𑁆𑀩𑀲𑀭𑀻𑀭𑀁 𑀫𑀸𑀧𑁂𑀢𑁆𑀯𑀸 𑀲𑀓𑁆𑀓𑀮𑀻𑀮𑀸𑀬 𑀧𑀼𑀧𑁆𑀨𑀸𑀲𑀦𑁂 𑀦𑀺𑀲𑀻𑀤𑀺. 𑀦𑀸𑀕𑀫𑀸𑀡𑀯𑀺𑀓𑀸𑀧𑀺 𑀦𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀤𑀺𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀸𑀤𑁂𑀢𑁆𑀯𑀸 𑀦𑀘𑁆𑀘𑀕𑀻𑀢𑀁 𑀧𑀝𑁆𑀞𑀧𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀏𑀲, 𑀚𑀸𑀦𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀼𑀢𑁆𑀢, 𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀢𑁆𑀢𑀁 𑀧𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀬𑀢𑀼 𑀏𑀲, 𑀓𑀺𑀮𑀦𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀸 𑀑𑀭𑀼𑀬𑁆𑀳 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀦𑀸𑀕𑀫𑀸𑀡𑀯𑀺𑀓𑀸 𑀢𑀁 𑀤𑀺𑀲𑁆𑀯𑀸 𑀲𑀤𑁆𑀥𑀺𑀁 𑀢𑀽𑀭𑀺𑀬𑁂𑀳𑀺 𑀪𑀽𑀫𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀫𑁂𑀯 𑀕𑀢𑀸. 𑀩𑁄𑀥𑀺𑀲𑀢𑁆𑀢𑁄 𑀏𑀓𑀓𑁄𑀯 ¶ ¶ 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁭𑁯𑁭.

‘‘𑀧𑀼𑀧𑁆𑀨𑀸𑀪𑀺𑀳𑀸𑀭𑀲𑁆𑀲 𑀯𑀦𑀲𑁆𑀲 𑀫𑀚𑁆𑀛𑁂, 𑀓𑁄 𑀮𑁄𑀳𑀺𑀢𑀓𑁆𑀔𑁄 𑀯𑀺𑀢𑀢𑀦𑁆𑀢𑀭𑀁𑀲𑁄;

𑀓𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸 𑀲𑀼𑀯𑀢𑁆𑀣𑀸, 𑀢𑀺𑀝𑁆𑀞𑀦𑁆𑀢𑀺 𑀦𑀸𑀭𑀺𑀬𑁄 𑀤𑀲 𑀯𑀦𑁆𑀤𑀫𑀸𑀦𑀸.

𑁭𑁯𑁮.

‘‘𑀓𑁄 ¶ 𑀢𑁆𑀯𑀁 𑀩𑁆𑀭𑀳𑀸𑀩𑀸𑀳𑀼 𑀯𑀦𑀲𑁆𑀲 𑀫𑀚𑁆𑀛𑁂, 𑀯𑀺𑀭𑁄𑀘𑀲𑀺 𑀖𑀢𑀲𑀺𑀢𑁆𑀢𑁄𑀯 𑀅𑀕𑁆𑀕𑀺;

𑀫𑀳𑁂𑀲𑀓𑁆𑀔𑁄 𑀅𑀜𑁆𑀜𑀢𑀭𑁄𑀲𑀺 𑀬𑀓𑁆𑀔𑁄, 𑀉𑀤𑀸𑀳𑀼 𑀦𑀸𑀕𑁄𑀲𑀺 𑀫𑀳𑀸𑀦𑀼𑀪𑀸𑀯𑁄’’𑀢𑀺.

𑀢𑀢𑁆𑀣 𑀧𑀼𑀧𑁆𑀨𑀸𑀪𑀺𑀳𑀸𑀭𑀲𑁆𑀲𑀸𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀽𑀚𑀦𑀢𑁆𑀣𑀸𑀬 𑀆𑀪𑀢𑁂𑀦 𑀤𑀺𑀩𑁆𑀩𑀧𑀼𑀧𑁆𑀨𑀸𑀪𑀺𑀳𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀓𑁄𑀢𑀺 𑀓𑁄 𑀦𑀸𑀫 𑀢𑁆𑀯𑀁. 𑀮𑁄𑀳𑀺𑀢𑀓𑁆𑀔𑁄𑀢𑀺 𑀭𑀢𑁆𑀢𑀓𑁆𑀔𑁄. 𑀯𑀺𑀢𑀢𑀦𑁆𑀢𑀭𑀁𑀲𑁄𑀢𑀺 𑀧𑀼𑀣𑀼𑀮𑀅𑀦𑁆𑀢𑀭𑀁𑀲𑁄. 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸𑀢𑀺 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀥𑀭𑀸. 𑀩𑁆𑀭𑀳𑀸𑀩𑀸𑀳𑀽𑀢𑀺 𑀫𑀳𑀸𑀩𑀸𑀳𑀼.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀲𑀘𑁂𑀧𑀺 ‘𑀲𑀓𑁆𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑁄𑀳𑀫𑀲𑁆𑀫𑀻’𑀢𑀺 𑀯𑀓𑁆𑀔𑀸𑀫𑀺, 𑀲𑀤𑁆𑀤𑀳𑀺𑀲𑁆𑀲𑀢𑁂𑀯𑀸𑀬𑀁 𑀩𑁆𑀭𑀸𑀳𑁆𑀫𑀡𑁄, 𑀅𑀚𑁆𑀚 𑀧𑀦 𑀫𑀬𑀸 𑀲𑀘𑁆𑀘𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀕𑀭𑀸𑀚𑀪𑀸𑀯𑀁 𑀓𑀣𑁂𑀦𑁆𑀢𑁄 𑀆𑀳 𑁋

𑁭𑁯𑁯.

‘‘𑀦𑀸𑀕𑁄𑀳𑀫𑀲𑁆𑀫𑀺 𑀇𑀤𑁆𑀥𑀺𑀫𑀸, 𑀢𑁂𑀚𑀲𑁆𑀲𑀻 𑀤𑀼𑀭𑀢𑀺𑀓𑁆𑀓𑀫𑁄;

𑀟𑀁𑀲𑁂𑀬𑁆𑀬𑀁 𑀢𑁂𑀚𑀲𑀸 𑀓𑀼𑀤𑁆𑀥𑁄, 𑀨𑀻𑀢𑀁 𑀚𑀦𑀧𑀤𑀁 𑀅𑀧𑀺.

𑁮𑁦𑁦.

‘‘𑀲𑀫𑀼𑀤𑁆𑀤𑀚𑀸 𑀳𑀺 𑀫𑁂 𑀫𑀸𑀢𑀸, 𑀥𑀢𑀭𑀝𑁆𑀞𑁄 𑀘 𑀫𑁂 𑀧𑀺𑀢𑀸;

𑀲𑀼𑀤𑀲𑁆𑀲𑀦𑀓𑀦𑀺𑀝𑁆𑀞𑁄𑀲𑁆𑀫𑀺, 𑀪𑀽𑀭𑀺𑀤𑀢𑁆𑀢𑁄𑀢𑀺 𑀫𑀁 𑀯𑀺𑀤𑀽’’𑀢𑀺.

𑀢𑀢𑁆𑀣 𑀢𑁂𑀚𑀲𑁆𑀲𑀻𑀢𑀺 𑀯𑀺𑀲𑀢𑁂𑀚𑁂𑀦 𑀢𑁂𑀚𑀯𑀸. 𑀤𑀼𑀭𑀢𑀺𑀓𑁆𑀓𑀫𑁄𑀢𑀺 𑀅𑀜𑁆𑀜𑁂𑀦 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀟𑀁𑀲𑁂𑀬𑁆𑀬𑀦𑁆𑀢𑀺 𑀲𑀘𑀸𑀳𑀁 𑀓𑀼𑀤𑁆𑀥𑁄 𑀨𑀻𑀢𑀁 𑀚𑀦𑀧𑀤𑀁 𑀅𑀧𑀺 𑀟𑀁𑀲𑁂𑀬𑁆𑀬𑀁, 𑀧𑀣𑀯𑀺𑀬𑀁 𑀫𑀫 𑀤𑀸𑀞𑀸𑀬 𑀧𑀢𑀺𑀢𑀫𑀢𑁆𑀢𑀸𑀬 𑀲𑀤𑁆𑀥𑀺𑀁 𑀧𑀣𑀯𑀺𑀬𑀸 𑀫𑀫 𑀢𑁂𑀚𑁂𑀦 𑀲𑁄 𑀲𑀩𑁆𑀩𑁄 𑀚𑀦𑀧𑀤𑁄 𑀪𑀲𑁆𑀫𑀸 𑀪𑀯𑁂𑀬𑁆𑀬𑀸𑀢𑀺 𑀯𑀤𑀢𑀺. 𑀲𑀼𑀤𑀲𑁆𑀲𑀦𑀓𑀦𑀺𑀝𑁆𑀞𑁄𑀲𑁆𑀫𑀻𑀢𑀺 𑀅𑀳𑀁 𑀫𑀫 𑀪𑀸𑀢𑀼 𑀲𑀼𑀤𑀲𑁆𑀲𑀦𑀲𑁆𑀲 𑀓𑀦𑀺𑀝𑁆𑀞𑁄 𑀅𑀲𑁆𑀫𑀺. 𑀯𑀺𑀤𑀽𑀢𑀺 𑀏𑀯𑀁 𑀫𑀫𑀁 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁂 𑀦𑀸𑀕𑀪𑀯𑀦𑁂 𑀚𑀸𑀦𑀦𑁆𑀢𑀻𑀢𑀺.

𑀇𑀤𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀘𑀡𑁆𑀟𑁄 𑀨𑀭𑀼𑀲𑁄, 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀫𑁂 𑀅𑀦𑁆𑀢𑀭𑀸𑀬𑀫𑁆𑀧𑀺 𑀓𑀭𑁂𑀬𑁆𑀬, 𑀬𑀁 𑀦𑀽𑀦𑀸𑀳𑀁 𑀇𑀫𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀫𑀳𑀦𑁆𑀢𑀁 𑀬𑀲𑀁 𑀤𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀅𑀤𑁆𑀥𑀦𑀺𑀬𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀦𑀁 𑀆𑀳 ¶ ‘‘𑀩𑁆𑀭𑀸𑀳𑁆𑀫𑀡, 𑀫𑀳𑀦𑁆𑀢𑀁 𑀢𑁂 𑀬𑀲𑀁 𑀤𑀲𑁆𑀲𑀸𑀫𑀺, 𑀭𑀫𑀡𑀻𑀬𑀁 𑀦𑀸𑀕𑀪𑀯𑀦𑀁, 𑀏𑀳𑀺 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. ‘‘𑀲𑀸𑀫𑀺, 𑀧𑀼𑀢𑁆𑀢𑁄 𑀫𑁂 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀕𑀘𑁆𑀙𑀦𑁆𑀢𑁂 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 ‘‘𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀆𑀦𑁂𑀳𑀺 𑀦’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀆𑀯𑀸𑀲𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋

𑁮𑁦𑁧.

‘‘𑀬𑀁 ¶ 𑀕𑀫𑁆𑀪𑀻𑀭𑀁 𑀲𑀤𑀸𑀯𑀝𑁆𑀝𑀁, 𑀭𑀳𑀤𑀁 𑀪𑁂𑀲𑁆𑀫𑀁 𑀧𑁂𑀓𑁆𑀔𑀲𑀺;

𑀏𑀲 𑀤𑀺𑀩𑁆𑀬𑁄 𑀫𑀫𑀸𑀯𑀸𑀲𑁄, 𑀅𑀦𑁂𑀓𑀲𑀢𑀧𑁄𑀭𑀺𑀲𑁄.

𑁮𑁦𑁨.

‘‘𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀁, 𑀦𑀻𑀮𑁄𑀤𑀁 𑀯𑀦𑀫𑀚𑁆𑀛𑀢𑁄;

𑀬𑀫𑀼𑀦𑀁 𑀧𑀯𑀺𑀲 𑀫𑀸 𑀪𑀻𑀢𑁄, 𑀔𑁂𑀫𑀁 𑀯𑀢𑁆𑀢𑀯𑀢𑀁 𑀲𑀺𑀯’’𑀦𑁆𑀢𑀺.

𑀢𑀢𑁆𑀣 𑀲𑀤𑀸𑀯𑀝𑁆𑀝𑀦𑁆𑀢𑀺 𑀲𑀤𑀸 𑀧𑀯𑀢𑁆𑀢𑀁 𑀆𑀯𑀝𑁆𑀝𑀁. 𑀪𑁂𑀲𑁆𑀫𑀦𑁆𑀢𑀺 𑀪𑀬𑀸𑀦𑀓𑀁. 𑀧𑁂𑀓𑁆𑀔𑀲𑀻𑀢𑀺 𑀬𑀁 𑀏𑀯𑀭𑀽𑀧𑀁 𑀭𑀳𑀤𑀁 𑀧𑀲𑁆𑀲𑀲𑀺. 𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀦𑁆𑀢𑀺 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀯𑀦𑀖𑀝𑀸𑀬𑀁 𑀯𑀲𑀦𑁆𑀢𑁂𑀳𑀺 𑀫𑀬𑀽𑀭𑁂𑀳𑀺 𑀘 𑀓𑁄𑀜𑁆𑀘𑁂𑀳𑀺 𑀘 𑀅𑀪𑀺𑀭𑀼𑀤𑀁 𑀉𑀧𑀓𑀽𑀚𑀺𑀢𑀁. 𑀦𑀻𑀮𑁄𑀤𑀦𑁆𑀢𑀺 𑀦𑀻𑀮𑀲𑀮𑀺𑀮𑀁. 𑀯𑀦𑀫𑀚𑁆𑀛𑀢𑁄𑀢𑀺 𑀯𑀦𑀫𑀚𑁆𑀛𑁂𑀦 𑀲𑀦𑁆𑀤𑀫𑀸𑀦𑀁. 𑀧𑀯𑀺𑀲 𑀫𑀸 𑀪𑀻𑀢𑁄𑀢𑀺 𑀏𑀯𑀭𑀽𑀧𑀁 𑀬𑀫𑀼𑀦𑀁 𑀅𑀪𑀻𑀢𑁄 𑀳𑀼𑀢𑁆𑀯𑀸 𑀧𑀯𑀺𑀲. 𑀯𑀢𑁆𑀢𑀯𑀢𑀦𑁆𑀢𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑀸𑀦𑀁 𑀆𑀘𑀸𑀭𑀯𑀦𑁆𑀢𑀸𑀦𑀁 𑀯𑀲𑀦𑀪𑀽𑀫𑀺𑀁 𑀧𑀯𑀺𑀲, 𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑀁 𑀆𑀦𑁂𑀳𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀧𑀼𑀢𑁆𑀢𑀁 𑀆𑀦𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀢𑁂 𑀉𑀪𑁄𑀧𑀺 𑀆𑀤𑀸𑀬 𑀬𑀫𑀼𑀦𑀸𑀢𑀻𑀭𑀁 𑀕𑀦𑁆𑀢𑁆𑀯𑀸 𑀢𑀻𑀭𑁂 𑀞𑀺𑀢𑁄 𑀆𑀳 𑁋

𑁮𑁦𑁩.

‘‘𑀢𑀢𑁆𑀣 𑀧𑀢𑁆𑀢𑁄 𑀲𑀸𑀦𑀼𑀘𑀭𑁄, 𑀲𑀳 𑀧𑀼𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡;

𑀧𑀽𑀚𑀺𑀢𑁄 𑀫𑀬𑁆𑀳𑀁 𑀓𑀸𑀫𑁂𑀳𑀺, 𑀲𑀼𑀔𑀁 𑀩𑁆𑀭𑀸𑀳𑁆𑀫𑀡 𑀯𑀘𑁆𑀙𑀲𑀻’’𑀢𑀺.

𑀢𑀢𑁆𑀣 𑀢𑀢𑁆𑀣 𑀧𑀢𑁆𑀢𑁄𑀢𑀺 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀦𑀸𑀕𑀪𑀯𑀦𑀁 𑀧𑀢𑁆𑀢𑁄 𑀳𑀼𑀢𑁆𑀯𑀸. 𑀫𑀬𑁆𑀳𑀦𑁆𑀢𑀺 𑀫𑀫 𑀲𑀦𑁆𑀢𑀓𑁂𑀳𑀺 𑀓𑀸𑀫𑁂𑀳𑀺 𑀧𑀽𑀚𑀺𑀢𑁄. 𑀯𑀘𑁆𑀙𑀲𑀻𑀢𑀺 𑀢𑀢𑁆𑀣 𑀦𑀸𑀕𑀪𑀯𑀦𑁂 𑀲𑀼𑀔𑀁 𑀯𑀲𑀺𑀲𑁆𑀲𑀢𑀺.

𑀏𑀯𑀁 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀉𑀪𑁄𑀧𑀺 𑀢𑁂 𑀧𑀺𑀢𑀸𑀧𑀼𑀢𑁆𑀢𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀸𑀕𑀪𑀯𑀦𑀁 𑀆𑀦𑁂𑀲𑀺. 𑀢𑁂𑀲𑀁 𑀢𑀢𑁆𑀣 𑀤𑀺𑀩𑁆𑀩𑁄 𑀅𑀢𑁆𑀢𑀪𑀸𑀯𑁄 𑀧𑀸𑀢𑀼𑀪𑀯𑀺. 𑀅𑀣 ¶ 𑀦𑁂𑀲𑀁 𑀫𑀳𑀸𑀲𑀢𑁆𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀤𑀢𑁆𑀯𑀸 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀦𑀸𑀕𑀓𑀜𑁆𑀜𑀸𑀲𑀢𑀸𑀦𑀺 𑀅𑀤𑀸𑀲𑀺. 𑀢𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀅𑀧𑁆𑀧𑀫𑀢𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀅𑀓𑀸𑀲𑀺. 𑀅𑀦𑁆𑀯𑀟𑁆𑀠𑀫𑀸𑀲𑀁 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀢𑀢𑁄 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂𑀦 𑀢𑁂 𑀅𑀢𑁆𑀣𑁄, 𑀢𑀁 𑀯𑀤𑁂𑀬𑁆𑀬𑀸𑀲𑀺, 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁄 𑀅𑀪𑀺𑀭𑀫𑀸’’𑀢𑀺 𑀯𑀢𑁆𑀯𑀸 𑀲𑁄𑀫𑀤𑀢𑁆𑀢𑁂𑀦𑀧𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀅𑀕𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀓𑀲𑀁𑀯𑀘𑁆𑀙𑀭𑀁 𑀦𑀸𑀕𑀪𑀯𑀦𑁂 𑀯𑀲𑀺𑀢𑁆𑀯𑀸 𑀫𑀦𑁆𑀤𑀧𑀼𑀜𑁆𑀜𑀢𑀸𑀬 𑀉𑀓𑁆𑀓𑀡𑁆𑀞𑀺𑀢𑁄 ¶ 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀦𑀸𑀕𑀪𑀯𑀦𑀫𑀲𑁆𑀲 𑀮𑁄𑀓𑀦𑁆𑀢𑀭𑀦𑀺𑀭𑀬𑁄 𑀯𑀺𑀬 𑀅𑀮𑀗𑁆𑀓𑀢𑀧𑀸𑀲𑀸𑀤𑁄 𑀩𑀦𑁆𑀥𑀦𑀸𑀕𑀸𑀭𑀁 𑀯𑀺𑀬 𑀅𑀮𑀗𑁆𑀓𑀢𑀦𑀸𑀕𑀓𑀜𑁆𑀜𑀸 𑀬𑀓𑁆𑀔𑀺𑀦𑀺𑀬𑁄 𑀯𑀺𑀬 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 ‘‘𑀅𑀳𑀁 𑀢𑀸𑀯 𑀉𑀓𑁆𑀓𑀡𑁆𑀞𑀺𑀢𑁄 ¶ , 𑀲𑁄𑀫𑀤𑀢𑁆𑀢𑀲𑁆𑀲𑀧𑀺 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀳 ‘‘𑀓𑀺𑀁, 𑀢𑀸𑀢, 𑀉𑀓𑁆𑀓𑀡𑁆𑀞𑀲𑀻’’𑀢𑀺? ‘‘𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀺𑀲𑁆𑀲𑀸𑀫𑀺 𑀦 𑀉𑀓𑁆𑀓𑀡𑁆𑀞𑀸𑀫𑀺, 𑀢𑁆𑀯𑀁 𑀧𑀦 𑀉𑀓𑁆𑀓𑀡𑁆𑀞𑀲𑀺, 𑀢𑀸𑀢𑀸’’𑀢𑀺? ‘‘𑀆𑀫 𑀢𑀸𑀢𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺. ‘‘𑀢𑀯 𑀫𑀸𑀢𑀼 𑀘𑁂𑀯 𑀪𑀸𑀢𑀼𑀪𑀕𑀺𑀦𑀻𑀦𑀜𑁆𑀘 𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀸𑀫𑀺, 𑀏𑀳𑀺, 𑀢𑀸𑀢 𑀲𑁄𑀫𑀤𑀢𑁆𑀢, 𑀕𑀘𑁆𑀙𑀸𑀫𑀸’’𑀢𑀺. 𑀲𑁄 ‘‘𑀦 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀧𑀺𑀢𑀭𑀸 𑀬𑀸𑀘𑀺𑀬𑀫𑀸𑀦𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀩𑁆𑀭𑀸𑀳𑁆𑀫𑀡𑁄 ‘‘𑀧𑀼𑀢𑁆𑀢𑀲𑁆𑀲 𑀢𑀸𑀯 𑀫𑁂 𑀫𑀦𑁄 𑀮𑀤𑁆𑀥𑁄, 𑀲𑀘𑁂 𑀧𑀦𑀸𑀳𑀁 𑀪𑀽𑀭𑀺𑀤𑀢𑁆𑀢𑀲𑁆𑀲 ‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’𑀢𑀺 𑀯𑀓𑁆𑀔𑀸𑀫𑀺, 𑀅𑀢𑀺𑀭𑁂𑀓𑀢𑀭𑀁 𑀫𑁂 𑀬𑀲𑀁 𑀤𑀲𑁆𑀲𑀢𑀺, 𑀏𑀯𑀁 𑀫𑁂 𑀕𑀫𑀦𑀁 𑀦 𑀪𑀯𑀺𑀲𑁆𑀲𑀢𑀺. 𑀏𑀓𑁂𑀦 𑀧𑀦 𑀉𑀧𑀸𑀬𑁂𑀦 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑁂𑀢𑁆𑀯𑀸 ‘𑀢𑁆𑀯𑀁 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀓𑀺𑀁𑀓𑀸𑀭𑀡𑀸 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀲𑀻’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘𑀲𑀕𑁆𑀕𑀢𑁆𑀣𑀸𑀬𑀸’𑀢𑀺 𑀯𑀼𑀢𑁆𑀢𑁂 ‘𑀢𑁆𑀯𑀁 𑀢𑀸𑀯 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀲𑀕𑁆𑀕𑀢𑁆𑀣𑀸𑀬 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑀁𑀬𑁂𑀯 𑀧𑀭𑀥𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫, 𑀅𑀳𑀫𑁆𑀧𑀺 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀜𑀸𑀢𑀓𑁂 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀺. 𑀅𑀣 𑀫𑁂 𑀲𑁄 𑀕𑀫𑀦𑀁 𑀅𑀦𑀼𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀢𑁂𑀦𑀸𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀉𑀓𑁆𑀓𑀡𑁆𑀞𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀅𑀫𑁆𑀳𑀸𑀓𑀁 𑀦 𑀓𑀺𑀜𑁆𑀘𑀺 𑀧𑀭𑀺𑀳𑀸𑀬𑀢𑀻’’𑀢𑀺 𑀓𑀺𑀜𑁆𑀘𑀺 𑀕𑀫𑀦𑀧𑀝𑀺𑀩𑀤𑁆𑀥𑀁 𑀅𑀯𑀢𑁆𑀯𑀸𑀯 𑀆𑀤𑀺𑀢𑁄 𑀢𑀸𑀯 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀯𑀡𑁆𑀡𑁂𑀦𑁆𑀢𑁄 𑀆𑀳 𑁋

𑁮𑁦𑁪.

‘‘𑀲𑀫𑀸 𑀲𑀫𑀦𑁆𑀢𑀧𑀭𑀺𑀢𑁄, 𑀧𑀳𑀽𑀢𑀢𑀕𑀭𑀸 𑀫𑀳𑀻;

𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸, 𑀲𑁄𑀪𑀢𑀺 𑀳𑀭𑀺𑀢𑀼𑀢𑁆𑀢𑀫𑀸.

𑁮𑁦𑁫.

‘‘𑀭𑀫𑁆𑀫𑀸𑀦𑀺 ¶ 𑀯𑀦𑀘𑁂𑀢𑁆𑀬𑀸𑀦𑀺, 𑀭𑀫𑁆𑀫𑀸 𑀳𑀁𑀲𑀽𑀧𑀓𑀽𑀚𑀺𑀢𑀸;

𑀑𑀧𑀼𑀧𑁆𑀨𑀧𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀺, 𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀦𑀺𑀫𑁆𑀫𑀺𑀢𑀸.

𑁮𑁦𑁬.

‘‘𑀅𑀝𑁆𑀞𑀁𑀲𑀸 𑀲𑀼𑀓𑀢𑀸 𑀣𑀫𑁆𑀪𑀸, 𑀲𑀩𑁆𑀩𑁂 𑀯𑁂𑀴𑀼𑀭𑀺𑀬𑀸𑀫𑀬𑀸;

𑀲𑀳𑀲𑁆𑀲𑀣𑀫𑁆𑀪𑀸 𑀧𑀸𑀲𑀸𑀤𑀸, 𑀧𑀽𑀭𑀸 𑀓𑀜𑁆𑀜𑀸𑀳𑀺 𑀚𑁄𑀢𑀭𑁂.

𑁮𑁦𑁭.

‘‘𑀯𑀺𑀫𑀸𑀦𑀁 ¶ 𑀉𑀧𑀧𑀦𑁆𑀦𑁄𑀲𑀺, 𑀤𑀺𑀩𑁆𑀬𑀁 𑀧𑀼𑀜𑁆𑀜𑁂𑀳𑀺 𑀅𑀢𑁆𑀢𑀦𑁄;

𑀅𑀲𑀫𑁆𑀩𑀸𑀥𑀁 𑀲𑀺𑀯𑀁 𑀭𑀫𑁆𑀫𑀁, 𑀅𑀘𑁆𑀘𑀦𑁆𑀢𑀲𑀼𑀔𑀲𑀁𑀳𑀺𑀢𑀁.

𑁮𑁦𑁮.

‘‘𑀫𑀜𑁆𑀜𑁂 𑀲𑀳𑀲𑁆𑀲𑀦𑁂𑀢𑁆𑀢𑀲𑁆𑀲, 𑀯𑀺𑀫𑀸𑀦𑀁 𑀦𑀸𑀪𑀺𑀓𑀗𑁆𑀔𑀲𑀺;

𑀇𑀤𑁆𑀥𑀻 𑀳𑀺 𑀢𑁆𑀬𑀸𑀬𑀁 𑀯𑀺𑀧𑀼𑀮𑀸, 𑀲𑀓𑁆𑀓𑀲𑁆𑀲𑁂𑀯 𑀚𑀼𑀢𑀻𑀫𑀢𑁄’’𑀢𑀺.

𑀢𑀢𑁆𑀣 ¶ 𑀲𑀫𑀸 𑀲𑀫𑀦𑁆𑀢𑀧𑀭𑀺𑀢𑁄𑀢𑀺 𑀧𑀭𑀺𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸𑀪𑀸𑀕𑁂𑀲𑀼 𑀅𑀬𑀁 𑀢𑀯 𑀦𑀸𑀕𑀪𑀯𑀦𑁂 𑀫𑀳𑀻 𑀲𑀼𑀯𑀡𑁆𑀡𑀭𑀚𑀢𑀫𑀡𑀺 𑀫𑀼𑀢𑁆𑀢𑀸𑀯𑀸𑀮𑀼𑀓𑀸𑀧𑀭𑀺𑀓𑀺𑀡𑁆𑀡𑀸 𑀲𑀫𑀢𑀮𑀸. 𑀧𑀳𑀽𑀢𑀢𑀕𑀭𑀸 𑀫𑀳𑀻𑀢𑀺 𑀩𑀳𑀼𑀓𑁂𑀳𑀺 𑀢𑀕𑀭𑀕𑀘𑁆𑀙𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸𑀢𑀺 𑀲𑀼𑀯𑀡𑁆𑀡𑀇𑀦𑁆𑀤𑀕𑁄𑀧𑀓𑁂𑀳𑀺 𑀲𑀜𑁆𑀙𑀦𑁆𑀦𑀸. 𑀲𑁄𑀪𑀢𑀺 𑀳𑀭𑀺𑀢𑀼𑀢𑁆𑀢𑀫𑀸𑀢𑀺 𑀳𑀭𑀺𑀢𑀯𑀡𑁆𑀡𑀤𑀩𑁆𑀩𑀢𑀺𑀡𑀲𑀜𑁆𑀙𑀦𑁆𑀦𑀸 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀯𑀦𑀘𑁂𑀢𑁆𑀬𑀸𑀦𑀻𑀢𑀺 𑀯𑀦𑀖𑀝𑀸. 𑀑𑀧𑀼𑀧𑁆𑀨𑀧𑀤𑁆𑀥𑀸𑀢𑀺 𑀧𑀼𑀧𑁆𑀨𑀺𑀢𑁆𑀯𑀸 𑀧𑀢𑀺𑀢𑁂𑀳𑀺 𑀧𑀤𑀼𑀫𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑀸 𑀉𑀤𑀓𑀧𑀺𑀝𑁆𑀞𑀸. 𑀲𑀼𑀦𑀺𑀫𑁆𑀫𑀺𑀢𑀸𑀢𑀺 𑀢𑀯 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀦𑀺𑀫𑁆𑀫𑀺𑀢𑀸. 𑀅𑀝𑁆𑀞𑀁𑀲𑀸𑀢𑀺 𑀢𑀯 𑀯𑀲𑀦𑀧𑀸𑀲𑀸𑀤𑁂𑀲𑀼 𑀅𑀝𑁆𑀞𑀁𑀲𑀸 𑀲𑀼𑀓𑀢𑀸 𑀯𑁂𑀴𑀼𑀭𑀺𑀬𑀫𑀬𑀸 𑀣𑀫𑁆𑀪𑀸. 𑀢𑁂𑀳𑀺 𑀣𑀫𑁆𑀪𑁂𑀳𑀺 𑀲𑀳𑀲𑁆𑀲𑀣𑀫𑁆𑀪𑀸 𑀢𑀯 𑀧𑀸𑀲𑀸𑀤𑀸 𑀦𑀸𑀕𑀓𑀜𑁆𑀜𑀸𑀳𑀺 𑀧𑀽𑀭𑀸 𑀯𑀺𑀚𑁆𑀚𑁄𑀢𑀦𑁆𑀢𑀺. 𑀉𑀧𑀧𑀦𑁆𑀦𑁄𑀲𑀻𑀢𑀺 𑀏𑀯𑀭𑀽𑀧𑁂 𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀲𑀳𑀲𑁆𑀲𑀦𑁂𑀢𑁆𑀢𑀲𑁆𑀲 𑀯𑀺𑀫𑀸𑀦𑀦𑁆𑀢𑀺 𑀲𑀓𑁆𑀓𑀲𑁆𑀲 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀁. 𑀇𑀤𑁆𑀥𑀻 𑀳𑀺 𑀢𑁆𑀬𑀸𑀬𑀁 𑀯𑀺𑀧𑀼𑀮𑀸𑀢𑀺 𑀬𑀲𑁆𑀫𑀸 𑀢𑀯𑀸𑀬𑀁 𑀯𑀺𑀧𑀼𑀮𑀸 𑀇𑀤𑁆𑀥𑀺, 𑀢𑀲𑁆𑀫𑀸 𑀢𑁆𑀯𑀁 𑀢𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦 𑀲𑀓𑁆𑀓𑀲𑁆𑀲 𑀯𑀺𑀫𑀸𑀦𑀫𑁆𑀧𑀺 𑀦 𑀧𑀢𑁆𑀣𑁂𑀲𑀺, 𑀅𑀜𑁆𑀜𑀁 𑀢𑀢𑁄 𑀉𑀢𑁆𑀢𑀭𑀺 𑀫𑀳𑀦𑁆𑀢𑀁 𑀞𑀸𑀦𑀁 𑀧𑀢𑁆𑀣𑁂𑀲𑀻𑀢𑀺 𑀫𑀜𑁆𑀜𑀸𑀫𑀺.

𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀫𑀸 𑀳𑁂𑀯𑀁, 𑀩𑁆𑀭𑀸𑀳𑁆𑀫𑀡, 𑀅𑀯𑀘, 𑀲𑀓𑁆𑀓𑀲𑁆𑀲 𑀬𑀲𑀁 𑀧𑀝𑀺𑀘𑁆𑀘 𑀅𑀫𑁆𑀳𑀸𑀓𑀁 𑀬𑀲𑁄 𑀲𑀺𑀦𑁂𑀭𑀼𑀲𑀦𑁆𑀢𑀺𑀓𑁂 𑀲𑀸𑀲𑀧𑁄 𑀯𑀺𑀬, 𑀫𑀬𑀁 𑀢𑀲𑁆𑀲 𑀧𑀭𑀺𑀘𑀸𑀭𑀓𑁂𑀧𑀺 𑀦 𑀅𑀕𑁆𑀖𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁮𑁦𑁯.

‘‘𑀫𑀦𑀲𑀸𑀧𑀺 𑀦 𑀧𑀢𑁆𑀢𑀩𑁆𑀩𑁄, 𑀆𑀦𑀼𑀪𑀸𑀯𑁄 𑀚𑀼𑀢𑀻𑀫𑀢𑁄;

𑀧𑀭𑀺𑀘𑀸𑀭𑀬𑀫𑀸𑀦𑀸𑀦𑀁, 𑀲𑀇𑀦𑁆𑀤𑀸𑀦𑀁 𑀯𑀲𑀯𑀢𑁆𑀢𑀺𑀦’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 ¶ 𑁋 𑀩𑁆𑀭𑀸𑀳𑁆𑀫𑀡, 𑀲𑀓𑁆𑀓𑀲𑁆𑀲 𑀬𑀲𑁄 𑀦𑀸𑀫 𑀏𑀓𑀁 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀯𑀸 𑀤𑀺𑀯𑀲𑁂 ‘‘𑀏𑀢𑁆𑀢𑀓𑁄 𑀲𑀺𑀬𑀸’’𑀢𑀺 𑀫𑀦𑀲𑀸 𑀘𑀺𑀦𑁆𑀢𑁂𑀦𑁆𑀢𑁂𑀦𑀧𑀺 𑀦 𑀅𑀪𑀺𑀧𑀢𑁆𑀢𑀩𑁆𑀩𑁄. 𑀬𑁂𑀧𑀺 𑀦𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀢𑁂𑀲𑀁 𑀤𑁂𑀯𑀭𑀸𑀚𑀸𑀦𑀁 𑀧𑀭𑀺𑀘𑀸𑀭𑀬𑀫𑀸𑀦𑀸𑀦𑀁 𑀇𑀦𑁆𑀤𑀁 𑀦𑀸𑀬𑀓𑀁 𑀓𑀢𑁆𑀯𑀸 𑀘𑀭𑀦𑁆𑀢𑀸𑀦𑀁 𑀲𑀇𑀦𑁆𑀤𑀸𑀦𑀁 𑀯𑀲𑀯𑀢𑁆𑀢𑀻𑀦𑀁 𑀘𑀢𑀼𑀦𑁆𑀦𑀁 𑀮𑁄𑀓𑀧𑀸𑀮𑀸𑀦𑀁 𑀬𑀲𑀲𑁆𑀲𑀧𑀺 𑀅𑀫𑁆𑀳𑀸𑀓𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀬𑀲𑁄 𑀲𑁄𑀴𑀲𑀺𑀁 𑀓𑀮𑀁 𑀦𑀕𑁆𑀖𑀢𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀇𑀤𑀁 𑀢𑁂 𑀫𑀜𑁆𑀜𑁂 𑀲𑀳𑀲𑁆𑀲𑀦𑁂𑀢𑁆𑀢𑀲𑁆𑀲 𑀯𑀺𑀫𑀸𑀦’’𑀦𑁆𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀳𑀁 𑀢𑀁 𑀅𑀦𑀼𑀲𑁆𑀲𑀭𑀺𑀁. ‘‘𑀅𑀳𑀜𑁆𑀳𑀺 𑀯𑁂𑀚𑀬𑀦𑁆𑀢𑀁 𑀧𑀢𑁆𑀣𑁂𑀦𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀢𑁆𑀣𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋

𑁮𑁧𑁦.

‘‘𑀢𑀁 𑀯𑀺𑀫𑀸𑀦𑀁 𑀅𑀪𑀺𑀚𑁆𑀛𑀸𑀬, 𑀅𑀫𑀭𑀸𑀦𑀁 𑀲𑀼𑀔𑁂𑀲𑀺𑀦𑀁;

𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄, 𑀲𑁂𑀫𑀺 𑀯𑀫𑁆𑀫𑀺𑀓𑀫𑀼𑀤𑁆𑀥𑀦𑀻’’𑀢𑀺.

𑀢𑀢𑁆𑀣 ¶ ¶ 𑀅𑀪𑀺𑀚𑁆𑀛𑀸𑀬𑀸𑀢𑀺 𑀧𑀢𑁆𑀣𑁂𑀢𑁆𑀯𑀸. 𑀅𑀫𑀭𑀸𑀦𑀦𑁆𑀢𑀺 𑀤𑀻𑀖𑀸𑀬𑀼𑀓𑀸𑀦𑀁 𑀤𑁂𑀯𑀸𑀦𑀁. 𑀲𑀼𑀔𑁂𑀲𑀺𑀦𑀦𑁆𑀢𑀺 𑀏𑀲𑀺𑀢𑀲𑀼𑀔𑀸𑀦𑀁 𑀲𑀼𑀔𑁂 𑀧𑀢𑀺𑀝𑁆𑀞𑀺𑀢𑀸𑀦𑀁.

𑀓𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀸𑀦𑀺 𑀫𑁂 𑀑𑀓𑀸𑀲𑁄 𑀮𑀤𑁆𑀥𑁄’’𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀕𑀦𑁆𑀢𑀼𑀁 𑀆𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁮𑁧𑁧.

‘‘𑀅𑀳𑀜𑁆𑀘 𑀫𑀺𑀕𑀫𑁂𑀲𑀸𑀦𑁄, 𑀲𑀧𑀼𑀢𑁆𑀢𑁄 𑀧𑀸𑀯𑀺𑀲𑀺𑀁 𑀯𑀦𑀁;

𑀢𑀁 𑀫𑀁 𑀫𑀢𑀁 𑀯𑀸 𑀚𑀻𑀯𑀁 𑀯𑀸, 𑀦𑀸𑀪𑀺𑀯𑁂𑀤𑁂𑀦𑁆𑀢𑀺 𑀜𑀸𑀢𑀓𑀸.

𑁮𑁧𑁨.

‘‘𑀆𑀫𑀦𑁆𑀢𑀬𑁂 𑀪𑀽𑀭𑀺𑀤𑀢𑁆𑀢𑀁, 𑀓𑀸𑀲𑀺𑀧𑀼𑀢𑁆𑀢𑀁 𑀬𑀲𑀲𑁆𑀲𑀺𑀦𑀁;

𑀢𑀬𑀸 𑀦𑁄 𑀲𑀫𑀦𑀼𑀜𑁆𑀜𑀸𑀢𑀸, 𑀅𑀧𑀺 𑀧𑀲𑁆𑀲𑁂𑀫𑀼 𑀜𑀸𑀢𑀓𑁂’’𑀢𑀺.

𑀢𑀢𑁆𑀣 𑀦𑀸𑀪𑀺𑀯𑁂𑀤𑁂𑀦𑁆𑀢𑀻𑀢𑀺 𑀦 𑀚𑀸𑀦𑀦𑁆𑀢𑀺, 𑀓𑀣𑁂𑀦𑁆𑀢𑁄𑀧𑀺 𑀦𑁂𑀲𑀁 𑀦𑀢𑁆𑀣𑀺. 𑀆𑀫𑀦𑁆𑀢𑀬𑁂𑀢𑀺 𑀆𑀫𑀦𑁆𑀢𑀬𑀸𑀫𑀺. 𑀓𑀸𑀲𑀺𑀧𑀼𑀢𑁆𑀢𑀦𑁆𑀢𑀺 𑀓𑀸𑀲𑀺𑀭𑀸𑀚𑀥𑀻𑀢𑀸𑀬 𑀧𑀼𑀢𑁆𑀢𑀁.

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁮𑁧𑁩.

‘‘𑀏𑀲𑁄 𑀳𑀺 𑀯𑀢 𑀫𑁂 𑀙𑀦𑁆𑀤𑁄, 𑀬𑀁 𑀯𑀲𑁂𑀲𑀺 𑀫𑀫𑀦𑁆𑀢𑀺𑀓𑁂;

𑀦 𑀳𑀺 𑀏𑀢𑀸𑀤𑀺𑀲𑀸 𑀓𑀸𑀫𑀸, 𑀲𑀼𑀮𑀪𑀸 𑀳𑁄𑀦𑁆𑀢𑀺 𑀫𑀸𑀦𑀼𑀲𑁂.

𑁮𑁧𑁪.

‘‘𑀲𑀘𑁂 𑀢𑁆𑀯𑀁 𑀦𑀺𑀘𑁆𑀙𑀲𑁂 𑀯𑀢𑁆𑀣𑀼𑀁, 𑀫𑀫 𑀓𑀸𑀫𑁂𑀳𑀺 𑀧𑀽𑀚𑀺𑀢𑁄;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀜𑀸𑀢𑀓𑁂’’𑀢𑀺.

𑀫𑀳𑀸𑀲𑀢𑁆𑀢𑁄 ¶ 𑀕𑀸𑀣𑀸𑀤𑁆𑀯𑀬𑀁 𑀯𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀡𑀺𑀁 𑀦𑀺𑀲𑁆𑀲𑀸𑀬 𑀲𑀼𑀔𑀁 𑀚𑀻𑀯𑀦𑁆𑀢𑁄 𑀓𑀲𑁆𑀲𑀘𑀺 𑀦𑀸𑀘𑀺𑀓𑁆𑀔𑀺𑀲𑁆𑀲𑀢𑀺, 𑀏𑀢𑀲𑁆𑀲 𑀲𑀩𑁆𑀩𑀓𑀸𑀫𑀤𑀤𑀁 𑀫𑀡𑀺𑀁 𑀤𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀢𑀁 𑀤𑀤𑀦𑁆𑀢𑁄 𑀆𑀳 𑁋

𑁮𑁧𑁫.

‘‘𑀥𑀸𑀭𑀬𑀺𑀫𑀁 𑀫𑀡𑀺𑀁 𑀤𑀺𑀩𑁆𑀬𑀁, 𑀧𑀲𑀼𑀁 𑀧𑀼𑀢𑁆𑀢𑁂 𑀘 𑀯𑀺𑀦𑁆𑀤𑀢𑀺;

𑀅𑀭𑁄𑀕𑁄 𑀲𑀼𑀔𑀺𑀢𑁄 𑀳𑁄𑀢𑀺, 𑀕𑀘𑁆𑀙𑁂𑀯𑀸𑀤𑀸𑀬 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 ¶ 𑀧𑀲𑀼𑀁 𑀧𑀼𑀢𑁆𑀢𑁂 𑀘 𑀯𑀺𑀦𑁆𑀤𑀢𑀻𑀢𑀺 𑀇𑀫𑀁 𑀫𑀡𑀺𑀁 𑀥𑀸𑀭𑀬𑀫𑀸𑀦𑁄 𑀇𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀲𑀼𑀜𑁆𑀘 𑀧𑀼𑀢𑁆𑀢𑁂 𑀘 𑀅𑀜𑁆𑀜𑀜𑁆𑀘 𑀬𑀁 𑀇𑀘𑁆𑀙𑀢𑀺, 𑀢𑀁 𑀲𑀩𑁆𑀩𑀁 𑀮𑀪𑀢𑀺.

𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀕𑀸𑀣𑀫𑀸𑀳 𑁋

𑁮𑁧𑁬.

‘‘𑀓𑀼𑀲𑀮𑀁 𑀧𑀝𑀺𑀦𑀦𑁆𑀤𑀸𑀫𑀺, 𑀪𑀽𑀭𑀺𑀤𑀢𑁆𑀢 𑀯𑀘𑁄 𑀢𑀯;

𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀚𑀺𑀡𑁆𑀡𑁄𑀲𑁆𑀫𑀺, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀽𑀭𑀺𑀤𑀢𑁆𑀢, 𑀢𑀯 𑀯𑀘𑀦𑀁 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁, 𑀢𑀁 𑀧𑀝𑀺𑀦𑀦𑁆𑀤𑀸𑀫𑀺 𑀦 𑀧𑀝𑀺𑀓𑁆𑀔𑀺𑀧𑀸𑀫𑀺. 𑀅𑀳𑀁 𑀧𑀦 𑀚𑀺𑀡𑁆𑀡𑁄 𑀅𑀲𑁆𑀫𑀺, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑀸𑀫𑀺, 𑀓𑀺𑀁 𑀫𑁂 𑀫𑀡𑀺𑀦𑀸𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋

𑁮𑁧𑁭.

‘‘𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑁂 𑀪𑀗𑁆𑀕𑁄, 𑀳𑁄𑀢𑀺 𑀪𑁄𑀕𑁂𑀳𑀺 𑀓𑀸𑀭𑀺𑀬𑀁;

𑀅𑀯𑀺𑀓𑀫𑁆𑀧𑀫𑀸𑀦𑁄 𑀏𑀬𑁆𑀬𑀸𑀲𑀺, 𑀩𑀳𑀼𑀁 𑀤𑀲𑁆𑀲𑀸𑀫𑀺 𑀢𑁂 𑀥𑀦’’𑀦𑁆𑀢𑀺.

𑀢𑀢𑁆𑀣 ¶ 𑀘𑁂 𑀪𑀗𑁆𑀕𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀸𑀫 𑀤𑀼𑀓𑁆𑀓𑀭𑁄, 𑀅𑀦𑀪𑀺𑀭𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑁂 𑀪𑀗𑁆𑀕𑁄 𑀳𑁄𑀢𑀺, 𑀢𑀤𑀸 𑀕𑀺𑀳𑀺𑀪𑀽𑀢𑀲𑁆𑀲 𑀪𑁄𑀕𑁂𑀳𑀺 𑀓𑀸𑀭𑀺𑀬𑀁 𑀳𑁄𑀢𑀺, 𑀏𑀯𑀭𑀽𑀧𑁂 𑀓𑀸𑀮𑁂 𑀢𑁆𑀯𑀁 𑀦𑀺𑀭𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑁂𑀬𑁆𑀬𑀸𑀲𑀺, 𑀩𑀳𑀼𑀁 𑀢𑁂 𑀥𑀦𑀁 𑀤𑀲𑁆𑀲𑀸𑀫𑀻𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁮𑁧𑁮.

‘‘𑀓𑀼𑀲𑀮𑀁 𑀧𑀝𑀺𑀦𑀦𑁆𑀤𑀸𑀫𑀺, 𑀪𑀽𑀭𑀺𑀤𑀢𑁆𑀢 𑀯𑀘𑁄 𑀢𑀯;

𑀧𑀼𑀦𑀧𑀺 𑀆𑀕𑀫𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀧𑀼𑀦𑀧𑀻𑀢𑀺 𑀧𑀼𑀦 𑀅𑀧𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀅𑀣𑀲𑁆𑀲 ¶ 𑀢𑀢𑁆𑀣 𑀅𑀯𑀲𑀺𑀢𑀼𑀓𑀸𑀫𑀢𑀁 𑀜𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀦𑀸𑀕𑀫𑀸𑀡𑀯𑀓𑁂 𑀆𑀡𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀫𑀦𑀼𑀲𑁆𑀲𑀮𑁄𑀓𑀁 𑀧𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁮𑁧𑁯.

‘‘𑀇𑀤𑀁 ¶ 𑀯𑀢𑁆𑀯𑀸 𑀪𑀽𑀭𑀺𑀤𑀢𑁆𑀢𑁄, 𑀧𑁂𑀲𑁂𑀲𑀺 𑀘𑀢𑀼𑀭𑁄 𑀚𑀦𑁂;

𑀏𑀣 𑀕𑀘𑁆𑀙𑀣 𑀉𑀝𑁆𑀞𑁂𑀣, 𑀔𑀺𑀧𑁆𑀧𑀁 𑀧𑀸𑀧𑁂𑀣 𑀩𑁆𑀭𑀸𑀳𑁆𑀫𑀡𑀁.

𑁮𑁨𑁦.

‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀝𑁆𑀞𑀸𑀬 𑀘𑀢𑀼𑀭𑁄 𑀚𑀦𑀸;

𑀧𑁂𑀲𑀺𑀢𑀸 𑀪𑀽𑀭𑀺𑀤𑀢𑁆𑀢𑁂𑀦, 𑀔𑀺𑀧𑁆𑀧𑀁 𑀧𑀸𑀧𑁂𑀲𑀼 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀧𑀸𑀧𑁂𑀲𑀽𑀢𑀺 𑀬𑀫𑀼𑀦𑀸𑀢𑁄 𑀉𑀢𑁆𑀢𑀸𑀭𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑀕𑁆𑀕𑀁 𑀧𑀸𑀧𑀬𑀺𑀁𑀲𑀼, 𑀧𑀸𑀧𑀬𑀺𑀢𑁆𑀯𑀸 𑀘 𑀧𑀦 ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀧𑀘𑁆𑀘𑀸𑀕𑀫𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄𑀧𑀺 ‘‘𑀢𑀸𑀢 𑀲𑁄𑀫𑀤𑀢𑁆𑀢, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀺𑀕𑀁 𑀯𑀺𑀚𑁆𑀛𑀺𑀫𑁆𑀳𑀸, 𑀇𑀫𑀲𑁆𑀫𑀺𑀁 𑀲𑀽𑀓𑀭’’𑀦𑁆𑀢𑀺 𑀧𑀼𑀢𑁆𑀢𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑁄𑀓𑁆𑀔𑀭𑀡𑀺𑀁 𑀤𑀺𑀲𑁆𑀯𑀸 ‘‘𑀢𑀸𑀢 𑀲𑁄𑀫𑀤𑀢𑁆𑀢, 𑀦𑁆𑀳𑀸𑀬𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 𑀉𑀪𑁄𑀧𑀺 𑀤𑀺𑀩𑁆𑀩𑀸𑀪𑀭𑀡𑀸𑀦𑀺 𑀘𑁂𑀯 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀘 𑀑𑀫𑀼𑀜𑁆𑀘𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀢𑀻𑀭𑁂 𑀞𑀧𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀢𑀸𑀦𑀺 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀅𑀕𑀫𑀁𑀲𑀼. 𑀧𑀞𑀫𑀁 𑀦𑀺𑀯𑀢𑁆𑀣𑀓𑀸𑀲𑀸𑀯𑀧𑀺𑀮𑁄𑀢𑀺𑀓𑀸𑀯 𑀦𑁂𑀲𑀁 𑀲𑀭𑀻𑀭𑁂 𑀧𑀝𑀺𑀫𑀼𑀜𑁆𑀘𑀺𑀁𑀲𑀼, 𑀥𑀦𑀼𑀲𑀭𑀲𑀢𑁆𑀢𑀺𑀬𑁄𑀧𑀺 𑀧𑀸𑀓𑀢𑀺𑀓𑀸𑀯 𑀅𑀳𑁂𑀲𑀼𑀁. 𑀲𑁄𑀫𑀤𑀢𑁆𑀢𑁄 ‘‘𑀦𑀸𑀲𑀺𑀢𑀸𑀫𑁆𑀳𑀸 𑀢𑀬𑀸, 𑀢𑀸𑀢𑀸’’𑀢𑀺 𑀧𑀭𑀺𑀤𑁂𑀯𑀺. 𑀅𑀣 𑀦𑀁 𑀧𑀺𑀢𑀸 ‘‘𑀫𑀸 𑀘𑀺𑀦𑁆𑀢𑀬𑀺, 𑀫𑀺𑀕𑁂𑀲𑀼 𑀲𑀦𑁆𑀢𑁂𑀲𑀼 𑀅𑀭𑀜𑁆𑀜𑁂 𑀫𑀺𑀕𑁂 𑀯𑀥𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀸𑀫𑀸’’𑀢𑀺 𑀅𑀲𑁆𑀲𑀸𑀲𑁂𑀲𑀺. 𑀲𑁄𑀫𑀤𑀢𑁆𑀢𑀲𑁆𑀲 𑀫𑀸𑀢𑀸 𑀢𑁂𑀲𑀁 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀖𑀭𑀁 𑀦𑁂𑀢𑁆𑀯𑀸 𑀅𑀦𑁆𑀦𑀧𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀇𑀢𑀭𑀸 𑀧𑀼𑀢𑁆𑀢𑀁 𑀧𑀼𑀘𑁆𑀙𑀺 ‘‘𑀢𑀸𑀢 ¶ , 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀼𑀳𑀺𑀁 𑀕𑀢𑀢𑁆𑀣𑀸’’𑀢𑀺? ‘‘𑀅𑀫𑁆𑀫, 𑀪𑀽𑀭𑀺𑀤𑀢𑁆𑀢𑀦𑀸𑀕𑀭𑀸𑀚𑁂𑀦 𑀅𑀫𑁆𑀳𑁂 𑀦𑀸𑀕𑀪𑀯𑀦𑀁 𑀦𑀻𑀢𑀸, 𑀢𑀢𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀇𑀤𑀸𑀦𑀺 𑀆𑀕𑀢𑀸’’𑀢𑀺. ‘‘𑀓𑀺𑀜𑁆𑀘𑀺 𑀧𑀦 𑀯𑁄 𑀭𑀢𑀦𑀁 𑀆𑀪𑀢’’𑀦𑁆𑀢𑀺. ‘‘𑀦𑀸𑀪𑀢𑀁 𑀅𑀫𑁆𑀫𑀸’’𑀢𑀺. ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀢𑁂𑀦 𑀓𑀺𑀜𑁆𑀘𑀺 𑀦 𑀤𑀺𑀦𑁆𑀦’’𑀦𑁆𑀢𑀺. ‘‘𑀅𑀫𑁆𑀫, 𑀪𑀽𑀭𑀺𑀤𑀢𑁆𑀢𑁂𑀦 𑀫𑁂 𑀧𑀺𑀢𑀼 𑀲𑀩𑁆𑀩𑀓𑀸𑀫𑀤𑀤𑁄 𑀫𑀡𑀺 𑀤𑀺𑀦𑁆𑀦𑁄 𑀅𑀳𑁄𑀲𑀺, 𑀇𑀫𑀺𑀦𑀸 𑀧𑀦 𑀦 𑀕𑀳𑀺𑀢𑁄’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺. ‘‘𑀧𑀩𑁆𑀩𑀚𑀺𑀲𑁆𑀲𑀢𑀺 𑀓𑀺𑀭𑀸’’𑀢𑀺. 𑀲𑀸 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀤𑀸𑀭𑀓𑁂 𑀫𑀫 𑀪𑀸𑀭𑀁 𑀓𑀭𑁄𑀦𑁆𑀢𑁄 𑀦𑀸𑀕𑀪𑀯𑀦𑁂 𑀯𑀲𑀺𑀢𑁆𑀯𑀸 𑀇𑀤𑀸𑀦𑀺 𑀓𑀺𑀭 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀯𑀻𑀳𑀺𑀪𑀜𑁆𑀚𑀦𑀤𑀩𑁆𑀩𑀺𑀬𑀸 𑀧𑀺𑀝𑁆𑀞𑀺𑀁 𑀧𑁄𑀣𑁂𑀦𑁆𑀢𑀻 ‘‘𑀅𑀭𑁂, 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀓𑀺𑀭 𑀫𑀡𑀺𑀭𑀢𑀦𑀁 𑀦 𑀕𑀡𑁆𑀳𑀲𑀺, 𑀅𑀣 𑀓𑀲𑁆𑀫𑀸 𑀅𑀧𑀩𑁆𑀩𑀚𑀺𑀢𑁆𑀯𑀸 𑀇𑀥𑀸𑀕𑀢𑁄𑀲𑀺, 𑀦𑀺𑀓𑁆𑀔𑀫 𑀫𑀫 𑀖𑀭𑀸 𑀲𑀻𑀖’’𑀦𑁆𑀢𑀺 𑀲𑀦𑁆𑀢𑀚𑁆𑀚𑁂𑀲𑀺. 𑀅𑀣 𑀦𑀁 ‘‘𑀪𑀤𑁆𑀤𑁂, 𑀫𑀸 𑀓𑀼𑀚𑁆𑀛𑀺, 𑀅𑀭𑀜𑁆𑀜𑁂 𑀫𑀺𑀕𑁂𑀲𑀼 𑀲𑀦𑁆𑀢𑁂𑀲𑀼 𑀅𑀳𑀁 𑀢𑀁 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 ¶ 𑀯𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀦𑀺𑀬𑀸𑀫𑁂𑀦𑁂𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺.

𑀢𑀤𑀸 𑀤𑀓𑁆𑀔𑀺𑀡𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀤𑀺𑀲𑀸𑀪𑀸𑀕𑁂 𑀲𑀺𑀫𑁆𑀩𑀮𑀺𑀯𑀸𑀲𑀻 𑀏𑀓𑁄 𑀕𑀭𑀼𑀴𑁄 𑀧𑀓𑁆𑀔𑀯𑀸𑀢𑁂𑀳𑀺 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀯𑀺𑀬𑀽𑀳𑀺𑀢𑁆𑀯𑀸 𑀏𑀓𑀁 𑀦𑀸𑀕𑀭𑀸𑀚𑀸𑀦𑀁 𑀲𑀻𑀲𑁂 𑀕𑀡𑁆𑀳𑀺. 𑀢𑀤𑀸𑀳𑀺 𑀲𑀼𑀧𑀡𑁆𑀡𑀸 𑀦𑀸𑀕𑀁 𑀕𑀳𑁂𑀢𑀼𑀁 𑀅𑀚𑀸𑀦𑀦𑀓𑀸𑀬𑁂𑀯 ¶ , 𑀧𑀘𑁆𑀙𑀸 𑀧𑀡𑁆𑀟𑀭𑀚𑀸𑀢𑀓𑁂 𑀚𑀸𑀦𑀺𑀁𑀲𑀼. 𑀲𑁄 𑀧𑀦 𑀢𑀁 𑀲𑀻𑀲𑁂 𑀕𑀳𑁂𑀢𑁆𑀯𑀸𑀧𑀺 𑀉𑀤𑀓𑁂 𑀅𑀦𑁄𑀢𑁆𑀣𑀭𑀦𑁆𑀢𑁂𑀬𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑀫𑁆𑀩𑀦𑁆𑀢𑀁 𑀆𑀤𑀸𑀬 𑀳𑀺𑀫𑀯𑀦𑁆𑀢𑀫𑀢𑁆𑀣𑀓𑁂𑀦 𑀧𑀸𑀬𑀸𑀲𑀺. 𑀢𑀤𑀸 𑀘𑁂𑀓𑁄 𑀓𑀸𑀲𑀺𑀭𑀝𑁆𑀞𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺. 𑀲𑁄 𑀢𑀲𑁆𑀲 𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀲𑀼𑀧𑀡𑁆𑀡𑁄 𑀦𑀺𑀕𑁆𑀭𑁄𑀥𑀫𑀢𑁆𑀣𑀓𑁂𑀦 𑀦𑀸𑀕𑀁 𑀳𑀭𑀢𑀺. 𑀦𑀸𑀕𑁄 𑀑𑀮𑀫𑁆𑀩𑀦𑁆𑀢𑁄 𑀫𑁄𑀓𑁆𑀔𑀢𑁆𑀣𑀸𑀬 𑀦𑀗𑁆𑀕𑀼𑀝𑁆𑀞𑁂𑀦 𑀦𑀺𑀕𑁆𑀭𑁄𑀥𑀯𑀺𑀝𑀧𑀁 𑀯𑁂𑀞𑁂𑀲𑀺. 𑀲𑀼𑀧𑀡𑁆𑀡𑁄 𑀢𑀁 𑀅𑀚𑀸𑀦𑀦𑁆𑀢𑁄𑀯 𑀫𑀳𑀩𑁆𑀩𑀮𑀢𑀸𑀬 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀺𑀬𑁂𑀯. 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀲𑀫𑀽𑀮𑁄 𑀉𑀧𑁆𑀧𑀸𑀝𑀺𑀢𑁄. 𑀲𑀼𑀧𑀡𑁆𑀡𑁄 𑀦𑀸𑀕𑀁 𑀲𑀺𑀫𑁆𑀩𑀮𑀺𑀯𑀦𑀁 𑀦𑁂𑀢𑁆𑀯𑀸 𑀢𑀼𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀦𑀸𑀕𑀫𑁂𑀤𑀁 ¶ 𑀔𑀸𑀤𑀺𑀢𑁆𑀯𑀸 𑀲𑀭𑀻𑀭𑀁 𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀫𑁆𑀳𑀺 𑀙𑀟𑁆𑀟𑁂𑀲𑀺. 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀧𑀢𑀦𑁆𑀢𑁄 𑀫𑀳𑀸𑀲𑀤𑁆𑀤𑀫𑀓𑀸𑀲𑀺. 𑀲𑀼𑀧𑀡𑁆𑀡𑁄 ‘‘𑀓𑀺𑀲𑁆𑀲 𑀏𑀲𑁄 𑀲𑀤𑁆𑀤𑁄’’𑀢𑀺 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀏𑀲 𑀫𑀬𑀸 𑀉𑀧𑁆𑀧𑀸𑀝𑀺𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀸𑀧𑀲𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀸 𑀦𑀺𑀕𑁆𑀭𑁄𑀥𑁄 𑀏𑀲𑁄’’𑀢𑀺 𑀢𑀣𑀢𑁄 𑀜𑀢𑁆𑀯𑀸 ‘‘𑀅𑀬𑀁 𑀢𑀲𑁆𑀲 𑀩𑀳𑀽𑀧𑀓𑀸𑀭𑁄, ‘𑀅𑀓𑀼𑀲𑀮𑀁 𑀦𑀼 𑀔𑁄 𑀫𑁂 𑀧𑀲𑀼𑀢𑀁, 𑀉𑀤𑀸𑀳𑀼 𑀦𑁄’𑀢𑀺 𑀢𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀡𑀯𑀓𑀯𑁂𑀲𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀢𑀸𑀧𑀲𑁄 𑀢𑀁 𑀞𑀸𑀦𑀁 𑀲𑀫𑀁 𑀓𑀭𑁄𑀢𑀺. 𑀲𑀼𑀧𑀡𑁆𑀡𑀭𑀸𑀚𑀸 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀅𑀚𑀸𑀦𑀦𑁆𑀢𑁄 𑀯𑀺𑀬 ‘‘𑀓𑀺𑀲𑁆𑀲 𑀞𑀸𑀦𑀁, 𑀪𑀦𑁆𑀢𑁂, 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀉𑀧𑀸𑀲𑀓, 𑀏𑀓𑁄 𑀲𑀼𑀧𑀡𑁆𑀡𑁄 𑀪𑁄𑀚𑀦𑀢𑁆𑀣𑀸𑀬 𑀦𑀸𑀕𑀁 𑀳𑀭𑀦𑁆𑀢𑁄 𑀦𑀸𑀕𑁂𑀦 𑀫𑁄𑀓𑁆𑀔𑀢𑁆𑀣𑀸𑀬 𑀦𑀺𑀕𑁆𑀭𑁄𑀥𑀯𑀺𑀝𑀧𑀁 𑀦𑀗𑁆𑀕𑀼𑀝𑁆𑀞𑁂𑀦 𑀯𑁂𑀞𑀺𑀢𑀸𑀬𑀧𑀺 𑀅𑀢𑁆𑀢𑀦𑁄 𑀫𑀳𑀩𑁆𑀩𑀮𑀢𑀸𑀬 𑀧𑀓𑁆𑀔𑀦𑁆𑀢𑀺𑀢𑁆𑀯𑀸 𑀕𑀢𑁄, 𑀅𑀣 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀉𑀧𑁆𑀧𑀸𑀝𑀺𑀢𑁄, 𑀇𑀤𑀁 𑀢𑀲𑁆𑀲 𑀉𑀧𑁆𑀧𑀸𑀝𑀺𑀢𑀝𑁆𑀞𑀸𑀦’’𑀦𑁆𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑀲𑁆𑀲 𑀲𑀼𑀧𑀡𑁆𑀡𑀲𑁆𑀲 𑀅𑀓𑀼𑀲𑀮𑀁 𑀳𑁄𑀢𑀺, 𑀉𑀤𑀸𑀳𑀼 𑀦𑁄’’𑀢𑀺? ‘‘𑀲𑀘𑁂 𑀦 𑀚𑀸𑀦𑀸𑀢𑀺, 𑀅𑀘𑁂𑀢𑀦𑀓𑀫𑁆𑀫𑀁 𑀦𑀸𑀫 𑀅𑀓𑀼𑀲𑀮𑀁 𑀦 𑀳𑁄𑀢𑀻’’𑀢𑀺. ‘‘𑀓𑀺𑀁 𑀦𑀸𑀕𑀲𑁆𑀲 𑀧𑀦 ¶ , 𑀪𑀦𑁆𑀢𑁂’’𑀢𑀺? ‘‘𑀲𑁄 𑀇𑀫𑀁 𑀦𑀸𑀲𑁂𑀢𑀼𑀁 𑀦 𑀕𑀡𑁆𑀳𑀺, 𑀫𑁄𑀓𑁆𑀔𑀢𑁆𑀣𑀸𑀬 𑀕𑀡𑁆𑀳𑀺, 𑀢𑀲𑁆𑀫𑀸 𑀢𑀲𑁆𑀲𑀧𑀺 𑀦 𑀳𑁄𑀢𑀺𑀬𑁂𑀯𑀸’’𑀢𑀺. 𑀲𑀼𑀧𑀡𑁆𑀡𑁄 𑀢𑀸𑀧𑀲𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀳𑀁 𑀲𑁄 𑀲𑀼𑀧𑀡𑁆𑀡𑀭𑀸𑀚𑀸, 𑀢𑀼𑀫𑁆𑀳𑀸𑀓𑀜𑁆𑀳𑀺 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄. 𑀢𑀼𑀫𑁆𑀳𑁂 𑀅𑀭𑀜𑁆𑀜𑁂 𑀯𑀲𑀣, 𑀅𑀳𑀜𑁆𑀘𑁂𑀓𑀁 𑀅𑀮𑀫𑁆𑀧𑀸𑀬𑀦𑀫𑀦𑁆𑀢𑀁 𑀚𑀸𑀦𑀸𑀫𑀺, 𑀅𑀦𑀕𑁆𑀖𑁄 𑀫𑀦𑁆𑀢𑁄. 𑀢𑀫𑀳𑀁 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀪𑀸𑀕𑀁 𑀓𑀢𑁆𑀯𑀸 𑀤𑀫𑁆𑀫𑀺, 𑀧𑀝𑀺𑀕𑁆𑀕𑀡𑁆𑀳𑀣 𑀦’’𑀦𑁆𑀢𑀺 𑀆𑀳. ‘‘𑀅𑀮𑀁 𑀫𑀬𑁆𑀳𑀁 𑀫𑀦𑁆𑀢𑁂𑀦, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺. 𑀲𑁄 𑀢𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀫𑀦𑁆𑀢𑀁 𑀤𑀢𑁆𑀯𑀸 𑀑𑀲𑀥𑀸𑀦𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀕𑀭𑀼𑀴𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀓𑀻𑀴𑀦𑀓𑀡𑁆𑀟𑀁

𑀢𑀲𑁆𑀫𑀺𑀁 ¶ 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀤𑀮𑀺𑀤𑁆𑀤𑀩𑁆𑀭𑀸𑀳𑁆𑀫𑀡𑁄 𑀩𑀳𑀼𑀁 𑀇𑀡𑀁 𑀕𑀳𑁂𑀢𑁆𑀯𑀸 𑀇𑀡𑀲𑀸𑀫𑀺𑀓𑁂𑀳𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀓𑀺𑀁 𑀫𑁂 𑀇𑀥 𑀯𑀸𑀲𑁂𑀦, 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀢𑀁 𑀲𑁂𑀬𑁆𑀬𑁄’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀅𑀲𑁆𑀲𑀫𑀧𑀤𑀁 𑀧𑀢𑁆𑀯𑀸 𑀢𑀸𑀧𑀲𑀁 𑀯𑀢𑁆𑀢𑀲𑀫𑁆𑀧𑀤𑀸𑀬 𑀆𑀭𑀸𑀥𑁂𑀲𑀺. 𑀢𑀸𑀧𑀲𑁄 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁 𑀅𑀢𑀺𑀯𑀺𑀬 𑀉𑀧𑀓𑀸𑀭𑀓𑁄, 𑀲𑀼𑀧𑀡𑁆𑀡𑀭𑀸𑀚𑁂𑀦 𑀤𑀺𑀦𑁆𑀦𑀁 𑀤𑀺𑀩𑁆𑀩𑀫𑀦𑁆𑀢𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡, 𑀅𑀳𑀁 𑀅𑀮𑀫𑁆𑀧𑀸𑀬𑀦𑀫𑀦𑁆𑀢𑀁 𑀚𑀸𑀦𑀸𑀫𑀺, 𑀢𑀁 𑀢𑁂 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀮𑀁, 𑀪𑀦𑁆𑀢𑁂, 𑀦 𑀫𑀬𑁆𑀳𑀁 𑀫𑀦𑁆𑀢𑁂𑀦𑀢𑁆𑀣𑁄’’𑀢𑀺 ¶ 𑀯𑀼𑀢𑁆𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀯𑀸 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀅𑀤𑀸𑀲𑀺𑀬𑁂𑀯. 𑀢𑀲𑁆𑀲 𑀘 𑀫𑀦𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀑𑀲𑀥𑀸𑀦𑀺 𑀘𑁂𑀯 𑀫𑀦𑁆𑀢𑀼𑀧𑀘𑀸𑀭𑀜𑁆𑀘 𑀲𑀩𑁆𑀩𑀁 𑀓𑀣𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀮𑀤𑁆𑀥𑁄 𑀫𑁂 𑀚𑀻𑀯𑀺𑀢𑀼𑀧𑀸𑀬𑁄’’𑀢𑀺 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 ‘‘𑀯𑀸𑀢𑀸𑀩𑀸𑀥𑁄 𑀫𑁂, 𑀪𑀦𑁆𑀢𑁂, 𑀩𑀸𑀥𑀢𑀻’’𑀢𑀺 𑀅𑀧𑀤𑁂𑀲𑀁 𑀓𑀢𑁆𑀯𑀸 𑀢𑀸𑀧𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀬𑀫𑀼𑀦𑀸𑀬 𑀢𑀻𑀭𑀁 𑀧𑀢𑁆𑀯𑀸 𑀢𑀁 𑀫𑀦𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 𑀫𑀳𑀸𑀫𑀕𑁆𑀕𑀁 𑀕𑀘𑁆𑀙𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀲𑀳𑀲𑁆𑀲𑀫𑀢𑁆𑀢𑀸 𑀪𑀽𑀭𑀺𑀤𑀢𑁆𑀢𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀦𑀸𑀕𑀫𑀸𑀡𑀯𑀺𑀓𑀸 𑀢𑀁 𑀲𑀩𑁆𑀩𑀓𑀸𑀫𑀤𑀤𑀁 𑀫𑀡𑀺𑀭𑀢𑀦𑀁 𑀆𑀤𑀸𑀬 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀫𑀼𑀦𑀸𑀢𑀻𑀭𑁂 𑀯𑀸𑀮𑀼𑀓𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀑𑀪𑀸𑀲𑁂𑀦 𑀲𑀩𑁆𑀩𑀭𑀢𑁆𑀢𑀺𑀁 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀡𑀺𑀭𑀢𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀺𑀭𑀺𑀁 𑀧𑀯𑁂𑀲𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀫𑀦𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀸𑀧𑀼𑀡𑀺. 𑀢𑀸 𑀫𑀦𑁆𑀢𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 ‘‘𑀇𑀫𑀺𑀦𑀸 𑀲𑀼𑀧𑀡𑁆𑀡𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀫𑀡𑀺𑀭𑀢𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀅𑀕𑀫𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑁂𑀯 𑀫𑁂 𑀫𑀦𑁆𑀢𑁄 𑀲𑀫𑀺𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 ¶ 𑀫𑀡𑀺𑀭𑀢𑀦𑀁 𑀆𑀤𑀸𑀬 𑀧𑀸𑀬𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀲𑁄𑀫𑀤𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀺𑀕𑀯𑀥𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀦𑁆𑀢𑁄 𑀢𑀲𑁆𑀲 𑀳𑀢𑁆𑀣𑁂 𑀢𑀁 𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀁 𑀆𑀳 ‘‘𑀢𑀸𑀢, 𑀦𑀦𑀼 𑀏𑀲𑁄 𑀅𑀫𑁆𑀳𑀸𑀓𑀁 𑀪𑀽𑀭𑀺𑀤𑀢𑁆𑀢𑁂𑀦 𑀤𑀺𑀦𑁆𑀦𑁄 𑀫𑀡𑀻’’𑀢𑀺? ‘‘𑀆𑀫, 𑀢𑀸𑀢, 𑀏𑀲𑁄 𑀫𑀡𑀻’’𑀢𑀺. ‘‘𑀢𑁂𑀦 𑀳𑀺𑀲𑁆𑀲 𑀅𑀕𑀼𑀡𑀁 𑀓𑀣𑁂𑀢𑁆𑀯𑀸 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀸𑀫𑁂𑀢𑀁 𑀫𑀡𑀺𑀭𑀢𑀦’’𑀦𑁆𑀢𑀺. ‘‘𑀢𑀸𑀢, 𑀧𑀼𑀩𑁆𑀩𑁂 𑀪𑀽𑀭𑀺𑀤𑀢𑁆𑀢𑁂𑀦 𑀤𑀻𑀬𑀫𑀸𑀦𑀁 𑀦 𑀕𑀡𑁆𑀳𑀺, 𑀇𑀤𑀸𑀦𑀺 𑀧𑀦𑁂𑀲 𑀩𑁆𑀭𑀸𑀳𑁆𑀫𑀡𑁄 𑀢𑀜𑁆𑀜𑁂𑀯 𑀯𑀜𑁆𑀘𑁂𑀲𑁆𑀲𑀢𑀺, 𑀢𑀼𑀡𑁆𑀳𑀻 𑀳𑁄𑀳𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀳𑁄𑀢𑀼, 𑀢𑀸𑀢, 𑀧𑀲𑁆𑀲𑀲𑀺 𑀏𑀢𑀲𑁆𑀲 𑀯𑀸 𑀫𑀫 𑀯𑀸 𑀯𑀜𑁆𑀘𑀦𑀪𑀸𑀯’’𑀦𑁆𑀢𑀺 𑀅𑀮𑀫𑁆𑀧𑀸𑀬𑀦𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳 𑁋

𑁮𑁨𑁧.

‘‘𑀫𑀡𑀺𑀁 𑀧𑀕𑁆𑀕𑀬𑁆𑀳 𑀫𑀗𑁆𑀕𑀮𑁆𑀬𑀁, 𑀲𑀸𑀥𑀼𑀯𑀺𑀢𑁆𑀢𑀁 𑀫𑀦𑁄𑀭𑀫𑀁;

𑀲𑁂𑀮𑀁 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀓𑁄 𑀇𑀫𑀁 𑀫𑀡𑀺𑀫𑀚𑁆𑀛𑀕𑀸’’𑀢𑀺.

𑀢𑀢𑁆𑀣 ¶ 𑀫𑀗𑁆𑀕𑀮𑁆𑀬𑀦𑁆𑀢𑀺 𑀫𑀗𑁆𑀕𑀮𑀲𑀫𑁆𑀫𑀢𑀁 𑀲𑀩𑁆𑀩𑀓𑀸𑀫𑀤𑀤𑀁. 𑀓𑁄 𑀇𑀫𑀦𑁆𑀢𑀺 𑀓𑀼𑀳𑀺𑀁 𑀇𑀫𑀁 𑀫𑀡𑀺𑀁 𑀅𑀥𑀺𑀕𑀢𑁄𑀲𑀺.

𑀢𑀢𑁄 ¶ 𑀅𑀮𑀫𑁆𑀧𑀸𑀬𑀦𑁄 𑀕𑀸𑀣𑀫𑀸𑀳 𑁋

𑁮𑁨𑁨.

‘‘𑀮𑁄𑀳𑀺𑀢𑀓𑁆𑀔𑀲𑀳𑀲𑁆𑀲𑀸𑀳𑀺, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑀁;

𑀅𑀚𑁆𑀚 𑀓𑀸𑀮𑀁 𑀧𑀣𑀁 𑀕𑀘𑁆𑀙𑀁, 𑀅𑀚𑁆𑀛𑀕𑀸𑀳𑀁 𑀫𑀡𑀺𑀁 𑀇𑀫’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀅𑀚𑁆𑀚 𑀓𑀸𑀮𑀁 𑀧𑀸𑀢𑁄𑀯 𑀧𑀣𑀁 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀭𑀢𑁆𑀢𑀓𑁆𑀔𑀺𑀓𑀸𑀳𑀺 𑀲𑀳𑀲𑁆𑀲𑀫𑀢𑁆𑀢𑀸𑀳𑀺 𑀦𑀸𑀕𑀫𑀸𑀡𑀯𑀺𑀓𑀸𑀳𑀺 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑀁 𑀇𑀫𑀁 𑀫𑀡𑀺𑀁 𑀅𑀚𑁆𑀛𑀕𑀸. 𑀫𑀁 𑀤𑀺𑀲𑁆𑀯𑀸 𑀳𑀺 𑀲𑀩𑁆𑀩𑀸𑀯 𑀏𑀢𑀸 𑀪𑀬𑀢𑀚𑁆𑀚𑀺𑀢𑀸 𑀇𑀫𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸𑀢𑀺.

𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀢𑀁 𑀯𑀜𑁆𑀘𑁂𑀢𑀼𑀓𑀸𑀫𑁄 𑀫𑀡𑀺𑀭𑀢𑀦𑀲𑁆𑀲 𑀅𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀢𑀦𑀸 𑀕𑀡𑁆𑀳𑀺𑀢𑀼𑀓𑀸𑀫𑁄 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁨𑁩.

‘‘𑀲𑀽𑀧𑀘𑀺𑀡𑁆𑀡𑁄 𑀅𑀬𑀁 𑀲𑁂𑀮𑁄, 𑀅𑀘𑁆𑀘𑀺𑀢𑁄 𑀫𑀸𑀦𑀺𑀢𑁄 𑀲𑀤𑀸;

𑀲𑀼𑀥𑀸𑀭𑀺𑀢𑁄 𑀲𑀼𑀦𑀺𑀓𑁆𑀔𑀺𑀢𑁆𑀢𑁄, 𑀲𑀩𑁆𑀩𑀢𑁆𑀣𑀫𑀪𑀺𑀲𑀸𑀥𑀬𑁂.

𑁮𑁨𑁪.

‘‘𑀉𑀧𑀘𑀸𑀭𑀯𑀺𑀧𑀦𑁆𑀦𑀲𑁆𑀲, 𑀦𑀺𑀓𑁆𑀔𑁂𑀧𑁂 𑀥𑀸𑀭𑀡𑀸𑀬 𑀯𑀸;

𑀅𑀬𑀁 𑀲𑁂𑀮𑁄 𑀯𑀺𑀦𑀸𑀲𑀸𑀬, 𑀧𑀭𑀺𑀘𑀺𑀡𑁆𑀡𑁄 𑀅𑀬𑁄𑀦𑀺𑀲𑁄.

𑁮𑁨𑁫.

‘‘𑀦 ¶ 𑀇𑀫𑀁 𑀅𑀓𑀼𑀲𑀮𑁄 𑀤𑀺𑀩𑁆𑀬𑀁, 𑀫𑀡𑀺𑀁 𑀥𑀸𑀭𑁂𑀢𑀼𑀫𑀸𑀭𑀳𑁄;

𑀧𑀝𑀺𑀧𑀚𑁆𑀚 𑀲𑀢𑀁 𑀦𑀺𑀓𑁆𑀔𑀁, 𑀤𑁂𑀳𑀺𑀫𑀁 𑀭𑀢𑀦𑀁 𑀫𑀫’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀢𑁆𑀣𑀦𑁆𑀢𑀺 𑀬𑁄 𑀇𑀫𑀁 𑀲𑁂𑀮𑀁 𑀲𑀼𑀝𑁆𑀞𑀼 𑀉𑀧𑀘𑀭𑀺𑀢𑀼𑀁 𑀅𑀘𑁆𑀘𑀺𑀢𑀼𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀯𑀺𑀬 𑀫𑀫𑀸𑀬𑀺𑀢𑀼𑀁 𑀲𑀼𑀝𑁆𑀞𑀼 𑀥𑀸𑀭𑁂𑀢𑀼𑀁 𑀲𑀼𑀝𑁆𑀞𑀼 𑀦𑀺𑀓𑁆𑀔𑀺𑀧𑀺𑀢𑀼𑀁 𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯 𑀲𑀽𑀧𑀘𑀺𑀡𑁆𑀡𑁄 𑀅𑀘𑁆𑀘𑀺𑀢𑁄 𑀫𑀸𑀦𑀺𑀢𑁄 𑀲𑀼𑀥𑀸𑀭𑀺𑀢𑁄 𑀲𑀼𑀦𑀺𑀓𑁆𑀔𑀺𑀢𑁆𑀢𑁄 𑀅𑀬𑀁 𑀲𑁂𑀮𑁄 𑀲𑀩𑁆𑀩𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀘𑀸𑀭𑀯𑀺𑀧𑀦𑁆𑀦𑀲𑁆𑀲𑀸𑀢𑀺 𑀬𑁄 𑀧𑀦 𑀉𑀧𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲𑁂𑀲𑁄 𑀅𑀦𑀼𑀧𑀸𑀬𑁂𑀦 𑀧𑀭𑀺𑀘𑀺𑀡𑁆𑀡𑁄 𑀯𑀺𑀦𑀸𑀲𑀫𑁂𑀯 𑀯𑀳𑀢𑀻𑀢𑀺 𑀯𑀤𑀢𑀺. 𑀥𑀸𑀭𑁂𑀢𑀼𑀫𑀸𑀭𑀳𑁄𑀢𑀺 𑀥𑀸𑀭𑁂𑀢𑀼𑀁 𑀅𑀭𑀳𑁄. 𑀧𑀝𑀺𑀧𑀚𑁆𑀚 𑀲𑀢𑀁 𑀦𑀺𑀓𑁆𑀔𑀦𑁆𑀢𑀺 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀩𑀳𑀽 𑀫𑀡𑀻, 𑀫𑀬𑀫𑁂𑀢𑀁 𑀕𑀳𑁂𑀢𑀼𑀁 𑀚𑀸𑀦𑀸𑀫. 𑀅𑀳𑀁 𑀢𑁂 𑀦𑀺𑀓𑁆𑀔𑀲𑀢𑀁 𑀤𑀲𑁆𑀲𑀸𑀫𑀺, 𑀢𑀁 𑀧𑀝𑀺𑀧𑀚𑁆𑀚, 𑀤𑁂𑀳𑀺 𑀇𑀫𑀁 𑀫𑀡𑀺𑀭𑀢𑀦𑀁 𑀫𑀫𑀦𑁆𑀢𑀺. 𑀢𑀲𑁆𑀲 𑀳𑀺 𑀕𑁂𑀳𑁂 𑀏𑀓𑁄𑀧𑀺 𑀲𑀼𑀯𑀡𑁆𑀡𑀦𑀺𑀓𑁆𑀔𑁄 𑀦𑀢𑁆𑀣𑀺. 𑀲𑁄 𑀧𑀦 𑀢𑀲𑁆𑀲 𑀫𑀡𑀺𑀦𑁄 𑀲𑀩𑁆𑀩𑀓𑀸𑀫𑀤𑀤𑀪𑀸𑀯𑀁 𑀚𑀸𑀦𑀸𑀢𑀺 ¶ . 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀳𑀁 𑀲𑀲𑀻𑀲𑀁 𑀦𑁆𑀳𑀢𑁆𑀯𑀸 𑀫𑀡𑀺𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 ‘𑀦𑀺𑀓𑁆𑀔𑀲𑀢𑀁 𑀫𑁂 𑀤𑁂𑀳𑀻’𑀢𑀺 𑀯𑀓𑁆𑀔𑀸𑀫𑀺, 𑀅𑀣𑁂𑀲 𑀫𑁂 𑀤𑀲𑁆𑀲𑀢𑀺, 𑀢𑀫𑀳𑀁 𑀏𑀢𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀲𑀽𑀭𑁄 𑀳𑀼𑀢𑁆𑀯𑀸 𑀏𑀯𑀫𑀸𑀳.

𑀢𑀢𑁄 𑀅𑀮𑀫𑁆𑀧𑀸𑀬𑀦𑁄 𑀕𑀸𑀣𑀫𑀸𑀳 𑁋

𑁮𑁨𑁬.

‘‘𑀦 𑀘 𑀫𑁆𑀬𑀸𑀬𑀁 𑀫𑀡𑀻 𑀓𑁂𑀬𑁆𑀬𑁄, 𑀕𑁄𑀳𑀺 𑀯𑀸 𑀭𑀢𑀦𑁂𑀳𑀺 𑀯𑀸;

𑀲𑁂𑀮𑁄 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀦𑁂𑀯 𑀓𑁂𑀬𑁆𑀬𑁄 𑀫𑀡𑀺 𑀫𑀫𑀸’’𑀢𑀺.

𑀢𑀢𑁆𑀣 𑀦 𑀘 𑀫𑁆𑀬𑀸𑀬𑀦𑁆𑀢𑀺 𑀅𑀬𑀁 𑀫𑀡𑀺 𑀫𑀫 𑀲𑀦𑁆𑀢𑀓𑁄 𑀓𑁂𑀦𑀘𑀺 𑀯𑀺𑀓𑁆𑀓𑀺𑀡𑀺𑀢𑀩𑁆𑀩𑁄 𑀦𑀸𑀫 𑀦 𑀳𑁄𑀢𑀺. 𑀦𑁂𑀯 𑀓𑁂𑀬𑁆𑀬𑁄𑀢𑀺 𑀅𑀬𑀜𑁆𑀘 𑀫𑀫 𑀫𑀡𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀦𑁂𑀯 𑀓𑁂𑀬𑁆𑀬𑁄 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸𑀧𑀺 𑀯𑀺𑀓𑁆𑀓𑀺𑀡𑀺𑀢𑀩𑁆𑀩𑁄 𑀦𑀸𑀫 𑀦 𑀳𑁄𑀢𑀻𑀢𑀺.

𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 ¶ 𑀆𑀳 𑁋

𑁮𑁨𑁭.

‘‘𑀦𑁄 𑀘𑁂 𑀢𑀬𑀸 𑀫𑀡𑀻 𑀓𑁂𑀬𑁆𑀬𑁄, 𑀕𑁄𑀳𑀺 𑀯𑀸 𑀭𑀢𑀦𑁂𑀳𑀺 𑀯𑀸;

𑀅𑀣 𑀓𑁂𑀦 𑀫𑀡𑀻 𑀓𑁂𑀬𑁆𑀬𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

𑀅𑀮𑀫𑁆𑀧𑀸𑀬𑀦𑁄 𑀆𑀳 𑁋

𑁮𑁨𑁮.

‘‘𑀬𑁄 𑀫𑁂 𑀲𑀁𑀲𑁂 𑀫𑀳𑀸𑀦𑀸𑀕𑀁, 𑀢𑁂𑀚𑀲𑁆𑀲𑀺𑀁 𑀤𑀼𑀭𑀢𑀺𑀓𑁆𑀓𑀫𑀁;

𑀢𑀲𑁆𑀲 𑀤𑀚𑁆𑀚𑀁 𑀇𑀫𑀁 𑀲𑁂𑀮𑀁, 𑀚𑀮𑀦𑁆𑀢𑀫𑀺𑀯 𑀢𑁂𑀚𑀲𑀸’’𑀢𑀺.

𑀢𑀢𑁆𑀣 𑀚𑀮𑀦𑁆𑀢𑀫𑀺𑀯 𑀢𑁂𑀚𑀲𑀸𑀢𑀺 𑀧𑀪𑀸𑀬 𑀚𑀮𑀦𑁆𑀢𑀁 𑀯𑀺𑀬.

𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 ¶ 𑀆𑀳 𑁋

𑁮𑁨𑁯.

‘‘𑀓𑁄 𑀦𑀼 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦, 𑀲𑀼𑀧𑀡𑁆𑀡𑁄 𑀧𑀢𑀢𑀁 𑀯𑀭𑁄;

𑀦𑀸𑀕𑀁 𑀚𑀺𑀕𑀻𑀲𑀫𑀦𑁆𑀯𑁂𑀲𑀺, 𑀅𑀦𑁆𑀯𑁂𑀲𑀁 𑀪𑀓𑁆𑀔𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 ¶ 𑀓𑁄 𑀦𑀽𑀢𑀺 𑀇𑀤𑀁 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 ‘‘𑀅𑀢𑁆𑀢𑀦𑁄 𑀪𑀓𑁆𑀔𑀁 𑀅𑀦𑁆𑀯𑁂𑀲𑀦𑁆𑀢𑁂𑀦 𑀕𑀭𑀼𑀴𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳.

𑀅𑀮𑀫𑁆𑀧𑀸𑀬𑀦𑁄 𑀏𑀯𑀫𑀸𑀳 𑁋

𑁮𑁩𑁦.

‘‘𑀦𑀸𑀳𑀁 𑀤𑀺𑀚𑀸𑀥𑀺𑀧𑁄 𑀳𑁄𑀫𑀺, 𑀅𑀤𑀺𑀝𑁆𑀞𑁄 𑀕𑀭𑀼𑀴𑁄 𑀫𑀬𑀸;

𑀆𑀲𑀻𑀯𑀺𑀲𑁂𑀦 𑀯𑀺𑀢𑁆𑀢𑁄𑀢𑀺, 𑀯𑁂𑀚𑁆𑀚𑁄 𑀩𑁆𑀭𑀸𑀳𑁆𑀫𑀡 𑀫𑀁 𑀯𑀺𑀤𑀽’’𑀢𑀺.

𑀢𑀢𑁆𑀣 𑀫𑀁 𑀯𑀺𑀤𑀽𑀢𑀺 𑀫𑀁 ‘‘𑀏𑀲 𑀆𑀲𑀻𑀯𑀺𑀲𑁂𑀦 𑀯𑀺𑀢𑁆𑀢𑀓𑁄 𑀅𑀮𑀫𑁆𑀧𑀸𑀬𑀦𑁄 𑀦𑀸𑀫 𑀯𑁂𑀚𑁆𑀚𑁄’’𑀢𑀺 𑀚𑀸𑀦𑀦𑁆𑀢𑀺.

𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁮𑁩𑁧.

‘‘𑀓𑀺𑀁 𑀦𑀼 𑀢𑀼𑀬𑁆𑀳𑀁 𑀨𑀮𑀁 𑀅𑀢𑁆𑀣𑀺, 𑀓𑀺𑀁 𑀲𑀺𑀧𑁆𑀧𑀁 𑀯𑀺𑀚𑁆𑀚𑀢𑁂 𑀢𑀯;

𑀓𑀺𑀲𑁆𑀫𑀺𑀁 𑀯𑀸 𑀢𑁆𑀯𑀁 𑀧𑀭𑀢𑁆𑀣𑀤𑁆𑀥𑁄, 𑀉𑀭𑀕𑀁 𑀦𑀸𑀧𑀘𑀸𑀬𑀲𑀻’’𑀢𑀺.

𑀢𑀢𑁆𑀣 𑀓𑀺𑀲𑁆𑀫𑀺𑀁 𑀯𑀸 𑀢𑁆𑀯𑀁 𑀧𑀭𑀢𑁆𑀣𑀤𑁆𑀥𑁄𑀢𑀺 𑀢𑁆𑀯𑀁 𑀓𑀺𑀲𑁆𑀫𑀺𑀁 𑀯𑀸 𑀉𑀧𑀢𑁆𑀣𑀤𑁆𑀥𑁄 𑀳𑀼𑀢𑁆𑀯𑀸, 𑀓𑀺𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀭𑀕𑀁 𑀆𑀲𑀻𑀯𑀺𑀲𑀁 𑀦 𑀅𑀧𑀘𑀸𑀬𑀲𑀺 𑀚𑁂𑀝𑁆𑀞𑀓𑀁 𑀅𑀓𑀢𑁆𑀯𑀸 𑀅𑀯𑀚𑀸𑀦𑀸𑀲𑀻𑀢𑀺 𑀧𑀼𑀘𑁆𑀙𑀢𑀺.

𑀲𑁄 𑀅𑀢𑁆𑀢𑀦𑁄 𑀩𑀮𑀁 𑀤𑀻𑀧𑁂𑀦𑁆𑀢𑁄 𑀆𑀳 𑁋

𑁮𑁩𑁨.

‘‘𑀆𑀭𑀜𑁆𑀜𑀺𑀓𑀲𑁆𑀲 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀁 𑀢𑀧𑀲𑁆𑀲𑀺𑀦𑁄;

𑀲𑀼𑀧𑀡𑁆𑀡𑁄 𑀓𑁄𑀲𑀺𑀬𑀲𑁆𑀲𑀓𑁆𑀔𑀸, 𑀯𑀺𑀲𑀯𑀺𑀚𑁆𑀚𑀁 𑀅𑀦𑀼𑀢𑁆𑀢𑀭𑀁.

𑁮𑁩𑁩.

‘‘𑀢𑀁 𑀪𑀸𑀯𑀺𑀢𑀢𑁆𑀢𑀜𑁆𑀜𑀢𑀭𑀁, 𑀲𑀫𑁆𑀫𑀦𑁆𑀢𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀲𑀓𑁆𑀓𑀘𑁆𑀘𑀁 𑀢𑀁 𑀉𑀧𑀝𑁆𑀞𑀸𑀲𑀺𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

𑁮𑁩𑁪.

‘‘𑀲𑁄 𑀢𑀤𑀸 𑀧𑀭𑀺𑀘𑀺𑀡𑁆𑀡𑁄 𑀫𑁂, 𑀯𑀢𑁆𑀢𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸;

𑀤𑀺𑀩𑁆𑀩𑀁 𑀧𑀸𑀢𑀼𑀓𑀭𑀻 𑀫𑀦𑁆𑀢𑀁, 𑀓𑀸𑀫𑀲𑀸 𑀪𑀕𑀯𑀸 𑀫𑀫.

𑁮𑁩𑁫.

‘‘𑀢𑁆𑀬𑀸𑀳𑀁 ¶ ¶ 𑀫𑀦𑁆𑀢𑁂 𑀧𑀭𑀢𑁆𑀣𑀤𑁆𑀥𑁄, 𑀦𑀸𑀳𑀁 𑀪𑀸𑀬𑀸𑀫𑀺 𑀪𑁄𑀕𑀺𑀦𑀁;

𑀆𑀘𑀭𑀺𑀬𑁄 𑀯𑀺𑀲𑀖𑀸𑀢𑀸𑀦𑀁, 𑀅𑀮𑀫𑁆𑀧𑀸𑀦𑁄𑀢𑀺 𑀫𑀁 𑀯𑀺𑀤𑀽’’𑀢𑀺.

𑀢𑀢𑁆𑀣 ¶ 𑀓𑁄𑀲𑀺𑀬𑀲𑁆𑀲𑀓𑁆𑀔𑀸𑀢𑀺 𑀓𑁄𑀲𑀺𑀬𑀕𑁄𑀢𑁆𑀢𑀲𑁆𑀲 𑀇𑀲𑀺𑀦𑁄 𑀲𑀼𑀧𑀡𑁆𑀡𑁄 𑀆𑀘𑀺𑀓𑁆𑀔𑀺. 𑀢𑁂𑀦 𑀅𑀓𑁆𑀔𑀸𑀢𑀓𑀸𑀭𑀡𑀁 𑀧𑀦 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀪𑀸𑀯𑀺𑀢𑀢𑁆𑀢𑀜𑁆𑀜𑀢𑀭𑀦𑁆𑀢𑀺 𑀪𑀸𑀯𑀺𑀢𑀢𑁆𑀢𑀸𑀦𑀁 𑀇𑀲𑀻𑀦𑀁 𑀅𑀜𑁆𑀜𑀢𑀭𑀁. 𑀲𑀫𑁆𑀫𑀦𑁆𑀢𑀦𑁆𑀢𑀺 𑀯𑀲𑀦𑁆𑀢𑀁. 𑀓𑀸𑀫𑀲𑀸𑀢𑀺 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬. 𑀫𑀫𑀸𑀢𑀺 𑀢𑀁 𑀫𑀦𑁆𑀢𑀁 𑀫𑀬𑁆𑀳𑀁 𑀧𑀓𑀸𑀲𑁂𑀲𑀺. 𑀢𑁆𑀬𑀸𑀳𑀁 𑀫𑀦𑁆𑀢𑁂, 𑀧𑀭𑀢𑁆𑀣𑀤𑁆𑀥𑁄𑀢𑀺 𑀅𑀳𑀁 𑀢𑁂 𑀫𑀦𑁆𑀢𑁂 𑀉𑀧𑀢𑁆𑀣𑀤𑁆𑀥𑁄 𑀦𑀺𑀲𑁆𑀲𑀺𑀢𑁄. 𑀪𑁄𑀕𑀺𑀦𑀦𑁆𑀢𑀺 𑀦𑀸𑀕𑀸𑀦𑀁. 𑀯𑀺𑀲𑀖𑀸𑀢𑀸𑀦𑀦𑁆𑀢𑀺 𑀯𑀺𑀲𑀖𑀸𑀢𑀓𑀯𑁂𑀚𑁆𑀚𑀸𑀦𑀁.

𑀢𑀁 𑀲𑀼𑀢𑁆𑀯𑀸 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀅𑀮𑀫𑁆𑀧𑀸𑀬𑀦𑁄 𑀬𑁆𑀯𑀸𑀲𑁆𑀲 𑀦𑀸𑀕𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀲 𑀫𑀡𑀺𑀭𑀢𑀦𑀁 𑀤𑀲𑁆𑀲𑀢𑀺, 𑀪𑀽𑀭𑀺𑀤𑀢𑁆𑀢𑀫𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀫𑀡𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁮𑁩𑁬.

‘‘𑀕𑀡𑁆𑀳𑀸𑀫𑀲𑁂 𑀫𑀡𑀺𑀁 𑀢𑀸𑀢, 𑀲𑁄𑀫𑀤𑀢𑁆𑀢 𑀯𑀺𑀚𑀸𑀦𑀳𑀺;

𑀫𑀸 𑀤𑀡𑁆𑀟𑁂𑀦 𑀲𑀺𑀭𑀺𑀁 𑀧𑀢𑁆𑀢𑀁, 𑀓𑀸𑀫𑀲𑀸 𑀧𑀚𑀳𑀺𑀫𑁆𑀳𑀲𑁂’’𑀢𑀺.

𑀢𑀢𑁆𑀣 𑀕𑀡𑁆𑀳𑀸𑀫𑀲𑁂𑀢𑀺 𑀕𑀡𑁆𑀳𑀸𑀫. 𑀓𑀸𑀫𑀲𑀸𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸 𑀚𑀳𑀸𑀫.

𑀲𑁄𑀫𑀤𑀢𑁆𑀢𑁄 𑀆𑀳 𑁋

𑁮𑁩𑁭.

‘‘𑀲𑀓𑀁 𑀦𑀺𑀯𑁂𑀲𑀦𑀁 𑀧𑀢𑁆𑀢𑀁, 𑀬𑁄 𑀢𑀁 𑀩𑁆𑀭𑀸𑀳𑁆𑀫𑀡 𑀧𑀽𑀚𑀬𑀺;

𑀏𑀯𑀁 𑀓𑀮𑁆𑀬𑀸𑀡𑀓𑀸𑀭𑀺𑀲𑁆𑀲, 𑀓𑀺𑀁 𑀫𑁄𑀳𑀸 𑀤𑀼𑀩𑁆𑀪𑀺𑀫𑀺𑀘𑁆𑀙𑀲𑀺.

𑁮𑁩𑁮.

‘‘𑀲𑀘𑁂 𑀢𑁆𑀯𑀁 𑀥𑀦𑀓𑀸𑀫𑁄𑀲𑀺, 𑀪𑀽𑀭𑀺𑀤𑀢𑁆𑀢𑁄 𑀧𑀤𑀲𑁆𑀲𑀢𑀺;

𑀢𑀫𑁂𑀯 𑀕𑀦𑁆𑀢𑁆𑀯𑀸 𑀬𑀸𑀘𑀲𑁆𑀲𑀼, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦’’𑀦𑁆𑀢𑀺.

𑀢𑀢𑁆𑀣 𑀧𑀽𑀚𑀬𑀻𑀢𑀺 𑀤𑀺𑀩𑁆𑀩𑀓𑀸𑀫𑁂𑀳𑀺 𑀧𑀽𑀚𑀬𑀺𑀢𑁆𑀣. 𑀤𑀼𑀩𑁆𑀪𑀺𑀫𑀺𑀘𑁆𑀙𑀲𑀻𑀢𑀺 𑀓𑀺𑀁 𑀢𑀣𑀸𑀭𑀽𑀧𑀲𑁆𑀲 𑀫𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀓𑀫𑁆𑀫𑀁 𑀓𑀸𑀢𑀼𑀁 𑀇𑀘𑁆𑀙𑀲𑀺 𑀢𑀸𑀢𑀸𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁮𑁩𑁯.

‘‘𑀳𑀢𑁆𑀣𑀕𑀢𑀁 ¶ 𑀧𑀢𑁆𑀢𑀕𑀢𑀁, 𑀦𑀺𑀓𑀺𑀡𑁆𑀡𑀁 𑀔𑀸𑀤𑀺𑀢𑀼𑀁 𑀯𑀭𑀁;

𑀫𑀸 𑀦𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀢𑁆𑀣𑁄, 𑀲𑁄𑀫𑀤𑀢𑁆𑀢 𑀉𑀧𑀘𑁆𑀘𑀕𑀸’’𑀢𑀺.

𑀢𑀢𑁆𑀣 𑀳𑀢𑁆𑀣𑀕𑀢𑀦𑁆𑀢𑀺 𑀢𑀸𑀢 𑀲𑁄𑀫𑀤𑀢𑁆𑀢, 𑀢𑁆𑀯𑀁 𑀢𑀭𑀼𑀡𑀓𑁄 𑀮𑁄𑀓𑀧𑀯𑀢𑁆𑀢𑀺𑀁 𑀦 𑀚𑀸𑀦𑀸𑀲𑀺. 𑀬𑀜𑁆𑀳𑀺 𑀳𑀢𑁆𑀣𑀕𑀢𑀁 𑀯𑀸 𑀳𑁄𑀢𑀺 𑀧𑀢𑁆𑀢𑀕𑀢𑀁 𑀯𑀸 𑀧𑀼𑀭𑀢𑁄 𑀯𑀸 𑀦𑀺𑀓𑀺𑀡𑁆𑀡𑀁 𑀞𑀧𑀺𑀢𑀁, 𑀢𑀤𑁂𑀯 𑀫𑁂 𑀔𑀸𑀤𑀺𑀢𑀼𑀁 𑀯𑀭𑀁, 𑀦 𑀤𑀽𑀭𑁂 𑀞𑀺𑀢𑀁.

𑀲𑁄𑀫𑀤𑀢𑁆𑀢𑁄 ¶ ¶ 𑀆𑀳 𑁋

𑁮𑁪𑁦.

‘‘𑀧𑀘𑁆𑀘𑀢𑀺 𑀦𑀺𑀭𑀬𑁂 𑀖𑁄𑀭𑁂, 𑀫𑀳𑀺𑀲𑁆𑀲𑀫𑀧𑀺 𑀯𑀺𑀯𑀭𑀢𑀺;

𑀫𑀺𑀢𑁆𑀢𑀤𑀼𑀩𑁆𑀪𑀻 𑀳𑀺𑀢𑀘𑁆𑀘𑀸𑀕𑀻, 𑀚𑀻𑀯𑀭𑁂𑀯𑀸𑀧𑀺 𑀲𑀼𑀲𑁆𑀲𑀢𑀺.

𑁮𑁪𑁧.

‘‘𑀲𑀘𑁂 𑀢𑁆𑀯𑀁 𑀥𑀦𑀓𑀸𑀫𑁄𑀲𑀺, 𑀪𑀽𑀭𑀺𑀤𑀢𑁆𑀢𑁄 𑀧𑀤𑀲𑁆𑀲𑀢𑀺;

𑀫𑀜𑁆𑀜𑁂 𑀅𑀢𑁆𑀢𑀓𑀢𑀁 𑀯𑁂𑀭𑀁, 𑀦 𑀘𑀺𑀭𑀁 𑀯𑁂𑀤𑀬𑀺𑀲𑁆𑀲𑀲𑀻’’𑀢𑀺.

𑀢𑀢𑁆𑀣 𑀫𑀳𑀺𑀲𑁆𑀲𑀫𑀧𑀺 𑀯𑀺𑀯𑀭𑀢𑀻𑀢𑀺 𑀢𑀸𑀢, 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑁄 𑀚𑀻𑀯𑀦𑁆𑀢𑀲𑁆𑀲𑁂𑀯 𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀯𑀭𑀁 𑀤𑁂𑀢𑀺. 𑀳𑀺𑀢𑀘𑁆𑀘𑀸𑀕𑀻𑀢𑀺 𑀅𑀢𑁆𑀢𑀦𑁄 𑀳𑀺𑀢𑀧𑀭𑀺𑀘𑁆𑀘𑀸𑀕𑀻. 𑀚𑀻𑀯𑀭𑁂𑀯𑀸𑀧𑀺 𑀲𑀼𑀲𑁆𑀲𑀢𑀻𑀢𑀺 𑀚𑀻𑀯𑀫𑀸𑀦𑁄𑀯 𑀲𑀼𑀲𑁆𑀲𑀢𑀺, 𑀫𑀦𑀼𑀲𑁆𑀲𑀧𑁂𑀢𑁄 𑀳𑁄𑀢𑀺. 𑀅𑀢𑁆𑀢𑀓𑀢𑀁 𑀯𑁂𑀭𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑀁 𑀧𑀸𑀧𑀁. 𑀦 𑀘𑀺𑀭𑀦𑁆𑀢𑀺 𑀦 𑀘𑀺𑀭𑀲𑁆𑀲𑁂𑀯 𑀯𑁂𑀤𑀬𑀺𑀲𑁆𑀲𑀲𑀻𑀢𑀺 𑀫𑀜𑁆𑀜𑀸𑀫𑀺.

𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋

𑁮𑁪𑁨.

‘‘𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀏𑀯𑀁 𑀲𑀼𑀚𑁆𑀛𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀫𑀳𑀸𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫, 𑀏𑀯𑀁 𑀫𑁄𑀓𑁆𑀔𑀸𑀫 𑀧𑀸𑀧𑀓𑀸’’𑀢𑀺.

𑀢𑀢𑁆𑀣 𑀲𑀼𑀚𑁆𑀛𑀦𑁆𑀢𑀻𑀢𑀺 𑀢𑀸𑀢 𑀲𑁄𑀫𑀤𑀢𑁆𑀢, 𑀢𑁆𑀯𑀁 𑀤𑀳𑀭𑁄 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀲𑀺, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀧𑀸𑀧𑀁 𑀓𑀢𑁆𑀯𑀸 𑀬𑀜𑁆𑀜𑁂𑀦 𑀲𑀼𑀚𑁆𑀛𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀲𑁄𑀫𑀤𑀢𑁆𑀢𑁄 𑀆𑀳 𑁋

𑁮𑁪𑁩.

‘‘𑀳𑀦𑁆𑀤 ¶ 𑀤𑀸𑀦𑀺 𑀅𑀧𑀸𑀬𑀸𑀫𑀺, 𑀦𑀸𑀳𑀁 𑀅𑀚𑁆𑀚 𑀢𑀬𑀸 𑀲𑀳;

𑀧𑀤𑀫𑁆𑀧𑁂𑀓𑀁 𑀦 𑀕𑀘𑁆𑀙𑁂𑀬𑁆𑀬𑀁, 𑀏𑀯𑀁 𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑀸’’𑀢𑀺.

𑀢𑀢𑁆𑀣 𑀅𑀧𑀸𑀬𑀸𑀫𑀻𑀢𑀺 𑀅𑀧𑀕𑀘𑁆𑀙𑀸𑀫𑀺, 𑀧𑀮𑀸𑀬𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀡𑁆𑀟𑀺𑀢𑁄 𑀫𑀸𑀡𑀯𑁄 𑀧𑀺𑀢𑀭𑀁 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀤𑁂𑀯𑀢𑀸 𑀉𑀚𑁆𑀛𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑁂𑀦 𑀧𑀸𑀧𑀓𑀸𑀭𑀺𑀦𑀸 𑀲𑀤𑁆𑀥𑀺𑀁 𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀺𑀢𑀼 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀮𑀸𑀬𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁮𑁪𑁪.

‘‘𑀇𑀤𑀁 ¶ 𑀯𑀢𑁆𑀯𑀸𑀦 𑀧𑀺𑀢𑀭𑀁, 𑀲𑁄𑀫𑀤𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄;

𑀉𑀚𑁆𑀛𑀸𑀧𑁂𑀢𑁆𑀯𑀸𑀦 𑀪𑀽𑀢𑀸𑀦𑀺, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀻’’𑀢𑀺.

𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 ‘‘𑀲𑁄𑀫𑀤𑀢𑁆𑀢𑁄 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀮𑀫𑁆𑀧𑀸𑀬𑀦𑀁 𑀣𑁄𑀓𑀁 𑀅𑀦𑀢𑁆𑀢𑀫𑀦𑀁 𑀤𑀺𑀲𑁆𑀯𑀸 ‘‘𑀅𑀮𑀫𑁆𑀧𑀸𑀬𑀦 ¶ , 𑀫𑀸 𑀘𑀺𑀦𑁆𑀢𑀬𑀺, 𑀤𑀲𑁆𑀲𑁂𑀲𑁆𑀲𑀸𑀫𑀺 𑀢𑁂 𑀪𑀽𑀭𑀺𑀤𑀢𑁆𑀢’’𑀦𑁆𑀢𑀺 𑀢𑀁 𑀆𑀤𑀸𑀬 𑀦𑀸𑀕𑀭𑀸𑀚𑀲𑁆𑀲 𑀉𑀧𑁄𑀲𑀣𑀓𑀭𑀡𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀪𑁄𑀕𑁂 𑀆𑀪𑀼𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑀁 𑀦𑀸𑀕𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁪𑁫.

‘‘𑀕𑀡𑁆𑀳𑀸𑀳𑁂𑀢𑀁 𑀫𑀳𑀸𑀦𑀸𑀕𑀁, 𑀆𑀳𑀭𑁂𑀢𑀁 𑀫𑀡𑀺𑀁 𑀫𑀫;

𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑁄, 𑀬𑀲𑁆𑀲 𑀮𑁄𑀳𑀺𑀢𑀓𑁄 𑀲𑀺𑀭𑁄.

𑁮𑁪𑁬.

‘‘𑀓𑀧𑁆𑀧𑀸𑀲𑀧𑀺𑀘𑀼𑀭𑀸𑀲𑀻𑀯, 𑀏𑀲𑁄 𑀓𑀸𑀬𑁄 𑀧𑀤𑀺𑀲𑁆𑀲𑀢𑀺;

𑀯𑀫𑁆𑀫𑀺𑀓𑀕𑁆𑀕𑀕𑀢𑁄 𑀲𑁂𑀢𑀺, 𑀢𑀁 𑀢𑁆𑀯𑀁 𑀕𑀡𑁆𑀳𑀸𑀳𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑁄𑀢𑀺 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑁄 𑀯𑀺𑀬 𑀆𑀪𑀸𑀲𑀢𑀺. 𑀓𑀧𑁆𑀧𑀸𑀲𑀧𑀺𑀘𑀼𑀭𑀸𑀲𑀻𑀯𑀸𑀢𑀺 𑀲𑀼𑀯𑀺𑀳𑀺𑀢𑀲𑁆𑀲 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀭𑀸𑀲𑀺 𑀯𑀺𑀬.

𑀅𑀣 𑀫𑀳𑀸𑀲𑀢𑁆𑀢𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀧𑁄𑀲𑀣𑀲𑁆𑀲 𑀫𑁂 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀸𑀢𑀺 𑀇𑀫𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀸𑀧𑁂𑀲𑀺𑀁. 𑀫𑀬𑀸 𑀤𑀻𑀬𑀫𑀸𑀦𑀁 𑀫𑀡𑀺𑀁 𑀕𑀡𑁆𑀳𑀺𑀢𑀼𑀁 𑀦 𑀇𑀘𑁆𑀙𑀺. 𑀇𑀤𑀸𑀦𑀺 𑀧𑀦 𑀅𑀳𑀺𑀢𑀼𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀲𑀘𑀸𑀳𑀁 𑀇𑀫𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑁄 ¶ 𑀓𑀼𑀚𑁆𑀛𑁂𑀬𑁆𑀬𑀁, 𑀲𑀻𑀮𑀁 𑀫𑁂 𑀔𑀡𑁆𑀟𑀁 𑀪𑀯𑀺𑀲𑁆𑀲𑀢𑀺. 𑀫𑀬𑀸 𑀔𑁄 𑀧𑀦 𑀧𑀞𑀫𑀜𑁆𑀜𑁂𑀯 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀉𑀧𑁄𑀲𑀣𑁄 𑀅𑀥𑀺𑀝𑁆𑀞𑀺𑀢𑁄, 𑀲𑁄 𑀬𑀣𑀸𑀥𑀺𑀝𑁆𑀞𑀺𑀢𑁄𑀯 𑀳𑁄𑀢𑀼, 𑀅𑀮𑀫𑁆𑀧𑀸𑀬𑀦𑁄 𑀫𑀁 𑀙𑀺𑀦𑁆𑀤𑀢𑀼 𑀯𑀸 𑀧𑀘𑀢𑀼 𑀯𑀸, 𑀲𑀽𑀮𑁂𑀦 𑀯𑀸 𑀯𑀺𑀚𑁆𑀛𑀢𑀼, 𑀦𑁂𑀯𑀲𑁆𑀲 𑀓𑀼𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑁂 𑀑𑀮𑁄𑀓𑁂𑀲𑁆𑀲𑀸𑀫𑀺, 𑀪𑀲𑁆𑀫𑀸 𑀪𑀯𑁂𑀬𑁆𑀬𑀼𑀁. 𑀫𑀁 𑀧𑁄𑀣𑁂𑀦𑁆𑀢𑁂𑀧𑀺 𑀦 𑀓𑀼𑀚𑁆𑀛𑀺𑀲𑁆𑀲𑀸𑀫𑀺 𑀦 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀪𑁄𑀕𑀦𑁆𑀢𑀭𑁂 𑀲𑀻𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄𑀧𑀺 ‘‘𑀪𑁄 𑀅𑀮𑀫𑁆𑀧𑀸𑀬𑀦, 𑀇𑀫𑀁 𑀦𑀸𑀕𑀁 𑀕𑀡𑁆𑀳𑀸𑀳𑀺, 𑀤𑁂𑀳𑀺 𑀫𑁂 𑀫𑀡𑀺’’𑀦𑁆𑀢𑀺 𑀆𑀳. 𑀅𑀮𑀫𑁆𑀧𑀸𑀬𑀦𑁄 𑀦𑀸𑀕𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀫𑀡𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀅𑀕𑀡𑁂𑀢𑁆𑀯𑀸 ‘‘𑀕𑀡𑁆𑀳, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀔𑀺𑀧𑀺. 𑀲𑁄 𑀢𑀲𑁆𑀲 𑀳𑀢𑁆𑀣𑀢𑁄 𑀕𑀴𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺. 𑀧𑀢𑀺𑀢𑀫𑀢𑁆𑀢𑁄𑀯 𑀧𑀣𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀸𑀕𑀪𑀯𑀦𑀫𑁂𑀯 𑀕𑀢𑁄.

𑀩𑁆𑀭𑀸𑀳𑁆𑀫𑀡𑁄 ¶ 𑀫𑀡𑀺𑀭𑀢𑀦𑀢𑁄 𑀪𑀽𑀭𑀺𑀤𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀢𑁄 𑀧𑀼𑀢𑁆𑀢𑀢𑁄𑀢𑀺 𑀢𑀻𑀳𑀺 𑀧𑀭𑀺𑀳𑀸𑀬𑀺. 𑀲𑁄 ‘‘𑀦𑀺𑀧𑁆𑀧𑀘𑁆𑀘𑀬𑁄 𑀚𑀸𑀢𑁄𑀫𑁆𑀳𑀺, 𑀧𑀼𑀢𑁆𑀢𑀲𑁆𑀲 𑀫𑁂 𑀯𑀘𑀦𑀁 𑀦 𑀓𑀢’’𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑁄 𑀕𑁂𑀳𑀁 𑀅𑀕𑀫𑀸𑀲𑀺. 𑀅𑀮𑀫𑁆𑀧𑀸𑀬𑀦𑁄𑀧𑀺 ¶ 𑀤𑀺𑀩𑁆𑀩𑁄𑀲𑀥𑁂𑀳𑀺 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀫𑀓𑁆𑀔𑁂𑀢𑁆𑀯𑀸 𑀣𑁄𑀓𑀁 𑀔𑀸𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀬𑀁 𑀧𑀭𑀺𑀧𑁆𑀨𑁄𑀲𑁂𑀢𑁆𑀯𑀸 𑀤𑀺𑀩𑁆𑀩𑀫𑀦𑁆𑀢𑀁 𑀚𑀧𑁆𑀧𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀲𑀻𑀲𑀁 𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑁄 𑀫𑀼𑀔𑀫𑀲𑁆𑀲 𑀯𑀺𑀯𑀭𑀺𑀢𑁆𑀯𑀸 𑀑𑀲𑀥𑀁 𑀔𑀸𑀤𑀺𑀢𑁆𑀯𑀸 𑀫𑀼𑀔𑁂 𑀔𑁂𑀴𑀁 𑀑𑀧𑀺. 𑀲𑀼𑀘𑀺𑀚𑀸𑀢𑀺𑀓𑁄 𑀦𑀸𑀕𑀭𑀸𑀚𑀸 𑀲𑀻𑀮𑀪𑁂𑀤𑀪𑀬𑁂𑀦 𑀅𑀓𑀼𑀚𑁆𑀛𑀺𑀢𑁆𑀯𑀸 𑀅𑀓𑁆𑀔𑀻𑀦𑀺𑀧𑀺 𑀦 𑀉𑀫𑁆𑀫𑀻𑀮𑁂𑀲𑀺. 𑀅𑀣 𑀦𑀁 𑀑𑀲𑀥𑀫𑀦𑁆𑀢𑀁 𑀓𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀲𑀻𑀲𑀁 𑀓𑀢𑁆𑀯𑀸 𑀲𑀜𑁆𑀘𑀸𑀮𑁂𑀢𑁆𑀯𑀸 𑀕𑀳𑀺𑀢𑀪𑁄𑀚𑀦𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀪𑀽𑀫𑀺𑀬𑀁 𑀤𑀻𑀖𑀢𑁄 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀫𑀲𑀽𑀭𑀓𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀧𑀸𑀤𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀅𑀝𑁆𑀞𑀻𑀦𑀺 𑀘𑀼𑀡𑁆𑀡𑀺𑀬𑀫𑀸𑀦𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀧𑀼𑀦 𑀦𑀗𑁆𑀕𑀼𑀝𑁆𑀞𑁂 𑀕𑀳𑁂𑀢𑁆𑀯𑀸 𑀤𑀼𑀲𑁆𑀲𑀁 𑀧𑁄𑀣𑁂𑀦𑁆𑀢𑁄 𑀯𑀺𑀬 𑀧𑁄𑀣𑁂𑀲𑀺. 𑀫𑀳𑀸𑀲𑀢𑁆𑀢𑁄 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄𑀧𑀺 𑀦𑁂𑀯 𑀓𑀼𑀚𑁆𑀛𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁮𑁪𑁭.

‘‘𑀅𑀣𑁄𑀲𑀥𑁂𑀳𑀺 𑀤𑀺𑀩𑁆𑀩𑁂𑀳𑀺, 𑀚𑀧𑁆𑀧𑀁 𑀫𑀦𑁆𑀢𑀧𑀤𑀸𑀦𑀺 𑀘;

𑀏𑀯𑀁 𑀢𑀁 𑀅𑀲𑀓𑁆𑀔𑀺 𑀲𑀢𑁆𑀣𑀼𑀁, 𑀓𑀢𑁆𑀯𑀸 𑀧𑀭𑀺𑀢𑁆𑀢𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀅𑀲𑀓𑁆𑀔𑀻𑀢𑀺 𑀲𑀓𑁆𑀔𑀺. 𑀲𑀢𑁆𑀣𑀼𑀦𑁆𑀢𑀺 𑀕𑀡𑁆𑀳𑀺𑀢𑀼𑀁.

𑀇𑀢𑀺 𑀲𑁄 𑀫𑀳𑀸𑀲𑀢𑁆𑀢𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀯𑀮𑁆𑀮𑀻𑀳𑀺 𑀧𑁂𑀴𑀁 𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀢𑀢𑁆𑀣 𑀧𑀓𑁆𑀔𑀺𑀧𑀺, 𑀲𑀭𑀻𑀭𑀲𑁆𑀲 𑀫𑀳𑀦𑁆𑀢𑀢𑀸𑀬 𑀢𑀢𑁆𑀣 𑀦 𑀧𑀯𑀺𑀲𑀢𑀺. 𑀅𑀣 𑀦𑀁 𑀧𑀡𑁆𑀳𑀺𑀬𑀸 𑀓𑁄𑀝𑁆𑀝𑁂𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑁂𑀴𑀁 𑀆𑀤𑀸𑀬 𑀏𑀓𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀑𑀢𑀸𑀭𑁂𑀢𑁆𑀯𑀸 ‘‘𑀦𑀸𑀕𑀲𑁆𑀲 𑀦𑀘𑁆𑀘𑀁 𑀤𑀝𑁆𑀞𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀅𑀮𑀫𑁆𑀧𑀸𑀬𑀦𑁄 ‘‘𑀦𑀺𑀓𑁆𑀔𑀫 𑀫𑀳𑀸𑀦𑀸𑀕𑀸’’𑀢𑀺 ¶ 𑀆𑀳. 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀚𑁆𑀚 𑀫𑀬𑀸 𑀧𑀭𑀺𑀲𑀁 𑀢𑁄𑀲𑁂𑀦𑁆𑀢𑁂𑀦 𑀓𑀻𑀴𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀅𑀮𑀫𑁆𑀧𑀸𑀬𑀦𑁄 𑀩𑀳𑀼𑀁 𑀥𑀦𑀁 𑀮𑀪𑀺𑀢𑁆𑀯𑀸 𑀢𑀼𑀝𑁆𑀞𑁄 𑀫𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺. 𑀬𑀁 𑀬𑀁 𑀏𑀲 𑀫𑀁 𑀓𑀸𑀭𑁂𑀢𑀺, 𑀢𑀁 𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀲𑁄 𑀧𑁂𑀴𑀢𑁄 𑀦𑀻𑀳𑀭𑀺𑀢𑁆𑀯𑀸 ‘‘𑀫𑀳𑀸 𑀳𑁄𑀳𑀻’’𑀢𑀺 𑀆𑀳. 𑀲𑁄 𑀫𑀳𑀸 𑀅𑀳𑁄𑀲𑀺, ‘‘𑀔𑀼𑀤𑁆𑀤𑀓𑁄, 𑀯𑀝𑁆𑀝𑁄, 𑀯𑀫𑁆𑀫𑀺𑀢𑁄, 𑀏𑀓𑀧𑁆𑀨𑀡𑁄, 𑀤𑁆𑀯𑀺𑀨𑀡𑁄, 𑀢𑀺𑀧𑁆𑀨𑀡𑁄, 𑀘𑀢𑀼𑀧𑁆𑀨𑀡𑁄, 𑀧𑀜𑁆𑀘, 𑀙, 𑀲𑀢𑁆𑀢, 𑀅𑀝𑁆𑀞, 𑀦𑀯, 𑀤𑀲 𑀯𑀻𑀲𑀢𑀺, 𑀢𑀺𑀁𑀲𑀢𑀺, 𑀘𑀢𑁆𑀢𑀸𑀮𑀻𑀲, 𑀧𑀡𑁆𑀡𑀸𑀲𑀧𑁆𑀨𑀡𑁄, 𑀲𑀢𑀧𑁆𑀨𑀡𑁄, 𑀉𑀘𑁆𑀘𑁄, 𑀦𑀻𑀘𑁄, 𑀤𑀺𑀲𑁆𑀲𑀫𑀸𑀦𑀓𑀸𑀬𑁄, 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁄, 𑀤𑀺𑀲𑁆𑀲𑀫𑀸𑀦𑀉𑀧𑀟𑁆𑀠𑀓𑀸𑀬𑁄 ¶ , 𑀦𑀻𑀮𑁄, 𑀧𑀻𑀢𑁄, 𑀮𑁄𑀳𑀺𑀢𑁄, 𑀑𑀤𑀸𑀢𑁄, 𑀫𑀜𑁆𑀚𑀝𑁆𑀞𑀺𑀓𑁄 𑀳𑁄𑀳𑀺, 𑀅𑀕𑁆𑀕𑀺𑀚𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀳𑀺, 𑀉𑀤𑀓𑀁, 𑀥𑀽𑀫𑀁 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺. 𑀫𑀳𑀸𑀲𑀢𑁆𑀢𑁄 𑀇𑀫𑁂𑀲𑀼𑀧𑀺 𑀆𑀓𑀸𑀭𑁂𑀲𑀼 𑀯𑀼𑀢𑁆𑀢𑀯𑀼𑀢𑁆𑀢𑁂 ¶ 𑀅𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀘𑁆𑀘𑀁 𑀤𑀲𑁆𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀓𑁄𑀘𑀺 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀫𑀦𑀼𑀲𑁆𑀲𑀸 𑀩𑀳𑀽𑀦𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀅𑀤𑀁𑀲𑀼. 𑀇𑀢𑀺 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀳𑀲𑁆𑀲𑀫𑀢𑁆𑀢𑀁 𑀮𑀪𑀺. 𑀲𑁄 𑀓𑀺𑀜𑁆𑀘𑀸𑀧𑀺 𑀫𑀳𑀸𑀲𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 ‘‘𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀆𑀳, 𑀢𑀁 𑀧𑀦 𑀥𑀦𑀁 𑀮𑀪𑀺𑀢𑁆𑀯𑀸 ‘‘𑀕𑀸𑀫𑀓𑁂𑀧𑀺 𑀢𑀸𑀯 𑀫𑀬𑀸 𑀏𑀢𑁆𑀢𑀓𑀁 𑀥𑀦𑀁 𑀮𑀤𑁆𑀥𑀁, 𑀦𑀕𑀭𑁂 𑀓𑀺𑀭 𑀩𑀳𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀥𑀦𑀮𑁄𑀪𑁂𑀦 𑀢𑀁 𑀦 𑀫𑀼𑀜𑁆𑀘𑀺. 𑀲𑁄 𑀢𑀲𑁆𑀫𑀺𑀁 𑀕𑀸𑀫𑁂 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀭𑀢𑀦𑀫𑀬𑀁 𑀧𑁂𑀴𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀫𑀳𑀸𑀲𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀔𑀬𑀸𑀦𑀓𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀓𑀻𑀴𑀸𑀧𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀸𑀧𑀼𑀡𑀺. 𑀦𑀸𑀕𑀭𑀸𑀚𑀲𑁆𑀲 𑀧𑀦 𑀫𑀥𑀼𑀮𑀸𑀚𑁂 𑀤𑁂𑀢𑀺, 𑀫𑀡𑁆𑀟𑀽𑀓𑁂 𑀫𑀸𑀭𑁂𑀢𑁆𑀯𑀸 𑀤𑁂𑀢𑀺, 𑀲𑁄 𑀕𑁄𑀘𑀭𑀁 𑀦 𑀕𑀡𑁆𑀳𑀸𑀢𑀺 𑀅𑀯𑀺𑀲𑁆𑀲𑀚𑁆𑀚𑀦𑀪𑀬𑁂𑀦. 𑀕𑁄𑀘𑀭𑀁 𑀅𑀕𑁆𑀕𑀡𑁆𑀳𑀦𑁆𑀢𑀫𑁆𑀧𑀺 𑀧𑀼𑀦 𑀦𑀁 𑀘𑀢𑁆𑀢𑀸𑀭𑁄 𑀤𑁆𑀯𑀸𑀭𑀕𑀸𑀫𑁂 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀫𑀸𑀲𑀫𑀢𑁆𑀢𑀁 𑀓𑀻𑀴𑀸𑀧𑁂𑀲𑀺. 𑀧𑀦𑁆𑀦𑀭𑀲𑀉𑀧𑁄𑀲𑀣𑀤𑀺𑀯𑀲𑁂 𑀧𑀦 ‘‘𑀅𑀚𑁆𑀚 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀻𑀴𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀲𑀺. 𑀭𑀸𑀚𑀗𑁆𑀕𑀡𑁂 𑀫𑀜𑁆𑀘𑀸𑀢𑀺𑀫𑀜𑁆𑀘𑀁 𑀩𑀦𑁆𑀥𑀺𑀁𑀲𑀼.

𑀓𑀻𑀴𑀦𑀔𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀦𑀕𑀭𑀧𑀯𑁂𑀲𑀦𑀓𑀡𑁆𑀟𑀁

𑀅𑀮𑀫𑁆𑀧𑀸𑀬𑀦𑁂𑀦 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀳𑀺𑀢𑀤𑀺𑀯𑀲𑁂𑀬𑁂𑀯 𑀫𑀳𑀸𑀲𑀢𑁆𑀢𑀲𑁆𑀲 𑀫𑀸𑀢𑀸 𑀲𑀼𑀧𑀺𑀦𑀦𑁆𑀢𑁂 𑀅𑀤𑁆𑀤𑀲 𑀓𑀸𑀴𑁂𑀦 𑀭𑀢𑁆𑀢𑀓𑁆𑀔𑀺𑀦𑀸 𑀧𑀼𑀭𑀺𑀲𑁂𑀦 𑀅𑀲𑀺𑀦𑀸 𑀤𑀓𑁆𑀔𑀺𑀡𑀩𑀸𑀳𑀼𑀁 𑀙𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀺𑀢𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀦𑀻𑀬𑀫𑀸𑀦𑀁. 𑀲𑀸 𑀪𑀻𑀢𑀢𑀲𑀺𑀢𑀸 𑀉𑀝𑁆𑀞𑀸𑀬 𑀤𑀓𑁆𑀔𑀺𑀡𑀩𑀸𑀳𑀼𑀁 𑀧𑀭𑀸𑀫𑀲𑀺𑀢𑁆𑀯𑀸 𑀲𑀼𑀧𑀺𑀦𑀪𑀸𑀯𑀁 𑀚𑀸𑀦𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 ‘‘𑀫𑀬𑀸 𑀓𑀓𑁆𑀔𑀴𑁄 𑀧𑀸𑀧𑀲𑀼𑀧𑀺𑀦𑁄 𑀤𑀺𑀝𑁆𑀞𑁄, 𑀘𑀢𑀼𑀦𑁆𑀦𑀁 𑀯𑀸 𑀫𑁂 𑀧𑀼𑀢𑁆𑀢𑀸𑀦𑀁 𑀥𑀢𑀭𑀝𑁆𑀞𑀲𑁆𑀲 𑀭𑀜𑁆𑀜𑁄 𑀯𑀸 𑀫𑀫 𑀯𑀸 𑀧𑀭𑀺𑀧𑀦𑁆𑀣𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀅𑀧𑀺𑀘 𑀔𑁄 𑀧𑀦 𑀫𑀳𑀸𑀲𑀢𑁆𑀢𑀫𑁂𑀯 𑀆𑀭𑀩𑁆𑀪 𑀅𑀢𑀺𑀭𑁂𑀓𑀢𑀭𑀁 𑀘𑀺𑀦𑁆𑀢𑁂𑀲𑀺. 𑀓𑀺𑀁𑀓𑀸𑀭𑀡𑀸 ¶ ? 𑀲𑁂𑀲𑀸 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑁂 𑀯𑀲𑀦𑁆𑀢𑀺, 𑀇𑀢𑀭𑁄 𑀧𑀦 𑀲𑀻𑀮𑀚𑁆𑀛𑀸𑀲𑀬𑀢𑁆𑀢𑀸 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀫𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑀁 𑀅𑀳𑀺𑀢𑀼𑀡𑁆𑀟𑀺𑀓𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸 𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀢𑀲𑁆𑀲𑁂𑀯 𑀅𑀢𑀺𑀭𑁂𑀓𑀢𑀭𑀁 𑀘𑀺𑀦𑁆𑀢𑁂𑀲𑀺 ¶ . 𑀢𑀢𑁄 𑀅𑀟𑁆𑀠𑀫𑀸𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 ‘‘𑀫𑀫 𑀧𑀼𑀢𑁆𑀢𑁄 𑀅𑀟𑁆𑀠𑀫𑀸𑀲𑀸𑀢𑀺𑀓𑁆𑀓𑀫𑁂𑀦 𑀫𑀁 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀤𑁆𑀥𑀸𑀲𑁆𑀲 𑀓𑀺𑀜𑁆𑀘𑀺 ¶ 𑀪𑀬𑀁 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀫𑀸𑀲𑀸𑀢𑀺𑀓𑁆𑀓𑀫𑁂𑀦 𑀧𑀦𑀲𑁆𑀲𑀸 𑀲𑁄𑀓𑁂𑀦 𑀅𑀲𑁆𑀲𑀽𑀦𑀁 𑀅𑀧𑀕𑁆𑀖𑀭𑀡𑀓𑀸𑀮𑁄 𑀦𑀸𑀫 𑀦𑀸𑀳𑁄𑀲𑀺, 𑀳𑀤𑀬𑀁 𑀲𑀼𑀲𑁆𑀲𑀺, 𑀅𑀓𑁆𑀔𑀻𑀦𑀺 𑀉𑀧𑀘𑁆𑀘𑀺𑀁𑀲𑀼. 𑀲𑀸 ‘‘𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲𑀸𑀕𑀫𑀦𑀫𑀕𑁆𑀕𑀫𑁂𑀯 𑀑𑀮𑁄𑀓𑁂𑀦𑁆𑀢𑀻 𑀦𑀺𑀲𑀻𑀤𑀺. 𑀅𑀣𑀲𑁆𑀲𑀸 𑀚𑁂𑀝𑁆𑀞𑀧𑀼𑀢𑁆𑀢𑁄 𑀲𑀼𑀤𑀲𑁆𑀲𑀦𑁄 𑀫𑀸𑀲𑀘𑁆𑀘𑀬𑁂𑀦 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀫𑀸𑀢𑀸𑀧𑀺𑀢𑀽𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑁄, 𑀧𑀭𑀺𑀲𑀁 𑀩𑀳𑀺 𑀞𑀧𑁂𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀸 𑀪𑀽𑀭𑀺𑀤𑀢𑁆𑀢𑀁 𑀅𑀦𑀼𑀲𑁄𑀘𑀦𑁆𑀢𑀻 𑀢𑁂𑀦 𑀲𑀤𑁆𑀥𑀺𑀁 𑀦 𑀓𑀺𑀜𑁆𑀘𑀺 𑀲𑀮𑁆𑀮𑀧𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀫𑀸𑀢𑀸 𑀫𑀬𑀺 𑀧𑀼𑀩𑁆𑀩𑁂 𑀆𑀕𑀢𑁂 𑀢𑀼𑀲𑁆𑀲𑀢𑀺, 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺, 𑀅𑀚𑁆𑀚 𑀧𑀦 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? 𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋

𑁮𑁪𑁮.

‘‘𑀫𑀫𑀁 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀳𑀝𑁆𑀞𑀸𑀦𑀺, 𑀲𑀸𑀯𑀁 𑀚𑀸𑀢𑀁 𑀫𑀼𑀔𑀁 𑀢𑀯.

𑁮𑁪𑁯.

‘‘𑀧𑀤𑁆𑀥𑀁 𑀬𑀣𑀸 𑀳𑀢𑁆𑀣𑀕𑀢𑀁, 𑀧𑀸𑀡𑀺𑀦𑀸 𑀧𑀭𑀺𑀫𑀤𑁆𑀤𑀺𑀢𑀁;

𑀲𑀸𑀯𑀁 𑀚𑀸𑀢𑀁 𑀫𑀼𑀔𑀁 𑀢𑀼𑀬𑁆𑀳𑀁, 𑀫𑀫𑀁 𑀤𑀺𑀲𑁆𑀯𑀸𑀦 𑀏𑀤𑀺𑀲’’𑀦𑁆𑀢𑀺.

𑀢𑀢𑁆𑀣 𑀅𑀳𑀝𑁆𑀞𑀸𑀦𑀻𑀢𑀺 𑀦 𑀯𑀺𑀧𑁆𑀧𑀲𑀦𑁆𑀦𑀸𑀦𑀺. 𑀲𑀸𑀯𑀦𑁆𑀢𑀺 𑀓𑀜𑁆𑀘𑀦𑀸𑀤𑀸𑀲𑀯𑀡𑁆𑀡𑀁 𑀢𑁂 𑀫𑀼𑀔𑀁 𑀧𑀻𑀢𑀓𑀸𑀴𑀓𑀁 𑀚𑀸𑀢𑀁. 𑀳𑀢𑁆𑀣𑀕𑀢𑀦𑁆𑀢𑀺 𑀳𑀢𑁆𑀣𑁂𑀦 𑀙𑀺𑀦𑁆𑀤𑀺𑀢𑀁. 𑀏𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀁 𑀫𑀁 𑀤𑀺𑀲𑁆𑀯𑀸.

𑀲𑀸 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀦𑁂𑀯 𑀓𑀣𑁂𑀲𑀺. 𑀲𑀼𑀤𑀲𑁆𑀲𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀺𑀁 𑀦𑀼 𑀔𑁄 𑀓𑁂𑀦𑀘𑀺 𑀓𑀼𑀤𑁆𑀥𑀸 𑀯𑀸 𑀧𑀭𑀺𑀩𑀤𑁆𑀥𑀸 𑀯𑀸 𑀪𑀯𑁂𑀬𑁆𑀬𑀸’’𑀢𑀺. 𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁮𑁫𑁦.

‘‘𑀓𑀘𑁆𑀘𑀺 𑀦𑀼 𑀢𑁂 𑀦𑀸𑀪𑀺𑀲𑀲𑀺, 𑀓𑀘𑁆𑀘𑀺 𑀢𑁂 𑀅𑀢𑁆𑀣𑀺 𑀯𑁂𑀤𑀦𑀸;

𑀬𑁂𑀦 𑀲𑀸𑀯𑀁 𑀫𑀼𑀔𑀁 𑀢𑀼𑀬𑁆𑀳𑀁, 𑀫𑀫𑀁 𑀤𑀺𑀲𑁆𑀯𑀸𑀦 𑀆𑀕𑀢’’𑀦𑁆𑀢𑀺.

𑀢𑀢𑁆𑀣 𑀓𑀘𑁆𑀘𑀺 𑀦𑀼 𑀢𑁂 𑀦𑀸𑀪𑀺𑀲𑀲𑀻𑀢𑀺 𑀓𑀘𑁆𑀘𑀺 𑀦𑀼 𑀢𑀁 𑀓𑁄𑀘𑀺 𑀦 𑀅𑀪𑀺𑀲𑀲𑀺 𑀅𑀓𑁆𑀓𑁄𑀲𑁂𑀦 𑀯𑀸 𑀧𑀭𑀺𑀪𑀸𑀲𑀸𑀬 ¶ 𑀯𑀸 𑀯𑀺𑀳𑀺𑀁𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀼𑀬𑁆𑀳𑀦𑁆𑀢𑀺 𑀢𑀯 𑀧𑀼𑀩𑁆𑀩𑁂 𑀫𑀫𑀁 𑀤𑀺𑀲𑁆𑀯𑀸 𑀆𑀕𑀢𑀁 𑀏𑀤𑀺𑀲𑀁 𑀫𑀼𑀔𑀁 𑀦 𑀳𑁄𑀢𑀺. 𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀅𑀚𑁆𑀚 𑀢𑀯 𑀫𑀼𑀔𑀁 𑀲𑀸𑀯𑀁 𑀚𑀸𑀢𑀁, 𑀢𑀁 𑀫𑁂 𑀆𑀘𑀺𑀓𑁆𑀔𑀸𑀢𑀺 𑀧𑀼𑀘𑁆𑀙𑀢𑀺.

𑀅𑀣𑀲𑁆𑀲 ¶ 𑀲𑀸 𑀆𑀘𑀺𑀓𑁆𑀔𑀦𑁆𑀢𑀻 𑀆𑀳 𑁋

𑁮𑁫𑁧.

‘‘𑀲𑀼𑀧𑀺𑀦𑀁 𑀢𑀸𑀢 𑀅𑀤𑁆𑀤𑀓𑁆𑀔𑀺𑀁, 𑀇𑀢𑁄 𑀫𑀸𑀲𑀁 𑀅𑀥𑁄𑀕𑀢𑀁;

‘𑀤𑀓𑁆𑀔𑀺𑀡𑀁 ¶ 𑀯𑀺𑀬 𑀫𑁂 𑀩𑀸𑀳𑀼𑀁, 𑀙𑁂𑀢𑁆𑀯𑀸 𑀭𑀼𑀳𑀺𑀭𑀫𑀓𑁆𑀔𑀺𑀢𑀁;

𑀧𑀼𑀭𑀺𑀲𑁄 𑀆𑀤𑀸𑀬 𑀧𑀓𑁆𑀓𑀸𑀫𑀺, 𑀫𑀫 𑀭𑁄𑀤𑀦𑁆𑀢𑀺𑀬𑀸 𑀲𑀢𑀺’.

𑁮𑁫𑁨.

‘‘𑀬𑀢𑁄𑀳𑀁 𑀲𑀼𑀧𑀺𑀦𑀫𑀤𑁆𑀤𑀓𑁆𑀔𑀺𑀁, 𑀲𑀼𑀤𑀲𑁆𑀲𑀦 𑀯𑀺𑀚𑀸𑀦𑀳𑀺;

𑀢𑀢𑁄 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀼𑀔𑀁 𑀫𑁂 𑀦𑁄𑀧𑀮𑀩𑁆𑀪𑀢𑀻’’𑀢𑀺.

𑀢𑀢𑁆𑀣 𑀇𑀢𑁄 𑀫𑀸𑀲𑀁 𑀅𑀥𑁄𑀕𑀢𑀦𑁆𑀢𑀺 𑀇𑀢𑁄 𑀳𑁂𑀝𑁆𑀞𑀸 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀁. 𑀅𑀚𑁆𑀚 𑀫𑁂 𑀤𑀺𑀝𑁆𑀞𑀲𑀼𑀧𑀺𑀦𑀲𑁆𑀲 𑀫𑀸𑀲𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀲𑁄𑀢𑀺 𑀏𑀓𑁄 𑀓𑀸𑀴𑁄 𑀭𑀢𑁆𑀢𑀓𑁆𑀔𑀺 𑀧𑀼𑀭𑀺𑀲𑁄. 𑀭𑁄𑀤𑀦𑁆𑀢𑀺𑀬𑀸 𑀲𑀢𑀻𑀢𑀺 𑀭𑁄𑀤𑀫𑀸𑀦𑀸𑀬 𑀲𑀢𑀺𑀬𑀸. 𑀲𑀼𑀔𑀁 𑀫𑁂 𑀦𑁄𑀧𑀮𑀩𑁆𑀪𑀢𑀻𑀢𑀺 𑀫𑀫 𑀲𑀼𑀔𑀁 𑀦𑀸𑀫 𑀦 𑀯𑀺𑀚𑁆𑀚𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀢𑀸𑀢, 𑀧𑀺𑀬𑀧𑀼𑀢𑁆𑀢𑀓𑁄 𑀫𑁂 𑀢𑀯 𑀓𑀦𑀺𑀝𑁆𑀞𑁄 𑀦 𑀤𑀺𑀲𑁆𑀲𑀢𑀺, 𑀪𑀬𑁂𑀦𑀲𑁆𑀲 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀻 𑀆𑀳 𑁋

𑁮𑁫𑁩.

‘‘𑀬𑀁 𑀧𑀼𑀩𑁆𑀩𑁂 𑀧𑀭𑀺𑀯𑀸𑀭𑀺𑀁𑀲𑀼, 𑀓𑀜𑁆𑀜𑀸 𑀭𑀼𑀘𑀺𑀭𑀯𑀺𑀕𑁆𑀕𑀳𑀸;

𑀳𑁂𑀫𑀚𑀸𑀮𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀪𑀽𑀭𑀺𑀤𑀢𑁆𑀢𑁄 𑀦 𑀤𑀺𑀲𑁆𑀲𑀢𑀺.

𑁮𑁫𑁪.

‘‘𑀬𑀁 𑀧𑀼𑀩𑁆𑀩𑁂 𑀧𑀭𑀺𑀯𑀸𑀭𑀺𑀁𑀲𑀼, 𑀦𑁂𑀢𑁆𑀢𑀺𑀁𑀲𑀯𑀭𑀥𑀸𑀭𑀺𑀦𑁄;

𑀓𑀡𑀺𑀓𑀸𑀭𑀸𑀯 𑀲𑀫𑁆𑀨𑀼𑀮𑁆𑀮𑀸, 𑀪𑀽𑀭𑀺𑀤𑀢𑁆𑀢𑁄 𑀦 𑀤𑀺𑀲𑁆𑀲𑀢𑀺.

𑁮𑁫𑁫.

‘‘𑀳𑀦𑁆𑀤 𑀤𑀸𑀦𑀺 𑀕𑀫𑀺𑀲𑁆𑀲𑀸𑀫, 𑀪𑀽𑀭𑀺𑀤𑀢𑁆𑀢𑀦𑀺𑀯𑁂𑀲𑀦𑀁;

𑀥𑀫𑁆𑀫𑀝𑁆𑀞𑀁 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀧𑀲𑁆𑀲𑀸𑀫 𑀢𑀯 𑀪𑀸𑀢𑀭’’𑀦𑁆𑀢𑀺.

𑀢𑀢𑁆𑀣 𑀲𑀫𑁆𑀨𑀼𑀮𑁆𑀮𑀸𑀢𑀺 𑀲𑀼𑀯𑀡𑁆𑀡𑀯𑀢𑁆𑀣𑀸𑀮𑀗𑁆𑀓𑀸𑀭𑀥𑀸𑀭𑀺𑀢𑀸𑀬 𑀲𑀫𑁆𑀨𑀼𑀮𑁆𑀮𑀸 𑀓𑀡𑀺𑀓𑀸𑀭𑀸 𑀯𑀺𑀬. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀳𑀺, 𑀢𑀸𑀢, 𑀪𑀽𑀭𑀺𑀤𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀕𑀘𑁆𑀙𑀸𑀫𑀸𑀢𑀺 𑀯𑀤𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀢𑀲𑁆𑀲 𑀘𑁂𑀯 𑀅𑀢𑁆𑀢𑀦𑁄 𑀘 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀢𑁆𑀣 𑀅𑀕𑀫𑀸𑀲𑀺. 𑀪𑀽𑀭𑀺𑀤𑀢𑁆𑀢𑀲𑁆𑀲 𑀪𑀭𑀺𑀬𑀸𑀬𑁄 𑀧𑀦 𑀢𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀅𑀤𑀺𑀲𑁆𑀯𑀸 ‘‘𑀫𑀸𑀢𑀼 𑀦𑀺𑀯𑁂𑀲𑀦𑁂 𑀯𑀲𑀺𑀲𑁆𑀲𑀢𑀻’’𑀢𑀺 𑀅𑀩𑁆𑀬𑀸𑀯𑀝𑀸 𑀅𑀳𑁂𑀲𑀼𑀁. 𑀢𑀸 ‘‘𑀲𑀲𑁆𑀲𑀼 𑀓𑀺𑀭 𑀦𑁄 𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ‘‘𑀅𑀬𑁆𑀬𑁂, 𑀧𑀼𑀢𑁆𑀢𑀲𑁆𑀲 𑀢𑁂 𑀅𑀤𑀺𑀲𑁆𑀲𑀫𑀸𑀦𑀲𑁆𑀲 𑀅𑀚𑁆𑀚 𑀫𑀸𑀲𑁄 𑀅𑀢𑀻𑀢𑁄’’𑀢𑀺 𑀫𑀳𑀸𑀧𑀭𑀺𑀤𑁂𑀯𑀁 𑀧𑀭𑀺𑀤𑁂𑀯𑀫𑀸𑀦𑀸 ¶ 𑀢𑀲𑁆𑀲𑀸 𑀧𑀸𑀤𑀫𑀽𑀮𑁂 𑀧𑀢𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁮𑁫𑁬.

‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀪𑀽𑀭𑀺𑀤𑀢𑁆𑀢𑀲𑁆𑀲 𑀫𑀸𑀢𑀭𑀁;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁, 𑀪𑀽𑀭𑀺𑀤𑀢𑁆𑀢𑀲𑁆𑀲 𑀦𑀸𑀭𑀺𑀬𑁄.

𑁮𑁫𑁭.

‘‘𑀧𑀼𑀢𑁆𑀢𑀁 𑀢𑁂𑀬𑁆𑀬𑁂 𑀦 𑀚𑀸𑀦𑀸𑀫, 𑀇𑀢𑁄 𑀫𑀸𑀲𑀁 𑀅𑀥𑁄𑀕𑀢𑀁;

𑀫𑀢𑀁 𑀯𑀸 𑀬𑀤𑀺 𑀯𑀸 𑀚𑀻𑀯𑀁, 𑀪𑀽𑀭𑀺𑀤𑀢𑁆𑀢𑀁 𑀬𑀲𑀲𑁆𑀲𑀺𑀦’’𑀦𑁆𑀢𑀺.

𑀢𑀢𑁆𑀣 ¶ ‘‘𑀧𑀼𑀢𑁆𑀢𑀁 𑀢𑁂𑀬𑁆𑀬𑁂’’𑀢𑀺 𑀅𑀬𑀁 𑀢𑀸𑀲𑀁 𑀧𑀭𑀺𑀤𑁂𑀯𑀦𑀓𑀣𑀸.

𑀪𑀽𑀭𑀺𑀤𑀢𑁆𑀢𑀲𑁆𑀲 𑀫𑀸𑀢𑀸 𑀲𑀼𑀡𑁆𑀳𑀸𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀭𑀺𑀤𑁂𑀯𑀺𑀢𑁆𑀯𑀸 𑀢𑀸 𑀆𑀤𑀸𑀬 𑀢𑀲𑁆𑀲 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀧𑀼𑀢𑁆𑀢𑀲𑁆𑀲 𑀲𑀬𑀦𑀜𑁆𑀘 𑀆𑀲𑀦𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀆𑀳 𑁋

𑁮𑁫𑁮.

‘‘𑀲𑀓𑀼𑀡𑀻 𑀳𑀢𑀧𑀼𑀢𑁆𑀢𑀸𑀯, 𑀲𑀼𑀜𑁆𑀜𑀁 𑀤𑀺𑀲𑁆𑀯𑀸 𑀓𑀼𑀮𑀸𑀯𑀓𑀁;

𑀘𑀺𑀭𑀁 𑀤𑀼𑀓𑁆𑀔𑁂𑀦 𑀛𑀸𑀬𑀺𑀲𑁆𑀲𑀁, 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀢𑀻.

𑁮𑁫𑁯.

‘‘𑀓𑀼𑀭𑀭𑀻 𑀳𑀢𑀙𑀸𑀧𑀸𑀯, 𑀲𑀼𑀜𑁆𑀜𑀁 𑀤𑀺𑀲𑁆𑀯𑀸 𑀓𑀼𑀮𑀸𑀯𑀓𑀁;

𑀘𑀺𑀭𑀁 𑀤𑀼𑀓𑁆𑀔𑁂𑀦 𑀛𑀸𑀬𑀺𑀲𑁆𑀲𑀁, 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀢𑀻.

𑁮𑁬𑁦.

‘‘𑀲𑀸 𑀦𑀽𑀦 𑀘𑀓𑁆𑀓𑀯𑀸𑀓𑀻𑀯, 𑀧𑀮𑁆𑀮𑀮𑀲𑁆𑀫𑀺𑀁 𑀅𑀦𑁄𑀤𑀓𑁂;

𑀘𑀺𑀭𑀁 𑀤𑀼𑀓𑁆𑀔𑁂𑀦 𑀛𑀸𑀬𑀺𑀲𑁆𑀲𑀁, 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀢𑀻.

𑁮𑁬𑁧.

‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀺;

𑀏𑀯𑀁 𑀛𑀸𑀬𑀸𑀫𑀺 𑀲𑁄𑀓𑁂𑀦, 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀅𑀧𑀲𑁆𑀲𑀢𑀻𑀢𑀺 𑀅𑀧𑀲𑁆𑀲𑀦𑁆𑀢𑀻. 𑀳𑀢𑀙𑀸𑀧𑀸𑀯𑀸𑀢𑀺 𑀳𑀢𑀧𑁄𑀢𑀓𑀸𑀯.

𑀏𑀯𑀁 ¶ 𑀪𑀽𑀭𑀺𑀤𑀢𑁆𑀢𑀫𑀸𑀢𑀭𑀺 𑀯𑀺𑀮𑀧𑀫𑀸𑀦𑀸𑀬 𑀪𑀽𑀭𑀺𑀤𑀢𑁆𑀢𑀦𑀺𑀯𑁂𑀲𑀦𑀁 𑀅𑀡𑁆𑀡𑀯𑀓𑀼𑀘𑁆𑀙𑀺 𑀯𑀺𑀬 𑀏𑀓𑀲𑀤𑁆𑀤𑀁 𑀅𑀳𑁄𑀲𑀺. 𑀏𑀓𑁄𑀧𑀺 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀓𑀮𑀦𑀺𑀯𑁂𑀲𑀦𑀁 𑀬𑀼𑀕𑀦𑁆𑀥𑀭𑀯𑀸𑀢𑀧𑁆𑀧𑀳𑀝𑀁 𑀯𑀺𑀬 𑀲𑀸𑀮𑀯𑀦𑀁 𑀅𑀳𑁄𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁮𑁬𑁨.

‘‘𑀲𑀸𑀮𑀸𑀯 𑀲𑀫𑁆𑀧𑀫𑀣𑀺𑀢𑀸, 𑀫𑀸𑀮𑀼𑀢𑁂𑀦 𑀧𑀫𑀤𑁆𑀤𑀺𑀢𑀸;

𑀲𑁂𑀦𑁆𑀢𑀺 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘, 𑀪𑀽𑀭𑀺𑀤𑀢𑁆𑀢𑀦𑀺𑀯𑁂𑀲𑀦𑁂’’𑀢𑀺.

𑀅𑀭𑀺𑀝𑁆𑀞𑁄 ¶ 𑀘 𑀲𑀼𑀪𑁄𑀕𑁄 𑀘 𑀉𑀪𑁄𑀧𑀺 𑀪𑀸𑀢𑀭𑁄 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀽𑀭𑀺𑀤𑀢𑁆𑀢𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀭𑀁 𑀅𑀲𑁆𑀲𑀸𑀲𑀬𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁮𑁬𑁩.

‘‘𑀇𑀤𑀁 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀪𑀽𑀭𑀺𑀤𑀢𑁆𑀢𑀦𑀺𑀯𑁂𑀲𑀦𑁂;

𑀅𑀭𑀺𑀝𑁆𑀞𑁄 𑀘 𑀲𑀼𑀪𑁄𑀕𑁄 𑀘, 𑀧𑀥𑀸𑀯𑀺𑀁𑀲𑀼 𑀅𑀦𑀦𑁆𑀢𑀭𑀸.

𑁮𑁬𑁪.

‘‘𑀅𑀫𑁆𑀫 𑀅𑀲𑁆𑀲𑀸𑀲 𑀫𑀸 𑀲𑁄𑀘𑀺, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄;

𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀏𑀲𑀸𑀲𑁆𑀲 𑀧𑀭𑀺𑀡𑀸𑀫𑀺𑀢𑀸’’𑀢𑀺.

𑀢𑀢𑁆𑀣 𑀏𑀲𑀸𑀲𑁆𑀲 𑀧𑀭𑀺𑀡𑀸𑀫𑀺𑀢𑀸𑀢𑀺 𑀏𑀲𑀸 𑀘𑀼𑀢𑀽𑀧𑀧𑀢𑁆𑀢𑀺 𑀅𑀲𑁆𑀲 𑀮𑁄𑀓𑀲𑁆𑀲 𑀧𑀭𑀺𑀡𑀸𑀫𑀺𑀢𑀸, 𑀏𑀯𑀜𑁆𑀳𑀺 𑀲𑁄 𑀮𑁄𑀓𑁄 𑀧𑀭𑀺𑀡𑀸𑀫𑁂𑀢𑀺. 𑀏𑀢𑁂𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀫𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺.

𑀲𑀫𑀼𑀤𑁆𑀤𑀚𑀸 ¶ 𑀆𑀳 𑁋

𑁮𑁬𑁫.

‘‘𑀅𑀳𑀫𑁆𑀧𑀺 𑀢𑀸𑀢 𑀚𑀸𑀦𑀸𑀫𑀺, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄;

𑀲𑁄𑀓𑁂𑀦 𑀘 𑀧𑀭𑁂𑀢𑀲𑁆𑀫𑀺, 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀢𑀻.

𑁮𑁬𑁬.

‘‘𑀅𑀚𑁆𑀚 𑀘𑁂 𑀫𑁂 𑀇𑀫𑀁 𑀭𑀢𑁆𑀢𑀺𑀁, 𑀲𑀼𑀤𑀲𑁆𑀲𑀦 𑀯𑀺𑀚𑀸𑀦𑀳𑀺;

𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀫𑀜𑁆𑀜𑁂 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢’’𑀦𑁆𑀢𑀺.

𑀢𑀢𑁆𑀣 𑀅𑀚𑁆𑀚 𑀘𑁂 𑀫𑁂𑀢𑀺 𑀢𑀸𑀢 𑀲𑀼𑀤𑀲𑁆𑀲𑀦, 𑀲𑀘𑁂 𑀅𑀚𑁆𑀚 𑀇𑀫𑀁 𑀭𑀢𑁆𑀢𑀺𑀁 𑀪𑀽𑀭𑀺𑀤𑀢𑁆𑀢𑁄 𑀫𑀫 𑀤𑀲𑁆𑀲𑀦𑀁 𑀦𑀸𑀕𑀫𑀺𑀲𑁆𑀲𑀢𑀺, 𑀅𑀣𑀸𑀳𑀁 𑀢𑀁 𑀅𑀧𑀲𑁆𑀲𑀦𑁆𑀢𑀻 𑀚𑀻𑀯𑀺𑀢𑀁 𑀚𑀳𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀸𑀫𑀺.

𑀧𑀼𑀢𑁆𑀢𑀸 ¶ 𑀆𑀳𑀁𑀲𑀼 𑁋

𑁮𑁬𑁭.

‘‘𑀅𑀫𑁆𑀫 𑀅𑀲𑁆𑀲𑀸𑀲 𑀫𑀸 𑀲𑁄𑀘𑀺, 𑀆𑀦𑀬𑀺𑀲𑁆𑀲𑀸𑀫 𑀪𑀸𑀢𑀭𑀁;

𑀤𑀺𑀲𑁄𑀤𑀺𑀲𑀁 𑀕𑀫𑀺𑀲𑁆𑀲𑀸𑀫, 𑀪𑀸𑀢𑀼𑀧𑀭𑀺𑀬𑁂𑀲𑀦𑀁 𑀘𑀭𑀁.

𑁮𑁬𑁮.

‘‘𑀧𑀩𑁆𑀩𑀢𑁂 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘;

𑀑𑀭𑁂𑀦 𑀲𑀢𑁆𑀢𑀭𑀢𑁆𑀢𑀲𑁆𑀲, 𑀪𑀸𑀢𑀭𑀁 𑀧𑀲𑁆𑀲 𑀆𑀕𑀢’’𑀦𑁆𑀢𑀺.

𑀢𑀢𑁆𑀣 𑀘𑀭𑀦𑁆𑀢𑀺 𑀅𑀫𑁆𑀫, 𑀫𑀬𑀁 𑀢𑀬𑁄𑀧𑀺 𑀚𑀦𑀸 𑀪𑀸𑀢𑀼𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀸 𑀤𑀺𑀲𑁄𑀤𑀺𑀲𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀦𑀁 𑀅𑀲𑁆𑀲𑀸𑀲𑁂𑀲𑀼𑀁.

𑀢𑀢𑁄 ¶ 𑀲𑀼𑀤𑀲𑁆𑀲𑀦𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀢𑀬𑁄𑀧𑀺 𑀏𑀓𑀁 𑀤𑀺𑀲𑀁 𑀕𑀫𑀺𑀲𑁆𑀲𑀸𑀫, 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀢𑀻𑀳𑀺 𑀢𑀻𑀡𑀺 𑀞𑀸𑀦𑀸𑀦𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑁋 𑀏𑀓𑁂𑀦 𑀤𑁂𑀯𑀮𑁄𑀓𑀁, 𑀏𑀓𑁂𑀦 𑀳𑀺𑀫𑀯𑀦𑁆𑀢𑀁, 𑀏𑀓𑁂𑀦 𑀫𑀦𑀼𑀲𑁆𑀲𑀮𑁄𑀓𑀁. 𑀲𑀘𑁂 𑀔𑁄 𑀧𑀦 𑀓𑀸𑀡𑀸𑀭𑀺𑀝𑁆𑀞𑁄 𑀫𑀦𑀼𑀲𑁆𑀲𑀮𑁄𑀓𑀁 𑀕𑀫𑀺𑀲𑁆𑀲𑀢𑀺, 𑀬𑀢𑁆𑀣𑁂𑀯 𑀪𑀽𑀭𑀺𑀤𑀢𑁆𑀢𑀁 𑀧𑀲𑁆𑀲𑀢𑀺. 𑀢𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀛𑀸𑀧𑁂𑀢𑁆𑀯𑀸 𑀏𑀲𑁆𑀲𑀢𑀺, 𑀏𑀲 𑀓𑀓𑁆𑀔𑀴𑁄 𑀨𑀭𑀼𑀲𑁄, 𑀦 𑀲𑀓𑁆𑀓𑀸 𑀏𑀢𑀁 𑀢𑀢𑁆𑀣 𑀧𑁂𑀲𑁂𑀢𑀼’’𑀦𑁆𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀧𑀦 ‘‘𑀢𑀸𑀢 𑀅𑀭𑀺𑀝𑁆𑀞, 𑀢𑁆𑀯𑀁 𑀤𑁂𑀯𑀮𑁄𑀓𑀁 𑀕𑀘𑁆𑀙, 𑀲𑀘𑁂 𑀤𑁂𑀯𑀢𑀸𑀳𑀺 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸𑀳𑀺 𑀪𑀽𑀭𑀺𑀤𑀢𑁆𑀢𑁄 𑀤𑁂𑀯𑀮𑁄𑀓𑀁 𑀦𑀻𑀢𑁄, 𑀢𑀢𑁄 𑀦𑀁 𑀆𑀦𑁂𑀳𑀻’’𑀢𑀺 𑀅𑀭𑀺𑀝𑁆𑀞𑀁 𑀤𑁂𑀯𑀮𑁄𑀓𑀁 𑀧𑀳𑀺𑀡𑀺. 𑀲𑀼𑀪𑁄𑀕𑀁 𑀧𑀦 ‘‘𑀢𑀸𑀢, 𑀢𑁆𑀯𑀁 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀼 𑀫𑀳𑀸𑀦𑀤𑀻𑀲𑀼 𑀪𑀽𑀭𑀺𑀤𑀢𑁆𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀏𑀳𑀻’’𑀢𑀺 𑀳𑀺𑀫𑀯𑀦𑁆𑀢𑀁 𑀧𑀳𑀺𑀡𑀺. 𑀲𑀬𑀁 𑀧𑀦 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀫𑀸𑀡𑀯𑀓𑀯𑀡𑁆𑀡𑁂𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀸 𑀦𑁂𑀯 𑀫𑁂 𑀧𑀺𑀬𑀸𑀬𑀺𑀲𑁆𑀲𑀦𑁆𑀢𑀺, 𑀫𑀬𑀸 𑀢𑀸𑀧𑀲𑀯𑁂𑀲𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀧𑀩𑁆𑀩𑀚𑀺𑀢𑀸 𑀧𑀺𑀬𑀸 𑀫𑀦𑀸𑀧𑀸’’𑀢𑀺. 𑀲𑁄 𑀢𑀸𑀧𑀲𑀯𑁂𑀲𑀁 𑀕𑀳𑁂𑀢𑁆𑀯𑀸 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀅𑀚𑀫𑀼𑀔𑀻 𑀦𑀸𑀫 𑀯𑁂𑀫𑀸𑀢𑀺𑀓𑀪𑀕𑀺𑀦𑀻 𑀅𑀢𑁆𑀣𑀺. 𑀢𑀲𑁆𑀲𑀸 𑀩𑁄𑀥𑀺𑀲𑀢𑁆𑀢𑁂 𑀅𑀥𑀺𑀫𑀢𑁆𑀢𑁄 𑀲𑀺𑀦𑁂𑀳𑁄. 𑀲𑀸 𑀲𑀼𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀪𑀸𑀢𑀺𑀓 ¶ , 𑀅𑀢𑀺𑀯𑀺𑀬 𑀓𑀺𑀮𑀫𑀸𑀫𑀺, 𑀅𑀳𑀫𑁆𑀧𑀺 𑀢𑀬𑀸 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀦 𑀲𑀓𑁆𑀓𑀸 𑀢𑀬𑀸 𑀕𑀦𑁆𑀢𑀼𑀁, 𑀅𑀳𑀁 𑀧𑀩𑁆𑀩𑀚𑀺𑀢𑀯𑀲𑁂𑀦 𑀕𑀘𑁆𑀙𑀸𑀫𑀻’’𑀢𑀺. ‘‘𑀅𑀳𑀁 𑀧𑀦 𑀔𑀼𑀤𑁆𑀤𑀓𑀫𑀡𑁆𑀟𑀽𑀓𑀻 𑀳𑀼𑀢𑁆𑀯𑀸 𑀢𑀯 𑀚𑀝𑀦𑁆𑀢𑀭𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀏𑀳𑀻’’𑀢𑀺. 𑀲𑀸 𑀫𑀡𑁆𑀟𑀽𑀓𑀧𑁄𑀢𑀺𑀓𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀚𑀝𑀦𑁆𑀢𑀭𑁂 𑀦𑀺𑀧𑀚𑁆𑀚𑀺. 𑀲𑀼𑀤𑀲𑁆𑀲𑀦𑁄 ‘‘𑀫𑀽𑀮𑀢𑁄 𑀧𑀝𑁆𑀞𑀸𑀬 𑀯𑀺𑀘𑀺𑀦𑀦𑁆𑀢𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀪𑀭𑀺𑀬𑀸𑀬𑁄 𑀢𑀲𑁆𑀲 𑀉𑀧𑁄𑀲𑀣𑀓𑀭𑀡𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀞𑀫𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀮𑀫𑁆𑀧𑀸𑀬𑀦𑁂𑀦 𑀫𑀳𑀸𑀲𑀢𑁆𑀢𑀲𑁆𑀲 𑀕𑀳𑀺𑀢𑀝𑁆𑀞𑀸𑀦𑁂 𑀮𑁄𑀳𑀺𑀢𑀜𑁆𑀘 𑀯𑀮𑁆𑀮𑀻𑀳𑀺 𑀓𑀢𑀧𑁂𑀴𑀝𑁆𑀞𑀸𑀦𑀜𑁆𑀘 𑀤𑀺𑀲𑁆𑀯𑀸 ‘‘𑀪𑀽𑀭𑀺𑀤𑀢𑁆𑀢𑁄 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀕𑀳𑀺𑀢𑁄’’𑀢𑀺 𑀜𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀲𑁄𑀓𑁄 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 ¶ 𑀦𑁂𑀢𑁆𑀢𑁂𑀳𑀺 𑀅𑀮𑀫𑁆𑀧𑀸𑀬𑀦𑀲𑁆𑀲 𑀕𑀢𑀫𑀕𑁆𑀕𑁂𑀦𑁂𑀯 𑀧𑀞𑀫𑀁 𑀓𑀻𑀴𑀸𑀧𑀺𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 𑀫𑀦𑀲𑁆𑀲𑁂 𑀧𑀼𑀘𑁆𑀙𑀺 ‘‘𑀏𑀯𑀭𑀽𑀧𑁄 𑀦𑀸𑀫 𑀦𑀸𑀕𑁄 𑀓𑁂𑀦𑀘𑀻𑀥 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀓𑀻𑀴𑀸𑀧𑀺𑀢𑁄’’𑀢𑀺? ‘‘𑀆𑀫, 𑀅𑀮𑀫𑁆𑀧𑀸𑀬𑀦𑁂𑀦 𑀇𑀢𑁄 𑀫𑀸𑀲𑀫𑀢𑁆𑀣𑀓𑁂 𑀓𑀻𑀴𑀸𑀧𑀺𑀢𑁄’’𑀢𑀺. ‘‘𑀓𑀺𑀜𑁆𑀘𑀺 𑀥𑀦𑀁 𑀢𑁂𑀦 𑀮𑀤𑁆𑀥’’𑀦𑁆𑀢𑀺? ‘‘𑀆𑀫, 𑀇𑀥𑁂𑀯 𑀢𑁂𑀦 𑀲𑀳𑀲𑁆𑀲𑀫𑀢𑁆𑀢𑀁 𑀮𑀤𑁆𑀥’’𑀦𑁆𑀢𑀺. ‘‘𑀇𑀤𑀸𑀦𑀺 𑀲𑁄 𑀓𑀼𑀳𑀺𑀁 𑀕𑀢𑁄’’𑀢𑀺? ‘‘𑀅𑀲𑀼𑀓𑀕𑀸𑀫𑀁 𑀦𑀸𑀫𑀸’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀅𑀮𑀫𑁆𑀧𑀸𑀬𑀦𑁄 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄 𑀫𑀝𑁆𑀞𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀭𑀢𑀦𑀧𑁂𑀴𑀁 𑀕𑀸𑀳𑀸𑀧𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑀫𑁂𑀯 𑀕𑀢𑁄. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺, 𑀭𑀜𑁆𑀜𑁄 𑀆𑀲𑀦𑀁 𑀧𑀜𑁆𑀜𑀢𑁆𑀢𑀁. 𑀲𑁄 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀞𑀺𑀢𑁄𑀯 ‘‘𑀅𑀳𑀁 𑀆𑀕𑀘𑁆𑀙𑀸𑀫𑀺, 𑀦𑀸𑀕𑀭𑀸𑀚𑀸𑀦𑀁 𑀓𑀻𑀴𑀸𑀧𑁂𑀢𑀽’’𑀢𑀺 𑀧𑁂𑀲𑁂𑀲𑀺. 𑀅𑀮𑀫𑁆𑀧𑀸𑀬𑀦𑁄 𑀘𑀺𑀢𑁆𑀢𑀢𑁆𑀣𑀭𑀡𑁂 𑀭𑀢𑀦𑀧𑁂𑀴𑀁 𑀞𑀧𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 ‘‘𑀏𑀳𑀺 𑀫𑀳𑀸𑀦𑀸𑀕𑀸’’𑀢𑀺 𑀲𑀜𑁆𑀜𑀫𑀤𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑀲𑁆𑀲𑀦𑁄𑀧𑀺 𑀧𑀭𑀺𑀲𑀦𑁆𑀢𑀭𑁂 𑀞𑀸𑀢𑁄. 𑀅𑀣 𑀫𑀳𑀸𑀲𑀢𑁆𑀢𑁄 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀸𑀯𑀦𑁆𑀢𑀁 𑀧𑀭𑀺𑀲𑀁 𑀑𑀮𑁄𑀓𑁂𑀲𑀺. 𑀦𑀸𑀕𑀸 𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑀺 𑀲𑀼𑀧𑀡𑁆𑀡𑀧𑀭𑀺𑀧𑀦𑁆𑀣𑀁 𑀯𑀸 𑀜𑀸𑀢𑀓𑁂 𑀯𑀸 𑀤𑀲𑁆𑀲𑀦𑀢𑁆𑀣𑀸𑀬. 𑀢𑁂 𑀲𑀼𑀧𑀡𑁆𑀡𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀦 𑀦𑀘𑁆𑀘𑀦𑁆𑀢𑀺, 𑀜𑀸𑀢𑀓𑁂 𑀯𑀸 𑀤𑀺𑀲𑁆𑀯𑀸 𑀮𑀚𑁆𑀚𑀫𑀸𑀦𑀸 𑀦 𑀦𑀘𑁆𑀘𑀦𑁆𑀢𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀲𑀦𑁆𑀢𑀭𑁂 𑀪𑀸𑀢𑀭𑀁 𑀅𑀤𑁆𑀤𑀲. 𑀲𑁄 𑀅𑀓𑁆𑀔𑀺𑀧𑀽𑀭𑀸𑀦𑀺 𑀅𑀲𑁆𑀲𑀽𑀦𑀺 𑀕𑀳𑁂𑀢𑁆𑀯𑀸 𑀧𑁂𑀴𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀸𑀢𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀫𑀳𑀸𑀚𑀦𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀧𑀝𑀺𑀓𑁆𑀓𑀫𑀺, 𑀏𑀓𑁄 𑀲𑀼𑀤𑀲𑁆𑀲𑀦𑁄𑀯 𑀅𑀝𑁆𑀞𑀸𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑀧𑀺𑀝𑁆𑀞𑀺𑀬𑀁 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀭𑁄𑀤𑀺, 𑀲𑀼𑀤𑀲𑁆𑀲𑀦𑁄𑀧𑀺 𑀧𑀭𑀺𑀤𑁂𑀯𑀺. 𑀫𑀳𑀸𑀲𑀢𑁆𑀢𑁄 𑀭𑁄𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑁂𑀴𑀫𑁂𑀯 𑀧𑀸𑀯𑀺𑀲𑀺. 𑀅𑀮𑀫𑁆𑀧𑀸𑀬𑀦𑁄𑀧𑀺 ‘‘𑀇𑀫𑀺𑀦𑀸 𑀦𑀸𑀕𑁂𑀦 𑀢𑀸𑀧𑀲𑁄 𑀟𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋

𑁮𑁬𑁯.

‘‘𑀳𑀢𑁆𑀣𑀸 ¶ 𑀧𑀫𑀼𑀢𑁆𑀢𑁄 𑀉𑀭𑀕𑁄, 𑀧𑀸𑀤𑁂 𑀢𑁂 𑀦𑀺𑀧𑀢𑀻 𑀪𑀼𑀲𑀁;

𑀓𑀘𑁆𑀘𑀺 𑀦𑀼 𑀢𑀁 𑀟𑀁𑀲𑀻 𑀢𑀸𑀢, 𑀫𑀸 𑀪𑀸𑀬𑀺 𑀲𑀼𑀔𑀺𑀢𑁄 𑀪𑀯𑀸’’𑀢𑀺.

𑀢𑀢𑁆𑀣 𑀫𑀸 𑀪𑀸𑀬𑀻𑀢𑀺 𑀢𑀸𑀢 𑀢𑀸𑀧𑀲, 𑀅𑀳𑀁 𑀅𑀮𑀫𑁆𑀧𑀸𑀬𑀦𑁄 𑀦𑀸𑀫, 𑀫𑀸 𑀪𑀸𑀬𑀺, 𑀢𑀯 𑀧𑀝𑀺𑀚𑀕𑁆𑀕𑀦𑀁 𑀦𑀸𑀫 𑀫𑀫 𑀪𑀸𑀭𑁄𑀢𑀺.

𑀲𑀼𑀤𑀲𑁆𑀲𑀦𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀕𑀸𑀣𑀫𑀸𑀳 𑁋

𑁮𑁭𑁦.

‘‘𑀦𑁂𑀯 𑀫𑀬𑁆𑀳𑀁 𑀅𑀬𑀁 𑀦𑀸𑀕𑁄, 𑀅𑀮𑀁 𑀤𑀼𑀓𑁆𑀔𑀸𑀬 𑀓𑀸𑀬𑀘𑀺;

𑀬𑀸𑀯𑀢𑀢𑁆𑀣𑀺 𑀅𑀳𑀺𑀕𑁆𑀕𑀸𑀳𑁄, 𑀫𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 ¶ 𑀓𑀸𑀬𑀘𑀻𑀢𑀺 𑀓𑀲𑁆𑀲𑀘𑀺 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀧𑀺 𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀸𑀤𑀦𑁂 𑀅𑀬𑀁 𑀫𑀫 𑀅𑀲𑀫𑀢𑁆𑀣𑁄. 𑀫𑀬𑀸 𑀳𑀺 𑀲𑀤𑀺𑀲𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀦𑀸𑀫 𑀦𑀢𑁆𑀣𑀻𑀢𑀺.

𑀅𑀮𑀫𑁆𑀧𑀸𑀬𑀦𑁄 ‘‘𑀅𑀲𑀼𑀓𑁄 𑀦𑀸𑀫𑁂𑀲𑁄’’𑀢𑀺 𑀅𑀚𑀸𑀦𑀦𑁆𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 𑀆𑀳 𑁋

𑁮𑁭𑁧.

‘‘𑀓𑁄 ¶ 𑀦𑀼 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦, 𑀤𑀺𑀢𑁆𑀢𑁄 𑀧𑀭𑀺𑀲𑀫𑀸𑀕𑀢𑁄;

𑀅𑀯𑁆𑀳𑀸𑀬𑀦𑁆𑀢𑀼 𑀲𑀼𑀬𑀼𑀤𑁆𑀥𑁂𑀦, 𑀲𑀼𑀡𑀦𑁆𑀢𑀼 𑀧𑀭𑀺𑀲𑀸 𑀫𑀫𑀸’’𑀢𑀺.

𑀢𑀢𑁆𑀣 𑀤𑀺𑀢𑁆𑀢𑁄𑀢𑀺 𑀕𑀩𑁆𑀩𑀺𑀢𑁄 𑀩𑀸𑀮𑁄 𑀅𑀦𑁆𑀥𑀜𑀸𑀡𑁄. 𑀅𑀯𑁆𑀳𑀸𑀬𑀦𑁆𑀢𑀽𑀢𑀺 𑀅𑀯𑁆𑀳𑀸𑀬𑀦𑁆𑀢𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀁 𑀓𑁄 𑀩𑀸𑀮𑁄 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀫𑀁 𑀲𑀼𑀬𑀼𑀤𑁆𑀥𑁂𑀦 𑀅𑀯𑁆𑀳𑀸𑀬𑀦𑁆𑀢𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀫𑀁 𑀓𑀭𑁄𑀦𑁆𑀢𑁄 𑀧𑀭𑀺𑀲𑀫𑀸𑀕𑀢𑁄, 𑀧𑀭𑀺𑀲𑀸 𑀫𑀫 𑀯𑀘𑀦𑀁 𑀲𑀼𑀡𑀦𑁆𑀢𑀼, 𑀫𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀫𑀸 𑀔𑁄 𑀫𑁂 𑀓𑀼𑀚𑁆𑀛𑀺𑀢𑁆𑀣𑀸𑀢𑀺.

𑀅𑀣 𑀦𑀁 𑀲𑀼𑀤𑀲𑁆𑀲𑀦𑁄 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁮𑁭𑁨.

‘‘𑀢𑁆𑀯𑀁 𑀫𑀁 𑀦𑀸𑀕𑁂𑀦 𑀆𑀮𑀫𑁆𑀧, 𑀅𑀳𑀁 𑀫𑀡𑁆𑀟𑀽𑀓𑀙𑀸𑀧𑀺𑀬𑀸;

𑀳𑁄𑀢𑀼 𑀦𑁄 𑀅𑀩𑁆𑀪𑀼𑀢𑀁 𑀢𑀢𑁆𑀣, 𑀆 𑀲𑀳𑀲𑁆𑀲𑁂𑀳𑀺 𑀧𑀜𑁆𑀘𑀳𑀻’’𑀢𑀺.

𑀢𑀢𑁆𑀣 𑀦𑀸𑀕𑁂𑀦𑀸𑀢𑀺 𑀢𑁆𑀯𑀁 𑀦𑀸𑀕𑁂𑀦 𑀫𑀬𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛, 𑀅𑀳𑀁 𑀫𑀡𑁆𑀟𑀽𑀓𑀙𑀸𑀧𑀺𑀬𑀸 𑀢𑀬𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀲𑁆𑀲𑀸𑀫𑀺. 𑀆 𑀲𑀳𑀲𑁆𑀲𑁂𑀳𑀺 𑀧𑀜𑁆𑀘𑀳𑀻𑀢𑀺 𑀢𑀲𑁆𑀫𑀺𑀁 𑀦𑁄 𑀬𑀼𑀤𑁆𑀥𑁂 𑀬𑀸𑀯 𑀧𑀜𑁆𑀘𑀳𑀺 𑀲𑀳𑀲𑁆𑀲𑁂𑀳𑀺 𑀅𑀩𑁆𑀪𑀼𑀢𑀁 𑀳𑁄𑀢𑀽𑀢𑀺.

𑀅𑀮𑀫𑁆𑀧𑀸𑀬𑀦𑁄 𑀆𑀳 𑁋

𑁮𑁭𑁩.

‘‘𑀅𑀳𑀜𑁆𑀳𑀺 𑀯𑀲𑀼𑀫𑀸 𑀅𑀟𑁆𑀠𑁄, 𑀢𑁆𑀯𑀁 𑀤𑀮𑀺𑀤𑁆𑀤𑁄𑀲𑀺 𑀫𑀸𑀡𑀯;

𑀓𑁄 𑀦𑀼 𑀢𑁂 𑀧𑀸𑀝𑀺𑀪𑁄𑀕𑀢𑁆𑀣𑀺, 𑀉𑀧𑀚𑀽𑀢𑀜𑁆𑀘 𑀓𑀺𑀁 𑀲𑀺𑀬𑀸.

𑁮𑁭𑁪.

‘‘𑀉𑀧𑀚𑀽𑀢𑀜𑁆𑀘 𑀫𑁂 𑀅𑀲𑁆𑀲, 𑀧𑀸𑀝𑀺𑀪𑁄𑀕𑁄 𑀘 𑀢𑀸𑀤𑀺𑀲𑁄;

𑀳𑁄𑀢𑀼 𑀦𑁄 𑀅𑀩𑁆𑀪𑀼𑀢𑀁 𑀢𑀢𑁆𑀣, 𑀆 𑀲𑀳𑀲𑁆𑀲𑁂𑀳𑀺 𑀧𑀜𑁆𑀘𑀳𑀻’’𑀢𑀺.

𑀢𑀢𑁆𑀣 ¶ 𑀓𑁄 𑀦𑀼 𑀢𑁂𑀢𑀺 𑀢𑀯 𑀧𑀩𑁆𑀩𑀚𑀺𑀢𑀲𑁆𑀲 𑀓𑁄 𑀦𑀼 𑀧𑀸𑀝𑀺𑀪𑁄𑀕𑁄 𑀅𑀢𑁆𑀣𑀺. 𑀉𑀧𑀚𑀽𑀢𑀜𑁆𑀘𑀸𑀢𑀺 𑀇𑀫𑀲𑁆𑀫𑀺𑀁 𑀯𑀸 𑀚𑀽𑀢𑁂 𑀉𑀧𑀦𑀺𑀓𑁆𑀔𑁂𑀧𑀪𑀽𑀢𑀁 𑀓𑀺𑀁 𑀦𑀸𑀫 𑀢𑀯 𑀥𑀦𑀁 𑀲𑀺𑀬𑀸, 𑀤𑀲𑁆𑀲𑁂𑀳𑀺 𑀫𑁂𑀢𑀺 ¶ 𑀯𑀤𑀢𑀺. 𑀉𑀧𑀚𑀽𑀢𑀜𑁆𑀘 𑀫𑁂𑀢𑀺 𑀫𑀬𑁆𑀳𑀁 𑀧𑀦 𑀤𑀸𑀢𑀩𑁆𑀩𑀁 𑀉𑀧𑀦𑀺𑀓𑁆𑀔𑁂𑀧𑀥𑀦𑀁 𑀯𑀸 𑀞𑀧𑁂𑀢𑀩𑁆𑀩𑀧𑀸𑀝𑀺𑀪𑁄𑀕𑁄 𑀯𑀸 𑀢𑀸𑀤𑀺𑀲𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀦𑁄 𑀢𑀢𑁆𑀣 𑀬𑀸𑀯 𑀧𑀜𑁆𑀘𑀳𑀺 𑀲𑀳𑀲𑁆𑀲𑁂𑀳𑀺 𑀅𑀩𑁆𑀪𑀼𑀢𑀁 𑀳𑁄𑀢𑀽𑀢𑀺.

𑀲𑀼𑀤𑀲𑁆𑀲𑀦𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀜𑁆𑀘𑀳𑀺 𑀦𑁄 𑀲𑀳𑀲𑁆𑀲𑁂𑀳𑀺 𑀅𑀩𑁆𑀪𑀼𑀢𑀁 𑀳𑁄𑀢𑀽’’𑀢𑀺 𑀅𑀪𑀻𑀢𑁄 𑀭𑀸𑀚𑀦𑀺𑀯𑁂𑀲𑀦𑀁 𑀆𑀭𑀼𑀬𑁆𑀳 𑀫𑀸𑀢𑀼𑀮𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀞𑀺𑀢𑁄 𑀕𑀸𑀣𑀫𑀸𑀳 𑁋

𑁮𑁭𑁫.

‘‘𑀲𑀼𑀡𑁄𑀳𑀺 ¶ 𑀫𑁂 𑀫𑀳𑀸𑀭𑀸𑀚, 𑀯𑀘𑀦𑀁 𑀪𑀤𑁆𑀤𑀫𑀢𑁆𑀣𑀼 𑀢𑁂;

𑀧𑀜𑁆𑀘𑀦𑁆𑀦𑀁 𑀫𑁂 𑀲𑀳𑀲𑁆𑀲𑀸𑀦𑀁, 𑀧𑀸𑀝𑀺𑀪𑁄𑀕𑁄 𑀳𑀺 𑀓𑀺𑀢𑁆𑀢𑀺𑀫𑀸’’𑀢𑀺.

𑀢𑀢𑁆𑀣 𑀓𑀺𑀢𑁆𑀢𑀺𑀫𑀸𑀢𑀺 𑀕𑀼𑀡𑀓𑀺𑀢𑁆𑀢𑀺𑀲𑀫𑁆𑀧𑀦𑁆𑀦 𑀯𑀺𑀯𑀺𑀥𑀕𑀼𑀡𑀸𑀘𑀸𑀭𑀓𑀺𑀢𑁆𑀢𑀺𑀲𑀫𑁆𑀧𑀦𑁆𑀦.

𑀭𑀸𑀚𑀸 ‘‘𑀅𑀬𑀁 𑀢𑀸𑀧𑀲𑁄 𑀫𑀁 𑀅𑀢𑀺𑀩𑀳𑀼𑀁 𑀥𑀦𑀁 𑀬𑀸𑀘𑀢𑀺, 𑀓𑀺𑀁 𑀦𑀼 𑀔𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁮𑁭𑁬.

‘‘𑀧𑁂𑀢𑁆𑀢𑀺𑀓𑀁 𑀯𑀸 𑀇𑀡𑀁 𑀳𑁄𑀢𑀺, 𑀬𑀁 𑀯𑀸 𑀳𑁄𑀢𑀺 𑀲𑀬𑀁𑀓𑀢𑀁;

𑀓𑀺𑀁 𑀢𑁆𑀯𑀁 𑀏𑀯𑀁 𑀩𑀳𑀼𑀁 𑀫𑀬𑁆𑀳𑀁, 𑀥𑀦𑀁 𑀬𑀸𑀘𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀧𑁂𑀢𑁆𑀢𑀺𑀓𑀁 𑀯𑀸𑀢𑀺 𑀧𑀺𑀢𑀭𑀸 𑀯𑀸 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑀁, 𑀅𑀢𑁆𑀢𑀦𑀸 𑀯𑀸 𑀓𑀢𑀁 𑀇𑀡𑀁 𑀦𑀸𑀫 𑀳𑁄𑀢𑀺, 𑀓𑀺𑀁 𑀫𑀫 𑀧𑀺𑀢𑀭𑀸 𑀢𑀯 𑀳𑀢𑁆𑀣𑀢𑁄 𑀕𑀳𑀺𑀢𑀁 𑀅𑀢𑁆𑀣𑀺, 𑀉𑀤𑀸𑀳𑀼 𑀫𑀬𑀸, 𑀓𑀺𑀁𑀓𑀸𑀭𑀡𑀸 𑀫𑀁 𑀏𑀯𑀁 𑀩𑀳𑀼𑀁 𑀥𑀦𑀁 𑀬𑀸𑀘𑀲𑀻𑀢𑀺?

𑀏𑀯𑀁 𑀯𑀼𑀢𑁆𑀢𑁂 𑀲𑀼𑀤𑀲𑁆𑀲𑀦𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁭𑁭.

‘‘𑀅𑀮𑀫𑁆𑀧𑀸𑀬𑀦𑁄 𑀳𑀺 𑀦𑀸𑀕𑁂𑀦, 𑀫𑀫𑀁 𑀅𑀪𑀺𑀚𑀺𑀕𑀻𑀲𑀢𑀺;

𑀅𑀳𑀁 𑀫𑀡𑁆𑀟𑀽𑀓𑀙𑀸𑀧𑀺𑀬𑀸, 𑀟𑀁𑀲𑀬𑀺𑀲𑁆𑀲𑀸𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁮𑁭𑁮.

‘‘𑀢𑀁 𑀢𑁆𑀯𑀁 𑀤𑀝𑁆𑀞𑀼𑀁 𑀫𑀳𑀸𑀭𑀸𑀚, 𑀅𑀚𑁆𑀚 𑀭𑀝𑁆𑀞𑀸𑀪𑀺𑀯𑀟𑁆𑀠𑀦;

𑀔𑀢𑁆𑀢𑀲𑀗𑁆𑀖𑀧𑀭𑀺𑀩𑁆𑀬𑀽𑀴𑁆𑀳𑁄, 𑀦𑀺𑀬𑁆𑀬𑀸𑀳𑀺 𑀅𑀳𑀺𑀤𑀲𑁆𑀲𑀦’’𑀦𑁆𑀢𑀺.

𑀢𑀢𑁆𑀣 ¶ 𑀅𑀪𑀺𑀚𑀺𑀕𑀻𑀲𑀢𑀻𑀢𑀺 𑀬𑀼𑀤𑁆𑀥𑁂 𑀚𑀺𑀦𑀺𑀢𑀼𑀁 𑀇𑀘𑁆𑀙𑀢𑀺. 𑀢𑀢𑁆𑀣 𑀲𑀘𑁂 𑀲𑁄 𑀚𑀻𑀬𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀜𑁆𑀘𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑀢𑀺. 𑀲𑀘𑀸𑀳𑀁 𑀚𑀻𑀬𑀺𑀲𑁆𑀲𑀸𑀫𑀺, 𑀅𑀳𑀫𑀲𑁆𑀲 𑀤𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀢𑀁 𑀩𑀳𑀼𑀁 𑀥𑀦𑀁 𑀬𑀸𑀘𑀸𑀫𑀺. 𑀢𑀦𑁆𑀢𑀺 𑀢𑀲𑁆𑀫𑀸 𑀢𑁆𑀯𑀁 𑀫𑀳𑀸𑀭𑀸𑀚, 𑀅𑀚𑁆𑀚 𑀅𑀳𑀺𑀤𑀲𑁆𑀲𑀦𑀁 𑀤𑀝𑁆𑀞𑀼𑀁 𑀦𑀺𑀬𑁆𑀬𑀸𑀳𑀻𑀢𑀺.

𑀭𑀸𑀚𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀢𑀸𑀧𑀲𑁂𑀦 𑀲𑀤𑁆𑀥𑀺𑀁𑀬𑁂𑀯 𑀦𑀺𑀓𑁆𑀔𑀫𑀺. 𑀢𑀁 𑀤𑀺𑀲𑁆𑀯𑀸 𑀅𑀮𑀫𑁆𑀧𑀸𑀬𑀦𑁄 ‘‘𑀅𑀬𑀁 𑀢𑀸𑀧𑀲𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀭𑀸𑀚𑀓𑀼𑀮𑀽𑀧𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀻𑀢𑁄 𑀢𑀁 𑀅𑀦𑀼𑀯𑀢𑁆𑀢𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁮𑁭𑁯.

‘‘𑀦𑁂𑀯 𑀢𑀁 𑀅𑀢𑀺𑀫𑀜𑁆𑀜𑀸𑀫𑀺, 𑀲𑀺𑀧𑁆𑀧𑀯𑀸𑀤𑁂𑀦 𑀫𑀸𑀡𑀯;

𑀅𑀢𑀺𑀫𑀢𑁆𑀢𑁄𑀲𑀺 𑀲𑀺𑀧𑁆𑀧𑁂𑀦, 𑀉𑀭𑀕𑀁 𑀦𑀸𑀧𑀘𑀸𑀬𑀲𑀻’’𑀢𑀺.

𑀢𑀢𑁆𑀣 ¶ ¶ 𑀲𑀺𑀧𑁆𑀧𑀯𑀸𑀤𑁂𑀦𑀸𑀢𑀺 𑀫𑀸𑀡𑀯, 𑀅𑀳𑀁 𑀅𑀢𑁆𑀢𑀦𑁄 𑀲𑀺𑀧𑁆𑀧𑁂𑀦 𑀢𑀁 𑀦𑀸𑀢𑀺𑀫𑀜𑁆𑀜𑀸𑀫𑀺, 𑀢𑁆𑀯𑀁 𑀧𑀦 𑀲𑀺𑀧𑁆𑀧𑁂𑀦 𑀅𑀢𑀺𑀫𑀢𑁆𑀢𑁄 𑀇𑀫𑀁 𑀉𑀭𑀕𑀁 𑀦 𑀧𑀽𑀚𑁂𑀲𑀺, 𑀦𑀸𑀕𑀲𑁆𑀲 𑀅𑀧𑀘𑀺𑀢𑀺𑀁 𑀦 𑀓𑀭𑁄𑀲𑀻𑀢𑀺.

𑀢𑀢𑁄 𑀲𑀼𑀤𑀲𑁆𑀲𑀦𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁮𑁦.

‘‘𑀅𑀳𑀫𑁆𑀧𑀺 𑀦𑀸𑀢𑀺𑀫𑀜𑁆𑀜𑀸𑀫𑀺, 𑀲𑀺𑀧𑁆𑀧𑀯𑀸𑀤𑁂𑀦 𑀩𑁆𑀭𑀸𑀳𑁆𑀫𑀡;

𑀅𑀯𑀺𑀲𑁂𑀦 𑀘 𑀦𑀸𑀕𑁂𑀦, 𑀪𑀼𑀲𑀁 𑀯𑀜𑁆𑀘𑀬𑀲𑁂 𑀚𑀦𑀁.

𑁮𑁮𑁧.

‘‘𑀏𑀯𑀜𑁆𑀘𑁂𑀢𑀁 𑀚𑀦𑁄 𑀚𑀜𑁆𑀜𑀸, 𑀬𑀣𑀸 𑀚𑀸𑀦𑀸𑀫𑀺 𑀢𑀁 𑀅𑀳𑀁;

𑀦 𑀢𑁆𑀯𑀁 𑀮𑀪𑀲𑀺 𑀆𑀮𑀫𑁆𑀧, 𑀪𑀼𑀲𑀫𑀼𑀝𑁆𑀞𑀺𑀁 𑀓𑀼𑀢𑁄 𑀥𑀦’’𑀦𑁆𑀢𑀺.

𑀅𑀣𑀲𑁆𑀲 𑀅𑀮𑀫𑁆𑀧𑀸𑀬𑀦𑁄 𑀓𑀼𑀚𑁆𑀛𑀺𑀢𑁆𑀯𑀸 𑀆𑀳 𑁋

𑁮𑁮𑁨.

‘‘𑀔𑀭𑀸𑀚𑀺𑀦𑁄 𑀚𑀝𑀻 𑀤𑀼𑀫𑁆𑀫𑀻, 𑀤𑀺𑀢𑁆𑀢𑁄 𑀧𑀭𑀺𑀲𑀫𑀸𑀕𑀢𑁄;

𑀬𑁄 𑀢𑁆𑀯𑀁 𑀏𑀯𑀁 𑀕𑀢𑀁 𑀦𑀸𑀕𑀁, ‘𑀅𑀯𑀺𑀲𑁄’ 𑀅𑀢𑀺𑀫𑀜𑁆𑀜𑀢𑀺.

𑁮𑁮𑁩.

‘‘𑀆𑀲𑀚𑁆𑀚 𑀔𑁄 𑀦𑀁 𑀚𑀜𑁆𑀜𑀸𑀲𑀺, 𑀧𑀼𑀡𑁆𑀡𑀁 𑀉𑀕𑁆𑀕𑀲𑁆𑀲 𑀢𑁂𑀚𑀲𑁄;

𑀫𑀜𑁆𑀜𑁂 𑀢𑀁 𑀪𑀲𑁆𑀫𑀭𑀸𑀲𑀺𑀁𑀯, 𑀔𑀺𑀧𑁆𑀧𑀫𑁂𑀲 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀤𑀼𑀫𑁆𑀫𑀻𑀢𑀺 𑀅𑀦𑀜𑁆𑀚𑀺𑀢𑀦𑀬𑀦𑁄 [𑀭𑀼𑀫𑁆𑀫𑀻𑀢𑀺 𑀅𑀦𑀜𑁆𑀚𑀺𑀢𑀸 𑀫𑀡𑁆𑀟𑀺𑀢𑁄 (𑀲𑀻. 𑀧𑀻.)]. 𑀅𑀯𑀺𑀲𑁄 𑀅𑀢𑀺𑀫𑀜𑁆𑀜𑀲𑀻𑀢𑀺 𑀦𑀺𑀩𑁆𑀩𑀺𑀲𑁄𑀢𑀺 𑀅𑀯𑀚𑀸𑀦𑀸𑀲𑀺. 𑀆𑀲𑀚𑁆𑀚𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀚𑀜𑁆𑀜𑀸𑀲𑀻𑀢𑀺 𑀚𑀸𑀦𑁂𑀬𑁆𑀬𑀸𑀲𑀺.

𑀅𑀣 𑀢𑁂𑀦 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑁄 𑀲𑀼𑀤𑀲𑁆𑀲𑀦𑁄 𑀕𑀸𑀣𑀫𑀸𑀳 𑁋

𑁮𑁮𑁪.

‘‘𑀲𑀺𑀬𑀸 𑀯𑀺𑀲𑀁 𑀲𑀺𑀮𑀼𑀢𑁆𑀢𑀲𑁆𑀲, 𑀤𑁂𑀟𑁆𑀟𑀼𑀪𑀲𑁆𑀲 𑀲𑀺𑀮𑀸𑀪𑀼𑀦𑁄;

𑀦𑁂𑀯 𑀮𑁄𑀳𑀺𑀢𑀲𑀻𑀲𑀲𑁆𑀲, 𑀯𑀺𑀲𑀁 𑀦𑀸𑀕𑀲𑁆𑀲 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀲𑀺𑀮𑀼𑀢𑁆𑀢𑀲𑁆𑀲𑀸𑀢𑀺 𑀖𑀭𑀲𑀧𑁆𑀧𑀲𑁆𑀲. 𑀤𑁂𑀟𑁆𑀟𑀼𑀪𑀲𑁆𑀲𑀸𑀢𑀺 𑀉𑀤𑀓𑀲𑀧𑁆𑀧𑀲𑁆𑀲. 𑀲𑀺𑀮𑀸𑀪𑀼𑀦𑁄𑀢𑀺 𑀦𑀻𑀮𑀯𑀡𑁆𑀡𑀲𑀧𑁆𑀧𑀲𑁆𑀲. 𑀇𑀢𑀺 𑀦𑀺𑀩𑁆𑀩𑀺𑀲𑁂 𑀲𑀧𑁆𑀧𑁂 𑀤𑀲𑁆𑀲𑁂𑀢𑁆𑀯𑀸 𑀏𑀢𑁂𑀲𑀁 𑀯𑀺𑀲𑀁 𑀲𑀺𑀬𑀸, 𑀦𑁂𑀯 𑀮𑁄𑀳𑀺𑀢𑀲𑀻𑀲𑀲𑁆𑀲 𑀲𑀧𑁆𑀧𑀲𑁆𑀲𑀸𑀢𑀺 𑀆𑀳.

𑀅𑀣 𑀦𑀁 𑀅𑀮𑀫𑁆𑀧𑀸𑀬𑀦𑁄 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

𑁮𑁮𑁫.

‘‘𑀲𑀼𑀢𑀫𑁂𑀢𑀁 𑀅𑀭𑀳𑀢𑀁, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁;

𑀇𑀥 𑀤𑀸𑀦𑀸𑀦𑀺 𑀤𑀢𑁆𑀯𑀸𑀦, 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺 𑀤𑀸𑀬𑀓𑀸;

𑀚𑀻𑀯𑀦𑁆𑀢𑁄 𑀤𑁂𑀳𑀺 𑀤𑀸𑀦𑀸𑀦𑀺, 𑀬𑀤𑀺 𑀢𑁂 𑀅𑀢𑁆𑀣𑀺 𑀤𑀸𑀢𑀯𑁂.

𑁮𑁮𑁬.

‘‘𑀅𑀬𑀁 ¶ 𑀦𑀸𑀕𑁄 𑀫𑀳𑀺𑀤𑁆𑀥𑀺𑀓𑁄, 𑀢𑁂𑀚𑀲𑁆𑀲𑀻 𑀤𑀼𑀭𑀢𑀺𑀓𑁆𑀓𑀫𑁄;

𑀢𑁂𑀦 𑀢𑀁 𑀟𑀁𑀲𑀬𑀺𑀲𑁆𑀲𑀸𑀫𑀺, 𑀲𑁄 𑀢𑀁 𑀪𑀲𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀤𑀸𑀢𑀯𑁂𑀢𑀺 𑀬𑀤𑀺 𑀢𑁂 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀤𑁂𑀳𑀻𑀢𑀺.

𑁮𑁮𑁭.

‘‘𑀫𑀬𑀸𑀧𑁂𑀢𑀁 𑀲𑀼𑀢𑀁 𑀲𑀫𑁆𑀫, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁;

𑀇𑀥 𑀤𑀸𑀦𑀸𑀦𑀺 𑀤𑀢𑁆𑀯𑀸𑀦, 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺 𑀤𑀸𑀬𑀓𑀸;

𑀢𑁆𑀯𑀫𑁂𑀯 𑀤𑁂𑀳𑀺 𑀚𑀻𑀯𑀦𑁆𑀢𑁄, 𑀬𑀤𑀺 𑀢𑁂 𑀅𑀢𑁆𑀣𑀺 𑀤𑀸𑀢𑀯𑁂.

𑁮𑁮𑁮.

‘‘𑀅𑀬𑀁 ¶ 𑀅𑀚𑀫𑀼𑀔𑀻 𑀦𑀸𑀫, 𑀧𑀼𑀡𑁆𑀡𑀸 𑀉𑀕𑁆𑀕𑀲𑁆𑀲 𑀢𑁂𑀚𑀲𑁄;

𑀢𑀸𑀬 𑀢𑀁 𑀟𑀁𑀲𑀬𑀺𑀲𑁆𑀲𑀸𑀫𑀺, 𑀲𑀸 𑀢𑀁 𑀪𑀲𑁆𑀫𑀁 𑀓𑀭𑀺𑀲𑁆𑀲𑀢𑀺.

𑁮𑁮𑁯.

‘‘𑀬𑀸 ¶ 𑀥𑀻𑀢𑀸 𑀥𑀢𑀭𑀝𑁆𑀞𑀲𑁆𑀲, 𑀯𑁂𑀫𑀸𑀢𑀸 𑀪𑀕𑀺𑀦𑀻 𑀫𑀫;

𑀲𑀸 𑀢𑀁 𑀟𑀁𑀲𑀢𑁆𑀯𑀚𑀫𑀼𑀔𑀻, 𑀧𑀼𑀡𑁆𑀡𑀸 𑀉𑀕𑁆𑀕𑀲𑁆𑀲 𑀢𑁂𑀚𑀲𑁄’’𑀢𑀺. 𑁋

𑀇𑀫𑀸 𑀕𑀸𑀣𑀸 𑀲𑀼𑀤𑀲𑁆𑀲𑀦𑀲𑁆𑀲 𑀯𑀘𑀦𑀁. 𑀢𑀢𑁆𑀣 𑀧𑀼𑀡𑁆𑀡𑀸 𑀉𑀕𑁆𑀕𑀲𑁆𑀲 𑀢𑁂𑀚𑀲𑁄𑀢𑀺 𑀉𑀕𑁆𑀕𑁂𑀦 𑀯𑀺𑀲𑁂𑀦 𑀧𑀼𑀡𑁆𑀡𑀸.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀅𑀫𑁆𑀫 𑀅𑀚𑀫𑀼𑀔𑀺, 𑀚𑀝𑀦𑁆𑀢𑀭𑀢𑁄 𑀫𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀸𑀡𑀺𑀫𑁆𑀳𑀺 𑀧𑀢𑀺𑀝𑁆𑀞𑀳𑀸’’𑀢𑀺 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂𑀬𑁂𑀯 𑀪𑀕𑀺𑀦𑀺𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀸 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀚𑀝𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀸𑀯 𑀢𑀺𑀓𑁆𑀔𑀢𑁆𑀢𑀼𑀁 𑀫𑀡𑁆𑀟𑀽𑀓𑀯𑀲𑁆𑀲𑀺𑀢𑀁 𑀯𑀲𑁆𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀁𑀲𑀓𑀽𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑀮𑁂 𑀢𑀻𑀡𑀺 𑀯𑀺𑀲𑀩𑀺𑀦𑁆𑀤𑀽𑀦𑀺 𑀧𑀸𑀢𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀚𑀝𑀦𑁆𑀢𑀭𑀫𑁂𑀯 𑀧𑀸𑀯𑀺𑀲𑀺. 𑀲𑀼𑀤𑀲𑁆𑀲𑀦𑁄 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄𑀯 ‘‘𑀦𑀲𑁆𑀲𑀺𑀲𑁆𑀲𑀢𑀸𑀬𑀁 𑀚𑀦𑀧𑀤𑁄, 𑀦𑀲𑁆𑀲𑀺𑀲𑁆𑀲𑀢𑀸𑀬𑀁 𑀚𑀦𑀧𑀤𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑀁 𑀅𑀪𑀸𑀲𑀺. 𑀢𑀲𑁆𑀲 𑀲𑁄 𑀲𑀤𑁆𑀤𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑀸𑀭𑀸𑀡𑀲𑀺𑀁 𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀚𑀦𑀧𑀤𑁄 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀫𑀳𑀸𑀭𑀸𑀚, 𑀇𑀫𑀲𑁆𑀲 𑀯𑀺𑀲𑀲𑁆𑀲 𑀦𑀺𑀲𑀺𑀜𑁆𑀘𑀦𑀝𑁆𑀞𑀸𑀦𑀁 𑀦 𑀧𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢, 𑀫𑀳𑀦𑁆𑀢𑀸 𑀅𑀬𑀁 𑀧𑀣𑀯𑀻, 𑀧𑀣𑀯𑀺𑀬𑀁 𑀦𑀺𑀲𑀺𑀜𑁆𑀘𑀸’’𑀢𑀺. 𑀅𑀣 𑀦𑀁 ‘‘𑀦 𑀲𑀓𑁆𑀓𑀸 𑀧𑀣𑀯𑀺𑀬𑀁 𑀲𑀺𑀜𑁆𑀘𑀺𑀢𑀼𑀁, 𑀫𑀳𑀸𑀭𑀸𑀚𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁮𑁯𑁦.

‘‘𑀙𑀫𑀸𑀬𑀁 𑀘𑁂 𑀦𑀺𑀲𑀺𑀜𑁆𑀘𑀺𑀲𑁆𑀲𑀁, 𑀩𑁆𑀭𑀳𑁆𑀫𑀤𑀢𑁆𑀢 𑀯𑀺𑀚𑀸𑀦𑀳𑀺;

𑀢𑀺𑀡𑀮𑀢𑀸𑀦𑀺 𑀑𑀲𑀥𑁆𑀬𑁄, 𑀉𑀲𑁆𑀲𑀼𑀲𑁆𑀲𑁂𑀬𑁆𑀬𑀼𑀁 𑀅𑀲𑀁𑀲𑀬’’𑀦𑁆𑀢𑀺.

𑀢𑀢𑁆𑀣 ¶ 𑀢𑀺𑀡𑀮𑀢𑀸𑀦𑀻𑀢𑀺 𑀧𑀣𑀯𑀺𑀦𑀺𑀲𑁆𑀲𑀺𑀢𑀸𑀦𑀺 𑀢𑀺𑀡𑀸𑀦𑀺 𑀘 𑀮𑀢𑀸 𑀘 𑀲𑀩𑁆𑀩𑁄𑀲𑀥𑀺𑀬𑁄 𑀘 𑀉𑀲𑁆𑀲𑀼𑀲𑁆𑀲𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀧𑀣𑀯𑀺𑀬𑀁 𑀦𑀺𑀲𑀺𑀜𑁆𑀘𑀺𑀢𑀼𑀦𑁆𑀢𑀺.

𑀢𑁂𑀦 𑀳𑀺 𑀦𑀁, 𑀢𑀸𑀢, 𑀉𑀤𑁆𑀥𑀁 𑀆𑀓𑀸𑀲𑀁 𑀔𑀺𑀧𑀸𑀢𑀺. 𑀢𑀢𑁆𑀭𑀸𑀧𑀺 𑀦 𑀲𑀓𑁆𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁮𑁯𑁧.

‘‘𑀉𑀤𑁆𑀥𑀁 𑀘𑁂 𑀧𑀸𑀢𑀬𑀺𑀲𑁆𑀲𑀸𑀫𑀺, 𑀩𑁆𑀭𑀳𑁆𑀫𑀤𑀢𑁆𑀢 𑀯𑀺𑀚𑀸𑀦𑀳𑀺;

𑀲𑀢𑁆𑀢𑀯𑀲𑁆𑀲𑀸𑀦𑀺𑀬𑀁 𑀤𑁂𑀯𑁄, 𑀦 𑀯𑀲𑁆𑀲𑁂 𑀦 𑀳𑀺𑀫𑀁 𑀧𑀢𑁂’’𑀢𑀺.

𑀢𑀢𑁆𑀣 𑀦 𑀳𑀺𑀫𑀁 𑀧𑀢𑁂𑀢𑀺 𑀲𑀢𑁆𑀢𑀯𑀲𑁆𑀲𑀸𑀦𑀺 𑀳𑀺𑀫𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀦 𑀧𑀢𑀺𑀲𑁆𑀲𑀢𑀺.

𑀢𑁂𑀦 ¶ 𑀳𑀺 𑀦𑀁 𑀢𑀸𑀢 𑀉𑀤𑀓𑁂 𑀲𑀺𑀜𑁆𑀘𑀸𑀢𑀺. 𑀢𑀢𑁆𑀭𑀸𑀧𑀺 𑀦 𑀲𑀓𑁆𑀓𑀸𑀢𑀺 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳 𑁋

𑁮𑁯𑁨.

‘‘𑀉𑀤𑀓𑁂 ¶ 𑀘𑁂 𑀦𑀺𑀲𑀺𑀜𑁆𑀘𑀺𑀲𑁆𑀲𑀁, 𑀩𑁆𑀭𑀳𑁆𑀫𑀤𑀢𑁆𑀢 𑀯𑀺𑀚𑀸𑀦𑀳𑀺;

𑀬𑀸𑀯𑀦𑁆𑀢𑁄𑀤𑀓𑀚𑀸 𑀧𑀸𑀡𑀸, 𑀫𑀭𑁂𑀬𑁆𑀬𑀼𑀁 𑀫𑀘𑁆𑀙𑀓𑀘𑁆𑀙𑀧𑀸’’𑀢𑀺.

𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀢𑀸𑀢, 𑀫𑀬𑀁 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀫, 𑀬𑀣𑀸 𑀅𑀫𑁆𑀳𑀸𑀓𑀁 𑀭𑀝𑁆𑀞𑀁 𑀦 𑀦𑀲𑁆𑀲𑀢𑀺, 𑀢𑀁 𑀉𑀧𑀸𑀬𑀁 𑀢𑁆𑀯𑀫𑁂𑀯 𑀚𑀸𑀦𑀸𑀳𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀆𑀯𑀸𑀝𑁂 𑀔𑀡𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀔𑀡𑀸𑀧𑁂𑀲𑀺. 𑀲𑀼𑀤𑀲𑁆𑀲𑀦𑁄 𑀧𑀞𑀫𑀁 𑀆𑀯𑀸𑀝𑀁 𑀦𑀸𑀦𑀸𑀪𑁂𑀲𑀚𑁆𑀚𑀸𑀦𑀁 𑀧𑀽𑀭𑀸𑀧𑁂𑀲𑀺, 𑀤𑀼𑀢𑀺𑀬𑀁 𑀕𑁄𑀫𑀬𑀲𑁆𑀲, 𑀢𑀢𑀺𑀬𑀁 𑀤𑀺𑀩𑁆𑀩𑁄𑀲𑀥𑀸𑀦𑀜𑁆𑀜𑁂𑀯. 𑀢𑀢𑁄 𑀧𑀞𑀫𑁂 𑀆𑀯𑀸𑀝𑁂 𑀯𑀺𑀲𑀩𑀺𑀦𑁆𑀤𑀽𑀦𑀺 𑀧𑀸𑀢𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀥𑀽𑀫𑀸𑀬𑀺𑀢𑁆𑀯𑀸 𑀚𑀸𑀮𑀸 𑀉𑀝𑁆𑀞𑀳𑀺. 𑀲𑀸 𑀕𑀦𑁆𑀢𑁆𑀯𑀸 𑀕𑁄𑀫𑀬𑁂 𑀆𑀯𑀸𑀝𑀁 𑀕𑀡𑁆𑀳𑀺. 𑀢𑀢𑁄𑀧𑀺 𑀚𑀸𑀮𑀸 𑀉𑀝𑁆𑀞𑀸𑀬 𑀇𑀢𑀭𑀁 𑀤𑀺𑀩𑁆𑀩𑁄𑀲𑀥𑀲𑁆𑀲 𑀧𑀼𑀡𑁆𑀡𑀁 𑀕𑀳𑁂𑀢𑁆𑀯𑀸 𑀑𑀲𑀥𑀸𑀦𑀺 𑀛𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀺. 𑀅𑀮𑀫𑁆𑀧𑀸𑀬𑀦𑁄 𑀢𑀲𑁆𑀲 𑀆𑀯𑀸𑀝𑀲𑁆𑀲 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀯𑀺𑀲𑀉𑀲𑀼𑀫𑀸 𑀧𑀳𑀭𑀺, 𑀲𑀭𑀻𑀭𑀘𑁆𑀙𑀯𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀢𑀸, 𑀲𑁂𑀢𑀓𑀼𑀝𑁆𑀞𑀺 𑀅𑀳𑁄𑀲𑀺. 𑀲𑁄 𑀪𑀬𑀢𑀚𑁆𑀚𑀺𑀢𑁄 ‘‘𑀦𑀸𑀕𑀭𑀸𑀚𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀭𑀢𑀦𑀧𑁂𑀴𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀤𑁂𑀯𑀭𑀸𑀚𑀮𑀻𑀮𑀸𑀬 𑀞𑀺𑀢𑁄. 𑀲𑀼𑀤𑀲𑁆𑀲𑀦𑁄𑀧𑀺 𑀅𑀚𑀫𑀼𑀔𑀻𑀧𑀺 𑀢𑀣𑁂𑀯 𑀅𑀝𑁆𑀞𑀁𑀲𑀼. 𑀢𑀢𑁄 𑀲𑀼𑀤𑀲𑁆𑀲𑀦𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀚𑀸𑀦𑀸𑀲𑀺 𑀦𑁄, 𑀫𑀳𑀸𑀭𑀸𑀚, 𑀓𑀲𑁆𑀲𑁂𑀢𑁂 𑀧𑀼𑀢𑁆𑀢𑀸’’𑀢𑀺? ‘‘𑀦 𑀚𑀸𑀦𑀸𑀫𑀻’’𑀢𑀺. ‘‘𑀢𑀼𑀫𑁆𑀳𑁂 𑀢𑀸𑀯 𑀦 𑀚𑀸𑀦𑀸𑀲𑀺, 𑀓𑀸𑀲𑀺𑀭𑀜𑁆𑀜𑁄 𑀧𑀦 𑀥𑀻𑀢𑀸𑀬 𑀲𑀫𑀼𑀤𑁆𑀤𑀚𑀸𑀬 𑀥𑀢𑀭𑀝𑁆𑀞𑀲𑁆𑀲 𑀤𑀺𑀦𑁆𑀦𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀚𑀸𑀦𑀸𑀫𑀺, 𑀫𑀬𑁆𑀳𑀁 𑀲𑀸 𑀓𑀦𑀺𑀝𑁆𑀞𑀪𑀕𑀺𑀦𑀻’’𑀢𑀺. ‘‘𑀫𑀬𑀁 𑀢𑀲𑁆𑀲𑀸 𑀧𑀼𑀢𑁆𑀢𑀸, 𑀢𑁆𑀯𑀁 𑀦𑁄 𑀫𑀸𑀢𑀼𑀮𑁄’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀓𑀫𑁆𑀧𑀫𑀸𑀦𑁄 𑀢𑁂 𑀆𑀮𑀺𑀗𑁆𑀕𑀺𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀪𑀽𑀭𑀺𑀤𑀢𑁆𑀢𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀧𑀼𑀘𑁆𑀙𑀺 ‘‘𑀢𑀸𑀢, 𑀢𑀁 𑀏𑀯𑀭𑀽𑀧𑀁 𑀉𑀕𑁆𑀕𑀢𑁂𑀚𑀁 𑀓𑀣𑀁 𑀅𑀮𑀫𑁆𑀧𑀸𑀬𑀦𑁄 𑀕𑀡𑁆𑀳𑀻’’𑀢𑀺? 𑀲𑁄 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 𑀑𑀯𑀤𑀦𑁆𑀢𑁄 ‘‘𑀫𑀳𑀸𑀭𑀸𑀚, 𑀭𑀜𑁆𑀜𑀸 𑀦𑀸𑀫 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀸𑀢𑀼𑀮𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀣 𑀦𑀁 𑀲𑀼𑀤𑀲𑁆𑀲𑀦𑁄 𑀆𑀳 𑁋 ‘‘𑀫𑀸𑀢𑀼𑀮, 𑀫𑀫 𑀫𑀸𑀢𑀸 𑀪𑀽𑀭𑀺𑀤𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀓𑀺𑀮𑀫𑀢𑀺, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀧𑀧𑀜𑁆𑀘𑀁 𑀓𑀸𑀢𑀼’’𑀦𑁆𑀢𑀺. ‘‘𑀲𑀸𑀥𑀼, 𑀢𑀸𑀢𑀸, 𑀢𑀼𑀫𑁆𑀳𑁂 𑀢𑀸𑀯 𑀕𑀘𑁆𑀙𑀣. 𑀅𑀳𑀁 𑀧𑀦 𑀫𑀫 𑀪𑀕𑀺𑀦𑀺𑀁 𑀤𑀝𑁆𑀞𑀼𑀓𑀸𑀫𑁄𑀫𑁆𑀳𑀺, 𑀓𑀣𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀸𑀢𑀼𑀮, 𑀓𑀳𑀁 𑀧𑀦 𑀦𑁄 𑀅𑀬𑁆𑀬𑀓𑁄 𑀓𑀸𑀲𑀺𑀭𑀸𑀚𑀸’’𑀢𑀺? ‘‘𑀢𑀸𑀢, 𑀫𑀫 𑀪𑀕𑀺𑀦𑀺𑀬𑀸 𑀯𑀺𑀦𑀸 ¶ 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀲𑀼𑀓𑁂 𑀯𑀦𑀲𑀡𑁆𑀟𑁂 𑀦𑀸𑀫 𑀯𑀲𑀢𑀻’’𑀢𑀺. ‘‘𑀫𑀸𑀢𑀼𑀮, 𑀫𑀫 𑀫𑀸𑀢𑀸 𑀢𑀼𑀫𑁆𑀳𑁂 𑀘𑁂𑀯 𑀅𑀬𑁆𑀬𑀓𑀜𑁆𑀘 𑀤𑀝𑁆𑀞𑀼𑀓𑀸𑀫𑀸, 𑀢𑀼𑀫𑁆𑀳𑁂 𑀅𑀲𑀼𑀓𑀤𑀺𑀯𑀲𑁂 𑀫𑀫 𑀅𑀬𑁆𑀬𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣, 𑀫𑀬𑀁 𑀫𑀸𑀢𑀭𑀁 𑀆𑀤𑀸𑀬 𑀅𑀬𑁆𑀬𑀓𑀲𑁆𑀲 𑀅𑀲𑁆𑀲𑀫𑀧𑀤𑀁 𑀆𑀕𑀘𑁆𑀙𑀺𑀲𑁆𑀲𑀸𑀫. 𑀢𑀢𑁆𑀣 𑀦𑀁 𑀢𑀼𑀫𑁆𑀳𑁂𑀧𑀺 𑀧𑀲𑁆𑀲𑀺𑀲𑁆𑀲𑀣𑀸’’𑀢𑀺. 𑀇𑀢𑀺 𑀢𑁂 𑀫𑀸𑀢𑀼𑀮𑀲𑁆𑀲 𑀤𑀺𑀯𑀲𑀁 ¶ 𑀯𑀯𑀢𑁆𑀣𑀧𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀸 𑀑𑀢𑀭𑀺𑀁𑀲𑀼. 𑀭𑀸𑀚𑀸 𑀪𑀸𑀕𑀺𑀦𑁂𑀬𑁆𑀬𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀢𑁂𑀧𑀺 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀦𑀸𑀕𑀪𑀯𑀦𑀁 𑀕𑀢𑀸.

𑀦𑀕𑀭𑀧𑀯𑁂𑀲𑀦𑀔𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑀔𑀡𑁆𑀟𑀁

𑀫𑀳𑀸𑀲𑀢𑁆𑀢𑁂 𑀲𑀫𑁆𑀧𑀢𑁆𑀢𑁂 𑀲𑀓𑀮𑀦𑀸𑀕𑀪𑀯𑀦𑀁 𑀏𑀓𑀧𑀭𑀺𑀤𑁂𑀯𑀲𑀤𑁆𑀤𑀁 𑀅𑀳𑁄𑀲𑀺. 𑀲𑁄𑀧𑀺 𑀫𑀸𑀲𑀁 𑀧𑁂𑀴𑀸𑀬 𑀯𑀲𑀺𑀢𑀢𑁆𑀢𑀸 𑀓𑀺𑀮𑀦𑁆𑀢𑁄 𑀕𑀺𑀮𑀸𑀦𑀲𑁂𑀬𑁆𑀬𑀁 𑀲𑀬𑀺. 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀸𑀦𑀁 𑀦𑀸𑀕𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀓𑀺𑀮𑀫𑀢𑀺. 𑀓𑀸𑀡𑀸𑀭𑀺𑀝𑁆𑀞𑁄 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀤𑀺𑀲𑁆𑀯𑀸 𑀧𑀞𑀫𑀫𑁂𑀯𑀸𑀕𑀢𑁄. 𑀅𑀣 𑀦𑀁 ‘‘𑀏𑀲 𑀘𑀡𑁆𑀟𑁄 𑀨𑀭𑀼𑀲𑁄, 𑀲𑀓𑁆𑀔𑀺𑀲𑁆𑀲𑀢𑀺 𑀦𑀸𑀕𑀧𑀭𑀺𑀲𑀁 𑀯𑀸𑀭𑁂𑀢𑀼’’𑀦𑁆𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀤𑁄𑀯𑀸𑀭𑀺𑀓𑀁 𑀓𑀭𑀺𑀁𑀲𑀼. 𑀲𑀼𑀪𑁄𑀕𑁄𑀧𑀺 𑀲𑀓𑀮𑀳𑀺𑀫𑀯𑀦𑁆𑀢𑀁 𑀯𑀺𑀘𑀭𑀺𑀢𑁆𑀯𑀸 𑀢𑀢𑁄 𑀫𑀳𑀸𑀲𑀫𑀼𑀤𑁆𑀤𑀜𑁆𑀘 𑀲𑁂𑀲𑀦𑀤𑀺𑀬𑁄 𑀘 𑀉𑀧𑀥𑀸𑀭𑁂𑀢𑁆𑀯𑀸 𑀬𑀫𑀼𑀦𑀁 𑀉𑀧𑀥𑀸𑀭𑁂𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄𑀧𑀺 𑀅𑀮𑀫𑁆𑀧𑀸𑀬𑀦𑀁 𑀓𑀼𑀝𑁆𑀞𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀪𑀽𑀭𑀺𑀤𑀢𑁆𑀢𑀁 𑀓𑀺𑀮𑀫𑁂𑀢𑁆𑀯𑀸 𑀓𑀼𑀝𑁆𑀞𑀺 𑀚𑀸𑀢𑁄, 𑀅𑀳𑀁 𑀧𑀦 𑀢𑀁 𑀫𑀬𑁆𑀳𑀁 𑀢𑀸𑀯 𑀩𑀳𑀽𑀧𑀓𑀸𑀭𑀁 𑀫𑀡𑀺𑀮𑁄𑀪𑁂𑀦 𑀅𑀮𑀫𑁆𑀧𑀸𑀬𑀦𑀲𑁆𑀲 𑀤𑀲𑁆𑀲𑁂𑀲𑀺𑀁, 𑀢𑀁 𑀧𑀸𑀧𑀁 𑀫𑀫 𑀆𑀕𑀫𑀺𑀲𑁆𑀲𑀢𑀺. 𑀬𑀸𑀯 𑀢𑀁 𑀦 𑀆𑀕𑀘𑁆𑀙𑀢𑀺, 𑀢𑀸𑀯𑀤𑁂𑀯 𑀬𑀫𑀼𑀦𑀁 𑀕𑀦𑁆𑀢𑁆𑀯𑀸 𑀧𑀬𑀸𑀕𑀢𑀺𑀢𑁆𑀣𑁂 𑀧𑀸𑀧𑀧𑀯𑀸𑀳𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀫𑀬𑀸 𑀪𑀽𑀭𑀺𑀤𑀢𑁆𑀢𑁂 𑀫𑀺𑀢𑁆𑀢𑀤𑀼𑀩𑁆𑀪𑀺𑀓𑀫𑁆𑀫𑀁 𑀓𑀢𑀁, 𑀢𑀁 𑀧𑀸𑀧𑀁 𑀧𑀯𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀤𑀓𑁄𑀭𑁄𑀳𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀼𑀪𑁄𑀕𑁄 ¶ 𑀢𑀁 𑀞𑀸𑀦𑀁 𑀧𑀢𑁆𑀢𑁄. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀺𑀦𑀸 𑀓𑀺𑀭 𑀧𑀸𑀧𑀓𑁂𑀦 𑀢𑀸𑀯 𑀫𑀳𑀦𑁆𑀢𑀲𑁆𑀲 𑀬𑀲𑀲𑁆𑀲 𑀤𑀸𑀬𑀓𑁄 𑀫𑀫 𑀪𑀸𑀢𑀸 𑀫𑀡𑀺𑀭𑀢𑀦𑀲𑁆𑀲 𑀓𑀸𑀭𑀡𑀸 𑀅𑀮𑀫𑁆𑀧𑀸𑀬𑀦𑀲𑁆𑀲 𑀤𑀲𑁆𑀲𑀺𑀢𑁄, 𑀦𑀸𑀲𑁆𑀲 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀦𑀗𑁆𑀕𑀼𑀝𑁆𑀞𑁂𑀦 𑀢𑀲𑁆𑀲 𑀧𑀸𑀤𑁂𑀲𑀼 𑀯𑁂𑀞𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀉𑀤𑀓𑁂 𑀑𑀲𑀺𑀤𑀸𑀧𑁂𑀢𑁆𑀯𑀸 𑀦𑀺𑀭𑀲𑁆𑀲𑀸𑀲𑀓𑀸𑀮𑁂 𑀣𑁄𑀓𑀁 𑀲𑀺𑀣𑀺𑀮𑀁 𑀅𑀓𑀸𑀲𑀺. 𑀲𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺. 𑀅𑀣 𑀦𑀁 𑀧𑀼𑀦𑀸𑀓𑀟𑁆𑀠𑀺𑀢𑁆𑀯𑀸 ¶ 𑀑𑀲𑀻𑀤𑀸𑀧𑁂𑀲𑀺. 𑀏𑀯𑀁 𑀩𑀳𑀽 𑀯𑀸𑀭𑁂 𑀢𑁂𑀦 𑀓𑀺𑀮𑀫𑀺𑀬𑀫𑀸𑀦𑁄 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁮𑁯𑁩.

‘‘𑀮𑁄𑀓𑁆𑀬𑀁 𑀲𑀚𑀦𑁆𑀢𑀁 𑀉𑀤𑀓𑀁, 𑀧𑀬𑀸𑀕𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀁;

𑀓𑁄 𑀫𑀁 𑀅𑀚𑁆𑀛𑁄𑀳𑀭𑀻 𑀪𑀽𑀢𑁄, 𑀑𑀕𑀸𑀴𑁆𑀳𑀁 𑀬𑀫𑀼𑀦𑀁 𑀦𑀤𑀺’’𑀦𑁆𑀢𑀺.

𑀢𑀢𑁆𑀣 𑀮𑁄𑀓𑁆𑀬𑀦𑁆𑀢𑀺 𑀏𑀯𑀁 𑀧𑀸𑀧𑀯𑀸𑀳𑀦𑀲𑀫𑀢𑁆𑀣𑀦𑁆𑀢𑀺 𑀮𑁄𑀓𑀲𑀫𑁆𑀫𑀢𑀁. 𑀲𑀚𑀦𑁆𑀢𑀦𑁆𑀢𑀺 𑀏𑀯𑀭𑀽𑀧𑀁 𑀉𑀤𑀓𑀁 𑀅𑀪𑀺𑀲𑀺𑀜𑁆𑀘𑀦𑁆𑀢𑀁. 𑀧𑀬𑀸𑀕𑀲𑁆𑀫𑀺𑀦𑁆𑀢𑀺 𑀧𑀬𑀸𑀕𑀢𑀺𑀢𑁆𑀣𑁂.

𑀅𑀣 ¶ 𑀦𑀁 𑀲𑀼𑀪𑁄𑀕𑁄 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁮𑁯𑁪.

‘‘𑀬𑀤𑁂𑀲 𑀮𑁄𑀓𑀸𑀥𑀺𑀧𑀢𑀻 𑀬𑀲𑀲𑁆𑀲𑀻, 𑀩𑀸𑀭𑀸𑀡𑀲𑀺𑀁 𑀧𑀓𑁆𑀭𑀺𑀬 𑀲𑀫𑀦𑁆𑀢𑀢𑁄;

𑀢𑀲𑁆𑀲𑀸𑀳 𑀧𑀼𑀢𑁆𑀢𑁄 𑀉𑀭𑀕𑀽𑀲𑀪𑀲𑁆𑀲, 𑀲𑀼𑀪𑁄𑀕𑁄𑀢𑀺 𑀫𑀁 𑀩𑁆𑀭𑀸𑀳𑁆𑀫𑀡 𑀯𑁂𑀤𑀬𑀦𑁆𑀢𑀻’’𑀢𑀺.

𑀢𑀢𑁆𑀣 𑀬𑀤𑁂𑀲𑀸𑀢𑀺 𑀬𑁄 𑀏𑀲𑁄. 𑀧𑀓𑁆𑀭𑀺𑀬 𑀲𑀫𑀦𑁆𑀢𑀢𑁄𑀢𑀺 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀤𑀼𑀧𑁆𑀧𑀳𑀭𑀡𑀲𑀫𑀢𑁆𑀣𑀢𑀸𑀬 𑀧𑀭𑀺𑀲𑀫𑀦𑁆𑀢𑀢𑁄 𑀧𑀓𑀺𑀭𑀺𑀬 𑀲𑀩𑁆𑀩𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑁂𑀦 𑀙𑀸𑀤𑁂𑀲𑀺.

𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀪𑀽𑀭𑀺𑀤𑀢𑁆𑀢𑀪𑀸𑀢𑀸, 𑀦 𑀫𑁂 𑀚𑀻𑀯𑀺𑀢𑀁 𑀤𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀏𑀢𑀲𑁆𑀲 𑀘𑁂𑀯 𑀫𑀸𑀢𑀸𑀧𑀺𑀢𑀽𑀦𑀜𑁆𑀘𑀲𑁆𑀲 𑀯𑀡𑁆𑀡𑀓𑀺𑀢𑁆𑀢𑀦𑁂𑀦 𑀫𑀼𑀤𑀼𑀘𑀺𑀢𑁆𑀢𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁮𑁯𑁫.

‘‘𑀲𑀘𑁂 𑀳𑀺 𑀧𑀼𑀢𑁆𑀢𑁄 𑀉𑀭𑀕𑀽𑀲𑀪𑀲𑁆𑀲, 𑀓𑀸𑀲𑀺𑀲𑁆𑀲 𑀭𑀜𑁆𑀜𑁄 𑀅𑀫𑀭𑀸𑀥𑀺𑀧𑀲𑁆𑀲;

𑀫𑀳𑁂𑀲𑀓𑁆𑀔𑁄 𑀅𑀜𑁆𑀜𑀢𑀭𑁄 𑀧𑀺𑀢𑀸 𑀢𑁂, 𑀫𑀘𑁆𑀘𑁂𑀲𑀼 𑀫𑀸𑀢𑀸 𑀧𑀦 𑀢𑁂 𑀅𑀢𑀼𑀮𑁆𑀬𑀸;

𑀦 𑀢𑀸𑀤𑀺𑀲𑁄 𑀅𑀭𑀳𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀤𑀸𑀲𑀫𑁆𑀧𑀺 𑀑𑀳𑀸𑀭𑀺𑀢𑀼𑀁 𑀫𑀳𑀸𑀦𑀼𑀪𑀸𑀯𑁄’’𑀢𑀺.

𑀢𑀢𑁆𑀣 ¶ 𑀓𑀸𑀲𑀺𑀲𑁆𑀲𑀸𑀢𑀺 𑀅𑀧𑀭𑁂𑀦 𑀦𑀸𑀫𑁂𑀦 𑀏𑀯𑀁𑀦𑀸𑀫𑀓𑀲𑁆𑀲. ‘‘𑀓𑀸𑀲𑀺𑀓𑀭𑀜𑁆𑀜𑁄’’𑀢𑀺𑀧𑀺 𑀧𑀞𑀦𑁆𑀢𑀺𑀬𑁂𑀯. 𑀓𑀸𑀲𑀺𑀭𑀸𑀚𑀥𑀻𑀢𑀸𑀬 𑀕𑀳𑀺𑀢𑀢𑁆𑀢𑀸 𑀓𑀸𑀲𑀺𑀭𑀚𑁆𑀚𑀫𑁆𑀧𑀺 𑀢𑀲𑁆𑀲𑁂𑀯 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀯𑀡𑁆𑀡𑁂𑀢𑀺. 𑀅𑀫𑀭𑀸𑀥𑀺𑀧𑀲𑁆𑀲𑀸𑀢𑀺 𑀤𑀻𑀖𑀸𑀬𑀼𑀓𑀢𑀸𑀬 𑀅𑀫𑀭𑀲𑀗𑁆𑀔𑀸𑀢𑀸𑀦𑀁 𑀦𑀸𑀕𑀸𑀦𑀁 𑀅𑀥𑀺𑀧𑀲𑁆𑀲. 𑀫𑀳𑁂𑀲𑀓𑁆𑀔𑁄𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀅𑀜𑁆𑀜𑀢𑀭𑁄𑀢𑀺 𑀫𑀳𑁂𑀲𑀓𑁆𑀔𑀸𑀦𑀁 𑀅𑀜𑁆𑀜𑀢𑀭𑁄. 𑀤𑀸𑀲𑀫𑁆𑀧𑀻𑀢𑀺 ¶ 𑀢𑀸𑀤𑀺𑀲𑁄 𑀳𑀺 𑀫𑀳𑀸𑀦𑀼𑀪𑀸𑀯𑁄 𑀆𑀦𑀼𑀪𑀸𑀯𑀭𑀳𑀺𑀢𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀲𑀫𑁆𑀧𑀺 𑀉𑀤𑀓𑁂 𑀑𑀳𑀭𑀺𑀢𑀼𑀁 𑀦𑀸𑀭𑀳𑀢𑀺, 𑀧𑀕𑁂𑀯 𑀫𑀳𑀸𑀦𑀼𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀦𑁆𑀢𑀺.

𑀅𑀣 𑀦𑀁 𑀲𑀼𑀪𑁄𑀕𑁄 ‘‘𑀅𑀭𑁂 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀫𑀁 𑀯𑀜𑁆𑀘𑁂𑀢𑁆𑀯𑀸 ‘𑀫𑀼𑀜𑁆𑀘𑀺𑀲𑁆𑀲𑀸𑀫𑀻’𑀢𑀺 𑀫𑀜𑁆𑀜𑀲𑀺, 𑀦 𑀢𑁂 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀓𑀢𑀓𑀫𑁆𑀫𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋

𑁮𑁯𑁬.

‘‘𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀯𑀺𑀚𑁆𑀛𑀺𑀢𑁆𑀣𑁄, 𑀏𑀡𑁂𑀬𑁆𑀬𑀁 𑀧𑀸𑀢𑀼𑀫𑀸𑀕𑀢𑀁;

𑀲𑁄 𑀯𑀺𑀤𑁆𑀥𑁄 𑀤𑀽𑀭𑀫𑀘𑀭𑀺, 𑀲𑀭𑀯𑁂𑀕𑁂𑀦 𑀲𑀻𑀖𑀯𑀸.

𑁮𑁯𑁭.

‘‘𑀢𑀁 𑀢𑁆𑀯𑀁 𑀧𑀢𑀺𑀢𑀫𑀤𑁆𑀤𑀓𑁆𑀔𑀺, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀲 𑀫𑀁𑀲𑀓𑀸𑀚𑀫𑀸𑀤𑀸𑀬, 𑀲𑀸𑀬𑀁 𑀦𑀺𑀕𑁆𑀭𑁄𑀥𑀼𑀧𑀸𑀕𑀫𑀺.

𑁮𑁯𑁮.

‘‘𑀲𑀼𑀓𑀲𑀸𑀴𑀺𑀓𑀲𑀗𑁆𑀖𑀼𑀝𑁆𑀞𑀁 ¶ , 𑀧𑀺𑀗𑁆𑀕𑀮𑀁 𑀲𑀦𑁆𑀣𑀢𑀸𑀬𑀼𑀢𑀁;

𑀓𑁄𑀓𑀺𑀮𑀸𑀪𑀺𑀭𑀼𑀤𑀁 𑀭𑀫𑁆𑀫𑀁, 𑀥𑀼𑀯𑀁 𑀳𑀭𑀺𑀢𑀲𑀤𑁆𑀤𑀮𑀁.

𑁮𑁯𑁯.

‘‘𑀢𑀢𑁆𑀣 𑀢𑁂 𑀲𑁄 𑀧𑀸𑀢𑀼𑀭𑀳𑀼, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀫𑀳𑀸𑀦𑀼𑀪𑀸𑀯𑁄 𑀪𑀸𑀢𑀸 𑀫𑁂, 𑀓𑀜𑁆𑀜𑀸𑀳𑀺 𑀧𑀭𑀺𑀯𑀸𑀭𑀺𑀢𑁄.

𑁯𑁦𑁦.

‘‘𑀲𑁄 𑀢𑁂𑀦 𑀧𑀭𑀺𑀘𑀺𑀡𑁆𑀡𑁄 𑀢𑁆𑀯𑀁, 𑀲𑀩𑁆𑀩𑀓𑀸𑀫𑁂𑀳𑀺 𑀢𑀧𑁆𑀧𑀺𑀢𑁄;

𑀅𑀤𑀼𑀝𑁆𑀞𑀲𑁆𑀲 𑀢𑀼𑀯𑀁 𑀤𑀼𑀩𑁆𑀪𑀺, 𑀢𑀁 𑀢𑁂 𑀯𑁂𑀭𑀁 𑀇𑀥𑀸𑀕𑀢𑀁.

𑁯𑁦𑁧.

‘‘𑀔𑀺𑀧𑁆𑀧𑀁 𑀕𑀻𑀯𑀁 𑀧𑀲𑀸𑀭𑁂𑀳𑀺, 𑀦 𑀢𑁂 𑀤𑀲𑁆𑀲𑀸𑀫𑀺 𑀚𑀻𑀯𑀺𑀢𑀁;

𑀪𑀸𑀢𑀼 𑀧𑀭𑀺𑀲𑀭𑀁 𑀯𑁂𑀭𑀁, 𑀙𑁂𑀤𑀬𑀺𑀲𑁆𑀲𑀸𑀫𑀺 𑀢𑁂 𑀲𑀺𑀭’’𑀦𑁆𑀢𑀺.

𑀢𑀢𑁆𑀣 𑀲𑀸𑀬𑀁 𑀦𑀺𑀕𑁆𑀭𑁄𑀥𑀼𑀧𑀸𑀕𑀫𑀻𑀢𑀺 𑀯𑀺𑀓𑀸𑀮𑁂 𑀦𑀺𑀕𑁆𑀭𑁄𑀥𑀁 𑀉𑀧𑀕𑀢𑁄 𑀅𑀲𑀺. 𑀧𑀺𑀗𑁆𑀕𑀮𑀦𑁆𑀢𑀺 𑀧𑀓𑁆𑀓𑀸𑀦𑀁 𑀯𑀡𑁆𑀡𑁂𑀦 𑀧𑀺𑀗𑁆𑀕𑀮𑀁. 𑀲𑀦𑁆𑀣𑀢𑀸𑀬𑀼𑀢𑀦𑁆𑀢𑀺 𑀧𑀸𑀭𑁄𑀳𑀧𑀭𑀺𑀓𑀺𑀡𑁆𑀡𑀁. 𑀓𑁄𑀓𑀺𑀮𑀸𑀪𑀺𑀭𑀼𑀤𑀦𑁆𑀢𑀺 𑀓𑁄𑀓𑀺𑀮𑀸𑀳𑀺 𑀅𑀪𑀺𑀭𑀼𑀤𑀁. 𑀥𑀼𑀯𑀁 𑀳𑀭𑀺𑀢𑀲𑀤𑁆𑀤𑀮𑀦𑁆𑀢𑀺 𑀉𑀤𑀓𑀪𑀽𑀫𑀺𑀬𑀁 𑀚𑀸𑀢𑀢𑁆𑀢𑀸 𑀦𑀺𑀘𑁆𑀘𑀁 𑀳𑀭𑀺𑀢𑀲𑀤𑁆𑀤𑀮𑀁 𑀪𑀽𑀫𑀺𑀪𑀸𑀕𑀁. 𑀧𑀸𑀢𑀼𑀭𑀳𑀽𑀢𑀺 𑀢𑀲𑁆𑀫𑀺𑀁 𑀢𑁂 𑀦𑀺𑀕𑁆𑀭𑁄𑀥𑁂 𑀞𑀺𑀢𑀲𑁆𑀲 ¶ 𑀲𑁄 𑀫𑀫 𑀪𑀸𑀢𑀸 𑀧𑀸𑀓𑀝𑁄 𑀅𑀳𑁄𑀲𑀺. 𑀇𑀤𑁆𑀥𑀺𑀬𑀸𑀢𑀺 𑀧𑀼𑀜𑁆𑀜𑀢𑁂𑀚𑁂𑀦. 𑀲𑁄 𑀢𑁂𑀦𑀸𑀢𑀺 𑀲𑁄 𑀢𑀼𑀯𑀁 𑀢𑁂𑀦 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀧𑀭𑀺𑀘𑀺𑀡𑁆𑀡𑁄. 𑀧𑀭𑀺𑀲𑀭𑀦𑁆𑀢𑀺 𑀢𑀬𑀸 𑀫𑀫 𑀪𑀸𑀢𑀼 𑀓𑀢𑀁 𑀯𑁂𑀭𑀁 𑀧𑀸𑀧𑀓𑀫𑁆𑀫𑀁 𑀧𑀭𑀺𑀲𑀭𑀦𑁆𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀙𑁂𑀤𑀬𑀺𑀲𑁆𑀲𑀸𑀫𑀺 𑀢𑁂 𑀲𑀺𑀭𑀦𑁆𑀢𑀺 𑀢𑀯 𑀲𑀻𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀦 𑀫𑁂𑀲 𑀚𑀻𑀯𑀺𑀢𑀁 𑀤𑀲𑁆𑀲𑀢𑀺, 𑀬𑀁 𑀓𑀺𑀜𑁆𑀘𑀺 𑀧𑀦 𑀯𑀢𑁆𑀯𑀸 𑀫𑁄𑀓𑁆𑀔𑀢𑁆𑀣𑀸𑀬 𑀯𑀸𑀬𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁯𑁦𑁨.

‘‘𑀅𑀚𑁆𑀛𑀸𑀬𑀓𑁄 𑀬𑀸𑀘𑀬𑁄𑀕𑀻, 𑀆𑀳𑀼𑀢𑀕𑁆𑀕𑀺 𑀘 𑀩𑁆𑀭𑀸𑀳𑁆𑀫𑀡𑁄;

𑀏𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺, 𑀅𑀯𑀚𑁆𑀛𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀢𑀢𑁆𑀣 𑀏𑀢𑁂𑀳𑀻𑀢𑀺 𑀏𑀢𑁂𑀳𑀺 𑀅𑀚𑁆𑀛𑀸𑀬𑀓𑀢𑀸𑀤𑀻𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁄 𑀅𑀯𑀚𑁆𑀛𑁄, 𑀦 𑀮𑀩𑁆𑀪𑀸 𑀩𑁆𑀭𑀸𑀳𑁆𑀫𑀡𑀁 𑀯𑀥𑀺𑀢𑀼𑀁, 𑀓𑀺𑀁 𑀢𑁆𑀯𑀁 𑀯𑀤𑁂𑀲𑀺, 𑀬𑁄 𑀳𑀺 𑀩𑁆𑀭𑀸𑀳𑁆𑀫𑀡𑀁 𑀯𑀥𑁂𑀢𑀺, 𑀲𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀲𑀼𑀪𑁄𑀕𑁄 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀳𑀼𑀢𑁆𑀯𑀸 ‘‘𑀇𑀫𑀁 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀪𑀸𑀢𑀭𑁄 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁯𑁦𑁩.

‘‘𑀬𑀁 ¶ 𑀧𑀼𑀭𑀁 𑀥𑀢𑀭𑀝𑁆𑀞𑀲𑁆𑀲, 𑀑𑀕𑀸𑀴𑁆𑀳𑀁 𑀬𑀫𑀼𑀦𑀁 𑀦𑀤𑀺𑀁;

𑀚𑁄𑀢𑀢𑁂 𑀲𑀩𑁆𑀩𑀲𑁄𑀯𑀡𑁆𑀡𑀁, 𑀕𑀺𑀭𑀺𑀫𑀸𑀳𑀘𑁆𑀘 𑀬𑀸𑀫𑀼𑀦𑀁.

𑁯𑁦𑁪.

‘‘𑀢𑀢𑁆𑀣 𑀢𑁂 𑀧𑀼𑀭𑀺𑀲𑀩𑁆𑀬𑀕𑁆𑀖𑀸, 𑀲𑁄𑀤𑀭𑀺𑀬𑀸 𑀫𑀫 𑀪𑀸𑀢𑀭𑁄;

𑀬𑀣𑀸 𑀢𑁂 𑀢𑀢𑁆𑀣 𑀯𑀓𑁆𑀔𑀦𑁆𑀢𑀺, 𑀢𑀣𑀸 𑀳𑁂𑀲𑁆𑀲𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀧𑀼𑀭𑀦𑁆𑀢𑀺 𑀦𑀸𑀕𑀧𑀼𑀭𑀁. 𑀑𑀕𑀸𑀴𑁆𑀳𑀦𑁆𑀢𑀺 𑀅𑀦𑀼𑀧𑀯𑀺𑀝𑁆𑀞𑀁. 𑀕𑀺𑀭𑀺𑀫𑀸𑀳𑀘𑁆𑀘 𑀬𑀸𑀫𑀼𑀦𑀦𑁆𑀢𑀺 𑀬𑀫𑀼𑀦𑀸𑀢𑁄 𑀅𑀯𑀺𑀤𑀽𑀭𑁂 𑀞𑀺𑀢𑀁 𑀳𑀺𑀫𑀯𑀦𑁆𑀢𑀁 𑀆𑀳𑀘𑁆𑀘 𑀚𑁄𑀢𑀢𑀺. 𑀢𑀢𑁆𑀣 𑀢𑁂𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂 𑀢𑁂 𑀫𑀫 𑀪𑀸𑀢𑀭𑁄 𑀯𑀲𑀦𑁆𑀢𑀺, 𑀢𑀢𑁆𑀣 𑀦𑀻𑀢𑁂 𑀢𑀬𑀺 𑀬𑀣𑀸 𑀢𑁂 𑀯𑀓𑁆𑀔𑀦𑁆𑀢𑀺, 𑀢𑀣𑀸 𑀪𑀯𑀺𑀲𑁆𑀲𑀲𑀺. 𑀲𑀘𑁂 𑀳𑀺 𑀲𑀘𑁆𑀘𑀁 𑀓𑀣𑁂𑀲𑀺, 𑀚𑀻𑀯𑀺𑀢𑀁 𑀢𑁂 𑀅𑀢𑁆𑀣𑀺. 𑀦𑁄 𑀘𑁂, 𑀢𑀢𑁆𑀣𑁂𑀯 𑀲𑀻𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺.

𑀇𑀢𑀺 𑀦𑀁 𑀯𑀢𑁆𑀯𑀸 𑀲𑀼𑀪𑁄𑀕𑁄 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀔𑀺𑀧𑀦𑁆𑀢𑁄 𑀅𑀓𑁆𑀓𑁄𑀲𑀦𑁆𑀢𑁄 𑀧𑀭𑀺𑀪𑀸𑀲𑀦𑁆𑀢𑁄 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀲𑀸𑀤𑀤𑁆𑀯𑀸𑀭𑀁 𑀅𑀕𑀫𑀸𑀲𑀺.

𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑀬𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀫𑀺𑀘𑁆𑀙𑀸𑀓𑀣𑀸

𑀅𑀣 ¶ 𑀦𑀁 𑀤𑁄𑀯𑀸𑀭𑀺𑀓𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀓𑀸𑀡𑀸𑀭𑀺𑀝𑁆𑀞𑁄 𑀢𑀣𑀸 𑀓𑀺𑀮𑀫𑁂𑀢𑁆𑀯𑀸 𑀆𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀧𑀝𑀺𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 ‘‘𑀲𑀼𑀪𑁄𑀕, 𑀫𑀸 𑀯𑀺𑀳𑁂𑀞𑀬𑀺, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸. 𑀲𑀘𑁂 𑀳𑀺 𑀫𑀳𑀸𑀩𑁆𑀭𑀳𑁆𑀫𑀸 𑀚𑀸𑀦𑀺𑀲𑁆𑀲𑀢𑀺, ‘𑀫𑀫 𑀧𑀼𑀢𑁆𑀢𑀁 𑀯𑀺𑀳𑁂𑀞𑁂𑀦𑁆𑀢𑀻’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀓𑀮𑀁 𑀦𑀸𑀕𑀪𑀯𑀦𑀁 𑀯𑀺𑀦𑀸𑀲𑁂𑀲𑁆𑀲𑀢𑀺. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀲𑁂𑀝𑁆𑀞𑀸 𑀫𑀳𑀸𑀦𑀼𑀪𑀸𑀯𑀸, 𑀢𑁆𑀯𑀁 𑀢𑁂𑀲𑀁 𑀆𑀦𑀼𑀪𑀸𑀯𑀁 𑀦 𑀚𑀸𑀦𑀸𑀲𑀺, 𑀅𑀳𑀁 𑀧𑀦 𑀚𑀸𑀦𑀸𑀫𑀻’’𑀢𑀺 𑀆𑀳. 𑀓𑀸𑀡𑀸𑀭𑀺𑀝𑁆𑀞𑁄 𑀓𑀺𑀭 𑀅𑀢𑀻𑀢𑀸𑀦𑀦𑁆𑀢𑀭𑀪𑀯𑁂 𑀬𑀜𑁆𑀜𑀓𑀸𑀭𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀯𑀢𑁆𑀯𑀸 𑀘 𑀧𑀦 𑀅𑀦𑀼𑀪𑀽𑀢𑀧𑀼𑀩𑁆𑀩𑀯𑀲𑁂𑀦 𑀬𑀚𑀦𑀲𑀻𑀮𑁄 𑀳𑀼𑀢𑁆𑀯𑀸 𑀲𑀼𑀪𑁄𑀕𑀜𑁆𑀘 𑀦𑀸𑀕𑀧𑀭𑀺𑀲𑀜𑁆𑀘 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀏𑀣, 𑀪𑁄, 𑀬𑀜𑁆𑀜𑀓𑀸𑀭𑀓𑀸𑀦𑀁 𑀯𑁄 𑀕𑀼𑀡𑁂 𑀯𑀡𑁆𑀡𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀬𑀜𑁆𑀜𑀯𑀡𑁆𑀡𑀦𑀁 𑀆𑀭𑀪𑀦𑁆𑀢𑁄 𑀆𑀳 𑁋

𑁯𑁦𑁫.

‘‘𑀅𑀦𑀺𑀢𑁆𑀢𑀭𑀸 𑀇𑀢𑁆𑀢𑀭𑀲𑀫𑁆𑀧𑀬𑀼𑀢𑁆𑀢𑀸, 𑀬𑀜𑁆𑀜𑀸 𑀘 𑀯𑁂𑀤𑀸 𑀘 𑀲𑀼𑀪𑁄𑀕 𑀮𑁄𑀓𑁂;

𑀢𑀤𑀕𑁆𑀕𑀭𑀬𑁆𑀳𑀜𑁆𑀳𑀺 𑀯𑀺𑀦𑀺𑀦𑁆𑀤𑀫𑀸𑀦𑁄, 𑀚𑀳𑀸𑀢𑀺 𑀯𑀺𑀢𑁆𑀢𑀜𑁆𑀘 𑀲𑀢𑀜𑁆𑀘 𑀥𑀫𑁆𑀫’’𑀦𑁆𑀢𑀺.

𑀢𑀢𑁆𑀣 ¶ ¶ 𑀅𑀦𑀺𑀢𑁆𑀢𑀭𑀸𑀢𑀺 𑀲𑀼𑀪𑁄𑀕 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑀜𑁆𑀜𑀸 𑀘 𑀯𑁂𑀤𑀸 𑀘 𑀅𑀦𑀺𑀢𑁆𑀢𑀭𑀸 𑀦 𑀮𑀸𑀫𑀓𑀸 𑀫𑀳𑀸𑀦𑀼𑀪𑀸𑀯𑀸, 𑀢𑁂 𑀇𑀢𑁆𑀢𑀭𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑀸𑀧𑀺 𑀅𑀦𑀺𑀢𑁆𑀢𑀭𑀸𑀯 𑀚𑀸𑀢𑀸. 𑀢𑀤𑀕𑁆𑀕𑀭𑀬𑁆𑀳𑀦𑁆𑀢𑀺 𑀢𑀲𑁆𑀫𑀸 𑀅𑀕𑀸𑀭𑀬𑁆𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀺𑀦𑀺𑀦𑁆𑀤𑀫𑀸𑀦𑁄 𑀥𑀦𑀜𑁆𑀘 𑀧𑀡𑁆𑀟𑀺𑀢𑀸𑀦𑀁 𑀥𑀫𑁆𑀫𑀜𑁆𑀘 𑀚𑀳𑀸𑀢𑀺. 𑀇𑀤𑀁 𑀓𑀺𑀭 𑀲𑁄 ‘‘𑀇𑀫𑀺𑀦𑀸 𑀪𑀽𑀭𑀺𑀤𑀢𑁆𑀢𑁂 𑀫𑀺𑀢𑁆𑀢𑀤𑀼𑀩𑁆𑀪𑀺𑀓𑀫𑁆𑀫𑀁 𑀓𑀢𑀦𑁆𑀢𑀺 𑀯𑀢𑁆𑀢𑀼𑀁 𑀦𑀸𑀕𑀧𑀭𑀺𑀲𑀸 𑀫𑀸 𑀮𑀪𑀦𑁆𑀢𑀽’’𑀢𑀺 𑀅𑀯𑁄𑀘.

𑀅𑀣 𑀦𑀁 𑀓𑀸𑀡𑀸𑀭𑀺𑀝𑁆𑀞𑁄 ‘‘𑀲𑀼𑀪𑁄𑀕 𑀚𑀸𑀦𑀸𑀲𑀺 𑀧𑀦 𑀅𑀬𑀁 𑀮𑁄𑀓𑁄 𑀓𑁂𑀦 𑀦𑀺𑀫𑁆𑀫𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀺𑀢𑀸𑀫𑀳𑁂𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁦𑁬.

‘‘𑀅𑀚𑁆𑀛𑁂𑀦𑀫𑀭𑀺𑀬𑀸 𑀧𑀣𑀯𑀺𑀁 𑀚𑀦𑀺𑀦𑁆𑀤𑀸, 𑀯𑁂𑀲𑁆𑀲𑀸 𑀓𑀲𑀺𑀁 𑀧𑀸𑀭𑀺𑀘𑀭𑀺𑀬𑀜𑁆𑀘 𑀲𑀼𑀤𑁆𑀤𑀸;

𑀉𑀧𑀸𑀕𑀼 𑀧𑀘𑁆𑀘𑁂𑀓𑀁 𑀬𑀣𑀸𑀧𑀤𑁂𑀲𑀁, 𑀓𑀢𑀸𑀳𑀼 𑀏𑀢𑁂 𑀯𑀲𑀺𑀦𑀸𑀢𑀺 𑀆𑀳𑀽’’𑀢𑀺.

𑀢𑀢𑁆𑀣 𑀉𑀧𑀸𑀕𑀽𑀢𑀺 𑀉𑀧𑀕𑀢𑀸. 𑀩𑁆𑀭𑀳𑁆𑀫𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀘𑀢𑁆𑀢𑀸𑀭𑁄 𑀯𑀡𑁆𑀡𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀭𑀺𑀬𑁂 𑀢𑀸𑀯 𑀩𑁆𑀭𑀸𑀳𑁆𑀫𑀡𑁂 𑀆𑀳 𑁋 ‘‘𑀢𑀼𑀫𑁆𑀳𑁂 𑀅𑀚𑁆𑀛𑁂𑀦𑀫𑁂𑀯 𑀉𑀧𑀕𑀘𑁆𑀙𑀣 ¶ , 𑀫𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀭𑀺𑀢𑁆𑀣𑀸’’𑀢𑀺, 𑀚𑀦𑀺𑀦𑁆𑀤𑁂 𑀆𑀳 ‘‘𑀢𑀼𑀫𑁆𑀳𑁂 𑀧𑀣𑀯𑀺𑀁𑀬𑁂𑀯 𑀯𑀺𑀚𑀺𑀦𑀣’’, 𑀯𑁂𑀲𑁆𑀲𑁂 𑀆𑀳 𑁋 ‘‘𑀢𑀼𑀫𑁆𑀳𑁂 𑀓𑀲𑀺𑀁𑀬𑁂𑀯 𑀉𑀧𑁂𑀣’’, 𑀲𑀼𑀤𑁆𑀤𑁂 𑀆𑀳 ‘‘𑀢𑀼𑀫𑁆𑀳𑁂 𑀢𑀺𑀡𑁆𑀡𑀁 𑀯𑀡𑁆𑀡𑀸𑀦𑀁 𑀧𑀸𑀭𑀺𑀘𑀭𑀺𑀬𑀁𑀬𑁂𑀯 𑀉𑀧𑁂𑀣𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀭𑀺𑀬𑀸 𑀅𑀚𑁆𑀛𑁂𑀦𑀁, 𑀚𑀦𑀺𑀦𑁆𑀤𑀸 𑀧𑀣𑀯𑀺𑀁, 𑀯𑁂𑀲𑁆𑀲𑀸 𑀓𑀲𑀺𑀁, 𑀲𑀼𑀤𑁆𑀤𑀸 𑀧𑀸𑀭𑀺𑀘𑀭𑀺𑀬𑀁 𑀉𑀧𑀸𑀕𑀢𑀸𑀢𑀺 𑀯𑀤𑀦𑁆𑀢𑀺. 𑀧𑀘𑁆𑀘𑁂𑀓𑀁 𑀬𑀣𑀸𑀧𑀤𑁂𑀲𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀸 𑀘 𑀧𑀸𑀝𑀺𑀬𑁂𑀓𑁆𑀓𑀁 𑀅𑀢𑁆𑀢𑀦𑁄 𑀓𑀼𑀮𑀧𑀤𑁂𑀲𑀸𑀦𑀼𑀭𑀽𑀧𑁂𑀦 𑀩𑁆𑀭𑀳𑁆𑀫𑀼𑀦𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀉𑀧𑀕𑀢𑀸. 𑀓𑀢𑀸𑀳𑀼 𑀏𑀢𑁂 𑀯𑀲𑀺𑀦𑀸𑀢𑀺 𑀆𑀳𑀽𑀢𑀺 𑀏𑀯𑀁 𑀓𑀺𑀭 𑀏𑀢𑁂 𑀯𑀲𑀺𑀦𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀓𑀢𑀸 𑀅𑀳𑁂𑀲𑀼𑀦𑁆𑀢𑀺 𑀓𑀣𑁂𑀦𑁆𑀢𑀺.

𑀏𑀯𑀁 𑀫𑀳𑀸𑀕𑀼𑀡𑀸 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫. 𑀬𑁄 𑀳𑀺 𑀏𑀢𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀢𑀲𑁆𑀲 𑀅𑀜𑁆𑀜𑀢𑁆𑀣 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀺, 𑀤𑁂𑀯𑀮𑁄𑀓𑀫𑁂𑀯 𑀕𑀘𑁆𑀙𑀢𑀻𑀢𑀺 𑀯𑀢𑁆𑀯𑀸 𑀆𑀳 𑁋

𑁯𑁦𑁭.

‘‘𑀥𑀸𑀢𑀸 𑀯𑀺𑀥𑀸𑀢𑀸 𑀯𑀭𑀼𑀡𑁄 𑀓𑀼𑀯𑁂𑀭𑁄, 𑀲𑁄𑀫𑁄 𑀬𑀫𑁄 𑀘𑀦𑁆𑀤𑀺𑀫𑀸 𑀯𑀸𑀬𑀼 𑀲𑀽𑀭𑀺𑀬𑁄;

𑀏𑀢𑁂𑀧𑀺 𑀬𑀜𑁆𑀜𑀁 𑀧𑀼𑀣𑀼𑀲𑁄 𑀬𑀚𑀺𑀢𑁆𑀯𑀸, 𑀅𑀚𑁆𑀛𑀸𑀬𑀓𑀸𑀦𑀁 𑀅𑀣𑁄 𑀲𑀩𑁆𑀩𑀓𑀸𑀫𑁂.

𑁯𑁦𑁮.

‘‘𑀯𑀺𑀓𑀸𑀲𑀺𑀢𑀸 𑀘𑀸𑀧𑀲𑀢𑀸𑀦𑀺 𑀧𑀜𑁆𑀘, 𑀬𑁄 𑀅𑀚𑁆𑀚𑀼𑀦𑁄 𑀩𑀮𑀯𑀸 𑀪𑀻𑀫𑀲𑁂𑀦𑁄;

𑀲𑀳𑀲𑁆𑀲𑀩𑀸𑀳𑀼 𑀅𑀲𑀫𑁄 𑀧𑀣𑀩𑁆𑀬𑀸, 𑀲𑁄𑀧𑀺 𑀢𑀤𑀸 𑀆𑀤𑀳𑀺 𑀚𑀸𑀢𑀯𑁂𑀤’’𑀦𑁆𑀢𑀺.

𑀢𑀢𑁆𑀣 ¶ ¶ 𑀏𑀢𑁂𑀧𑀻𑀢𑀺 𑀏𑀢𑁂 𑀥𑀸𑀢𑀸𑀤𑀬𑁄 𑀤𑁂𑀯𑀭𑀸𑀚𑀸𑀦𑁄. 𑀧𑀼𑀣𑀼𑀲𑁄𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸. 𑀅𑀣𑁄 𑀲𑀩𑁆𑀩𑀓𑀸𑀫𑁂𑀢𑀺 𑀅𑀣 𑀅𑀚𑁆𑀛𑀸𑀬𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀓𑀸𑀫𑁂 𑀤𑀢𑁆𑀯𑀸 𑀏𑀢𑀸𑀦𑀺 𑀞𑀸𑀦𑀸𑀦𑀺 𑀧𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀓𑀸𑀲𑀺𑀢𑀸𑀢𑀺 𑀆𑀓𑀟𑁆𑀠𑀺𑀢𑀸. 𑀘𑀸𑀧𑀲𑀢𑀸𑀦𑀺 𑀧𑀜𑁆𑀘𑀸𑀢𑀺 𑀦 𑀥𑀦𑀼𑀧𑀜𑁆𑀘𑀲𑀢𑀸𑀦𑀺, 𑀧𑀜𑁆𑀘𑀘𑀸𑀧𑀲𑀢𑀧𑁆𑀧𑀫𑀸𑀡𑀁 𑀧𑀦 𑀫𑀳𑀸𑀥𑀦𑀼𑀁 𑀲𑀬𑀫𑁂𑀯 𑀆𑀓𑀟𑁆𑀠𑀢𑀺. 𑀪𑀻𑀫𑀲𑁂𑀦𑁄𑀢𑀺 𑀪𑀬𑀸𑀦𑀓𑀲𑁂𑀦𑁄. 𑀲𑀳𑀲𑁆𑀲𑀩𑀸𑀳𑀽𑀢𑀺 𑀦 𑀢𑀲𑁆𑀲 𑀩𑀸𑀳𑀽𑀦𑀁 𑀲𑀳𑀲𑁆𑀲𑀁, 𑀧𑀜𑁆𑀘𑀦𑁆𑀦𑀁 𑀧𑀦 𑀥𑀦𑀼𑀕𑁆𑀕𑀳𑀲𑀢𑀸𑀦𑀁 𑀩𑀸𑀳𑀼𑀲𑀳𑀲𑁆𑀲𑁂𑀦 𑀆𑀓𑀟𑁆𑀠𑀺𑀢𑀩𑁆𑀩𑀲𑁆𑀲 𑀥𑀦𑀼𑀦𑁄 𑀆𑀓𑀟𑁆𑀠𑀦𑁂𑀦𑁂𑀯𑀁 𑀯𑀼𑀢𑁆𑀢𑀁. 𑀆𑀤𑀳𑀺 𑀚𑀸𑀢𑀯𑁂𑀤𑀦𑁆𑀢𑀺 𑀲𑁄𑀧𑀺 𑀭𑀸𑀚𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑁂 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀆𑀤𑀳𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑀺𑀘𑀭𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦 ¶ 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀚𑁂𑀝𑁆𑀞𑀓𑀸𑀢𑀺 𑀆𑀳.

𑀲𑁄 𑀉𑀢𑁆𑀢𑀭𑀺𑀧𑀺 𑀩𑁆𑀭𑀸𑀳𑁆𑀫𑀡𑁂 𑀯𑀡𑁆𑀡𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁯𑁦𑁯.

‘‘𑀬𑁄 𑀩𑁆𑀭𑀸𑀳𑁆𑀫𑀡𑁂 𑀪𑁄𑀚𑀬𑀺 𑀤𑀻𑀖𑀭𑀢𑁆𑀢𑀁, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀬𑀣𑀸𑀦𑀼𑀪𑀸𑀯𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀫𑁄𑀤𑀫𑀸𑀦𑁄, 𑀲𑀼𑀪𑁄𑀕 𑀤𑁂𑀯𑀜𑁆𑀜𑀢𑀭𑁄 𑀅𑀳𑁄𑀲𑀻’’𑀢𑀺.

𑀢𑀢𑁆𑀣 𑀬𑁄𑀢𑀺 𑀬𑁄 𑀲𑁄 𑀧𑁄𑀭𑀸𑀡𑀓𑁄 𑀩𑀸𑀭𑀸𑀡𑀲𑀺𑀭𑀸𑀚𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀦𑀼𑀪𑀸𑀯𑀦𑁆𑀢𑀺 𑀬𑀣𑀸𑀩𑀮𑀁 𑀬𑀁 𑀢𑀲𑁆𑀲 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀪𑁄𑀚𑁂𑀲𑀺. 𑀤𑁂𑀯𑀜𑁆𑀜𑀢𑀭𑁄𑀢𑀺 𑀲𑁄 𑀅𑀜𑁆𑀜𑀢𑀭𑁄 𑀫𑀳𑁂𑀲𑀓𑁆𑀔𑀤𑁂𑀯𑀭𑀸𑀚𑀸 𑀅𑀳𑁄𑀲𑀺. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀣𑀲𑁆𑀲 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁯𑁧𑁦.

‘‘𑀫𑀳𑀸𑀲𑀦𑀁 𑀤𑁂𑀯𑀫𑀦𑁄𑀫𑀯𑀡𑁆𑀡𑀁, 𑀬𑁄 𑀲𑀧𑁆𑀧𑀺𑀦𑀸 𑀅𑀲𑀓𑁆𑀔𑀺 𑀪𑁄𑀚𑁂𑀢𑀼𑀫𑀕𑁆𑀕𑀺𑀁;

𑀲 𑀬𑀜𑁆𑀜𑀢𑀦𑁆𑀢𑀁 𑀯𑀭𑀢𑁄 𑀬𑀚𑀺𑀢𑁆𑀯𑀸, 𑀤𑀺𑀩𑁆𑀩𑀁 𑀕𑀢𑀺𑀁 𑀫𑀼𑀘𑀮𑀺𑀦𑁆𑀤𑀚𑁆𑀛𑀕𑀘𑁆𑀙𑀻’’𑀢𑀺.

𑀢𑀢𑁆𑀣 𑀫𑀳𑀸𑀲𑀦𑀦𑁆𑀢𑀺 𑀫𑀳𑀸𑀪𑀓𑁆𑀔𑀁. 𑀪𑁄𑀚𑁂𑀢𑀼𑀦𑁆𑀢𑀺 𑀲𑀦𑁆𑀢𑀧𑁆𑀧𑁂𑀢𑀼𑀁. 𑀬𑀜𑁆𑀜𑀢𑀦𑁆𑀢𑀦𑁆𑀢𑀺 𑀬𑀜𑁆𑀜𑀯𑀺𑀥𑀸𑀦𑀁. 𑀯𑀭𑀢𑁄𑀢𑀺 𑀯𑀭𑀲𑁆𑀲 𑀅𑀕𑁆𑀕𑀺𑀤𑁂𑀯𑀲𑁆𑀲 𑀬𑀚𑀺𑀢𑁆𑀯𑀸. 𑀫𑀼𑀘𑀮𑀺𑀦𑁆𑀤𑀚𑁆𑀛𑀕𑀘𑁆𑀙𑀻𑀢𑀺 𑀫𑀼𑀘𑀮𑀺𑀦𑁆𑀤𑁄 𑀅𑀥𑀺𑀕𑀢𑁄𑀢𑀺.

𑀏𑀓𑁄 𑀓𑀺𑀭 𑀧𑀼𑀩𑁆𑀩𑁂 𑀩𑀸𑀭𑀸𑀡𑀲𑀺𑀬𑀁 𑀫𑀼𑀘𑀮𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀕𑁆𑀕𑀫𑀕𑁆𑀕𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀢𑁂 ‘‘𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀤𑁂𑀯𑀢𑀸𑀬 𑀘 𑀲𑀓𑁆𑀓𑀸𑀭𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 ‘‘𑀓𑀸 𑀩𑁆𑀭𑀸𑀳𑁆𑀫𑀡𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁂 ‘‘‘𑀅𑀕𑁆𑀕𑀺𑀤𑁂𑀯𑁄𑀢𑀺 𑀢𑀁 𑀦𑀯𑀦𑀻𑀢𑀲𑀧𑁆𑀧𑀺𑀦𑀸 𑀲𑀦𑁆𑀢𑀧𑁆𑀧𑁂𑀳𑀻’’’𑀢𑀺 𑀆𑀳𑀁𑀲𑀼. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀏𑀲 𑀇𑀫𑀁 𑀕𑀸𑀣𑀫𑀸𑀳.

𑀅𑀧𑀭𑀫𑁆𑀧𑀺 ¶ ¶ 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁯𑁧𑁧.

‘‘𑀫𑀳𑀸𑀦𑀼𑀪𑀸𑀯𑁄 𑀯𑀲𑁆𑀲𑀲𑀳𑀲𑁆𑀲𑀚𑀻𑀯𑀻, 𑀬𑁄 𑀧𑀩𑁆𑀩𑀚𑀻 𑀤𑀲𑁆𑀲𑀦𑁂𑀬𑁆𑀬𑁄 𑀉𑀴𑀸𑀭𑁄;

𑀳𑀺𑀢𑁆𑀯𑀸 ¶ 𑀅𑀧𑀭𑀺𑀬𑀦𑁆𑀢 𑀭𑀝𑁆𑀞𑀁 𑀲𑀲𑁂𑀦𑀁, 𑀭𑀸𑀚𑀸 𑀤𑀼𑀤𑀻𑀧𑁄𑀧𑀺 𑀚𑀕𑀸𑀫 𑀲𑀕𑁆𑀕’’𑀦𑁆𑀢𑀺.

𑀢𑀢𑁆𑀣 𑀧𑀩𑁆𑀩𑀚𑀻𑀢𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀅𑀧𑀭𑀺𑀬𑀦𑁆𑀢𑀁 𑀭𑀝𑁆𑀞𑀁 𑀲𑀲𑁂𑀦𑀁 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀤𑀼𑀤𑀻𑀧𑁄𑀧𑀻𑀢𑀺 𑀲𑁄 𑀤𑀼𑀤𑀻𑀧𑁄 𑀦𑀸𑀫 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀧𑀽𑀚𑁂𑀢𑁆𑀯𑀸𑀯 𑀲𑀕𑁆𑀕𑀁 𑀕𑀢𑁄𑀢𑀺 𑀯𑀤𑀢𑀺. ‘‘𑀤𑀼𑀚𑀻𑀧𑁄’’𑀢𑀺𑀧𑀺 𑀧𑀸𑀞𑁄.

𑀅𑀧𑀭𑀸𑀦𑀺𑀧𑀺𑀲𑁆𑀲 𑀉𑀤𑀸𑀳𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁯𑁧𑁨.

‘‘𑀬𑁄 𑀲𑀸𑀕𑀭𑀦𑁆𑀢𑀁 𑀲𑀸𑀕𑀭𑁄 𑀯𑀺𑀚𑀺𑀢𑁆𑀯𑀸, 𑀬𑀽𑀧𑀁 𑀲𑀼𑀪𑀁 𑀲𑁄𑀡𑁆𑀡𑀫𑀬𑀁 𑀉𑀴𑀸𑀭𑀁;

𑀉𑀲𑁆𑀲𑁂𑀲𑀺 𑀯𑁂𑀲𑁆𑀲𑀸𑀦𑀭𑀫𑀸𑀤𑀳𑀸𑀦𑁄, 𑀲𑀼𑀪𑁄𑀕 𑀤𑁂𑀯𑀜𑁆𑀜𑀢𑀭𑁄 𑀅𑀳𑁄𑀲𑀺.

𑁯𑁧𑁩.

‘‘𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀼𑀪𑁄𑀕 𑀕𑀗𑁆𑀕𑀸, 𑀧𑀯𑀢𑁆𑀢𑀣 𑀤𑀥𑀺𑀲𑀦𑁆𑀦𑀺𑀲𑀺𑀦𑁆𑀦𑀁 𑀲𑀫𑀼𑀤𑁆𑀤𑀁;

𑀲 𑀮𑁄𑀫𑀧𑀸𑀤𑁄 𑀧𑀭𑀺𑀘𑀭𑀺𑀬 𑀫𑀕𑁆𑀕𑀺𑀁, 𑀅𑀗𑁆𑀕𑁄 𑀲𑀳𑀲𑁆𑀲𑀓𑁆𑀔𑀧𑀼𑀭𑀚𑁆𑀛𑀕𑀘𑁆𑀙𑀻’’𑀢𑀺.

𑀢𑀢𑁆𑀣 𑀲𑀸𑀕𑀭𑀦𑁆𑀢𑀦𑁆𑀢𑀺 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁. 𑀉𑀲𑁆𑀲𑁂𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑁂 𑀲𑀕𑁆𑀕𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁄𑀯𑀡𑁆𑀡𑀬𑀽𑀧𑀁 𑀉𑀲𑁆𑀲𑀸𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀧𑀲𑀼𑀖𑀸𑀢𑀦𑀢𑁆𑀣𑀸𑀬 𑀉𑀲𑁆𑀲𑀸𑀧𑁂𑀲𑀺. 𑀯𑁂𑀲𑁆𑀲𑀸𑀦𑀭𑀫𑀸𑀤𑀳𑀸𑀦𑁄𑀢𑀺 𑀯𑁂𑀲𑁆𑀲𑀸𑀦𑀭𑀁 𑀅𑀕𑁆𑀕𑀺𑀁 𑀆𑀤𑀳𑀦𑁆𑀢𑁄. ‘‘𑀯𑁂𑀲𑀸𑀦𑀭𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀤𑁂𑀯𑀜𑁆𑀜𑀢𑀭𑁄𑀢𑀺 𑀲𑀼𑀪𑁄𑀕, 𑀲𑁄 𑀳𑀺 𑀭𑀸𑀚𑀸 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀅𑀜𑁆𑀜𑀢𑀭𑁄 𑀫𑀳𑁂𑀲𑀓𑁆𑀔𑀤𑁂𑀯𑁄 𑀅𑀳𑁄𑀲𑀻𑀢𑀺 𑀯𑀤𑀢𑀺. 𑀬𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀪𑁄 𑀲𑀼𑀪𑁄𑀕, 𑀕𑀗𑁆𑀕𑀸 𑀘 𑀫𑀳𑀸𑀲𑀫𑀼𑀤𑁆𑀤𑁄 𑀘 𑀓𑁂𑀦 𑀓𑀢𑁄𑀢𑀺 𑀚𑀸𑀦𑀸𑀲𑀻𑀢𑀺. 𑀦 𑀚𑀸𑀦𑀸𑀫𑀻𑀢𑀺. 𑀓𑀺𑀁 𑀢𑁆𑀯𑀁 𑀚𑀸𑀦𑀺𑀲𑁆𑀲𑀲𑀺, 𑀩𑁆𑀭𑀸𑀳𑁆𑀫𑀡𑁂𑀬𑁂𑀯 𑀧𑁄𑀣𑁂𑀢𑀼𑀁 𑀚𑀸𑀦𑀸𑀲𑀻𑀢𑀺. 𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀅𑀗𑁆𑀕𑁄 𑀦𑀸𑀫 𑀮𑁄𑀫𑀧𑀸𑀤𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀲𑀕𑁆𑀕𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀪𑁄, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀧𑀭𑀺𑀫𑀸𑀡𑀸 ¶ 𑀕𑀸𑀯𑀺𑀬𑁄 𑀘 𑀫𑀳𑀺𑀁𑀲𑀺𑀬𑁄 𑀘 𑀆𑀤𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. ‘‘𑀩𑁆𑀭𑀸𑀳𑁆𑀫𑀡𑁂𑀳𑀺 𑀪𑀼𑀢𑁆𑀢𑀸𑀢𑀺𑀭𑀺𑀢𑁆𑀢𑀁 𑀔𑀻𑀭𑀤𑀥𑀺𑀁 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀙𑀟𑁆𑀟𑁂𑀣𑀸’’𑀢𑀺 𑀆𑀳. 𑀢𑀢𑁆𑀣 𑀣𑁄𑀓𑀲𑁆𑀲 𑀔𑀻𑀭𑀲𑁆𑀲 𑀙𑀟𑁆𑀟𑀺𑀢𑀝𑁆𑀞𑀸𑀦𑁂 𑀓𑀼𑀦𑁆𑀦𑀤𑀺𑀬𑁄 𑀅𑀳𑁂𑀲𑀼𑀁, 𑀩𑀳𑀼𑀓𑀲𑁆𑀲 𑀙𑀟𑁆𑀟𑀺𑀢𑀝𑁆𑀞𑀸𑀦𑁂 𑀕𑀗𑁆𑀕𑀸 𑀧𑀯𑀢𑁆𑀢𑀣. 𑀢𑀁 𑀧𑀦 𑀔𑀻𑀭𑀁 𑀬𑀢𑁆𑀣 𑀤𑀥𑀺 𑀳𑀼𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀁 𑀞𑀺𑀢𑀁, 𑀢𑀁 𑀲𑀫𑀼𑀤𑁆𑀤𑀁 𑀦𑀸𑀫 𑀚𑀸𑀢𑀁. 𑀇𑀢𑀺 𑀲𑁄 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀼𑀢𑁆𑀢𑀯𑀺𑀥𑀸𑀦𑁂𑀦 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀬 𑀲𑀳𑀲𑁆𑀲𑀓𑁆𑀔𑀲𑁆𑀲 𑀧𑀼𑀭𑀁 𑀅𑀚𑁆𑀛𑀕𑀘𑁆𑀙𑀺.

𑀇𑀢𑀺𑀲𑁆𑀲 ¶ 𑀇𑀤𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁧𑁪.

‘‘𑀫𑀳𑀺𑀤𑁆𑀥𑀺𑀓𑁄 𑀤𑁂𑀯𑀯𑀭𑁄 𑀬𑀲𑀲𑁆𑀲𑀻, 𑀲𑁂𑀦𑀸𑀧𑀢𑀺 𑀢𑀺𑀤𑀺𑀯𑁂 𑀯𑀸𑀲𑀯𑀲𑁆𑀲;

𑀲𑁄 ¶ 𑀲𑁄𑀫𑀬𑀸𑀕𑁂𑀦 𑀫𑀮𑀁 𑀯𑀺𑀳𑀦𑁆𑀢𑁆𑀯𑀸, 𑀲𑀼𑀪𑁄𑀕 𑀤𑁂𑀯𑀜𑁆𑀜𑀢𑀭𑁄 𑀅𑀳𑁄𑀲𑀻’’𑀢𑀺.

𑀢𑀢𑁆𑀣 𑀲𑁄 𑀲𑁄𑀫𑀬𑀸𑀕𑁂𑀦 𑀫𑀮𑀁 𑀯𑀺𑀳𑀦𑁆𑀢𑁆𑀯𑀸𑀢𑀺 𑀪𑁄 𑀲𑀼𑀪𑁄𑀕, 𑀬𑁄 𑀇𑀤𑀸𑀦𑀺 𑀲𑀓𑁆𑀓𑀲𑁆𑀲 𑀲𑁂𑀦𑀸𑀧𑀢𑀺 𑀫𑀳𑀸𑀬𑀲𑁄 𑀤𑁂𑀯𑀧𑀼𑀢𑁆𑀢𑁄, 𑀲𑁄𑀧𑀺 𑀧𑀼𑀩𑁆𑀩𑁂 𑀏𑀓𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀲𑀕𑁆𑀕𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 ‘‘𑀲𑁄𑀫𑀬𑀸𑀕𑁂𑀦 𑀅𑀢𑁆𑀢𑀦𑁄 𑀫𑀮𑀁 𑀧𑀯𑀸𑀳𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀢𑁂𑀳𑀺 𑀯𑀼𑀢𑁆𑀢𑀯𑀺𑀥𑀸𑀦𑁂𑀦 𑀲𑁄𑀫𑀬𑀸𑀕𑀁 𑀓𑀢𑁆𑀯𑀸 𑀢𑁂𑀦 𑀅𑀢𑁆𑀢𑀦𑁄 𑀫𑀮𑀁 𑀯𑀺𑀳𑀦𑁆𑀢𑁆𑀯𑀸 𑀤𑁂𑀯𑀜𑁆𑀜𑀢𑀭𑁄 𑀚𑀸𑀢𑁄𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀅𑀧𑀭𑀸𑀦𑀺𑀧𑀺𑀲𑁆𑀲 𑀉𑀤𑀸𑀳𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁯𑁧𑁫.

‘‘𑀅𑀓𑀸𑀭𑀬𑀺 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘, 𑀪𑀸𑀕𑀻𑀭𑀣𑀺𑀁 𑀳𑀺𑀫𑀯𑀦𑁆𑀢𑀜𑁆𑀘 𑀕𑀺𑀚𑁆𑀛𑀁;

𑀬𑁄 𑀇𑀤𑁆𑀥𑀺𑀫𑀸 𑀤𑁂𑀯𑀯𑀭𑁄 𑀬𑀲𑀲𑁆𑀲𑀻, 𑀲𑁄𑀧𑀺 𑀢𑀤𑀸 𑀆𑀤𑀳𑀺 𑀚𑀸𑀢𑀯𑁂𑀤𑀁.

𑁯𑁧𑁬.

‘‘𑀫𑀸𑀮𑀸𑀕𑀺𑀭𑀻 𑀳𑀺𑀫𑀯𑀸 𑀬𑁄 𑀘 𑀕𑀺𑀚𑁆𑀛𑁄, 𑀲𑀼𑀤𑀲𑁆𑀲𑀦𑁄 𑀦𑀺𑀲𑀪𑁄 𑀓𑀼𑀯𑁂𑀭𑀼;

𑀏𑀢𑁂 𑀘 𑀅𑀜𑁆𑀜𑁂 𑀘 𑀦𑀕𑀸 𑀫𑀳𑀦𑁆𑀢𑀸, 𑀘𑀺𑀢𑁆𑀬𑀸 𑀓𑀢𑀸 𑀬𑀜𑁆𑀜𑀓𑀭𑁂𑀳𑀺 𑀫𑀸𑀳𑀽’’𑀢𑀺.

𑀢𑀢𑁆𑀣 ¶ 𑀲𑁄𑀧𑀺 𑀢𑀤𑀸 𑀆𑀤𑀳𑀺 𑀚𑀸𑀢𑀯𑁂𑀤𑀦𑁆𑀢𑀺 𑀪𑀸𑀢𑀺𑀓 𑀲𑀼𑀪𑁄𑀕, 𑀬𑁂𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀅𑀬𑀜𑁆𑀘 𑀮𑁄𑀓𑁄 𑀧𑀭𑁄 𑀘 𑀮𑁄𑀓𑁄 𑀪𑀸𑀕𑀻𑀭𑀣𑀺𑀕𑀗𑁆𑀕𑀸 𑀘 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀘 𑀕𑀺𑀚𑁆𑀛𑀧𑀩𑁆𑀩𑀢𑁄 𑀘 𑀓𑀢𑁄, 𑀲𑁄𑀧𑀺 𑀬𑀤𑀸 𑀩𑁆𑀭𑀳𑁆𑀫𑀼𑀧𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀫𑀸𑀡𑀯𑀓𑁄 𑀅𑀳𑁄𑀲𑀺, 𑀢𑀤𑀸 𑀅𑀕𑁆𑀕𑀺𑀫𑁂𑀯 𑀆𑀤𑀳𑀺, 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀇𑀤𑀁 𑀲𑀩𑁆𑀩𑀫𑀓𑀸𑀲𑀺. 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀤𑀲𑁆𑀲𑁂𑀢𑀺.

𑀘𑀺𑀢𑁆𑀬𑀸 𑀓𑀢𑀸𑀢𑀺 𑀧𑀼𑀩𑁆𑀩𑁂 𑀓𑀺𑀭𑁂𑀓𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀲𑀕𑁆𑀕𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀫𑀳𑀸𑀤𑀸𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀤𑀸𑀦𑁂 𑀓𑀺𑀁 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀩𑁆𑀩𑀁, 𑀤𑁂𑀯, 𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀦 𑀆𑀲𑀦𑀸𑀦𑀺 𑀦𑀧𑁆𑀧𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀇𑀝𑁆𑀞𑀓𑀸𑀳𑀺 𑀘𑀺𑀦𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀺 𑀓𑀸𑀭𑁂𑀲𑀺. 𑀢𑀤𑀸 𑀘𑀺𑀢𑁆𑀬𑀸 𑀆𑀲𑀦𑀧𑀻𑀞𑀺𑀓𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀦𑀼𑀪𑀸𑀯𑁂𑀦 𑀯𑀟𑁆𑀠𑀺𑀢𑁆𑀯𑀸 𑀫𑀸𑀮𑀸𑀕𑀺𑀭𑀺𑀆𑀤𑀬𑁄 𑀧𑀩𑁆𑀩𑀢𑀸 𑀚𑀸𑀢𑀸. 𑀏𑀯𑀫𑁂𑀢𑁂 𑀬𑀜𑁆𑀜𑀓𑀸𑀭𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀸𑀢𑀺 𑀓𑀣𑁂𑀦𑁆𑀢𑀻𑀢𑀺.

𑀅𑀣 ¶ 𑀦𑀁 𑀧𑀼𑀦 𑀆𑀳 ‘‘𑀪𑀸𑀢𑀺𑀓, 𑀚𑀸𑀦𑀸𑀲𑀺 𑀧𑀦𑀸𑀬𑀁 𑀲𑀫𑀼𑀤𑁆𑀤𑁄 𑀓𑁂𑀦 𑀓𑀸𑀭𑀡𑁂𑀦 𑀅𑀧𑁂𑀬𑁆𑀬𑁄 𑀮𑁄𑀡𑁄𑀤𑀓𑁄 𑀚𑀸𑀢𑁄’’𑀢𑀺? ‘‘𑀦 𑀚𑀸𑀦𑀸𑀫𑀺, 𑀅𑀭𑀺𑀝𑁆𑀞𑀸’’𑀢𑀺. 𑀅𑀣 𑀦𑀁 ‘‘𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑁂𑀬𑁂𑀯 𑀯𑀺𑀳𑀺𑀁𑀲𑀺𑀢𑀼𑀁 𑀚𑀸𑀦𑀸𑀲𑀺, 𑀲𑀼𑀡𑁄𑀳𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁯𑁧𑁭.

‘‘𑀅𑀚𑁆𑀛𑀸𑀬𑀓𑀁 𑀫𑀦𑁆𑀢𑀕𑀼𑀡𑀽𑀧𑀧𑀦𑁆𑀦𑀁, 𑀢𑀧𑀲𑁆𑀲𑀺𑀦𑀁 ‘𑀬𑀸𑀘𑀬𑁄𑀕𑁄’𑀢𑀺𑀥𑀸𑀳𑀼;

𑀢𑀻𑀭𑁂 ¶ 𑀲𑀫𑀼𑀤𑁆𑀤𑀲𑁆𑀲𑀼𑀤𑀓𑀁 𑀲𑀚𑀦𑁆𑀢𑀁, 𑀢𑀁 𑀲𑀸𑀕𑀭𑁄𑀚𑁆𑀛𑁄𑀳𑀭𑀺 𑀢𑁂𑀦𑀸𑀧𑁂𑀬𑁆𑀬𑁄’’𑀢𑀺.

𑀢𑀢𑁆𑀣 ‘𑀬𑀸𑀘𑀬𑁄𑀕𑁄𑀢𑀺𑀥𑀸𑀳𑀽𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀬𑀸𑀘𑀬𑁄𑀕𑁄𑀢𑀺 𑀇𑀥 𑀮𑁄𑀓𑁂 𑀆𑀳𑀼. 𑀉𑀤𑀓𑀁 𑀲𑀚𑀦𑁆𑀢𑀢𑀺 𑀲𑁄 𑀓𑀺𑀭𑁂𑀓𑀤𑀺𑀯𑀲𑀁 𑀧𑀸𑀧𑀧𑀯𑀸𑀳𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀢𑀻𑀭𑁂 𑀞𑀢𑁆𑀯𑀸 𑀲𑀫𑀼𑀤𑁆𑀤𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀲𑀻𑀲𑁂 𑀲𑀚𑀦𑁆𑀢𑀁 𑀅𑀩𑁆𑀪𑀼𑀓𑀺𑀭𑀢𑀺. 𑀅𑀣 𑀦𑀁 𑀏𑀯𑀁 𑀓𑀭𑁄𑀦𑁆𑀢𑀁 𑀯𑀟𑁆𑀠𑀺𑀢𑁆𑀯𑀸 𑀲𑀸𑀕𑀭𑁄 𑀅𑀚𑁆𑀛𑁄𑀳𑀭𑀺. 𑀢𑀁 𑀓𑀸𑀭𑀡𑀁 𑀫𑀳𑀸𑀩𑁆𑀭𑀳𑁆𑀫𑀸 𑀜𑀢𑁆𑀯𑀸 ‘‘𑀇𑀫𑀺𑀦𑀸 𑀓𑀺𑀭 𑀫𑁂 𑀧𑀼𑀢𑁆𑀢𑁄 𑀳𑀢𑁄’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀲𑀫𑀼𑀤𑁆𑀤𑁄 𑀅𑀧𑁂𑀬𑁆𑀬𑁄 𑀮𑁄𑀡𑁄𑀤𑀓𑁄 𑀪𑀯𑀢𑀽’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀧𑀺, 𑀢𑁂𑀦 𑀓𑀸𑀭𑀡𑁂𑀦 𑀅𑀧𑁂𑀬𑁆𑀬𑁄 𑀚𑀸𑀢𑁄. 𑀏𑀯𑀭𑀽𑀧𑀸 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀫𑀳𑀸𑀦𑀼𑀪𑀸𑀯𑀸𑀢𑀺.

𑀧𑀼𑀦𑀧𑀺 ¶ 𑀆𑀳 𑁋

𑁯𑁧𑁮.

‘‘𑀆𑀬𑀸𑀕𑀯𑀢𑁆𑀣𑀽𑀦𑀺 𑀧𑀼𑀣𑀽 𑀧𑀣𑀩𑁆𑀬𑀸, 𑀲𑀁𑀯𑀺𑀚𑁆𑀚𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸 𑀯𑀸𑀲𑀯𑀲𑁆𑀲;

𑀧𑀼𑀭𑀺𑀫𑀁 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀤𑀓𑁆𑀔𑀺𑀡𑀼𑀢𑁆𑀢𑀭𑀁, 𑀲𑀁𑀯𑀺𑀚𑁆𑀚𑀫𑀸𑀦𑀸 𑀚𑀦𑀬𑀦𑁆𑀢𑀺 𑀯𑁂𑀤’’𑀦𑁆𑀢𑀺.

𑀢𑀢𑁆𑀣 𑀯𑀸𑀲𑀯𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀸𑀦𑀁 𑀤𑀢𑁆𑀯𑀸 𑀯𑀸𑀲𑀯𑀢𑁆𑀢𑀁 𑀧𑀢𑁆𑀢𑀲𑁆𑀲 𑀯𑀸𑀲𑀯𑀲𑁆𑀲. 𑀆𑀬𑀸𑀕𑀯𑀢𑁆𑀣𑀽𑀦𑀻𑀢𑀺 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑀸 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸 𑀧𑀣𑀩𑁆𑀬𑀸 𑀧𑀼𑀣𑀽 𑀩𑁆𑀭𑀸𑀳𑁆𑀫𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀧𑀼𑀭𑀺𑀫𑀁 𑀤𑀺𑀲𑀦𑁆𑀢𑀺 𑀢𑁂 𑀇𑀤𑀸𑀦𑀺𑀧𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀁𑀯𑀺𑀚𑁆𑀚𑀫𑀸𑀦𑀸 𑀢𑀲𑁆𑀲 𑀯𑀸𑀲𑀯𑀲𑁆𑀲 𑀫𑀳𑀦𑁆𑀢𑀁 𑀯𑁂𑀤𑀁 𑀚𑀦𑀬𑀦𑁆𑀢𑀺, 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀆𑀯𑀳𑀦𑁆𑀢𑀺.

𑀏𑀯𑀁 𑀅𑀭𑀺𑀝𑁆𑀞𑁄 𑀘𑀼𑀤𑁆𑀤𑀲𑀳𑀺 𑀕𑀸𑀣𑀸𑀳𑀺 𑀩𑁆𑀭𑀸𑀳𑁆𑀫𑀡𑁂 𑀘 𑀬𑀜𑁆𑀜𑁂 𑀘 𑀯𑁂𑀤𑁂 𑀘 𑀯𑀡𑁆𑀡𑁂𑀲𑀺.

𑀫𑀺𑀘𑁆𑀙𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀲𑁆𑀲 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀆𑀕𑀢𑀸 𑀩𑀳𑀽 𑀦𑀸𑀕𑀸 ‘‘𑀅𑀬𑀁 𑀪𑀽𑀢𑀫𑁂𑀯 𑀓𑀣𑁂𑀢𑀻’’𑀢𑀺 𑀫𑀺𑀘𑁆𑀙𑀸𑀕𑀸𑀳𑀁 𑀕𑀡𑁆𑀳𑀦𑀸𑀓𑀸𑀭𑀧𑁆𑀧𑀢𑁆𑀢𑀸 𑀚𑀸𑀢𑀸. 𑀫𑀳𑀸𑀲𑀢𑁆𑀢𑁄 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑁄𑀯 𑀢𑀁 𑀲𑀩𑁆𑀩𑀁 𑀅𑀲𑁆𑀲𑁄𑀲𑀺 ¶ . 𑀦𑀸𑀕𑀸𑀧𑀺𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀭𑀺𑀝𑁆𑀞𑁄 𑀫𑀺𑀘𑁆𑀙𑀸𑀫𑀕𑁆𑀕𑀁 𑀯𑀡𑁆𑀡𑁂𑀢𑀺, 𑀯𑀸𑀤𑀫𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀲𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀉𑀝𑁆𑀞𑀸𑀬 𑀦𑁆𑀳𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀁 𑀦𑀸𑀕𑀧𑀭𑀺𑀲𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀭𑀺𑀝𑁆𑀞, 𑀢𑁆𑀯𑀁 𑀅𑀪𑀽𑀢𑀁 𑀯𑀢𑁆𑀯𑀸 𑀯𑁂𑀤𑁂 𑀘 𑀬𑀜𑁆𑀜𑁂 𑀘 𑀩𑁆𑀭𑀸𑀳𑁆𑀫𑀡𑁂 𑀘 𑀯𑀡𑁆𑀡𑁂𑀲𑀺, 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀳𑀺 𑀯𑁂𑀤𑀯𑀺𑀥𑀸𑀦𑁂𑀦 𑀬𑀜𑁆𑀜𑀬𑀚𑀦𑀁 𑀦𑀸𑀫 𑀅𑀦𑀭𑀺𑀬𑀲𑀫𑁆𑀫𑀢𑀁 𑀦 𑀲𑀕𑁆𑀕𑀸𑀯𑀳𑀁, 𑀢𑀯 𑀯𑀸𑀤𑁂 𑀅𑀪𑀽𑀢𑀁 𑀧𑀲𑁆𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀬𑀜𑁆𑀜𑀪𑁂𑀤𑀯𑀸𑀤𑀁 𑀦𑀸𑀫 𑀆𑀭𑀪𑀦𑁆𑀢𑁄 𑀆𑀳 𑁋

𑁯𑁧𑁯.

‘‘𑀓𑀮𑀻 ¶ 𑀳𑀺 𑀥𑀻𑀭𑀸𑀦 𑀓𑀝𑀁 𑀫𑀕𑀸𑀦𑀁, 𑀪𑀯𑀦𑁆𑀢𑀺 𑀯𑁂𑀤𑀚𑁆𑀛𑀕𑀢𑀸𑀦𑀭𑀺𑀝𑁆𑀞;

𑀫𑀭𑀻𑀘𑀺𑀥𑀫𑁆𑀫𑀁 𑀅𑀲𑀫𑁂𑀓𑁆𑀔𑀺𑀢𑀢𑁆𑀢𑀸, 𑀫𑀸𑀬𑀸𑀕𑀼𑀡𑀸 𑀦𑀸𑀢𑀺𑀯𑀳𑀦𑁆𑀢𑀺 𑀧𑀜𑁆𑀜𑀁.

𑁯𑁨𑁦.

‘‘𑀯𑁂𑀤𑀸 ¶ 𑀦 𑀢𑀸𑀡𑀸𑀬 𑀪𑀯𑀦𑁆𑀢𑀺 𑀤𑀲𑁆𑀲, 𑀫𑀺𑀢𑁆𑀢𑀤𑁆𑀤𑀼𑀦𑁄 𑀪𑀽𑀦𑀳𑀼𑀦𑁄 𑀦𑀭𑀲𑁆𑀲;

𑀦 𑀢𑀸𑀬𑀢𑁂 𑀧𑀭𑀺𑀘𑀺𑀡𑁆𑀡𑁄 𑀘 𑀅𑀕𑁆𑀕𑀺, 𑀤𑁄𑀲𑀦𑁆𑀢𑀭𑀁 𑀫𑀘𑁆𑀘𑀫𑀦𑀭𑀺𑀬𑀓𑀫𑁆𑀫𑀁.

𑁯𑁨𑁧.

‘‘𑀲𑀩𑁆𑀩𑀜𑁆𑀘 𑀫𑀘𑁆𑀘𑀸 𑀲𑀥𑀦𑀁 𑀲𑀪𑁄𑀕𑀁, 𑀆𑀤𑀻𑀧𑀺𑀢𑀁 𑀤𑀸𑀭𑀼 𑀢𑀺𑀡𑁂𑀦 𑀫𑀺𑀲𑁆𑀲𑀁;

𑀤𑀳𑀁 𑀦 𑀢𑀧𑁆𑀧𑁂 𑀅𑀲𑀫𑀢𑁆𑀣𑀢𑁂𑀚𑁄, 𑀓𑁄 𑀢𑀁 𑀲𑀼𑀪𑀺𑀓𑁆𑀔𑀁 𑀤𑁆𑀯𑀺𑀭𑀲𑀜𑁆𑀜𑀼 𑀓𑀬𑀺𑀭𑀸.

𑁯𑁨𑁨.

‘‘𑀬𑀣𑀸𑀧𑀺 𑀔𑀻𑀭𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀤𑀥𑀺 𑀪𑀯𑀺𑀢𑁆𑀯𑀸 𑀦𑀯𑀦𑀻𑀢𑀫𑁆𑀧𑀺 𑀳𑁄𑀢𑀺;

𑀏𑀯𑀫𑁆𑀧𑀺 𑀅𑀕𑁆𑀕𑀺 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀢𑁂𑀚𑁄 𑀲𑀫𑁄𑀭𑁄𑀳𑀢𑀻 𑀬𑁄𑀕𑀬𑀼𑀢𑁆𑀢𑁄.

𑁯𑁨𑁩.

‘‘𑀦 𑀤𑀺𑀲𑁆𑀲𑀢𑀻 𑀅𑀕𑁆𑀕𑀺 𑀫𑀦𑀼𑀧𑁆𑀧𑀯𑀺𑀝𑁆𑀞𑁄, 𑀲𑀼𑀓𑁆𑀔𑁂𑀲𑀼 𑀓𑀝𑁆𑀞𑁂𑀲𑀼 𑀦𑀯𑁂𑀲𑀼 𑀘𑀸𑀧𑀺;

𑀦𑀸𑀫𑀢𑁆𑀣𑀫𑀸𑀦𑁄 𑀅𑀭𑀡𑀻𑀦𑀭𑁂𑀦, 𑀦𑀸𑀓𑀫𑁆𑀫𑀼𑀦𑀸 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄.

𑁯𑁨𑁪.

‘‘𑀲𑀘𑁂 𑀳𑀺 𑀅𑀕𑁆𑀕𑀺 𑀅𑀦𑁆𑀢𑀭𑀢𑁄 𑀯𑀲𑁂𑀬𑁆𑀬, 𑀲𑀼𑀓𑁆𑀔𑁂𑀲𑀼 𑀓𑀝𑁆𑀞𑁂𑀲𑀼 𑀦𑀯𑁂𑀲𑀼 𑀘𑀸𑀧𑀺;

𑀲𑀩𑁆𑀩𑀸𑀦𑀺 𑀲𑀼𑀲𑁆𑀲𑁂𑀬𑁆𑀬𑀼 𑀯𑀦𑀸𑀦𑀺 𑀮𑁄𑀓𑁂, 𑀲𑀼𑀓𑁆𑀔𑀸𑀦𑀺 𑀓𑀝𑁆𑀞𑀸𑀦𑀺 𑀘 𑀧𑀚𑁆𑀚𑀮𑁂𑀬𑁆𑀬𑀼𑀁.

𑁯𑁨𑁫.

‘‘𑀓𑀭𑁄𑀢𑀺 𑀘𑁂 𑀤𑀸𑀭𑀼𑀢𑀺𑀡𑁂𑀦 𑀧𑀼𑀜𑁆𑀜𑀁, 𑀪𑁄𑀚𑀁 𑀦𑀭𑁄 𑀥𑀽𑀫𑀲𑀺𑀔𑀺𑀁 𑀧𑀢𑀸𑀧𑀯𑀁;

𑀅𑀗𑁆𑀕𑀸𑀭𑀺𑀓𑀸 𑀮𑁄𑀡𑀓𑀭𑀸 𑀘 𑀲𑀽𑀤𑀸, 𑀲𑀭𑀻𑀭𑀤𑀸𑀳𑀸𑀧𑀺 𑀓𑀭𑁂𑀬𑁆𑀬𑀼 𑀧𑀼𑀜𑁆𑀜𑀁.

𑁯𑁨𑁬.

‘‘𑀅𑀣 ¶ 𑀘𑁂 𑀳𑀺 𑀏𑀢𑁂 𑀦 𑀓𑀭𑁄𑀦𑁆𑀢𑀺 𑀧𑀼𑀜𑁆𑀜𑀁, 𑀅𑀚𑁆𑀛𑁂𑀦𑀫𑀕𑁆𑀕𑀺𑀁 𑀇𑀥 𑀢𑀧𑁆𑀧𑀬𑀺𑀢𑁆𑀯𑀸;

𑀦 𑀓𑁄𑀘𑀺 𑀮𑁄𑀓𑀲𑁆𑀫𑀺𑀁 𑀓𑀭𑁄𑀢𑀺 𑀧𑀼𑀜𑁆𑀜𑀁, 𑀪𑁄𑀚𑀁 𑀦𑀭𑁄 𑀥𑀽𑀫𑀲𑀺𑀔𑀺𑀁 𑀧𑀢𑀸𑀧𑀯𑀁.

𑁯𑁨𑁭.

‘‘𑀓𑀣𑀜𑁆𑀳𑀺 ¶ ¶ 𑀮𑁄𑀓𑀸𑀧𑀘𑀺𑀢𑁄 𑀲𑀫𑀸𑀦𑁄, 𑀅𑀫𑀦𑀼𑀜𑁆𑀜𑀕𑀦𑁆𑀥𑀁 𑀩𑀳𑀽𑀦𑀁 𑀅𑀓𑀦𑁆𑀢𑀁;

𑀬𑀤𑁂𑀯 𑀫𑀘𑁆𑀘𑀸 𑀧𑀭𑀺𑀯𑀚𑁆𑀚𑀬𑀦𑁆𑀢𑀺, 𑀢𑀤𑀧𑁆𑀧𑀲𑀢𑁆𑀣𑀁 𑀤𑁆𑀯𑀺𑀭𑀲𑀜𑁆𑀜𑀼 𑀪𑀼𑀜𑁆𑀚𑁂.

𑁯𑁨𑁮.

‘‘𑀲𑀺𑀔𑀺𑀫𑁆𑀧𑀺 𑀤𑁂𑀯𑁂𑀲𑀼 𑀯𑀤𑀦𑁆𑀢𑀺 𑀳𑁂𑀓𑁂, 𑀆𑀧𑀁 𑀫𑀺𑀮𑀓𑁆𑀔𑀽 𑀧𑀦 𑀤𑁂𑀯𑀫𑀸𑀳𑀼;

𑀲𑀩𑁆𑀩𑁂𑀯 𑀏𑀢𑁂 𑀯𑀺𑀢𑀣𑀁 𑀪𑀡𑀦𑁆𑀢𑀺, 𑀅𑀕𑁆𑀕𑀻 𑀦 𑀤𑁂𑀯𑀜𑁆𑀜𑀢𑀭𑁄 𑀦 𑀘𑀸𑀧𑁄.

𑁯𑁨𑁯.

‘‘𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑀲𑀜𑁆𑀜𑀓𑀸𑀬𑀁, 𑀯𑁂𑀲𑁆𑀲𑀸𑀦𑀭𑀁 𑀓𑀫𑁆𑀫𑀓𑀭𑀁 𑀧𑀚𑀸𑀦𑀁;

𑀧𑀭𑀺𑀘𑀭𑀺𑀬 𑀫𑀕𑁆𑀕𑀺𑀁 𑀲𑀼𑀕𑀢𑀺𑀁 𑀓𑀣𑀁 𑀯𑀚𑁂, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄.

𑁯𑁩𑁦.

‘‘𑀲𑀩𑁆𑀩𑀸𑀪𑀺𑀪𑀽 𑀢𑀸𑀳𑀼𑀥 𑀚𑀻𑀯𑀺𑀓𑀢𑁆𑀣𑀸, 𑀅𑀕𑁆𑀕𑀺𑀲𑁆𑀲 𑀩𑁆𑀭𑀳𑁆𑀫𑀸 𑀧𑀭𑀺𑀘𑀸𑀭𑀺𑀓𑁄𑀢𑀺;

𑀲𑀩𑁆𑀩𑀸𑀦𑀼𑀪𑀸𑀯𑀻 𑀘 𑀯𑀲𑀻 𑀓𑀺𑀫𑀢𑁆𑀣𑀁, 𑀅𑀦𑀺𑀫𑁆𑀫𑀺𑀢𑁄 𑀦𑀺𑀫𑁆𑀫𑀺𑀢𑀁 𑀯𑀦𑁆𑀤𑀺𑀢𑀲𑁆𑀲.

𑁯𑁩𑁧.

‘‘𑀳𑀲𑁆𑀲𑀁 𑀅𑀦𑀺𑀚𑁆𑀛𑀸𑀦𑀓𑁆𑀔𑀫𑀁 𑀅𑀢𑀘𑁆𑀙𑀁, 𑀲𑀓𑁆𑀓𑀸𑀭𑀳𑁂𑀢𑀼 𑀧𑀓𑀺𑀭𑀺𑀁𑀲𑀼 𑀧𑀼𑀩𑁆𑀩𑁂;

𑀢𑁂 𑀮𑀸𑀪𑀲𑀓𑁆𑀓𑀸𑀭𑁂 𑀅𑀧𑀸𑀢𑀼𑀪𑁄𑀦𑁆𑀢𑁂, 𑀲𑀦𑁆𑀥𑀸𑀧𑀺𑀢𑀸 𑀚𑀦𑁆𑀢𑀼𑀪𑀺 𑀲𑀦𑁆𑀢𑀺𑀥𑀫𑁆𑀫𑀁.

𑁯𑁩𑁨.

‘‘𑀅𑀚𑁆𑀛𑁂𑀦𑀫𑀭𑀺𑀬𑀸 𑀧𑀣𑀯𑀺𑀁 𑀚𑀦𑀺𑀦𑁆𑀤𑀸, 𑀯𑁂𑀲𑁆𑀲𑀸 𑀓𑀲𑀺𑀁 𑀧𑀸𑀭𑀺𑀘𑀭𑀺𑀬𑀜𑁆𑀘 𑀲𑀼𑀤𑁆𑀤𑀸;

𑀉𑀧𑀸𑀕𑀼 𑀧𑀘𑁆𑀘𑁂𑀓𑀁 𑀬𑀣𑀸𑀧𑀤𑁂𑀲𑀁, 𑀓𑀢𑀸𑀳𑀼 𑀏𑀢𑁂 𑀯𑀲𑀺𑀦𑀸𑀢𑀺 𑀆𑀳𑀼.

𑁯𑁩𑁩.

‘‘𑀏𑀢𑀜𑁆𑀘 ¶ 𑀲𑀘𑁆𑀘𑀁 𑀯𑀘𑀦𑀁 𑀪𑀯𑁂𑀬𑁆𑀬, 𑀬𑀣𑀸 𑀇𑀤𑀁 𑀪𑀸𑀲𑀺𑀢𑀁 𑀩𑁆𑀭𑀸𑀳𑁆𑀫𑀡𑁂𑀳𑀺;

𑀦𑀸𑀔𑀢𑁆𑀢𑀺𑀬𑁄 𑀚𑀸𑀢𑀼 𑀮𑀪𑁂𑀣 𑀭𑀚𑁆𑀚𑀁, 𑀦𑀸𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀤𑀸𑀦𑀺 𑀲𑀺𑀓𑁆𑀔𑁂;

𑀦𑀸𑀜𑁆𑀜𑀢𑁆𑀭 𑀯𑁂𑀲𑁆𑀲𑁂𑀳𑀺 𑀓𑀲𑀺𑀁 𑀓𑀭𑁂𑀬𑁆𑀬, 𑀲𑀼𑀤𑁆𑀤𑁄 𑀦 𑀫𑀼𑀘𑁆𑀘𑁂 𑀧𑀭𑀧𑁂𑀲𑀦𑀸𑀬.

𑁯𑁩𑁪.

‘‘𑀬𑀲𑁆𑀫𑀸 ¶ 𑀘 𑀏𑀢𑀁 𑀯𑀘𑀦𑀁 𑀅𑀪𑀽𑀢𑀁, 𑀫𑀼𑀲𑀸𑀯𑀺𑀫𑁂 𑀑𑀤𑀭𑀺𑀬𑀸 𑀪𑀡𑀦𑁆𑀢𑀺;

𑀢𑀤𑀧𑁆𑀧𑀧𑀜𑁆𑀜𑀸 𑀅𑀪𑀺𑀲𑀤𑁆𑀤𑀳𑀦𑁆𑀢𑀺, 𑀧𑀲𑁆𑀲𑀦𑁆𑀢𑀺 𑀢𑀁 𑀧𑀡𑁆𑀟𑀺𑀢𑀸 𑀅𑀢𑁆𑀢𑀦𑀸𑀯.

𑁯𑁩𑁫.

‘‘𑀔𑀢𑁆𑀬𑀸 𑀳𑀺 𑀯𑁂𑀲𑁆𑀲𑀸𑀦𑀁 𑀩𑀮𑀺𑀁 𑀳𑀭𑀦𑁆𑀢𑀺, 𑀆𑀤𑀸𑀬 𑀲𑀢𑁆𑀣𑀸𑀦𑀺 𑀘𑀭𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀢𑀁 𑀢𑀸𑀤𑀺𑀲𑀁 𑀲𑀗𑁆𑀔𑀼𑀪𑀺𑀢𑀁 𑀧𑀪𑀺𑀦𑁆𑀦𑀁, 𑀓𑀲𑁆𑀫𑀸 𑀩𑁆𑀭𑀳𑁆𑀫𑀸 𑀦𑀼𑀚𑁆𑀚𑀼 𑀓𑀭𑁄𑀢𑀺 𑀮𑁄𑀓𑀁.

𑁯𑁩𑁬.

‘‘𑀲𑀘𑁂 𑀳𑀺 𑀲𑁄 𑀇𑀲𑁆𑀲𑀭𑁄 𑀲𑀩𑁆𑀩𑀮𑁄𑀓𑁂, 𑀩𑁆𑀭𑀳𑁆𑀫𑀸 𑀩𑀳𑀽𑀪𑀽𑀢𑀧𑀢𑀻 𑀧𑀚𑀸𑀦𑀁;

𑀓𑀺𑀁 𑀲𑀩𑁆𑀩𑀮𑁄𑀓𑀁 𑀯𑀺𑀤𑀳𑀻 𑀅𑀮𑀓𑁆𑀔𑀺𑀁, 𑀓𑀺𑀁 𑀲𑀩𑁆𑀩𑀮𑁄𑀓𑀁 𑀦 𑀲𑀼𑀔𑀺𑀁 𑀅𑀓𑀸𑀲𑀺.

𑁯𑁩𑁭.

‘‘𑀲𑀘𑁂 ¶ 𑀳𑀺 𑀲𑁄 𑀇𑀲𑁆𑀲𑀭𑁄 𑀲𑀩𑁆𑀩𑀮𑁄𑀓𑁂, 𑀩𑁆𑀭𑀳𑁆𑀫𑀸 𑀩𑀳𑀽𑀪𑀽𑀢𑀧𑀢𑀻 𑀧𑀚𑀸𑀦𑀁;

𑀫𑀸𑀬𑀸 𑀫𑀼𑀲𑀸𑀯𑀚𑁆𑀚𑀫𑀤𑁂𑀦 𑀘𑀸𑀧𑀺, 𑀮𑁄𑀓𑀁 𑀅𑀥𑀫𑁆𑀫𑁂𑀦 𑀓𑀺𑀫𑀢𑁆𑀣𑀫𑀓𑀸𑀭𑀺.

𑁯𑁩𑁮.

‘‘𑀲𑀘𑁂 𑀳𑀺 𑀲𑁄 𑀇𑀲𑁆𑀲𑀭𑁄 𑀲𑀩𑁆𑀩𑀮𑁄𑀓𑁂, 𑀩𑁆𑀭𑀳𑁆𑀫𑀸 𑀩𑀳𑀽𑀪𑀽𑀢𑀧𑀢𑀻 𑀧𑀚𑀸𑀦𑀁;

𑀅𑀥𑀫𑁆𑀫𑀺𑀓𑁄 𑀪𑀽𑀢𑀧𑀢𑀻 𑀅𑀭𑀺𑀝𑁆𑀞, 𑀥𑀫𑁆𑀫𑁂 𑀲𑀢𑀺 𑀬𑁄 𑀯𑀺𑀤𑀳𑀻 𑀅𑀥𑀫𑁆𑀫𑀁.

𑁯𑁩𑁯.

‘‘𑀓𑀻𑀝𑀸 𑀧𑀝𑀗𑁆𑀕𑀸 𑀉𑀭𑀕𑀸 𑀘 𑀪𑁂𑀓𑀸, 𑀕𑀦𑁆𑀢𑁆𑀯𑀸 𑀓𑀺𑀫𑀻 𑀲𑀼𑀚𑁆𑀛𑀢𑀺 𑀫𑀓𑁆𑀔𑀺𑀓𑀸 𑀘;

𑀏𑀢𑁂𑀧𑀺 𑀥𑀫𑁆𑀫𑀸 𑀅𑀦𑀭𑀺𑀬𑀭𑀽𑀧𑀸, 𑀓𑀫𑁆𑀩𑁄𑀚𑀓𑀸𑀦𑀁 𑀯𑀺𑀢𑀣𑀸 𑀩𑀳𑀽𑀦’’𑀦𑁆𑀢𑀺.

𑀢𑀢𑁆𑀣 ¶ 𑀯𑁂𑀤𑀚𑁆𑀛𑀕𑀢𑀸𑀦𑀭𑀺𑀝𑁆𑀞𑀸𑀢𑀺 𑀅𑀭𑀺𑀝𑁆𑀞, 𑀇𑀫𑀸𑀦𑀺 𑀯𑁂𑀤𑀸𑀥𑀺𑀕𑀫𑀦𑀸𑀦𑀺 𑀦𑀸𑀫 𑀥𑀻𑀭𑀸𑀦𑀁 𑀧𑀭𑀸𑀚𑀬𑀲𑀗𑁆𑀔𑀸𑀢𑁄 𑀓𑀮𑀺𑀕𑁆𑀕𑀸𑀳𑁄, 𑀫𑀕𑀸𑀦𑀁 𑀩𑀸𑀮𑀸𑀦𑀁 𑀚𑀬𑀲𑀗𑁆𑀔𑀸𑀢𑁄 𑀓𑀝𑀕𑁆𑀕𑀸𑀳𑁄. 𑀫𑀭𑀻𑀘𑀺𑀥𑀫𑁆𑀫𑀦𑁆𑀢𑀺 𑀇𑀤𑀜𑁆𑀳𑀺 𑀯𑁂𑀤𑀢𑁆𑀢𑀬𑀁 𑀫𑀭𑀻𑀘𑀺𑀥𑀫𑁆𑀫𑀁. 𑀢𑀬𑀺𑀤𑀁 𑀅𑀲𑀫𑁂𑀓𑁆𑀔𑀺𑀢𑀢𑁆𑀢𑀸 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 ¶ 𑀅𑀚𑀸𑀦𑀦𑁆𑀢𑀸 𑀩𑀸𑀮𑀸 𑀉𑀤𑀓𑀲𑀜𑁆𑀜𑀸𑀬 𑀫𑀕𑀸 𑀫𑀭𑀻𑀘𑀺𑀁 𑀯𑀺𑀬 𑀪𑀽𑀢𑀲𑀜𑁆𑀜𑀸𑀬 𑀅𑀦𑀯𑀚𑁆𑀚𑀲𑀜𑁆𑀜𑀸𑀬 𑀅𑀢𑁆𑀢𑀦𑁄 𑀯𑀺𑀦𑀸𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀧𑀜𑁆𑀜𑀦𑁆𑀢𑀺 𑀏𑀯𑀭𑀽𑀧𑀸 𑀧𑀦 𑀫𑀸𑀬𑀸𑀓𑁄𑀝𑁆𑀞𑀸𑀲𑀸 𑀧𑀜𑁆𑀜𑀁 𑀜𑀸𑀡𑀲𑀫𑁆𑀧𑀦𑁆𑀦𑀁 𑀧𑀼𑀭𑀺𑀲𑀁 𑀦𑀸𑀢𑀺𑀯𑀳𑀦𑁆𑀢𑀺 𑀦 𑀯𑀜𑁆𑀘𑁂𑀦𑁆𑀢𑀺. 𑀪𑀯𑀦𑁆𑀢𑀺 𑀤𑀲𑁆𑀲𑀸𑀢𑀺 𑀤-𑀓𑀸𑀭𑁄 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀫𑀢𑁆𑀢𑀁, 𑀅𑀲𑁆𑀲 𑀪𑀽𑀦𑀳𑀼𑀦𑁄 𑀯𑀼𑀟𑁆𑀠𑀺𑀖𑀸𑀢𑀓𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑁄 𑀦𑀭𑀲𑁆𑀲 𑀯𑁂𑀤𑀸 𑀦 𑀢𑀸𑀡𑀢𑁆𑀣𑀸𑀬 𑀪𑀯𑀦𑁆𑀢𑀺, 𑀧𑀢𑀺𑀝𑁆𑀞𑀸 𑀳𑁄𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀘𑀺𑀡𑁆𑀡𑁄 𑀘 𑀅𑀕𑁆𑀕𑀻𑀢𑀺 𑀅𑀕𑁆𑀕𑀺 𑀘 𑀧𑀭𑀺𑀘𑀺𑀡𑁆𑀡𑁄 𑀢𑀺𑀯𑀺𑀥𑁂𑀦 𑀤𑀼𑀘𑁆𑀘𑀭𑀺𑀢𑀤𑁄𑀲𑁂𑀦 𑀲𑀤𑁄𑀲𑀘𑀺𑀢𑁆𑀢𑀁 𑀧𑀸𑀧𑀓𑀫𑁆𑀫𑀁 𑀧𑀼𑀭𑀺𑀲𑀁 𑀦 𑀢𑀸𑀬𑀢𑀺 𑀦 𑀭𑀓𑁆𑀔𑀢𑀺.

𑀲𑀩𑁆𑀩𑀜𑁆𑀘 𑀫𑀘𑁆𑀘𑀸𑀢𑀺 𑀲𑀘𑁂𑀧𑀺 𑀳𑀺 𑀫𑀘𑁆𑀘𑀸 𑀬𑀢𑁆𑀢𑀓𑀁 𑀮𑁄𑀓𑁂 𑀤𑀸𑀭𑀼 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀲𑀥𑀦𑀁 𑀲𑀪𑁄𑀕𑀁 𑀅𑀢𑁆𑀢𑀦𑁄 𑀥𑀦𑁂𑀦 𑀘 𑀪𑁄𑀕𑁂𑀳𑀺 𑀘 𑀲𑀤𑁆𑀥𑀺𑀁 𑀢𑀺𑀡𑁂𑀦 𑀫𑀺𑀲𑁆𑀲𑀁 𑀓𑀢𑁆𑀯𑀸 𑀆𑀤𑀻𑀧𑁂𑀬𑁆𑀬𑀼𑀁. 𑀏𑀯𑀁 𑀲𑀩𑁆𑀩𑀫𑁆𑀧𑀺 𑀢𑀁 𑀢𑁂𑀳𑀺 𑀆𑀤𑀻𑀧𑀺𑀢𑀁 𑀤𑀳𑀦𑁆𑀢𑁄 𑀅𑀬𑀁 𑀅𑀲𑀫𑀢𑁆𑀣𑀢𑁂𑀚𑁄 𑀅𑀲𑀤𑀺𑀲𑀢𑁂𑀚𑁄 𑀢𑀯 𑀅𑀕𑁆𑀕𑀺 𑀦 𑀢𑀧𑁆𑀧𑁂𑀬𑁆𑀬. 𑀏𑀯𑀁 𑀅𑀢𑀧𑁆𑀧𑀦𑀻𑀬𑀁, 𑀪𑀸𑀢𑀺𑀓, 𑀤𑁆𑀯𑀺𑀭𑀲𑀜𑁆𑀜𑀼 𑀤𑁆𑀯𑀻𑀳𑀺 𑀚𑀺𑀯𑁆𑀳𑀸𑀳𑀺 𑀭𑀲𑀚𑀸𑀦𑀦𑀲𑀫𑀢𑁆𑀣𑁄 𑀓𑁄 𑀢𑀁 𑀲𑀧𑁆𑀧𑀺𑀆𑀤𑀻𑀳𑀺 𑀲𑀼𑀪𑀺𑀓𑁆𑀔𑀁 𑀲𑀼𑀳𑀻𑀢𑀁 𑀓𑀬𑀺𑀭𑀸, 𑀓𑁄 𑀲𑀓𑁆𑀓𑀼𑀡𑁂𑀬𑁆𑀬 𑀓𑀸𑀢𑀼𑀁. 𑀏𑀯𑀁 𑀅𑀢𑀺𑀢𑁆𑀢𑀁 𑀧𑀦𑁂𑀢𑀁 𑀫𑀳𑀕𑁆𑀖𑀲𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀓𑁄 𑀦𑀸𑀫 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺, 𑀧𑀲𑁆𑀲 𑀬𑀸𑀯𑀜𑁆𑀘𑁂𑀢𑀁 𑀤𑀼𑀓𑁆𑀓𑀣𑀺𑀢𑀦𑁆𑀢𑀺. 𑀬𑁄𑀕𑀬𑀼𑀢𑁆𑀢𑁄𑀢𑀺 𑀅𑀭𑀡𑀺𑀫𑀣𑀦𑀬𑁄𑀕𑁂𑀦 𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸𑀯 𑀅𑀕𑁆𑀕𑀺 𑀲𑀫𑁄𑀭𑁄𑀳𑀢𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀏𑀯𑀁 𑀧𑀭𑀯𑀸𑀬𑀸𑀫𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀘𑁂𑀢𑀦𑀁 𑀢𑀁 𑀢𑁆𑀯𑀁 ‘‘𑀤𑁂𑀯𑁄’’𑀢𑀺 𑀯𑀤𑁂𑀲𑀺. 𑀇𑀤𑀫𑁆𑀧𑀺 𑀅𑀪𑀽𑀢𑀫𑁂𑀯 𑀓𑀣𑁂𑀲𑀻𑀢𑀺.

𑀅𑀕𑁆𑀕𑀺 𑀫𑀦𑀼𑀧𑁆𑀧𑀯𑀺𑀝𑁆𑀞𑁄𑀢𑀺 𑀅𑀕𑁆𑀕𑀺 𑀅𑀦𑀼𑀧𑀯𑀺𑀝𑁆𑀞𑁄. 𑀦𑀸𑀫𑀢𑁆𑀣𑀫𑀸𑀦𑁄𑀢𑀺 𑀦𑀸𑀧𑀺 𑀅𑀭𑀡𑀺𑀳𑀢𑁆𑀣𑁂𑀦 𑀦𑀭𑁂𑀦 𑀅𑀫𑀢𑁆𑀣𑀺𑀬𑀫𑀸𑀦𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀦𑀸𑀓𑀫𑁆𑀫𑀼𑀦𑀸 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄𑀢𑀺 𑀏𑀓𑀲𑁆𑀲 𑀓𑀺𑀭𑀺𑀬𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀦 𑀚𑀸𑀬𑀢𑀺. 𑀲𑀼𑀲𑁆𑀲𑁂𑀬𑁆𑀬𑀼𑀦𑁆𑀢𑀺 𑀅𑀦𑁆𑀢𑁄 𑀅𑀕𑁆𑀕𑀺𑀦𑀸 𑀲𑁄𑀲𑀺𑀬𑀫𑀸𑀦𑀸𑀦𑀺 𑀯𑀦𑀸𑀦𑀺 𑀲𑀼𑀓𑁆𑀔𑁂𑀬𑁆𑀬𑀼𑀁, 𑀅𑀮𑁆𑀮𑀸𑀦𑁂𑀯 ¶ 𑀦 𑀲𑀺𑀬𑀼𑀁. 𑀪𑁄𑀚𑀦𑁆𑀢𑀺 𑀪𑁄𑀚𑁂𑀦𑁆𑀢𑁄. 𑀥𑀽𑀫𑀲𑀺𑀔𑀺𑀁 𑀧𑀢𑀸𑀧𑀯𑀦𑁆𑀢𑀺 𑀥𑀽𑀫𑀲𑀺𑀔𑀸𑀬 𑀬𑀼𑀢𑁆𑀢𑀁 𑀧𑀢𑀸𑀧𑀯𑀦𑁆𑀢𑀁. 𑀅𑀗𑁆𑀕𑀸𑀭𑀺𑀓𑀸𑀢𑀺 𑀅𑀗𑁆𑀕𑀸𑀭𑀓𑀫𑁆𑀫𑀓𑀭𑀸. 𑀮𑁄𑀡𑀓𑀭𑀸𑀢𑀺 𑀮𑁄𑀡𑁄𑀤𑀓𑀁 𑀧𑀘𑀺𑀢𑁆𑀯𑀸 𑀮𑁄𑀡𑀓𑀸𑀭𑀓𑀸. 𑀲𑀽𑀤𑀸𑀢𑀺 𑀪𑀢𑁆𑀢𑀓𑀸𑀭𑀓𑀸. 𑀲𑀭𑀻𑀭𑀤𑀸𑀳𑀸𑀢𑀺 𑀫𑀢𑀲𑀭𑀻𑀭𑀚𑁆𑀛𑀸𑀧𑀓𑀸. 𑀧𑀼𑀜𑁆𑀜𑀦𑁆𑀢𑀺 𑀏𑀢𑁂𑀧𑀺 𑀲𑀩𑁆𑀩𑁂 𑀧𑀼𑀜𑁆𑀜𑀫𑁂𑀯 𑀓𑀭𑁂𑀬𑁆𑀬𑀼𑀁.

𑀅𑀚𑁆𑀛𑁂𑀦𑀫𑀕𑁆𑀕𑀺𑀦𑁆𑀢𑀺 𑀅𑀚𑁆𑀛𑁂𑀦𑀅𑀕𑁆𑀕𑀺𑀁. 𑀦 𑀓𑁄𑀘𑀻𑀢𑀺 𑀫𑀦𑁆𑀢𑀚𑁆𑀛𑀸𑀬𑀓𑀸 𑀩𑁆𑀭𑀸𑀳𑁆𑀫𑀡𑀸𑀧𑀺 𑀳𑁄𑀦𑁆𑀢𑀼, 𑀓𑁄𑀘𑀺 𑀦𑀭𑁄 𑀥𑀽𑀫𑀲𑀺𑀔𑀺𑀁 𑀧𑀢𑀸𑀧𑀯𑀦𑁆𑀢𑀁 𑀅𑀕𑁆𑀕𑀺𑀁 𑀪𑁄𑀚𑁂𑀦𑁆𑀢𑁄 𑀢𑀧𑁆𑀧𑀬𑀺𑀢𑁆𑀯𑀸𑀧𑀺 𑀧𑀼𑀜𑁆𑀜𑀁 ¶ 𑀦 𑀓𑀭𑁄𑀢𑀺 𑀦𑀸𑀫. 𑀮𑁄𑀓𑀸𑀧𑀘𑀺𑀢𑁄 𑀲𑀫𑀸𑀦𑁄𑀢𑀺 𑀢𑀯 𑀤𑁂𑀯𑁄𑀮𑁄𑀓𑀲𑁆𑀲 𑀅𑀧𑀘𑀺𑀢𑁄 𑀧𑀽𑀚𑀺𑀢𑁄 𑀲𑀫𑀸𑀦𑁄. 𑀬𑀤𑁂𑀯𑀸𑀢𑀺 𑀬𑀁 𑀅𑀳𑀺𑀓𑀼𑀡𑀧𑀸𑀤𑀺𑀁 𑀧𑀝𑀺𑀓𑀼𑀮𑀁 𑀚𑁂𑀕𑀼𑀘𑁆𑀙𑀁 𑀫𑀘𑁆𑀘𑀸 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑁂𑀦𑁆𑀢𑀺. 𑀢𑀤𑀧𑁆𑀧𑀲𑀢𑁆𑀣𑀦𑁆𑀢𑀺 𑀢𑀁 𑀅𑀧𑁆𑀧𑀲𑀢𑁆𑀣𑀁, 𑀲𑀫𑁆𑀫, 𑀤𑁆𑀯𑀺𑀭𑀲𑀜𑁆𑀜𑀼 𑀓𑀣𑀁 𑀓𑁂𑀦 𑀓𑀸𑀭𑀡𑁂𑀦 𑀧𑀭𑀺𑀪𑀼𑀜𑁆𑀚𑁂𑀬𑁆𑀬. 𑀤𑁂𑀯𑁂𑀲𑀽𑀢𑀺 𑀏𑀓𑁂 𑀫𑀦𑀼𑀲𑁆𑀲𑀸 𑀲𑀺𑀔𑀺𑀫𑁆𑀧𑀺 𑀤𑁂𑀯𑁂𑀲𑀼 𑀅𑀜𑁆𑀜𑀢𑀭𑀁 𑀤𑁂𑀯𑀁 𑀯𑀤𑀦𑁆𑀢𑀺. 𑀫𑀺𑀮𑀓𑁆𑀔𑀽 𑀧𑀦𑀸𑀢𑀺 𑀅𑀜𑁆𑀜𑀸𑀡𑀸 𑀧𑀦 𑀫𑀺𑀮𑀓𑁆𑀔𑀽 𑀉𑀤𑀓𑀁 ‘‘𑀤𑁂𑀯𑁄’’𑀢𑀺 𑀯𑀤𑀦𑁆𑀢𑀺. 𑀅𑀲𑀜𑁆𑀜𑀓𑀸𑀬𑀦𑁆𑀢𑀺 ¶ 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀅𑀘𑀺𑀢𑁆𑀢𑀓𑀸𑀬𑀜𑁆𑀘 𑀲𑀫𑀸𑀦𑀁 𑀏𑀢𑀁 𑀅𑀘𑁂𑀢𑀦𑀁 𑀧𑀚𑀸𑀦𑀁 𑀧𑀘𑀦𑀸𑀤𑀺𑀓𑀫𑁆𑀫𑀓𑀭𑀁 𑀯𑁂𑀲𑁆𑀲𑀸𑀦𑀭𑀁 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀮𑁄𑀓𑁄 𑀓𑀣𑀁 𑀲𑀼𑀕𑀢𑀺𑀁 𑀕𑀫𑀺𑀲𑁆𑀲𑀢𑀺. 𑀇𑀤𑀁 𑀢𑁂 𑀅𑀢𑀺𑀯𑀺𑀬 𑀤𑀼𑀓𑁆𑀓𑀣𑀺𑀢𑀁.

𑀲𑀩𑁆𑀩𑀸𑀪𑀺 𑀪𑀽𑀢𑀸𑀳𑀼𑀥 𑀚𑀻𑀯𑀺𑀓𑀢𑁆𑀣𑀸𑀢𑀺 𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀚𑀻𑀯𑀺𑀓𑀢𑁆𑀣𑀁 𑀫𑀳𑀸𑀩𑁆𑀭𑀳𑁆𑀫𑀸 𑀲𑀩𑁆𑀩𑀸𑀪𑀺𑀪𑀽𑀢𑀺 𑀆𑀳𑀁𑀲𑀼, 𑀲𑀩𑁆𑀩𑁄 𑀮𑁄𑀓𑁄 𑀢𑁂𑀦𑁂𑀯 𑀦𑀺𑀫𑁆𑀫𑀺𑀢𑁄𑀢𑀺 𑀯𑀤𑀦𑁆𑀢𑀺. 𑀧𑀼𑀦 𑀅𑀕𑁆𑀕𑀺𑀲𑁆𑀲 𑀩𑁆𑀭𑀳𑁆𑀫𑀸 𑀧𑀭𑀺𑀘𑀸𑀭𑀓𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁄𑀧𑀺 𑀓𑀺𑀭 𑀅𑀕𑁆𑀕𑀺𑀁 𑀚𑀼𑀳𑀢𑁂𑀯. 𑀲𑀩𑁆𑀩𑀸𑀦𑀼𑀪𑀸𑀯𑀻 𑀘 𑀯𑀲𑀻𑀢𑀺 𑀲𑁄 𑀧𑀦 𑀬𑀤𑀺 𑀲𑀩𑁆𑀩𑀸𑀦𑀼𑀪𑀸𑀯𑀻 𑀘 𑀯𑀲𑀻 𑀘, 𑀅𑀣 𑀓𑀺𑀫𑀢𑁆𑀣𑀁 𑀲𑀬𑀁 𑀅𑀦𑀺𑀫𑁆𑀫𑀺𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸𑀯 𑀦𑀺𑀫𑁆𑀫𑀺𑀢𑀁 𑀯𑀦𑁆𑀤𑀺𑀢𑀸 𑀪𑀯𑁂𑀬𑁆𑀬. 𑀇𑀤𑀫𑁆𑀧𑀺 𑀢𑁂 𑀤𑀼𑀓𑁆𑀓𑀣𑀺𑀢𑀫𑁂𑀯. 𑀳𑀲𑁆𑀲𑀦𑁆𑀢𑀺 𑀅𑀭𑀺𑀝𑁆𑀞 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀁 𑀦𑀸𑀫 𑀳𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀡𑁆𑀟𑀺𑀢𑀸𑀦𑀁 𑀦 𑀦𑀺𑀚𑁆𑀛𑀸𑀦𑀓𑁆𑀔𑀫𑀁. 𑀧𑀓𑀺𑀭𑀺𑀁𑀲𑀽𑀢𑀺 𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀏𑀯𑀭𑀽𑀧𑀁 𑀫𑀼𑀲𑀸𑀯𑀸𑀤𑀁 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀳𑁂𑀢𑀼 𑀧𑀼𑀩𑁆𑀩𑁂 𑀧𑀢𑁆𑀣𑀭𑀺𑀁𑀲𑀼. 𑀲𑀦𑁆𑀥𑀸𑀧𑀺𑀢𑀸 𑀚𑀦𑁆𑀢𑀼𑀪𑀺 𑀲𑀦𑁆𑀢𑀺𑀥𑀫𑁆𑀫𑀦𑁆𑀢𑀺 𑀢𑁂 𑀏𑀢𑁆𑀢𑀓𑁂𑀦 𑀮𑀸𑀪𑀲𑀓𑁆𑀓𑀸𑀭𑁂 𑀅𑀧𑀸𑀢𑀼𑀪𑀽𑀢𑁂 𑀚𑀦𑁆𑀢𑀽𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀸𑀡𑀯𑀥𑀧𑀝𑀺𑀲𑀁𑀬𑀼𑀢𑁆𑀢𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀦𑁆𑀢𑀺𑀥𑀫𑁆𑀫𑀁 𑀲𑀦𑁆𑀥𑀸𑀧𑀺𑀢𑀸, 𑀬𑀜𑁆𑀜𑀲𑀼𑀢𑁆𑀢𑀁 𑀦𑀸𑀫 𑀕𑀦𑁆𑀣𑀬𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀏𑀢𑀜𑁆𑀘 𑀲𑀘𑁆𑀘𑀦𑁆𑀢𑀺 𑀬𑀤𑁂𑀢𑀁 𑀢𑀬𑀸 ‘‘𑀅𑀚𑁆𑀛𑁂𑀦𑀫𑀭𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀏𑀢𑀜𑁆𑀘 𑀲𑀘𑁆𑀘𑀁 𑀪𑀯𑁂𑀬𑁆𑀬. 𑀦𑀸𑀔𑀢𑁆𑀢𑀺𑀬𑁄𑀢𑀺 𑀏𑀯𑀁 𑀲𑀦𑁆𑀢𑁂 𑀅𑀔𑀢𑁆𑀢𑀺𑀬𑁄 𑀭𑀚𑁆𑀚𑀁 𑀦𑀸𑀫 𑀦 𑀮𑀪𑁂𑀬𑁆𑀬, 𑀅𑀩𑁆𑀭𑀸𑀳𑁆𑀫𑀡𑁄𑀧𑀺 𑀫𑀦𑁆𑀢𑀧𑀤𑀸𑀦𑀺 𑀦 𑀲𑀺𑀓𑁆𑀔𑁂𑀬𑁆𑀬. 𑀫𑀼𑀲𑀸𑀯𑀺𑀫𑁂𑀢𑀺 𑀫𑀼𑀲𑀸𑀯 𑀇𑀫𑁂. 𑀑𑀤𑀭𑀺𑀬𑀸𑀢𑀺 𑀉𑀤𑀭𑀦𑀺𑀲𑁆𑀲𑀺𑀢𑀚𑀻𑀯𑀺𑀓𑀸, 𑀉𑀤𑀭𑀧𑀽𑀭𑀡𑀳𑁂𑀢𑀼 𑀯𑀸. 𑀢𑀤𑀧𑁆𑀧𑀧𑀜𑁆𑀜𑀸𑀢𑀺 𑀢𑀁 𑀢𑁂𑀲𑀁 𑀯𑀘𑀦𑀁 𑀅𑀧𑁆𑀧𑀧𑀜𑁆𑀜𑀸. 𑀅𑀢𑁆𑀢𑀦𑀸𑀯𑀸𑀢𑀺 𑀧𑀡𑁆𑀟𑀺𑀢𑀸 𑀧𑀦 𑀢𑁂𑀲𑀁 𑀯𑀘𑀦𑀁 ‘‘𑀲𑀤𑁄𑀲’’𑀦𑁆𑀢𑀺 𑀅𑀢𑁆𑀢𑀦𑀸𑀯 𑀧𑀲𑁆𑀲𑀦𑁆𑀢𑀺. 𑀢𑀸𑀤𑀺𑀲𑀦𑁆𑀢𑀺 𑀢𑀣𑀸𑀭𑀽𑀧𑀁. 𑀲𑀗𑁆𑀔𑀼𑀪𑀺𑀢𑀦𑁆𑀢𑀺 𑀲𑀗𑁆𑀔𑀼𑀪𑀺𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑀸 𑀞𑀧𑀺𑀢𑀫𑀭𑀺𑀬𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀲𑀗𑁆𑀔𑀼𑀪𑀺𑀢𑀁 𑀯𑀺𑀪𑀺𑀦𑁆𑀤𑀁 𑀮𑁄𑀓𑀁 𑀲𑁄 𑀢𑀯𑀩𑁆𑀭𑀳𑁆𑀫𑀸 𑀓𑀲𑁆𑀫𑀸 𑀉𑀚𑀼𑀁 𑀦 𑀓𑀭𑁄𑀢𑀺 ¶ . 𑀅𑀮𑀓𑁆𑀔𑀺𑀦𑁆𑀢𑀺 𑀓𑀺𑀁𑀓𑀸𑀭𑀡𑀸 𑀲𑀩𑁆𑀩𑀮𑁄𑀓𑁂 𑀤𑀼𑀓𑁆𑀔𑀁 𑀯𑀺𑀤𑀳𑀺. 𑀲𑀼𑀔𑀺𑀦𑁆𑀢𑀺 𑀓𑀺𑀁 𑀦𑀼 𑀏𑀓𑀦𑁆𑀢𑀲𑀼𑀔𑀺𑀫𑁂𑀯 𑀲𑀩𑁆𑀩𑀮𑁄𑀓𑀁 𑀦 ¶ 𑀅𑀓𑀸𑀲𑀺, 𑀮𑁄𑀓𑀯𑀺𑀦𑀸𑀲𑀓𑁄 𑀘𑁄𑀭𑁄 𑀫𑀜𑁆𑀜𑁂 𑀢𑀯 𑀩𑁆𑀭𑀳𑁆𑀫𑀸𑀢𑀺. 𑀫𑀸𑀬𑀸𑀢𑀺 𑀫𑀸𑀬𑀸𑀬. 𑀅𑀥𑀫𑁆𑀫𑁂𑀦 𑀓𑀺𑀫𑀢𑁆𑀣𑀫𑀓𑀸𑀭𑀻𑀢𑀺 𑀇𑀫𑀺𑀦𑀸 𑀫𑀸𑀬𑀸𑀤𑀺𑀦𑀸 𑀅𑀥𑀫𑁆𑀫𑁂𑀦 𑀓𑀺𑀁𑀓𑀸𑀭𑀡𑀸 𑀮𑁄𑀓𑀁 𑀅𑀦𑀢𑁆𑀣𑀓𑀺𑀭𑀺𑀬𑀸𑀬𑀁 𑀲𑀁𑀬𑁄𑀚𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀝𑁆𑀞𑀸𑀢𑀺 𑀅𑀭𑀺𑀝𑁆𑀞, 𑀢𑀯 𑀪𑀽𑀢𑀧𑀢𑀺 𑀅𑀥𑀫𑁆𑀫𑀺𑀓𑁄, 𑀬𑁄 𑀤𑀲𑀯𑀺𑀥𑁂 𑀓𑀼𑀲𑀮𑀥𑀫𑁆𑀫𑁂 𑀲𑀢𑀺 𑀥𑀫𑁆𑀫𑀫𑁂𑀯 𑀅𑀯𑀺𑀤𑀳𑀺𑀢𑁆𑀯𑀸 𑀅𑀥𑀫𑁆𑀫𑀁 𑀯𑀺𑀤𑀳𑀺. 𑀓𑀻𑀝𑀸𑀢𑀺𑀆𑀤𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀁. 𑀏𑀢𑁂 𑀓𑀻𑀝𑀸𑀤𑀬𑁄 𑀧𑀸𑀡𑁂 𑀳𑀦𑁆𑀢𑁆𑀯𑀸 𑀫𑀘𑁆𑀘𑁄 𑀲𑀼𑀚𑁆𑀛𑀢𑀻𑀢𑀺 𑀏𑀢𑁂𑀧𑀺 𑀓𑀫𑁆𑀩𑁄𑀚𑀭𑀝𑁆𑀞𑀯𑀸𑀲𑀻𑀦𑀁 𑀩𑀳𑀽𑀦𑀁 𑀅𑀦𑀭𑀺𑀬𑀸𑀦𑀁 𑀥𑀫𑁆𑀫𑀸, 𑀢𑁂 𑀧𑀦 𑀯𑀺𑀢𑀣𑀸, 𑀅𑀥𑀫𑁆𑀫𑀸𑀯 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀳𑀺𑀧𑀺 𑀢𑀯 𑀩𑁆𑀭𑀳𑁆𑀫𑀼𑀦𑀸𑀯 𑀦𑀺𑀫𑁆𑀫𑀺𑀢𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀇𑀤𑀸𑀦𑀺 𑀢𑁂𑀲𑀁 𑀯𑀺𑀢𑀣𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁯𑁪𑁦.

‘‘𑀲𑀘𑁂 𑀳𑀺 𑀲𑁄 𑀲𑀼𑀚𑁆𑀛𑀢𑀺 𑀬𑁄 𑀳𑀦𑀸𑀢𑀺, 𑀳𑀢𑁄𑀧𑀺 𑀲𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁;

𑀪𑁄𑀯𑀸𑀤𑀺 ¶ 𑀪𑁄𑀯𑀸𑀤𑀺𑀦 𑀫𑀸𑀭𑀬𑁂𑀬𑁆𑀬𑀼𑀁, 𑀬𑁂 𑀘𑀸𑀧𑀺 𑀢𑁂𑀲𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀼𑀁.

𑁯𑁪𑁧.

‘‘𑀦𑁂𑀯 𑀫𑀺𑀕𑀸 𑀦 𑀧𑀲𑀽 𑀦𑁄𑀧𑀺 𑀕𑀸𑀯𑁄, 𑀆𑀬𑀸𑀘𑀦𑁆𑀢𑀺 𑀅𑀢𑁆𑀢𑀯𑀥𑀸𑀬 𑀓𑁂𑀘𑀺;

𑀯𑀺𑀧𑁆𑀨𑀦𑁆𑀤𑀫𑀸𑀦𑁂 𑀇𑀥 𑀚𑀻𑀯𑀺𑀓𑀢𑁆𑀣𑀸, 𑀬𑀜𑁆𑀜𑁂𑀲𑀼 𑀧𑀸𑀡𑁂 𑀧𑀲𑀼𑀫𑀸𑀭𑀪𑀦𑁆𑀢𑀺.

𑁯𑁪𑁨.

‘‘𑀬𑀽𑀧𑀼𑀲𑁆𑀲𑀦𑁂 𑀧𑀲𑀼𑀩𑀦𑁆𑀥𑁂 𑀘 𑀩𑀸𑀮𑀸, 𑀘𑀺𑀢𑁆𑀢𑁂𑀳𑀺 𑀯𑀡𑁆𑀡𑁂𑀳𑀺 𑀫𑀼𑀔𑀁 𑀦𑀬𑀦𑁆𑀢𑀺;

𑀅𑀬𑀁 𑀢𑁂 𑀬𑀽𑀧𑁄 𑀓𑀸𑀫𑀤𑀼𑀳𑁄 𑀧𑀭𑀢𑁆𑀣, 𑀪𑀯𑀺𑀲𑁆𑀲𑀢𑀺 𑀲𑀲𑁆𑀲𑀢𑁄 𑀲𑀫𑁆𑀧𑀭𑀸𑀬𑁂.

𑁯𑁪𑁩.

‘‘𑀲𑀘𑁂 𑀘 𑀬𑀽𑀧𑁂 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀁, 𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁;

𑀲𑀼𑀓𑁆𑀔𑁂𑀲𑀼 𑀓𑀝𑁆𑀞𑁂𑀲𑀼 𑀦𑀯𑁂𑀲𑀼 𑀘𑀸𑀧𑀺, 𑀲𑀘𑁂 𑀤𑀼𑀳𑁂 𑀢𑀺𑀤𑀺𑀯𑁂 𑀲𑀩𑁆𑀩𑀓𑀸𑀫𑁂;

𑀢𑁂𑀯𑀺𑀚𑁆𑀚𑀲𑀗𑁆𑀖𑀸𑀯 𑀧𑀼𑀣𑀽 𑀬𑀚𑁂𑀬𑁆𑀬𑀼𑀁, 𑀅𑀩𑁆𑀭𑀸𑀳𑁆𑀫𑀡𑀁 𑀓𑀜𑁆𑀘𑀺 𑀦 𑀬𑀸𑀚𑀬𑁂𑀬𑁆𑀬𑀼𑀁.

𑁯𑁪𑁪.

‘‘𑀓𑀼𑀢𑁄 ¶ 𑀘 𑀬𑀽𑀧𑁂 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀁, 𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁;

𑀲𑀼𑀓𑁆𑀔𑁂𑀲𑀼 𑀓𑀝𑁆𑀞𑁂𑀲𑀼 𑀦𑀯𑁂𑀲𑀼 𑀘𑀸𑀧𑀺, 𑀓𑀼𑀢𑁄 𑀤𑀼𑀳𑁂 𑀢𑀺𑀤𑀺𑀯𑁂 𑀲𑀩𑁆𑀩𑀓𑀸𑀫𑁂.

𑁯𑁪𑁫.

‘‘𑀲𑀞𑀸 𑀘 𑀮𑀼𑀤𑁆𑀤𑀸 𑀘 𑀧𑀮𑀼𑀤𑁆𑀥𑀩𑀸𑀮𑀸, 𑀘𑀺𑀢𑁆𑀢𑁂𑀳𑀺 𑀯𑀡𑁆𑀡𑁂𑀳𑀺 𑀫𑀼𑀔𑀁 𑀦𑀬𑀦𑁆𑀢𑀺;

𑀆𑀤𑀸𑀬 𑀅𑀕𑁆𑀕𑀺𑀁 𑀫𑀫 𑀤𑁂𑀳𑀺 𑀯𑀺𑀢𑁆𑀢𑀁, 𑀢𑀢𑁄 𑀲𑀼𑀔𑀻 𑀳𑁄𑀳𑀺𑀲𑀺 𑀲𑀩𑁆𑀩𑀓𑀸𑀫𑁂.

𑁯𑁪𑁬.

‘‘𑀢𑀫𑀕𑁆𑀕𑀺𑀳𑀼𑀢𑁆𑀢𑀁 ¶ 𑀲𑀭𑀡𑀁 𑀧𑀯𑀺𑀲𑁆𑀲, 𑀘𑀺𑀢𑁆𑀢𑁂𑀳𑀺 𑀯𑀡𑁆𑀡𑁂𑀳𑀺 𑀫𑀼𑀔𑀁 𑀦𑀬𑀦𑁆𑀢𑀺;

𑀑𑀭𑁄𑀧𑀬𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀦𑀔𑀜𑁆𑀘, 𑀯𑁂𑀤𑁂𑀳𑀺 𑀯𑀺𑀢𑁆𑀢𑀁 𑀅𑀢𑀺𑀕𑀸𑀴𑁆𑀳𑀬𑀦𑁆𑀢𑀺.

𑁯𑁪𑁭.

‘‘𑀓𑀸𑀓𑀸 𑀉𑀮𑀽𑀓𑀁𑀯 𑀭𑀳𑁄 𑀮𑀪𑀺𑀢𑁆𑀯𑀸, 𑀏𑀓𑀁 𑀲𑀫𑀸𑀦𑀁 𑀩𑀳𑀼𑀓𑀸 𑀲𑀫𑁂𑀘𑁆𑀘;

𑀅𑀦𑁆𑀦𑀸𑀦𑀺 ¶ 𑀪𑀼𑀢𑁆𑀯𑀸 𑀓𑀼𑀳𑀓𑀸 𑀓𑀼𑀳𑀺𑀢𑁆𑀯𑀸, 𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀬𑀜𑁆𑀜𑀧𑀣𑁄𑀲𑁆𑀲𑀚𑀦𑁆𑀢𑀺.

𑁯𑁪𑁮.

‘‘𑀏𑀯𑀜𑁆𑀳𑀺 𑀲𑁄 𑀯𑀜𑁆𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀳𑀺, 𑀏𑀓𑁄 𑀲𑀫𑀸𑀦𑁄 𑀩𑀳𑀼𑀓𑀸 𑀲𑀫𑁂𑀘𑁆𑀘;

𑀢𑁂 𑀬𑁄𑀕𑀬𑁄𑀕𑁂𑀦 𑀯𑀺𑀮𑀼𑀫𑁆𑀧𑀫𑀸𑀦𑀸, 𑀤𑀺𑀝𑁆𑀞𑀁 𑀅𑀤𑀺𑀝𑁆𑀞𑁂𑀦 𑀥𑀦𑀁 𑀳𑀭𑀦𑁆𑀢𑀺.

𑁯𑁪𑁯.

‘‘𑀅𑀓𑀸𑀲𑀺𑀬𑀸 𑀭𑀸𑀚𑀽𑀳𑀺𑀯𑀸𑀦𑀼𑀲𑀺𑀝𑁆𑀞𑀸, 𑀢𑀤𑀲𑁆𑀲 𑀆𑀤𑀸𑀬 𑀥𑀦𑀁 𑀳𑀭𑀦𑁆𑀢𑀺;

𑀢𑁂 𑀢𑀸𑀤𑀺𑀲𑀸 𑀘𑁄𑀭𑀲𑀫𑀸 𑀅𑀲𑀦𑁆𑀢𑀸, 𑀯𑀚𑁆𑀛𑀸 𑀦 𑀳𑀜𑁆𑀜𑀦𑁆𑀢𑀺 𑀅𑀭𑀺𑀝𑁆𑀞 𑀮𑁄𑀓𑁂.

𑁯𑁫𑁦.

‘‘𑀇𑀦𑁆𑀤𑀲𑁆𑀲 𑀩𑀸𑀳𑀸𑀭𑀲𑀺 𑀤𑀓𑁆𑀔𑀺𑀡𑀸𑀢𑀺, 𑀬𑀜𑁆𑀜𑁂𑀲𑀼 𑀙𑀺𑀦𑁆𑀤𑀦𑁆𑀢𑀺 𑀧𑀮𑀸𑀲𑀬𑀝𑁆𑀞𑀺𑀁;

𑀢𑀁 𑀘𑁂𑀧𑀺 𑀲𑀘𑁆𑀘𑀁 𑀫𑀖𑀯𑀸 𑀙𑀺𑀦𑁆𑀦𑀩𑀸𑀳𑀼, 𑀓𑁂𑀦𑀲𑁆𑀲 𑀇𑀦𑁆𑀤𑁄 𑀅𑀲𑀼𑀭𑁂 𑀚𑀺𑀦𑀸𑀢𑀺.

𑁯𑁫𑁧.

‘‘𑀢𑀜𑁆𑀘𑁂𑀯 ¶ 𑀢𑀼𑀘𑁆𑀙𑀁 𑀫𑀖𑀯𑀸 𑀲𑀫𑀗𑁆𑀕𑀻, 𑀳𑀦𑁆𑀢𑀸 𑀅𑀯𑀚𑁆𑀛𑁄 𑀧𑀭𑀫𑁄 𑀲 𑀤𑁂𑀯𑁄;

𑀫𑀦𑁆𑀢𑀸 𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀢𑀼𑀘𑁆𑀙𑀭𑀽𑀧𑀸, 𑀲𑀦𑁆𑀤𑀺𑀝𑁆𑀞𑀺𑀓𑀸 𑀯𑀜𑁆𑀘𑀦𑀸 𑀏𑀲 𑀮𑁄𑀓𑁂.

𑁯𑁫𑁨.

‘‘𑀫𑀸𑀮𑀸𑀕𑀺𑀭𑀺 𑀳𑀺𑀫𑀯𑀸 𑀬𑁄 𑀘 𑀕𑀺𑀚𑁆𑀛𑁄, 𑀲𑀼𑀤𑀲𑁆𑀲𑀦𑁄 𑀦𑀺𑀲𑀪𑁄 𑀓𑀼𑀯𑁂𑀭𑀼;

𑀏𑀢𑁂 𑀘 𑀅𑀜𑁆𑀜𑁂 𑀘 𑀦𑀕𑀸 𑀫𑀳𑀦𑁆𑀢𑀸, 𑀘𑀺𑀢𑁆𑀬𑀸 𑀓𑀢𑀸 𑀬𑀜𑁆𑀜𑀓𑀭𑁂𑀳𑀺 𑀫𑀸𑀳𑀼.

𑁯𑁫𑁩.

‘‘𑀬𑀣𑀸𑀧𑀓𑀸𑀭𑀸𑀦𑀺 𑀳𑀺 𑀇𑀝𑁆𑀞𑀓𑀸𑀦𑀺, 𑀘𑀺𑀢𑁆𑀬𑀸 𑀓𑀢𑀸 𑀬𑀜𑁆𑀜𑀓𑀭𑁂𑀳𑀺 𑀫𑀸𑀳𑀼;

𑀦 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺 𑀢𑀣𑀸𑀧𑀓𑀸𑀭𑀸, 𑀅𑀜𑁆𑀜𑀸 𑀤𑀺𑀲𑀸 𑀅𑀘𑀮𑀸 𑀢𑀺𑀝𑁆𑀞𑀲𑁂𑀮𑀸.

𑁯𑁫𑁪.

‘‘𑀦 𑀇𑀝𑁆𑀞𑀓𑀸 𑀳𑁄𑀦𑁆𑀢𑀺 𑀲𑀺𑀮𑀸 𑀘𑀺𑀭𑁂𑀦, 𑀦 𑀢𑀢𑁆𑀣 𑀲𑀜𑁆𑀚𑀸𑀬𑀢𑀺 𑀅𑀬𑁄 𑀦 𑀮𑁄𑀳𑀁;

𑀬𑀜𑁆𑀜𑀜𑁆𑀘 ¶ 𑀏𑀢𑀁 𑀧𑀭𑀺𑀯𑀡𑁆𑀡𑀬𑀦𑁆𑀢𑀸, 𑀘𑀺𑀢𑁆𑀬𑀸 𑀓𑀢𑀸 𑀬𑀜𑁆𑀜𑀓𑀭𑁂𑀳𑀺 𑀫𑀸𑀳𑀼.

𑁯𑁫𑁫.

‘‘𑀅𑀚𑁆𑀛𑀸𑀬𑀓𑀁 𑀫𑀦𑁆𑀢𑀕𑀼𑀡𑀽𑀧𑀧𑀦𑁆𑀦𑀁, 𑀢𑀧𑀲𑁆𑀲𑀺𑀦𑀁 ‘𑀬𑀸𑀘𑀬𑁄𑀕𑁄’𑀢𑀺𑀥𑀸𑀳𑀼;

𑀢𑀻𑀭𑁂 𑀲𑀫𑀼𑀤𑁆𑀤𑀲𑁆𑀲𑀼𑀤𑀓𑀁 𑀲𑀚𑀦𑁆𑀢𑀁, 𑀢𑀁 𑀲𑀸𑀕𑀭𑀚𑁆𑀛𑁄𑀳𑀭𑀺 𑀢𑁂𑀦𑀸𑀧𑁂𑀬𑁆𑀬𑁄.

𑁯𑁫𑁬.

‘‘𑀧𑀭𑁄𑀲𑀳𑀲𑁆𑀲𑀫𑁆𑀧𑀺 ¶ 𑀲𑀫𑀦𑁆𑀢𑀯𑁂𑀤𑁂, 𑀫𑀦𑁆𑀢𑀽𑀧𑀧𑀦𑁆𑀦𑁂 𑀦𑀤𑀺𑀬𑁄 𑀯𑀳𑀦𑁆𑀢𑀺;

𑀦 𑀢𑁂𑀦 𑀩𑁆𑀬𑀸𑀧𑀦𑁆𑀦𑀭𑀲𑀽𑀤𑀓𑀸 𑀦, 𑀓𑀲𑁆𑀫𑀸 𑀲𑀫𑀼𑀤𑁆𑀤𑁄 𑀅𑀢𑀼𑀮𑁄 𑀅𑀧𑁂𑀬𑁆𑀬𑁄.

𑁯𑁫𑁭.

‘‘𑀬𑁂 𑀓𑁂𑀘𑀺 𑀓𑀽𑀧𑀸 𑀇𑀥 𑀚𑀻𑀯𑀮𑁄𑀓𑁂, 𑀮𑁄𑀡𑀽𑀤𑀓𑀸 𑀓𑀽𑀧𑀔𑀡𑁂𑀳𑀺 𑀔𑀸𑀢𑀸;

𑀦 𑀩𑁆𑀭𑀸𑀳𑁆𑀫𑀡𑀚𑁆𑀛𑁄𑀳𑀭𑀡𑁂𑀦 𑀢𑁂𑀲𑀼, 𑀆𑀧𑁄 𑀅𑀧𑁂𑀬𑁆𑀬𑁄 𑀤𑁆𑀯𑀺𑀭𑀲𑀜𑁆𑀜𑀼 𑀫𑀸𑀳𑀼.

𑁯𑁫𑁮.

‘‘𑀧𑀼𑀭𑁂 ¶ 𑀧𑀼𑀭𑀢𑁆𑀣𑀸 𑀓𑀸 𑀓𑀲𑁆𑀲 𑀪𑀭𑀺𑀬𑀸, 𑀫𑀦𑁄 𑀫𑀦𑀼𑀲𑁆𑀲𑀁 𑀅𑀚𑀦𑁂𑀲𑀺 𑀧𑀼𑀩𑁆𑀩𑁂;

𑀢𑁂𑀦𑀸𑀧𑀺 𑀥𑀫𑁆𑀫𑁂𑀦 𑀦 𑀓𑁄𑀘𑀺 𑀳𑀻𑀦𑁄, 𑀏𑀯𑀫𑁆𑀧𑀺 𑀯𑁄𑀲𑁆𑀲𑀕𑁆𑀕𑀯𑀺𑀪𑀗𑁆𑀕𑀫𑀸𑀳𑀼.

𑁯𑁫𑁯.

‘‘𑀘𑀡𑁆𑀟𑀸𑀮𑀧𑀼𑀢𑁆𑀢𑁄𑀧𑀺 𑀅𑀥𑀺𑀘𑁆𑀘 𑀯𑁂𑀤𑁂, 𑀪𑀸𑀲𑁂𑀬𑁆𑀬 𑀫𑀦𑁆𑀢𑁂 𑀓𑀼𑀲𑀮𑁄 𑀫𑀢𑀻𑀫𑀸;

𑀦 𑀢𑀲𑁆𑀲 𑀫𑀼𑀤𑁆𑀥𑀸𑀧𑀺 𑀨𑀮𑁂𑀬𑁆𑀬 𑀲𑀢𑁆𑀢𑀥𑀸, 𑀫𑀦𑁆𑀢𑀸 𑀇𑀫𑁂 𑀅𑀢𑁆𑀢𑀯𑀥𑀸𑀬 𑀓𑀢𑀸.

𑁯𑁬𑁦.

‘‘𑀯𑀸𑀘𑀸𑀓𑀢𑀸 𑀕𑀺𑀤𑁆𑀥𑀺𑀓𑀢𑀸 𑀕𑀳𑀻𑀢𑀸, 𑀤𑀼𑀫𑁆𑀫𑁄𑀘𑀬𑀸 𑀓𑀩𑁆𑀬𑀧𑀣𑀸𑀦𑀼𑀧𑀦𑁆𑀦𑀸;

𑀩𑀸𑀮𑀸𑀦 𑀘𑀺𑀢𑁆𑀢𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁, 𑀢𑀤𑀧𑁆𑀧𑀧𑀜𑁆𑀜𑀸 𑀅𑀪𑀺𑀲𑀤𑁆𑀤𑀳𑀦𑁆𑀢𑀺.

𑁯𑁬𑁧.

‘‘𑀲𑀻𑀳𑀲𑁆𑀲 𑀩𑁆𑀬𑀕𑁆𑀖𑀲𑁆𑀲 𑀘 𑀤𑀻𑀧𑀺𑀦𑁄 𑀘, 𑀦 𑀯𑀺𑀚𑁆𑀚𑀢𑀻 𑀧𑁄𑀭𑀺𑀲𑀺𑀬𑀁 𑀩𑀮𑁂𑀦;

𑀫𑀦𑀼𑀲𑁆𑀲𑀪𑀸𑀯𑁄 𑀘 𑀕𑀯𑀁𑀯 𑀧𑁂𑀓𑁆𑀔𑁄, 𑀚𑀸𑀢𑀻 𑀳𑀺 𑀢𑁂𑀲𑀁 𑀅𑀲𑀫𑀸 𑀲𑀫𑀸𑀦𑀸.

𑁯𑁬𑁨.

‘‘𑀲𑀘𑁂 ¶ 𑀘 𑀭𑀸𑀚𑀸 𑀧𑀣𑀯𑀺𑀁 𑀯𑀺𑀚𑀺𑀢𑁆𑀯𑀸, 𑀲𑀚𑀻𑀯𑀯𑀸 𑀅𑀲𑁆𑀲𑀯𑀧𑀸𑀭𑀺𑀲𑀚𑁆𑀚𑁄;

𑀲𑀬𑀫𑁂𑀯 𑀲𑁄 𑀲𑀢𑁆𑀢𑀼𑀲𑀗𑁆𑀖𑀁 𑀯𑀺𑀚𑁂𑀬𑁆𑀬, 𑀢𑀲𑁆𑀲𑀧𑁆𑀧𑀚𑀸 𑀦𑀺𑀘𑁆𑀘𑀲𑀼𑀔𑀻 𑀪𑀯𑁂𑀬𑁆𑀬.

𑁯𑁬𑁩.

‘‘𑀔𑀢𑁆𑀢𑀺𑀬𑀫𑀦𑁆𑀢𑀸 𑀘 𑀢𑀬𑁄 𑀘 𑀯𑁂𑀤𑀸, 𑀅𑀢𑁆𑀣𑁂𑀦 𑀏𑀢𑁂 𑀲𑀫𑀓𑀸 𑀪𑀯𑀦𑁆𑀢𑀺;

𑀢𑁂𑀲𑀜𑁆𑀘 𑀅𑀢𑁆𑀣𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸, 𑀦 𑀩𑀼𑀚𑁆𑀛𑀢𑀻 𑀑𑀖𑀧𑀣𑀁𑀯 𑀙𑀦𑁆𑀦𑀁.

𑁯𑁬𑁪.

‘‘𑀔𑀢𑁆𑀢𑀺𑀬𑀫𑀦𑁆𑀢𑀸 𑀘 𑀢𑀬𑁄 𑀘 𑀯𑁂𑀤𑀸, 𑀅𑀢𑁆𑀣𑁂𑀦 𑀏𑀢𑁂 𑀲𑀫𑀓𑀸 𑀪𑀯𑀦𑁆𑀢𑀺;

𑀮𑀸𑀪𑁄 𑀅𑀮𑀸𑀪𑁄 𑀅𑀬𑀲𑁄 𑀬𑀲𑁄 𑀘, 𑀲𑀩𑁆𑀩𑁂𑀯 𑀢𑁂𑀲𑀁 𑀘𑀢𑀼𑀦𑁆𑀦𑀜𑁆𑀘 𑀥𑀫𑁆𑀫𑀸.

𑁯𑁬𑁫.

‘‘𑀬𑀣𑀸𑀧𑀺 ¶ 𑀇𑀩𑁆𑀪𑀸 𑀥𑀦𑀥𑀜𑁆𑀜𑀳𑁂𑀢𑀼, 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀧𑀼𑀣𑀽 𑀧𑀣𑀩𑁆𑀬𑀸;

𑀢𑁂𑀯𑀺𑀚𑁆𑀚𑀲𑀗𑁆𑀖𑀸 𑀘 𑀢𑀣𑁂𑀯 𑀅𑀚𑁆𑀚, 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀧𑀼𑀣𑀽 𑀧𑀣𑀩𑁆𑀬𑀸.

𑁯𑁬𑁬.

‘‘𑀇𑀩𑁆𑀪𑁂𑀳𑀺 ¶ 𑀬𑁂 𑀢𑁂 𑀲𑀫𑀓𑀸 𑀪𑀯𑀦𑁆𑀢𑀺, 𑀦𑀺𑀘𑁆𑀘𑀼𑀲𑁆𑀲𑀼𑀓𑀸 𑀓𑀸𑀫𑀕𑀼𑀡𑁂𑀲𑀼 𑀬𑀼𑀢𑁆𑀢𑀸;

𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀧𑀼𑀣𑀽 𑀧𑀣𑀩𑁆𑀬𑀸, 𑀢𑀤𑀧𑁆𑀧𑀧𑀜𑁆𑀜𑀸 𑀤𑁆𑀯𑀺𑀭𑀲𑀜𑁆𑀜𑀼𑀭𑀸 𑀢𑁂’’𑀢𑀺.

𑀢𑀢𑁆𑀣 𑀪𑁄𑀯𑀸𑀤𑀻𑀢𑀺 𑀩𑁆𑀭𑀸𑀳𑁆𑀫𑀡𑀸. 𑀪𑁄𑀯𑀸𑀤𑀺𑀦 𑀫𑀸𑀭𑀬𑁂𑀬𑁆𑀬𑀼𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀫𑁂𑀯 𑀫𑀸𑀭𑁂𑀬𑁆𑀬𑀼𑀁. 𑀬𑁂 𑀘𑀸𑀧𑀻𑀢𑀺 𑀬𑁂𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀁 𑀯𑀘𑀦𑀁 𑀲𑀤𑁆𑀤𑀳𑁂𑀬𑁆𑀬𑀼𑀁, 𑀢𑁂 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂𑀬𑁂𑀯 𑀘 𑀩𑁆𑀭𑀸𑀳𑁆𑀫𑀡𑁂 𑀘 𑀫𑀸𑀭𑁂𑀬𑁆𑀬𑀼𑀁. 𑀩𑁆𑀭𑀸𑀳𑁆𑀫𑀡𑀸 𑀧𑀦 𑀩𑁆𑀭𑀸𑀳𑁆𑀫𑀡𑁂 𑀘 𑀉𑀧𑀝𑁆𑀞𑀸𑀓𑁂 𑀘 𑀅𑀫𑀸𑀭𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂 𑀢𑀺𑀭𑀘𑁆𑀙𑀸𑀦𑁂𑀬𑁂𑀯 𑀫𑀸𑀭𑁂𑀦𑁆𑀢𑀺. 𑀇𑀢𑀺 𑀢𑁂𑀲𑀁 𑀯𑀘𑀦𑀁 𑀫𑀺𑀘𑁆𑀙𑀸. 𑀓𑁂𑀘𑀻𑀢𑀺 𑀬𑀜𑁆𑀜𑁂𑀲𑀼 𑀦𑁄 𑀫𑀸𑀭𑁂𑀣, 𑀫𑀬𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀆𑀬𑀸𑀘𑀦𑁆𑀢𑀸 𑀓𑁂𑀘𑀺 𑀦𑀢𑁆𑀣𑀺. 𑀧𑀸𑀡𑁂 𑀧𑀲𑀼𑀫𑀸𑀭𑀪𑀦𑁆𑀢𑀻𑀢𑀺 𑀫𑀺𑀕𑀸𑀤𑀬𑁄 𑀧𑀸𑀡𑁂 𑀘 𑀧𑀲𑀽 𑀘 𑀯𑀺𑀧𑁆𑀨𑀦𑁆𑀤𑀫𑀸𑀦𑁂 𑀚𑀻𑀯𑀺𑀓𑀢𑁆𑀣𑀸𑀬 𑀫𑀸𑀭𑁂𑀦𑁆𑀢𑀺. 𑀫𑀼𑀔𑀁 𑀦𑀬𑀦𑁆𑀢𑀻𑀢𑀺 𑀏𑀢𑁂𑀲𑀼 𑀬𑀽𑀧𑀼𑀲𑁆𑀲𑀦𑁂𑀲𑀼 𑀧𑀲𑀼𑀩𑀦𑁆𑀥𑁂𑀲𑀼 𑀇𑀫𑀲𑁆𑀫𑀺𑀁 𑀢𑁂 𑀬𑀽𑀧𑁂 𑀲𑀩𑁆𑀩𑀁 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀁 𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀲𑀦𑁆𑀦𑀺𑀳𑀺𑀢𑀁, 𑀅𑀬𑀁 𑀢𑁂 𑀬𑀽𑀧𑁄 𑀧𑀭𑀢𑁆𑀣 𑀧𑀭𑀮𑁄𑀓𑁂 𑀓𑀸𑀫𑀤𑀼𑀳𑁄 𑀪𑀯𑀺𑀲𑁆𑀲𑀢𑀺, 𑀲𑀲𑁆𑀲𑀢𑀪𑀸𑀯𑀁 𑀆𑀯𑀳𑀺𑀲𑁆𑀲𑀢𑀻𑀢𑀺 𑀘𑀺𑀢𑁆𑀭𑁂𑀳𑀺 𑀓𑀸𑀭𑀡𑁂𑀳𑀺 𑀫𑀼𑀔𑀁 𑀧𑀲𑀸𑀤𑁂𑀦𑁆𑀢𑀺, 𑀢𑀁 𑀢𑀁 𑀯𑀢𑁆𑀯𑀸 𑀫𑀺𑀘𑁆𑀙𑀸𑀕𑀸𑀳𑀁 ¶ 𑀕𑀸𑀳𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀘𑁂 𑀘𑀸𑀢𑀺 𑀲𑀘𑁂 𑀘 𑀬𑀽𑀧𑁂 𑀯𑀸 𑀲𑁂𑀲𑀓𑀝𑁆𑀞𑁂𑀲𑀼 𑀯𑀸 𑀏𑀢𑀁 𑀫𑀡𑀺𑀆𑀤𑀺𑀓𑀁 𑀪𑀯𑁂𑀬𑁆𑀬, 𑀢𑀺𑀤𑀺𑀯𑁂 𑀯𑀸 𑀲𑀩𑁆𑀩𑀓𑀸𑀫𑀤𑀼𑀳𑁄 𑀅𑀲𑁆𑀲, 𑀢𑁂𑀯𑀺𑀚𑁆𑀚𑀲𑀗𑁆𑀖𑀸𑀯 𑀧𑀼𑀣𑀽 𑀳𑀼𑀢𑁆𑀯𑀸 𑀬𑀜𑁆𑀜𑀁 𑀬𑀚𑁂𑀬𑁆𑀬𑀼𑀁 𑀩𑀳𑀼𑀥𑀦𑀢𑀸𑀬 𑀘𑁂𑀯 𑀲𑀕𑁆𑀕𑀓𑀸𑀫𑀢𑀸𑀬 𑀘, 𑀅𑀜𑁆𑀜𑀁 𑀅𑀩𑁆𑀭𑀸𑀳𑁆𑀫𑀡𑀁 𑀦 𑀬𑀸𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀧𑀦 𑀅𑀢𑁆𑀢𑀦𑁄 𑀥𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸 𑀅𑀜𑁆𑀜𑀫𑁆𑀧𑀺 𑀬𑀚𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀪𑀽𑀢𑀯𑀸𑀤𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀢𑁄 𑀘𑀸𑀢𑀺 𑀏𑀢𑀲𑁆𑀫𑀺𑀜𑁆𑀘 𑀬𑀽𑀧𑁂 𑀯𑀸 𑀲𑁂𑀲𑀓𑀝𑁆𑀞𑁂𑀲𑀼 𑀯𑀸 𑀓𑀼𑀢𑁄 𑀏𑀢𑀁 𑀫𑀡𑀺𑀆𑀤𑀺𑀓𑀁 𑀅𑀯𑀺𑀚𑁆𑀚𑀫𑀸𑀦𑀫𑁂𑀯, 𑀓𑀼𑀢𑁄 𑀢𑀺𑀤𑀺𑀯𑁂 𑀲𑀩𑁆𑀩𑀓𑀸𑀫𑁂 𑀤𑀼𑀳𑀺𑀲𑁆𑀲𑀢𑀺. 𑀲𑀩𑁆𑀩𑀣𑀸𑀧𑀺 𑀅𑀪𑀽𑀢𑀫𑁂𑀯 𑀢𑁂𑀲𑀁 𑀯𑀘𑀦𑀁.

𑀲𑀞𑀸 ¶ 𑀘 𑀮𑀼𑀤𑁆𑀤𑀸 𑀘 𑀧𑀮𑀼𑀤𑁆𑀥𑀩𑀸𑀮𑀸𑀢𑀺 𑀅𑀭𑀺𑀝𑁆𑀞, 𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀓𑁂𑀭𑀸𑀝𑀺𑀓𑀸 𑀘𑁂𑀯 𑀦𑀺𑀓𑁆𑀓𑀭𑀼𑀡𑀸 𑀘, 𑀢𑁂 𑀩𑀸𑀮𑀸 𑀮𑁄𑀓𑀁 𑀧𑀮𑁄𑀪𑁂𑀢𑁆𑀯𑀸 𑀉𑀧𑀮𑁄𑀪𑁂𑀢𑁆𑀯𑀸 𑀘𑀺𑀢𑁆𑀭𑁂𑀳𑀺 𑀓𑀸𑀭𑀡𑁂𑀳𑀺 𑀫𑀼𑀔𑀁 𑀧𑀲𑀸𑀤𑁂𑀦𑁆𑀢𑀺. 𑀲𑀩𑁆𑀩𑀓𑀸𑀫𑁂𑀢𑀺 𑀅𑀕𑁆𑀕𑀺𑀁 𑀆𑀤𑀸𑀬 𑀢𑁆𑀯𑀜𑁆𑀘 𑀚𑀽𑀳, 𑀅𑀫𑁆𑀳𑀸𑀓𑀜𑁆𑀘 𑀯𑀺𑀢𑁆𑀢𑀁 𑀤𑁂𑀳𑀺, 𑀢𑀢𑁄 𑀲𑀩𑁆𑀩𑀓𑀸𑀫𑁂 𑀮𑀪𑀺𑀢𑁆𑀯𑀸 𑀲𑀼𑀔𑀻 𑀳𑁄𑀳𑀺𑀲𑀺.

𑀢𑀫𑀕𑁆𑀕𑀺𑀳𑀼𑀢𑁆𑀢𑀁 𑀲𑀭𑀡𑀁 𑀧𑀯𑀺𑀲𑁆𑀲𑀸𑀢𑀺 𑀢𑀁 𑀭𑀸𑀚𑀸𑀦𑀁 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀁 𑀯𑀸 𑀆𑀤𑀸𑀬 𑀅𑀕𑁆𑀕𑀺𑀚𑀼𑀳𑀦𑀝𑁆𑀞𑀸𑀦𑀁 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸. 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 𑀘𑀺𑀢𑁆𑀭𑀸𑀦𑀺 𑀓𑀸𑀭𑀡𑀸𑀦𑀺 𑀯𑀤𑀦𑁆𑀢𑀸 𑀓𑁂𑀲𑀫𑀲𑁆𑀲𑀼𑀁 𑀦𑀔𑁂 𑀘 𑀑𑀭𑁄𑀧𑀬𑀺𑀢𑁆𑀯𑀸. 𑀅𑀢𑀺𑀕𑀸𑀴𑁆𑀳𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀢𑀸𑀬 𑀢𑀬𑁄 𑀯𑁂𑀤𑁂 𑀦𑀺𑀲𑁆𑀲𑀸𑀬 ‘‘𑀇𑀤𑀁 𑀤𑀸𑀢𑀩𑁆𑀩𑀁, 𑀇𑀤𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀸 𑀯𑁂𑀤𑁂𑀳𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀢𑁆𑀢𑀁 𑀅𑀢𑀺𑀕𑀸𑀴𑁆𑀳𑀬𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀺.

𑀅𑀦𑁆𑀦𑀸𑀦𑀺 ¶ 𑀪𑀼𑀢𑁆𑀯𑀸 𑀓𑀼𑀳𑀓𑀸 𑀓𑀼𑀳𑀺𑀢𑁆𑀯𑀸𑀢𑀺 𑀢𑁂 𑀓𑀼𑀳𑀓𑀸 𑀦𑀸𑀦𑀧𑁆𑀧𑀓𑀸𑀭𑀁 𑀓𑀼𑀳𑀓𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑁂𑀘𑁆𑀘 𑀲𑀫𑀸𑀕𑀦𑁆𑀢𑁆𑀯𑀸 𑀬𑀜𑁆𑀜𑀁 𑀯𑀡𑁆𑀡𑁂𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀣 𑀦𑀁 𑀫𑀼𑀡𑁆𑀟𑀓𑀁 𑀓𑀢𑁆𑀯𑀸 𑀬𑀜𑁆𑀜𑀧𑀣𑁂 𑀑𑀲𑁆𑀲𑀚𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀩𑀳𑀺𑀬𑀜𑁆𑀜𑀸𑀯𑀸𑀝𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀬𑁄𑀕𑀬𑁄𑀕𑁂𑀦𑀸𑀢𑀺 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀏𑀓𑀁 𑀩𑀳𑀼𑀓𑀸 𑀲𑀫𑁂𑀘𑁆𑀘 𑀢𑁂𑀦 𑀢𑁂𑀦 𑀬𑁄𑀕𑁂𑀦 𑀢𑀸𑀬 𑀢𑀸𑀬 𑀬𑀼𑀢𑁆𑀢𑀺𑀬𑀸 𑀯𑀺𑀮𑀼𑀫𑁆𑀧𑀫𑀸𑀦𑀸 𑀤𑀺𑀝𑁆𑀞𑀁 𑀧𑀘𑁆𑀘𑀓𑁆𑀔𑀁 𑀢𑀲𑁆𑀲 𑀥𑀦𑀁 𑀅𑀤𑀺𑀝𑁆𑀞𑁂𑀦 𑀤𑁂𑀯𑀮𑁄𑀓𑁂𑀦 𑀅𑀤𑀺𑀝𑁆𑀞𑀁 𑀤𑁂𑀯𑀮𑁄𑀓𑀁 𑀯𑀡𑁆𑀡𑁂𑀢𑁆𑀯𑀸 𑀆𑀳𑀭𑀡𑀝𑁆𑀞𑀸𑀦𑀁 𑀓𑀢𑁆𑀯𑀸 𑀳𑀭𑀦𑁆𑀢𑀺. 𑀅𑀓𑀸𑀲𑀺𑀬𑀸 𑀭𑀸𑀚𑀽𑀳𑀺𑀯𑀸𑀦𑀼𑀲𑀺𑀝𑁆𑀞𑀸𑀢𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀩𑀮𑀺𑀁 𑀕𑀡𑁆𑀳𑀣𑀸’’𑀢𑀺 𑀭𑀸𑀚𑀽𑀳𑀺 𑀅𑀦𑀼𑀲𑀺𑀝𑁆𑀞𑀸 𑀅𑀓𑀸𑀲𑀺𑀬𑀲𑀗𑁆𑀔𑀸𑀢𑀸 𑀭𑀸𑀚𑀧𑀼𑀭𑀺𑀲𑀸 𑀯𑀺𑀬. 𑀢𑀤𑀲𑁆𑀲𑀸𑀢𑀺 𑀢𑀁 𑀅𑀲𑁆𑀲 𑀥𑀦𑀁 𑀆𑀤𑀸𑀬 𑀳𑀭𑀦𑁆𑀢𑀺. 𑀘𑁄𑀭𑀲𑀫𑀸𑀢𑀺 𑀅𑀪𑀽𑀢𑀩𑀮𑀺𑀕𑁆𑀕𑀸𑀳𑀓𑀸 𑀲𑀦𑁆𑀥𑀺𑀘𑁆𑀙𑁂𑀤𑀓𑀘𑁄𑀭𑀲𑀤𑀺𑀲𑀸 𑀅𑀲𑀧𑁆𑀧𑀼𑀭𑀺𑀲𑀸. 𑀯𑀚𑁆𑀛𑀸𑀢𑀺 𑀯𑀥𑀸𑀭𑀳𑀸 𑀏𑀯𑀭𑀽𑀧𑀸 𑀧𑀸𑀧𑀥𑀫𑁆𑀫𑀸 𑀉𑀤𑀸𑀦𑀺 𑀮𑁄𑀓𑁂 𑀦 𑀳𑀜𑁆𑀜𑀦𑁆𑀢𑀺.

𑀩𑀸𑀳𑀸𑀭𑀲𑀻𑀢𑀺 𑀩𑀸𑀳𑀸 𑀅𑀲𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀤𑀫𑁆𑀧𑀺 𑀅𑀭𑀺𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀼𑀲𑀸𑀯𑀸𑀤𑀁 𑀧𑀲𑁆𑀲. 𑀢𑁂 𑀓𑀺𑀭 𑀬𑀜𑁆𑀜𑁂𑀲𑀼 𑀫𑀳𑀢𑀺𑀁 𑀧𑀮𑀸𑀲𑀬𑀝𑁆𑀞𑀺𑀁 ‘‘𑀇𑀦𑁆𑀤𑀲𑁆𑀲 𑀩𑀸𑀳𑀸 𑀅𑀲𑀺 𑀤𑀓𑁆𑀔𑀺𑀡𑀸’’𑀢𑀺 𑀯𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀺. 𑀢𑀜𑁆𑀘𑁂 𑀏𑀢𑁂𑀲𑀁 𑀯𑀘𑀦𑀁 𑀲𑀘𑁆𑀘𑀁, 𑀅𑀣 𑀙𑀺𑀦𑁆𑀦𑀩𑀸𑀳𑀼 𑀲𑀫𑀸𑀦𑁄 𑀓𑁂𑀦𑀲𑁆𑀲 𑀩𑀸𑀳𑀼𑀩𑀮𑁂𑀦 𑀇𑀦𑁆𑀤𑁄 𑀅𑀲𑀼𑀭𑁂 𑀚𑀺𑀦𑀸𑀢𑀻𑀢𑀺. 𑀲𑀫𑀗𑁆𑀕𑀻𑀢𑀺 𑀩𑀸𑀳𑀼𑀲𑀫𑀗𑁆𑀕𑀻 𑀅𑀘𑁆𑀙𑀺𑀦𑁆𑀦𑀩𑀸𑀳𑀼 𑀅𑀭𑁄𑀕𑁄𑀬𑁂𑀯. 𑀳𑀦𑁆𑀢𑀸𑀢𑀺 𑀅𑀲𑀼𑀭𑀸𑀦𑀁 𑀳𑀦𑁆𑀢𑀸. 𑀧𑀭𑀫𑁄𑀢𑀺 𑀉𑀢𑁆𑀢𑀫𑁄 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀜𑁆𑀜𑁂𑀲𑀁 𑀅𑀯𑀚𑁆𑀛𑁄. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀢𑀼𑀘𑁆𑀙𑀭𑀽𑀧𑀸𑀢𑀺 𑀢𑀼𑀘𑁆𑀙𑀲𑀪𑀸𑀯𑀸 𑀦𑀺𑀧𑁆𑀨𑀮𑀸 ¶ . 𑀯𑀜𑁆𑀘𑀦𑀸𑀢𑀺 𑀬𑁂 𑀘 𑀢𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑁆𑀢𑀸 𑀦𑀸𑀫, 𑀏𑀲𑀸 𑀮𑁄𑀓𑁂 𑀲𑀦𑁆𑀤𑀺𑀝𑁆𑀞𑀺𑀓𑀸 𑀯𑀜𑁆𑀘𑀦𑀸.

𑀬𑀣𑀸𑀧𑀓𑀸𑀭𑀸𑀦𑀻𑀢𑀺 𑀬𑀸𑀤𑀺𑀲𑀸𑀦𑀺 𑀇𑀝𑁆𑀞𑀓𑀸𑀦𑀺 𑀕𑀳𑁂𑀢𑁆𑀯𑀸 𑀬𑀜𑁆𑀜𑀓𑀭𑁂𑀳𑀺 𑀘𑀺𑀢𑁆𑀬𑀸 𑀓𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀺𑀝𑁆𑀞𑀲𑁂𑀮𑀸𑀢𑀺 𑀧𑀩𑁆𑀩𑀢𑀸 𑀳𑀺 𑀅𑀘𑀮𑀸 𑀢𑀺𑀝𑁆𑀞𑀸 𑀦 𑀉𑀧𑀘𑀺𑀢𑀸 𑀏𑀓𑀕𑁆𑀖𑀦𑀸 𑀲𑀺𑀮𑀸𑀫𑀬𑀸 𑀘. 𑀇𑀝𑁆𑀞𑀓𑀸𑀦𑀺 𑀘𑀮𑀸𑀦𑀺 𑀦 𑀏𑀓𑀕𑁆𑀖𑀦𑀸𑀦𑀺 𑀦 𑀲𑀺𑀮𑀸𑀫𑀬𑀸𑀦𑀺. 𑀧𑀭𑀺𑀯𑀡𑁆𑀡𑀬𑀦𑁆𑀢𑀸𑀢𑀺 𑀏𑀢𑀁 ¶ 𑀬𑀜𑁆𑀜𑀁 𑀯𑀡𑁆𑀡𑁂𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀸.

𑀲𑀫𑀦𑁆𑀢𑀯𑁂𑀤𑁂𑀢𑀺 𑀧𑀭𑀺𑀧𑀼𑀡𑁆𑀡𑀯𑁂𑀤𑁂 𑀩𑁆𑀭𑀸𑀳𑁆𑀫𑀡𑁂. 𑀯𑀳𑀦𑁆𑀢𑀻𑀢𑀺 𑀲𑁄𑀢𑁂𑀲𑀼𑀧𑀺 𑀆𑀯𑀝𑁆𑀝𑁂𑀲𑀼𑀧𑀺 𑀧𑀢𑀺𑀢𑁂 𑀯𑀳𑀦𑁆𑀢𑀺, 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀦 𑀢𑁂𑀦 𑀩𑁆𑀬𑀸𑀧𑀦𑁆𑀦𑀭𑀲𑀽𑀤𑀓𑀸 𑀦𑀸𑀢𑀺 𑀏𑀢𑁆𑀣 𑀏𑀓𑁄 𑀦-𑀓𑀸𑀭𑁄 𑀧𑀼𑀘𑁆𑀙𑀦𑀢𑁆𑀣𑁄 𑀳𑁄𑀢𑀺. 𑀦𑀦𑀼 𑀢𑁂𑀦 𑀩𑁆𑀬𑀸𑀧𑀦𑁆𑀦𑀭𑀲𑀽𑀤𑀓𑀸 𑀦𑀤𑀺𑀬𑁄𑀢𑀺 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀓𑀲𑁆𑀫𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀢𑀸𑀯 𑀫𑀳𑀸𑀲𑀫𑀼𑀤𑁆𑀤𑁄𑀯 𑀅𑀧𑁂𑀬𑁆𑀬𑁄 𑀓𑀢𑁄, 𑀓𑀺𑀁 𑀫𑀳𑀸𑀩𑁆𑀭𑀳𑁆𑀫𑀸 𑀬𑀫𑀼𑀦𑀸𑀤𑀻𑀲𑀼 𑀦𑀤𑀻𑀲𑀼 𑀉𑀤𑀓𑀁 𑀅𑀧𑁂𑀬𑁆𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀫𑀼𑀤𑁆𑀤𑁂𑀬𑁂𑀯 𑀲𑀓𑁆𑀓𑁄𑀢𑀻𑀢𑀺. 𑀤𑁆𑀯𑀺𑀭𑀲𑀜𑁆𑀜𑀼 𑀫𑀸𑀳𑀽𑀢𑀺 𑀤𑁆𑀯𑀺𑀭𑀲𑀜𑁆𑀜𑀽 𑀅𑀳𑀼, 𑀚𑀸𑀢𑁄𑀢𑀺 𑀅𑀢𑁆𑀣𑁄.

𑀧𑀼𑀭𑁂 ¶ 𑀧𑀼𑀭𑀢𑁆𑀣𑀸𑀢𑀺 𑀇𑀢𑁄 𑀧𑀼𑀭𑁂 𑀧𑀼𑀩𑁆𑀩𑁂 𑀧𑀼𑀭𑀢𑁆𑀣𑀸 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂. 𑀓𑀸 𑀓𑀲𑁆𑀲 𑀪𑀭𑀺𑀬𑀸𑀢𑀺 𑀓𑀸 𑀓𑀲𑁆𑀲 𑀪𑀭𑀺𑀬𑀸 𑀦𑀸𑀫. 𑀢𑀤𑀸 𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀫𑁂𑀯 𑀦𑀢𑁆𑀣𑀺, 𑀧𑀘𑁆𑀙𑀸 𑀫𑁂𑀣𑀼𑀦𑀥𑀫𑁆𑀫𑀯𑀲𑁂𑀦 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀚𑀸𑀢𑀸. 𑀫𑀦𑁄 𑀫𑀦𑀼𑀲𑁆𑀲𑀦𑁆𑀢𑀺 𑀢𑀤𑀸 𑀳𑀺 𑀫𑀦𑁄𑀬𑁂𑀯 𑀫𑀦𑀼𑀲𑁆𑀲𑀁 𑀚𑀦𑁂𑀲𑀺, 𑀫𑀦𑁄𑀫𑀬𑀸𑀯 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀧𑀺 𑀥𑀫𑁆𑀫𑁂𑀦𑀸𑀢𑀺 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑁂𑀦 𑀲𑀪𑀸𑀯𑁂𑀦 𑀦 𑀓𑁄𑀘𑀺 𑀚𑀸𑀢𑀺𑀬𑀸 𑀳𑀻𑀦𑁄. 𑀦 𑀳𑀺 𑀢𑀤𑀸 𑀔𑀢𑁆𑀢𑀺𑀬𑀸𑀤𑀺𑀪𑁂𑀤𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀁 𑀩𑁆𑀭𑀸𑀳𑁆𑀫𑀡𑀸 𑀯𑀤𑀦𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸𑀯 𑀚𑀸𑀢𑀺𑀬𑀸 𑀲𑁂𑀝𑁆𑀞𑀸, 𑀇𑀢𑀭𑁂 𑀳𑀻𑀦𑀸’’𑀢𑀺, 𑀢𑀁 𑀫𑀺𑀘𑁆𑀙𑀸. 𑀏𑀯𑀫𑁆𑀧𑀻𑀢𑀺 𑀏𑀯𑀁 𑀯𑀢𑁆𑀢𑀫𑀸𑀦𑁂 𑀮𑁄𑀓𑁂 𑀧𑁄𑀭𑀸𑀡𑀓𑀯𑀢𑁆𑀢𑀁 𑀚𑀳𑀺𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑀸 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀓𑀢𑀸𑀦𑀁 𑀯𑀲𑁂𑀦 𑀔𑀢𑁆𑀢𑀺𑀬𑀸𑀤𑀬𑁄 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀚𑀸𑀢𑀸, 𑀏𑀯𑀫𑁆𑀧𑀺 𑀯𑁄𑀲𑁆𑀲𑀕𑁆𑀕𑀯𑀺𑀪𑀗𑁆𑀕𑀫𑀸𑀳𑀼, 𑀅𑀢𑁆𑀢𑀦𑀸 𑀓𑀢𑁂𑀳𑀺 𑀓𑀫𑁆𑀫𑀯𑁄𑀲𑁆𑀲𑀕𑁆𑀕𑁂𑀳𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀏𑀓𑀘𑁆𑀘𑁂 𑀔𑀢𑁆𑀢𑀺𑀬𑀸 𑀚𑀸𑀢𑀸, 𑀏𑀓𑀘𑁆𑀘𑁂 𑀩𑁆𑀭𑀸𑀳𑁆𑀫𑀡𑀸𑀤𑀬𑁄𑀢𑀺 𑀇𑀫𑀁 𑀯𑀺𑀪𑀸𑀕𑀁 𑀓𑀣𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑀸𑀯 𑀲𑁂𑀝𑁆𑀞𑀸’’𑀢𑀺 𑀯𑀘𑀦𑀁 𑀫𑀺𑀘𑁆𑀙𑀸.

𑀲𑀢𑁆𑀢𑀥𑀸𑀢𑀺 𑀬𑀤𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀜𑁂𑀯 𑀢𑀬𑁄 𑀯𑁂𑀤𑀸 𑀤𑀺𑀦𑁆𑀦𑀸, 𑀦 𑀅𑀜𑁆𑀜𑁂𑀲𑀁, 𑀘𑀡𑁆𑀟𑀸𑀮𑀲𑁆𑀲 𑀫𑀦𑁆𑀢𑁂 𑀪𑀸𑀲𑀦𑁆𑀢𑀲𑁆𑀲 𑀫𑀼𑀤𑁆𑀥𑀸 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬, 𑀦 ¶ 𑀘 𑀨𑀮𑀢𑀺, 𑀢𑀲𑁆𑀫𑀸 𑀇𑀫𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀢𑁆𑀢𑀯𑀥𑀸𑀬 𑀫𑀦𑁆𑀢𑀸 𑀓𑀢𑀸, 𑀅𑀢𑁆𑀢𑀦𑁄𑀬𑁂𑀯 𑀦𑁂𑀲𑀁 𑀫𑀼𑀲𑀸𑀯𑀸𑀤𑀺𑀢𑀁 𑀧𑀓𑀸𑀲𑁂𑀦𑁆𑀢𑀸 𑀕𑀼𑀡𑀯𑀥𑀁 𑀓𑀭𑁄𑀦𑁆𑀢𑀺. 𑀯𑀸𑀘𑀸𑀓𑀢𑀸𑀢𑀺 𑀏𑀢𑁂 𑀫𑀦𑁆𑀢𑀸 𑀦𑀸𑀫 𑀫𑀼𑀲𑀸𑀯𑀸𑀤𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑀸. 𑀕𑀺𑀤𑁆𑀥𑀺𑀓𑀢𑀸 𑀕𑀳𑀻𑀢𑀸𑀢𑀺 𑀮𑀸𑀪𑀕𑀺𑀤𑁆𑀥𑀺𑀓𑀢𑀸𑀬 𑀩𑁆𑀭𑀸𑀳𑁆𑀫𑀡𑁂𑀳𑀺 𑀕𑀳𑀺𑀢𑀸. 𑀤𑀼𑀫𑁆𑀫𑁄𑀘𑀬𑀸𑀢𑀺 𑀫𑀘𑁆𑀙𑁂𑀦 𑀕𑀺𑀮𑀺𑀢𑀩𑀮𑀺𑀲𑁄 𑀯𑀺𑀬 𑀤𑀼𑀫𑁆𑀫𑁄𑀘𑀬𑀸. 𑀓𑀩𑁆𑀬𑀧𑀣𑀸𑀦𑀼𑀧𑀦𑁆𑀦𑀸𑀢𑀺 𑀓𑀩𑁆𑀬𑀸𑀓𑀸𑀭𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀧𑀣𑀁 𑀅𑀦𑀼𑀧𑀦𑁆𑀦𑀸 𑀅𑀦𑀼𑀕𑀢𑀸. 𑀢𑁂 𑀳𑀺 𑀬𑀣𑀸 𑀇𑀘𑁆𑀙𑀦𑁆𑀢𑀺, 𑀢𑀣𑀸 𑀫𑀼𑀲𑀸 𑀯𑀢𑁆𑀯𑀸 𑀩𑀦𑁆𑀥𑀦𑁆𑀢𑀺. 𑀩𑀸𑀮𑀸𑀦𑀦𑁆𑀢𑀺 𑀢𑁂𑀲𑀜𑁆𑀳𑀺 𑀩𑀸𑀮𑀸𑀦𑀁 𑀘𑀺𑀢𑁆𑀢𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁, 𑀢𑀁 𑀅𑀜𑁆𑀜𑁂 𑀅𑀧𑁆𑀧𑀧𑀜𑁆𑀜𑀸𑀯 𑀅𑀪𑀺𑀲𑀤𑁆𑀤𑀳𑀦𑁆𑀢𑀺.

𑀧𑁄𑀭𑀺𑀲𑀺𑀬𑀁𑀩𑀮𑁂𑀦𑀸𑀢𑀺 𑀧𑁄𑀭𑀺𑀲𑀺𑀬𑀲𑀗𑁆𑀔𑀸𑀢𑁂𑀦 𑀩𑀮𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀏𑀢𑁂𑀲𑀁 𑀲𑀻𑀳𑀸𑀤𑀻𑀦𑀁 𑀧𑀼𑀭𑀺𑀲𑀣𑀸𑀫𑀲𑀗𑁆𑀔𑀸𑀢𑀁 𑀧𑁄𑀭𑀺𑀲𑀺𑀬𑀩𑀮𑀁, 𑀢𑁂𑀦 𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀇𑀫𑁂𑀳𑀺 𑀢𑀺𑀭𑀘𑁆𑀙𑀸𑀦𑁂𑀳𑀺𑀧𑀺 𑀳𑀻𑀦𑀸𑀬𑁂𑀯𑀸𑀢𑀺. 𑀫𑀦𑀼𑀲𑁆𑀲𑀪𑀸𑀯𑁄 𑀘 𑀕𑀯𑀁𑀯 𑀧𑁂𑀓𑁆𑀔𑁄𑀢𑀺 𑀅𑀧𑀺𑀘 𑀬𑁄 𑀏𑀢𑁂𑀲𑀁 𑀫𑀦𑀼𑀲𑁆𑀲𑀪𑀸𑀯𑁄, 𑀲𑁄 𑀕𑀼𑀦𑁆𑀦𑀁 𑀯𑀺𑀬 𑀧𑁂𑀓𑁆𑀔𑀺𑀢𑀩𑁆𑀩𑁄. 𑀓𑀺𑀁𑀓𑀸𑀭𑀡𑀸? 𑀚𑀸𑀢𑀺 𑀳𑀺 𑀢𑁂𑀲𑀁 𑀅𑀲𑀫𑀸 𑀲𑀫𑀸𑀦𑀸. 𑀢𑁂𑀲𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀼𑀧𑁆𑀧𑀜𑁆𑀜𑀢𑀸𑀬 𑀕𑁄𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀚𑀸𑀢𑀺𑀬𑁂𑀯 𑀅𑀲𑀫𑀸. 𑀅𑀜𑁆𑀜𑀫𑁂𑀯 𑀳𑀺 𑀕𑀼𑀦𑁆𑀦𑀁 𑀲𑀡𑁆𑀞𑀸𑀦𑀁, 𑀅𑀜𑁆𑀜𑀁 𑀢𑁂𑀲𑀦𑁆𑀢𑀺. 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑁂 𑀢𑀺𑀭𑀘𑁆𑀙𑀸𑀦𑁂𑀲𑀼 𑀲𑀻𑀳𑀸𑀤𑀻𑀳𑀺 𑀲𑀫𑁂𑀧𑀺 𑀅𑀓𑀢𑁆𑀯𑀸 𑀕𑁄𑀭𑀽𑀧𑀲𑀫𑁂𑀯 𑀓𑀭𑁄𑀢𑀺.

𑀲𑀘𑁂 𑀘 𑀭𑀸𑀚𑀸𑀢𑀺 𑀅𑀭𑀺𑀝𑁆𑀞, 𑀬𑀤𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀤𑀺𑀦𑁆𑀦𑀪𑀸𑀯𑁂𑀦 𑀔𑀢𑁆𑀢𑀺𑀬𑁄𑀯 𑀧𑀣𑀯𑀺𑀁 𑀯𑀺𑀚𑀺𑀢𑁆𑀯𑀸. 𑀲𑀚𑀻𑀯𑀯𑀸𑀢𑀺 𑀲𑀳𑀚𑀻𑀯𑀻𑀳𑀺 𑀅𑀫𑀘𑁆𑀘𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀲𑁆𑀲𑀯𑀧𑀸𑀭𑀺𑀲𑀚𑁆𑀚𑁄𑀢𑀺 𑀅𑀢𑁆𑀢𑀦𑁄 𑀑𑀯𑀸𑀤𑀓𑀭𑀧𑀭𑀺𑀲𑀸𑀯𑀘𑀭𑁄𑀯 𑀲𑀺𑀬𑀸, 𑀅𑀣𑀲𑁆𑀲 𑀧𑀭𑀺𑀲𑀸𑀬 𑀬𑀼𑀚𑁆𑀛𑀺𑀢𑁆𑀯𑀸 ¶ 𑀭𑀚𑁆𑀚𑀁 𑀓𑀸𑀢𑀩𑁆𑀩𑀁 𑀦𑀸𑀫 𑀦 𑀪𑀯𑁂𑀬𑁆𑀬 ¶ . 𑀲𑀬𑀫𑁂𑀯 𑀲𑁄 𑀏𑀓𑀓𑁄𑀯 𑀲𑀢𑁆𑀢𑀼𑀲𑀗𑁆𑀖𑀁 𑀯𑀺𑀚𑁂𑀬𑁆𑀬, 𑀏𑀯𑀁 𑀲𑀢𑀺 𑀬𑀼𑀤𑁆𑀥𑁂 𑀤𑀼𑀓𑁆𑀔𑀸𑀪𑀸𑀯𑁂𑀦 𑀢𑀲𑁆𑀲 𑀧𑀚𑀸 𑀦𑀺𑀘𑁆𑀘𑀲𑀼𑀔𑀻 𑀪𑀯𑁂𑀬𑁆𑀬, 𑀏𑀢𑀜𑁆𑀘 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀁 𑀫𑀺𑀘𑁆𑀙𑀸.

𑀔𑀢𑁆𑀢𑀺𑀬𑀫𑀦𑁆𑀢𑀸𑀢𑀺 𑀭𑀸𑀚𑀲𑀢𑁆𑀣𑀜𑁆𑀘 𑀢𑀬𑁄 𑀘 𑀯𑁂𑀤𑀸 𑀅𑀢𑁆𑀢𑀦𑁄 𑀆𑀡𑀸𑀬 𑀭𑀼𑀘𑀺𑀬𑀸 ‘‘𑀇𑀤𑀫𑁂𑀯 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀯𑀢𑁆𑀢𑀢𑁆𑀢𑀸 𑀅𑀢𑁆𑀣𑁂𑀦 𑀏𑀢𑁂 𑀲𑀫𑀓𑀸 𑀪𑀯𑀦𑁆𑀢𑀺. 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀢𑀺 𑀢𑁂𑀲𑀁 𑀔𑀢𑁆𑀢𑀺𑀬𑀫𑀦𑁆𑀢𑀸𑀦𑀁 𑀔𑀢𑁆𑀢𑀺𑀬𑁄𑀧𑀺 𑀯𑁂𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑁄𑀧𑀺 𑀅𑀢𑁆𑀣𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀆𑀡𑀸𑀯𑀲𑁂𑀦𑁂𑀯 𑀉𑀕𑁆𑀕𑀡𑁆𑀳𑀦𑁆𑀢𑁄 𑀢𑀁 𑀅𑀢𑁆𑀣𑀁 𑀉𑀤𑀓𑁄𑀖𑁂𑀦 𑀙𑀦𑁆𑀦𑀫𑀕𑁆𑀕𑀁 𑀯𑀺𑀬 𑀦 𑀩𑀼𑀚𑁆𑀛𑀢𑀺.

𑀅𑀢𑁆𑀣𑁂𑀦 ¶ 𑀏𑀢𑁂𑀢𑀺 𑀯𑀜𑁆𑀘𑀦𑀢𑁆𑀣𑁂𑀦 𑀏𑀢𑁂 𑀲𑀫𑀓𑀸 𑀪𑀯𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀩𑁆𑀭𑀸𑀳𑁆𑀫𑀡𑀸𑀯 𑀲𑁂𑀝𑁆𑀞𑀸, 𑀅𑀜𑁆𑀜𑁂 𑀯𑀡𑁆𑀡𑀸 𑀳𑀻𑀦𑀸𑀢𑀺 𑀯𑀤𑀦𑁆𑀢𑀺. 𑀬𑁂 𑀘 𑀢𑁂 𑀮𑀸𑀪𑀸𑀤𑀬𑁄 𑀮𑁄𑀓𑀥𑀫𑁆𑀫𑀸, 𑀲𑀩𑁆𑀩𑁂𑀯 𑀢𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀡𑁆𑀡𑀸𑀦𑀁 𑀥𑀫𑁆𑀫𑀸. 𑀏𑀓𑀲𑀢𑁆𑀢𑁄𑀧𑀺 𑀏𑀢𑁂𑀳𑀺 𑀫𑀼𑀢𑁆𑀢𑀓𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀥𑀫𑁆𑀫𑁂𑀳𑀺 𑀅𑀧𑀭𑀺𑀫𑀼𑀢𑁆𑀢𑀸𑀯 𑀲𑀫𑀸𑀦𑀸 ‘‘𑀲𑁂𑀝𑁆𑀞𑀸 𑀫𑀬’’𑀦𑁆𑀢𑀺 𑀫𑀼𑀲𑀸 𑀓𑀣𑁂𑀦𑁆𑀢𑀺.

𑀇𑀩𑁆𑀪𑀸𑀢𑀺 𑀕𑀳𑀧𑀢𑀺𑀓𑀸. 𑀢𑁂𑀯𑀺𑀚𑁆𑀚𑀲𑀗𑁆𑀖𑀸 𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑀸𑀧𑀺 𑀢𑀣𑁂𑀯 𑀧𑀼𑀣𑀽𑀦𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺. 𑀦𑀺𑀘𑁆𑀘𑀼𑀲𑁆𑀲𑀼𑀓𑀸𑀢𑀺 𑀦𑀺𑀘𑁆𑀘𑀁 𑀉𑀲𑁆𑀲𑀼𑀓𑁆𑀓𑀚𑀸𑀢𑀸 𑀙𑀦𑁆𑀤𑀚𑀸𑀢𑀸. 𑀢𑀤𑀧𑁆𑀧𑀧𑀜𑁆𑀜𑀸 𑀤𑁆𑀯𑀺𑀭𑀲𑀜𑁆𑀜𑀼𑀭𑀸 𑀢𑁂𑀢𑀺 𑀢𑀲𑁆𑀫𑀸 𑀪𑀸𑀢𑀺𑀓, 𑀤𑁆𑀯𑀺𑀭𑀲𑀜𑁆𑀜𑀼 𑀦𑀺𑀧𑁆𑀧𑀜𑁆𑀜𑀸 𑀩𑁆𑀭𑀸𑀳𑁆𑀫𑀡𑀸, 𑀆𑀭𑀸 𑀢𑁂 𑀥𑀫𑁆𑀫𑀢𑁄. 𑀧𑁄𑀭𑀸𑀡𑀓𑀸 𑀳𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀸 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑀸 𑀦𑀸𑀕𑀧𑀭𑀺𑀲𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁂𑀲𑀼𑀁. 𑀫𑀳𑀸𑀲𑀢𑁆𑀢𑁄 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑀁 𑀦𑀸𑀕𑀪𑀯𑀦𑀸 𑀦𑀻𑀳𑀭𑀸𑀧𑁂𑀲𑀺, 𑀧𑀭𑀺𑀪𑀸𑀲𑀫𑀢𑁆𑀢𑀫𑁆𑀧𑀺𑀲𑁆𑀲 𑀦𑀸𑀓𑀸𑀲𑀺. 𑀲𑀸𑀕𑀭𑀩𑁆𑀭𑀳𑁆𑀫𑀤𑀢𑁆𑀢𑁄𑀧𑀺 𑀞𑀧𑀺𑀢𑀤𑀺𑀯𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀳 𑀧𑀺𑀢𑀼 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 ‘‘𑀫𑀸𑀢𑀼𑀮𑀜𑁆𑀘 𑀅𑀬𑁆𑀬𑀓𑀜𑁆𑀘 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀬𑀫𑀼𑀦𑀸𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀢𑀫𑁂𑀯 𑀅𑀲𑁆𑀲𑀫𑀧𑀤𑀁 𑀆𑀭𑀩𑁆𑀪 𑀧𑀸𑀬𑀸𑀲𑀺. 𑀅𑀯𑀲𑁂𑀲𑀸 𑀪𑀸𑀢𑀭𑁄 𑀘𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀘 𑀧𑀘𑁆𑀙𑀢𑁄 𑀧𑀸𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀸𑀕𑀭𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀳𑀸𑀲𑀢𑁆𑀢𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀆𑀕𑀘𑁆𑀙𑀦𑁆𑀢𑀁 𑀅𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀺𑀢𑀭𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋

𑁯𑁬𑁭.

‘‘𑀓𑀲𑁆𑀲 𑀪𑁂𑀭𑀻 𑀫𑀼𑀤𑀺𑀗𑁆𑀕𑀸 𑀘, 𑀲𑀗𑁆𑀔𑀸 𑀧𑀡𑀯𑀤𑀺𑀦𑁆𑀤𑀺𑀫𑀸;

𑀧𑀼𑀭𑀢𑁄 𑀧𑀝𑀺𑀧𑀦𑁆𑀦𑀸𑀦𑀺, 𑀳𑀸𑀲𑀬𑀦𑁆𑀢𑀸 𑀭𑀣𑁂𑀲𑀪𑀁.

𑁯𑁬𑁮.

‘‘𑀓𑀲𑁆𑀲 ¶ 𑀓𑀜𑁆𑀘𑀦𑀧𑀝𑁆𑀝𑁂𑀦, 𑀧𑀼𑀣𑀼𑀦𑀸 𑀯𑀺𑀚𑁆𑀚𑀼𑀯𑀡𑁆𑀡𑀺𑀦𑀸;

𑀬𑀼𑀯𑀸 𑀓𑀮𑀸𑀧𑀲𑀦𑁆𑀦𑀤𑁆𑀥𑁄, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.

𑁯𑁬𑁯.

‘‘𑀉𑀓𑁆𑀓𑀸𑀫𑀼𑀔𑀧𑀳𑀝𑁆𑀞𑀁𑀯, 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑀁;

𑀫𑀼𑀔𑀜𑁆𑀘 𑀭𑀼𑀘𑀺𑀭𑀸 𑀪𑀸𑀢𑀺, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.

𑁯𑁭𑁦.

‘‘𑀓𑀲𑁆𑀲 ¶ 𑀚𑀫𑁆𑀩𑁄𑀦𑀤𑀁 𑀙𑀢𑁆𑀢𑀁, 𑀲𑀲𑀮𑀸𑀓𑀁 𑀫𑀦𑁄𑀭𑀫𑀁;

𑀆𑀤𑀺𑀘𑁆𑀘𑀭𑀁𑀲𑀸𑀯𑀭𑀡𑀁, 𑀓𑁄 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁.

𑁯𑁭𑁧.

‘‘𑀓𑀲𑁆𑀲 ¶ 𑀅𑀗𑁆𑀕𑀁 𑀧𑀭𑀺𑀕𑁆𑀕𑀬𑁆𑀳, 𑀯𑀸𑀮𑀩𑀻𑀚𑀦𑀺𑀫𑀼𑀢𑁆𑀢𑀫𑀁;

𑀉𑀪𑀢𑁄 𑀯𑀭𑀧𑀼𑀜𑁆𑀜𑀲𑁆𑀲, 𑀫𑀼𑀤𑁆𑀥𑀦𑀺 𑀉𑀧𑀭𑀽𑀧𑀭𑀺.

𑁯𑁭𑁨.

‘‘𑀓𑀲𑁆𑀲 𑀧𑁂𑀔𑀼𑀡𑀳𑀢𑁆𑀣𑀸𑀦𑀺, 𑀘𑀺𑀢𑁆𑀭𑀸𑀦𑀺 𑀘 𑀫𑀼𑀤𑀽𑀦𑀺 𑀘;

𑀓𑀜𑁆𑀘𑀦𑀫𑀡𑀺𑀤𑀡𑁆𑀟𑀸𑀦𑀺, 𑀘𑀭𑀦𑁆𑀢𑀺 𑀤𑀼𑀪𑀢𑁄 𑀫𑀼𑀔𑀁.

𑁯𑁭𑁩.

‘‘𑀔𑀤𑀺𑀭𑀗𑁆𑀕𑀸𑀭𑀯𑀡𑁆𑀡𑀸𑀪𑀸, 𑀉𑀓𑁆𑀓𑀸𑀫𑀼𑀔𑀧𑀳𑀁𑀲𑀺𑀢𑀸;

𑀓𑀲𑁆𑀲𑁂𑀢𑁂 𑀓𑀼𑀡𑁆𑀟𑀮𑀸 𑀯𑀕𑁆𑀕𑀽, 𑀲𑁄𑀪𑀦𑁆𑀢𑀺 𑀤𑀼𑀪𑀢𑁄 𑀫𑀼𑀔𑀁.

𑁯𑁭𑁪.

‘‘𑀓𑀲𑁆𑀲 𑀯𑀸𑀢𑁂𑀦 𑀙𑀼𑀧𑀺𑀢𑀸, 𑀦𑀺𑀤𑁆𑀥𑀦𑁆𑀢𑀸 𑀫𑀼𑀤𑀼𑀓𑀸𑀴𑀓𑀸;

𑀲𑁄𑀪𑀬𑀦𑁆𑀢𑀺 𑀦𑀮𑀸𑀝𑀦𑁆𑀢𑀁, 𑀦𑀪𑀸 𑀯𑀺𑀚𑁆𑀚𑀼𑀭𑀺𑀯𑀼𑀕𑁆𑀕𑀢𑀸.

𑁯𑁭𑁫.

‘‘𑀓𑀲𑁆𑀲 𑀏𑀢𑀸𑀦𑀺 𑀅𑀓𑁆𑀔𑀻𑀦𑀺, 𑀆𑀬𑀢𑀸𑀦𑀺 𑀧𑀼𑀣𑀽𑀦𑀺 𑀘;

𑀓𑁄 𑀲𑁄𑀪𑀢𑀺 𑀯𑀺𑀲𑀸𑀮𑀓𑁆𑀔𑁄, 𑀓𑀲𑁆𑀲𑁂𑀢𑀁 𑀉𑀡𑁆𑀡𑀚𑀁 𑀫𑀼𑀔𑀁.

𑁯𑁭𑁬.

‘‘𑀓𑀲𑁆𑀲𑁂𑀢𑁂 𑀮𑀧𑀦𑀚𑀸𑀢𑀸, 𑀲𑀼𑀤𑁆𑀥𑀸 𑀲𑀗𑁆𑀔𑀯𑀭𑀽𑀧𑀫𑀸;

𑀪𑀸𑀲𑀫𑀸𑀦𑀲𑁆𑀲 𑀲𑁄𑀪𑀦𑁆𑀢𑀺, 𑀤𑀦𑁆𑀢𑀸 𑀓𑀼𑀧𑁆𑀧𑀺𑀮𑀲𑀸𑀤𑀺𑀲𑀸.

𑁯𑁭𑁭.

‘‘𑀓𑀲𑁆𑀲 𑀮𑀸𑀔𑀸𑀭𑀲𑀲𑀫𑀸, 𑀳𑀢𑁆𑀣𑀧𑀸𑀤𑀸 𑀲𑀼𑀔𑁂𑀥𑀺𑀢𑀸;

𑀓𑁄 𑀲𑁄 𑀩𑀺𑀫𑁆𑀩𑁄𑀝𑁆𑀞𑀲𑀫𑁆𑀧𑀦𑁆𑀦𑁄, 𑀤𑀺𑀯𑀸 𑀲𑀽𑀭𑀺𑀬𑁄𑀯 𑀪𑀸𑀲𑀢𑀺.

𑁯𑁭𑁮.

‘‘𑀳𑀺𑀫𑀘𑁆𑀘𑀬𑁂 ¶ 𑀳𑀺𑀫𑀯𑀢𑀺, 𑀫𑀳𑀸𑀲𑀸𑀮𑁄𑀯 𑀧𑀼𑀧𑁆𑀨𑀺𑀢𑁄;

𑀓𑁄 𑀲𑁄 𑀑𑀤𑀸𑀢𑀧𑀸𑀯𑀸𑀭𑁄, 𑀚𑀬𑀁 𑀇𑀦𑁆𑀤𑁄𑀯 𑀲𑁄𑀪𑀢𑀺.

𑁯𑁭𑁯.

‘‘𑀲𑀼𑀯𑀡𑁆𑀡𑀧𑀻𑀴𑀓𑀸𑀓𑀺𑀡𑁆𑀡𑀁, 𑀫𑀡𑀺𑀤𑀡𑁆𑀟𑀯𑀺𑀘𑀺𑀢𑁆𑀢𑀓𑀁;

𑀓𑁄 𑀲𑁄 𑀧𑀭𑀺𑀲𑀫𑁄𑀕𑀬𑁆𑀳, 𑀈𑀲𑀁 𑀔𑀕𑁆𑀕𑀁 𑀧𑀫𑀼𑀜𑁆𑀘𑀢𑀺.

𑁯𑁮𑁦.

‘‘𑀲𑀼𑀯𑀡𑁆𑀡𑀯𑀺𑀓𑀢𑀸 𑀘𑀺𑀢𑁆𑀢𑀸, 𑀲𑀼𑀓𑀢𑀸 𑀘𑀺𑀢𑁆𑀢𑀲𑀺𑀩𑁆𑀩𑀦𑀸;

𑀓𑁄 𑀲𑁄 𑀑𑀫𑀼𑀜𑁆𑀘𑀢𑁂 𑀧𑀸𑀤𑀸, 𑀦𑀫𑁄 𑀓𑀢𑁆𑀯𑀸 𑀫𑀳𑁂𑀲𑀺𑀦𑁄’’𑀢𑀺.

𑀢𑀢𑁆𑀣 𑀧𑀝𑀺𑀧𑀦𑁆𑀦𑀸𑀦𑀻𑀢𑀺 𑀓𑀲𑁆𑀲𑁂𑀢𑀸𑀦𑀺 𑀢𑀽𑀭𑀺𑀬𑀸𑀦𑀺 𑀧𑀼𑀭𑀢𑁄 𑀧𑀝𑀺𑀧𑀦𑁆𑀦𑀸𑀦𑀺. 𑀳𑀸𑀲𑀬𑀦𑁆𑀢𑀸𑀢𑀺 𑀏𑀢𑀁 𑀭𑀸𑀚𑀸𑀦𑀁 𑀳𑀸𑀲𑀬𑀦𑁆𑀢𑀸. 𑀓𑀲𑁆𑀲 𑀓𑀜𑁆𑀘𑀦𑀧𑀝𑁆𑀝𑁂𑀦𑀸𑀢𑀺 𑀓𑀲𑁆𑀲 𑀦𑀮𑀸𑀝𑀦𑁆𑀢𑁂 𑀩𑀦𑁆𑀥𑁂𑀦 𑀉𑀡𑁆𑀳𑀻𑀲𑀧𑀝𑁆𑀝𑁂𑀦 𑀯𑀺𑀚𑁆𑀚𑀼𑀬𑀸 𑀫𑁂𑀖𑀫𑀼𑀔𑀁 𑀯𑀺𑀬 𑀫𑀼𑀔𑀁 𑀧𑀚𑁆𑀚𑁄𑀢𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀬𑀼𑀯𑀸 𑀓𑀮𑀸𑀧𑀲𑀦𑁆𑀦𑀤𑁆𑀥𑁄𑀢𑀺 𑀢𑀭𑀼𑀡𑁄 𑀲𑀦𑁆𑀦𑀤𑁆𑀥𑀓𑀮𑀸𑀧𑁄. 𑀉𑀓𑁆𑀓𑀸𑀫𑀼𑀔𑀧𑀳𑀝𑁆𑀞𑀁𑀯𑀸𑀢𑀺 𑀓𑀫𑁆𑀫𑀸𑀭𑀼𑀤𑁆𑀥𑀦𑁂 𑀧𑀳𑀝𑁆𑀞𑀲𑀼𑀯𑀡𑁆𑀡𑀁 𑀯𑀺𑀬. 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑀦𑁆𑀢𑀺 𑀆𑀤𑀺𑀢𑁆𑀢𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑀁. 𑀚𑀫𑁆𑀩𑁄𑀦𑀤𑀦𑁆𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀁. 𑀅𑀗𑁆𑀕𑀁 𑀧𑀭𑀺𑀕𑁆𑀕𑀬𑁆𑀳𑀸𑀢𑀺 𑀘𑀸𑀫𑀭𑀺𑀕𑀸𑀳𑀓𑁂𑀦 ¶ 𑀅𑀗𑁆𑀕𑁂𑀦 𑀧𑀭𑀺𑀕𑁆𑀕𑀳𑀺𑀢𑀸 𑀳𑀼𑀢𑁆𑀯𑀸. 𑀯𑀸𑀮𑀩𑀻𑀚𑀦𑀺𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀯𑀸𑀮𑀩𑀻𑀚𑀦𑀺𑀁. 𑀧𑁂𑀔𑀼𑀡𑀳𑀢𑁆𑀣𑀸𑀦𑀻𑀢𑀺 𑀫𑁄𑀭𑀧𑀺𑀜𑁆𑀙𑀳𑀢𑁆𑀣𑀓𑀸𑀦𑀺. 𑀘𑀺𑀢𑁆𑀭𑀸𑀦𑀻𑀢𑀺 𑀲𑀢𑁆𑀢𑀭𑀢𑀦𑀘𑀺𑀢𑁆𑀭𑀸𑀦𑀺. 𑀓𑀜𑁆𑀘𑀦𑀫𑀡𑀺𑀤𑀡𑁆𑀟𑀸𑀦𑀻𑀢𑀺 𑀢𑀧𑀦𑀻𑀬𑀲𑀼𑀯𑀡𑁆𑀡𑁂𑀦 𑀘 𑀫𑀡𑀻𑀳𑀺 ¶ 𑀘 𑀔𑀡𑀺𑀢𑀤𑀡𑁆𑀟𑀸𑀦𑀺. 𑀤𑀼𑀪𑀢𑁄 𑀫𑀼𑀔𑀦𑁆𑀢𑀺 𑀫𑀼𑀔𑀲𑁆𑀲 𑀉𑀪𑀬𑀧𑀲𑁆𑀲𑁂𑀲𑀼 𑀘𑀭𑀦𑁆𑀢𑀺.

𑀯𑀸𑀢𑁂𑀦 𑀙𑀼𑀧𑀺𑀢𑀸𑀢𑀺 𑀯𑀸𑀢𑀧𑀳𑀝𑀸. 𑀦𑀺𑀤𑁆𑀥𑀦𑁆𑀢𑀸𑀢𑀺 𑀲𑀺𑀦𑀺𑀤𑁆𑀥𑀅𑀦𑁆𑀢𑀸. 𑀦𑀮𑀸𑀝𑀦𑁆𑀢𑀦𑁆𑀢𑀺 𑀓𑀲𑁆𑀲𑁂𑀢𑁂 𑀏𑀯𑀭𑀽𑀧𑀸 𑀓𑁂𑀲𑀸 𑀦𑀮𑀸𑀝𑀦𑁆𑀢𑀁 𑀉𑀧𑀲𑁄𑀪𑁂𑀦𑁆𑀢𑀺. 𑀦𑀪𑀸 𑀯𑀺𑀚𑁆𑀚𑀼𑀭𑀺𑀯𑀼𑀕𑁆𑀕𑀢𑀸𑀢𑀺 𑀦𑀪𑀢𑁄 𑀉𑀕𑁆𑀕𑀢𑀸 𑀯𑀺𑀚𑁆𑀚𑀼 𑀯𑀺𑀬. 𑀉𑀡𑁆𑀡𑀚𑀦𑁆𑀢𑀺 𑀓𑀜𑁆𑀘𑀦𑀸𑀤𑀸𑀲𑁄 𑀯𑀺𑀬 𑀧𑀭𑀺𑀧𑀼𑀡𑁆𑀡𑀁. 𑀮𑀧𑀦𑀚𑀸𑀢𑀸𑀢𑀺 𑀫𑀼𑀔𑀚𑀸𑀢𑀸. 𑀓𑀼𑀧𑁆𑀧𑀺𑀮𑀲𑀸𑀤𑀺𑀲𑀸𑀢𑀺 𑀫𑀦𑁆𑀤𑀸𑀮𑀓𑀫𑀓𑀼𑀮𑀲𑀤𑀺𑀲𑀸. 𑀲𑀼𑀔𑁂𑀥𑀺𑀢𑀸𑀢𑀺 𑀲𑀼𑀔𑀧𑀭𑀺𑀳𑀝𑀸. 𑀚𑀬𑀁 𑀇𑀦𑁆𑀤𑁄𑀯𑀸𑀢𑀺 𑀚𑀬𑀁 𑀧𑀢𑁆𑀢𑁄 𑀇𑀦𑁆𑀤𑁄 𑀯𑀺𑀬. 𑀲𑀼𑀯𑀡𑁆𑀡𑀧𑀻𑀴𑀓𑀸𑀓𑀺𑀡𑁆𑀡𑀦𑁆𑀢𑀺 𑀲𑀼𑀯𑀡𑁆𑀡𑀧𑀻𑀴𑀓𑀸𑀳𑀺 𑀆𑀓𑀺𑀡𑁆𑀡𑀁. 𑀫𑀡𑀺𑀤𑀡𑁆𑀟𑀯𑀺𑀘𑀺𑀢𑁆𑀢𑀓𑀦𑁆𑀢𑀺 𑀫𑀡𑀻𑀳𑀺 𑀣𑀭𑀼𑀫𑁆𑀳𑀺 𑀯𑀺𑀘𑀺𑀢𑁆𑀢𑀓𑀁. 𑀲𑀼𑀯𑀡𑁆𑀡𑀯𑀺𑀓𑀢𑀸𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀸. 𑀘𑀺𑀢𑁆𑀢𑀸𑀢𑀺 𑀲𑀢𑁆𑀢𑀭𑀢𑀦𑀯𑀺𑀘𑀺𑀢𑁆𑀢𑀸. 𑀲𑀼𑀓𑀢𑀸𑀢𑀺 𑀲𑀼𑀝𑁆𑀞𑀼 𑀦𑀺𑀝𑁆𑀞𑀺𑀢𑀸. 𑀘𑀺𑀢𑁆𑀢𑀲𑀺𑀩𑁆𑀩𑀦𑀸𑀢𑀺 𑀘𑀺𑀢𑁆𑀭𑀲𑀺𑀩𑁆𑀩𑀺𑀦𑀺𑀬𑁄. 𑀓𑁄 𑀲𑁄 𑀑𑀫𑀼𑀜𑁆𑀘𑀢𑁂 𑀧𑀸𑀤𑀸𑀢𑀺 𑀓𑁄 𑀏𑀲 𑀧𑀸𑀤𑀢𑁄 𑀏𑀯𑀭𑀽𑀧𑀸 𑀧𑀸𑀤𑀼𑀓𑀸 𑀑𑀫𑀼𑀜𑁆𑀘𑀢𑀻𑀢𑀺.

𑀏𑀯𑀁 𑀧𑀼𑀢𑁆𑀢𑁂𑀦 𑀲𑀸𑀕𑀭𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀧𑀼𑀝𑁆𑀞𑁄 𑀇𑀤𑁆𑀥𑀺𑀫𑀸 𑀅𑀪𑀺𑀜𑁆𑀜𑀸𑀮𑀸𑀪𑀻 𑀢𑀸𑀧𑀲𑁄 ‘‘𑀢𑀸𑀢, 𑀏𑀢𑁂 𑀥𑀢𑀭𑀝𑁆𑀞𑀭𑀜𑁆𑀜𑁄 𑀧𑀼𑀢𑁆𑀢𑀸 𑀢𑀯 𑀪𑀸𑀕𑀺𑀦𑁂𑀬𑁆𑀬𑀦𑀸𑀕𑀸’’𑀢𑀺 𑀆𑀘𑀺𑀓𑁆𑀔𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁯𑁮𑁧.

‘‘𑀥𑀢𑀭𑀝𑁆𑀞𑀸 ¶ 𑀳𑀺 𑀢𑁂 𑀦𑀸𑀕𑀸, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀲𑀫𑀼𑀤𑁆𑀤𑀚𑀸𑀬 𑀉𑀧𑁆𑀧𑀦𑁆𑀦𑀸, 𑀦𑀸𑀕𑀸 𑀏𑀢𑁂 𑀫𑀳𑀺𑀤𑁆𑀥𑀺𑀓𑀸’’𑀢𑀺.

𑀏𑀯𑀁 𑀢𑁂𑀲𑀁 𑀓𑀣𑁂𑀦𑁆𑀢𑀸𑀦𑀜𑁆𑀜𑁂𑀯 𑀦𑀸𑀕𑀧𑀭𑀺𑀲𑀸 𑀧𑀢𑁆𑀯𑀸 𑀢𑀸𑀧𑀲𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀫𑀼𑀤𑁆𑀤𑀚𑀸𑀧𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀦𑀸𑀕𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀦𑀸𑀕𑀪𑀯𑀦𑀫𑁂𑀯 𑀕𑀢𑀸. 𑀲𑀸𑀕𑀭𑀩𑁆𑀭𑀳𑁆𑀫𑀤𑀢𑁆𑀢𑁄𑀧𑀺 𑀢𑀢𑁆𑀣𑁂𑀯 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀕𑀢𑁄. 𑀲𑀫𑀼𑀤𑁆𑀤𑀚𑀸 𑀦𑀸𑀕𑀪𑀯𑀦𑁂𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀚𑀻𑀯𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀕𑁆𑀕𑀧𑀼𑀭𑀁 𑀧𑀽𑀭𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁 𑀉𑀧𑀸𑀲𑀓𑀸 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀩𑀼𑀤𑁆𑀥𑁂 𑀏𑀯𑀭𑀽𑀧𑀁 𑀦𑀸𑀫 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀁𑀲𑀼𑀬𑁂𑀯𑀸’’𑀢𑀺 ¶ 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀸𑀲𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀤𑀸 𑀫𑀸𑀢𑀸𑀧𑀺𑀢𑀭𑁄 𑀫𑀳𑀸𑀭𑀸𑀚𑀓𑀼𑀮𑀸𑀦𑀺 𑀅𑀳𑁂𑀲𑀼𑀁, 𑀦𑁂𑀲𑀸𑀤𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀤𑀢𑁆𑀢𑁄, 𑀲𑁄𑀫𑀤𑀢𑁆𑀢𑁄 𑀆𑀦𑀦𑁆𑀤𑁄, 𑀅𑀚𑀫𑀼𑀔𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀲𑀼𑀤𑀲𑁆𑀲𑀦𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀼𑀪𑁄𑀕𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀓𑀸𑀡𑀸𑀭𑀺𑀝𑁆𑀞𑁄 𑀲𑀼𑀦𑀓𑁆𑀔𑀢𑁆𑀢𑁄, 𑀪𑀽𑀭𑀺𑀤𑀢𑁆𑀢𑁄 𑀧𑀦 𑀅𑀳𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀳𑁄𑀲𑀺𑀦𑁆𑀢𑀺.

𑀪𑀽𑀭𑀺𑀤𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸𑀦𑀺𑀝𑁆𑀞𑀺𑀢𑀸.

[𑁫𑁪𑁪] 𑁭. 𑀘𑀦𑁆𑀤𑀓𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀭𑀸𑀚𑀸𑀲𑀺 ¶ ¶ 𑀮𑀼𑀤𑁆𑀤𑀓𑀫𑁆𑀫𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 𑀆𑀕𑀢𑀫𑁂𑀯. 𑀢𑀁 𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀫𑀭𑀡𑀸 𑀢𑀢𑁆𑀣𑀸𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦 𑀫𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀤𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀢𑀯 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀫𑀫 𑀫𑀦𑁄𑀭𑀣𑁄 𑀢𑀸𑀯 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀳. ‘‘𑀓𑁄 𑀧𑀦 𑀢𑁂, 𑀪𑀦𑁆𑀢𑁂, 𑀫𑀦𑁄𑀭𑀣𑁄’’𑀢𑀺? ‘‘𑀦𑀦𑀼 𑀤𑀲𑀩𑀮𑀁 𑀫𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀫𑁆𑀳𑁂𑀳𑁂𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺? ‘‘𑀫𑀳𑀸𑀭𑀸𑀚, 𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀅𑀓𑁆𑀔𑀡𑀯𑁂𑀥𑀻𑀦𑀁 𑀥𑀦𑀼𑀕𑁆𑀕𑀳𑀸𑀦𑀁 𑀧𑀜𑁆𑀘𑀲𑀢𑀸𑀦𑀺 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀢𑁄 𑀏𑀓𑀢𑀺𑀁𑀲 𑀚𑀦𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀳𑁂𑀲𑀺. 𑀲𑁄 𑀢𑁂𑀲𑀁 𑀚𑁂𑀝𑁆𑀞𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀆𑀯𑀼𑀲𑁄 𑀲𑀫𑀡𑁄 𑀕𑁄𑀢𑀫𑁄 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀢𑀺, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀤𑀺𑀯𑀸𑀝𑁆𑀞𑀸𑀦𑁂 𑀘𑀗𑁆𑀓𑀫𑀢𑀺. 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀅𑀲𑀼𑀓𑁂𑀦 𑀦𑀸𑀫 𑀫𑀕𑁆𑀕𑁂𑀦 𑀏𑀳𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀤𑁆𑀯𑁂 𑀥𑀦𑀼𑀕𑁆𑀕𑀳𑁂 𑀞𑀧𑁂𑀲𑀺 ‘‘𑀢𑀼𑀫𑁆𑀳𑀸𑀓𑀁 𑀞𑀺𑀢𑀫𑀕𑁆𑀕𑁂𑀦 𑀏𑀓𑁄 𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀢𑀺, 𑀢𑀁 𑀢𑀼𑀫𑁆𑀳𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀲𑀼𑀓𑁂𑀦 𑀦𑀸𑀫 𑀫𑀕𑁆𑀕𑁂𑀦 𑀏𑀣𑀸’’𑀢𑀺, 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑁂 𑀞𑀧𑁂𑀲𑀺 ‘‘𑀢𑀼𑀫𑁆𑀳𑀸𑀓𑀁 𑀞𑀺𑀢𑀫𑀕𑁆𑀕𑁂𑀦 𑀤𑁆𑀯𑁂 𑀧𑀼𑀭𑀺𑀲𑀸 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀲𑀼𑀓𑁂𑀦 𑀦𑀸𑀫 𑀫𑀕𑁆𑀕𑁂𑀦 𑀏𑀣𑀸’’𑀢𑀺, 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀅𑀝𑁆𑀞 𑀚𑀦𑁂 𑀞𑀧𑁂𑀲𑀺 ‘‘𑀢𑀼𑀫𑁆𑀳𑀸𑀓𑀁 𑀞𑀺𑀢𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀲𑀼𑀓𑁂𑀦 𑀦𑀸𑀫 𑀫𑀕𑁆𑀕𑁂𑀦 𑀏𑀣𑀸’’𑀢𑀺, 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀲𑁄𑀴𑀲 𑀧𑀼𑀭𑀺𑀲𑁂 𑀞𑀧𑁂𑀲𑀺 ‘‘𑀢𑀼𑀫𑁆𑀳𑀸𑀓𑀁 𑀞𑀺𑀢𑀫𑀕𑁆𑀕𑁂𑀦 𑀅𑀝𑁆𑀞 𑀧𑀼𑀭𑀺𑀲𑀸 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀲𑀼𑀓𑁂𑀦 𑀦𑀸𑀫 𑀫𑀕𑁆𑀕𑁂𑀦 𑀏𑀣𑀸’’𑀢𑀺.

𑀓𑀲𑁆𑀫𑀸 𑀧𑀦𑁂𑀲 𑀏𑀯𑀫𑀓𑀸𑀲𑀻𑀢𑀺? 𑀅𑀢𑁆𑀢𑀦𑁄 𑀓𑀫𑁆𑀫𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀅𑀣 𑀲𑁄 𑀚𑁂𑀝𑁆𑀞𑀓𑀥𑀦𑀼𑀕𑁆𑀕𑀳𑁄 𑀯𑀸𑀫𑀢𑁄 𑀔𑀕𑁆𑀕𑀁 𑀮𑀕𑁆𑀕𑁂𑀢𑁆𑀯𑀸 𑀧𑀺𑀝𑁆𑀞𑀺𑀬𑀸 𑀢𑀼𑀡𑀻𑀭𑀁 𑀩𑀦𑁆𑀥𑀺𑀢𑁆𑀯𑀸 𑀫𑁂𑀡𑁆𑀟𑀲𑀺𑀗𑁆𑀕𑀫𑀳𑀸𑀥𑀦𑀼𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀯𑀺𑀚𑁆𑀛𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀜𑁆𑀜𑀸𑀬 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 ¶ 𑀆𑀓𑀟𑁆𑀠𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀲𑀭𑀁 𑀑𑀭𑁄𑀧𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀨𑀸𑀲𑀼𑀓𑀸 𑀪𑀺𑀚𑁆𑀚𑀦𑁆𑀢𑀺𑀬𑁄 𑀯𑀺𑀬 𑀫𑀼𑀔𑀢𑁄 𑀔𑁂𑀴𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀓𑀺𑀮𑀦𑁆𑀢𑀭𑀽𑀧𑁄 𑀅𑀳𑁄𑀲𑀺, 𑀲𑀓𑀮𑀲𑀭𑀻𑀭𑀁 𑀣𑀤𑁆𑀥𑀁 𑀚𑀸𑀢𑀁, 𑀬𑀦𑁆𑀢𑁂𑀦 𑀧𑀻𑀴𑀺𑀢𑀸𑀓𑀸𑀭𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀲𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀤𑀺𑀲𑁆𑀯𑀸 ¶ 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀫𑀸 𑀪𑀸𑀬𑀺 𑀪𑁄, 𑀧𑀼𑀭𑀺𑀲, 𑀇𑀢𑁄 𑀏𑀳𑀻’’𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀲𑁆𑀯𑀸𑀳𑀁 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀅𑀚𑀸𑀦𑀦𑁆𑀢𑁄 𑀅𑀦𑁆𑀥𑀩𑀸𑀮𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀯𑀘𑀦𑁂𑀦 𑀢𑀼𑀫𑁆𑀳𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀆𑀕𑀢𑁄𑀫𑁆𑀳𑀺, 𑀔𑀫𑀣 𑀫𑁂, 𑀪𑀦𑁆𑀢𑁂’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁂𑀦 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑀁 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀬𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀉𑀬𑁆𑀬𑁄𑀚𑁂𑀢𑁆𑀯𑀸 𑀘 𑀧𑀦 𑀘𑀗𑁆𑀓𑀫𑀸 𑀑𑀭𑀼𑀬𑁆𑀳 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺.

𑀅𑀣 𑀢𑀲𑁆𑀫𑀺𑀁 𑀥𑀦𑀼𑀕𑁆𑀕𑀳𑁂 𑀅𑀦𑀸𑀕𑀘𑁆𑀙𑀦𑁆𑀢𑁂 𑀇𑀢𑀭𑁂 𑀤𑁆𑀯𑁂 𑀚𑀦𑀸 ‘‘𑀓𑀺𑀁 𑀦𑀼 𑀔𑁄 𑀲𑁄 𑀘𑀺𑀭𑀸𑀬𑀢𑀻’’𑀢𑀺 𑀧𑀝𑀺𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀸 𑀤𑀲𑀩𑀮𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀆𑀯𑀼𑀲𑁄, 𑀤𑁂𑀯𑀤𑀢𑁆𑀢𑁂𑀦 𑀓𑀣𑀺𑀢𑀫𑀕𑁆𑀕𑀁 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀢𑀭𑁂𑀲𑀼𑀧𑀺 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀉𑀬𑁆𑀬𑁄𑀚𑁂𑀲𑀺. 𑀅𑀣 𑀲𑁄 𑀧𑀞𑀫𑀫𑀸𑀕𑀢𑁄 𑀚𑁂𑀝𑁆𑀞𑀓𑀥𑀦𑀼𑀕𑁆𑀕𑀳𑁄 𑀤𑁂𑀯𑀤𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢 𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀫𑀳𑀺𑀤𑁆𑀥𑀺𑀓𑁄 𑀲𑁄 𑀪𑀕𑀯𑀸 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀆𑀭𑁄𑀘𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑁂𑀳𑀺 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀬𑀁 𑀧𑀯𑀢𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄 𑀤𑁂𑀯𑀤𑀢𑁆𑀢𑁄 𑀓𑀺𑀭 𑀏𑀓𑀲𑁆𑀫𑀺𑀁 𑀢𑀣𑀸𑀕𑀢𑁂 𑀯𑁂𑀭𑀘𑀺𑀢𑁆𑀢𑁂𑀦 𑀩𑀳𑀽 𑀚𑀦𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀯𑀸𑀬𑀸𑀫𑀫𑀓𑀸𑀲𑀺, 𑀢𑁂 𑀲𑀩𑁆𑀩𑁂𑀧𑀺 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀁𑀲𑀽’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 ¶ 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀫𑀁 𑀏𑀓𑀓𑀁 𑀦𑀺𑀲𑁆𑀲𑀸𑀬 𑀫𑀬𑀺 𑀯𑁂𑀭𑀘𑀺𑀢𑁆𑀢𑁂𑀦 𑀩𑀳𑀽 𑀚𑀦𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀯𑀸𑀬𑀸𑀫𑀁 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀅𑀬𑀁 𑀩𑀸𑀭𑀸𑀡𑀲𑀻 𑀧𑀼𑀧𑁆𑀨𑀯𑀢𑀻 𑀦𑀸𑀫 𑀅𑀳𑁄𑀲𑀺. 𑀢𑀢𑁆𑀣 𑀯𑀲𑀯𑀢𑁆𑀢𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀏𑀓𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀘𑀦𑁆𑀤𑀓𑀼𑀫𑀸𑀭𑁄 𑀦𑀸𑀫 𑀑𑀧𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀔𑀡𑁆𑀟𑀳𑀸𑀮𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀲𑁄 𑀭𑀜𑁆𑀜𑁄 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀺. 𑀢𑀁 𑀓𑀺𑀭 𑀭𑀸𑀚𑀸 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀲𑁄 𑀮𑀜𑁆𑀚𑀯𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀲𑀸𑀫𑀺𑀓𑁂 𑀲𑀸𑀫𑀺𑀓𑁂 𑀓𑀭𑁄𑀢𑀺, 𑀲𑀸𑀫𑀺𑀓𑁂 𑀘 𑀅𑀲𑀸𑀫𑀺𑀓𑁂. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀅𑀟𑁆𑀟𑀧𑀭𑀸𑀚𑀺𑀢𑁄 𑀧𑀼𑀭𑀺𑀲𑁄 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸 𑀉𑀧𑀓𑁆𑀓𑁄𑀲𑁂𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀁 𑀘𑀦𑁆𑀤𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀥𑀸𑀯𑀺𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀭𑁄𑀤𑀺. 𑀲𑁄 ‘‘𑀓𑀺𑀁, 𑀪𑁄 𑀧𑀼𑀭𑀺𑀲, 𑀭𑁄𑀤𑀲𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀔𑀡𑁆𑀟𑀳𑀸𑀮𑁄 ¶ 𑀯𑀺𑀦𑀺𑀘𑁆𑀙𑀬𑁂 𑀯𑀺𑀮𑁄𑀧𑀁 𑀔𑀸𑀤𑀢𑀺, 𑀅𑀳𑀁 𑀢𑁂𑀦 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀧𑀭𑀸𑀚𑀬𑀁 𑀧𑀸𑀧𑀺𑀢𑁄’’𑀢𑀺. 𑀘𑀦𑁆𑀤𑀓𑀼𑀫𑀸𑀭𑁄 ‘‘𑀫𑀸 𑀪𑀸𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀦𑁂𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁, 𑀅𑀲𑀸𑀫𑀺𑀓𑀫𑁂𑀯 𑀅𑀲𑀸𑀫𑀺𑀓𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀓𑀺𑀁𑀲𑀤𑁆𑀤𑁄 𑀏𑀲𑁄’’𑀢𑀺 𑀧𑀼𑀘𑁆𑀙𑀺. ‘‘𑀘𑀦𑁆𑀤𑀓𑀼𑀫𑀸𑀭𑁂𑀦 𑀓𑀺𑀭 𑀅𑀟𑁆𑀟𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄, 𑀢𑀢𑁆𑀣𑁂𑀲𑁄 𑀲𑀸𑀥𑀼𑀓𑀸𑀭𑀲𑀤𑁆𑀤𑁄’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀲𑁆𑀲𑀺. 𑀓𑀼𑀫𑀸𑀭𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀭𑀸𑀚𑀸 ‘‘𑀢𑀸𑀢, 𑀏𑀓𑁄 𑀓𑀺𑀭 𑀢𑁂 𑀅𑀟𑁆𑀟𑁄 𑀯𑀺𑀦𑀺𑀘𑁆𑀙𑀺𑀢𑁄’’𑀢𑀺 𑀆𑀳. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢, 𑀇𑀢𑁄 𑀧𑀝𑁆𑀞𑀸𑀬 𑀢𑁆𑀯𑀫𑁂𑀯 𑀯𑀺𑀦𑀺𑀘𑁆𑀙𑀬𑀁 𑀧𑀝𑁆𑀞𑀧𑁂𑀳𑀻’’𑀢𑀺 𑀯𑀺𑀦𑀺𑀘𑁆𑀙𑀬𑀁 𑀓𑀼𑀫𑀸𑀭𑀲𑁆𑀲 𑀅𑀤𑀸𑀲𑀺.

𑀢𑀢𑁄 𑀧𑀝𑁆𑀞𑀸𑀬 𑀔𑀡𑁆𑀟𑀳𑀸𑀮𑀲𑁆𑀲 𑀆𑀬𑁄 𑀧𑀘𑁆𑀙𑀺𑀚𑁆𑀚𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀓𑀼𑀫𑀸𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑁄 𑀅𑀦𑁆𑀢𑀭𑀸𑀧𑁂𑀓𑁆𑀔𑁄 𑀯𑀺𑀘𑀭𑀺. 𑀲𑁄 𑀧𑀦 𑀭𑀸𑀚𑀸 𑀫𑀦𑁆𑀤𑀧𑀜𑁆𑀜𑁄. 𑀲𑁄 𑀏𑀓𑀤𑀺𑀯𑀲𑀁 𑀭𑀢𑁆𑀢𑀺𑀪𑀸𑀕𑁂 𑀲𑀼𑀧𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀼𑀧𑀺𑀦𑀦𑁆𑀢𑁂 𑀅𑀮𑀗𑁆𑀓𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀁, 𑀲𑀢𑁆𑀢𑀭𑀢𑀦𑀫𑀬𑀧𑀸𑀓𑀸𑀭𑀁, 𑀲𑀝𑁆𑀞𑀺𑀬𑁄𑀚𑀦𑀺𑀓𑀲𑀼𑀯𑀡𑁆𑀡𑀫𑀬𑀯𑀸𑀮𑀼𑀓𑀫𑀳𑀸𑀯𑀻𑀣𑀺𑀁, 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑀁 𑀦𑀦𑁆𑀤𑀦𑀯𑀦𑀸𑀤𑀺𑀯𑀦𑀭𑀸𑀫𑀡𑁂𑀬𑁆𑀬𑀓𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀺𑀆𑀤𑀺𑀧𑁄𑀓𑁆𑀔𑀭𑀡𑀺𑀭𑀸𑀫𑀡𑁂𑀬𑁆𑀬𑀓𑀲𑀫𑀦𑁆𑀦𑀸𑀕𑀢𑀁 𑀆𑀓𑀺𑀡𑁆𑀡𑀤𑁂𑀯𑀕𑀡𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀺𑀲𑁆𑀯𑀸 ¶ 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁆𑀯𑁂 𑀆𑀘𑀭𑀺𑀬𑀔𑀡𑁆𑀟𑀳𑀸𑀮𑀲𑁆𑀲𑀸𑀕𑀫𑀦𑀯𑁂𑀮𑀸𑀬 𑀤𑁂𑀯𑀮𑁄𑀓𑀕𑀸𑀫𑀺𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀤𑁂𑀲𑀺𑀢𑀫𑀕𑁆𑀕𑁂𑀦 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀔𑀡𑁆𑀟𑀳𑀸𑀮𑁄𑀧𑀺 𑀧𑀸𑀢𑁄𑀯 𑀦𑁆𑀳𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀭𑀸𑀚𑀸 𑀆𑀲𑀦𑀁 𑀤𑀸𑀧𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁯𑁮𑁨.

‘‘𑀭𑀸𑀚𑀸𑀲𑀺 𑀮𑀼𑀤𑁆𑀤𑀓𑀫𑁆𑀫𑁄, 𑀏𑀓𑀭𑀸𑀚𑀸 𑀧𑀼𑀧𑁆𑀨𑀯𑀢𑀻𑀬𑀸;

𑀲𑁄 𑀧𑀼𑀘𑁆𑀙𑀺 𑀩𑁆𑀭𑀳𑁆𑀫𑀩𑀦𑁆𑀥𑀼𑀁, 𑀔𑀡𑁆𑀟𑀳𑀸𑀮𑀁 𑀧𑀼𑀭𑁄𑀳𑀺𑀢𑀁 𑀫𑀽𑀴𑁆𑀳𑀁.

𑁯𑁮𑁩.

‘‘𑀲𑀕𑁆𑀕𑀸𑀦 𑀫𑀕𑁆𑀕𑀫𑀸𑀘𑀺𑀓𑁆𑀔, 𑀢𑁆𑀯𑀁𑀲𑀺 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀯𑀺𑀦𑀬𑀓𑀼𑀲𑀮𑁄;

𑀬𑀣𑀸 𑀇𑀢𑁄 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀦𑀭𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦𑀸’’𑀢𑀺.

𑀢𑀢𑁆𑀣 𑀭𑀸𑀚𑀸𑀲𑀻𑀢𑀺 𑀭𑀸𑀚𑀸 𑀆𑀲𑀺. 𑀮𑀼𑀤𑁆𑀤𑀓𑀫𑁆𑀫𑁄𑀢𑀺 𑀓𑀓𑁆𑀔𑀴𑀨𑀭𑀼𑀲𑀓𑀫𑁆𑀫𑁄. 𑀲𑀕𑁆𑀕𑀸𑀦 𑀫𑀕𑁆𑀕𑀦𑁆𑀢𑀺 𑀲𑀕𑁆𑀕𑀸𑀦𑀁 𑀕𑀫𑀦𑀫𑀕𑁆𑀕𑀁. 𑀥𑀫𑁆𑀫𑀯𑀺𑀦𑀬𑀓𑀼𑀲𑀮𑁄𑀢𑀺 𑀲𑀼𑀘𑀭𑀺𑀢𑀥𑀫𑁆𑀫𑁂 𑀘 𑀆𑀘𑀸𑀭𑀯𑀺𑀦𑀬𑁂 𑀘 𑀓𑀼𑀲𑀮𑁄. 𑀬𑀣𑀸𑀢𑀺 𑀬𑀣𑀸 𑀦𑀭𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀇𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀫𑁂 𑀲𑀼𑀕𑀢𑀺𑀫𑀕𑁆𑀕𑀁 𑀆𑀘𑀺𑀓𑁆𑀔𑀸𑀳𑀻𑀢𑀺 𑀧𑀼𑀘𑁆𑀙𑀺.

𑀇𑀫𑀁 ¶ 𑀧𑀦 𑀧𑀜𑁆𑀳𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁 𑀯𑀸 𑀢𑀲𑁆𑀲 𑀲𑀸𑀯𑀓𑁂 𑀯𑀸 𑀢𑁂𑀲𑀁 𑀅𑀮𑀸𑀪𑁂𑀦 𑀩𑁄𑀥𑀺𑀲𑀢𑁆𑀢𑀁 𑀯𑀸 𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀭𑀸𑀚𑀸 𑀧𑀦 𑀬𑀣𑀸 𑀦𑀸𑀫 𑀲𑀢𑁆𑀢𑀸𑀳𑀁 𑀫𑀕𑁆𑀕𑀫𑀽𑀴𑁆𑀳𑁄 𑀧𑀼𑀭𑀺𑀲𑁄 𑀅𑀜𑁆𑀜𑀁 𑀫𑀸𑀲𑀫𑀢𑁆𑀢𑀁 𑀫𑀕𑁆𑀕𑀫𑀽𑀴𑁆𑀳𑀁 𑀫𑀕𑁆𑀕𑀁 𑀧𑀼𑀘𑁆𑀙𑁂𑀬𑁆𑀬, 𑀏𑀯𑀁 𑀔𑀡𑁆𑀟𑀳𑀸𑀮𑀁 𑀧𑀼𑀘𑁆𑀙𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀤𑀲𑁆𑀲𑀦𑀓𑀸𑀮𑁄, 𑀇𑀤𑀸𑀦𑀺 𑀘𑀦𑁆𑀤𑀓𑀼𑀫𑀸𑀭𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀫𑀫 𑀫𑀦𑁄𑀭𑀣𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁯𑁮𑁪.

‘‘𑀅𑀢𑀺𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀅𑀯𑀚𑁆𑀛𑁂 𑀤𑁂𑀯 𑀖𑀸𑀢𑁂𑀢𑁆𑀯𑀸;

𑀏𑀯𑀁 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀦𑀭𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀦𑀸𑀫 𑀅𑀢𑀺𑀤𑀸𑀦𑀁 𑀤𑀤𑀦𑁆𑀢𑀺, 𑀅𑀯𑀚𑁆𑀛𑁂 𑀖𑀸𑀢𑁂𑀦𑁆𑀢𑀺. 𑀲𑀘𑁂𑀧𑀺 𑀲𑀕𑁆𑀕𑀁 𑀕𑀦𑁆𑀢𑀼𑀓𑀸𑀫𑁄𑀲𑀺, 𑀢𑁆𑀯𑀫𑁆𑀧𑀺 𑀢𑀣𑁂𑀯 𑀓𑀭𑁄𑀳𑀻𑀢𑀺.

𑀅𑀣 𑀦𑀁 𑀭𑀸𑀚𑀸 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀧𑀼𑀘𑁆𑀙𑀺 𑁋

𑁯𑁮𑁫.

‘‘𑀓𑀺𑀁 𑀧𑀦 𑀢𑀁 𑀅𑀢𑀺𑀤𑀸𑀦𑀁, 𑀓𑁂 𑀘 𑀅𑀯𑀚𑁆𑀛𑀸 𑀇𑀫𑀲𑁆𑀫𑀺 𑀮𑁄𑀓𑀲𑁆𑀫𑀺𑀁;

𑀏𑀢𑀜𑁆𑀘 𑀔𑁄 𑀦𑁄 𑀅𑀓𑁆𑀔𑀸𑀳𑀺, 𑀬𑀚𑀺𑀲𑁆𑀲𑀸𑀫𑀺 𑀤𑀤𑀸𑀫𑀺 𑀤𑀸𑀦𑀸𑀦𑀻’’𑀢𑀺.

𑀲𑁄𑀧𑀺𑀲𑁆𑀲 ¶ 𑀩𑁆𑀬𑀸𑀓𑀸𑀲𑀺 𑁋

𑁯𑁮𑁬.

‘‘𑀧𑀼𑀢𑁆𑀢𑁂𑀳𑀺 𑀤𑁂𑀯 𑀬𑀚𑀺𑀢𑀩𑁆𑀩𑀁, 𑀫𑀳𑁂𑀲𑀻𑀳𑀺 𑀦𑁂𑀕𑀫𑁂𑀳𑀺 𑀘;

𑀉𑀲𑀪𑁂𑀳𑀺 𑀆𑀚𑀸𑀦𑀺𑀬𑁂𑀳𑀺 𑀘𑀢𑀽𑀳𑀺, 𑀲𑀩𑁆𑀩𑀘𑀢𑀼𑀓𑁆𑀓𑁂𑀦 𑀤𑁂𑀯 𑀬𑀚𑀺𑀢𑀩𑁆𑀩’’𑀦𑁆𑀢𑀺.

𑀭𑀜𑁆𑀜𑁄 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀘 𑀤𑁂𑀯𑀮𑁄𑀓𑀫𑀕𑁆𑀕𑀁 𑀧𑀼𑀝𑁆𑀞𑁄 𑀦𑀺𑀭𑀬𑀫𑀕𑁆𑀕𑀁 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀧𑀼𑀢𑁆𑀢𑁂𑀳𑀻𑀢𑀺 𑀅𑀢𑁆𑀢𑀦𑀸 𑀚𑀸𑀢𑁂𑀳𑀺 𑀧𑀺𑀬𑀧𑀼𑀢𑁆𑀢𑁂𑀳𑀺 𑀘𑁂𑀯 𑀧𑀺𑀬𑀥𑀻𑀢𑀸𑀳𑀺 𑀘. 𑀫𑀳𑁂𑀲𑀻𑀳𑀻𑀢𑀺 𑀧𑀺𑀬𑀪𑀭𑀺𑀬𑀸𑀳𑀺. 𑀦𑁂𑀕𑀫𑁂𑀳𑀻𑀢𑀺 𑀲𑁂𑀝𑁆𑀞𑀻𑀳𑀺. 𑀉𑀲𑀪𑁂𑀳𑀻𑀢𑀺 𑀲𑀩𑁆𑀩𑀲𑁂𑀢𑁂𑀳𑀺 𑀉𑀲𑀪𑀭𑀸𑀚𑀽𑀳𑀺. 𑀆𑀚𑀸𑀦𑀺𑀬𑁂𑀳𑀻𑀢𑀺 𑀫𑀗𑁆𑀕𑀮𑀅𑀲𑁆𑀲𑁂𑀳𑀺. 𑀘𑀢𑀽𑀳𑀻𑀢𑀺 𑀏𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀜𑁆𑀜𑁂𑀳𑀺 𑀘 𑀳𑀢𑁆𑀣𑀺𑀆𑀤𑀻𑀳𑀺 𑀘𑀢𑀽𑀳𑀺 𑀘𑀢𑀽𑀳𑀻𑀢𑀺 𑀏𑀯𑀁 𑀲𑀩𑁆𑀩𑀘𑀢𑀼𑀓𑁆𑀓𑁂𑀦, 𑀤𑁂𑀯, 𑀬𑀚𑀺𑀢𑀩𑁆𑀩𑀁. 𑀏𑀢𑁂𑀲𑀜𑁆𑀳𑀺 𑀔𑀕𑁆𑀕𑁂𑀦 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀕𑀮𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀆𑀯𑀸𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀜𑁆𑀜𑀲𑁆𑀲 𑀬𑀚𑀦𑀓𑀭𑀸𑀚𑀸𑀦𑁄 𑀲𑀭𑀻𑀭𑁂𑀦 𑀲𑀳 𑀤𑁂𑀯𑀮𑁄𑀓𑀁 𑀕𑀘𑁆𑀙𑀦𑁆𑀢𑀺. 𑀫𑀳𑀸𑀭𑀸𑀚, 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀖𑀸𑀲𑀘𑁆𑀙𑀸𑀤𑀦𑀸𑀤𑀺𑀲𑀫𑁆𑀧𑀤𑀸𑀦𑀁 𑀤𑀸𑀦𑀫𑁂𑀯 ¶ 𑀧𑀯𑀢𑁆𑀢𑀢𑀺. 𑀇𑀫𑁂 𑀧𑀦 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀫𑀸𑀭𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀬𑀜𑁆𑀜𑀲𑁆𑀲 𑀬𑀚𑀦𑀁 𑀅𑀢𑀺𑀤𑀸𑀦𑀁 𑀦𑀸𑀫𑀸𑀢𑀺 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀲𑀺.

𑀇𑀢𑀺 𑀲𑁄 ‘‘𑀲𑀘𑁂 𑀘𑀦𑁆𑀤𑀓𑀼𑀫𑀸𑀭𑀁 𑀏𑀓𑀜𑁆𑀜𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀯𑁂𑀭𑀘𑀺𑀢𑁆𑀢𑁂𑀦 𑀓𑀭𑀡𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀁 𑀫𑀳𑀸𑀚𑀦𑀲𑁆𑀲 𑀅𑀦𑁆𑀢𑀭𑁂 𑀧𑀓𑁆𑀔𑀺𑀧𑀺. 𑀇𑀤𑀁 𑀧𑀦 𑀢𑁂𑀲𑀁 𑀓𑀣𑁂𑀦𑁆𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀅𑀦𑁆𑀢𑁂𑀧𑀼𑀭𑀚𑀦𑀸 𑀪𑀻𑀢𑀢𑀲𑀺𑀢𑀸 𑀲𑀁𑀯𑀺𑀕𑁆𑀕𑀫𑀸𑀦𑀳𑀤𑀬𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀭𑀯𑀁 𑀭𑀯𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁯𑁮𑁭.

‘‘𑀢𑀁 𑀲𑀼𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑁂, 𑀓𑀼𑀫𑀸𑀭𑀸 𑀫𑀳𑁂𑀲𑀺𑀬𑁄 𑀘 𑀳𑀜𑁆𑀜𑀦𑁆𑀢𑀼;

𑀏𑀓𑁄 𑀅𑀳𑁄𑀲𑀺 𑀦𑀺𑀕𑁆𑀖𑁄𑀲𑁄, 𑀪𑀺𑀓𑁆𑀔𑀸 𑀅𑀘𑁆𑀘𑀼𑀕𑁆𑀕𑀢𑁄 𑀲𑀤𑁆𑀤𑁄’’𑀢𑀺.

𑀢𑀢𑁆𑀣 𑀢𑀦𑁆𑀢𑀺 ‘‘𑀓𑀼𑀫𑀸𑀭𑀸 𑀘 𑀫𑀳𑁂𑀲𑀺𑀬𑁄 𑀘 𑀳𑀜𑁆𑀜𑀦𑁆𑀢𑀽’’𑀢𑀺 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀏𑀓𑁄𑀢𑀺 𑀲𑀓𑀮𑀭𑀸𑀚𑀦𑀺𑀯𑁂𑀲𑀦𑁂 𑀏𑀓𑁄𑀯 𑀦𑀺𑀕𑁆𑀖𑁄𑀲𑁄 𑀅𑀳𑁄𑀲𑀺. 𑀪𑀺𑀲𑁆𑀫𑀸𑀢𑀺 𑀪𑀬𑀸𑀦𑀓𑁄. 𑀅𑀘𑁆𑀘𑀼𑀕𑁆𑀕𑀢𑁄𑀢𑀺 𑀅𑀢𑀺𑀉𑀕𑁆𑀕𑀢𑁄 𑀅𑀳𑁄𑀲𑀺, 𑀲𑀓𑀮𑀭𑀸𑀚𑀓𑀼𑀮𑀁 𑀬𑀼𑀕𑀦𑁆𑀢𑀯𑀸𑀢𑀧𑁆𑀧𑀳𑀝𑀁 𑀯𑀺𑀬 𑀲𑀸𑀮𑀯𑀦𑀁 𑀅𑀳𑁄𑀲𑀺.

𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀬𑀜𑁆𑀜𑀁 𑀬𑀚𑀺𑀢𑀼𑀁 𑀲𑀓𑁆𑀓𑁄𑀲𑀺, 𑀦 𑀲𑀓𑁆𑀓𑁄𑀲𑀻’’𑀢𑀺? ‘‘𑀓𑀺𑀁 𑀓𑀣𑁂𑀲𑀺, 𑀆𑀘𑀭𑀺𑀬, 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 ¶ 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀳𑀸𑀭𑀸𑀚, 𑀪𑀻𑀭𑀼𑀓𑀸 𑀤𑀼𑀩𑁆𑀩𑀮𑀚𑁆𑀛𑀸𑀲𑀬𑀸 𑀬𑀜𑁆𑀜𑀁 𑀬𑀚𑀺𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀢𑀼𑀫𑁆𑀳𑁂 𑀇𑀥 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀣, 𑀅𑀳𑀁 𑀬𑀜𑁆𑀜𑀸𑀯𑀸𑀝𑁂 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀩𑀮𑀓𑀸𑀬𑀁 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀬𑀜𑁆𑀜𑀸𑀯𑀸𑀝𑀁 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀧𑀺. 𑀓𑀲𑁆𑀫𑀸? 𑀥𑀫𑁆𑀫𑀺𑀓𑁄 𑀳𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀕𑀦𑁆𑀢𑁆𑀯𑀸 𑀦𑀺𑀯𑀸𑀭𑁂𑀬𑁆𑀬𑀸𑀢𑀺 𑀬𑀜𑁆𑀜𑀸𑀯𑀸𑀝𑁂 𑀯𑀢𑀺𑀬𑀸 𑀧𑀭𑀺𑀓𑁆𑀔𑁂𑀧𑀦𑀁 𑀦𑀸𑀫 𑀘𑀸𑀭𑀺𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀧𑁄𑀭𑀸𑀡𑀓𑀩𑁆𑀭𑀸𑀳𑁆𑀫𑀡𑁂𑀳𑀺 𑀞𑀧𑀺𑀢𑀁. 𑀭𑀸𑀚𑀸𑀧𑀺 𑀧𑀼𑀭𑀺𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀸𑀢𑀸, 𑀅𑀳𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀭𑁄 𑀘 𑀪𑀭𑀺𑀬𑀸𑀬𑁄 𑀘 𑀫𑀸𑀭𑁂𑀢𑁆𑀯𑀸 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀸𑀫𑀺, 𑀕𑀘𑁆𑀙𑀣 𑀦𑁂𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑀩𑁆𑀩𑁂 𑀇𑀥𑀸𑀦𑁂𑀣𑀸’’𑀢𑀺 𑀧𑀼𑀢𑁆𑀢𑀸𑀦𑀁 𑀢𑀸𑀯 𑀆𑀦𑀬𑀦𑀢𑁆𑀣𑀸𑀬 𑀆𑀳 𑁋

𑁯𑁮𑁮.

‘‘𑀕𑀘𑁆𑀙𑀣 𑀯𑀤𑁂𑀣 𑀓𑀼𑀫𑀸𑀭𑁂, 𑀘𑀦𑁆𑀤𑀁 𑀲𑀽𑀭𑀺𑀬𑀜𑁆𑀘 𑀪𑀤𑁆𑀤𑀲𑁂𑀦𑀜𑁆𑀘;

𑀲𑀽𑀭𑀜𑁆𑀘 𑀯𑀸𑀫𑀕𑁄𑀢𑁆𑀢𑀜𑁆𑀘, 𑀧𑀘𑀼𑀭𑀸 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬𑀸’’𑀢𑀺.

𑀢𑀢𑁆𑀣 𑀕𑀘𑁆𑀙𑀣 𑀯𑀤𑁂𑀣 𑀓𑀼𑀫𑀸𑀭𑁂𑀢𑀺 𑀘𑀦𑁆𑀤𑀓𑀼𑀫𑀸𑀭𑁄 𑀘 𑀲𑀽𑀭𑀺𑀬𑀓𑀼𑀫𑀸𑀭𑁄 𑀘𑀸𑀢𑀺 𑀤𑁆𑀯𑁂 𑀕𑁄𑀢𑀫𑀺𑀤𑁂𑀯𑀺𑀬𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 ¶ 𑀧𑀼𑀢𑁆𑀢𑀸, 𑀪𑀤𑁆𑀤𑀲𑁂𑀦𑁄 𑀘 𑀲𑀽𑀭𑁄 𑀘 𑀯𑀸𑀫𑀕𑁄𑀢𑁆𑀢𑁄 𑀘 𑀢𑁂𑀲𑀁 𑀯𑁂𑀫𑀸𑀢𑀺𑀓𑀪𑀸𑀢𑀭𑁄. 𑀧𑀘𑀼𑀭𑀸 𑀓𑀺𑀭 𑀳𑁄𑀣𑀸𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑀸𑀲𑀻 𑀳𑁄𑀣𑀸𑀢𑀺 𑀆𑀘𑀺𑀓𑁆𑀔𑀣𑀸𑀢𑀺 𑀅𑀢𑁆𑀣𑁄.

𑀢𑁂 𑀧𑀞𑀫𑀁 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀳𑀁𑀲𑀼 ‘‘𑀓𑀼𑀫𑀸𑀭, 𑀢𑀼𑀫𑁆𑀳𑁂 𑀓𑀺𑀭 𑀫𑀸𑀭𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀺𑀢𑀸 𑀤𑁂𑀯𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀼𑀫𑁆𑀳𑀸𑀓𑀁 𑀕𑀡𑁆𑀳𑀦𑀢𑁆𑀣𑀸𑀬 𑀅𑀫𑁆𑀳𑁂 𑀧𑁂𑀲𑁂𑀲𑀻’’𑀢𑀺. ‘‘𑀓𑀲𑁆𑀲 𑀯𑀘𑀦𑁂𑀦 𑀫𑀁 𑀕𑀡𑁆𑀳𑀸𑀧𑁂𑀲𑀻’’𑀢𑀺? ‘‘𑀔𑀡𑁆𑀟𑀳𑀸𑀮𑀲𑁆𑀲, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀲𑁄 𑀫𑀜𑁆𑀜𑁂𑀯 𑀕𑀡𑁆𑀳𑀸𑀧𑁂𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀻’’𑀢𑀺. ‘‘𑀭𑀸𑀚𑀧𑀼𑀢𑁆𑀢, 𑀅𑀜𑁆𑀜𑁂𑀧𑀺 𑀕𑀡𑁆𑀳𑀸𑀧𑁂𑀢𑀺, 𑀲𑀩𑁆𑀩𑀘𑀢𑀼𑀓𑁆𑀓𑀁 𑀓𑀺𑀭 𑀬𑀜𑁆𑀜𑀁 𑀬𑀚𑀺𑀢𑀼𑀓𑀸𑀫𑁄’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀢𑀲𑁆𑀲 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀯𑁂𑀭𑀁 𑀦𑀢𑁆𑀣𑀺, ‘𑀯𑀺𑀦𑀺𑀘𑁆𑀙𑀬𑁂 𑀯𑀺𑀮𑁄𑀧𑀁 𑀓𑀸𑀢𑀼𑀁 𑀦 𑀮𑀪𑀸𑀫𑀻’𑀢𑀺 𑀧𑀦 𑀫𑀬𑀺 𑀏𑀓𑀲𑁆𑀫𑀺𑀁 𑀯𑁂𑀭𑀘𑀺𑀢𑁆𑀢𑁂𑀦 𑀩𑀳𑀽 𑀫𑀸𑀭𑀸𑀧𑁂𑀢𑀺, 𑀧𑀺𑀢𑀭𑀁 𑀤𑀝𑁆𑀞𑀼𑀁 𑀮𑀪𑀦𑁆𑀢𑀲𑁆𑀲 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀫𑁄𑀘𑀸𑀧𑀦𑀁 𑀦𑀸𑀫 𑀫𑀫 𑀪𑀸𑀭𑁄’’𑀢𑀺. 𑀅𑀣 𑀦𑁂 𑀭𑀸𑀚𑀧𑀼𑀭𑀺𑀲𑁂 𑀆𑀳 ‘‘𑀢𑁂𑀦 𑀳𑀺 𑀫𑁂 𑀧𑀺𑀢𑀼 𑀯𑀘𑀦𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑀁 𑀦𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀇𑀢𑀭𑁂𑀧𑀺 𑀢𑀬𑁄 𑀆𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼 ‘‘𑀆𑀦𑀻𑀢𑀸 𑀢𑁂, 𑀤𑁂𑀯, 𑀧𑀼𑀢𑁆𑀢𑀸’’𑀢𑀺. 𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑀸𑀢𑀸, 𑀇𑀤𑀸𑀦𑀺 𑀫𑁂 𑀥𑀻𑀢𑀭𑁄 𑀆𑀦𑁂𑀢𑁆𑀯𑀸 ¶ 𑀢𑁂𑀲𑀜𑁆𑀜𑁂𑀯 𑀪𑀸𑀢𑀺𑀓𑀸𑀦𑀁 𑀲𑀦𑁆𑀢𑀺𑀓𑁂 𑀓𑀭𑁄𑀣𑀸’’𑀢𑀺 𑀘𑀢𑀲𑁆𑀲𑁄 𑀥𑀻𑀢𑀭𑁄 𑀆𑀳𑀭𑀸𑀧𑁂𑀢𑀼𑀁 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁮𑁯.

‘‘𑀓𑀼𑀫𑀸𑀭𑀺𑀬𑁄𑀧𑀺 𑀯𑀤𑁂𑀣, 𑀉𑀧𑀲𑁂𑀦𑀁 𑀓𑁄𑀓𑀺𑀮𑀜𑁆𑀘 𑀫𑀼𑀤𑀺𑀢𑀜𑁆𑀘;

𑀦𑀦𑁆𑀤𑀜𑁆𑀘𑀸𑀧𑀺 𑀓𑀼𑀫𑀸𑀭𑀺𑀁, 𑀧𑀘𑀼𑀭𑀸 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬𑀸’’𑀢𑀺.

𑀢𑁂 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀸 𑀭𑁄𑀤𑀫𑀸𑀦𑀸 𑀧𑀭𑀺𑀤𑁂𑀯𑀫𑀸𑀦𑀸 𑀆𑀦𑁂𑀢𑁆𑀯𑀸 𑀪𑀸𑀢𑀺𑀓𑀸𑀦𑀜𑁆𑀜𑁂𑀯 𑀲𑀦𑁆𑀢𑀺𑀓𑁂 𑀓𑀭𑀺𑀁𑀲𑀼. 𑀢𑀢𑁄 𑀭𑀸𑀚𑀸 𑀅𑀢𑁆𑀢𑀦𑁄 𑀪𑀭𑀺𑀬𑀸𑀦𑀁 𑀕𑀳𑀡𑀢𑁆𑀣𑀸𑀬 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁯𑁦.

‘‘𑀯𑀺𑀚𑀬𑀫𑁆𑀧𑀺 𑀫𑀬𑁆𑀳𑀁 𑀫𑀳𑁂𑀲𑀺𑀁, 𑀏𑀭𑀸𑀯𑀢𑀺𑀁 𑀓𑁂𑀲𑀺𑀦𑀺𑀁𑀲𑀼𑀦𑀦𑁆𑀤𑀜𑁆𑀘;

𑀮𑀓𑁆𑀔𑀡𑀯𑀭𑀽𑀧𑀧𑀦𑁆𑀦𑀸, 𑀧𑀘𑀼𑀭𑀸 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬𑀸’’𑀢𑀺.

𑀢𑀢𑁆𑀣 𑀮𑀓𑁆𑀔𑀡𑀯𑀭𑀽𑀧𑀧𑀦𑁆𑀦𑀸𑀢𑀺 𑀉𑀢𑁆𑀢𑀫𑁂𑀳𑀺 𑀘𑀢𑀼𑀲𑀝𑁆𑀞𑀺𑀬𑀸 𑀇𑀢𑁆𑀣𑀺𑀮𑀓𑁆𑀔𑀡𑁂𑀳𑀺 𑀉𑀧𑀧𑀦𑁆𑀦𑀸 𑀏𑀢𑀸𑀧𑀺 𑀯𑀤𑁂𑀣𑀸𑀢𑀺 𑀅𑀢𑁆𑀣𑁄.

𑀢𑁂 𑀢𑀸𑀧𑀺 𑀧𑀭𑀺𑀤𑁂𑀯𑀫𑀸𑀦𑀸 𑀆𑀦𑁂𑀢𑁆𑀯𑀸 𑀓𑀼𑀫𑀸𑀭𑀸𑀦𑀁 𑀲𑀦𑁆𑀢𑀺𑀓𑁂 𑀓𑀭𑀺𑀁𑀲𑀼. 𑀅𑀣 𑀭𑀸𑀚𑀸 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀦𑁄 𑀕𑀳𑀡𑀢𑁆𑀣𑀸𑀬 𑀆𑀡𑀸𑀧𑁂𑀦𑁆𑀢𑁄 𑀇𑀢𑀭𑀁 𑀕𑀸𑀣𑀫𑀸𑀳 𑁋

𑁯𑁯𑁧.

‘‘𑀕𑀳𑀧𑀢𑀬𑁄 ¶ 𑀘 𑀯𑀤𑁂𑀣, 𑀧𑀼𑀡𑁆𑀡𑀫𑀼𑀔𑀁 𑀪𑀤𑁆𑀤𑀺𑀬𑀁 𑀲𑀺𑀗𑁆𑀕𑀸𑀮𑀜𑁆𑀘;

𑀯𑀟𑁆𑀠𑀜𑁆𑀘𑀸𑀧𑀺 𑀕𑀳𑀧𑀢𑀺𑀁, 𑀧𑀘𑀼𑀭𑀸 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬𑀸’’𑀢𑀺.

𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀢𑁂𑀧𑀺 𑀆𑀦𑀬𑀺𑀁𑀲𑀼. 𑀭𑀜𑁆𑀜𑁄 𑀧𑀼𑀢𑁆𑀢𑀤𑀸𑀭𑁂 𑀕𑀬𑁆𑀳𑀫𑀸𑀦𑁂 𑀲𑀓𑀮𑀦𑀕𑀭𑀁 𑀦 𑀓𑀺𑀜𑁆𑀘𑀺 𑀅𑀯𑁄𑀘. 𑀲𑁂𑀝𑁆𑀞𑀺𑀓𑀼𑀮𑀸𑀦𑀺 𑀧𑀦 𑀫𑀳𑀸𑀲𑀫𑁆𑀩𑀦𑁆𑀥𑀸𑀦𑀺, 𑀢𑀲𑁆𑀫𑀸 𑀢𑁂𑀲𑀁 𑀕𑀳𑀺𑀢𑀓𑀸𑀮𑁂 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺𑀢𑁆𑀯𑀸 ‘‘𑀭𑀜𑁆𑀜𑁄 𑀲𑁂𑀝𑁆𑀞𑀺𑀦𑁄 𑀫𑀸𑀭𑁂𑀢𑁆𑀯𑀸 𑀬𑀜𑁆𑀜𑀁 𑀬𑀚𑀺𑀢𑀼𑀁 𑀦 𑀤𑀲𑁆𑀲𑀸𑀫𑀸’’𑀢𑀺 𑀲𑁂𑀝𑁆𑀞𑀺𑀦𑁄 𑀧𑀭𑀺𑀯𑀸𑀭𑁂𑀢𑁆𑀯𑀸𑀯 𑀢𑁂𑀲𑀁 𑀜𑀸𑀢𑀺𑀯𑀕𑁆𑀕𑁂𑀦 𑀲𑀤𑁆𑀥𑀺𑀁 𑀭𑀸𑀚𑀓𑀼𑀮𑀁 𑀅𑀕𑀫𑀺. 𑀅𑀣 𑀢𑁂 𑀲𑁂𑀝𑁆𑀞𑀺𑀦𑁄 𑀜𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀬𑀸𑀘𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁯𑁯𑁨.

‘‘𑀢𑁂 𑀢𑀢𑁆𑀣 𑀕𑀳𑀧𑀢𑀬𑁄, 𑀅𑀯𑁄𑀘𑀺𑀲𑀼𑀁 𑀲𑀫𑀸𑀕𑀢𑀸 𑀧𑀼𑀢𑁆𑀢𑀤𑀸𑀭𑀧𑀭𑀺𑀓𑀺𑀡𑁆𑀡𑀸;

𑀲𑀩𑁆𑀩𑁂𑀯 𑀲𑀺𑀔𑀺𑀦𑁄 𑀤𑁂𑀯 𑀓𑀭𑁄𑀳𑀺, 𑀅𑀣 𑀯𑀸 𑀦𑁄 𑀤𑀸𑀲𑁂 𑀲𑀸𑀯𑁂𑀳𑀻’’𑀢𑀺.

𑀢𑀢𑁆𑀣 ¶ 𑀲𑀩𑁆𑀩𑁂𑀯 𑀲𑀺𑀔𑀺𑀦𑁄𑀢𑀺 𑀲𑀩𑁆𑀩𑁂 𑀅𑀫𑁆𑀳𑁂 𑀫𑀢𑁆𑀣𑀓𑁂 𑀘𑀽𑀴𑀁 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑁂𑀝𑀓𑁂 𑀓𑀭𑁄𑀳𑀺, 𑀫𑀬𑀁 𑀢𑁂 𑀘𑁂𑀝𑀓𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫. 𑀅𑀣 𑀯𑀸 𑀦𑁄 𑀤𑀸𑀲𑁂 𑀲𑀸𑀯𑁂𑀳𑀻𑀢𑀺 𑀅𑀣 𑀯𑀸 𑀦𑁄 𑀅𑀲𑀤𑁆𑀤𑀳𑀦𑁆𑀢𑁄 𑀲𑀩𑁆𑀩𑀲𑁂𑀦𑀺𑀬𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀭𑀸𑀲𑀺𑀫𑀚𑁆𑀛𑁂 𑀅𑀫𑁆𑀳𑁂 𑀤𑀸𑀲𑁂 𑀲𑀸𑀯𑁂𑀳𑀺, 𑀫𑀬𑀁 𑀢𑁂 𑀤𑀸𑀲𑀢𑁆𑀢𑀁 𑀧𑀝𑀺𑀲𑁆𑀲𑀼𑀡𑀺𑀲𑁆𑀲𑀸𑀫𑀸𑀢𑀺.

𑀢𑁂 𑀏𑀯𑀁 𑀬𑀸𑀘𑀦𑁆𑀢𑀸𑀧𑀺 𑀚𑀻𑀯𑀺𑀢𑀁 𑀮𑀤𑁆𑀥𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀭𑀸𑀚𑀧𑀼𑀭𑀺𑀲𑀸 𑀲𑁂𑀲𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀢𑁂 𑀕𑀳𑁂𑀢𑁆𑀯𑀸 𑀓𑀼𑀫𑀸𑀭𑀸𑀦𑀜𑁆𑀜𑁂𑀯 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀢𑀢𑁄 𑀧𑀦 𑀭𑀸𑀚𑀸 𑀳𑀢𑁆𑀣𑀺𑀆𑀤𑀻𑀦𑀁 𑀕𑀳𑀡𑀢𑁆𑀣𑀸𑀬 𑀆𑀡𑀸𑀧𑁂𑀦𑁆𑀢𑁄 𑀆𑀳 𑁋

𑁯𑁯𑁩.

‘‘𑀅𑀪𑀬𑀗𑁆𑀓𑀭𑀫𑁆𑀧𑀺 𑀫𑁂 𑀳𑀢𑁆𑀣𑀺𑀁, 𑀦𑀸𑀴𑀸𑀕𑀺𑀭𑀺𑀁 𑀅𑀘𑁆𑀘𑀼𑀕𑁆𑀕𑀢𑀁 𑀯𑀭𑀼𑀡𑀤𑀦𑁆𑀢𑀁;

𑀆𑀦𑁂𑀣 𑀔𑁄 𑀦𑁂 𑀔𑀺𑀧𑁆𑀧𑀁, 𑀬𑀜𑁆𑀜𑀢𑁆𑀣𑀸𑀬 𑀪𑀯𑀺𑀲𑁆𑀲𑀦𑁆𑀢𑀺.

𑁯𑁯𑁪.

‘‘𑀅𑀲𑁆𑀲𑀭𑀢𑀦𑀫𑁆𑀧𑀺 𑀓𑁂𑀲𑀺𑀁, 𑀲𑀼𑀭𑀸𑀫𑀼𑀔𑀁 𑀧𑀼𑀡𑁆𑀡𑀓𑀁 𑀯𑀺𑀦𑀢𑀓𑀜𑁆𑀘;

𑀆𑀦𑁂𑀣 𑀔𑁄 𑀦𑁂 𑀔𑀺𑀧𑁆𑀧𑀁, 𑀬𑀜𑁆𑀜𑀢𑁆𑀣𑀸𑀬 𑀪𑀯𑀺𑀲𑁆𑀲𑀦𑁆𑀢𑀺.

𑁯𑁯𑁫.

‘‘𑀉𑀲𑀪𑀫𑁆𑀧𑀺 𑀬𑀽𑀣𑀧𑀢𑀺𑀁 𑀅𑀦𑁄𑀚𑀁, 𑀦𑀺𑀲𑀪𑀁 𑀕𑀯𑀫𑁆𑀧𑀢𑀺𑀁 𑀢𑁂𑀧𑀺 𑀫𑀬𑁆𑀳𑀁 𑀆𑀦𑁂𑀣;

𑀲𑀫𑀽𑀳 𑀓𑀭𑁄𑀦𑁆𑀢𑀼 𑀲𑀩𑁆𑀩𑀁, 𑀬𑀚𑀺𑀲𑁆𑀲𑀸𑀫𑀺 𑀤𑀤𑀸𑀫𑀺 𑀤𑀸𑀦𑀸𑀦𑀺.

𑁯𑁯𑁬.

‘‘𑀲𑀩𑁆𑀩𑀁 ¶ 𑀧𑀝𑀺𑀬𑀸𑀤𑁂𑀣, 𑀬𑀜𑁆𑀜𑀁 𑀧𑀦 𑀉𑀕𑁆𑀕𑀢𑀫𑁆𑀳𑀺 𑀲𑀽𑀭𑀺𑀬𑀫𑁆𑀳𑀺;

𑀆𑀡𑀸𑀧𑁂𑀣 𑀘 𑀓𑀼𑀫𑀸𑀭𑁂, 𑀅𑀪𑀺𑀭𑀫𑀦𑁆𑀢𑀼 𑀇𑀫𑀁 𑀭𑀢𑁆𑀢𑀺𑀁.

𑁯𑁯𑁭.

‘‘𑀲𑀩𑁆𑀩𑀁 𑀉𑀧𑀝𑁆𑀞𑀧𑁂𑀣, 𑀬𑀜𑁆𑀜𑀁 𑀧𑀦 𑀉𑀕𑁆𑀕𑀢𑀫𑁆𑀳𑀺 𑀲𑀽𑀭𑀺𑀬𑀫𑁆𑀳𑀺;

𑀯𑀤𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀚𑁆𑀚 𑀔𑁄 𑀧𑀘𑁆𑀙𑀺𑀫𑀸 𑀭𑀢𑁆𑀢𑀻’’𑀢𑀺.

𑀢𑀢𑁆𑀣 𑀲𑀫𑀽𑀳 𑀓𑀭𑁄𑀦𑁆𑀢𑀼 𑀲𑀩𑁆𑀩𑀦𑁆𑀢𑀺 𑀦 𑀓𑁂𑀯𑀮𑀁 𑀏𑀢𑁆𑀢𑀓𑀫𑁂𑀯, 𑀅𑀯𑀲𑁂𑀲𑀫𑁆𑀧𑀺 𑀘𑀢𑀼𑀧𑁆𑀧𑀤𑀕𑀡𑀜𑁆𑀘𑁂𑀯 𑀧𑀓𑁆𑀔𑀺𑀕𑀡𑀜𑁆𑀘 𑀲𑀩𑁆𑀩𑀁 𑀘𑀢𑀼𑀓𑁆𑀓𑀁 𑀓𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀼, 𑀲𑀩𑁆𑀩𑀘𑀢𑀼𑀓𑁆𑀓𑀁 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀺, 𑀬𑀸𑀘𑀓𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺. 𑀲𑀩𑁆𑀩𑀁 𑀧𑀝𑀺𑀬𑀸𑀤𑁂𑀣𑀸𑀢𑀺 𑀏𑀯𑀁 𑀫𑀬𑀸 𑀯𑀼𑀢𑁆𑀢𑀁 𑀅𑀦𑀯𑀲𑁂𑀲𑀁 𑀉𑀧𑀝𑁆𑀞𑀧𑁂𑀣. 𑀉𑀕𑁆𑀕𑀢𑀫𑁆𑀳𑀻𑀢𑀺 𑀅𑀳𑀁 𑀧𑀦 𑀬𑀜𑁆𑀜𑀁 𑀉𑀕𑁆𑀕𑀢𑁂 𑀲𑀽𑀭𑀺𑀬𑁂 𑀲𑁆𑀯𑁂 𑀧𑀸𑀢𑁄𑀯 𑀬𑀚𑀺𑀲𑁆𑀲𑀸𑀫𑀺. 𑀲𑀩𑁆𑀩𑀁 𑀉𑀧𑀝𑁆𑀞𑀧𑁂𑀣𑀸𑀢𑀺 𑀲𑁂𑀲𑀫𑁆𑀧𑀺 𑀲𑀩𑁆𑀩𑀁 𑀬𑀜𑁆𑀜𑀉𑀧𑀓𑀭𑀡𑀁 𑀉𑀧𑀝𑁆𑀞𑀧𑁂𑀣𑀸𑀢𑀺.

𑀭𑀜𑁆𑀜𑁄 ¶ 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀥𑀭𑀦𑁆𑀢𑀺𑀬𑁂𑀯. 𑀅𑀣𑀲𑁆𑀲 𑀅𑀫𑀘𑁆𑀘𑀸 𑀕𑀦𑁆𑀢𑁆𑀯𑀸 𑀫𑀸𑀢𑀼𑀬𑀸 𑀆𑀭𑁄𑀘𑁂𑀲𑀼𑀁 ‘‘𑀅𑀬𑁆𑀬𑁂, 𑀧𑀼𑀢𑁆𑀢𑁄 𑀯𑁄 𑀧𑀼𑀢𑁆𑀢𑀤𑀸𑀭𑀁 𑀫𑀸𑀭𑁂𑀢𑁆𑀯𑀸 𑀬𑀜𑁆𑀜𑀁 𑀬𑀚𑀺𑀢𑀼𑀓𑀸𑀫𑁄’’𑀢𑀺. 𑀲𑀸 ‘‘𑀓𑀺𑀁 𑀓𑀣𑁂𑀣, 𑀢𑀸𑀢𑀸’’𑀢𑀺 𑀳𑀢𑁆𑀣𑁂𑀦 𑀳𑀤𑀬𑀁 𑀧𑀳𑀭𑀺𑀢𑁆𑀯𑀸 𑀭𑁄𑀤𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀏𑀯𑀭𑀽𑀧𑁄 𑀢𑁂 𑀬𑀜𑁆𑀜𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁯𑁯𑁮.

‘‘𑀢𑀁𑀢𑀁 𑀫𑀸𑀢𑀸 𑀅𑀯𑀘, 𑀭𑁄𑀤𑀦𑁆𑀢𑀻 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄;

𑀬𑀜𑁆𑀜𑁄 𑀓𑀺𑀭 𑀢𑁂 𑀧𑀼𑀢𑁆𑀢, 𑀪𑀯𑀺𑀲𑁆𑀲𑀢𑀺 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀻’’𑀢𑀺.

𑀢𑀢𑁆𑀣 𑀢𑀁𑀢𑀦𑁆𑀢𑀺 𑀢𑀁 𑀏𑀢𑀁 𑀭𑀸𑀚𑀸𑀦𑀁. 𑀯𑀺𑀫𑀸𑀦𑀢𑁄𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄.

𑀭𑀸𑀚𑀸 𑀆𑀳 𑁋

𑁯𑁯𑁯.

‘‘𑀲𑀩𑁆𑀩𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑀸 𑀘𑀢𑁆𑀢𑀸, 𑀘𑀦𑁆𑀤𑀲𑁆𑀫𑀺𑀁 𑀳𑀜𑁆𑀜𑀫𑀸𑀦𑀲𑁆𑀫𑀺𑀁;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀢𑀢𑁆𑀣 𑀘𑀢𑁆𑀢𑀸𑀢𑀺 𑀘𑀦𑁆𑀤𑀓𑀼𑀫𑀸𑀭𑁂 𑀳𑀜𑁆𑀜𑀫𑀸𑀦𑁂𑀬𑁂𑀯 𑀲𑀩𑁆𑀩𑁂𑀧𑀺 𑀬𑀜𑁆𑀜𑀢𑁆𑀣𑀸𑀬 𑀫𑀬𑀸 𑀧𑀭𑀺𑀘𑁆𑀘𑀢𑁆𑀢𑀸.

𑀅𑀣 𑀦𑀁 𑀫𑀸𑀢𑀸 𑀆𑀳 𑁋

𑁧𑁦𑁦𑁦.

‘‘𑀫𑀸 ¶ 𑀢𑀁 𑀧𑀼𑀢𑁆𑀢 𑀲𑀤𑁆𑀤𑀳𑁂𑀲𑀺, 𑀲𑀼𑀕𑀢𑀺 𑀓𑀺𑀭 𑀳𑁄𑀢𑀺 𑀧𑀼𑀢𑁆𑀢𑀬𑀜𑁆𑀜𑁂𑀦;

𑀦𑀺𑀭𑀬𑀸𑀦𑁂𑀲𑁄 𑀫𑀕𑁆𑀕𑁄, 𑀦𑁂𑀲𑁄 𑀫𑀕𑁆𑀕𑁄 𑀳𑀺 𑀲𑀕𑁆𑀕𑀸𑀦𑀁.

𑁧𑁦𑁦𑁧.

‘‘𑀤𑀸𑀦𑀸𑀦𑀺 𑀤𑁂𑀳𑀺 𑀓𑁄𑀡𑁆𑀟𑀜𑁆𑀜, 𑀅𑀳𑀺𑀁𑀲𑀸 𑀲𑀩𑁆𑀩𑀪𑀽𑀢𑀪𑀩𑁆𑀬𑀸𑀦𑀁;

𑀏𑀲 𑀫𑀕𑁆𑀕𑁄 𑀲𑀼𑀕𑀢𑀺𑀬𑀸, 𑀦 𑀘 𑀫𑀕𑁆𑀕𑁄 𑀧𑀼𑀢𑁆𑀢𑀬𑀜𑁆𑀜𑁂𑀦𑀸’’𑀢𑀺.

𑀢𑀢𑁆𑀣 𑀦𑀺𑀭𑀬𑀸𑀦𑁂𑀲𑁄𑀢𑀺 𑀦𑀺𑀭𑀲𑁆𑀲𑀸𑀤𑀢𑁆𑀣𑁂𑀦 𑀦𑀺𑀭𑀬𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁 𑀏𑀲 𑀫𑀕𑁆𑀕𑁄. 𑀓𑁄𑀡𑁆𑀟𑀜𑁆𑀜𑀸𑀢𑀺 𑀭𑀸𑀚𑀸𑀦𑀁 𑀕𑁄𑀢𑁆𑀢𑁂𑀦𑀸𑀮𑀧𑀢𑀺. 𑀪𑀽𑀢𑀪𑀩𑁆𑀬𑀸𑀦𑀦𑁆𑀢𑀺 𑀪𑀽𑀢𑀸𑀦𑀜𑁆𑀘 𑀪𑀯𑀺𑀢𑀩𑁆𑀩𑀲𑀢𑁆𑀢𑀸𑀦𑀜𑁆𑀘. 𑀧𑀼𑀢𑁆𑀢𑀬𑀜𑁆𑀜𑁂𑀦𑀸𑀢𑀺 𑀏𑀯𑀭𑀽𑀧𑁂𑀦 𑀧𑀼𑀢𑁆𑀢𑀥𑀻𑀢𑀭𑁄 𑀫𑀸𑀭𑁂𑀢𑁆𑀯𑀸 𑀬𑀚𑀓𑀬𑀜𑁆𑀜𑁂𑀦 𑀲𑀕𑁆𑀕𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀻𑀢𑀺.

𑀭𑀸𑀚𑀸 𑀆𑀳 𑁋

𑁧𑁦𑁦𑁨.

‘‘𑀆𑀘𑀭𑀺𑀬𑀸𑀦𑀁 𑀯𑀘𑀦𑀸, 𑀖𑀸𑀢𑁂𑀲𑁆𑀲𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦 𑀤𑀼𑀘𑁆𑀘𑀚𑁂𑀳𑀺, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀢𑀢𑁆𑀣 ¶ 𑀆𑀘𑀭𑀺𑀬𑀸𑀦𑀁 𑀯𑀘𑀦𑀦𑁆𑀢𑀺 𑀅𑀫𑁆𑀫, 𑀦𑁂𑀲𑀸 𑀫𑀫 𑀅𑀢𑁆𑀢𑀦𑁄 𑀫𑀢𑀺, 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀓𑀲𑁆𑀲 𑀧𑀦 𑀫𑁂 𑀔𑀡𑁆𑀟𑀳𑀸𑀮𑀸𑀘𑀭𑀺𑀬𑀲𑁆𑀲 𑀏𑀢𑀁 𑀯𑀘𑀦𑀁, 𑀏𑀲𑀸 𑀅𑀦𑀼𑀲𑀺𑀝𑁆𑀞𑀺. 𑀢𑀲𑁆𑀫𑀸 𑀅𑀳𑀁 𑀏𑀢𑁂 𑀖𑀸𑀢𑁂𑀲𑁆𑀲𑀁, 𑀤𑀼𑀘𑁆𑀘𑀚𑁂𑀳𑀺 𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲 𑀫𑀸𑀢𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀅𑀧𑀕𑀢𑀸. 𑀧𑀺𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁦𑁦𑁩.

‘‘𑀢𑀁𑀢𑀁 𑀧𑀺𑀢𑀸𑀧𑀺 𑀅𑀯𑀘, 𑀯𑀲𑀯𑀢𑁆𑀢𑀻 𑀑𑀭𑀲𑀁 𑀲𑀓𑀁 𑀧𑀼𑀢𑁆𑀢𑀁;

𑀬𑀜𑁆𑀜𑁄 𑀓𑀺𑀭 𑀢𑁂 𑀧𑀼𑀢𑁆𑀢, 𑀪𑀯𑀺𑀲𑁆𑀲𑀢𑀺 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀻’’𑀢𑀺.

𑀢𑀢𑁆𑀣 𑀯𑀲𑀯𑀢𑁆𑀢𑀻𑀢𑀺 𑀢𑀲𑁆𑀲 𑀦𑀸𑀫𑀁.

𑀭𑀸𑀚𑀸 𑀆𑀳 𑁋

𑁧𑁦𑁦𑁪.

‘‘𑀲𑀩𑁆𑀩𑁂𑀧𑀺 ¶ 𑀫𑀬𑁆𑀳𑀁 𑀧𑀼𑀢𑁆𑀢𑀸 𑀘𑀢𑁆𑀢𑀸, 𑀘𑀦𑁆𑀤𑀲𑁆𑀫𑀺𑀁 𑀳𑀜𑁆𑀜𑀫𑀸𑀦𑀲𑁆𑀫𑀺𑀁;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀦𑀁 𑀧𑀺𑀢𑀸 𑀆𑀳 𑁋

𑁧𑁦𑁦𑁫.

‘‘𑀫𑀸 𑀢𑀁 𑀧𑀼𑀢𑁆𑀢 𑀲𑀤𑁆𑀤𑀳𑁂𑀲𑀺, 𑀲𑀼𑀕𑀢𑀺 𑀓𑀺𑀭 𑀳𑁄𑀢𑀺 𑀧𑀼𑀢𑁆𑀢𑀬𑀜𑁆𑀜𑁂𑀦;

𑀦𑀺𑀭𑀬𑀸𑀦𑁂𑀲𑁄 𑀫𑀕𑁆𑀕𑁄, 𑀦𑁂𑀲𑁄 𑀫𑀕𑁆𑀕𑁄 𑀳𑀺 𑀲𑀕𑁆𑀕𑀸𑀦𑀁.

𑁧𑁦𑁦𑁬.

‘‘𑀤𑀸𑀦𑀸𑀦𑀺 𑀤𑁂𑀳𑀺 𑀓𑁄𑀡𑁆𑀟𑀜𑁆𑀜, 𑀅𑀳𑀺𑀁𑀲𑀸 𑀲𑀩𑁆𑀩𑀪𑀽𑀢𑀪𑀩𑁆𑀬𑀸𑀦𑀁;

𑀏𑀲 𑀫𑀕𑁆𑀕𑁄 𑀲𑀼𑀕𑀢𑀺𑀬𑀸, 𑀦 𑀘 𑀫𑀕𑁆𑀕𑁄 𑀧𑀼𑀢𑁆𑀢𑀬𑀜𑁆𑀜𑁂𑀦𑀸’’𑀢𑀺.

𑀭𑀸𑀚𑀸 𑀆𑀳 𑁋

𑁧𑁦𑁦𑁭.

‘‘𑀆𑀘𑀭𑀺𑀬𑀸𑀦𑀁 𑀯𑀘𑀦𑀸, 𑀖𑀸𑀢𑁂𑀲𑁆𑀲𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦 𑀤𑀼𑀘𑁆𑀘𑀚𑁂𑀳𑀺, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀦𑀁 𑀧𑀺𑀢𑀸 𑀆𑀳 𑁋

𑁧𑁦𑁦𑁮.

‘‘𑀤𑀸𑀦𑀸𑀦𑀺 𑀤𑁂𑀳𑀺 𑀓𑁄𑀡𑁆𑀟𑀜𑁆𑀜, 𑀅𑀳𑀺𑀁𑀲𑀸 𑀲𑀩𑁆𑀩𑀪𑀽𑀢𑀪𑀩𑁆𑀬𑀸𑀦𑀁;

𑀧𑀼𑀢𑁆𑀢𑀧𑀭𑀺𑀯𑀼𑀢𑁄 𑀢𑀼𑀯𑀁, 𑀭𑀝𑁆𑀞𑀁 𑀚𑀦𑀧𑀤𑀜𑁆𑀘 𑀧𑀸𑀮𑁂𑀳𑀻’’𑀢𑀺.

𑀢𑀢𑁆𑀣 𑀧𑀼𑀢𑁆𑀢𑀧𑀭𑀺𑀯𑀼𑀢𑁄𑀢𑀺 𑀧𑀼𑀢𑁆𑀢𑁂𑀳𑀺 𑀧𑀭𑀺𑀯𑀼𑀢𑁄. 𑀭𑀝𑁆𑀞𑀁 𑀚𑀦𑀧𑀤𑀜𑁆𑀘𑀸𑀢𑀺 𑀲𑀓𑀮𑀓𑀸𑀲𑀺𑀭𑀝𑁆𑀞𑀜𑁆𑀘 𑀢𑀲𑁆𑀲𑁂𑀯 𑀢𑀁 𑀢𑀁 𑀓𑁄𑀝𑁆𑀞𑀸𑀲𑀪𑀽𑀢𑀁 𑀚𑀦𑀧𑀤𑀜𑁆𑀘.

𑀲𑁄𑀧𑀺 ¶ 𑀢𑀁 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀘𑀦𑁆𑀤𑀓𑀼𑀫𑀸𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀲 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀤𑀼𑀓𑁆𑀔𑀁 𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁, 𑀫𑀫 𑀧𑀺𑀢𑀭𑀁 𑀬𑀸𑀘𑀺𑀢𑁆𑀯𑀸 𑀏𑀢𑁆𑀢𑀓𑀁 𑀚𑀦𑀁 𑀫𑀭𑀡𑀤𑀼𑀓𑁆𑀔𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳 𑁋

𑁧𑁦𑁦𑁯.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀧𑀸𑀮𑁂𑀫.

𑁧𑁦𑁧𑁦.

‘‘𑀫𑀸 ¶ 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀺𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁧𑁧.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀅𑀲𑁆𑀲𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁧𑁨.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀬𑀲𑁆𑀲 𑀳𑁄𑀦𑁆𑀢𑀺 𑀢𑀯 𑀓𑀸𑀫𑀸, 𑀅𑀧𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀸;

𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺.

𑀢𑀢𑁆𑀣 𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀻𑀢𑀺 𑀅𑀧𑀺 𑀦𑀸𑀫 𑀫𑀬𑀁 𑀫𑀳𑀸𑀦𑀺𑀕𑀴𑁂𑀳𑀺 𑀩𑀦𑁆𑀥𑀓𑀸𑀧𑀺 𑀳𑀼𑀢𑁆𑀯𑀸. 𑀬𑀲𑁆𑀲 𑀳𑁄𑀦𑁆𑀢𑀺 𑀢𑀯 𑀓𑀸𑀫𑀸𑀢𑀺 𑀲𑀘𑁂𑀧𑀺 𑀔𑀡𑁆𑀟𑀳𑀸𑀮𑀲𑁆𑀲 𑀤𑀸𑀢𑀼𑀓𑀸𑀫𑁄𑀲𑀺, 𑀢𑀲𑁆𑀲 𑀦𑁄 𑀤𑀸𑀲𑁂 𑀓𑀢𑁆𑀯𑀸 𑀤𑁂𑀳𑀺, 𑀓𑀭𑀺𑀲𑁆𑀲𑀸𑀫𑀲𑁆𑀲 𑀤𑀸𑀲𑀓𑀫𑁆𑀫𑀦𑁆𑀢𑀺 𑀯𑀤𑀢𑀺. 𑀅𑀧𑀺 𑀭𑀝𑁆𑀞𑀸𑀢𑀺 𑀲𑀘𑁂 𑀅𑀫𑁆𑀳𑀸𑀓𑀁 𑀓𑁄𑀘𑀺 𑀤𑁄𑀲𑁄 𑀅𑀢𑁆𑀣𑀺, 𑀭𑀝𑁆𑀞𑀸 𑀦𑁄 𑀧𑀩𑁆𑀩𑀸𑀚𑁂𑀳𑀺. 𑀅𑀧𑀺 𑀦𑀸𑀫 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀸𑀧𑀺 𑀓𑀧𑀡𑀸 𑀯𑀺𑀬 𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫, 𑀫𑀸 𑀦𑁄 𑀅𑀯𑀥𑀺, 𑀤𑁂𑀳𑀺 𑀦𑁄 𑀚𑀻𑀯𑀺𑀢𑀦𑁆𑀢𑀺 𑀯𑀺𑀮𑀧𑀺.

𑀢𑀲𑁆𑀲 𑀢𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀮𑀸𑀧𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀳𑀤𑀬𑀨𑀮𑀺𑀢𑀧𑁆𑀧𑀢𑁆𑀢𑁄 𑀯𑀺𑀬 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀭𑁄𑀤𑀫𑀸𑀦𑁄 ‘‘𑀦 𑀫𑁂 𑀓𑁄𑀘𑀺 𑀧𑀼𑀢𑁆𑀢𑁂 𑀫𑀸𑀭𑁂𑀢𑀼𑀁 𑀮𑀘𑁆𑀙𑀢𑀺, 𑀦 𑀫𑀫𑀢𑁆𑀣𑁄 𑀤𑁂𑀯𑀮𑁄𑀓𑁂𑀦𑀸’’𑀢𑀺 𑀲𑀩𑁆𑀩𑁂 𑀢𑁂 𑀫𑁄𑀘𑁂𑀢𑀼𑀁 𑀆𑀳 𑁋

𑁧𑁦𑁧𑁩.

‘‘𑀤𑀼𑀓𑁆𑀔𑀁 𑀔𑁄 𑀫𑁂 𑀚𑀦𑀬𑀣, 𑀯𑀺𑀮𑀧𑀦𑁆𑀢𑀸 𑀚𑀻𑀯𑀺𑀢𑀲𑁆𑀲 𑀓𑀸𑀫𑀸 𑀳𑀺;

𑀫𑀼𑀜𑁆𑀘𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀮𑀫𑁆𑀧𑀺 𑀫𑁂 𑀳𑁄𑀢𑀼 𑀧𑀼𑀢𑁆𑀢𑀬𑀜𑁆𑀜𑁂𑀦𑀸’’𑀢𑀺.

𑀢𑀁 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀧𑀓𑁆𑀔𑀺𑀧𑀭𑀺𑀬𑁄𑀲𑀸𑀦𑀁 𑀧𑀸𑀡𑀕𑀡𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀔𑀡𑁆𑀟𑀳𑀸𑀮𑁄𑀧𑀺 𑀬𑀜𑁆𑀜𑀸𑀯𑀸𑀝𑁂 𑀓𑀫𑁆𑀫𑀁 𑀲𑀁𑀯𑀺𑀤𑀳𑀢𑀺. 𑀅𑀣 𑀦𑀁 𑀏𑀓𑁄 𑀧𑀼𑀭𑀺𑀲𑁄 ‘‘𑀅𑀭𑁂 𑀤𑀼𑀝𑁆𑀞, 𑀔𑀡𑁆𑀟𑀳𑀸𑀮, 𑀭𑀜𑁆𑀜𑀸 𑀧𑀼𑀢𑁆𑀢𑀸 ¶ 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀢𑁆𑀯𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀫𑀸𑀭𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀬𑀜𑁆𑀜𑀁 𑀬𑀚𑀲𑁆𑀲𑀽’’𑀢𑀺 𑀆𑀳. 𑀲𑁄 ‘‘𑀓𑀺𑀁 𑀦𑀸𑀫 𑀭𑀜𑁆𑀜𑀸 𑀓𑀢’’𑀦𑁆𑀢𑀺 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺 𑀯𑀺𑀬 𑀅𑀯𑀢𑁆𑀣𑀭𑀦𑁆𑀢𑁄 𑀉𑀝𑁆𑀞𑀸𑀬 𑀢𑀼𑀭𑀺𑀢𑁄 𑀥𑀸𑀯𑀺𑀢𑁆𑀯𑀸 𑀆𑀳 𑁋

𑁧𑁦𑁧𑁪.

‘‘𑀧𑀼𑀩𑁆𑀩𑁂𑀯 ¶ 𑀔𑁄𑀲𑀺 𑀫𑁂 𑀯𑀼𑀢𑁆𑀢𑁄, 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀜𑁆𑀘𑁂𑀢𑀁;

𑀅𑀣 𑀦𑁄 𑀉𑀧𑀓𑁆𑀔𑀝𑀲𑁆𑀲 𑀬𑀜𑁆𑀜𑀲𑁆𑀲, 𑀓𑀲𑁆𑀫𑀸 𑀓𑀭𑁄𑀲𑀺 𑀯𑀺𑀓𑁆𑀔𑁂𑀧𑀁.

𑁧𑁦𑁧𑁫.

‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜’’𑀦𑁆𑀢𑀺.

𑀢𑀢𑁆𑀣 𑀧𑀼𑀩𑁆𑀩𑁂𑀯𑀸𑀢𑀺 𑀫𑀬𑀸 𑀢𑁆𑀯𑀁 𑀧𑀼𑀩𑁆𑀩𑁂𑀯 𑀯𑀼𑀢𑁆𑀢𑁄 ‘‘𑀦 𑀢𑀼𑀫𑁆𑀳𑀸𑀤𑀺𑀲𑁂𑀦 𑀪𑀻𑀭𑀼𑀓𑀚𑀸𑀢𑀺𑀓𑁂𑀦 𑀲𑀓𑁆𑀓𑀸 𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀬𑀜𑁆𑀜𑀬𑀚𑀦𑀁 𑀦𑀸𑀫𑁂𑀢𑀁 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯’’𑀦𑁆𑀢𑀺, 𑀅𑀣 𑀦𑁄 𑀇𑀤𑀸𑀦𑀺 𑀉𑀧𑀓𑁆𑀔𑀝𑀲𑁆𑀲 𑀧𑀝𑀺𑀬𑀢𑁆𑀢𑀲𑁆𑀲 𑀬𑀜𑁆𑀜𑀲𑁆𑀲 𑀯𑀺𑀓𑁆𑀔𑁂𑀧𑀁 𑀓𑀭𑁄𑀲𑀺. ‘‘𑀯𑀺𑀓𑁆𑀔𑀫𑁆𑀪’’𑀦𑁆𑀢𑀺𑀧𑀺 𑀧𑀸𑀞𑁄, 𑀧𑀝𑀺𑀲𑁂𑀥𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀭𑀸𑀚, 𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺. 𑀬𑀢𑁆𑀢𑀓𑀸 𑀳𑀺 𑀬𑀜𑁆𑀜𑀁 𑀬𑀚𑀦𑁆𑀢𑀺 𑀯𑀸 𑀬𑀸𑀚𑁂𑀦𑁆𑀢𑀺 𑀯𑀸 𑀅𑀦𑀼𑀫𑁄𑀤𑀦𑁆𑀢𑀺 𑀯𑀸, 𑀲𑀩𑁆𑀩𑁂 𑀲𑀼𑀕𑀢𑀺𑀫𑁂𑀯 𑀯𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀲𑁄 𑀅𑀦𑁆𑀥𑀩𑀸𑀮𑁄 𑀭𑀸𑀚𑀸 𑀢𑀲𑁆𑀲 𑀓𑁄𑀥𑀯𑀲𑀺𑀓𑀲𑁆𑀲 𑀓𑀣𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀼𑀦 𑀧𑀼𑀢𑁆𑀢𑁂 𑀕𑀡𑁆𑀳𑀸𑀧𑁂𑀲𑀺. 𑀢𑀢𑁄 𑀘𑀦𑁆𑀤𑀓𑀼𑀫𑀸𑀭𑁄 𑀧𑀺𑀢𑀭𑀁 𑀅𑀦𑀼𑀩𑁄𑀥𑀬𑀫𑀸𑀦𑁄 𑀆𑀳 𑁋

𑁧𑁦𑁧𑁬.

‘‘𑀅𑀣 𑀓𑀺𑀲𑁆𑀲 𑀚𑀦𑁄 𑀧𑀼𑀩𑁆𑀩𑁂, 𑀲𑁄𑀢𑁆𑀣𑀸𑀦𑀁 𑀩𑁆𑀭𑀸𑀳𑁆𑀫𑀡𑁂 𑀅𑀯𑀸𑀘𑁂𑀲𑀺;

𑀅𑀣 𑀦𑁄 𑀅𑀓𑀸𑀭𑀡𑀲𑁆𑀫𑀸, 𑀬𑀜𑁆𑀜𑀢𑁆𑀣𑀸𑀬 𑀤𑁂𑀯 𑀖𑀸𑀢𑁂𑀲𑀺.

𑁧𑁦𑁧𑁭.

‘‘𑀧𑀼𑀩𑁆𑀩𑁂𑀯 𑀦𑁄 𑀤𑀳𑀭𑀓𑀸𑀮𑁂, 𑀦 𑀳𑀦𑁂𑀲𑀺 𑀦 𑀖𑀸𑀢𑁂𑀲𑀺;

𑀤𑀳𑀭𑀫𑁆𑀳𑀸 𑀬𑁄𑀩𑁆𑀩𑀦𑀁 𑀧𑀢𑁆𑀢𑀸, 𑀅𑀤𑀽𑀲𑀓𑀸 𑀢𑀸𑀢 𑀳𑀜𑁆𑀜𑀸𑀫.

𑁧𑁦𑁧𑁮.

‘‘𑀳𑀢𑁆𑀣𑀺𑀕𑀢𑁂 𑀅𑀲𑁆𑀲𑀕𑀢𑁂, 𑀲𑀦𑁆𑀦𑀤𑁆𑀥𑁂 𑀧𑀲𑁆𑀲 𑀦𑁄 𑀫𑀳𑀸𑀭𑀸𑀚;

𑀬𑀼𑀤𑁆𑀥𑁂 𑀯𑀸 𑀬𑀼𑀚𑁆𑀛𑀫𑀸𑀦𑁂 𑀯𑀸, 𑀦 𑀳𑀺 𑀫𑀸𑀤𑀺𑀲𑀸 𑀲𑀽𑀭𑀸 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬.

𑁧𑁦𑁧𑁯.

‘‘𑀧𑀘𑁆𑀘𑀦𑁆𑀢𑁂 𑀯𑀸𑀧𑀺 𑀓𑀼𑀧𑀺𑀢𑁂, 𑀅𑀝𑀯𑀻𑀲𑀼 𑀯𑀸 𑀫𑀸𑀤𑀺𑀲𑁂 𑀦𑀺𑀬𑁄𑀚𑁂𑀦𑁆𑀢𑀺;

𑀅𑀣 𑀦𑁄 𑀅𑀓𑀸𑀭𑀡𑀲𑁆𑀫𑀸, 𑀅𑀪𑀽𑀫𑀺𑀬𑀁 𑀢𑀸𑀢 𑀳𑀜𑁆𑀜𑀸𑀫.

𑁧𑁦𑁨𑁦.

‘‘𑀬𑀸𑀧𑀺 ¶ 𑀳𑀺 𑀢𑀸 𑀲𑀓𑀼𑀡𑀺𑀬𑁄, 𑀯𑀲𑀦𑁆𑀢𑀺 𑀢𑀺𑀡𑀖𑀭𑀸𑀦𑀺 𑀓𑀢𑁆𑀯𑀸𑀦;

𑀢𑀸𑀲𑀫𑁆𑀧𑀺 𑀧𑀺𑀬𑀸 𑀧𑀼𑀢𑁆𑀢𑀸, 𑀅𑀣 𑀦𑁄 𑀢𑁆𑀯𑀁 𑀤𑁂𑀯 𑀖𑀸𑀢𑁂𑀲𑀺.

𑁧𑁦𑁨𑁧.

‘‘𑀫𑀸 ¶ 𑀢𑀲𑁆𑀲 𑀲𑀤𑁆𑀤𑀳𑁂𑀲𑀺, 𑀦 𑀫𑀁 𑀔𑀡𑁆𑀟𑀳𑀸𑀮𑁄 𑀖𑀸𑀢𑁂𑀬𑁆𑀬;

𑀫𑀫𑀜𑁆𑀳𑀺 𑀲𑁄 𑀖𑀸𑀢𑁂𑀢𑁆𑀯𑀸𑀦, 𑀅𑀦𑀦𑁆𑀢𑀭𑀸 𑀢𑀫𑁆𑀧𑀺 𑀤𑁂𑀯 𑀖𑀸𑀢𑁂𑀬𑁆𑀬.

𑁧𑁦𑁨𑁨.

‘‘𑀕𑀸𑀫𑀯𑀭𑀁 𑀦𑀺𑀕𑀫𑀯𑀭𑀁 𑀤𑀤𑀦𑁆𑀢𑀺, 𑀪𑁄𑀕𑀫𑁆𑀧𑀺𑀲𑁆𑀲 𑀫𑀳𑀸𑀭𑀸𑀚;

𑀅𑀣𑀕𑁆𑀕𑀧𑀺𑀡𑁆𑀟𑀺𑀓𑀸𑀧𑀺, 𑀓𑀼𑀮𑁂 𑀓𑀼𑀮𑁂 𑀳𑁂𑀢𑁂 𑀪𑀼𑀜𑁆𑀚𑀦𑁆𑀢𑀺.

𑁧𑁦𑁨𑁩.

‘‘𑀢𑁂𑀲𑀫𑁆𑀧𑀺 𑀢𑀸𑀤𑀺𑀲𑀸𑀦𑀁, 𑀇𑀘𑁆𑀙𑀦𑁆𑀢𑀺 𑀤𑀼𑀩𑁆𑀪𑀺𑀢𑀼𑀁 𑀫𑀳𑀸𑀭𑀸𑀚;

𑀬𑁂𑀪𑀼𑀬𑁆𑀬𑁂𑀦 𑀏𑀢𑁂, 𑀅𑀓𑀢𑀜𑁆𑀜𑀼𑀦𑁄 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯.

𑁧𑁦𑁨𑁪.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀧𑀸𑀮𑁂𑀫.

𑁧𑁦𑁨𑁫.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀺𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁨𑁬.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀅𑀲𑁆𑀲𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁨𑁭.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀬𑀲𑁆𑀲 𑀳𑁄𑀦𑁆𑀢𑀺 𑀢𑀯 𑀓𑀸𑀫𑀸, 𑀅𑀧𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀸;

𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺.

𑀢𑀢𑁆𑀣 𑀧𑀼𑀩𑁆𑀩𑁂𑀢𑀺 𑀢𑀸𑀢, 𑀬𑀤𑀺 𑀅𑀳𑀁 𑀫𑀸𑀭𑁂𑀢𑀩𑁆𑀩𑁄, 𑀅𑀣 𑀓𑀲𑁆𑀫𑀸 𑀅𑀫𑁆𑀳𑀸𑀓𑀁 𑀜𑀸𑀢𑀺𑀚𑀦𑁄 𑀧𑀼𑀩𑁆𑀩𑁂 𑀫𑀫 𑀚𑀸𑀢𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑁂 𑀲𑁄𑀢𑁆𑀣𑀸𑀦𑀁 𑀅𑀯𑀸𑀘𑁂𑀲𑀺. 𑀢𑀤𑀸 𑀓𑀺𑀭 𑀔𑀡𑁆𑀟𑀳𑀸𑀮𑁄𑀯 𑀫𑀫 𑀮𑀓𑁆𑀔𑀡𑀸𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀇𑀫𑀲𑁆𑀲 𑀓𑀼𑀫𑀸𑀭𑀲𑁆𑀲 𑀦 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀻’’𑀢𑀺 𑀆𑀳. 𑀇𑀘𑁆𑀘𑀲𑁆𑀲 𑀧𑀼𑀭𑀺𑀫𑁂𑀦 𑀧𑀘𑁆𑀙𑀺𑀫𑀁 𑀦 𑀲𑀫𑁂𑀢𑀺, 𑀫𑀼𑀲𑀸𑀯𑀸𑀤𑀻 𑀏𑀲. 𑀅𑀣 𑀦𑁄 𑀏𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀓𑀸𑀭𑀡𑀲𑁆𑀫𑀸 𑀦𑀺𑀓𑁆𑀓𑀸𑀭𑀡𑀸𑀬𑁂𑀯 𑀬𑀜𑁆𑀜𑀢𑁆𑀣𑀸𑀬, 𑀤𑁂𑀯, 𑀖𑀸𑀢𑁂𑀲𑀺. 𑀫𑀸 𑀅𑀫𑁆𑀳𑁂 𑀖𑀸𑀢𑁂𑀲𑀺. 𑀅𑀬𑀜𑁆𑀳𑀺 𑀫𑀬𑀺 𑀏𑀓𑀲𑁆𑀫𑀺𑀁 𑀯𑁂𑀭𑁂𑀦 𑀫𑀳𑀸𑀚𑀦𑀁 𑀫𑀸𑀭𑁂𑀢𑀼𑀓𑀸𑀫𑁄, 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀳𑀺 𑀦𑀭𑀺𑀦𑁆𑀤𑀸𑀢𑀺. 𑀧𑀼𑀩𑁆𑀩𑁂𑀯 𑀦𑁄𑀢𑀺 𑀫𑀳𑀸𑀭𑀸𑀚, 𑀲𑀘𑁂𑀧𑀺 𑀅𑀫𑁆𑀳𑁂 𑀫𑀸𑀭𑁂𑀢𑀼𑀓𑀸𑀫𑁄, 𑀧𑀼𑀩𑁆𑀩𑁂𑀯 𑀦𑁄 𑀓𑀲𑁆𑀫𑀸 𑀲𑀬𑀁 ¶ 𑀯𑀸 𑀦 𑀳𑀦𑁂𑀲𑀺, 𑀅𑀜𑁆𑀜𑁂𑀳𑀺 𑀯𑀸 𑀦 ¶ 𑀖𑀸𑀢𑀸𑀧𑁂𑀲𑀺. 𑀇𑀤𑀸𑀦𑀺 𑀧𑀦 𑀫𑀬𑀁 𑀤𑀳𑀭𑀫𑁆𑀳𑀸 𑀢𑀭𑀼𑀡𑀸, 𑀧𑀞𑀫𑀯𑀬𑁂 𑀞𑀺𑀢𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀸𑀫, 𑀏𑀯𑀁𑀪𑀽𑀢𑀸 𑀢𑀯 𑀅𑀤𑀽𑀲𑀓𑀸𑀯 𑀓𑀺𑀁𑀓𑀸𑀭𑀡𑀸 𑀳𑀜𑁆𑀜𑀸𑀫𑀸𑀢𑀺?

𑀧𑀲𑁆𑀲 𑀦𑁄𑀢𑀺 𑀅𑀫𑁆𑀳𑁂𑀯 𑀘𑀢𑁆𑀢𑀸𑀭𑁄 𑀪𑀸𑀢𑀺𑀓𑁂 𑀧𑀲𑁆𑀲. 𑀬𑀼𑀚𑁆𑀛𑀫𑀸𑀦𑁂𑀢𑀺 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀓𑀸𑀮𑁂 𑀅𑀫𑁆𑀳𑀸𑀤𑀺𑀲𑁂 𑀧𑀼𑀢𑁆𑀢𑁂 𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀫𑀸𑀦𑁂 𑀧𑀲𑁆𑀲. 𑀅𑀧𑀼𑀢𑁆𑀢𑀓𑀸 𑀳𑀺 𑀭𑀸𑀚𑀸𑀦𑁄 𑀅𑀦𑀸𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀫𑀸𑀤𑀺𑀲𑀸𑀢𑀺 𑀅𑀫𑁆𑀳𑀸𑀤𑀺𑀲𑀸 𑀲𑀽𑀭𑀸 𑀩𑀮𑀯𑀦𑁆𑀢𑁄 𑀦 𑀬𑀜𑁆𑀜𑀢𑁆𑀣𑀸𑀬 𑀫𑀸𑀭𑁂𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀦𑀺𑀬𑁄𑀚𑁂𑀦𑁆𑀢𑀻𑀢𑀺 𑀢𑁂𑀲𑀁 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀕𑀡𑁆𑀳𑀦𑀢𑁆𑀣𑀸𑀬 𑀧𑀬𑁄𑀚𑁂𑀦𑁆𑀢𑀺. 𑀅𑀣 𑀦𑁄𑀢𑀺 𑀅𑀣 𑀅𑀫𑁆𑀳𑁂 𑀅𑀓𑀸𑀭𑀡𑀲𑁆𑀫𑀸 𑀅𑀓𑀸𑀭𑀡𑁂𑀦 𑀅𑀪𑀽𑀫𑀺𑀬𑀁 𑀅𑀦𑁄𑀓𑀸𑀲𑁂𑀬𑁂𑀯 𑀓𑀲𑁆𑀫𑀸, 𑀢𑀸𑀢, 𑀳𑀜𑁆𑀜𑀸𑀫𑀸𑀢𑀺 𑀅𑀢𑁆𑀣𑁄. 𑀫𑀸 𑀢𑀲𑁆𑀲 𑀲𑀤𑁆𑀤𑀳𑁂𑀲𑀻𑀢𑀺 𑀫𑀳𑀸𑀭𑀸𑀚, 𑀦 𑀫𑀁 𑀔𑀡𑁆𑀟𑀳𑀸𑀮𑁄 𑀖𑀸𑀢𑀬𑁂, 𑀫𑀸 𑀢𑀲𑁆𑀲 𑀲𑀤𑁆𑀤𑀳𑁂𑀬𑁆𑀬𑀸𑀲𑀺. 𑀪𑁄𑀕𑀫𑁆𑀧𑀺𑀲𑁆𑀲𑀸𑀢𑀺 𑀪𑁄𑀕𑀫𑁆𑀧𑀺 𑀅𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀭𑀸𑀚𑀸𑀦𑁄 𑀤𑁂𑀦𑁆𑀢𑀺. 𑀅𑀣𑀕𑁆𑀕𑀧𑀺𑀡𑁆𑀟𑀺𑀓𑀸𑀧𑀻𑀢𑀺 𑀅𑀣 𑀢𑁂 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁 𑀮𑀪𑀦𑁆𑀢𑀸 𑀅𑀕𑁆𑀕𑀧𑀺𑀡𑁆𑀟𑀺𑀓𑀸𑀧𑀺 𑀳𑁄𑀦𑁆𑀢𑀺. 𑀢𑁂𑀲𑀫𑁆𑀧𑀻𑀢𑀺 𑀬𑁂𑀲𑀁 𑀓𑀼𑀮𑁂 𑀪𑀼𑀜𑁆𑀚𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀏𑀯𑀭𑀽𑀧𑀸𑀦𑀁 𑀧𑀺𑀡𑁆𑀟𑀤𑀸𑀬𑀓𑀸𑀦𑀁 𑀤𑀼𑀩𑁆𑀪𑀺𑀢𑀼𑀁 𑀇𑀘𑁆𑀙𑀦𑁆𑀢𑀺.

𑀭𑀸𑀚𑀸 𑀓𑀼𑀫𑀸𑀭𑀲𑁆𑀲 𑀯𑀺𑀮𑀸𑀧𑀁 𑀲𑀼𑀢𑁆𑀯𑀸 𑁋

𑁧𑁦𑁨𑁮.

‘‘𑀤𑀼𑀓𑁆𑀔𑀁 𑀔𑁄 𑀫𑁂 𑀚𑀦𑀬𑀣, 𑀯𑀺𑀮𑀧𑀦𑁆𑀢𑀸 𑀚𑀻𑀯𑀺𑀢𑀲𑁆𑀲 𑀓𑀸𑀫𑀸 𑀳𑀺;

𑀫𑀼𑀜𑁆𑀘𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀮𑀫𑁆𑀧𑀺 𑀫𑁂 𑀳𑁄𑀢𑀼 𑀧𑀼𑀢𑁆𑀢𑀬𑀜𑁆𑀜𑁂𑀦𑀸’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀧𑀼𑀦𑀧𑀺 𑀫𑁄𑀘𑁂𑀲𑀺. 𑀔𑀡𑁆𑀟𑀳𑀸𑀮𑁄 𑀆𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑁋

𑁧𑁦𑁨𑁯.

‘‘𑀧𑀼𑀩𑁆𑀩𑁂𑀯 𑀔𑁄𑀲𑀺 𑀫𑁂 𑀯𑀼𑀢𑁆𑀢𑁄, 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀜𑁆𑀘𑁂𑀢𑀁;

𑀅𑀣 𑀦𑁄 𑀉𑀧𑀓𑁆𑀔𑀝𑀲𑁆𑀲 𑀬𑀜𑁆𑀜𑀲𑁆𑀲, 𑀓𑀲𑁆𑀫𑀸 𑀓𑀭𑁄𑀲𑀺 𑀯𑀺𑀓𑁆𑀔𑁂𑀧𑀁.

𑁧𑁦𑁩𑁦.

‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜’’𑀦𑁆𑀢𑀺. 𑁋

𑀏𑀯𑀁 𑀯𑀢𑁆𑀯𑀸 𑀧𑀼𑀦 𑀕𑀡𑁆𑀳𑀸𑀧𑁂𑀲𑀺. 𑀅𑀣𑀲𑁆𑀲 𑀅𑀦𑀼𑀦𑀬𑀦𑀢𑁆𑀣𑀁 𑀓𑀼𑀫𑀸𑀭𑁄 𑀆𑀳 𑁋

𑁧𑁦𑁩𑁧.

‘‘𑀬𑀤𑀺 𑀓𑀺𑀭 𑀬𑀚𑀺𑀢𑁆𑀯𑀸 𑀧𑀼𑀢𑁆𑀢𑁂𑀳𑀺, 𑀤𑁂𑀯𑀮𑁄𑀓𑀁 𑀇𑀢𑁄 𑀘𑀼𑀢𑀸 𑀬𑀦𑁆𑀢𑀺;

𑀩𑁆𑀭𑀸𑀳𑁆𑀫𑀡𑁄 𑀢𑀸𑀯 𑀬𑀚𑀢𑀼, 𑀧𑀘𑁆𑀙𑀸𑀧𑀺 𑀬𑀚𑀲𑀺 𑀢𑀼𑀯𑀁 𑀭𑀸𑀚.

𑁧𑁦𑁩𑁨.

‘‘𑀬𑀤𑀺 ¶ ¶ 𑀓𑀺𑀭 𑀬𑀚𑀺𑀢𑁆𑀯𑀸 𑀧𑀼𑀢𑁆𑀢𑁂𑀳𑀺, 𑀤𑁂𑀯𑀮𑁄𑀓𑀁 𑀇𑀢𑁄 𑀘𑀼𑀢𑀸 𑀬𑀦𑁆𑀢𑀺;

𑀏𑀲𑁆𑀯𑁂𑀯 𑀔𑀡𑁆𑀟𑀳𑀸𑀮𑁄, 𑀬𑀚𑀢𑀁 𑀲𑀓𑁂𑀳𑀺 𑀧𑀼𑀢𑁆𑀢𑁂𑀳𑀺.

𑁧𑁦𑁩𑁩.

‘‘𑀏𑀯𑀁 𑀚𑀸𑀦𑀦𑁆𑀢𑁄 𑀔𑀡𑁆𑀟𑀳𑀸𑀮𑁄, 𑀓𑀺𑀁 𑀧𑀼𑀢𑁆𑀢𑀓𑁂 𑀦 𑀖𑀸𑀢𑁂𑀲𑀺;

𑀲𑀩𑁆𑀩𑀜𑁆𑀘 𑀜𑀸𑀢𑀺𑀚𑀦𑀁, 𑀅𑀢𑁆𑀢𑀸𑀦𑀜𑁆𑀘 𑀦 𑀖𑀸𑀢𑁂𑀲𑀺.

𑁧𑁦𑁩𑁪.

‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀦𑀺𑀭𑀬𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜𑀁.

𑁧𑁦𑁩𑁫.

‘‘𑀲𑀘𑁂 𑀳𑀺 𑀲𑁄 𑀲𑀼𑀚𑁆𑀛𑀢𑀺 𑀬𑁄 𑀳𑀦𑀸𑀢𑀺, 𑀳𑀢𑁄𑀧𑀺 𑀲𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁;

𑀪𑁄𑀯𑀸𑀤𑀺 𑀪𑁄𑀯𑀸𑀤𑀺𑀦 𑀫𑀸𑀭𑀬𑁂𑀬𑁆𑀬𑀼𑀁, 𑀬𑁂 𑀘𑀸𑀧𑀺 𑀢𑁂𑀲𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀼’’𑀦𑁆𑀢𑀺.

𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 𑀢𑀸𑀯𑀸𑀢𑀺 𑀧𑀞𑀫𑀁 𑀢𑀸𑀯 𑀔𑀡𑁆𑀟𑀳𑀸𑀮𑁄 𑀬𑀚𑀢𑀼 𑀲𑀓𑁂𑀳𑀺 𑀧𑀼𑀢𑁆𑀢𑁂𑀳𑀺, 𑀅𑀣 𑀢𑀲𑁆𑀫𑀺𑀁 𑀏𑀯𑀁 𑀬𑀚𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀢𑁂 𑀧𑀘𑁆𑀙𑀸 𑀢𑁆𑀯𑀁 𑀬𑀚𑀺𑀲𑁆𑀲𑀲𑀺. 𑀤𑁂𑀯, 𑀲𑀸𑀤𑀼𑀭𑀲𑀪𑁄𑀚𑀦𑀫𑁆𑀧𑀺 𑀳𑀺 𑀢𑁆𑀯𑀁 𑀅𑀜𑁆𑀜𑁂𑀳𑀺 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀲𑀺, 𑀧𑀼𑀢𑁆𑀢𑀤𑀸𑀭𑀫𑀸𑀭𑀡𑀁𑀬𑁂𑀯 𑀓𑀲𑁆𑀫𑀸 𑀅𑀯𑀻𑀫𑀁𑀲𑀺𑀢𑁆𑀯𑀸 𑀓𑀭𑁄𑀲𑀻𑀢𑀺 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀏𑀯𑀁 𑀚𑀸𑀦𑀦𑁆𑀢𑁄𑀢𑀺 ‘‘𑀧𑀼𑀢𑁆𑀢𑀥𑀻𑀢𑀭𑁄 𑀫𑀸𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀓𑀺𑀁𑀓𑀸𑀭𑀡𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀘 𑀜𑀸𑀢𑀻 𑀘 𑀅𑀢𑁆𑀢𑀸𑀦𑀜𑁆𑀘 𑀦 𑀖𑀸𑀢𑁂𑀲𑀺. 𑀲𑀘𑁂 𑀳𑀺 𑀧𑀭𑀁 𑀫𑀸𑀭𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀘𑁆𑀙𑀦𑁆𑀢𑀺, 𑀅𑀢𑁆𑀢𑀸𑀦𑀁 𑀫𑀸𑀭𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀬𑀜𑁆𑀜𑀕𑀼𑀡𑀁 𑀚𑀸𑀦𑀦𑁆𑀢𑁂𑀦 𑀧𑀭𑀁 𑀅𑀫𑀸𑀭𑁂𑀢𑁆𑀯𑀸 𑀅𑀢𑁆𑀢𑀸𑀯 𑀫𑀸𑀭𑁂𑀢𑀩𑁆𑀩𑁄 𑀲𑀺𑀬𑀸. 𑀅𑀬𑀁 𑀧𑀦 𑀢𑀣𑀸 𑀅𑀓𑀢𑁆𑀯𑀸 𑀫𑀁 𑀫𑀸𑀭𑀸𑀧𑁂𑀢𑀺. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀸𑀦𑀸𑀳𑀺, 𑀫𑀳𑀸𑀭𑀸𑀚 ‘‘𑀬𑀣𑀸 𑀏𑀲 𑀯𑀺𑀦𑀺𑀘𑁆𑀙𑀬𑁂 𑀯𑀺𑀮𑁄𑀧𑀁 𑀓𑀸𑀢𑀼𑀁 𑀅𑀮𑀪𑀦𑁆𑀢𑁄 𑀏𑀯𑀁 𑀓𑀭𑁄𑀢𑀻’’𑀢𑀺. 𑀏𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀧𑀼𑀢𑁆𑀢𑀖𑀸𑀢𑀬𑀜𑁆𑀜𑀁.

𑀓𑀼𑀫𑀸𑀭𑁄 𑀏𑀢𑁆𑀢𑀓𑀁 𑀓𑀣𑁂𑀦𑁆𑀢𑁄𑀧𑀺 𑀧𑀺𑀢𑀭𑀁 𑀅𑀢𑁆𑀢𑀦𑁄 𑀯𑀘𑀦𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁 𑀧𑀭𑀺𑀲𑀁 𑀆𑀭𑀩𑁆𑀪 𑀆𑀳 𑁋

𑁧𑁦𑁩𑁬.

‘‘𑀓𑀣𑀜𑁆𑀘 𑀓𑀺𑀭 𑀧𑀼𑀢𑁆𑀢𑀓𑀸𑀫𑀸𑀬𑁄, 𑀕𑀳𑀧𑀢𑀬𑁄 𑀖𑀭𑀡𑀺𑀬𑁄 𑀘;

𑀦𑀕𑀭𑀫𑁆𑀳𑀺 𑀦 𑀉𑀧𑀭𑀯𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀑𑀭𑀲𑀁 𑀧𑀼𑀢𑁆𑀢𑀁.

𑁧𑁦𑁩𑁭.

‘‘𑀓𑀣𑀜𑁆𑀘 ¶ 𑀓𑀺𑀭 𑀧𑀼𑀢𑁆𑀢𑀓𑀸𑀫𑀸𑀬𑁄, 𑀕𑀳𑀧𑀢𑀬𑁄 𑀖𑀭𑀡𑀺𑀬𑁄 𑀘;

𑀦𑀕𑀭𑀫𑁆𑀳𑀺 𑀦 𑀉𑀧𑀭𑀯𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀅𑀢𑁆𑀭𑀚𑀁 𑀧𑀼𑀢𑁆𑀢𑀁.

𑁧𑁦𑁩𑁮.

‘‘𑀭𑀜𑁆𑀜𑁄 ¶ 𑀘𑀫𑁆𑀳𑀺 𑀅𑀢𑁆𑀣𑀓𑀸𑀫𑁄, 𑀳𑀺𑀢𑁄 𑀘 𑀲𑀩𑁆𑀩𑀚𑀦𑀧𑀤𑀲𑁆𑀲;

𑀦 𑀓𑁄𑀘𑀺 𑀅𑀲𑁆𑀲 𑀧𑀝𑀺𑀖𑀁, 𑀫𑀬𑀸 𑀚𑀸𑀦𑀧𑀤𑁄 𑀦 𑀧𑀯𑁂𑀤𑁂𑀢𑀻’’𑀢𑀺.

𑀢𑀢𑁆𑀣 𑀧𑀼𑀢𑁆𑀢𑀓𑀸𑀫𑀸𑀬𑁄𑀢𑀺 𑀖𑀭𑀡𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀕𑀳𑀧𑀢𑀬𑁄 𑀧𑀦 𑀧𑀼𑀢𑁆𑀢𑀓𑀸𑀫𑀸 𑀦𑀸𑀫 𑀳𑁄𑀦𑁆𑀢𑀺. 𑀦 𑀉𑀧𑀭𑀯𑀦𑁆𑀢𑀻𑀢𑀺 𑀦 𑀉𑀧𑀓𑁆𑀓𑁄𑀲𑀦𑁆𑀢𑀺 𑀦 𑀯𑀤𑀦𑁆𑀢𑀺. 𑀅𑀢𑁆𑀭𑀚𑀦𑁆𑀢𑀺 𑀅𑀢𑁆𑀢𑀢𑁄 𑀚𑀸𑀢𑀁. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑁄𑀘𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀦 𑀓𑁄𑀘𑀺 𑀅𑀲𑁆𑀲 𑀧𑀝𑀺𑀖𑀁 𑀫𑀬𑀸𑀢𑀺 𑀇𑀫𑀺𑀦𑀸 𑀦𑁄 𑀮𑀜𑁆𑀚𑁄 𑀯𑀸 𑀕𑀳𑀺𑀢𑁄, 𑀇𑀲𑁆𑀲𑀭𑀺𑀬𑀫𑀤𑁂𑀦 𑀯𑀸 𑀇𑀤𑀁 𑀦𑀸𑀫 𑀤𑀼𑀓𑁆𑀔𑀁 𑀓𑀢𑀦𑁆𑀢𑀺 𑀓𑁄𑀘𑀺 𑀏𑀓𑁄𑀧𑀺 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀖𑀁 𑀓𑀢𑁆𑀢𑀸 𑀦𑀸𑀫 𑀦𑀸𑀳𑁄𑀲𑀺. 𑀚𑀸𑀦𑀧𑀤𑁄 𑀦 𑀧𑀯𑁂𑀤𑁂𑀢𑀻𑀢𑀺 𑀏𑀯𑀁 𑀭𑀜𑁆𑀜𑁄 𑀘 𑀚𑀦𑀧𑀤𑀲𑁆𑀲 𑀘 𑀅𑀢𑁆𑀣𑀓𑀸𑀫𑀲𑁆𑀲 𑀫𑀫 𑀧𑀺𑀢𑀭𑀁 𑀅𑀬𑀁 𑀚𑀸𑀦𑀧𑀤𑁄 ‘‘𑀕𑀼𑀡𑀲𑀫𑁆𑀧𑀦𑁆𑀦𑁄 𑀢𑁂 𑀧𑀼𑀢𑁆𑀢𑁄’’𑀢𑀺 𑀦 𑀧𑀯𑁂𑀤𑁂𑀢𑀺, 𑀦 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑁄𑀘𑀺 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺. 𑀢𑀢𑁄 𑀘𑀦𑁆𑀤𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬𑁄 𑀢𑀁 𑀬𑀸𑀘𑀦𑀢𑁆𑀣𑀸𑀬 𑀉𑀬𑁆𑀬𑁄𑀚𑁂𑀦𑁆𑀢𑁄 𑀆𑀳 𑁋

𑁧𑁦𑁩𑁯.

‘‘𑀕𑀘𑁆𑀙𑀣 𑀯𑁄 𑀖𑀭𑀡𑀺𑀬𑁄, 𑀢𑀸𑀢𑀜𑁆𑀘 𑀯𑀤𑁂𑀣 𑀔𑀡𑁆𑀟𑀳𑀸𑀮𑀜𑁆𑀘;

𑀫𑀸 𑀖𑀸𑀢𑁂𑀣 𑀓𑀼𑀫𑀸𑀭𑁂, 𑀅𑀤𑀽𑀲𑀓𑁂 𑀲𑀻𑀳𑀲𑀗𑁆𑀓𑀸𑀲𑁂.

𑁧𑁦𑁪𑁦.

‘‘𑀕𑀘𑁆𑀙𑀣 𑀯𑁄 𑀖𑀭𑀡𑀺𑀬𑁄, 𑀢𑀸𑀢𑀜𑁆𑀘 𑀯𑀤𑁂𑀣 𑀔𑀡𑁆𑀟𑀳𑀸𑀮𑀜𑁆𑀘;

𑀫𑀸 𑀖𑀸𑀢𑁂𑀣 𑀓𑀼𑀫𑀸𑀭𑁂, 𑀅𑀧𑁂𑀓𑁆𑀔𑀺𑀢𑁂 𑀲𑀩𑁆𑀩𑀮𑁄𑀓𑀲𑁆𑀲𑀸’’𑀢𑀺.

𑀢𑀸 𑀕𑀦𑁆𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀢𑀸𑀧𑀺 𑀭𑀸𑀚𑀸 𑀦 𑀑𑀮𑁄𑀓𑁂𑀲𑀺. 𑀢𑀢𑁄 𑀓𑀼𑀫𑀸𑀭𑁄 𑀅𑀦𑀸𑀣𑁄 𑀳𑀼𑀢𑁆𑀯𑀸 𑀯𑀺𑀮𑀧𑀦𑁆𑀢𑁄 𑁋

𑁧𑁦𑁪𑁧.

‘‘𑀬𑀁𑀦𑀽𑀦𑀸𑀳𑀁 𑀚𑀸𑀬𑁂𑀬𑁆𑀬𑀁, 𑀭𑀣𑀓𑀸𑀭𑀓𑀼𑀮𑁂𑀲𑀼 𑀯𑀸,

𑀧𑀼𑀓𑁆𑀓𑀼𑀲𑀓𑀼𑀮𑁂𑀲𑀼 𑀯𑀸 𑀯𑁂𑀲𑁆𑀲𑁂𑀲𑀼 𑀯𑀸 𑀚𑀸𑀬𑁂𑀬𑁆𑀬𑀁,

𑀦 𑀳𑀚𑁆𑀚 𑀫𑀁 𑀭𑀸𑀚 𑀬𑀜𑁆𑀜𑁂 𑀖𑀸𑀢𑁂𑀬𑁆𑀬𑀸’’𑀢𑀺. 𑁋

𑀯𑀢𑁆𑀯𑀸 𑀧𑀼𑀦 𑀢𑀸 𑀪𑀭𑀺𑀬𑀸𑀬𑁄 𑀉𑀬𑁆𑀬𑁄𑀚𑁂𑀦𑁆𑀢𑁄 𑀆𑀳 𑁋

𑁧𑁦𑁪𑁨.

‘‘𑀲𑀩𑁆𑀩𑀸 𑀲𑀻𑀫𑀦𑁆𑀢𑀺𑀦𑀺𑀬𑁄 𑀕𑀘𑁆𑀙𑀣, 𑀅𑀬𑁆𑀬𑀲𑁆𑀲 𑀔𑀡𑁆𑀟𑀳𑀸𑀮𑀲𑁆𑀲;

𑀧𑀸𑀤𑁂𑀲𑀼 𑀦𑀺𑀧𑀢𑀣, 𑀅𑀧𑀭𑀸𑀥𑀸𑀳𑀁 𑀦 𑀧𑀲𑁆𑀲𑀸𑀫𑀺.

𑁧𑁦𑁪𑁩.

‘‘𑀲𑀩𑁆𑀩𑀸 ¶ ¶ 𑀲𑀻𑀫𑀦𑁆𑀢𑀺𑀦𑀺𑀬𑁄 𑀕𑀘𑁆𑀙𑀣, 𑀅𑀬𑁆𑀬𑀲𑁆𑀲 𑀔𑀡𑁆𑀟𑀳𑀸𑀮𑀲𑁆𑀲;

𑀧𑀸𑀤𑁂𑀲𑀼 𑀦𑀺𑀧𑀢𑀣, 𑀓𑀺𑀦𑁆𑀢𑁂 𑀪𑀦𑁆𑀢𑁂 𑀫𑀬𑀁 𑀅𑀤𑀽𑀲𑁂𑀫𑀸’’𑀢𑀺.

𑀢𑀢𑁆𑀣 𑀅𑀧𑀭𑀸𑀥𑀸𑀳𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀅𑀳𑀁 𑀆𑀘𑀭𑀺𑀬𑀔𑀡𑁆𑀟𑀳𑀸𑀮𑁂 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀦 𑀧𑀲𑁆𑀲𑀸𑀫𑀺. 𑀓𑀺𑀦𑁆𑀢𑁂 𑀪𑀦𑁆𑀢𑁂𑀢𑀺 𑀅𑀬𑁆𑀬 𑀔𑀡𑁆𑀟𑀳𑀸𑀮, 𑀫𑀬𑀁 𑀢𑀼𑀬𑁆𑀳𑀁 𑀓𑀺𑀁 𑀤𑀽𑀲𑀬𑀺𑀫𑁆𑀳𑀸, 𑀅𑀣 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀤𑁄𑀲𑁄 𑀅𑀢𑁆𑀣𑀺, 𑀢𑀁 𑀔𑀫𑀣𑀸𑀢𑀺 𑀯𑀤𑁂𑀣𑀸𑀢𑀺.

𑀅𑀣 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀓𑀦𑀺𑀝𑁆𑀞𑀪𑀕𑀺𑀦𑀻 𑀲𑁂𑀮𑀓𑀼𑀫𑀸𑀭𑀻 𑀦𑀸𑀫 𑀲𑁄𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀺𑀢𑀼 𑀧𑀸𑀤𑀫𑀽𑀮𑁂 𑀧𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁦𑁪𑁪.

‘‘𑀓𑀧𑀡𑀸 𑀯𑀺𑀮𑀧𑀢𑀺 𑀲𑁂𑀮𑀸, 𑀤𑀺𑀲𑁆𑀯𑀸𑀦 𑀪𑀸𑀢𑀭𑁂 𑀉𑀧𑀦𑀻𑀢𑀢𑁆𑀢𑁂;

𑀬𑀜𑁆𑀜𑁄 𑀓𑀺𑀭 𑀫𑁂 𑀉𑀓𑁆𑀔𑀺𑀧𑀺𑀢𑁄, 𑀢𑀸𑀢𑁂𑀦 𑀲𑀕𑁆𑀕𑀓𑀸𑀫𑁂𑀦𑀸’’𑀢𑀺.

𑀢𑀢𑁆𑀣 𑀉𑀧𑀦𑀻𑀢𑀢𑁆𑀢𑁂𑀢𑀺 𑀉𑀧𑀦𑀻𑀢𑀲𑀪𑀸𑀯𑁂. 𑀉𑀓𑁆𑀔𑀺𑀧𑀺𑀢𑁄𑀢𑀺 𑀉𑀓𑁆𑀔𑀺𑀢𑁆𑀢𑁄. 𑀲𑀕𑁆𑀕𑀓𑀸𑀫𑁂𑀦𑁄𑀢𑀺 𑀫𑀫 𑀪𑀸𑀢𑀭𑁄 𑀫𑀸𑀭𑁂𑀢𑁆𑀯𑀸 𑀲𑀕𑁆𑀕𑀁 𑀇𑀘𑁆𑀙𑀦𑁆𑀢𑁂𑀦. 𑀢𑀸𑀢, 𑀇𑀫𑁂 𑀫𑀸𑀭𑁂𑀢𑁆𑀯𑀸 𑀓𑀺𑀁 𑀲𑀕𑁆𑀕𑁂𑀦 𑀓𑀭𑀺𑀲𑁆𑀲𑀲𑀻𑀢𑀺 𑀯𑀺𑀮𑀧𑀢𑀺.

𑀭𑀸𑀚𑀸 𑀢𑀲𑁆𑀲𑀸𑀧𑀺 𑀓𑀣𑀁 𑀦 𑀕𑀡𑁆𑀳𑀺. 𑀢𑀢𑁄 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄 𑀯𑀲𑀼𑀮𑁄 𑀦𑀸𑀫 𑀧𑀺𑀢𑀭𑀁 𑀤𑀼𑀓𑁆𑀔𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀅𑀬𑁆𑀬𑀓𑀁 𑀬𑀸𑀘𑀺𑀢𑁆𑀯𑀸 𑀫𑀫 𑀧𑀺𑀢𑀼 𑀚𑀻𑀯𑀺𑀢𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀧𑀭𑀺𑀤𑁂𑀯𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁦𑁪𑁫.

‘‘𑀆𑀯𑀢𑁆𑀢𑀺 𑀧𑀭𑀺𑀯𑀢𑁆𑀢𑀺 𑀘, 𑀯𑀲𑀼𑀮𑁄 𑀲𑀫𑁆𑀫𑀼𑀔𑀸 𑀭𑀜𑁆𑀜𑁄;

𑀫𑀸 𑀦𑁄 𑀧𑀺𑀢𑀭𑀁 𑀅𑀯𑀥𑀺, 𑀤𑀳𑀭𑀫𑁆𑀳𑀸𑀬𑁄𑀩𑁆𑀩𑀦𑀁 𑀧𑀢𑁆𑀢𑀸’’𑀢𑀺.

𑀢𑀢𑁆𑀣 𑀤𑀳𑀭𑀫𑁆𑀳𑀸𑀬𑁄𑀩𑁆𑀩𑀦𑀁 𑀧𑀢𑁆𑀢𑀸𑀢𑀺 𑀤𑁂𑀯, 𑀫𑀬𑀁 𑀢𑀭𑀼𑀡𑀤𑀸𑀭𑀓𑀸, 𑀦 𑀢𑀸𑀯 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸, 𑀅𑀫𑁆𑀳𑁂𑀲𑀼𑀧𑀺 𑀢𑀸𑀯 𑀅𑀦𑀼𑀓𑀫𑁆𑀧𑀸𑀬 𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀫𑀸 𑀅𑀯𑀥𑀻𑀢𑀺.

𑀭𑀸𑀚𑀸 𑀢𑀲𑁆𑀲 𑀧𑀭𑀺𑀤𑁂𑀯𑀺𑀢𑀁 𑀲𑀼𑀢𑁆𑀯𑀸 𑀪𑀺𑀚𑁆𑀚𑀫𑀸𑀦𑀳𑀤𑀬𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 𑀓𑀼𑀫𑀸𑀭𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 ‘‘𑀢𑀸𑀢, 𑀅𑀲𑁆𑀲𑀸𑀲𑀁 𑀧𑀝𑀺𑀮𑀪, 𑀯𑀺𑀲𑁆𑀲𑀚𑁆𑀚𑁂𑀫𑀺 𑀢𑁂 𑀧𑀺𑀢𑀭’’𑀦𑁆𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁦𑁪𑁬.

‘‘𑀏𑀲𑁄 ¶ 𑀢𑁂 𑀯𑀲𑀼𑀮 𑀧𑀺𑀢𑀸, 𑀲𑀫𑁂𑀳𑀺 𑀧𑀺𑀢𑀭𑀸 𑀲𑀳;

𑀤𑀼𑀓𑁆𑀔𑀁 𑀔𑁄 𑀫𑁂 𑀚𑀦𑀬𑀲𑀺, 𑀯𑀺𑀮𑀧𑀦𑁆𑀢𑁄 𑀅𑀦𑁆𑀢𑁂𑀧𑀼𑀭𑀲𑁆𑀫𑀺𑀁;

𑀫𑀼𑀜𑁆𑀘𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀮𑀫𑁆𑀧𑀺 𑀫𑁂 𑀳𑁄𑀢𑀼 𑀧𑀼𑀢𑁆𑀢𑀬𑀜𑁆𑀜𑁂𑀦𑀸’’𑀢𑀺.

𑀢𑀢𑁆𑀣 𑀅𑀦𑁆𑀢𑁂𑀧𑀼𑀭𑀲𑁆𑀫𑀺𑀦𑁆𑀢𑀺 𑀭𑀸𑀚𑀦𑀺𑀯𑁂𑀲𑀦𑀲𑁆𑀲 𑀅𑀦𑁆𑀢𑀭𑁂.

𑀧𑀼𑀦 ¶ 𑀔𑀡𑁆𑀟𑀳𑀸𑀮𑁄 𑀆𑀕𑀦𑁆𑀢𑁆𑀯𑀸 𑀆𑀳 𑁋

𑁧𑁦𑁪𑁭.

‘‘𑀧𑀼𑀩𑁆𑀩𑁂𑀯 𑀔𑁄𑀲𑀺 𑀫𑁂 𑀯𑀼𑀢𑁆𑀢𑁄, 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀜𑁆𑀘𑁂𑀢𑀁;

𑀅𑀣 𑀦𑁄 𑀉𑀧𑀓𑁆𑀔𑀝𑀲𑁆𑀲 𑀬𑀜𑁆𑀜𑀲𑁆𑀲, 𑀓𑀲𑁆𑀫𑀸 𑀓𑀭𑁄𑀲𑀺 𑀯𑀺𑀓𑁆𑀔𑁂𑀧𑀁.

𑁧𑁦𑁪𑁮.

‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜’’𑀦𑁆𑀢𑀺.

𑀭𑀸𑀚𑀸 𑀧𑀦 𑀅𑀦𑁆𑀥𑀩𑀸𑀮𑁄 𑀧𑀼𑀦 𑀢𑀲𑁆𑀲 𑀯𑀘𑀦𑁂𑀦 𑀧𑀼𑀢𑁆𑀢𑁂 𑀕𑀡𑁆𑀳𑀸𑀧𑁂𑀲𑀺. 𑀢𑀢𑁄 𑀔𑀡𑁆𑀟𑀳𑀸𑀮𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀼𑀤𑀼𑀘𑀺𑀢𑁆𑀢𑁄 𑀓𑀸𑀮𑁂𑀦 𑀕𑀡𑁆𑀳𑀸𑀧𑁂𑀢𑀺, 𑀓𑀸𑀮𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀼𑀦𑀧𑀺 𑀤𑀸𑀭𑀓𑀸𑀦𑀁 𑀯𑀘𑀦𑁂𑀦 𑀧𑀼𑀢𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀬𑀜𑁆𑀜𑀸𑀯𑀸𑀝𑀜𑁆𑀜𑁂𑀯 𑀦𑀁 𑀦𑁂𑀫𑀻’’𑀢𑀺. 𑀅𑀣𑀲𑁆𑀲 𑀢𑀢𑁆𑀣 𑀕𑀫𑀦𑀢𑁆𑀣𑀸𑀬 𑀕𑀸𑀣𑀫𑀸𑀳 𑁋

𑁧𑁦𑁪𑁯.

‘‘𑀲𑀩𑁆𑀩𑀭𑀢𑀦𑀲𑁆𑀲 𑀬𑀜𑁆𑀜𑁄 𑀉𑀧𑀓𑁆𑀔𑀝𑁄, 𑀏𑀓𑀭𑀸𑀚 𑀢𑀯 𑀧𑀝𑀺𑀬𑀢𑁆𑀢𑁄;

𑀅𑀪𑀺𑀦𑀺𑀓𑁆𑀔𑀫𑀲𑁆𑀲𑀼 𑀤𑁂𑀯, 𑀲𑀕𑁆𑀕𑀁 𑀕𑀢𑁄 𑀢𑁆𑀯𑀁 𑀧𑀫𑁄𑀤𑀺𑀲𑁆𑀲𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀢𑀯 𑀬𑀜𑁆𑀜𑁄 𑀲𑀩𑁆𑀩𑀭𑀢𑀦𑁂𑀳𑀺 𑀉𑀧𑀓𑁆𑀔𑀝𑁄 𑀧𑀝𑀺𑀬𑀢𑁆𑀢𑁄, 𑀇𑀤𑀸𑀦𑀺 𑀢𑁂 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁄, 𑀢𑀲𑁆𑀫𑀸 𑀅𑀪𑀺𑀦𑀺𑀓𑁆𑀔𑀫, 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀲𑀕𑁆𑀕𑀁 𑀕𑀢𑁄 𑀧𑀫𑁄𑀤𑀺𑀲𑁆𑀲𑀲𑀻𑀢𑀺.

𑀢𑀢𑁄 𑀩𑁄𑀥𑀺𑀲𑀢𑁆𑀢𑀁 𑀆𑀤𑀸𑀬 𑀬𑀜𑁆𑀜𑀸𑀯𑀸𑀝𑀕𑀫𑀦𑀓𑀸𑀮𑁂 𑀢𑀲𑁆𑀲 𑀑𑀭𑁄𑀥𑀸 𑀏𑀓𑀢𑁄𑀯 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁦𑁫𑁦.

‘‘𑀤𑀳𑀭𑀸 𑀲𑀢𑁆𑀢𑀲𑀢𑀸 𑀏𑀢𑀸, 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀪𑀭𑀺𑀬𑀸𑀬𑁄;

𑀓𑁂𑀲𑁂 𑀧𑀓𑀺𑀭𑀺𑀢𑁆𑀯𑀸𑀦, 𑀭𑁄𑀤𑀦𑁆𑀢𑀺𑀬𑁄 𑀫𑀕𑁆𑀕𑀫𑀦𑀼𑀬𑀸𑀬𑀺𑀁𑀲𑀼.

𑁧𑁦𑁫𑁧.

‘‘𑀅𑀧𑀭𑀸 ¶ 𑀧𑀦 𑀲𑁄𑀓𑁂𑀦, 𑀦𑀺𑀓𑁆𑀔𑀦𑁆𑀢𑀸 𑀦𑀦𑁆𑀤𑀦𑁂 𑀯𑀺𑀬 𑀤𑁂𑀯𑀸;

𑀓𑁂𑀲𑁂 𑀧𑀓𑀺𑀭𑀺𑀢𑁆𑀯𑀸𑀦, 𑀭𑁄𑀤𑀦𑁆𑀢𑀺𑀬𑁄 𑀫𑀕𑁆𑀕𑀫𑀦𑀼𑀬𑀸𑀬𑀺𑀲𑀼’’𑀦𑁆𑀢𑀺.

𑀢𑀢𑁆𑀣 𑀦𑀦𑁆𑀤𑀦𑁂 𑀯𑀺𑀬 𑀤𑁂𑀯𑀸𑀢𑀺 𑀦𑀦𑁆𑀤𑀦𑀯𑀦𑁂 𑀘𑀯𑀦𑀤𑁂𑀯𑀧𑀼𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀤𑁂𑀯𑀢𑀸 𑀯𑀺𑀬 𑀕𑀢𑀸.

𑀇𑀢𑁄 ¶ 𑀧𑀭𑀁 𑀢𑀸𑀲𑀁 𑀯𑀺𑀮𑀸𑀧𑀕𑀸𑀣𑀸 𑀳𑁄𑀦𑁆𑀢𑀺 𑁋

𑁧𑁦𑁫𑁨.

‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀻𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀬𑀜𑁆𑀜𑀢𑁆𑀣𑀸𑀬 𑀏𑀓𑀭𑀸𑀚𑀲𑁆𑀲.

𑁧𑁦𑁫𑁩.

‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀻𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀫𑀸𑀢𑀼 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁦𑁫𑁪.

‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀻𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀚𑀦𑀲𑁆𑀲 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁦𑁫𑁫.

‘‘𑀫𑀁𑀲𑀭𑀲𑀪𑁄𑀚𑀦𑀸 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀻𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀬𑀜𑁆𑀜𑀢𑁆𑀣𑀸𑀬 𑀏𑀓𑀭𑀸𑀚𑀲𑁆𑀲.

𑁧𑁦𑁫𑁬.

‘‘𑀫𑀁𑀲𑀭𑀲𑀪𑁄𑀚𑀦𑀸 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀻𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀫𑀸𑀢𑀼 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁦𑁫𑁭.

‘‘𑀫𑀁𑀲𑀭𑀲𑀪𑁄𑀚𑀦𑀸 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀻𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀚𑀦𑀲𑁆𑀲 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁦𑁫𑁮.

‘‘𑀬𑀲𑁆𑀲𑀼 𑀧𑀼𑀩𑁆𑀩𑁂 𑀳𑀢𑁆𑀣𑀺𑀯𑀭𑀥𑀼𑀭𑀕𑀢𑁂, 𑀳𑀢𑁆𑀣𑀻𑀳𑀺 𑀅𑀦𑀼𑀯𑀚𑀦𑁆𑀢𑀺;

𑀢𑁆𑀬𑀚𑁆𑀚 𑀘𑀦𑁆𑀤𑀲𑀽𑀭𑀺𑀬𑀸, 𑀉𑀪𑁄𑀯 𑀧𑀢𑁆𑀢𑀺𑀓𑀸 𑀬𑀦𑁆𑀢𑀺.

𑁧𑁦𑁫𑁯.

‘‘𑀬𑀲𑁆𑀲𑀼 ¶ 𑀧𑀼𑀩𑁆𑀩𑁂 𑀅𑀲𑁆𑀲𑀯𑀭𑀥𑀼𑀭𑀕𑀢𑁂, 𑀅𑀲𑁆𑀲𑁂𑀳𑀺 𑀅𑀦𑀼𑀯𑀚𑀦𑁆𑀢𑀺;

𑀢𑁆𑀬𑀚𑁆𑀚 𑀘𑀦𑁆𑀤𑀲𑀽𑀭𑀺𑀬𑀸, 𑀉𑀪𑁄𑀯 𑀧𑀢𑁆𑀢𑀺𑀓𑀸 𑀬𑀦𑁆𑀢𑀺.

𑁧𑁦𑁬𑁦.

‘‘𑀬𑀲𑁆𑀲𑀼 𑀧𑀼𑀩𑁆𑀩𑁂 𑀭𑀣𑀯𑀭𑀥𑀼𑀭𑀕𑀢𑁂, 𑀭𑀣𑁂𑀳𑀺 𑀅𑀦𑀼𑀯𑀚𑀦𑁆𑀢𑀺;

𑀢𑁆𑀬𑀚𑁆𑀚 𑀘𑀦𑁆𑀤𑀲𑀽𑀭𑀺𑀬𑀸, 𑀉𑀪𑁄𑀯 𑀧𑀢𑁆𑀢𑀺𑀓𑀸 𑀬𑀦𑁆𑀢𑀺.

𑁧𑁦𑁬𑁧.

‘‘𑀬𑁂𑀳𑀺𑀲𑁆𑀲𑀼 𑀧𑀼𑀩𑁆𑀩𑁂 𑀦𑀺𑀬𑁆𑀬𑀁𑀲𑀼, 𑀢𑀧𑀦𑀻𑀬𑀓𑀧𑁆𑀧𑀦𑁂𑀳𑀺 𑀢𑀼𑀭𑀗𑁆𑀕𑁂𑀳𑀺;

𑀢𑁆𑀬𑀚𑁆𑀚 𑀘𑀦𑁆𑀤𑀲𑀽𑀭𑀺𑀬𑀸, 𑀉𑀪𑁄𑀯 𑀧𑀢𑁆𑀢𑀺𑀓𑀸 𑀬𑀦𑁆𑀢𑀻’’𑀢𑀺.

𑀢𑀢𑁆𑀣 𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸𑀢𑀺 𑀓𑀸𑀲𑀺𑀓𑀸𑀦𑀺 𑀲𑀼𑀘𑀺𑀯𑀢𑁆𑀣𑀸𑀦𑀺 𑀥𑀸𑀭𑀬𑀫𑀸𑀦𑀸. 𑀘𑀦𑁆𑀤𑀲𑀽𑀭𑀺𑀬𑀸𑀢𑀺 𑀘𑀦𑁆𑀤𑀓𑀼𑀫𑀸𑀭𑁄 𑀘 𑀲𑀽𑀭𑀺𑀬𑀓𑀼𑀫𑀸𑀭𑁄 𑀘. 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸𑀢𑀺 𑀘𑀦𑁆𑀤𑀦𑀘𑀼𑀡𑁆𑀡𑁂𑀦 ¶ 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀦𑁆𑀳𑀸𑀧𑀓𑁂𑀳𑀺 𑀓𑀢𑀧𑀭𑀺𑀓𑀫𑁆𑀫𑀢𑀸𑀬 𑀲𑀼𑀦𑁆𑀳𑀸𑀧𑀺𑀢𑀸. 𑀬𑀲𑁆𑀲𑀽𑀢𑀺 𑀬𑁂 𑀅𑀲𑁆𑀲𑀼. 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑁂 𑀓𑀼𑀫𑀸𑀭𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀢𑀺 𑀇𑀢𑁄 𑀧𑀼𑀩𑁆𑀩𑁂. 𑀳𑀢𑁆𑀣𑀺𑀯𑀭𑀥𑀼𑀭𑀕𑀢𑁂𑀢𑀺 𑀳𑀢𑁆𑀣𑀺𑀯𑀭𑀸𑀦𑀁 𑀥𑀼𑀭𑀕𑀢𑁂, 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁂𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀯𑀭𑀥𑀼𑀭𑀕𑀢𑁂𑀢𑀺 𑀅𑀲𑁆𑀲𑀯𑀭𑀧𑀺𑀝𑁆𑀞𑀺𑀕𑀢𑁂. 𑀭𑀣𑀯𑀭𑀥𑀼𑀭𑀕𑀢𑁂𑀢𑀺 𑀭𑀣𑀯𑀭𑀫𑀚𑁆𑀛𑀕𑀢𑁂. 𑀦𑀺𑀬𑁆𑀬𑀁𑀲𑀽𑀢𑀺 𑀦𑀺𑀓𑁆𑀔𑀫𑀺𑀁𑀲𑀼.

𑀏𑀯𑀁 𑀢𑀸𑀲𑀼 𑀧𑀭𑀺𑀤𑁂𑀯𑀦𑁆𑀢𑀻𑀲𑀼𑀬𑁂𑀯 𑀩𑁄𑀥𑀺𑀲𑀢𑁆𑀢𑀁 𑀦𑀕𑀭𑀸 𑀦𑀻𑀳𑀭𑀺𑀁𑀲𑀼. 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀆𑀭𑀪𑀺. 𑀫𑀳𑀸𑀚𑀦𑁂 𑀦𑀺𑀓𑁆𑀔𑀦𑁆𑀢𑁂 𑀤𑁆𑀯𑀸𑀭𑀸𑀦𑀺 𑀦𑀧𑁆𑀧𑀳𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀢𑀺𑀩𑀳𑀼𑀁 𑀚𑀦𑀁 𑀤𑀺𑀲𑁆𑀯𑀸 ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀕𑀭𑀤𑁆𑀯𑀸𑀭𑀸𑀦𑀺 𑀣𑀓𑀸𑀧𑁂𑀲𑀺. 𑀫𑀳𑀸𑀚𑀦𑁄 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀉𑀬𑁆𑀬𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀳𑀸𑀯𑀺𑀭𑀯𑀁 𑀭𑀯𑀺. 𑀢𑁂𑀦 𑀭𑀯𑁂𑀦 𑀲𑀓𑀼𑀡𑀲𑀗𑁆𑀖𑁄 𑀲𑀗𑁆𑀔𑀼𑀪𑀺𑀢𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀫𑀳𑀸𑀚𑀦𑁄 𑀢𑀁 𑀢𑀁 𑀲𑀓𑀼𑀡𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 𑀯𑀺𑀮𑀧𑀦𑁆𑀢𑁄 𑀆𑀳 𑁋

𑁧𑁦𑁬𑁨.

‘‘𑀬𑀤𑀺 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀺.

𑁧𑁦𑁬𑁩.

‘‘𑀬𑀤𑀺 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀓𑀜𑁆𑀜𑀸𑀳𑀺.

𑁧𑁦𑁬𑁪.

‘‘𑀬𑀤𑀺 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀫𑀳𑁂𑀲𑀻𑀢𑀺.

𑁧𑁦𑁬𑁫.

‘‘𑀬𑀤𑀺 ¶ 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀕𑀳𑀧𑀢𑀻𑀳𑀺.

𑁧𑁦𑁬𑁬.

‘‘𑀬𑀤𑀺 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀳𑀢𑁆𑀣𑀻𑀳𑀺.

𑁧𑁦𑁬𑁭.

‘‘𑀬𑀤𑀺 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀅𑀲𑁆𑀲𑁂𑀳𑀺.

𑁧𑁦𑁬𑁮.

‘‘𑀬𑀤𑀺 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀉𑀲𑀪𑁂𑀳𑀺.

𑁧𑁦𑁬𑁯.

‘‘𑀬𑀤𑀺 ¶ 𑀲𑀓𑀼𑀡𑀺 𑀫𑀁𑀲𑀫𑀺𑀘𑁆𑀙𑀲𑀺, 𑀟𑀬𑀲𑁆𑀲𑀼 𑀧𑀼𑀩𑁆𑀩𑁂𑀦 𑀧𑀼𑀧𑁆𑀨𑀯𑀢𑀺𑀬𑀸;

𑀬𑀚𑀢𑁂𑀢𑁆𑀣 𑀏𑀓𑀭𑀸𑀚𑀸, 𑀲𑀫𑁆𑀫𑀽𑀴𑁆𑀳𑁄 𑀲𑀩𑁆𑀩𑀘𑀢𑀼𑀓𑁆𑀓𑁂𑀦𑀸’’𑀢𑀺.

𑀢𑀢𑁆𑀣 𑀫𑀁𑀲𑀫𑀺𑀘𑁆𑀙𑀲𑀻𑀢𑀺 𑀅𑀫𑁆𑀪𑁄 𑀲𑀓𑀼𑀡𑀺, 𑀲𑀘𑁂 𑀫𑀁𑀲𑀁 𑀇𑀘𑁆𑀙𑀲𑀺, 𑀧𑀼𑀧𑁆𑀨𑀯𑀢𑀺𑀬𑀸 𑀧𑀼𑀩𑁆𑀩𑁂𑀦 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀬𑀜𑁆𑀜𑀸𑀯𑀸𑀝𑁄 𑀅𑀢𑁆𑀣𑀺, 𑀢𑀢𑁆𑀣 𑀕𑀘𑁆𑀙. 𑀬𑀚𑀢𑁂𑀢𑁆𑀣𑀸𑀢𑀺 𑀏𑀢𑁆𑀣 𑀔𑀡𑁆𑀟𑀳𑀸𑀮𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀽𑀴𑁆𑀳𑁄 𑀏𑀓𑀭𑀸𑀚𑀸 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀢𑀺. 𑀲𑁂𑀲𑀕𑀸𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀫𑀳𑀸𑀚𑀦𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀤𑁂𑀯𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀸𑀲𑀸𑀤𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀧𑀼𑀭𑁂 𑀓𑀽𑀝𑀸𑀕𑀸𑀭𑀉𑀬𑁆𑀬𑀸𑀦𑀸𑀤𑀻𑀦𑀺 𑀧𑀲𑁆𑀲𑀦𑁆𑀢𑁄 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺 𑁋

𑁧𑁦𑁭𑁦.

‘‘𑀅𑀬𑀫𑀲𑁆𑀲 𑀧𑀸𑀲𑀸𑀤𑁄, 𑀇𑀤𑀁 𑀅𑀦𑁆𑀢𑁂𑀧𑀼𑀭𑀁 𑀲𑀼𑀭𑀫𑀡𑀻𑀬𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁧.

‘‘𑀇𑀤𑀫𑀲𑁆𑀲 𑀓𑀽𑀝𑀸𑀕𑀸𑀭𑀁, 𑀲𑁄𑀯𑀡𑁆𑀡𑀁 𑀧𑀼𑀧𑁆𑀨𑀫𑀮𑁆𑀬𑀯𑀺𑀓𑀺𑀡𑁆𑀡𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁨.

‘‘𑀇𑀤𑀫𑀲𑁆𑀲 𑀉𑀬𑁆𑀬𑀸𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁩.

‘‘𑀇𑀤𑀫𑀲𑁆𑀲 ¶ 𑀅𑀲𑁄𑀓𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁪.

‘‘𑀇𑀤𑀫𑀲𑁆𑀲 𑀓𑀡𑀺𑀓𑀸𑀭𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁫.

‘‘𑀇𑀤𑀫𑀲𑁆𑀲 𑀧𑀸𑀝𑀮𑀺𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁬.

‘‘𑀇𑀤𑀫𑀲𑁆𑀲 𑀅𑀫𑁆𑀩𑀯𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀲𑀩𑁆𑀩𑀓𑀸𑀮𑀺𑀓𑀁 𑀭𑀫𑁆𑀫𑀁;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁭.

‘‘𑀅𑀬𑀫𑀲𑁆𑀲 𑀧𑁄𑀓𑁆𑀔𑀭𑀡𑀻, 𑀲𑀜𑁆𑀙𑀦𑁆𑀦𑀸 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑁂𑀳𑀺;

𑀦𑀸𑀯𑀸 𑀘 𑀲𑁄𑀯𑀡𑁆𑀡𑀯𑀺𑀓𑀢𑀸, 𑀧𑀼𑀧𑁆𑀨𑀯𑀮𑁆𑀮𑀺𑀬𑀸 𑀘𑀺𑀢𑁆𑀢𑀸 𑀲𑀼𑀭𑀫𑀡𑀻𑀬𑀸;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸’’𑀢𑀺.

𑀢𑀢𑁆𑀣 ¶ 𑀢𑁂𑀤𑀸𑀦𑀻𑀢𑀺 𑀇𑀤𑀸𑀦𑀺 𑀢𑁂 𑀘𑀦𑁆𑀤𑀓𑀼𑀫𑀸𑀭𑀧𑁆𑀧𑀫𑀼𑀔𑀸 𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑀸 𑀏𑀯𑀭𑀽𑀧𑀁 𑀧𑀸𑀲𑀸𑀤𑀁 𑀙𑀟𑁆𑀟𑁂𑀢𑁆𑀯𑀸 𑀯𑀥𑀸𑀬 𑀦𑀻𑀬𑀦𑁆𑀢𑀺. 𑀲𑁄𑀯𑀡𑁆𑀡𑀯𑀺𑀓𑀢𑀸𑀢𑀺 𑀲𑀼𑀯𑀡𑁆𑀡𑀔𑀘𑀺𑀢𑀸.

𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀯𑀺𑀮𑀧𑀦𑁆𑀢𑀸 𑀧𑀼𑀦 𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 𑁋

𑁧𑁦𑁭𑁮.

‘‘𑀇𑀤𑀫𑀲𑁆𑀲 𑀳𑀢𑁆𑀣𑀺𑀭𑀢𑀦𑀁, 𑀏𑀭𑀸𑀯𑀡𑁄 𑀕𑀚𑁄 𑀩𑀮𑀻 𑀤𑀦𑁆𑀢𑀻;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁭𑁯.

‘‘𑀇𑀤𑀫𑀲𑁆𑀲 𑀅𑀲𑁆𑀲𑀭𑀢𑀦𑀁, 𑀏𑀓𑀔𑀼𑀭𑁄 𑀅𑀲𑁆𑀲𑁄;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁮𑁦.

‘‘𑀅𑀬𑀫𑀲𑁆𑀲 𑀅𑀲𑁆𑀲𑀭𑀣𑁄, 𑀲𑀸𑀴𑀺𑀬𑀦𑀺𑀕𑁆𑀖𑁄𑀲𑁄 𑀲𑀼𑀪𑁄 𑀭𑀢𑀦𑀯𑀺𑀘𑀺𑀢𑁆𑀢𑁄;

𑀬𑀢𑁆𑀣𑀲𑁆𑀲𑀼 𑀅𑀬𑁆𑀬𑀧𑀼𑀢𑁆𑀢𑀸, 𑀲𑁄𑀪𑀺𑀁𑀲𑀼 𑀦𑀦𑁆𑀤𑀦𑁂 𑀯𑀺𑀬 𑀤𑁂𑀯𑀸;

𑀢𑁂𑀤𑀸𑀦𑀺 𑀅𑀬𑁆𑀬𑀧𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀥𑀸𑀬 𑀦𑀺𑀦𑁆𑀦𑀻𑀢𑀸.

𑁧𑁦𑁮𑁧.

‘‘𑀓𑀣𑀁 ¶ 𑀦𑀸𑀫 𑀲𑀸𑀫𑀲𑀫𑀲𑀼𑀦𑁆𑀤𑀭𑁂𑀳𑀺, 𑀘𑀦𑁆𑀤𑀦𑀫𑀼𑀤𑀼𑀓𑀕𑀢𑁆𑀢𑁂𑀳𑀺;

𑀭𑀸𑀚𑀸 𑀬𑀚𑀺𑀲𑁆𑀲𑀢𑁂 𑀬𑀜𑁆𑀜𑀁, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀺.

𑁧𑁦𑁮𑁨.

‘‘𑀓𑀣𑀁 𑀦𑀸𑀫 𑀲𑀸𑀫𑀲𑀫𑀲𑀼𑀦𑁆𑀤𑀭𑀸𑀳𑀺, 𑀘𑀦𑁆𑀤𑀦𑀫𑀼𑀤𑀼𑀓𑀕𑀢𑁆𑀢𑀸𑀳𑀺;

𑀭𑀸𑀚𑀸 𑀬𑀚𑀺𑀲𑁆𑀲𑀢𑁂 𑀬𑀜𑁆𑀜𑀁, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀓𑀜𑁆𑀜𑀸𑀳𑀺.

𑁧𑁦𑁮𑁩.

‘‘𑀓𑀣𑀁 𑀦𑀸𑀫 𑀲𑀸𑀫𑀲𑀫𑀲𑀼𑀦𑁆𑀤𑀭𑀸𑀳𑀺, 𑀘𑀦𑁆𑀤𑀦𑀫𑀼𑀤𑀼𑀓𑀕𑀢𑁆𑀢𑀸𑀳𑀺;

𑀭𑀸𑀚𑀸 𑀬𑀚𑀺𑀲𑁆𑀲𑀢𑁂 𑀬𑀜𑁆𑀜𑀁, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀫𑀳𑁂𑀲𑀻𑀳𑀺.

𑁧𑁦𑁮𑁪.

‘‘𑀓𑀣𑀁 𑀦𑀸𑀫 𑀲𑀸𑀫𑀲𑀫𑀲𑀼𑀦𑁆𑀤𑀭𑁂𑀳𑀺, 𑀘𑀦𑁆𑀤𑀦𑀫𑀼𑀤𑀼𑀓𑀕𑀢𑁆𑀢𑁂𑀳𑀺;

𑀭𑀸𑀚𑀸 𑀬𑀚𑀺𑀲𑁆𑀲𑀢𑁂 𑀬𑀜𑁆𑀜𑀁, 𑀲𑀫𑁆𑀫𑀽𑀴𑁆𑀳𑁄 𑀘𑀢𑀽𑀳𑀺 𑀕𑀳𑀧𑀢𑀻𑀳𑀺.

𑁧𑁦𑁮𑁫.

‘‘𑀬𑀣𑀸 𑀳𑁄𑀦𑁆𑀢𑀺 𑀕𑀸𑀫𑀦𑀺𑀕𑀫𑀸, 𑀲𑀼𑀜𑁆𑀜𑀸 𑀅𑀫𑀦𑀼𑀲𑁆𑀲𑀓𑀸 𑀩𑁆𑀭𑀳𑀸𑀭𑀜𑁆𑀜𑀸;

𑀢𑀣𑀸 𑀳𑁂𑀲𑁆𑀲𑀢𑀺 𑀧𑀼𑀧𑁆𑀨𑀯𑀢𑀺𑀬𑀸, 𑀬𑀺𑀝𑁆𑀞𑁂𑀲𑀼 𑀘𑀦𑁆𑀤𑀲𑀽𑀭𑀺𑀬𑁂𑀲𑀽’’𑀢𑀺.

𑀢𑀢𑁆𑀣 𑀏𑀭𑀸𑀯𑀡𑁄𑀢𑀺 𑀢𑀲𑁆𑀲 𑀳𑀢𑁆𑀣𑀺𑀦𑁄 𑀦𑀸𑀫𑀁. 𑀏𑀓𑀔𑀼𑀭𑁄𑀢𑀺 𑀅𑀪𑀺𑀦𑁆𑀦𑀔𑀼𑀭𑁄. 𑀲𑀸𑀴𑀺𑀬𑀦𑀺𑀕𑁆𑀖𑁄𑀲𑁄𑀢𑀺 𑀕𑀫𑀦𑀓𑀸𑀮𑁂 𑀲𑀸𑀴𑀺𑀓𑀸𑀦𑀁 𑀯𑀺𑀬 𑀫𑀥𑀼𑀭𑁂𑀦 𑀦𑀺𑀕𑁆𑀖𑁄𑀲𑁂𑀦 ¶ 𑀲𑀫𑀦𑁆𑀦𑀸𑀕𑀢𑁄. 𑀓𑀣𑀁 𑀦𑀸𑀫𑀸𑀢𑀺 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦. 𑀲𑀸𑀫𑀲𑀫𑀲𑀼𑀦𑁆𑀤𑀭𑁂𑀳𑀻𑀢𑀺 𑀲𑀼𑀯𑀡𑁆𑀡𑀲𑀸𑀫𑁂𑀳𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀚𑀸𑀢𑀺𑀬𑀸 𑀲𑀫𑁂𑀳𑀺 𑀘 𑀦𑀺𑀤𑁆𑀤𑁄𑀲𑀢𑀸𑀬 𑀲𑀼𑀦𑁆𑀤𑀭𑁂𑀳𑀺. 𑀘𑀦𑁆𑀤𑀦𑀫𑀼𑀤𑀼𑀓𑀕𑀢𑁆𑀢𑁂𑀳𑀻𑀢𑀺 𑀮𑁄𑀳𑀺𑀢𑀘𑀦𑁆𑀤𑀦𑀮𑀺𑀢𑁆𑀢𑀕𑀢𑁆𑀢𑁂𑀳𑀺. 𑀩𑁆𑀭𑀳𑀸𑀭𑀜𑁆𑀜𑀸𑀢𑀺 𑀬𑀣𑀸 𑀢𑁂 𑀕𑀸𑀫𑀦𑀺𑀕𑀫𑀸 𑀲𑀼𑀜𑁆𑀜𑀸 𑀦𑀺𑀫𑁆𑀫𑀦𑀼𑀲𑁆𑀲𑀸 𑀩𑁆𑀭𑀳𑀸𑀭𑀜𑁆𑀜𑀸 𑀳𑁄𑀦𑁆𑀢𑀺, 𑀢𑀣𑀸 𑀧𑀼𑀧𑁆𑀨𑀯𑀢𑀺𑀬𑀸𑀧𑀺 𑀬𑀜𑁆𑀜𑁂 𑀬𑀺𑀝𑁆𑀞𑁂𑀲𑀼 𑀭𑀸𑀚𑀧𑀼𑀢𑁆𑀢𑁂𑀲𑀼 𑀲𑀼𑀜𑁆𑀜𑀸 𑀅𑀭𑀜𑁆𑀜𑀲𑀤𑀺𑀲𑀸 𑀪𑀯𑀺𑀲𑁆𑀲𑀢𑀻𑀢𑀺.

𑀅𑀣 𑀫𑀳𑀸𑀚𑀦𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑁄 𑀅𑀦𑁆𑀢𑁄𑀦𑀕𑀭𑁂𑀬𑁂𑀯 𑀯𑀺𑀘𑀭𑀦𑁆𑀢𑁄 𑀧𑀭𑀺𑀤𑁂𑀯𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀜𑁆𑀜𑀸𑀯𑀸𑀝𑀁 𑀦𑀻𑀢𑁄. 𑀅𑀣𑀲𑁆𑀲 𑀫𑀸𑀢𑀸 𑀕𑁄𑀢𑀫𑀻 𑀦𑀸𑀫 𑀤𑁂𑀯𑀻 ‘‘𑀧𑀼𑀢𑁆𑀢𑀸𑀦𑀁 𑀫𑁂 𑀚𑀻𑀯𑀺𑀢𑀁 𑀤𑁂𑀳𑀺, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀆𑀳 𑁋

𑁧𑁦𑁮𑁬.

‘‘𑀉𑀫𑁆𑀫𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀸𑀫𑀺, 𑀪𑀽𑀦𑀳𑀢𑀸 𑀧𑀁𑀲𑀼𑀦𑀸 𑀘 𑀧𑀭𑀺𑀓𑀺𑀡𑁆𑀡𑀸;

𑀲𑀘𑁂 𑀘𑀦𑁆𑀤𑀯𑀭𑀁 𑀳𑀦𑁆𑀢𑀺, 𑀧𑀸𑀡𑀸 𑀫𑁂 𑀤𑁂𑀯 𑀭𑀼𑀚𑁆𑀛𑀦𑁆𑀢𑀺.

𑁧𑁦𑁮𑁭.

‘‘𑀉𑀫𑁆𑀫𑀢𑁆𑀢𑀺𑀓𑀸 ¶ 𑀪𑀯𑀺𑀲𑁆𑀲𑀸𑀫𑀺, 𑀪𑀽𑀦𑀳𑀢𑀸 𑀧𑀁𑀲𑀼𑀦𑀸 𑀘 𑀧𑀭𑀺𑀓𑀺𑀡𑁆𑀡𑀸;

𑀲𑀘𑁂 𑀲𑀽𑀭𑀺𑀬𑀯𑀭𑀁 𑀳𑀦𑁆𑀢𑀺, 𑀧𑀸𑀡𑀸 𑀫𑁂 𑀤𑁂𑀯 𑀭𑀼𑀚𑁆𑀛𑀦𑁆𑀢𑀻’’𑀢𑀺.

𑀢𑀢𑁆𑀣 𑀪𑀽𑀦𑀳𑀢𑀸𑀢𑀺 𑀳𑀢𑀯𑀼𑀟𑁆𑀠𑀺. 𑀧𑀁𑀲𑀼𑀦𑀸 𑀘 𑀧𑀭𑀺𑀓𑀺𑀡𑁆𑀡𑀸𑀢𑀺 𑀧𑀁𑀲𑀼𑀧𑀭𑀺𑀓𑀺𑀡𑁆𑀡𑀲𑀭𑀻𑀭𑀸 𑀉𑀫𑁆𑀫𑀢𑁆𑀢𑀺𑀓𑀸 𑀳𑀼𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀸𑀫𑀺.

𑀲𑀸 𑀏𑀯𑀁 𑀧𑀭𑀺𑀤𑁂𑀯𑀦𑁆𑀢𑀻𑀧𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀓𑀣𑀁 𑀅𑀮𑀪𑀺𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑁄 𑀢𑀼𑀫𑁆𑀳𑀸𑀓𑀁 𑀓𑀼𑀚𑁆𑀛𑀺𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀓𑀺𑀲𑁆𑀲 𑀦𑀁 𑀢𑀼𑀫𑁆𑀳𑁂 𑀦 𑀦𑀺𑀯𑀢𑁆𑀢𑁂𑀣𑀸’’𑀢𑀺 𑀓𑀼𑀫𑀸𑀭𑀲𑁆𑀲 𑀘𑀢𑀲𑁆𑀲𑁄 𑀪𑀭𑀺𑀬𑀸𑀬𑁄 𑀆𑀮𑀺𑀗𑁆𑀕𑀺𑀢𑁆𑀯𑀸 𑀧𑀭𑀺𑀤𑁂𑀯𑀦𑁆𑀢𑀻 𑀆𑀳 𑁋

𑁧𑁦𑁮𑁮.

‘‘𑀓𑀺𑀦𑁆𑀦𑀼𑀫𑀸 𑀦 𑀭𑀫𑀸𑀧𑁂𑀬𑁆𑀬𑀼𑀁, 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀁𑀯𑀤𑀸;

𑀖𑀝𑁆𑀝𑀺𑀓𑀸 𑀉𑀧𑀭𑀺𑀓𑁆𑀔𑀻 𑀘, 𑀧𑁄𑀓𑁆𑀔𑀭𑀡𑀻 𑀘 𑀪𑀸𑀭𑀺𑀓𑀸;

𑀘𑀦𑁆𑀤𑀲𑀽𑀭𑀺𑀬𑁂𑀲𑀼 𑀦𑀘𑁆𑀘𑀦𑁆𑀢𑀺𑀬𑁄, 𑀲𑀫𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀓𑀺𑀦𑁆𑀦𑀼𑀫𑀸 𑀦 𑀭𑀫𑀸𑀧𑁂𑀬𑁆𑀬𑀼𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀇𑀫𑀸 𑀖𑀝𑁆𑀝𑀺𑀓𑀸𑀢𑀺𑀆𑀤𑀺𑀓𑀸 𑀘𑀢𑀲𑁆𑀲𑁄 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀁𑀯𑀤𑀸 𑀘𑀦𑁆𑀤𑀲𑀽𑀭𑀺𑀬𑀓𑀼𑀫𑀸𑀭𑀸𑀦𑀁 𑀲𑀦𑁆𑀢𑀺𑀓𑁂 ¶ 𑀦𑀘𑁆𑀘𑀦𑁆𑀢𑀺𑀬𑁄 𑀫𑀫 𑀧𑀼𑀢𑁆𑀢𑁂 𑀦 𑀭𑀫𑀸𑀧𑀬𑀺𑀁𑀲𑀼, 𑀉𑀓𑁆𑀓𑀡𑁆𑀞𑀸𑀧𑀬𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑀲𑁆𑀫𑀺𑀜𑁆𑀳𑀺 𑀦𑀘𑁆𑀘𑁂 𑀯𑀸 𑀕𑀻𑀢𑁂 𑀯𑀸 𑀲𑀫𑀸 𑀅𑀜𑁆𑀜𑀸 𑀓𑀸𑀘𑀺 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀲𑀸 𑀲𑀼𑀡𑁆𑀳𑀸𑀳𑀺 𑀲𑀤𑁆𑀥𑀺𑀁 𑀧𑀭𑀺𑀤𑁂𑀯𑀺𑀢𑁆𑀯𑀸 𑀅𑀜𑁆𑀜𑀁 𑀕𑀳𑁂𑀢𑀩𑁆𑀩𑀕𑁆𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑀻 𑀔𑀡𑁆𑀟𑀳𑀸𑀮𑀁 𑀅𑀓𑁆𑀓𑁄𑀲𑀫𑀸𑀦𑀸 𑀅𑀝𑁆𑀞 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁮𑁯.

‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀔𑀡𑁆𑀟𑀳𑀸𑀮 𑀢𑀯 𑀫𑀸𑀢𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀘𑀦𑁆𑀤𑀫𑁆𑀳𑀺 𑀯𑀥𑀸𑀬 𑀦𑀺𑀦𑁆𑀦𑀻𑀢𑁂.

𑁧𑁦𑁯𑁦.

‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀔𑀡𑁆𑀟𑀳𑀸𑀮 𑀢𑀯 𑀫𑀸𑀢𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀲𑀽𑀭𑀺𑀬𑀫𑁆𑀳𑀺 𑀯𑀥𑀸𑀬 𑀦𑀺𑀦𑁆𑀦𑀻𑀢𑁂.

𑁧𑁦𑁯𑁧.

‘‘𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀔𑀡𑁆𑀟𑀳𑀸𑀮 𑀢𑀯 𑀚𑀸𑀬𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀘𑀦𑁆𑀤𑀫𑁆𑀳𑀺 𑀯𑀥𑀸𑀬 𑀦𑀺𑀦𑁆𑀦𑀻𑀢𑁂.

𑁧𑁦𑁯𑁨.

‘‘𑀇𑀫𑀁 ¶ 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀔𑀡𑁆𑀟𑀳𑀸𑀮 𑀢𑀯 𑀚𑀸𑀬𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀲𑀽𑀭𑀺𑀬𑀫𑁆𑀳𑀺 𑀯𑀥𑀸𑀬 𑀦𑀺𑀦𑁆𑀦𑀻𑀢𑁂.

𑁧𑁦𑁯𑁩.

‘‘𑀫𑀸 𑀘 𑀧𑀼𑀢𑁆𑀢𑁂 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀔𑀡𑁆𑀟𑀳𑀸𑀮 𑀢𑀯 𑀫𑀸𑀢𑀸;

𑀬𑁄 𑀖𑀸𑀢𑁂𑀲𑀺 𑀓𑀼𑀫𑀸𑀭𑁂, 𑀅𑀤𑀽𑀲𑀓𑁂 𑀲𑀻𑀳𑀲𑀗𑁆𑀓𑀸𑀲𑁂.

𑁧𑁦𑁯𑁪.

‘‘𑀫𑀸 𑀘 𑀧𑀼𑀢𑁆𑀢𑁂 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀔𑀡𑁆𑀟𑀳𑀸𑀮 𑀢𑀯 𑀫𑀸𑀢𑀸;

𑀬𑁄 𑀖𑀸𑀢𑁂𑀲𑀺 𑀓𑀼𑀫𑀸𑀭𑁂, 𑀅𑀧𑁂𑀓𑁆𑀔𑀺𑀢𑁂 𑀲𑀩𑁆𑀩𑀮𑁄𑀓𑀲𑁆𑀲.

𑁧𑁦𑁯𑁫.

‘‘𑀫𑀸 𑀘 𑀧𑀼𑀢𑁆𑀢𑁂 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀔𑀡𑁆𑀟𑀳𑀸𑀮 𑀢𑀯 𑀚𑀸𑀬𑀸;

𑀬𑁄 𑀖𑀸𑀢𑁂𑀲𑀺 𑀓𑀼𑀫𑀸𑀭𑁂, 𑀅𑀤𑀽𑀲𑀓𑁂 𑀲𑀻𑀳𑀲𑀗𑁆𑀓𑀸𑀲𑁂.

𑁧𑁦𑁯𑁬.

‘‘𑀫𑀸 𑀘 𑀧𑀼𑀢𑁆𑀢𑁂 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀔𑀡𑁆𑀟𑀳𑀸𑀮 𑀢𑀯 𑀚𑀸𑀬𑀸;

𑀬𑁄 𑀖𑀸𑀢𑁂𑀲𑀺 𑀓𑀼𑀫𑀸𑀭𑁂, 𑀅𑀧𑁂𑀓𑁆𑀔𑀺𑀢𑁂 𑀲𑀩𑁆𑀩𑀮𑁄𑀓𑀲𑁆𑀲𑀸’’𑀢𑀺.

𑀢𑀢𑁆𑀣 𑀇𑀫𑀁 𑀫𑀬𑁆𑀳𑀦𑁆𑀢𑀺 𑀫𑀬𑁆𑀳𑀁 𑀇𑀫𑀁 𑀳𑀤𑀬𑀲𑁄𑀓𑀁 𑀤𑀼𑀓𑁆𑀔𑀁. 𑀧𑀝𑀺𑀫𑀼𑀜𑁆𑀘𑀢𑀽𑀢𑀺 𑀧𑀯𑀺𑀲𑀢𑀼 𑀧𑀸𑀧𑀼𑀡𑀸𑀢𑀼. 𑀬𑁄 𑀖𑀸𑀢𑁂𑀲𑀻𑀢𑀺 𑀬𑁄 𑀢𑁆𑀯𑀁 𑀖𑀸𑀢𑁂𑀲𑀺. 𑀅𑀧𑁂𑀓𑁆𑀔𑀺𑀢𑁂𑀢𑀺 𑀲𑀩𑁆𑀩𑀮𑁄𑀓𑁂𑀦 𑀑𑀮𑁄𑀓𑀺𑀢𑁂 𑀤𑀺𑀲𑁆𑀲𑀫𑀸𑀦𑁂 𑀫𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑀩𑁄𑀥𑀺𑀲𑀢𑁆𑀢𑁄 ¶ 𑀬𑀜𑁆𑀜𑀸𑀯𑀸𑀝𑁂𑀧𑀺 𑀧𑀺𑀢𑀭𑀁 𑀬𑀸𑀘𑀦𑁆𑀢𑁄 𑀆𑀳 𑁋

𑁧𑁦𑁯𑁭.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀧𑀸𑀮𑁂𑀫.

𑁧𑁦𑁯𑁮.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀺𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁯𑁯.

‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀅𑀲𑁆𑀲𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁧𑁦𑁦.

‘‘𑀫𑀸 ¶ 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀬𑀲𑁆𑀲 𑀳𑁄𑀦𑁆𑀢𑀺 𑀢𑀯 𑀓𑀸𑀫𑀸, 𑀅𑀧𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀸;

𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫.

𑁧𑁧𑁦𑁧.

‘‘𑀤𑀺𑀩𑁆𑀩𑀁 𑀤𑁂𑀯 𑀉𑀧𑀬𑀸𑀘𑀦𑁆𑀢𑀺, 𑀧𑀼𑀢𑁆𑀢𑀢𑁆𑀣𑀺𑀓𑀸𑀧𑀺 𑀤𑀮𑀺𑀤𑁆𑀤𑀸;

𑀧𑀝𑀺𑀪𑀸𑀦𑀸𑀦𑀺𑀧𑀺 𑀳𑀺𑀢𑁆𑀯𑀸, 𑀧𑀼𑀢𑁆𑀢𑁂 𑀦 𑀮𑀪𑀦𑁆𑀢𑀺 𑀏𑀓𑀘𑁆𑀘𑀸.

𑁧𑁧𑁦𑁨.

‘‘𑀆𑀲𑀻𑀲𑀺𑀓𑀸𑀦𑀺 𑀓𑀭𑁄𑀦𑁆𑀢𑀺, 𑀧𑀼𑀢𑁆𑀢𑀸 𑀦𑁄 𑀚𑀸𑀬𑀦𑁆𑀢𑀼 𑀢𑀢𑁄 𑀧𑀧𑀼𑀢𑁆𑀢𑀸;

𑀅𑀣 𑀦𑁄 𑀅𑀓𑀸𑀭𑀡𑀲𑁆𑀫𑀸, 𑀬𑀜𑁆𑀜𑀢𑁆𑀣𑀸𑀬 𑀤𑁂𑀯 𑀖𑀸𑀢𑁂𑀲𑀺.

𑁧𑁧𑁦𑁩.

‘‘𑀉𑀧𑀬𑀸𑀘𑀺𑀢𑀓𑁂𑀦 𑀧𑀼𑀢𑁆𑀢𑀁 𑀮𑀪𑀦𑁆𑀢𑀺, 𑀫𑀸 𑀢𑀸𑀢 𑀦𑁄 𑀅𑀖𑀸𑀢𑁂𑀲𑀺;

𑀫𑀸 𑀓𑀺𑀘𑁆𑀙𑀸𑀮𑀤𑁆𑀥𑀓𑁂𑀳𑀺 𑀧𑀼𑀢𑁆𑀢𑁂𑀳𑀺, 𑀬𑀚𑀺𑀢𑁆𑀣𑁄 𑀇𑀫𑀁 𑀬𑀜𑁆𑀜𑀁.

𑁧𑁧𑁦𑁪.

‘‘𑀉𑀧𑀬𑀸𑀘𑀺𑀢𑀓𑁂𑀦 𑀧𑀼𑀢𑁆𑀢𑀁 𑀮𑀪𑀦𑁆𑀢𑀺, 𑀫𑀸 𑀢𑀸𑀢 𑀦𑁄 𑀅𑀖𑀸𑀢𑁂𑀲𑀺;

𑀫𑀸 𑀓𑀧𑀡𑀮𑀤𑁆𑀥𑀓𑁂𑀳𑀺 𑀧𑀼𑀢𑁆𑀢𑁂𑀳𑀺, 𑀅𑀫𑁆𑀫𑀸𑀬 𑀦𑁄 𑀯𑀺𑀧𑁆𑀧𑀯𑀸𑀲𑁂𑀳𑀻’’𑀢𑀺.

𑀢𑀢𑁆𑀣 𑀤𑀺𑀩𑁆𑀩𑀦𑁆𑀢𑀺 𑀤𑁂𑀯, 𑀅𑀧𑀼𑀢𑁆𑀢𑀺𑀓𑀸 𑀤𑀮𑀺𑀤𑁆𑀤𑀸𑀧𑀺 𑀦𑀸𑀭𑀺𑀬𑁄 𑀧𑀼𑀢𑁆𑀢𑀢𑁆𑀣𑀺𑀓𑀸 𑀳𑀼𑀢𑁆𑀯𑀸 𑀩𑀳𑀼𑀁 𑀧𑀡𑁆𑀡𑀸𑀓𑀸𑀭𑀁 𑀓𑀭𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀮𑀪𑀸𑀫𑀸𑀢𑀺 𑀤𑀺𑀩𑁆𑀬𑀁 𑀉𑀧𑀬𑀸𑀘𑀦𑁆𑀢𑀺. 𑀧𑀝𑀺𑀪𑀸𑀦𑀸𑀦𑀺𑀧𑀺 𑀳𑀺𑀢𑁆𑀯𑀸𑀢𑀺 𑀤𑁄𑀳𑀴𑀸𑀦𑀺 𑀙𑀟𑁆𑀟𑁂𑀢𑁆𑀯𑀸𑀧𑀺, 𑀅𑀮𑀪𑀺𑀢𑁆𑀯𑀸𑀧𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀦𑀸𑀭𑀻𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀁 𑀤𑁄𑀳𑀴𑀁 𑀅𑀮𑀪𑀺𑀢𑁆𑀯𑀸 𑀕𑀩𑁆𑀪𑁄 𑀲𑀼𑀲𑁆𑀲𑀺𑀢𑁆𑀯𑀸 𑀦𑀲𑁆𑀲𑀢𑀺. 𑀢𑀢𑁆𑀣 𑀏𑀓𑀘𑁆𑀘𑀸 𑀬𑀸𑀘𑀦𑁆𑀢𑀸𑀧𑀺 𑀧𑀼𑀢𑁆𑀢𑁂 𑀅𑀮𑀪𑀫𑀸𑀦𑀸, 𑀓𑀸𑀘𑀺 𑀮𑀤𑁆𑀥𑀫𑁆𑀧𑀺 𑀤𑁄𑀳𑀴𑀁 𑀧𑀳𑀸𑀬 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀦 𑀮𑀪𑀦𑁆𑀢𑀺, 𑀓𑀸𑀘𑀺 𑀤𑁄𑀳𑀴𑀁 𑀅𑀮𑀪𑀫𑀸𑀦𑀸 𑀦 𑀮𑀪𑀦𑁆𑀢𑀺. 𑀫𑀬𑁆𑀳𑀁 𑀧𑀦 𑀫𑀸𑀢𑀸 𑀉𑀧𑁆𑀧𑀦𑁆𑀦𑀁 𑀤𑁄𑀳𑀴𑀁 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀕𑀩𑁆𑀪𑀁 𑀅𑀦𑀸𑀲𑁂𑀢𑁆𑀯𑀸 𑀧𑀼𑀢𑁆𑀢𑁂 𑀧𑀝𑀺𑀮𑀪𑀺. 𑀏𑀯𑀁 𑀧𑀝𑀺𑀮𑀤𑁆𑀥𑁂 𑀫𑀸 𑀦𑁄 𑀅𑀯𑀥𑀻𑀢𑀺 𑀬𑀸𑀘𑀢𑀺.

𑀆𑀲𑀻𑀲𑀺𑀓𑀸𑀦𑀻𑀢𑀺 ¶ 𑀫𑀳𑀸𑀭𑀸𑀚, 𑀇𑀫𑁂 𑀲𑀢𑁆𑀢𑀸 𑀆𑀲𑀻𑀲𑀁 𑀓𑀭𑁄𑀦𑁆𑀢𑀺. 𑀓𑀺𑀦𑁆𑀢𑀺? 𑀧𑀼𑀢𑁆𑀢𑀸 𑀦𑁄 𑀚𑀸𑀬𑀦𑁆𑀢𑀽𑀢𑀺. 𑀢𑀢𑁄 𑀧𑀧𑀼𑀢𑁆𑀢𑀸𑀢𑀺 𑀧𑀼𑀢𑁆𑀢𑀸𑀦𑀫𑁆𑀧𑀺 𑀦𑁄 𑀧𑀼𑀢𑁆𑀢𑀸 𑀚𑀸𑀬𑀦𑁆𑀢𑀽𑀢𑀺. 𑀅𑀣 𑀦𑁄 𑀅𑀓𑀸𑀭𑀡𑀲𑁆𑀫𑀸𑀢𑀺 𑀅𑀣 𑀢𑁆𑀯𑀁 𑀅𑀫𑁆𑀳𑁂 𑀅𑀓𑀸𑀭𑀡𑁂𑀦 𑀬𑀜𑁆𑀜𑀢𑁆𑀣𑀸𑀬 𑀖𑀸𑀢𑁂𑀲𑀺. 𑀉𑀧𑀬𑀸𑀘𑀺𑀢𑀓𑁂𑀦𑀸𑀢𑀺 𑀤𑁂𑀯𑀢𑀸𑀦𑀁 𑀆𑀬𑀸𑀘𑀦𑁂𑀦. 𑀓𑀧𑀡𑀮𑀤𑁆𑀥𑀓𑁂𑀳𑀻𑀢𑀺 𑀓𑀧𑀡𑀸 𑀯𑀺𑀬 𑀳𑀼𑀢𑁆𑀯𑀸 𑀮𑀤𑁆𑀥𑀓𑁂𑀳𑀺. 𑀧𑀼𑀢𑁆𑀢𑁂𑀳𑀻𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀅𑀫𑁆𑀫𑀸𑀬 𑀫𑀸 𑀯𑀺𑀧𑁆𑀧𑀯𑀸𑀲𑁂𑀳𑀺, 𑀫𑀸 𑀦𑁄 𑀫𑀸𑀢𑀭𑀸 𑀲𑀤𑁆𑀥𑀺𑀁 𑀯𑀺𑀧𑁆𑀧𑀯𑀸𑀲𑀁 𑀓𑀭𑀻𑀢𑀺 𑀯𑀤𑀢𑀺.

𑀲𑁄 ¶ 𑀏𑀯𑀁 𑀯𑀤𑀦𑁆𑀢𑁄𑀧𑀺 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀓𑀣𑀁 𑀅𑀮𑀪𑀺𑀢𑁆𑀯𑀸 𑀫𑀸𑀢𑀼 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀆𑀳 𑁋

𑁧𑁧𑁦𑁫.

‘‘𑀩𑀳𑀼𑀤𑀼𑀓𑁆𑀔𑀸 𑀧𑁄𑀲𑀺𑀬 𑀘𑀦𑁆𑀤𑀁, 𑀅𑀫𑁆𑀫 𑀢𑀼𑀯𑀁 𑀚𑀻𑀬𑀲𑁂 𑀧𑀼𑀢𑁆𑀢𑀁;

𑀯𑀦𑁆𑀤𑀸𑀫𑀺 𑀔𑁄 𑀢𑁂 𑀧𑀸𑀤𑁂, 𑀮𑀪𑀢𑀁 𑀢𑀸𑀢𑁄 𑀧𑀭𑀮𑁄𑀓𑀁.

𑁧𑁧𑁦𑁬.

‘‘𑀳𑀦𑁆𑀤 𑀘 𑀫𑀁 𑀉𑀧𑀕𑀽𑀳, 𑀧𑀸𑀤𑁂 𑀢𑁂 𑀅𑀫𑁆𑀫 𑀯𑀦𑁆𑀤𑀺𑀢𑀼𑀁 𑀤𑁂𑀳𑀺;

𑀕𑀘𑁆𑀙𑀸𑀫𑀺 𑀤𑀸𑀦𑀺 𑀧𑀯𑀸𑀲𑀁, 𑀬𑀜𑁆𑀜𑀢𑁆𑀣𑀸𑀬 𑀏𑀓𑀭𑀸𑀚𑀲𑁆𑀲.

𑁧𑁧𑁦𑁭.

‘‘𑀳𑀦𑁆𑀤 𑀘 𑀫𑀁 𑀉𑀧𑀕𑀽𑀳, 𑀧𑀸𑀤𑁂 𑀢𑁂 𑀅𑀫𑁆𑀫 𑀯𑀦𑁆𑀤𑀺𑀢𑀼𑀁 𑀤𑁂𑀳𑀺;

𑀕𑀘𑁆𑀙𑀸𑀫𑀺 𑀤𑀸𑀦𑀺 𑀧𑀯𑀸𑀲𑀁, 𑀫𑀸𑀢𑀼 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁧𑁦𑁮.

‘‘𑀳𑀦𑁆𑀤 𑀘 𑀫𑀁 𑀉𑀧𑀕𑀽𑀳, 𑀧𑀸𑀤𑁂 𑀢𑁂 𑀅𑀫𑁆𑀫 𑀯𑀦𑁆𑀤𑀺𑀢𑀼𑀁 𑀤𑁂𑀳𑀺;

𑀕𑀘𑁆𑀙𑀸𑀫𑀺 𑀤𑀸𑀦𑀺 𑀧𑀯𑀸𑀲𑀁, 𑀚𑀦𑀲𑁆𑀲 𑀓𑀢𑁆𑀯𑀸 𑀳𑀤𑀬𑀲𑁄𑀓’’𑀦𑁆𑀢𑀺.

𑀢𑀢𑁆𑀣 𑀩𑀳𑀼𑀤𑀼𑀓𑁆𑀔𑀸 𑀧𑁄𑀲𑀺𑀬𑀸𑀢𑀺 𑀩𑀳𑀽𑀳𑀺 𑀤𑀼𑀓𑁆𑀔𑁂𑀳𑀺 𑀧𑁄𑀲𑀺𑀬. 𑀘𑀦𑁆𑀤𑀦𑁆𑀢𑀺 𑀫𑀁 𑀘𑀦𑁆𑀤𑀓𑀼𑀫𑀸𑀭𑀁 𑀏𑀯𑀁 𑀧𑁄𑀲𑁂𑀢𑁆𑀯𑀸 𑀇𑀤𑀸𑀦𑀺, 𑀅𑀫𑁆𑀫, 𑀢𑁆𑀯𑀁 𑀚𑀻𑀬𑀲𑁂 𑀧𑀼𑀢𑁆𑀢𑀁. 𑀮𑀪𑀢𑀁 𑀢𑀸𑀢𑁄 𑀧𑀭𑀮𑁄𑀓𑀦𑁆𑀢𑀺 𑀧𑀺𑀢𑀸 𑀫𑁂 𑀪𑁄𑀕𑀲𑀫𑁆𑀧𑀦𑁆𑀦𑀁 𑀧𑀭𑀮𑁄𑀓𑀁 𑀮𑀪𑀢𑀼. 𑀉𑀧𑀕𑀽𑀳𑀸𑀢𑀺 𑀆𑀮𑀺𑀗𑁆𑀕 𑀧𑀭𑀺𑀲𑁆𑀲𑀚. 𑀧𑀯𑀸𑀲𑀦𑁆𑀢𑀺 𑀧𑀼𑀦 𑀅𑀦𑀸𑀕𑀫𑀦𑀸𑀬 𑀅𑀘𑁆𑀘𑀦𑁆𑀢𑀁 𑀯𑀺𑀧𑁆𑀧𑀯𑀸𑀲𑀁 𑀕𑀘𑁆𑀙𑀸𑀫𑀺.

𑀅𑀣𑀲𑁆𑀲 𑀫𑀸𑀢𑀸 𑀧𑀭𑀺𑀤𑁂𑀯𑀦𑁆𑀢𑀻 𑀘𑀢𑀲𑁆𑀲𑁄 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁧𑁦𑁯.

‘‘𑀳𑀦𑁆𑀤 𑀘 𑀧𑀤𑀼𑀫𑀧𑀢𑁆𑀢𑀸𑀦𑀁, 𑀫𑁄𑀴𑀺𑀁 𑀩𑀦𑁆𑀥𑀲𑁆𑀲𑀼 𑀕𑁄𑀢𑀫𑀺𑀧𑀼𑀢𑁆𑀢;

𑀘𑀫𑁆𑀧𑀓𑀤𑀮𑀫𑀺𑀲𑁆𑀲𑀸𑀬𑁄, 𑀏𑀲𑀸 𑀢𑁂 𑀧𑁄𑀭𑀸𑀡𑀺𑀓𑀸 𑀧𑀓𑀢𑀺.

𑁧𑁧𑁧𑁦.

‘‘𑀳𑀦𑁆𑀤 ¶ 𑀘 𑀯𑀺𑀮𑁂𑀧𑀦𑀁 𑀢𑁂, 𑀧𑀘𑁆𑀙𑀺𑀫𑀓𑀁 𑀘𑀦𑁆𑀤𑀦𑀁 𑀯𑀺𑀮𑀺𑀫𑁆𑀧𑀲𑁆𑀲𑀼;

𑀬𑁂𑀳𑀺 𑀘 𑀲𑀼𑀯𑀺𑀮𑀺𑀢𑁆𑀢𑁄, 𑀲𑁄𑀪𑀲𑀺 𑀭𑀸𑀚𑀧𑀭𑀺𑀲𑀸𑀬𑀁.

𑁧𑁧𑁧𑁧.

‘‘𑀳𑀦𑁆𑀤 𑀘 𑀫𑀼𑀤𑀼𑀓𑀸𑀦𑀺 𑀯𑀢𑁆𑀣𑀸𑀦𑀺, 𑀧𑀘𑁆𑀙𑀺𑀫𑀓𑀁 𑀓𑀸𑀲𑀺𑀓𑀁 𑀦𑀺𑀯𑀸𑀲𑁂𑀳𑀺;

𑀬𑁂𑀳𑀺 𑀘 𑀲𑀼𑀦𑀺𑀯𑀢𑁆𑀣𑁄, 𑀲𑁄𑀪𑀲𑀺 𑀭𑀸𑀚𑀧𑀭𑀺𑀲𑀸𑀬𑀁.

𑁧𑁧𑁧𑁨.

‘‘𑀫𑀼𑀢𑁆𑀢𑀸𑀫𑀡𑀺𑀓𑀦𑀓𑀯𑀺𑀪𑀽𑀲𑀺𑀢𑀸𑀦𑀺 ¶ , 𑀕𑀡𑁆𑀳𑀲𑁆𑀲𑀼 𑀳𑀢𑁆𑀣𑀸𑀪𑀭𑀡𑀸𑀦𑀺;

𑀬𑁂𑀳𑀺 𑀘 𑀳𑀢𑁆𑀣𑀸𑀪𑀭𑀡𑁂𑀳𑀺, 𑀲𑁄𑀪𑀲𑀺 𑀭𑀸𑀚𑀧𑀭𑀺𑀲𑀸𑀬’’𑀦𑁆𑀢𑀺.

𑀢𑀢𑁆𑀣 𑀧𑀤𑀼𑀫𑀧𑀢𑁆𑀢𑀸𑀦𑀦𑁆𑀢𑀺 𑀧𑀤𑀼𑀫𑀧𑀢𑁆𑀢𑀯𑁂𑀞𑀦𑀁 𑀦𑀸𑀫𑁂𑀓𑀁 𑀧𑀲𑀸𑀥𑀦𑀁, 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀢𑀯 𑀯𑀺𑀧𑁆𑀧𑀓𑀺𑀡𑁆𑀡𑀁 𑀫𑁄𑀴𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀼𑀫𑀧𑀢𑁆𑀢𑀯𑁂𑀞𑀦𑁂𑀦 𑀬𑁄𑀚𑁂𑀢𑁆𑀯𑀸 𑀩𑀦𑁆𑀥𑀸𑀢𑀺 𑀅𑀢𑁆𑀣𑁄. 𑀕𑁄𑀢𑀫𑀺𑀧𑀼𑀢𑁆𑀢𑀸𑀢𑀺 𑀘𑀦𑁆𑀤𑀓𑀼𑀫𑀸𑀭𑀁 𑀆𑀮𑀧𑀢𑀺. 𑀘𑀫𑁆𑀧𑀓𑀤𑀮𑀫𑀺𑀲𑁆𑀲𑀸𑀬𑁄𑀢𑀺 𑀅𑀩𑁆𑀪𑀦𑁆𑀢𑀭𑀺𑀫𑁂𑀳𑀺 𑀘𑀫𑁆𑀧𑀓𑀤𑀮𑁂𑀳𑀺 𑀫𑀺𑀲𑁆𑀲𑀺𑀢𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸 𑀦𑀸𑀦𑀸𑀧𑀼𑀧𑁆𑀨𑀫𑀸𑀮𑀸 𑀧𑀺𑀮𑀦𑁆𑀥𑀲𑁆𑀲𑀼. 𑀏𑀲𑀸 𑀢𑁂𑀢𑀺 𑀏𑀲𑀸 𑀢𑀯 𑀧𑁄𑀭𑀸𑀡𑀺𑀓𑀸 𑀧𑀓𑀢𑀺, 𑀢𑀫𑁂𑀯 𑀕𑀡𑁆𑀳𑀲𑁆𑀲𑀼 𑀧𑀼𑀢𑁆𑀢𑀸𑀢𑀺 𑀧𑀭𑀺𑀤𑁂𑀯𑀢𑀺. 𑀬𑁂𑀳𑀺 𑀘𑀸𑀢𑀺 𑀬𑁂𑀳𑀺 𑀮𑁄𑀳𑀺𑀢𑀘𑀦𑁆𑀤𑀦𑀯𑀺𑀮𑁂𑀧𑀦𑁂𑀳𑀺 𑀯𑀺𑀮𑀺𑀢𑁆𑀢𑁄 𑀭𑀸𑀚𑀧𑀭𑀺𑀲𑀸𑀬 𑀲𑁄𑀪𑀲𑀺, 𑀢𑀸𑀦𑀺 𑀯𑀺𑀮𑀺𑀫𑁆𑀧𑀲𑁆𑀲𑀽𑀢𑀺 𑀅𑀢𑁆𑀣𑁄. 𑀓𑀸𑀲𑀺𑀓𑀦𑁆𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀓𑀸𑀲𑀺𑀓𑀯𑀢𑁆𑀣𑀁. 𑀕𑀡𑁆𑀳𑀲𑁆𑀲𑀽𑀢𑀺 𑀧𑀺𑀮𑀦𑁆𑀥𑀲𑁆𑀲𑀼.

𑀇𑀤𑀸𑀦𑀺𑀲𑁆𑀲 𑀘𑀦𑁆𑀤𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀆𑀳 𑁋

𑁧𑁧𑁧𑁩.

‘‘𑀦 𑀳𑀺 𑀦𑀽𑀦𑀸𑀬𑀁 𑀭𑀝𑁆𑀞𑀧𑀸𑀮𑁄, 𑀪𑀽𑀫𑀺𑀧𑀢𑀺 𑀚𑀦𑀧𑀤𑀲𑁆𑀲 𑀤𑀸𑀬𑀸𑀤𑁄;

𑀮𑁄𑀓𑀺𑀲𑁆𑀲𑀭𑁄 𑀫𑀳𑀦𑁆𑀢𑁄, 𑀧𑀼𑀢𑁆𑀢𑁂 𑀲𑁆𑀦𑁂𑀳𑀁 𑀚𑀦𑀬𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀕𑀸𑀣𑀫𑀸𑀳 𑁋

𑁧𑁧𑁧𑁪.

‘‘𑀫𑀬𑁆𑀳𑀫𑁆𑀧𑀺 𑀧𑀺𑀬𑀸 𑀧𑀼𑀢𑁆𑀢𑀸, 𑀅𑀢𑁆𑀢𑀸 𑀘 𑀧𑀺𑀬𑁄 𑀢𑀼𑀫𑁆𑀳𑁂 𑀘 𑀪𑀭𑀺𑀬𑀸𑀬𑁄;

𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄, 𑀢𑁂𑀦𑀸𑀳𑀁 𑀖𑀸𑀢𑀬𑀺𑀲𑁆𑀲𑀸𑀫𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀺𑀁𑀓𑀸𑀭𑀡𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀦 𑀚𑀦𑁂𑀫𑀺? 𑀦 𑀓𑁂𑀯𑀮𑀁 𑀕𑁄𑀢𑀫𑀺𑀬𑀸 𑀏𑀯, 𑀅𑀣 𑀔𑁄 𑀫𑀬𑁆𑀳𑀫𑁆𑀧𑀺 𑀧𑀺𑀬𑀸 𑀧𑀼𑀢𑁆𑀢𑀸, 𑀢𑀣𑀸 𑀅𑀢𑁆𑀢𑀸 𑀘 𑀢𑀼𑀫𑁆𑀳𑁂 𑀘 𑀲𑀼𑀡𑁆𑀳𑀸𑀬𑁄 𑀪𑀭𑀺𑀬𑀸𑀬𑁄 𑀘 𑀧𑀺𑀬𑀸𑀬𑁂𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀕𑁆𑀕𑀜𑁆𑀘 𑀧𑀢𑁆𑀣𑀬𑀸𑀦𑁄 𑀅𑀳𑀁 𑀲𑀕𑁆𑀕𑀁 𑀧𑀢𑁆𑀣𑁂𑀦𑁆𑀢𑁄, 𑀢𑁂𑀦 𑀓𑀸𑀭𑀡𑁂𑀦 𑀏𑀢𑁂 𑀖𑀸𑀢𑀬𑀺𑀲𑁆𑀲𑀸𑀫𑀺, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀲𑀩𑁆𑀩𑁂𑀧𑁂𑀢𑁂 𑀫𑀬𑀸 𑀲𑀤𑁆𑀥𑀺𑀁 𑀤𑁂𑀯𑀮𑁄𑀓𑀁 𑀏𑀓𑀢𑁄 𑀕𑀫𑀺𑀲𑁆𑀲𑀦𑁆𑀢𑀻𑀢𑀺.

𑀘𑀦𑁆𑀤𑀸 ¶ 𑀆𑀳 𑁋

𑁧𑁧𑁧𑁫.

‘‘𑀫𑀁 𑀧𑀞𑀫𑀁 𑀖𑀸𑀢𑁂𑀳𑀺, 𑀫𑀸 𑀫𑁂 𑀳𑀤𑀬𑀁 𑀤𑀼𑀓𑁆𑀔𑀁 𑀨𑀸𑀮𑁂𑀲𑀺;

𑀅𑀮𑀗𑁆𑀓𑀢𑁄 𑀲𑀼𑀦𑁆𑀤𑀭𑀓𑁄, 𑀧𑀼𑀢𑁆𑀢𑁄 𑀤𑁂𑀯 𑀢𑀯 𑀲𑀼𑀔𑀼𑀫𑀸𑀮𑁄.

𑁧𑁧𑁧𑁬.

‘‘𑀳𑀦𑁆𑀤𑀬𑁆𑀬 ¶ 𑀫𑀁 𑀳𑀦𑀲𑁆𑀲𑀼, 𑀧𑀭𑀮𑁄𑀓𑁂 𑀘𑀦𑁆𑀤𑀓𑁂𑀦 𑀳𑁂𑀲𑁆𑀲𑀸𑀫𑀺;

𑀧𑀼𑀜𑁆𑀜𑀁 𑀓𑀭𑀲𑁆𑀲𑀼 𑀯𑀺𑀧𑀼𑀮𑀁, 𑀯𑀺𑀘𑀭𑀸𑀫 𑀉𑀪𑁄𑀧𑀺 𑀧𑀭𑀮𑁄𑀓𑁂’’𑀢𑀺.

𑀢𑀢𑁆𑀣 𑀧𑀞𑀫𑀦𑁆𑀢𑀺 𑀤𑁂𑀯, 𑀫𑀫 𑀲𑀸𑀫𑀺𑀓𑀢𑁄 𑀧𑀞𑀫𑀢𑀭𑀁 𑀫𑀁 𑀖𑀸𑀢𑁂𑀳𑀺. 𑀤𑀼𑀓𑁆𑀔𑀦𑁆𑀢𑀺 𑀘𑀦𑁆𑀤𑀲𑁆𑀲 𑀫𑀭𑀡𑀤𑀼𑀓𑁆𑀔𑀁 𑀫𑀫 𑀳𑀤𑀬𑀁 𑀫𑀸 𑀨𑀸𑀮𑁂𑀲𑀺. 𑀅𑀮𑀗𑁆𑀓𑀢𑁄𑀢𑀺 𑀅𑀬𑀁 𑀫𑀫 𑀏𑀓𑁄𑀯 𑀅𑀮𑀁 𑀧𑀭𑀺𑀬𑀢𑁆𑀢𑁄𑀢𑀺 𑀏𑀯𑀁 𑀅𑀮𑀗𑁆𑀓𑀢𑁄. 𑀏𑀯𑀭𑀽𑀧𑀁 𑀦𑀸𑀫 𑀧𑀼𑀢𑁆𑀢𑀁 𑀫𑀸 𑀖𑀸𑀢𑀬𑀺, 𑀫𑀳𑀸𑀭𑀸𑀚𑀸𑀢𑀺 𑀤𑀻𑀧𑁂𑀢𑀺. 𑀳𑀦𑁆𑀤𑀬𑁆𑀬𑀸𑀢𑀺 𑀳𑀦𑁆𑀤, 𑀅𑀬𑁆𑀬, 𑀭𑀸𑀚𑀸𑀦𑀁 𑀆𑀮𑀧𑀦𑁆𑀢𑀻 𑀏𑀯𑀫𑀸𑀳. 𑀧𑀭𑀮𑁄𑀓𑁂 𑀘𑀦𑁆𑀤𑀓𑁂𑀦𑀸𑀢𑀺 𑀘𑀦𑁆𑀤𑁂𑀦 𑀲𑀤𑁆𑀥𑀺𑀁 𑀧𑀭𑀮𑁄𑀓𑁂 𑀪𑀯𑀺𑀲𑁆𑀲𑀸𑀫𑀺. 𑀯𑀺𑀘𑀭𑀸𑀫 𑀉𑀪𑁄𑀧𑀺 𑀧𑀭𑀮𑁄𑀓𑁂𑀢𑀺 𑀢𑀬𑀸 𑀏𑀓𑀢𑁄 𑀖𑀸𑀢𑀺𑀢𑀸 𑀉𑀪𑁄𑀧𑀺 𑀧𑀭𑀮𑁄𑀓𑁂 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀸 𑀯𑀺𑀘𑀭𑀸𑀫, 𑀫𑀸 𑀦𑁄 𑀲𑀕𑁆𑀕𑀦𑁆𑀢𑀭𑀸𑀬𑀫𑀓𑀸𑀲𑀻𑀢𑀺.

𑀭𑀸𑀚𑀸 𑀆𑀳 𑁋

𑁧𑁧𑁧𑁭.

‘‘𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑀼𑀘𑁆𑀘𑀺 𑀫𑀭𑀡𑀁, 𑀩𑀳𑀼𑀓𑀸 𑀢𑀯 𑀤𑁂𑀯𑀭𑀸 𑀯𑀺𑀲𑀸𑀮𑀓𑁆𑀔𑀺;

𑀢𑁂 𑀢𑀁 𑀭𑀫𑀬𑀺𑀲𑁆𑀲𑀦𑁆𑀢𑀺, 𑀬𑀺𑀝𑁆𑀞𑀲𑁆𑀫𑀺𑀁 𑀕𑁄𑀢𑀫𑀺𑀧𑀼𑀢𑁆𑀢𑁂’’𑀢𑀺.

𑀢𑀢𑁆𑀣 𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑀼𑀘𑁆𑀘𑀻𑀢𑀺 𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀫𑀭𑀡𑀁 𑀭𑁄𑀘𑁂𑀲𑀺. ‘‘𑀫𑀸 𑀭𑀼𑀤𑁆𑀤𑀻’’𑀢𑀺𑀧𑀺 𑀧𑀸𑀞𑁄, 𑀫𑀸 𑀭𑁄𑀤𑀻𑀢𑀺 𑀅𑀢𑁆𑀣𑁄. 𑀤𑁂𑀯𑀭𑀸𑀢𑀺 𑀧𑀢𑀺𑀪𑀸𑀢𑀼𑀓𑀸.

𑀢𑀢𑁄 𑀧𑀭𑀁 𑀲𑀢𑁆𑀣𑀸 𑁋

𑁧𑁧𑁧𑁮.

‘‘𑀏𑀯𑀁 𑀯𑀼𑀢𑁆𑀢𑁂 𑀘𑀦𑁆𑀤𑀸 𑀅𑀢𑁆𑀢𑀸𑀦𑀁, 𑀳𑀦𑁆𑀢𑀺 𑀳𑀢𑁆𑀣𑀢𑀮𑀓𑁂𑀳𑀻’’𑀢𑀺. 𑁋 𑀉𑀧𑀟𑁆𑀠𑀕𑀸𑀣𑀫𑀸𑀳;

𑀢𑀢𑁄 𑀧𑀭𑀁 𑀢𑀲𑁆𑀲𑀸𑀬𑁂𑀯 𑀯𑀺𑀮𑀸𑀧𑁄 𑀳𑁄𑀢𑀺 𑁋

‘‘𑀅𑀮𑀫𑁂𑀢𑁆𑀣 𑀚𑀻𑀯𑀺𑀢𑁂𑀦, 𑀧𑀺𑀲𑁆𑀲𑀸𑀫𑀺 𑀯𑀺𑀲𑀁 𑀫𑀭𑀺𑀲𑁆𑀲𑀸𑀫𑀺.

𑁧𑁧𑁧𑁯.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀭𑀜𑁆𑀜𑁄, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸;

𑀬𑁂 𑀦 𑀯𑀤𑀦𑁆𑀢𑀺 𑀭𑀸𑀚𑀸𑀦𑀁, ‘𑀫𑀸 𑀖𑀸𑀢𑀬𑀺 𑀑𑀭𑀲𑁂 𑀧𑀼𑀢𑁆𑀢𑁂’.

𑁧𑁧𑁨𑁦.

‘‘𑀦 ¶ ¶ 𑀳𑀺 𑀦𑀽𑀦𑀺𑀫𑀲𑁆𑀲 𑀭𑀜𑁆𑀜𑁄, 𑀜𑀸𑀢𑀻 𑀫𑀺𑀢𑁆𑀢𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸;

𑀬𑁂 𑀦 𑀯𑀤𑀦𑁆𑀢𑀺 𑀭𑀸𑀚𑀸𑀦𑀁, ‘𑀫𑀸 𑀖𑀸𑀢𑀬𑀺 𑀅𑀢𑁆𑀭𑀚𑁂 𑀧𑀼𑀢𑁆𑀢𑁂’.

𑁧𑁧𑁨𑁧.

‘‘𑀇𑀫𑁂 𑀢𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑀸, 𑀕𑀼𑀡𑀺𑀦𑁄 𑀓𑀸𑀬𑀽𑀭𑀥𑀸𑀭𑀺𑀦𑁄 𑀭𑀸𑀚;

𑀢𑁂𑀳𑀺𑀧𑀺 𑀬𑀚𑀲𑁆𑀲𑀼 𑀬𑀜𑁆𑀜𑀁, 𑀅𑀣 𑀫𑀼𑀜𑁆𑀘𑀢𑀼 𑀕𑁄𑀢𑀫𑀺𑀧𑀼𑀢𑁆𑀢𑁂.

𑁧𑁧𑁨𑁨.

‘‘𑀩𑀺𑀮𑀲𑀢𑀁 𑀫𑀁 𑀓𑀢𑁆𑀯𑀸𑀦, 𑀬𑀚𑀲𑁆𑀲𑀼 𑀲𑀢𑁆𑀢𑀥𑀸 𑀫𑀳𑀸𑀭𑀸𑀚;

𑀫𑀸 𑀚𑁂𑀝𑁆𑀞𑀧𑀼𑀢𑁆𑀢𑀫𑀯𑀥𑀺, 𑀅𑀤𑀽𑀲𑀓𑀁 𑀲𑀻𑀳𑀲𑀗𑁆𑀓𑀸𑀲𑀁.

𑁧𑁧𑁨𑁩.

‘‘𑀩𑀺𑀮𑀲𑀢𑀁 𑀫𑀁 𑀓𑀢𑁆𑀯𑀸𑀦, 𑀬𑀚𑀲𑁆𑀲𑀼 𑀲𑀢𑁆𑀢𑀥𑀸 𑀫𑀳𑀸𑀭𑀸𑀚;

𑀫𑀸 𑀚𑁂𑀝𑁆𑀞𑀧𑀼𑀢𑁆𑀢𑀫𑀯𑀥𑀺, 𑀅𑀧𑁂𑀓𑁆𑀔𑀺𑀢𑀁 𑀲𑀩𑁆𑀩𑀮𑁄𑀓𑀲𑁆𑀲𑀸’’𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀏𑀯𑀁 𑀅𑀦𑁆𑀥𑀩𑀸𑀮𑁂𑀦 𑀏𑀓𑀭𑀸𑀚𑁂𑀦 𑀯𑀼𑀢𑁆𑀢𑁂. 𑀳𑀦𑁆𑀢𑀻𑀢𑀺 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀢𑀮𑁂𑀳𑀺 𑀅𑀢𑁆𑀢𑀸𑀦𑀁 𑀳𑀦𑁆𑀢𑀺. 𑀧𑀺𑀲𑁆𑀲𑀸𑀫𑀻𑀢𑀺 𑀧𑀺𑀯𑀺𑀲𑁆𑀲𑀸𑀫𑀺. 𑀇𑀫𑁂 𑀢𑁂𑀧𑀻𑀢𑀺 𑀯𑀲𑀼𑀮𑀓𑀼𑀫𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀲𑁂𑀲𑀤𑀸𑀭𑀓𑁂 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀧𑀸𑀤𑀫𑀽𑀮𑁂 𑀞𑀺𑀢𑀸 𑀏𑀯𑀫𑀸𑀳. 𑀕𑀼𑀡𑀺𑀦𑁄𑀢𑀺 𑀫𑀸𑀮𑀸𑀕𑀼𑀡𑀆𑀪𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀓𑀸𑀬𑀽𑀭𑀥𑀸𑀭𑀺𑀦𑁄𑀢𑀺 𑀓𑀸𑀬𑀽𑀭𑀧𑀲𑀸𑀥𑀦𑀥𑀭𑀸. 𑀩𑀺𑀮𑀲𑀢𑀦𑁆𑀢𑀺 𑀫𑀳𑀸𑀭𑀸𑀚, 𑀫𑀁 𑀖𑀸𑀢𑁂𑀢𑁆𑀯𑀸 𑀓𑁄𑀝𑁆𑀞𑀸𑀲𑀲𑀢𑀁 𑀓𑀢𑁆𑀯𑀸 𑀲𑀢𑁆𑀢𑀥𑀸 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀬𑀜𑁆𑀜𑀁 𑀬𑀚𑀲𑁆𑀲𑀼.

𑀇𑀢𑀺 𑀲𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀅𑀲𑁆𑀲𑀸𑀲𑀁 𑀅𑀮𑀪𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀘𑀦𑁆𑀤𑁂, 𑀫𑀬𑀸 𑀚𑀻𑀯𑀫𑀸𑀦𑁂𑀦 𑀢𑀼𑀬𑁆𑀳𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀼𑀪𑀡𑀺𑀢𑁂 𑀲𑀼𑀓𑀣𑀺𑀢𑁂 𑀉𑀘𑁆𑀘𑀸𑀯𑀘𑀸𑀦𑀺 𑀫𑀡𑀺𑀫𑀼𑀢𑁆𑀢𑀸𑀤𑀻𑀦𑀺 𑀩𑀳𑀽𑀦𑀺 𑀆𑀪𑀭𑀡𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀅𑀚𑁆𑀚 𑀧𑀦 𑀢𑁂 𑀇𑀤𑀁 𑀧𑀘𑁆𑀙𑀺𑀫𑀤𑀸𑀦𑀁, 𑀲𑀭𑀻𑀭𑀸𑀭𑀼𑀴𑁆𑀳𑀁 𑀆𑀪𑀭𑀡𑀁 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺. 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁨𑁪.

‘‘𑀩𑀳𑀼𑀓𑀸 𑀢𑀯 𑀤𑀺𑀦𑁆𑀦𑀸𑀪𑀭𑀡𑀸, 𑀉𑀘𑁆𑀘𑀸𑀯𑀘𑀸 𑀲𑀼𑀪𑀡𑀺𑀢𑀫𑁆𑀳𑀺;

𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸, 𑀏𑀢𑀁 𑀢𑁂 𑀧𑀘𑁆𑀙𑀺𑀫𑀓𑀁 𑀤𑀸𑀦’’𑀦𑁆𑀢𑀺.

𑀘𑀦𑁆𑀤𑀸𑀤𑁂𑀯𑀻𑀧𑀺 𑀢𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀭𑀸𑀳𑀺 𑀦𑀯𑀳𑀺 𑀕𑀸𑀣𑀸𑀳𑀺 𑀯𑀺𑀮𑀧𑀺 𑁋

𑁧𑁧𑁨𑁫.

‘‘𑀬𑁂𑀲𑀁 ¶ 𑀧𑀼𑀩𑁆𑀩𑁂 𑀔𑀦𑁆𑀥𑁂𑀲𑀼, 𑀨𑀼𑀮𑁆𑀮𑀸 𑀫𑀸𑀮𑀸𑀕𑀼𑀡𑀸 𑀯𑀺𑀯𑀢𑁆𑀢𑀺𑀁𑀲𑀼;

𑀢𑁂𑀲𑀚𑁆𑀚𑀧𑀺 𑀲𑀼𑀦𑀺𑀲𑀺𑀢𑁄, 𑀦𑁂𑀢𑁆𑀢𑀺𑀁𑀲𑁄 𑀯𑀺𑀯𑀢𑁆𑀢𑀺𑀲𑁆𑀲𑀢𑀺 𑀔𑀦𑁆𑀥𑁂𑀲𑀼.

𑁧𑁧𑁨𑁬.

‘‘𑀬𑁂𑀲𑀁 ¶ 𑀧𑀼𑀩𑁆𑀩𑁂 𑀔𑀦𑁆𑀥𑁂𑀲𑀼, 𑀘𑀺𑀢𑁆𑀢𑀸 𑀫𑀸𑀮𑀸𑀕𑀼𑀡𑀸 𑀯𑀺𑀯𑀢𑁆𑀢𑀺𑀁𑀲𑀼;

𑀢𑁂𑀲𑀚𑁆𑀚𑀧𑀺 𑀲𑀼𑀦𑀺𑀲𑀺𑀢𑁄, 𑀦𑁂𑀢𑁆𑀢𑀺𑀁𑀲𑁄 𑀯𑀺𑀯𑀢𑁆𑀢𑀺𑀲𑁆𑀲𑀢𑀺 𑀔𑀦𑁆𑀥𑁂𑀲𑀼.

𑁧𑁧𑁨𑁭.

‘‘𑀅𑀘𑀺𑀭𑀁 𑀯𑀢 𑀦𑁂𑀢𑁆𑀢𑀺𑀁𑀲𑁄, 𑀯𑀺𑀯𑀢𑁆𑀢𑀺𑀲𑁆𑀲𑀓𑀺 𑀭𑀸𑀚𑀧𑀼𑀢𑁆𑀢𑀸𑀦𑀁 𑀔𑀦𑁆𑀥𑁂𑀲𑀼;

𑀅𑀣 𑀫𑀫 𑀳𑀤𑀬𑀁 𑀦 𑀨𑀮𑀢𑀺, 𑀢𑀸𑀯 𑀤𑀴𑁆𑀳𑀩𑀦𑁆𑀥𑀜𑁆𑀘 𑀫𑁂 𑀆𑀲𑀺.

𑁧𑁧𑁨𑁮.

‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀸𑀣 𑀘𑀦𑁆𑀤𑀲𑀽𑀭𑀺𑀬𑀸, 𑀬𑀜𑁆𑀜𑀢𑁆𑀣𑀸𑀬 𑀏𑀓𑀭𑀸𑀚𑀲𑁆𑀲.

𑁧𑁧𑁨𑁯.

‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀸𑀣 𑀘𑀦𑁆𑀤𑀲𑀽𑀭𑀺𑀬𑀸, 𑀫𑀸𑀢𑀼 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁧𑁩𑁦.

‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀸𑀣 𑀘𑀦𑁆𑀤𑀲𑀽𑀭𑀺𑀬𑀸, 𑀚𑀦𑀲𑁆𑀲 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁧𑁩𑁧.

‘‘𑀫𑀁𑀲𑀭𑀲𑀪𑁄𑀚𑀦𑀸 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀸𑀣 𑀘𑀦𑁆𑀤𑀲𑀽𑀭𑀺𑀬𑀸, 𑀬𑀜𑁆𑀜𑀢𑁆𑀣𑀸𑀬 𑀏𑀓𑀭𑀸𑀚𑀲𑁆𑀲.

𑁧𑁧𑁩𑁨.

‘‘𑀫𑀁𑀲𑀭𑀲𑀪𑁄𑀚𑀦𑀸 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀸𑀣 𑀘𑀦𑁆𑀤𑀲𑀽𑀭𑀺𑀬𑀸, 𑀫𑀸𑀢𑀼 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁧𑁩𑁩.

‘‘𑀫𑀁𑀲𑀭𑀲𑀪𑁄𑀚𑀦𑀸 𑀦𑁆𑀳𑀸𑀧𑀓𑀲𑀼𑀦𑁆𑀳𑀸𑀧𑀺𑀢𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀸𑀣 𑀘𑀦𑁆𑀤𑀲𑀽𑀭𑀺𑀬𑀸, 𑀚𑀦𑀲𑁆𑀲 𑀓𑀢𑁆𑀯𑀸 𑀳𑀤𑀬𑀲𑁄𑀓’’𑀦𑁆𑀢𑀺.

𑀢𑀢𑁆𑀣 𑀫𑀸𑀮𑀸𑀕𑀼𑀡𑀸𑀢𑀺 𑀧𑀼𑀧𑁆𑀨𑀤𑀸𑀫𑀸𑀦𑀺. 𑀢𑁂𑀲𑀚𑁆𑀚𑀸𑀢𑀺 𑀢𑁂𑀲𑀁 𑀅𑀚𑁆𑀚. 𑀦𑁂𑀢𑁆𑀢𑀺𑀁𑀲𑁄𑀢𑀺 𑀅𑀲𑀺. 𑀯𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀧𑀢𑀺𑀲𑁆𑀲𑀢𑀺. 𑀅𑀘𑀺𑀭𑀁 𑀯𑀢𑀸𑀢𑀺 𑀅𑀘𑀺𑀭𑁂𑀦 𑀯𑀢. 𑀦 𑀨𑀮𑀢𑀻𑀢𑀺 𑀦 𑀪𑀺𑀚𑁆𑀚𑀢𑀺. 𑀢𑀸𑀯 𑀤𑀴𑁆𑀳𑀩𑀦𑁆𑀥𑀜𑁆𑀘 ¶ 𑀫𑁂 𑀆𑀲𑀻𑀢𑀺 𑀅𑀢𑀺𑀯𑀺𑀬 𑀣𑀺𑀭𑀩𑀦𑁆𑀥𑀦𑀁 𑀫𑁂 𑀳𑀤𑀬𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀣𑀸𑀢𑀺 𑀕𑀘𑁆𑀙𑀣.

𑀏𑀯𑀁 𑀢𑀲𑁆𑀲𑀸 𑀧𑀭𑀺𑀤𑁂𑀯𑀦𑁆𑀢𑀺𑀬𑀸𑀯 𑀬𑀜𑁆𑀜𑀸𑀯𑀸𑀝𑁂 𑀲𑀩𑁆𑀩𑀓𑀫𑁆𑀫𑀁 𑀦𑀺𑀝𑁆𑀞𑀸𑀲𑀺. 𑀭𑀸𑀚𑀧𑀼𑀢𑁆𑀢𑀁 𑀦𑁂𑀢𑁆𑀯𑀸 𑀕𑀻𑀯𑀁 𑀑𑀦𑀸𑀫𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀔𑀡𑁆𑀟𑀳𑀸𑀮𑁄 𑀲𑀼𑀯𑀡𑁆𑀡𑀧𑀸𑀢𑀺𑀁 𑀉𑀧𑀦𑀸𑀫𑁂𑀢𑁆𑀯𑀸 𑀔𑀕𑁆𑀕𑀁 𑀆𑀤𑀸𑀬 ‘‘𑀢𑀲𑁆𑀲 𑀕𑀻𑀯𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀘𑀦𑁆𑀤𑀸𑀤𑁂𑀯𑀻 ‘‘𑀅𑀜𑁆𑀜𑀁 𑀫𑁂 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀘𑁆𑀘𑀩𑀮𑁂𑀦 𑀲𑀸𑀫𑀺𑀓𑀲𑁆𑀲 ¶ 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀭𑀺𑀲𑀸𑀬 𑀅𑀦𑁆𑀢𑀭𑁂 𑀯𑀺𑀘𑀭𑀦𑁆𑀢𑀻 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁩𑁪.

‘‘𑀲𑀩𑁆𑀩𑀲𑁆𑀫𑀺𑀁 𑀉𑀧𑀓𑁆𑀔𑀝𑀲𑁆𑀫𑀺𑀁, 𑀦𑀺𑀲𑀻𑀤𑀺𑀢𑁂 𑀘𑀦𑁆𑀤𑀲𑁆𑀫𑀺𑀁 𑀬𑀜𑁆𑀜𑀢𑁆𑀣𑀸𑀬;

𑀧𑀜𑁆𑀘𑀸𑀮𑀭𑀸𑀚𑀥𑀻𑀢𑀸 𑀧𑀜𑁆𑀚𑀮𑀺𑀓𑀸, 𑀲𑀩𑁆𑀩𑀧𑀭𑀺𑀲𑀸𑀬 𑀲𑀫𑀦𑀼𑀧𑀭𑀺𑀬𑀸𑀬𑀺.

𑁧𑁧𑁩𑁫.

‘‘𑀬𑁂𑀦 𑀲𑀘𑁆𑀘𑁂𑀦 𑀔𑀡𑁆𑀟𑀳𑀸𑀮𑁄, 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀤𑀼𑀫𑁆𑀫𑁂𑀥𑁄;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀲𑀫𑀗𑁆𑀕𑀺𑀦𑀻 𑀲𑀸𑀫𑀺𑀓𑁂𑀦 𑀳𑁄𑀫𑀺.

𑁧𑁧𑁩𑁬.

‘‘𑀬𑁂 𑀇𑀥𑀢𑁆𑀣𑀺 𑀅𑀫𑀦𑀼𑀲𑁆𑀲𑀸, 𑀬𑀸𑀦𑀺 𑀘 𑀬𑀓𑁆𑀔𑀪𑀽𑀢𑀪𑀩𑁆𑀬𑀸𑀦𑀺;

𑀓𑀭𑁄𑀦𑁆𑀢𑀼 𑀫𑁂 𑀯𑁂𑀬𑁆𑀬𑀸𑀯𑀝𑀺𑀓𑀁, 𑀲𑀫𑀗𑁆𑀕𑀺𑀦𑀻 𑀲𑀸𑀫𑀺𑀓𑁂𑀦 𑀳𑁄𑀫𑀺.

𑁧𑁧𑁩𑁭.

‘‘𑀬𑀸 𑀤𑁂𑀯𑀢𑀸 𑀇𑀥𑀸𑀕𑀢𑀸, 𑀬𑀸𑀦𑀺 𑀘 𑀬𑀓𑁆𑀔𑀪𑀽𑀢𑀪𑀩𑁆𑀬𑀸𑀦𑀺;

𑀲𑀭𑀡𑁂𑀲𑀺𑀦𑀺𑀁 𑀅𑀦𑀸𑀣𑀁 𑀢𑀸𑀬𑀣 𑀫𑀁, 𑀬𑀸𑀘𑀸𑀫𑀳𑀁 𑀧𑀢𑀺 𑀫𑀸𑀳𑀁 𑀅𑀚𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 𑀉𑀧𑀓𑁆𑀔𑀝𑀲𑁆𑀫𑀺𑀦𑁆𑀢𑀺 𑀲𑀩𑁆𑀩𑀲𑁆𑀫𑀺𑀁 𑀬𑀜𑁆𑀜𑀲𑀫𑁆𑀪𑀸𑀭𑁂 𑀲𑀚𑁆𑀚𑀺𑀢𑁂 𑀧𑀝𑀺𑀬𑀢𑁆𑀢𑁂. 𑀲𑀫𑀗𑁆𑀕𑀺𑀦𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀲𑀁𑀯𑀸𑀲𑀸. 𑀬𑁂 𑀇𑀥𑀢𑁆𑀣𑀻𑀢𑀺 𑀬𑁂 𑀇𑀥 𑀅𑀢𑁆𑀣𑀺. 𑀬𑀓𑁆𑀔𑀪𑀽𑀢𑀪𑀩𑁆𑀬𑀸𑀦𑀻𑀢𑀺 𑀤𑁂𑀯𑀲𑀗𑁆𑀔𑀸𑀢𑀸 𑀬𑀓𑁆𑀔𑀸 𑀘 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑀲𑀢𑁆𑀢𑀲𑀗𑁆𑀔𑀸𑀢𑀸 𑀪𑀽𑀢𑀸 𑀘 𑀇𑀤𑀸𑀦𑀺 𑀯𑀟𑁆𑀠𑀦𑀓𑀲𑀢𑁆𑀢𑀲𑀗𑁆𑀔𑀸𑀢𑀸𑀦𑀺 𑀪𑀩𑁆𑀬𑀸𑀦𑀺 𑀘. 𑀯𑁂𑀬𑁆𑀬𑀸𑀯𑀝𑀺𑀓𑀦𑁆𑀢𑀺 𑀫𑀬𑁆𑀳𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀼. 𑀢𑀸𑀬𑀣 𑀫𑀦𑁆𑀢𑀺 𑀭𑀓𑁆𑀔𑀣 𑀫𑀁. 𑀬𑀸𑀘𑀸𑀫𑀳𑀦𑁆𑀢𑀺 𑀅𑀳𑀁 𑀯𑁄 𑀬𑀸𑀘𑀸𑀫𑀺. 𑀧𑀢𑀺 𑀫𑀸𑀳𑀦𑁆𑀢𑀺 𑀧𑀢𑀺𑀁 𑀅𑀳𑀁 𑀫𑀸 𑀅𑀚𑁂𑀬𑁆𑀬𑀁.

𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀲𑁆𑀲𑀸 𑀧𑀭𑀺𑀤𑁂𑀯𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀚𑀮𑀺𑀢𑀁 𑀅𑀬𑀓𑀽𑀝𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀢𑀸𑀲𑁂𑀢𑁆𑀯𑀸 𑀲𑀩𑁆𑀩𑁂 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁩𑁮.

‘‘𑀢𑀁 ¶ 𑀲𑀼𑀢𑁆𑀯𑀸 𑀅𑀫𑀦𑀼𑀲𑁆𑀲𑁄, 𑀅𑀬𑁄𑀓𑀽𑀝𑀁 𑀧𑀭𑀺𑀩𑁆𑀪𑀫𑁂𑀢𑁆𑀯𑀸𑀦;

𑀪𑀬𑀫𑀲𑁆𑀲 𑀚𑀦𑀬𑀦𑁆𑀢𑁄, 𑀭𑀸𑀚𑀸𑀦𑀁 𑀇𑀤𑀫𑀯𑁄𑀘.

𑁧𑁧𑁩𑁯.

‘‘𑀩𑀼𑀚𑁆𑀛𑀲𑁆𑀲𑀼 𑀔𑁄 𑀭𑀸𑀚𑀓𑀮𑀺, 𑀫𑀸 𑀢𑀸𑀳𑀁 𑀫𑀢𑁆𑀣𑀓𑀁 𑀦𑀺𑀢𑀸𑀴𑁂𑀲𑀺𑀁;

𑀫𑀸 𑀚𑁂𑀝𑁆𑀞𑀧𑀼𑀢𑁆𑀢𑀫𑀯𑀥𑀺, 𑀅𑀤𑀽𑀲𑀓𑀁 𑀲𑀻𑀳𑀲𑀗𑁆𑀓𑀸𑀲𑀁.

𑁧𑁧𑁪𑁦.

‘‘𑀓𑁄 ¶ 𑀢𑁂 𑀤𑀺𑀝𑁆𑀞𑁄 𑀭𑀸𑀚𑀓𑀮𑀺, 𑀧𑀼𑀢𑁆𑀢𑀪𑀭𑀺𑀬𑀸𑀬𑁄 𑀳𑀜𑁆𑀜𑀫𑀸𑀦𑀸𑀬𑁄;

𑀲𑁂𑀝𑁆𑀞𑀺 𑀘 𑀕𑀳𑀧𑀢𑀬𑁄, 𑀅𑀤𑀽𑀲𑀓𑀸 𑀲𑀕𑁆𑀕𑀓𑀸𑀫𑀸 𑀳𑀺.

𑁧𑁧𑁪𑁧.

‘‘𑀢𑀁 𑀲𑀼𑀢𑁆𑀯𑀸 𑀔𑀡𑁆𑀟𑀳𑀸𑀮𑁄, 𑀭𑀸𑀚𑀸 𑀘 𑀅𑀩𑁆𑀪𑀼𑀢𑀫𑀺𑀤𑀁 𑀤𑀺𑀲𑁆𑀯𑀸𑀦;

𑀲𑀩𑁆𑀩𑁂𑀲𑀁 𑀩𑀦𑁆𑀥𑀦𑀸𑀦𑀺 𑀫𑁄𑀘𑁂𑀲𑀼𑀁, 𑀬𑀣𑀸 𑀢𑀁 𑀅𑀦𑀼𑀧𑀖𑀸𑀢𑀁.

𑁧𑁧𑁪𑁨.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀲𑀩𑁆𑀩𑁂 𑀏𑀓𑁂𑀓𑀮𑁂𑀟𑁆𑀟𑀼𑀓𑀫𑀤𑀁𑀲𑀼, 𑀏𑀲 𑀯𑀥𑁄 𑀔𑀡𑁆𑀟𑀳𑀸𑀮𑀲𑁆𑀲𑀸’’𑀢𑀺.

𑀢𑀢𑁆𑀣 𑀅𑀫𑀦𑀼𑀲𑁆𑀲𑁄𑀢𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸. 𑀩𑀼𑀚𑁆𑀛𑀲𑁆𑀲𑀽𑀢𑀺 𑀚𑀸𑀦𑀲𑁆𑀲𑀼 𑀲𑀮𑁆𑀮𑀓𑁆𑀔𑁂𑀳𑀺. 𑀭𑀸𑀚𑀓𑀮𑀻𑀢𑀺 𑀭𑀸𑀚𑀓𑀸𑀴𑀓𑀡𑁆𑀡𑀺 𑀭𑀸𑀚𑀮𑀸𑀫𑀓. 𑀫𑀸 𑀢𑀸𑀳𑀦𑁆𑀢𑀺 𑀧𑀸𑀧𑀭𑀸𑀚, 𑀩𑀼𑀚𑁆𑀛, 𑀫𑀸 𑀢𑁂 𑀅𑀳𑀁 𑀫𑀢𑁆𑀣𑀓𑀁 𑀦𑀺𑀢𑀸𑀴𑁂𑀲𑀺𑀁. 𑀓𑁄 𑀢𑁂 𑀤𑀺𑀝𑁆𑀞𑁄𑀢𑀺 𑀓𑀼𑀳𑀺𑀁 𑀢𑀬𑀸 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀲𑀕𑁆𑀕𑀓𑀸𑀫𑀸 𑀳𑀻𑀢𑀺 𑀏𑀢𑁆𑀣 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀲𑀕𑁆𑀕𑀓𑀸𑀫𑀸 𑀲𑀕𑁆𑀕𑀁 𑀧𑀢𑁆𑀣𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑀁 𑀲𑀼𑀢𑁆𑀯𑀸𑀢𑀺, 𑀪𑀺𑀓𑁆𑀔𑀯𑁂, 𑀢𑀁 𑀲𑀓𑁆𑀓𑀲𑁆𑀲 𑀯𑀘𑀦𑀁 𑀔𑀡𑁆𑀟𑀳𑀸𑀮𑁄 𑀲𑀼𑀢𑁆𑀯𑀸. 𑀅𑀩𑁆𑀪𑀼𑀢𑀫𑀺𑀤𑀦𑁆𑀢𑀺 𑀭𑀸𑀚𑀸 𑀘 𑀇𑀤𑀁 𑀲𑀓𑁆𑀓𑀲𑁆𑀲 𑀤𑀲𑁆𑀲𑀦𑀁 𑀧𑀼𑀩𑁆𑀩𑁂 𑀅𑀪𑀽𑀢𑀁 𑀤𑀺𑀲𑁆𑀯𑀸. 𑀬𑀣𑀸 𑀢𑀦𑁆𑀢𑀺 𑀬𑀣𑀸 𑀅𑀦𑀼𑀧𑀖𑀸𑀢𑀁 𑀧𑀸𑀡𑀁 𑀫𑁄𑀘𑁂𑀦𑁆𑀢𑀺, 𑀏𑀯𑀫𑁂𑀯 𑀫𑁄𑀘𑁂𑀲𑀼𑀁. 𑀏𑀓𑁂𑀓𑀮𑁂𑀟𑁆𑀟𑀼𑀓𑀫𑀤𑀁𑀲𑀽𑀢𑀺 𑀪𑀺𑀓𑁆𑀔𑀯𑁂, 𑀬𑀢𑁆𑀢𑀓𑀸 𑀢𑀲𑁆𑀫𑀺𑀁 𑀬𑀜𑁆𑀜𑀸𑀯𑀸𑀝𑁂 𑀲𑀫𑀸𑀕𑀢𑀸, 𑀲𑀩𑁆𑀩𑁂 𑀏𑀓𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀔𑀡𑁆𑀟𑀳𑀸𑀮𑀲𑁆𑀲 𑀏𑀓𑁂𑀓𑀮𑁂𑀟𑁆𑀟𑀼𑀧𑀳𑀸𑀭𑀁 𑀅𑀤𑀁𑀲𑀼. 𑀏𑀲 𑀯𑀥𑁄𑀢𑀺 𑀏𑀲𑁄𑀯 𑀔𑀡𑁆𑀟𑀳𑀸𑀮𑀲𑁆𑀲 𑀯𑀥𑁄 𑀅𑀳𑁄𑀲𑀺, 𑀢𑀢𑁆𑀣𑁂𑀯 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑀢𑀁 𑀧𑀦 𑀫𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑁄 𑀭𑀸𑀚𑀸𑀦𑀁 𑀫𑀸𑀭𑁂𑀢𑀼𑀁 𑀆𑀭𑀪𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀭𑀁 𑀧𑀭𑀺𑀲𑁆𑀲𑀚𑀺𑀢𑁆𑀯𑀸 𑀫𑀸𑀭𑁂𑀢𑀼𑀁 𑀦 𑀅𑀤𑀸𑀲𑀺. 𑀫𑀳𑀸𑀚𑀦𑁄 ‘‘𑀚𑀻𑀯𑀺𑀢𑀁 𑀏𑀢𑀲𑁆𑀲 𑀧𑀸𑀧𑀭𑀜𑁆𑀜𑁄 𑀤𑁂𑀫, 𑀙𑀢𑁆𑀢𑀁 𑀧𑀦𑀲𑁆𑀲 𑀦𑀕𑀭𑁂 𑀘 𑀯𑀸𑀲𑀁 𑀦 𑀤𑀲𑁆𑀲𑀸𑀫, 𑀘𑀡𑁆𑀟𑀸𑀮𑀁 𑀓𑀢𑁆𑀯𑀸 𑀩𑀳𑀺𑀦𑀕𑀭𑁂 𑀯𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀭𑀸𑀚𑀯𑁂𑀲𑀁 𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀯𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀳𑀮𑀺𑀤𑁆𑀤𑀺𑀧𑀺𑀮𑁄𑀢𑀺𑀓𑀸𑀬 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀘𑀡𑁆𑀟𑀸𑀮𑀁 𑀓𑀢𑁆𑀯𑀸 𑀘𑀡𑁆𑀟𑀸𑀮𑀯𑀲𑀦𑀝𑁆𑀞𑀸𑀦𑀁 𑀢𑀁 𑀧𑀳𑀺𑀡𑀺. 𑀬𑁂 𑀧𑀦𑁂𑀢𑀁 𑀧𑀲𑀼𑀖𑀸𑀢𑀬𑀜𑁆𑀜𑀁 𑀬𑀚𑀺𑀁𑀲𑀼 𑀘𑁂𑀯 𑀬𑀚𑀸𑀧𑁂𑀲𑀼𑀜𑁆𑀘 𑀅𑀦𑀼𑀫𑁄𑀤𑀺𑀁𑀲𑀼 𑀘, 𑀲𑀩𑁆𑀩𑁂 𑀦𑀺𑀭𑀬𑀧𑀭𑀸𑀬𑀡𑀸𑀯 𑀅𑀳𑁂𑀲𑀼𑀁. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁪𑁩.

‘‘𑀲𑀩𑁆𑀩𑁂 ¶ ¶ 𑀧𑀯𑀺𑀝𑁆𑀞𑀸 𑀦𑀺𑀭𑀬𑀁, 𑀬𑀣𑀸 𑀢𑀁 𑀧𑀸𑀧𑀓𑀁 𑀓𑀭𑀺𑀢𑁆𑀯𑀸𑀦;

𑀦 𑀳𑀺 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸, 𑀮𑀩𑁆𑀪𑀸 𑀲𑀼𑀕𑀢𑀺𑀁 𑀇𑀢𑁄 𑀕𑀦𑁆𑀢𑀼’’𑀦𑁆𑀢𑀺.

𑀲𑁄𑀧𑀺 𑀔𑁄 𑀫𑀳𑀸𑀚𑀦𑁄 𑀤𑁆𑀯𑁂 𑀓𑀸𑀴𑀓𑀡𑁆𑀡𑀺𑀬𑁄 𑀳𑀸𑀭𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀪𑀺𑀲𑁂𑀓𑀲𑀫𑁆𑀪𑀸𑀭𑁂 𑀆𑀳𑀭𑀺𑀢𑁆𑀯𑀸 𑀘𑀦𑁆𑀤𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁪𑁪.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑀦𑁆𑀤𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀲𑀫𑀸𑀕𑀢𑀸 𑀭𑀸𑀚𑀧𑀭𑀺𑀲𑀸 𑀘.

𑁧𑁧𑁪𑁫.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑀦𑁆𑀤𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀲𑀫𑀸𑀕𑀢𑀸 𑀭𑀸𑀚𑀓𑀜𑁆𑀜𑀸𑀬𑁄 𑀘.

𑁧𑁧𑁪𑁬.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑀦𑁆𑀤𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀲𑀫𑀸𑀕𑀢𑀸 𑀤𑁂𑀯𑀧𑀭𑀺𑀲𑀸 𑀘.

𑁧𑁧𑁪𑁭.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑀦𑁆𑀤𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀲𑀫𑀸𑀕𑀢𑀸 𑀤𑁂𑀯𑀓𑀜𑁆𑀜𑀸𑀬𑁄 𑀘.

𑁧𑁧𑁪𑁮.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑁂𑀮𑀼𑀓𑁆𑀔𑁂𑀧𑀫𑀓𑀭𑀼𑀁, 𑀲𑀫𑀸𑀕𑀢𑀸 𑀭𑀸𑀚𑀧𑀭𑀺𑀲𑀸 𑀘.

𑁧𑁧𑁪𑁯.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑁂𑀮𑀼𑀓𑁆𑀔𑁂𑀧𑀫𑀓𑀭𑀼𑀁, 𑀲𑀫𑀸𑀕𑀢𑀸 𑀭𑀸𑀚𑀓𑀜𑁆𑀜𑀸𑀬𑁄 𑀘.

𑁧𑁧𑁫𑁦.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑁂𑀮𑀼𑀓𑁆𑀔𑁂𑀧𑀫𑀓𑀭𑀼𑀁, 𑀲𑀫𑀸𑀕𑀢𑀸 𑀤𑁂𑀯𑀧𑀭𑀺𑀲𑀸 𑀘.

𑁧𑁧𑁫𑁧.

‘‘𑀲𑀩𑁆𑀩𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀬𑁂 𑀢𑀢𑁆𑀣 𑀲𑀫𑀸𑀕𑀢𑀸 𑀢𑀤𑀸 𑀆𑀲𑀼𑀁;

𑀘𑁂𑀮𑀼𑀓𑁆𑀔𑁂𑀧𑀫𑀓𑀭𑀼𑀁, 𑀲𑀫𑀸𑀕𑀢𑀸 𑀤𑁂𑀯𑀓𑀜𑁆𑀜𑀸𑀬𑁄 𑀘.

𑁧𑁧𑁫𑁨.

‘‘𑀲𑀩𑁆𑀩𑁂𑀲𑀼 ¶ 𑀯𑀺𑀧𑁆𑀧𑀫𑀼𑀢𑁆𑀢𑁂𑀲𑀼, 𑀩𑀳𑀽 𑀆𑀦𑀦𑁆𑀤𑀺𑀢𑀸 𑀅𑀳𑀼𑀁;

𑀦𑀦𑁆𑀤𑀺𑀁 𑀧𑀯𑁂𑀲𑀺 𑀦𑀕𑀭𑀁, 𑀩𑀦𑁆𑀥𑀦𑀸 𑀫𑁄𑀓𑁆𑀔𑁄 𑀅𑀖𑁄𑀲𑀺𑀢𑁆𑀣𑀸’’𑀢𑀺.

𑀢𑀢𑁆𑀣 𑀭𑀸𑀚𑀧𑀭𑀺𑀲𑀸 𑀘𑀸𑀢𑀺 𑀭𑀸𑀚𑀧𑀭𑀺𑀲𑀸𑀧𑀺 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀭𑀸𑀚𑀓𑀜𑁆𑀜𑀸𑀬𑁄 𑀘𑀸𑀢𑀺 𑀔𑀢𑁆𑀢𑀺𑀬𑀥𑀻𑀢𑀭𑁄𑀧𑀺 𑀦𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀤𑁂𑀯𑀧𑀭𑀺𑀲𑀸 𑀘𑀸𑀢𑀺 𑀲𑀓𑁆𑀓𑁄 ¶ 𑀤𑁂𑀯𑀭𑀸𑀚𑀸 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀕𑀳𑁂𑀢𑁆𑀯𑀸 𑀤𑁂𑀯𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀅𑀪𑀺𑀲𑀺𑀜𑁆𑀘𑀺. 𑀤𑁂𑀯𑀓𑀜𑁆𑀜𑀸𑀬𑁄 𑀘𑀸𑀢𑀺 𑀲𑀼𑀚𑀸𑀧𑀺 𑀤𑁂𑀯𑀥𑀻𑀢𑀭𑀸𑀳𑀺 𑀲𑀤𑁆𑀥𑀺𑀁 𑀅𑀪𑀺𑀲𑀺𑀜𑁆𑀘𑀺. 𑀘𑁂𑀮𑀼𑀓𑁆𑀔𑁂𑀧𑀫𑀓𑀭𑀼𑀦𑁆𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀢𑁆𑀣𑁂𑀳𑀺 𑀥𑀚𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀺𑀲𑀸𑀝𑀓𑀸𑀦𑀺 𑀆𑀓𑀸𑀲𑁂 𑀔𑀺𑀧𑀦𑁆𑀢𑀸 𑀘𑁂𑀮𑀼𑀓𑁆𑀔𑁂𑀧𑀁 𑀓𑀭𑀺𑀁𑀲𑀼. 𑀭𑀸𑀚𑀧𑀭𑀺𑀲𑀸 𑀘 𑀇𑀢𑀭𑁂 𑀢𑀬𑁄 𑀓𑁄𑀝𑁆𑀞𑀸𑀲𑀸 𑀘𑀸𑀢𑀺 𑀅𑀪𑀺𑀲𑁂𑀓𑀓𑀸𑀭𑀓𑀸 𑀘𑀢𑁆𑀢𑀸𑀭𑁄𑀧𑀺 𑀓𑁄𑀝𑁆𑀞𑀸𑀲𑀸 𑀓𑀭𑀺𑀁𑀲𑀼𑀬𑁂𑀯. 𑀆𑀦𑀦𑁆𑀤𑀺𑀢𑀸 𑀅𑀳𑀼𑀦𑁆𑀢𑀺 𑀆𑀫𑁄𑀤𑀺𑀢𑀸 𑀅𑀳𑁂𑀲𑀼𑀁. 𑀦𑀦𑁆𑀤𑀺𑀁 𑀧𑀯𑁂𑀲𑀺 𑀦𑀕𑀭𑀦𑁆𑀢𑀺 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀝𑁆𑀞𑀓𑀸𑀮𑁂 𑀦𑀕𑀭𑁂 𑀆𑀦𑀦𑁆𑀤𑀪𑁂𑀭𑀺 𑀘𑀭𑀺. ‘‘𑀓𑀺𑀁 𑀯𑀢𑁆𑀯𑀸’’𑀢𑀺? 𑀬𑀣𑀸 ‘‘𑀅𑀫𑁆𑀳𑀸𑀓𑀁 𑀘𑀦𑁆𑀤𑀓𑀼𑀫𑀸𑀭𑁄 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄, 𑀏𑀯𑀫𑁂𑀯 𑀲𑀩𑁆𑀩𑁂 𑀩𑀦𑁆𑀥𑀦𑀸 𑀫𑀼𑀘𑁆𑀘𑀦𑁆𑀢𑀽’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀦𑁆𑀥𑀦𑀸 𑀫𑁄𑀓𑁆𑀔𑁄 𑀅𑀖𑁄𑀲𑀺𑀢𑁆𑀣𑀸’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀼 𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀅𑀦𑁆𑀢𑁄𑀦𑀕𑀭𑀁 𑀧𑀦 𑀧𑀯𑀺𑀲𑀺𑀢𑀼𑀁 𑀦 𑀮𑀪𑀢𑀺. 𑀧𑀭𑀺𑀩𑁆𑀩𑀬𑀲𑁆𑀲 𑀔𑀻𑀡𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑀓𑀻𑀴𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀢𑀺𑀫𑁆𑀳𑀻’’𑀢𑀺 𑀦 𑀯𑀦𑁆𑀤𑀢𑀺, 𑀅𑀜𑁆𑀚𑀮𑀺𑀁 𑀧𑀦 𑀓𑀢𑁆𑀯𑀸 ‘‘𑀘𑀺𑀭𑀁 𑀚𑀻𑀯 𑀲𑀸𑀫𑀻’’𑀢𑀺 𑀯𑀤𑀢𑀺. ‘‘𑀓𑁂𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲 𑀧𑀭𑀺𑀩𑁆𑀩𑀬𑀁 𑀤𑀸𑀧𑁂𑀲𑀺. 𑀲𑁄 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑀁 𑀧𑀽𑀭𑀬𑀫𑀸𑀦𑁄 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀤𑀢𑁆𑀢𑁄 𑀫𑀁 𑀏𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀫𑀸𑀭𑁂𑀢𑀼𑀁 𑀯𑀸𑀬𑀸𑀫𑀫𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺. 𑀢𑀤𑀸 𑀔𑀡𑁆𑀟𑀳𑀸𑀮𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀕𑁄𑀢𑀫𑀻𑀤𑁂𑀯𑀻 𑀫𑀳𑀸𑀫𑀸𑀬𑀸, 𑀘𑀦𑁆𑀤𑀸𑀤𑁂𑀯𑀻 𑀭𑀸𑀳𑀼𑀮𑀫𑀸𑀢𑀸, 𑀯𑀲𑀼𑀮𑁄 𑀭𑀸𑀳𑀼𑀮𑁄, 𑀲𑁂𑀮𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀲𑀽𑀭𑁄 𑀯𑀸𑀫𑀕𑁄𑀢𑁆𑀢𑁄 𑀓𑀲𑁆𑀲𑀧𑁄, 𑀪𑀤𑁆𑀤𑀲𑁂𑀦𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀲𑀽𑀭𑀺𑀬𑀓𑀼𑀫𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀘𑀦𑁆𑀤𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀳𑁄𑀲𑀺𑀦𑁆𑀢𑀺.

𑀘𑀦𑁆𑀤𑀓𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁫𑁪𑁫] 𑁮. 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀯𑀡𑁆𑀡𑀦𑀸

𑀅𑀳𑀼 ¶ ¶ 𑀭𑀸𑀚𑀸 𑀯𑀺𑀤𑁂𑀳𑀸𑀦𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑁂 𑀯𑀺𑀳𑀭𑀦𑁆𑀢𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀤𑀫𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀬𑀤𑀸 𑀳𑀺 𑀲𑀢𑁆𑀣𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 ¶ 𑀚𑀝𑀺𑀮𑁂 𑀤𑀫𑁂𑀢𑁆𑀯𑀸 𑀫𑀕𑀥𑀭𑀸𑀚𑀲𑁆𑀲 𑀧𑀝𑀺𑀲𑁆𑀲𑀯𑀁 𑀮𑁄𑀘𑁂𑀢𑀼𑀁 𑀧𑀼𑀭𑀸𑀡𑀚𑀝𑀺𑀮𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀢𑀤𑀸 𑀤𑁆𑀯𑀸𑀤𑀲𑀦𑀳𑀼𑀢𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀫𑀕𑀥𑀭𑀜𑁆𑀜𑁄 𑀧𑀭𑀺𑀲𑀦𑁆𑀢𑀭𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀺 ‘‘𑀓𑀺𑀁 𑀦𑀼 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀉𑀤𑀸𑀳𑀼 𑀫𑀳𑀸𑀲𑀫𑀡𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁂’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 ‘‘𑀓𑀲𑁆𑀲𑀧𑀲𑁆𑀲 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀺𑀫𑁂𑀯 𑀤𑀺𑀲𑁆𑀯𑀸 𑀉𑀭𑀼𑀯𑁂𑀮𑀯𑀸𑀲𑀺, 𑀧𑀳𑀸𑀲𑀺 𑀅𑀕𑁆𑀕𑀺𑀁 𑀓𑀺𑀲𑀓𑁄𑀯𑀤𑀸𑀦𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀓𑀲𑁆𑀲𑀧 𑀏𑀢𑀫𑀢𑁆𑀣𑀁, 𑀓𑀣𑀁 𑀧𑀳𑀻𑀦𑀁 𑀢𑀯 𑀅𑀕𑁆𑀕𑀺𑀳𑀼𑀢𑁆𑀢’’𑀦𑁆𑀢𑀺. (𑀫𑀳𑀸𑀯. 𑁫𑁫);

𑀣𑁂𑀭𑁄𑀧𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑁋

‘‘𑀭𑀽𑀧𑁂 𑀘 𑀲𑀤𑁆𑀤𑁂 𑀘 𑀅𑀣𑁄 𑀭𑀲𑁂 𑀘, 𑀓𑀸𑀫𑀺𑀢𑁆𑀣𑀺𑀬𑁄 𑀘𑀸𑀪𑀺𑀯𑀤𑀦𑁆𑀢𑀺 𑀬𑀜𑁆𑀜𑀸;

𑀏𑀢𑀁 𑀫𑀮𑀦𑁆𑀢𑀺 𑀉𑀧𑀥𑀻𑀲𑀼 𑀜𑀢𑁆𑀯𑀸, 𑀢𑀲𑁆𑀫𑀸 𑀦 𑀬𑀺𑀝𑁆𑀞𑁂 𑀦 𑀳𑀼𑀢𑁂 𑀅𑀭𑀜𑁆𑀚𑀺’’𑀦𑁆𑀢𑀺. (𑀫𑀳𑀸𑀯. 𑁫𑁫); 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀯𑀓𑀪𑀸𑀯𑀁 𑀧𑀓𑀸𑀲𑀦𑀢𑁆𑀣𑀁 𑀢𑀣𑀸𑀕𑀢𑀲𑁆𑀲 𑀧𑀸𑀤𑀧𑀺𑀝𑁆𑀞𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀯𑀢𑁆𑀯𑀸 𑀏𑀓𑀢𑀸𑀮𑀁 𑀤𑁆𑀯𑀺𑀢𑀸𑀮𑀁 𑀢𑀺𑀢𑀸𑀮𑀦𑁆𑀢𑀺 𑀬𑀸𑀯 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀑𑀭𑀼𑀬𑁆𑀳 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀅𑀳𑁄 𑀫𑀳𑀸𑀦𑀼𑀪𑀸𑀯𑁄 𑀩𑀼𑀤𑁆𑀥𑁄, 𑀏𑀯𑀁 𑀣𑀸𑀫𑀕𑀢𑀤𑀺𑀝𑁆𑀞𑀺𑀓𑁄 𑀦𑀸𑀫 𑀅𑀢𑁆𑀢𑀸𑀦𑀁 ‘𑀅𑀭𑀳𑀸’𑀢𑀺 𑀫𑀜𑁆𑀜𑀫𑀸𑀦𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄𑀧𑀺 𑀤𑀺𑀝𑁆𑀞𑀺𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 𑀤𑀫𑀺𑀢𑁄’’𑀢𑀺 𑀲𑀢𑁆𑀣𑀼 𑀕𑀼𑀡𑀓𑀣𑀜𑁆𑀜𑁂𑀯 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀅𑀦𑀘𑁆𑀙𑀭𑀺𑀬𑀁 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑁂𑀦 ¶ 𑀫𑀬𑀸 𑀇𑀫𑀲𑁆𑀲 𑀤𑀫𑀦𑀁, 𑀲𑁆𑀯𑀸𑀳𑀁 𑀧𑀼𑀩𑁆𑀩𑁂 𑀲𑀭𑀸𑀕𑀓𑀸𑀮𑁂𑀧𑀺 𑀦𑀸𑀭𑀤𑁄 𑀦𑀸𑀫 𑀩𑁆𑀭𑀳𑁆𑀫𑀸 ¶ 𑀳𑀼𑀢𑁆𑀯𑀸 𑀇𑀫𑀲𑁆𑀲 𑀤𑀺𑀝𑁆𑀞𑀺𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀇𑀫𑀁 𑀦𑀺𑀩𑁆𑀩𑀺𑀲𑁂𑀯𑀦𑀫𑀓𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑀸𑀬 𑀧𑀭𑀺𑀲𑀸𑀬 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀸𑀬𑀁 𑀅𑀗𑁆𑀕𑀢𑀺 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸. 𑀢𑀲𑁆𑀲 𑀭𑀼𑀘𑀸 𑀦𑀸𑀫 𑀥𑀻𑀢𑀸 𑀅𑀳𑁄𑀲𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀢𑁆𑀣𑀺𑀢𑀧𑀢𑁆𑀣𑀦𑀸 𑀫𑀳𑀸𑀧𑀼𑀜𑁆𑀜𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀸. 𑀲𑁂𑀲𑀸 𑀧𑀦𑀲𑁆𑀲 𑀲𑁄𑀴𑀲𑀲𑀳𑀲𑁆𑀲𑀸 𑀇𑀢𑁆𑀣𑀺𑀬𑁄 𑀯𑀜𑁆𑀛𑀸 𑀅𑀳𑁂𑀲𑀼𑀁. 𑀢𑀲𑁆𑀲 𑀲𑀸 𑀥𑀻𑀢𑀸 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸. 𑀲𑁄 𑀢𑀲𑁆𑀲𑀸 𑀦𑀸𑀦𑀸𑀧𑀼𑀧𑁆𑀨𑀧𑀽𑀭𑁂 𑀧𑀜𑁆𑀘𑀯𑀻𑀲𑀢𑀺𑀧𑀼𑀧𑁆𑀨𑀲𑀫𑀼𑀕𑁆𑀕𑁂 𑀅𑀦𑀕𑁆𑀖𑀸𑀦𑀺 𑀲𑀼𑀔𑀼𑀫𑀸𑀦𑀺 𑀯𑀢𑁆𑀣𑀸𑀦𑀺 𑀘 ‘‘𑀇𑀫𑁂𑀳𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑁄𑀢𑀽’’𑀢𑀺 ¶ 𑀤𑁂𑀯𑀲𑀺𑀓𑀁 𑀧𑀳𑀺𑀡𑀺. 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑁆𑀲 𑀧𑀦 𑀧𑀫𑀸𑀡𑀁 𑀦𑀢𑁆𑀣𑀺. 𑀅𑀦𑁆𑀯𑀟𑁆𑀠𑀫𑀸𑀲𑀁 ‘‘𑀤𑀸𑀦𑀁 𑀤𑁂𑀢𑀽’’𑀢𑀺 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀧𑁂𑀲𑁂𑀲𑀺. 𑀢𑀲𑁆𑀲 𑀔𑁄 𑀧𑀦 𑀯𑀺𑀚𑀬𑁄 𑀘 𑀲𑀼𑀦𑀸𑀫𑁄 𑀘 𑀅𑀮𑀸𑀢𑁄 𑀘𑀸𑀢𑀺 𑀢𑀬𑁄 𑀅𑀫𑀘𑁆𑀘𑀸 𑀅𑀳𑁂𑀲𑀼𑀁. 𑀲𑁄 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀙𑀡𑁂 𑀧𑀯𑀢𑁆𑀢𑀫𑀸𑀦𑁂 𑀤𑁂𑀯𑀦𑀕𑀭𑀁 𑀯𑀺𑀬 𑀦𑀕𑀭𑁂 𑀘 𑀅𑀦𑁆𑀢𑁂𑀧𑀼𑀭𑁂 𑀘 𑀅𑀮𑀗𑁆𑀓𑀢𑁂 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀪𑀼𑀢𑁆𑀢𑀲𑀸𑀬𑀫𑀸𑀲𑁄 𑀯𑀺𑀯𑀝𑀲𑀻𑀳𑀧𑀜𑁆𑀚𑀭𑁂 𑀫𑀳𑀸𑀢𑀮𑁂 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀯𑀺𑀲𑀼𑀤𑁆𑀥𑀁 𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 ‘‘𑀭𑀫𑀡𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀓𑀸𑀬 𑀦𑀼 𑀔𑁄 𑀅𑀚𑁆𑀚 𑀭𑀢𑀺𑀬𑀸 𑀅𑀪𑀺𑀭𑀫𑁂𑀬𑁆𑀬𑀸𑀫𑀸’’𑀢𑀺 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁫𑁩.

‘‘𑀅𑀳𑀼 𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀅𑀗𑁆𑀕𑀢𑀺 𑀦𑀸𑀫 𑀔𑀢𑁆𑀢𑀺𑀬𑁄;

𑀧𑀳𑀽𑀢𑀬𑁄𑀕𑁆𑀕𑁄 𑀥𑀦𑀺𑀫𑀸, 𑀅𑀦𑀦𑁆𑀢𑀩𑀮𑀧𑁄𑀭𑀺𑀲𑁄.

𑁧𑁧𑁫𑁪.

‘‘𑀲𑁄 𑀘 𑀧𑀦𑁆𑀦𑀭𑀲𑀺𑀁 𑀭𑀢𑁆𑀢𑀺𑀁, 𑀧𑀼𑀭𑀺𑀫𑀬𑀸𑀫𑁂 𑀅𑀦𑀸𑀕𑀢𑁂;

𑀘𑀸𑀢𑀼𑀫𑀸𑀲𑀸 𑀓𑁄𑀫𑀼𑀤𑀺𑀬𑀸, 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀬𑀺.

𑁧𑁧𑁫𑁫.

‘‘𑀧𑀡𑁆𑀟𑀺𑀢𑁂 𑀲𑀼𑀢𑀲𑀫𑁆𑀧𑀦𑁆𑀦𑁂, 𑀫𑁆𑀳𑀺𑀢𑀧𑀼𑀩𑁆𑀩𑁂 𑀯𑀺𑀘𑀓𑁆𑀔𑀡𑁂;

𑀯𑀺𑀚𑀬𑀜𑁆𑀘 𑀲𑀼𑀦𑀸𑀫𑀜𑁆𑀘, 𑀲𑁂𑀦𑀸𑀧𑀢𑀺𑀁 𑀅𑀮𑀸𑀢𑀓𑀁.

𑁧𑁧𑁫𑁬.

‘‘𑀢𑀫𑀦𑀼𑀧𑀼𑀘𑁆𑀙𑀺 𑀯𑁂𑀤𑁂𑀳𑁄, 𑀧𑀘𑁆𑀘𑁂𑀓𑀁 𑀩𑁆𑀭𑀽𑀣 𑀲𑀁 𑀭𑀼𑀘𑀺𑀁;

𑀘𑀸𑀢𑀼𑀫𑀸𑀲𑀸 𑀓𑁄𑀫𑀼𑀤𑀚𑁆𑀚, 𑀚𑀼𑀡𑁆𑀳𑀁 𑀩𑁆𑀬𑀧𑀳𑀢𑀁 𑀢𑀫𑀁;

𑀓𑀸𑀬𑀚𑁆𑀚 𑀭𑀢𑀺𑀬𑀸 𑀭𑀢𑁆𑀢𑀺𑀁, 𑀯𑀺𑀳𑀭𑁂𑀫𑀼 𑀇𑀫𑀁 𑀉𑀢𑀼’’𑀦𑁆𑀢𑀺.

𑀢𑀢𑁆𑀣 ¶ ¶ 𑀧𑀳𑀽𑀢𑀬𑁄𑀕𑁆𑀕𑁄𑀢𑀺 𑀩𑀳𑀼𑀓𑁂𑀦 𑀳𑀢𑁆𑀣𑀺𑀬𑁄𑀕𑁆𑀕𑀸𑀤𑀺𑀦𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀦𑁆𑀢𑀩𑀮𑀧𑁄𑀭𑀺𑀲𑁄𑀢𑀺 𑀅𑀦𑀦𑁆𑀢𑀩𑀮𑀓𑀸𑀬𑁄. 𑀅𑀦𑀸𑀕𑀢𑁂𑀢𑀺 𑀧𑀭𑀺𑀬𑁄𑀲𑀸𑀦𑀁 𑀅𑀧𑁆𑀧𑀢𑁆𑀢𑁂, 𑀅𑀦𑀢𑀺𑀓𑁆𑀓𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀫𑀸𑀲𑀸𑀢𑀺 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀫𑀸𑀲𑀸𑀦𑀁 𑀧𑀘𑁆𑀙𑀺𑀫𑀤𑀺𑀯𑀲𑀪𑀽𑀢𑀸𑀬 𑀭𑀢𑁆𑀢𑀺𑀬𑀸. 𑀓𑁄𑀫𑀼𑀤𑀺𑀬𑀸𑀢𑀺 𑀨𑀼𑀮𑁆𑀮𑀓𑀼𑀫𑀼𑀤𑀸𑀬. 𑀫𑁆𑀳𑀺𑀢𑀧𑀼𑀩𑁆𑀩𑁂𑀢𑀺 𑀧𑀞𑀫𑀁 𑀲𑀺𑀢𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀓𑀣𑀦𑀲𑀻𑀮𑁂. 𑀢𑀫𑀦𑀼𑀧𑀼𑀘𑁆𑀙𑀻𑀢𑀺 𑀢𑀁 𑀢𑁂𑀲𑀼 𑀅𑀫𑀘𑁆𑀘𑁂𑀲𑀼 𑀏𑀓𑁂𑀓𑀁 𑀅𑀫𑀘𑁆𑀘𑀁 𑀅𑀦𑀼𑀧𑀼𑀘𑁆𑀙𑀺. 𑀧𑀘𑁆𑀘𑁂𑀓𑀁 𑀩𑁆𑀭𑀽𑀣 𑀲𑀁 𑀭𑀼𑀘𑀺𑀦𑁆𑀢𑀺 𑀲𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀭𑀼𑀘𑀺𑀁 𑀧𑀘𑁆𑀘𑁂𑀓𑀁 𑀫𑀬𑁆𑀳𑀁 𑀓𑀣𑁂𑀣. 𑀓𑁄𑀫𑀼𑀤𑀚𑁆𑀚𑀸𑀢𑀺 𑀓𑁄𑀫𑀼𑀤𑀻 𑀅𑀚𑁆𑀚. 𑀚𑀼𑀡𑁆𑀳𑀦𑁆𑀢𑀺 𑀚𑀼𑀡𑁆𑀳𑀸𑀬 𑀦𑀺𑀲𑁆𑀲𑀬𑀪𑀽𑀢𑀁 𑀘𑀦𑁆𑀤𑀫𑀡𑁆𑀟𑀮𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀩𑁆𑀬𑀧𑀳𑀢𑀁 𑀢𑀫𑀦𑁆𑀢𑀺 𑀢𑁂𑀦 𑀲𑀩𑁆𑀩𑀁 𑀅𑀦𑁆𑀥𑀓𑀸𑀭𑀁 𑀯𑀺𑀳𑀢𑀁. 𑀉𑀢𑀼𑀦𑁆𑀢𑀺 𑀅𑀚𑁆𑀚 𑀭𑀢𑁆𑀢𑀺𑀁 𑀇𑀫𑀁 𑀏𑀯𑀭𑀽𑀧𑀁 𑀉𑀢𑀼𑀁 𑀓𑀸𑀬𑀭𑀢𑀺𑀬𑀸 𑀯𑀺𑀳𑀭𑁂𑀬𑁆𑀬𑀸𑀫𑀸𑀢𑀺.

𑀇𑀢𑀺 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺. 𑀢𑁂𑀦 𑀢𑁂 𑀧𑀼𑀘𑁆𑀙𑀺𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀓𑀣𑀁 𑀓𑀣𑀬𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁫𑁭.

‘‘𑀢𑀢𑁄 𑀲𑁂𑀦𑀸𑀧𑀢𑀺 𑀭𑀜𑁆𑀜𑁄, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

‘𑀳𑀝𑁆𑀞𑀁 𑀬𑁄𑀕𑁆𑀕𑀁 𑀩𑀮𑀁 𑀲𑀩𑁆𑀩𑀁, 𑀲𑁂𑀦𑀁 𑀲𑀦𑁆𑀦𑀸𑀳𑀬𑀸𑀫𑀲𑁂.

𑁧𑁧𑁫𑁮.

‘𑀦𑀺𑀬𑁆𑀬𑀸𑀫 ¶ 𑀤𑁂𑀯 𑀬𑀼𑀤𑁆𑀥𑀸𑀬, 𑀅𑀦𑀦𑁆𑀢𑀩𑀮𑀧𑁄𑀭𑀺𑀲𑀸;

𑀬𑁂 𑀢𑁂 𑀯𑀲𑀁 𑀦 𑀆𑀬𑀦𑁆𑀢𑀺, 𑀯𑀲𑀁 𑀉𑀧𑀦𑀬𑀸𑀫𑀲𑁂;

𑀏𑀲𑀸 𑀫𑀬𑁆𑀳𑀁 𑀲𑀓𑀸 𑀤𑀺𑀝𑁆𑀞𑀺, 𑀅𑀚𑀺𑀢𑀁 𑀑𑀚𑀺𑀦𑀸𑀫𑀲𑁂’.

𑁧𑁧𑁫𑁯.

𑀅𑀮𑀸𑀢𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀲𑀼𑀦𑀸𑀫𑁄 𑀏𑀢𑀤𑀩𑁆𑀭𑀯𑀺;

‘𑀲𑀩𑁆𑀩𑁂 𑀢𑀼𑀬𑁆𑀳𑀁 𑀫𑀳𑀸𑀭𑀸𑀚, 𑀅𑀫𑀺𑀢𑁆𑀢𑀸 𑀯𑀲𑀫𑀸𑀕𑀢𑀸.

𑁧𑁧𑁬𑁦.

‘𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑀸 𑀧𑀘𑁆𑀘𑀢𑁆𑀣𑀸, 𑀦𑀺𑀯𑀸𑀢𑀫𑀦𑀼𑀯𑀢𑁆𑀢𑀭𑁂;

𑀉𑀢𑁆𑀢𑀫𑁄 𑀉𑀲𑁆𑀲𑀯𑁄 𑀅𑀚𑁆𑀚, 𑀦 𑀬𑀼𑀤𑁆𑀥𑀁 𑀫𑀫 𑀭𑀼𑀘𑁆𑀘𑀢𑀺.

𑁧𑁧𑁬𑁧.

‘𑀅𑀦𑁆𑀦𑀧𑀸𑀦𑀜𑁆𑀘 𑀔𑀚𑁆𑀚𑀜𑁆𑀘, 𑀔𑀺𑀧𑁆𑀧𑀁 𑀅𑀪𑀺𑀳𑀭𑀦𑁆𑀢𑀼 𑀢𑁂;

𑀭𑀫𑀲𑁆𑀲𑀼 𑀤𑁂𑀯 𑀓𑀸𑀫𑁂𑀳𑀺, 𑀦𑀘𑁆𑀘𑀕𑀻𑀢𑁂 𑀲𑀼𑀯𑀸𑀤𑀺𑀢𑁂’.

𑁧𑁧𑁬𑁨.

𑀲𑀼𑀦𑀸𑀫𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀯𑀺𑀚𑀬𑁄 𑀏𑀢𑀤𑀩𑁆𑀭𑀯𑀺;

‘𑀲𑀩𑁆𑀩𑁂 𑀓𑀸𑀫𑀸 𑀫𑀳𑀸𑀭𑀸𑀚, 𑀦𑀺𑀘𑁆𑀘𑀁 𑀢𑀯 𑀫𑀼𑀧𑀝𑁆𑀞𑀺𑀢𑀸.

𑁧𑁧𑁬𑁩.

‘𑀦 ¶ ¶ 𑀳𑁂𑀢𑁂 𑀤𑀼𑀮𑁆𑀮𑀪𑀸 𑀤𑁂𑀯, 𑀢𑀯 𑀓𑀸𑀫𑁂𑀳𑀺 𑀫𑁄𑀤𑀺𑀢𑀼𑀁;

𑀲𑀤𑀸𑀧𑀺 𑀓𑀸𑀫𑀸 𑀲𑀼𑀮𑀪𑀸, 𑀦𑁂𑀢𑀁 𑀘𑀺𑀢𑁆𑀢𑀫𑀢𑀁 𑀫𑀫.

𑁧𑁧𑁬𑁪.

‘𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸𑀧𑀺, 𑀉𑀧𑀸𑀲𑁂𑀫𑀼 𑀩𑀳𑀼𑀲𑁆𑀲𑀼𑀢𑀁;

𑀬𑁄 𑀦𑀚𑁆𑀚 𑀯𑀺𑀦𑀬𑁂 𑀓𑀗𑁆𑀔𑀁, 𑀅𑀢𑁆𑀣𑀥𑀫𑁆𑀫𑀯𑀺𑀤𑀽 𑀇𑀲𑁂’.

𑁧𑁧𑁬𑁫.

𑀯𑀺𑀚𑀬𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀸𑀚𑀸 𑀅𑀗𑁆𑀕𑀢𑀺 𑀫𑀩𑁆𑀭𑀯𑀺;

‘𑀬𑀣𑀸 𑀯𑀺𑀚𑀬𑁄 𑀪𑀡𑀢𑀺, 𑀫𑀬𑁆𑀳𑀫𑁆𑀧𑁂𑀢𑀁𑀯 𑀭𑀼𑀘𑁆𑀘𑀢𑀺;

𑁧𑁧𑁬𑁬.

‘𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸𑀧𑀺, 𑀉𑀧𑀸𑀲𑁂𑀫𑀼 𑀩𑀳𑀼𑀲𑁆𑀲𑀼𑀢𑀁;

𑀬𑁄 𑀦𑀚𑁆𑀚 𑀯𑀺𑀦𑀬𑁂 𑀓𑀗𑁆𑀔𑀁, 𑀅𑀢𑁆𑀣𑀥𑀫𑁆𑀫𑀯𑀺𑀤𑀽 𑀇𑀲𑁂.

𑁧𑁧𑁬𑁭.

‘𑀲𑀩𑁆𑀩𑁂𑀯 𑀲𑀦𑁆𑀢𑀸 𑀓𑀭𑁄𑀣 𑀫𑀢𑀺𑀁, 𑀓𑀁 𑀉𑀧𑀸𑀲𑁂𑀫𑀼 𑀧𑀡𑁆𑀟𑀺𑀢𑀁;

𑀬𑁄 𑀦𑀚𑁆𑀚 𑀯𑀺𑀦𑀬𑁂 𑀓𑀗𑁆𑀔𑀁, 𑀅𑀢𑁆𑀣𑀥𑀫𑁆𑀫𑀯𑀺𑀤𑀽 𑀇𑀲𑁂’.

𑁧𑁧𑁬𑁮.

𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

‘𑀅𑀢𑁆𑀣𑀸𑀬𑀁 𑀫𑀺𑀕𑀤𑀸𑀬𑀲𑁆𑀫𑀺𑀁, 𑀅𑀘𑁂𑀮𑁄 𑀥𑀻𑀭𑀲𑀫𑁆𑀫𑀢𑁄.

𑁧𑁧𑁬𑁯.

‘𑀕𑀼𑀡𑁄 𑀓𑀲𑁆𑀲𑀧𑀕𑁄𑀢𑁆𑀢𑀸𑀬𑀁, 𑀲𑀼𑀢𑁄 𑀘𑀺𑀢𑁆𑀭𑀓𑀣𑀻 𑀕𑀡𑀻;

𑀢𑀁 𑀤𑁂𑀯 𑀧𑀬𑀺𑀭𑀼𑀧𑀸𑀲𑁂𑀫𑀼, 𑀲𑁄 𑀦𑁄 𑀓𑀗𑁆𑀔𑀁 𑀯𑀺𑀦𑁂𑀲𑁆𑀲𑀢𑀺’.

𑁧𑁧𑁭𑁦.

‘‘𑀅𑀮𑀸𑀢𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀸𑀚𑀸 𑀘𑁄𑀤𑁂𑀲𑀺 𑀲𑀸𑀭𑀣𑀺𑀁;

𑀫𑀺𑀕𑀤𑀸𑀬𑀁 𑀕𑀫𑀺𑀲𑁆𑀲𑀸𑀫, 𑀬𑀼𑀢𑁆𑀢𑀁 𑀬𑀸𑀦𑀁 𑀇𑀥𑀸 𑀦𑀬𑀸’’𑀢𑀺.

𑀢𑀢𑁆𑀣 𑀳𑀝𑁆𑀞𑀦𑁆𑀢𑀺 𑀢𑀼𑀝𑁆𑀞𑀧𑀳𑀝𑁆𑀞𑀁. 𑀑𑀚𑀺𑀦𑀸𑀫𑀲𑁂𑀢𑀺 𑀬𑀁 𑀦𑁄 𑀅𑀚𑀺𑀢𑀁, 𑀢𑀁 𑀚𑀺𑀦𑀸𑀫. 𑀏𑀲𑁄 𑀫𑀫 𑀅𑀚𑁆𑀛𑀸𑀲𑀬𑁄𑀢𑀺. 𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀦𑁂𑀯 𑀧𑀝𑀺𑀓𑁆𑀓𑁄𑀲𑀺, 𑀦𑀸𑀪𑀺𑀦𑀦𑁆𑀤𑀺. 𑀏𑀢𑀤𑀩𑁆𑀭𑀯𑀻𑀢𑀺 𑀭𑀸𑀚𑀸𑀦𑀁 𑀅𑀮𑀸𑀢𑀲𑁆𑀲 𑀯𑀘𑀦𑀁 𑀅𑀦𑀪𑀺𑀦𑀦𑁆𑀤𑀦𑁆𑀢𑀁 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀬𑀼𑀤𑁆𑀥𑀚𑁆𑀛𑀸𑀲𑀬𑁄, 𑀅𑀳𑀫𑀲𑁆𑀲 𑀘𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀓𑀸𑀫𑀕𑀼𑀡𑀸𑀪𑀺𑀭𑀢𑀺𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀲𑀩𑁆𑀩𑁂 𑀢𑀼𑀬𑁆𑀳’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀩𑁆𑀭𑀯𑀺.

𑀯𑀺𑀚𑀬𑁄 ¶ 𑀏𑀢𑀤𑀩𑁆𑀭𑀯𑀻𑀢𑀺 𑀭𑀸𑀚𑀸 𑀲𑀼𑀦𑀸𑀫𑀲𑁆𑀲𑀧𑀺 𑀯𑀘𑀦𑀁 𑀦𑀸𑀪𑀺𑀦𑀦𑁆𑀤𑀺, 𑀦 𑀧𑀝𑀺𑀓𑁆𑀓𑁄𑀲𑀺. 𑀢𑀢𑁄 𑀯𑀺𑀚𑀬𑁄 ‘‘𑀅𑀬𑀁 𑀭𑀸𑀚𑀸 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻𑀬𑁂𑀯 𑀞𑀺𑀢𑁄, 𑀧𑀡𑁆𑀟𑀺𑀢𑀸 𑀦𑀸𑀫 𑀥𑀫𑁆𑀫𑀲𑁆𑀲𑀯𑀦𑀲𑁄𑀡𑁆𑀟𑀸 𑀳𑁄𑀦𑁆𑀢𑀺, 𑀥𑀫𑁆𑀫𑀲𑁆𑀲𑀯𑀦𑀫𑀲𑁆𑀲 𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀲𑀩𑁆𑀩𑁂 𑀓𑀸𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀩𑁆𑀭𑀯𑀺. 𑀢𑀢𑁆𑀣 𑀢𑀯 ¶ 𑀫𑀼𑀧𑀝𑁆𑀞𑀺𑀢𑀸𑀢𑀺 𑀢𑀯 𑀉𑀧𑀝𑁆𑀞𑀺𑀢𑀸. 𑀫𑁄𑀤𑀺𑀢𑀼𑀦𑁆𑀢𑀺 ¶ 𑀢𑀯 𑀓𑀸𑀫𑁂𑀳𑀺 𑀫𑁄𑀤𑀺𑀢𑀼𑀁 𑀅𑀪𑀺𑀭𑀫𑀺𑀢𑀼𑀁 𑀇𑀘𑁆𑀙𑀸𑀬 𑀲𑀢𑀺 𑀦 𑀳𑀺 𑀏𑀢𑁂 𑀓𑀸𑀫𑀸 𑀤𑀼𑀮𑁆𑀮𑀪𑀸. 𑀦𑁂𑀢𑀁 𑀘𑀺𑀢𑁆𑀢𑀫𑀢𑀁 𑀫𑀫𑀸𑀢𑀺 𑀏𑀢𑀁 𑀢𑀯 𑀓𑀸𑀫𑁂𑀳𑀺 𑀅𑀪𑀺𑀭𑀫𑀡𑀁 𑀫𑀫 𑀘𑀺𑀢𑁆𑀢𑀫𑀢𑀁 𑀦 𑀳𑁄𑀢𑀺, 𑀦 𑀫𑁂 𑀏𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑁄 𑀦𑀚𑁆𑀚𑀸𑀢𑀺 𑀬𑁄 𑀦𑁄 𑀅𑀚𑁆𑀚. 𑀅𑀢𑁆𑀣𑀥𑀫𑁆𑀫𑀯𑀺𑀤𑀽𑀢𑀺 𑀧𑀸𑀴𑀺𑀅𑀢𑁆𑀣𑀜𑁆𑀘𑁂𑀯 𑀧𑀸𑀴𑀺𑀥𑀫𑁆𑀫𑀜𑁆𑀘 𑀚𑀸𑀦𑀦𑁆𑀢𑁄. 𑀇𑀲𑁂𑀢𑀺 𑀇𑀲𑀺 𑀏𑀲𑀺𑀢𑀕𑀼𑀡𑁄.

𑀅𑀗𑁆𑀕𑀢𑀺 𑀫𑀩𑁆𑀭𑀯𑀻𑀢𑀺 𑀅𑀗𑁆𑀕𑀢𑀺 𑀅𑀩𑁆𑀭𑀯𑀺. 𑀫𑀬𑁆𑀳𑀫𑁆𑀧𑁂𑀢𑀁𑀯 𑀭𑀼𑀘𑁆𑀘𑀢𑀻𑀢𑀺 𑀫𑀬𑁆𑀳𑀫𑁆𑀧𑀺 𑀏𑀢𑀜𑁆𑀜𑁂𑀯 𑀭𑀼𑀘𑁆𑀘𑀢𑀺. 𑀲𑀩𑁆𑀩𑁂𑀯 𑀲𑀦𑁆𑀢𑀸𑀢𑀺 𑀲𑀩𑁆𑀩𑁂𑀯 𑀢𑀼𑀫𑁆𑀳𑁂 𑀇𑀥 𑀯𑀺𑀚𑁆𑀚𑀫𑀸𑀦𑀸 𑀫𑀢𑀺𑀁 𑀓𑀭𑁄𑀣 𑀘𑀺𑀦𑁆𑀢𑁂𑀣. 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀻𑀢𑀺 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀅𑀮𑀸𑀢𑁄 ‘‘𑀅𑀬𑀁 𑀫𑀫 𑀓𑀼𑀮𑀽𑀧𑀓𑁄 𑀕𑀼𑀡𑁄 𑀦𑀸𑀫 𑀆𑀚𑀻𑀯𑀓𑁄 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀢𑀺, 𑀢𑀁 𑀧𑀲𑀁𑀲𑀺𑀢𑁆𑀯𑀸 𑀭𑀸𑀚𑀓𑀼𑀮𑀽𑀧𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀅𑀢𑁆𑀣𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀩𑁆𑀭𑀯𑀺. 𑀢𑀢𑁆𑀣 𑀥𑀻𑀭𑀲𑀫𑁆𑀫𑀢𑁄𑀢𑀺 𑀧𑀡𑁆𑀟𑀺𑀢𑁄𑀢𑀺 𑀲𑀫𑁆𑀫𑀢𑁄. 𑀓𑀲𑁆𑀲𑀧𑀕𑁄𑀢𑁆𑀢𑀸𑀬𑀦𑁆𑀢𑀺 𑀓𑀲𑁆𑀲𑀧𑀕𑁄𑀢𑁆𑀢𑁄 𑀅𑀬𑀁. 𑀲𑀼𑀢𑁄𑀢𑀺 𑀩𑀳𑀼𑀲𑁆𑀲𑀼𑀢𑁄. 𑀕𑀡𑀻𑀢𑀺 𑀕𑀡𑀲𑀢𑁆𑀣𑀸. 𑀘𑁄𑀤𑁂𑀲𑀻𑀢𑀺 𑀆𑀡𑀸𑀧𑁂𑀲𑀺.

𑀭𑀜𑁆𑀜𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀸𑀭𑀣𑀺𑀦𑁄 𑀢𑀣𑀸 𑀓𑀭𑀺𑀁𑀲𑀼. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁭𑁧.

‘‘𑀢𑀲𑁆𑀲 𑀬𑀸𑀦𑀁 𑀅𑀬𑁄𑀚𑁂𑀲𑀼𑀁, 𑀤𑀦𑁆𑀢𑀁 𑀭𑀽𑀧𑀺𑀬𑀧𑀓𑁆𑀔𑀭𑀁;

𑀲𑀼𑀓𑁆𑀓𑀫𑀝𑁆𑀞𑀧𑀭𑀺𑀯𑀸𑀭𑀁, 𑀧𑀡𑁆𑀟𑀭𑀁 𑀤𑁄𑀲𑀺𑀦𑀸 𑀫𑀼𑀔𑀁.

𑁧𑁧𑁭𑁨.

‘‘𑀢𑀢𑁆𑀭𑀸𑀲𑀼𑀁 𑀓𑀼𑀫𑀼𑀤𑀸𑀬𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑀸 𑀳𑀬𑀸;

𑀅𑀦𑀺𑀮𑀽𑀧𑀫𑀲𑀫𑀼𑀧𑁆𑀧𑀸𑀢𑀸, 𑀲𑀼𑀤𑀦𑁆𑀢𑀸 𑀲𑁄𑀡𑁆𑀡𑀫𑀸𑀮𑀺𑀦𑁄.

𑁧𑁧𑁭𑁩.

‘‘𑀲𑁂𑀢𑀘𑁆𑀙𑀢𑁆𑀢𑀁 𑀲𑁂𑀢𑀭𑀣𑁄, 𑀲𑁂𑀢𑀲𑁆𑀲𑀸 𑀲𑁂𑀢𑀩𑀻𑀚𑀦𑀻;

𑀯𑁂𑀤𑁂𑀳𑁄 𑀲𑀳𑀫𑀘𑁆𑀘𑁂𑀳𑀺, 𑀦𑀺𑀬𑁆𑀬𑀁 𑀘𑀦𑁆𑀤𑁄𑀯 𑀲𑁄𑀪𑀢𑀺.

𑁧𑁧𑁭𑁪.

‘‘𑀢𑀫𑀦𑀼𑀬𑀸𑀬𑀺𑀁𑀲𑀼 𑀩𑀳𑀯𑁄, 𑀇𑀦𑁆𑀤𑀺𑀔𑀕𑁆𑀕𑀥𑀭𑀸 𑀩𑀮𑀻;

𑀅𑀲𑁆𑀲𑀧𑀺𑀝𑁆𑀞𑀺𑀕𑀢𑀸 𑀯𑀻𑀭𑀸, 𑀦𑀭𑀸 𑀦𑀭𑀯𑀭𑀸𑀥𑀺𑀧𑀁.

𑁧𑁧𑁭𑁫.

‘‘𑀲𑁄 ¶ 𑀫𑀼𑀳𑀼𑀢𑁆𑀢𑀁𑀯 𑀬𑀸𑀬𑀺𑀢𑁆𑀯𑀸, 𑀬𑀸𑀦𑀸 𑀑𑀭𑀼𑀬𑁆𑀳 𑀔𑀢𑁆𑀢𑀺𑀬𑁄;

𑀯𑁂𑀤𑁂𑀳𑁄 𑀲𑀳𑀫𑀘𑁆𑀘𑁂𑀳𑀺, 𑀧𑀢𑁆𑀢𑀻 𑀕𑀼𑀡𑀫𑀼𑀧𑀸𑀕𑀫𑀺.

𑁧𑁧𑁭𑁬.

‘‘𑀬𑁂𑀧𑀺 𑀢𑀢𑁆𑀣 𑀢𑀤𑀸 𑀆𑀲𑀼𑀁, 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑀸 𑀲𑀫𑀸𑀕𑀢𑀸;

𑀦 𑀢𑁂 𑀅𑀧𑀦𑀬𑀻 𑀭𑀸𑀚𑀸, 𑀅𑀓𑀢𑀁 𑀪𑀽𑀫𑀺𑀫𑀸𑀕𑀢𑁂’’𑀢𑀺.

𑀢𑀢𑁆𑀣 ¶ 𑀢𑀲𑁆𑀲 𑀬𑀸𑀦𑀦𑁆𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀭𑀣𑀁 𑀬𑁄𑀚𑀬𑀺𑀁𑀲𑀼. 𑀤𑀦𑁆𑀢𑀦𑁆𑀢𑀺 𑀤𑀦𑁆𑀢𑀫𑀬𑀁. 𑀭𑀽𑀧𑀺𑀬𑀧𑀓𑁆𑀔𑀭𑀦𑁆𑀢𑀺 𑀭𑀚𑀢𑀫𑀬𑀉𑀧𑀓𑁆𑀔𑀭𑀁. 𑀲𑀼𑀓𑁆𑀓𑀫𑀝𑁆𑀞𑀧𑀭𑀺𑀯𑀸𑀭𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀸𑀨𑀭𑀼𑀲𑀧𑀭𑀺𑀯𑀸𑀭𑀁. 𑀤𑁄𑀲𑀺𑀦𑀸 𑀫𑀼𑀔𑀦𑁆𑀢𑀺 𑀯𑀺𑀕𑀢𑀤𑁄𑀲𑀸𑀬 𑀭𑀢𑁆𑀢𑀺𑀬𑀸 𑀫𑀼𑀔𑀁 𑀯𑀺𑀬, 𑀘𑀦𑁆𑀤𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀲𑀼𑀦𑁆𑀢𑀺 𑀢𑀢𑁆𑀭 𑀅𑀳𑁂𑀲𑀼𑀁. 𑀓𑀼𑀫𑀼𑀤𑀸𑀢𑀺 𑀓𑀼𑀫𑀼𑀤𑀯𑀡𑁆𑀡𑀸. 𑀲𑀺𑀦𑁆𑀥𑀯𑀸𑀢𑀺 𑀲𑀺𑀦𑁆𑀥𑀯𑀚𑀸𑀢𑀺𑀓𑀸. 𑀅𑀦𑀺𑀮𑀽𑀧𑀫𑀲𑀫𑀼𑀧𑁆𑀧𑀸𑀢𑀸𑀢𑀺 𑀯𑀸𑀢𑀲𑀤𑀺𑀲𑀯𑁂𑀕𑀸. 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀭𑀣𑁂 𑀲𑀫𑀼𑀲𑁆𑀲𑀸𑀧𑀺𑀢𑀁 𑀙𑀢𑁆𑀢𑀫𑁆𑀧𑀺 𑀲𑁂𑀢𑀁 𑀅𑀳𑁄𑀲𑀺. 𑀲𑁂𑀢𑀭𑀣𑁄𑀢𑀺 𑀲𑁄𑀧𑀺 𑀭𑀣𑁄 𑀲𑁂𑀢𑁄𑀬𑁂𑀯. 𑀲𑁂𑀢𑀲𑁆𑀲𑀸𑀢𑀺 𑀅𑀲𑁆𑀲𑀸𑀧𑀺 𑀲𑁂𑀢𑀸. 𑀲𑁂𑀢𑀩𑀻𑀚𑀦𑀻𑀢𑀺 𑀩𑀻𑀚𑀦𑀻𑀧𑀺 𑀲𑁂𑀢𑀸. 𑀦𑀺𑀬𑁆𑀬𑀦𑁆𑀢𑀺 𑀢𑁂𑀦 𑀭𑀣𑁂𑀦 𑀦𑀺𑀕𑁆𑀕𑀘𑁆𑀙𑀦𑁆𑀢𑁄 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀯𑁂𑀤𑁂𑀳𑀭𑀸𑀚𑀸 𑀘𑀦𑁆𑀤𑁄 𑀯𑀺𑀬 𑀲𑁄𑀪𑀢𑀺.

𑀦𑀭𑀯𑀭𑀸𑀥𑀺𑀧𑀦𑁆𑀢𑀺 𑀦𑀭𑀯𑀭𑀸𑀦𑀁 𑀅𑀥𑀺𑀧𑀢𑀺𑀁 𑀭𑀸𑀚𑀸𑀥𑀺𑀭𑀸𑀚𑀸𑀦𑀁. 𑀲𑁄 𑀫𑀼𑀳𑀼𑀢𑁆𑀢𑀁𑀯 𑀬𑀸𑀬𑀺𑀢𑁆𑀯𑀸𑀢𑀺 𑀲𑁄 𑀭𑀸𑀚𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸. 𑀧𑀢𑁆𑀢𑀻 𑀕𑀼𑀡𑀫𑀼𑀧𑀸𑀕𑀫𑀻𑀢𑀺 𑀧𑀢𑁆𑀢𑀺𑀓𑁄𑀯 𑀕𑀼𑀡𑀁 𑀆𑀚𑀻𑀯𑀓𑀁 𑀉𑀧𑀸𑀕𑀫𑀺. 𑀬𑁂𑀧𑀺 𑀢𑀢𑁆𑀣 𑀢𑀤𑀸 𑀆𑀲𑀼𑀦𑁆𑀢𑀺 𑀬𑁂𑀧𑀺 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀢𑀤𑀸 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀚𑀻𑀯𑀓𑀁 𑀧𑀬𑀺𑀭𑀼𑀧𑀸𑀲𑀫𑀸𑀦𑀸 𑀦𑀺𑀲𑀺𑀦𑁆𑀦𑀸 𑀅𑀳𑁂𑀲𑀼𑀁. 𑀦 𑀢𑁂 𑀅𑀧𑀦𑀬𑀻𑀢𑀺 𑀅𑀫𑁆𑀳𑀸𑀓𑀫𑁂𑀯 𑀤𑁄𑀲𑁄, 𑀬𑁂 𑀫𑀬𑀁 𑀧𑀘𑁆𑀙𑀸 ¶ 𑀅𑀕𑀫𑀺𑀫𑁆𑀳𑀸, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸𑀢𑀺 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀘 𑀇𑀩𑁆𑀪𑁂 𑀘 𑀭𑀜𑁆𑀜𑁄𑀬𑁂𑀯 𑀅𑀢𑁆𑀣𑀸𑀬 𑀅𑀓𑀢𑀁 𑀅𑀓𑀢𑁄𑀓𑀸𑀲𑀁 𑀪𑀽𑀫𑀺𑀁 𑀲𑀫𑀸𑀕𑀢𑁂 𑀦 𑀉𑀲𑁆𑀲𑀸𑀭𑀡𑀁 𑀓𑀸𑀭𑁂𑀢𑁆𑀯𑀸 𑀅𑀧𑀦𑀬𑀻𑀢𑀺.

𑀢𑀸𑀬 𑀧𑀦 𑀑𑀫𑀺𑀲𑁆𑀲𑀓𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁭𑁭.

‘‘𑀢𑀢𑁄 𑀲𑁄 𑀫𑀼𑀤𑀼𑀓𑀸 𑀪𑀺𑀲𑀺𑀬𑀸, 𑀫𑀼𑀤𑀼𑀘𑀺𑀢𑁆𑀢𑀓𑀲𑀦𑁆𑀣𑀢𑁂;

𑀫𑀼𑀤𑀼𑀧𑀘𑁆𑀘𑀢𑁆𑀣𑀢𑁂 𑀭𑀸𑀚𑀸, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺.

𑁧𑁧𑁭𑁮.

‘‘𑀦𑀺𑀲𑀚𑁆𑀚 𑀭𑀸𑀚𑀸 𑀲𑀫𑁆𑀫𑁄𑀤𑀺, 𑀓𑀣𑀁 𑀲𑀸𑀭𑀡𑀺𑀬𑀁 𑀢𑀢𑁄;

‘𑀓𑀘𑁆𑀘𑀺 𑀬𑀸𑀧𑀦𑀺𑀬𑀁 𑀪𑀦𑁆𑀢𑁂, 𑀯𑀸𑀢𑀸𑀦𑀫𑀯𑀺𑀬𑀕𑁆𑀕𑀢𑀸.

𑁧𑁧𑁭𑁯.

‘𑀓𑀘𑁆𑀘𑀺 ¶ 𑀅𑀓𑀲𑀺𑀭𑀸 𑀯𑀼𑀢𑁆𑀢𑀺, 𑀮𑀪𑀲𑀺 𑀧𑀺𑀡𑁆𑀟𑀬𑀸𑀧𑀦𑀁;

𑀅𑀧𑁆𑀧𑀸𑀩𑀸𑀥𑁄 𑀘𑀲𑀺 𑀓𑀘𑁆𑀘𑀺, 𑀘𑀓𑁆𑀔𑀼𑀁 𑀦 𑀧𑀭𑀺𑀳𑀸𑀬𑀢𑀺’.

𑁧𑁧𑁮𑁦.

𑀢𑀁 𑀕𑀼𑀡𑁄 𑀧𑀝𑀺𑀲𑀫𑁆𑀫𑁄𑀤𑀺, 𑀯𑁂𑀤𑁂𑀳𑀁 𑀯𑀺𑀦𑀬𑁂 𑀭𑀢𑀁;

‘𑀬𑀸𑀧𑀦𑀻𑀬𑀁 𑀫𑀳𑀸𑀭𑀸𑀚, 𑀲𑀩𑁆𑀩𑀫𑁂𑀢𑀁 𑀢𑀤𑀽𑀪𑀬𑀁.

𑁧𑁧𑁮𑁧.

‘𑀓𑀘𑁆𑀘𑀺 ¶ 𑀢𑀼𑀬𑁆𑀳𑀫𑁆𑀧𑀺 𑀯𑁂𑀤𑁂𑀳, 𑀧𑀘𑁆𑀘𑀦𑁆𑀢𑀸 𑀦 𑀩𑀮𑀻𑀬𑀭𑁂;

𑀓𑀘𑁆𑀘𑀺 𑀅𑀭𑁄𑀕𑀁 𑀬𑁄𑀕𑁆𑀕𑀁 𑀢𑁂, 𑀓𑀘𑁆𑀘𑀺 𑀯𑀳𑀢𑀺 𑀯𑀸𑀳𑀦𑀁;

𑀓𑀘𑁆𑀘𑀺 𑀢𑁂 𑀩𑁆𑀬𑀸𑀥𑀬𑁄 𑀦𑀢𑁆𑀣𑀺, 𑀲𑀭𑀻𑀭𑀲𑁆𑀲𑀼𑀧𑀢𑀸𑀧𑀺𑀬𑀸’.

𑁧𑁧𑁮𑁨.

‘‘𑀧𑀝𑀺𑀲𑀫𑁆𑀫𑁄𑀤𑀺𑀢𑁄 𑀭𑀸𑀚𑀸, 𑀢𑀢𑁄 𑀧𑀼𑀘𑁆𑀙𑀺 𑀅𑀦𑀦𑁆𑀢𑀭𑀸;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀜𑀸𑀬𑀜𑁆𑀘, 𑀥𑀫𑁆𑀫𑀓𑀸𑀫𑁄 𑀭𑀣𑁂𑀲𑀪𑁄.

𑁧𑁧𑁮𑁩.

‘𑀓𑀣𑀁 𑀥𑀫𑁆𑀫𑀁 𑀘𑀭𑁂 𑀫𑀘𑁆𑀘𑁄, 𑀫𑀸𑀢𑀸𑀧𑀺𑀢𑀽𑀲𑀼 𑀓𑀲𑁆𑀲𑀧;

𑀓𑀣𑀁 𑀘𑀭𑁂 𑀆𑀘𑀭𑀺𑀬𑁂, 𑀧𑀼𑀢𑁆𑀢𑀤𑀸𑀭𑁂 𑀓𑀣𑀁 𑀘𑀭𑁂.

𑁧𑁧𑁮𑁪.

‘𑀓𑀣𑀁 𑀘𑀭𑁂𑀬𑁆𑀬 𑀯𑀼𑀟𑁆𑀠𑁂𑀲𑀼, 𑀓𑀣𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂;

𑀓𑀣𑀜𑁆𑀘 𑀩𑀮𑀓𑀸𑀬𑀲𑁆𑀫𑀺𑀁, 𑀓𑀣𑀁 𑀚𑀦𑀧𑀤𑁂 𑀘𑀭𑁂.

𑁧𑁧𑁮𑁫.

‘𑀓𑀣𑀁 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀫𑀘𑁆𑀘𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁;

𑀓𑀣𑀜𑁆𑀘𑁂𑀓𑁂 𑀅𑀥𑀫𑁆𑀫𑀝𑁆𑀞𑀸, 𑀧𑀢𑀦𑁆𑀢𑀺 𑀦𑀺𑀭𑀬𑀁 𑀅𑀣𑁄’’’𑀢𑀺.

𑀢𑀢𑁆𑀣 𑀫𑀼𑀤𑀼𑀓𑀸 𑀪𑀺𑀲𑀺𑀬𑀸𑀢𑀺 𑀫𑀼𑀤𑀼𑀓𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀪𑀺𑀲𑀺𑀬𑀸. 𑀫𑀼𑀤𑀼𑀘𑀺𑀢𑁆𑀢𑀓𑀲𑀦𑁆𑀣𑀢𑁂𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑁂 𑀘𑀺𑀢𑁆𑀢𑀢𑁆𑀣𑀭𑀡𑁂. 𑀫𑀼𑀤𑀼𑀧𑀘𑁆𑀘𑀢𑁆𑀣𑀢𑁂𑀢𑀺 𑀫𑀼𑀤𑀼𑀦𑀸 𑀧𑀘𑁆𑀘𑀢𑁆𑀣𑀭𑀡𑁂𑀦 𑀧𑀘𑁆𑀘𑀢𑁆𑀣𑀢𑁂. 𑀲𑀫𑁆𑀫𑁄𑀤𑀻𑀢𑀺 𑀆𑀚𑀻𑀯𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀲𑀺. 𑀢𑀢𑁄𑀢𑀺 𑀢𑀢𑁄 𑀦𑀺𑀲𑀚𑁆𑀚𑀦𑀢𑁄 𑀅𑀦𑀦𑁆𑀢𑀭𑀫𑁂𑀯 𑀲𑀸𑀭𑀡𑀻𑀬𑀁 𑀓𑀣𑀁 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀘𑁆𑀘𑀺 𑀬𑀸𑀧𑀦𑀺𑀬𑀦𑁆𑀢𑀺 𑀓𑀘𑁆𑀘𑀺 𑀢𑁂, 𑀪𑀦𑁆𑀢𑁂, 𑀲𑀭𑀻𑀭𑀁 𑀧𑀘𑁆𑀘𑀬𑁂𑀳𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸. 𑀯𑀸𑀢𑀸𑀦𑀫𑀯𑀺𑀬𑀕𑁆𑀕𑀢𑀸𑀢𑀺 𑀓𑀘𑁆𑀘𑀺 𑀢𑁂 𑀲𑀭𑀻𑀭𑁂 𑀥𑀸𑀢𑀼𑀬𑁄 𑀲𑀫𑀧𑁆𑀧𑀯𑀢𑁆𑀢𑀸, 𑀯𑀸𑀢𑀸𑀦𑀁 𑀩𑁆𑀬𑀕𑁆𑀕𑀢𑀸 𑀦𑀢𑁆𑀣𑀺, 𑀢𑀢𑁆𑀣 𑀢𑀢𑁆𑀣 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀯𑀸𑀢𑀸 𑀦 𑀩𑀸𑀥𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀓𑀲𑀺𑀭𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀸. 𑀯𑀼𑀢𑁆𑀢𑀻𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺. 𑀅𑀧𑁆𑀧𑀸𑀩𑀸𑀥𑁄𑀢𑀺 𑀇𑀭𑀺𑀬𑀸𑀧𑀣𑀪𑀜𑁆𑀚𑀓𑁂𑀦𑀸𑀩𑀸𑀥𑁂𑀦 𑀯𑀺𑀭𑀳𑀺𑀢𑁄 ¶ . 𑀘𑀓𑁆𑀔𑀼𑀦𑁆𑀢𑀺 𑀓𑀘𑁆𑀘𑀺 𑀢𑁂 𑀘𑀓𑁆𑀔𑀼𑀆𑀤𑀻𑀦𑀺 ¶ 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀧𑀝𑀺𑀲𑀫𑁆𑀫𑁄𑀤𑀻𑀢𑀺 𑀲𑀫𑁆𑀫𑁄𑀤𑀦𑀻𑀬𑀓𑀣𑀸𑀬 𑀧𑀝𑀺𑀓𑀣𑁂𑀲𑀺. 𑀢𑀢𑁆𑀣 𑀲𑀩𑁆𑀩𑀫𑁂𑀢𑀦𑁆𑀢𑀺 𑀬𑀁 𑀢𑀬𑀸 𑀯𑀼𑀢𑁆𑀢𑀁 𑀯𑀸𑀢𑀸𑀦𑀫𑀯𑀺𑀬𑀕𑁆𑀕𑀢𑀸𑀤𑀺, 𑀢𑀁 𑀲𑀩𑁆𑀩𑀁 𑀢𑀣𑁂𑀯. 𑀢𑀤𑀼𑀪𑀬𑀦𑁆𑀢𑀺 𑀬𑀫𑁆𑀧𑀺 𑀢𑀬𑀸 ‘‘𑀅𑀧𑁆𑀧𑀸𑀩𑀸𑀥𑁄 𑀘𑀲𑀺 𑀓𑀘𑁆𑀘𑀺, 𑀘𑀓𑁆𑀔𑀼𑀁 𑀦 𑀧𑀭𑀺𑀳𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀉𑀪𑀬𑀁 𑀢𑀣𑁂𑀯.

𑀦 𑀩𑀮𑀻𑀬𑀭𑁂𑀢𑀺 𑀦𑀸𑀪𑀺𑀪𑀯𑀦𑁆𑀢𑀺 𑀦 𑀓𑀼𑀧𑁆𑀧𑀦𑁆𑀢𑀺. 𑀅𑀦𑀦𑁆𑀢𑀭𑀸𑀢𑀺 𑀧𑀝𑀺𑀲𑀦𑁆𑀣𑀸𑀭𑀢𑁄 𑀅𑀦𑀦𑁆𑀢𑀭𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀢𑁆𑀣 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀜𑀸𑀬𑀜𑁆𑀘𑀸𑀢𑀺 𑀧𑀸𑀴𑀺𑀅𑀢𑁆𑀣𑀜𑁆𑀘 𑀧𑀸𑀴𑀺𑀜𑁆𑀘 𑀓𑀸𑀭𑀡𑀬𑀼𑀢𑁆𑀢𑀺𑀜𑁆𑀘 ¶ . 𑀲𑁄 𑀳𑀺 ‘‘𑀓𑀣𑀁 𑀥𑀫𑁆𑀫𑀁 𑀘𑀭𑁂’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀫𑀸𑀢𑀸𑀧𑀺𑀢𑀼𑀆𑀤𑀻𑀲𑀼 𑀧𑀝𑀺𑀧𑀢𑁆𑀢𑀺𑀤𑀻𑀧𑀓𑀁 𑀧𑀸𑀴𑀺𑀜𑁆𑀘 𑀧𑀸𑀴𑀺𑀅𑀢𑁆𑀣𑀜𑁆𑀘 𑀓𑀸𑀭𑀡𑀬𑀼𑀢𑁆𑀢𑀺𑀜𑁆𑀘 𑀫𑁂 𑀓𑀣𑁂𑀣𑀸𑀢𑀺 𑀇𑀫𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀜𑀸𑀬𑀜𑁆𑀘 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀓𑀣𑀜𑁆𑀘𑁂𑀓𑁂 𑀅𑀥𑀫𑁆𑀫𑀝𑁆𑀞𑀸𑀢𑀺 𑀏𑀓𑀘𑁆𑀘𑁂 𑀅𑀥𑀫𑁆𑀫𑁂 𑀞𑀺𑀢𑀸 𑀓𑀣𑀁 𑀦𑀺𑀭𑀬𑀜𑁆𑀘𑁂𑀯 𑀅𑀣𑁄 𑀲𑁂𑀲𑀅𑀧𑀸𑀬𑁂 𑀘 𑀧𑀢𑀦𑁆𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀲𑀼 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀅𑀮𑀸𑀪𑁂𑀦 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀼𑀘𑁆𑀙𑀺𑀢𑀩𑁆𑀩𑀓𑀁 𑀫𑀳𑁂𑀲𑀓𑁆𑀔𑀧𑀜𑁆𑀳𑀁 𑀭𑀸𑀚𑀸 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀁 𑀦𑀕𑁆𑀕𑀪𑁄𑀕𑁆𑀕𑀁 𑀦𑀺𑀲𑁆𑀲𑀺𑀭𑀺𑀓𑀁 𑀅𑀦𑁆𑀥𑀩𑀸𑀮𑀁 𑀆𑀚𑀻𑀯𑀓𑀁 𑀧𑀼𑀘𑁆𑀙𑀺.

𑀲𑁄𑀧𑀺 𑀏𑀯𑀁 𑀧𑀼𑀘𑁆𑀙𑀺𑀢𑁄 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀩𑁆𑀬𑀸𑀓𑀭𑀡𑀁 𑀅𑀤𑀺𑀲𑁆𑀯𑀸 𑀘𑀭𑀦𑁆𑀢𑀁 𑀕𑁄𑀡𑀁 𑀤𑀡𑁆𑀟𑁂𑀦 𑀧𑀳𑀭𑀦𑁆𑀢𑁄 𑀯𑀺𑀬 𑀪𑀢𑁆𑀢𑀧𑀸𑀢𑀺𑀬𑀁 𑀓𑀘𑀯𑀭𑀁 𑀔𑀺𑀧𑀦𑁆𑀢𑁄 𑀯𑀺𑀬 𑀘 ‘‘𑀲𑀼𑀡, 𑀫𑀳𑀸𑀭𑀸𑀚𑀸’’𑀢𑀺 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑁆𑀞𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁧𑁮𑁬.

‘‘𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀓𑀲𑁆𑀲𑀧𑁄 𑀏𑀢𑀤𑀩𑁆𑀭𑀯𑀺;

‘𑀲𑀼𑀡𑁄𑀳𑀺 𑀫𑁂 𑀫𑀳𑀸𑀭𑀸𑀚, 𑀲𑀘𑁆𑀘𑀁 𑀅𑀯𑀺𑀢𑀣𑀁 𑀧𑀤𑀁.

𑁧𑁧𑁮𑁭.

‘𑀦𑀢𑁆𑀣𑀺 𑀥𑀫𑁆𑀫𑀘𑀭𑀺𑀢𑀲𑁆𑀲, 𑀨𑀮𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;

𑀦𑀢𑁆𑀣𑀺 𑀤𑁂𑀯 𑀧𑀭𑁄 𑀮𑁄𑀓𑁄, 𑀓𑁄 𑀢𑀢𑁄 𑀳𑀺 𑀇𑀥𑀸𑀕𑀢𑁄.

𑁧𑁧𑁮𑁮.

‘𑀦𑀢𑁆𑀣𑀺 𑀤𑁂𑀯 𑀧𑀺𑀢𑀭𑁄 𑀯𑀸, 𑀓𑀼𑀢𑁄 𑀫𑀸𑀢𑀸 𑀓𑀼𑀢𑁄 𑀧𑀺𑀢𑀸;

𑀦𑀢𑁆𑀣𑀺 𑀆𑀘𑀭𑀺𑀬𑁄 𑀦𑀸𑀫, 𑀅𑀤𑀦𑁆𑀢𑀁 𑀓𑁄 𑀤𑀫𑁂𑀲𑁆𑀲𑀢𑀺.

𑁧𑁧𑁮𑁯.

‘𑀲𑀫𑀢𑀼𑀮𑁆𑀬𑀸𑀦𑀺 𑀪𑀽𑀢𑀸𑀦𑀺, 𑀦𑀢𑁆𑀣𑀺 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸;

𑀦𑀢𑁆𑀣𑀺 𑀩𑀮𑀁 𑀯𑀻𑀭𑀺𑀬𑀁 𑀯𑀸, 𑀓𑀼𑀢𑁄 𑀉𑀝𑁆𑀞𑀸𑀦𑀧𑁄𑀭𑀺𑀲𑀁;

𑀦𑀺𑀬𑀢𑀸𑀦𑀺 𑀳𑀺 𑀪𑀽𑀢𑀸𑀦𑀺, 𑀬𑀣𑀸 𑀕𑁄𑀝𑀯𑀺𑀲𑁄 𑀢𑀣𑀸.

𑁧𑁧𑁯𑁦.

‘𑀮𑀤𑁆𑀥𑁂𑀬𑁆𑀬𑀁 ¶ 𑀮𑀪𑀢𑁂 𑀫𑀘𑁆𑀘𑁄, 𑀢𑀢𑁆𑀣 𑀤𑀸𑀦𑀨𑀮𑀁 𑀓𑀼𑀢𑁄;

𑀦𑀢𑁆𑀣𑀺 𑀤𑀸𑀦𑀨𑀮𑀁 𑀤𑁂𑀯, 𑀅𑀯𑀲𑁄 𑀤𑁂𑀯𑀯𑀻𑀭𑀺𑀬𑁄.

𑁧𑁧𑁯𑁧.

‘𑀩𑀸𑀮𑁂𑀳𑀺 𑀤𑀸𑀦𑀁 𑀧𑀜𑁆𑀜𑀢𑁆𑀢𑀁, 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀘𑁆𑀙𑀺𑀢𑀁;

𑀅𑀯𑀲𑀸 𑀤𑁂𑀦𑁆𑀢𑀺 𑀥𑀻𑀭𑀸𑀦𑀁, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄’’’𑀢𑀺.

𑀢𑀢𑁆𑀣 𑀇𑀥𑀸𑀕𑀢𑁄𑀢𑀺 𑀢𑀢𑁄 𑀧𑀭𑀮𑁄𑀓𑀢𑁄 𑀇𑀥𑀸𑀕𑀢𑁄 𑀦𑀸𑀫 𑀦𑀢𑁆𑀣𑀺. 𑀦𑀢𑁆𑀣𑀺 𑀤𑁂𑀯 𑀧𑀺𑀢𑀭𑁄 𑀯𑀸𑀢𑀺 𑀤𑁂𑀯, 𑀅𑀬𑁆𑀬𑀓𑀧𑁂𑀬𑁆𑀬𑀓𑀸𑀤𑀬𑁄 𑀯𑀸 𑀦𑀢𑁆𑀣𑀺, 𑀢𑁂𑀲𑀼 ¶ 𑀅𑀲𑀦𑁆𑀢𑁂𑀲𑀼 𑀓𑀼𑀢𑁄 𑀫𑀸𑀢𑀸 𑀓𑀼𑀢𑁄 𑀧𑀺𑀢𑀸. 𑀬𑀣𑀸 𑀕𑁄𑀝𑀯𑀺𑀲𑁄 ¶ 𑀢𑀣𑀸𑀢𑀺 𑀕𑁄𑀝𑀯𑀺𑀲𑁄 𑀯𑀼𑀘𑁆𑀘𑀢𑀺 𑀧𑀘𑁆𑀙𑀸𑀩𑀦𑁆𑀥𑁄, 𑀬𑀣𑀸 𑀦𑀸𑀯𑀸𑀬 𑀧𑀘𑁆𑀙𑀸𑀩𑀦𑁆𑀥𑁄 𑀦𑀸𑀯𑀫𑁂𑀯 𑀅𑀦𑀼𑀕𑀘𑁆𑀙𑀢𑀺, 𑀢𑀣𑀸 𑀇𑀫𑁂 𑀲𑀢𑁆𑀢𑀸 𑀦𑀺𑀬𑀢𑀫𑁂𑀯 𑀅𑀦𑀼𑀕𑀘𑁆𑀙𑀦𑁆𑀢𑀻𑀢𑀺 𑀯𑀤𑀢𑀺. 𑀅𑀯𑀲𑁄 𑀤𑁂𑀯𑀯𑀻𑀭𑀺𑀬𑁄𑀢𑀺 𑀏𑀯𑀁 𑀤𑀸𑀦𑀨𑀮𑁂 𑀅𑀲𑀢𑀺 𑀬𑁄 𑀓𑁄𑀘𑀺 𑀩𑀸𑀮𑁄 𑀤𑀸𑀦𑀁 𑀤𑁂𑀢𑀺, 𑀲𑁄 𑀅𑀯𑀲𑁄 𑀅𑀯𑀻𑀭𑀺𑀬𑁄 𑀦 𑀅𑀢𑁆𑀢𑀦𑁄 𑀯𑀲𑁂𑀦 𑀩𑀮𑁂𑀦 𑀤𑁂𑀢𑀺, 𑀤𑀸𑀦𑀨𑀮𑀁 𑀧𑀦 𑀅𑀢𑁆𑀣𑀻𑀢𑀺 𑀲𑀜𑁆𑀜𑀸𑀬 𑀅𑀜𑁆𑀜𑁂𑀲𑀁 𑀅𑀦𑁆𑀥𑀩𑀸𑀮𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀩𑀸𑀮𑁂𑀳𑀺 𑀤𑀸𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 ‘‘𑀤𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀅𑀦𑁆𑀥𑀩𑀸𑀮𑁂𑀳𑀺 𑀧𑀜𑁆𑀜𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀤𑀸𑀦𑀁 𑀩𑀸𑀮𑀸𑀬𑁂𑀯 𑀤𑁂𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺.

𑀏𑀯𑀁 𑀤𑀸𑀦𑀲𑁆𑀲 𑀦𑀺𑀧𑁆𑀨𑀮𑀢𑀁 𑀯𑀡𑁆𑀡𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀧𑀲𑁆𑀲 𑀦𑀺𑀧𑁆𑀨𑀮𑀪𑀸𑀯𑀁 𑀯𑀡𑁆𑀡𑁂𑀢𑀼𑀁 𑀆𑀳 𑁋

𑁧𑁧𑁯𑁨.

‘‘𑀲𑀢𑁆𑀢𑀺𑀫𑁂 𑀲𑀲𑁆𑀲𑀢𑀸 𑀓𑀸𑀬𑀸, 𑀅𑀘𑁆𑀙𑁂𑀚𑁆𑀚𑀸 𑀅𑀯𑀺𑀓𑁄𑀧𑀺𑀦𑁄;

𑀢𑁂𑀚𑁄 𑀧𑀣𑀯𑀻 𑀆𑀧𑁄 𑀘, 𑀯𑀸𑀬𑁄 𑀲𑀼𑀔𑀁 𑀤𑀼𑀔𑀜𑁆𑀘𑀺𑀫𑁂;

𑀚𑀻𑀯𑁂 𑀘 𑀲𑀢𑁆𑀢𑀺𑀫𑁂 𑀓𑀸𑀬𑀸, 𑀬𑁂𑀲𑀁 𑀙𑁂𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

𑁧𑁧𑁯𑁩.

‘‘𑀦𑀢𑁆𑀣𑀺 𑀳𑀦𑁆𑀢𑀸 𑀯 𑀙𑁂𑀢𑁆𑀢𑀸 𑀯𑀸, 𑀳𑀜𑁆𑀜𑁂 𑀬𑁂𑀯𑀸𑀧𑀺 𑀓𑁄𑀘𑀺 𑀦𑀁;

𑀅𑀦𑁆𑀢𑀭𑁂𑀦𑁂𑀯 𑀓𑀸𑀬𑀸𑀦𑀁, 𑀲𑀢𑁆𑀣𑀸𑀦𑀺 𑀯𑀻𑀢𑀺𑀯𑀢𑁆𑀢𑀭𑁂.

𑁧𑁧𑁯𑁪.

‘‘𑀬𑁄 𑀘𑀸𑀧𑀺 𑀲𑀺𑀭𑀫𑀸𑀤𑀸𑀬, 𑀧𑀭𑁂𑀲𑀁 𑀦𑀺𑀲𑀺𑀢𑀸𑀲𑀺𑀦𑀸;

𑀦 𑀲𑁄 𑀙𑀺𑀦𑁆𑀤𑀢𑀺 𑀢𑁂 𑀓𑀸𑀬𑁂, 𑀢𑀢𑁆𑀣 𑀧𑀸𑀧𑀨𑀮𑀁 𑀓𑀼𑀢𑁄.

𑁧𑁧𑁯𑁫.

‘‘𑀘𑀼𑀮𑁆𑀮𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑁂, 𑀲𑀩𑁆𑀩𑁂 𑀲𑀼𑀚𑁆𑀛𑀦𑁆𑀢𑀺 𑀲𑀁𑀲𑀭𑀁;

𑀅𑀦𑀸𑀕𑀢𑁂 𑀢𑀫𑁆𑀳𑀺 𑀓𑀸𑀮𑁂, 𑀲𑀜𑁆𑀜𑀢𑁄𑀧𑀺 𑀦 𑀲𑀼𑀚𑁆𑀛𑀢𑀺.

𑁧𑁧𑁯𑁬.

‘‘𑀘𑀭𑀺𑀢𑁆𑀯𑀸𑀧𑀺 ¶ 𑀩𑀳𑀼𑀁 𑀪𑀤𑁆𑀭𑀁, 𑀦𑁂𑀯 𑀲𑀼𑀚𑁆𑀛𑀦𑁆𑀢𑀺𑀦𑀸𑀕𑀢𑁂;

𑀧𑀸𑀧𑀜𑁆𑀘𑁂𑀧𑀺 𑀩𑀳𑀼𑀁 𑀓𑀢𑁆𑀯𑀸, 𑀢𑀁 𑀔𑀡𑀁 𑀦𑀸𑀢𑀺𑀯𑀢𑁆𑀢𑀭𑁂.

𑁧𑁧𑁯𑁭.

‘‘𑀅𑀦𑀼𑀧𑀼𑀩𑁆𑀩𑁂𑀦 𑀦𑁄 𑀲𑀼𑀤𑁆𑀥𑀺, 𑀓𑀧𑁆𑀧𑀸𑀦𑀁 𑀘𑀼𑀮𑁆𑀮𑀲𑀻𑀢𑀺𑀬𑀸;

𑀦𑀺𑀬𑀢𑀺𑀁 𑀦𑀸𑀢𑀺𑀯𑀢𑁆𑀢𑀸𑀫, 𑀯𑁂𑀮𑀦𑁆𑀢𑀫𑀺𑀯 𑀲𑀸𑀕𑀭𑁄’’𑀢𑀺.

𑀢𑀢𑁆𑀣 𑀓𑀸𑀬𑀸𑀢𑀺 𑀲𑀫𑀽𑀳𑀸. 𑀅𑀯𑀺𑀓𑁄𑀧𑀺𑀦𑁄𑀢𑀺 𑀯𑀺𑀓𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀚𑀻𑀯𑁂𑀢𑀺 𑀚𑀻𑀯𑁄. ‘‘𑀚𑀻𑀯𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄. 𑀲𑀢𑁆𑀢𑀺𑀫𑁂 𑀓𑀸𑀬𑀸𑀢𑀺 𑀇𑀫𑁂 𑀲𑀢𑁆𑀢 𑀓𑀸𑀬𑀸. 𑀳𑀜𑁆𑀜𑁂 𑀬𑁂𑀯𑀸𑀧𑀺 𑀓𑁄𑀘𑀺 𑀦𑀦𑁆𑀢𑀺 𑀬𑁄 𑀳𑀜𑁆𑀜𑁂𑀬𑁆𑀬, 𑀲𑁄𑀧𑀺 𑀦𑀢𑁆𑀣𑁂𑀯. 𑀯𑀻𑀢𑀺𑀯𑀢𑁆𑀢𑀭𑁂𑀢𑀺 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀅𑀦𑁆𑀢𑀭𑁂𑀬𑁂𑀯 𑀘𑀭𑀦𑁆𑀢𑀺 ¶ , 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀺𑀭𑀫𑀸𑀤𑀸𑀬𑀸𑀢𑀺 𑀧𑀭𑁂𑀲𑀁 𑀲𑀻𑀲𑀁 𑀕𑀳𑁂𑀢𑁆𑀯𑀸. 𑀦𑀺𑀲𑀺𑀢𑀸𑀲𑀺𑀦𑀸𑀢𑀺 𑀦𑀺𑀲𑀺𑀢𑁂𑀦 𑀅𑀲𑀺𑀦𑀸 𑀙𑀺𑀦𑁆𑀤𑀢𑀺, 𑀦 𑀲𑁄 𑀙𑀺𑀦𑁆𑀤𑀢𑀻𑀢𑀺 𑀲𑁄𑀧𑀺 𑀢𑁂 𑀓𑀸𑀬𑁂 𑀦 𑀙𑀺𑀦𑁆𑀤𑀢𑀺, 𑀧𑀣𑀯𑀻 𑀧𑀣𑀯𑀺𑀫𑁂𑀯 𑀉𑀧𑁂𑀢𑀺, 𑀆𑀧𑀸𑀤𑀬𑁄 𑀆𑀧𑀸𑀤𑀺𑀓𑁂, 𑀲𑀼𑀔𑀤𑀼𑀓𑁆𑀔𑀚𑀻𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀲𑀁𑀲𑀭𑀦𑁆𑀢𑀺 𑀫𑀳𑀸𑀭𑀸𑀚, 𑀇𑀫𑁂 𑀲𑀢𑁆𑀢𑀸 𑀇𑀫𑀁 𑀧𑀣𑀯𑀺𑀁 𑀏𑀓𑀫𑀁𑀲𑀔𑀮𑀁 𑀓𑀢𑁆𑀯𑀸𑀧𑀺 𑀏𑀢𑁆𑀢𑀓𑁂 𑀓𑀧𑁆𑀧𑁂 𑀲𑀁𑀲𑀭𑀦𑁆𑀢𑀸 𑀲𑀼𑀚𑁆𑀛𑀦𑁆𑀢𑀺. 𑀅𑀜𑁆𑀜𑀢𑁆𑀭 𑀳𑀺 𑀲𑀁𑀲𑀸𑀭𑀸 𑀲𑀢𑁆𑀢𑁂 𑀲𑁄𑀥𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀲𑀁𑀲𑀸𑀭𑁂𑀦𑁂𑀯 𑀲𑀼𑀚𑁆𑀛𑀦𑁆𑀢𑀺. 𑀅𑀦𑀸𑀕𑀢𑁂 𑀢𑀫𑁆𑀳𑀺 𑀓𑀸𑀮𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀧𑀦 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀅𑀦𑀸𑀕𑀢𑁂 𑀅𑀧𑁆𑀧𑀢𑁆𑀢𑁂 𑀅𑀦𑁆𑀢𑀭𑀸 𑀲𑀜𑁆𑀜𑀢𑁄𑀧𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀧𑀺 𑀦 𑀲𑀼𑀚𑁆𑀛𑀢𑀺. 𑀢𑀁 ¶ 𑀔𑀡𑀦𑁆𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀸𑀮𑀁. 𑀅𑀦𑀼𑀧𑀼𑀩𑁆𑀩𑁂𑀦 𑀦𑁄 𑀲𑀼𑀤𑁆𑀥𑀻𑀢𑀺 𑀅𑀫𑁆𑀳𑀸𑀓𑀁 𑀯𑀸𑀤𑁂 𑀅𑀦𑀼𑀧𑀼𑀩𑁆𑀩𑁂𑀦 𑀲𑀼𑀤𑁆𑀥𑀺, 𑀲𑀩𑁆𑀩𑁂𑀲𑀁 𑀅𑀫𑁆𑀳𑀸𑀓𑀁 𑀅𑀦𑀼𑀧𑀼𑀩𑁆𑀩𑁂𑀦 𑀲𑀼𑀤𑁆𑀥𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀲𑁄 𑀉𑀘𑁆𑀙𑁂𑀤𑀯𑀸𑀤𑁄 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀲𑀓𑀯𑀸𑀤𑀁 𑀦𑀺𑀧𑁆𑀧𑀤𑁂𑀲𑀢𑁄 𑀓𑀣𑁂𑀲𑀻𑀢𑀺.

𑁧𑁧𑁯𑁮.

‘‘𑀓𑀲𑁆𑀲𑀧𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

‘‘𑀬𑀣𑀸 𑀪𑀤𑀦𑁆𑀢𑁄 𑀪𑀡𑀢𑀺, 𑀫𑀬𑁆𑀳𑀫𑁆𑀧𑁂𑀢𑀁𑀯 𑀭𑀼𑀘𑁆𑀘𑀢𑀺.

𑁧𑁧𑁯𑁯.

‘𑀅𑀳𑀫𑁆𑀧𑀺 𑀧𑀼𑀭𑀺𑀫𑀁 𑀚𑀸𑀢𑀺𑀁, 𑀲𑀭𑁂 𑀲𑀁𑀲𑀭𑀺𑀢𑀢𑁆𑀢𑀦𑁄;

𑀧𑀺𑀗𑁆𑀕𑀮𑁄 𑀦𑀸𑀫𑀳𑀁 𑀆𑀲𑀺𑀁, 𑀮𑀼𑀤𑁆𑀤𑁄 𑀕𑁄𑀖𑀸𑀢𑀓𑁄 𑀧𑀼𑀭𑁂.

𑁧𑁨𑁦𑁦.

‘𑀩𑀸𑀭𑀸𑀡𑀲𑀺𑀬𑀁 𑀨𑀻𑀢𑀸𑀬𑀁, 𑀩𑀳𑀼𑀁 𑀧𑀸𑀧𑀁 𑀫𑀬𑀸 𑀓𑀢𑀁;

𑀩𑀳𑀽 𑀫𑀬𑀸 𑀳𑀢𑀸 𑀧𑀸𑀡𑀸, 𑀫𑀳𑀺𑀁𑀲𑀸 𑀲𑀽𑀓𑀭𑀸 𑀅𑀚𑀸.

𑁧𑁨𑁦𑁧.

‘𑀢𑀢𑁄 ¶ 𑀘𑀼𑀢𑁄 𑀇𑀥 𑀚𑀸𑀢𑁄, 𑀇𑀤𑁆𑀥𑁂 𑀲𑁂𑀦𑀸𑀧𑀢𑀻𑀓𑀼𑀮𑁂;

𑀦𑀢𑁆𑀣𑀺 𑀦𑀽𑀦 𑀨𑀮𑀁 𑀧𑀸𑀧𑀁, 𑀬𑁄𑀳𑀁 𑀦 𑀦𑀺𑀭𑀬𑀁 𑀕𑀢𑁄’’’𑀢𑀺.

𑀢𑀢𑁆𑀣 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀻𑀢𑀺 𑀲𑁄 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀘𑁂𑀢𑀺𑀬𑁂 𑀅𑀦𑁄𑀚𑀧𑀼𑀧𑁆𑀨𑀤𑀸𑀫𑁂𑀦 𑀧𑀽𑀚𑀁 𑀓𑀢𑁆𑀯𑀸 𑀫𑀭𑀡𑀲𑀫𑀬𑁂 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀬𑀣𑀸𑀦𑀼𑀪𑀸𑀯𑀁 𑀔𑀺𑀢𑁆𑀢𑁄 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀏𑀓𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀕𑁄𑀖𑀸𑀢𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀳𑀼𑀁 𑀧𑀸𑀧𑀫𑀓𑀸𑀲𑀺. 𑀅𑀣𑀲𑁆𑀲 𑀫𑀭𑀡𑀓𑀸𑀮𑁂 𑀪𑀲𑁆𑀫𑀧𑀝𑀺𑀘𑁆𑀙𑀦𑁆𑀦𑁄 𑀯𑀺𑀬 𑀅𑀕𑁆𑀕𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀞𑀺𑀢𑀁 𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀑𑀓𑀸𑀲𑀫𑀓𑀸𑀲𑀺. 𑀲𑁄 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀁 𑀯𑀺𑀪𑀽𑀢𑀺𑀁 𑀧𑀢𑁆𑀢𑁄, 𑀚𑀸𑀢𑀺𑀁 𑀲𑀭𑀦𑁆𑀢𑁄 𑀧𑀦 𑀅𑀢𑀻𑀢𑀸𑀦𑀦𑁆𑀢𑀭𑀢𑁄 𑀧𑀭𑀁 𑀧𑀭𑀺𑀲𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀕𑁄𑀖𑀸𑀢𑀓𑀓𑀫𑁆𑀫𑀁 𑀓𑀢𑁆𑀯𑀸 𑀇𑀥 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’’𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲 ¶ 𑀯𑀸𑀤𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀇𑀤𑀁 ‘‘𑀬𑀣𑀸 𑀪𑀤𑀦𑁆𑀢𑁄 𑀪𑀡𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀅𑀩𑁆𑀭𑀯𑀺. 𑀢𑀢𑁆𑀣 𑀲𑀭𑁂 𑀲𑀁𑀲𑀭𑀺𑀢𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀲𑀁𑀲𑀭𑀺𑀢𑀁 𑀲𑀭𑀸𑀫𑀺. 𑀲𑁂𑀦𑀸𑀧𑀢𑀻𑀓𑀼𑀮𑁂𑀢𑀺 𑀲𑁂𑀦𑀸𑀧𑀢𑀺𑀓𑀼𑀮𑀫𑁆𑀳𑀺.

𑁧𑁨𑁦𑁨.

‘‘𑀅𑀣𑁂𑀢𑁆𑀣 𑀩𑀻𑀚𑀓𑁄 𑀦𑀸𑀫, 𑀤𑀸𑀲𑁄 𑀆𑀲𑀺 𑀧𑀝𑀘𑁆𑀘𑀭𑀻;

𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄, 𑀕𑀼𑀡𑀲𑀦𑁆𑀢𑀺𑀓𑀼𑀧𑀸𑀕𑀫𑀺.

𑁧𑁨𑁦𑁩.

‘‘𑀓𑀲𑁆𑀲𑀧𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑀲𑁆𑀲 𑀘 𑀪𑀸𑀲𑀺𑀢𑀁;

𑀧𑀲𑁆𑀲𑀲𑀦𑁆𑀢𑁄 𑀫𑀼𑀳𑀼𑀁 𑀉𑀡𑁆𑀳𑀁, 𑀭𑀼𑀤𑀁 𑀅𑀲𑁆𑀲𑀽𑀦𑀺 𑀯𑀢𑁆𑀢𑀬𑀻’’𑀢𑀺.

𑀢𑀢𑁆𑀣 𑀅𑀣𑁂𑀢𑁆𑀣𑀸𑀢𑀺 𑀅𑀣 𑀏𑀢𑁆𑀣 𑀏𑀢𑀺𑀲𑁆𑀲𑀁 𑀫𑀺𑀣𑀺𑀮𑀸𑀬𑀁. 𑀧𑀝𑀘𑁆𑀘𑀭𑀻𑀢𑀺 𑀤𑀮𑀺𑀤𑁆𑀤𑁄 𑀓𑀧𑀡𑁄 𑀅𑀳𑁄𑀲𑀺. 𑀕𑀼𑀡𑀲𑀦𑁆𑀢𑀺𑀓𑀼𑀧𑀸𑀕𑀫𑀻𑀢𑀺 𑀕𑀼𑀡𑀲𑁆𑀲 𑀲𑀦𑁆𑀢𑀺𑀓𑀁 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁 𑀲𑁄𑀲𑁆𑀲𑀸𑀫𑀻𑀢𑀺 𑀉𑀧𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁨𑁦𑁪.

‘‘𑀢𑀫𑀦𑀼𑀧𑀼𑀘𑁆𑀙𑀺 𑀯𑁂𑀤𑁂𑀳𑁄, ‘𑀓𑀺𑀫𑀢𑁆𑀣𑀁 𑀲𑀫𑁆𑀫 𑀭𑁄𑀤𑀲𑀺;

𑀓𑀺𑀁 𑀢𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀓𑀺𑀁 𑀫𑀁 𑀯𑁂𑀤𑁂𑀲𑀺 𑀯𑁂𑀤𑀦’’’𑀦𑁆𑀢𑀺.

𑀢𑀢𑁆𑀣 ¶ 𑀓𑀺𑀁 𑀫𑀁 𑀯𑁂𑀤𑁂𑀲𑀺 𑀯𑁂𑀤𑀦𑀦𑁆𑀢𑀺 𑀓𑀺𑀁 𑀦𑀸𑀫 𑀢𑁆𑀯𑀁 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸 𑀯𑁂𑀤𑀦𑀁 𑀧𑀢𑁆𑀢𑁄𑀬𑀁, 𑀏𑀯𑀁 𑀭𑁄𑀤𑀦𑁆𑀢𑁄 𑀫𑀁 𑀯𑁂𑀤𑁂𑀲𑀺 𑀚𑀸𑀦𑀸𑀧𑁂𑀲𑀺, 𑀉𑀢𑁆𑀢𑀸𑀦𑀫𑁂𑀯 𑀦𑀁 𑀓𑀢𑁆𑀯𑀸 𑀫𑀬𑁆𑀳𑀁 𑀆𑀘𑀺𑀓𑁆𑀔𑀸𑀳𑀻𑀢𑀺.

𑁧𑁨𑁦𑁫.

‘‘𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀩𑀻𑀚𑀓𑁄 𑀏𑀢𑀤𑀩𑁆𑀭𑀯𑀺;

‘𑀦𑀢𑁆𑀣𑀺 𑀫𑁂 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁧𑁨𑁦𑁬.

‘𑀅𑀳𑀫𑁆𑀧𑀺 ¶ 𑀧𑀼𑀭𑀺𑀫𑀁 𑀚𑀸𑀢𑀺𑀁, 𑀲𑀭𑀸𑀫𑀺 𑀲𑀼𑀔𑀫𑀢𑁆𑀢𑀦𑁄;

𑀲𑀸𑀓𑁂𑀢𑀸𑀳𑀁 𑀧𑀼𑀭𑁂 𑀆𑀲𑀺𑀁, 𑀪𑀸𑀯𑀲𑁂𑀝𑁆𑀞𑀺 𑀕𑀼𑀡𑁂 𑀭𑀢𑁄.

𑁧𑁨𑁦𑁭.

‘𑀲𑀫𑁆𑀫𑀢𑁄 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑀸𑀦𑀁, 𑀲𑀁𑀯𑀺𑀪𑀸𑀕𑀭𑀢𑁄 𑀲𑀼𑀘𑀺;

𑀦 𑀘𑀸𑀧𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀲𑀭𑀸𑀫𑀺 𑀓𑀢𑀫𑀢𑁆𑀢𑀦𑁄.

𑁧𑁨𑁦𑁮.

‘𑀢𑀢𑁄 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀇𑀥 𑀚𑀸𑀢𑁄 𑀤𑀼𑀭𑀺𑀢𑁆𑀣𑀺𑀬𑀸;

𑀕𑀩𑁆𑀪𑀫𑁆𑀳𑀺 𑀓𑀼𑀫𑁆𑀪𑀤𑀸𑀲𑀺𑀬𑀸, 𑀬𑀢𑁄 𑀚𑀸𑀢𑁄 𑀲𑀼𑀤𑀼𑀕𑁆𑀕𑀢𑁄.

𑁧𑁨𑁦𑁯.

‘𑀏𑀯𑀫𑁆𑀧𑀺 𑀤𑀼𑀕𑁆𑀕𑀢𑁄 𑀲𑀦𑁆𑀢𑁄, 𑀲𑀫𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄;

𑀉𑀧𑀟𑁆𑀠𑀪𑀸𑀕𑀁 𑀪𑀢𑁆𑀢𑀲𑁆𑀲, 𑀤𑀤𑀸𑀫𑀺 𑀬𑁄 𑀫𑁂 𑀇𑀘𑁆𑀙𑀢𑀺.

𑁧𑁨𑁧𑁦.

‘𑀘𑀸𑀢𑀼𑀤𑁆𑀤𑀲𑀺𑀁 ¶ 𑀧𑀜𑁆𑀘𑀤𑀲𑀺𑀁, 𑀲𑀤𑀸 𑀉𑀧𑀯𑀲𑀸𑀫𑀳𑀁;

𑀦 𑀘𑀸𑀧𑀺 𑀪𑀽𑀢𑁂 𑀳𑀺𑀁𑀲𑀸𑀫𑀺, 𑀣𑁂𑀬𑁆𑀬𑀁 𑀘𑀸𑀧𑀺 𑀯𑀺𑀯𑀚𑁆𑀚𑀬𑀺𑀁.

𑁧𑁨𑁧𑁧.

‘𑀲𑀩𑁆𑀩𑀫𑁂𑀯 𑀳𑀺 𑀦𑀽𑀦𑁂𑀢𑀁, 𑀲𑀼𑀘𑀺𑀡𑁆𑀡𑀁 𑀪𑀯𑀢𑀺 𑀦𑀺𑀧𑁆𑀨𑀮𑀁;

𑀦𑀺𑀭𑀢𑁆𑀣𑀁 𑀫𑀜𑁆𑀜𑀺𑀤𑀁 𑀲𑀻𑀮𑀁, 𑀅𑀮𑀸𑀢𑁄 𑀪𑀸𑀲𑀢𑀻 𑀬𑀣𑀸.

𑁧𑁨𑁧𑁨.

‘𑀓𑀮𑀺𑀫𑁂𑀯 𑀦𑀽𑀦 𑀕𑀡𑁆𑀳𑀸𑀫𑀺, 𑀅𑀲𑀺𑀧𑁆𑀧𑁄 𑀥𑀼𑀢𑁆𑀢𑀓𑁄 𑀬𑀣𑀸;

𑀓𑀝𑀁 𑀅𑀮𑀸𑀢𑁄 𑀕𑀡𑁆𑀳𑀸𑀢𑀺, 𑀓𑀺𑀢𑀯𑁄𑀲𑀺𑀓𑁆𑀔𑀺𑀢𑁄 𑀬𑀣𑀸.

𑁧𑁨𑁧𑁩.

‘𑀤𑁆𑀯𑀸𑀭𑀁 𑀦𑀧𑁆𑀧𑀝𑀺𑀧𑀲𑁆𑀲𑀸𑀫𑀺, 𑀬𑁂𑀦 𑀕𑀘𑁆𑀙𑀸𑀫𑀺 𑀲𑀼𑀕𑁆𑀕𑀢𑀺𑀁;

𑀢𑀲𑁆𑀫𑀸 𑀭𑀸𑀚 𑀧𑀭𑁄𑀤𑀸𑀫𑀺, 𑀲𑀼𑀢𑁆𑀯𑀸 𑀓𑀲𑁆𑀲𑀧𑀪𑀸𑀲𑀺𑀢’’’𑀦𑁆𑀢𑀺.

𑀢𑀢𑁆𑀣 𑀪𑀸𑀯𑀲𑁂𑀝𑁆𑀞𑀻𑀢𑀺 𑀏𑀯𑀁𑀦𑀸𑀫𑀓𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀲𑁂𑀝𑁆𑀞𑀺. 𑀕𑀼𑀡𑁂 𑀭𑀢𑁄𑀢𑀺 𑀕𑀼𑀡𑀫𑁆𑀳𑀺 𑀭𑀢𑁄. 𑀲𑀫𑁆𑀫𑀢𑁄𑀢𑀺 𑀲𑀫𑁆𑀪𑀸𑀯𑀺𑀢𑁄 𑀲𑀁𑀯𑀡𑁆𑀡𑀺𑀢𑁄. 𑀲𑀼𑀘𑀻𑀢𑀺 𑀲𑀼𑀘𑀺𑀓𑀫𑁆𑀫𑁄. 𑀇𑀥 𑀚𑀸𑀢𑁄 𑀤𑀼𑀭𑀺𑀢𑁆𑀣𑀺𑀬𑀸𑀢𑀺 𑀇𑀫𑀲𑁆𑀫𑀺𑀁 𑀫𑀺𑀣𑀺𑀮𑀦𑀕𑀭𑁂 𑀤𑀮𑀺𑀤𑁆𑀤𑀺𑀬𑀸 𑀓𑀧𑀡𑀸𑀬 𑀓𑀼𑀫𑁆𑀪𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑁄𑀲𑁆𑀫𑀻𑀢𑀺. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀅𑀭𑀜𑁆𑀜𑁂 𑀦𑀝𑁆𑀞𑀁 𑀩𑀮𑀺𑀩𑀤𑁆𑀤𑀁 𑀕𑀯𑁂𑀲𑀫𑀸𑀦𑁄 𑀏𑀓𑁂𑀦 𑀫𑀕𑁆𑀕𑀫𑀽𑀴𑁆𑀳𑁂𑀦 𑀪𑀺𑀓𑁆𑀔𑀼𑀦𑀸 𑀫𑀕𑁆𑀕𑀁 𑀧𑀼𑀝𑁆𑀞𑁄 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀧𑀼𑀦 𑀢𑁂𑀦 𑀧𑀼𑀘𑁆𑀙𑀺𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀲𑀫𑀡, 𑀤𑀸𑀲𑀸 𑀦𑀸𑀫 𑀫𑀼𑀔𑀭𑀸 𑀳𑁄𑀦𑁆𑀢𑀺, 𑀤𑀸𑀲𑁂𑀦 𑀢𑀬𑀸 𑀪𑀯𑀺𑀢𑀩𑁆𑀩𑀁, 𑀅𑀢𑀺𑀫𑀼𑀔𑀭𑁄𑀲𑀻’’𑀢𑀺 𑀆𑀳. 𑀢𑀁 𑀓𑀫𑁆𑀫𑀁 𑀢𑀤𑀸 𑀯𑀺𑀧𑀸𑀓𑀁 𑀅𑀤𑀢𑁆𑀯𑀸 𑀪𑀲𑁆𑀫𑀘𑁆𑀙𑀦𑁆𑀦𑁄 𑀯𑀺𑀬 𑀧𑀸𑀯𑀓𑁄 ¶ 𑀞𑀺𑀢𑀁. 𑀫𑀭𑀡𑀲𑀫𑀬𑁂 𑀅𑀜𑁆𑀜𑀁 𑀓𑀫𑁆𑀫𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀬𑀣𑀸𑀓𑀫𑁆𑀫𑀁 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀏𑀓𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲 𑀩𑀮𑁂𑀦 𑀲𑀸𑀓𑁂𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀅𑀓𑀸𑀲𑀺. 𑀢𑀁 𑀧𑀦𑀲𑁆𑀲 𑀓𑀫𑁆𑀫𑀁 𑀧𑀣𑀯𑀺𑀬𑀁 𑀦𑀺𑀳𑀺𑀢𑀦𑀺𑀥𑀺 𑀯𑀺𑀬 𑀞𑀺𑀢𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀯𑀺𑀧𑀸𑀓𑀁 𑀤𑀲𑁆𑀲𑀢𑀺. 𑀬𑀁 𑀧𑀦 𑀢𑁂𑀦 𑀢𑀁 𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑀦𑁆𑀢𑁂𑀦 𑀓𑀢𑀁 𑀧𑀸𑀧𑀓𑀫𑁆𑀫𑀁, 𑀢𑀫𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀅𑀤𑀸𑀲𑀺. 𑀲𑁄 𑀅𑀚𑀸𑀦𑀦𑁆𑀢𑁄 ‘‘𑀇𑀢𑀭𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀩𑀮𑁂𑀦 𑀓𑀼𑀫𑁆𑀪𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’’𑀢𑀺 𑀲𑀜𑁆𑀜𑀸𑀬 𑀏𑀯𑀫𑀸𑀳. 𑀬𑀢𑁄 𑀚𑀸𑀢𑁄 𑀲𑀼𑀤𑀼𑀕𑁆𑀕𑀢𑁄𑀢𑀺 𑀲𑁄𑀳𑀁 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑀺𑀤𑀼𑀕𑁆𑀕𑀢𑁄𑀢𑀺 𑀤𑀻𑀧𑁂𑀢𑀺.

𑀲𑀫𑀘𑀭𑀺𑀬𑀫𑀥𑀺𑀝𑁆𑀞𑀺𑀢𑁄𑀢𑀺 𑀲𑀫𑀘𑀭𑀺𑀬𑀸𑀬𑀫𑁂𑀯 ¶ 𑀧𑀢𑀺𑀝𑁆𑀞𑀺𑀢𑁄𑀫𑁆𑀳𑀺. 𑀦𑀽𑀦𑁂𑀢𑀦𑁆𑀢𑀺 𑀏𑀓𑀁𑀲𑁂𑀦 𑀏𑀢𑀁. 𑀫𑀜𑁆𑀜𑀺𑀤𑀁 𑀲𑀻𑀮𑀦𑁆𑀢𑀺 𑀤𑁂𑀯, 𑀇𑀤𑀁 𑀲𑀻𑀮𑀁 𑀦𑀸𑀫 𑀦𑀺𑀭𑀢𑁆𑀣𑀓𑀁 𑀫𑀜𑁆𑀜𑁂. 𑀅𑀮𑀸𑀢𑁄𑀢𑀺 𑀬𑀣𑀸 𑀅𑀬𑀁 𑀅𑀮𑀸𑀢𑀲𑁂𑀦𑀸𑀧𑀢𑀺 ‘‘𑀫𑀬𑀸 𑀧𑀼𑀭𑀺𑀫𑀪𑀯𑁂 𑀩𑀳𑀼𑀁 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀮𑀤𑁆𑀥’’𑀦𑁆𑀢𑀺 𑀪𑀸𑀲𑀢𑀺, 𑀢𑁂𑀦 𑀓𑀸𑀭𑀡𑁂𑀦𑀸𑀳𑀁 ¶ 𑀦𑀺𑀭𑀢𑁆𑀣𑀓𑀁 𑀲𑀻𑀮𑀦𑁆𑀢𑀺 𑀫𑀜𑁆𑀜𑀸𑀫𑀺. 𑀓𑀮𑀺𑀫𑁂𑀯𑀸𑀢𑀺 𑀬𑀣𑀸 𑀅𑀲𑀺𑀧𑁆𑀧𑁄 𑀅𑀲𑀺𑀓𑁆𑀔𑀺𑀢𑁄 𑀅𑀓𑁆𑀔𑀥𑀼𑀢𑁆𑀢𑁄 𑀧𑀭𑀸𑀚𑀬𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺, 𑀢𑀣𑀸 𑀦𑀽𑀦 𑀕𑀡𑁆𑀳𑀸𑀫𑀺, 𑀧𑀼𑀭𑀺𑀫𑀪𑀯𑁂 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑀁 𑀦𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫𑀺. 𑀓𑀲𑁆𑀲𑀧𑀪𑀸𑀲𑀺𑀢𑀦𑁆𑀢𑀺 𑀓𑀲𑁆𑀲𑀧𑀕𑁄𑀢𑁆𑀢𑀲𑁆𑀲 𑀅𑀘𑁂𑀮𑀓𑀲𑁆𑀲 𑀪𑀸𑀲𑀺𑀢𑀁 𑀲𑀼𑀢𑁆𑀯𑀸𑀢𑀺 𑀯𑀤𑀢𑀺.

𑁧𑁨𑁧𑁪.

‘‘𑀩𑀻𑀚𑀓𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀸𑀚𑀸 𑀅𑀗𑁆𑀕𑀢𑀺 𑀫𑀩𑁆𑀭𑀯𑀺;

‘𑀦𑀢𑁆𑀣𑀺 𑀤𑁆𑀯𑀸𑀭𑀁 𑀲𑀼𑀕𑀢𑀺𑀬𑀸, 𑀦𑀺𑀬𑀢𑀺𑀁 𑀓𑀗𑁆𑀔 𑀩𑀻𑀚𑀓.

𑁧𑁨𑁧𑁫.

‘𑀲𑀼𑀔𑀁 𑀯𑀸 𑀬𑀤𑀺 𑀯𑀸 𑀤𑀼𑀓𑁆𑀔𑀁, 𑀦𑀺𑀬𑀢𑀺𑀬𑀸 𑀓𑀺𑀭 𑀮𑀩𑁆𑀪𑀢𑀺;

𑀲𑀁𑀲𑀸𑀭𑀲𑀼𑀤𑁆𑀥𑀺 𑀲𑀩𑁆𑀩𑁂𑀲𑀁, 𑀫𑀸 𑀢𑀼𑀭𑀺𑀢𑁆𑀣𑁄 𑀅𑀦𑀸𑀕𑀢𑁂.

𑁧𑁨𑁧𑁬.

‘𑀅𑀳𑀫𑁆𑀧𑀺 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑁄, 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑁂𑀲𑀼 𑀩𑁆𑀬𑀸𑀯𑀝𑁄;

𑀯𑁄𑀳𑀸𑀭𑀫𑀦𑀼𑀲𑀸𑀲𑀦𑁆𑀢𑁄, 𑀭𑀢𑀺𑀳𑀻𑀦𑁄 𑀢𑀤𑀦𑁆𑀢𑀭𑀸’’’𑀢𑀺.

𑀢𑀢𑁆𑀣 𑀅𑀗𑁆𑀕𑀢𑀺 𑀫𑀩𑁆𑀭𑀯𑀻𑀢𑀺 𑀧𑀞𑀫𑀫𑁂𑀯 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁, 𑀧𑀘𑁆𑀙𑀸 𑀩𑀻𑀚𑀓𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀴𑁆𑀳𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀏𑀢𑀁 ‘‘𑀦𑀢𑁆𑀣𑀺 𑀤𑁆𑀯𑀸𑀭’’𑀦𑁆𑀢𑀺𑀆𑀤𑀺𑀯𑀘𑀦𑀫𑀩𑁆𑀭𑀯𑀺. 𑀦𑀺𑀬𑀢𑀺𑀁 𑀓𑀗𑁆𑀔𑀸𑀢𑀺 𑀲𑀫𑁆𑀫 𑀩𑀻𑀚𑀓, 𑀦𑀺𑀬𑀢𑀺𑀫𑁂𑀯 𑀑𑀮𑁄𑀓𑁂𑀳𑀺. 𑀘𑀼𑀮𑁆𑀮𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑀧𑁆𑀧𑀫𑀸𑀡𑁄 𑀓𑀸𑀮𑁄𑀬𑁂𑀯 𑀳𑀺 𑀲𑀢𑁆𑀢𑁂 𑀲𑁄𑀥𑁂𑀢𑀺, 𑀢𑁆𑀯𑀁 𑀅𑀢𑀺𑀢𑀼𑀭𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳. 𑀅𑀦𑀸𑀕𑀢𑁂𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂 𑀅𑀦𑁆𑀢𑀭𑀸𑀯 𑀤𑁂𑀯𑀮𑁄𑀓𑀁 𑀕𑀘𑁆𑀙𑀸𑀫𑀻𑀢𑀺 𑀫𑀸 𑀢𑀼𑀭𑀺𑀢𑁆𑀣𑁄. 𑀩𑁆𑀬𑀸𑀯𑀝𑁄𑀢𑀺 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀕𑀳𑀧𑀢𑀺𑀓𑁂𑀲𑀼 𑀘 𑀢𑁂𑀲𑀁𑀬𑁂𑀯 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀤𑀸𑀦𑀸𑀤𑀺𑀓𑀫𑁆𑀫𑀓𑀭𑀡𑁂𑀦 𑀩𑁆𑀬𑀸𑀯𑀝𑁄 𑀅𑀳𑁄𑀲𑀺𑀁. 𑀯𑁄𑀳𑀸𑀭𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀭𑀸𑀚𑀓𑀺𑀘𑁆𑀘𑀁 ¶ 𑀯𑁄𑀳𑀸𑀭𑀁 𑀅𑀦𑀼𑀲𑀸𑀲𑀦𑁆𑀢𑁄𑀯. 𑀭𑀢𑀺𑀳𑀻𑀦𑁄 𑀢𑀤𑀦𑁆𑀢𑀭𑀸𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀸𑀫𑀕𑀼𑀡𑀭𑀢𑀺𑀬𑀸 𑀧𑀭𑀺𑀳𑀻𑀦𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀪𑀦𑁆𑀢𑁂 𑀓𑀲𑁆𑀲𑀧, 𑀫𑀬𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀧𑀫𑀚𑁆𑀚𑀺𑀫𑁆𑀳𑀸, 𑀇𑀤𑀸𑀦𑀺 𑀧𑀦 𑀅𑀫𑁆𑀳𑁂𑀳𑀺 𑀆𑀘𑀭𑀺𑀬𑁄 𑀮𑀤𑁆𑀥𑁄, 𑀇𑀢𑁄 𑀧𑀝𑁆𑀞𑀸𑀬 𑀓𑀸𑀫𑀭𑀢𑀺𑀫𑁂𑀯 𑀅𑀦𑀼𑀪𑀯𑀺𑀲𑁆𑀲𑀸𑀫, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀇𑀢𑁄 𑀉𑀢𑁆𑀢𑀭𑀺 𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀺 𑀦𑁄 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀫𑀬𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋

𑁧𑁨𑁧𑁭.

‘‘𑀧𑀼𑀦𑀧𑀺 𑀪𑀦𑁆𑀢𑁂 𑀤𑀓𑁆𑀔𑁂𑀫𑀼, 𑀲𑀗𑁆𑀕𑀢𑀺 𑀘𑁂 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀲𑀗𑁆𑀕𑀢𑀺 𑀘𑁂𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀘𑁂 𑀦𑁄 𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀺,𑀦𑁄 𑀘𑁂, 𑀅𑀲𑀢𑀺 𑀧𑀼𑀜𑁆𑀜𑀨𑀮𑁂 𑀓𑀺𑀁 𑀢𑀬𑀸 𑀤𑀺𑀝𑁆𑀞𑁂𑀦𑀸𑀢𑀺.

‘‘𑀇𑀤𑀁 ¶ 𑀯𑀢𑁆𑀯𑀸𑀦 𑀯𑁂𑀤𑁂𑀳𑁄, 𑀧𑀘𑁆𑀘𑀕𑀸 𑀲𑀦𑀺𑀯𑁂𑀲𑀦’’𑀦𑁆𑀢𑀺;

𑀢𑀢𑁆𑀣 𑀲𑀦𑀺𑀯𑁂𑀲𑀦𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀇𑀤𑀁 𑀯𑀘𑀦𑀁 𑀯𑁂𑀤𑁂𑀳𑀭𑀸𑀚𑀸 𑀯𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀬𑁆𑀳 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀘𑀦𑁆𑀤𑀓𑀧𑀸𑀲𑀸𑀤𑀢𑀮𑀫𑁂𑀯 𑀧𑀝𑀺𑀕𑀢𑁄.

𑀭𑀸𑀚𑀸 ¶ 𑀧𑀞𑀫𑀁 𑀕𑀼𑀡𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀆𑀕𑀘𑁆𑀙𑀦𑁆𑀢𑁄 𑀧𑀦 𑀅𑀯𑀦𑁆𑀤𑀺𑀢𑁆𑀯𑀸𑀯 𑀆𑀕𑀢𑁄. 𑀕𑀼𑀡𑁄 𑀅𑀢𑁆𑀢𑀦𑁄 𑀅𑀕𑀼𑀡𑀢𑀸𑀬 𑀯𑀦𑁆𑀤𑀦𑀫𑁆𑀧𑀺 𑀦𑀸𑀮𑀢𑁆𑀣, 𑀧𑀺𑀡𑁆𑀟𑀸𑀤𑀺𑀓𑀁 𑀲𑀓𑁆𑀓𑀸𑀭𑀁 𑀓𑀺𑀫𑁂𑀯 𑀮𑀘𑁆𑀙𑀢𑀺. 𑀭𑀸𑀚𑀸𑀧𑀺 𑀢𑀁 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀓𑀸𑀫𑀕𑀼𑀡𑁂 𑀫𑁂 𑀉𑀧𑀝𑁆𑀞𑀸𑀧𑁂𑀣, 𑀅𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀓𑀸𑀫𑀕𑀼𑀡𑀲𑀼𑀔𑀫𑁂𑀯 𑀅𑀦𑀼𑀪𑀯𑀺𑀲𑁆𑀲𑀸𑀫𑀺, 𑀦 𑀫𑁂 𑀅𑀜𑁆𑀜𑀸𑀦𑀺 𑀓𑀺𑀘𑁆𑀘𑀸𑀦𑀺 𑀆𑀭𑁄𑀘𑁂𑀢𑀩𑁆𑀩𑀸𑀦𑀺, 𑀯𑀺𑀦𑀺𑀘𑁆𑀙𑀬𑀓𑀺𑀘𑁆𑀘𑀁 𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀓𑀭𑁄𑀢𑀽’’𑀢𑀺 𑀯𑀢𑁆𑀯𑀸 𑀓𑀸𑀫𑀭𑀢𑀺𑀫𑀢𑁆𑀢𑁄 𑀅𑀳𑁄𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁨𑁧𑁮.

‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀉𑀧𑀝𑁆𑀞𑀸𑀦𑀫𑁆𑀳𑀺 𑀅𑀗𑁆𑀕𑀢𑀺;

𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁨𑁧𑁯.

‘𑀘𑀦𑁆𑀤𑀓𑁂 𑀫𑁂 𑀯𑀺𑀫𑀸𑀦𑀲𑁆𑀫𑀺𑀁, 𑀲𑀤𑀸 𑀓𑀸𑀫𑁂 𑀯𑀺𑀥𑁂𑀦𑁆𑀢𑀼 𑀫𑁂;

𑀫𑀸 𑀉𑀧𑀕𑀘𑁆𑀙𑀼𑀁 𑀅𑀢𑁆𑀣𑁂𑀲𑀼, 𑀕𑀼𑀬𑁆𑀳𑀧𑁆𑀧𑀓𑀸𑀲𑀺𑀬𑁂𑀲𑀼 𑀘.

𑁧𑁨𑁨𑁦.

‘𑀯𑀺𑀚𑀬𑁄 ¶ 𑀘 𑀲𑀼𑀦𑀸𑀫𑁄 𑀘, 𑀲𑁂𑀦𑀸𑀧𑀢𑀺 𑀅𑀮𑀸𑀢𑀓𑁄;

𑀏𑀢𑁂 𑀅𑀢𑁆𑀣𑁂 𑀦𑀺𑀲𑀻𑀤𑀦𑁆𑀢𑀼, 𑀯𑁄𑀳𑀸𑀭𑀓𑀼𑀲𑀮𑀸 𑀢𑀬𑁄’.

𑁧𑁨𑁨𑁧.

‘‘𑀇𑀤𑀁 𑀯𑀢𑁆𑀯𑀸𑀦 𑀯𑁂𑀤𑁂𑀳𑁄, 𑀓𑀸𑀫𑁂𑀯 𑀩𑀳𑀼𑀫𑀜𑁆𑀜𑀣;

𑀦 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑁂𑀲𑀼, 𑀅𑀢𑁆𑀣𑁂 𑀓𑀺𑀲𑁆𑀫𑀺𑀜𑁆𑀘𑀺 𑀩𑁆𑀬𑀸𑀯𑀝𑁄’’𑀢𑀺.

𑀢𑀢𑁆𑀣 𑀉𑀧𑀝𑁆𑀞𑀸𑀦𑀫𑁆𑀳𑀻𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀝𑁆𑀞𑀸𑀦𑁂. 𑀘𑀦𑁆𑀤𑀓𑁂 𑀫𑁂𑀢𑀺 𑀫𑀫 𑀲𑀦𑁆𑀢𑀓𑁂 𑀘𑀦𑁆𑀤𑀓𑀧𑀸𑀲𑀸𑀤𑁂. 𑀯𑀺𑀥𑁂𑀦𑁆𑀢𑀼 𑀫𑁂𑀢𑀺 𑀦𑀺𑀘𑁆𑀘𑀁 𑀫𑀬𑁆𑀳𑀁 𑀓𑀸𑀫𑁂 𑀲𑀁𑀯𑀺𑀤𑀳𑀦𑁆𑀢𑀼 𑀉𑀧𑀝𑁆𑀞𑀧𑁂𑀦𑁆𑀢𑀼. 𑀕𑀼𑀬𑁆𑀳𑀧𑁆𑀧𑀓𑀸𑀲𑀺𑀬𑁂𑀲𑀽𑀢𑀺 𑀕𑀼𑀬𑁆𑀳𑁂𑀲𑀼𑀧𑀺 𑀧𑀓𑀸𑀲𑀺𑀬𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀫𑀁 𑀓𑁂𑀘𑀺 𑀫𑀸 𑀉𑀧𑀕𑀘𑁆𑀙𑀼𑀁. 𑀅𑀢𑁆𑀣𑁂𑀢𑀺 𑀅𑀢𑁆𑀣𑀓𑀭𑀡𑁂 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂. 𑀦𑀺𑀲𑀻𑀤𑀦𑁆𑀢𑀽𑀢𑀺 𑀫𑀬𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀢𑁆𑀣𑀁 𑀲𑁂𑀲𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀦𑁆𑀢𑀽𑀢𑀺.

𑁧𑁨𑁨𑁨.

‘‘𑀢𑀢𑁄 𑀤𑁆𑀯𑁂𑀲𑀢𑁆𑀢𑀭𑀢𑁆𑀢𑀲𑁆𑀲, 𑀯𑁂𑀤𑁂𑀳𑀲𑁆𑀲𑀢𑁆𑀭𑀚𑀸 𑀧𑀺𑀬𑀸;

𑀭𑀸𑀚𑀥𑀻𑀢𑀸 𑀭𑀼𑀘𑀸 𑀦𑀸𑀫, 𑀥𑀸𑀢𑀺𑀫𑀸𑀢𑀭𑀫𑀩𑁆𑀭𑀯𑀺.

𑁧𑁨𑁨𑁩.

‘‘𑀅𑀮𑀗𑁆𑀓𑀭𑁄𑀣 ¶ 𑀫𑀁 𑀔𑀺𑀧𑁆𑀧𑀁, 𑀲𑀔𑀺𑀬𑁄 𑀘𑀸𑀮𑀗𑁆𑀓𑀭𑁄𑀦𑁆𑀢𑀼 𑀫𑁂;

𑀲𑀼𑀯𑁂 𑀧𑀦𑁆𑀦𑀭𑀲𑁄 𑀤𑀺𑀩𑁆𑀬𑁄, 𑀕𑀘𑁆𑀙𑀁 𑀇𑀲𑁆𑀲𑀭𑀲𑀦𑁆𑀢𑀺𑀓𑁂.

𑁧𑁨𑁨𑁪.

‘‘𑀢𑀲𑁆𑀲𑀸 𑀫𑀸𑀮𑁆𑀬𑀁 𑀅𑀪𑀺𑀳𑀭𑀺𑀁𑀲𑀼, 𑀘𑀦𑁆𑀤𑀦𑀜𑁆𑀘 𑀫𑀳𑀸𑀭𑀳𑀁;

𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀭𑀢𑀦𑀁, 𑀦𑀸𑀦𑀸𑀭𑀢𑁆𑀢𑁂 𑀘 𑀅𑀫𑁆𑀩𑀭𑁂.

𑁧𑁨𑁨𑁫.

‘‘𑀢𑀜𑁆𑀘 𑀲𑁄𑀡𑁆𑀡𑀫𑀬𑁂 𑀧𑀻𑀞𑁂, 𑀦𑀺𑀲𑀺𑀦𑁆𑀦𑀁 𑀩𑀳𑀼𑀓𑀺𑀢𑁆𑀣𑀺𑀬𑁄;

𑀧𑀭𑀺𑀓𑀺𑀭𑀺𑀬 𑀅𑀲𑁄𑀪𑀺𑀁𑀲𑀼, 𑀭𑀼𑀘𑀁 𑀭𑀼𑀘𑀺𑀭𑀯𑀡𑁆𑀡𑀺𑀦𑀺’’𑀦𑁆𑀢𑀺.

𑀢𑀢𑁆𑀣 𑀢𑀢𑁄𑀢𑀺 𑀢𑀢𑁄 𑀭𑀜𑁆𑀜𑁄 𑀓𑀸𑀫𑀧𑀗𑁆𑀓𑁂 𑀮𑀕𑁆𑀕𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀤𑁆𑀯𑁂𑀲𑀢𑁆𑀢𑀭𑀢𑁆𑀢𑀲𑁆𑀲𑀸𑀢𑀺 𑀘𑀼𑀤𑁆𑀤𑀲𑀫𑁂 𑀤𑀺𑀯𑀲𑁂. 𑀥𑀸𑀢𑀺𑀫𑀸𑀢𑀭𑀫𑀩𑁆𑀭𑀯𑀻𑀢𑀺 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑀸 ¶ 𑀳𑀼𑀢𑁆𑀯𑀸 𑀥𑀸𑀢𑀺𑀫𑀸𑀢𑀭𑀫𑀸𑀳. 𑀲𑀸 𑀓𑀺𑀭 𑀘𑀸𑀢𑀼𑀤𑁆𑀤𑀲𑁂 𑀘𑀸𑀢𑀼𑀤𑁆𑀤𑀲𑁂 𑀧𑀜𑁆𑀘𑀲𑀢𑀓𑀼𑀫𑀸𑀭𑀺𑀓𑀸𑀳𑀺 𑀧𑀭𑀺𑀯𑀼𑀢𑀸 𑀥𑀸𑀢𑀺𑀕𑀡𑀁 𑀆𑀤𑀸𑀬 𑀫𑀳𑀦𑁆𑀢𑁂𑀦 𑀲𑀺𑀭𑀺𑀯𑀺𑀮𑀸𑀲𑁂𑀦 𑀅𑀢𑁆𑀢𑀦𑁄 𑀲𑀢𑁆𑀢𑀪𑀽𑀫𑀺𑀓𑀸 𑀭𑀢𑀺𑀯𑀟𑁆𑀠𑀦𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀧𑀺𑀢𑀼 𑀤𑀲𑁆𑀲𑀦𑀢𑁆𑀣𑀁 𑀘𑀦𑁆𑀤𑀓𑀧𑀸𑀲𑀸𑀤𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀧𑀺𑀢𑀸 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀦𑁆𑀢𑁄 ‘‘𑀅𑀫𑁆𑀫, 𑀤𑀸𑀦𑀁 𑀤𑁂𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀺. 𑀲𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀉𑀧𑁄𑀲𑀣𑀺𑀓𑀸 𑀳𑀼𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀭𑀜𑁆𑀜𑀸 𑀓𑀺𑀭𑀲𑁆𑀲𑀸 𑀏𑀓𑁄 𑀚𑀦𑀧𑀤𑁄𑀧𑀺 𑀤𑀺𑀦𑁆𑀦𑁄. 𑀢𑀢𑁄 𑀆𑀬𑁂𑀦 ¶ 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀢𑀤𑀸 𑀧𑀦 ‘‘𑀭𑀜𑁆𑀜𑀸 𑀓𑀺𑀭 𑀕𑀼𑀡𑀁 𑀆𑀚𑀻𑀯𑀓𑀁 𑀦𑀺𑀲𑁆𑀲𑀸𑀬 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀳𑀺𑀢’’𑀦𑁆𑀢𑀺 𑀲𑀓𑀮𑀦𑀕𑀭𑁂 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀢𑀁 𑀧𑀯𑀢𑁆𑀢𑀺𑀁 𑀭𑀼𑀘𑀸𑀬 𑀥𑀸𑀢𑀺𑀬𑁄 𑀲𑀼𑀢𑁆𑀯𑀸 𑀭𑀸𑀚𑀥𑀻𑀢𑀸𑀬 𑀆𑀭𑁄𑀘𑀬𑀺𑀁𑀲𑀼 ‘‘𑀅𑀬𑁆𑀬𑁂, 𑀧𑀺𑀢𑀭𑀸 𑀓𑀺𑀭 𑀢𑁂 𑀆𑀚𑀻𑀯𑀓𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀳𑀺𑀢𑀁, 𑀲𑁄 𑀓𑀺𑀭 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀤𑀸𑀦𑀲𑀸𑀮𑀸𑀬𑁄 𑀯𑀺𑀤𑁆𑀥𑀁𑀲𑀸𑀧𑁂𑀢𑁆𑀯𑀸 𑀧𑀭𑀧𑀭𑀺𑀕𑁆𑀕𑀳𑀺𑀢𑀸 𑀇𑀢𑁆𑀣𑀺𑀬𑁄 𑀘 𑀓𑀼𑀫𑀸𑀭𑀺𑀓𑀸𑀬𑁄 𑀘 𑀧𑀲𑀬𑁆𑀳𑀓𑀸𑀭𑁂𑀦 𑀕𑀡𑁆𑀳𑀺𑀢𑀼𑀁 𑀆𑀡𑀸𑀧𑁂𑀢𑀺, 𑀭𑀚𑁆𑀚𑀁 𑀦 𑀯𑀺𑀘𑀸𑀭𑁂𑀢𑀺, 𑀓𑀸𑀫𑀫𑀢𑁆𑀢𑁄𑀬𑁂𑀯 𑀓𑀺𑀭 𑀚𑀸𑀢𑁄’’𑀢𑀺. 𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀦𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑁂 𑀢𑀸𑀢𑁄 𑀅𑀧𑀕𑀢𑀲𑀼𑀓𑁆𑀓𑀥𑀫𑁆𑀫𑀁 𑀦𑀺𑀮𑁆𑀮𑀚𑁆𑀚𑀁 𑀦𑀕𑁆𑀕𑀪𑁄𑀕𑁆𑀕𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑀦𑀼 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀓𑀫𑁆𑀫𑀯𑀸𑀤𑀺𑀦𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑁄 𑀲𑀺𑀬𑀸, 𑀞𑀧𑁂𑀢𑁆𑀯𑀸 𑀔𑁄 𑀧𑀦 𑀫𑀁 𑀅𑀜𑁆𑀜𑁄 𑀫𑀬𑁆𑀳𑀁 𑀧𑀺𑀢𑀭𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀸 𑀅𑀧𑀦𑁂𑀢𑁆𑀯𑀸 𑀲𑀫𑁆𑀫𑀸𑀤𑀲𑁆𑀲𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀳𑀜𑁆𑀳𑀺 𑀅𑀢𑀻𑀢𑀸 𑀲𑀢𑁆𑀢, 𑀅𑀦𑀸𑀕𑀢𑀸 𑀲𑀢𑁆𑀢𑀸𑀢𑀺 𑀘𑀼𑀤𑁆𑀤𑀲 𑀚𑀸𑀢𑀺𑀬𑁄 𑀅𑀦𑀼𑀲𑁆𑀲𑀭𑀸𑀫𑀺, 𑀢𑀲𑁆𑀫𑀸 𑀧𑀼𑀩𑁆𑀩𑁂 𑀫𑀬𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀸𑀧𑀓𑀫𑁆𑀫𑀲𑁆𑀲 𑀨𑀮𑀁 𑀤𑀲𑁆𑀲𑁂𑀦𑁆𑀢𑀻 𑀫𑀫 𑀧𑀺𑀢𑀭𑀁 ¶ 𑀫𑀺𑀘𑁆𑀙𑀸𑀤𑀲𑁆𑀲𑀦𑀸 𑀫𑁄𑀘𑁂𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀅𑀚𑁆𑀚𑁂𑀯 𑀕𑀫𑀺𑀲𑁆𑀲𑀸𑀫𑀺, 𑀅𑀣 𑀫𑀁 𑀧𑀺𑀢𑀸 ‘𑀅𑀫𑁆𑀫, 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀟𑁆𑀠𑀫𑀸𑀲𑁂 𑀆𑀕𑀘𑁆𑀙𑀲𑀺, 𑀅𑀚𑁆𑀚 𑀓𑀲𑁆𑀫𑀸 𑀏𑀯𑀁 𑀮𑀳𑀼 𑀆𑀕𑀢𑀸𑀲𑀻’𑀢𑀺 𑀯𑀓𑁆𑀔𑀢𑀺. 𑀢𑀢𑁆𑀭 𑀲𑀘𑁂 𑀅𑀳𑀁 ‘𑀢𑀼𑀫𑁆𑀳𑁂𑀳𑀺 𑀓𑀺𑀭 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀳𑀺𑀢’𑀦𑁆𑀢𑀺 𑀲𑀼𑀢𑁆𑀯𑀸 ‘𑀆𑀕𑀢𑀫𑁆𑀳𑀻’𑀢𑀺 𑀯𑀓𑁆𑀔𑀸𑀫𑀺, 𑀦 𑀫𑁂 𑀯𑀘𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀚𑁆𑀚 𑀅𑀕𑀦𑁆𑀢𑁆𑀯𑀸 𑀇𑀢𑁄 𑀘𑀼𑀤𑁆𑀤𑀲𑀫𑁂 𑀤𑀺𑀯𑀲𑁂 𑀓𑀸𑀴𑀧𑀓𑁆𑀔𑁂𑀬𑁂𑀯 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀻 𑀯𑀺𑀬 𑀧𑀼𑀩𑁆𑀩𑁂 𑀕𑀫𑀦𑀸𑀓𑀸𑀭𑁂𑀦𑁆𑀢𑁂𑀯 𑀕𑀦𑁆𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀤𑀸𑀦𑀯𑀢𑁆𑀢𑀢𑁆𑀣𑀸𑀬 𑀲𑀳𑀲𑁆𑀲𑀁 𑀬𑀸𑀘𑀺𑀲𑁆𑀲𑀸𑀫𑀺, 𑀢𑀤𑀸 𑀫𑁂 𑀧𑀺𑀢𑀸 𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀪𑀸𑀯𑀁 𑀓𑀣𑁂𑀲𑁆𑀲𑀢𑀺. 𑀅𑀣 𑀦𑀁 𑀅𑀳𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀙𑀟𑁆𑀟𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀫𑀸 𑀘𑀼𑀤𑁆𑀤𑀲𑀫𑁂 𑀤𑀺𑀯𑀲𑁂 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀏𑀯𑀫𑀸𑀳.

𑀢𑀢𑁆𑀣 𑀲𑀔𑀺𑀬𑁄 𑀘𑀸𑀢𑀺 𑀲𑀳𑀸𑀬𑀺𑀓𑀸𑀬𑁄𑀧𑀺 𑀫𑁂 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀏𑀓𑀸𑀬𑁂𑀓𑀁 𑀅𑀲𑀤𑀺𑀲𑀁 𑀓𑀢𑁆𑀯𑀸 𑀦𑀸𑀦𑀸𑀮𑀗𑁆𑀓𑀸𑀭𑁂𑀳𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀅𑀮𑀗𑁆𑀓𑀭𑁄𑀦𑁆𑀢𑀽𑀢𑀺. 𑀤𑀺𑀩𑁆𑀬𑁄𑀢𑀺 𑀤𑀺𑀩𑁆𑀩𑀲𑀤𑀺𑀲𑁄, 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀧𑀝𑀺𑀫𑀡𑁆𑀟𑀺𑀢𑁄𑀢𑀺𑀧𑀺 𑀤𑀺𑀩𑁆𑀩𑁄. 𑀕𑀘𑁆𑀙𑀦𑁆𑀢𑀺 𑀫𑀫 𑀤𑀸𑀦𑀯𑀢𑁆𑀢𑀁 𑀆𑀳𑀭𑀸𑀧𑁂𑀢𑀼𑀁 𑀯𑀺𑀤𑁂𑀳𑀺𑀲𑁆𑀲𑀭𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀅𑀪𑀺𑀳𑀭𑀺𑀁𑀲𑀽𑀢𑀺 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑀦𑀢𑁆𑀣𑀸𑀬 𑀅𑀪𑀺𑀳𑀭𑀺𑀁𑀲𑀼. 𑀧𑀭𑀺𑀓𑀺𑀭𑀺𑀬𑀸𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸. 𑀅𑀲𑁄𑀪𑀺𑀁𑀲𑀽𑀢𑀺 𑀲𑀼𑀚𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀢𑀁 𑀤𑀺𑀯𑀲𑀁 𑀅𑀢𑀺𑀯𑀺𑀬 𑀅𑀲𑁄𑀪𑀺𑀁𑀲𑀽𑀢𑀺.

𑁧𑁨𑁨𑁬.

‘‘𑀲𑀸 𑀘 𑀲𑀔𑀺𑀫𑀚𑁆𑀛𑀕𑀢𑀸, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀸;

𑀲𑀢𑁂𑀭𑀢𑀸 𑀅𑀩𑁆𑀪𑀫𑀺𑀯, 𑀘𑀦𑁆𑀤𑀓𑀁 𑀧𑀸𑀯𑀺𑀲𑀻 𑀭𑀼𑀘𑀸.

𑁧𑁨𑁨𑁭.

‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀯𑁂𑀤𑁂𑀳𑀁, 𑀯𑀦𑁆𑀤𑀺𑀢𑁆𑀯𑀸 𑀯𑀺𑀦𑀬𑁂 𑀭𑀢𑀁;

𑀲𑀼𑀯𑀡𑁆𑀡𑀔𑀘𑀺𑀢𑁂 𑀧𑀻𑀞𑁂, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀻’’𑀢𑀺.

𑀢𑀢𑁆𑀣 ¶ 𑀉𑀧𑀸𑀯𑀺𑀲𑀻𑀢𑀺 𑀧𑀺𑀢𑀼 𑀯𑀲𑀦𑀝𑁆𑀞𑀸𑀦𑀁 𑀘𑀦𑁆𑀤𑀓𑀧𑀸𑀲𑀸𑀤𑀁 𑀧𑀸𑀯𑀺𑀲𑀺. 𑀲𑀼𑀯𑀡𑁆𑀡𑀔𑀘𑀺𑀢𑁂𑀢𑀺 𑀲𑀢𑁆𑀢𑀭𑀢𑀦𑀔𑀘𑀺𑀢𑁂 𑀲𑀼𑀯𑀡𑁆𑀡𑀫𑀬𑁂 𑀧𑀻𑀞𑁂.

𑁧𑁨𑁨𑁮.

‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀯𑁂𑀤𑁂𑀳𑁄, 𑀅𑀘𑁆𑀙𑀭𑀸𑀦𑀁𑀯 𑀲𑀗𑁆𑀕𑀫𑀁;

𑀭𑀼𑀘𑀁 𑀲𑀔𑀺𑀫𑀚𑁆𑀛𑀕𑀢𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁨𑁨𑁯.

‘‘‘𑀓𑀘𑁆𑀘𑀺 𑀭𑀫𑀲𑀺 𑀧𑀸𑀲𑀸𑀤𑁂, 𑀅𑀦𑁆𑀢𑁄𑀧𑁄𑀓𑁆𑀔𑀭𑀡𑀺𑀁 𑀧𑀢𑀺;

𑀓𑀘𑁆𑀘𑀺 𑀩𑀳𑀼𑀯𑀺𑀥𑀁 𑀔𑀚𑁆𑀚𑀁, 𑀲𑀤𑀸 𑀅𑀪𑀺𑀳𑀭𑀦𑁆𑀢𑀺 𑀢𑁂.

𑁧𑁨𑁩𑁦.

‘𑀓𑀘𑁆𑀘𑀺 ¶ 𑀩𑀳𑀼𑀯𑀺𑀥𑀁 𑀫𑀸𑀮𑁆𑀬𑀁, 𑀑𑀘𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀺𑀬𑁄;

𑀖𑀭𑀓𑁂 𑀓𑀭𑁄𑀣 𑀧𑀘𑁆𑀘𑁂𑀓𑀁, 𑀔𑀺𑀟𑁆𑀟𑀸𑀭𑀢𑀺𑀭𑀢𑀸 𑀫𑀼𑀳𑀼𑀁.

𑁧𑁨𑁩𑁧.

‘𑀓𑁂𑀦 𑀯𑀸 𑀯𑀺𑀓𑀮𑀁 𑀢𑀼𑀬𑁆𑀳𑀁, 𑀓𑀺𑀁 𑀔𑀺𑀧𑁆𑀧𑀁 𑀆𑀳𑀭𑀦𑁆𑀢𑀺 𑀢𑁂;

𑀫𑀦𑁄 𑀓𑀭𑀲𑁆𑀲𑀼 𑀓𑀼𑀟𑁆𑀟𑀫𑀼𑀔𑀻, 𑀅𑀧𑀺 𑀘𑀦𑁆𑀤𑀲𑀫𑀫𑁆𑀳𑀺𑀧𑀻’’’𑀢𑀺.

𑀢𑀢𑁆𑀣 𑀲𑀗𑁆𑀕𑀫𑀦𑁆𑀢𑀺 𑀅𑀘𑁆𑀙𑀭𑀸𑀦𑀁 𑀲𑀗𑁆𑀕𑀫𑀁 𑀯𑀺𑀬 𑀲𑀫𑀸𑀕𑀫𑀁 𑀤𑀺𑀲𑁆𑀯𑀸. 𑀧𑀸𑀲𑀸𑀤𑁂𑀢𑀺 𑀅𑀫𑁆𑀫 𑀫𑀬𑀸 𑀢𑀼𑀬𑁆𑀳𑀁 𑀯𑁂𑀚𑀬𑀦𑁆𑀢𑀲𑀤𑀺𑀲𑁄 𑀭𑀢𑀺𑀯𑀟𑁆𑀠𑀦𑀧𑀸𑀲𑀸𑀤𑁄 𑀓𑀸𑀭𑀺𑀢𑁄, 𑀓𑀘𑁆𑀘𑀺 𑀢𑀢𑁆𑀣 𑀭𑀫𑀲𑀺. 𑀅𑀦𑁆𑀢𑁄𑀧𑁄𑀓𑁆𑀔𑀭𑀡𑀺𑀁 𑀧𑀢𑀻𑀢𑀺 𑀅𑀦𑁆𑀢𑁄𑀯𑀢𑁆𑀣𑀼𑀲𑁆𑀫𑀺𑀜𑁆𑀜𑁂𑀯 𑀢𑁂 𑀫𑀬𑀸 𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀻𑀧𑀝𑀺𑀪𑀸𑀕𑀸𑀧𑁄𑀓𑁆𑀔𑀭𑀡𑀻 𑀓𑀸𑀭𑀺𑀢𑀸, 𑀓𑀘𑁆𑀘𑀺 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀧𑀝𑀺𑀘𑁆𑀘 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑀻 𑀭𑀫𑀲𑀺. 𑀫𑀸𑀮𑁆𑀬𑀦𑁆𑀢𑀺 𑀅𑀫𑁆𑀫, 𑀅𑀳𑀁 𑀢𑀼𑀬𑁆𑀳𑀁 𑀤𑁂𑀯𑀲𑀺𑀓𑀁 𑀧𑀜𑁆𑀘𑀯𑀻𑀲𑀢𑀺 𑀧𑀼𑀧𑁆𑀨𑀲𑀫𑀼𑀕𑁆𑀕𑁂 𑀧𑀳𑀺𑀡𑀸𑀫𑀺, 𑀓𑀘𑁆𑀘𑀺 𑀢𑀼𑀫𑁆𑀳𑁂 𑀲𑀩𑁆𑀩𑀸𑀧𑀺 𑀓𑀼𑀫𑀸𑀭𑀺𑀓𑀸𑀬𑁄 𑀢𑀁 𑀫𑀸𑀮𑁆𑀬𑀁 𑀑𑀘𑀺𑀦𑀺𑀢𑁆𑀯𑀸 𑀕𑀦𑁆𑀣𑀺𑀢𑁆𑀯𑀸 𑀅𑀪𑀺𑀡𑁆𑀳𑀁 𑀔𑀺𑀟𑁆𑀟𑀸𑀭𑀢𑀺𑀭𑀢𑀸 𑀳𑀼𑀢𑁆𑀯𑀸 𑀧𑀘𑁆𑀘𑁂𑀓𑀁 𑀖𑀭𑀓𑁂 𑀓𑀭𑁄𑀣, ‘‘𑀇𑀤𑀁 𑀲𑀼𑀦𑁆𑀤𑀭𑀁, 𑀇𑀤𑀁 𑀲𑀼𑀦𑁆𑀤𑀭𑀢𑀭’’𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀲𑀸𑀭𑀫𑁆𑀪𑁂𑀦 𑀯𑀸𑀬𑀧𑀼𑀧𑁆𑀨𑀖𑀭𑀓𑀸𑀦𑀺 𑀧𑀼𑀧𑁆𑀨𑀕𑀩𑁆𑀪𑁂 𑀘 𑀧𑀼𑀧𑁆𑀨𑀸𑀲𑀦𑀧𑀼𑀧𑁆𑀨𑀲𑀬𑀦𑀸𑀦𑀺 𑀘 𑀓𑀘𑁆𑀘𑀺 𑀓𑀭𑁄𑀣𑀸𑀢𑀺 𑀧𑀼𑀘𑁆𑀙𑀢𑀺.

𑀯𑀺𑀓𑀮𑀦𑁆𑀢𑀺 𑀯𑁂𑀓𑀮𑁆𑀮𑀁. 𑀫𑀦𑁄 𑀓𑀭𑀲𑁆𑀲𑀽𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀳𑀺. 𑀓𑀼𑀟𑁆𑀟𑀫𑀼𑀔𑀻𑀢𑀺 𑀲𑀸𑀲𑀧𑀓𑀓𑁆𑀓𑁂𑀳𑀺 𑀧𑀲𑀸𑀤𑀺𑀢𑀫𑀼𑀔𑀢𑀸𑀬 𑀢𑀁 𑀏𑀯𑀫𑀸𑀳. 𑀇𑀢𑁆𑀣𑀺𑀬𑁄 𑀳𑀺 𑀫𑀼𑀔𑀯𑀡𑁆𑀡𑀁 𑀧𑀲𑀸𑀤𑁂𑀦𑁆𑀢𑀺𑀬𑁄 𑀤𑀼𑀝𑁆𑀞𑀮𑁄𑀳𑀺𑀢𑀫𑀼𑀔𑀤𑀽𑀲𑀺𑀢𑀧𑀻𑀴𑀓𑀸𑀳𑀭𑀡𑀢𑁆𑀣𑀁 𑀧𑀞𑀫𑀁 𑀲𑀸𑀲𑀧𑀓𑀓𑁆𑀓𑁂𑀦 𑀫𑀼𑀔𑀁 𑀯𑀺𑀮𑀺𑀫𑁆𑀧𑀦𑁆𑀢𑀺, 𑀢𑀢𑁄 𑀮𑁄𑀳𑀺𑀢𑀲𑁆𑀲 𑀲𑀫𑀓𑀭𑀡𑀢𑁆𑀣𑀁 ¶ 𑀫𑀢𑁆𑀢𑀺𑀓𑀸𑀓𑀓𑁆𑀓𑁂𑀦, 𑀢𑀢𑁄 𑀙𑀯𑀺𑀧𑀲𑀸𑀤𑀦𑀢𑁆𑀣𑀁 𑀢𑀺𑀮𑀓𑀓𑁆𑀓𑁂𑀦. 𑀘𑀦𑁆𑀤𑀲𑀫𑀫𑁆𑀳𑀺𑀧𑀻𑀢𑀺 𑀘𑀦𑁆𑀤𑀢𑁄 𑀤𑀼𑀮𑁆𑀮𑀪𑀢𑀭𑁄 𑀦𑀸𑀫 𑀦𑀢𑁆𑀣𑀺, 𑀢𑀸𑀤𑀺𑀲𑁂𑀧𑀺 𑀭𑀼𑀘𑀺𑀁 𑀓𑀢𑁆𑀯𑀸 𑀫𑀫𑀸𑀘𑀺𑀓𑁆𑀔, 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀺 𑀢𑁂𑀢𑀺.

𑁧𑁨𑁩𑁨.

‘‘𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀼𑀘𑀸 𑀧𑀺𑀢𑀭 𑀫𑀩𑁆𑀭𑀯𑀺;

‘𑀲𑀩𑁆𑀩𑀫𑁂𑀢𑀁 𑀫𑀳𑀸𑀭𑀸𑀚, 𑀮𑀩𑁆𑀪𑀢𑀺𑀲𑁆𑀲𑀭𑀲𑀦𑁆𑀢𑀺𑀓𑁂.

𑁧𑁨𑁩𑁩.

‘𑀲𑀼𑀯𑁂 𑀧𑀦𑁆𑀦𑀭𑀲𑁄 𑀤𑀺𑀩𑁆𑀬𑁄, 𑀲𑀳𑀲𑁆𑀲𑀁 𑀆𑀳𑀭𑀦𑁆𑀢𑀼 𑀫𑁂;

𑀬𑀣𑀸𑀤𑀺𑀦𑁆𑀦𑀜𑁆𑀘 𑀤𑀲𑁆𑀲𑀸𑀫𑀺, 𑀤𑀸𑀦𑀁 𑀲𑀩𑁆𑀩𑀯𑀡𑀻𑀲𑁆𑀯𑀳’’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀯𑀡𑀻𑀲𑁆𑀯𑀳𑀦𑁆𑀢𑀺 𑀲𑀩𑁆𑀩𑀯𑀡𑀺𑀩𑁆𑀩𑀓𑁂𑀲𑀼 𑀅𑀳𑀁 𑀤𑀲𑁆𑀲𑀸𑀫𑀺.

𑁧𑁨𑁩𑁪.

‘‘𑀭𑀼𑀘𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀸𑀚𑀸 𑀅𑀗𑁆𑀕𑀢𑀺 𑀫𑀩𑁆𑀭𑀯𑀺;

‘𑀩𑀳𑀼𑀁 𑀯𑀺𑀦𑀸𑀲𑀺𑀢𑀁 𑀯𑀺𑀢𑁆𑀢𑀁, 𑀦𑀺𑀭𑀢𑁆𑀣𑀁 𑀅𑀨𑀮𑀁 𑀢𑀬𑀸.

𑁧𑁨𑁩𑁫.

‘𑀉𑀧𑁄𑀲𑀣𑁂 ¶ 𑀯𑀲𑀁 𑀦𑀺𑀘𑁆𑀘𑀁, 𑀅𑀦𑁆𑀦𑀧𑀸𑀦𑀁 𑀦 𑀪𑀼𑀜𑁆𑀚𑀲𑀺;

𑀦𑀺𑀬𑀢𑁂𑀢𑀁 𑀅𑀪𑀼𑀢𑁆𑀢𑀩𑁆𑀩𑀁, 𑀦𑀢𑁆𑀣𑀺 𑀧𑀼𑀜𑁆𑀜𑀁 𑀅𑀪𑀼𑀜𑁆𑀚𑀢𑁄’’’𑀢𑀺.

𑀢𑀢𑁆𑀣 ¶ 𑀅𑀗𑁆𑀕𑀢𑀺 𑀫𑀩𑁆𑀭𑀯𑀻𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀅𑀗𑁆𑀕𑀢𑀺𑀭𑀸𑀚𑀸 𑀧𑀼𑀩𑁆𑀩𑁂 𑀅𑀬𑀸𑀘𑀺𑀢𑁄𑀧𑀺 ‘‘𑀅𑀫𑁆𑀫, 𑀤𑀸𑀦𑀁 𑀤𑁂𑀳𑀻’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀬𑀸𑀘𑀺𑀢𑁄𑀧𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀅𑀤𑀢𑁆𑀯𑀸 𑀇𑀤𑀁 ‘‘𑀩𑀳𑀼𑀁 𑀯𑀺𑀦𑀸𑀲𑀺𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀩𑁆𑀭𑀯𑀺. 𑀦𑀺𑀬𑀢𑁂𑀢𑀁 𑀅𑀪𑀼𑀢𑁆𑀢𑀩𑁆𑀩𑀦𑁆𑀢𑀺 𑀏𑀢𑀁 𑀦𑀺𑀬𑀢𑀺𑀯𑀲𑁂𑀦 𑀢𑀬𑀸 𑀅𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀅𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀧𑀼𑀜𑁆𑀜𑀁 𑀦𑀢𑁆𑀣𑀺. 𑀲𑀩𑁆𑀩𑁂 𑀳𑀺 𑀘𑀼𑀮𑁆𑀮𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀲𑀼𑀚𑁆𑀛𑀦𑁆𑀢𑀺.

𑁧𑁨𑁩𑁬.

‘‘𑀩𑀻𑀚𑀓𑁄𑀧𑀺 𑀳𑀺 𑀲𑀼𑀢𑁆𑀯𑀸𑀦, 𑀢𑀤𑀸 𑀓𑀲𑁆𑀲𑀧𑀪𑀸𑀲𑀺𑀢𑀁;

‘𑀧𑀲𑁆𑀲𑀲𑀦𑁆𑀢𑁄 𑀫𑀼𑀳𑀼𑀁 𑀉𑀡𑁆𑀳𑀁, 𑀭𑀼𑀤𑀁 𑀅𑀲𑁆𑀲𑀽𑀦𑀺 𑀯𑀢𑁆𑀢𑀬𑀺.

𑁧𑁨𑁩𑁭.

‘𑀬𑀸𑀯 𑀭𑀼𑀘𑁂 𑀚𑀻𑀯𑀫𑀸𑀦𑀸, 𑀫𑀸 𑀪𑀢𑁆𑀢𑀫𑀧𑀦𑀸𑀫𑀬𑀺;

𑀦𑀢𑁆𑀣𑀺 𑀪𑀤𑁆𑀤𑁂 𑀧𑀭𑁄 𑀮𑁄𑀓𑁄, 𑀓𑀺𑀁 𑀦𑀺𑀭𑀢𑁆𑀣𑀁 𑀯𑀺𑀳𑀜𑁆𑀜𑀲𑀻’’’𑀢𑀺.

𑀢𑀢𑁆𑀣 𑀩𑀻𑀚𑀓𑁄𑀧𑀻𑀢𑀺 𑀩𑀻𑀚𑀓𑁄𑀧𑀺 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀤𑀸𑀲𑀺𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀢𑀺 ¶ 𑀩𑀻𑀚𑀓𑀯𑀢𑁆𑀣𑀼𑀫𑁆𑀧𑀺𑀲𑁆𑀲𑀸 𑀉𑀤𑀸𑀳𑀭𑀡𑀢𑁆𑀣𑀁 𑀆𑀳𑀭𑀺. 𑀦𑀢𑁆𑀣𑀺 𑀪𑀤𑁆𑀤𑁂𑀢𑀺 𑀪𑀤𑁆𑀤𑁂, 𑀕𑀼𑀡𑀸𑀘𑀭𑀺𑀬𑁄 𑀏𑀯𑀫𑀸𑀳 ‘‘𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’’𑀢𑀺. 𑀧𑀭𑀮𑁄𑀓𑁂 𑀳𑀺 𑀲𑀢𑀺 𑀇𑀥𑀮𑁄𑀓𑁄𑀧𑀺 𑀦𑀸𑀫 𑀪𑀯𑁂𑀬𑁆𑀬, 𑀲𑁄𑀬𑁂𑀯 𑀘 𑀦𑀢𑁆𑀣𑀺. 𑀫𑀸𑀢𑀸𑀧𑀺𑀢𑀽𑀲𑀼 𑀲𑀦𑁆𑀢𑁂𑀲𑀼 𑀧𑀼𑀢𑁆𑀢𑀥𑀻𑀢𑀭𑁄 𑀦𑀸𑀫 𑀪𑀯𑁂𑀬𑁆𑀬𑀽𑀉𑀁, 𑀢𑁂𑀬𑁂𑀯 𑀘 𑀦𑀢𑁆𑀣𑀺. 𑀥𑀫𑁆𑀫𑁂 𑀲𑀢𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀪𑀯𑁂𑀬𑁆𑀬𑀽𑀁, 𑀢𑁂𑀬𑁂𑀯 𑀘 𑀦𑀢𑁆𑀣𑀺. 𑀓𑀺𑀁 𑀤𑀸𑀦𑀁 𑀤𑁂𑀦𑁆𑀢𑀻 𑀲𑀻𑀮𑀁 𑀭𑀓𑁆𑀔𑀦𑁆𑀢𑀻 𑀦𑀺𑀭𑀢𑁆𑀣𑀁 𑀯𑀺𑀳𑀜𑁆𑀜𑀲𑀻𑀢𑀺.

𑁧𑁨𑁩𑁮.

‘‘𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀼𑀘𑀸 𑀭𑀼𑀘𑀺𑀭𑀯𑀡𑁆𑀡𑀺𑀦𑀻;

𑀚𑀸𑀦𑀁 𑀧𑀼𑀩𑁆𑀩𑀸𑀧𑀭𑀁 𑀥𑀫𑁆𑀫𑀁, 𑀧𑀺𑀢𑀭𑀁 𑀏𑀢𑀤𑀩𑁆𑀭𑀯𑀺.

𑁧𑁨𑁩𑁯.

‘𑀲𑀼𑀢𑀫𑁂𑀯 𑀧𑀼𑀭𑁂 𑀆𑀲𑀺, 𑀲𑀓𑁆𑀔𑀺 𑀤𑀺𑀝𑁆𑀞𑀫𑀺𑀤𑀁 𑀫𑀬𑀸;

𑀩𑀸𑀮𑀽𑀧𑀲𑁂𑀯𑀻 𑀬𑁄 𑀳𑁄𑀢𑀺, 𑀩𑀸𑀮𑁄𑀯 𑀲𑀫𑀧𑀚𑁆𑀚𑀣.

𑁧𑁨𑁪𑁦.

‘𑀫𑀽𑀴𑁆𑀳𑁄 ¶ 𑀳𑀺 𑀫𑀽𑀴𑁆𑀳𑀫𑀸𑀕𑀫𑁆𑀫, 𑀪𑀺𑀬𑁆𑀬𑁄 𑀫𑁄𑀳𑀁 𑀦𑀺𑀕𑀘𑁆𑀙𑀢𑀺;

𑀧𑀢𑀺𑀭𑀽𑀧𑀁 𑀅𑀮𑀸𑀢𑁂𑀦, 𑀩𑀻𑀚𑀓𑁂𑀦 𑀘 𑀫𑀼𑀬𑁆𑀳𑀺𑀢𑀼’’’𑀦𑁆𑀢𑀺.

𑀢𑀢𑁆𑀣 𑀧𑀼𑀩𑁆𑀩𑀸𑀧𑀭𑀁 𑀥𑀫𑁆𑀫𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀼𑀘𑀸 𑀭𑀸𑀚𑀥𑀻𑀢𑀸 𑀅𑀢𑀻𑀢𑁂 𑀲𑀢𑁆𑀢𑀚𑀸𑀢𑀺𑀯𑀲𑁂𑀦 𑀧𑀼𑀩𑁆𑀩𑀥𑀫𑁆𑀫𑀁, 𑀅𑀦𑀸𑀕𑀢𑁂 𑀲𑀢𑁆𑀢𑀚𑀸𑀢𑀺𑀯𑀲𑁂𑀦 𑀅𑀦𑀸𑀕𑀢𑀥𑀫𑁆𑀫𑀜𑁆𑀘 𑀚𑀸𑀦𑀦𑁆𑀢𑀻 𑀧𑀺𑀢𑀭𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀫𑁄𑀘𑁂𑀢𑀼𑀓𑀸𑀫𑀸 𑀏𑀢𑀁 ‘‘𑀲𑀼𑀢𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀧𑀚𑁆𑀚𑀣𑀸𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀩𑀸𑀮𑀽𑀧𑀲𑁂𑀯𑀻 𑀳𑁄𑀢𑀺, 𑀲𑁄 𑀩𑀸𑀮𑁄𑀯 𑀲𑀫𑀧𑀚𑁆𑀚𑀢𑀻𑀢𑀺 𑀏𑀢𑀁 𑀫𑀬𑀸 𑀧𑀼𑀩𑁆𑀩𑁂 𑀲𑀼𑀢𑀫𑁂𑀯, 𑀅𑀚𑁆𑀚 𑀧𑀦 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀁. 𑀫𑀽𑀴𑁆𑀳𑁄𑀢𑀺 𑀫𑀕𑁆𑀕𑀫𑀽𑀴𑁆𑀳𑀁 𑀆𑀕𑀫𑁆𑀫 𑀫𑀕𑁆𑀕𑀫𑀽𑀴𑁆𑀳𑁄 𑀯𑀺𑀬 𑀤𑀺𑀝𑁆𑀞𑀺𑀫𑀽𑀴𑁆𑀳𑀁 𑀆𑀕𑀫𑁆𑀫 𑀤𑀺𑀝𑁆𑀞𑀺𑀫𑀽𑀴𑁆𑀳𑁄𑀧𑀺 𑀉𑀢𑁆𑀢𑀭𑀺 𑀫𑁄𑀳𑀁 𑀦𑀺𑀕𑀘𑁆𑀙𑀢𑀺, 𑀫𑀽𑀴𑁆𑀳𑀢𑀭𑁄 𑀳𑁄𑀢𑀺. 𑀅𑀮𑀸𑀢𑁂𑀦𑀸𑀢𑀺 𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀇𑀲𑁆𑀲𑀭𑀺𑀬𑀧𑀼𑀜𑁆𑀜𑀧𑀜𑁆𑀜𑀸𑀳𑀻𑀦𑁂𑀦 𑀅𑀮𑀸𑀢𑀲𑁂𑀦𑀸𑀧𑀢𑀺𑀦𑀸 𑀅𑀘𑁆𑀘𑀦𑁆𑀢𑀳𑀻𑀦𑁂𑀦 𑀤𑀼𑀧𑁆𑀧𑀜𑁆𑀜𑁂𑀦 𑀩𑀻𑀚𑀓𑀤𑀸𑀲𑁂𑀦 𑀘 𑀕𑀸𑀫𑀤𑀸𑀭𑀓𑀲𑀤𑀺𑀲𑀁 𑀅𑀳𑀺𑀭𑀺𑀓𑀁 𑀩𑀸𑀮𑀁 𑀕𑀼𑀡𑀁 𑀆𑀚𑀻𑀯𑀓𑀁 𑀆𑀕𑀫𑁆𑀫 𑀫𑀼𑀬𑁆𑀳𑀺𑀢𑀼𑀁 𑀧𑀢𑀺𑀭𑀽𑀧𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀓𑀺𑀁 𑀢𑁂 𑀦 𑀫𑀼𑀬𑁆𑀳𑀺𑀲𑁆𑀲𑀦𑁆𑀢𑀻𑀢𑀺?

𑀏𑀯𑀁 𑀢𑁂 𑀉𑀪𑁄𑀧𑀺 𑀕𑀭𑀳𑀺𑀢𑁆𑀯𑀸 𑀤𑀺𑀝𑁆𑀞𑀺𑀢𑁄 𑀫𑁄𑀘𑁂𑀢𑀼𑀓𑀸𑀫𑀢𑀸𑀬 𑀧𑀺𑀢𑀭𑀁 𑀯𑀡𑁆𑀡𑁂𑀦𑁆𑀢𑀻 𑀆𑀳 𑁋

𑁧𑁨𑁪𑁧.

‘‘𑀢𑁆𑀯𑀜𑁆𑀘 ¶ 𑀤𑁂𑀯𑀸𑀲𑀺 𑀲𑀧𑁆𑀧𑀜𑁆𑀜𑁄, 𑀥𑀻𑀭𑁄 𑀅𑀢𑁆𑀣𑀲𑁆𑀲 𑀓𑁄𑀯𑀺𑀤𑁄;

𑀓𑀣𑀁 𑀩𑀸𑀮𑁂𑀪𑀺 𑀲𑀤𑀺𑀲𑀁, 𑀳𑀻𑀦𑀤𑀺𑀝𑁆𑀞𑀺𑀁 𑀉𑀧𑀸𑀕𑀫𑀺.

𑁧𑁨𑁪𑁨.

‘‘𑀲𑀘𑁂𑀧𑀺 ¶ 𑀲𑀁𑀲𑀸𑀭𑀧𑀣𑁂𑀦 𑀲𑀼𑀚𑁆𑀛𑀢𑀺, 𑀦𑀺𑀭𑀢𑁆𑀣𑀺𑀬𑀸 𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑁆𑀲;

𑀓𑀻𑀝𑁄𑀯 𑀅𑀕𑁆𑀕𑀺𑀁 𑀚𑀮𑀺𑀢𑀁 𑀅𑀧𑀸𑀧𑀢𑀁, 𑀉𑀧𑀧𑀚𑁆𑀚𑀢𑀺 𑀫𑁄𑀳𑀫𑀽𑀴𑁆𑀳𑁄 𑀦𑀕𑁆𑀕𑀪𑀸𑀯𑀁.

𑁧𑁨𑁪𑁩.

‘‘𑀲𑀁𑀲𑀸𑀭𑀲𑀼𑀤𑁆𑀥𑀻𑀢𑀺 𑀧𑀼𑀭𑁂 𑀦𑀺𑀯𑀺𑀝𑁆𑀞𑀸, 𑀓𑀫𑁆𑀫𑀁 𑀯𑀺𑀤𑀽𑀲𑁂𑀦𑁆𑀢𑀺 𑀩𑀳𑀽 𑀅𑀚𑀸𑀦𑀁;

𑀧𑀼𑀩𑁆𑀩𑁂 𑀓𑀮𑀻 𑀤𑀼𑀕𑁆𑀕𑀳𑀺𑀢𑁄𑀯𑀦𑀢𑁆𑀣𑀸, 𑀤𑀼𑀫𑁆𑀫𑁄𑀘𑀬𑀸 𑀩𑀮𑀺𑀲𑀸 𑀅𑀫𑁆𑀩𑀼𑀚𑁄𑀯𑀸’’𑀢𑀺.

𑀢𑀢𑁆𑀣 𑀲𑀧𑁆𑀧𑀜𑁆𑀜𑁄𑀢𑀺 𑀬𑀲𑀯𑀬𑀧𑀼𑀜𑁆𑀜𑀢𑀺𑀢𑁆𑀣𑀸𑀯𑀸𑀲𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀸𑀓𑀘𑁆𑀙𑀸𑀯𑀲𑁂𑀦 𑀮𑀤𑁆𑀥𑀸𑀬 𑀧𑀜𑁆𑀜𑀸𑀬 𑀲𑀧𑁆𑀧𑀜𑁆𑀜𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀥𑀻𑀭𑁄, 𑀥𑀻𑀭𑀢𑀸𑀬 𑀅𑀢𑁆𑀣𑀸𑀦𑀢𑁆𑀣𑀲𑁆𑀲 𑀓𑀸𑀭𑀡𑀸𑀓𑀸𑀭𑀡𑀲𑁆𑀲 𑀓𑁄𑀯𑀺𑀤𑁄. 𑀩𑀸𑀮𑁂𑀪𑀺 𑀲𑀤𑀺𑀲𑀦𑁆𑀢𑀺 𑀬𑀣𑀸 𑀢𑁂 𑀩𑀸𑀮𑀸 𑀉𑀧𑀕𑀢𑀸, 𑀢𑀣𑀸 𑀓𑀣𑀁 ¶ 𑀢𑁆𑀯𑀁 𑀳𑀻𑀦𑀤𑀺𑀝𑁆𑀞𑀺𑀁 𑀉𑀧𑀕𑀢𑁄. 𑀅𑀧𑀸𑀧𑀢𑀦𑁆𑀢𑀺 𑀅𑀧𑀺 𑀆𑀧𑀢𑀁, 𑀧𑀢𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀸𑀢, 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀻𑀢𑀺 𑀮𑀤𑁆𑀥𑀺𑀬𑀸 𑀲𑀢𑀺 𑀬𑀣𑀸 𑀧𑀝𑀗𑁆𑀕𑀓𑀻𑀝𑁄 𑀭𑀢𑁆𑀢𑀺𑀪𑀸𑀕𑁂 𑀚𑀮𑀺𑀢𑀁 𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 𑀢𑀧𑁆𑀧𑀘𑁆𑀘𑀬𑀁 𑀤𑀼𑀓𑁆𑀔𑀁 𑀅𑀚𑀸𑀦𑀺𑀢𑁆𑀯𑀸 𑀫𑁄𑀳𑁂𑀦 𑀢𑀢𑁆𑀣 𑀧𑀢𑀦𑁆𑀢𑁄 𑀫𑀳𑀸𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀺, 𑀢𑀣𑀸 𑀕𑀼𑀡𑁄𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀳𑀸𑀬 𑀫𑁄𑀳𑀫𑀽𑀴𑁆𑀳𑁄 𑀦𑀺𑀭𑀲𑁆𑀲𑀸𑀤𑀁 𑀦𑀕𑁆𑀕𑀪𑀸𑀯𑀁 𑀉𑀧𑀧𑀚𑁆𑀚𑀢𑀺.

𑀧𑀼𑀭𑁂 𑀦𑀺𑀯𑀺𑀝𑁆𑀞𑀸𑀢𑀺 𑀢𑀸𑀢, 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀻𑀢𑀺 𑀓𑀲𑁆𑀲𑀘𑀺 𑀯𑀘𑀦𑀁 𑀅𑀲𑀼𑀢𑁆𑀯𑀸 𑀧𑀞𑀫𑀫𑁂𑀯 𑀦𑀺𑀯𑀺𑀝𑁆𑀞𑁄 𑀦𑀢𑁆𑀣𑀺, 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀩𑀳𑀽 𑀚𑀦𑀸 𑀅𑀚𑀸𑀦𑀦𑁆𑀢𑀸 𑀓𑀫𑁆𑀫𑀁 𑀯𑀺𑀤𑀽𑀲𑁂𑀦𑁆𑀢𑀸 𑀓𑀫𑁆𑀫𑀨𑀮𑀫𑁆𑀧𑀺 𑀯𑀺𑀤𑀽𑀲𑁂𑀦𑁆𑀢𑀺𑀬𑁂𑀯, 𑀏𑀯𑀁 𑀢𑁂𑀲𑀁 𑀧𑀼𑀩𑁆𑀩𑁂 𑀕𑀳𑀺𑀢𑁄 𑀓𑀮𑀺 𑀧𑀭𑀸𑀚𑀬𑀕𑀸𑀳𑁄 𑀤𑀼𑀕𑁆𑀕𑀳𑀺𑀢𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀫𑁆𑀫𑁄𑀘𑀬𑀸 𑀩𑀮𑀺𑀲𑀸 𑀅𑀫𑁆𑀩𑀼𑀚𑁄𑀯𑀸𑀢𑀺 𑀢𑁂 𑀧𑀦 𑀏𑀯𑀁 𑀅𑀚𑀸𑀦𑀦𑁆𑀢𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀅𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀩𑀸𑀮𑀸 𑀬𑀣𑀸 𑀦𑀸𑀫 𑀩𑀮𑀺𑀲𑀁 𑀕𑀺𑀮𑀺𑀢𑁆𑀯𑀸 𑀞𑀺𑀢𑁄 𑀫𑀘𑁆𑀙𑁄 𑀩𑀮𑀺𑀲𑀸 𑀤𑀼𑀫𑁆𑀫𑁄𑀘𑀬𑁄 𑀳𑁄𑀢𑀺, 𑀏𑀯𑀁 𑀢𑀫𑁆𑀳𑀸 𑀅𑀦𑀢𑁆𑀣𑀸 𑀤𑀼𑀫𑁆𑀫𑁄𑀘𑀬𑀸 𑀳𑁄𑀦𑁆𑀢𑀺.

𑀉𑀢𑁆𑀢𑀭𑀺𑀧𑀺 𑀉𑀤𑀸𑀳𑀭𑀡𑀁 𑀆𑀳𑀭𑀦𑁆𑀢𑀻 𑀆𑀳 𑁋

𑁧𑁨𑁪𑁪.

‘‘𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚 𑀢𑀯𑀢𑁆𑀣𑀺𑀬𑀸;

𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂, 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁧𑁨𑁪𑁫.

‘‘𑀯𑀸𑀡𑀺𑀚𑀸𑀦𑀁 𑀬𑀣𑀸 𑀦𑀸𑀯𑀸, 𑀅𑀧𑁆𑀧𑀫𑀸𑀡𑀪𑀭𑀸 𑀕𑀭𑀼;

𑀅𑀢𑀺𑀪𑀸𑀭𑀁 𑀲𑀫𑀸𑀤𑀸𑀬, 𑀅𑀡𑁆𑀡𑀯𑁂 𑀅𑀯𑀲𑀻𑀤𑀢𑀺.

𑁧𑁨𑁪𑁬.

‘‘𑀏𑀯𑀫𑁂𑀯 ¶ 𑀦𑀭𑁄 𑀧𑀸𑀧𑀁, 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀆𑀘𑀺𑀦𑀁;

𑀅𑀢𑀺𑀪𑀸𑀭𑀁 𑀲𑀫𑀸𑀤𑀸𑀬, 𑀦𑀺𑀭𑀬𑁂 𑀅𑀯𑀲𑀻𑀤𑀢𑀺.

𑁧𑁨𑁪𑁭.

‘‘𑀦 𑀢𑀸𑀯 𑀪𑀸𑀭𑁄 𑀧𑀭𑀺𑀧𑀽𑀭𑁄, 𑀅𑀮𑀸𑀢𑀲𑁆𑀲 𑀫𑀳𑀻𑀧𑀢𑀺;

𑀆𑀘𑀺𑀦𑀸𑀢𑀺 𑀘 𑀢𑀁 𑀧𑀸𑀧𑀁, 𑀬𑁂𑀦 𑀕𑀘𑁆𑀙𑀢𑀺 𑀤𑀼𑀕𑁆𑀕𑀢𑀺𑀁.

𑁧𑁨𑁪𑁮.

‘‘𑀧𑀼𑀩𑁆𑀩𑁂𑀯𑀲𑁆𑀲 𑀓𑀢𑀁 𑀧𑀼𑀜𑁆𑀜𑀁, 𑀅𑀮𑀸𑀢𑀲𑁆𑀲 𑀫𑀳𑀻𑀧𑀢𑀺;

𑀢𑀲𑁆𑀲𑁂𑀯 𑀤𑁂𑀯 𑀦𑀺𑀲𑁆𑀲𑀦𑁆𑀤𑁄, 𑀬𑀜𑁆𑀘𑁂𑀲𑁄 𑀮𑀪𑀢𑁂 𑀲𑀼𑀔𑀁.

𑁧𑁨𑁪𑁯.

‘‘𑀔𑀻𑀬𑀢𑁂 𑀘𑀲𑁆𑀲 𑀢𑀁 𑀧𑀼𑀜𑁆𑀜𑀁, 𑀢𑀣𑀸 𑀳𑀺 𑀅𑀕𑀼𑀡𑁂 𑀭𑀢𑁄;

𑀉𑀚𑀼𑀫𑀕𑁆𑀕𑀁 𑀅𑀯𑀳𑀸𑀬, 𑀓𑀼𑀫𑁆𑀫𑀕𑁆𑀕𑀫𑀦𑀼𑀥𑀸𑀯𑀢𑀺.

𑁧𑁨𑁫𑁦.

‘‘𑀢𑀼𑀮𑀸 ¶ ¶ 𑀬𑀣𑀸 𑀧𑀕𑁆𑀕𑀳𑀺𑀢𑀸, 𑀑𑀳𑀺𑀢𑁂 𑀢𑀼𑀮𑀫𑀡𑁆𑀟𑀮𑁂;

𑀉𑀦𑁆𑀦𑀫𑁂𑀢𑀺 𑀢𑀼𑀮𑀸𑀲𑀻𑀲𑀁, 𑀪𑀸𑀭𑁂 𑀑𑀭𑁄𑀧𑀺𑀢𑁂 𑀲𑀢𑀺.

𑁧𑁨𑁫𑁧.

‘‘𑀏𑀯𑀫𑁂𑀯 𑀦𑀭𑁄 𑀧𑀼𑀜𑁆𑀜𑀁, 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀆𑀘𑀺𑀦𑀁;

𑀲𑀕𑁆𑀕𑀸𑀢𑀺𑀫𑀸𑀦𑁄 𑀤𑀸𑀲𑁄𑀯, 𑀩𑀻𑀚𑀓𑁄 𑀲𑀸𑀢𑀯𑁂 𑀭𑀢𑁄’’𑀢𑀺.

𑀢𑀢𑁆𑀣 𑀦𑀺𑀭𑀬𑁂𑀢𑀺 𑀅𑀝𑁆𑀞𑀯𑀺𑀥𑁂 𑀫𑀳𑀸𑀦𑀺𑀭𑀬𑁂, 𑀲𑁄𑀴𑀲𑀯𑀺𑀥𑁂 𑀉𑀲𑁆𑀲𑀤𑀦𑀺𑀭𑀬𑁂, 𑀮𑁄𑀓𑀦𑁆𑀢𑀭𑀦𑀺𑀭𑀬𑁂 𑀘. 𑀪𑀸𑀭𑁄𑀢𑀺 𑀢𑀸𑀢, 𑀦 𑀢𑀸𑀯 𑀅𑀮𑀸𑀢𑀲𑁆𑀲 𑀅𑀓𑀼𑀲𑀮𑀪𑀸𑀭𑁄 𑀧𑀽𑀭𑀢𑀺. 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀧𑀼𑀜𑁆𑀜𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁄, 𑀬𑀁 𑀲𑁄 𑀅𑀮𑀸𑀢𑀲𑁂𑀦𑀸𑀧𑀢𑀺 𑀅𑀚𑁆𑀚 𑀲𑀼𑀔𑀁 𑀮𑀪𑀢𑀺. 𑀦 𑀳𑀺 𑀢𑀸𑀢, 𑀏𑀢𑀁 𑀕𑁄𑀖𑀸𑀢𑀓𑀓𑀫𑁆𑀫𑀲𑁆𑀲 𑀨𑀮𑀁. 𑀧𑀸𑀧𑀓𑀫𑁆𑀫𑀲𑁆𑀲 𑀳𑀺 𑀦𑀸𑀫 𑀯𑀺𑀧𑀸𑀓𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁. 𑀅𑀕𑀼𑀡𑁂 𑀭𑀢𑁄𑀢𑀺 𑀢𑀣𑀸𑀳𑁂𑀲 𑀇𑀤𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑁂 𑀭𑀢𑁄. 𑀉𑀚𑀼𑀫𑀕𑁆𑀕𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀫𑀕𑁆𑀕𑀁. 𑀓𑀼𑀫𑁆𑀫𑀕𑁆𑀕𑀦𑁆𑀢𑀺 𑀦𑀺𑀭𑀬𑀕𑀸𑀫𑀺𑀅𑀓𑀼𑀲𑀮𑀫𑀕𑁆𑀕𑀁.

𑀑𑀳𑀺𑀢𑁂 𑀢𑀼𑀮𑀫𑀡𑁆𑀟𑀮𑁂𑀢𑀺 𑀪𑀡𑁆𑀟𑀧𑀝𑀺𑀘𑁆𑀙𑀦𑀢𑁆𑀣𑀸𑀬 𑀢𑀼𑀮𑀫𑀡𑁆𑀟𑀮𑁂 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑁂. 𑀉𑀦𑁆𑀦𑀫𑁂𑀢𑀻𑀢𑀺 𑀉𑀤𑁆𑀥𑀁 𑀉𑀓𑁆𑀔𑀺𑀧𑀢𑀺. 𑀆𑀘𑀺𑀦𑀦𑁆𑀢𑀺 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀼𑀜𑁆𑀜𑀁 𑀆𑀘𑀺𑀦𑀦𑁆𑀢𑁄 𑀧𑀸𑀧𑀪𑀸𑀭𑀁 𑀑𑀢𑀸𑀭𑁂𑀢𑁆𑀯𑀸 𑀦𑀭𑁄 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀘𑁆𑀙𑀢𑀺. 𑀲𑀕𑁆𑀕𑀸𑀢𑀺𑀫𑀸𑀦𑁄𑀢𑀺 𑀲𑀕𑁆𑀕𑁂 𑀅𑀢𑀺𑀫𑀸𑀦𑁄 𑀲𑀕𑁆𑀕𑀲𑀫𑁆𑀧𑀸𑀧𑀓𑁂 𑀲𑀸𑀢𑀨𑀮𑁂 𑀓𑀮𑁆𑀬𑀸𑀡𑀓𑀫𑁆𑀫𑁂 𑀅𑀪𑀺𑀭𑀢𑁄. ‘‘𑀲𑀕𑁆𑀕𑀸𑀥𑀺𑀫𑀸𑀦𑁄’’𑀢𑀺𑀧𑀺 𑀧𑀸𑀞𑁄, 𑀲𑀕𑁆𑀕𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀞𑀺𑀢𑀘𑀺𑀢𑁆𑀢𑁄𑀢𑀺 ¶ 𑀅𑀢𑁆𑀣𑁄. 𑀲𑀸𑀢𑀯𑁂 𑀭𑀢𑁄𑀢𑀺 𑀏𑀲 𑀩𑀻𑀚𑀓𑀤𑀸𑀲𑁄 𑀲𑀸𑀢𑀯𑁂 𑀫𑀥𑀼𑀭𑀯𑀺𑀧𑀸𑀓𑁂 𑀓𑀼𑀲𑀮𑀥𑀫𑁆𑀫𑁂𑀬𑁂𑀯 𑀭𑀢𑁄. 𑀲𑁄 𑀇𑀫𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀔𑀻𑀡𑀓𑀸𑀮𑁂, 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀨𑀮𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺.

𑀬𑀜𑁆𑀘𑁂𑀲 𑀇𑀤𑀸𑀦𑀺 𑀤𑀸𑀲𑀢𑁆𑀢𑀁 𑀉𑀧𑀕𑀢𑁄, 𑀦 𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀨𑀮𑁂𑀦. 𑀤𑀸𑀲𑀢𑁆𑀢𑀲𑀁𑀯𑀢𑁆𑀢𑀦𑀺𑀓𑀜𑁆𑀳𑀺𑀲𑁆𑀲 𑀧𑀼𑀩𑁆𑀩𑁂 𑀓𑀢𑀁 𑀧𑀸𑀧𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁫𑁨.

‘‘𑀬𑀫𑀚𑁆𑀚 𑀩𑀻𑀚𑀓𑁄 𑀤𑀸𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺 𑀅𑀢𑁆𑀢𑀦𑀺;

𑀧𑀼𑀩𑁆𑀩𑁂𑀯𑀲𑁆𑀲 𑀓𑀢𑀁 𑀧𑀸𑀧𑀁, 𑀢𑀫𑁂𑀲𑁄 𑀧𑀝𑀺𑀲𑁂𑀯𑀢𑀺.

𑁧𑁨𑁫𑁩.

‘‘𑀔𑀻𑀬𑀢𑁂 𑀘𑀲𑁆𑀲 𑀢𑀁 𑀧𑀸𑀧𑀁, 𑀢𑀣𑀸 𑀳𑀺 𑀯𑀺𑀦𑀬𑁂 𑀭𑀢𑁄;

𑀓𑀲𑁆𑀲𑀧𑀜𑁆𑀘 𑀲𑀫𑀸𑀧𑀚𑁆𑀚, 𑀫𑀸 𑀳𑁂𑀯𑀼𑀧𑁆𑀧𑀣𑀫𑀸𑀕𑀫𑀸’’𑀢𑀺.

𑀢𑀢𑁆𑀣 ¶ 𑀫𑀸 𑀳𑁂𑀯𑀼𑀧𑁆𑀧𑀣𑀫𑀸𑀕𑀫𑀸𑀢𑀺 𑀢𑀸𑀢, 𑀢𑁆𑀯𑀁 𑀇𑀫𑀁 𑀦𑀕𑁆𑀕𑀁 𑀓𑀲𑁆𑀲𑀧𑀸𑀚𑀻𑀯𑀓𑀁 𑀉𑀧𑀕𑀦𑁆𑀢𑁆𑀯𑀸 𑀫𑀸 𑀳𑁂𑀯 𑀦𑀺𑀭𑀬𑀕𑀸𑀫𑀺𑀁 𑀉𑀧𑁆𑀧𑀣𑀁 𑀅𑀕𑀫𑀸, 𑀫𑀸 𑀧𑀸𑀧𑀫𑀓𑀸𑀲𑀻𑀢𑀺 𑀧𑀺𑀢𑀭𑀁 𑀑𑀯𑀤𑀢𑀺.

𑀇𑀤𑀸𑀦𑀺𑀲𑁆𑀲 𑀧𑀸𑀧𑀽𑀧𑀲𑁂𑀯𑀦𑀸𑀬 𑀤𑁄𑀲𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀲𑁂𑀯𑀦𑀸𑀬 𑀘 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁫𑁪.

‘‘𑀬𑀁 𑀬𑀜𑁆𑀳𑀺 𑀭𑀸𑀚 𑀪𑀚𑀢𑀺, 𑀲𑀦𑁆𑀢𑀁 𑀯𑀸 𑀬𑀤𑀺 𑀯𑀸 𑀅𑀲𑀁;

𑀲𑀻𑀮𑀯𑀦𑁆𑀢𑀁 𑀯𑀺𑀲𑀻𑀮𑀁 𑀯𑀸, 𑀯𑀲𑀁 𑀢𑀲𑁆𑀲𑁂𑀯 𑀕𑀘𑁆𑀙𑀢𑀺.

𑁧𑁨𑁫𑁫.

‘‘𑀬𑀸𑀤𑀺𑀲𑀁 𑀓𑀼𑀭𑀼𑀢𑁂 𑀫𑀺𑀢𑁆𑀢𑀁, 𑀬𑀸𑀤𑀺𑀲𑀁 𑀘𑀽𑀧𑀲𑁂𑀯𑀢𑀺;

𑀲𑁄𑀧𑀺 𑀢𑀸𑀤𑀺𑀲𑀓𑁄 𑀳𑁄𑀢𑀺, 𑀲𑀳𑀯𑀸𑀲𑁄 𑀳𑀺 𑀢𑀸𑀤𑀺𑀲𑁄.

𑁧𑁨𑁫𑁬.

‘‘𑀲𑁂𑀯𑀫𑀸𑀦𑁄 ¶ 𑀲𑁂𑀯𑀫𑀸𑀦𑀁, 𑀲𑀫𑁆𑀨𑀼𑀝𑁆𑀞𑁄 𑀲𑀫𑁆𑀨𑀼𑀲𑀁 𑀧𑀭𑀁;

𑀲𑀭𑁄 𑀤𑀺𑀤𑁆𑀥𑁄 𑀓𑀮𑀸𑀧𑀁𑀯, 𑀅𑀮𑀺𑀢𑁆𑀢𑀫𑀼𑀧𑀮𑀺𑀫𑁆𑀧𑀢𑀺;

𑀉𑀧𑀮𑁂𑀧𑀪𑀬𑀸 𑀥𑀻𑀭𑁄, 𑀦𑁂𑀯 𑀧𑀸𑀧𑀲𑀔𑀸 𑀲𑀺𑀬𑀸.

𑁧𑁨𑁫𑁭.

‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸.

𑁧𑁨𑁫𑁮.

‘‘𑀢𑀕𑀭𑀜𑁆𑀘 ¶ 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸.

𑁧𑁨𑁫𑁯.

‘‘𑀢𑀲𑁆𑀫𑀸 𑀧𑀢𑁆𑀢𑀧𑀼𑀝𑀲𑁆𑀲𑁂𑀯, 𑀜𑀢𑁆𑀯𑀸 𑀲𑀫𑁆𑀧𑀸𑀓𑀫𑀢𑁆𑀢𑀦𑁄

𑀅𑀲𑀦𑁆𑀢𑁂 𑀦𑁄𑀧𑀲𑁂𑀯𑁂𑀬𑁆𑀬, 𑀲𑀦𑁆𑀢𑁂 𑀲𑁂𑀯𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀦𑁂𑀦𑁆𑀢𑀺, 𑀲𑀦𑁆𑀢𑁄 𑀧𑀸𑀧𑁂𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺.

𑀢𑀢𑁆𑀣 𑀲𑀦𑁆𑀢𑀁 𑀯𑀸𑀢𑀺 𑀲𑀧𑁆𑀧𑀼𑀭𑀺𑀲𑀁 𑀯𑀸. 𑀬𑀤𑀺 𑀯𑀸 𑀅𑀲𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑀁 𑀯𑀸. 𑀲𑀭𑁄 𑀤𑀺𑀤𑁆𑀥𑁄 𑀓𑀮𑀸𑀧𑀁𑀯𑀸𑀢𑀺 𑀫𑀳𑀸𑀭𑀸𑀚, 𑀬𑀣𑀸 𑀦𑀸𑀫 𑀳𑀮𑀸𑀳𑀮𑀯𑀺𑀲𑀮𑀺𑀢𑁆𑀢𑁄 𑀲𑀭𑁄 𑀲𑀭𑀓𑀮𑀸𑀧𑁂 𑀔𑀺𑀢𑁆𑀢𑁄 𑀲𑀩𑁆𑀩𑀁 𑀢𑀁 𑀯𑀺𑀲𑁂𑀦 𑀅𑀮𑀺𑀢𑁆𑀢𑀫𑁆𑀧𑀺 𑀲𑀭𑀓𑀮𑀸𑀧𑀁 𑀮𑀺𑀫𑁆𑀧𑀢𑀺, 𑀯𑀺𑀲𑀤𑀺𑀤𑁆𑀥𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀁 𑀲𑁂𑀯𑀫𑀸𑀦𑁄 𑀅𑀢𑁆𑀢𑀸𑀦𑀁 𑀲𑁂𑀯𑀫𑀸𑀦𑀁 𑀧𑀭𑀁, 𑀢𑁂𑀦 𑀲𑀫𑁆𑀨𑀼𑀝𑁆𑀞𑁄 𑀢𑀁 𑀲𑀫𑁆𑀨𑀼𑀲𑀁 𑀅𑀮𑀺𑀢𑁆𑀢𑀁 𑀧𑀸𑀧𑁂𑀦 𑀧𑀼𑀭𑀺𑀲𑀁 𑀅𑀢𑁆𑀢𑀦𑀸 𑀏𑀓𑀚𑁆𑀛𑀸𑀲𑀬𑀁 𑀓𑀭𑁄𑀦𑁆𑀢𑁄 𑀉𑀧𑀮𑀺𑀫𑁆𑀧𑀢𑀺. 𑀧𑀽𑀢𑀺 𑀯𑀸𑀬𑀦𑁆𑀢𑀻𑀢𑀺 𑀢𑀲𑁆𑀲 𑀢𑁂 𑀓𑀼𑀲𑀸𑀧𑀺 𑀤𑀼𑀕𑁆𑀕𑀦𑁆𑀥𑀸 𑀯𑀸𑀬𑀦𑁆𑀢𑀺. 𑀢𑀕𑀭𑀜𑁆𑀘𑀸𑀢𑀺 𑀢𑀕𑀭𑀜𑁆𑀘 𑀅𑀜𑁆𑀜𑀜𑁆𑀘 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀕𑀦𑁆𑀥𑀚𑀸𑀢𑀁. 𑀏𑀯𑀦𑁆𑀢𑀺 𑀏𑀯𑀭𑀽𑀧𑀸 𑀥𑀻𑀭𑀽𑀧𑀲𑁂𑀯𑀦𑀸. 𑀥𑀻𑀭𑁄 𑀳𑀺 𑀅𑀢𑁆𑀢𑀸𑀦𑀁 𑀲𑁂𑀯𑀫𑀸𑀦𑀁 𑀥𑀻𑀭𑀫𑁂𑀯 𑀓𑀭𑁄𑀢𑀺.

𑀢𑀲𑁆𑀫𑀸 ¶ 𑀧𑀢𑁆𑀢𑀧𑀼𑀝𑀲𑁆𑀲𑁂𑀯𑀸𑀢𑀺 𑀬𑀲𑁆𑀫𑀸 𑀢𑀕𑀭𑀸𑀤𑀺𑀧𑀮𑀺𑀯𑁂𑀞𑀫𑀸𑀦𑀸𑀦𑀺 𑀧𑀡𑁆𑀡𑀸𑀦𑀺𑀧𑀺 𑀲𑀼𑀕𑀦𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀮𑀸𑀲𑀧𑀢𑁆𑀢𑀧𑀼𑀝𑀲𑁆𑀲𑁂𑀯 𑀧𑀡𑁆𑀟𑀺𑀢𑀽𑀧𑀲𑁂𑀯𑀦𑁂𑀦 𑀅𑀳𑀫𑁆𑀧𑀺 𑀧𑀡𑁆𑀟𑀺𑀢𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀏𑀯𑀁. 𑀜𑀢𑁆𑀯𑀸 𑀲𑀫𑁆𑀧𑀸𑀓𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀧𑀭𑀺𑀧𑀸𑀓𑀁 𑀧𑀡𑁆𑀟𑀺𑀢𑀪𑀸𑀯𑀁 𑀧𑀭𑀺𑀫𑀸𑀡𑀁 𑀜𑀢𑁆𑀯𑀸 𑀅𑀲𑀦𑁆𑀢𑁂 𑀧𑀳𑀸𑀬 𑀧𑀡𑁆𑀟𑀺𑀢𑁂 𑀲𑀦𑁆𑀢𑁂 𑀲𑁂𑀯𑁂𑀬𑁆𑀬. ‘‘𑀦𑀺𑀭𑀬𑀁 𑀦𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀤𑁂𑀯𑀤𑀢𑁆𑀢𑀸𑀤𑀻𑀳𑀺 𑀦𑀺𑀭𑀬𑀁, ‘‘𑀧𑀸𑀧𑁂𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺 𑀏𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀳𑀺 𑀲𑀼𑀕𑀢𑀺𑀁 𑀦𑀻𑀢𑀸𑀦𑀁 𑀯𑀲𑁂𑀦 𑀉𑀤𑀸𑀳𑀭𑀡𑀸𑀦𑀺 𑀆𑀳𑀭𑀺𑀢𑀩𑁆𑀩𑀸𑀦𑀺.

𑀏𑀯𑀁 𑀭𑀸𑀚𑀥𑀻𑀢𑀸 𑀙𑀳𑀺 𑀕𑀸𑀣𑀸𑀳𑀺 𑀧𑀺𑀢𑀼 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑀻𑀢𑁂 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀁 𑀤𑀼𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁬𑁦.

‘‘𑀅𑀳𑀫𑁆𑀧𑀺 𑀚𑀸𑀢𑀺𑀬𑁄 𑀲𑀢𑁆𑀢, 𑀲𑀭𑁂 𑀲𑀁𑀲𑀭𑀺𑀢𑀢𑁆𑀢𑀦𑁄;

𑀅𑀦𑀸𑀕𑀢𑀸𑀧𑀺 𑀲𑀢𑁆𑀢𑁂𑀯, 𑀬𑀸 𑀕𑀫𑀺𑀲𑁆𑀲𑀁 𑀇𑀢𑁄 𑀘𑀼𑀢𑀸.

𑁧𑁨𑁬𑁧.

‘‘𑀬𑀸 𑀫𑁂 𑀲𑀸 𑀲𑀢𑁆𑀢𑀫𑀻 𑀚𑀸𑀢𑀺, 𑀅𑀳𑀼 𑀧𑀼𑀩𑁆𑀩𑁂 𑀚𑀦𑀸𑀥𑀺𑀧;

𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀫𑀕𑀥𑁂𑀲𑀼, 𑀅𑀳𑀼𑀁 𑀭𑀸𑀚𑀕𑀳𑁂 𑀧𑀼𑀭𑁂.

𑁧𑁨𑁬𑁨.

‘‘𑀧𑀸𑀧𑀁 ¶ 𑀲𑀳𑀸𑀬𑀫𑀸𑀕𑀫𑁆𑀫, 𑀩𑀳𑀼𑀁 𑀧𑀸𑀧𑀁 𑀓𑀢𑀁 𑀫𑀬𑀸;

𑀧𑀭𑀤𑀸𑀭𑀲𑁆𑀲 𑀳𑁂𑀞𑁂𑀦𑁆𑀢𑁄, 𑀘𑀭𑀺𑀫𑁆𑀳𑀸 𑀅𑀫𑀭𑀸 𑀯𑀺𑀬.

𑁧𑁨𑁬𑁩.

‘‘𑀢𑀁 𑀓𑀫𑁆𑀫𑀁 𑀦𑀺𑀳𑀺𑀢𑀁 𑀅𑀝𑁆𑀞𑀸, 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 𑀧𑀸𑀯𑀓𑁄;

𑀅𑀣 𑀅𑀜𑁆𑀜𑁂𑀳𑀺 𑀓𑀫𑁆𑀫𑁂𑀳𑀺, 𑀅𑀚𑀸𑀬𑀺𑀁 𑀯𑀁𑀲𑀪𑀽𑀫𑀺𑀬𑀁.

𑁧𑁨𑁬𑁪.

‘‘𑀓𑁄𑀲𑀫𑁆𑀩𑀺𑀬𑀁 ¶ 𑀲𑁂𑀝𑁆𑀞𑀺𑀓𑀼𑀮𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂;

𑀏𑀓𑀧𑀼𑀢𑁆𑀢𑁄 𑀫𑀳𑀸𑀭𑀸𑀚, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑁄.

𑁧𑁨𑁬𑁫.

‘‘𑀢𑀢𑁆𑀣 𑀫𑀺𑀢𑁆𑀢𑀁 𑀅𑀲𑁂𑀯𑀺𑀲𑁆𑀲𑀁, 𑀲𑀳𑀸𑀬𑀁 𑀲𑀸𑀢𑀯𑁂 𑀭𑀢𑀁;

𑀧𑀡𑁆𑀟𑀺𑀢𑀁 𑀲𑀼𑀢𑀲𑀫𑁆𑀧𑀦𑁆𑀦𑀁, 𑀲𑁄 𑀫𑀁 𑀅𑀢𑁆𑀣𑁂 𑀦𑀺𑀯𑁂𑀲𑀬𑀺.

𑁧𑁨𑁬𑁬.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀩𑀳𑀼𑀁 𑀭𑀢𑁆𑀢𑀺𑀁 𑀉𑀧𑀸𑀯𑀲𑀺𑀁;

𑀢𑀁 𑀓𑀫𑁆𑀫𑀁 𑀦𑀺𑀳𑀺𑀢𑀁 𑀅𑀝𑁆𑀞𑀸, 𑀦𑀺𑀥𑀻𑀯 𑀉𑀤𑀓𑀦𑁆𑀢𑀺𑀓𑁂.

𑁧𑁨𑁬𑁭.

‘‘𑀅𑀣 𑀧𑀸𑀧𑀸𑀦 𑀓𑀫𑁆𑀫𑀸𑀦𑀁, 𑀬𑀫𑁂𑀢𑀁 𑀫𑀕𑀥𑁂 𑀓𑀢𑀁;

𑀨𑀮𑀁 𑀧𑀭𑀺𑀬𑀸𑀕 𑀫𑀁 𑀧𑀘𑁆𑀙𑀸, 𑀪𑀼𑀢𑁆𑀯𑀸 𑀤𑀼𑀝𑁆𑀞𑀯𑀺𑀲𑀁 𑀬𑀣𑀸.

𑁧𑁨𑁬𑁮.

‘‘𑀢𑀢𑁄 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀭𑁄𑀭𑀼𑀯𑁂 𑀦𑀺𑀭𑀬𑁂 𑀘𑀺𑀭𑀁;

𑀲𑀓𑀫𑁆𑀫𑀼𑀦𑀸 𑀅𑀧𑀘𑁆𑀘𑀺𑀲𑁆𑀲𑀁, 𑀢𑀁 𑀲𑀭𑀁 𑀦 𑀲𑀼𑀔𑀁 𑀮𑀪𑁂.

𑁧𑁨𑁬𑁯.

‘‘𑀩𑀳𑀼𑀯𑀲𑁆𑀲𑀕𑀡𑁂 ¶ 𑀢𑀢𑁆𑀣, 𑀔𑁂𑀧𑀬𑀺𑀢𑁆𑀯𑀸 𑀩𑀳𑀼𑀁 𑀤𑀼𑀔𑀁;

𑀪𑀺𑀦𑁆𑀦𑀸𑀕𑀢𑁂 𑀅𑀳𑀼𑀁 𑀭𑀸𑀚, 𑀙𑀕𑀮𑁄 𑀉𑀤𑁆𑀥𑀢𑀧𑁆𑀨𑀮𑁄’’𑀢𑀺.

𑀢𑀢𑁆𑀣 𑀲𑀢𑁆𑀢𑀸𑀢𑀺 𑀫𑀳𑀸𑀭𑀸𑀚, 𑀇𑀥𑀮𑁄𑀓𑀧𑀭𑀮𑁄𑀓𑀸 𑀦𑀸𑀫 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀜𑁆𑀘 𑀨𑀮𑀁 𑀦𑀸𑀫 𑀅𑀢𑁆𑀣𑀺. 𑀦 𑀳𑀺 𑀲𑀁𑀲𑀸𑀭𑁄 𑀲𑀢𑁆𑀢𑁂 𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀓𑀫𑁆𑀫𑀼𑀦𑀸 𑀏𑀯 𑀲𑀢𑁆𑀢𑀸 𑀲𑀼𑀚𑁆𑀛𑀦𑁆𑀢𑀺. 𑀅𑀮𑀸𑀢𑀲𑁂𑀦𑀸𑀧𑀢𑀺 𑀘 𑀩𑀻𑀚𑀓𑀤𑀸𑀲𑁄 𑀘 𑀏𑀓𑀫𑁂𑀯 𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀦 𑀓𑁂𑀯𑀮𑀁 𑀏𑀢𑁂𑀯 𑀚𑀸𑀢𑀺𑀁 𑀲𑀭𑀦𑁆𑀢𑀺, 𑀅𑀳𑀫𑁆𑀧𑀺 𑀅𑀢𑀻𑀢𑁂 𑀲𑀢𑁆𑀢 𑀚𑀸𑀢𑀺𑀬𑁄 𑀅𑀢𑁆𑀢𑀦𑁄 𑀲𑀁𑀲𑀭𑀺𑀢𑀁 𑀲𑀭𑀸𑀫𑀺, 𑀅𑀦𑀸𑀕𑀢𑁂𑀧𑀺 𑀇𑀢𑁄 𑀕𑀦𑁆𑀢𑀩𑁆𑀩𑀸 𑀲𑀢𑁆𑀢𑁂𑀯 𑀚𑀸𑀦𑀸𑀫𑀺. 𑀬𑀸 𑀫𑁂 𑀲𑀸𑀢𑀺 𑀬𑀸 𑀲𑀸 𑀫𑀫 𑀅𑀢𑀻𑀢𑁂 𑀲𑀢𑁆𑀢𑀫𑀻 𑀚𑀸𑀢𑀺 𑀆𑀲𑀺. 𑀓𑀫𑁆𑀫𑀸𑀭𑀧𑀼𑀢𑁆𑀢𑁄𑀢𑀺 𑀢𑀸𑀬 𑀚𑀸𑀢𑀺𑀬𑀸 𑀅𑀳𑀁 𑀫𑀕𑀥𑁂𑀲𑀼 𑀭𑀸𑀚𑀕𑀳𑀦𑀕𑀭𑁂 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑁄 𑀅𑀳𑁄𑀲𑀺𑀁.

𑀧𑀭𑀤𑀸𑀭𑀲𑁆𑀲 ¶ 𑀳𑁂𑀞𑁂𑀦𑁆𑀢𑁄𑀢𑀺 𑀧𑀭𑀤𑀸𑀭𑀁 𑀳𑁂𑀞𑁂𑀦𑁆𑀢𑀸 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂 𑀯𑀭𑀪𑀡𑁆𑀟𑁂 𑀅𑀧𑀭𑀚𑁆𑀛𑀦𑁆𑀢𑀸. 𑀅𑀝𑁆𑀞𑀸𑀢𑀺 𑀢𑀁 𑀢𑀤𑀸 𑀫𑀬𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀑𑀓𑀸𑀲𑁂 𑀲𑀢𑀺 𑀯𑀺𑀧𑀸𑀓𑀤𑀸𑀬𑀓𑀁 𑀳𑀼𑀢𑁆𑀯𑀸 𑀪𑀲𑁆𑀫𑀧𑀝𑀺𑀘𑁆𑀙𑀦𑁆𑀦𑁄 𑀅𑀕𑁆𑀕𑀺 𑀯𑀺𑀬 𑀦𑀺𑀳𑀺𑀢𑀁 𑀅𑀝𑁆𑀞𑀸𑀲𑀺. 𑀯𑀁𑀲𑀪𑀽𑀫𑀺𑀬𑀦𑁆𑀢𑀺 𑀯𑀁𑀲𑀭𑀝𑁆𑀞𑁂. 𑀏𑀓𑀧𑀼𑀢𑁆𑀢𑁄𑀢𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁂 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀁 𑀏𑀓𑀧𑀼𑀢𑁆𑀢𑀓𑁄𑀯 𑀅𑀳𑁄𑀲𑀺𑀁. 𑀲𑀸𑀢𑀯𑁂 𑀭𑀢𑀦𑁆𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑁂 𑀅𑀪𑀺𑀭𑀢𑀁. 𑀲𑁄 𑀫𑀦𑁆𑀢𑀺 𑀲𑁄 𑀲𑀳𑀸𑀬𑀓𑁄 𑀫𑀁 𑀅𑀢𑁆𑀣𑁂 𑀓𑀼𑀲𑀮𑀓𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀢𑀁 𑀓𑀫𑁆𑀫𑀦𑁆𑀢𑀺 𑀢𑀫𑁆𑀧𑀺 𑀫𑁂 𑀓𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀢𑀤𑀸 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀑𑀓𑀸𑀲𑁂 𑀲𑀢𑀺 𑀯𑀺𑀧𑀸𑀓𑀤𑀸𑀬𑀓𑀁 𑀳𑀼𑀢𑁆𑀯𑀸 𑀉𑀤𑀓𑀦𑁆𑀢𑀺𑀓𑁂 𑀦𑀺𑀥𑀺 𑀯𑀺𑀬 𑀦𑀺𑀳𑀺𑀢𑀁 𑀅𑀝𑁆𑀞𑀸𑀲𑀺. 𑀬𑀫𑁂𑀢𑀦𑁆𑀢𑀺 𑀅𑀣 𑀫𑀫 𑀲𑀦𑁆𑀢𑀓𑁂𑀲𑀼 𑀧𑀸𑀧𑀓𑀫𑁆𑀫𑁂𑀲𑀼 𑀬𑀁 𑀏𑀢𑀁 𑀫𑀬𑀸 𑀫𑀕𑀥𑁂𑀲𑀼 𑀧𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀨𑀮𑀁 𑀧𑀘𑁆𑀙𑀸 𑀫𑀁 𑀧𑀭𑀺𑀬𑀸𑀕𑀁 𑀉𑀧𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀺𑀁? 𑀪𑀼𑀢𑁆𑀯𑀸 𑀤𑀼𑀝𑁆𑀞𑀯𑀺𑀲𑀁 𑀬𑀣𑀸, 𑀬𑀣𑀸 𑀲𑀯𑀺𑀲𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀞𑀺𑀢𑀲𑁆𑀲 𑀢𑀁 𑀤𑀼𑀝𑁆𑀞𑀁 𑀓𑀓𑁆𑀔𑀴𑀁 𑀳𑀮𑀸𑀳𑀮𑀁 𑀯𑀺𑀲𑀁 𑀓𑀼𑀧𑁆𑀧𑀢𑀺, 𑀢𑀣𑀸 𑀫𑀁 𑀧𑀭𑀺𑀬𑀸𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀢𑁄 𑀓𑁄𑀲𑀫𑁆𑀩𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑀢𑁄. 𑀢𑀁 𑀲𑀭𑀦𑁆𑀢𑀺 𑀢𑀁 𑀢𑀲𑁆𑀫𑀺𑀁 𑀦𑀺𑀭𑀬𑁂 𑀅𑀦𑀼𑀪𑀽𑀢𑀤𑀼𑀓𑁆𑀔𑀁 𑀲𑀭𑀦𑁆𑀢𑀻 𑀘𑀺𑀢𑁆𑀢𑀲𑀼𑀔𑀁 𑀦𑀸𑀫 𑀦 𑀮𑀪𑀸𑀫𑀺, 𑀪𑀬𑀫𑁂𑀯 𑀫𑁂 𑀉𑀧𑁆𑀧𑀚𑁆𑀚𑀢𑀺. 𑀪𑀺𑀦𑁆𑀦𑀸𑀕𑀢𑁂𑀢𑀺 𑀪𑀺𑀦𑁆𑀦𑀸𑀕𑀢𑁂 𑀦𑀸𑀫 𑀭𑀝𑁆𑀞𑁂. 𑀉𑀤𑁆𑀥𑀢𑀧𑁆𑀨𑀮𑁄𑀢𑀺 𑀉𑀤𑁆𑀥𑀢𑀩𑀻𑀚𑁄.

𑀲𑁄 𑀧𑀦 𑀙𑀕𑀮𑀓𑁄 𑀩𑀮𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀧𑀺𑀝𑁆𑀞𑀺𑀬𑀁 𑀅𑀪𑀺𑀭𑀼𑀬𑁆𑀳𑀧𑀺 𑀦𑀁 𑀯𑀸𑀳𑀬𑀺𑀁𑀲𑀼, 𑀬𑀸𑀦𑀓𑁂𑀧𑀺 𑀬𑁄𑀚𑀬𑀺𑀁𑀲𑀼. 𑀇𑀫𑀫𑀢𑁆𑀣𑀁 ¶ 𑀧𑀓𑀸𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁭𑁦.

‘‘𑀲𑀸𑀢𑀧𑀼𑀢𑁆𑀢𑀸 ¶ 𑀫𑀬𑀸 𑀯𑀽𑀴𑁆𑀳𑀸, 𑀧𑀺𑀝𑁆𑀞𑀺𑀬𑀸 𑀘 𑀭𑀣𑁂𑀦 𑀘;

𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄, 𑀧𑀭𑀤𑀸𑀭𑀕𑀫𑀦𑀲𑁆𑀲 𑀫𑁂’’𑀢𑀺.

𑀢𑀢𑁆𑀣 𑀲𑀸𑀢𑀧𑀼𑀢𑁆𑀢𑀸𑀢𑀺 𑀅𑀫𑀘𑁆𑀘𑀧𑀼𑀢𑁆𑀢𑀸. 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀤𑁂𑀯, 𑀭𑁄𑀭𑀼𑀯𑁂 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀦𑀜𑁆𑀘 𑀙𑀕𑀮𑀓𑀓𑀸𑀮𑁂 𑀩𑀻𑀚𑀼𑀧𑁆𑀧𑀸𑀝𑀦𑀜𑁆𑀘 𑀧𑀺𑀝𑁆𑀞𑀺𑀯𑀸𑀳𑀦𑀬𑀸𑀦𑀓𑀬𑁄𑀚𑀦𑀸𑀦𑀺 𑀘 𑀲𑀩𑁆𑀩𑁄𑀧𑁂𑀲 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁄 𑀧𑀭𑀤𑀸𑀭𑀕𑀫𑀦𑀲𑁆𑀲 𑀫𑁂𑀢𑀺.

𑀢𑀢𑁄 𑀧𑀦 𑀘𑀯𑀺𑀢𑁆𑀯𑀸 𑀅𑀭𑀜𑁆𑀜𑁂 𑀓𑀧𑀺𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣 𑀦𑀁 𑀚𑀸𑀢𑀤𑀺𑀯𑀲𑁂 𑀬𑀽𑀣𑀧𑀢𑀺𑀦𑁄 𑀤𑀲𑁆𑀲𑁂𑀲𑀼𑀁. 𑀲𑁄 ‘‘𑀆𑀦𑁂𑀣 𑀫𑁂, 𑀧𑀼𑀢𑁆𑀢’’𑀦𑁆𑀢𑀺 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀯𑀺𑀭𑀯𑀦𑁆𑀢𑀲𑁆𑀲 𑀤𑀦𑁆𑀢𑁂𑀳𑀺 𑀨𑀮𑀸𑀦𑀺 𑀉𑀧𑁆𑀧𑀸𑀝𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁭𑁧.

‘‘𑀢𑀢𑁄 ¶ 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀓𑀧𑀺 𑀆𑀲𑀺𑀁 𑀩𑁆𑀭𑀳𑀸𑀯𑀦𑁂;

𑀦𑀺𑀮𑀼𑀜𑁆𑀘𑀺𑀢𑀨𑀮𑁄𑀬𑁂𑀯, 𑀬𑀽𑀣𑀧𑁂𑀦 𑀧𑀕𑀩𑁆𑀪𑀺𑀦𑀸;

𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄, 𑀧𑀭𑀤𑀸𑀭𑀕𑀫𑀦𑀲𑁆𑀲 𑀫𑁂’’𑀢𑀺.

𑀢𑀢𑁆𑀣 𑀦𑀺𑀮𑀼𑀜𑁆𑀘𑀺𑀢𑀨𑀮𑁄𑀬𑁂𑀯𑀸𑀢𑀺 𑀢𑀢𑁆𑀭𑀧𑀸𑀳𑀁 𑀧𑀕𑀩𑁆𑀪𑁂𑀦 𑀬𑀽𑀣𑀧𑀢𑀺𑀦𑀸 𑀮𑀼𑀜𑁆𑀘𑀺𑀢𑁆𑀯𑀸 𑀉𑀧𑁆𑀧𑀸𑀝𑀺𑀢𑀨𑀮𑁄𑀬𑁂𑀯 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀣 𑀅𑀧𑀭𑀸𑀧𑀺 𑀚𑀸𑀢𑀺𑀬𑁄 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁭𑁨.

‘‘𑀢𑀢𑁄 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀤𑀲𑁆𑀲𑀦𑁂𑀲𑀼 𑀧𑀲𑀽 𑀅𑀳𑀼𑀁;

𑀦𑀺𑀮𑀼𑀜𑁆𑀘𑀺𑀢𑁄 𑀚𑀯𑁄 𑀪𑀤𑁆𑀭𑁄, 𑀬𑁄𑀕𑁆𑀕𑀁 𑀯𑀽𑀴𑁆𑀳𑀁 𑀘𑀺𑀭𑀁 𑀫𑀬𑀸;

𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄, 𑀧𑀭𑀤𑀸𑀭𑀕𑀫𑀦𑀲𑁆𑀲 𑀫𑁂.

𑁧𑁨𑁭𑁩.

‘‘𑀢𑀢𑁄 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀯𑀚𑁆𑀚𑀻𑀲𑀼 𑀓𑀼𑀮𑀫𑀸𑀕𑀫𑀸;

𑀦𑁂𑀯𑀺𑀢𑁆𑀣𑀻 𑀦 𑀧𑀼𑀫𑀸 𑀆𑀲𑀺𑀁, 𑀫𑀦𑀼𑀲𑁆𑀲𑀢𑁆𑀢𑁂 𑀲𑀼𑀤𑀼𑀮𑁆𑀮𑀪𑁂;

𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄, 𑀧𑀭𑀤𑀸𑀭𑀕𑀫𑀦𑀲𑁆𑀲 𑀫𑁂.

𑁧𑁨𑁭𑁪.

‘‘𑀢𑀢𑁄 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀅𑀚𑀸𑀬𑀺𑀁 𑀦𑀦𑁆𑀤𑀦𑁂 𑀯𑀦𑁂;

𑀪𑀯𑀦𑁂 𑀢𑀸𑀯𑀢𑀺𑀁𑀲𑀸𑀳𑀁, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻.

𑁧𑁨𑁭𑁫.

‘‘𑀯𑀺𑀘𑀺𑀢𑁆𑀭𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀲𑀓𑁆𑀓𑀲𑁆𑀲 𑀧𑀭𑀺𑀘𑀸𑀭𑀺𑀓𑀸.

𑁧𑁨𑁭𑁬.

‘‘𑀢𑀢𑁆𑀣 ¶ 𑀞𑀺𑀢𑀸𑀳𑀁 𑀯𑁂𑀤𑁂𑀳, 𑀲𑀭𑀸𑀫𑀺 𑀚𑀸𑀢𑀺𑀬𑁄 𑀇𑀫𑀸;

𑀅𑀦𑀸𑀕𑀢𑀸𑀧𑀺 𑀲𑀢𑁆𑀢𑁂𑀯, 𑀬𑀸 𑀕𑀫𑀺𑀲𑁆𑀲𑀁 𑀇𑀢𑁄 𑀘𑀼𑀢𑀸.

𑁧𑁨𑁭𑁭.

‘‘𑀧𑀭𑀺𑀬𑀸𑀕𑀢𑀁 𑀢𑀁 𑀓𑀼𑀲𑀮𑀁, 𑀬𑀁 𑀫𑁂 𑀓𑁄𑀲𑀫𑁆𑀩𑀺𑀬𑀁 𑀓𑀢𑀁;

𑀤𑁂𑀯𑁂 𑀘𑁂𑀯 𑀫𑀦𑀼𑀲𑁆𑀲𑁂 𑀘, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀇𑀢𑁄 𑀘𑀼𑀢𑀸.

𑁧𑁨𑁭𑁮.

‘‘𑀲𑀢𑁆𑀢 ¶ 𑀚𑀘𑁆𑀘𑁄 𑀫𑀳𑀸𑀭𑀸𑀚, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀣𑀻𑀪𑀸𑀯𑀸𑀧𑀺 𑀦 𑀫𑀼𑀘𑁆𑀘𑀺𑀲𑁆𑀲𑀁, 𑀙𑀝𑁆𑀞𑀸 𑀦𑀺𑀕𑀢𑀺𑀬𑁄 𑀇𑀫𑀸.

𑁧𑁨𑁭𑁯.

‘‘𑀲𑀢𑁆𑀢𑀫𑀻 ¶ 𑀘 𑀕𑀢𑀺 𑀤𑁂𑀯, 𑀤𑁂𑀯𑀧𑀼𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄;

𑀧𑀼𑀫𑀸 𑀤𑁂𑀯𑁄 𑀪𑀯𑀺𑀲𑁆𑀲𑀸𑀫𑀺, 𑀤𑁂𑀯𑀓𑀸𑀬𑀲𑁆𑀫𑀺𑀫𑀼𑀢𑁆𑀢𑀫𑁄.

𑁧𑁨𑁮𑁦.

‘‘𑀅𑀚𑁆𑀚𑀸𑀧𑀺 𑀲𑀦𑁆𑀢𑀸𑀦𑀫𑀬𑀁, 𑀫𑀸𑀮𑀁 𑀕𑀦𑁆𑀣𑁂𑀦𑁆𑀢𑀺 𑀦𑀦𑁆𑀤𑀦𑁂;

𑀤𑁂𑀯𑀧𑀼𑀢𑁆𑀢𑁄 𑀚𑀯𑁄 𑀦𑀸𑀫, 𑀬𑁄 𑀫𑁂 𑀫𑀸𑀮𑀁 𑀧𑀝𑀺𑀘𑁆𑀙𑀢𑀺.

𑁧𑁨𑁮𑁧.

‘‘𑀫𑀼𑀳𑀼𑀢𑁆𑀢𑁄 𑀯𑀺𑀬 𑀲𑁄 𑀤𑀺𑀩𑁆𑀬𑁄, 𑀇𑀥 𑀯𑀲𑁆𑀲𑀸𑀦𑀺 𑀲𑁄𑀴𑀲;

𑀭𑀢𑁆𑀢𑀺𑀦𑁆𑀤𑀺𑀯𑁄 𑀘 𑀲𑁄 𑀤𑀺𑀩𑁆𑀬𑁄, 𑀫𑀸𑀦𑀼𑀲𑀺𑀁 𑀲𑀭𑀤𑁄𑀲𑀢𑀁.

𑁧𑁨𑁮𑁨.

‘‘𑀇𑀢𑀺 𑀓𑀫𑁆𑀫𑀸𑀦𑀺 𑀅𑀦𑁆𑀯𑁂𑀦𑁆𑀢𑀺, 𑀅𑀲𑀗𑁆𑀔𑁂𑀬𑁆𑀬𑀸𑀧𑀺 𑀚𑀸𑀢𑀺𑀬𑁄;

𑀓𑀮𑁆𑀬𑀸𑀡𑀁 𑀬𑀤𑀺 𑀯𑀸 𑀧𑀸𑀧𑀁, 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀤𑀲𑁆𑀲𑀦𑁂𑀲𑀽𑀢𑀺 𑀤𑀲𑁆𑀲𑀦𑀭𑀝𑁆𑀞𑁂𑀲𑀼. 𑀧𑀲𑀽𑀢𑀺 𑀕𑁄𑀡𑁄 𑀅𑀳𑁄𑀲𑀺𑀁. 𑀦𑀺𑀮𑀼𑀜𑁆𑀘𑀺𑀢𑁄𑀢𑀺 𑀯𑀘𑁆𑀙𑀓𑀸𑀮𑁂𑀬𑁂𑀯 𑀫𑀁 𑀏𑀯𑀁 𑀫𑀦𑀸𑀧𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀻𑀚𑀓𑀫𑀓𑀁𑀲𑀼. 𑀲𑁄𑀳𑀁 𑀦𑀺𑀮𑀼𑀜𑁆𑀘𑀺𑀢𑁄 𑀉𑀤𑁆𑀥𑀢𑀩𑀻𑀚𑁄 𑀚𑀯𑁄 𑀪𑀤𑁆𑀭𑁄 𑀅𑀳𑁄𑀲𑀺𑀁. 𑀯𑀚𑁆𑀚𑀻𑀲𑀼 𑀓𑀼𑀮𑀫𑀸𑀕𑀫𑀸𑀢𑀺 𑀕𑁄𑀬𑁄𑀦𑀺𑀢𑁄 𑀘𑀯𑀺𑀢𑁆𑀯𑀸 𑀯𑀚𑁆𑀚𑀺𑀭𑀝𑁆𑀞𑁂 𑀏𑀓𑀲𑁆𑀫𑀺𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑁂𑀯𑀺𑀢𑁆𑀣𑀻 𑀦 𑀧𑀼𑀫𑀸𑀢𑀺 𑀦𑀧𑀼𑀁𑀲𑀓𑀢𑁆𑀢𑀁 𑀲𑀦𑁆𑀥𑀸𑀬 𑀆𑀳. 𑀪𑀯𑀦𑁂 𑀢𑀸𑀯𑀢𑀺𑀁𑀲𑀸𑀳𑀦𑁆𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀳𑀁.

𑀢𑀢𑁆𑀣 𑀞𑀺𑀢𑀸𑀳𑀁, 𑀯𑁂𑀤𑁂𑀳, 𑀲𑀭𑀸𑀫𑀺 𑀚𑀸𑀢𑀺𑀬𑁄 𑀇𑀫𑀸𑀢𑀺 𑀲𑀸 𑀓𑀺𑀭 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀞𑀺𑀢𑀸 ‘‘𑀅𑀳𑀁 𑀏𑀯𑀭𑀽𑀧𑀁 𑀤𑁂𑀯𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀻 𑀓𑀼𑀢𑁄 𑀦𑀼 𑀔𑁄 𑀆𑀕𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑀻 𑀯𑀚𑁆𑀚𑀺𑀭𑀝𑁆𑀞𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀧𑀼𑀁𑀲𑀓𑀢𑁆𑀢𑀪𑀸𑀯𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀧𑀲𑁆𑀲𑀺. 𑀢𑀢𑁄 ‘‘𑀓𑁂𑀦 𑀦𑀼 𑀔𑁄 𑀓𑀫𑁆𑀫𑁂𑀦 𑀏𑀯𑀭𑀽𑀧𑁂 𑀭𑀫𑀡𑀻𑀬𑁂 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸𑀫𑁆𑀳𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀻 𑀓𑁄𑀲𑀫𑁆𑀩𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀢𑀁 𑀤𑀸𑀦𑀸𑀤𑀺𑀓𑀼𑀲𑀮𑀁 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀲 𑀨𑀮𑁂𑀦 𑀦𑀺𑀩𑁆𑀩𑀢𑁆𑀢𑀸𑀫𑁆𑀳𑀻’’𑀢𑀺 𑀜𑀢𑁆𑀯𑀸 ‘‘𑀅𑀦𑀦𑁆𑀢𑀭𑀸𑀢𑀻𑀢𑁂 𑀦𑀧𑀼𑀁𑀲𑀓𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀸 𑀓𑀼𑀢𑁄 𑀆𑀕𑀢𑀸𑀫𑁆𑀳𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀻 𑀤𑀲𑁆𑀲𑀦𑀭𑀝𑁆𑀞𑁂𑀲𑀼 𑀕𑁄𑀬𑁄𑀦𑀺𑀬𑀁 𑀫𑀳𑀸𑀤𑀼𑀓𑁆𑀔𑀲𑁆𑀲 𑀅𑀦𑀼𑀪𑀽𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀢𑀢𑁄 𑀅𑀦𑀦𑁆𑀢𑀭𑀁 𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀫𑀸𑀦𑀸 𑀯𑀸𑀦𑀭𑀬𑁄𑀦𑀺𑀬𑀁 𑀉𑀤𑁆𑀥𑀢𑀨𑀮𑀪𑀸𑀯𑀁 𑀅𑀤𑁆𑀤𑀲. 𑀢𑀢𑁄 𑀅𑀦𑀦𑁆𑀢𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀪𑀺𑀦𑁆𑀦𑀸𑀕𑀢𑁂 𑀙𑀕𑀮𑀓𑀬𑁄𑀦𑀺𑀬𑀁 𑀉𑀤𑁆𑀥𑀢𑀩𑀻𑀚𑀪𑀸𑀯𑀁 𑀅𑀦𑀼𑀲𑁆𑀲𑀭𑀺. 𑀢𑀢𑁄 𑀧𑀭𑀁 𑀅𑀦𑀼𑀲𑁆𑀲𑀭𑀫𑀸𑀦𑀸 𑀭𑁄𑀭𑀼𑀯𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀺.

𑀅𑀣𑀲𑁆𑀲𑀸 ¶ 𑀦𑀺𑀭𑀬𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀜𑁆𑀘 𑀅𑀦𑀼𑀪𑀽𑀢𑀁 𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑀸 𑀪𑀬𑀁 𑀉𑀧𑁆𑀧𑀚𑁆𑀚𑀺. 𑀢𑀢𑁄 ‘‘𑀓𑁂𑀦 𑀦𑀼 𑀔𑁄 𑀓𑀫𑁆𑀫𑁂𑀦 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁 𑀫𑀬𑀸’’𑀢𑀺 𑀙𑀝𑁆𑀞𑀁 𑀚𑀸𑀢𑀺𑀁 𑀑𑀮𑁄𑀓𑁂𑀦𑁆𑀢𑀻 𑀢𑀸𑀬 𑀚𑀸𑀢𑀺𑀬𑀸 𑀓𑁄𑀲𑀫𑁆𑀩𑀺𑀦𑀕𑀭𑁂 𑀓𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀤𑀺𑀲𑁆𑀯𑀸 𑀲𑀢𑁆𑀢𑀫𑀁 𑀑𑀮𑁄𑀓𑁂𑀦𑁆𑀢𑀻 𑀫𑀕𑀥𑀭𑀝𑁆𑀞𑁂 𑀧𑀸𑀧𑀲𑀳𑀸𑀬𑀁 𑀦𑀺𑀲𑁆𑀲𑀸𑀬 𑀓𑀢𑀁 𑀧𑀭𑀤𑀸𑀭𑀺𑀓𑀓𑀫𑁆𑀫𑀁 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀲 𑀨𑀮𑁂𑀦 𑀫𑁂 𑀢𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀽𑀢’’𑀦𑁆𑀢𑀺 𑀅𑀜𑁆𑀜𑀸𑀲𑀺. 𑀅𑀣 ‘‘𑀇𑀢𑁄 𑀘𑀯𑀺𑀢𑁆𑀯𑀸 𑀅𑀦𑀸𑀕𑀢𑁂 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀻 ‘‘𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀼𑀦 𑀲𑀓𑁆𑀓𑀲𑁆𑀲𑁂𑀯 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀸𑀲𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀬𑀫𑀸𑀦𑀸 ‘‘𑀢𑀢𑀺𑀬𑁂𑀧𑀺 𑀅𑀢𑁆𑀢𑀪𑀸𑀯𑁂 𑀲𑀓𑁆𑀓𑀲𑁆𑀲𑁂𑀯 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, 𑀢𑀣𑀸 𑀘𑀢𑀼𑀢𑁆𑀣𑁂, 𑀧𑀜𑁆𑀘𑀫𑁂 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀤𑁂𑀯𑀮𑁄𑀓𑁂 𑀚𑀯𑀦𑀤𑁂𑀯𑀧𑀼𑀢𑁆𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀜𑀢𑁆𑀯𑀸 𑀢𑀢𑁄 𑀅𑀦𑀦𑁆𑀢𑀭𑀁 𑀑𑀮𑁄𑀓𑁂𑀦𑁆𑀢𑀻 ‘‘𑀙𑀝𑁆𑀞𑁂 𑀅𑀢𑁆𑀢𑀪𑀸𑀯𑁂 𑀇𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑀢𑁄 𑀘𑀯𑀺𑀢𑁆𑀯𑀸 𑀅𑀗𑁆𑀕𑀢𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, ‘𑀭𑀼𑀘𑀸’𑀢𑀺 𑀫𑁂 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀢𑁄 𑀅𑀦𑀦𑁆𑀢𑀭𑀸 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀻 ‘‘𑀲𑀢𑁆𑀢𑀫𑀸𑀬 𑀚𑀸𑀢𑀺𑀬𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀫𑀳𑀺𑀤𑁆𑀥𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, 𑀇𑀢𑁆𑀣𑀺𑀪𑀸𑀯𑀢𑁄 ¶ 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑁋

‘‘𑀢𑀢𑁆𑀣 𑀞𑀺𑀢𑀸𑀳𑀁 𑀯𑁂𑀤𑁂𑀳, 𑀲𑀭𑀸𑀫𑀺 𑀲𑀢𑁆𑀢 𑀚𑀸𑀢𑀺𑀬𑁄;

𑀅𑀦𑀸𑀕𑀢𑀸𑀧𑀺 𑀲𑀢𑁆𑀢𑁂𑀯, 𑀬𑀸 𑀕𑀫𑀺𑀲𑁆𑀲𑀁 𑀇𑀢𑁄 𑀘𑀼𑀢𑀸’’𑀢𑀺. 𑁋 𑀆𑀤𑀺𑀫𑀸𑀳;

𑀢𑀢𑁆𑀣 𑀧𑀭𑀺𑀬𑀸𑀕𑀢𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀦𑁄 𑀯𑀸𑀭𑁂𑀦 𑀆𑀕𑀢𑀁. 𑀲𑀢𑁆𑀢 𑀚𑀘𑁆𑀘𑁄𑀢𑀺 𑀯𑀚𑁆𑀚𑀺𑀭𑀝𑁆𑀞𑁂 𑀦𑀧𑀼𑀁𑀲𑀓𑀚𑀸𑀢𑀺𑀬𑀸 𑀲𑀤𑁆𑀥𑀺𑀁 𑀤𑁂𑀯𑀮𑁄𑀓𑁂 𑀧𑀜𑁆𑀘, 𑀅𑀬𑀜𑁆𑀘 𑀙𑀝𑁆𑀞𑀸𑀢𑀺 𑀲𑀢𑁆𑀢 𑀚𑀸𑀢𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑀸 𑀲𑀢𑁆𑀢 𑀚𑀸𑀢𑀺𑀬𑁄 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸 ¶ 𑀅𑀳𑁄𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀙𑀝𑁆𑀞𑀸 𑀦𑀺𑀕𑀢𑀺𑀬𑁄𑀢𑀺 𑀤𑁂𑀯𑀮𑁄𑀓𑁂 𑀧𑀦 𑀧𑀜𑁆𑀘, 𑀅𑀬𑀜𑁆𑀘 𑀏𑀓𑀸𑀢𑀺 𑀇𑀫𑀸 𑀙 𑀕𑀢𑀺𑀬𑁄 𑀇𑀢𑁆𑀣𑀺𑀪𑀸𑀯𑀸𑀦 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺 𑀯𑀤𑀢𑀺. 𑀲𑀢𑁆𑀢𑀫𑀻 𑀘𑀸𑀢𑀺 𑀇𑀢𑁄 𑀘𑀯𑀺𑀢𑁆𑀯𑀸 𑀅𑀦𑀦𑁆𑀢𑀭𑀁. 𑀲𑀦𑁆𑀢𑀸𑀦𑀫𑀬𑀦𑁆𑀢𑀺 𑀏𑀓𑀢𑁄𑀯𑀡𑁆𑀝𑀓𑀸𑀤𑀺𑀯𑀲𑁂𑀦 𑀓𑀢𑀲𑀦𑁆𑀢𑀸𑀦𑀁. 𑀕𑀦𑁆𑀣𑁂𑀦𑁆𑀢𑀻𑀢𑀺 𑀬𑀣𑀸 𑀲𑀦𑁆𑀢𑀸𑀦𑀫𑀬𑀸 𑀳𑁄𑀦𑁆𑀢𑀺, 𑀏𑀯𑀁 𑀅𑀚𑁆𑀚𑀧𑀺 𑀫𑀫 𑀧𑀭𑀺𑀘𑀸𑀭𑀺𑀓𑀸 𑀦𑀦𑁆𑀤𑀦𑀯𑀦𑁂 𑀫𑀸𑀮𑀁 𑀕𑀦𑁆𑀣𑁂𑀦𑁆𑀢𑀺𑀬𑁂𑀯. 𑀬𑁄 𑀫𑁂 𑀫𑀸𑀮𑀁 𑀧𑀝𑀺𑀘𑁆𑀙𑀢𑀻𑀢𑀺 𑀫𑀳𑀸𑀭𑀸𑀚, 𑀅𑀦𑀦𑁆𑀢𑀭𑀚𑀸𑀢𑀺𑀬𑀁 𑀫𑀫 𑀲𑀸𑀫𑀺𑀓𑁄 𑀚𑀯𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀬𑁄 𑀭𑀼𑀓𑁆𑀔𑀢𑁄 𑀧𑀢𑀺𑀢𑀧𑀢𑀺𑀢𑀁 𑀫𑀸𑀮𑀁 𑀧𑀝𑀺𑀘𑁆𑀙𑀢𑀺.

𑀲𑁄𑀴𑀲𑀸𑀢𑀺 𑀫𑀳𑀸𑀭𑀸𑀚, 𑀫𑀫 𑀚𑀸𑀢𑀺𑀬𑀸 𑀇𑀫𑀸𑀦𑀺 𑀲𑁄𑀴𑀲 𑀯𑀲𑁆𑀲𑀸𑀦𑀺, 𑀏𑀢𑁆𑀢𑀓𑁄 𑀧𑀦 𑀓𑀸𑀮𑁄 𑀤𑁂𑀯𑀸𑀦𑀁 𑀏𑀓𑁄 𑀫𑀼𑀳𑀼𑀢𑁆𑀢𑁄, 𑀢𑁂𑀦 𑀢𑀸 𑀫𑀫 𑀘𑀼𑀢𑀪𑀸𑀯𑀫𑁆𑀧𑀺 𑀅𑀚𑀸𑀦𑀦𑁆𑀢𑀸 𑀫𑀫𑀢𑁆𑀣𑀸𑀬 𑀫𑀸𑀮𑀁 𑀕𑀦𑁆𑀣𑁂𑀦𑁆𑀢𑀺𑀬𑁂𑀯. 𑀫𑀸𑀦𑀼𑀲𑀺𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀯𑀲𑁆𑀲𑀕𑀡𑀦𑀁 𑀆𑀕𑀫𑁆𑀫 𑀏𑀲 𑀲𑀭𑀤𑁄𑀲𑀢𑀁 𑀯𑀲𑁆𑀲𑀲𑀢𑀁 𑀳𑁄𑀢𑀺, 𑀏𑀯𑀁 𑀤𑀻𑀖𑀸𑀬𑀼𑀓𑀸 𑀤𑁂𑀯𑀸 ¶ . 𑀇𑀫𑀺𑀦𑀸 𑀧𑀦 𑀓𑀸𑀭𑀡𑁂𑀦 𑀧𑀭𑀮𑁄𑀓𑀲𑁆𑀲 𑀘 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀜𑁆𑀘 𑀓𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀁 𑀚𑀸𑀦𑀸𑀳𑀺, 𑀤𑁂𑀯𑀸𑀢𑀺.

𑀅𑀦𑁆𑀯𑁂𑀦𑁆𑀢𑀻𑀢𑀺 𑀬𑀣𑀸 𑀫𑀁 𑀅𑀦𑀼𑀩𑀦𑁆𑀥𑀺𑀁𑀲𑀼, 𑀏𑀯𑀁 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀦𑀦𑁆𑀢𑀭𑀪𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀧𑀦 𑀯𑀺𑀧𑀸𑀓𑀁 𑀅𑀤𑀢𑁆𑀯𑀸 𑀦 𑀦𑀲𑁆𑀲𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀤𑁂𑀯, 𑀅𑀳𑀁 𑀧𑀭𑀤𑀸𑀭𑀺𑀓𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀭𑀬𑁂 𑀘 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀜𑁆𑀘 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀁. 𑀲𑀘𑁂 𑀧𑀦 𑀢𑀼𑀫𑁆𑀳𑁂𑀧𑀺 𑀇𑀤𑀸𑀦𑀺 𑀕𑀼𑀡𑀲𑁆𑀲 𑀓𑀣𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀓𑀭𑀺𑀲𑁆𑀲𑀣, 𑀫𑀬𑀸 𑀅𑀦𑀼𑀪𑀽𑀢𑀲𑀤𑀺𑀲𑀫𑁂𑀯 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀣, 𑀢𑀲𑁆𑀫𑀸 𑀏𑀯𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀆𑀳.

𑀅𑀣𑀲𑁆𑀲 𑀉𑀢𑁆𑀢𑀭𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻 𑀆𑀳 𑁋

𑁧𑁨𑁮𑁩.

‘‘𑀬𑁄 𑀇𑀘𑁆𑀙𑁂 𑀧𑀼𑀭𑀺𑀲𑁄 𑀳𑁄𑀢𑀼𑀁, 𑀚𑀸𑀢𑀺𑀁 𑀚𑀸𑀢𑀺𑀁 𑀧𑀼𑀦𑀧𑁆𑀧𑀼𑀦𑀁;

𑀧𑀭𑀤𑀸𑀭𑀁 𑀯𑀺𑀯𑀚𑁆𑀚𑁂𑀬𑁆𑀬, 𑀥𑁄𑀢𑀧𑀸𑀤𑁄𑀯 𑀓𑀤𑁆𑀤𑀫𑀁.

𑁧𑁨𑁮𑁪.

‘‘𑀬𑀸 𑀇𑀘𑁆𑀙𑁂 𑀧𑀼𑀭𑀺𑀲𑁄 𑀳𑁄𑀢𑀼𑀁, 𑀚𑀸𑀢𑀺𑀁 𑀚𑀸𑀢𑀺𑀁 𑀧𑀼𑀦𑀧𑁆𑀧𑀼𑀦𑀁;

𑀲𑀸𑀫𑀺𑀓𑀁 𑀅𑀧𑀘𑀸𑀬𑁂𑀬𑁆𑀬, 𑀇𑀦𑁆𑀤𑀁𑀯 𑀧𑀭𑀺𑀘𑀸𑀭𑀺𑀓𑀸.

𑁧𑁨𑁮𑁫.

‘‘𑀬𑁄 𑀇𑀘𑁆𑀙𑁂 𑀤𑀺𑀩𑁆𑀬𑀪𑁄𑀕𑀜𑁆𑀘, 𑀤𑀺𑀩𑁆𑀩𑀫𑀸𑀬𑀼𑀁 𑀬𑀲𑀁 𑀲𑀼𑀔𑀁;

𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑁆𑀯𑀸, 𑀢𑀺𑀯𑀺𑀥𑀁 𑀥𑀫𑁆𑀫𑀫𑀸𑀘𑀭𑁂.

𑁧𑁨𑁮𑁬.

‘‘𑀓𑀸𑀬𑁂𑀦 ¶ 𑀯𑀸𑀘𑀸 𑀫𑀦𑀲𑀸, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄;

𑀅𑀢𑁆𑀢𑀦𑁄 𑀳𑁄𑀢𑀺 𑀅𑀢𑁆𑀣𑀸𑀬, 𑀇𑀢𑁆𑀣𑀻 𑀯𑀸 𑀬𑀤𑀺 𑀯𑀸 𑀧𑀼𑀫𑀸.

𑁧𑁨𑁮𑁭.

‘‘𑀬𑁂 𑀓𑁂𑀘𑀺𑀫𑁂 𑀫𑀸𑀦𑀼𑀚𑀸 𑀚𑀻𑀯𑀮𑁄𑀓𑁂, 𑀬𑀲𑀲𑁆𑀲𑀺𑀦𑁄 𑀲𑀩𑁆𑀩𑀲𑀫𑀦𑁆𑀢𑀪𑁄𑀕𑀸;

𑀅𑀲𑀁𑀲𑀬𑀁 𑀢𑁂𑀳𑀺 𑀧𑀼𑀭𑁂 𑀲𑀼𑀘𑀺𑀡𑁆𑀡𑀁, 𑀓𑀫𑁆𑀫𑀲𑁆𑀲𑀓𑀸𑀲𑁂 𑀧𑀼𑀣𑀼 𑀲𑀩𑁆𑀩𑀲𑀢𑁆𑀢𑀸.

𑁧𑁨𑁮𑁮.

‘‘𑀇𑀗𑁆𑀖𑀸𑀦𑀼𑀘𑀺𑀦𑁆𑀢𑁂𑀲𑀺 𑀲𑀬𑀫𑁆𑀧𑀺 𑀤𑁂𑀯, 𑀓𑀼𑀢𑁄𑀦𑀺𑀤𑀸𑀦𑀸 𑀢𑁂 𑀇𑀫𑀸 𑀚𑀦𑀺𑀦𑁆𑀤;

𑀬𑀸 𑀢𑁂 𑀇𑀫𑀸 𑀅𑀘𑁆𑀙𑀭𑀸𑀲𑀦𑁆𑀦𑀺𑀓𑀸𑀲𑀸, 𑀅𑀮𑀗𑁆𑀓𑀢𑀸 𑀓𑀜𑁆𑀘𑀦𑀚𑀸𑀮𑀙𑀦𑁆𑀦𑀸’’𑀢𑀺.

𑀢𑀢𑁆𑀣 ¶ ¶ 𑀳𑁄𑀢𑀼𑀦𑁆𑀢𑀺 𑀪𑀯𑀺𑀢𑀼𑀁. 𑀲𑀩𑁆𑀩𑀲𑀫𑀦𑁆𑀢𑀪𑁄𑀕𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀩𑁆𑀩𑀪𑁄𑀕𑀸. 𑀲𑀼𑀘𑀺𑀡𑁆𑀡𑀦𑁆𑀢𑀺 𑀲𑀼𑀝𑁆𑀞𑀼 𑀘𑀺𑀡𑁆𑀡𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑀁. 𑀓𑀫𑁆𑀫𑀲𑁆𑀲𑀓𑀸𑀲𑁂𑀢𑀺 𑀓𑀫𑁆𑀫𑀲𑁆𑀲𑀓𑀸 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀲𑁆𑀲𑁂𑀯 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀺𑀦𑁄. 𑀦 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀁 𑀓𑀫𑁆𑀫𑀁 𑀧𑀼𑀢𑁆𑀢𑀥𑀻𑀢𑀸𑀦𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀦 𑀢𑀸𑀳𑀺 𑀧𑀼𑀢𑁆𑀢𑀥𑀻𑀢𑀸𑀳𑀺 𑀓𑀢𑀁 𑀓𑀫𑁆𑀫𑀁 𑀫𑀸𑀢𑀸𑀧𑀺𑀢𑀽𑀦𑀁 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑁂𑀲𑁂𑀳𑀺 𑀓𑀢𑀁 𑀲𑁂𑀲𑀸𑀦𑀁 𑀓𑀺𑀫𑁂𑀯 𑀤𑀲𑁆𑀲𑀢𑀺? 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀦𑀼𑀘𑀺𑀦𑁆𑀢𑁂𑀲𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀬𑁆𑀬𑀸𑀲𑀺. 𑀬𑀸 𑀢𑁂 𑀇𑀫𑀸𑀢𑀺 𑀬𑀸 𑀇𑀫𑀸 𑀲𑁄𑀴𑀲𑀲𑀳𑀲𑁆𑀲𑀸 𑀇𑀢𑁆𑀣𑀺𑀬𑁄 𑀢𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀇𑀫𑀸 𑀢𑁂 𑀓𑀼𑀢𑁄𑀦𑀺𑀤𑀸𑀦𑀸, 𑀓𑀺𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀦 𑀮𑀤𑁆𑀥𑀸, 𑀉𑀤𑀸𑀳𑀼 𑀧𑀦𑁆𑀣𑀤𑀽𑀲𑀦𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀧𑀸𑀧𑀸𑀦𑀺 𑀓𑀢𑁆𑀯𑀸, 𑀅𑀤𑀼 𑀓𑀮𑁆𑀬𑀸𑀡𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀸𑀢𑀺 𑀇𑀤𑀁 𑀢𑀸𑀯 𑀅𑀢𑁆𑀢𑀦𑀸𑀧𑀺 𑀘𑀺𑀦𑁆𑀢𑁂𑀬𑁆𑀬𑀸𑀲𑀺, 𑀤𑁂𑀯𑀸𑀢𑀺.

𑀏𑀯𑀁 𑀲𑀸 𑀧𑀺𑀢𑀭𑀁 𑀅𑀦𑀼𑀲𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁨𑁮𑁯.

‘‘𑀇𑀘𑁆𑀘𑁂𑀯𑀁 𑀧𑀺𑀢𑀭𑀁 𑀓𑀜𑁆𑀜𑀸, 𑀭𑀼𑀘𑀸 𑀢𑁄𑀲𑁂𑀲𑀺 𑀅𑀗𑁆𑀕𑀢𑀺𑀁;

𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀫𑀸𑀘𑀺𑀓𑁆𑀔𑀺, 𑀥𑀫𑁆𑀫𑀫𑀓𑁆𑀔𑀸𑀲𑀺 𑀲𑀼𑀩𑁆𑀩𑀢𑀸’’𑀢𑀺.

𑀢𑀢𑁆𑀣 𑀇𑀘𑁆𑀘𑁂𑀯𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀇𑀢𑀺 𑀇𑀫𑁂𑀳𑀺 𑀏𑀯𑀭𑀽𑀧𑁂𑀳𑀺 𑀫𑀥𑀼𑀭𑁂𑀳𑀺 𑀯𑀘𑀦𑁂𑀳𑀺 𑀭𑀼𑀘𑀸𑀓𑀜𑁆𑀜𑀸 𑀧𑀺𑀢𑀭𑀁 𑀢𑁄𑀲𑁂𑀲𑀺, 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀯𑀺𑀬 𑀢𑀲𑁆𑀲 𑀲𑀼𑀕𑀢𑀺𑀫𑀕𑁆𑀕𑀁 𑀆𑀘𑀺𑀓𑁆𑀔𑀺, 𑀦𑀸𑀦𑀸𑀦𑀬𑁂𑀳𑀺 𑀲𑀼𑀘𑀭𑀺𑀢𑀥𑀫𑁆𑀫𑀁 𑀅𑀓𑁆𑀔𑀸𑀲𑀺. 𑀥𑀫𑁆𑀫𑀁 𑀓𑀣𑁂𑀦𑁆𑀢𑀻𑀬𑁂𑀯 𑀲𑀸 𑀲𑀼𑀩𑁆𑀩𑀢𑀸 𑀲𑀼𑀦𑁆𑀤𑀭𑀯𑀢𑀸 𑀅𑀢𑁆𑀢𑀦𑁄 𑀅𑀢𑀻𑀢𑀚𑀸𑀢𑀺𑀬𑁄𑀧𑀺 𑀓𑀣𑁂𑀲𑀺.

𑀏𑀯𑀁 𑀧𑀼𑀩𑁆𑀩𑀡𑁆𑀳𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀭𑀢𑁆𑀢𑀺𑀁 𑀧𑀺𑀢𑀼 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀫𑀸, 𑀤𑁂𑀯, 𑀦𑀕𑁆𑀕𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀯𑀘𑀦𑀁 𑀕𑀡𑁆𑀳𑀺, ‘𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀅𑀢𑁆𑀣𑀺 𑀧𑀭𑀮𑁄𑀓𑁄 ¶ , 𑀅𑀢𑁆𑀣𑀺 𑀲𑀼𑀓𑀝𑀤𑀼𑀓𑁆𑀓𑀝𑀓𑀫𑁆𑀫𑀸𑀦𑀁 𑀨𑀮’𑀦𑁆𑀢𑀺 𑀯𑀤𑀦𑁆𑀢𑀲𑁆𑀲 𑀫𑀸𑀤𑀺𑀲𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀯𑀘𑀦𑀁 𑀕𑀡𑁆𑀳, 𑀫𑀸 𑀅𑀢𑀺𑀢𑁆𑀣𑁂𑀦 𑀧𑀓𑁆𑀔𑀦𑁆𑀤𑀻’’𑀢𑀺 𑀆𑀳. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀺𑀢𑀭𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀸 𑀫𑁄𑀘𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀳𑀺 𑀓𑁂𑀯𑀮𑀁 𑀢𑀲𑁆𑀲𑀸 𑀫𑀥𑀼𑀭𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀺𑀬𑀧𑀼𑀢𑁆𑀢𑀸𑀦𑀁 𑀯𑀘𑀦𑀁 𑀧𑀺𑀬𑀸𑀬𑀦𑁆𑀢𑀺, 𑀦 𑀧𑀦 𑀢𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀦𑀕𑀭𑁂𑀧𑀺 ‘‘𑀭𑀼𑀘𑀸 𑀓𑀺𑀭 𑀭𑀸𑀚𑀥𑀻𑀢𑀸 𑀧𑀺𑀢𑀼 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀻’’𑀢𑀺 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. ‘‘𑀧𑀡𑁆𑀟𑀺𑀢𑀸 𑀭𑀸𑀚𑀥𑀻𑀢𑀸 𑀅𑀚𑁆𑀚 𑀧𑀺𑀢𑀭𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀸 𑀫𑁄𑀘𑁂𑀢𑁆𑀯𑀸 𑀦𑀕𑀭𑀯𑀸𑀲𑀻𑀦𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀚𑀦𑁄 𑀢𑀼𑀲𑁆𑀲𑀺. 𑀲𑀸 𑀧𑀺𑀢𑀭𑀁 𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀻𑀭𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 ‘‘𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀧𑀺𑀢𑀼 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀤𑀲𑀤𑀺𑀲𑀸 𑀦𑀫𑀲𑁆𑀲𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀮𑁄𑀓𑀲𑀦𑁆𑀥𑀸𑀭𑀓𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀮𑁄𑀓𑀧𑀸𑀮𑀤𑁂𑀯𑀢𑀸 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀦𑀸𑀫 𑀅𑀢𑁆𑀣𑀺, 𑀢𑁂 𑀇𑀥𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀫𑀫 𑀧𑀺𑀢𑀭𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀦𑁆𑀢𑀼 ¶ , 𑀏𑀢𑀲𑁆𑀲 𑀕𑀼𑀡𑁂 𑀅𑀲𑀢𑀺𑀧𑀺 𑀫𑀫 ¶ 𑀕𑀼𑀡𑁂𑀦 𑀫𑀫 𑀲𑀻𑀮𑁂𑀦 𑀫𑀫 𑀲𑀘𑁆𑀘𑁂𑀦 𑀇𑀥𑀸𑀕𑀦𑁆𑀢𑁆𑀯𑀸 𑀇𑀫𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀓𑀮𑀮𑁄𑀓𑀲𑁆𑀲 𑀲𑁄𑀢𑁆𑀣𑀺𑀁 𑀓𑀭𑁄𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀫𑀲𑁆𑀲𑀺.

𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦𑀸𑀭𑀤𑁄 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑀸 𑀘 𑀦𑀸𑀫 𑀅𑀢𑁆𑀢𑀦𑁄 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀅𑀦𑀼𑀤𑁆𑀤𑀬𑀸𑀬 𑀫𑀳𑀦𑁆𑀢𑀪𑀸𑀯𑁂𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑀤𑀼𑀧𑁆𑀧𑀝𑀺𑀧𑀦𑁆𑀦𑁂 𑀲𑀢𑁆𑀢𑁂 𑀤𑀲𑁆𑀲𑀦𑀢𑁆𑀣𑀁 𑀓𑀸𑀮𑀸𑀦𑀼𑀓𑀸𑀮𑀁 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑀺. 𑀲𑁄 𑀢𑀁 𑀤𑀺𑀯𑀲𑀁 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀭𑀸𑀚𑀥𑀻𑀢𑀭𑀁 𑀧𑀺𑀢𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑁄𑀘𑀦𑀢𑁆𑀣𑀁 𑀮𑁄𑀓𑀲𑀦𑁆𑀥𑀸𑀭𑀓𑀤𑁂𑀯𑀢𑀸𑀬𑁄 𑀦𑀫𑀲𑁆𑀲𑀫𑀸𑀦𑀁 𑀤𑀺𑀲𑁆𑀯𑀸, ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀏𑀢𑀁 𑀭𑀸𑀚𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀅𑀚𑁆𑀚 𑀫𑀬𑀸 𑀭𑀸𑀚𑀥𑀻𑀢𑀼 𑀲𑀗𑁆𑀕𑀳𑀁, 𑀭𑀜𑁆𑀜𑁄 𑀘 𑀲𑀧𑀭𑀺𑀚𑀦𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑀁 𑀓𑀢𑁆𑀯𑀸 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀓𑁂𑀦 𑀦𑀼 𑀔𑁄 𑀯𑁂𑀲𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀦𑀼𑀲𑁆𑀲𑀸𑀦𑀁 𑀧𑀩𑁆𑀩𑀚𑀺𑀢𑀸 𑀧𑀺𑀬𑀸 𑀘𑁂𑀯 𑀕𑀭𑀼𑀦𑁄 𑀘 𑀆𑀤𑁂𑀬𑁆𑀬𑀯𑀘𑀦𑀸 𑀘, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑀯𑁂𑀲𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀸𑀲𑀸𑀤𑀺𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀫𑀦𑀼𑀜𑁆𑀜𑀁 𑀚𑀝𑀸𑀫𑀡𑁆𑀟𑀮𑀁 𑀩𑀦𑁆𑀥𑀺𑀢𑁆𑀯𑀸 𑀚𑀝𑀦𑁆𑀢𑀭𑁂 𑀓𑀜𑁆𑀘𑀦𑀲𑀽𑀘𑀺𑀁 𑀑𑀤𑀳𑀺𑀢𑁆𑀯𑀸 𑀅𑀦𑁆𑀢𑁄 𑀭𑀢𑁆𑀢𑀧𑀝𑀁 𑀉𑀧𑀭𑀺 𑀭𑀢𑁆𑀢𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀯𑀡𑁆𑀡𑀢𑀸𑀭𑀸𑀔𑀘𑀺𑀢𑀁 𑀭𑀚𑀢𑀫𑀬𑀁 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁𑀲𑁂 𑀓𑀢𑁆𑀯𑀸 𑀫𑀼𑀢𑁆𑀢𑀸𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀢𑁆𑀢𑀁 𑀲𑀼𑀯𑀡𑁆𑀡𑀫𑀬𑀁 𑀪𑀺𑀓𑁆𑀔𑀸𑀪𑀸𑀚𑀦𑀁 𑀆𑀤𑀸𑀬 𑀢𑀻𑀲𑀼 𑀞𑀸𑀦𑁂𑀲𑀼 𑀑𑀦𑀢𑀁 𑀲𑀼𑀯𑀡𑁆𑀡𑀓𑀸𑀚𑀁 𑀔𑀦𑁆𑀥𑁂 𑀓𑀢𑁆𑀯𑀸 𑀫𑀼𑀢𑁆𑀢𑀸𑀲𑀺𑀓𑁆𑀓𑀸𑀬 ¶ 𑀏𑀯 𑀧𑀯𑀸𑀴𑀓𑀫𑀡𑁆𑀟𑀮𑀼𑀁 𑀆𑀤𑀸𑀬 𑀇𑀫𑀺𑀦𑀸 𑀇𑀲𑀺𑀯𑁂𑀲𑁂𑀦 𑀕𑀕𑀦𑀢𑀮𑁂 𑀘𑀦𑁆𑀤𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀘𑀦𑁆𑀤𑀓𑀧𑀸𑀲𑀸𑀤𑀫𑀳𑀸𑀢𑀮𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁨𑁯𑁦.

‘‘𑀅𑀣𑀸𑀕𑀫𑀸 𑀩𑁆𑀭𑀳𑁆𑀫𑀮𑁄𑀓𑀸, 𑀦𑀸𑀭𑀤𑁄 𑀫𑀸𑀦𑀼𑀲𑀺𑀁 𑀧𑀚𑀁;

𑀚𑀫𑁆𑀩𑀼𑀤𑀻𑀧𑀁 𑀅𑀯𑁂𑀓𑁆𑀔𑀦𑁆𑀢𑁄, 𑀅𑀤𑁆𑀤𑀸 𑀭𑀸𑀚𑀸𑀦𑀫𑀗𑁆𑀕𑀢𑀺𑀁.

𑁧𑁨𑁯𑁧.

‘‘𑀢𑀢𑁄 𑀧𑀢𑀺𑀝𑁆𑀞𑀸 𑀧𑀸𑀲𑀸𑀤𑁂, 𑀯𑁂𑀤𑁂𑀳𑀲𑁆𑀲 𑀧𑀼𑀭𑀢𑁆𑀣𑀢𑁄;

𑀢𑀜𑁆𑀘 𑀤𑀺𑀲𑁆𑀯𑀸𑀦𑀸𑀦𑀼𑀧𑁆𑀧𑀢𑁆𑀢𑀁, 𑀭𑀼𑀘𑀸 𑀇𑀲𑀺𑀫𑀯𑀦𑁆𑀤𑀣𑀸’’𑀢𑀺.

𑀢𑀢𑁆𑀣 𑀅𑀤𑁆𑀤𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄𑀯 𑀚𑀫𑁆𑀩𑀼𑀤𑀻𑀧𑀁 𑀅𑀯𑁂𑀓𑁆𑀔𑀦𑁆𑀢𑁄 𑀕𑀼𑀡𑀸𑀚𑀻𑀯𑀓𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀺𑀢𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀭𑀸𑀚𑀸𑀦𑀁 𑀅𑀗𑁆𑀕𑀢𑀺𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀢𑀺𑀝𑁆𑀞𑀸𑀢𑀺 𑀢𑀢𑁄 𑀲𑁄 𑀩𑁆𑀭𑀳𑁆𑀫𑀸 𑀢𑀲𑁆𑀲 𑀭𑀜𑁆𑀜𑁄 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀭𑀢𑁄 ¶ 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀓𑀸𑀲𑁂 𑀧𑀢𑀺𑀝𑁆𑀞𑀳𑀺. 𑀅𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀆𑀕𑀢𑀁. 𑀇𑀲𑀺𑀦𑁆𑀢𑀺 𑀇𑀲𑀺𑀯𑁂𑀲𑁂𑀦 𑀆𑀕𑀢𑀢𑁆𑀢𑀸 𑀲𑀢𑁆𑀣𑀸 ‘‘𑀇𑀲𑀺’’𑀦𑁆𑀢𑀺 𑀆𑀳. 𑀅𑀯𑀦𑁆𑀤𑀣𑀸𑀢𑀺 ‘‘𑀫𑀫𑀸𑀦𑀼𑀕𑁆𑀕𑀳𑁂𑀦 𑀫𑀫 𑀧𑀺𑀢𑀭𑀺 𑀓𑀸𑀭𑀼𑀜𑁆𑀜𑀁 𑀓𑀢𑁆𑀯𑀸 𑀏𑀓𑁄 𑀤𑁂𑀯𑀭𑀸𑀚𑀸 𑀆𑀕𑀢𑁄 ¶ 𑀪𑀯𑀺𑀲𑁆𑀲𑀢𑀻’’𑀢𑀺 𑀳𑀝𑁆𑀞𑀧𑀳𑀝𑁆𑀞𑀸 𑀯𑀸𑀢𑀸𑀪𑀺𑀳𑀝𑀸 𑀲𑀼𑀯𑀡𑁆𑀡𑀓𑀤𑀮𑀻 𑀯𑀺𑀬 𑀑𑀦𑀫𑀺𑀢𑁆𑀯𑀸 𑀦𑀸𑀭𑀤𑀩𑁆𑀭𑀳𑁆𑀫𑀸𑀦𑀁 𑀅𑀯𑀦𑁆𑀤𑀺.

𑀭𑀸𑀚𑀸𑀧𑀺 𑀢𑀁 𑀤𑀺𑀲𑁆𑀯𑀸𑀯 𑀩𑁆𑀭𑀳𑁆𑀫𑀢𑁂𑀚𑁂𑀦 𑀢𑀚𑁆𑀚𑀺𑀢𑁄 𑀅𑀢𑁆𑀢𑀦𑁄 𑀆𑀲𑀦𑁂 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀲𑀦𑀸 𑀑𑀭𑀼𑀬𑁆𑀳 𑀪𑀽𑀫𑀺𑀬𑀁 𑀞𑀢𑁆𑀯𑀸 𑀆𑀕𑀢𑀝𑁆𑀞𑀸𑀦𑀜𑁆𑀘 𑀦𑀸𑀫𑀕𑁄𑀢𑁆𑀢𑀜𑁆𑀘 𑀧𑀼𑀘𑁆𑀙𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁨𑁯𑁨.

‘‘𑀅𑀣𑀸𑀲𑀦𑀫𑁆𑀳𑀸 𑀑𑀭𑀼𑀬𑁆𑀳, 𑀭𑀸𑀚𑀸 𑀩𑁆𑀬𑀣𑀺𑀢𑀫𑀸𑀦𑀲𑁄;

𑀦𑀸𑀭𑀤𑀁 𑀧𑀭𑀺𑀧𑀼𑀘𑁆𑀙𑀦𑁆𑀢𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁨𑁯𑁩.

‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑁂𑀯𑀯𑀡𑁆𑀡𑀺, 𑀑𑀪𑀸𑀲𑀬𑀁 𑀲𑀩𑁆𑀩𑀤𑀺𑀲𑀸 𑀘𑀦𑁆𑀤𑀺𑀫𑀸𑀯;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁, 𑀓𑀣𑀁 𑀢𑀁 𑀚𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂’’’𑀢𑀺.

𑀢𑀢𑁆𑀣 𑀩𑁆𑀬𑀣𑀺𑀢𑀫𑀸𑀦𑀲𑁄𑀢𑀺 𑀪𑀻𑀢𑀘𑀺𑀢𑁆𑀢𑁄. 𑀓𑀼𑀢𑁄 𑀦𑀽𑀢𑀺 𑀓𑀘𑁆𑀘𑀺 𑀦𑀼 𑀔𑁄 𑀯𑀺𑀚𑁆𑀚𑀸𑀥𑀭𑁄 𑀪𑀯𑁂𑀬𑁆𑀬𑀸𑀢𑀺 𑀫𑀜𑁆𑀜𑀫𑀸𑀦𑁄 𑀅𑀯𑀦𑁆𑀤𑀺𑀢𑁆𑀯𑀸𑀯 𑀏𑀯𑀁 𑀧𑀼𑀘𑁆𑀙𑀺.

𑀅𑀣 ¶ 𑀲𑁄 ‘‘𑀅𑀬𑀁 𑀭𑀸𑀚𑀸 ‘𑀧𑀭𑀮𑁄𑀓𑁄 𑀦𑀢𑁆𑀣𑀻’𑀢𑀺 𑀫𑀜𑁆𑀜𑀢𑀺, 𑀧𑀭𑀮𑁄𑀓𑀫𑁂𑀯𑀲𑁆𑀲 𑀢𑀸𑀯 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁨𑁯𑁪.

‘‘𑀅𑀳𑀜𑁆𑀳𑀺 𑀤𑁂𑀯𑀢𑁄 𑀇𑀤𑀸𑀦𑀺 𑀏𑀫𑀺, 𑀑𑀪𑀸𑀲𑀬𑀁 𑀲𑀩𑁆𑀩𑀤𑀺𑀲𑀸 𑀘𑀦𑁆𑀤𑀺𑀫𑀸𑀯;

𑀅𑀓𑁆𑀔𑀸𑀫𑀺 𑀢𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁, 𑀚𑀸𑀦𑀦𑁆𑀢𑀺 𑀫𑀁 𑀦𑀸𑀭𑀤𑁄 𑀓𑀲𑁆𑀲𑀧𑁄 𑀘𑀸’’𑀢𑀺.

𑀢𑀢𑁆𑀣 𑀤𑁂𑀯𑀢𑁄𑀢𑀺 𑀤𑁂𑀯𑀮𑁄𑀓𑀢𑁄. 𑀦𑀸𑀭𑀤𑁄 𑀓𑀲𑁆𑀲𑀧𑁄 𑀘𑀸𑀢𑀺 𑀫𑀁 𑀦𑀸𑀫𑁂𑀦 𑀦𑀸𑀭𑀤𑁄, 𑀕𑁄𑀢𑁆𑀢𑁂𑀦 𑀓𑀲𑁆𑀲𑀧𑁄𑀢𑀺 𑀚𑀸𑀦𑀦𑁆𑀢𑀺.

𑀅𑀣 𑀭𑀸𑀚𑀸 ‘‘𑀇𑀫𑀁 𑀧𑀘𑁆𑀙𑀸𑀧𑀺 𑀧𑀭𑀮𑁄𑀓𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀇𑀤𑁆𑀥𑀺𑀬𑀸 𑀮𑀤𑁆𑀥𑀓𑀸𑀭𑀡𑀁 𑀢𑀸𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁨𑁯𑁫.

‘‘𑀅𑀘𑁆𑀙𑁂𑀭𑀭𑀽𑀧𑀁 𑀢𑀯 𑀬𑀸𑀤𑀺𑀲𑀜𑁆𑀘, 𑀯𑁂𑀳𑀸𑀬𑀲𑀁 𑀕𑀘𑁆𑀙𑀲𑀺 𑀢𑀺𑀝𑁆𑀞𑀲𑀻 𑀘;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀤 𑀏𑀢𑀫𑀢𑁆𑀣𑀁, 𑀅𑀣 𑀓𑁂𑀦 𑀯𑀡𑁆𑀡𑁂𑀦 𑀢𑀯𑀸𑀬𑀫𑀺𑀤𑁆𑀥𑀻’’𑀢𑀺.

𑀢𑀢𑁆𑀣 ¶ 𑀬𑀸𑀤𑀺𑀲𑀜𑁆𑀘𑀸𑀢𑀺 𑀬𑀸𑀤𑀺𑀲𑀜𑁆𑀘 𑀢𑀯 𑀲𑀡𑁆𑀞𑀸𑀦𑀁, 𑀬𑀜𑁆𑀘 𑀢𑁆𑀯𑀁 𑀆𑀓𑀸𑀲𑁂 𑀕𑀘𑁆𑀙𑀲𑀺 𑀢𑀺𑀝𑁆𑀞𑀲𑀺 𑀘, 𑀇𑀤𑀁 𑀅𑀘𑁆𑀙𑀭𑀺𑀬𑀚𑀸𑀢𑀁.

𑀦𑀸𑀭𑀤𑁄 ¶ 𑀆𑀳 𑁋

𑁧𑁨𑁯𑁬.

‘‘𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘 𑀤𑀫𑁄 𑀘 𑀘𑀸𑀕𑁄, 𑀕𑀼𑀡𑀸 𑀫𑀫𑁂𑀢𑁂 𑀧𑀓𑀢𑀸 𑀧𑀼𑀭𑀸𑀡𑀸;

𑀢𑁂𑀳𑁂𑀯 𑀥𑀫𑁆𑀫𑁂𑀳𑀺 𑀲𑀼𑀲𑁂𑀯𑀺𑀢𑁂𑀳𑀺, 𑀫𑀦𑁄𑀚𑀮𑁄 𑀬𑁂𑀦 𑀓𑀸𑀫𑀁 𑀕𑀢𑁄𑀲𑁆𑀫𑀻’’𑀢𑀺.

𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀫𑀼𑀲𑀸𑀯𑀸𑀤𑀯𑀺𑀭𑀳𑀺𑀢𑀁 𑀯𑀘𑀻𑀲𑀘𑁆𑀘𑀁. 𑀥𑀫𑁆𑀫𑁄𑀢𑀺 𑀢𑀺𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑁄 𑀘𑁂𑀯 𑀓𑀲𑀺𑀡𑀧𑀭𑀺𑀓𑀫𑁆𑀫𑀛𑀸𑀦𑀥𑀫𑁆𑀫𑁄 𑀘. 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑀁. 𑀘𑀸𑀕𑁄𑀢𑀺 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑁄 𑀘 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄 𑀘. 𑀫𑀫𑁂𑀢𑁂 𑀕𑀼𑀡𑀸𑀢𑀺 𑀫𑀫 𑀏𑀢𑁂 𑀕𑀼𑀡𑀲𑀫𑁆𑀧𑀬𑀼𑀢𑁆𑀢𑀸 𑀕𑀼𑀡𑀲𑀳𑀕𑀢𑀸. 𑀧𑀓𑀢𑀸 𑀧𑀼𑀭𑀸𑀡𑀸𑀢𑀺 𑀫𑀬𑀸 𑀧𑀼𑀭𑀺𑀫𑀪𑀯𑁂 𑀓𑀢𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀢𑁂𑀳𑁂𑀯 𑀥𑀫𑁆𑀫𑁂𑀳𑀺 𑀲𑀼𑀲𑁂𑀯𑀺𑀢𑁂𑀳𑀻’’𑀢𑀺 𑀢𑁂 𑀲𑀩𑁆𑀩𑁂 𑀕𑀼𑀡𑁂 𑀲𑀼𑀲𑁂𑀯𑀺𑀢𑁂 𑀧𑀭𑀺𑀘𑀸𑀭𑀺𑀢𑁂 𑀤𑀲𑁆𑀲𑁂𑀢𑀺. 𑀫𑀦𑁄𑀚𑀯𑁄𑀢𑀺 𑀇𑀤𑁆𑀥𑀺𑀬𑀸 ¶ 𑀓𑀸𑀭𑀡𑁂𑀦 𑀧𑀝𑀺𑀮𑀤𑁆𑀥𑁄. 𑀬𑁂𑀦 𑀓𑀸𑀫𑀁 𑀕𑀢𑁄𑀲𑁆𑀫𑀻𑀢𑀺 𑀬𑁂𑀦 𑀤𑁂𑀯𑀝𑁆𑀞𑀸𑀦𑁂 𑀘 𑀫𑀦𑀼𑀲𑁆𑀲𑀝𑁆𑀞𑀸𑀦𑁂 𑀘 𑀕𑀦𑁆𑀢𑀼𑀁 𑀇𑀘𑁆𑀙𑀦𑀁, 𑀢𑁂𑀦 𑀕𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄.

𑀭𑀸𑀚𑀸 𑀏𑀯𑀁 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀧𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀧𑀭𑀮𑁄𑀓𑀁 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀧𑀼𑀜𑁆𑀜𑀯𑀺𑀧𑀸𑀓𑁄’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁨𑁯𑁭.

‘‘𑀅𑀘𑁆𑀙𑁂𑀭𑀫𑀸𑀘𑀺𑀓𑁆𑀔𑀲𑀺 𑀧𑀼𑀜𑁆𑀜𑀲𑀺𑀤𑁆𑀥𑀺𑀁, 𑀲𑀘𑁂 𑀳𑀺 𑀏𑀢𑁂𑀳𑀺 𑀬𑀣𑀸 𑀯𑀤𑁂𑀲𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀤 𑀏𑀢𑀫𑀢𑁆𑀣𑀁, 𑀧𑀼𑀝𑁆𑀞𑁄 𑀘 𑀫𑁂 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻’’𑀢𑀺.

𑀢𑀢𑁆𑀣 𑀧𑀼𑀜𑁆𑀜𑀲𑀺𑀤𑁆𑀥𑀺𑀦𑁆𑀢𑀺 𑀧𑀼𑀜𑁆𑀜𑀸𑀦𑀁 𑀲𑀺𑀤𑁆𑀥𑀺𑀁 𑀨𑀮𑀤𑀸𑀬𑀓𑀢𑁆𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀅𑀘𑁆𑀙𑀭𑀺𑀬𑀁 𑀆𑀘𑀺𑀓𑁆𑀔𑀲𑀺.

𑀦𑀸𑀭𑀤𑁄 𑀆𑀳 𑁋

𑁧𑁨𑁯𑁮.

‘‘𑀧𑀼𑀘𑁆𑀙𑀲𑁆𑀲𑀼 𑀫𑀁 𑀭𑀸𑀚 𑀢𑀯𑁂𑀲 𑀅𑀢𑁆𑀣𑁄, 𑀬𑀁 𑀲𑀁𑀲𑀬𑀁 𑀓𑀼𑀭𑀼𑀲𑁂 𑀪𑀽𑀫𑀺𑀧𑀸𑀮;

𑀅𑀳𑀁 𑀢𑀁 𑀦𑀺𑀲𑁆𑀲𑀁𑀲𑀬𑀢𑀁 𑀕𑀫𑁂𑀫𑀺, 𑀦𑀬𑁂𑀳𑀺 𑀜𑀸𑀬𑁂𑀳𑀺 𑀘 𑀳𑁂𑀢𑀼𑀪𑀻 𑀘𑀸’’𑀢𑀺.

𑀢𑀢𑁆𑀣 𑀢𑀯𑁂𑀲 𑀅𑀢𑁆𑀣𑁄𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀓𑁄 𑀦𑀸𑀫 𑀢𑀯 𑀏𑀲 𑀅𑀢𑁆𑀣𑁄. 𑀬𑀁 𑀲𑀁𑀲𑀬𑀦𑁆𑀢𑀺 𑀬𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 ¶ 𑀅𑀢𑁆𑀣𑁂 𑀲𑀁𑀲𑀬𑀁 𑀓𑀭𑁄𑀲𑀺, 𑀢𑀁 𑀫𑀁 𑀧𑀼𑀘𑁆𑀙. 𑀦𑀺𑀲𑁆𑀲𑀁𑀲𑀬𑀢𑀦𑁆𑀢𑀺 𑀅𑀳𑀁 𑀢𑀁 𑀦𑀺𑀲𑁆𑀲𑀁𑀲𑀬𑀪𑀸𑀯𑀁 𑀕𑀫𑁂𑀫𑀺. 𑀦𑀬𑁂𑀳𑀻𑀢𑀺 𑀓𑀸𑀭𑀡𑀯𑀘𑀦𑁂𑀳𑀺. 𑀜𑀸𑀬𑁂𑀳𑀻𑀢𑀺 𑀜𑀸𑀡𑁂𑀳𑀺. 𑀳𑁂𑀢𑀼𑀪𑀻𑀢𑀺 𑀧𑀘𑁆𑀘𑀬𑁂𑀳𑀺, 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀅𑀯𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀭𑀡𑀯𑀘𑀦𑁂𑀦 𑀘 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀝𑁆𑀞𑀸𑀧𑀓𑀧𑀘𑁆𑀘𑀬𑁂𑀳𑀺 𑀘 𑀢𑀁 𑀦𑀺𑀲𑁆𑀲𑀁𑀲𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀭𑀸𑀚𑀸 ¶ 𑀆𑀳 𑁋

𑁧𑁨𑁯𑁯.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀤 𑀏𑀢𑀫𑀢𑁆𑀣𑀁, 𑀧𑀼𑀝𑁆𑀞𑁄 𑀘 𑀫𑁂 𑀦𑀸𑀭𑀤 𑀫𑀸 𑀫𑀼𑀲𑀸 𑀪𑀡𑀺;

𑀅𑀢𑁆𑀣𑀺 𑀦𑀼 𑀤𑁂𑀯𑀸 𑀧𑀺𑀢𑀭𑁄 𑀦𑀼 𑀅𑀢𑁆𑀣𑀺, 𑀮𑁄𑀓𑁄 𑀧𑀭𑁄 𑀅𑀢𑁆𑀣𑀺 𑀚𑀦𑁄 𑀬𑀫𑀸𑀳𑀽’’𑀢𑀺.

𑀢𑀢𑁆𑀣 𑀚𑀦𑁄 𑀬𑀫𑀸𑀳𑀽𑀢𑀺 𑀬𑀁 𑀚𑀦𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀤𑁂𑀯𑀸, 𑀅𑀢𑁆𑀣𑀺 𑀧𑀺𑀢𑀭𑁄, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺, 𑀢𑀁 𑀲𑀩𑁆𑀩𑀁 𑀅𑀢𑁆𑀣𑀺 𑀦𑀼 𑀔𑁄𑀢𑀺 𑀧𑀼𑀘𑁆𑀙𑀢𑀺.

𑀦𑀸𑀭𑀤𑁄 ¶ 𑀆𑀳 𑁋

𑁧𑁩𑁦𑁦.

‘‘𑀅𑀢𑁆𑀣𑁂𑀯 𑀤𑁂𑀯𑀸 𑀧𑀺𑀢𑀭𑁄 𑀘 𑀅𑀢𑁆𑀣𑀺, 𑀮𑁄𑀓𑁄 𑀧𑀭𑁄 𑀅𑀢𑁆𑀣𑀺 𑀚𑀦𑁄 𑀬𑀫𑀸𑀳𑀼;

𑀓𑀸𑀫𑁂𑀲𑀼 𑀕𑀺𑀤𑁆𑀥𑀸 𑀘 𑀦𑀭𑀸 𑀧𑀫𑀽𑀴𑁆𑀳𑀸, 𑀮𑁄𑀓𑀁 𑀧𑀭𑀁 𑀦 𑀯𑀺𑀤𑀽 𑀫𑁄𑀳𑀬𑀼𑀢𑁆𑀢𑀸’’𑀢𑀺.

𑀢𑀢𑁆𑀣 𑀅𑀢𑁆𑀣𑁂𑀯 𑀤𑁂𑀯𑀸𑀢𑀺 𑀫𑀳𑀸𑀭𑀸𑀚, 𑀤𑁂𑀯𑀸 𑀘 𑀧𑀺𑀢𑀭𑁄 𑀘 𑀅𑀢𑁆𑀣𑀺, 𑀬𑀫𑁆𑀧𑀺 𑀚𑀦𑁄 𑀧𑀭𑀮𑁄𑀓𑀫𑀸𑀳, 𑀲𑁄𑀧𑀺 𑀅𑀢𑁆𑀣𑁂𑀯. 𑀦 𑀯𑀺𑀤𑀽𑀢𑀺 𑀓𑀸𑀫𑀕𑀺𑀤𑁆𑀥𑀸 𑀧𑀦 𑀫𑁄𑀳𑀫𑀽𑀴𑁆𑀳𑀸 𑀚𑀦𑀸 𑀧𑀭𑀮𑁄𑀓𑀁 𑀦 𑀯𑀺𑀤𑀦𑁆𑀢𑀺 𑀦 𑀚𑀸𑀦𑀦𑁆𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳 𑁋

𑁧𑁩𑁦𑁧.

‘‘𑀅𑀢𑁆𑀣𑀻𑀢𑀺 𑀘𑁂 𑀦𑀸𑀭𑀤 𑀲𑀤𑁆𑀤𑀳𑀸𑀲𑀺, 𑀦𑀺𑀯𑁂𑀲𑀦𑀁 𑀧𑀭𑀮𑁄𑀓𑁂 𑀫𑀢𑀸𑀦𑀁;

𑀇𑀥𑁂𑀯 𑀫𑁂 𑀧𑀜𑁆𑀘 𑀲𑀢𑀸𑀦𑀺 𑀤𑁂𑀳𑀺, 𑀤𑀲𑁆𑀲𑀸𑀫𑀺 𑀢𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀦𑀺𑀯𑁂𑀲𑀦𑀦𑁆𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀧𑀜𑁆𑀘 𑀲𑀢𑀸𑀦𑀻𑀢𑀺 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺.

𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀧𑀭𑀺𑀲𑀫𑀚𑁆𑀛𑁂𑀬𑁂𑀯 𑀕𑀭𑀳𑀦𑁆𑀢𑁄 𑀆𑀳 𑁋

𑁧𑁩𑁦𑁨.

‘‘𑀤𑀚𑁆𑀚𑁂𑀫𑀼 ¶ 𑀔𑁄 𑀧𑀜𑁆𑀘 𑀲𑀢𑀸𑀦𑀺 𑀪𑁄𑀢𑁄, 𑀚𑀜𑁆𑀜𑀸𑀫𑀼 𑀘𑁂 𑀲𑀻𑀮𑀯𑀦𑁆𑀢𑀁 𑀯𑀤𑀜𑁆𑀜𑀼𑀁;

𑀮𑀼𑀤𑁆𑀤𑀁 𑀢𑀁 𑀪𑁄𑀦𑁆𑀢𑀁 𑀦𑀺𑀭𑀬𑁂 𑀯𑀲𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲𑀁.

𑁧𑁩𑁦𑁩.

‘‘𑀇𑀥𑁂𑀯 𑀬𑁄 𑀳𑁄𑀢𑀺 𑀅𑀥𑀫𑁆𑀫𑀲𑀻𑀮𑁄, 𑀧𑀸𑀧𑀸𑀘𑀸𑀭𑁄 𑀅𑀮𑀲𑁄 𑀮𑀼𑀤𑁆𑀤𑀓𑀫𑁆𑀫𑁄;

𑀦 𑀧𑀡𑁆𑀟𑀺𑀢𑀸 𑀢𑀲𑁆𑀫𑀺𑀁 𑀇𑀡𑀁 𑀤𑀤𑀦𑁆𑀢𑀺, 𑀦 𑀳𑀺 𑀆𑀕𑀫𑁄 𑀳𑁄𑀢𑀺 𑀢𑀣𑀸𑀯𑀺𑀥𑀫𑁆𑀳𑀸.

𑁧𑁩𑁦𑁪.

‘‘𑀤𑀓𑁆𑀔𑀜𑁆𑀘 ¶ 𑀧𑁄𑀲𑀁 𑀫𑀦𑀼𑀚𑀸 𑀯𑀺𑀤𑀺𑀢𑁆𑀯𑀸, 𑀉𑀝𑁆𑀞𑀸𑀦𑀓𑀁 𑀲𑀻𑀮𑀯𑀦𑁆𑀢𑀁 𑀯𑀤𑀜𑁆𑀜𑀼𑀁;

𑀲𑀬𑀫𑁂𑀯 𑀪𑁄𑀕𑁂𑀳𑀺 𑀦𑀺𑀫𑀦𑁆𑀢𑀬𑀦𑁆𑀢𑀺, 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸 𑀧𑀼𑀦 𑀫𑀸𑀳𑀭𑁂𑀲𑀻’’𑀢𑀺.

𑀢𑀢𑁆𑀣 ¶ 𑀚𑀜𑁆𑀜𑀸𑀫𑀼 𑀘𑁂𑀢𑀺 𑀬𑀤𑀺 𑀫𑀬𑀁 𑀪𑀯𑀦𑁆𑀢𑀁 ‘‘𑀲𑀻𑀮𑀯𑀸 𑀏𑀲 𑀯𑀤𑀜𑁆𑀜𑀽, 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀫𑀺𑀦𑀸 𑀦𑀸𑀫𑀢𑁆𑀣𑁄𑀢𑀺 𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀸𑀭𑀓𑁄 𑀯𑀤𑀜𑁆𑀜𑀽’’𑀢𑀺 𑀚𑀸𑀦𑁂𑀬𑁆𑀬𑀸𑀫. 𑀅𑀣 𑀢𑁂 𑀯𑀟𑁆𑀠𑀺𑀬𑀸 𑀧𑀜𑁆𑀘 𑀲𑀢𑀸𑀦𑀺 𑀤𑀤𑁂𑀬𑁆𑀬𑀸𑀫, 𑀢𑁆𑀯𑀁 𑀧𑀦 𑀮𑀼𑀤𑁆𑀤𑁄 𑀲𑀸𑀳𑀲𑀺𑀓𑁄 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀳𑁂𑀢𑁆𑀯𑀸 𑀤𑀸𑀦𑀲𑀸𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀭𑀤𑀸𑀭𑁂𑀲𑀼 𑀅𑀧𑀭𑀚𑁆𑀛𑀲𑀺, 𑀇𑀢𑁄 𑀘𑀼𑀢𑁄 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀏𑀯𑀁 𑀮𑀼𑀤𑁆𑀤𑀁 𑀢𑀁 𑀦𑀺𑀭𑀬𑁂 𑀯𑀲𑀦𑁆𑀢𑀁 𑀪𑁄𑀦𑁆𑀢𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑁄 ‘‘𑀲𑀳𑀲𑁆𑀲𑀁 𑀫𑁂 𑀤𑁂𑀳𑀻’’𑀢𑀺 𑀘𑁄𑀤𑁂𑀲𑁆𑀲𑀢𑀺. 𑀢𑀣𑀸𑀯𑀺𑀥𑀫𑁆𑀳𑀸𑀢𑀺 𑀢𑀸𑀤𑀺𑀲𑀸 𑀧𑀼𑀭𑀺𑀲𑀸 𑀤𑀺𑀦𑁆𑀦𑀲𑁆𑀲 𑀇𑀡𑀲𑁆𑀲 𑀧𑀼𑀦 𑀆𑀕𑀫𑁄 𑀦𑀸𑀫 𑀦 𑀳𑁄𑀢𑀺. 𑀤𑀓𑁆𑀔𑀦𑁆𑀢𑀺 𑀥𑀦𑀼𑀧𑁆𑀧𑀸𑀤𑀦𑀓𑀼𑀲𑀮𑀁. 𑀧𑀼𑀦 𑀫𑀸𑀳𑀭𑁂𑀲𑀻𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸 𑀥𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀆𑀳𑀭𑁂𑀬𑁆𑀬𑀸𑀲𑀺, 𑀫𑀸 𑀦𑀺𑀓𑁆𑀓𑀫𑁆𑀫𑁄 𑀯𑀲𑀻𑀢𑀺 𑀲𑀬𑀫𑁂𑀯 𑀪𑁄𑀕𑁂𑀳𑀺 𑀦𑀺𑀫𑀦𑁆𑀢𑀬𑀦𑁆𑀢𑀻𑀢𑀺.

𑀇𑀢𑀺 𑀭𑀸𑀚𑀸 𑀢𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑁄 𑀅𑀧𑁆𑀧𑀝𑀺𑀪𑀸𑀦𑁄 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 ‘‘𑀫𑀳𑀺𑀤𑁆𑀥𑀺𑀓𑁄 𑀤𑁂𑀯𑁄𑀧𑀺 𑀅𑀚𑁆𑀚 𑀭𑀸𑀚𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀢𑀻’’𑀢𑀺 𑀲𑀓𑀮𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀤𑀸 𑀲𑀢𑁆𑀢𑀬𑁄𑀚𑀦𑀺𑀓𑀸𑀬 𑀫𑀺𑀣𑀺𑀮𑀸𑀬 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀅𑀲𑁆𑀲𑀼𑀡𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀭𑀸𑀚𑀸 𑀅𑀢𑀺𑀯𑀺𑀬 𑀤𑀴𑁆𑀳𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀡𑁆𑀳𑀺, 𑀦𑀺𑀭𑀬𑀪𑀬𑁂𑀦 𑀦𑀁 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀧𑀼𑀦 𑀤𑁂𑀯𑀮𑁄𑀓𑁂𑀦 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀲𑀘𑁂 𑀤𑀺𑀝𑁆𑀞𑀺𑀁 𑀦 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀲𑀺, 𑀏𑀯𑀁 𑀅𑀦𑀦𑁆𑀢𑀤𑀼𑀓𑁆𑀔𑀁 𑀦𑀺𑀭𑀬𑀁 𑀕𑀫𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀦𑀺𑀭𑀬𑀓𑀣𑀁 𑀧𑀝𑁆𑀞𑀧𑁂𑀲𑀺 𑁋

𑁧𑁩𑁦𑁫.

‘‘𑀇𑀢𑁄 𑀘𑀼𑀢𑁄 𑀤𑀓𑁆𑀔𑀲𑀺 𑀢𑀢𑁆𑀣 𑀭𑀸𑀚, 𑀓𑀸𑀓𑁄𑀮𑀲𑀗𑁆𑀖𑁂𑀳𑀺 𑀯𑀺𑀓𑀲𑁆𑀲𑀫𑀸𑀦𑀁;

𑀢𑀁 𑀔𑀚𑁆𑀚𑀫𑀸𑀦𑀁 𑀦𑀺𑀭𑀬𑁂 𑀯𑀲𑀦𑁆𑀢𑀁, 𑀓𑀸𑀓𑁂𑀳𑀺 𑀕𑀺𑀚𑁆𑀛𑁂𑀳𑀺 𑀘 𑀲𑁂𑀦𑀓𑁂𑀳𑀺;

𑀲𑀜𑁆𑀙𑀺𑀦𑁆𑀦𑀕𑀢𑁆𑀢𑀁 𑀭𑀼𑀳𑀺𑀭𑀁 𑀲𑀯𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 ¶ 𑀓𑀸𑀓𑁄𑀮𑀲𑀗𑁆𑀖𑁂𑀳𑀻𑀢𑀺 𑀮𑁄𑀳𑀢𑀼𑀡𑁆𑀟𑁂𑀳𑀺 𑀓𑀸𑀓𑀲𑀗𑁆𑀖𑁂𑀳𑀺. 𑀯𑀺𑀓𑀲𑁆𑀲𑀫𑀸𑀦𑀦𑁆𑀢𑀺 𑀅𑀢𑁆𑀢𑀸𑀦𑀁 𑀆𑀓𑀟𑁆𑀠𑀺𑀬𑀫𑀸𑀦𑀁 𑀢𑀢𑁆𑀣 𑀦𑀺𑀭𑀬𑁂 𑀧𑀲𑁆𑀲𑀺𑀲𑁆𑀲𑀲𑀺. 𑀢𑀦𑁆𑀢𑀺 𑀢𑀁 𑀪𑀯𑀦𑁆𑀢𑀁.

𑀢𑀁 ¶ ¶ 𑀧𑀦 𑀓𑀸𑀓𑁄𑀮𑀦𑀺𑀭𑀬𑀁 𑀯𑀡𑁆𑀡𑁂𑀢𑁆𑀯𑀸 ‘‘𑀲𑀘𑁂𑀧𑀺 𑀏𑀢𑁆𑀣 𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺, 𑀮𑁄𑀓𑀦𑁆𑀢𑀭𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀦𑀺𑀭𑀬𑀁 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳 𑁋

𑁧𑁩𑁦𑁬.

‘‘𑀅𑀦𑁆𑀥𑀁𑀢𑀫𑀁 𑀢𑀢𑁆𑀣 𑀦 𑀘𑀦𑁆𑀤𑀲𑀽𑀭𑀺𑀬𑀸, 𑀦𑀺𑀭𑀬𑁄 𑀲𑀤𑀸 𑀢𑀼𑀫𑀼𑀮𑁄 𑀖𑁄𑀭𑀭𑀽𑀧𑁄;

𑀲𑀸 𑀦𑁂𑀯 𑀭𑀢𑁆𑀢𑀻 𑀦 𑀤𑀺𑀯𑀸 𑀧𑀜𑁆𑀜𑀸𑀬𑀢𑀺, 𑀢𑀣𑀸𑀯𑀺𑀥𑁂 𑀓𑁄 𑀯𑀺𑀘𑀭𑁂 𑀥𑀦𑀢𑁆𑀣𑀺𑀓𑁄’’𑀢𑀺.

𑀢𑀢𑁆𑀣 𑀅𑀦𑁆𑀥𑀁 𑀢𑀫𑀦𑁆𑀢𑀺 𑀫𑀳𑀸𑀭𑀸𑀚, 𑀬𑀫𑁆𑀳𑀺 𑀮𑁄𑀓𑀦𑁆𑀢𑀭𑀦𑀺𑀭𑀬𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀁 𑀅𑀦𑁆𑀥𑀢𑀫𑀁. 𑀲𑀤𑀸 𑀢𑀼𑀫𑀼𑀮𑁄𑀢𑀺 𑀲𑁄 𑀦𑀺𑀭𑀬𑁄 𑀦𑀺𑀘𑁆𑀘𑀁 𑀩𑀳𑀮𑀦𑁆𑀥𑀓𑀸𑀭𑁄. 𑀖𑁄𑀭𑀭𑀽𑀧𑁄𑀢𑀺 𑀪𑀻𑀲𑀦𑀓𑀚𑀸𑀢𑀺𑀓𑁄. 𑀲𑀸 𑀦𑁂𑀯 𑀭𑀢𑁆𑀢𑀻𑀢𑀺 𑀬𑀸 𑀇𑀥 𑀭𑀢𑁆𑀢𑀺 𑀤𑀺𑀯𑀸 𑀘, 𑀲𑀸 𑀦𑁂𑀯 𑀢𑀢𑁆𑀣 𑀧𑀜𑁆𑀜𑀸𑀬𑀢𑀺. 𑀓𑁄 𑀯𑀺𑀘𑀭𑁂𑀢𑀺 𑀓𑁄 𑀉𑀤𑁆𑀥𑀸𑀭𑀁 𑀲𑁄𑀥𑁂𑀦𑁆𑀢𑁄 𑀯𑀺𑀘𑀭𑀺𑀲𑁆𑀲𑀢𑀺.

𑀢𑀫𑁆𑀧𑀺𑀲𑁆𑀲 𑀮𑁄𑀓𑀦𑁆𑀢𑀭𑀦𑀺𑀭𑀬𑀁 𑀯𑀺𑀢𑁆𑀣𑀸𑀭𑁂𑀦 𑀯𑀡𑁆𑀡𑁂𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦 𑀓𑁂𑀯𑀮𑀁 𑀏𑀢𑀤𑁂𑀯, 𑀅𑀜𑁆𑀜𑀫𑁆𑀧𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀲𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁩𑁦𑁭.

‘‘𑀲𑀩𑀮𑁄 𑀘 𑀲𑀸𑀫𑁄 𑀘 𑀤𑀼𑀯𑁂 𑀲𑀼𑀯𑀸𑀦𑀸, 𑀧𑀯𑀤𑁆𑀥𑀓𑀸𑀬𑀸 𑀩𑀮𑀺𑀦𑁄 𑀫𑀳𑀦𑁆𑀢𑀸;

𑀔𑀸𑀤𑀦𑁆𑀢𑀺 𑀤𑀦𑁆𑀢𑁂𑀳𑀺 𑀅𑀬𑁄𑀫𑀬𑁂𑀳𑀺, 𑀇𑀢𑁄 𑀧𑀡𑀼𑀦𑁆𑀦𑀁 𑀧𑀭𑀮𑁄𑀓𑀧𑀢𑁆𑀢’’𑀦𑁆𑀢𑀺.

𑀢𑀢𑁆𑀣 𑀇𑀢𑁄 𑀧𑀡𑀼𑀦𑁆𑀦𑀦𑁆𑀢𑀺 𑀇𑀫𑀫𑁆𑀳𑀸 𑀫𑀦𑀼𑀲𑁆𑀲𑀮𑁄𑀓𑀸 𑀘𑀼𑀢𑀁. 𑀧𑀭𑀢𑁄 𑀦𑀺𑀭𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀺𑀭𑀬𑀝𑁆𑀞𑀸𑀦𑀸𑀦𑀺 𑀦𑀺𑀭𑀬𑀧𑀸𑀮𑀸𑀦𑀁 𑀉𑀧𑀓𑁆𑀓𑀫𑁂𑀳𑀺 𑀲𑀤𑁆𑀥𑀺𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀢𑀸𑀲𑀁 𑀢𑀸𑀲𑀁 𑀕𑀸𑀣𑀸𑀦𑀁 𑀅𑀦𑀼𑀢𑁆𑀢𑀸𑀦𑀸𑀦𑀺 𑀧𑀤𑀸𑀦𑀺 𑀯𑀡𑁆𑀡𑁂𑀢𑀩𑁆𑀩𑀸𑀦𑀺.

𑁧𑁩𑁦𑁮.

‘‘𑀢𑀁 𑀔𑀚𑁆𑀚𑀫𑀸𑀦𑀁 𑀦𑀺𑀭𑀬𑁂 𑀯𑀲𑀦𑁆𑀢𑀁, 𑀮𑀼𑀤𑁆𑀤𑁂𑀳𑀺 𑀯𑀸𑀴𑁂𑀳𑀺 𑀅𑀖𑀫𑁆𑀫𑀺𑀕𑁂𑀳𑀺 𑀘;

𑀲𑀜𑁆𑀙𑀺𑀦𑁆𑀦𑀕𑀢𑁆𑀢𑀁 𑀭𑀼𑀳𑀺𑀭𑀁 𑀲𑀯𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀮𑀼𑀤𑁆𑀤𑁂𑀳𑀻𑀢𑀺 𑀤𑀸𑀭𑀼𑀡𑁂𑀳𑀺. 𑀯𑀸𑀴𑁂𑀳𑀻𑀢𑀺 𑀤𑀼𑀝𑁆𑀞𑁂𑀳𑀺. 𑀅𑀖𑀫𑁆𑀫𑀺𑀕𑁂𑀳𑀻𑀢𑀺 𑀅𑀖𑀸𑀯𑀳𑁂𑀳𑀺 𑀫𑀺𑀕𑁂𑀳𑀺, 𑀤𑀼𑀓𑁆𑀔𑀸𑀯𑀳𑁂𑀳𑀺 𑀲𑀼𑀦𑀔𑁂𑀳𑀻𑀢𑀺 𑀅𑀢𑁆𑀣𑁄.

𑁧𑁩𑁦𑁯.

‘‘𑀉𑀲𑀽𑀳𑀺 ¶ ¶ ¶ 𑀲𑀢𑁆𑀢𑀻𑀳𑀺 𑀘 𑀲𑀼𑀦𑀺𑀲𑀺𑀢𑀸𑀳𑀺, 𑀳𑀦𑀦𑁆𑀢𑀺 𑀯𑀺𑀚𑁆𑀛𑀦𑁆𑀢𑀺 𑀘 𑀧𑀘𑁆𑀘𑀫𑀺𑀢𑁆𑀢𑀸;

𑀓𑀸𑀴𑀽𑀧𑀓𑀸𑀴𑀸 𑀦𑀺𑀭𑀬𑀫𑁆𑀳𑀺 𑀖𑁄𑀭𑁂, 𑀧𑀼𑀩𑁆𑀩𑁂 𑀦𑀭𑀁 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀺’’𑀦𑁆𑀢𑀺.

𑀢𑀢𑁆𑀣 𑀳𑀦𑀦𑁆𑀢𑀺 𑀯𑀺𑀚𑁆𑀛𑀦𑁆𑀢𑀺 𑀘𑀸𑀢𑀺 𑀚𑀮𑀺𑀢𑀸𑀬 𑀅𑀬𑀧𑀣𑀯𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀭𑁄𑀦𑁆𑀢𑀸 𑀧𑀳𑀭𑀦𑁆𑀢𑀺 𑀘𑁂𑀯 𑀯𑀺𑀚𑁆𑀛𑀦𑁆𑀢𑀺 𑀘. 𑀓𑀸𑀴𑀽𑀧𑀓𑀸𑀴𑀸𑀢𑀺 𑀏𑀯𑀁𑀦𑀸𑀫𑀓𑀸 𑀦𑀺𑀭𑀬𑀧𑀸𑀮𑀸. 𑀦𑀺𑀭𑀬𑀫𑁆𑀳𑀻𑀢𑀺 𑀢𑀲𑁆𑀫𑀺𑀁 𑀢𑁂𑀲𑀜𑁆𑀜𑁂𑀯 𑀯𑀲𑁂𑀦 𑀓𑀸𑀴𑀽𑀧𑀓𑀸𑀴𑀲𑀗𑁆𑀔𑀸𑀢𑁂 𑀦𑀺𑀭𑀬𑁂. 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀺𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀓𑀸𑀭𑀓𑀁.

𑁧𑁩𑁧𑁦.

‘‘𑀢𑀁 𑀳𑀜𑁆𑀜𑀫𑀸𑀦𑀁 𑀦𑀺𑀭𑀬𑁂 𑀯𑀚𑀦𑁆𑀢𑀁, 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀲𑁆𑀲𑀲𑁆𑀫𑀺𑀁 𑀯𑀺𑀧𑁆𑀨𑀸𑀮𑀺𑀢𑀽𑀤𑀭𑀁;

𑀲𑀜𑁆𑀙𑀺𑀦𑁆𑀦𑀕𑀢𑁆𑀢𑀁 𑀭𑀼𑀳𑀺𑀭𑀁 𑀲𑀯𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀢𑀦𑁆𑀢𑀺 𑀢𑀁 𑀪𑀯𑀦𑁆𑀢𑀁 𑀢𑀢𑁆𑀣 𑀦𑀺𑀭𑀬𑁂 𑀢𑀣𑀸 𑀳𑀜𑁆𑀜𑀫𑀸𑀦𑀁. 𑀯𑀚𑀦𑁆𑀢𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀦𑁆𑀢𑀁. 𑀓𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀓𑀼𑀘𑁆𑀙𑀺𑀬𑀜𑁆𑀘 𑀧𑀲𑁆𑀲𑁂 𑀘 𑀳𑀜𑁆𑀜𑀫𑀸𑀦𑀁 𑀯𑀺𑀚𑁆𑀛𑀺𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁩𑁧𑁧.

‘‘𑀲𑀢𑁆𑀢𑀻 𑀉𑀲𑀽 𑀢𑁄𑀫𑀭𑀪𑀺𑀡𑁆𑀟𑀺𑀯𑀸𑀮𑀸, 𑀯𑀺𑀯𑀺𑀥𑀸𑀯𑀼𑀥𑀸 𑀯𑀲𑁆𑀲𑀦𑁆𑀢𑀺 𑀢𑀢𑁆𑀣 𑀤𑁂𑀯𑀸;

𑀧𑀢𑀦𑁆𑀢𑀺 𑀅𑀗𑁆𑀕𑀸𑀭𑀫𑀺𑀯𑀘𑁆𑀘𑀺𑀫𑀦𑁆𑀢𑁄, 𑀲𑀺𑀮𑀸𑀲𑀦𑀻 𑀯𑀲𑁆𑀲𑀢𑀺 𑀮𑀼𑀤𑁆𑀤𑀓𑀫𑁆𑀫𑁂𑀢𑀺.

𑀢𑀢𑁆𑀣 𑀅𑀗𑁆𑀕𑀸𑀭𑀫𑀺𑀯𑀘𑁆𑀘𑀺𑀫𑀦𑁆𑀢𑁄𑀢𑀺 𑀚𑀮𑀺𑀢𑀅𑀗𑁆𑀕𑀸𑀭𑀸 𑀯𑀺𑀬 𑀅𑀘𑁆𑀘𑀺𑀫𑀦𑁆𑀢𑀸 𑀆𑀯𑀼𑀥𑀯𑀺𑀲𑁂𑀲𑀸 𑀧𑀢𑀦𑁆𑀢𑀺. 𑀲𑀺𑀮𑀸𑀲𑀦𑀻𑀢𑀺 𑀚𑀮𑀺𑀢𑀲𑀺𑀮𑀸𑀲𑀦𑀺. 𑀯𑀲𑁆𑀲𑀢𑀺 𑀮𑀼𑀤𑁆𑀤𑀓𑀫𑁆𑀫𑁂𑀢𑀺 𑀬𑀣𑀸 𑀦𑀸𑀫 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀅𑀲𑀦𑀺 𑀧𑀢𑀢𑀺, 𑀏𑀯𑀫𑁂𑀯 𑀆𑀓𑀸𑀲𑁂 𑀲𑀫𑀼𑀝𑁆𑀞𑀸𑀬 𑀘𑀺𑀘𑁆𑀘𑀺𑀝𑀸𑀬𑀫𑀸𑀦𑀁 𑀚𑀮𑀺𑀢𑀲𑀺𑀮𑀸𑀯𑀲𑁆𑀲𑀁 𑀢𑁂𑀲𑀁 𑀮𑀼𑀤𑁆𑀤𑀓𑀫𑁆𑀫𑀸𑀦𑀁 𑀉𑀧𑀭𑀺 𑀧𑀢𑀢𑀺.

𑁧𑁩𑁧𑁨.

‘‘𑀉𑀡𑁆𑀳𑁄 𑀘 𑀯𑀸𑀢𑁄 𑀦𑀺𑀭𑀬𑀫𑁆𑀳𑀺 𑀤𑀼𑀲𑁆𑀲𑀳𑁄, 𑀦 𑀢𑀫𑁆𑀳𑀺 𑀲𑀼𑀔𑀁 𑀮𑀩𑁆𑀪𑀢𑀺 𑀇𑀢𑁆𑀢𑀭𑀫𑁆𑀧𑀺;

𑀢𑀁 𑀢𑀁 𑀯𑀺𑀥𑀸𑀯𑀦𑁆𑀢𑀫𑀮𑁂𑀦𑀫𑀸𑀢𑀼𑀭𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀇𑀢𑁆𑀢𑀭𑀫𑁆𑀧𑀻𑀢𑀺 𑀧𑀭𑀺𑀢𑁆𑀢𑀓𑀫𑁆𑀧𑀺. 𑀯𑀺𑀥𑀸𑀯𑀦𑁆𑀢𑀦𑁆𑀢𑀺 𑀯𑀺𑀯𑀺𑀥𑀸 𑀥𑀸𑀯𑀦𑁆𑀢𑀁.

𑁧𑁩𑁧𑁩.

‘‘𑀲𑀦𑁆𑀥𑀸𑀯𑀫𑀸𑀦𑀫𑁆𑀧𑀺 ¶ 𑀭𑀣𑁂𑀲𑀼 𑀬𑀼𑀢𑁆𑀢𑀁, 𑀲𑀚𑁄𑀢𑀺𑀪𑀽𑀢𑀁 𑀧𑀣𑀯𑀺𑀁 𑀓𑀫𑀦𑁆𑀢𑀁;

𑀧𑀢𑁄𑀤𑀮𑀝𑁆𑀞𑀻𑀳𑀺 ¶ 𑀲𑀼𑀘𑁄𑀤𑀬𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 ¶ 𑀭𑀣𑁂𑀲𑀼 𑀬𑀼𑀢𑁆𑀢𑀦𑁆𑀢𑀺 𑀯𑀸𑀭𑁂𑀦 𑀯𑀸𑀭𑀁 𑀢𑁂𑀲𑀼 𑀚𑀮𑀺𑀢𑀮𑁄𑀳𑀭𑀣𑁂𑀲𑀼 𑀬𑀼𑀢𑁆𑀢𑀁. 𑀓𑀫𑀦𑁆𑀢𑀦𑁆𑀢𑀺 𑀅𑀓𑁆𑀓𑀫𑀫𑀸𑀦𑀁. 𑀲𑀼𑀘𑁄𑀤𑀬𑀦𑁆𑀢𑀦𑁆𑀢𑀺 𑀲𑀼𑀝𑁆𑀞𑀼 𑀘𑁄𑀤𑀬𑀦𑁆𑀢𑀁.

𑁧𑁩𑁧𑁪.

‘‘𑀢𑀫𑀸𑀭𑀼𑀳𑀦𑁆𑀢𑀁 𑀔𑀼𑀭𑀲𑀜𑁆𑀘𑀺𑀢𑀁 𑀕𑀺𑀭𑀺𑀁, 𑀯𑀺𑀪𑀺𑀁𑀲𑀦𑀁 𑀧𑀚𑁆𑀚𑀮𑀺𑀢𑀁 𑀪𑀬𑀸𑀦𑀓𑀁;

𑀲𑀜𑁆𑀙𑀺𑀦𑁆𑀦𑀕𑀢𑁆𑀢𑀁 𑀭𑀼𑀳𑀺𑀭𑀁 𑀲𑀯𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀢𑀫𑀸𑀭𑀼𑀳𑀦𑁆𑀢𑀦𑁆𑀢𑀺 𑀢𑀁 𑀪𑀯𑀦𑁆𑀢𑀁 𑀚𑀮𑀺𑀢𑀸𑀯𑀼𑀥𑀧𑀳𑀸𑀭𑁂 𑀅𑀲𑀳𑀺𑀢𑁆𑀯𑀸 𑀚𑀮𑀺𑀢𑀔𑀼𑀭𑁂𑀳𑀺 𑀲𑀜𑁆𑀘𑀺𑀢𑀁 𑀚𑀮𑀺𑀢𑀮𑁄𑀳𑀧𑀩𑁆𑀩𑀢𑀁 𑀆𑀭𑀼𑀳𑀦𑁆𑀢𑀁.

𑁧𑁩𑁧𑁫.

‘‘𑀢𑀫𑀸𑀭𑀼𑀳𑀦𑁆𑀢𑀁 𑀧𑀩𑁆𑀩𑀢𑀲𑀦𑁆𑀦𑀺𑀓𑀸𑀲𑀁, 𑀅𑀗𑁆𑀕𑀸𑀭𑀭𑀸𑀲𑀺𑀁 𑀚𑀮𑀺𑀢𑀁 𑀪𑀬𑀸𑀦𑀓𑀁;

𑀲𑀼𑀤𑀟𑁆𑀠𑀕𑀢𑁆𑀢𑀁 𑀓𑀧𑀡𑀁 𑀭𑀼𑀤𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀲𑀼𑀤𑀟𑁆𑀠𑀕𑀢𑁆𑀢𑀦𑁆𑀢𑀺 𑀲𑀼𑀝𑁆𑀞𑀼 𑀤𑀟𑁆𑀠𑀲𑀭𑀻𑀭𑀁.

𑁧𑁩𑁧𑁬.

‘‘𑀅𑀩𑁆𑀪𑀓𑀽𑀝𑀲𑀫𑀸 𑀉𑀘𑁆𑀘𑀸, 𑀓𑀡𑁆𑀝𑀓𑀦𑀺𑀘𑀺𑀢𑀸 𑀤𑀼𑀫𑀸;

𑀅𑀬𑁄𑀫𑀬𑁂𑀳𑀺 𑀢𑀺𑀓𑁆𑀔𑁂𑀳𑀺, 𑀦𑀭𑀮𑁄𑀳𑀺𑀢𑀧𑀸𑀬𑀺𑀪𑀻’’𑀢𑀺.

𑀢𑀢𑁆𑀣 𑀓𑀡𑁆𑀝𑀓𑀦𑀺𑀘𑀺𑀢𑀸𑀢𑀺 𑀚𑀮𑀺𑀢𑀓𑀡𑁆𑀝𑀓𑁂𑀳𑀺 𑀘𑀺𑀢𑀸. ‘‘𑀅𑀬𑁄𑀫𑀬𑁂𑀳𑀻’’𑀢𑀺 𑀇𑀤𑀁 𑀬𑁂𑀳𑀺 𑀓𑀡𑁆𑀝𑀓𑁂𑀳𑀺 𑀆𑀘𑀺𑀢𑀸, 𑀢𑁂 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑁧𑁩𑁧𑁭.

‘‘𑀢𑀫𑀸𑀭𑀼𑀳𑀦𑁆𑀢𑀺 𑀦𑀸𑀭𑀺𑀬𑁄, 𑀦𑀭𑀸 𑀘 𑀧𑀭𑀤𑀸𑀭𑀕𑀽;

𑀘𑁄𑀤𑀺𑀢𑀸 𑀲𑀢𑁆𑀢𑀺𑀳𑀢𑁆𑀣𑁂𑀳𑀺, 𑀬𑀫𑀦𑀺𑀤𑁆𑀤𑁂𑀲𑀓𑀸𑀭𑀺𑀪𑀻’’𑀢𑀺.

𑀢𑀢𑁆𑀣 𑀢𑀫𑀸𑀭𑀼𑀳𑀦𑁆𑀢𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀁 𑀆𑀭𑀼𑀳𑀦𑁆𑀢𑀺. 𑀬𑀫𑀦𑀺𑀤𑁆𑀤𑁂𑀲𑀓𑀸𑀭𑀺𑀪𑀻𑀢𑀺 𑀬𑀫𑀲𑁆𑀲 𑀯𑀘𑀦𑀓𑀭𑁂𑀳𑀺, 𑀦𑀺𑀭𑀬𑀧𑀸𑀮𑁂𑀳𑀻𑀢𑀺 𑀅𑀢𑁆𑀣𑁄.

𑁧𑁩𑁧𑁮.

‘‘𑀢𑀫𑀸𑀭𑀼𑀳𑀦𑁆𑀢𑀁 ¶ 𑀦𑀺𑀭𑀬𑀁, 𑀲𑀺𑀫𑁆𑀩𑀮𑀺𑀁 𑀭𑀼𑀳𑀺𑀭𑀫𑀓𑁆𑀔𑀺𑀢𑀁;

𑀯𑀺𑀤𑀟𑁆𑀠𑀓𑀸𑀬𑀁 𑀯𑀺𑀢𑀘𑀁, 𑀆𑀢𑀼𑀭𑀁 𑀕𑀸𑀴𑁆𑀳𑀯𑁂𑀤𑀦𑀁.

𑁧𑁩𑁧𑁯.

‘‘𑀧𑀲𑁆𑀲𑀲𑀦𑁆𑀢𑀁 ¶ 𑀫𑀼𑀳𑀼𑀁 𑀉𑀡𑁆𑀳𑀁, 𑀧𑀼𑀩𑁆𑀩𑀓𑀫𑁆𑀫𑀸𑀧𑀭𑀸𑀥𑀺𑀓𑀁;

𑀤𑀼𑀫𑀕𑁆𑀕𑁂 𑀯𑀺𑀢𑀘𑀁 𑀕𑀢𑁆𑀢𑀁, 𑀓𑁄 𑀢𑀁 𑀬𑀸𑀘𑁂𑀬𑁆𑀬 𑀢𑀁 𑀥𑀦’’𑀦𑁆𑀢𑀺.

𑀢𑀢𑁆𑀣 𑀯𑀺𑀤𑀟𑁆𑀠𑀓𑀸𑀬𑀦𑁆𑀢𑀺 𑀯𑀺𑀳𑀺𑀁𑀲𑀺𑀢𑀓𑀸𑀬𑀁. 𑀯𑀺𑀢𑀘𑀦𑁆𑀢𑀺 𑀘𑀫𑁆𑀫𑀫𑀁𑀲𑀸𑀦𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀙𑀺𑀦𑁆𑀦𑀢𑀸𑀬 𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀁 𑀯𑀺𑀬 𑀓𑀺𑀁𑀲𑀼𑀓𑀧𑀼𑀧𑁆𑀨𑀁 𑀯𑀺𑀬 𑀘.

𑁧𑁩𑁨𑁦.

‘‘𑀅𑀩𑁆𑀪𑀓𑀽𑀝𑀲𑀫𑀸 ¶ 𑀉𑀘𑁆𑀘𑀸, 𑀅𑀲𑀺𑀧𑀢𑁆𑀢𑀸𑀘𑀺𑀢𑀸 𑀤𑀼𑀫𑀸;

𑀅𑀬𑁄𑀫𑀬𑁂𑀳𑀺 𑀢𑀺𑀓𑁆𑀔𑁂𑀳𑀺, 𑀦𑀭𑀮𑁄𑀳𑀺𑀢𑀧𑀸𑀬𑀺𑀪𑀻’’𑀢𑀺.

𑀢𑀢𑁆𑀣 𑀅𑀲𑀺𑀧𑀢𑁆𑀢𑀸𑀘𑀺𑀢𑀸𑀢𑀺 𑀅𑀲𑀺𑀫𑀬𑁂𑀳𑀺 𑀧𑀢𑁆𑀢𑁂𑀳𑀺 𑀘𑀺𑀢𑀸.

𑁧𑁩𑁨𑁧.

‘‘𑀢𑀫𑀸𑀭𑀼𑀳𑀦𑁆𑀢𑀁 𑀅𑀲𑀺𑀧𑀢𑁆𑀢𑀧𑀸𑀤𑀧𑀁, 𑀅𑀲𑀻𑀳𑀺 𑀢𑀺𑀓𑁆𑀔𑁂𑀳𑀺 𑀘 𑀙𑀺𑀚𑁆𑀚𑀫𑀸𑀦𑀁;

𑀲𑀜𑁆𑀙𑀺𑀦𑁆𑀦𑀕𑀢𑁆𑀢𑀁 𑀭𑀼𑀳𑀺𑀭𑀁 𑀲𑀯𑀦𑁆𑀢𑀁, 𑀓𑁄 𑀘𑁄𑀤𑀬𑁂 𑀧𑀭𑀮𑁄𑀓𑁂 𑀲𑀳𑀲𑁆𑀲’’𑀦𑁆𑀢𑀺.

𑀢𑀢𑁆𑀣 𑀢𑀫𑀸𑀭𑀼𑀳𑀦𑁆𑀢𑀦𑁆𑀢𑀺 𑀢𑀁 𑀪𑀯𑀦𑁆𑀢𑀁 𑀦𑀺𑀭𑀬𑀧𑀸𑀮𑀸𑀦𑀁 𑀆𑀯𑀼𑀥𑀧𑀳𑀸𑀭𑁂 𑀅𑀲𑀳𑀺𑀢𑁆𑀯𑀸 𑀆𑀭𑀼𑀳𑀦𑁆𑀢𑀁.

𑁧𑁩𑁨𑁨.

‘‘𑀢𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀁 𑀢𑀁, 𑀅𑀲𑀺𑀧𑀢𑁆𑀢𑀸𑀘𑀺𑀢𑀸 𑀤𑀼𑀫𑀸;

𑀲𑀫𑁆𑀧𑀢𑀺𑀢𑀁 𑀯𑁂𑀢𑀭𑀡𑀺𑀁, 𑀓𑁄 𑀢𑀁 𑀬𑀸𑀘𑁂𑀬𑁆𑀬 𑀢𑀁 𑀥𑀦’’𑀦𑁆𑀢𑀺.

𑀢𑀢𑁆𑀣 𑀲𑀫𑁆𑀧𑀢𑀺𑀢𑀦𑁆𑀢𑀺 𑀧𑀢𑀺𑀢𑀁.

𑁧𑁩𑁨𑁩.

‘‘𑀔𑀭𑀸 𑀔𑀸𑀭𑁄𑀤𑀺𑀓𑀸 𑀢𑀢𑁆𑀢𑀸, 𑀤𑀼𑀕𑁆𑀕𑀸 𑀯𑁂𑀢𑀭𑀡𑀻 𑀦𑀤𑀻;

𑀅𑀬𑁄𑀧𑁄𑀓𑁆𑀔𑀭𑀲𑀜𑁆𑀙𑀦𑁆𑀦𑀸, 𑀢𑀺𑀓𑁆𑀔𑀸 𑀧𑀢𑁆𑀢𑁂𑀳𑀺 𑀲𑀦𑁆𑀤𑀢𑀺’’.

𑀢𑀢𑁆𑀣 𑀔𑀭𑀸𑀢𑀺 𑀨𑀭𑀼𑀲𑀸. 𑀅𑀬𑁄𑀧𑁄𑀓𑁆𑀔𑀭𑀲𑀜𑁆𑀙𑀦𑁆𑀦𑀸𑀢𑀺 𑀅𑀬𑁄𑀫𑀬𑁂𑀳𑀺 𑀢𑀺𑀔𑀺𑀡𑀧𑀭𑀺𑀬𑀦𑁆𑀢𑁂𑀳𑀺 𑀧𑁄𑀓𑁆𑀔𑀭𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑀸. 𑀧𑀢𑁆𑀢𑁂𑀳𑀻𑀢𑀺 𑀢𑁂𑀳𑀺 𑀧𑀢𑁆𑀢𑁂𑀳𑀺 𑀲𑀸 𑀦𑀤𑀻 𑀢𑀺𑀓𑁆𑀔𑀸 𑀳𑀼𑀢𑁆𑀯𑀸 𑀲𑀦𑁆𑀤𑀢𑀺.

𑁧𑁩𑁨𑁪.

‘‘𑀢𑀢𑁆𑀣 𑀲𑀜𑁆𑀙𑀺𑀦𑁆𑀦𑀕𑀢𑁆𑀢𑀁 𑀢𑀁, 𑀯𑀼𑀬𑁆𑀳𑀦𑁆𑀢𑀁 𑀭𑀼𑀳𑀺𑀭𑀫𑀓𑁆𑀔𑀺𑀢𑀁;

𑀯𑁂𑀢𑀭𑀜𑁆𑀜𑁂 𑀅𑀦𑀸𑀮𑀫𑁆𑀩𑁂, 𑀓𑁄 𑀢𑀁 𑀬𑀸𑀘𑁂𑀬𑁆𑀬 𑀢𑀁 𑀥𑀦’’𑀦𑁆𑀢𑀺.

𑀢𑀢𑁆𑀣 ¶ 𑀯𑁂𑀢𑀭𑀜𑁆𑀜𑁂𑀢𑀺 𑀯𑁂𑀢𑀭𑀡𑀻𑀉𑀤𑀓𑁂.

𑀇𑀫𑀁 ¶ 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀦𑀺𑀭𑀬𑀓𑀣𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀫𑀳𑀸𑀲𑀢𑁆𑀢𑀜𑁆𑀜𑁂𑀯 𑀢𑀸𑀡𑀕𑀯𑁂𑀲𑀻 𑀳𑀼𑀢𑁆𑀯𑀸 𑀆𑀳 𑁋

𑁧𑁩𑁨𑁫.

‘‘𑀯𑁂𑀥𑀸𑀫𑀺 𑀭𑀼𑀓𑁆𑀔𑁄 𑀯𑀺𑀬 𑀙𑀺𑀚𑁆𑀚𑀫𑀸𑀦𑁄, 𑀤𑀺𑀲𑀁 𑀦 𑀚𑀸𑀦𑀸𑀫𑀺 𑀧𑀫𑀽𑀴𑁆𑀳𑀲𑀜𑁆𑀜𑁄;

𑀪𑀬𑀸𑀦𑀼𑀢𑀧𑁆𑀧𑀸𑀫𑀺 𑀫𑀳𑀸 𑀘 𑀫𑁂 𑀪𑀬𑀸, 𑀲𑀼𑀢𑁆𑀯𑀸𑀦 𑀓𑀣𑀸 𑀢𑀯 𑀪𑀸𑀲𑀺𑀢𑀸 𑀇𑀲𑁂.

𑁧𑁩𑁨𑁬.

‘‘𑀆𑀤𑀺𑀢𑁆𑀢𑁂 𑀯𑀸𑀭𑀺𑀫𑀚𑁆𑀛𑀁𑀯, 𑀤𑀻𑀧𑀁𑀯𑁄𑀖𑁂 𑀫𑀳𑀡𑁆𑀡𑀯𑁂;

𑀅𑀦𑁆𑀥𑀓𑀸𑀭𑁂𑀯 𑀧𑀚𑁆𑀚𑁄𑀢𑁄, 𑀢𑁆𑀯𑀁 𑀦𑁄𑀲𑀺 𑀲𑀭𑀡𑀁 𑀇𑀲𑁂.

𑁧𑁩𑁨𑁭.

‘‘𑀅𑀢𑁆𑀣𑀜𑁆𑀘 ¶ 𑀥𑀫𑁆𑀫𑀁 𑀅𑀦𑀼𑀲𑀸𑀲 𑀫𑀁 𑀇𑀲𑁂, 𑀅𑀢𑀻𑀢𑀫𑀤𑁆𑀥𑀸 𑀅𑀧𑀭𑀸𑀥𑀺𑀢𑀁 𑀫𑀬𑀸;

𑀆𑀘𑀺𑀓𑁆𑀔 𑀫𑁂 𑀦𑀸𑀭𑀤 𑀲𑀼𑀤𑁆𑀥𑀺𑀫𑀕𑁆𑀕𑀁, 𑀬𑀣𑀸 𑀅𑀳𑀁 𑀦𑁄 𑀦𑀺𑀭𑀬𑀁 𑀧𑀢𑁂𑀬𑁆𑀬’’𑀦𑁆𑀢𑀺.

𑀢𑀢𑁆𑀣 𑀪𑀬𑀸𑀦𑀼𑀢𑀧𑁆𑀧𑀸𑀫𑀻𑀢𑀺 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀧𑀸𑀧𑀲𑁆𑀲 𑀪𑀬𑁂𑀦 𑀅𑀦𑀼𑀢𑀧𑁆𑀧𑀸𑀫𑀺. 𑀫𑀳𑀸 𑀘 𑀫𑁂 𑀪𑀬𑀸𑀢𑀺 𑀫𑀳𑀦𑁆𑀢𑀜𑁆𑀘 𑀫𑁂 𑀦𑀺𑀭𑀬𑀪𑀬𑀁 𑀉𑀧𑁆𑀧𑀦𑁆𑀦𑀁. 𑀤𑀺𑀧𑀁𑀯𑁄𑀖𑁂𑀢𑀺 𑀤𑀻𑀧𑀁𑀯 𑀑𑀖𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀤𑀺𑀢𑁆𑀢𑁂 𑀓𑀸𑀮𑁂 𑀯𑀸𑀭𑀺𑀫𑀚𑁆𑀛𑀁 𑀯𑀺𑀬 𑀪𑀺𑀦𑁆𑀦𑀦𑀸𑀯𑀸𑀦𑀁 𑀑𑀖𑁂 𑀅𑀡𑁆𑀡𑀯𑁂 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑀸𑀦𑀁 𑀤𑀻𑀧𑀁 𑀯𑀺𑀬 𑀅𑀦𑁆𑀥𑀓𑀸𑀭𑀕𑀢𑀸𑀦𑀁 𑀧𑀚𑁆𑀚𑁄𑀢𑁄 𑀯𑀺𑀬 𑀘 𑀢𑁆𑀯𑀁 𑀦𑁄 𑀇𑀲𑁂 𑀲𑀭𑀡𑀁 𑀪𑀯. 𑀅𑀢𑀻𑀢𑀫𑀤𑁆𑀥𑀸 𑀅𑀧𑀭𑀸𑀥𑀺𑀢𑀁 𑀫𑀬𑀸𑀢𑀺 𑀏𑀓𑀁𑀲𑁂𑀦 𑀫𑀬𑀸 𑀅𑀢𑀻𑀢𑀁 𑀓𑀫𑁆𑀫𑀁 𑀅𑀧𑀭𑀸𑀥𑀺𑀢𑀁 𑀯𑀺𑀭𑀸𑀥𑀺𑀢𑀁, 𑀓𑀼𑀲𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀓𑀼𑀲𑀮𑀫𑁂𑀯 𑀓𑀢𑀦𑁆𑀢𑀺.

𑀅𑀣𑀲𑁆𑀲 𑀫𑀳𑀸𑀲𑀢𑁆𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀆𑀘𑀺𑀓𑁆𑀔𑀺𑀢𑀼𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂 𑀧𑁄𑀭𑀸𑀡𑀓𑀭𑀸𑀚𑀸𑀦𑁄 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

𑁧𑁩𑁨𑁮.

‘‘𑀬𑀣𑀸 𑀅𑀳𑀽 𑀥𑀢𑀭𑀝𑁆𑀞𑁄, 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀅𑀝𑁆𑀞𑀓𑁄 𑀬𑀸𑀫𑀢𑀕𑁆𑀕𑀺;

𑀉𑀲𑀺𑀦𑁆𑀤𑀭𑁄 𑀘𑀸𑀧𑀺 𑀲𑀺𑀯𑀻 𑀘 𑀭𑀸𑀚𑀸, 𑀧𑀭𑀺𑀘𑀸𑀭𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁.

𑁧𑁩𑁨𑁯.

‘‘𑀏𑀢𑁂 𑀘𑀜𑁆𑀜𑁂 𑀘 𑀭𑀸𑀚𑀸𑀦𑁄, 𑀬𑁂 𑀲𑀕𑁆𑀕𑀯𑀺𑀲𑀬𑀁 𑀕𑀢𑀸;

𑀅𑀥𑀫𑁆𑀫𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸, 𑀥𑀫𑁆𑀫𑀁 𑀘𑀭 𑀫𑀳𑀻𑀧𑀢𑀺.

𑁧𑁩𑁩𑁦.

‘‘𑀅𑀦𑁆𑀦𑀳𑀢𑁆𑀣𑀸 ¶ ¶ 𑀘 𑀢𑁂 𑀩𑁆𑀬𑀫𑁆𑀳𑁂, 𑀖𑁄𑀲𑀬𑀦𑁆𑀢𑀼 𑀧𑀼𑀭𑁂 𑀢𑀯;

‘𑀓𑁄 𑀙𑀸𑀢𑁄 𑀓𑁄 𑀘 𑀢𑀲𑀺𑀢𑁄, 𑀓𑁄 𑀫𑀸𑀮𑀁 𑀓𑁄 𑀯𑀺𑀮𑁂𑀧𑀦𑀁;

𑀦𑀸𑀦𑀸𑀭𑀢𑁆𑀢𑀸𑀦𑀁 𑀯𑀢𑁆𑀣𑀸𑀦𑀁, 𑀓𑁄 𑀦𑀕𑁆𑀕𑁄 𑀧𑀭𑀺𑀤𑀳𑀺𑀲𑁆𑀲𑀢𑀺.

𑁧𑁩𑁩𑁧.

‘𑀓𑁄 𑀧𑀦𑁆𑀣𑁂 𑀙𑀢𑁆𑀢𑀫𑀸𑀦𑁂𑀢𑀺, 𑀧𑀸𑀤𑀼𑀓𑀸 𑀘 𑀫𑀼𑀤𑀽 𑀲𑀼𑀪𑀸’;

𑀇𑀢𑀺 𑀲𑀸𑀬𑀜𑁆𑀘 𑀧𑀸𑀢𑁄 𑀘, 𑀖𑁄𑀲𑀬𑀦𑁆𑀢𑀼 𑀧𑀼𑀭𑁂 𑀢𑀯.

𑁧𑁩𑁩𑁨.

‘‘𑀚𑀺𑀡𑁆𑀡𑀁 𑀧𑁄𑀲𑀁 𑀕𑀯𑀸𑀲𑁆𑀲𑀜𑁆𑀘, 𑀫𑀸𑀲𑁆𑀲𑀼 𑀬𑀼𑀜𑁆𑀚 𑀬𑀣𑀸 𑀧𑀼𑀭𑁂;

𑀧𑀭𑀺𑀳𑀸𑀭𑀜𑁆𑀘 𑀤𑀚𑁆𑀚𑀸𑀲𑀺, 𑀅𑀥𑀺𑀓𑀸𑀭𑀓𑀢𑁄 𑀩𑀮𑀻’’𑀢𑀺.

𑀢𑀢𑁆𑀣 𑀏𑀢𑁂 𑀘𑀸𑀢𑀺 𑀬𑀣𑀸 𑀏𑀢𑁂 𑀘 𑀥𑀢𑀭𑀝𑁆𑀞𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀅𑀝𑁆𑀞𑀓𑁄 𑀬𑀸𑀫𑀢𑀕𑁆𑀕𑀺 𑀉𑀲𑀺𑀦𑁆𑀤𑀭𑁄 𑀲𑀺𑀯𑀻𑀢𑀺 𑀙 𑀭𑀸𑀚𑀸𑀦𑁄 𑀅𑀜𑁆𑀜𑁂 𑀘 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸 𑀲𑀕𑁆𑀕𑀯𑀺𑀲𑀬𑀁 𑀕𑀢𑀸, 𑀏𑀯𑀁 𑀢𑁆𑀯𑀫𑁆𑀧𑀺 𑀅𑀥𑀫𑁆𑀫𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀁 𑀘𑀭. 𑀓𑁄 𑀙𑀸𑀢𑁄𑀢𑀺 𑀫𑀳𑀸𑀭𑀸𑀚, 𑀢𑀯 𑀩𑁆𑀬𑀫𑁆𑀳𑁂 𑀧𑀼𑀭𑁂 𑀭𑀸𑀚𑀦𑀺𑀯𑁂𑀲𑀦𑁂 𑀘𑁂𑀯 𑀦𑀕𑀭𑁂 𑀘 𑀅𑀦𑁆𑀦𑀳𑀢𑁆𑀣𑀸 𑀧𑀼𑀭𑀺𑀲𑀸 ‘‘𑀓𑁄 𑀙𑀸𑀢𑁄, 𑀓𑁄 𑀢𑀲𑀺𑀢𑁄’’𑀢𑀺 𑀢𑁂𑀲𑀁 𑀤𑀸𑀢𑀼𑀓𑀸𑀫𑀢𑀸𑀬 𑀖𑁄𑀲𑁂𑀦𑁆𑀢𑀼. 𑀓𑁄 𑀫𑀸𑀮𑀦𑁆𑀢𑀺 𑀓𑁄 𑀫𑀸𑀮𑀁 𑀇𑀘𑁆𑀙𑀢𑀺, 𑀓𑁄 ¶ 𑀯𑀺𑀮𑁂𑀧𑀦𑀁 𑀇𑀘𑁆𑀙𑀢𑀺, 𑀦𑀸𑀦𑀸𑀭𑀢𑁆𑀢𑀸𑀦𑀁 𑀯𑀢𑁆𑀣𑀸𑀦𑀁 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀓𑁄 𑀦𑀕𑁆𑀕𑁄 𑀧𑀭𑀺𑀤𑀳𑀺𑀲𑁆𑀲𑀢𑀻𑀢𑀺 𑀖𑁄𑀲𑁂𑀦𑁆𑀢𑀼. 𑀓𑁄 𑀧𑀦𑁆𑀣𑁂 𑀙𑀢𑁆𑀢𑀫𑀸𑀦𑁂𑀢𑀻𑀢𑀺 𑀓𑁄 𑀧𑀦𑁆𑀣𑁂 𑀙𑀢𑁆𑀢𑀁 𑀥𑀸𑀭𑀬𑀺𑀲𑁆𑀲𑀢𑀺. 𑀧𑀸𑀤𑀼𑀓𑀸 𑀘𑀸𑀢𑀺 𑀉𑀧𑀸𑀳𑀦𑀸 𑀘 𑀫𑀼𑀤𑀽 𑀲𑀼𑀪𑀸 𑀓𑁄 𑀇𑀘𑁆𑀙𑀢𑀺.

𑀚𑀺𑀡𑁆𑀡𑀁 𑀧𑁄𑀲𑀦𑁆𑀢𑀺 𑀬𑁄 𑀢𑁂 𑀉𑀧𑀝𑁆𑀞𑀸𑀓𑁂𑀲𑀼 𑀅𑀫𑀘𑁆𑀘𑁄 𑀯𑀸 𑀅𑀜𑁆𑀜𑁄 𑀯𑀸 𑀧𑀼𑀩𑁆𑀩𑁂 𑀓𑀢𑀽𑀧𑀓𑀸𑀭𑁄 𑀚𑀭𑀸𑀚𑀺𑀡𑁆𑀡𑀓𑀸𑀮𑁂 𑀬𑀣𑀸 𑀧𑁄𑀭𑀸𑀡𑀓𑀸𑀮𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑁂𑀧𑀺 𑀢𑁂 𑀕𑀯𑀸𑀲𑁆𑀲𑀸𑀤𑀬𑁄 𑀚𑀺𑀡𑁆𑀡𑀢𑀸𑀬 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀲𑀼 𑀏𑀓𑀫𑁆𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀓𑀫𑁆𑀫𑁂𑀲𑀼 𑀫𑀸 𑀬𑁄𑀚𑀬𑀺. 𑀚𑀺𑀡𑁆𑀡𑀓𑀸𑀮𑀲𑁆𑀫𑀺𑀜𑁆𑀳𑀺 𑀢𑁂 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀭𑀺𑀳𑀸𑀭𑀜𑁆𑀘𑀸𑀢𑀺 𑀇𑀥 𑀧𑀭𑀺𑀯𑀸𑀭𑁄 ‘‘𑀧𑀭𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀘 𑀢𑁂 𑀩𑀮𑀻 𑀳𑀼𑀢𑁆𑀯𑀸 𑀅𑀥𑀺𑀓𑀸𑀭𑀓𑀢𑁄 𑀧𑀼𑀩𑁆𑀩𑁂 𑀓𑀢𑀽𑀧𑀓𑀸𑀭𑁄 𑀳𑁄𑀢𑀺, 𑀢𑀲𑁆𑀲 𑀚𑀭𑀸𑀚𑀺𑀡𑁆𑀡𑀓𑀸𑀮𑁂 𑀬𑀣𑀸𑀧𑁄𑀭𑀸𑀡𑀧𑀭𑀺𑀯𑀸𑀭𑀁 𑀤𑀤𑁂𑀬𑁆𑀬𑀸𑀲𑀺. 𑀅𑀲𑀧𑁆𑀧𑀼𑀭𑀺𑀲𑀸 𑀳𑀺 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀸𑀦𑀁 𑀉𑀧𑀓𑀸𑀭𑀁 𑀓𑀸𑀢𑀼𑀁 𑀲𑀫𑀢𑁆𑀣𑀓𑀸𑀮𑁂𑀬𑁂𑀯 𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑀺, 𑀲𑀫𑀢𑁆𑀣𑀓𑀸𑀮𑁂 𑀧𑀦 𑀦 𑀑𑀮𑁄𑀓𑁂𑀦𑁆𑀢𑀺. 𑀲𑀧𑁆𑀧𑀼𑀭𑀺𑀲𑀸 𑀧𑀦 𑀅𑀲𑀫𑀢𑁆𑀣𑀓𑀸𑀮𑁂𑀧𑀺 𑀢𑁂𑀲𑀁 𑀢𑀣𑁂𑀯 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀼𑀯𑀫𑁆𑀧𑀺 𑀏𑀯𑀁 𑀓𑀭𑁂𑀬𑁆𑀬𑀸𑀲𑀻𑀢𑀺.

𑀇𑀢𑀺 ¶ 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀤𑀸𑀦𑀓𑀣𑀜𑁆𑀘 𑀲𑀻𑀮𑀓𑀣𑀜𑁆𑀘 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀬𑀁 𑀭𑀸𑀚𑀸 𑀅𑀢𑁆𑀢𑀦𑁄 ¶ 𑀅𑀢𑁆𑀢𑀪𑀸𑀯𑁂 𑀭𑀣𑁂𑀦 𑀉𑀧𑀫𑁂𑀢𑁆𑀯𑀸 𑀯𑀡𑁆𑀡𑀺𑀬𑀫𑀸𑀦𑁂 𑀢𑀼𑀲𑁆𑀲𑀺𑀲𑁆𑀲𑀢𑀺, 𑀢𑀲𑁆𑀫𑀸𑀲𑁆𑀲 𑀲𑀩𑁆𑀩𑀓𑀸𑀫𑀤𑀼𑀳𑀭𑀣𑁄𑀧𑀫𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 𑁋

𑁧𑁩𑁩𑁩.

‘‘𑀓𑀸𑀬𑁄 𑀢𑁂 𑀭𑀣𑀲𑀜𑁆𑀜𑀸𑀢𑁄, 𑀫𑀦𑁄𑀲𑀸𑀭𑀣𑀺𑀓𑁄 𑀮𑀳𑀼;

𑀅𑀯𑀺𑀳𑀺𑀁𑀲𑀸𑀲𑀸𑀭𑀺𑀢𑀓𑁆𑀔𑁄, 𑀲𑀁𑀯𑀺𑀪𑀸𑀕𑀧𑀝𑀺𑀘𑁆𑀙𑀤𑁄.

𑁧𑁩𑁩𑁪.

‘‘𑀧𑀸𑀤𑀲𑀜𑁆𑀜𑀫𑀦𑁂𑀫𑀺𑀬𑁄, 𑀳𑀢𑁆𑀣𑀲𑀜𑁆𑀜𑀫𑀧𑀓𑁆𑀔𑀭𑁄;

𑀓𑀼𑀘𑁆𑀙𑀺𑀲𑀜𑁆𑀜𑀫𑀦𑀩𑁆𑀪𑀦𑁆𑀢𑁄, 𑀯𑀸𑀘𑀸𑀲𑀜𑁆𑀜𑀫𑀓𑀽𑀚𑀦𑁄.

𑁧𑁩𑁩𑁫.

‘‘𑀲𑀘𑁆𑀘𑀯𑀸𑀓𑁆𑀬𑀲𑀫𑀢𑁆𑀢𑀗𑁆𑀕𑁄, 𑀅𑀧𑁂𑀲𑀼𑀜𑁆𑀜𑀲𑀼𑀲𑀜𑁆𑀜𑀢𑁄;

𑀕𑀺𑀭𑀸𑀲𑀔𑀺𑀮𑀦𑁂𑀮𑀗𑁆𑀕𑁄, 𑀫𑀺𑀢𑀪𑀸𑀡𑀺𑀲𑀺𑀮𑁂𑀲𑀺𑀢𑁄.

𑁧𑁩𑁩𑁬.

‘‘𑀲𑀤𑁆𑀥𑀸𑀮𑁄𑀪𑀲𑀼𑀲𑀗𑁆𑀔𑀸𑀭𑁄, 𑀦𑀺𑀯𑀸𑀢𑀜𑁆𑀚𑀮𑀺𑀓𑀼𑀩𑁆𑀩𑀭𑁄;

𑀅𑀣𑀤𑁆𑀥𑀢𑀸𑀦𑀢𑀻𑀲𑀸𑀓𑁄, 𑀲𑀻𑀮𑀲𑀁𑀯𑀭𑀦𑀦𑁆𑀥𑀦𑁄.

𑁧𑁩𑁩𑁭.

‘‘𑀅𑀓𑁆𑀓𑁄𑀥𑀦𑀫𑀦𑀼𑀕𑁆𑀖𑀸𑀢𑀻, 𑀥𑀫𑁆𑀫𑀧𑀡𑁆𑀟𑀭𑀙𑀢𑁆𑀢𑀓𑁄;

𑀩𑀸𑀳𑀼𑀲𑀘𑁆𑀘𑀫𑀧𑀸𑀮𑀫𑁆𑀩𑁄, 𑀞𑀺𑀢𑀘𑀺𑀢𑁆𑀢𑀫𑀼𑀧𑀸𑀥𑀺𑀬𑁄.

𑁧𑁩𑁩𑁮.

‘‘𑀓𑀸𑀮𑀜𑁆𑀜𑀼𑀢𑀸𑀘𑀺𑀢𑁆𑀢𑀲𑀸𑀭𑁄, 𑀯𑁂𑀲𑀸𑀭𑀚𑁆𑀚𑀢𑀺𑀤𑀡𑁆𑀟𑀓𑁄;

𑀦𑀺𑀯𑀸𑀢𑀯𑀼𑀢𑁆𑀢𑀺𑀬𑁄𑀢𑁆𑀢𑀓𑁄, 𑀅𑀦𑀢𑀺𑀫𑀸𑀦𑀬𑀼𑀕𑁄 𑀮𑀳𑀼.

𑁧𑁩𑁩𑁯.

‘‘𑀅𑀮𑀻𑀦𑀘𑀺𑀢𑁆𑀢𑀲𑀦𑁆𑀣𑀸𑀭𑁄, 𑀯𑀼𑀤𑁆𑀥𑀺𑀲𑁂𑀯𑀻 𑀭𑀚𑁄𑀳𑀢𑁄;

𑀲𑀢𑀺𑀧𑀢𑁄𑀤𑁄 𑀥𑀻𑀭𑀲𑁆𑀲, 𑀥𑀺𑀢𑀺 𑀬𑁄𑀕𑁄 𑀘 𑀭𑀲𑁆𑀫𑀺𑀬𑁄.

𑁧𑁩𑁪𑁦.

‘‘𑀫𑀦𑁄 𑀤𑀦𑁆𑀢𑀁 𑀧𑀣𑀁 𑀦𑁂𑀢𑀺, 𑀲𑀫𑀤𑀦𑁆𑀢𑁂𑀳𑀺 𑀯𑀸𑀳𑀺𑀪𑀺;

𑀇𑀘𑁆𑀙𑀸 𑀮𑁄𑀪𑁄 𑀘 𑀓𑀼𑀫𑁆𑀫𑀕𑁆𑀕𑁄, 𑀉𑀚𑀼𑀫𑀕𑁆𑀕𑁄 𑀘 𑀲𑀁𑀬𑀫𑁄.

𑁧𑁩𑁪𑁧.

‘‘𑀭𑀽𑀧𑁂 ¶ 𑀲𑀤𑁆𑀤𑁂 𑀭𑀲𑁂 𑀕𑀦𑁆𑀥𑁂, 𑀯𑀸𑀳𑀦𑀲𑁆𑀲 𑀧𑀥𑀸𑀯𑀢𑁄;

𑀧𑀜𑁆𑀜𑀸 𑀆𑀓𑁄𑀝𑀦𑀻 𑀭𑀸𑀚, 𑀢𑀢𑁆𑀣 𑀅𑀢𑁆𑀢𑀸𑀯 𑀲𑀸𑀭𑀣𑀺.

𑁧𑁩𑁪𑁨.

‘‘𑀲𑀘𑁂 ¶ 𑀏𑀢𑁂𑀦 𑀬𑀸𑀦𑁂𑀦, 𑀲𑀫𑀘𑀭𑀺𑀬𑀸 𑀤𑀴𑁆𑀳𑀸 𑀥𑀺𑀢𑀺;

𑀲𑀩𑁆𑀩𑀓𑀸𑀫𑀤𑀼𑀳𑁄 𑀭𑀸𑀚, 𑀦 𑀚𑀸𑀢𑀼 𑀦𑀺𑀭𑀬𑀁 𑀯𑀚𑁂’’𑀢𑀺.

𑀢𑀢𑁆𑀣 ¶ 𑀭𑀣𑀲𑀜𑁆𑀜𑀸𑀢𑁄𑀢𑀺 𑀫𑀳𑀸𑀭𑀸𑀚, 𑀢𑀯 𑀓𑀸𑀬𑁄 𑀭𑀣𑁄𑀢𑀺 𑀲𑀜𑁆𑀜𑀸𑀢𑁄 𑀳𑁄𑀢𑀼. 𑀫𑀦𑁄𑀲𑀸𑀭𑀣𑀺𑀓𑁄𑀢𑀺 𑀫𑀦𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀸𑀭𑀣𑀺𑀦𑀸 𑀲𑀫𑀦𑁆𑀦𑀸𑀕𑀢𑁄. 𑀮𑀳𑀽𑀢𑀺 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀢𑀸𑀬 𑀲𑀮𑁆𑀮𑀳𑀼𑀓𑁄. 𑀅𑀯𑀺𑀳𑀺𑀁𑀲𑀸𑀲𑀸𑀭𑀺𑀢𑀓𑁆𑀔𑁄𑀢𑀺 𑀅𑀯𑀺𑀳𑀺𑀁𑀲𑀸𑀫𑀬𑁂𑀦 𑀲𑀸𑀭𑀺𑀢𑁂𑀦 𑀲𑀼𑀝𑁆𑀞𑀼 𑀧𑀭𑀺𑀦𑀺𑀝𑁆𑀞𑀺𑀢𑁂𑀦 𑀅𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀁𑀯𑀺𑀪𑀸𑀕𑀧𑀝𑀺𑀘𑁆𑀙𑀤𑁄𑀢𑀺 𑀤𑀸𑀦𑀲𑀁𑀯𑀺𑀪𑀸𑀕𑀫𑀬𑁂𑀦 𑀧𑀝𑀺𑀘𑁆𑀙𑀤𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀸𑀤𑀲𑀜𑁆𑀜𑀫𑀦𑁂𑀫𑀺𑀬𑁄𑀢𑀺 𑀧𑀸𑀤𑀲𑀁𑀬𑀫𑀫𑀬𑀸𑀬 𑀦𑁂𑀫𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀳𑀢𑁆𑀣𑀲𑀜𑁆𑀜𑀫𑀧𑀓𑁆𑀔𑀭𑁄𑀢𑀺 𑀳𑀢𑁆𑀣𑀲𑀁𑀬𑀫𑀫𑀬𑁂𑀦 𑀧𑀓𑁆𑀔𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀓𑀼𑀘𑁆𑀙𑀺𑀲𑀜𑁆𑀜𑀫𑀦𑀩𑁆𑀪𑀦𑁆𑀢𑁄𑀢𑀺 𑀓𑀼𑀘𑁆𑀙𑀺𑀲𑀁𑀬𑀫𑀲𑀗𑁆𑀔𑀸𑀢𑁂𑀦 𑀫𑀺𑀢𑀪𑁄𑀚𑀦𑀫𑀬𑁂𑀦 𑀢𑁂𑀮𑁂𑀦 𑀅𑀩𑁆𑀪𑀦𑁆𑀢𑁄. ‘‘𑀅𑀩𑁆𑀪𑀜𑁆𑀚𑀺𑀢𑀩𑁆𑀩𑁄 𑀦𑀸𑀪𑀺 𑀳𑁄𑀢𑀽’’𑀢𑀺𑀧𑀺 𑀧𑀸𑀞𑁄. 𑀯𑀸𑀘𑀸𑀲𑀜𑁆𑀜𑀫𑀓𑀽𑀚𑀦𑁄𑀢𑀺 𑀯𑀸𑀘𑀸𑀲𑀁𑀬𑀫𑁂𑀦 𑀅𑀓𑀽𑀚𑀦𑁄.

𑀲𑀘𑁆𑀘𑀯𑀸𑀓𑁆𑀬𑀲𑀫𑀢𑁆𑀢𑀗𑁆𑀕𑁄𑀢𑀺 𑀲𑀘𑁆𑀘𑀯𑀸𑀓𑁆𑀬𑁂𑀦 𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑁄 𑀅𑀔𑀡𑁆𑀟𑀭𑀣𑀗𑁆𑀕𑁄. 𑀅𑀧𑁂𑀲𑀼𑀜𑁆𑀜𑀲𑀼𑀲𑀜𑁆𑀜𑀢𑁄𑀢𑀺 𑀅𑀧𑁂𑀲𑀼𑀜𑁆𑀜𑁂𑀦 𑀲𑀼𑀝𑁆𑀞𑀼 𑀲𑀜𑁆𑀜𑀢𑁄 𑀲𑀫𑀼𑀲𑁆𑀲𑀺𑀢𑁄. 𑀕𑀺𑀭𑀸𑀲𑀔𑀺𑀮𑀦𑁂𑀮𑀗𑁆𑀕𑁄𑀢𑀺 𑀲𑀔𑀺𑀮𑀸𑀬 𑀲𑀡𑁆𑀳𑀯𑀸𑀘𑀸𑀬 𑀦𑀺𑀤𑁆𑀤𑁄𑀲𑀗𑁆𑀕𑁄 𑀫𑀝𑁆𑀞𑀭𑀣𑀗𑁆𑀕𑁄. 𑀫𑀺𑀢𑀪𑀸𑀡𑀺𑀲𑀺𑀮𑁂𑀲𑀺𑀢𑁄 𑀫𑀺𑀢𑀪𑀸𑀡𑀲𑀗𑁆𑀔𑀸𑀢𑁂𑀦 𑀲𑀺𑀮𑁂𑀲𑁂𑀦 𑀲𑀼𑀝𑁆𑀞𑀼 𑀲𑀫𑁆𑀩𑀦𑁆𑀥𑁄. 𑀲𑀤𑁆𑀥𑀸𑀮𑁄𑀪𑀲𑀼𑀲𑀗𑁆𑀔𑀸𑀭𑁄𑀢𑀺 𑀓𑀫𑁆𑀫𑀨𑀮𑀲𑀤𑁆𑀤𑀳𑀦𑀲𑀤𑁆𑀥𑀸𑀫𑀬𑁂𑀦 𑀘 𑀅𑀮𑁄𑀪𑀫𑀬𑁂𑀦 𑀘 𑀲𑀼𑀦𑁆𑀤𑀭𑁂𑀦 𑀅𑀮𑀗𑁆𑀓𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀦𑀺𑀯𑀸𑀢𑀜𑁆𑀚𑀮𑀺𑀓𑀼𑀩𑁆𑀩𑀭𑁄𑀢𑀺 𑀲𑀻𑀮𑀯𑀦𑁆𑀢𑀸𑀦𑀁 𑀦𑀺𑀯𑀸𑀢𑀫𑀬𑁂𑀦 𑀘𑁂𑀯 𑀅𑀜𑁆𑀚𑀮𑀺𑀓𑀫𑁆𑀫𑀫𑀬𑁂𑀦 𑀘 𑀓𑀼𑀩𑁆𑀩𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀣𑀤𑁆𑀥𑀢𑀸𑀦𑀢𑀻𑀲𑀸𑀓𑁄𑀢𑀺 𑀲𑀔𑀺𑀮𑀲𑀫𑁆𑀫𑁄𑀤𑀪𑀸𑀯𑀲𑀗𑁆𑀔𑀸𑀢𑀸𑀬 𑀅𑀣𑀤𑁆𑀥𑀢𑀸𑀬 𑀅𑀦𑀢𑀈𑀲𑁄, 𑀣𑁄𑀓𑀦𑀢𑀈𑀲𑁄𑀢𑀺 𑀅𑀢𑁆𑀣𑁄. 𑀲𑀻𑀮𑀲𑀁𑀯𑀭𑀦𑀦𑁆𑀥𑀦𑁄𑀢𑀺 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀲𑀁𑀯𑀭𑀲𑀗𑁆𑀔𑀸𑀢𑀸𑀬 𑀦𑀦𑁆𑀥𑀦𑀭𑀚𑁆𑀚𑀼𑀬𑀸 𑀲𑀫𑀦𑁆𑀦𑀸𑀕𑀢𑁄.

𑀅𑀓𑁆𑀓𑁄𑀥𑀦𑀫𑀦𑀼𑀕𑁆𑀖𑀸𑀢𑀻𑀢𑀺 𑀅𑀓𑁆𑀓𑁄𑀥𑀦𑀪𑀸𑀯𑀲𑀗𑁆𑀔𑀸𑀢𑁂𑀦 𑀅𑀦𑀼𑀕𑁆𑀖𑀸𑀢𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀫𑁆𑀫𑀧𑀡𑁆𑀟𑀭-𑀙𑀢𑁆𑀢𑀓𑁄𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀧𑀡𑁆𑀟𑀭𑀘𑁆𑀙𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑀸𑀳𑀼𑀲𑀘𑁆𑀘𑀫𑀧𑀸𑀮𑀫𑁆𑀩𑁄𑀢𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀩𑀳𑀼𑀲𑁆𑀲𑀼𑀢𑀪𑀸𑀯𑀫𑀬𑁂𑀦 𑀅𑀧𑀸𑀮𑀫𑁆𑀩𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀞𑀺𑀢𑀘𑀺𑀢𑁆𑀢𑀫𑀼𑀧𑀸𑀥𑀺𑀬𑁄𑀢𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀯𑀺𑀓𑀫𑁆𑀧𑀦𑀪𑀸𑀯𑁂𑀦 𑀲𑀼𑀝𑁆𑀞𑀼 𑀞𑀺𑀢𑀏𑀓𑀕𑁆𑀕𑀪𑀸𑀯𑀧𑁆𑀧𑀢𑁆𑀢𑀘𑀺𑀢𑁆𑀢𑀲𑀗𑁆𑀔𑀸𑀢𑁂𑀦 𑀉𑀧𑀸𑀥𑀺𑀦𑀸 𑀉𑀢𑁆𑀢𑀭𑀢𑁆𑀣𑀭𑀡𑁂𑀦 𑀯𑀸 𑀭𑀸𑀚𑀸𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀓𑀸𑀮𑀜𑁆𑀜𑀼𑀢𑀸𑀘𑀺𑀢𑁆𑀢𑀲𑀸𑀭𑁄𑀢𑀺 ‘‘𑀅𑀬𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀓𑀸𑀮𑁄, 𑀅𑀬𑀁 𑀲𑀻𑀮𑀲𑁆𑀲 𑀭𑀓𑁆𑀔𑀦𑀓𑀸𑀮𑁄’’𑀢𑀺 𑀏𑀯𑀁 𑀓𑀸𑀮𑀜𑁆𑀜𑀼𑀢𑀸𑀲𑀗𑁆𑀔𑀸𑀢𑁂𑀦 𑀓𑀸𑀮𑀁 𑀚𑀸𑀦𑀺𑀢𑁆𑀯𑀸 𑀓𑀢𑁂𑀦 𑀘𑀺𑀢𑁆𑀢𑁂𑀦 ¶ 𑀓𑀼𑀲𑀮𑀲𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸, 𑀫𑀳𑀸𑀭𑀸𑀚, 𑀭𑀣𑀲𑁆𑀲 𑀦𑀸𑀫 𑀆𑀡𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀚𑀸𑀢𑀁 𑀧𑀭𑀺𑀲𑀼𑀤𑁆𑀥𑀁 𑀲𑀸𑀭𑀫𑀬𑀜𑁆𑀘 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀯𑀜𑁆𑀳𑀺 𑀲𑁄 𑀭𑀣𑁄 𑀅𑀤𑁆𑀥𑀸𑀦𑀓𑁆𑀔𑀫𑁄 𑀳𑁄𑀢𑀺, 𑀏𑀯𑀁 𑀢𑀯𑀧𑀺 𑀓𑀸𑀬𑀭𑀣𑁄 𑀓𑀸𑀮𑀁 𑀚𑀸𑀦𑀺𑀢𑁆𑀯𑀸 𑀓𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀤𑀸𑀦𑀸𑀤𑀺𑀓𑀼𑀲𑀮𑀲𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀽𑀢𑀺. 𑀯𑁂𑀲𑀸𑀭𑀚𑁆𑀚𑀢𑀺𑀤𑀡𑁆𑀟𑀓𑁄𑀢𑀺 𑀧𑀭𑀺𑀲𑀫𑀚𑁆𑀛𑁂 𑀓𑀣𑁂𑀦𑁆𑀢𑀲𑁆𑀲𑀧𑀺 𑀯𑀺𑀲𑀸𑀭𑀤𑀪𑀸𑀯𑀲𑀗𑁆𑀔𑀸𑀢𑁂𑀦 𑀢𑀺𑀤𑀡𑁆𑀟𑁂𑀦 ¶ 𑀲𑀫𑀦𑁆𑀦𑀸𑀕𑀢𑁄. 𑀦𑀺𑀯𑀸𑀢𑀯𑀼𑀢𑁆𑀢𑀺𑀬𑁄𑀢𑁆𑀢𑀓𑁄𑀢𑀺 𑀑𑀯𑀸𑀤𑁂 𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀫𑀼𑀤𑀼𑀦𑀸 𑀥𑀼𑀭𑀬𑁄𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 ¶ . 𑀫𑀼𑀤𑀼𑀦𑀸 𑀳𑀺 𑀥𑀼𑀭𑀬𑁄𑀢𑁆𑀢𑁂𑀦 𑀩𑀤𑁆𑀥𑀭𑀣𑀁 𑀲𑀺𑀦𑁆𑀥𑀯𑀸 𑀲𑀼𑀔𑀁 𑀯𑀳𑀦𑁆𑀢𑀺, 𑀏𑀯𑀁 𑀢𑀯 𑀓𑀸𑀬𑀭𑀣𑁄𑀧𑀺 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑀧𑁆𑀧𑀯𑀢𑁆𑀢𑀺𑀢𑀸𑀬 𑀆𑀩𑀤𑁆𑀥𑁄 𑀲𑀼𑀔𑀁 𑀬𑀸𑀢𑀽𑀢𑀺 𑀅𑀢𑁆𑀣𑁄. 𑀅𑀦𑀢𑀺𑀫𑀸𑀦𑀬𑀼𑀕𑁄 𑀮𑀳𑀽𑀢𑀺 𑀅𑀦𑀢𑀺𑀫𑀸𑀦𑀲𑀗𑁆𑀔𑀸𑀢𑁂𑀦 𑀮𑀳𑀼𑀓𑁂𑀦 𑀬𑀼𑀕𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀅𑀮𑀻𑀦𑀘𑀺𑀢𑁆𑀢𑀲𑀦𑁆𑀣𑀸𑀭𑁄𑀢𑀺 𑀬𑀣𑀸 𑀭𑀣𑁄 𑀦𑀸𑀫 𑀤𑀦𑁆𑀢𑀫𑀬𑁂𑀦 𑀉𑀴𑀸𑀭𑁂𑀦 𑀲𑀦𑁆𑀣𑀸𑀭𑁂𑀦 𑀲𑁄𑀪𑀢𑀺, 𑀏𑀯𑀁 𑀢𑀯 𑀓𑀸𑀬𑀭𑀣𑁄𑀧𑀺 𑀤𑀸𑀦𑀸𑀤𑀺𑀦𑀸 𑀅𑀮𑀻𑀦𑀅𑀲𑀗𑁆𑀓𑀼𑀝𑀺𑀢𑀘𑀺𑀢𑁆𑀢𑀲𑀦𑁆𑀣𑀸𑀭𑁄 𑀳𑁄𑀢𑀼. 𑀯𑀼𑀤𑁆𑀥𑀺𑀲𑁂𑀯𑀻 𑀭𑀚𑁄𑀳𑀢𑁄𑀢𑀺 𑀬𑀣𑀸 𑀭𑀣𑁄 𑀦𑀸𑀫 𑀯𑀺𑀲𑀫𑁂𑀦 𑀭𑀚𑀼𑀝𑁆𑀞𑀸𑀦𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀭𑀚𑁄𑀓𑀺𑀡𑁆𑀡𑁄 𑀦 𑀲𑁄𑀪𑀢𑀺, 𑀲𑀫𑁂𑀦 𑀯𑀺𑀭𑀚𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀲𑁄𑀪𑀢𑀺, 𑀏𑀯𑀁 𑀢𑀯 𑀓𑀸𑀬𑀭𑀣𑁄𑀧𑀺 𑀧𑀜𑁆𑀜𑀸𑀯𑀼𑀤𑁆𑀥𑀺𑀲𑁂𑀯𑀺𑀢𑀸𑀬 𑀲𑀫𑀢𑀮𑀁 𑀉𑀚𑀼𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀳𑀢𑀭𑀚𑁄 𑀳𑁄𑀢𑀼. 𑀲𑀢𑀺𑀧𑀢𑁄𑀤𑁄 𑀥𑀻𑀭𑀲𑁆𑀲𑀸𑀢𑀺 𑀧𑀡𑁆𑀟𑀺𑀢𑀲𑁆𑀲 𑀢𑀯 𑀢𑀲𑁆𑀫𑀺𑀁 𑀓𑀸𑀬𑀭𑀣𑁂 𑀲𑀼𑀧𑀢𑀺𑀝𑁆𑀞𑀺𑀢𑀲𑀢𑀺𑀧𑀢𑁄𑀤𑁄 𑀳𑁄𑀢𑀼. 𑀥𑀺𑀢𑀺 𑀬𑁄𑀕𑁄 𑀘 𑀭𑀲𑁆𑀫𑀺𑀬𑁄𑀢𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀯𑀻𑀭𑀺𑀬𑀲𑀗𑁆𑀔𑀸𑀢𑀸 𑀥𑀺𑀢𑀺 𑀘 𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀬𑀼𑀜𑁆𑀚𑀦𑀪𑀸𑀯𑀲𑀗𑁆𑀔𑀸𑀢𑁄 𑀬𑁄𑀕𑁄 𑀘 𑀢𑀯 𑀢𑀲𑁆𑀫𑀺𑀁 𑀓𑀸𑀬𑀭𑀣𑁂 𑀯𑀝𑁆𑀝𑀺𑀢𑀸 𑀣𑀺𑀭𑀸 𑀭𑀲𑁆𑀫𑀺𑀬𑁄 𑀳𑁄𑀦𑁆𑀢𑀼. 𑀫𑀦𑁄 𑀤𑀦𑁆𑀢𑀁 𑀧𑀣𑀁 𑀦𑁂𑀢𑀺, 𑀲𑀫𑀤𑀦𑁆𑀢𑁂𑀳𑀺 𑀯𑀸𑀳𑀺𑀪𑀻𑀢𑀺 𑀬𑀣𑀸 𑀭𑀣𑁄 𑀦𑀸𑀫 𑀯𑀺𑀲𑀫𑀤𑀦𑁆𑀢𑁂𑀳𑀺 𑀲𑀺𑀦𑁆𑀥𑀯𑁂𑀳𑀺 𑀉𑀧𑁆𑀧𑀣𑀁 𑀬𑀸𑀢𑀺, 𑀲𑀫𑀤𑀦𑁆𑀢𑁂𑀳𑀺 𑀲𑀫𑀲𑀺𑀓𑁆𑀔𑀺𑀢𑁂𑀳𑀺 𑀬𑀼𑀢𑁆𑀢𑁄 𑀉𑀚𑀼𑀧𑀣𑀫𑁂𑀯 𑀅𑀦𑁆𑀯𑁂𑀢𑀺, 𑀏𑀯𑀁 𑀫𑀦𑁄𑀧𑀺 𑀤𑀦𑁆𑀢𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀼𑀫𑁆𑀫𑀕𑁆𑀕𑀁 𑀧𑀳𑀸𑀬 𑀉𑀚𑀼𑀫𑀕𑁆𑀕𑀁 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀲𑀼𑀤𑀦𑁆𑀢𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀢𑀯 𑀓𑀸𑀬𑀭𑀣𑀲𑁆𑀲 𑀲𑀺𑀦𑁆𑀥𑀯𑀓𑀺𑀘𑁆𑀘𑀁 𑀲𑀸𑀥𑁂𑀢𑀼. 𑀇𑀘𑁆𑀙𑀸𑀮𑁄𑀪𑁄 𑀘𑀸𑀢𑀺 𑀅𑀧𑁆𑀧𑀢𑁆𑀢𑁂𑀲𑀼 𑀯𑀢𑁆𑀣𑀽𑀲𑀼 𑀇𑀘𑁆𑀙𑀸, 𑀧𑀢𑁆𑀢𑁂𑀲𑀼 𑀮𑁄𑀪𑁄𑀢𑀺 𑀅𑀬𑀁 𑀇𑀘𑁆𑀙𑀸 𑀘 𑀮𑁄𑀪𑁄 𑀘 𑀓𑀼𑀫𑁆𑀫𑀕𑁆𑀕𑁄 𑀦𑀸𑀫. 𑀓𑀼𑀝𑀺𑀮𑁄 𑀅𑀦𑀼𑀚𑀼𑀫𑀕𑁆𑀕𑁄 𑀅𑀧𑀸𑀬𑀫𑁂𑀯 𑀦𑁂𑀢𑀺. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀧𑀦 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀯𑀸 𑀧𑀯𑀢𑁆𑀢𑁄 𑀲𑀻𑀮𑀲𑀁𑀬𑀫𑁄 𑀉𑀚𑀼𑀫𑀕𑁆𑀕𑁄 𑀦𑀸𑀫. 𑀲𑁄 𑀢𑀯 𑀓𑀸𑀬𑀭𑀣𑀲𑁆𑀲 𑀫𑀕𑁆𑀕𑁄 𑀳𑁄𑀢𑀼.

𑀭𑀽𑀧𑁂𑀢𑀺 ¶ 𑀏𑀢𑁂𑀲𑀼 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀓𑀸𑀫𑀕𑀼𑀡𑁂𑀲𑀼 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀥𑀸𑀯𑀦𑁆𑀢𑀲𑁆𑀲 𑀢𑀯 𑀓𑀸𑀬𑀭𑀣𑀲𑁆𑀲 𑀉𑀧𑁆𑀧𑀣𑀁 𑀧𑀝𑀺𑀧𑀦𑁆𑀦𑀲𑁆𑀲 𑀭𑀸𑀚𑀭𑀣𑀲𑁆𑀲 𑀲𑀺𑀦𑁆𑀥𑀯𑁂 𑀆𑀓𑁄𑀝𑁂𑀢𑁆𑀯𑀸 𑀦𑀺𑀯𑀸𑀭𑀡𑀧𑀢𑁄𑀤𑀬𑀝𑁆𑀞𑀺 𑀯𑀺𑀬 𑀧𑀜𑁆𑀜𑀸 𑀆𑀓𑁄𑀝𑀦𑀻 𑀳𑁄𑀢𑀼. 𑀲𑀸 𑀳𑀺 𑀢𑀁 𑀉𑀧𑁆𑀧𑀣𑀕𑀫𑀦𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀉𑀚𑀼𑀁 𑀲𑀼𑀘𑀭𑀺𑀢𑀫𑀕𑁆𑀕𑀁 𑀆𑀭𑁄𑀧𑁂𑀲𑁆𑀲𑀢𑀺. 𑀢𑀢𑁆𑀣 𑀅𑀢𑁆𑀢𑀸𑀯 𑀲𑀸𑀭𑀣𑀻𑀢𑀺 𑀢𑀲𑁆𑀫𑀺𑀁 𑀧𑀦 𑀢𑁂 𑀓𑀸𑀬𑀭𑀣𑁂 𑀅𑀜𑁆𑀜𑁄 𑀲𑀸𑀭𑀣𑀺 𑀦𑀸𑀫 𑀦𑀢𑁆𑀣𑀺, 𑀢𑀯 𑀅𑀢𑁆𑀢𑀸𑀯 𑀲𑀸𑀭𑀣𑀺 𑀳𑁄𑀢𑀼. 𑀲𑀘𑁂 𑀏𑀢𑁂𑀦 𑀬𑀸𑀦𑁂𑀦𑀸𑀢𑀺 𑀫𑀳𑀸𑀭𑀸𑀚, 𑀬𑀲𑁆𑀲𑁂𑀢𑀁 𑀏𑀯𑀭𑀽𑀧𑀁 𑀬𑀸𑀦𑀁 𑀲𑀘𑁂 𑀅𑀢𑁆𑀣𑀺, 𑀏𑀢𑁂𑀦 𑀬𑀸𑀦𑁂𑀦. 𑀲𑀫𑀘𑀭𑀺𑀬𑀸 𑀤𑀴𑁆𑀳𑀸 𑀥𑀺𑀢𑀻𑀢𑀺 𑀬𑀲𑁆𑀲 𑀲𑀫𑀘𑀭𑀺𑀬𑀸 𑀘 𑀥𑀺𑀢𑀺 𑀘 𑀤𑀴𑁆𑀳𑀸 𑀳𑁄𑀢𑀺 𑀣𑀺𑀭𑀸, 𑀲𑁄 𑀏𑀢𑁂𑀦 𑀬𑀸𑀦𑁂𑀦 𑀬𑀲𑁆𑀫𑀸 𑀏𑀲 𑀭𑀣𑁄 𑀲𑀩𑁆𑀩𑀓𑀸𑀫𑀤𑀼𑀳𑁄 𑀭𑀸𑀚, 𑀬𑀣𑀸𑀥𑀺𑀧𑁆𑀧𑁂𑀢𑁂 𑀲𑀩𑁆𑀩𑀓𑀸𑀫𑁂 𑀤𑁂𑀢𑀺, 𑀢𑀲𑁆𑀫𑀸 𑀦 𑀚𑀸𑀢𑀼 𑀦𑀺𑀭𑀬𑀁 𑀯𑀚𑁂, 𑀏𑀓𑀁𑀲𑁂𑀦𑁂𑀢𑀁 𑀥𑀸𑀭𑁂𑀳𑀺, 𑀏𑀯𑀭𑀽𑀧𑁂𑀦 𑀬𑀸𑀦𑁂𑀦 𑀦𑀺𑀭𑀬𑀁 𑀦 𑀕𑀘𑁆𑀙𑀲𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀬𑀁 𑀫𑀁 𑀅𑀯𑀘 ‘‘𑀆𑀘𑀺𑀓𑁆𑀔 𑀫𑁂, 𑀦𑀸𑀭𑀤, 𑀲𑀼𑀤𑁆𑀥𑀺𑀫𑀕𑁆𑀕𑀁, 𑀬𑀣𑀸 𑀅𑀳𑀁 𑀦𑁄 𑀦𑀺𑀭𑀬𑁂 𑀧𑀢𑁂𑀬𑁆𑀬’’𑀦𑁆𑀢𑀺, 𑀅𑀬𑀁 𑀢𑁂 𑀲𑁄 𑀫𑀬𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀓𑁆𑀔𑀸𑀢𑁄𑀢𑀺.

𑀏𑀯𑀫𑀲𑁆𑀲 ¶ 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀚𑀳𑀸𑀧𑁂𑀢𑁆𑀯𑀸 𑀲𑀻𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀧𑀸𑀧𑀫𑀺𑀢𑁆𑀢𑁂 𑀧𑀳𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀉𑀧𑀲𑀗𑁆𑀓𑀫, 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀑𑀯𑀸𑀤𑀁 𑀤𑀢𑁆𑀯𑀸 𑀭𑀸𑀚𑀥𑀻𑀢𑀼 𑀕𑀼𑀡𑀁 𑀯𑀡𑁆𑀡𑁂𑀢𑁆𑀯𑀸 𑀭𑀸𑀚𑀧𑀭𑀺𑀲𑀸𑀬 ¶ 𑀘 𑀭𑀸𑀚𑁄𑀭𑁄𑀥𑀸𑀦𑀜𑁆𑀘 𑀑𑀯𑀸𑀤𑀁 𑀤𑀢𑁆𑀯𑀸 𑀫𑀳𑀦𑁆𑀢𑁂𑀦𑀸𑀦𑀼𑀪𑀸𑀯𑁂𑀦 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀩𑁆𑀭𑀳𑁆𑀫𑀮𑁄𑀓𑀁 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀫𑀬𑀸 𑀤𑀺𑀝𑁆𑀞𑀺𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀤𑀫𑀺𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩𑁪𑁩.

‘‘𑀅𑀮𑀸𑀢𑁄 𑀤𑁂𑀯𑀤𑀢𑁆𑀢𑁄𑀲𑀺, 𑀲𑀼𑀦𑀸𑀫𑁄 𑀆𑀲𑀺 𑀪𑀤𑁆𑀤𑀚𑀺;

𑀯𑀺𑀚𑀬𑁄 𑀲𑀸𑀭𑀺𑀧𑀼𑀢𑁆𑀢𑁄𑀲𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄𑀲𑀺 𑀩𑀻𑀚𑀓𑁄.

𑁧𑁩𑁪𑁪.

‘‘𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄, 𑀕𑀼𑀡𑁄 𑀆𑀲𑀺 𑀅𑀘𑁂𑀮𑀓𑁄;

𑀆𑀦𑀦𑁆𑀤𑁄 𑀲𑀸 𑀭𑀼𑀘𑀸 𑀆𑀲𑀺, 𑀬𑀸 𑀭𑀸𑀚𑀸𑀦𑀁 𑀧𑀲𑀸𑀤𑀬𑀺.

𑁧𑁩𑁪𑁫.

‘‘𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀭𑀸𑀚𑀸, 𑀧𑀸𑀧𑀤𑀺𑀝𑁆𑀞𑀺 𑀢𑀤𑀸 𑀅𑀳𑀼;

𑀫𑀳𑀸𑀩𑁆𑀭𑀳𑁆𑀫𑀸 𑀩𑁄𑀥𑀺𑀲𑀢𑁆𑀢𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺.

𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁫𑁪𑁬] 𑁯. 𑀯𑀺𑀥𑀼𑀭𑀚𑀸𑀢𑀓𑀯𑀡𑁆𑀡𑀦𑀸

𑀘𑀢𑀼𑀧𑁄𑀲𑀣𑀓𑀡𑁆𑀟𑀁

𑀧𑀡𑁆𑀟𑀼 ¶ ¶ 𑀓𑀺𑀲𑀺𑀬𑀸𑀲𑀺 𑀤𑀼𑀩𑁆𑀩𑀮𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀕𑀫𑁆𑀪𑀻𑀭𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑁄, 𑀅𑀢𑁆𑀢𑀦𑁄 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑁂 𑀲𑀼𑀔𑀼𑀫𑀧𑀜𑁆𑀳𑁂 𑀪𑀺𑀦𑁆𑀤𑀺𑀢𑁆𑀯𑀸 𑀢𑁂 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀢𑁆𑀯𑀸 𑀢𑀻𑀲𑀼 𑀲𑀭𑀡𑁂𑀲𑀼 𑀘𑁂𑀯 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀫𑀢𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀧𑀸𑀤𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀬𑀁 𑀢𑀣𑀸𑀕𑀢𑁄 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑁄 𑀧𑀭𑀧𑁆𑀧𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀔𑀢𑁆𑀢𑀺𑀬𑀸𑀤𑀬𑁄 𑀤𑀫𑁂𑀬𑁆𑀬. 𑀧𑀼𑀭𑀺𑀫𑀪𑀯𑀲𑁆𑀫𑀺𑀜𑁆𑀳𑀺 𑀩𑁄𑀥𑀺𑀜𑀸𑀡𑀁 𑀧𑀭𑀺𑀬𑁂𑀲𑀦𑁆𑀢𑁄𑀧𑀺 𑀢𑀣𑀸𑀕𑀢𑁄 𑀧𑀜𑁆𑀜𑀯𑀸 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑁄𑀬𑁂𑀯. 𑀢𑀣𑀸 𑀳𑀺 𑀅𑀳𑀁 𑀯𑀺𑀥𑀼𑀭𑀓𑀸𑀮𑁂 𑀲𑀝𑁆𑀞𑀺𑀬𑁄𑀚𑀦𑀼𑀩𑁆𑀩𑁂𑀥𑁂 𑀓𑀸𑀴𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀧𑀼𑀡𑁆𑀡𑀓𑀁 𑀦𑀸𑀫 𑀬𑀓𑁆𑀔𑀲𑁂𑀦𑀸𑀧𑀢𑀺𑀁 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦𑁂𑀯 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀜𑁆𑀘𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀤𑀸𑀧𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀣𑀦𑀕𑀭𑁂 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀦𑀸𑀫 𑀅𑀫𑀘𑁆𑀘𑁄 𑀢𑀲𑁆𑀲 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀳𑁄𑀲𑀺. 𑀲𑁄 𑀫𑀥𑀼𑀭𑀓𑀣𑁄 𑀫𑀳𑀸𑀥𑀫𑁆𑀫𑀓𑀣𑀺𑀓𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀸𑀲𑀭𑁂𑀦 𑀧𑀮𑀼𑀤𑁆𑀥𑀳𑀢𑁆𑀣𑀺𑀦𑁄 𑀯𑀺𑀬 ¶ 𑀅𑀢𑁆𑀢𑀦𑁄 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀸𑀬 𑀧𑀮𑁄𑀪𑁂𑀢𑁆𑀯𑀸 𑀢𑁂𑀲𑀁 𑀲𑀓𑀲𑀓𑀭𑀚𑁆𑀚𑀸𑀦𑀺 𑀕𑀦𑁆𑀢𑀼𑀁 𑀅𑀤𑀤𑀫𑀸𑀦𑁄 𑀩𑀼𑀤𑁆𑀥𑀮𑀻𑀮𑀸𑀬 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀝𑀺𑀯𑀲𑀺.

𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀫𑁆𑀧𑀺 𑀕𑀺𑀳𑀺𑀲𑀳𑀸𑀬𑀓𑀸 𑀘𑀢𑁆𑀢𑀸𑀭𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀫𑀳𑀮𑁆𑀮𑀓𑀓𑀸𑀮𑁂 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀢𑀢𑁆𑀣𑁂𑀯 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀘𑀸𑀭𑀺𑀓𑀁 ¶ 𑀘𑀭𑀫𑀸𑀦𑀸 𑀅𑀗𑁆𑀕𑀭𑀝𑁆𑀞𑁂 ¶ 𑀓𑀸𑀮𑀘𑀫𑁆𑀧𑀸𑀦𑀕𑀭𑀁 𑀧𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀬 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀲𑀳𑀸𑀬𑀓𑀸 𑀓𑀼𑀝𑀼𑀫𑁆𑀩𑀺𑀓𑀸 𑀢𑁂𑀲𑀁 𑀇𑀭𑀺𑀬𑀸𑀧𑀣𑁂𑀲𑀼 𑀧𑀲𑀻𑀤𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀏𑀓𑁂𑀓𑀁 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀆𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑁂𑀬𑁂𑀯 𑀯𑀸𑀲𑀸𑀧𑁂𑀲𑀼𑀁. 𑀢𑁂 𑀘𑀢𑁆𑀢𑀸𑀭𑁄 𑀢𑀸𑀧𑀲𑀸 𑀘𑀢𑀼𑀦𑁆𑀦𑀁 𑀓𑀼𑀝𑀼𑀫𑁆𑀩𑀺𑀓𑀸𑀦𑀁 𑀕𑁂𑀳𑁂𑀲𑀼 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀏𑀓𑁄 𑀢𑀸𑀧𑀲𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀘𑁆𑀙𑀢𑀺, 𑀏𑀓𑁄 𑀦𑀸𑀕𑀪𑀯𑀦𑀁, 𑀏𑀓𑁄 𑀲𑀼𑀧𑀡𑁆𑀡𑀪𑀯𑀦𑀁, 𑀏𑀓𑁄 𑀓𑁄𑀭𑀩𑁆𑀬𑀭𑀜𑁆𑀜𑁄 𑀫𑀺𑀕𑀸𑀚𑀺𑀦𑀉𑀬𑁆𑀬𑀸𑀦𑀁 𑀕𑀘𑁆𑀙𑀢𑀺. 𑀢𑁂𑀲𑀼 𑀬𑁄 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺, 𑀲𑁄 𑀲𑀓𑁆𑀓𑀲𑁆𑀲 𑀬𑀲𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀢𑀫𑁂𑀯 𑀯𑀡𑁆𑀡𑁂𑀢𑀺. 𑀬𑁄 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺, 𑀲𑁄 𑀦𑀸𑀕𑀭𑀸𑀚𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀢𑀫𑁂𑀯 𑀯𑀡𑁆𑀡𑁂𑀢𑀺. 𑀬𑁄 𑀲𑀼𑀧𑀡𑁆𑀡𑀪𑀯𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺, 𑀲𑁄 𑀲𑀼𑀧𑀡𑁆𑀡𑀭𑀸𑀚𑀲𑁆𑀲 𑀯𑀺𑀪𑀽𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀢𑀫𑁂𑀯 𑀯𑀡𑁆𑀡𑁂𑀢𑀺. 𑀬𑁄 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀭𑀸𑀚𑀲𑁆𑀲 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺, 𑀲𑁄 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀭𑀜𑁆𑀜𑁄 𑀲𑀺𑀭𑀺𑀲𑁄𑀪𑀕𑁆𑀕𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀢𑀫𑁂𑀯 𑀯𑀡𑁆𑀡𑁂𑀢𑀺.

𑀢𑁂 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸 𑀢𑀁 𑀢𑀤𑁂𑀯 𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀏𑀓𑁄 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀓𑁄 𑀲𑀧𑀼𑀢𑁆𑀢𑀤𑀸𑀭𑁄 𑀦𑀸𑀕𑀪𑀯𑀦𑁂 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀓𑁄 𑀲𑀼𑀧𑀡𑁆𑀡𑀪𑀯𑀦𑁂 𑀲𑀺𑀫𑁆𑀩𑀮𑀺𑀯𑀺𑀫𑀸𑀦𑁂 𑀲𑀼𑀧𑀡𑁆𑀡𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀏𑀓𑁄 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀧𑀺 𑀢𑀸𑀧𑀲𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀓𑁄𑀭𑀩𑁆𑀬𑀓𑀼𑀫𑀸𑀭𑁄 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀲𑁄 𑀧𑀦 𑀚𑀽𑀢𑀯𑀺𑀢𑁆𑀢𑀓𑁄 𑀅𑀳𑁄𑀲𑀺. 𑀲𑁄 𑀯𑀺𑀥𑀼𑀭𑀧𑀡𑁆𑀟𑀺𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀁 𑀉𑀧𑀯𑀲𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑁄 ‘‘𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀺𑀲𑁆𑀲𑀸𑀫𑀻’’𑀢𑀺 ¶ 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀦𑀼𑀜𑁆𑀜𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀲𑀓𑁆𑀓𑁄𑀧𑀺 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑁄 ‘‘𑀤𑁂𑀯𑀮𑁄𑀓𑁂 𑀧𑀮𑀺𑀩𑁄𑀥𑁄 𑀳𑁄𑀢𑀻’’𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀢𑀫𑁂𑀯 𑀉𑀬𑁆𑀬𑀸𑀦𑀁 𑀆𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀦𑀼𑀜𑁆𑀜𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀯𑀭𑀼𑀡𑀦𑀸𑀕𑀭𑀸𑀚𑀸𑀧𑀺 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑁄 ‘‘𑀦𑀸𑀕𑀪𑀯𑀦𑁂 𑀧𑀮𑀺𑀩𑁄𑀥𑁄 𑀳𑁄𑀢𑀻’’𑀢𑀺 𑀢𑀢𑁆𑀣𑁂𑀯𑀸𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀦𑀼𑀜𑁆𑀜𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀲𑀼𑀧𑀡𑁆𑀡𑀭𑀸𑀚𑀸𑀧𑀺 𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑁄 ‘‘𑀲𑀼𑀧𑀡𑁆𑀡𑀪𑀯𑀦𑁂 𑀧𑀮𑀺𑀩𑁄𑀥𑁄 𑀳𑁄𑀢𑀻’’𑀢𑀺 𑀢𑀢𑁆𑀣𑁂𑀯𑀸𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀫𑀦𑀼𑀜𑁆𑀜𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀚𑀦𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀓𑀝𑁆𑀞𑀸𑀦𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀢𑀻𑀭𑁂 𑀲𑀫𑀸𑀕𑀦𑁆𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀩𑁆𑀩𑀲𑀺𑀦𑁂𑀳𑀯𑀲𑁂𑀦 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀲𑀓𑁆𑀓𑁄 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺, 𑀇𑀢𑀭𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀬𑀼𑀢𑁆𑀢𑀸𑀲𑀦𑀁 𑀜𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂 𑀲𑀓𑁆𑀓𑁄 𑀆𑀳 ‘‘𑀫𑀬𑀁 𑀘𑀢𑁆𑀢𑀸𑀭𑁄𑀧𑀺 𑀭𑀸𑀚𑀸𑀦𑁄𑀯 ¶ , 𑀅𑀫𑁆𑀳𑁂𑀲𑀼 𑀧𑀦 𑀓𑀲𑁆𑀲 𑀲𑀻𑀮𑀁 𑀫𑀳𑀦𑁆𑀢’’𑀦𑁆𑀢𑀺? 𑀅𑀣 𑀦𑀁 𑀯𑀭𑀼𑀡𑀦𑀸𑀕𑀭𑀸𑀚𑀸 𑀆𑀳 ‘‘𑀢𑀼𑀫𑁆𑀳𑀸𑀓𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀲𑀻𑀮𑀢𑁄 𑀫𑀬𑁆𑀳𑀁 𑀲𑀻𑀮𑀁 𑀫𑀳𑀦𑁆𑀢’’𑀦𑁆𑀢𑀺. ‘‘𑀓𑀺𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺? ‘‘𑀅𑀬𑀁 𑀲𑀼𑀧𑀡𑁆𑀡𑀭𑀸𑀚𑀸 𑀅𑀫𑁆𑀳𑀸𑀓𑀁 𑀚𑀸𑀢𑀸𑀦𑀫𑁆𑀧𑀺 𑀅𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀸𑀫𑀺𑀢𑁆𑀢𑁄𑀯, 𑀅𑀳𑀁 𑀏𑀯𑀭𑀽𑀧𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀓𑁆𑀔𑀬𑀓𑀭𑀁 𑀧𑀘𑁆𑀘𑀸𑀫𑀺𑀢𑁆𑀢𑀁 𑀤𑀺𑀲𑁆𑀯𑀸𑀧𑀺 𑀓𑁄𑀥𑀁 𑀦 𑀓𑀭𑁄𑀫𑀺, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀫 𑀲𑀻𑀮𑀁 𑀫𑀳𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀁 𑀤𑀲𑀓𑀦𑀺𑀧𑀸𑀢𑁂 𑀘𑀢𑀼𑀧𑁄𑀲𑀣𑀚𑀸𑀢𑀓𑁂 𑀧𑀞𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁄 𑀓𑁄𑀧𑀦𑁂𑀬𑁆𑀬𑁂 𑀦 𑀓𑀭𑁄𑀢𑀺 𑀓𑁄𑀧𑀁, 𑀦 𑀓𑀼𑀚𑁆𑀛𑀢𑀺 𑀲𑀧𑁆𑀧𑀼𑀭𑀺𑀲𑁄 𑀓𑀤𑀸𑀘𑀺;

𑀓𑀼𑀤𑁆𑀥𑁄𑀧𑀺 𑀲𑁄 𑀦𑀸𑀯𑀺𑀓𑀭𑁄𑀢𑀺 𑀓𑁄𑀧𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂’’𑀢𑀺. (𑀚𑀸. 𑁧.𑁧𑁦.𑁨𑁪);

𑀢𑀢𑁆𑀣 𑀬𑁄𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀓𑁄𑀧𑀦𑁂𑀬𑁆𑀬𑁂𑀢𑀺 𑀓𑀼𑀚𑁆𑀛𑀺𑀢𑀩𑁆𑀩𑀬𑀼𑀢𑁆𑀢𑀓𑁂 𑀧𑀼𑀕𑁆𑀕𑀮𑁂 𑀔𑀦𑁆𑀢𑀻𑀯𑀸𑀤𑀻𑀢𑀸𑀧𑀲𑁄 𑀯𑀺𑀬 𑀓𑁄𑀧𑀁 𑀦 𑀓𑀭𑁄𑀢𑀺. 𑀓𑀤𑀸𑀘𑀻𑀢𑀺 𑀬𑁄 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀦 𑀓𑀼𑀚𑁆𑀛𑀢𑁂𑀯. 𑀓𑀼𑀤𑁆𑀥𑁄𑀧𑀻𑀢𑀺 𑀲𑀘𑁂 𑀧𑀦 𑀲𑁄 𑀲𑀧𑁆𑀧𑀼𑀭𑀺𑀲𑁄 𑀓𑀼𑀚𑁆𑀛𑀢𑀺, 𑀅𑀣 𑀓𑀼𑀤𑁆𑀥𑁄𑀧𑀺 𑀢𑀁 𑀓𑁄𑀧𑀁 𑀦𑀸𑀯𑀺𑀓𑀭𑁄𑀢𑀺 𑀘𑀽𑀴𑀩𑁄𑀥𑀺𑀢𑀸𑀧𑀲𑁄 𑀯𑀺𑀬. 𑀢𑀁 𑀯𑁂 𑀦𑀭𑀦𑁆𑀢𑀺 𑀫𑀳𑀸𑀭𑀸𑀚𑀸𑀦𑁄 𑀢𑀁 𑀯𑁂 𑀧𑀼𑀭𑀺𑀲𑀁 𑀲𑀫𑀺𑀢𑀧𑀸𑀧𑀢𑀸𑀬 𑀮𑁄𑀓𑁂 𑀧𑀡𑁆𑀟𑀺𑀢𑀸 ‘‘𑀲𑀫𑀡’’𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀇𑀫𑁂 ¶ 𑀧𑀦 𑀕𑀼𑀡𑀸 𑀫𑀬𑀺 𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀫𑁂𑀯 𑀲𑀻𑀮𑀁 𑀫𑀳𑀦𑁆𑀢𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀼𑀧𑀡𑁆𑀡𑀭𑀸𑀚𑀸 ‘‘𑀅𑀬𑀁 𑀦𑀸𑀕𑁄 𑀫𑀫 𑀅𑀕𑁆𑀕𑀪𑀓𑁆𑀔𑁄, 𑀬𑀲𑁆𑀫𑀸 𑀧𑀦𑀸𑀳𑀁 𑀏𑀯𑀭𑀽𑀧𑀁 𑀅𑀕𑁆𑀕𑀪𑀓𑁆𑀔𑀁 𑀤𑀺𑀲𑁆𑀯𑀸𑀧𑀺 𑀔𑀼𑀤𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀆𑀳𑀸𑀭𑀳𑁂𑀢𑀼 𑀧𑀸𑀧𑀁 𑀦 𑀓𑀭𑁄𑀫𑀺, 𑀢𑀲𑁆𑀫𑀸 𑀫𑀫𑁂𑀯 𑀲𑀻𑀮𑀁 𑀫𑀳𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀊𑀦𑀽𑀤𑀭𑁄 ¶ 𑀬𑁄 𑀲𑀳𑀢𑁂 𑀚𑀺𑀖𑀘𑁆𑀙𑀁, 𑀤𑀦𑁆𑀢𑁄 𑀢𑀧𑀲𑁆𑀲𑀻 𑀫𑀺𑀢𑀧𑀸𑀦𑀪𑁄𑀚𑀦𑁄;

𑀆𑀳𑀸𑀭𑀳𑁂𑀢𑀼 𑀦 𑀓𑀭𑁄𑀢𑀺 𑀧𑀸𑀧𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂’’𑀢𑀺. (𑀚𑀸. 𑁧.𑁧𑁦.𑁨𑁫);

𑀢𑀢𑁆𑀣 𑀤𑀦𑁆𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑀧𑀲𑁆𑀲𑀻𑀢𑀺 𑀢𑀧𑀦𑀺𑀲𑁆𑀲𑀺𑀢𑀓𑁄. 𑀆𑀳𑀸𑀭𑀳𑁂𑀢𑀽𑀢𑀺 𑀅𑀢𑀺𑀚𑀺𑀖𑀘𑁆𑀙𑀧𑀺𑀴𑀺𑀢𑁄𑀧𑀺 𑀬𑁄 𑀧𑀸𑀧𑀁 𑀮𑀸𑀫𑀓𑀓𑀫𑁆𑀫𑀁 𑀦 𑀓𑀭𑁄𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬. 𑀅𑀳𑀁 𑀧𑀦𑀚𑁆𑀚 𑀆𑀳𑀸𑀭𑀳𑁂𑀢𑀼 𑀧𑀸𑀧𑀁 𑀦 𑀓𑀭𑁄𑀫𑀺, 𑀢𑀲𑁆𑀫𑀸 𑀫𑀫𑁂𑀯 𑀲𑀻𑀮𑀁 𑀫𑀳𑀦𑁆𑀢𑀦𑁆𑀢𑀺.

𑀢𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀅𑀳𑀁 𑀦𑀸𑀦𑀧𑁆𑀧𑀓𑀸𑀭𑀁 𑀲𑀼𑀔𑀧𑀤𑀝𑁆𑀞𑀸𑀦𑀁 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀲𑀻𑀮𑀭𑀓𑁆𑀔𑀡𑀢𑁆𑀣𑀸𑀬 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑁄, 𑀢𑀲𑁆𑀫𑀸 𑀫𑀫𑁂𑀯 𑀲𑀻𑀮𑀁 𑀫𑀳𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀔𑀺𑀟𑁆𑀟𑀁 ¶ 𑀭𑀢𑀺𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸𑀦 𑀲𑀩𑁆𑀩𑀁, 𑀦 𑀘𑀸𑀮𑀺𑀓𑀁 𑀪𑀸𑀲𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂;

𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂’’𑀢𑀺. (𑀚𑀸. 𑁧.𑁧𑁦.𑁨𑁬);

𑀢𑀢𑁆𑀣 𑀔𑀺𑀟𑁆𑀟𑀦𑁆𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀔𑀺𑀟𑁆𑀟𑀁. 𑀭𑀢𑀺𑀦𑁆𑀢𑀺 𑀤𑀺𑀩𑁆𑀩𑀓𑀸𑀫𑀕𑀼𑀡𑀭𑀢𑀺𑀁. 𑀓𑀺𑀜𑁆𑀘𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀯𑀺𑀪𑀽𑀲𑀝𑁆𑀞𑀸𑀦𑀸𑀢𑀺 𑀫𑀁𑀲𑀯𑀺𑀪𑀽𑀲𑀸 𑀙𑀯𑀺𑀯𑀺𑀪𑀽𑀲𑀸𑀢𑀺 𑀤𑁆𑀯𑁂 𑀯𑀺𑀪𑀽𑀲𑀸. 𑀢𑀢𑁆𑀣 𑀅𑀚𑁆𑀛𑁄𑀳𑀭𑀡𑀻𑀬𑀸𑀳𑀸𑀭𑁄 𑀫𑀁𑀲𑀯𑀺𑀪𑀽𑀲𑀸 𑀦𑀸𑀫, 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀙𑀯𑀺𑀯𑀺𑀪𑀽𑀲𑀸 𑀦𑀸𑀫, 𑀬𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀥𑀸𑀭𑀻𑀬𑀢𑀺, 𑀢𑀁 𑀢𑀲𑁆𑀲 𑀞𑀸𑀦𑀁, 𑀢𑀢𑁄 𑀯𑀺𑀭𑀢𑁄 𑀫𑁂𑀣𑀼𑀦𑀲𑁂𑀯𑀦𑀢𑁄 𑀘 𑀬𑁄 𑀧𑀝𑀺𑀯𑀺𑀭𑀢𑁄. 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂𑀢𑀺 𑀅𑀳𑀁 𑀅𑀚𑁆𑀚 𑀤𑁂𑀯𑀘𑁆𑀙𑀭𑀸𑀬𑁄 𑀧𑀳𑀸𑀬 𑀇𑀥𑀸𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀺, 𑀢𑀲𑁆𑀫𑀸 𑀫𑀫𑁂𑀯 𑀲𑀻𑀮𑀁 𑀫𑀳𑀦𑁆𑀢𑀦𑁆𑀢𑀺. 𑀏𑀯𑀁 𑀲𑀓𑁆𑀓𑁄𑀧𑀺 𑀅𑀢𑁆𑀢𑀦𑁄 𑀲𑀻𑀮𑀫𑁂𑀯 𑀯𑀡𑁆𑀡𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀥𑀦𑀜𑁆𑀘𑀬𑀭𑀸𑀚𑀸 ‘‘𑀅𑀳𑀁 𑀅𑀚𑁆𑀚 𑀫𑀳𑀦𑁆𑀢𑀁 𑀧𑀭𑀺𑀕𑁆𑀕𑀳𑀁 𑀲𑁄𑀴𑀲𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀧𑀭𑀺𑀧𑀼𑀡𑁆𑀡𑀁 𑀅𑀦𑁆𑀢𑁂𑀧𑀼𑀭𑀁 𑀘𑀚𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀺, 𑀢𑀲𑁆𑀫𑀸 𑀫𑀫𑁂𑀯 𑀲𑀻𑀮𑀁 𑀫𑀳𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀭𑀺𑀕𑁆𑀕𑀳𑀁 ¶ ¶ 𑀮𑁄𑀪𑀥𑀫𑁆𑀫𑀜𑁆𑀘 𑀲𑀩𑁆𑀩𑀁, 𑀬𑁄 𑀯𑁂 𑀧𑀭𑀺𑀜𑁆𑀜𑀸𑀬 𑀧𑀭𑀺𑀘𑁆𑀘𑀚𑁂𑀢𑀺;

𑀤𑀦𑁆𑀢𑀁 𑀞𑀺𑀢𑀢𑁆𑀢𑀁 𑀅𑀫𑀫𑀁 𑀦𑀺𑀭𑀸𑀲𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂’’𑀢𑀺. (𑀚𑀸. 𑁧.𑁧𑁦.𑁨𑁭);

𑀢𑀢𑁆𑀣 𑀧𑀭𑀺𑀕𑁆𑀕𑀳𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀯𑀢𑁆𑀣𑀼𑀓𑀸𑀫𑀁. 𑀮𑁄𑀪𑀥𑀫𑁆𑀫𑀦𑁆𑀢𑀺 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀢𑀡𑁆𑀳𑀁. 𑀧𑀭𑀺𑀜𑁆𑀜𑀸𑀬𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸, 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀢𑀢𑁆𑀣 𑀔𑀦𑁆𑀥𑀸𑀤𑀻𑀦𑀁 𑀤𑀼𑀓𑁆𑀔𑀸𑀤𑀺𑀲𑀪𑀸𑀯𑀚𑀸𑀦𑀦𑀁 𑀜𑀸𑀢𑀧𑀭𑀺𑀜𑁆𑀜𑀸, 𑀢𑁂𑀲𑀼 𑀅𑀕𑀼𑀡𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀻𑀭𑀡𑀁 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀢𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀙𑀦𑁆𑀤𑀭𑀸𑀕𑀲𑁆𑀲𑀸𑀧𑀓𑀟𑁆𑀠𑀦𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀬𑁄 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀚𑀸𑀦𑀺𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀧𑀭𑀺𑀘𑁆𑀘𑀚𑀢𑀺, 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀤𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁. 𑀞𑀺𑀢𑀢𑁆𑀢𑀦𑁆𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀞𑀺𑀢𑀲𑀪𑀸𑀯𑀁. 𑀅𑀫𑀫𑀦𑁆𑀢𑀺 𑀅𑀳𑀦𑁆𑀢𑀺 𑀫𑀫𑀸𑀬𑀦𑀢𑀡𑁆𑀳𑀸𑀭𑀳𑀺𑀢𑀁. 𑀦𑀺𑀭𑀸𑀲𑀦𑁆𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 𑀦𑀺𑀘𑁆𑀙𑀦𑁆𑀤𑀭𑀸𑀕𑀁. 𑀢𑀁 𑀯𑁂 𑀦𑀭𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 ‘‘𑀲𑀫𑀡’’𑀦𑁆𑀢𑀺 𑀯𑀤𑀦𑁆𑀢𑀺.

𑀇𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀻𑀮𑀫𑁂𑀯 𑀫𑀳𑀦𑁆𑀢𑀦𑁆𑀢𑀺 𑀯𑀡𑁆𑀡𑁂𑀢𑁆𑀯𑀸 𑀲𑀓𑁆𑀓𑀸𑀤𑀬𑁄 𑀥𑀦𑀜𑁆𑀘𑀬𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀡𑁆𑀟𑀺𑀢𑁄, 𑀬𑁄 𑀦𑁄 𑀇𑀫𑀁 𑀓𑀗𑁆𑀔𑀁 𑀯𑀺𑀦𑁄𑀤𑁂𑀬𑁆𑀬𑀸’’𑀢𑀺 ¶ . ‘‘𑀆𑀫, 𑀫𑀳𑀸𑀭𑀸𑀚𑀸𑀦𑁄 𑀫𑀫 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀫𑀳𑀸𑀧𑀜𑁆𑀜𑁄 𑀅𑀲𑀫𑀥𑀼𑀭𑁄 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀦𑀸𑀫 𑀅𑀢𑁆𑀣𑀺, 𑀲𑁄 𑀦𑁄 𑀇𑀫𑀁 𑀓𑀗𑁆𑀔𑀁 𑀯𑀺𑀦𑁄𑀤𑁂𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺. 𑀅𑀣 𑀢𑁂 𑀲𑀩𑁆𑀩𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀲𑀩𑁆𑀩𑁂𑀧𑀺 𑀉𑀬𑁆𑀬𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀮𑁆𑀮𑀗𑁆𑀓𑀯𑀭𑀫𑀚𑁆𑀛𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 ‘‘𑀧𑀡𑁆𑀟𑀺𑀢, 𑀅𑀫𑁆𑀳𑀸𑀓𑀁 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀁 𑀦𑁄 𑀯𑀺𑀦𑁄𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

‘‘𑀧𑀼𑀘𑁆𑀙𑀸𑀫 𑀓𑀢𑁆𑀢𑀸𑀭𑀫𑀦𑁄𑀫𑀧𑀜𑁆𑀜𑀁, 𑀓𑀣𑀸𑀲𑀼 𑀦𑁄 𑀯𑀺𑀕𑁆𑀕𑀳𑁄 𑀅𑀢𑁆𑀣𑀺 𑀚𑀸𑀢𑁄;

𑀙𑀺𑀦𑁆𑀤𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺, 𑀢𑀤𑀚𑁆𑀚 𑀓𑀗𑁆𑀔𑀁 𑀯𑀺𑀢𑀭𑁂𑀫𑀼 𑀲𑀩𑁆𑀩𑁂’’𑀢𑀺. (𑀚𑀸. 𑁧.𑁧𑁦.𑁨𑁮);

𑀢𑀢𑁆𑀣 𑀓𑀢𑁆𑀢𑀸𑀭𑀦𑁆𑀢𑀺 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀓𑀸𑀭𑀓𑀁. 𑀯𑀺𑀕𑁆𑀕𑀳𑁄 𑀅𑀢𑁆𑀣𑀺 𑀚𑀸𑀢𑁄𑀢𑀺 𑀏𑀓𑁄 𑀲𑀻𑀮𑀯𑀺𑀕𑁆𑀕𑀳𑁄 𑀲𑀻𑀮𑀯𑀺𑀯𑀸𑀤𑁄 𑀉𑀧𑁆𑀧𑀦𑁆𑀦𑁄 𑀅𑀢𑁆𑀣𑀺. 𑀙𑀺𑀦𑁆𑀤𑀚𑁆𑀚𑀸𑀢𑀺 𑀅𑀫𑁆𑀳𑀸𑀓𑀁 𑀢𑀁 ¶ 𑀓𑀗𑁆𑀔𑀁 𑀢𑀸𑀦𑀺 𑀘 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺 𑀯𑀚𑀺𑀭𑁂𑀦 𑀲𑀺𑀦𑁂𑀭𑀼𑀁 𑀧𑀳𑀭𑀦𑁆𑀢𑁄 𑀯𑀺𑀬 𑀅𑀚𑁆𑀚 𑀙𑀺𑀦𑁆𑀤. 𑀯𑀺𑀢𑀭𑁂𑀫𑀽𑀢𑀺 𑀯𑀺𑀢𑀭𑁂𑀬𑁆𑀬𑀸𑀫.

𑀧𑀡𑁆𑀟𑀺𑀢𑁄 ¶ 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀭𑀸𑀚𑀸𑀦𑁄 𑀢𑀼𑀫𑁆𑀳𑀸𑀓𑀁 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀯𑀺𑀯𑀸𑀤𑀓𑀣𑀁 𑀲𑀼𑀓𑀣𑀺𑀢𑀤𑀼𑀓𑁆𑀓𑀣𑀺𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁂 𑀧𑀡𑁆𑀟𑀺𑀢𑀸 𑀅𑀢𑁆𑀣𑀤𑀲𑀸 𑀪𑀯𑀦𑁆𑀢𑀺, 𑀪𑀸𑀲𑀦𑁆𑀢𑀺 𑀢𑁂 𑀬𑁄𑀦𑀺𑀲𑁄 𑀢𑀢𑁆𑀣 𑀓𑀸𑀮𑁂;

𑀓𑀣𑀁 𑀦𑀼 𑀓𑀣𑀸𑀦𑀁 𑀅𑀪𑀸𑀲𑀺𑀢𑀸𑀦𑀁, 𑀅𑀢𑁆𑀣𑀁 𑀦𑀬𑁂𑀬𑁆𑀬𑀼𑀁 𑀓𑀼𑀲𑀮𑀸 𑀚𑀦𑀺𑀦𑁆𑀤𑀸’’𑀢𑀺. (𑀚𑀸. 𑁧.𑁧𑁦.𑁨𑁯);

𑀢𑀢𑁆𑀣 𑀅𑀢𑁆𑀣𑀤𑀲𑀸𑀢𑀺 𑀅𑀢𑁆𑀣𑀤𑀲𑁆𑀲𑀦𑀲𑀫𑀢𑁆𑀣𑀸. 𑀢𑀢𑁆𑀣 𑀓𑀸𑀮𑁂𑀢𑀺 𑀢𑀲𑁆𑀫𑀺𑀁 𑀯𑀺𑀕𑁆𑀕𑀳𑁂 𑀆𑀭𑁄𑀘𑀺𑀢𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂 𑀢𑁂 𑀧𑀡𑁆𑀟𑀺𑀢𑀸 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀦𑁆𑀢𑀸 𑀬𑁄𑀦𑀺𑀲𑁄 𑀪𑀸𑀲𑀦𑁆𑀢𑀺. 𑀅𑀢𑁆𑀣𑀁 𑀦𑀬𑁂𑀬𑁆𑀬𑀼𑀁 𑀓𑀼𑀲𑀮𑀸𑀢𑀺 𑀓𑀼𑀲𑀮𑀸 𑀙𑁂𑀓𑀸𑀧𑀺 𑀲𑀫𑀸𑀦𑀸 𑀅𑀪𑀸𑀲𑀺𑀢𑀸𑀦𑀁 𑀓𑀣𑀸𑀦𑀁 𑀓𑀣𑀁 𑀦𑀼 𑀅𑀢𑁆𑀣𑀁 𑀜𑀸𑀡𑁂𑀦 𑀦𑀬𑁂𑀬𑁆𑀬𑀼𑀁 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀼𑀁. 𑀚𑀦𑀺𑀦𑁆𑀤𑀸𑀢𑀺 𑀭𑀸𑀚𑀸𑀦𑁄 𑀆𑀮𑀧𑀢𑀺. 𑀢𑀲𑁆𑀫𑀸 𑀇𑀤𑀁 𑀢𑀸𑀯 𑀫𑁂 𑀯𑀤𑁂𑀣.

‘‘𑀓𑀣𑀁 𑀳𑀯𑁂 𑀪𑀸𑀲𑀢𑀺 𑀦𑀸𑀕𑀭𑀸𑀚𑀸, 𑀕𑀭𑀼𑀴𑁄 𑀧𑀦 𑀯𑁂𑀦𑀢𑁂𑀬𑁆𑀬𑁄 𑀓𑀺𑀫𑀸𑀳;

𑀕𑀦𑁆𑀥𑀩𑁆𑀩𑀭𑀸𑀚𑀸 𑀧𑀦 𑀓𑀺𑀁 𑀯𑀤𑁂𑀢𑀺, 𑀓𑀣𑀁 𑀧𑀦 𑀓𑀼𑀭𑀽𑀦𑀁 𑀭𑀸𑀚𑀲𑁂𑀝𑁆𑀞𑁄’’𑀢𑀺. (𑀚𑀸. 𑁧.𑁧𑁦.𑁩𑁦);

𑀢𑀢𑁆𑀣 ¶ 𑀕𑀦𑁆𑀥𑀩𑁆𑀩𑀭𑀸𑀚𑀸𑀢𑀺 𑀲𑀓𑁆𑀓𑀁 𑀲𑀦𑁆𑀥𑀸𑀬𑀸𑀳.

𑀅𑀣𑀲𑁆𑀲 𑀢𑁂 𑀇𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

‘‘𑀔𑀦𑁆𑀢𑀺𑀁 𑀳𑀯𑁂 𑀪𑀸𑀲𑀢𑀺 𑀦𑀸𑀕𑀭𑀸𑀚𑀸, 𑀅𑀧𑁆𑀧𑀸𑀳𑀸𑀭𑀁 𑀕𑀭𑀼𑀴𑁄 𑀯𑁂𑀦𑀢𑁂𑀬𑁆𑀬𑁄;

𑀕𑀦𑁆𑀥𑀩𑁆𑀩𑀭𑀸𑀚𑀸 𑀭𑀢𑀺𑀯𑀺𑀧𑁆𑀧𑀳𑀸𑀦𑀁, 𑀅𑀓𑀺𑀜𑁆𑀘𑀦𑀁 𑀓𑀼𑀭𑀽𑀦𑀁 𑀭𑀸𑀚𑀲𑁂𑀝𑁆𑀞𑁄’’𑀢𑀺. (𑀚𑀸. 𑁧.𑁧𑁦.𑁩𑁧);

𑀢𑀲𑁆𑀲𑀢𑁆𑀣𑁄 𑁋 𑀧𑀡𑁆𑀟𑀺𑀢, 𑀦𑀸𑀕𑀭𑀸𑀚𑀸 𑀢𑀸𑀯 𑀓𑁄𑀧𑀦𑁂𑀬𑁆𑀬𑁂𑀧𑀺 𑀧𑀼𑀕𑁆𑀕𑀮𑁂 𑀅𑀓𑀼𑀧𑁆𑀧𑀦𑀲𑀗𑁆𑀔𑀸𑀢𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀁 𑀯𑀡𑁆𑀡𑁂𑀢𑀺, 𑀕𑀭𑀼𑀴𑁄 𑀅𑀧𑁆𑀧𑀸𑀳𑀸𑀭𑀢𑀸𑀲𑀗𑁆𑀔𑀸𑀢𑀁 𑀆𑀳𑀸𑀭𑀳𑁂𑀢𑀼 ¶ 𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀲𑀓𑁆𑀓𑁄 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀻𑀦𑀁 𑀯𑀺𑀧𑁆𑀧𑀳𑀸𑀦𑀁, 𑀓𑀼𑀭𑀼𑀭𑀸𑀚𑀸 𑀦𑀺𑀧𑁆𑀧𑀮𑀺𑀩𑁄𑀥𑀪𑀸𑀯𑀁 𑀯𑀡𑁆𑀡𑁂𑀢𑀻𑀢𑀺.

𑀅𑀣 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀩𑁆𑀩𑀸𑀦𑀺 𑀏𑀢𑀸𑀦𑀺 𑀲𑀼𑀪𑀸𑀲𑀺𑀢𑀸𑀦𑀺, 𑀦 𑀳𑁂𑀢𑁆𑀣 𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀣𑀺 𑀓𑀺𑀜𑁆𑀘𑀺;

𑀬𑀲𑁆𑀫𑀺𑀜𑁆𑀘 𑀏𑀢𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀅𑀭𑀸𑀯 ¶ 𑀦𑀸𑀪𑁆𑀬𑀸 𑀲𑀼𑀲𑀫𑁄𑀳𑀺𑀢𑀸𑀦𑀺;

𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂’’𑀢𑀺. (𑀚𑀸. 𑁧.𑁧𑁦.𑁩𑁨);

𑀢𑀢𑁆𑀣 𑀏𑀢𑀸𑀦𑀻𑀢𑀺 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀕𑀼𑀡𑀚𑀸𑀢𑀸𑀦𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀓𑀝𑀦𑀸𑀪𑀺𑀬𑀁 𑀲𑀼𑀝𑁆𑀞𑀼 𑀲𑀫𑁄𑀳𑀺𑀢𑀸𑀦𑀺 𑀅𑀭𑀸 𑀯𑀺𑀬 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀘𑀢𑀽𑀳𑀺𑀧𑁂𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀕𑁆𑀕𑀮𑀁 𑀧𑀡𑁆𑀟𑀺𑀢𑀸 ‘‘𑀲𑀫𑀡’’𑀦𑁆𑀢𑀺 𑀆𑀳𑀼 𑀮𑁄𑀓𑁂𑀢𑀺.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀲𑀻𑀮𑀁 𑀏𑀓𑀲𑀫𑀫𑁂𑀯 𑀅𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀭𑀸𑀚𑀸𑀦𑁄 𑀢𑀲𑁆𑀲 𑀢𑀼𑀝𑁆𑀞𑀸 𑀣𑀼𑀢𑀺𑀁 𑀓𑀭𑁄𑀦𑁆𑀢𑀸 𑀇𑀫𑀁 𑀕𑀸𑀣𑀫𑀸𑀳𑀁𑀲𑀼 𑁋

‘‘𑀢𑀼𑀯𑀜𑁆𑀳𑀺 𑀲𑁂𑀝𑁆𑀞𑁄 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀺, 𑀢𑁆𑀯𑀁 𑀥𑀫𑁆𑀫𑀕𑀽 𑀥𑀫𑁆𑀫𑀯𑀺𑀤𑀽 𑀲𑀼𑀫𑁂𑀥𑁄;

𑀧𑀜𑁆𑀜𑀸𑀬 𑀧𑀜𑁆𑀳𑀁 𑀲𑀫𑀥𑀺𑀕𑁆𑀕𑀳𑁂𑀢𑁆𑀯𑀸, 𑀅𑀘𑁆𑀙𑁂𑀘𑁆𑀙𑀺 𑀥𑀻𑀭𑁄 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺;

𑀅𑀘𑁆𑀙𑁂𑀘𑁆𑀙𑀺 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺, 𑀘𑀼𑀦𑁆𑀤𑁄 𑀬𑀣𑀸 𑀦𑀸𑀕𑀤𑀦𑁆𑀢𑀁 𑀔𑀭𑁂𑀦𑀸’’𑀢𑀺. (𑀚𑀸. 𑁧.𑁧𑁦.𑁩𑁩).

𑀢𑀢𑁆𑀣 ¶ 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀻𑀢𑀺 𑀢𑁆𑀯𑀁 𑀅𑀦𑀼𑀢𑁆𑀢𑀭𑁄 𑀅𑀲𑀺, 𑀦𑀢𑁆𑀣𑀺 𑀢𑀬𑀸 𑀉𑀢𑁆𑀢𑀭𑀺𑀢𑀭𑁄 𑀦𑀸𑀫. 𑀥𑀫𑁆𑀫𑀕𑀽𑀢𑀺 𑀥𑀫𑁆𑀫𑀲𑁆𑀲 𑀕𑁄𑀧𑀓𑁄 𑀘𑁂𑀯 𑀥𑀫𑁆𑀫𑀜𑁆𑀜𑀽 𑀘. 𑀥𑀫𑁆𑀫𑀯𑀺𑀤𑀽𑀢𑀺 𑀧𑀸𑀓𑀝𑀥𑀫𑁆𑀫𑁄. 𑀲𑀼𑀫𑁂𑀥𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄 𑀧𑀜𑁆𑀜𑀸𑀬𑀸𑀢𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀅𑀫𑁆𑀳𑀸𑀓𑀁 𑀧𑀜𑁆𑀳𑀁 𑀲𑀼𑀝𑁆𑀞𑀼 𑀅𑀥𑀺𑀕𑀡𑁆𑀳𑀺𑀢𑁆𑀯𑀸 ‘‘𑀇𑀤𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸. 𑀅𑀘𑁆𑀙𑁂𑀘𑁆𑀙𑀻𑀢𑀺 𑀢𑁆𑀯𑀁 𑀥𑀻𑀭𑁄 𑀅𑀫𑁆𑀳𑀸𑀓𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺 𑀙𑀺𑀦𑁆𑀤𑀺, 𑀏𑀯𑀁 𑀙𑀺𑀦𑁆𑀤𑀦𑁆𑀢𑁄 𑀘 ‘‘𑀙𑀺𑀦𑁆𑀤𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀻’’𑀢𑀺 𑀇𑀤𑀁 𑀅𑀫𑁆𑀳𑀸𑀓𑀁 𑀆𑀬𑀸𑀘𑀦𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀅𑀘𑁆𑀙𑁂𑀘𑁆𑀙𑀺 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺 ¶ . 𑀘𑀼𑀦𑁆𑀤𑁄 𑀬𑀣𑀸 𑀦𑀸𑀕𑀤𑀦𑁆𑀢𑀁 𑀔𑀭𑁂𑀦𑀸𑀢𑀺 𑀬𑀣𑀸 𑀤𑀦𑁆𑀢𑀓𑀸𑀭𑁄 𑀓𑀓𑀘𑁂𑀦 𑀳𑀢𑁆𑀣𑀺𑀤𑀦𑁆𑀢𑀁 𑀙𑀺𑀦𑁆𑀤𑁂𑀬𑁆𑀬, 𑀏𑀯𑀁 𑀙𑀺𑀦𑁆𑀤𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀭𑀸𑀚𑀸𑀦𑁄 𑀢𑀲𑁆𑀲 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑀫𑀸𑀦𑀲𑀸 𑀅𑀳𑁂𑀲𑀼𑀁. 𑀅𑀣 𑀦𑀁 𑀲𑀓𑁆𑀓𑁄 𑀤𑀺𑀩𑁆𑀩𑀤𑀼𑀓𑀽𑀮𑁂𑀦 𑀧𑀽𑀚𑁂𑀲𑀺, 𑀕𑀭𑀼𑀴𑁄 𑀲𑀼𑀯𑀡𑁆𑀡𑀫𑀸𑀮𑀸𑀬, 𑀯𑀭𑀼𑀡𑁄 𑀦𑀸𑀕𑀭𑀸𑀚𑀸 𑀫𑀡𑀺𑀦𑀸, 𑀥𑀦𑀜𑁆𑀘𑀬𑀭𑀸𑀚𑀸 𑀕𑀯𑀲𑀳𑀲𑁆𑀲𑀸𑀤𑀻𑀳𑀺 𑀧𑀽𑀚𑁂𑀲𑀺. 𑀢𑁂𑀦𑁂𑀯𑀸𑀳 𑁋

‘‘𑀦𑀻𑀮𑀼𑀧𑁆𑀧𑀮𑀸𑀪𑀁 𑀯𑀺𑀫𑀮𑀁 𑀅𑀦𑀕𑁆𑀖𑀁, 𑀯𑀢𑁆𑀣𑀁 𑀇𑀤𑀁 𑀥𑀽𑀫𑀲𑀫𑀸𑀦𑀯𑀡𑁆𑀡𑀁;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀥𑀫𑁆𑀫𑀧𑀽𑀚𑀸𑀬 𑀥𑀻𑀭.

‘‘𑀲𑀼𑀯𑀡𑁆𑀡𑀫𑀸𑀮𑀁 𑀲𑀢𑀧𑀢𑁆𑀢𑀨𑀼𑀮𑁆𑀮𑀺𑀢𑀁, 𑀲𑀓𑁂𑀲𑀭𑀁 𑀭𑀢𑁆𑀦𑀲𑀳𑀲𑁆𑀲𑀫𑀡𑁆𑀟𑀺𑀢𑀁;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀥𑀫𑁆𑀫𑀧𑀽𑀚𑀸𑀬 𑀥𑀻𑀭.

‘‘𑀫𑀡𑀺𑀁 𑀅𑀦𑀕𑁆𑀖𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀓𑀡𑁆𑀞𑀸𑀯𑀲𑀢𑁆𑀢𑀁 𑀫𑀡𑀺𑀪𑀽𑀲𑀺𑀢𑀁 𑀫𑁂;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀥𑀫𑁆𑀫𑀧𑀽𑀚𑀸𑀬 𑀥𑀻𑀭.

‘‘𑀕𑀯𑀁 𑀲𑀳𑀲𑁆𑀲𑀁 𑀉𑀲𑀪𑀜𑁆𑀘 𑀦𑀸𑀕𑀁, 𑀆𑀚𑀜𑁆𑀜𑀬𑀼𑀢𑁆𑀢𑁂 𑀘 𑀭𑀣𑁂 𑀤𑀲 𑀇𑀫𑁂;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀲𑁄𑀴𑀲𑀸’’𑀢𑀺. (𑀚𑀸. 𑁧.𑁧𑁦.𑁩𑁪-𑁩𑁭);

𑀏𑀯𑀁 𑀲𑀓𑁆𑀓𑀸𑀤𑀬𑁄 ¶ 𑀫𑀳𑀸𑀲𑀢𑁆𑀢𑀁 𑀧𑀽𑀚𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀺𑀁𑀲𑀼.

𑀘𑀢𑀼𑀧𑁄𑀲𑀣𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀤𑁄𑀳𑀴𑀓𑀡𑁆𑀟𑀁

𑀢𑁂𑀲𑀼 ¶ ¶ 𑀦𑀸𑀕𑀭𑀸𑀚𑀲𑁆𑀲 𑀪𑀭𑀺𑀬𑀸 𑀯𑀺𑀫𑀮𑀸𑀤𑁂𑀯𑀻 𑀦𑀸𑀫. 𑀲𑀸 𑀢𑀲𑁆𑀲 𑀕𑀻𑀯𑀸𑀬 𑀧𑀺𑀴𑀦𑁆𑀥𑀦𑀫𑀡𑀺𑀁 𑀅𑀧𑀲𑁆𑀲𑀦𑁆𑀢𑀻 𑀧𑀼𑀘𑁆𑀙𑀺 ‘‘𑀤𑁂𑀯, 𑀓𑀳𑀁 𑀧𑀦 𑀢𑁂 𑀫𑀡𑀻’’𑀢𑀺? ‘‘𑀪𑀤𑁆𑀤𑁂, 𑀘𑀦𑁆𑀤𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀲𑁆𑀲 𑀯𑀺𑀥𑀼𑀭𑀧𑀡𑁆𑀟𑀺𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀳𑀁 𑀢𑁂𑀦 𑀫𑀡𑀺𑀦𑀸 𑀢𑀁 𑀧𑀽𑀚𑁂𑀲𑀺𑀁. 𑀦 𑀓𑁂𑀯𑀮𑀜𑁆𑀘 𑀅𑀳𑀫𑁂𑀯, 𑀲𑀓𑁆𑀓𑁄𑀧𑀺 𑀢𑀁 𑀤𑀺𑀩𑁆𑀩𑀤𑀼𑀓𑀽𑀮𑁂𑀦 𑀧𑀽𑀚𑁂𑀲𑀺, 𑀲𑀼𑀧𑀡𑁆𑀡𑀭𑀸𑀚𑀸 𑀲𑀼𑀯𑀡𑁆𑀡𑀫𑀸𑀮𑀸𑀬, 𑀥𑀦𑀜𑁆𑀘𑀬𑀭𑀸𑀚𑀸 𑀕𑀯𑀲𑁆𑀲𑀲𑀳𑀲𑁆𑀲𑀸𑀤𑀻𑀳𑀺 𑀧𑀽𑀚𑁂𑀲𑀻’’𑀢𑀺. ‘‘𑀥𑀫𑁆𑀫𑀓𑀣𑀺𑀓𑁄 𑀲𑁄, 𑀤𑁂𑀯𑀸’’𑀢𑀺. ‘‘𑀪𑀤𑁆𑀤𑁂, 𑀓𑀺𑀁 𑀯𑀤𑁂𑀲𑀺, 𑀚𑀫𑁆𑀩𑀼𑀤𑀻𑀧𑀢𑀮𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀯𑀺𑀬 𑀧𑀯𑀢𑁆𑀢𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀭𑀸𑀚𑀸𑀦𑁄 𑀢𑀲𑁆𑀲 𑀫𑀥𑀼𑀭𑀥𑀫𑁆𑀫𑀓𑀣𑀸𑀬 𑀩𑀚𑁆𑀛𑀺𑀢𑁆𑀯𑀸 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀸𑀲𑀭𑁂𑀦 𑀧𑀮𑀼𑀤𑁆𑀥𑀫𑀢𑁆𑀢𑀯𑀸𑀭𑀡𑀸 𑀯𑀺𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀚𑁆𑀚𑀸𑀦𑀺 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀏𑀯𑀭𑀽𑀧𑁄 𑀲𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄’’𑀢𑀺 𑀢𑀲𑁆𑀲 𑀕𑀼𑀡𑀁 𑀯𑀡𑁆𑀡𑁂𑀲𑀺. 𑀲𑀸 𑀯𑀺𑀥𑀼𑀭𑀧𑀡𑁆𑀟𑀺𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑀸𑀳𑀁 𑀯𑀓𑁆𑀔𑀸𑀫𑀺 ‘𑀤𑁂𑀯, 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑀸, 𑀇𑀥 𑀦𑀁 𑀆𑀦𑁂𑀳𑀻’𑀢𑀺, 𑀦 𑀫𑁂𑀢𑀁 𑀆𑀦𑁂𑀲𑁆𑀲𑀢𑀺. 𑀬𑀁𑀦𑀽𑀦𑀸𑀳𑀁 ‘𑀢𑀲𑁆𑀲 𑀫𑁂 𑀳𑀤𑀬𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀕𑀺𑀮𑀸𑀦𑀸𑀮𑀬𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀲𑀸 𑀢𑀣𑀸 𑀓𑀢𑁆𑀯𑀸 𑀲𑀺𑀭𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀺. 𑀦𑀸𑀕𑀭𑀸𑀚𑀸 𑀉𑀧𑀝𑁆𑀞𑀸𑀦𑀯𑁂𑀮𑀸𑀬 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀯𑀺𑀫𑀮𑀸’’𑀢𑀺 𑀧𑀭𑀺𑀘𑀸𑀭𑀺𑀓𑀸𑀬𑁄 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀺𑀮𑀸𑀦𑀸, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀉𑀝𑁆𑀞𑀸𑀬𑀸𑀲𑀦𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀬𑀦𑀧𑀲𑁆𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀭𑀻𑀭𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁪𑁬.

‘‘𑀧𑀡𑁆𑀟𑀼 𑀓𑀺𑀲𑀺𑀬𑀸𑀲𑀺 𑀤𑀼𑀩𑁆𑀩𑀮𑀸, 𑀯𑀡𑁆𑀡𑀭𑀽𑀧𑀁 𑀦 𑀢𑀯𑁂𑀤𑀺𑀲𑀁 𑀧𑀼𑀭𑁂;

𑀯𑀺𑀫𑀮𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸, 𑀓𑀻𑀤𑀺𑀲𑀻 𑀢𑀼𑀬𑁆𑀳𑀁 𑀲𑀭𑀻𑀭𑀯𑁂𑀤𑀦𑀸’’𑀢𑀺.

𑀢𑀢𑁆𑀣 𑀧𑀡𑁆𑀟𑀽𑀢𑀺 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀸. 𑀓𑀺𑀲𑀺𑀬𑀸𑀢𑀺 𑀓𑀺𑀲𑀸. 𑀤𑀼𑀩𑁆𑀩𑀮𑀸𑀢𑀺 𑀅𑀧𑁆𑀧𑀣𑀸𑀫𑀸. 𑀯𑀡𑁆𑀡𑀭𑀽𑀧𑀁 𑀦 𑀢𑀯𑁂𑀤𑀺𑀲𑀁 𑀧𑀼𑀭𑁂𑀢𑀺 𑀢𑀯 𑀯𑀡𑁆𑀡𑀲𑀗𑁆𑀔𑀸𑀢𑀁 𑀭𑀽𑀧𑀁 𑀧𑀼𑀭𑁂 𑀏𑀤𑀺𑀲𑀁 𑀦 𑀳𑁄𑀢𑀺, 𑀦𑀺𑀤𑁆𑀤𑁄𑀲𑀁 𑀅𑀦𑀯𑀚𑁆𑀚𑀁, 𑀢𑀁 𑀇𑀤𑀸𑀦𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀫𑀦𑀼𑀜𑁆𑀜𑀲𑀪𑀸𑀯𑀁 𑀚𑀸𑀢𑀁. 𑀯𑀺𑀫𑀮𑁂𑀢𑀺 𑀢𑀁 𑀆𑀮𑀧𑀢𑀺.

𑀅𑀣𑀲𑁆𑀲 ¶ 𑀲𑀸 𑀆𑀘𑀺𑀓𑁆𑀔𑀦𑁆𑀢𑀻 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁪𑁭.

‘‘𑀥𑀫𑁆𑀫𑁄 ¶ 𑀫𑀦𑀼𑀚𑁂𑀲𑀼 𑀫𑀸𑀢𑀻𑀦𑀁, 𑀤𑁄𑀳𑀴𑁄 𑀦𑀸𑀫 𑀚𑀦𑀺𑀦𑁆𑀤 𑀯𑀼𑀘𑁆𑀘𑀢𑀺;

𑀥𑀫𑁆𑀫𑀸𑀳𑀝𑀁 𑀦𑀸𑀕𑀓𑀼𑀜𑁆𑀚𑀭, 𑀯𑀺𑀥𑀼𑀭𑀲𑁆𑀲 𑀳𑀤𑀬𑀸𑀪𑀺𑀧𑀢𑁆𑀣𑀬𑁂’’𑀢𑀺.

𑀢𑀢𑁆𑀣 ¶ 𑀥𑀫𑁆𑀫𑁄𑀢𑀺 𑀲𑀪𑀸𑀯𑁄. 𑀫𑀸𑀢𑀻𑀦𑀦𑁆𑀢𑀺 𑀇𑀢𑁆𑀣𑀻𑀦𑀁. 𑀚𑀦𑀺𑀦𑁆𑀤𑀸𑀢𑀺 𑀦𑀸𑀕𑀚𑀦𑀲𑁆𑀲 𑀇𑀦𑁆𑀤. 𑀥𑀫𑁆𑀫𑀸𑀳𑀝𑀁 𑀦𑀸𑀕𑀓𑀼𑀜𑁆𑀚𑀭, 𑀯𑀺𑀥𑀼𑀭𑀲𑁆𑀲 𑀳𑀤𑀬𑀸𑀪𑀺𑀧𑀢𑁆𑀣𑀬𑁂𑀢𑀺 𑀦𑀸𑀕𑀲𑁂𑀝𑁆𑀞, 𑀅𑀳𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀲𑀸𑀳𑀲𑀺𑀓𑀓𑀫𑁆𑀫𑁂𑀦 𑀆𑀳𑀝𑀁 𑀯𑀺𑀥𑀼𑀭𑀲𑁆𑀲 𑀳𑀤𑀬𑀁 𑀅𑀪𑀺𑀧𑀢𑁆𑀣𑀬𑀸𑀫𑀺, 𑀢𑀁 𑀫𑁂 𑀮𑀪𑀫𑀸𑀦𑀸𑀬 𑀚𑀻𑀯𑀺𑀢𑀁 𑀅𑀢𑁆𑀣𑀺, 𑀅𑀮𑀪𑀫𑀸𑀦𑀸𑀬 𑀇𑀥𑁂𑀯 𑀫𑀭𑀡𑀦𑁆𑀢𑀺 𑀢𑀲𑁆𑀲 𑀧𑀜𑁆𑀜𑀁 𑀲𑀦𑁆𑀥𑀸𑀬𑁂𑀯𑀫𑀸𑀳 𑁋

𑀢𑀁 𑀲𑀼𑀢𑁆𑀯𑀸 𑀦𑀸𑀕𑀭𑀸𑀚𑀸 𑀢𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁩𑁪𑁮.

‘‘𑀘𑀦𑁆𑀤𑀁 𑀔𑁄 𑀢𑁆𑀯𑀁 𑀤𑁄𑀳𑀴𑀸𑀬𑀲𑀺, 𑀲𑀽𑀭𑀺𑀬𑀁 𑀯𑀸 𑀅𑀣 𑀯𑀸𑀧𑀺 𑀫𑀸𑀮𑀼𑀢𑀁;

𑀤𑀼𑀮𑁆𑀮𑀪𑀜𑁆𑀳𑀺 𑀯𑀺𑀥𑀼𑀭𑀲𑁆𑀲 𑀤𑀲𑁆𑀲𑀦𑀁, 𑀓𑁄 𑀯𑀺𑀥𑀼𑀭𑀫𑀺𑀥 𑀫𑀸𑀦𑀬𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀤𑀼𑀮𑁆𑀮𑀪𑀜𑁆𑀳𑀺 𑀯𑀺𑀥𑀼𑀭𑀲𑁆𑀲 𑀤𑀲𑁆𑀲𑀦𑀦𑁆𑀢𑀺 𑀅𑀲𑀫𑀥𑀼𑀭𑀲𑁆𑀲 𑀯𑀺𑀥𑀼𑀭𑀲𑁆𑀲 𑀤𑀲𑁆𑀲𑀦𑀫𑁂𑀯 𑀤𑀼𑀮𑁆𑀮𑀪𑀁. 𑀢𑀲𑁆𑀲 𑀳𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀧𑀲𑁆𑀲𑀺𑀢𑀼𑀫𑁆𑀧𑀺 𑀦𑀁 𑀓𑁄𑀘𑀺 𑀦 𑀮𑀪𑀢𑀺, 𑀢𑀁 𑀓𑁄 𑀇𑀥 𑀆𑀦𑀬𑀺𑀲𑁆𑀲𑀢𑀻𑀢𑀺 𑀯𑀤𑀢𑀺.

𑀲𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀮𑀪𑀫𑀸𑀦𑀸𑀬 𑀫𑁂 𑀇𑀥𑁂𑀯 𑀫𑀭𑀡’’𑀦𑁆𑀢𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀲𑀸𑀴𑀓𑀓𑀡𑁆𑀡𑁂𑀦 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀦𑀸𑀕𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄 ‘‘𑀯𑀺𑀫𑀮𑀸 𑀯𑀺𑀥𑀼𑀭𑀧𑀡𑁆𑀟𑀺𑀢𑀲𑁆𑀲 𑀳𑀤𑀬𑀫𑀁𑀲𑀁 𑀆𑀳𑀭𑀸𑀧𑁂𑀢𑀻’’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 ‘‘𑀧𑀡𑁆𑀟𑀺𑀢𑀲𑁆𑀲 𑀳𑀤𑀬𑀁 𑀅𑀮𑀪𑀦𑁆𑀢𑀺𑀬𑀸 𑀯𑀺𑀫𑀮𑀸𑀬 𑀚𑀻𑀯𑀺𑀢𑀁 𑀦𑀢𑁆𑀣𑀺, 𑀓𑀣𑀁 𑀦𑀼 𑀔𑁄 𑀢𑀲𑁆𑀲 𑀳𑀤𑀬𑀫𑀁𑀲𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀥𑀻𑀢𑀸 𑀇𑀭𑀦𑁆𑀥𑀢𑀻 𑀦𑀸𑀫 𑀦𑀸𑀕𑀓𑀜𑁆𑀜𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀯𑀺𑀮𑀸𑀲𑁂𑀦 𑀧𑀺𑀢𑀼 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸, 𑀲𑀸 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀅𑀢𑀺𑀯𑀺𑀬 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀻 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁪𑁯.

‘‘𑀓𑀺𑀁 ¶ 𑀦𑀼 𑀢𑀸𑀢 𑀢𑀼𑀯𑀁 𑀧𑀚𑁆𑀛𑀸𑀬𑀲𑀺, 𑀧𑀤𑀼𑀫𑀁 𑀳𑀢𑁆𑀣𑀕𑀢𑀁𑀯 𑀢𑁂 𑀫𑀼𑀔𑀁;

𑀓𑀺𑀁 𑀦𑀼 𑀤𑀼𑀫𑁆𑀫𑀦𑀭𑀽𑀧𑁄𑀲𑀺 ¶ 𑀇𑀲𑁆𑀲𑀭, 𑀫𑀸 𑀢𑁆𑀯𑀁 𑀲𑁄𑀘𑀺 𑀅𑀫𑀺𑀢𑁆𑀢𑀢𑀸𑀧𑀦𑀸’’𑀢𑀺.

𑀢𑀢𑁆𑀣 𑀧𑀚𑁆𑀛𑀸𑀬𑀲𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀲𑀺. 𑀳𑀢𑁆𑀣𑀕𑀢𑀦𑁆𑀢𑀺 𑀳𑀢𑁆𑀣𑁂𑀦 𑀧𑀭𑀺𑀫𑀤𑁆𑀤𑀺𑀢𑀁 𑀧𑀤𑀼𑀫𑀁 𑀯𑀺𑀬 𑀢𑁂 𑀫𑀼𑀔𑀁 𑀚𑀸𑀢𑀁. 𑀇𑀲𑁆𑀲𑀭𑀸𑀢𑀺 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀲𑁆𑀲 𑀫𑀦𑁆𑀤𑀺𑀭𑀦𑀸𑀕𑀪𑀯𑀦𑀲𑁆𑀲, 𑀲𑀸𑀫𑀻𑀢𑀺.

𑀥𑀻𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀸𑀕𑀭𑀸𑀚𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀦𑁆𑀢𑁄 𑀆𑀳 𑁋

𑁧𑁩𑁫𑁦.

‘‘𑀫𑀸𑀢𑀸 ¶ 𑀳𑀺 𑀢𑀯 𑀇𑀭𑀦𑁆𑀥𑀢𑀺, 𑀯𑀺𑀥𑀼𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑀢𑀺;

𑀤𑀼𑀮𑁆𑀮𑀪𑀜𑁆𑀳𑀺 𑀯𑀺𑀥𑀼𑀭𑀲𑁆𑀲 𑀤𑀲𑁆𑀲𑀦𑀁, 𑀓𑁄 𑀯𑀺𑀥𑀼𑀭𑀫𑀺𑀥 𑀫𑀸𑀦𑀬𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀥𑀦𑀺𑀬𑀢𑀻𑀢𑀺 𑀧𑀢𑁆𑀣𑁂𑀢𑀺 𑀇𑀘𑁆𑀙𑀢𑀺.

𑀅𑀣 𑀦𑀁 𑀦𑀸𑀕𑀭𑀸𑀚𑀸 ‘‘𑀅𑀫𑁆𑀫, 𑀫𑀫 𑀲𑀦𑁆𑀢𑀺𑀓𑁂 𑀯𑀺𑀥𑀼𑀭𑀁 𑀆𑀦𑁂𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺, 𑀢𑁆𑀯𑀁 𑀫𑀸𑀢𑀼 𑀚𑀻𑀯𑀺𑀢𑀁 𑀤𑁂𑀳𑀺, 𑀯𑀺𑀥𑀼𑀭𑀁 𑀆𑀦𑁂𑀢𑀼𑀁 𑀲𑀫𑀢𑁆𑀣𑀁 𑀪𑀢𑁆𑀢𑀸𑀭𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀦𑁆𑀢𑁄 𑀉𑀧𑀟𑁆𑀠𑀕𑀸𑀣𑀫𑀸𑀳 𑁋

𑁧𑁩𑁫𑁧.

‘‘𑀢𑀲𑁆𑀲 𑀪𑀢𑁆𑀢𑀼𑀧𑀭𑀺𑀬𑁂𑀲𑀦𑀁 𑀘𑀭, 𑀬𑁄 𑀯𑀺𑀥𑀼𑀭𑀫𑀺𑀥 𑀫𑀸𑀦𑀬𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀘𑀭𑀸𑀢𑀺 𑀯𑀺𑀘𑀭.

𑀇𑀢𑀺 𑀲𑁄 𑀓𑀺𑀮𑁂𑀲𑀸𑀪𑀺𑀭𑀢𑀪𑀸𑀯𑁂𑀦 𑀥𑀻𑀢𑀼 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀣𑀁 𑀓𑀣𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

‘‘𑀧𑀺𑀢𑀼𑀦𑁄 𑀘 𑀲𑀸 𑀲𑀼𑀢𑁆𑀯𑀸𑀦 𑀯𑀸𑀓𑁆𑀬𑀁, 𑀭𑀢𑁆𑀢𑀺𑀁 𑀦𑀺𑀓𑁆𑀔𑀫𑁆𑀫 𑀅𑀯𑀲𑁆𑀲𑀼𑀢𑀺𑀁 𑀘𑀭𑀻’’𑀢𑀺.

𑀢𑀢𑁆𑀣 𑀅𑀯𑀲𑁆𑀲𑀼𑀢𑀺𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀲𑀸 𑀦𑀸𑀕𑀫𑀸𑀡𑀯𑀺𑀓𑀸 𑀧𑀺𑀢𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀺𑀢𑀭𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀅𑀲𑁆𑀲𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀺𑀭𑀺𑀕𑀩𑁆𑀪𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀏𑀓𑀁 𑀓𑀼𑀲𑀼𑀫𑁆𑀪𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀏𑀓𑀁𑀲𑁂 𑀓𑀢𑁆𑀯𑀸 𑀢𑀫𑁂𑀯 𑀭𑀢𑁆𑀢𑀺𑀁 𑀉𑀤𑀓𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀦𑀸𑀕𑀪𑀯𑀦𑀢𑁄 𑀦𑀺𑀓𑁆𑀔𑀫𑁆𑀫 ¶ 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀲𑀫𑀼𑀤𑁆𑀤𑀢𑀻𑀭𑁂 𑀞𑀺𑀢𑀁 𑀲𑀝𑁆𑀞𑀺𑀬𑁄𑀚𑀦𑀼𑀩𑁆𑀩𑁂𑀥𑀁 𑀏𑀓𑀕𑁆𑀖𑀦𑀁 𑀓𑀸𑀴𑀧𑀩𑁆𑀩𑀢𑀁 𑀦𑀸𑀫 𑀅𑀜𑁆𑀚𑀦𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀯𑀲𑁆𑀲𑀼𑀢𑀺𑀁 𑀘𑀭𑀺 𑀓𑀺𑀮𑁂𑀲𑀅𑀯𑀲𑁆𑀲𑀼𑀢𑀺𑀁 𑀪𑀢𑁆𑀢𑀼𑀧𑀭𑀺𑀬𑁂𑀲𑀦𑀁 𑀘𑀭𑀻𑀢𑀺 𑀅𑀢𑁆𑀣𑁄.

𑀘𑀭𑀦𑁆𑀢𑀻 ¶ 𑀘 𑀬𑀸𑀦𑀺 𑀳𑀺𑀫𑀯𑀦𑁆𑀢𑁂 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀢𑀸𑀦𑀺 𑀆𑀳𑀭𑀺𑀢𑁆𑀯𑀸 𑀲𑀓𑀮𑀧𑀩𑁆𑀩𑀢𑀁 𑀫𑀡𑀺𑀅𑀕𑁆𑀖𑀺𑀬𑀁 𑀯𑀺𑀬 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑀮𑁂 𑀧𑀼𑀧𑁆𑀨𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀫𑀦𑁄𑀭𑀫𑁂𑀦𑀸𑀓𑀸𑀭𑁂𑀦 𑀦𑀘𑁆𑀘𑀺𑀢𑁆𑀯𑀸 𑀫𑀥𑀼𑀭𑀕𑀻𑀢𑀁 𑀕𑀸𑀬𑀦𑁆𑀢𑀻 𑀲𑀢𑁆𑀢𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁫𑁨.

‘‘𑀓𑁂 𑀕𑀦𑁆𑀥𑀩𑁆𑀩𑁂 𑀭𑀓𑁆𑀔𑀲𑁂 𑀘 𑀦𑀸𑀕𑁂, 𑀓𑁂 𑀓𑀺𑀫𑁆𑀧𑀼𑀭𑀺𑀲𑁂 𑀘𑀸𑀧𑀺 𑀫𑀸𑀦𑀼𑀲𑁂;

𑀓𑁂 𑀧𑀡𑁆𑀟𑀺𑀢𑁂 𑀲𑀩𑁆𑀩𑀓𑀸𑀫𑀤𑀤𑁂, 𑀤𑀻𑀖𑀭𑀢𑁆𑀢𑀁 𑀪𑀢𑁆𑀢𑀸 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 ¶ 𑀓𑁂 𑀕𑀦𑁆𑀥𑀩𑁆𑀩𑁂 𑀭𑀓𑁆𑀔𑀲𑁂 𑀘 𑀦𑀸𑀕𑁂𑀢𑀺 𑀓𑁄 𑀕𑀦𑁆𑀥𑀩𑁆𑀩𑁄 𑀯𑀸 𑀭𑀓𑁆𑀔𑀲𑁄 𑀯𑀸 𑀦𑀸𑀕𑁄 𑀯𑀸. 𑀓𑁂 𑀧𑀡𑁆𑀟𑀺𑀢𑁂 𑀲𑀩𑁆𑀩𑀓𑀸𑀫𑀤𑀤𑁂𑀢𑀺 𑀓𑁄 𑀏𑀢𑁂𑀲𑀼 𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀧𑀡𑁆𑀟𑀺𑀢𑁄 𑀲𑀩𑁆𑀩𑀓𑀸𑀫𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀯𑀺𑀥𑀼𑀭𑀲𑁆𑀲 𑀳𑀤𑀬𑀫𑀁𑀲𑀤𑁄𑀳𑀴𑀺𑀦𑀺𑀬𑀸 𑀫𑀫 𑀫𑀸𑀢𑀼 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀤𑀻𑀖𑀭𑀢𑁆𑀢𑀁 𑀪𑀢𑁆𑀢𑀸 𑀪𑀯𑀺𑀲𑁆𑀲𑀢𑀻𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀧𑀼𑀡𑁆𑀡𑀓𑁄 𑀦𑀸𑀫 𑀬𑀓𑁆𑀔𑀲𑁂𑀦𑀸𑀧𑀢𑀺 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀫𑀦𑁄𑀫𑀬𑀲𑀺𑀦𑁆𑀥𑀯𑀁 𑀅𑀪𑀺𑀭𑀼𑀬𑁆𑀳 𑀓𑀸𑀴𑀧𑀩𑁆𑀩𑀢𑀫𑀢𑁆𑀣𑀓𑁂𑀦 𑀬𑀓𑁆𑀔𑀲𑀫𑀸𑀕𑀫𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀢𑀸𑀬 𑀕𑀻𑀢𑀲𑀤𑁆𑀤𑀁 𑀅𑀲𑁆𑀲𑁄𑀲𑀺. 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀅𑀦𑀼𑀪𑀽𑀢𑀧𑀼𑀩𑁆𑀩𑀸𑀬 𑀇𑀢𑁆𑀣𑀺𑀬𑀸 𑀕𑀻𑀢𑀲𑀤𑁆𑀤𑁄 𑀢𑀲𑁆𑀲 𑀙𑀯𑀺𑀆𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀲𑁄 𑀢𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀺𑀦𑁆𑀥𑀯𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀯 ‘‘𑀪𑀤𑁆𑀤𑁂, 𑀅𑀳𑀁 𑀫𑀫 𑀧𑀜𑁆𑀜𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀯𑀺𑀥𑀼𑀭𑀲𑁆𑀲 𑀳𑀤𑀬𑀁 𑀆𑀦𑁂𑀢𑀼𑀁 𑀲𑀫𑀢𑁆𑀣𑁄𑀫𑁆𑀳𑀺, 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀻’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑁄 𑀅𑀝𑁆𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁩𑁫𑁩.

‘‘𑀅𑀲𑁆𑀲𑀸𑀲 𑀳𑁂𑀲𑁆𑀲𑀸𑀫𑀺 𑀢𑁂 𑀧𑀢𑀺, 𑀪𑀢𑁆𑀢𑀸 𑀢𑁂 𑀳𑁂𑀲𑁆𑀲𑀸𑀫𑀺 𑀅𑀦𑀺𑀦𑁆𑀤𑀮𑁄𑀘𑀦𑁂;

𑀧𑀜𑁆𑀜𑀸 𑀳𑀺 𑀫𑀫𑀁 𑀢𑀣𑀸𑀯𑀺𑀥𑀸, 𑀅𑀲𑁆𑀲𑀸𑀲 𑀳𑁂𑀲𑁆𑀲𑀲𑀺 𑀪𑀭𑀺𑀬𑀸 𑀫𑀫𑀸’’𑀢𑀺.

𑀢𑀢𑁆𑀣 ¶ 𑀅𑀦𑀺𑀦𑁆𑀤𑀮𑁄𑀘𑀦𑁂𑀢𑀺 𑀅𑀦𑀺𑀦𑁆𑀤𑀺𑀢𑀩𑁆𑀩𑀮𑁄𑀘𑀦𑁂. 𑀢𑀣𑀸𑀯𑀺𑀥𑀸𑀢𑀺 𑀯𑀺𑀥𑀼𑀭𑀲𑁆𑀲 𑀳𑀤𑀬𑀫𑀁𑀲𑀁 𑀆𑀳𑀭𑀡𑀲𑀫𑀢𑁆𑀣𑀸.

𑀅𑀣 𑀦𑀁 𑀇𑀭𑀦𑁆𑀥𑀢𑀻 ‘‘𑀢𑁂𑀦 𑀳𑀺 𑀏𑀳𑀺, 𑀕𑀘𑁆𑀙𑀸𑀫 𑀫𑁂 𑀧𑀺𑀢𑀼 𑀲𑀦𑁆𑀢𑀺𑀓’’𑀦𑁆𑀢𑀺 𑀆𑀦𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁫𑁪.

‘‘𑀅𑀯𑀘𑀸𑀲𑀺 𑀧𑀼𑀡𑁆𑀡𑀓𑀁 𑀇𑀭𑀦𑁆𑀥𑀢𑀻, 𑀧𑀼𑀩𑁆𑀩𑀧𑀣𑀸𑀦𑀼𑀕𑀢𑁂𑀦 𑀘𑁂𑀢𑀲𑀸;

𑀏𑀳𑀺 ¶ 𑀕𑀘𑁆𑀙𑀸𑀫 𑀧𑀺𑀢𑀼 𑀫𑀫𑀦𑁆𑀢𑀺𑀓𑁂, 𑀏𑀲𑁄𑀯 𑀢𑁂 𑀏𑀢𑀫𑀢𑁆𑀣𑀁 𑀧𑀯𑀓𑁆𑀔𑀢𑀻’’𑀢𑀺.

𑀢𑀢𑁆𑀣 𑀧𑀼𑀩𑁆𑀩𑀧𑀣𑀸𑀦𑀼𑀕𑀢𑁂𑀦𑀸𑀢𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀪𑀽𑀢𑀧𑀼𑀩𑁆𑀩𑀲𑀸𑀫𑀺𑀓𑁂 𑀢𑀲𑁆𑀫𑀺𑀁 𑀧𑀼𑀩𑁆𑀩𑀧𑀣𑁂𑀦𑁂𑀯 𑀅𑀦𑀼𑀕𑀢𑁂𑀦. 𑀏𑀳𑀺 𑀕𑀘𑁆𑀙𑀸𑀫𑀸𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀬𑀓𑁆𑀔𑀲𑁂𑀦𑀸𑀧𑀢𑀺 𑀏𑀯𑀁 𑀯𑀢𑁆𑀯𑀸 ‘‘𑀇𑀫𑀁 𑀅𑀲𑁆𑀲𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑀸 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲𑀸 𑀕𑀳𑀡𑀢𑁆𑀣𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀸 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀕𑀡𑁆𑀳𑀺𑀢𑀼𑀁 𑀅𑀤𑀢𑁆𑀯𑀸 𑀢𑁂𑀦 𑀧𑀲𑀸𑀭𑀺𑀢𑀳𑀢𑁆𑀣𑀁 𑀲𑀬𑀁 𑀕𑀳𑁂𑀢𑁆𑀯𑀸 ‘‘𑀲𑀸𑀫𑀺, 𑀦𑀸𑀳𑀁 𑀅𑀦𑀸𑀣𑀸, 𑀫𑀬𑁆𑀳𑀁 𑀧𑀺𑀢𑀸 𑀯𑀭𑀼𑀡𑁄 𑀦𑀸𑀫 𑀦𑀸𑀕𑀭𑀸𑀚𑀸, 𑀫𑀸𑀢𑀸 𑀯𑀺𑀫𑀮𑀸 𑀦𑀸𑀫 𑀤𑁂𑀯𑀻, 𑀏𑀳𑀺 𑀫𑀫 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫, 𑀏𑀲𑁄 𑀏𑀯 𑀢𑁂 𑀬𑀣𑀸 𑀅𑀫𑁆𑀳𑀸𑀓𑀁 𑀫𑀗𑁆𑀕𑀮𑀓𑀺𑀭𑀺𑀬𑀸𑀬 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀏𑀢𑀫𑀢𑁆𑀣𑀁 𑀧𑀯𑀓𑁆𑀔𑀢𑀻’’𑀢𑀺 𑀅𑀯𑀘𑀸𑀲𑀺.

𑀏𑀯𑀁 ¶ 𑀯𑀢𑁆𑀯𑀸 𑀲𑀸 𑀬𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁫𑁫.

‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀬𑀓𑁆𑀔𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀧𑀺𑀢𑀼𑀲𑀦𑁆𑀢𑀺𑀓𑀼𑀧𑀸𑀕𑀫𑀻’’𑀢𑀺.

𑀢𑀢𑁆𑀣 𑀧𑀺𑀢𑀼𑀲𑀦𑁆𑀢𑀺𑀓𑀼𑀧𑀸𑀕𑀫𑀻𑀢𑀺 𑀅𑀢𑁆𑀢𑀦𑁄 𑀧𑀺𑀢𑀼𑀦𑁄 𑀦𑀸𑀕𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀉𑀧𑀸𑀕𑀫𑀺.

𑀧𑀼𑀡𑁆𑀡𑀓𑁄𑀧𑀺 𑀬𑀓𑁆𑀔𑁄 𑀧𑀝𑀺𑀳𑀭𑀺𑀢𑁆𑀯𑀸 𑀦𑀸𑀕𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀭𑀦𑁆𑀥𑀢𑀺𑀁 𑀬𑀸𑀘𑀦𑁆𑀢𑁄 𑀆𑀳 𑁋

𑁧𑁩𑁫𑁬.

‘‘𑀦𑀸𑀕𑀯𑀭 𑀯𑀘𑁄 𑀲𑀼𑀡𑁄𑀳𑀺 𑀫𑁂, 𑀧𑀢𑀺𑀭𑀽𑀧𑀁 𑀧𑀝𑀺𑀧𑀚𑁆𑀚 𑀲𑀼𑀗𑁆𑀓𑀺𑀬𑀁;

𑀧𑀢𑁆𑀣𑁂𑀫𑀺 𑀅𑀳𑀁 𑀇𑀭𑀦𑁆𑀥𑀢𑀺𑀁, 𑀢𑀸𑀬 𑀲𑀫𑀗𑁆𑀕𑀺𑀁 𑀓𑀭𑁄𑀳𑀺 𑀫𑀁 𑀢𑀼𑀯𑀁.

𑁧𑁩𑁫𑁭.

‘‘𑀲𑀢𑀁 ¶ 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀯𑀮𑀪𑀺𑀬𑁄 𑀧𑀼𑀡𑁆𑀡𑀸, 𑀦𑀸𑀦𑀸𑀭𑀢𑁆𑀦𑀲𑁆𑀲 𑀓𑁂𑀯𑀮𑀸;

𑀢𑁂 𑀦𑀸𑀕 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀥𑀻𑀢𑀭𑀁 𑀤𑁂𑀳𑀺𑀭𑀦𑁆𑀥𑀢𑀺’’𑀦𑁆𑀢𑀺.

𑀢𑀢𑁆𑀣 𑀲𑀼𑀗𑁆𑀓𑀺𑀬𑀦𑁆𑀢𑀺 𑀅𑀢𑁆𑀢𑀦𑁄 𑀓𑀼𑀮𑀧𑀤𑁂𑀲𑀸𑀦𑀼𑀭𑀽𑀧𑀁 𑀥𑀺𑀢𑀼 𑀲𑀼𑀗𑁆𑀓𑀁 𑀥𑀦𑀁 𑀧𑀝𑀺𑀧𑀚𑁆𑀚 𑀕𑀡𑁆𑀳. 𑀲𑀫𑀗𑁆𑀕𑀺𑀁 𑀓𑀭𑁄𑀳𑀻𑀢𑀺 𑀫𑀁 𑀢𑀸𑀬 𑀲𑀤𑁆𑀥𑀺𑀁 𑀲𑀫𑀗𑁆𑀕𑀺𑀪𑀽𑀢𑀁 𑀓𑀭𑁄𑀳𑀺. 𑀯𑀮𑀪𑀺𑀬𑁄𑀢𑀺 𑀪𑀡𑁆𑀟𑀲𑀓𑀝𑀺𑀬𑁄. 𑀦𑀸𑀦𑀸𑀭𑀢𑁆𑀦𑀲𑁆𑀲 𑀓𑁂𑀯𑀮𑀸𑀢𑀺 𑀦𑀸𑀦𑀸𑀭𑀢𑀦𑀲𑁆𑀲 𑀲𑀓𑀮𑀧𑀭𑀺𑀧𑀼𑀡𑁆𑀡𑀸.

𑀅𑀣 𑀦𑀁 𑀦𑀸𑀕𑀭𑀸𑀚𑀸 𑀆𑀳 𑁋

𑁧𑁩𑁫𑁮.

‘‘𑀬𑀸𑀯 𑀆𑀫𑀦𑁆𑀢𑀬𑁂 𑀜𑀸𑀢𑀻, 𑀫𑀺𑀢𑁆𑀢𑁂 𑀘 𑀲𑀼𑀳𑀤𑀚𑁆𑀚𑀦𑁂;

𑀅𑀦𑀸𑀫𑀦𑁆𑀢 𑀓𑀢𑀁 𑀓𑀫𑁆𑀫𑀁, 𑀢𑀁 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀬𑀸𑀯 𑀆𑀫𑀦𑁆𑀢𑀬𑁂 𑀜𑀸𑀢𑀻𑀢𑀺 𑀪𑁄 𑀬𑀓𑁆𑀔𑀲𑁂𑀦𑀸𑀧𑀢𑀺, 𑀅𑀳𑀁 𑀢𑀼𑀬𑁆𑀳𑀁 𑀥𑀻𑀢𑀭𑀁 𑀤𑁂𑀫𑀺, 𑀦𑁄 𑀦 𑀤𑁂𑀫𑀺, 𑀣𑁄𑀓𑀁 𑀧𑀦 𑀆𑀕𑀫𑁂𑀳𑀺, 𑀬𑀸𑀯 𑀜𑀸𑀢𑀓𑁂𑀧𑀺 𑀚𑀸𑀦𑀸𑀧𑁂𑀫𑀺. 𑀢𑀁 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀢𑀻𑀢𑀺 𑀇𑀢𑁆𑀣𑀺𑀬𑁄 𑀳𑀺 𑀕𑀢𑀕𑀢𑀝𑁆𑀞𑀸𑀦𑁂 𑀅𑀪𑀺𑀭𑀫𑀦𑁆𑀢𑀺𑀧𑀺 𑀅𑀦𑀪𑀺𑀭𑀫𑀦𑁆𑀢𑀺𑀧𑀺, 𑀅𑀦𑀪𑀺𑀭𑀢𑀺𑀓𑀸𑀮𑁂 𑀜𑀸𑀢𑀓𑀸𑀤𑀬𑁄 𑀅𑀫𑁆𑀳𑁂𑀳𑀺 ¶ 𑀲𑀤𑁆𑀥𑀺𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 ¶ 𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀏𑀯𑀭𑀽𑀧𑀁 𑀳𑁄𑀢𑀻𑀢𑀺 𑀉𑀲𑁆𑀲𑀼𑀓𑁆𑀓𑀁 𑀦 𑀓𑀭𑁄𑀦𑁆𑀢𑀺, 𑀏𑀯𑀁 𑀢𑀁 𑀓𑀫𑁆𑀫𑀁 𑀧𑀘𑁆𑀙𑀸 𑀅𑀦𑀼𑀢𑀸𑀧𑀁 𑀆𑀯𑀳𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀲𑁄 𑀪𑀭𑀺𑀬𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁫𑁯.

‘‘𑀢𑀢𑁄 𑀲𑁄 𑀯𑀭𑀼𑀡𑁄 𑀦𑀸𑀕𑁄, 𑀧𑀯𑀺𑀲𑀺𑀢𑁆𑀯𑀸 𑀦𑀺𑀯𑁂𑀲𑀦𑀁;

𑀪𑀭𑀺𑀬𑀁 𑀆𑀫𑀦𑁆𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁩𑁬𑁦.

‘‘‘𑀅𑀬𑀁 𑀲𑁄 𑀧𑀼𑀡𑁆𑀡𑀓𑁄 𑀬𑀓𑁆𑀔𑁄, 𑀬𑀸𑀘𑀢𑀻 𑀫𑀁 𑀇𑀭𑀦𑁆𑀥𑀢𑀺𑀁;

𑀩𑀳𑀼𑀦𑀸 𑀯𑀺𑀢𑁆𑀢𑀮𑀸𑀪𑁂𑀦, 𑀢𑀲𑁆𑀲 𑀤𑁂𑀫 𑀧𑀺𑀬𑀁 𑀫𑀫’’’𑀦𑁆𑀢𑀺.

𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸𑀢𑀺 𑀯𑀭𑀼𑀡𑁄 𑀧𑀼𑀡𑁆𑀡𑀓𑀁 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 𑀲𑀬𑀁 𑀉𑀝𑁆𑀞𑀸𑀬 𑀬𑀢𑁆𑀣𑀲𑁆𑀲 𑀪𑀭𑀺𑀬𑀸 𑀦𑀺𑀧𑀦𑁆𑀦𑀸, 𑀢𑀁 𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸. 𑀧𑀺𑀬𑀁 𑀫𑀫𑀦𑁆𑀢𑀺 𑀫𑀫 𑀧𑀺𑀬𑀁 𑀥𑀻𑀢𑀭𑀁 𑀢𑀲𑁆𑀲 𑀩𑀳𑀼𑀦𑀸 𑀯𑀺𑀢𑁆𑀢𑀮𑀸𑀪𑁂𑀦 𑀤𑁂𑀫𑀸𑀢𑀺 𑀧𑀼𑀘𑁆𑀙𑀢𑀺.

𑀯𑀺𑀫𑀮𑀸 ¶ 𑀆𑀳 𑁋

𑁧𑁩𑁬𑁧.

‘‘𑀦 𑀥𑀦𑁂𑀦 𑀦 𑀯𑀺𑀢𑁆𑀢𑁂𑀦, 𑀮𑀩𑁆𑀪𑀸 𑀅𑀫𑁆𑀳𑀁 𑀇𑀭𑀦𑁆𑀥𑀢𑀻;

𑀲𑀘𑁂 𑀘 𑀔𑁄 𑀳𑀤𑀬𑀁 𑀧𑀡𑁆𑀟𑀺𑀢𑀲𑁆𑀲, 𑀥𑀫𑁆𑀫𑁂𑀦 𑀮𑀤𑁆𑀥𑀸 𑀇𑀥 𑀫𑀸𑀳𑀭𑁂𑀬𑁆𑀬;

𑀏𑀢𑁂𑀦 𑀯𑀺𑀢𑁆𑀢𑁂𑀦 𑀓𑀼𑀫𑀸𑀭𑀺 𑀮𑀩𑁆𑀪𑀸, 𑀦𑀸𑀜𑁆𑀜𑀁 𑀥𑀦𑀁 𑀉𑀢𑁆𑀢𑀭𑀺 𑀧𑀢𑁆𑀣𑀬𑀸𑀫𑀸’’𑀢𑀺.

𑀢𑀢𑁆𑀣 𑀅𑀫𑁆𑀳𑀁 𑀇𑀭𑀦𑁆𑀥𑀢𑀻𑀢𑀺 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀇𑀭𑀦𑁆𑀥𑀢𑀻. 𑀏𑀢𑁂𑀦 𑀯𑀺𑀢𑁆𑀢𑁂𑀦𑀸𑀢𑀺 𑀏𑀢𑁂𑀦 𑀢𑀼𑀝𑁆𑀞𑀺𑀓𑀸𑀭𑀡𑁂𑀦.

𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑁂𑀯 𑀧𑀼𑀡𑁆𑀡𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁬𑁨.

‘‘𑀢𑀢𑁄 𑀲𑁄 𑀯𑀭𑀼𑀡𑁄 𑀦𑀸𑀕𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀯𑁂𑀲𑀦𑀸;

𑀧𑀼𑀡𑁆𑀡𑀓𑀸𑀫𑀦𑁆𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁩𑁬𑁩.

‘‘‘𑀦 ¶ 𑀥𑀦𑁂𑀦 𑀦 𑀯𑀺𑀢𑁆𑀢𑁂𑀦, 𑀮𑀩𑁆𑀪𑀸 𑀅𑀫𑁆𑀳𑀁 𑀇𑀭𑀦𑁆𑀥𑀢𑀻;

𑀲𑀘𑁂 𑀢𑀼𑀯𑀁 𑀳𑀤𑀬𑀁 𑀧𑀡𑁆𑀟𑀺𑀢𑀲, 𑀥𑀫𑁆𑀫𑁂𑀦 𑀮𑀤𑁆𑀥𑀸 𑀇𑀥 𑀫𑀸𑀳𑀭𑁂𑀲𑀺;

𑀏𑀢𑁂𑀦 𑀯𑀺𑀢𑁆𑀢𑁂𑀦 𑀓𑀼𑀫𑀸𑀭𑀺 𑀮𑀩𑁆𑀪𑀸, 𑀦𑀸𑀜𑁆𑀜𑀁 𑀥𑀦𑀁 𑀉𑀢𑁆𑀢𑀭𑀺 𑀧𑀢𑁆𑀣𑀬𑀸𑀫𑀸’’’𑀢𑀺.

𑀢𑀢𑁆𑀣 𑀧𑀼𑀡𑁆𑀡𑀓𑀸𑀫𑀦𑁆𑀢𑀬𑀺𑀢𑁆𑀯𑀸𑀦𑀸𑀢𑀺 𑀧𑀼𑀡𑁆𑀡𑀓𑀁 𑀆𑀫𑀦𑁆𑀢𑀬𑀺𑀢𑁆𑀯𑀸.

𑀧𑀼𑀡𑁆𑀡𑀓𑁄 𑀆𑀳 𑁋

𑁧𑁩𑁬𑁪.

‘‘𑀬𑀁 𑀧𑀡𑁆𑀟𑀺𑀢𑁄𑀢𑁆𑀬𑁂𑀓𑁂 𑀯𑀤𑀦𑁆𑀢𑀺 𑀮𑁄𑀓𑁂, 𑀢𑀫𑁂𑀯 𑀩𑀸𑀮𑁄𑀢𑀺 𑀧𑀼𑀦𑀸𑀳𑀼 𑀅𑀜𑁆𑀜𑁂;

𑀅𑀓𑁆𑀔𑀸𑀳𑀺 𑀫𑁂 𑀯𑀺𑀧𑁆𑀧𑀯𑀤𑀦𑁆𑀢𑀺 𑀏𑀢𑁆𑀣, 𑀓𑀁 𑀧𑀡𑁆𑀟𑀺𑀢𑀁 𑀦𑀸𑀕 𑀢𑀼𑀯𑀁 𑀯𑀤𑁂𑀲𑀻’’𑀢𑀺.

𑀢𑀢𑁆𑀣 𑀬𑀁 ¶ 𑀧𑀡𑁆𑀟𑀺𑀢𑁄𑀢𑁆𑀬𑁂𑀓𑁂𑀢𑀺 𑀲𑁄 𑀓𑀺𑀭 ‘‘𑀳𑀤𑀬𑀁 𑀧𑀡𑁆𑀟𑀺𑀢𑀲𑁆𑀲𑀸’’𑀢𑀺 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀬𑀁 𑀏𑀓𑁂 𑀧𑀡𑁆𑀟𑀺𑀢𑁄𑀢𑀺 𑀯𑀤𑀦𑁆𑀢𑀺, 𑀢𑀫𑁂𑀯 𑀅𑀜𑁆𑀜𑁂 𑀩𑀸𑀮𑁄𑀢𑀺 𑀓𑀣𑁂𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀫𑁂 𑀇𑀭𑀦𑁆𑀥𑀢𑀺𑀬𑀸 𑀯𑀺𑀥𑀼𑀭𑁄𑀢𑀺 𑀅𑀓𑁆𑀔𑀸𑀢𑀁, 𑀢𑀣𑀸𑀧𑀺 𑀢𑀣𑀢𑁄 𑀚𑀸𑀦𑀺𑀢𑀼𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀦𑀸𑀕𑀭𑀸𑀚𑀸 ¶ 𑀆𑀳 𑁋

𑁧𑁩𑁬𑁫.

‘‘𑀓𑁄𑀭𑀩𑁆𑀬𑀭𑀸𑀚𑀲𑁆𑀲 𑀥𑀦𑀜𑁆𑀘𑀬𑀲𑁆𑀲, 𑀬𑀤𑀺 𑀢𑁂 𑀲𑀼𑀢𑁄 𑀯𑀺𑀥𑀼𑀭𑁄 𑀦𑀸𑀫 𑀓𑀢𑁆𑀢𑀸;

𑀆𑀦𑁂𑀳𑀺 𑀢𑀁 𑀧𑀡𑁆𑀟𑀺𑀢𑀁 𑀥𑀫𑁆𑀫𑀮𑀤𑁆𑀥𑀸, 𑀇𑀭𑀦𑁆𑀥𑀢𑀻 𑀧𑀤𑀘𑀭𑀸 𑀢𑁂 𑀳𑁄𑀢𑀽’’𑀢𑀺.

𑀢𑀢𑁆𑀣 𑀥𑀫𑁆𑀫𑀮𑀤𑁆𑀥𑀸𑀢𑀺 𑀥𑀫𑁆𑀫𑁂𑀦 𑀮𑀪𑀺𑀢𑁆𑀯𑀸. 𑀧𑀤𑀘𑀭𑀸𑀢𑀺 𑀧𑀸𑀤𑀧𑀭𑀺𑀘𑀸𑀭𑀺𑀓𑀸.

𑀢𑀁 𑀲𑀼𑀢𑁆𑀯𑀸 𑀧𑀼𑀡𑁆𑀡𑀓𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀲𑀺𑀦𑁆𑀥𑀯𑀁 𑀦𑀬𑀦𑀢𑁆𑀣𑀸𑀬 𑀉𑀧𑀝𑁆𑀞𑀸𑀓𑀁 𑀆𑀡𑀸𑀧𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁬𑁬.

‘‘𑀇𑀤𑀜𑁆𑀘 𑀲𑀼𑀢𑁆𑀯𑀸 𑀯𑀭𑀼𑀡𑀲𑁆𑀲 𑀯𑀸𑀓𑁆𑀬𑀁, 𑀉𑀝𑁆𑀞𑀸𑀬 𑀬𑀓𑁆𑀔𑁄 𑀧𑀭𑀫𑀧𑁆𑀧𑀢𑀻𑀢𑁄;

𑀢𑀢𑁆𑀣𑁂𑀯 𑀲𑀦𑁆𑀢𑁄 𑀧𑀼𑀭𑀺𑀲𑀁 𑀅𑀲𑀁𑀲𑀺, 𑀆𑀦𑁂𑀳𑀺 𑀆𑀚𑀜𑁆𑀜𑀫𑀺𑀥𑁂𑀯 𑀬𑀼𑀢𑁆𑀢’’𑀦𑁆𑀢𑀺.

𑀢𑀢𑁆𑀣 𑀧𑀼𑀭𑀺𑀲𑀁 𑀅𑀲𑀁𑀲𑀻𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀁 𑀆𑀡𑀸𑀧𑁂𑀲𑀺. 𑀆𑀚𑀜𑁆𑀜𑀦𑁆𑀢𑀺 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑀓𑀲𑀺𑀦𑁆𑀥𑀯𑀁. 𑀬𑀼𑀢𑁆𑀢𑀦𑁆𑀢𑀺 𑀓𑀧𑁆𑀧𑀺𑀢𑀁.

𑁧𑁩𑁬𑁭.

‘‘𑀚𑀸𑀢𑀭𑀽𑀧𑀫𑀬𑀸 ¶ 𑀓𑀡𑁆𑀡𑀸, 𑀓𑀸𑀘𑀫𑁆𑀳𑀺𑀘𑀫𑀬𑀸 𑀔𑀼𑀭𑀸;

𑀚𑀫𑁆𑀩𑁄𑀦𑀤𑀲𑁆𑀲 𑀧𑀸𑀓𑀲𑁆𑀲, 𑀲𑀼𑀯𑀡𑁆𑀡𑀲𑁆𑀲 𑀉𑀭𑀘𑁆𑀙𑀤𑁄’’𑀢𑀺.

𑀢𑀢𑁆𑀣 𑀚𑀸𑀢𑀭𑀽𑀧𑀫𑀬𑀸 𑀓𑀡𑁆𑀡𑀸𑀢𑀺 𑀢𑀫𑁂𑀯 𑀲𑀺𑀦𑁆𑀥𑀯𑀁 𑀯𑀡𑁆𑀡𑁂𑀦𑁆𑀢𑁄 𑀆𑀳. 𑀢𑀲𑁆𑀲 𑀳𑀺 𑀫𑀦𑁄𑀫𑀬𑀲𑁆𑀲 𑀲𑀺𑀦𑁆𑀥𑀯𑀲𑁆𑀲 𑀚𑀸𑀢𑀭𑀽𑀧𑀫𑀬𑀸 𑀓𑀡𑁆𑀡𑀸, 𑀓𑀸𑀘𑀫𑁆𑀳𑀺𑀘𑀫𑀬𑀸 𑀔𑀼𑀭𑀸, 𑀢𑀲𑁆𑀲 𑀔𑀼𑀭𑀸 𑀭𑀢𑁆𑀢𑀫𑀡𑀺𑀫𑀬𑀸𑀢𑀺 𑀅𑀢𑁆𑀣𑁄. 𑀚𑀫𑁆𑀩𑁄𑀦𑀤𑀲𑁆𑀲 𑀧𑀸𑀓𑀲𑁆𑀲𑀸𑀢𑀺 𑀚𑀫𑁆𑀩𑁄𑀦𑀤𑀲𑁆𑀲 𑀧𑀓𑁆𑀓𑀲𑁆𑀲 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲 𑀉𑀭𑀘𑁆𑀙𑀤𑁄.

𑀲𑁄 𑀧𑀼𑀭𑀺𑀲𑁄 𑀢𑀸𑀯𑀤𑁂𑀯 𑀢𑀁 𑀲𑀺𑀦𑁆𑀥𑀯𑀁 𑀆𑀦𑁂𑀲𑀺. 𑀧𑀼𑀡𑁆𑀡𑀓𑁄 𑀢𑀁 𑀅𑀪𑀺𑀭𑀼𑀬𑁆𑀳 𑀆𑀓𑀸𑀲𑁂𑀦 𑀯𑁂𑀲𑁆𑀲𑀯𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀸𑀕𑀪𑀯𑀦𑀁 𑀯𑀡𑁆𑀡𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀇𑀤𑀁 𑀯𑀼𑀢𑁆𑀢𑀁 𑁋

𑁧𑁩𑁬𑁮.

‘‘𑀤𑁂𑀯𑀯𑀸𑀳𑀯𑀳𑀁 𑀬𑀸𑀦𑀁, 𑀅𑀲𑁆𑀲𑀫𑀸𑀭𑀼𑀬𑁆𑀳 𑀧𑀼𑀡𑁆𑀡𑀓𑁄;

𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼, 𑀧𑀓𑁆𑀓𑀸𑀫𑀺 𑀯𑁂𑀳𑀸𑀬𑀲𑀫𑀦𑁆𑀢𑀮𑀺𑀓𑁆𑀔𑁂.

𑁧𑁩𑁬𑁯.

‘‘𑀲𑁄 ¶ 𑀧𑀼𑀡𑁆𑀡𑀓𑁄 𑀓𑀸𑀫𑀭𑀸𑀕𑁂𑀦 𑀕𑀺𑀤𑁆𑀥𑁄, 𑀇𑀭𑀦𑁆𑀥𑀢𑀺𑀁 𑀦𑀸𑀕𑀓𑀜𑁆𑀜𑀁 𑀚𑀺𑀕𑀻𑀲𑀁;

𑀕𑀦𑁆𑀢𑁆𑀯𑀸𑀦 ¶ 𑀢𑀁 𑀪𑀽𑀢𑀧𑀢𑀺𑀁 𑀬𑀲𑀲𑁆𑀲𑀺𑀁, 𑀇𑀘𑁆𑀘𑀩𑁆𑀭𑀯𑀻 𑀯𑁂𑀲𑁆𑀲𑀯𑀡𑀁 𑀓𑀼𑀯𑁂𑀭𑀁.

𑁧𑁩𑁭𑁦.

‘‘𑀪𑁄𑀕𑀯𑀢𑀻 𑀦𑀸𑀫 𑀫𑀦𑁆𑀤𑀺𑀭𑁂, 𑀯𑀸𑀲𑀸 𑀳𑀺𑀭𑀜𑁆𑀜𑀯𑀢𑀻𑀢𑀺 𑀯𑀼𑀘𑁆𑀘𑀢𑀺;

𑀦𑀕𑀭𑁂 𑀦𑀺𑀫𑁆𑀫𑀺𑀢𑁂 𑀓𑀜𑁆𑀘𑀦𑀫𑀬𑁂, 𑀫𑀡𑁆𑀟𑀮𑀲𑁆𑀲 𑀉𑀭𑀕𑀲𑁆𑀲 𑀦𑀺𑀝𑁆𑀞𑀺𑀢𑀁.

𑁧𑁩𑁭𑁧.

‘‘𑀅𑀝𑁆𑀝𑀸𑀮𑀓𑀸 𑀑𑀝𑁆𑀞𑀕𑀻𑀯𑀺𑀬𑁄, 𑀮𑁄𑀳𑀺𑀢𑀗𑁆𑀓𑀲𑁆𑀲 𑀫𑀲𑀸𑀭𑀕𑀮𑁆𑀮𑀺𑀦𑁄;

𑀧𑀸𑀲𑀸𑀤𑁂𑀢𑁆𑀣 𑀲𑀺𑀮𑀸𑀫𑀬𑀸, 𑀲𑁄𑀯𑀡𑁆𑀡𑀭𑀢𑀦𑁂𑀳𑀺 𑀙𑀸𑀤𑀺𑀢𑀸.

𑁧𑁩𑁭𑁨.

‘‘𑀅𑀫𑁆𑀩𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀲𑀢𑁆𑀢𑀧𑀡𑁆𑀡𑀸 𑀫𑀼𑀘𑀮𑀺𑀦𑁆𑀤𑀓𑁂𑀢𑀓𑀸;

𑀧𑀺𑀬𑀗𑁆𑀕𑀼 𑀉𑀤𑁆𑀤𑀸𑀮𑀓𑀸 𑀲𑀳𑀸, 𑀉𑀧𑀭𑀺𑀪𑀤𑁆𑀤𑀓𑀸 𑀲𑀺𑀦𑁆𑀤𑀼𑀯𑀸𑀭𑀓𑀸.

𑁧𑁩𑁭𑁩.

‘‘𑀘𑀫𑁆𑀧𑁂𑀬𑁆𑀬𑀓𑀸 𑀦𑀸𑀕𑀫𑀮𑁆𑀮𑀺𑀓𑀸, 𑀪𑀕𑀺𑀦𑀻𑀫𑀸𑀮𑀸 𑀅𑀣 𑀫𑁂𑀢𑁆𑀣 𑀓𑁄𑀮𑀺𑀬𑀸;

𑀏𑀢𑁂 𑀤𑀼𑀫𑀸 𑀧𑀭𑀺𑀡𑀸𑀫𑀺𑀢𑀸, 𑀲𑁄𑀪𑀬𑀦𑁆𑀢𑀺 𑀉𑀭𑀕𑀲𑁆𑀲 𑀫𑀦𑁆𑀤𑀺𑀭𑀁.

𑁧𑁩𑁭𑁪.

‘‘𑀔𑀚𑁆𑀚𑀼𑀭𑁂𑀢𑁆𑀣 ¶ 𑀲𑀺𑀮𑀸𑀫𑀬𑀸, 𑀲𑁄𑀯𑀡𑁆𑀡𑀥𑀼𑀯𑀧𑀼𑀧𑁆𑀨𑀺𑀢𑀸 𑀩𑀳𑀽;

𑀬𑀢𑁆𑀣 𑀯𑀲𑀢𑁄𑀧𑀧𑀸𑀢𑀺𑀓𑁄, 𑀦𑀸𑀕𑀭𑀸𑀚𑀸 𑀯𑀭𑀼𑀡𑁄 𑀫𑀳𑀺𑀤𑁆𑀥𑀺𑀓𑁄.

𑁧𑁩𑁭𑁫.

‘‘𑀢𑀲𑁆𑀲 𑀓𑁄𑀫𑀸𑀭𑀺𑀓𑀸 𑀪𑀭𑀺𑀬𑀸, 𑀯𑀺𑀫𑀮𑀸 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑀸;

𑀓𑀸𑀮𑀸 𑀢𑀭𑀼𑀡𑀸𑀯 𑀉𑀕𑁆𑀕𑀢𑀸, 𑀧𑀼𑀘𑀺𑀫𑀦𑁆𑀤𑀢𑁆𑀣𑀦𑀻 𑀘𑀸𑀭𑀼𑀤𑀲𑁆𑀲𑀦𑀸.

𑁧𑁩𑁭𑁬.

‘‘𑀮𑀸𑀔𑀸𑀭𑀲𑀭𑀢𑁆𑀢𑀲𑀼𑀘𑁆𑀙𑀯𑀻 ¶ , 𑀓𑀡𑀺𑀓𑀸𑀭𑀸𑀯 𑀦𑀺𑀯𑀸𑀢𑀧𑀼𑀧𑁆𑀨𑀺𑀢𑀸;

𑀢𑀺𑀤𑀺𑀯𑁄𑀓𑀘𑀭𑀸𑀯 𑀅𑀘𑁆𑀙𑀭𑀸, 𑀯𑀺𑀚𑁆𑀚𑀼𑀯𑀩𑁆𑀪𑀖𑀦𑀸 𑀯𑀺𑀦𑀺𑀲𑁆𑀲𑀝𑀸.

𑁧𑁩𑁭𑁭.

‘‘𑀲𑀸 ¶ 𑀤𑁄𑀳𑀴𑀺𑀦𑀻 𑀲𑀼𑀯𑀺𑀫𑁆𑀳𑀺𑀢𑀸, 𑀯𑀺𑀥𑀼𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑀢𑀺;

𑀢𑀁 𑀢𑁂𑀲𑀁 𑀤𑁂𑀫𑀺 𑀇𑀲𑁆𑀲𑀭, 𑀢𑁂𑀦 𑀢𑁂 𑀤𑁂𑀦𑁆𑀢𑀺 𑀇𑀭𑀦𑁆𑀥𑀢𑀺𑀁 𑀫𑀫’’𑀦𑁆𑀢𑀺.

𑀢𑀢𑁆𑀣 𑀤𑁂𑀯𑀯𑀸𑀳𑀯𑀳𑀁 𑀬𑀸𑀦𑀦𑁆𑀢𑀺 𑀯𑀳𑀺𑀢𑀩𑁆𑀩𑁄𑀢𑀺 𑀯𑀸𑀳𑁄, 𑀤𑁂𑀯𑀲𑀗𑁆𑀔𑀸𑀢𑀁 𑀯𑀸𑀳𑀁 𑀯𑀳𑀢𑀻𑀢𑀺 𑀤𑁂𑀯𑀯𑀸𑀳𑀯𑀳𑀁. 𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀬𑀸𑀦𑀁. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀫𑀡𑁆𑀟𑀦𑀯𑀲𑁂𑀦 𑀲𑀼𑀲𑀁𑀯𑀺𑀳𑀺𑀢𑀓𑁂𑀲𑀫𑀲𑁆𑀲𑀼. 𑀤𑁂𑀯𑀸𑀦𑀁 𑀧𑀦 𑀓𑁂𑀲𑀫𑀲𑁆𑀲𑀼𑀓𑀭𑀡𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀯𑀺𑀘𑀺𑀢𑁆𑀢𑀓𑀣𑀺𑀓𑁂𑀦 𑀧𑀦 𑀓𑀣𑀺𑀢𑀁. 𑀚𑀺𑀕𑀻𑀲𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑁄. 𑀯𑁂𑀲𑁆𑀲𑀯𑀡𑀦𑁆𑀢𑀺 𑀯𑀺𑀲𑀸𑀡𑀸𑀬 𑀭𑀸𑀚𑀥𑀸𑀦𑀺𑀬𑀸 𑀇𑀲𑁆𑀲𑀭𑀭𑀸𑀚𑀸𑀦𑀁. 𑀓𑀼𑀯𑁂𑀭𑀦𑁆𑀢𑀺 𑀏𑀯𑀁𑀦𑀸𑀫𑀓𑀁. 𑀪𑁄𑀕𑀯𑀢𑀻 𑀦𑀸𑀫𑀸𑀢𑀺 𑀲𑀫𑁆𑀧𑀦𑁆𑀦𑀪𑁄𑀕𑀢𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑀁. 𑀫𑀦𑁆𑀤𑀺𑀭𑁂𑀢𑀺 𑀫𑀦𑁆𑀤𑀺𑀭𑀁, 𑀪𑀯𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀸𑀲𑀸 𑀳𑀺𑀭𑀜𑁆𑀜𑀯𑀢𑀻𑀢𑀺 𑀦𑀸𑀕𑀭𑀸𑀚𑀲𑁆𑀲 𑀯𑀲𑀦𑀝𑁆𑀞𑀸𑀦𑀢𑁆𑀢𑀸 𑀯𑀸𑀲𑀸𑀢𑀺 𑀘, 𑀓𑀜𑁆𑀘𑀦𑀯𑀢𑀺𑀬𑀸 𑀲𑀼𑀯𑀡𑁆𑀡𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀳𑀺𑀭𑀜𑁆𑀜𑀯𑀢𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀕𑀭𑁂 𑀦𑀺𑀫𑁆𑀫𑀺𑀢𑁂𑀢𑀺 𑀦𑀕𑀭𑀁 𑀦𑀺𑀫𑁆𑀫𑀺𑀢𑀁. 𑀓𑀜𑁆𑀘𑀦𑀫𑀬𑁂𑀢𑀺 𑀲𑀼𑀯𑀡𑁆𑀡𑀫𑀬𑀁. 𑀫𑀡𑁆𑀟𑀮𑀲𑁆𑀲𑀸𑀢𑀺 𑀪𑁄𑀕𑀫𑀡𑁆𑀟𑀮𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀦𑀺𑀝𑁆𑀞𑀺𑀢𑀦𑁆𑀢𑀺 𑀓𑀭𑀡𑀧𑀭𑀺𑀦𑀺𑀝𑁆𑀞𑀺𑀢𑀁. 𑀑𑀝𑁆𑀞𑀕𑀻𑀯𑀺𑀬𑁄𑀢𑀺 𑀑𑀝𑁆𑀞𑀕𑀻𑀯𑀸𑀲𑀡𑁆𑀞𑀸𑀦𑁂𑀦 𑀓𑀢𑀸 𑀭𑀢𑁆𑀢𑀫𑀡𑀺𑀫𑀲𑀸𑀭𑀕𑀮𑁆𑀮𑀫𑀬𑀸 𑀅𑀝𑁆𑀝𑀸𑀮𑀓𑀸. 𑀧𑀸𑀲𑀸𑀤𑁂𑀢𑁆𑀣𑀸𑀢𑀺 𑀏𑀢𑁆𑀣 𑀦𑀸𑀕𑀪𑀯𑀦𑁂 𑀧𑀸𑀲𑀸𑀤𑀸. 𑀲𑀺𑀮𑀸𑀫𑀬𑀸𑀢𑀺 𑀫𑀡𑀺𑀫𑀬𑀸. 𑀲𑁄𑀯𑀡𑁆𑀡𑀭𑀢𑀦𑁂𑀳𑀻𑀢𑀺 𑀲𑀼𑀯𑀡𑁆𑀡𑀲𑀗𑁆𑀔𑀸𑀢𑁂𑀳𑀺 𑀭𑀢𑀦𑁂𑀳𑀺, 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀙𑀸𑀤𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀳𑀸𑀢𑀺 𑀲𑀳𑀓𑀸𑀭𑀸. 𑀉𑀧𑀭𑀺𑀪𑀤𑁆𑀤𑀓𑀸𑀢𑀺 𑀉𑀤𑁆𑀤𑀸𑀮𑀓𑀚𑀸𑀢𑀺𑀓𑀸𑀬𑁂𑀯 𑀭𑀼𑀓𑁆𑀔𑀸. 𑀘𑀫𑁆𑀧𑁂𑀬𑁆𑀬𑀓𑀸 𑀦𑀸𑀕𑀫𑀮𑁆𑀮𑀺𑀓𑀸𑀢𑀺 𑀘𑀫𑁆𑀧𑀓𑀸 𑀘 𑀦𑀸𑀕𑀸 𑀘 𑀫𑀮𑁆𑀮𑀺𑀓𑀸 𑀘. 𑀪𑀕𑀺𑀦𑀻𑀫𑀸𑀮𑀸 𑀅𑀣 𑀫𑁂𑀢𑁆𑀣 𑀓𑁄𑀮𑀺𑀬𑀸𑀢𑀺 𑀪𑀕𑀺𑀦𑀻𑀫𑀸𑀮𑀸 𑀘𑁂𑀯 𑀅𑀣 𑀏𑀢𑁆𑀣 𑀦𑀸𑀕𑀪𑀯𑀦𑁂 𑀓𑁄𑀮𑀺𑀬𑀸 𑀦𑀸𑀫 𑀭𑀼𑀓𑁆𑀔𑀸 𑀘. 𑀏𑀢𑁂 𑀤𑀼𑀫𑀸 𑀧𑀭𑀺𑀡𑀸𑀫𑀺𑀢𑀸𑀢𑀺 𑀏𑀢𑁂 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀸 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀲𑀸𑀔𑀢𑀸𑀬 𑀧𑀭𑀺𑀡𑀸𑀫𑀺𑀢𑀸 𑀆𑀓𑀼𑀮𑀲𑀫𑀸𑀓𑀼𑀮𑀸. 𑀔𑀚𑁆𑀚𑀼𑀭𑁂𑀢𑁆𑀣𑀸𑀢𑀺 𑀔𑀚𑁆𑀚𑀼𑀭𑀺𑀭𑀼𑀓𑁆𑀔𑀸 𑀏𑀢𑁆𑀣. 𑀲𑀺𑀮𑀸𑀫𑀬𑀸𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀸. 𑀲𑁄𑀯𑀡𑁆𑀡𑀥𑀼𑀯𑀧𑀼𑀧𑁆𑀨𑀺𑀢𑀸𑀢𑀺 𑀢𑁂 𑀧𑀦 𑀲𑀼𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀦𑀺𑀘𑁆𑀘𑀧𑀼𑀧𑁆𑀨𑀺𑀢𑀸. 𑀬𑀢𑁆𑀣 𑀯𑀲𑀢𑁄𑀧𑀧𑀸𑀢𑀺𑀓𑁄𑀢𑀺 𑀬𑀢𑁆𑀣 𑀦𑀸𑀕𑀪𑀯𑀦𑁂 𑀑𑀧𑀧𑀸𑀢𑀺𑀓𑁄 𑀦𑀸𑀕𑀭𑀸𑀚𑀸 𑀯𑀲𑀢𑀺. 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑀸𑀢𑀺 ¶ 𑀲𑀼𑀯𑀡𑁆𑀡𑀭𑀸𑀲𑀺𑀲𑀲𑁆𑀲𑀺𑀭𑀺𑀓𑀲𑀭𑀻𑀭𑀸. 𑀓𑀸𑀮𑀸 𑀢𑀭𑀼𑀡𑀸𑀯 𑀉𑀕𑁆𑀕𑀢𑀸𑀢𑀺 𑀯𑀺𑀮𑀸𑀲𑀬𑀼𑀢𑁆𑀢𑀢𑀸𑀬 𑀫𑀦𑁆𑀤𑀯𑀸𑀢𑁂𑀭𑀺𑀢𑀸 𑀓𑀸𑀮𑀯𑀮𑁆𑀮𑀺𑀧𑀮𑁆𑀮𑀯𑀸 𑀯𑀺𑀬 𑀉𑀕𑁆𑀕𑀢𑀸. 𑀧𑀼𑀘𑀺𑀫𑀦𑁆𑀤𑀢𑁆𑀣𑀦𑀻𑀢𑀺 𑀦𑀺𑀫𑁆𑀩𑀨𑀮𑀲𑀡𑁆𑀞𑀸𑀦𑀘𑀽𑀘𑀼𑀓𑀸 ¶ . 𑀮𑀸𑀔𑀸𑀭𑀲𑀭𑀢𑁆𑀢𑀲𑀼𑀘𑁆𑀙𑀯𑀻𑀢𑀺 𑀳𑀢𑁆𑀣𑀧𑀸𑀤𑀢𑀮𑀙𑀯𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀺𑀤𑀺𑀯𑁄𑀓𑀘𑀭𑀸𑀢𑀺 𑀢𑀺𑀤𑀲𑀪𑀯𑀦𑀘𑀭𑀸. 𑀯𑀺𑀚𑁆𑀚𑀼𑀯𑀩𑁆𑀪𑀖𑀦𑀸𑀢𑀺 𑀅𑀩𑁆𑀪𑀖𑀦𑀯𑀮𑀸𑀳𑀓𑀦𑁆𑀢𑀭𑀢𑁄 𑀦𑀺𑀲𑁆𑀲𑀝𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬. 𑀢𑀁 𑀢𑁂𑀲𑀁 𑀤𑁂𑀫𑀻𑀢𑀺 𑀢𑀁 𑀢𑀲𑁆𑀲 𑀳𑀤𑀬𑀁 𑀅𑀳𑀁 𑀢𑁂𑀲𑀁 𑀤𑁂𑀫𑀺, 𑀏𑀯𑀁 𑀚𑀸𑀦𑀲𑁆𑀲𑀼. 𑀇𑀲𑁆𑀲𑀭𑀸𑀢𑀺 𑀫𑀸𑀢𑀼𑀮𑀁 𑀆𑀮𑀧𑀢𑀺.

𑀇𑀢𑀺 𑀲𑁄 𑀯𑁂𑀲𑁆𑀲𑀯𑀡𑁂𑀦 𑀅𑀦𑀦𑀼𑀜𑁆𑀜𑀸𑀢𑁄 𑀕𑀦𑁆𑀢𑀼𑀁 𑀅𑀯𑀺𑀲𑀳𑀺𑀢𑁆𑀯𑀸 𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑀼𑀁 𑀏𑀢𑀸 𑀏𑀢𑁆𑀢𑀓𑀸 𑀕𑀸𑀣𑀸 𑀓𑀣𑁂𑀲𑀺. 𑀯𑁂𑀲𑁆𑀲𑀯𑀡𑁄 𑀧𑀦 𑀢𑀲𑁆𑀲 𑀓𑀣𑀁 𑀦 𑀲𑀼𑀡𑀸𑀢𑀺. 𑀓𑀺𑀁𑀓𑀸𑀭𑀡𑀸? 𑀤𑁆𑀯𑀺𑀦𑁆𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀯𑀺𑀫𑀸𑀦𑀅𑀟𑁆𑀟𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺. 𑀧𑀼𑀡𑁆𑀡𑀓𑁄 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀅𑀲𑁆𑀲𑀼𑀢𑀪𑀸𑀯𑀁 𑀜𑀢𑁆𑀯𑀸 𑀚𑀺𑀦𑀓𑀤𑁂𑀯𑀧𑀼𑀢𑁆𑀢𑀲𑁆𑀲 ¶ 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀯𑁂𑀲𑁆𑀲𑀯𑀡𑁄 𑀅𑀟𑁆𑀟𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀭𑀸𑀚𑀺𑀢𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀇𑀢𑀭𑀁 ‘‘𑀕𑀘𑁆𑀙 𑀢𑁆𑀯𑀁, 𑀢𑀯 𑀯𑀺𑀫𑀸𑀦𑁂 𑀯𑀲𑀸𑀳𑀻’’𑀢𑀺 𑀆𑀳. 𑀧𑀼𑀡𑁆𑀡𑀓𑁄 ‘‘𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 ‘‘𑀫𑀬𑁆𑀳𑀁 𑀫𑀸𑀢𑀼𑀮𑁂𑀦 𑀫𑀫 𑀧𑁂𑀲𑀺𑀢𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀓𑀢𑀺𑀧𑀬𑀤𑁂𑀯𑀧𑀼𑀢𑁆𑀢𑁂 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀺𑀦𑁆𑀥𑀯𑀁 𑀆𑀳𑀭𑀸𑀧𑁂𑀢𑁆𑀯𑀸 𑀅𑀪𑀺𑀭𑀼𑀬𑁆𑀳 𑀧𑀓𑁆𑀓𑀸𑀫𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁭𑁮.

‘‘𑀲𑁄 𑀧𑀼𑀡𑁆𑀡𑀓𑁄 𑀪𑀽𑀢𑀧𑀢𑀺𑀁 𑀬𑀲𑀲𑁆𑀲𑀺𑀁, 𑀆𑀫𑀦𑁆𑀢𑀬 𑀯𑁂𑀲𑁆𑀲𑀯𑀡𑀁 𑀓𑀼𑀯𑁂𑀭𑀁;

𑀢𑀢𑁆𑀣𑁂𑀯 𑀲𑀦𑁆𑀢𑁄 𑀧𑀼𑀭𑀺𑀲𑀁 𑀅𑀲𑀁𑀲𑀺, 𑀆𑀦𑁂𑀳𑀺 𑀆𑀚𑀜𑁆𑀜𑀫𑀺𑀥𑁂𑀯 𑀬𑀼𑀢𑁆𑀢𑀁.

𑁧𑁩𑁭𑁯.

‘‘𑀚𑀸𑀢𑀭𑀽𑀧𑀫𑀬𑀸 𑀓𑀡𑁆𑀡𑀸, 𑀓𑀸𑀘𑀫𑁆𑀳𑀺𑀘𑀫𑀬𑀸 𑀔𑀼𑀭𑀸;

𑀚𑀫𑁆𑀩𑁄𑀦𑀤𑀲𑁆𑀲 𑀧𑀸𑀓𑀲𑁆𑀲, 𑀲𑀼𑀯𑀡𑁆𑀡𑀲𑁆𑀲 𑀉𑀭𑀘𑁆𑀙𑀤𑁄.

𑁧𑁩𑁮𑁦.

‘‘𑀤𑁂𑀯𑀯𑀸𑀳𑀯𑀳𑀁 𑀬𑀸𑀦𑀁, 𑀅𑀲𑁆𑀲𑀫𑀸𑀭𑀼𑀬𑁆𑀳 𑀧𑀼𑀡𑁆𑀡𑀓𑁄;

𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼, 𑀧𑀓𑁆𑀓𑀸𑀫𑀺 𑀯𑁂𑀳𑀸𑀬𑀲𑀫𑀦𑁆𑀢𑀮𑀺𑀓𑁆𑀔𑁂’’𑀢𑀺.

𑀢𑀢𑁆𑀣 𑀆𑀫𑀦𑁆𑀢𑀬𑀸𑀢𑀺 𑀆𑀫𑀦𑁆𑀢𑀬𑀺𑀢𑁆𑀯𑀸.

𑀲𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄𑀬𑁂𑀯 𑀘𑀺𑀦𑁆𑀢𑁂𑀲𑀺 ‘‘𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀫𑀳𑀸𑀧𑀭𑀺𑀯𑀸𑀭𑁄, 𑀦 𑀲𑀓𑁆𑀓𑀸 𑀢𑀁 𑀕𑀡𑁆𑀳𑀺𑀢𑀼𑀁, 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑁄 𑀧𑀦 𑀚𑀽𑀢𑀯𑀺𑀢𑁆𑀢𑀓𑁄, 𑀢𑀁 𑀚𑀽𑀢𑁂𑀦 ¶ 𑀚𑀺𑀦𑀺𑀢𑁆𑀯𑀸 𑀯𑀺𑀥𑀼𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀖𑀭𑁂 𑀧𑀦𑀲𑁆𑀲 𑀩𑀳𑀽𑀦𑀺 𑀭𑀢𑀦𑀸𑀦𑀺, 𑀅𑀧𑁆𑀧𑀕𑁆𑀖𑁂𑀦 𑀮𑀓𑁆𑀔𑁂𑀦 𑀚𑀽𑀢𑀁 𑀦 𑀓𑀻𑀴𑀺𑀲𑁆𑀲𑀢𑀺, 𑀫𑀳𑀕𑁆𑀖𑀭𑀢𑀦𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀜𑁆𑀜𑀁 𑀭𑀢𑀦𑀁 𑀭𑀸𑀚𑀸 𑀦 𑀕𑀡𑁆𑀳𑀺𑀲𑁆𑀲𑀢𑀺, 𑀭𑀸𑀚𑀕𑀳𑀲𑁆𑀲 𑀲𑀸𑀫𑀦𑁆𑀢𑀸 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀩𑁆𑀪𑀦𑁆𑀢𑀭𑁂 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀧𑀭𑀺𑀪𑁄𑀕𑀫𑀡𑀺𑀭𑀢𑀦𑀁 𑀅𑀢𑁆𑀣𑀺 𑀫𑀳𑀸𑀦𑀼𑀪𑀸𑀯𑀁, 𑀢𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀭𑀸𑀚𑀸𑀦𑀁 𑀧𑀮𑁄𑀪𑁂𑀢𑁆𑀯𑀸 𑀚𑀺𑀦𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁮𑁧.

‘‘𑀲𑁄 ¶ 𑀅𑀕𑁆𑀕𑀫𑀸 𑀭𑀸𑀚𑀕𑀳𑀁 𑀲𑀼𑀭𑀫𑁆𑀫𑀁, 𑀅𑀗𑁆𑀕𑀲𑁆𑀲 𑀭𑀜𑁆𑀜𑁄 𑀦𑀕𑀭𑀁 𑀤𑀼𑀭𑀸𑀬𑀼𑀢𑀁;

𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀫𑀲𑀓𑁆𑀓𑀲𑀸𑀭𑀁 𑀯𑀺𑀬 𑀯𑀸𑀲𑀯𑀲𑁆𑀲.

𑁧𑁩𑁮𑁨.

‘‘𑀫𑀬𑀽𑀭𑀓𑁄𑀜𑁆𑀘𑀸𑀕𑀡𑀲𑀫𑁆𑀧𑀖𑀼𑀝𑁆𑀞𑀁 ¶ , 𑀤𑀺𑀚𑀸𑀪𑀺𑀖𑀼𑀝𑁆𑀞𑀁 𑀤𑀺𑀚𑀲𑀗𑁆𑀖𑀲𑁂𑀯𑀺𑀢𑀁;

𑀦𑀸𑀦𑀸𑀲𑀓𑀼𑀦𑁆𑀢𑀸𑀪𑀺𑀭𑀼𑀤𑀁 𑀲𑀼𑀯𑀗𑁆𑀕𑀡𑀁, 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀳𑀺𑀫𑀯𑀁𑀯 𑀧𑀩𑁆𑀩𑀢𑀁.

𑁧𑁩𑁮𑁩.

‘‘𑀲𑁄 𑀧𑀼𑀡𑁆𑀡𑀓𑁄 𑀯𑁂𑀧𑀼𑀮𑀫𑀸𑀪𑀺𑀭𑀽𑀳𑀺, 𑀲𑀺𑀮𑀼𑀘𑁆𑀘𑀬𑀁 𑀓𑀺𑀫𑁆𑀧𑀼𑀭𑀺𑀲𑀸𑀦𑀼𑀘𑀺𑀡𑁆𑀡𑀁;

𑀅𑀦𑁆𑀯𑁂𑀲𑀫𑀸𑀦𑁄 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁, 𑀢𑀫𑀤𑁆𑀤𑀲𑀸 𑀧𑀩𑁆𑀩𑀢𑀓𑀽𑀝𑀫𑀚𑁆𑀛𑁂’’𑀢𑀺.

𑀢𑀢𑁆𑀣 𑀅𑀗𑁆𑀕𑀲𑁆𑀲 𑀭𑀜𑁆𑀜𑁄𑀢𑀺 𑀢𑀤𑀸 𑀅𑀗𑁆𑀕𑀲𑁆𑀲 𑀭𑀜𑁆𑀜𑁄𑀯 𑀫𑀕𑀥𑀭𑀚𑁆𑀚𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀗𑁆𑀕𑀲𑁆𑀲 𑀭𑀜𑁆𑀜𑁄 𑀦𑀕𑀭’’𑀦𑁆𑀢𑀺. 𑀤𑀼𑀭𑀸𑀬𑀼𑀢𑀦𑁆𑀢𑀺 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀤𑀼𑀭𑀸𑀬𑀼𑀢𑁆𑀢𑀁. 𑀫𑀲𑀓𑁆𑀓𑀲𑀸𑀭𑀁 𑀯𑀺𑀬 𑀯𑀸𑀲𑀯𑀲𑁆𑀲𑀸𑀢𑀺 𑀫𑀲𑀓𑁆𑀓𑀲𑀸𑀭𑀲𑀗𑁆𑀔𑀸𑀢𑁂 𑀲𑀺𑀦𑁂𑀭𑀼𑀧𑀩𑁆𑀩𑀢𑀫𑀢𑁆𑀣𑀓𑁂 𑀫𑀸𑀧𑀺𑀢𑀢𑁆𑀢𑀸 ‘‘𑀫𑀲𑀓𑁆𑀓𑀲𑀸𑀭’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀯𑀸𑀲𑀯𑀲𑁆𑀲 𑀪𑀯𑀦𑀁 𑀯𑀺𑀬. 𑀤𑀺𑀚𑀸𑀪𑀺𑀖𑀼𑀝𑁆𑀞𑀦𑁆𑀢𑀺 𑀅𑀜𑁆𑀜𑁂𑀳𑀺 𑀘 𑀧𑀓𑁆𑀔𑀻𑀳𑀺 𑀅𑀪𑀺𑀲𑀗𑁆𑀖𑀼𑀝𑁆𑀞𑀁 𑀦𑀺𑀦𑁆𑀦𑀸𑀤𑀺𑀢𑀁. 𑀦𑀸𑀦𑀸𑀲𑀓𑀼𑀦𑁆𑀢𑀸𑀪𑀺𑀭𑀼𑀤𑀦𑁆𑀢𑀺 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀦𑁆𑀢𑁂𑀳𑀺 𑀯𑀺𑀬 𑀦𑀸𑀦𑀸𑀯𑀺𑀥𑁂𑀳𑀺 𑀲𑀓𑀼𑀡𑁂𑀳𑀺 𑀅𑀪𑀺𑀭𑀼𑀤𑀁, 𑀅𑀪𑀺𑀕𑀻𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀯𑀗𑁆𑀕𑀡𑀦𑁆𑀢𑀺 𑀲𑀼𑀦𑁆𑀤𑀭𑀅𑀗𑁆𑀕𑀡𑀁 𑀫𑀦𑀼𑀜𑁆𑀜𑀢𑀮𑀁. 𑀳𑀺𑀫𑀯𑀁𑀯 𑀧𑀩𑁆𑀩𑀢𑀦𑁆𑀢𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀁 𑀯𑀺𑀬. 𑀯𑁂𑀧𑀼𑀮𑀫𑀸𑀪𑀺𑀭𑀽𑀳𑀻𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀧𑀼𑀡𑁆𑀡𑀓𑁄 𑀏𑀯𑀭𑀽𑀧𑀁 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺. 𑀧𑀩𑁆𑀩𑀢𑀓𑀽𑀝𑀫𑀚𑁆𑀛𑁂𑀢𑀺 𑀧𑀩𑁆𑀩𑀢𑀓𑀽𑀝𑀅𑀦𑁆𑀢𑀭𑁂 𑀢𑀁 𑀫𑀡𑀺𑀁 𑀅𑀤𑁆𑀤𑀲.

𑁧𑁩𑁮𑁪.

‘‘𑀤𑀺𑀲𑁆𑀯𑀸 ¶ 𑀫𑀡𑀺𑀁 𑀧𑀪𑀲𑁆𑀲𑀭𑀁 𑀚𑀸𑀢𑀺𑀫𑀦𑁆𑀢𑀁, 𑀫𑀦𑁄𑀳𑀭𑀁 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁;

𑀤𑀤𑁆𑀤𑀮𑁆𑀮𑀫𑀸𑀦𑀁 𑀬𑀲𑀲𑀸 𑀬𑀲𑀲𑁆𑀲𑀺𑀦𑀁, 𑀑𑀪𑀸𑀲𑀢𑀻 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.

𑁧𑁩𑁮𑁫.

‘‘𑀢𑀫𑀕𑁆𑀕𑀳𑀻 𑀯𑁂𑀴𑀼𑀭𑀺𑀬𑀁 𑀫𑀳𑀕𑁆𑀖𑀁, 𑀫𑀦𑁄𑀳𑀭𑀁 𑀦𑀸𑀫 𑀫𑀳𑀸𑀦𑀼𑀪𑀸𑀯𑀁;

𑀆𑀚𑀜𑁆𑀜𑀫𑀸𑀭𑀼𑀬𑁆𑀳 𑀫𑀦𑁄𑀫𑀯𑀡𑁆𑀡𑁄, 𑀧𑀓𑁆𑀓𑀸𑀫𑀺 𑀯𑁂𑀳𑀸𑀬𑀲𑀫𑀦𑁆𑀢𑀮𑀺𑀓𑁆𑀔𑁂’’𑀢𑀺.

𑀢𑀢𑁆𑀣 𑀫𑀦𑁄𑀳𑀭𑀦𑁆𑀢𑀺 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀲𑁆𑀲 𑀥𑀦𑀲𑁆𑀲 𑀆𑀳𑀭𑀡𑀲𑀫𑀢𑁆𑀣𑀁. 𑀤𑀤𑁆𑀤𑀮𑁆𑀮𑀫𑀸𑀦𑀦𑁆𑀢𑀺 𑀉𑀚𑁆𑀚𑀮𑀫𑀸𑀦𑀁. 𑀬𑀲𑀲𑀸𑀢𑀺 𑀧𑀭𑀺𑀯𑀸𑀭𑀫𑀡𑀺𑀕𑀡𑁂𑀦. 𑀑𑀪𑀸𑀲𑀢𑀻𑀢𑀺 𑀢𑀁 𑀫𑀡𑀺𑀭𑀢𑀦𑀁 𑀆𑀓𑀸𑀲𑁂 𑀯𑀺𑀚𑁆𑀚𑀼𑀭𑀺𑀯 𑀑𑀪𑀸𑀲𑀢𑀺. 𑀢𑀫𑀕𑁆𑀕𑀳𑀻𑀢𑀺 𑀢𑀁 𑀫𑀡𑀺𑀭𑀢𑀦𑀁 𑀅𑀕𑁆𑀕𑀳𑁂𑀲𑀺. 𑀢𑀁 𑀧𑀦 𑀫𑀡𑀺𑀭𑀢𑀦𑀁 𑀓𑀼𑀫𑁆𑀪𑀺𑀭𑁄 𑀦𑀸𑀫 𑀬𑀓𑁆𑀔𑁄 𑀓𑀼𑀫𑁆𑀪𑀡𑁆𑀟𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀭𑀓𑁆𑀔𑀢𑀺. 𑀲𑁄 𑀧𑀦 𑀢𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀺𑀢𑀫𑀢𑁆𑀢𑁂𑀦𑁂𑀯 𑀪𑀻𑀢𑀢𑀲𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀯𑀸 𑀓𑀫𑁆𑀧𑀫𑀸𑀦𑁄 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀇𑀢𑀺 𑀢𑀁 𑀧𑀮𑀸𑀧𑁂𑀢𑁆𑀯𑀸 𑀧𑀼𑀡𑁆𑀡𑀓𑁄 𑀫𑀡𑀺𑀭𑀢𑀦𑀁 𑀅𑀕𑁆𑀕𑀳𑁂𑀲𑀺. 𑀫𑀦𑁄𑀳𑀭𑀁 𑀦𑀸𑀫𑀸𑀢𑀺 𑀫𑀦𑀲𑀸 𑀘𑀺𑀦𑁆𑀢𑀺𑀢𑀁 𑀥𑀦𑀁 𑀆𑀳𑀭𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑀁.

𑀇𑀢𑀺 ¶ 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀢𑀁 𑀦𑀕𑀭𑀁 𑀧𑀢𑁆𑀢𑁄. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁩𑁮𑁬.

‘‘𑀲𑁄 𑀅𑀕𑁆𑀕𑀫𑀸 𑀦𑀕𑀭𑀫𑀺𑀦𑁆𑀤𑀧𑀢𑁆𑀣𑀁, 𑀑𑀭𑀼𑀬𑁆𑀳𑀼𑀧𑀸𑀕𑀘𑁆𑀙𑀺 𑀲𑀪𑀁 𑀓𑀼𑀭𑀽𑀦𑀁;

𑀲𑀫𑀸𑀕𑀢𑁂 ¶ 𑀏𑀓𑀲𑀢𑀁 𑀲𑀫𑀕𑁆𑀕𑁂, 𑀅𑀯𑁆𑀳𑁂𑀢𑁆𑀣 𑀬𑀓𑁆𑀔𑁄 𑀅𑀯𑀺𑀓𑀫𑁆𑀧𑀫𑀸𑀦𑁄.

𑁧𑁩𑁮𑁭.

‘‘𑀓𑁄 𑀦𑀻𑀥 𑀭𑀜𑁆𑀜𑀁 𑀯𑀭𑀫𑀸𑀪𑀺𑀚𑁂𑀢𑀺, 𑀓𑀫𑀸𑀪𑀺𑀚𑁂𑀬𑁆𑀬𑀸𑀫 𑀯𑀭𑀤𑁆𑀥𑀦𑁂𑀦;

𑀓𑀫𑀦𑀼𑀢𑁆𑀢𑀭𑀁 𑀭𑀢𑀦𑀯𑀭𑀁 𑀚𑀺𑀦𑀸𑀫, 𑀓𑁄 𑀯𑀸𑀧𑀺 𑀦𑁄 𑀚𑁂𑀢𑀺 𑀯𑀭𑀤𑁆𑀥𑀦𑁂𑀦𑀸’’𑀢𑀺.

𑀢𑀢𑁆𑀣 ¶ 𑀑𑀭𑀼𑀬𑁆𑀳𑀼𑀧𑀸𑀕𑀘𑁆𑀙𑀺 𑀲𑀪𑀁 𑀓𑀼𑀭𑀽𑀦𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀲𑁄 𑀧𑀼𑀡𑁆𑀡𑀓𑁄 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀭𑀼𑀬𑁆𑀳 𑀅𑀲𑁆𑀲𑀁 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀁 𑀞𑀧𑁂𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑁂𑀦 𑀓𑀼𑀭𑀽𑀦𑀁 𑀲𑀪𑀁 𑀉𑀧𑀕𑀢𑁄. 𑀏𑀓𑀲𑀢𑀦𑁆𑀢𑀺 𑀏𑀓𑀲𑀢𑀭𑀸𑀚𑀸𑀦𑁄 𑀅𑀙𑀫𑁆𑀪𑀻𑀢𑁄 𑀳𑀼𑀢𑁆𑀯𑀸 ‘‘𑀓𑁄 𑀦𑀻𑀥𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀚𑀽𑀢𑁂𑀦 𑀅𑀯𑁆𑀳𑁂𑀢𑁆𑀣. 𑀓𑁄 𑀦𑀻𑀥𑀸𑀢𑀺 𑀓𑁄 𑀦𑀼 𑀇𑀫𑀲𑁆𑀫𑀺𑀁 𑀭𑀸𑀚𑀲𑀫𑀸𑀕𑀫𑁂. 𑀭𑀜𑁆𑀜𑀦𑁆𑀢𑀺 𑀭𑀸𑀚𑀽𑀦𑀁 𑀅𑀦𑁆𑀢𑀭𑁂. 𑀯𑀭𑀫𑀸𑀪𑀺𑀚𑁂𑀢𑀻𑀢𑀺 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀲𑁂𑀝𑁆𑀞𑀭𑀢𑀦𑀁 𑀅𑀪𑀺𑀚𑁂𑀢𑀺, ‘‘𑀅𑀳𑀁 𑀚𑀺𑀦𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀉𑀲𑁆𑀲𑀳𑀢𑀺. 𑀓𑀫𑀸𑀪𑀺𑀚𑁂𑀬𑁆𑀬𑀸𑀫𑀸𑀢𑀺 𑀓𑀁 𑀯𑀸 𑀫𑀬𑀁 𑀚𑀺𑀦𑁂𑀬𑁆𑀬𑀸𑀫. 𑀯𑀭𑀤𑁆𑀥𑀦𑁂𑀦𑀸𑀢𑀺 𑀉𑀢𑁆𑀢𑀫𑀥𑀦𑁂𑀦. 𑀓𑀫𑀦𑀼𑀢𑁆𑀢𑀭𑀦𑁆𑀢𑀺 𑀚𑀺𑀦𑀦𑁆𑀢𑁄 𑀘 𑀓𑀢𑀭𑀁 𑀭𑀸𑀚𑀸𑀦𑀁 𑀅𑀦𑀼𑀢𑁆𑀢𑀭𑀁 𑀭𑀢𑀦𑀯𑀭𑀁 𑀚𑀺𑀦𑀸𑀫. 𑀓𑁄 𑀯𑀸𑀧𑀺 𑀦𑁄 𑀚𑁂𑀢𑀻𑀢𑀺 𑀅𑀣 𑀯𑀸 𑀓𑁄 𑀦𑀸𑀫 𑀭𑀸𑀚𑀸 𑀅𑀫𑁆𑀳𑁂 𑀯𑀭𑀥𑀦𑁂𑀦 𑀚𑁂𑀢𑀺. 𑀇𑀢𑀺 𑀲𑁄 𑀘𑀢𑀽𑀳𑀺 𑀧𑀤𑁂𑀳𑀺 𑀓𑁄𑀭𑀩𑁆𑀬𑀫𑁂𑀯 𑀖𑀝𑁆𑀝𑁂𑀢𑀺.

𑀅𑀣 𑀭𑀸𑀚𑀸 ‘‘𑀫𑀬𑀸 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀁 𑀲𑀽𑀭𑁄 𑀳𑀼𑀢𑁆𑀯𑀸 𑀓𑀣𑁂𑀦𑁆𑀢𑁄 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁩𑁮𑁮.

‘‘𑀓𑀼𑀳𑀺𑀁 𑀦𑀼 𑀭𑀝𑁆𑀞𑁂 𑀢𑀯 𑀚𑀸𑀢𑀺𑀪𑀽𑀫𑀺, 𑀦 𑀓𑁄𑀭𑀩𑁆𑀬𑀲𑁆𑀲𑁂𑀯 𑀯𑀘𑁄 𑀢𑀯𑁂𑀤𑀁;

𑀅𑀪𑀻𑀢𑁄𑀲𑀺 𑀦𑁄 𑀯𑀡𑁆𑀡𑀦𑀺𑀪𑀸𑀬 𑀲𑀩𑁆𑀩𑁂, 𑀅𑀓𑁆𑀔𑀸𑀳𑀺 𑀫𑁂 𑀦𑀸𑀫𑀜𑁆𑀘 𑀩𑀦𑁆𑀥𑀯𑁂 𑀘𑀸’’𑀢𑀺.

𑀢𑀢𑁆𑀣 𑀦 𑀓𑁄𑀭𑀩𑁆𑀬𑀲𑁆𑀲𑁂𑀯𑀸𑀢𑀺 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀓𑀲𑁆𑀲𑁂𑀯 𑀢𑀯 𑀯𑀘𑀦𑀁 𑀦 𑀳𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 ‘‘𑀅𑀬𑀁 𑀭𑀸𑀚𑀸 𑀫𑀫 𑀦𑀸𑀫𑀁 𑀧𑀼𑀘𑁆𑀙𑀢𑀺, 𑀧𑀼𑀡𑁆𑀡𑀓𑁄 𑀘 𑀦𑀸𑀫 𑀤𑀸𑀲𑁄 𑀳𑁄𑀢𑀺. 𑀲𑀘𑀸𑀳𑀁 ‘𑀧𑀼𑀡𑁆𑀡𑀓𑁄𑀲𑁆𑀫𑀻’𑀢𑀺 𑀯𑀓𑁆𑀔𑀸𑀫𑀺, ‘𑀏𑀲 𑀤𑀸𑀲𑁄, 𑀢𑀲𑁆𑀫𑀸 𑀫𑀁 𑀧𑀕𑀩𑁆𑀪𑀢𑀸𑀬 𑀏𑀯𑀁 𑀯𑀤𑁂𑀢𑀻’𑀢𑀺 𑀅𑀯𑀫𑀜𑁆𑀜𑀺𑀲𑁆𑀲𑀢𑀺, 𑀅𑀦𑀦𑁆𑀢𑀭𑀸𑀢𑀻𑀢𑁂 𑀅𑀢𑁆𑀢𑀪𑀸𑀯𑁂 𑀦𑀸𑀫𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁩𑁮𑁯.

‘‘𑀓𑀘𑁆𑀘𑀸𑀬𑀦𑁄 ¶ 𑀫𑀸𑀡𑀯𑀓𑁄𑀲𑁆𑀫𑀺 𑀭𑀸𑀚, 𑀅𑀦𑀽𑀦𑀦𑀸𑀫𑁄 𑀇𑀢𑀺 𑀫𑀯𑁆𑀳𑀬𑀦𑁆𑀢𑀺;

𑀅𑀗𑁆𑀕𑁂𑀲𑀼 ¶ 𑀫𑁂 𑀜𑀸𑀢𑀬𑁄 𑀩𑀦𑁆𑀥𑀯𑀸 𑀘, 𑀅𑀓𑁆𑀔𑁂𑀦 𑀤𑁂𑀯𑀲𑁆𑀫𑀺 𑀇𑀥𑀸𑀦𑀼𑀧𑀢𑁆𑀢𑁄’’𑀢𑀺.

𑀢𑀢𑁆𑀣 𑀅𑀦𑀽𑀦𑀦𑀸𑀫𑁄𑀢𑀺 𑀦 𑀊𑀦𑀦𑀸𑀫𑁄. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀧𑀼𑀡𑁆𑀡𑀓𑀦𑀸𑀫𑀫𑁂𑀯 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀓𑀣𑁂𑀢𑀺. 𑀇𑀢𑀺 𑀫𑀯𑁆𑀳𑀬𑀦𑁆𑀢𑀻𑀢𑀺 𑀇𑀢𑀺 𑀫𑀁 𑀅𑀯𑁆𑀳𑀬𑀦𑁆𑀢𑀺 𑀧𑀓𑁆𑀓𑁄𑀲𑀦𑁆𑀢𑀺 ¶ . 𑀅𑀗𑁆𑀕𑁂𑀲𑀽𑀢𑀺 𑀅𑀗𑁆𑀕𑀭𑀝𑁆𑀞𑁂 𑀓𑀸𑀮𑀘𑀫𑁆𑀧𑀸𑀦𑀕𑀭𑁂 𑀯𑀲𑀦𑁆𑀢𑀺. 𑀅𑀓𑁆𑀔𑁂𑀦 𑀤𑁂𑀯𑀲𑁆𑀫𑀻𑀢𑀺 𑀤𑁂𑀯, 𑀚𑀽𑀢𑀓𑀻𑀴𑀦𑀢𑁆𑀣𑁂𑀦 𑀇𑀥 𑀅𑀦𑀼𑀧𑁆𑀧𑀢𑁆𑀢𑁄𑀲𑁆𑀫𑀺.

𑀅𑀣 𑀭𑀸𑀚𑀸 ‘‘𑀫𑀸𑀡𑀯, 𑀢𑁆𑀯𑀁 𑀚𑀽𑀢𑁂𑀦 𑀚𑀺𑀢𑁄 𑀓𑀺𑀁 𑀤𑀲𑁆𑀲𑀲𑀺, 𑀓𑀺𑀁 𑀢𑁂 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁩𑁯𑁦.

‘‘𑀓𑀺𑀁 𑀫𑀸𑀡𑀯𑀲𑁆𑀲 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀬𑁂 𑀢𑀁 𑀚𑀺𑀦𑀦𑁆𑀢𑁄 𑀳𑀭𑁂 𑀅𑀓𑁆𑀔𑀥𑀼𑀢𑁆𑀢𑁄;

𑀩𑀳𑀽𑀦𑀺 𑀭𑀜𑁆𑀜𑁄 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀢𑁂 𑀢𑁆𑀯𑀁 𑀤𑀮𑀺𑀤𑁆𑀤𑁄 𑀓𑀣𑀫𑀯𑁆𑀳𑀬𑁂𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀺𑀢𑁆𑀢𑀓𑀸𑀦𑀺 𑀪𑁄𑀢𑁄 𑀫𑀸𑀡𑀯𑀲𑁆𑀲 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀬𑁂 𑀢𑀁 𑀚𑀺𑀦𑀦𑁆𑀢𑁄 𑀅𑀓𑁆𑀔𑀥𑀼𑀢𑁆𑀢𑁄 ‘‘𑀆𑀳𑀭𑀸’’𑀢𑀺 𑀯𑀢𑁆𑀯𑀸 𑀳𑀭𑁂𑀬𑁆𑀬. 𑀭𑀜𑁆𑀜𑁄 𑀧𑀦 𑀦𑀺𑀯𑁂𑀲𑀦𑁂 𑀩𑀳𑀽𑀦𑀺 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀢𑁂 𑀭𑀸𑀚𑀸𑀦𑁄 𑀏𑀯𑀁 𑀩𑀳𑀼𑀥𑀦𑁂 𑀢𑁆𑀯𑀁 𑀤𑀮𑀺𑀤𑁆𑀤𑁄 𑀲𑀫𑀸𑀦𑁄 𑀓𑀣𑀁 𑀚𑀽𑀢𑁂𑀦 𑀅𑀯𑁆𑀳𑀬𑀲𑀻𑀢𑀺.

𑀢𑀢𑁄 𑀧𑀼𑀡𑁆𑀡𑀓𑁄 𑀕𑀸𑀣𑀫𑀸𑀳 𑁋

𑁧𑁩𑁯𑁧.

‘‘𑀫𑀦𑁄𑀳𑀭𑁄 𑀦𑀸𑀫 𑀫𑀡𑀻 𑀫𑀫𑀸𑀬𑀁, 𑀫𑀦𑁄𑀳𑀭𑀁 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁;

𑀇𑀫𑀜𑁆𑀘 𑀆𑀚𑀜𑁆𑀜𑀫𑀫𑀺𑀢𑁆𑀢𑀢𑀸𑀧𑀦𑀁, 𑀏𑀢𑀁 𑀫𑁂 𑀚𑀺𑀦𑀺𑀢𑁆𑀯𑀸 𑀳𑀭𑁂 𑀅𑀓𑁆𑀔𑀥𑀼𑀢𑁆𑀢𑁄’’𑀢𑀺.

𑀧𑀸𑀴𑀺𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀫𑀡𑀺 𑀫𑀫 𑀯𑀺𑀚𑁆𑀚𑀢𑀺 𑀮𑁄𑀳𑀺𑀢𑀗𑁆𑀓𑁄’’𑀢𑀺 𑀮𑀺𑀔𑀺𑀢𑀁. 𑀲𑁄 𑀧𑀦 𑀫𑀡𑀺 𑀯𑁂𑀴𑀼𑀭𑀺𑀬𑁄, 𑀢𑀲𑁆𑀫𑀸 𑀇𑀤𑀫𑁂𑀯 𑀲𑀫𑁂𑀢𑀺.

𑀢𑀢𑁆𑀣 𑀆𑀚𑀜𑁆𑀜𑀦𑁆𑀢𑀺 𑀇𑀫𑀁 𑀆𑀚𑀸𑀦𑀻𑀬𑀲𑁆𑀲𑀜𑁆𑀘 𑀫𑀡𑀺𑀜𑁆𑀘𑀸𑀢𑀺 𑀏𑀢𑀁 𑀫𑁂 𑀉𑀪𑀬𑀁 𑀳𑀭𑁂𑀬𑁆𑀬 𑀅𑀓𑁆𑀔𑀥𑀼𑀢𑁆𑀢𑁄𑀢𑀺 𑀅𑀲𑁆𑀲𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀫𑀸𑀳.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀕𑀸𑀣𑀫𑀸𑀳 𑁋

𑁧𑁩𑁯𑁨.

‘‘𑀏𑀓𑁄 ¶ 𑀫𑀡𑀻 𑀫𑀸𑀡𑀯 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀆𑀚𑀸𑀦𑀺𑀬𑁂𑀓𑁄 𑀧𑀦 𑀓𑀺𑀁 𑀓𑀭𑀺𑀲𑁆𑀲𑀢𑀺;

𑀩𑀳𑀽𑀦𑀺 𑀭𑀜𑁆𑀜𑁄 𑀫𑀡𑀺𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀆𑀚𑀸𑀦𑀺𑀬𑀸 𑀯𑀸𑀢𑀚𑀯𑀸 𑀅𑀦𑀧𑁆𑀧𑀓𑀸’’𑀢𑀺.

𑀤𑁄𑀳𑀴𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀫𑀡𑀺𑀓𑀡𑁆𑀟𑀁

𑀲𑁄 ¶ ¶ 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀓𑀺𑀁 𑀦𑀸𑀫 𑀏𑀢𑀁 𑀯𑀤𑁂𑀣, 𑀏𑀓𑁄 𑀅𑀲𑁆𑀲𑁄 𑀅𑀲𑁆𑀲𑀲𑀳𑀲𑁆𑀲𑀁 𑀮𑀓𑁆𑀔𑀁 𑀳𑁄𑀢𑀺, 𑀏𑀓𑁄 𑀫𑀡𑀺 𑀫𑀡𑀺𑀲𑀳𑀲𑁆𑀲𑀁 𑀮𑀓𑁆𑀔𑀁 𑀳𑁄𑀢𑀺. 𑀦 𑀳𑀺 𑀲𑀩𑁆𑀩𑁂 𑀅𑀲𑁆𑀲𑀸 𑀏𑀓𑀲𑀤𑀺𑀲𑀸, 𑀇𑀫𑀲𑁆𑀲 𑀢𑀸𑀯 𑀚𑀯𑀁 𑀧𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀸𑀓𑀸𑀭𑀫𑀢𑁆𑀣𑀓𑁂𑀦 𑀧𑁂𑀲𑁂𑀲𑀺. 𑀲𑀢𑁆𑀢𑀬𑁄𑀚𑀦𑀺𑀓𑀁 𑀦𑀕𑀭𑀁 𑀅𑀲𑁆𑀲𑁂𑀳𑀺 𑀕𑀻𑀯𑀸𑀬 𑀕𑀻𑀯𑀁 𑀧𑀳𑀭𑀦𑁆𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀅𑀣𑀸𑀦𑀼𑀓𑁆𑀓𑀫𑁂𑀦 𑀅𑀲𑁆𑀲𑁄𑀧𑀺 𑀦 𑀧𑀜𑁆𑀜𑀸𑀬𑀺, 𑀬𑀓𑁆𑀔𑁄𑀧𑀺 𑀦 𑀧𑀜𑁆𑀜𑀸𑀬𑀺, 𑀉𑀤𑀭𑁂 𑀩𑀤𑁆𑀥𑀭𑀢𑁆𑀢𑀧𑀝𑁄𑀯 𑀧𑀜𑁆𑀜𑀸𑀬𑀺. 𑀲𑁄 𑀅𑀲𑁆𑀲𑀢𑁄 𑀑𑀭𑀼𑀬𑁆𑀳 ‘‘𑀤𑀺𑀝𑁆𑀞𑁄, 𑀫𑀳𑀸𑀭𑀸𑀚, 𑀅𑀲𑁆𑀲𑀲𑁆𑀲 𑀯𑁂𑀕𑁄’’𑀢𑀺 𑀯𑀢𑁆𑀯𑀸 ‘‘𑀆𑀫, 𑀤𑀺𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀸𑀦𑀺 𑀧𑀼𑀦 𑀧𑀲𑁆𑀲, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀅𑀲𑁆𑀲𑀁 𑀅𑀦𑁆𑀢𑁄𑀦𑀕𑀭𑁂 𑀉𑀬𑁆𑀬𑀸𑀦𑁂 𑀧𑁄𑀓𑁆𑀔𑀭𑀡𑀺𑀬𑀸 𑀉𑀤𑀓𑀧𑀺𑀝𑁆𑀞𑁂 𑀧𑁂𑀲𑁂𑀲𑀺, 𑀔𑀼𑀭𑀕𑁆𑀕𑀸𑀦𑀺 𑀅𑀢𑁂𑀫𑁂𑀦𑁆𑀢𑁄𑀯 𑀧𑀓𑁆𑀔𑀦𑁆𑀤𑀺. 𑀅𑀣 𑀦𑀁 𑀧𑀤𑀼𑀫𑀧𑀢𑁆𑀢𑁂𑀲𑀼 𑀯𑀺𑀘𑀭𑀸𑀧𑁂𑀢𑁆𑀯𑀸 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺, 𑀅𑀲𑁆𑀲𑁄 𑀆𑀕𑀦𑁆𑀢𑁆𑀯𑀸 𑀧𑀸𑀡𑀺𑀢𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀢𑁄 ‘‘𑀯𑀝𑁆𑀝𑀢𑁂 𑀏𑀯𑀭𑀽𑀧𑀁 𑀅𑀲𑁆𑀲𑀭𑀢𑀦𑀁 𑀦𑀭𑀺𑀦𑁆𑀤𑀸’’𑀢𑀺 𑀯𑀢𑁆𑀯𑀸 ‘‘𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀳𑀸𑀭𑀸𑀚, 𑀅𑀲𑁆𑀲𑀭𑀢𑀦𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀫𑀡𑀺𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀁 𑀧𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋

𑁧𑁩𑁯𑁩.

‘‘𑀇𑀤𑀜𑁆𑀘 𑀫𑁂 𑀫𑀡𑀺𑀭𑀢𑀦𑀁, 𑀧𑀲𑁆𑀲 𑀢𑁆𑀯𑀁 𑀤𑁆𑀯𑀺𑀧𑀤𑀼𑀢𑁆𑀢𑀫;

𑀇𑀢𑁆𑀣𑀻𑀦𑀁 𑀯𑀺𑀕𑁆𑀕𑀳𑀸 𑀘𑁂𑀢𑁆𑀣, 𑀧𑀼𑀭𑀺𑀲𑀸𑀦𑀜𑁆𑀘 𑀯𑀺𑀕𑁆𑀕𑀳𑀸.

𑁧𑁩𑁯𑁪.

‘‘𑀫𑀺𑀕𑀸𑀦𑀁 𑀯𑀺𑀕𑁆𑀕𑀳𑀸 𑀘𑁂𑀢𑁆𑀣, 𑀲𑀓𑀼𑀡𑀸𑀦𑀜𑁆𑀘 𑀯𑀺𑀕𑁆𑀕𑀳𑀸;

𑀦𑀸𑀕𑀭𑀸𑀚𑀸 𑀲𑀼𑀧𑀡𑁆𑀡𑀸 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀇𑀢𑁆𑀣𑀻𑀦𑀦𑁆𑀢𑀺 𑀏𑀢𑀲𑁆𑀫𑀺𑀜𑁆𑀳𑀺 𑀫𑀡𑀺𑀭𑀢𑀦𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀅𑀦𑁂𑀓𑀸 𑀇𑀢𑁆𑀣𑀺𑀯𑀺𑀕𑁆𑀕𑀳𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑀸 𑀦𑀸𑀦𑀧𑁆𑀧𑀓𑀸𑀭𑀸 𑀫𑀺𑀕𑀧𑀓𑁆𑀔𑀺𑀲𑀗𑁆𑀖𑀸 𑀲𑁂𑀦𑀗𑁆𑀕𑀸𑀤𑀻𑀦𑀺 𑀘 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀦𑀺𑀫𑁆𑀫𑀺𑀢𑀦𑁆𑀢𑀺 𑀇𑀤𑀁 𑀏𑀯𑀭𑀽𑀧𑀁 𑀅𑀘𑁆𑀙𑁂𑀭𑀓𑀁 𑀫𑀡𑀺𑀫𑁆𑀳𑀺 𑀦𑀺𑀫𑁆𑀫𑀺𑀢𑀁 𑀧𑀲𑁆𑀲.

‘‘𑀅𑀧𑀭𑀫𑁆𑀧𑀺 𑀧𑀲𑁆𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀸 𑀆𑀳 𑁋

𑁧𑁩𑁯𑁫.

‘‘𑀳𑀢𑁆𑀣𑀸𑀦𑀻𑀓𑀁 ¶ 𑀭𑀣𑀸𑀦𑀻𑀓𑀁, 𑀅𑀲𑁆𑀲𑁂 𑀧𑀢𑁆𑀢𑀻 𑀘 𑀯𑀫𑁆𑀫𑀺𑀦𑁂;

𑀘𑀢𑀼𑀭𑀗𑁆𑀕𑀺𑀦𑀺𑀫𑀁 𑀲𑁂𑀦𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁬.

‘‘𑀳𑀢𑁆𑀣𑀸𑀭𑁄𑀳𑁂 ¶ 𑀅𑀦𑀻𑀓𑀝𑁆𑀞𑁂, 𑀭𑀣𑀺𑀓𑁂 𑀧𑀢𑁆𑀢𑀺𑀓𑀸𑀭𑀓𑁂;

𑀩𑀮𑀕𑁆𑀕𑀸𑀦𑀺 𑀯𑀺𑀬𑀽𑀴𑁆𑀳𑀸𑀦𑀺, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀩𑀮𑀕𑁆𑀕𑀸𑀦𑀻𑀢𑀺 𑀩𑀮𑀸𑀦𑁂𑀯. 𑀯𑀺𑀬𑀽𑀴𑁆𑀳𑀸𑀦𑀻𑀢𑀺 𑀩𑁆𑀬𑀽𑀳𑀯𑀲𑁂𑀦 𑀞𑀺𑀢𑀸𑀦𑀺.

𑁧𑁩𑁯𑁭.

‘‘𑀧𑀼𑀭𑀁 ¶ 𑀉𑀤𑁆𑀥𑀸𑀧𑀲𑀫𑁆𑀧𑀦𑁆𑀦𑀁, 𑀩𑀳𑀼𑀧𑀸𑀓𑀸𑀭𑀢𑁄𑀭𑀡𑀁;

𑀲𑀺𑀗𑁆𑀖𑀸𑀝𑀓𑁂 𑀲𑀼𑀪𑀽𑀫𑀺𑀬𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁮.

‘‘𑀏𑀲𑀺𑀓𑀸 𑀧𑀭𑀺𑀔𑀸𑀬𑁄 𑀘, 𑀧𑀮𑀺𑀔𑀁 𑀅𑀕𑁆𑀕𑀴𑀸𑀦𑀺 𑀘;

𑀅𑀝𑁆𑀝𑀸𑀮𑀓𑁂 𑀘 𑀤𑁆𑀯𑀸𑀭𑁂 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀧𑀼𑀭𑀦𑁆𑀢𑀺 𑀦𑀕𑀭𑀁. 𑀉𑀤𑁆𑀥𑀸𑀧𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀸𑀓𑀸𑀭𑀯𑀢𑁆𑀣𑀼𑀦𑀸 𑀲𑀫𑁆𑀧𑀦𑁆𑀦𑀁. 𑀩𑀳𑀼𑀧𑀸𑀓𑀸𑀭𑀢𑁄𑀭𑀡𑀦𑁆𑀢𑀺 𑀉𑀘𑁆𑀘𑀧𑀸𑀓𑀸𑀭𑀢𑁄𑀭𑀡𑀦𑀕𑀭𑀤𑁆𑀯𑀸𑀭𑁂𑀦 𑀲𑀫𑁆𑀧𑀦𑁆𑀦𑀁. 𑀲𑀺𑀗𑁆𑀖𑀸𑀝𑀓𑁂𑀢𑀺 𑀯𑀻𑀣𑀺𑀘𑀢𑀼𑀓𑁆𑀓𑀸𑀦𑀺. 𑀲𑀼𑀪𑀽𑀫𑀺𑀬𑁄𑀢𑀺 𑀦𑀕𑀭𑀽𑀧𑀘𑀸𑀭𑁂 𑀯𑀺𑀘𑀺𑀢𑁆𑀢𑀸 𑀭𑀫𑀡𑀻𑀬𑀪𑀽𑀫𑀺𑀬𑁄. 𑀏𑀲𑀺𑀓𑀸𑀢𑀺 𑀦𑀕𑀭𑀤𑁆𑀯𑀸𑀭𑁂𑀲𑀼 𑀉𑀝𑁆𑀞𑀸𑀧𑀺𑀢𑁂 𑀏𑀲𑀺𑀓𑀢𑁆𑀣𑀫𑁆𑀪𑁂. 𑀧𑀮𑀺𑀔𑀦𑁆𑀢𑀺 𑀧𑀮𑀺𑀖𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀕𑁆𑀕𑀴𑀸𑀦𑀻𑀢𑀺 𑀦𑀕𑀭𑀤𑁆𑀯𑀸𑀭𑀓𑀯𑀸𑀝𑀸𑀦𑀺. 𑀤𑁆𑀯𑀸𑀭𑁂 𑀘𑀸𑀢𑀺 𑀕𑁄𑀧𑀼𑀭𑀸𑀦𑀺 𑀘.

𑁧𑁩𑁯𑁯.

‘‘𑀧𑀲𑁆𑀲 𑀢𑁄𑀭𑀡𑀫𑀕𑁆𑀕𑁂𑀲𑀼, 𑀦𑀸𑀦𑀸𑀤𑀺𑀚𑀕𑀡𑀸 𑀩𑀳𑀽;

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀘𑀓𑁆𑀓𑀯𑀸𑀓𑀸 𑀘 𑀓𑀼𑀓𑁆𑀓𑀼𑀳𑀸.

𑁧𑁪𑁦𑁦.

‘‘𑀓𑀼𑀡𑀸𑀮𑀓𑀸 𑀩𑀳𑀽 𑀘𑀺𑀢𑁆𑀭𑀸, 𑀲𑀺𑀔𑀡𑁆𑀟𑀻 𑀚𑀻𑀯𑀚𑀻𑀯𑀓𑀸;

𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀢𑁄𑀭𑀡𑀫𑀕𑁆𑀕𑁂𑀲𑀽𑀢𑀺 𑀏𑀢𑀲𑁆𑀫𑀺𑀁 𑀦𑀕𑀭𑁂 𑀢𑁄𑀭𑀡𑀕𑁆𑀕𑁂𑀲𑀼. 𑀓𑀼𑀡𑀸𑀮𑀓𑀸𑀢𑀺 𑀓𑀸𑀴𑀓𑁄𑀓𑀺𑀮𑀸. 𑀘𑀺𑀢𑁆𑀭𑀸𑀢𑀺 𑀘𑀺𑀢𑁆𑀭𑀧𑀢𑁆𑀢𑀓𑁄𑀓𑀺𑀮𑀸.

𑁧𑁪𑁦𑁧.

‘‘𑀧𑀲𑁆𑀲 𑀦𑀕𑀭𑀁 𑀲𑀼𑀧𑀸𑀓𑀸𑀭𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀲𑀫𑀼𑀲𑁆𑀲𑀺𑀢𑀥𑀚𑀁 𑀭𑀫𑁆𑀫𑀁, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀁.

𑁧𑁪𑁦𑁨.

‘‘𑀧𑀲𑁆𑀲𑁂𑀢𑁆𑀣 ¶ 𑀧𑀡𑁆𑀡𑀲𑀸𑀮𑀸𑀬𑁄, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀦𑀺𑀯𑁂𑀲𑀦𑁂 𑀦𑀺𑀯𑁂𑀲𑁂 𑀘, 𑀲𑀦𑁆𑀥𑀺𑀩𑁆𑀬𑀽𑀳𑁂 𑀧𑀣𑀤𑁆𑀥𑀺𑀬𑁄’’𑀢𑀺.

𑀢𑀢𑁆𑀣 𑀲𑀼𑀧𑀸𑀓𑀸𑀭𑀦𑁆𑀢𑀺 𑀓𑀜𑁆𑀘𑀦𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁. 𑀧𑀡𑁆𑀡𑀲𑀸𑀮𑀸𑀬𑁄𑀢𑀺 𑀦𑀸𑀦𑀸𑀪𑀡𑁆𑀟𑀧𑀼𑀡𑁆𑀡𑁂 𑀆𑀧𑀡𑁂. 𑀦𑀺𑀯𑁂𑀲𑀦𑁂 𑀦𑀺𑀯𑁂𑀲𑁂 𑀘𑀸𑀢𑀺 𑀕𑁂𑀳𑀸𑀦𑀺 𑀘𑁂𑀯 𑀕𑁂𑀳𑀯𑀢𑁆𑀣𑀽𑀦𑀺 𑀘. 𑀲𑀦𑁆𑀥𑀺𑀩𑁆𑀬𑀽𑀳𑁂𑀢𑀺 𑀖𑀭𑀲𑀦𑁆𑀥𑀺𑀬𑁄 𑀘 𑀅𑀦𑀺𑀩𑁆𑀩𑀺𑀤𑁆𑀥𑀭𑀘𑁆𑀙𑀸 𑀘. 𑀧𑀣𑀤𑁆𑀥𑀺𑀬𑁄𑀢𑀺 𑀦𑀺𑀩𑁆𑀩𑀺𑀤𑁆𑀥𑀯𑀻𑀣𑀺𑀬𑁄.

𑁧𑁪𑁦𑁩.

‘‘𑀧𑀸𑀦𑀸𑀕𑀸𑀭𑁂 ¶ 𑀘 𑀲𑁄𑀡𑁆𑀟𑁂 𑀘, 𑀲𑀽𑀦𑀸 𑀑𑀤𑀦𑀺𑀬𑀸 𑀖𑀭𑀸;

𑀯𑁂𑀲𑀻 𑀘 𑀕𑀡𑀺𑀓𑀸𑀬𑁄 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁪.

‘‘𑀫𑀸𑀮𑀸𑀓𑀸𑀭𑁂 𑀘 𑀭𑀚𑀓𑁂, 𑀕𑀦𑁆𑀥𑀺𑀓𑁂 𑀅𑀣 𑀤𑀼𑀲𑁆𑀲𑀺𑀓𑁂;

𑀲𑀼𑀯𑀡𑁆𑀡𑀓𑀸𑀭𑁂 𑀫𑀡𑀺𑀓𑀸𑀭𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁫.

‘‘𑀆𑀴𑀸𑀭𑀺𑀓𑁂 𑀘 𑀲𑀽𑀤𑁂 𑀘, 𑀦𑀝𑀦𑀸𑀝𑀓𑀕𑀸𑀬𑀺𑀦𑁄;

𑀧𑀸𑀡𑀺𑀲𑁆𑀲𑀭𑁂 𑀓𑀼𑀫𑁆𑀪𑀣𑀽𑀦𑀺𑀓𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑁄𑀡𑁆𑀟𑁂 𑀘𑀸𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀳𑀺 𑀓𑀡𑁆𑀞𑀓𑀡𑁆𑀡𑀧𑀺𑀮𑀦𑁆𑀥𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀆𑀧𑀸𑀦𑀪𑀽𑀫𑀺𑀁 ¶ 𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀼𑀭𑀸𑀲𑁄𑀡𑁆𑀟𑁂 𑀘. 𑀆𑀴𑀸𑀭𑀺𑀓𑁂𑀢𑀺 𑀧𑀽𑀯𑀧𑀸𑀓𑁂. 𑀲𑀽𑀤𑁂𑀢𑀺 𑀪𑀢𑁆𑀢𑀓𑀸𑀭𑀓𑁂. 𑀧𑀸𑀡𑀺𑀲𑁆𑀲𑀭𑁂𑀢𑀺 𑀧𑀸𑀡𑀺𑀧𑁆𑀧𑀳𑀸𑀭𑁂𑀦 𑀕𑀸𑀬𑀦𑁆𑀢𑁂. 𑀓𑀼𑀫𑁆𑀪𑀣𑀽𑀦𑀺𑀓𑁂𑀢𑀺 𑀖𑀝𑀤𑀤𑁆𑀤𑀭𑀺𑀯𑀸𑀤𑀓𑁂.

𑁧𑁪𑁦𑁬.

‘‘𑀧𑀲𑁆𑀲 𑀪𑁂𑀭𑀻 𑀫𑀼𑀤𑀺𑀗𑁆𑀕𑀸 𑀘, 𑀲𑀗𑁆𑀔𑀸 𑀧𑀡𑀯𑀤𑀺𑀦𑁆𑀤𑀺𑀫𑀸;

𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁭.

‘‘𑀲𑀫𑁆𑀫𑀢𑀸𑀮𑀜𑁆𑀘 𑀯𑀻𑀡𑀜𑁆𑀘, 𑀦𑀘𑁆𑀘𑀕𑀻𑀢𑀁 𑀲𑀼𑀯𑀸𑀤𑀺𑀢𑀁;

𑀢𑀽𑀭𑀺𑀬𑀢𑀸𑀴𑀺𑀢𑀲𑀗𑁆𑀖𑀼𑀝𑁆𑀞𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁮.

‘‘𑀮𑀗𑁆𑀖𑀺𑀓𑀸 𑀫𑀼𑀝𑁆𑀞𑀺𑀓𑀸 𑀘𑁂𑀢𑁆𑀣, 𑀫𑀸𑀬𑀸𑀓𑀸𑀭𑀸 𑀘 𑀲𑁄𑀪𑀺𑀬𑀸;

𑀯𑁂𑀢𑀸𑀮𑀺𑀓𑁂 𑀘 𑀚𑀮𑁆𑀮𑁂 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀫𑁆𑀫𑀢𑀸𑀮𑀜𑁆𑀘𑀸𑀢𑀺 𑀔𑀤𑀺𑀭𑀸𑀤𑀺𑀲𑀫𑁆𑀫𑀜𑁆𑀘𑁂𑀯 𑀓𑀁𑀲𑀢𑀸𑀮𑀜𑁆𑀘. 𑀢𑀽𑀭𑀺𑀬𑀢𑀸𑀴𑀺𑀢𑀲𑀗𑁆𑀖𑀼𑀝𑁆𑀞𑀦𑁆𑀢𑀺 𑀦𑀸𑀦𑀸𑀢𑀽𑀭𑀺𑀬𑀸𑀦𑀁 ¶ 𑀢𑀸𑀴𑀺𑀢𑁂𑀳𑀺 𑀲𑀗𑁆𑀖𑀼𑀝𑁆𑀞𑀁. 𑀫𑀼𑀝𑁆𑀞𑀺𑀓𑀸𑀢𑀺 𑀫𑀼𑀝𑁆𑀞𑀺𑀓𑀫𑀮𑁆𑀮𑀸. 𑀲𑁄𑀪𑀺𑀬𑀸𑀢𑀺 𑀦𑀕𑀭𑀲𑁄𑀪𑀦𑀸 𑀇𑀢𑁆𑀣𑀻 𑀘 𑀲𑀫𑁆𑀧𑀦𑁆𑀦𑀭𑀽𑀧𑀸 𑀧𑀼𑀭𑀺𑀲𑀸 𑀘. 𑀯𑁂𑀢𑀸𑀮𑀺𑀓𑁂𑀢𑀺 𑀯𑁂𑀢𑀸𑀮𑀉𑀝𑁆𑀞𑀸𑀧𑀓𑁂. 𑀚𑀮𑁆𑀮𑁂𑀢𑀺 𑀫𑀲𑁆𑀲𑀽𑀦𑀺 𑀓𑀭𑁄𑀦𑁆𑀢𑁂 𑀦𑁆𑀳𑀸𑀧𑀺𑀢𑁂.

𑁧𑁪𑁦𑁯.

‘‘𑀲𑀫𑀚𑁆𑀚𑀸 𑀘𑁂𑀢𑁆𑀣 𑀯𑀢𑁆𑀢𑀦𑁆𑀢𑀺, 𑀆𑀓𑀺𑀡𑁆𑀡𑀸 𑀦𑀭𑀦𑀸𑀭𑀺𑀪𑀺;

𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀪𑀽𑀫𑀺𑀬𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀫𑀜𑁆𑀘𑀸𑀢𑀺𑀫𑀜𑁆𑀘𑁂𑀢𑀺 𑀫𑀜𑁆𑀘𑀸𑀦𑀁 𑀉𑀧𑀭𑀺 𑀩𑀤𑁆𑀥𑀫𑀜𑁆𑀘𑁂. 𑀪𑀽𑀫𑀺𑀬𑁄𑀢𑀺 𑀭𑀫𑀡𑀻𑀬𑀸 𑀲𑀫𑀚𑁆𑀚𑀪𑀽𑀫𑀺𑀬𑁄.

𑁧𑁪𑁧𑁦.

‘‘𑀧𑀲𑁆𑀲 ¶ 𑀫𑀮𑁆𑀮𑁂 𑀲𑀫𑀚𑁆𑀚𑀲𑁆𑀫𑀺𑀁, 𑀨𑁄𑀝𑁂𑀦𑁆𑀢𑁂 𑀤𑀺𑀕𑀼𑀡𑀁 𑀪𑀼𑀚𑀁;

𑀦𑀺𑀳𑀢𑁂 𑀦𑀺𑀳𑀢𑀫𑀸𑀦𑁂 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀫𑀚𑁆𑀚𑀲𑁆𑀫𑀺𑀦𑁆𑀢𑀺 𑀫𑀮𑁆𑀮𑀭𑀗𑁆𑀕𑁂. 𑀦𑀺𑀳𑀢𑁂𑀢𑀺 𑀦𑀺𑀳𑀦𑀺𑀢𑁆𑀯𑀸 𑀚𑀺𑀦𑀺𑀢𑁆𑀯𑀸 𑀞𑀺𑀢𑁂. 𑀦𑀺𑀳𑀢𑀫𑀸𑀦𑁂𑀢𑀺 𑀧𑀭𑀸𑀚𑀺𑀢𑁂.

𑁧𑁪𑁧𑁧.

‘‘𑀧𑀲𑁆𑀲 𑀧𑀩𑁆𑀩𑀢𑀧𑀸𑀤𑁂𑀲𑀼, 𑀦𑀸𑀦𑀸𑀫𑀺𑀕𑀕𑀡𑀸 𑀩𑀳𑀽;

𑀲𑀻𑀳𑀸 𑀩𑁆𑀬𑀕𑁆𑀖𑀸 𑀯𑀭𑀸𑀳𑀸 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀬𑁄.

𑁧𑁪𑁧𑁨.

‘‘𑀧𑀮𑀸𑀲𑀸𑀤𑀸 𑀕𑀯𑀚𑀸 𑀘, 𑀫𑀳𑀺𑀁𑀲𑀸 𑀭𑁄𑀳𑀺𑀢𑀸 𑀭𑀼𑀭𑀽;

𑀏𑀡𑁂𑀬𑁆𑀬𑀸 𑀘 𑀯𑀭𑀸𑀳𑀸 𑀘, 𑀕𑀡𑀺𑀦𑁄 𑀦𑀻𑀓𑀲𑀽𑀓𑀭𑀸.

𑁧𑁪𑁧𑁩.

‘‘𑀓𑀤𑀮𑀺𑀫𑀺𑀕𑀸 𑀩𑀳𑀽 𑀘𑀺𑀢𑁆𑀭𑀸, 𑀩𑀺𑀴𑀸𑀭𑀸 𑀲𑀲𑀓𑀡𑁆𑀝𑀓𑀸;

𑀦𑀸𑀦𑀸𑀫𑀺𑀕𑀕𑀡𑀸𑀓𑀺𑀡𑁆𑀡𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀧𑀮𑀸𑀲𑀸𑀤𑀸𑀢𑀺 𑀔𑀕𑁆𑀕𑀫𑀺𑀕𑀸. ‘‘𑀧𑀮𑀢𑀸’’𑀢𑀺𑀧𑀺 𑀧𑀸𑀞𑁄. 𑀕𑀯𑀚𑀸𑀢𑀺 𑀕𑀯𑀬𑀸. 𑀯𑀭𑀸𑀳𑀸𑀢𑀺 𑀏𑀓𑀸 𑀫𑀺𑀕𑀚𑀸𑀢𑀺𑀓𑀸. 𑀢𑀣𑀸 𑀕𑀡𑀺𑀦𑁄 𑀘𑁂𑀯 𑀦𑀻𑀓𑀲𑀽𑀓𑀭𑀸 𑀘. 𑀩𑀳𑀽 𑀘𑀺𑀢𑁆𑀭𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀸 𑀘𑀺𑀢𑁆𑀭𑀸 𑀫𑀺𑀕𑀸. 𑀩𑀺𑀴𑀸𑀭𑀸𑀢𑀺 𑀅𑀭𑀜𑁆𑀜𑀩𑀺𑀴𑀸𑀭𑀸. 𑀲𑀲𑀓𑀡𑁆𑀝𑀓𑀸𑀢𑀺 𑀲𑀲𑀸 𑀘 𑀓𑀡𑁆𑀝𑀓𑀸 𑀘.

𑁧𑁪𑁧𑁪.

‘‘𑀦𑀚𑁆𑀚𑀸𑀬𑁄 ¶ 𑀲𑀼𑀧𑁆𑀧𑀢𑀺𑀢𑁆𑀣𑀸𑀬𑁄, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸;

𑀅𑀘𑁆𑀙𑀸 𑀲𑀯𑀦𑁆𑀢𑀺 𑀅𑀫𑁆𑀩𑀽𑀦𑀺, 𑀫𑀘𑁆𑀙𑀕𑀼𑀫𑁆𑀩𑀦𑀺𑀲𑁂𑀯𑀺𑀢𑀸.

𑁧𑁪𑁧𑁫.

‘‘𑀓𑀼𑀫𑁆𑀪𑀻𑀮𑀸 ¶ 𑀫𑀓𑀭𑀸 𑀘𑁂𑀢𑁆𑀣, 𑀲𑀼𑀲𑀼𑀫𑀸𑀭𑀸 𑀘 𑀓𑀘𑁆𑀙𑀧𑀸;

𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀘𑀭𑁄𑀳𑀺𑀢𑀸’’𑀢𑀺.

𑀢𑀢𑁆𑀣 𑀦𑀚𑁆𑀚𑀸𑀬𑁄𑀢𑀺 𑀦𑀤𑀺𑀬𑁄. 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸𑀢𑀺 𑀲𑀼𑀯𑀡𑁆𑀡𑀯𑀸𑀮𑀼𑀓𑀸𑀬 𑀲𑀦𑁆𑀣𑀢𑀢𑀮𑀸. 𑀓𑀼𑀫𑁆𑀪𑀻𑀮𑀸𑀢𑀺 𑀇𑀫𑁂 𑀏𑀯𑀭𑀽𑀧𑀸 𑀚𑀮𑀘𑀭𑀸 𑀅𑀦𑁆𑀢𑁄𑀦𑀤𑀺𑀬𑀁 𑀯𑀺𑀘𑀭𑀦𑁆𑀢𑀺, 𑀢𑁂𑀧𑀺 𑀫𑀡𑀺𑀫𑁆𑀳𑀺 𑀧𑀲𑁆𑀲𑀸𑀳𑀻𑀢𑀺.

𑁧𑁪𑁧𑁬.

‘‘𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀦𑀸𑀦𑀸𑀤𑀼𑀫𑀕𑀡𑀸𑀬𑀼𑀢𑀸;

𑀯𑁂𑀴𑀼𑀭𑀺𑀬𑀓𑀭𑁄𑀤𑀸𑀬𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 ¶ 𑀯𑁂𑀴𑀼𑀭𑀺𑀬𑀓𑀭𑁄𑀤𑀸𑀬𑁄𑀢𑀺 𑀯𑁂𑀴𑀼𑀭𑀺𑀬𑀧𑀸𑀲𑀸𑀡𑁂 𑀧𑀳𑀭𑀺𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑁄 𑀏𑀯𑀭𑀽𑀧𑀸 𑀦𑀚𑁆𑀚𑀸𑀬𑁄𑀢𑀺.

𑁧𑁪𑁧𑁭.

‘‘𑀧𑀲𑁆𑀲𑁂𑀢𑁆𑀣 𑀧𑁄𑀓𑁆𑀔𑀭𑀡𑀺𑀬𑁄, 𑀲𑀼𑀯𑀺𑀪𑀢𑁆𑀢𑀸 𑀘𑀢𑀼𑀤𑁆𑀤𑀺𑀲𑀸;

𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸.

𑁧𑁪𑁧𑁮.

‘‘𑀲𑀫𑀦𑁆𑀢𑁄𑀤𑀓𑀲𑀫𑁆𑀧𑀦𑁆𑀦𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀉𑀧𑁂𑀢𑀁 𑀯𑀦𑀭𑀸𑀚𑁂𑀳𑀺, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸𑀢𑀺 𑀫𑀳𑀸𑀫𑀘𑁆𑀙𑁂𑀳𑀺 𑀦𑀺𑀲𑁂𑀯𑀺𑀢𑀸. 𑀯𑀦𑀭𑀸𑀚𑁂𑀳𑀻𑀢𑀺 𑀯𑀦𑀭𑀸𑀚𑀻𑀳𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑁧𑁪𑁧𑁯.

‘‘𑀧𑀼𑀭𑀢𑁄 𑀯𑀺𑀤𑁂𑀳𑁂 𑀧𑀲𑁆𑀲, 𑀕𑁄𑀬𑀸𑀦𑀺𑀬𑁂 𑀘 𑀧𑀘𑁆𑀙𑀢𑁄;

𑀓𑀼𑀭𑀼𑀬𑁄 𑀚𑀫𑁆𑀩𑀼𑀤𑀻𑀧𑀜𑁆𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁦.

‘‘𑀧𑀲𑁆𑀲 𑀘𑀦𑁆𑀤𑀁 𑀲𑀽𑀭𑀺𑀬𑀜𑁆𑀘, 𑀑𑀪𑀸𑀲𑀦𑁆𑀢𑁂 𑀘𑀢𑀼𑀤𑁆𑀤𑀺𑀲𑀸;

𑀲𑀺𑀦𑁂𑀭𑀼𑀁 𑀅𑀦𑀼𑀧𑀭𑀺𑀬𑀦𑁆𑀢𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁧.

‘‘𑀲𑀺𑀦𑁂𑀭𑀼𑀁 𑀳𑀺𑀫𑀯𑀦𑁆𑀢𑀜𑁆𑀘, 𑀲𑀸𑀕𑀭𑀜𑁆𑀘 𑀫𑀳𑀻𑀢𑀮𑀁;

𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁨.

‘‘𑀆𑀭𑀸𑀫𑁂 ¶ 𑀯𑀦𑀕𑀼𑀫𑁆𑀩𑁂 𑀘, 𑀧𑀸𑀝𑀺𑀬𑁂 𑀘 𑀲𑀺𑀮𑀼𑀘𑁆𑀘𑀬𑁂;

𑀭𑀫𑁆𑀫𑁂 𑀓𑀺𑀫𑁆𑀧𑀼𑀭𑀺𑀲𑀸𑀓𑀺𑀡𑁆𑀡𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁩.

‘‘𑀨𑀸𑀭𑀼𑀲𑀓𑀁 𑀘𑀺𑀢𑁆𑀢𑀮𑀢𑀁, 𑀫𑀺𑀲𑁆𑀲𑀓𑀁 𑀦𑀦𑁆𑀤𑀦𑀁 𑀯𑀦𑀁;

𑀯𑁂𑀚𑀬𑀦𑁆𑀢𑀜𑁆𑀘 𑀧𑀸𑀲𑀸𑀤𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁪.

‘‘𑀲𑀼𑀥𑀫𑁆𑀫𑀁 𑀢𑀸𑀯𑀢𑀺𑀁𑀲𑀜𑁆𑀘, 𑀧𑀸𑀭𑀺𑀙𑀢𑁆𑀢𑀜𑁆𑀘 𑀧𑀼𑀧𑁆𑀨𑀺𑀢𑀁;

𑀏𑀭𑀸𑀯𑀡𑀁 𑀦𑀸𑀕𑀭𑀸𑀚𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁫.

‘‘𑀧𑀲𑁆𑀲𑁂𑀢𑁆𑀣 𑀤𑁂𑀯𑀓𑀜𑁆𑀜𑀸𑀬𑁄, 𑀦𑀪𑀸 𑀯𑀺𑀚𑁆𑀚𑀼𑀭𑀺𑀯𑀼𑀕𑁆𑀕𑀢𑀸;

𑀦𑀦𑁆𑀤𑀦𑁂 𑀯𑀺𑀘𑀭𑀦𑁆𑀢𑀺𑀬𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁬.

‘‘𑀧𑀲𑁆𑀲𑁂𑀢𑁆𑀣 ¶ ¶ 𑀤𑁂𑀯𑀓𑀜𑁆𑀜𑀸𑀬𑁄, 𑀤𑁂𑀯𑀧𑀼𑀢𑁆𑀢𑀧𑀮𑁄𑀪𑀺𑀦𑀻;

𑀤𑁂𑀯𑀧𑀼𑀢𑁆𑀢𑁂 𑀭𑀫𑀫𑀸𑀦𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢’’𑀦𑁆𑀢𑀺.

𑀢𑀢𑁆𑀣 𑀯𑀺𑀤𑁂𑀳𑁂𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑀁. 𑀕𑁄𑀬𑀸𑀦𑀺𑀬𑁂𑀢𑀺 𑀅𑀧𑀭𑀕𑁄𑀬𑀸𑀦𑀤𑀻𑀧𑀁. 𑀓𑀼𑀭𑀼𑀬𑁄𑀢𑀺 𑀉𑀢𑁆𑀢𑀭𑀓𑀼𑀭𑀼 𑀘 𑀤𑀓𑁆𑀔𑀺𑀡𑀢𑁄 𑀚𑀫𑁆𑀩𑀼𑀤𑀻𑀧𑀜𑁆𑀘. 𑀅𑀦𑀼𑀧𑀭𑀺𑀬𑀦𑁆𑀢𑁂𑀢𑀺 𑀏𑀢𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀲𑀺𑀦𑁂𑀭𑀼𑀁 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂. 𑀧𑀸𑀝𑀺𑀬𑁂𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑁂 𑀯𑀺𑀬 𑀧𑀺𑀝𑁆𑀞𑀺𑀧𑀸𑀲𑀸𑀡𑁂.

𑁧𑁪𑁨𑁭.

‘‘𑀧𑀭𑁄𑀲𑀳𑀲𑁆𑀲𑀧𑀸𑀲𑀸𑀤𑁂, 𑀯𑁂𑀴𑀼𑀭𑀺𑀬𑀨𑀮𑀲𑀦𑁆𑀣𑀢𑁂;

𑀧𑀚𑁆𑀚𑀮𑀦𑁆𑀢𑁂 𑀘 𑀯𑀡𑁆𑀡𑁂𑀦, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁮.

‘‘𑀢𑀸𑀯𑀢𑀺𑀁𑀲𑁂 𑀘 𑀬𑀸𑀫𑁂 𑀘, 𑀢𑀼𑀲𑀺𑀢𑁂 𑀘𑀸𑀧𑀺 𑀦𑀺𑀫𑁆𑀫𑀺𑀢𑁂;

𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁨𑁯.

‘‘𑀧𑀲𑁆𑀲𑁂𑀢𑁆𑀣 𑀧𑁄𑀓𑁆𑀔𑀭𑀡𑀺𑀬𑁄, 𑀯𑀺𑀧𑁆𑀧𑀲𑀦𑁆𑀦𑁄𑀤𑀺𑀓𑀸 𑀲𑀼𑀘𑀻;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘𑀸’’𑀢𑀺.

𑀢𑀢𑁆𑀣 𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀅𑀢𑀺𑀭𑁂𑀓𑀲𑀳𑀲𑁆𑀲𑀧𑀸𑀲𑀸𑀤𑁂.

𑁧𑁪𑁩𑁦.

‘‘𑀤𑀲𑁂𑀢𑁆𑀣 ¶ 𑀭𑀸𑀚𑀺𑀬𑁄 𑀲𑁂𑀢𑀸, 𑀤𑀲 𑀦𑀻𑀮𑀸 𑀫𑀦𑁄𑀭𑀫𑀸;

𑀙 𑀧𑀺𑀗𑁆𑀕𑀮𑀸 𑀧𑀦𑁆𑀦𑀭𑀲, 𑀳𑀮𑀺𑀤𑁆𑀤𑀸 𑀘 𑀘𑀢𑀼𑀤𑁆𑀤𑀲.

𑁧𑁪𑁩𑁧.

‘‘𑀯𑀻𑀲𑀢𑀺 𑀢𑀢𑁆𑀣 𑀲𑁄𑀯𑀡𑁆𑀡𑀸, 𑀯𑀻𑀲𑀢𑀺 𑀭𑀚𑀢𑀸𑀫𑀬𑀸;

𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸, 𑀢𑀸𑀯 𑀤𑀺𑀲𑁆𑀲𑀦𑁆𑀢𑀺 𑀢𑀺𑀁𑀲𑀢𑀺.

𑁧𑁪𑁩𑁨.

‘‘𑀤𑀲𑁂𑀢𑁆𑀣 𑀓𑀸𑀴𑀺𑀬𑁄 𑀙𑀘𑁆𑀘, 𑀫𑀜𑁆𑀚𑁂𑀝𑁆𑀞𑀸 𑀧𑀦𑁆𑀦𑀯𑀻𑀲𑀢𑀺;

𑀫𑀺𑀲𑁆𑀲𑀸 𑀩𑀦𑁆𑀥𑀼𑀓𑀧𑀼𑀧𑁆𑀨𑁂𑀳𑀺, 𑀦𑀻𑀮𑀼𑀧𑁆𑀧𑀮𑀯𑀺𑀘𑀺𑀢𑁆𑀢𑀺𑀓𑀸.

𑁧𑁪𑁩𑁩.

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀅𑀘𑁆𑀘𑀺𑀫𑀦𑁆𑀢𑀁 𑀧𑀪𑀲𑁆𑀲𑀭𑀁;

𑀑𑀥𑀺𑀲𑀼𑀗𑁆𑀓𑀁 𑀫𑀳𑀸𑀭𑀸𑀚, 𑀧𑀲𑁆𑀲 𑀢𑁆𑀯𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀸’’𑀢𑀺.

𑀢𑀢𑁆𑀣 𑀤𑀲𑁂𑀢𑁆𑀣 𑀭𑀸𑀚𑀺𑀬𑁄 𑀲𑁂𑀢𑀸𑀢𑀺 𑀏𑀢𑀲𑁆𑀫𑀺𑀁 𑀫𑀡𑀺𑀓𑁆𑀔𑀦𑁆𑀥𑁂 𑀤𑀲 𑀲𑁂𑀢𑀭𑀸𑀚𑀺𑀬𑁄. 𑀙 𑀧𑀺𑀗𑁆𑀕𑀮𑀸 𑀧𑀦𑁆𑀦𑀭𑀲𑀸𑀢𑀺 𑀙 𑀘 𑀧𑀦𑁆𑀦𑀭𑀲 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀧𑀺𑀗𑁆𑀕𑀮𑀭𑀸𑀚𑀺𑀬𑁄 ¶ . 𑀳𑀮𑀺𑀤𑁆𑀤𑀸𑀢𑀺 𑀳𑀮𑀺𑀤𑁆𑀤𑀯𑀡𑁆𑀡𑀸 𑀘𑀢𑀼𑀤𑁆𑀤𑀲. 𑀢𑀺𑀁𑀲𑀢𑀻𑀢𑀺 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸 𑀢𑀺𑀁𑀲 𑀭𑀸𑀚𑀺𑀬𑁄. 𑀤𑀲 𑀙𑀘𑁆𑀘𑀸𑀢𑀺 𑀤𑀲 𑀘 𑀙 𑀘 𑀲𑁄𑀴𑀲 𑀓𑀸𑀴𑀭𑀸𑀚𑀺𑀬𑁄. 𑀧𑀦𑁆𑀦𑀯𑀻𑀲𑀢𑀻𑀢𑀺 𑀧𑀜𑁆𑀘𑀯𑀻𑀲𑀢𑀺 𑀫𑀜𑁆𑀚𑁂𑀝𑁆𑀞𑀯𑀡𑁆𑀡𑀸 𑀧𑀪𑀲𑁆𑀲𑀭𑀸. 𑀫𑀺𑀲𑁆𑀲𑀸 𑀩𑀦𑁆𑀥𑀼𑀓𑀧𑀼𑀧𑁆𑀨𑁂𑀳𑀻𑀢𑀺 𑀓𑀸𑀴𑀫𑀜𑁆𑀚𑁂𑀝𑁆𑀞𑀯𑀡𑁆𑀡𑀭𑀸𑀚𑀺𑀬𑁄 𑀏𑀢𑁂𑀳𑀺 𑀫𑀺𑀲𑁆𑀲𑀸 𑀯𑀺𑀘𑀺𑀢𑁆𑀢𑀺𑀓𑀸 𑀧𑀲𑁆𑀲. 𑀏𑀢𑁆𑀣 𑀳𑀺 𑀓𑀸𑀴𑀭𑀸𑀚𑀺𑀬𑁄 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑁂𑀳𑀺 𑀫𑀺𑀲𑁆𑀲𑀸, 𑀫𑀜𑁆𑀚𑁂𑀝𑁆𑀞𑀭𑀸𑀚𑀺𑀬𑁄 𑀦𑀻𑀮𑀼𑀧𑁆𑀧𑀮𑁂𑀳𑀺 𑀯𑀺𑀘𑀺𑀢𑁆𑀢𑀺𑀓𑀸. 𑀑𑀥𑀺𑀲𑀼𑀗𑁆𑀓𑀦𑁆𑀢𑀺 𑀲𑀼𑀗𑁆𑀓𑀓𑁄𑀝𑁆𑀞𑀸𑀲𑀁. 𑀬𑁄 𑀫𑀁 𑀚𑀽𑀢𑁂 𑀚𑀺𑀦𑀺𑀲𑁆𑀲𑀢𑀺, 𑀢𑀲𑁆𑀲𑀺𑀫𑀁 𑀲𑀼𑀗𑁆𑀓𑀓𑁄𑀝𑁆𑀞𑀸𑀲𑀁 𑀧𑀲𑁆𑀲𑀸𑀢𑀺 𑀯𑀤𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀳𑁄𑀢𑀼 𑀲𑀼𑀗𑁆𑀓𑀁, 𑀫𑀳𑀸𑀭𑀸𑀚𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀤𑁆𑀯𑀺𑀧𑀤𑀼𑀢𑁆𑀢𑀫 𑀧𑀲𑁆𑀲 𑀢𑁆𑀯𑀁 𑀇𑀫𑀁 𑀏𑀯𑀭𑀽𑀧𑀁 𑀫𑀡𑀺𑀓𑁆𑀔𑀦𑁆𑀥𑀁, 𑀇𑀤𑀫𑁂𑀯, 𑀫𑀳𑀸𑀭𑀸𑀚, 𑀲𑀼𑀗𑁆𑀓𑀁 𑀳𑁄𑀢𑀼. 𑀬𑁄 𑀫𑀁 𑀚𑀽𑀢𑁂 𑀚𑀺𑀦𑀺𑀲𑁆𑀲𑀢𑀺, 𑀢𑀲𑁆𑀲𑀺𑀤𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀫𑀡𑀺𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀅𑀓𑁆𑀔𑀓𑀡𑁆𑀟𑀁

𑀏𑀯𑀁 ¶ 𑀯𑀢𑁆𑀯𑀸 𑀧𑀼𑀡𑁆𑀡𑀓𑁄 ‘‘𑀫𑀳𑀸𑀭𑀸𑀚, 𑀅𑀳𑀁 𑀢𑀸𑀯 𑀚𑀽𑀢𑁂 𑀧𑀭𑀸𑀚𑀺𑀢𑁄 𑀇𑀫𑀁 𑀫𑀡𑀺𑀭𑀢𑀦𑀁 𑀤𑀲𑁆𑀲𑀸𑀫𑀺, 𑀢𑁆𑀯𑀁 𑀧𑀦 𑀓𑀺𑀁 𑀤𑀲𑁆𑀲𑀲𑀻’’𑀢𑀺 𑀆𑀳. ‘‘𑀢𑀸𑀢, 𑀫𑀫 𑀲𑀭𑀻𑀭𑀜𑁆𑀘 𑀤𑁂𑀯𑀺𑀜𑁆𑀘 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀫𑀫 𑀲𑀦𑁆𑀢𑀓𑀁 𑀲𑀼𑀗𑁆𑀓𑀁 𑀳𑁄𑀢𑀽’’𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀫𑀸 𑀘𑀺𑀭𑀸𑀬𑀺, 𑀅𑀳𑀁 𑀤𑀽𑀭𑀸𑀕𑀢𑁄, 𑀔𑀺𑀧𑁆𑀧𑀁 𑀚𑀽𑀢𑀫𑀡𑁆𑀟𑀮𑀁 𑀲𑀚𑁆𑀚𑀸𑀧𑁂𑀳𑀻’’𑀢𑀺. 𑀭𑀸𑀚𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀢𑁂 𑀔𑀺𑀧𑁆𑀧𑀁 𑀚𑀽𑀢𑀫𑀡𑁆𑀟𑀮𑀁 𑀲𑀚𑁆𑀚𑁂𑀢𑁆𑀯𑀸 ¶ 𑀭𑀜𑁆𑀜𑁄 𑀯𑀭𑀧𑁄𑀢𑁆𑀣𑀓𑀢𑁆𑀣𑀭𑀡𑀁 𑀲𑀦𑁆𑀣𑀭𑀺𑀢𑁆𑀯𑀸 𑀲𑁂𑀲𑀭𑀸𑀚𑀽𑀦𑀜𑁆𑀘𑀸𑀧𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀧𑀼𑀡𑁆𑀡𑀓𑀲𑁆𑀲𑀧𑀺 𑀧𑀢𑀺𑀭𑀽𑀧𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀭𑀜𑁆𑀜𑁄 𑀓𑀸𑀮𑀁 𑀆𑀭𑁄𑀘𑀬𑀺𑀁𑀲𑀼. 𑀢𑀢𑁄 𑀧𑀼𑀡𑁆𑀡𑀓𑁄 𑀭𑀸𑀚𑀸𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁧𑁪𑁩𑁪.

‘‘𑀉𑀧𑀸𑀕𑀢𑀁 𑀭𑀸𑀚 𑀫𑀼𑀧𑁂𑀳𑀺 𑀮𑀓𑁆𑀔𑀁, 𑀦𑁂𑀢𑀸𑀤𑀺𑀲𑀁 𑀫𑀡𑀺𑀭𑀢𑀦𑀁 𑀢𑀯𑀢𑁆𑀣𑀺;

𑀥𑀫𑁆𑀫𑁂𑀦 𑀚𑀺𑀲𑁆𑀲𑀸𑀫 𑀅𑀲𑀸𑀳𑀲𑁂𑀦, 𑀚𑀺𑀢𑁄 𑀘 𑀦𑁄 𑀔𑀺𑀧𑁆𑀧𑀫𑀯𑀸𑀓𑀭𑁄𑀳𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀭𑀸𑀚, 𑀚𑀽𑀢𑀲𑀸𑀮𑀸𑀬 𑀓𑀫𑁆𑀫𑀁 𑀉𑀧𑀸𑀕𑀢𑀁 𑀦𑀺𑀝𑁆𑀞𑀺𑀢𑀁, 𑀏𑀢𑀸𑀤𑀺𑀲𑀁 𑀫𑀡𑀺𑀭𑀢𑀦𑀁 𑀢𑀯 𑀦𑀢𑁆𑀣𑀺, 𑀫𑀸 𑀧𑀧𑀜𑁆𑀘𑀁 𑀓𑀭𑁄𑀳𑀺, 𑀉𑀧𑁂𑀳𑀺 𑀮𑀓𑁆𑀔𑀁 𑀅𑀓𑁆𑀔𑁂𑀳𑀺 𑀓𑀻𑀴𑀦𑀝𑁆𑀞𑀸𑀦𑀁 ¶ 𑀉𑀧𑀕𑀘𑁆𑀙. 𑀓𑀻𑀴𑀦𑁆𑀢𑀸 𑀘 𑀫𑀬𑀁 𑀥𑀫𑁆𑀫𑁂𑀦 𑀚𑀺𑀲𑁆𑀲𑀸𑀫, 𑀥𑀫𑁆𑀫𑁂𑀦𑁂𑀯 𑀦𑁄 𑀅𑀲𑀸𑀳𑀲𑁂𑀦 𑀚𑀬𑁄 𑀳𑁄𑀢𑀼. 𑀲𑀘𑁂 𑀧𑀦 𑀢𑁆𑀯𑀁 𑀚𑀺𑀢𑁄 𑀪𑀯𑀺𑀲𑁆𑀲𑀲𑀺, 𑀅𑀣 𑀦𑁄 𑀔𑀺𑀧𑁆𑀧𑀫𑀯𑀸𑀓𑀭𑁄𑀳𑀺, 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸𑀯 𑀚𑀺𑀢𑁄 𑀥𑀦𑀁 𑀤𑀤𑁂𑀬𑁆𑀬𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀦𑀁 𑀭𑀸𑀚𑀸 ‘‘𑀫𑀸𑀡𑀯, 𑀢𑁆𑀯𑀁 𑀫𑀁 ‘𑀭𑀸𑀚𑀸’𑀢𑀺 𑀫𑀸 𑀪𑀸𑀬𑀺, 𑀥𑀫𑁆𑀫𑁂𑀦𑁂𑀯 𑀦𑁄 𑀅𑀲𑀸𑀳𑀲𑁂𑀦 𑀚𑀬𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀧𑀼𑀡𑁆𑀡𑀓𑁄 ‘‘𑀅𑀫𑁆𑀳𑀸𑀓𑀁 𑀥𑀫𑁆𑀫𑁂𑀦𑁂𑀯 𑀚𑀬𑀧𑀭𑀸𑀚𑀬𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀢𑁂𑀧𑀺 𑀭𑀸𑀚𑀸𑀦𑁄 𑀲𑀓𑁆𑀔𑀺𑀁 𑀓𑀭𑁄𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁪𑁩𑁫.

‘‘𑀧𑀜𑁆𑀘𑀸𑀮 𑀧𑀘𑁆𑀘𑀼𑀕𑁆𑀕𑀢 𑀲𑀽𑀭𑀲𑁂𑀦, 𑀫𑀘𑁆𑀙𑀸 𑀘 𑀫𑀤𑁆𑀤𑀸 𑀲𑀳 𑀓𑁂𑀓𑀓𑁂𑀪𑀺;

𑀧𑀲𑁆𑀲𑀦𑁆𑀢𑀼 𑀦𑁄𑀢𑁂 𑀅𑀲𑀞𑁂𑀦 𑀬𑀼𑀤𑁆𑀥𑀁, 𑀦 𑀦𑁄 𑀲𑀪𑀸𑀬𑀁 𑀦 𑀓𑀭𑁄𑀦𑁆𑀢𑀺 𑀓𑀺𑀜𑁆𑀘𑀻’’𑀢𑀺.

𑀢𑀢𑁆𑀣 𑀧𑀘𑁆𑀘𑀼𑀕𑁆𑀕𑀢𑀸𑀢𑀺 𑀉𑀕𑁆𑀕𑀢𑀢𑁆𑀢𑀸 𑀧𑀜𑁆𑀜𑀸𑀢𑀢𑁆𑀢𑀸 𑀧𑀸𑀓𑀝𑀢𑁆𑀢𑀸 𑀧𑀜𑁆𑀘𑀸𑀮𑀭𑀸𑀚𑀸𑀦𑀫𑁂𑀯𑀸𑀮𑀧𑀢𑀺. 𑀫𑀘𑁆𑀙𑀸 𑀘𑀸𑀢𑀺 𑀢𑁆𑀯𑀜𑁆𑀘, 𑀲𑀫𑁆𑀫 𑀫𑀘𑁆𑀙𑀭𑀸𑀚. 𑀫𑀤𑁆𑀤𑀸𑀢𑀺 𑀫𑀤𑁆𑀤𑀭𑀸𑀚. 𑀲𑀳 𑀓𑁂𑀓𑀓𑁂𑀪𑀻𑀢𑀺 𑀓𑁂𑀓𑀓𑁂𑀪𑀺𑀦𑀸𑀫𑁂𑀦 𑀚𑀦𑀧𑀤𑁂𑀦 𑀲𑀳 𑀯𑀢𑁆𑀢𑀫𑀸𑀦𑀓𑁂𑀓𑀓𑁂𑀪𑀺𑀭𑀸𑀚, 𑀢𑁆𑀯𑀜𑁆𑀘. 𑀅𑀣 𑀯𑀸 ¶ 𑀲𑀳𑀲𑀤𑁆𑀤𑀁 ‘‘𑀓𑁂𑀓𑀓𑁂𑀪𑀻’’𑀢𑀺 𑀧𑀤𑀲𑁆𑀲 𑀧𑀘𑁆𑀙𑀢𑁄 𑀞𑀧𑁂𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀢𑀲𑀤𑁆𑀤𑀜𑁆𑀘 𑀲𑀽𑀭𑀲𑁂𑀦𑀯𑀺𑀲𑁂𑀲𑀦𑀁 𑀓𑀢𑁆𑀯𑀸 𑀧𑀜𑁆𑀘𑀸𑀮𑀧𑀘𑁆𑀘𑀼𑀕𑁆𑀕𑀢𑀲𑀽𑀭𑀲𑁂𑀦 𑀫𑀘𑁆𑀙𑀸 𑀘 𑀫𑀤𑁆𑀤𑀸 𑀘 𑀓𑁂𑀓𑀓𑁂𑀪𑀺 𑀲𑀳 𑀲𑁂𑀲𑀭𑀸𑀚𑀸𑀦𑁄 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀲𑁆𑀲𑀦𑁆𑀢𑀼 𑀦𑁄𑀢𑁂𑀢𑀺 𑀅𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀁 𑀏𑀢𑁂 𑀭𑀸𑀚𑀸𑀦𑁄 𑀅𑀲𑀞𑁂𑀦 𑀅𑀓𑁆𑀔𑀬𑀼𑀤𑁆𑀥𑀁 𑀧𑀲𑁆𑀲𑀦𑁆𑀢𑀼. 𑀦 𑀦𑁄 𑀲𑀪𑀸𑀬𑀁 𑀦 𑀓𑀭𑁄𑀦𑁆𑀢𑀺 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀲𑀪𑀸𑀬𑀁 𑀓𑀺𑀜𑁆𑀘𑀺 𑀲𑀓𑁆𑀔𑀺𑀁 𑀦 𑀦 𑀓𑀭𑁄𑀦𑁆𑀢𑀺, 𑀔𑀢𑁆𑀢𑀺𑀬𑁂𑀧𑀺 𑀩𑁆𑀭𑀸𑀳𑁆𑀫𑀡𑁂𑀧𑀺 𑀓𑀭𑁄𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀲𑀘𑁂 𑀓𑀺𑀜𑁆𑀘𑀺 𑀅𑀓𑀸𑀭𑀡𑀁 𑀉𑀧𑁆𑀧𑀚𑁆𑀚𑀢𑀺, ‘‘𑀦 𑀦𑁄 𑀲𑀼𑀢𑀁, 𑀦 𑀦𑁄 𑀤𑀺𑀝𑁆𑀞’’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀮𑀪𑀺𑀲𑁆𑀲𑀣, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸𑀢𑀺.

𑀏𑀯𑀁 𑀬𑀓𑁆𑀔𑀲𑁂𑀦𑀸𑀧𑀢𑀺 𑀭𑀸𑀚𑀸𑀦𑁄 𑀲𑀓𑁆𑀔𑀺𑀁 𑀅𑀓𑀸𑀲𑀺. 𑀭𑀸𑀚𑀸𑀧𑀺 𑀏𑀓𑀲𑀢𑀭𑀸𑀚𑀧𑀭𑀺𑀯𑀼𑀢𑁄 𑀧𑀼𑀡𑁆𑀡𑀓𑀁 𑀕𑀳𑁂𑀢𑁆𑀯𑀸 ¶ 𑀚𑀽𑀢𑀲𑀸𑀮𑀁 𑀧𑀸𑀯𑀺𑀲𑀺. 𑀲𑀩𑁆𑀩𑁂𑀧𑀺 𑀧𑀢𑀺𑀭𑀽𑀧𑀸𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼, 𑀭𑀚𑀢𑀨𑀮𑀓𑁂 𑀲𑀼𑀯𑀡𑁆𑀡𑀧𑀸𑀲𑀓𑁂 𑀞𑀧𑀬𑀺𑀁𑀲𑀼. 𑀧𑀼𑀡𑁆𑀡𑀓𑁄 𑀢𑀼𑀭𑀺𑀢𑀢𑀼𑀭𑀺𑀢𑁄 𑀆𑀳 ‘‘𑀫𑀳𑀸𑀭𑀸𑀚, 𑀧𑀸𑀲𑀓𑁂𑀲𑀼 𑀆𑀬𑀸 𑀦𑀸𑀫 𑀫𑀸𑀮𑀺𑀓𑀁 𑀲𑀸𑀯𑀝𑁆𑀝𑀁 𑀩𑀳𑀼𑀮𑀁 𑀲𑀦𑁆𑀢𑀺𑀪𑀤𑁆𑀭𑀸𑀤𑀬𑁄 𑀘𑀢𑀼𑀯𑀻𑀲𑀢𑀺, 𑀢𑁂𑀲𑀼 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀭𑀼𑀘𑁆𑀘𑀦𑀓𑀁 𑀆𑀬𑀁 𑀕𑀡𑁆𑀳𑀣𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀩𑀳𑀼𑀮𑀁 𑀕𑀡𑁆𑀳𑀺. 𑀧𑀼𑀡𑁆𑀡𑀓𑁄 ¶ 𑀲𑀸𑀯𑀝𑁆𑀝𑀁 𑀕𑀡𑁆𑀳𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 ‘‘𑀢𑁂𑀦 𑀳𑀺 𑀢𑀸𑀯 𑀫𑀸𑀡𑀯, 𑀧𑀸𑀲𑀓𑁂 𑀧𑀸𑀢𑁂𑀳𑀻’’𑀢𑀺. ‘‘𑀫𑀳𑀸𑀭𑀸𑀚, 𑀧𑀞𑀫𑀁 𑀫𑀫 𑀯𑀸𑀭𑁄 𑀦 𑀧𑀸𑀧𑀼𑀡𑀸𑀢𑀺, 𑀢𑀼𑀫𑁆𑀳𑁂 𑀧𑀸𑀢𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀲𑁆𑀲 𑀧𑀦 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀫𑀸𑀢𑀼𑀪𑀽𑀢𑀧𑀼𑀩𑁆𑀩𑀸 𑀆𑀭𑀓𑁆𑀔𑀤𑁂𑀯𑀢𑀸, 𑀢𑀲𑁆𑀲𑀸 𑀆𑀦𑀼𑀪𑀸𑀯𑁂𑀦 𑀭𑀸𑀚𑀸 𑀚𑀽𑀢𑁂 𑀚𑀺𑀦𑀸𑀢𑀺. 𑀲𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀺𑀢𑀸 𑀅𑀳𑁄𑀲𑀺. 𑀭𑀸𑀚𑀸 𑀤𑁂𑀯𑀥𑀻𑀢𑀭𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀚𑀽𑀢𑀕𑀻𑀢𑀁 𑀕𑀸𑀬𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

‘‘𑀲𑀩𑁆𑀩𑀸 𑀦𑀤𑀻 𑀯𑀗𑁆𑀓𑀕𑀢𑀻, 𑀲𑀩𑁆𑀩𑁂 𑀓𑀝𑁆𑀞𑀫𑀬𑀸 𑀯𑀦𑀸;

𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀭𑁂 𑀧𑀸𑀧𑀁, 𑀮𑀪𑀫𑀸𑀦𑁂 𑀦𑀺𑀯𑀸𑀢𑀓𑁂. (𑀚𑀸. 𑁨.𑁨𑁧.𑁩𑁦𑁮);

‘‘𑀅𑀣 𑀧𑀲𑁆𑀲𑀢𑀼 𑀫𑀁 𑀅𑀫𑁆𑀫, 𑀯𑀺𑀚𑀬𑀁 𑀫𑁂 𑀧𑀤𑀺𑀲𑁆𑀲𑀢𑀼;

𑀅𑀦𑀼𑀓𑀫𑁆𑀧𑀸𑀳𑀺 𑀫𑁂 𑀅𑀫𑁆𑀫, 𑀫𑀳𑀦𑁆𑀢𑀁 𑀚𑀬𑀫𑁂𑀲𑁆𑀲𑀢𑀼.

‘‘𑀤𑁂𑀯𑀢𑁂 𑀢𑁆𑀯𑀚𑁆𑀚 𑀭𑀓𑁆𑀔 𑀤𑁂𑀯𑀺, 𑀧𑀲𑁆𑀲 𑀫𑀸 𑀫𑀁 𑀯𑀺𑀪𑀸𑀯𑁂𑀬𑁆𑀬;

𑀅𑀦𑀼𑀓𑀫𑁆𑀧𑀓𑀸 𑀧𑀢𑀺𑀝𑁆𑀞𑀸 𑀘, 𑀧𑀲𑁆𑀲 𑀪𑀤𑁆𑀭𑀸𑀦𑀺 𑀭𑀓𑁆𑀔𑀺𑀢𑀼𑀁.

‘‘𑀚𑀫𑁆𑀩𑁄𑀦𑀤𑀫𑀬𑀁 𑀧𑀸𑀲𑀁, 𑀘𑀢𑀼𑀭𑀁𑀲𑀫𑀝𑁆𑀞𑀗𑁆𑀕𑀼𑀮𑀺;

𑀯𑀺𑀪𑀸𑀢𑀺 𑀧𑀭𑀺𑀲𑀫𑀚𑁆𑀛𑁂, 𑀲𑀩𑁆𑀩𑀓𑀸𑀫𑀤𑀤𑁄 𑀪𑀯.

‘‘𑀤𑁂𑀯𑀢𑁂 𑀫𑁂 𑀚𑀬𑀁 𑀤𑁂𑀳𑀺, 𑀧𑀲𑁆𑀲 𑀫𑀁 𑀅𑀧𑁆𑀧𑀪𑀸𑀕𑀺𑀦𑀁;

𑀫𑀸𑀢𑀸𑀦𑀼𑀓𑀫𑁆𑀧𑀓𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀺.

‘‘𑀅𑀝𑁆𑀞𑀓𑀁 𑀫𑀸𑀮𑀺𑀓𑀁 𑀯𑀼𑀢𑁆𑀢𑀁, 𑀲𑀸𑀯𑀝𑁆𑀝𑀜𑁆𑀘 𑀙𑀓𑀁 𑀫𑀢𑀁;

𑀘𑀢𑀼𑀓𑁆𑀓𑀁 𑀩𑀳𑀼𑀮𑀁 𑀜𑁂𑀬𑁆𑀬𑀁, 𑀤𑁆𑀯𑀺𑀩𑀺𑀦𑁆𑀤𑀼𑀲𑀦𑁆𑀢𑀺𑀪𑀤𑁆𑀭𑀓𑀁;

𑀘𑀢𑀼𑀯𑀻𑀲𑀢𑀺 𑀆𑀬𑀸 𑀘, 𑀫𑀼𑀦𑀺𑀦𑁆𑀤𑁂𑀦 𑀧𑀓𑀸𑀲𑀺𑀢𑀸’’𑀢𑀺.

𑀭𑀸𑀚𑀸 𑀏𑀯𑀁 𑀚𑀽𑀢𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀧𑀸𑀲𑀓𑁂 𑀳𑀢𑁆𑀣𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀺. 𑀧𑀼𑀡𑁆𑀡𑀓𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀸𑀲𑀓𑀸 𑀭𑀜𑁆𑀜𑁄 𑀧𑀭𑀸𑀚𑀬𑀸𑀬 𑀪𑀲𑁆𑀲𑀦𑁆𑀢𑀺. 𑀭𑀸𑀚𑀸 𑀚𑀽𑀢𑀲𑀺𑀧𑁆𑀧𑀫𑁆𑀳𑀺 𑀅𑀢𑀺𑀓𑀼𑀲𑀮𑀢𑀸𑀬 𑀧𑀸𑀲𑀓𑁂 𑀅𑀢𑁆𑀢𑀦𑁄 ¶ 𑀧𑀭𑀸𑀚𑀬𑀸𑀬 ¶ 𑀪𑀲𑁆𑀲𑀦𑁆𑀢𑁂 𑀜𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀲𑀗𑁆𑀓𑀟𑁆𑀠𑀦𑁆𑀢𑁄 𑀕𑀳𑁂𑀢𑁆𑀯𑀸 𑀧𑀼𑀦 𑀆𑀓𑀸𑀲𑁂 𑀔𑀺𑀧𑀺. 𑀤𑀼𑀢𑀺𑀬𑀫𑁆𑀧𑀺 𑀅𑀢𑁆𑀢𑀦𑁄 𑀧𑀭𑀸𑀚𑀬𑀸𑀬 𑀪𑀲𑁆𑀲𑀦𑁆𑀢𑁂 𑀜𑀢𑁆𑀯𑀸 𑀢𑀣𑁂𑀯 𑀅𑀕𑁆𑀕𑀳𑁂𑀲𑀺. 𑀢𑀢𑁄 𑀧𑀼𑀡𑁆𑀡𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀭𑀸𑀚𑀸 𑀫𑀸𑀤𑀺𑀲𑁂𑀦 𑀬𑀓𑁆𑀔𑁂𑀦 𑀲𑀤𑁆𑀥𑀺𑀁 𑀚𑀽𑀢𑀁 𑀓𑀻𑀴𑀦𑁆𑀢𑁄 𑀪𑀲𑁆𑀲𑀫𑀸𑀦𑁂 𑀧𑀸𑀲𑀓𑁂 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺. 𑀲𑁄 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸𑀬 𑀆𑀦𑀼𑀪𑀸𑀯𑀁 𑀜𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀓𑀼𑀤𑁆𑀥𑁄 𑀯𑀺𑀬 𑀦𑀁 𑀑𑀮𑁄𑀓𑁂𑀲𑀺. 𑀲𑀸 𑀪𑀻𑀢𑀢𑀲𑀺𑀢𑀸 ¶ 𑀧𑀮𑀸𑀬𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑀢𑁆𑀣𑀓𑀁 𑀧𑀢𑁆𑀯𑀸 𑀓𑀫𑁆𑀧𑀫𑀸𑀦𑀸 𑀑𑀮𑁄𑀓𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀢𑀺𑀬𑀫𑁆𑀧𑀺 𑀧𑀸𑀲𑀓𑁂 𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀸𑀚𑀬𑀸𑀬 𑀪𑀲𑁆𑀲𑀦𑁆𑀢𑁂 𑀜𑀢𑁆𑀯𑀸𑀧𑀺 𑀧𑀼𑀡𑁆𑀡𑀓𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑁂 𑀭𑀜𑁆𑀜𑁄 𑀧𑀭𑀸𑀚𑀬𑀸𑀬 𑀧𑀢𑀺𑀁𑀲𑀼. 𑀅𑀣𑀲𑁆𑀲 𑀧𑀭𑀸𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀡𑁆𑀡𑀓𑁄 𑀅𑀧𑁆𑀨𑁄𑀝𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 ‘‘𑀚𑀺𑀢𑀁 𑀫𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀲𑁄 𑀲𑀤𑁆𑀤𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀨𑀭𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁪𑁩𑁬.

‘‘𑀢𑁂 𑀧𑀸𑀯𑀺𑀲𑀼𑀁 𑀅𑀓𑁆𑀔𑀫𑀤𑁂𑀦 𑀫𑀢𑁆𑀢𑀸, 𑀭𑀸𑀚𑀸 𑀓𑀼𑀭𑀽𑀦𑀁 𑀧𑀼𑀡𑁆𑀡𑀓𑁄 𑀘𑀸𑀧𑀺 𑀬𑀓𑁆𑀔𑁄;

𑀭𑀸𑀚𑀸 𑀓𑀮𑀺𑀁 𑀯𑀺𑀘𑁆𑀘𑀺𑀦𑀫𑀕𑁆𑀕𑀳𑁂𑀲𑀺, 𑀓𑀝𑀁 𑀅𑀕𑁆𑀕𑀳𑀻 𑀧𑀼𑀡𑁆𑀡𑀓𑁄 𑀦𑀸𑀫 𑀬𑀓𑁆𑀔𑁄.

𑁧𑁪𑁩𑁭.

‘‘𑀢𑁂 𑀢𑀢𑁆𑀣 𑀚𑀽𑀢𑁂 𑀉𑀪𑀬𑁂 𑀲𑀫𑀸𑀕𑀢𑁂, 𑀭𑀜𑁆𑀜𑀁 𑀲𑀓𑀸𑀲𑁂 𑀲𑀔𑀻𑀦𑀜𑁆𑀘 𑀫𑀚𑁆𑀛𑁂;

𑀅𑀚𑁂𑀲𑀺 𑀬𑀓𑁆𑀔𑁄 𑀦𑀭𑀯𑀻𑀭𑀲𑁂𑀝𑁆𑀞𑀁, 𑀢𑀢𑁆𑀣𑀧𑁆𑀧𑀦𑀸𑀤𑁄 𑀢𑀼𑀫𑀼𑀮𑁄 𑀩𑀪𑀽𑀯𑀸’’𑀢𑀺.

𑀢𑀢𑁆𑀣 𑀧𑀸𑀯𑀺𑀲𑀼𑀦𑁆𑀢𑀺 𑀚𑀽𑀢𑀲𑀸𑀮𑀁 𑀧𑀯𑀺𑀲𑀺𑀁𑀲𑀼. 𑀯𑀺𑀘𑁆𑀘𑀺𑀦𑀦𑁆𑀢𑀺 𑀭𑀸𑀚𑀸 𑀘𑀢𑀼𑀯𑀻𑀲𑀢𑀺𑀬𑀸 𑀆𑀬𑁂𑀲𑀼 𑀯𑀺𑀘𑀺𑀦𑀦𑁆𑀢𑁄 𑀓𑀮𑀺𑀁 𑀧𑀭𑀸𑀚𑀬𑀕𑁆𑀕𑀸𑀳𑀁 𑀅𑀕𑁆𑀕𑀳𑁂𑀲𑀺. 𑀓𑀝𑀁 𑀅𑀕𑁆𑀕𑀳𑀻𑀢𑀺 𑀧𑀼𑀡𑁆𑀡𑀓𑁄 𑀦𑀸𑀫 𑀬𑀓𑁆𑀔𑁄 𑀚𑀬𑀕𑁆𑀕𑀸𑀳𑀁 𑀕𑀡𑁆𑀳𑀺. 𑀢𑁂 𑀢𑀢𑁆𑀣 𑀚𑀽𑀢𑁂 𑀉𑀪𑀬𑁂 𑀲𑀫𑀸𑀕𑀢𑁂𑀢𑀺 𑀢𑁂 𑀢𑀢𑁆𑀣 𑀚𑀽𑀢𑁂 𑀲𑀫𑀸𑀕𑀢𑀸 𑀉𑀪𑁄 𑀚𑀽𑀢𑀁 𑀓𑀻𑀴𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀭𑀜𑁆𑀜𑀦𑁆𑀢𑀺 𑀅𑀣 𑀢𑁂𑀲𑀁 𑀏𑀓𑀲𑀢𑀭𑀸𑀚𑀽𑀦𑀁 𑀲𑀓𑀸𑀲𑁂 𑀅𑀯𑀲𑁂𑀲𑀸𑀦𑀜𑁆𑀘 𑀲𑀔𑀻𑀦𑀁 𑀫𑀚𑁆𑀛𑁂 𑀲𑁄 𑀬𑀓𑁆𑀔𑁄 𑀦𑀭𑀯𑀻𑀭𑀲𑁂𑀝𑁆𑀞𑀁 𑀭𑀸𑀚𑀸𑀦𑀁 𑀅𑀚𑁂𑀲𑀺. 𑀢𑀢𑁆𑀣𑀧𑁆𑀧𑀦𑀸𑀤𑁄 𑀢𑀼𑀫𑀼𑀮𑁄 𑀩𑀪𑀽𑀯𑀸𑀢𑀺 𑀢𑀲𑁆𑀫𑀺𑀁 𑀚𑀽𑀢𑀫𑀡𑁆𑀟𑀮𑁂 ‘‘𑀭𑀜𑁆𑀜𑁄 𑀧𑀭𑀸𑀚𑀺𑀢𑀪𑀸𑀯𑀁 𑀚𑀸𑀦𑀸𑀣, 𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’’𑀢𑀺 𑀫𑀳𑀦𑁆𑀢𑁄 𑀲𑀤𑁆𑀤𑁄 𑀅𑀳𑁄𑀲𑀺.

𑀭𑀸𑀚𑀸 𑀧𑀭𑀸𑀚𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀧𑀼𑀡𑁆𑀡𑀓𑁄 𑀕𑀸𑀣𑀫𑀸𑀳 𑁋

𑁧𑁪𑁩𑁮.

‘‘𑀚𑀬𑁄 ¶ ¶ 𑀫𑀳𑀸𑀭𑀸𑀚 𑀧𑀭𑀸𑀚𑀬𑁄 𑀘, 𑀆𑀬𑀽𑀳𑀢𑀁 𑀅𑀜𑁆𑀜𑀢𑀭𑀲𑁆𑀲 𑀳𑁄𑀢𑀺;

𑀚𑀦𑀺𑀦𑁆𑀤 𑀚𑀻𑀦𑁄𑀲𑀺 𑀯𑀭𑀤𑁆𑀥𑀦𑁂𑀦, 𑀚𑀺𑀢𑁄 𑀘 𑀫𑁂 𑀔𑀺𑀧𑁆𑀧𑀫𑀯𑀸𑀓𑀭𑁄𑀳𑀻’’𑀢𑀺.

𑀢𑀢𑁆𑀣 𑀆𑀬𑀽𑀳𑀢𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀯𑀸𑀬𑀸𑀫𑀫𑀸𑀦𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀭𑀸𑀚𑀺𑀢𑁄𑀫𑁆𑀳𑀻’’𑀢𑀺 ¶ 𑀫𑀸 𑀘𑀺𑀦𑁆𑀢𑀬𑀺. 𑀚𑀻𑀦𑁄𑀲𑀻𑀢𑀺 𑀧𑀭𑀺𑀳𑀻𑀦𑁄𑀲𑀺. 𑀯𑀭𑀤𑁆𑀥𑀦𑁂𑀦𑀸𑀢𑀺 𑀧𑀭𑀫𑀥𑀦𑁂𑀦. 𑀔𑀺𑀧𑁆𑀧𑀫𑀯𑀸𑀓𑀭𑁄𑀳𑀻𑀢𑀺 𑀔𑀺𑀧𑁆𑀧𑀁 𑀫𑁂 𑀚𑀬𑀁 𑀥𑀦𑀁 𑀤𑁂𑀳𑀻𑀢𑀺.

𑀅𑀣 𑀦𑀁 𑀭𑀸𑀚𑀸 ‘‘𑀕𑀡𑁆𑀳, 𑀢𑀸𑀢𑀸’’𑀢𑀺 𑀯𑀤𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁪𑁩𑁯.

‘‘𑀳𑀢𑁆𑀣𑀻 𑀕𑀯𑀸𑀲𑁆𑀲𑀸 𑀫𑀡𑀺𑀓𑀼𑀡𑁆𑀟𑀮𑀸 𑀘, 𑀬𑀜𑁆𑀘𑀸𑀧𑀺 𑀫𑀬𑁆𑀳𑀁 𑀭𑀢𑀦𑀁 𑀧𑀣𑀩𑁆𑀬𑀸;

𑀕𑀡𑁆𑀳𑀸𑀳𑀺 𑀓𑀘𑁆𑀘𑀸𑀦 𑀯𑀭𑀁 𑀥𑀦𑀸𑀦𑀁, 𑀆𑀤𑀸𑀬 𑀬𑁂𑀦𑀺𑀘𑁆𑀙𑀲𑀺 𑀢𑁂𑀦 𑀕𑀘𑁆𑀙𑀸’’𑀢𑀺.

𑀧𑀼𑀡𑁆𑀡𑀓𑁄 𑀆𑀳 𑁋

𑁧𑁪𑁪𑁦.

‘‘𑀳𑀢𑁆𑀣𑀻 𑀕𑀯𑀸𑀲𑁆𑀲𑀸 𑀫𑀡𑀺𑀓𑀼𑀡𑁆𑀟𑀮𑀸 𑀘, 𑀬𑀜𑁆𑀘𑀸𑀧𑀺 𑀢𑀼𑀬𑁆𑀳𑀁 𑀭𑀢𑀦𑀁 𑀧𑀣𑀩𑁆𑀬𑀸;

𑀢𑁂𑀲𑀁 𑀯𑀭𑁄 𑀯𑀺𑀥𑀼𑀭𑁄 𑀦𑀸𑀫 𑀓𑀢𑁆𑀢𑀸, 𑀲𑁄 𑀫𑁂 𑀚𑀺𑀢𑁄 𑀢𑀁 𑀫𑁂 𑀅𑀯𑀸𑀓𑀭𑁄𑀳𑀻’’𑀢𑀺.

𑀢𑀢𑁆𑀣 𑀲𑁄 𑀫𑁂 𑀚𑀺𑀢𑁄 𑀢𑀁 𑀫𑁂𑀢𑀺 𑀫𑀬𑀸 𑀳𑀺 𑀢𑀯 𑀯𑀺𑀚𑀺𑀢𑁂 𑀉𑀢𑁆𑀢𑀫𑀁 𑀭𑀢𑀦𑀁 𑀚𑀺𑀢𑀁, 𑀲𑁄 𑀘 𑀲𑀩𑁆𑀩𑀭𑀢𑀦𑀸𑀦𑀁 𑀯𑀭𑁄 𑀯𑀺𑀥𑀼𑀭𑁄, 𑀢𑀲𑁆𑀫𑀸, 𑀤𑁂𑀯, 𑀲𑁄 𑀫𑀬𑀸 𑀚𑀺𑀢𑁄 𑀦𑀸𑀫 𑀳𑁄𑀢𑀺, 𑀢𑀁 𑀫𑁂 𑀤𑁂𑀳𑀻𑀢𑀺.

𑀭𑀸𑀚𑀸 𑀆𑀳 𑁋

𑁧𑁪𑁪𑁧.

‘‘𑀅𑀢𑁆𑀢𑀸 𑀘 𑀫𑁂 𑀲𑁄 𑀲𑀭𑀡𑀁 𑀕𑀢𑀻 𑀘, 𑀤𑀻𑀧𑁄 𑀘 𑀮𑁂𑀡𑁄 𑀘 𑀧𑀭𑀸𑀬𑀡𑁄 𑀘;

𑀅𑀲𑀦𑁆𑀢𑀼𑀮𑁂𑀬𑁆𑀬𑁄 𑀫𑀫 𑀲𑁄 𑀥𑀦𑁂𑀦, 𑀧𑀸𑀡𑁂𑀦 𑀫𑁂 𑀲𑀸𑀤𑀺𑀲𑁄 𑀏𑀲 𑀓𑀢𑁆𑀢𑀸’’𑀢𑀺.

𑀢𑀢𑁆𑀣 𑀅𑀢𑁆𑀢𑀸 𑀘 𑀫𑁂 𑀲𑁄𑀢𑀺 𑀲𑁄 𑀫𑀬𑁆𑀳𑀁 𑀅𑀢𑁆𑀢𑀸 𑀘, 𑀫𑀬𑀸 𑀘 ‘‘𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀫𑀸 𑀕𑀡𑁆𑀳𑀺. 𑀦 𑀓𑁂𑀯𑀮𑀜𑁆𑀘 𑀅𑀢𑁆𑀢𑀸𑀯 ¶ , 𑀅𑀣 𑀔𑁄 𑀫𑁂 𑀲𑁄 𑀲𑀭𑀡𑀜𑁆𑀘 𑀕𑀢𑀺 𑀘 𑀤𑀻𑀧𑁄 𑀘 𑀮𑁂𑀡𑁄 𑀘 𑀧𑀭𑀸𑀬𑀡𑁄 𑀘. 𑀅𑀲𑀦𑁆𑀢𑀼𑀮𑁂𑀬𑁆𑀬𑁄 𑀫𑀫 𑀲𑁄 𑀥𑀦𑁂𑀦𑀸𑀢𑀺 𑀲𑀢𑁆𑀢𑀯𑀺𑀥𑁂𑀦 𑀭𑀢𑀦𑁂𑀦 𑀲𑀤𑁆𑀥𑀺𑀁 𑀦 𑀢𑀼𑀮𑁂𑀢𑀩𑁆𑀩𑁄𑀢𑀺.

𑀧𑀼𑀡𑁆𑀡𑀓𑁄 𑀆𑀳 𑁋

𑁧𑁪𑁪𑁨.

‘‘𑀘𑀺𑀭𑀁 𑀯𑀺𑀯𑀸𑀤𑁄 𑀫𑀫 𑀢𑀼𑀬𑁆𑀳𑀜𑁆𑀘𑀲𑁆𑀲, 𑀓𑀸𑀫𑀜𑁆𑀘 𑀧𑀼𑀘𑁆𑀙𑀸𑀫 𑀢𑀫𑁂𑀯 𑀕𑀦𑁆𑀢𑁆𑀯𑀸;

𑀏𑀲𑁄𑀯 ¶ 𑀦𑁄 𑀯𑀺𑀯𑀭𑀢𑀼 𑀏𑀢𑀫𑀢𑁆𑀣𑀁, 𑀬𑀁 𑀯𑀓𑁆𑀔𑀢𑀻 𑀳𑁄𑀢𑀼 𑀓𑀣𑀸 𑀉𑀪𑀺𑀦𑁆𑀦’’𑀦𑁆𑀢𑀺.

𑀢𑀢𑁆𑀣 ¶ 𑀯𑀺𑀯𑀭𑀢𑀼 𑀏𑀢𑀫𑀢𑁆𑀣𑀦𑁆𑀢𑀺 ‘‘𑀲𑁄 𑀢𑀯 𑀅𑀢𑁆𑀢𑀸 𑀯𑀸 𑀦 𑀯𑀸’’𑀢𑀺 𑀏𑀢𑀫𑀢𑁆𑀣𑀁 𑀏𑀲𑁄𑀯 𑀧𑀓𑀸𑀲𑁂𑀢𑀼. 𑀳𑁄𑀢𑀼 𑀓𑀣𑀸 𑀉𑀪𑀺𑀦𑁆𑀦𑀦𑁆𑀢𑀺 𑀬𑀁 𑀲𑁄 𑀯𑀓𑁆𑀔𑀢𑀺, 𑀲𑀸𑀬𑁂𑀯 𑀦𑁄 𑀉𑀪𑀺𑀦𑁆𑀦𑀁 𑀓𑀣𑀸 𑀳𑁄𑀢𑀼, 𑀢𑀁 𑀧𑀫𑀸𑀡𑀁 𑀳𑁄𑀢𑀽𑀢𑀺 𑀅𑀢𑁆𑀣𑁄.

𑀭𑀸𑀚𑀸 𑀆𑀳 𑁋

𑁧𑁪𑁪𑁩.

‘‘𑀅𑀤𑁆𑀥𑀸 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀦 𑀘 𑀫𑀸𑀡𑀯 𑀲𑀸𑀳𑀲𑀁;

𑀢𑀫𑁂𑀯 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸𑀫, 𑀢𑁂𑀦 𑀢𑀼𑀲𑁆𑀲𑀸𑀫𑀼𑀪𑁄 𑀚𑀦𑀸’’𑀢𑀺.

𑀢𑀢𑁆𑀣 𑀦 𑀘 𑀫𑀸𑀡𑀯 𑀲𑀸𑀳𑀲𑀦𑁆𑀢𑀺 𑀫𑀬𑁆𑀳𑀁 𑀧𑀲𑀬𑁆𑀳 𑀲𑀸𑀳𑀲𑀺𑀓𑀯𑀘𑀦𑀁 𑀦 𑀘 𑀪𑀡𑀲𑀺.

𑀏𑀯𑀁 𑀯𑀢𑁆𑀯𑀸 𑀭𑀸𑀚𑀸 𑀏𑀓𑀲𑀢𑀭𑀸𑀚𑀸𑀦𑁄 𑀧𑀼𑀡𑁆𑀡𑀓𑀜𑁆𑀘 𑀕𑀳𑁂𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀯𑁂𑀕𑁂𑀦 𑀥𑀫𑁆𑀫𑀲𑀪𑀁 𑀅𑀕𑀫𑀸𑀲𑀺. 𑀧𑀡𑁆𑀟𑀺𑀢𑁄𑀧𑀺 𑀆𑀲𑀦𑀸 𑀑𑀭𑀼𑀬𑁆𑀳 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀧𑀼𑀡𑁆𑀡𑀓𑁄 𑀫𑀳𑀸𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢, ‘𑀢𑁆𑀯𑀁 𑀥𑀫𑁆𑀫𑁂 𑀞𑀺𑀢𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸𑀯𑀸𑀤𑀁 𑀦 𑀪𑀡𑀲𑀻’𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄 𑀢𑁂 𑀲𑀓𑀮𑀮𑁄𑀓𑁂 𑀨𑀼𑀝𑁄, 𑀅𑀳𑀁 𑀧𑀦 𑀢𑁂 𑀅𑀚𑁆𑀚 𑀥𑀫𑁆𑀫𑁂 𑀞𑀺𑀢𑀪𑀸𑀯𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁪𑁪𑁪.

‘‘𑀲𑀘𑁆𑀘𑀁 𑀦𑀼 𑀤𑁂𑀯𑀸 𑀯𑀺𑀤𑀳𑀽 𑀓𑀼𑀭𑀽𑀦𑀁, 𑀥𑀫𑁆𑀫𑁂 𑀞𑀺𑀢𑀁 𑀯𑀺𑀥𑀼𑀭𑀁 𑀦𑀸𑀫𑀫𑀘𑁆𑀘𑀁;

𑀤𑀸𑀲𑁄𑀲𑀺 𑀭𑀜𑁆𑀜𑁄 𑀉𑀤 𑀯𑀸𑀲𑀺 𑀜𑀸𑀢𑀺, 𑀯𑀺𑀥𑀼𑀭𑁄𑀢𑀺 𑀲𑀗𑁆𑀔𑀸 𑀓𑀢𑀫𑀸𑀲𑀺 𑀮𑁄𑀓𑁂’’𑀢𑀺.

𑀢𑀢𑁆𑀣 𑀲𑀘𑁆𑀘𑀁 𑀦𑀼 𑀤𑁂𑀯𑀸 𑀯𑀺𑀤𑀳𑀽 𑀓𑀼𑀭𑀽𑀦𑀁, 𑀥𑀫𑁆𑀫𑁂 𑀞𑀺𑀢𑀁 𑀯𑀺𑀥𑀼𑀭𑀁 𑀦𑀸𑀫𑀫𑀘𑁆𑀘𑀦𑁆𑀢𑀺 ‘‘𑀓𑀼𑀭𑀽𑀦𑀁 𑀭𑀝𑁆𑀞𑁂 𑀯𑀺𑀥𑀼𑀭𑁄 𑀦𑀸𑀫 𑀅𑀫𑀘𑁆𑀘𑁄 𑀥𑀫𑁆𑀫𑁂 𑀞𑀺𑀢𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸𑀯𑀸𑀤𑀁 𑀦 ¶ 𑀪𑀡𑀢𑀻’’𑀢𑀺 𑀏𑀯𑀁 𑀤𑁂𑀯𑀸 𑀯𑀺𑀤𑀳𑀽 𑀯𑀺𑀤𑀳𑀦𑁆𑀢𑀺 𑀓𑀣𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺, 𑀏𑀯𑀁 𑀯𑀺𑀤𑀳𑀫𑀸𑀦𑀸 𑀢𑁂 𑀤𑁂𑀯𑀸 𑀲𑀘𑁆𑀘𑀁 𑀦𑀼 𑀯𑀺𑀤𑀳𑀦𑁆𑀢𑀺, 𑀉𑀤𑀸𑀳𑀼 𑀅𑀪𑀽𑀢𑀯𑀸𑀤𑀸𑀬𑁂𑀯𑁂𑀢𑁂𑀢𑀺. 𑀯𑀺𑀥𑀼𑀭𑁄𑀢𑀺 𑀲𑀗𑁆𑀔𑀸 𑀓𑀢𑀫𑀸𑀲𑀺 𑀮𑁄𑀓𑁂𑀢𑀺 𑀬𑀸 𑀏𑀲𑀸 𑀢𑀯 ‘‘𑀯𑀺𑀥𑀼𑀭𑁄’’𑀢𑀺 𑀮𑁄𑀓𑁂 𑀲𑀗𑁆𑀔𑀸 𑀧𑀜𑁆𑀜𑀢𑁆𑀢𑀺, 𑀲𑀸 𑀓𑀢𑀫𑀸 𑀆𑀲𑀺, 𑀢𑁆𑀯𑀁 𑀧𑀓𑀸𑀲𑁂𑀳𑀺, 𑀓𑀺𑀁 𑀦𑀼 𑀭𑀜𑁆𑀜𑁄 𑀤𑀸𑀲𑁄 𑀦𑀻𑀘𑀢𑀭𑀚𑀸𑀢𑀺𑀓𑁄, 𑀉𑀤𑀸𑀳𑀼 𑀲𑀫𑁄 𑀯𑀸 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀜𑀸𑀢𑀻𑀢𑀺 𑀇𑀤𑀁 𑀢𑀸𑀯 𑀫𑁂 𑀆𑀘𑀺𑀓𑁆𑀔, 𑀤𑀸𑀲𑁄𑀲𑀺 𑀭𑀜𑁆𑀜𑁄, 𑀉𑀤 𑀯𑀸𑀲𑀺 𑀜𑀸𑀢𑀻𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀫𑀁 𑀏𑀯𑀁 𑀧𑀼𑀘𑁆𑀙𑀢𑀺, 𑀅𑀳𑀁 𑀔𑁄 𑀧𑀦𑁂𑀢𑀁 ‘𑀭𑀜𑁆𑀜𑁄 𑀜𑀸𑀢𑀻’𑀢𑀺𑀧𑀺 ‘𑀭𑀜𑁆𑀜𑁄 𑀉𑀢𑁆𑀢𑀭𑀺𑀢𑀭𑁄’𑀢𑀺𑀧𑀺 ‘𑀭𑀜𑁆𑀜𑁄 𑀦 𑀓𑀺𑀜𑁆𑀘𑀺 𑀳𑁄𑀫𑀻’𑀢𑀺𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀫𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 ¶ 𑀲𑀘𑁆𑀘𑀲𑀫𑁄 𑀅𑀯𑀲𑁆𑀲𑀬𑁄 ¶ 𑀦𑀸𑀫 𑀦𑀢𑁆𑀣𑀺, 𑀲𑀘𑁆𑀘𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀸𑀡𑀯, 𑀦𑁂𑀯𑀸𑀳𑀁 𑀭𑀜𑁆𑀜𑁄 𑀜𑀸𑀢𑀺, 𑀦 𑀉𑀢𑁆𑀢𑀭𑀺𑀢𑀭𑁄, 𑀘𑀢𑀼𑀦𑁆𑀦𑀁 𑀧𑀦 𑀤𑀸𑀲𑀸𑀦𑀁 𑀅𑀜𑁆𑀜𑀢𑀭𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁧𑁪𑁪𑁫.

‘‘𑀆𑀫𑀸𑀬𑀤𑀸𑀲𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀥𑀦𑁂𑀦 𑀓𑀻𑀢𑀸𑀧𑀺 𑀪𑀯𑀦𑁆𑀢𑀺 𑀤𑀸𑀲𑀸;

𑀲𑀬𑀫𑁆𑀧𑀺 𑀳𑁂𑀓𑁂 𑀉𑀧𑀬𑀦𑁆𑀢𑀺 𑀤𑀸𑀲𑀸, 𑀪𑀬𑀸 𑀧𑀡𑀼𑀦𑁆𑀦𑀸𑀧𑀺 𑀪𑀯𑀦𑁆𑀢𑀺 𑀤𑀸𑀲𑀸.

𑁧𑁪𑁪𑁬.

‘‘𑀏𑀢𑁂 𑀦𑀭𑀸𑀦𑀁 𑀘𑀢𑀼𑀭𑁄𑀯 𑀤𑀸𑀲𑀸, 𑀅𑀤𑁆𑀥𑀸 𑀳𑀺 𑀬𑁄𑀦𑀺𑀢𑁄 𑀅𑀳𑀫𑁆𑀧𑀺 𑀚𑀸𑀢𑁄;

𑀪𑀯𑁄 𑀘 𑀭𑀜𑁆𑀜𑁄 𑀅𑀪𑀯𑁄 𑀘 𑀭𑀜𑁆𑀜𑁄, 𑀤𑀸𑀲𑀸𑀳𑀁 𑀤𑁂𑀯𑀲𑁆𑀲 𑀧𑀭𑀫𑁆𑀧𑀺 𑀕𑀦𑁆𑀢𑁆𑀯𑀸;

𑀥𑀫𑁆𑀫𑁂𑀦 𑀫𑀁 𑀫𑀸𑀡𑀯 𑀢𑀼𑀬𑁆𑀳 𑀤𑀚𑁆𑀚𑀸’’𑀢𑀺.

𑀢𑀢𑁆𑀣 𑀆𑀫𑀸𑀬𑀤𑀸𑀲𑀸𑀢𑀺 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀤𑀸𑀲𑀸. 𑀲𑀬𑀫𑁆𑀧𑀺 𑀳𑁂𑀓𑁂 𑀉𑀧𑀬𑀦𑁆𑀢𑀺 𑀤𑀸𑀲𑀸𑀢𑀺 𑀬𑁂 𑀓𑁂𑀘𑀺 𑀉𑀧𑀝𑁆𑀞𑀸𑀓𑀚𑀸𑀢𑀺𑀓𑀸, 𑀲𑀩𑁆𑀩𑁂 𑀢𑁂 𑀲𑀬𑀁 𑀤𑀸𑀲𑀪𑀸𑀯𑀁 𑀉𑀧𑀕𑀢𑀸 𑀤𑀸𑀲𑀸 𑀦𑀸𑀫. 𑀪𑀬𑀸 𑀧𑀡𑀼𑀦𑁆𑀦𑀸𑀢𑀺 𑀭𑀸𑀚𑀪𑀬𑁂𑀦 𑀯𑀸 𑀘𑁄𑀭𑀪𑀬𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀧𑀡𑀼𑀦𑁆𑀦𑀸 𑀓𑀭𑀫𑀭𑀸 𑀳𑀼𑀢𑁆𑀯𑀸 𑀧𑀭𑀯𑀺𑀲𑀬𑀁 𑀕𑀢𑀸𑀧𑀺 𑀤𑀸𑀲𑀸𑀬𑁂𑀯 𑀦𑀸𑀫. 𑀅𑀤𑁆𑀥𑀸 𑀳𑀺 𑀬𑁄𑀦𑀺𑀢𑁄 𑀅𑀳𑀫𑁆𑀧𑀺 𑀚𑀸𑀢𑁄𑀢𑀺 𑀫𑀸𑀡𑀯, 𑀏𑀓𑀁𑀲𑁂𑀦𑁂𑀯 𑀅𑀳𑀫𑁆𑀧𑀺 𑀘𑀢𑀽𑀲𑀼 𑀤𑀸𑀲𑀬𑁄𑀦𑀻𑀲𑀼 𑀏𑀓𑀢𑁄 𑀲𑀬𑀁 𑀤𑀸𑀲𑀬𑁄𑀦𑀺𑀢𑁄 𑀦𑀺𑀩𑁆𑀩𑀢𑁆𑀢𑀤𑀸𑀲𑁄. 𑀪𑀯𑁄 𑀘 𑀭𑀜𑁆𑀜𑁄 𑀅𑀪𑀯𑁄 𑀘 𑀭𑀜𑁆𑀜𑁄𑀢𑀺 𑀭𑀜𑁆𑀜𑁄 ¶ 𑀯𑀼𑀟𑁆𑀠𑀺 𑀯𑀸 𑀳𑁄𑀢𑀼 𑀅𑀯𑀼𑀟𑁆𑀠𑀺 𑀯𑀸, 𑀦 𑀲𑀓𑁆𑀓𑀸 𑀫𑀬𑀸 𑀫𑀼𑀲𑀸 𑀪𑀸𑀲𑀺𑀢𑀼𑀁. 𑀧𑀭𑀫𑁆𑀧𑀻𑀢𑀺 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺 𑀅𑀳𑀁 𑀤𑁂𑀯𑀲𑁆𑀲 𑀤𑀸𑀲𑁄𑀬𑁂𑀯. 𑀤𑀚𑁆𑀚𑀸𑀢𑀺 𑀫𑀁 𑀭𑀸𑀚𑀸 𑀚𑀬𑀥𑀦𑁂𑀦 𑀔𑀡𑁆𑀟𑁂𑀢𑁆𑀯𑀸 𑀢𑀼𑀬𑁆𑀳𑀁 𑀤𑁂𑀦𑁆𑀢𑁄 𑀥𑀫𑁆𑀫𑁂𑀦 𑀲𑀪𑀸𑀯𑁂𑀦 𑀤𑀤𑁂𑀬𑁆𑀬𑀸𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀡𑁆𑀡𑀓𑁄 𑀳𑀝𑁆𑀞𑀢𑀼𑀝𑁆𑀞𑁄 𑀧𑀼𑀦 𑀅𑀧𑁆𑀨𑁄𑀝𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁪𑁪𑁭.

‘‘𑀅𑀬𑀁 𑀤𑀼𑀢𑀻𑀬𑁄 𑀯𑀺𑀚𑀬𑁄 𑀫𑀫𑀚𑁆𑀚, 𑀧𑀼𑀝𑁆𑀞𑁄 𑀳𑀺 𑀓𑀢𑁆𑀢𑀸 𑀯𑀺𑀯𑀭𑁂𑀢𑁆𑀣 𑀧𑀜𑁆𑀳𑀁;

𑀅𑀥𑀫𑁆𑀫𑀭𑀽𑀧𑁄 𑀯𑀢 𑀭𑀸𑀚𑀲𑁂𑀝𑁆𑀞𑁄, 𑀲𑀼𑀪𑀸𑀲𑀺𑀢𑀁 𑀦𑀸𑀦𑀼𑀚𑀸𑀦𑀸𑀲𑀺 𑀫𑀬𑁆𑀳’’𑀦𑁆𑀢𑀺.

𑀢𑀢𑁆𑀣 𑀭𑀸𑀚𑀲𑁂𑀝𑁆𑀞𑁄𑀢𑀺 𑀅𑀬𑀁 𑀭𑀸𑀚𑀲𑁂𑀝𑁆𑀞𑁄 𑀅𑀥𑀫𑁆𑀫𑀭𑀽𑀧𑁄 𑀯𑀢. 𑀲𑀼𑀪𑀸𑀲𑀺𑀢𑀦𑁆𑀢𑀺 𑀯𑀺𑀥𑀼𑀭𑀧𑀡𑁆𑀟𑀺𑀢𑁂𑀦 𑀲𑀼𑀓𑀣𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁. 𑀦𑀸𑀦𑀼𑀚𑀸𑀦𑀸𑀲𑀺 𑀫𑀬𑁆𑀳𑀦𑁆𑀢𑀺 𑀇𑀤𑀸𑀦𑁂𑀢𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑀁 𑀫𑀬𑁆𑀳𑀁 𑀓𑀲𑁆𑀫𑀸 𑀦𑀸𑀦𑀼𑀚𑀸𑀦𑀸𑀲𑀺, 𑀓𑀺𑀫𑀢𑁆𑀣𑀁 𑀦 𑀤𑁂𑀲𑀻𑀢𑀺 𑀯𑀤𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀧𑀡𑁆𑀟𑀺𑀢𑁄 𑀫𑀸𑀤𑀺𑀲𑀁 𑀬𑀲𑀤𑀸𑀬𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀇𑀤𑀸𑀦𑀺 𑀤𑀺𑀝𑁆𑀞𑀁 ¶ 𑀫𑀸𑀡𑀯𑀓𑀁 𑀑𑀮𑁄𑀓𑁂𑀢𑀻’’𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀫𑀸𑀡𑀯, 𑀲𑀘𑁂 𑀲𑁄 𑀤𑀸𑀲𑁄 𑀫𑁂 𑀪𑀯𑁂𑀬𑁆𑀬, 𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁪𑁪𑁮.

‘‘𑀏𑀯𑀁 ¶ 𑀘𑁂 𑀦𑁄 𑀲𑁄 𑀯𑀺𑀯𑀭𑁂𑀢𑁆𑀣 𑀧𑀜𑁆𑀳𑀁, 𑀤𑀸𑀲𑁄𑀳𑀫𑀲𑁆𑀫𑀺 𑀦 𑀘 𑀔𑁄𑀲𑁆𑀫𑀺 𑀜𑀸𑀢𑀺;

𑀕𑀡𑁆𑀳𑀸𑀳𑀺 𑀓𑀘𑁆𑀘𑀸𑀦 𑀯𑀭𑀁 𑀥𑀦𑀸𑀦𑀁, 𑀆𑀤𑀸𑀬 𑀬𑁂𑀦𑀺𑀘𑁆𑀙𑀲𑀺 𑀢𑁂𑀦 𑀕𑀘𑁆𑀙𑀸’’𑀢𑀺.

𑀢𑀢𑁆𑀣 𑀏𑀯𑀁 𑀘𑁂 𑀦𑁄 𑀲𑁄 𑀯𑀺𑀯𑀭𑁂𑀢𑁆𑀣 𑀧𑀜𑁆𑀳𑀦𑁆𑀢𑀺 𑀲𑀘𑁂 𑀲𑁄 𑀅𑀫𑁆𑀳𑀸𑀓𑀁 𑀧𑀜𑁆𑀳𑀁 ‘‘𑀤𑀸𑀲𑁄𑀳𑀫𑀲𑁆𑀫𑀺, 𑀦 𑀘 𑀔𑁄𑀲𑁆𑀫𑀺 𑀜𑀸𑀢𑀻’’𑀢𑀺 𑀏𑀯𑀁 𑀯𑀺𑀯𑀭𑀺 𑀏𑀢𑁆𑀣 𑀧𑀭𑀺𑀲𑀫𑀡𑁆𑀟𑀮𑁂, 𑀅𑀣 𑀓𑀺𑀁 𑀅𑀘𑁆𑀙𑀲𑀺, 𑀲𑀓𑀮𑀮𑁄𑀓𑁂 𑀥𑀦𑀸𑀦𑀁 𑀯𑀭𑀁 𑀏𑀢𑀁 𑀕𑀡𑁆𑀳, 𑀕𑀳𑁂𑀢𑁆𑀯𑀸 𑀘 𑀧𑀦 𑀬𑁂𑀦 𑀇𑀘𑁆𑀙𑀲𑀺, 𑀢𑁂𑀦 𑀕𑀘𑁆𑀙𑀸𑀢𑀺.

𑀅𑀓𑁆𑀔𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.

𑀖𑀭𑀸𑀯𑀸𑀲𑀧𑀜𑁆𑀳𑀸

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 ‘‘𑀧𑀡𑁆𑀟𑀺𑀢𑀁 𑀕𑀳𑁂𑀢𑁆𑀯𑀸 𑀫𑀸𑀡𑀯𑁄 𑀬𑀣𑀸𑀭𑀼𑀘𑀺 𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀫𑀥𑀼𑀭𑀥𑀫𑁆𑀫𑀓𑀣𑀸 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀧𑁂𑀢𑁆𑀯𑀸 𑀖𑀭𑀸𑀯𑀸𑀲𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀦𑀁 𑀭𑀸𑀚𑀸 𑀏𑀯𑀫𑀸𑀳 ‘‘𑀧𑀡𑁆𑀟𑀺𑀢, 𑀢𑀼𑀫𑁆𑀳𑀸𑀓𑀁 𑀕𑀢𑀓𑀸𑀮𑁂 𑀫𑀫 𑀫𑀥𑀼𑀭𑀥𑀫𑁆𑀫𑀓𑀣𑀸 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀺, 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀢𑁆𑀯𑀸 𑀫𑀬𑁆𑀳𑀁 𑀖𑀭𑀸𑀯𑀸𑀲𑀧𑀜𑁆𑀳𑀁 𑀓𑀣𑁂𑀣𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀭𑀜𑁆𑀜𑀸 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁆𑀭𑀸𑀬𑀁 𑀧𑀜𑁆𑀳𑁄 𑁋

𑁧𑁪𑁪𑁯.

‘‘𑀯𑀺𑀥𑀼𑀭 𑀯𑀲𑀫𑀸𑀦𑀲𑁆𑀲, 𑀕𑀳𑀝𑁆𑀞𑀲𑁆𑀲 𑀲𑀓𑀁 𑀖𑀭𑀁;

𑀔𑁂𑀫𑀸 𑀯𑀼𑀢𑁆𑀢𑀺 𑀓𑀣𑀁 𑀅𑀲𑁆𑀲, 𑀓𑀣𑀁 𑀦𑀼 𑀅𑀲𑁆𑀲 𑀲𑀗𑁆𑀕𑀳𑁄.

𑁧𑁪𑁫𑁦.

‘‘𑀅𑀩𑁆𑀬𑀸𑀩𑀚𑁆𑀛𑀁 𑀓𑀣𑀁 𑀅𑀲𑁆𑀲, 𑀲𑀘𑁆𑀘𑀯𑀸𑀤𑀻 𑀘 𑀫𑀸𑀡𑀯𑁄;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀓𑀣𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺.

𑀢𑀢𑁆𑀣 𑀔𑁂𑀫𑀸 𑀯𑀼𑀢𑁆𑀢𑀺 𑀓𑀣𑀁 𑀅𑀲𑁆𑀲𑀸𑀢𑀺 𑀓𑀣𑀁 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑀲𑁆𑀲 𑀕𑀳𑀝𑁆𑀞𑀲𑁆𑀲 𑀔𑁂𑀫𑀸 𑀦𑀺𑀩𑁆𑀪𑀬𑀸 𑀯𑀼𑀢𑁆𑀢𑀺 𑀪𑀯𑁂𑀬𑁆𑀬. 𑀓𑀣𑀁 𑀦𑀼 𑀅𑀲𑁆𑀲 𑀲𑀗𑁆𑀕𑀳𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀲𑀗𑁆𑀕𑀳𑀯𑀢𑁆𑀣𑀼𑀲𑀗𑁆𑀔𑀸𑀢𑁄 𑀲𑀗𑁆𑀕𑀳𑁄 𑀢𑀲𑁆𑀲 𑀓𑀣𑀁 𑀪𑀯𑁂𑀬𑁆𑀬 ¶ . 𑀅𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀸. 𑀲𑀘𑁆𑀘𑀯𑀸𑀤𑀻 𑀘𑀸𑀢𑀺 𑀓𑀣𑀁 𑀦𑀼 𑀫𑀸𑀡𑀯𑁄 𑀲𑀘𑁆𑀘𑀯𑀸𑀤𑀻 𑀦𑀸𑀫 𑀪𑀯𑁂𑀬𑁆𑀬. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸.

𑀢𑀁 𑀲𑀼𑀢𑁆𑀯𑀸 𑀧𑀡𑁆𑀟𑀺𑀢𑁄 𑀭𑀜𑁆𑀜𑁄 𑀧𑀜𑁆𑀳𑀁 𑀓𑀣𑁂𑀲𑀺. 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀆𑀳 𑁋

𑁧𑁪𑁫𑁧.

‘‘𑀢𑀁 𑀢𑀢𑁆𑀣 𑀕𑀢𑀺𑀫𑀸 𑀥𑀺𑀢𑀺𑀫𑀸, 𑀫𑀢𑀺𑀫𑀸 𑀅𑀢𑁆𑀣𑀤𑀲𑁆𑀲𑀺𑀫𑀸;

𑀲𑀗𑁆𑀔𑀸𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀯𑀺𑀥𑀼𑀭𑁄 𑀏𑀢𑀤𑀩𑁆𑀭𑀯𑀺.

𑁧𑁪𑁫𑁨.

‘‘𑀦 𑀲𑀸𑀥𑀸𑀭𑀡𑀤𑀸𑀭𑀲𑁆𑀲, 𑀦 𑀪𑀼𑀜𑁆𑀚𑁂 𑀲𑀸𑀤𑀼𑀫𑁂𑀓𑀓𑁄;

𑀦 𑀲𑁂𑀯𑁂 𑀮𑁄𑀓𑀸𑀬𑀢𑀺𑀓𑀁, 𑀦𑁂𑀢𑀁 𑀧𑀜𑁆𑀜𑀸𑀬 𑀯𑀟𑁆𑀠𑀦𑀁.

𑁧𑁪𑁫𑁩.

‘‘𑀲𑀻𑀮𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄;

𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀢𑁆𑀣𑀤𑁆𑀥𑁄, 𑀲𑀼𑀭𑀢𑁄 𑀲𑀔𑀺𑀮𑁄 𑀫𑀼𑀤𑀼.

𑁧𑁪𑁫𑁪.

‘‘𑀲𑀗𑁆𑀕𑀳𑁂𑀢𑀸 ¶ ¶ 𑀘 𑀫𑀺𑀢𑁆𑀢𑀸𑀦𑀁, 𑀲𑀁𑀯𑀺𑀪𑀸𑀕𑀻 𑀯𑀺𑀥𑀸𑀦𑀯𑀸;

𑀢𑀧𑁆𑀧𑁂𑀬𑁆𑀬 𑀅𑀦𑁆𑀦𑀧𑀸𑀦𑁂𑀦, 𑀲𑀤𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑁂.

𑁧𑁪𑁫𑁫.

‘‘𑀥𑀫𑁆𑀫𑀓𑀸𑀫𑁄 𑀲𑀼𑀢𑀸𑀥𑀸𑀭𑁄, 𑀪𑀯𑁂𑀬𑁆𑀬 𑀧𑀭𑀺𑀧𑀼𑀘𑁆𑀙𑀓𑁄;

𑀲𑀓𑁆𑀓𑀘𑁆𑀘𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂.

𑁧𑁪𑁫𑁬.

‘‘𑀖𑀭𑀫𑀸𑀯𑀲𑀫𑀸𑀦𑀲𑁆𑀲, 𑀕𑀳𑀝𑁆𑀞𑀲𑁆𑀲 𑀲𑀓𑀁 𑀖𑀭𑀁;

𑀔𑁂𑀫𑀸 𑀯𑀼𑀢𑁆𑀢𑀺 𑀲𑀺𑀬𑀸 𑀏𑀯𑀁, 𑀏𑀯𑀁 𑀦𑀼 𑀅𑀲𑁆𑀲 𑀲𑀗𑁆𑀕𑀳𑁄.

𑁧𑁪𑁫𑁭.

‘‘𑀅𑀩𑁆𑀬𑀸𑀩𑀚𑁆𑀛𑀁 𑀲𑀺𑀬𑀸 𑀏𑀯𑀁, 𑀲𑀘𑁆𑀘𑀯𑀸𑀤𑀻 𑀘 𑀫𑀸𑀡𑀯𑁄;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺.

𑀢𑀢𑁆𑀣 𑀢𑀁 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀯𑁂, 𑀢𑀁 𑀭𑀸𑀚𑀸𑀦𑀁 𑀢𑀢𑁆𑀣 𑀥𑀫𑁆𑀫𑀲𑀪𑀸𑀬𑀁 𑀜𑀸𑀡𑀕𑀢𑀺𑀬𑀸 𑀕𑀢𑀺𑀫𑀸, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀯𑀻𑀭𑀺𑀬𑁂𑀦 𑀥𑀺𑀢𑀺𑀫𑀸, 𑀪𑀽𑀭𑀺𑀲𑀫𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀫𑀢𑀺𑀫𑀸, 𑀲𑀡𑁆𑀳𑀲𑀼𑀔𑀼𑀫𑀢𑁆𑀣𑀤𑀲𑁆𑀲𑀺𑀦𑀸 𑀜𑀸𑀡𑁂𑀦 𑀅𑀢𑁆𑀣𑀤𑀲𑁆𑀲𑀺𑀫𑀸, 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀦𑀜𑀸𑀡𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀗𑁆𑀔𑀸𑀢𑀸, 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀏𑀢𑀁 ‘‘𑀦 𑀲𑀸𑀥𑀸𑀭𑀡𑀤𑀸𑀭𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀩𑁆𑀭𑀯𑀺. 𑀢𑀢𑁆𑀣 𑀬𑁄 𑀧𑀭𑁂𑀲𑀁 𑀤𑀸𑀭𑁂𑀲𑀼 𑀅𑀧𑀭𑀚𑁆𑀛𑀢𑀺 ¶ , 𑀲𑁄 𑀲𑀸𑀥𑀸𑀭𑀡𑀤𑀸𑀭𑁄 𑀦𑀸𑀫, 𑀢𑀸𑀤𑀺𑀲𑁄 𑀦 𑀅𑀲𑁆𑀲 𑀪𑀯𑁂𑀬𑁆𑀬. 𑀦 𑀪𑀼𑀜𑁆𑀚𑁂 𑀲𑀸𑀤𑀼𑀫𑁂𑀓𑀓𑁄𑀢𑀺 𑀲𑀸𑀤𑀼𑀭𑀲𑀁 𑀧𑀡𑀻𑀢𑀪𑁄𑀚𑀦𑀁 𑀅𑀜𑁆𑀜𑁂𑀲𑀁 𑀅𑀤𑀢𑁆𑀯𑀸 𑀏𑀓𑀓𑁄𑀯 𑀦 𑀪𑀼𑀜𑁆𑀚𑁂𑀬𑁆𑀬. 𑀮𑁄𑀓𑀸𑀬𑀢𑀺𑀓𑀦𑁆𑀢𑀺 𑀅𑀦𑀢𑁆𑀣𑀦𑀺𑀲𑁆𑀲𑀺𑀢𑀁 𑀲𑀕𑁆𑀕𑀫𑀕𑁆𑀕𑀸𑀦𑀁 𑀅𑀤𑀸𑀬𑀓𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀯𑀺𑀢𑀡𑁆𑀟𑀲𑀮𑁆𑀮𑀸𑀧𑀁 𑀮𑁄𑀓𑀸𑀬𑀢𑀺𑀓𑀯𑀸𑀤𑀁 𑀦 𑀲𑁂𑀯𑁂𑀬𑁆𑀬. 𑀦𑁂𑀢𑀁 𑀧𑀜𑁆𑀜𑀸𑀬 𑀯𑀟𑁆𑀠𑀦𑀦𑁆𑀢𑀺 𑀦 𑀳𑀺 𑀏𑀢𑀁 𑀮𑁄𑀓𑀸𑀬𑀢𑀺𑀓𑀁 𑀧𑀜𑁆𑀜𑀸𑀬 𑀯𑀟𑁆𑀠𑀦𑀁. 𑀲𑀻𑀮𑀯𑀸𑀢𑀺 𑀅𑀔𑀡𑁆𑀟𑁂𑀳𑀺 𑀧𑀜𑁆𑀘𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀯𑀢𑁆𑀢𑀲𑀫𑁆𑀧𑀦𑁆𑀦𑁄𑀢𑀺 𑀖𑀭𑀸𑀯𑀸𑀲𑀯𑀢𑁆𑀢𑁂𑀦 𑀯𑀸 𑀭𑀸𑀚𑀯𑀢𑁆𑀢𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑁄. 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀅𑀢𑀺𑀫𑀸𑀦𑀁 𑀅𑀓𑀢𑁆𑀯𑀸 𑀦𑀻𑀘𑀯𑀼𑀢𑁆𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀧𑀝𑀺𑀘𑁆𑀙𑀓𑁄. 𑀅𑀢𑁆𑀣𑀤𑁆𑀥𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀬𑀯𑀺𑀭𑀳𑀺𑀢𑁄. 𑀲𑀼𑀭𑀢𑁄𑀢𑀺 𑀲𑁄𑀭𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀔𑀺𑀮𑁄𑀢𑀺 𑀧𑁂𑀫𑀦𑀻𑀬𑀯𑀘𑀦𑁄. 𑀫𑀼𑀤𑀽𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀅𑀨𑀭𑀼𑀲𑁄.

𑀲𑀗𑁆𑀕𑀳𑁂𑀢𑀸 𑀘 𑀫𑀺𑀢𑁆𑀢𑀸𑀦𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀲𑀗𑁆𑀕𑀳𑀓𑀭𑁄. 𑀤𑀸𑀦𑀸𑀤𑀻𑀲𑀼 𑀬𑁄 𑀬𑁂𑀦 𑀲𑀗𑁆𑀕𑀳𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀢𑁂𑀦𑁂𑀯 𑀲𑀗𑁆𑀕𑀸𑀳𑀓𑁄. 𑀲𑀁𑀯𑀺𑀪𑀸𑀕𑀻𑀢𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘𑁂𑀯 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀤𑀻𑀦𑀜𑁆𑀘 𑀲𑀁𑀯𑀺𑀪𑀸𑀕𑀓𑀭𑁄. 𑀯𑀺𑀥𑀸𑀦𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀯𑀺𑀥𑀸𑀦𑀲𑀫𑁆𑀧𑀦𑁆𑀦𑁄. 𑀢𑀧𑁆𑀧𑁂𑀬𑁆𑀬𑀸𑀢𑀺 𑀕𑀳𑀺𑀢𑀕𑀳𑀺𑀢𑀪𑀸𑀚𑀦𑀸𑀦𑀺 ¶ 𑀧𑀽𑀭𑁂𑀢𑁆𑀯𑀸 𑀤𑀤𑀫𑀸𑀦𑁄 𑀢𑀧𑁆𑀧𑁂𑀬𑁆𑀬. 𑀥𑀫𑁆𑀫𑀓𑀸𑀫𑁄𑀢𑀺 𑀧𑀯𑁂𑀡𑀺𑀥𑀫𑁆𑀫𑀫𑁆𑀧𑀺 𑀲𑀼𑀘𑀭𑀺𑀢𑀥𑀫𑁆𑀫𑀫𑁆𑀧𑀺 𑀓𑀸𑀫𑀬𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄. 𑀲𑀼𑀢𑀸𑀥𑀸𑀭𑁄𑀢𑀺 𑀲𑀼𑀢𑀲𑁆𑀲 𑀆𑀥𑀸𑀭𑀪𑀽𑀢𑁄. 𑀧𑀭𑀺𑀧𑀼𑀘𑁆𑀙𑀓𑁄𑀢𑀺 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀧𑀭𑀺𑀧𑀼𑀘𑁆𑀙𑀦𑀲𑀻𑀮𑁄. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀕𑀸𑀭𑀯𑁂𑀦. 𑀏𑀯𑀁 𑀦𑀼 𑀅𑀲𑁆𑀲 𑀲𑀗𑁆𑀕𑀳𑁄𑀢𑀺 𑀲𑀗𑁆𑀕𑀳𑁄𑀧𑀺𑀲𑁆𑀲 𑀏𑀯𑀁 𑀓𑀢𑁄 𑀦𑀸𑀫 𑀪𑀯𑁂𑀬𑁆𑀬. 𑀲𑀘𑁆𑀘𑀯𑀸𑀤𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑁄𑀬𑁂𑀯 𑀲𑀪𑀸𑀯𑀯𑀸𑀤𑀻 𑀦𑀸𑀫 𑀲𑀺𑀬𑀸.

𑀏𑀯𑀁 𑀫𑀳𑀸𑀲𑀢𑁆𑀢𑁄 𑀭𑀜𑁆𑀜𑁄 𑀖𑀭𑀸𑀯𑀸𑀲𑀧𑀜𑁆𑀳𑀁 𑀓𑀣𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀸 𑀑𑀭𑀼𑀬𑁆𑀳 𑀭𑀸𑀚𑀸𑀦𑀁 𑀯𑀦𑁆𑀤𑀺. 𑀭𑀸𑀚𑀸𑀧𑀺𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀏𑀓𑀲𑀢𑀭𑀸𑀚𑀽𑀳𑀺 𑀧𑀭𑀺𑀯𑀼𑀢𑁄 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀫𑁂𑀯 𑀕𑀢𑁄.

𑀖𑀭𑀸𑀯𑀸𑀲𑀧𑀜𑁆𑀳𑀸 𑀦𑀺𑀝𑁆𑀞𑀺𑀢𑀸.

𑀮𑀓𑁆𑀔𑀡𑀓𑀡𑁆𑀟𑀁

𑀫𑀳𑀸𑀲𑀢𑁆𑀢𑁄 ¶ 𑀧𑀦 𑀧𑀝𑀺𑀦𑀺𑀯𑀢𑁆𑀢𑁄. 𑀅𑀣 𑀦𑀁 𑀧𑀼𑀡𑁆𑀡𑀓𑁄 𑀆𑀳 𑁋

𑁧𑁪𑁫𑁮.

‘‘𑀏𑀳𑀺 𑀤𑀸𑀦𑀺 𑀕𑀫𑀺𑀲𑁆𑀲𑀸𑀫, 𑀤𑀺𑀦𑁆𑀦𑁄 𑀦𑁄 𑀇𑀲𑁆𑀲𑀭𑁂𑀦 𑀫𑁂;

𑀫𑀫𑁂𑀯𑀢𑁆𑀣𑀁 𑀧𑀝𑀺𑀧𑀚𑁆𑀚, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄’’𑀢𑀺.

𑀢𑀢𑁆𑀣 ¶ 𑀤𑀺𑀦𑁆𑀦𑁄 𑀦𑁄𑀢𑀺 𑀏𑀢𑁆𑀣 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑁆𑀯𑀁 𑀇𑀲𑁆𑀲𑀭𑁂𑀦 𑀫𑀬𑁆𑀳𑀁 𑀤𑀺𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀦𑀦𑁆𑀢𑀦𑁄𑀢𑀺 𑀫𑀫 𑀅𑀢𑁆𑀣𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀳𑀺 𑀢𑀬𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀅𑀢𑁆𑀣𑁄 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀬𑀜𑁆𑀘𑁂𑀢𑀁 𑀲𑀸𑀫𑀺𑀓𑀲𑁆𑀲 𑀅𑀢𑁆𑀣𑀓𑀭𑀡𑀁 𑀦𑀸𑀫, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀲𑀪𑀸𑀯𑁄𑀢𑀺.

𑀯𑀺𑀥𑀼𑀭𑀧𑀡𑁆𑀟𑀺𑀢𑁄 𑀆𑀳 𑁋

𑁧𑁪𑁫𑁯.

‘‘𑀚𑀸𑀦𑀸𑀫𑀺 𑀫𑀸𑀡𑀯 𑀢𑀬𑀸𑀳𑀫𑀲𑁆𑀫𑀺, 𑀤𑀺𑀦𑁆𑀦𑁄𑀳𑀫𑀲𑁆𑀫𑀺 𑀢𑀯 𑀇𑀲𑁆𑀲𑀭𑁂𑀦;

𑀢𑀻𑀳𑀜𑁆𑀘 𑀢𑀁 𑀯𑀸𑀲𑀬𑁂𑀫𑀼 𑀅𑀕𑀸𑀭𑁂, 𑀬𑁂𑀦𑀤𑁆𑀥𑀼𑀦𑀸 𑀅𑀦𑀼𑀲𑀸𑀲𑁂𑀫𑀼 𑀧𑀼𑀢𑁆𑀢𑁂’’𑀢𑀺.

𑀢𑀢𑁆𑀣 𑀢𑀬𑀸𑀳𑀫𑀲𑁆𑀫𑀻𑀢𑀺 𑀢𑀬𑀸 𑀮𑀤𑁆𑀥𑁄𑀳𑀫𑀲𑁆𑀫𑀻𑀢𑀺 𑀚𑀸𑀦𑀸𑀫𑀺, 𑀮𑀪𑀦𑁆𑀢𑁂𑀦 𑀘 𑀦 𑀅𑀜𑁆𑀜𑀣𑀸 𑀮𑀤𑁆𑀥𑁄. 𑀤𑀺𑀦𑁆𑀦𑁄𑀳𑀫𑀲𑁆𑀫𑀺 𑀢𑀯 𑀇𑀲𑁆𑀲𑀭𑁂𑀦𑀸𑀢𑀺 𑀫𑀫 𑀇𑀲𑁆𑀲𑀭𑁂𑀦 𑀭𑀜𑁆𑀜𑀸 ¶ 𑀅𑀳𑀁 𑀢𑀯 𑀤𑀺𑀦𑁆𑀦𑁄. 𑀢𑀻𑀳𑀁 𑀘𑀸𑀢𑀺 𑀫𑀸𑀡𑀯, 𑀅𑀳𑀁 𑀢𑀯 𑀩𑀳𑀽𑀧𑀓𑀸𑀭𑁄, 𑀭𑀸𑀚𑀸𑀦𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀘𑁆𑀘𑀫𑁂𑀯 𑀓𑀣𑁂𑀲𑀺𑀁, 𑀢𑁂𑀦𑀸𑀳𑀁 𑀢𑀬𑀸 𑀮𑀤𑁆𑀥𑁄, 𑀢𑁆𑀯𑀁 𑀫𑁂 𑀫𑀳𑀦𑁆𑀢𑀕𑀼𑀡𑀪𑀸𑀯𑀁 𑀚𑀸𑀦𑀸𑀳𑀺, 𑀫𑀬𑀁 𑀢𑀻𑀡𑀺𑀧𑀺 𑀤𑀺𑀯𑀲𑀸𑀦𑀺 𑀅𑀢𑁆𑀢𑀦𑁄 𑀅𑀕𑀸𑀭𑁂 𑀯𑀸𑀲𑁂𑀫𑀼, 𑀢𑀲𑁆𑀫𑀸 𑀬𑁂𑀦𑀤𑁆𑀥𑀼𑀦𑀸 𑀬𑀢𑁆𑀢𑀓𑁂𑀦 𑀓𑀸𑀮𑁂𑀦 𑀫𑀬𑀁 𑀧𑀼𑀢𑁆𑀢𑀸𑀤𑀸𑀭𑁂 𑀅𑀦𑀼𑀲𑀸𑀲𑁂𑀫𑀼, 𑀢𑀁 𑀓𑀸𑀮𑀁 𑀅𑀥𑀺𑀯𑀸𑀲𑁂𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀧𑀼𑀡𑁆𑀡𑀓𑁄 ‘‘𑀲𑀘𑁆𑀘𑀁 𑀧𑀡𑁆𑀟𑀺𑀢𑁄 𑀆𑀳, 𑀩𑀳𑀽𑀧𑀓𑀸𑀭𑁄 𑀏𑀲 𑀫𑀫, ‘𑀲𑀢𑁆𑀢𑀸𑀳𑀫𑁆𑀧𑀺 𑀅𑀟𑁆𑀠𑀫𑀸𑀲𑀫𑁆𑀧𑀺 𑀦𑀺𑀲𑀻𑀤𑀸𑀳𑀻’𑀢𑀺 𑀯𑀼𑀢𑁆𑀢𑁂 𑀅𑀥𑀺𑀯𑀸𑀲𑁂𑀢𑀩𑁆𑀩𑀫𑁂𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

𑁧𑁪𑁬𑁦.

‘‘𑀢𑀁 𑀫𑁂 𑀢𑀣𑀸 𑀳𑁄𑀢𑀼 𑀯𑀲𑁂𑀫𑀼 𑀢𑀻𑀳𑀁, 𑀓𑀼𑀭𑀼𑀢𑀁 𑀪𑀯𑀚𑁆𑀚 𑀖𑀭𑁂𑀲𑀼 𑀓𑀺𑀘𑁆𑀘𑀁;

𑀅𑀦𑀼𑀲𑀸𑀲𑀢𑀁 𑀧𑀼𑀢𑁆𑀢𑀤𑀸𑀭𑁂 𑀪𑀯𑀚𑁆𑀚, 𑀬𑀣𑀸 𑀢𑀬𑀻 𑀧𑁂𑀘𑁆𑀘 𑀲𑀼𑀔𑀻 𑀪𑀯𑁂𑀬𑁆𑀬𑀸’’𑀢𑀺.

𑀢𑀢𑁆𑀣 𑀢𑀁 𑀫𑁂𑀢𑀺 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀲𑀩𑁆𑀩𑀁 𑀢𑀁 𑀫𑀫 𑀢𑀣𑀸 𑀳𑁄𑀢𑀼. 𑀪𑀯𑀚𑁆𑀚𑀸𑀢𑀺 𑀪𑀯𑀁 𑀅𑀚𑁆𑀚 𑀧𑀝𑁆𑀞𑀸𑀬 𑀢𑀻𑀳𑀁 𑀅𑀦𑀼𑀲𑀸𑀲𑀢𑀼. 𑀢𑀬𑀻 𑀧𑁂𑀘𑁆𑀘𑀸𑀢𑀺 𑀬𑀣𑀸 𑀢𑀬𑀺 𑀕𑀢𑁂 𑀧𑀘𑁆𑀙𑀸 𑀢𑀯 𑀧𑀼𑀢𑁆𑀢𑀤𑀸𑀭𑁄 𑀲𑀼𑀔𑀻 𑀪𑀯𑁂𑀬𑁆𑀬, 𑀏𑀯𑀁 𑀅𑀦𑀼𑀲𑀸𑀲𑀢𑀼.

𑀏𑀯𑀁 𑀯𑀢𑁆𑀯𑀸 𑀧𑀼𑀡𑁆