𑀫𑀽𑀮 > 𑀲𑀼𑀢𑁆𑀢𑀧𑀺𑀝𑀓 > 𑀔𑀼𑀤𑁆𑀤𑀓𑀦𑀺𑀓𑀸𑀬

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸; 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 [𑀧𑀸𑀧𑀼𑀭𑀡𑀸 (𑀲𑀻. 𑀲𑁆𑀬𑀸.)] 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀯𑀢𑁆𑀣𑀼 𑁋 𑀯𑀢𑁆𑀣𑀼𑀓𑀸𑀫𑀸.

𑀅𑀧𑀺 ¶ 𑀘 𑀅𑀢𑀻𑀢𑀸 𑀓𑀸𑀫𑀸 𑀅𑀦𑀸𑀕𑀢𑀸 𑀓𑀸𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀸; 𑀅𑀚𑁆𑀛𑀢𑁆𑀢𑀸 𑀓𑀸𑀫𑀸 𑀩𑀳𑀺𑀤𑁆𑀥𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀫𑀸; 𑀳𑀻𑀦𑀸 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀓𑀸𑀫𑀸 𑀧𑀡𑀻𑀢𑀸 𑀓𑀸𑀫𑀸; 𑀆𑀧𑀸𑀬𑀺𑀓𑀸 𑀓𑀸𑀫𑀸 𑀫𑀸𑀦𑀼𑀲𑀺𑀓𑀸 𑀓𑀸𑀫𑀸 𑀤𑀺𑀩𑁆𑀩𑀸 𑀓𑀸𑀫𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸; 𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀅𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸; 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸, 𑀅𑀧𑀭𑀺𑀕𑁆𑀕𑀳𑀺𑀢𑀸 ¶ 𑀓𑀸𑀫𑀸, 𑀫𑀫𑀸𑀬𑀺𑀢𑀸 ¶ 𑀓𑀸𑀫𑀸, 𑀅𑀫𑀫𑀸𑀬𑀺𑀢𑀸 𑀓𑀸𑀫𑀸; 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 ¶ 𑀥𑀫𑁆𑀫𑀸, 𑀢𑀡𑁆𑀳𑀸𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀭𑀫𑁆𑀫𑀡𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀭𑀚𑀦𑀻𑀬𑀝𑁆𑀞𑁂𑀦 𑀫𑀤𑀦𑀻𑀬𑀝𑁆𑀞𑁂𑀦 𑀓𑀸𑀫𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄; 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄; 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁.

‘‘𑀅𑀤𑁆𑀤𑀲𑀁 𑀓𑀸𑀫 𑀢𑁂 𑀫𑀽𑀮𑀁, 𑀲𑀗𑁆𑀓𑀧𑁆𑀧𑀸 𑀓𑀸𑀫 𑀚𑀸𑀬𑀲𑀺;

𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀓𑀸𑀫 𑀦 𑀳𑁄𑀳𑀺𑀲𑀻’’𑀢𑀺 [𑀦 𑀳𑁂𑀳𑀺𑀲𑀻𑀢𑀺 (𑀲𑁆𑀬𑀸.)]. 𑁋

𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀓𑀸𑀫𑀬𑀫𑀸𑀦𑀲𑁆𑀲 𑀇𑀘𑁆𑀙𑀫𑀸𑀦𑀲𑁆𑀲 𑀲𑀸𑀤𑀺𑀬𑀫𑀸𑀦𑀲𑁆𑀲 𑀧𑀢𑁆𑀣𑀬𑀫𑀸𑀦𑀲𑁆𑀲 𑀧𑀺𑀳𑀬𑀫𑀸𑀦𑀲𑁆𑀲 𑀅𑀪𑀺𑀚𑀧𑁆𑀧𑀫𑀸𑀦𑀲𑁆𑀲𑀸𑀢𑀺 𑁋 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲.

𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀻𑀢𑀺. 𑀢𑀲𑁆𑀲 𑀘𑁂𑀢𑀺 𑀢𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸. 𑀢𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸 𑀯𑀼𑀘𑁆𑀘𑀦𑁆𑀢𑀺 𑁋 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸. 𑀲𑀫𑀺𑀚𑁆𑀛𑀢𑀻𑀢𑀺 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀺 𑀮𑀪𑀢𑀺 𑀧𑀝𑀺𑀮𑀪𑀢𑀺 𑀅𑀥𑀺𑀕𑀘𑁆𑀙𑀢𑀺 𑀯𑀺𑀦𑁆𑀤𑀢𑀻𑀢𑀺 𑁋 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺.

𑀅𑀤𑁆𑀥𑀸 ¶ 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁 𑀦𑀺𑀲𑁆𑀲𑀁𑀲𑀬𑀯𑀘𑀦𑀁 𑀦𑀺𑀓𑁆𑀓𑀗𑁆𑀔𑀸𑀯𑀘𑀦𑀁 𑀅𑀤𑁆𑀯𑁂𑀚𑁆𑀛𑀯𑀘𑀦𑀁 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀁 𑀦𑀺𑀬𑁄𑀕𑀯𑀘𑀦𑀁 𑀅𑀧𑀡𑁆𑀡𑀓𑀯𑀘𑀦𑀁 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 ¶ 𑁋 𑀅𑀤𑁆𑀥𑀸𑀢𑀺. 𑀧𑀻𑀢𑀻𑀢𑀺 𑀬𑀸 𑀧𑀜𑁆𑀘𑀓𑀸𑀫𑀕𑀼𑀡𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀧𑀻𑀢𑀺 𑀧𑀸𑀫𑀼𑀚𑁆𑀚𑀁 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀺 𑀢𑀼𑀝𑁆𑀞𑀺 𑀑𑀤𑀕𑁆𑀬𑀁 𑀅𑀢𑁆𑀢𑀫𑀦𑀢𑀸 𑀅𑀪𑀺𑀨𑀭𑀡𑀢𑀸 𑀘𑀺𑀢𑁆𑀢𑀲𑁆𑀲. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀅𑀬𑀁 ¶ 𑀯𑀼𑀘𑁆𑀘𑀢𑀺 𑀫𑀦𑁄. 𑀅𑀬𑀁 𑀫𑀦𑁄 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢𑁄 𑀳𑁄𑀢𑀺 𑀲𑀳𑀚𑀸𑀢𑁄 𑀲𑀁𑀲𑀝𑁆𑀞𑁄 𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑁄 𑀏𑀓𑀦𑀺𑀭𑁄𑀥𑁄 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄. 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺 𑀧𑀻𑀢𑀺𑀫𑀦𑁄 𑀳𑁄𑀢𑀺 𑀢𑀼𑀝𑁆𑀞𑀫𑀦𑁄 𑀳𑀝𑁆𑀞𑀫𑀦𑁄 𑀧𑀳𑀝𑁆𑀞𑀫𑀦𑁄 ¶ 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑀫𑀦𑁄 𑀫𑀼𑀤𑀺𑀢𑀫𑀦𑁄 𑀧𑀫𑁄𑀤𑀺𑀢𑀫𑀦𑁄 𑀳𑁄𑀢𑀻𑀢𑀺 𑁋 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺.

𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻𑀢𑀺. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸. 𑀫𑀘𑁆𑀘𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 [𑀚𑀸𑀢𑀼 (𑀲𑁆𑀬𑀸.), 𑀚𑀕𑀼 (𑀓.)] 𑀚𑀦𑁆𑀢𑀼 𑀇𑀦𑁆𑀤𑀕𑀼 [𑀳𑀺𑀦𑁆𑀤𑀕𑀽 (𑀲𑀻. 𑀲𑁆𑀬𑀸.)] 𑀫𑀦𑀼𑀚𑁄. 𑀬𑀤𑀺𑀘𑁆𑀙𑀢𑀻𑀢𑀺 𑀬𑀁 𑀇𑀘𑁆𑀙𑀢𑀺 𑀬𑀁 𑀲𑀸𑀤𑀺𑀬𑀢𑀺 𑀬𑀁 𑀧𑀢𑁆𑀣𑁂𑀢𑀺 𑀬𑀁 𑀧𑀺𑀳𑁂𑀢𑀺 𑀬𑀁 𑀅𑀪𑀺𑀚𑀧𑁆𑀧𑀢𑀺, 𑀭𑀽𑀧𑀁 𑀯𑀸 𑀲𑀤𑁆𑀤𑀁 𑀯𑀸 𑀕𑀦𑁆𑀥𑀁 𑀯𑀸 𑀭𑀲𑀁 𑀯𑀸 𑀨𑁄𑀝𑁆𑀞𑀩𑁆𑀩𑀁 𑀯𑀸𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺.

𑀢𑀲𑁆𑀲 ¶ 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀢𑀲𑁆𑀲 ¶ 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸𑀢𑀺. 𑀢𑀲𑁆𑀲 𑀘𑁂𑀢𑀺 𑀢𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸. 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀓𑀸𑀫𑁂 𑀇𑀘𑁆𑀙𑀫𑀸𑀦𑀲𑁆𑀲 𑀲𑀸𑀤𑀺𑀬𑀫𑀸𑀦𑀲𑁆𑀲 𑀧𑀢𑁆𑀣𑀬𑀫𑀸𑀦𑀲𑁆𑀲 𑀧𑀺𑀳𑀬𑀫𑀸𑀦𑀲𑁆𑀲 𑀅𑀪𑀺𑀚𑀧𑁆𑀧𑀫𑀸𑀦𑀲𑁆𑀲. 𑀅𑀣 𑀯𑀸 𑀓𑀸𑀫𑀢𑀡𑁆𑀳𑀸𑀬 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺. 𑀬𑀣𑀸 𑀳𑀢𑁆𑀣𑀺𑀬𑀸𑀦𑁂𑀦 𑀯𑀸 𑀅𑀲𑁆𑀲𑀬𑀸𑀦𑁂𑀦 𑀯𑀸 𑀕𑁄𑀬𑀸𑀦𑁂𑀦 𑀯𑀸 𑀅𑀚𑀬𑀸𑀦𑁂𑀦 𑀯𑀸 𑀫𑁂𑀡𑁆𑀟𑀬𑀸𑀦𑁂𑀦 𑀯𑀸 𑀑𑀝𑁆𑀞𑀬𑀸𑀦𑁂𑀦 𑀯𑀸 𑀔𑀭𑀬𑀸𑀦𑁂𑀦 𑀯𑀸 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺; 𑀏𑀯𑀫𑁂𑀯𑀁 𑀓𑀸𑀫𑀢𑀡𑁆𑀳𑀸𑀬 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲.

𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄𑀢𑀺. 𑀙𑀦𑁆𑀤𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀢𑀲𑁆𑀲 𑀲𑁄 𑀓𑀸𑀫𑀘𑁆𑀙𑀦𑁆𑀤𑁄 𑀚𑀸𑀢𑁄 𑀳𑁄𑀢𑀺 𑀲𑀜𑁆𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀧𑀸𑀢𑀼𑀪𑀽𑀢𑁄. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲 𑀦𑀭𑀲𑁆𑀲 𑀫𑀸𑀦𑀯𑀲𑁆𑀲 𑀧𑁄𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀲𑁆𑀲 𑀚𑀸𑀕𑀼𑀲𑁆𑀲 𑀚𑀦𑁆𑀢𑀼𑀲𑁆𑀲 𑀇𑀦𑁆𑀤𑀕𑀼𑀲𑁆𑀲 𑀫𑀦𑀼𑀚𑀲𑁆𑀲𑀸𑀢𑀺 𑁋 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄.

𑀢𑁂 ¶ 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑁋 𑀢𑁂 𑀯𑀸 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑁄 ¶ 𑀯𑀸 𑀓𑀸𑀫𑁂𑀳𑀺 𑀧𑀭𑀺𑀳𑀸𑀬𑀢𑀺. 𑀓𑀣𑀁 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺? 𑀢𑀲𑁆𑀲 𑀢𑀺𑀝𑁆𑀞𑀦𑁆𑀢𑀲𑁆𑀲𑁂𑀯 ¶ 𑀢𑁂 𑀪𑁄𑀕𑁂 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺, 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺, 𑀅𑀕𑁆𑀕𑀺 𑀯𑀸 𑀤𑀳𑀢𑀺, 𑀉𑀤𑀓𑀁 𑀯𑀸 𑀯𑀳𑀢𑀺, 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺, 𑀦𑀺𑀳𑀺𑀢𑀁 𑀯𑀸 𑀦𑀸𑀥𑀺𑀕𑀘𑁆𑀙𑀢𑀺, 𑀤𑀼𑀧𑁆𑀧𑀬𑀼𑀢𑁆𑀢𑀸 𑀯𑀸 𑀓𑀫𑁆𑀫𑀦𑁆𑀢𑀸 𑀪𑀺𑀚𑁆𑀚𑀦𑁆𑀢𑀺, 𑀓𑀼𑀮𑁂 𑀯𑀸 ¶ 𑀓𑀼𑀮𑀗𑁆𑀕𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀬𑁄 𑀢𑁂 𑀪𑁄𑀕𑁂 𑀯𑀺𑀓𑀺𑀭𑀢𑀺 𑀯𑀺𑀥𑀫𑀢𑀺 [𑀯𑀺𑀥𑀫𑁂𑀢𑀺 (𑀲𑁆𑀬𑀸.)] 𑀯𑀺𑀤𑁆𑀥𑀁𑀲𑁂𑀢𑀺 𑀅𑀦𑀺𑀘𑁆𑀘𑀢𑀸𑀬𑁂𑀯 𑀅𑀝𑁆𑀞𑀫𑀻. 𑀏𑀯𑀁 𑀢𑁂 𑀓𑀸𑀫𑀸 𑀳𑀸𑀬𑀦𑁆𑀢𑀺 𑀧𑀭𑀺𑀳𑀸𑀬𑀦𑁆𑀢𑀺 𑀧𑀭𑀺𑀥𑀁𑀲𑁂𑀦𑁆𑀢𑀺 𑀧𑀭𑀺𑀧𑀢𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀺. 𑀓𑀣𑀁 𑀲𑁄 𑀓𑀸𑀫𑁂𑀳𑀺 𑀧𑀭𑀺𑀳𑀸𑀬𑀢𑀺? 𑀢𑀺𑀝𑁆𑀞𑀦𑁆𑀢𑁂𑀯 𑀢𑁂 𑀪𑁄𑀕𑁂 𑀲𑁄 𑀘𑀯𑀢𑀺 𑀫𑀭𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺. 𑀏𑀯𑀁 𑀲𑁄 𑀓𑀸𑀫𑁂𑀳𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺 𑀧𑀭𑀺𑀥𑀁𑀲𑁂𑀢𑀺 𑀧𑀭𑀺𑀧𑀢𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺.

𑀘𑁄𑀭𑀸 𑀳𑀭𑀦𑁆𑀢𑀺 𑀭𑀸𑀚𑀸𑀦𑁄, 𑀅𑀕𑁆𑀕𑀺 𑀤𑀳𑀢𑀺 𑀦𑀲𑁆𑀲𑀢𑀺;

𑀅𑀣 𑀅𑀦𑁆𑀢𑁂𑀦 𑀚𑀳𑀢𑀺 [𑀅𑀣𑁄 𑀅𑀦𑁆𑀢𑁂𑀦 𑀳𑁂𑀢𑀺 (𑀲𑁆𑀬𑀸.), 𑀅𑀲𑀳𑀦𑁆𑀢𑁂𑀦 𑀤𑀳𑀢𑀺 (𑀓.)], 𑀲𑀭𑀻𑀭𑀁 𑀲𑀧𑀭𑀺𑀕𑁆𑀕𑀳𑀁;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀪𑀼𑀜𑁆𑀚𑁂𑀣 𑀘 𑀤𑀤𑁂𑀣 𑀘.

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀦𑁆𑀢𑀺, 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺.

𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺. 𑀬𑀣𑀸 𑀅𑀬𑁄𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄, 𑀅𑀝𑁆𑀞𑀺𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀤𑀦𑁆𑀢𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀯𑀺𑀲𑀸𑀡𑀫𑀬𑁂𑀦 𑀯𑀸 ¶ 𑀲𑀮𑁆𑀮𑁂𑀦 𑀓𑀝𑁆𑀞𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀭𑀼𑀧𑁆𑀧𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺, 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺, 𑀏𑀯𑀫𑁂𑀯 𑀯𑀢𑁆𑀣𑀼𑀓𑀸𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸. 𑀲𑁄 𑀓𑀸𑀫𑀲𑀮𑁆𑀮𑁂𑀦 𑀘 𑀲𑁄𑀓𑀲𑀮𑁆𑀮𑁂𑀦 𑀘 𑀯𑀺𑀤𑁆𑀥𑁄, 𑀭𑀼𑀧𑁆𑀧𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑁋 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

‘‘𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺.

𑀬𑁄 ¶ 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑀬𑁄 ¶ 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁𑀞𑀸𑀦𑀧𑁆𑀧𑀢𑁆𑀢𑁄 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 ¶ 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺 𑁋 𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀸 𑀲𑀫𑀼𑀘𑁆𑀙𑁂𑀤𑀢𑁄 𑀯𑀸. 𑀓𑀣𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺? ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀫𑀁𑀲𑀧𑁂𑀲𑀽𑀧𑀫𑀸 ¶ 𑀓𑀸𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀫𑀳𑀸𑀧𑀭𑀺𑀴𑀸𑀳𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀲𑀫𑁆𑀪𑀜𑁆𑀚𑀦𑀧𑀭𑀺𑀪𑀜𑁆𑀚𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦𑀸’’𑀢𑀺 [𑀅𑀥𑀺𑀓𑀦𑁆𑀢𑀦𑀝𑁆𑀞𑁂𑀦𑀸𑀢𑀺 (𑀲𑁆𑀬𑀸.)] 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦𑀸’’𑀢𑀺 ¶ 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸 𑀓𑀸𑀫𑀸 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺…𑀧𑁂… 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀲𑀻𑀮𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀘𑀸𑀕𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 [𑀆𑀦𑀸𑀧𑀸𑀦𑀲𑀢𑀺𑀁 (𑀲𑀻.)] 𑀪𑀸𑀯𑁂𑀦𑁆𑀢𑁄𑀧𑀺… 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀓𑀸𑀬𑀕𑀢𑀸𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀧𑀞𑀫𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 ¶ 𑀧𑀭𑀺𑀯𑀚𑁆𑀚𑁂𑀢𑀺, 𑀤𑀼𑀢𑀺𑀬𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 ¶ … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺. 𑀏𑀯𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀓𑀣𑀁 ¶ 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀅𑀧𑀸𑀬𑀕𑀫𑀦𑀻𑀬𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀑𑀴𑀸𑀭𑀺𑀓𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀅𑀦𑀼𑀲𑀳𑀕𑀢𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺. 𑀏𑀯𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑁋 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄𑀢𑀺. 𑀲𑀧𑁆𑀧𑁄 𑀯𑀼𑀘𑁆𑀘𑀢𑀺 𑀅𑀳𑀺. 𑀓𑁂𑀦𑀝𑁆𑀞𑁂𑀦 𑀲𑀧𑁆𑀧𑁄? 𑀲𑀁𑀲𑀧𑁆𑀧𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀲𑀧𑁆𑀧𑁄; 𑀪𑀼𑀚𑀦𑁆𑀢𑁄 ¶ 𑀕𑀘𑁆𑀙𑀢𑀻𑀢𑀺 𑀪𑀼𑀚𑀕𑁄; 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄; 𑀧𑀦𑁆𑀦𑀲𑀺𑀭𑁄 𑀕𑀘𑁆𑀙𑀢𑀻𑀢𑀺 𑀧𑀦𑁆𑀦𑀕𑁄; 𑀲𑀺𑀭𑁂𑀦 𑀲𑀼𑀧𑀢𑀻𑀢𑀺 [𑀲𑀧𑁆𑀧𑀢𑀻𑀢𑀺 (𑀓.)] 𑀲𑀭𑀻𑀲𑀧𑁄 [𑀲𑀺𑀭𑀺𑀁𑀲𑀧𑁄 (𑀲𑀻.)]; 𑀩𑀺𑀮𑁂 𑀲𑀬𑀢𑀻𑀢𑀺 𑀩𑀺𑀮𑀸𑀲𑀬𑁄; 𑀕𑀼𑀳𑀸𑀬𑀁 𑀲𑀬𑀢𑀻𑀢𑀺 𑀕𑀼𑀳𑀸𑀲𑀬𑁄; 𑀤𑀸𑀞𑀸 𑀢𑀲𑁆𑀲 𑀆𑀯𑀼𑀥𑁄𑀢𑀺 𑀤𑀸𑀞𑀸𑀯𑀼𑀥𑁄; 𑀯𑀺𑀲𑀁 𑀢𑀲𑁆𑀲 𑀖𑁄𑀭𑀦𑁆𑀢𑀺 𑀖𑁄𑀭𑀯𑀺𑀲𑁄; 𑀚𑀺𑀯𑁆𑀳𑀸 𑀢𑀲𑁆𑀲 𑀤𑀼𑀯𑀺𑀥𑀸𑀢𑀺 𑀤𑁆𑀯𑀺𑀚𑀺𑀯𑁆𑀳𑁄; 𑀤𑁆𑀯𑀻𑀳𑀺 𑀚𑀺𑀯𑁆𑀳𑀸𑀳𑀺 ¶ 𑀭𑀲𑀁 𑀲𑀸𑀬𑀢𑀻𑀢𑀺 𑀤𑁆𑀯𑀺𑀭𑀲𑀜𑁆𑀜𑀽. 𑀬𑀣𑀸 𑀧𑀼𑀭𑀺𑀲𑁄 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑁄 𑀧𑀸𑀤𑁂𑀦 𑀲𑀧𑁆𑀧𑀲𑀺𑀭𑀁 𑀯𑀚𑁆𑀚𑁂𑀬𑁆𑀬 𑀯𑀺𑀯𑀚𑁆𑀚𑁂𑀬𑁆𑀬 𑀧𑀭𑀺𑀯𑀚𑁆𑀚𑁂𑀬𑁆𑀬 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑁄 𑀓𑀸𑀫𑁂 𑀯𑀚𑁆𑀚𑁂𑀬𑁆𑀬 𑀯𑀺𑀯𑀚𑁆𑀚𑁂𑀬𑁆𑀬 𑀧𑀭𑀺𑀯𑀚𑁆𑀚𑁂𑀬𑁆𑀬 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑁋 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄.

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻𑀢𑀺. 𑀲𑁄𑀢𑀺 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺. 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀺𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 [𑀧𑀴𑀺𑀕𑁂𑀥𑁄 (𑀲𑀻.)] 𑀲𑀗𑁆𑀕𑁄 𑀧𑀗𑁆𑀓𑁄, 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸, 𑀲𑀼𑀢𑁆𑀢𑀁 𑀯𑀺𑀲𑀢𑀸 𑀆𑀬𑀽𑀳𑀺𑀦𑀻 [𑀆𑀬𑀽𑀳𑀦𑀻 (𑀲𑀻. 𑀲𑁆𑀬𑀸.)] 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺, 𑀯𑀦𑀁 𑀯𑀦𑀣𑁄 𑀲𑀦𑁆𑀥𑀯𑁄 𑀲𑁆𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼, 𑀆𑀲𑀸 𑀆𑀲𑀻𑀲𑀦𑀸 𑀆𑀲𑀻𑀲𑀺𑀢𑀢𑁆𑀢𑀁, 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸, 𑀮𑀸𑀪𑀸𑀲𑀸 𑀚𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸, 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸, 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 ¶ 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸, 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 ¶ 𑀯𑀺𑀪𑀯𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸 ¶ , 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁, 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁, 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀯𑀺𑀲𑀬𑁄, 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁.

𑀯𑀺𑀲𑀢𑁆𑀢𑀺𑀓𑀸𑀢𑀺. 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀝𑀸𑀢𑀺 ¶ 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀧𑀭𑀺𑀪𑁄𑀕𑁄𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂, 𑀓𑀼𑀮𑁂 𑀕𑀡𑁂 𑀆𑀯𑀸𑀲𑁂 𑀮𑀸𑀪𑁂 𑀬𑀲𑁂, 𑀧𑀲𑀁𑀲𑀸𑀬 𑀲𑀼𑀔𑁂 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀲𑁂𑀦𑀸𑀲𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂, 𑀓𑀸𑀫𑀥𑀸𑀢𑀼𑀬𑀸 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸, 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂, 𑀲𑀜𑁆𑀜𑀸𑀪𑀯𑁂 𑀅𑀲𑀜𑁆𑀜𑀸𑀪𑀯𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂, 𑀏𑀓𑀯𑁄𑀓𑀸𑀭𑀪𑀯𑁂 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂, 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸.

𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂, 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 ¶ 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀅𑀲𑀢𑀺𑀧𑀭𑀺𑀯𑀚𑁆𑀚𑀦𑀸𑀬 𑀲𑀢𑁄, 𑀲𑀢𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀓𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀧𑀭𑀺𑀩𑀦𑁆𑀥𑀸𑀦𑀁 𑀥𑀫𑁆𑀫𑀸𑀦𑀁 𑀳𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑁆𑀢𑀸 ¶ 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀯𑀲𑀺𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀧𑀸𑀕𑀼𑀜𑁆𑀜𑀢𑀸𑀬 𑀲𑀢𑁄, 𑀲𑀢𑀺𑀬𑀸 𑀅𑀧𑀘𑁆𑀘𑁄𑀭𑁄𑀳𑀡𑀢𑀸𑀬 [𑀅𑀧𑀘𑁆𑀘𑁄𑀭𑁄𑀧𑀦𑀢𑀸𑀬 (𑀲𑀻.)] 𑀲𑀢𑁄.

𑀅𑀧𑀭𑁂𑀳𑀺𑀧𑀺 ¶ 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑁆𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀢𑁆𑀢𑀸 𑀲𑀢𑁄, 𑀲𑀫𑀺𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀲𑀢𑁄, 𑀫𑀭𑀡𑀲𑁆𑀲𑀢𑀺𑀬𑀸 𑀲𑀢𑁄, 𑀓𑀸𑀬𑀕𑀢𑀸𑀲𑀢𑀺𑀬𑀸 𑀲𑀢𑁄, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄. 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄.

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻𑀢𑀺. 𑀮𑁄𑀓𑁂 𑀯𑀸 𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑀸 𑀢𑀁 ¶ 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑀢𑀺 𑀉𑀢𑁆𑀢𑀭𑀢𑀺 𑀧𑀢𑀭𑀢𑀺 𑀲𑀫𑀢𑀺𑀓𑁆𑀓𑀫𑀢𑀺 𑀯𑀻𑀢𑀺𑀯𑀢𑁆𑀢𑀢𑀻𑀢𑀺 𑁋 𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

‘‘𑀬𑁄 𑀓𑀸𑀫𑁂 ¶ 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀺.

𑀔𑁂𑀢𑁆𑀢𑀁 ¶ 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸𑀢𑀺. 𑀔𑁂𑀢𑁆𑀢𑀦𑁆𑀢𑀺 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀯𑀻𑀳𑀺𑀓𑁆𑀔𑁂𑀢𑁆𑀢𑀁 𑀫𑀼𑀕𑁆𑀕𑀓𑁆𑀔𑁂𑀢𑁆𑀢𑀁 𑀫𑀸𑀲𑀓𑁆𑀔𑁂𑀢𑁆𑀢𑀁 𑀬𑀯𑀓𑁆𑀔𑁂𑀢𑁆𑀢𑀁 𑀕𑁄𑀥𑀼𑀫𑀓𑁆𑀔𑁂𑀢𑁆𑀢𑀁 𑀢𑀺𑀮𑀓𑁆𑀔𑁂𑀢𑁆𑀢𑀁. 𑀯𑀢𑁆𑀣𑀼𑀦𑁆𑀢𑀺 𑀖𑀭𑀯𑀢𑁆𑀣𑀼𑀁 𑀓𑁄𑀝𑁆𑀞𑀓𑀯𑀢𑁆𑀣𑀼𑀁 𑀧𑀼𑀭𑁂𑀯𑀢𑁆𑀣𑀼𑀁 𑀧𑀘𑁆𑀙𑀸𑀯𑀢𑁆𑀣𑀼𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀯𑀢𑁆𑀣𑀼𑀁. 𑀳𑀺𑀭𑀜𑁆𑀜𑀦𑁆𑀢𑀺 𑀳𑀺𑀭𑀜𑁆𑀜𑀁 𑀯𑀼𑀘𑁆𑀘𑀢𑀺 𑀓𑀳𑀸𑀧𑀡𑁄𑀢𑀺 𑁋 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸.

𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀦𑁆𑀢𑀺. 𑀕𑀯𑀦𑁆𑀢𑀺 𑀕𑀯𑀸 [𑀕𑀸𑀯𑁄 (𑀓.)] 𑀯𑀼𑀘𑁆𑀘𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀧𑀲𑀼𑀓𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀤𑀸𑀲𑀸𑀢𑀺 𑀘𑀢𑁆𑀢𑀸𑀭𑁄 𑀤𑀸𑀲𑀸 𑁋 𑀅𑀦𑁆𑀢𑁄𑀚𑀸𑀢𑀓𑁄 𑀤𑀸𑀲𑁄, 𑀥𑀦𑀓𑁆𑀓𑀻𑀢𑀓𑁄 𑀤𑀸𑀲𑁄, 𑀲𑀸𑀫𑀁 𑀯𑀸 𑀤𑀸𑀲𑀩𑁆𑀬𑀁 𑀉𑀧𑁂𑀢𑀺, 𑀅𑀓𑀸𑀫𑀓𑁄 𑀯𑀸 𑀤𑀸𑀲𑀯𑀺𑀲𑀬𑀁 𑀉𑀧𑁂𑀢𑀺.

‘‘𑀆𑀫𑀸𑀬 ¶ 𑀤𑀸𑀲𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀥𑀦𑁂𑀦 𑀓𑀻𑀢𑀸𑀧𑀺 𑀪𑀯𑀦𑁆𑀢𑀺 𑀤𑀸𑀲𑀸;

𑀲𑀸𑀫𑀜𑁆𑀘 𑀏𑀓𑁂 𑀉𑀧𑀬𑀦𑁆𑀢𑀺 𑀤𑀸𑀲𑁆𑀬𑀁, 𑀪𑀬𑀸𑀧𑀦𑀼𑀡𑁆𑀡𑀸𑀧𑀺 𑀪𑀯𑀦𑁆𑀢𑀺 𑀤𑀸𑀲𑀸’’𑀢𑀺.

𑀧𑀼𑀭𑀺𑀲𑀸𑀢𑀺 𑀢𑀬𑁄 𑀧𑀼𑀭𑀺𑀲𑀸 𑁋 𑀪𑀢𑀓𑀸, 𑀓𑀫𑁆𑀫𑀓𑀭𑀸, 𑀉𑀧𑀚𑀻𑀯𑀺𑀦𑁄𑀢𑀺 𑁋 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁.

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂𑀢𑀺. 𑀣𑀺𑀬𑁄𑀢𑀺 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁄 𑀯𑀼𑀘𑁆𑀘𑀢𑀺. 𑀩𑀦𑁆𑀥𑀽𑀢𑀺 ¶ 𑀘𑀢𑁆𑀢𑀸𑀭𑁄 𑀩𑀦𑁆𑀥𑀽 𑁋 𑀜𑀸𑀢𑀺𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀕𑁄𑀢𑁆𑀢𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀫𑀦𑁆𑀢𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀲𑀺𑀧𑁆𑀧𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼. 𑀧𑀼𑀣𑀼 𑀓𑀸𑀫𑁂𑀢𑀺 𑀩𑀳𑀽 𑀓𑀸𑀫𑁂. 𑀏𑀢𑁂 𑀧𑀼𑀣𑀼 𑀓𑀸𑀫𑀸 𑀫𑀦𑀸𑀧𑀺𑀓𑀸 𑀭𑀽𑀧𑀸…𑀧𑁂… 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸𑀢𑀺 𑁋 𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂.

𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁𑀞𑀸𑀦𑀧𑁆𑀧𑀢𑁆𑀢𑁄 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 ¶ 𑀯𑀸 𑀧𑀩𑁆𑀩𑀚𑀺𑀢𑁄 ¶ 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀦𑀭𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀅𑀦𑀼𑀕𑀺𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼 𑀕𑀺𑀚𑁆𑀛𑀢𑀺 𑀅𑀦𑀼𑀕𑀺𑀚𑁆𑀛𑀢𑀺 𑀧𑀮𑀺𑀕𑀺𑀚𑁆𑀛𑀢𑀺 𑀧𑀮𑀺𑀩𑀚𑁆𑀛𑀢𑀻𑀢𑀺 𑁋 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀺.

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻’’𑀢𑀺.

𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓𑀁.

𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻𑀢𑀺. 𑀅𑀩𑀮𑀸𑀢𑀺 𑀅𑀩𑀮𑀸 𑀓𑀺𑀮𑁂𑀲𑀸 𑀤𑀼𑀩𑁆𑀩𑀮𑀸 𑀅𑀧𑁆𑀧𑀩𑀮𑀸 𑀅𑀧𑁆𑀧𑀣𑀸𑀫𑀓𑀸 𑀳𑀻𑀦𑀸 𑀦𑀺𑀳𑀻𑀦𑀸 ( ) [(𑀧𑀭𑀺𑀳𑀻𑀦𑀸) (𑀲𑀻. 𑀲𑁆𑀬𑀸.)] 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸. 𑀢𑁂 𑀓𑀺𑀮𑁂𑀲𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺, 𑀏𑀯𑀫𑁆𑀧𑀺 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺. 𑀅𑀣 𑀯𑀸, 𑀅𑀩𑀮𑀁 𑀧𑀼𑀕𑁆𑀕𑀮𑀁 𑀤𑀼𑀩𑁆𑀩𑀮𑀁 𑀅𑀧𑁆𑀧𑀩𑀮𑀁 𑀅𑀧𑁆𑀧𑀣𑀸𑀫𑀓𑀁 𑀳𑀻𑀦𑀁 ¶ 𑀦𑀺𑀳𑀻𑀦𑀁 𑀑𑀫𑀓𑀁 𑀮𑀸𑀫𑀓𑀁 𑀙𑀢𑀼𑀓𑁆𑀓𑀁 𑀧𑀭𑀺𑀢𑁆𑀢𑀁, 𑀬𑀲𑁆𑀲 𑀦𑀢𑁆𑀣𑀺 𑀲𑀤𑁆𑀥𑀸𑀩𑀮𑀁 𑀯𑀻𑀭𑀺𑀬𑀩𑀮𑀁 𑀲𑀢𑀺𑀩𑀮𑀁 𑀲𑀫𑀸𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀁 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀁 ¶ . 𑀢𑁂 𑀓𑀺𑀮𑁂𑀲𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻𑀢𑀺.

𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸𑀢𑀺. 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 [𑀫𑀳𑀺𑀲𑀸 (𑀲𑀻. 𑀲𑁆𑀬𑀸.)] 𑀳𑀢𑁆𑀣𑀻 𑀅𑀳𑀺𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 ¶ 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄, 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄, 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸, 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄, 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 [𑀭𑀓𑁆𑀔𑀲𑀸 (𑀓.)] 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁, 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸, 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑀇𑀢𑀺 𑀯𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.

𑀓𑀢𑀫𑁂 ¶ 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 ¶ , 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁, 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁, 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑀸? 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸. 𑀓𑀣𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀏𑀯𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸. 𑀓𑀣𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 ¶ 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 ¶ 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬, 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀺𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 ¶ 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 ¶ 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑀯𑀦𑁆𑀢𑀺 𑀧𑀸𑀧𑀓𑀸 ¶ 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 𑁋 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀁 [𑀅𑀦𑁆𑀢𑀭𑀸𑀫𑀮𑁄 (𑀲𑁆𑀬𑀸.)] 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀤𑁄𑀲𑁄…𑀧𑁂… 𑀫𑁄𑀳𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀁 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑁋 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸.

‘‘𑀅𑀦𑀢𑁆𑀣𑀚𑀦𑀦𑁄 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀲𑁆𑀬𑀸. 𑀓.)] 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 ¶ 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 ¶ 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 ¶ 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀫𑀽𑀴𑁆𑀳𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀫𑀽𑀴𑁆𑀳𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚…𑀧𑁂… 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬.

‘‘𑀮𑁄𑀪𑁄 ¶ 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀫𑁆𑀧𑀺 ¶ 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀺 𑀭𑀢𑀺 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺 [𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑁆𑀚𑀦𑁆𑀢𑀺 (𑀲𑁆𑀬𑀸.)].

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸𑀢𑀺. 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺 𑁋 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸.

𑀢𑀢𑁄 ¶ 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀻𑀢𑀺. 𑀢𑀢𑁄𑀢𑀺 𑀢𑀢𑁄 𑀢𑀢𑁄 𑀧𑀭𑀺𑀲𑁆𑀲𑀬𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀚𑀸𑀢𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀚𑀭𑀸𑀤𑀼𑀓𑁆𑀔𑀁 ¶ 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀫𑀭𑀡𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀦𑁂𑀭𑀬𑀺𑀓𑀁 𑀤𑀼𑀓𑁆𑀔𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀁 𑀤𑀼𑀓𑁆𑀔𑀁, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀫𑀸𑀦𑀼𑀲𑀺𑀓𑀁 𑀤𑀼𑀓𑁆𑀔𑀁… 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁… 𑀕𑀩𑁆𑀪𑁂 𑀞𑀺𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁… 𑀕𑀩𑁆𑀪𑀸 𑀯𑀼𑀝𑁆𑀞𑀸𑀦𑀫𑀽𑀮𑀓𑀁 𑀤𑀼𑀓𑁆𑀔𑀁… 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑀁 𑀤𑀼𑀓𑁆𑀔𑀁… 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑀁 𑀤𑀼𑀓𑁆𑀔𑀁… 𑀅𑀢𑁆𑀢𑀽𑀧𑀓𑁆𑀓𑀫𑀁 𑀤𑀼𑀓𑁆𑀔𑀁… 𑀧𑀭𑀽𑀧𑀓𑁆𑀓𑀫𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀤𑀼𑀓𑁆𑀔𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀲𑀗𑁆𑀔𑀸𑀭𑀤𑀼𑀓𑁆𑀔𑀁… 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 ¶ … 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄, 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄, 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸, 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄, 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁, 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 ¶ 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸, 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀤𑀼𑀓𑁆𑀔𑀁… 𑀫𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁… 𑀧𑀺𑀢𑀼𑀫𑀭𑀡𑀁 𑀤𑀼𑀓𑁆𑀔𑀁… 𑀪𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁… 𑀪𑀕𑀺𑀦𑀺𑀫𑀭𑀡𑀁 𑀤𑀼𑀓𑁆𑀔𑀁… 𑀧𑀼𑀢𑁆𑀢𑀫𑀭𑀡𑀁 𑀤𑀼𑀓𑁆𑀔𑀁… 𑀥𑀻𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 ¶ … 𑀜𑀸𑀢𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀪𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀭𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀲𑀻𑀮𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀻𑀢𑀺 𑁋 𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺.

𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓𑀦𑁆𑀢𑀺. 𑀬𑀣𑀸 𑀪𑀺𑀦𑁆𑀦𑀁 𑀦𑀸𑀯𑀁 𑀤𑀓𑀫𑁂𑀲𑀺𑀁 [𑀉𑀤𑀓𑀤𑀸𑀬𑀺𑀢𑁄 (𑀲𑀻.), 𑀉𑀤𑀓𑀁 𑀅𑀦𑁆𑀯𑀸𑀬𑀺𑀓𑀁 (𑀲𑁆𑀬𑀸.)] 𑀢𑀢𑁄 𑀢𑀢𑁄 𑀉𑀤𑀓𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀧𑀼𑀭𑀢𑁄𑀧𑀺 𑀉𑀤𑀓𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀧𑀘𑁆𑀙𑀢𑁄𑀧𑀺… 𑀳𑁂𑀝𑁆𑀞𑀢𑁄𑀧𑀺… 𑀧𑀲𑁆𑀲𑀢𑁄𑀧𑀺 𑀉𑀤𑀓𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯 𑀢𑀢𑁄 𑀢𑀢𑁄 𑀧𑀭𑀺𑀲𑁆𑀲𑀬𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀚𑀸𑀢𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀻𑀢𑀺 𑁋 𑀦𑀸𑀯𑀁 ¶ 𑀪𑀺𑀦𑁆𑀦𑀫𑀺𑀯𑁄𑀤𑀓𑀁.

‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓’’𑀦𑁆𑀢𑀺.

𑀢𑀲𑁆𑀫𑀸 ¶ 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽.

𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀓𑀸𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀤𑀓𑀽𑀫𑀺𑀓𑀚𑀸𑀢𑀁 𑀅𑀯𑀻𑀘𑀺 𑀲𑀦𑁆𑀢𑀢𑀺 𑀲𑀳𑀺𑀢𑀁 𑀨𑀲𑁆𑀲𑀺𑀢𑀁 [𑀨𑀼𑀲𑀺𑀢𑀁 (𑀲𑀻. 𑀲𑁆𑀬𑀸.)], 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 ¶ 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁, 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂, 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄. 𑀅𑀧𑀭𑁂𑀳𑀺 𑀘𑀢𑀽𑀳𑀺 ¶ 𑀓𑀸𑀭𑀡𑁂𑀳𑀺 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄.

𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 ¶ 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬 𑁋 𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀸 𑀲𑀫𑀼𑀘𑁆𑀙𑁂𑀤𑀢𑁄 𑀯𑀸. 𑀓𑀣𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬? ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬, ‘‘𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬, ‘‘𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬. 𑀏𑀯𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬…𑀧𑁂… 𑀏𑀯𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑁋 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂.

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀦𑁆𑀢𑀺. 𑀢𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸; 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸; 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁…𑀧𑁂… 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁… 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁.

𑀦𑀸𑀯𑀁 ¶ ¶ 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽𑀢𑀺. 𑀬𑀣𑀸 𑀕𑀭𑀼𑀓𑀁 𑀦𑀸𑀯𑀁 𑀪𑀸𑀭𑀺𑀓𑀁 𑀉𑀤𑀓𑀁 𑀲𑀺𑀢𑁆𑀯𑀸 [𑀲𑀺𑀜𑁆𑀘𑀺𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀑𑀲𑀺𑀜𑁆𑀘𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀮𑀳𑀼𑀓𑀸𑀬 𑀦𑀸𑀯𑀸𑀬 𑀔𑀺𑀧𑁆𑀧𑀁 𑀮𑀳𑀼𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 ¶ 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸; 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁… 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁… 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁… 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸 𑀔𑀺𑀧𑁆𑀧𑀁 𑀮𑀳𑀼𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 ¶ . 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑁋 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀨𑀼𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬. 𑀧𑀸𑀭𑀕𑀽𑀢𑀺 𑀬𑁄𑀧𑀺 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁄 𑀲𑁄𑀧𑀺 𑀧𑀸𑀭𑀕𑀽; 𑀬𑁄𑀧𑀺 𑀧𑀸𑀭𑀁 𑀕𑀘𑁆𑀙𑀢𑀺 𑀲𑁄𑀧𑀺 𑀧𑀸𑀭𑀕𑀽; 𑀬𑁄𑀧𑀺 𑀧𑀸𑀭𑀁 𑀕𑀢𑁄, 𑀲𑁄𑀧𑀺 𑀧𑀸𑀭𑀕𑀽.

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀧𑀳𑀸𑀦𑀧𑀸𑀭𑀕𑀽 𑀪𑀸𑀯𑀦𑀸𑀧𑀸𑀭𑀕𑀽 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽. 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀤𑀼𑀓𑁆𑀔𑀸𑀦𑀁, 𑀧𑀳𑀸𑀦𑀧𑀸𑀭𑀕𑀽 𑀲𑀩𑁆𑀩𑀓𑀺𑀮𑁂𑀲𑀸𑀦𑀁, 𑀪𑀸𑀯𑀦𑀸𑀧𑀸𑀭𑀕𑀽 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀦𑀺𑀭𑁄𑀥𑀲𑁆𑀲, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽 𑀲𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑁄 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀲𑁆𑀫𑀺𑀁 𑀲𑀻𑀮𑀲𑁆𑀫𑀺𑀁, 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀲𑁆𑀫𑀺𑀁 𑀲𑀫𑀸𑀥𑀺𑀲𑁆𑀫𑀺𑀁, 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬, 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀲𑁄 𑀧𑀸𑀭𑀁 𑀕𑀢𑁄 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 ¶ 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀕𑀢𑀤𑁆𑀥𑁄 𑀕𑀢𑀤𑀺𑀲𑁄 𑀕𑀢𑀓𑁄𑀝𑀺𑀓𑁄 𑀧𑀸𑀮𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀳𑀻𑀦𑀓𑀺𑀮𑁂𑀲𑁄 ¶ 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄, 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁.

𑀲𑁄 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀅𑀩𑁆𑀩𑀼𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑁄. 𑀲𑁄 𑀦𑁂𑀯𑀸𑀘𑀺𑀦𑀢𑀺 [𑀦𑁂𑀯 𑀆𑀘𑀺𑀦𑀸𑀢𑀺 (𑀲𑀻. 𑀲𑁆𑀬𑀸.)] 𑀦𑀸𑀧𑀘𑀺𑀦𑀢𑀺 ¶ , 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺, 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀲𑀁𑀲𑀺𑀩𑁆𑀩𑀢𑀺 [𑀦𑁂𑀯 𑀲𑀺𑀦𑁂𑀢𑀺 (𑀲𑀻.), 𑀦𑁂𑀯 𑀯𑀺𑀲𑀻𑀦𑁂𑀢𑀺 (𑀲𑁆𑀬𑀸.)] 𑀦 𑀉𑀲𑁆𑀲𑀺𑀦𑁂𑀢𑀺, 𑀯𑀺𑀲𑀺𑀦𑀺𑀢𑁆𑀯𑀸 ¶ 𑀞𑀺𑀢𑁄. 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺, 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄. 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ¶ 𑀞𑀺𑀢𑁄. 𑀲𑀘𑁆𑀘𑀁 𑀲𑀫𑁆𑀧𑀝𑀺𑀧𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄. 𑀏𑀚𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀓𑀺𑀮𑁂𑀲𑀕𑁆𑀕𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄, 𑀅𑀧𑀭𑀺𑀕𑀫𑀦𑀢𑀸𑀬 𑀞𑀺𑀢𑁄, 𑀓𑀝𑀁 𑀲𑀫𑀸𑀤𑀸𑀬 𑀞𑀺𑀢𑁄, 𑀫𑀼𑀢𑁆𑀢𑀺𑀧𑀝𑀺𑀲𑁂𑀯𑀦𑀢𑀸𑀬 𑀞𑀺𑀢𑁄, 𑀫𑁂𑀢𑁆𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀓𑀭𑀼𑀡𑀸𑀬… 𑀫𑀼𑀤𑀺𑀢𑀸𑀬… 𑀉𑀧𑁂𑀓𑁆𑀔𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀘𑁆𑀘𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀓𑀫𑁆𑀫𑀬𑀢𑀸𑀬 [𑀅𑀢𑀫𑁆𑀫𑀬𑀢𑀸𑀬 (𑀲𑀻.), 𑀅𑀓𑀫𑁆𑀫𑀜𑁆𑀜𑀢𑀸𑀬 (𑀲𑁆𑀬𑀸.)] 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑁄, 𑀲𑀦𑁆𑀢𑀼𑀲𑁆𑀲𑀺𑀢𑀢𑁆𑀢𑀸 𑀞𑀺𑀢𑁄, 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, (𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 ¶ 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀅𑀦𑁆𑀢𑀺𑀫𑁂 𑀪𑀯𑁂 𑀞𑀺𑀢𑁄,) [( ) 𑀦𑀢𑁆𑀣𑀺 𑀲𑀻𑀳𑀴𑀧𑁄𑀢𑁆𑀣𑀓𑁂] 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑁄, 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀅𑀭𑀳𑀸.

‘‘𑀢𑀲𑁆𑀲𑀸𑀬𑀁 𑀧𑀘𑁆𑀙𑀺𑀫𑀓𑁄 𑀪𑀯𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.

𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽’’𑀢𑀺.

𑀓𑀸𑀫𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀧𑀞𑀫𑁄.

𑁨. 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀲𑀢𑁆𑀢𑁄 ¶ ¶ 𑀕𑀼𑀳𑀸𑀬𑀁 𑀩𑀳𑀼𑀦𑀸𑀪𑀺𑀙𑀦𑁆𑀦𑁄, 𑀢𑀺𑀝𑁆𑀞𑀁 𑀦𑀭𑁄 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄;

𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄, 𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸.

𑀲𑀢𑁆𑀢𑁄 𑀕𑀼𑀳𑀸𑀬𑀁 𑀩𑀳𑀼𑀦𑀸𑀪𑀺𑀙𑀦𑁆𑀦𑁄𑀢𑀺. 𑀲𑀢𑁆𑀢𑁄𑀢𑀺 𑀳𑀺 𑀔𑁄 𑀯𑀼𑀢𑁆𑀢𑀁, 𑀅𑀧𑀺 𑀘 𑀕𑀼𑀳𑀸 𑀢𑀸𑀯 𑀯𑀢𑁆𑀢𑀩𑁆𑀩𑀸. 𑀕𑀼𑀳𑀸 𑀯𑀼𑀘𑁆𑀘𑀢𑀺 𑀓𑀸𑀬𑁄. 𑀓𑀸𑀬𑁄𑀢𑀺 𑀯𑀸 𑀕𑀼𑀳𑀸𑀢𑀺 𑀯𑀸 𑀤𑁂𑀳𑁄𑀢𑀺 ¶ 𑀯𑀸 𑀲𑀦𑁆𑀤𑁂𑀳𑁄𑀢𑀺 𑀯𑀸 𑀦𑀸𑀯𑀸𑀢𑀺 𑀯𑀸 𑀭𑀣𑁄𑀢𑀺 𑀯𑀸 𑀥𑀚𑁄𑀢𑀺 𑀯𑀸 𑀯𑀫𑁆𑀫𑀺𑀓𑁄𑀢𑀺 𑀯𑀸 𑀦𑀕𑀭𑀦𑁆𑀢𑀺 𑀯𑀸 𑀦𑀺𑀟𑁆𑀟𑀦𑁆𑀢𑀺 𑀯𑀸 𑀓𑀼𑀝𑀻𑀢𑀺 𑀯𑀸 𑀕𑀡𑁆𑀟𑁄𑀢𑀺 𑀯𑀸 𑀓𑀼𑀫𑁆𑀪𑁄𑀢𑀺 𑀯𑀸 𑀦𑀸𑀕𑁄𑀢𑀺 𑀯𑀸 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀢𑁆𑀢𑁄 𑀕𑀼𑀳𑀸𑀬𑀦𑁆𑀢𑀺 𑀕𑀼𑀳𑀸𑀬𑀁 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄. 𑀬𑀣𑀸 𑀪𑀺𑀢𑁆𑀢𑀺𑀔𑀺𑀮𑁂 𑀯𑀸 𑀦𑀸𑀕𑀤𑀦𑁆𑀢𑁂 𑀯𑀸 𑀕𑀡𑁆𑀟𑀁 𑀲𑀢𑁆𑀢𑀁 𑀯𑀺𑀲𑀢𑁆𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀁 𑀮𑀕𑁆𑀕𑀺𑀢𑀁 𑀧𑀮𑀺𑀩𑀼𑀤𑁆𑀥𑀁; 𑀏𑀯𑀫𑁂𑀯 𑀕𑀼𑀳𑀸𑀬𑀁 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀽𑀧𑀸𑀤𑀸𑀦𑀸 𑀘𑁂𑀢𑀲𑁄 ¶ 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄; 𑀢𑀲𑁆𑀫𑀸 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀬 𑀔𑁄, 𑀭𑀸𑀥…𑀧𑁂… 𑀲𑀜𑁆𑀜𑀸𑀬 𑀔𑁄, 𑀭𑀸𑀥… 𑀲𑀗𑁆𑀔𑀸𑀭𑁂𑀲𑀼 𑀔𑁄, 𑀭𑀸𑀥… 𑀯𑀺𑀜𑁆𑀜𑀸𑀡𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀽𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄; 𑀢𑀲𑁆𑀫𑀸 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀢𑁆𑀢𑁄𑀢𑀺 𑀮𑀕𑁆𑀕𑀦𑀸𑀥𑀺𑀯𑀘𑀦’’𑀦𑁆𑀢𑀺 𑁋 𑀲𑀢𑁆𑀢𑁄 𑀕𑀼𑀳𑀸𑀬𑀁. 𑀩𑀳𑀼𑀦𑀸𑀪𑀺𑀙𑀦𑁆𑀦𑁄𑀢𑀺 𑀩𑀳𑀼𑀓𑁂𑀳𑀺 𑀓𑀺𑀮𑁂𑀲𑁂𑀳𑀺 𑀙𑀦𑁆𑀦𑁄, 𑀭𑀸𑀕𑁂𑀦 𑀙𑀦𑁆𑀦𑁄 𑀤𑁄𑀲𑁂𑀦 𑀙𑀦𑁆𑀦𑁄 𑀫𑁄𑀳𑁂𑀦 𑀙𑀦𑁆𑀦𑁄 ¶ 𑀓𑁄𑀥𑁂𑀦 𑀙𑀦𑁆𑀦𑁄 𑀉𑀧𑀦𑀸𑀳𑁂𑀦 𑀙𑀦𑁆𑀦𑁄 𑀫𑀓𑁆𑀔𑁂𑀦 𑀙𑀦𑁆𑀦𑁄 𑀧𑀴𑀸𑀲𑁂𑀦 𑀙𑀦𑁆𑀦𑁄 𑀇𑀲𑁆𑀲𑀸𑀬 𑀙𑀦𑁆𑀦𑁄 𑀫𑀘𑁆𑀙𑀭𑀺𑀬𑁂𑀦 𑀙𑀦𑁆𑀦𑁄 𑀫𑀸𑀬𑀸𑀬 𑀙𑀦𑁆𑀦𑁄 𑀲𑀸𑀞𑁂𑀬𑁆𑀬𑁂𑀦 𑀙𑀦𑁆𑀦𑁄 𑀣𑀫𑁆𑀪𑁂𑀦 𑀙𑀦𑁆𑀦𑁄 𑀲𑀸𑀭𑀫𑁆𑀪𑁂𑀦 𑀙𑀦𑁆𑀦𑁄 𑀫𑀸𑀦𑁂𑀦 𑀙𑀦𑁆𑀦𑁄 𑀅𑀢𑀺𑀫𑀸𑀦𑁂𑀦 𑀙𑀦𑁆𑀦𑁄 𑀫𑀤𑁂𑀦 𑀙𑀦𑁆𑀦𑁄 𑀧𑀫𑀸𑀤𑁂𑀦 𑀙𑀦𑁆𑀦𑁄. 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺 𑀲𑀩𑁆𑀩𑀤𑀭𑀣𑁂𑀳𑀺 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀙𑀦𑁆𑀦𑁄 𑀯𑀺𑀙𑀦𑁆𑀦𑁄 𑀉𑀘𑁆𑀙𑀦𑁆𑀦𑁄 𑀆𑀯𑀼𑀢𑁄 𑀦𑀺𑀯𑀼𑀢𑁄 𑀑𑀯𑀼𑀢𑁄 [𑀑𑀨𑀼𑀢𑁄 (𑀲𑁆𑀬𑀸.)] 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑁋 𑀲𑀢𑁆𑀢𑁄 𑀕𑀼𑀳𑀸𑀬𑀁 𑀩𑀳𑀼𑀦𑀸𑀪𑀺𑀙𑀦𑁆𑀦𑁄.

𑀢𑀺𑀝𑁆𑀞𑀁 ¶ 𑀦𑀭𑁄 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄𑀢𑀺 𑀢𑀺𑀝𑁆𑀞𑀦𑁆𑀢𑁄 𑀦𑀭𑁄 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀢𑀺𑀝𑁆𑀞𑀢𑀺, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀯𑀲𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀫𑁆𑀧𑀺 𑀢𑀺𑀝𑁆𑀞𑀁 𑀦𑀭𑁄.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 ¶ 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 ¶ 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀺𑀝𑁆𑀞𑀁 𑀦𑀭𑁄.

𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀪𑀕𑀯𑀢𑀸 𑁋 ‘‘𑀭𑀽𑀧𑀽𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺, 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀯𑁂𑀤𑀦𑀽𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂…𑀧𑁂… 𑀲𑀜𑁆𑀜𑀽𑀧𑀬𑀁… 𑀲𑀗𑁆𑀔𑀸𑀭𑀽𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀺𑀝𑁆𑀞𑀁 𑀦𑀭𑁄.

𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲𑀸𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲𑀸𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀭𑀚𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀏𑀯𑀫𑁆𑀧𑀺 𑀢𑀺𑀝𑁆𑀞𑀁 𑀦𑀭𑁄.

‘‘𑀨𑀲𑁆𑀲𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂…𑀧𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂… 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸 ¶ , 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲𑀸𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲𑀸𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 ¶ 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 ¶ , 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀭𑀚𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀏𑀯𑀫𑁆𑀧𑀺 𑀢𑀺𑀝𑁆𑀞𑀁 𑀦𑀭𑁄.

𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄𑀢𑀺. 𑀫𑁄𑀳𑀦𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸; 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀓𑀺𑀁 𑀓𑀸𑀭𑀡𑀸 𑀫𑁄𑀳𑀦𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸? 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀫𑀦𑀼𑀲𑁆𑀲𑀸 ¶ 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀫𑀼𑀬𑁆𑀳𑀦𑁆𑀢𑀺 𑀲𑀫𑁆𑀫𑀼𑀬𑁆𑀳𑀦𑁆𑀢𑀺 𑀲𑀫𑁆𑀧𑀫𑀼𑀬𑁆𑀳𑀦𑁆𑀢𑀺, 𑀫𑀽𑀴𑁆𑀳𑀸 𑀲𑀫𑁆𑀫𑀽𑀴𑁆𑀳𑀸 𑀲𑀫𑁆𑀧𑀫𑀽𑀴𑁆𑀳𑀸 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑀸 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸, 𑀢𑀁 𑀓𑀸𑀭𑀡𑀸 𑀫𑁄𑀳𑀦𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄𑀢𑀺 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄 𑀑𑀕𑀸𑀴𑁆𑀳𑁄 𑀅𑀚𑁆𑀛𑁄𑀕𑀸𑀴𑁆𑀳𑁄 𑀦𑀺𑀫𑀼𑀕𑁆𑀕𑁄𑀢𑀺 𑁋 𑀢𑀺𑀝𑁆𑀞𑀁 𑀦𑀭𑁄 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄.

𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄𑀢𑀺. 𑀯𑀺𑀯𑁂𑀓𑀸𑀢𑀺 𑀢𑀬𑁄 𑀯𑀺𑀯𑁂𑀓𑀸 𑁋 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀢𑀫𑁄 𑀓𑀸𑀬𑀯𑀺𑀯𑁂𑀓𑁄? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀓𑀸𑀬𑁂𑀦 𑀯𑀺𑀯𑀺𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 ¶ 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀅𑀬𑀁 𑀓𑀸𑀬𑀯𑀺𑀯𑁂𑀓𑁄.

𑀓𑀢𑀫𑁄 ¶ 𑀘𑀺𑀢𑁆𑀢𑀯𑀺𑀯𑁂𑀓𑁄? 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀤𑀺𑀝𑁆𑀞𑀸𑀦𑀼𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 ¶ 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀅𑀭𑀳𑀢𑁄 𑀭𑀽𑀧𑀸𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 ¶ , 𑀢𑀤𑁂𑀓𑀝𑁆𑀞𑁂𑀳𑀺 ¶ 𑀘 𑀓𑀺𑀮𑁂𑀲𑁂𑀳𑀺 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑁄.

𑀓𑀢𑀫𑁄 𑀉𑀧𑀥𑀺𑀯𑀺𑀯𑁂𑀓𑁄? 𑀉𑀧𑀥𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀉𑀧𑀥𑀺𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 [𑀯𑀽𑀧𑀓𑀝𑁆𑀞𑀓𑀸𑀬𑀸𑀦𑀁 (𑀲𑁆𑀬𑀸.)] 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀽𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁.

𑀤𑀽𑀭𑁂 ¶ 𑀯𑀺𑀯𑁂𑀓𑀸 𑀳𑀻𑀢𑀺. 𑀬𑁄 𑀲𑁄 𑀏𑀯𑀁 𑀕𑀼𑀳𑀸𑀬𑀁 𑀲𑀢𑁆𑀢𑁄, 𑀏𑀯𑀁 𑀩𑀳𑀼𑀓𑁂𑀳𑀺 𑀓𑀺𑀮𑁂𑀲𑁂𑀳𑀺 𑀙𑀦𑁆𑀦𑁄, 𑀏𑀯𑀁 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄, 𑀲𑁄 𑀓𑀸𑀬𑀯𑀺𑀯𑁂𑀓𑀸𑀧𑀺 𑀤𑀽𑀭𑁂, 𑀘𑀺𑀢𑁆𑀢𑀯𑀺𑀯𑁂𑀓𑀸𑀧𑀺 𑀤𑀽𑀭𑁂, 𑀉𑀧𑀥𑀺𑀯𑀺𑀯𑁂𑀓𑀸𑀧𑀺 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸 𑀅𑀦𑀸𑀲𑀦𑁆𑀦𑁂 𑀯𑀺𑀯𑁂𑀓𑀝𑁆𑀞𑁂 [𑀯𑀯𑀓𑀝𑁆𑀞𑁂 (𑀲𑀻.), 𑀅𑀦𑀼𑀧𑀓𑀝𑁆𑀞𑁂 (𑀲𑁆𑀬𑀸.)]. 𑀢𑀣𑀸𑀯𑀺𑀥𑁄𑀢𑀺 𑀢𑀸𑀤𑀺𑀲𑁄 𑀢𑀲𑁆𑀲𑀡𑁆𑀞𑀺𑀢𑁄 𑀢𑀧𑁆𑀧𑀓𑀸𑀭𑁄 𑀢𑀧𑁆𑀧𑀝𑀺𑀪𑀸𑀕𑁄 𑀬𑁄 𑀲𑁄 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄𑀢𑀺 𑁋 𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄.

𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸, 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 ¶ 𑀲𑀼𑀯𑀡𑁆𑀡𑀁, 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀯𑀢𑁆𑀣𑀼 𑁋 𑀯𑀢𑁆𑀣𑀼𑀓𑀸𑀫𑀸. 𑀅𑀧𑀺 𑀘 𑀅𑀢𑀻𑀢𑀸 𑀓𑀸𑀫𑀸 𑀅𑀦𑀸𑀕𑀢𑀸 𑀓𑀸𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀸, 𑀅𑀚𑁆𑀛𑀢𑁆𑀢𑀸 𑀓𑀸𑀫𑀸 𑀩𑀳𑀺𑀤𑁆𑀥𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀫𑀸, 𑀳𑀻𑀦𑀸 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀓𑀸𑀫𑀸 𑀧𑀡𑀻𑀢𑀸 𑀓𑀸𑀫𑀸, 𑀆𑀧𑀸𑀬𑀺𑀓𑀸 𑀓𑀸𑀫𑀸 𑀫𑀸𑀦𑀼𑀲𑀺𑀓𑀸 𑀓𑀸𑀫𑀸 𑀤𑀺𑀩𑁆𑀩𑀸 𑀓𑀸𑀫𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸, 𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀅𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸, 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸 𑀅𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸, 𑀫𑀫𑀸𑀬𑀺𑀢𑀸 𑀓𑀸𑀫𑀸 𑀅𑀫𑀫𑀸𑀬𑀺𑀢𑀸 𑀓𑀸𑀫𑀸, 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀢𑀡𑁆𑀳𑀸𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀭𑀫𑁆𑀫𑀡𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀭𑀚𑀦𑀻𑀬𑀝𑁆𑀞𑁂𑀦 𑀫𑀤𑀦𑀻𑀬𑀝𑁆𑀞𑁂𑀦 𑀓𑀸𑀫𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

𑀓𑀢𑀫𑁂 ¶ ¶ 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁.

‘‘𑀅𑀤𑁆𑀤𑀲𑀁 𑀓𑀸𑀫 𑀢𑁂 𑀫𑀽𑀮𑀁, 𑀲𑀗𑁆𑀓𑀧𑁆𑀧𑀸 𑀓𑀸𑀫 𑀚𑀸𑀬𑀲𑀺;

𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀓𑀸𑀫 𑀦 𑀳𑁄𑀳𑀺𑀲𑀻’’𑀢𑀺. 𑁋

𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀮𑁄𑀓𑁂𑀢𑀺 ¶ 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂, 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀓𑀸𑀫𑀸 𑀳𑀺 𑀮𑁄𑀓𑁂 𑀦 ¶ 𑀳𑀺 𑀲𑀼𑀧𑁆𑀧𑀳𑀸𑀬𑀸𑀢𑀺. 𑀓𑀸𑀫𑀸 𑀳𑀺 𑀮𑁄𑀓𑁂 𑀤𑀼𑀧𑁆𑀧𑀳𑀸𑀬𑀸 𑀤𑀼𑀘𑁆𑀘𑀚𑁆𑀚𑀸 𑀤𑀼𑀧𑁆𑀧𑀭𑀺𑀘𑁆𑀘𑀚𑁆𑀚𑀸 𑀤𑀼𑀦𑁆𑀦𑀺𑀫𑁆𑀫𑀤𑀬𑀸 𑀤𑀼𑀦𑁆𑀦𑀺𑀯𑁂𑀞𑀬𑀸 𑀤𑀼𑀩𑁆𑀩𑀺𑀦𑀺𑀯𑁂𑀞𑀬𑀸 𑀤𑀼𑀢𑁆𑀢𑀭𑀸 𑀤𑀼𑀧𑁆𑀧𑀢𑀭𑀸 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸𑀢𑀺 𑁋 𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸.

‘‘𑀲𑀢𑁆𑀢𑁄 𑀕𑀼𑀳𑀸𑀬𑀁 𑀩𑀳𑀼𑀦𑀸𑀪𑀺𑀙𑀦𑁆𑀦𑁄, 𑀢𑀺𑀝𑁆𑀞𑀁 𑀦𑀭𑁄 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄;

𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄, 𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸’’𑀢𑀺.

𑀇𑀘𑁆𑀙𑀸𑀦𑀺𑀤𑀸𑀦𑀸 𑀪𑀯𑀲𑀸𑀢𑀩𑀤𑁆𑀥𑀸, 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸;

𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸, 𑀇𑀫𑁂 𑀯 𑀓𑀸𑀫𑁂 𑀧𑀼𑀭𑀺𑀫𑁂 𑀯 𑀚𑀧𑁆𑀧𑀁.

𑀇𑀘𑁆𑀙𑀸𑀦𑀺𑀤𑀸𑀦𑀸 𑀪𑀯𑀲𑀸𑀢𑀩𑀤𑁆𑀥𑀸𑀢𑀺. 𑀇𑀘𑁆𑀙𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀺𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 𑀲𑀗𑁆𑀕𑁄 𑀧𑀗𑁆𑀓𑁄, 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸, 𑀲𑀼𑀢𑁆𑀢𑀁 𑀯𑀺𑀲𑀝𑀸 𑀆𑀬𑀽𑀳𑀺𑀦𑀻 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺, 𑀯𑀦𑀁 𑀯𑀦𑀣𑁄 𑀲𑀦𑁆𑀥𑀯𑁄 𑀲𑁆𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼, 𑀆𑀲𑀸 𑀆𑀲𑀻𑀲𑀦𑀸 𑀆𑀲𑀻𑀲𑀺𑀢𑀢𑁆𑀢𑀁, 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸, 𑀮𑀸𑀪𑀸𑀲𑀸 𑀥𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸 ¶ , 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 ¶ 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀙𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸, 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 ¶ 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸, 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸, 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁, 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁 ¶ , 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀯𑀺𑀲𑀬𑁄, 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀇𑀘𑁆𑀙𑀸𑀦𑀺𑀤𑀸𑀦𑀸𑀢𑀺 𑀇𑀘𑁆𑀙𑀸𑀦𑀺𑀤𑀸𑀦𑀓𑀸 𑀇𑀘𑁆𑀙𑀸𑀳𑁂𑀢𑀼𑀓𑀸 𑀇𑀘𑁆𑀙𑀸𑀧𑀘𑁆𑀘𑀬𑀸 𑀇𑀘𑁆𑀙𑀸𑀓𑀸𑀭𑀡𑀸 𑀇𑀘𑁆𑀙𑀸𑀧𑀪𑀯𑀸𑀢𑀺 𑁋 𑀇𑀘𑁆𑀙𑀸𑀦𑀺𑀤𑀸𑀦𑀸.

𑀪𑀯𑀲𑀸𑀢𑀩𑀤𑁆𑀥𑀸𑀢𑀺. 𑀏𑀓𑀁 𑀪𑀯𑀲𑀸𑀢𑀁 𑁋 𑀲𑀼𑀔𑀸 𑀯𑁂𑀤𑀦𑀸. 𑀤𑁆𑀯𑁂 𑀪𑀯𑀲𑀸𑀢𑀸𑀦𑀺 𑁋 𑀲𑀼𑀔𑀸 𑀘 𑀯𑁂𑀤𑀦𑀸 𑀇𑀝𑁆𑀞𑀜𑁆𑀘 𑀯𑀢𑁆𑀣𑀼. 𑀢𑀻𑀡𑀺 𑀪𑀯𑀲𑀸𑀢𑀸𑀦𑀺 𑁋 𑀬𑁄𑀩𑁆𑀩𑀜𑁆𑀜𑀁, 𑀆𑀭𑁄𑀕𑁆𑀬𑀁, 𑀚𑀻𑀯𑀺𑀢𑀁. 𑀘𑀢𑁆𑀢𑀸𑀭𑀺 𑀪𑀯𑀲𑀸𑀢𑀸𑀦𑀺 𑁋 𑀮𑀸𑀪𑁄, 𑀬𑀲𑁄, 𑀧𑀲𑀁𑀲𑀸, 𑀲𑀼𑀔𑀁. 𑀧𑀜𑁆𑀘 𑀪𑀯𑀲𑀸𑀢𑀸𑀦𑀺 𑁋 𑀫𑀦𑀸𑀧𑀺𑀓𑀸 𑀭𑀽𑀧𑀸, 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸, 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸, 𑀫𑀦𑀸𑀧𑀺𑀓𑀸 𑀭𑀲𑀸, 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸. 𑀙 𑀪𑀯𑀲𑀸𑀢𑀸𑀦𑀺 𑁋 𑀘𑀓𑁆𑀔𑀼𑀲𑀫𑁆𑀧𑀤𑀸, 𑀲𑁄𑀢𑀲𑀫𑁆𑀧𑀤𑀸, 𑀖𑀸𑀦𑀲𑀫𑁆𑀧𑀤𑀸, 𑀚𑀺𑀯𑁆𑀳𑀸𑀲𑀫𑁆𑀧𑀤𑀸, 𑀓𑀸𑀬𑀲𑀫𑁆𑀧𑀤𑀸, 𑀫𑀦𑁄𑀲𑀫𑁆𑀧𑀤𑀸. 𑀪𑀯𑀲𑀸𑀢𑀩𑀤𑁆𑀥𑀸, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀸𑀢𑀩𑀤𑁆𑀥𑀸, 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀩𑀤𑁆𑀥𑀸, 𑀬𑁄𑀩𑁆𑀩𑀜𑁆𑀜𑁂 𑀩𑀤𑁆𑀥𑀸, 𑀆𑀭𑁄𑀕𑁆𑀬𑁂 𑀩𑀤𑁆𑀥𑀸, 𑀚𑀻𑀯𑀺𑀢𑁂 𑀩𑀤𑁆𑀥𑀸, 𑀮𑀸𑀪𑁂 𑀩𑀤𑁆𑀥𑀸, 𑀬𑀲𑁂 𑀩𑀤𑁆𑀥𑀸, 𑀧𑀲𑀁𑀲𑀸𑀬𑀁 𑀩𑀤𑁆𑀥𑀸, 𑀲𑀼𑀔𑁂 𑀩𑀤𑁆𑀥𑀸 ¶ , 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼 𑀩𑀤𑁆𑀥𑀸, 𑀲𑀤𑁆𑀤𑁂𑀲𑀼… 𑀕𑀦𑁆𑀥𑁂𑀲𑀼… 𑀭𑀲𑁂𑀲𑀼… 𑀫𑀦𑀸𑀧𑀺𑀓𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼 𑀩𑀤𑁆𑀥𑀸, 𑀘𑀓𑁆𑀔𑀼𑀲𑀫𑁆𑀧𑀤𑀸𑀬 𑀩𑀤𑁆𑀥𑀸, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀲𑀫𑁆𑀧𑀤𑀸𑀬 𑀩𑀤𑁆𑀥𑀸, 𑀯𑀺𑀩𑀤𑁆𑀥𑀸 𑀆𑀩𑀤𑁆𑀥𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀤𑁆𑀥𑀸𑀢𑀺 𑁋 𑀇𑀘𑁆𑀙𑀸𑀦𑀺𑀤𑀸𑀦𑀸 𑀪𑀯𑀲𑀸𑀢𑀩𑀤𑁆𑀥𑀸.

𑀢𑁂 ¶ 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸𑀢𑀺 𑀢𑁂 𑀯𑀸 𑀪𑀯𑀲𑀸𑀢𑀯𑀢𑁆𑀣𑀽 𑀤𑀼𑀧𑁆𑀧𑀫𑀼𑀜𑁆𑀘𑀸, 𑀲𑀢𑁆𑀢𑀸 𑀯𑀸 𑀏𑀢𑁆𑀢𑁄 𑀤𑀼𑀫𑁆𑀫𑁄𑀘𑀬𑀸. 𑀓𑀣𑀁 𑀢𑁂 𑀪𑀯𑀲𑀸𑀢𑀯𑀢𑁆𑀣𑀽 𑀤𑀼𑀧𑁆𑀧𑀫𑀼𑀜𑁆𑀘𑀸? 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀧𑁆𑀧𑀫𑀼𑀜𑁆𑀘𑀸, 𑀇𑀝𑁆𑀞𑀁 𑀯𑀢𑁆𑀣𑀼 𑀤𑀼𑀧𑁆𑀧𑀫𑀼𑀜𑁆𑀘𑀁, 𑀬𑁄𑀩𑁆𑀩𑀜𑁆𑀜𑀁 𑀤𑀼𑀧𑁆𑀧𑀫𑀼𑀜𑁆𑀘𑀁, 𑀆𑀭𑁄𑀕𑁆𑀬𑀁 𑀤𑀼𑀧𑁆𑀧𑀫𑀼𑀜𑁆𑀘𑀁, 𑀚𑀻𑀯𑀺𑀢𑀁 𑀤𑀼𑀧𑁆𑀧𑀫𑀼𑀜𑁆𑀘𑀁, 𑀮𑀸𑀪𑁄 𑀤𑀼𑀧𑁆𑀧𑀫𑀼𑀜𑁆𑀘𑁄, 𑀬𑀲𑁄 𑀤𑀼𑀧𑁆𑀧𑀫𑀼𑀜𑁆𑀘𑁄, 𑀧𑀲𑀁𑀲𑀸 𑀤𑀼𑀧𑁆𑀧𑀫𑀼𑀜𑁆𑀘𑀸, 𑀲𑀼𑀔𑀁 𑀤𑀼𑀧𑁆𑀧𑀫𑀼𑀜𑁆𑀘𑀁, 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀤𑀼𑀧𑁆𑀧𑀫𑀼𑀜𑁆𑀘𑀸, 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸… 𑀕𑀦𑁆𑀥𑀸… 𑀭𑀲𑀸… 𑀨𑁄𑀝𑁆𑀞𑀩𑁆𑀩𑀸 𑀤𑀼𑀧𑁆𑀧𑀫𑀼𑀜𑁆𑀘𑀸, 𑀘𑀓𑁆𑀔𑀼𑀲𑀫𑁆𑀧𑀤𑀸 𑀤𑀼𑀧𑁆𑀧𑀫𑀼𑀜𑁆𑀘𑀸, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀲𑀫𑁆𑀧𑀤𑀸 𑀤𑀼𑀧𑁆𑀧𑀫𑀼𑀜𑁆𑀘𑀸 𑀤𑀼𑀫𑁆𑀫𑁄𑀘𑀬𑀸 𑀤𑀼𑀧𑁆𑀧𑀫𑁄𑀘𑀬𑀸 𑀤𑀼𑀦𑁆𑀦𑀺𑀯𑁂𑀞𑀬𑀸 𑀤𑀼𑀩𑁆𑀩𑀺𑀦𑀺𑀯𑁂𑀞𑀬𑀸 ¶ , 𑀤𑀼𑀢𑁆𑀢𑀭𑀸 𑀤𑀼𑀧𑁆𑀧𑀢𑀭𑀸 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸. 𑀏𑀯𑀁 𑀢𑁂 𑀪𑀯𑀲𑀸𑀢𑀯𑀢𑁆𑀣𑀽 𑀤𑀼𑀧𑁆𑀧𑀫𑀼𑀜𑁆𑀘𑀸.

𑀓𑀣𑀁 𑀲𑀢𑁆𑀢𑀸 𑀏𑀢𑁆𑀢𑁄 𑀤𑀼𑀫𑁆𑀫𑁄𑀘𑀬𑀸? 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀢𑁆𑀢𑀸 𑀤𑀼𑀫𑁆𑀫𑁄𑀘𑀬𑀸, 𑀇𑀝𑁆𑀞𑀲𑁆𑀫𑀸 𑀯𑀢𑁆𑀣𑀼𑀲𑁆𑀫𑀸 𑀤𑀼𑀫𑁆𑀫𑁄𑀘𑀬𑀸, 𑀬𑁄𑀩𑁆𑀩𑀜𑁆𑀜𑀸 𑀤𑀼𑀫𑁆𑀫𑁄𑀘𑀬𑀸, 𑀆𑀭𑁄𑀕𑁆𑀬𑀸 𑀤𑀼𑀫𑁆𑀫𑁄𑀘𑀬𑀸, 𑀚𑀻𑀯𑀺𑀢𑀸 𑀤𑀼𑀫𑁆𑀫𑁄𑀘𑀬𑀸, 𑀮𑀸𑀪𑀸 𑀤𑀼𑀫𑁆𑀫𑁄𑀘𑀬𑀸, 𑀬𑀲𑀸 𑀤𑀼𑀫𑁆𑀫𑁄𑀘𑀬𑀸, 𑀧𑀲𑀁𑀲𑀸𑀬 𑀤𑀼𑀫𑁆𑀫𑁄𑀘𑀬𑀸, 𑀲𑀼𑀔𑀸 𑀤𑀼𑀫𑁆𑀫𑁄𑀘𑀬𑀸 ¶ , 𑀫𑀦𑀸𑀧𑀺𑀓𑁂𑀳𑀺 𑀭𑀽𑀧𑁂𑀳𑀺 𑀤𑀼𑀫𑁆𑀫𑁄𑀘𑀬𑀸, 𑀫𑀦𑀸𑀧𑀺𑀓𑁂𑀳𑀺 𑀲𑀤𑁆𑀤𑁂𑀳𑀺… 𑀕𑀦𑁆𑀥𑁂𑀳𑀺… 𑀭𑀲𑁂𑀳𑀺… 𑀨𑁄𑀝𑁆𑀞𑀩𑁆𑀩𑁂𑀳𑀺 𑀤𑀼𑀫𑁆𑀫𑁄𑀘𑀬𑀸, 𑀘𑀓𑁆𑀔𑀼𑀲𑀫𑁆𑀧𑀤𑀸𑀬 𑀤𑀼𑀫𑁆𑀫𑁄𑀘𑀬𑀸, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀲𑀫𑁆𑀧𑀤𑀸𑀬 𑀤𑀼𑀫𑁆𑀫𑁄𑀘𑀬𑀸 𑀤𑀼𑀭𑀼𑀤𑁆𑀥𑀭𑀸 [𑀤𑀼𑀤𑁆𑀥𑀭𑀸 (𑀓.)], 𑀤𑀼𑀲𑁆𑀲𑀫𑀼𑀤𑁆𑀥𑀭𑀸 𑀤𑀼𑀩𑁆𑀩𑀼𑀝𑁆𑀞𑀸𑀧𑀬𑀸 𑀤𑀼𑀲𑁆𑀲𑀫𑀼𑀝𑁆𑀞𑀸𑀧𑀬𑀸 𑀤𑀼𑀦𑁆𑀦𑀺𑀯𑁂𑀞𑀬𑀸 𑀤𑀼𑀩𑁆𑀩𑀺𑀦𑀺𑀯𑁂𑀞𑀬𑀸 𑀤𑀼𑀢𑁆𑀢𑀭𑀸 𑀤𑀼𑀧𑁆𑀧𑀢𑀭𑀸 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸. 𑀏𑀯𑀁 𑀲𑀢𑁆𑀢𑀸 𑀏𑀢𑁆𑀢𑁄 𑀤𑀼𑀫𑁆𑀫𑁄𑀘𑀬𑀸𑀢𑀺 𑁋 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸.

𑀦 ¶ ¶ 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸𑀢𑀺 𑀢𑁂 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀢𑀼𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀁 𑀤𑀫𑁂𑀲𑁆𑀲𑀢𑀺 𑀯𑀺𑀦𑁂𑀲𑁆𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. 𑀏𑀯𑀫𑁆𑀧𑀺 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸.

𑀅𑀣 𑀯𑀸 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀫𑁄𑀘𑁂𑀢𑀸. 𑀢𑁂 𑀬𑀤𑀺 𑀫𑀼𑀜𑁆𑀘𑁂𑀬𑁆𑀬𑀼𑀁, 𑀲𑀓𑁂𑀦 𑀣𑀸𑀫𑁂𑀦 𑀲𑀓𑁂𑀦 𑀩𑀮𑁂𑀦 𑀲𑀓𑁂𑀦 𑀯𑀻𑀭𑀺𑀬𑁂𑀦 𑀲𑀓𑁂𑀦 𑀧𑀭𑀓𑁆𑀓𑀫𑁂𑀦 𑀲𑀓𑁂𑀦 𑀧𑀼𑀭𑀺𑀲𑀣𑀸𑀫𑁂𑀦 𑀲𑀓𑁂𑀦 𑀧𑀼𑀭𑀺𑀲𑀩𑀮𑁂𑀦 𑀲𑀓𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀲𑀓𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀅𑀢𑁆𑀢𑀦𑀸 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑀼𑀜𑁆𑀘𑁂𑀬𑁆𑀬𑀼𑀦𑁆𑀢𑀺. 𑀏𑀯𑀫𑁆𑀧𑀺 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸.

‘‘𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀺𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 ¶ 𑀲𑁂𑀝𑁆𑀞𑀁 𑀅𑀪𑀺𑀚𑀸𑀦𑀫𑀸𑀦𑁄, 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀻’’𑀢𑀺.

𑀏𑀯𑀫𑁆𑀧𑀺 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸.

‘‘𑀅𑀢𑁆𑀢𑀦𑀸𑀯 ¶ 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸 𑀲𑀁𑀓𑀺𑀮𑀺𑀲𑁆𑀲𑀢𑀺;

𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺;

𑀲𑀼𑀤𑁆𑀥𑀻 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁, 𑀦𑀸𑀜𑁆𑀜𑁄 𑀅𑀜𑁆𑀜𑀁 𑀯𑀺𑀲𑁄𑀥𑀬𑁂’’𑀢𑀺.

𑀏𑀯𑀫𑁆𑀧𑀺 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸.

𑀯𑀼𑀢𑁆𑀢𑀫𑁆𑀧𑀺 ¶ 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀝𑁆𑀞𑀢𑁂𑀯 𑀦𑀺𑀩𑁆𑀩𑀸𑀦𑀁, 𑀢𑀺𑀝𑁆𑀞𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄, 𑀢𑀺𑀝𑁆𑀞𑀸𑀫𑀳𑀁 𑀲𑀫𑀸𑀤𑀧𑁂𑀢𑀸. 𑀅𑀣 𑀘 𑀧𑀦 𑀫𑀫 𑀲𑀸𑀯𑀓𑀸 𑀫𑀬𑀸 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸 𑀅𑀧𑁆𑀧𑁂𑀓𑀘𑁆𑀘𑁂 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀦𑁆𑀢𑀺, 𑀏𑀓𑀘𑁆𑀘𑁂 𑀦𑀸𑀭𑀸𑀥𑁂𑀦𑁆𑀢𑀺. 𑀏𑀢𑁆𑀣 𑀓𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀓𑀭𑁄𑀫𑀺? 𑀫𑀕𑁆𑀕𑀓𑁆𑀔𑀸𑀬𑀻, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄. 𑀫𑀕𑁆𑀕𑀁 𑀩𑀼𑀤𑁆𑀥𑁄 𑀆𑀘𑀺𑀓𑁆𑀔𑀢𑀺 ¶ . 𑀅𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑀼𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀫𑁆𑀧𑀺 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸𑀢𑀺 𑁋 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸.

𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸𑀢𑀺. 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀁, 𑀧𑀼𑀭𑁂 𑀯𑀼𑀘𑁆𑀘𑀢𑀺 𑀅𑀢𑀻𑀢𑀁. 𑀅𑀧𑀺 𑀘 𑀅𑀢𑀻𑀢𑀁 𑀉𑀧𑀸𑀤𑀸𑀬 𑀅𑀦𑀸𑀕𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀧𑀘𑁆𑀙𑀸, 𑀅𑀦𑀸𑀕𑀢𑀁 𑀉𑀧𑀸𑀤𑀸𑀬 𑀅𑀢𑀻𑀢𑀜𑁆𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀧𑀼𑀭𑁂. 𑀓𑀣𑀁 𑀧𑀼𑀭𑁂 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺? ‘‘𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. ‘‘𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁… 𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁… 𑀏𑀯𑀁𑀲𑀗𑁆𑀔𑀸𑀭𑁄 ¶ 𑀅𑀳𑁄𑀲𑀺𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀫𑁆𑀧𑀺 𑀧𑀼𑀭𑁂 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺.

𑀅𑀣 𑀯𑀸 ‘‘𑀇𑀢𑀺 𑀫𑁂 𑀘𑀓𑁆𑀔𑀼 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀭𑀽𑀧𑀸’’𑀢𑀺 𑁋 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺. 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀏𑀯𑀫𑁆𑀧𑀺 𑀧𑀼𑀭𑁂 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺. ‘‘𑀇𑀢𑀺 𑀫𑁂 𑀲𑁄𑀢𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀲𑀤𑁆𑀤𑀸’’𑀢𑀺…𑀧𑁂… ‘‘𑀇𑀢𑀺 𑀫𑁂 𑀖𑀸𑀦𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀕𑀦𑁆𑀥𑀸’’𑀢𑀺… ‘‘𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀭𑀲𑀸’’𑀢𑀺… ‘‘𑀇𑀢𑀺 𑀫𑁂 𑀓𑀸𑀬𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸’’𑀢𑀺… ‘‘𑀇𑀢𑀺 𑀫𑁂 𑀫𑀦𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀥𑀫𑁆𑀫𑀸’’𑀢𑀺 𑁋 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺. 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀏𑀯𑀫𑁆𑀧𑀺 𑀧𑀼𑀭𑁂 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺.

𑀅𑀣 ¶ ¶ 𑀯𑀸 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀢𑀤𑀲𑁆𑀲𑀸𑀤𑁂𑀢𑀺 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀧𑀼𑀭𑁂 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺.

𑀓𑀣𑀁 𑀧𑀘𑁆𑀙𑀸 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺? ‘‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. ‘‘𑀏𑀯𑀁𑀯𑁂𑀤𑀦𑁄 𑀲𑀺𑀬𑀁… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀫𑁆𑀧𑀺 𑀧𑀘𑁆𑀙𑀸 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺.

𑀅𑀣 𑀯𑀸 ‘‘𑀇𑀢𑀺 𑀫𑁂 𑀘𑀓𑁆𑀔𑀼 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀭𑀽𑀧𑀸’’𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀘𑁂𑀢𑀲𑁄 𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀢𑀤𑀪𑀺𑀦𑀦𑁆𑀤𑀢𑀺. 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀏𑀯𑀫𑁆𑀧𑀺 𑀧𑀘𑁆𑀙𑀸 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺. ‘‘𑀇𑀢𑀺 ¶ 𑀫𑁂 𑀲𑁄𑀢𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀲𑀤𑁆𑀤𑀸’’𑀢𑀺… ‘‘𑀇𑀢𑀺 𑀫𑁂 𑀖𑀸𑀦𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀕𑀦𑁆𑀥𑀸’’𑀢𑀺… ‘‘𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 ¶ 𑀭𑀲𑀸’’𑀢𑀺… ‘‘𑀇𑀢𑀺 𑀫𑁂 𑀓𑀸𑀬𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸’’𑀢𑀺… ‘‘𑀇𑀢𑀺 𑀫𑁂 𑀫𑀦𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀢𑀺 𑀥𑀫𑁆𑀫𑀸’’𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀘𑁂𑀢𑀲𑁄 𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀢𑀤𑀪𑀺𑀦𑀦𑁆𑀤𑀢𑀺. 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀏𑀯𑀫𑁆𑀧𑀺 𑀧𑀘𑁆𑀙𑀸 𑀅𑀧𑁂𑀓𑁆𑀔𑀁 𑀓𑀭𑁄𑀢𑀺.

𑀅𑀣 𑀯𑀸 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑁋 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀘𑁂𑀢𑀲𑁄 𑀧𑀡𑀺𑀥𑀸𑀦𑀧𑀘𑁆𑀘𑀬𑀸 𑀢𑀤𑀪𑀺𑀦𑀦𑁆𑀤𑀢𑀺. 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀏𑀯𑀫𑁆𑀧𑀺 𑀧𑀘𑁆𑀙𑀸 𑀅𑀧𑁂𑀓𑁆𑀔𑀁 𑀓𑀭𑁄𑀢𑀻𑀢𑀺 𑁋 𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸.

𑀇𑀫𑁂 𑀯 𑀓𑀸𑀫𑁂 𑀧𑀼𑀭𑀺𑀫𑁂 𑀯 𑀚𑀧𑁆𑀧𑀦𑁆𑀢𑀺. 𑀇𑀫𑁂 𑀯 𑀓𑀸𑀫𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 ¶ 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀇𑀘𑁆𑀙𑀦𑁆𑀢𑀸 𑀲𑀸𑀤𑀺𑀬𑀦𑁆𑀢𑀸 𑀧𑀢𑁆𑀣𑀬𑀦𑁆𑀢𑀸 𑀧𑀺𑀳𑀬𑀦𑁆𑀢𑀸 𑀅𑀪𑀺𑀚𑀧𑁆𑀧𑀦𑁆𑀢𑀸. 𑀧𑀼𑀭𑀺𑀫𑁂 𑀯 𑀚𑀧𑁆𑀧𑀦𑁆𑀢𑀺 𑀅𑀢𑀻𑀢𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀚𑀧𑁆𑀧𑀦𑁆𑀢𑀸 𑀧𑀚𑀧𑁆𑀧𑀦𑁆𑀢𑀸 𑀅𑀪𑀺𑀚𑀧𑁆𑀧𑀦𑁆𑀢𑀸𑀢𑀺 𑁋 𑀇𑀫𑁂 𑀯 𑀓𑀸𑀫𑁂 𑀧𑀼𑀭𑀺𑀫𑁂 𑀯 𑀚𑀧𑁆𑀧𑀁.

‘‘𑀇𑀘𑁆𑀙𑀸𑀦𑀺𑀤𑀸𑀦𑀸 𑀪𑀯𑀲𑀸𑀢𑀩𑀤𑁆𑀥𑀸, 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸;

𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸, 𑀇𑀫𑁂 𑀯 𑀓𑀸𑀫𑁂 𑀧𑀼𑀭𑀺𑀫𑁂 𑀯 𑀚𑀧𑁆𑀧’’𑀦𑁆𑀢𑀺.

𑀓𑀸𑀫𑁂𑀲𑀼 ¶ ¶ 𑀕𑀺𑀤𑁆𑀥𑀸 𑀧𑀲𑀼𑀢𑀸 𑀧𑀫𑀽𑀴𑁆𑀳𑀸, 𑀅𑀯𑀤𑀸𑀦𑀺𑀬𑀸 𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸;

𑀤𑀼𑀓𑁆𑀔𑀽𑀧𑀦𑀻𑀢𑀸 𑀧𑀭𑀺𑀤𑁂𑀯𑀬𑀦𑁆𑀢𑀺, 𑀓𑀺𑀁𑀲𑀽 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂.

𑀓𑀸𑀫𑁂𑀲𑀼 𑀕𑀺𑀤𑁆𑀥𑀸 𑀧𑀲𑀼𑀢𑀸 𑀧𑀫𑀽𑀴𑁆𑀳𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 [𑀅𑀚𑁆𑀛𑁄𑀧𑀦𑁆𑀦𑀸 (𑀲𑀻. 𑀲𑁆𑀬𑀸.)] 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑁋 𑀓𑀸𑀫𑁂𑀲𑀼 𑀕𑀺𑀤𑁆𑀥𑀸.

𑀧𑀲𑀼𑀢𑀸𑀢𑀺 𑀬𑁂𑀧𑀺 𑀓𑀸𑀫𑁂 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺, 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸. 𑀬𑁂𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂…𑀧𑁂… 𑀧𑀭𑀺𑀬𑁂𑀲𑀦𑁆𑀢𑀺 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸 ¶ . 𑀬𑁂𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀝𑀺𑀮𑀪𑀦𑁆𑀢𑀺… 𑀲𑀤𑁆𑀤𑁂… 𑀕𑀦𑁆𑀥𑁂 ¶ … 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀝𑀺𑀮𑀪𑀦𑁆𑀢𑀺 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸. 𑀬𑁂𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 ¶ … 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸. 𑀬𑀣𑀸 𑀓𑀮𑀳𑀓𑀸𑀭𑀓𑁄 𑀓𑀮𑀳𑀧𑀲𑀼𑀢𑁄, 𑀓𑀫𑁆𑀫𑀓𑀸𑀭𑀓𑁄 𑀓𑀫𑁆𑀫𑀧𑀲𑀼𑀢𑁄, 𑀕𑁄𑀘𑀭𑁂 𑀘𑀭𑀦𑁆𑀢𑁄 𑀕𑁄𑀘𑀭𑀧𑀲𑀼𑀢𑁄, 𑀛𑀸𑀬𑀻 𑀛𑀸𑀦𑀧𑀲𑀼𑀢𑁄; 𑀏𑀯𑀫𑁂𑀯 𑀬𑁂𑀧𑀺 𑀓𑀸𑀫𑁂 𑀏𑀲𑀦𑁆𑀢𑀺 𑀕𑀯𑁂𑀲𑀢𑀺 𑀧𑀭𑀺𑀬𑁂𑀲𑀦𑁆𑀢𑀺, 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸. 𑀬𑁂𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂…𑀧𑁂… 𑀧𑀭𑀺𑀬𑁂𑀲𑀦𑁆𑀢𑀺 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸. 𑀬𑁂𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀝𑀺𑀮𑀪𑀦𑁆𑀢𑀺… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀝𑀺𑀮𑀪𑀦𑁆𑀢𑀺 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸, 𑀢𑀦𑁆𑀦𑀺𑀦𑁆𑀦𑀸 ¶ 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸. 𑀬𑁂𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀓𑀸𑀫𑀧𑀲𑀼𑀢𑀸.

𑀧𑀫𑀽𑀴𑁆𑀳𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀫𑀦𑀼𑀲𑁆𑀲𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀫𑀼𑀬𑁆𑀳𑀦𑁆𑀢𑀺 𑀲𑀫𑁆𑀫𑀼𑀬𑁆𑀳𑀦𑁆𑀢𑀺 𑀲𑀫𑁆𑀧𑀫𑀼𑀬𑁆𑀳𑀦𑁆𑀢𑀺 𑀫𑀽𑀴𑁆𑀳𑀸 𑀲𑀫𑁆𑀫𑀽𑀴𑁆𑀳𑀸 𑀲𑀫𑁆𑀧𑀫𑀽𑀴𑁆𑀳𑀸 𑀅𑀯𑀺𑀚𑁆𑀚𑀸𑀬 𑀅𑀦𑁆𑀥𑀻𑀓𑀢𑀸 𑀆𑀯𑀼𑀢𑀸 ¶ 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑁋 𑀓𑀸𑀫𑁂𑀲𑀼 𑀕𑀺𑀤𑁆𑀥𑀸 𑀧𑀲𑀼𑀢𑀸 𑀧𑀫𑀽𑀴𑁆𑀳𑀸.

𑀅𑀯𑀤𑀸𑀦𑀺𑀬𑀸 𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸𑀢𑀺. 𑀅𑀯𑀤𑀸𑀦𑀺𑀬𑀸𑀢𑀺 𑀅𑀯𑀕𑀘𑁆𑀙𑀦𑁆𑀢𑀻𑀢𑀺𑀧𑀺 𑀅𑀯𑀤𑀸𑀦𑀺𑀬𑀸, 𑀫𑀘𑁆𑀙𑀭𑀺𑀦𑁄𑀧𑀺 𑀯𑀼𑀘𑁆𑀘𑀦𑁆𑀢𑀺 𑀅𑀯𑀤𑀸𑀦𑀺𑀬𑀸, 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 ¶ 𑀤𑁂𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀦𑀸𑀤𑀺𑀬𑀦𑁆𑀢𑀻𑀢𑀺 𑁋 𑀅𑀯𑀤𑀸𑀦𑀺𑀬𑀸. 𑀓𑀣𑀁 𑀅𑀯𑀕𑀘𑁆𑀙𑀦𑁆𑀢𑀻𑀢𑀺 𑀅𑀯𑀤𑀸𑀦𑀺𑀬𑀸? 𑀦𑀺𑀭𑀬𑀁 𑀕𑀘𑁆𑀙𑀦𑁆𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀕𑀘𑁆𑀙𑀦𑁆𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑀁 𑀕𑀘𑁆𑀙𑀦𑁆𑀢𑀻𑀢𑀺, 𑀏𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑁋 𑀅𑀯𑀤𑀸𑀦𑀺𑀬𑀸. 𑀓𑀣𑀁 𑀫𑀘𑁆𑀙𑀭𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀅𑀯𑀤𑀸𑀦𑀺𑀬𑀸? 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘, 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀇𑀫𑀺𑀦𑀸 𑀫𑀘𑁆𑀙𑀭𑀺𑀬𑁂𑀦 𑀅𑀯𑀤𑀜𑁆𑀜𑀼𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀚𑀦𑀸 𑀧𑀫𑀢𑁆𑀢𑀸. 𑀏𑀯𑀁 𑀫𑀘𑁆𑀙𑀭𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀅𑀯𑀤𑀸𑀦𑀺𑀬𑀸. 𑀓𑀣𑀁 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀦𑀸𑀤𑀺𑀬𑀦𑁆𑀢𑀻𑀢𑀺 𑁋 𑀅𑀯𑀤𑀸𑀦𑀺𑀬𑀸? 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 ¶ 𑀦 𑀆𑀤𑀺𑀬𑀦𑁆𑀢𑀺 𑀦 𑀲𑀼𑀲𑁆𑀲𑀼𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 ¶ 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀅𑀦𑀲𑁆𑀲𑀯𑀸 𑀅𑀯𑀘𑀦𑀓𑀭𑀸 𑀧𑀝𑀺𑀮𑁄𑀫𑀯𑀼𑀢𑁆𑀢𑀺𑀦𑁄, 𑀅𑀜𑁆𑀜𑁂𑀦𑁂𑀯 𑀫𑀼𑀔𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 [𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 (𑀲𑀻. 𑀲𑁆𑀬𑀸.)] 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀦𑀸𑀤𑀺𑀬𑀦𑁆𑀢𑀻𑀢𑀺 𑀅𑀯𑀤𑀸𑀦𑀺𑀬𑀸𑀢𑀺 𑁋 𑀅𑀯𑀤𑀸𑀦𑀺𑀬𑀸.

𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸𑀢𑀺 𑀯𑀺𑀲𑀫𑁂 𑀓𑀸𑀬𑀓𑀫𑁆𑀫𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀯𑀘𑀻𑀓𑀫𑁆𑀫𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀫𑀦𑁄𑀓𑀫𑁆𑀫𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀧𑀸𑀡𑀸𑀢𑀺𑀧𑀸𑀢𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀫𑀼𑀲𑀸𑀯𑀸𑀤𑁂 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀦𑀺𑀯𑀺𑀝𑁆𑀞𑀸 ¶ , 𑀯𑀺𑀲𑀫𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬… 𑀯𑀺𑀲𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁂… 𑀯𑀺𑀲𑀫𑀸𑀬 𑀅𑀪𑀺𑀚𑁆𑀛𑀸𑀬 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂 𑀩𑁆𑀬𑀸𑀧𑀸𑀤𑁂… 𑀯𑀺𑀲𑀫𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀦𑀺𑀯𑀺𑀝𑁆𑀞𑀸, 𑀯𑀺𑀲𑀫𑁂𑀲𑀼 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼 𑀦𑀺𑀯𑀺𑀝𑁆𑀞𑀸 𑀯𑀺𑀦𑀺𑀯𑀺𑀝𑁆𑀞𑀸 ¶ 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑁋 𑀅𑀯𑀤𑀸𑀦𑀺𑀬𑀸 𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸.

𑀤𑀼𑀓𑁆𑀔𑀽𑀧𑀦𑀻𑀢𑀸 𑀧𑀭𑀺𑀤𑁂𑀯𑀬𑀦𑁆𑀢𑀻𑀢𑀺. 𑀤𑀼𑀓𑁆𑀔𑀽𑀧𑀦𑀻𑀢𑀸𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀤𑀼𑀓𑁆𑀔𑀲𑀫𑁆𑀧𑀢𑁆𑀢𑀸 𑀤𑀼𑀓𑁆𑀔𑀽𑀧𑀕𑀢𑀸, 𑀫𑀸𑀭𑀧𑁆𑀧𑀢𑁆𑀢𑀸 𑀫𑀸𑀭𑀲𑀫𑁆𑀧𑀢𑁆𑀢𑀸 𑀫𑀸𑀭𑀽𑀧𑀕𑀢𑀸, 𑀫𑀭𑀡𑀧𑁆𑀧𑀢𑁆𑀢𑀸 𑀫𑀭𑀡𑀲𑀫𑁆𑀧𑀢𑁆𑀢𑀸 𑀫𑀭𑀡𑀽𑀧𑀕𑀢𑀸. 𑀧𑀭𑀺𑀤𑁂𑀯𑀬𑀦𑁆𑀢𑀻𑀢𑀺 𑀮𑀧𑀦𑁆𑀢𑀺 𑀮𑀸𑀮𑀧𑀦𑁆𑀢𑀺 [𑀲𑀮𑁆𑀮𑀧𑀦𑁆𑀢𑀺 (𑀲𑀻.)], 𑀲𑁄𑀘𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑁋 𑀤𑀼𑀓𑁆𑀔𑀽𑀧𑀦𑀻𑀢𑀸 𑀧𑀭𑀺𑀤𑁂𑀯𑀬𑀦𑁆𑀢𑀺.

𑀓𑀺𑀁𑀲𑀽 ¶ 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂𑀢𑀺 𑀇𑀢𑁄 𑀘𑀼𑀢𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫? 𑀦𑁂𑀭𑀬𑀺𑀓𑀸 𑀪𑀯𑀺𑀲𑁆𑀲𑀸𑀫, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸 𑀪𑀯𑀺𑀲𑁆𑀲𑀸𑀫, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸 𑀪𑀯𑀺𑀲𑁆𑀲𑀸𑀫, 𑀫𑀦𑀼𑀲𑁆𑀲𑀸 𑀪𑀯𑀺𑀲𑁆𑀲𑀸𑀫, 𑀤𑁂𑀯𑀸 𑀪𑀯𑀺𑀲𑁆𑀲𑀸𑀫, 𑀭𑀽𑀧𑀻 𑀪𑀯𑀺𑀲𑁆𑀲𑀸𑀫, 𑀅𑀭𑀽𑀧𑀻 𑀪𑀯𑀺𑀲𑁆𑀲𑀸𑀫, 𑀲𑀜𑁆𑀜𑀻 𑀪𑀯𑀺𑀲𑁆𑀲𑀸𑀫, 𑀅𑀲𑀜𑁆𑀜𑀻 𑀪𑀯𑀺𑀲𑁆𑀲𑀸𑀫, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲𑀸𑀫, ‘‘𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀫𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀫𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀲𑀁𑀲𑀬𑀧𑀓𑁆𑀔𑀦𑁆𑀤𑀸 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑀸 𑀤𑁆𑀯𑁂𑀴𑁆𑀳𑀓𑀚𑀸𑀢𑀸 𑀮𑀧𑀦𑁆𑀢𑀺 𑀮𑀸𑀮𑀧𑀦𑁆𑀢𑀺, 𑀲𑁄𑀘𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑁋 𑀓𑀺𑀁𑀲𑀽 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂.

‘‘𑀓𑀸𑀫𑁂𑀲𑀼 ¶ 𑀕𑀺𑀤𑁆𑀥𑀸 𑀧𑀲𑀼𑀢𑀸 𑀧𑀫𑀽𑀴𑁆𑀳𑀸, 𑀅𑀯𑀤𑀸𑀦𑀺𑀬𑀸 𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸;

𑀤𑀼𑀓𑁆𑀔𑀽𑀧𑀦𑀻𑀢𑀸 𑀧𑀭𑀺𑀤𑁂𑀯𑀬𑀦𑁆𑀢𑀺, 𑀓𑀺𑀁𑀲𑀽 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂’’𑀢𑀺.

𑀢𑀲𑁆𑀫𑀸 ¶ 𑀳𑀺 𑀲𑀺𑀓𑁆𑀔𑁂𑀣 𑀇𑀥𑁂𑀯 𑀚𑀦𑁆𑀢𑀼, 𑀬𑀁 𑀓𑀺𑀜𑁆𑀘𑀺 𑀚𑀜𑁆𑀜𑀸 𑀯𑀺𑀲𑀫𑀦𑁆𑀢𑀺 𑀮𑁄𑀓𑁂;

𑀦 𑀢𑀲𑁆𑀲 𑀳𑁂𑀢𑀽 𑀯𑀺𑀲𑀫𑀁 𑀘𑀭𑁂𑀬𑁆𑀬, 𑀅𑀧𑁆𑀧𑀜𑁆𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸.

𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣 𑀇𑀥𑁂𑀯 𑀚𑀦𑁆𑀢𑀽𑀢𑀺. 𑀢𑀲𑁆𑀫𑀸𑀢𑀺 𑀢𑀁𑀓𑀸𑀭𑀡𑀸 ¶ 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀦𑁆𑀦𑀺𑀤𑀸𑀦𑀸, 𑀏𑀢𑀫𑀸𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀓𑀸𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸. 𑀲𑀺𑀓𑁆𑀔𑁂𑀣𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 ¶ 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄, 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄, 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑁄𑀓𑁆𑀔𑀁 𑀧𑀸𑀫𑁄𑀓𑁆𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸.

𑀓𑀢𑀫𑀸 ¶ 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸 ¶ . 𑀲𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀇𑀫𑁂 𑀆𑀲𑀯𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 ¶ , 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 ¶ , 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬.

𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑁋 𑀢𑁂𑀦 𑀯𑀼𑀘𑁆𑀘𑀢𑀺 𑀇𑀥𑀸𑀢𑀺. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄…𑀧𑁂… 𑀫𑀦𑀼𑀚𑁄𑀢𑀺 𑁋 𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣 𑀇𑀥𑁂𑀯 𑀚𑀦𑁆𑀢𑀼.

𑀬𑀁 𑀓𑀺𑀜𑁆𑀘𑀺 𑀚𑀜𑁆𑀜𑀸 𑀯𑀺𑀲𑀫𑀦𑁆𑀢𑀺 𑀮𑁄𑀓𑁂𑀢𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 ¶ 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 ¶ [𑀧𑀭𑀺𑀤𑀸𑀬𑀯𑀘𑀦𑀫𑁂𑀢𑀁 (𑀲𑁆𑀬𑀸.)] 𑁋 𑀬𑀁 𑀓𑀺𑀜𑁆𑀘𑀻𑀢𑀺. 𑀯𑀺𑀲𑀫𑀦𑁆𑀢𑀺 𑀚𑀜𑁆𑀜𑀸𑀢𑀺 𑀯𑀺𑀲𑀫𑀁 𑀓𑀸𑀬𑀓𑀫𑁆𑀫𑀁 𑀯𑀺𑀲𑀫𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀯𑀘𑀻𑀓𑀫𑁆𑀫𑀁 𑀯𑀺𑀲𑀫𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀫𑀦𑁄𑀓𑀫𑁆𑀫𑀁 𑀯𑀺𑀲𑀫𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀧𑀸𑀡𑀸𑀢𑀺𑀧𑀸𑀢𑀁 𑀯𑀺𑀲𑀫𑁄𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀲𑀫𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀯𑀺𑀲𑀫𑁄𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀫𑀼𑀲𑀸𑀯𑀸𑀤𑀁 𑀯𑀺𑀲𑀫𑁄𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀧𑀺𑀲𑀼𑀡𑀁 𑀯𑀸𑀘𑀁 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀨𑀭𑀼𑀲𑀁 𑀯𑀸𑀘𑀁 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀯𑀺𑀲𑀫𑁄𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀅𑀪𑀺𑀚𑁆𑀛𑀁 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀩𑁆𑀬𑀸𑀧𑀸𑀤𑀁 𑀯𑀺𑀲𑀫𑁄𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑁂 𑀲𑀗𑁆𑀔𑀸𑀭𑁂 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬, 𑀯𑀺𑀲𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀯𑀺𑀲𑀫𑀸𑀢𑀺 𑀚𑀸𑀦𑁂𑀬𑁆𑀬 𑀆𑀚𑀸𑀦𑁂𑀬𑁆𑀬 𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑁆𑀛𑁂𑀬𑁆𑀬. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀁 𑀓𑀺𑀜𑁆𑀘𑀺 𑀚𑀜𑁆𑀜𑀸 𑀯𑀺𑀲𑀫𑀦𑁆𑀢𑀺 𑀮𑁄𑀓𑁂.

𑀦 𑀢𑀲𑁆𑀲 𑀳𑁂𑀢𑀽 𑀯𑀺𑀲𑀫𑀁 𑀘𑀭𑁂𑀬𑁆𑀬𑀸𑀢𑀺. 𑀯𑀺𑀲𑀫𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 ¶ 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀅𑀪𑀺𑀚𑁆𑀛𑀸𑀬 ¶ 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀳𑁂𑀢𑀼 𑀯𑀺𑀲𑀫𑀁 ¶ 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀦𑀁 ¶ 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀦𑀁 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀘𑁂𑀢𑀦𑀸𑀬 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀧𑀢𑁆𑀣𑀦𑀸𑀬 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬, 𑀯𑀺𑀲𑀫𑀸𑀬 𑀧𑀡𑀺𑀥𑀺𑀬𑀸 𑀳𑁂𑀢𑀼 𑀯𑀺𑀲𑀫𑀁 𑀦 𑀘𑀭𑁂𑀬𑁆𑀬 𑀦 𑀆𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀦 𑀢𑀲𑁆𑀲 𑀳𑁂𑀢𑀽 𑀯𑀺𑀲𑀫𑀁 𑀘𑀭𑁂𑀬𑁆𑀬.

𑀅𑀧𑁆𑀧𑀜𑁆𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸𑀢𑀺. 𑀚𑀻𑀯𑀺𑀢𑀦𑁆𑀢𑀺 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀧𑀺 𑀘, 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑁋 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁, 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁. 𑀓𑀣𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁? 𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺; 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀲𑁆𑀲𑀢𑀺, 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣; 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀢𑀺, 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀺𑀲𑁆𑀲𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 ¶ , 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦𑀢𑁆𑀯𑁂𑀯 𑀢𑁂𑀧𑀺 𑀚𑀻𑀯𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀁𑀬𑀼𑀢𑀸.

‘‘𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

‘‘𑀅𑀦𑀦𑁆𑀢𑀭𑀸 𑀘 𑀬𑁂 𑀪𑀕𑁆𑀕𑀸 [𑀪𑀗𑁆𑀕𑀸 (𑀲𑀻. 𑀲𑁆𑀬𑀸.)], 𑀬𑁂 𑀘 𑀪𑀕𑁆𑀕𑀸 𑀅𑀦𑀸𑀕𑀢𑀸;

𑀢𑀤𑀦𑁆𑀢𑀭𑁂 𑀦𑀺𑀭𑀼𑀤𑁆𑀥𑀸𑀦𑀁, 𑀯𑁂𑀲𑀫𑀁 𑀦𑀢𑁆𑀣𑀺 𑀮𑀓𑁆𑀔𑀡𑁂.

‘‘𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀕𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸.

‘‘𑀬𑀣𑀸 𑀦𑀺𑀦𑁆𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀙𑀦𑁆𑀤𑁂𑀦 𑀧𑀭𑀺𑀡𑀸𑀫𑀺𑀢𑀸;

𑀅𑀘𑁆𑀙𑀺𑀦𑁆𑀦𑀥𑀸𑀭𑀸 𑀯𑀢𑁆𑀢𑀦𑁆𑀢𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸.

‘‘𑀅𑀦𑀺𑀥𑀸𑀦𑀕𑀢𑀸 ¶ ¶ 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂;

𑀦𑀺𑀩𑁆𑀩𑀢𑁆𑀢𑀸 𑀬𑁂 𑀘 [𑀦𑀺𑀩𑁆𑀩𑀢𑁆𑀢𑀸𑀬𑁂𑀯 (𑀲𑀩𑁆𑀩𑀢𑁆𑀣)] 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸.

‘‘𑀦𑀺𑀩𑁆𑀩𑀢𑁆𑀢𑀸𑀦𑀜𑁆𑀘 ¶ 𑀥𑀫𑁆𑀫𑀸𑀦𑀁, 𑀪𑀗𑁆𑀕𑁄 𑀦𑁂𑀲𑀁 𑀧𑀼𑀭𑀓𑁆𑀔𑀢𑁄;

𑀧𑀮𑁄𑀓𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀼𑀭𑀸𑀡𑁂𑀳𑀺 𑀅𑀫𑀺𑀲𑁆𑀲𑀺𑀢𑀸.

‘‘𑀅𑀤𑀲𑁆𑀲𑀦𑀢𑁄 𑀆𑀬𑀦𑁆𑀢𑀺, 𑀪𑀗𑁆𑀕𑀸 𑀕𑀘𑁆𑀙𑀦𑁆𑀢𑀺 𑀤𑀲𑁆𑀲𑀦𑀁;

𑀯𑀺𑀚𑁆𑀚𑀼𑀧𑁆𑀧𑀸𑀤𑁄𑀯 𑀆𑀓𑀸𑀲𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺 𑀘𑀸’’𑀢𑀺.

𑀏𑀯𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁.

𑀓𑀣𑀁 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁? 𑀅𑀲𑁆𑀲𑀸𑀲𑀽𑀧𑀦𑀺𑀩𑀦𑁆𑀥𑀁 𑀚𑀻𑀯𑀺𑀢𑀁, 𑀧𑀲𑁆𑀲𑀸𑀲𑀽𑀧𑀦𑀺𑀩𑀦𑁆𑀥𑀁 𑀚𑀻𑀯𑀺𑀢𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀦𑁆𑀥𑀁 𑀚𑀻𑀯𑀺𑀢𑀁, 𑀫𑀳𑀸𑀪𑀽𑀢𑀽𑀧𑀦𑀺𑀩𑀦𑁆𑀥𑀁 ¶ 𑀚𑀻𑀯𑀺𑀢𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀦𑀺𑀩𑀦𑁆𑀥𑀁 𑀚𑀻𑀯𑀺𑀢𑀁, 𑀉𑀲𑁆𑀫𑀽𑀧𑀦𑀺𑀩𑀦𑁆𑀥𑀁 𑀚𑀻𑀯𑀺𑀢𑀁, 𑀯𑀺𑀜𑁆𑀜𑀸𑀡𑀽𑀧𑀦𑀺𑀩𑀦𑁆𑀥𑀁 𑀚𑀻𑀯𑀺𑀢𑀁. 𑀫𑀽𑀮𑀫𑁆𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀁, 𑀧𑀼𑀩𑁆𑀩𑀳𑁂𑀢𑀽𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸. 𑀬𑁂 𑀧𑀘𑁆𑀘𑀬𑀸 𑀢𑁂𑀧𑀺 𑀤𑀼𑀩𑁆𑀩𑀮𑀸, 𑀬𑁂𑀧𑀺 𑀧𑀪𑀸𑀯𑀺𑀓𑀸 𑀢𑁂𑀧𑀺 𑀤𑀼𑀩𑁆𑀩𑀮𑀸. 𑀲𑀳𑀪𑀽𑀫𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀲𑀫𑁆𑀧𑀬𑁄𑀕𑀸𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀲𑀳𑀚𑀸𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀬𑀸𑀧𑀺 𑀧𑀬𑁄𑀚𑀺𑀓𑀸 𑀲𑀸𑀧𑀺 𑀤𑀼𑀩𑁆𑀩𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀇𑀫𑁂 𑀦𑀺𑀘𑁆𑀘𑀤𑀼𑀩𑁆𑀩𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀦𑀯𑀝𑁆𑀞𑀺𑀢𑀸 𑀇𑀫𑁂. 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀧𑀸𑀢𑀬𑀦𑁆𑀢𑀺 𑀇𑀫𑁂, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺 𑀦𑀢𑁆𑀣𑀺 𑀢𑀸𑀬𑀺𑀢𑀸, 𑀦 𑀘𑀸𑀧𑀺 𑀞𑀧𑁂𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀇𑀫𑁂. 𑀬𑁄𑀧𑀺 𑀦𑀺𑀩𑁆𑀩𑀢𑁆𑀢𑀓𑁄 𑀲𑁄 𑀦 𑀯𑀺𑀚𑁆𑀚𑀢𑀺.

‘‘𑀦 𑀘 𑀓𑁂𑀦𑀘𑀺 𑀓𑁄𑀘𑀺 𑀳𑀸𑀬𑀢𑀺, 𑀕𑀦𑁆𑀥𑀩𑁆𑀩𑀸 𑀘 𑀇𑀫𑁂 𑀳𑀺 𑀲𑀩𑁆𑀩𑀲𑁄;

𑀧𑀼𑀭𑀺𑀫𑁂𑀳𑀺 𑀧𑀪𑀸𑀯𑀺𑀓𑀸 𑀇𑀫𑁂, 𑀬𑁂𑀧𑀺 𑀧𑀪𑀸𑀯𑀺𑀓𑀸 𑀢𑁂 𑀧𑀼𑀭𑁂 𑀫𑀢𑀸;

𑀧𑀼𑀭𑀺𑀫𑀸𑀧𑀺 𑀘 𑀧𑀘𑁆𑀙𑀺𑀫𑀸𑀧𑀺 ¶ 𑀘, 𑀅𑀜𑁆𑀜𑀫𑀜𑁆𑀜𑀁 𑀦 𑀓𑀤𑀸𑀘𑀺 𑀫𑀤𑁆𑀤𑀲𑀁𑀲𑀽’’𑀢𑀺.

𑀏𑀯𑀁 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁.

𑀅𑀧𑀺 𑀘 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀓𑀁 𑀚𑀻𑀯𑀺𑀢𑀁 𑀣𑁄𑀓𑀁 [𑀣𑁄𑀓𑀓𑀁 (𑀓.)] 𑀚𑀻𑀯𑀺𑀢𑀁 𑀔𑀡𑀺𑀓𑀁 𑀚𑀻𑀯𑀺𑀢𑀁 𑀮𑀳𑀼𑀓𑀁 𑀚𑀻𑀯𑀺𑀢𑀁 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 ¶ 𑀚𑀻𑀯𑀺𑀢𑀁. 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁… 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁… 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 ¶ 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀓𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑀔𑀡𑀺𑀓𑀁 𑀚𑀻𑀯𑀺𑀢𑀁 𑀮𑀳𑀼𑀓𑀁 𑀚𑀻𑀯𑀺𑀢𑀁 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀚𑀻𑀯𑀺𑀢𑀁.

‘‘𑀅𑀧𑁆𑀧𑀫𑀺𑀤𑀁 ¶ , 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼. 𑀕𑀫𑀦𑀺𑀬𑁄 𑀲𑀫𑁆𑀧𑀭𑀸𑀬𑁄 𑀫𑀦𑁆𑀢𑀸𑀬 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’.

‘‘𑀅𑀧𑁆𑀧𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀳𑀻𑀴𑁂𑀬𑁆𑀬 𑀦𑀁 𑀲𑀼𑀧𑁄𑀭𑀺𑀲𑁄;

𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄𑀯 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲𑀦𑀸𑀕𑀫𑁄.

‘‘𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀔𑀺𑀬𑁆𑀬𑀢𑀺 𑀫𑀘𑁆𑀘𑀸𑀦𑀁, 𑀓𑀼𑀦𑁆𑀦𑀤𑀻𑀦𑀁𑀯 𑀑𑀤𑀓’’𑀦𑁆𑀢𑀺.

𑀅𑀧𑁆𑀧𑀜𑁆𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸𑀢𑀺. 𑀥𑀻𑀭𑀸𑀢𑀺 𑀥𑀻𑀭𑀸, 𑀥𑀺𑀢𑀺𑀫𑀸𑀢𑀺 𑀥𑀻𑀭𑀸, 𑀥𑀺𑀢𑀺𑀲𑀫𑁆𑀧𑀦𑁆𑀦𑀸𑀢𑀺 𑀥𑀻𑀭𑀸, 𑀥𑀻𑀓𑀢𑀧𑀸𑀧𑀸𑀢𑀺 𑀥𑀻𑀭𑀸. 𑀥𑀻 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 ¶ 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀺 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀥𑀻𑀭𑀸. 𑀅𑀧𑀺 𑀘 𑀔𑀦𑁆𑀥𑀥𑀻𑀭𑀸 𑀥𑀸𑀢𑀼𑀥𑀻𑀭𑀸 𑀆𑀬𑀢𑀦𑀥𑀻𑀭𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀥𑀻𑀭𑀸 𑀲𑀢𑀺𑀧𑀝𑁆𑀞𑀸𑀦𑀥𑀻𑀭𑀸 𑀲𑀫𑁆𑀫𑀧𑁆𑀧𑀥𑀸𑀦𑀥𑀻𑀭𑀸 𑀇𑀤𑁆𑀥𑀺𑀧𑀸𑀤𑀥𑀻𑀭𑀸, 𑀇𑀦𑁆𑀤𑁆𑀭𑀺𑀬𑀥𑀻𑀭𑀸 𑀩𑀮𑀥𑀻𑀭𑀸 𑀩𑁄𑀚𑁆𑀛𑀗𑁆𑀕𑀥𑀻𑀭𑀸 𑀫𑀕𑁆𑀕𑀥𑀻𑀭𑀸 𑀨𑀮𑀥𑀻𑀭𑀸 𑀦𑀺𑀩𑁆𑀩𑀸𑀦𑀥𑀻𑀭𑀸. 𑀢𑁂 𑀥𑀻𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁, 𑀧𑀭𑀺𑀢𑁆𑀢𑀓𑀁 𑀚𑀻𑀯𑀺𑀢𑀁 ¶ , 𑀣𑁄𑀓𑀁 𑀚𑀻𑀯𑀺𑀢𑀁, 𑀔𑀡𑀺𑀓𑀁 𑀚𑀻𑀯𑀺𑀢𑀁, 𑀮𑀳𑀼𑀓𑀁 𑀚𑀻𑀯𑀺𑀢𑀁, 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁, 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁, 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀚𑀻𑀯𑀺𑀢’’𑀦𑁆𑀢𑀺. 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀧𑁆𑀧𑀜𑁆𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸.

‘‘𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣 𑀇𑀥𑁂𑀯 𑀚𑀦𑁆𑀢𑀼, 𑀬𑀁 𑀓𑀺𑀜𑁆𑀘𑀺 𑀚𑀜𑁆𑀜𑀸 𑀯𑀺𑀲𑀫𑀦𑁆𑀢𑀺 𑀮𑁄𑀓𑁂;

𑀦 𑀢𑀲𑁆𑀲 𑀳𑁂𑀢𑀽 𑀯𑀺𑀲𑀫𑀁 𑀘𑀭𑁂𑀬𑁆𑀬, 𑀅𑀧𑁆𑀧𑀜𑁆𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸’’𑀢𑀺.

𑀧𑀲𑁆𑀲𑀸𑀫𑀺 ¶ 𑀮𑁄𑀓𑁂 𑀧𑀭𑀺𑀨𑀦𑁆𑀤𑀫𑀸𑀦𑀁, 𑀧𑀚𑀁 𑀇𑀫𑀁 𑀢𑀡𑁆𑀳𑀕𑀢𑀁 𑀪𑀯𑁂𑀲𑀼;

𑀳𑀻𑀦𑀸 𑀦𑀭𑀸 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀺, 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀼.

𑀧𑀲𑁆𑀲𑀸𑀫𑀺 ¶ 𑀮𑁄𑀓𑁂 𑀧𑀭𑀺𑀨𑀦𑁆𑀤𑀫𑀸𑀦𑀦𑁆𑀢𑀺. 𑀧𑀲𑁆𑀲𑀸𑀫𑀻𑀢𑀺 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀸𑀫𑀺, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀸𑀫𑀺, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀸𑀫𑀺, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺 𑀦𑀺𑀚𑁆𑀛𑀸𑀬𑀸𑀫𑀺 𑀉𑀧𑀧𑀭𑀺𑀓𑁆𑀔𑀸𑀫𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 ¶ 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂.

𑀧𑀭𑀺𑀨𑀦𑁆𑀤𑀫𑀸𑀦𑀦𑁆𑀢𑀺 𑀢𑀡𑁆𑀳𑀸𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁, 𑀤𑀺𑀝𑁆𑀞𑀺𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁, 𑀓𑀺𑀮𑁂𑀲𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁, 𑀧𑀬𑁄𑀕𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁, 𑀯𑀺𑀧𑀸𑀓𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁, 𑀤𑀼𑀘𑁆𑀘𑀭𑀺𑀢𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁, 𑀭𑀢𑁆𑀢𑀁 𑀭𑀸𑀕𑁂𑀦 𑀨𑀦𑁆𑀤𑀫𑀸𑀦𑀁, 𑀤𑀼𑀝𑁆𑀞𑀁 ¶ 𑀤𑁄𑀲𑁂𑀦 𑀨𑀦𑁆𑀤𑀫𑀸𑀦𑀁, 𑀫𑀽𑀴𑁆𑀳𑀁 𑀫𑁄𑀳𑁂𑀦 𑀨𑀦𑁆𑀤𑀫𑀸𑀦𑀁, 𑀯𑀺𑀦𑀺𑀩𑀤𑁆𑀥𑀁 𑀫𑀸𑀦𑁂𑀦 𑀨𑀦𑁆𑀤𑀫𑀸𑀦𑀁, 𑀧𑀭𑀸𑀫𑀝𑁆𑀞𑀁 𑀤𑀺𑀝𑁆𑀞𑀺𑀬𑀸 𑀨𑀦𑁆𑀤𑀫𑀸𑀦𑀁, 𑀯𑀺𑀓𑁆𑀔𑁂𑀧𑀕𑀢𑀁 𑀉𑀤𑁆𑀥𑀘𑁆𑀘𑁂𑀦 𑀨𑀦𑁆𑀤𑀫𑀸𑀦𑀁, 𑀅𑀦𑀺𑀝𑁆𑀞𑀗𑁆𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀨𑀦𑁆𑀤𑀫𑀸𑀦𑀁, 𑀣𑀸𑀫𑀕𑀢𑀁 𑀅𑀦𑀼𑀲𑀬𑁂𑀳𑀺 𑀨𑀦𑁆𑀤𑀫𑀸𑀦𑀁, 𑀮𑀸𑀪𑁂𑀦 𑀨𑀦𑁆𑀤𑀫𑀸𑀦𑀁, 𑀅𑀮𑀸𑀪𑁂𑀦 𑀨𑀦𑁆𑀤𑀫𑀸𑀦𑀁, 𑀬𑀲𑁂𑀦 𑀨𑀦𑁆𑀤𑀫𑀸𑀦𑀁, 𑀅𑀬𑀲𑁂𑀦 𑀨𑀦𑁆𑀤𑀫𑀸𑀦𑀁, 𑀧𑀲𑀁𑀲𑀸𑀬 𑀨𑀦𑁆𑀤𑀫𑀸𑀦𑀁, 𑀦𑀺𑀦𑁆𑀤𑀸𑀬 𑀨𑀦𑁆𑀤𑀫𑀸𑀦𑀁, 𑀲𑀼𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀚𑀸𑀢𑀺𑀬𑀸 𑀨𑀦𑁆𑀤𑀫𑀸𑀦𑀁, 𑀚𑀭𑀸𑀬 𑀨𑀦𑁆𑀤𑀫𑀸𑀦𑀁, 𑀩𑁆𑀬𑀸𑀥𑀺𑀦𑀸 𑀨𑀦𑁆𑀤𑀫𑀸𑀦𑀁, 𑀫𑀭𑀡𑁂𑀦 𑀨𑀦𑁆𑀤𑀫𑀸𑀦𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀨𑀦𑁆𑀤𑀫𑀸𑀦𑀁, 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀫𑀸𑀦𑀼𑀲𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀕𑀩𑁆𑀪𑁂 𑀞𑀺𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀕𑀩𑁆𑀪𑀸 𑀯𑀼𑀝𑁆𑀞𑀸𑀦𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀧𑀭𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀤𑀼𑀓𑁆𑀔𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀘𑀓𑁆𑀔𑀼𑀭𑁄𑀕𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀲𑁄𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁, 𑀖𑀸𑀦𑀭𑁄𑀕𑁂𑀦 ¶ 𑀤𑀼𑀓𑁆𑀔𑁂𑀦…𑀧𑁂… 𑀚𑀺𑀯𑁆𑀳𑀸𑀭𑁄𑀕𑁂𑀦… 𑀓𑀸𑀬𑀭𑁄𑀕𑁂𑀦… 𑀲𑀻𑀲𑀭𑁄𑀕𑁂𑀦… 𑀓𑀡𑁆𑀡𑀭𑁄𑀕𑁂𑀦… 𑀫𑀼𑀔𑀭𑁄𑀕𑁂𑀦… 𑀤𑀦𑁆𑀢𑀭𑁄𑀕𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀤𑀸𑀳𑁂𑀦… 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑀸𑀬 ¶ … 𑀯𑀺𑀲𑀼𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦… 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸… 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬… 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑁂𑀦… 𑀧𑀺𑀢𑁆𑀢𑁂𑀦… 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀺𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦 [𑀪𑀕𑀦𑁆𑀤𑀮𑀸𑀬 (𑀲𑁆𑀬𑀸.)] … 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦… 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦 ¶ … 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬… 𑀧𑀺𑀧𑀸𑀲𑀸𑀬 ¶ … 𑀉𑀘𑁆𑀘𑀸𑀭𑁂𑀦… 𑀧𑀲𑁆𑀲𑀸𑀯𑁂𑀦… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀺𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑀕𑀺𑀦𑀺𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀼𑀢𑁆𑀢𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀥𑀻𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀜𑀸𑀢𑀺𑀩𑁆𑀬𑀲𑀦𑁂𑀦… 𑀪𑁄𑀕𑀩𑁆𑀬𑀲𑀦𑁂𑀦… 𑀭𑁄𑀕𑀩𑁆𑀬𑀲𑀦𑁂𑀦… 𑀲𑀻𑀮𑀩𑁆𑀬𑀲𑀦𑁂𑀦… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀲𑀫𑁆𑀨𑀦𑁆𑀤𑀫𑀸𑀦𑀁 𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀯𑁂𑀥𑀫𑀸𑀦𑀁 𑀧𑀯𑁂𑀥𑀫𑀸𑀦𑀁 𑀲𑀫𑁆𑀧𑀯𑁂𑀥𑀫𑀸𑀦𑀁 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺 𑀦𑀺𑀚𑁆𑀛𑀸𑀬𑀸𑀫𑀺 𑀉𑀧𑀧𑀭𑀺𑀓𑁆𑀔𑀸𑀫𑀻𑀢𑀺 𑁋 𑀧𑀲𑁆𑀲𑀸𑀫𑀺 𑀮𑁄𑀓𑁂 𑀧𑀭𑀺𑀨𑀦𑁆𑀤𑀫𑀸𑀦𑀁.

𑀧𑀚𑀁 𑀇𑀫𑀁 𑀢𑀡𑁆𑀳𑀕𑀢𑀁 𑀪𑀯𑁂𑀲𑀽𑀢𑀺. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸, 𑀲𑀤𑁆𑀤𑀢𑀡𑁆𑀳𑀸, 𑀕𑀦𑁆𑀥𑀢𑀡𑁆𑀳𑀸, 𑀭𑀲𑀢𑀡𑁆𑀳𑀸, 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸, 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀕𑀢𑀦𑁆𑀢𑀺 𑀢𑀡𑁆𑀳𑀸𑀕𑀢𑀁 𑀢𑀡𑁆𑀳𑀸𑀦𑀼𑀕𑀢𑀁 𑀢𑀡𑁆𑀳𑀸𑀬𑀸𑀦𑀼𑀲𑀝𑀁 𑀢𑀡𑁆𑀳𑀸𑀬𑀸𑀲𑀦𑁆𑀦𑀁 𑀢𑀡𑁆𑀳𑀸𑀬 𑀧𑀸𑀢𑀺𑀢𑀁 𑀅𑀪𑀺𑀪𑀽𑀢𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀁 ¶ ¶ . 𑀪𑀯𑁂𑀲𑀽𑀢𑀺 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂𑀢𑀺 𑁋 𑀧𑀚𑀁 𑀇𑀫𑀁 𑀢𑀡𑁆𑀳𑀕𑀢𑀁 𑀪𑀯𑁂𑀲𑀼.

𑀳𑀻𑀦𑀸 𑀦𑀭𑀸 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀻𑀢𑀺. 𑀳𑀻𑀦𑀸 𑀦𑀭𑀸𑀢𑀺 𑀳𑀻𑀦𑀸 𑀦𑀭𑀸 𑀳𑀻𑀦𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀳𑀻𑀦𑀸 𑀦𑀭𑀸, 𑀳𑀻𑀦𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀳𑀻𑀦𑀸 𑀦𑀭𑀸, 𑀳𑀻𑀦𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀳𑀻𑀦𑀸 𑀦𑀭𑀸, 𑀳𑀻𑀦𑁂𑀦 𑀧𑀸𑀡𑀸𑀢𑀺𑀧𑀸𑀢𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀳𑀻𑀦𑀸 𑀦𑀭𑀸, 𑀳𑀻𑀦𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑁂𑀦…𑀧𑁂… 𑀳𑀻𑀦𑁂𑀦 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂𑀦… 𑀳𑀻𑀦𑁂𑀦 𑀫𑀼𑀲𑀸𑀯𑀸𑀤𑁂𑀦… 𑀳𑀻𑀦𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬… 𑀳𑀻𑀦𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬… 𑀳𑀻𑀦𑁂𑀦 𑀲𑀫𑁆𑀨𑀧𑁆𑀧𑀮𑀸𑀧𑁂𑀦… 𑀳𑀻𑀦𑀸𑀬 𑀅𑀪𑀺𑀚𑁆𑀛𑀸𑀬… 𑀳𑀻𑀦𑁂𑀦 𑀩𑁆𑀬𑀸𑀧𑀸𑀤𑁂𑀦… 𑀳𑀻𑀦𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸… 𑀳𑀻𑀦𑁂𑀳𑀺 𑀲𑀗𑁆𑀔𑀸𑀭𑁂𑀳𑀺… 𑀳𑀻𑀦𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀦𑀻𑀯𑀭𑀡𑁂𑀳𑀺… 𑀳𑀻𑀦𑀸𑀬 𑀘𑁂𑀢𑀦𑀸𑀬… 𑀳𑀻𑀦𑀸𑀬 𑀧𑀢𑁆𑀣𑀦𑀸𑀬… 𑀳𑀻𑀦𑀸𑀬 𑀧𑀡𑀺𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀳𑀻𑀦𑀸 𑀦𑀭𑀸 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸𑀢𑀺 𑁋 𑀳𑀻𑀦𑀸 𑀦𑀭𑀸. 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀻𑀢𑀺. 𑀫𑀘𑁆𑀘𑀼𑀫𑀼𑀔𑁂𑀢𑀺 𑀫𑀸𑀭𑀫𑀼𑀔𑁂 𑀫𑀭𑀡𑀫𑀼𑀔𑁂, 𑀫𑀘𑁆𑀘𑀼𑀧𑁆𑀧𑀢𑁆𑀢𑀸 𑀫𑀘𑁆𑀘𑀼𑀲𑀫𑁆𑀧𑀢𑁆𑀢𑀸 𑀫𑀘𑁆𑀘𑀽𑀧𑀸𑀕𑀢𑀸, 𑀫𑀸𑀭𑀧𑁆𑀧𑀢𑁆𑀢𑀸 𑀫𑀸𑀭𑀲𑀫𑁆𑀧𑀢𑁆𑀢𑀸 𑀫𑀸𑀭𑀽𑀧𑀸𑀕𑀢𑀸, 𑀫𑀭𑀡𑀧𑁆𑀧𑀢𑁆𑀢𑀸 𑀫𑀭𑀡𑀲𑀫𑁆𑀧𑀢𑁆𑀢𑀸 𑀫𑀭𑀡𑀽𑀧𑀸𑀕𑀢𑀸 𑀮𑀧𑀦𑁆𑀢𑀺 𑀮𑀸𑀮𑀧𑀦𑁆𑀢𑀺 𑀲𑁄𑀘𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑁋 𑀳𑀻𑀦𑀸 𑀦𑀭𑀸 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀺.

𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀽𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀪𑀯𑀸𑀪𑀯𑁂𑀲𑀽𑀢𑀺 𑀪𑀯𑀸𑀪𑀯𑁂 𑀓𑀫𑁆𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀓𑀸𑀫𑀪𑀯𑁂 ¶ , 𑀓𑀫𑁆𑀫𑀪𑀯𑁂 𑀓𑀸𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀅𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 ¶ 𑀅𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂, 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 ¶ 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀅𑀯𑀻𑀢𑀢𑀡𑁆𑀳𑀸 𑀅𑀯𑀺𑀕𑀢𑀢𑀡𑁆𑀳𑀸 ¶ 𑀅𑀘𑀢𑁆𑀢𑀢𑀡𑁆𑀳𑀸 𑀅𑀯𑀦𑁆𑀢𑀢𑀡𑁆𑀳𑀸. 𑀅𑀫𑀼𑀢𑁆𑀢𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀢𑀡𑁆𑀳𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑀡𑁆𑀳𑀸𑀢𑀺 𑁋 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀼.

‘‘𑀧𑀲𑁆𑀲𑀸𑀫𑀺 𑀮𑁄𑀓𑁂 𑀧𑀭𑀺𑀨𑀦𑁆𑀤𑀫𑀸𑀦𑀁, 𑀧𑀚𑀁 𑀇𑀫𑀁 𑀢𑀡𑁆𑀳𑀕𑀢𑀁 𑀪𑀯𑁂𑀲𑀼;

𑀳𑀻𑀦𑀸 𑀦𑀭𑀸 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀺, 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀽’’𑀢𑀺.

𑀫𑀫𑀸𑀬𑀺𑀢𑁂 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂, 𑀫𑀘𑁆𑀙𑁂𑀯 [𑀫𑀘𑁆𑀙𑁄𑀯 (𑀲𑀻.)] 𑀅𑀧𑁆𑀧𑁄𑀤𑀓𑁂 𑀔𑀻𑀡𑀲𑁄𑀢𑁂;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀫𑀫𑁄 𑀘𑀭𑁂𑀬𑁆𑀬, 𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

𑀫𑀫𑀸𑀬𑀺𑀢𑁂 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂𑀢𑀺. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘. 𑀓𑀢𑀫𑀁 𑀢𑀡𑁆𑀳𑀸𑀫𑀫𑀢𑁆𑀢𑀁? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀫𑀭𑀺𑀬𑀸𑀤𑀺𑀓𑀢𑀁 𑀑𑀥𑀺𑀓𑀢𑀁 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁. 𑀇𑀤𑀁 𑀫𑀫𑀁, 𑀏𑀢𑀁 𑀫𑀫𑀁, 𑀏𑀢𑁆𑀢𑀓𑀁 𑀫𑀫𑀁, 𑀏𑀢𑁆𑀢𑀸𑀯𑀢𑀸 𑀫𑀫𑀁, 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 ¶ 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺. 𑀬𑀸𑀯𑀢𑀸 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀁, 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁.

𑀓𑀢𑀫𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺; 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 ¶ 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀓𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 ‘‘𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓’’𑀦𑁆𑀢𑀺 𑀕𑀸𑀳𑁄. 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺, 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀫𑀸𑀬𑀺𑀢𑁂 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂𑀢𑀺 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀁𑀓𑀺𑀦𑁄𑀧𑀺 𑀨𑀦𑁆𑀤𑀦𑁆𑀢𑀺, 𑀅𑀘𑁆𑀙𑀺𑀦𑁆𑀤𑀦𑁆𑀢𑁂𑀧𑀺 𑀨𑀦𑁆𑀤𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀨𑀦𑁆𑀤𑀦𑁆𑀢𑀺, 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀁𑀓𑀺𑀦𑁄𑀧𑀺 𑀨𑀦𑁆𑀤𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀨𑀦𑁆𑀤𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀨𑀦𑁆𑀤𑀦𑁆𑀢𑀺 𑀧𑀨𑀦𑁆𑀤𑀦𑁆𑀢𑀺 𑀲𑀫𑁆𑀨𑀦𑁆𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀯𑁂𑀥𑀦𑁆𑀢𑀺 [𑀯𑁂𑀥𑁂𑀦𑁆𑀢𑀺 (𑀲𑁆𑀬𑀸.)] 𑀧𑀯𑁂𑀥𑀦𑁆𑀢𑀺 𑀲𑀫𑁆𑀧𑀯𑁂𑀥𑀦𑁆𑀢𑀺. 𑀏𑀯𑀁 𑀨𑀦𑁆𑀤𑀫𑀸𑀦𑁂 𑀧𑀨𑀦𑁆𑀤𑀫𑀸𑀦𑁂 𑀲𑀫𑁆𑀨𑀦𑁆𑀤𑀫𑀸𑀦𑁂 𑀯𑀺𑀧𑁆𑀨𑀦𑁆𑀤𑀫𑀸𑀦𑁂 𑀯𑁂𑀥𑀫𑀸𑀦𑁂 𑀧𑀯𑁂𑀥𑀫𑀸𑀦𑁂 𑀲𑀫𑁆𑀧𑀯𑁂𑀥𑀫𑀸𑀦𑁂 𑀧𑀲𑁆𑀲𑀣 ¶ 𑀤𑀓𑁆𑀔𑀣 𑀑𑀮𑁄𑀓𑁂𑀣 𑀦𑀺𑀚𑁆𑀛𑀸𑀬𑀣 𑀉𑀧𑀧𑀭𑀺𑀓𑁆𑀔𑀣𑀸𑀢𑀺 𑁋 𑀫𑀫𑀸𑀬𑀺𑀢𑁂 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂.

𑀫𑀘𑁆𑀙𑁂𑀯 ¶ 𑀅𑀧𑁆𑀧𑁄𑀤𑀓𑁂 𑀔𑀻𑀡𑀲𑁄𑀢𑁂𑀢𑀺. 𑀬𑀣𑀸 𑀫𑀘𑁆𑀙𑀸 𑀅𑀧𑁆𑀧𑁄𑀤𑀓𑁂 𑀧𑀭𑀺𑀢𑁆𑀢𑁄𑀤𑀓𑁂 ¶ 𑀉𑀤𑀓𑀧𑀭𑀺𑀬𑀸𑀤𑀸𑀦𑁂 𑀓𑀸𑀓𑁂𑀳𑀺 𑀯𑀸 𑀓𑀼𑀮𑀮𑁂𑀳𑀺 𑀯𑀸 𑀩𑀮𑀸𑀓𑀸𑀳𑀺 𑀯𑀸 𑀧𑀭𑀺𑀧𑀸𑀢𑀺𑀬𑀫𑀸𑀦𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑀸 𑀔𑀚𑁆𑀚𑀫𑀸𑀦𑀸 𑀨𑀦𑁆𑀤𑀦𑁆𑀢𑀺 𑀧𑀨𑀦𑁆𑀤𑀦𑁆𑀢𑀺 𑀲𑀫𑁆𑀨𑀦𑁆𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀯𑁂𑀥𑀦𑁆𑀢𑀺 𑀧𑀯𑁂𑀥𑀦𑁆𑀢𑀺 𑀲𑀫𑁆𑀧𑀯𑁂𑀥𑀦𑁆𑀢𑀺; 𑀏𑀯𑀫𑁂𑀯 𑀧𑀚𑀸 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀁𑀓𑀺𑀦𑁄𑀧𑀺 𑀨𑀦𑁆𑀤𑀦𑁆𑀢𑀺, 𑀅𑀘𑁆𑀙𑀺𑀦𑁆𑀤𑀦𑁆𑀢𑁂𑀧𑀺 𑀨𑀦𑁆𑀤𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀨𑀦𑁆𑀤𑀦𑁆𑀢𑀺, 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀁𑀓𑀺𑀦𑁄𑀧𑀺 𑀨𑀦𑁆𑀤𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀨𑀦𑁆𑀤𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀨𑀦𑁆𑀤𑀦𑁆𑀢𑀺 𑀧𑀨𑀦𑁆𑀤𑀦𑁆𑀢𑀺 𑀲𑀫𑁆𑀨𑀦𑁆𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀯𑁂𑀥𑀦𑁆𑀢𑀺 𑀧𑀯𑁂𑀥𑀦𑁆𑀢𑀺 𑀲𑀫𑁆𑀧𑀯𑁂𑀥𑀦𑁆𑀢𑀻𑀢𑀺 𑁋 𑀫𑀘𑁆𑀙𑁂𑀯 𑀅𑀧𑁆𑀧𑁄𑀤𑀓𑁂 𑀔𑀻𑀡𑀲𑁄𑀢𑁂.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀫𑀫𑁄 𑀘𑀭𑁂𑀬𑁆𑀬𑀸𑀢𑀺. 𑀏𑀢𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 [𑀢𑀺𑀭𑀬𑀺𑀢𑁆𑀯𑀸 (𑀓.)] 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀫𑀢𑁆𑀢𑁂𑀲𑀽𑀢𑀺 ¶ 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸. 𑀅𑀫𑀫𑁄 𑀘𑀭𑁂𑀬𑁆𑀬𑀸𑀢𑀺 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀢𑀡𑁆𑀳𑀸𑀫𑀫𑀢𑁆𑀢𑀁 𑀧𑀳𑀸𑀬 𑀤𑀺𑀝𑁆𑀞𑀺𑀫𑀫𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀫𑀫𑀸𑀬𑀦𑁆𑀢𑁄 𑀲𑁄𑀢𑀁 𑀅𑀫𑀫𑀸𑀬𑀦𑁆𑀢𑁄 𑀖𑀸𑀦𑀁 𑀅𑀫𑀫𑀸𑀬𑀦𑁆𑀢𑁄 𑀚𑀺𑀯𑁆𑀳𑀁 𑀅𑀫𑀫𑀸𑀬𑀦𑁆𑀢𑁄 𑀓𑀸𑀬𑀁 𑀅𑀫𑀫𑀸𑀬𑀦𑁆𑀢𑁄 𑀫𑀦𑀁 𑀅𑀫𑀫𑀸𑀬𑀦𑁆𑀢𑁄 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀥𑀫𑁆𑀫𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀅𑀫𑀫𑀸𑀬𑀦𑁆𑀢𑁄 𑀅𑀕𑀡𑁆𑀳𑀦𑁆𑀢𑁄 𑀅𑀧𑀭𑀸𑀫𑀲𑀦𑁆𑀢𑁄 𑀅𑀦𑀪𑀺𑀦𑀺𑀯𑀺𑀲𑀦𑁆𑀢𑁄 𑀘𑀭𑁂𑀬𑁆𑀬 ¶ 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀫𑀫𑁄 𑀘𑀭𑁂𑀬𑁆𑀬.

𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄𑀢𑀺. 𑀪𑀯𑁂𑀲𑀽𑀢𑀺 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂. 𑀆𑀲𑀢𑁆𑀢𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄𑀢𑀺. 𑀪𑀯𑁂𑀲𑀼 𑀆𑀲𑀢𑁆𑀢𑀺𑀁 𑀅𑀓𑀼𑀩𑁆𑀩𑀫𑀸𑀦𑁄, 𑀙𑀦𑁆𑀤𑀁 𑀧𑁂𑀫𑀁 𑀭𑀸𑀕𑀁 𑀔𑀦𑁆𑀢𑀺𑀁 𑀅𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄𑀢𑀺 𑁋 𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

‘‘𑀫𑀫𑀸𑀬𑀺𑀢𑁂 ¶ 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂, 𑀫𑀘𑁆𑀙𑁂𑀯 𑀅𑀧𑁆𑀧𑁄𑀤𑀓𑁂 𑀔𑀻𑀡𑀲𑁄𑀢𑁂;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀫𑀫𑁄 𑀘𑀭𑁂𑀬𑁆𑀬, 𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄’’𑀢𑀺.

𑀉𑀪𑁄𑀲𑀼 ¶ 𑀅𑀦𑁆𑀢𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀦𑀼𑀕𑀺𑀤𑁆𑀥𑁄;

𑀬𑀤𑀢𑁆𑀢𑀕𑀭𑀳𑀻 𑀢𑀤𑀓𑀼𑀩𑁆𑀩𑀫𑀸𑀦𑁄, 𑀦 𑀮𑀺𑀫𑁆𑀧𑀢𑀻 [𑀦 𑀮𑀺𑀧𑁆𑀧𑀢𑀺 (𑀲𑀻.)] 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄.

𑀉𑀪𑁄𑀲𑀼 ¶ 𑀅𑀦𑁆𑀢𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀦𑁆𑀢𑀺. 𑀅𑀦𑁆𑀢𑀸𑀢𑀺 𑀨𑀲𑁆𑀲𑁄 𑀏𑀓𑁄 𑀅𑀦𑁆𑀢𑁄 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀅𑀢𑀻𑀢𑁄 𑀏𑀓𑁄 𑀅𑀦𑁆𑀢𑁄 𑀅𑀦𑀸𑀕𑀢𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀲𑀼𑀔𑀸 𑀯𑁂𑀤𑀦𑀸 𑀏𑀓𑁄 𑀅𑀦𑁆𑀢𑁄 𑀤𑀼𑀓𑁆𑀔𑀸 ¶ 𑀯𑁂𑀤𑀦𑀸 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀦𑀸𑀫𑀁 𑀏𑀓𑁄 𑀅𑀦𑁆𑀢𑁄 𑀭𑀽𑀧𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀓𑁄 𑀅𑀦𑁆𑀢𑁄 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄. 𑀙𑀦𑁆𑀤𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀦𑁆𑀢𑀺 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀙𑀦𑁆𑀤𑀁 𑀯𑀺𑀦𑁂𑀬𑁆𑀬 𑀧𑀝𑀺𑀯𑀺𑀦𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁.

𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀦𑀼𑀕𑀺𑀤𑁆𑀥𑁄𑀢𑀺. 𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑁄𑀢𑀲𑀫𑁆𑀨𑀲𑁆𑀲𑁄 𑀖𑀸𑀦𑀲𑀫𑁆𑀨𑀲𑁆𑀲𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄, 𑀧𑀝𑀺𑀖𑀲𑀫𑁆𑀨𑀲𑁆𑀲𑁄, 𑀲𑀼𑀔𑀯𑁂𑀤𑀦𑀻𑀬𑁄 𑀲𑀫𑁆𑀨𑀲𑁆𑀲𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀲𑀫𑁆𑀨𑀲𑁆𑀲𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀲𑀫𑁆𑀨𑀲𑁆𑀲𑁄, 𑀓𑀼𑀲𑀮𑁄 𑀨𑀲𑁆𑀲𑁄 𑀅𑀓𑀼𑀲𑀮𑁄 𑀨𑀲𑁆𑀲𑁄 𑀅𑀩𑁆𑀬𑀸𑀓𑀢𑁄 𑀨𑀲𑁆𑀲𑁄, 𑀓𑀸𑀫𑀸𑀯𑀘𑀭𑁄 𑀨𑀲𑁆𑀲𑁄 𑀭𑀽𑀧𑀸𑀯𑀘𑀭𑁄 𑀨𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑁄 𑀨𑀲𑁆𑀲𑁄, 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄 𑀅𑀧𑁆𑀧𑀡𑀺𑀳𑀺𑀢𑁄 𑀨𑀲𑁆𑀲𑁄, 𑀮𑁄𑀓𑀺𑀬𑁄 𑀨𑀲𑁆𑀲𑁄 𑀮𑁄𑀓𑀼𑀢𑁆𑀢𑀭𑁄 𑀨𑀲𑁆𑀲𑁄, 𑀅𑀢𑀻𑀢𑁄 𑀨𑀲𑁆𑀲𑁄 𑀅𑀦𑀸𑀕𑀢𑁄 𑀨𑀲𑁆𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 ¶ 𑀨𑀲𑁆𑀲𑁄, 𑀬𑁄 𑀏𑀯𑀭𑀽𑀧𑁄 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀫𑁆𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀨𑀲𑁆𑀲𑁄.

𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀨𑀲𑁆𑀲𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸 𑁋 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 [𑀢𑀺𑀭𑀡𑀧𑀭𑀺𑀜𑁆𑀜𑀸𑀬 (𑀲𑁆𑀬𑀸.)], 𑀧𑀳𑀸𑀦𑀧𑀭𑀺𑀜𑁆𑀜𑀸𑀬. 𑀓𑀢𑀫𑀸 ¶ 𑀜𑀸𑀢𑀧𑀭𑀺𑀜𑁆𑀜𑀸? 𑀨𑀲𑁆𑀲𑀁 𑀚𑀸𑀦𑀸𑀢𑀺 𑁋 𑀅𑀬𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀲𑁄𑀢𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀖𑀸𑀦𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀓𑀸𑀬𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀧𑀝𑀺𑀖𑀲𑀫𑁆𑀨𑀲𑁆𑀲𑁄, 𑀅𑀬𑀁 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀬𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀬𑀁 𑀓𑀼𑀲𑀮𑁄 𑀨𑀲𑁆𑀲𑁄, 𑀅𑀬𑀁 𑀅𑀓𑀼𑀲𑀮𑁄 𑀨𑀲𑁆𑀲𑁄, 𑀅𑀬𑀁 𑀅𑀩𑁆𑀬𑀸𑀓𑀢𑁄 𑀨𑀲𑁆𑀲𑁄, 𑀅𑀬𑀁 𑀓𑀸𑀫𑀸𑀯𑀘𑀭𑁄 𑀨𑀲𑁆𑀲𑁄, 𑀅𑀬𑀁 𑀭𑀽𑀧𑀸𑀯𑀘𑀭𑁄 𑀨𑀲𑁆𑀲𑁄, 𑀅𑀬𑀁 ¶ 𑀅𑀭𑀽𑀧𑀸𑀯𑀘𑀭𑁄 𑀨𑀲𑁆𑀲𑁄, 𑀅𑀬𑀁 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄, 𑀅𑀬𑀁 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄, 𑀅𑀬𑀁 𑀅𑀧𑁆𑀧𑀡𑀺𑀳𑀺𑀢𑁄 𑀨𑀲𑁆𑀲𑁄, 𑀅𑀬𑀁 𑀮𑁄𑀓𑀺𑀬𑁄 𑀨𑀲𑁆𑀲𑁄, 𑀅𑀬𑀁 𑀮𑁄𑀓𑀼𑀢𑁆𑀢𑀭𑁄 𑀨𑀲𑁆𑀲𑁄 ¶ , 𑀅𑀬𑀁 𑀅𑀢𑀻𑀢𑁄 𑀨𑀲𑁆𑀲𑁄, 𑀅𑀬𑀁 𑀅𑀦𑀸𑀕𑀢𑁄 𑀨𑀲𑁆𑀲𑁄, 𑀅𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀨𑀲𑁆𑀲𑁄𑀢𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀨𑀲𑁆𑀲𑀁 𑀢𑀻𑀭𑁂𑀢𑀺. 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄 𑀧𑀭𑀢𑁄 𑀧𑀮𑁄𑀓𑀢𑁄 𑀈𑀢𑀺𑀢𑁄 𑀉𑀧𑀤𑁆𑀤𑀯𑀢𑁄 𑀪𑀬𑀢𑁄 𑀉𑀧𑀲𑀕𑁆𑀕𑀢𑁄 𑀘𑀮𑀢𑁄 𑀧𑀪𑀗𑁆𑀕𑀼𑀢𑁄 𑀅𑀥𑀼𑀯𑀢𑁄 𑀅𑀢𑀸𑀡𑀢𑁄 𑀅𑀮𑁂𑀡𑀢𑁄 𑀅𑀲𑀭𑀡𑀢𑁄 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀆𑀤𑀻𑀦𑀯𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄 𑀅𑀲𑀸𑀭𑀓𑀢𑁄 𑀅𑀖𑀫𑀽𑀮𑀢𑁄 𑀯𑀥𑀓𑀢𑁄 𑀯𑀺𑀪𑀯𑀢𑁄 𑀲𑀸𑀲𑀯𑀢𑁄 𑀲𑀗𑁆𑀔𑀢𑀢𑁄 𑀫𑀸𑀭𑀸𑀫𑀺𑀲𑀢𑁄 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀥𑀫𑁆𑀫𑀢𑁄 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀢𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀢𑀻𑀭𑁂𑀢𑀺 𑁋 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸.

𑀓𑀢𑀫𑀸 ¶ 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀨𑀲𑁆𑀲𑁂 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑁂𑀲𑀼 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀲𑁄 𑀨𑀲𑁆𑀲𑁄 𑀧𑀳𑀻𑀦𑁄 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁 𑀓𑀢𑁄 𑀆𑀬𑀢𑀺𑀁 ¶ 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄’’𑀢𑀺 𑁋 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬𑀸𑀢𑀺. 𑀨𑀲𑁆𑀲𑀁 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀅𑀦𑀸𑀦𑀼𑀕𑀺𑀤𑁆𑀥𑁄𑀢𑀺. 𑀕𑁂𑀥𑁄𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑁄 𑀕𑁂𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑀅𑀕𑀺𑀤𑁆𑀥𑁄. 𑀲𑁄 𑀭𑀽𑀧𑁂 𑀅𑀕𑀺𑀤𑁆𑀥𑁄 𑀲𑀤𑁆𑀤𑁂 𑀅𑀕𑀺𑀤𑁆𑀥𑁄 𑀕𑀦𑁆𑀥𑁂 𑀅𑀕𑀺𑀤𑁆𑀥𑁄 𑀭𑀲𑁂 𑀅𑀕𑀺𑀤𑁆𑀥𑁄 𑀨𑁄𑀝𑁆𑀞𑀩𑁆𑀩𑁂 𑀅𑀕𑀺𑀤𑁆𑀥𑁄 𑀓𑀼𑀮𑁂… 𑀕𑀡𑁂… 𑀆𑀯𑀸𑀲𑁂… 𑀮𑀸𑀪𑁂… 𑀬𑀲𑁂… 𑀧𑀲𑀁𑀲𑀸𑀬… 𑀲𑀼𑀔𑁂… 𑀘𑀻𑀯𑀭𑁂… 𑀧𑀺𑀡𑁆𑀟𑀧𑀸𑀢𑁂… 𑀲𑁂𑀦𑀸𑀲𑀦𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂 𑀅𑀕𑀺𑀤𑁆𑀥𑁄 ¶ 𑀓𑀸𑀫𑀥𑀸𑀢𑀼𑀬𑀸… 𑀭𑀽𑀧𑀥𑀸𑀢𑀼𑀬𑀸… 𑀅𑀭𑀽𑀧𑀥𑀸𑀢𑀼𑀬𑀸… 𑀓𑀸𑀫𑀪𑀯𑁂… 𑀭𑀽𑀧𑀪𑀯𑁂… 𑀅𑀭𑀽𑀧𑀪𑀯𑁂… 𑀲𑀜𑁆𑀜𑀸𑀪𑀯𑁂… 𑀅𑀲𑀜𑁆𑀜𑀸𑀪𑀯𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂… 𑀏𑀓𑀯𑁄𑀓𑀸𑀭𑀪𑀯𑁂… 𑀘𑀢𑀼𑀯𑁄𑀓𑀸𑀭𑀪𑀯𑁂… 𑀧𑀜𑁆𑀘𑀯𑁄𑀓𑀸𑀭𑀪𑀯𑁂… 𑀅𑀢𑀻𑀢𑁂… 𑀅𑀦𑀸𑀕𑀢𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀕𑀺𑀤𑁆𑀥𑁄 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄 𑀯𑀦𑁆𑀢𑀕𑁂𑀥𑁄 𑀫𑀼𑀢𑁆𑀢𑀕𑁂𑀥𑁄 𑀧𑀳𑀻𑀦𑀕𑁂𑀥𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 ¶ 𑁋 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀦𑀼𑀕𑀺𑀤𑁆𑀥𑁄.

𑀬𑀤𑀢𑁆𑀢𑀕𑀭𑀳𑀻 𑀢𑀤𑀓𑀼𑀩𑁆𑀩𑀫𑀸𑀦𑁄𑀢𑀺. 𑀬𑀤𑀦𑁆𑀢𑀺 𑀬𑀁. 𑀅𑀢𑁆𑀢𑀕𑀭𑀳𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺 𑁋 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺? 𑀓𑀢𑀁 𑀫𑁂 ¶ 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢𑀦𑁆𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀯𑀘𑀻𑀲𑀼𑀘𑀭𑀺𑀢𑀦𑁆𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑁄 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀓𑀢𑀸 𑀫𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑀁 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀅𑀓𑀢𑀸 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑁄 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀅𑀓𑀢𑀸 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑁄 𑀫𑁂 𑀫𑀼𑀲𑀸𑀯𑀸𑀤𑁄, 𑀅𑀓𑀢𑀸 𑀫𑁂 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑀸 𑀫𑁂 𑀧𑀺𑀲𑀼𑀡𑀸 𑀯𑀸𑀘𑀸, 𑀅𑀓𑀢𑀸 𑀫𑁂 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑀸 𑀫𑁂 𑀨𑀭𑀼𑀲𑀸 𑀯𑀸𑀘𑀸, 𑀅𑀓𑀢𑀸 𑀫𑁂 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑁄 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀓𑀢𑀸 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻𑀢𑀺 𑁋 𑀅𑀢𑁆𑀢𑀸𑀦𑀁 ¶ 𑀕𑀭𑀳𑀢𑀺. 𑀓𑀢𑀸 𑀫𑁂 𑀅𑀪𑀺𑀚𑁆𑀛𑀸, 𑀅𑀓𑀢𑀸 𑀫𑁂 𑀅𑀦𑀪𑀺𑀚𑁆𑀛𑀸𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑁄 𑀫𑁂 𑀩𑁆𑀬𑀸𑀧𑀸𑀤𑁄, 𑀅𑀓𑀢𑁄 𑀫𑁂 𑀅𑀩𑁆𑀬𑀸𑀧𑀸𑀤𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀓𑀢𑀸 𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑁋 𑀅𑀢𑁆𑀢𑀸𑀦𑀁 ¶ 𑀕𑀭𑀳𑀢𑀺. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀣 𑀯𑀸, 𑀲𑀻𑀮𑁂𑀲𑀼𑀫𑁆𑀳𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀇𑀦𑁆𑀤𑁆𑀭𑀺𑀬𑁂𑀲𑀼𑀫𑁆𑀳𑀺 ¶ 𑀅𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀪𑁄𑀚𑀦𑁂𑀫𑁆𑀳𑀺 [𑀪𑁄𑀚𑀦𑁂 (𑀲𑁆𑀬𑀸.)] 𑀅𑀫𑀢𑁆𑀢𑀜𑁆𑀜𑀽𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀅𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘 𑀩𑀮𑀸𑀦𑀻𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑀸 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀅𑀪𑀸𑀯𑀺𑀢𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀤𑀼𑀓𑁆𑀔𑀁 𑀫𑁂 𑀅𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀲𑀫𑀼𑀤𑀬𑁄 𑀫𑁂 𑀅𑀧𑁆𑀧𑀳𑀻𑀦𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀫𑀕𑁆𑀕𑁄 𑀫𑁂 𑀅𑀪𑀸𑀯𑀺𑀢𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀦𑀺𑀭𑁄𑀥𑁄 𑀫𑁂 𑀅𑀲𑀘𑁆𑀙𑀺𑀓𑀢𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀏𑀯𑀁 𑀅𑀢𑁆𑀢𑀕𑀭𑀳𑀺𑀢𑀁 𑀓𑀫𑁆𑀫𑀁 𑀅𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄𑀢𑀺 𑁋 𑀬𑀤𑀢𑁆𑀢𑀕𑀭𑀳𑀻 𑀢𑀤𑀓𑀼𑀩𑁆𑀩𑀫𑀸𑀦𑁄. 𑀦 𑀮𑀺𑀫𑁆𑀧𑀢𑀻 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄𑀢𑀺. 𑀮𑁂𑀧𑁄𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀥𑀻𑀭𑁄𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 ¶ 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀥𑀻𑀭𑁄 𑀢𑀡𑁆𑀳𑀸𑀮𑁂𑀧𑀁 𑀧𑀳𑀸𑀬 𑀤𑀺𑀝𑁆𑀞𑀺𑀮𑁂𑀧𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑀺𑀝𑁆𑀞𑁂 𑀦 𑀮𑀺𑀫𑁆𑀧𑀢𑀺, 𑀲𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀫𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀯𑀺𑀜𑁆𑀜𑀸𑀢𑁂 𑀦 𑀮𑀺𑀫𑁆𑀧𑀢𑀺, 𑀦 𑀧𑀮𑀺𑀫𑁆𑀧𑀢𑀺 [𑀦 𑀲𑀁𑀮𑀺𑀫𑁆𑀧𑀢𑀺 (𑀲𑁆𑀬𑀸.)], 𑀦 𑀉𑀧𑀮𑀺𑀫𑁆𑀧𑀢𑀺. 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 [𑀅𑀲𑀁𑀮𑀺𑀢𑁆𑀢𑁄 (𑀲𑁆𑀬𑀸.)] 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀦 𑀮𑀺𑀫𑁆𑀧𑀢𑀻 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄𑀢𑀺.

‘‘𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀦𑀼𑀕𑀺𑀤𑁆𑀥𑁄;

𑀬𑀤𑀢𑁆𑀢𑀕𑀭𑀳𑀻 𑀢𑀤𑀓𑀼𑀩𑁆𑀩𑀫𑀸𑀦𑁄, 𑀦 𑀮𑀺𑀫𑁆𑀧𑀢𑀻 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄’’𑀢𑀺.

𑀲𑀜𑁆𑀜𑀁 ¶ ¶ 𑀧𑀭𑀺𑀜𑁆𑀜𑀸 𑀯𑀺𑀢𑀭𑁂𑀬𑁆𑀬 𑀑𑀖𑀁, 𑀧𑀭𑀺𑀕𑁆𑀕𑀳𑁂𑀲𑀼 𑀫𑀼𑀦𑀺 𑀦𑁄𑀧𑀮𑀺𑀢𑁆𑀢𑁄;

𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀘𑀭𑀫𑀧𑁆𑀧𑀫𑀢𑁆𑀢𑁄, 𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘.

𑀲𑀜𑁆𑀜𑀁 𑀧𑀭𑀺𑀜𑁆𑀜𑀸 𑀯𑀺𑀢𑀭𑁂𑀬𑁆𑀬 𑀑𑀖𑀦𑁆𑀢𑀺. 𑀲𑀜𑁆𑀜𑀸𑀢𑀺 𑀓𑀸𑀫𑀲𑀜𑁆𑀜𑀸 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸 𑀕𑀦𑁆𑀥𑀲𑀜𑁆𑀜𑀸 𑀭𑀲𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀥𑀫𑁆𑀫𑀲𑀜𑁆𑀜𑀸 𑁋 𑀬𑀸 𑀏𑀯𑀭𑀽𑀧𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀜𑁆𑀜𑀸. 𑀲𑀜𑁆𑀜𑀁 𑀧𑀭𑀺𑀜𑁆𑀜𑀸𑀢𑀺 𑀲𑀜𑁆𑀜𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸 𑁋 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬, 𑀧𑀳𑀸𑀦𑀧𑀭𑀺𑀜𑁆𑀜𑀸𑀬.

𑀓𑀢𑀫𑀸 ¶ 𑀜𑀸𑀢𑀧𑀭𑀺𑀜𑁆𑀜𑀸? 𑀲𑀜𑁆𑀜𑀁 𑀚𑀸𑀦𑀸𑀢𑀺 𑁋 𑀅𑀬𑀁 𑀓𑀸𑀫𑀲𑀜𑁆𑀜𑀸, 𑀅𑀬𑀁 𑀩𑁆𑀬𑀸𑀧𑀸𑀤𑀲𑀜𑁆𑀜𑀸, 𑀅𑀬𑀁 𑀯𑀺𑀳𑀺𑀁𑀲𑀸𑀲𑀜𑁆𑀜𑀸, 𑀅𑀬𑀁 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸, 𑀅𑀬𑀁 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸, 𑀅𑀬𑀁 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸, 𑀅𑀬𑀁 𑀭𑀽𑀧𑀲𑀜𑁆𑀜𑀸, 𑀅𑀬𑀁 𑀲𑀤𑁆𑀤𑀲𑀜𑁆𑀜𑀸, 𑀅𑀬𑀁 𑀕𑀦𑁆𑀥𑀲𑀜𑁆𑀜𑀸, 𑀅𑀬𑀁 𑀭𑀲𑀲𑀜𑁆𑀜𑀸, 𑀅𑀬𑀁 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀅𑀬𑀁 𑀥𑀫𑁆𑀫𑀲𑀜𑁆𑀜𑀸𑀢𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀲𑀜𑁆𑀜𑀁 𑀢𑀻𑀭𑁂𑀢𑀺. 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄 𑀧𑀭𑀢𑁄 𑀧𑀮𑁄𑀓𑀢𑁄 𑀈𑀢𑀺𑀢𑁄 𑀉𑀧𑀤𑁆𑀤𑀯𑀢𑁄 𑀪𑀬𑀢𑁄 𑀉𑀧𑀲𑀕𑁆𑀕𑀢𑁄 𑀘𑀮𑀢𑁄 𑀧𑀪𑀗𑁆𑀕𑀼𑀢𑁄…𑀧𑁂… 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀢𑀻𑀭𑁂𑀢𑀺 𑁋 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀲𑀜𑁆𑀜𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀬 𑀙𑀦𑁆𑀤𑀭𑀸𑀕𑁄, 𑀢𑀁 𑀧𑀚𑀳𑀣. 𑀏𑀯𑀁 𑀲𑀸 𑀲𑀜𑁆𑀜𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁 𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺 𑁋 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀲𑀜𑁆𑀜𑀁 𑀧𑀭𑀺𑀜𑁆𑀜𑀸𑀢𑀺 𑀲𑀜𑁆𑀜𑀁 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀯𑀺𑀢𑀭𑁂𑀬𑁆𑀬 ¶ 𑀑𑀖𑀦𑁆𑀢𑀺 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀲𑀜𑁆𑀜𑀁 𑀧𑀭𑀺𑀜𑁆𑀜𑀸 𑀯𑀺𑀢𑀭𑁂𑀬𑁆𑀬 𑀑𑀖𑀁.

𑀧𑀭𑀺𑀕𑁆𑀕𑀳𑁂𑀲𑀼 ¶ 𑀫𑀼𑀦𑀺 𑀦𑁄𑀧𑀮𑀺𑀢𑁆𑀢𑁄𑀢𑀺. 𑀧𑀭𑀺𑀕𑁆𑀕𑀳𑀸𑀢𑀺 𑀤𑁆𑀯𑁂 𑀧𑀭𑀺𑀕𑁆𑀕𑀳𑀸 𑁋 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 ¶ 𑀘 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 ¶ 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀺 𑀫𑁄𑀦𑀧𑁆𑀧𑀢𑁆𑀢𑁄𑀢𑀺. 𑀢𑀻𑀡𑀺 𑀫𑁄𑀦𑁂𑀬𑁆𑀬𑀸𑀦𑀺 𑁋 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀫𑀦𑁄𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 𑀓𑀸𑀬𑀫𑁄𑀦𑁂𑀬𑁆𑀬𑀁? 𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀸𑀭𑀫𑁆𑀫𑀡𑁂 𑀜𑀸𑀡𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀧𑀭𑀺𑀜𑁆𑀜𑀸 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀓𑀸𑀬𑀫𑁄𑀦𑁂𑀬𑁆𑀬𑀁 𑁋 𑀇𑀤𑀁 𑀓𑀸𑀬𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 𑀯𑀘𑀻𑀫𑁄𑀦𑁂𑀬𑁆𑀬𑀁? 𑀘𑀢𑀼𑀩𑁆𑀩𑀺𑀥𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀸𑀘𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀸𑀘𑀸𑀧𑀭𑀺𑀜𑁆𑀜𑀸 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀸𑀘𑀸𑀬 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀘𑀻𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀯𑀘𑀻𑀫𑁄𑀦𑁂𑀬𑁆𑀬𑀁 𑁋 𑀇𑀤𑀁 𑀯𑀘𑀻𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 𑀫𑀦𑁄𑀫𑁄𑀦𑁂𑀬𑁆𑀬𑀁? 𑀢𑀺𑀯𑀺𑀥𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑀸𑀭𑀫𑁆𑀫𑀡𑁂 𑀜𑀸𑀡𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑀧𑀭𑀺𑀜𑁆𑀜𑀸 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 ¶ 𑀫𑀕𑁆𑀕𑁄 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 ¶ 𑀫𑀦𑁄𑀫𑁄𑀦𑁂𑀬𑁆𑀬𑀁 𑁋 𑀇𑀤𑀁 𑀫𑀦𑁄𑀫𑁄𑀦𑁂𑀬𑁆𑀬𑀁.

‘‘𑀓𑀸𑀬𑀫𑀼𑀦𑀺𑀁 𑀯𑀸𑀘𑀸𑀫𑀼𑀦𑀺𑀁, 𑀫𑀦𑁄𑀫𑀼𑀦𑀺𑀫𑀦𑀸𑀲𑀯𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀆𑀳𑀼 𑀲𑀩𑁆𑀩𑀧𑁆𑀧𑀳𑀸𑀬𑀺𑀦𑀁.

‘‘𑀓𑀸𑀬𑀫𑀼𑀦𑀺𑀁 𑀯𑀸𑀘𑀸𑀫𑀼𑀦𑀺𑀁, 𑀫𑀦𑁄𑀫𑀼𑀦𑀺𑀫𑀦𑀸𑀲𑀯𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀆𑀳𑀼 𑀦𑀺𑀦𑁆𑀳𑀸𑀢𑀧𑀸𑀧𑀓’’𑀦𑁆𑀢𑀺 [𑀦𑀺𑀁𑀦𑁆𑀳𑀸𑀢𑀧𑀸𑀧𑀓𑀦𑁆𑀢𑀺 (𑀲𑁆𑀬𑀸.)].

𑀇𑀫𑁂𑀳𑀺 𑀢𑀻𑀳𑀺 𑀫𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀙 𑀫𑀼𑀦𑀺𑀦𑁄 [𑀙 𑀫𑀼𑀦𑀬𑁄 (𑀲𑁆𑀬𑀸.)] 𑁋 𑀅𑀕𑀸𑀭𑀫𑀼𑀦𑀺𑀦𑁄, 𑀅𑀦𑀕𑀸𑀭𑀫𑀼𑀦𑀺𑀦𑁄, 𑀲𑁂𑀔𑀫𑀼𑀦𑀺𑀦𑁄, 𑀅𑀲𑁂𑀔𑀫𑀼𑀦𑀺𑀦𑁄, 𑀧𑀘𑁆𑀘𑁂𑀓𑀫𑀼𑀦𑀺𑀦𑁄, 𑀫𑀼𑀦𑀺𑀫𑀼𑀦𑀺𑀦𑁄𑀢𑀺. 𑀓𑀢𑀫𑁂 𑀅𑀕𑀸𑀭𑀫𑀼𑀦𑀺𑀦𑁄? 𑀬𑁂 𑀢𑁂 𑀅𑀕𑀸𑀭𑀺𑀓𑀸 𑀤𑀺𑀝𑁆𑀞𑀧𑀤𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑁋 𑀇𑀫𑁂 𑀅𑀕𑀸𑀭𑀫𑀼𑀦𑀺𑀦𑁄. 𑀓𑀢𑀫𑁂 𑀅𑀦𑀕𑀸𑀭𑀫𑀼𑀦𑀺𑀦𑁄 ¶ ? 𑀬𑁂 𑀢𑁂 𑀧𑀩𑁆𑀩𑀚𑀺𑀢𑀸 𑀤𑀺𑀝𑁆𑀞𑀧𑀤𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑁋 𑀇𑀫𑁂 𑀅𑀦𑀕𑀸𑀭𑀫𑀼𑀦𑀺𑀦𑁄. 𑀲𑀢𑁆𑀢 𑀲𑁂𑀔𑀸 𑀲𑁂𑀔𑀫𑀼𑀦𑀺𑀦𑁄. 𑀅𑀭𑀳𑀦𑁆𑀢𑁄 𑀅𑀲𑁂𑀔𑀫𑀼𑀦𑀺𑀦𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀫𑀼𑀦𑀺𑀦𑁄. 𑀫𑀼𑀦𑀺𑀫𑀼𑀦𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸.

‘‘𑀦 ¶ 𑀫𑁄𑀦𑁂𑀦 𑀫𑀼𑀦𑀺 𑀳𑁄𑀢𑀺, 𑀫𑀽𑀴𑁆𑀳𑀭𑀽𑀧𑁄 𑀅𑀯𑀺𑀤𑁆𑀤𑀲𑀼;

𑀬𑁄 𑀘 𑀢𑀼𑀮𑀁𑀯 𑀧𑀕𑁆𑀕𑀬𑁆𑀳, 𑀯𑀭𑀫𑀸𑀤𑀸𑀬 𑀧𑀡𑁆𑀟𑀺𑀢𑁄.

‘‘𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀲 𑀫𑀼𑀦𑀺 𑀢𑁂𑀦 𑀲𑁄 𑀫𑀼𑀦𑀺;

𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀺.

‘‘𑀅𑀲𑀢𑀜𑁆𑀘 𑀲𑀢𑀜𑁆𑀘 𑀜𑀢𑁆𑀯𑀸 𑀥𑀫𑁆𑀫𑀁, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀤𑁂𑀯𑀫𑀦𑀼𑀲𑁆𑀲𑁂𑀳𑀺 ¶ 𑀧𑀽𑀚𑀺𑀢𑁄 𑀬𑁄, 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻’’𑀢𑀺.

𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀫𑀼𑀦𑀺 𑀢𑀡𑁆𑀳𑀸𑀮𑁂𑀧𑀁 𑀧𑀳𑀸𑀬 𑀤𑀺𑀝𑁆𑀞𑀺𑀮𑁂𑀧𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀕𑁆𑀕𑀳𑁂𑀲𑀼 ¶ 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺. 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀧𑀭𑀺𑀕𑁆𑀕𑀳𑁂𑀲𑀼 𑀫𑀼𑀦𑀺 𑀦𑁄𑀧𑀮𑀺𑀢𑁆𑀢𑁄.

𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀘𑀭𑀫𑀧𑁆𑀧𑀫𑀢𑁆𑀢𑁄𑀢𑀺. 𑀲𑀮𑁆𑀮𑀦𑁆𑀢𑀺 𑀲𑀢𑁆𑀢 𑀲𑀮𑁆𑀮𑀸𑀦𑀺 𑁋 𑀭𑀸𑀕𑀲𑀮𑁆𑀮𑀁, 𑀤𑁄𑀲𑀲𑀮𑁆𑀮𑀁, 𑀫𑁄𑀳𑀲𑀮𑁆𑀮𑀁, 𑀫𑀸𑀦𑀲𑀮𑁆𑀮𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁, 𑀲𑁄𑀓𑀲𑀮𑁆𑀮𑀁, 𑀓𑀣𑀁𑀓𑀣𑀸𑀲𑀮𑁆𑀮𑀁 [𑀤𑀼𑀘𑁆𑀘𑀭𑀺𑀢𑀲𑀮𑁆𑀮𑀁 (𑀲𑀻.)]. 𑀬𑀲𑁆𑀲𑁂𑀢𑁂 𑀲𑀮𑁆𑀮𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀅𑀩𑁆𑀩𑀳𑀺𑀢𑀲𑀮𑁆𑀮𑁄 𑀉𑀤𑁆𑀥𑀢𑀲𑀮𑁆𑀮𑁄 𑀲𑀫𑀼𑀤𑁆𑀥𑀢𑀲𑀮𑁆𑀮𑁄 𑀉𑀧𑁆𑀧𑀸𑀝𑀺𑀢𑀲𑀮𑁆𑀮𑁄 𑀲𑀫𑀼𑀧𑁆𑀧𑀸𑀝𑀺𑀢𑀲𑀮𑁆𑀮𑁄 𑀘𑀢𑁆𑀢𑀲𑀮𑁆𑀮𑁄 𑀯𑀦𑁆𑀢𑀲𑀮𑁆𑀮𑁄 𑀫𑀼𑀢𑁆𑀢𑀲𑀮𑁆𑀮𑁄 𑀧𑀳𑀻𑀦𑀲𑀮𑁆𑀮𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀲𑀮𑁆𑀮𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄.

𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻 𑀲𑀸𑀢𑀘𑁆𑀘𑀓𑀸𑀭𑀻 𑀅𑀝𑁆𑀞𑀺𑀢𑀓𑀸𑀭𑀻 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀣𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁, 𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀢𑀢𑁆𑀣 ¶ 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀺 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 ¶ 𑀥𑀫𑁆𑀫𑁂𑀲𑀼. ‘‘𑀓𑀣𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁, 𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 ¶ 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺…𑀧𑁂… 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀣𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 ¶ 𑀧𑀭𑀺𑀧𑀽𑀭𑁂𑀬𑁆𑀬𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁, 𑀧𑀭𑀺𑀧𑀽𑀭𑀁 𑀯𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀺 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀣𑀸𑀳𑀁 𑀅𑀧𑀭𑀺𑀜𑁆𑀜𑀸𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑁂𑀬𑁆𑀬𑀁, 𑀅𑀧𑁆𑀧𑀳𑀻𑀦𑁂 𑀯𑀸 𑀓𑀺𑀮𑁂𑀲𑁂 𑀧𑀚𑀳𑁂𑀬𑁆𑀬𑀁, 𑀅𑀪𑀸𑀯𑀺𑀢𑀁 𑀯𑀸 𑀫𑀕𑁆𑀕𑀁 𑀪𑀸𑀯𑁂𑀬𑁆𑀬𑀁, 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀺 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀘𑀭𑀫𑀧𑁆𑀧𑀫𑀢𑁆𑀢𑁄.

𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸𑀢𑀺 𑀇𑀫𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀲𑀓𑀢𑁆𑀢𑀪𑀸𑀯𑀁, 𑀧𑀭𑀮𑁄𑀓𑀁 𑀦𑀸𑀲𑀻𑀲𑀢𑀺 𑀧𑀭𑀢𑁆𑀢𑀪𑀸𑀯𑀁; 𑀇𑀫𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀲𑀓𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀧𑀭𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀧𑀭𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁; 𑀇𑀫𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀧𑀭𑀁 ¶ 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺; 𑀇𑀫𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀫𑀦𑀼𑀲𑁆𑀲𑀮𑁄𑀓𑀁, 𑀧𑀭𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀤𑁂𑀯𑀮𑁄𑀓𑀁. 𑀇𑀫𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀓𑀸𑀫𑀥𑀸𑀢𑀼𑀁, 𑀧𑀭𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀭𑀽𑀧𑀥𑀸𑀢𑀼𑀁 𑀅𑀭𑀽𑀧𑀥𑀸𑀢𑀼𑀁; 𑀇𑀫𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀓𑀸𑀫𑀥𑀸𑀢𑀼𑀁 𑀭𑀽𑀧𑀥𑀸𑀢𑀼𑀁, 𑀧𑀭𑀁 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀅𑀭𑀽𑀧𑀥𑀸𑀢𑀼𑀁. 𑀧𑀼𑀦 𑀕𑀢𑀺𑀁 𑀯𑀸 𑀉𑀧𑀧𑀢𑁆𑀢𑀺𑀁 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀯𑀸 𑀪𑀯𑀁 𑀯𑀸 𑀲𑀁𑀲𑀸𑀭𑀁 𑀯𑀸 𑀯𑀝𑁆𑀝𑀁 𑀯𑀸 𑀦𑀸𑀲𑀻𑀲𑀢𑀺 𑀦 𑀇𑀘𑁆𑀙𑀢𑀺 𑀦 𑀲𑀸𑀤𑀺𑀬𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀧𑀺𑀳𑁂𑀢𑀺 𑀦𑀸𑀢𑀺𑀚𑀧𑁆𑀧𑀢𑀻𑀢𑀺 𑁋 𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸𑀢𑀺.

‘‘𑀲𑀜𑁆𑀜𑀁 ¶ 𑀧𑀭𑀺𑀜𑁆𑀜𑀸 𑀯𑀺𑀢𑀭𑁂𑀬𑁆𑀬 𑀑𑀖𑀁, 𑀧𑀭𑀺𑀕𑁆𑀕𑀳𑁂𑀲𑀼 𑀫𑀼𑀦𑀺 𑀦𑁄𑀧𑀮𑀺𑀢𑁆𑀢𑁄;

𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀘𑀭𑀫𑀧𑁆𑀧𑀫𑀢𑁆𑀢𑁄, 𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺.

𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀤𑀼𑀢𑀺𑀬𑁄.

𑁩. 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ ¶ 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀯𑀤𑀦𑁆𑀢𑀺 ¶ ¶ 𑀯𑁂 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂, 𑀅𑀣𑁄𑀧𑀺 [𑀅𑀜𑁆𑀜𑁂𑀧𑀺 𑀢𑁂 (𑀲𑀻.), 𑀅𑀜𑁆𑀜𑁂𑀧𑀺 (𑀲𑁆𑀬𑀸.)] 𑀯𑁂 𑀲𑀘𑁆𑀘𑀫𑀦𑀸 𑀯𑀤𑀦𑁆𑀢𑀺;

𑀯𑀸𑀤𑀜𑁆𑀘 𑀚𑀸𑀢𑀁 𑀫𑀼𑀦𑀺 𑀦𑁄 𑀉𑀧𑁂𑀢𑀺, 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀺.

𑀯𑀤𑀦𑁆𑀢𑀺 𑀯𑁂 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂𑀢𑀺 𑀢𑁂 𑀢𑀺𑀢𑁆𑀣𑀺𑀬𑀸 𑀤𑀼𑀝𑁆𑀞𑀫𑀦𑀸 𑀯𑀺𑀭𑀼𑀤𑁆𑀥𑀫𑀦𑀸 𑀧𑀝𑀺𑀯𑀺𑀭𑀼𑀤𑁆𑀥𑀫𑀦𑀸 𑀆𑀳𑀢𑀫𑀦𑀸 𑀧𑀘𑁆𑀘𑀸𑀳𑀢𑀫𑀦𑀸 𑀆𑀖𑀸𑀢𑀺𑀢𑀫𑀦𑀸 𑀧𑀘𑁆𑀘𑀸𑀖𑀸𑀢𑀺𑀢𑀫𑀦𑀸 𑀯𑀤𑀦𑁆𑀢𑀺 𑀉𑀧𑀯𑀤𑀦𑁆𑀢𑀺 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀅𑀪𑀽𑀢𑁂𑀦𑀸𑀢𑀺 𑁋 𑀯𑀤𑀦𑁆𑀢𑀺 𑀯𑁂 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂.

𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸 𑀯𑀤𑀦𑁆𑀢𑀻𑀢𑀺 𑀬𑁂 𑀢𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀲𑀤𑁆𑀤𑀳𑀦𑁆𑀢𑀸 𑀑𑀓𑀧𑁆𑀧𑁂𑀦𑁆𑀢𑀸 𑀅𑀥𑀺𑀫𑀼𑀘𑁆𑀘𑀦𑁆𑀢𑀸 𑀲𑀘𑁆𑀘𑀫𑀦𑀸 𑀲𑀘𑁆𑀘𑀲𑀜𑁆𑀜𑀺𑀦𑁄 𑀪𑀽𑀢𑀫𑀦𑀸 𑀪𑀽𑀢𑀲𑀜𑁆𑀜𑀺𑀦𑁄 𑀢𑀣𑀫𑀦𑀸 𑀢𑀣𑀲𑀜𑁆𑀜𑀺𑀦𑁄 𑀬𑀸𑀣𑀸𑀯𑀫𑀦𑀸 𑀬𑀸𑀣𑀸𑀯𑀲𑀜𑁆𑀜𑀺𑀦𑁄 𑀅𑀯𑀺𑀧𑀭𑀻𑀢𑀫𑀦𑀸 𑀅𑀯𑀺𑀧𑀭𑀻𑀢𑀲𑀜𑁆𑀜𑀺𑀦𑁄 𑀯𑀤𑀦𑁆𑀢𑀺 𑀉𑀧𑀯𑀤𑀦𑁆𑀢𑀺 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀅𑀪𑀽𑀢𑁂𑀦𑀸𑀢𑀺 𑁋 𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸 𑀯𑀤𑀦𑁆𑀢𑀺.

𑀯𑀸𑀤𑀜𑁆𑀘 𑀚𑀸𑀢𑀁 𑀫𑀼𑀦𑀺 𑀦𑁄 𑀉𑀧𑁂𑀢𑀻𑀢𑀺. 𑀲𑁄 𑀯𑀸𑀤𑁄 𑀚𑀸𑀢𑁄 𑀳𑁄𑀢𑀺 𑀲𑀜𑁆𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀧𑀸𑀢𑀼𑀪𑀽𑀢𑁄 𑀧𑀭𑀢𑁄𑀖𑁄𑀲𑁄 𑀅𑀓𑁆𑀓𑁄𑀲𑁄 𑀉𑀧𑀯𑀸𑀤𑁄 𑀪𑀕𑀯𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀪𑀽𑀢𑁂𑀦𑀸𑀢𑀺 𑁋 𑀯𑀸𑀤𑀜𑁆𑀘 𑀚𑀸𑀢𑀁. 𑀫𑀼𑀦𑀺 𑀦𑁄 𑀉𑀧𑁂𑀢𑀻𑀢𑀺. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑁂𑀦 ¶ 𑀜𑀸𑀡𑁂𑀦 ¶ 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀺 𑀫𑁄𑀦𑀧𑁆𑀧𑀢𑁆𑀢𑁄…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀬𑁄 𑀯𑀸𑀤𑀁 𑀉𑀧𑁂𑀢𑀺 𑀲𑁄 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀯𑀸𑀤𑀁 𑀉𑀧𑁂𑀢𑀺 𑁋 𑀓𑀸𑀭𑀓𑁄 𑀓𑀸𑀭𑀓𑀢𑀸𑀬 𑀯𑀸𑀤𑀁 𑀉𑀧𑁂𑀢𑀺, 𑀅𑀣 𑀯𑀸 𑀯𑀼𑀘𑁆𑀘𑀫𑀸𑀦𑁄 𑀉𑀧𑀯𑀤𑀺𑀬𑀫𑀸𑀦𑁄 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀝𑁆𑀞𑀺𑀬𑀢𑀺 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀅𑀓𑀸𑀭𑀓𑁄𑀫𑁆𑀳𑀻𑀢𑀺 𑀬𑁄 𑀯𑀸𑀤𑀁 𑀉𑀧𑁂𑀢𑀺 𑀲𑁄 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀯𑀸𑀤𑀁 𑀉𑀧𑁂𑀢𑀺. 𑀫𑀼𑀦𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀯𑀸𑀤𑀁 𑀦 𑀉𑀧𑁂𑀢𑀺 𑁋 𑀅𑀓𑀸𑀭𑀓𑁄 𑀫𑀼𑀦𑀺 𑀅𑀓𑀸𑀭𑀓𑀢𑀸𑀬 𑀯𑀸𑀤𑀁 𑀦 𑀉𑀧𑁂𑀢𑀺, 𑀅𑀣 𑀯𑀸 𑀯𑀼𑀘𑁆𑀘𑀫𑀸𑀦𑁄 𑀉𑀧𑀯𑀤𑀺𑀬𑀫𑀸𑀦𑁄 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀝𑁆𑀞𑀺𑀬𑀢𑀺 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀅𑀓𑀸𑀭𑀓𑁄𑀫𑁆𑀳𑀻𑀢𑀺 ¶ 𑀫𑀼𑀦𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀯𑀸𑀤𑀁 𑀦 𑀉𑀧𑁂𑀢𑀺 𑀦 𑀉𑀧𑀕𑀘𑁆𑀙𑀢𑀺 ¶ 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀯𑀸𑀤𑀜𑁆𑀘 𑀚𑀸𑀢𑀁 𑀫𑀼𑀦𑀺 𑀦𑁄 𑀉𑀧𑁂𑀢𑀺.

𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀁 𑀫𑀼𑀦𑀺𑀦𑁄 𑀆𑀳𑀢𑀘𑀺𑀢𑁆𑀢𑀢𑀸 𑀔𑀺𑀮𑀚𑀸𑀢𑀢𑀸𑀧𑀺 𑀦𑀢𑁆𑀣𑀺. 𑀧𑀜𑁆𑀘𑀧𑀺 𑀘𑁂𑀢𑁄𑀔𑀺𑀮𑀸 𑀦𑀢𑁆𑀣𑀺, 𑀢𑀬𑁄𑀧𑀺 𑀔𑀺𑀮𑀸 𑀦𑀢𑁆𑀣𑀺. 𑀭𑀸𑀕𑀔𑀺𑀮𑁄 𑀤𑁄𑀲𑀔𑀺𑀮𑁄 𑀫𑁄𑀳𑀔𑀺𑀮𑁄 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻𑀢𑀺.

‘‘𑀯𑀤𑀦𑁆𑀢𑀺 ¶ 𑀯𑁂 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂, 𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸 𑀯𑀤𑀦𑁆𑀢𑀺;

𑀯𑀸𑀤𑀜𑁆𑀘 𑀚𑀸𑀢𑀁 𑀫𑀼𑀦𑀺 𑀦𑁄 𑀉𑀧𑁂𑀢𑀺, 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀻’’𑀢𑀺.

𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬, 𑀙𑀦𑁆𑀤𑀸𑀦𑀼𑀦𑀻𑀢𑁄 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄;

𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀬𑀣𑀸 𑀳𑀺 𑀚𑀸𑀦𑁂𑀬𑁆𑀬 𑀢𑀣𑀸 𑀯𑀤𑁂𑀬𑁆𑀬.

𑀲𑀓𑀜𑁆𑀳𑀺 ¶ 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬𑀸𑀢𑀺. 𑀬𑀁 𑀢𑁂 𑀢𑀺𑀢𑁆𑀣𑀺𑀬𑀸 𑀲𑀼𑀦𑁆𑀤𑀭𑀺𑀧𑀭𑀺𑀩𑁆𑀩𑀸𑀚𑀺𑀓𑀁 𑀳𑀦𑁆𑀢𑁆𑀯𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀅𑀯𑀡𑁆𑀡𑀁 𑀧𑀓𑀸𑀲𑀬𑀺𑀢𑁆𑀯𑀸 ‘‘𑀏𑀯𑀁 𑀏𑀢𑀁 𑀮𑀸𑀪𑀁 𑀬𑀲𑀲𑀓𑁆𑀓𑀸𑀭𑀁 𑀲𑀫𑁆𑀫𑀸𑀦𑀁 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀏𑀯𑀁𑀤𑀺𑀝𑁆𑀞𑀺𑀓𑀸 𑀏𑀯𑀁𑀔𑀦𑁆𑀢𑀺𑀓𑀸 𑀏𑀯𑀁𑀭𑀼𑀘𑀺𑀓𑀸 𑀏𑀯𑀁𑀮𑀤𑁆𑀥𑀺𑀓𑀸 𑀏𑀯𑀁𑀅𑀚𑁆𑀛𑀸𑀲𑀬𑀸 𑀏𑀯𑀁𑀅𑀥𑀺𑀧𑁆𑀧𑀸𑀬𑀸, 𑀢𑁂 𑀦𑀸𑀲𑀓𑁆𑀔𑀺𑀁𑀲𑀼 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀔𑀦𑁆𑀢𑀺𑀁 𑀲𑀓𑀁 𑀭𑀼𑀘𑀺𑀁 𑀲𑀓𑀁 𑀮𑀤𑁆𑀥𑀺𑀁 𑀲𑀓𑀁 𑀅𑀚𑁆𑀛𑀸𑀲𑀬𑀁 𑀲𑀓𑀁 𑀅𑀥𑀺𑀧𑁆𑀧𑀸𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁; 𑀅𑀣 𑀔𑁄 𑀲𑁆𑀯𑁂𑀯 𑀅𑀬𑀲𑁄 𑀢𑁂 𑀧𑀘𑁆𑀘𑀸𑀕𑀢𑁄𑀢𑀺, 𑀏𑀯𑀫𑁆𑀧𑀺 𑁋 𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬. 𑀅𑀣 𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀬𑁄 𑀲𑁄 𑀏𑀯𑀁𑀯𑀸𑀤𑁄, 𑀲𑁄 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀔𑀦𑁆𑀢𑀺𑀁 𑀲𑀓𑀁 𑀭𑀼𑀘𑀺𑀁 𑀲𑀓𑀁 𑀮𑀤𑁆𑀥𑀺𑀁 𑀲𑀓𑀁 𑀅𑀚𑁆𑀛𑀸𑀲𑀬𑀁 𑀲𑀓𑀁 𑀅𑀥𑀺𑀧𑁆𑀧𑀸𑀬𑀁 𑀓𑀣𑀁 𑀅𑀘𑁆𑀘𑀬𑁂𑀬𑁆𑀬 𑀅𑀢𑀺𑀓𑁆𑀓𑀫𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬? 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀢𑀣𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸 𑀅𑀪𑀺𑀦𑀺𑀯𑀺𑀝𑁆𑀞𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺. 𑀏𑀯𑀫𑁆𑀧𑀺 ¶ 𑁋 𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬? ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 ¶ 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 ¶ 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀬𑁄 𑀲𑁄 𑀏𑀯𑀁 𑀯𑀸𑀤𑁄, 𑀲𑁄 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀔𑀦𑁆𑀢𑀺𑀁 𑀲𑀓𑀁 𑀭𑀼𑀘𑀺𑀁 𑀲𑀓𑀁 𑀮𑀤𑁆𑀥𑀺𑀁 𑀲𑀓𑀁 𑀅𑀚𑁆𑀛𑀸𑀲𑀬𑀁 𑀲𑀓𑀁 𑀅𑀥𑀺𑀧𑁆𑀧𑀸𑀬𑀁 𑀓𑀣𑀁 𑀅𑀘𑁆𑀘𑀬𑁂𑀬𑁆𑀬 𑀅𑀢𑀺𑀓𑁆𑀓𑀫𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬? 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀢𑀣𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸 𑀅𑀪𑀺𑀦𑀺𑀯𑀺𑀝𑁆𑀞𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺. 𑀏𑀯𑀫𑁆𑀧𑀺 𑁋 𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬.

𑀙𑀦𑁆𑀤𑀸𑀦𑀼𑀦𑀻𑀢𑁄 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄𑀢𑀺. 𑀙𑀦𑁆𑀤𑀸𑀦𑀼𑀦𑀻𑀢𑁄𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺. 𑀬𑀣𑀸 𑀳𑀢𑁆𑀣𑀺𑀬𑀸𑀦𑁂𑀦 𑀯𑀸 𑀅𑀲𑁆𑀲𑀬𑀸𑀦𑁂𑀦 𑀯𑀸 ¶ 𑀭𑀣𑀬𑀸𑀦𑁂𑀦 𑀯𑀸 𑀕𑁄𑀬𑀸𑀦𑁂𑀦 𑀯𑀸 𑀅𑀚𑀬𑀸𑀦𑁂𑀦 𑀯𑀸 𑀫𑁂𑀡𑁆𑀟𑀬𑀸𑀦𑁂𑀦 𑀯𑀸 𑀑𑀝𑁆𑀞𑀬𑀸𑀦𑁂𑀦 𑀯𑀸 𑀔𑀭𑀬𑀸𑀦𑁂𑀦 𑀯𑀸 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺, 𑀏𑀯𑀫𑁂𑀯 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀙𑀦𑁆𑀤𑀸𑀦𑀼𑀦𑀻𑀢𑁄. 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀦𑀺𑀯𑀺𑀝𑁆𑀞𑁄 𑀧𑀢𑀺𑀝𑁆𑀞𑀺𑀢𑁄 𑀅𑀮𑁆𑀮𑀻𑀦𑁄 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 ¶ 𑁋 𑀙𑀦𑁆𑀤𑀸𑀦𑀼𑀦𑀻𑀢𑁄 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄.

𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄𑀢𑀺. 𑀲𑀬𑀁 𑀲𑀫𑀢𑁆𑀢𑀁 𑀓𑀭𑁄𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀢𑀺 𑀅𑀦𑁄𑀫𑀁 𑀓𑀭𑁄𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺. ‘‘𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽’’𑀢𑀺 𑀲𑀬𑀁 𑀲𑀫𑀢𑁆𑀢𑀁 𑀓𑀭𑁄𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀢𑀺 𑀅𑀦𑁄𑀫𑀁 𑀓𑀭𑁄𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺. ‘‘𑀅𑀬𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄…𑀧𑁂… 𑀅𑀬𑀁 𑀕𑀡𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄… 𑀅𑀬𑀁 𑀤𑀺𑀝𑁆𑀞𑀺 𑀪𑀤𑁆𑀤𑀺𑀓𑀸… 𑀅𑀬𑀁 𑀧𑀝𑀺𑀧𑀤𑀸 𑀲𑀼𑀧𑀜𑁆𑀜𑀢𑁆𑀢𑀸… 𑀅𑀬𑀁 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀲𑀬𑀁 𑀲𑀫𑀢𑁆𑀢𑀁 𑀓𑀭𑁄𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀢𑀺 𑀅𑀦𑁄𑀫𑀁 𑀓𑀭𑁄𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄.

𑀬𑀣𑀸 𑀳𑀺 𑀚𑀸𑀦𑁂𑀬𑁆𑀬 𑀢𑀣𑀸 𑀯𑀤𑁂𑀬𑁆𑀬𑀸𑀢𑀺 𑀬𑀣𑀸 𑀚𑀸𑀦𑁂𑀬𑁆𑀬, 𑀢𑀣𑀸 𑀯𑀤𑁂𑀬𑁆𑀬 𑀓𑀣𑁂𑀬𑁆𑀬 𑀪𑀡𑁂𑀬𑁆𑀬 𑀤𑀻𑀧𑀬𑁂𑀬𑁆𑀬 𑀯𑁄𑀳𑀭𑁂𑀬𑁆𑀬. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀬𑀣𑀸 𑀚𑀸𑀦𑁂𑀬𑁆𑀬, 𑀢𑀣𑀸 𑀯𑀤𑁂𑀬𑁆𑀬 𑀓𑀣𑁂𑀬𑁆𑀬 𑀪𑀡𑁂𑀬𑁆𑀬 𑀤𑀻𑀧𑀬𑁂𑀬𑁆𑀬 𑀯𑁄𑀳𑀭𑁂𑀬𑁆𑀬. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 ¶ 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀬𑀣𑀸 𑀚𑀸𑀦𑁂𑀬𑁆𑀬, 𑀢𑀣𑀸 𑀯𑀤𑁂𑀬𑁆𑀬 𑀓𑀣𑁂𑀬𑁆𑀬 𑀪𑀡𑁂𑀬𑁆𑀬 𑀤𑀻𑀧𑀬𑁂𑀬𑁆𑀬 𑀯𑁄𑀳𑀭𑁂𑀬𑁆𑀬𑀸𑀢𑀺 𑁋 𑀬𑀣𑀸 𑀳𑀺 𑀚𑀸𑀦𑁂𑀬𑁆𑀬 𑀢𑀣𑀸 𑀯𑀤𑁂𑀬𑁆𑀬.

‘‘𑀲𑀓𑀜𑁆𑀳𑀺 ¶ 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬, 𑀙𑀦𑁆𑀤𑀸𑀦𑀼𑀦𑀻𑀢𑁄 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄;

𑀲𑀬𑀁 ¶ 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀬𑀣𑀸 𑀳𑀺 𑀚𑀸𑀦𑁂𑀬𑁆𑀬 𑀢𑀣𑀸 𑀯𑀤𑁂𑀬𑁆𑀬𑀸’’𑀢𑀺.

𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀺 𑀚𑀦𑁆𑀢𑀼, 𑀅𑀦𑀸𑀦𑀼𑀧𑀼𑀝𑁆𑀞𑁄𑀯 [𑀅𑀦𑀸𑀦𑀼𑀧𑀼𑀝𑁆𑀞𑁄 𑀘 (𑀲𑁆𑀬𑀸.)] 𑀧𑀭𑁂𑀲 𑀧𑀸𑀯 𑀧𑀸𑀯𑀸 (𑀲𑀻. 𑀲𑁆𑀬𑀸.) ;

𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼, 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯 [𑀧𑀸𑀯𑀸 (𑀲𑀻. 𑀲𑁆𑀬𑀸.)] .

𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀺 𑀚𑀦𑁆𑀢𑀽𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁𑀞𑀸𑀦𑀧𑁆𑀧𑀢𑁆𑀢𑁄 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀲𑀻𑀮𑀯𑀢𑀸𑀦𑀻𑀢𑀺 𑀅𑀢𑁆𑀣𑀺 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘 [𑀯𑀢𑁆𑀢𑀜𑁆𑀘 (𑀲𑁆𑀬𑀸.), 𑀏𑀯𑀫𑀼𑀧𑀭𑀺𑀧𑀺], 𑀅𑀢𑁆𑀣𑀺 𑀯𑀢𑀁 𑀦 𑀲𑀻𑀮𑀁. 𑀓𑀢𑀫𑀁 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑁄 𑀢𑀢𑁆𑀣 𑀲𑀁𑀬𑀫𑁄 𑀲𑀁𑀯𑀭𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀇𑀤𑀁 𑀲𑀻𑀮𑀁. 𑀬𑀁 𑀲𑀫𑀸𑀤𑀸𑀦𑀁 𑀢𑀁 𑀯𑀢𑀁. 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁; 𑀲𑀫𑀸𑀤𑀸𑀦𑀝𑁆𑀞𑁂𑀦 𑀯𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘. 𑀓𑀢𑀫𑀁 𑀯𑀢𑀁, 𑀦 𑀲𑀻𑀮𑀁? 𑀅𑀝𑁆𑀞 𑀥𑀼𑀢𑀗𑁆𑀕𑀸𑀦𑀺 𑁋 𑀆𑀭𑀜𑁆𑀜𑀺𑀓𑀗𑁆𑀕𑀁, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁, 𑀢𑁂𑀘𑀻𑀯𑀭𑀺𑀓𑀗𑁆𑀕𑀁, 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁, 𑀦𑁂𑀲𑀚𑁆𑀚𑀺𑀓𑀗𑁆𑀕𑀁, 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁 ¶ . 𑀯𑀻𑀭𑀺𑀬𑀲𑀫𑀸𑀤𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 [𑀦𑀳𑀸𑀭𑀼 (𑀲𑀻. 𑀲𑁆𑀬𑀸.)] 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼 [𑀅𑀯𑀲𑀼𑀲𑁆𑀲𑀢𑀼 (𑀲𑁆𑀬𑀸.)], 𑀲𑀭𑀻𑀭𑁂 𑀉𑀧𑀲𑁆𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢𑀁. 𑀬𑀁 𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀩𑀮𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁 ¶ , 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀁 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁.

‘‘𑀦𑀸𑀲𑀺𑀲𑁆𑀲𑀁 ¶ 𑀦 𑀧𑀺𑀯𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀢𑁄 𑀦 𑀦𑀺𑀓𑁆𑀔𑀫𑁂;

𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀁, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂’’𑀢𑀺.

𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. ‘‘𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. ‘‘𑀦 𑀢𑀸𑀯𑀸𑀳𑀁 𑀇𑀫𑀫𑁆𑀳𑀸 𑀆𑀲𑀦𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀘𑀗𑁆𑀓𑀫𑀸 𑀑𑀭𑁄𑀳𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀅𑀟𑁆𑀠𑀬𑁄𑀕𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀧𑀸𑀲𑀸𑀤𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀳𑀫𑁆𑀫𑀺𑀬𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀕𑀼𑀳𑀸𑀬 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀮𑁂𑀡𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀓𑀼𑀝𑀺𑀬𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀓𑀽𑀝𑀸𑀕𑀸𑀭𑀸 ¶ 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀅𑀝𑁆𑀝𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀫𑀸𑀴𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀉𑀤𑁆𑀤𑀡𑁆𑀟𑀸 [𑀉𑀝𑁆𑀝𑀡𑁆𑀟𑀸 (𑀓.)] 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀫𑀡𑁆𑀟𑀧𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀭𑀼𑀓𑁆𑀔𑀫𑀽𑀮𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. ‘‘𑀇𑀫𑀲𑁆𑀫𑀺𑀜𑁆𑀜𑁂𑀯 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀭𑀺𑀬𑀥𑀫𑁆𑀫𑀁 ¶ 𑀆𑀳𑀭𑀺𑀲𑁆𑀲𑀸𑀫𑀺 𑀲𑀫𑀸𑀳𑀭𑀺𑀲𑁆𑀲𑀸𑀫𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. ‘‘𑀇𑀫𑀲𑁆𑀫𑀺𑀜𑁆𑀜𑁂𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁, 𑀲𑀸𑀬𑀦𑁆𑀳𑀲𑀫𑀬𑀁, 𑀧𑀼𑀭𑁂𑀪𑀢𑁆𑀢𑀁, 𑀧𑀘𑁆𑀙𑀸𑀪𑀢𑁆𑀢𑀁, 𑀧𑀼𑀭𑀺𑀫𑀁 𑀬𑀸𑀫𑀁, 𑀫𑀚𑁆𑀛𑀺𑀫𑀁 𑀬𑀸𑀫𑀁, 𑀧𑀘𑁆𑀙𑀺𑀫𑀁 𑀬𑀸𑀫𑀁, 𑀓𑀸𑀴𑁂, 𑀚𑀼𑀡𑁆𑀳𑁂, 𑀯𑀲𑁆𑀲𑁂, 𑀳𑁂𑀫𑀦𑁆𑀢𑁂, 𑀕𑀺𑀫𑁆𑀳𑁂, 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂, 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂, 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂 𑀅𑀭𑀺𑀬𑀥𑀫𑁆𑀫𑀁 𑀆𑀳𑀭𑀺𑀲𑁆𑀲𑀸𑀫𑀺 ¶ 𑀲𑀫𑀸𑀳𑀭𑀺𑀲𑁆𑀲𑀸𑀫𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 [𑀫𑀸𑀡𑀯𑁄 (𑀓.)] 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄𑀢𑀺 𑁋 𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀺 𑀚𑀦𑁆𑀢𑀼.

𑀅𑀦𑀸𑀦𑀼𑀧𑀼𑀝𑁆𑀞𑁄𑀯 𑀧𑀭𑁂𑀲 𑀧𑀸𑀯𑀸𑀢𑀺. 𑀧𑀭𑁂𑀲𑀦𑁆𑀢𑀺 𑀧𑀭𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀅𑀦𑀸𑀦𑀼𑀧𑀼𑀝𑁆𑀞𑁄𑀢𑀺 𑀅𑀧𑀼𑀝𑁆𑀞𑁄 𑀅𑀧𑀼𑀘𑁆𑀙𑀺𑀢𑁄 𑀅𑀬𑀸𑀘𑀺𑀢𑁄 𑀅𑀦𑀚𑁆𑀛𑁂𑀲𑀺𑀢𑁄 𑀅𑀧𑀲𑀸𑀤𑀺𑀢𑁄. 𑀧𑀸𑀯𑀸𑀢𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀯𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀯𑀸 𑀧𑀸𑀯𑀤𑀢𑀺. 𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀲𑀻𑀮𑀩𑁆𑀩𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 ¶ 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 [𑀯𑀺𑀚𑁆𑀚𑀝𑁆𑀞𑀸𑀦𑁂𑀦 (𑀲𑁆𑀬𑀸.)] 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 [𑀧𑀝𑀺𑀪𑀸𑀡𑁂𑀦 (𑀲𑀻. 𑀲𑁆𑀬𑀸. 𑀓.)] 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸, 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 ¶ 𑀯𑀸, 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀜𑀸𑀢𑁄 𑀬𑀲𑀲𑁆𑀲𑀻 𑀲𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀯𑀸, 𑀮𑀸𑀪𑀺𑀫𑁆𑀳𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 𑀯𑀸, 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸, 𑀯𑀺𑀦𑀬𑀥𑀭𑁄𑀢𑀺 𑀯𑀸, 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸, 𑀆𑀭𑀜𑁆𑀜𑀺𑀓𑁄𑀢𑀺 𑀯𑀸, 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀯𑀸, 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀯𑀸, 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀸, 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀯𑀸, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄𑀢𑀺 𑀯𑀸, 𑀦𑁂𑀲𑀚𑁆𑀚𑀺𑀓𑁄𑀢𑀺 𑀯𑀸, 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀯𑀸, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀧𑀸𑀯𑀤𑀢𑀺 𑀓𑀣𑁂𑀢𑀺 𑀪𑀡𑀢𑀺 𑀤𑀻𑀧𑀬𑀢𑀺 𑀯𑁄𑀳𑀭𑀢𑀻𑀢𑀺 𑁋 𑀅𑀦𑀸𑀦𑀼𑀧𑀼𑀝𑁆𑀞𑁄𑀯 𑀧𑀭𑁂𑀲𑀁 𑀧𑀸𑀯.

𑀅𑀦𑀭𑀺𑀬𑀥𑀫𑁆𑀫𑀁 ¶ ¶ 𑀓𑀼𑀲𑀮𑀸 𑀢𑀫𑀸𑀳𑀽𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑀭𑀺𑀬𑀸𑀦𑀁 𑀏𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀥𑀫𑁆𑀫𑁄 𑀅𑀭𑀺𑀬𑀸𑀦𑀁; 𑀩𑀸𑀮𑀸𑀦𑀁 𑀏𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀥𑀫𑁆𑀫𑁄 𑀧𑀡𑁆𑀟𑀺𑀢𑀸𑀦𑀁; 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀏𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀥𑀫𑁆𑀫𑁄 𑀲𑀧𑁆𑀧𑀼𑀭𑀺𑀲𑀸𑀦’’𑀦𑁆𑀢𑀺. 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼.

𑀬𑁄 ¶ 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸𑀢𑀺. 𑀆𑀢𑀼𑀫𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀸. 𑀲𑀬𑀫𑁂𑀯 𑀧𑀸𑀯𑀸𑀢𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀧𑀸𑀯𑀤𑀢𑀺 𑁋 ‘‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀲𑀻𑀮𑀩𑁆𑀩𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸, 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 ¶ 𑀯𑀸, 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀜𑀸𑀢𑁄 𑀬𑀲𑀲𑁆𑀲𑀻 𑀲𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀯𑀸, 𑀮𑀸𑀪𑀺𑀫𑁆𑀳𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀯𑀸, 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸, 𑀯𑀺𑀦𑀬𑀥𑀭𑁄𑀢𑀺 𑀯𑀸, 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸, 𑀆𑀭𑀜𑁆𑀜𑀺𑀓𑁄𑀢𑀺 𑀯𑀸, 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀯𑀸, 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀯𑀸, 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀸, 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀯𑀸, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄𑀢𑀺 𑀯𑀸, 𑀦𑁂𑀲𑀚𑁆𑀚𑀺𑀓𑁄𑀢𑀺 𑀯𑀸, 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀯𑀸, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸,

𑀯𑀺𑀪𑀯𑀜𑁆𑀘 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬, 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀽’’𑀢𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 ¶ 𑀮𑀸𑀪𑀻𑀢𑀺 𑀯𑀸, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸’’ 𑀧𑀸𑀯𑀤𑀢𑀺 𑀓𑀣𑁂𑀢𑀺 𑀪𑀡𑀢𑀺 𑀤𑀻𑀧𑀬𑀢𑀺 𑀯𑁄𑀳𑀭𑀢𑀻𑀢𑀺 𑁋 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸𑀢𑀺.

‘‘𑀬𑁄 ¶ 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀺 𑀚𑀦𑁆𑀢𑀼, 𑀅𑀦𑀸𑀦𑀼𑀧𑀼𑀝𑁆𑀞𑁄𑀯 𑀧𑀭𑁂𑀲 𑀧𑀸𑀯;

𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼, 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸’’𑀢𑀺.

𑀲𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄;

𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑀲𑀦𑁆𑀢𑁄 ¶ 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄, 𑀫𑁄𑀳𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄, 𑀓𑁄𑀥𑀲𑁆𑀲…𑀧𑁂… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲 [𑀧𑀮𑀸𑀲𑀲𑁆𑀲 (𑀲𑀻. 𑀓.)] … 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁… 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 ¶ 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑁋 𑀲𑀦𑁆𑀢𑁄. 𑀪𑀺𑀓𑁆𑀔𑀽𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀪𑀺𑀦𑁆𑀦𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀪𑀺𑀦𑁆𑀦𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀭𑀸𑀕𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀤𑁄𑀲𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀫𑁄𑀳𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀫𑀸𑀦𑁄 𑀪𑀺𑀦𑁆𑀦𑁄 𑀳𑁄𑀢𑀺 ¶ . 𑀪𑀺𑀦𑁆𑀦𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀲𑁆𑀬𑀸. 𑀓.)] 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

‘‘𑀧𑀚𑁆𑀚𑁂𑀦 ¶ 𑀓𑀢𑁂𑀦 𑀅𑀢𑁆𑀢𑀦𑀸, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀪𑀯𑀜𑁆𑀘 [𑀯𑀺𑀪𑀯𑀁 (𑀲𑀻. 𑀓.) 𑀲𑀼. 𑀦𑀺. 𑁫𑁧𑁯] 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬,

𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀽’’𑀢𑀺.

𑀲𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄𑀢𑀺 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀓𑁄𑀥𑀲𑁆𑀲…𑀧𑁂… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁… 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄𑀢𑀺 𑁋 𑀲𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄.

𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄𑀢𑀺. 𑀇𑀢𑀺𑀳𑀦𑁆𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 [𑀧𑀤𑀸𑀦𑀼𑀧𑀼𑀩𑁆𑀩𑀢𑀸 𑀫𑁂𑀢𑀁 (𑀲𑁆𑀬𑀸. 𑀓.)] 𑁋 𑀇𑀢𑀺𑀳𑀦𑁆𑀢𑀺. 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻. 𑀲𑁄 𑀓𑀢𑁆𑀣𑀢𑀺 𑀯𑀺𑀓𑀢𑁆𑀣𑀢𑀺. 𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀲𑀻𑀮𑀩𑁆𑀩𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀓𑀢𑁆𑀣𑀢𑀺 𑀯𑀺𑀓𑀢𑁆𑀣𑀢𑀺. 𑀏𑀯𑀁 ¶ 𑀦 𑀓𑀢𑁆𑀣𑀢𑀺 𑀦 𑀯𑀺𑀓𑀢𑁆𑀣𑀢𑀺. 𑀓𑀢𑁆𑀣𑀦𑀸 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄.

𑀢𑀫𑀭𑀺𑀬𑀥𑀫𑁆𑀫𑀁 ¶ ¶ 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 ¶ 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀭𑀺𑀬𑀸𑀦𑀁 𑀏𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀥𑀫𑁆𑀫𑁄 𑀅𑀦𑀭𑀺𑀬𑀸𑀦𑀁; 𑀧𑀡𑁆𑀟𑀺𑀢𑀸𑀦𑀁 𑀏𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀥𑀫𑁆𑀫𑁄 𑀩𑀸𑀮𑀸𑀦𑀁; 𑀲𑀧𑁆𑀧𑀼𑀭𑀺𑀲𑀸𑀦𑀁 𑀏𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀥𑀫𑁆𑀫𑁄 𑀅𑀲𑀧𑁆𑀧𑀼𑀭𑀺𑀲𑀸𑀦’’𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑀺, 𑀅𑀭𑀺𑀬𑀸𑀦𑀁 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀉𑀲𑁆𑀲𑀤𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑀸 𑁋 𑀭𑀸𑀕𑀼𑀲𑁆𑀲𑀤𑁄, 𑀤𑁄𑀲𑀼𑀲𑁆𑀲𑀤𑁄, 𑀫𑁄𑀳𑀼𑀲𑁆𑀲𑀤𑁄, 𑀫𑀸𑀦𑀼𑀲𑁆𑀲𑀤𑁄, 𑀤𑀺𑀝𑁆𑀞𑀼𑀲𑁆𑀲𑀤𑁄, 𑀓𑀺𑀮𑁂𑀲𑀼𑀲𑁆𑀲𑀤𑁄, 𑀓𑀫𑁆𑀫𑀼𑀲𑁆𑀲𑀤𑁄. 𑀬𑀲𑁆𑀲𑀺𑀫𑁂 [𑀢𑀲𑁆𑀲𑀺𑀫𑁂 (𑀲𑀻. 𑀲𑁆𑀬𑀸.)] 𑀉𑀲𑁆𑀲𑀤𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 ¶ 𑀮𑁄𑀓𑁂.

‘‘𑀲𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄;

𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀬𑀲𑁆𑀲 𑀥𑀫𑁆𑀫𑀸, 𑀧𑀼𑀭𑀓𑁆𑀔𑀢𑀸 [𑀧𑀼𑀭𑁂𑀓𑁆𑀔𑀢𑀸 (𑀲𑀻. 𑀓.)] 𑀲𑀦𑁆𑀢𑀺 𑀅𑀯𑀻𑀯𑀤𑀸𑀢𑀸;

𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀁.

𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀬𑀲𑁆𑀲 𑀥𑀫𑁆𑀫𑀸𑀢𑀺. 𑀧𑀓𑀧𑁆𑀧𑀦𑀸𑀢𑀺 𑀤𑁆𑀯𑁂 𑀧𑀓𑀧𑁆𑀧𑀦𑀸 𑁋 𑀢𑀡𑁆𑀳𑀸𑀧𑀓𑀧𑁆𑀧𑀦𑀸 𑀘 𑀤𑀺𑀝𑁆𑀞𑀺𑀧𑀓𑀧𑁆𑀧𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀓𑀧𑁆𑀧𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀓𑀧𑁆𑀧𑀦𑀸. 𑀲𑀗𑁆𑀔𑀢𑀸𑀢𑀺 𑀲𑀗𑁆𑀔𑀢𑀸 𑀅𑀪𑀺𑀲𑀗𑁆𑀔𑀢𑀸 ¶ 𑀲𑀡𑁆𑀞𑀧𑀺𑀢𑀸𑀢𑀺𑀧𑀺 𑁋 𑀲𑀗𑁆𑀔𑀢𑀸. 𑀅𑀣 𑀯𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸𑀢𑀺𑀧𑀺 𑁋 𑀲𑀗𑁆𑀔𑀢𑀸 ¶ . 𑀬𑀲𑁆𑀲𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲. 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 𑁋 𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀬𑀲𑁆𑀲 𑀥𑀫𑁆𑀫𑀸.

𑀧𑀼𑀭𑀓𑁆𑀔𑀢𑀸 𑀲𑀦𑁆𑀢𑀺 𑀅𑀯𑀻𑀯𑀤𑀸𑀢𑀸𑀢𑀺. 𑀧𑀼𑀭𑀓𑁆𑀔𑀢𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑀲𑁆𑀲 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 ¶ 𑀅𑀧𑁆𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀲𑁆𑀲 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 ¶ 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀲𑁄 𑀢𑀡𑁆𑀳𑀁 𑀯𑀸 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀺 𑀢𑀡𑁆𑀳𑀸𑀥𑀚𑁄 𑀢𑀡𑁆𑀳𑀸𑀓𑁂𑀢𑀼 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄, 𑀤𑀺𑀝𑁆𑀞𑀺𑀥𑀚𑁄 𑀤𑀺𑀝𑁆𑀞𑀺𑀓𑁂𑀢𑀼 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑁄, 𑀢𑀡𑁆𑀳𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑀺𑀢𑁄 𑀘𑀭𑀢𑀻𑀢𑀺 𑁋 𑀧𑀼𑀭𑀓𑁆𑀔𑀢𑀸. 𑀲𑀦𑁆𑀢𑀻𑀢𑀺 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀅𑀯𑀻𑀯𑀤𑀸𑀢𑀸𑀢𑀺 𑀅𑀯𑁂𑀯𑀤𑀸𑀢𑀸 𑀅𑀯𑁄𑀤𑀸𑀢𑀸 𑀅𑀧𑀭𑀺𑀲𑀼𑀤𑁆𑀥𑀸 𑀲𑀁𑀓𑀺𑀮𑀺𑀝𑁆𑀞𑀸 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑁋 𑀧𑀼𑀭𑀓𑁆𑀔𑀢𑀸 𑀲𑀦𑁆𑀢𑀺 𑀅𑀯𑀻𑀯𑀤𑀸𑀢𑀸.

𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀦𑁆𑀢𑀺. 𑀬𑀤𑀢𑁆𑀢𑀦𑀻𑀢𑀺 𑀬𑀁 𑀅𑀢𑁆𑀢𑀦𑀺. 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀆𑀦𑀺𑀲𑀁𑀲𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀦𑀺𑀲𑀁𑀲𑀁. 𑀓𑀢𑀫𑁄 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄? 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀺, 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺. 𑀢𑀁𑀤𑀺𑀝𑁆𑀞𑀺𑀓𑀁 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 [𑀕𑀭𑀼𑀓𑀭𑁄𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑀺. 𑀮𑀪𑀢𑀺 𑀘 𑀢𑀢𑁄𑀦𑀺𑀤𑀸𑀦𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑁋 𑀅𑀬𑀁 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄. 𑀓𑀢𑀫𑁄 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄? 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸 𑀲𑀼𑀧𑀡𑁆𑀡𑀢𑁆𑀢𑀸𑀬 𑀯𑀸 𑀬𑀓𑁆𑀔𑀢𑁆𑀢𑀸𑀬 𑀯𑀸 𑀅𑀲𑀼𑀭𑀢𑁆𑀢𑀸𑀬 𑀯𑀸 𑀕𑀦𑁆𑀥𑀩𑁆𑀩𑀢𑁆𑀢𑀸𑀬 𑀯𑀸 𑀫𑀳𑀸𑀭𑀸𑀚𑀢𑁆𑀢𑀸𑀬 𑀯𑀸 𑀇𑀦𑁆𑀤𑀢𑁆𑀢𑀸𑀬 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸𑀬 𑀯𑀸 𑀤𑁂𑀯𑀢𑁆𑀢𑀸𑀬 𑀯𑀸. 𑀅𑀬𑀁 𑀤𑀺𑀝𑁆𑀞𑀺 ¶ 𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀤𑁆𑀥𑀺𑀬𑀸, 𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀫𑀼𑀢𑁆𑀢𑀺𑀬𑀸. 𑀇𑀫𑀸𑀬 𑀤𑀺𑀝𑁆𑀞𑀺𑀬𑀸 𑀲𑀼𑀚𑁆𑀛𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑁆𑀢𑀺 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 ¶ 𑀫𑀼𑀘𑁆𑀘𑀦𑁆𑀢𑀺 𑀯𑀺𑀫𑀼𑀘𑁆𑀘𑀦𑁆𑀢𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀇𑀫𑀸𑀬 𑀤𑀺𑀝𑁆𑀞𑀺𑀬𑀸 𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀯𑀺𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀧𑀭𑀺𑀲𑀼𑀚𑁆𑀛𑀺𑀲𑁆𑀲𑀸𑀫𑀺, 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀯𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻𑀢𑀺 𑀆𑀬𑀢𑀺𑀁 𑀨𑀮𑀧𑀸𑀝𑀺𑀓𑀗𑁆𑀔𑀻 𑀳𑁄𑀢𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀇𑀫𑁂 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁.

𑀢𑀁 ¶ 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀦𑁆𑀢𑀺. 𑀢𑀺𑀲𑁆𑀲𑁄 𑀲𑀦𑁆𑀢𑀺𑀬𑁄 𑁋 𑀅𑀘𑁆𑀘𑀦𑁆𑀢𑀲𑀦𑁆𑀢𑀺, 𑀢𑀤𑀗𑁆𑀕𑀲𑀦𑁆𑀢𑀺, 𑀲𑀫𑁆𑀫𑀼𑀢𑀺𑀲𑀦𑁆𑀢𑀺. 𑀓𑀢𑀫𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑀺? 𑀅𑀘𑁆𑀘𑀦𑁆𑀢𑀲𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀬𑀁 𑀅𑀘𑁆𑀘𑀦𑁆𑀢𑀲𑀦𑁆𑀢𑀺. 𑀓𑀢𑀫𑀸 𑀢𑀤𑀗𑁆𑀕𑀲𑀦𑁆𑀢𑀺? 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑀸 𑀲𑀦𑁆𑀢𑀸 𑀳𑁄𑀦𑁆𑀢𑀺; 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀦𑁆𑀢𑀸 𑀳𑁄𑀦𑁆𑀢𑀺; 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺 𑀲𑀦𑁆𑀢𑀸 𑀳𑁄𑀢𑀺; 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀤𑀼𑀓𑁆𑀔𑀸 𑀲𑀦𑁆𑀢𑀸 𑀳𑁄𑀦𑁆𑀢𑀺; 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸 𑀲𑀦𑁆𑀢𑀸 𑀳𑁄𑀢𑀺; 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀲𑀦𑁆𑀢𑀸 𑀳𑁄𑀢𑀺; 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸 ¶ 𑀲𑀦𑁆𑀢𑀸 𑀳𑁄𑀢𑀺; 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀲𑀦𑁆𑀢𑀸 𑀳𑁄𑀢𑀺. 𑀅𑀬𑀁 𑀢𑀤𑀗𑁆𑀕𑀲𑀦𑁆𑀢𑀺. 𑀓𑀢𑀫𑀸 ¶ 𑀲𑀫𑁆𑀫𑀼𑀢𑀺𑀲𑀦𑁆𑀢𑀺? 𑀲𑀫𑁆𑀫𑀼𑀢𑀺𑀲𑀦𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀺𑀝𑁆𑀞𑀺𑀲𑀦𑁆𑀢𑀺𑀬𑁄. 𑀅𑀧𑀺 𑀘 𑀲𑀫𑁆𑀫𑀼𑀢𑀺𑀲𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀦𑁆𑀢𑀻𑀢𑀺. 𑀢𑀁 ¶ 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀦𑁆𑀢𑀺. 𑀓𑀼𑀧𑁆𑀧𑀲𑀦𑁆𑀢𑀺𑀁 𑀧𑀓𑀼𑀧𑁆𑀧𑀲𑀦𑁆𑀢𑀺𑀁 𑀏𑀭𑀺𑀢𑀲𑀦𑁆𑀢𑀺𑀁 𑀲𑀫𑁂𑀭𑀺𑀢𑀲𑀦𑁆𑀢𑀺𑀁 𑀘𑀮𑀺𑀢𑀲𑀦𑁆𑀢𑀺𑀁 𑀖𑀝𑁆𑀝𑀺𑀢𑀲𑀦𑁆𑀢𑀺𑀁 𑀓𑀧𑁆𑀧𑀺𑀢𑀲𑀦𑁆𑀢𑀺𑀁 𑀧𑀓𑀧𑁆𑀧𑀺𑀢𑀲𑀦𑁆𑀢𑀺𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁, 𑀲𑀦𑁆𑀢𑀺𑀁 𑀦𑀺𑀲𑁆𑀲𑀺𑀢𑁄 𑀅𑀲𑀺𑀢𑁄 𑀅𑀮𑁆𑀮𑀻𑀦𑁄 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 𑁋 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺𑀁.

‘‘𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀬𑀲𑁆𑀲 𑀥𑀫𑁆𑀫𑀸, 𑀧𑀼𑀭𑀓𑁆𑀔𑀢𑀸 𑀲𑀦𑁆𑀢𑀺 𑀅𑀯𑀻𑀯𑀤𑀸𑀢𑀸;

𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘𑀲𑀦𑁆𑀢𑀺’’𑀦𑁆𑀢𑀺.

𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼, 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀁.

𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸𑀢𑀺. 𑀤𑀺𑀝𑁆𑀞𑀻𑀦𑀺𑀯𑁂𑀲𑀸𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀁. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄 ¶ … 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 ¶ 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀦𑁆𑀢𑀺. 𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸 ¶ 𑀤𑀼𑀭𑀢𑀺𑀯𑀢𑁆𑀢𑀸 𑀤𑀼𑀢𑁆𑀢𑀭𑀸 𑀤𑀼𑀧𑁆𑀧𑀢𑀭𑀸 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑀸 𑀤𑀼𑀩𑁆𑀩𑀺𑀦𑀺𑀯𑀢𑁆𑀢𑀸𑀢𑀺 𑁋 [𑀤𑀼𑀩𑁆𑀩𑀻𑀢𑀺𑀯𑀢𑁆𑀢𑀸𑀢𑀺 (𑀲𑀻. 𑀲𑁆𑀬𑀸. 𑀓.)] 𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸.

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑁂𑀲𑀼. 𑀦𑀺𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀺𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺 𑀦𑀺𑀯𑁂𑀲𑀦𑁂𑀲𑀼 𑀑𑀥𑀺𑀕𑁆𑀕𑀸𑀳𑁄 𑀩𑀺𑀮𑀕𑁆𑀕𑀸𑀳𑁄 𑀯𑀭𑀕𑁆𑀕𑀸𑀳𑁄 𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑁄 𑀉𑀘𑁆𑀘𑀬𑀕𑁆𑀕𑀸𑀳𑁄 𑀲𑀫𑀼𑀘𑁆𑀘𑀬𑀕𑁆𑀕𑀸𑀳𑁄. 𑀇𑀤𑀁 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀦𑁆𑀢𑀺 𑁋 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑀢𑀲𑁆𑀫𑀸 ¶ 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀽𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀁. 𑀦𑀭𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀽𑀢𑀺 𑀢𑁂𑀲𑀼 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼.

𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀦𑁆𑀢𑀺. 𑀦𑀺𑀭𑀲𑁆𑀲𑀢𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦𑀺𑀭𑀲𑁆𑀲𑀢𑀺 𑁋 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀯𑀸 𑀦𑀺𑀭𑀲𑁆𑀲𑀢𑀺, 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀸 𑀦𑀺𑀭𑀲𑁆𑀲𑀢𑀺. 𑀓𑀣𑀁 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀦𑀺𑀭𑀲𑁆𑀲𑀢𑀺? 𑀧𑀭𑁄 𑀯𑀺𑀘𑁆𑀙𑀺𑀦𑁆𑀤𑁂𑀢𑀺 𑁋 𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 ¶ 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸, 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 𑀯𑀸, 𑀦𑀢𑁆𑀣𑁂𑀢𑁆𑀣 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 [𑀚𑀢𑀼𑀓𑁆𑀓𑀸 (𑀲𑀻. 𑀲𑁆𑀬𑀸.)] 𑀧𑀭𑀺𑀢𑁆𑀢𑀸𑀢𑀺 𑁋 𑀏𑀯𑀁 𑀧𑀭𑁄 𑀯𑀺𑀘𑁆𑀙𑀺𑀦𑁆𑀤𑁂𑀢𑀺. 𑀏𑀯𑀁 𑀯𑀺𑀘𑁆𑀙𑀺𑀦𑁆𑀤𑀺𑀬𑀫𑀸𑀦𑁄 𑀲𑀢𑁆𑀣𑀸𑀭𑀁 𑀦𑀺𑀭𑀲𑁆𑀲𑀢𑀺 ¶ , 𑀥𑀫𑁆𑀫𑀓𑁆𑀔𑀸𑀦𑀁 𑀦𑀺𑀭𑀲𑁆𑀲𑀢𑀺, 𑀕𑀡𑀁 𑀦𑀺𑀭𑀲𑁆𑀲𑀢𑀺, 𑀤𑀺𑀝𑁆𑀞𑀺𑀁 𑀦𑀺𑀭𑀲𑁆𑀲𑀢𑀺, 𑀧𑀝𑀺𑀧𑀤𑀁 𑀦𑀺𑀭𑀲𑁆𑀲𑀢𑀺, 𑀫𑀕𑁆𑀕𑀁 𑀦𑀺𑀭𑀲𑁆𑀲𑀢𑀺. 𑀏𑀯𑀁 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀦𑀺𑀭𑀲𑁆𑀲𑀢𑀺. 𑀓𑀣𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀦𑀺𑀭𑀲𑁆𑀲𑀢𑀺? 𑀲𑀻𑀮𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀲𑀻𑀮𑀁 𑀦𑀺𑀭𑀲𑁆𑀲𑀢𑀺, 𑀯𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀢𑀁 𑀦𑀺𑀭𑀲𑁆𑀲𑀢𑀺, 𑀲𑀻𑀮𑀩𑁆𑀩𑀢𑀁 ¶ 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀲𑀻𑀮𑀩𑁆𑀩𑀢𑀁 𑀦𑀺𑀭𑀲𑁆𑀲𑀢𑀺. 𑀏𑀯𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀦𑀺𑀭𑀲𑁆𑀲𑀢𑀺. 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀦𑁆𑀢𑀺. 𑀲𑀢𑁆𑀣𑀸𑀭𑀁 𑀕𑀡𑁆𑀳𑀸𑀢𑀺, 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀸𑀢𑀺, 𑀕𑀡𑀁 𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀧𑀝𑀺𑀧𑀤𑀁 𑀕𑀡𑁆𑀳𑀸𑀢𑀺, 𑀫𑀕𑁆𑀕𑀁 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀁.

‘‘𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼, 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫’’𑀦𑁆𑀢𑀺.

𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀼;

𑀫𑀸𑀬𑀜𑁆𑀘 ¶ 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄, 𑀲 𑀓𑁂𑀦 𑀕𑀘𑁆𑀙𑁂𑀬𑁆𑀬 𑀅𑀦𑀽𑀧𑀬𑁄 𑀲𑁄.

𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀽𑀢𑀺. 𑀥𑁄𑀦𑁄𑀢𑀺. 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸 𑁋 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀺 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 ¶ 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀓𑀺𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸? 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 ¶ 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘; 𑀯𑀘𑀻𑀤𑀼𑀘𑁆𑀘𑀭𑀺𑀢𑀁… 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘; 𑀭𑀸𑀕𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘; 𑀤𑁄𑀲𑁄…𑀧𑁂… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘; 𑀇𑀲𑁆𑀲𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘; 𑀫𑀘𑁆𑀙𑀭𑀺𑀬𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘; 𑀫𑀸𑀬𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘; 𑀲𑀸𑀞𑁂𑀬𑁆𑀬𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘; 𑀣𑀫𑁆𑀪𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘; 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘; 𑀲𑀩𑁆𑀩𑁂 𑀓𑀺𑀮𑁂𑀲𑀸, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸, 𑀲𑀩𑁆𑀩𑁂 𑀤𑀭𑀣𑀸, 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸, 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸, 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 ¶ 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀢𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸.

𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀥𑀼𑀢𑀸 𑀘 𑀥𑁄𑀢𑀸 ¶ 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘; 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘; 𑀲𑀫𑁆𑀫𑀸𑀯𑀸𑀘𑀸𑀬 𑀫𑀺𑀘𑁆𑀙𑀸𑀯𑀸𑀘𑀸 𑀥𑀼𑀢𑀸 𑀘 𑀥𑁄𑀢𑀸 𑀘…𑀧𑁂… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀆𑀚𑀻𑀯𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀲𑀢𑀺𑀬𑀸 𑀫𑀺𑀘𑁆𑀙𑀸𑀲𑀢𑀺 𑀥𑀼𑀢𑀸 𑀘… 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀫𑀺𑀘𑁆𑀙𑀸𑀲𑀫𑀸𑀥𑀺 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘; 𑀲𑀫𑁆𑀫𑀸𑀜𑀸𑀡𑁂𑀦 𑀫𑀺𑀘𑁆𑀙𑀸𑀜𑀸𑀡𑀁 𑀥𑀼𑀢𑀁 𑀘… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘.

𑀅𑀣 𑀯𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸, 𑀲𑀩𑁆𑀩𑁂 𑀤𑀭𑀣𑀸, 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸, 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸, 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀅𑀭𑀳𑀸 𑀇𑀫𑁂𑀳𑀺 𑀥𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄; 𑀢𑀲𑁆𑀫𑀸 𑀅𑀭𑀳𑀸 𑀥𑁄𑀦𑁄. 𑀲𑁄 𑀥𑀼𑀢𑀭𑀸𑀕𑁄 𑀥𑀼𑀢𑀧𑀸𑀧𑁄 𑀥𑀼𑀢𑀓𑀺𑀮𑁂𑀲𑁄 𑀥𑀼𑀢𑀧𑀭𑀺𑀴𑀸𑀳𑁄𑀢𑀺 𑁋 𑀥𑁄𑀦𑁄. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂.

𑀧𑀓𑀧𑁆𑀧𑀺𑀢𑀸𑀢𑀺 ¶ 𑀤𑁆𑀯𑁂 𑀧𑀓𑀧𑁆𑀧𑀦𑀸 𑁋 𑀢𑀡𑁆𑀳𑀸𑀧𑀓𑀧𑁆𑀧𑀦𑀸 ¶ 𑀘 𑀤𑀺𑀝𑁆𑀞𑀺𑀧𑀓𑀧𑁆𑀧𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀓𑀧𑁆𑀧𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀓𑀧𑁆𑀧𑀦𑀸. 𑀪𑀯𑀸𑀪𑀯𑁂𑀲𑀽𑀢𑀺 𑀪𑀯𑀸𑀪𑀯𑁂 𑀓𑀫𑁆𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀓𑀸𑀫𑀪𑀯𑁂, 𑀓𑀫𑁆𑀫𑀪𑀯𑁂 𑀓𑀸𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀅𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 𑀅𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 ¶ 𑀧𑀼𑀦𑀧𑁆𑀧𑀼𑀦𑀪𑀯𑁂 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀽𑀢𑀺 𑀥𑁄𑀦𑀲𑁆𑀲 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀪𑀯𑀸𑀪𑀯𑁂𑀲𑀼 𑀘 𑀓𑀧𑁆𑀧𑀺𑀢𑀸 𑀧𑀓𑀧𑁆𑀧𑀺𑀢𑀸 𑀅𑀪𑀺𑀲𑀗𑁆𑀔𑀢𑀸 𑀲𑀡𑁆𑀞𑀧𑀺𑀢𑀸 𑀤𑀺𑀝𑁆𑀞𑀺 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀼.

𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄𑀢𑀺. 𑀫𑀸𑀬𑀸 𑀯𑀼𑀘𑁆𑀘𑀢𑀺 𑀯𑀜𑁆𑀘𑀦𑀺𑀓𑀸 𑀘𑀭𑀺𑀬𑀸. 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 ¶ 𑀘𑀭𑀺𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺 𑁋 ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀇𑀘𑁆𑀙𑀢𑀺, ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀲𑀗𑁆𑀓𑀧𑁆𑀧𑁂𑀢𑀺, ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀯𑀸𑀘𑀁 𑀪𑀸𑀲𑀢𑀺, ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺. 𑀬𑀸 𑀏𑀯𑀭𑀽𑀧𑀸 𑀫𑀸𑀬𑀸 𑀫𑀸𑀬𑀸𑀯𑀺𑀢𑀸 𑀅𑀘𑁆𑀘𑀲𑀭𑀸 𑀯𑀜𑁆𑀘𑀦𑀸 𑀦𑀺𑀓𑀢𑀺 𑀦𑀺𑀓𑀺𑀭𑀡𑀸 𑀧𑀭𑀺𑀳𑀭𑀡𑀸 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸 𑀙𑀸𑀤𑀦𑀸 𑀧𑀭𑀺𑀘𑁆𑀙𑀸𑀤𑀦𑀸 𑀅𑀦𑀼𑀢𑁆𑀢𑀸𑀦𑀺𑀓𑀫𑁆𑀫𑀁 𑀅𑀦𑀸𑀯𑀺𑀓𑀫𑁆𑀫𑀁 𑀯𑁄𑀘𑁆𑀙𑀸𑀤𑀦𑀸 𑀧𑀸𑀧𑀓𑀺𑀭𑀺𑀬𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀬𑀸.

𑀫𑀸𑀦𑁄𑀢𑀺 𑀏𑀓𑀯𑀺𑀥𑁂𑀦 𑀫𑀸𑀦𑁄 𑁋 𑀬𑀸 𑀘𑀺𑀢𑁆𑀢𑀲𑁆𑀲 𑀉𑀦𑁆𑀦𑀢𑀺 [𑀉𑀡𑁆𑀡𑀢𑀺 (𑀲𑁆𑀬𑀸. 𑀓.)]. 𑀤𑀼𑀯𑀺𑀥𑁂𑀦 𑀫𑀸𑀦𑁄 𑁋 𑀅𑀢𑁆𑀢𑀼𑀓𑁆𑀓𑀁𑀲𑀦𑀫𑀸𑀦𑁄, 𑀧𑀭𑀯𑀫𑁆𑀪𑀦𑀫𑀸𑀦𑁄. 𑀢𑀺𑀯𑀺𑀥𑁂𑀦 𑀫𑀸𑀦𑁄 𑁋 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 ¶ 𑀫𑀸𑀦𑁄, ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄. 𑀘𑀢𑀼𑀩𑁆𑀩𑀺𑀥𑁂𑀦 ¶ 𑀫𑀸𑀦𑁄 𑁋 𑀮𑀸𑀪𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀬𑀲𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀧𑀲𑀁𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀲𑀼𑀔𑁂𑀦 𑀫𑀸𑀦𑀁 𑀚𑀦𑁂𑀢𑀺. 𑀧𑀜𑁆𑀘𑀯𑀺𑀥𑁂𑀦 𑀫𑀸𑀦𑁄 𑁋 ‘‘𑀮𑀸𑀪𑀺𑀫𑁆𑀳𑀺 𑀫𑀦𑀸𑀧𑀺𑀓𑀸𑀦𑀁 𑀭𑀽𑀧𑀸𑀦’’𑀦𑁆𑀢𑀺 𑀫𑀸𑀦𑀁 𑀚𑀦𑁂𑀢𑀺, ‘‘𑀮𑀸𑀪𑀺𑀫𑁆𑀳𑀺 𑀫𑀦𑀸𑀧𑀺𑀓𑀸𑀦𑀁 𑀲𑀤𑁆𑀤𑀸𑀦𑀁…𑀧𑁂… 𑀕𑀦𑁆𑀥𑀸𑀦𑀁… 𑀭𑀲𑀸𑀦𑀁… 𑀨𑁄𑀝𑁆𑀞𑀩𑁆𑀩𑀸𑀦’’𑀦𑁆𑀢𑀺 𑀫𑀸𑀦𑀁 𑀚𑀦𑁂𑀢𑀺. 𑀙𑀩𑁆𑀩𑀺𑀥𑁂𑀦 𑀫𑀸𑀦𑁄 𑁋 𑀘𑀓𑁆𑀔𑀼𑀲𑀫𑁆𑀧𑀤𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀲𑁄𑀢𑀲𑀫𑁆𑀧𑀤𑀸𑀬… 𑀖𑀸𑀦𑀲𑀫𑁆𑀧𑀤𑀸𑀬… 𑀚𑀺𑀯𑁆𑀳𑀸𑀲𑀫𑁆𑀧𑀤𑀸𑀬… 𑀓𑀸𑀬𑀲𑀫𑁆𑀧𑀤𑀸𑀬… 𑀫𑀦𑁄𑀲𑀫𑁆𑀧𑀤𑀸𑀬 𑀫𑀸𑀦𑀁 𑀚𑀦𑁂𑀢𑀺. 𑀲𑀢𑁆𑀢𑀯𑀺𑀥𑁂𑀦 𑀫𑀸𑀦𑁄 𑁋 𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀸𑀦𑀸𑀢𑀺𑀫𑀸𑀦𑁄, 𑀑𑀫𑀸𑀦𑁄, 𑀅𑀥𑀺𑀫𑀸𑀦𑁄, 𑀅𑀲𑁆𑀫𑀺𑀫𑀸𑀦𑁄, 𑀫𑀺𑀘𑁆𑀙𑀸𑀫𑀸𑀦𑁄. 𑀅𑀝𑁆𑀞𑀯𑀺𑀥𑁂𑀦 𑀫𑀸𑀦𑁄 𑁋 𑀮𑀸𑀪𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀅𑀮𑀸𑀪𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺, 𑀬𑀲𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀅𑀬𑀲𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺, 𑀧𑀲𑀁𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀦𑀺𑀦𑁆𑀤𑀸𑀬 𑀑𑀫𑀸𑀦𑀁 𑀚𑀦𑁂𑀢𑀺, 𑀲𑀼𑀔𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀤𑀼𑀓𑁆𑀔𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺. 𑀦𑀯𑀯𑀺𑀥𑁂𑀦 𑀫𑀸𑀦𑁄 𑁋 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 ¶ , 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄. 𑀤𑀲𑀯𑀺𑀥𑁂𑀦 𑀫𑀸𑀦𑁄 𑁋 𑀇𑀥𑁂𑀓𑀘𑁆𑀘𑁄 𑀫𑀸𑀦𑀁 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀬𑁄 ¶ 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 [𑀉𑀡𑁆𑀡𑀫𑁄 (𑀲𑁆𑀬𑀸. 𑀓.)] 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 ¶ 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀦𑁄. 𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄𑀢𑀺. 𑀥𑁄𑀦𑁄 𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄.

𑀲 𑀓𑁂𑀦 𑀕𑀘𑁆𑀙𑁂𑀬𑁆𑀬 𑀅𑀦𑀽𑀧𑀬𑁄 𑀲𑁄𑀢𑀺. 𑀉𑀧𑀬𑀸𑀢𑀺 𑀤𑁆𑀯𑁂 𑀉𑀧𑀬𑀸 𑁋 𑀢𑀡𑁆𑀳𑀽𑀧𑀬𑁄 𑀘 𑀤𑀺𑀝𑁆𑀞𑀽𑀧𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀽𑀧𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀽𑀧𑀬𑁄. 𑀢𑀲𑁆𑀲 𑀢𑀡𑁆𑀳𑀽𑀧𑀬𑁄 𑀧𑀳𑀻𑀦𑁄 ¶ , 𑀤𑀺𑀝𑁆𑀞𑀽𑀧𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀽𑀧𑀬𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀽𑀧𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀅𑀦𑀽𑀧𑀬𑁄 𑀧𑀼𑀕𑁆𑀕𑀮𑁄 𑀓𑁂𑀦 𑀭𑀸𑀕𑁂𑀦 𑀕𑀘𑁆𑀙𑁂𑀬𑁆𑀬, 𑀓𑁂𑀦 𑀤𑁄𑀲𑁂𑀦 𑀕𑀘𑁆𑀙𑁂𑀬𑁆𑀬, 𑀓𑁂𑀦 𑀫𑁄𑀳𑁂𑀦 𑀕𑀘𑁆𑀙𑁂𑀬𑁆𑀬, 𑀓𑁂𑀦 𑀫𑀸𑀦𑁂𑀦 𑀕𑀘𑁆𑀙𑁂𑀬𑁆𑀬, 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀕𑀘𑁆𑀙𑁂𑀬𑁆𑀬, 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀕𑀘𑁆𑀙𑁂𑀬𑁆𑀬, 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀕𑀘𑁆𑀙𑁂𑀬𑁆𑀬, 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀕𑀘𑁆𑀙𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑁄 𑀓𑁂𑀦 𑀕𑀘𑁆𑀙𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀕𑀘𑁆𑀙𑁂𑀬𑁆𑀬𑀸𑀢𑀺 𑁋 𑀲 𑀓𑁂𑀦 𑀕𑀘𑁆𑀙𑁂𑀬𑁆𑀬 𑀅𑀦𑀽𑀧𑀬𑁄 𑀲𑁄.

‘‘𑀥𑁄𑀦𑀲𑁆𑀲 ¶ 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀼;

𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄, 𑀲 𑀓𑁂𑀦 𑀕𑀘𑁆𑀙𑁂𑀬𑁆𑀬 𑀅𑀦𑀽𑀧𑀬𑁄 𑀲𑁄’’𑀢𑀺.

𑀉𑀧𑀬𑁄 𑀳𑀺 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁, 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬;

𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀺, 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀁.

𑀉𑀧𑀬𑁄 ¶ 𑀳𑀺 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀦𑁆𑀢𑀺. 𑀉𑀧𑀬𑀸𑀢𑀺 𑀤𑁆𑀯𑁂 𑀉𑀧𑀬𑀸 𑁋 𑀢𑀡𑁆𑀳𑀽𑀧𑀬𑁄 𑀘 𑀤𑀺𑀝𑁆𑀞𑀽𑀧𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀽𑀧𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀽𑀧𑀬𑁄. 𑀢𑀲𑁆𑀲 𑀢𑀡𑁆𑀳𑀽𑀧𑀬𑁄 𑀅𑀧𑁆𑀧𑀳𑀻𑀦𑁄, 𑀤𑀺𑀝𑁆𑀞𑀽𑀧𑀬𑁄 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀽𑀧𑀬𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 ¶ , 𑀤𑀺𑀝𑁆𑀞𑀽𑀧𑀬𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀥𑀫𑁆𑀫𑁂𑀲𑀼 𑀯𑀸𑀤𑀁 𑀉𑀧𑁂𑀢𑀺 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 ¶ 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀅𑀧𑁆𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀯𑀸𑀤𑀁 𑀉𑀧𑁂𑀢𑀺. 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸 𑀯𑀸𑀤𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀉𑀧𑀬𑁄 𑀳𑀺 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁.

𑀅𑀦𑀽𑀧𑀬𑀁 ¶ 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬𑀸𑀢𑀺. 𑀉𑀧𑀬𑀸𑀢𑀺 𑀤𑁆𑀯𑁂 𑀉𑀧𑀬𑀸 𑁋 𑀢𑀡𑁆𑀳𑀽𑀧𑀬𑁄 𑀘 𑀤𑀺𑀝𑁆𑀞𑀽𑀧𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀽𑀧𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀽𑀧𑀬𑁄. 𑀢𑀲𑁆𑀲 𑀢𑀡𑁆𑀳𑀽𑀧𑀬𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀽𑀧𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀽𑀧𑀬𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀽𑀧𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀅𑀦𑀽𑀧𑀬𑀁 𑀧𑀼𑀕𑁆𑀕𑀮𑀁 𑀓𑁂𑀦 𑀭𑀸𑀕𑁂𑀦 𑀯𑀤𑁂𑀬𑁆𑀬, 𑀓𑁂𑀦 𑀤𑁄𑀲𑁂𑀦 𑀯𑀤𑁂𑀬𑁆𑀬, 𑀓𑁂𑀦 𑀫𑁄𑀳𑁂𑀦 𑀯𑀤𑁂𑀬𑁆𑀬, 𑀓𑁂𑀦 𑀫𑀸𑀦𑁂𑀦 𑀯𑀤𑁂𑀬𑁆𑀬, 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀤𑁂𑀬𑁆𑀬, 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀤𑁂𑀬𑁆𑀬, 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀤𑁂𑀬𑁆𑀬, 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀯𑀤𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑁄 𑀓𑁂𑀦 𑀯𑀤𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺, 𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀯𑀤𑁂𑀬𑁆𑀬 𑀓𑀣𑁂𑀬𑁆𑀬 𑀪𑀡𑁂𑀬𑁆𑀬 𑀤𑀻𑀧𑀬𑁂𑀬𑁆𑀬 𑀯𑁄𑀳𑀭𑁂𑀬𑁆𑀬𑀸𑀢𑀺 𑁋 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬.

𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀻𑀢𑀺. 𑀅𑀢𑁆𑀢𑀸𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀢𑁆𑀣𑀺. 𑀦𑀺𑀭𑀢𑁆𑀢𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀢𑁆𑀣𑀺. 𑀅𑀢𑁆𑀢𑀸𑀢𑀺 𑀕𑀳𑀺𑀢𑀁 𑀦𑀢𑁆𑀣𑀺. 𑀦𑀺𑀭𑀢𑁆𑀢𑀸𑀢𑀺 𑀫𑀼𑀜𑁆𑀘𑀺𑀢𑀩𑁆𑀩𑀁 𑀦𑀢𑁆𑀣𑀺. 𑀬𑀲𑁆𑀲𑀢𑁆𑀣𑀺 𑀕𑀳𑀺𑀢𑀁, 𑀢𑀲𑁆𑀲𑀢𑁆𑀣𑀺 𑀫𑀼𑀜𑁆𑀘𑀺𑀢𑀩𑁆𑀩𑀁; 𑀬𑀲𑁆𑀲𑀢𑁆𑀣𑀺 𑀫𑀼𑀜𑁆𑀘𑀺𑀢𑀩𑁆𑀩𑀁, 𑀢𑀲𑁆𑀲𑀢𑁆𑀣𑀺 𑀕𑀳𑀺𑀢𑀁. 𑀕𑀳𑀡𑀁 𑀫𑀼𑀜𑁆𑀘𑀦𑀸 𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀭𑀳𑀸 𑀩𑀼𑀤𑁆𑀥𑀺𑀧𑀭𑀺𑀳𑀸𑀦𑀺𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀕𑀢𑀤𑁆𑀥𑁄 𑀕𑀢𑀤𑀺𑀲𑁄 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀺.

𑀅𑀥𑁄𑀲𑀺 ¶ 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀦𑁆𑀢𑀺 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 ¶ 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀁 𑀇𑀥𑁂𑀯 𑀅𑀥𑁄𑀲𑀺 ¶ 𑀥𑀼𑀦𑀺 𑀲𑀦𑁆𑀥𑀼𑀦𑀺 𑀦𑀺𑀤𑁆𑀥𑀼𑀦𑀺 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀺𑀁 ¶ 𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀻𑀢𑀺 𑁋 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀁.

‘‘𑀉𑀧𑀬𑁄 𑀳𑀺 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁, 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬;

𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀺, 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩’’𑀦𑁆𑀢𑀺.

𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀢𑀢𑀺𑀬𑁄.

𑁪. 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀧𑀲𑁆𑀲𑀸𑀫𑀺 ¶ ¶ 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁, 𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺;

𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸, 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 𑀧𑀘𑁆𑀘𑁂𑀢𑀺 𑀜𑀸𑀡𑀁.

𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀦𑁆𑀢𑀺. 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀦𑁆𑀢𑀺 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁, 𑀤𑀓𑁆𑀔𑀸𑀫𑀺 𑀲𑀼𑀤𑁆𑀥𑀁, 𑀑𑀮𑁄𑀓𑁂𑀫𑀺 𑀲𑀼𑀤𑁆𑀥𑀁, 𑀦𑀺𑀚𑁆𑀛𑀸𑀬𑀸𑀫𑀺 𑀲𑀼𑀤𑁆𑀥𑀁, 𑀉𑀧𑀧𑀭𑀺𑀓𑁆𑀔𑀸𑀫𑀺 𑀲𑀼𑀤𑁆𑀥𑀁. 𑀧𑀭𑀫𑀁 𑀅𑀭𑁄𑀕𑀦𑁆𑀢𑀺 𑀧𑀭𑀫𑀁 𑀆𑀭𑁄𑀕𑁆𑀬𑀧𑁆𑀧𑀢𑁆𑀢𑀁 𑀢𑀸𑀡𑀧𑁆𑀧𑀢𑁆𑀢𑀁 𑀮𑁂𑀡𑀧𑁆𑀧𑀢𑁆𑀢𑀁 𑀲𑀭𑀡𑀧𑁆𑀧𑀢𑁆𑀢𑀁 𑀅𑀪𑀬𑀧𑁆𑀧𑀢𑁆𑀢𑀁 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑀁 𑀅𑀫𑀢𑀧𑁆𑀧𑀢𑁆𑀢𑀁 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀦𑁆𑀢𑀺 𑁋 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁.

𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 [𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 (𑀲𑀻. 𑀲𑁆𑀬𑀸.)] 𑀭𑀽𑀧𑀤𑀲𑁆𑀲𑀦𑁂𑀦 𑀦𑀭𑀲𑁆𑀲 𑀲𑀼𑀤𑁆𑀥𑀺 𑀯𑀺𑀲𑀼𑀤𑁆𑀥𑀺 𑀧𑀭𑀺𑀲𑀼𑀤𑁆𑀥𑀺, 𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺 𑀧𑀭𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀦𑀭𑁄 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑁋 𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺.

𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸𑀢𑀺. 𑀏𑀯𑀁 𑀅𑀪𑀺𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 ¶ 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸.

𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 ¶ ¶ 𑀧𑀘𑁆𑀘𑁂𑀢𑀺 𑀜𑀸𑀡𑀦𑁆𑀢𑀺. 𑀬𑁄 𑀲𑀼𑀤𑁆𑀥𑀁 𑀧𑀲𑁆𑀲𑀢𑀺, 𑀲𑁄 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻, 𑀧𑀘𑁆𑀘𑁂𑀢𑀺 𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦 𑀜𑀸𑀡𑀦𑁆𑀢𑀺 𑀧𑀘𑁆𑀘𑁂𑀢𑀺, 𑀫𑀕𑁆𑀕𑁄𑀢𑀺 𑀧𑀘𑁆𑀘𑁂𑀢𑀺, 𑀧𑀣𑁄𑀢𑀺 𑀧𑀘𑁆𑀘𑁂𑀢𑀺, 𑀦𑀺𑀬𑁆𑀬𑀸𑀦𑀦𑁆𑀢𑀺 𑀧𑀘𑁆𑀘𑁂𑀢𑀻𑀢𑀺 𑁋 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻 𑀧𑀘𑁆𑀘𑁂𑀢𑀺 𑀜𑀸𑀡𑀁.

‘‘𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁, 𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺;

𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸, 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 𑀧𑀘𑁆𑀘𑁂𑀢𑀺 𑀜𑀸𑀡’’𑀦𑁆𑀢𑀺.

𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺, 𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁;

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄, 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁.

𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦 𑀘𑁂 𑀦𑀭𑀲𑁆𑀲 𑀲𑀼𑀤𑁆𑀥𑀺 𑀯𑀺𑀲𑀼𑀤𑁆𑀥𑀺 𑀧𑀭𑀺𑀲𑀼𑀤𑁆𑀥𑀺, 𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺 𑀧𑀭𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀦𑀭𑁄 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑁋 𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺.

𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦 𑀘𑁂 𑀦𑀭𑁄 𑀚𑀸𑀢𑀺𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀚𑀭𑀸𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 ¶ 𑀧𑀚𑀳𑀢𑀺, 𑀫𑀭𑀡𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀧𑀚𑀳𑀢𑀻𑀢𑀺 𑁋 𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁.

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄𑀢𑀺. 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀧𑀣𑁂𑀦 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀦𑀭𑁄 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀺 𑀧𑀭𑀺𑀲𑀼𑀚𑁆𑀛𑀢𑀺 ¶ , 𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀺. 𑀲𑁄𑀧𑀥𑀻𑀓𑁄𑀢𑀺 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀫𑀸𑀦𑁄 𑀲𑀢𑀡𑁆𑀳𑁄 𑀲𑀤𑀺𑀝𑁆𑀞𑀺 𑀲𑀓𑀺𑀮𑁂𑀲𑁄 𑀲𑀉𑀧𑀸𑀤𑀸𑀦𑁄𑀢𑀺 𑁋 𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄.

𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀦𑁆𑀢𑀺. 𑀲𑀸𑀯 𑀤𑀺𑀝𑁆𑀞𑀺 𑀢𑀁 𑀧𑀼𑀕𑁆𑀕𑀮𑀁 𑀧𑀸𑀯𑀤𑀢𑀺 𑁋 𑀇𑀢𑀺 𑀯𑀸𑀬𑀁 𑀧𑀼𑀕𑁆𑀕𑀮𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀢𑀣𑀸 𑀯𑀤𑀸𑀦𑀦𑁆𑀢𑀺 𑀢𑀣𑀸 𑀯𑀤𑀦𑁆𑀢𑀁 𑀓𑀣𑁂𑀦𑁆𑀢𑀁 𑀪𑀡𑀦𑁆𑀢𑀁 𑀤𑀻𑀧𑀬𑀦𑁆𑀢𑀁 𑀯𑁄𑀳𑀭𑀦𑁆𑀢𑀁. ‘‘𑀲𑀲𑁆𑀲𑀢𑁄 𑀮𑁄𑀓𑁄 ¶ , 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀢𑀣𑀸 𑀯𑀤𑀦𑁆𑀢𑀁 𑀓𑀣𑁂𑀦𑁆𑀢𑀁 𑀪𑀡𑀦𑁆𑀢𑀁 𑀤𑀻𑀧𑀬𑀦𑁆𑀢𑀁 𑀯𑁄𑀳𑀭𑀦𑁆𑀢𑀁. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀢𑀣𑀸 𑀯𑀤𑀦𑁆𑀢𑀁 𑀓𑀣𑁂𑀦𑁆𑀢𑀁 𑀪𑀡𑀦𑁆𑀢𑀁 𑀤𑀻𑀧𑀬𑀦𑁆𑀢𑀁 𑀯𑁄𑀳𑀭𑀦𑁆𑀢𑀦𑁆𑀢𑀺 𑁋 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁 ¶ .

‘‘𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺, 𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁;

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄, 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦’’𑀦𑁆𑀢𑀺.

𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄, 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄.

𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺 ¶ , 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀩𑀸𑀳𑀺𑀢𑁄 𑀳𑁄𑀢𑀺. 𑀩𑀸𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀯𑀺𑀫𑀮𑁄 𑀲𑀸𑀥𑀼𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀲𑀁𑀲𑀸𑀭𑀫𑀢𑀺𑀘𑁆𑀘 𑀓𑁂𑀯𑀮𑀻 𑀲𑁄, 𑀅𑀲𑀺𑀢𑁄 [𑀅𑀦𑀺𑀲𑁆𑀲𑀺𑀢𑁄 (𑀲𑁆𑀬𑀸.)] 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸.

𑀦 ¶ ¶ 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀧𑀣𑁂𑀦 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀜𑁆𑀜𑀢𑁆𑀭 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁, 𑀦𑀸𑀳 𑀦 𑀓𑀣𑁂𑀢𑀺 𑀦 𑀪𑀡𑀢𑀺 𑀦 𑀤𑀻𑀧𑀬𑀢𑀺 𑀦 𑀯𑁄𑀳𑀭𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳.

𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀲𑀼𑀤𑁆𑀥𑀺𑀓𑀸. 𑀢𑁂 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺, 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀢𑁂 𑀓𑀸𑀮𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀪𑀺𑀫𑀗𑁆𑀕𑀮𑀕𑀢𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺 𑁋 𑀘𑀸𑀝𑀓𑀲𑀓𑀼𑀡𑀁 [𑀯𑀸𑀢𑀲𑀓𑀼𑀡𑀁 (𑀲𑁆𑀬𑀸.), 𑀘𑀸𑀧𑀲𑀓𑀼𑀡𑀁 (𑀓.)] 𑀧𑀲𑁆𑀲𑀦𑁆𑀢𑀺, 𑀨𑀼𑀲𑁆𑀲𑀯𑁂𑀴𑀼𑀯𑀮𑀝𑁆𑀞𑀺𑀁 𑀧𑀲𑁆𑀲𑀦𑁆𑀢𑀺, 𑀕𑀩𑁆𑀪𑀺𑀦𑀺𑀢𑁆𑀣𑀺𑀁 𑀧𑀲𑁆𑀲𑀦𑁆𑀢𑀺, 𑀓𑀼𑀫𑀸𑀭𑀓𑀁 𑀔𑀦𑁆𑀥𑁂 𑀆𑀭𑁄𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑀦𑁆𑀢𑀺, 𑀧𑀼𑀡𑁆𑀡𑀖𑀝𑀁 𑀧𑀲𑁆𑀲𑀦𑁆𑀢𑀺, 𑀭𑁄𑀳𑀺𑀢𑀫𑀘𑁆𑀙𑀁 𑀧𑀲𑁆𑀲𑀦𑁆𑀢𑀺, 𑀆𑀚𑀜𑁆𑀜𑀁 𑀧𑀲𑁆𑀲𑀦𑁆𑀢𑀺, 𑀆𑀚𑀜𑁆𑀜𑀭𑀣𑀁 𑀧𑀲𑁆𑀲𑀦𑁆𑀢𑀺, 𑀉𑀲𑀪𑀁 ¶ 𑀧𑀲𑁆𑀲𑀦𑁆𑀢𑀺, 𑀕𑁄𑀓𑀧𑀺𑀮𑀁 𑀧𑀲𑁆𑀲𑀦𑁆𑀢𑀺. 𑀏𑀯𑀭𑀽𑀧𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀧𑀮𑀸𑀮𑀧𑀼𑀜𑁆𑀚𑀁 𑀧𑀲𑁆𑀲𑀦𑁆𑀢𑀺, 𑀢𑀓𑁆𑀓𑀖𑀝𑀁 ¶ 𑀧𑀲𑁆𑀲𑀦𑁆𑀢𑀺, 𑀭𑀺𑀢𑁆𑀢𑀖𑀝𑀁 𑀧𑀲𑁆𑀲𑀦𑁆𑀢𑀺, 𑀦𑀝𑀁 𑀧𑀲𑁆𑀲𑀦𑁆𑀢𑀺, 𑀦𑀕𑁆𑀕𑀲𑀫𑀡𑀓𑀁 𑀧𑀲𑁆𑀲𑀦𑁆𑀢𑀺, 𑀔𑀭𑀁 𑀧𑀲𑁆𑀲𑀦𑁆𑀢𑀺, 𑀔𑀭𑀬𑀸𑀦𑀁 𑀧𑀲𑁆𑀲𑀦𑁆𑀢𑀺, 𑀏𑀓𑀬𑀼𑀢𑁆𑀢𑀬𑀸𑀦𑀁 𑀧𑀲𑁆𑀲𑀦𑁆𑀢𑀺 ¶ , 𑀓𑀸𑀡𑀁 𑀧𑀲𑁆𑀲𑀦𑁆𑀢𑀺, 𑀓𑀼𑀡𑀺𑀁 𑀧𑀲𑁆𑀲𑀦𑁆𑀢𑀺, 𑀔𑀜𑁆𑀚𑀁 𑀧𑀲𑁆𑀲𑀦𑁆𑀢𑀺, 𑀧𑀓𑁆𑀔𑀳𑀢𑀁 [𑀧𑀓𑁆𑀔𑀧𑀸𑀤𑀁 (𑀓.)] 𑀧𑀲𑁆𑀲𑀦𑁆𑀢𑀺, 𑀚𑀺𑀡𑁆𑀡𑀓𑀁 𑀧𑀲𑁆𑀲𑀦𑁆𑀢𑀺, 𑀩𑁆𑀬𑀸𑀥𑀺𑀓𑀁 [𑀩𑁆𑀬𑀸𑀥𑀺𑀢𑀁 (𑀲𑀻.)] 𑀧𑀲𑁆𑀲𑀦𑁆𑀢𑀺. 𑀏𑀯𑀭𑀽𑀧𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀲𑀼𑀤𑁆𑀥𑀺𑀓𑀸. 𑀢𑁂 𑀤𑀺𑀝𑁆𑀞𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀏𑀓𑀘𑁆𑀘𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺, 𑀏𑀓𑀘𑁆𑀘𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀢𑁂 𑀓𑀸𑀮𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀪𑀺𑀫𑀗𑁆𑀕𑀮𑀕𑀢𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀦𑁆𑀢𑀺 𑁋 𑀯𑀟𑁆𑀠𑀸𑀢𑀺 𑀯𑀸 𑀯𑀟𑁆𑀠𑀫𑀸𑀦𑀸𑀢𑀺 𑀯𑀸 𑀧𑀼𑀡𑁆𑀡𑀸𑀢𑀺 𑀯𑀸 𑀨𑀼𑀲𑁆𑀲𑀸𑀢𑀺 𑀯𑀸 𑀅𑀲𑁄𑀓𑀸𑀢𑀺 𑀯𑀸 𑀲𑀼𑀫𑀦𑀸𑀢𑀺 𑀯𑀸 𑀲𑀼𑀦𑀓𑁆𑀔𑀢𑁆𑀢𑀸𑀢𑀺 𑀯𑀸 𑀲𑀼𑀫𑀗𑁆𑀕𑀮𑀸𑀢𑀺 𑀯𑀸 𑀲𑀺𑀭𑀻𑀢𑀺 𑀯𑀸 𑀲𑀺𑀭𑀻𑀯𑀟𑁆𑀠𑀸𑀢𑀺 𑀯𑀸. 𑀏𑀯𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀓𑀸𑀡𑁄𑀢𑀺 𑀯𑀸 𑀓𑀼𑀡𑀻𑀢𑀺 𑀯𑀸 𑀔𑀜𑁆𑀚𑁄𑀢𑀺 𑀯𑀸 𑀧𑀓𑁆𑀔𑀳𑀢𑁄𑀢𑀺 𑀯𑀸 𑀚𑀺𑀡𑁆𑀡𑀓𑁄𑀢𑀺 𑀯𑀸 𑀩𑁆𑀬𑀸𑀥𑀺𑀓𑁄𑀢𑀺 𑀯𑀸 𑀫𑀢𑁄𑀢𑀺 𑀯𑀸 𑀙𑀺𑀦𑁆𑀤𑀦𑁆𑀢𑀺 𑀯𑀸 𑀪𑀺𑀦𑁆𑀤𑀦𑁆𑀢𑀺 𑀯𑀸 𑀤𑀟𑁆𑀠𑀦𑁆𑀢𑀺 𑀯𑀸 𑀦𑀝𑁆𑀞𑀦𑁆𑀢𑀺 𑀯𑀸 𑀦𑀢𑁆𑀣𑀻𑀢𑀺 𑀯𑀸. 𑀏𑀯𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 ¶ 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀲𑀼𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 ¶ 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀲𑀼𑀤𑁆𑀥𑀺𑀓𑀸. 𑀢𑁂 𑀲𑀻𑀮𑀫𑀢𑁆𑀢𑁂𑀦 𑀲𑀁𑀬𑀫𑀫𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 ¶ 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺. 𑀲𑀫𑀡𑁄𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 [𑀲𑀫𑀡𑁄 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑁄 (𑀲𑀻.), 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 (𑀲𑁆𑀬𑀸.)] 𑀏𑀯𑀫𑀸𑀳 𑁋 ‘‘𑀘𑀢𑀽𑀳𑀺 𑀔𑁄 𑀅𑀳𑀁, 𑀕𑀳𑀧𑀢𑀺 [𑀣𑀧𑀢𑀺 (𑀲𑀻. 𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺], 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀧𑀜𑁆𑀜𑀸𑀧𑁂𑀫𑀺 𑀲𑀫𑁆𑀧𑀦𑁆𑀦𑀓𑀼𑀲𑀮𑀁 𑀧𑀭𑀫𑀓𑀼𑀲𑀮𑀁 𑀉𑀢𑁆𑀢𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑀁 𑀲𑀫𑀡𑀁 𑀅𑀬𑁄𑀚𑁆𑀚𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀕𑀳𑀧𑀢𑀺, 𑀦 𑀓𑀸𑀬𑁂𑀦 𑀧𑀸𑀧𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀧𑀸𑀧𑀓𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀧𑀸𑀧𑀓𑀁 𑀲𑀗𑁆𑀓𑀧𑁆𑀧𑀁 𑀲𑀗𑁆𑀓𑀧𑁆𑀧𑀢𑀺, 𑀦 𑀧𑀸𑀧𑀓𑀁 𑀆𑀚𑀻𑀯𑀁 𑀆𑀚𑀻𑀯𑀢𑀺. 𑀇𑀫𑁂𑀳𑀺 𑀔𑁄 𑀅𑀳𑀁, 𑀕𑀳𑀧𑀢𑀺, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀧𑀜𑁆𑀜𑀸𑀧𑁂𑀫𑀺 𑀲𑀫𑁆𑀧𑀦𑁆𑀦𑀓𑀼𑀲𑀮𑀁 𑀧𑀭𑀫𑀓𑀼𑀲𑀮𑀁 𑀉𑀢𑁆𑀢𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑀁 𑀲𑀫𑀡𑀁 𑀅𑀬𑁄𑀚𑁆𑀚𑀁’’. 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀲𑀼𑀤𑁆𑀥𑀺𑀓𑀸, 𑀢𑁂 𑀲𑀻𑀮𑀫𑀢𑁆𑀢𑁂𑀦 𑀲𑀁𑀬𑀫𑀫𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀳𑀢𑁆𑀣𑀺𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀲𑁆𑀲𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀕𑁄𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀓𑀼𑀓𑁆𑀓𑀼𑀭𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀓𑀸𑀓𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀯𑀸𑀲𑀼𑀤𑁂𑀯𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀩𑀮𑀤𑁂𑀯𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀧𑀼𑀡𑁆𑀡𑀪𑀤𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀫𑀡𑀺𑀪𑀤𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀕𑁆𑀕𑀺𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀦𑀸𑀕𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀲𑀼𑀧𑀡𑁆𑀡𑀯𑀢𑀺𑀓𑀸 ¶ 𑀯𑀸 𑀳𑁄𑀦𑁆𑀢𑀺, 𑀬𑀓𑁆𑀔𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀲𑀼𑀭𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀕𑀦𑁆𑀥𑀩𑁆𑀩𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀫𑀳𑀸𑀭𑀸𑀚𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀘𑀦𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀲𑀽𑀭𑀺𑀬𑀯𑀢𑀺𑀓𑀸 𑀯𑀸 ¶ 𑀳𑁄𑀦𑁆𑀢𑀺, 𑀇𑀦𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀩𑁆𑀭𑀳𑁆𑀫𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀤𑁂𑀯𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀤𑀺𑀲𑀸𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀯𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀓𑀸𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀁 𑀆𑀫𑀲𑀦𑁆𑀢𑀺, 𑀳𑀭𑀺𑀢𑀁 𑀆𑀫𑀲𑀦𑁆𑀢𑀺, 𑀕𑁄𑀫𑀬𑀁 ¶ 𑀆𑀫𑀲𑀦𑁆𑀢𑀺, 𑀓𑀘𑁆𑀙𑀧𑀁 𑀆𑀫𑀲𑀦𑁆𑀢𑀺, 𑀨𑀸𑀮𑀁 𑀅𑀓𑁆𑀓𑀫𑀦𑁆𑀢𑀺, 𑀢𑀺𑀮𑀯𑀸𑀳𑀁 𑀆𑀫𑀲𑀦𑁆𑀢𑀺, 𑀨𑀼𑀲𑁆𑀲𑀢𑀺𑀮𑀁 𑀔𑀸𑀤𑀦𑁆𑀢𑀺, 𑀨𑀼𑀲𑁆𑀲𑀢𑁂𑀮𑀁 ¶ 𑀫𑀓𑁆𑀔𑁂𑀦𑁆𑀢𑀺, 𑀨𑀼𑀲𑁆𑀲𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑀺, 𑀨𑀼𑀲𑁆𑀲𑀫𑀢𑁆𑀢𑀺𑀓𑀸𑀬 𑀦𑁆𑀳𑀸𑀬𑀦𑁆𑀢𑀺, 𑀨𑀼𑀲𑁆𑀲𑀲𑀸𑀝𑀓𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀨𑀼𑀲𑁆𑀲𑀯𑁂𑀞𑀦𑀁 𑀯𑁂𑀞𑁂𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀫𑀼𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺. 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳.

𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀲𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀲𑀻𑀮𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀯𑀢𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀫𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳 𑀦 𑀓𑀣𑁂𑀢𑀺 𑀦 𑀪𑀡𑀢𑀺 𑀦 𑀤𑀻𑀧𑀬𑀢𑀺 𑀦 𑀯𑁄𑀳𑀭𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸.

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺. 𑀧𑀼𑀜𑁆𑀜𑀁 𑀯𑀼𑀘𑁆𑀘𑀢𑀺 𑀬𑀁 𑀓𑀺𑀜𑁆𑀘𑀺 𑀢𑁂𑀥𑀸𑀢𑀼𑀓𑀁 𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀁, 𑀅𑀧𑀼𑀜𑁆𑀜𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀁 𑀅𑀓𑀼𑀲𑀮𑀁. 𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 ¶ 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀏𑀢𑁆𑀢𑀸𑀯𑀢𑀸 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀽𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄.

𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄𑀢𑀺. 𑀅𑀢𑁆𑀢𑀜𑁆𑀚𑀳𑁄𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀚𑀳𑁄. 𑀅𑀢𑁆𑀢𑀜𑁆𑀚𑀳𑁄𑀢𑀺 𑀕𑀸𑀳𑀁 𑀚𑀳𑁄 [𑀕𑀸𑀳𑀚𑀳𑁄 (𑀲𑀻. 𑀲𑁆𑀬𑀸.), 𑀅𑀢𑁆𑀢𑀕𑀸𑀳𑀁 𑀚𑀳𑁄 (𑀓.)]. 𑀅𑀢𑁆𑀢𑀜𑁆𑀚𑀳𑁄𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 ¶ 𑀅𑀥𑀺𑀫𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀘𑀢𑁆𑀢𑀁 𑀳𑁄𑀢𑀺 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀅𑀧𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄𑀢𑀺 𑁋 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄.

‘‘𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄, 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄’’𑀢𑀺.

𑀧𑀼𑀭𑀺𑀫𑀁 ¶ 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂, 𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁;

𑀢𑁂 ¶ 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺, 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 [𑀧𑀫𑀼𑀔𑀁 (𑀲𑀻. 𑀲𑁆𑀬𑀸.)] 𑀕𑀳𑀸𑀬.

𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂𑀢𑀺. 𑀧𑀼𑀭𑀺𑀫𑀁 𑀲𑀢𑁆𑀣𑀸𑀭𑀁 𑀧𑀳𑀸𑀬 𑀧𑀭𑀁 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀥𑀫𑁆𑀫𑀓𑁆𑀔𑀸𑀦𑀁 𑀧𑀳𑀸𑀬 𑀅𑀧𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀕𑀡𑀁 𑀧𑀳𑀸𑀬 𑀅𑀧𑀭𑀁 𑀕𑀡𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀤𑀺𑀝𑁆𑀞𑀺𑀁 𑀧𑀳𑀸𑀬 𑀅𑀧𑀭𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀧𑀝𑀺𑀧𑀤𑀁 𑀧𑀳𑀸𑀬 𑀅𑀧𑀭𑀁 𑀧𑀝𑀺𑀧𑀤𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀫𑀕𑁆𑀕𑀁 𑀧𑀳𑀸𑀬 𑀅𑀧𑀭𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑀸 𑀲𑀦𑁆𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂.

𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀦𑁆𑀢𑀺. 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀏𑀚𑀸𑀦𑀼𑀕𑀸𑀢𑀺 𑀏𑀚𑀸𑀦𑀼𑀕𑀸 𑀏𑀚𑀸𑀦𑀼𑀕𑀢𑀸 𑀏𑀚𑀸𑀦𑀼𑀲𑀝𑀸 𑀏𑀚𑀸𑀬 𑀧𑀦𑁆𑀦𑀸 𑀧𑀢𑀺𑀢𑀸 𑀅𑀪𑀺𑀪𑀽𑀢𑀸 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸. 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀦𑁆𑀢𑀺 𑀭𑀸𑀕𑀲𑀗𑁆𑀕𑀁 𑀤𑁄𑀲𑀲𑀗𑁆𑀕𑀁 𑀫𑁄𑀳𑀲𑀗𑁆𑀕𑀁 𑀫𑀸𑀦𑀲𑀗𑁆𑀕𑀁 𑀤𑀺𑀝𑁆𑀞𑀺𑀲𑀗𑁆𑀕𑀁 𑀓𑀺𑀮𑁂𑀲𑀲𑀗𑁆𑀕𑀁 𑀤𑀼𑀘𑁆𑀘𑀭𑀺𑀢𑀲𑀗𑁆𑀕𑀁 𑀦 𑀢𑀭𑀦𑁆𑀢𑀺 𑀦 𑀉𑀢𑁆𑀢𑀭𑀦𑁆𑀢𑀺 𑀦 𑀧𑀢𑀭𑀦𑁆𑀢𑀺 𑀦 𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀦 𑀯𑀻𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑁋 𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁.

𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀻𑀢𑀺 𑀲𑀢𑁆𑀣𑀸𑀭𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀕𑀡𑁆𑀳𑀦𑁆𑀢𑀺; 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀦𑁆𑀢𑀺 ¶ , 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀦𑁆𑀢𑀺; 𑀕𑀡𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑀁 𑀕𑀡𑁆𑀳𑀦𑁆𑀢𑀺; 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 ¶ 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺; 𑀧𑀝𑀺𑀧𑀤𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀧𑀝𑀺𑀧𑀤𑀁 𑀕𑀡𑁆𑀳𑀦𑁆𑀢𑀺; 𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑀺; 𑀕𑀡𑁆𑀳𑀦𑁆𑀢𑀺 𑀘 𑀫𑀼𑀜𑁆𑀘𑀦𑁆𑀢𑀺 𑀘 𑀆𑀤𑀺𑀬𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘𑀸𑀢𑀺 𑁋 𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺.

𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬𑀸𑀢𑀺. 𑀬𑀣𑀸 𑀫𑀓𑁆𑀓𑀝𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀲𑀸𑀔𑀁 𑀕𑀡𑁆𑀳𑀸𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀲𑀸𑀔𑀁 𑀕𑀡𑁆𑀳𑀸𑀢𑀺. 𑀏𑀯𑀫𑁂𑀯 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀣𑀼𑀤𑀺𑀝𑁆𑀞𑀺𑀕𑀢𑀸𑀦𑀺 𑀕𑀡𑁆𑀳𑀦𑁆𑀢𑀺 𑀘 𑀫𑀼𑀜𑁆𑀘𑀦𑁆𑀢𑀺 𑀘 𑀆𑀤𑀺𑀬𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘𑀸𑀢𑀺 𑁋 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬.

‘‘𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂, 𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁;

𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺, 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬𑀸’’𑀢𑀺.

𑀲𑀬𑀁 ¶ 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄;

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄.

𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀽𑀢𑀺. 𑀲𑀬𑀁 𑀲𑀫𑀸𑀤𑀸𑀬𑀸𑀢𑀺 𑀲𑀸𑀫𑀁 𑀲𑀫𑀸𑀤𑀸𑀬 ¶ . 𑀯𑀢𑀸𑀦𑀻𑀢𑀺 𑀳𑀢𑁆𑀣𑀺𑀯𑀢𑀁 𑀯𑀸 𑀅𑀲𑁆𑀲𑀯𑀢𑀁 𑀯𑀸 𑀕𑁄𑀯𑀢𑀁 𑀯𑀸 𑀓𑀼𑀓𑁆𑀓𑀽𑀭𑀯𑀢𑀁 𑀯𑀸 𑀓𑀸𑀓𑀯𑀢𑀁 𑀯𑀸 𑀯𑀸𑀲𑀼𑀤𑁂𑀯𑀯𑀢𑀁 𑀯𑀸 𑀩𑀮𑀤𑁂𑀯𑀯𑀢𑀁 𑀯𑀸 𑀧𑀼𑀡𑁆𑀡𑀪𑀤𑁆𑀤𑀯𑀢𑀁 𑀯𑀸 𑀫𑀡𑀺𑀪𑀤𑁆𑀤𑀯𑀢𑀁 𑀯𑀸 𑀅𑀕𑁆𑀕𑀺𑀯𑀢𑀁 𑀯𑀸 𑀦𑀸𑀕𑀯𑀢𑀁 𑀯𑀸 𑀲𑀼𑀧𑀡𑁆𑀡𑀯𑀢𑀁 𑀯𑀸 𑀬𑀓𑁆𑀔𑀯𑀢𑀁 𑀯𑀸 𑀅𑀲𑀼𑀭𑀯𑀢𑀁 𑀯𑀸…𑀧𑁂… 𑀤𑀺𑀲𑀸𑀯𑀢𑀁 𑀯𑀸 𑀆𑀤𑀸𑀬 𑀲𑀫𑀸𑀤𑀸𑀬 𑀆𑀤𑀺𑀬𑀺𑀢𑁆𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 ¶ …𑀧𑁂… 𑀫𑀦𑀼𑀚𑁄𑀢𑀺 𑁋 𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼.

𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄𑀢𑀺 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀺; 𑀥𑀫𑁆𑀫𑀓𑁆𑀔𑀸𑀦𑀢𑁄 𑀥𑀫𑁆𑀫𑀓𑁆𑀔𑀸𑀦𑀁 𑀕𑀘𑁆𑀙𑀢𑀺; 𑀕𑀡𑀢𑁄 𑀕𑀡𑀁 𑀕𑀘𑁆𑀙𑀢𑀺; 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀁 𑀕𑀘𑁆𑀙𑀢𑀺; 𑀧𑀝𑀺𑀧𑀤𑀸𑀬 𑀧𑀝𑀺𑀧𑀤𑀁 𑀕𑀘𑁆𑀙𑀢𑀺; 𑀫𑀕𑁆𑀕𑀢𑁄 𑀫𑀕𑁆𑀕𑀁 𑀕𑀘𑁆𑀙𑀢𑀺. 𑀲𑀜𑁆𑀜𑀲𑀢𑁆𑀢𑁄𑀢𑀺 𑀓𑀸𑀫𑀲𑀜𑁆𑀜𑀸𑀬 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬 𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀬 𑀤𑀺𑀝𑁆𑀞𑀺𑀲𑀜𑁆𑀜𑀸𑀬 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄. 𑀬𑀣𑀸 𑀪𑀺𑀢𑁆𑀢𑀺𑀔𑀺𑀮𑁂 𑀯𑀸 𑀦𑀸𑀕𑀤𑀦𑁆𑀢𑁂 𑀯𑀸 𑀪𑀡𑁆𑀟𑀁 𑀲𑀢𑁆𑀢𑀁 𑀯𑀺𑀲𑀢𑁆𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀁 𑀮𑀕𑁆𑀕𑀺𑀢𑀁 𑀧𑀮𑀺𑀩𑀼𑀤𑁆𑀥𑀁, 𑀏𑀯𑀫𑁂𑀯 𑀓𑀸𑀫𑀲𑀜𑁆𑀜𑀸𑀬 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬 𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀬 𑀤𑀺𑀝𑁆𑀞𑀺𑀲𑀜𑁆𑀜𑀸𑀬 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄𑀢𑀺 𑁋 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄.

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺. 𑀯𑀺𑀤𑁆𑀯𑀸𑀢𑀺 𑀯𑀺𑀤𑁆𑀯𑀸 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀯𑁂𑀤𑁂𑀳𑀻𑀢𑀺 𑀯𑁂𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀳𑀺 𑀯𑁂𑀤𑁂𑀳𑀺 ¶ 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄, 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄, 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄, 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄, 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄, 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄, 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄, 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄, 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄, 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄, 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽, 𑀯𑁂𑀤𑁂𑀳𑀺 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽, 𑀲𑀢𑁆𑀢𑀦𑁆𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀯𑁂𑀤𑀕𑀽. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀤𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀤𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀯𑀺𑀤𑀺𑀢𑁄 ¶ ¶ 𑀳𑁄𑀢𑀺, 𑀭𑀸𑀕𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀯𑀺𑀤𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀡𑀸𑀦𑀁 𑀬𑀸𑀦𑀻𑀥𑀢𑁆𑀣𑀺 [𑀬𑀸𑀦𑀺𑀧𑀢𑁆𑀣𑀺 (𑀲𑀻. 𑀲𑁆𑀬𑀸.) 𑀲𑀼. 𑀦𑀺. 𑁫𑁩𑁪] 𑀩𑁆𑀭𑀸𑀳𑁆𑀫𑀡𑀸𑀦𑀁;

𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄, 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺.

𑀯𑀺𑀤𑁆𑀯𑀸 ¶ 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺. 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 ¶ 𑀦𑀸𑀫𑀭𑀽𑀧𑀦𑁆𑀢𑀺…𑀧𑁂… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺… 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺… 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺… 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺… 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺… 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄𑀢𑀺… 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄𑀢𑀺… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺… 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄𑀢𑀺… 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺… 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄𑀢𑀺… 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄𑀢𑀺… 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀫𑁂 𑀆𑀲𑀯𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺… 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺… 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺… 𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸𑀢𑀺… 𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 ¶ … 𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑁂𑀘𑁆𑀘 ¶ 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 ¶ 𑀥𑀫𑁆𑀫𑀁. 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 ¶ 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑁋 𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁.

𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄𑀢𑀺 𑀦 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀺, 𑀦 𑀥𑀫𑁆𑀫𑀓𑁆𑀔𑀸𑀦𑀢𑁄 𑀥𑀫𑁆𑀫𑀓𑁆𑀔𑀸𑀦𑀁 𑀕𑀘𑁆𑀙𑀢𑀺, 𑀦 𑀕𑀡𑀢𑁄 𑀕𑀡𑀁 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀁 𑀕𑀘𑁆𑀙𑀢𑀺, 𑀦 𑀧𑀝𑀺𑀧𑀤𑀸𑀬 𑀧𑀝𑀺𑀧𑀤𑀁 𑀕𑀘𑁆𑀙𑀢𑀺, 𑀦 𑀫𑀕𑁆𑀕𑀢𑁄 𑀫𑀕𑁆𑀕𑀁 𑀕𑀘𑁆𑀙𑀢𑀺. 𑀪𑀽𑀭𑀺𑀧𑀜𑁆𑀜𑁄𑀢𑀺 𑀪𑀽𑀭𑀺𑀧𑀜𑁆𑀜𑁄 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄.

‘‘𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄;

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄’’𑀢𑀺.

𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀢𑀫𑁂𑀯 ¶ 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬.

𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸𑀢𑀺. 𑀲𑁂𑀦𑀸 𑀯𑀼𑀘𑁆𑀘𑀢𑀺 𑀫𑀸𑀭𑀲𑁂𑀦𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀭𑀸𑀕𑁄 𑀫𑀸𑀭𑀲𑁂𑀦𑀸, 𑀤𑁄𑀲𑁄 𑀫𑀸𑀭𑀲𑁂𑀦𑀸, 𑀫𑁄𑀳𑁄 𑀫𑀸𑀭𑀲𑁂𑀦𑀸, 𑀓𑁄𑀥𑁄 𑀫𑀸𑀭𑀲𑁂𑀦𑀸, 𑀉𑀧𑀦𑀸𑀳𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀸𑀭𑀲𑁂𑀦𑀸.

‘‘𑀓𑀸𑀫𑀸 ¶ 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀯𑀼𑀘𑁆𑀘𑀢𑀺.

‘‘𑀧𑀜𑁆𑀘𑀫𑀻 ¶ 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

‘‘𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂, 𑀧𑀭𑁂 𑀘 𑀅𑀯𑀚𑀸𑀦𑀢𑀺.

‘‘𑀏𑀲𑀸 ¶ 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀼𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀩𑁆𑀩𑀸 𑀘 𑀫𑀸𑀭𑀲𑁂𑀦𑀸 𑀲𑀩𑁆𑀩𑁂 𑀘 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀚𑀺𑀢𑀸 𑀘 𑀧𑀭𑀸𑀚𑀺𑀢𑀸 𑀘 𑀪𑀕𑁆𑀕𑀸 𑀯𑀺𑀧𑁆𑀧𑀮𑀼𑀕𑁆𑀕𑀸 𑀧𑀭𑀫𑁆𑀫𑀼𑀔𑀸, 𑀲𑁄 𑀯𑀼𑀘𑁆𑀘𑀢𑀺 𑀯𑀺𑀲𑁂𑀦𑀺𑀪𑀽𑀢𑁄. 𑀲𑁄 𑀤𑀺𑀝𑁆𑀞𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀲𑀼𑀢𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀫𑀼𑀢𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀯𑀺𑀜𑁆𑀜𑀸𑀢𑁂 𑀯𑀺𑀲𑁂𑀦𑀺𑀪𑀽𑀢𑁄𑀢𑀺 𑁋 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸.

𑀢𑀫𑁂𑀯 ¶ 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀦𑁆𑀢𑀺. 𑀢𑀫𑁂𑀯 𑀲𑀼𑀤𑁆𑀥𑀤𑀲𑁆𑀲𑀺𑀁 𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀁 𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀺𑀁 𑀯𑁄𑀤𑀸𑀢𑀤𑀲𑁆𑀲𑀺𑀁 𑀧𑀭𑀺𑀬𑁄𑀤𑀸𑀢𑀤𑀲𑁆𑀲𑀺𑀁. 𑀅𑀣 𑀯𑀸, 𑀲𑀼𑀤𑁆𑀥𑀤𑀲𑁆𑀲𑀦𑀁 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑀁 𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀦𑀁 𑀯𑁄𑀤𑀸𑀢𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀤𑀲𑁆𑀲𑀦𑀁. 𑀯𑀺𑀯𑀝𑀦𑁆𑀢𑀺 𑀢𑀡𑁆𑀳𑀸𑀙𑀤𑀦𑀁 𑀤𑀺𑀝𑁆𑀞𑀺𑀙𑀤𑀦𑀁 𑀓𑀺𑀮𑁂𑀲𑀙𑀤𑀦𑀁 𑀤𑀼𑀘𑁆𑀘𑀭𑀺𑀢𑀙𑀤𑀦𑀁 𑀅𑀯𑀺𑀚𑁆𑀚𑀸𑀙𑀤𑀦𑀁. 𑀢𑀸𑀦𑀺 𑀙𑀤𑀦𑀸𑀦𑀺 𑀯𑀺𑀯𑀝𑀸𑀦𑀺 𑀳𑁄𑀦𑁆𑀢𑀺 𑀯𑀺𑀤𑁆𑀥𑀁𑀲𑀺𑀢𑀸𑀦𑀺 𑀉𑀕𑁆𑀖𑀸𑀝𑀺𑀢𑀸𑀦𑀺 𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀘𑀭𑀦𑁆𑀢𑀦𑁆𑀢𑀺 𑀘𑀭𑀦𑁆𑀢𑀁 𑀯𑀺𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀇𑀭𑀺𑀬𑀦𑁆𑀢𑀁 𑀯𑀢𑁆𑀢𑁂𑀦𑁆𑀢𑀁 𑀧𑀸𑀮𑁂𑀦𑁆𑀢𑀁 𑀬𑀧𑁂𑀦𑁆𑀢𑀁 𑀬𑀸𑀧𑁂𑀦𑁆𑀢𑀦𑁆𑀢𑀺 𑁋 𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁.

𑀓𑁂𑀦𑀻𑀥 ¶ 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬𑀸𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑁂𑀦 𑀭𑀸𑀕𑁂𑀦 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀤𑁄𑀲𑁂𑀦 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀫𑁄𑀳𑁂𑀦 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀫𑀸𑀦𑁂𑀦 𑀓𑀧𑁆𑀧𑁂𑀬𑁆𑀬, 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀓𑀧𑁆𑀧𑁂𑀬𑁆𑀬, 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀧𑁆𑀧𑁂𑀬𑁆𑀬, 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀓𑀧𑁆𑀧𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 ¶ 𑀕𑀢𑀺𑀬𑁄 𑀓𑁂𑀦 𑀓𑀧𑁆𑀧𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 ¶ 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺, 𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

‘‘𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬𑀸’’𑀢𑀺.

𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺;

𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚, 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑁂𑀲𑀁 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 ¶ 𑀯𑀸 𑀦 𑀓𑀧𑁆𑀧𑁂𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 𑀦 𑀲𑀜𑁆𑀚𑀦𑁂𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺 ¶ . 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑁂𑀲𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦 𑀢𑀡𑁆𑀳𑀁 𑀯𑀸 𑀦 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀦𑁆𑀢𑀺, 𑀦 𑀢𑀡𑁆𑀳𑀸𑀥𑀚𑀸 𑀦 𑀢𑀡𑁆𑀳𑀸𑀓𑁂𑀢𑀽 𑀦 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑀸, 𑀦 𑀤𑀺𑀝𑁆𑀞𑀺𑀥𑀚𑀸 𑀦 𑀤𑀺𑀝𑁆𑀞𑀺𑀓𑁂𑀢𑀽 𑀦 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑀸, 𑀦 𑀢𑀡𑁆𑀳𑀸𑀬 𑀯𑀸 𑀦 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑀺𑀢𑀸 𑀘𑀭𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺.

𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀻𑀢𑀺 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀁 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀲𑀲𑁆𑀲𑀢𑀯𑀸𑀤𑀁 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀦 𑀪𑀡𑀦𑁆𑀢𑀺 𑀦 𑀤𑀻𑀧𑀬𑀦𑁆𑀢𑀺 𑀦 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺.

𑀆𑀤𑀸𑀦𑀕𑀦𑁆𑀣𑀁 ¶ 𑀕𑀣𑀺𑀢𑀁 𑀯𑀺𑀲𑀚𑁆𑀚𑀸𑀢𑀺. 𑀕𑀦𑁆𑀣𑀸𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑁋 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄; 𑀧𑀭𑀯𑀸𑀤𑁂𑀲𑀼 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄; 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀯𑀢𑀁 𑀯𑀸 𑀲𑀻𑀮𑀯𑀢𑀁 𑀯𑀸 𑀧𑀭𑀸𑀫𑀲𑀦𑁆𑀢𑀻𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀕𑀦𑁆𑀣𑁄? 𑀢𑁂𑀳𑀺 𑀕𑀦𑁆𑀣𑁂𑀳𑀺 𑀭𑀽𑀧𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁 ¶ … 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀯𑀝𑁆𑀝𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀕𑀦𑁆𑀣𑁄. 𑀯𑀺𑀲𑀚𑁆𑀚𑀸𑀢𑀺 ¶ 𑀕𑀦𑁆𑀣𑁂 𑀯𑁄𑀲𑀚𑁆𑀚𑀺𑀢𑁆𑀯𑀸 𑀯𑀸 𑁋 𑀯𑀺𑀲𑀚𑁆𑀚. 𑀅𑀣 𑀯𑀸 𑀕𑀦𑁆𑀣𑁂 𑀕𑀥𑀺𑀢𑁂 ¶ 𑀕𑀦𑁆𑀣𑀺𑀢𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀧𑁄𑀝𑀬𑀺𑀢𑁆𑀯𑀸 𑁋 [𑀨𑁄𑀝𑀬𑀺𑀢𑁆𑀯𑀸 (𑀲𑁆𑀬𑀸.)] 𑀯𑀺𑀲𑀚𑁆𑀚. 𑀬𑀣𑀸 𑀯𑀬𑁆𑀳𑀁 𑀯𑀸 𑀭𑀣𑀁 𑀯𑀸 𑀲𑀓𑀝𑀁 𑀯𑀸 𑀲𑀦𑁆𑀤𑀫𑀸𑀦𑀺𑀓𑀁 𑀯𑀸 𑀲𑀚𑁆𑀚𑀁 𑀯𑀺𑀲𑀚𑁆𑀚𑀁 𑀓𑀭𑁄𑀦𑁆𑀢𑀺 𑀯𑀺𑀓𑁄𑀧𑁂𑀦𑁆𑀢𑀺; 𑀏𑀯𑀫𑁂𑀯 𑀕𑀦𑁆𑀣𑁂 𑀯𑁄𑀲𑀚𑁆𑀚𑀺𑀢𑁆𑀯𑀸 𑁋 𑀯𑀺𑀲𑀚𑁆𑀚. 𑀅𑀣 𑀯𑀸 𑀕𑀦𑁆𑀣𑁂 𑀕𑀥𑀺𑀢𑁂 𑀕𑀦𑁆𑀣𑀺𑀢𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀧𑁄𑀝𑀬𑀺𑀢𑁆𑀯𑀸 𑀯𑀺𑀲𑀚𑁆𑀚𑀸𑀢𑀺 𑁋 𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚.

𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀻𑀢𑀺 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 𑀦 𑀲𑀜𑁆𑀚𑀦𑁂𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

‘‘𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺;

𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚, 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

𑀲𑀻𑀫𑀸𑀢𑀺𑀕𑁄 ¶ 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀁;

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄, 𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

𑀲𑀻𑀫𑀸𑀢𑀺𑀕𑁄 ¶ 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀲𑀻𑀫𑀸𑀢𑀺 𑀘𑀢𑀲𑁆𑀲𑁄 𑀲𑀻𑀫𑀸𑀬𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀧𑀞𑀫𑀸 𑀲𑀻𑀫𑀸. 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁, 𑀑𑀴𑀸𑀭𑀺𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀤𑀼𑀢𑀺𑀬𑀸 𑀲𑀻𑀫𑀸. 𑀅𑀦𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁, 𑀅𑀦𑀼𑀲𑀳𑀕𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀢𑀢𑀺𑀬𑀸 𑀲𑀻𑀫𑀸. 𑀭𑀽𑀧𑀭𑀸𑀕𑁄 ¶ 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸, 𑀫𑀸𑀦𑀸𑀦𑀼𑀲𑀬𑁄 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀲𑀻𑀫𑀸. 𑀬𑀢𑁄 𑀘 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀇𑀫𑀸 𑀘𑀢𑀲𑁆𑀲𑁄 𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀻𑀫𑀸𑀢𑀺𑀕𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺 ¶ , 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲.

𑀜𑀢𑁆𑀯𑀸𑀢𑀺 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 𑀯𑀸 𑀜𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀜𑀢𑁆𑀯𑀸. 𑀤𑀺𑀲𑁆𑀯𑀸𑀢𑀺 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸. 𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 ¶ 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀢𑀲𑁆𑀲 𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 [𑀯𑀺𑀲𑁂𑀝𑁆𑀞𑀁 (𑀲𑀻. 𑀲𑁆𑀬𑀸.)] 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀁.

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄𑀢𑀺. 𑀭𑀸𑀕𑀭𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀯𑀺𑀭𑀸𑀕𑀭𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄𑀢𑀺 𑀬𑀢𑁄 𑀓𑀸𑀫𑀭𑀸𑀕𑁄 𑀘 𑀭𑀽𑀧𑀭𑀸𑀕𑁄 𑀘 𑀅𑀭𑀽𑀧𑀭𑀸𑀕𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 [𑀅𑀦𑀪𑀸𑀯𑀓𑀢𑀸 (𑀲𑀻.), 𑀅𑀦𑀪𑀸𑀯𑀁𑀕𑀢𑀸 (𑀲𑁆𑀬𑀸.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀢𑁆𑀢𑀸𑀯𑀢𑀸 𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄.

𑀢𑀲𑁆𑀲𑀻𑀥 ¶ 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀢𑀲𑁆𑀲 𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 ¶ 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

‘‘𑀲𑀻𑀫𑀸𑀢𑀺𑀕𑁄 ¶ 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀁;

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄, 𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢’’𑀦𑁆𑀢𑀺.

𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀘𑀢𑀼𑀢𑁆𑀣𑁄.

𑁫. 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀧𑀭𑀫𑀦𑁆𑀢𑀺 ¶ ¶ 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄, 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂;

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳, 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄.

𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀧𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀺. 𑀬𑀣𑀸 𑀆𑀕𑀸𑀭𑀺𑀓𑀸 𑀯𑀸 𑀖𑀭𑁂𑀲𑀼 𑀯𑀲𑀦𑁆𑀢𑀺, 𑀲𑀸𑀧𑀢𑁆𑀢𑀺𑀓𑀸 𑀯𑀸 𑀆𑀧𑀢𑁆𑀢𑀻𑀲𑀼 𑀯𑀲𑀦𑁆𑀢𑀺, 𑀲𑀓𑀺𑀮𑁂𑀲𑀸 𑀯𑀸 𑀓𑀺𑀮𑁂𑀲𑁂𑀲𑀼 𑀯𑀲𑀦𑁆𑀢𑀺; 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀧𑀯𑀲𑀦𑁆𑀢𑀺 [𑀲𑀁𑀯𑀲𑀦𑁆𑀢𑀺 (𑀲𑁆𑀬𑀸.) 𑀦𑀢𑁆𑀣𑀺 𑀲𑀻𑀳𑀴𑀧𑁄𑀢𑁆𑀣𑀓𑁂] 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄.

𑀬𑀤𑀼𑀢𑁆𑀢𑀭𑀺𑀁 ¶ 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂𑀢𑀺. 𑀬𑀤𑀦𑁆𑀢𑀺 𑀬𑀁. 𑀉𑀢𑁆𑀢𑀭𑀺𑀁 𑀓𑀼𑀭𑀼𑀢𑁂𑀢𑀺 𑀉𑀢𑁆𑀢𑀭𑀺𑀁 𑀓𑀭𑁄𑀢𑀺, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 ¶ 𑀉𑀢𑁆𑀢𑀫𑀁 𑀧𑀯𑀭𑀁 ¶ 𑀓𑀭𑁄𑀢𑀺 ‘‘𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽’’𑀢𑀺 𑀉𑀢𑁆𑀢𑀭𑀺𑀁 𑀓𑀭𑁄𑀢𑀺, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺. ‘‘𑀅𑀬𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄…, 𑀅𑀬𑀁 𑀕𑀡𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄…, 𑀅𑀬𑀁 𑀤𑀺𑀝𑁆𑀞𑀺 𑀪𑀤𑁆𑀤𑀺𑀓𑀸…, 𑀅𑀬𑀁 𑀧𑀝𑀺𑀧𑀤𑀸 𑀲𑀼𑀧𑀜𑁆𑀜𑀢𑁆𑀢𑀸…, 𑀅𑀬𑀁 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀉𑀢𑁆𑀢𑀭𑀺𑀁 𑀓𑀭𑁄𑀢𑀺, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄…𑀧𑁂… 𑀫𑀦𑀼𑀚𑁄. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂.

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳𑀸𑀢𑀺 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 ¶ 𑀲𑀩𑁆𑀩𑁂 𑀧𑀭𑀧𑁆𑀧𑀯𑀸𑀤𑁂 𑀔𑀺𑀧𑀢𑀺 𑀉𑀓𑁆𑀔𑀺𑀧𑀢𑀺 𑀧𑀭𑀺𑀓𑁆𑀔𑀺𑀧𑀢𑀺. ‘‘𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸, 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 𑀯𑀸, 𑀦𑀢𑁆𑀣𑁂𑀢𑁆𑀣 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸’’𑀢𑀺 𑀏𑀯𑀫𑀸𑀳 𑀏𑀯𑀁 𑀓𑀣𑁂𑀢𑀺 𑀏𑀯𑀁 𑀪𑀡𑀢𑀺 𑀏𑀯𑀁 𑀤𑀻𑀧𑀬𑀢𑀺 𑀏𑀯𑀁 𑀯𑁄𑀳𑀭𑀢𑀻𑀢𑀺 𑁋 𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳.

𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸. 𑀯𑀺𑀯𑀸𑀤𑀸𑀦𑀻𑀢𑀺 𑀤𑀺𑀝𑁆𑀞𑀺𑀓𑀮𑀳𑀸𑀦𑀺 𑀤𑀺𑀝𑁆𑀞𑀺𑀪𑀡𑁆𑀟𑀦𑀸𑀦𑀺 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑀸𑀦𑀺 𑀤𑀺𑀝𑁆𑀞𑀺𑀯𑀺𑀯𑀸𑀤𑀸𑀦𑀺 𑀤𑀺𑀝𑁆𑀞𑀺𑀫𑁂𑀥𑀕𑀸𑀦𑀺 𑀘. 𑀅𑀯𑀻𑀢𑀺𑀯𑀢𑁆𑀢𑁄𑀢𑀺 𑀅𑀦𑀢𑀺𑀓𑁆𑀓𑀦𑁆𑀢𑁄 𑀅𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀢𑀲𑁆𑀫𑀸 ¶ 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄.

‘‘𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄, 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂;

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳, 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄’’𑀢𑀺.

𑀬𑀤𑀢𑁆𑀢𑀦𑀻 ¶ 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬, 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀁.

𑀬𑀤𑀢𑁆𑀢𑀦𑀻 ¶ 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀬𑀤𑀢𑁆𑀢𑀦𑀻𑀢𑀺 𑀬𑀁 𑀅𑀢𑁆𑀢𑀦𑀺. 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀆𑀦𑀺𑀲𑀁𑀲𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀦𑀺𑀲𑀁𑀲𑀁. 𑀓𑀢𑀫𑁄 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄? 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀺, 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺. 𑀢𑀁𑀤𑀺𑀝𑁆𑀞𑀺𑀓𑀁 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀮𑀪𑀢𑀺 𑀘 𑀢𑀢𑁄𑀦𑀺𑀤𑀸𑀦𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀅𑀬𑀁 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄. 𑀓𑀢𑀫𑁄 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄? 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸 𑀲𑀼𑀧𑀡𑁆𑀡𑀢𑁆𑀢𑀸𑀬 𑀯𑀸 𑀬𑀓𑁆𑀔𑀢𑁆𑀢𑀸𑀬 𑀯𑀸 𑀅𑀲𑀼𑀭𑀢𑁆𑀢𑀸𑀬 𑀯𑀸 𑀕𑀦𑁆𑀥𑀩𑁆𑀩𑀢𑁆𑀢𑀸𑀬 ¶ 𑀯𑀸 𑀫𑀳𑀸𑀭𑀸𑀚𑀢𑁆𑀢𑀸𑀬 𑀯𑀸 𑀇𑀦𑁆𑀤𑀢𑁆𑀢𑀸𑀬 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸𑀬 𑀯𑀸 𑀤𑁂𑀯𑀢𑁆𑀢𑀸𑀬 𑀯𑀸; 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀤𑁆𑀥𑀺𑀬𑀸 𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀫𑀼𑀢𑁆𑀢𑀺𑀬𑀸; 𑀇𑀫𑀸𑀬 𑀤𑀺𑀝𑁆𑀞𑀺𑀬𑀸 𑀲𑀼𑀚𑁆𑀛𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑁆𑀢𑀺 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀫𑀼𑀘𑁆𑀘𑀦𑁆𑀢𑀺 𑀯𑀺𑀫𑀼𑀘𑁆𑀘𑀦𑁆𑀢𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺; 𑀇𑀫𑀸𑀬 𑀤𑀺𑀝𑁆𑀞𑀺𑀬𑀸 𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀯𑀺𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀧𑀭𑀺𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀯𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀆𑀬𑀢𑀺𑀁 ¶ 𑀨𑀮𑀧𑀸𑀝𑀺𑀓𑀗𑁆𑀔𑀻 𑀳𑁄𑀢𑀺. 𑀅𑀬𑀁 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀇𑀫𑁂 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀲𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀲𑀻𑀮𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀯𑀢𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀫𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀆𑀦𑀺𑀲𑀁𑀲𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀦𑀺𑀲𑀁𑀲𑀁. 𑀓𑀢𑀫𑁄 𑀫𑀼𑀢𑀲𑀼𑀤𑁆𑀥𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄? 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀺 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀅𑀬𑀁 𑀫𑀼𑀢𑀲𑀼𑀤𑁆𑀥𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄. 𑀓𑀢𑀫𑁄 ¶ 𑀫𑀼𑀢𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄? 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸…𑀧𑁂… 𑀅𑀬𑀁 𑀫𑀼𑀢𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄. 𑀫𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀇𑀫𑁂 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸.

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬𑀸𑀢𑀺. 𑀢𑀤𑁂𑀯𑀸𑀢𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁. 𑀢𑀢𑁆𑀣𑀸𑀢𑀺 ¶ 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀲𑀫𑀼𑀕𑁆𑀕𑀳𑀸𑀬𑀸𑀢𑀺 𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬.

𑀦𑀺𑀳𑀻𑀦𑀢𑁄 ¶ 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀦𑁆𑀢𑀺. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀺𑀲𑁆𑀲𑀢𑀺 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀁.

‘‘𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬, 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜’’𑀦𑁆𑀢𑀺.

𑀢𑀁 𑀯𑀸𑀧𑀺 [𑀘𑀸𑀧𑀺 (𑀲𑀻.)] 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁;

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬.

𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 ¶ 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀕𑀦𑁆𑀣𑁄 𑀏𑀲𑁄, 𑀮𑀕𑁆𑀕𑀦𑀁 𑀏𑀢𑀁, 𑀩𑀦𑁆𑀥𑀦𑀁 𑀏𑀢𑀁, 𑀧𑀮𑀺𑀩𑁄𑀥𑁄 ¶ 𑀏𑀲𑁄’’𑀢𑀺. 𑀏𑀯𑀁 𑀯𑀤𑀦𑁆𑀢𑀺 𑀏𑀯𑀁 ¶ 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀦𑁆𑀢𑀺. 𑀬𑀁 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑁄 𑀲𑀦𑁆𑀦𑀺𑀲𑁆𑀲𑀺𑀢𑁄 𑀅𑀮𑁆𑀮𑀻𑀦𑁄 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄. 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀺𑀲𑁆𑀲𑀢𑀺 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁.

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀤𑀺𑀝𑁆𑀞𑀁 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀁 𑀯𑀸 𑀲𑀼𑀢𑀁 𑀯𑀸 𑀲𑀼𑀢𑀲𑀼𑀤𑁆𑀥𑀺𑀁 𑀯𑀸 𑀫𑀼𑀢𑀁 𑀯𑀸 𑀫𑀼𑀢𑀲𑀼𑀤𑁆𑀥𑀺𑀁 𑀯𑀸 𑀲𑀻𑀮𑀁 𑀯𑀸 ¶ 𑀲𑀻𑀮𑀲𑀼𑀤𑁆𑀥𑀺𑀁 𑀯𑀸 𑀯𑀢𑀁 𑀯𑀸 𑀯𑀢𑀲𑀼𑀤𑁆𑀥𑀺𑀁 𑀯𑀸 𑀦 𑀦𑀺𑀲𑁆𑀲𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑁋 𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬.

‘‘𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁;

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬𑀸’’𑀢𑀺.

𑀤𑀺𑀝𑁆𑀞𑀺𑀫𑁆𑀧𑀺 ¶ 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺;

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀺.

𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀻𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸, 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀲𑀻𑀮𑀩𑁆𑀩𑀢𑁂𑀦 𑀯𑀸 ¶ , 𑀤𑀺𑀝𑁆𑀞𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺.

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬𑀸𑀢𑀺. 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 ¶ 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬.

𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀻𑀢𑀺. 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀳𑀻𑀦𑁄 𑀦 𑀫𑀜𑁆𑀜𑁂𑀣 ¶ 𑀯𑀺𑀲𑁂𑀲𑀺 𑀯𑀸𑀧𑀺.

‘‘𑀤𑀺𑀝𑁆𑀞𑀺𑀫𑁆𑀧𑀺 ¶ 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺;

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀻’’𑀢𑀺.

𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄, 𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺;

𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻, 𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀺.

𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄𑀢𑀺. 𑀅𑀢𑁆𑀢𑀁 𑀧𑀳𑀸𑀬𑀸𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀳𑀸𑀬. 𑀅𑀢𑁆𑀢𑀁 𑀧𑀳𑀸𑀬𑀸𑀢𑀺 𑀕𑀸𑀳𑀁 [𑀅𑀢𑁆𑀢𑀕𑀸𑀳𑀁 (𑀲𑀻. 𑀓.)] 𑀧𑀳𑀸𑀬. 𑀅𑀢𑁆𑀢𑀁 𑀧𑀳𑀸𑀬𑀸𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀅𑀢𑁆𑀢𑀁 ¶ 𑀧𑀳𑀸𑀬. 𑀅𑀦𑀼𑀧𑀸𑀤𑀺𑀬𑀸𑀦𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀫𑀸𑀦𑁄 𑀅𑀕𑀡𑁆𑀳𑀫𑀸𑀦𑁄 𑀅𑀧𑀭𑀸𑀫𑀸𑀲𑀫𑀸𑀦𑁄 𑀅𑀦𑀪𑀺𑀦𑀺𑀯𑀺𑀲𑀫𑀸𑀦𑁄𑀢𑀺 𑁋 𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄.

𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀻𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀯𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀯𑀸 𑀦 𑀓𑀭𑁄𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺.

𑀲 ¶ 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻𑀢𑀺 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀪𑀺𑀦𑁆𑀦𑁂𑀲𑀼 𑀤𑁆𑀯𑁂𑀚𑁆𑀛𑀸𑀧𑀦𑁆𑀦𑁂𑀲𑀼 𑀤𑁆𑀯𑁂𑀴𑁆𑀳𑀓𑀚𑀸𑀢𑁂𑀲𑀼 𑀦𑀸𑀦𑀸𑀤𑀺𑀝𑁆𑀞𑀺𑀓𑁂𑀲𑀼 𑀦𑀸𑀦𑀸𑀔𑀦𑁆𑀢𑀺𑀓𑁂𑀲𑀼 𑀦𑀸𑀦𑀸𑀭𑀼𑀘𑀺𑀓𑁂𑀲𑀼 𑀦𑀸𑀦𑀸𑀮𑀤𑁆𑀥𑀺𑀓𑁂𑀲𑀼 𑀦𑀸𑀦𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀺𑀢𑁂𑀲𑀼 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀤𑀺𑀝𑁆𑀞𑀺𑀯𑀲𑁂𑀦 ¶ 𑀕𑀘𑁆𑀙𑀢𑀺 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻.

𑀤𑀺𑀝𑁆𑀞𑀺𑀫𑁆𑀧𑀺 ¶ 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀻𑀢𑀺. 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀓𑀺𑀜𑁆𑀘𑀺 𑀤𑀺𑀝𑁆𑀞𑀺𑀕𑀢𑀁 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀺.

‘‘𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄, 𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺;

𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻, 𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀻’’𑀢𑀺.

𑀬𑀲𑁆𑀲𑀽𑀪𑀬𑀦𑁆𑀢𑁂 ¶ 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸;

𑀦𑀺𑀯𑁂𑀲𑀦𑀸 ¶ 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀅𑀦𑁆𑀢𑁄𑀢𑀺 [𑀅𑀦𑁆𑀢𑀸𑀢𑀺 (𑀲𑁆𑀬𑀸.)] 𑀨𑀲𑁆𑀲𑁄 𑀏𑀓𑁄 𑀅𑀦𑁆𑀢𑁄, 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀅𑀢𑀻𑀢𑁄 𑀏𑀓𑁄 𑀅𑀦𑁆𑀢𑁄, 𑀅𑀦𑀸𑀕𑀢𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀲𑀼𑀔𑀸 𑀯𑁂𑀤𑀦𑀸 𑀏𑀓𑁄 𑀅𑀦𑁆𑀢𑁄, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀦𑀸𑀫𑀁 𑀏𑀓𑁄 𑀅𑀦𑁆𑀢𑁄, 𑀭𑀽𑀧𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀓𑁄 𑀅𑀦𑁆𑀢𑁄, 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄. 𑀧𑀡𑀺𑀥𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁.

𑀪𑀯𑀸𑀪𑀯𑀸𑀬𑀸𑀢𑀺 𑀪𑀯𑀸𑀪𑀯𑀸𑀬 𑀓𑀫𑁆𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀓𑀸𑀫𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀓𑀸𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀅𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀅𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀇𑀥𑀸𑀢𑀺 𑀲𑀓𑀢𑁆𑀢𑀪𑀸𑀯𑁄, 𑀳𑀼𑀭𑀸𑀢𑀺 𑀧𑀭𑀢𑁆𑀢𑀪𑀸𑀯𑁄; 𑀇𑀥𑀸𑀢𑀺 𑀲𑀓𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀳𑀼𑀭𑀸𑀢𑀺 𑀧𑀭𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁; 𑀇𑀥𑀸𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀳𑀼𑀭𑀸𑀢𑀺 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺; 𑀇𑀥𑀸𑀢𑀺 𑀫𑀦𑀼𑀲𑁆𑀲𑀮𑁄𑀓𑁄, 𑀳𑀼𑀭𑀸𑀢𑀺 𑀤𑁂𑀯𑀮𑁄𑀓𑁄 ¶ ; 𑀇𑀥𑀸𑀢𑀺 𑀓𑀸𑀫𑀥𑀸𑀢𑀼, 𑀳𑀼𑀭𑀸𑀢𑀺 𑀭𑀽𑀧𑀥𑀸𑀢𑀼 𑀅𑀭𑀽𑀧𑀥𑀸𑀢𑀼; 𑀇𑀥𑀸𑀢𑀺 𑀓𑀸𑀫𑀥𑀸𑀢𑀼 ¶ 𑀭𑀽𑀧𑀥𑀸𑀢𑀼. 𑀳𑀼𑀭𑀸𑀢𑀺 𑀅𑀭𑀽𑀧𑀥𑀸𑀢𑀼. 𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺. 𑀬𑀲𑁆𑀲 𑀉𑀪𑁄 𑀅𑀦𑁆𑀢𑁂 ¶ 𑀘 𑀪𑀯𑀸𑀪𑀯𑀸𑀬 𑀘 𑀇𑀥 𑀳𑀼𑀭𑀜𑁆𑀘 𑀧𑀡𑀺𑀥𑀺 𑀢𑀡𑁆𑀳𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 ¶ 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸.

𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀻𑀢𑀺. 𑀦𑀺𑀯𑁂𑀲𑀦𑀸𑀢𑀺 𑀤𑁆𑀯𑁂 𑀦𑀺𑀯𑁂𑀲𑀦𑀸 𑁋 𑀢𑀡𑁆𑀳𑀸𑀦𑀺𑀯𑁂𑀲𑀦𑀸 𑀘 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀯𑁂𑀲𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀻𑀢𑀺 𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺.

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼. 𑀦𑀺𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀺𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺 𑀑𑀥𑀺𑀕𑁆𑀕𑀸𑀳𑁄 𑀩𑀺𑀮𑀕𑁆𑀕𑀸𑀳𑁄 𑀯𑀭𑀕𑁆𑀕𑀸𑀳𑁄 𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑁄 𑀉𑀘𑁆𑀘𑀬𑀕𑁆𑀕𑀸𑀳𑁄 𑀲𑀫𑀼𑀘𑁆𑀘𑀬𑀕𑁆𑀕𑀸𑀳𑁄, ‘‘𑀇𑀤𑀁 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢’’𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

‘‘𑀬𑀲𑁆𑀲𑀽𑀪𑀬𑀦𑁆𑀢𑁂 ¶ 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸;

𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢’’𑀦𑁆𑀢𑀺.

𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸;

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

𑀢𑀲𑁆𑀲𑀻𑀥 ¶ 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 ¶ 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸 𑀯𑀸 𑀲𑀼𑀢𑁂 𑀯𑀸 𑀲𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀫𑀼𑀢𑁂 𑀯𑀸 𑀫𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀲𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀢𑀸 𑀲𑀜𑁆𑀜𑀸𑀯𑀺𑀓𑀧𑁆𑀧𑀬𑁂𑀬𑁆𑀬𑀢𑀸 𑀲𑀜𑁆𑀜𑀸𑀯𑀺𑀕𑁆𑀕𑀳𑁂𑀦 𑀲𑀜𑁆𑀜𑀸𑀬 𑀉𑀝𑁆𑀞𑀧𑀺𑀢𑀸 𑀲𑀫𑀼𑀝𑁆𑀞𑀧𑀺𑀢𑀸 𑀓𑀧𑁆𑀧𑀺𑀢𑀸 𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀅𑀪𑀺𑀲𑀗𑁆𑀔𑀢𑀸 𑀲𑀡𑁆𑀞𑀧𑀺𑀢𑀸, 𑀤𑀺𑀝𑁆𑀞𑀺 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 ¶ 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸.

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀦𑁆𑀢𑀺. 𑀢𑀁 𑀩𑁆𑀭𑀸𑀳𑁆𑀫𑀡𑀁 ¶ 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀦𑁆𑀢𑀁 𑀅𑀕𑀡𑁆𑀳𑀦𑁆𑀢𑀁 𑀅𑀧𑀭𑀸𑀫𑀲𑀦𑁆𑀢𑀁 𑀅𑀦𑀪𑀺𑀦𑀺𑀯𑁂𑀲𑀦𑁆𑀢𑀦𑁆𑀢𑀺 𑁋 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁.

𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬𑀸𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑁂𑀦 𑀭𑀸𑀕𑁂𑀦 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀤𑁄𑀲𑁂𑀦 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀫𑁄𑀳𑁂𑀦 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀫𑀸𑀦𑁂𑀦 𑀓𑀧𑁆𑀧𑁂𑀬𑁆𑀬 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀓𑀧𑁆𑀧𑁂𑀬𑁆𑀬 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀧𑁆𑀧𑁂𑀬𑁆𑀬 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀓𑀧𑁆𑀧𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑁄 𑀓𑁂𑀦 𑀓𑀧𑁆𑀧𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 ¶ 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

‘‘𑀢𑀲𑁆𑀲𑀻𑀥 ¶ 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸;

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬𑀸’’𑀢𑀺.

𑀦 ¶ 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄, 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻.

𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀓𑀧𑁆𑀧𑁄? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀫𑀭𑀺𑀬𑀸𑀤𑀺𑀓𑀢𑀁 𑀑𑀥𑀺𑀓𑀢𑀁 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 ¶ 𑀫𑀫𑀸𑀬𑀺𑀢𑀁 𑁋 ‘‘𑀇𑀤𑀁 𑀫𑀫𑀁, 𑀏𑀢𑀁 𑀫𑀫𑀁, 𑀏𑀢𑁆𑀢𑀓𑀁 𑀫𑀫𑀁, 𑀏𑀢𑁆𑀢𑀸𑀯𑀢𑀸 𑀫𑀫𑀁, 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 [𑀤𑀸𑀲𑀻𑀤𑀸𑀲𑀸 (𑀲𑁆𑀬𑀸. 𑀓.)] 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀬𑀸𑀯𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄. 𑀓𑀢𑀫𑁄 𑀤𑀺𑀝𑁆𑀞𑀺𑀓𑀧𑁆𑀧𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 ¶ 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺, 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 ¶ 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 [𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 (𑀲𑀻. 𑀲𑁆𑀬𑀸. 𑀓.)] 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄, 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑁂𑀲𑀁 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 𑀦 𑀲𑀜𑁆𑀚𑀦𑁂𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺.

𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑁂𑀲𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦 𑀢𑀡𑁆𑀳𑀁 𑀯𑀸 𑀦 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀦𑁆𑀢𑀺 𑀦 𑀢𑀡𑁆𑀳𑀸𑀥𑀚𑀸 𑀦 𑀢𑀡𑁆𑀳𑀸𑀓𑁂𑀢𑀽 𑀦 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑀸 𑀦 𑀤𑀺𑀝𑁆𑀞𑀺𑀥𑀚𑀸 𑀦 𑀤𑀺𑀝𑁆𑀞𑀺𑀓𑁂𑀢𑀽 𑀦 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑀸. 𑀦 𑀢𑀡𑁆𑀳𑀸𑀬 𑀯𑀸 𑀦 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺.

𑀥𑀫𑁆𑀫𑀸𑀧𑀺 ¶ 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺. 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀅𑀭𑀳𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁. 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺 ¶ ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄… 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺 𑁋 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂.

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺…𑀧𑁂… ¶ 𑀅𑀲𑀺𑀢𑁄 𑀢𑀸𑀤𑀺 𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸 ¶ . 𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀲𑀻𑀮𑀩𑁆𑀩𑀢𑁂𑀦 𑀯𑀸 𑀦 𑀬𑀸𑀬𑀢𑀺 𑀦 𑀦𑀺𑀬𑁆𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄.

𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻𑀢𑀺. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑁄 𑀧𑀸𑀭𑀗𑁆𑀕𑀢𑁄 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 [𑀯𑀺𑀢𑁆𑀣𑀸𑀭𑁄] 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀧𑀸𑀭𑀗𑁆𑀕𑀢𑁄. 𑀦 𑀧𑀘𑁆𑀘𑁂𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 ¶ 𑁋 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺. 𑀢𑀸𑀤𑀻𑀢𑀺 𑀅𑀭𑀳𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑁋 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀅𑀭𑀳𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻, 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻. 𑀏𑀓𑀘𑁆𑀘𑁂 𑀩𑀸𑀳𑀁 [𑀅𑀗𑁆𑀕𑀁 (𑀲𑀻.)] 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀘𑁆𑀘𑁂 ¶ 𑀩𑀸𑀳𑀁 [𑀅𑀗𑁆𑀕𑀁 (𑀲𑀻.)] 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀁 𑁋 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀁, 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀲𑀫𑀢𑀺𑀓𑁆𑀓𑀦𑁆𑀢𑁄. 𑀏𑀯𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄 𑀭𑀸𑀕𑁄 𑀘𑀢𑁆𑀢𑁄 𑀯𑀦𑁆𑀢𑁄 ¶ 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀤𑁄𑀲𑁄…𑀧𑁂… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀢𑁆𑀢𑀸 𑀯𑀦𑁆𑀢𑀸 𑀫𑀼𑀢𑁆𑀢𑀸 𑀧𑀳𑀻𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸. 𑀏𑀯𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄 𑀪𑀯𑁄𑀖𑀁 𑀢𑀺𑀡𑁆𑀡𑁄 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 ¶ 𑀯𑀻𑀢𑀺𑀯𑀢𑁆𑀢𑁄 ¶ . 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺. 𑀏𑀯𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀫𑁄𑀳𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀓𑁄𑀥𑀸…𑀧𑁂… 𑀉𑀧𑀦𑀸𑀳𑀸… 𑀫𑀓𑁆𑀔𑀸… 𑀧𑀴𑀸𑀲𑀸… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀸… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀸… 𑀣𑀫𑁆𑀪𑀸… 𑀲𑀸𑀭𑀫𑁆𑀪𑀸… 𑀫𑀸𑀦𑀸… 𑀅𑀢𑀺𑀫𑀸𑀦𑀸… 𑀫𑀤𑀸… 𑀧𑀫𑀸𑀤𑀸… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀏𑀯𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻? 𑀅𑀭𑀳𑀸 𑀲𑀻𑀮𑁂 𑀲𑀢𑀺 𑀲𑀻𑀮𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀯𑀻𑀭𑀺𑀬𑁂 𑀲𑀢𑀺 𑀯𑀻𑀭𑀺𑀬𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀲𑀢𑀺𑀬𑀸 𑀲𑀢𑀺 𑀲𑀢𑀺𑀫𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑀸𑀳𑀺𑀢𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀧𑀜𑁆𑀜𑀸𑀬 𑀲𑀢𑀺 𑀧𑀜𑁆𑀜𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀯𑀺𑀚𑁆𑀚𑀸𑀬 𑀲𑀢𑀺 𑀢𑁂𑀯𑀺𑀚𑁆𑀚𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀅𑀪𑀺𑀜𑁆𑀜𑀸𑀬 𑀲𑀢𑀺 𑀙𑀴𑀪𑀺𑀜𑁆𑀜𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻. 𑀏𑀯𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 ¶ 𑀢𑀸𑀤𑀻𑀢𑀺 𑁋 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻.

‘‘𑀦 ¶ 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 ¶ 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄, 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻’’𑀢𑀺.

𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.

𑀅𑀣 ¶ 𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀅𑀧𑁆𑀧𑀁 ¶ ¶ 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺 [𑀫𑀻𑀬𑀢𑀺 (𑀲𑀻.)] ;

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺, 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀺.

𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀦𑁆𑀢𑀺. 𑀚𑀻𑀯𑀺𑀢𑀦𑁆𑀢𑀺 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀧𑀺 𑀘, 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑁋 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁, 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁. 𑀓𑀣𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁? 𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺; 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀲𑁆𑀲𑀢𑀺, 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣; 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀢𑀺, 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀺𑀲𑁆𑀲𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦 𑀢𑁆𑀯𑁂𑀯 𑀢𑁂𑀧𑀺 𑀚𑀻𑀯𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀁𑀬𑀼𑀢𑀸 [𑀲𑀫𑁄𑀳𑀺𑀢𑀸 (𑀲𑀻. 𑀲𑁆𑀬𑀸. 𑀓.)].

‘‘𑀬𑁂 ¶ 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

‘‘𑀅𑀦𑀦𑁆𑀢𑀭𑀸 ¶ 𑀘 𑀬𑁂 𑀪𑀕𑁆𑀕𑀸, 𑀬𑁂 𑀘 𑀪𑀕𑁆𑀕𑀸 𑀅𑀦𑀸𑀕𑀢𑀸;

𑀢𑀤𑀦𑁆𑀢𑀭𑁂 𑀦𑀺𑀭𑀼𑀤𑁆𑀥𑀸𑀦𑀁, 𑀯𑁂𑀲𑀫𑀁 𑀦𑀢𑁆𑀣𑀺 𑀮𑀓𑁆𑀔𑀡𑁂.

‘‘𑀅𑀦𑀺𑀩𑁆𑀩𑀢𑁆𑀢𑁂𑀦 ¶ 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀕𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸.

‘‘𑀬𑀣𑀸 ¶ 𑀦𑀺𑀦𑁆𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀙𑀦𑁆𑀤𑁂𑀦 𑀧𑀭𑀺𑀡𑀸𑀫𑀺𑀢𑀸;

𑀅𑀘𑁆𑀙𑀺𑀦𑁆𑀦𑀥𑀸𑀭𑀸 𑀯𑀢𑁆𑀢𑀦𑁆𑀢𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸.

‘‘𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂;

𑀦𑀺𑀩𑁆𑀩𑀢𑁆𑀢𑀸 𑀬𑁂 𑀘 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸.

‘‘𑀦𑀺𑀩𑁆𑀩𑀢𑁆𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀪𑀗𑁆𑀕𑁄 𑀦𑁂𑀲𑀁 𑀧𑀼𑀭𑀓𑁆𑀔𑀢𑁄;

𑀧𑀮𑁄𑀓𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀼𑀭𑀸𑀡𑁂𑀳𑀺 𑀅𑀫𑀺𑀲𑁆𑀲𑀺𑀢𑀸.

‘‘𑀅𑀤𑀲𑁆𑀲𑀦𑀢𑁄 𑀆𑀬𑀦𑁆𑀢𑀺, 𑀪𑀗𑁆𑀕𑀸 𑀕𑀘𑁆𑀙𑀦𑁆𑀢𑀺 𑀤𑀲𑁆𑀲𑀦𑀁;

𑀯𑀺𑀚𑁆𑀚𑀼𑀧𑁆𑀧𑀸𑀤𑁄𑀯 𑀆𑀓𑀸𑀲𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺 𑀘𑀸’’𑀢𑀺.

𑀏𑀯𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁.

𑀓𑀣𑀁 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁? 𑀅𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 [𑀅𑀲𑁆𑀲𑀸𑀲𑀽𑀧𑀦𑀺𑀩𑀦𑁆𑀥𑀁 (𑀓.)] 𑀚𑀻𑀯𑀺𑀢𑀁, 𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀫𑀳𑀸𑀪𑀽𑀢𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀉𑀲𑁆𑀫𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀯𑀺𑀜𑁆𑀜𑀸𑀡𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁. 𑀫𑀽𑀮𑀫𑁆𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀁, 𑀧𑀼𑀩𑁆𑀩𑀳𑁂𑀢𑀽𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀬𑁂 𑀧𑀘𑁆𑀘𑀬𑀸 𑀢𑁂𑀧𑀺 𑀤𑀼𑀩𑁆𑀩𑀮𑀸, 𑀬𑁂𑀧𑀺 𑀧𑀪𑀸𑀯𑀺𑀓𑀸 𑀢𑁂𑀧𑀺 𑀤𑀼𑀩𑁆𑀩𑀮𑀸, 𑀲𑀳𑀪𑀽𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀲𑀫𑁆𑀧𑀬𑁄𑀕𑀸𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀲𑀳𑀚𑀸𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀬𑀸𑀧𑀺 ¶ 𑀧𑀬𑁄𑀚𑀺𑀓𑀸 𑀲𑀸𑀧𑀺 𑀤𑀼𑀩𑁆𑀩𑀮𑀸. 𑀅𑀜𑁆𑀜𑀫𑀜𑁆𑀜𑀁 𑀇𑀫𑁂 𑀦𑀺𑀘𑁆𑀘𑀤𑀼𑀩𑁆𑀩𑀮𑀸, 𑀅𑀜𑁆𑀜𑀫𑀜𑁆𑀜𑀁 ¶ 𑀅𑀦𑀯𑀝𑁆𑀞𑀺𑀢𑀸 𑀇𑀫𑁂. 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀧𑀸𑀢𑀬𑀦𑁆𑀢𑀺 𑀇𑀫𑁂, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺 𑀦𑀢𑁆𑀣𑀺 𑀢𑀸𑀬𑀺𑀢𑀸, 𑀦 𑀘𑀸𑀧𑀺 𑀞𑀧𑁂𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀇𑀫𑁂. 𑀬𑁄𑀧𑀺 𑀦𑀺𑀩𑁆𑀩𑀢𑁆𑀢𑀓𑁄 𑀲𑁄 𑀦 𑀯𑀺𑀚𑁆𑀚𑀢𑀺.

‘‘𑀦 𑀘 𑀓𑁂𑀦𑀘𑀺 𑀓𑁄𑀘𑀺 𑀳𑀸𑀬𑀢𑀺, 𑀕𑀦𑁆𑀥𑀩𑁆𑀩𑀸 𑀘 𑀇𑀫𑁂 𑀳𑀺 𑀲𑀩𑁆𑀩𑀲𑁄;

𑀧𑀼𑀭𑀺𑀫𑁂𑀳𑀺 𑀧𑀪𑀸𑀯𑀺𑀓𑀸 𑀇𑀫𑁂, 𑀬𑁂𑀧𑀺 𑀧𑀪𑀸𑀯𑀺𑀓𑀸 𑀢𑁂 𑀧𑀼𑀭𑁂 𑀫𑀢𑀸;

𑀧𑀼𑀭𑀺𑀫𑀸𑀧𑀺 𑀘 𑀧𑀘𑁆𑀙𑀺𑀫𑀸𑀧𑀺 𑀘, 𑀅𑀜𑁆𑀜𑀫𑀜𑁆𑀜𑀁 𑀦 𑀓𑀤𑀸𑀘𑀺 𑀫𑀤𑁆𑀤𑀲𑀁𑀲𑀽’’𑀢𑀺.

𑀏𑀯𑀁 ¶ 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁.

𑀅𑀧𑀺 𑀘, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸𑀦𑀁 (𑀲𑀻. 𑀲𑁆𑀬𑀸.)] 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑀔𑀡𑀺𑀓𑀁 𑀚𑀻𑀯𑀺𑀢𑀁 𑀮𑀳𑀼𑀓𑀁 𑀚𑀻𑀯𑀺𑀢𑀁 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 ¶ 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀚𑀻𑀯𑀺𑀢𑀁. 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁… 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁… 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑀔𑀡𑀺𑀓𑀁 𑀚𑀻𑀯𑀺𑀢𑀁 𑀮𑀳𑀼𑀓𑀁 𑀚𑀻𑀯𑀺𑀢𑀁 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀚𑀻𑀯𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀧𑁆𑀧𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼, 𑀕𑀫𑀦𑀺𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄.

‘‘𑀅𑀧𑁆𑀧𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀳𑀻𑀴𑁂𑀬𑁆𑀬 𑀦𑀁 𑀲𑀼𑀧𑁄𑀭𑀺𑀲𑁄;

𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄𑀯 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲𑀦𑀸𑀕𑀫𑁄.

‘‘𑀅𑀘𑁆𑀘𑀬𑀦𑁆𑀢𑀺 ¶ 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀔𑀺𑀬𑁆𑀬𑀢𑀺 𑀫𑀘𑁆𑀘𑀸𑀦𑀁, 𑀓𑀼𑀦𑁆𑀦𑀤𑀻𑀦𑀁𑀯 𑀑𑀤𑀓’’𑀦𑁆𑀢𑀺.

𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀻𑀢𑀺. 𑀓𑀮𑀮𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀅𑀩𑁆𑀩𑀼𑀤𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀧𑁂𑀲𑀺𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀖𑀦𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀧𑀲𑀸𑀔𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀚𑀸𑀢𑀫𑀢𑁆𑀢𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀲𑀽𑀢𑀺𑀖𑀭𑁂𑀧𑀺 [𑀧𑀲𑀽𑀢𑀺𑀖𑀭𑁂 (𑀲𑁆𑀬𑀸.), 𑀲𑀽𑀢𑀺𑀓𑀖𑀭𑁂 (𑀓.)] 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀅𑀤𑁆𑀥𑀫𑀸𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀫𑀸𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀤𑁆𑀯𑁂𑀫𑀸𑀲𑀺𑀓𑁄𑀧𑀺…𑀧𑁂… 𑀢𑁂𑀫𑀸𑀲𑀺𑀓𑁄𑀧𑀺… 𑀘𑀢𑀼𑀫𑀸𑀲𑀺𑀓𑁄𑀧𑀺… 𑀧𑀜𑁆𑀘𑀫𑀸𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀙𑀫𑀸𑀲𑀺𑀓𑁄𑀧𑀺… 𑀲𑀢𑁆𑀢𑀫𑀸𑀲𑀺𑀓𑁄𑀧𑀺… 𑀅𑀝𑁆𑀞𑀫𑀸𑀲𑀺𑀓𑁄𑀧𑀺… 𑀦𑀯𑀫𑀸𑀲𑀺𑀓𑁄𑀧𑀺… 𑀤𑀲𑀫𑀸𑀲𑀺𑀓𑁄𑀧𑀺… 𑀲𑀁𑀯𑀘𑁆𑀙𑀭𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀤𑁆𑀯𑁂𑀯𑀲𑁆𑀲𑀺𑀓𑁄𑀧𑀺… 𑀢𑀺𑀯𑀲𑁆𑀲𑀺𑀓𑁄𑀧𑀺… 𑀘𑀢𑀼𑀯𑀲𑁆𑀲𑀺𑀓𑁄𑀧𑀺… 𑀧𑀜𑁆𑀘𑀯𑀲𑁆𑀲𑀺𑀓𑁄𑀧𑀺 ¶ … 𑀙𑀯𑀲𑁆𑀲𑀺𑀓𑁄𑀧𑀺… 𑀲𑀢𑁆𑀢𑀯𑀲𑁆𑀲𑀺𑀓𑁄𑀧𑀺… 𑀅𑀝𑁆𑀞𑀯𑀲𑁆𑀲𑀺𑀓𑁄𑀧𑀺… 𑀦𑀯𑀯𑀲𑁆𑀲𑀺𑀓𑁄𑀧𑀺… 𑀤𑀲𑀯𑀲𑁆𑀲𑀺𑀓𑁄𑀧𑀺… 𑀯𑀻𑀲𑀢𑀺𑀯𑀲𑁆𑀲𑀺𑀓𑁄𑀧𑀺… 𑀢𑀺𑀁𑀲𑀯𑀲𑁆𑀲𑀺𑀓𑁄𑀧𑀺… 𑀘𑀢𑁆𑀢𑀸𑀭𑀻𑀲𑀯𑀲𑁆𑀲𑀺𑀓𑁄𑀧𑀺… 𑀧𑀜𑁆𑀜𑀸𑀲𑀯𑀲𑁆𑀲𑀺𑀓𑁄𑀧𑀺… 𑀲𑀝𑁆𑀞𑀺𑀯𑀲𑁆𑀲𑀺𑀓𑁄𑀧𑀺… 𑀲𑀢𑁆𑀢𑀢𑀺𑀯𑀲𑁆𑀲𑀺𑀓𑁄𑀧𑀺… 𑀅𑀲𑀻𑀢𑀺𑀯𑀲𑁆𑀲𑀺𑀓𑁄𑀧𑀺… 𑀦𑀯𑀼𑀢𑀺𑀯𑀲𑁆𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀻𑀢𑀺 𑁋 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺.

𑀬𑁄 ¶ ¶ 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀻𑀢𑀺. 𑀬𑁄 𑀯𑀲𑁆𑀲𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀢𑀺 𑀲𑁄 𑀏𑀓𑀁 𑀯𑀸 𑀯𑀲𑁆𑀲𑀁 𑀚𑀻𑀯𑀢𑀺, 𑀤𑁆𑀯𑁂 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀢𑀻𑀡𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀧𑀜𑁆𑀘 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺…𑀧𑁂… 𑀤𑀲 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀯𑀻𑀲𑀢𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀢𑀺𑀁𑀲𑀁 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀘𑀢𑁆𑀢𑀸𑀭𑀻𑀲𑀁 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀻𑀢𑀺 𑁋 𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺. 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻𑀢𑀺. 𑀬𑀤𑀸 𑀚𑀺𑀡𑁆𑀡𑁄 𑀳𑁄𑀢𑀺 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄 𑀔𑀡𑁆𑀟𑀤𑀦𑁆𑀢𑁄 ¶ 𑀧𑀮𑀺𑀢𑀓𑁂𑀲𑁄 𑀯𑀺𑀮𑀽𑀦𑀁 𑀔𑀮𑀺𑀢𑀲𑀺𑀭𑁄 [𑀔𑀮𑀺𑀢𑀁 𑀲𑀺𑀭𑁄 (𑀲𑀻.)] 𑀯𑀮𑀺𑀦𑀁 𑀢𑀺𑀮𑀓𑀸𑀳𑀢𑀕𑀢𑁆𑀢𑁄 𑀯𑀗𑁆𑀓𑁄 𑀪𑁄𑀕𑁆𑀕𑁄 𑀤𑀡𑁆𑀟𑀧𑀭𑀸𑀬𑀦𑁄, 𑀲𑁄 𑀚𑀭𑀸𑀬𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀦𑀢𑁆𑀣𑀺 𑀫𑀭𑀡𑀫𑁆𑀳𑀸 𑀫𑁄𑀓𑁆𑀔𑁄.

‘‘𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦𑀁, 𑀧𑀸𑀢𑁄 𑀧𑀢𑀦𑀢𑁄 [𑀧𑀧𑀢𑀢𑁄 (𑀲𑀻.)] 𑀪𑀬𑀁;

𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀁.

‘‘𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀓𑀢𑀸 𑀫𑀢𑁆𑀢𑀺𑀓𑀪𑀸𑀚𑀦𑀸;

𑀲𑀩𑁆𑀩𑁂 𑀪𑁂𑀤𑀦𑀧𑀭𑀺𑀬𑀦𑁆𑀢𑀸, 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁.

‘‘𑀤𑀳𑀭𑀸 𑀘 𑀫𑀳𑀦𑁆𑀢𑀸 𑀘, 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸;

𑀲𑀩𑁆𑀩𑁂 𑀫𑀘𑁆𑀘𑀼𑀯𑀲𑀁 𑀬𑀦𑁆𑀢𑀺, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀦𑀸.

‘‘𑀢𑁂𑀲𑀁 𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀕𑀘𑁆𑀙𑀢𑀁 𑀧𑀭𑀮𑁄𑀓𑀢𑁄;

𑀦 𑀧𑀺𑀢𑀸 𑀢𑀸𑀬𑀢𑁂 𑀧𑀼𑀢𑁆𑀢𑀁, 𑀜𑀸𑀢𑀻 𑀯𑀸 𑀧𑀦 𑀜𑀸𑀢𑀓𑁂.

‘‘𑀧𑁂𑀓𑁆𑀔𑀢𑀜𑁆𑀜𑁂𑀯 𑀜𑀸𑀢𑀻𑀦𑀁, 𑀧𑀲𑁆𑀲 𑀮𑀸𑀮𑀧𑁆𑀧𑀢𑀁 𑀧𑀼𑀣𑀼;

𑀏𑀓𑀫𑁂𑀓𑁄𑀯 ¶ 𑀫𑀘𑁆𑀘𑀸𑀦𑀁, 𑀕𑁄𑀯𑀚𑁆𑀛𑁄 𑀯𑀺𑀬 𑀦𑀺𑀬𑁆𑀬𑀢𑀺;

𑀏𑀯𑀫𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀫𑀘𑁆𑀘𑀼𑀦𑀸 𑀘 𑀚𑀭𑀸𑀬 𑀘𑀸’’𑀢𑀺.

𑀅𑀣 ¶ 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀺.

‘‘𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺;

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺, 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻’’𑀢𑀺.

𑀲𑁄𑀘𑀦𑁆𑀢𑀺 ¶ 𑀚𑀦𑀸 𑀫𑀫𑀸𑀬𑀺𑀢𑁂, 𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸;

𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀁, 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂.

𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂𑀢𑀺. 𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 ¶ 𑀘. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀲𑁄𑀘𑀦𑁆𑀢𑀺. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀲𑁄𑀘𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑁋 𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂.

𑀦 ¶ 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸𑀢𑀺. 𑀤𑁆𑀯𑁂 𑀧𑀭𑀺𑀕𑁆𑀕𑀳𑀸 𑁋 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀘 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄. 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄𑀧𑀺 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀁 𑀧𑀭𑀺𑀕𑁆𑀕𑀳𑀁 𑀬𑁆𑀯𑀸𑀬𑀁 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀅𑀳𑀫𑁆𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀕𑁆𑀕𑀳𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁆𑀯𑀸𑀬𑀁 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺. 𑀧𑀭𑀺𑀕𑁆𑀕𑀳𑀸 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑁋 𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸.

𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀦𑁆𑀢𑀺. 𑀦𑀸𑀦𑀸𑀪𑀸𑀯𑁂 𑀯𑀺𑀦𑀸𑀪𑀸𑀯𑁂 𑀅𑀜𑁆𑀜𑀣𑀸𑀪𑀸𑀯𑁂 𑀲𑀦𑁆𑀢𑁂 𑀲𑀁𑀯𑀺𑀚𑁆𑀚𑀫𑀸𑀦𑁂 𑀉𑀧𑀮𑀩𑁆𑀪𑀺𑀬𑀫𑀸𑀦𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀮𑀁, 𑀆𑀦𑀦𑁆𑀤! 𑀫𑀸 𑀲𑁄𑀘𑀺 𑀫𑀸 𑀧𑀭𑀺𑀤𑁂𑀯𑀺. 𑀦𑀦𑀼 𑀏𑀢𑀁, 𑀆𑀦𑀦𑁆𑀤, 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀅𑀓𑁆𑀔𑀸𑀢𑀁 ¶ 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 ¶ 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣, 𑀆𑀦𑀦𑁆𑀤, 𑀮𑀩𑁆𑀪𑀸 𑁋 𑀬𑀁 𑀢𑀁 𑀚𑀸𑀢𑀁 ¶ 𑀪𑀽𑀢𑀁 ¶ 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻’𑀢𑀺! 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀼𑀭𑀺𑀫𑀸𑀦𑀁 𑀧𑀼𑀭𑀺𑀫𑀸𑀦𑀁 𑀔𑀦𑁆𑀥𑀸𑀦𑀁 𑀥𑀸𑀢𑀽𑀦𑀁 𑀆𑀬𑀢𑀦𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀔𑀦𑁆𑀥𑀸 𑀘 𑀥𑀸𑀢𑀼𑀬𑁄 𑀘 𑀆𑀬𑀢𑀦𑀸𑀦𑀺 𑀘 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑁋 𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀁.

𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂𑀢𑀺. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁. 𑀇𑀢𑀻𑀢𑀺 𑀇𑀢𑀺 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀫𑀢𑁆𑀢𑁂𑀲𑀽𑀢𑀺 𑁋 𑀇𑀢𑀺 𑀤𑀺𑀲𑁆𑀯𑀸. 𑀦𑀸𑀕𑀸𑀭𑀫𑀸𑀯𑀲𑁂𑀢𑀺 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂.

‘‘𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂, 𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸;

𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀁, 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂’’𑀢𑀺.

𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺 [𑀧𑀳𑀺𑀬𑁆𑀬𑀢𑀺 (𑀓.)] 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀺;

𑀏𑀢𑀫𑁆𑀧𑀺 ¶ 𑀯𑀺𑀤𑀺𑀢𑁆𑀯𑀸𑀦 [𑀏𑀢𑀁 𑀤𑀺𑀲𑁆𑀯𑀸𑀦 (𑀲𑀻. 𑀓.)] 𑀧𑀡𑁆𑀟𑀺𑀢𑁄, 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄.

𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀻𑀢𑀺. 𑀫𑀭𑀡𑀦𑁆𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 ¶ 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼𑀫𑀭𑀡𑀁 𑀓𑀸𑀮𑀁𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄. 𑀢𑀦𑁆𑀢𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀧𑀳𑀻𑀬𑀢𑀻𑀢𑀺 𑀧𑀳𑀻𑀬𑀢𑀺 𑀚𑀳𑀻𑀬𑀢𑀺 𑀯𑀺𑀚𑀳𑀻𑀬𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺. 𑀪𑀸𑀲𑀺𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀧𑀼𑀩𑁆𑀩𑁂𑀯 ¶ 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄𑀯 𑀦𑁂 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀺;

𑀅𑀲𑀲𑁆𑀲𑀢𑀸 𑀪𑁄𑀕𑀺𑀦𑁄 𑀓𑀸𑀫𑀓𑀸𑀫𑀻, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

‘‘𑀉𑀤𑁂𑀢𑀺 𑀆𑀧𑀽𑀭𑀢𑀺 𑀯𑁂𑀢𑀺 𑀘𑀦𑁆𑀤𑁄, 𑀅𑀢𑁆𑀢𑀁 𑀕𑀫𑁂𑀢𑁆𑀯𑀸𑀦 𑀧𑀮𑁂𑀢𑀺 𑀲𑀽𑀭𑀺𑀬𑁄;

𑀯𑀺𑀤𑀺𑀢𑀸 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂’’𑀢𑀺.

𑀫𑀭𑀡𑁂𑀦𑀧𑀺 ¶ 𑀢𑀁 𑀧𑀳𑀻𑀬𑀢𑀺. 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀻𑀢𑀺. 𑀬𑀦𑁆𑀢𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀧𑀼𑀭𑀺𑀲𑁄𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 [𑀮𑁄𑀓𑀯𑁄𑀳𑀸𑀭𑁄 (𑀲𑁆𑀬𑀸.)] 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 ¶ 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀻𑀢𑀺 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀓𑀺𑀮𑁂𑀲𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀤𑀼𑀘𑁆𑀘𑀭𑀺𑀢𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀧𑀬𑁄𑀕𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀯𑀺𑀧𑀸𑀓𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑁋 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀺.

𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 𑀧𑀡𑁆𑀟𑀺𑀢𑁄𑀢𑀺. 𑀏𑀢𑀁 𑀆𑀤𑀻𑀦𑀯𑀁 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀫𑀢𑁆𑀢𑁂𑀲𑀽𑀢𑀺, 𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸 𑀧𑀡𑁆𑀟𑀺𑀢𑁄 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑁋 𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 𑀧𑀡𑁆𑀟𑀺𑀢𑁄.

𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄𑀢𑀺. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 ¶ 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀸𑀫𑀓𑁄𑀢𑀺 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄. 𑀲𑁄 𑀪𑀕𑀯𑀦𑁆𑀢𑀁 𑀫𑀫𑀸𑀬𑀢𑀺, 𑀪𑀕𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀳𑀸 𑀣𑀤𑁆𑀥𑀸 [𑀩𑀤𑁆𑀥𑀸 (𑀓.) 𑀇𑀢𑀺𑀯𑀼. 𑁧𑁦𑁮] 𑀮𑀧𑀸 𑀲𑀺𑀗𑁆𑀕𑀻 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸; 𑀅𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀦 𑀘 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀬𑁂 𑀘 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸, 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸; 𑀅𑀦𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀢𑁂 𑀘 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 ¶ 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺’’.

‘‘𑀓𑀼𑀳𑀸 ¶ 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸;

𑀦 𑀢𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂.

‘‘𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸, 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂’’.

𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄𑀢𑀺. 𑀫𑀸𑀫𑀓𑁄 𑀢𑀡𑁆𑀳𑀸𑀫𑀫𑀢𑁆𑀢𑀁 𑀧𑀳𑀸𑀬 𑀤𑀺𑀝𑁆𑀞𑀺𑀫𑀫𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫𑀢𑁆𑀢𑀸𑀬 𑀦 𑀦𑀫𑁂𑀬𑁆𑀬 𑀦 𑀑𑀦𑀫𑁂𑀬𑁆𑀬, 𑀦 𑀢𑀁𑀦𑀺𑀦𑁆𑀦𑁄 𑀅𑀲𑁆𑀲 𑀦 𑀢𑀧𑁆𑀧𑁄𑀡𑁄 𑀦 𑀢𑀧𑁆𑀧𑀩𑁆𑀪𑀸𑀭𑁄 𑀦 𑀢𑀤𑀥𑀺𑀫𑀼𑀢𑁆𑀢𑁄 𑀦 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄.

‘‘𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺, 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀺;

𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 𑀧𑀡𑁆𑀟𑀺𑀢𑁄, 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄’’𑀢𑀺.

𑀲𑀼𑀧𑀺𑀦𑁂𑀦 ¶ 𑀬𑀣𑀸𑀧𑀺 𑀲𑀗𑁆𑀕𑀢𑀁, 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺;

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁, 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 [𑀓𑀸𑀮𑀓𑀢𑀁 (𑀲𑀻. 𑀲𑁆𑀬𑀸.)] 𑀦 𑀧𑀲𑁆𑀲𑀢𑀺.

𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀦𑁆𑀢𑀺. 𑀲𑀗𑁆𑀕𑀢𑀁 𑀲𑀫𑀸𑀕𑀢𑀁 𑀲𑀫𑀸𑀳𑀺𑀢𑀁 𑀲𑀦𑁆𑀦𑀺𑀧𑀢𑀺𑀢𑀦𑁆𑀢𑀺 𑁋 𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁. 𑀧𑀝𑀺𑀩𑀼𑀤𑁆𑀥𑁄 ¶ 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀻𑀢𑀺 𑀬𑀣𑀸 𑀧𑀼𑀭𑀺𑀲𑁄 𑀲𑀼𑀧𑀺𑀦𑀕𑀢𑁄 𑀘𑀦𑁆𑀤𑀁 𑀧𑀲𑁆𑀲𑀢𑀺, 𑀲𑀽𑀭𑀺𑀬𑀁 𑀧𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑀁 𑀧𑀲𑁆𑀲𑀢𑀺, 𑀲𑀺𑀦𑁂𑀭𑀼𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀧𑀲𑁆𑀲𑀢𑀺, 𑀳𑀢𑁆𑀣𑀺𑀁 𑀧𑀲𑁆𑀲𑀢𑀺, 𑀅𑀲𑁆𑀲𑀁 𑀧𑀲𑁆𑀲𑀢𑀺, 𑀭𑀣𑀁 𑀧𑀲𑁆𑀲𑀢𑀺, 𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁂𑀦𑀸𑀩𑁆𑀬𑀽𑀳𑀁 𑀧𑀲𑁆𑀲𑀢𑀺, 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺, 𑀯𑀦𑀭𑀸𑀫𑀡𑁂𑀬𑁆𑀬𑀓𑀁…𑀧𑁂… 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁… 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺; 𑀧𑀝𑀺𑀩𑀼𑀤𑁆𑀥𑁄 𑀦 𑀓𑀺𑀜𑁆𑀘𑀺 𑀧𑀲𑁆𑀲𑀢𑀻𑀢𑀺 𑁋 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺.

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀦𑁆𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀧𑀺𑀬𑀸𑀬𑀺𑀢𑀁 𑀚𑀦𑀦𑁆𑀢𑀺 𑀫𑀫𑀸𑀬𑀺𑀢𑀁 𑀚𑀦𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀪𑀸𑀢𑀭𑀁 𑀯𑀸 𑀪𑀕𑀺𑀦𑀺𑀁 𑀯𑀸 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀫𑀺𑀢𑁆𑀢𑀁 𑀯𑀸 𑀅𑀫𑀘𑁆𑀘𑀁 𑀯𑀸 𑀜𑀸𑀢𑀺𑀁 𑀯𑀸 𑀲𑀸𑀮𑁄𑀳𑀺𑀢𑀁 𑀯𑀸𑀢𑀺 𑁋 𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁.

𑀧𑁂𑀢𑀁 ¶ 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀻𑀢𑀺. 𑀧𑁂𑀢𑁄 𑀯𑀼𑀘𑁆𑀘𑀢𑀺 𑀫𑀢𑁄. 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀺 𑀦 𑀤𑀓𑁆𑀔𑀢𑀺 𑀦𑀸𑀥𑀺𑀕𑀘𑁆𑀙𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀻𑀢𑀺 𑁋 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀺.

‘‘𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁, 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺;

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁, 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀻’’𑀢𑀺.

𑀤𑀺𑀝𑁆𑀞𑀸𑀧𑀺 ¶ 𑀲𑀼𑀢𑀸𑀧𑀺 𑀢𑁂 𑀚𑀦𑀸, 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺;

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺 ¶ , [𑀦𑀸𑀫𑀫𑁂𑀯𑀸’𑀯𑀲𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)] 𑀅𑀓𑁆𑀔𑁂𑀬𑁆𑀬𑀁 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄.

𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸𑀢𑀺. 𑀤𑀺𑀝𑁆𑀞𑀸𑀢𑀺 𑀬𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀪𑀺𑀲𑀫𑁆𑀪𑀽𑀢𑀸. 𑀲𑀼𑀢𑀸𑀢𑀺 𑀬𑁂 𑀲𑁄𑀢𑀯𑀺𑀜𑁆𑀜𑀸𑀡𑀸𑀪𑀺𑀲𑀫𑁆𑀪𑀽𑀢𑀸 ¶ . 𑀢𑁂 𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘𑀸𑀢𑀺 𑁋 𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸.

𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀻𑀢𑀺. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀦𑀸𑀫𑀦𑁆𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀧𑀯𑀼𑀘𑁆𑀘𑀢𑀻𑀢𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑁋 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺.

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺 𑀅𑀓𑁆𑀔𑁂𑀬𑁆𑀬𑀦𑁆𑀢𑀺. 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀧𑀳𑀻𑀬𑀢𑀺 𑀚𑀳𑀻𑀬𑀢𑀺 𑀯𑀺𑀚𑀳𑀻𑀬𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺. 𑀅𑀓𑁆𑀔𑁂𑀬𑁆𑀬𑀦𑁆𑀢𑀺. 𑀅𑀓𑁆𑀔𑀸𑀢𑀼𑀁 𑀓𑀣𑁂𑀢𑀼𑀁 𑀪𑀡𑀺𑀢𑀼𑀁 𑀤𑀻𑀧𑀬𑀺𑀢𑀼𑀁 𑀯𑁄𑀳𑀭𑀺𑀢𑀼𑀦𑁆𑀢𑀺 𑁋 𑀦𑀸𑀫𑀁 𑀏𑀯𑀸𑀯𑀲𑀺𑀲𑁆𑀲𑀢𑀺 𑀅𑀓𑁆𑀔𑁂𑀬𑁆𑀬𑀁. 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄𑀢𑀺. 𑀧𑁂𑀢𑀲𑁆𑀲𑀸𑀢𑀺 𑀫𑀢𑀲𑁆𑀲 𑀓𑀸𑀮𑀗𑁆𑀓𑀢𑀲𑁆𑀲. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲 𑀦𑀭𑀲𑁆𑀲 𑀫𑀸𑀦𑀯𑀲𑁆𑀲 𑀧𑁄𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀲𑁆𑀲 𑀚𑀸𑀕𑀼𑀲𑁆𑀲 𑀚𑀦𑁆𑀢𑀼𑀲𑁆𑀲 𑀇𑀦𑁆𑀤𑀕𑀼𑀲𑁆𑀲 𑀫𑀦𑀼𑀚𑀲𑁆𑀲𑀸𑀢𑀺 𑁋 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄.

‘‘𑀤𑀺𑀝𑁆𑀞𑀸𑀧𑀺 ¶ ¶ 𑀲𑀼𑀢𑀸𑀧𑀺 𑀢𑁂 𑀚𑀦𑀸, 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺;

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺, 𑀅𑀓𑁆𑀔𑁂𑀬𑁆𑀬𑀁 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄’’𑀢𑀺.

𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁 ¶ , 𑀦 𑀧𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂;

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄.

𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀦 𑀧𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂𑀢𑀺. 𑀲𑁄𑀓𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄 𑀅𑀦𑁆𑀢𑁄𑀤𑀸𑀳𑁄 𑀅𑀦𑁆𑀢𑁄𑀧𑀭𑀺𑀤𑀸𑀳𑁄 [𑀅𑀦𑁆𑀢𑁄𑀟𑀸𑀳𑁄 𑀅𑀦𑁆𑀢𑁄𑀧𑀭𑀺𑀟𑀸𑀳𑁄 (𑀲𑁆𑀬𑀸.)] 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸 𑀤𑁄𑀫𑀦𑀲𑁆𑀲𑀁 𑀲𑁄𑀓𑀲𑀮𑁆𑀮𑀁. 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 ¶ , 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁 ¶ , 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘 ¶ …𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀲𑁄𑀘𑀦𑁆𑀢𑀺, 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 ¶ 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀫𑀸𑀬𑀦𑁆𑀢𑀺 𑀫𑀘𑁆𑀙𑀭𑀸𑀬𑀦𑁆𑀢𑀺; 𑀫𑀫𑀸𑀬𑀺𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑁄𑀓𑀁 𑀦 𑀚𑀳𑀦𑁆𑀢𑀺, 𑀧𑀭𑀺𑀤𑁂𑀯𑀁 𑀦 𑀚𑀳𑀦𑁆𑀢𑀺, 𑀫𑀘𑁆𑀙𑀭𑀺𑀬𑀁 𑀦 𑀚𑀳𑀦𑁆𑀢𑀺, 𑀕𑁂𑀥𑀁 𑀦 𑀚𑀳𑀦𑁆𑀢𑀺 𑀦𑀧𑁆𑀧𑀚𑀳𑀦𑁆𑀢𑀺 𑀦 𑀯𑀺𑀦𑁄𑀤𑁂𑀦𑁆𑀢𑀺 𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀦𑁆𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀦𑁆𑀢𑀻𑀢𑀺 𑁋 𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀦𑀧𑁆𑀧𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂.

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀢𑀁 𑀆𑀤𑀻𑀦𑀯𑀁 ¶ 𑀲𑀫𑁆𑀧𑀲𑁆𑀲𑀫𑀸𑀦𑀸 𑀫𑀫𑀢𑁆𑀢𑁂𑀲𑀽𑀢𑀺 𑁋 𑀢𑀲𑁆𑀫𑀸. 𑀫𑀼𑀦𑀬𑁄𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀼𑀦𑀬𑁄 𑀫𑁄𑀦𑀧𑁆𑀧𑀢𑁆𑀢𑀸. 𑀢𑀻𑀡𑀺 𑀫𑁄𑀦𑁂𑀬𑁆𑀬𑀸𑀦𑀺 𑁋 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀫𑀦𑁄𑀫𑁄𑀦𑁂𑀬𑁆𑀬𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀧𑀭𑀺𑀕𑁆𑀕𑀳𑁄𑀢𑀺 𑀤𑁆𑀯𑁂 𑀧𑀭𑀺𑀕𑁆𑀕𑀳𑀸 𑁋 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀘 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄. 𑀫𑀼𑀦𑀬𑁄 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀅𑀘𑀭𑀺𑀁𑀲𑀼 𑀯𑀺𑀳𑀭𑀺𑀁𑀲𑀼 𑀇𑀭𑀺𑀬𑀺𑀁𑀲𑀼 𑀯𑀢𑁆𑀢𑀺𑀁𑀲𑀼 𑀧𑀸𑀮𑀺𑀁𑀲𑀼 𑀬𑀧𑀺𑀁𑀲𑀼 𑀬𑀸𑀧𑀺𑀁𑀲𑀼. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 ¶ 𑀔𑁂𑀫𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 𑀔𑁂𑀫𑀤𑀲𑁆𑀲𑀺𑀦𑁄 𑀢𑀸𑀡𑀤𑀲𑁆𑀲𑀺𑀦𑁄 𑀮𑁂𑀡𑀤𑀲𑁆𑀲𑀺𑀦𑁄 𑀲𑀭𑀡𑀤𑀲𑁆𑀲𑀺𑀦𑁄 𑀅𑀪𑀬𑀤𑀲𑁆𑀲𑀺𑀦𑁄 𑀅𑀘𑁆𑀘𑀼𑀢𑀤𑀲𑁆𑀲𑀺𑀦𑁄 𑀅𑀫𑀢𑀤𑀲𑁆𑀲𑀺𑀦𑁄 𑀦𑀺𑀩𑁆𑀩𑀸𑀦𑀤𑀲𑁆𑀲𑀺𑀦𑁄𑀢𑀺 𑁋 𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄.

‘‘𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀦 𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂;

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄’’𑀢𑀺.

𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁;

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 ¶ 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂.

𑀧𑀢𑀺𑀮𑀻𑀦𑀘𑀭𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄𑀢𑀺. 𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸 [𑀲𑁂𑀔𑀸 (𑀲𑀻. 𑀲𑁆𑀬𑀸.)]. 𑀅𑀭𑀳𑀸 𑀧𑀢𑀺𑀮𑀻𑀦𑁄. 𑀓𑀺𑀁𑀓𑀸𑀭𑀡𑀸 𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸? 𑀢𑁂 𑀢𑀢𑁄 𑀢𑀢𑁄 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 [𑀲𑀦𑁆𑀦𑀺𑀭𑀼𑀫𑁆𑀪𑁂𑀦𑁆𑀢𑀸 (𑀲𑀻.)] 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀲𑁄𑀢𑀤𑁆𑀯𑀸𑀭𑁂 𑀘𑀺𑀢𑁆𑀢𑀁…𑀧𑁂… 𑀖𑀸𑀦𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀓𑀸𑀬𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀫𑀦𑁄𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 ¶ 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀬𑀣𑀸 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀝𑁆𑀝𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺; 𑀏𑀯𑀫𑁂𑀯 𑀢𑀢𑁄 𑀢𑀢𑁄 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀺𑀢𑁆𑀢𑀁…𑀧𑁂… 𑀲𑁄𑀢𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀖𑀸𑀦𑀤𑁆𑀯𑀸𑀭𑁂 ¶ 𑀘𑀺𑀢𑁆𑀢𑀁… 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀓𑀸𑀬𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀫𑀦𑁄𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀲𑁂𑀓𑁆𑀔𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄𑀢𑀺 𑁋 𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀦𑁆𑀢𑀺 𑀆𑀲𑀦𑀁 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀦𑀺𑀲𑀻𑀤𑀦𑁆𑀢𑀺 𑁋 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄. 𑀢𑀁 𑀆𑀲𑀦𑀁 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑀲𑀤𑁆𑀤𑀲𑁆𑀲𑀯𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑀕𑀦𑁆𑀥𑀖𑀸𑀬𑀦𑁂𑀦… 𑀅𑀲𑀧𑁆𑀧𑀸𑀬𑀭𑀲𑀲𑀸𑀬𑀦𑁂𑀦… 𑀅𑀲𑀧𑁆𑀧𑀸𑀬𑀨𑁄𑀝𑁆𑀞𑀩𑁆𑀩𑀨𑀼𑀲𑀦𑁂𑀦… 𑀅𑀲𑀧𑁆𑀧𑀸𑀬𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 ¶ 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁. 𑀢𑀁 𑀯𑀺𑀯𑀺𑀢𑁆𑀢𑀁 𑀆𑀲𑀦𑀁 𑀪𑀚𑀢𑁄 𑀲𑀫𑁆𑀪𑀚𑀢𑁄 𑀲𑁂𑀯𑀢𑁄 𑀦𑀺𑀲𑁂𑀯𑀢𑁄 𑀲𑀁𑀲𑁂𑀯𑀢𑁄 𑀧𑀝𑀺𑀲𑁂𑀯𑀢𑁄𑀢𑀺 𑁋 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁.

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 ¶ 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺. 𑀲𑀸𑀫𑀕𑁆𑀕𑀺𑀬𑁄𑀢𑀺 𑀢𑀺𑀲𑁆𑀲𑁄 𑀲𑀸𑀫𑀕𑁆𑀕𑀺𑀬𑁄 𑁋 𑀕𑀡𑀲𑀸𑀫𑀕𑁆𑀕𑀻, 𑀥𑀫𑁆𑀫𑀲𑀸𑀫𑀕𑁆𑀕𑀻, 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻. 𑀓𑀢𑀫𑀸 𑀕𑀡𑀲𑀸𑀫𑀕𑁆𑀕𑀻? 𑀩𑀳𑀼 𑀘𑁂𑀧𑀺 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 ¶ 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺 𑁋 𑀅𑀬𑀁 ¶ 𑀕𑀡𑀲𑀸𑀫𑀕𑁆𑀕𑀻. 𑀓𑀢𑀫𑀸 𑀥𑀫𑁆𑀫𑀲𑀸𑀫𑀕𑁆𑀕𑀻? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀢𑁂 𑀏𑀓𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑀺 𑀧𑀲𑀻𑀤𑀦𑁆𑀢𑀺 𑀲𑀫𑁆𑀧𑀢𑀺𑀝𑁆𑀞𑀦𑁆𑀢𑀺 𑀯𑀺𑀫𑀼𑀘𑁆𑀘𑀦𑁆𑀢𑀺; 𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀯𑀸𑀤𑁄 𑀧𑀯𑀺𑀯𑀸𑀤𑁄 𑀅𑀢𑁆𑀣𑀺 𑁋 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻. 𑀓𑀢𑀫𑀸 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻? 𑀩𑀳𑀼 𑀘𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺; 𑀦 𑀢𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 [𑀢𑁂𑀦 (𑀲𑀻.)] 𑀊𑀦𑀢𑁆𑀢𑀁 𑀯𑀸 𑀧𑀼𑀡𑁆𑀡𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺 𑁋 𑀅𑀬𑀁 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻. 𑀪𑀯𑀦𑁂𑀢𑀺 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑁄 𑀪𑀯𑀦𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀪𑀯𑀦𑀁, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁄 𑀪𑀯𑀦𑀁, 𑀫𑀦𑀼𑀲𑁆𑀲𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑁄 𑀪𑀯𑀦𑀁, 𑀤𑁂𑀯𑀸𑀦𑀁 𑀤𑁂𑀯𑀮𑁄𑀓𑁄 𑀪𑀯𑀦𑀦𑁆𑀢𑀺. 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺. 𑀢𑀲𑁆𑀲𑁂𑀲𑀸 𑀲𑀸𑀫𑀕𑁆𑀕𑀻 𑀏𑀢𑀁 𑀙𑀦𑁆𑀦𑀁 𑀏𑀢𑀁 𑀧𑀢𑀺𑀭𑀽𑀧𑀁 𑀏𑀢𑀁 𑀅𑀦𑀼𑀘𑁆𑀙𑀯𑀺𑀓𑀁 𑀏𑀢𑀁 𑀅𑀦𑀼𑀮𑁄𑀫𑀁, 𑀬𑁄 𑀏𑀯𑀁 𑀧𑀝𑀺𑀘𑁆𑀙𑀦𑁆𑀦𑁂 𑀦𑀺𑀭𑀬𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀤𑁂𑀯𑀮𑁄𑀓𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬𑀸𑀢𑀺 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂.

‘‘𑀧𑀢𑀺𑀮𑀻𑀦𑀘𑀭𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄, 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁;

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂’’𑀢𑀺.

𑀲𑀩𑁆𑀩𑀢𑁆𑀣 ¶ 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄, 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁;

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺.

𑀲𑀩𑁆𑀩𑀢𑁆𑀣 ¶ 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄𑀢𑀺. 𑀲𑀩𑁆𑀩𑀁 𑀯𑀼𑀘𑁆𑀘𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀸 𑀘, 𑀲𑁄𑀢𑀜𑁆𑀘 𑀲𑀤𑁆𑀤𑀸 𑀘, 𑀖𑀸𑀦𑀜𑁆𑀘 𑀕𑀦𑁆𑀥𑀸 𑀘, 𑀚𑀺𑀯𑁆𑀳𑀸 𑀘 𑀭𑀲𑀸 𑀘, 𑀓𑀸𑀬𑁄 𑀘 𑀨𑁄𑀝𑁆𑀞𑀩𑁆𑀩𑀸 𑀘, 𑀫𑀦𑁄 𑀘 𑀥𑀫𑁆𑀫𑀸 𑀘. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀅𑀦𑀺𑀲𑁆𑀲𑀺𑀢𑁄𑀢𑀺 ¶ . 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀫𑀼𑀦𑀺 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄 𑀖𑀸𑀦𑀁 𑀅𑀦𑀺𑀲𑁆𑀲𑀺𑀢𑁄 𑀚𑀺𑀯𑁆𑀳𑀁 𑀅𑀦𑀺𑀲𑁆𑀲𑀺𑀢𑁄 𑀓𑀸𑀬𑀁 𑀅𑀦𑀺𑀲𑁆𑀲𑀺𑀢𑁄 𑀫𑀦𑀁 𑀅𑀦𑀺𑀲𑁆𑀲𑀺𑀢𑁄 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀥𑀫𑁆𑀫𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁 ¶ … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀲𑀩𑁆𑀩𑁂 𑀥𑀫𑁆𑀫𑁂 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀲𑀩𑁆𑀩𑀢𑁆𑀣 𑀫𑀼𑀦𑀺 𑀅𑀦𑀺𑀲𑁆𑀲𑀺𑀢𑁄.

𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀦𑁆𑀢𑀺. 𑀧𑀺𑀬𑀸𑀢𑀺 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 ¶ 𑀯𑀸 𑀪𑀕𑀺𑀦𑀻 𑀯𑀸 𑀧𑀼𑀢𑁆𑀢𑀸 𑀯𑀸 𑀥𑀻𑀢𑀭𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑁋 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸. 𑀅𑀧𑁆𑀧𑀺𑀬𑀸𑀢𑀺 𑀤𑁆𑀯𑁂 𑀅𑀧𑁆𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀅𑀧𑁆𑀧𑀺𑀬𑀸? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸 𑀅𑀨𑀸𑀲𑀼𑀓𑀸𑀫𑀸 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀓𑀸𑀫𑀸 𑁋 𑀇𑀫𑁂 𑀲𑀢𑁆𑀢𑀸 𑀅𑀧𑁆𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀅𑀧𑁆𑀧𑀺𑀬𑀸? 𑀅𑀫𑀦𑀸𑀧𑀺𑀓𑀸 𑀭𑀽𑀧𑀸 𑀅𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀅𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀅𑀫𑀦𑀸𑀧𑀺𑀓𑀸 𑀭𑀲𑀸 𑀅𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 ¶ 𑀅𑀧𑁆𑀧𑀺𑀬𑀸. 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀦𑁆𑀢𑀺. ‘‘𑀅𑀬𑀁 𑀫𑁂 𑀲𑀢𑁆𑀢𑁄 𑀧𑀺𑀬𑁄, 𑀇𑀫𑁂 𑀘 𑀲𑀗𑁆𑀔𑀸𑀭𑀸 𑀫𑀦𑀸𑀧𑀸’’𑀢𑀺 𑀭𑀸𑀕𑀯𑀲𑁂𑀦 𑀧𑀺𑀬𑀁 𑀦 𑀓𑀭𑁄𑀢𑀺; ‘‘𑀅𑀬𑀁 𑀫𑁂 𑀲𑀢𑁆𑀢𑁄 𑀅𑀧𑁆𑀧𑀺𑀬𑁄, 𑀇𑀫𑁂 𑀘 𑀲𑀗𑁆𑀔𑀸𑀭𑀸 𑀅𑀫𑀦𑀸𑀧𑀸’’𑀢𑀺 𑀧𑀝𑀺𑀖𑀯𑀲𑁂𑀦 ¶ 𑀅𑀧𑁆𑀧𑀺𑀬𑀁 𑀦 𑀓𑀭𑁄𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁.

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻𑀢𑀺. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂. 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 ¶ 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 ¶ 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁.

𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻𑀢𑀺. 𑀧𑀡𑁆𑀡𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀢𑁆𑀢𑀁. 𑀯𑀸𑀭𑀺 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀬𑀣𑀸 ¶ 𑀯𑀸𑀭𑀺 𑀧𑀤𑀼𑀫𑀧𑀢𑁆𑀢𑀁 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀁, 𑀏𑀯𑀫𑁂𑀯 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂 𑀧𑀭𑀺𑀤𑁂𑀯𑁄 𑀫𑀘𑁆𑀙𑀭𑀺𑀬𑀜𑁆𑀘 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀸 𑀅𑀧𑀮𑀺𑀢𑁆𑀢𑀸 𑀅𑀦𑀼𑀧𑀮𑀺𑀢𑁆𑀢𑀸. 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀳𑀦𑁆𑀢𑁄 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺.

‘‘𑀲𑀩𑁆𑀩𑀢𑁆𑀣 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄, 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁;

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻’’𑀢𑀺.

𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂, 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺;

𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 [𑀤𑀺𑀝𑁆𑀞𑀲𑀼𑀢𑁂 𑀫𑀼𑀢𑁂𑀲𑀼 (𑀲𑀻.), 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 (𑀲𑁆𑀬𑀸. 𑀓.)] 𑀯𑀸.

𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂𑀢𑀺. 𑀉𑀤𑀩𑀺𑀦𑁆𑀤𑀼 𑀯𑀼𑀘𑁆𑀘𑀢𑀺 𑀉𑀤𑀓𑀣𑁂𑀯𑁄. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀢𑁆𑀢𑀁. 𑀬𑀣𑀸 𑀉𑀤𑀩𑀺𑀦𑁆𑀤𑀼 𑀧𑀤𑀼𑀫𑀧𑀢𑁆𑀢𑁂 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 ¶ 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀦𑁆𑀢𑀺 𑁋 𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂. 𑀧𑀤𑀼𑀫𑁂 ¶ 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻𑀢𑀺. 𑀧𑀤𑀼𑀫𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀼𑀧𑁆𑀨𑀁. 𑀯𑀸𑀭𑀺 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀬𑀣𑀸 𑀯𑀸𑀭𑀺 𑀧𑀤𑀼𑀫𑀧𑀼𑀧𑁆𑀨𑀁 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀦𑁆𑀢𑀺 𑁋 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺.

𑀏𑀯𑀁 ¶ 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 ¶ 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀫𑀼𑀦𑀺 𑀢𑀡𑁆𑀳𑀸𑀮𑁂𑀧𑀁 𑀧𑀳𑀸𑀬 𑀤𑀺𑀝𑁆𑀞𑀺𑀮𑁂𑀧𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑀺𑀝𑁆𑀞𑁂 𑀦 𑀮𑀺𑀫𑁆𑀧𑀢𑀺, 𑀲𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀫𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀯𑀺𑀜𑁆𑀜𑀸𑀢𑁂 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸.

‘‘𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂, 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺;

𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸’’𑀢𑀺.

𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸;

𑀦𑀸𑀜𑁆𑀜𑁂𑀦 ¶ 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺, 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺.

𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺. 𑀥𑁄𑀦𑁄𑀢𑀺 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀓𑀺𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸? 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢 𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀭𑀸𑀕𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 ¶ 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀢𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸.

𑀅𑀣 ¶ 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘, 𑀲𑀫𑁆𑀫𑀸𑀯𑀸𑀘𑀸𑀬 𑀫𑀺𑀘𑁆𑀙𑀸𑀯𑀸𑀘𑀸 𑀥𑀼𑀢𑀸 𑀘… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀆𑀚𑀻𑀯𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀲𑀢𑀺𑀬𑀸 𑀫𑀺𑀘𑁆𑀙𑀸𑀲𑀢𑀺 ¶ 𑀥𑀼𑀢𑀸 𑀘… 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀫𑀺𑀘𑁆𑀙𑀸𑀲𑀫𑀸𑀥𑀺 𑀥𑀼𑀢𑁄 𑀘… 𑀲𑀫𑁆𑀫𑀸𑀜𑀸𑀡𑁂𑀦 𑀫𑀺𑀘𑁆𑀙𑀸𑀜𑀸𑀡𑀁 𑀥𑀼𑀢𑀜𑁆𑀘… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘.

𑀅𑀣 ¶ 𑀯𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀅𑀭𑀳𑀸 𑀇𑀫𑁂𑀳𑀺 𑀥𑁄𑀦𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀅𑀭𑀳𑀸 𑀥𑁄𑀦𑁄. 𑀲𑁄 𑀥𑀼𑀢𑀭𑀸𑀕𑁄 𑀥𑀼𑀢𑀧𑀸𑀧𑁄 𑀥𑀼𑀢𑀓𑀺𑀮𑁂𑀲𑁄 𑀥𑀼𑀢𑀧𑀭𑀺𑀴𑀸𑀳𑁄𑀢𑀺 𑁋 𑀥𑁄𑀦𑁄.

𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺. 𑀥𑁄𑀦𑁄 𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀢𑁄 𑀦 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀸 𑀫𑁂𑀢𑀺 𑀦 𑀫𑀜𑁆𑀜𑀢𑀺; 𑀲𑀼𑀢𑀁 𑀦 𑀫𑀜𑁆𑀜𑀢𑀺, 𑀲𑀼𑀢𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀲𑀼𑀢𑀢𑁄 𑀦 𑀫𑀜𑁆𑀜𑀢𑀺, 𑀲𑀼𑀢𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺; 𑀫𑀼𑀢𑀁 𑀦 𑀫𑀜𑁆𑀜𑀢𑀺, 𑀫𑀼𑀢𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀫𑀼𑀢𑀢𑁄 𑀦 𑀫𑀜𑁆𑀜𑀢𑀺, 𑀫𑀼𑀢𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺; 𑀯𑀺𑀜𑁆𑀜𑀸𑀢𑀁 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀢𑁄 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀜𑀺𑀢𑀫𑁂𑀢𑀁, 𑀅𑀬𑀫𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀦 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀭𑀽𑀧𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀅𑀭𑀽𑀧𑀻 𑀪𑀯𑀺𑀲𑁆𑀲𑀦𑁆𑀢𑀺 ¶ 𑀫𑀜𑁆𑀜𑀺𑀢𑀫𑁂𑀢𑀁, 𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 ¶ 𑀫𑀜𑁆𑀜𑀺𑀢𑀫𑁂𑀢𑀁, 𑀅𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁. 𑀫𑀜𑁆𑀜𑀺𑀢𑀁 [𑀫𑀜𑁆𑀜𑀺𑀢𑀁 𑀳𑀺 (𑀲𑀻.)], 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀫𑀜𑁆𑀜𑀺𑀢𑀁 𑀕𑀡𑁆𑀟𑁄, 𑀫𑀜𑁆𑀜𑀺𑀢𑀁 𑀲𑀮𑁆𑀮𑀁, 𑀫𑀜𑁆𑀜𑀺𑀢𑀁 𑀉𑀧𑀤𑁆𑀤𑀯𑁄. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀅𑀫𑀜𑁆𑀜𑀫𑀸𑀦𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺, 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑁋 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸.

𑀦𑀸𑀜𑁆𑀜𑁂𑀦 ¶ 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀻𑀢𑀺. 𑀥𑁄𑀦𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀧𑀣𑁂𑀦 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦 𑀇𑀘𑁆𑀙𑀢𑀺 𑀦 𑀲𑀸𑀤𑀺𑀬𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀧𑀺𑀳𑁂𑀢𑀺 𑀦𑀸𑀪𑀺𑀚𑀧𑁆𑀧𑀢𑀻𑀢𑀺 𑁋 𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺.

𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺. 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀭𑀚𑁆𑀚𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀲𑀢𑁆𑀢 𑀲𑁂𑀓𑁆𑀔𑀸 𑀯𑀺𑀭𑀚𑁆𑀚𑀦𑁆𑀢𑀺; 𑀅𑀭𑀳𑀸 𑀦𑁂𑀯 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺. 𑀯𑀺𑀭𑀢𑁆𑀢𑁄 𑀲𑁄 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀚𑀭𑀸𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺.

‘‘𑀥𑁄𑀦𑁄 ¶ 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸;

𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺, 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻’’𑀢𑀺.

𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑁄.

𑁭. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲 ¶ ¶ , [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄]

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁, 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄 𑀯𑀲𑀮𑀥𑀫𑁆𑀫𑁄 𑀤𑀼𑀝𑁆𑀞𑀼𑀮𑁆𑀮𑁄 𑀑𑀤𑀓𑀦𑁆𑀢𑀺𑀓𑁄 𑀭𑀳𑀲𑁆𑀲𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄? 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀬𑀣𑀸 𑀉𑀪𑁄 𑀓𑀮𑀳𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 ¶ 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀡𑁆𑀟𑀦𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀲𑁆𑀲𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀺𑀯𑀸𑀤𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀅𑀥𑀺𑀓𑀭𑀡𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀸𑀤𑀺𑀦𑁄 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀲𑀮𑁆𑀮𑀸𑀧𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑁂𑀯𑀁 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁂 𑀬𑀼𑀢𑁆𑀢𑀲𑁆𑀲 𑀧𑀬𑀼𑀢𑁆𑀢𑀲𑁆𑀲 𑀆𑀬𑀼𑀢𑁆𑀢𑀲𑁆𑀲 𑀲𑀫𑀸𑀬𑀼𑀢𑁆𑀢𑀲𑁆𑀲 𑀢𑀘𑁆𑀘𑀭𑀺𑀢𑀲𑁆𑀲 𑀢𑀩𑁆𑀩𑀳𑀼𑀮𑀲𑁆𑀲 𑀢𑀕𑁆𑀕𑀭𑀼𑀓𑀲𑁆𑀲 𑀢𑀦𑁆𑀦𑀺𑀦𑁆𑀦𑀲𑁆𑀲 𑀢𑀧𑁆𑀧𑁄𑀡𑀲𑁆𑀲 𑀢𑀧𑁆𑀧𑀩𑁆𑀪𑀸𑀭𑀲𑁆𑀲 𑀢𑀤𑀥𑀺𑀫𑀼𑀢𑁆𑀢𑀲𑁆𑀲 𑀢𑀤𑀥𑀺𑀧𑀢𑁂𑀬𑁆𑀬𑀲𑁆𑀲𑀸𑀢𑀺 ¶ 𑁋 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲.

𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 ¶ 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀯𑀘𑀦𑀁 𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀢𑀺𑀲𑁆𑀲𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀫𑁂𑀢𑁆𑀢𑁂𑀬𑁆𑀬𑁄𑀢𑀺 ¶ 𑀢𑀲𑁆𑀲 𑀣𑁂𑀭𑀲𑁆𑀲 𑀕𑁄𑀢𑁆𑀢𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄.

𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲𑀸𑀢𑀺. 𑀯𑀺𑀖𑀸𑀢𑀦𑁆𑀢𑀺 𑀯𑀺𑀖𑀸𑀢𑀁 𑀉𑀧𑀖𑀸𑀢𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑀁 𑀉𑀧𑀲𑀕𑁆𑀕𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 [𑀉𑀢𑁆𑀢𑀸𑀦𑀺𑀁 𑀓𑀭𑁄𑀳𑀺 (𑀓.)] 𑀧𑀓𑀸𑀲𑁂𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀯𑀘𑀦𑀁 𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲.

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀦𑁆𑀢𑀺. 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁.

𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺. 𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸 𑁋 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀢𑀫𑁄 𑀓𑀸𑀬𑀯𑀺𑀯𑁂𑀓𑁄? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀲𑀧𑀼𑀜𑁆𑀚𑀁 ¶ , 𑀓𑀸𑀬𑁂𑀦 𑀯𑀺𑀯𑀺𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺 ¶ , 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀅𑀬𑀁 𑀓𑀸𑀬𑀯𑀺𑀯𑁂𑀓𑁄.

𑀓𑀢𑀫𑁄 𑀘𑀺𑀢𑁆𑀢𑀯𑀺𑀯𑁂𑀓𑁄? 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 ¶ 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀤𑀺𑀝𑁆𑀞𑀸𑀦𑀼𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 ¶ 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 ¶ 𑀧𑀝𑀺𑀖𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀅𑀭𑀳𑀢𑁄 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑁄.

𑀓𑀢𑀫𑁄 𑀉𑀧𑀥𑀺𑀯𑀺𑀯𑁂𑀓𑁄? 𑀉𑀧𑀥𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀉𑀧𑀥𑀺𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑁋 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁; 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑀢𑁆𑀢𑀸𑀦𑀁; 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀽𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁. 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺. 𑀲𑁄 𑀣𑁂𑀭𑁄 𑀧𑀓𑀢𑀺𑀬𑀸 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄. 𑀅𑀧𑀺 𑀘 𑀥𑀫𑁆𑀫𑀤𑁂𑀲𑀦𑀁 𑀉𑀧𑀸𑀤𑀸𑀬 𑀥𑀫𑁆𑀫𑀤𑁂𑀲𑀦𑀁 𑀲𑀸𑀯𑁂𑀦𑁆𑀢𑁄 [𑀬𑀸𑀘𑀦𑁆𑀢𑁄 (𑀲𑀻. 𑀲𑁆𑀬𑀸.)] 𑀏𑀯𑀫𑀸𑀳 𑁋 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺.

𑀢𑁂𑀦𑀸𑀳 𑀣𑁂𑀭𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄 𑁋

‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲 ¶ , [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄]

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁, 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂’’𑀢𑀺.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲 ¶ ¶ , [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺, 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀁.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄 𑀯𑀲𑀮𑀥𑀫𑁆𑀫𑁄 𑀤𑀼𑀝𑁆𑀞𑀼𑀮𑁆𑀮𑁄 𑀑𑀤𑀓𑀦𑁆𑀢𑀺𑀓𑁄 𑀭𑀳𑀲𑁆𑀲𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄? 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀬𑀣𑀸 𑀉𑀪𑁄 𑀓𑀮𑀳𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀡𑁆𑀟𑀦𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀲𑁆𑀲𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀺𑀯𑀸𑀤𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀅𑀥𑀺𑀓𑀭𑀡𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀸𑀤𑀺𑀦𑁄 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀲𑀮𑁆𑀮𑀸𑀧𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑁂𑀯𑀁 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 ¶ 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁂 𑀬𑀼𑀢𑁆𑀢𑀲𑁆𑀲 𑀧𑀬𑀼𑀢𑁆𑀢𑀲𑁆𑀲 𑀆𑀬𑀼𑀢𑁆𑀢𑀲𑁆𑀲 𑀲𑀫𑀸𑀬𑀼𑀢𑁆𑀢𑀲𑁆𑀲 𑀢𑀘𑁆𑀘𑀭𑀺𑀢𑀲𑁆𑀲 𑀢𑀩𑁆𑀩𑀳𑀼𑀮𑀲𑁆𑀲 𑀢𑀕𑁆𑀕𑀭𑀼𑀓𑀲𑁆𑀲 𑀢𑀦𑁆𑀦𑀺𑀦𑁆𑀦𑀲𑁆𑀲 𑀢𑀧𑁆𑀧𑁄𑀡𑀲𑁆𑀲 𑀢𑀧𑁆𑀧𑀩𑁆𑀪𑀸𑀭𑀲𑁆𑀲 𑀢𑀤𑀥𑀺𑀫𑀼𑀢𑁆𑀢𑀲𑁆𑀲 𑀢𑀤𑀥𑀺𑀧𑀢𑁂𑀬𑁆𑀬𑀲𑁆𑀲𑀸𑀢𑀺 𑁋 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲.

𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸 𑀢𑀁 𑀣𑁂𑀭𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 ¶ 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀡𑁆𑀟𑀓𑁄𑀢𑀺 [𑀪𑀕𑁆𑀕𑀓𑀡𑁆𑀟𑀓𑁄𑀢𑀺 (𑀲𑀻. 𑀲𑁆𑀬𑀸.)] 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 [𑀅𑀭𑀜𑁆𑀜𑁂 𑀯𑀦𑀧𑀢𑁆𑀣𑀸𑀦𑀺 (𑀲𑀻.)] 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 ¶ 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑀻. 𑀲𑁆𑀬𑀸.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 ¶ 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 [𑀅𑀪𑀺𑀜𑁆𑀜𑀸𑀡𑀸𑀦𑀁 (𑀲𑀻.)] 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸. 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 ¶ 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸.

𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀦𑁆𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀸𑀲𑀦𑀁 𑀫𑀼𑀲𑁆𑀲𑀢𑀺 𑁋 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁆𑀧𑀺 𑀫𑀼𑀲𑁆𑀲𑀢𑀺, 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀫𑁆𑀧𑀺 𑀫𑀼𑀲𑁆𑀲𑀢𑀺. 𑀓𑀢𑀫𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁? 𑀬𑀁 𑀢𑀲𑁆𑀲 𑀧𑀭𑀺𑀬𑀸𑀧𑀼𑀝𑀁 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 ¶ 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁 𑁋 𑀇𑀤𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁. 𑀢𑀫𑁆𑀧𑀺 𑀫𑀼𑀲𑁆𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺 𑀧𑀫𑀼𑀲𑁆𑀲𑀢𑀺 𑀲𑀫𑁆𑀧𑀫𑀼𑀲𑁆𑀲𑀢𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁.

𑀓𑀢𑀫𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸 𑀅𑀦𑀼𑀮𑁄𑀫𑀧𑀝𑀺𑀧𑀤𑀸 ¶ 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀇𑀤𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁. 𑀢𑀫𑁆𑀧𑀺 𑀫𑀼𑀲𑁆𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺 𑀧𑀫𑀼𑀲𑁆𑀲𑀢𑀺 𑀲𑀫𑁆𑀧𑀫𑀼𑀲𑁆𑀲𑀢𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺. 𑀏𑀯𑀫𑁆𑀧𑀺 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁.

𑀫𑀺𑀘𑁆𑀙𑀸 ¶ 𑀘 𑀧𑀝𑀺𑀧𑀚𑁆𑀚𑀢𑀻𑀢𑀺. 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺 ¶ , 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀻𑀢𑀺 𑁋 𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺.

𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀦𑁆𑀢𑀺. 𑀏𑀢𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀦𑀭𑀺𑀬𑀥𑀫𑁆𑀫𑁄 𑀩𑀸𑀮𑀥𑀫𑁆𑀫𑁄 𑀫𑀽𑀴𑁆𑀳𑀥𑀫𑁆𑀫𑁄 𑀅𑀜𑁆𑀜𑀸𑀡𑀥𑀫𑁆𑀫𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀥𑀫𑁆𑀫𑁄, 𑀬𑀤𑀺𑀤𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀢𑀺 𑁋 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀁.

‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺, 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬’’𑀦𑁆𑀢𑀺.

𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦, 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺;

𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀁.

𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦𑀸𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸. 𑀓𑀣𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦? 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 ¶ 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 ¶ 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 ¶ 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦.

𑀓𑀣𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦.

𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀻𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀻𑀢𑀺 ¶ . 𑀬𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑁂𑀯𑀢𑀺 𑀦𑀺𑀲𑁂𑀯𑀢𑀺 𑀲𑀁𑀲𑁂𑀯𑀢𑀺 𑀧𑀝𑀺𑀲𑁂𑀯𑀢𑀻𑀢𑀺 𑁋 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺.

𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂𑀢𑀺. 𑀬𑀸𑀦𑀦𑁆𑀢𑀺 𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁 𑀕𑁄𑀬𑀸𑀦𑀁 𑀅𑀚𑀬𑀸𑀦𑀁 𑀫𑁂𑀡𑁆𑀟𑀬𑀸𑀦𑀁 𑀑𑀝𑁆𑀞𑀬𑀸𑀦𑀁 𑀔𑀭𑀬𑀸𑀦𑀁 𑀪𑀦𑁆𑀢𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀺, 𑀯𑀺𑀲𑀫𑀁 𑀔𑀸𑀡𑀼𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀅𑀪𑀺𑀭𑀼𑀳𑀢𑀺, 𑀬𑀸𑀦𑀫𑁆𑀧𑀺 𑀆𑀭𑁄𑀳𑀦𑀓𑀫𑁆𑀧𑀺 𑀪𑀜𑁆𑀚𑀢𑀺, 𑀧𑀧𑀸𑀢𑁂𑀧𑀺 𑀧𑀧𑀢𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 ¶ 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺𑀁 𑀕𑀡𑁆𑀳𑀸𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀯𑀺𑀲𑀫𑀁 𑀔𑀸𑀡𑀼𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀅𑀪𑀺𑀭𑀼𑀳𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀯𑀺𑀲𑀫𑀁 𑀓𑀸𑀬𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀯𑀘𑀻𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀫𑀦𑁄𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀧𑀸𑀡𑀸𑀢𑀺𑀧𑀸𑀢𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀅𑀤𑀺𑀦𑁆𑀦𑀸𑀤𑀸𑀦𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀫𑀼𑀲𑀸𑀯𑀸𑀤𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀧𑀺𑀲𑀼𑀡𑀯𑀸𑀘𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀨𑀭𑀼𑀲𑀯𑀸𑀘𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀅𑀪𑀺𑀭𑀼𑀳𑀢𑀺 ¶ , 𑀯𑀺𑀲𑀫𑀁 𑀅𑀪𑀺𑀚𑁆𑀛𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀩𑁆𑀬𑀸𑀧𑀸𑀤𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑁂 𑀲𑀗𑁆𑀔𑀸𑀭𑁂 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑁂 𑀦𑀻𑀯𑀭𑀡𑁂 𑀅𑀪𑀺𑀭𑀼𑀳𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀬𑀸𑀦𑀫𑁆𑀧𑀺 𑀆𑀭𑁄𑀳𑀦𑀓𑀫𑁆𑀧𑀺 𑀪𑀜𑁆𑀚𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀦𑀺𑀭𑀬𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺 ¶ , 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀤𑁂𑀯𑀮𑁄𑀓𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀧𑀧𑀸𑀢𑁂 𑀧𑀧𑀢𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀚𑀸𑀢𑀺𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀚𑀭𑀸𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀩𑁆𑀬𑀸𑀥𑀺𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀫𑀭𑀡𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 ¶ 𑁋 𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂.

𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀼𑀣𑀼𑀚𑁆𑀚𑀦𑀸? 𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸 ¶ , 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 [𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂𑀳𑀺 (𑀲𑁆𑀬𑀸.)] 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀤𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 [𑀅𑀚𑁆𑀛𑁄𑀧𑀦𑁆𑀦𑀸 (𑀲𑀻. 𑀲𑁆𑀬𑀸.)] 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀁 𑀳𑀻𑀦𑀁 𑀦𑀺𑀳𑀻𑀦𑀁 𑀑𑀫𑀓𑀁 𑀮𑀸𑀫𑀓𑀁 ¶ 𑀙𑀢𑀼𑀓𑁆𑀓𑀁 𑀧𑀭𑀺𑀢𑁆𑀢𑀦𑁆𑀢𑀺 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀁.

‘‘𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦, 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺;

𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦’’𑀦𑁆𑀢𑀺.

𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂.

𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸𑀢𑀺. 𑀓𑀢𑀫𑁄 𑀬𑀲𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 ¶ 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑁋 𑀅𑀬𑀁 𑀬𑀲𑁄. 𑀓𑀢𑀫𑀸 𑀓𑀺𑀢𑁆𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀓𑀺𑀢𑁆𑀢𑀺𑀯𑀡𑁆𑀡𑀕𑀢𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑁋 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸 𑀯𑀺𑀦𑀬𑀥𑀭𑁄𑀢𑀺 𑀯𑀸 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸 𑀆𑀭𑀜𑁆𑀜𑀺𑀓𑁄𑀢𑀺 𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀯𑀸 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀯𑀸 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀸 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀯𑀸 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄𑀢𑀺 ¶ 𑀯𑀸 𑀦𑁂𑀲𑀚𑁆𑀚𑀺𑀓𑁄𑀢𑀺 𑀯𑀸 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀯𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸, 𑀅𑀬𑀁 𑀓𑀺𑀢𑁆𑀢𑀻𑀢𑀺 𑁋 𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂.

𑀳𑀸𑀬𑀢𑁂 ¶ 𑀯𑀸𑀧𑀺 𑀢𑀲𑁆𑀲 𑀲𑀸𑀢𑀺. 𑀢𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀲𑁆𑀲 𑀲𑁄 𑀘 𑀬𑀲𑁄 𑀲𑀸 𑀘 𑀓𑀺𑀢𑁆𑀢𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺 ¶ 𑀧𑀭𑀺𑀥𑀁𑀲𑀢𑀺 𑀧𑀭𑀺𑀧𑀢𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀻𑀢𑀺 𑁋 𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂𑀢𑀺. 𑀏𑀢𑀦𑁆𑀢𑀺 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀬𑀲𑁄 𑀓𑀺𑀢𑁆𑀢𑀺 𑀘, 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀲𑁆𑀲 𑀅𑀬𑀲𑁄 𑀘 𑀅𑀓𑀺𑀢𑁆𑀢𑀺 𑀘; 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 ¶ 𑀯𑀺𑀧𑀢𑁆𑀢𑀺𑀁. 𑀤𑀺𑀲𑁆𑀯𑀸𑀢𑀺 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸. 𑀲𑀺𑀓𑁆𑀔𑁂𑀣𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄, 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄. 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀫𑁂 𑀆𑀲𑀯𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 ¶ , 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 ¶ 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀫𑁂𑀣𑀼𑀦𑀥𑀫𑁆𑀫𑁄 ¶ 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀏𑀢𑀫𑁆𑀧𑀺 ¶ 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀳𑀸𑀦𑀸𑀬 𑀯𑀽𑀧𑀲𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂.

‘‘𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂’’𑀢𑀺.

𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

𑀲𑀗𑁆𑀓𑀧𑁆𑀧𑁂𑀳𑀺 ¶ 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀻𑀢𑀺. 𑀓𑀸𑀫𑀲𑀗𑁆𑀓𑀧𑁆𑀧𑁂𑀦 𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁂𑀦 𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁂𑀦 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀺𑀳𑀺𑀢𑁄 𑀓𑀧𑀡𑁄 𑀯𑀺𑀬 𑀫𑀦𑁆𑀤𑁄 𑀯𑀺𑀬 𑀫𑁄𑀫𑀽𑀳𑁄 𑀯𑀺𑀬 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺 [𑀅𑀯𑀚𑁆𑀛𑀸𑀬𑀢𑀺 (𑀲𑁆𑀬𑀸.)]. 𑀬𑀣𑀸 𑀉𑀮𑀽𑀓𑁄 𑀭𑀼𑀓𑁆𑀔𑀲𑀸𑀔𑀸𑀬𑀁 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀬𑀣𑀸 𑀓𑁄𑀢𑁆𑀣𑀼 𑀦𑀤𑀻𑀢𑀻𑀭𑁂 𑀫𑀘𑁆𑀙𑁂 𑀫𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀬𑀣𑀸 ¶ 𑀩𑀺𑀴𑀸𑀭𑁄 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀬𑀣𑀸 𑀕𑀤𑁆𑀭𑀪𑁄 𑀯𑀳𑀘𑁆𑀙𑀺𑀦𑁆𑀦𑁄 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀓𑀸𑀫𑀲𑀗𑁆𑀓𑀧𑁆𑀧𑁂𑀦 𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁂𑀦 𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁂𑀦 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 ¶ 𑀲𑀫𑀦𑁆𑀦𑀸𑀕𑀢𑁄 𑀧𑀺𑀳𑀺𑀢𑁄 𑀓𑀧𑀡𑁄 𑀯𑀺𑀬 𑀫𑀦𑁆𑀤𑁄 𑀯𑀺𑀬 𑀫𑁄𑀫𑀽𑀳𑁄 𑀯𑀺𑀬 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀻𑀢𑀺 𑁋 𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺.

𑀲𑀼𑀢𑁆𑀯𑀸 ¶ 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄𑀢𑀺. 𑀧𑀭𑁂𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀯𑀸 𑀆𑀘𑀭𑀺𑀬𑀸 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀲𑀦𑁆𑀤𑀺𑀝𑁆𑀞𑀸 𑀯𑀸 𑀲𑀫𑁆𑀪𑀢𑁆𑀢𑀸 𑀯𑀸 𑀲𑀳𑀸𑀬𑀸 𑀯𑀸 𑀘𑁄𑀤𑁂𑀦𑁆𑀢𑀺 𑁋 ‘‘𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀅𑀮𑀸𑀪𑀸, 𑀢𑀲𑁆𑀲 𑀢𑁂 𑀤𑀼𑀮𑁆𑀮𑀤𑁆𑀥𑀁, 𑀬𑀁 𑀢𑁆𑀯𑀁 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀲𑀢𑁆𑀣𑀸𑀭𑀁 𑀮𑀪𑀺𑀢𑁆𑀯𑀸 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀭𑀽𑀧𑀁 𑀅𑀭𑀺𑀬𑀕𑀡𑀁 𑀮𑀪𑀺𑀢𑁆𑀯𑀸 𑀳𑀻𑀦𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀓𑀸𑀭𑀡𑀸 𑀩𑀼𑀤𑁆𑀥𑀁 ¶ 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑁄𑀲𑀺. 𑀲𑀤𑁆𑀥𑀸𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀫𑁆𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀻𑀭𑀺𑀬𑀫𑁆𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀢𑀺𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀜𑁆𑀜𑀸𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀢𑁂𑀲𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸 𑀫𑀗𑁆𑀓𑀼 𑀳𑁄𑀢𑀺, 𑀧𑀻𑀴𑀺𑀢𑁄 𑀖𑀝𑁆𑀝𑀺𑀢𑁄 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀣𑀸𑀯𑀺𑀥𑁄𑀢𑀺 ¶ 𑀢𑀣𑀸𑀯𑀺𑀥𑁄 𑀢𑀸𑀤𑀺𑀲𑁄 𑀢𑀲𑁆𑀲𑀡𑁆𑀞𑀺𑀢𑁄 𑀢𑀧𑁆𑀧𑀓𑀸𑀭𑁄 𑀢𑀧𑁆𑀧𑀝𑀺𑀪𑀸𑀕𑁄. 𑀬𑁄 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄𑀢𑀺 𑁋 𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

‘‘𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄’’𑀢𑀺.

𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄;

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺 [𑀲𑀁𑀕𑀸𑀳𑀢𑀺 (𑀓.)] .

𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀲𑀢𑁆𑀣𑀸𑀦𑀻𑀢𑀺 𑀢𑀻𑀡𑀺 𑀲𑀢𑁆𑀣𑀸𑀦𑀺 𑁋 𑀓𑀸𑀬𑀲𑀢𑁆𑀣𑀁, 𑀯𑀘𑀻𑀲𑀢𑁆𑀣𑀁, 𑀫𑀦𑁄𑀲𑀢𑁆𑀣𑀁. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀲𑀢𑁆𑀣𑀁, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀲𑀢𑁆𑀣𑀁, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀲𑀢𑁆𑀣𑀁. 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄𑀢𑀺. 𑀉𑀧𑀚𑁆𑀛𑀸𑀬𑁂𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁂𑀳𑀺 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑁂𑀳𑀺 ¶ 𑀯𑀸 𑀫𑀺𑀢𑁆𑀢𑁂𑀳𑀺 𑀯𑀸 𑀲𑀦𑁆𑀤𑀺𑀝𑁆𑀞𑁂𑀳𑀺 𑀯𑀸 𑀲𑀫𑁆𑀪𑀢𑁆𑀢𑁂𑀳𑀺 𑀯𑀸 𑀲𑀳𑀸𑀬𑁂𑀳𑀺 𑀯𑀸 𑀘𑁄𑀤𑀺𑀢𑁄 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. ‘‘𑀅𑀪𑀺𑀭𑀢𑁄 𑀅𑀳𑀁, 𑀪𑀦𑁆𑀢𑁂, 𑀅𑀳𑁄𑀲𑀺𑀁 𑀧𑀩𑁆𑀩𑀚𑁆𑀚𑀸𑀬. 𑀫𑀸𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸, 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀢𑀺 ¶ . ‘‘𑀧𑀺𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑁄 ¶ , 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀢𑀺. ‘‘𑀪𑀸𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑁄… 𑀪𑀕𑀺𑀦𑀻 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀧𑀼𑀢𑁆𑀢𑁄 𑀫𑁂 𑀧𑁄𑀲𑁂𑀢𑀩𑁆𑀩𑁄… 𑀥𑀻𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀫𑀺𑀢𑁆𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀅𑀫𑀘𑁆𑀘𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀜𑀸𑀢𑀓𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀲𑀸𑀮𑁄𑀳𑀺𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸, 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀢𑀺. 𑀯𑀘𑀻𑀲𑀢𑁆𑀣𑀁 𑀓𑀭𑁄𑀢𑀺 𑀲𑀗𑁆𑀓𑀭𑁄𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄.

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄𑀢𑀺. 𑀏𑀲𑁄 𑀢𑀲𑁆𑀲 𑀫𑀳𑀸𑀕𑁂𑀥𑁄 ¶ 𑀫𑀳𑀸𑀯𑀦𑀁 𑀫𑀳𑀸𑀕𑀳𑀦𑀁 𑀫𑀳𑀸𑀓𑀦𑁆𑀢𑀸𑀭𑁄 𑀫𑀳𑀸𑀯𑀺𑀲𑀫𑁄 𑀫𑀳𑀸𑀓𑀼𑀝𑀺𑀮𑁄 𑀫𑀳𑀸𑀧𑀗𑁆𑀓𑁄 𑀫𑀳𑀸𑀧𑀮𑀺𑀧𑁄 𑀫𑀳𑀸𑀧𑀮𑀺𑀩𑁄𑀥𑁄 𑀫𑀳𑀸𑀩𑀦𑁆𑀥𑀦𑀁, 𑀬𑀤𑀺𑀤𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄𑀢𑀺 𑁋 𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄.

𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻𑀢𑀺. 𑀫𑁄𑀲𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀫𑀼𑀲𑀸𑀯𑀸𑀤𑁄. 𑀇𑀥𑁂𑀓𑀘𑁆𑀘𑁄 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀻’’𑀢𑀺, ‘‘𑀚𑀸𑀦𑀁’’ 𑀯𑀸 𑀆𑀳 𑁋 ‘‘𑀦 𑀚𑀸𑀦𑀸𑀫𑀻’’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀧𑀲𑁆𑀲𑀸𑀫𑀻’’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀦 𑀧𑀲𑁆𑀲𑀸𑀫𑀻’’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 ¶ 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑁄𑀲𑀯𑀚𑁆𑀚𑀁.

𑀅𑀧𑀺 𑀘 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺. 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘 𑀘𑀢𑀽𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘 𑀧𑀜𑁆𑀘𑀳𑀸𑀓𑀸𑀭𑁂𑀳𑀺… 𑀙𑀳𑀸𑀓𑀸𑀭𑁂𑀳𑀺… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺… 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀲𑀜𑁆𑀜𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁. 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻𑀢𑀺. 𑀫𑁄𑀲𑀯𑀚𑁆𑀚𑀁 ¶ 𑀧𑀕𑀸𑀳𑀢𑀺 𑀑𑀕𑀸𑀳𑀢𑀺 𑀅𑀚𑁆𑀛𑁄𑀕𑀸𑀳𑀢𑀺 𑀧𑀯𑀺𑀲𑀢𑀻𑀢𑀺 𑁋 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺.

‘‘𑀅𑀣 ¶ 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄;

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻’’𑀢𑀺.

𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀏𑀓𑀘𑁆𑀘𑀭𑀺𑀬𑀁 [𑀏𑀓𑀘𑀭𑀺𑀬𑀁 (𑀲𑀻. 𑀲𑁆𑀬𑀸.)] 𑀅𑀥𑀺𑀝𑁆𑀞𑀺𑀢𑁄;

𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀺.

𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀓𑀺𑀢𑁆𑀢𑀺 𑀯𑀡𑁆𑀡𑀕𑀢𑁄 𑀳𑁄𑀢𑀺 𑁋 ‘‘𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸 𑀯𑀺𑀦𑀬𑀥𑀭𑁄𑀢𑀺 𑀯𑀸 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻’’𑀢𑀺 𑀯𑀸 ¶ . 𑀏𑀯𑀁 𑀜𑀸𑀢𑁄 𑀳𑁄𑀢𑀺 𑀧𑀜𑁆𑀜𑀸𑀢𑁄 𑀲𑀫𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑁋 𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄.

𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸. 𑀓𑀣𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄? 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸…𑀧𑁂… 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄. 𑀓𑀣𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺…𑀧𑁂… 𑀏𑀯𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄𑀢𑀺 𑁋 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄.

𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑁂 𑀬𑀼𑀢𑁆𑀢𑁄 [𑀬𑀼𑀢𑁆𑀢𑁄 𑀲𑀁𑀬𑀼𑀢𑁆𑀢𑁄 (𑀲𑀻.)] 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄𑀢𑀺 𑁋 𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄.

𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀻𑀢𑀺. 𑀓𑀧𑀡𑁄 𑀯𑀺𑀬 𑀫𑀦𑁆𑀤𑁄 𑀯𑀺𑀬 𑀫𑁄𑀫𑀽𑀳𑁄 𑀯𑀺𑀬 𑀓𑀺𑀲𑁆𑀲𑀢𑀺 ¶ 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺. 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑀺 ¶ 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀅𑀤𑁆𑀥𑀤𑀡𑁆𑀟𑀓𑁂𑀳𑀺𑀧𑀺 ¶ 𑀢𑀸𑀴𑁂𑀦𑁆𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺 ¶ , 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀘𑀺𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀓𑀫𑁆𑀧𑀺 (𑀓.)] 𑀓𑀭𑁄𑀦𑁆𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀅𑀣 𑀯𑀸 𑀓𑀸𑀫𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀪𑁄𑀕𑁂 𑀧𑀭𑀺𑀬𑁂𑀲𑀦𑁆𑀢𑁄 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀢𑀺, 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀧𑀻𑀴𑀺𑀬𑀫𑀸𑀦𑁄 𑀔𑀼𑀧𑁆𑀧𑀺𑀧𑀸𑀲𑀸𑀬 𑀫𑀺𑀬𑁆𑀬𑀫𑀸𑀦𑁄 𑀢𑀺𑀕𑀼𑀫𑁆𑀩𑀁 𑀕𑀘𑁆𑀙𑀢𑀺, 𑀢𑀓𑁆𑀓𑁄𑀮𑀁 𑀕𑀘𑁆𑀙𑀢𑀺, 𑀢𑀓𑁆𑀓𑀲𑀻𑀮𑀁 𑀕𑀘𑁆𑀙𑀢𑀺, 𑀓𑀸𑀮𑀫𑀼𑀔𑀁 𑀕𑀘𑁆𑀙𑀢𑀺, 𑀧𑀼𑀭𑀧𑀽𑀭𑀁 𑀕𑀘𑁆𑀙𑀢𑀺, 𑀯𑁂𑀲𑀼𑀗𑁆𑀕𑀁 𑀕𑀘𑁆𑀙𑀢𑀺, 𑀯𑁂𑀭𑀸𑀧𑀣𑀁 𑀕𑀘𑁆𑀙𑀢𑀺, 𑀚𑀯𑀁 𑀕𑀘𑁆𑀙𑀢𑀺, 𑀢𑀸𑀫𑀮𑀺𑀁 [𑀓𑀫𑀮𑀺𑀁 (𑀲𑁆𑀬𑀸.), 𑀢𑀁𑀫𑀮𑀺𑀁 (𑀓.)] 𑀕𑀘𑁆𑀙𑀢𑀺, 𑀯𑀗𑁆𑀕𑀁 𑀕𑀘𑁆𑀙𑀢𑀺, 𑀏𑀴𑀩𑀦𑁆𑀥𑀦𑀁 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀓𑀽𑀝𑀁 ¶ 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀢𑀺, 𑀢𑀫𑁆𑀩𑀧𑀸𑀡𑀺𑀁 𑀕𑀘𑁆𑀙𑀢𑀺, 𑀲𑀼𑀧𑁆𑀧𑀸𑀤𑀓𑀁 𑀕𑀘𑁆𑀙𑀢𑀺, 𑀪𑀸𑀭𑀼𑀓𑀘𑁆𑀙𑀁 𑀕𑀘𑁆𑀙𑀢𑀺, 𑀲𑀼𑀭𑀝𑁆𑀞𑀁 𑀕𑀘𑁆𑀙𑀢𑀺, 𑀪𑀗𑁆𑀕𑀮𑁄𑀓𑀁 𑀕𑀘𑁆𑀙𑀢𑀺, 𑀪𑀗𑁆𑀕𑀡𑀁 𑀕𑀘𑁆𑀙𑀢𑀺, 𑀲𑀭𑀫𑀢𑀁 𑀕𑀡𑀁 𑀕𑀘𑁆𑀙𑀢𑀺, 𑀬𑁄𑀦𑀁 𑀕𑀘𑁆𑀙𑀢𑀺 ¶ , 𑀧𑀭𑀫𑀬𑁄𑀦𑀁 [𑀧𑀻𑀦𑀁 (𑀲𑁆𑀬𑀸.)] 𑀕𑀘𑁆𑀙𑀢𑀺, 𑀯𑀺𑀦𑀓𑀁 [𑀦𑀯𑀓𑀁 (𑀲𑀻.)] 𑀕𑀘𑁆𑀙𑀢𑀺, 𑀫𑀽𑀮𑀧𑀤𑀁 𑀕𑀘𑁆𑀙𑀢𑀺, 𑀫𑀭𑀼𑀓𑀦𑁆𑀢𑀸𑀭𑀁 𑀕𑀘𑁆𑀙𑀢𑀺, 𑀚𑀡𑁆𑀡𑀼𑀧𑀣𑀁 𑀕𑀘𑁆𑀙𑀢𑀺, 𑀅𑀚𑀧𑀣𑀁 𑀕𑀘𑁆𑀙𑀢𑀺, 𑀫𑁂𑀡𑁆𑀟𑀧𑀣𑀁 𑀕𑀘𑁆𑀙𑀢𑀺, 𑀲𑀗𑁆𑀓𑀼𑀧𑀣𑀁 𑀕𑀘𑁆𑀙𑀢𑀺, 𑀙𑀢𑁆𑀢𑀧𑀣𑀁 𑀕𑀘𑁆𑀙𑀢𑀺, 𑀯𑀁𑀲𑀧𑀣𑀁 𑀕𑀘𑁆𑀙𑀢𑀺, 𑀲𑀓𑀼𑀡𑀧𑀣𑀁 𑀕𑀘𑁆𑀙𑀢𑀺, 𑀫𑀽𑀲𑀺𑀓𑀧𑀣𑀁 𑀕𑀘𑁆𑀙𑀢𑀺, 𑀤𑀭𑀺𑀧𑀣𑀁 𑀕𑀘𑁆𑀙𑀢𑀺, 𑀯𑁂𑀢𑁆𑀢𑀸𑀘𑀸𑀭𑀁 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀕𑀯𑁂𑀲𑀦𑁆𑀢𑁄 𑀦 𑀯𑀺𑀦𑁆𑀤𑀢𑀺, 𑀅𑀮𑀸𑀪𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀕𑀯𑁂𑀲𑀦𑁆𑀢𑁄 𑀯𑀺𑀦𑁆𑀤𑀢𑀺, 𑀮𑀤𑁆𑀥𑀸𑀧𑀺 𑀆𑀭𑀓𑁆𑀔𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑁋 ‘‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁, 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁, 𑀦 𑀅𑀕𑁆𑀕𑀻 𑀤𑀳𑁂𑀬𑁆𑀬𑀼𑀁, 𑀦 𑀉𑀤𑀓𑀁 𑀯𑀳𑁂𑀬𑁆𑀬, 𑀦 𑀅𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀆𑀭𑀓𑁆𑀔𑀢𑁄 𑀕𑁄𑀧𑀬𑀢𑁄 𑀢𑁂 𑀪𑁄𑀕𑀸 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀺. 𑀲𑁄 𑀯𑀺𑀧𑁆𑀧𑀬𑁄𑀕𑀫𑀽𑀮𑀓𑀫𑁆𑀧𑀺 ¶ 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀻𑀢𑀺 ¶ 𑁋 𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀺.

‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄;

𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀻’’𑀢𑀺.

𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺𑀁 𑀧𑀼𑀩𑁆𑀩𑀸𑀧𑀭𑁂 𑀇𑀥;

𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀁.

𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥𑀸𑀢𑀺. 𑀏𑀢𑀦𑁆𑀢𑀺 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀬𑀲𑁄 𑀘 𑀓𑀺𑀢𑁆𑀢𑀺 𑀘, 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 ¶ 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀲𑁆𑀲 𑀅𑀬𑀲𑁄 𑀘 𑀅𑀓𑀺𑀢𑁆𑀢𑀺 𑀘; 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀯𑀺𑀧𑀢𑁆𑀢𑀺𑀜𑁆𑀘. 𑀜𑀢𑁆𑀯𑀸𑀢𑀺 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥.

𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀏𑀓𑀘𑁆𑀘𑀭𑀺𑀬𑀁 𑀤𑀴𑀳𑀁 𑀓𑀭𑁂𑀬𑁆𑀬 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸. 𑀓𑀣𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬? 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 ¶ 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬. 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬.

𑀓𑀣𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑁂𑀬𑁆𑀬 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 ¶ 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑁂𑀬𑁆𑀬, 𑀏𑀓𑁄 𑀢𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀦𑀺𑀲𑀻𑀤𑁂𑀬𑁆𑀬, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑁂𑀬𑁆𑀬, 𑀏𑀓𑁄 ¶ 𑀧𑀝𑀺𑀓𑁆𑀓𑀫𑁂𑀬𑁆𑀬, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑁂𑀬𑁆𑀬, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬. 𑀏𑀯𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬𑀸𑀢𑀺 𑁋 𑀏𑀓𑀘𑁆𑀘𑀭𑀺𑀬𑀁 ¶ 𑀤𑀴𑁆𑀳𑀁 𑀓𑀭𑁂𑀬𑁆𑀬, 𑀣𑀺𑀭𑀁 𑀓𑀭𑁂𑀬𑁆𑀬, 𑀤𑀴𑁆𑀳𑀁 𑀲𑀫𑀸𑀤𑀸𑀦𑁄 𑀅𑀲𑁆𑀲, 𑀅𑀯𑀝𑁆𑀞𑀺𑀢𑀲𑀫𑀸𑀤𑀸𑀦𑁄 𑀅𑀲𑁆𑀲 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸.

𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀦𑁆𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀫𑁂𑀣𑀼𑀦𑀥𑀫𑁆𑀫𑀁 𑀦 𑀲𑁂𑀯𑁂𑀬𑁆𑀬 𑀦 𑀦𑀺𑀲𑁂𑀯𑁂𑀬𑁆𑀬 𑀦 𑀲𑀁𑀲𑁂𑀯𑁂𑀬𑁆𑀬 𑀦 𑀧𑀝𑀺𑀲𑁂𑀯𑁂𑀬𑁆𑀬 𑀦 𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀁.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥;

𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦’’𑀦𑁆𑀢𑀺.

𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣, 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀁;

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣𑀸𑀢𑀺. 𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸 𑁋 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀢𑀫𑁄 ¶ 𑀓𑀸𑀬𑀯𑀺𑀯𑁂𑀓𑁄…𑀧𑁂… 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁. 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀉𑀧𑀥𑀺𑀯𑀺𑀯𑁂𑀓𑁄 𑀘 ¶ 𑀦𑀺𑀭𑀽𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁. 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣𑀸𑀢𑀺 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣.

𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀦𑁆𑀢𑀺. 𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘. 𑀅𑀭𑀺𑀬𑀸𑀦𑀁 𑀏𑀢𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀬𑀤𑀺𑀤𑀁 𑀯𑀺𑀯𑁂𑀓𑀘𑀭𑀺𑀬𑀸𑀢𑀺 𑁋 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀁.

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣𑀸𑀢𑀺. 𑀓𑀸𑀬𑀯𑀺𑀯𑁂𑀓𑀘𑀭𑀺𑀬𑀸𑀬 𑀉𑀦𑁆𑀦𑀢𑀺𑀁 𑀦 𑀓𑀭𑁂𑀬𑁆𑀬, 𑀉𑀦𑁆𑀦𑀫𑀁 𑀦 𑀓𑀭𑁂𑀬𑁆𑀬, 𑀫𑀸𑀦𑀁 𑀦 𑀓𑀭𑁂𑀬𑁆𑀬, 𑀣𑀸𑀫𑀁 𑀦 𑀓𑀭𑁂𑀬𑁆𑀬, 𑀣𑀫𑁆𑀪𑀁 𑀦 𑀓𑀭𑁂𑀬𑁆𑀬, 𑀦 𑀢𑁂𑀦 𑀫𑀸𑀦𑀁 𑀚𑀦𑁂𑀬𑁆𑀬, 𑀦 𑀢𑁂𑀦 𑀣𑀤𑁆𑀥𑁄 𑀅𑀲𑁆𑀲 𑀧𑀢𑁆𑀣𑀤𑁆𑀥𑁄 𑀧𑀕𑁆𑀕𑀳𑀺𑀢𑀲𑀺𑀭𑁄𑀢𑀺 𑁋 𑀢𑁂𑀦 𑀲𑁂𑀝𑁆𑀞𑁄 𑀦 𑀫𑀜𑁆𑀜𑁂𑀣.

𑀲 ¶ ¶ 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂𑀢𑀺. 𑀲𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀺𑀓𑁂 𑀲𑀸𑀫𑀦𑁆𑀢𑀸 𑀆𑀲𑀦𑁆𑀦𑁂 𑀅𑀯𑀺𑀤𑀽𑀭𑁂 𑀉𑀧𑀓𑀝𑁆𑀞𑁂𑀢𑀺 𑁋 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

‘‘𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣, 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀁;

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂’’𑀢𑀺.

𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄;

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸.

𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄𑀢𑀺. 𑀭𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀲𑁆𑀲 ¶ 𑀧𑀯𑀺𑀯𑀺𑀢𑁆𑀢𑀲𑁆𑀲 ¶ , 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀭𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲. 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦… 𑀭𑀸𑀕𑁂𑀦… 𑀤𑁄𑀲𑁂𑀦… 𑀫𑁄𑀳𑁂𑀦… 𑀓𑁄𑀥𑁂𑀦… 𑀉𑀧𑀦𑀸𑀳𑁂𑀦… 𑀫𑀓𑁆𑀔𑁂𑀦… 𑀧𑀴𑀸𑀲𑁂𑀦… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑁂𑀦… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑁂𑀦… 𑀣𑀫𑁆𑀪𑁂𑀦… 𑀲𑀸𑀭𑀫𑁆𑀪𑁂𑀦… 𑀫𑀸𑀦𑁂𑀦… 𑀅𑀢𑀺𑀫𑀸𑀦𑁂𑀦… 𑀫𑀤𑁂𑀦… 𑀧𑀫𑀸𑀤𑁂𑀦… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀭𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲. 𑀫𑀼𑀦𑀺𑀦𑁄𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀘𑀭𑀢𑁄𑀢𑀺 𑀘𑀭𑀢𑁄 𑀯𑀺𑀳𑀭𑀢𑁄 𑀇𑀭𑀺𑀬𑀢𑁄 𑀯𑀢𑁆𑀢𑀢𑁄 𑀧𑀸𑀮𑀬𑀢𑁄 𑀬𑀧𑀬𑀢𑁄 𑀬𑀸𑀧𑀬𑀢𑁄𑀢𑀺 𑁋 𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄.

𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀫𑀸𑀦𑁄 𑀘𑀢𑁆𑀢𑀓𑀸𑀫𑁄 𑀯𑀦𑁆𑀢𑀓𑀸𑀫𑁄 𑀫𑀼𑀢𑁆𑀢𑀓𑀸𑀫𑁄 𑀧𑀳𑀻𑀦𑀓𑀸𑀫𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑁄, 𑀯𑀻𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 [𑀲𑀻𑀢𑀻𑀪𑀽𑀢𑁄 (𑀲𑀻.)] 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄.

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸𑀢𑀺. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁 ¶ 𑀧𑀚𑀸 𑀓𑀸𑀫𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀢𑁂 𑀓𑀸𑀫𑁄𑀖𑀁 𑀢𑀺𑀡𑁆𑀡𑀲𑁆𑀲 𑀪𑀯𑁄𑀖𑀁 𑀢𑀺𑀡𑁆𑀡𑀲𑁆𑀲 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑀲𑁆𑀲 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑀲𑁆𑀲 𑀲𑀩𑁆𑀩𑀲𑀗𑁆𑀔𑀸𑀭𑀧𑀣𑀁 𑀢𑀺𑀡𑁆𑀡𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 𑀦𑀺𑀢𑁆𑀢𑀺𑀡𑁆𑀡𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀲𑁆𑀲 𑀯𑀻𑀢𑀺𑀯𑀢𑁆𑀢𑀲𑁆𑀲 𑀧𑀸𑀭𑀁 𑀕𑀢𑀲𑁆𑀲 𑀧𑀸𑀭𑀁 𑀧𑀢𑁆𑀢𑀲𑁆𑀲 ¶ ¶ 𑀅𑀦𑁆𑀢𑀁 𑀕𑀢𑀲𑁆𑀲 ¶ 𑀅𑀦𑁆𑀢𑀁 𑀧𑀢𑁆𑀢𑀲𑁆𑀲 𑀓𑁄𑀝𑀺𑀁 𑀕𑀢𑀲𑁆𑀲 𑀓𑁄𑀝𑀺𑀁 𑀧𑀢𑁆𑀢𑀲𑁆𑀲 𑀧𑀭𑀺𑀬𑀦𑁆𑀢𑀁 𑀕𑀢𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀢𑁆𑀢𑀲𑁆𑀲 𑀯𑁄𑀲𑀸𑀦𑀁 𑀕𑀢𑀲𑁆𑀲 𑀯𑁄𑀲𑀸𑀦𑀁 𑀧𑀢𑁆𑀢𑀲𑁆𑀲 𑀢𑀸𑀡𑀁 𑀕𑀢𑀲𑁆𑀲 𑀢𑀸𑀡𑀁 𑀧𑀢𑁆𑀢𑀲𑁆𑀲 𑀮𑁂𑀡𑀁 𑀕𑀢𑀲𑁆𑀲 𑀮𑁂𑀡𑀁 𑀧𑀢𑁆𑀢𑀲𑁆𑀲 𑀲𑀭𑀡𑀁 𑀕𑀢𑀲𑁆𑀲 𑀲𑀭𑀡𑀁 𑀧𑀢𑁆𑀢𑀲𑁆𑀲 𑀅𑀪𑀬𑀁 𑀕𑀢𑀲𑁆𑀲 𑀅𑀪𑀬𑀁 𑀧𑀢𑁆𑀢𑀲𑁆𑀲 𑀅𑀘𑁆𑀘𑀼𑀢𑀁 𑀕𑀢𑀲𑁆𑀲 𑀅𑀘𑁆𑀘𑀼𑀢𑀁 𑀧𑀢𑁆𑀢𑀲𑁆𑀲 𑀅𑀫𑀢𑀁 𑀕𑀢𑀲𑁆𑀲 𑀅𑀫𑀢𑀁 𑀧𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀲𑁆𑀲 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺. 𑀬𑀣𑀸 𑀇𑀡𑀸𑀬𑀺𑀓𑀸 𑀆𑀦𑀡𑁆𑀬𑀁 [𑀆𑀡𑀡𑁆𑀬𑀁 (𑀅𑀝𑁆𑀞.)] 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀆𑀩𑀸𑀥𑀺𑀓𑀸 𑀆𑀭𑁄𑀕𑁆𑀬𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀩𑀦𑁆𑀥𑀦𑀩𑀤𑁆𑀥𑀸 𑀩𑀦𑁆𑀥𑀦𑀫𑁄𑀓𑁆𑀔𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀤𑀸𑀲𑀸 𑀪𑀼𑀚𑀺𑀲𑁆𑀲𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀤𑀸 [𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀢𑀸 (𑀲𑀻.), 𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀦𑀸 (𑀲𑁆𑀬𑀸.)] 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺; 𑀏𑀯𑀫𑁂𑀯𑀁 𑀧𑀚𑀸 𑀓𑀸𑀫𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸 𑀢𑁂 𑀓𑀸𑀫𑁄𑀖𑀁 𑀢𑀺𑀡𑁆𑀡𑀲𑁆𑀲 𑀪𑀯𑁄𑀖𑀁 𑀢𑀺𑀡𑁆𑀡𑀲𑁆𑀲…𑀧𑁂… 𑀦𑀺𑀩𑁆𑀩𑀸𑀦𑀁 𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀲𑁆𑀲 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑁋 𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸.

‘‘𑀭𑀺𑀢𑁆𑀢𑀲𑁆𑀲 ¶ 𑀫𑀼𑀦𑀺𑀦𑁄 𑀘𑀭𑀢𑁄, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄;

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀫𑁄.

𑀅𑀣 ¶ 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀇𑀥𑁂𑀯 ¶ ¶ 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸, 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸.

𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀻𑀢𑀺. 𑀇𑀥𑁂𑀯 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄 ¶ … 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺.

𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀽𑀢𑀺. 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀭𑀯𑀸𑀤𑁂 𑀔𑀺𑀧𑀦𑁆𑀢𑀺 𑀉𑀓𑁆𑀔𑀺𑀧𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺. ‘‘𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄 ¶ , 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸 ¶ , 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 𑀯𑀸, 𑀦 𑀢𑀢𑁆𑀣 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸’’𑀢𑀺 𑁋 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀯𑀤𑀦𑁆𑀢𑀺 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼.

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸𑀢𑀺. 𑀬𑀁 𑀦𑀺𑀲𑁆𑀲𑀺𑀢𑀸𑀢𑀺 𑀬𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 ¶ 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑀸 𑀆𑀦𑀺𑀲𑁆𑀲𑀺𑀢𑀸 [𑀧𑀢𑀺𑀝𑁆𑀞𑀺𑀢𑀸 (𑀲𑀻.), 𑀲𑀦𑁆𑀦𑀺𑀲𑁆𑀲𑀺𑀢𑀸 (𑀲𑁆𑀬𑀸.)] 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀲𑀼𑀪𑀁 𑀯𑀤𑀸𑀦𑀸𑀢𑀺 𑀲𑀼𑀪𑀯𑀸𑀤𑀸 𑀲𑁄𑀪𑀦𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 [𑀥𑀻𑀭𑀯𑀸𑀤𑀸 (𑀲𑁆𑀬𑀸.)] 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸.

𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸𑀢𑀺. 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀣𑀽 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 ¶ 𑁋 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸.

‘‘𑀇𑀥𑁂𑀯 ¶ 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸, 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸’’𑀢𑀺.

𑀢𑁂 ¶ 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁, 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸.

𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳𑀸𑀢𑀺. 𑀢𑁂 𑀯𑀸𑀤𑀓𑀸𑀫𑀸𑀢𑀺 𑀢𑁂 𑀯𑀸𑀤𑀓𑀸𑀫𑀸 𑀯𑀸𑀤𑀢𑁆𑀣𑀺𑀓𑀸 𑀯𑀸𑀤𑀸𑀥𑀺𑀧𑁆𑀧𑀸𑀬𑀸 𑀯𑀸𑀤𑀧𑀼𑀭𑁂𑀓𑁆𑀔𑀸𑀭𑀸 𑀯𑀸𑀤𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀸. 𑀧𑀭𑀺𑀲𑀁 𑀯𑀺𑀕𑀬𑁆𑀳𑀸𑀢𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀕𑀳𑀧𑀢𑀺𑀧𑀭𑀺𑀲𑀁 𑀲𑀫𑀡𑀧𑀭𑀺𑀲𑀁 𑀯𑀺𑀕𑀬𑁆𑀳 𑀑𑀕𑀬𑁆𑀳 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸𑀢𑀺 𑁋 𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳.

𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀦𑁆𑀢𑀺. 𑀫𑀺𑀣𑀽𑀢𑀺 𑀤𑁆𑀯𑁂 𑀚𑀦𑀸 𑀤𑁆𑀯𑁂 𑀓𑀮𑀳𑀓𑀸𑀭𑀓𑀸 𑀤𑁆𑀯𑁂 𑀪𑀡𑁆𑀟𑀦𑀓𑀸𑀭𑀓𑀸 𑀤𑁆𑀯𑁂 𑀪𑀲𑁆𑀲𑀓𑀸𑀭𑀓𑀸 𑀤𑁆𑀯𑁂 𑀯𑀺𑀯𑀸𑀤𑀓𑀸𑀭𑀓𑀸 𑀤𑁆𑀯𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀤𑁆𑀯𑁂 𑀯𑀸𑀤𑀺𑀦𑁄 𑀤𑁆𑀯𑁂 𑀲𑀮𑁆𑀮𑀸𑀧𑀓𑀸; 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀩𑀸𑀮𑀢𑁄 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀳𑀦𑁆𑀢𑀺 𑀧𑀲𑁆𑀲𑀦𑁆𑀢𑀺 𑀤𑀓𑁆𑀔𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑁋 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁.

𑀯𑀤𑀦𑁆𑀢𑀺 ¶ ¶ 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀦𑁆𑀢𑀺. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑀸 𑀆𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. 𑀓𑀣𑁄𑀚𑁆𑀚𑀁 𑀯𑀼𑀘𑁆𑀘𑀢𑀺 𑀓𑀮𑀳𑁄 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀫𑁂𑀥𑀕𑀁. 𑀅𑀣 𑀯𑀸 𑀓𑀣𑁄𑀚𑁆𑀚𑀦𑁆𑀢𑀺 𑀅𑀦𑁄𑀚𑀯𑀦𑁆𑀢𑀻 𑀦𑀺𑀲𑀸𑀓𑀣𑀸 𑀓𑀣𑁄𑀚𑁆𑀚𑀁 𑀯𑀤𑀦𑁆𑀢𑀺, 𑀓𑀮𑀳𑀁 𑀯𑀤𑀦𑁆𑀢𑀺, 𑀪𑀡𑁆𑀟𑀦𑀁 𑀯𑀤𑀦𑁆𑀢𑀺, 𑀯𑀺𑀕𑁆𑀕𑀳𑀁 𑀯𑀤𑀦𑁆𑀢𑀺, 𑀯𑀺𑀯𑀸𑀤𑀁 𑀯𑀤𑀦𑁆𑀢𑀺, 𑀫𑁂𑀥𑀕𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁.

𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸𑀢𑀺. 𑀧𑀲𑀁𑀲𑀓𑀸𑀫𑀸𑀢𑀺 𑀧𑀲𑀁𑀲𑀓𑀸𑀫𑀸 𑀧𑀲𑀁𑀲𑀢𑁆𑀣𑀺𑀓𑀸 𑀧𑀲𑀁𑀲𑀸𑀥𑀺𑀧𑁆𑀧𑀸𑀬𑀸 𑀧𑀲𑀁𑀲𑀧𑀼𑀭𑁂𑀓𑁆𑀔𑀸𑀭𑀸 𑀧𑀲𑀁𑀲𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀸. 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 ¶ 𑀓𑀼𑀲𑀮𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸.

‘‘𑀢𑁂 ¶ 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁, 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺.

𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺, 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻.

𑀬𑀼𑀢𑁆𑀢𑁄 ¶ 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂𑀢𑀺. 𑀔𑀢𑁆𑀢𑀺𑀬𑀧𑀭𑀺𑀲𑀸𑀬 𑀯𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸𑀬 𑀯𑀸 𑀕𑀳𑀧𑀢𑀺𑀧𑀭𑀺𑀲𑀸𑀬 𑀯𑀸 𑀲𑀫𑀡𑀧𑀭𑀺𑀲𑀸𑀬 𑀯𑀸 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀓𑀣𑀸𑀬𑀁 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑁄 𑀓𑀣𑁂𑀢𑀼𑀦𑁆𑀢𑀺 𑁋 𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂.

𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺. 𑀧𑀲𑀁𑀲𑀫𑀺𑀘𑁆𑀙𑀦𑁆𑀢𑀺 𑀧𑀲𑀁𑀲𑀁 𑀣𑁄𑀫𑀦𑀁 𑀓𑀺𑀢𑁆𑀢𑀺𑀁 𑀯𑀡𑁆𑀡𑀳𑀸𑀭𑀺𑀬𑀁 𑀇𑀘𑁆𑀙𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄 𑀧𑀢𑁆𑀣𑀬𑀦𑁆𑀢𑁄 𑀧𑀺𑀳𑀬𑀦𑁆𑀢𑁄 𑀅𑀪𑀺𑀚𑀧𑁆𑀧𑀦𑁆𑀢𑁄. 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑀧𑀼𑀩𑁆𑀩𑁂𑀯 𑀲𑀮𑁆𑀮𑀸𑀧𑀸 𑀓𑀣𑀁𑀓𑀣𑀻 𑀯𑀺𑀦𑀺𑀖𑀸𑀢𑀻 𑀳𑁄𑀢𑀺. ‘‘𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀧𑀭𑀸𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑀣𑀁 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀆𑀯𑁂𑀞𑀺𑀬𑀁 [𑀆𑀯𑁂𑀥𑀺𑀬𑀁 (𑀲𑁆𑀬𑀸.)] 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀦𑀺𑀩𑁆𑀩𑁂𑀞𑀺𑀬𑀁 [𑀦𑀺𑀩𑁆𑀩𑁂𑀥𑀺𑀬𑀁 (𑀲𑁆𑀬𑀸. 𑀓.)] 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀙𑁂𑀤𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀫𑀡𑁆𑀟𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺, 𑀏𑀯𑀁 𑀧𑀼𑀩𑁆𑀩𑁂𑀯 𑀲𑀮𑁆𑀮𑀸𑀧𑀸 𑀓𑀣𑀁𑀓𑀣𑀻 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑁋 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺.

𑀅𑀧𑀸𑀳𑀢𑀲𑁆𑀫𑀺𑀁 ¶ 𑀧𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺. 𑀬𑁂 𑀢𑁂 𑀧𑀜𑁆𑀳𑀯𑀻𑀫𑀁𑀲𑀓𑀸 ¶ 𑀧𑀭𑀺𑀲𑀸 𑀧𑀸𑀭𑀺𑀲𑀚𑁆𑀚𑀸 𑀧𑀸𑀲𑀸𑀭𑀺𑀓𑀸 [𑀧𑀸𑀲𑀦𑀺𑀓𑀸 (𑀲𑁆𑀬𑀸.)], 𑀢𑁂 𑀅𑀧𑀳𑀭𑀦𑁆𑀢𑀺. ‘‘𑀅𑀢𑁆𑀣𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑁄 𑀢𑁂 𑀤𑀼𑀦𑁆𑀦𑀻𑀢𑁄, 𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀭𑁄𑀧𑀺𑀢𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀦𑁆𑀦𑀻𑀢𑀁 𑀤𑀼𑀭𑁄𑀧𑀺𑀢𑀁, 𑀦𑀺𑀕𑁆𑀕𑀳𑁄 𑀢𑁂 𑀅𑀓𑀢𑁄, 𑀧𑀝𑀺𑀓𑀫𑁆𑀫𑀁 𑀢𑁂 𑀤𑀼𑀓𑁆𑀓𑀝𑀁, 𑀯𑀺𑀲𑁂𑀲𑁄 𑀢𑁂 𑀅𑀓𑀢𑁄, 𑀧𑀝𑀺𑀯𑀺𑀲𑁂𑀲𑁄 𑀢𑁂 𑀤𑀼𑀓𑁆𑀓𑀝𑁄, 𑀆𑀯𑁂𑀞𑀺𑀬𑀸 𑀢𑁂 𑀅𑀓𑀢𑀸, 𑀦𑀺𑀩𑁆𑀩𑁂𑀞𑀺𑀬𑀸 𑀢𑁂 𑀤𑀼𑀓𑁆𑀓𑀝𑀸 ¶ , 𑀙𑁂𑀤𑁄 𑀢𑁂 𑀅𑀓𑀢𑁄, 𑀫𑀡𑁆𑀟𑀮𑀁 𑀢𑁂 𑀤𑀼𑀓𑁆𑀓𑀝𑀁 𑀯𑀺𑀲𑀫𑀓𑀣𑀁 𑀤𑀼𑀓𑁆𑀓𑀣𑀺𑀢𑀁 𑀤𑀼𑀩𑁆𑀪𑀡𑀺𑀢𑀁 𑀤𑀼𑀮𑁆𑀮𑀧𑀺𑀢𑀁 𑀤𑀼𑀭𑀼𑀢𑁆𑀢𑀁 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺 𑀅𑀧𑀳𑀭𑀦𑁆𑀢𑀺. 𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺 ¶ . 𑀅𑀧𑀸𑀳𑀢𑀲𑁆𑀫𑀺𑀁 𑀫𑀗𑁆𑀓𑀼 𑀳𑁄𑀢𑀺 𑀧𑀻𑀴𑀺𑀢𑁄 𑀖𑀝𑁆𑀝𑀺𑀢𑁄 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑁋 𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺.

𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻𑀢𑀺. 𑀦𑀺𑀦𑁆𑀤𑀸𑀬 𑀕𑀭𑀳𑀸𑀬 𑀅𑀓𑀺𑀢𑁆𑀢𑀺𑀬𑀸 𑀅𑀯𑀡𑁆𑀡𑀳𑀸𑀭𑀺𑀓𑀸𑀬 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀝𑁆𑀞𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀻𑀢𑀺 𑁋 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺. 𑀭𑀦𑁆𑀥𑀫𑁂𑀲𑀻𑀢𑀺 𑀯𑀺𑀭𑀦𑁆𑀥𑀫𑁂𑀲𑀻 𑀅𑀧𑀭𑀤𑁆𑀥𑀫𑁂𑀲𑀻 𑀔𑀮𑀺𑀢𑀫𑁂𑀲𑀻 𑀕𑀴𑀺𑀢𑀫𑁂𑀲𑀻 𑀯𑀺𑀯𑀭𑀫𑁂𑀲𑀻𑀢𑀺 𑁋 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻.

‘‘𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺, 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻’’𑀢𑀺.

𑀬𑀫𑀲𑁆𑀲 ¶ 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼, 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂 [𑀧𑀜𑁆𑀳𑀯𑀺𑀫𑀁𑀲𑀓𑀸 𑀬𑁂 (𑀲𑁆𑀬𑀸.)] ;

𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄, 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺.

𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀽𑀢𑀺 𑀬𑀁 𑀢𑀲𑁆𑀲 𑀯𑀸𑀤𑀁 𑀳𑀻𑀦𑀁 𑀦𑀺𑀳𑀻𑀦𑀁 𑀧𑀭𑀺𑀳𑀻𑀦𑀁 𑀧𑀭𑀺𑀳𑀸𑀧𑀺𑀢𑀁 𑀦 𑀧𑀭𑀺𑀧𑀽𑀭𑀺𑀢𑀁, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 ¶ 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼.

𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂𑀢𑀺. 𑀬𑁂 𑀢𑁂 𑀧𑀜𑁆𑀳𑀯𑀻𑀫𑀁𑀲𑀓𑀸 𑀧𑀭𑀺𑀲𑀸 𑀧𑀸𑀭𑀺𑀲𑀚𑁆𑀚𑀸 𑀧𑀸𑀲𑀸𑀭𑀺𑀓𑀸, 𑀢𑁂 𑀅𑀧𑀳𑀭𑀦𑁆𑀢𑀺. ‘‘𑀅𑀢𑁆𑀣𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑁄 𑀢𑁂 𑀤𑀼𑀦𑁆𑀦𑀻𑀢𑁄, 𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀭𑁄𑀧𑀺𑀢𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀦𑁆𑀦𑀻𑀢𑀁 𑀤𑀼𑀭𑁄𑀧𑀺𑀢𑀁, 𑀦𑀺𑀕𑁆𑀕𑀳𑁄 𑀢𑁂 𑀅𑀓𑀢𑁄, 𑀧𑀝𑀺𑀓𑀫𑁆𑀫𑀁 ¶ 𑀢𑁂 𑀤𑀼𑀓𑁆𑀓𑀝𑀁, 𑀯𑀺𑀲𑁂𑀲𑁄 𑀢𑁂 𑀅𑀓𑀢𑁄, 𑀧𑀝𑀺𑀯𑀺𑀲𑁂𑀲𑁄 𑀢𑁂 𑀤𑀼𑀓𑁆𑀓𑀝𑁄, 𑀆𑀯𑁂𑀞𑀺𑀬𑀸 𑀢𑁂 𑀅𑀓𑀢𑀸, 𑀦𑀺𑀩𑁆𑀩𑁂𑀞𑀺𑀬𑀸 𑀢𑁂 𑀤𑀼𑀓𑁆𑀓𑀝𑀸, 𑀙𑁂𑀤𑁄 𑀢𑁂 𑀅𑀓𑀢𑁄, 𑀫𑀡𑁆𑀟𑀮𑀁 𑀢𑁂 𑀤𑀼𑀓𑁆𑀓𑀝𑀁 𑀯𑀺𑀲𑀫𑀓𑀣𑀁 𑀤𑀼𑀓𑁆𑀓𑀣𑀺𑀢𑀁 𑀤𑀼𑀩𑁆𑀪𑀡𑀺𑀢𑀁 𑀤𑀼𑀮𑁆𑀮𑀧𑀺𑀢𑀁 𑀤𑀼𑀭𑀼𑀢𑁆𑀢𑀁 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺, 𑀅𑀧𑀳𑀭𑀦𑁆𑀢𑀻𑀢𑀺 𑁋 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂.

𑀧𑀭𑀺𑀤𑁂𑀯𑀢𑀺 ¶ 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 ‘‘𑀅𑀜𑁆𑀜𑀁 𑀫𑀬𑀸 𑀆𑀯𑀚𑁆𑀚𑀺𑀢𑀁 𑀅𑀜𑁆𑀜𑀁 𑀘𑀺𑀦𑁆𑀢𑀺𑀢𑀁 𑀅𑀜𑁆𑀜𑀁 𑀉𑀧𑀥𑀸𑀭𑀺𑀢𑀁, 𑀅𑀜𑁆𑀜𑀁 𑀉𑀧𑀮𑀓𑁆𑀔𑀺𑀢𑀁 𑀲𑁄 𑀫𑀳𑀸𑀧𑀓𑁆𑀔𑁄 𑀫𑀳𑀸𑀧𑀭𑀺𑀲𑁄 𑀫𑀳𑀸𑀧𑀭𑀺𑀯𑀸𑀭𑁄; 𑀧𑀭𑀺𑀲𑀸 𑀘𑀸𑀬𑀁 𑀯𑀕𑁆𑀕𑀸, 𑀦 𑀲𑀫𑀕𑁆𑀕𑀸; 𑀲𑀫𑀕𑁆𑀕𑀸𑀬 𑀧𑀭𑀺𑀲𑀸𑀬 𑀳𑁂𑀢𑀼 𑀓𑀣𑀸𑀲𑀮𑁆𑀮𑀸𑀧𑁄 𑀧𑀼𑀦 𑀪𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺, 𑀬𑀸 𑀏𑀯𑀭𑀽𑀧𑀸 [𑀬𑁄 𑀏𑀯𑀭𑀽𑀧𑁄 (𑀲𑁆𑀬𑀸.)] 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀦𑁆𑀢𑀺 𑁋 𑀧𑀭𑀺𑀤𑁂𑀯𑀢𑀺. 𑀲𑁄𑀘𑀢𑀻𑀢𑀺 ‘‘𑀢𑀲𑁆𑀲 𑀚𑀬𑁄’’𑀢𑀺 𑀲𑁄𑀘𑀢𑀺 ‘‘𑀫𑀬𑁆𑀳𑀁 𑀧𑀭𑀸𑀚𑀬𑁄’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀮𑀸𑀪𑁄’’𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀅𑀮𑀸𑀪𑁄’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀬𑀲𑁄’’𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀅𑀬𑀲𑁄’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀧𑀲𑀁𑀲𑀸’’𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀦𑀺𑀦𑁆𑀤𑀸’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀲𑀼𑀔’’𑀦𑁆𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀤𑀼𑀓𑁆𑀔’’𑀦𑁆𑀢𑀺 𑀲𑁄𑀘𑀢𑀺, ‘‘𑀲𑁄 ¶ 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀅𑀳𑀫𑀲𑁆𑀫𑀺 𑀅𑀲𑀓𑁆𑀓𑀢𑁄 𑀅𑀕𑀭𑀼𑀓𑀢𑁄 𑀅𑀫𑀸𑀦𑀺𑀢𑁄 ¶ 𑀅𑀧𑀽𑀚𑀺𑀢𑁄 𑀅𑀦𑀧𑀘𑀺𑀢𑁄 𑀦 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺. 𑀳𑀻𑀦𑀯𑀸𑀤𑁄𑀢𑀺 𑀳𑀻𑀦𑀯𑀸𑀤𑁄 𑀦𑀺𑀳𑀻𑀦𑀯𑀸𑀤𑁄 𑀧𑀭𑀺𑀳𑀻𑀦𑀯𑀸𑀤𑁄 𑀧𑀭𑀺𑀳𑀸𑀧𑀺𑀢𑀯𑀸𑀤𑁄 𑀦 𑀧𑀭𑀺𑀧𑀽𑀭𑀯𑀸𑀤𑁄𑀢𑀺 𑁋 𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄.

𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀻𑀢𑀺. 𑀲𑁄 𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀅𑀘𑁆𑀘𑀕𑀸 𑀉𑀧𑀘𑁆𑀘𑀕𑀸 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺. 𑀏𑀯𑀫𑁆𑀧𑀺 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺. 𑀅𑀣 𑀯𑀸 𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀬𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺. 𑀏𑀯𑀫𑁆𑀧𑀺 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺. 𑀅𑀦𑀼𑀢𑁆𑀣𑀼𑀦𑀸 𑀯𑀼𑀘𑁆𑀘𑀢𑀺 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀦𑁆𑀢𑀺 𑁋 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺.

‘‘𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼, 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂;

𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄, 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀻’’𑀢𑀺.

𑀏𑀢𑁂 ¶ 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸, 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀏𑀢𑀫𑁆𑀧𑀺 ¶ 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁, 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸.

𑀏𑀢𑁂 ¶ 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸𑀢𑀺. 𑀲𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀭𑀺𑀩𑁆𑀩𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀚𑀲𑀫𑀸𑀧𑀦𑁆𑀦𑀸. 𑀏𑀢𑁂 𑀤𑀺𑀝𑁆𑀞𑀺𑀓𑀮𑀳𑀸 𑀤𑀺𑀝𑁆𑀞𑀺𑀪𑀡𑁆𑀟𑀦𑀸 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑀸 𑀤𑀺𑀝𑁆𑀞𑀺𑀯𑀺𑀯𑀸𑀤𑀸 𑀤𑀺𑀝𑁆𑀞𑀺𑀫𑁂𑀥𑀕𑀸 𑀲𑀫𑀡𑁂𑀲𑀼 𑀚𑀸𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸𑀢𑀺 𑁋 𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸.

𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺. 𑀚𑀬𑀧𑀭𑀸𑀚𑀬𑁄 𑀳𑁄𑀢𑀺, 𑀮𑀸𑀪𑀸𑀮𑀸𑀪𑁄 𑀳𑁄𑀢𑀺, 𑀬𑀲𑀸𑀬𑀲𑁄 𑀳𑁄𑀢𑀺, 𑀦𑀺𑀦𑁆𑀤𑀸𑀧𑀲𑀁𑀲𑀸 𑀳𑁄𑀢𑀺, 𑀲𑀼𑀔𑀤𑀼𑀓𑁆𑀔𑀁 ¶ 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀇𑀝𑁆𑀞𑀸𑀦𑀺𑀝𑁆𑀞𑀁 𑀳𑁄𑀢𑀺, 𑀅𑀦𑀼𑀦𑀬𑀧𑀝𑀺𑀖𑀁 𑀳𑁄𑀢𑀺, 𑀉𑀕𑁆𑀖𑀸𑀢𑀺𑀢𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀅𑀦𑀼𑀭𑁄𑀥𑀯𑀺𑀭𑁄𑀥𑁄 𑀳𑁄𑀢𑀺, 𑀚𑀬𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀧𑀭𑀸𑀚𑀬𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀮𑀸𑀪𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀅𑀮𑀸𑀪𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀬𑀲𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀅𑀬𑀲𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀧𑀲𑀁𑀲𑀸𑀬 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀦𑀺𑀦𑁆𑀤𑀸𑀬 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀤𑀼𑀓𑁆𑀔𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀤𑁄𑀫𑀦𑀲𑁆𑀲𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀉𑀦𑁆𑀦𑀢𑀺𑀬𑀸 [𑀉𑀡𑁆𑀡𑀢𑀺𑀬𑀸 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀑𑀦𑀢𑀺𑀬𑀸 [𑀑𑀡𑀢𑀺𑀬𑀸 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀻𑀢𑀺 𑁋 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀺.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀦𑁆𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀁 ¶ 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀓𑀮𑀳𑁂𑀲𑀼 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀲𑀼 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀲𑀼 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀲𑀼 𑀤𑀺𑀝𑁆𑀞𑀺𑀫𑁂𑀥𑀕𑁂𑀲𑀽𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀦𑁆𑀢𑀺. 𑀓𑀣𑁄𑀚𑁆𑀚𑀁 𑀯𑀼𑀘𑁆𑀘𑀢𑀺 𑀓𑀮𑀳𑁄 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀫𑁂𑀥𑀕𑀁. 𑀅𑀣 𑀯𑀸 𑀓𑀣𑁄𑀚𑁆𑀚𑀦𑁆𑀢𑀺 𑀅𑀦𑁄𑀚𑀯𑀦𑁆𑀢𑀻 𑀦𑀺𑀲𑀸𑀓𑀣𑀸 𑀓𑀣𑁄𑀚𑁆𑀚𑀁 𑀦 𑀓𑀭𑁂𑀬𑁆𑀬, 𑀓𑀮𑀳𑀁 𑀦 𑀓𑀭𑁂𑀬𑁆𑀬, 𑀪𑀡𑁆𑀟𑀦𑀁 𑀦 𑀓𑀭𑁂𑀬𑁆𑀬, 𑀯𑀺𑀕𑁆𑀕𑀳𑀁 𑀦 𑀓𑀭𑁂𑀬𑁆𑀬, 𑀯𑀺𑀯𑀸𑀤𑀁 𑀦 𑀓𑀭𑁂𑀬𑁆𑀬, 𑀫𑁂𑀥𑀕𑀁 𑀦 𑀓𑀭𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 ¶ 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁.

𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸𑀢𑀺. 𑀧𑀲𑀁𑀲𑀮𑀸𑀪𑀸 𑀅𑀜𑁆𑀜𑁄 𑀅𑀢𑁆𑀣𑁄 𑀦𑀢𑁆𑀣𑀺 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 ¶ , 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄, 𑀦𑀻𑀢𑁄 𑀯𑀸 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀻𑀢𑀺 𑁋 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸.

‘‘𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸, 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀏𑀢𑀫𑁆𑀧𑀺 ¶ 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁, 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸’’𑀢𑀺.

𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺, 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁄 [𑀲𑁄 𑀢𑀁 (𑀲𑀻.)] 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 [𑀉𑀡𑁆𑀡𑀫𑀢𑀻 (𑀲𑁆𑀬𑀸. 𑀓.)] 𑀘 𑀢𑁂𑀦, 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀼.

𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀧𑀲𑀁𑀲𑀺𑀢𑁄 𑀣𑁄𑀫𑀺𑀢𑁄 𑀓𑀺𑀢𑁆𑀢𑀺𑀢𑁄 𑀯𑀡𑁆𑀡𑀺𑀢𑁄 𑀳𑁄𑀢𑀻𑀢𑀺 𑁋 𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺.

𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂𑀢𑀺. 𑀔𑀢𑁆𑀢𑀺𑀬𑀧𑀭𑀺𑀲𑀸𑀬 𑀯𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸𑀬 𑀯𑀸 𑀕𑀳𑀧𑀢𑀺𑀧𑀭𑀺𑀲𑀸𑀬 𑀯𑀸 𑀲𑀫𑀡𑀧𑀭𑀺𑀲𑀸𑀬 𑀯𑀸 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀯𑀸𑀤𑀁 𑀅𑀓𑁆𑀔𑀸𑀬 𑀆𑀘𑀺𑀓𑁆𑀔𑀺𑀢𑁆𑀯𑀸 𑀅𑀦𑀼𑀯𑀸𑀤𑀁 𑀅𑀓𑁆𑀔𑀸𑀬 𑀆𑀘𑀺𑀓𑁆𑀔𑀺𑀢𑁆𑀯𑀸 𑀣𑀫𑁆𑀪𑀬𑀺𑀢𑁆𑀯𑀸 𑀩𑁆𑀭𑀽𑀳𑀬𑀺𑀢𑁆𑀯𑀸 𑀤𑀻𑀧𑀬𑀺𑀢𑁆𑀯𑀸 𑀚𑁄𑀢𑀬𑀺𑀢𑁆𑀯𑀸 𑀯𑁄𑀳𑀭𑀺𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑁋 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂.

𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦𑀸𑀢𑀺. 𑀲𑁄 𑀢𑁂𑀦 𑀚𑀬𑀢𑁆𑀣𑁂𑀦 𑀢𑀼𑀝𑁆𑀞𑁄 𑀳𑁄𑀢𑀺 𑀳𑀝𑁆𑀞𑁄 𑀧𑀳𑀝𑁆𑀞𑁄 𑀅𑀢𑁆𑀢𑀫𑀦𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀅𑀣 𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀫𑀸𑀦𑁄. 𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦𑀸𑀢𑀺 𑀲𑁄 𑀢𑁂𑀦 𑀚𑀬𑀢𑁆𑀣𑁂𑀦 ¶ 𑀉𑀦𑁆𑀦𑀢𑁄 𑀳𑁄𑀢𑀺 𑀉𑀦𑁆𑀦𑀫𑁄 ¶ 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑁋 𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦.

𑀧𑀧𑁆𑀧𑀼𑀬𑁆𑀬 ¶ 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀽𑀢𑀺. 𑀢𑀁 𑀚𑀬𑀢𑁆𑀣𑀁 𑀧𑀧𑁆𑀧𑀼𑀬𑁆𑀬 𑀧𑀸𑀧𑀼𑀡𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸. 𑀬𑀣𑀸 𑀫𑀦𑁄 𑀅𑀳𑀽𑀢𑀺 𑀬𑀣𑀸 𑀫𑀦𑁄 𑀅𑀳𑀼, 𑀬𑀣𑀸 𑀘𑀺𑀢𑁆𑀢𑁄 𑀅𑀳𑀼, 𑀬𑀣𑀸 𑀲𑀗𑁆𑀓𑀧𑁆𑀧𑁄 𑀅𑀳𑀼, 𑀬𑀣𑀸 𑀯𑀺𑀜𑁆𑀜𑀸𑀡𑁄 𑀅𑀳𑀽𑀢𑀺 𑁋 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀼.

‘‘𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺, 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦, 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀽’’𑀢𑀺.

𑀬𑀸 ¶ 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺, 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀻𑀢𑀺. 𑀬𑀸 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑁋 𑀬𑀸 𑀉𑀦𑁆𑀦𑀢𑀺. 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀻𑀢𑀺 𑀲𑀸 𑀢𑀲𑁆𑀲 𑀯𑀺𑀖𑀸𑀢𑀪𑀽𑀫𑀺 𑀉𑀧𑀖𑀸𑀢𑀪𑀽𑀫𑀺 𑀧𑀻𑀴𑀦𑀪𑀽𑀫𑀺 𑀖𑀝𑁆𑀝𑀦𑀪𑀽𑀫𑀺 𑀉𑀧𑀤𑁆𑀤𑀯𑀪𑀽𑀫𑀺 𑀉𑀧𑀲𑀕𑁆𑀕𑀪𑀽𑀫𑀻𑀢𑀺 𑁋 𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺.

𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄𑀢𑀺. 𑀲𑁄 𑀧𑀼𑀕𑁆𑀕𑀮𑁄 𑀫𑀸𑀦𑀜𑁆𑀘 𑀯𑀤𑀢𑀺 𑀅𑀢𑀺𑀫𑀸𑀦𑀜𑁆𑀘 𑀯𑀤𑀢𑀻𑀢𑀺 𑁋 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣𑀸𑀢𑀺. 𑀏𑀢𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀓𑀮𑀳𑁂𑀲𑀼 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀲𑀼 ¶ 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀲𑀼 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀲𑀼 𑀤𑀺𑀝𑁆𑀞𑀺𑀫𑁂𑀥𑀕𑁂𑀲𑀽𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸. 𑀦 𑀯𑀺𑀯𑀸𑀤𑀬𑁂𑀣𑀸𑀢𑀺 ¶ 𑀦 𑀓𑀮𑀳𑀁 𑀓𑀭𑁂𑀬𑁆𑀬 𑀦 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬 𑀦 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬 𑀦 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬, 𑀦 𑀫𑁂𑀥𑀕𑀁 𑀓𑀭𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣.

𑀦 ¶ 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 𑀤𑀺𑀝𑁆𑀞𑀺𑀓𑀮𑀳𑁂𑀦 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀦 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀦 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀦 𑀤𑀺𑀝𑁆𑀞𑀺𑀫𑁂𑀥𑀕𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀦 𑀪𑀡𑀦𑁆𑀢𑀺 𑀦 𑀤𑀻𑀧𑀬𑀦𑁆𑀢𑀺 𑀦 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

‘‘𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺, 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻’’𑀢𑀺.

𑀲𑀽𑀭𑁄 ¶ ¶ 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄, 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁;

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭, 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬.

𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄𑀢𑀺. 𑀲𑀽𑀭𑁄𑀢𑀺 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻. 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄𑀢𑀺 𑀭𑀸𑀚𑀔𑀸𑀤𑀦𑀻𑀬𑁂𑀦 𑀭𑀸𑀚𑀪𑁄𑀚𑀦𑀻𑀬𑁂𑀦 𑀧𑀼𑀝𑁆𑀞𑁄 𑀧𑁄𑀲𑀺𑀢𑁄 ¶ 𑀅𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄𑀢𑀺 𑁋 𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄.

𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀦𑁆𑀢𑀺. 𑀲𑁄 𑀕𑀚𑁆𑀚𑀦𑁆𑀢𑁄 𑀉𑀕𑁆𑀕𑀚𑁆𑀚𑀦𑁆𑀢𑁄 𑀅𑀪𑀺𑀕𑀚𑁆𑀚𑀦𑁆𑀢𑁄 𑀏𑀢𑀺 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀧𑀝𑀺𑀲𑀽𑀭𑀁 𑀧𑀝𑀺𑀧𑀼𑀭𑀺𑀲𑀁 𑀧𑀝𑀺𑀲𑀢𑁆𑀢𑀼𑀁 𑀧𑀝𑀺𑀫𑀮𑁆𑀮𑀁 𑀇𑀘𑁆𑀙𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄 𑀧𑀢𑁆𑀣𑀬𑀦𑁆𑀢𑁄 𑀧𑀺𑀳𑀬𑀦𑁆𑀢𑁄 𑀅𑀪𑀺𑀚𑀧𑁆𑀧𑀦𑁆𑀢𑁄𑀢𑀺 𑁋 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁.

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭𑀸𑀢𑀺. 𑀬𑁂𑀦𑁂𑀯 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀢𑁂𑀦 𑀧𑀮𑁂𑀳𑀺, 𑀢𑁂𑀦 𑀯𑀚, 𑀢𑁂𑀦 𑀕𑀘𑁆𑀙, 𑀢𑁂𑀦 𑀅𑀢𑀺𑀓𑁆𑀓𑀫, 𑀲𑁄 𑀢𑀼𑀬𑁆𑀳𑀁 𑀧𑀝𑀺𑀲𑀽𑀭𑁄 𑀧𑀝𑀺𑀧𑀼𑀭𑀺𑀲𑁄 𑀧𑀝𑀺𑀲𑀢𑁆𑀢𑀼 𑀧𑀝𑀺𑀫𑀮𑁆𑀮𑁄𑀢𑀺 𑁋 𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭.

𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬𑀸𑀢𑀺. 𑀧𑀼𑀩𑁆𑀩𑁂𑀯 𑀩𑁄𑀥𑀺𑀬𑀸 𑀫𑀽𑀮𑁂 𑀬𑁂 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀧𑀝𑀺𑀮𑁄𑀫𑀓𑀭𑀸 𑀧𑀝𑀺𑀓𑀡𑁆𑀟𑀓𑀓𑀭𑀸 𑀧𑀝𑀺𑀧𑀓𑁆𑀔𑀓𑀭𑀸 𑀢𑁂 𑀦𑀢𑁆𑀣𑀺 𑀦 ¶ 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀬𑀤𑀺𑀤𑀁 ¶ 𑀬𑀼𑀥𑀸𑀬𑀸𑀢𑀺 𑀬𑀤𑀺𑀤𑀁 𑀬𑀼𑀤𑁆𑀥𑀢𑁆𑀣𑀸𑀬 𑀓𑀮𑀳𑀢𑁆𑀣𑀸𑀬 𑀪𑀡𑁆𑀟𑀦𑀢𑁆𑀣𑀸𑀬 𑀯𑀺𑀕𑁆𑀕𑀳𑀢𑁆𑀣𑀸𑀬 𑀯𑀺𑀯𑀸𑀤𑀢𑁆𑀣𑀸𑀬 𑀫𑁂𑀥𑀕𑀢𑁆𑀣𑀸𑀬𑀸𑀢𑀺 𑁋 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬.

‘‘𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄, 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁;

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭, 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬𑀸’’𑀢𑀺.

𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺;

𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸.

𑀬𑁂 ¶ 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀻𑀢𑀺 𑀬𑁂 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀯𑀸𑀤𑀬𑀦𑁆𑀢𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺 𑀪𑀡𑁆𑀟𑀦𑀁 𑀓𑀭𑁄𑀦𑁆𑀢𑀺 ¶ ‘𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀫𑁂𑀥𑀕𑀁 𑀓𑀭𑁄𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂, 𑀧𑀼𑀭𑁂 𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸 𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘, 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 ¶ 𑀧𑀳𑁄𑀲𑀻’’𑀢𑀺 𑁋 𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺.

𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀻𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀸𑀤𑀬𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀸𑀤𑀬𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺.

𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸𑀢𑀺. 𑀢𑁂 𑀢𑁆𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑁂 𑀯𑀤𑀲𑁆𑀲𑀼 𑀯𑀸𑀤𑁂𑀦 𑀯𑀸𑀤𑀁, 𑀦𑀺𑀕𑁆𑀕𑀳𑁂𑀦 𑀦𑀺𑀕𑁆𑀕𑀳𑀁, 𑀧𑀝𑀺𑀓𑀫𑁆𑀫𑁂𑀦 𑀧𑀝𑀺𑀓𑀫𑁆𑀫𑀁, 𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀁, 𑀧𑀝𑀺𑀯𑀺𑀲𑁂𑀲𑁂𑀦 𑀧𑀝𑀺𑀯𑀺𑀲𑁂𑀲𑀁, 𑀆𑀯𑁂𑀞𑀺𑀬𑀸𑀬 𑀆𑀯𑁂𑀞𑀺𑀬𑀁, 𑀦𑀺𑀩𑁆𑀩𑁂𑀞𑀺𑀬𑀸𑀬 𑀦𑀺𑀩𑁆𑀩𑁂𑀞𑀺𑀬𑀁, 𑀙𑁂𑀤𑁂𑀦 𑀙𑁂𑀤𑀁, 𑀫𑀡𑁆𑀟𑀮𑁂𑀦 𑀫𑀡𑁆𑀟𑀮𑀁, 𑀢𑁂 ¶ 𑀢𑀼𑀬𑁆𑀳𑀁 𑀧𑀝𑀺𑀲𑀽𑀭𑀸 𑀧𑀝𑀺𑀧𑀼𑀭𑀺𑀲𑀸 𑀧𑀝𑀺𑀲𑀢𑁆𑀢𑀽 𑀧𑀝𑀺𑀫𑀮𑁆𑀮𑀸𑀢𑀺 𑁋 𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺. 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸𑀢𑀺. 𑀯𑀸𑀤𑁂 𑀚𑀸𑀢𑁂 𑀲𑀜𑁆𑀚𑀸𑀢𑁂 𑀦𑀺𑀩𑁆𑀩𑀢𑁆𑀢𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀧𑀸𑀢𑀼𑀪𑀽𑀢𑁂𑀬𑁂𑀯 𑀧𑀝𑀺𑀲𑁂𑀦𑀺𑀓𑀢𑁆𑀢𑀸 [𑀧𑀝𑀺𑀲𑁂𑀦𑀺𑀓𑀢𑀸 (𑀓.), 𑀏𑀯𑀁 𑀲𑁂𑀲𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼𑀧𑀺] 𑀧𑀝𑀺𑀮𑁄𑀫𑀓𑀢𑁆𑀢𑀸 ¶ 𑀧𑀝𑀺𑀪𑀡𑁆𑀟𑀓𑀢𑁆𑀢𑀸 𑀧𑀝𑀺𑀧𑀓𑁆𑀔𑀓𑀢𑁆𑀢𑀸 𑀓𑀮𑀳𑀁 𑀓𑀭𑁂𑀬𑁆𑀬𑀼𑀁 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬𑀼𑀁 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬𑀼𑀁 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬𑀼𑀁 𑀫𑁂𑀥𑀕𑀁 𑀓𑀭𑁂𑀬𑁆𑀬𑀼𑀁, 𑀢𑁂 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸.

‘‘𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺;

𑀢𑁂 ¶ 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸’’𑀢𑀺.

𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀺, 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸;

𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭, 𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀻𑀢𑀺. 𑀲𑁂𑀦𑀸 𑀯𑀼𑀘𑁆𑀘𑀢𑀺 𑀫𑀸𑀭𑀲𑁂𑀦𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 ¶ 𑀫𑀸𑀭𑀲𑁂𑀦𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀮𑁄𑀪𑁄 𑀫𑀸𑀭𑀲𑁂𑀦𑀸, 𑀤𑁄𑀲𑁄 𑀫𑀸𑀭𑀲𑁂𑀦𑀸, 𑀫𑁄𑀳𑁄 𑀫𑀸𑀭𑀲𑁂𑀦𑀸, 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀸𑀭𑀲𑁂𑀦𑀸.

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺…𑀧𑁂…;

𑀦 𑀦𑀁 𑀅𑀲𑀼𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀩𑁆𑀩𑀸 𑀘 𑀫𑀸𑀭𑀲𑁂𑀦𑀸 𑀲𑀩𑁆𑀩𑁂 𑀘 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀚𑀺𑀢𑀸 𑀘 𑀧𑀭𑀸𑀚𑀺𑀢𑀸 𑀘 𑀪𑀕𑁆𑀕𑀸 𑀯𑀺𑀧𑁆𑀧𑀮𑀼𑀕𑁆𑀕𑀸 ¶ 𑀧𑀭𑀫𑁆𑀫𑀼𑀔𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀲𑁂𑀦𑀺𑀓𑀢𑁆𑀯𑀸𑀢𑀺. 𑀬𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀘𑀭𑀦𑁆𑀢𑀻𑀢𑀺 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 ¶ 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀻𑀢𑀺 𑁋 𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀺.

𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸𑀢𑀺. 𑀬𑁂𑀲𑀁 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 ¶ 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀢𑁂 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀼𑀚𑁆𑀛𑀫𑀸𑀦𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑀸 𑀅𑀧𑁆𑀧𑀝𑀺𑀳𑀢𑀫𑀸𑀦𑀸𑀢𑀺 𑁋 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸.

𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭𑀸𑀢𑀺. 𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀔𑀻𑀡𑀸𑀲𑀯𑁂𑀲𑀼 𑀓𑀺𑀁 𑀮𑀪𑁂𑀣 𑀧𑀝𑀺𑀲𑀽𑀭𑀁 𑀧𑀝𑀺𑀧𑀼𑀭𑀺𑀲𑀁 𑀧𑀝𑀺𑀲𑀢𑁆𑀢𑀼𑀁 𑀧𑀝𑀺𑀫𑀮𑁆𑀮𑀦𑁆𑀢𑀺 𑁋 𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭.

𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀬𑁂𑀲𑀁 𑀅𑀭𑀳𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁, 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

‘‘𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀺, 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸;

𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭, 𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢’’𑀦𑁆𑀢𑀺.

𑀅𑀣 ¶ 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸, [𑀧𑀯𑀺𑀢𑀓𑁆𑀓𑀫𑀸𑀕𑀫 (𑀲𑀻.), 𑀲𑀯𑀺𑀢𑀓𑁆𑀓𑀫𑀸𑀕𑀫𑀸 (𑀓.)] 𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄;

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂.

𑀅𑀣 ¶ ¶ 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀧𑀯𑀺𑀢𑀓𑁆𑀓𑀫𑀸𑀕𑀫𑀸𑀢𑀺 𑀢𑀓𑁆𑀓𑁂𑀦𑁆𑀢𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀗𑁆𑀓𑀧𑁆𑀧𑁂𑀦𑁆𑀢𑁄 ‘‘𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀧𑀭𑀸𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑀣𑀁 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀆𑀯𑁂𑀞𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀦𑀺𑀩𑁆𑀩𑁂𑀞𑀺𑀬𑀁 𑀓𑀭𑀺𑀲𑁆𑀲𑀸𑀫𑀺 ¶ , 𑀓𑀣𑀁 𑀙𑁂𑀤𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀫𑀡𑁆𑀟𑀮𑀁 𑀓𑀭𑀺𑀲𑁆𑀲𑀸𑀫𑀺’’ 𑀏𑀯𑀁 𑀢𑀓𑁆𑀓𑁂𑀦𑁆𑀢𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀗𑁆𑀓𑀧𑁆𑀧𑁂𑀦𑁆𑀢𑁄 𑀆𑀕𑀢𑁄𑀲𑀺 𑀉𑀧𑀕𑀢𑁄𑀲𑀺 𑀲𑀫𑁆𑀧𑀢𑁆𑀢𑁄𑀲𑀺 𑀫𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀢𑁄𑀲𑀻𑀢𑀺 𑁋 𑀅𑀣 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸.

𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄𑀢𑀺. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁, 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀘𑀺𑀢𑁆𑀢𑁂𑀦 𑀤𑀺𑀝𑁆𑀞𑀺𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀘𑀺𑀦𑁆𑀢𑁂𑀦𑁆𑀢𑁄 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸𑀢𑀺 𑁋 𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄.

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂𑀢𑀺. 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀓𑀺𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸? 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 ¶ 𑀘. 𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺… 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀅𑀣 𑀯𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀪𑀕𑀯𑀸 𑀇𑀫𑁂𑀳𑀺 𑀥𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 ¶ 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀪𑀕𑀯𑀸 𑀥𑁄𑀦𑁄. 𑀲𑁄 𑀥𑀼𑀢𑀭𑀸𑀕𑁄 𑀥𑀼𑀢𑀧𑀸𑀧𑁄 𑀥𑀼𑀢𑀓𑀺𑀮𑁂𑀲𑁄 𑀥𑀼𑀢𑀧𑀭𑀺𑀴𑀸𑀳𑁄𑀢𑀺 𑁋 𑀥𑁄𑀦𑁄𑀢𑀺.

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂𑀢𑀺. 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀦 𑀧𑀝𑀺𑀩𑀮𑁄 𑀥𑁄𑀦𑁂𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀓𑀘𑁆𑀙𑁂𑀢𑀼𑀁 𑀲𑀮𑁆𑀮𑀧𑀺𑀢𑀼𑀁 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀳𑀻𑀦𑁄 𑀦𑀺𑀳𑀻𑀦𑁄 ¶ 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄. 𑀲𑁄 𑀳𑀺 𑀪𑀕𑀯𑀸 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀯𑀺𑀲𑀺𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘. 𑀬𑀣𑀸 𑀲𑀲𑁄 𑀦 𑀧𑀝𑀺𑀩𑀮𑁄 𑀫𑀢𑁆𑀢𑁂𑀦 𑀫𑀸𑀢𑀗𑁆𑀕𑁂𑀦 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀓𑁄𑀢𑁆𑀣𑀼𑀓𑁄 𑀦 𑀧𑀝𑀺𑀩𑀮𑁄 𑀲𑀻𑀳𑁂𑀦 𑀫𑀺𑀕𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀯𑀘𑁆𑀙𑀓𑁄 𑀢𑀭𑀼𑀡𑀓𑁄 𑀥𑁂𑀦𑀼𑀧𑀓𑁄 ¶ 𑀦 𑀧𑀝𑀺𑀩𑀮𑁄 𑀉𑀲𑀪𑁂𑀦 𑀘𑀮𑀓𑀓𑀼𑀦𑀸 [𑀩𑀮𑀓𑁆𑀓𑀓𑀼𑀦𑀸 (𑀲𑁆𑀬𑀸.)] 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀥𑀗𑁆𑀓𑁄 𑀦 ¶ 𑀧𑀝𑀺𑀩𑀮𑁄 𑀕𑀭𑀼𑀴𑁂𑀦 𑀯𑁂𑀦𑀢𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀘𑀡𑁆𑀟𑀸𑀮𑁄 𑀦 𑀧𑀝𑀺𑀩𑀮𑁄 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀧𑀁𑀲𑀼𑀧𑀺𑀲𑀸𑀘𑀓𑁄 𑀦 𑀧𑀝𑀺𑀩𑀮𑁄 𑀇𑀦𑁆𑀤𑁂𑀦 𑀤𑁂𑀯𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀏𑀯𑀫𑁂𑀯 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀦 𑀧𑀝𑀺𑀩𑀮𑁄 𑀥𑁄𑀦𑁂𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀓𑀘𑁆𑀙𑁂𑀢𑀼𑀁 𑀲𑀮𑁆𑀮𑀧𑀺𑀢𑀼𑀁 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀳𑀻𑀦𑀧𑀜𑁆𑀜𑁄 𑀦𑀺𑀳𑀻𑀦𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄 𑀧𑀭𑀺𑀢𑁆𑀢𑀧𑀜𑁆𑀜𑁄. 𑀲𑁄 𑀳𑀺 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄, 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻, 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 ¶ 𑀧𑀼𑀭𑀺𑀲𑀥𑁄𑀭𑀬𑁆𑀳𑁄, 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸, 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸, 𑀧𑀜𑁆𑀜𑀸𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦𑀲𑁆𑀲 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀲𑁄 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄, 𑀯𑀢𑁆𑀢𑀸 ¶ 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄; 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 [𑀅𑀨𑀼𑀲𑀺𑀢𑀁 (𑀲𑁆𑀬𑀸.)] 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁. 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄, 𑀦𑀻𑀢𑁄 𑀯𑀸 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀲𑀩𑁆𑀩𑀁 ¶ 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺 ¶ , 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺 ¶ , 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸 𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺 ¶ 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀲𑀩𑁆𑀩𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀸 𑀆𑀲𑀬𑀁 𑀚𑀸𑀦𑀸𑀢𑀺 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺 𑀘𑀭𑀺𑀢𑀁 𑀚𑀸𑀦𑀸𑀢𑀺 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺. 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸. 𑀯𑁄𑀪𑀺𑀦𑁆𑀤𑀦𑁆𑀢𑀸 [𑀢𑁂 𑀪𑀺𑀦𑁆𑀤𑀦𑁆𑀢𑀸 (𑀓.)] 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺 ¶ . 𑀢𑁂 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸𑀯 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘. 𑀢𑁂 𑀪𑀕𑀯𑀢𑁄 ¶ 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸𑀯 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺 𑁋 𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂.

‘‘𑀅𑀣 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸, 𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄;

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂’’𑀢𑀺.

𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀫𑁄.

𑁯. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀤𑀺𑀲𑁆𑀯𑀸𑀦 ¶ ¶ 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘, 𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁, 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂.

𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘, 𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀦𑁆𑀢𑀺. 𑀢𑀡𑁆𑀳𑀜𑁆𑀘 𑀅𑀭𑀢𑀺𑀜𑁆𑀘 𑀭𑀕𑀜𑁆𑀘 𑀫𑀸𑀭𑀥𑀻𑀢𑀭𑁄 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑁂 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁 𑀯𑀸 𑀦𑀸𑀳𑁄𑀲𑀻𑀢𑀺 𑁋 𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘 𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁.

𑀓𑀺𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁, 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂𑀢𑀺. 𑀓𑀺𑀫𑁂𑀯𑀺𑀤𑀁 𑀲𑀭𑀻𑀭𑀁 𑀫𑀼𑀢𑁆𑀢𑀧𑀼𑀡𑁆𑀡𑀁 𑀓𑀭𑀻𑀲𑀧𑀼𑀡𑁆𑀡𑀁 𑀲𑁂𑀫𑁆𑀳𑀧𑀼𑀡𑁆𑀡𑀁 𑀭𑀼𑀳𑀺𑀭𑀧𑀼𑀡𑁆𑀡𑀁 𑀅𑀝𑁆𑀞𑀺𑀲𑀗𑁆𑀖𑀸𑀢𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁 𑀭𑀼𑀥𑀺𑀭𑀫𑀁𑀲𑀸𑀯𑀮𑁂𑀧𑀦𑀁 𑀘𑀫𑁆𑀫𑀯𑀺𑀦𑀤𑁆𑀥𑀁 𑀙𑀯𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁 𑀓𑀺𑀫𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁 𑀦𑀸𑀦𑀸𑀓𑀮𑀺𑀫𑀮𑀧𑀭𑀺𑀧𑀽𑀭𑀁 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑀼𑀁 𑀦 𑀇𑀘𑁆𑀙𑁂𑀬𑁆𑀬, 𑀓𑀼𑀢𑁄 𑀧𑀦 𑀲𑀁𑀯𑀸𑀲𑁄 𑀯𑀸 𑀲𑀫𑀸𑀕𑀫𑁄 𑀯𑀸𑀢𑀺 𑁋 𑀓𑀺𑀫𑁂𑀯𑀺𑀤𑀁 ¶ 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁, 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁 𑀫𑀦𑀼𑀲𑁆𑀲𑁄 𑀤𑀺𑀩𑁆𑀩𑁂 𑀓𑀸𑀫𑁂 𑀧𑀢𑁆𑀣𑀬𑀦𑁆𑀢𑁄 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀦 𑀇𑀘𑁆𑀙𑁂𑀬𑁆𑀬, 𑀫𑀸𑀦𑀼𑀲𑀓𑁂 𑀯𑀸 𑀓𑀸𑀫𑁂 𑀧𑀢𑁆𑀣𑀬𑀦𑁆𑀢𑁄 ¶ 𑀤𑀺𑀩𑁆𑀩𑁂 𑀓𑀸𑀫𑁂 𑀦 𑀇𑀘𑁆𑀙𑁂𑀬𑁆𑀬. 𑀬𑀁 𑀢𑁆𑀯𑀁 𑀉𑀪𑁄𑀧𑀺 𑀦 𑀇𑀘𑁆𑀙𑀲𑀺 𑀦 𑀲𑀸𑀤𑀺𑀬𑀲𑀺 𑀦 𑀧𑀢𑁆𑀣𑁂𑀲𑀺 𑀦 𑀧𑀺𑀳𑁂𑀲𑀺 𑀦𑀸𑀪𑀺𑀚𑀧𑁆𑀧𑀲𑀺, 𑀓𑀺𑀁 𑀢𑁂 𑀤𑀲𑁆𑀲𑀦𑀁, 𑀓𑀢𑀫𑀸𑀬 𑀢𑁆𑀯𑀁 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀼𑀘𑁆𑀙𑀢𑀻𑀢𑀺.

‘‘𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘, 𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀫𑁂𑀯𑀺𑀤𑀁 ¶ 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁, 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’’𑀢𑀺.

𑀏𑀢𑀸𑀤𑀺𑀲𑀁 ¶ 𑀘𑁂 𑀭𑀢𑀦𑀁 𑀦 𑀇𑀘𑁆𑀙𑀲𑀺, 𑀦𑀸𑀭𑀺𑀁 𑀦𑀭𑀺𑀦𑁆𑀤𑁂𑀳𑀺 𑀩𑀳𑀽𑀳𑀺 𑀧𑀢𑁆𑀣𑀺𑀢𑀁;

𑀤𑀺𑀝𑁆𑀞𑀺𑀕𑀢𑀁 𑀲𑀻𑀮𑀯𑀢𑀁 𑀦𑀼 𑀚𑀻𑀯𑀺𑀢𑀁, 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀯𑀤𑁂𑀲𑀺 𑀓𑀻𑀤𑀺𑀲𑀁.

𑀇𑀤𑀁 𑀯𑀤𑀸𑀫𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, [𑀫𑀸𑀕𑀡𑁆𑀟𑀺𑀬𑀸𑀢𑀺 [𑀫𑀸𑀕𑀦𑁆𑀤𑀺𑀬𑀸𑀢𑀺 (𑀲𑀻. 𑀲𑁆𑀬𑀸.)] 𑀪𑀕𑀯𑀸]

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬, 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀘𑀺𑀦𑀁 𑀅𑀤𑀲𑁆𑀲𑀁.

𑀇𑀤𑀁 𑀯𑀤𑀸𑀫𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀻𑀢𑀺. 𑀇𑀤𑀁 𑀯𑀤𑀸𑀫𑀻𑀢𑀺 𑀇𑀤𑀁 𑀯𑀤𑀸𑀫𑀺, 𑀏𑀢𑀁 𑀯𑀤𑀸𑀫𑀺, 𑀏𑀢𑁆𑀢𑀓𑀁 𑀯𑀤𑀸𑀫𑀺, 𑀏𑀢𑁆𑀢𑀸𑀯𑀢𑀸 𑀯𑀤𑀸𑀫𑀺, 𑀇𑀤𑀁 𑀤𑀺𑀝𑁆𑀞𑀺𑀕𑀢𑀁 𑀯𑀤𑀸𑀫𑀺 𑁋 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸. 𑀦 𑀢𑀲𑁆𑀲 𑀳𑁄𑀢𑀻𑀢𑀺 𑀦 𑀫𑀬𑁆𑀳𑀁 𑀳𑁄𑀢𑀺, ‘‘𑀏𑀢𑁆𑀢𑀸𑀯𑀢𑀸 𑀯𑀤𑀸𑀫𑀻’’𑀢𑀺 𑀦 𑀢𑀲𑁆𑀲 𑀳𑁄𑀢𑀻𑀢𑀺 𑁋 𑀇𑀤𑀁 𑀯𑀤𑀸𑀫𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺.

𑀫𑀸𑀕𑀡𑁆𑀟𑀺𑀬𑀸𑀢𑀺 ¶ 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸.

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼. 𑀦𑀺𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀺𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, 𑀑𑀥𑀺𑀕𑁆𑀕𑀸𑀳𑁄 𑀩𑀺𑀮𑀕𑁆𑀕𑀸𑀳𑁄 ¶ 𑀯𑀭𑀕𑁆𑀕𑀸𑀳𑁄 𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑁄 𑀉𑀘𑁆𑀘𑀬𑀕𑁆𑀕𑀸𑀳𑁄 𑀲𑀫𑀼𑀘𑁆𑀘𑀬𑀕𑁆𑀕𑀸𑀳𑁄, ‘‘𑀇𑀤𑀁 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢’’𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 ¶ 𑀅𑀥𑀺𑀫𑀼𑀢𑁆𑀢𑀁, 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬𑀸𑀢𑀺. 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 𑀦 𑀧𑀭𑀸𑀫𑀲𑀸𑀫𑀺 𑀦𑀸𑀪𑀺𑀦𑀺𑀯𑀺𑀲𑀸𑀫𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬.

𑀅𑀣 𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀫𑁂𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁, 𑀲𑀤𑀼𑀓𑁆𑀔𑀁 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁, 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺. 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 𑀦 𑀧𑀭𑀸𑀫𑀲𑀸𑀫𑀺 ¶ 𑀦𑀸𑀪𑀺𑀦𑀺𑀯𑀺𑀲𑀸𑀫𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬.

𑀅𑀣 𑀯𑀸 ‘‘𑀅𑀲𑀲𑁆𑀲𑀢𑁄 ¶ 𑀮𑁄𑀓𑁄, 𑀅𑀦𑁆𑀢𑀯𑀸 𑀮𑁄𑀓𑁄, 𑀅𑀦𑀦𑁆𑀢𑀯𑀸 𑀮𑁄𑀓𑁄, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀫𑁂𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 ¶ 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁, 𑀲𑀤𑀼𑀓𑁆𑀔𑀁 𑀲𑀯𑀺𑀖𑀸𑀢𑀁 𑀲𑀉𑀧𑀸𑀬𑀸𑀲𑀁 𑀲𑀧𑀭𑀺𑀴𑀸𑀳𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺. 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 𑀦 𑀧𑀭𑀸𑀫𑀲𑀸𑀫𑀺 𑀦𑀸𑀪𑀺𑀦𑀺𑀯𑀺𑀲𑀸𑀫𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬.

𑀅𑀣 𑀯𑀸 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀏𑀯𑀁𑀕𑀳𑀺𑀢𑀸 𑀏𑀯𑀁𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸𑀢𑀺. 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 𑀦 𑀧𑀭𑀸𑀫𑀲𑀸𑀫𑀺 𑀦𑀸𑀪𑀺𑀦𑀺𑀯𑀺𑀲𑀸𑀫𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬.

𑀅𑀣 𑀯𑀸 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀲𑀁𑀯𑀢𑁆𑀢𑀦𑀺𑀓𑀸 𑀧𑁂𑀢𑁆𑀢𑀺𑀯𑀺𑀲𑀬𑀲𑀁𑀯𑀢𑁆𑀢𑀦𑀺𑀓𑀸𑀢𑀺. 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 ¶ 𑀦 𑀧𑀭𑀸𑀫𑀲𑀸𑀫𑀺 𑀦𑀸𑀪𑀺𑀦𑀺𑀯𑀺𑀲𑀸𑀫𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬.

𑀅𑀣 𑀯𑀸 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸𑀢𑀺. 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 𑀦 𑀧𑀭𑀸𑀫𑀲𑀸𑀫𑀺 𑀦𑀸𑀪𑀺𑀦𑀺𑀯𑀺𑀲𑀸𑀫𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬.

𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 ¶ 𑀧𑀘𑀺𑀦𑀁 𑀅𑀤𑀲𑁆𑀲𑀦𑁆𑀢𑀺. 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀅𑀚𑁆𑀛𑀢𑁆𑀢𑀁 𑀭𑀸𑀕𑀲𑁆𑀲 𑀲𑀦𑁆𑀢𑀺𑀁, 𑀤𑁄𑀲𑀲𑁆𑀲 𑀲𑀦𑁆𑀢𑀺𑀁, 𑀫𑁄𑀳𑀲𑁆𑀲 𑀲𑀦𑁆𑀢𑀺𑀁, 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲 ¶ … 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲 ¶ … 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁… 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀺𑀁 𑀉𑀧𑀲𑀦𑁆𑀢𑀺𑀁 𑀯𑀽𑀧𑀲𑀦𑁆𑀢𑀺𑀁 𑀦𑀺𑀩𑁆𑀩𑀼𑀢𑀺𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀁 𑀲𑀦𑁆𑀢𑀺𑀁. 𑀧𑀘𑀺𑀦𑀦𑁆𑀢𑀺 𑀧𑀘𑀺𑀦𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀧𑀯𑀺𑀘𑀺𑀦𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀢𑀻𑀭𑀬𑀦𑁆𑀢𑁄 𑀯𑀺𑀪𑀸𑀯𑀬𑀦𑁆𑀢𑁄 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑁄, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀧𑀘𑀺𑀦𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀧𑀯𑀺𑀘𑀺𑀦𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀢𑀻𑀭𑀬𑀦𑁆𑀢𑁄 𑀯𑀺𑀪𑀸𑀯𑀬𑀦𑁆𑀢𑁄 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑁄, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀧𑀘𑀺𑀦𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀧𑀯𑀺𑀘𑀺𑀦𑀦𑁆𑀢𑁄… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀧𑀘𑀺𑀦𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀧𑀯𑀺𑀘𑀺𑀦𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀢𑀻𑀭𑀬𑀦𑁆𑀢𑁄 𑀯𑀺𑀪𑀸𑀯𑀬𑀦𑁆𑀢𑁄 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑁄. 𑀅𑀤𑀲𑁆𑀲𑀦𑁆𑀢𑀺 𑀅𑀤𑀲𑁆𑀲𑀁 𑀅𑀤𑀓𑁆𑀔𑀺𑀁 𑀅𑀧𑀲𑁆𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑁋 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀘𑀺𑀦𑀁 𑀅𑀤𑀲𑁆𑀲𑀁.

‘‘𑀇𑀤𑀁 𑀯𑀤𑀸𑀫𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, [𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸]

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬;

𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀘𑀺𑀦𑀁 𑀅𑀤𑀲𑁆𑀲’’𑀦𑁆𑀢𑀺.

𑀯𑀺𑀦𑀺𑀘𑁆𑀙𑀬𑀸 𑀬𑀸𑀦𑀺 𑀧𑀓𑀧𑁆𑀧𑀺𑀢𑀸𑀦𑀺, [𑀇𑀢𑀺 𑀫𑀸𑀕𑀡𑁆𑀟𑀺𑀬𑁄]

𑀢𑁂 𑀯𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑀼𑀕𑁆𑀕𑀳𑀸𑀬;

𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁, 𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀢𑀁.

𑀯𑀺𑀦𑀺𑀘𑁆𑀙𑀬𑀸 ¶ ¶ 𑀬𑀸𑀦𑀺 𑀧𑀓𑀧𑁆𑀧𑀺𑀢𑀸𑀦𑀻𑀢𑀺. 𑀯𑀺𑀦𑀺𑀘𑁆𑀙𑀬𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀸. 𑀧𑀓𑀧𑁆𑀧𑀺𑀢𑀸𑀦𑀻𑀢𑀺 𑀓𑀧𑁆𑀧𑀺𑀢𑀸 𑀧𑀓𑀧𑁆𑀧𑀺𑀢𑀸 𑀅𑀪𑀺𑀲𑀗𑁆𑀔𑀢𑀸 𑀲𑀡𑁆𑀞𑀧𑀺𑀢𑀸𑀢𑀺𑀧𑀺 𑀧𑀓𑀧𑁆𑀧𑀺𑀢𑀸 ¶ . 𑀅𑀣 𑀯𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺𑀧𑀺 𑀧𑀓𑀧𑁆𑀧𑀺𑀢𑀸𑀢𑀺 𑁋 𑀯𑀺𑀦𑀺𑀘𑁆𑀙𑀬𑀸 𑀬𑀸𑀦𑀺 𑀧𑀓𑀧𑁆𑀧𑀺𑀢𑀸𑀦𑀺.

𑀇𑀢𑀺 𑀫𑀸𑀕𑀡𑁆𑀟𑀺𑀬𑁄𑀢𑀺. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀢𑀻𑀢𑀺. 𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑁋 𑀇𑀢𑀺 𑀫𑀸𑀕𑀡𑁆𑀟𑀺𑀬𑁄𑀢𑀺.

𑀢𑁂 ¶ 𑀯𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑀼𑀕𑁆𑀕𑀳𑀸𑀬, 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀦𑁆𑀢𑀺. 𑀢𑁂 𑀯𑁂𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺. 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀤𑀺𑀝𑁆𑀞𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑀺𑀬𑁄 𑀦 𑀕𑀡𑁆𑀳𑀸𑀫𑀺 𑀦 𑀧𑀭𑀸𑀫𑀲𑀸𑀫𑀺 𑀦𑀸𑀪𑀺𑀦𑀺𑀯𑀺𑀲𑀸𑀫𑀻𑀢𑀺 𑀘 𑀪𑀡𑀲𑀺, 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀘 𑀪𑀡𑀲𑀺. 𑀬𑀫𑁂𑀢𑀫𑀢𑁆𑀣𑀦𑁆𑀢𑀺 𑀬𑀁 𑀧𑀭𑀫𑀢𑁆𑀣𑀦𑁆𑀢𑀺 𑁋 𑀢𑁂 𑀯𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑀼𑀕𑁆𑀕𑀳𑀸𑀬, 𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁.

𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀢𑀦𑁆𑀢𑀺. 𑀓𑀣𑀁 𑀦𑀽𑀢𑀺 𑀧𑀤𑀁 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸, 𑀏𑀯𑀁 𑀦𑀼 𑀔𑁄 𑀦𑀦𑀼 𑀔𑁄 𑀓𑀺𑀁 𑀦𑀼 𑀔𑁄 𑀓𑀣𑀁 𑀦𑀼 𑀔𑁄𑀢𑀺 𑁋 𑀓𑀣𑀁 𑀦𑀼. 𑀥𑀻𑀭𑁂𑀳𑀻𑀢𑀺 𑀥𑀻𑀭𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀜𑁆𑀜𑀯𑀦𑁆𑀢𑁂𑀳𑀺 [𑀧𑀜𑁆𑀜𑀸𑀯𑀦𑁆𑀢𑁂𑀳𑀺 (𑀲𑀻. 𑀲𑁆𑀬𑀸.)] 𑀩𑀼𑀤𑁆𑀥𑀺𑀫𑀦𑁆𑀢𑁂𑀳𑀺 𑀜𑀸𑀡𑀻𑀳𑀺 𑀯𑀺𑀪𑀸𑀯𑀻𑀳𑀺 𑀫𑁂𑀥𑀸𑀯𑀻𑀳𑀺. 𑀧𑀯𑁂𑀤𑀺𑀢𑀦𑁆𑀢𑀺 𑀯𑁂𑀤𑀺𑀢𑀁 𑀧𑀯𑁂𑀤𑀺𑀢𑀁 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀸𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀝𑀁 ¶ 𑀯𑀺𑀪𑀢𑁆𑀢𑀁 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑁋 𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀢𑀁.

‘‘𑀯𑀺𑀦𑀺𑀘𑁆𑀙𑀬𑀸 ¶ 𑀬𑀸𑀦𑀺 𑀧𑀓𑀧𑁆𑀧𑀺𑀢𑀸𑀦𑀺, [𑀇𑀢𑀺 𑀫𑀸𑀕𑀡𑁆𑀟𑀺𑀬𑁄]

𑀢𑁂 𑀯𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑀼𑀕𑁆𑀕𑀳𑀸𑀬;

𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁, 𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀢’’𑀦𑁆𑀢𑀺.

𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, [𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸]

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳;

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦;

𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬, 𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂.

𑀦 ¶ 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦𑀸𑀢𑀺. 𑀤𑀺𑀝𑁆𑀞𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀺; 𑀲𑀼𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀺; 𑀤𑀺𑀝𑁆𑀞𑀲𑀼𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀺; 𑀜𑀸𑀡𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀻𑀢𑀺 𑁋 𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦.

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 ¶ ¶ 𑀦 𑀲𑀼𑀤𑁆𑀥𑀺𑀫𑀸𑀳𑀸𑀢𑀺. 𑀲𑀻𑀮𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀺; 𑀯𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀺; 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀻𑀢𑀺 𑁋 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳.

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦𑀸𑀢𑀺. 𑀤𑀺𑀝𑁆𑀞𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀤𑀲𑀯𑀢𑁆𑀣𑀼𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑁋 𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 [𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 (𑀲𑀻.)] 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀫𑀸𑀢𑀸, 𑀅𑀢𑁆𑀣𑀺 𑀧𑀺𑀢𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 [𑀲𑀫𑀕𑁆𑀕𑀢𑀸 (𑀓.)] 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺; 𑀲𑀯𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁 𑁋 𑀧𑀭𑀢𑁄 𑀖𑁄𑀲𑁄, 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀸, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁; 𑀜𑀸𑀡𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁 𑁋 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁, 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 [𑀓𑀫𑁆𑀫𑀲𑁆𑀲𑀓𑀢𑀁 𑀜𑀸𑀡𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀁 (𑀲𑀻. 𑀓.) 𑀜𑀸𑀡𑀯𑀺𑀪𑀗𑁆𑀕𑁂𑀧𑀺], 𑀅𑀪𑀺𑀜𑁆𑀜𑀸𑀜𑀸𑀡𑀁, 𑀲𑀫𑀸𑀧𑀢𑁆𑀢𑀺𑀜𑀸𑀡𑀁; 𑀲𑀻𑀮𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁 𑁋 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄; 𑀯𑀢𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀁 𑁋 𑀅𑀝𑁆𑀞 𑀥𑀼𑀢𑀗𑁆𑀕𑀸𑀦𑀺 𑁋 𑀆𑀭𑀜𑁆𑀜𑀺𑀓𑀗𑁆𑀕𑀁, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁, 𑀢𑁂𑀘𑀻𑀯𑀭𑀺𑀓𑀗𑁆𑀕, 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁, 𑀦𑁂𑀲𑀚𑁆𑀚𑀺𑀓𑀗𑁆𑀕𑀁, 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀦𑁆𑀢𑀺.

𑀅𑀤𑀺𑀝𑁆𑀞𑀺𑀬𑀸 ¶ 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 ¶ 𑀢𑁂𑀦𑀸𑀢𑀺 ¶ . 𑀦𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀢𑁆𑀢𑁂𑀦, 𑀦𑀸𑀧𑀺 𑀲𑀯𑀦𑀫𑀢𑁆𑀢𑁂𑀦, 𑀦𑀸𑀧𑀺 𑀜𑀸𑀡𑀫𑀢𑁆𑀢𑁂𑀦, 𑀦𑀸𑀧𑀺 𑀲𑀻𑀮𑀫𑀢𑁆𑀢𑁂𑀦, 𑀦𑀸𑀧𑀺 𑀯𑀢𑀫𑀢𑁆𑀢𑁂𑀦 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀢𑁆𑀢𑁄 𑀳𑁄𑀢𑀺, 𑀦𑀸𑀧𑀺 𑀯𑀺𑀦𑀸 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀸𑀧𑀼𑀡𑀸𑀢𑀺. 𑀅𑀧𑀺 𑀘 𑀲𑀫𑁆𑀪𑀸𑀭𑀸 𑀇𑀫𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀁 𑀅𑀥𑀺𑀕𑀦𑁆𑀢𑀼𑀁 𑀨𑀲𑁆𑀲𑀺𑀢𑀼𑀁 𑀲𑀘𑁆𑀙𑀺𑀓𑀸𑀢𑀼𑀦𑁆𑀢𑀺 𑁋 𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦.

𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬𑀸𑀢𑀺. 𑀏𑀢𑁂𑀢𑀺 𑀓𑀡𑁆𑀳𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀼𑀕𑁆𑀖𑀸𑀢𑀢𑁄 𑀧𑀳𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑁂𑀥𑀸𑀢𑀼𑀓𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀢𑀫𑁆𑀫𑀬𑀢𑀸 [𑀅𑀓𑀫𑁆𑀫𑀬𑀢𑀸 (𑀲𑀻. 𑀓.)] 𑀇𑀘𑁆𑀙𑀺𑀢𑀩𑁆𑀩𑀸, 𑀬𑀢𑁄 𑀓𑀡𑁆𑀳𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀲𑀫𑀼𑀕𑁆𑀖𑀸𑀢𑀧𑀳𑀸𑀦𑁂𑀦 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑁂𑀥𑀸𑀢𑀼𑀓𑁂𑀲𑀼 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀢𑀫𑁆𑀫𑀬𑀢𑀸 𑀳𑁄𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀦 𑀕𑀡𑁆𑀳𑀸𑀢𑀺 𑀦 ¶ 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀺. 𑀅𑀣 𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀸 𑀦 𑀧𑀭𑀸𑀫𑀲𑀺𑀢𑀩𑁆𑀩𑀸 𑀦𑀸𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀸𑀢𑀺. 𑀏𑀯𑀫𑁆𑀧𑀺 𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬. 𑀬𑀢𑁄 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘 𑀫𑀸𑀦𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺. 𑀏𑀯𑀫𑁆𑀧𑀺 𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬.

𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺. 𑀏𑀯𑀫𑁆𑀧𑀺 ¶ 𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬.

𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄, 𑀫𑁄𑀳𑀲𑁆𑀲 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄 ¶ , 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁… 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑁋 𑀲𑀦𑁆𑀢𑁄.

𑀅𑀦𑀺𑀲𑁆𑀲𑀸𑀬𑀸𑀢𑀺 ¶ 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀸𑀬, 𑀲𑁄𑀢𑀁 𑀅𑀦𑀺𑀲𑁆𑀲𑀸𑀬, 𑀖𑀸𑀦𑀁 𑀅𑀦𑀺𑀲𑁆𑀲𑀸𑀬, 𑀚𑀺𑀯𑁆𑀳𑀁 𑀅𑀦𑀺𑀲𑁆𑀲𑀸𑀬, 𑀓𑀸𑀬𑀁 𑀅𑀦𑀺𑀲𑁆𑀲𑀸𑀬, 𑀫𑀦𑀁 𑀅𑀦𑀺𑀲𑁆𑀲𑀸𑀬, 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀅𑀦𑀺𑀲𑁆𑀲𑀸𑀬 𑀅𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀸𑀫𑀲𑀺𑀢𑁆𑀯𑀸 𑀅𑀦𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀲𑀦𑁆𑀢𑁄 ¶ 𑀅𑀦𑀺𑀲𑁆𑀲𑀸𑀬. 𑀪𑀯𑀁 𑀦 𑀚𑀧𑁆𑀧𑁂𑀢𑀺 𑀓𑀸𑀫𑀪𑀯𑀁 𑀦 𑀚𑀧𑁆𑀧𑁂𑀬𑁆𑀬, 𑀭𑀽𑀧𑀪𑀯𑀁 𑀦 𑀚𑀧𑁆𑀧𑁂𑀬𑁆𑀬, 𑀅𑀭𑀽𑀧𑀪𑀯𑀁 𑀦 𑀚𑀧𑁆𑀧𑁂𑀬𑁆𑀬 𑀦𑀧𑁆𑀧𑀚𑀧𑁆𑀧𑁂𑀬𑁆𑀬 𑀦 𑀅𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑁋 𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂.

‘‘𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, [𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸]

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳;

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦;

𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬, 𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂’’𑀢𑀺.

𑀦𑁄 ¶ 𑀘𑁂 𑀓𑀺𑀭 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, [𑀇𑀢𑀺 𑀫𑀸𑀕𑀡𑁆𑀟𑀺𑀬𑁄]

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳;

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦;

𑀫𑀜𑁆𑀜𑀸𑀫𑀳𑀁 𑀫𑁄𑀫𑀼𑀳𑀫𑁂𑀯 𑀥𑀫𑁆𑀫𑀁, 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀦𑁄 𑀘𑁂 𑀓𑀺𑀭 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦𑀸𑀢𑀺. 𑀤𑀺𑀝𑁆𑀞𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀺; 𑀲𑀼𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁… 𑀤𑀺𑀝𑁆𑀞𑀲𑀼𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 ¶ , 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁… 𑀜𑀸𑀡𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 ¶ 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀻𑀢𑀺 𑁋 𑀦𑁄 𑀘𑁂 𑀓𑀺𑀭 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦.

𑀇𑀢𑀺 𑀫𑀸𑀕𑀡𑁆𑀟𑀺𑀬𑁄𑀢𑀺 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀇𑀢𑀺 𑀫𑀸𑀕𑀡𑁆𑀟𑀺𑀬𑁄.

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳𑀸𑀢𑀺. 𑀲𑀻𑀮𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁…𑀧𑁂… 𑀯𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁…𑀧𑁂… 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦𑀸𑀳 𑀦 𑀓𑀣𑁂𑀲𑀺 𑀦 𑀪𑀡𑀲𑀺 𑀦 𑀤𑀻𑀧𑀬𑀲𑀺 𑀦 𑀯𑁄𑀳𑀭𑀲𑀻𑀢𑀺 𑁋 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳.

𑀅𑀤𑀺𑀝𑁆𑀞𑀺𑀬𑀸 ¶ 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦𑀸𑀢𑀺. 𑀤𑀺𑀝𑁆𑀞𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀏𑀯𑀁 𑀪𑀡𑀲𑀺, 𑀲𑀯𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀪𑀡𑀲𑀺, 𑀜𑀸𑀡𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀪𑀡𑀲𑀺, 𑀦 𑀲𑀓𑁆𑀓𑁄𑀲𑀺 𑀏𑀓𑀁𑀲𑁂𑀦 𑀅𑀦𑀼𑀚𑀸𑀦𑀺𑀢𑀼𑀁, 𑀦𑀧𑀺 𑀲𑀓𑁆𑀓𑁄𑀲𑀺 𑀏𑀓𑀁𑀲𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑁋 𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦.

𑀫𑀜𑁆𑀜𑀸𑀫𑀳𑀁 ¶ 𑀫𑁄𑀫𑀼𑀳𑀫𑁂𑀯 𑀥𑀫𑁆𑀫𑀦𑁆𑀢𑀺. 𑀫𑁄𑀫𑀽𑀳𑀥𑀫𑁆𑀫𑁄 𑀅𑀬𑀁 𑀢𑀼𑀬𑁆𑀳𑀁 𑀩𑀸𑀮𑀥𑀫𑁆𑀫𑁄 𑀫𑀽𑀴𑁆𑀳𑀥𑀫𑁆𑀫𑁄 𑀅𑀜𑁆𑀜𑀸𑀡𑀥𑀫𑁆𑀫𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀥𑀫𑁆𑀫𑁄𑀢𑀺 𑀏𑀯𑀁 𑀫𑀜𑁆𑀜𑀸𑀫𑀺 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀆𑀚𑀸𑀦𑀸𑀫𑀺 𑀏𑀯𑀁 𑀯𑀺𑀚𑀸𑀦𑀸𑀫𑀺 𑀏𑀯𑀁 𑀧𑀝𑀺𑀯𑀺𑀚𑀸𑀦𑀸𑀫𑀺 𑀏𑀯𑀁 𑀧𑀝𑀺𑀯𑀺𑀚𑁆𑀛𑀸𑀫𑀻𑀢𑀺 𑁋 𑀫𑀜𑁆𑀜𑀸𑀫𑀳𑀁 𑀫𑁄𑀫𑀼𑀳𑀫𑁂𑀯 𑀥𑀫𑁆𑀫𑀁.

𑀤𑀺𑀝𑁆𑀞𑀺𑀬𑀸 ¶ 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺. 𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀬𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺; ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺; ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀻𑀢𑀺 𑁋 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁.

‘‘𑀦𑁄 𑀘𑁂 𑀓𑀺𑀭 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, [𑀇𑀢𑀺 𑀫𑀸𑀕𑀡𑁆𑀟𑀺𑀬𑁄]

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳;

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸, 𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦;

𑀫𑀜𑁆𑀜𑀸𑀫𑀳𑀁 𑀫𑁄𑀫𑀼𑀳𑀫𑁂𑀯 𑀥𑀫𑁆𑀫𑀁, 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺’’𑀦𑁆𑀢𑀺.

𑀤𑀺𑀝𑁆𑀞𑀺𑀜𑁆𑀘 ¶ ¶ [𑀤𑀺𑀝𑁆𑀞𑀻𑀲𑀼 (𑀲𑀻. 𑀲𑁆𑀬𑀸. 𑀓.)] 𑀦𑀺𑀲𑁆𑀲𑀸𑀬𑀦𑀼𑀧𑀼𑀘𑁆𑀙𑀫𑀸𑀦𑁄, [𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀧𑀫𑁄𑀳𑀫𑀸𑀕𑀸 [𑀲𑀫𑁄𑀳𑀫𑀸𑀕𑀸 (𑀓.)] ;

𑀇𑀢𑁄 𑀘 𑀦𑀸𑀤𑁆𑀤𑀓𑁆𑀔𑀺 𑀅𑀡𑀼𑀫𑁆𑀧𑀺 𑀲𑀜𑁆𑀜𑀁, 𑀢𑀲𑁆𑀫𑀸 𑀢𑀼𑀯𑀁 𑀫𑁄𑀫𑀼𑀳𑀢𑁄 𑀤𑀳𑀸𑀲𑀺.

𑀤𑀺𑀝𑁆𑀞𑀺𑀜𑁆𑀘 𑀦𑀺𑀲𑁆𑀲𑀸𑀬𑀦𑀼𑀧𑀼𑀘𑁆𑀙𑀫𑀸𑀦𑁄𑀢𑀺. 𑀫𑀸𑀕𑀡𑁆𑀟𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀤𑀺𑀝𑁆𑀞𑀺𑀁 𑀧𑀼𑀘𑁆𑀙𑀢𑀺, 𑀮𑀕𑁆𑀕𑀦𑀁 𑀦𑀺𑀲𑁆𑀲𑀸𑀬 𑀮𑀕𑁆𑀕𑀦𑀁 𑀧𑀼𑀘𑁆𑀙𑀢𑀺, 𑀩𑀦𑁆𑀥𑀦𑀁 ¶ 𑀦𑀺𑀲𑁆𑀲𑀸𑀬 𑀩𑀦𑁆𑀥𑀦𑀁 𑀧𑀼𑀘𑁆𑀙𑀢𑀺, 𑀧𑀮𑀺𑀩𑁄𑀥𑀁 𑀦𑀺𑀲𑁆𑀲𑀸𑀬 𑀧𑀮𑀺𑀩𑁄𑀥𑀁 𑀧𑀼𑀘𑁆𑀙𑀢𑀺. 𑀅𑀦𑀼𑀧𑀼𑀘𑁆𑀙𑀫𑀸𑀦𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀢𑀻𑀢𑀺 𑁋 𑀤𑀺𑀝𑁆𑀞𑀺𑀜𑁆𑀘 𑀦𑀺𑀲𑁆𑀲𑀸𑀬𑀦𑀼𑀧𑀼𑀘𑁆𑀙𑀫𑀸𑀦𑁄.

𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸.

𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀧𑀫𑁄𑀳𑀫𑀸𑀕𑀸𑀢𑀺. 𑀬𑀸 𑀲𑀸 𑀤𑀺𑀝𑁆𑀞𑀺 𑀢𑀬𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸 𑀅𑀪𑀺𑀦𑀺𑀯𑀺𑀝𑁆𑀞𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸, 𑀢𑀸𑀬𑁂𑀯 𑀢𑁆𑀯𑀁 𑀤𑀺𑀝𑁆𑀞𑀺𑀬𑀸 𑀫𑀽𑀴𑁆𑀳𑁄𑀲𑀺 𑀧𑀫𑀽𑀴𑁆𑀳𑁄𑀲𑀺 𑀲𑀫𑁆𑀫𑀽𑀴𑁆𑀳𑁄𑀲𑀺 𑀫𑁄𑀳𑀁 𑀆𑀕𑀢𑁄𑀲𑀺 ¶ 𑀧𑀫𑁄𑀳𑀁 𑀆𑀕𑀢𑁄𑀲𑀺 𑀲𑀫𑁆𑀫𑁄𑀳𑀁 𑀆𑀕𑀢𑁄𑀲𑀺 𑀅𑀦𑁆𑀥𑀓𑀸𑀭𑀁 𑀧𑀓𑁆𑀔𑀦𑁆𑀤𑁄𑀲𑀻𑀢𑀺 𑁋 𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀧𑀫𑁄𑀳𑀫𑀸𑀕𑀸.

𑀇𑀢𑁄 𑀘 𑀦𑀸𑀤𑁆𑀤𑀓𑁆𑀔𑀺 𑀅𑀡𑀼𑀫𑁆𑀧𑀺 𑀲𑀜𑁆𑀜𑀦𑁆𑀢𑀺. 𑀇𑀢𑁄 𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀢𑁄 𑀯𑀸 𑀧𑀝𑀺𑀧𑀤𑀸𑀢𑁄 𑀯𑀸 𑀥𑀫𑁆𑀫𑀤𑁂𑀲𑀦𑀸𑀢𑁄 𑀯𑀸, 𑀬𑀼𑀢𑁆𑀢𑀲𑀜𑁆𑀜𑀁 𑀧𑀢𑁆𑀢𑀲𑀜𑁆𑀜𑀁 𑀮𑀓𑁆𑀔𑀡𑀲𑀜𑁆𑀜𑀁 𑀓𑀸𑀭𑀡𑀲𑀜𑁆𑀜𑀁 𑀞𑀸𑀦𑀲𑀜𑁆𑀜𑀁 𑀦 𑀧𑀝𑀺𑀮𑀪𑀢𑀺, 𑀓𑀼𑀢𑁄 𑀜𑀸𑀡𑀦𑁆𑀢𑀺. 𑀏𑀯𑀫𑁆𑀧𑀺 𑀇𑀢𑁄 𑀘 𑀦𑀸𑀤𑁆𑀤𑀓𑁆𑀔𑀺 𑀅𑀡𑀼𑀫𑁆𑀧𑀺 𑀲𑀜𑁆𑀜𑀁. 𑀅𑀣 𑀯𑀸 𑀅𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀲𑀜𑁆𑀜𑀸𑀦𑀼𑀮𑁄𑀫𑀁 𑀯𑀸, 𑀤𑀼𑀓𑁆𑀔𑀁 𑀯𑀸 𑀤𑀼𑀓𑁆𑀔𑀲𑀜𑁆𑀜𑀸𑀦𑀼𑀮𑁄𑀫𑀁 𑀯𑀸, 𑀅𑀦𑀢𑁆𑀢𑀁 𑀯𑀸 𑀅𑀦𑀢𑁆𑀢𑀲𑀜𑁆𑀜𑀸𑀦𑀼𑀮𑁄𑀫𑀁 𑀯𑀸, 𑀲𑀜𑁆𑀜𑀼𑀧𑁆𑀧𑀸𑀤𑀫𑀢𑁆𑀢𑀁 𑀯𑀸 𑀲𑀜𑁆𑀚𑀸𑀦𑀺𑀢𑀫𑀢𑁆𑀢𑀁 𑀯𑀸 𑀦 𑀧𑀝𑀺𑀮𑀪𑀢𑀺 ¶ , 𑀓𑀼𑀢𑁄 𑀜𑀸𑀡𑀦𑁆𑀢𑀺. 𑀏𑀯𑀫𑁆𑀧𑀺 𑀇𑀢𑁄 𑀘 𑀦𑀸𑀤𑁆𑀤𑀓𑁆𑀔𑀺 𑀅𑀡𑀼𑀫𑁆𑀧𑀺 𑀲𑀜𑁆𑀜𑀁.

𑀢𑀲𑁆𑀫𑀸 𑀢𑀼𑀯𑀁 𑀫𑁄𑀫𑀼𑀳𑀢𑁄 𑀤𑀳𑀸𑀲𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀫𑁄𑀫𑀽𑀳𑀥𑀫𑁆𑀫𑀢𑁄 𑀩𑀸𑀮𑀥𑀫𑁆𑀫𑀢𑁄 𑀫𑀽𑀴𑁆𑀳𑀥𑀫𑁆𑀫𑀢𑁄 ¶ 𑀅𑀜𑁆𑀜𑀸𑀡𑀥𑀫𑁆𑀫𑀢𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀥𑀫𑁆𑀫𑀢𑁄 𑀤𑀳𑀸𑀲𑀺 𑀧𑀲𑁆𑀲𑀲𑀺 𑀤𑀓𑁆𑀔𑀲𑀺 𑀑𑀮𑁄𑀓𑁂𑀲𑀺 𑀦𑀺𑀚𑁆𑀛𑀸𑀬𑀲𑀺 𑀉𑀧𑀧𑀭𑀺𑀓𑁆𑀔𑀲𑀻𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀫𑁄𑀫𑀼𑀳𑀢𑁄 𑀤𑀳𑀸𑀲𑀺.

‘‘𑀤𑀺𑀝𑁆𑀞𑀺𑀜𑁆𑀘 ¶ 𑀦𑀺𑀲𑁆𑀲𑀸𑀬𑀦𑀼𑀧𑀼𑀘𑁆𑀙𑀫𑀸𑀦𑁄, [𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀧𑀫𑁄𑀳𑀫𑀸𑀕𑀸;

𑀇𑀢𑁄 𑀘 𑀦𑀸𑀤𑁆𑀤𑀓𑁆𑀔𑀺 𑀅𑀡𑀼𑀫𑁆𑀧𑀺 𑀲𑀜𑁆𑀜𑀁, 𑀢𑀲𑁆𑀫𑀸 𑀢𑀼𑀯𑀁 𑀫𑁄𑀫𑀼𑀳𑀢𑁄 𑀤𑀳𑀸𑀲𑀻’’𑀢𑀺.

𑀲𑀫𑁄 𑀯𑀺𑀲𑁂𑀲𑀻 𑀉𑀤 𑀯𑀸 𑀦𑀺𑀳𑀻𑀦𑁄, 𑀬𑁄 𑀫𑀜𑁆𑀜𑀢𑀺 𑀲𑁄 𑀯𑀺𑀯𑀤𑁂𑀣 𑀢𑁂𑀦;

𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺.

𑀲𑀫𑁄 𑀯𑀺𑀲𑁂𑀲𑀻 𑀉𑀤 𑀯𑀸 𑀦𑀺𑀳𑀻𑀦𑁄, 𑀬𑁄 𑀫𑀜𑁆𑀜𑀢𑀺 𑀲𑁄 𑀯𑀺𑀯𑀤𑁂𑀣 𑀢𑁂𑀦𑀸𑀢𑀺. 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀸 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀸 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀸 𑀬𑁄 𑀫𑀜𑁆𑀜𑀢𑀺, 𑀲𑁄 𑀢𑁂𑀦 𑀫𑀸𑀦𑁂𑀦 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀢𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀓𑀮𑀳𑀁 𑀓𑀭𑁂𑀬𑁆𑀬 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬 𑀫𑁂𑀥𑀕𑀁 𑀓𑀭𑁂𑀬𑁆𑀬 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂, 𑀧𑀼𑀭𑁂 𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸 𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘, 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 ¶ 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺 𑁋 𑀲𑀫𑁄 𑀯𑀺𑀲𑁂𑀲𑀻 𑀉𑀤 𑀯𑀸 𑀦𑀺𑀳𑀻𑀦𑁄 𑀬𑁄 𑀫𑀜𑁆𑀜𑀢𑀺 𑀲𑁄 𑀯𑀺𑀯𑀤𑁂𑀣 𑀢𑁂𑀦.

𑀢𑀻𑀲𑀼 ¶ ¶ 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀻𑀢𑀺. 𑀬𑀲𑁆𑀲𑁂𑀢𑀸 𑀢𑀺𑀲𑁆𑀲𑁄 𑀯𑀺𑀥𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀢𑀻𑀲𑀼 𑀯𑀺𑀥𑀸𑀲𑀼 𑀦 𑀓𑀫𑁆𑀧𑀢𑀺 𑀦 𑀯𑀺𑀓𑀫𑁆𑀧𑀢𑀺, 𑀅𑀯𑀺𑀓𑀫𑁆𑀧𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀸 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀸 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀸. 𑀦 𑀢𑀲𑁆𑀲 𑀳𑁄𑀢𑀻𑀢𑀺. 𑀦 𑀫𑀬𑁆𑀳𑀁 𑀳𑁄𑀢𑀻𑀢𑀺 𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑁋 𑀦 𑀢𑀲𑁆𑀲 𑀳𑁄𑀢𑀺.

‘‘𑀲𑀫𑁄 𑀯𑀺𑀲𑁂𑀲𑀻 𑀉𑀤 𑀯𑀸 𑀦𑀺𑀳𑀻𑀦𑁄, 𑀬𑁄 𑀫𑀜𑁆𑀜𑀢𑀺 𑀲𑁄 𑀯𑀺𑀯𑀤𑁂𑀣 𑀢𑁂𑀦;

𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀻’’𑀢𑀺.

𑀲𑀘𑁆𑀘𑀦𑁆𑀢𑀺 ¶ 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬, 𑀫𑀼𑀲𑀸𑀢𑀺 𑀯𑀸 𑀲𑁄 𑀯𑀺𑀯𑀤𑁂𑀣 𑀓𑁂𑀦;

𑀬𑀲𑁆𑀫𑀺𑀁 𑀲𑀫𑀁 𑀯𑀺𑀲𑀫𑀁 𑀯𑀸𑀧𑀺 𑀦𑀢𑁆𑀣𑀺, 𑀲 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬.

𑀲𑀘𑁆𑀘𑀦𑁆𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀲𑀘𑁆𑀘𑀦𑁆𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬𑀸𑀢𑀺. ‘‘𑀲𑀲𑁆𑀲𑀢𑁄 ¶ 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬 𑀓𑀺𑀁 𑀓𑀣𑁂𑀬𑁆𑀬 𑀓𑀺𑀁 𑀪𑀡𑁂𑀬𑁆𑀬 𑀓𑀺𑀁 𑀤𑀻𑀧𑀬𑁂𑀬𑁆𑀬 𑀓𑀺𑀁 𑀯𑁄𑀳𑀭𑁂𑀬𑁆𑀬; ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬 𑀓𑀺𑀁 𑀓𑀣𑁂𑀬𑁆𑀬 𑀓𑀺𑀁 𑀪𑀡𑁂𑀬𑁆𑀬 𑀓𑀺𑀁 𑀤𑀻𑀧𑀬𑁂𑀬𑁆𑀬 𑀓𑀺𑀁 𑀯𑁄𑀳𑀭𑁂𑀬𑁆𑀬𑀸𑀢𑀺 𑁋 𑀲𑀘𑁆𑀘𑀦𑁆𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬.

𑀫𑀼𑀲𑀸𑀢𑀺 𑀯𑀸 𑀲𑁄 𑀯𑀺𑀯𑀤𑁂𑀣 𑀓𑁂𑀦𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁𑀯 𑀲𑀘𑁆𑀘𑀁, 𑀢𑀼𑀬𑁆𑀳𑀁 𑀫𑀼𑀲𑀸𑀢𑀺 𑀓𑁂𑀦 𑀫𑀸𑀦𑁂𑀦, 𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀓𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀓𑀮𑀳𑀁 𑀓𑀭𑁂𑀬𑁆𑀬 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬 𑀯𑀺𑀕𑁆𑀕𑀳𑀁 ¶ 𑀓𑀭𑁂𑀬𑁆𑀬 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬 𑀫𑁂𑀥𑀕𑀁 𑀓𑀭𑁂𑀬𑁆𑀬 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺 𑁋 𑀫𑀼𑀲𑀸𑀢𑀺 𑀯𑀸 𑀲𑁄 𑀯𑀺𑀯𑀤𑁂𑀣 𑀓𑁂𑀦.

𑀬𑀲𑁆𑀫𑀺𑀁 𑀲𑀫𑀁 𑀯𑀺𑀲𑀫𑀁 𑀯𑀸𑀧𑀺 𑀦𑀢𑁆𑀣𑀻𑀢𑀺. 𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 𑀦𑀢𑁆𑀣𑀺, 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 𑀦𑀢𑁆𑀣𑀺, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀑𑀫𑀸𑀦𑁄 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀬𑀲𑁆𑀫𑀺𑀁 𑀲𑀫𑀁 𑀯𑀺𑀲𑀫𑀁 𑀯𑀸𑀧𑀺 𑀦𑀢𑁆𑀣𑀺.

𑀲 ¶ 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬𑀸𑀢𑀺. 𑀲𑁄 𑀓𑁂𑀦 𑀫𑀸𑀦𑁂𑀦, 𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀓𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸𑀤𑀁 𑀧𑀝𑀺𑀲𑀜𑁆𑀜𑁄𑀚𑁂𑀬𑁆𑀬 𑀧𑀝𑀺𑀩𑀮𑁂𑀬𑁆𑀬 𑀓𑀮𑀳𑀁 𑀓𑀭𑁂𑀬𑁆𑀬 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬 𑀫𑁂𑀥𑀕𑀁 𑀓𑀭𑁂𑀬𑁆𑀬 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 ¶ 𑀧𑀳𑁄𑀲𑀻’’𑀢𑀺 𑁋 𑀲 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬.

‘‘𑀲𑀘𑁆𑀘𑀦𑁆𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬, 𑀫𑀼𑀲𑀸𑀢𑀺 𑀯𑀸 𑀲𑁄 𑀯𑀺𑀯𑀤𑁂𑀣 𑀓𑁂𑀦;

𑀬𑀲𑁆𑀫𑀺𑀁 𑀲𑀫𑀁 𑀯𑀺𑀲𑀫𑀁 𑀯𑀸𑀧𑀺 𑀦𑀢𑁆𑀣𑀺, 𑀲 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬𑀸’’𑀢𑀺.

𑀑𑀓𑀁 ¶ 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻, 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀺 [𑀲𑀦𑁆𑀥𑀯𑀸𑀦𑀺 (𑀓.)] ;

𑀓𑀸𑀫𑁂𑀳𑀺 𑀭𑀺𑀢𑁆𑀢𑁄 𑀅𑀧𑀼𑀭𑁂𑀓𑁆𑀔𑀭𑀸𑀦𑁄, 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸.

𑀅𑀣 ¶ 𑀔𑁄 𑀳𑀸𑀮𑀺𑀤𑁆𑀤𑀓𑀸𑀦𑀺 [𑀳𑀮𑀺𑀤𑁆𑀤𑀓𑀸𑀦𑀻 (𑀲𑀻.)] 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀳𑀸𑀮𑀺𑀤𑁆𑀤𑀓𑀸𑀦𑀺 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀯𑀼𑀢𑁆𑀢𑀫𑀺𑀤𑀁 𑀪𑀦𑁆𑀢𑁂, 𑀓𑀘𑁆𑀘𑀸𑀦, 𑀪𑀕𑀯𑀢𑀸 𑀅𑀝𑁆𑀞𑀓𑀯𑀕𑁆𑀕𑀺𑀓𑁂 𑀫𑀸𑀕𑀡𑁆𑀟𑀺𑀬𑀧𑀜𑁆𑀳𑁂 𑁋

‘‘𑀑𑀓𑀁 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻, 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀺;

𑀓𑀸𑀫𑁂𑀳𑀺 𑀭𑀺𑀢𑁆𑀢𑁄 𑀅𑀧𑀼𑀭𑁂𑀓𑁆𑀔𑀭𑀸𑀦𑁄, 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸’’𑀢𑀺.

‘‘𑀇𑀫𑀲𑁆𑀲 𑀦𑀼 𑀔𑁄 𑀪𑀦𑁆𑀢𑁂, 𑀓𑀘𑁆𑀘𑀸𑀦, 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

‘‘𑀭𑀽𑀧𑀥𑀸𑀢𑀼 𑀔𑁄, 𑀕𑀳𑀧𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀑𑀓𑁄 ¶ 𑀭𑀽𑀧𑀥𑀸𑀢𑀼 𑀭𑀸𑀕𑀯𑀺𑀦𑀺𑀩𑀦𑁆𑀥𑀜𑁆𑀘 [𑀭𑀸𑀕𑀯𑀺𑀦𑀺𑀩𑀤𑁆𑀥𑀜𑁆𑀘 (𑀲𑀻.)] 𑀧𑀦 𑀯𑀺𑀜𑁆𑀜𑀸𑀡𑀁 𑀑𑀓𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀥𑀸𑀢𑀼 𑀔𑁄, 𑀕𑀳𑀧𑀢𑀺… 𑀲𑀜𑁆𑀜𑀸𑀥𑀸𑀢𑀼 𑀔𑁄, 𑀕𑀳𑀧𑀢𑀺… 𑀲𑀗𑁆𑀔𑀸𑀭𑀥𑀸𑀢𑀼 𑀔𑁄, 𑀕𑀳𑀧𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀑𑀓𑁄 𑀲𑀗𑁆𑀔𑀸𑀭𑀥𑀸𑀢𑀼 𑀭𑀸𑀕𑀯𑀺𑀦𑀺𑀩𑀦𑁆𑀥𑀜𑁆𑀘 𑀧𑀦 𑀯𑀺𑀜𑁆𑀜𑀸𑀡𑀁 𑀑𑀓𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀑𑀓𑀲𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀅𑀦𑁄𑀓𑀲𑀸𑀭𑀻 𑀳𑁄𑀢𑀺? 𑀭𑀽𑀧𑀥𑀸𑀢𑀼𑀬𑀸 𑀔𑁄, 𑀕𑀳𑀧𑀢𑀺, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀸𑀬𑀼𑀧𑀸𑀤𑀸𑀦𑀸 [𑀉𑀧𑀬𑀼𑀧𑀸𑀤𑀸𑀦𑀸 (𑀓.)] 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 ¶ 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 ¶ 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀅𑀦𑁄𑀓𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑀦𑀸𑀥𑀸𑀢𑀼𑀬𑀸 𑀔𑁄, 𑀕𑀳𑀧𑀢𑀺… 𑀲𑀜𑁆𑀜𑀸𑀥𑀸𑀢𑀼𑀬𑀸 𑀔𑁄, 𑀕𑀳𑀧𑀢𑀺… 𑀲𑀗𑁆𑀔𑀸𑀭𑀥𑀸𑀢𑀼𑀬𑀸 𑀔𑁄, 𑀕𑀳𑀧𑀢𑀺… 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀔𑁄, 𑀕𑀳𑀧𑀢𑀺, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀸𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸 𑀢𑁂 ¶ 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀅𑀦𑁄𑀓𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀅𑀦𑁄𑀓𑀲𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀦𑀺𑀓𑁂𑀢𑀲𑀸𑀭𑀻 𑀳𑁄𑀢𑀺? 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀔𑁄, 𑀕𑀳𑀧𑀢𑀺, 𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀤𑁆𑀤𑀦𑀺𑀫𑀺𑀢𑁆𑀢… 𑀕𑀦𑁆𑀥𑀦𑀺𑀫𑀺𑀢𑁆𑀢… 𑀭𑀲𑀦𑀺𑀫𑀺𑀢𑁆𑀢… 𑀨𑁄𑀝𑁆𑀞𑀩𑁆𑀩𑀦𑀺𑀫𑀺𑀢𑁆𑀢… 𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀔𑁄, 𑀕𑀳𑀧𑀢𑀺, 𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀦𑀺𑀓𑁂𑀢𑀲𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀅𑀦𑀺𑀓𑁂𑀢𑀲𑀸𑀭𑀻 𑀳𑁄𑀢𑀺? 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀔𑁄, 𑀕𑀳𑀧𑀢𑀺, 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 ¶ 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀅𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀤𑁆𑀤𑀦𑀺𑀫𑀺𑀢𑁆𑀢… 𑀕𑀦𑁆𑀥𑀦𑀺𑀫𑀺𑀢𑁆𑀢… 𑀭𑀲𑀦𑀺𑀫𑀺𑀢𑁆𑀢… 𑀨𑁄𑀝𑁆𑀞𑀩𑁆𑀩𑀦𑀺𑀫𑀺𑀢𑁆𑀢… 𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀔𑁄, 𑀕𑀳𑀧𑀢𑀺, 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀅𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀅𑀦𑀺𑀓𑁂𑀢𑀲𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀕𑀸𑀫𑁂 𑀲𑀦𑁆𑀣𑀯𑀚𑀸𑀢𑁄 𑀳𑁄𑀢𑀺? 𑀇𑀥 ¶ , 𑀕𑀳𑀧𑀢𑀺, 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻, 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀕𑀸𑀫𑁂 𑀲𑀦𑁆𑀣𑀯𑀚𑀸𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀕𑀸𑀫𑁂 𑀦 𑀲𑀦𑁆𑀣𑀯𑀚𑀸𑀢𑁄 𑀳𑁄𑀢𑀺? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀕𑀺𑀳𑀻𑀳𑀺 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀦 𑀲𑀳𑀦𑀦𑁆𑀤𑀻 𑀦 𑀲𑀳𑀲𑁄𑀓𑀻, 𑀦 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀦 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀦 𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀕𑀸𑀫𑁂 𑀦 𑀲𑀦𑁆𑀣𑀯𑀚𑀸𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀓𑀸𑀫𑁂𑀳𑀺 𑀅𑀭𑀺𑀢𑁆𑀢𑁄 𑀳𑁄𑀢𑀺? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑁄 ¶ 𑀳𑁄𑀢𑀺 𑀅𑀯𑀺𑀕𑀢𑀘𑁆𑀙𑀦𑁆𑀤𑁄 𑀅𑀯𑀺𑀕𑀢𑀧𑁂𑀫𑁄 𑀅𑀯𑀺𑀕𑀢𑀧𑀺𑀧𑀸𑀲𑁄 𑀅𑀯𑀺𑀕𑀢𑀧𑀭𑀺𑀴𑀸𑀳𑁄 𑀅𑀯𑀺𑀕𑀢𑀢𑀡𑁆𑀳𑁄. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀓𑀸𑀫𑁂𑀳𑀺 𑀅𑀭𑀺𑀢𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘 ¶ , 𑀕𑀳𑀧𑀢𑀺, 𑀓𑀸𑀫𑁂𑀳𑀺 𑀭𑀺𑀢𑁆𑀢𑁄 𑀳𑁄𑀢𑀺? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑁄 𑀯𑀺𑀕𑀢𑀧𑁂𑀫𑁄 𑀯𑀺𑀕𑀢𑀧𑀺𑀧𑀸𑀲𑁄 𑀯𑀺𑀕𑀢𑀧𑀭𑀺𑀴𑀸𑀳𑁄 𑀯𑀺𑀕𑀢𑀢𑀡𑁆𑀳𑁄. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀓𑀸𑀫𑁂𑀳𑀺 𑀭𑀺𑀢𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀧𑀼𑀭𑁂𑀓𑁆𑀔𑀭𑀸𑀦𑁄 𑀳𑁄𑀢𑀺? 𑀇𑀥 ¶ , 𑀕𑀳𑀧𑀢𑀺, 𑀏𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺, ‘𑀏𑀯𑀁𑀯𑁂𑀤𑀦𑁄 𑀲𑀺𑀬𑀁… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀧𑀼𑀭𑁂𑀓𑁆𑀔𑀭𑀸𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘 ¶ , 𑀕𑀳𑀧𑀢𑀺, 𑀅𑀧𑀼𑀭𑁂𑀓𑁆𑀔𑀭𑀸𑀦𑁄 𑀳𑁄𑀢𑀺? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀦 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺, ‘𑀏𑀯𑀁𑀯𑁂𑀤𑀦𑁄 𑀲𑀺𑀬𑀁… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺 𑀦 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀅𑀧𑀼𑀭𑁂𑀓𑁆𑀔𑀭𑀸𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀓𑀣𑀁 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀢𑁆𑀢𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑁄 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺 𑁋 ‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂, 𑀧𑀼𑀭𑁂 𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸 𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘, 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀓𑀣𑀁 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀢𑁆𑀢𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀕𑀳𑀧𑀢𑀺, 𑀓𑀣𑀁 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀦 𑀓𑀢𑁆𑀢𑀸 𑀳𑁄𑀢𑀺? 𑀇𑀥, 𑀕𑀳𑀧𑀢𑀺, 𑀏𑀓𑀘𑁆𑀘𑁄 𑀦 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺 𑁋 ‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’𑀢𑀺. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀦 𑀓𑀢𑁆𑀢𑀸 𑀳𑁄𑀢𑀺. 𑀇𑀢𑀺 𑀔𑁄, 𑀕𑀳𑀧𑀢𑀺, 𑀬𑀁 𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀅𑀝𑁆𑀞𑀓𑀯𑀕𑁆𑀕𑀺𑀓𑁂 𑀫𑀸𑀕𑀡𑁆𑀟𑀺𑀬𑀧𑀜𑁆𑀳𑁂 𑁋

‘‘𑀑𑀓𑀁 ¶ 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻, 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀺;

𑀓𑀸𑀫𑁂𑀳𑀺 ¶ 𑀭𑀺𑀢𑁆𑀢𑁄 𑀅𑀧𑀼𑀭𑁂𑀓𑁆𑀔𑀭𑀸𑀦𑁄, 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸’’𑀢𑀺.

‘‘𑀇𑀫𑀲𑁆𑀲 ¶ ¶ 𑀔𑁄, 𑀕𑀳𑀧𑀢𑀺, 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺.

‘‘𑀑𑀓𑀁 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻, 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀺;

𑀬𑁂𑀳𑀺 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬 𑀮𑁄𑀓𑁂, 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄;

𑀏𑀮𑀫𑁆𑀩𑀼𑀚𑀁 𑀓𑀡𑁆𑀟𑀓𑀯𑀸𑀭𑀺𑀚𑀁 [𑀓𑀡𑁆𑀝𑀓𑀁 𑀯𑀸𑀭𑀺𑀚𑀁 (𑀲𑀻.)] 𑀬𑀣𑀸, 𑀚𑀮𑁂𑀦 𑀧𑀗𑁆𑀓𑁂𑀦 𑀘𑀦𑀽𑀧𑀮𑀺𑀢𑁆𑀢𑀁;

𑀏𑀯𑀁 𑀫𑀼𑀦𑀻 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄, 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄.

𑀬𑁂𑀳𑀺 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬 𑀮𑁄𑀓𑁂𑀢𑀺. 𑀬𑁂𑀳𑀻𑀢𑀺 𑀬𑁂𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀺. 𑀯𑀺𑀯𑀺𑀢𑁆𑀢𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀭𑀺𑀢𑁆𑀢𑁄 𑀯𑀺𑀯𑀺𑀢𑁆𑀢𑁄 𑀧𑀯𑀺𑀯𑀺𑀢𑁆𑀢𑁄, 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦… 𑀭𑀸𑀕𑁂𑀦…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀭𑀺𑀢𑁆𑀢𑁄 𑀯𑀺𑀯𑀺𑀢𑁆𑀢𑁄 𑀧𑀯𑀺𑀯𑀺𑀢𑁆𑀢𑁄. 𑀯𑀺𑀘𑀭𑁂𑀬𑁆𑀬𑀸𑀢𑀺 𑀯𑀺𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀬𑁂𑀳𑀺 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬 𑀮𑁄𑀓𑁂.

𑀦 ¶ 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄𑀢𑀺. 𑀦𑀸𑀕𑁄𑀢𑀺 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑁋 𑀦𑀸𑀕𑁄, 𑀦 𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄, 𑀦𑀸𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄. 𑀓𑀣𑀁 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑁋 𑀦𑀸𑀕𑁄? 𑀆𑀕𑀽 𑀯𑀼𑀘𑁆𑀘𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀆𑀕𑀼𑀁 ¶ 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀩𑁆𑀩𑀲𑀜𑁆𑀜𑁄𑀕𑁂 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀺 𑀯𑀺𑀫𑀼𑀢𑁆𑀢𑁄, 𑀦𑀸𑀕𑁄 𑀢𑀸𑀤𑀻 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑀏𑀯𑀁 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑁋 𑀦𑀸𑀕𑁄.

𑀓𑀣𑀁 ¶ ¶ 𑀦 𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺, 𑀦𑀸𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀻𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺. 𑀏𑀯𑀁 𑀦 𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄.

𑀓𑀣𑀁 𑀦𑀸𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀏𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄.

𑀦 ¶ 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄𑀢𑀺. 𑀦𑀸𑀕𑁄 𑀦 𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀤𑁂𑀬𑁆𑀬 𑀓𑀣𑁂𑀬𑁆𑀬 𑀪𑀡𑁂𑀬𑁆𑀬 𑀤𑀻𑀧𑀬𑁂𑀬𑁆𑀬 𑀯𑁄𑀳𑀭𑁂𑀬𑁆𑀬; ‘‘𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀤𑁂𑀬𑁆𑀬 𑀓𑀣𑁂𑀬𑁆𑀬 𑀪𑀡𑁂𑀬𑁆𑀬 𑀤𑀻𑀧𑀬𑁂𑀬𑁆𑀬 𑀯𑁄𑀳𑀭𑁂𑀬𑁆𑀬𑀸𑀢𑀺 𑁋 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄.

𑀏𑀮𑀫𑁆𑀩𑀼𑀚𑀁 𑀓𑀡𑁆𑀟𑀓𑀯𑀸𑀭𑀺𑀚𑀁 𑀬𑀣𑀸, 𑀚𑀮𑁂𑀦 𑀧𑀗𑁆𑀓𑁂𑀦 𑀘𑀦𑀽𑀧𑀮𑀺𑀢𑁆𑀢𑀦𑁆𑀢𑀺. 𑀏𑀮𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀅𑀫𑁆𑀩𑀼𑀚𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁, 𑀓𑀡𑁆𑀟𑀓𑁄 𑀯𑀼𑀘𑁆𑀘𑀢𑀺 ¶ 𑀔𑀭𑀤𑀡𑁆𑀟𑁄, 𑀯𑀸𑀭𑀺 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀯𑀸𑀭𑀺𑀚𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁 𑀯𑀸𑀭𑀺𑀲𑀫𑁆𑀪𑀯𑀁, 𑀚𑀮𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀧𑀗𑁆𑀓𑁄 𑀯𑀼𑀘𑁆𑀘𑀢𑀺 𑀓𑀤𑁆𑀤𑀫𑁄. 𑀬𑀣𑀸 𑀧𑀤𑀼𑀫𑀁 𑀯𑀸𑀭𑀺𑀚𑀁 𑀯𑀸𑀭𑀺𑀲𑀫𑁆𑀪𑀯𑀁 𑀚𑀮𑁂𑀦 𑀘 𑀧𑀗𑁆𑀓𑁂𑀦 𑀘 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺, 𑀅𑀮𑀺𑀢𑁆𑀢𑀁 𑀅𑀲𑀁𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀦𑁆𑀢𑀺 𑁋 𑀏𑀮𑀫𑁆𑀩𑀼𑀚𑀁 𑀓𑀡𑁆𑀟𑀓𑀯𑀸𑀭𑀺𑀚𑀁 𑀬𑀣𑀸 𑀚𑀮𑁂𑀦 𑀧𑀗𑁆𑀓𑁂𑀦 𑀘𑀦𑀽𑀧𑀮𑀺𑀢𑁆𑀢𑀁.

𑀏𑀯𑀁 𑀫𑀼𑀦𑀻 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄, 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀁𑀧𑀝𑀺𑀧𑀸𑀤𑀦𑀁. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀲𑀦𑁆𑀢𑀺𑀯𑀸𑀤𑁄𑀢𑀺 𑀲𑀦𑁆𑀢𑀺𑀯𑀸𑀤𑁄 𑀫𑀼𑀦𑀺 𑀢𑀸𑀡𑀯𑀸𑀤𑁄 𑀮𑁂𑀡𑀯𑀸𑀤𑁄 𑀲𑀭𑀡𑀯𑀸𑀤𑁄 𑀅𑀪𑀬𑀯𑀸𑀤𑁄 𑀅𑀘𑁆𑀘𑀼𑀢𑀯𑀸𑀤𑁄 𑀅𑀫𑀢𑀯𑀸𑀤𑁄 𑀦𑀺𑀩𑁆𑀩𑀸𑀦𑀯𑀸𑀤𑁄𑀢𑀺 𑁋 𑀏𑀯𑀁 𑀫𑀼𑀦𑀺 𑀲𑀦𑁆𑀢𑀺𑀯𑀸𑀤𑁄. 𑀅𑀕𑀺𑀤𑁆𑀥𑁄𑀢𑀺. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 ¶ 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑁄 𑀕𑁂𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄 𑀲𑁄 𑀯𑀼𑀘𑁆𑀘𑀢𑀺 𑀅𑀕𑀺𑀤𑁆𑀥𑁄. 𑀲𑁄 𑀭𑀽𑀧𑁂 𑀅𑀕𑀺𑀤𑁆𑀥𑁄, 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑁂… 𑀕𑀡𑁂… 𑀆𑀯𑀸𑀲𑁂… 𑀮𑀸𑀪𑁂… 𑀬𑀲𑁂… 𑀧𑀲𑀁𑀲𑀸𑀬… 𑀲𑀼𑀔𑁂… 𑀘𑀻𑀯𑀭𑁂… 𑀧𑀺𑀡𑁆𑀟𑀧𑀸𑀢𑁂 ¶ … 𑀲𑁂𑀦𑀸𑀲𑀦𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂… 𑀓𑀸𑀫𑀥𑀸𑀢𑀼𑀬𑀸 ¶ … 𑀭𑀽𑀧𑀥𑀸𑀢𑀼𑀬𑀸… 𑀅𑀭𑀽𑀧𑀥𑀸𑀢𑀼𑀬𑀸… 𑀓𑀸𑀫𑀪𑀯𑁂… 𑀭𑀽𑀧𑀪𑀯𑁂… 𑀅𑀭𑀽𑀧𑀪𑀯𑁂… 𑀲𑀜𑁆𑀜𑀸𑀪𑀯𑁂… 𑀅𑀲𑀜𑁆𑀜𑀸𑀪𑀯𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂… 𑀏𑀓𑀯𑁄𑀓𑀸𑀭𑀪𑀯𑁂… 𑀘𑀢𑀼𑀯𑁄𑀓𑀸𑀭𑀪𑀯𑁂… 𑀧𑀜𑁆𑀘𑀯𑁄𑀓𑀸𑀭𑀪𑀯𑁂… 𑀅𑀢𑀻𑀢𑁂… 𑀅𑀦𑀸𑀕𑀢𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑁂… 𑀤𑀺𑀝𑁆𑀞-𑀲𑀼𑀢-𑀫𑀼𑀢-𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀕𑀺𑀤𑁆𑀥𑁄 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀦𑁆𑀦𑁄 [𑀅𑀦𑀚𑁆𑀛𑀸𑀧𑀦𑁆𑀦𑁄 (𑀲𑀻.), 𑀅𑀦𑀚𑁆𑀛𑁄𑀧𑀦𑁆𑀦𑁄 (𑀲𑁆𑀬𑀸.)], 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄 𑀯𑀦𑁆𑀢𑀕𑁂𑀥𑁄 𑀫𑀼𑀢𑁆𑀢𑀕𑁂𑀥𑁄 𑀧𑀳𑀻𑀦𑀕𑁂𑀥𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄, 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 ¶ 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄, 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀏𑀯𑀁 𑀫𑀼𑀦𑀺 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄.

𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺. 𑀓𑀸𑀫𑀸𑀢𑀺 𑀉𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀫𑀼𑀦𑀺 𑀢𑀡𑁆𑀳𑀸𑀮𑁂𑀧𑀁 𑀧𑀳𑀸𑀬 𑀤𑀺𑀝𑁆𑀞𑀺𑀮𑁂𑀧𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀸𑀫𑁂 𑀘 𑀮𑁄𑀓𑁂 𑀘 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 ¶ 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀏𑀯𑀁 𑀫𑀼𑀦𑀻 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄, 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄.

‘‘𑀬𑁂𑀳𑀺 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬 𑀮𑁄𑀓𑁂, 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄;

𑀏𑀮𑀫𑁆𑀩𑀼𑀚𑀁 𑀓𑀡𑁆𑀟𑀓𑀯𑀸𑀭𑀺𑀚𑀁 𑀬𑀣𑀸, 𑀚𑀮𑁂𑀦 𑀧𑀗𑁆𑀓𑁂𑀦 𑀘𑀦𑀽𑀧𑀮𑀺𑀢𑁆𑀢𑀁;

𑀏𑀯𑀁 𑀫𑀼𑀦𑀻 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄, 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄’’𑀢𑀺.

𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸 [𑀤𑀺𑀝𑁆𑀞𑀺𑀬𑀸𑀬𑀓𑁄 (𑀓. 𑀅𑀝𑁆𑀞.) 𑀲𑀼. 𑀦𑀺. 𑁮𑁫𑁨] 𑀦 𑀫𑀼𑀢𑀺𑀬𑀸, 𑀲 𑀫𑀸𑀦𑀫𑁂𑀢𑀺 𑀦 𑀳𑀺 𑀢𑀫𑁆𑀫𑀬𑁄 𑀲𑁄;

𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄, 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀼.

𑀦 ¶ 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸 𑀦 𑀫𑀼𑀢𑀺𑀬𑀸, 𑀲 𑀫𑀸𑀦𑀫𑁂𑀢𑀻𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀯𑁂𑀤𑀕𑀽𑀢𑀺. 𑀯𑁂𑀤𑁄 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 ¶ , 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀳𑀺 𑀯𑁂𑀤𑁂𑀳𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄, 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄, 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄, 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄, 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄, 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄, 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄, 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄, 𑀅𑀘𑁆𑀘𑀼𑀢𑀕𑀢𑁄 ¶ 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 ¶ , 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄, 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄, 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀁 𑀕𑀢𑁄𑀢𑀺 𑀯𑁂𑀤𑀕𑀽, 𑀯𑁂𑀤𑁂𑀳𑀺 𑀯𑀸 𑀅𑀦𑁆𑀢𑀁 𑀕𑀢𑁄𑀢𑀺 𑀯𑁂𑀤𑀕𑀽, 𑀲𑀢𑁆𑀢𑀦𑁆𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀯𑁂𑀤𑀕𑀽, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀤𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀤𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀯𑀺𑀤𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀡𑀸𑀦𑀁 𑀬𑀸𑀦𑀻𑀥𑀢𑁆𑀣𑀺 𑀩𑁆𑀭𑀸𑀳𑁆𑀫𑀡𑀸𑀦𑀁;

𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄, 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺.

𑀦 𑀤𑀺𑀝𑁆𑀞𑀺𑀬𑀸𑀢𑀺 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀤𑀺𑀝𑁆𑀞𑀺𑀬𑀸 𑀦 𑀬𑀸𑀬𑀢𑀺 𑀦 𑀦𑀻𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀺, 𑀦𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸. 𑀦 𑀫𑀼𑀢𑀺𑀬𑀸𑀢𑀺 𑀫𑀼𑀢𑀭𑀽𑀧𑁂𑀦 𑀯𑀸 𑀧𑀭𑀢𑁄 𑀖𑁄𑀲𑁂𑀦 𑀯𑀸 𑀫𑀳𑀸𑀚𑀦𑀲𑀫𑁆𑀫𑀼𑀢𑀺𑀬𑀸 𑀯𑀸 𑀫𑀸𑀦𑀁 𑀦𑁂𑀢𑀺 ¶ 𑀦 𑀉𑀧𑁂𑀢𑀺 𑀦 𑀉𑀧𑀕𑀘𑁆𑀙𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸 𑀦 𑀫𑀼𑀢𑀺𑀬𑀸 𑀲 𑀫𑀸𑀦𑀫𑁂𑀢𑀺.

𑀦 𑀳𑀺 𑀢𑀫𑁆𑀫𑀬𑁄 𑀲𑁄𑀢𑀺 𑀦 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 ¶ 𑀢𑀫𑁆𑀫𑀬𑁄 𑀳𑁄𑀢𑀺 𑀢𑀧𑁆𑀧𑀭𑀫𑁄 𑀢𑀧𑁆𑀧𑀭𑀸𑀬𑀦𑁄. 𑀬𑀢𑁄 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘 𑀫𑀸𑀦𑁄 𑀘𑀲𑁆𑀲 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸 𑀏𑀢𑁆𑀢𑀸𑀯𑀢𑀸 𑀦 𑀢𑀫𑁆𑀫𑀬𑁄 𑀳𑁄𑀢𑀺 𑀦 𑀢𑀧𑁆𑀧𑀭𑀫𑁄 𑀦 𑀢𑀧𑁆𑀧𑀭𑀸𑀬𑀦𑁄𑀢𑀺 𑁋 𑀲 𑀫𑀸𑀦𑀫𑁂𑀢𑀺 𑀦 𑀳𑀺 𑀢𑀫𑁆𑀫𑀬𑁄 𑀲𑁄.

𑀦 ¶ 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄𑀢𑀺. 𑀦 𑀓𑀫𑁆𑀫𑀼𑀦𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀸 𑀦 𑀬𑀸𑀬𑀢𑀺 𑀦 𑀦𑀻𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀦 𑀓𑀫𑁆𑀫𑀼𑀦𑀸. 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄𑀢𑀺 𑀲𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀧𑀭𑀢𑁄 𑀖𑁄𑀲𑁂𑀦 𑀯𑀸 𑀫𑀳𑀸𑀚𑀦𑀲𑀫𑁆𑀫𑀼𑀢𑀺𑀬𑀸 𑀯𑀸 𑀦 𑀬𑀸𑀬𑀢𑀺 𑀦 𑀦𑀻𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄.

𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀽𑀢𑀺. 𑀉𑀧𑀬𑀸𑀢𑀺 𑀤𑁆𑀯𑁂 𑀉𑀧𑀬𑀸 𑁋 𑀢𑀡𑁆𑀳𑀽𑀧𑀬𑁄 𑀘 𑀤𑀺𑀝𑁆𑀞𑀽𑀧𑀬𑁄 𑀘…𑀧𑁂… 𑀅𑀬𑀁 ¶ 𑀢𑀡𑁆𑀳𑀽𑀧𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀽𑀧𑀬𑁄. 𑀢𑀲𑁆𑀲 𑀢𑀡𑁆𑀳𑀽𑀧𑀬𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀽𑀧𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀽𑀧𑀬𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀽𑀧𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀲𑁄 𑀦𑀺𑀯𑁂𑀲𑀦𑁂𑀲𑀼 𑀅𑀦𑀽𑀧𑀦𑀻𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀼.

‘‘𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸 𑀦 𑀫𑀼𑀢𑀺𑀬𑀸, 𑀲 𑀫𑀸𑀦𑀫𑁂𑀢𑀺 𑀦 𑀳𑀺 𑀢𑀫𑁆𑀫𑀬𑁄 𑀲𑁄;

𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄, 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀽’’𑀢𑀺.

𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 ¶ 𑀦 𑀲𑀦𑁆𑀢𑀺 𑀕𑀦𑁆𑀣𑀸, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀫𑁄𑀳𑀸;

𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀫𑀸𑀦𑀸 [𑀖𑀝𑁆𑀝𑀬𑀦𑁆𑀢𑀸 (𑀲𑁆𑀬𑀸.) 𑀲𑀼. 𑀦𑀺. 𑁮𑁫𑁩] 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂.

𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸𑀢𑀺. 𑀬𑁄 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺 𑀢𑀲𑁆𑀲 𑀆𑀤𑀺𑀢𑁄 𑀉𑀧𑀸𑀤𑀸𑀬 𑀕𑀦𑁆𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀺, 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 𑀅𑀭𑀳𑀢𑁄 𑀕𑀦𑁆𑀣𑀸 𑀘 𑀫𑁄𑀳𑀸 𑀘 𑀦𑀻𑀯𑀭𑀡𑀸 𑀘 𑀓𑀸𑀫𑀲𑀜𑁆𑀜𑀸 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀤𑀺𑀝𑁆𑀞𑀺𑀲𑀜𑁆𑀜𑀸 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑁋 𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸.

𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀫𑁄𑀳𑀸𑀢𑀺. 𑀬𑁄 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀆𑀤𑀺𑀢𑁄 𑀉𑀧𑀸𑀤𑀸𑀬 𑀫𑁄𑀳𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀺, 𑀅𑀭𑀳𑀢𑁆𑀢𑁂 ¶ 𑀧𑀢𑁆𑀢𑁂 𑀅𑀭𑀳𑀢𑁄 𑀫𑁄𑀳𑀸 𑀘 𑀕𑀦𑁆𑀣𑀸 𑀘 𑀦𑀻𑀯𑀭𑀡𑀸 𑀘 𑀓𑀸𑀫𑀲𑀜𑁆𑀜𑀸 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀤𑀺𑀝𑁆𑀞𑀺𑀲𑀜𑁆𑀜𑀸 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑁋 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀫𑁄𑀳𑀸.

𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺. 𑀬𑁂 𑀲𑀜𑁆𑀜𑀁 𑀕𑀡𑁆𑀳𑀦𑁆𑀢𑀺 𑀓𑀸𑀫𑀲𑀜𑁆𑀜𑀁 𑀩𑁆𑀬𑀸𑀧𑀸𑀤𑀲𑀜𑁆𑀜𑀁 𑀯𑀺𑀳𑀺𑀁𑀲𑀸𑀲𑀜𑁆𑀜𑀁 𑀢𑁂 𑀲𑀜𑁆𑀜𑀸𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀺 𑀲𑀗𑁆𑀖𑀝𑁆𑀝𑁂𑀦𑁆𑀢𑀺. 𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀺, 𑀔𑀢𑁆𑀢𑀺𑀬𑀸𑀧𑀺 𑀔𑀢𑁆𑀢𑀺𑀬𑁂𑀳𑀺 ¶ 𑀯𑀺𑀯𑀤𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 ¶ 𑀯𑀺𑀯𑀤𑀦𑁆𑀢𑀺, 𑀕𑀳𑀧𑀢𑀻𑀧𑀺 𑀕𑀳𑀧𑀢𑀻𑀳𑀺 𑀯𑀺𑀯𑀤𑀦𑁆𑀢𑀺, 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺 ¶ . 𑀢𑁂 𑀢𑀢𑁆𑀣 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀧𑀸𑀡𑀻𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀮𑁂𑀟𑁆𑀟𑀽𑀳𑀺𑀧𑀺 [𑀮𑁂𑀝𑁆𑀝𑀽𑀳𑀺𑀧𑀺 (𑀓.)] 𑀉𑀧𑀓𑁆𑀓𑀫𑀦𑁆𑀢𑀺, 𑀤𑀡𑁆𑀟𑁂𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀲𑀢𑁆𑀣𑁂𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺. 𑀢𑁂 𑀢𑀢𑁆𑀣 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀬𑁂 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸 𑀢𑁂 𑀤𑀺𑀝𑁆𑀞𑀺𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀺 𑀲𑀗𑁆𑀖𑀝𑁆𑀝𑁂𑀦𑁆𑀢𑀺, 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀖𑀝𑁆𑀝𑁂𑀦𑁆𑀢𑀺, 𑀥𑀫𑁆𑀫𑀓𑁆𑀔𑀸𑀦𑀢𑁄 𑀥𑀫𑁆𑀫𑀓𑁆𑀔𑀸𑀦𑀁 𑀖𑀝𑁆𑀝𑁂𑀦𑁆𑀢𑀺, 𑀕𑀡𑀢𑁄 𑀕𑀡𑀁 𑀖𑀝𑁆𑀝𑁂𑀦𑁆𑀢𑀺, 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀁 𑀖𑀝𑁆𑀝𑁂𑀦𑁆𑀢𑀺, 𑀧𑀝𑀺𑀧𑀤𑀸𑀬 𑀧𑀝𑀺𑀧𑀤𑀁 𑀖𑀝𑁆𑀝𑁂𑀦𑁆𑀢𑀺, 𑀫𑀕𑁆𑀕𑀢𑁄 𑀫𑀕𑁆𑀕𑀁 𑀖𑀝𑁆𑀝𑁂𑀦𑁆𑀢𑀺.

𑀅𑀣 𑀯𑀸 𑀢𑁂 𑀯𑀺𑀯𑀤𑀦𑁆𑀢𑀺, 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀪𑀡𑁆𑀟𑀦𑀁 𑀓𑀭𑁄𑀦𑁆𑀢𑀺, 𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀫𑁂𑀥𑀕𑀁 𑀓𑀭𑁄𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺. 𑀢𑁂𑀲𑀁 𑀅𑀪𑀺𑀲𑀗𑁆𑀔𑀸𑀭𑀸 𑀅𑀧𑁆𑀧𑀳𑀻𑀦𑀸; 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀖𑀝𑁆𑀝𑁂𑀦𑁆𑀢𑀺, 𑀦𑀺𑀭𑀬𑁂 𑀖𑀝𑁆𑀝𑁂𑀦𑁆𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀖𑀝𑁆𑀝𑁂𑀦𑁆𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀖𑀝𑁆𑀝𑁂𑀦𑁆𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀖𑀝𑁆𑀝𑁂𑀦𑁆𑀢𑀺, 𑀤𑁂𑀯𑀮𑁄𑀓𑁂 𑀖𑀝𑁆𑀝𑁂𑀦𑁆𑀢𑀺, 𑀕𑀢𑀺𑀬𑀸 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀬𑀸 𑀧𑀝𑀺𑀲𑀦𑁆𑀥𑀺𑀁… 𑀪𑀯𑁂𑀦 𑀪𑀯𑀁… 𑀲𑀁𑀲𑀸𑀭𑁂𑀦 𑀲𑀁𑀲𑀸𑀭𑀁… 𑀯𑀝𑁆𑀝𑁂𑀦 ¶ 𑀯𑀝𑁆𑀝𑀁 𑀖𑀝𑁆𑀝𑁂𑀦𑁆𑀢𑀺 𑀲𑀗𑁆𑀖𑀝𑁆𑀝𑁂𑀦𑁆𑀢𑀺 𑀯𑀤𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀲𑀜𑁆𑀜𑀜𑁆𑀘 ¶ 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁 𑀢𑁂 𑀖𑀝𑁆𑀝𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂.

‘‘𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 ¶ 𑀦 𑀲𑀦𑁆𑀢𑀺 𑀕𑀦𑁆𑀣𑀸, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀫𑁄𑀳𑀸;

𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂’’𑀢𑀺.

𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀦𑀯𑀫𑁄.

𑁧𑁦. 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀓𑀣𑀁𑀤𑀲𑁆𑀲𑀻 ¶ ¶ 𑀓𑀣𑀁𑀲𑀻𑀮𑁄, 𑀉𑀧𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺;

𑀢𑀁 𑀫𑁂 𑀕𑁄𑀢𑀫 𑀧𑀩𑁆𑀭𑀽𑀳𑀺, 𑀧𑀼𑀘𑁆𑀙𑀺𑀢𑁄 𑀉𑀢𑁆𑀢𑀫𑀁 𑀦𑀭𑀁.

𑀓𑀣𑀁𑀤𑀲𑁆𑀲𑀻 𑀓𑀣𑀁𑀲𑀻𑀮𑁄, 𑀉𑀧𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀓𑀣𑀁𑀤𑀲𑁆𑀲𑀻𑀢𑀺 𑀓𑀻𑀤𑀺𑀲𑁂𑀦 𑀤𑀲𑁆𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀺𑀁𑀲𑀡𑁆𑀞𑀺𑀢𑁂𑀦, 𑀓𑀺𑀁𑀧𑀓𑀸𑀭𑁂𑀦, 𑀓𑀺𑀁𑀧𑀝𑀺𑀪𑀸𑀕𑁂𑀦𑀸𑀢𑀺 𑁋 𑀓𑀣𑀁𑀤𑀲𑁆𑀲𑀻. 𑀓𑀣𑀁𑀲𑀻𑀮𑁄𑀢𑀺 𑀓𑀻𑀤𑀺𑀲𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀺𑀁𑀲𑀡𑁆𑀞𑀺𑀢𑁂𑀦, 𑀓𑀺𑀁𑀧𑀓𑀸𑀭𑁂𑀦, 𑀓𑀺𑀁𑀧𑀝𑀺𑀪𑀸𑀕𑁂𑀦𑀸𑀢𑀺 𑁋 𑀓𑀣𑀁𑀤𑀲𑁆𑀲𑀻 𑀓𑀣𑀁𑀲𑀻𑀮𑁄. 𑀉𑀧𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀺. 𑀓𑀣𑀁𑀤𑀲𑁆𑀲𑀻𑀢𑀺 𑀅𑀥𑀺𑀧𑀜𑁆𑀜𑀁 𑀧𑀼𑀘𑁆𑀙𑀢𑀺, 𑀓𑀣𑀁𑀲𑀻𑀮𑁄𑀢𑀺 𑀅𑀥𑀺𑀲𑀻𑀮𑀁 𑀧𑀼𑀘𑁆𑀙𑀢𑀺, 𑀉𑀧𑀲𑀦𑁆𑀢𑁄𑀢𑀺 𑀅𑀥𑀺𑀘𑀺𑀢𑁆𑀢𑀁 𑀧𑀼𑀘𑁆𑀙𑀢𑀻𑀢𑀺 𑁋 𑀓𑀣𑀁𑀤𑀲𑁆𑀲𑀻 𑀓𑀣𑀁𑀲𑀻𑀮𑁄 𑀉𑀧𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

𑀢𑀁 𑀫𑁂 𑀕𑁄𑀢𑀫 𑀧𑀩𑁆𑀭𑀽𑀳𑀻𑀢𑀺. 𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺, 𑀬𑀁 𑀬𑀸𑀘𑀸𑀫𑀺, 𑀬𑀁 𑀅𑀚𑁆𑀛𑁂𑀲𑀸𑀫𑀺, 𑀬𑀁 𑀧𑀲𑀸𑀤𑁂𑀫𑀺. 𑀕𑁄𑀢𑀫𑀸𑀢𑀺 𑀲𑁄 𑀦𑀺𑀫𑁆𑀫𑀺𑀢𑁄 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀧𑀩𑁆𑀭𑀽𑀳𑀻𑀢𑀺 ¶ 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑀁 𑀫𑁂 𑀕𑁄𑀢𑀫 𑀧𑀩𑁆𑀭𑀽𑀳𑀺.

𑀧𑀼𑀘𑁆𑀙𑀺𑀢𑁄 𑀉𑀢𑁆𑀢𑀫𑀁 𑀦𑀭𑀦𑁆𑀢𑀺. 𑀧𑀼𑀘𑁆𑀙𑀺𑀢𑁄𑀢𑀺 𑀧𑀼𑀝𑁆𑀞𑁄 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀉𑀢𑁆𑀢𑀫𑀁 𑀦𑀭𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀦𑀭𑀦𑁆𑀢𑀺 𑁋 𑀧𑀼𑀘𑁆𑀙𑀺𑀢𑁄 𑀉𑀢𑁆𑀢𑀫𑀁 𑀦𑀭𑀁.

‘‘𑀓𑀣𑀁𑀤𑀲𑁆𑀲𑀻 𑀓𑀣𑀁𑀲𑀻𑀮𑁄, 𑀉𑀧𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺;

𑀢𑀁 𑀫𑁂 𑀕𑁄𑀢𑀫 𑀧𑀩𑁆𑀭𑀽𑀳𑀺, 𑀧𑀼𑀘𑁆𑀙𑀺𑀢𑁄 𑀉𑀢𑁆𑀢𑀫𑀁 𑀦𑀭’’𑀦𑁆𑀢𑀺.

𑀯𑀻𑀢𑀢𑀡𑁆𑀳𑁄 ¶ ¶ 𑀧𑀼𑀭𑀸𑀪𑁂𑀤𑀸, [𑀇𑀢𑀺 𑀪𑀕𑀯𑀸]

𑀯𑁂𑀫𑀚𑁆𑀛𑁂 𑀦𑀼𑀧𑀲𑀗𑁆𑀔𑁂𑀬𑁆𑀬𑁄,

𑀯𑀻𑀢𑀢𑀡𑁆𑀳𑁄 𑀧𑀼𑀭𑀸𑀪𑁂𑀤𑀸𑀢𑀺. 𑀧𑀼𑀭𑀸 𑀓𑀸𑀬𑀲𑁆𑀲 𑀪𑁂𑀤𑀸, 𑀧𑀼𑀭𑀸 𑀅𑀢𑁆𑀢𑀪𑀸𑀯𑀲𑁆𑀲 𑀪𑁂𑀤𑀸, 𑀧𑀼𑀭𑀸 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀸, 𑀧𑀼𑀭𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸 𑀯𑀻𑀢𑀢𑀡𑁆𑀳𑁄 𑀯𑀺𑀕𑀢𑀢𑀡𑁆𑀳𑁄 𑀘𑀢𑁆𑀢𑀢𑀡𑁆𑀳𑁄 𑀯𑀦𑁆𑀢𑀢𑀡𑁆𑀳𑁄 𑀫𑀼𑀢𑁆𑀢𑀢𑀡𑁆𑀳𑁄 𑀧𑀳𑀻𑀦𑀢𑀡𑁆𑀳𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑀡𑁆𑀳𑁄, 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄, 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺.

𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀢𑀡𑁆𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 ¶ 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 ¶ 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀧𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸. 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 ¶ , 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁; 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀯𑀻𑀢𑀢𑀡𑁆𑀳𑁄 𑀧𑀼𑀭𑀸𑀪𑁂𑀤𑀸𑀢𑀺 𑀪𑀕𑀯𑀸.

𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄𑀢𑀺 ¶ ¶ 𑀧𑀼𑀩𑁆𑀩𑀦𑁆𑀢𑁄 𑀯𑀼𑀘𑁆𑀘𑀢𑀺 𑀅𑀢𑀻𑀢𑁄 𑀅𑀤𑁆𑀥𑀸. 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀢𑀡𑁆𑀳𑀸 𑀧𑀳𑀻𑀦𑀸, 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀸 𑀢𑀡𑁆𑀳𑀸𑀬 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀬𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸. 𑀏𑀯𑀫𑁆𑀧𑀺 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄. 𑀅𑀣 𑀯𑀸 ‘‘𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺, ‘‘𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺𑀁… 𑀏𑀯𑀁𑀲𑀜𑁆𑀜𑁄 𑀅𑀳𑁄𑀲𑀺𑀁… 𑀏𑀯𑀁𑀲𑀗𑁆𑀔𑀸𑀭𑁄 ¶ 𑀅𑀳𑁄𑀲𑀺𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀫𑁆𑀧𑀺 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄. 𑀅𑀣 𑀯𑀸 ‘‘𑀇𑀢𑀺 𑀫𑁂 𑀘𑀓𑁆𑀔𑀼 [𑀘𑀓𑁆𑀔𑀼𑀁 (𑀲𑀻. 𑀓.)] 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀭𑀽𑀧𑀸’’𑀢𑀺 𑀢𑀢𑁆𑀣 𑀦 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀦 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄. ‘‘𑀇𑀢𑀺 𑀫𑁂 𑀲𑁄𑀢𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀲𑀤𑁆𑀤𑀸’’𑀢𑀺, ‘‘𑀇𑀢𑀺 𑀫𑁂 𑀖𑀸𑀦𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀕𑀦𑁆𑀥𑀸’’𑀢𑀺, ‘‘𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀭𑀲𑀸’’𑀢𑀺, ‘‘𑀇𑀢𑀺 𑀫𑁂 𑀓𑀸𑀬𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸’’𑀢𑀺, ‘‘𑀇𑀢𑀺 𑀫𑁂 𑀫𑀦𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀥𑀫𑁆𑀫𑀸’’𑀢𑀺 𑀢𑀢𑁆𑀣 𑀦 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀦 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄. 𑀅𑀣 𑀯𑀸 𑀬𑀸𑀦𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀦 𑀢𑀤𑀲𑁆𑀲𑀸𑀤𑁂𑀢𑀺, 𑀦 𑀢𑀁 𑀦𑀺𑀓𑀸𑀫𑁂𑀢𑀺, 𑀦 𑀘 𑀢𑁂𑀦 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀧𑀼𑀩𑁆𑀩𑀫𑀦𑁆𑀢𑀫𑀦𑀺𑀲𑁆𑀲𑀺𑀢𑁄.

𑀯𑁂𑀫𑀚𑁆𑀛𑁂 𑀦𑀼𑀧𑀲𑀗𑁆𑀔𑁂𑀬𑁆𑀬𑁄𑀢𑀺. 𑀯𑁂𑀫𑀚𑁆𑀛𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀢𑀡𑁆𑀳𑀸 𑀧𑀳𑀻𑀦𑀸, 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀸 ¶ . 𑀢𑀡𑁆𑀳𑀸𑀬 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀬𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀭𑀢𑁆𑀢𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀤𑀼𑀝𑁆𑀞𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀫𑀽𑀴𑁆𑀳𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀯𑀺𑀦𑀺𑀩𑀤𑁆𑀥𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀧𑀭𑀸𑀫𑀝𑁆𑀞𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀣𑀸𑀫𑀕𑀢𑁄𑀢𑀺 𑀦𑀼𑀧𑀲𑀗𑁆𑀔𑁂𑀬𑁆𑀬𑁄; 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸; 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀦𑀼𑀧𑀲𑀗𑁆𑀔𑁂𑀬𑁆𑀬𑁄, 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 ¶ 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 ¶ 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺 𑀬𑁂𑀦 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑁋 𑀯𑁂𑀫𑀚𑁆𑀛𑁂 𑀦𑀼𑀧𑀲𑀗𑁆𑀔𑁂𑀬𑁆𑀬𑁄.

𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑀲𑁆𑀲 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦 𑀢𑀡𑁆𑀳𑀁 𑀯𑀸 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀺, 𑀦 𑀢𑀡𑁆𑀳𑀸𑀥𑀚𑁄 𑀦 𑀢𑀡𑁆𑀳𑀸𑀓𑁂𑀢𑀼 𑀦 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀤𑀺𑀝𑁆𑀞𑀺𑀥𑀚𑁄 𑀦 𑀤𑀺𑀝𑁆𑀞𑀺𑀓𑁂𑀢𑀼 𑀦 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀢𑀡𑁆𑀳𑀸𑀬 ¶ 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑀺𑀢𑁄 𑀘𑀭𑀢𑀺. 𑀏𑀯𑀫𑁆𑀧𑀺 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀁. 𑀅𑀣 𑀯𑀸 ‘‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺, ‘‘𑀏𑀯𑀁𑀯𑁂𑀤𑀦𑁄 ¶ 𑀲𑀺𑀬𑀁… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀫𑁆𑀧𑀺 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀁. 𑀅𑀣 𑀯𑀸 ‘‘𑀇𑀢𑀺 𑀫𑁂 𑀘𑀓𑁆𑀔𑀼 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀭𑀽𑀧𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑁆𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀁. ‘‘𑀇𑀢𑀺 𑀫𑁂 𑀲𑁄𑀢𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀲𑀤𑁆𑀤𑀸’’𑀢𑀺, ‘‘𑀇𑀢𑀺 𑀫𑁂 𑀖𑀸𑀦𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀕𑀦𑁆𑀥𑀸’’𑀢𑀺, ‘‘𑀇𑀢𑀺 𑀫𑁂 𑀚𑀺𑀯𑁆𑀳𑀸 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀭𑀲𑀸’’𑀢𑀺, ‘‘𑀇𑀢𑀺 𑀫𑁂 𑀓𑀸𑀬𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀨𑁄𑀝𑁆𑀞𑀩𑁆𑀩𑀸’’𑀢𑀺, ‘‘𑀇𑀢𑀺 𑀫𑁂 𑀫𑀦𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀥𑀫𑁆𑀫𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑁆𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀁. 𑀅𑀣 𑀯𑀸 ‘‘𑀇𑀫𑀺𑀦𑀸𑀳𑀁 ¶ 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄’’𑀢𑀺 𑀯𑀸 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑁆𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀢𑁄. 𑀏𑀯𑀫𑁆𑀧𑀺 𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢𑀁.

‘‘𑀯𑀻𑀢𑀢𑀡𑁆𑀳𑁄 𑀧𑀼𑀭𑀸𑀪𑁂𑀤𑀸, [𑀇𑀢𑀺 𑀪𑀕𑀯𑀸]

𑀢𑀲𑁆𑀲 𑀦𑀢𑁆𑀣𑀺 𑀧𑀼𑀭𑀓𑁆𑀔𑀢’’𑀦𑁆𑀢𑀺.

𑀅𑀓𑁆𑀓𑁄𑀥𑀦𑁄 ¶ ¶ 𑀅𑀲𑀦𑁆𑀢𑀸𑀲𑀻, 𑀅𑀯𑀺𑀓𑀢𑁆𑀣𑀻 𑀅𑀓𑀼𑀓𑁆𑀓𑀼𑀘𑁄;

𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄, 𑀲 𑀯𑁂 𑀯𑀸𑀘𑀸𑀬𑀢𑁄 𑀫𑀼𑀦𑀺.

𑀅𑀓𑁆𑀓𑁄𑀥𑀦𑁄 𑀅𑀲𑀦𑁆𑀢𑀸𑀲𑀻𑀢𑀺. 𑀅𑀓𑁆𑀓𑁄𑀥𑀦𑁄𑀢𑀺 𑀬𑀜𑁆𑀳𑀺 𑀔𑁄 𑀯𑀼𑀢𑁆𑀢𑀁. 𑀅𑀧𑀺 𑀘 𑀓𑁄𑀥𑁄 𑀢𑀸𑀯 𑀯𑀢𑁆𑀢𑀩𑁆𑀩𑁄. 𑀤𑀲𑀳𑀸𑀓𑀸𑀭𑁂𑀳𑀺 𑀓𑁄𑀥𑁄 𑀚𑀸𑀬𑀢𑀺 𑁋 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺 𑀓𑁄𑀥𑁄 𑀚𑀸𑀬𑀢𑀺, ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻’’𑀢𑀺 𑀓𑁄𑀥𑁄 𑀚𑀸𑀬𑀢𑀺, ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻’’𑀢𑀺 𑀓𑁄𑀥𑁄 𑀚𑀸𑀬𑀢𑀺, ‘‘𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺… 𑀅𑀦𑀢𑁆𑀣𑀁 𑀘𑀭𑀢𑀺… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻’’𑀢𑀺 𑀓𑁄𑀥𑁄 𑀚𑀸𑀬𑀢𑀺, ‘‘𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺… 𑀅𑀢𑁆𑀣𑀁 𑀘𑀭𑀢𑀺… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻’’𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀓𑁄𑀥𑁄 𑀚𑀸𑀬𑀢𑀺. 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄, 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄, 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄, 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄 ¶ , 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁, 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁, 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁, 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁, 𑀅𑀲𑀼𑀭𑁄𑀧𑁄 [𑀅𑀲𑁆𑀲𑀼𑀭𑁄𑀧𑁄 (𑀲𑀻. 𑀓.)] 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀓𑁄𑀥𑁄.

𑀅𑀧𑀺 ¶ 𑀘 𑀓𑁄𑀥𑀲𑁆𑀲 𑀅𑀥𑀺𑀫𑀢𑁆𑀢𑀧𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀺 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.)] 𑀓𑀸𑀮𑀁 𑀓𑁄𑀥𑁄 𑀘𑀺𑀢𑁆𑀢𑀸𑀯𑀺𑀮𑀓𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀳𑀦𑀼𑀲𑀜𑁆𑀘𑁄𑀧𑀦𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀳𑀦𑀼𑀲𑀜𑁆𑀘𑁄𑀧𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑁄 [𑀨𑀭𑀼𑀲𑀯𑀸𑀘𑀦𑀺𑀘𑁆𑀙𑀸𑀭𑀡𑁄 (𑀲𑁆𑀬𑀸.)] 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑁄 ¶ 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀦𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 ¶ 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑁄 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑁄 [𑀚𑀻𑀯𑀺𑀢𑀧𑀦𑀸𑀲𑀦𑁄 (𑀲𑁆𑀬𑀸.)] 𑀳𑁄𑀢𑀺; 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀲𑀩𑁆𑀩𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀬 𑀲𑀡𑁆𑀞𑀺𑀢𑁄 𑀳𑁄𑀢𑀺. 𑀬𑀢𑁄 𑀓𑁄𑀥𑁄 𑀧𑀭𑀧𑀼𑀕𑁆𑀕𑀮𑀁 𑀖𑀸𑀝𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀖𑀸𑀝𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀓𑁄𑀥𑁄 𑀧𑀭𑀫𑀼𑀲𑁆𑀲𑀤𑀕𑀢𑁄 𑀧𑀭𑀫𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀬𑀲𑁆𑀲 𑀲𑁄 𑀓𑁄𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 ¶ 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑁆𑀓𑁄𑀥𑀦𑁄. 𑀓𑁄𑀥𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀓𑁆𑀓𑁄𑀥𑀦𑁄, 𑀓𑁄𑀥𑀯𑀢𑁆𑀣𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀅𑀓𑁆𑀓𑁄𑀥𑀦𑁄, 𑀓𑁄𑀥𑀳𑁂𑀢𑀼𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀓𑁆𑀓𑁄𑀥𑀦𑁄𑀢𑀺 𑁋 𑀅𑀓𑁆𑀓𑁄𑀥𑀦𑁄.

𑀅𑀲𑀦𑁆𑀢𑀸𑀲𑀻𑀢𑀺 𑀇𑀥𑁂𑀓𑀘𑁆𑀘𑁄 𑀢𑀸𑀲𑀻 𑀳𑁄𑀢𑀺 𑀉𑀢𑁆𑀢𑀸𑀲𑀻 𑀧𑀭𑀺𑀢𑁆𑀢𑀸𑀲𑀻, 𑀲𑁄 ¶ 𑀢𑀲𑀢𑀺 𑀦 𑀉𑀢𑁆𑀢𑀲𑀢𑀺 𑀧𑀭𑀺𑀢𑁆𑀢𑀲𑀢𑀺 𑀪𑀸𑀬𑀢𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺. 𑀓𑀼𑀮𑀁 𑀯𑀸 𑀦 𑀮𑀪𑀸𑀫𑀺, 𑀕𑀡𑀁 𑀯𑀸 𑀦 𑀮𑀪𑀸𑀫𑀺, 𑀆𑀯𑀸𑀲𑀁 𑀯𑀸 𑀦 𑀮𑀪𑀸𑀫𑀺, 𑀮𑀸𑀪𑀁 𑀯𑀸 𑀦 𑀮𑀪𑀸𑀫𑀺, 𑀬𑀲𑀁 𑀯𑀸 𑀦 𑀮𑀪𑀸𑀫𑀺, 𑀧𑀲𑀁𑀲𑀁 𑀯𑀸 𑀦 𑀮𑀪𑀸𑀫𑀺, 𑀲𑀼𑀔𑀁 𑀯𑀸 𑀦 𑀮𑀪𑀸𑀫𑀺, 𑀘𑀻𑀯𑀭𑀁 𑀯𑀸 𑀦 𑀮𑀪𑀸𑀫𑀺, 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀦 𑀮𑀪𑀸𑀫𑀺, 𑀲𑁂𑀦𑀸𑀲𑀦𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀁 𑀯𑀸 𑀦 𑀮𑀪𑀸𑀫𑀺, 𑀅𑀧𑁆𑀧𑀜𑁆𑀜𑀸𑀢𑁄𑀫𑁆𑀳𑀻𑀢𑀺 𑀢𑀲𑀢𑀺 𑀉𑀢𑁆𑀢𑀲𑀢𑀺 𑀧𑀭𑀺𑀢𑁆𑀢𑀲𑀢𑀺 𑀪𑀸𑀬𑀢𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺.

𑀇𑀥 ¶ 𑀪𑀺𑀓𑁆𑀔𑀼 𑀅𑀲𑀦𑁆𑀢𑀸𑀲𑀻 𑀳𑁄𑀢𑀺 𑀅𑀦𑀼𑀢𑁆𑀢𑀸𑀲𑀻 𑀅𑀧𑀭𑀺𑀢𑁆𑀢𑀸𑀲𑀻; 𑀲𑁄 𑀦 𑀢𑀲𑀢𑀺 𑀦 𑀉𑀢𑁆𑀢𑀲𑀢𑀺 𑀦 𑀧𑀭𑀺𑀢𑁆𑀢𑀲𑀢𑀺 𑀦 𑀪𑀸𑀬𑀢𑀺 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺. 𑀓𑀼𑀮𑀁 𑀯𑀸 𑀦 𑀮𑀪𑀸𑀫𑀺, 𑀕𑀡𑀁 𑀯𑀸 𑀦 𑀮𑀪𑀸𑀫𑀺, 𑀆𑀯𑀸𑀲𑀁 𑀯𑀸 𑀦 𑀮𑀪𑀸𑀫𑀺, 𑀮𑀸𑀪𑀁 𑀯𑀸 𑀦 𑀮𑀪𑀸𑀫𑀺, 𑀬𑀲𑀁 𑀯𑀸 𑀦 𑀮𑀪𑀸𑀫𑀺, 𑀧𑀲𑀁𑀲𑀁 𑀯𑀸 𑀦 𑀮𑀪𑀸𑀫𑀺, 𑀲𑀼𑀔𑀁 𑀯𑀸 𑀦 𑀮𑀪𑀸𑀫𑀺, 𑀘𑀻𑀯𑀭𑀁 𑀯𑀸 𑀦 𑀮𑀪𑀸𑀫𑀺, 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀦 𑀮𑀪𑀸𑀫𑀺, 𑀲𑁂𑀦𑀸𑀲𑀦𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀁 𑀯𑀸 𑀦 𑀮𑀪𑀸𑀫𑀺, 𑀅𑀧𑁆𑀧𑀜𑁆𑀜𑀸𑀢𑁄𑀫𑁆𑀳𑀻𑀢𑀺 𑀦 𑀢𑀲𑀢𑀺 𑀦 𑀉𑀢𑁆𑀢𑀲𑀢𑀺 𑀦 𑀧𑀭𑀺𑀢𑁆𑀢𑀲𑀢𑀺 𑀦 𑀪𑀸𑀬𑀢𑀺 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀅𑀓𑁆𑀓𑁄𑀥𑀦𑁄 𑀅𑀲𑀦𑁆𑀢𑀸𑀲𑀻.

𑀅𑀯𑀺𑀓𑀢𑁆𑀣𑀻 𑀅𑀓𑀼𑀓𑁆𑀓𑀼𑀘𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻, 𑀲𑁄 𑀓𑀢𑁆𑀣𑀢𑀺 𑀯𑀺𑀓𑀢𑁆𑀣𑀢𑀺 𑁋 𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀲𑀻𑀮𑀩𑁆𑀩𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 ¶ 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 ¶ 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀉𑀘𑁆𑀘𑀸 𑀓𑀼𑀮𑀸 ¶ 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸, 𑀜𑀸𑀢𑁄 𑀬𑀲𑀲𑁆𑀲𑀻 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀯𑀸, 𑀮𑀸𑀪𑀺𑀫𑁆𑀳𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀯𑀸, 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸 𑀯𑀺𑀦𑀬𑀥𑀭𑁄𑀢𑀺 𑀯𑀸 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸, 𑀆𑀭𑀜𑁆𑀜𑀺𑀓𑁄𑀢𑀺 𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀯𑀸 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀯𑀸 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀸, 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀯𑀸 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄𑀢𑀺 𑀯𑀸 𑀦𑁂𑀲𑀚𑁆𑀚𑀺𑀓𑁄𑀢𑀺 𑀯𑀸 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀯𑀸, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀓𑀢𑁆𑀣𑀢𑀺 𑀯𑀺𑀓𑀢𑁆𑀣𑀢𑀺. 𑀏𑀯𑀁 𑀦 𑀓𑀢𑁆𑀣𑀢𑀺 𑀦 𑀯𑀺𑀓𑀢𑁆𑀣𑀢𑀺, 𑀓𑀢𑁆𑀣𑀦𑀸 𑀯𑀺𑀓𑀢𑁆𑀣𑀦𑀸 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀅𑀯𑀺𑀓𑀢𑁆𑀣𑀻.

𑀅𑀓𑀼𑀓𑁆𑀓𑀼𑀘𑁄𑀢𑀺. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀯𑀺𑀓𑀸𑀮𑁂 𑀓𑀸𑀮𑀲𑀜𑁆𑀜𑀺𑀢𑀸 𑀓𑀸𑀮𑁂 𑀯𑀺𑀓𑀸𑀮𑀲𑀜𑁆𑀜𑀺𑀢𑀸, 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸; 𑀬𑀁 𑀏𑀯𑀭𑀽𑀧𑀁 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀢𑁆𑀢𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀼𑀓𑁆𑀓𑀼𑀘𑁆𑀘𑀁.

𑀅𑀧𑀺 ¶ ¶ 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄? ‘‘𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’’𑀦𑁆𑀢𑀺𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀯𑀘𑀻𑀲𑀼𑀘𑀭𑀺𑀢𑀁… 𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀫𑀦𑁄𑀲𑀼𑀘𑀭𑀺𑀢’’𑀦𑁆𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀓𑀢𑁄 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀓𑀢𑀸 𑀫𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 ¶ 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀓𑀢𑀁 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀁 ¶ , 𑀅𑀓𑀢𑀸 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻’’𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀓𑀢𑁄 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀅𑀓𑀢𑀸 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻’’𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀓𑀢𑁄 𑀫𑁂 𑀫𑀼𑀲𑀸𑀯𑀸𑀤𑁄, 𑀅𑀓𑀢𑀸 𑀫𑁂 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻’’𑀢𑀺… ‘‘𑀓𑀢𑀸 𑀫𑁂 𑀧𑀺𑀲𑀼𑀡𑀸 𑀯𑀸𑀘𑀸, 𑀅𑀓𑀢𑀸 𑀫𑁂 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻’’𑀢𑀺… ‘‘𑀓𑀢𑀸 𑀫𑁂 𑀨𑀭𑀼𑀲𑀸 𑀯𑀸𑀘𑀸, 𑀅𑀓𑀢𑀸 𑀫𑁂 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻’’𑀢𑀺… ‘‘𑀓𑀢𑁄 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀓𑀢𑀸 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻’’𑀢𑀺… ‘‘𑀓𑀢𑀸 𑀫𑁂 𑀅𑀪𑀺𑀚𑁆𑀛𑀸, 𑀅𑀓𑀢𑀸 𑀫𑁂 𑀅𑀦𑀪𑀺𑀚𑁆𑀛𑀸’’𑀢𑀺… ‘‘𑀓𑀢𑁄 𑀫𑁂 𑀩𑁆𑀬𑀸𑀧𑀸𑀤𑁄, 𑀅𑀓𑀢𑁄 𑀫𑁂 𑀅𑀩𑁆𑀬𑀸𑀧𑀸𑀤𑁄’’𑀢𑀺… ‘‘𑀓𑀢𑀸 𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 ¶ 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄.

𑀅𑀣 𑀯𑀸 ‘‘𑀲𑀻𑀮𑁂𑀲𑀼𑀫𑁆𑀳𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀇𑀦𑁆𑀤𑁆𑀭𑀺𑀬𑁂𑀲𑀼𑀫𑁆𑀳𑀺 𑀅𑀕𑀼𑀢𑁆𑀢𑀤𑁆𑀯𑀸𑀭𑁄’’𑀢𑀺… ‘‘𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀫𑁆𑀳𑀻’’𑀢𑀺… ‘‘𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁄𑀫𑁆𑀳𑀻’’𑀢𑀺… ‘‘𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘 𑀩𑀮𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺… ‘‘𑀅𑀪𑀸𑀯𑀺𑀢𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺… ‘‘𑀤𑀼𑀓𑁆𑀔𑀁 𑀫𑁂 𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺… ‘‘𑀲𑀫𑀼𑀤𑀬𑁄 𑀫𑁂 𑀅𑀧𑁆𑀧𑀳𑀻𑀦𑁄’’𑀢𑀺… ‘‘𑀫𑀕𑁆𑀕𑁄 𑀫𑁂 𑀅𑀪𑀸𑀯𑀺𑀢𑁄’’𑀢𑀺… ‘‘𑀦𑀺𑀭𑁄𑀥𑁄 𑀫𑁂 𑀅𑀲𑀘𑁆𑀙𑀺𑀓𑀢𑁄’’𑀢𑀺 𑁋 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. 𑀬𑀲𑁆𑀲𑁂𑀢𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀼𑀓𑁆𑀓𑀼𑀘𑁆𑀘𑁄𑀢𑀺 𑁋 𑀅𑀯𑀺𑀓𑀢𑁆𑀣𑀻 𑀅𑀓𑀼𑀓𑁆𑀓𑀼𑀘𑁄.

𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄𑀢𑀺. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀫𑀦𑁆𑀢𑀸𑀬 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀘𑀁 𑀪𑀸𑀲𑀢𑀺 𑀩𑀳𑀼𑀫𑁆𑀧𑀺 𑀓𑀣𑁂𑀦𑁆𑀢𑁄 𑀩𑀳𑀼𑀫𑁆𑀧𑀺 ¶ 𑀪𑀡𑀦𑁆𑀢𑁄 𑀩𑀳𑀼𑀫𑁆𑀧𑀺 𑀤𑀻𑀧𑀬𑀦𑁆𑀢𑁄 𑀩𑀳𑀼𑀫𑁆𑀧𑀺 𑀯𑁄𑀳𑀭𑀦𑁆𑀢𑁄. 𑀤𑀼𑀓𑁆𑀓𑀣𑀺𑀢𑀁 𑀤𑀼𑀩𑁆𑀪𑀡𑀺𑀢𑀁 ¶ 𑀤𑀼𑀮𑁆𑀮𑀧𑀺𑀢𑀁 𑀤𑀼𑀭𑀼𑀢𑁆𑀢𑀁 𑀤𑀼𑀩𑁆𑀪𑀸𑀲𑀺𑀢𑀁 𑀯𑀸𑀘𑀁 𑀦 𑀪𑀸𑀲𑀢𑀻𑀢𑀺 𑁋 𑀫𑀦𑁆𑀢𑀪𑀸𑀡𑀻. 𑀅𑀦𑀼𑀤𑁆𑀥𑀢𑁄𑀢𑀺. 𑀢𑀢𑁆𑀣 𑀓𑀢𑀫𑀁 ¶ 𑀉𑀤𑁆𑀥𑀘𑁆𑀘𑀁? 𑀬𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀘𑁆𑀘𑀁 ¶ 𑀅𑀯𑀽𑀧𑀲𑀫𑁄 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀪𑀦𑁆𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀉𑀤𑁆𑀥𑀘𑁆𑀘𑀁. 𑀬𑀲𑁆𑀲𑁂𑀢𑀁 𑀉𑀤𑁆𑀥𑀘𑁆𑀘𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀼𑀤𑁆𑀥𑀢𑁄𑀢𑀺 𑁋 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄.

𑀲 𑀯𑁂 𑀯𑀸𑀘𑀸𑀬𑀢𑁄 𑀫𑀼𑀦𑀻𑀢𑀺. 𑀇𑀥 𑀪𑀺𑀓𑁆𑀔𑀼 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲. 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀘𑀢𑀽𑀳𑀺 𑀯𑀘𑀻𑀲𑀼𑀘𑀭𑀺𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀤𑁆𑀤𑁄𑀲𑀸𑀧𑀕𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀩𑀸𑀢𑁆𑀢𑀺𑀁𑀲𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺.

𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀁 𑀓𑀣𑁂𑀢𑀺, 𑀲𑀦𑁆𑀢𑀼𑀝𑁆𑀞𑀻𑀓𑀣𑀁 ¶ 𑀓𑀣𑁂𑀢𑀺, 𑀧𑀯𑀺𑀯𑁂𑀓𑀓𑀣𑀁… 𑀅𑀲𑀁𑀲𑀕𑁆𑀕𑀓𑀣𑀁… 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀁… 𑀲𑀻𑀮𑀓𑀣𑀁… 𑀲𑀫𑀸𑀥𑀺𑀓𑀣𑀁… 𑀧𑀜𑁆𑀜𑀸𑀓𑀣𑀁… 𑀯𑀺𑀫𑀼𑀢𑁆𑀢𑀺𑀓𑀣𑀁 ¶ … 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀁… 𑀲𑀢𑀺𑀧𑀝𑁆𑀞𑀸𑀦𑀓𑀣𑀁… 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀁… 𑀇𑀤𑁆𑀥𑀺𑀧𑀸𑀤𑀓𑀣𑀁… 𑀇𑀦𑁆𑀤𑁆𑀭𑀺𑀬𑀓𑀣𑀁… 𑀩𑀮𑀓𑀣𑀁… 𑀩𑁄𑀚𑁆𑀛𑀗𑁆𑀕𑀓𑀣𑀁… 𑀫𑀕𑁆𑀕𑀓𑀣𑀁… 𑀨𑀮𑀓𑀣𑀁… 𑀦𑀺𑀩𑁆𑀩𑀸𑀦𑀓𑀣𑀁 𑀓𑀣𑁂𑀢𑀺. 𑀯𑀸𑀘𑀸𑀬𑀢𑁄𑀢𑀺 𑀬𑀢𑁆𑀢𑁄 𑀧𑀭𑀺𑀬𑀢𑁆𑀢𑁄 𑀕𑀼𑀢𑁆𑀢𑁄 𑀕𑁄𑀧𑀺𑀢𑁄 𑀭𑀓𑁆𑀔𑀺𑀢𑁄 𑀯𑀽𑀧𑀲𑀦𑁆𑀢𑁄. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺 𑁋 𑀲 𑀯𑁂 𑀯𑀸𑀘𑀸𑀬𑀢𑁄 𑀫𑀼𑀦𑀺.

‘‘𑀅𑀓𑁆𑀓𑁄𑀥𑀦𑁄 𑀅𑀲𑀦𑁆𑀢𑀸𑀲𑀻, 𑀅𑀯𑀺𑀓𑀢𑁆𑀣𑀻 𑀅𑀓𑀼𑀓𑁆𑀓𑀼𑀘𑁄;

𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄, 𑀲 𑀯𑁂 𑀯𑀸𑀘𑀸𑀬𑀢𑁄 𑀫𑀼𑀦𑀻’’𑀢𑀺.

𑀦𑀺𑀭𑀸𑀲𑀢𑁆𑀢𑀺 ¶ ¶ 𑀅𑀦𑀸𑀕𑀢𑁂, 𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀢𑀺;

𑀯𑀺𑀯𑁂𑀓𑀤𑀲𑁆𑀲𑀻 𑀨𑀲𑁆𑀲𑁂𑀲𑀼, 𑀤𑀺𑀝𑁆𑀞𑀻𑀲𑀼 𑀘 𑀦 𑀦𑀻𑀬𑀢𑀺.

𑀦𑀺𑀭𑀸𑀲𑀢𑁆𑀢𑀺 𑀅𑀦𑀸𑀕𑀢𑁂𑀢𑀺. 𑀆𑀲𑀢𑁆𑀢𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀆𑀲𑀢𑁆𑀢𑀺 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺. 𑀏𑀯𑀫𑁆𑀧𑀺 𑀦𑀺𑀭𑀸𑀲𑀢𑁆𑀢𑀺 𑀅𑀦𑀸𑀕𑀢𑁂. 𑀅𑀣 𑀯𑀸 ‘‘𑀏𑀯𑀁𑀭𑀽𑀧𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺, ‘‘𑀏𑀯𑀁𑀯𑁂𑀤𑀦𑁄 𑀲𑀺𑀬𑀁… 𑀏𑀯𑀁𑀲𑀜𑁆𑀜𑁄 𑀲𑀺𑀬𑀁… 𑀏𑀯𑀁𑀲𑀗𑁆𑀔𑀸𑀭𑁄 𑀲𑀺𑀬𑀁… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀲𑀺𑀬𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀢𑀢𑁆𑀣 𑀦𑀦𑁆𑀤𑀺𑀁 𑀦 𑀲𑀫𑀦𑁆𑀦𑀸𑀦𑁂𑀢𑀺. 𑀏𑀯𑀫𑁆𑀧𑀺 𑀦𑀺𑀭𑀸𑀲𑀢𑁆𑀢𑀺 𑀅𑀦𑀸𑀕𑀢𑁂. 𑀅𑀣 𑀯𑀸 ‘‘𑀇𑀢𑀺 𑀫𑁂 𑀘𑀓𑁆𑀔𑀼 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀭𑀽𑀧𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦 𑀧𑀡𑀺𑀤𑀳𑀢𑀺 ¶ , 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑁆𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀦𑀺𑀭𑀸𑀲𑀢𑁆𑀢𑀺 𑀅𑀦𑀸𑀕𑀢𑁂. ‘‘𑀇𑀢𑀺 𑀫𑁂 𑀲𑁄𑀢𑀁 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀲𑀤𑁆𑀤𑀸’’𑀢𑀺…𑀧𑁂… ‘‘𑀇𑀢𑀺 𑀫𑁂 𑀫𑀦𑁄 𑀲𑀺𑀬𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑁋 𑀇𑀢𑀺 𑀥𑀫𑁆𑀫𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑁆𑀧𑀘𑁆𑀘𑀬𑀸 ¶ 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀦𑀺𑀭𑀸𑀲𑀢𑁆𑀢𑀺 𑀅𑀦𑀸𑀕𑀢𑁂. 𑀅𑀣 𑀯𑀸 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀧𑀝𑀺𑀮𑀸𑀪𑀸𑀬 𑀘𑀺𑀢𑁆𑀢𑀁 𑀦 𑀧𑀡𑀺𑀤𑀳𑀢𑀺, 𑀘𑁂𑀢𑀲𑁄 𑀅𑀧𑁆𑀧𑀡𑀺𑀥𑀸𑀦𑀧𑁆𑀧𑀘𑁆𑀘𑀬𑀸 𑀦 𑀢𑀤𑀪𑀺𑀦𑀦𑁆𑀤𑀢𑀺; 𑀦 𑀢𑀤𑀪𑀺𑀦𑀦𑁆𑀤𑀦𑁆𑀢𑁄. 𑀏𑀯𑀫𑁆𑀧𑀺 𑀦𑀺𑀭𑀸𑀲𑀢𑁆𑀢𑀺 𑀅𑀦𑀸𑀕𑀢𑁂.

𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀢𑀻𑀢𑀺. 𑀯𑀺𑀧𑀭𑀺𑀡𑀢𑀁 𑀯𑀸 𑀯𑀢𑁆𑀣𑀼𑀁 𑀦 𑀲𑁄𑀘𑀢𑀺, 𑀯𑀺𑀧𑀭𑀺𑀡𑀢𑀲𑁆𑀫𑀺𑀁 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑁄𑀘𑀢𑀺, ‘‘𑀘𑀓𑁆𑀔𑀼 𑀫𑁂 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀦 𑀲𑁄𑀘𑀢𑀺, ‘‘𑀲𑁄𑀢𑀁 𑀫𑁂… 𑀖𑀸𑀦𑀁 𑀫𑁂… 𑀚𑀺𑀯𑁆𑀳𑀸 𑀫𑁂… 𑀓𑀸𑀬𑁄 𑀫𑁂… 𑀭𑀽𑀧𑀸 𑀫𑁂… 𑀲𑀤𑁆𑀤𑀸 𑀫𑁂… 𑀕𑀦𑁆𑀥𑀸 𑀫𑁂… 𑀭𑀲𑀸 𑀫𑁂… 𑀨𑁄𑀝𑁆𑀞𑀩𑁆𑀩𑀸 𑀫𑁂… 𑀓𑀼𑀮𑀁 𑀫𑁂… 𑀕𑀡𑁄 𑀫𑁂… 𑀆𑀯𑀸𑀲𑁄 𑀫𑁂… 𑀮𑀸𑀪𑁄 𑀫𑁂… 𑀬𑀲𑁄 𑀫𑁂… 𑀧𑀲𑀁𑀲𑀸 𑀫𑁂… 𑀲𑀼𑀔𑀁 𑀫𑁂… 𑀘𑀻𑀯𑀭𑀁 𑀫𑁂… 𑀧𑀺𑀡𑁆𑀟𑀧𑀸𑀢𑁄 𑀫𑁂… 𑀲𑁂𑀦𑀸𑀲𑀦𑀁 𑀫𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄 𑀫𑁂… 𑀫𑀸𑀢𑀸 𑀫𑁂… 𑀧𑀺𑀢𑀸 𑀫𑁂… 𑀪𑀸𑀢𑀸 𑀫𑁂… 𑀪𑀕𑀺𑀦𑀻 𑀫𑁂… 𑀧𑀼𑀢𑁆𑀢𑁄 𑀫𑁂… 𑀥𑀻𑀢𑀸 𑀫𑁂… 𑀫𑀺𑀢𑁆𑀢𑀸 𑀫𑁂… 𑀅𑀫𑀘𑁆𑀘𑀸 𑀫𑁂… 𑀜𑀸𑀢𑀓𑀸 𑀫𑁂… 𑀲𑀸𑀮𑁄𑀳𑀺𑀢𑀸 𑀫𑁂 𑀯𑀺𑀧𑀭𑀺𑀡𑀢𑀸’’𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀢𑀺.

𑀯𑀺𑀯𑁂𑀓𑀤𑀲𑁆𑀲𑀻 ¶ ¶ 𑀨𑀲𑁆𑀲𑁂𑀲𑀽𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑁄𑀢𑀲𑀫𑁆𑀨𑀲𑁆𑀲𑁄 𑀖𑀸𑀦𑀲𑀫𑁆𑀨𑀲𑁆𑀲𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀧𑀝𑀺𑀖𑀲𑀫𑁆𑀨𑀲𑁆𑀲𑁄, 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀓𑀼𑀲𑀮𑁄 𑀨𑀲𑁆𑀲𑁄 𑀅𑀓𑀼𑀲𑀮𑁄 𑀨𑀲𑁆𑀲𑁄 𑀅𑀩𑁆𑀬𑀸𑀓𑀢𑁄 ¶ 𑀨𑀲𑁆𑀲𑁄, 𑀓𑀸𑀫𑀸𑀯𑀘𑀭𑁄 𑀨𑀲𑁆𑀲𑁄 𑀭𑀽𑀧𑀸𑀯𑀘𑀭𑁄 𑀨𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑁄 𑀨𑀲𑁆𑀲𑁄, 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄 𑀅𑀧𑁆𑀧𑀡𑀺𑀳𑀺𑀢𑁄 𑀨𑀲𑁆𑀲𑁄, 𑀮𑁄𑀓𑀺𑀬𑁄 𑀨𑀲𑁆𑀲𑁄 𑀮𑁄𑀓𑀼𑀢𑁆𑀢𑀭𑁄 𑀨𑀲𑁆𑀲𑁄, 𑀅𑀢𑀻𑀢𑁄 𑀨𑀲𑁆𑀲𑁄 𑀅𑀦𑀸𑀕𑀢𑁄 𑀨𑀲𑁆𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀨𑀲𑁆𑀲𑁄; 𑀬𑁄 𑀏𑀯𑀭𑀽𑀧𑁄 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀫𑁆𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀨𑀲𑁆𑀲𑁄.

𑀯𑀺𑀯𑁂𑀓𑀤𑀲𑁆𑀲𑀻 𑀨𑀲𑁆𑀲𑁂𑀲𑀽𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸, 𑀲𑁄𑀢𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 ¶ 𑀧𑀲𑁆𑀲𑀢𑀺… 𑀖𑀸𑀦𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺… 𑀓𑀸𑀬𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺… 𑀫𑀦𑁄𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺… 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺… 𑀧𑀝𑀺𑀖𑀲𑀫𑁆𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺… 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁… 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁… 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁… 𑀓𑀼𑀲𑀮𑀁 𑀨𑀲𑁆𑀲𑀁… 𑀅𑀓𑀼𑀲𑀮𑀁 𑀨𑀲𑁆𑀲𑀁… 𑀅𑀩𑁆𑀬𑀸𑀓𑀢𑀁 𑀨𑀲𑁆𑀲𑀁… 𑀓𑀸𑀫𑀸𑀯𑀘𑀭𑀁 𑀨𑀲𑁆𑀲𑀁… 𑀭𑀽𑀧𑀸𑀯𑀘𑀭𑀁 𑀨𑀲𑁆𑀲𑀁… 𑀅𑀭𑀽𑀧𑀸𑀯𑀘𑀭𑀁 𑀨𑀲𑁆𑀲𑀁… 𑀮𑁄𑀓𑀺𑀬𑀁 𑀨𑀲𑁆𑀲𑀁 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸.

𑀅𑀣 𑀯𑀸 𑀅𑀢𑀻𑀢𑀁 𑀨𑀲𑁆𑀲𑀁 𑀅𑀦𑀸𑀕𑀢𑁂𑀳𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀳𑀺 𑀘 𑀨𑀲𑁆𑀲𑁂𑀳𑀺 ¶ 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺, 𑀅𑀦𑀸𑀕𑀢𑀁 𑀨𑀲𑁆𑀲𑀁 𑀅𑀢𑀻𑀢𑁂𑀳𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀳𑀺 𑀘 𑀨𑀲𑁆𑀲𑁂𑀳𑀺 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀨𑀲𑁆𑀲𑀁 𑀅𑀢𑀻𑀢𑁂𑀳𑀺 𑀘 𑀅𑀦𑀸𑀕𑀢𑁂𑀳𑀺 𑀘 𑀨𑀲𑁆𑀲𑁂𑀳𑀺 𑀯𑀺𑀯𑀺𑀢𑁆𑀢𑀁 𑀧𑀲𑁆𑀲𑀢𑀺. 𑀅𑀣 𑀯𑀸 𑀬𑁂 𑀢𑁂 𑀨𑀲𑁆𑀲𑀸 𑀅𑀭𑀺𑀬𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸 𑀲𑀼𑀜𑁆𑀜𑀢𑀧𑀝𑀺𑀲𑀜𑁆𑀜𑀼𑀢𑁆𑀢𑀸, 𑀢𑁂 𑀨𑀲𑁆𑀲𑁂 𑀯𑀺𑀯𑀺𑀢𑁆𑀢𑁂 𑀧𑀲𑁆𑀲𑀢𑀺 𑀭𑀸𑀕𑁂𑀦 𑀤𑁄𑀲𑁂𑀦 𑀫𑁄𑀳𑁂𑀦 𑀓𑁄𑀥𑁂𑀦 𑀉𑀧𑀦𑀸𑀳𑁂𑀦 𑀫𑀓𑁆𑀔𑁂𑀦 𑀧𑀴𑀸𑀲𑁂𑀦 𑀇𑀲𑁆𑀲𑀸𑀬 𑀫𑀘𑁆𑀙𑀭𑀺𑀬𑁂𑀦 𑀫𑀸𑀬𑀸𑀬 𑀲𑀸𑀞𑁂𑀬𑁆𑀬𑁂𑀦 𑀣𑀫𑁆𑀪𑁂𑀦 𑀲𑀸𑀭𑀫𑁆𑀪𑁂𑀦 𑀫𑀸𑀦𑁂𑀦 𑀅𑀢𑀺𑀫𑀸𑀦𑁂𑀦 𑀫𑀤𑁂𑀦 𑀧𑀫𑀸𑀤𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺 𑀲𑀩𑁆𑀩𑀤𑀭𑀣𑁂𑀳𑀺 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀯𑀺𑀯𑀺𑀢𑁆𑀢𑁂 𑀧𑀲𑁆𑀲𑀢𑀻𑀢𑀺 𑁋 𑀯𑀺𑀯𑁂𑀓𑀤𑀲𑁆𑀲𑀻 𑀨𑀲𑁆𑀲𑁂𑀲𑀼.

𑀤𑀺𑀝𑁆𑀞𑀻𑀲𑀼 𑀘 𑀦 𑀦𑀻𑀬𑀢𑀻𑀢𑀺. 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀤𑀺𑀝𑁆𑀞𑀺𑀬𑀸 𑀦 ¶ 𑀬𑀸𑀬𑀢𑀺 𑀦 𑀦𑀻𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀺; 𑀦𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀤𑀺𑀝𑁆𑀞𑀻𑀲𑀼 𑀘 𑀦 𑀦𑀻𑀬𑀢𑀺.

‘‘𑀦𑀺𑀭𑀸𑀲𑀢𑁆𑀢𑀺 ¶ 𑀅𑀦𑀸𑀕𑀢𑁂, 𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀢𑀺;

𑀯𑀺𑀯𑁂𑀓𑀤𑀲𑁆𑀲𑀻 𑀨𑀲𑁆𑀲𑁂𑀲𑀼, 𑀤𑀺𑀝𑁆𑀞𑀻𑀲𑀼 𑀘 𑀦 𑀦𑀻𑀬𑀢𑀻’’𑀢𑀺.

𑀧𑀢𑀺𑀮𑀻𑀦𑁄 𑀅𑀓𑀼𑀳𑀓𑁄, 𑀅𑀧𑀺𑀳𑀸𑀮𑀼 𑀅𑀫𑀘𑁆𑀙𑀭𑀻;

𑀅𑀧𑁆𑀧𑀕𑀩𑁆𑀪𑁄 𑀅𑀚𑁂𑀕𑀼𑀘𑁆𑀙𑁄, 𑀧𑁂𑀲𑀼𑀡𑁂𑀬𑁆𑀬𑁂 𑀘 𑀦𑁄 𑀬𑀼𑀢𑁄.

𑀧𑀢𑀺𑀮𑀻𑀦𑁄 𑀅𑀓𑀼𑀳𑀓𑁄𑀢𑀺. 𑀧𑀢𑀺𑀮𑀻𑀦𑁄𑀢𑀺 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀢𑀺𑀮𑀻𑀦𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀢𑀺𑀮𑀻𑀦𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀢𑀺𑀮𑀻𑀦𑁄, 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲 ¶ … 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀧𑀢𑀺𑀮𑀻𑀦𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀢𑀺𑀮𑀻𑀦𑁄 𑀳𑁄𑀢𑀺? 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀢𑀺𑀮𑀻𑀦𑁄 𑀳𑁄𑀢𑀻’’𑀢𑀺 𑁋 𑀧𑀢𑀺𑀮𑀻𑀦𑁄.

𑀅𑀓𑀼𑀳𑀓𑁄𑀢𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑁋 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥 𑀕𑀳𑀧𑀢𑀺𑀓𑀸 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀢𑁆𑀣𑀺𑀓𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁂𑀦𑀸𑀲𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀘𑀻𑀯𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀲𑀼𑀲𑀸𑀦𑀸 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀧𑀺𑀡𑁆𑀟𑀧𑀸𑀢𑁂𑀦 ¶ ! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀲𑁂𑀦𑀸𑀲𑀦𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀅𑀲𑁆𑀲 𑀲𑁄𑀲𑀸𑀦𑀺𑀓𑁄 𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑁄 ¶ 𑀯𑀸. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀧𑀽𑀢𑀺𑀫𑀼𑀢𑁆𑀢𑁂𑀦 𑀯𑀸 𑀳𑀭𑀺𑀢𑀓𑀻𑀔𑀡𑁆𑀟𑁂𑀦 𑀯𑀸 𑀑𑀲𑀥𑀁 𑀓𑀭𑁂𑀬𑁆𑀬𑀸’’𑀢𑀺. 𑀢𑀤𑀼𑀧𑀸𑀤𑀸𑀬 𑀮𑀽𑀔𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀮𑀽𑀔𑀁 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺 ¶ , 𑀮𑀽𑀔𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺. 𑀢𑀫𑁂𑀦𑀁 𑀕𑀳𑀧𑀢𑀺𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 ¶ 𑀥𑀼𑀢𑀯𑀸𑀤𑁄’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀏𑀯𑀫𑀸𑀳 𑁋 ‘‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. ‘𑀢𑀼𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀲𑀤𑁆𑀥𑀸 𑀅𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀲𑀁𑀯𑀺𑀚𑁆𑀚𑀢𑀺, 𑀅𑀳𑀜𑁆𑀘 𑀧𑀝𑀺𑀕𑁆𑀕𑀸𑀳𑀓𑁄. 𑀲𑀘𑁂𑀳𑀁 𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄. 𑀅𑀧𑀺 𑀘 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’’𑀢𑀺. 𑀢𑀤𑀼𑀧𑀸𑀤𑀸𑀬 𑀩𑀳𑀼𑀫𑁆𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 ¶ 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄, ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺, 𑀕𑀫𑀦𑀁 𑀲𑀡𑁆𑀞𑀧𑁂𑀢𑀺 𑀞𑀸𑀦𑀁 𑀲𑀡𑁆𑀞𑀧𑁂𑀢𑀺 ¶ 𑀦𑀺𑀲𑀚𑁆𑀚𑀁 𑀲𑀡𑁆𑀞𑀧𑁂𑀢𑀺 𑀲𑀬𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀡𑀺𑀥𑀸𑀬 𑀕𑀘𑁆𑀙𑀢𑀺 𑀧𑀡𑀺𑀥𑀸𑀬 𑀢𑀺𑀝𑁆𑀞𑀢𑀺 𑀧𑀡𑀺𑀥𑀸𑀬 𑀦𑀺𑀲𑀻𑀤𑀢𑀺 𑀧𑀡𑀺𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀦𑀺𑀲𑀻𑀤𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀸𑀣𑀓𑀚𑁆𑀛𑀸𑀬𑀻𑀯 𑀳𑁄𑀢𑀺. 𑀬𑀸 𑀏𑀯𑀭𑀽𑀧𑀸 𑀇𑀭𑀺𑀬𑀸𑀧𑀣𑀲𑁆𑀲 𑀞𑀧𑀦𑀸 𑀆𑀞𑀧𑀦𑀸 [𑀅𑀝𑁆𑀞𑀧𑀦𑀸 (𑀲𑀻.)] 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄, ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺, 𑀅𑀭𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺. ‘‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀥𑀸𑀭𑁂𑀢𑀺… 𑀮𑁄𑀳𑀣𑀸𑀮𑀓𑀁 𑀥𑀸𑀭𑁂𑀢𑀺… 𑀥𑀫𑁆𑀫𑀓𑀭𑀡𑀁 𑀥𑀸𑀭𑁂𑀢𑀺… 𑀧𑀭𑀺𑀲𑀸𑀯𑀦𑀁 𑀥𑀸𑀭𑁂𑀢𑀺… 𑀓𑀼𑀜𑁆𑀘𑀺𑀓𑀁 𑀥𑀸𑀭𑁂𑀢𑀺… 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺… 𑀓𑀸𑀬𑀩𑀦𑁆𑀥𑀦𑀁 𑀥𑀸𑀭𑁂𑀢𑀺… 𑀆𑀬𑁄𑀕𑀁 𑀥𑀸𑀭𑁂𑀢𑀺 𑀲𑁄 𑀲𑀫𑀡𑁄 ¶ 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑁄 𑀉𑀧𑀚𑁆𑀛𑀸𑀬𑁄 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑁄 𑀆𑀘𑀭𑀺𑀬𑁄… 𑀏𑀯𑀭𑀽𑀧𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸… 𑀲𑀫𑀸𑀦𑀸𑀘𑀭𑀺𑀬𑀓𑀸… 𑀫𑀺𑀢𑁆𑀢𑀸… 𑀲𑀦𑁆𑀤𑀺𑀝𑁆𑀞𑀸… 𑀲𑀫𑁆𑀪𑀢𑁆𑀢𑀸… 𑀲𑀳𑀸𑀬𑀸 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑁂 ¶ 𑀅𑀟𑁆𑀠𑀬𑁄𑀕𑁂 𑀯𑀲𑀢𑀺… 𑀧𑀸𑀲𑀸𑀤𑁂 𑀯𑀲𑀢𑀺… 𑀳𑀫𑁆𑀫𑀺𑀬𑁂 𑀯𑀲𑀢𑀺… 𑀕𑀼𑀳𑀸𑀬𑀁 𑀯𑀲𑀢𑀺… 𑀮𑁂𑀡𑁂 𑀯𑀲𑀢𑀺… 𑀓𑀼𑀝𑀺𑀬𑀸 𑀯𑀲𑀢𑀺… 𑀓𑀽𑀝𑀸𑀕𑀸𑀭𑁂 𑀯𑀲𑀢𑀺… 𑀅𑀝𑁆𑀝𑁂 𑀯𑀲𑀢𑀺 ¶ … 𑀫𑀸𑀴𑁂 𑀯𑀲𑀢𑀺… 𑀉𑀤𑁆𑀤𑀡𑁆𑀟𑁂 𑀯𑀲𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀯𑀲𑀢𑀺… 𑀫𑀡𑁆𑀟𑀧𑁂 𑀯𑀲𑀢𑀺… 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺.

𑀅𑀣 𑀯𑀸 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄 [𑀓𑁄𑀭𑀜𑁆𑀚𑀺𑀓𑀓𑁄𑀭𑀜𑁆𑀚𑀺𑀓𑁄 (𑀲𑀻.)] 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀓𑀼𑀳𑀓𑀓𑀼𑀳𑀓𑁄 𑀮𑀧𑀓𑀮𑀧𑀓𑁄 𑀫𑀼𑀔𑀲𑀫𑁆𑀪𑀸𑀯𑀺𑀓𑁄, ‘‘𑀅𑀬𑀁 𑀲𑀫𑀡𑁄 𑀇𑀫𑀸𑀲𑀁 𑀏𑀯𑀭𑀽𑀧𑀸𑀦𑀁 𑀲𑀦𑁆𑀢𑀸𑀦𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’’𑀢𑀺 𑀢𑀸𑀤𑀺𑀲𑀁 𑀕𑀫𑁆𑀪𑀻𑀭𑀁 𑀕𑀽𑀴𑁆𑀳𑀁 𑀦𑀺𑀧𑀼𑀡𑀁 𑀧𑀝𑀺𑀘𑁆𑀙𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 ¶ 𑀓𑀣𑀁 𑀓𑀣𑁂𑀲𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼. 𑀬𑀲𑁆𑀲𑀺𑀫𑀸𑀦𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀼𑀳𑀓𑁄𑀢𑀺 𑁋 𑀧𑀢𑀺𑀮𑀻𑀦𑁄 𑀅𑀓𑀼𑀳𑀓𑁄.

𑀅𑀧𑀺𑀳𑀸𑀮𑀼 𑀅𑀫𑀘𑁆𑀙𑀭𑀻𑀢𑀺. 𑀧𑀺𑀳𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀧𑀺𑀳𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀧𑀺𑀳𑀸𑀮𑀼. 𑀲𑁄 𑀭𑀽𑀧𑁂 𑀦 𑀧𑀺𑀳𑁂𑀢𑀺, 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁 ¶ … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀦 𑀧𑀺𑀳𑁂𑀢𑀺 𑀦 𑀇𑀘𑁆𑀙𑀢𑀺 𑀦 𑀲𑀸𑀤𑀺𑀬𑀢𑀺 𑀦 𑀧𑀢𑁆𑀣𑁂𑀢𑀺 𑀦𑀸𑀪𑀺𑀚𑀧𑁆𑀧𑀢𑀻𑀢𑀺 𑁋 𑀅𑀧𑀺𑀳𑀸𑀮𑀼. 𑀅𑀫𑀘𑁆𑀙𑀭𑀻𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 ¶ 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀬𑀲𑁆𑀲𑁂𑀢𑀁 𑀫𑀘𑁆𑀙𑀭𑀺𑀬𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀅𑀫𑀘𑁆𑀙𑀭𑀻𑀢𑀺 𑁋 𑀅𑀧𑀺𑀳𑀸𑀮𑀼 𑀅𑀫𑀘𑁆𑀙𑀭𑀻.

𑀅𑀧𑁆𑀧𑀕𑀩𑁆𑀪𑁄 ¶ 𑀅𑀚𑁂𑀕𑀼𑀘𑁆𑀙𑁄𑀢𑀺. 𑀧𑀸𑀕𑀩𑁆𑀪𑀺𑀬𑀦𑁆𑀢𑀺 𑀢𑀻𑀡𑀺 𑀧𑀸𑀕𑀩𑁆𑀪𑀺𑀬𑀸𑀦𑀺 𑁋 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁, 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁, 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁. 𑀓𑀢𑀫𑀁 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀕𑀡𑀕𑀢𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀪𑁄𑀚𑀦𑀲𑀸𑀮𑀸𑀬𑀫𑁆𑀧𑀺 ¶ 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀚𑀦𑁆𑀢𑀸𑀖𑀭𑁂𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀉𑀤𑀓𑀢𑀺𑀢𑁆𑀣𑁂𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀲𑀗𑁆𑀖𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 ¶ [𑀅𑀘𑀺𑀢𑁆𑀢𑀺𑀓𑀸𑀭𑀓𑀢𑁄 (𑀲𑁆𑀬𑀸. 𑀓.)] 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸𑀧𑀺 𑀦𑀺𑀲𑀻𑀤𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀲𑀗𑁆𑀖𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀕𑀡𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀕𑀡𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀳𑀦𑀸𑀦𑀁 𑀘𑀗𑁆𑀓𑀫𑀦𑁆𑀢𑀸𑀦𑀁 𑀲𑀉𑀧𑀸𑀳𑀦𑁄 𑀘𑀗𑁆𑀓𑀫𑀢𑀺, 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀸𑀦𑀁 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀙𑀫𑀸𑀬 𑀘𑀗𑁆𑀓𑀫𑀦𑁆𑀢𑀸𑀦𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀕𑀡𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀪𑁄𑀚𑀦𑀲𑀸𑀮𑀸𑀬𑀁 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀪𑁄𑀚𑀦𑀲𑀸𑀮𑀸𑀬𑀁 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀢𑀺, 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸𑀧𑀺 𑀦𑀺𑀲𑀻𑀤𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 ¶ 𑀪𑀡𑀢𑀺. 𑀏𑀯𑀁 𑀪𑁄𑀚𑀦𑀲𑀸𑀮𑀸𑀬𑀁 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 ¶ 𑀚𑀦𑁆𑀢𑀸𑀖𑀭𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀚𑀦𑁆𑀢𑀸𑀖𑀭𑁂 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺 ¶ , 𑀅𑀦𑀸𑀧𑀼𑀘𑁆𑀙𑀫𑁆𑀧𑀺 𑀅𑀦𑀚𑁆𑀛𑀺𑀝𑁆𑀞𑁄𑀧𑀺 𑀓𑀝𑁆𑀞𑀁 𑀧𑀓𑁆𑀔𑀺𑀧𑀢𑀺, 𑀤𑁆𑀯𑀸𑀭𑀫𑁆𑀧𑀺 𑀧𑀺𑀤𑀳𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀚𑀦𑁆𑀢𑀸𑀖𑀭𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀉𑀤𑀓𑀢𑀺𑀢𑁆𑀣𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀉𑀤𑀓𑀢𑀺𑀢𑁆𑀣𑁂 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀑𑀢𑀭𑀢𑀺, 𑀧𑀼𑀭𑀢𑁄𑀧𑀺 𑀑𑀢𑀭𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑁆𑀳𑀸𑀬𑀢𑀺 [𑀦𑀳𑀸𑀬𑀢𑀺 (𑀲𑀻.)], 𑀧𑀼𑀭𑀢𑁄𑀧𑀺 𑀦𑁆𑀳𑀸𑀬𑀢𑀺 ¶ , 𑀉𑀧𑀭𑀺𑀢𑁄𑀧𑀺 𑀦𑁆𑀳𑀸𑀬𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀉𑀢𑁆𑀢𑀭𑀢𑀺, 𑀧𑀼𑀭𑀢𑁄𑀧𑀺 𑀉𑀢𑁆𑀢𑀭𑀢𑀺, 𑀉𑀧𑀭𑀺𑀢𑁄𑀧𑀺 𑀉𑀢𑁆𑀢𑀭𑀢𑀺. 𑀏𑀯𑀁 𑀉𑀤𑀓𑀢𑀺𑀢𑁆𑀣𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀕𑀘𑁆𑀙𑀢𑀺, 𑀧𑀼𑀭𑀢𑁄𑀧𑀺 𑀕𑀘𑁆𑀙𑀢𑀺, 𑀯𑁄𑀓𑁆𑀓𑀫𑁆𑀫𑀸𑀧𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺. 𑀏𑀯𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄, ‘‘𑀦 𑀧𑀯𑀺𑀲 [𑀧𑀯𑀺𑀲𑀣 (𑀲𑀻.) 𑀏𑀯𑀫𑀜𑁆𑀜𑁂𑀲𑀼 𑀧𑀤𑀤𑁆𑀯𑀬𑁂𑀲𑀼𑀧𑀺], 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀧𑀯𑀺𑀲𑀢𑀺, ‘‘𑀦 𑀢𑀺𑀝𑁆𑀞, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀢𑀺𑀝𑁆𑀞𑀢𑀺, ‘‘𑀦 𑀦𑀺𑀲𑀻𑀤, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦𑀺𑀲𑀻𑀤𑀢𑀺, 𑀅𑀦𑁄𑀓𑀸𑀲𑀫𑁆𑀧𑀺 𑀧𑀯𑀺𑀲𑀢𑀺, 𑀅𑀦𑁄𑀓𑀸𑀲𑁂𑀧𑀺 𑀢𑀺𑀝𑁆𑀞𑀢𑀺, 𑀅𑀦𑁄𑀓𑀸𑀲𑁂𑀧𑀺 𑀦𑀺𑀲𑀻𑀤𑀢𑀺, 𑀬𑀸𑀦𑀺𑀧𑀺 𑀢𑀸𑀦𑀺 𑀳𑁄𑀦𑁆𑀢𑀺 𑀓𑀼𑀮𑀸𑀦𑀁 𑀑𑀯𑀭𑀓𑀸𑀦𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀬𑀢𑁆𑀣 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀥𑀻𑀢𑀭𑁄 𑀓𑀼𑀮𑀲𑀼𑀡𑁆𑀳𑀸𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀦𑀺𑀲𑀻𑀤𑀦𑁆𑀢𑀺, 𑀢𑀢𑁆𑀣𑀧𑀺 𑀲𑀳𑀲𑀸 𑀧𑀯𑀺𑀲𑀢𑀺 𑀓𑀼𑀫𑀸𑀭𑀓𑀲𑁆𑀲𑀧𑀺 𑀲𑀺𑀭𑀁 𑀧𑀭𑀸𑀫𑀲𑀢𑀺. 𑀏𑀯𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺 𑁋 𑀇𑀤𑀁 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀢𑀫𑀁 ¶ 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄𑀧𑀺 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 ¶ 𑀤𑀲𑁆𑀲𑁂𑀢𑀺, 𑀕𑀡𑀕𑀢𑁄𑀧𑀺 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀧𑀺 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 ¶ 𑀲𑀗𑁆𑀖𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀅𑀦𑀚𑁆𑀛𑀺𑀝𑁆𑀞𑁄 𑀯𑀸 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀪𑀡𑀢𑀺, 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀲𑀗𑁆𑀖𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀕𑀡𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀕𑀡𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀅𑀦𑀚𑁆𑀛𑀺𑀝𑁆𑀞𑁄 𑀯𑀸 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀪𑀡𑀢𑀺, 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀪𑀡𑀢𑀺, 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀕𑀡𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 ¶ 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀏𑀯𑀫𑀸𑀳 𑁋 ‘‘𑀇𑀢𑁆𑀣𑀁𑀦𑀸𑀫𑁂 𑀇𑀢𑁆𑀣𑀁𑀕𑁄𑀢𑁆𑀢𑁂 𑀓𑀺𑀁 𑀅𑀢𑁆𑀣𑀺? 𑀬𑀸𑀕𑀼 𑀅𑀢𑁆𑀣𑀺, 𑀪𑀢𑁆𑀢𑀁 𑀅𑀢𑁆𑀣𑀺, 𑀔𑀸𑀤𑀦𑀻𑀬𑀁 𑀅𑀢𑁆𑀣𑀺. 𑀓𑀺𑀁 𑀧𑀺𑀯𑀺𑀲𑁆𑀲𑀸𑀫, 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀓𑀺𑀁 𑀔𑀸𑀤𑀺𑀲𑁆𑀲𑀸𑀫? 𑀓𑀺𑀁 𑀯𑀸 𑀅𑀢𑁆𑀣𑀺, 𑀓𑀺𑀁 𑀯𑀸 𑀫𑁂 𑀤𑀲𑁆𑀲𑀣𑀸’’𑀢𑀺 𑀯𑀺𑀧𑁆𑀧𑀮𑀧𑀢𑀺, 𑀬𑀸 𑀏𑀯𑀭𑀽𑀧𑀸 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀦𑀸 𑀮𑀸𑀮𑀧𑁆𑀧𑀺𑀢𑀢𑁆𑀢𑀁. 𑀏𑀯𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺 𑁋 𑀇𑀤𑀁 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁.

𑀓𑀢𑀫𑀁 ¶ 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁? 𑀇𑀥𑁂𑀓𑀘𑁆𑀘𑁄 𑀦 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺 𑀘𑀺𑀢𑁆𑀢𑁂𑀦, 𑀦 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺 𑀘𑀺𑀢𑁆𑀢𑁂𑀦, 𑀦 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺 ¶ 𑀘𑀺𑀢𑁆𑀢𑁂𑀦, 𑀦 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄… 𑀦 𑀲𑀼𑀢𑁆𑀢𑀦𑁆𑀢𑀺𑀓𑁄 𑀲𑀫𑀸𑀦𑁄 𑀲𑀼𑀢𑁆𑀢𑀦𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺 𑀘𑀺𑀢𑁆𑀢𑁂𑀦, 𑀦 𑀯𑀺𑀦𑀬𑀥𑀭𑁄 𑀲𑀫𑀸𑀦𑁄… 𑀦 𑀥𑀫𑁆𑀫𑀓𑀣𑀺𑀓𑁄 𑀲𑀫𑀸𑀦𑁄… 𑀦 𑀆𑀭𑀜𑁆𑀜𑀺𑀓𑁄 𑀲𑀫𑀸𑀦𑁄… 𑀦 𑀧𑀺𑀡𑁆𑀟𑀧𑀸𑀢𑀺𑀓𑁄 𑀲𑀫𑀸𑀦𑁄… 𑀦 𑀧𑀁𑀲𑀼𑀓𑀽𑀮𑀺𑀓𑁄 𑀲𑀫𑀸𑀦𑁄… 𑀦 𑀢𑁂𑀘𑀻𑀯𑀭𑀺𑀓𑁄 𑀲𑀫𑀸𑀦𑁄… 𑀦 𑀲𑀧𑀤𑀸𑀦𑀘𑀸𑀭𑀺𑀓𑁄 𑀲𑀫𑀸𑀦𑁄… 𑀦 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀲𑀫𑀸𑀦𑁄… 𑀦 𑀦𑁂𑀲𑀚𑁆𑀚𑀺𑀓𑁄 𑀲𑀫𑀸𑀦𑁄… 𑀦 𑀬𑀣𑀸𑀲𑀦𑁆𑀣𑀢𑀺𑀓𑁄 𑀲𑀫𑀸𑀦𑁄… 𑀦 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑀫𑀸𑀦𑁄 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀦𑀸 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺 𑀘𑀺𑀢𑁆𑀢𑁂𑀦…𑀧𑁂… 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 ¶ 𑀲𑀫𑀸𑀦𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀺𑀦𑀸 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺 𑀘𑀺𑀢𑁆𑀢𑁂𑀦 𑁋 𑀇𑀤𑀁 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁. 𑀬𑀲𑁆𑀲𑀺𑀫𑀸𑀦𑀺 𑀢𑀻𑀡𑀺 𑀧𑀸𑀕𑀩𑁆𑀪𑀺𑀬𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀲𑁄 𑀯𑀼𑀘𑁆𑀘𑀢𑀺 𑀅𑀧𑁆𑀧𑀕𑀩𑁆𑀪𑁄𑀢𑀺 𑁋 𑀅𑀧𑁆𑀧𑀕𑀩𑁆𑀪𑁄.

𑀅𑀚𑁂𑀕𑀼𑀘𑁆𑀙𑁄𑀢𑀺 ¶ . 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀚𑁂𑀕𑀼𑀘𑁆𑀙𑁄, 𑀅𑀢𑁆𑀣𑀺 𑀅𑀚𑁂𑀕𑀼𑀘𑁆𑀙𑁄. 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀚𑁂𑀕𑀼𑀘𑁆𑀙𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀚𑁂𑀕𑀼𑀘𑁆𑀙𑁄. 𑀅𑀣 𑀯𑀸 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀝𑁆𑀞𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀚𑁂𑀕𑀼𑀘𑁆𑀙𑁄. 𑀅𑀣 𑀯𑀸 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻, 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻, 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻, 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻 ¶ , 𑀣𑀤𑁆𑀥𑁄 𑀳𑁄𑀢𑀺 𑀅𑀢𑀺𑀫𑀸𑀦𑀻, 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 [𑀫𑀺𑀘𑁆𑀙𑀸𑀤𑀺𑀝𑁆𑀞𑀻 (𑀲𑀻.)], 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀤𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀚𑁂𑀕𑀼𑀘𑁆𑀙𑁄.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀅𑀚𑁂𑀕𑀼𑀘𑁆𑀙𑁄? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 ¶ 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀅𑀚𑁂𑀕𑀼𑀘𑁆𑀙𑁄. 𑀅𑀣 𑀯𑀸 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺 𑀅𑀦𑀼𑀧𑀸𑀬𑀸𑀲𑀩𑀳𑀼𑀮𑁄, 𑀩𑀳𑀼𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀦 𑀅𑀪𑀺𑀲𑀚𑁆𑀚𑀢𑀺 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀝𑁆𑀞𑀻𑀬𑀢𑀺, 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀅𑀚𑁂𑀕𑀼𑀘𑁆𑀙𑁄. 𑀅𑀣 𑀯𑀸 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺 𑀅𑀦𑀼𑀧𑀦𑀸𑀳𑀻, 𑀅𑀫𑀓𑁆𑀔𑀻 𑀳𑁄𑀢𑀺 𑀅𑀧𑀴𑀸𑀲𑀻, 𑀅𑀦𑀺𑀲𑁆𑀲𑀼𑀓𑀻 𑀳𑁄𑀢𑀺 𑀅𑀫𑀘𑁆𑀙𑀭𑀻, 𑀅𑀲𑀞𑁄 𑀳𑁄𑀢𑀺 𑀅𑀫𑀸𑀬𑀸𑀯𑀻, 𑀅𑀣𑀤𑁆𑀥𑁄 𑀳𑁄𑀢𑀺 𑀅𑀦𑀢𑀺𑀫𑀸𑀦𑀻 ¶ , 𑀦 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀅𑀦𑀸𑀤𑀸𑀦𑀕𑁆𑀕𑀸𑀳𑀻 𑀲𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀅𑀚𑁂𑀕𑀼𑀘𑁆𑀙𑁄. 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀚𑁂𑀕𑀼𑀘𑁆𑀙𑀸, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀚𑁂𑀕𑀼𑀘𑁆𑀙𑀸𑀢𑀺 𑁋 𑀅𑀧𑁆𑀧𑀕𑀩𑁆𑀪𑁄 𑀅𑀚𑁂𑀕𑀼𑀘𑁆𑀙𑁄.

𑀧𑁂𑀲𑀼𑀡𑁂𑀬𑁆𑀬𑁂 𑀘 𑀦𑁄 𑀬𑀼𑀢𑁄𑀢𑀺. 𑀧𑁂𑀲𑀼𑀜𑁆𑀜𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 ¶ 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸 [𑀪𑁂𑀤𑁄 (𑀓.)], 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀯𑀕𑁆𑀕𑀸𑀭𑀸𑀫𑁄, 𑀯𑀕𑁆𑀕𑀭𑀢𑁄, 𑀯𑀕𑁆𑀕𑀦𑀦𑁆𑀤𑀻, 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀧𑁂𑀲𑀼𑀜𑁆𑀜𑀁.

𑀅𑀧𑀺 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸, 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 [𑀪𑁂𑀤𑀸𑀥𑀺𑀧𑁆𑀧𑀸𑀬𑁄 (𑀩𑀳𑀽𑀲𑀼)] 𑀯𑀸. 𑀓𑀣𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺? 𑀇𑀫𑀲𑁆𑀲 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀦𑀸𑀧𑁄 𑀪𑀯𑀺𑀲𑁆𑀲𑀸𑀫𑀺, 𑀯𑀺𑀲𑁆𑀲𑀸𑀲𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀅𑀩𑁆𑀪𑀦𑁆𑀢𑀭𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀲𑀼𑀳𑀤𑀬𑁄 𑀪𑀯𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀓𑀣𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺? ‘‘𑀓𑀣𑀁 𑀇𑀫𑁂 𑀦𑀸𑀦𑀸 𑀅𑀲𑁆𑀲𑀼 𑀯𑀺𑀦𑀸 𑀅𑀲𑁆𑀲𑀼 𑀯𑀕𑁆𑀕𑀸 𑀅𑀲𑁆𑀲𑀼 𑀤𑁆𑀯𑁂𑀥𑀸 𑀅𑀲𑁆𑀲𑀼 𑀤𑁆𑀯𑁂𑀚𑁆𑀛𑀸 𑀅𑀲𑁆𑀲𑀼 𑀤𑁆𑀯𑁂 𑀧𑀓𑁆𑀔𑀸 𑀅𑀲𑁆𑀲𑀼 𑀪𑀺𑀚𑁆𑀚𑁂𑀬𑁆𑀬𑀼𑀁 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀁 𑀤𑀼𑀓𑁆𑀔𑀁 𑀦 𑀨𑀸𑀲𑀼 [𑀅𑀨𑀸𑀲𑀼𑀁 (𑀲𑀻.)] 𑀯𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀁 ¶ 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀬𑀲𑁆𑀲𑁂𑀢𑀁 𑀧𑁂𑀲𑀼𑀜𑁆𑀜𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀧𑁂𑀲𑀼𑀜𑁆𑀜𑁂 𑀦𑁄 𑀬𑀼𑀢𑁄 𑀦 𑀬𑀼𑀢𑁆𑀢𑁄 𑀦 ¶ 𑀧𑀬𑀼𑀢𑁆𑀢𑁄 𑀦 𑀲𑀫𑁆𑀫𑀸𑀬𑀼𑀢𑁆𑀢𑁄𑀢𑀺 𑁋 𑀧𑁂𑀲𑀼𑀡𑁂𑀬𑁆𑀬𑁂 𑀘 𑀦𑁄 𑀬𑀼𑀢𑁄.

‘‘𑀧𑀢𑀺𑀮𑀻𑀦𑁄 𑀅𑀓𑀼𑀳𑀓𑁄, 𑀅𑀧𑀺𑀳𑀸𑀮𑀼 𑀅𑀫𑀘𑁆𑀙𑀭𑀻;

𑀅𑀧𑁆𑀧𑀕𑀩𑁆𑀪𑁄 𑀅𑀚𑁂𑀕𑀼𑀘𑁆𑀙𑁄, 𑀧𑁂𑀲𑀼𑀡𑁂𑀬𑁆𑀬𑁂 𑀘 𑀦𑁄 𑀬𑀼𑀢𑁄’’𑀢𑀺.

𑀲𑀸𑀢𑀺𑀬𑁂𑀲𑀼 𑀅𑀦𑀲𑁆𑀲𑀸𑀯𑀻, 𑀅𑀢𑀺𑀫𑀸𑀦𑁂 𑀘 𑀦𑁄 𑀬𑀼𑀢𑁄;

𑀲𑀡𑁆𑀳𑁄 𑀘 𑀧𑀝𑀺𑀪𑀸𑀦𑀯𑀸, 𑀦 𑀲𑀤𑁆𑀥𑁄 𑀦 𑀯𑀺𑀭𑀚𑁆𑀚𑀢𑀺.

𑀲𑀸𑀢𑀺𑀬𑁂𑀲𑀼 𑀅𑀦𑀲𑁆𑀲𑀸𑀯𑀻𑀢𑀺. 𑀲𑀸𑀢𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀓𑀺𑀁𑀓𑀸𑀭𑀡𑀸 𑀲𑀸𑀢𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸? 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀫𑀦𑀼𑀲𑁆𑀲𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀇𑀘𑁆𑀙𑀦𑁆𑀢𑀺 𑀲𑀸𑀢𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀢𑀁𑀓𑀸𑀭𑀡𑀸 𑀲𑀸𑀢𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀬𑁂𑀲𑀁 𑀏𑀲𑀸 𑀲𑀸𑀢𑀺𑀬𑀸 𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸 𑀢𑁂𑀲𑀁 𑀘𑀓𑁆𑀔𑀼𑀢𑁄 𑀭𑀽𑀧𑀢𑀡𑁆𑀳𑀸 𑀲𑀯𑀢𑀺 𑀆𑀲𑀯𑀢𑀺 [𑀧𑀲𑀯𑀢𑀺 (𑀲𑁆𑀬𑀸.)] 𑀲𑀦𑁆𑀤𑀢𑀺 𑀧𑀯𑀢𑁆𑀢𑀢𑀺, 𑀲𑁄𑀢𑀢𑁄 𑀲𑀤𑁆𑀤𑀢𑀡𑁆𑀳𑀸… 𑀖𑀸𑀦𑀢𑁄 𑀕𑀦𑁆𑀥𑀢𑀡𑁆𑀳𑀸… 𑀚𑀺𑀯𑁆𑀳𑀸𑀢𑁄 𑀭𑀲𑀢𑀡𑁆𑀳𑀸… 𑀓𑀸𑀬𑀢𑁄 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸… 𑀫𑀦𑀢𑁄 𑀥𑀫𑁆𑀫𑀢𑀡𑁆𑀳𑀸 𑀲𑀯𑀢𑀺 𑀆𑀲𑀯𑀢𑀺 𑀲𑀦𑁆𑀤𑀢𑀺 𑀧𑀯𑀢𑁆𑀢𑀢𑀺. 𑀬𑁂𑀲𑀁 𑀏𑀲𑀸 𑀲𑀸𑀢𑀺𑀬𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸 𑀢𑁂𑀲𑀁 𑀘𑀓𑁆𑀔𑀼𑀢𑁄 𑀭𑀽𑀧𑀢𑀡𑁆𑀳𑀸 𑀦 𑀲𑀯𑀢𑀺 𑀦𑀸𑀲𑀯𑀢𑀺 [𑀦 𑀧𑀲𑀯𑀢𑀺 (𑀲𑁆𑀬𑀸.)] 𑀦 𑀲𑀦𑁆𑀤𑀢𑀺 𑀦 𑀧𑀯𑀢𑁆𑀢𑀢𑀺 ¶ , 𑀲𑁄𑀢𑀢𑁄 𑀲𑀤𑁆𑀤𑀢𑀡𑁆𑀳𑀸…𑀧𑁂… 𑀫𑀦𑀢𑁄 𑀥𑀫𑁆𑀫𑀢𑀡𑁆𑀳𑀸 𑀦 𑀲𑀯𑀢𑀺 𑀦𑀸𑀲𑀯𑀢𑀺 𑀦 𑀲𑀦𑁆𑀤𑀢𑀺 𑀦 𑀧𑀯𑀢𑁆𑀢𑀢𑀻𑀢𑀺 𑁋 𑀲𑀸𑀢𑀺𑀬𑁂𑀲𑀼 𑀅𑀦𑀲𑁆𑀲𑀸𑀯𑀻.

𑀅𑀢𑀺𑀫𑀸𑀦𑁂 𑀘 𑀦𑁄 𑀬𑀼𑀢𑁄𑀢𑀺. 𑀓𑀢𑀫𑁄 𑀅𑀢𑀺𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀭𑀁 ¶ 𑀅𑀢𑀺𑀫𑀜𑁆𑀜𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 ¶ 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀢𑀺𑀫𑀸𑀦𑁄. 𑀬𑀲𑁆𑀲𑁂𑀲𑁄 𑀅𑀢𑀺𑀫𑀸𑀦𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀅𑀢𑀺𑀫𑀸𑀦𑁂 𑀘 𑀦𑁄 𑀬𑀼𑀢𑁄 𑀦 𑀬𑀼𑀢𑁆𑀢𑁄 𑀦𑀧𑁆𑀧𑀬𑀼𑀢𑁆𑀢𑁄 𑀦 𑀲𑀫𑁆𑀫𑀸𑀬𑀼𑀢𑁆𑀢𑁄𑀢𑀺 𑁋 𑀅𑀢𑀺𑀫𑀸𑀦𑁂 𑀘 𑀦𑁄 𑀬𑀼𑀢𑁄.

𑀲𑀡𑁆𑀳𑁄 𑀘 𑀧𑀝𑀺𑀪𑀸𑀦𑀯𑀸𑀢𑀺. 𑀲𑀡𑁆𑀳𑁄𑀢𑀺 𑀲𑀡𑁆𑀳𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀡𑁆𑀳𑁄, 𑀲𑀡𑁆𑀳𑁂𑀦 𑀯𑀘𑀻𑀓𑀫𑁆𑀫𑁂𑀦… 𑀲𑀡𑁆𑀳𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀡𑁆𑀳𑁄, 𑀲𑀡𑁆𑀳𑁂𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀡𑁆𑀳𑁄, 𑀲𑀡𑁆𑀳𑁂𑀳𑀺 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺… 𑀲𑀡𑁆𑀳𑁂𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀺… 𑀲𑀡𑁆𑀳𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺… 𑀲𑀡𑁆𑀳𑁂𑀳𑀺 𑀩𑀮𑁂𑀳𑀺… 𑀲𑀡𑁆𑀳𑁂𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀡𑁆𑀳𑁄, 𑀲𑀡𑁆𑀳𑁂𑀦 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀲𑀡𑁆𑀳𑁄.

𑀧𑀝𑀺𑀪𑀸𑀦𑀯𑀸𑀢𑀺 ¶ 𑀢𑀬𑁄 𑀧𑀝𑀺𑀪𑀸𑀦𑀯𑀦𑁆𑀢𑁄 𑁋 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸, 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸, 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸. 𑀓𑀢𑀫𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑀲𑁆𑀲 𑀧𑀓𑀢𑀺𑀬𑀸 𑀧𑀭𑀺𑀬𑀸𑀧𑀼𑀝𑀁 𑀳𑁄𑀢𑀺 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀬𑀢𑀺 𑁋 𑀅𑀬𑀁 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸. 𑀓𑀢𑀫𑁄 ¶ 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑁄 𑀧𑀭𑀺𑀧𑀼𑀘𑁆𑀙𑀺𑀢𑀸 [𑀧𑀭𑀺𑀧𑀼𑀘𑁆𑀙𑀺𑀢𑀁 (𑀲𑀻.), 𑀧𑀭𑀺𑀧𑀼𑀘𑁆𑀙𑀓𑁄 (𑀲𑁆𑀬𑀸.)] 𑀳𑁄𑀢𑀺 𑀅𑀢𑁆𑀢𑀢𑁆𑀣𑁂 𑀘 𑀜𑀸𑀬𑀢𑁆𑀣𑁂 𑀘 𑀮𑀓𑁆𑀔𑀡𑁂 𑀘 𑀓𑀸𑀭𑀡𑁂 𑀘 𑀞𑀸𑀦𑀸𑀞𑀸𑀦𑁂 𑀘, 𑀢𑀲𑁆𑀲 𑀢𑀁 𑀧𑀭𑀺𑀧𑀼𑀘𑁆𑀙𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀬𑀢𑀺 𑁋 𑀅𑀬𑀁 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸. 𑀓𑀢𑀫𑁄 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑀲𑁆𑀲 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄, 𑀢𑀲𑁆𑀲 𑀅𑀢𑁆𑀣𑁄 𑀜𑀸𑀢𑁄 𑀥𑀫𑁆𑀫𑁄 𑀜𑀸𑀢𑁄 𑀦𑀺𑀭𑀼𑀢𑁆𑀢𑀺 𑀜𑀸𑀢𑀸, 𑀅𑀢𑁆𑀣𑁂 𑀜𑀸𑀢𑁂 𑀅𑀢𑁆𑀣𑁄 𑀧𑀝𑀺𑀪𑀸𑀬𑀢𑀺 ¶ , 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁄 𑀧𑀝𑀺𑀪𑀸𑀬𑀢𑀺, 𑀦𑀺𑀭𑀼𑀢𑁆𑀢𑀺𑀬𑀸 𑀜𑀸𑀢𑀸𑀬 𑀦𑀺𑀭𑀼𑀢𑁆𑀢𑀺 𑀧𑀝𑀺𑀪𑀸𑀬𑀢𑀺; 𑀇𑀫𑁂𑀲𑀼 𑀢𑀻𑀲𑀼 ¶ 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀇𑀫𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄 𑀲𑁄 𑀯𑀼𑀘𑁆𑀘𑀢𑀺 𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀧𑀭𑀺𑀬𑀢𑁆𑀢𑀺 𑀦𑀢𑁆𑀣𑀺, 𑀧𑀭𑀺𑀧𑀼𑀘𑁆𑀙𑀸 𑀦𑀢𑁆𑀣𑀺, 𑀅𑀥𑀺𑀕𑀫𑁄 𑀦𑀢𑁆𑀣𑀺, 𑀓𑀺𑀁 𑀢𑀲𑁆𑀲 𑀧𑀝𑀺𑀪𑀸𑀬𑀺𑀲𑁆𑀲𑀢𑀻𑀢𑀺 𑁋 𑀲𑀡𑁆𑀳𑁄 𑀘 𑀧𑀝𑀺𑀪𑀸𑀦𑀯𑀸.

𑀦 𑀲𑀤𑁆𑀥𑁄 𑀦 𑀯𑀺𑀭𑀚𑁆𑀚𑀢𑀻𑀢𑀺. 𑀦 𑀲𑀤𑁆𑀥𑁄𑀢𑀺 𑀲𑀸𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀁 𑀦 𑀓𑀲𑁆𑀲𑀘𑀺 𑀲𑀤𑁆𑀤𑀳𑀢𑀺 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀸𑀭𑀲𑁆𑀲 𑀯𑀸 𑀩𑁆𑀭𑀳𑁆𑀫𑀼𑀦𑁄 𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀸𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁…𑀧𑁂… ¶ ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺…𑀧𑁂… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺… ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺…𑀧𑁂… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺… ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺… ‘‘𑀇𑀫𑁂 𑀆𑀲𑀯𑀸’’𑀢𑀺…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺…𑀧𑁂… ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀲𑀸𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁…𑀧𑁂… 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘…𑀧𑁂… 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀸𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀸𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀁 𑀦 𑀓𑀲𑁆𑀲𑀘𑀺 𑀲𑀤𑁆𑀤𑀳𑀢𑀺 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 ¶ 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀸𑀭𑀲𑁆𑀲 𑀯𑀸 𑀩𑁆𑀭𑀳𑁆𑀫𑀼𑀦𑁄 𑀯𑀸 [𑀩𑁆𑀭𑀳𑁆𑀫𑀼𑀦𑁄 𑀯𑀸…𑀧𑁂… (𑀲𑀻. 𑀓.)].

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀤𑁆𑀤𑀳𑀲𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 ¶ 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁; 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺?

‘‘𑀦 𑀔𑁆𑀯𑀸𑀳𑀁 𑀏𑀢𑁆𑀣, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁… 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀬𑁂𑀲𑀁 𑀦𑀽𑀦𑁂𑀢𑀁, 𑀪𑀦𑁆𑀢𑁂 ¶ , 𑀅𑀜𑁆𑀜𑀸𑀢𑀁 𑀅𑀲𑁆𑀲 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬, 𑀢𑁂 𑀢𑀢𑁆𑀣 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀕𑀘𑁆𑀙𑁂𑀬𑁆𑀬𑀼𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 ¶ … 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀬𑁂𑀲𑀜𑁆𑀘 𑀔𑁄 𑀏𑀢𑀁, 𑀪𑀦𑁆𑀢𑁂, 𑀜𑀸𑀢𑀁 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬, 𑀦𑀺𑀓𑁆𑀓𑀗𑁆𑀔𑀸 𑀢𑁂 𑀢𑀢𑁆𑀣 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁… 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀫𑀬𑁆𑀳𑀜𑁆𑀘 𑀔𑁄, 𑀏𑀢𑀁 𑀪𑀦𑁆𑀢𑁂, 𑀜𑀸𑀢𑀁 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬, 𑀦𑀺𑀓𑁆𑀓𑀗𑁆𑀔𑁄𑀳𑀁 𑀢𑀢𑁆𑀣 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁… 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑁂𑀲𑀜𑁆𑀳𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀸𑀢𑀁 𑀅𑀲𑁆𑀲 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬, 𑀢𑁂 𑀢𑀢𑁆𑀣 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀕𑀘𑁆𑀙𑁂𑀬𑁆𑀬𑀼𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 ¶ 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀦𑁆𑀢𑀺.

‘‘𑀅𑀲𑁆𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘, 𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄, 𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺.

𑀦 𑀲𑀤𑁆𑀥𑁄 𑀦 𑀯𑀺𑀭𑀚𑁆𑀚𑀢𑀻𑀢𑀺. 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀭𑀚𑁆𑀚𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀲𑀢𑁆𑀢 𑀲𑁂𑀓𑁆𑀔𑀸 𑀯𑀺𑀭𑀚𑁆𑀚𑀦𑁆𑀢𑀺. 𑀅𑀭𑀳𑀸 𑀦𑁂𑀯 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀢𑁆𑀢𑁄 𑀲𑁄 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 ¶ 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀦 𑀲𑀤𑁆𑀥𑁄 𑀦 𑀯𑀺𑀭𑀚𑁆𑀚𑀢𑀺.

‘‘𑀲𑀸𑀢𑀺𑀬𑁂𑀲𑀼 𑀅𑀦𑀲𑁆𑀲𑀸𑀯𑀻, 𑀅𑀢𑀺𑀫𑀸𑀦𑁂 𑀘 𑀦𑁄 𑀬𑀼𑀢𑁄;

𑀲𑀡𑁆𑀳𑁄 𑀘 𑀧𑀝𑀺𑀪𑀸𑀦𑀯𑀸, 𑀦 𑀲𑀤𑁆𑀥𑁄 𑀦 𑀯𑀺𑀭𑀚𑁆𑀚𑀢𑀻’’𑀢𑀺.

𑀮𑀸𑀪𑀓𑀫𑁆𑀬𑀸 𑀦 𑀲𑀺𑀓𑁆𑀔𑀢𑀺, 𑀅𑀮𑀸𑀪𑁂 𑀘 𑀦 𑀓𑀼𑀧𑁆𑀧𑀢𑀺;

𑀅𑀯𑀺𑀭𑀼𑀤𑁆𑀥𑁄 𑀘 𑀢𑀡𑁆𑀳𑀸𑀬, 𑀭𑀲𑁂𑀲𑀼 [𑀭𑀲𑁂 𑀘 (𑀲𑀻. 𑀲𑁆𑀬𑀸.)] 𑀦𑀸𑀦𑀼𑀕𑀺𑀚𑁆𑀛𑀢𑀺.

𑀮𑀸𑀪𑀓𑀫𑁆𑀬𑀸 𑀦 𑀲𑀺𑀓𑁆𑀔𑀢𑀺, 𑀅𑀮𑀸𑀪𑁂 𑀘 𑀦 𑀓𑀼𑀧𑁆𑀧𑀢𑀻𑀢𑀺. 𑀓𑀣𑀁 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀓𑁂𑀦 𑀦𑀼 ¶ 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺? 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀢𑁂𑀦𑀸𑀬𑀫𑀸𑀬𑀲𑁆𑀫𑀸 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀲𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄 𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑀸𑀢𑀺. 𑀏𑀯𑀫𑁆𑀧𑀺 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀺.

𑀅𑀣 𑀯𑀸 ¶ 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀓𑁂𑀦 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺? 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀯𑀺𑀦𑀬𑀥𑀭𑁄…𑀧𑁂… 𑀥𑀫𑁆𑀫𑀓𑀣𑀺𑀓𑁄… 𑀆𑀪𑀺𑀥𑀫𑁆𑀫𑀺𑀓𑁄, 𑀢𑁂𑀦𑀸𑀬𑀫𑀸𑀬𑀲𑁆𑀫𑀸 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀲𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 ¶ 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄 𑀅𑀪𑀺𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺. 𑀏𑀯𑀫𑁆𑀧𑀺 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀮𑀸𑀪𑀺𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀓𑁂𑀦 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺? 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀆𑀭𑀜𑁆𑀜𑀺𑀓𑁄… 𑀧𑀺𑀡𑁆𑀟𑀧𑀸𑀢𑀺𑀓𑁄… 𑀧𑀁𑀲𑀼𑀓𑀽𑀮𑀺𑀓𑁄… 𑀢𑁂𑀘𑀻𑀯𑀭𑀺𑀓𑁄… 𑀲𑀧𑀤𑀸𑀦𑀘𑀸𑀭𑀺𑀓𑁄… 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄… 𑀦𑁂𑀲𑀚𑁆𑀚𑀺𑀓𑁄… 𑀬𑀣𑀸𑀲𑀦𑁆𑀣𑀢𑀺𑀓𑁄, 𑀢𑁂𑀦𑀸𑀬𑀫𑀸𑀬𑀲𑁆𑀫𑀸 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀲𑁄 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 ¶ 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺…𑀧𑁂… 𑀬𑀣𑀸𑀲𑀦𑁆𑀣𑀢𑀺𑀓𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀺.

𑀓𑀣𑀁 𑀦 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀺? 𑀇𑀥 𑀪𑀺𑀓𑁆𑀔𑀼 𑀦 𑀮𑀸𑀪𑀳𑁂𑀢𑀼, 𑀦 𑀮𑀸𑀪𑀧𑀘𑁆𑀘𑀬𑀸, 𑀦 𑀮𑀸𑀪𑀓𑀸𑀭𑀡𑀸, 𑀦 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀦 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄, 𑀬𑀸𑀯𑀤𑁂𑀯 𑀅𑀢𑁆𑀢𑀤𑀫𑀢𑁆𑀣𑀸𑀬 𑀅𑀢𑁆𑀢𑀲𑀫𑀢𑁆𑀣𑀸𑀬 𑀅𑀢𑁆𑀢𑀧𑀭𑀺𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬 𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀅𑀪𑀺𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺. 𑀏𑀯𑀫𑁆𑀧𑀺 𑀦 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀺.

𑀅𑀣 ¶ 𑀯𑀸 𑀪𑀺𑀓𑁆𑀔𑀼 𑀦 𑀮𑀸𑀪𑀳𑁂𑀢𑀼, 𑀦 𑀮𑀸𑀪𑀧𑀘𑁆𑀘𑀬𑀸, 𑀦 𑀮𑀸𑀪𑀓𑀸𑀭𑀡𑀸, 𑀦 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀦 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄, 𑀬𑀸𑀯𑀤𑁂𑀯 𑀅𑀧𑁆𑀧𑀺𑀘𑁆𑀙𑀜𑁆𑀜𑁂𑀯 [𑀅𑀧𑁆𑀧𑀺𑀘𑁆𑀙𑀁𑀬𑁂𑀯 (𑀲𑀻.)] 𑀦𑀺𑀲𑁆𑀲𑀸𑀬 𑀲𑀦𑁆𑀢𑀼𑀝𑁆𑀞𑀺𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀲𑀮𑁆𑀮𑁂𑀔𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀧𑀯𑀺𑀯𑁂𑀓𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀇𑀤𑀫𑀢𑁆𑀣𑀺𑀢𑀜𑁆𑀜𑁂𑀯 [𑀇𑀤𑀫𑀢𑁆𑀣𑀺𑀓𑀢𑀜𑁆𑀜𑁂𑀯 (𑀲𑀻.)] 𑀦𑀺𑀲𑁆𑀲𑀸𑀬 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺, 𑀢𑁂𑀘𑀻𑀯𑀭𑀺𑀓𑁄 𑀳𑁄𑀢𑀺 ¶ , 𑀲𑀧𑀤𑀸𑀦𑀘𑀸𑀭𑀺𑀓𑁄 𑀳𑁄𑀢𑀺, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀳𑁄𑀢𑀺, 𑀦𑁂𑀲𑀚𑁆𑀚𑀺𑀓𑁄 𑀳𑁄𑀢𑀺, 𑀬𑀣𑀸𑀲𑀦𑁆𑀣𑀢𑀺𑀓𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀦 𑀮𑀸𑀪𑀓𑀫𑁆𑀬𑀸 𑀲𑀺𑀓𑁆𑀔𑀢𑀻𑀢𑀺 𑁋 𑀮𑀸𑀪𑀓𑀫𑁆𑀬𑀸 𑀦 𑀲𑀺𑀓𑁆𑀔𑀢𑀺.

𑀅𑀮𑀸𑀪𑁂 ¶ 𑀘 𑀦 𑀓𑀼𑀧𑁆𑀧𑀢𑀻𑀢𑀺. 𑀓𑀣𑀁 𑀅𑀮𑀸𑀪𑁂 𑀓𑀼𑀧𑁆𑀧𑀢𑀺? 𑀇𑀥𑁂𑀓𑀘𑁆𑀘𑁄 ‘‘𑀓𑀼𑀮𑀁 𑀯𑀸 𑀦 𑀮𑀪𑀸𑀫𑀺, 𑀕𑀡𑀁 𑀯𑀸 𑀦 𑀮𑀪𑀸𑀫𑀺, 𑀆𑀯𑀸𑀲𑀁 𑀯𑀸 𑀦 𑀮𑀪𑀸𑀫𑀺, 𑀮𑀸𑀪𑀁 𑀯𑀸 𑀦 𑀮𑀪𑀸𑀫𑀺, 𑀬𑀲𑀁 𑀯𑀸 𑀦 𑀮𑀪𑀸𑀫𑀺, 𑀧𑀲𑀁𑀲𑀁 𑀯𑀸 𑀦 𑀮𑀪𑀸𑀫𑀺, 𑀲𑀼𑀔𑀁 𑀯𑀸 𑀦 𑀮𑀪𑀸𑀫𑀺, 𑀘𑀻𑀯𑀭𑀁 𑀯𑀸 𑀦 𑀮𑀪𑀸𑀫𑀺, 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀦 𑀮𑀪𑀸𑀫𑀺, 𑀲𑁂𑀦𑀸𑀲𑀦𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀁 𑀯𑀸 𑀦 𑀮𑀪𑀸𑀫𑀺, 𑀅𑀧𑁆𑀧𑀜𑁆𑀜𑀸𑀢𑁄𑀫𑁆𑀳𑀻’’𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀝𑁆𑀞𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀏𑀯𑀁 𑀅𑀮𑀸𑀪𑁂 𑀓𑀼𑀧𑁆𑀧𑀢𑀺.

𑀓𑀣𑀁 𑀅𑀮𑀸𑀪𑁂 𑀦 𑀓𑀼𑀧𑁆𑀧𑀢𑀺? 𑀇𑀥 𑀪𑀺𑀓𑁆𑀔𑀼 ‘‘𑀓𑀼𑀮𑀁 𑀯𑀸 𑀦 𑀮𑀪𑀸𑀫𑀺 𑀕𑀡𑀁 𑀯𑀸 𑀦 𑀮𑀪𑀸𑀫𑀺…𑀧𑁂… 𑀅𑀧𑁆𑀧𑀜𑁆𑀜𑀸𑀢𑁄𑀫𑁆𑀳𑀻’’𑀢𑀺 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀝𑁆𑀞𑀻𑀬𑀢𑀺, 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀏𑀯𑀁 𑀅𑀮𑀸𑀪𑁂 𑀦 𑀓𑀼𑀧𑁆𑀧𑀢𑀻𑀢𑀺 𑁋 𑀮𑀸𑀪𑀓𑀫𑁆𑀬𑀸 𑀦 𑀲𑀺𑀓𑁆𑀔𑀢𑀺 𑀅𑀮𑀸𑀪𑁂 𑀘 𑀦 𑀓𑀼𑀧𑁆𑀧𑀢𑀺.

𑀅𑀯𑀺𑀭𑀼𑀤𑁆𑀥𑁄 ¶ 𑀘 𑀢𑀡𑁆𑀳𑀸𑀬, 𑀭𑀲𑁂𑀲𑀼 𑀦𑀸𑀦𑀼𑀕𑀺𑀚𑁆𑀛𑀢𑀻𑀢𑀺. 𑀯𑀺𑀭𑀼𑀤𑁆𑀥𑁄𑀢𑀺 𑀬𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄, 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄, 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄, 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄, 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁, 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁, 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 ¶ 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄, 𑀘𑀡𑁆𑀟𑀺𑀓𑁆𑀓𑀁, 𑀅𑀲𑀼𑀭𑁄𑀧𑁄, 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀭𑁄𑀥𑁄. 𑀬𑀲𑁆𑀲𑁂𑀲𑁄 𑀯𑀺𑀭𑁄𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑀅𑀯𑀺𑀭𑀼𑀤𑁆𑀥𑁄. 𑀢𑀡𑁆𑀳𑀸𑀢𑀺 ¶ 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀭𑀲𑁄𑀢𑀺 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄, 𑀅𑀫𑁆𑀩𑀺𑀮𑀁 ¶ 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀓𑀁 [𑀮𑀧𑀺𑀮𑀁 (𑀲𑀻.), 𑀮𑀫𑁆𑀩𑀺𑀮𑀁 (𑀲𑁆𑀬𑀸.), 𑀮𑀩𑀺𑀮𑀁 (𑀓.), 𑀆𑀬𑀢𑀦𑀯𑀺𑀪𑀗𑁆𑀕𑁂] 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼 𑀲𑀻𑀢𑀁 𑀉𑀡𑁆𑀳𑀁. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀭𑀲𑀕𑀺𑀤𑁆𑀥𑀸. 𑀢𑁂 𑀚𑀺𑀯𑁆𑀳𑀕𑁆𑀕𑁂𑀦 𑀭𑀲𑀕𑁆𑀕𑀸𑀦𑀺 𑀧𑀭𑀺𑀬𑁂𑀲𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺, 𑀢𑁂 𑀅𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀦𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀦𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀫𑀥𑀼𑀭𑀁 𑀮𑀪𑀺𑀢𑁆𑀯𑀸 𑀅𑀫𑀥𑀼𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀫𑀥𑀼𑀭𑀁 𑀮𑀪𑀺𑀢𑁆𑀯𑀸 𑀫𑀥𑀼𑀭𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀢𑀺𑀢𑁆𑀢𑀓𑀁 𑀮𑀪𑀺𑀢𑁆𑀯𑀸 𑀅𑀢𑀺𑀢𑁆𑀢𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀢𑀺𑀢𑁆𑀢𑀓𑀁 𑀮𑀪𑀺𑀢𑁆𑀯𑀸 𑀢𑀺𑀢𑁆𑀢𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀓𑀝𑀼𑀓𑀁 𑀮𑀪𑀺𑀢𑁆𑀯𑀸 𑀅𑀓𑀝𑀼𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀓𑀝𑀼𑀓𑀁 𑀮𑀪𑀺𑀢𑁆𑀯𑀸 𑀓𑀝𑀼𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀮𑁄𑀡𑀺𑀓𑀁 𑀮𑀪𑀺𑀢𑁆𑀯𑀸 𑀅𑀮𑁄𑀡𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀮𑁄𑀡𑀺𑀓𑀁 𑀮𑀪𑀺𑀢𑁆𑀯𑀸 𑀮𑁄𑀡𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀔𑀸𑀭𑀺𑀓𑀁 𑀮𑀪𑀺𑀢𑁆𑀯𑀸 𑀅𑀔𑀸𑀭𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀔𑀸𑀭𑀺𑀓𑀁 𑀮𑀪𑀺𑀢𑁆𑀯𑀸 𑀔𑀸𑀭𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀮𑀫𑁆𑀩𑀺𑀓𑀁 𑀮𑀪𑀺𑀢𑁆𑀯𑀸 𑀓𑀲𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺 ¶ , 𑀓𑀲𑀸𑀯𑀁 𑀮𑀪𑀺𑀢𑁆𑀯𑀸 𑀮𑀫𑁆𑀩𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀲𑀸𑀤𑀼𑀁 𑀮𑀪𑀺𑀢𑁆𑀯𑀸 𑀅𑀲𑀸𑀤𑀼𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀲𑀸𑀤𑀼𑀁 𑀮𑀪𑀺𑀢𑁆𑀯𑀸 𑀲𑀸𑀤𑀼𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀲𑀻𑀢𑀁 𑀮𑀪𑀺𑀢𑁆𑀯𑀸 𑀉𑀡𑁆𑀳𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀉𑀡𑁆𑀳𑀁 𑀮𑀪𑀺𑀢𑁆𑀯𑀸 𑀲𑀻𑀢𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀢𑁂 𑀬𑀁 𑀬𑀁 𑀮𑀪𑀺𑀢𑁆𑀯𑀸 𑀢𑁂𑀦 𑀢𑁂𑀦 𑀦 𑀲𑀦𑁆𑀢𑀼𑀲𑁆𑀲𑀦𑁆𑀢𑀺 𑀅𑀧𑀭𑀸𑀧𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀫𑀦𑀸𑀧𑀺𑀓𑁂𑀲𑀼 𑀭𑀲𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀬𑀲𑁆𑀲𑁂𑀲𑀸 𑀭𑀲𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 ‘‘𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺.

𑀬𑀣𑀸 ¶ 𑀯𑀦𑀁 𑀆𑀮𑀺𑀫𑁆𑀧𑁂𑀬𑁆𑀬 𑀬𑀸𑀯𑀤𑁂𑀯 𑀭𑁄𑀧𑀦𑀢𑁆𑀣𑀸𑀬, 𑀬𑀣𑀸 𑀯𑀸 𑀧𑀦 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑁂𑀬𑁆𑀬 𑀬𑀸𑀯𑀤𑁂𑀯 𑀪𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀬𑀣𑀸 𑀯𑀸 𑀧𑀦 𑀧𑀼𑀢𑁆𑀢𑀫𑀁𑀲𑀁 𑀆𑀳𑀸𑀭𑀁 𑀆𑀳𑀭𑁂𑀬𑁆𑀬 𑀬𑀸𑀯𑀤𑁂𑀯 𑀓𑀦𑁆𑀢𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬; 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 ‘‘𑀦𑁂𑀯 𑀤𑀯𑀸𑀬…𑀧𑁂… 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺. 𑀭𑀲𑀢𑀡𑁆𑀳𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 ¶ 𑀕𑀫𑁂𑀢𑀺, 𑀭𑀲𑀢𑀡𑁆𑀳𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀅𑀯𑀺𑀭𑀼𑀤𑁆𑀥𑁄 𑀘 𑀢𑀡𑁆𑀳𑀸𑀬 𑀭𑀲𑁂𑀲𑀼 𑀦𑀸𑀦𑀼𑀕𑀺𑀚𑁆𑀛𑀢𑀺.

‘‘𑀮𑀸𑀪𑀓𑀫𑁆𑀬𑀸 ¶ 𑀦 𑀲𑀺𑀓𑁆𑀔𑀢𑀺, 𑀅𑀮𑀸𑀪𑁂 𑀘 𑀦 𑀓𑀼𑀧𑁆𑀧𑀢𑀺;

𑀅𑀯𑀺𑀭𑀼𑀤𑁆𑀥𑁄 𑀘 𑀢𑀡𑁆𑀳𑀸𑀬, 𑀭𑀲𑁂𑀲𑀼 𑀦𑀸𑀦𑀼𑀕𑀺𑀚𑁆𑀛𑀢𑀻’’𑀢𑀺.

𑀉𑀧𑁂𑀓𑁆𑀔𑀓𑁄 𑀲𑀤𑀸 𑀲𑀢𑁄, 𑀦 𑀮𑁄𑀓𑁂 𑀫𑀜𑁆𑀜𑀢𑁂 𑀲𑀫𑀁;

𑀦 𑀯𑀺𑀲𑁂𑀲𑀻 𑀦 𑀦𑀻𑀘𑁂𑀬𑁆𑀬𑁄, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀉𑀲𑁆𑀲𑀤𑀸.

𑀉𑀧𑁂𑀓𑁆𑀔𑀓𑁄 𑀲𑀤𑀸 𑀲𑀢𑁄𑀢𑀺. 𑀉𑀧𑁂𑀓𑁆𑀔𑀓𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀫𑀦𑀸𑀧𑀁 𑀦𑀸𑀪𑀺𑀕𑀺𑀚𑁆𑀛𑀢𑀺 𑀦𑀸𑀪𑀺𑀳𑀁𑀲𑀢𑀺 [𑀦𑀸𑀪𑀺𑀳𑀲𑀢𑀺 (𑀲𑀻. 𑀲𑁆𑀬𑀸.)] 𑀦 𑀭𑀸𑀕𑀁 𑀚𑀦𑁂𑀢𑀺, 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀘𑀓𑁆𑀔𑀼𑀦𑀸 ¶ 𑀔𑁄 𑀧𑀦𑁂𑀯 𑀭𑀽𑀧𑀁 𑀤𑀺𑀲𑁆𑀯𑀸 𑀅𑀫𑀦𑀸𑀧𑀁 𑀦 𑀫𑀗𑁆𑀓𑀼 𑀳𑁄𑀢𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 [𑀅𑀧𑁆𑀧𑀢𑀺𑀝𑁆𑀞𑀻𑀦 𑀘𑀺𑀢𑁆𑀢𑁄 (𑀲𑁆𑀬𑀸.), 𑀅𑀧𑁆𑀧𑀢𑀺𑀝𑁆𑀞𑀦𑀘𑀺𑀢𑁆𑀢𑁄 (𑀓.)] 𑀅𑀮𑀻𑀦𑀫𑀦𑀲𑁄 [𑀆𑀤𑀺𑀦𑀫𑀦𑀲𑁄 (𑀲𑁆𑀬𑀸.)] 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄, 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀫𑀦𑀸𑀧𑀁 𑀦𑀸𑀪𑀺𑀕𑀺𑀚𑁆𑀛𑀢𑀺 𑀦𑀸𑀪𑀺𑀳𑀁𑀲𑀢𑀺 𑀦 ¶ 𑀭𑀸𑀕𑀁 𑀚𑀦𑁂𑀢𑀺, 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀫𑀦𑀲𑀸 𑀔𑁄 𑀧𑀦𑁂𑀯 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀅𑀫𑀦𑀸𑀧𑀁 𑀦 𑀫𑀗𑁆𑀓𑀼 𑀳𑁄𑀢𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀮𑀻𑀦𑀫𑀦𑀲𑁄 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄, 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀽𑀧𑁂𑀲𑀼 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀭𑀚𑀦𑀻𑀬𑁂 𑀦 𑀭𑀚𑁆𑀚𑀢𑀺, 𑀤𑀼𑀲𑁆𑀲𑀦𑀻𑀬𑁂 [𑀤𑁄𑀲𑀦𑀻𑀬𑁂 (𑀩𑀳𑀽𑀲𑀼)] 𑀦 𑀤𑀼𑀲𑁆𑀲𑀢𑀺, 𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀢𑀺, 𑀓𑁄𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺, 𑀫𑀤𑀦𑀻𑀬𑁂 𑀦 𑀫𑀚𑁆𑀚𑀢𑀺, 𑀓𑀺𑀮𑁂𑀲𑀦𑀻𑀬𑁂 𑀦 𑀓𑀺𑀮𑀺𑀲𑁆𑀲𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀭𑀚𑀦𑀻𑀬𑁂 𑀦 𑀭𑀚𑁆𑀚𑀢𑀺 𑀤𑀼𑀲𑁆𑀲𑀦𑀻𑀬𑁂 𑀦 𑀤𑀼𑀲𑁆𑀲𑀢𑀺, 𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀢𑀺, 𑀓𑁄𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺, 𑀫𑀤𑀦𑀻𑀬𑁂 𑀦 𑀫𑀚𑁆𑀚𑀢𑀺, 𑀓𑀺𑀮𑁂𑀲𑀦𑀻𑀬𑁂 𑀦 𑀓𑀺𑀮𑀺𑀲𑁆𑀲𑀢𑀺. 𑀤𑀺𑀝𑁆𑀞𑁂 ¶ 𑀤𑀺𑀝𑁆𑀞𑀫𑀢𑁆𑀢𑁄, 𑀲𑀼𑀢𑁂 𑀲𑀼𑀢𑀫𑀢𑁆𑀢𑁄, 𑀫𑀼𑀢𑁂 𑀫𑀼𑀢𑀫𑀢𑁆𑀢𑁄, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑁄. 𑀤𑀺𑀝𑁆𑀞𑁂 𑀦 ¶ 𑀮𑀺𑀫𑁆𑀧𑀢𑀺, 𑀲𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀫𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀯𑀺𑀜𑁆𑀜𑀸𑀢𑁂 𑀦 𑀮𑀺𑀫𑁆𑀧𑀢𑀺. 𑀤𑀺𑀝𑁆𑀞𑁂 𑀅𑀦𑀽𑀧𑀬𑁄 𑀅𑀦𑀧𑀸𑀬𑁄 𑀅𑀦𑀺𑀲𑁆𑀲𑀺𑀢𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺. 𑀲𑀼𑀢𑁂… 𑀫𑀼𑀢𑁂… 𑀯𑀺𑀜𑁆𑀜𑀸𑀢𑁂 ¶ 𑀅𑀦𑀽𑀧𑀬𑁄 𑀅𑀦𑀧𑀸𑀬𑁄 𑀅𑀦𑀺𑀲𑁆𑀲𑀺𑀢𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺.

𑀲𑀁𑀯𑀺𑀚𑁆𑀚𑀢𑀺 𑀅𑀭𑀳𑀢𑁄 𑀘𑀓𑁆𑀔𑀼, 𑀧𑀲𑁆𑀲𑀢𑀺 𑀅𑀭𑀳𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁. 𑀙𑀦𑁆𑀤𑀭𑀸𑀕𑁄 ¶ 𑀅𑀭𑀳𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀭𑀳𑀸. 𑀲𑀁𑀯𑀺𑀚𑁆𑀚𑀢𑀺 𑀅𑀭𑀳𑀢𑁄 𑀲𑁄𑀢𑀁, 𑀲𑀼𑀡𑀸𑀢𑀺 𑀅𑀭𑀳𑀸 𑀲𑁄𑀢𑁂𑀦 𑀲𑀤𑁆𑀤𑀁. 𑀙𑀦𑁆𑀤𑀭𑀸𑀕𑁄 𑀅𑀭𑀳𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀭𑀳𑀸. 𑀲𑀁𑀯𑀺𑀚𑁆𑀚𑀢𑀺 𑀅𑀭𑀳𑀢𑁄 𑀖𑀸𑀦𑀁, 𑀖𑀸𑀬𑀢𑀺 𑀅𑀭𑀳𑀸 𑀖𑀸𑀦𑁂𑀦 𑀕𑀦𑁆𑀥𑀁. 𑀙𑀦𑁆𑀤𑀭𑀸𑀕𑁄 𑀅𑀭𑀳𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀭𑀳𑀸. 𑀲𑀁𑀯𑀺𑀚𑁆𑀚𑀢𑀺 𑀅𑀭𑀳𑀢𑁄 𑀚𑀺𑀯𑁆𑀳𑀸, 𑀲𑀸𑀬𑀢𑀺 𑀅𑀭𑀳𑀸 𑀚𑀺𑀯𑁆𑀳𑀸𑀬 𑀭𑀲𑀁…𑀧𑁂… 𑀲𑀁𑀯𑀺𑀚𑁆𑀚𑀢𑀺 𑀅𑀭𑀳𑀢𑁄 𑀓𑀸𑀬𑁄, 𑀨𑀼𑀲𑀢𑀺 𑀅𑀭𑀳𑀸 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁…𑀧𑁂… 𑀲𑀁𑀯𑀺𑀚𑁆𑀚𑀢𑀺 𑀅𑀭𑀳𑀢𑁄 𑀫𑀦𑁄, 𑀯𑀺𑀚𑀸𑀦𑀸𑀢𑀺 𑀅𑀭𑀳𑀸 𑀫𑀦𑀲𑀸 𑀥𑀫𑁆𑀫𑀁. 𑀙𑀦𑁆𑀤𑀭𑀸𑀕𑁄 𑀅𑀭𑀳𑀢𑁄 𑀦𑀢𑁆𑀣𑀺 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀭𑀳𑀸.

𑀘𑀓𑁆𑀔𑀼 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢𑀁, 𑀢𑀁 𑀅𑀭𑀳𑀢𑁄 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀭𑀓𑁆𑀔𑀺𑀢𑀁 𑀲𑀁𑀯𑀼𑀢𑀁, 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑁄𑀢𑀁 𑀲𑀤𑁆𑀤𑀸𑀭𑀸𑀫𑀁…𑀧𑁂… 𑀖𑀸𑀦𑀁 𑀕𑀦𑁆𑀥𑀸𑀭𑀸𑀫𑀁… 𑀚𑀺𑀯𑁆𑀳𑀸 𑀭𑀲𑀸𑀭𑀸𑀫𑀸 𑀭𑀲𑀭𑀢𑀸 𑀭𑀲𑀲𑀫𑁆𑀫𑀼𑀤𑀺𑀢𑀸, 𑀲𑀸 𑀅𑀭𑀳𑀢𑁄 𑀤𑀦𑁆𑀢𑀸 𑀕𑀼𑀢𑁆𑀢𑀸 𑀭𑀓𑁆𑀔𑀺𑀢𑀸 𑀲𑀁𑀯𑀼𑀢𑀸, 𑀢𑀲𑁆𑀲𑀸 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀓𑀸𑀬𑁄 𑀨𑁄𑀝𑁆𑀞𑀩𑁆𑀩𑀸𑀭𑀸𑀫𑁄…𑀧𑁂… 𑀫𑀦𑁄 𑀥𑀫𑁆𑀫𑀸𑀭𑀸𑀫𑁄 𑀥𑀫𑁆𑀫𑀭𑀢𑁄 𑀥𑀫𑁆𑀫𑀲𑀫𑁆𑀫𑀼𑀤𑀺𑀢𑁄, 𑀲𑁄 𑀅𑀭𑀳𑀢𑁄 𑀤𑀦𑁆𑀢𑁄 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄, 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺.

‘‘𑀤𑀦𑁆𑀢𑀁 𑀦𑀬𑀦𑁆𑀢𑀺 𑀲𑀫𑀺𑀢𑀺𑀁, 𑀤𑀦𑁆𑀢𑀁 𑀭𑀸𑀚𑀸𑀪𑀺𑀭𑀽𑀳𑀢𑀺;

𑀤𑀦𑁆𑀢𑁄 𑀲𑁂𑀝𑁆𑀞𑁄 𑀫𑀦𑀼𑀲𑁆𑀲𑁂𑀲𑀼, 𑀬𑁄𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀢𑀺.

‘‘𑀯𑀭𑀫𑀲𑁆𑀲𑀢𑀭𑀸 ¶ 𑀤𑀦𑁆𑀢𑀸, 𑀆𑀚𑀸𑀦𑀻𑀬𑀸 𑀘 [𑀆𑀚𑀸𑀦𑀺𑀬𑀸𑀯 (𑀲𑁆𑀬𑀸.)] 𑀲𑀺𑀦𑁆𑀥𑀯𑀸;

𑀓𑀼𑀜𑁆𑀚𑀭𑀸 𑀘 𑀫𑀳𑀸𑀦𑀸𑀕𑀸, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭𑀁.

‘‘𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺, 𑀕𑀘𑁆𑀙𑁂𑀬𑁆𑀬 𑀅𑀕𑀢𑀁 𑀤𑀺𑀲𑀁;

𑀬𑀣𑀸𑀢𑁆𑀢𑀦𑀸 𑀲𑀼𑀤𑀦𑁆𑀢𑁂𑀦, 𑀤𑀦𑁆𑀢𑁄 𑀤𑀦𑁆𑀢𑁂𑀦 𑀕𑀘𑁆𑀙𑀢𑀺.

‘‘𑀯𑀺𑀥𑀸𑀲𑀼 ¶ 𑀦 𑀯𑀺𑀓𑀫𑁆𑀧𑀦𑁆𑀢𑀺, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀼𑀦𑀩𑁆𑀪𑀯𑀸;

𑀤𑀦𑁆𑀢𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑀸, 𑀢𑁂 𑀮𑁄𑀓𑁂 𑀯𑀺𑀚𑀺𑀢𑀸𑀯𑀺𑀦𑁄.

‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 ¶ ¶ 𑀪𑀸𑀯𑀺𑀢𑀸𑀦𑀺 [𑀯𑀺𑀪𑀸𑀯𑀺𑀢𑀸𑀦𑀺 (𑀲𑀻.)], 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 [𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀘 (𑀲𑀻.), 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 (𑀲𑁆𑀬𑀸. 𑀓.) 𑀲𑀼. 𑀦𑀺. 𑁫𑁨𑁧] 𑀲𑀩𑁆𑀩𑀮𑁄𑀓𑁂;

𑀦𑀺𑀩𑁆𑀩𑀺𑀚𑁆𑀛 𑀇𑀫𑀁 [𑀦𑀺𑀩𑁆𑀩𑀺𑀚𑁆𑀛𑀺𑀫𑀁 (𑀲𑁆𑀬𑀸.), 𑀦𑀺𑀩𑁆𑀩𑀺𑀚𑁆𑀚 𑀇𑀫𑀁 (𑀓.)] 𑀧𑀭𑀜𑁆𑀘 𑀮𑁄𑀓𑀁, 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲 𑀤𑀦𑁆𑀢𑁄’’𑀢𑀺.

𑀉𑀧𑁂𑀓𑁆𑀔𑀓𑁄 𑀲𑀤𑀸𑀢𑀺. 𑀲𑀤𑀸 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁…𑀧𑁂… 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀉𑀧𑁂𑀓𑁆𑀔𑀓𑁄 𑀲𑀤𑀸 𑀲𑀢𑁄.

𑀦 𑀮𑁄𑀓𑁂 𑀫𑀜𑁆𑀜𑀢𑁂 𑀲𑀫𑀦𑁆𑀢𑀺. ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀁 𑀦 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀦 𑀮𑁄𑀓𑁂 𑀫𑀜𑁆𑀜𑀢𑁂 𑀲𑀫𑀁.

𑀦 𑀯𑀺𑀲𑁂𑀲𑀻 𑀦 𑀦𑀻𑀘𑁂𑀬𑁆𑀬𑁄𑀢𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀅𑀢𑀺𑀫𑀸𑀦𑀁 𑀦 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸 ¶ . ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀑𑀫𑀸𑀦𑀁 𑀦 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀦 𑀯𑀺𑀲𑁂𑀲𑀻 𑀦 𑀦𑀻𑀘𑁂𑀬𑁆𑀬𑁄.

𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀉𑀲𑁆𑀲𑀤𑀸𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀉𑀲𑁆𑀲𑀤𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑀸 𑁋 𑀭𑀸𑀕𑀼𑀲𑁆𑀲𑀤𑁄 𑀤𑁄𑀲𑀼𑀲𑁆𑀲𑀤𑁄 𑀫𑁄𑀳𑀼𑀲𑁆𑀲𑀤𑁄 𑀫𑀸𑀦𑀼𑀲𑁆𑀲𑀤𑁄 𑀤𑀺𑀝𑁆𑀞𑀼𑀲𑁆𑀲𑀤𑁄 𑀓𑀺𑀮𑁂𑀲𑀼𑀲𑁆𑀲𑀤𑁄 𑀓𑀫𑁆𑀫𑀼𑀲𑁆𑀲𑀤𑁄. 𑀢𑀲𑁆𑀲𑀺𑀫𑁂 𑀉𑀲𑁆𑀲𑀤𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀉𑀲𑁆𑀲𑀤𑀸.

‘‘𑀉𑀧𑁂𑀓𑁆𑀔𑀓𑁄 𑀲𑀤𑀸 𑀲𑀢𑁄, 𑀦 𑀮𑁄𑀓𑁂 𑀫𑀜𑁆𑀜𑀢𑁂 𑀲𑀫𑀁;

𑀦 𑀯𑀺𑀲𑁂𑀲𑀻 𑀦 𑀦𑀻𑀘𑁂𑀬𑁆𑀬𑁄, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀉𑀲𑁆𑀲𑀤𑀸’’𑀢𑀺.

𑀬𑀲𑁆𑀲 ¶ 𑀦𑀺𑀲𑁆𑀲𑀬𑀢𑀸 [𑀦𑀺𑀲𑁆𑀲𑀬𑀦𑀸 (𑀓.)] 𑀦𑀢𑁆𑀣𑀺, 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄;

𑀪𑀯𑀸𑀬 𑀯𑀺𑀪𑀯𑀸𑀬 𑀯𑀸, 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.

𑀬𑀲𑁆𑀲 ¶ 𑀦𑀺𑀲𑁆𑀲𑀬𑀢𑀸 𑀦𑀢𑁆𑀣𑀻𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀦𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 ¶ . 𑀢𑀲𑁆𑀲 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀸𑀦𑀺𑀲𑁆𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦𑀺𑀲𑁆𑀲𑀬𑀢𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀬𑀲𑁆𑀲 𑀦𑀺𑀲𑁆𑀲𑀬𑀢𑀸 𑀦𑀢𑁆𑀣𑀺.

𑀜𑀢𑁆𑀯𑀸 ¶ 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄𑀢𑀺. 𑀜𑀢𑁆𑀯𑀸𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄, 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄, 𑀖𑀸𑀦𑀁 𑀅𑀦𑀺𑀲𑁆𑀲𑀺𑀢𑁄, 𑀚𑀺𑀯𑁆𑀳𑀁 𑀅𑀦𑀺𑀲𑁆𑀲𑀺𑀢𑁄, 𑀓𑀸𑀬𑀁 𑀅𑀦𑀺𑀲𑁆𑀲𑀺𑀢𑁄, 𑀫𑀦𑀁 𑀅𑀦𑀺𑀲𑁆𑀲𑀺𑀢𑁄, 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄.

𑀪𑀯𑀸𑀬 𑀯𑀺𑀪𑀯𑀸𑀬 𑀯𑀸, 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀪𑀯𑀸𑀬𑀸𑀢𑀺 𑀪𑀯𑀤𑀺𑀝𑁆𑀞𑀺𑀬𑀸, 𑀯𑀺𑀪𑀯𑀸𑀬𑀸𑀢𑀺 𑀯𑀺𑀪𑀯𑀤𑀺𑀝𑁆𑀞𑀺𑀬𑀸; 𑀪𑀯𑀸𑀬𑀸𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀯𑀺𑀪𑀯𑀸𑀬𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸; 𑀪𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 ¶ 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 ¶ . 𑀢𑀡𑁆𑀳𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 ¶ 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀪𑀯𑀸𑀬 𑀯𑀺𑀪𑀯𑀸𑀬 𑀯𑀸 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.

‘‘𑀬𑀲𑁆𑀲 𑀦𑀺𑀲𑁆𑀲𑀬𑀢𑀸 𑀦𑀢𑁆𑀣𑀺, 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄;

𑀪𑀯𑀸𑀬 𑀯𑀺𑀪𑀯𑀸𑀬 𑀯𑀸, 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀁 ¶ 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀁;

𑀕𑀦𑁆𑀣𑀸 𑀢𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀢𑀭𑀻 𑀲𑁄 𑀯𑀺𑀲𑀢𑁆𑀢𑀺𑀓𑀁.

𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺. 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺. 𑀢𑀁 𑀩𑁆𑀭𑀽𑀫𑀺 𑀢𑀁 𑀓𑀣𑁂𑀫𑀺 𑀢𑀁 𑀪𑀡𑀸𑀫𑀺 𑀢𑀁 𑀤𑀻𑀧𑀬𑀸𑀫𑀺 𑀢𑀁 𑀯𑁄𑀳𑀭𑀸𑀫𑀻𑀢𑀺 𑁋 𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺.

𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀦𑁆𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸, 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄 𑀯𑀻𑀢𑀓𑀸𑀫𑁄 𑀘𑀢𑁆𑀢𑀓𑀸𑀫𑁄 𑀯𑀦𑁆𑀢𑀓𑀸𑀫𑁄 𑀫𑀼𑀢𑁆𑀢𑀓𑀸𑀫𑁄 𑀧𑀳𑀻𑀦𑀓𑀸𑀫𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑁄, 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀁.

𑀕𑀦𑁆𑀣𑀸 ¶ 𑀢𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀕𑀦𑁆𑀣𑀸𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑁋 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀦𑁄 ¶ 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀧𑀭𑀯𑀸𑀤𑁂𑀲𑀼 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀯𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀯𑀸 𑀧𑀭𑀸𑀫𑀸𑀲𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀕𑀦𑁆𑀣𑀸 𑀢𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀕𑀦𑁆𑀣𑀸 𑀢𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀕𑀦𑁆𑀣𑀸 𑀢𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺.

𑀅𑀢𑀭𑀻 𑀲𑁄 𑀯𑀺𑀲𑀢𑁆𑀢𑀺𑀓𑀦𑁆𑀢𑀺. 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸 ¶ ? 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑁂… 𑀕𑀡𑁂… 𑀆𑀯𑀸𑀲𑁂…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀢𑀁 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀅𑀢𑀭𑀻 𑀲𑁄 𑀯𑀺𑀲𑀢𑁆𑀢𑀺𑀓𑀦𑁆𑀢𑀺. 𑀲𑁄 𑀇𑀫𑀁 𑀯𑀺𑀲𑀢𑁆𑀢𑀺𑀓𑀁 𑀢𑀡𑁆𑀳𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀻𑀢𑀺 𑁋 𑀅𑀢𑀭𑀻 ¶ 𑀲𑁄 𑀯𑀺𑀲𑀢𑁆𑀢𑀺𑀓𑀁.

‘‘𑀢𑀁 𑀩𑁆𑀭𑀽𑀫𑀺 𑀉𑀧𑀲𑀦𑁆𑀢𑁄𑀢𑀺, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀁;

𑀕𑀦𑁆𑀣𑀸 𑀢𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀢𑀭𑀻 𑀲𑁄 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀦 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀜𑁆𑀘 𑀯𑀺𑀚𑁆𑀚𑀢𑀺;

𑀅𑀢𑁆𑀢𑀸 𑀯𑀸𑀧𑀺 𑀦𑀺𑀭𑀢𑁆𑀢𑀸 𑀯𑀸, 𑀦 𑀢𑀲𑁆𑀫𑀺𑀁 𑀉𑀧𑀮𑀩𑁆𑀪𑀢𑀺.

𑀦 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀜𑁆𑀘 𑀯𑀺𑀚𑁆𑀚𑀢𑀻𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄 ¶ , 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀧𑀲𑀯𑁄𑀢𑀺. 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀸𑀯𑀸𑀲𑁆𑀲𑀯𑀴𑀯𑀸. 𑀔𑁂𑀢𑁆𑀢𑀦𑁆𑀢𑀺 𑀲𑀸𑀮𑀺𑀔𑁂𑀢𑁆𑀢𑀁 𑀯𑀻𑀳𑀺𑀔𑁂𑀢𑁆𑀢𑀁 𑀫𑀼𑀕𑁆𑀕𑀔𑁂𑀢𑁆𑀢𑀁 𑀫𑀸𑀲𑀔𑁂𑀢𑁆𑀢𑀁 𑀬𑀯𑀔𑁂𑀢𑁆𑀢𑀁 𑀕𑁄𑀥𑀼𑀫𑀔𑁂𑀢𑁆𑀢𑀁 𑀢𑀺𑀮𑀔𑁂𑀢𑁆𑀢𑀁. 𑀯𑀢𑁆𑀣𑀼𑀦𑁆𑀢𑀺 𑀖𑀭𑀯𑀢𑁆𑀣𑀼𑀁 𑀓𑁄𑀝𑁆𑀞𑀯𑀢𑁆𑀣𑀼𑀁 𑀧𑀼𑀭𑁂𑀯𑀢𑁆𑀣𑀼𑀁 𑀧𑀘𑁆𑀙𑀸𑀯𑀢𑁆𑀣𑀼𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀯𑀢𑁆𑀣𑀼𑀁. 𑀦 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀜𑁆𑀘 𑀯𑀺𑀚𑁆𑀚𑀢𑀻𑀢𑀺. 𑀢𑀲𑁆𑀲 𑀧𑀼𑀢𑁆𑀢𑀧𑀭𑀺𑀕𑁆𑀕𑀳𑁄 𑀯𑀸 𑀧𑀲𑀼𑀧𑀭𑀺𑀕𑁆𑀕𑀳𑁄 𑀯𑀸 𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀯𑀸 𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑁄 𑀯𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀦 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀜𑁆𑀘 𑀯𑀺𑀚𑁆𑀚𑀢𑀺.

𑀅𑀢𑁆𑀢𑀸 𑀯𑀸𑀧𑀺 𑀦𑀺𑀭𑀢𑁆𑀢𑀸 𑀯𑀸, 𑀦 𑀢𑀲𑁆𑀫𑀺𑀁 𑀉𑀧𑀮𑀩𑁆𑀪𑀢𑀻𑀢𑀺. 𑀅𑀢𑁆𑀢𑀸𑀢𑀺 𑀅𑀢𑁆𑀢𑀤𑀺𑀝𑁆𑀞𑀺, 𑀦𑀺𑀭𑀢𑁆𑀢𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺; 𑀅𑀢𑁆𑀢𑀸𑀢𑀺 𑀕𑀳𑀺𑀢𑀁 𑀦𑀢𑁆𑀣𑀺, 𑀦𑀺𑀭𑀢𑁆𑀢𑀸𑀢𑀺 𑀫𑀼𑀜𑁆𑀘𑀺𑀢𑀩𑁆𑀩𑀁 𑀦𑀢𑁆𑀣𑀺. 𑀬𑀲𑁆𑀲 𑀦𑀢𑁆𑀣𑀺 𑀕𑀳𑀺𑀢𑀁 𑀢𑀲𑁆𑀲 𑀦𑀢𑁆𑀣𑀺 ¶ 𑀫𑀼𑀜𑁆𑀘𑀺𑀢𑀩𑁆𑀩𑀁. 𑀬𑀲𑁆𑀲 𑀦𑀢𑁆𑀣𑀺 𑀫𑀼𑀜𑁆𑀘𑀺𑀢𑀩𑁆𑀩𑀁 𑀢𑀲𑁆𑀲 𑀦𑀢𑁆𑀣𑀺 𑀕𑀳𑀺𑀢𑀁. 𑀕𑀸𑀳𑀫𑀼𑀜𑁆𑀘𑀦𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀭𑀳𑀸 𑀯𑀼𑀤𑁆𑀥𑀺𑀧𑀭𑀺𑀳𑀸𑀦𑀺𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀅𑀢𑁆𑀢𑀸 𑀯𑀸𑀧𑀺 𑀦𑀺𑀭𑀢𑁆𑀢𑀸 𑀯𑀸, 𑀦 𑀢𑀲𑁆𑀫𑀺𑀁 𑀉𑀧𑀮𑀩𑁆𑀪𑀢𑀺.

‘‘𑀦 ¶ 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀜𑁆𑀘 𑀯𑀺𑀚𑁆𑀚𑀢𑀺;

𑀅𑀢𑁆𑀢𑀸 𑀯𑀸𑀧𑀺 𑀦𑀺𑀭𑀢𑁆𑀢𑀸 𑀯𑀸, 𑀦 𑀢𑀲𑁆𑀫𑀺𑀁 𑀉𑀧𑀮𑀩𑁆𑀪𑀢𑀻’’𑀢𑀺.

𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀧𑀼𑀣𑀼𑀚𑁆𑀚𑀦𑀸, 𑀅𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀢𑀁 𑀢𑀲𑁆𑀲 𑀅𑀧𑀼𑀭𑀓𑁆𑀔𑀢𑀁, 𑀢𑀲𑁆𑀫𑀸 𑀯𑀸𑀤𑁂𑀲𑀼 𑀦𑁂𑀚𑀢𑀺.

𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀧𑀼𑀣𑀼𑀚𑁆𑀚𑀦𑀸, 𑀅𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺. 𑀧𑀼𑀣𑀼𑀚𑁆𑀚𑀦𑀸𑀢𑀺 𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 ¶ 𑀧𑀼𑀣𑀼𑀚𑁆𑀚𑀦𑀸 ¶ , 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 [𑀫𑀼𑀔𑀼𑀮𑁆𑀮𑁄𑀓𑀓𑀸𑀢𑀺 (𑀲𑀻.)] 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑁆𑀧𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑁋 𑀧𑀼𑀣𑀼𑀚𑁆𑀚𑀦𑀸. 𑀲𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀭𑀺𑀩𑁆𑀩𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀚𑀲𑀫𑀸𑀧𑀦𑁆𑀦𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸. 𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀧𑀼𑀣𑀼𑀚𑁆𑀚𑀦𑀸, 𑀅𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 ¶ . 𑀧𑀼𑀣𑀼𑀚𑁆𑀚𑀦𑀸 𑀬𑁂𑀦 𑀢𑀁 𑀭𑀸𑀕𑁂𑀦 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀤𑁄𑀲𑁂𑀦 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀫𑁄𑀳𑁂𑀦 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀫𑀸𑀦𑁂𑀦 𑀯𑀤𑁂𑀬𑁆𑀬𑀼𑀁, 𑀬𑀸𑀬 𑀤𑀺𑀝𑁆𑀞𑀺𑀬𑀸 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀤𑁂𑀬𑁆𑀬𑀼𑀁, 𑀬𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀤𑁂𑀬𑁆𑀬𑀼𑀁, 𑀬𑁂𑀳𑀺 𑀅𑀦𑀼𑀲𑀬𑁂𑀳𑀺 𑀯𑀤𑁂𑀬𑁆𑀬𑀼𑀁, 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸; 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 [𑀕𑀢𑀺𑀬𑁄 (𑀲𑁆𑀬𑀸.)] 𑀬𑁂𑀦 𑀢𑀁 𑀯𑀤𑁂𑀬𑁆𑀬𑀼𑀁 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺 𑀬𑁂𑀦 𑀦𑀁 𑀯𑀤𑁂𑀬𑁆𑀬𑀼𑀁 𑀓𑀣𑁂𑀬𑁆𑀬𑀼𑀁 𑀪𑀡𑁂𑀬𑁆𑀬𑀼𑀁 𑀤𑀻𑀧𑀬𑁂𑀬𑁆𑀬𑀼𑀁 𑀯𑁄𑀳𑀭𑁂𑀬𑁆𑀬𑀼𑀦𑁆𑀢𑀺 𑁋 𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀧𑀼𑀣𑀼𑀚𑁆𑀚𑀦𑀸, 𑀅𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸.

𑀢𑀁 𑀢𑀲𑁆𑀲 𑀅𑀧𑀼𑀭𑀓𑁆𑀔𑀢𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 ¶ 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 ¶ 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑀲𑁆𑀲 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦 𑀢𑀡𑁆𑀳𑀁 𑀯𑀸 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀺, 𑀦 𑀢𑀡𑁆𑀳𑀸𑀥𑀚𑁄 𑀦 𑀢𑀡𑁆𑀳𑀸𑀓𑁂𑀢𑀼 𑀦 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀤𑀺𑀝𑁆𑀞𑀺𑀥𑀚𑁄 𑀦 𑀤𑀺𑀝𑁆𑀞𑀺𑀓𑁂𑀢𑀼 𑀦 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀢𑀡𑁆𑀳𑀸𑀬 𑀯𑀸 𑀦 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑀺𑀢𑁄 ¶ 𑀘𑀭𑀢𑀻𑀢𑀺 𑁋 𑀢𑀁 𑀢𑀲𑁆𑀲 𑀅𑀧𑀼𑀭𑀓𑁆𑀔𑀢𑀁.

𑀢𑀲𑁆𑀫𑀸 𑀯𑀸𑀤𑁂𑀲𑀼 𑀦𑁂𑀚𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀯𑀸𑀤𑁂𑀲𑀼 𑀉𑀧𑀯𑀸𑀤𑁂𑀲𑀼 𑀦𑀺𑀦𑁆𑀤𑀸𑀬 𑀕𑀭𑀳𑀸𑀬 𑀅𑀓𑀺𑀢𑁆𑀢𑀺𑀬𑀸 𑀅𑀯𑀡𑁆𑀡𑀳𑀸𑀭𑀺𑀓𑀸𑀬 𑀦𑁂𑀚𑀢𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀢𑀲𑁆𑀫𑀸 𑀯𑀸𑀤𑁂𑀲𑀼 𑀦𑁂𑀚𑀢𑀺.

‘‘𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀧𑀼𑀣𑀼𑀚𑁆𑀚𑀦𑀸, 𑀅𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀢𑀁 𑀢𑀲𑁆𑀲 𑀅𑀧𑀼𑀭𑀓𑁆𑀔𑀢𑀁, 𑀢𑀲𑁆𑀫𑀸 𑀯𑀸𑀤𑁂𑀲𑀼 𑀦𑁂𑀚𑀢𑀻’’𑀢𑀺.

𑀯𑀻𑀢𑀕𑁂𑀥𑁄 𑀅𑀫𑀘𑁆𑀙𑀭𑀻, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺;

𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀓𑀧𑁆𑀧𑀁 𑀦𑁂𑀢𑀺 𑀅𑀓𑀧𑁆𑀧𑀺𑀬𑁄.

𑀯𑀻𑀢𑀕𑁂𑀥𑁄 𑀅𑀫𑀘𑁆𑀙𑀭𑀻𑀢𑀺. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑁄 𑀕𑁂𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑀯𑀻𑀢𑀕𑁂𑀥𑁄. 𑀲𑁄 𑀭𑀽𑀧𑁂 𑀅𑀕𑀺𑀤𑁆𑀥𑁄…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀕𑀺𑀤𑁆𑀥𑁄 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀺𑀢𑁄, 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄 𑀯𑀦𑁆𑀢𑀕𑁂𑀥𑁄 𑀫𑀼𑀢𑁆𑀢𑀕𑁂𑀥𑁄 𑀧𑀳𑀻𑀦𑀕𑁂𑀥𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄 𑀦𑀺𑀘𑁆𑀙𑀸𑀢𑁄…𑀧𑁂… 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀻𑀢𑀕𑁂𑀥𑁄. 𑀅𑀫𑀘𑁆𑀙𑀭𑀻𑀢𑀺 ¶ 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁…𑀧𑁂… 𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀬𑀲𑁆𑀲𑁂𑀢𑀁 𑀫𑀘𑁆𑀙𑀭𑀺𑀬𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 ¶ 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀅𑀫𑀘𑁆𑀙𑀭𑀻𑀢𑀺 𑁋 𑀯𑀻𑀢𑀕𑁂𑀥𑁄 𑀅𑀫𑀘𑁆𑀙𑀭𑀻.

𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺, 𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀽𑀢𑀺. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀯𑀸, ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀯𑀸, ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀯𑀸 𑀦 𑀯𑀤𑀢𑀺 𑀦 𑀓𑀣𑁂𑀢𑀺 𑀦 𑀪𑀡𑀢𑀺 𑀦 𑀤𑀻𑀧𑀬𑀢𑀺 𑀦 𑀯𑁄𑀳𑀭𑀢𑀻𑀢𑀺 𑁋 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺, 𑀦 ¶ 𑀲𑀫𑁂𑀲𑀼 𑀦 𑀑𑀫𑁂𑀲𑀼.

𑀓𑀧𑁆𑀧𑀁 𑀦𑁂𑀢𑀺 𑀅𑀓𑀧𑁆𑀧𑀺𑀬𑁄𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦𑁂𑀢𑀺 𑀦 𑀉𑀧𑁂𑀢𑀺 𑀦 𑀉𑀧𑀕𑀘𑁆𑀙𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀓𑀧𑁆𑀧𑀁 𑀦𑁂𑀢𑀺. 𑀅𑀓𑀧𑁆𑀧𑀺𑀬𑁄𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀲𑁆𑀲 ¶ 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀓𑀧𑁆𑀧𑀁 𑀦𑁂𑀢𑀺 𑀅𑀓𑀧𑁆𑀧𑀺𑀬𑁄.

‘‘𑀯𑀻𑀢𑀕𑁂𑀥𑁄 ¶ 𑀅𑀫𑀘𑁆𑀙𑀭𑀻, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺;

𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀓𑀧𑁆𑀧𑀁 𑀦𑁂𑀢𑀺 𑀅𑀓𑀧𑁆𑀧𑀺𑀬𑁄’’𑀢𑀺.

𑀬𑀲𑁆𑀲 𑀮𑁄𑀓𑁂 𑀲𑀓𑀁 𑀦𑀢𑁆𑀣𑀺, 𑀅𑀲𑀢𑀸 𑀘 𑀦 𑀲𑁄𑀘𑀢𑀺;

𑀥𑀫𑁆𑀫𑁂𑀲𑀼 𑀘 𑀦 𑀕𑀘𑁆𑀙𑀢𑀺, 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀲 ¶ 𑀮𑁄𑀓𑁂 𑀲𑀓𑀁 𑀦𑀢𑁆𑀣𑀻𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀮𑁄𑀓𑁂 𑀲𑀓𑀁 𑀦𑀢𑁆𑀣𑀻𑀢𑀺. 𑀢𑀲𑁆𑀲 𑀫𑀬𑁆𑀳𑀁 𑀯𑀸 𑀇𑀤𑀁 𑀧𑀭𑁂𑀲𑀁 𑀯𑀸 𑀇𑀤𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁, 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁, 𑀦𑀢𑁆𑀣𑀺 𑀦 𑀲𑀦𑁆𑀢𑀺…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀬𑀲𑁆𑀲 𑀮𑁄𑀓𑁂 𑀲𑀓𑀁 𑀦𑀢𑁆𑀣𑀺. 𑀅𑀲𑀢𑀸 𑀘 𑀦 𑀲𑁄𑀘𑀢𑀻𑀢𑀺. 𑀯𑀺𑀧𑀭𑀺𑀡𑀢𑀁 𑀯𑀸 𑀯𑀢𑁆𑀣𑀼𑀁 𑀦 𑀲𑁄𑀘𑀢𑀺, 𑀯𑀺𑀧𑀭𑀺𑀡𑀢𑀲𑁆𑀫𑀺𑀁 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑁄𑀘𑀢𑀺. 𑀘𑀓𑁆𑀔𑀼 𑀫𑁂 𑀯𑀺𑀧𑀭𑀺𑀡𑀢𑀦𑁆𑀢𑀺 𑀦 𑀲𑁄𑀘𑀢𑀺. 𑀲𑁄𑀢𑀁 𑀫𑁂… 𑀖𑀸𑀦𑀁 𑀫𑁂… 𑀚𑀺𑀯𑁆𑀳𑀸 𑀫𑁂… 𑀓𑀸𑀬𑁄 𑀫𑁂… 𑀫𑀦𑁄 𑀫𑁂… 𑀭𑀽𑀧𑀸 𑀫𑁂… 𑀲𑀤𑁆𑀤𑀸 𑀫𑁂… 𑀕𑀦𑁆𑀥𑀸 𑀫𑁂… 𑀭𑀲𑀸 𑀫𑁂… 𑀨𑁄𑀝𑁆𑀞𑀩𑁆𑀩𑀸 𑀫𑁂… 𑀓𑀼𑀮𑀁 𑀫𑁂… 𑀕𑀡𑁄 𑀫𑁂… 𑀆𑀯𑀸𑀲𑁄 𑀫𑁂… 𑀮𑀸𑀪𑁄 𑀫𑁂… 𑀬𑀲𑁄 𑀫𑁂… 𑀧𑀲𑀁𑀲𑀸 𑀫𑁂… 𑀲𑀼𑀔𑀁 𑀫𑁂… 𑀘𑀻𑀯𑀭𑀁 𑀫𑁂… 𑀧𑀺𑀡𑁆𑀟𑀧𑀸𑀢𑁄 𑀫𑁂… 𑀲𑁂𑀦𑀸𑀲𑀦𑀁 𑀫𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄 𑀫𑁂… 𑀫𑀸𑀢𑀸 𑀫𑁂… 𑀧𑀺𑀢𑀸 𑀫𑁂… 𑀪𑀸𑀢𑀸 𑀫𑁂… 𑀪𑀕𑀺𑀦𑀻 𑀫𑁂… 𑀧𑀼𑀢𑁆𑀢𑁄 𑀫𑁂… 𑀥𑀻𑀢𑀸 𑀫𑁂… 𑀫𑀺𑀢𑁆𑀢𑀸 𑀫𑁂… 𑀅𑀫𑀘𑁆𑀘𑀸 𑀫𑁂… 𑀜𑀸𑀢𑀓𑀸 𑀫𑁂… 𑀲𑀸𑀮𑁄𑀳𑀺𑀢𑀸 𑀫𑁂 𑀯𑀺𑀧𑀭𑀺𑀡𑀢𑀸𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺, 𑀅𑀲𑀢𑀸 𑀘 𑀦 𑀲𑁄𑀘𑀢𑀺.

𑀅𑀣 𑀯𑀸 𑀅𑀲𑀦𑁆𑀢𑀸𑀬 [𑀅𑀲𑀢𑀸𑀬 (𑀲𑀻.), 𑀅𑀲𑀸𑀢𑀸𑀬 (𑀲𑁆𑀬𑀸.)] 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀦 ¶ 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 ¶ 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀘𑀓𑁆𑀔𑀼𑀭𑁄𑀕𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀲𑁄𑀢𑀭𑁄𑀕𑁂𑀦… 𑀖𑀸𑀦𑀭𑁄𑀕𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦… 𑀓𑀸𑀬𑀭𑁄𑀕𑁂𑀦… 𑀲𑀻𑀲𑀭𑁄𑀕𑁂𑀦… 𑀓𑀡𑁆𑀡𑀭𑁄𑀕𑁂𑀦… 𑀫𑀼𑀔𑀭𑁄𑀕𑁂𑀦… 𑀤𑀦𑁆𑀢𑀭𑁄𑀕𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀟𑀸𑀳𑁂𑀦… 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑁂𑀦… 𑀯𑀺𑀲𑀽𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦… 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸… 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬 ¶ … 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑁂𑀦… 𑀧𑀺𑀢𑁆𑀢𑁂𑀦… 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀺𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦 [𑀪𑀕𑀦𑁆𑀤𑀮𑀸𑀬 (𑀲𑀻. 𑀲𑁆𑀬𑀸.)] … 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 ¶ 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦… 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦… 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬… 𑀧𑀺𑀧𑀸𑀲𑀸𑀬… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺, 𑀅𑀲𑀢𑀸 𑀘 𑀦 𑀲𑁄𑀘𑀢𑀺.

𑀅𑀣 𑀯𑀸 𑀅𑀲𑀦𑁆𑀢𑁂 𑀅𑀲𑀁𑀯𑀺𑀚𑁆𑀚𑀫𑀸𑀦𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 [𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 (𑀲𑁆𑀬𑀸. 𑀓.)] 𑁋 ‘‘𑀅𑀳𑁄 𑀯𑀢 𑀫𑁂 𑀢𑀁 𑀦𑀢𑁆𑀣𑀺, 𑀲𑀺𑀬𑀸 𑀯𑀢 𑀫𑁂 𑀢𑀁, 𑀢𑀁 𑀯𑀢𑀸𑀳𑀁 𑀦 𑀘 𑀮𑀪𑀸𑀫𑀻’’𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀅𑀲𑀢𑀸 𑀘 𑀦 𑀲𑁄𑀘𑀢𑀺. 𑀥𑀫𑁆𑀫𑁂𑀲𑀼 ¶ 𑀘 𑀦 𑀕𑀘𑁆𑀙𑀢𑀻𑀢𑀺 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀘 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀻𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀥𑀫𑁆𑀫𑁂𑀲𑀼 𑀘 𑀦 𑀕𑀘𑁆𑀙𑀢𑀺.

𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑁄 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 ¶ 𑀯𑁄𑀳𑀭𑀻𑀬𑀢𑀻𑀢𑀺 𑁋 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀲𑁆𑀲 ¶ 𑀮𑁄𑀓𑁂 𑀲𑀓𑀁 𑀦𑀢𑁆𑀣𑀺, 𑀅𑀲𑀢𑀸 𑀘 𑀦 𑀲𑁄𑀘𑀢𑀺;

𑀥𑀫𑁆𑀫𑁂𑀲𑀼 𑀘 𑀦 𑀕𑀘𑁆𑀙𑀢𑀺, 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀤𑀲𑀫𑁄.

𑁧𑁧. 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀓𑀼𑀢𑁄𑀧𑀳𑀽𑀢𑀸 ¶ ¶ 𑀓𑀮𑀳𑀸 𑀯𑀺𑀯𑀸𑀤𑀸, 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘;

𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘, 𑀓𑀼𑀢𑁄𑀧𑀳𑀽𑀢𑀸 𑀢𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺.

𑀓𑀼𑀢𑁄𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺. 𑀓𑀮𑀳𑁄𑀢𑀺 𑀏𑀓𑁂𑀦 𑀆𑀓𑀸𑀭𑁂𑀦 𑀓𑀮𑀳𑁄; 𑀯𑀺𑀯𑀸𑀤𑁄𑀢𑀺𑀧𑀺 𑀢𑀜𑁆𑀜𑁂𑀯. 𑀬𑁄 𑀓𑀮𑀳𑁄 𑀲𑁄 𑀯𑀺𑀯𑀸𑀤𑁄, 𑀬𑁄 𑀯𑀺𑀯𑀸𑀤𑁄 𑀲𑁄 𑀓𑀮𑀳𑁄. 𑀅𑀣 𑀯𑀸 𑀅𑀧𑀭𑁂𑀦 𑀆𑀓𑀸𑀭𑁂𑀦 𑀯𑀺𑀯𑀸𑀤𑁄 𑀯𑀼𑀘𑁆𑀘𑀢𑀺 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀯𑀺𑀯𑀸𑀤𑁄. 𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀺, 𑀔𑀢𑁆𑀢𑀺𑀬𑀸𑀧𑀺 𑀔𑀢𑁆𑀢𑀺𑀬𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀕𑀳𑀧𑀢𑀻𑀧𑀺 𑀕𑀳𑀧𑀢𑀻𑀳𑀺 𑀯𑀺𑀯𑀤𑀦𑁆𑀢𑀺, 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺 𑁋 𑀅𑀬𑀁 𑀯𑀺𑀯𑀸𑀤𑁄. 𑀓𑀢𑀫𑁄 𑀓𑀮𑀳𑁄? 𑀆𑀕𑀸𑀭𑀺𑀓𑀸 𑀤𑀡𑁆𑀟𑀧𑀲𑀼𑀢𑀸 𑀓𑀸𑀬𑁂𑀦 𑀯𑀸𑀘𑀸𑀬 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀓𑀸𑀬𑁂𑀦 𑀯𑀸𑀘𑀸𑀬 𑀓𑀮𑀳𑀁 𑀓𑀭𑁄𑀦𑁆𑀢𑀺 𑁋 𑀅𑀬𑀁 𑀓𑀮𑀳𑁄.

𑀓𑀼𑀢𑁄𑀧𑀳𑀽𑀢𑀸 ¶ 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺. 𑀓𑀮𑀳𑀸 𑀘 𑀯𑀺𑀯𑀸𑀤𑀸 𑀘 𑀓𑀼𑀢𑁄𑀧𑀳𑀽𑀢𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺 𑀓𑀮𑀳𑀲𑁆𑀲 𑀘 𑀯𑀺𑀯𑀸𑀤𑀲𑁆𑀲 𑀘 𑀫𑀽𑀮𑀁 𑀧𑀼𑀘𑁆𑀙𑀢𑀺, 𑀳𑁂𑀢𑀼𑀁 𑀧𑀼𑀘𑁆𑀙𑀢𑀺 ¶ , 𑀦𑀺𑀤𑀸𑀦𑀁 𑀧𑀼𑀘𑁆𑀙𑀢𑀺, 𑀲𑀫𑁆𑀪𑀯𑀁 𑀧𑀼𑀘𑁆𑀙𑀢𑀺, 𑀧𑀪𑀯𑀁 𑀧𑀼𑀘𑁆𑀙𑀢𑀺, 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, 𑀆𑀳𑀸𑀭𑀁 𑀧𑀼𑀘𑁆𑀙𑀢𑀺, 𑀆𑀭𑀫𑁆𑀫𑀡𑀁 𑀧𑀼𑀘𑁆𑀙𑀢𑀺, 𑀧𑀘𑁆𑀘𑀬𑀁 𑀧𑀼𑀘𑁆𑀙𑀢𑀺, 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 ¶ 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 [𑀅𑀚𑁆𑀛𑁄𑀲𑀢𑀺 (𑀲𑀻.)] 𑀧𑀲𑀸𑀤𑁂𑀢𑀻𑀢𑀺 𑁋 𑀓𑀼𑀢𑁄𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸.

𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘𑀸𑀢𑀺. 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 ¶ 𑀯𑀸 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲, 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄, 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸, 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁, 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁. 𑀲𑁄𑀓𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀪𑁄𑀕𑀭𑁄𑀕𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲, 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁, 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄, 𑀅𑀦𑁆𑀢𑁄𑀟𑀸𑀳𑁄 𑀅𑀦𑁆𑀢𑁄𑀧𑀭𑀺𑀟𑀸𑀳𑁄, 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸 𑀤𑁄𑀫𑀦𑀲𑁆𑀲𑀁 𑀲𑁄𑀓𑀲𑀮𑁆𑀮𑀁. 𑀫𑀘𑁆𑀙𑀭𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀸𑀬𑀦𑀁 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘, 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 ¶ , 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 ¶ 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀦𑁆𑀢𑀺 𑁋 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘.

𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘𑀸𑀢𑀺. 𑀫𑀸𑀦𑁄𑀢𑀺 𑀇𑀥𑁂𑀓𑀘𑁆𑀘𑁄 𑀫𑀸𑀦𑀁 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀅𑀢𑀺𑀫𑀸𑀦𑁄𑀢𑀺 𑀇𑀥𑁂𑀓𑀘𑁆𑀘𑁄 𑀧𑀭𑀁 𑀅𑀢𑀺𑀫𑀜𑁆𑀜𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀧𑁂𑀲𑀼𑀜𑁆𑀜𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺 𑁋 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸, 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀯𑀕𑁆𑀕𑀸𑀭𑀸𑀫𑁄 𑀯𑀕𑁆𑀕𑀭𑀢𑁄 𑀯𑀕𑁆𑀕𑀦𑀦𑁆𑀤𑀻 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀧𑁂𑀲𑀼𑀜𑁆𑀜𑀁. 𑀅𑀧𑀺 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀯𑀸. 𑀓𑀣𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺? 𑀇𑀫𑀲𑁆𑀲 𑀧𑀺𑀬𑁄 ¶ 𑀪𑀯𑀺𑀲𑁆𑀲𑀸𑀫𑀺, 𑀫𑀦𑀸𑀧𑁄 𑀪𑀯𑀺𑀲𑁆𑀲𑀸𑀫𑀺, 𑀯𑀺𑀲𑁆𑀲𑀸𑀲𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀅𑀩𑁆𑀪𑀦𑁆𑀢𑀭𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀲𑀼𑀳𑀤𑀬𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑁋 𑀏𑀯𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀓𑀣𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺? 𑀓𑀣𑀁 𑀇𑀫𑁂 𑀦𑀸𑀦𑀸 𑀅𑀲𑁆𑀲𑀼, 𑀯𑀺𑀦𑀸 𑀅𑀲𑁆𑀲𑀼, 𑀯𑀕𑁆𑀕𑀸 𑀅𑀲𑁆𑀲𑀼, 𑀤𑁆𑀯𑀺𑀥𑀸 𑀅𑀲𑁆𑀲𑀼, 𑀤𑁆𑀯𑁂𑀚𑁆𑀛𑀸 𑀅𑀲𑁆𑀲𑀼, 𑀤𑁆𑀯𑁂 𑀧𑀓𑁆𑀔𑀸 𑀅𑀲𑁆𑀲𑀼, 𑀪𑀺𑀚𑁆𑀚𑁂𑀬𑁆𑀬𑀼𑀁 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀁, 𑀤𑀼𑀓𑁆𑀔𑀁 𑀦 𑀨𑀸𑀲𑀼 ¶ 𑀯𑀺𑀳𑀭𑁂𑀬𑁆𑀬𑀼𑀦𑁆𑀢𑀺 𑁋 𑀏𑀯𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀻𑀢𑀺 𑁋 𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘.

𑀓𑀼𑀢𑁄𑀧𑀳𑀽𑀢𑀸 𑀢𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻𑀢𑀺. 𑀓𑀮𑀳𑁄 𑀘 𑀯𑀺𑀯𑀸𑀤𑁄 𑀘 𑀧𑀭𑀺𑀤𑁂𑀯𑁄 𑀘 𑀲𑁄𑀓𑁄 𑀘 𑀫𑀘𑁆𑀙𑀭𑀺𑀬𑀜𑁆𑀘 𑀫𑀸𑀦𑁄 𑀘 𑀅𑀢𑀺𑀫𑀸𑀦𑁄 𑀘 ¶ 𑀧𑁂𑀲𑀼𑀜𑁆𑀜𑀜𑁆𑀘𑀸𑀢𑀺 𑁋 𑀇𑀫𑁂 𑀅𑀝𑁆𑀞 𑀓𑀺𑀮𑁂𑀲𑀸 𑀓𑀼𑀢𑁄𑀧𑀳𑀽𑀢𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 ¶ 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺. 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀓𑀺𑀮𑁂𑀲𑀸𑀦𑀁 𑀫𑀽𑀮𑀁 𑀧𑀼𑀘𑁆𑀙𑀢𑀺, 𑀳𑁂𑀢𑀼𑀁 𑀧𑀼𑀘𑁆𑀙𑀢𑀺, 𑀦𑀺𑀤𑀸𑀦𑀁 𑀧𑀼𑀘𑁆𑀙𑀢𑀺, 𑀲𑀫𑁆𑀪𑀯𑀁 𑀧𑀼𑀘𑁆𑀙𑀢𑀺, 𑀧𑀪𑀯𑀁 𑀧𑀼𑀘𑁆𑀙𑀢𑀺, 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, 𑀆𑀳𑀸𑀭𑀁 𑀧𑀼𑀘𑁆𑀙𑀢𑀺, 𑀆𑀭𑀫𑁆𑀫𑀡𑀁 𑀧𑀼𑀘𑁆𑀙𑀢𑀺, 𑀧𑀘𑁆𑀘𑀬𑀁 𑀧𑀼𑀘𑁆𑀙𑀢𑀺, 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀓𑀼𑀢𑁄𑀧𑀳𑀽𑀢𑀸 𑀢𑁂 𑀢𑀤𑀺𑀗𑁆𑀖𑀁 𑀩𑁆𑀭𑀽𑀳𑀻𑀢𑀺. 𑀇𑀗𑁆𑀖 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀓𑀼𑀢𑁄𑀧𑀳𑀽𑀢𑀸 𑀢𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺.

‘‘𑀓𑀼𑀢𑁄𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸, 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘;

𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘, 𑀓𑀼𑀢𑁄𑀧𑀳𑀽𑀢𑀸 𑀢𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺.

𑀧𑀺𑀬𑀧𑁆𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸, 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘;

𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘, 𑀫𑀘𑁆𑀙𑁂𑀭𑀬𑀼𑀢𑁆𑀢𑀸 ¶ 𑀓𑀮𑀳𑀸 𑀯𑀺𑀯𑀸𑀤𑀸;

𑀯𑀺𑀯𑀸𑀤𑀚𑀸𑀢𑁂𑀲𑀼 𑀘 𑀧𑁂𑀲𑀼𑀡𑀸𑀦𑀺.

𑀧𑀺𑀬𑀧𑁆𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸, 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘𑀸𑀢𑀺. 𑀧𑀺𑀬𑀸𑀢𑀺 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸? 𑀇𑀥 𑀬𑀲𑁆𑀲 ¶ 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑁋 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸.

𑀧𑀺𑀬𑀁 𑀯𑀢𑁆𑀣𑀼𑀁 ¶ 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀯𑀺𑀯𑀤𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀯𑀺𑀯𑀤𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀯𑀺𑀯𑀤𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀯𑀺𑀯𑀤𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀯𑀺𑀯𑀤𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀯𑀺𑀯𑀤𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀲𑁄𑀘𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 ¶ 𑀲𑁄𑀘𑀦𑁆𑀢𑀺 ¶ , 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀲𑁄𑀘𑀦𑁆𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀫𑀸𑀬𑀦𑁆𑀢𑀺 𑀫𑀘𑁆𑀙𑀭𑀸𑀬𑀦𑁆𑀢𑀺.

𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘𑀸𑀢𑀺. 𑀧𑀺𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀦𑁂𑀦𑁆𑀢𑀺, 𑀧𑀺𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀅𑀢𑀺𑀫𑀸𑀦𑀁 𑀚𑀦𑁂𑀦𑁆𑀢𑀺. 𑀓𑀣𑀁 𑀧𑀺𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀦𑁂𑀦𑁆𑀢𑀺? 𑀫𑀬𑀁 𑀮𑀸𑀪𑀺𑀦𑁄 𑀫𑀦𑀸𑀧𑀺𑀓𑀸𑀦𑀁 𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀕𑀦𑁆𑀥𑀸𑀦𑀁 𑀭𑀲𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀦𑀦𑁆𑀢𑀺. 𑀏𑀯𑀁 𑀧𑀺𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀦𑁂𑀦𑁆𑀢𑀺. 𑀓𑀣𑀁 𑀧𑀺𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀅𑀢𑀺𑀫𑀸𑀦𑀁 𑀚𑀦𑁂𑀦𑁆𑀢𑀺? 𑀫𑀬𑀁 𑀮𑀸𑀪𑀺𑀦𑁄 𑀫𑀦𑀸𑀧𑀺𑀓𑀸𑀦𑀁 𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀕𑀦𑁆𑀥𑀸𑀦𑀁 𑀭𑀲𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀦𑀁, 𑀇𑀫𑁂 𑀧𑀦𑀜𑁆𑀜𑁂 𑀦 𑀮𑀸𑀪𑀺𑀦𑁄 𑀫𑀦𑀸𑀧𑀺𑀓𑀸𑀦𑀁 𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀕𑀦𑁆𑀥𑀸𑀦𑀁 𑀭𑀲𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀦𑀦𑁆𑀢𑀺. 𑀏𑀯𑀁 𑀧𑀺𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀅𑀢𑀺𑀫𑀸𑀦𑀁 𑀚𑀦𑁂𑀦𑁆𑀢𑀺. 𑀧𑁂𑀲𑀼𑀜𑁆𑀜𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬…𑀧𑁂… 𑀏𑀯𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀻𑀢𑀺…𑀧𑁂… 𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘.

𑀫𑀘𑁆𑀙𑁂𑀭𑀬𑀼𑀢𑁆𑀢𑀸 ¶ 𑀓𑀮𑀳𑀸 𑀯𑀺𑀯𑀸𑀤𑀸𑀢𑀺. 𑀓𑀮𑀳𑁄 𑀘 𑀯𑀺𑀯𑀸𑀤𑁄 𑀘 𑀧𑀭𑀺𑀤𑁂𑀯𑁄 𑀘 𑀲𑁄𑀓𑁄 𑀘 𑀫𑀸𑀦𑁄 𑀘 𑀅𑀢𑀺𑀫𑀸𑀦𑁄 𑀘 𑀧𑁂𑀲𑀼𑀜𑁆𑀜𑀜𑁆𑀘𑀸𑀢𑀺 𑁋 𑀇𑀫𑁂 𑀲𑀢𑁆𑀢 𑀓𑀺𑀮𑁂𑀲𑀸 𑀫𑀘𑁆𑀙𑀭𑀺𑀬𑁂 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸 𑀆𑀬𑀼𑀢𑁆𑀢𑀸 𑀲𑀫𑀸𑀬𑀼𑀢𑁆𑀢𑀸𑀢𑀺 𑁋 𑀫𑀘𑁆𑀙𑁂𑀭𑀬𑀼𑀢𑁆𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸.

𑀯𑀺𑀯𑀸𑀤𑀚𑀸𑀢𑁂𑀲𑀼 ¶ 𑀘 𑀧𑁂𑀲𑀼𑀡𑀸𑀦𑀻𑀢𑀺. 𑀯𑀺𑀯𑀸𑀤𑁂 𑀚𑀸𑀢𑁂 𑀲𑀜𑁆𑀚𑀸𑀢𑁂 𑀦𑀺𑀩𑁆𑀩𑀢𑁆𑀢𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀧𑀸𑀢𑀼𑀪𑀽𑀢𑁂 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀺; 𑀇𑀢𑁄 𑀲𑀼𑀢𑁆𑀯𑀸 ¶ 𑀅𑀫𑀼𑀢𑁆𑀭 𑀅𑀓𑁆𑀔𑀸𑀬𑀦𑁆𑀢𑀺 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀬𑀦𑁆𑀢𑀺 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸𑀭𑁄, 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸𑀭𑁄, 𑀯𑀕𑁆𑀕𑀸𑀭𑀸𑀫𑀸 𑀯𑀕𑁆𑀕𑀭𑀢𑀸 𑀯𑀕𑁆𑀕𑀦𑀦𑁆𑀤𑀻 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀭𑁄 𑀳𑁄𑀦𑁆𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀧𑁂𑀲𑀼𑀜𑁆𑀜𑀁. 𑀅𑀧𑀺 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀺 𑁋 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀯𑀸. 𑀓𑀣𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀺? 𑀇𑀫𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀸𑀫, 𑀫𑀦𑀸𑀧𑀸 𑀪𑀯𑀺𑀲𑁆𑀲𑀸𑀫, 𑀯𑀺𑀲𑁆𑀲𑀸𑀲𑀺𑀓𑀸 𑀪𑀯𑀺𑀲𑁆𑀲𑀸𑀫, 𑀅𑀩𑁆𑀪𑀦𑁆𑀢𑀭𑀺𑀓𑀸 𑀪𑀯𑀺𑀲𑁆𑀲𑀸𑀫, 𑀲𑀼𑀳𑀤𑀬𑀸 𑀪𑀯𑀺𑀲𑁆𑀲𑀸𑀫𑀸𑀢𑀺. 𑀏𑀯𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀺. 𑀓𑀣𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀺? ‘‘𑀓𑀣𑀁 𑀇𑀫𑁂 𑀦𑀸𑀦𑀸 𑀅𑀲𑁆𑀲𑀼, 𑀯𑀺𑀦𑀸 𑀅𑀲𑁆𑀲𑀼, 𑀯𑀕𑁆𑀕𑀸 𑀅𑀲𑁆𑀲𑀼, 𑀤𑁆𑀯𑁂𑀥𑀸 𑀅𑀲𑁆𑀲𑀼, 𑀤𑁆𑀯𑁂𑀚𑁆𑀛𑀸 𑀅𑀲𑁆𑀲𑀼, 𑀤𑁆𑀯𑁂 𑀧𑀓𑁆𑀔𑀸 𑀅𑀲𑁆𑀲𑀼, 𑀪𑀺𑀚𑁆𑀚𑁂𑀬𑁆𑀬𑀼𑀁 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀁, 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺 𑁋 𑀏𑀯𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑁋 𑀯𑀺𑀯𑀸𑀤𑀚𑀸𑀢𑁂𑀲𑀼 𑀘 𑀧𑁂𑀲𑀼𑀡𑀸𑀦𑀺.

‘‘𑀧𑀺𑀬𑀧𑁆𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸, 𑀧𑀭𑀺𑀤𑁂𑀯𑀲𑁄𑀓𑀸 𑀲𑀳𑀫𑀘𑁆𑀙𑀭𑀸 𑀘;

𑀫𑀸𑀦𑀸𑀢𑀺𑀫𑀸𑀦𑀸 𑀲𑀳𑀧𑁂𑀲𑀼𑀡𑀸 𑀘, 𑀫𑀘𑁆𑀙𑁂𑀭𑀬𑀼𑀢𑁆𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸;

𑀯𑀺𑀯𑀸𑀤𑀚𑀸𑀢𑁂𑀲𑀼 𑀘 𑀧𑁂𑀲𑀼𑀡𑀸𑀦𑀻’’𑀢𑀺.

𑀧𑀺𑀬𑀸 ¶ ¶ 𑀲𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸, 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀓𑀼𑀢𑁄𑀦𑀺𑀤𑀸𑀦𑀸, 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀺.

𑀧𑀺𑀬𑀸 𑀲𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸𑀢𑀺. 𑀧𑀺𑀬𑀸 𑀓𑀼𑀢𑁄𑀦𑀺𑀤𑀸𑀦𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺 𑀧𑀺𑀬𑀸𑀦𑀁 𑀫𑀽𑀮𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀧𑀺𑀬𑀸 𑀲𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸.

𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺. 𑀬𑁂 𑀘𑀸𑀧𑀻𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 ¶ 𑀘. 𑀮𑁄𑀪𑀸𑀢𑀺 𑀬𑁄 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀲𑀸𑀭𑀸𑀕𑁄 𑀲𑀸𑀭𑀚𑁆𑀚𑀦𑀸 𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀘𑀭𑀦𑁆𑀢𑀻𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂.

𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀓𑀼𑀢𑁄𑀦𑀺𑀤𑀸𑀦𑀸𑀢𑀺. 𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀓𑀼𑀢𑁄𑀦𑀺𑀤𑀸𑀦𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺 𑀆𑀲𑀸𑀬 ¶ 𑀘 𑀦𑀺𑀝𑁆𑀞𑀸𑀬 𑀘 𑀫𑀽𑀮𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀓𑀼𑀢𑁄𑀦𑀺𑀤𑀸𑀦𑀸. 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀻𑀢𑀺. 𑀬𑁂 𑀦𑀭𑀲𑁆𑀲 𑀧𑀭𑀸𑀬𑀦𑀸 𑀳𑁄𑀦𑁆𑀢𑀺 𑀤𑀻𑀧𑀸 𑀳𑁄𑀦𑁆𑀢𑀺 𑀢𑀸𑀡𑀸 𑀳𑁄𑀦𑁆𑀢𑀺 𑀮𑁂𑀡𑀸 𑀳𑁄𑀦𑁆𑀢𑀺 𑀲𑀭𑀡𑀸 𑀳𑁄𑀦𑁆𑀢𑀺 𑀦𑀺𑀝𑁆𑀞𑀸 𑀧𑀭𑀸𑀬𑀦𑀸 𑀳𑁄𑀦𑁆𑀢𑀻𑀢𑀺 𑁋 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀺.

‘‘𑀧𑀺𑀬𑀸 ¶ 𑀲𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑀸, 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀓𑀼𑀢𑁄𑀦𑀺𑀤𑀸𑀦𑀸, 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀻’’𑀢𑀺.

𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀺 ¶ 𑀧𑀺𑀬𑀸𑀦𑀺 𑀮𑁄𑀓𑁂, 𑀬𑁂 𑀘𑀸𑀧𑀺 [𑀬𑁂 𑀯𑀸𑀧𑀺 (𑀲𑁆𑀬𑀸.)] 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀇𑀢𑁄𑀦𑀺𑀤𑀸𑀦𑀸, 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀺.

𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀺 𑀧𑀺𑀬𑀸𑀦𑀺 𑀮𑁄𑀓𑁂𑀢𑀺. 𑀙𑀦𑁆𑀤𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀅𑀧𑀺 𑀘 𑀧𑀜𑁆𑀘 𑀙𑀦𑁆𑀤𑀸 𑁋 𑀧𑀭𑀺𑀬𑁂𑀲𑀦𑀘𑁆𑀙𑀦𑁆𑀤𑁄, 𑀧𑀝𑀺𑀮𑀸𑀪𑀘𑁆𑀙𑀦𑁆𑀤𑁄, 𑀧𑀭𑀺𑀪𑁄𑀕𑀘𑁆𑀙𑀦𑁆𑀤𑁄, 𑀲𑀦𑁆𑀦𑀺𑀥𑀺𑀘𑁆𑀙𑀦𑁆𑀤𑁄, 𑀯𑀺𑀲𑀚𑁆𑀚𑀦𑀘𑁆𑀙𑀦𑁆𑀤𑁄. 𑀓𑀢𑀫𑁄 ¶ 𑀧𑀭𑀺𑀬𑁂𑀲𑀦𑀘𑁆𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑁄𑀲𑀺𑀢𑁄𑀬𑁂𑀯 𑀅𑀢𑁆𑀣𑀺𑀓𑁄 𑀙𑀦𑁆𑀤𑀚𑀸𑀢𑁄 𑀭𑀽𑀧𑁂 𑀧𑀭𑀺𑀬𑁂𑀲𑀢𑀺, 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀬𑁂𑀲𑀢𑀺 𑁋 𑀅𑀬𑀁 ¶ 𑀧𑀭𑀺𑀬𑁂𑀲𑀦𑀘𑁆𑀙𑀦𑁆𑀤𑁄. 𑀓𑀢𑀫𑁄 𑀧𑀝𑀺𑀮𑀸𑀪𑀘𑁆𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑁄𑀲𑀺𑀢𑁄𑀬𑁂𑀯 𑀅𑀢𑁆𑀣𑀺𑀓𑁄 𑀙𑀦𑁆𑀤𑀚𑀸𑀢𑁄 𑀭𑀽𑀧𑁂 𑀧𑀝𑀺𑀮𑀪𑀢𑀺, 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀝𑀺𑀮𑀪𑀢𑀺 𑁋 𑀅𑀬𑀁 𑀧𑀝𑀺𑀮𑀸𑀪𑀘𑁆𑀙𑀦𑁆𑀤𑁄. 𑀓𑀢𑀫𑁄 𑀧𑀭𑀺𑀪𑁄𑀕𑀘𑁆𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑁄𑀲𑀺𑀢𑁄𑀬𑁂𑀯 𑀅𑀢𑁆𑀣𑀺𑀓𑁄 𑀙𑀦𑁆𑀤𑀚𑀸𑀢𑁄 𑀭𑀽𑀧𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀪𑀼𑀜𑁆𑀚𑀢𑀺 𑁋 𑀅𑀬𑀁 𑀧𑀭𑀺𑀪𑁄𑀕𑀘𑁆𑀙𑀦𑁆𑀤𑁄. 𑀓𑀢𑀫𑁄 𑀲𑀦𑁆𑀦𑀺𑀥𑀺𑀘𑁆𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑁄𑀲𑀺𑀢𑁄𑀬𑁂𑀯 𑀅𑀢𑁆𑀣𑀺𑀓𑁄 𑀙𑀦𑁆𑀤𑀚𑀸𑀢𑁄 𑀥𑀦𑀲𑀦𑁆𑀦𑀺𑀘𑀬𑀁 𑀓𑀭𑁄𑀢𑀺 ‘‘𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺 𑁋 𑀅𑀬𑀁 𑀲𑀦𑁆𑀦𑀺𑀥𑀺𑀘𑁆𑀙𑀦𑁆𑀤𑁄. 𑀓𑀢𑀫𑁄 𑀯𑀺𑀲𑀚𑁆𑀚𑀦𑀘𑁆𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑁄𑀲𑀺𑀢𑁄𑀬𑁂𑀯 𑀅𑀢𑁆𑀣𑀺𑀓𑁄 𑀙𑀦𑁆𑀤𑀚𑀸𑀢𑁄 𑀥𑀦𑀁 𑀯𑀺𑀲𑀚𑁆𑀚𑁂𑀢𑀺 𑀳𑀢𑁆𑀣𑀸𑀭𑁄𑀳𑀸𑀦𑀁 𑀅𑀲𑁆𑀲𑀸𑀭𑁄𑀳𑀸𑀦𑀁 𑀭𑀣𑀺𑀓𑀸𑀦𑀁 𑀥𑀦𑀼𑀕𑁆𑀕𑀳𑀸𑀦𑀁 𑀧𑀢𑁆𑀢𑀺𑀓𑀸𑀦𑀁 ‘‘𑀇𑀫𑁂 𑀫𑀁 𑀭𑀓𑁆𑀔𑀺𑀲𑁆𑀲𑀦𑁆𑀢𑀺 𑀕𑁄𑀧𑀺𑀲𑁆𑀲𑀦𑁆𑀢𑀺 𑀲𑀫𑁆𑀧𑀭𑀺𑀯𑀸𑀭𑀺𑀲𑁆𑀲𑀦𑁆𑀢𑀻’’𑀢𑀺 𑁋 𑀅𑀬𑀁 𑀯𑀺𑀲𑀚𑁆𑀚𑀦𑀘𑁆𑀙𑀦𑁆𑀤𑁄. 𑀧𑀺𑀬𑀸𑀦𑀻𑀢𑀺 ¶ 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸…𑀧𑁂… 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸…𑀧𑁂… 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸. 𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀺 𑀧𑀺𑀬𑀸𑀦𑀺 𑀮𑁄𑀓𑁂𑀢𑀺. 𑀧𑀺𑀬𑀸 𑀙𑀦𑁆𑀤𑀦𑀺𑀤𑀸𑀦𑀸 𑀙𑀦𑁆𑀤𑀲𑀫𑀼𑀤𑀬𑀸 𑀙𑀦𑁆𑀤𑀚𑀸𑀢𑀺𑀓𑀸 𑀙𑀦𑁆𑀤𑀧𑀪𑀯𑀸𑀢𑀺 𑁋 𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀺 𑀧𑀺𑀬𑀸𑀦𑀺 𑀮𑁄𑀓𑁂.

𑀬𑁂 ¶ 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂𑀢𑀺. 𑀬𑁂 𑀘𑀸𑀧𑀻𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀮𑁄𑀪𑀸𑀢𑀺 𑀬𑁄 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀲𑀸𑀭𑀸𑀕𑁄 𑀲𑀸𑀭𑀚𑁆𑀚𑀦𑀸 𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀘𑀭𑀦𑁆𑀢𑀻𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂.

𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀇𑀢𑁄𑀦𑀺𑀤𑀸𑀦𑀸𑀢𑀺. 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀦𑀺𑀝𑁆𑀞𑀸𑀢𑀺 𑀇𑀥𑁂𑀓𑀘𑁆𑀘𑁄 𑀭𑀽𑀧𑁂 𑀧𑀭𑀺𑀬𑁂𑀲𑀦𑁆𑀢𑁄 𑀭𑀽𑀧𑀁 𑀧𑀝𑀺𑀮𑀪𑀢𑀺, 𑀭𑀽𑀧𑀦𑀺𑀝𑁆𑀞𑁄 𑀳𑁄𑀢𑀺, 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 ¶ … 𑀲𑀼𑀢𑁆𑀢𑀦𑁆𑀢𑀁… 𑀯𑀺𑀦𑀬𑀁… 𑀅𑀪𑀺𑀥𑀫𑁆𑀫𑀁… 𑀆𑀭𑀜𑁆𑀜𑀺𑀓𑀗𑁆𑀕𑀁… 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁… 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁… 𑀢𑁂𑀘𑀻𑀯𑀭𑀺𑀓𑀗𑁆𑀕𑀁… 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁… 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁… 𑀦𑁂𑀲𑀚𑁆𑀚𑀺𑀓𑀗𑁆𑀕𑀁… 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁… 𑀧𑀞𑀫𑀁 𑀛𑀸𑀦𑀁… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 ¶ … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀭𑀺𑀬𑁂𑀲𑀦𑁆𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀦𑀺𑀝𑁆𑀞𑁄 𑀳𑁄𑀢𑀺.

‘‘𑀆𑀲𑀸𑀬 ¶ 𑀓𑀲𑀢𑁂 𑀔𑁂𑀢𑁆𑀢𑀁, 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀺;

𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀺, 𑀲𑀫𑀼𑀤𑁆𑀤𑀁 𑀥𑀦𑀳𑀸𑀭𑀓𑀸;

𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀺, 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀻’’𑀢𑀺.

𑀆𑀲𑀸𑀬 𑀲𑀫𑀺𑀤𑁆𑀥𑀺 𑀯𑀼𑀘𑁆𑀘𑀢𑁂 𑀦𑀺𑀝𑁆𑀞𑀸. 𑀆𑀲𑀸 ¶ 𑀘 𑀦𑀺𑀝𑁆𑀞𑀸 𑀘 𑀇𑀢𑁄𑀦𑀺𑀤𑀸𑀦𑀸𑀢𑀺. 𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀇𑀢𑁄 𑀙𑀦𑁆𑀤𑀦𑀺𑀤𑀸𑀦𑀸 𑀙𑀦𑁆𑀤𑀲𑀫𑀼𑀤𑀬𑀸 𑀙𑀦𑁆𑀤𑀚𑀸𑀢𑀺𑀓𑀸 𑀙𑀦𑁆𑀤𑀧𑀪𑀯𑀸𑀢𑀺 𑁋 𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀇𑀢𑁄𑀦𑀺𑀤𑀸𑀦𑀸.

𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀻𑀢𑀺. 𑀬𑁂 𑀦𑀭𑀲𑁆𑀲 𑀧𑀭𑀸𑀬𑀦𑀸 𑀳𑁄𑀦𑁆𑀢𑀺 𑀤𑀻𑀧𑀸 𑀳𑁄𑀦𑁆𑀢𑀺 𑀢𑀸𑀡𑀸 𑀳𑁄𑀦𑁆𑀢𑀺 𑀮𑁂𑀡𑀸 𑀳𑁄𑀦𑁆𑀢𑀺 𑀲𑀭𑀡𑀸 𑀳𑁄𑀦𑁆𑀢𑀺 𑀦𑀺𑀝𑁆𑀞𑀸 𑀧𑀭𑀸𑀬𑀦𑀸 𑀳𑁄𑀦𑁆𑀢𑀻𑀢𑀺 𑁋 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀺.

‘‘𑀙𑀦𑁆𑀤𑀸𑀦𑀺𑀤𑀸𑀦𑀸𑀦𑀺 𑀧𑀺𑀬𑀸𑀦𑀺 𑀮𑁄𑀓𑁂, 𑀬𑁂 𑀘𑀸𑀧𑀺 𑀮𑁄𑀪𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀆𑀲𑀸 𑀘 𑀦𑀺𑀝𑁆𑀞𑀸 𑀘 𑀇𑀢𑁄𑀦𑀺𑀤𑀸𑀦𑀸, 𑀬𑁂 𑀲𑀫𑁆𑀧𑀭𑀸𑀬𑀸𑀬 𑀦𑀭𑀲𑁆𑀲 𑀳𑁄𑀦𑁆𑀢𑀻’’𑀢𑀺.

𑀙𑀦𑁆𑀤𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄, 𑀯𑀺𑀦𑀺𑀘𑁆𑀙𑀬𑀸 𑀘𑀸𑀧𑀺 [𑀯𑀸𑀧𑀺 (𑀲𑀻. 𑀲𑁆𑀬𑀸.)] 𑀓𑀼𑀢𑁄𑀧𑀳𑀽𑀢𑀸;

𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘, 𑀬𑁂 𑀘𑀸𑀧𑀺 𑀥𑀫𑁆𑀫𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸.

𑀙𑀦𑁆𑀤𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄𑀢𑀺. 𑀙𑀦𑁆𑀤𑁄 𑀓𑀼𑀢𑁄𑀦𑀺𑀤𑀸𑀦𑁄 𑀓𑀼𑀢𑁄𑀚𑀸𑀢𑁄 ¶ 𑀓𑀼𑀢𑁄𑀲𑀜𑁆𑀚𑀸𑀢𑁄 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑁄 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀓𑀼𑀢𑁄𑀧𑀸𑀢𑀼𑀪𑀽𑀢𑁄, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄𑀢𑀺 𑀙𑀦𑁆𑀤𑀲𑁆𑀲 𑀫𑀽𑀮𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀙𑀦𑁆𑀤𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄.

𑀯𑀺𑀦𑀺𑀘𑁆𑀙𑀬𑀸 ¶ 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸𑀢𑀺. 𑀯𑀺𑀦𑀺𑀘𑁆𑀙𑀬𑀸 𑀓𑀼𑀢𑁄𑀧𑀳𑀽𑀢𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸 ¶ , 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺 𑀯𑀺𑀦𑀺𑀘𑁆𑀙𑀬𑀸𑀦𑀁 𑀫𑀽𑀮𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀯𑀺𑀦𑀺𑀘𑁆𑀙𑀬𑀸 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸.

𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘𑀸𑀢𑀺. 𑀓𑁄𑀥𑁄𑀢𑀺 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄, 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄, 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄, 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 ¶ 𑀫𑀦𑁄𑀧𑀤𑁄𑀲𑁄, 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁, 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁, 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁, 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄, 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲. 𑀫𑁄𑀲𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀫𑀼𑀲𑀸𑀯𑀸𑀤𑁄. 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑁋 𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘.

𑀬𑁂 𑀘𑀸𑀧𑀺 𑀥𑀫𑁆𑀫𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸𑀢𑀺. 𑀬𑁂 𑀘𑀸𑀧𑀻𑀢𑀺 𑀬𑁂 𑀓𑁄𑀥𑁂𑀦 𑀘 𑀫𑁄𑀲𑀯𑀚𑁆𑀚𑁂𑀦 𑀘 𑀓𑀣𑀁𑀓𑀣𑀸𑀬 𑀘 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀘𑀸𑀧𑀺 𑀥𑀫𑁆𑀫𑀸. 𑀅𑀣 𑀯𑀸 𑀬𑁂 𑀢𑁂 𑀓𑀺𑀮𑁂𑀲𑀸 ¶ 𑀅𑀜𑁆𑀜𑀚𑀸𑀢𑀺𑀓𑀸 𑀅𑀜𑁆𑀜𑀯𑀺𑀳𑀺𑀢𑀓𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀘𑀸𑀧𑀺 𑀥𑀫𑁆𑀫𑀸. 𑀲𑀫𑀡𑁂𑀦 𑀯𑀼𑀢𑁆𑀢𑀸𑀢𑀺 𑀲𑀫𑀡𑁂𑀦 𑀲𑀫𑀺𑀢𑀧𑀸𑀧𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀦𑀸 𑀪𑀺𑀦𑁆𑀦𑀓𑀺𑀮𑁂𑀲𑀫𑀽𑀮𑁂𑀦 𑀲𑀩𑁆𑀩𑀸𑀓𑀼𑀲𑀮𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁂𑀦 𑀯𑀼𑀢𑁆𑀢𑀸 𑀧𑀯𑀼𑀢𑁆𑀢𑀸 𑀆𑀘𑀺𑀓𑁆𑀔𑀺𑀢𑀸 𑀤𑁂𑀲𑀺𑀢𑀸 𑀧𑀜𑁆𑀜𑀧𑀺𑀢𑀸 𑀧𑀝𑁆𑀞𑀧𑀺𑀢𑀸 𑀯𑀺𑀯𑀝𑀸 𑀯𑀺𑀪𑀢𑁆𑀢𑀸 𑀉𑀢𑁆𑀢𑀸𑀦𑀻𑀓𑀢𑀸 𑀧𑀓𑀸𑀲𑀺𑀢𑀸𑀢𑀺 𑁋 𑀬𑁂 𑀘𑀸𑀧𑀺 𑀥𑀫𑁆𑀫𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸.

‘‘𑀙𑀦𑁆𑀤𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄, 𑀯𑀺𑀦𑀺𑀘𑁆𑀙𑀢𑀸 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸;

𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘, 𑀬𑁂 𑀘𑀸𑀧𑀺 𑀥𑀫𑁆𑀫𑀸 𑀲𑀫𑀡𑁂𑀦 𑀯𑀼𑀢𑁆𑀢𑀸’’𑀢𑀺.

𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 𑀬𑀫𑀸𑀳𑀼 𑀮𑁄𑀓𑁂, 𑀢𑀫𑀽𑀧𑀦𑀺𑀲𑁆𑀲𑀸𑀬 𑀧𑀳𑁄𑀢𑀺 𑀙𑀦𑁆𑀤𑁄;

𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘, 𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 [𑀓𑀽𑀭𑀼𑀢𑁂 (𑀲𑁆𑀬𑀸.)] 𑀚𑀦𑁆𑀢𑀼 𑀮𑁄𑀓𑁂.

𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 𑀬𑀫𑀸𑀳𑀼 𑀮𑁄𑀓𑁂𑀢𑀺. 𑀲𑀸𑀢𑀦𑁆𑀢𑀺 𑀲𑀼𑀔𑀸 𑀘 𑀯𑁂𑀤𑀦𑀸, 𑀇𑀝𑁆𑀞𑀜𑁆𑀘 𑀯𑀢𑁆𑀣𑀼 [𑀯𑀢𑁆𑀣𑀼𑀁 (𑀲𑀻. 𑀓.)]. 𑀅𑀲𑀸𑀢𑀦𑁆𑀢𑀺 𑀤𑀼𑀓𑁆𑀔𑀸 𑀘 𑀯𑁂𑀤𑀦𑀸, 𑀅𑀦𑀺𑀝𑁆𑀞𑀜𑁆𑀘 𑀯𑀢𑁆𑀣𑀼. 𑀬𑀫𑀸𑀳𑀼 𑀮𑁄𑀓𑁂𑀢𑀺 ¶ 𑀬𑀁 𑀆𑀳𑀁𑀲𑀼 𑀬𑀁 𑀓𑀣𑁂𑀦𑁆𑀢𑀺 𑀬𑀁 𑀪𑀡𑀦𑁆𑀢𑀺 𑀬𑀁 𑀤𑀻𑀧𑁂𑀦𑁆𑀢𑀺 𑀬𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 𑀬𑀫𑀸𑀳𑀼 𑀮𑁄𑀓𑁂.

𑀢𑀫𑀽𑀧𑀦𑀺𑀲𑁆𑀲𑀸𑀬 ¶ ¶ 𑀧𑀳𑁄𑀢𑀺 𑀙𑀦𑁆𑀤𑁄𑀢𑀺. 𑀲𑀸𑀢𑀸𑀲𑀸𑀢𑀁 𑀦𑀺𑀲𑁆𑀲𑀸𑀬, 𑀲𑀼𑀔𑀤𑀼𑀓𑁆𑀔𑀁 𑀦𑀺𑀲𑁆𑀲𑀸𑀬, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀦𑀺𑀲𑁆𑀲𑀸𑀬, 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀺𑀲𑁆𑀲𑀸𑀬, 𑀅𑀦𑀼𑀦𑀬𑀧𑀝𑀺𑀖𑀁 ¶ 𑀦𑀺𑀲𑁆𑀲𑀸𑀬 𑀙𑀦𑁆𑀤𑁄 𑀧𑀳𑁄𑀢𑀺 𑀧𑀪𑀯𑀢𑀺 𑀚𑀸𑀬𑀢𑀺 𑀲𑀜𑁆𑀚𑀸𑀬𑀢𑀺 𑀦𑀺𑀩𑁆𑀩𑀢𑁆𑀢𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑁋 𑀢𑀫𑀽𑀧𑀦𑀺𑀲𑁆𑀲𑀸𑀬 𑀧𑀳𑁄𑀢𑀺 𑀙𑀦𑁆𑀤𑁄.

𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘𑀸𑀢𑀺. 𑀭𑀽𑀧𑁂𑀲𑀽𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀓𑀢𑀫𑁄 𑀭𑀽𑀧𑀸𑀦𑀁 𑀪𑀯𑁄? 𑀬𑁄 𑀭𑀽𑀧𑀸𑀦𑀁 𑀪𑀯𑁄 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄 𑁋 𑀅𑀬𑀁 𑀭𑀽𑀧𑀸𑀦𑀁 𑀪𑀯𑁄. 𑀓𑀢𑀫𑁄 𑀭𑀽𑀧𑀸𑀦𑀁 𑀯𑀺𑀪𑀯𑁄? 𑀬𑁄 𑀭𑀽𑀧𑀸𑀦𑀁 𑀔𑀬𑁄 𑀯𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄 𑀅𑀦𑀺𑀘𑁆𑀘𑀢𑀸 𑀅𑀦𑁆𑀢𑀭𑀥𑀸𑀦𑀁 𑁋 𑀅𑀬𑀁 𑀭𑀽𑀧𑀸𑀦𑀁 𑀯𑀺𑀪𑀯𑁄. 𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘𑀸𑀢𑀺 𑀭𑀽𑀧𑁂𑀲𑀼 𑀪𑀯𑀜𑁆𑀘 𑀯𑀺𑀪𑀯𑀜𑁆𑀘 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘.

𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺. 𑀯𑀺𑀦𑀺𑀘𑁆𑀙𑀬𑀸𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸 𑁋 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀘, 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀘. 𑀓𑀣𑀁 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺? 𑀇𑀥𑁂𑀓𑀘𑁆𑀘𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀓𑁂𑀦 𑀦𑀼 𑀔𑁄 𑀫𑁂 𑀉𑀧𑀸𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀢𑀲𑁆𑀲 𑀧𑀦 𑀏𑀯𑀁 𑀳𑁄𑀢𑀺 ‘‘𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺; 𑀯𑀺𑀓𑀸𑀮𑀯𑀺𑀲𑀺𑀔𑀸𑀘𑀭𑀺𑀬𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 ¶ 𑀘𑁂𑀯 𑀪𑁄𑀕𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺; 𑀲𑀫𑀚𑁆𑀚𑀸𑀪𑀺𑀘𑀭𑀡𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂… 𑀚𑀼𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂… 𑀧𑀸𑀧𑀫𑀺𑀢𑁆𑀢𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺; 𑀆𑀮𑀲𑁆𑀬𑀸𑀦𑀼𑀬𑁄𑀕𑀁 ¶ 𑀅𑀦𑀼𑀬𑀼𑀢𑁆𑀢𑀲𑁆𑀲 𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀏𑀯𑀁 𑀜𑀸𑀡𑀁 𑀓𑀢𑁆𑀯𑀸 𑀙 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀸𑀦𑀺 𑀦 𑀲𑁂𑀯𑀢𑀺, 𑀙 𑀪𑁄𑀕𑀸𑀦𑀁 𑀆𑀬𑀫𑀼𑀔𑀸𑀦𑀺 𑀲𑁂𑀯𑀢𑀺. 𑀏𑀯𑀫𑁆𑀧𑀺 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺.

𑀅𑀣 ¶ 𑀯𑀸 𑀓𑀲𑀺𑀬𑀸 𑀯𑀸 𑀯𑀡𑀺𑀚𑁆𑀚𑀸𑀬 𑀯𑀸 𑀕𑁄𑀭𑀓𑁆𑀔𑁂𑀦 𑀯𑀸 𑀇𑀲𑁆𑀲𑀢𑁆𑀣𑁂𑀦 [𑀇𑀲𑁆𑀲𑀢𑁆𑀢𑁂𑀦 (𑀓. 𑀲𑀻. 𑀓.) 𑀇𑀲𑀼 + 𑀲𑀢𑁆𑀣] 𑀯𑀸 𑀭𑀸𑀚𑀧𑁄𑀭𑀺𑀲𑁂𑀦 𑀯𑀸 𑀲𑀺𑀧𑁆𑀧𑀜𑁆𑀜𑀢𑀭𑁂𑀦 𑀯𑀸 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺. 𑀓𑀣𑀁 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺? 𑀘𑀓𑁆𑀔𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀚𑀸𑀦𑀸𑀢𑀺 𑁋 ‘‘𑀅𑀢𑁆𑀢𑀸 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀚𑀸𑀦𑀸𑀢𑀺 𑁋 ‘‘𑀅𑀢𑁆𑀢𑀸 𑀫𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀕𑀢𑁄 𑀫𑁂 𑀅𑀢𑁆𑀢𑀸’’𑀢𑀺. 𑀏𑀯𑀫𑁆𑀧𑀺 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺. 𑀲𑁄𑀢𑀲𑁆𑀫𑀺𑀁… 𑀖𑀸𑀦𑀲𑁆𑀫𑀺𑀁… 𑀚𑀺𑀯𑁆𑀳𑀸𑀬… 𑀓𑀸𑀬𑀲𑁆𑀫𑀺𑀁… 𑀭𑀽𑀧𑀲𑁆𑀫𑀺𑀁… 𑀲𑀤𑁆𑀤𑀲𑁆𑀫𑀺𑀁… 𑀕𑀦𑁆𑀥𑀲𑁆𑀫𑀺𑀁… 𑀭𑀲𑀲𑁆𑀫𑀺𑀁… 𑀨𑁄𑀝𑁆𑀞𑀩𑁆𑀩𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀚𑀸𑀦𑀸𑀢𑀺 𑁋 ‘‘𑀅𑀢𑁆𑀢𑀸 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺, 𑀨𑁄𑀝𑁆𑀞𑀩𑁆𑀩𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀚𑀸𑀦𑀸𑀢𑀺 𑁋 ‘‘𑀅𑀢𑁆𑀢𑀸 ¶ 𑀫𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀕𑀢𑁄 𑀫𑁂 𑀅𑀢𑁆𑀢𑀸’’𑀢𑀺. 𑀏𑀯𑀫𑁆𑀧𑀺 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄…𑀧𑁂… 𑀫𑀦𑀼𑀚𑁄. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 ¶ …𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂.

‘‘𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 𑀬𑀫𑀸𑀳𑀼 𑀮𑁄𑀓𑁂, 𑀢𑀫𑀽𑀧𑀦𑀺𑀲𑁆𑀲𑀸𑀬 𑀧𑀳𑁄𑀢𑀺 𑀙𑀦𑁆𑀤𑁄;

𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘, 𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂’’𑀢𑀺.

𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘, 𑀏𑀢𑁂𑀧𑀺 𑀥𑀫𑁆𑀫𑀸 𑀤𑁆𑀯𑀬𑀫𑁂𑀯 𑀲𑀦𑁆𑀢𑁂;

𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂, 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸.

𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘𑀸𑀢𑀺. 𑀓𑁄𑀥𑁄𑀢𑀺 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄…𑀧𑁂… 𑀫𑁄𑀲𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 ¶ 𑀫𑀼𑀲𑀸𑀯𑀸𑀤𑁄. 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑀧𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑀧𑀺 𑀓𑁄𑀥𑁄 𑀚𑀸𑀬𑀢𑀺. 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑀧𑀺 𑀫𑀼𑀲𑀸𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑀧𑀺 𑀫𑀼𑀲𑀸𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑀧𑀺 𑀓𑀣𑀁𑀓𑀣𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬𑀧𑀺 𑀓𑀣𑀁𑀓𑀣𑀸 𑀉𑀧𑁆𑀧𑀚𑁆𑀚𑀢𑀺.

𑀓𑀣𑀁 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑁄𑀥𑁄 𑀚𑀸𑀬𑀢𑀺? 𑀧𑀓𑀢𑀺𑀬𑀸 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑁄𑀥𑁄 𑀚𑀸𑀬𑀢𑀺. 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻𑀢𑀺 ¶ 𑀓𑁄𑀥𑁄 𑀚𑀸𑀬𑀢𑀺; 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺 ¶ … 𑀅𑀦𑀢𑁆𑀣𑀁 𑀘𑀭𑀢𑀺… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺; 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺… 𑀅𑀢𑁆𑀣𑀁 𑀘𑀭𑀢𑀺… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺. 𑀏𑀯𑀁 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑁄𑀥𑁄 𑀚𑀸𑀬𑀢𑀺.

𑀓𑀣𑀁 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑁄𑀥𑁄 𑀚𑀸𑀬𑀢𑀺? 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀓𑁄𑀥𑁄 𑀚𑀸𑀬𑀢𑀺. 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀓𑁄𑀥𑁄 𑀚𑀸𑀬𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀓𑁄𑀥𑁄 𑀚𑀸𑀬𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀓𑁄𑀥𑁄 𑀚𑀸𑀬𑀢𑀺. 𑀏𑀯𑀁 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑁄𑀥𑁄 𑀚𑀸𑀬𑀢𑀺.

𑀓𑀣𑀁 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀼𑀲𑀸𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀤𑀼𑀩𑀦𑁆𑀥𑀦𑁂𑀦 [𑀅𑀤𑁆𑀤𑀼𑀩𑀦𑁆𑀥𑀦𑁂𑀦 (𑀲𑁆𑀬𑀸. 𑀓.)] 𑀯𑀸 𑀩𑀤𑁆𑀥𑁄 [𑀩𑀦𑁆𑀥𑁄 (𑀲𑁆𑀬𑀸. 𑀓.)]; 𑀢𑀲𑁆𑀲 𑀩𑀦𑁆𑀥𑀦𑀲𑁆𑀲 𑀫𑁄𑀓𑁆𑀔𑀢𑁆𑀣𑀸𑀬 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺… 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄… 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 ¶ 𑀯𑀸 𑀩𑀤𑁆𑀥𑁄… 𑀯𑁂𑀢𑁆𑀢𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄… 𑀮𑀢𑀸𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄… 𑀧𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄… 𑀧𑀭𑀺𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄… 𑀕𑀸𑀫𑀦𑀺𑀕𑀫𑀦𑀕𑀭𑀭𑀝𑁆𑀞𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄… 𑀚𑀦𑀧𑀤𑀩𑀦𑁆𑀥𑀦𑁂𑀦 𑀯𑀸 𑀩𑀤𑁆𑀥𑁄; 𑀢𑀲𑁆𑀲 𑀩𑀦𑁆𑀥𑀦𑀲𑁆𑀲 𑀫𑁄𑀓𑁆𑀔𑀢𑁆𑀣𑀸𑀬 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺 ¶ . 𑀏𑀯𑀁 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀼𑀲𑀸𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀓𑀣𑀁 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀼𑀲𑀸𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀺? 𑀇𑀥𑁂𑀓𑀘𑁆𑀘𑁄 𑀫𑀦𑀸𑀧𑀺𑀓𑀸𑀦𑀁 [𑀫𑀦𑀸𑀧𑀸𑀦𑀁 (𑀲𑀻.)] 𑀭𑀽𑀧𑀸𑀦𑀁 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺… 𑀫𑀦𑀸𑀧𑀺𑀓𑀸𑀦𑀁 𑀲𑀤𑁆𑀤𑀸𑀦𑀁… 𑀕𑀦𑁆𑀥𑀸𑀦𑀁… 𑀭𑀲𑀸𑀦𑀁… 𑀨𑁄𑀝𑁆𑀞𑀩𑁆𑀩𑀸𑀦𑀁 𑀳𑁂𑀢𑀼… 𑀘𑀻𑀯𑀭𑀳𑁂𑀢𑀼… 𑀧𑀺𑀡𑁆𑀟𑀧𑀸𑀢𑀳𑁂𑀢𑀼… 𑀲𑁂𑀦𑀸𑀲𑀦𑀳𑁂𑀢𑀼… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. 𑀏𑀯𑀁 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀫𑀼𑀲𑀸𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀺.

𑀓𑀣𑀁 ¶ 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀣𑀁𑀓𑀣𑀸 𑀉𑀧𑁆𑀧𑀚𑁆𑀚𑀢𑀺? ‘‘𑀫𑀼𑀘𑁆𑀘𑀺𑀲𑁆𑀲𑀸𑀫𑀺 [𑀫𑀼𑀜𑁆𑀘𑀺𑀲𑁆𑀲𑀸𑀫𑀺 (𑀲𑀻.)] 𑀦𑀼 𑀔𑁄 𑀘𑀓𑁆𑀔𑀼𑀭𑁄𑀕𑀢𑁄, 𑀦 𑀦𑀼 𑀔𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀘𑀓𑁆𑀔𑀼𑀭𑁄𑀕𑀢𑁄. 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀲𑁄𑀢𑀭𑁄𑀕𑀢𑁄… 𑀖𑀸𑀦𑀭𑁄𑀕𑀢𑁄… 𑀚𑀺𑀯𑁆𑀳𑀸𑀭𑁄𑀕𑀢𑁄… 𑀓𑀸𑀬𑀭𑁄𑀕𑀢𑁄… 𑀲𑀻𑀲𑀭𑁄𑀕𑀢𑁄… 𑀓𑀡𑁆𑀡𑀭𑁄𑀕𑀢𑁄… 𑀫𑀼𑀔𑀭𑁄𑀕𑀢𑁄… 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀤𑀦𑁆𑀢𑀭𑁄𑀕𑀢𑁄, 𑀦 𑀦𑀼 𑀔𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀤𑀦𑁆𑀢𑀭𑁄𑀕𑀢𑁄’’𑀢𑀺. 𑀏𑀯𑀁 𑀅𑀦𑀺𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀣𑀁𑀓𑀣𑀸 𑀉𑀧𑁆𑀧𑀚𑁆𑀚𑀢𑀺.

𑀓𑀣𑀁 ¶ 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀣𑀁𑀓𑀣𑀸 𑀉𑀧𑁆𑀧𑀚𑁆𑀚𑀢𑀺? ‘‘𑀮𑀪𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀫𑀦𑀸𑀧𑀺𑀓𑁂 [𑀫𑀦𑀸𑀧𑀺𑀬𑁂 (𑀲𑀻. 𑀓.)] 𑀭𑀽𑀧𑁂, 𑀦 𑀦𑀼 𑀔𑁄 𑀮𑀪𑀺𑀲𑁆𑀲𑀸𑀫𑀺 𑀫𑀦𑀸𑀧𑀺𑀓𑁂 𑀭𑀽𑀧𑁂. 𑀮𑀪𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀫𑀦𑀸𑀧𑀺𑀓𑁂 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺. 𑀏𑀯𑀁 𑀇𑀝𑁆𑀞𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀣𑀁𑀓𑀣𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑁋 𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘.

𑀏𑀢𑁂𑀧𑀺 𑀥𑀫𑁆𑀫𑀸 𑀤𑁆𑀯𑀬𑀫𑁂𑀯 𑀲𑀦𑁆𑀢𑁂𑀢𑀺. 𑀲𑀸𑀢𑀸𑀲𑀸𑀢𑁂 𑀲𑀦𑁆𑀢𑁂, 𑀲𑀼𑀔𑀤𑀼𑀓𑁆𑀔𑁂 𑀲𑀦𑁆𑀢𑁂, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑁂 𑀲𑀦𑁆𑀢𑁂, 𑀇𑀝𑁆𑀞𑀸𑀦𑀺𑀝𑁆𑀞𑁂 𑀲𑀦𑁆𑀢𑁂, 𑀅𑀦𑀼𑀦𑀬𑀧𑀝𑀺𑀖𑁂 𑀲𑀦𑁆𑀢𑁂 𑀲𑀁𑀯𑀺𑀚𑁆𑀚𑀫𑀸𑀦𑁂 𑀅𑀢𑁆𑀣𑀺 𑀉𑀧𑀮𑀩𑁆𑀪𑀫𑀸𑀦𑁂𑀢𑀺 𑁋 𑀏𑀢𑁂𑀧𑀺 𑀥𑀫𑁆𑀫𑀸 𑀤𑁆𑀯𑀬𑀫𑁂𑀯 𑀲𑀦𑁆𑀢𑁂.

𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂𑀢𑀺. 𑀜𑀸𑀡𑀫𑁆𑀧𑀺 𑀜𑀸𑀡𑀧𑀣𑁄, 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀜𑀸𑀡𑀧𑀣𑁄, 𑀜𑀸𑀡𑀲𑀳𑀪𑀼𑀦𑁄𑀧𑀺 𑀥𑀫𑁆𑀫𑀸 𑀜𑀸𑀡𑀧𑀣𑁄. 𑀬𑀣𑀸 𑀅𑀭𑀺𑀬𑀫𑀕𑁆𑀕𑁄 𑀅𑀭𑀺𑀬𑀧𑀣𑁄, 𑀤𑁂𑀯𑀫𑀕𑁆𑀕𑁄 𑀤𑁂𑀯𑀧𑀣𑁄, 𑀩𑁆𑀭𑀳𑁆𑀫𑀫𑀕𑁆𑀕𑁄 𑀩𑁆𑀭𑀳𑁆𑀫𑀧𑀣𑁄; 𑀏𑀯𑀫𑁂𑀯 𑀜𑀸𑀡𑀫𑁆𑀧𑀺 𑀜𑀸𑀡𑀧𑀣𑁄, 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 ¶ 𑀜𑀸𑀡𑀧𑀣𑁄, 𑀜𑀸𑀡𑀲𑀳𑀪𑀼𑀦𑁄𑀧𑀺 𑀥𑀫𑁆𑀫𑀸 𑀜𑀸𑀡𑀧𑀣𑁄.

𑀲𑀺𑀓𑁆𑀔𑁂𑀢𑀺 ¶ ¶ 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄… 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄… 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺, 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀇𑀫𑁂 𑀆𑀲𑀯𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀓𑀣𑀁𑀓𑀣𑀻 ¶ 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂𑀢𑀺. 𑀓𑀣𑀁𑀓𑀣𑀻 𑀧𑀼𑀕𑁆𑀕𑀮𑁄 𑀲𑀓𑀗𑁆𑀔𑁄 𑀲𑀯𑀺𑀮𑁂𑀔𑁄 𑀲𑀤𑁆𑀯𑁂𑀴𑁆𑀳𑀓𑁄 𑀲𑀯𑀺𑀘𑀺𑀓𑀺𑀘𑁆𑀙𑁄, 𑀜𑀸𑀡𑀸𑀥𑀺𑀕𑀫𑀸𑀬 𑀜𑀸𑀡𑀨𑀼𑀲𑀦𑀸𑀬 𑀜𑀸𑀡𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬; 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 ¶ 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 ¶ 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂.

𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸𑀢𑀺. 𑀜𑀢𑁆𑀯𑀸𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸 𑀧𑀯𑀼𑀢𑁆𑀢𑀸 𑀆𑀘𑀺𑀓𑁆𑀔𑀺𑀢𑀸 𑀤𑁂𑀲𑀺𑀢𑀸 𑀧𑀜𑁆𑀜𑀧𑀺𑀢𑀸 𑀧𑀝𑁆𑀞𑀧𑀺𑀢𑀸 𑀯𑀺𑀯𑀝𑀸 𑀯𑀺𑀪𑀢𑁆𑀢𑀸 𑀉𑀢𑁆𑀢𑀸𑀦𑀻𑀓𑀢𑀸 [𑀉𑀢𑁆𑀢𑀸𑀦𑀺𑀁 𑀓𑀢𑀸 (𑀓.)] 𑀧𑀓𑀸𑀲𑀺𑀢𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸 𑀧𑀯𑀼𑀢𑁆𑀢𑀸 𑀆𑀘𑀺𑀓𑁆𑀔𑀺𑀢𑀸 𑀤𑁂𑀲𑀺𑀢𑀸 𑀧𑀜𑁆𑀜𑀧𑀺𑀢𑀸 𑀧𑀝𑁆𑀞𑀧𑀺𑀢𑀸 𑀯𑀺𑀯𑀝𑀸 𑀯𑀺𑀪𑀢𑁆𑀢𑀸 𑀉𑀢𑁆𑀢𑀸𑀦𑀻𑀓𑀢𑀸 𑀧𑀓𑀸𑀲𑀺𑀢𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺…𑀧𑁂… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺… ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺…𑀧𑁂… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺… ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺… ‘‘𑀇𑀫𑁂 𑀆𑀲𑀯𑀸’’𑀢𑀺…𑀧𑁂… ‘‘𑀅𑀬𑀁 ¶ 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺… ‘‘𑀇𑀫𑁂 ¶ 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺… 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘… 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁… 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸 𑀧𑀯𑀼𑀢𑁆𑀢𑀸 𑀆𑀘𑀺𑀓𑁆𑀔𑀺𑀢𑀸 𑀤𑁂𑀲𑀺𑀢𑀸 𑀧𑀜𑁆𑀜𑀧𑀺𑀢𑀸 𑀧𑀝𑁆𑀞𑀧𑀺𑀢𑀸 𑀯𑀺𑀯𑀝𑀸 𑀯𑀺𑀪𑀢𑁆𑀢𑀸 𑀉𑀢𑁆𑀢𑀸𑀦𑀻𑀓𑀢𑀸 𑀧𑀓𑀸𑀲𑀺𑀢𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀪𑀕𑀯𑀢𑀸 𑁋 ‘‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀦𑁄 𑀅𑀦𑀪𑀺𑀜𑁆𑀜𑀸𑀬. 𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀦𑁄 𑀅𑀦𑀺𑀤𑀸𑀦𑀁. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀥𑀫𑁆𑀫𑀁 𑀤𑁂𑀲𑀬𑀢𑁄, 𑀦𑁄 𑀅𑀦𑀪𑀺𑀜𑁆𑀜𑀸𑀬, 𑀲𑀦𑀺𑀤𑀸𑀦𑀁 𑀥𑀫𑁆𑀫𑀁 𑀤𑁂𑀲𑀬𑀢𑁄, 𑀦𑁄 𑀅𑀦𑀺𑀤𑀸𑀦𑀁, 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 ¶ 𑀤𑁂𑀲𑀬𑀢𑁄, 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁, 𑀓𑀭𑀡𑀻𑀬𑁄 𑀑𑀯𑀸𑀤𑁄, 𑀓𑀭𑀡𑀻𑀬𑀸 𑀅𑀦𑀼𑀲𑀸𑀲𑀦𑀻. 𑀅𑀮𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀯𑁄 𑀢𑀼𑀝𑁆𑀞𑀺𑀬𑀸 𑀅𑀮𑀁 𑀧𑀸𑀫𑁄𑀚𑁆𑀚𑀸𑀬 𑀅𑀮𑀁 𑀲𑁄𑀫𑀦𑀲𑁆𑀲𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣𑀸’’𑀢𑀺 𑁋 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸.

‘‘𑀓𑁄𑀥𑁄 𑀫𑁄𑀲𑀯𑀚𑁆𑀚𑀜𑁆𑀘 𑀓𑀣𑀁𑀓𑀣𑀸 𑀘, 𑀏𑀢𑁂𑀧𑀺 𑀥𑀫𑁆𑀫𑀸 𑀤𑁆𑀯𑀬𑀫𑁂𑀯 𑀲𑀦𑁆𑀢𑁂;

𑀓𑀣𑀁𑀓𑀣𑀻 𑀜𑀸𑀡𑀧𑀣𑀸𑀬 𑀲𑀺𑀓𑁆𑀔𑁂, 𑀜𑀢𑁆𑀯𑀸 𑀧𑀯𑀼𑀢𑁆𑀢𑀸 𑀲𑀫𑀡𑁂𑀦 𑀥𑀫𑁆𑀫𑀸’’𑀢𑀺.

𑀲𑀸𑀢𑀁 ¶ 𑀅𑀲𑀸𑀢𑀜𑁆𑀘 𑀓𑀼𑀢𑁄𑀦𑀺𑀤𑀸𑀦𑀸, 𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂;

𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁, 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀁.

𑀲𑀸𑀢𑀁 𑀅𑀲𑀸𑀢𑀜𑁆𑀘 𑀓𑀼𑀢𑁄𑀦𑀺𑀤𑀸𑀦𑀸𑀢𑀺. 𑀲𑀸𑀢𑀸 𑀅𑀲𑀸𑀢𑀸 𑀓𑀼𑀢𑁄𑀦𑀺𑀤𑀸𑀦𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺 𑀲𑀸𑀢𑀸𑀲𑀸𑀢𑀸𑀦𑀁 𑀫𑀽𑀮𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀲𑀸𑀢𑀁 𑀅𑀲𑀸𑀢𑀜𑁆𑀘 𑀓𑀼𑀢𑁄𑀦𑀺𑀤𑀸𑀦𑀸.

𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂𑀢𑀺. 𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀅𑀲𑀁𑀯𑀺𑀚𑁆𑀚𑀫𑀸𑀦𑁂 𑀦𑀢𑁆𑀣𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 ¶ 𑀲𑀸𑀢𑀸𑀲𑀸𑀢𑀸 𑀦 𑀪𑀯𑀦𑁆𑀢𑀺 𑀦𑀧𑁆𑀧𑀪𑀯𑀦𑁆𑀢𑀺 𑀦 𑀚𑀸𑀬𑀦𑁆𑀢𑀺 𑀦 𑀲𑀜𑁆𑀚𑀸𑀬𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑁋 𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂.

𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀦𑁆𑀢𑀺. 𑀓𑀢𑀫𑁄 𑀲𑀸𑀢𑀸𑀲𑀸𑀢𑀸𑀦𑀁 𑀪𑀯𑁄? 𑀬𑁄 𑀲𑀸𑀢𑀸𑀲𑀸𑀢𑀸𑀦𑀁 𑀪𑀯𑁄 𑀧𑀪𑀯𑁄 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄 𑁋 𑀅𑀬𑀁 𑀲𑀸𑀢𑀸𑀲𑀸𑀢𑀸𑀦𑀁 𑀪𑀯𑁄. 𑀓𑀢𑀫𑁄 ¶ 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑁄? 𑀬𑁄 𑀲𑀸𑀢𑀸𑀲𑀸𑀢𑀸𑀦𑀁 𑀔𑀬𑁄 𑀯𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄 𑀅𑀦𑀺𑀘𑁆𑀘𑀢𑀸 ¶ 𑀅𑀦𑁆𑀢𑀭𑀥𑀸𑀦𑀁 𑁋 𑀅𑀬𑀁 𑀲𑀸𑀢𑀸𑀲𑀸𑀢𑀸𑀦𑀁 𑀯𑀺𑀪𑀯𑁄. 𑀬𑀫𑁂𑀢𑀫𑀢𑁆𑀣𑀦𑁆𑀢𑀺 𑀬𑀁 𑀧𑀭𑀫𑀢𑁆𑀣𑀦𑁆𑀢𑀺 𑁋 𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁.

𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀦𑁆𑀢𑀺. 𑀏𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 ¶ 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀧𑀩𑁆𑀭𑀽𑀳𑀻𑀢𑀺 𑀩𑁆𑀭𑀽𑀳𑀺 𑀯𑀤𑁂𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺. 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀬𑀁𑀦𑀺𑀤𑀸𑀦𑀁 𑀬𑀁𑀲𑀫𑀼𑀤𑀬𑀁 𑀬𑀁𑀚𑀸𑀢𑀺𑀓𑀁 𑀬𑀁𑀧𑀪𑀯𑀦𑁆𑀢𑀺 𑁋 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦𑀁.

‘‘𑀲𑀸𑀢𑀁 𑀅𑀲𑀸𑀢𑀜𑁆𑀘 𑀓𑀼𑀢𑁄𑀦𑀺𑀤𑀸𑀦𑀸, 𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂;

𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁, 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀢𑁄𑀦𑀺𑀤𑀸𑀦’’𑀦𑁆𑀢𑀺.

𑀨𑀲𑁆𑀲𑀦𑀺𑀤𑀸𑀦𑀁 𑀲𑀸𑀢𑀁 𑀅𑀲𑀸𑀢𑀁, 𑀨𑀲𑁆𑀲𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂;

𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁, 𑀏𑀢𑀁 𑀢𑁂 𑀧𑀩𑁆𑀭𑀽𑀫𑀺 𑀇𑀢𑁄𑀦𑀺𑀤𑀸𑀦𑀁.

𑀨𑀲𑁆𑀲𑀦𑀺𑀤𑀸𑀦𑀁 𑀲𑀸𑀢𑀁 𑀅𑀲𑀸𑀢𑀦𑁆𑀢𑀺. 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸. 𑀬𑀸 𑀢𑀲𑁆𑀲𑁂𑀯 𑀲𑀼𑀔𑀯𑁂𑀤𑀦𑀻𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸, 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀬𑀸 𑀢𑀲𑁆𑀲𑁂𑀯 𑀤𑀼𑀓𑁆𑀔𑀯𑁂𑀤𑀦𑀻𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸, 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 ¶ 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀬𑀸 𑀢𑀲𑁆𑀲𑁂𑀯 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀲𑁆𑀲 ¶ 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸, 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺, 𑀯𑀽𑀧𑀲𑀫𑁆𑀫𑀢𑀺. 𑀨𑀲𑁆𑀲𑀦𑀺𑀤𑀸𑀦𑀁 𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 ¶ . 𑀲𑀸𑀢𑀸𑀲𑀸𑀢𑀸 𑀨𑀲𑁆𑀲𑀦𑀺𑀤𑀸𑀦𑀸 𑀨𑀲𑁆𑀲𑀲𑀫𑀼𑀤𑀬𑀸 𑀨𑀲𑁆𑀲𑀚𑀸𑀢𑀺𑀓𑀸 𑀨𑀲𑁆𑀲𑀧𑁆𑀧𑀪𑀯𑀸𑀢𑀺 𑁋 𑀨𑀲𑁆𑀲𑀦𑀺𑀤𑀸𑀦𑀁 𑀲𑀸𑀢𑀁 𑀅𑀲𑀸𑀢𑀁.

𑀨𑀲𑁆𑀲𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂𑀢𑀺. 𑀨𑀲𑁆𑀲𑁂 𑀅𑀲𑀦𑁆𑀢𑁂 𑀅𑀲𑀁𑀯𑀺𑀚𑁆𑀚𑀫𑀸𑀦𑁂 𑀦𑀢𑁆𑀣𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 𑀲𑀸𑀢𑀸𑀲𑀸𑀢𑀸 𑀦 𑀪𑀯𑀦𑁆𑀢𑀺 𑀦𑀧𑁆𑀧𑀪𑀯𑀦𑁆𑀢𑀺 𑀦 𑀚𑀸𑀬𑀦𑁆𑀢𑀺 𑀦 𑀲𑀜𑁆𑀚𑀸𑀬𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀦 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑁋 𑀨𑀲𑁆𑀲𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂.

𑀯𑀺𑀪𑀯𑀁 ¶ 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀦𑁆𑀢𑀺. 𑀪𑀯𑀤𑀺𑀝𑁆𑀞𑀺𑀧𑀺 𑀨𑀲𑁆𑀲𑀦𑀺𑀤𑀸𑀦𑀸, 𑀯𑀺𑀪𑀯𑀤𑀺𑀝𑁆𑀞𑀺𑀧𑀺 𑀨𑀲𑁆𑀲𑀦𑀺𑀤𑀸𑀦𑀸. 𑀬𑀫𑁂𑀢𑀫𑀢𑁆𑀣𑀦𑁆𑀢𑀺 𑀬𑀁 𑀧𑀭𑀫𑀢𑁆𑀣𑀦𑁆𑀢𑀺 𑁋 𑀯𑀺𑀪𑀯𑀁 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁.

𑀏𑀢𑀁 𑀢𑁂 𑀧𑀩𑁆𑀭𑀽𑀫𑀺 𑀇𑀢𑁄𑀦𑀺𑀤𑀸𑀦𑀦𑁆𑀢𑀺. 𑀏𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀲𑀺 𑀬𑀁 𑀬𑀸𑀘𑀲𑀺 𑀬𑀁 𑀅𑀚𑁆𑀛𑁂𑀲𑀲𑀺 𑀬𑀁 𑀧𑀲𑀸𑀤𑁂𑀲𑀺. 𑀧𑀩𑁆𑀭𑀽𑀫𑀻𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀏𑀢𑀁 𑀢𑁂 𑀧𑀩𑁆𑀭𑀽𑀫𑀺. 𑀇𑀢𑁄𑀦𑀺𑀤𑀸𑀦𑀦𑁆𑀢𑀺 𑀇𑀢𑁄 𑀨𑀲𑁆𑀲𑀦𑀺𑀤𑀸𑀦𑀁 𑀨𑀲𑁆𑀲𑀲𑀫𑀼𑀤𑀬𑀁 𑀨𑀲𑁆𑀲𑀚𑀸𑀢𑀺𑀓𑀁 𑀨𑀲𑁆𑀲𑀧𑁆𑀧𑀪𑀯𑀦𑁆𑀢𑀺 𑁋 𑀏𑀢𑀁 𑀢𑁂 𑀧𑀩𑁆𑀭𑀽𑀫𑀺 𑀇𑀢𑁄𑀦𑀺𑀤𑀸𑀦𑀁.

‘‘𑀨𑀲𑁆𑀲𑀦𑀺𑀤𑀸𑀦𑀁 𑀲𑀸𑀢𑀁 𑀅𑀲𑀸𑀢𑀁, 𑀨𑀲𑁆𑀲𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀳𑁂𑀢𑁂;

𑀯𑀺𑀪𑀯𑀁 ¶ 𑀪𑀯𑀜𑁆𑀘𑀸𑀧𑀺 𑀬𑀫𑁂𑀢𑀫𑀢𑁆𑀣𑀁, 𑀏𑀢𑀁 𑀢𑁂 𑀧𑀩𑁆𑀭𑀽𑀫𑀺 𑀇𑀢𑁄𑀦𑀺𑀤𑀸𑀦’’𑀦𑁆𑀢𑀺.

𑀨𑀲𑁆𑀲𑁄 ¶ 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄, 𑀧𑀭𑀺𑀕𑁆𑀕𑀳𑀸 𑀘𑀸𑀧𑀺 [𑀯𑀸𑀧𑀺 (𑀲𑀻. 𑀲𑁆𑀬𑀸.)] 𑀓𑀼𑀢𑁄𑀧𑀳𑀽𑀢𑀸;

𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀫𑀫𑀢𑁆𑀢𑀫𑀢𑁆𑀣𑀺, 𑀓𑀺𑀲𑁆𑀫𑀺𑀁 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸.

𑀨𑀲𑁆𑀲𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄𑀢𑀺. 𑀨𑀲𑁆𑀲𑁄 𑀓𑀼𑀢𑁄𑀦𑀺𑀤𑀸𑀦𑁄 𑀓𑀼𑀢𑁄𑀚𑀸𑀢𑁄 𑀓𑀼𑀢𑁄𑀲𑀜𑁆𑀚𑀸𑀢𑁄 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑁄 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀓𑀼𑀢𑁄𑀧𑀸𑀢𑀼𑀪𑀽𑀢𑁄, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄𑀢𑀺 𑀨𑀲𑁆𑀲𑀲𑁆𑀲 𑀫𑀽𑀮𑀁 𑀧𑀼𑀘𑁆𑀙𑀢𑀺 𑀳𑁂𑀢𑀼𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀨𑀲𑁆𑀲𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄.

𑀧𑀭𑀺𑀕𑁆𑀕𑀳𑀸 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸𑀢𑀺 𑀧𑀭𑀺𑀕𑁆𑀕𑀳𑀸 𑀓𑀼𑀢𑁄𑀧𑀳𑀽𑀢𑀸 𑀓𑀼𑀢𑁄𑀚𑀸𑀢𑀸 𑀓𑀼𑀢𑁄𑀲𑀜𑁆𑀚𑀸𑀢𑀸 𑀓𑀼𑀢𑁄𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄𑀧𑀸𑀢𑀼𑀪𑀽𑀢𑀸, 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺 ¶ 𑀧𑀭𑀺𑀕𑁆𑀕𑀳𑀸𑀦𑀁 𑀫𑀽𑀮𑀁 𑀧𑀼𑀘𑁆𑀙𑀢𑀺 𑀳𑁂𑀢𑀼𑀁 𑀧𑀼𑀘𑁆𑀙𑀢𑀺…𑀧𑁂… 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀧𑀭𑀺𑀕𑁆𑀕𑀳𑀸 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸.

𑀓𑀺𑀲𑁆𑀫𑀺𑀁 ¶ 𑀅𑀲𑀦𑁆𑀢𑁂 𑀦 𑀫𑀫𑀢𑁆𑀢𑀫𑀢𑁆𑀣𑀻𑀢𑀺. 𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀅𑀲𑀁𑀯𑀺𑀚𑁆𑀚𑀫𑀸𑀦𑁂 𑀦𑀢𑁆𑀣𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 𑀫𑀫𑀢𑁆𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀫𑀫𑀢𑁆𑀢𑀫𑀢𑁆𑀣𑀺.

𑀓𑀺𑀲𑁆𑀫𑀺𑀁 ¶ 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺. 𑀓𑀺𑀲𑁆𑀫𑀺𑀁 𑀯𑀺𑀪𑀽𑀢𑁂 𑀯𑀺𑀪𑀯𑀺𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑁂 𑀯𑀻𑀢𑀺𑀯𑀢𑁆𑀢𑁂 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀻𑀢𑀺 𑁋 𑀓𑀺𑀲𑁆𑀫𑀺𑀁 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸.

‘‘𑀨𑀲𑁆𑀲𑁄 𑀦𑀼 𑀮𑁄𑀓𑀲𑁆𑀫𑀺𑀁 𑀓𑀼𑀢𑁄𑀦𑀺𑀤𑀸𑀦𑁄, 𑀧𑀭𑀺𑀕𑁆𑀕𑀳𑀸 𑀘𑀸𑀧𑀺 𑀓𑀼𑀢𑁄𑀧𑀳𑀽𑀢𑀸;

𑀓𑀺𑀲𑁆𑀫𑀺𑀁 𑀅𑀲𑀦𑁆𑀢𑁂 𑀦 𑀫𑀫𑀢𑁆𑀢𑀫𑀢𑁆𑀣𑀺, 𑀓𑀺𑀲𑁆𑀫𑀺𑀁 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸’’𑀢𑀺.

𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄, 𑀇𑀘𑁆𑀙𑀸𑀦𑀺𑀤𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀸𑀦𑀺;

𑀇𑀘𑁆𑀙𑀸𑀬𑀲𑀦𑁆𑀢𑁆𑀬𑀸 𑀦 𑀫𑀫𑀢𑁆𑀢𑀫𑀢𑁆𑀣𑀺, 𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸.

𑀦𑀸𑀫𑀜𑁆𑀘 ¶ 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄𑀢𑀺. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀘𑀓𑁆𑀔𑀼 𑀘 [𑀘𑀓𑁆𑀔𑀼𑀜𑁆𑀘 (𑀩𑀳𑀽𑀲𑀼)] 𑀭𑀽𑀧𑀸 𑀘 𑀭𑀽𑀧𑀲𑁆𑀫𑀺𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀲𑁄𑀢𑀜𑁆𑀘 𑀲𑀤𑁆𑀤𑀸 𑀘 𑀭𑀽𑀧𑀲𑁆𑀫𑀺𑀁 𑀲𑁄𑀢𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄. 𑀖𑀸𑀦𑀜𑁆𑀘 𑀧𑀝𑀺𑀘𑁆𑀘 𑀕𑀦𑁆𑀥𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀖𑀸𑀦𑀜𑁆𑀘 𑀕𑀦𑁆𑀥𑀸 𑀘 𑀭𑀽𑀧𑀲𑁆𑀫𑀺𑀁 𑀖𑀸𑀦𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 ¶ 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄. 𑀚𑀺𑀯𑁆𑀳𑀜𑁆𑀘 𑀧𑀝𑀺𑀘𑁆𑀘 𑀭𑀲𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀚𑀺𑀯𑁆𑀳𑀸 𑀘 𑀭𑀲𑀸 𑀘 𑀭𑀽𑀧𑀲𑁆𑀫𑀺𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄. 𑀓𑀸𑀬𑀜𑁆𑀘 𑀧𑀝𑀺𑀘𑁆𑀘 𑀨𑁄𑀝𑁆𑀞𑀩𑁆𑀩𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀓𑀸𑀬𑁄 𑀘 𑀨𑁄𑀝𑁆𑀞𑀩𑁆𑀩𑀸 𑀘 𑀭𑀽𑀧𑀲𑁆𑀫𑀺𑀁 𑀓𑀸𑀬𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄. 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀯𑀢𑁆𑀣𑀼 ¶ 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁, 𑀥𑀫𑁆𑀫𑀸 𑀭𑀽𑀧𑀺𑀦𑁄 𑀭𑀽𑀧𑀲𑁆𑀫𑀺𑀁 ¶ 𑀫𑀦𑁄𑀲𑀫𑁆𑀨𑀲𑁆𑀲𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀦𑀸𑀫𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄.

𑀇𑀘𑁆𑀙𑀸𑀦𑀺𑀤𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀸𑀦𑀻𑀢𑀺. 𑀇𑀘𑁆𑀙𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀧𑀭𑀺𑀕𑁆𑀕𑀳𑀸𑀢𑀺 𑀤𑁆𑀯𑁂 𑀧𑀭𑀺𑀕𑁆𑀕𑀳𑀸 𑁋 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀘 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄. 𑀇𑀘𑁆𑀙𑀸𑀦𑀺𑀤𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀸𑀦𑀻𑀢𑀺. 𑀧𑀭𑀺𑀕𑁆𑀕𑀳𑀸 𑀇𑀘𑁆𑀙𑀸𑀦𑀺𑀤𑀸𑀦𑀸 𑀇𑀘𑁆𑀙𑀸𑀳𑁂𑀢𑀼𑀓𑀸 𑀇𑀘𑁆𑀙𑀸𑀧𑀘𑁆𑀘𑀬𑀸 𑀇𑀘𑁆𑀙𑀸𑀓𑀸𑀭𑀡𑀸 𑀇𑀘𑁆𑀙𑀸𑀧𑀪𑀯𑀸𑀢𑀺 𑁋 𑀇𑀘𑁆𑀙𑀸𑀦𑀺𑀤𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀸𑀦𑀺.

𑀇𑀘𑁆𑀙𑀸𑀬𑀲𑀦𑁆𑀢𑁆𑀬𑀸 𑀦 𑀫𑀫𑀢𑁆𑀢𑀫𑀢𑁆𑀣𑀻𑀢𑀺. 𑀇𑀘𑁆𑀙𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘 ¶ …𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁 ¶ …𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀇𑀘𑁆𑀙𑀸𑀬𑀲𑀦𑁆𑀢𑁆𑀬𑀸 𑀦 𑀫𑀫𑀢𑁆𑀢𑀫𑀢𑁆𑀣𑀻𑀢𑀺. 𑀇𑀘𑁆𑀙𑀸𑀬 𑀅𑀲𑀦𑁆𑀢𑁆𑀬𑀸 𑀅𑀲𑀁𑀯𑀺𑀚𑁆𑀚𑀫𑀸𑀦𑀸𑀬 𑀦𑀢𑁆𑀣𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑀸𑀬 𑀫𑀫𑀢𑁆𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀇𑀘𑁆𑀙𑀸𑀬𑀲𑀦𑁆𑀢𑁆𑀬𑀸 𑀦 𑀫𑀫𑀢𑁆𑀢𑀫𑀢𑁆𑀣𑀺.

𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺. 𑀭𑀽𑀧𑁂𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀭𑀽𑀧𑁂 𑀯𑀺𑀪𑀽𑀢𑁂𑀢𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 [𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 (𑀲𑁆𑀬𑀸.)] 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺 𑁋 𑀜𑀸𑀢𑀯𑀺𑀪𑀽𑀢𑁂𑀦 [𑀜𑀸𑀡𑀯𑀺𑀪𑀽𑀢𑁂𑀦 (𑀲𑀻.), 𑀢𑀤𑀝𑁆𑀞𑀓𑀣𑀸𑀬𑀁 𑀧𑀦 𑀜𑀸𑀢𑀯𑀻𑀢𑀺𑀯𑀢𑁆𑀢𑁂𑀦𑀸𑀢𑀺 𑀤𑀺𑀲𑁆𑀲𑀢𑀺], 𑀢𑀻𑀭𑀡𑀯𑀺𑀪𑀽𑀢𑁂𑀦, 𑀧𑀳𑀸𑀦𑀯𑀺𑀪𑀽𑀢𑁂𑀦, 𑀲𑀫𑀢𑀺𑀓𑁆𑀓𑀫𑀯𑀺𑀪𑀽𑀢𑁂𑀦. 𑀓𑀣𑀁 𑀜𑀸𑀢𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺? 𑀭𑀽𑀧𑀁 𑀚𑀸𑀦𑀸𑀢𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀲𑀩𑁆𑀩𑀁 𑀭𑀽𑀧𑀁 𑀘𑀢𑁆𑀢𑀸𑀭𑀺 𑀘 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧’’𑀦𑁆𑀢𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀁 𑀜𑀸𑀢𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺.

𑀓𑀣𑀁 𑀢𑀻𑀭𑀡𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀭𑀽𑀧𑀁 𑀢𑀻𑀭𑁂𑀢𑀺, 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄 𑀧𑀭𑀢𑁄 𑀧𑀮𑁄𑀓𑀢𑁄 𑀈𑀢𑀺𑀢𑁄 𑀉𑀧𑀤𑁆𑀤𑀯𑀢𑁄 𑀪𑀬𑀢𑁄 𑀉𑀧𑀲𑀕𑁆𑀕𑀢𑁄 𑀘𑀮𑀢𑁄 𑀧𑀪𑀗𑁆𑀕𑀼𑀢𑁄 𑀅𑀥𑀼𑀯𑀢𑁄 𑀅𑀢𑀸𑀡𑀢𑁄 𑀅𑀮𑁂𑀡𑀢𑁄 𑀅𑀲𑀭𑀡𑀢𑁄 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀆𑀤𑀻𑀦𑀯𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄 𑀅𑀲𑀸𑀭𑀓𑀢𑁄 𑀅𑀖𑀫𑀽𑀮𑀢𑁄 𑀯𑀥𑀓𑀢𑁄 ¶ 𑀯𑀺𑀪𑀯𑀢𑁄 𑀲𑀸𑀲𑀯𑀢𑁄 𑀲𑀗𑁆𑀔𑀢𑀢𑁄 𑀫𑀸𑀭𑀸𑀫𑀺𑀲𑀢𑁄 𑀚𑀸𑀢𑀺𑀥𑀫𑁆𑀫𑀢𑁄 𑀚𑀭𑀸𑀥𑀫𑁆𑀫𑀢𑁄 𑀩𑁆𑀬𑀸𑀥𑀺𑀥𑀫𑁆𑀫𑀢𑁄 𑀫𑀭𑀡𑀥𑀫𑁆𑀫𑀢𑁄, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀢𑁄 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄, 𑀅𑀲𑁆𑀲𑀸𑀤𑀢𑁄 ¶ 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀢𑀻𑀭𑁂𑀢𑀺. 𑀏𑀯𑀁 𑀢𑀻𑀭𑀡𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺.

𑀓𑀣𑀁 ¶ ¶ 𑀧𑀳𑀸𑀦𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀭𑀽𑀧𑁂 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑁂 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫’’𑀦𑁆𑀢𑀺. 𑀏𑀯𑀁 𑀧𑀳𑀸𑀦𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺.

𑀓𑀣𑀁 𑀲𑀫𑀢𑀺𑀓𑁆𑀓𑀫𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺. 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀧𑀝𑀺𑀮𑀤𑁆𑀥𑀲𑁆𑀲 𑀭𑀽𑀧𑀸 𑀯𑀺𑀪𑀽𑀢𑀸 𑀳𑁄𑀦𑁆𑀢𑀺 𑀯𑀺𑀪𑀸𑀯𑀺𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀫𑀢𑀺𑀓𑁆𑀓𑀦𑁆𑀢𑀸 𑀯𑀻𑀢𑀺𑀯𑀢𑁆𑀢𑀸. 𑀏𑀯𑀁 𑀲𑀫𑀢𑀺𑀓𑁆𑀓𑀫𑀯𑀺𑀪𑀽𑀢𑁂𑀦 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀭𑀽𑀧𑀁 𑀯𑀺𑀪𑀽𑀢𑀁 𑀳𑁄𑀢𑀺.

𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸𑀢𑀺. 𑀭𑀽𑀧𑁂 𑀯𑀺𑀪𑀽𑀢𑁂 𑀯𑀺𑀪𑀸𑀯𑀺𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑁂 𑀯𑀻𑀢𑀺𑀯𑀢𑁆𑀢𑁂 𑀧𑀜𑁆𑀘 𑀨𑀲𑁆𑀲𑀸 𑀦 𑀨𑀼𑀲𑀦𑁆𑀢𑀺 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄, 𑀲𑁄𑀢𑀲𑀫𑁆𑀨𑀲𑁆𑀲𑁄, 𑀖𑀸𑀦𑀲𑀫𑁆𑀨𑀲𑁆𑀲𑁄, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄, 𑀓𑀸𑀬𑀲𑀫𑁆𑀨𑀲𑁆𑀲𑁄𑀢𑀺 𑁋 𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸.

‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀨𑀲𑁆𑀲𑁄, 𑀇𑀘𑁆𑀙𑀸𑀦𑀺𑀤𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀸𑀦𑀺;

𑀇𑀘𑁆𑀙𑀸𑀬𑀲𑀦𑁆𑀢𑁆𑀬𑀸 𑀦 𑀫𑀫𑀢𑁆𑀢𑀫𑀢𑁆𑀣𑀺, 𑀭𑀽𑀧𑁂 𑀯𑀺𑀪𑀽𑀢𑁂 𑀦 𑀨𑀼𑀲𑀦𑁆𑀢𑀺 𑀨𑀲𑁆𑀲𑀸’’𑀢𑀺.

𑀓𑀣𑀁 ¶ 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁, 𑀲𑀼𑀔𑀁 𑀤𑀼𑀔𑀜𑁆𑀘𑀸𑀧𑀺 [𑀤𑀼𑀓𑁆𑀔𑀁 𑀯𑀸𑀧𑀺 (𑀲𑁆𑀬𑀸.)] 𑀓𑀣𑀁 𑀯𑀺𑀪𑁄𑀢𑀺;

𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀣𑀸 𑀯𑀺𑀪𑁄𑀢𑀺, 𑀢𑀁 𑀚𑀸𑀦𑀺𑀬𑀸𑀫𑀸𑀢𑀺 [𑀚𑀸𑀦𑀺𑀲𑁆𑀲𑀸𑀫𑀸𑀢𑀺 (𑀲𑀻. 𑀓.)] 𑀫𑁂 𑀫𑀦𑁄 𑀅𑀳𑀼.

𑀓𑀣𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀦𑁆𑀢𑀺. 𑀓𑀣𑀁 𑀲𑀫𑁂𑀢𑀲𑁆𑀲𑀸𑀢𑀺 𑀓𑀣𑀁 𑀲𑀫𑁂𑀢𑀲𑁆𑀲 𑀓𑀣𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀣𑀁 𑀇𑀭𑀺𑀬𑀦𑁆𑀢𑀲𑁆𑀲 𑀓𑀣𑀁 𑀯𑀢𑁆𑀢𑁂𑀦𑁆𑀢𑀲𑁆𑀲 𑀓𑀣𑀁 𑀧𑀸𑀮𑁂𑀦𑁆𑀢𑀲𑁆𑀲 𑀓𑀣𑀁 𑀬𑀧𑁂𑀦𑁆𑀢𑀲𑁆𑀲 ¶ 𑀓𑀣𑀁 𑀬𑀸𑀧𑁂𑀦𑁆𑀢𑀲𑁆𑀲 𑀭𑀽𑀧𑀁 𑀯𑀺𑀪𑁄𑀢𑀺 𑀯𑀺𑀪𑀸𑀯𑀻𑀬𑀢𑀺 𑀅𑀢𑀺𑀓𑁆𑀓𑀫𑀻𑀬𑀢𑀺 ¶ 𑀲𑀫𑀢𑀺𑀓𑁆𑀓𑀫𑀻𑀬𑀢𑀺 [𑀯𑀺𑀪𑀸𑀯𑀺𑀬𑁆𑀬𑀢𑀺 𑀅𑀢𑀺𑀓𑁆𑀓𑀫𑀺𑀬𑁆𑀬𑀢𑀺 𑀲𑀫𑀢𑀺𑀓𑁆𑀓𑀫𑀺𑀬𑁆𑀬𑀢𑀺 (𑀩𑀳𑀽𑀲𑀼)] 𑀯𑀻𑀢𑀺𑀯𑀢𑁆𑀢𑀻𑀬𑀢𑀻𑀢𑀺 𑁋 𑀓𑀣𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁.

𑀲𑀼𑀔𑀁 𑀤𑀼𑀔𑀜𑁆𑀘𑀸𑀧𑀺 𑀓𑀣𑀁 𑀯𑀺𑀪𑁄𑀢𑀻𑀢𑀺 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀓𑀣𑀁 𑀯𑀺𑀪𑁄𑀢𑀺 𑀯𑀺𑀪𑀸𑀯𑀻𑀬𑀢𑀺 𑀅𑀢𑀺𑀓𑁆𑀓𑀫𑀻𑀬𑀢𑀺 𑀲𑀫𑀢𑀺𑀓𑁆𑀓𑀫𑀻𑀬𑀢𑀺 𑀯𑀻𑀢𑀺𑀯𑀢𑁆𑀢𑀻𑀬𑀢𑀻𑀢𑀺 𑁋 𑀲𑀼𑀔𑀁 𑀤𑀼𑀔𑀜𑁆𑀘𑀸𑀧𑀺 𑀓𑀣𑀁 𑀯𑀺𑀪𑁄𑀢𑀺.

𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀣𑀸 𑀯𑀺𑀪𑁄𑀢𑀻𑀢𑀺. 𑀏𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀻𑀢𑀺 𑁋 𑀏𑀢𑀁. 𑀫𑁂 𑀧𑀩𑁆𑀭𑀽𑀳𑀻𑀢𑀺 𑀫𑁂 𑀧𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 ¶ 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺. 𑀬𑀣𑀸 𑀯𑀺𑀪𑁄𑀢𑀻𑀢𑀺 𑀬𑀣𑀸 𑀯𑀺𑀪𑁄𑀢𑀺 𑀯𑀺𑀪𑀸𑀯𑀻𑀬𑀢𑀺 𑀅𑀢𑀺𑀓𑁆𑀓𑀫𑀻𑀬𑀢𑀺 𑀲𑀫𑀢𑀺𑀓𑁆𑀓𑀫𑀻𑀬𑀢𑀺 𑀯𑀻𑀢𑀺𑀯𑀢𑁆𑀢𑀻𑀬𑀢𑀻𑀢𑀺 𑁋 𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀣𑀸 𑀯𑀺𑀪𑁄𑀢𑀺.

𑀢𑀁 𑀚𑀸𑀦𑀺𑀬𑀸𑀫𑀸𑀢𑀺 𑀫𑁂 𑀫𑀦𑁄 𑀅𑀳𑀽𑀢𑀺. 𑀢𑀁 𑀚𑀸𑀦𑀺𑀬𑀸𑀫𑀸𑀢𑀺 𑀢𑀁 𑀚𑀸𑀦𑁂𑀬𑁆𑀬𑀸𑀫 𑀆𑀚𑀸𑀦𑁂𑀬𑁆𑀬𑀸𑀫 𑀯𑀺𑀚𑀸𑀦𑁂𑀬𑁆𑀬𑀸𑀫 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀸𑀫 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀫𑀸𑀢𑀺 𑁋 𑀢𑀁 𑀚𑀸𑀦𑀺𑀬𑀸𑀫. 𑀇𑀢𑀺 𑀫𑁂 𑀫𑀦𑁄 𑀅𑀳𑀽𑀢𑀺 𑀇𑀢𑀺 𑀫𑁂 𑀫𑀦𑁄 𑀅𑀳𑀼, 𑀇𑀢𑀺 𑀫𑁂 𑀘𑀺𑀢𑁆𑀢𑀁 𑀅𑀳𑀼 ¶ , 𑀇𑀢𑀺 𑀫𑁂 𑀲𑀗𑁆𑀓𑀧𑁆𑀧𑁄 𑀅𑀳𑀼, 𑀇𑀢𑀺 𑀫𑁂 𑀯𑀺𑀜𑁆𑀜𑀸𑀡𑀁 𑀅𑀳𑀽𑀢𑀺 𑁋 𑀢𑀁 𑀚𑀸𑀦𑀺𑀬𑀸𑀫 𑀇𑀢𑀺 𑀫𑁂 𑀫𑀦𑁄 𑀅𑀳𑀼.

‘‘𑀓𑀣𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁, 𑀲𑀼𑀔𑀁 𑀤𑀼𑀔𑀜𑁆𑀘𑀸𑀧𑀺 𑀓𑀣𑀁 𑀯𑀺𑀪𑁄𑀢𑀺;

𑀏𑀢𑀁 𑀫𑁂 𑀧𑀩𑁆𑀭𑀽𑀳𑀺 𑀬𑀣𑀸 𑀯𑀺𑀪𑁄𑀢𑀺, 𑀢𑀁 𑀚𑀸𑀦𑀺𑀬𑀸𑀫𑀸𑀢𑀺 𑀫𑁂 𑀫𑀦𑁄 𑀅𑀳𑀽’’𑀢𑀺.

𑀦 𑀲𑀜𑁆𑀜𑀲𑀜𑁆𑀜𑀻 𑀦 𑀯𑀺𑀲𑀜𑁆𑀜𑀲𑀜𑁆𑀜𑀻, 𑀦𑁄𑀧𑀺 𑀅𑀲𑀜𑁆𑀜𑀻 𑀦 𑀯𑀺𑀪𑀽𑀢𑀲𑀜𑁆𑀜𑀻;

𑀏𑀯𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁, 𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸.

𑀦 𑀲𑀜𑁆𑀜𑀲𑀜𑁆𑀜𑀻 𑀦 𑀯𑀺𑀲𑀜𑁆𑀜𑀲𑀜𑁆𑀜𑀻𑀢𑀺. 𑀲𑀜𑁆𑀜𑀲𑀜𑁆𑀜𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀧𑀓𑀢𑀺𑀲𑀜𑁆𑀜𑀸𑀬 𑀞𑀺𑀢𑀸, 𑀦𑀧𑀺 𑀲𑁄 𑀧𑀓𑀢𑀺𑀲𑀜𑁆𑀜𑀸𑀬 𑀞𑀺𑀢𑁄. 𑀯𑀺𑀲𑀜𑁆𑀜𑀲𑀜𑁆𑀜𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀉𑀫𑁆𑀫𑀢𑁆𑀢𑀓𑀸 𑀬𑁂 𑀘 𑀔𑀺𑀢𑁆𑀢𑀘𑀺𑀢𑁆𑀢𑀸 ¶ [𑀉𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 (𑀲𑁆𑀬𑀸.)], 𑀦𑀧𑀺 𑀲𑁄 𑀉𑀫𑁆𑀫𑀢𑁆𑀢𑀓𑁄, 𑀦𑁄𑀧𑀺 𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑁋 𑀦 𑀲𑀜𑁆𑀜𑀲𑀜𑁆𑀜𑀻 𑀦 𑀯𑀺𑀲𑀜𑁆𑀜𑀲𑀜𑁆𑀜𑀻.

𑀦𑁄𑀧𑀺 ¶ 𑀅𑀲𑀜𑁆𑀜𑀻 𑀦 𑀯𑀺𑀪𑀽𑀢𑀲𑀜𑁆𑀜𑀻𑀢𑀺. 𑀅𑀲𑀜𑁆𑀜𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀬𑁂 𑀘 𑀅𑀲𑀜𑁆𑀜𑀲𑀢𑁆𑀢𑀸, 𑀦𑀧𑀺 𑀲𑁄 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄, 𑀦𑀧𑀺 𑀅𑀲𑀜𑁆𑀜𑀲𑀢𑁆𑀢𑁄. 𑀯𑀺𑀪𑀽𑀢𑀲𑀜𑁆𑀜𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀺𑀦𑁄, 𑀦𑀧𑀺 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻𑀢𑀺 𑁋 𑀦𑁄𑀧𑀺 𑀅𑀲𑀜𑁆𑀜𑀻 𑀦 𑀯𑀺𑀪𑀽𑀢𑀲𑀜𑁆𑀜𑀻.

𑀏𑀯𑀁 ¶ 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀦𑁆𑀢𑀺. 𑀇𑀥 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀆𑀭𑀼𑀧𑁆𑀧𑀫𑀕𑁆𑀕𑀲𑀫𑀗𑁆𑀕𑀻𑀢𑀺. 𑀏𑀯𑀁 𑀲𑀫𑁂𑀢𑀲𑁆𑀲 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀏𑀯𑀁 𑀇𑀭𑀺𑀬𑀦𑁆𑀢𑀲𑁆𑀲 𑀏𑀯𑀁 𑀯𑀢𑁆𑀢𑁂𑀦𑁆𑀢𑀲𑁆𑀲 𑀏𑀯𑀁 𑀧𑀸𑀮𑁂𑀦𑁆𑀢𑀲𑁆𑀲 𑀏𑀯𑀁 𑀬𑀧𑁂𑀦𑁆𑀢𑀲𑁆𑀲 𑀏𑀯𑀁 𑀬𑀸𑀧𑁂𑀦𑁆𑀢𑀲𑁆𑀲 𑀭𑀽𑀧𑀁 ¶ 𑀯𑀺𑀪𑁄𑀢𑀺 𑀯𑀺𑀪𑀸𑀯𑀻𑀬𑀢𑀺 𑀅𑀢𑀺𑀓𑁆𑀓𑀫𑀻𑀬𑀢𑀺 𑀲𑀫𑀢𑀺𑀓𑁆𑀓𑀫𑀻𑀬𑀢𑀺 𑀯𑀻𑀢𑀺𑀯𑀢𑁆𑀢𑀻𑀬𑀢𑀻𑀢𑀺 𑁋 𑀏𑀯𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁.

𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸𑀢𑀺. 𑀧𑀧𑀜𑁆𑀘𑀸𑀬𑁂𑀯 𑀧𑀧𑀜𑁆𑀘𑀲𑀗𑁆𑀔𑀸 𑀢𑀡𑁆𑀳𑀸𑀧𑀧𑀜𑁆𑀘𑀲𑀗𑁆𑀔𑀸, 𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑀗𑁆𑀔𑀸, 𑀫𑀸𑀦𑀧𑀧𑀜𑁆𑀘𑀲𑀗𑁆𑀔𑀸 𑀲𑀜𑁆𑀜𑀸𑀦𑀺𑀤𑀸𑀦𑀸 𑀲𑀜𑁆𑀜𑀸𑀲𑀫𑀼𑀤𑀬𑀸 𑀲𑀜𑁆𑀜𑀸𑀚𑀸𑀢𑀺𑀓𑀸 𑀲𑀜𑁆𑀜𑀸𑀧𑀪𑀯𑀸𑀢𑀺 𑁋 𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸.

‘‘𑀦 𑀲𑀜𑁆𑀜𑀲𑀜𑁆𑀜𑀻 𑀦 𑀯𑀺𑀲𑀜𑁆𑀜𑀲𑀜𑁆𑀜𑀻, 𑀦𑁄𑀧𑀺 𑀅𑀲𑀜𑁆𑀜𑀻 𑀦 𑀯𑀺𑀪𑀽𑀢𑀲𑀜𑁆𑀜𑀻;

𑀏𑀯𑀁 𑀲𑀫𑁂𑀢𑀲𑁆𑀲 𑀯𑀺𑀪𑁄𑀢𑀺 𑀭𑀽𑀧𑀁, 𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺.

𑀬𑀁 ¶ 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀏𑀢𑁆𑀢𑀸𑀯𑀢𑀕𑁆𑀕𑀁 ¶ 𑀦𑀼 𑀯𑀤𑀦𑁆𑀢𑀺 𑀳𑁂𑀓𑁂, 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂;

𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀯𑀤𑀦𑁆𑀢𑀺 𑀏𑀢𑁆𑀢𑁄.

𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄𑀢𑀺. 𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀬𑀸𑀘𑀺𑀫𑁆𑀳 𑀅𑀚𑁆𑀛𑁂𑀲𑀺𑀫𑁆𑀳 𑀧𑀲𑀸𑀤𑀬𑀺𑀫𑁆𑀳. 𑀅𑀓𑀺𑀢𑁆𑀢𑀬𑀻 𑀦𑁄𑀢𑀺 𑀓𑀺𑀢𑁆𑀢𑀺𑀢𑀁 𑀧𑀓𑀺𑀢𑁆𑀢𑀺𑀢𑀁 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀝𑀁 𑀯𑀺𑀪𑀢𑁆𑀢𑀁 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑁋 𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄.

𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻𑀢𑀺. 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫, 𑀅𑀜𑁆𑀜𑀁 𑀢𑀁 𑀬𑀸𑀘𑀸𑀫, 𑀅𑀜𑁆𑀜𑀁 𑀢𑀁 𑀅𑀚𑁆𑀛𑁂𑀲𑀸𑀫, 𑀅𑀜𑁆𑀜𑀁 𑀢𑀁 𑀧𑀲𑀸𑀤𑁂𑀫, 𑀉𑀢𑁆𑀢𑀭𑀺𑀁 𑀢𑀁 𑀧𑀼𑀘𑁆𑀙𑀸𑀫. 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻𑀢𑀺 𑀇𑀗𑁆𑀖 ¶ 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺.

𑀏𑀢𑁆𑀢𑀸𑀯𑀢𑀕𑁆𑀕𑀁 𑀦𑀼 𑀯𑀤𑀦𑁆𑀢𑀺 𑀳𑁂𑀓𑁂 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂𑀢𑀺. 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀢𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀬𑀓𑁆𑀔𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲 𑀦𑀭𑀲𑁆𑀲 𑀫𑀸𑀦𑀯𑀲𑁆𑀲 𑀧𑁄𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀲𑁆𑀲 𑀚𑀸𑀕𑀼𑀲𑁆𑀲 𑀚𑀦𑁆𑀢𑀼𑀲𑁆𑀲 𑀇𑀦𑁆𑀤𑀕𑀼𑀲𑁆𑀲 𑀫𑀦𑀼𑀚𑀲𑁆𑀲. 𑀲𑀼𑀤𑁆𑀥𑀺𑀦𑁆𑀢𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁. 𑀇𑀥 𑀧𑀡𑁆𑀟𑀺𑀢𑀸𑀲𑁂𑀢𑀺 𑀇𑀥 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 ¶ 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀏𑀢𑁆𑀢𑀸𑀯𑀢𑀕𑁆𑀕𑀁 𑀦𑀼 ¶ 𑀯𑀤𑀦𑁆𑀢𑀺 𑀳𑁂𑀓𑁂 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂.

𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀯𑀤𑀦𑁆𑀢𑀺 𑀏𑀢𑁆𑀢𑁄𑀢𑀺. 𑀉𑀤𑀸𑀳𑀼 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀢𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 ¶ 𑀯𑀻𑀢𑀺𑀯𑀢𑁆𑀢𑁂𑀢𑁆𑀯𑀸 𑀏𑀢𑁆𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀅𑀜𑁆𑀜𑀁 𑀉𑀢𑁆𑀢𑀭𑀺𑀁 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀯𑀤𑀦𑁆𑀢𑀺 𑀏𑀢𑁆𑀢𑁄.

‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀏𑀢𑁆𑀢𑀸𑀯𑀢𑀕𑁆𑀕𑀁 𑀦𑀼 𑀯𑀤𑀦𑁆𑀢𑀺 𑀳𑁂𑀓𑁂, 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂;

𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀯𑀤𑀦𑁆𑀢𑀺 𑀏𑀢𑁆𑀢𑁄’’𑀢𑀺.

𑀏𑀢𑁆𑀢𑀸𑀯𑀢𑀕𑁆𑀕𑀫𑁆𑀧𑀺 𑀯𑀤𑀦𑁆𑀢𑀺 𑀳𑁂𑀓𑁂, 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂;

𑀢𑁂𑀲𑀁 𑀧𑀦𑁂𑀓𑁂 𑀲𑀫𑀬𑀁 𑀯𑀤𑀦𑁆𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀸𑀯𑀤𑀸𑀦𑀸.

𑀏𑀢𑁆𑀢𑀸𑀯𑀢𑀕𑁆𑀕𑀫𑁆𑀧𑀺 𑀯𑀤𑀦𑁆𑀢𑀺 𑀳𑁂𑀓𑁂, 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸, 𑀏𑀢𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀬𑀓𑁆𑀔𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲 𑀦𑀭𑀲𑁆𑀲 𑀫𑀸𑀦𑀯𑀲𑁆𑀲 𑀧𑁄𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀲𑁆𑀲 𑀚𑀸𑀕𑀼𑀲𑁆𑀲 𑀚𑀦𑁆𑀢𑀼𑀲𑁆𑀲 𑀇𑀦𑁆𑀤𑀕𑀼𑀲𑁆𑀲 ¶ 𑀫𑀦𑀼𑀚𑀲𑁆𑀲. 𑀲𑀼𑀤𑁆𑀥𑀺𑀦𑁆𑀢𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁. 𑀇𑀥 𑀧𑀡𑁆𑀟𑀺𑀢𑀸𑀲𑁂𑀢𑀺 𑀇𑀥 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 ¶ 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀏𑀢𑁆𑀢𑀸𑀯𑀢𑀕𑁆𑀕𑀫𑁆𑀧𑀺 𑀯𑀤𑀦𑁆𑀢𑀺 𑀳𑁂𑀓𑁂 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂.

𑀢𑁂𑀲𑀁 𑀧𑀦𑁂𑀓𑁂 𑀲𑀫𑀬𑀁 𑀯𑀤𑀦𑁆𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 𑀢𑁂𑀲𑀁𑀬𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀪𑀯𑀢𑀚𑁆𑀚𑀺𑀢𑀸 𑀯𑀺𑀪𑀯𑀁 𑀅𑀪𑀺𑀦𑀦𑁆𑀤𑀦𑁆𑀢𑀺, 𑀢𑁂 𑀲𑀢𑁆𑀢𑀲𑁆𑀲 𑀲𑀫𑀁 𑀉𑀧𑀲𑀫𑀁 𑀯𑀽𑀧𑀲𑀫𑀁 𑀦𑀺𑀭𑁄𑀥𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑁆𑀢𑀺 𑀯𑀤𑀦𑁆𑀢𑀺, 𑀬𑀢𑁄 𑀓𑀺𑀁, 𑀪𑁄, 𑀅𑀬𑀁 𑀅𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀅𑀦𑀼𑀧𑀸𑀤𑀺𑀲𑁂𑀲𑁄𑀢𑀺. 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 𑀓𑀼𑀲𑀮𑀯𑀸𑀤𑀸 ¶ 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀢𑁂𑀲𑀁 𑀧𑀦𑁂𑀓𑁂 𑀲𑀫𑀬𑀁 𑀯𑀤𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀸𑀯𑀤𑀸𑀦𑀸.

‘‘𑀏𑀢𑁆𑀢𑀸𑀯𑀢𑀕𑁆𑀕𑀫𑁆𑀧𑀺 𑀯𑀤𑀦𑁆𑀢𑀺 𑀳𑁂𑀓𑁂, 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺𑀁 𑀇𑀥 𑀧𑀡𑁆𑀟𑀺𑀢𑀸𑀲𑁂;

𑀢𑁂𑀲𑀁 𑀧𑀦𑁂𑀓𑁂 𑀲𑀫𑀬𑀁 𑀯𑀤𑀦𑁆𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺.

𑀏𑀢𑁂 𑀘 𑀜𑀢𑁆𑀯𑀸 𑀉𑀧𑀦𑀺𑀲𑁆𑀲𑀺𑀢𑀸𑀢𑀺, 𑀜𑀢𑁆𑀯𑀸 𑀫𑀼𑀦𑀻 𑀦𑀺𑀲𑁆𑀲𑀬𑁂 𑀲𑁄 𑀯𑀻𑀫𑀁𑀲𑀻;

𑀜𑀢𑁆𑀯𑀸 ¶ 𑀯𑀺𑀫𑀼𑀢𑁆𑀢𑁄 𑀦 𑀯𑀺𑀯𑀸𑀤𑀫𑁂𑀢𑀺, 𑀪𑀯𑀸𑀪𑀯𑀸𑀬 𑀦 𑀲𑀫𑁂𑀢𑀺 𑀥𑀻𑀭𑁄.

𑀏𑀢𑁂 𑀘 𑀜𑀢𑁆𑀯𑀸 𑀉𑀧𑀦𑀺𑀲𑁆𑀲𑀺𑀢𑀸𑀢𑀺. 𑀏𑀢𑁂𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁂. 𑀉𑀧𑀦𑀺𑀲𑁆𑀲𑀺𑀢𑀸𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸, 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀢𑁂 𑀘 𑀜𑀢𑁆𑀯𑀸 𑀉𑀧𑀦𑀺𑀲𑁆𑀲𑀺𑀢𑀸𑀢𑀺.

𑀜𑀢𑁆𑀯𑀸 𑀫𑀼𑀦𑀻 𑀦𑀺𑀲𑁆𑀲𑀬𑁂 𑀲𑁄 𑀯𑀻𑀫𑀁𑀲𑀻𑀢𑀺. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀫𑀼𑀦𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸, 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑁄 𑀯𑀻𑀫𑀁𑀲𑀻𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑀜𑀢𑁆𑀯𑀸 𑀫𑀼𑀦𑀺 𑀦𑀺𑀲𑁆𑀲𑀬𑁂 𑀲𑁄 𑀯𑀻𑀫𑀁𑀲𑀻. 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄 𑀦 𑀯𑀺𑀯𑀸𑀤𑀫𑁂𑀢𑀻𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 ¶ . 𑀯𑀺𑀫𑀼𑀢𑁆𑀢𑁄𑀢𑀺 𑀫𑀼𑀢𑁆𑀢𑁄 𑀯𑀺𑀫𑀼𑀢𑁆𑀢𑁄 𑀧𑀭𑀺𑀫𑀼𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑁄 𑀅𑀘𑁆𑀘𑀦𑁆𑀢𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁂𑀦. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀼𑀢𑁆𑀢𑁄 𑀯𑀺𑀫𑀼𑀢𑁆𑀢𑁄 𑀧𑀭𑀺𑀫𑀼𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑁄 𑀅𑀘𑁆𑀘𑀦𑁆𑀢𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁂𑀦. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 ¶ 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀼𑀢𑁆𑀢𑁄 𑀯𑀺𑀫𑀼𑀢𑁆𑀢𑁄 𑀧𑀭𑀺𑀫𑀼𑀢𑁆𑀢𑁄 ¶ 𑀲𑀼𑀯𑀺𑀫𑀼𑀢𑁆𑀢𑁄 𑀅𑀘𑁆𑀘𑀦𑁆𑀢𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁂𑀦𑀸𑀢𑀺 𑁋 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀦 𑀯𑀺𑀯𑀸𑀤𑀫𑁂𑀢𑀻𑀢𑀺 𑀦 𑀓𑀮𑀳𑀁 𑀓𑀭𑁄𑀢𑀺, 𑀦 𑀪𑀡𑁆𑀟𑀦𑀁 𑀓𑀭𑁄𑀢𑀺, 𑀦 𑀯𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀦 𑀯𑀺𑀯𑀸𑀤𑀁 𑀓𑀭𑁄𑀢𑀺, 𑀦 𑀫𑁂𑀥𑀕𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀦 𑀓𑁂𑀦𑀘𑀺 𑀲𑀁𑀯𑀤𑀢𑀺, 𑀦 𑀓𑁂𑀦𑀘𑀺 𑀯𑀺𑀯𑀤𑀢𑀺, 𑀬𑀜𑁆𑀘 𑀮𑁄𑀓𑁂 𑀯𑀼𑀢𑁆𑀢𑀁 𑀢𑁂𑀦 𑀘 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲’’𑀦𑁆𑀢𑀺 𑁋 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄 𑀦 𑀯𑀺𑀯𑀸𑀤𑀫𑁂𑀢𑀺.

𑀪𑀯𑀸𑀪𑀯𑀸𑀬 𑀦 𑀲𑀫𑁂𑀢𑀺 𑀥𑀻𑀭𑁄𑀢𑀺. 𑀪𑀯𑀸𑀪𑀯𑀸𑀬𑀸𑀢𑀺 𑀪𑀯𑀸𑀬 𑀓𑀫𑁆𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀓𑀸𑀫𑀪𑀯𑀸𑀬 ¶ , 𑀓𑀫𑁆𑀫𑀪𑀯𑀸𑀬 𑀓𑀸𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀅𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀅𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀬 𑀧𑀼𑀦𑀧𑁆𑀧𑀼𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀦 𑀲𑀫𑁂𑀢𑀺 𑀦 𑀲𑀫𑀸𑀕𑀘𑁆𑀙𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀺. 𑀥𑀻𑀭𑁄𑀢𑀺 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑁋 𑀪𑀯𑀸𑀪𑀯𑀸𑀬 𑀦 𑀲𑀫𑁂𑀢𑀺 𑀥𑀻𑀭𑁄.

‘‘𑀏𑀢𑁂 𑀘 𑀜𑀢𑁆𑀯𑀸 𑀉𑀧𑀦𑀺𑀲𑁆𑀲𑀺𑀢𑀸𑀢𑀺, 𑀜𑀢𑁆𑀯𑀸 𑀫𑀼𑀦𑀻 𑀦𑀺𑀲𑁆𑀲𑀬𑁂 𑀲𑁄 𑀯𑀻𑀫𑀁𑀲𑀻;

𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑁄 𑀦 𑀯𑀺𑀯𑀸𑀤𑀫𑁂𑀢𑀺, 𑀪𑀯𑀸𑀪𑀯𑀸𑀬 𑀦 𑀲𑀫𑁂𑀢𑀺 𑀥𑀻𑀭𑁄’’𑀢𑀺.

𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀏𑀓𑀸𑀤𑀲𑀫𑁄.

𑁧𑁨. 𑀘𑀽𑀴𑀯𑀺𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀘𑀽𑀴𑀯𑀺𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀲𑀓𑀁 ¶ ¶ 𑀲𑀓𑀁 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, 𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀬𑁄 𑀏𑀯𑀁 𑀚𑀸𑀦𑀸𑀢𑀺 [𑀏𑀯𑀁 𑀧𑀚𑀸𑀦𑀸𑀢𑀺 (𑀲𑀻.)] 𑀲 𑀯𑁂𑀤𑀺 𑀥𑀫𑁆𑀫𑀁, 𑀇𑀤𑀁 𑀧𑀝𑀺𑀓𑁆𑀓𑁄𑀲𑀫𑀓𑁂𑀯𑀮𑀻 𑀲𑁄.

𑀲𑀓𑀁 ¶ 𑀲𑀓𑀁 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸; 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀲𑀁𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀺. 𑀬𑀣𑀸 𑀅𑀕𑀸𑀭𑀺𑀓𑀸 𑀖𑀭𑁂𑀲𑀼 𑀯𑀲𑀦𑁆𑀢𑀺, 𑀲𑀸𑀧𑀢𑁆𑀢𑀺𑀓𑀸 𑀯𑀸 𑀆𑀧𑀢𑁆𑀢𑀻𑀲𑀼 𑀯𑀲𑀦𑁆𑀢𑀺, 𑀲𑀓𑀺𑀮𑁂𑀲𑀸 𑀯𑀸 𑀓𑀺𑀮𑁂𑀲𑁂𑀲𑀼 𑀯𑀲𑀦𑁆𑀢𑀺; 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸, 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀲𑀁𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸.

𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀯𑀺𑀕𑁆𑀕𑀬𑁆𑀳𑀸𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀦𑀸𑀦𑀸 𑀯𑀤𑀦𑁆𑀢𑀺 𑀯𑀺𑀯𑀺𑀥𑀁 𑀯𑀤𑀦𑁆𑀢𑀺 𑀅𑀜𑁆𑀜𑁄𑀜𑁆𑀜𑀁 𑀯𑀤𑀦𑁆𑀢𑀺 𑀧𑀼𑀣𑀼 [𑀧𑀼𑀣𑀼𑀁 (𑀲𑀻.)] 𑀯𑀤𑀦𑁆𑀢𑀺, 𑀦 𑀏𑀓𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀓𑀼𑀲𑀮𑀸𑀢𑀺 𑀓𑀼𑀲𑀮𑀯𑀸𑀤𑀸 ¶ 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 ¶ 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀦𑁆𑀢𑀺. 𑀬𑁄 𑀇𑀫𑀁 [𑀇𑀤𑀁 (𑀲𑀻. 𑀓.)] 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀚𑀸𑀦𑀸𑀢𑀺 𑀲𑁄 𑀥𑀫𑁆𑀫𑀁 𑀯𑁂𑀤𑀺 𑀅𑀜𑁆𑀜𑀸𑀲𑀺 𑀅𑀧𑀲𑁆𑀲𑀺 𑀧𑀝𑀺𑀯𑀺𑀚𑁆𑀛𑀻𑀢𑀺 𑁋 𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀁.

𑀇𑀤𑀁 𑀧𑀝𑀺𑀓𑁆𑀓𑁄𑀲𑀫𑀓𑁂𑀯𑀮𑀻 𑀲𑁄𑀢𑀺. 𑀬𑁄 𑀇𑀫𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀧𑀝𑀺𑀓𑁆𑀓𑁄𑀲𑀢𑀺, 𑀅𑀓𑁂𑀯𑀮𑀻 ¶ 𑀲𑁄 𑀅𑀲𑀫𑀢𑁆𑀢𑁄 𑀲𑁄 𑀅𑀧𑀭𑀺𑀧𑀼𑀡𑁆𑀡𑁄 𑀲𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄𑀢𑀺 𑁋 𑀇𑀤𑀁 𑀧𑀝𑀺𑀓𑁆𑀓𑁄𑀲𑀫𑀓𑁂𑀯𑀮𑀻 𑀲𑁄.

‘‘𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, 𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀁, 𑀇𑀤𑀁 𑀧𑀝𑀺𑀓𑁆𑀓𑁄𑀲𑀫𑀓𑁂𑀯𑀮𑀻 𑀲𑁄’’𑀢𑀺.

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀼;

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁, 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸𑀯𑀤𑀸𑀦𑀸.

𑀏𑀯𑀫𑁆𑀧𑀺 ¶ 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀻𑀢𑀺. 𑀏𑀯𑀁 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀯𑀸𑀤𑀬𑀦𑁆𑀢𑀺, 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀪𑀡𑁆𑀟𑀦𑀁 ¶ 𑀓𑀭𑁄𑀦𑁆𑀢𑀺, 𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀫𑁂𑀥𑀕𑀁 𑀓𑀭𑁄𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺 𑁋 𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺.

𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀽𑀢𑀺. 𑀧𑀭𑁄 𑀩𑀸𑀮𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄 𑀅𑀓𑀼𑀲𑀮𑁄 𑀅𑀯𑀺𑀤𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀯𑀺𑀪𑀸𑀯𑀻 𑀤𑀼𑀧𑁆𑀧𑀜𑁆𑀜𑁄𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 ¶ 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀼.

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀦𑁆𑀢𑀺. 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀤𑁄 𑀓𑀢𑀫𑁄 𑀲𑀘𑁆𑀘𑁄 𑀢𑀘𑁆𑀙𑁄 𑀢𑀣𑁄 𑀪𑀽𑀢𑁄 𑀬𑀸𑀣𑀸𑀯𑁄 𑀅𑀯𑀺𑀧𑀭𑀻𑀢𑁄𑀢𑀺 𑁋 𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁.

𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸𑀯𑀤𑀸𑀦𑀸𑀢𑀺. 𑀲𑀩𑁆𑀩𑁂𑀯𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀼𑀲𑀮𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸𑀯𑀤𑀸𑀦𑀸.

‘‘𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀼;

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁, 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺.

𑀧𑀭𑀲𑁆𑀲 ¶ 𑀘𑁂 𑀥𑀫𑁆𑀫𑀫𑀦𑀸𑀦𑀼𑀚𑀸𑀦𑀁, 𑀩𑀸𑀮𑁄𑀫𑀓𑁄 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀲𑀩𑁆𑀩𑁂𑀯 ¶ 𑀩𑀸𑀮𑀸 𑀲𑀼𑀦𑀺𑀳𑀻𑀦𑀧𑀜𑁆𑀜𑀸, 𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸.

𑀧𑀭𑀲𑁆𑀲 𑀘𑁂 𑀥𑀫𑁆𑀫𑀫𑀦𑀸𑀦𑀼𑀚𑀸𑀦𑀦𑁆𑀢𑀺. 𑀧𑀭𑀲𑁆𑀲 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀅𑀦𑀸𑀦𑀼𑀚𑀸𑀦𑀦𑁆𑀢𑁄 𑀅𑀦𑀸𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀸𑀦𑀼𑀫𑀦𑀦𑁆𑀢𑁄 𑀅𑀦𑀸𑀦𑀼𑀫𑀜𑁆𑀜𑀦𑁆𑀢𑁄 𑀅𑀦𑀸𑀦𑀼𑀫𑁄𑀤𑀦𑁆𑀢𑁄𑀢𑀺 𑁋 𑀧𑀭𑀲𑁆𑀲 𑀘𑁂 𑀥𑀫𑁆𑀫𑀫𑀦𑀸𑀦𑀼𑀚𑀸𑀦𑀁.

𑀩𑀸𑀮𑁄𑀫𑀓𑁄 ¶ 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄𑀢𑀺. 𑀧𑀭𑁄 𑀩𑀸𑀮𑁄 𑀳𑁄𑀢𑀺 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄, 𑀳𑀻𑀦𑀧𑀜𑁆𑀜𑁄 𑀦𑀺𑀳𑀻𑀦𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄 𑀧𑀭𑀺𑀢𑁆𑀢𑀧𑀜𑁆𑀜𑁄𑀢𑀺 𑁋 𑀩𑀸𑀮𑁄𑀫𑀓𑁄 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄.

𑀲𑀩𑁆𑀩𑁂𑀯 𑀩𑀸𑀮𑀸 𑀲𑀼𑀦𑀺𑀳𑀻𑀦𑀧𑀜𑁆𑀜𑀸𑀢𑀺. 𑀲𑀩𑁆𑀩𑁂𑀯𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀩𑀸𑀮𑀸 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸, 𑀲𑀩𑁆𑀩𑁂𑀯 𑀳𑀻𑀦𑀧𑀜𑁆𑀜𑀸 𑀦𑀺𑀳𑀻𑀦𑀧𑀜𑁆𑀜𑀸 𑀑𑀫𑀓𑀧𑀜𑁆𑀜𑀸 ¶ 𑀮𑀸𑀫𑀓𑀧𑀜𑁆𑀜𑀸 𑀙𑀢𑀼𑀓𑁆𑀓𑀧𑀜𑁆𑀜𑀸 𑀧𑀭𑀺𑀢𑁆𑀢𑀧𑀜𑁆𑀜𑀸𑀢𑀺 𑁋 𑀲𑀩𑁆𑀩𑁂𑀯 𑀩𑀸𑀮𑀸 𑀲𑀼𑀦𑀺𑀳𑀻𑀦𑀧𑀜𑁆𑀜𑀸.

𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺. 𑀲𑀩𑁆𑀩𑁂𑀯𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸; 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 𑀕𑀳𑁂𑀢𑁆𑀯𑀸 ¶ 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀲𑀁𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀺. 𑀬𑀣𑀸 𑀅𑀕𑀸𑀭𑀺𑀓𑀸 𑀯𑀸 𑀖𑀭𑁂𑀲𑀼 𑀯𑀲𑀦𑁆𑀢𑀺, 𑀲𑀸𑀧𑀢𑁆𑀢𑀺𑀓𑀸 𑀯𑀸 𑀆𑀧𑀢𑁆𑀢𑀻𑀲𑀼 𑀯𑀲𑀦𑁆𑀢𑀺, 𑀲𑀓𑀺𑀮𑁂𑀲𑀸 𑀯𑀸 𑀓𑀺𑀮𑁂𑀲𑁂𑀲𑀼 𑀯𑀲𑀦𑁆𑀢𑀺; 𑀏𑀯𑀫𑁂𑀯 𑀲𑀩𑁆𑀩𑁂𑀯𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸…𑀧𑁂… 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸.

‘‘𑀧𑀭𑀲𑁆𑀲 𑀘𑁂 𑀥𑀫𑁆𑀫𑀫𑀦𑀸𑀦𑀼𑀚𑀸𑀦𑀁, 𑀩𑀸𑀮𑁄𑀫𑀓𑁄 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀲𑀩𑁆𑀩𑁂𑀯 𑀩𑀸𑀮𑀸 𑀲𑀼𑀦𑀺𑀳𑀻𑀦𑀧𑀜𑁆𑀜𑀸, 𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸’’𑀢𑀺.

𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦𑀯𑀻𑀯𑀤𑀸𑀢𑀸, [𑀘𑁂𑀯𑀦𑀯𑁂𑀯𑀤𑀸𑀢𑀸 (𑀲𑀻.), 𑀘𑁂 𑀧𑀦 𑀯𑀺𑀯𑀤𑀸𑀢𑀸 (𑀲𑁆𑀬𑀸.)] 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀻𑀫𑀸;

𑀦 𑀢𑁂𑀲𑀁 𑀓𑁄𑀘𑀺 𑀧𑀭𑀺𑀳𑀻𑀦𑀧𑀜𑁆𑀜𑁄, 𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸.

𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦𑀯𑀻𑀯𑀤𑀸𑀢𑀸𑀢𑀺. 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 ¶ 𑀮𑀤𑁆𑀥𑀺𑀬𑀸 𑀅𑀦𑀯𑀻𑀯𑀤𑀸𑀢𑀸 𑀅𑀯𑁄𑀤𑀸𑀢𑀸 𑀅𑀧𑀭𑀺𑀬𑁄𑀤𑀸𑀢𑀸 𑀲𑀁𑀓𑀺𑀮𑀺𑀝𑁆𑀞𑀸 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑁋 𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦𑀯𑀻𑀯𑀤𑀸𑀢𑀸.

𑀲𑀁𑀲𑀼𑀤𑁆𑀥𑀧𑀜𑁆𑀜𑀸 ¶ 𑀓𑀼𑀲𑀮𑀸 𑀫𑀼𑀢𑀻𑀫𑀸𑀢𑀺. 𑀲𑀼𑀤𑁆𑀥𑀧𑀜𑁆𑀜𑀸 𑀯𑀺𑀲𑀼𑀤𑁆𑀥𑀧𑀜𑁆𑀜𑀸 𑀧𑀭𑀺𑀲𑀼𑀤𑁆𑀥𑀧𑀜𑁆𑀜𑀸 𑀯𑁄𑀤𑀸𑀢𑀧𑀜𑁆𑀜𑀸 𑀧𑀭𑀺𑀬𑁄𑀤𑀸𑀢𑀧𑀜𑁆𑀜𑀸. 𑀅𑀣 𑀯𑀸 𑀲𑀼𑀤𑁆𑀥𑀤𑀲𑁆𑀲𑀦𑀸 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑀸 𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀦𑀸 ¶ 𑀯𑁄𑀤𑀸𑀢𑀤𑀲𑁆𑀲𑀦𑀸 𑀧𑀭𑀺𑀬𑁄𑀤𑀸𑀢𑀤𑀲𑁆𑀲𑀦𑀸𑀢𑀺 𑁋 𑀲𑀁𑀲𑀼𑀤𑁆𑀥𑀧𑀜𑁆𑀜𑀸. 𑀓𑀼𑀲𑀮𑀸𑀢𑀺 𑀓𑀼𑀲𑀮𑀸 𑀧𑀡𑁆𑀟𑀺𑀢𑀸 𑀧𑀜𑁆𑀜𑀯𑀦𑁆𑀢𑁄 𑀇𑀤𑁆𑀥𑀺𑀫𑀦𑁆𑀢𑁄 𑀜𑀸𑀡𑀺𑀦𑁄 𑀯𑀺𑀪𑀸𑀯𑀺𑀦𑁄 𑀫𑁂𑀥𑀸𑀯𑀺𑀦𑁄𑀢𑀺 𑁋 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸. 𑀫𑀼𑀢𑀻𑀫𑀸𑀢𑀺 𑀫𑀼𑀢𑀺𑀫𑀸 𑀧𑀡𑁆𑀟𑀺𑀢𑀸 𑀧𑀜𑁆𑀜𑀯𑀦𑁆𑀢𑁄 𑀇𑀤𑁆𑀥𑀺𑀫𑀦𑁆𑀢𑁄 𑀜𑀸𑀡𑀺𑀦𑁄 ¶ 𑀯𑀺𑀪𑀸𑀯𑀺𑀦𑁄 𑀫𑁂𑀥𑀸𑀯𑀺𑀦𑁄𑀢𑀺 𑁋 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀻𑀫𑀸.

𑀢𑁂𑀲𑀁 𑀦 𑀓𑁄𑀘𑀺 𑀧𑀭𑀺𑀳𑀻𑀦𑀧𑀜𑁆𑀜𑁄𑀢𑀺. 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀦 𑀓𑁄𑀘𑀺 𑀳𑀻𑀦𑀧𑀜𑁆𑀜𑁄 𑀦𑀺𑀳𑀻𑀦𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄 𑀧𑀭𑀺𑀢𑁆𑀢𑀧𑀜𑁆𑀜𑁄 𑀅𑀢𑁆𑀣𑀺. 𑀲𑀩𑁆𑀩𑁂𑀯 𑀲𑁂𑀝𑁆𑀞𑀧𑀜𑁆𑀜𑀸 𑀯𑀺𑀲𑀺𑀝𑁆𑀞𑀧𑀜𑁆𑀜𑀸 𑀧𑀸𑀫𑁄𑀓𑁆𑀔𑀧𑀜𑁆𑀜𑀸 𑀉𑀢𑁆𑀢𑀫𑀧𑀜𑁆𑀜𑀸 𑀧𑀯𑀭𑀧𑀜𑁆𑀜𑀸𑀢𑀺 𑁋 𑀢𑁂𑀲𑀁 𑀦 𑀓𑁄𑀘𑀺 𑀧𑀭𑀺𑀳𑀻𑀦𑀧𑀜𑁆𑀜𑁄.

𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸𑀢𑀺. 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀺 𑀢𑀣𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸 𑀅𑀪𑀺𑀦𑀺𑀯𑀺𑀝𑁆𑀞𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸.

‘‘𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦𑀯𑀻𑀯𑀤𑀸𑀢𑀸, 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀻𑀫𑀸;

𑀢𑁂𑀲𑀁 𑀦 𑀓𑁄𑀘𑀺 𑀧𑀭𑀺𑀳𑀻𑀦𑀧𑀜𑁆𑀜𑁄, 𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸’’𑀢𑀺.

𑀦 𑀯𑀸𑀳𑀫𑁂𑀢𑀁 𑀢𑀣𑀺𑀬𑀦𑁆𑀢𑀺 [𑀢𑀣𑀺𑀯𑀦𑁆𑀢𑀺 (𑀲𑁆𑀬𑀸.)] 𑀩𑁆𑀭𑀽𑀫𑀺, 𑀬𑀫𑀸𑀳𑀼 𑀩𑀸𑀮𑀸 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀫𑀓𑀁𑀲𑀼 𑀲𑀘𑁆𑀘𑀁, 𑀢𑀲𑁆𑀫𑀸 𑀳𑀺 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀦𑁆𑀢𑀺.

𑀦 ¶ 𑀯𑀸𑀳𑀫𑁂𑀢𑀁 𑀢𑀣𑀺𑀬𑀦𑁆𑀢𑀺 𑀩𑁆𑀭𑀽𑀫𑀻𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀏𑀢𑀦𑁆𑀢𑀺 ‘‘𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺 𑀦𑀸𑀳𑀁 𑀏𑀢𑀁 𑀢𑀘𑁆𑀙𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢’’𑀦𑁆𑀢𑀺 ¶ 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀦 𑀯𑀸𑀳𑀫𑁂𑀢𑀁 𑀢𑀣𑀺𑀬𑀦𑁆𑀢𑀺 𑀩𑁆𑀭𑀽𑀫𑀺.

𑀬𑀫𑀸𑀳𑀼 𑀩𑀸𑀮𑀸 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀦𑁆𑀢𑀺. 𑀫𑀺𑀣𑀽𑀢𑀺 𑀤𑁆𑀯𑁂 𑀚𑀦𑀸, 𑀤𑁆𑀯𑁂 𑀓𑀮𑀳𑀓𑀸𑀭𑀓𑀸, 𑀤𑁆𑀯𑁂 𑀪𑀡𑁆𑀟𑀦𑀓𑀸𑀭𑀓𑀸, 𑀤𑁆𑀯𑁂 𑀪𑀲𑁆𑀲𑀓𑀸𑀭𑀓𑀸, 𑀤𑁆𑀯𑁂 𑀯𑀺𑀯𑀸𑀤𑀓𑀸𑀭𑀓𑀸, 𑀤𑁆𑀯𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀤𑁆𑀯𑁂 𑀯𑀸𑀤𑀺𑀦𑁄, 𑀤𑁆𑀯𑁂 𑀲𑀮𑁆𑀮𑀧𑀓𑀸; 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀩𑀸𑀮𑁄 [𑀩𑀸𑀮𑀢𑁄 (𑀲𑀻. 𑀓.) 𑀏𑀯𑀫𑀜𑁆𑀜𑁂𑀲𑀼 𑀙𑀧𑁆𑀧𑀤𑁂𑀲𑀼𑀧𑀺 𑀢𑁄𑀧𑀘𑁆𑀘𑀬𑀦𑁆𑀢𑀯𑀲𑁂𑀦] 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄𑀢𑀺, 𑀏𑀯𑀫𑀸𑀳𑀁𑀲𑀼 ¶ ¶ 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀬𑀫𑀸𑀳𑀼 𑀩𑀸𑀮𑀸 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁.

𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀫𑀓𑀁𑀲𑀼 𑀲𑀘𑁆𑀘𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑁋 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀫𑀓𑀁𑀲𑀼 𑀲𑀘𑁆𑀘𑀁. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑁋 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀫𑀓𑀁𑀲𑀼 𑀲𑀘𑁆𑀘𑀁.

𑀢𑀲𑁆𑀫𑀸 𑀳𑀺 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀦𑁆𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀧𑀭𑀁 𑀩𑀸𑀮𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄𑀢𑀺 𑀤𑀳𑀦𑁆𑀢𑀺 𑀧𑀲𑁆𑀲𑀦𑁆𑀢𑀺 𑀤𑀓𑁆𑀔𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑁋 𑀢𑀲𑁆𑀫𑀸 𑀳𑀺 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀦𑁆𑀢𑀺.

‘‘𑀦 𑀯𑀸𑀳𑀫𑁂𑀢𑀁 𑀢𑀣𑀺𑀬𑀦𑁆𑀢𑀺 𑀩𑁆𑀭𑀽𑀫𑀺, 𑀬𑀫𑀸𑀳𑀼 𑀩𑀸𑀮𑀸 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀲𑀓𑀁 ¶ 𑀲𑀓𑀁 𑀤𑀺𑀝𑁆𑀞𑀺𑀫𑀓𑀁𑀲𑀼 𑀲𑀘𑁆𑀘𑀁, 𑀢𑀲𑁆𑀫𑀸 𑀳𑀺 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀦𑁆𑀢𑀻’’𑀢𑀺.

𑀬𑀫𑀸𑀳𑀼 ¶ 𑀲𑀘𑁆𑀘𑀁 𑀢𑀣𑀺𑀬𑀦𑁆𑀢𑀺 𑀏𑀓𑁂, 𑀢𑀫𑀸𑀳𑀼 𑀅𑀜𑁆𑀜𑁂𑀧𑀺 [𑀅𑀜𑁆𑀜𑁂 (𑀲𑀻. 𑀓.)] 𑀢𑀼𑀘𑁆𑀙𑀁 𑀫𑀼𑀲𑀸𑀢𑀺;

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀓𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀺.

𑀬𑀫𑀸𑀳𑀼 𑀲𑀘𑁆𑀘𑀁 𑀢𑀣𑀺𑀬𑀦𑁆𑀢𑀺 𑀏𑀓𑁂𑀢𑀺. 𑀬𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀇𑀤𑀁 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢’’𑀦𑁆𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀬𑀫𑀸𑀳𑀼 𑀲𑀘𑁆𑀘𑀁 𑀢𑀣𑀺𑀬𑀦𑁆𑀢𑀺 𑀏𑀓𑁂.

𑀢𑀫𑀸𑀳𑀼 𑀅𑀜𑁆𑀜𑁂𑀧𑀺 𑀢𑀼𑀘𑁆𑀙𑀁 𑀫𑀼𑀲𑀸𑀢𑀻𑀢𑀺. 𑀢𑀫𑁂𑀯 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀢𑀼𑀘𑁆𑀙𑀁 𑀏𑀢𑀁, 𑀫𑀼𑀲𑀸 𑀏𑀢𑀁, 𑀅𑀪𑀽𑀢𑀁 𑀏𑀢𑀁, 𑀅𑀮𑀺𑀓𑀁 𑀏𑀢𑀁, 𑀅𑀬𑀸𑀣𑀸𑀯𑀁 𑀏𑀢’’𑀦𑁆𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀫𑀸𑀳𑀼 𑀅𑀜𑁆𑀜𑁂𑀧𑀺 𑀢𑀼𑀘𑁆𑀙𑀁 𑀫𑀼𑀲𑀸𑀢𑀺.

𑀏𑀯𑀫𑁆𑀧𑀺 ¶ 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀻𑀢𑀺. 𑀏𑀯𑀁 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀯𑀸𑀤𑀬𑀦𑁆𑀢𑀺, 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀪𑀡𑁆𑀟𑀦𑀁 𑀓𑀭𑁄𑀦𑁆𑀢𑀺, 𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺 ¶ , 𑀫𑁂𑀥𑀕𑀁 𑀓𑀭𑁄𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺 𑁋 𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺.

𑀓𑀲𑁆𑀫𑀸 ¶ 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀻𑀢𑀺. 𑀓𑀲𑁆𑀫𑀸𑀢𑀺 𑀓𑀲𑁆𑀫𑀸 𑀓𑀺𑀁𑀓𑀸𑀭𑀡𑀸 𑀓𑀺𑀁𑀳𑁂𑀢𑀼 𑀓𑀺𑀁𑀧𑀘𑁆𑀘𑀬𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸 𑀦 𑀏𑀓𑀁 𑀯𑀤𑀦𑁆𑀢𑀺 𑀦𑀸𑀦𑀸 𑀯𑀤𑀦𑁆𑀢𑀺 𑀯𑀺𑀯𑀺𑀥𑀁 𑀯𑀤𑀦𑁆𑀢𑀺 𑀅𑀜𑁆𑀜𑁄𑀜𑁆𑀜𑀁 [𑀅𑀜𑁆𑀜𑁄𑀜𑁆𑀜𑁂 (𑀓.)] 𑀯𑀤𑀦𑁆𑀢𑀺 𑀧𑀼𑀣𑀼 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀓𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀺.

‘‘𑀬𑀫𑀸𑀳𑀼 ¶ 𑀲𑀘𑁆𑀘𑀁 𑀢𑀣𑀺𑀬𑀦𑁆𑀢𑀺 𑀏𑀓𑁂, 𑀢𑀫𑀸𑀳𑀼 𑀅𑀜𑁆𑀜𑁂𑀧𑀺 𑀢𑀼𑀘𑁆𑀙𑀁 𑀫𑀼𑀲𑀸𑀢𑀺;

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀓𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀻’’𑀢𑀺.

𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀺, 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀁;

𑀦𑀸𑀦𑀸 𑀢𑁂 𑀲𑀘𑁆𑀘𑀸𑀦𑀺 𑀲𑀬𑀁 𑀣𑀼𑀦𑀦𑁆𑀢𑀺, 𑀢𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀺.

𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀻𑀢𑀺. 𑀏𑀓𑀁 𑀲𑀘𑁆𑀘𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀣 𑀯𑀸 𑀏𑀓𑀁 𑀲𑀘𑁆𑀘𑀁 𑀯𑀼𑀘𑁆𑀘𑀢𑀺 𑁋 𑀫𑀕𑁆𑀕𑀲𑀘𑁆𑀘𑀁, 𑀦𑀺𑀬𑁆𑀬𑀸𑀦𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑁋 𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀺.

𑀬𑀲𑁆𑀫𑀺𑀁 ¶ 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀦𑁆𑀢𑀺. 𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀲𑀘𑁆𑀘𑁂. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁. 𑀧𑀚𑀸𑀦𑀦𑁆𑀢𑀺 [𑀧𑀚𑀸𑀦𑀁 (𑀲𑀻. 𑀓.), 𑀧𑀚𑀸 (𑀲𑁆𑀬𑀸.)] 𑀬𑀁 𑀲𑀘𑁆𑀘𑀁 𑀧𑀚𑀸𑀦𑀦𑁆𑀢𑀸 𑀆𑀚𑀸𑀦𑀦𑁆𑀢𑀸 𑀯𑀺𑀚𑀸𑀦𑀦𑁆𑀢𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀸 𑀦 𑀓𑀮𑀳𑀁 𑀓𑀭𑁂𑀬𑁆𑀬𑀼𑀁, 𑀦 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬𑀼𑀁, 𑀦 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬𑀼𑀁, 𑀦 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬𑀼𑀁, 𑀦 𑀫𑁂𑀥𑀕𑀁 𑀓𑀭𑁂𑀬𑁆𑀬𑀼𑀁, 𑀓𑀮𑀳𑀁 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀫𑁂𑀥𑀕𑀁 𑀧𑀚𑀳𑁂𑀬𑁆𑀬𑀼𑀁, 𑀯𑀺𑀦𑁄𑀤𑁂𑀬𑁆𑀬𑀼𑀁, 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬𑀼𑀁 [𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬𑀼𑀁 (𑀲𑀻. 𑀲𑁆𑀬𑀸.)], 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀼𑀦𑁆𑀢𑀺 𑁋 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀁.

𑀦𑀸𑀦𑀸 ¶ 𑀢𑁂 𑀲𑀘𑁆𑀘𑀸𑀦𑀺 𑀲𑀬𑀁 𑀣𑀼𑀦𑀦𑁆𑀢𑀻𑀢𑀺. 𑀦𑀸𑀦𑀸 𑀢𑁂 𑀲𑀘𑁆𑀘𑀸𑀦𑀺 𑀲𑀬𑀁 𑀣𑀼𑀦𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 ¶ 𑀲𑀬𑀁 𑀣𑀼𑀦𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 ¶ 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀬𑀁 𑀣𑀼𑀦𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦𑀸𑀦𑀸 𑀢𑁂 𑀲𑀘𑁆𑀘𑀸𑀦𑀺 𑀲𑀬𑀁 𑀣𑀼𑀦𑀦𑁆𑀢𑀺.

𑀢𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀦 𑀏𑀓𑀁 𑀯𑀤𑀦𑁆𑀢𑀺 𑀦𑀸𑀦𑀸 𑀯𑀤𑀦𑁆𑀢𑀺 𑀯𑀺𑀯𑀺𑀥𑀁 𑀯𑀤𑀦𑁆𑀢𑀺 𑀅𑀜𑁆𑀜𑁄𑀜𑁆𑀜𑀁 𑀯𑀤𑀦𑁆𑀢𑀺 𑀧𑀼𑀣𑀼 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀺.

‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀺, 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀁;

𑀦𑀸𑀦𑀸 ¶ 𑀢𑁂 𑀲𑀘𑁆𑀘𑀸𑀦𑀺 𑀲𑀬𑀁 𑀣𑀼𑀦𑀦𑁆𑀢𑀺, 𑀢𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀻’’𑀢𑀺.

𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸;

𑀲𑀘𑁆𑀘𑀸𑀦𑀺 𑀲𑀼𑀢𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸, 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀺.

𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸𑀢𑀺. 𑀓𑀲𑁆𑀫𑀸𑀢𑀺 𑀓𑀲𑁆𑀫𑀸 𑀓𑀺𑀁𑀓𑀸𑀭𑀡𑀸 𑀓𑀺𑀁𑀳𑁂𑀢𑀼 𑀓𑀺𑀁𑀧𑀘𑁆𑀘𑀬𑀸 𑀓𑀺𑀁𑀦𑀺𑀤𑀸𑀦𑀸 𑀲𑀘𑁆𑀘𑀸𑀦𑀺 𑀦𑀸𑀦𑀸 [𑀦𑀸𑀦𑀸𑀦𑀺 (𑀓.)] 𑀯𑀤𑀦𑁆𑀢𑀺, 𑀯𑀺𑀯𑀺𑀥𑀸𑀦𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁄𑀜𑁆𑀜𑀸𑀦𑀺 𑀯𑀤𑀦𑁆𑀢𑀺, 𑀧𑀼𑀣𑀽𑀦𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸.

𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸𑀢𑀺. 𑀧𑀯𑀸𑀤𑀺𑀬𑀸𑀲𑁂𑀢𑀺 𑀯𑀺𑀧𑁆𑀧𑀯𑀤𑀦𑁆𑀢𑀻𑀢𑀺𑀧𑀺 𑀧𑀯𑀸𑀤𑀺𑀬𑀸𑀲𑁂. 𑀅𑀣 𑀯𑀸 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀧𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀧𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 ¶ ¶ 𑀓𑀼𑀲𑀮𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸.

𑀲𑀘𑁆𑀘𑀸𑀦𑀺 𑀲𑀼𑀢𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸𑀢𑀺 𑀲𑀘𑁆𑀘𑀸𑀦𑀺 𑀲𑀼𑀢𑀸𑀦𑀺 𑀩𑀳𑀼𑀓𑀸𑀦𑀺 𑀦𑀸𑀦𑀸𑀦𑀺 ¶ 𑀯𑀺𑀯𑀺𑀥𑀸𑀦𑀺 𑀅𑀜𑁆𑀜𑁄𑀜𑁆𑀜𑀸𑀦𑀺 𑀧𑀼𑀣𑀽𑀦𑀻𑀢𑀺 𑁋 𑀲𑀘𑁆𑀘𑀸𑀦𑀺 𑀲𑀼𑀢𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸.

𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀉𑀤𑀸𑀳𑀼 𑀢𑀓𑁆𑀓𑁂𑀦 𑀲𑀗𑁆𑀓𑀧𑁆𑀧𑁂𑀦 𑀬𑀸𑀬𑀦𑁆𑀢𑀺 𑀦𑀻𑀬𑀦𑁆𑀢𑀺 𑀯𑀼𑀬𑁆𑀳𑀦𑁆𑀢𑀺 𑀲𑀁𑀳𑀭𑀻𑀬𑀦𑁆𑀢𑀻𑀢𑀺 ¶ . 𑀏𑀯𑀫𑁆𑀧𑀺 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀺. 𑀅𑀣 𑀯𑀸 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁 𑀧𑀝𑀺𑀪𑀸𑀦𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺. 𑀏𑀯𑀫𑁆𑀧𑀺 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀺.

‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸𑀯𑀤𑀸𑀦𑀸;

𑀲𑀘𑁆𑀘𑀸𑀦𑀺 𑀲𑀼𑀢𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸, 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀻’’𑀢𑀺.

𑀦 𑀳𑁂𑀯 𑀲𑀘𑁆𑀘𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸, 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀺 𑀮𑁄𑀓𑁂;

𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀼.

𑀦 𑀳𑁂𑀯 𑀲𑀘𑁆𑀘𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸𑀢𑀺 𑀦 𑀳𑁂𑀯 𑀲𑀘𑁆𑀘𑀸𑀦𑀺 𑀩𑀳𑀼𑀓𑀸𑀦𑀺 𑀦𑀸𑀦𑀸𑀦𑀺 𑀯𑀺𑀯𑀺𑀥𑀸𑀦𑀺 𑀅𑀜𑁆𑀜𑁄𑀜𑁆𑀜𑀸𑀦𑀺 𑀧𑀼𑀣𑀽𑀦𑀻𑀢𑀺 𑁋 𑀦 𑀳𑁂𑀯 𑀲𑀘𑁆𑀘𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸.

𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀺 𑀮𑁄𑀓𑁂𑀢𑀺 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀕𑁆𑀕𑀸𑀳𑀸 𑀏𑀓𑀜𑁆𑀜𑁂𑀯 𑀲𑀘𑁆𑀘𑀁 𑀮𑁄𑀓𑁂 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀺 𑁋 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 ¶ 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀣 𑀯𑀸 𑀏𑀓𑀁 𑀲𑀘𑁆𑀘𑀁 𑀯𑀼𑀘𑁆𑀘𑀢𑀺 𑀫𑀕𑁆𑀕𑀲𑀘𑁆𑀘𑀁, 𑀦𑀺𑀬𑁆𑀬𑀸𑀦𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 ¶ …𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑁋 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀺 𑀮𑁄𑀓𑁂.

𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽𑀢𑀺. 𑀢𑀓𑁆𑀓𑀁 𑀯𑀺𑀢𑀓𑁆𑀓𑀁 𑀲𑀗𑁆𑀓𑀧𑁆𑀧𑀁 𑀢𑀓𑁆𑀓𑀬𑀺𑀢𑁆𑀯𑀸 𑀯𑀺𑀢𑀓𑁆𑀓𑀬𑀺𑀢𑁆𑀯𑀸 𑀲𑀗𑁆𑀓𑀧𑁆𑀧𑀬𑀺𑀢𑁆𑀯𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀚𑀦𑁂𑀦𑁆𑀢𑀺 𑀲𑀜𑁆𑀚𑀦𑁂𑀦𑁆𑀢𑀺 ¶ 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀤𑀺𑀝𑁆𑀞𑀺𑀕𑀢𑀸𑀦𑀺 𑀚𑀦𑁂𑀢𑁆𑀯𑀸 𑀲𑀜𑁆𑀚𑀦𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀘𑁆𑀘𑀁 𑀢𑀼𑀬𑁆𑀳𑀁 𑀫𑀼𑀲𑀸’’𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀼.

‘‘𑀦 𑀳𑁂𑀯 𑀲𑀘𑁆𑀘𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸, 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀺 𑀮𑁄𑀓𑁂;

𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺.

𑀤𑀺𑀝𑁆𑀞𑁂 ¶ 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸, 𑀏𑀢𑁂 𑀘 [𑀏𑀢𑁂𑀲𑀼 (𑀲𑀻.)] 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻;

𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳.

𑀤𑀺𑀝𑁆𑀞𑁂 ¶ 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸, 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻𑀢𑀺. 𑀤𑀺𑀝𑁆𑀞𑀁 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀁 𑀯𑀸, 𑀲𑀼𑀢𑀁 𑀯𑀸 𑀲𑀼𑀢𑀲𑀼𑀤𑁆𑀥𑀺𑀁 𑀯𑀸, 𑀲𑀻𑀮𑀁 𑀯𑀸 𑀲𑀻𑀮𑀲𑀼𑀤𑁆𑀥𑀺𑀁 𑀯𑀸, 𑀯𑀢𑀁 𑀯𑀸 𑀯𑀢𑀲𑀼𑀤𑁆𑀥𑀺𑀁 𑀯𑀸, 𑀫𑀼𑀢𑀁 𑀯𑀸 𑀫𑀼𑀢𑀲𑀼𑀤𑁆𑀥𑀺𑀁 𑀯𑀸 𑀦𑀺𑀲𑁆𑀲𑀸𑀬 𑀉𑀧𑀦𑀺𑀲𑁆𑀲𑀸𑀬 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸. 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻𑀢𑀺. 𑀦 𑀲𑀫𑁆𑀫𑀸𑀦𑁂𑀢𑀻𑀢𑀺𑀧𑀺 𑀯𑀺𑀫𑀸𑀦𑀤𑀲𑁆𑀲𑀻. 𑀅𑀣 𑀯𑀸 𑀤𑁄𑀫𑀦𑀲𑁆𑀲𑀁 𑀚𑀦𑁂𑀢𑀻𑀢𑀺𑀧𑀺 𑀯𑀺𑀫𑀸𑀦𑀤𑀲𑁆𑀲𑀻𑀢𑀺 𑁋 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻.

𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄𑀢𑀺. 𑀯𑀺𑀦𑀺𑀘𑁆𑀙𑀬𑀸 𑀯𑀼𑀘𑁆𑀘𑀦𑁆𑀢𑀺 ¶ 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁂 𑀯𑀺𑀦𑀺𑀘𑁆𑀙𑀬𑀤𑀺𑀝𑁆𑀞𑀺𑀬𑀸 𑀞𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸. 𑀧𑀳𑀲𑁆𑀲𑀫𑀸𑀦𑁄𑀢𑀺 𑀢𑀼𑀝𑁆𑀞𑁄 𑀳𑁄𑀢𑀺 𑀳𑀝𑁆𑀞𑁄 𑀧𑀳𑀝𑁆𑀞𑁄 𑀅𑀢𑁆𑀢𑀫𑀦𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀅𑀣 𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀧𑀳𑀲𑁆𑀲𑀫𑀸𑀦𑁄𑀢𑀺 𑁋 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄.

𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀸𑀢𑀺. 𑀧𑀭𑁄 𑀩𑀸𑀮𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄 𑀅𑀓𑀼𑀲𑀮𑁄 𑀅𑀯𑀺𑀤𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀯𑀺𑀪𑀸𑀯𑀻 𑀅𑀫𑁂𑀥𑀸𑀯𑀻 𑀤𑀼𑀧𑁆𑀧𑀜𑁆𑀜𑁄𑀢𑀺, 𑀏𑀯𑀫𑀸𑀳 𑀏𑀯𑀁 𑀓𑀣𑁂𑀢𑀺 𑀏𑀯𑀁 𑀪𑀡𑀢𑀺 𑀏𑀯𑀁 𑀤𑀻𑀧𑀬𑀢𑀺 𑀏𑀯𑀁 𑀯𑁄𑀳𑀭𑀢𑀻𑀢𑀺 𑁋 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳.

‘‘𑀤𑀺𑀝𑁆𑀞𑁂 ¶ ¶ 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸, 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻;

𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳𑀸’’𑀢𑀺.

𑀬𑁂𑀦𑁂𑀯 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀸𑀢𑀺, 𑀢𑁂𑀦𑀸𑀢𑀼𑀫𑀸𑀦𑀁 𑀓𑀼𑀲𑀮𑁄𑀢𑀺 𑀘𑀸𑀳;

𑀲𑀬𑀫𑀢𑁆𑀢𑀦𑀸 𑀲𑁄 𑀓𑀼𑀲𑀮𑀸𑀯𑀤𑀸𑀦𑁄, 𑀅𑀜𑁆𑀜𑀁 𑀯𑀺𑀫𑀸𑀦𑁂𑀢𑀺 𑀢𑀤𑁂𑀯 𑀧𑀸𑀯.

𑀬𑁂𑀦𑁂𑀯 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀸𑀢𑀻𑀢𑀺. 𑀬𑁂𑀦𑁂𑀯 𑀳𑁂𑀢𑀼𑀦𑀸 𑀬𑁂𑀦 𑀧𑀘𑁆𑀘𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦 𑀬𑁂𑀦 𑀧𑀪𑀯𑁂𑀦 𑀧𑀭𑀁 𑀩𑀸𑀮𑀢𑁄 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀳𑀢𑀺 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀬𑁂𑀦𑁂𑀯 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀸𑀢𑀺.

𑀢𑁂𑀦𑀸𑀢𑀼𑀫𑀸𑀦𑀁 ¶ 𑀓𑀼𑀲𑀮𑁄𑀢𑀺 𑀘𑀸𑀳𑀸𑀢𑀺. 𑀆𑀢𑀼𑀫𑀸𑀦𑁄 𑀯𑀼𑀘𑁆𑀘𑀢𑀺 𑀅𑀢𑁆𑀢𑀸. 𑀲𑁄𑀧𑀺 𑀢𑁂𑀦𑁂𑀯 𑀳𑁂𑀢𑀼𑀦𑀸 𑀢𑁂𑀦 𑀧𑀘𑁆𑀘𑀬𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑁂𑀦 𑀧𑀪𑀯𑁂𑀦 𑀅𑀢𑁆𑀢𑀸𑀦𑀁 𑀅𑀳𑀫𑀲𑁆𑀫𑀺 𑀓𑀼𑀲𑀮𑁄 𑀧𑀡𑁆𑀟𑀺𑀢𑁄 ¶ 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑁋 𑀢𑁂𑀦𑀸𑀢𑀼𑀫𑀸𑀦𑀁 𑀓𑀼𑀲𑀮𑁄𑀢𑀺 𑀘𑀸𑀳.

𑀲𑀬𑀫𑀢𑁆𑀢𑀦𑀸 𑀲𑁄 𑀓𑀼𑀲𑀮𑀸𑀯𑀤𑀸𑀦𑁄𑀢𑀺. 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀓𑀼𑀲𑀮𑀯𑀸𑀤𑁄 𑀧𑀡𑁆𑀟𑀺𑀢𑀯𑀸𑀤𑁄 𑀣𑀺𑀭𑀯𑀸𑀤𑁄 𑀜𑀸𑀬𑀯𑀸𑀤𑁄 𑀳𑁂𑀢𑀼𑀯𑀸𑀤𑁄 𑀮𑀓𑁆𑀔𑀡𑀯𑀸𑀤𑁄 𑀓𑀸𑀭𑀡𑀯𑀸𑀤𑁄 𑀞𑀸𑀦𑀯𑀸𑀤𑁄 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀲𑀬𑀫𑀢𑁆𑀢𑀦𑀸 𑀲𑁄 𑀓𑀼𑀲𑀮𑀸𑀯𑀤𑀸𑀦𑁄.

𑀅𑀜𑁆𑀜𑀁 ¶ 𑀯𑀺𑀫𑀸𑀦𑁂𑀢𑀺 𑀢𑀤𑁂𑀯 𑀧𑀸𑀯𑀸𑀢𑀺. 𑀦 𑀲𑀫𑁆𑀫𑀸𑀦𑁂𑀢𑀻𑀢𑀺𑀧𑀺 𑀅𑀜𑁆𑀜𑀁 𑀯𑀺𑀫𑀸𑀦𑁂𑀢𑀺. 𑀅𑀣 𑀯𑀸 𑀤𑁄𑀫𑀦𑀲𑁆𑀲𑀁 𑀚𑀦𑁂𑀢𑀻𑀢𑀺𑀧𑀺 𑀅𑀜𑁆𑀜𑀁 𑀯𑀺𑀫𑀸𑀦𑁂𑀢𑀺. 𑀢𑀤𑁂𑀯 𑀧𑀸𑀯𑀸𑀢𑀺 𑀢𑀤𑁂𑀯 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀧𑀸𑀯𑀤𑀢𑀺 ‘‘𑀇𑀢𑀺𑀧𑀸𑀬𑀁 𑀧𑀼𑀕𑁆𑀕𑀮𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀧𑀭𑀻𑀢𑀤𑀲𑁆𑀲𑀦𑁄’’𑀢𑀺 𑁋 𑀅𑀜𑁆𑀜𑀁 𑀯𑀺𑀫𑀸𑀦𑁂𑀢𑀺 𑀢𑀤𑁂𑀯 𑀧𑀸𑀯𑀤.

‘‘𑀬𑁂𑀦𑁂𑀯 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀸𑀢𑀺, 𑀢𑁂𑀦𑀸𑀢𑀼𑀫𑀸𑀦𑀁 𑀓𑀼𑀲𑀮𑁄𑀢𑀺 𑀘𑀸𑀳;

𑀲𑀬𑀫𑀢𑁆𑀢𑀦𑀸 𑀲𑁄 𑀓𑀼𑀲𑀮𑀸𑀯𑀤𑀸𑀦𑁄, 𑀅𑀜𑁆𑀜𑀁 𑀯𑀺𑀫𑀸𑀦𑁂𑀢𑀺 𑀢𑀤𑁂𑀯 𑀧𑀸𑀯𑀸’’𑀢𑀺.

𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 ¶ 𑀲𑁄 𑀲𑀫𑀢𑁆𑀢𑁄, 𑀫𑀸𑀦𑁂𑀦 𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑀫𑀸𑀦𑀻;

𑀲𑀬𑀫𑁂𑀯 𑀲𑀸𑀫𑀁 𑀫𑀦𑀲𑀸𑀪𑀺𑀲𑀺𑀢𑁆𑀢𑁄, 𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸.

𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑁄 𑀲𑀫𑀢𑁆𑀢𑁄𑀢𑀺. 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀓𑀺𑀁𑀓𑀸𑀭𑀡𑀸 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺? 𑀲𑀩𑁆𑀩𑀸 𑀢𑀸 𑀤𑀺𑀝𑁆𑀞𑀺𑀬𑁄 𑀓𑀸𑀭𑀡𑀸𑀢𑀺𑀓𑁆𑀓𑀦𑁆𑀢𑀸 𑀮𑀓𑁆𑀔𑀡𑀸𑀢𑀺𑀓𑁆𑀓𑀦𑁆𑀢𑀸 𑀞𑀸𑀦𑀸𑀢𑀺𑀓𑁆𑀓𑀦𑁆𑀢𑀸, 𑀢𑀁𑀓𑀸𑀭𑀡𑀸 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀲𑀩𑁆𑀩𑀸𑀧𑀺 ¶ 𑀤𑀺𑀝𑁆𑀞𑀺𑀬𑁄 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑁄 [𑀲𑀩𑁆𑀩𑁂𑀧𑀺 𑀢𑀺𑀢𑁆𑀣𑀺𑀬𑀸 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 (𑀲𑁆𑀬𑀸.)]. 𑀓𑀺𑀁𑀓𑀸𑀭𑀡𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑁄? 𑀢𑁂 [𑀢𑀸 (𑀓.)] 𑀅𑀜𑁆𑀜𑀫𑀜𑁆𑀜𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀺𑀢𑁆𑀯𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀚𑀦𑁂𑀦𑁆𑀢𑀺 𑀲𑀜𑁆𑀚𑀦𑁂𑀦𑁆𑀢𑀺 ¶ 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑀁𑀓𑀸𑀭𑀡𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑁄. 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑁄 𑀲𑀫𑀢𑁆𑀢𑁄𑀢𑀺. 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄 𑀅𑀦𑁄𑀫𑁄𑀢𑀺 𑁋 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑁄 𑀲𑀫𑀢𑁆𑀢𑁄.

𑀫𑀸𑀦𑁂𑀦 𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑀫𑀸𑀦𑀻𑀢𑀺. 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀫𑀸𑀦𑁂𑀦 𑀫𑀢𑁆𑀢𑁄 𑀧𑀫𑀢𑁆𑀢𑁄 𑀉𑀫𑁆𑀫𑀢𑁆𑀢𑁄 𑀅𑀢𑀺𑀫𑀢𑁆𑀢𑁄𑀢𑀺 ¶ 𑁋 𑀫𑀸𑀦𑁂𑀦 𑀫𑀢𑁆𑀢𑁄. 𑀧𑀭𑀺𑀧𑀼𑀡𑁆𑀡𑀫𑀸𑀦𑀻𑀢𑀺 𑀧𑀭𑀺𑀧𑀼𑀡𑁆𑀡𑀫𑀸𑀦𑀻 𑀲𑀫𑀢𑁆𑀢𑀫𑀸𑀦𑀻 𑀅𑀦𑁄𑀫𑀫𑀸𑀦𑀻𑀢𑀺 𑁋 𑀫𑀸𑀦𑁂𑀦 𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑀫𑀸𑀦𑀻.

𑀲𑀬𑀫𑁂𑀯 𑀲𑀸𑀫𑀁 𑀫𑀦𑀲𑀸𑀪𑀺𑀲𑀺𑀢𑁆𑀢𑁄𑀢𑀺. 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀘𑀺𑀢𑁆𑀢𑁂𑀦 𑀅𑀪𑀺𑀲𑀺𑀜𑁆𑀘𑀢𑀺 ‘‘𑀅𑀳𑀫𑀲𑁆𑀫𑀺 𑀓𑀼𑀲𑀮𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻’’𑀢𑀺 𑁋 𑀲𑀬𑀫𑁂𑀯 𑀲𑀸𑀫𑀁 𑀫𑀦𑀲𑀸𑀪𑀺𑀲𑀺𑀢𑁆𑀢𑁄.

𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸𑀢𑀺. 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀢𑀣𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸 𑀅𑀪𑀺𑀦𑀺𑀯𑀺𑀝𑁆𑀞𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸.

‘‘𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸 𑀲𑁄 𑀲𑀫𑀢𑁆𑀢𑁄, 𑀫𑀸𑀦𑁂𑀦 𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑀫𑀸𑀦𑀻;

𑀲𑀬𑀫𑁂𑀯 𑀲𑀸𑀫𑀁 𑀫𑀦𑀲𑀸𑀪𑀺𑀲𑀺𑀢𑁆𑀢𑁄, 𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸’’𑀢𑀺.

𑀧𑀭𑀲𑁆𑀲 ¶ 𑀘𑁂 𑀳𑀺 𑀯𑀘𑀲𑀸 𑀦𑀺𑀳𑀻𑀦𑁄, 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀅𑀣 ¶ 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄, 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀺.

𑀧𑀭𑀲𑁆𑀲 ¶ 𑀘𑁂 𑀳𑀺 𑀯𑀘𑀲𑀸 𑀦𑀺𑀳𑀻𑀦𑁄𑀢𑀺 𑀧𑀭𑀲𑁆𑀲 𑀘𑁂 𑀯𑀸𑀘𑀸𑀬 𑀯𑀘𑀦𑁂𑀦 𑀦𑀺𑀦𑁆𑀤𑀺𑀢𑀓𑀸𑀭𑀡𑀸 𑀕𑀭𑀳𑀺𑀢𑀓𑀸𑀭𑀡𑀸 𑀉𑀧𑀯𑀤𑀺𑀢𑀓𑀸𑀭𑀡𑀸 𑀧𑀭𑁄 𑀩𑀸𑀮𑁄 𑀳𑁄𑀢𑀺 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄𑀢𑀺 𑁋 𑀧𑀭𑀲𑁆𑀲 𑀘𑁂 𑀳𑀺 𑀯𑀘𑀲𑀸 𑀦𑀺𑀳𑀻𑀦𑁄. 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄𑀢𑀺. 𑀲𑁄𑀧𑀺 𑀢𑁂𑀦𑁂𑀯 𑀲𑀳𑀸 𑀳𑁄𑀢𑀺 𑀳𑀻𑀦𑀧𑀜𑁆𑀜𑁄 𑀦𑀺𑀳𑀻𑀦𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄 𑀧𑀭𑀺𑀢𑁆𑀢𑀧𑀜𑁆𑀜𑁄𑀢𑀺 𑁋 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄.

𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄𑀢𑀺 𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑁋 𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄.

𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀻𑀢𑀺. 𑀲𑀫𑀡𑁂𑀲𑀼 𑀦 𑀓𑁄𑀘𑀺 𑀩𑀸𑀮𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄 𑀅𑀢𑁆𑀣𑀺, 𑀲𑀩𑁆𑀩𑁂𑀯 𑀲𑁂𑀝𑁆𑀞𑀧𑀜𑁆𑀜𑀸 [𑀅𑀕𑁆𑀕𑀧𑀜𑁆𑀜𑀸 𑀲𑁂𑀝𑁆𑀞𑀧𑀜𑁆𑀜𑀸 (𑀲𑁆𑀬𑀸.)] 𑀯𑀺𑀲𑀺𑀝𑁆𑀞𑀧𑀜𑁆𑀜𑀸 𑀧𑀸𑀫𑁄𑀓𑁆𑀔𑀧𑀜𑁆𑀜𑀸 𑀉𑀢𑁆𑀢𑀫𑀧𑀜𑁆𑀜𑀸 𑀧𑀯𑀭𑀧𑀜𑁆𑀜𑀸𑀢𑀺 𑁋 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀺.

‘‘𑀧𑀭𑀲𑁆𑀲 𑀘𑁂 𑀳𑀺 𑀯𑀘𑀲𑀸 𑀦𑀺𑀳𑀻𑀦𑁄, 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄, 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀻’’𑀢𑀺.

𑀅𑀜𑁆𑀜𑀁 ¶ 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂;

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂𑀪𑀺𑀭𑀢𑁆𑀢𑀸.

𑀅𑀜𑁆𑀜𑀁 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂𑀢𑀺. 𑀇𑀢𑁄 𑀅𑀜𑁆𑀜𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 ¶ 𑀬𑁂 𑀅𑀪𑀺𑀯𑀤𑀦𑁆𑀢𑀺, 𑀢𑁂 𑀲𑀼𑀤𑁆𑀥𑀺𑀫𑀕𑁆𑀕𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀧𑀭𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀯𑁄𑀤𑀸𑀢𑀫𑀕𑁆𑀕𑀁 𑀧𑀭𑀺𑀬𑁄𑀤𑀸𑀢𑀫𑀕𑁆𑀕𑀁 𑀯𑀺𑀭𑀤𑁆𑀥𑀸 𑀅𑀧𑀭𑀤𑁆𑀥𑀸 𑀔𑀮𑀺𑀢𑀸 𑀕𑀮𑀺𑀢𑀸 𑀅𑀜𑁆𑀜𑀸𑀬 𑀅𑀧𑀭𑀤𑁆𑀥𑀸 ¶ 𑀅𑀓𑁂𑀯𑀮𑀻 𑀢𑁂, 𑀅𑀲𑀫𑀢𑁆𑀢𑀸 𑀢𑁂, 𑀅𑀧𑀭𑀺𑀧𑀼𑀡𑁆𑀡𑀸 𑀢𑁂, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸𑀢𑀺 𑁋 𑀅𑀜𑁆𑀜𑀁 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂.

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀻𑀢𑀺. 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀢𑀺𑀢𑁆𑀣𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀧𑀼𑀣𑀼𑀤𑀺𑀝𑁆𑀞𑀺𑀬𑀸 𑀧𑀼𑀣𑀼𑀤𑀺𑀝𑁆𑀞𑀺𑀕𑀢𑀸𑀦𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺.

𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂𑀪𑀺𑀭𑀢𑁆𑀢𑀸𑀢𑀺. 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀭𑀸𑀕𑁂𑀦 𑀭𑀢𑁆𑀢𑀸 𑀅𑀪𑀺𑀭𑀢𑁆𑀢𑀸𑀢𑀺 𑁋 𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂𑀪𑀺𑀭𑀢𑁆𑀢𑀸.

‘‘𑀅𑀜𑁆𑀜𑀁 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂;

𑀏𑀯𑀫𑁆𑀧𑀺 ¶ 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂𑀪𑀺𑀭𑀢𑁆𑀢𑀸’’𑀢𑀺.

𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀦𑀺𑀯𑀺𑀝𑁆𑀞𑀸, 𑀲𑀓𑀸𑀬𑀦𑁂 𑀢𑀢𑁆𑀣 𑀤𑀴𑁆𑀳𑀁 𑀯𑀤𑀸𑀦𑀸.

𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀻𑀢𑀺. 𑀇𑀥 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀇𑀥 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 ¶ 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀇𑀥 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 ¶ 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺.

𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀽𑀢𑀺. 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀭𑀯𑀸𑀤𑁂 𑀔𑀺𑀧𑀦𑁆𑀢𑀺 𑀉𑀓𑁆𑀔𑀺𑀧𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺. ‘‘𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸, 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸, 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 𑀯𑀸, 𑀦𑀢𑁆𑀣𑁂𑀢𑁆𑀣 ¶ 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸, 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀳𑀻𑀦𑀸 ¶ 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸’’𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼.

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀦𑀺𑀯𑀺𑀝𑁆𑀞𑀸𑀢𑀺. 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀢𑀺𑀢𑁆𑀣𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀧𑀼𑀣𑀼𑀤𑀺𑀝𑁆𑀞𑀺𑀬𑀸 [𑀧𑀼𑀣𑀼𑀢𑀺𑀢𑁆𑀣𑀺𑀬𑀸 (𑀲𑀻. 𑀓.) 𑀧𑀼𑀭𑀺𑀫𑀕𑀸𑀣𑀸𑀬 𑀧𑀸𑀞𑀪𑁂𑀤𑁄 𑀦𑀢𑁆𑀣𑀺] 𑀧𑀼𑀣𑀼𑀤𑀺𑀝𑁆𑀞𑀺𑀕𑀢𑁂𑀲𑀼 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀦𑀺𑀯𑀺𑀝𑁆𑀞𑀸.

𑀲𑀓𑀸𑀬𑀦𑁂 𑀢𑀢𑁆𑀣 𑀤𑀴𑁆𑀳𑀁 𑀯𑀤𑀸𑀦𑀸𑀢𑀺. 𑀥𑀫𑁆𑀫𑁄 𑀲𑀓𑀸𑀬𑀦𑀁, 𑀤𑀺𑀝𑁆𑀞𑀺 𑀲𑀓𑀸𑀬𑀦𑀁, 𑀧𑀝𑀺𑀧𑀤𑀸 𑀲𑀓𑀸𑀬𑀦𑀁, 𑀫𑀕𑁆𑀕𑁄 𑀲𑀓𑀸𑀬𑀦𑀁, 𑀲𑀓𑀸𑀬𑀦𑁂 𑀤𑀴𑁆𑀳𑀯𑀸𑀤𑀸 𑀣𑀺𑀭𑀯𑀸𑀤𑀸 𑀩𑀮𑀺𑀓𑀯𑀸𑀤𑀸 𑀅𑀯𑀝𑁆𑀞𑀺𑀢𑀯𑀸𑀤𑀸𑀢𑀺 𑁋 𑀲𑀓𑀸𑀬𑀦𑁂 𑀢𑀢𑁆𑀣 𑀤𑀴𑁆𑀳𑀁 𑀯𑀤𑀸𑀦𑀸.

‘‘𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀦𑀺𑀯𑀺𑀝𑁆𑀞𑀸, 𑀲𑀓𑀸𑀬𑀦𑁂 𑀢𑀢𑁆𑀣 𑀤𑀴𑁆𑀳𑀁 𑀯𑀤𑀸𑀦𑀸’’𑀢𑀺.

𑀲𑀓𑀸𑀬𑀦𑁂 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄, 𑀓𑀫𑁂𑀢𑁆𑀣 [𑀓𑀁 𑀢𑀢𑁆𑀣 (𑀲𑀻. 𑀓.)] 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬;

𑀲𑀬𑀁𑀯 [𑀲𑀬𑀫𑁂𑀯 (𑀲𑁆𑀬𑀸.)] 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬, 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫𑀁.

𑀲𑀓𑀸𑀬𑀦𑁂 ¶ ¶ 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄𑀢𑀺. 𑀥𑀫𑁆𑀫𑁄 𑀲𑀓𑀸𑀬𑀦𑀁, 𑀤𑀺𑀝𑁆𑀞𑀺 𑀲𑀓𑀸𑀬𑀦𑀁, 𑀧𑀝𑀺𑀧𑀤𑀸 𑀲𑀓𑀸𑀬𑀦𑀁, 𑀫𑀕𑁆𑀕𑁄 𑀲𑀓𑀸𑀬𑀦𑀁, 𑀲𑀓𑀸𑀬𑀦𑁂 𑀤𑀴𑁆𑀳𑀯𑀸𑀤𑁄 𑀣𑀺𑀭𑀯𑀸𑀤𑁄 𑀩𑀮𑀺𑀓𑀯𑀸𑀤𑁄 𑀅𑀯𑀝𑁆𑀞𑀺𑀢𑀯𑀸𑀤𑁄𑀢𑀺 𑁋 𑀲𑀓𑀸𑀬𑀦𑁂 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄.

𑀓𑀫𑁂𑀢𑁆𑀣 ¶ 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬𑀸𑀢𑀺. 𑀏𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀧𑀭𑀁 𑀩𑀸𑀮𑀢𑁄 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀓𑀁 𑀤𑀳𑁂𑀬𑁆𑀬 𑀓𑀁 𑀧𑀲𑁆𑀲𑁂𑀬𑁆𑀬 𑀓𑀁 𑀤𑀓𑁆𑀔𑁂𑀬𑁆𑀬 𑀓𑀁 𑀑𑀮𑁄𑀓𑁂𑀬𑁆𑀬 𑀓𑀁 𑀦𑀺𑀚𑁆𑀛𑀸𑀬𑁂𑀬𑁆𑀬 𑀓𑀁 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀸𑀢𑀺 𑁋 𑀓𑀫𑁂𑀢𑁆𑀣 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬.

𑀲𑀬𑀁𑀯 ¶ 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬, 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫𑀦𑁆𑀢𑀺. 𑀧𑀭𑁄 𑀩𑀸𑀮𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄 𑀅𑀲𑀼𑀤𑁆𑀥𑀺𑀥𑀫𑁆𑀫𑁄 𑀅𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑁄 𑀅𑀧𑀭𑀺𑀲𑀼𑀤𑁆𑀥𑀺𑀥𑀫𑁆𑀫𑁄 𑀅𑀯𑁄𑀤𑀸𑀢𑀥𑀫𑁆𑀫𑁄𑀢𑀺 𑁋 𑀏𑀯𑀁 𑀯𑀤𑀦𑁆𑀢𑁄 𑀏𑀯𑀁 𑀓𑀣𑁂𑀦𑁆𑀢𑁄 𑀏𑀯𑀁 𑀪𑀡𑀦𑁆𑀢𑁄 𑀏𑀯𑀁 𑀤𑀻𑀧𑀬𑀦𑁆𑀢𑁄 𑀏𑀯𑀁 𑀯𑁄𑀳𑀭𑀦𑁆𑀢𑁄 𑀲𑀬𑀫𑁂𑀯 𑀓𑀮𑀳𑀁 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀫𑁂𑀥𑀕𑀁 𑀆𑀯𑀳𑁂𑀬𑁆𑀬 𑀲𑀫𑀸𑀯𑀳𑁂𑀬𑁆𑀬 𑀆𑀳𑀭𑁂𑀬𑁆𑀬 𑀲𑀫𑀸𑀳𑀭𑁂𑀬𑁆𑀬 𑀆𑀓𑀟𑁆𑀠𑁂𑀬𑁆𑀬 𑀲𑀫𑀸𑀓𑀟𑁆𑀠𑁂𑀬𑁆𑀬 𑀕𑀡𑁆𑀳𑁂𑀬𑁆𑀬 𑀧𑀭𑀸𑀫𑀲𑁂𑀬𑁆𑀬 𑀅𑀪𑀺𑀦𑀺𑀯𑀺𑀲𑁂𑀬𑁆𑀬𑀸𑀢𑀺 𑁋 𑀲𑀬𑀁𑀯 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫𑀁.

‘‘𑀲𑀓𑀸𑀬𑀦𑁂 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄, 𑀓𑀫𑁂𑀢𑁆𑀣 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬;

𑀲𑀬𑀁𑀯 ¶ 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬, 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫’’𑀦𑁆𑀢𑀺.

𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬, 𑀉𑀤𑁆𑀥𑀁𑀲 [𑀉𑀤𑁆𑀥𑀁 𑀲𑁄 (𑀲𑁆𑀬𑀸.)] 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀺;

𑀳𑀺𑀢𑁆𑀯𑀸𑀦 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀺, 𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂.

𑀯𑀺𑀦𑀺𑀘𑁆𑀙𑀬𑁂 ¶ 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬𑀸𑀢𑀺. 𑀯𑀺𑀦𑀺𑀘𑁆𑀙𑀬𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀯𑀺𑀦𑀺𑀘𑁆𑀙𑀬𑀤𑀺𑀝𑁆𑀞𑀺𑀬𑀸 𑀞𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸. 𑀲𑀬𑀁 𑀧𑀫𑀸𑀬𑀸𑀢𑀺 𑀲𑀬𑀁 𑀧𑀫𑀸𑀬 𑀧𑀫𑀺𑀦𑀺𑀢𑁆𑀯𑀸. ‘‘𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽’’𑀢𑀺 𑀲𑀬𑀁 𑀧𑀫𑀸𑀬 𑀧𑀫𑀺𑀦𑀺𑀢𑁆𑀯𑀸, ‘‘𑀅𑀬𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄… 𑀅𑀬𑀁 𑀕𑀡𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄… 𑀅𑀬𑀁 𑀤𑀺𑀝𑁆𑀞𑀺 𑀪𑀤𑁆𑀤𑀺𑀓𑀸… 𑀅𑀬𑀁 𑀧𑀝𑀺𑀧𑀤𑀸 𑀲𑀼𑀧𑀜𑁆𑀜𑀢𑁆𑀢𑀸… 𑀅𑀬𑀁 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀲𑀬𑀁 𑀧𑀫𑀸𑀬 𑀧𑀫𑀺𑀦𑀺𑀢𑁆𑀯𑀸𑀢𑀺 𑁋 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬.

𑀉𑀤𑁆𑀥𑀁𑀲 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀻𑀢𑀺. 𑀉𑀤𑁆𑀥𑀁𑀲𑁄 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀁. 𑀅𑀢𑁆𑀢𑀦𑁄 𑀯𑀸𑀤𑀁 𑀉𑀤𑁆𑀥𑀁 𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀓𑀮𑀳𑀁 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀫𑁂𑀥𑀕𑀁 𑀏𑀢𑀺 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺. 𑀏𑀯𑀫𑁆𑀧𑀺 𑀉𑀤𑁆𑀥𑀁𑀲 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀺. 𑀅𑀣 𑀯𑀸 𑀅𑀜𑁆𑀜𑁂𑀦 𑀉𑀤𑁆𑀥𑀁 𑀯𑀸𑀤𑁂𑀦 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀢𑀺 𑀪𑀡𑁆𑀟𑀦𑀁 𑀓𑀭𑁄𑀢𑀺 𑀯𑀺𑀕𑁆𑀕𑀳𑀁 𑀓𑀭𑁄𑀢𑀺 𑀯𑀺𑀯𑀸𑀤𑀁 𑀓𑀭𑁄𑀢𑀺 𑀫𑁂𑀥𑀕𑀁 𑀓𑀭𑁄𑀢𑀺 𑁋 ‘‘𑀦 𑀢𑁆𑀯𑀁 ¶ 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺. 𑀏𑀯𑀫𑁆𑀧𑀺 𑀉𑀤𑁆𑀥𑀁𑀲 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀺.

𑀳𑀺𑀢𑁆𑀯𑀸𑀦 ¶ ¶ 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀻𑀢𑀺. 𑀯𑀺𑀦𑀺𑀘𑁆𑀙𑀬𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑀸 𑀲𑀩𑁆𑀩𑁂 𑀯𑀺𑀦𑀺𑀘𑁆𑀙𑀬𑁂 [𑀲𑀩𑁆𑀩𑀸 𑀯𑀺𑀦𑀺𑀘𑁆𑀙𑀺𑀢𑀤𑀺𑀝𑁆𑀞𑀺𑀬𑁄 (𑀲𑁆𑀬𑀸.), 𑀲𑀩𑁆𑀩𑀸 𑀯𑀺𑀦𑀺𑀘𑁆𑀙𑀬𑀤𑀺𑀝𑁆𑀞𑀺𑀬𑁄 (𑀓.)] 𑀳𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀳𑀺𑀢𑁆𑀯𑀸𑀦 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀺.

𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺. 𑀦 𑀓𑀮𑀳𑀁 𑀓𑀭𑁄𑀢𑀺, 𑀦 𑀪𑀡𑁆𑀟𑀦𑀁 𑀓𑀭𑁄𑀢𑀺, 𑀦 𑀯𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀦 𑀯𑀺𑀯𑀸𑀤𑀁 𑀓𑀭𑁄𑀢𑀺, 𑀦 𑀫𑁂𑀥𑀕𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀺𑀓𑁆𑀔𑀼 𑀦 𑀓𑁂𑀦𑀘𑀺 𑀲𑀁𑀯𑀤𑀢𑀺, 𑀦 𑀓𑁂𑀦𑀘𑀺 𑀯𑀺𑀯𑀤𑀢𑀺, 𑀬𑀜𑁆𑀘 𑀮𑁄𑀓𑁂 𑀯𑀼𑀢𑁆𑀢𑀁 𑀢𑁂𑀦 𑀘 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲’’𑀦𑁆𑀢𑀺. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 ¶ 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺.

‘‘𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬, 𑀉𑀤𑁆𑀥𑀁𑀲 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀺;

𑀳𑀺𑀢𑁆𑀯𑀸𑀦 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀺, 𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂’’𑀢𑀺.

𑀘𑀽𑀴𑀯𑀺𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀫𑀳𑀸𑀯𑀺𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀫𑀳𑀸𑀯𑀺𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀬𑁂 ¶ ¶ 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺 [𑀲𑀘𑁆𑀘𑀦𑁆𑀢𑀺 𑀧𑀯𑀸𑀤𑀬𑀦𑁆𑀢𑀺 (𑀲𑁆𑀬𑀸.)] ;

𑀲𑀩𑁆𑀩𑁂𑀯 𑀢𑁂 𑀦𑀺𑀦𑁆𑀤𑀫𑀦𑁆𑀯𑀸𑀦𑀬𑀦𑁆𑀢𑀺, 𑀅𑀣𑁄 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺 𑀢𑀢𑁆𑀣.

𑀬𑁂 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸; 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 ¶ 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀲𑀁𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀺. 𑀬𑀣𑀸 𑀅𑀕𑀸𑀭𑀺𑀓𑀸 𑀯𑀸 𑀖𑀭𑁂𑀲𑀼 𑀯𑀲𑀦𑁆𑀢𑀺, 𑀲𑀸𑀧𑀢𑁆𑀢𑀺𑀓𑀸 𑀯𑀸 𑀆𑀧𑀢𑁆𑀢𑀻𑀲𑀼 𑀯𑀲𑀦𑁆𑀢𑀺, 𑀲𑀓𑀺𑀮𑁂𑀲𑀸 𑀯𑀸 𑀓𑀺𑀮𑁂𑀲𑁂𑀲𑀼 𑀯𑀲𑀦𑁆𑀢𑀺; 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂…𑀧𑁂… 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀬𑁂 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸.

𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀻𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 ¶ 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 ¶ 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺.

𑀲𑀩𑁆𑀩𑁂𑀯 𑀢𑁂 𑀦𑀺𑀦𑁆𑀤𑀫𑀦𑁆𑀯𑀸𑀦𑀬𑀦𑁆𑀢𑀻𑀢𑀺. 𑀲𑀩𑁆𑀩𑁂𑀯 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀺𑀦𑁆𑀤𑀫𑁂𑀯 𑀅𑀦𑁆𑀯𑁂𑀦𑁆𑀢𑀺, 𑀕𑀭𑀳𑀫𑁂𑀯 𑀅𑀦𑁆𑀯𑁂𑀦𑁆𑀢𑀺, 𑀅𑀓𑀺𑀢𑁆𑀢𑀺𑀫𑁂𑀯 𑀅𑀦𑁆𑀯𑁂𑀦𑁆𑀢𑀺; 𑀲𑀩𑁆𑀩𑁂 𑀦𑀺𑀦𑁆𑀤𑀺𑀢𑀸𑀬𑁂𑀯 𑀳𑁄𑀦𑁆𑀢𑀺, 𑀕𑀭𑀳𑀺𑀢𑀸𑀬𑁂𑀯 𑀳𑁄𑀦𑁆𑀢𑀺, 𑀅𑀓𑀺𑀢𑁆𑀢𑀺𑀢𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑁋 𑀲𑀩𑁆𑀩𑁂𑀯 𑀢𑁂 𑀦𑀺𑀦𑁆𑀤𑀫𑀦𑁆𑀯𑀸𑀦𑀬𑀦𑁆𑀢𑀺.

𑀅𑀣𑁄 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺 𑀢𑀢𑁆𑀣𑀸𑀢𑀺. 𑀢𑀢𑁆𑀣 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀧𑀲𑀁𑀲𑀁 𑀣𑁄𑀫𑀦𑀁 𑀓𑀺𑀢𑁆𑀢𑀺𑀁 𑀯𑀡𑁆𑀡𑀳𑀸𑀭𑀺𑀓𑀁 𑀮𑀪𑀦𑁆𑀢𑀺 𑀧𑀝𑀺𑀮𑀪𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀯𑀺𑀦𑁆𑀤𑀦𑁆𑀢𑀻𑀢𑀺 𑁋 𑀅𑀣𑁄 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺 𑀢𑀢𑁆𑀣.

‘‘𑀬𑁂 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺;

𑀲𑀩𑁆𑀩𑁂𑀯 𑀢𑁂 𑀦𑀺𑀦𑁆𑀤𑀫𑀦𑁆𑀯𑀸𑀦𑀬𑀦𑁆𑀢𑀺, 𑀅𑀣𑁄 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺 𑀢𑀢𑁆𑀣𑀸’’𑀢𑀺.

𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬, 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺𑀁.

𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬𑀸𑀢𑀺. 𑀅𑀧𑁆𑀧𑀜𑁆𑀳𑀺 𑀏𑀢𑀦𑁆𑀢𑀺 𑀅𑀧𑁆𑀧𑀓𑀁 𑀏𑀢𑀁, 𑀑𑀫𑀓𑀁 𑀏𑀢𑀁, 𑀣𑁄𑀓𑀓𑀁 𑀏𑀢𑀁, 𑀮𑀸𑀫𑀓𑀁 𑀏𑀢𑀁, 𑀙𑀢𑀼𑀓𑁆𑀓𑀁 𑀏𑀢𑀁, 𑀧𑀭𑀺𑀢𑁆𑀢𑀓𑀁 𑀏𑀢𑀦𑁆𑀢𑀺 𑁋 𑀅𑀧𑁆𑀧𑀜𑁆𑀳𑀺 𑀏𑀢𑀁. 𑀦 𑀅𑀮𑀁 𑀲𑀫𑀸𑀬𑀸𑀢𑀺 𑀦𑀸𑀮𑀁 𑀭𑀸𑀕𑀲𑁆𑀲 ¶ 𑀲𑀫𑀸𑀬, 𑀤𑁄𑀲𑀲𑁆𑀲 𑀲𑀫𑀸𑀬, 𑀫𑁄𑀳𑀲𑁆𑀲 𑀲𑀫𑀸𑀬 ¶ , 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁 ¶ … 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀫𑀸𑀬 𑀉𑀧𑀲𑀫𑀸𑀬 𑀯𑀽𑀧𑀲𑀫𑀸𑀬 𑀦𑀺𑀩𑁆𑀩𑀸𑀦𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑁋 𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬.

𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀻𑀢𑀺. 𑀤𑀺𑀝𑁆𑀞𑀺𑀓𑀮𑀳𑀲𑁆𑀲 𑀤𑀺𑀝𑁆𑀞𑀺𑀪𑀡𑁆𑀟𑀦𑀲𑁆𑀲 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑀲𑁆𑀲 𑀤𑀺𑀝𑁆𑀞𑀺𑀯𑀺𑀯𑀸𑀤𑀲𑁆𑀲 𑀤𑀺𑀝𑁆𑀞𑀺𑀫𑁂𑀥𑀕𑀲𑁆𑀲 𑀤𑁆𑀯𑁂 𑀨𑀮𑀸𑀦𑀺 𑀳𑁄𑀦𑁆𑀢𑀺 𑁋 𑀚𑀬𑀧𑀭𑀸𑀚𑀬𑁄 𑀳𑁄𑀢𑀺, 𑀮𑀸𑀪𑀸𑀮𑀸𑀪𑁄 𑀳𑁄𑀢𑀺, 𑀬𑀲𑀸𑀬𑀲𑁄 𑀳𑁄𑀢𑀺, 𑀦𑀺𑀦𑁆𑀤𑀸𑀧𑀲𑀁𑀲𑁄 𑀳𑁄𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀇𑀝𑁆𑀞𑀸𑀦𑀺𑀝𑁆𑀞𑀁 𑀳𑁄𑀢𑀺, 𑀅𑀦𑀼𑀦𑀬𑀧𑀝𑀺𑀖𑀁 𑀳𑁄𑀢𑀺, 𑀉𑀕𑁆𑀖𑀸𑀢𑀺𑀦𑀺𑀕𑁆𑀖𑀸𑀢𑀺 𑀳𑁄𑀢𑀺, 𑀅𑀦𑀼𑀭𑁄𑀥𑀯𑀺𑀭𑁄𑀥𑁄 𑀳𑁄𑀢𑀺. 𑀅𑀣 𑀯𑀸 𑀢𑀁 𑀓𑀫𑁆𑀫𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀲𑀁𑀯𑀢𑁆𑀢𑀦𑀺𑀓𑀁, 𑀧𑁂𑀢𑁆𑀢𑀺𑀯𑀺𑀲𑀬𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀺.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣𑀸𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀓𑀮𑀳𑁂𑀲𑀼 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀲𑀼 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀲𑀼 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀲𑀼 𑀤𑀺𑀝𑁆𑀞𑀺𑀫𑁂𑀥𑀕𑁂𑀲𑀽𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸. 𑀦 𑀯𑀺𑀯𑀸𑀤𑀬𑁂𑀣𑀸𑀢𑀺 𑀦 𑀓𑀮𑀳𑀁 ¶ 𑀓𑀭𑁂𑀬𑁆𑀬, 𑀦 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬, 𑀦 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬, 𑀦 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬, 𑀦 𑀫𑁂𑀥𑀕𑀁 𑀓𑀭𑁂𑀬𑁆𑀬, 𑀓𑀮𑀳𑀁 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀸 𑀪𑀡𑁆𑀟𑀦𑀸 𑀯𑀺𑀕𑁆𑀕𑀳𑀸 ¶ 𑀯𑀺𑀯𑀸𑀤𑀸 𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣.

𑀔𑁂𑀫𑀸𑀪𑀺𑀧𑀲𑁆𑀲𑀁 ¶ 𑀅𑀯𑀺𑀯𑀸𑀤𑀪𑀽𑀫𑀺𑀦𑁆𑀢𑀺. 𑀅𑀯𑀺𑀯𑀸𑀤𑀪𑀽𑀫𑀺𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀏𑀢𑀁 𑀅𑀯𑀺𑀯𑀸𑀤𑀪𑀽𑀫𑀺𑀁 𑀔𑁂𑀫𑀢𑁄 𑀢𑀸𑀡𑀢𑁄 𑀮𑁂𑀡𑀢𑁄 𑀲𑀭𑀡𑀢𑁄 𑀅𑀪𑀬𑀢𑁄 𑀅𑀘𑁆𑀘𑀼𑀢𑀢𑁄 𑀅𑀫𑀢𑀢𑁄 𑀦𑀺𑀩𑁆𑀩𑀸𑀦𑀢𑁄 𑀧𑀲𑁆𑀲𑀦𑁆𑀢𑁄 𑀤𑀓𑁆𑀔𑀦𑁆𑀢𑁄 𑀑𑀮𑁄𑀓𑁂𑀦𑁆𑀢𑁄 𑀦𑀺𑀚𑁆𑀛𑀸𑀬𑀦𑁆𑀢𑁄 𑀉𑀧𑀧𑀭𑀺𑀓𑁆𑀔𑀦𑁆𑀢𑁄𑀢𑀺 𑁋 𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺𑀁.

‘‘𑀅𑀧𑁆𑀧𑀜𑁆𑀳𑀺 ¶ 𑀏𑀢𑀁 𑀦 𑀅𑀮𑀁 𑀲𑀫𑀸𑀬, 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺’’𑀦𑁆𑀢𑀺.

𑀬𑀸 𑀓𑀸𑀘𑀺𑀫𑀸 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸, 𑀲𑀩𑁆𑀩𑀸𑀯 𑀏𑀢𑀸 𑀦 𑀉𑀧𑁂𑀢𑀺 𑀯𑀺𑀤𑁆𑀯𑀸;

𑀅𑀦𑀽𑀧𑀬𑁄 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬, 𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

𑀬𑀸 ¶ 𑀓𑀸𑀘𑀺𑀫𑀸 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸𑀢𑀺. 𑀬𑀸 𑀓𑀸𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑀸 𑀓𑀸𑀘𑀻𑀢𑀺. 𑀲𑀫𑁆𑀫𑀼𑀢𑀺𑀬𑁄𑀢𑀺. 𑀲𑀫𑁆𑀫𑀼𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀺𑀝𑁆𑀞𑀺𑀲𑀫𑁆𑀫𑀼𑀢𑀺𑀬𑁄. 𑀧𑀼𑀣𑀼𑀚𑁆𑀚𑀸𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀚𑀦𑀺𑀢𑀸 𑀲𑀫𑁆𑀫𑀼𑀢𑀺𑀬𑁄𑀢𑀺 𑀧𑀼𑀣𑀼𑀚𑁆𑀚𑀸, 𑀧𑀼𑀣𑀼 𑀦𑀸𑀦𑀸𑀚𑀦𑁂𑀳𑀺 𑀚𑀦𑀺𑀢𑀸 𑀯𑀸 𑀲𑀫𑁆𑀫𑀼𑀢𑀺𑀬𑁄𑀢𑀺 𑀧𑀼𑀣𑀼𑀚𑁆𑀚𑀸𑀢𑀺 𑁋 𑀬𑀸 𑀓𑀸𑀘𑀺𑀫𑀸 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸.

𑀲𑀩𑁆𑀩𑀸𑀯 𑀏𑀢𑀸 𑀦 𑀉𑀧𑁂𑀢𑀺 𑀯𑀺𑀤𑁆𑀯𑀸𑀢𑀺. 𑀯𑀺𑀤𑁆𑀯𑀸 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀲𑀩𑁆𑀩𑀸𑀯 𑀏𑀢𑀸 𑀤𑀺𑀝𑁆𑀞𑀺𑀲𑀫𑁆𑀫𑀼𑀢𑀺𑀬𑁄 𑀦𑁂𑀢𑀺 𑀦 𑀉𑀧𑁂𑀢𑀺 𑀦 𑀉𑀧𑀕𑀘𑁆𑀙𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀲𑀩𑁆𑀩𑀸𑀯 𑀏𑀢𑀸 𑀦 𑀉𑀧𑁂𑀢𑀺 𑀯𑀺𑀤𑁆𑀯𑀸.

𑀅𑀦𑀽𑀧𑀬𑁄 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬𑀸𑀢𑀺. 𑀉𑀧𑀬𑁄𑀢𑀺 𑀤𑁆𑀯𑁂 𑀉𑀧𑀬𑀸 𑁋 𑀢𑀡𑁆𑀳𑀽𑀧𑀬𑁄 𑀘 𑀤𑀺𑀝𑁆𑀞𑀽𑀧𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀽𑀧𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀽𑀧𑀬𑁄. 𑀢𑀲𑁆𑀲 𑀢𑀡𑁆𑀳𑀽𑀧𑀬𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀽𑀧𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀽𑀧𑀬𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀽𑀧𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀅𑀦𑀽𑀧𑀬𑁄 𑀧𑀼𑀕𑁆𑀕𑀮𑁄 𑀓𑀺𑀁 𑀭𑀽𑀧𑀁 𑀉𑀧𑁂𑀬𑁆𑀬 𑀉𑀧𑀕𑀘𑁆𑀙𑁂𑀬𑁆𑀬 𑀕𑀡𑁆𑀳𑁂𑀬𑁆𑀬 𑀧𑀭𑀸𑀫𑀲𑁂𑀬𑁆𑀬 𑀅𑀪𑀺𑀦𑀺𑀯𑀺𑀲𑁂𑀬𑁆𑀬 ¶ 𑀅𑀢𑁆𑀢𑀸 𑀫𑁂𑀢𑀺. 𑀓𑀺𑀁 𑀯𑁂𑀤𑀦𑀁… 𑀓𑀺𑀁 𑀲𑀜𑁆𑀜𑀁… 𑀓𑀺𑀁 𑀲𑀗𑁆𑀔𑀸𑀭𑁂… 𑀓𑀺𑀁 𑀯𑀺𑀜𑁆𑀜𑀸𑀡𑀁… 𑀓𑀺𑀁 𑀕𑀢𑀺𑀁… 𑀓𑀺𑀁 𑀉𑀧𑀧𑀢𑁆𑀢𑀺𑀁… 𑀓𑀺𑀁 𑀧𑀝𑀺𑀲𑀦𑁆𑀥𑀺𑀁… 𑀓𑀺𑀁 𑀪𑀯𑀁 ¶ … 𑀓𑀺𑀁 𑀲𑀁𑀲𑀸𑀭𑀁… 𑀓𑀺𑀁 𑀯𑀝𑁆𑀝𑀁 𑀉𑀧𑁂𑀬𑁆𑀬 𑀉𑀧𑀕𑀘𑁆𑀙𑁂𑀬𑁆𑀬 𑀕𑀡𑁆𑀳𑁂𑀬𑁆𑀬 𑀧𑀭𑀸𑀫𑀲𑁂𑀬𑁆𑀬 𑀅𑀪𑀺𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑁋 𑀅𑀦𑀽𑀧𑀬𑁄 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬.

𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄𑀢𑀺. 𑀤𑀺𑀝𑁆𑀞𑁂 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸 𑀯𑀸 𑀲𑀼𑀢𑁂 𑀯𑀸 𑀲𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀫𑀼𑀢𑁂 𑀯𑀸 𑀫𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀔𑀦𑁆𑀢𑀺𑀁 ¶ 𑀅𑀓𑀼𑀩𑁆𑀩𑀫𑀸𑀦𑁄 𑀙𑀦𑁆𑀤𑀁 𑀅𑀓𑀼𑀩𑁆𑀩𑀫𑀸𑀦𑁄 𑀧𑁂𑀫𑀁 𑀅𑀓𑀼𑀩𑁆𑀩𑀫𑀸𑀦𑁄 𑀭𑀸𑀕𑀁 𑀅𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄𑀢𑀺 𑁋 𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

‘‘𑀬𑀸 ¶ 𑀓𑀸𑀘𑀺𑀫𑀸 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸, 𑀲𑀩𑁆𑀩𑀸𑀯 𑀏𑀢𑀸 𑀦 𑀉𑀧𑁂𑀢𑀺 𑀯𑀺𑀤𑁆𑀯𑀸;

𑀅𑀦𑀽𑀧𑀬𑁄 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬, 𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄’’𑀢𑀺.

𑀲𑀻𑀮𑀼𑀢𑁆𑀢𑀫𑀸 𑀲𑀜𑁆𑀜𑀫𑁂𑀦𑀸𑀳𑀼 𑀲𑀼𑀤𑁆𑀥𑀺𑀁, 𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸𑀲𑁂;

𑀇𑀥𑁂𑀯 𑀲𑀺𑀓𑁆𑀔𑁂𑀫 𑀅𑀣𑀲𑁆𑀲 𑀲𑀼𑀤𑁆𑀥𑀺𑀁, 𑀪𑀯𑀽𑀧𑀦𑀻𑀢𑀸 𑀓𑀼𑀲𑀮𑀸𑀯𑀤𑀸𑀦𑀸.

𑀲𑀻𑀮𑀼𑀢𑁆𑀢𑀫𑀸 𑀲𑀜𑁆𑀜𑀫𑁂𑀦𑀸𑀳𑀼 𑀲𑀼𑀤𑁆𑀥𑀺𑀦𑁆𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀼𑀢𑁆𑀢𑀫𑀯𑀸𑀤𑀸; 𑀢𑁂 𑀲𑀻𑀮𑀫𑀢𑁆𑀢𑁂𑀦 𑀲𑀜𑁆𑀜𑀫𑀫𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀯𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀯𑀺𑀫𑀼𑀢𑁆𑀢𑀺𑀁 𑀆𑀳𑀼 [𑀆𑀳𑀁𑀲𑀼 (𑀲𑀻. 𑀓.)] 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺.

𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀏𑀯𑀫𑀸𑀳 𑁋 ‘‘𑀘𑀢𑀽𑀳𑀺 𑀔𑁄 𑀅𑀳𑀁, 𑀕𑀳𑀧𑀢𑀺, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀧𑀜𑁆𑀜𑀧𑁂𑀫𑀺 𑀲𑀫𑁆𑀧𑀦𑁆𑀦𑀓𑀼𑀲𑀮𑀁 𑀧𑀭𑀫𑀓𑀼𑀲𑀮𑀁 𑀉𑀢𑁆𑀢𑀫𑀧𑀢𑁆𑀢𑀺𑀧𑀢𑁆𑀢𑀁 ¶ 𑀲𑀫𑀡𑀁 𑀅𑀬𑁄𑀚𑁆𑀛𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀕𑀳𑀧𑀢𑀺, 𑀦 𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀧𑀸𑀧𑀺𑀓𑀁 [𑀧𑀸𑀧𑀓𑀁 (𑀲𑀻.)] 𑀯𑀸𑀘𑀁 𑀪𑀸𑀲𑀢𑀺, 𑀦 𑀧𑀸𑀧𑀓𑀁 𑀲𑀗𑁆𑀓𑀧𑁆𑀧𑀁 𑀲𑀗𑁆𑀓𑀧𑁆𑀧𑁂𑀢𑀺, 𑀦 𑀧𑀸𑀧𑀓𑀁 𑀆𑀚𑀻𑀯𑀁 𑀆𑀚𑀻𑀯𑀢𑀺. 𑀇𑀫𑁂𑀳𑀺 𑀔𑁄 𑀅𑀳𑀁, 𑀕𑀳𑀧𑀢𑀺 ¶ , 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀧𑀜𑁆𑀜𑀧𑁂𑀫𑀺 𑀲𑀫𑁆𑀧𑀦𑁆𑀦𑀓𑀼𑀲𑀮𑀁 𑀧𑀭𑀫𑀓𑀼𑀲𑀮𑀁 𑀉𑀢𑁆𑀢𑀫𑀧𑀢𑁆𑀢𑀺𑀧𑀢𑁆𑀢𑀁 𑀲𑀫𑀡𑀁 𑀅𑀬𑁄𑀚𑁆𑀛𑀁; 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀼𑀢𑁆𑀢𑀫𑀯𑀸𑀤𑀸; 𑀢𑁂 𑀲𑀻𑀮𑀫𑀢𑁆𑀢𑁂𑀦 𑀲𑀜𑁆𑀜𑀫𑀫𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀆𑀳𑀼 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻’’𑀢𑀺 𑁋 𑀲𑀻𑀮𑀼𑀢𑁆𑀢𑀫𑀸 𑀲𑀜𑁆𑀜𑀫𑁂𑀦𑀸𑀳𑀼 𑀲𑀼𑀤𑁆𑀥𑀺𑀁.

𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸𑀲𑁂𑀢𑀺. 𑀯𑀢𑀦𑁆𑀢𑀺 𑀳𑀢𑁆𑀣𑀺𑀯𑀢𑀁 𑀯𑀸 𑀅𑀲𑁆𑀲𑀯𑀢𑀁 𑀯𑀸 𑀕𑁄𑀯𑀢𑀁 𑀯𑀸 𑀓𑀼𑀓𑁆𑀓𑀼𑀭𑀯𑀢𑀁 𑀯𑀸 𑀓𑀸𑀓𑀯𑀢𑀁 𑀯𑀸 𑀯𑀸𑀲𑀼𑀤𑁂𑀯𑀯𑀢𑀁 𑀯𑀸 𑀩𑀮𑀤𑁂𑀯𑀯𑀢𑀁 𑀯𑀸 𑀧𑀼𑀡𑁆𑀡𑀪𑀤𑁆𑀤𑀯𑀢𑀁 𑀯𑀸 𑀫𑀡𑀺𑀪𑀤𑁆𑀤𑀯𑀢𑀁 𑀯𑀸 𑀅𑀕𑁆𑀕𑀺𑀯𑀢𑀁 ¶ 𑀯𑀸 𑀦𑀸𑀕𑀯𑀢𑀁 𑀯𑀸 𑀲𑀼𑀧𑀡𑁆𑀡𑀯𑀢𑀁 𑀯𑀸 𑀬𑀓𑁆𑀔𑀯𑀢𑀁 𑀯𑀸 𑀅𑀲𑀼𑀭𑀯𑀢𑀁 𑀯𑀸 𑀕𑀦𑁆𑀥𑀩𑁆𑀩𑀯𑀢𑀁 𑀯𑀸 𑀫𑀳𑀸𑀭𑀸𑀚𑀯𑀢𑀁 𑀯𑀸 𑀘𑀦𑁆𑀤𑀯𑀢𑀁 𑀯𑀸 𑀲𑀽𑀭𑀺𑀬𑀯𑀢𑀁 𑀯𑀸 𑀇𑀦𑁆𑀤𑀯𑀢𑀁 𑀯𑀸 𑀩𑁆𑀭𑀳𑁆𑀫𑀯𑀢𑀁 𑀯𑀸 𑀤𑁂𑀯𑀯𑀢𑀁 𑀯𑀸 𑀤𑀺𑀲𑀸𑀯𑀢𑀁 𑀯𑀸 𑀆𑀤𑀸𑀬 𑀲𑀫𑀸𑀤𑀸𑀬 𑀆𑀤𑀺𑀬𑀺𑀢𑁆𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 ¶ 𑀉𑀧𑀝𑁆𑀞𑀺𑀢𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸𑀲𑁂.

𑀇𑀥𑁂𑀯 𑀲𑀺𑀓𑁆𑀔𑁂𑀫 𑀅𑀣𑀲𑁆𑀲 𑀲𑀼𑀤𑁆𑀥𑀺𑀦𑁆𑀢𑀺. 𑀇𑀥𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀲𑀺𑀓𑁆𑀔𑁂𑀫𑀸𑀢𑀺 𑀲𑀺𑀓𑁆𑀔𑁂𑀫 𑀆𑀘𑀭𑁂𑀫 𑀲𑀫𑀸𑀘𑀭𑁂𑀫 𑀲𑀫𑀸𑀤𑀸𑀬 𑀯𑀢𑁆𑀢𑁂𑀫𑀸𑀢𑀺 𑁋 𑀇𑀥𑁂𑀯 𑀲𑀺𑀓𑁆𑀔𑁂𑀫. 𑀅𑀣𑀲𑁆𑀲 𑀲𑀼𑀤𑁆𑀥𑀺𑀦𑁆𑀢𑀺 𑀅𑀣𑀲𑁆𑀲 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀦𑁆𑀢𑀺 𑁋 𑀇𑀥𑁂𑀯 𑀲𑀺𑀓𑁆𑀔𑁂𑀫 𑀅𑀣𑀲𑁆𑀲 𑀲𑀼𑀤𑁆𑀥𑀺𑀁.

𑀪𑀯𑀽𑀧𑀦𑀻𑀢𑀸 ¶ 𑀓𑀼𑀲𑀮𑀸𑀯𑀤𑀸𑀦𑀸𑀢𑀺. 𑀪𑀯𑀽𑀧𑀦𑀻𑀢𑀸𑀢𑀺 𑀪𑀯𑀽𑀧𑀦𑀻𑀢𑀸 𑀪𑀯𑀽𑀧𑀕𑀢𑀸 𑀪𑀯𑀚𑁆𑀛𑁄𑀲𑀺𑀢𑀸 𑀪𑀯𑀸𑀥𑀺𑀫𑀼𑀢𑁆𑀢𑀸𑀢𑀺 𑁋 𑀪𑀯𑀽𑀧𑀦𑀻𑀢𑀸 ¶ . 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 𑀓𑀼𑀲𑀮𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀪𑀯𑀽𑀧𑀦𑀻𑀢𑀸 𑀓𑀼𑀲𑀮𑀸𑀯𑀤𑀸𑀦𑀸.

‘‘𑀲𑀻𑀮𑀼𑀢𑁆𑀢𑀫𑀸 𑀲𑀜𑁆𑀜𑀫𑁂𑀦𑀸𑀳𑀼 𑀲𑀼𑀤𑁆𑀥𑀺𑀁, 𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸𑀲𑁂;

𑀇𑀥𑁂𑀯 𑀲𑀺𑀓𑁆𑀔𑁂𑀫 𑀅𑀣𑀲𑁆𑀲 𑀲𑀼𑀤𑁆𑀥𑀺𑀁, 𑀪𑀯𑀽𑀧𑀦𑀻𑀢𑀸 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺.

𑀲𑀘𑁂 𑀘𑀼𑀢𑁄 𑀲𑀻𑀮𑀯𑀢𑀢𑁄 𑀳𑁄𑀢𑀺, 𑀧𑀯𑁂𑀥𑀢𑀻 [𑀲 𑀯𑁂𑀥𑀢𑀻 (𑀲𑀻 𑀲𑁆𑀬𑀸.)] 𑀓𑀫𑁆𑀫𑀯𑀺𑀭𑀸𑀥𑀬𑀺𑀢𑁆𑀯𑀸;

𑀧𑀚𑀧𑁆𑀧𑀢𑀻 [𑀲 𑀚𑀧𑁆𑀧𑀢𑀻 (𑀲𑀻. 𑀲𑁆𑀬𑀸.)] 𑀧𑀢𑁆𑀣𑀬𑀢𑀻 𑀘 𑀲𑀼𑀤𑁆𑀥𑀺𑀁, 𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸.

𑀲𑀘𑁂 𑀘𑀼𑀢𑁄 𑀲𑀻𑀮𑀯𑀢𑀢𑁄 𑀳𑁄𑀢𑀻𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀻𑀮𑀯𑀢𑀢𑁄 𑀘𑀯𑀢𑀺 𑁋 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀯𑀸 𑀘𑀯𑀢𑀺, 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀸 𑀘𑀯𑀢𑀺. 𑀓𑀣𑀁 𑀧𑀭𑀯𑀺𑀘𑁆𑀙𑀺𑀦𑁆𑀤𑀦𑀸𑀬 𑀘𑀯𑀢𑀺? 𑀧𑀭𑁄 𑀯𑀺𑀘𑁆𑀙𑀺𑀦𑁆𑀤𑀢𑀺 𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸, 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸, 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 ¶ 𑀯𑀸, 𑀦𑀢𑁆𑀣𑁂𑀢𑁆𑀣 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸, 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸𑀢𑀺. 𑀏𑀯𑀁 𑀧𑀭𑁄 𑀯𑀺𑀘𑁆𑀙𑀺𑀦𑁆𑀤𑀢𑀺. 𑀏𑀯𑀁 𑀯𑀺𑀘𑁆𑀙𑀺𑀦𑁆𑀤𑀺𑀬𑀫𑀸𑀦𑁄 𑀲𑀢𑁆𑀣𑀸𑀭𑀸 𑀘𑀯𑀢𑀺, 𑀥𑀫𑁆𑀫𑀓𑁆𑀔𑀸𑀦𑀸 ¶ 𑀘𑀯𑀢𑀺, 𑀕𑀡𑀸 𑀘𑀯𑀢𑀺, 𑀤𑀺𑀝𑁆𑀞𑀺𑀬𑀸 𑀘𑀯𑀢𑀺, 𑀧𑀝𑀺𑀧𑀤𑀸𑀬 𑀘𑀯𑀢𑀺, 𑀫𑀕𑁆𑀕𑀢𑁄 𑀘𑀯𑀢𑀺. 𑀏𑀯𑀁 𑀧𑀭𑀺𑀯𑀺𑀘𑁆𑀙𑀺𑀦𑁆𑀤𑀦𑀸𑀬 ¶ 𑀘𑀯𑀢𑀺. 𑀓𑀣𑀁 ¶ 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀘𑀯𑀢𑀺? 𑀲𑀻𑀮𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀲𑀻𑀮𑀢𑁄 𑀘𑀯𑀢𑀺, 𑀯𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀯𑀢𑀢𑁄 𑀘𑀯𑀢𑀺, 𑀲𑀻𑀮𑀩𑁆𑀩𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀲𑀻𑀮𑀩𑁆𑀩𑀢𑀢𑁄 𑀘𑀯𑀢𑀺. 𑀏𑀯𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀘𑀯𑀢𑀻𑀢𑀺 𑁋 𑀲𑀘𑁂 𑀘𑀼𑀢𑁄 𑀲𑀻𑀮𑀯𑀢𑀢𑁄 𑀳𑁄𑀢𑀺.

𑀧𑀯𑁂𑀥𑀢𑀺 𑀓𑀫𑁆𑀫𑀯𑀺𑀭𑀸𑀥𑀬𑀺𑀢𑁆𑀯𑀸𑀢𑀺. 𑀧𑀯𑁂𑀥𑀢𑀻𑀢𑀺 𑀲𑀻𑀮𑀁 𑀯𑀸 𑀯𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀯𑀸 ‘‘𑀯𑀺𑀭𑀤𑁆𑀥𑀁 𑀫𑀬𑀸, 𑀅𑀧𑀭𑀤𑁆𑀥𑀁 𑀫𑀬𑀸, 𑀔𑀮𑀺𑀢𑀁 𑀫𑀬𑀸, 𑀕𑀮𑀺𑀢𑀁 𑀫𑀬𑀸, 𑀅𑀜𑁆𑀜𑀸𑀬 𑀅𑀧𑀭𑀤𑁆𑀥𑁄 𑀅𑀳’’𑀦𑁆𑀢𑀺 𑀯𑁂𑀥𑀢𑀺 𑀧𑀯𑁂𑀥𑀢𑀺 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀧𑀯𑁂𑀥𑀢𑀺. 𑀓𑀫𑁆𑀫𑀯𑀺𑀭𑀸𑀥𑀬𑀺𑀢𑁆𑀯𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 ‘‘𑀯𑀺𑀭𑀤𑁆𑀥𑀁 𑀫𑀬𑀸, 𑀅𑀧𑀭𑀤𑁆𑀥𑀁 𑀫𑀬𑀸, 𑀔𑀮𑀺𑀢𑀁 𑀫𑀬𑀸, 𑀕𑀮𑀺𑀢𑀁 𑀫𑀬𑀸, 𑀅𑀜𑁆𑀜𑀸𑀬 𑀅𑀧𑀭𑀤𑁆𑀥𑁄 𑀅𑀳’’𑀦𑁆𑀢𑀺 𑀯𑁂𑀥𑀢𑀺 𑀧𑀯𑁂𑀥𑀢𑀺 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀧𑀯𑁂𑀥𑀢𑀺 𑀓𑀫𑁆𑀫𑀯𑀺𑀭𑀸𑀥𑀬𑀺𑀢𑁆𑀯𑀸.

𑀧𑀚𑀧𑁆𑀧𑀢𑀻 𑀧𑀢𑁆𑀣𑀬𑀢𑀻 𑀘 𑀲𑀼𑀤𑁆𑀥𑀺𑀦𑁆𑀢𑀺. 𑀧𑀚𑀧𑁆𑀧𑀢𑀻𑀢𑀺 𑀲𑀻𑀮𑀁 𑀯𑀸 𑀚𑀧𑁆𑀧𑀢𑀺, 𑀯𑀢𑀁 𑀯𑀸 𑀚𑀧𑁆𑀧𑀢𑀺, 𑀲𑀻𑀮𑀩𑁆𑀩𑀢𑀁 𑀯𑀸 𑀚𑀧𑁆𑀧𑀢𑀺 𑀧𑀚𑀧𑁆𑀧𑀢𑀺 𑀅𑀪𑀺𑀚𑀧𑁆𑀧𑀢𑀻𑀢𑀺 𑁋 𑀧𑀚𑀧𑁆𑀧𑀢𑀺. 𑀧𑀢𑁆𑀣𑀬𑀢𑀻 𑀘 𑀲𑀼𑀤𑁆𑀥𑀺𑀦𑁆𑀢𑀺 𑀲𑀻𑀮𑀲𑀼𑀤𑁆𑀥𑀺𑀁 𑀯𑀸 𑀧𑀢𑁆𑀣𑁂𑀢𑀺, 𑀯𑀢𑀲𑀼𑀤𑁆𑀥𑀺𑀁 𑀯𑀸 𑀧𑀢𑁆𑀣𑁂𑀢𑀺, 𑀲𑀻𑀮𑀩𑁆𑀩𑀢𑀲𑀼𑀤𑁆𑀥𑀺𑀁 𑀯𑀸 𑀧𑀢𑁆𑀣𑁂𑀢𑀺 𑀧𑀺𑀳𑁂𑀢𑀺 𑀅𑀪𑀺𑀚𑀧𑁆𑀧𑀢𑀻𑀢𑀺 ¶ 𑁋 𑀧𑀚𑀧𑁆𑀧𑀢𑀻 𑀧𑀢𑁆𑀣𑀬𑀢𑀻 𑀘 𑀲𑀼𑀤𑁆𑀥𑀺𑀁.

𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸𑀢𑀺. 𑀬𑀣𑀸 𑀧𑀼𑀭𑀺𑀲𑁄 𑀖𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀲𑀢𑁆𑀣𑁂𑀦 𑀧𑀯𑀲𑀁 𑀯𑀲𑀦𑁆𑀢𑁄 𑀲𑀢𑁆𑀣𑀸 𑀑𑀳𑀻𑀦𑁄, 𑀢𑀁 𑀯𑀸 𑀲𑀢𑁆𑀣𑀁 𑀅𑀦𑀼𑀩𑀦𑁆𑀥𑀢𑀺 𑀲𑀓𑀁 𑀯𑀸 𑀖𑀭𑀁 𑀧𑀘𑁆𑀘𑀸𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀢𑀁 𑀯𑀸 𑀲𑀢𑁆𑀣𑀸𑀭𑀁 𑀕𑀡𑁆𑀳𑀸𑀢𑀺 𑀅𑀜𑁆𑀜𑀁 𑀯𑀸 𑀲𑀢𑁆𑀣𑀸𑀭𑀁 𑀕𑀡𑁆𑀳𑀸𑀢𑀺, 𑀢𑀁 𑀯𑀸 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀸𑀢𑀺 𑀅𑀜𑁆𑀜𑀁 𑀯𑀸 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀸𑀢𑀺, 𑀢𑀁 𑀯𑀸 𑀕𑀡𑀁 𑀕𑀡𑁆𑀳𑀸𑀢𑀺 𑀅𑀜𑁆𑀜𑀁 𑀯𑀸 𑀕𑀡𑀁 𑀕𑀡𑁆𑀳𑀸𑀢𑀺, 𑀢𑀁 𑀯𑀸 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺 𑀅𑀜𑁆𑀜𑀁 𑀯𑀸 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀢𑀁 𑀯𑀸 𑀧𑀝𑀺𑀧𑀤𑀁 𑀕𑀡𑁆𑀳𑀸𑀢𑀺 𑀅𑀜𑁆𑀜𑀁 𑀯𑀸 𑀧𑀝𑀺𑀧𑀤𑀁 𑀕𑀡𑁆𑀳𑀸𑀢𑀺, 𑀢𑀁 𑀯𑀸 𑀫𑀕𑁆𑀕𑀁 𑀕𑀡𑁆𑀳𑀸𑀢𑀺 𑀅𑀜𑁆𑀜𑀁 𑀯𑀸 𑀫𑀕𑁆𑀕𑀁 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 ¶ 𑁋 𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸.

‘‘𑀲𑀘𑁂 𑀘𑀼𑀢𑁄 𑀲𑀻𑀮𑀯𑀢𑀢𑁄 𑀳𑁄𑀢𑀺, 𑀧𑀯𑁂𑀥𑀢𑀻 𑀓𑀫𑁆𑀫𑀯𑀺𑀭𑀸𑀥𑀬𑀺𑀢𑁆𑀯𑀸;

𑀧𑀚𑀧𑁆𑀧𑀢𑀻 𑀧𑀢𑁆𑀣𑀬𑀢𑀻 𑀘 𑀲𑀼𑀤𑁆𑀥𑀺𑀁, 𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸’’𑀢𑀺.

𑀲𑀻𑀮𑀩𑁆𑀩𑀢𑀁 ¶ 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀓𑀫𑁆𑀫𑀜𑁆𑀘 𑀲𑀸𑀯𑀚𑁆𑀚𑀦𑀯𑀚𑁆𑀚𑀫𑁂𑀢𑀁;

𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄, 𑀯𑀺𑀭𑀢𑁄 𑀘𑀭𑁂 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬.

𑀲𑀻𑀮𑀩𑁆𑀩𑀢𑀁 ¶ 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺. 𑀲𑀩𑁆𑀩𑀸 𑀲𑀻𑀮𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 ¶ 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸, 𑀲𑀩𑁆𑀩𑀸 𑀯𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸, 𑀲𑀩𑁆𑀩𑀸 𑀲𑀻𑀮𑀩𑁆𑀩𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀓𑀫𑁆𑀫𑀜𑁆𑀘 𑀲𑀸𑀯𑀚𑁆𑀚𑀦𑀯𑀚𑁆𑀚𑀫𑁂𑀢𑀦𑁆𑀢𑀺. 𑀲𑀸𑀯𑀚𑁆𑀚𑀓𑀫𑁆𑀫𑀁 𑀯𑀼𑀘𑁆𑀘𑀢𑀺 𑁋 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁. 𑀅𑀦𑀯𑀚𑁆𑀚𑀓𑀫𑁆𑀫𑀁 𑀯𑀼𑀘𑁆𑀘𑀢𑀺 𑁋 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁. 𑀲𑀸𑀯𑀚𑁆𑀚𑀜𑁆𑀘 𑀓𑀫𑁆𑀫𑀁 𑀅𑀦𑀯𑀚𑁆𑀚𑀜𑁆𑀘 𑀓𑀫𑁆𑀫𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀓𑀫𑁆𑀫𑀜𑁆𑀘 𑀲𑀸𑀯𑀚𑁆𑀚𑀦𑀯𑀚𑁆𑀚𑀫𑁂𑀢𑀁.

𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄𑀢𑀺. 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺. 𑀲𑀼𑀤𑁆𑀥𑀺𑀦𑁆𑀢𑀺 𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀢𑁆𑀣𑁂𑀦𑁆𑀢𑀺; 𑀅𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀢𑁆𑀣𑁂𑀦𑁆𑀢𑀺; 𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀢𑁆𑀣𑁂𑀦𑁆𑀢𑀺, 𑀅𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀢𑁆𑀣𑁂𑀦𑁆𑀢𑀺, 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀢𑁆𑀣𑁂𑀦𑁆𑀢𑀺; 𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀢𑁂𑀥𑀸𑀢𑀼𑀓𑁂 𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀅𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀢𑁆𑀣𑁂𑀦𑁆𑀢𑀺, 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀢𑁆𑀣𑁂𑀦𑁆𑀢𑀺, 𑀢𑁂𑀥𑀸𑀢𑀼𑀓𑁂 𑀓𑀼𑀲𑀮𑁂 ¶ 𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺; 𑀲𑀼𑀤𑁆𑀥𑀺𑀁 𑀧𑀢𑁆𑀣𑁂𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸 [𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀁 [𑀦𑀺𑀬𑀸𑀫𑀸𑀯𑀢𑁆𑀢𑀦𑁆𑀢𑀺𑀁 (𑀓.)] 𑀧𑀢𑁆𑀣𑁂𑀦𑁆𑀢𑀺. 𑀲𑁂𑀓𑁆𑀔𑀸 𑀅𑀕𑁆𑀕𑀥𑀫𑁆𑀫𑀁 ¶ 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀺. 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 𑀅𑀭𑀳𑀸 𑀦𑁂𑀯 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀢𑀺, 𑀦𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀢𑁆𑀣𑁂𑀢𑀺, 𑀦𑀧𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀢𑁆𑀣𑁂𑀢𑀺, 𑀦𑀧𑀺 𑀢𑁂𑀥𑀸𑀢𑀼𑀓𑁂 𑀓𑀼𑀲𑀮𑁂 𑀥𑀫𑁆𑀫𑁂 𑀧𑀢𑁆𑀣𑁂𑀢𑀺, 𑀦𑀧𑀺 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀁 𑀧𑀢𑁆𑀣𑁂𑀢𑀺, 𑀦𑀧𑀺 𑀅𑀕𑁆𑀕𑀥𑀫𑁆𑀫𑀁 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀢𑀺. 𑀧𑀢𑁆𑀣𑀦𑀸 𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀭𑀳𑀸 𑀯𑀼𑀤𑁆𑀥𑀺𑀧𑀸𑀭𑀺𑀳𑀸𑀦𑀺𑀯𑀻𑀢𑀺𑀯𑀢𑁆𑀢𑁄 [𑀯𑀼𑀤𑁆𑀥𑀺𑀧𑀸𑀭𑀺𑀳𑀸𑀦𑀺𑀁 𑀯𑀻𑀢𑀺𑀯𑀢𑁆𑀢𑁄 (𑀲𑀻.)]. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀚𑀭𑀸𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄.

𑀯𑀺𑀭𑀢𑁄 ¶ 𑀘𑀭𑁂 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬𑀸𑀢𑀺. 𑀯𑀺𑀭𑀢𑁄𑀢𑀺 𑀲𑀼𑀤𑁆𑀥𑀺𑀅𑀲𑀼𑀤𑁆𑀥𑀺𑀬𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄, 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀺𑀭𑀢𑁄. 𑀘𑀭𑁂𑀢𑀺 𑀘𑀭𑁂𑀬𑁆𑀬 𑀯𑀺𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀯𑀺𑀭𑀢𑁄 𑀘𑀭𑁂. 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀦𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀺𑀝𑁆𑀞𑀺𑀲𑀦𑁆𑀢𑀺𑀬𑁄 𑀅𑀕𑀡𑁆𑀳𑀦𑁆𑀢𑁄 𑀅𑀧𑀭𑀸𑀫𑀲𑀦𑁆𑀢𑁄 𑀅𑀦𑀪𑀺𑀦𑀺𑀯𑀺𑀲𑀦𑁆𑀢𑁄𑀢𑀺 𑁋 𑀯𑀺𑀭𑀢𑁄 𑀘𑀭𑁂 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬.

‘‘𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀓𑀫𑁆𑀫𑀜𑁆𑀘 𑀲𑀸𑀯𑀚𑁆𑀚𑀦𑀯𑀚𑁆𑀚𑀫𑁂𑀢𑀁;

𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄, 𑀯𑀺𑀭𑀢𑁄 𑀘𑀭𑁂 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬𑀸’’𑀢𑀺.

𑀢𑀫𑀽𑀧𑀦𑀺𑀲𑁆𑀲𑀸𑀬 ¶ ¶ 𑀚𑀺𑀕𑀼𑀘𑁆𑀙𑀺𑀢𑀁 𑀯𑀸, 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀉𑀤𑁆𑀥𑀁𑀲𑀭𑀸 𑀲𑀼𑀤𑁆𑀥𑀺𑀫𑀦𑀼𑀢𑁆𑀣𑀼𑀦𑀦𑁆𑀢𑀺, 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀼.

𑀢𑀫𑀽𑀧𑀦𑀺𑀲𑁆𑀲𑀸𑀬 𑀚𑀺𑀕𑀼𑀘𑁆𑀙𑀺𑀢𑀁 𑀯𑀸𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑀸 𑀢𑀧𑁄𑀚𑀺𑀕𑀼𑀘𑁆𑀙𑀲𑀸𑀭𑀸 𑀢𑀧𑁄𑀚𑀺𑀕𑀼𑀘𑁆𑀙𑀦𑀺𑀲𑁆𑀲𑀺𑀢𑀸 𑀆𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀢𑀫𑀽𑀧𑀦𑀺𑀲𑁆𑀲𑀸𑀬 𑀚𑀺𑀕𑀼𑀘𑁆𑀙𑀺𑀢𑀁 𑀯𑀸.

𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸𑀢𑀺. 𑀤𑀺𑀝𑁆𑀞𑀁 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀁 𑀯𑀸 𑀲𑀼𑀢𑀁 𑀯𑀸 𑀲𑀼𑀢𑀲𑀼𑀤𑁆𑀥𑀺𑀁 𑀯𑀸 𑀫𑀼𑀢𑀁 𑀯𑀸 𑀫𑀼𑀢𑀲𑀼𑀤𑁆𑀥𑀺𑀁 𑀯𑀸 𑀦𑀺𑀲𑁆𑀲𑀸𑀬 𑀉𑀧𑀦𑀺𑀲𑁆𑀲𑀸𑀬 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸.

𑀉𑀤𑁆𑀥𑀁𑀲𑀭𑀸 𑀲𑀼𑀤𑁆𑀥𑀺𑀫𑀦𑀼𑀢𑁆𑀣𑀼𑀦𑀦𑁆𑀢𑀻𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀁𑀲𑀭𑀸𑀯𑀸𑀤𑀸. 𑀓𑀢𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀁𑀲𑀭𑀸𑀯𑀸𑀤𑀸? 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀓𑀸, 𑀲𑀁𑀲𑀸𑀭𑀲𑀼𑀤𑁆𑀥𑀺𑀓𑀸, 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀓𑀸, 𑀲𑀲𑁆𑀲𑀢𑀯𑀸𑀤𑀸 𑁋 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀁𑀲𑀭𑀸𑀯𑀸𑀤𑀸. 𑀢𑁂 𑀲𑀁𑀲𑀸𑀭𑁂 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀣𑀼𑀦𑀦𑁆𑀢𑀺 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀉𑀤𑁆𑀥𑀁𑀲𑀭𑀸 𑀲𑀼𑀤𑁆𑀥𑀺𑀫𑀦𑀼𑀢𑁆𑀣𑀼𑀦𑀦𑁆𑀢𑀺.

𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀽𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀪𑀯𑀸𑀪𑀯𑁂𑀲𑀽𑀢𑀺 𑀪𑀯𑀸𑀪𑀯𑁂 𑀓𑀫𑁆𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀓𑀸𑀫𑀪𑀯𑁂, 𑀓𑀫𑁆𑀫𑀪𑀯𑁂 𑀓𑀸𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀭𑀽𑀧𑀪𑀯𑁂 ¶ , 𑀓𑀫𑁆𑀫𑀪𑀯𑁂 𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀅𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 𑀅𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 ¶ 𑀅𑀯𑀻𑀢𑀢𑀡𑁆𑀳𑀸 𑀅𑀯𑀺𑀕𑀢𑀢𑀡𑁆𑀳𑀸 𑀅𑀘𑀢𑁆𑀢𑀢𑀡𑁆𑀳𑀸 𑀅𑀯𑀦𑁆𑀢𑀢𑀡𑁆𑀳𑀸 𑀅𑀫𑀼𑀢𑁆𑀢𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀢𑀡𑁆𑀳𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑀡𑁆𑀳𑀸𑀢𑀺 𑁋 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀼.

‘‘𑀢𑀫𑀽𑀧𑀦𑀺𑀲𑁆𑀲𑀸𑀬 ¶ 𑀚𑀺𑀕𑀼𑀘𑁆𑀙𑀺𑀢𑀁 𑀯𑀸, 𑀅𑀣 𑀯𑀸𑀧𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀉𑀤𑁆𑀥𑀁𑀲𑀭𑀸 𑀲𑀼𑀤𑁆𑀥𑀺𑀫𑀦𑀼𑀢𑁆𑀣𑀼𑀦𑀦𑁆𑀢𑀺, 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀽’’𑀢𑀺.

𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀺, 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀼;

𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀺, 𑀲 𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁 𑀯 𑀚𑀧𑁆𑀧𑁂.

𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀻𑀢𑀺. 𑀧𑀢𑁆𑀣𑀦𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀧𑀢𑁆𑀣𑀬𑀫𑀸𑀦𑀲𑁆𑀲𑀸𑀢𑀺 𑀧𑀢𑁆𑀣𑀬𑀫𑀸𑀦𑀲𑁆𑀲 𑀇𑀘𑁆𑀙𑀫𑀸𑀦𑀲𑁆𑀲 𑀲𑀸𑀤𑀺𑀬𑀫𑀸𑀦𑀲𑁆𑀲 𑀧𑀺𑀳𑀬𑀫𑀸𑀦𑀲𑁆𑀲 𑀅𑀪𑀺𑀚𑀧𑁆𑀧𑀬𑀫𑀸𑀦𑀲𑁆𑀲𑀸𑀢𑀺 𑁋 𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺. 𑀚𑀧𑁆𑀧𑀺𑀢𑀸𑀦𑀻𑀢𑀺. 𑀚𑀧𑁆𑀧𑀦𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑁋 𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀺.

𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀽𑀢𑀺. 𑀧𑀓𑀧𑁆𑀧𑀦𑀸𑀢𑀺 𑀤𑁆𑀯𑁂 𑀧𑀓𑀧𑁆𑀧𑀦𑀸 𑁋 𑀢𑀡𑁆𑀳𑀸𑀧𑀓𑀧𑁆𑀧𑀦𑀸 𑀘 𑀤𑀺𑀝𑁆𑀞𑀺𑀧𑀓𑀧𑁆𑀧𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀓𑀧𑁆𑀧𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀓𑀧𑁆𑀧𑀦𑀸. 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀽𑀢𑀺. 𑀧𑀓𑀧𑁆𑀧𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀯𑁂𑀥𑁂𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 ¶ 𑀯𑁂𑀥𑁂𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀯𑁂𑀥𑁂𑀦𑁆𑀢𑀺; 𑀧𑀓𑀧𑁆𑀧𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀯𑁂𑀥𑁂𑀦𑁆𑀢𑀺, 𑀯𑀺𑀧𑀭𑀺𑀡𑀫𑀦𑁆𑀢𑁂𑀧𑀺 𑀯𑁂𑀥𑁂𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀯𑁂𑀥𑁂𑀦𑁆𑀢𑀺 𑀧𑀯𑁂𑀥𑁂𑀦𑁆𑀢𑀺 𑀲𑀫𑁆𑀧𑀯𑁂𑀥𑁂𑀦𑁆𑀢𑀻𑀢𑀺 𑁋 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀼.

𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀻𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀬𑀲𑁆𑀲 𑀕𑀫𑀦𑀁 𑀆𑀕𑀫𑀦𑀁 𑀕𑀫𑀦𑀸𑀕𑀫𑀦𑀁 𑀓𑀸𑀮𑀁𑀕𑀢𑀺 𑀪𑀯𑀸𑀪𑀯𑁄 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘 𑀦𑀺𑀩𑁆𑀩𑀢𑁆𑀢𑀺 𑀘 𑀪𑁂𑀤𑁄 𑀘 𑀚𑀸𑀢𑀺 𑀘 𑀚𑀭𑀸𑀫𑀭𑀡𑀜𑁆𑀘 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 ¶ 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀺.

𑀲 ¶ 𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁 𑀯 𑀚𑀧𑁆𑀧𑁂𑀢𑀺. 𑀲𑁄 𑀓𑁂𑀦 𑀭𑀸𑀕𑁂𑀦 𑀯𑁂𑀥𑁂𑀬𑁆𑀬, 𑀓𑁂𑀦 𑀤𑁄𑀲𑁂𑀦 𑀯𑁂𑀥𑁂𑀬𑁆𑀬, 𑀓𑁂𑀦 𑀫𑁄𑀳𑁂𑀦 𑀯𑁂𑀥𑁂𑀬𑁆𑀬, 𑀓𑁂𑀦 𑀫𑀸𑀦𑁂𑀦 𑀯𑁂𑀥𑁂𑀬𑁆𑀬, 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑁂𑀥𑁂𑀬𑁆𑀬, 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑁂𑀥𑁂𑀬𑁆𑀬, 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑁂𑀥𑁂𑀬𑁆𑀬, 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀯𑁂𑀥𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸; 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀓𑁂𑀦 𑀯𑁂𑀥𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 ¶ 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸, 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺 𑀬𑁂𑀦 𑀯𑁂𑀥𑁂𑀬𑁆𑀬 𑀧𑀯𑁂𑀥𑁂𑀬𑁆𑀬 𑀲𑀫𑁆𑀧𑀯𑁂𑀥𑁂𑀬𑁆𑀬𑀸𑀢𑀺 ¶ 𑁋 𑀲 𑀓𑁂𑀦 𑀯𑁂𑀥𑁂𑀬𑁆𑀬. 𑀓𑀼𑀳𑀺𑀁𑀯 𑀚𑀧𑁆𑀧𑁂𑀢𑀺 𑀓𑀼𑀳𑀺𑀁 𑀯𑀸 𑀚𑀧𑁆𑀧𑁂𑀬𑁆𑀬 𑀓𑀺𑀫𑁆𑀳𑀺 𑀚𑀧𑁆𑀧𑁂𑀬𑁆𑀬, 𑀓𑀢𑁆𑀣 𑀚𑀧𑁆𑀧𑁂𑀬𑁆𑀬 𑀧𑀚𑀧𑁆𑀧𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑁋 𑀲 𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁 𑀯 𑀚𑀧𑁆𑀧𑁂.

‘‘𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀺, 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀼;

𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀺, 𑀲 𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁 𑀯 𑀚𑀧𑁆𑀧𑁂’’𑀢𑀺.

𑀬𑀫𑀸𑀳𑀼 𑀥𑀫𑁆𑀫𑀁 𑀧𑀭𑀫𑀦𑁆𑀢𑀺 𑀏𑀓𑁂, 𑀢𑀫𑁂𑀯 𑀳𑀻𑀦𑀦𑁆𑀢𑀺 𑀧𑀦𑀸𑀳𑀼 𑀅𑀜𑁆𑀜𑁂;

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁, 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸𑀯𑀤𑀸𑀦𑀸.

𑀬𑀫𑀸𑀳𑀼 𑀥𑀫𑁆𑀫𑀁 𑀧𑀭𑀫𑀦𑁆𑀢𑀺 𑀏𑀓𑁂𑀢𑀺. 𑀬𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 ¶ , 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀬𑀫𑀸𑀳𑀼 𑀥𑀫𑁆𑀫𑀁 𑀧𑀭𑀫𑀦𑁆𑀢𑀺 𑀏𑀓𑁂.

𑀢𑀫𑁂𑀯 𑀳𑀻𑀦𑀦𑁆𑀢𑀺 𑀧𑀦𑀸𑀳𑀼 𑀅𑀜𑁆𑀜𑁂𑀢𑀺 𑀢𑀫𑁂𑀯 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀳𑀻𑀦𑀁 𑀏𑀢𑀁, 𑀦𑀺𑀳𑀻𑀦𑀁 𑀏𑀢𑀁, 𑀑𑀫𑀓𑀁 𑀏𑀢𑀁, 𑀮𑀸𑀫𑀓𑀁 𑀏𑀢𑀁, 𑀙𑀢𑀼𑀓𑁆𑀓𑀁 𑀏𑀢𑀁, 𑀧𑀭𑀺𑀢𑁆𑀢𑀓𑀁 𑀏𑀢’’𑀦𑁆𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀫𑁂𑀯 𑀳𑀻𑀦𑀦𑁆𑀢𑀺 𑀧𑀦𑀸𑀳𑀼 𑀅𑀜𑁆𑀜𑁂.

𑀲𑀘𑁆𑀘𑁄 ¶ ¶ 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀦𑁆𑀢𑀺. 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀤𑁄 𑀓𑀢𑀫𑁄 𑀲𑀘𑁆𑀘𑁄 𑀢𑀘𑁆𑀙𑁄 𑀢𑀣𑁄 𑀪𑀽𑀢𑁄 𑀬𑀸𑀣𑀸𑀯𑁄 𑀅𑀯𑀺𑀧𑀭𑀻𑀢𑁄𑀢𑀺 𑁋 𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁.

‘‘𑀬𑀫𑀸𑀳𑀼 𑀥𑀫𑁆𑀫𑀁 𑀧𑀭𑀫𑀦𑁆𑀢𑀺 𑀏𑀓𑁂, 𑀢𑀫𑁂𑀯 𑀳𑀻𑀦𑀦𑁆𑀢𑀺 𑀧𑀦𑀸𑀳𑀼 𑀅𑀜𑁆𑀜𑁂;

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁, 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺.

𑀲𑀓𑀜𑁆𑀳𑀺 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀫𑀸𑀳𑀼, 𑀅𑀜𑁆𑀜𑀲𑁆𑀲 𑀥𑀫𑁆𑀫𑀁 𑀧𑀦 𑀳𑀻𑀦𑀫𑀸𑀳𑀼;

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀲𑀓𑀁 𑀲𑀓𑀁 𑀲𑀫𑁆𑀫𑀼𑀢𑀺𑀫𑀸𑀳𑀼 𑀲𑀘𑁆𑀘𑀁.

𑀲𑀓𑀜𑁆𑀳𑀺 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀫𑀸𑀳𑀽𑀢𑀺 𑀲𑀓𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀇𑀤𑀁 𑀲𑀫𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀅𑀦𑁄𑀫’’𑀦𑁆𑀢𑀺, 𑀏𑀯𑀫𑀸𑀳𑀁𑀲𑀼…𑀧𑁂… 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀓𑀜𑁆𑀳𑀺 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀫𑀸𑀳𑀼.

𑀅𑀜𑁆𑀜𑀲𑁆𑀲 ¶ 𑀥𑀫𑁆𑀫𑀁 𑀧𑀦 𑀳𑀻𑀦𑀫𑀸𑀳𑀽𑀢𑀺. 𑀅𑀜𑁆𑀜𑀲𑁆𑀲 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 ¶ 𑀫𑀕𑁆𑀕𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀳𑀻𑀦𑀁 𑀏𑀢𑀁, 𑀦𑀺𑀳𑀻𑀦𑀁 𑀏𑀢𑀁, 𑀑𑀫𑀓𑀁 𑀏𑀢𑀁, 𑀮𑀸𑀫𑀓𑀁 𑀏𑀢𑀁, 𑀙𑀢𑀼𑀓𑁆𑀓𑀁 𑀏𑀢𑀁, 𑀧𑀭𑀺𑀢𑁆𑀢𑀓𑀁 𑀏𑀢’’𑀦𑁆𑀢𑀺, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀜𑁆𑀜𑀲𑁆𑀲 𑀥𑀫𑁆𑀫𑀁 𑀧𑀦 𑀳𑀻𑀦𑀫𑀸𑀳𑀼.

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀻𑀢𑀺 𑀏𑀯𑀁 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀯𑀸𑀤𑀬𑀦𑁆𑀢𑀺, 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀪𑀡𑁆𑀟𑀦𑀁 𑀓𑀭𑁄𑀦𑁆𑀢𑀺, 𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀫𑁂𑀥𑀕𑀁 𑀓𑀭𑁄𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺 𑁋 𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺.

𑀲𑀓𑀁 𑀲𑀓𑀁 𑀲𑀫𑁆𑀫𑀼𑀢𑀺𑀫𑀸𑀳𑀼 𑀲𑀘𑁆𑀘𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑁋 𑀲𑀓𑀁 𑀲𑀓𑀁 𑀲𑀫𑁆𑀫𑀼𑀢𑀺𑀫𑀸𑀳𑀼 𑀲𑀘𑁆𑀘𑀁. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄 ¶ …𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑁋 𑀲𑀓𑀁 𑀲𑀓𑀁 𑀲𑀫𑁆𑀫𑀼𑀢𑀺𑀫𑀸𑀳𑀼 𑀲𑀘𑁆𑀘𑀁.

‘‘𑀲𑀓𑀜𑁆𑀳𑀺 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀫𑀸𑀳𑀼, 𑀅𑀜𑁆𑀜𑀲𑁆𑀲 𑀥𑀫𑁆𑀫𑀁 𑀧𑀦 𑀳𑀻𑀦𑀫𑀸𑀳𑀼;

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀲𑀓𑀁 𑀲𑀓𑀁 𑀲𑀫𑁆𑀫𑀼𑀢𑀺𑀫𑀸𑀳𑀼 𑀲𑀘𑁆𑀘’’𑀦𑁆𑀢𑀺.

𑀧𑀭𑀲𑁆𑀲 ¶ 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄, 𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲;

𑀧𑀼𑀣𑀽 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀦𑀺𑀳𑀻𑀦𑀢𑁄 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸.

𑀧𑀭𑀲𑁆𑀲 ¶ 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄𑀢𑀺 𑀧𑀭𑀲𑁆𑀲 𑀘𑁂 𑀯𑀫𑁆𑀪𑀬𑀺𑀢𑀓𑀸𑀭𑀡𑀸 𑀦𑀺𑀦𑁆𑀤𑀺𑀢𑀓𑀸𑀭𑀡𑀸 𑀕𑀭𑀳𑀺𑀢𑀓𑀸𑀭𑀡𑀸 𑀉𑀧𑀯𑀤𑀺𑀢𑀓𑀸𑀭𑀡𑀸 𑀧𑀭𑁄 𑀩𑀸𑀮𑁄 𑀳𑁄𑀢𑀺 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄𑀢𑀺 𑁋 𑀧𑀭𑀲𑁆𑀲 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄.

𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲𑀸𑀢𑀺. 𑀥𑀫𑁆𑀫𑁂𑀲𑀼 𑀦 𑀓𑁄𑀘𑀺 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀯𑀺𑀲𑀺𑀝𑁆𑀞𑁄 𑀧𑀸𑀫𑁄𑀓𑁆𑀔𑁄 𑀉𑀢𑁆𑀢𑀫𑁄 𑀧𑀯𑀭𑁄 𑀅𑀲𑁆𑀲𑀸𑀢𑀺 𑁋 𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑀧𑀼𑀣𑀽 ¶ 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀦𑀺𑀳𑀻𑀦𑀢𑁄𑀢𑀺. 𑀩𑀳𑀼𑀓𑀸𑀧𑀺 𑀩𑀳𑀽𑀦𑀁 𑀥𑀫𑁆𑀫𑀁 𑀯𑀤𑀦𑁆𑀢𑀺 𑀉𑀧𑀯𑀤𑀦𑁆𑀢𑀺 𑀦𑀺𑀦𑁆𑀤𑀦𑁆𑀢𑀺 𑀕𑀭𑀳𑀦𑁆𑀢𑀺 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄, 𑀩𑀳𑀼𑀓𑀸𑀧𑀺 𑀏𑀓𑀲𑁆𑀲 𑀥𑀫𑁆𑀫𑀁 𑀯𑀤𑀦𑁆𑀢𑀺 𑀉𑀧𑀯𑀤𑀦𑁆𑀢𑀺 𑀦𑀺𑀦𑁆𑀤𑀦𑁆𑀢𑀺 𑀕𑀭𑀳𑀦𑁆𑀢𑀺 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄, 𑀏𑀓𑁄𑀧𑀺 𑀩𑀳𑀽𑀦𑀁 𑀥𑀫𑁆𑀫𑀁 𑀯𑀤𑀢𑀺 𑀉𑀧𑀯𑀤𑀢𑀺 𑀦𑀺𑀦𑁆𑀤𑀢𑀺 𑀕𑀭𑀳𑀢𑀺 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄, 𑀏𑀓𑁄𑀧𑀺 𑀏𑀓𑀲𑁆𑀲 𑀥𑀫𑁆𑀫𑀁 𑀯𑀤𑀢𑀺 𑀉𑀧𑀯𑀤𑀢𑀺 𑀦𑀺𑀦𑁆𑀤𑀢𑀺 𑀕𑀭𑀳𑀢𑀺 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄𑀢𑀺 𑁋 𑀧𑀼𑀣𑀽 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁.

𑀦𑀺𑀳𑀻𑀦𑀢𑁄 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸𑀢𑀺. 𑀥𑀫𑁆𑀫𑁄 𑀲𑀓𑀸𑀬𑀦𑀁, 𑀤𑀺𑀝𑁆𑀞𑀺 𑀲𑀓𑀸𑀬𑀦𑀁, 𑀧𑀝𑀺𑀧𑀤𑀸 𑀲𑀓𑀸𑀬𑀦𑀁, 𑀫𑀕𑁆𑀕𑁄 𑀲𑀓𑀸𑀬𑀦𑀁, 𑀲𑀓𑀸𑀬𑀦𑁂 𑀤𑀴𑁆𑀳𑀯𑀸𑀤𑀸 𑀣𑀺𑀭𑀯𑀸𑀤𑀸 𑀩𑀮𑀺𑀓𑀯𑀸𑀤𑀸 ¶ 𑀅𑀝𑁆𑀞𑀺𑀢𑀯𑀸𑀤𑀸𑀢𑀺 𑁋 𑀦𑀺𑀳𑀻𑀦𑀢𑁄 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸.

‘‘𑀧𑀭𑀲𑁆𑀲 ¶ 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄, 𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲;

𑀧𑀼𑀣𑀽 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀦𑀺𑀳𑀻𑀦𑀢𑁄 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸’’𑀢𑀺.

𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 [𑀲𑀤𑁆𑀥𑀫𑁆𑀫𑀧𑀽𑀚𑀸 𑀘 (𑀲𑀻. 𑀲𑁆𑀬𑀸.)] 𑀧𑀦𑀸 𑀢𑀣𑁂𑀯, 𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀺;

𑀲𑀩𑁆𑀩𑁂𑀯 𑀯𑀸𑀤𑀸 [𑀲𑀩𑁆𑀩𑁂 𑀧𑀯𑀸𑀤𑀸 (𑀲𑁆𑀬𑀸.)] 𑀢𑀣𑀺𑀬𑀸 [𑀢𑀣𑀺 𑀯𑀸 (𑀩𑀳𑀽𑀲𑀼)] 𑀪𑀯𑁂𑀬𑁆𑀬𑀼𑀁, 𑀲𑀼𑀤𑁆𑀥𑀻 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯.

𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀧𑀦𑀸 𑀢𑀣𑁂𑀯𑀸𑀢𑀺. 𑀓𑀢𑀫𑀸 𑀲𑀤𑁆𑀥𑀫𑁆𑀫𑀧𑀽𑀚𑀸? 𑀲𑀓𑀁 𑀲𑀢𑁆𑀣𑀸𑀭𑀁 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 ¶ 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺 ‘‘𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽’’𑀢𑀺 𑁋 𑀅𑀬𑀁 𑀲𑀤𑁆𑀥𑀫𑁆𑀫𑀧𑀽𑀚𑀸. 𑀲𑀓𑀁 𑀥𑀫𑁆𑀫𑀓𑁆𑀔𑀸𑀦𑀁 𑀲𑀓𑀁 𑀕𑀡𑀁 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀧𑀝𑀺𑀧𑀤𑀁 𑀲𑀓𑀁 𑀫𑀕𑁆𑀕𑀁 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺 ‘‘𑀅𑀬𑀁 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑁋 𑀅𑀬𑀁 𑀲𑀤𑁆𑀥𑀫𑁆𑀫𑀧𑀽𑀚𑀸 ¶ . 𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀧𑀦𑀸 𑀢𑀣𑁂𑀯𑀸𑀢𑀺 𑀲𑀤𑁆𑀥𑀫𑁆𑀫𑀧𑀽𑀚𑀸 𑀢𑀣𑀸 𑀢𑀘𑁆𑀙𑀸 𑀪𑀽𑀢𑀸 𑀬𑀸𑀣𑀸𑀯𑀸 𑀅𑀯𑀺𑀧𑀭𑀻𑀢𑀸𑀢𑀺 𑁋 𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀧𑀦𑀸 𑀢𑀣𑁂𑀯.

𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀻𑀢𑀺. 𑀥𑀫𑁆𑀫𑁄 𑀲𑀓𑀸𑀬𑀦𑀁 𑀤𑀺𑀝𑁆𑀞𑀺 𑀲𑀓𑀸𑀬𑀦𑀁 𑀧𑀝𑀺𑀧𑀤𑀸 𑀲𑀓𑀸𑀬𑀦𑀁 𑀫𑀕𑁆𑀕𑁄 𑀲𑀓𑀸𑀬𑀦𑀁, 𑀲𑀓𑀸𑀬𑀦𑀸𑀦𑀺 𑀧𑀲𑀁𑀲𑀦𑁆𑀢𑀺 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀻𑀢𑀺 𑁋 𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀺.

𑀲𑀩𑁆𑀩𑁂𑀯 𑀯𑀸𑀤𑀸 𑀢𑀣𑀺𑀬𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀲𑀩𑁆𑀩𑁂𑀯 𑀯𑀸𑀤𑀸 𑀢𑀣𑀸 𑀢𑀘𑁆𑀙𑀸 𑀪𑀽𑀢𑀸 𑀬𑀸𑀣𑀸𑀯𑀸 𑀅𑀯𑀺𑀧𑀭𑀻𑀢𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑁋 𑀲𑀩𑁆𑀩𑁂𑀯 𑀯𑀸𑀤𑀸 𑀢𑀣𑀺𑀬𑀸 𑀪𑀯𑁂𑀬𑁆𑀬𑀼𑀁.

𑀲𑀼𑀤𑁆𑀥𑀻 ¶ 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯𑀸𑀢𑀺. 𑀧𑀘𑁆𑀘𑀢𑁆𑀢𑀫𑁂𑀯 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀤𑁆𑀥𑀺 𑀯𑀺𑀲𑀼𑀤𑁆𑀥𑀺 𑀧𑀭𑀺𑀲𑀼𑀤𑁆𑀥𑀺, 𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺 𑀧𑀭𑀺𑀫𑀼𑀢𑁆𑀢𑀻𑀢𑀺 𑁋 𑀲𑀼𑀤𑁆𑀥𑀻 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯.

‘‘𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀧𑀦𑀸 𑀢𑀣𑁂𑀯, 𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀺;

𑀲𑀩𑁆𑀩𑁂𑀯 𑀯𑀸𑀤𑀸 𑀢𑀣𑀺𑀬𑀸 𑀪𑀯𑁂𑀬𑁆𑀬𑀼𑀁, 𑀲𑀼𑀤𑁆𑀥𑀻 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯𑀸’’𑀢𑀺.

𑀦 ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁.

𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀻𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀻𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀢𑀸 𑀦𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀭𑀦𑁂𑀬𑁆𑀬𑁄, 𑀦 𑀧𑀭𑀧𑀢𑁆𑀢𑀺𑀬𑁄, 𑀦 𑀧𑀭𑀧𑀘𑁆𑀘𑀬𑁄, 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽 [𑀧𑀭𑀧𑀝𑀺𑀩𑀦𑁆𑀥𑀕𑀽 (𑀓.)] 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀢𑀸 𑀦𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀭𑀦𑁂𑀬𑁆𑀬𑁄, 𑀦 𑀧𑀭𑀧𑀢𑁆𑀢𑀺𑀬𑁄, 𑀦 𑀧𑀭𑀧𑀘𑁆𑀘𑀬𑁄, 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽 𑀚𑀸𑀦𑀸𑀢𑀺 ¶ 𑀧𑀲𑁆𑀲𑀢𑀺 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀬𑀁 ¶ 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀢𑀸 𑀦𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀭𑀦𑁂𑀬𑁆𑀬𑁄 ¶ , 𑀦 𑀧𑀭𑀧𑀢𑁆𑀢𑀺𑀬𑁄, 𑀦 𑀧𑀭𑀧𑀘𑁆𑀘𑀬𑁄, 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀺.

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼. 𑀦𑀺𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀺𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀑𑀥𑀺𑀕𑁆𑀕𑀸𑀳𑁄 𑀩𑀺𑀮𑀕𑁆𑀕𑀸𑀳𑁄 𑀯𑀭𑀕𑁆𑀕𑀸𑀳𑁄 𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑁄 𑀉𑀘𑁆𑀘𑀬𑀕𑁆𑀕𑀸𑀳𑁄 𑀲𑀫𑀼𑀘𑁆𑀘𑀬𑀕𑁆𑀕𑀸𑀳𑁄 ‘‘𑀇𑀤𑀁 𑀲𑀘𑁆𑀘𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢’’𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀤𑀺𑀝𑁆𑀞𑀺𑀓𑀮𑀳𑀸𑀦𑀺 𑀤𑀺𑀝𑁆𑀞𑀺𑀪𑀡𑁆𑀟𑀦𑀸𑀦𑀺 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑀸𑀦𑀺 𑀤𑀺𑀝𑁆𑀞𑀺𑀯𑀺𑀯𑀸𑀤𑀸𑀦𑀺 𑀤𑀺𑀝𑁆𑀞𑀺𑀫𑁂𑀥𑀕𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄.

𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀦𑁆𑀢𑀺. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺, 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺, 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 ¶ , 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺, 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺, 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺, 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 ¶ 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺 𑀦 𑀤𑀓𑁆𑀔𑀢𑀺 𑀦 𑀑𑀮𑁄𑀓𑁂𑀢𑀺 𑀦 𑀦𑀺𑀚𑁆𑀛𑀸𑀬𑀢𑀺 ¶ 𑀦 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁.

‘‘𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜’’𑀦𑁆𑀢𑀺.

𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀁, 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀅𑀤𑀓𑁆𑀔𑀺 𑀘𑁂 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦, 𑀅𑀢𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀦𑁆𑀢𑀺. 𑀚𑀸𑀦𑀸𑀫𑀻𑀢𑀺 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 [𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀜𑀸𑀡𑁂𑀦 (𑀲𑀻.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀯𑀸 𑀚𑀸𑀦𑀸𑀫𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀚𑀸𑀦𑀸𑀫𑀺. 𑀧𑀲𑁆𑀲𑀸𑀫𑀻𑀢𑀺 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀧𑀲𑁆𑀲𑀸𑀫𑀺, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 ¶ 𑀯𑀸 𑀧𑀲𑁆𑀲𑀸𑀫𑀺. 𑀢𑀣𑁂𑀯 𑀏𑀢𑀦𑁆𑀢𑀺 𑀏𑀢𑀁 𑀢𑀣𑀁 𑀢𑀘𑁆𑀙𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢𑀦𑁆𑀢𑀺 𑁋 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀁.

𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺. 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 ¶ 𑀧𑀘𑁆𑀘𑁂𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀻𑀢𑀺 𑁋 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀅𑀤𑀓𑁆𑀔𑀺 𑀘𑁂 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦𑀸𑀢𑀺. 𑀅𑀤𑀓𑁆𑀔𑀻𑀢𑀺 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 𑀯𑀸 𑀅𑀤𑀓𑁆𑀔𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀅𑀤𑀓𑁆𑀔𑀺, 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀅𑀤𑀓𑁆𑀔𑀺, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀸 𑀅𑀤𑀓𑁆𑀔𑀻𑀢𑀺 𑁋 𑀅𑀤𑀓𑁆𑀔𑀺 𑀘𑁂. 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦𑀸𑀢𑀺. 𑀢𑀲𑁆𑀲 𑀢𑁂𑀦 𑀤𑀲𑁆𑀲𑀦𑁂𑀦 𑀓𑀺𑀁 𑀓𑀢𑀁? 𑀦 𑀤𑀼𑀓𑁆𑀔𑀧𑀭𑀺𑀜𑁆𑀜𑀸 𑀅𑀢𑁆𑀣𑀺, 𑀦 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀁 𑀅𑀢𑁆𑀣𑀺, 𑀦 𑀫𑀕𑁆𑀕𑀪𑀸𑀯𑀦𑀸 𑀅𑀢𑁆𑀣𑀺, 𑀦 ¶ 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀅𑀢𑁆𑀣𑀺, 𑀦 𑀭𑀸𑀕𑀲𑁆𑀲 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀅𑀢𑁆𑀣𑀺, 𑀦 𑀤𑁄𑀲𑀲𑁆𑀲 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀅𑀢𑁆𑀣𑀺, 𑀦 𑀫𑁄𑀳𑀲𑁆𑀲 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀅𑀢𑁆𑀣𑀺 ¶ , 𑀦 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀁 𑀅𑀢𑁆𑀣𑀺, 𑀦 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑁄 𑀅𑀢𑁆𑀣𑀻𑀢𑀺 𑁋 𑀅𑀤𑀓𑁆𑀔𑀺 𑀘𑁂 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦.

𑀅𑀢𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀢𑁂 𑀢𑀺𑀢𑁆𑀣𑀺𑀬𑀸 𑀲𑀼𑀤𑁆𑀥𑀺𑀫𑀕𑁆𑀕𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀧𑀭𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀯𑁄𑀤𑀸𑀢𑀫𑀕𑁆𑀕𑀁 𑀧𑀭𑀺𑀯𑁄𑀤𑀸𑀢𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺, 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺, 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺, 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺, 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺, 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺. 𑀏𑀯𑀫𑁆𑀧𑀺 𑀅𑀢𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 ¶ 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀢𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀅𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀧𑀭𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀯𑁄𑀤𑀸𑀢𑀫𑀕𑁆𑀕𑀁 𑀅𑀧𑀭𑀺𑀯𑁄𑀤𑀸𑀢𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀺𑀢𑁆𑀯𑀸 𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀘𑀢𑀽𑀳𑀺 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀘𑀢𑀽𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 ¶ 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀢𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

‘‘𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀁, 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀅𑀤𑀓𑁆𑀔𑀺 𑀘𑁂 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦, 𑀅𑀢𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺’’𑀦𑁆𑀢𑀺.

𑀧𑀲𑁆𑀲𑀁 𑀦𑀭𑁄 𑀤𑀓𑁆𑀔𑀢𑀺 𑀦𑀸𑀫𑀭𑀽𑀧𑀁, 𑀤𑀺𑀲𑁆𑀯𑀸𑀦 𑀯𑀸 𑀜𑀸𑀬𑀢𑀺 [𑀜𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)] 𑀢𑀸𑀦𑀺𑀫𑁂𑀯;

𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀧𑀲𑁆𑀲𑀁 ¶ 𑀦𑀭𑁄 𑀤𑀓𑁆𑀔𑀢𑀺 𑀦𑀸𑀫𑀭𑀽𑀧𑀦𑁆𑀢𑀺 𑀧𑀲𑁆𑀲𑀁 𑀦𑀭𑁄 𑀤𑀓𑁆𑀔𑀢𑀺 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 𑀯𑀸 𑀧𑀲𑁆𑀲𑀦𑁆𑀢𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀧𑀲𑁆𑀲𑀦𑁆𑀢𑁄, 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀧𑀲𑁆𑀲𑀦𑁆𑀢𑁄, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀸 𑀧𑀲𑁆𑀲𑀦𑁆𑀢𑁄 𑀦𑀸𑀫𑀭𑀽𑀧𑀁𑀬𑁂𑀯 𑀤𑀓𑁆𑀔𑀢𑀺 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀅𑀢𑁆𑀢𑀢𑁄, 𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀯𑀸 ¶ 𑀅𑀢𑁆𑀣𑀗𑁆𑀕𑀫𑀁 𑀯𑀸 𑀅𑀲𑁆𑀲𑀸𑀤𑀁 𑀯𑀸 𑀆𑀤𑀻𑀦𑀯𑀁 𑀯𑀸 𑀦𑀺𑀲𑁆𑀲𑀭𑀡𑀁 𑀯𑀸 𑀤𑀓𑁆𑀔𑀢𑀻𑀢𑀺 𑁋 𑀧𑀲𑁆𑀲𑀁 𑀦𑀭𑁄 𑀤𑀓𑁆𑀔𑀢𑀺 𑀦𑀸𑀫𑀭𑀽𑀧𑀁.

𑀤𑀺𑀲𑁆𑀯𑀸𑀦 ¶ 𑀯𑀸 𑀜𑀸𑀬𑀢𑀺 𑀢𑀸𑀦𑀺𑀫𑁂𑀯𑀸𑀢𑀺. 𑀤𑀺𑀲𑁆𑀯𑀸𑀢𑀺 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 𑀯𑀸 𑀤𑀺𑀲𑁆𑀯𑀸, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀤𑀺𑀲𑁆𑀯𑀸, 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸, 𑀦𑀸𑀫𑀭𑀽𑀧𑀁𑀬𑁂𑀯 𑀤𑀺𑀲𑁆𑀯𑀸 𑀜𑀸𑀬𑀢𑀺 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀅𑀢𑁆𑀢𑀢𑁄, 𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀁 𑀯𑀸 𑀅𑀢𑁆𑀣𑀗𑁆𑀕𑀫𑀁 𑀯𑀸 𑀅𑀲𑁆𑀲𑀸𑀤𑀁 𑀯𑀸 𑀆𑀤𑀻𑀦𑀯𑀁 𑀯𑀸 𑀦𑀺𑀲𑁆𑀲𑀭𑀡𑀁 𑀯𑀸 𑀜𑀸𑀬𑀢𑀻𑀢𑀺 𑁋 𑀤𑀺𑀲𑁆𑀯𑀸𑀦 𑀯𑀸 𑀜𑀸𑀬𑀢𑀺 𑀢𑀸𑀦𑀺𑀫𑁂𑀯.

𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸𑀢𑀺. 𑀓𑀸𑀫𑀁 𑀩𑀳𑀼𑀓𑀁 𑀯𑀸 𑀧𑀲𑁆𑀲𑀦𑁆𑀢𑁄 𑀦𑀸𑀫𑀭𑀽𑀧𑀁 𑀅𑀧𑁆𑀧𑀓𑀁 𑀯𑀸 𑀦𑀺𑀘𑁆𑀘𑀢𑁄 𑀲𑀼𑀔𑀢𑁄 𑀅𑀢𑁆𑀢𑀢𑁄𑀢𑀺 𑁋 𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸.

𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀸 𑀦𑀸𑀫𑀭𑀽𑀧𑀤𑀲𑁆𑀲𑀦𑁂𑀦 ¶ 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀦 𑀪𑀡𑀦𑁆𑀢𑀺 𑀦 𑀤𑀻𑀧𑀬𑀦𑁆𑀢𑀺 𑀦 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

‘‘𑀧𑀲𑁆𑀲𑀁 ¶ 𑀦𑀭𑁄 𑀤𑀓𑁆𑀔𑀢𑀺 𑀦𑀸𑀫𑀭𑀽𑀧𑀁, 𑀤𑀺𑀲𑁆𑀯𑀸𑀦 𑀯𑀸 𑀜𑀸𑀬𑀢𑀺 𑀢𑀸𑀦𑀺𑀫𑁂𑀯;

𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻’’𑀢𑀺.

𑀦𑀺𑀯𑀺𑀲𑁆𑀲𑀯𑀸𑀤𑀻 ¶ 𑀦 𑀳𑀺 𑀲𑀼𑀩𑁆𑀩𑀺𑀦𑀸𑀬𑁄, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀭𑀸𑀦𑁄;

𑀬𑀁 𑀦𑀺𑀲𑁆𑀲𑀺𑀢𑁄 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑁄, 𑀲𑀼𑀤𑁆𑀥𑀺𑀁 𑀯𑀤𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄.

𑀦𑀺𑀯𑀺𑀲𑁆𑀲𑀯𑀸𑀤𑀻 𑀦 𑀳𑀺 𑀲𑀼𑀩𑁆𑀩𑀺𑀦𑀸𑀬𑁄𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦𑀺𑀯𑀺𑀲𑁆𑀲𑀯𑀸𑀤𑀻, ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑁋 𑀦𑀺𑀯𑀺𑀲𑁆𑀲𑀯𑀸𑀤𑀻. 𑀦 𑀳𑀺 𑀲𑀼𑀩𑁆𑀩𑀺𑀦𑀸𑀬𑁄𑀢𑀺. 𑀦𑀺𑀯𑀺𑀲𑁆𑀲𑀯𑀸𑀤𑀻 𑀤𑀼𑀩𑁆𑀩𑀺𑀦𑀬𑁄 𑀤𑀼𑀧𑁆𑀧𑀜𑁆𑀜𑀸𑀧𑀬𑁄 [𑀤𑀼𑀧𑁆𑀧𑀜𑁆𑀜𑀸𑀧𑀺𑀬𑁄 (𑀲𑀻.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀤𑀼𑀦𑁆𑀦𑀺𑀚𑁆𑀛𑀸𑀧𑀬𑁄 ¶ 𑀤𑀼𑀧𑁆𑀧𑁂𑀓𑁆𑀔𑀸𑀧𑀬𑁄 𑀤𑀼𑀧𑁆𑀧𑀲𑀸𑀤𑀬𑁄𑀢𑀺 𑁋 𑀦𑀺𑀯𑀺𑀲𑁆𑀲𑀯𑀸𑀤𑀻 𑀦 𑀳𑀺 𑀲𑀼𑀩𑁆𑀩𑀺𑀦𑀸𑀬𑁄.

𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀭𑀸𑀦𑁄𑀢𑀺. 𑀓𑀧𑁆𑀧𑀺𑀢𑀸 𑀧𑀓𑀧𑁆𑀧𑀺𑀢𑀸 𑀅𑀪𑀺𑀲𑀗𑁆𑀔𑀢𑀸 𑀲𑀡𑁆𑀞𑀧𑀺𑀢𑀸 𑀤𑀺𑀝𑁆𑀞𑀺𑀁 𑀧𑀼𑀭𑁂𑀓𑁆𑀔𑀢𑁄 𑀓𑀢𑁆𑀯𑀸 𑀘𑀭𑀢𑀺. 𑀤𑀺𑀝𑁆𑀞𑀺𑀥𑀚𑁄 𑀤𑀺𑀝𑁆𑀞𑀺𑀓𑁂𑀢𑀼 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑁄 𑀤𑀺𑀝𑁆𑀞𑀺𑀬𑀸 𑀧𑀭𑀺𑀯𑀸𑀭𑀺𑀢𑁄 𑀘𑀭𑀢𑀻𑀢𑀺 𑁋 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀭𑀸𑀦𑁄.

𑀬𑀁 𑀦𑀺𑀲𑁆𑀲𑀺𑀢𑁄 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑁄𑀢𑀺. 𑀬𑀁 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑁄 𑀆𑀦𑀺𑀲𑁆𑀲𑀺𑀢𑁄 𑀅𑀮𑁆𑀮𑀻𑀦𑁄 ¶ 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑁄. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀲𑀼𑀪𑀁 𑀯𑀤𑀸𑀦𑁄𑀢𑀺 𑀲𑀼𑀪𑀯𑀸𑀤𑁄 𑀲𑁄𑀪𑀦𑀯𑀸𑀤𑁄 𑀧𑀡𑁆𑀟𑀺𑀢𑀯𑀸𑀤𑁄 𑀣𑀺𑀭𑀯𑀸𑀤𑁄 𑀜𑀸𑀬𑀯𑀸𑀤𑁄 𑀳𑁂𑀢𑀼𑀯𑀸𑀤𑁄 𑀮𑀓𑁆𑀔𑀡𑀯𑀸𑀤𑁄 𑀓𑀸𑀭𑀡𑀯𑀸𑀤𑁄 𑀞𑀸𑀦𑀯𑀸𑀤𑁄 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑁄 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑁄.

𑀲𑀼𑀤𑁆𑀥𑀺𑀁 𑀯𑀤𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄𑀢𑀺. 𑀲𑀼𑀤𑁆𑀥𑀺𑀯𑀸𑀤𑁄 ¶ 𑀯𑀺𑀲𑀼𑀤𑁆𑀥𑀺𑀯𑀸𑀤𑁄 𑀧𑀭𑀺𑀲𑀼𑀤𑁆𑀥𑀺𑀯𑀸𑀤𑁄 𑀯𑁄𑀤𑀸𑀢𑀯𑀸𑀤𑁄 𑀧𑀭𑀺𑀯𑁄𑀤𑀸𑀢𑀯𑀸𑀤𑁄. 𑀅𑀣 𑀯𑀸 𑀲𑀼𑀤𑁆𑀥𑀺𑀤𑀲𑁆𑀲𑀦𑁄 𑀯𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑁄 𑀧𑀭𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑁄 𑀯𑁄𑀤𑀸𑀢𑀤𑀲𑁆𑀲𑀦𑁄 𑀧𑀭𑀺𑀯𑁄𑀤𑀸𑀢𑀤𑀲𑁆𑀲𑀦𑁄𑀢𑀺 𑁋 𑀲𑀼𑀤𑁆𑀥𑀺𑀁 𑀯𑀸𑀤𑁄. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 ¶ 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀢𑀣𑀁 𑀢𑀘𑁆𑀙𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢𑀦𑁆𑀢𑀺 𑀅𑀤𑁆𑀤𑀲𑁆𑀲 𑀅𑀤𑀓𑁆𑀔𑀺 𑀅𑀧𑀲𑁆𑀲𑀺 𑀧𑀝𑀺𑀯𑀺𑀚𑁆𑀛𑀻𑀢𑀺 𑁋 𑀲𑀼𑀤𑁆𑀥𑀺𑀁 𑀯𑀸𑀤𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄.

‘‘𑀦𑀺𑀯𑀺𑀲𑁆𑀲𑀯𑀸𑀤𑀻 𑀦 𑀳𑀺 𑀲𑀼𑀩𑁆𑀩𑀺𑀦𑀸𑀬𑁄, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀭𑀸𑀦𑁄;

𑀬𑀁 𑀦𑀺𑀲𑁆𑀲𑀺𑀢𑁄 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑁄, 𑀲𑀼𑀤𑁆𑀥𑀺𑀁 𑀯𑀤𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄’’𑀢𑀺.

𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸, 𑀦 𑀤𑀺𑀝𑁆𑀞𑀺𑀲𑀸𑀭𑀻 𑀦𑀧𑀺 𑀜𑀸𑀡𑀩𑀦𑁆𑀥𑀼;

𑀜𑀢𑁆𑀯𑀸 𑀘 𑀲𑁄 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸, 𑀉𑀧𑁂𑀓𑁆𑀔𑀢𑀻 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂.

𑀦 ¶ 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 ¶ 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸… 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸…𑀧𑁂… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 ¶ 𑀯𑀸 𑀦𑁂𑀢𑀺 𑀦 𑀉𑀧𑁂𑀢𑀺 𑀦 𑀉𑀧𑀕𑀘𑁆𑀙𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸.

𑀦 𑀤𑀺𑀝𑁆𑀞𑀺𑀲𑀸𑀭𑀻 𑀦𑀧𑀺 𑀜𑀸𑀡𑀩𑀦𑁆𑀥𑀽𑀢𑀺. 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀤𑀺𑀝𑁆𑀞𑀺𑀬𑀸 𑀦 𑀬𑀸𑀬𑀢𑀺 𑀦 𑀦𑀻𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀺 𑀦𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀦 𑀤𑀺𑀝𑁆𑀞𑀺𑀲𑀸𑀭𑀻. 𑀦𑀧𑀺 𑀜𑀸𑀡𑀩𑀦𑁆𑀥𑀽𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀩𑀦𑁆𑀥𑀼𑀁 𑀯𑀸 𑀤𑀺𑀝𑁆𑀞𑀺𑀩𑀦𑁆𑀥𑀼𑀁 𑀯𑀸 𑀦 𑀓𑀭𑁄𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 ¶ 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀦 𑀤𑀺𑀝𑁆𑀞𑀺𑀲𑀸𑀭𑀻 𑀦𑀧𑀺 𑀜𑀸𑀡𑀩𑀦𑁆𑀥𑀼.

𑀜𑀢𑁆𑀯𑀸 𑀘 𑀲𑁄 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸𑀢𑀺. 𑀜𑀢𑁆𑀯𑀸𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 ¶ 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀜𑀢𑁆𑀯𑀸 𑀘 𑀲𑁄. 𑀲𑀫𑁆𑀫𑀼𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀺𑀝𑁆𑀞𑀺𑀲𑀫𑁆𑀫𑀼𑀢𑀺𑀬𑁄. 𑀧𑀼𑀣𑀼𑀚𑁆𑀚𑀸𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀚𑀦𑀺𑀢𑀸 𑀯𑀸 𑀢𑀸 𑀲𑀫𑁆𑀫𑀼𑀢𑀺𑀬𑁄𑀢𑀺 𑁋 𑀧𑀼𑀣𑀼𑀚𑁆𑀚𑀸. 𑀧𑀼𑀣𑀼 𑀦𑀸𑀦𑀸𑀚𑀦𑁂𑀳𑀺 𑀚𑀦𑀺𑀢𑀸 𑀯𑀸 𑀲𑀫𑁆𑀫𑀼𑀢𑀺𑀬𑁄𑀢𑀺 𑀧𑀼𑀣𑀼𑀚𑁆𑀚𑀸𑀢𑀺 𑁋 𑀜𑀢𑁆𑀯𑀸 𑀘 𑀲𑁄 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸.

𑀉𑀧𑁂𑀓𑁆𑀔𑀢𑀻 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂𑀢𑀺. 𑀅𑀜𑁆𑀜𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀅𑀭𑀳𑀸 𑀉𑀧𑁂𑀓𑁆𑀔𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀉𑀧𑁂𑀓𑁆𑀔𑀢𑀻 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂.

‘‘𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸, 𑀦 𑀤𑀺𑀝𑁆𑀞𑀺𑀲𑀸𑀭𑀻 𑀦𑀧𑀺 𑀜𑀸𑀡𑀩𑀦𑁆𑀥𑀼;

𑀜𑀢𑁆𑀯𑀸 𑀘 𑀲𑁄 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸, 𑀉𑀧𑁂𑀓𑁆𑀔𑀢𑀻 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂’’𑀢𑀺.

𑀯𑀺𑀲𑁆𑀲𑀚𑁆𑀚 ¶ ¶ 𑀕𑀦𑁆𑀣𑀸𑀦𑀺 𑀫𑀼𑀦𑀻𑀥 𑀮𑁄𑀓𑁂, 𑀯𑀺𑀯𑀸𑀤𑀚𑀸𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻;

𑀲𑀦𑁆𑀢𑁄 ¶ 𑀅𑀲𑀦𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑁄 𑀲𑁄, 𑀅𑀦𑀼𑀕𑁆𑀕𑀳𑁄 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂.

𑀯𑀺𑀲𑁆𑀲𑀚𑁆𑀚 𑀕𑀦𑁆𑀣𑀸𑀦𑀺 𑀫𑀼𑀦𑀻𑀥 𑀮𑁄𑀓𑁂𑀢𑀺. 𑀕𑀦𑁆𑀣𑀸𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑁋 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀧𑀭𑀯𑀸𑀤𑁂𑀲𑀼 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀯𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀯𑀸 𑀧𑀭𑀸𑀫𑀲𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀅𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀯𑀺𑀲𑁆𑀲𑀚𑁆𑀚𑀸𑀢𑀺 𑀕𑀦𑁆𑀣𑁂 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚. 𑀅𑀣 𑀯𑀸 𑀕𑀦𑁆𑀣𑁂 𑀕𑀥𑀺𑀢𑁂 𑀕𑀦𑁆𑀣𑀺𑀢𑁂 [𑀕𑀣𑀺𑀢𑁂 𑀕𑀡𑁆𑀞𑀺𑀢𑁂 (𑀩𑀳𑀽𑀲𑀼) 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑁂 𑀲𑀢𑁆𑀢𑀫𑀕𑀸𑀣𑀸𑀯𑀡𑁆𑀡𑀦𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 [𑀩𑀤𑁆𑀥𑁂 𑀯𑀺𑀩𑀤𑁆𑀥𑁂 𑀆𑀩𑀤𑁆𑀥𑁂 (𑀲𑀻.)] 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀨𑁄𑀝𑀬𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚. 𑀬𑀣𑀸 𑀯𑀬𑁆𑀳𑀁 𑀯𑀸 𑀭𑀣𑀁 𑀯𑀸 𑀲𑀓𑀝𑀁 𑀯𑀸 𑀲𑀦𑁆𑀤𑀫𑀸𑀦𑀺𑀓𑀁 𑀯𑀸 𑀲𑀚𑁆𑀚𑀁 𑀯𑀺𑀲𑁆𑀲𑀚𑁆𑀚𑀁 𑀓𑀭𑁄𑀦𑁆𑀢𑀺 𑀯𑀺𑀓𑁄𑀧𑁂𑀦𑁆𑀢𑀺; 𑀏𑀯𑀫𑁂𑀯 𑀕𑀦𑁆𑀣𑁂 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚. 𑀅𑀣 𑀯𑀸 𑀕𑀦𑁆𑀣𑁂 𑀕𑀣𑀺𑀢𑁂 𑀕𑀡𑁆𑀞𑀺𑀢𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀨𑁄𑀝𑀬𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸…𑀧𑁂… 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀯𑀺𑀲𑁆𑀲𑀚𑁆𑀚 𑀕𑀦𑁆𑀣𑀸𑀦𑀺 𑀫𑀼𑀦𑀻𑀥 𑀮𑁄𑀓𑁂.

𑀯𑀺𑀯𑀸𑀤𑀚𑀸𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻𑀢𑀺. 𑀯𑀺𑀯𑀸𑀤𑀚𑀸𑀢𑁂𑀲𑀼 𑀲𑀜𑁆𑀚𑀸𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑁂𑀲𑀼 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 [𑀯𑀺𑀯𑀸𑀤𑁂 𑀚𑀸𑀢𑁂 𑀲𑀜𑁆𑀚𑀸𑀢𑁂 𑀦𑀺𑀩𑁆𑀩𑀢𑁆𑀢𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀧𑀸𑀢𑀼𑀪𑀽𑀢𑁂 (𑀲𑀻. 𑀓.)] 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀤𑁄𑀲𑀸𑀕𑀢𑀺𑀁 ¶ 𑀕𑀘𑁆𑀙𑀦𑁆𑀢𑁂𑀲𑀼 ¶ 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 ¶ 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀻𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀯𑀺𑀯𑀸𑀤𑀚𑀸𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻.

𑀲𑀦𑁆𑀢𑁄 𑀅𑀲𑀦𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑁄 𑀲𑁄𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄, 𑀫𑁄𑀳𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 ¶ 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑁋 𑀲𑀦𑁆𑀢𑁄. 𑀅𑀲𑀦𑁆𑀢𑁂𑀲𑀽𑀢𑀺 𑀅𑀲𑀦𑁆𑀢𑁂𑀲𑀼 𑀅𑀦𑀼𑀧𑀲𑀦𑁆𑀢𑁂𑀲𑀼 𑀅𑀯𑀽𑀧𑀲𑀦𑁆𑀢𑁂𑀲𑀼 𑀅𑀦𑀺𑀩𑁆𑀩𑀼𑀢𑁂𑀲𑀼 𑀅𑀧𑁆𑀧𑀝𑀺𑀧𑀲𑁆𑀲𑀤𑁆𑀥𑁂𑀲𑀽𑀢𑀺 𑁋 𑀲𑀦𑁆𑀢𑁄 𑀅𑀲𑀦𑁆𑀢𑁂𑀲𑀼. 𑀉𑀧𑁂𑀓𑁆𑀔𑀓𑁄 𑀲𑁄𑀢𑀺 𑀅𑀭𑀳𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲𑀦𑁆𑀢𑁄𑀢𑀺 𑁋 𑀲𑀦𑁆𑀢𑁄 𑀅𑀲𑀦𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑁄 𑀲𑁄.

𑀅𑀦𑀼𑀕𑁆𑀕𑀳𑁄 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂𑀢𑀺. 𑀅𑀜𑁆𑀜𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀡𑁆𑀳𑀦𑁆𑀢𑁂 𑀧𑀭𑀸𑀫𑀲𑀦𑁆𑀢𑁂 𑀅𑀪𑀺𑀦𑀺𑀯𑀺𑀲𑀦𑁆𑀢𑁂. 𑀅𑀭𑀳𑀸 𑀉𑀧𑁂𑀓𑁆𑀔𑀢𑀺 𑀦 ¶ 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀅𑀦𑀼𑀕𑁆𑀕𑀳𑁄 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂.

‘‘𑀯𑀺𑀲𑁆𑀲𑀚𑁆𑀚 𑀕𑀦𑁆𑀣𑀸𑀦𑀺 𑀫𑀼𑀦𑀻𑀥 𑀮𑁄𑀓𑁂, 𑀯𑀺𑀯𑀸𑀤𑀚𑀸𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻;

𑀲𑀦𑁆𑀢𑁄 𑀅𑀲𑀦𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑁄 𑀲𑁄, 𑀅𑀦𑀼𑀕𑁆𑀕𑀳𑁄 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂’’𑀢𑀺.

𑀧𑀼𑀩𑁆𑀩𑀸𑀲𑀯𑁂 𑀳𑀺𑀢𑁆𑀯𑀸 𑀦𑀯𑁂 𑀅𑀓𑀼𑀩𑁆𑀩𑀁, 𑀦 𑀙𑀦𑁆𑀤𑀕𑀽 𑀦𑁄𑀧𑀺 𑀦𑀺𑀯𑀺𑀲𑁆𑀲𑀯𑀸𑀤𑀻;

𑀲 𑀯𑀺𑀧𑁆𑀧𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀕𑀢𑁂𑀳𑀺 𑀥𑀻𑀭𑁄, 𑀦 𑀮𑀺𑀫𑁆𑀧𑀢𑀺 𑀮𑁄𑀓𑁂 𑀅𑀦𑀢𑁆𑀢𑀕𑀭𑀳𑀻.

𑀧𑀼𑀩𑁆𑀩𑀸𑀲𑀯𑁂 ¶ 𑀳𑀺𑀢𑁆𑀯𑀸 𑀦𑀯𑁂 𑀅𑀓𑀼𑀩𑁆𑀩𑀦𑁆𑀢𑀺. 𑀧𑀼𑀩𑁆𑀩𑀸𑀲𑀯𑀸 𑀯𑀼𑀘𑁆𑀘𑀦𑁆𑀢𑀺 𑀅𑀢𑀻𑀢𑀸 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸. 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀬𑁂 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀢𑁂 𑀓𑀺𑀮𑁂𑀲𑁂 𑀳𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀧𑀼𑀩𑁆𑀩𑀸𑀲𑀯𑁂 𑀳𑀺𑀢𑁆𑀯𑀸. 𑀦𑀯𑁂 𑀅𑀓𑀼𑀩𑁆𑀩𑀦𑁆𑀢𑀺 𑀦𑀯𑀸 𑀯𑀼𑀘𑁆𑀘𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 ¶ 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀙𑀦𑁆𑀤𑀁 [𑀔𑀦𑁆𑀢𑀺𑀁 (𑀓.)] 𑀅𑀓𑀼𑀩𑁆𑀩𑀫𑀸𑀦𑁄 𑀧𑁂𑀫𑀁 𑀅𑀓𑀼𑀩𑁆𑀩𑀫𑀸𑀦𑁄 𑀭𑀸𑀕𑀁 𑀅𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄𑀢𑀺 𑁋 𑀧𑀼𑀩𑁆𑀩𑀸𑀲𑀯𑁂 𑀳𑀺𑀢𑁆𑀯𑀸 𑀦𑀯𑁂 𑀅𑀓𑀼𑀩𑁆𑀩𑀁.

𑀦 𑀙𑀦𑁆𑀤𑀕𑀽 𑀦𑁄𑀧𑀺 𑀦𑀺𑀯𑀺𑀲𑁆𑀲𑀯𑀸𑀤𑀻𑀢𑀺. 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 ¶ , 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺 ¶ , 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀻𑀬𑀢𑀺 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀦 𑀙𑀦𑁆𑀤𑀕𑀽. 𑀦𑁄𑀧𑀺 𑀦𑀺𑀯𑀺𑀲𑁆𑀲𑀯𑀸𑀤𑀻𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦 𑀦𑀺𑀯𑀺𑀲𑁆𑀲𑀯𑀸𑀤𑀻…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦 𑀦𑀺𑀯𑀺𑀲𑁆𑀲𑀯𑀸𑀤𑀻𑀢𑀺 𑁋 𑀦 𑀙𑀦𑁆𑀤𑀕𑀽 𑀦𑁄𑀧𑀺 𑀦𑀺𑀯𑀺𑀲𑁆𑀲𑀯𑀸𑀤𑀻.

𑀲 𑀯𑀺𑀧𑁆𑀧𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀕𑀢𑁂𑀳𑀺 𑀥𑀻𑀭𑁄𑀢𑀺 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀤𑀺𑀝𑁆𑀞𑀺𑀕𑀢𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺. 𑀥𑀻𑀭𑁄𑀢𑀺 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑁋 𑀲 𑀯𑀺𑀧𑁆𑀧𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀕𑀢𑁂𑀳𑀺 𑀥𑀻𑀭𑁄.

𑀦 𑀮𑀺𑀫𑁆𑀧𑀢𑀺 𑀮𑁄𑀓𑁂 𑀅𑀦𑀢𑁆𑀢𑀕𑀭𑀳𑀻𑀢𑀺. 𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄 ¶ …𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀮𑁂𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀮𑁂𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀲𑁆𑀲 𑀢𑀡𑁆𑀳𑀸𑀮𑁂𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀮𑁂𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀅𑀧𑀸𑀬𑀮𑁄𑀓𑁂 𑀦 𑀮𑀺𑀫𑁆𑀧𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀦 𑀮𑀺𑀫𑁆𑀧𑀢𑀺, 𑀤𑁂𑀯𑀮𑁄𑀓𑁂 𑀦 ¶ 𑀮𑀺𑀫𑁆𑀧𑀢𑀺, 𑀔𑀦𑁆𑀥𑀮𑁄𑀓𑁂 𑀦 𑀮𑀺𑀫𑁆𑀧𑀢𑀺, 𑀥𑀸𑀢𑀼𑀮𑁄𑀓𑁂 𑀦 𑀮𑀺𑀫𑁆𑀧𑀢𑀺, 𑀆𑀬𑀢𑀦𑀮𑁄𑀓𑁂 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀦 𑀮𑀺𑀫𑁆𑀧𑀢𑀺 𑀮𑁄𑀓𑁂.

𑀅𑀦𑀢𑁆𑀢𑀕𑀭𑀳𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺 𑁋 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺? ‘‘𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. ‘‘𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 ¶ … 𑀓𑀢𑁄 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄…𑀧𑁂… 𑀓𑀢𑀸 𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺.

𑀅𑀣 𑀯𑀸 ‘‘𑀲𑀻𑀮𑁂𑀲𑀼𑀫𑁆𑀳𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. ‘‘𑀇𑀦𑁆𑀤𑁆𑀭𑀺𑀬𑁂𑀲𑀼𑀫𑁆𑀳𑀺 𑀅𑀕𑀼𑀢𑁆𑀢𑀤𑁆𑀯𑀸𑀭𑁄’’𑀢𑀺… ‘‘𑀪𑁄𑀚𑀦𑁂𑀫𑁆𑀳𑀺 𑀅𑀫𑀢𑁆𑀢𑀜𑁆𑀜𑀽’’𑀢𑀺… ‘‘𑀚𑀸𑀕𑀭𑀺𑀬𑀫𑁆𑀳𑀺 𑀅𑀦𑀦𑀼𑀬𑀼𑀢𑁆𑀢𑁄’’𑀢𑀺… ‘‘𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦𑀸𑀫𑁆𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 ¶ 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘 𑀩𑀮𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺… ‘‘𑀅𑀪𑀸𑀯𑀺𑀢𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺… ‘‘𑀤𑀼𑀓𑁆𑀔𑀁 𑀫𑁂 𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺… ‘‘𑀤𑀼𑀓𑁆𑀔𑀲𑀫𑀼𑀤𑀬𑁄 𑀫𑁂 𑀅𑀧𑁆𑀧𑀳𑀻𑀦𑁄’’𑀢𑀺… ‘‘𑀫𑀕𑁆𑀕𑁄 𑀫𑁂 𑀅𑀪𑀸𑀯𑀺𑀢𑁄’’𑀢𑀺… ‘‘𑀦𑀺𑀭𑁄𑀥𑁄 𑀫𑁂 𑀅𑀲𑀘𑁆𑀙𑀺𑀓𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀅𑀢𑁆𑀢𑀸𑀦𑀁 𑀕𑀭𑀳𑀢𑀺. 𑀏𑀯𑀁 𑀅𑀢𑁆𑀢𑀕𑀭𑀳𑀻. 𑀢𑀬𑀺𑀤𑀁 𑀓𑀫𑁆𑀫𑀁 𑀅𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 ¶ ¶ 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀢𑁆𑀢𑀕𑀭𑀳𑀻𑀢𑀺 𑁋 𑀦 𑀮𑀺𑀫𑁆𑀧𑀢𑀺 𑀮𑁄𑀓𑁂 𑀅𑀦𑀢𑁆𑀢𑀕𑀭𑀳𑀻.

‘‘𑀧𑀼𑀩𑁆𑀩𑀸𑀲𑀯𑁂 𑀳𑀺𑀢𑁆𑀯𑀸 𑀦𑀯𑁂 𑀅𑀓𑀼𑀩𑁆𑀩𑀁, 𑀦 𑀙𑀦𑁆𑀤𑀕𑀽 𑀦𑁄𑀧𑀺 𑀦𑀺𑀯𑀺𑀲𑁆𑀲𑀯𑀸𑀤𑀻;

𑀲 𑀯𑀺𑀧𑁆𑀧𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀕𑀢𑁂𑀳𑀺 𑀥𑀻𑀭𑁄, 𑀦 𑀮𑀺𑀫𑁆𑀧𑀢𑀺 𑀮𑁄𑀓𑁂 𑀅𑀦𑀢𑁆𑀢𑀕𑀭𑀳𑀻’’𑀢𑀺.

𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀲 𑀧𑀦𑁆𑀦𑀪𑀸𑀭𑁄 𑀫𑀼𑀦𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀦 𑀓𑀧𑁆𑀧𑀺𑀬𑁄 𑀦𑀽𑀧𑀭𑀢𑁄 𑀦 𑀧𑀢𑁆𑀣𑀺𑀬𑁄.[𑀇𑀢𑀺 𑀪𑀕𑀯𑀸]

𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸𑀢𑀺. 𑀲𑁂𑀦𑀸 𑀯𑀼𑀘𑁆𑀘𑀢𑀺 𑀫𑀸𑀭𑀲𑁂𑀦𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀸𑀭𑀲𑁂𑀦𑀸.

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺…𑀧𑁂… ¶ ¶ ;

𑀦 𑀦𑀁 𑀅𑀲𑀼𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀩𑁆𑀩𑀸 𑀘 𑀫𑀸𑀭𑀲𑁂𑀦𑀸 𑀲𑀩𑁆𑀩𑁂 𑀘 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀚𑀺𑀢𑀸 𑀘 𑀧𑀭𑀸𑀚𑀺𑀢𑀸 𑀘 𑀪𑀕𑁆𑀕𑀸 𑀯𑀺𑀧𑁆𑀧𑀮𑀼𑀕𑁆𑀕𑀸 𑀧𑀭𑀫𑁆𑀫𑀼𑀔𑀸 𑁋 𑀲𑁄 𑀯𑀼𑀘𑁆𑀘𑀢𑀺 𑀯𑀺𑀲𑁂𑀦𑀺𑀪𑀽𑀢𑁄. 𑀲𑁄 𑀤𑀺𑀝𑁆𑀞𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀲𑀼𑀢𑁂… 𑀫𑀼𑀢𑁂 ¶ … 𑀯𑀺𑀜𑁆𑀜𑀸𑀢𑁂 𑀯𑀺𑀲𑁂𑀦𑀺𑀪𑀽𑀢𑁄𑀢𑀺 𑁋 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸.

𑀲 𑀧𑀦𑁆𑀦𑀪𑀸𑀭𑁄 𑀫𑀼𑀦𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺. 𑀪𑀸𑀭𑀸𑀢𑀺 𑀢𑀬𑁄 𑀪𑀸𑀭𑀸 𑁋 𑀔𑀦𑁆𑀥𑀪𑀸𑀭𑁄, 𑀓𑀺𑀮𑁂𑀲𑀪𑀸𑀭𑁄, 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑁄. 𑀓𑀢𑀫𑁄 𑀔𑀦𑁆𑀥𑀪𑀸𑀭𑁄? 𑀧𑀝𑀺𑀲𑀦𑁆𑀥𑀺𑀬𑀸 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑁋 𑀅𑀬𑀁 𑀔𑀦𑁆𑀥𑀪𑀸𑀭𑁄. 𑀓𑀢𑀫𑁄 𑀓𑀺𑀮𑁂𑀲𑀪𑀸𑀭𑁄? 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑁋 𑀅𑀬𑀁 𑀓𑀺𑀮𑁂𑀲𑀪𑀸𑀭𑁄. 𑀓𑀢𑀫𑁄 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑁄? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑁋 𑀅𑀬𑀁 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑁄. 𑀬𑀢𑁄 𑀔𑀦𑁆𑀥𑀪𑀸𑀭𑁄 𑀘 𑀓𑀺𑀮𑁂𑀲𑀪𑀸𑀭𑁄 𑀘 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀲𑁄 𑀯𑀼𑀘𑁆𑀘𑀢𑀺 𑀧𑀦𑁆𑀦𑀪𑀸𑀭𑁄 𑀧𑀢𑀺𑀢𑀪𑀸𑀭𑁄 𑀑𑀭𑁄𑀧𑀺𑀢𑀪𑀸𑀭𑁄 𑀲𑀫𑁄𑀭𑁄𑀧𑀺𑀢𑀪𑀸𑀭𑁄 𑀦𑀺𑀓𑁆𑀔𑀺𑀢𑁆𑀢𑀪𑀸𑀭𑁄 𑀧𑀝𑀺𑀧𑀲𑁆𑀲𑀤𑁆𑀥𑀪𑀸𑀭𑁄.

𑀫𑀼𑀦𑀻𑀢𑀺 ¶ 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸, 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀺 𑀫𑁂𑀥𑀸 𑀧𑀭𑀺𑀦𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 ¶ 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀺 𑀫𑁄𑀦𑀧𑁆𑀧𑀢𑁆𑀢𑁄.

𑀢𑀻𑀡𑀺 𑀫𑁄𑀦𑁂𑀬𑁆𑀬𑀸𑀦𑀺 𑁋 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀓𑀢𑀫𑀁 𑀓𑀸𑀬𑀫𑁄𑀦𑁂𑀬𑁆𑀬𑀁? 𑀢𑀺𑀯𑀺𑀥𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀦𑀁 [𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀦𑀁 (𑀓.) 𑀫𑀳𑀸𑀦𑀺. 𑁧𑁪] 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀸𑀭𑀫𑁆𑀫𑀡𑁂 𑀜𑀸𑀡𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀧𑀭𑀺𑀜𑁆𑀜𑀸 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀓𑀸𑀬𑀫𑁄𑀦𑁂𑀬𑁆𑀬𑀁 𑁋 𑀇𑀤𑀁 𑀓𑀸𑀬𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 ¶ 𑀯𑀘𑀻𑀫𑁄𑀦𑁂𑀬𑁆𑀬𑀁? 𑀘𑀢𑀼𑀩𑁆𑀩𑀺𑀥𑀸𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀸𑀘𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀸𑀘𑀸𑀧𑀭𑀺𑀜𑁆𑀜𑀸 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀸𑀘𑀸𑀬 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀯𑀘𑀻𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀯𑀘𑀻𑀫𑁄𑀦𑁂𑀬𑁆𑀬𑀁 𑁋 𑀇𑀤𑀁 𑀯𑀘𑀻𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 ¶ 𑀫𑀦𑁄𑀫𑁄𑀦𑁂𑀬𑁆𑀬𑀁? 𑀢𑀺𑀯𑀺𑀥𑀸𑀦𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑀸𑀭𑀫𑁆𑀫𑀡𑁂 ¶ 𑀜𑀸𑀡𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑀧𑀭𑀺𑀜𑁆𑀜𑀸 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀫𑀦𑁄𑀫𑁄𑀦𑁂𑀬𑁆𑀬𑀁, 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀦𑁄𑀫𑁄𑀦𑁂𑀬𑁆𑀬𑀁 𑁋 𑀇𑀤𑀁 𑀫𑀦𑁄𑀫𑁄𑀦𑁂𑀬𑁆𑀬𑀁.

‘‘𑀓𑀸𑀬𑀫𑀼𑀦𑀺𑀁 𑀯𑀸𑀘𑀸𑀫𑀼𑀦𑀺𑀁, 𑀫𑀦𑁄𑀫𑀼𑀦𑀺𑀫𑀦𑀸𑀲𑀯𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀆𑀳𑀼 𑀲𑀩𑁆𑀩𑀧𑁆𑀧𑀳𑀸𑀬𑀺𑀦𑀁.

‘‘𑀓𑀸𑀬𑀫𑀼𑀦𑀺𑀁 𑀯𑀸𑀘𑀸𑀫𑀼𑀦𑀺𑀁, 𑀫𑀦𑁄𑀫𑀼𑀦𑀺𑀫𑀦𑀸𑀲𑀯𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀆𑀳𑀼 𑀦𑀺𑀦𑁆𑀳𑀸𑀢𑀧𑀸𑀧𑀓’’𑀦𑁆𑀢𑀺 [𑀦𑀺𑀦𑀳𑀸𑀢𑀧𑀸𑀧𑀓𑀦𑁆𑀢𑀺 (𑀲𑀻.)].

𑀇𑀫𑁂𑀳𑀺 ¶ 𑀢𑀻𑀳𑀺 𑀫𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀙 𑀫𑀼𑀦𑀺𑀦𑁄 [𑀫𑀼𑀦𑀬𑁄 (𑀲𑀻. 𑀲𑁆𑀬𑀸. 𑀓.)] 𑁋 𑀅𑀕𑀸𑀭𑀫𑀼𑀦𑀺𑀦𑁄, 𑀅𑀦𑀕𑀸𑀭𑀫𑀼𑀦𑀺𑀦𑁄, 𑀲𑁂𑀔𑀫𑀼𑀦𑀺𑀦𑁄, 𑀅𑀲𑁂𑀔𑀫𑀼𑀦𑀺𑀦𑁄, 𑀧𑀘𑁆𑀘𑁂𑀓𑀫𑀼𑀦𑀺𑀦𑁄, 𑀫𑀼𑀦𑀺𑀫𑀼𑀦𑀺𑀦𑁄𑀢𑀺 [𑀫𑀼𑀦𑀺𑀫𑀼𑀦𑀺𑀦𑁄 (𑀲𑀻. 𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁪]. 𑀓𑀢𑀫𑁂 𑀅𑀕𑀸𑀭𑀫𑀼𑀦𑀺𑀦𑁄? 𑀬𑁂 𑀢𑁂 𑀅𑀕𑀸𑀭𑀺𑀓𑀸 𑀤𑀺𑀝𑁆𑀞𑀧𑀤𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑁋 𑀇𑀫𑁂 𑀅𑀕𑀸𑀭𑀫𑀼𑀦𑀺𑀦𑁄. 𑀓𑀢𑀫𑁂 𑀅𑀦𑀕𑀸𑀭𑀫𑀼𑀦𑀺𑀦𑁄? 𑀬𑁂 𑀢𑁂 𑀧𑀩𑁆𑀩𑀚𑀺𑀢𑀸 𑀤𑀺𑀝𑁆𑀞𑀧𑀤𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑁋 𑀇𑀫𑁂 𑀅𑀦𑀕𑀸𑀭𑀫𑀼𑀦𑀺𑀦𑁄. 𑀲𑀢𑁆𑀢 𑀲𑁂𑀔𑀸 𑀲𑁂𑀔𑀫𑀼𑀦𑀺𑀦𑁄, 𑀅𑀭𑀳𑀦𑁆𑀢𑁄 𑀅𑀲𑁂𑀔𑀫𑀼𑀦𑀺𑀦𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀫𑀼𑀦𑀺𑀦𑁄. 𑀫𑀼𑀦𑀺𑀫𑀼𑀦𑀺𑀦𑁄 𑀯𑀼𑀘𑁆𑀘𑀦𑁆𑀢𑀺 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸.

‘‘𑀦 𑀫𑁄𑀦𑁂𑀦 𑀫𑀼𑀦𑀺 𑀳𑁄𑀢𑀺, 𑀫𑀽𑀴𑁆𑀳𑀭𑀽𑀧𑁄 𑀅𑀯𑀺𑀤𑁆𑀤𑀲𑀼;

𑀬𑁄 𑀘 𑀢𑀼𑀮𑀁𑀯 𑀧𑀕𑁆𑀕𑀬𑁆𑀳, 𑀯𑀭𑀫𑀸𑀤𑀸𑀬 𑀧𑀡𑁆𑀟𑀺𑀢𑁄.

‘‘𑀧𑀸𑀧𑀸𑀦𑀺 ¶ 𑀧𑀭𑀺𑀯𑀚𑁆𑀚𑁂𑀢𑀺, 𑀲 𑀫𑀼𑀦𑀺 𑀢𑁂𑀦 𑀲𑁄 𑀫𑀼𑀦𑀺;

𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀺.

‘‘𑀅𑀲𑀢𑀜𑁆𑀘 ¶ 𑀲𑀢𑀜𑁆𑀘 𑀜𑀢𑁆𑀯𑀸 𑀥𑀫𑁆𑀫𑀁, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀺𑀢𑁄 𑀬𑁄, 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺’’.

𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀫𑀼𑀦𑀺𑀦𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁; 𑀤𑁄𑀲𑀸 𑀘𑀺𑀢𑁆𑀢𑀁… 𑀫𑁄𑀳𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑁋 𑀲 𑀧𑀦𑁆𑀦𑀪𑀸𑀭𑁄 𑀫𑀼𑀦𑀺 𑀯𑀺𑀧𑁆𑀧𑀫𑀼𑀢𑁆𑀢𑁄.

𑀦 𑀓𑀧𑁆𑀧𑀺𑀬𑁄 𑀦𑀽𑀧𑀭𑀢𑁄 𑀦 𑀧𑀢𑁆𑀣𑀺𑀬𑁄𑀢𑀺 𑀪𑀕𑀯𑀸𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸 ¶ 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 ¶ 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀦 𑀓𑀧𑁆𑀧𑀺𑀬𑁄. 𑀦𑀽𑀧𑀭𑀢𑁄𑀢𑀺. 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀭𑀚𑁆𑀚𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀲𑀢𑁆𑀢 𑀲𑁂𑀔𑀸 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀆𑀭𑀫𑀦𑁆𑀢𑀺 𑀯𑀺𑀭𑀫𑀦𑁆𑀢𑀺 𑀧𑀝𑀺𑀯𑀺𑀭𑀫𑀦𑁆𑀢𑀺, 𑀅𑀭𑀳𑀸 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 ¶ 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀦 𑀓𑀧𑁆𑀧𑀺𑀬𑁄 𑀦𑀽𑀧𑀭𑀢𑁄. 𑀦 𑀧𑀢𑁆𑀣𑀺𑀬𑁄𑀢𑀺. 𑀧𑀢𑁆𑀣𑀦𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀧𑀢𑁆𑀣𑀦𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀦 𑀧𑀢𑁆𑀣𑀺𑀬𑁄.

𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀡𑁆𑀟𑀓𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 ¶ 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 ¶ 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 ¶ 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 ¶ 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁; 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀦 𑀓𑀧𑁆𑀧𑀺𑀬𑁄 𑀦𑀽𑀧𑀭𑀢𑁄 𑀦 𑀧𑀢𑁆𑀣𑀺𑀬𑁄 𑀇𑀢𑀺 𑀪𑀕𑀯𑀸.

𑀲 𑀧𑀦𑁆𑀦𑀪𑀸𑀭𑁄 𑀫𑀼𑀦𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀦 𑀓𑀧𑁆𑀧𑀺𑀬𑁄 𑀦𑀽𑀧𑀭𑀢𑁄 𑀦 𑀧𑀢𑁆𑀣𑀺𑀬𑁄’’.[𑀇𑀢𑀺 𑀪𑀕𑀯𑀸𑀢𑀺]

𑀫𑀳𑀸𑀯𑀺𑀬𑀽𑀳𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀢𑁂𑀭𑀲𑀫𑁄.

𑁧𑁪. 𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀧𑀼𑀘𑁆𑀙𑀸𑀫𑀺 ¶ ¶ 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼, [𑀆𑀤𑀺𑀘𑁆𑀘𑀩𑀦𑁆𑀥𑀽 (𑀲𑀻. 𑀲𑁆𑀬𑀸.)] 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀺 [𑀫𑀳𑁂𑀲𑀺𑀁 (𑀲𑀻. 𑀲𑁆𑀬𑀸.)] ;

𑀓𑀣𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀸𑀢𑀺 𑀪𑀺𑀓𑁆𑀔𑀼, 𑀅𑀦𑀼𑀧𑀸𑀤𑀺𑀬𑀸𑀦𑁄 𑀮𑁄𑀓𑀲𑁆𑀫𑀺𑀁 𑀓𑀺𑀜𑁆𑀘𑀺.

𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺. 𑀧𑀼𑀘𑁆𑀙𑀸𑀢𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁, 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀸𑀯𑀦𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸. 𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁, 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸. 𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 [𑀲𑀁𑀲𑀬𑀧𑀓𑁆𑀔𑀦𑁆𑀦𑁄 (𑀲𑀻. 𑀲𑁆𑀬𑀸.)] 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄, ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 ¶ 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀓𑀢𑀫𑀸 ¶ ¶ 𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀓𑀸 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀺𑀓𑀸𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀔𑀢𑁆𑀢𑀺𑀬𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀯𑁂𑀲𑁆𑀲𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀤𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀳𑀝𑁆𑀞𑀸 𑀧𑀼𑀘𑁆𑀙𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀫𑀦𑀼𑀲𑁆𑀲𑀧𑀼𑀘𑁆𑀙𑀸. 𑀓𑀢𑀫𑀸 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀅𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀦𑀸𑀕𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀧𑀡𑁆𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀬𑀓𑁆𑀔𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀲𑀼𑀭𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀦𑁆𑀥𑀩𑁆𑀩𑀸 𑀧𑀼𑀘𑁆𑀙𑀦𑁆𑀢𑀺, 𑀫𑀳𑀸𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀇𑀦𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀳𑁆𑀫𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀤𑁂𑀯𑀢𑀸𑀬𑁄 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸. 𑀓𑀢𑀫𑀸 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸? 𑀬𑀁 𑀪𑀕𑀯𑀸 𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁 𑀢𑀁 𑀲𑁄 𑀦𑀺𑀫𑁆𑀫𑀺𑀢𑁄 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀪𑀕𑀯𑀸 𑀢𑀲𑁆𑀲 [𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼] 𑀯𑀺𑀲𑀚𑁆𑀚𑁂𑀢𑀺 𑁋 𑀅𑀬𑀁 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 ¶ 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑁆𑀢𑀢𑁆𑀣𑀧𑀼𑀘𑁆𑀙𑀸, 𑀧𑀭𑀢𑁆𑀣𑀧𑀼𑀘𑁆𑀙𑀸, 𑀉𑀪𑀬𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀧𑀼𑀘𑁆𑀙𑀸, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀧𑀼𑀘𑁆𑀙𑀸, 𑀧𑀭𑀫𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀦𑀯𑀚𑁆𑀚𑀢𑁆𑀣𑀧𑀼𑀘𑁆𑀙𑀸, 𑀦𑀺𑀓𑁆𑀓𑀺𑀮𑁂𑀲𑀢𑁆𑀣𑀧𑀼𑀘𑁆𑀙𑀸 [𑀦𑀺𑀓𑁆𑀔𑁂𑀧𑀢𑁆𑀣𑀧𑀼𑀘𑁆𑀙𑀸 (𑀲𑀻. 𑀓.)], 𑀯𑁄𑀤𑀸𑀦𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑀻𑀢𑀧𑀼𑀘𑁆𑀙𑀸, 𑀅𑀦𑀸𑀕𑀢𑀧𑀼𑀘𑁆𑀙𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀚𑁆𑀛𑀢𑁆𑀢𑀧𑀼𑀘𑁆𑀙𑀸, 𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀓𑀼𑀲𑀮𑀧𑀼𑀘𑁆𑀙𑀸, 𑀅𑀓𑀼𑀲𑀮𑀧𑀼𑀘𑁆𑀙𑀸, 𑀅𑀩𑁆𑀬𑀸𑀓𑀢𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀔𑀦𑁆𑀥𑀧𑀼𑀘𑁆𑀙𑀸, 𑀥𑀸𑀢𑀼𑀧𑀼𑀘𑁆𑀙𑀸, 𑀆𑀬𑀢𑀦𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀲𑀢𑀺𑀧𑀝𑁆𑀞𑀸𑀦𑀧𑀼𑀘𑁆𑀙𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀼𑀘𑁆𑀙𑀸, 𑀇𑀤𑁆𑀥𑀺𑀧𑀸𑀤𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 ¶ 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀇𑀦𑁆𑀤𑁆𑀭𑀺𑀬𑀧𑀼𑀘𑁆𑀙𑀸, 𑀩𑀮𑀧𑀼𑀘𑁆𑀙𑀸, 𑀩𑁄𑀚𑁆𑀛𑀗𑁆𑀕𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀕𑁆𑀕𑀧𑀼𑀘𑁆𑀙𑀸, 𑀨𑀮𑀧𑀼𑀘𑁆𑀙𑀸, 𑀦𑀺𑀩𑁆𑀩𑀸𑀦𑀧𑀼𑀘𑁆𑀙𑀸.

𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁, ‘‘𑀓𑀣𑀬𑀲𑁆𑀲𑀼 𑀫𑁂’’𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺. 𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄 [𑀲𑀼𑀭𑀺𑀬𑁄 (𑀲𑀻. 𑀲𑁆𑀬𑀸.)]. 𑀲𑀽𑀭𑀺𑀬𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸𑀧𑀺 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸 𑀲𑀽𑀭𑀺𑀬𑀲𑁆𑀲 𑀕𑁄𑀢𑁆𑀢𑀜𑀸𑀢𑀓𑁄 𑀕𑁄𑀢𑁆𑀢𑀩𑀦𑁆𑀥𑀼; 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼.

𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀻𑀢𑀺. 𑀯𑀺𑀯𑁂𑀓𑀸𑀢𑀺 𑀢𑀬𑁄 𑀯𑀺𑀯𑁂𑀓𑀸 𑁋 𑀓𑀸𑀬𑀯𑀺𑀯𑁂𑀓𑁄 ¶ , 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀢𑀫𑁄 𑀓𑀸𑀬𑀯𑀺𑀯𑁂𑀓𑁄? 𑀇𑀥 ¶ 𑀪𑀺𑀓𑁆𑀔𑀼 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁 𑀓𑀸𑀬𑁂𑀦 𑀯𑀺𑀯𑀺𑀢𑁆𑀢𑁂𑀦 𑀯𑀺𑀳𑀭𑀢𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀅𑀬𑀁 𑀓𑀸𑀬𑀯𑀺𑀯𑁂𑀓𑁄.

𑀓𑀢𑀫𑁄 𑀘𑀺𑀢𑁆𑀢𑀯𑀺𑀯𑁂𑀓𑁄? 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 ¶ 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺 ¶ , 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀤𑀺𑀝𑁆𑀞𑀸𑀦𑀼𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 ¶ 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺. 𑀅𑀭𑀳𑀢𑁄 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸, 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑁄.

𑀓𑀢𑀫𑁄 𑀉𑀧𑀥𑀺𑀯𑀺𑀯𑁂𑀓𑁄? 𑀉𑀧𑀥𑀺 𑀯𑀼𑀘𑁆𑀘𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀉𑀧𑀥𑀺𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑁋 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 [𑀯𑀽𑀧𑀓𑀝𑁆𑀞𑀓𑀸𑀬𑀸𑀦𑀁 (𑀲𑀻.)] 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 ¶ 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁. 𑀲𑀦𑁆𑀢𑀻𑀢𑀺 𑀏𑀓𑁂𑀦 𑀆𑀓𑀸𑀭𑁂𑀦 𑀲𑀦𑁆𑀢𑀺𑀧𑀺 𑀲𑀦𑁆𑀢𑀺𑀧𑀤𑀫𑁆𑀧𑀺 𑀢𑀁𑀬𑁂𑀯 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁, 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀫𑁂𑀢𑀁 𑀧𑀤𑀁, 𑀧𑀡𑀻𑀢𑀫𑁂𑀢𑀁 𑀧𑀤𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀅𑀣 𑀅𑀧𑀭𑁂𑀦 ¶ 𑀆𑀓𑀸𑀭𑁂𑀦 𑀬𑁂 𑀥𑀫𑁆𑀫𑀸 𑀲𑀦𑁆𑀢𑀸𑀥𑀺𑀕𑀫𑀸𑀬 ¶ 𑀲𑀦𑁆𑀢𑀺𑀨𑀼𑀲𑀦𑀸𑀬 𑀲𑀦𑁆𑀢𑀺𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀦𑁆𑀢𑀺𑀧𑀤𑀁 𑀢𑀸𑀡𑀧𑀤𑀁 𑀮𑁂𑀡𑀧𑀤𑀁 𑀲𑀭𑀡𑀧𑀤𑀁 𑀅𑀪𑀬𑀧𑀤𑀁 𑀅𑀘𑁆𑀘𑀼𑀢𑀧𑀤𑀁 𑀅𑀫𑀢𑀧𑀤𑀁 𑀦𑀺𑀩𑁆𑀩𑀸𑀦𑀧𑀤𑀁.

𑀫𑀳𑁂𑀲𑀻𑀢𑀺 𑀫𑀳𑁂𑀲𑀺 𑀪𑀕𑀯𑀸. 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀦𑁆𑀢𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀫𑀳𑀦𑁆𑀢𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺; 𑀫𑀳𑀢𑁄 𑀢𑀫𑁄𑀓𑀸𑀬𑀲𑁆𑀲 𑀧𑀤𑀸𑀮𑀦𑀁, 𑀫𑀳𑀢𑁄 𑀯𑀺𑀧𑀮𑁆𑀮𑀸𑀲𑀲𑁆𑀲 𑀪𑁂𑀤𑀦𑀁, 𑀫𑀳𑀢𑁄 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀅𑀩𑁆𑀩𑀳𑀦𑀁 [𑀅𑀩𑁆𑀩𑀽𑀳𑀦𑀁 (𑀲𑀻. 𑀲𑁆𑀬𑀸.), 𑀅𑀩𑁆𑀪𑀼𑀳𑀦𑀁 (𑀓.)], 𑀫𑀳𑀢𑁄 𑀤𑀺𑀝𑁆𑀞𑀺𑀲𑀗𑁆𑀖𑀸𑀢𑀲𑁆𑀲 𑀯𑀺𑀦𑀺𑀯𑁂𑀞𑀦𑀁, 𑀫𑀳𑀢𑁄 𑀫𑀸𑀦𑀥𑀚𑀲𑁆𑀲 𑀧𑀧𑀸𑀢𑀦𑀁 [𑀧𑀯𑀸𑀳𑀦𑀁 (𑀲𑁆𑀬𑀸.)], 𑀫𑀳𑀢𑁄 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀽𑀧𑀲𑀫𑀁, 𑀫𑀳𑀢𑁄 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀁, 𑀫𑀳𑀢𑁄 𑀪𑀸𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀁, 𑀫𑀳𑀢𑁄 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑀁, 𑀫𑀳𑀢𑁄 𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀸𑀧𑀦𑀁 ¶ , 𑀫𑀳𑀢𑁄 𑀧𑀭𑀺𑀴𑀸𑀳𑀲𑁆𑀲 𑀧𑀝𑀺𑀧𑀲𑁆𑀲𑀤𑁆𑀥𑀺𑀁, 𑀫𑀳𑀢𑁄 𑀥𑀫𑁆𑀫𑀥𑀚𑀲𑁆𑀲 𑀉𑀲𑁆𑀲𑀸𑀧𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂 𑀫𑀳𑀦𑁆𑀢𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀫𑀳𑀦𑁆𑀢𑁂 𑀇𑀤𑁆𑀥𑀺𑀧𑀸𑀤𑁂 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀫𑀳𑀦𑁆𑀢𑀸𑀦𑀺 𑀩𑀮𑀸𑀦𑀺 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂 𑀫𑀳𑀦𑁆𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺; 𑀫𑀳𑁂𑀲𑀓𑁆𑀔𑁂𑀳𑀺 𑀯𑀸 𑀲𑀢𑁆𑀢𑁂𑀳𑀺 𑀏𑀲𑀺𑀢𑁄 𑀕𑀯𑁂𑀲𑀺𑀢𑁄 𑀧𑀭𑀺𑀬𑁂𑀲𑀺𑀢𑁄 𑀓𑀳𑀁 ¶ 𑀩𑀼𑀤𑁆𑀥𑁄 𑀓𑀳𑀁 𑀪𑀕𑀯𑀸 𑀓𑀳𑀁 𑀤𑁂𑀯𑀤𑁂𑀯𑁄 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀻𑀢𑀺 𑁋 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀺.

𑀓𑀣𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀸𑀢𑀺 𑀪𑀺𑀓𑁆𑀔𑀽𑀢𑀺. 𑀓𑀣𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 ¶ 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀭𑀸𑀕𑀁 𑀦𑀺𑀩𑁆𑀩𑀸𑀧𑁂𑀢𑀺, 𑀤𑁄𑀲𑀁 𑀦𑀺𑀩𑁆𑀩𑀸𑀧𑁂𑀢𑀺, 𑀫𑁄𑀳𑀁 𑀦𑀺𑀩𑁆𑀩𑀸𑀧𑁂𑀢𑀺, 𑀓𑁄𑀥𑀁…𑀧𑁂… 𑀉𑀧𑀦𑀸𑀳𑀁… 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁… 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀤𑀭𑀣𑁂… 𑀲𑀩𑁆𑀩𑁂 𑀧𑀭𑀺𑀴𑀸𑀳𑁂… 𑀲𑀩𑁆𑀩𑁂 𑀲𑀦𑁆𑀢𑀸𑀧𑁂 ¶ … 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂 𑀦𑀺𑀩𑁆𑀩𑀸𑀧𑁂𑀢𑀺 𑀲𑀫𑁂𑀢𑀺 𑀉𑀧𑀲𑀫𑁂𑀢𑀺 𑀯𑀽𑀧𑀲𑀫𑁂𑀢𑀺 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀯𑀸 𑀪𑀺𑀓𑁆𑀔𑀼 𑀲𑁂𑀔𑁄 𑀯𑀸 𑀪𑀺𑀓𑁆𑀔𑀽𑀢𑀺 𑁋 𑀓𑀣𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀸𑀢𑀺 𑀪𑀺𑀓𑁆𑀔𑀼.

𑀅𑀦𑀼𑀧𑀸𑀤𑀺𑀬𑀸𑀦𑁄 𑀮𑁄𑀓𑀲𑁆𑀫𑀺𑀁 𑀓𑀺𑀜𑁆𑀘𑀻𑀢𑀺. 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀫𑀸𑀦𑁄 𑀅𑀕𑀡𑁆𑀳𑀬𑀫𑀸𑀦𑁄 𑀅𑀧𑀭𑀸𑀫𑀲𑀫𑀸𑀦𑁄 𑀅𑀦𑀪𑀺𑀦𑀺𑀯𑀺𑀲𑀫𑀸𑀦𑁄. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂, 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀓𑀺𑀜𑁆𑀘𑀻𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀦𑁆𑀢𑀺 𑁋 𑀅𑀦𑀼𑀧𑀸𑀤𑀺𑀬𑀸𑀦𑁄 𑀮𑁄𑀓𑀲𑁆𑀫𑀺𑀁 𑀓𑀺𑀜𑁆𑀘𑀺.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀺;

𑀓𑀣𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀸𑀢𑀺 𑀪𑀺𑀓𑁆𑀔𑀼, 𑀅𑀦𑀼𑀧𑀸𑀤𑀺𑀬𑀸𑀦𑁄 𑀮𑁄𑀓𑀲𑁆𑀫𑀺𑀁 𑀓𑀺𑀜𑁆𑀘𑀻’’𑀢𑀺.

𑀫𑀽𑀮𑀁 ¶ 𑀧𑀧𑀜𑁆𑀘𑀲𑀗𑁆𑀔𑀸𑀬, [𑀇𑀢𑀺 𑀪𑀕𑀯𑀸]

𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂 [𑀲𑀩𑁆𑀩𑀫𑀼𑀧𑀭𑀼𑀤𑁆𑀥𑁂 (𑀲𑁆𑀬𑀸.)] ;

𑀬𑀸 𑀓𑀸𑀘𑀺 𑀢𑀡𑁆𑀳𑀸 𑀅𑀚𑁆𑀛𑀢𑁆𑀢𑀁, 𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂.

𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬, [𑀇𑀢𑀺 𑀪𑀕𑀯𑀸] 𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂𑀢𑀺. 𑀧𑀧𑀜𑁆𑀘𑀸𑀬𑁂𑀯 𑀧𑀧𑀜𑁆𑀘𑀲𑀗𑁆𑀔𑀸. 𑀢𑀡𑁆𑀳𑀸𑀧𑀧𑀜𑁆𑀘𑀲𑀗𑁆𑀔𑀸 𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑀗𑁆𑀔𑀸. 𑀓𑀢𑀫𑀁 𑀢𑀡𑁆𑀳𑀸𑀧𑀧𑀜𑁆𑀘𑀲𑁆𑀲 𑀫𑀽𑀮𑀁? 𑀅𑀯𑀺𑀚𑁆𑀚𑀸𑀫𑀽𑀮𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 ¶ 𑀫𑀽𑀮𑀁, 𑀅𑀲𑁆𑀫𑀺𑀫𑀸𑀦𑁄 𑀫𑀽𑀮𑀁, 𑀅𑀳𑀺𑀭𑀺𑀓𑀁 𑀫𑀽𑀮𑀁 ¶ , 𑀅𑀦𑁄𑀢𑁆𑀢𑀧𑁆𑀧𑀁 𑀫𑀽𑀮𑀁, 𑀉𑀤𑁆𑀥𑀘𑁆𑀘𑀁 𑀫𑀽𑀮𑀁 𑁋 𑀇𑀤𑀁 𑀢𑀡𑁆𑀳𑀸𑀧𑀧𑀜𑁆𑀘𑀲𑁆𑀲 𑀫𑀽𑀮𑀁. 𑀓𑀢𑀫𑀁 𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑁆𑀲 𑀫𑀽𑀮𑀁? 𑀅𑀯𑀺𑀚𑁆𑀚𑀸𑀫𑀽𑀮𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀫𑀽𑀮𑀁, 𑀅𑀲𑁆𑀫𑀺𑀫𑀸𑀦𑁄 𑀫𑀽𑀮𑀁, 𑀅𑀳𑀺𑀭𑀺𑀓𑀁 𑀫𑀽𑀮𑀁, 𑀅𑀦𑁄𑀢𑁆𑀢𑀧𑁆𑀧𑀁 𑀫𑀽𑀮𑀁, 𑀉𑀤𑁆𑀥𑀘𑁆𑀘𑀁 𑀫𑀽𑀮𑀁 𑁋 𑀇𑀤𑀁 𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑁆𑀲 𑀫𑀽𑀮𑀁.

𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀡𑁆𑀟𑀓𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 ¶ 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 ¶ 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 ¶ 𑀪𑀕𑀯𑀸, 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁; 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬 𑀇𑀢𑀺 𑀪𑀕𑀯𑀸.

𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂𑀢𑀺. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 ¶ 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀲𑁆𑀫𑀻𑀢𑀺 𑀭𑀽𑀧𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄 𑀅𑀲𑁆𑀫𑀻𑀢𑀺 𑀙𑀦𑁆𑀤𑁄 𑀅𑀲𑁆𑀫𑀻𑀢𑀺 𑀅𑀦𑀼𑀲𑀬𑁄; 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄 𑀅𑀲𑁆𑀫𑀻𑀢𑀺 𑀙𑀦𑁆𑀤𑁄 𑀅𑀲𑁆𑀫𑀻𑀢𑀺 𑀅𑀦𑀼𑀲𑀬𑁄𑀢𑀺. 𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬 𑀇𑀢𑀺 𑀪𑀕𑀯𑀸. 𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂𑀢𑀺. 𑀧𑀧𑀜𑁆𑀘𑀲𑀗𑁆𑀔𑀸𑀬 𑀫𑀽𑀮𑀜𑁆𑀘 𑀅𑀲𑁆𑀫𑀺𑀫𑀸𑀦𑀜𑁆𑀘 𑀫𑀦𑁆𑀢𑀸𑀬 𑀲𑀩𑁆𑀩𑀁 𑀭𑀼𑀦𑁆𑀥𑁂𑀬𑁆𑀬 𑀉𑀧𑀭𑀼𑀦𑁆𑀥𑁂𑀬𑁆𑀬 𑀦𑀺𑀭𑁄𑀥𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀗𑁆𑀕𑀫𑁂𑀬𑁆𑀬 ¶ 𑀧𑀝𑀺𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬 𑀇𑀢𑀺 𑀪𑀕𑀯𑀸, 𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂.

𑀬𑀸 𑀓𑀸𑀘𑀺 𑀢𑀡𑁆𑀳𑀸 𑀅𑀚𑁆𑀛𑀢𑁆𑀢𑀦𑁆𑀢𑀺. 𑀬𑀸 𑀓𑀸𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑀸 𑀓𑀸𑀘𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸 [𑀅𑀚𑁆𑀛𑀢𑁆𑀢𑀁 𑀲𑀫𑀼𑀝𑁆𑀞𑀸𑀢𑀺 (𑀲𑁆𑀬𑀸.)] 𑀲𑀸 𑀢𑀡𑁆𑀳𑀸𑀢𑀺 𑁋 𑀅𑀚𑁆𑀛𑀢𑁆𑀢𑀁 ¶ . 𑀅𑀣 𑀯𑀸 𑀅𑀚𑁆𑀛𑀢𑁆𑀢𑀺𑀓𑀁 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁. 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀘𑀺𑀢𑁆𑀢𑁂𑀦 𑀲𑀸 𑀢𑀡𑁆𑀳𑀸 𑀲𑀳𑀕𑀢𑀸 𑀲𑀳𑀚𑀸𑀢𑀸 𑀲𑀁𑀲𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸𑀢𑀺𑀧𑀺 𑀅𑀚𑁆𑀛𑀢𑁆𑀢𑀦𑁆𑀢𑀺 𑁋 𑀬𑀸 𑀓𑀸𑀘𑀺 𑀢𑀡𑁆𑀳𑀸 𑀅𑀚𑁆𑀛𑀢𑁆𑀢𑀁.

𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂𑀢𑀺. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀤𑀸 ¶ 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁, 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀤𑀓𑀽𑀫𑀺𑀕𑀚𑀸𑀢𑀁 𑀅𑀯𑀻𑀘𑀺𑀲𑀦𑁆𑀢𑀢𑀺𑀲𑀳𑀺𑀢𑀁 𑀨𑀼𑀲𑀺𑀢𑀁, 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 ¶ , 𑀧𑀼𑀭𑀺𑀫𑀁 𑀬𑀸𑀫𑀁 𑀫𑀚𑁆𑀛𑀺𑀫𑀁 𑀬𑀸𑀫𑀁 𑀧𑀘𑁆𑀙𑀺𑀫𑀁 𑀬𑀸𑀫𑀁, 𑀓𑀸𑀴𑁂 𑀚𑀼𑀡𑁆𑀳𑁂, 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂, 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀅𑀲𑀢𑀺 𑀧𑀭𑀺𑀯𑀚𑁆𑀚𑀦𑀸𑀬 𑀲𑀢𑁄, 𑀲𑀢𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀓𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀧𑀝𑀺𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀳𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑁆𑀢𑀸 𑀲𑀢𑁄. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀯𑀲𑀺𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀧𑀸𑀕𑀼𑀜𑁆𑀜𑀢𑀸𑀬 𑀲𑀢𑁄, 𑀲𑀢𑀺𑀬𑀸 𑀅𑀧𑀘𑁆𑀘𑁄𑀭𑁄𑀳𑀦𑀢𑀸𑀬 𑀲𑀢𑁄. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑁆𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀢𑁆𑀢𑀸 𑀲𑀢𑁄, 𑀲𑀫𑀺𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀲𑀢𑁄, 𑀫𑀭𑀡𑀲𑁆𑀲𑀢𑀺𑀬𑀸 𑀲𑀢𑁄, 𑀓𑀸𑀬𑀕𑀢𑀸𑀲𑀢𑀺𑀬𑀸 𑀲𑀢𑁄, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄. 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺, 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸, 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄, 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄, 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄, 𑀲𑀫𑀦𑁆𑀦𑀸𑀕𑀢𑁄 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄.

𑀲𑀺𑀓𑁆𑀔𑁂𑀢𑀺 ¶ 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀓𑀢𑀫𑀸 ¶ 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 ¶ 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄… 𑀫𑀳𑀦𑁆𑀢𑁄 ¶ 𑀲𑀻𑀮𑀓𑁆𑀔𑀦𑁆𑀥𑁄, 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺, 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 ¶ , 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀫𑁂 𑀆𑀲𑀯𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂𑀢𑀺. 𑀢𑀸𑀲𑀁 𑀢𑀡𑁆𑀳𑀸𑀦𑀁 𑀯𑀺𑀦𑀬𑀸𑀬 𑀧𑀝𑀺𑀯𑀺𑀦𑀬𑀸𑀬 𑀧𑀳𑀸𑀦𑀸𑀬 𑀯𑀽𑀧𑀲𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬; 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 ¶ 𑀲𑀺𑀓𑁆𑀔𑁂𑀬𑁆𑀬, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 ¶ 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂.

‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬, [𑀇𑀢𑀺 𑀪𑀕𑀯𑀸]

𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂;

𑀬𑀸 𑀓𑀸𑀘𑀺 𑀢𑀡𑁆𑀳𑀸 𑀅𑀚𑁆𑀛𑀢𑁆𑀢𑀁, 𑀢𑀸𑀲𑀁 𑀯𑀺𑀦𑀬𑀸 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂’’𑀢𑀺.

𑀬𑀁 ¶ 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸, 𑀅𑀚𑁆𑀛𑀢𑁆𑀢𑀁 𑀅𑀣 𑀯𑀸𑀧𑀺 𑀩𑀳𑀺𑀤𑁆𑀥𑀸;

𑀦 𑀢𑁂𑀦 𑀣𑀸𑀫𑀁 𑀓𑀼𑀩𑁆𑀩𑁂𑀣, 𑀦 𑀳𑀺 𑀲𑀸 𑀦𑀺𑀩𑁆𑀩𑀼𑀢𑀺 𑀲𑀢𑀁 𑀯𑀼𑀢𑁆𑀢𑀸.

𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸 𑀅𑀚𑁆𑀛𑀢𑁆𑀢𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀕𑀼𑀡𑀁 𑀚𑀸𑀦𑁂𑀬𑁆𑀬 𑀓𑀼𑀲𑀮𑁂 𑀯𑀸 𑀥𑀫𑁆𑀫𑁂 𑀅𑀩𑁆𑀬𑀸𑀓𑀢𑁂 𑀯𑀸 𑀥𑀫𑁆𑀫𑁂. 𑀓𑀢𑀫𑁂 𑀅𑀢𑁆𑀢𑀦𑁄 𑀕𑀼𑀡𑀸? 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀲𑁆𑀲𑀁 [𑀅𑀲𑁆𑀲 (𑀲𑁆𑀬𑀸.)], 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀲𑁆𑀲𑀁, 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀲𑁆𑀲𑀁, 𑀜𑀸𑀢𑁄 𑀬𑀲𑀲𑁆𑀲𑀻 𑀲𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀯𑀸 𑀅𑀲𑁆𑀲𑀁, 𑀮𑀸𑀪𑀺𑀫𑁆𑀳𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀯𑀸 𑀅𑀲𑁆𑀲𑀁, 𑀲𑀼𑀢𑁆𑀢𑀦𑁆𑀢𑀺𑀓𑁄 𑀯𑀸 𑀅𑀲𑁆𑀲𑀁, 𑀯𑀺𑀦𑀬𑀥𑀭𑁄 𑀯𑀸 𑀅𑀲𑁆𑀲𑀁, 𑀥𑀫𑁆𑀫𑀓𑀣𑀺𑀓𑁄 𑀯𑀸 𑀅𑀲𑁆𑀲𑀁, 𑀆𑀭𑀜𑁆𑀜𑀺𑀓𑁄 𑀯𑀸 𑀅𑀲𑁆𑀲𑀁, 𑀧𑀺𑀡𑁆𑀟𑀧𑀸𑀢𑀺𑀓𑁄 𑀯𑀸 𑀅𑀲𑁆𑀲𑀁, 𑀧𑀁𑀲𑀼𑀓𑀽𑀮𑀺𑀓𑁄 𑀯𑀸 𑀅𑀲𑁆𑀲𑀁, 𑀢𑁂𑀘𑀻𑀯𑀭𑀺𑀓𑁄 𑀯𑀸 𑀅𑀲𑁆𑀲𑀁, 𑀲𑀧𑀤𑀸𑀦𑀘𑀸𑀭𑀺𑀓𑁄 𑀯𑀸 𑀅𑀲𑁆𑀲𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀯𑀸 𑀅𑀲𑁆𑀲𑀁, 𑀦𑁂𑀲𑀚𑁆𑀚𑀺𑀓𑁄 𑀯𑀸 𑀅𑀲𑁆𑀲𑀁, 𑀬𑀣𑀸𑀲𑀦𑁆𑀣𑀢𑀺𑀓𑁄 𑀯𑀸 𑀅𑀲𑁆𑀲𑀁, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀅𑀲𑁆𑀲𑀁, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀅𑀲𑁆𑀲𑀁, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 ¶ 𑀮𑀸𑀪𑀻𑀢𑀺 𑀯𑀸 𑀅𑀲𑁆𑀲𑀁, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀅𑀲𑁆𑀲𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀅𑀲𑁆𑀲𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀅𑀲𑁆𑀲𑀁 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀡𑀸 ¶ . 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀕𑀼𑀡𑀁 𑀚𑀸𑀦𑁂𑀬𑁆𑀬 𑀆𑀚𑀸𑀦𑁂𑀬𑁆𑀬 𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑁋 𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸 𑀅𑀚𑁆𑀛𑀢𑁆𑀢𑀁. 𑀅𑀣 𑀯𑀸𑀧𑀺 𑀩𑀳𑀺𑀤𑁆𑀥𑀸𑀢𑀺. 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀆𑀘𑀭𑀺𑀬𑀲𑁆𑀲 𑀯𑀸 𑀢𑁂 𑀕𑀼𑀡𑀸 𑀅𑀲𑁆𑀲𑀽𑀢𑀺 [𑀅𑀲𑁆𑀲𑀽𑀢𑀺 𑀅𑀚𑁆𑀛𑀢𑁆𑀢𑀁 (𑀩𑀳𑀽𑀲𑀼)] 𑁋 𑀅𑀣 𑀯𑀸𑀧𑀺 𑀩𑀳𑀺𑀤𑁆𑀥𑀸.

𑀦 ¶ 𑀢𑁂𑀦 𑀣𑀸𑀫𑀁 𑀓𑀼𑀩𑁆𑀩𑁂𑀣𑀸𑀢𑀺. 𑀅𑀢𑁆𑀢𑀦𑁄 𑀯𑀸 𑀕𑀼𑀡𑁂𑀦 𑀧𑀭𑁂𑀲𑀁 𑀯𑀸 𑀕𑀼𑀡𑁂𑀦 𑀣𑀸𑀫𑀁 𑀦 𑀓𑀭𑁂𑀬𑁆𑀬, 𑀣𑀫𑁆𑀪𑀁 𑀦 𑀓𑀭𑁂𑀬𑁆𑀬, 𑀫𑀸𑀦𑀁 𑀦 𑀓𑀭𑁂𑀬𑁆𑀬, 𑀉𑀦𑁆𑀦𑀢𑀺𑀁 𑀦 𑀓𑀭𑁂𑀬𑁆𑀬, 𑀉𑀦𑁆𑀦𑀫𑀁 𑀦 𑀓𑀭𑁂𑀬𑁆𑀬, 𑀦 𑀢𑁂𑀦 𑀫𑀸𑀦𑀁 𑀚𑀦𑁂𑀬𑁆𑀬, 𑀦 𑀢𑁂𑀦 𑀣𑀤𑁆𑀥𑁄 𑀅𑀲𑁆𑀲 𑀧𑀢𑁆𑀣𑀤𑁆𑀥𑁄 𑀧𑀕𑁆𑀕𑀳𑀺𑀢𑀲𑀺𑀭𑁄𑀢𑀺 𑁋 𑀦 𑀢𑁂𑀦 𑀣𑀸𑀫𑀁 𑀓𑀼𑀩𑁆𑀩𑁂𑀣.

𑀦 𑀳𑀺 𑀲𑀸 𑀦𑀺𑀩𑁆𑀩𑀼𑀢𑀺 𑀲𑀢𑀁 𑀯𑀼𑀢𑁆𑀢𑀸𑀢𑀺. 𑀲𑀢𑀸𑀦𑀁 𑀲𑀦𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀸 𑀦𑀺𑀩𑁆𑀩𑀼𑀢𑀻𑀢𑀺 𑀦 𑀯𑀼𑀢𑁆𑀢𑀸 𑀦 𑀧𑀯𑀼𑀢𑁆𑀢𑀸 𑀦 𑀆𑀘𑀺𑀓𑁆𑀔𑀺𑀢𑀸 𑀦 𑀤𑁂𑀲𑀺𑀢𑀸 𑀦 𑀧𑀜𑁆𑀜𑀧𑀺𑀢𑀸 ¶ 𑀦 𑀧𑀝𑁆𑀞𑀧𑀺𑀢𑀸 𑀦 𑀯𑀺𑀯𑀝𑀸 𑀦 𑀯𑀺𑀪𑀢𑁆𑀢𑀸 𑀦 𑀉𑀢𑁆𑀢𑀸𑀦𑀻𑀓𑀢𑀸 𑀦𑀧𑁆𑀧𑀓𑀸𑀲𑀺𑀢𑀸𑀢𑀺 𑁋 𑀦 𑀳𑀺 𑀲𑀸 𑀦𑀺𑀩𑁆𑀩𑀼𑀢𑀺 𑀲𑀢𑀁 𑀯𑀼𑀢𑁆𑀢𑀸.

‘‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸, 𑀅𑀚𑁆𑀛𑀢𑁆𑀢𑀁 𑀅𑀣 𑀯𑀸𑀧𑀺 𑀩𑀳𑀺𑀤𑁆𑀥𑀸;

𑀦 𑀢𑁂𑀦 𑀣𑀸𑀫𑀁 𑀓𑀼𑀩𑁆𑀩𑁂𑀣, 𑀦 𑀳𑀺 𑀲𑀸 𑀦𑀺𑀩𑁆𑀩𑀼𑀢𑀺 𑀲𑀢𑀁 𑀯𑀼𑀢𑁆𑀢𑀸’’𑀢𑀺.

𑀲𑁂𑀬𑁆𑀬𑁄 𑀦 𑀢𑁂𑀦 𑀫𑀜𑁆𑀜𑁂𑀬𑁆𑀬, 𑀦𑀻𑀘𑁂𑀬𑁆𑀬𑁄 𑀅𑀣 𑀯𑀸𑀧𑀺 𑀲𑀭𑀺𑀓𑁆𑀔𑁄;

𑀨𑀼𑀝𑁆𑀞𑁄 ¶ 𑀅𑀦𑁂𑀓𑀭𑀽𑀧𑁂𑀳𑀺, 𑀦𑀸𑀢𑀼𑀫𑀸𑀦𑀁 𑀯𑀺𑀓𑀧𑁆𑀧𑀬𑀁 𑀢𑀺𑀝𑁆𑀞𑁂.

𑀲𑁂𑀬𑁆𑀬𑁄 𑀦 𑀢𑁂𑀦 𑀫𑀜𑁆𑀜𑁂𑀬𑁆𑀬𑀸𑀢𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀅𑀢𑀺𑀫𑀸𑀦𑀁 𑀦 𑀚𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 ¶ 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀲𑁂𑀬𑁆𑀬𑁄 𑀦 𑀢𑁂𑀦 𑀫𑀜𑁆𑀜𑁂𑀬𑁆𑀬.

𑀦𑀻𑀘𑁂𑀬𑁆𑀬𑁄 𑀅𑀣 𑀯𑀸𑀧𑀺 𑀲𑀭𑀺𑀓𑁆𑀔𑁄𑀢𑀺. ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀑𑀫𑀸𑀦𑀁 𑀦 𑀚𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀁 𑀦 𑀚𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀦𑀻𑀘𑁂𑀬𑁆𑀬𑁄 𑀅𑀣 𑀯𑀸𑀧𑀺 𑀲𑀭𑀺𑀓𑁆𑀔𑁄.

𑀨𑀼𑀝𑁆𑀞𑁄 𑀅𑀦𑁂𑀓𑀭𑀽𑀧𑁂𑀳𑀻𑀢𑀺. 𑀅𑀦𑁂𑀓𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀨𑀼𑀝𑁆𑀞𑁄 𑀅𑀦𑁂𑀓𑀭𑀽𑀧𑁂𑀳𑀺.

𑀦𑀸𑀢𑀼𑀫𑀸𑀦𑀁 ¶ 𑀯𑀺𑀓𑀧𑁆𑀧𑀬𑀁 𑀢𑀺𑀝𑁆𑀞𑁂𑀢𑀺. 𑀆𑀢𑀼𑀫𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀸. 𑀅𑀢𑁆𑀢𑀸𑀦𑀁 𑀓𑀧𑁆𑀧𑁂𑀦𑁆𑀢𑁄 𑀯𑀺𑀓𑀧𑁆𑀧𑁂𑀦𑁆𑀢𑁄 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑁄 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑁋 𑀦𑀸𑀢𑀼𑀫𑀸𑀦𑀁 𑀯𑀺𑀓𑀧𑁆𑀧𑀬𑀁 𑀢𑀺𑀝𑁆𑀞𑁂.

‘‘𑀲𑁂𑀬𑁆𑀬𑁄 ¶ 𑀦 𑀢𑁂𑀦 𑀫𑀜𑁆𑀜𑁂𑀬𑁆𑀬, 𑀦𑀻𑀘𑁂𑀬𑁆𑀬𑁄 𑀅𑀣 𑀯𑀸𑀧𑀺 𑀲𑀭𑀺𑀓𑁆𑀔𑁄;

𑀨𑀼𑀝𑁆𑀞𑁄 𑀅𑀦𑁂𑀓𑀭𑀽𑀧𑁂𑀳𑀺, 𑀦𑀸𑀢𑀼𑀫𑀸𑀦𑀁 𑀯𑀺𑀓𑀧𑁆𑀧𑀬𑀁 𑀢𑀺𑀝𑁆𑀞𑁂’’𑀢𑀺.

𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂 ¶ , 𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬;

𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀲𑁆𑀲, 𑀦𑀢𑁆𑀣𑀺 𑀅𑀢𑁆𑀢𑀸 [𑀅𑀢𑁆𑀢𑀁 (𑀲𑁆𑀬𑀸.)] 𑀓𑀼𑀢𑁄 𑀦𑀺𑀭𑀢𑁆𑀢𑀸 [𑀦𑀺𑀭𑀢𑁆𑀢𑀁 (𑀲𑁆𑀬𑀸.)] 𑀯𑀸.

𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀭𑀸𑀕𑀁 𑀲𑀫𑁂𑀬𑁆𑀬, 𑀤𑁄𑀲𑀁 𑀲𑀫𑁂𑀬𑁆𑀬, 𑀫𑁄𑀳𑀁 𑀲𑀫𑁂𑀬𑁆𑀬, 𑀓𑁄𑀥𑀁…𑀧𑁂… 𑀉𑀧𑀦𑀸𑀳𑀁… 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁 ¶ … 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀤𑀭𑀣𑁂… 𑀲𑀩𑁆𑀩𑁂 𑀧𑀭𑀺𑀴𑀸𑀳𑁂… 𑀲𑀩𑁆𑀩𑁂 𑀲𑀦𑁆𑀢𑀸𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂 𑀲𑀫𑁂𑀬𑁆𑀬 𑀉𑀧𑀲𑀫𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀦𑀺𑀩𑁆𑀩𑀸𑀧𑁂𑀬𑁆𑀬 𑀧𑀝𑀺𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂.

𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬𑀸𑀢𑀺. 𑀅𑀜𑁆𑀜𑀢𑁄 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦, 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬, 𑀅𑀦𑀺𑀬𑁆𑀬𑀸𑀦𑀧𑀢𑁂𑀦, 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺, 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺, 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺, 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺, 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺, 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺, 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀲𑀦𑁆𑀢𑀺𑀁 𑀉𑀧𑀲𑀦𑁆𑀢𑀺𑀁 𑀯𑀽𑀧𑀲𑀦𑁆𑀢𑀺𑀁 𑀦𑀺𑀩𑁆𑀩𑀼𑀢𑀺𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀁 𑀦 𑀏𑀲𑁂𑀬𑁆𑀬 𑀦 𑀕𑀯𑁂𑀲𑁂𑀬𑁆𑀬 𑀦 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑁋 𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬.

𑀅𑀚𑁆𑀛𑀢𑁆𑀢𑀁 ¶ 𑀉𑀧𑀲𑀦𑁆𑀢𑀲𑁆𑀲𑀸𑀢𑀺. 𑀅𑀚𑁆𑀛𑀢𑁆𑀢𑀁 𑀭𑀸𑀕𑀁 𑀲𑀦𑁆𑀢𑀲𑁆𑀲, 𑀤𑁄𑀲𑀁 𑀲𑀦𑁆𑀢𑀲𑁆𑀲, 𑀫𑁄𑀳𑀁 𑀲𑀦𑁆𑀢𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂 𑀲𑀦𑁆𑀢𑀲𑁆𑀲 𑀉𑀧𑀲𑀦𑁆𑀢𑀲𑁆𑀲 𑀯𑀽𑀧𑀲𑀦𑁆𑀢𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑁋 𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀲𑁆𑀲.

𑀦𑀢𑁆𑀣𑀺 𑀅𑀢𑁆𑀢𑀸 𑀓𑀼𑀢𑁄 𑀦𑀺𑀭𑀢𑁆𑀢𑀸 𑀯𑀸𑀢𑀺. 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀅𑀢𑁆𑀢𑀸𑀢𑀺 𑀅𑀢𑁆𑀢𑀤𑀺𑀝𑁆𑀞𑀺 𑀦𑀢𑁆𑀣𑀺; 𑀦𑀺𑀭𑀢𑁆𑀢𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀢𑁆𑀣𑀺. 𑀅𑀢𑁆𑀢𑀸𑀢𑀺 𑀕𑀳𑀺𑀢𑀁 𑀦𑀢𑁆𑀣𑀺; 𑀦𑀺𑀭𑀢𑁆𑀢𑀸𑀢𑀺 𑀫𑀼𑀜𑁆𑀘𑀺𑀢𑀩𑁆𑀩𑀁 𑀦𑀢𑁆𑀣𑀺. 𑀬𑀲𑁆𑀲𑀢𑁆𑀣𑀺 𑀕𑀳𑀺𑀢𑀁, 𑀢𑀲𑁆𑀲𑀢𑁆𑀣𑀺 𑀫𑀼𑀜𑁆𑀘𑀺𑀢𑀩𑁆𑀩𑀁. 𑀢𑀲𑁆𑀲 𑀕𑀳𑀺𑀢𑀁 𑀕𑀸𑀳𑀁 ¶ 𑀫𑀼𑀜𑁆𑀘𑀦𑀁 𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀭𑀳𑀸 𑀯𑀼𑀤𑁆𑀥𑀺𑀧𑀸𑀭𑀺𑀳𑀸𑀦𑀺𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀦𑀢𑁆𑀣𑀺 𑀅𑀢𑁆𑀢𑀸 𑀓𑀼𑀢𑁄 𑀦𑀺𑀭𑀢𑁆𑀢𑀸 𑀯𑀸.

‘‘𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂, 𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬;

𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀲𑁆𑀲, 𑀦𑀢𑁆𑀣𑀺 𑀅𑀢𑁆𑀢𑀸 𑀓𑀼𑀢𑁄 𑀦𑀺𑀭𑀢𑁆𑀢𑀸 𑀯𑀸’’𑀢𑀺.

𑀫𑀚𑁆𑀛𑁂 ¶ ¶ 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲, 𑀊𑀫𑀺 𑀦𑁄 𑀚𑀸𑀬𑀢𑀻 𑀞𑀺𑀢𑁄 𑀳𑁄𑀢𑀺;

𑀏𑀯𑀁 𑀞𑀺𑀢𑁄 𑀅𑀦𑁂𑀚𑀲𑁆𑀲, 𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 [𑀓𑀭𑁂 (𑀲𑀻.)] 𑀓𑀼𑀳𑀺𑀜𑁆𑀘𑀺.

𑀫𑀚𑁆𑀛𑁂 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲, 𑀊𑀫𑀺 𑀦𑁄 𑀚𑀸𑀬𑀢𑀻 𑀞𑀺𑀢𑁄 𑀳𑁄𑀢𑀻𑀢𑀺. 𑀲𑀫𑀼𑀤𑁆𑀤𑁄 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀉𑀩𑁆𑀩𑁂𑀥𑁂𑀦 𑀕𑀫𑁆𑀪𑀻𑀭𑁄. 𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑀻𑀲𑀬𑁄𑀚𑀦𑀲𑀳𑀲𑁆𑀲𑀸𑀦𑀺 ¶ 𑀉𑀤𑀓𑀁 𑀫𑀘𑁆𑀙𑀓𑀘𑁆𑀙𑀧𑁂𑀳𑀺 𑀓𑀫𑁆𑀧𑀢𑀺. 𑀉𑀧𑀭𑀺 𑀘𑀢𑁆𑀢𑀸𑀭𑀻𑀲𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀉𑀤𑀓𑀁 𑀯𑀸𑀢𑁂𑀳𑀺 𑀓𑀫𑁆𑀧𑀢𑀺. 𑀫𑀚𑁆𑀛𑁂 𑀘𑀢𑁆𑀢𑀸𑀭𑀻𑀲𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀉𑀤𑀓𑀁 𑀦 𑀓𑀫𑁆𑀧𑀢𑀺 𑀦 𑀯𑀺𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀺. 𑀅𑀦𑁂𑀭𑀺𑀢𑁄 𑀅𑀖𑀝𑁆𑀝𑀺𑀢𑁄 𑀅𑀘𑀮𑀺𑀢𑁄 𑀅𑀮𑀼𑀴𑀺𑀢𑁄 𑀅𑀪𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀢𑀢𑁆𑀭 𑀊𑀫𑀺 𑀦𑁄 𑀚𑀸𑀬𑀢𑀺, 𑀞𑀺𑀢𑁄 𑀳𑁄𑀢𑀺 𑀲𑀫𑀼𑀤𑁆𑀤𑁄𑀢𑀺. 𑀏𑀯𑀫𑁆𑀧𑀺 𑀫𑀚𑁆𑀛𑁂 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲 𑀊𑀫𑀺 𑀦𑁄 𑀚𑀸𑀬𑀢𑀻 𑀞𑀺𑀢𑁄 𑀳𑁄𑀢𑀺.

𑀅𑀣 𑀯𑀸 𑀲𑀢𑁆𑀢𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀺𑀓𑀸𑀲𑀼 𑀲𑀢𑁆𑀢𑀲𑀻𑀤𑀦𑁆𑀢𑀭𑀸 𑀫𑀳𑀸𑀲𑀫𑀼𑀤𑁆𑀤𑀸. [𑀲𑀻𑀤𑀦𑁆𑀢𑀭𑀲𑀫𑀼𑀤𑁆𑀤𑁄 (𑀲𑁆𑀬𑀸.)] 𑀢𑀢𑁆𑀭 𑀉𑀤𑀓𑀁 𑀦 𑀓𑀫𑁆𑀧𑀢𑀺 𑀦 𑀯𑀺𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀺. 𑀅𑀦𑁂𑀭𑀺𑀢𑁄 𑀅𑀖𑀝𑁆𑀝𑀺𑀢𑁄 𑀅𑀘𑀮𑀺𑀢𑁄 𑀅𑀮𑀼𑀴𑀺𑀢𑁄 𑀅𑀪𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀢𑀢𑁆𑀭 𑀊𑀫𑀺 𑀦𑁄 𑀚𑀸𑀬𑀢𑀺, 𑀞𑀺𑀢𑁄 𑀳𑁄𑀢𑀺 𑀲𑀫𑀼𑀤𑁆𑀤𑁄𑀢𑀺. 𑀏𑀯𑀫𑁆𑀧𑀺 𑀫𑀚𑁆𑀛𑁂 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲 𑀊𑀫𑀺 𑀦𑁄 𑀚𑀸𑀬𑀢𑀻 𑀞𑀺𑀢𑁄 𑀳𑁄𑀢𑀺.

𑀏𑀯𑀁 𑀞𑀺𑀢𑁄 𑀅𑀦𑁂𑀚𑀲𑁆𑀲𑀸𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀞𑀺𑀢𑁄𑀢𑀺 𑀮𑀸𑀪𑁂𑀧𑀺 𑀦 𑀓𑀫𑁆𑀧𑀢𑀺, 𑀅𑀮𑀸𑀪𑁂𑀧𑀺 𑀦 𑀓𑀫𑁆𑀧𑀢𑀺, 𑀬𑀲𑁂𑀧𑀺 𑀦 𑀓𑀫𑁆𑀧𑀢𑀺, 𑀅𑀬𑀲𑁂𑀧𑀺 𑀦 𑀓𑀫𑁆𑀧𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀓𑀫𑁆𑀧𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀓𑀫𑁆𑀧𑀢𑀺, 𑀲𑀼𑀔𑁂𑀧𑀺 𑀦 𑀓𑀫𑁆𑀧𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀓𑀫𑁆𑀧𑀢𑀺 𑀦 𑀯𑀺𑀓𑀫𑁆𑀧𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀏𑀯𑀁 𑀞𑀺𑀢𑁄. 𑀅𑀦𑁂𑀚𑀲𑁆𑀲𑀸𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 ¶ 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀏𑀚𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄 ¶ ; 𑀲𑁄 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 ¶ 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀏𑀯𑀁 𑀞𑀺𑀢𑁄 𑀅𑀦𑁂𑀚𑀲𑁆𑀲.

𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀻𑀢𑀺. 𑀉𑀲𑁆𑀲𑀤𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑀸 𑁋 𑀭𑀸𑀕𑀼𑀲𑁆𑀲𑀤𑀁 [𑀭𑀸𑀕𑀼𑀲𑁆𑀲𑀤𑁄 (𑀲𑁆𑀬𑀸.)], 𑀤𑁄𑀲𑀼𑀲𑁆𑀲𑀤𑀁, 𑀫𑁄𑀳𑀼𑀲𑁆𑀲𑀤𑀁, 𑀫𑀸𑀦𑀼𑀲𑁆𑀲𑀤𑀁, 𑀤𑀺𑀝𑁆𑀞𑀼𑀲𑁆𑀲𑀤𑀁, 𑀓𑀺𑀮𑁂𑀲𑀼𑀲𑁆𑀲𑀤𑀁, 𑀓𑀫𑁆𑀫𑀼𑀲𑁆𑀲𑀤𑀁 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 ¶ 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺.

‘‘𑀫𑀚𑁆𑀛𑁂 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲, 𑀊𑀫𑀺 𑀦𑁄 𑀚𑀸𑀬𑀢𑀻 𑀞𑀺𑀢𑁄 𑀳𑁄𑀢𑀺;

𑀏𑀯𑀁 𑀞𑀺𑀢𑁄 𑀅𑀦𑁂𑀚𑀲𑁆𑀲, 𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀻’’𑀢𑀺.

𑀅𑀓𑀺𑀢𑁆𑀢𑀬𑀻 𑀯𑀺𑀯𑀝𑀘𑀓𑁆𑀔𑀼, 𑀲𑀓𑁆𑀔𑀺𑀥𑀫𑁆𑀫𑀁 𑀧𑀭𑀺𑀲𑁆𑀲𑀬𑀯𑀺𑀦𑀬𑀁;

𑀧𑀝𑀺𑀧𑀤𑀁 𑀯𑀤𑁂𑀳𑀺 𑀪𑀤𑁆𑀤𑀦𑁆𑀢𑁂, 𑀧𑀸𑀢𑀺𑀫𑁄𑀓𑁆𑀔𑀁 𑀅𑀣 𑀯𑀸𑀧𑀺 𑀲𑀫𑀸𑀥𑀺𑀁.

𑀅𑀓𑀺𑀢𑁆𑀢𑀬𑀻 𑀯𑀺𑀯𑀝𑀘𑀓𑁆𑀔𑀽𑀢𑀺. 𑀅𑀓𑀺𑀢𑁆𑀢𑀬𑀻𑀢𑀺 𑀓𑀺𑀢𑁆𑀢𑀺𑀢𑀁 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀝𑀁 𑀯𑀺𑀪𑀢𑁆𑀢𑀁 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 ¶ 𑁋 𑀅𑀓𑀺𑀢𑁆𑀢𑀬𑀺 [𑀅𑀓𑀺𑀢𑁆𑀢𑀬𑀻𑀢𑀺 𑀅𑀓𑀺𑀢𑁆𑀢𑀬𑀺 𑀧𑀭𑀺𑀓𑀺𑀢𑁆𑀢𑀬𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀺𑀫𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑀅𑀓𑀺𑀢𑁆𑀢𑀬𑀺 (𑀲𑁆𑀬𑀸.)]. 𑀯𑀺𑀯𑀝𑀘𑀓𑁆𑀔𑀽𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀯𑀺𑀯𑀝𑀘𑀓𑁆𑀔𑀼 𑁋 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼.

𑀓𑀣𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼? 𑀫𑀁𑀲𑀘𑀓𑁆𑀔𑀼𑀫𑁆𑀳𑀺𑀧𑀺 𑀪𑀕𑀯𑀢𑁄 𑀧𑀜𑁆𑀘 𑀯𑀡𑁆𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑁋 𑀦𑀻𑀮𑁄 𑀘 𑀯𑀡𑁆𑀡𑁄, 𑀧𑀻𑀢𑀓𑁄 𑀘 𑀯𑀡𑁆𑀡𑁄, 𑀮𑁄𑀳𑀺𑀢𑀓𑁄 𑀘 ¶ 𑀯𑀡𑁆𑀡𑁄, 𑀓𑀡𑁆𑀳𑁄 𑀘 𑀯𑀡𑁆𑀡𑁄, 𑀑𑀤𑀸𑀢𑁄 ¶ 𑀘 𑀯𑀡𑁆𑀡𑁄. 𑀅𑀓𑁆𑀔𑀺𑀮𑁄𑀫𑀸𑀦𑀺 𑀘 𑀪𑀕𑀯𑀢𑁄 𑀬𑀢𑁆𑀣 𑀘 𑀅𑀓𑁆𑀔𑀺𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺 𑀢𑀁 𑀦𑀻𑀮𑀁 𑀳𑁄𑀢𑀺 𑀲𑀼𑀦𑀻𑀮𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀉𑀫𑀸𑀧𑀼𑀧𑁆𑀨𑀲𑀫𑀸𑀦𑀁 [𑀉𑀫𑁆𑀫𑀸𑀧𑀼𑀧𑁆𑀨𑀲𑀫𑀸𑀦𑀁 (𑀲𑀻. 𑀓.), 𑀉𑀫𑁆𑀫𑀸𑀭𑀧𑀼𑀧𑁆𑀨𑀲𑀫𑀸𑀦𑀁 (𑀲𑁆𑀬𑀸.)]. 𑀢𑀲𑁆𑀲 𑀧𑀭𑀢𑁄 𑀧𑀻𑀢𑀓𑀁 𑀳𑁄𑀢𑀺 𑀲𑀼𑀧𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑀸𑀦𑀁. 𑀉𑀪𑀬𑀢𑁄 𑀘 𑀅𑀓𑁆𑀔𑀺𑀓𑀽𑀝𑀸𑀦𑀺 𑀪𑀕𑀯𑀢𑁄 𑀮𑁄𑀳𑀺𑀢𑀓𑀸𑀦𑀺 𑀳𑁄𑀦𑁆𑀢𑀺 𑀲𑀼𑀮𑁄𑀳𑀺𑀢𑀓𑀸𑀦𑀺 𑀧𑀸𑀲𑀸𑀤𑀺𑀓𑀸𑀦𑀺 𑀤𑀲𑁆𑀲𑀦𑁂𑀬𑁆𑀬𑀸𑀦𑀺 𑀇𑀦𑁆𑀤𑀕𑁄𑀧𑀓𑀲𑀫𑀸𑀦𑀸𑀦𑀺. 𑀫𑀚𑁆𑀛𑁂 𑀓𑀡𑁆𑀳𑀁 𑀳𑁄𑀢𑀺 𑀲𑀼𑀓𑀡𑁆𑀳𑀁 𑀅𑀮𑀽𑀔𑀁 𑀲𑀺𑀦𑀺𑀤𑁆𑀥𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀫𑀸𑀦𑀁 [𑀅𑀴𑀸𑀭𑀺𑀝𑁆𑀞𑀓𑀲𑀫𑀸𑀦𑀁 (𑀲𑁆𑀬𑀸.)]. 𑀢𑀲𑁆𑀲 𑀧𑀭𑀢𑁄 𑀑𑀤𑀸𑀢𑀁 𑀳𑁄𑀢𑀺 𑀲𑀼𑀑𑀤𑀸𑀢𑀁 𑀲𑁂𑀢𑀁 𑀧𑀡𑁆𑀟𑀭𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀑𑀲𑀥𑀺𑀢𑀸𑀭𑀓𑀲𑀫𑀸𑀦𑀁. 𑀢𑁂𑀦 𑀪𑀕𑀯𑀸 𑀧𑀸𑀓𑀢𑀺𑀓𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂𑀦 𑀧𑀼𑀭𑀺𑀫𑀲𑀼𑀘𑀭𑀺𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘. 𑀬𑀤𑀸 𑀳𑀺𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺. 𑀲𑀽𑀭𑀺𑀬𑁄 𑀯𑀸 𑀅𑀢𑁆𑀣𑀗𑁆𑀕𑀢𑁄 𑀳𑁄𑀢𑀺. 𑀓𑀸𑀴𑀧𑀓𑁆𑀔𑁄 𑀘 𑀉𑀧𑁄𑀲𑀣𑁄 𑀳𑁄𑀢𑀺. 𑀢𑀺𑀩𑁆𑀩𑁄 𑀘 𑀯𑀦𑀲𑀡𑁆𑀟𑁄 𑀳𑁄𑀢𑀺. 𑀫𑀳𑀸 𑀘 𑀓𑀸𑀴𑀫𑁂𑀖𑁄 [𑀅𑀓𑀸𑀮𑀫𑁂𑀖𑁄 (𑀲𑁆𑀬𑀸.)] 𑀅𑀩𑁆𑀪𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀏𑀯𑀭𑀽𑀧𑁂𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀲𑀫𑀦𑁆𑀢𑀸 𑀬𑁄𑀚𑀦𑀁 ¶ 𑀧𑀲𑁆𑀲𑀢𑀺. 𑀦𑀢𑁆𑀣𑀺 𑀲𑁄 𑀓𑀼𑀝𑁆𑀝𑁄 [𑀓𑀼𑀟𑁆𑀟𑁄 (𑀲𑀻.)] 𑀯𑀸 𑀓𑀯𑀸𑀝𑀁 𑀯𑀸 𑀧𑀸𑀓𑀸𑀭𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀆𑀯𑀭𑀡𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬. 𑀏𑀓𑀜𑁆𑀘𑁂 𑀢𑀺𑀮𑀨𑀮𑀁 𑀦𑀺𑀫𑀺𑀢𑁆𑀢𑀁 ¶ 𑀓𑀢𑁆𑀯𑀸 𑀢𑀺𑀮𑀯𑀸𑀳𑁂 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀜𑁆𑀜𑁂𑀯 𑀢𑀺𑀮𑀨𑀮𑀁 𑀉𑀤𑁆𑀥𑀭𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀧𑀸𑀓𑀢𑀺𑀓𑀁 𑀫𑀁𑀲𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼.

𑀓𑀣𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼? 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂. 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸 ¶ , 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’’𑀢𑀺 ¶ . 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂; 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀆𑀓𑀗𑁆𑀔𑀫𑀸𑀦𑁄 𑀘 𑀪𑀕𑀯𑀸 𑀏𑀓𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑁂𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 ¶ 𑀧𑀲𑁆𑀲𑁂𑀬𑁆𑀬, 𑀘𑀢𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀘𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀤𑀲𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀯𑀻𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀁𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀜𑀸𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀲𑀢𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀲𑀳𑀲𑁆𑀲𑀺𑀫𑁆𑀧𑀺 𑀘𑀽𑀴𑀦𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑀺𑀲𑀳𑀲𑁆𑀲𑀺𑀫𑁆𑀧𑀺 𑀫𑀚𑁆𑀛𑀺𑀫𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀢𑀺𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀫𑀳𑀸𑀲𑀳𑀲𑁆𑀲𑀺𑀫𑁆𑀧𑀺 [𑀢𑀺𑀲𑀳𑀲𑁆𑀲𑀺𑀁 𑀫𑀳𑀸𑀲𑀳𑀲𑁆𑀲𑀺𑀫𑁆𑀧𑀺 (𑀲𑀻. 𑀓.)] 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬. 𑀬𑀸𑀯𑀢𑀓𑀁 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬 𑀢𑀸𑀯𑀢𑀓𑀁 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀤𑀺𑀩𑁆𑀩𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼.

𑀓𑀣𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼? 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀸𑀧𑁂𑀢𑀸 𑀅𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀲𑁄 ¶ 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 ¶ 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 ¶ 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 [𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁬𑁯] 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀚𑀸𑀦𑀺𑀢𑀩𑁆𑀩𑀁 [𑀅𑀢𑁆𑀣𑀺 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁 (𑀲𑀻. 𑀓.)] 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄 ¶ 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄 𑀦𑀻𑀢𑁄 𑀯𑀸 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 [𑀧𑀭𑀫𑀢𑁆𑀣𑁄 𑀯𑀸, 𑀲𑀩𑁆𑀩𑀦𑁆𑀢𑀁 (𑀲𑁆𑀬𑀸.)] 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁… 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁… 𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 ¶ 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 ¶ 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸.

𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀪𑀕𑀯𑀸 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺 [𑀧𑀭𑀺𑀯𑀢𑁆𑀢𑀦𑁆𑀢𑀺 (𑀓.) 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀅𑀯𑀲𑀸𑀦𑁂𑀧𑀺].

𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 𑀉𑀧𑀸𑀤𑀸𑀬 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 ¶ 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺 [𑀧𑀭𑀺𑀯𑀢𑁆𑀢𑀦𑁆𑀢𑀺 (𑀓.) 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀅𑀯𑀲𑀸𑀦𑁂𑀧𑀺]. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀻 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀬𑁂𑀧𑀺 𑀢𑁂 ¶ 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 𑀧𑀜𑁆𑀜𑀸𑀬 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 ¶ 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸 𑀯𑁄𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸 𑀘 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸. 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘 ¶ 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺. 𑀏𑀯𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼.

𑀓𑀣𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼? 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸 𑀅𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸 𑀅𑀘𑁆𑀘𑀼𑀕𑁆𑀕𑀫𑁆𑀫 𑀢𑀺𑀝𑁆𑀞𑀦𑁆𑀢𑀺 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦; 𑀏𑀯𑀫𑁂𑀯 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 ¶ 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀚𑀸𑀦𑀸𑀢𑀺 𑀪𑀕𑀯𑀸 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀤𑁄𑀲𑀘𑀭𑀺𑀢𑁄, 𑀅𑀬𑀁 𑀫𑁄𑀳𑀘𑀭𑀺𑀢𑁄, 𑀅𑀬𑀁 𑀯𑀺𑀢𑀓𑁆𑀓𑀘𑀭𑀺𑀢𑁄, 𑀅𑀬𑀁 𑀲𑀤𑁆𑀥𑀸𑀘𑀭𑀺𑀢𑁄, 𑀅𑀬𑀁 𑀜𑀸𑀡𑀘𑀭𑀺𑀢𑁄’’𑀢𑀺. 𑀭𑀸𑀕𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺; 𑀤𑁄𑀲𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀁 𑀆𑀘𑀺𑀓𑁆𑀔𑀢𑀺; 𑀫𑁄𑀳𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀕𑀭𑀼𑀲𑀁𑀯𑀸𑀲𑁂 𑀦𑀺𑀯𑁂𑀲𑁂𑀢𑀺; 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀘𑀺𑀓𑁆𑀔𑀢𑀺; 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀲𑀸𑀤𑀦𑀻𑀬𑀁 𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀩𑀼𑀤𑁆𑀥𑀲𑀼𑀩𑁄𑀥𑀺𑀁 ¶ ¶ [𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 (𑀓.)] 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀲𑀻𑀮𑀸𑀦𑀺 𑀘; 𑀅𑀢𑁆𑀢𑀦𑁄 𑀜𑀸𑀡𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀆𑀘𑀺𑀓𑁆𑀔𑀢𑀺 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀅𑀦𑀺𑀘𑁆𑀘𑀸𑀓𑀸𑀭𑀁 𑀤𑀼𑀓𑁆𑀔𑀸𑀓𑀸𑀭𑀁 𑀅𑀦𑀢𑁆𑀢𑀸𑀓𑀸𑀭𑀁.

‘‘𑀲𑁂𑀮𑁂 ¶ 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄, 𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢’’𑀦𑁆𑀢𑀺.

𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼.

𑀓𑀣𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀼? 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 ¶ 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.

‘‘𑀦 𑀢𑀲𑁆𑀲 𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑀏𑀯𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀯𑀺𑀯𑀝𑀘𑀓𑁆𑀔𑀽𑀢𑀺 𑁋 𑀅𑀓𑀺𑀢𑁆𑀢𑀬𑀺 𑀯𑀺𑀯𑀝𑀘𑀓𑁆𑀔𑀼.

𑀲𑀓𑁆𑀔𑀺𑀥𑀫𑁆𑀫𑀁 𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑁆𑀢𑀺. 𑀲𑀓𑁆𑀔𑀺𑀥𑀫𑁆𑀫𑀦𑁆𑀢𑀺 𑀦 𑀇𑀢𑀺𑀳𑀺𑀢𑀺𑀳𑀁, 𑀦 𑀇𑀢𑀺𑀓𑀺𑀭𑀸𑀬, 𑀦 𑀧𑀭𑀫𑁆𑀧𑀭𑀸𑀬, 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬, 𑀦 𑀢𑀓𑁆𑀓𑀳𑁂𑀢𑀼, 𑀦 𑀦𑀬𑀳𑁂𑀢𑀼, 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀦𑁆𑀢𑀺 𑁋 𑀲𑀓𑁆𑀔𑀺𑀥𑀫𑁆𑀫𑀁. 𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑁆𑀢𑀺. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 ¶ 𑀓𑁄𑀓𑀸 𑀫𑀳𑀺𑀁𑀲𑀸 [𑀕𑁄𑀫𑀳𑀺𑀲𑀸 (𑀲𑁆𑀬𑀸.) 𑀫𑀳𑀸𑀦𑀺. 𑁫] 𑀳𑀢𑁆𑀣𑀻 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 [𑀟𑀳𑁄 (𑀲𑀻. 𑀲𑁆𑀬𑀸.) 𑀫𑀳𑀸𑀦𑀺. 𑁫] 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 ¶ 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁 [𑀮𑁄𑀳𑀺𑀢𑀁 𑀧𑀺𑀢𑁆𑀢𑀁 (𑀲𑁆𑀬𑀸. 𑀓.)] 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 ¶ 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑀇𑀢𑀺 𑀯𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.

𑀓𑀢𑀫𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 ¶ 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 ¶ ¶ 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀫𑁆𑀧𑀺 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 ¶ 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺; 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 ¶ 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑀫𑀼𑀤𑀸𑀘𑀭𑀦𑁆𑀢𑀺 [𑀲𑀫𑀼𑀤𑀸𑀘𑀸𑀭𑁂𑀦𑁆𑀢𑀺 (𑀲𑀻.)] 𑀦𑀁 𑀧𑀸𑀧𑀓𑀸 ¶ 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 ¶ … 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 [𑀅𑀦𑁆𑀢𑀭𑀸𑀫𑀮𑀁 (𑀲𑀻. 𑀓.) 𑀇𑀢𑀺𑀯𑀼. 𑁮𑁮] 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄; 𑀤𑁄𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑁄𑀳𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺.

‘‘𑀅𑀦𑀢𑁆𑀣𑀚𑀦𑀦𑁄 ¶ 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀮𑀼𑀤𑁆𑀥𑁄 ¶ 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀲𑁆𑀬𑀸.) 𑀇𑀢𑀺𑀯𑀼. 𑁮𑁮] 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 ¶ ¶ 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀫𑀽𑀴𑁆𑀳𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀫𑀽𑀴𑁆𑀳𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬; 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚…𑀧𑁂… 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬.

‘‘𑀮𑁄𑀪𑁄 ¶ 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄 𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀯𑀺𑀦𑀬𑀦𑁆𑀢𑀺 ¶ 𑀧𑀭𑀺𑀲𑁆𑀲𑀬𑀯𑀺𑀦𑀬𑀁 𑀧𑀭𑀺𑀲𑁆𑀲𑀬𑀧𑁆𑀧𑀳𑀸𑀦𑀁 𑀧𑀭𑀺𑀲𑁆𑀲𑀬𑀯𑀽𑀧𑀲𑀫𑀁 𑀧𑀭𑀺𑀲𑁆𑀲𑀬𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀭𑀺𑀲𑁆𑀲𑀬𑀧𑀝𑀺𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀓𑁆𑀔𑀺𑀥𑀫𑁆𑀫𑀁 𑀧𑀭𑀺𑀲𑁆𑀲𑀬𑀯𑀺𑀦𑀬𑀁.

𑀧𑀝𑀺𑀧𑀤𑀁 𑀯𑀤𑁂𑀳𑀺 𑀪𑀤𑁆𑀤𑀦𑁆𑀢𑁂𑀢𑀺. 𑀧𑀝𑀺𑀧𑀤𑀁 𑀯𑀤𑁂𑀳𑀺 𑁋 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 ¶ 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀯𑀤𑁂𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀝𑀺𑀧𑀤𑀁 𑀯𑀤𑁂𑀳𑀺. 𑀪𑀤𑁆𑀤𑀦𑁆𑀢𑁂𑀢𑀺 𑀲𑁄 𑀦𑀺𑀫𑁆𑀫𑀺𑀢𑁄 ¶ 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀅𑀣 𑀯𑀸 𑀬𑀁 𑀢𑁆𑀯𑀁 𑀥𑀫𑁆𑀫𑀁 𑀆𑀘𑀺𑀓𑁆𑀔𑀲𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀺 𑀲𑀩𑁆𑀩𑀁 𑀢𑀁 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁 𑀓𑀮𑁆𑀬𑀸𑀡𑀁 𑀅𑀦𑀯𑀚𑁆𑀚𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑁋 𑀧𑀝𑀺𑀧𑀤𑀁 𑀯𑀤𑁂𑀳𑀺 𑀪𑀤𑁆𑀤𑀦𑁆𑀢𑁂.

𑀧𑀸𑀢𑀺𑀫𑁄𑀓𑁆𑀔𑀁 𑀅𑀣 𑀯𑀸𑀧𑀺 𑀲𑀫𑀸𑀥𑀺𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀅𑀣 𑀯𑀸𑀧𑀺 𑀲𑀫𑀸𑀥𑀺𑀦𑁆𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀢𑀫𑀸𑀦𑀲𑀢𑀸 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑁋 𑀧𑀸𑀢𑀺𑀫𑁄𑀓𑁆𑀔𑀁 𑀅𑀣 𑀯𑀸𑀧𑀺 𑀲𑀫𑀸𑀥𑀺𑀁.

‘‘𑀅𑀓𑀺𑀢𑁆𑀢𑀬𑀻 𑀯𑀺𑀯𑀝𑀘𑀓𑁆𑀔𑀼, 𑀲𑀓𑁆𑀔𑀺𑀥𑀫𑁆𑀫𑀁 𑀧𑀭𑀺𑀲𑁆𑀲𑀬𑀯𑀺𑀦𑀬𑀁;

𑀧𑀝𑀺𑀧𑀤𑀁 𑀯𑀤𑁂𑀳𑀺 𑀪𑀤𑁆𑀤𑀦𑁆𑀢𑁂, 𑀧𑀸𑀢𑀺𑀫𑁄𑀓𑁆𑀔𑀁 𑀅𑀣 𑀯𑀸𑀧𑀺 𑀲𑀫𑀸𑀥𑀺’’𑀦𑁆𑀢𑀺.

𑀘𑀓𑁆𑀔𑀽𑀳𑀺 ¶ 𑀦𑁂𑀯 𑀮𑁄𑀮𑀲𑁆𑀲, 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀁;

𑀭𑀲𑁂 𑀘 𑀦𑀸𑀦𑀼𑀕𑀺𑀚𑁆𑀛𑁂𑀬𑁆𑀬, 𑀦 𑀘 𑀫𑀫𑀸𑀬𑁂𑀣 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀁.

𑀘𑀓𑁆𑀔𑀽𑀳𑀺 ¶ 𑀦𑁂𑀯 𑀮𑁄𑀮𑀲𑁆𑀲𑀸𑀢𑀺. 𑀓𑀣𑀁 𑀘𑀓𑁆𑀔𑀼𑀮𑁄𑀮𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀘𑀓𑁆𑀔𑀼𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘‘𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀁 ¶ , 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀕𑀸𑀫𑁂𑀦 𑀕𑀸𑀫𑀁 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦𑀕𑀭𑁂𑀦 𑀦𑀕𑀭𑀁 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 [𑀅𑀦𑀯𑀢𑁆𑀣𑀺𑀢𑀘𑀸𑀭𑀺𑀓𑀁 (𑀲𑀻. 𑀲𑁆𑀬𑀸.)] 𑀅𑀦𑀼𑀬𑀼𑀢𑁆𑀢𑁄 𑀘 𑀳𑁄𑀢𑀺 𑀭𑀽𑀧𑀲𑁆𑀲 𑀤𑀲𑁆𑀲𑀦𑀸𑀬. 𑀏𑀯𑀫𑁆𑀧𑀺 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀅𑀲𑀁𑀯𑀼𑀢𑁄 𑀕𑀘𑁆𑀙𑀢𑀺 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄, 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀇𑀢𑁆𑀣𑀺𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀧𑀼𑀭𑀺𑀲𑁂 𑀑𑀮𑁄𑀓𑁂𑀦𑁆𑀢𑁄, 𑀓𑀼𑀫𑀸𑀭𑀓𑁂 𑀑𑀮𑁄𑀓𑁂𑀦𑁆𑀢𑁄, 𑀓𑀼𑀫𑀸𑀭𑀺𑀓𑀸𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀅𑀦𑁆𑀢𑀭𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄 ¶ , 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄, 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄, 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 𑀯𑁂𑀢𑀸𑀴𑀁 𑀓𑀼𑀫𑁆𑀪𑀣𑀽𑀡𑀁 [𑀓𑀼𑀫𑁆𑀪𑀣𑀽𑀦𑀁 (𑀲𑀻. 𑀲𑁆𑀬𑀸. 𑀓.)] 𑀲𑁄𑀪𑀦𑀓𑀁 [𑀲𑁄𑀪𑀦𑀕𑀭𑀓𑀁 (𑀲𑀻. 𑀲𑁆𑀬𑀸.)] 𑀘𑀡𑁆𑀟𑀸𑀮𑀁 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 𑀫𑀳𑀺𑀁𑀲𑀬𑀼𑀤𑁆𑀥𑀁 [𑀫𑀳𑀺𑀲𑀬𑀼𑀤𑁆𑀥𑀁 (𑀲𑀻. 𑀲𑁆𑀬𑀸.)] 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 ¶ 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸 ¶ . 𑀏𑀯𑀫𑁆𑀧𑀺 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀓𑀣𑀁 ¶ 𑀦 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀲𑀁𑀯𑀼𑀢𑁄 𑀕𑀘𑁆𑀙𑀢𑀺 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀇𑀢𑁆𑀣𑀺𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀧𑀼𑀭𑀺𑀲𑁂 𑀑𑀮𑁄𑀓𑁂𑀦𑁆𑀢𑁄, 𑀦 𑀓𑀼𑀫𑀸𑀭𑀓𑁂 𑀑𑀮𑁄𑀓𑁂𑀦𑁆𑀢𑁄, 𑀦 𑀓𑀼𑀫𑀸𑀭𑀺𑀓𑀸𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀦𑁆𑀢𑀭𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄, 𑀦 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀤𑀺𑀲𑀸𑀯𑀺𑀤𑀺𑀲𑀸𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀦 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀦 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁…𑀧𑁂… 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸. 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀦 𑀘𑀓𑁆𑀔𑀼𑀮𑁄𑀮𑁄 𑀳𑁄𑀢𑀺.

𑀘𑀓𑁆𑀔𑀽𑀳𑀺 ¶ 𑀦𑁂𑀯 𑀮𑁄𑀮𑀲𑁆𑀲𑀸𑀢𑀺. 𑀘𑀓𑁆𑀔𑀼𑀮𑁄𑀮𑀺𑀬𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀘𑀓𑁆𑀔𑀼𑀮𑁄𑀮𑀺𑀬𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 ¶ 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀘𑀓𑁆𑀔𑀽𑀳𑀺 𑀦𑁂𑀯 𑀮𑁄𑀮𑀲𑁆𑀲.

𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀦𑁆𑀢𑀺. 𑀕𑀸𑀫𑀓𑀣𑀸 𑀯𑀼𑀘𑁆𑀘𑀢𑀺 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀸 𑀘𑁄𑀭𑀓𑀣𑀸 𑀫𑀳𑀸𑀫𑀢𑁆𑀢𑀓𑀣𑀸 𑀲𑁂𑀦𑀸𑀓𑀣𑀸 𑀪𑀬𑀓𑀣𑀸 𑀬𑀼𑀤𑁆𑀥𑀓𑀣𑀸 𑀅𑀦𑁆𑀦𑀓𑀣𑀸 𑀧𑀸𑀦𑀓𑀣𑀸 𑀯𑀢𑁆𑀣𑀓𑀣𑀸 𑀬𑀸𑀦𑀓𑀣𑀸 𑀲𑀬𑀦𑀓𑀣𑀸 𑀫𑀸𑀮𑀸𑀓𑀣𑀸 𑀕𑀦𑁆𑀥𑀓𑀣𑀸 𑀜𑀸𑀢𑀺𑀓𑀣𑀸 𑀕𑀸𑀫𑀓𑀣𑀸 𑀦𑀺𑀕𑀫𑀓𑀣𑀸 ¶ 𑀦𑀕𑀭𑀓𑀣𑀸 𑀚𑀦𑀧𑀤𑀓𑀣𑀸 𑀇𑀢𑁆𑀣𑀺𑀓𑀣𑀸 [𑀇𑀢𑁆𑀣𑀺𑀓𑀣𑀸 𑀧𑀼𑀭𑀺𑀲𑀓𑀣𑀸 (𑀩𑀳𑀽𑀲𑀼)] 𑀲𑀽𑀭𑀓𑀣𑀸 𑀯𑀺𑀲𑀺𑀔𑀸𑀓𑀣𑀸 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀸 𑀧𑀼𑀩𑁆𑀩𑀧𑁂𑀢𑀓𑀣𑀸 𑀦𑀸𑀦𑀢𑁆𑀢𑀓𑀣𑀸 𑀮𑁄𑀓𑀓𑁆𑀔𑀸𑀬𑀺𑀓𑀸 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀸 𑀇𑀢𑀺𑀪𑀯𑀸𑀪𑀯𑀓𑀣𑀸 𑀇𑀢𑀺 𑀯𑀸. 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀦𑁆𑀢𑀺 ¶ . 𑀕𑀸𑀫𑀓𑀣𑀸𑀬 𑀲𑁄𑀢𑀁 𑀆𑀯𑀭𑁂𑀬𑁆𑀬 𑀦𑀺𑀯𑀸𑀭𑁂𑀬𑁆𑀬 𑀲𑀁𑀯𑀭𑁂𑀬𑁆𑀬 𑀭𑀓𑁆𑀔𑁂𑀬𑁆𑀬 𑀕𑁄𑀧𑁂𑀬𑁆𑀬 𑀧𑀺𑀤𑀳𑁂𑀬𑁆𑀬 𑀧𑀘𑁆𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑁋 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀁.

𑀭𑀲𑁂 𑀘 𑀦𑀸𑀦𑀼𑀕𑀺𑀚𑁆𑀛𑁂𑀬𑁆𑀬𑀸𑀢𑀺. 𑀭𑀲𑁂 𑀘𑀸𑀢𑀺 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀓𑀁 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼 𑀲𑀻𑀢𑀁 𑀉𑀡𑁆𑀳𑀁. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀭𑀲𑀕𑀺𑀤𑁆𑀥𑀸; 𑀢𑁂 𑀚𑀺𑀯𑁆𑀳𑀕𑁆𑀕𑁂𑀦 𑀭𑀲𑀕𑁆𑀕𑀸𑀦𑀺 𑀧𑀭𑀺𑀬𑁂𑀲𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺, 𑀢𑁂 𑀅𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀦𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀦𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀺…𑀧𑁂… 𑀲𑀻𑀢𑀁 𑀮𑀪𑀺𑀢𑁆𑀯𑀸 𑀉𑀡𑁆𑀳𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀉𑀡𑁆𑀳𑀁 𑀮𑀪𑀺𑀢𑁆𑀯𑀸 𑀲𑀻𑀢𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀢𑁂 𑀬𑀁 𑀬𑀁 𑀮𑀪𑀺𑀢𑁆𑀯𑀸 𑀢𑁂𑀦 𑀢𑁂𑀦 𑀦 𑀢𑀼𑀲𑁆𑀲𑀦𑁆𑀢𑀺, 𑀅𑀧𑀭𑀸𑀧𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀫𑀦𑀸𑀧𑀺𑀓𑁂𑀲𑀼 𑀭𑀲𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀬𑀲𑁆𑀲𑁂𑀲𑀸 𑀭𑀲𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 ¶ 𑀤𑀟𑁆𑀠𑀸, 𑀲𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬…𑀧𑁂… 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺.

𑀬𑀣𑀸 𑀯𑀡𑀁 𑀆𑀮𑀺𑀫𑁆𑀧𑁂𑀬𑁆𑀬 𑀬𑀸𑀯𑀤𑁂𑀯 𑀆𑀭𑀼𑀳𑀡𑀢𑁆𑀣𑀸𑀬 [𑀆𑀭𑀼𑀳𑀦𑀢𑁆𑀣𑀸𑀬 (𑀓.) 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀲𑀢𑁆𑀢𑀫𑀕𑀸𑀣𑀸𑀯𑀡𑁆𑀡𑀦𑀸𑀬𑀁], 𑀬𑀣𑀸 𑀯𑀸 𑀧𑀦 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑁂𑀬𑁆𑀬 𑀬𑀸𑀯𑀤𑁂𑀯 𑀪𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀬𑀣𑀸 𑀯𑀸 𑀧𑀼𑀢𑁆𑀢𑀫𑀁𑀲𑀁 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬 𑀬𑀸𑀯𑀤𑁂𑀯 𑀓𑀦𑁆𑀢𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬; 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 ¶ 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬…𑀧𑁂… 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀭𑀲𑀢𑀡𑁆𑀳𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀭𑀲𑀢𑀡𑁆𑀳𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀭𑀲𑁂 𑀘 𑀦𑀸𑀦𑀼𑀕𑀺𑀚𑁆𑀛𑁂𑀬𑁆𑀬.

𑀦 𑀘 𑀫𑀫𑀸𑀬𑁂𑀣 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀦𑁆𑀢𑀺. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘 ¶ …𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀢𑀡𑁆𑀳𑀸𑀫𑀫𑀢𑁆𑀢𑀁 𑀧𑀳𑀸𑀬 𑀤𑀺𑀝𑁆𑀞𑀺𑀫𑀫𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀦 𑀫𑀫𑀸𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬; 𑀲𑁄𑀢𑀁… 𑀖𑀸𑀦𑀁… 𑀚𑀺𑀯𑁆𑀳𑀁… 𑀓𑀸𑀬𑀁… 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁 ¶ … 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁 ¶ … 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀦 𑀫𑀫𑀸𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬. 𑀓𑀺𑀜𑁆𑀘𑀻𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀦 𑀘 𑀫𑀫𑀸𑀬𑁂𑀣 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀁.

‘‘𑀘𑀓𑁆𑀔𑀽𑀳𑀺 𑀦𑁂𑀯 𑀮𑁄𑀮𑀲𑁆𑀲, 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀁;

𑀭𑀲𑁂 𑀘 𑀦𑀸𑀦𑀼𑀕𑀺𑀚𑁆𑀛𑁂𑀬𑁆𑀬, 𑀦 𑀘 𑀫𑀫𑀸𑀬𑁂𑀣 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺’’𑀦𑁆𑀢𑀺.

𑀨𑀲𑁆𑀲𑁂𑀦 𑀬𑀤𑀸 𑀨𑀼𑀝𑁆𑀞𑀲𑁆𑀲, 𑀧𑀭𑀺𑀤𑁂𑀯𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺;

𑀪𑀯𑀜𑁆𑀘 𑀦𑀸𑀪𑀺𑀚𑀧𑁆𑀧𑁂𑀬𑁆𑀬, 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬.

𑀨𑀲𑁆𑀲𑁂𑀦 ¶ 𑀬𑀤𑀸 𑀨𑀼𑀝𑁆𑀞𑀲𑁆𑀲𑀸𑀢𑀺. 𑀨𑀲𑁆𑀲𑁄𑀢𑀺 𑀭𑁄𑀕𑀨𑀲𑁆𑀲𑁄. 𑀭𑁄𑀕𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲; 𑀘𑀓𑁆𑀔𑀼𑀭𑁄𑀕𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲, 𑀲𑁄𑀢𑀭𑁄𑀕𑁂𑀦…𑀧𑁂… 𑀖𑀸𑀦𑀭𑁄𑀕𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦… 𑀓𑀸𑀬𑀭𑁄𑀕𑁂𑀦… 𑀲𑀻𑀲𑀭𑁄𑀕𑁂𑀦… 𑀓𑀡𑁆𑀡𑀭𑁄𑀕𑁂𑀦… 𑀫𑀼𑀔𑀭𑁄𑀕𑁂𑀦… 𑀤𑀦𑁆𑀢𑀭𑁄𑀕𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀟𑀸𑀳𑁂𑀦… 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑀸𑀬… 𑀯𑀺𑀲𑀽𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦… 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸 ¶ … 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬… 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑁂𑀦… 𑀧𑀺𑀢𑁆𑀢𑁂𑀦… 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀺𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦… 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦… 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦… 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬… 𑀧𑀺𑀧𑀸𑀲𑀸𑀬… 𑀉𑀘𑁆𑀘𑀸𑀭𑁂𑀦… 𑀧𑀲𑁆𑀲𑀸𑀯𑁂𑀦… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸𑀢𑀺 𑁋 𑀨𑀲𑁆𑀲𑁂𑀦 𑀬𑀤𑀸 𑀨𑀼𑀝𑁆𑀞𑀲𑁆𑀲.

𑀧𑀭𑀺𑀤𑁂𑀯𑀁 ¶ 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀻𑀢𑀺. 𑀆𑀤𑁂𑀯𑀁 𑀧𑀭𑀺𑀤𑁂𑀯𑀁 𑀆𑀤𑁂𑀯𑀦𑀁 𑀧𑀭𑀺𑀤𑁂𑀯𑀦𑀁 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑀁 𑀯𑀺𑀧𑁆𑀧𑀮𑀸𑀧𑀁 𑀮𑀸𑀮𑀧𑁆𑀧𑀁 𑀮𑀸𑀮𑀧𑁆𑀧𑀸𑀬𑀦𑀁 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 ¶ 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀧𑀭𑀺𑀤𑁂𑀯𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺.

𑀪𑀯𑀜𑁆𑀘 𑀦𑀸𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺. 𑀓𑀸𑀫𑀪𑀯𑀁 𑀦 𑀚𑀧𑁆𑀧𑁂𑀬𑁆𑀬, 𑀭𑀽𑀧𑀪𑀯𑀁 𑀦 𑀚𑀧𑁆𑀧𑁂𑀬𑁆𑀬, 𑀅𑀭𑀽𑀧𑀪𑀯𑀁 𑀦 𑀚𑀧𑁆𑀧𑁂𑀬𑁆𑀬 𑀦 𑀧𑀚𑀧𑁆𑀧𑁂𑀬𑁆𑀬 𑀦𑀸𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑁋 𑀪𑀯𑀜𑁆𑀘 𑀦𑀸𑀪𑀺𑀚𑀧𑁆𑀧𑁂𑀬𑁆𑀬.

𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬𑀸𑀢𑀺. 𑀪𑁂𑀭𑀯𑀸𑀢𑀺 𑀏𑀓𑁂𑀦𑀸𑀓𑀸𑀭𑁂𑀦 𑀪𑀬𑀫𑁆𑀧𑀺 𑀪𑁂𑀭𑀯𑀫𑁆𑀧𑀺 𑀢𑀜𑁆𑀜𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀪𑀕𑀯𑀢𑀸 𑁋 ‘‘𑀏𑀢𑀁 𑀦𑀽𑀦 𑀢𑀁 𑀪𑀬𑀁 𑀪𑁂𑀭𑀯𑀁 𑀦 𑀚𑀳𑁂 𑀆𑀕𑀘𑁆𑀙𑀢𑀻’’𑀢𑀺. 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁 𑀲𑀻𑀳𑀸 𑀩𑁆𑀬𑀕𑁆𑀖𑀸 ¶ 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 𑀅𑀲𑁆𑀲𑀸 𑀳𑀢𑁆𑀣𑀻 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸. 𑀅𑀣𑀸𑀧𑀭𑁂𑀦 𑀆𑀓𑀸𑀭𑁂𑀦 𑀪𑀬𑀁 𑀯𑀼𑀘𑁆𑀘𑀢𑀺 𑀅𑀚𑁆𑀛𑀢𑁆𑀢𑀺𑀓𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄, 𑀚𑀸𑀢𑀺𑀪𑀬𑀁 𑀚𑀭𑀸𑀪𑀬𑀁 𑀩𑁆𑀬𑀸𑀥𑀺𑀪𑀬𑀁 𑀫𑀭𑀡𑀪𑀬𑀁 𑀭𑀸𑀚𑀪𑀬𑀁 𑀘𑁄𑀭𑀪𑀬𑀁 𑀅𑀕𑁆𑀕𑀺𑀪𑀬𑀁 𑀉𑀤𑀓𑀪𑀬𑀁 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀧𑀭𑀸𑀦𑀼𑀯𑀸𑀤𑀪𑀬𑀁 𑀤𑀡𑁆𑀟𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀊𑀫𑀺𑀪𑀬𑀁 𑀓𑀼𑀫𑁆𑀪𑀻𑀮𑀪𑀬𑀁 𑀆𑀯𑀝𑁆𑀝𑀪𑀬𑀁 𑀲𑀼𑀲𑀼𑀓𑀸𑀪𑀬𑀁 [𑀲𑀼𑀁𑀲𑀼𑀓𑀸𑀪𑀬𑀁 (𑀲𑁆𑀬𑀸.)] 𑀆𑀚𑀻𑀯𑀺𑀓𑀪𑀬𑀁 𑀅𑀲𑀺𑀮𑁄𑀓𑀪𑀬𑀁 𑀧𑀭𑀺𑀲𑀸𑀬 𑀲𑀸𑀭𑀚𑁆𑀚𑀪𑀬𑀁 𑀫𑀤𑀦𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄. 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬𑀸𑀢𑀺 𑀪𑁂𑀭𑀯𑁂 𑀧𑀲𑁆𑀲𑀺𑀢𑁆𑀯𑀸 𑀯𑀸 𑀲𑀼𑀡𑀺𑀢𑁆𑀯𑀸 𑀯𑀸 𑀦 𑀯𑁂𑀥𑁂𑀬𑁆𑀬 𑀦 𑀧𑀯𑁂𑀥𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬 𑀦 𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 𑀦 𑀧𑀭𑀺𑀢𑀲𑁂𑀬𑁆𑀬 𑀦 𑀪𑀸𑀬𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀪𑀻𑀭𑀽 𑀅𑀲𑁆𑀲 𑀅𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻, 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬.

‘‘𑀨𑀲𑁆𑀲𑁂𑀦 𑀬𑀤𑀸 𑀨𑀼𑀝𑁆𑀞𑀲𑁆𑀲, 𑀧𑀭𑀺𑀤𑁂𑀯𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺;

𑀪𑀯𑀜𑁆𑀘 𑀦𑀸𑀪𑀺𑀚𑀧𑁆𑀧𑁂𑀬𑁆𑀬, 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬𑀸’’𑀢𑀺.

𑀅𑀦𑁆𑀦𑀸𑀦𑀫𑀣𑁄 𑀧𑀸𑀦𑀸𑀦𑀁, 𑀔𑀸𑀤𑀦𑀻𑀬𑀸𑀦𑀫𑀣𑁄𑀧𑀺 𑀯𑀢𑁆𑀣𑀸𑀦𑀁;

𑀮𑀤𑁆𑀥𑀸 ¶ 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸, 𑀦 𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄.

𑀅𑀦𑁆𑀦𑀸𑀦𑀫𑀣𑁄 ¶ ¶ 𑀧𑀸𑀦𑀸𑀦𑀁, 𑀔𑀸𑀤𑀦𑀻𑀬𑀸𑀦𑀫𑀣𑁄𑀧𑀺 𑀯𑀢𑁆𑀣𑀸𑀦𑀦𑁆𑀢𑀺. 𑀅𑀦𑁆𑀦𑀸𑀦𑀦𑁆𑀢𑀺 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀁. 𑀧𑀸𑀦𑀸𑀦𑀦𑁆𑀢𑀺 𑀅𑀝𑁆𑀞 𑀧𑀸𑀦𑀸𑀦𑀺 𑁋 𑀅𑀫𑁆𑀩𑀧𑀸𑀦𑀁, 𑀚𑀫𑁆𑀩𑀼𑀧𑀸𑀦𑀁, 𑀘𑁄𑀘𑀧𑀸𑀦𑀁, 𑀫𑁄𑀘𑀧𑀸𑀦𑀁, 𑀫𑀥𑀼𑀧𑀸𑀦𑀁 ¶ , 𑀫𑀼𑀤𑁆𑀤𑀺𑀓𑀧𑀸𑀦𑀁, 𑀲𑀸𑀮𑀼𑀓𑀧𑀸𑀦𑀁, 𑀨𑀸𑀭𑀼𑀲𑀓𑀧𑀸𑀦𑀁. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀧𑀸𑀦𑀸𑀦𑀺 𑁋 𑀓𑁄𑀲𑀫𑁆𑀩𑀧𑀸𑀦𑀁, 𑀓𑁄𑀮𑀧𑀸𑀦𑀁, 𑀩𑀤𑀭𑀧𑀸𑀦𑀁, 𑀖𑀢𑀧𑀸𑀦𑀁, 𑀢𑁂𑀮𑀧𑀸𑀦𑀁, 𑀧𑀬𑁄𑀧𑀸𑀦𑀁, 𑀬𑀸𑀕𑀼𑀧𑀸𑀦𑀁, 𑀭𑀲𑀧𑀸𑀦𑀁. 𑀔𑀸𑀤𑀦𑀻𑀬𑀸𑀦𑀦𑁆𑀢𑀺 𑀧𑀺𑀝𑁆𑀞𑀔𑀚𑁆𑀚𑀓𑀁, 𑀧𑀽𑀯𑀔𑀚𑁆𑀚𑀓𑀁, 𑀫𑀽𑀮𑀔𑀚𑁆𑀚𑀓𑀁, 𑀢𑀘𑀔𑀚𑁆𑀚𑀓𑀁, 𑀧𑀢𑁆𑀢𑀔𑀚𑁆𑀚𑀓𑀁, 𑀧𑀼𑀧𑁆𑀨𑀔𑀚𑁆𑀚𑀓𑀁, 𑀨𑀮𑀔𑀚𑁆𑀚𑀓𑀁. 𑀯𑀢𑁆𑀣𑀸𑀦𑀦𑁆𑀢𑀺 𑀙 𑀘𑀻𑀯𑀭𑀸𑀦𑀺 𑁋 𑀔𑁄𑀫𑀁, 𑀓𑀧𑁆𑀧𑀸𑀲𑀺𑀓𑀁, 𑀓𑁄𑀲𑁂𑀬𑁆𑀬𑀁, 𑀓𑀫𑁆𑀩𑀮𑀁, 𑀲𑀸𑀡𑀁, 𑀪𑀗𑁆𑀕𑀦𑁆𑀢𑀺 𑁋 𑀅𑀦𑁆𑀦𑀸𑀦𑀫𑀣𑁄 𑀧𑀸𑀦𑀸𑀦𑀁 𑀔𑀸𑀤𑀦𑀻𑀬𑀸𑀦𑀫𑀣𑁄𑀧𑀺 𑀯𑀢𑁆𑀣𑀸𑀦𑀁.

𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸𑀢𑀺. 𑀮𑀤𑁆𑀥𑀸𑀢𑀺 𑀮𑀤𑁆𑀥𑀸 𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀓𑀼𑀳𑀦𑀸𑀬, 𑀦 𑀮𑀧𑀦𑀸𑀬, 𑀦 𑀦𑁂𑀫𑀺𑀢𑁆𑀢𑀺𑀓𑀢𑀸𑀬, 𑀦 𑀦𑀺𑀧𑁆𑀧𑁂𑀲𑀺𑀓𑀢𑀸𑀬, 𑀦 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀬 [𑀦𑀺𑀚𑀺𑀕𑀺𑀁𑀲𑀦𑀢𑀸𑀬 (𑀲𑀻. 𑀲𑁆𑀬𑀸.)], 𑀦 𑀓𑀝𑁆𑀞𑀤𑀸𑀦𑁂𑀦, 𑀦 𑀯𑁂𑀴𑀼𑀤𑀸𑀦𑁂𑀦, 𑀦 𑀧𑀢𑁆𑀢𑀤𑀸𑀦𑁂𑀦, 𑀦 𑀧𑀼𑀧𑁆𑀨𑀤𑀸𑀦𑁂𑀦, 𑀦 𑀨𑀮𑀤𑀸𑀦𑁂𑀦, 𑀦 𑀲𑀺𑀦𑀸𑀦𑀤𑀸𑀦𑁂𑀦, 𑀦 𑀘𑀼𑀡𑁆𑀡𑀤𑀸𑀦𑁂𑀦, 𑀦 𑀫𑀢𑁆𑀢𑀺𑀓𑀸𑀤𑀸𑀦𑁂𑀦, 𑀦 𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦, 𑀦 𑀫𑀼𑀔𑁄𑀤𑀓𑀤𑀸𑀦𑁂𑀦, 𑀦 𑀘𑀸𑀝𑀼𑀓𑀫𑁆𑀬𑀢𑀸𑀬, 𑀦 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬 [𑀦 𑀫𑀼𑀕𑁆𑀕𑀲𑀼𑀧𑁆𑀧𑀢𑀸𑀬 (𑀲𑀻.), 𑀦 𑀫𑀼𑀕𑁆𑀕𑀲𑀽𑀧𑀢𑀸𑀬 (𑀲𑁆𑀬𑀸.)], 𑀦 𑀧𑀸𑀭𑀺𑀪𑀝𑀬𑀬𑀢𑀸𑀬, 𑀦 𑀧𑀻𑀞𑀫𑀤𑁆𑀤𑀺𑀓𑀢𑀸𑀬 [𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀬 (𑀲𑀻.), 𑀧𑀺𑀝𑁆𑀞𑀺𑀫𑀤𑁆𑀤𑀺𑀓𑀢𑀸𑀬 (𑀓.)], 𑀦 𑀯𑀢𑁆𑀣𑀼𑀯𑀺𑀚𑁆𑀚𑀸𑀬, 𑀦 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬, 𑀦 𑀅𑀗𑁆𑀕𑀯𑀺𑀚𑁆𑀚𑀸𑀬, 𑀦 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀬, 𑀦 𑀤𑀽𑀢𑀕𑀫𑀦𑁂𑀦, 𑀦 𑀧𑀳𑀺𑀡𑀕𑀫𑀦𑁂𑀦, 𑀦 𑀚𑀗𑁆𑀖𑀧𑁂𑀲𑀦𑀺𑀬𑁂𑀦, 𑀦 𑀯𑁂𑀚𑁆𑀚𑀓𑀫𑁆𑀫𑁂𑀦, 𑀦 𑀦𑀯𑀓𑀫𑁆𑀫𑁂𑀦, 𑀦 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑁂𑀦, 𑀦 ¶ 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀸 𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑁋 𑀮𑀤𑁆𑀥𑀸. 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸𑀢𑀺 𑀅𑀦𑁆𑀦𑀲𑀦𑁆𑀦𑀺𑀥𑀺𑀁 𑀧𑀸𑀦𑀲𑀦𑁆𑀦𑀺𑀥𑀺𑀁 𑀯𑀢𑁆𑀣𑀲𑀦𑁆𑀦𑀺𑀥𑀺𑀁 𑀬𑀸𑀦𑀲𑀦𑁆𑀦𑀺𑀥𑀺𑀁 𑀲𑀬𑀦𑀲𑀦𑁆𑀦𑀺𑀥𑀺𑀁 𑀕𑀦𑁆𑀥𑀲𑀦𑁆𑀦𑀺𑀥𑀺𑀁 𑀆𑀫𑀺𑀲𑀲𑀦𑁆𑀦𑀺𑀥𑀺𑀁 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑁋 𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸.

𑀦 𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄𑀢𑀺. 𑀅𑀦𑁆𑀦𑀁 𑀯𑀸 𑀦 𑀮𑀪𑀸𑀫𑀺 ¶ , 𑀧𑀸𑀦𑀁 𑀯𑀸 𑀦 𑀮𑀪𑀸𑀫𑀺, 𑀯𑀢𑁆𑀣𑀁 𑀯𑀸 𑀦 𑀮𑀪𑀸𑀫𑀺, 𑀓𑀼𑀮𑀁 𑀯𑀸 𑀦 𑀮𑀪𑀸𑀫𑀺, 𑀕𑀡𑀁 𑀯𑀸 𑀦 𑀮𑀪𑀸𑀫𑀺, 𑀆𑀯𑀸𑀲𑀁 𑀯𑀸 𑀦 𑀮𑀪𑀸𑀫𑀺, 𑀮𑀸𑀪𑀁 𑀯𑀸 𑀦 𑀮𑀪𑀸𑀫𑀺, 𑀬𑀲𑀁 𑀯𑀸 𑀦 𑀮𑀪𑀸𑀫𑀺, 𑀧𑀲𑀁𑀲𑀁 𑀯𑀸 𑀦 𑀮𑀪𑀸𑀫𑀺, 𑀲𑀼𑀔𑀁 𑀯𑀸 𑀦 𑀮𑀪𑀸𑀫𑀺, 𑀘𑀻𑀯𑀭𑀁 𑀯𑀸 𑀦 𑀮𑀪𑀸𑀫𑀺, 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀦 𑀮𑀪𑀸𑀫𑀺, 𑀲𑁂𑀦𑀸𑀲𑀦𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀯𑀸 𑀦 𑀮𑀪𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀁 𑀯𑀸 𑀦 𑀮𑀪𑀸𑀫𑀺, ‘‘𑀅𑀧𑁆𑀧𑀜𑁆𑀜𑀸𑀢𑁄𑀫𑁆𑀳𑀻’’𑀢𑀺 𑀦 𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 𑀦 𑀧𑀭𑀺𑀢𑁆𑀢𑀲𑁂𑀬𑁆𑀬 𑀦 𑀪𑀸𑀬𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬 ¶ , 𑀅𑀪𑀻𑀭𑀽 𑀅𑀲𑁆𑀲 𑀅𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻, 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀦 𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄.

‘‘𑀅𑀦𑁆𑀦𑀸𑀦𑀫𑀣𑁄 𑀧𑀸𑀦𑀸𑀦𑀁, 𑀔𑀸𑀤𑀦𑀻𑀬𑀸𑀦𑀫𑀣𑁄𑀧𑀺 𑀯𑀢𑁆𑀣𑀸𑀦𑀁;

𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸, 𑀦 𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄’’𑀢𑀺.

𑀛𑀸𑀬𑀻 ¶ ¶ 𑀦 𑀧𑀸𑀤𑀮𑁄𑀮𑀲𑁆𑀲, 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬;

𑀅𑀣𑀸𑀲𑀦𑁂𑀲𑀼 𑀲𑀬𑀦𑁂𑀲𑀼, 𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬.

𑀛𑀸𑀬𑀻 𑀦 𑀧𑀸𑀤𑀮𑁄𑀮𑀲𑁆𑀲𑀸𑀢𑀺. 𑀛𑀸𑀬𑀻𑀢𑀺 𑀧𑀞𑀫𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀤𑀼𑀢𑀺𑀬𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀢𑀢𑀺𑀬𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀘𑀢𑀼𑀢𑁆𑀣𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀧𑁆𑀧𑀻𑀢𑀺𑀓𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀦𑀺𑀧𑁆𑀧𑀻𑀢𑀺𑀓𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀧𑀻𑀢𑀺𑀲𑀳𑀕𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀸𑀢𑀲𑀳𑀕𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀼𑀔𑀲𑀳𑀕𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀼𑀜𑁆𑀜𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀦𑀺𑀫𑀺𑀢𑁆𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀧𑁆𑀧𑀡𑀺𑀳𑀺𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀮𑁄𑀓𑀺𑀬𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀮𑁄𑀓𑀼𑀢𑁆𑀢𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀛𑀸𑀦𑀭𑀢𑁄 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀧𑀭𑀫𑀢𑁆𑀣𑀕𑀭𑀼𑀓𑁄𑀢𑀺 [𑀲𑀤𑀢𑁆𑀣𑀕𑀭𑀼𑀓𑁄𑀢𑀺 (𑀲𑀻. 𑀲𑁆𑀬𑀸.)] 𑁋 𑀛𑀸𑀬𑀻.

𑀦 ¶ 𑀧𑀸𑀤𑀮𑁄𑀮𑀲𑁆𑀲𑀸𑀢𑀺. 𑀓𑀣𑀁 𑀧𑀸𑀤𑀮𑁄𑀮𑁄 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀸𑀤𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀕𑀸𑀫𑁂𑀦 𑀕𑀸𑀫𑀁 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦𑀕𑀭𑁂𑀦 𑀦𑀕𑀭𑀁 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀫𑁆𑀧𑀺 𑀧𑀸𑀤𑀮𑁄𑀮𑁄 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀦𑁆𑀢𑁄𑀧𑀺𑀲𑀗𑁆𑀖𑀸𑀭𑀸𑀫𑁂 𑀧𑀸𑀤𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀦 𑀅𑀢𑁆𑀣𑀳𑁂𑀢𑀼 𑀦 𑀓𑀸𑀭𑀡𑀳𑁂𑀢𑀼 𑀉𑀤𑁆𑀥𑀢𑁄 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 ¶ 𑀧𑀭𑀺𑀯𑁂𑀡𑀢𑁄 𑀧𑀭𑀺𑀯𑁂𑀡𑀁 𑀕𑀘𑁆𑀙𑀢𑀺 𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺 𑀅𑀟𑁆𑀠𑀬𑁄𑀕𑀢𑁄 ¶ 𑀅𑀟𑁆𑀠𑀬𑁄𑀕𑀁 𑀕𑀘𑁆𑀙𑀢𑀺 𑀧𑀸𑀲𑀸𑀤𑀢𑁄 𑀧𑀸𑀲𑀸𑀤𑀁 𑀕𑀘𑁆𑀙𑀢𑀺 𑀳𑀫𑁆𑀫𑀺𑀬𑀢𑁄 𑀳𑀫𑁆𑀫𑀺𑀬𑀁 𑀕𑀘𑁆𑀙𑀢𑀺 𑀕𑀼𑀳𑀸𑀬 𑀕𑀼𑀳𑀁 𑀕𑀘𑁆𑀙𑀢𑀺 𑀮𑁂𑀡𑀢𑁄 𑀮𑁂𑀡𑀁 𑀕𑀘𑁆𑀙𑀢𑀺 𑀓𑀼𑀝𑀺𑀢𑁄 𑀓𑀼𑀝𑀺𑀁 𑀕𑀘𑁆𑀙𑀢𑀺 𑀓𑀽𑀝𑀸𑀕𑀸𑀭𑀢𑁄 𑀓𑀽𑀝𑀸𑀕𑀸𑀭𑀁 𑀕𑀘𑁆𑀙𑀢𑀺 𑀅𑀝𑁆𑀝𑀢𑁄 𑀅𑀝𑁆𑀝𑀁 𑀕𑀘𑁆𑀙𑀢𑀺 𑀫𑀸𑀴𑀢𑁄 𑀫𑀸𑀴𑀁 𑀕𑀘𑁆𑀙𑀢𑀺 𑀉𑀤𑁆𑀤𑀡𑁆𑀟𑀢𑁄 𑀉𑀤𑁆𑀤𑀡𑁆𑀟𑀁 𑀕𑀘𑁆𑀙𑀢𑀺 𑀉𑀧𑀝𑁆𑀞𑀸𑀦𑀲𑀸𑀮𑀢𑁄 𑀉𑀧𑀝𑁆𑀞𑀸𑀦𑀲𑀸𑀮𑀁 𑀕𑀘𑁆𑀙𑀢𑀺 𑀫𑀡𑁆𑀟𑀮𑀫𑀸𑀴𑀢𑁄 𑀫𑀡𑁆𑀟𑀮𑀫𑀸𑀴𑀁 𑀕𑀘𑁆𑀙𑀢𑀺 𑀭𑀼𑀓𑁆𑀔𑀫𑀽𑀮𑀢𑁄 𑀭𑀼𑀓𑁆𑀔𑀫𑀽𑀮𑀁 𑀕𑀘𑁆𑀙𑀢𑀺. 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀦𑀺𑀲𑀻𑀤𑀦𑁆𑀢𑀺 𑀢𑀳𑀺𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀏𑀓𑀲𑁆𑀲 𑀯𑀸 𑀤𑀼𑀢𑀺𑀬𑁄 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀢𑀺𑀬𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀯𑀸 𑀘𑀢𑀼𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀣 𑀩𑀳𑀼𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀮𑀧𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀬𑀸𑀦𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺 𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸. 𑀏𑀯𑀫𑁆𑀧𑀺 𑀧𑀸𑀤𑀮𑁄𑀮𑁄 𑀳𑁄𑀢𑀺.

𑀦 ¶ 𑀧𑀸𑀤𑀮𑁄𑀮𑀲𑁆𑀲𑀸𑀢𑀺. 𑀧𑀸𑀤𑀮𑁄𑀮𑀺𑀬𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀧𑀸𑀤𑀮𑁄𑀮𑀺𑀬𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 ¶ 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬 𑀘𑀭𑁂𑀬𑁆𑀬 𑀯𑀺𑀘𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬, 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀅𑀲𑁆𑀲 𑀧𑀝𑀺𑀲𑀮𑁆𑀮𑀸𑀦𑀭𑀢𑁄 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 ¶ 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁 𑀛𑀸𑀬𑀻 𑀛𑀸𑀦𑀭𑀢𑁄 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀧𑀭𑀫𑀢𑁆𑀣𑀕𑀭𑀼𑀓𑁄𑀢𑀺 𑁋 𑀛𑀸𑀬𑀻 𑀦 𑀧𑀸𑀤𑀮𑁄𑀮𑀲𑁆𑀲.

𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸, 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸, 𑀬𑀁 𑀏𑀯𑀭𑀽𑀧𑀁 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀢𑁆𑀢𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀼𑀓𑁆𑀓𑀼𑀘𑁆𑀘𑀁.

𑀅𑀧𑀺 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑁋 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄? ‘‘𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 ¶ 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄, ‘‘𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀯𑀘𑀻𑀲𑀼𑀘𑀭𑀺𑀢’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄, ‘‘𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺…𑀧𑁂… ‘‘𑀓𑀢𑁄 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀓𑀢𑀸 𑀫𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁…𑀧𑁂… 𑀫𑀦𑁄𑀯𑀺𑀮𑁂𑀔𑁄, ‘‘𑀓𑀢𑀁 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀁… 𑀓𑀢𑁄 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄… 𑀓𑀢𑁄 𑀫𑁂 𑀫𑀼𑀲𑀸𑀯𑀸𑀤𑁄… 𑀓𑀢𑀸 𑀫𑁂 𑀧𑀺𑀲𑀼𑀡𑀯𑀸𑀘𑀸… 𑀓𑀢𑀸 𑀫𑁂 𑀨𑀭𑀼𑀲𑀯𑀸𑀘𑀸… 𑀓𑀢𑁄 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁄… 𑀓𑀢𑀸 𑀫𑁂 𑀅𑀪𑀺𑀚𑁆𑀛𑀸… 𑀓𑀢𑁄 𑀫𑁂 𑀩𑁆𑀬𑀸𑀧𑀸𑀤𑁄… 𑀓𑀢𑀸 𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 ¶ . 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄.

𑀅𑀣 𑀯𑀸 ‘‘𑀲𑀻𑀮𑁂𑀲𑀼𑀫𑁆𑀳𑀺 ¶ 𑀦 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄, ‘‘𑀇𑀦𑁆𑀤𑁆𑀭𑀺𑀬𑁂𑀲𑀼𑀫𑁆𑀳𑀺 𑀅𑀕𑀼𑀢𑁆𑀢𑀤𑁆𑀯𑀸𑀭𑁄’’𑀢𑀺…𑀧𑁂… ‘‘𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀫𑁆𑀳𑀻’’𑀢𑀺… ‘‘𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁄𑀫𑁆𑀳𑀻’’𑀢𑀺… ‘‘𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 ¶ 𑀇𑀤𑁆𑀥𑀺𑀧𑀸𑀤𑀸’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘 𑀩𑀮𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺… ‘‘𑀅𑀪𑀸𑀯𑀺𑀢𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺… ‘‘𑀤𑀼𑀓𑁆𑀔𑀁 𑀫𑁂 𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺… ‘‘𑀲𑀫𑀼𑀤𑀬𑁄 𑀫𑁂 𑀅𑀧𑁆𑀧𑀳𑀻𑀦𑁄’’𑀢𑀺… ‘‘𑀫𑀕𑁆𑀕𑁄 𑀫𑁂 𑀅𑀪𑀸𑀯𑀺𑀢𑁄’’𑀢𑀺… ‘‘𑀦𑀺𑀭𑁄𑀥𑁄 𑀫𑁂 𑀅𑀲𑀘𑁆𑀙𑀺𑀓𑀢𑁄’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑀸 𑀆𑀭𑀫𑁂𑀬𑁆𑀬 𑀯𑀺𑀭𑀫𑁂𑀬𑁆𑀬 𑀧𑀝𑀺𑀯𑀺𑀭𑀫𑁂𑀬𑁆𑀬 𑀓𑀼𑀓𑁆𑀓𑀼𑀘𑁆𑀘𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬. 𑀓𑀼𑀓𑁆𑀓𑀼𑀘𑁆𑀘𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸.

𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻 𑀅𑀲𑁆𑀲 𑀲𑀸𑀢𑀘𑁆𑀘𑀓𑀸𑀭𑀻 𑀅𑀝𑁆𑀞𑀺𑀢𑀓𑀸𑀭𑀻 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀤𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁, 𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺? 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀣𑀸𑀫𑁄 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 ¶ 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 ¶ . ‘‘𑀓𑀤𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁… 𑀓𑀤𑀸𑀳𑀁 𑀅𑀧𑀭𑀺𑀜𑁆𑀜𑀸𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑁂𑀬𑁆𑀬𑀁, 𑀅𑀧𑁆𑀧𑀳𑀻𑀦𑁂 𑀯𑀸 𑀓𑀺𑀮𑁂𑀲𑁂 𑀧𑀚𑀳𑁂𑀬𑁆𑀬𑀁, 𑀅𑀪𑀸𑀯𑀺𑀢𑀁 𑀯𑀸 𑀫𑀕𑁆𑀕𑀁 𑀪𑀸𑀯𑁂𑀬𑁆𑀬𑀁, 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺? 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀣𑀸𑀫𑁄 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 ¶ 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬.

𑀅𑀣𑀸𑀲𑀦𑁂𑀲𑀼 𑀲𑀬𑀦𑁂𑀲𑀼, 𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬𑀸𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀲𑀦𑀁 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀦𑀺𑀲𑀻𑀤𑀢𑀺 𑁋 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄. 𑀲𑀬𑀦𑀁 𑀯𑀼𑀘𑁆𑀘𑀢𑀺 𑀲𑁂𑀦𑀸𑀲𑀦𑀁 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸𑀢𑀺 𑁋 𑀅𑀣𑀸𑀲𑀦𑁂𑀲𑀼 𑀲𑀬𑀦𑁂𑀲𑀼.

𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬𑀸𑀢𑀺. 𑀅𑀧𑁆𑀧𑀲𑀤𑁆𑀤𑁂𑀲𑀼 𑀅𑀧𑁆𑀧𑀦𑀺𑀕𑁆𑀖𑁄𑀲𑁂𑀲𑀼 𑀯𑀺𑀚𑀦𑀯𑀸𑀢𑁂𑀲𑀼 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑁂𑀲𑀼 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀘𑀭𑁂𑀬𑁆𑀬 𑀯𑀺𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀅𑀣𑀸𑀲𑀦𑁂𑀲𑀼 𑀲𑀬𑀦𑁂𑀲𑀼 𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬.

‘‘𑀛𑀸𑀬𑀻 𑀦 𑀧𑀸𑀤𑀮𑁄𑀮𑀲𑁆𑀲, 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬;

𑀅𑀣𑀸𑀲𑀦𑁂𑀲𑀼 ¶ 𑀲𑀬𑀦𑁂𑀲𑀼, 𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬𑀸’’𑀢𑀺.

𑀦𑀺𑀤𑁆𑀤𑀁 𑀦 𑀩𑀳𑀼𑀮𑀻𑀓𑀭𑁂𑀬𑁆𑀬, 𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬 𑀆𑀢𑀸𑀧𑀻;

𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀁, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀚𑀳𑁂 𑀲𑀯𑀺𑀪𑀽𑀲𑀁.

𑀦𑀺𑀤𑁆𑀤𑀁 𑀦 𑀩𑀳𑀼𑀮𑀻𑀓𑀭𑁂𑀬𑁆𑀬𑀸𑀢𑀺. 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙𑀓𑁄𑀝𑁆𑀞𑀸𑀲𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀘𑀓𑁄𑀝𑁆𑀞𑀸𑀲𑀁 𑀧𑀝𑀺𑀧𑀚𑁆𑀚𑁂𑀬𑁆𑀬 𑀏𑀓𑀓𑁄𑀝𑁆𑀞𑀸𑀲𑀁 𑀦𑀺𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑁋 𑀦𑀺𑀤𑁆𑀤𑀁 𑀦 𑀩𑀳𑀼𑀮𑀻𑀓𑀭𑁂𑀬𑁆𑀬.

𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬 𑀆𑀢𑀸𑀧𑀻𑀢𑀺. 𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀬𑁆𑀬, 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀬𑁆𑀬, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 ¶ 𑀬𑀸𑀫𑀁 ¶ 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀧𑀸𑀤𑁂𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀧𑀘𑁆𑀘𑀼𑀝𑁆𑀞𑀸𑀬 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀬𑁆𑀬.

𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬𑀸𑀢𑀺 𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬 𑀲𑀫𑁆𑀪𑀚𑁂𑀬𑁆𑀬 𑀲𑁂𑀯𑁂𑀬𑁆𑀬 𑀦𑀺𑀲𑁂𑀯𑁂𑀬𑁆𑀬 𑀲𑀁𑀲𑁂𑀯𑁂𑀬𑁆𑀬 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑁋 𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬.

𑀆𑀢𑀸𑀧𑀻𑀢𑀺. 𑀆𑀢𑀧𑁆𑀧𑀁 𑀯𑀼𑀘𑁆𑀘𑀢𑀺 𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑀻. 𑀲𑁆𑀬𑀸.)]. 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑁆𑀓𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀣𑀸𑀫𑁄 𑀞𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀳𑁄 𑀯𑀻𑀭𑀺𑀬𑀁 ¶ 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮𑀁 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀇𑀫𑀺𑀦𑀸 𑀆𑀢𑀸𑀧𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄 𑀲𑁄 𑀯𑀼𑀘𑁆𑀘𑀢𑀺 𑀆𑀢𑀸𑀧𑀻𑀢𑀺 𑁋 𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬 𑀆𑀢𑀸𑀧𑀻.

𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀁, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀚𑀳𑁂 𑀲𑀯𑀺𑀪𑀽𑀲𑀦𑁆𑀢𑀺. 𑀢𑀦𑁆𑀤𑀻𑀢𑀺 [𑀢𑀦𑁆𑀤𑀺𑀦𑁆𑀢𑀺 (𑀲𑀻.)] 𑀢𑀦𑁆𑀤𑀻 𑀢𑀦𑁆𑀤𑀺𑀬𑀦𑀸 𑀢𑀦𑁆𑀤𑀺𑀬𑀺𑀢𑀢𑁆𑀢𑀁 [𑀦𑀢𑁆𑀣𑀺 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂𑀧𑀺] 𑀢𑀦𑁆𑀤𑀺𑀫𑀦𑀓𑀢𑀸 𑀆𑀮𑀲𑁆𑀬𑀁 𑀆𑀮𑀲𑁆𑀬𑀸𑀬𑀦𑀸 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁. 𑀫𑀸𑀬𑀸 𑀯𑀼𑀘𑁆𑀘𑀢𑀺 𑀯𑀜𑁆𑀘𑀦𑀺𑀓𑀸 𑀘𑀭𑀺𑀬𑀸. 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸…𑀧𑁂… 𑀯𑀸𑀘𑀸𑀬 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺. 𑀫𑀸 𑀫𑀁 𑀚𑀜𑁆𑀜𑀸𑀢𑀺 [𑀚𑀜𑁆𑀜𑀽𑀢𑀺 (𑀓.)] 𑀇𑀘𑁆𑀙𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀲𑀗𑁆𑀓𑀧𑁆𑀧𑁂𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀯𑀸𑀘𑀁 𑀪𑀸𑀲𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺. 𑀬𑀸 𑀏𑀯𑀭𑀽𑀧𑀸 ¶ 𑀫𑀸𑀬𑀸𑀯𑀺𑀢𑀸 𑀅𑀘𑁆𑀘𑀲𑀭𑀸 𑀯𑀜𑁆𑀘𑀦𑀸 𑀦𑀺𑀓𑀢𑀺 𑀦𑀺𑀓𑀺𑀭𑀡𑀸 𑀧𑀭𑀺𑀳𑀭𑀡𑀸 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸 𑀙𑀸𑀤𑀦𑀸 𑀧𑀭𑀺𑀘𑁆𑀙𑀸𑀤𑀦𑀸 [𑀧𑀝𑀺𑀘𑁆𑀙𑀸𑀤𑀦𑀸 (𑀲𑀻. 𑀓.) 𑀫𑀳𑀸𑀦𑀺𑀤𑁆𑀤𑁂𑀲𑁂] 𑀅𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀁 𑀅𑀦𑀸𑀯𑀺𑀓𑀫𑁆𑀫𑀁 𑀯𑁄𑀘𑁆𑀙𑀸𑀤𑀦𑀸 𑀧𑀸𑀧𑀓𑀺𑀭𑀺𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀬𑀸. 𑀳𑀲𑁆𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀅𑀢𑀺𑀯𑁂𑀮𑀁 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑀼𑀫𑀸𑀭𑀓𑀫𑀺𑀤𑀁, 𑀪𑀺𑀓𑁆𑀔𑀯𑁂 ¶ , 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑀤𑀺𑀤𑀁 𑀅𑀢𑀺𑀯𑁂𑀮𑀁 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀺𑀢’’𑀦𑁆𑀢𑀺.

𑀔𑀺𑀟𑁆𑀟𑀸𑀢𑀺 𑀤𑁆𑀯𑁂 𑀔𑀺𑀟𑁆𑀟𑀸 𑁋 𑀓𑀸𑀬𑀺𑀓𑀸 𑀘 𑀔𑀺𑀟𑁆𑀟𑀸 𑀯𑀸𑀘𑀲𑀺𑀓𑀸 𑀘 𑀔𑀺𑀟𑁆𑀟𑀸. 𑀓𑀢𑀫𑀸 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸? 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀲𑁆𑀲𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀭𑀣𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀽𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀝𑁆𑀞𑀧𑀤𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺 ¶ , 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀓𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺 ¶ , 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺 𑁋 𑀅𑀬𑀁 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸. 𑀓𑀢𑀫𑀸 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸? 𑀫𑀼𑀔𑀪𑁂𑀭𑀺𑀓𑀁 [𑀫𑀼𑀔𑀪𑁂𑀭𑀺𑀬𑀁 (𑀲𑁆𑀬𑀸.)] 𑀫𑀼𑀔𑀸𑀮𑀫𑁆𑀩𑀭𑀁 𑀫𑀼𑀔𑀟𑀺𑀡𑁆𑀟𑀺𑀫𑀓𑀁 [𑀫𑀼𑀔𑀤𑁂𑀡𑁆𑀟𑀺𑀫𑀓𑀁 (𑀲𑀻. 𑀲𑁆𑀬𑀸.)] 𑀫𑀼𑀔𑀯𑀮𑀺𑀫𑀓𑀁 𑀫𑀼𑀔𑀪𑁂𑀭𑀼𑀴𑀓𑀁 [𑀫𑀼𑀔𑀪𑁂𑀭𑀼𑀮𑀓𑀁 (𑀲𑀻.)] 𑀫𑀼𑀔𑀤𑀤𑁆𑀤𑀭𑀺𑀓𑀁 𑀦𑀸𑀝𑀓𑀁 𑀮𑀸𑀧𑀁 𑀕𑀻𑀢𑀁 𑀤𑀯𑀓𑀫𑁆𑀫𑀁 𑁋 𑀅𑀬𑀁 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸.

𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄 𑀯𑀲𑀮𑀥𑀫𑁆𑀫𑁄 𑀤𑀼𑀝𑁆𑀞𑀼𑀮𑁆𑀮𑁄 𑀑𑀤𑀓𑀦𑁆𑀢𑀺𑀓𑁄 𑀭𑀳𑀲𑁆𑀲𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄? 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺, 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀬𑀣𑀸 𑀉𑀪𑁄 𑀓𑀮𑀳𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀉𑀪𑁄 𑀪𑀲𑁆𑀲𑀓𑀸𑀭𑀓𑀸… 𑀉𑀪𑁄 𑀅𑀥𑀺𑀓𑀭𑀡𑀓𑀸𑀭𑀓𑀸… 𑀉𑀪𑁄 𑀯𑀺𑀯𑀸𑀤𑀓𑀸𑀭𑀓𑀸… 𑀉𑀪𑁄 𑀯𑀸𑀤𑀺𑀦𑁄… 𑀉𑀪𑁄 𑀲𑀮𑁆𑀮𑀸𑀧𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 ¶ ; 𑀏𑀯𑀫𑁂𑀯 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺, 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀯𑀺𑀪𑀽𑀲𑀸𑀢𑀺 𑀤𑁆𑀯𑁂 𑀯𑀺𑀪𑀽𑀲𑀸 𑁋 𑀅𑀢𑁆𑀣𑀺 𑀅𑀕𑀸𑀭𑀺𑀬𑀲𑁆𑀲 𑀯𑀺𑀪𑀽𑀲𑀸, 𑀅𑀢𑁆𑀣𑀺 𑀧𑀩𑁆𑀩𑀚𑀺𑀢𑀲𑁆𑀲 𑀯𑀺𑀪𑀽𑀲𑀸. 𑀓𑀢𑀫𑀸 𑀅𑀕𑀸𑀭𑀺𑀬𑀲𑁆𑀲 𑀯𑀺𑀪𑀽𑀲𑀸? 𑀓𑁂𑀲𑀸 𑀘 𑀫𑀲𑁆𑀲𑀼 𑀘 𑀫𑀸𑀮𑀸 𑀘 𑀕𑀦𑁆𑀥𑀸 ¶ 𑀘 𑀯𑀺𑀮𑁂𑀧𑀦𑀸 𑀘 𑀆𑀪𑀭𑀡𑀸 𑀘 𑀧𑀺𑀮𑀦𑁆𑀥𑀦𑀸 𑀘 𑀯𑀢𑁆𑀣𑀜𑁆𑀘 𑀲𑀬𑀦𑀸𑀲𑀦𑀜𑁆𑀘 𑀯𑁂𑀞𑀦𑀜𑁆𑀘 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀁 𑀦𑁆𑀳𑀸𑀧𑀦𑀁 𑀲𑀫𑁆𑀩𑀸𑀳𑀦𑀁 𑀆𑀤𑀸𑀲𑀁 𑀅𑀜𑁆𑀚𑀦𑀁 𑀫𑀸𑀮𑀸𑀯𑀺𑀮𑁂𑀧𑀦𑀁 𑀫𑀼𑀔𑀘𑀼𑀡𑁆𑀡𑀓𑀁 𑀫𑀼𑀔𑀮𑁂𑀧𑀁 𑀳𑀢𑁆𑀣𑀩𑀦𑁆𑀥𑀁 𑀲𑀺𑀔𑀸𑀩𑀦𑁆𑀥𑀁 [𑀯𑀲𑀺𑀓𑁆𑀔𑀸𑀩𑀦𑁆𑀥𑀁 (𑀲𑁆𑀬𑀸.)] 𑀤𑀡𑁆𑀟𑀦𑀸𑀴𑀺𑀬𑀁 𑀔𑀕𑁆𑀕𑀁 𑀙𑀢𑁆𑀢𑀁 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸 𑀉𑀡𑁆𑀳𑀻𑀲𑀁 𑀫𑀡𑀺𑀁 𑀯𑀸𑀴𑀩𑀻𑀚𑀦𑀺𑀁 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀤𑀻𑀖𑀤𑀲𑀸𑀦𑀺 𑀇𑀢𑀺 𑀯𑀸 𑁋 𑀅𑀬𑀁 𑀅𑀕𑀸𑀭𑀺𑀬𑀲𑁆𑀲 𑀯𑀺𑀪𑀽𑀲𑀸. 𑀓𑀢𑀫𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀺𑀪𑀽𑀲𑀸? 𑀘𑀻𑀯𑀭𑀫𑀡𑁆𑀟𑀦𑀸 ¶ 𑀧𑀢𑁆𑀢𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲 𑀩𑀸𑀳𑀺𑀭𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀸𑀦𑀁 𑀫𑀡𑁆𑀟𑀦𑀸 𑀯𑀺𑀪𑀽𑀲𑀦𑀸 𑀓𑁂𑀴𑀦𑀸 𑀧𑀭𑀺𑀓𑁂𑀴𑀦𑀸 𑀕𑁂𑀥𑀺𑀢𑀢𑀸 𑀕𑁂𑀥𑀺𑀢𑀢𑁆𑀢𑀁 𑀘𑀧𑀮𑀢𑀸 𑀘𑀸𑀧𑀮𑁆𑀬𑀁 𑁋 𑀅𑀬𑀁 𑀧𑀩𑁆𑀩𑀚𑀺𑀢𑀲𑁆𑀲 𑀯𑀺𑀪𑀽𑀲𑀸.

𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀁, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀚𑀳𑁂 𑀲𑀯𑀺𑀪𑀽𑀲𑀦𑁆𑀢𑀺. 𑀢𑀦𑁆𑀤𑀺𑀜𑁆𑀘 𑀫𑀸𑀬𑀜𑁆𑀘 𑀳𑀲𑁆𑀲𑀜𑁆𑀘 𑀔𑀺𑀟𑁆𑀟𑀜𑁆𑀘 𑀫𑁂𑀣𑀼𑀦𑀥𑀫𑁆𑀫𑀜𑁆𑀘 𑀲𑀯𑀺𑀪𑀽𑀲𑀁 𑀲𑀧𑀭𑀺𑀯𑀸𑀭𑀁 𑀲𑀧𑀭𑀺𑀪𑀡𑁆𑀟𑀁 𑀲𑀧𑀭𑀺𑀓𑁆𑀔𑀸𑀭𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀁, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀚𑀳𑁂 𑀲𑀯𑀺𑀪𑀽𑀲𑀁.

‘‘𑀦𑀺𑀤𑁆𑀤𑀁 ¶ 𑀦 𑀩𑀳𑀼𑀮𑀻𑀓𑀭𑁂𑀬𑁆𑀬, 𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬 𑀆𑀢𑀸𑀧𑀻;

𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀁, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀚𑀳𑁂 𑀲𑀯𑀺𑀪𑀽𑀲’’𑀦𑁆𑀢𑀺.

𑀆𑀣𑀩𑁆𑀩𑀡𑀁 ¶ 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁, 𑀦𑁄 𑀯𑀺𑀤𑀳𑁂 𑀅𑀣𑁄𑀧𑀺 𑀦𑀓𑁆𑀔𑀢𑁆𑀢𑀁;

𑀯𑀺𑀭𑀼𑀢𑀜𑁆𑀘 ¶ 𑀕𑀩𑁆𑀪𑀓𑀭𑀡𑀁, 𑀢𑀺𑀓𑀺𑀘𑁆𑀙𑀁 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬.

𑀆𑀣𑀩𑁆𑀩𑀡𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁, 𑀦𑁄 𑀯𑀺𑀤𑀳𑁂 𑀅𑀣𑁄𑀧𑀺 𑀦𑀓𑁆𑀔𑀢𑁆𑀢𑀦𑁆𑀢𑀺. 𑀆𑀣𑀩𑁆𑀩𑀡𑀺𑀓𑀸 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀺, 𑀦𑀕𑀭𑁂 𑀯𑀸 𑀭𑀼𑀤𑁆𑀥𑁂 [𑀭𑀼𑀦𑁆𑀥𑁂 (𑀓.)] 𑀲𑀗𑁆𑀕𑀸𑀫𑁂 𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀧𑀭𑀲𑁂𑀦𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀧𑀘𑁆𑀘𑀸𑀫𑀺𑀢𑁆𑀢𑁂𑀲𑀼 𑀈𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀧𑀤𑁆𑀤𑀯𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀭𑁄𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀧𑀚𑁆𑀚𑀭𑀓𑀁 𑀓𑀭𑁄𑀦𑁆𑀢𑀺, 𑀲𑀽𑀮𑀁 𑀓𑀭𑁄𑀦𑁆𑀢𑀺, 𑀯𑀺𑀲𑀽𑀘𑀺𑀓𑀁 𑀓𑀭𑁄𑀦𑁆𑀢𑀺, 𑀧𑀓𑁆𑀔𑀦𑁆𑀤𑀺𑀓𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀆𑀣𑀩𑁆𑀩𑀡𑀺𑀓𑀸 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀺.

𑀲𑀼𑀧𑀺𑀦𑀧𑀸𑀞𑀓𑀸 𑀲𑀼𑀧𑀺𑀦𑀁 𑀆𑀤𑀺𑀲𑀦𑁆𑀢𑀺, 𑀬𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀏𑀯𑀁 𑀯𑀺𑀧𑀸𑀓𑁄 𑀳𑁄𑀢𑀺. 𑀬𑁄 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 [𑀫𑀚𑁆𑀛𑀦𑁆𑀢𑀺𑀓𑀲𑀫𑀬𑀁 (𑀩𑀳𑀽𑀲𑀼)] 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀏𑀯𑀁 𑀯𑀺𑀧𑀸𑀓𑁄 𑀳𑁄𑀢𑀺. 𑀬𑁄 𑀲𑀸𑀬𑀦𑁆𑀳𑀲𑀫𑀬𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀏𑀯𑀁 𑀯𑀺𑀧𑀸𑀓𑁄 𑀳𑁄𑀢𑀺. 𑀬𑁄 𑀧𑀼𑀭𑀺𑀫𑁂 𑀬𑀸𑀫𑁂…𑀧𑁂… 𑀬𑁄 𑀫𑀚𑁆𑀛𑀺𑀫𑁂 𑀬𑀸𑀫𑁂… 𑀬𑁄 𑀧𑀘𑁆𑀙𑀺𑀫𑁂 𑀬𑀸𑀫𑁂… 𑀬𑁄 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄… 𑀬𑁄 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄… 𑀬𑁄 𑀉𑀢𑁆𑀢𑀸𑀦𑀁 𑀦𑀺𑀧𑀦𑁆𑀦𑁄… 𑀬𑁄 𑀅𑀯𑀓𑀼𑀚𑁆𑀚 𑀦𑀺𑀧𑀦𑁆𑀦𑁄… 𑀬𑁄 𑀘𑀦𑁆𑀤𑀁 𑀧𑀲𑁆𑀲𑀢𑀺… 𑀬𑁄 𑀲𑀽𑀭𑀺𑀬𑀁 𑀧𑀲𑁆𑀲𑀢𑀺… 𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀧𑀲𑁆𑀲𑀢𑀺… 𑀬𑁄 𑀲𑀺𑀦𑁂𑀭𑀼𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀧𑀲𑁆𑀲𑀢𑀺… 𑀬𑁄 𑀳𑀢𑁆𑀣𑀺𑀁 𑀧𑀲𑁆𑀲𑀢𑀺… 𑀬𑁄 𑀅𑀲𑁆𑀲𑀁 𑀧𑀲𑁆𑀲𑀢𑀺… 𑀬𑁄 𑀭𑀣𑀁 𑀧𑀲𑁆𑀲𑀢𑀺… 𑀬𑁄 𑀧𑀢𑁆𑀢𑀺𑀁 𑀧𑀲𑁆𑀲𑀢𑀺… 𑀬𑁄 𑀲𑁂𑀦𑀸𑀩𑁆𑀬𑀽𑀳𑀁 𑀧𑀲𑁆𑀲𑀢𑀺… 𑀬𑁄 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺… 𑀬𑁄 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺… 𑀬𑁄 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺… 𑀬𑁄 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓𑀁 [𑀧𑁄𑀓𑁆𑀔𑀭𑀡𑀺𑀭𑀸𑀫𑀡𑁂𑀬𑁆𑀬𑀓𑀁 (𑀲𑁆𑀬𑀸.)] 𑀧𑀲𑁆𑀲𑀢𑀺, 𑀏𑀯𑀁 𑀯𑀺𑀧𑀸𑀓𑁄 𑀳𑁄𑀢𑀻𑀢𑀺. 𑀏𑀯𑀁 𑀲𑀼𑀧𑀺𑀦𑀧𑀸𑀞𑀓𑀸 𑀲𑀼𑀧𑀺𑀦𑀁 𑀆𑀤𑀺𑀲𑀦𑁆𑀢𑀺.

𑀮𑀓𑁆𑀔𑀡𑀧𑀸𑀞𑀓𑀸 ¶ 𑀮𑀓𑁆𑀔𑀡𑀁 𑀆𑀤𑀺𑀲𑀦𑁆𑀢𑀺 𑁋 𑀫𑀡𑀺𑀮𑀓𑁆𑀔𑀡𑀁 𑀤𑀡𑁆𑀟𑀮𑀓𑁆𑀔𑀡𑀁 ¶ 𑀯𑀢𑁆𑀣𑀮𑀓𑁆𑀔𑀡𑀁 𑀅𑀲𑀺𑀮𑀓𑁆𑀔𑀡𑀁 𑀉𑀲𑀼𑀮𑀓𑁆𑀔𑀡𑀁 𑀥𑀦𑀼𑀮𑀓𑁆𑀔𑀡𑀁 𑀆𑀯𑀼𑀥𑀮𑀓𑁆𑀔𑀡𑀁 𑀇𑀢𑁆𑀣𑀺𑀮𑀓𑁆𑀔𑀡𑀁 𑀧𑀼𑀭𑀺𑀲𑀮𑀓𑁆𑀔𑀡𑀁 𑀓𑀼𑀫𑀸𑀭𑀺𑀓𑀸𑀮𑀓𑁆𑀔𑀡𑀁 𑀓𑀼𑀫𑀸𑀭𑀮𑀓𑁆𑀔𑀡𑀁 𑀤𑀸𑀲𑀺𑀮𑀓𑁆𑀔𑀡𑀁 𑀤𑀸𑀲𑀮𑀓𑁆𑀔𑀡𑀁 𑀳𑀢𑁆𑀣𑀺𑀮𑀓𑁆𑀔𑀡𑀁 𑀅𑀲𑁆𑀲𑀮𑀓𑁆𑀔𑀡𑀁 𑀫𑀳𑀺𑀁𑀲𑀮𑀓𑁆𑀔𑀡𑀁 𑀉𑀲𑀪𑀮𑀓𑁆𑀔𑀡𑀁 𑀕𑁄𑀡𑀮𑀓𑁆𑀔𑀡𑀁 ¶ 𑀅𑀚𑀮𑀓𑁆𑀔𑀡𑀁 𑀫𑁂𑀡𑁆𑀟𑀮𑀓𑁆𑀔𑀡𑀁 ¶ 𑀓𑀼𑀓𑁆𑀓𑀼𑀝𑀮𑀓𑁆𑀔𑀡𑀁 𑀯𑀝𑁆𑀝𑀮𑀓𑁆𑀔𑀡𑀁 𑀕𑁄𑀥𑀸𑀮𑀓𑁆𑀔𑀡𑀁 𑀓𑀡𑁆𑀡𑀺𑀓𑀸𑀮𑀓𑁆𑀔𑀡𑀁 𑀓𑀘𑁆𑀙𑀧𑀮𑀓𑁆𑀔𑀡𑀁 𑀫𑀺𑀕𑀮𑀓𑁆𑀔𑀡𑀁 𑀇𑀢𑀺 𑀯𑀸𑀢𑀺. 𑀏𑀯𑀁 𑀮𑀓𑁆𑀔𑀡𑀧𑀸𑀞𑀓𑀸 𑀮𑀓𑁆𑀔𑀡𑀁 𑀆𑀤𑀺𑀲𑀦𑁆𑀢𑀺.

𑀦𑀓𑁆𑀔𑀢𑁆𑀢𑀧𑀸𑀞𑀓𑀸 𑀦𑀓𑁆𑀔𑀢𑁆𑀢𑀁 𑀆𑀤𑀺𑀲𑀦𑁆𑀢𑀺. 𑀅𑀝𑁆𑀞𑀯𑀻𑀲𑀢𑀺 𑀦𑀓𑁆𑀔𑀢𑁆𑀢𑀸𑀦𑀺. 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀖𑀭𑀧𑁆𑀧𑀯𑁂𑀲𑁄 𑀓𑀢𑁆𑀢𑀩𑁆𑀩𑁄, 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀫𑀓𑀼𑀝𑀁 𑀩𑀦𑁆𑀥𑀺𑀢𑀩𑁆𑀩𑀁, 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀯𑀸𑀭𑁂𑀬𑁆𑀬𑀁 𑀓𑀸𑀭𑁂𑀢𑀩𑁆𑀩𑀁, 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀩𑀻𑀚𑀦𑀻𑀳𑀸𑀭𑁄 [𑀩𑀻𑀚𑀦𑀺𑀳𑀸𑀭𑁄 (𑀲𑁆𑀬𑀸. 𑀓.)] 𑀓𑀢𑁆𑀢𑀩𑁆𑀩𑁄, 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀲𑀁𑀯𑀸𑀲𑁄 [𑀖𑀭𑀯𑀸𑀲𑁄 (𑀲𑁆𑀬𑀸.)] 𑀕𑀦𑁆𑀢𑀩𑁆𑀩𑁄𑀢𑀺. 𑀏𑀯𑀁 𑀦𑀓𑁆𑀔𑀢𑁆𑀢𑀧𑀸𑀞𑀓𑀸 𑀦𑀓𑁆𑀔𑀢𑁆𑀢𑀁 𑀆𑀤𑀺𑀲𑀦𑁆𑀢𑀺.

𑀆𑀣𑀩𑁆𑀩𑀡𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁, 𑀦𑁄 𑀯𑀺𑀤𑀳𑁂 𑀅𑀣𑁄𑀧𑀺 𑀦𑀓𑁆𑀔𑀢𑁆𑀢𑀦𑁆𑀢𑀺. 𑀆𑀣𑀩𑁆𑀩𑀡𑀜𑁆𑀘 𑀲𑀼𑀧𑀺𑀦𑀜𑁆𑀘 𑀮𑀓𑁆𑀔𑀡𑀜𑁆𑀘 𑀦𑀓𑁆𑀔𑀢𑁆𑀢𑀜𑁆𑀘 𑀦𑁄 𑀯𑀺𑀤𑀳𑁂𑀬𑁆𑀬 𑀦 𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬. 𑀅𑀣 𑀯𑀸 𑀦 𑀕𑀡𑁆𑀳𑁂𑀬𑁆𑀬 𑀦 𑀉𑀕𑁆𑀕𑀡𑁆𑀳𑁂𑀬𑁆𑀬 𑀦 𑀥𑀸𑀭𑁂𑀬𑁆𑀬 𑀦 𑀉𑀧𑀥𑀸𑀭𑁂𑀬𑁆𑀬 𑀦 𑀉𑀧𑀮𑀓𑁆𑀔𑁂𑀬𑁆𑀬 𑀦𑀧𑁆𑀧𑀬𑁄𑀚𑁂𑀬𑁆𑀬𑀸𑀢𑀺 𑁋 𑀆𑀣𑀩𑁆𑀩𑀡𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁, 𑀦𑁄 𑀯𑀺𑀤𑀳𑁂 𑀅𑀣𑁄𑀧𑀺 𑀦𑀓𑁆𑀔𑀢𑁆𑀢𑀁.

𑀯𑀺𑀭𑀼𑀢𑀜𑁆𑀘 𑀕𑀩𑁆𑀪𑀓𑀭𑀡𑀁, 𑀢𑀺𑀓𑀺𑀘𑁆𑀙𑀁 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬𑀸𑀢𑀺. 𑀯𑀺𑀭𑀼𑀢𑀁 𑀯𑀼𑀘𑁆𑀘𑀢𑀺 𑀫𑀺𑀕𑀯𑀸𑀓𑁆𑀓𑀁. 𑀫𑀺𑀕𑀯𑀸𑀓𑁆𑀓𑀧𑀸𑀞𑀓𑀸 [𑀫𑀺𑀕𑀘𑀓𑁆𑀓𑀁. 𑀫𑀺𑀕𑀘𑀓𑁆𑀓𑀧𑀸𑀞𑀓𑀸 (𑀲𑁆𑀬𑀸.)] 𑀫𑀺𑀕𑀯𑀸𑀓𑁆𑀓𑀁 𑀆𑀤𑀺𑀲𑀦𑁆𑀢𑀺 𑁋 𑀲𑀓𑀼𑀦𑁆𑀢𑀸𑀦𑀁 𑀯𑀸 𑀘𑀢𑀼𑀧𑁆𑀧𑀤𑀸𑀦𑀁 𑀯𑀸 𑀭𑀼𑀢𑀁 [𑀭𑀼𑀤𑀁 (𑀲𑁆𑀬𑀸.)] 𑀯𑀲𑁆𑀲𑀺𑀢𑀁 𑀚𑀸𑀦𑀦𑁆𑀢𑀻𑀢𑀺. 𑀏𑀯𑀁 𑀫𑀺𑀕𑀯𑀸𑀓𑁆𑀓𑀧𑀸𑀞𑀓𑀸 𑀫𑀺𑀕𑀯𑀸𑀓𑁆𑀓𑀁 𑀆𑀤𑀺𑀲𑀦𑁆𑀢𑀺. 𑀕𑀩𑁆𑀪𑀓𑀭𑀡𑀻𑀬𑀸 𑀕𑀩𑁆𑀪𑀁 𑀲𑀡𑁆𑀞𑀸𑀧𑁂𑀦𑁆𑀢𑀺. 𑀤𑁆𑀯𑀻𑀳𑀺 ¶ 𑀓𑀸𑀭𑀡𑁂𑀳𑀺 𑀕𑀩𑁆𑀪𑁄 𑀦 𑀲𑀡𑁆𑀞𑀸𑀢𑀺 𑁋 𑀧𑀸𑀡𑀓𑁂𑀳𑀺 𑀯𑀸 𑀯𑀸𑀢𑀓𑀼𑀧𑁆𑀧𑁂𑀳𑀺 𑀯𑀸. 𑀧𑀸𑀡𑀓𑀸𑀦𑀁 𑀯𑀸 𑀯𑀸𑀢𑀓𑀼𑀧𑁆𑀧𑀸𑀦𑀁 𑀯𑀸 𑀧𑀝𑀺𑀖𑀸𑀢𑀸𑀬 𑀑𑀲𑀥𑀁 𑀤𑁂𑀦𑁆𑀢𑀻𑀢𑀺. 𑀏𑀯𑀁 𑀕𑀩𑁆𑀪𑀓𑀭𑀡𑀻𑀬𑀸 𑀕𑀩𑁆𑀪𑀁 𑀲𑀡𑁆𑀞𑀸𑀧𑁂𑀦𑁆𑀢𑀺. 𑀢𑀺𑀓𑀺𑀘𑁆𑀙𑀸𑀢𑀺 𑀧𑀜𑁆𑀘 𑀢𑀺𑀓𑀺𑀘𑁆𑀙𑀸 𑁋 𑀲𑀸𑀮𑀸𑀓𑀺𑀬𑀁, 𑀲𑀮𑁆𑀮𑀓𑀢𑁆𑀢𑀺𑀬𑀁, 𑀓𑀸𑀬𑀢𑀺𑀓𑀺𑀘𑁆𑀙𑀁, 𑀪𑀽𑀢𑀺𑀬𑀁, 𑀓𑁄𑀫𑀸𑀭𑀪𑀘𑁆𑀘𑀁. 𑀫𑀸𑀫𑀓𑁄𑀢𑀺 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄, 𑀲𑁄 𑀯𑀸 𑀪𑀕𑀯𑀦𑁆𑀢𑀁 𑀫𑀫𑀸𑀬𑀢𑀺 𑀪𑀕𑀯𑀸 𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀪𑀕𑀯𑀢𑀸 𑁋 ‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸, 𑀅𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀦 𑀘 𑀢𑁂 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀬𑁂 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸 𑀦 𑀘 𑀅𑀧𑀕𑀢𑀸 𑀢𑁂 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀢𑁂 𑀘 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺’’.

‘‘𑀓𑀼𑀳𑀸 ¶ 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸;

𑀦 𑀢𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂.

‘‘𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸, 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂’’.

𑀯𑀺𑀭𑀼𑀢𑀜𑁆𑀘 𑀕𑀩𑁆𑀪𑀓𑀭𑀡𑀁, 𑀢𑀺𑀓𑀺𑀘𑁆𑀙𑀁 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬𑀸𑀢𑀺. 𑀯𑀺𑀭𑀼𑀢𑀜𑁆𑀘 𑀕𑀩𑁆𑀪𑀓𑀭𑀡𑀜𑁆𑀘 𑀢𑀺𑀓𑀺𑀘𑁆𑀙𑀜𑁆𑀘 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬 𑀦 𑀦𑀺𑀲𑁂𑀯𑁂𑀬𑁆𑀬 𑀦 𑀲𑀁𑀲𑁂𑀯𑁂𑀬𑁆𑀬 𑀦𑀧𑁆𑀧𑀝𑀺𑀲𑁂𑀯𑁂𑀬𑁆𑀬 𑀦 𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬. 𑀅𑀣 ¶ 𑀯𑀸 𑀦 𑀕𑀡𑁆𑀳𑁂𑀬𑁆𑀬 𑀦 𑀉𑀕𑁆𑀕𑀡𑁆𑀳𑁂𑀬𑁆𑀬 𑀦 𑀥𑀸𑀭𑁂𑀬𑁆𑀬 𑀦 𑀉𑀧𑀥𑀸𑀭𑁂𑀬𑁆𑀬 𑀦 𑀉𑀧𑀮𑀓𑁆𑀔𑁂𑀬𑁆𑀬 𑀦𑀧𑁆𑀧𑀬𑁄𑀚𑁂𑀬𑁆𑀬𑀸𑀢𑀺 𑁋 𑀯𑀺𑀭𑀼𑀢𑀜𑁆𑀘 𑀕𑀩𑁆𑀪𑀓𑀭𑀡𑀁 𑀢𑀺𑀓𑀺𑀘𑁆𑀙𑀁 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬.

‘‘𑀆𑀣𑀩𑁆𑀩𑀡𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁, 𑀦𑁄 𑀯𑀺𑀤𑀳𑁂 𑀅𑀣𑁄𑀧𑀺 𑀦𑀓𑁆𑀔𑀢𑁆𑀢𑀁;

𑀯𑀺𑀭𑀼𑀢𑀜𑁆𑀘 𑀕𑀩𑁆𑀪𑀓𑀭𑀡𑀁, 𑀢𑀺𑀓𑀺𑀘𑁆𑀙𑀁 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬𑀸’’𑀢𑀺.

𑀦𑀺𑀦𑁆𑀤𑀸𑀬 ¶ 𑀦𑀧𑁆𑀧𑀯𑁂𑀥𑁂𑀬𑁆𑀬, 𑀦 𑀉𑀦𑁆𑀦𑀫𑁂𑀬𑁆𑀬 𑀧𑀲𑀁𑀲𑀺𑀢𑁄 𑀪𑀺𑀓𑁆𑀔𑀼;

𑀮𑁄𑀪𑀁 𑀲𑀳 𑀫𑀘𑁆𑀙𑀭𑀺𑀬𑁂𑀦, 𑀓𑁄𑀥𑀁 𑀧𑁂𑀲𑀼𑀡𑀺𑀬𑀜𑁆𑀘 𑀧𑀦𑀼𑀤𑁂𑀬𑁆𑀬.

𑀦𑀺𑀦𑁆𑀤𑀸𑀬 𑀦𑀧𑁆𑀧𑀯𑁂𑀥𑁂𑀬𑁆𑀬𑀸𑀢𑀺. 𑀇𑀥𑁂𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦𑀺𑀦𑁆𑀤𑀦𑁆𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸 𑀦𑀺𑀦𑁆𑀤𑀦𑁆𑀢𑀺 𑀕𑀭𑀳𑀦𑁆𑀢𑀺 𑀉𑀧𑀯𑀤𑀦𑁆𑀢𑀺, 𑀦𑀺𑀦𑁆𑀤𑀺𑀢𑁄 𑀕𑀭𑀳𑀺𑀢𑁄 𑀉𑀧𑀯𑀤𑀺𑀢𑁄 𑀦𑀺𑀦𑁆𑀤𑀸𑀬 𑀕𑀭𑀳𑀸𑀬 𑀉𑀧𑀯𑀸𑀤𑁂𑀦 𑀅𑀓𑀺𑀢𑁆𑀢𑀺𑀬𑀸 𑀅𑀯𑀡𑁆𑀡𑀳𑀸𑀭𑀺𑀓𑀸𑀬 𑀦 𑀯𑁂𑀥𑁂𑀬𑁆𑀬 𑀦𑀧𑁆𑀧𑀯𑁂𑀥𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬 𑀦 𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 𑀦 𑀧𑀭𑀺𑀢𑀲𑁂𑀬𑁆𑀬 𑀦 𑀪𑀸𑀬𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀪𑀻𑀭𑀽 𑀅𑀲𑁆𑀲 𑀅𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻, 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 ¶ 𑁋 𑀦𑀺𑀦𑁆𑀤𑀸𑀬 𑀦𑀧𑁆𑀧𑀯𑁂𑀥𑁂𑀬𑁆𑀬.

𑀦 ¶ 𑀉𑀦𑁆𑀦𑀫𑁂𑀬𑁆𑀬 𑀧𑀲𑀁𑀲𑀺𑀢𑁄 𑀪𑀺𑀓𑁆𑀔𑀽𑀢𑀺. 𑀇𑀥𑁂𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀲𑀁𑀲𑀦𑁆𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 ¶ 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸 𑀧𑀲𑀁𑀲𑀦𑁆𑀢𑀺 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺, 𑀧𑀲𑀁𑀲𑀺𑀢𑁄 𑀣𑁄𑀫𑀺𑀢𑁄 𑀓𑀺𑀢𑁆𑀢𑀺𑀢𑁄 𑀯𑀡𑁆𑀡𑀺𑀢𑁄 𑀧𑀲𑀁𑀲𑀸𑀬 𑀣𑁄𑀫𑀦𑁂𑀦 𑀓𑀺𑀢𑁆𑀢𑀺𑀬𑀸 𑀯𑀡𑁆𑀡𑀳𑀸𑀭𑀺𑀓𑀸𑀬 𑀉𑀦𑁆𑀦𑀢𑀺𑀁 𑀦 𑀓𑀭𑁂𑀬𑁆𑀬 𑀉𑀦𑁆𑀦𑀫𑀁 𑀦 𑀓𑀭𑁂𑀬𑁆𑀬 𑀫𑀸𑀦𑀁 𑀦 𑀓𑀭𑁂𑀬𑁆𑀬 𑀣𑀫𑁆𑀪𑀁 𑀦 𑀓𑀭𑁂𑀬𑁆𑀬, 𑀦 𑀢𑁂𑀦 𑀫𑀸𑀦𑀁 𑀚𑀦𑁂𑀬𑁆𑀬 𑀦 𑀢𑁂𑀦 𑀣𑀤𑁆𑀥𑁄 𑀅𑀲𑁆𑀲 𑀧𑀢𑁆𑀣𑀤𑁆𑀥𑁄 𑀧𑀕𑁆𑀕𑀳𑀺𑀢𑀲𑀺𑀭𑁄𑀢𑀺 𑁋 𑀦 𑀉𑀦𑁆𑀦𑀫𑁂𑀬𑁆𑀬 𑀧𑀲𑀁𑀲𑀺𑀢𑁄 𑀪𑀺𑀓𑁆𑀔𑀼.

𑀮𑁄𑀪𑀁 𑀲𑀳 𑀫𑀘𑁆𑀙𑀭𑀺𑀬𑁂𑀦, 𑀓𑁄𑀥𑀁 𑀧𑁂𑀲𑀼𑀡𑀺𑀬𑀜𑁆𑀘 𑀧𑀦𑀼𑀤𑁂𑀬𑁆𑀬𑀸𑀢𑀺. 𑀮𑁄𑀪𑁄𑀢𑀺 𑀬𑁄 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀲𑀸𑀭𑀸𑀕𑁄 𑀲𑀸𑀭𑀚𑁆𑀚𑀦𑀸 𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁…𑀧𑁂… 𑀕𑀸𑀳𑁄 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀓𑁄𑀥𑁄𑀢𑀺 𑀬𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄, 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄, 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄, 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁, 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁, 𑀩𑁆𑀬𑀸𑀧𑀢𑁆𑀢𑀺𑀁 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁, 𑀯𑀺𑀭𑁄𑀥𑁄 ¶ 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲. 𑀧𑁂𑀲𑀼𑀜𑁆𑀜𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀯𑀕𑁆𑀕𑀸𑀭𑀸𑀫𑁄 𑀯𑀕𑁆𑀕𑀭𑀢𑁄 𑀯𑀕𑁆𑀕𑀦𑀦𑁆𑀤𑀻 𑀯𑀕𑁆𑀕𑀓𑀭𑀡𑀺𑀁 ¶ 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀧𑁂𑀲𑀼𑀜𑁆𑀜𑀁.

𑀅𑀧𑀺 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀯𑀸. 𑀓𑀣𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺? 𑀇𑀫𑀲𑁆𑀲 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀫𑀦𑀸𑀧𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄 𑀪𑀯𑀺𑀲𑁆𑀲𑀸𑀫𑀺 𑀅𑀩𑁆𑀪𑀦𑁆𑀢𑀭𑀺𑀓𑁄 𑀪𑀯𑀺𑀲𑁆𑀲𑀸𑀫𑀺 𑀲𑀼𑀳𑀤𑀬𑁄 𑀪𑀯𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀧𑀺𑀬𑀓𑀫𑁆𑀬𑀢𑀸𑀬 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀓𑀣𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺? 𑀓𑀣𑀁 𑀇𑀫𑁂 𑀦𑀸𑀦𑀸 𑀅𑀲𑁆𑀲𑀼 𑀯𑀺𑀦𑀸 𑀅𑀲𑁆𑀲𑀼 𑀯𑀕𑁆𑀕𑀸 𑀅𑀲𑁆𑀲𑀼 𑀤𑁆𑀯𑁂𑀥𑀸 𑀅𑀲𑁆𑀲𑀼 𑀤𑁆𑀯𑁂𑀚𑁆𑀛𑀸 𑀅𑀲𑁆𑀲𑀼 𑀤𑁆𑀯𑁂 𑀧𑀓𑁆𑀔𑀸 𑀅𑀲𑁆𑀲𑀼 𑀪𑀺𑀚𑁆𑀛𑁂𑀬𑁆𑀬𑀼𑀁 𑀦 𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀁 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀦𑁆𑀢𑀺. 𑀏𑀯𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀮𑁄𑀪𑀁 𑀲𑀳 𑀫𑀘𑁆𑀙𑀭𑀺𑀬𑁂𑀦, 𑀓𑁄𑀥𑀁 𑀧𑁂𑀲𑀼𑀡𑀺𑀬𑀜𑁆𑀘 𑀧𑀦𑀼𑀤𑁂𑀬𑁆𑀬𑀸𑀢𑀺. 𑀮𑁄𑀪𑀜𑁆𑀘 𑀫𑀘𑁆𑀙𑀭𑀺𑀬𑀜𑁆𑀘 𑀓𑁄𑀥𑀜𑁆𑀘 𑀧𑁂𑀲𑀼𑀜𑁆𑀜𑀜𑁆𑀘 𑀦𑀼𑀤𑁂𑀬𑁆𑀬 𑀧𑀦𑀼𑀤𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀮𑁄𑀪𑀁 𑀲𑀳 𑀫𑀘𑁆𑀙𑀭𑀺𑀬𑁂𑀦, 𑀓𑁄𑀥𑀁 𑀧𑁂𑀲𑀼𑀡𑀺𑀬𑀜𑁆𑀘 𑀧𑀦𑀼𑀤𑁂𑀬𑁆𑀬.

‘‘𑀦𑀺𑀦𑁆𑀤𑀸𑀬 ¶ 𑀦𑀧𑁆𑀧𑀯𑁂𑀥𑁂𑀬𑁆𑀬, 𑀦 𑀉𑀦𑁆𑀦𑀫𑁂𑀬𑁆𑀬 𑀧𑀲𑀁𑀲𑀺𑀢𑁄 𑀪𑀺𑀓𑁆𑀔𑀼;

𑀮𑁄𑀪𑀁 𑀲𑀳 𑀫𑀘𑁆𑀙𑀭𑀺𑀬𑁂𑀦, 𑀓𑁄𑀥𑀁 𑀧𑁂𑀲𑀼𑀡𑀺𑀬𑀜𑁆𑀘 𑀧𑀦𑀼𑀤𑁂𑀬𑁆𑀬𑀸’’𑀢𑀺.

𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑁂𑀬𑁆𑀬, 𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺;

𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬, 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬.

𑀓𑀬𑀯𑀺𑀓𑁆𑀓𑀬𑁂 ¶ ¶ 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺. 𑀬𑁂 𑀓𑀬𑀯𑀺𑀓𑁆𑀓𑀬𑀸 𑀯𑀺𑀦𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀦 𑀢𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸. 𑀓𑀣𑀁 𑀓𑀬𑀯𑀺𑀓𑁆𑀓𑀬𑁂 𑀢𑀺𑀝𑁆𑀞𑀢𑀺? 𑀧𑀜𑁆𑀘𑀦𑁆𑀦𑀁 𑀲𑀤𑁆𑀥𑀺𑀁 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀯𑀜𑁆𑀘𑀦𑀺𑀬𑀁 𑀯𑀸 𑀓𑀭𑁄𑀦𑁆𑀢𑁄 𑀉𑀤𑀬𑀁 𑀯𑀸 𑀧𑀢𑁆𑀣𑀬𑀦𑁆𑀢𑁄 𑀧𑀭𑀺𑀯𑀢𑁆𑀢𑁂𑀢𑀺. 𑀏𑀯𑀁 𑀓𑀬𑀯𑀺𑀓𑁆𑀓𑀬𑁂 𑀢𑀺𑀝𑁆𑀞𑀢𑀺. 𑀓𑀣𑀁 𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑀢𑀺? 𑀧𑀜𑁆𑀘𑀦𑁆𑀦𑀁 𑀲𑀤𑁆𑀥𑀺𑀁 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀦 𑀯𑀜𑁆𑀘𑀦𑀺𑀬𑀁 𑀯𑀸 𑀓𑀭𑁄𑀦𑁆𑀢𑁄 𑀦 𑀉𑀤𑀬𑀁 𑀯𑀸 𑀧𑀢𑁆𑀣𑀬𑀦𑁆𑀢𑁄 𑀧𑀭𑀺𑀯𑀢𑁆𑀢𑁂𑀢𑀺. 𑀏𑀯𑀁 𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑀢𑀺. 𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺. 𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑁂𑀬𑁆𑀬 𑀦 𑀲𑀦𑁆𑀢𑀺𑀝𑁆𑀞𑁂𑀬𑁆𑀬, 𑀓𑀬𑀯𑀺𑀓𑁆𑀓𑀬𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀬𑀯𑀺𑀓𑁆𑀓𑀬𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑁂𑀬𑁆𑀬.

𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀻𑀢𑀺. 𑀓𑀢𑀫𑁂 𑀉𑀧𑀯𑀸𑀤𑀓𑀭𑀸𑀢𑀺 𑀓𑀺𑀮𑁂𑀲𑀸? 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀤𑁆𑀥𑀺𑀫𑀦𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄, 𑀢𑁂 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀺, 𑀤𑁂𑀯𑀢𑀸𑀧𑀺 𑀔𑁄 𑀲𑀦𑁆𑀢𑀺 𑀇𑀤𑁆𑀥𑀺𑀫𑀦𑁆𑀢𑀺𑀦𑀺𑀬𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄, 𑀢𑀸 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀺. 𑀢𑁂 𑀑𑀴𑀸𑀭𑀺𑀓𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀫𑀚𑁆𑀛𑀺𑀫𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀲𑀼𑀔𑀼𑀫𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀉𑀧𑀯𑀤𑁂𑀬𑁆𑀬𑀼𑀁. 𑀓𑀢𑀫𑁂 𑀑𑀴𑀸𑀭𑀺𑀓𑀸 𑀓𑀺𑀮𑁂𑀲𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑁋 𑀇𑀫𑁂 ¶ 𑀯𑀼𑀘𑁆𑀘𑀦𑁆𑀢𑀺 𑀑𑀴𑀸𑀭𑀺𑀓𑀸 𑀓𑀺𑀮𑁂𑀲𑀸. 𑀓𑀢𑀫𑁂 𑀫𑀚𑁆𑀛𑀺𑀫𑀸 𑀓𑀺𑀮𑁂𑀲𑀸? 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀫𑀚𑁆𑀛𑀺𑀫𑀸 𑀓𑀺𑀮𑁂𑀲𑀸. 𑀓𑀢𑀫𑁂 𑀲𑀼𑀔𑀼𑀫𑀸 𑀓𑀺𑀮𑁂𑀲𑀸? 𑀜𑀸𑀢𑀺𑀯𑀺𑀢𑀓𑁆𑀓𑁄, 𑀚𑀦𑀧𑀤𑀯𑀺𑀢𑀓𑁆𑀓𑁄, 𑀅𑀧𑀭𑀯𑀺𑀢𑀓𑁆𑀓𑁄, 𑀧𑀭𑀸𑀦𑀼𑀤𑀬𑀢𑀸 𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 ¶ , 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀼𑀔𑀼𑀫𑀸 𑀓𑀺𑀮𑁂𑀲𑀸. 𑀢𑁂 𑀑𑀴𑀸𑀭𑀺𑀓𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀫𑀚𑁆𑀛𑀺𑀫𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀲𑀼𑀔𑀼𑀫𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀦 𑀉𑀧𑀯𑀤𑁂𑀬𑁆𑀬 𑀉𑀧𑀯𑀸𑀤𑀁 𑀦 𑀓𑀭𑁂𑀬𑁆𑀬 𑀉𑀧𑀯𑀸𑀤𑀓𑀭𑁂 𑀓𑀺𑀮𑁂𑀲𑁂 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀉𑀧𑀯𑀸𑀤𑀓𑀭𑁂 𑀓𑀺𑀮𑁂𑀲𑁂 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 ¶ ¶ 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀉𑀧𑀯𑀸𑀤𑀓𑀭𑁂𑀳𑀺 𑀓𑀺𑀮𑁂𑀲𑁂𑀳𑀺 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺.

𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬𑀸𑀢𑀺. 𑀓𑀣𑀁 𑀕𑀸𑀫𑁂 𑀲𑀚𑁆𑀚𑀢𑀺? 𑀇𑀥 𑀪𑀺𑀓𑁆𑀔𑀼 𑀕𑀸𑀫𑁂 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀕𑀸𑀫𑁂 𑀲𑀚𑁆𑀚𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀧𑀝𑁆𑀞𑀺𑀢𑀸𑀬 ¶ 𑀲𑀢𑀺𑀬𑀸 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀭 𑀢𑀢𑁆𑀭 𑀲𑀚𑁆𑀚𑀢𑀺 𑀢𑀢𑁆𑀭 𑀢𑀢𑁆𑀭 𑀕𑀡𑁆𑀳𑀸𑀢𑀺 𑀢𑀢𑁆𑀭 𑀢𑀢𑁆𑀭 𑀩𑀚𑁆𑀛𑀢𑀺 𑀢𑀢𑁆𑀭 𑀢𑀢𑁆𑀭 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀕𑀸𑀫𑁂 𑀲𑀚𑁆𑀚𑀢𑀺.

𑀓𑀣𑀁 𑀕𑀸𑀫𑁂 𑀦 𑀲𑀚𑁆𑀚𑀢𑀺? 𑀇𑀥 𑀪𑀺𑀓𑁆𑀔𑀼 𑀕𑀸𑀫𑁂 𑀕𑀺𑀳𑀻𑀳𑀺 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀦 𑀲𑀳𑀦𑀦𑁆𑀤𑀻 𑀦 𑀲𑀳𑀲𑁄𑀓𑀻 𑀦 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄 𑀦 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀦 𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀕𑀸𑀫𑁂 𑀦 𑀲𑀚𑁆𑀚𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀭 𑀢𑀢𑁆𑀭 𑀦 𑀲𑀚𑁆𑀚𑀢𑀺 𑀢𑀢𑁆𑀭 𑀢𑀢𑁆𑀭 𑀦 𑀕𑀡𑁆𑀳𑀸𑀢𑀺 𑀢𑀢𑁆𑀭 𑀢𑀢𑁆𑀭 𑀦 𑀩𑀚𑁆𑀛𑀢𑀺 𑀢𑀢𑁆𑀭 𑀢𑀢𑁆𑀭 𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀕𑀸𑀫𑁂 𑀦 𑀲𑀚𑁆𑀚𑀢𑀺. 𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬𑀸𑀢𑀺 𑀕𑀸𑀫𑁂 𑀦 𑀲𑀚𑁆𑀚𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀩𑀚𑁆𑀛𑁂𑀬𑁆𑀬 𑀦 𑀧𑀮𑀺𑀩𑀚𑁆𑀛𑁂𑀬𑁆𑀬, 𑀅𑀕𑀺𑀤𑁆𑀥𑁄 ¶ 𑀅𑀲𑁆𑀲 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀦𑁆𑀦𑁄 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄…𑀧𑁂… 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬.

𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬𑀸𑀢𑀺. 𑀓𑀢𑀫𑀸 𑀮𑀧𑀦𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀆𑀫𑀺𑀲𑀘𑀓𑁆𑀔𑀼𑀓𑀲𑁆𑀲 ¶ 𑀮𑁄𑀓𑀥𑀫𑁆𑀫𑀕𑀭𑀼𑀓𑀲𑁆𑀲 𑀬𑀸 𑀧𑀭𑁂𑀲𑀁 𑀆𑀮𑀧𑀦𑀸 𑀮𑀧𑀦𑀸 𑀲𑀮𑁆𑀮𑀧𑀦𑀸 𑀉𑀮𑁆𑀮𑀧𑀦𑀸 𑀲𑀫𑀼𑀮𑁆𑀮𑀧𑀦𑀸 𑀉𑀦𑁆𑀦𑀳𑀦𑀸 𑀲𑀫𑀼𑀦𑁆𑀦𑀳𑀦𑀸 𑀉𑀓𑁆𑀓𑀸𑀘𑀦𑀸 𑀲𑀫𑀼𑀓𑁆𑀓𑀸𑀘𑀦𑀸 [𑀉𑀓𑁆𑀓𑀸𑀧𑀦𑀸 𑀲𑀫𑀼𑀓𑁆𑀓𑀸𑀧𑀦𑀸 (𑀲𑁆𑀬𑀸.)] 𑀅𑀦𑀼𑀧𑀺𑀬𑀪𑀸𑀡𑀺𑀢𑀸 ¶ 𑀘𑀸𑀢𑀼𑀓𑀫𑁆𑀬𑀢𑀸 𑀫𑀼𑀕𑁆𑀕𑀲𑀽𑀧𑁆𑀬𑀢𑀸 𑀧𑀸𑀭𑀺𑀪𑀝𑀬𑀢𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸 [𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸 (𑀓.) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀻𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀑𑀮𑁄𑀓𑁂𑀢𑀩𑁆𑀩𑀸], 𑀬𑀸 ¶ 𑀢𑀢𑁆𑀣 𑀲𑀡𑁆𑀳𑀯𑀸𑀘𑀢𑀸 𑀲𑀔𑀺𑀮𑀯𑀸𑀘𑀢𑀸 𑀲𑀺𑀣𑀺𑀮𑀯𑀸𑀘𑀢𑀸 [𑀫𑁂𑀢𑁆𑀢𑀯𑀸𑀘𑀓𑀢𑀸 (𑀲𑁆𑀬𑀸.)] 𑀅𑀨𑀭𑀼𑀲𑀯𑀸𑀘𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑀧𑀦𑀸.

𑀅𑀧𑀺 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀚𑀦𑀁 𑀮𑀧𑀢𑀺 𑁋 𑀅𑀢𑁆𑀢𑀸𑀦𑀁 𑀯𑀸 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀚𑀦𑀁 𑀮𑀧𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀚𑀦𑀁 𑀮𑀧𑀢𑀺. 𑀓𑀣𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀚𑀦𑀁 𑀮𑀧𑀢𑀺? ‘‘𑀢𑀼𑀫𑁆𑀳𑁂 𑀫𑁂 𑀩𑀳𑀽𑀧𑀓𑀸𑀭𑀸, 𑀅𑀳𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀮𑀪𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀬𑁂𑀧𑀺 𑀫𑁂 𑀅𑀜𑁆𑀜𑁂 𑀤𑀸𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀫𑀜𑁆𑀜𑀦𑁆𑀢𑀺, 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂 𑀲𑀫𑁆𑀧𑀲𑁆𑀲𑀦𑁆𑀢𑀸 𑀬𑀫𑁆𑀧𑀺 𑀫𑁂 𑀧𑀼𑀭𑀸𑀡𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀁 𑀦𑀸𑀫𑀥𑁂𑀬𑁆𑀬𑀁 𑀢𑀫𑁆𑀧𑀺 𑀫𑁂 𑀅𑀦𑁆𑀢𑀭𑀳𑀺𑀢𑀁. 𑀢𑀼𑀫𑁆𑀳𑁂𑀳𑀺 𑀅𑀳𑀁 𑀜𑀸𑀬𑀸𑀫𑀺 𑀅𑀲𑀼𑀓𑀲𑁆𑀲 𑀓𑀼𑀮𑀽𑀧𑀓𑁄 𑀅𑀲𑀼𑀓𑀸𑀬 𑀓𑀼𑀮𑀽𑀧𑀓𑁄’’𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀚𑀦𑀁 𑀮𑀧𑀢𑀺.

𑀓𑀣𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀚𑀦𑀁 𑀮𑀧𑀢𑀺? ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄, 𑀢𑀼𑀫𑁆𑀳𑁂 𑀫𑀁 𑀆𑀕𑀫𑁆𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸. 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑁂𑀲𑀁 𑀤𑁂𑀫𑀺, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀫𑀺, 𑀉𑀧𑁄𑀲𑀣𑀁 𑀆𑀘𑀺𑀓𑁆𑀔𑀸𑀫𑀺, 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀫𑀺. 𑀅𑀣 𑀧𑀦 𑀢𑀼𑀫𑁆𑀳𑁂 𑀫𑀁 𑀉𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣𑀸’’𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 ¶ 𑀚𑀦𑀁 𑀮𑀧𑀢𑀺.

𑀮𑀸𑀪𑀓𑀫𑁆𑀬𑀸 ¶ ¶ 𑀚𑀦𑀁 𑀦 𑀮𑀧𑀬𑁂𑀬𑁆𑀬𑀸𑀢𑀺. 𑀮𑀸𑀪𑀳𑁂𑀢𑀼 𑀮𑀸𑀪𑀧𑀘𑁆𑀘𑀬𑀸 𑀮𑀸𑀪𑀓𑀸𑀭𑀡𑀸 𑀮𑀸𑀪𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀮𑀸𑀪𑀁 𑀧𑀭𑀺𑀧𑀸𑀘𑁂𑀦𑁆𑀢𑁄 𑀚𑀦𑀁 𑀦 𑀮𑀧𑀬𑁂𑀬𑁆𑀬, 𑀮𑀧𑀦𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀮𑀧𑀦𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬.

‘‘𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑁂𑀬𑁆𑀬, 𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺;

𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬, 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬𑀸’’𑀢𑀺.

𑀦 𑀘 𑀓𑀢𑁆𑀣𑀺𑀓𑁄 [𑀓𑀢𑁆𑀣𑀺𑀢𑀸 (𑀲𑁆𑀬𑀸. 𑀓.)] 𑀲𑀺𑀬𑀸 𑀪𑀺𑀓𑁆𑀔𑀼, 𑀦 𑀘 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀸𑀲𑁂𑀬𑁆𑀬;

𑀧𑀸𑀕𑀩𑁆𑀪𑀺𑀬𑀁 𑀦 𑀲𑀺𑀓𑁆𑀔𑁂𑀬𑁆𑀬, 𑀓𑀣𑀁 𑀯𑀺𑀕𑁆𑀕𑀸𑀳𑀺𑀓𑀁 𑀦 𑀓𑀣𑀬𑁂𑀬𑁆𑀬.

𑀦 ¶ 𑀘 𑀓𑀢𑁆𑀣𑀺𑀓𑁄 𑀲𑀺𑀬𑀸 𑀪𑀺𑀓𑁆𑀔𑀽𑀢𑀺. 𑀇𑀥𑁂𑀓𑀘𑁆𑀘𑁄 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻. 𑀲𑁄 𑀓𑀢𑁆𑀣𑀢𑀺 𑀯𑀺𑀓𑀢𑁆𑀣𑀢𑀺 𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀲𑀻𑀮𑀩𑁆𑀩𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 ¶ 𑀯𑀸 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸 𑀯𑀺𑀦𑀬𑀥𑀭𑁄𑀢𑀺 𑀯𑀸 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸 𑀆𑀭𑀜𑁆𑀜𑀺𑀓𑁄𑀢𑀺 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀓𑀢𑁆𑀣𑀢𑀺 𑀯𑀺𑀓𑀢𑁆𑀣𑀢𑀺. 𑀏𑀯𑀁 𑀦 𑀓𑀢𑁆𑀣𑁂𑀬𑁆𑀬 𑀦 𑀯𑀺𑀓𑀢𑁆𑀣𑁂𑀬𑁆𑀬, 𑀓𑀢𑁆𑀣𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀢𑁆𑀣𑀦𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀦 𑀘 𑀓𑀢𑁆𑀣𑀺𑀓𑁄 𑀲𑀺𑀬𑀸 𑀪𑀺𑀓𑁆𑀔𑀼.

𑀦 ¶ 𑀘 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀸𑀲𑁂𑀬𑁆𑀬𑀸𑀢𑀺. 𑀓𑀢𑀫𑀸 𑀧𑀬𑀼𑀢𑁆𑀢𑀯𑀸𑀘𑀸? 𑀇𑀥𑁂𑀓𑀘𑁆𑀘𑁄 ¶ 𑀘𑀻𑀯𑀭𑀧𑀬𑀼𑀢𑁆𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀧𑀺𑀡𑁆𑀟𑀧𑀸𑀢𑀧𑀬𑀼𑀢𑁆𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀲𑁂𑀦𑀸𑀲𑀦𑀧𑀬𑀼𑀢𑁆𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀧𑀬𑀼𑀢𑁆𑀢𑀁 𑀯𑀸𑀘𑀁 𑀪𑀸𑀲𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀧𑀬𑀼𑀢𑁆𑀢𑀯𑀸𑀘𑀸.

𑀅𑀣 𑀯𑀸 𑀘𑀻𑀯𑀭𑀳𑁂𑀢𑀼 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀲𑁂𑀦𑀸𑀲𑀦𑀳𑁂𑀢𑀼 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀲𑀘𑁆𑀘𑀫𑁆𑀧𑀺 𑀪𑀡𑀢𑀺 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀺𑀲𑀼𑀡𑀫𑁆𑀧𑀺 𑀪𑀡𑀢𑀺 𑀅𑀧𑀺𑀲𑀼𑀡𑀫𑁆𑀧𑀺 𑀪𑀡𑀢𑀺, 𑀨𑀭𑀼𑀲𑀫𑁆𑀧𑀺 𑀪𑀡𑀢𑀺 𑀅𑀨𑀭𑀼𑀲𑀫𑁆𑀧𑀺 𑀪𑀡𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀫𑁆𑀧𑀺 𑀪𑀡𑀢𑀺 𑀅𑀲𑀫𑁆𑀨𑀧𑁆𑀧𑀮𑀸𑀧𑀫𑁆𑀧𑀺 𑀪𑀡𑀢𑀺, 𑀫𑀦𑁆𑀢𑀸𑀧𑀺 𑀯𑀸𑀘𑀁 𑀪𑀸𑀲𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀧𑀬𑀼𑀢𑁆𑀢𑀯𑀸𑀘𑀸. 𑀅𑀣 𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘‘𑀅𑀳𑁄 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸𑀯 𑀥𑀫𑁆𑀫𑀁 𑀧𑀲𑀻𑀤𑁂𑀬𑁆𑀬𑀼𑀁, 𑀧𑀲𑀦𑁆𑀦𑀸 𑀘 𑀫𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀬𑀼𑀢𑁆𑀢𑀯𑀸𑀘𑀸. 𑀦 𑀘 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀸𑀲𑁂𑀬𑁆𑀬𑀸𑀢𑀺. 𑀅𑀦𑁆𑀢𑀫𑀲𑁄 𑀥𑀫𑁆𑀫𑀤𑁂𑀲𑀦𑀁 𑀯𑀸𑀘𑀁 𑀉𑀧𑀸𑀤𑀸𑀬 𑀧𑀬𑀼𑀢𑁆𑀢𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬 ¶ 𑀦 𑀓𑀣𑁂𑀬𑁆𑀬 𑀦 𑀪𑀡𑁂𑀬𑁆𑀬 𑀦 𑀤𑀻𑀧𑁂𑀬𑁆𑀬 𑀦 𑀯𑁄𑀳𑀭𑁂𑀬𑁆𑀬, 𑀧𑀬𑀼𑀢𑁆𑀢𑀁 𑀯𑀸𑀘𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀧𑀬𑀼𑀢𑁆𑀢𑀯𑀸𑀘𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀦 𑀘 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀸𑀲𑁂𑀬𑁆𑀬.

𑀧𑀸𑀕𑀩𑁆𑀪𑀺𑀬𑀁 𑀦 𑀲𑀺𑀓𑁆𑀔𑁂𑀬𑁆𑀬𑀸𑀢𑀺. 𑀧𑀸𑀕𑀩𑁆𑀪𑀺𑀬𑀦𑁆𑀢𑀺 𑀢𑀻𑀡𑀺 𑀧𑀸𑀕𑀩𑁆𑀪𑀺𑀬𑀸𑀦𑀺 𑁋 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁, 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁, 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁. 𑀓𑀢𑀫𑀁 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀕𑀡𑀕𑀢𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀪𑁄𑀚𑀦𑀲𑀸𑀮𑀸𑀬𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀚𑀦𑁆𑀢𑀸𑀖𑀭𑁂𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀉𑀤𑀓𑀢𑀺𑀢𑁆𑀣𑁂𑀧𑀺 ¶ 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀧𑀺 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀲𑀗𑁆𑀖𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀢𑀺 ¶ , 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀲𑀗𑁆𑀖𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 ¶ 𑀕𑀡𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀕𑀡𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀳𑀦𑀸𑀦𑀁 𑀘𑀗𑁆𑀓𑀫𑀦𑁆𑀢𑀸𑀦𑀁 𑀲𑀉𑀧𑀸𑀳𑀦𑁄 𑀘𑀗𑁆𑀓𑀫𑀢𑀺 ¶ , 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑀸𑀦𑀁 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀙𑀫𑀸𑀬 𑀘𑀗𑁆𑀓𑀫𑀦𑁆𑀢𑀸𑀦𑀁 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸𑀧𑀺 𑀦𑀺𑀲𑀻𑀤𑀢𑀺, 𑀞𑀺𑀢𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀕𑀡𑀕𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀪𑁄𑀚𑀦𑀲𑀸𑀮𑀸𑀬 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀪𑁄𑀚𑀦𑀲𑀸𑀮𑀸𑀬 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀢𑀺, 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀪𑁄𑀚𑀦𑀲𑀸𑀮𑀸𑀬 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀚𑀦𑁆𑀢𑀸𑀖𑀭𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀚𑀦𑁆𑀢𑀸𑀖𑀭𑁂 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀧𑀼𑀭𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀧𑀼𑀭𑀢𑁄𑀧𑀺 𑀦𑀺𑀲𑀻𑀤𑀢𑀺, 𑀉𑀘𑁆𑀘𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀢𑀺, 𑀅𑀦𑀸𑀧𑀼𑀘𑁆𑀙𑀸𑀧𑀺 𑀓𑀝𑁆𑀞𑀁 𑀧𑀓𑁆𑀔𑀺𑀧𑀢𑀺, 𑀅𑀦𑀸𑀧𑀼𑀘𑁆𑀙𑀸𑀧𑀺 𑀤𑁆𑀯𑀸𑀭𑀁 𑀧𑀺𑀤𑀳𑀢𑀺. 𑀏𑀯𑀁 𑀚𑀦𑁆𑀢𑀸𑀖𑀭𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀉𑀤𑀓𑀢𑀺𑀢𑁆𑀣𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀉𑀤𑀓𑀢𑀺𑀢𑁆𑀣𑁂 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀑𑀢𑀭𑀢𑀺, 𑀧𑀼𑀭𑀢𑁄𑀧𑀺 𑀑𑀢𑀭𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀦𑁆𑀳𑀸𑀬𑀢𑀺, 𑀧𑀼𑀭𑀢𑁄𑀧𑀺 𑀦𑁆𑀳𑀸𑀬𑀢𑀺, 𑀉𑀧𑀭𑀺𑀢𑁄𑀧𑀺 𑀦𑁆𑀳𑀸𑀬𑀢𑀺, 𑀖𑀝𑁆𑀝𑀬𑀦𑁆𑀢𑁄𑀧𑀺 𑀉𑀢𑁆𑀢𑀭𑀢𑀺, 𑀧𑀼𑀭𑀢𑁄𑀧𑀺 𑀉𑀢𑁆𑀢𑀭𑀢𑀺 ¶ . 𑀏𑀯𑀁 𑀉𑀤𑀓𑀢𑀺𑀢𑁆𑀣𑁂 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 ¶ 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀖𑀝𑁆𑀝𑀬𑀦𑁆𑀢𑁄𑀧𑀺 𑀕𑀘𑁆𑀙𑀢𑀺, 𑀧𑀼𑀭𑀢𑁄𑀧𑀺 𑀕𑀘𑁆𑀙𑀢𑀺, 𑀯𑁄𑀓𑁆𑀓𑀫𑁆𑀫𑀧𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀕𑀘𑁆𑀙𑀢𑀺 ¶ . 𑀏𑀯𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 ‘‘𑀦 𑀧𑀯𑀺𑀲, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀧𑀯𑀺𑀲𑀢𑀺, ‘‘𑀦 𑀢𑀺𑀝𑁆𑀞, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 ¶ 𑀢𑀺𑀝𑁆𑀞𑀢𑀺, ‘‘𑀦 𑀦𑀺𑀲𑀻𑀤, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦𑀺𑀲𑀻𑀤𑀢𑀺, 𑀅𑀦𑁄𑀓𑀸𑀲𑀫𑁆𑀧𑀺 𑀧𑀯𑀺𑀲𑀢𑀺, 𑀅𑀦𑁄𑀓𑀸𑀲𑁂𑀧𑀺 𑀢𑀺𑀝𑁆𑀞𑀢𑀺, 𑀅𑀦𑁄𑀓𑀸𑀲𑁂𑀧𑀺 𑀦𑀺𑀲𑀻𑀤𑀢𑀺, 𑀬𑀸𑀦𑀺𑀧𑀺 𑀢𑀸𑀦𑀺 𑀳𑁄𑀦𑁆𑀢𑀺 𑀓𑀼𑀮𑀸𑀦𑀁 𑀑𑀯𑀭𑀓𑀸𑀦𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘, 𑀬𑀢𑁆𑀣 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀥𑀻𑀢𑀭𑁄 𑀓𑀼𑀮𑀲𑀼𑀡𑁆𑀳𑀸𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀦𑀺𑀲𑀻𑀤𑀦𑁆𑀢𑀺 𑀢𑀢𑁆𑀣𑀧𑀺 𑀲𑀳𑀲𑀸 𑀧𑀯𑀺𑀲𑀢𑀺, 𑀓𑀼𑀫𑀸𑀭𑀓𑀲𑁆𑀲 𑀲𑀻𑀲𑀫𑁆𑀧𑀺 𑀧𑀭𑀸𑀫𑀲𑀢𑀺. 𑀏𑀯𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺 𑁋 𑀇𑀤𑀁 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁.

𑀓𑀢𑀫𑀁 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄𑀧𑀺 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀕𑀡𑀕𑀢𑁄𑀧𑀺 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀧𑀺 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺. 𑀓𑀣𑀁 𑀲𑀗𑁆𑀖𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀅𑀦𑀚𑁆𑀛𑀺𑀝𑁆𑀞𑁄 𑀯𑀸 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀪𑀡𑀢𑀺, 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺 ¶ , 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀲𑀗𑁆𑀖𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀕𑀡𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀕𑀡𑀕𑀢𑁄 𑀅𑀘𑀺𑀢𑁆𑀢𑀻𑀓𑀸𑀭𑀓𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀅𑀦𑀚𑁆𑀛𑀺𑀝𑁆𑀞𑁄 𑀯𑀸 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀪𑀡𑀢𑀺, 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺; 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀪𑀡𑀢𑀺, 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺, 𑀞𑀺𑀢𑀓𑁄𑀧𑀺 𑀪𑀡𑀢𑀺, 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑁄𑀧𑀺 𑀪𑀡𑀢𑀺. 𑀏𑀯𑀁 𑀕𑀡𑀕𑀢𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺.

𑀓𑀣𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀏𑀯𑀫𑀸𑀳 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁂 𑀇𑀢𑁆𑀣𑀁𑀕𑁄𑀢𑁆𑀢𑁂 𑀓𑀺𑀁 𑀅𑀢𑁆𑀣𑀺? 𑀬𑀸𑀕𑀼 𑀅𑀢𑁆𑀣𑀺, 𑀪𑀢𑁆𑀢𑀁 𑀅𑀢𑁆𑀣𑀺, 𑀔𑀸𑀤𑀦𑀻𑀬𑀁 𑀅𑀢𑁆𑀣𑀺? 𑀓𑀺𑀁 𑀧𑀺𑀯𑀺𑀲𑁆𑀲𑀸𑀫 ¶ , 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀓𑀺𑀁 𑀔𑀸𑀤𑀺𑀲𑁆𑀲𑀸𑀫, 𑀓𑀺𑀁 𑀯𑀸 𑀅𑀢𑁆𑀣𑀺, 𑀓𑀺𑀁 ¶ 𑀯𑀸 𑀫𑁂 𑀤𑀲𑁆𑀲𑀣𑀸’’𑀢𑀺 𑀯𑀺𑀧𑁆𑀧𑀮𑀧𑀢𑀺. 𑀏𑀯𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺 𑁋 𑀇𑀤𑀁 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁.

𑀓𑀢𑀫𑀁 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁? 𑀇𑀥𑁂𑀓𑀘𑁆𑀘𑁄 𑀦 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦, 𑀦 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀫𑀳𑀸𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦, 𑀦 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 ¶ 𑀲𑀫𑀸𑀦𑁄 𑀉𑀴𑀸𑀭𑀪𑁄𑀕𑀓𑀼𑀮𑀸 𑀧𑀩𑁆𑀩𑀚𑀺𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦, 𑀦 𑀲𑀼𑀢𑁆𑀢𑀦𑁆𑀢𑀺𑀓𑁄 ¶ 𑀲𑀫𑀸𑀦𑁄 𑀲𑀼𑀢𑁆𑀢𑀦𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦, 𑀦 𑀯𑀺𑀦𑀬𑀥𑀭𑁄 𑀲𑀫𑀸𑀦𑁄 𑀯𑀺𑀦𑀬𑀥𑀭𑁂𑀦… 𑀦 𑀥𑀫𑁆𑀫𑀓𑀣𑀺𑀓𑁄 𑀲𑀫𑀸𑀦𑁄 𑀥𑀫𑁆𑀫𑀓𑀣𑀺𑀓𑁂𑀦… 𑀦 𑀆𑀭𑀜𑁆𑀜𑀺𑀓𑁄 𑀲𑀫𑀸𑀦𑁄 𑀆𑀭𑀜𑁆𑀜𑀓𑁂𑀦… 𑀦 𑀧𑀺𑀡𑁆𑀟𑀧𑀸𑀢𑀺𑀓𑁄 𑀲𑀫𑀸𑀦𑁄 𑀧𑀺𑀡𑁆𑀟𑀧𑀸𑀢𑀺𑀓𑁂𑀦… 𑀦 𑀧𑀁𑀲𑀼𑀓𑀽𑀮𑀺𑀓𑁄 𑀲𑀫𑀸𑀦𑁄 𑀧𑀁𑀲𑀼𑀓𑀽𑀮𑀺𑀓𑁂𑀦… 𑀦 𑀢𑁂𑀘𑀻𑀯𑀭𑀺𑀓𑁄 𑀲𑀫𑀸𑀦𑁄 𑀢𑁂𑀘𑀻𑀯𑀭𑀓𑁂𑀦… 𑀦 𑀲𑀧𑀤𑀸𑀦𑀘𑀸𑀭𑀺𑀓𑁄 𑀲𑀫𑀸𑀦𑁄 𑀲𑀧𑀤𑀸𑀦𑀘𑀸𑀭𑀺𑀓𑁂𑀦… 𑀦 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀲𑀫𑀸𑀦𑁄 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁂𑀦… 𑀦 𑀦𑁂𑀲𑀚𑁆𑀚𑀺𑀓𑁄 𑀲𑀫𑀸𑀦𑁄 𑀦𑁂𑀲𑀜𑁆𑀜𑀺𑀓𑁂𑀦… 𑀦 𑀬𑀣𑀸𑀲𑀦𑁆𑀣𑀢𑀺𑀓𑁄 𑀲𑀫𑀸𑀦𑁄 𑀬𑀣𑀸𑀲𑀦𑁆𑀣𑀢𑀺𑀓𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦, 𑀦 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑀫𑀸𑀦𑁄 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀦𑀸 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦, 𑀦 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑀫𑀸𑀦𑁄 𑀤𑀼𑀢𑀺𑀬𑀲𑁆𑀲… 𑀦 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑀫𑀸𑀦𑁄 𑀢𑀢𑀺𑀬𑀲𑁆𑀲… 𑀦 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑀫𑀸𑀦𑁄 𑀮𑀸𑀪𑀻 𑀲𑀫𑀸𑀦𑁄 𑀘𑀢𑀼𑀢𑁆𑀣𑀲𑁆𑀲… 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀲𑀫𑀸𑀦𑁄 𑀆𑀓𑀸𑀲𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀲𑀫𑀸𑀦𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦 𑀲𑀫𑀸𑀧𑀢𑁆𑀢𑀺𑀬𑀸… 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀲𑀫𑀸𑀦𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦 𑀲𑀫𑀸𑀧𑀢𑁆𑀢𑀺𑀬𑀸… 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀲𑀫𑀸𑀦𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀺𑀦𑀸 𑀲𑀤𑁆𑀥𑀺𑀁 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀘𑀺𑀢𑁆𑀢𑁂𑀦 𑁋 𑀇𑀤𑀁 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁. 𑀦 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀧𑀸𑀕𑀩𑁆𑀪𑀺𑀬𑀁 𑀦 𑀲𑀺𑀓𑁆𑀔𑁂𑀬𑁆𑀬 𑀦 𑀘𑀭𑁂𑀬𑁆𑀬 𑀦 𑀆𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬, 𑀧𑀸𑀕𑀩𑁆𑀪𑀺𑀬𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀧𑀸𑀕𑀩𑁆𑀪𑀺𑀬𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀧𑀸𑀕𑀩𑁆𑀪𑀺𑀬𑀁 𑀦 𑀲𑀺𑀓𑁆𑀔𑁂𑀬𑁆𑀬.

𑀓𑀣𑀁 ¶ ¶ 𑀯𑀺𑀕𑁆𑀕𑀸𑀳𑀺𑀓𑀁 𑀦 𑀓𑀣𑀬𑁂𑀬𑁆𑀬𑀸𑀢𑀺. 𑀓𑀢𑀫𑀸 𑀯𑀺𑀕𑁆𑀕𑀸𑀳𑀺𑀓𑀸 𑀓𑀣𑀸? 𑀇𑀥𑁂𑀓𑀘𑁆𑀘𑁄 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺…𑀧𑁂… 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀯𑀺𑀕𑁆𑀕𑀸𑀳𑀺𑀓𑀸𑀬 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀣𑀸𑀬 𑀲𑀢𑀺 𑀓𑀣𑀸𑀩𑀸𑀳𑀼𑀮𑁆𑀮𑀁 𑀧𑀸𑀝𑀺𑀓𑀗𑁆𑀔𑀁, 𑀓𑀣𑀸𑀩𑀸𑀳𑀼𑀮𑁆𑀮𑁂 𑀲𑀢𑀺 𑀉𑀤𑁆𑀥𑀘𑁆𑀘𑀁, 𑀉𑀤𑁆𑀥𑀢𑀲𑁆𑀲 𑀅𑀲𑀁𑀯𑀭𑁄, 𑀅𑀲𑀁𑀯𑀼𑀢𑀲𑁆𑀲 𑀆𑀭𑀸 𑀘𑀺𑀢𑁆𑀢𑀁 ¶ 𑀲𑀫𑀸𑀥𑀺𑀫𑁆𑀳𑀸’’𑀢𑀺. 𑀓𑀣𑀁 𑀯𑀺𑀕𑁆𑀕𑀸𑀳𑀺𑀓𑀁 𑀦 𑀓𑀣𑀬𑁂𑀬𑁆𑀬𑀸𑀢𑀺. 𑀯𑀺𑀕𑁆𑀕𑀸𑀳𑀺𑀓𑀁 𑀓𑀣𑀁 𑀦 𑀓𑀣𑁂𑀬𑁆𑀬 𑀦 𑀪𑀡𑁂𑀬𑁆𑀬 𑀦 𑀤𑀻𑀧𑁂𑀬𑁆𑀬 𑀦 𑀯𑁄𑀳𑀭𑁂𑀬𑁆𑀬, 𑀯𑀺𑀕𑁆𑀕𑀸𑀳𑀺𑀓𑀁 𑀓𑀣𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀓𑀣𑀁 𑀯𑀺𑀕𑁆𑀕𑀸𑀳𑀺𑀓𑀁 𑀦 𑀓𑀣𑀬𑁂𑀬𑁆𑀬.

‘‘𑀦 ¶ 𑀘 𑀓𑀢𑁆𑀣𑀺𑀓𑁄 𑀲𑀺𑀬𑀸 𑀪𑀺𑀓𑁆𑀔𑀼, 𑀦 𑀘 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀸𑀲𑁂𑀬𑁆𑀬;

𑀧𑀸𑀕𑀩𑁆𑀪𑀺𑀬𑀁 𑀦 𑀲𑀺𑀓𑁆𑀔𑁂𑀬𑁆𑀬, 𑀓𑀣𑀁 𑀯𑀺𑀕𑁆𑀕𑀸𑀳𑀺𑀓𑀁 𑀦 𑀓𑀣𑀬𑁂𑀬𑁆𑀬𑀸’’𑀢𑀺.

𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣, 𑀲𑀫𑁆𑀧𑀚𑀸𑀦𑁄 𑀲𑀞𑀸𑀦𑀺 𑀦 𑀓𑀬𑀺𑀭𑀸;

𑀅𑀣 𑀚𑀻𑀯𑀺𑀢𑁂𑀦 𑀧𑀜𑁆𑀜𑀸𑀬, 𑀲𑀻𑀮𑀩𑁆𑀩𑀢𑁂𑀦 𑀦𑀸𑀜𑁆𑀜𑀫𑀢𑀺𑀫𑀜𑁆𑀜𑁂.

𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣𑀸𑀢𑀺. 𑀫𑁄𑀲𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀫𑀼𑀲𑀸𑀯𑀸𑀤𑁄. 𑀇𑀥𑁂𑀓𑀘𑁆𑀘𑁄 ¶ 𑀲𑀪𑀕𑁆𑀕𑀢𑁄 [𑀲𑀪𑀸𑀕𑀕𑁆𑀕𑀢𑁄 (𑀲𑀻. 𑀓.)] 𑀯𑀸 𑀧𑀭𑀺𑀲𑀕𑁆𑀕𑀢𑁄 [𑀧𑀭𑀺𑀲𑀕𑀢𑁄 (𑀲𑀻. 𑀓.)] 𑀯𑀸…𑀧𑁂… 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑁄𑀲𑀯𑀚𑁆𑀚𑀁. 𑀅𑀧𑀺 𑀘 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘 𑀘𑀢𑀽𑀳𑀸𑀓𑀸𑀭𑁂𑀳𑀺… 𑀧𑀜𑁆𑀘𑀳𑀸𑀓𑀸𑀭𑁂𑀳𑀺… 𑀙𑀳𑀸𑀓𑀸𑀭𑁂𑀳𑀺… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺… 𑀅𑀝𑁆𑀞𑀳𑀸𑀓𑀸𑀭𑁂𑀳𑀺… 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀫𑀬𑀸 ¶ 𑀪𑀡𑀺𑀢’’𑀦𑁆𑀢𑀺 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁 𑀯𑀺𑀦𑀺𑀥𑀸𑀬 𑀲𑀜𑁆𑀜𑀁 𑀯𑀺𑀦𑀺𑀥𑀸𑀬 𑀪𑀸𑀯𑀁 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣𑀸𑀢𑀺. 𑀫𑁄𑀲𑀯𑀚𑁆𑀚𑁂 𑀦 𑀬𑀸𑀬𑁂𑀬𑁆𑀬 𑀦 𑀦𑀺𑀬𑁆𑀬𑀸𑀬𑁂𑀬𑁆𑀬 𑀦 𑀯𑀳𑁂𑀬𑁆𑀬 [𑀦 𑀯𑀼𑀬𑁆𑀳𑁂𑀬𑁆𑀬 (𑀲𑀻. 𑀓.), 𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂] 𑀦 𑀲𑀁𑀳𑀭𑁂𑀬𑁆𑀬, 𑀫𑁄𑀲𑀯𑀚𑁆𑀚𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀫𑁄𑀲𑀯𑀚𑁆𑀚𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣.

𑀲𑀫𑁆𑀧𑀚𑀸𑀦𑁄 𑀲𑀞𑀸𑀦𑀺 𑀦 𑀓𑀬𑀺𑀭𑀸𑀢𑀺. 𑀓𑀢𑀫𑀁 𑀲𑀸𑀞𑁂𑀬𑁆𑀬𑀁? 𑀇𑀥𑁂𑀓𑀘𑁆𑀘𑁄 𑀲𑀞𑁄 𑀳𑁄𑀢𑀺 𑀧𑀭𑀺𑀲𑀞𑁄, 𑀬𑀁 𑀢𑀢𑁆𑀣 𑀲𑀞𑀁 𑀲𑀞𑀢𑀸 𑀲𑀸𑀞𑁂𑀬𑁆𑀬𑀁 𑀓𑀓𑁆𑀓𑀭𑀢𑀸 𑀓𑀓𑁆𑀓𑀭𑀺𑀬𑀁 𑀧𑀭𑀺𑀓𑁆𑀔𑀢𑁆𑀢𑀢𑀸 𑀧𑀸𑀭𑀺𑀓𑁆𑀔𑀢𑁆𑀢𑀺𑀬𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀸𑀞𑁂𑀬𑁆𑀬𑀁. 𑀲𑀫𑁆𑀧𑀚𑀸𑀦𑁄 𑀲𑀞𑀸𑀦𑀺 𑀦 𑀓𑀬𑀺𑀭𑀸𑀢𑀺. 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀲𑀸𑀞𑁂𑀬𑁆𑀬𑀁 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀲𑀸𑀞𑁂𑀬𑁆𑀬𑀁 ¶ 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 ¶ 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀲𑀸𑀞𑁂𑀬𑁆𑀬𑀸 𑀆𑀭𑀢𑁄 𑀅𑀲𑁆𑀲 ¶ 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀲𑀫𑁆𑀧𑀚𑀸𑀦𑁄 𑀲𑀞𑀸𑀦𑀺 𑀦 𑀓𑀬𑀺𑀭𑀸.

𑀅𑀣 𑀚𑀻𑀯𑀺𑀢𑁂𑀦 𑀧𑀜𑁆𑀜𑀸𑀬, 𑀲𑀻𑀮𑀩𑁆𑀩𑀢𑁂𑀦 𑀦𑀸𑀜𑁆𑀜𑀫𑀢𑀺𑀫𑀜𑁆𑀜𑁂𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀇𑀥𑁂𑀓𑀘𑁆𑀘𑁄 𑀮𑀽𑀔𑀚𑀻𑀯𑀺𑀢𑀁 𑀚𑀻𑀯𑀦𑁆𑀢𑁄 𑀧𑀭𑀁 𑀧𑀡𑀻𑀢𑀚𑀻𑀯𑀺𑀢𑀁 𑀚𑀻𑀯𑀦𑁆𑀢𑀁 𑀅𑀢𑀺𑀫𑀜𑁆𑀜𑀢𑀺 𑁋 ‘‘𑀓𑀺𑀁 𑀧𑀦𑀸𑀬𑀁 𑀩𑀳𑀼𑀮𑀸𑀚𑀻𑀯𑁄 𑀲𑀩𑁆𑀩𑀁 𑀲𑀁𑀪𑀓𑁆𑀔𑁂𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀁 𑀅𑀲𑀦𑀺𑀯𑀺𑀘𑀓𑁆𑀓𑀤𑀦𑁆𑀢𑀓𑀽𑀝𑀲𑀫𑀡𑀧𑁆𑀧𑀥𑀸𑀦𑁂𑀦𑀸’’𑀢𑀺 [𑀅𑀲𑀦𑀻𑀯 𑀘𑀓𑁆𑀓𑀁 𑀤𑀦𑁆𑀢𑀓𑀽𑀝𑀁 𑀲𑀫𑀡𑀧𑁆𑀧𑀥𑀸𑀦𑁂𑀦𑀸𑀢𑀺 (𑀲𑀻.)]. 𑀲𑁄 𑀢𑀸𑀬 𑀮𑀽𑀔𑀚𑀻𑀯𑀺𑀢𑀸𑀬 𑀧𑀭𑀁 𑀧𑀡𑀻𑀢𑀚𑀻𑀯𑀺𑀢𑀁 𑀚𑀻𑀯𑀦𑁆𑀢𑀁 𑀅𑀢𑀺𑀫𑀜𑁆𑀜𑀢𑀺.

𑀇𑀥𑁂𑀓𑀘𑁆𑀘𑁄 𑀧𑀡𑀻𑀢𑀚𑀻𑀯𑀺𑀢𑀁 𑀚𑀻𑀯𑀦𑁆𑀢𑁄 𑀧𑀭𑀁 𑀮𑀽𑀔𑀚𑀻𑀯𑀺𑀢𑀁 𑀚𑀻𑀯𑀦𑁆𑀢𑀁 𑀅𑀢𑀺𑀫𑀜𑁆𑀜𑀢𑀺 𑁋 ‘‘𑀓𑀺𑀁 𑀧𑀦𑀸𑀬𑀁 𑀅𑀧𑁆𑀧𑀧𑀼𑀜𑁆𑀜𑁄 𑀅𑀧𑁆𑀧𑁂𑀲𑀓𑁆𑀔𑁄 𑀦 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀲𑁄 𑀢𑀸𑀬 𑀧𑀡𑀻𑀢𑀚𑀻𑀯𑀺𑀢𑀸𑀬 ¶ 𑀧𑀭𑀁 𑀮𑀽𑀔𑀚𑀻𑀯𑀺𑀢𑀁 𑀚𑀻𑀯𑀦𑁆𑀢𑀁 𑀅𑀢𑀺𑀫𑀜𑁆𑀜𑀢𑀺. 𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑀫𑀲𑁆𑀫𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄, 𑀇𑀫𑁂 𑀧𑀦𑀜𑁆𑀜𑁂 𑀦 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸’’𑀢𑀺. 𑀲𑁄 𑀢𑀸𑀬 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀧𑀭𑀁 𑀅𑀢𑀺𑀫𑀜𑁆𑀜𑀢𑀺. 𑀇𑀥𑁂𑀓𑀘𑁆𑀘𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀇𑀫𑁂 𑀧𑀦𑀜𑁆𑀜𑁂 ¶ 𑀪𑀺𑀓𑁆𑀔𑀽 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺. 𑀲𑁄 𑀢𑀸𑀬 𑀲𑀻𑀮𑀲𑀫𑁆𑀧𑀤𑀸𑀬 𑀧𑀭𑀁 𑀅𑀢𑀺𑀫𑀜𑁆𑀜𑀢𑀺. 𑀇𑀥𑁂𑀓𑀘𑁆𑀘𑁄 𑀯𑀢𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀆𑀭𑀜𑁆𑀜𑀺𑀓𑁄 𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑁄 𑀯𑀸 𑀧𑀁𑀲𑀼𑀓𑀽𑀮𑀺𑀓𑁄 𑀯𑀸 𑀢𑁂𑀘𑀻𑀯𑀭𑀺𑀓𑁄 𑀯𑀸 𑀲𑀧𑀤𑀸𑀦𑀘𑀸𑀭𑀺𑀓𑁄 𑀯𑀸 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀯𑀸 𑀦𑁂𑀲𑀚𑁆𑀚𑀺𑀓𑁄 𑀯𑀸 𑀬𑀣𑀸𑀲𑀦𑁆𑀣𑀢𑀺𑀓𑁄 𑀯𑀸. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑀫𑀲𑁆𑀫𑀺 𑀯𑀢 𑀲𑀫𑁆𑀧𑀦𑁆𑀦𑁄, 𑀇𑀫𑁂 𑀧𑀦𑀜𑁆𑀜𑁂 𑀦 𑀯𑀢𑀲𑀫𑁆𑀧𑀦𑁆𑀦𑀸’’𑀢𑀺. 𑀲𑁄 𑀢𑀸𑀬 𑀯𑀢𑀲𑀫𑁆𑀧𑀤𑀸𑀬 𑀧𑀭𑀁 𑀅𑀢𑀺𑀫𑀜𑁆𑀜𑀢𑀺. 𑀅𑀣 𑀚𑀻𑀯𑀺𑀢𑁂𑀦 𑀧𑀜𑁆𑀜𑀸𑀬, 𑀲𑀻𑀮𑀩𑁆𑀩𑀢𑁂𑀦 𑀦𑀸𑀜𑁆𑀜𑀫𑀢𑀺𑀫𑀜𑁆𑀜𑁂𑀢𑀺. 𑀮𑀽𑀔𑀚𑀻𑀯𑀺𑀢𑀸𑀬 𑀯𑀸 𑀧𑀡𑀻𑀢𑀚𑀻𑀯𑀺𑀢𑀸𑀬 𑀯𑀸 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀯𑀸 𑀲𑀻𑀮𑀲𑀫𑁆𑀧𑀤𑀸𑀬 𑀯𑀸 𑀯𑀢𑀲𑀫𑁆𑀧𑀤𑀸𑀬 𑀯𑀸 𑀧𑀭𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀦𑀸𑀯𑀚𑀸𑀦𑁂𑀬𑁆𑀬, 𑀦 𑀢𑁂𑀦 𑀫𑀸𑀦𑀁 𑀚𑀦𑁂𑀬𑁆𑀬, 𑀦 𑀢𑁂𑀦 𑀣𑀤𑁆𑀥𑁄 𑀅𑀲𑁆𑀲, 𑀧𑀢𑁆𑀣𑀤𑁆𑀥𑁄 𑀧𑀕𑁆𑀕𑀳𑀺𑀢𑀲𑀺𑀭𑁄𑀢𑀺 𑁋 𑀅𑀣 𑀚𑀻𑀯𑀺𑀢𑁂𑀦 𑀧𑀜𑁆𑀜𑀸𑀬 𑀲𑀻𑀮𑀩𑁆𑀩𑀢𑁂𑀦 𑀦𑀸𑀜𑁆𑀜𑀫𑀢𑀺𑀫𑀜𑁆𑀜𑁂.

‘‘𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣, 𑀲𑀫𑁆𑀧𑀚𑀸𑀦𑁄 𑀲𑀞𑀸𑀦𑀺 𑀦 𑀓𑀬𑀺𑀭𑀸;

𑀅𑀣 𑀚𑀻𑀯𑀺𑀢𑁂𑀦 𑀧𑀜𑁆𑀜𑀸𑀬, 𑀲𑀻𑀮𑀩𑁆𑀩𑀢𑁂𑀦 𑀦𑀸𑀜𑁆𑀜𑀫𑀢𑀺𑀫𑀜𑁆𑀜𑁂’’𑀢𑀺.

𑀲𑀼𑀢𑁆𑀯𑀸 ¶ ¶ 𑀭𑀼𑀲𑀺𑀢𑁄 [𑀤𑀽𑀲𑀺𑀢𑁄 (𑀲𑀻. 𑀲𑁆𑀬𑀸.)] 𑀩𑀳𑀼𑀁 𑀯𑀸𑀘𑀁, 𑀲𑀫𑀡𑀸𑀦𑀁 𑀯𑀸 𑀧𑀼𑀣𑀼𑀚𑀦𑀸𑀦𑀁 [𑀧𑀼𑀣𑀼𑀯𑀘𑀦𑀸𑀦𑀁 (𑀲𑀻. 𑀲𑁆𑀬𑀸.)] ;

𑀨𑀭𑀼𑀲𑁂𑀦 𑀦𑁂 𑀦 𑀧𑀝𑀺𑀯𑀚𑁆𑀚𑀸, 𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀓𑀭𑁄𑀦𑁆𑀢𑀺 [𑀧𑀝𑀺𑀲𑁂𑀦𑀺 𑀓𑀭𑁄𑀢𑀺 (𑀲𑁆𑀬𑀸.)] .

𑀲𑀼𑀢𑁆𑀯𑀸 ¶ ¶ 𑀭𑀼𑀲𑀺𑀢𑁄 𑀩𑀳𑀼𑀁 𑀯𑀸𑀘𑀁, 𑀲𑀫𑀡𑀸𑀦𑀁 𑀧𑀼𑀣𑀼𑀚𑀦𑀸𑀦𑀦𑁆𑀢𑀺. 𑀭𑀼𑀲𑀺𑀢𑁄𑀢𑀺 𑀤𑀽𑀲𑀺𑀢𑁄 𑀔𑀼𑀁𑀲𑀺𑀢𑁄 𑀖𑀝𑁆𑀝𑀺𑀢𑁄 𑀯𑀫𑁆𑀪𑀺𑀢𑁄 𑀕𑀭𑀳𑀺𑀢𑁄 𑀉𑀧𑀯𑀤𑀺𑀢𑁄. 𑀲𑀫𑀡𑀸𑀦𑀦𑁆𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀭𑀺𑀩𑁆𑀩𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀚𑀲𑀫𑀸𑀧𑀦𑁆𑀦𑀸. 𑀧𑀼𑀣𑀼𑀚𑀦𑀸𑀦𑀦𑁆𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘, 𑀢𑁂 𑀩𑀳𑀼𑀓𑀸𑀳𑀺 𑀯𑀸𑀘𑀸𑀳𑀺 𑀅𑀦𑀺𑀝𑁆𑀞𑀸𑀳𑀺 𑀅𑀓𑀦𑁆𑀢𑀸𑀳𑀺 𑀅𑀫𑀦𑀸𑀧𑀸𑀳𑀺 𑀅𑀓𑁆𑀓𑁄𑀲𑁂𑀬𑁆𑀬𑀼𑀁 𑀧𑀭𑀺𑀪𑀸𑀲𑁂𑀬𑁆𑀬𑀼𑀁 𑀭𑁄𑀲𑁂𑀬𑁆𑀬𑀼𑀁 𑀯𑀺𑀭𑁄𑀲𑁂𑀬𑁆𑀬𑀼𑀁 𑀳𑀺𑀁𑀲𑁂𑀬𑁆𑀬𑀼𑀁 𑀯𑀺𑀳𑀺𑀁𑀲𑁂𑀬𑁆𑀬𑀼𑀁 𑀳𑁂𑀞𑁂𑀬𑁆𑀬𑀼𑀁 𑀯𑀺𑀳𑁂𑀞𑁂𑀬𑁆𑀬𑀼𑀁 𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑀁 𑀓𑀭𑁂𑀬𑁆𑀬𑀼𑀁 𑀢𑁂𑀲𑀁 𑀩𑀳𑀼𑀁 𑀯𑀸𑀘𑀁 𑀅𑀦𑀺𑀝𑁆𑀞𑀁 𑀅𑀓𑀦𑁆𑀢𑀁 𑀅𑀫𑀦𑀸𑀧𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀲𑀼𑀢𑁆𑀯𑀸 𑀭𑀼𑀲𑀺𑀢𑁄 𑀩𑀳𑀼𑀁 𑀯𑀸𑀘𑀁, 𑀲𑀫𑀡𑀸𑀦𑀁 𑀯𑀸 𑀧𑀼𑀣𑀼𑀚𑀦𑀸𑀦𑀁.

𑀨𑀭𑀼𑀲𑁂𑀦 𑀦𑁂 𑀦 𑀧𑀝𑀺𑀯𑀚𑁆𑀚𑀸𑀢𑀺. 𑀨𑀭𑀼𑀲𑁂𑀦𑀸𑀢𑀺 𑀨𑀭𑀼𑀲𑁂𑀦 𑀓𑀓𑁆𑀔𑀴𑁂𑀦 𑀦 𑀧𑀝𑀺𑀯𑀚𑁆𑀚𑀸 𑀦𑀧𑁆𑀧𑀝𑀺𑀪𑀡𑁂𑀬𑁆𑀬, 𑀅𑀓𑁆𑀓𑁄𑀲𑀦𑁆𑀢𑀁 𑀦 𑀧𑀘𑁆𑀘𑀓𑁆𑀓𑁄𑀲𑁂𑀬𑁆𑀬, 𑀭𑁄𑀲𑀦𑁆𑀢𑀁 𑀦𑀧𑁆𑀧𑀝𑀺𑀭𑁄𑀲𑁂𑀬𑁆𑀬, 𑀪𑀡𑁆𑀟𑀦𑀁 𑀦𑀧𑁆𑀧𑀝𑀺𑀪𑀡𑁆𑀟𑁂𑀬𑁆𑀬 𑀦 𑀓𑀮𑀳𑀁 𑀓𑀭𑁂𑀬𑁆𑀬 𑀦 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬 𑀦 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬 𑀦 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬 𑀦 𑀫𑁂𑀥𑀕𑀁 𑀓𑀭𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀨𑀭𑀼𑀲𑁂𑀦 𑀦𑁂 𑀦 𑀧𑀝𑀺𑀯𑀚𑁆𑀚𑀸.

𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀓𑀭𑁄𑀦𑁆𑀢𑀻𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲… 𑀫𑁄𑀳𑀲𑁆𑀲… 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 ¶ 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑁋 𑀲𑀦𑁆𑀢𑁄. 𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀓𑀭𑁄𑀦𑁆𑀢𑀻𑀢𑀺. 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀧𑀝𑀺𑀫𑀮𑁆𑀮𑀁 𑀧𑀝𑀺𑀓𑀡𑁆𑀝𑀓𑀁 [𑀧𑀝𑀺𑀩𑀦𑁆𑀥𑀦𑀁 (𑀲𑀻.)] 𑀧𑀝𑀺𑀧𑀓𑁆𑀔𑀁 𑀦 𑀓𑀭𑁄𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 ¶ 𑀦 𑀲𑀜𑁆𑀚𑀦𑁂𑀦𑁆𑀢𑀺 ¶ 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑁋 𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀓𑀭𑁄𑀦𑁆𑀢𑀺.

‘‘𑀲𑀼𑀢𑁆𑀯𑀸 𑀭𑀼𑀲𑀺𑀢𑁄 𑀩𑀳𑀼𑀁 𑀯𑀸𑀘𑀁, 𑀲𑀫𑀡𑀸𑀦𑀁 𑀯𑀸 𑀧𑀼𑀣𑀼𑀚𑀦𑀸𑀦𑀁;

𑀨𑀭𑀼𑀲𑁂𑀦 𑀦𑁂 𑀦 𑀧𑀝𑀺𑀯𑀚𑁆𑀚𑀸, 𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀓𑀭𑁄𑀦𑁆𑀢𑀻’’𑀢𑀺.

𑀏𑀢𑀜𑁆𑀘 ¶ 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀘𑀺𑀦𑀁 𑀪𑀺𑀓𑁆𑀔𑀼 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂;

𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀼𑀢𑀺𑀁 𑀜𑀢𑁆𑀯𑀸, 𑀲𑀸𑀲𑀦𑁂 𑀕𑁄𑀢𑀫𑀲𑁆𑀲 𑀦𑀧𑁆𑀧𑀫𑀚𑁆𑀚𑁂𑀬𑁆𑀬.

𑀏𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺. 𑀏𑀢𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀝𑀁 𑀯𑀺𑀪𑀢𑁆𑀢𑀁 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀁 𑀥𑀫𑁆𑀫𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺. 𑀏𑀯𑀫𑁆𑀧𑀺 𑀏𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬. 𑀅𑀣 𑀯𑀸 𑀲𑀫𑀜𑁆𑀘 𑀯𑀺𑀲𑀫𑀜𑁆𑀘 𑀧𑀣𑀜𑁆𑀘 𑀯𑀺𑀧𑀣𑀜𑁆𑀘 𑀲𑀸𑀯𑀚𑁆𑀚𑀜𑁆𑀘 𑀅𑀦𑀯𑀚𑁆𑀚𑀜𑁆𑀘 𑀳𑀻𑀦𑀜𑁆𑀘 𑀧𑀡𑀻𑀢𑀜𑁆𑀘 𑀓𑀡𑁆𑀳𑀜𑁆𑀘 𑀲𑀼𑀓𑁆𑀓𑀜𑁆𑀘 𑀯𑀺𑀜𑁆𑀜𑀽𑀕𑀭𑀳𑀺𑀢𑀜𑁆𑀘 𑀯𑀺𑀜𑁆𑀜𑀽𑀧𑀲𑀢𑁆𑀣𑀜𑁆𑀘 𑀥𑀫𑁆𑀫𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 ¶ 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺. 𑀏𑀯𑀫𑁆𑀧𑀺 𑀏𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬. 𑀅𑀣 𑀯𑀸 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀥𑀫𑁆𑀫𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺. 𑀏𑀯𑀫𑁆𑀧𑀺 𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬.

𑀯𑀺𑀘𑀺𑀦𑀁 𑀪𑀺𑀓𑁆𑀔𑀼 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂𑀢𑀺. 𑀯𑀺𑀘𑀺𑀦𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑁄 𑀧𑀯𑀺𑀘𑀺𑀦𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀢𑀻𑀭𑀬𑀦𑁆𑀢𑁄 𑀯𑀺𑀪𑀸𑀯𑀬𑀦𑁆𑀢𑁄 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑁄. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑁄 ¶ 𑀧𑀯𑀺𑀘𑀺𑀦𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀢𑀻𑀭𑀬𑀦𑁆𑀢𑁄 𑀯𑀺𑀪𑀸𑀯𑀬𑀦𑁆𑀢𑁄 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑁄𑀢𑀺 𑁋 𑀯𑀺𑀘𑀺𑀦𑀁 𑀪𑀺𑀓𑁆𑀔𑀼. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑀁…𑀧𑁂… 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀲𑀺𑀓𑁆𑀔𑁂𑀢𑀺 ¶ 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬…𑀧𑁂… 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀯𑀺𑀘𑀺𑀦𑀁 𑀪𑀺𑀓𑁆𑀔𑀼 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂.

𑀲𑀦𑁆𑀢𑀻𑀢𑀺 ¶ 𑀦𑀺𑀩𑁆𑀩𑀼𑀢𑀺𑀁 𑀜𑀢𑁆𑀯𑀸𑀢𑀺. 𑀭𑀸𑀕𑀲𑁆𑀲 𑀦𑀺𑀩𑁆𑀩𑀼𑀢𑀺𑀁 𑀲𑀦𑁆𑀢𑀻𑀢𑀺 𑀜𑀢𑁆𑀯𑀸, 𑀤𑁄𑀲𑀲𑁆𑀲… 𑀫𑁄𑀳𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀼𑀢𑀺𑀁 𑀲𑀦𑁆𑀢𑀻𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀼𑀢𑀺𑀁 𑀜𑀢𑁆𑀯𑀸.

𑀲𑀸𑀲𑀦𑁂 𑀕𑁄𑀢𑀫𑀲𑁆𑀲 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺. 𑀕𑁄𑀢𑀫𑀲𑁆𑀲 𑀲𑀸𑀲𑀦𑁂 𑀩𑀼𑀤𑁆𑀥𑀲𑀸𑀲𑀦𑁂 𑀚𑀺𑀦𑀲𑀸𑀲𑀦𑁂 𑀢𑀣𑀸𑀕𑀢𑀲𑀸𑀲𑀦𑁂 ¶ 𑀤𑁂𑀯𑀲𑀸𑀲𑀦𑁂 𑀅𑀭𑀳𑀦𑁆𑀢𑀲𑀸𑀲𑀦𑁂. 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻 𑀅𑀲𑁆𑀲 𑀲𑀸𑀢𑀘𑁆𑀘𑀓𑀸𑀭𑀻 𑀅𑀝𑁆𑀞𑀺𑀢𑀓𑀸𑀭𑀻 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀤𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁…𑀧𑁂… 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁… 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁? 𑀓𑀤𑀸𑀳𑀁 𑀅𑀧𑀭𑀺𑀜𑁆𑀜𑀸𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑁂𑀬𑁆𑀬𑀁, 𑀅𑀧𑁆𑀧𑀳𑀻𑀦𑁂 𑀯𑀸 𑀓𑀺𑀮𑁂𑀲𑁂 𑀧𑀚𑀳𑁂𑀬𑁆𑀬𑀁, 𑀅𑀪𑀸𑀯𑀺𑀢𑀁 𑀯𑀸 𑀫𑀕𑁆𑀕𑀁 𑀪𑀸𑀯𑁂𑀬𑁆𑀬𑀁, 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺? 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀣𑀸𑀫𑁄 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀲𑀸𑀲𑀦𑁂 𑀕𑁄𑀢𑀫𑀲𑁆𑀲 𑀦𑀧𑁆𑀧𑀫𑀚𑁆𑀚𑁂𑀬𑁆𑀬.

‘‘𑀏𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀘𑀺𑀦𑀁 𑀪𑀺𑀓𑁆𑀔𑀼 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂;

𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀼𑀢𑀺𑀁 𑀜𑀢𑁆𑀯𑀸, 𑀲𑀸𑀲𑀦𑁂 𑀕𑁄𑀢𑀫𑀲𑁆𑀲 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺.

𑀅𑀪𑀺𑀪𑀽 ¶ ¶ 𑀳𑀺 𑀲𑁄 𑀅𑀦𑀪𑀺𑀪𑀽𑀢𑁄, 𑀲𑀓𑁆𑀔𑀺𑀥𑀫𑁆𑀫𑀫𑀦𑀻𑀢𑀺𑀳𑀫𑀤𑁆𑀤𑀲𑀺;

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂, 𑀅𑀧𑁆𑀧𑀫𑀢𑁆𑀢𑁄 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂.[𑀇𑀢𑀺 𑀪𑀕𑀯𑀸]

𑀅𑀪𑀺𑀪𑀽 ¶ 𑀳𑀺 𑀲𑁄 𑀅𑀦𑀪𑀺𑀪𑀽𑀢𑁄𑀢𑀺. 𑀅𑀪𑀺𑀪𑀽𑀢𑀺 𑀭𑀽𑀧𑀸𑀪𑀺𑀪𑀽 [𑀅𑀪𑀺𑀪𑀽𑀢𑀭𑀽𑀧𑀸 (𑀲𑁆𑀬𑀸.) 𑀏𑀯𑀫𑀜𑁆𑀜𑁂𑀲𑀼 𑀧𑀜𑁆𑀘𑀧𑀤𑁂𑀲𑀼𑀧𑀺] 𑀲𑀤𑁆𑀤𑀸𑀪𑀺𑀪𑀽 𑀕𑀦𑁆𑀥𑀸𑀪𑀺𑀪𑀽 𑀭𑀲𑀸𑀪𑀺𑀪𑀽 𑀨𑁄𑀝𑁆𑀞𑀩𑁆𑀩𑀸𑀪𑀺𑀪𑀽 𑀥𑀫𑁆𑀫𑀸𑀪𑀺𑀪𑀽, 𑀅𑀦𑀪𑀺𑀪𑀽𑀢𑁄 𑀓𑁂𑀳𑀺𑀘𑀺 𑀓𑀺𑀮𑁂𑀲𑁂𑀳𑀺, 𑀅𑀪𑀺𑀪𑁄𑀲𑀺 𑀦𑁂 𑀧𑀸𑀧𑀓𑁂 [𑀅𑀪𑀺𑀪𑀽 𑀳𑀺 𑀦𑁂 𑀳𑀻𑀦𑁂 𑀧𑀸𑀧𑀓𑁂 (𑀲𑀻. 𑀓.), 𑀅𑀪𑀺𑀪𑀽 𑀳𑀺 𑀧𑀸𑀧𑀓𑁂 (𑀲𑁆𑀬𑀸.)] 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀲𑀁𑀓𑀺𑀮𑁂𑀲𑀺𑀓𑁂 𑀧𑁄𑀦𑁄𑀪𑀯𑀺𑀓𑁂 𑀲𑀤𑀭𑁂 𑀤𑀼𑀓𑁆𑀔𑀯𑀺𑀧𑀸𑀓𑁂 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑁂𑀢𑀺 𑁋 𑀅𑀪𑀺𑀪𑀽 𑀳𑀺 𑀲𑁄 𑀅𑀦𑀪𑀺𑀪𑀽𑀢𑁄.

𑀲𑀓𑁆𑀔𑀺𑀥𑀫𑁆𑀫𑀫𑀦𑀻𑀢𑀺𑀳𑀫𑀤𑁆𑀤𑀲𑀻𑀢𑀺. 𑀲𑀓𑁆𑀔𑀺𑀥𑀫𑁆𑀫𑀦𑁆𑀢𑀺 𑀦 𑀇𑀢𑀺𑀳𑀺𑀢𑀺𑀳𑀁 𑀦 𑀇𑀢𑀺𑀓𑀺𑀭𑀺𑀬𑀸𑀬 𑀦 𑀧𑀭𑀫𑁆𑀧𑀭𑀸𑀬 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬 𑀦 𑀢𑀓𑁆𑀓𑀳𑁂𑀢𑀼 𑀦 𑀦𑀬𑀳𑁂𑀢𑀼 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁 𑀅𑀤𑁆𑀤𑀲𑀺 𑀅𑀤𑁆𑀤𑀓𑁆𑀔𑀺 𑀅𑀧𑀲𑁆𑀲𑀺 𑀧𑀝𑀺𑀯𑀺𑀚𑁆𑀛𑀻𑀢𑀺 𑁋 𑀲𑀓𑁆𑀔𑀺𑀥𑀫𑁆𑀫𑀫𑀦𑀻𑀢𑀺𑀳𑀫𑀤𑁆𑀤𑀲𑀺.

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸. 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂𑀢𑀺. 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀕𑁄𑀢𑀫𑀲𑀸𑀲𑀦𑁂 𑀩𑀼𑀤𑁆𑀥𑀲𑀸𑀲𑀦𑁂 𑀚𑀺𑀦𑀲𑀸𑀲𑀦𑁂 𑀢𑀣𑀸𑀕𑀢𑀲𑀸𑀲𑀦𑁂 𑀤𑁂𑀯𑀲𑀸𑀲𑀦𑁂 𑀅𑀭𑀳𑀦𑁆𑀢𑀲𑀸𑀲𑀦𑁂𑀢𑀺 𑁋 𑀢𑀲𑁆𑀫𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂.

𑀅𑀧𑁆𑀧𑀫𑀢𑁆𑀢𑁄 ¶ ¶ 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂 (𑀇𑀢𑀺 𑀪𑀕𑀯𑀸)𑀢𑀺. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻…𑀧𑁂… 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁…𑀧𑁂… 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀦𑀫𑀲𑁆𑀲𑀦𑁆𑀢𑀺 𑀓𑀸𑀬𑁂𑀦 𑀯𑀸 𑀦𑀫𑀲𑁆𑀲𑀫𑀸𑀦𑁄 𑀯𑀸𑀘𑀸𑀬 𑀯𑀸 𑀦𑀫𑀲𑁆𑀲𑀫𑀸𑀦𑁄 𑀘𑀺𑀢𑁆𑀢𑁂𑀦 𑀯𑀸 𑀦𑀫𑀲𑁆𑀲𑀫𑀸𑀦𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀫𑀸𑀦𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 ¶ 𑀯𑀸 𑀦𑀫𑀲𑁆𑀲𑀫𑀸𑀦𑁄 𑀲𑀓𑁆𑀓𑀼𑀭𑀼𑀫𑀸𑀦𑁄 𑀕𑀭𑀼𑀓𑀼𑀭𑀼𑀫𑀸𑀦𑁄 [𑀲𑀓𑁆𑀓𑀸𑀭𑀫𑀸𑀦𑁄 𑀕𑀭𑀼𑀓𑀸𑀭𑀫𑀸𑀦𑁄 (𑀲𑁆𑀬𑀸.)] 𑀫𑀸𑀦𑀬𑀫𑀸𑀦𑁄 𑀧𑀽𑀚𑀬𑀫𑀸𑀦𑁄 𑀅𑀧𑀘𑀬𑀫𑀸𑀦𑁄. 𑀅𑀦𑀼𑀲𑀺𑀓𑁆𑀔𑁂𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀘𑀭𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀅𑀧𑁆𑀧𑀫𑀢𑁆𑀢𑁄 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂. (𑀇𑀢𑀺 𑀪𑀕𑀯𑀸).

‘‘𑀅𑀪𑀺𑀪𑀽 ¶ 𑀳𑀺 𑀲𑁄 𑀅𑀦𑀪𑀺𑀪𑀽𑀢𑁄, 𑀲𑀓𑁆𑀔𑀺𑀥𑀫𑁆𑀫𑀫𑀦𑀻𑀢𑀺𑀳𑀫𑀤𑁆𑀤𑀲𑀺;

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂, 𑀅𑀧𑁆𑀧𑀫𑀢𑁆𑀢𑁄 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂’’. [𑀇𑀢𑀺 𑀪𑀕𑀯𑀸𑀢𑀺]

𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 [𑀢𑀼𑀯𑀝𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 (𑀲𑀻. 𑀲𑁆𑀬𑀸.) 𑀲𑀼𑀢𑁆𑀢𑀦𑀺𑀧𑀸𑀢𑁂𑀧𑀺] 𑀘𑀼𑀤𑁆𑀤𑀲𑀫𑁄.

𑁧𑁫. 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀅𑀢𑁆𑀢𑀤𑀡𑁆𑀟𑀸 ¶ ¶ 𑀪𑀬𑀁 𑀚𑀸𑀢𑀁, 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁;

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸.

𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀦𑁆𑀢𑀺. 𑀤𑀡𑁆𑀟𑀸𑀢𑀺 𑀢𑀬𑁄 𑀤𑀡𑁆𑀟𑀸 𑁋 𑀓𑀸𑀬𑀤𑀡𑁆𑀟𑁄, 𑀯𑀘𑀻𑀤𑀡𑁆𑀟𑁄, 𑀫𑀦𑁄𑀤𑀡𑁆𑀟𑁄. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀡𑁆𑀟𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀡𑁆𑀟𑁄, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀡𑁆𑀟𑁄. 𑀪𑀬𑀦𑁆𑀢𑀺 𑀤𑁆𑀯𑁂 𑀪𑀬𑀸𑀦𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀪𑀬𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀪𑀬𑀁. 𑀓𑀢𑀫𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑀬𑀁? 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺. 𑀢𑀫𑁂𑀦𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺 𑁋 ‘‘𑀅𑀬𑀁, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻. 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀧𑀭𑀺𑀪𑀸𑀲𑀢𑀺. 𑀲𑁄 𑀧𑀭𑀺𑀪𑀸𑀲𑀧𑀘𑁆𑀘𑀬𑀸 𑀪𑀬𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀺, 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 [𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 (𑀲𑁆𑀬𑀸.)] 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀩𑀦𑁆𑀥𑀸𑀧𑁂𑀢𑀺 𑀅𑀦𑁆𑀤𑀼𑀩𑀦𑁆𑀥𑀦𑁂𑀦 ¶ 𑀯𑀸 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀯𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀯𑀸 𑀯𑁂𑀢𑁆𑀢𑀩𑀦𑁆𑀥𑀦𑁂𑀦 𑀯𑀸 𑀮𑀢𑀸𑀩𑀦𑁆𑀥𑀦𑁂𑀦 𑀯𑀸 𑀧𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 [𑀧𑁂𑀓𑁆𑀔𑀩𑀦𑁆𑀥𑀦𑁂𑀦 𑀯𑀸 (𑀲𑁆𑀬𑀸.)] 𑀧𑀭𑀺𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 ¶ 𑀕𑀸𑀫𑀩𑀦𑁆𑀥𑀦𑁂𑀦 𑀯𑀸 𑀦𑀺𑀕𑀫𑀩𑀦𑁆𑀥𑀦𑁂𑀦 𑀯𑀸 𑀦𑀕𑀭𑀩𑀦𑁆𑀥𑀦𑁂𑀦 𑀯𑀸 𑀭𑀝𑁆𑀞𑀩𑀦𑁆𑀥𑀦𑁂𑀦 𑀯𑀸 𑀚𑀦𑀧𑀤𑀩𑀦𑁆𑀥𑀦𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀲𑀯𑀘𑀦𑀻𑀬𑀫𑁆𑀧𑀺 𑀓𑀭𑁄𑀢𑀺 𑁋 ‘‘𑀦 𑀢𑁂 𑀮𑀩𑁆𑀪𑀸 𑀇𑀢𑁄 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺. 𑀲𑁄 𑀩𑀦𑁆𑀥𑀦𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 ¶ 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀭𑀸𑀚𑀸 𑀢𑀲𑁆𑀲 𑀥𑀦𑀁 𑀆𑀳𑀭𑀸𑀧𑁂𑀢𑀺 𑁋 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 ¶ 𑀯𑀸. 𑀲𑁄 𑀥𑀦𑀚𑀸𑀦𑀺𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑀸𑀧𑁂𑀢𑀺 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀢𑀺, 𑀅𑀟𑁆𑀠𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀏𑀭𑀓𑀧𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀢𑀺. 𑀲𑁄 𑀓𑀫𑁆𑀫𑀓𑀸𑀭𑀡𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 ¶ 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁. 𑀭𑀸𑀚𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀤𑀡𑁆𑀟𑀸𑀦𑀁 𑀇𑀲𑁆𑀲𑀭𑁄.

𑀲𑁄 𑀲𑀓𑁂𑀦 𑀓𑀫𑁆𑀫𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 ¶ 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀫𑁆𑀫𑀓𑀸𑀭𑀡𑀁 𑀓𑀸𑀭𑁂𑀦𑁆𑀢𑀺 𑁋 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀫𑀚𑁆𑀛𑁂 𑀉𑀭𑀲𑁆𑀫𑀺𑀁 𑀕𑀫𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 [𑀢𑀺𑀧𑁆𑀧𑀸 (𑀲𑁆𑀬𑀸.)] 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀁𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁.

𑀢𑀫𑁂𑀦𑀁 ¶ 𑀦𑀺𑀭𑀬𑀧𑀸𑀮𑀸 𑀲𑀁𑀯𑁂𑀲𑁂𑀢𑁆𑀯𑀸 [𑀲𑀁𑀯𑁂𑀲𑀺𑀢𑁆𑀯𑀸 (𑀲𑁆𑀬𑀸.) 𑀫. 𑀦𑀺. 𑁩.𑁨𑁬𑁭] 𑀓𑀼𑀞𑀸𑀭𑀻𑀳𑀺 [𑀓𑀼𑀥𑀸𑀭𑀻𑀳𑀺 (𑀲𑁆𑀬𑀸. 𑀓.)] 𑀢𑀘𑁆𑀙𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀁𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 [𑀉𑀤𑁆𑀥𑀧𑀸𑀤𑀁 (𑀲𑀻.)] 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑁂𑀦𑁆𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀆𑀤𑀺𑀢𑁆𑀢𑀸𑀬 𑀧𑀣𑀯𑀺𑀬𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀲𑀸𑀭𑁂𑀦𑁆𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀦𑁆𑀢𑀺𑀧𑀺 [𑀳𑀸𑀭𑁂𑀦𑁆𑀢𑀺𑀧𑀺 𑀧𑀘𑁆𑀘𑀸𑀳𑀸𑀭𑁂𑀦𑁆𑀢𑀺𑀧𑀺 (𑀲𑀻. 𑀓.)] …𑀧𑁂… 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀁 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺…𑀧𑁂… 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 ¶ 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀦𑁆𑀢𑀺 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀢𑀺. 𑀲𑁄 𑀢𑀢𑁆𑀣 ¶ 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀁𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀲𑁄 𑀔𑁄 𑀧𑀦 𑀫𑀳𑀸𑀦𑀺𑀭𑀬𑁄 𑁋

‘‘𑀘𑀢𑀼𑀓𑁆𑀓𑀡𑁆𑀡𑁄 ¶ 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄 [… 𑀧𑀭𑀺𑀬𑀢𑁆𑀢𑁄 (𑀲𑁆𑀬𑀸. 𑀓.)], 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

‘‘𑀓𑀤𑀭𑀺𑀬𑀸𑀢𑀧𑀦𑀸 𑀖𑁄𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 𑀤𑀼𑀭𑀸𑀲𑀤𑀸;

𑀮𑁄𑀫𑀳𑀁𑀲𑀦𑀭𑀽𑀧𑀸 𑀘, 𑀪𑀺𑀲𑁆𑀫𑀸 𑀧𑀝𑀺𑀪𑀬𑀸 𑀤𑀼𑀔𑀸.

‘‘𑀧𑀼𑀭𑀢𑁆𑀣𑀺𑀫𑀸𑀬 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀤𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀧𑀘𑁆𑀙𑀺𑀫𑀸𑀬 𑀧𑀝𑀺𑀳𑀜𑁆𑀜𑀢𑀺.

‘‘𑀧𑀘𑁆𑀙𑀺𑀫𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀤𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀧𑀼𑀭𑀢𑁆𑀣𑀺𑀫𑀸𑀬 𑀧𑀝𑀺𑀳𑀜𑁆𑀜𑀢𑀺.

‘‘𑀉𑀢𑁆𑀢𑀭𑀸𑀬 ¶ 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀤𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀤𑀓𑁆𑀔𑀺𑀡𑀸𑀬 𑀧𑀝𑀺𑀳𑀜𑁆𑀜𑀢𑀺.

‘‘𑀤𑀓𑁆𑀔𑀺𑀡𑀸𑀬 ¶ 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀤𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀧𑀝𑀺𑀳𑀜𑁆𑀜𑀢𑀺.

‘‘𑀳𑁂𑀝𑁆𑀞𑀢𑁄 𑀘 𑀲𑀫𑀼𑀝𑁆𑀞𑀸𑀬, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀪𑀬𑀸𑀦𑀓𑁄;

𑀤𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀙𑀤𑀦𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺.

‘‘𑀙𑀤𑀦𑀫𑁆𑀳𑀸 ¶ 𑀲𑀫𑀼𑀝𑁆𑀞𑀸𑀬, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀪𑀬𑀸𑀦𑀓𑁄;

𑀤𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀪𑀽𑀫𑀺𑀬𑀁 𑀧𑀝𑀺𑀳𑀜𑁆𑀜𑀢𑀺.

‘‘𑀅𑀬𑁄𑀓𑀧𑀸𑀮𑀫𑀸𑀤𑀺𑀢𑁆𑀢𑀁, 𑀲𑀦𑁆𑀢𑀢𑁆𑀢𑀁 𑀚𑀮𑀺𑀢𑀁 𑀬𑀣𑀸;

𑀏𑀯𑀁 𑀅𑀯𑀻𑀘𑀺𑀦𑀺𑀭𑀬𑁄, 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀲𑁆𑀲𑀢𑁄.

‘‘𑀢𑀢𑁆𑀣 𑀲𑀢𑁆𑀢𑀸 𑀫𑀳𑀸𑀮𑀼𑀤𑁆𑀤𑀸, 𑀫𑀳𑀸𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄;

𑀅𑀘𑁆𑀘𑀦𑁆𑀢𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀘𑁆𑀘𑀦𑁆𑀢𑀺 𑀦 𑀘 𑀫𑀺𑀬𑁆𑀬𑀭𑁂 [𑀫𑀻𑀬𑀭𑁂 (𑀲𑀻.)].

‘‘𑀚𑀸𑀢𑀯𑁂𑀤𑀲𑀫𑁄 𑀓𑀸𑀬𑁄, 𑀢𑁂𑀲𑀁 𑀦𑀺𑀭𑀬𑀯𑀸𑀲𑀺𑀦𑀁;

𑀧𑀲𑁆𑀲 𑀓𑀫𑁆𑀫𑀸𑀦𑀁 𑀤𑀴𑁆𑀳𑀢𑁆𑀢𑀁, 𑀦 𑀪𑀲𑁆𑀫𑀸 𑀳𑁄𑀢𑀺 𑀦𑀧𑀻 𑀫𑀲𑀺.

‘‘𑀧𑀼𑀭𑀢𑁆𑀣𑀺𑀫𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀧𑀘𑁆𑀙𑀺𑀫𑀁;

𑀉𑀢𑁆𑀢𑀭𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀤𑀓𑁆𑀔𑀺𑀡𑀁.

‘‘𑀬𑀁 𑀬𑀁 𑀤𑀺𑀲𑀁 𑀧𑀥𑀸𑀯𑀦𑁆𑀢𑀺 [𑀤𑀺𑀲𑀫𑁆𑀧𑀺 𑀥𑀸𑀯𑀦𑁆𑀢𑀺 (𑀲𑁆𑀬𑀸.)], 𑀢𑀁 𑀢𑀁 𑀤𑁆𑀯𑀸𑀭𑀁 𑀧𑀺𑀥𑀻𑀬𑀢𑀺 [𑀧𑀺𑀣𑀻𑀬𑀢𑀺 (𑀲𑀻. 𑀲𑁆𑀬𑀸.)];

𑀅𑀪𑀺𑀦𑀺𑀓𑁆𑀔𑀫𑀺𑀢𑀸𑀲𑀸 𑀢𑁂, 𑀲𑀢𑁆𑀢𑀸 𑀫𑁄𑀓𑁆𑀔𑀕𑀯𑁂𑀲𑀺𑀦𑁄.

‘‘𑀦 𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑀼𑀁, 𑀮𑀪𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑀸;

𑀢𑁂𑀲𑀜𑁆𑀘 𑀧𑀸𑀧𑀓𑀫𑁆𑀫𑀦𑁆𑀢𑀁, 𑀅𑀯𑀺𑀧𑀓𑁆𑀓𑀁 𑀓𑀢𑀁 𑀩𑀳𑀼’’𑀦𑁆𑀢𑀺.

𑀏𑀢𑀁 ¶ 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀢𑀲𑁆𑀲? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀁 𑀲𑀜𑁆𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁. 𑀬𑀸𑀦𑀺 ¶ 𑀘 𑀦𑁂𑀭𑀬𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀫𑀸𑀦𑀼𑀲𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺; 𑀢𑀸𑀦𑀺 𑀓𑀼𑀢𑁄 𑀚𑀸𑀢𑀸𑀦𑀺 𑀓𑀼𑀢𑁄 𑀲𑀜𑁆𑀚𑀸𑀢𑀸𑀦𑀺 𑀓𑀼𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀼𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀼𑀢𑁄 𑀧𑀸𑀢𑀼𑀪𑀽𑀢𑀸𑀦𑀺? 𑀅𑀢𑁆𑀢𑀤𑀡𑁆𑀟𑀢𑁄 𑀚𑀸𑀢𑀸𑀦𑀺 𑀲𑀜𑁆𑀚𑀸𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀧𑀸𑀢𑀼𑀪𑀽𑀢𑀸𑀦𑀻𑀢𑀺 𑁋 𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁.

𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀦𑁆𑀢𑀺. 𑀚𑀦𑀦𑁆𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀫𑁂𑀥𑀕𑀁 𑀚𑀦𑀁 𑀓𑀮𑀳𑀁 𑀚𑀦𑀁 𑀯𑀺𑀭𑀼𑀤𑁆𑀥𑀁 𑀚𑀦𑀁 𑀧𑀝𑀺𑀯𑀺𑀭𑀼𑀤𑁆𑀥𑀁 𑀚𑀦𑀁 ¶ 𑀆𑀳𑀢𑀁 𑀚𑀦𑀁 𑀧𑀘𑁆𑀘𑀸𑀳𑀢𑀁 𑀚𑀦𑀁 𑀆𑀖𑀸𑀢𑀺𑀢𑀁 𑀚𑀦𑀁 𑀧𑀘𑁆𑀘𑀸𑀖𑀸𑀢𑀺𑀢𑀁 ¶ 𑀚𑀦𑀁 𑀧𑀲𑁆𑀲𑀣 𑀤𑀓𑁆𑀔𑀣 𑀑𑀮𑁄𑀓𑁂𑀣 𑀦𑀺𑀚𑁆𑀛𑀸𑀬𑁂𑀣 𑀉𑀧𑀧𑀭𑀺𑀓𑁆𑀔𑀣𑀸𑀢𑀺 𑁋 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁.

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺. 𑀲𑀁𑀯𑁂𑀕𑀁 𑀉𑀩𑁆𑀩𑁂𑀕𑀁 𑀉𑀢𑁆𑀭𑀸𑀲𑀁 𑀪𑀬𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑀁 𑀉𑀧𑀲𑀕𑁆𑀕𑀁. 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀧𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺 𑁋 𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺.

𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸𑀢𑀺. 𑀬𑀣𑀸 𑀫𑀬𑀸 𑀅𑀢𑁆𑀢𑀦𑀸𑀬𑁂𑀯 𑀅𑀢𑁆𑀢𑀸𑀦𑀁 𑀲𑀁𑀯𑁂𑀚𑀺𑀢𑁄 𑀉𑀩𑁆𑀩𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀺𑀢𑁄𑀢𑀺 𑁋 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸.

‘‘𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁, 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁;

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸’’𑀢𑀺.

𑀨𑀦𑁆𑀤𑀫𑀸𑀦𑀁 ¶ 𑀧𑀚𑀁 𑀤𑀺𑀲𑁆𑀯𑀸, 𑀫𑀘𑁆𑀙𑁂 𑀅𑀧𑁆𑀧𑁄𑀤𑀓𑁂 𑀬𑀣𑀸;

𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑀁 𑀪𑀬𑀫𑀸𑀯𑀺𑀲𑀺.

𑀨𑀦𑁆𑀤𑀫𑀸𑀦𑀁 𑀧𑀚𑀁 𑀤𑀺𑀲𑁆𑀯𑀸𑀢𑀺. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁. 𑀧𑀚𑀁 𑀢𑀡𑁆𑀳𑀸𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁 𑀤𑀺𑀝𑁆𑀞𑀺𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁 ¶ 𑀓𑀺𑀮𑁂𑀲𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁 𑀤𑀼𑀘𑁆𑀘𑀭𑀺𑀢𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁 𑀧𑀬𑁄𑀕𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁 𑀯𑀺𑀧𑀸𑀓𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑀁 𑀭𑀢𑁆𑀢𑀁 𑀭𑀸𑀕𑁂𑀦 𑀨𑀦𑁆𑀤𑀫𑀸𑀦𑀁 𑀤𑀼𑀝𑁆𑀞𑀁 𑀤𑁄𑀲𑁂𑀦 𑀨𑀦𑁆𑀤𑀫𑀸𑀦𑀁 𑀫𑀽𑀴𑁆𑀳𑀁 𑀫𑁄𑀳𑁂𑀦 𑀨𑀦𑁆𑀤𑀫𑀸𑀦𑀁 𑀯𑀺𑀦𑀺𑀩𑀤𑁆𑀥𑀁 𑀫𑀸𑀦𑁂𑀦 𑀨𑀦𑁆𑀤𑀫𑀸𑀦𑀁 𑀧𑀭𑀸𑀫𑀝𑁆𑀞𑀁 𑀤𑀺𑀝𑁆𑀞𑀺𑀬𑀸 𑀨𑀦𑁆𑀤𑀫𑀸𑀦𑀁 𑀯𑀺𑀓𑁆𑀔𑁂𑀧𑀕𑀢𑀁 𑀉𑀤𑁆𑀥𑀘𑁆𑀘𑁂𑀦 𑀨𑀦𑁆𑀤𑀫𑀸𑀦𑀁 𑀅𑀦𑀺𑀝𑁆𑀞𑀗𑁆𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀨𑀦𑁆𑀤𑀫𑀸𑀦𑀁 𑀣𑀸𑀫𑀕𑀢𑀁 𑀅𑀦𑀼𑀲𑀬𑁂𑀳𑀺 𑀨𑀦𑁆𑀤𑀫𑀸𑀦𑀁 𑀮𑀸𑀪𑁂𑀦 𑀨𑀦𑁆𑀤𑀫𑀸𑀦𑀁 𑀅𑀮𑀸𑀪𑁂𑀦 𑀨𑀦𑁆𑀤𑀫𑀸𑀦𑀁 𑀬𑀲𑁂𑀦 𑀨𑀦𑁆𑀤𑀫𑀸𑀦𑀁 𑀅𑀬𑀲𑁂𑀦 𑀨𑀦𑁆𑀤𑀫𑀸𑀦𑀁 𑀧𑀲𑀁𑀲𑀸𑀬 𑀨𑀦𑁆𑀤𑀫𑀸𑀦𑀁 𑀦𑀺𑀦𑁆𑀤𑀸𑀬 𑀨𑀦𑁆𑀤𑀫𑀸𑀦𑀁 𑀲𑀼𑀔𑁂𑀦 𑀨𑀦𑁆𑀤𑀫𑀸𑀦𑀁 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀚𑀸𑀢𑀺𑀬𑀸 𑀨𑀦𑁆𑀤𑀫𑀸𑀦𑀁 𑀚𑀭𑀸𑀬 𑀨𑀦𑁆𑀤𑀫𑀸𑀦𑀁 𑀩𑁆𑀬𑀸𑀥𑀺𑀦𑀸 𑀨𑀦𑁆𑀤𑀫𑀸𑀦𑀁 𑀫𑀭𑀡𑁂𑀦 𑀨𑀦𑁆𑀤𑀫𑀸𑀦𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀨𑀦𑁆𑀤𑀫𑀸𑀦𑀁 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀫𑀸𑀦𑀼𑀲𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑁂𑀦 [𑀕𑀩𑁆𑀪𑁂𑀞𑀺𑀢𑀻𑀫𑀽𑀮𑀓𑁂𑀦 (𑀓.) 𑀫𑀳𑀸𑀦𑀺. 𑁧𑁧] 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀸𑀯𑀼𑀝𑁆𑀞𑀸𑀦𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑁂𑀦 𑀤𑀼𑀓𑁆𑀔𑁂𑀦… 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀧𑀭𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀤𑀼𑀓𑁆𑀔𑀤𑀼𑀓𑁆𑀔𑁂𑀦… 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀦… 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀦… 𑀘𑀓𑁆𑀔𑀼𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑁄𑀢𑀭𑁄𑀕𑁂𑀦 ¶ … 𑀖𑀸𑀦𑀭𑁄𑀕𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦 ¶ … 𑀓𑀸𑀬𑀭𑁄𑀕𑁂𑀦… 𑀲𑀻𑀲𑀭𑁄𑀕𑁂𑀦 ¶ … 𑀓𑀡𑁆𑀡𑀭𑁄𑀕𑁂𑀦… 𑀫𑀼𑀔𑀭𑁄𑀕𑁂𑀦… 𑀤𑀦𑁆𑀢𑀭𑁄𑀕𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀟𑀸𑀳𑁂𑀦… 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑀸𑀬… 𑀯𑀺𑀲𑀽𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦… 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸… 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬… 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑁂𑀦… 𑀧𑀺𑀢𑁆𑀢𑁂𑀦… 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀻𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦… 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦 ¶ … 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦… 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬… 𑀧𑀺𑀧𑀸𑀲𑀸𑀬… 𑀉𑀘𑁆𑀘𑀸𑀭𑁂𑀦… 𑀧𑀲𑁆𑀲𑀸𑀯𑁂𑀦… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀺𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑀕𑀺𑀦𑀺𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀼𑀢𑁆𑀢𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀥𑀻𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀜𑀸𑀢𑀺𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑁄𑀕𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀭𑁄𑀕𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀲𑀻𑀮𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑀁 𑀲𑀫𑁆𑀨𑀦𑁆𑀤𑀫𑀸𑀦𑀁 𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀯𑁂𑀥𑀫𑀸𑀦𑀁 𑀧𑀯𑁂𑀥𑀫𑀸𑀦𑀁 𑀲𑀫𑁆𑀧𑀯𑁂𑀥𑀫𑀸𑀦𑀁. 𑀤𑀺𑀲𑁆𑀯𑀸𑀢𑀺 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀨𑀦𑁆𑀤𑀫𑀸𑀦𑀁 𑀧𑀚𑀁 𑀤𑀺𑀲𑁆𑀯𑀸.

𑀫𑀘𑁆𑀙𑁂 𑀅𑀧𑁆𑀧𑁄𑀤𑀓𑁂 𑀬𑀣𑀸𑀢𑀺 𑀬𑀣𑀸 𑀫𑀘𑁆𑀙𑀸 𑀅𑀧𑁆𑀧𑁄𑀤𑀓𑁂 𑀉𑀤𑀓𑀧𑀭𑀺𑀬𑀸𑀤𑀸𑀦𑁂 𑀓𑀸𑀓𑁂𑀳𑀺 𑀯𑀸 𑀓𑀼𑀮𑀮𑁂𑀳𑀺 𑀯𑀸 𑀩𑀮𑀸𑀓𑀸𑀳𑀺 𑀯𑀸 ¶ 𑀧𑀭𑀺𑀧𑀸𑀢𑀺𑀬𑀫𑀸𑀦𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑀸 𑀔𑀚𑁆𑀚𑀫𑀸𑀦𑀸 𑀨𑀦𑁆𑀤𑀦𑁆𑀢𑀺 𑀲𑀫𑁆𑀨𑀦𑁆𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀯𑁂𑀥𑀦𑁆𑀢𑀺 𑀧𑀯𑁂𑀥𑀦𑁆𑀢𑀺 𑀲𑀫𑁆𑀧𑀯𑁂𑀥𑀦𑁆𑀢𑀺; 𑀏𑀯𑀫𑁂𑀯 𑀧𑀚𑀸 𑀢𑀡𑁆𑀳𑀸𑀨𑀦𑁆𑀤𑀦𑀸𑀬 𑀨𑀦𑁆𑀤𑀦𑁆𑀢𑀺…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀦𑁆𑀢𑀺 𑀲𑀫𑁆𑀨𑀦𑁆𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀯𑁂𑀥𑀦𑁆𑀢𑀺 𑀧𑀯𑁂𑀥𑀦𑁆𑀢𑀺 𑀲𑀫𑁆𑀧𑀯𑁂𑀥𑀦𑁆𑀢𑀻𑀢𑀺 𑁋 𑀫𑀘𑁆𑀙𑁂 𑀅𑀧𑁆𑀧𑁄𑀤𑀓𑁂 𑀬𑀣𑀸.

𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀢𑁆𑀢𑀸 𑀯𑀺𑀭𑀼𑀤𑁆𑀥𑀸 𑀧𑀝𑀺𑀯𑀺𑀭𑀼𑀤𑁆𑀥𑀸 𑀆𑀳𑀢𑀸 𑀧𑀘𑁆𑀘𑀸𑀳𑀢𑀸 𑀆𑀖𑀸𑀢𑀺𑀢𑀸 𑀧𑀘𑁆𑀘𑀸𑀖𑀸𑀢𑀺𑀢𑀸. 𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀺, 𑀔𑀢𑁆𑀢𑀺𑀬𑀸𑀧𑀺 𑀔𑀢𑁆𑀢𑀺𑀬𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀕𑀳𑀧𑀢𑀻𑀧𑀺 𑀕𑀳𑀧𑀢𑀻𑀳𑀺 𑀯𑀺𑀯𑀤𑀦𑁆𑀢𑀺, 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀺𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺; 𑀢𑁂 𑀢𑀢𑁆𑀣 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀧𑀸𑀡𑀻𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀮𑁂𑀟𑁆𑀟𑀽𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀤𑀡𑁆𑀟𑁂𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀲𑀢𑁆𑀣𑁂𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀢𑁂 𑀢𑀢𑁆𑀣 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀦𑁆𑀢𑀺 𑁋 𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂.

𑀤𑀺𑀲𑁆𑀯𑀸 ¶ ¶ ¶ 𑀫𑀁 𑀪𑀬𑀫𑀸𑀯𑀺𑀲𑀻𑀢𑀺. 𑀤𑀺𑀲𑁆𑀯𑀸𑀢𑀺 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀪𑀬𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑁄 𑀉𑀧𑀲𑀕𑁆𑀕𑁄 𑀆𑀯𑀺𑀲𑀻𑀢𑀺 [𑀆𑀯𑀻𑀲𑀻𑀢𑀺 (𑀲𑀻.), 𑀆𑀯𑀺𑀲𑀢𑀻𑀢𑀺 (𑀲𑁆𑀬𑀸.)] 𑁋 𑀤𑀺𑀲𑁆𑀯𑀸 𑀫𑀁 𑀪𑀬𑀫𑀸𑀯𑀺𑀲𑀺.

‘‘𑀨𑀦𑁆𑀤𑀫𑀸𑀦𑀁 ¶ 𑀧𑀚𑀁 𑀤𑀺𑀲𑁆𑀯𑀸, 𑀫𑀘𑁆𑀙𑁂 𑀅𑀧𑁆𑀧𑁄𑀤𑀓𑁂 𑀬𑀣𑀸;

𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑀁 𑀪𑀬𑀫𑀸𑀯𑀺𑀲𑀻’’𑀢𑀺.

𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄, 𑀤𑀺𑀲𑀸 𑀲𑀩𑁆𑀩𑀸 𑀲𑀫𑁂𑀭𑀺𑀢𑀸;

𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄, 𑀦𑀸𑀤𑁆𑀤𑀲𑀸𑀲𑀺𑀁 𑀅𑀦𑁄𑀲𑀺𑀢𑀁.

𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄𑀢𑀺. 𑀮𑁄𑀓𑁄𑀢𑀺 𑀦𑀺𑀭𑀬𑀮𑁄𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀮𑁄𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀤𑁂𑀯𑀮𑁄𑀓𑁄, 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄, 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄, 𑀩𑁆𑀭𑀳𑁆𑀫𑀮𑁄𑀓𑁄 𑀤𑁂𑀯𑀮𑁄𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀓𑁄. 𑀦𑀺𑀭𑀬𑀮𑁄𑀓𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀮𑁄𑀓𑁄…𑀧𑁂… 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄… 𑀫𑀦𑀼𑀲𑁆𑀲𑀮𑁄𑀓𑁄… 𑀤𑁂𑀯𑀮𑁄𑀓𑁄… 𑀔𑀦𑁆𑀥𑀮𑁄𑀓𑁄… 𑀥𑀸𑀢𑀼𑀮𑁄𑀓𑁄… 𑀆𑀬𑀢𑀦𑀮𑁄𑀓𑁄… 𑀅𑀬𑀁 𑀮𑁄𑀓𑁄… 𑀧𑀭𑁄 𑀮𑁄𑀓𑁄… 𑀩𑁆𑀭𑀳𑁆𑀫𑀮𑁄𑀓𑁄… 𑀤𑁂𑀯𑀮𑁄𑀓𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸.

𑀬𑀣𑀸 𑀧𑀦 𑀦𑀴𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀏𑀭𑀡𑁆𑀟𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀉𑀤𑀼𑀫𑁆𑀩𑀭𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀲𑁂𑀢𑀓𑀘𑁆𑀙𑁄 ¶ 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀧𑀸𑀭𑀺𑀪𑀤𑁆𑀤𑀓𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀨𑁂𑀡𑀧𑀺𑀡𑁆𑀟𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀉𑀤𑀓𑀧𑀼𑀩𑁆𑀩𑀼𑀴𑀁 [𑀩𑀼𑀩𑁆𑀩𑀼𑀮𑀓𑀁 (𑀲𑀻.), 𑀧𑀼𑀩𑁆𑀩𑀼𑀴𑀓𑀁 (𑀲𑁆𑀬𑀸.)] 𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 ¶ , 𑀬𑀣𑀸 𑀫𑀭𑀻𑀘𑀺 𑀅𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸, 𑀬𑀣𑀸 𑀓𑀤𑀮𑀺𑀓𑁆𑀔𑀦𑁆𑀥𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀫𑀸𑀬𑀸 𑀅𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸; 𑀏𑀯𑀫𑁂𑀯 𑀦𑀺𑀭𑀬𑀮𑁄𑀓𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 ¶ 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸.

𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀮𑁄𑀓𑁄… 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄… 𑀫𑀦𑀼𑀲𑁆𑀲𑀮𑁄𑀓𑁄… 𑀤𑁂𑀯𑀮𑁄𑀓𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄 ¶ 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀔𑀦𑁆𑀥𑀮𑁄𑀓𑁄… 𑀥𑀸𑀢𑀼𑀮𑁄𑀓𑁄… 𑀆𑀬𑀢𑀦𑀮𑁄𑀓𑁄… 𑀅𑀬𑀁 𑀮𑁄𑀓𑁄… 𑀧𑀭𑁄 𑀮𑁄𑀓𑁄… 𑀩𑁆𑀭𑀳𑁆𑀫𑀮𑁄𑀓𑁄… 𑀤𑁂𑀯𑀮𑁄𑀓𑁄 𑀅𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸𑀢𑀺 𑁋 𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄.

𑀤𑀺𑀲𑀸 𑀲𑀩𑁆𑀩𑀸 𑀲𑀫𑁂𑀭𑀺𑀢𑀸𑀢𑀺. 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸, 𑀢𑁂𑀧𑀺 𑀏𑀭𑀺𑀢𑀸 𑀲𑀫𑁂𑀭𑀺𑀢𑀸 𑀘𑀮𑀺𑀢𑀸 𑀖𑀝𑁆𑀝𑀺𑀢𑀸 𑀅𑀦𑀺𑀘𑁆𑀘𑀢𑀸𑀬 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸 𑀚𑀭𑀸𑀬 𑀅𑀦𑀼𑀲𑀝𑀸 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸. 𑀬𑁂 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸…𑀧𑁂… 𑀬𑁂 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀗𑁆𑀔𑀸𑀭𑀸… 𑀬𑁂 𑀤𑀲𑀲𑀼 𑀤𑀺𑀲𑀸𑀲𑀼 𑀲𑀗𑁆𑀔𑀸𑀭𑀸, 𑀢𑁂𑀧𑀺 𑀏𑀭𑀺𑀢𑀸 𑀲𑀫𑁂𑀭𑀺𑀢𑀸 𑀘𑀮𑀺𑀢𑀸 𑀖𑀝𑁆𑀝𑀺𑀢𑀸 𑀅𑀦𑀺𑀘𑁆𑀘𑀢𑀸𑀬 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸 𑀚𑀭𑀸𑀬 𑀅𑀦𑀼𑀲𑀝𑀸 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀫𑀭𑀡𑁂𑀦 ¶ 𑀅𑀩𑁆𑀪𑀸𑀳𑀢𑀸 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸. 𑀪𑀸𑀲𑀺𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀺𑀜𑁆𑀘𑀸𑀧𑀺 ¶ 𑀘𑁂𑀢𑀁 𑀚𑀮𑀢𑀻 𑀯𑀺𑀫𑀸𑀦𑀁, 𑀑𑀪𑀸𑀲𑀬𑀁 𑀉𑀢𑁆𑀢𑀭𑀺𑀬𑀁 𑀤𑀺𑀲𑀸𑀬;

𑀭𑀽𑀧𑁂 𑀭𑀡𑀁 𑀤𑀺𑀲𑁆𑀯𑀸 𑀲𑀤𑀸 𑀧𑀯𑁂𑀥𑀺𑀢𑀁, 𑀢𑀲𑁆𑀫𑀸 𑀦 𑀭𑀽𑀧𑁂 𑀭𑀫𑀢𑀻 𑀲𑀼𑀫𑁂𑀥𑁄.

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀫𑀸𑀬𑀺𑀢𑁄 [𑀇𑀘𑁆𑀙𑀸𑀥𑀼𑀫𑀸𑀬𑀺𑀓𑁄 (𑀲𑁆𑀬𑀸.)] 𑀲𑀤𑀸.

‘‘𑀲𑀩𑁆𑀩𑁄 𑀆𑀤𑀻𑀧𑀺𑀢𑁄 ¶ 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀥𑀽𑀧𑀺𑀢𑁄;

𑀲𑀩𑁆𑀩𑁄 𑀧𑀚𑁆𑀚𑀮𑀺𑀢𑁄 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀓𑀫𑁆𑀧𑀺𑀢𑁄’’𑀢𑀺.

𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄𑀢𑀺. 𑀅𑀢𑁆𑀢𑀦𑁄 𑀪𑀯𑀦𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀕𑀢𑀺𑀁 𑀧𑀭𑀸𑀬𑀦𑀁 𑀇𑀘𑁆𑀙𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄 𑀧𑀢𑁆𑀣𑀬𑀦𑁆𑀢𑁄 𑀧𑀺𑀳𑀬𑀦𑁆𑀢𑁄 𑀅𑀪𑀺𑀚𑀧𑁆𑀧𑀦𑁆𑀢𑁄𑀢𑀺 𑁋 𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄. 𑀦𑀸𑀤𑁆𑀤𑀲𑀸𑀲𑀺𑀁 𑀅𑀦𑁄𑀲𑀺𑀢𑀦𑁆𑀢𑀺. 𑀅𑀚𑁆𑀛𑁄𑀲𑀺𑀢𑀁𑀬𑁂𑀯 𑀅𑀤𑁆𑀤𑀲𑀁, 𑀅𑀦𑀚𑁆𑀛𑁄𑀲𑀺𑀢𑀁 𑀦𑀸𑀤𑁆𑀤𑀲𑀁, 𑀲𑀩𑁆𑀩𑀁 𑀬𑁄𑀩𑁆𑀩𑀜𑁆𑀜𑀁 𑀚𑀭𑀸𑀬 𑀑𑀲𑀺𑀢𑀁, 𑀲𑀩𑁆𑀩𑀁 ¶ 𑀆𑀭𑁄𑀕𑁆𑀬𑀁 𑀩𑁆𑀬𑀸𑀥𑀺𑀦𑀸 𑀑𑀲𑀺𑀢𑀁, 𑀲𑀩𑁆𑀩𑀁 𑀚𑀻𑀯𑀺𑀢𑀁 𑀫𑀭𑀡𑁂𑀦 𑀑𑀲𑀺𑀢𑀁, 𑀲𑀩𑁆𑀩𑀁 𑀮𑀸𑀪𑀁 𑀅𑀮𑀸𑀪𑁂𑀦 𑀑𑀲𑀺𑀢𑀁, 𑀲𑀩𑁆𑀩𑀁 𑀬𑀲𑀁 𑀅𑀬𑀲𑁂𑀦 𑀑𑀲𑀺𑀢𑀁, 𑀲𑀩𑁆𑀩𑀁 𑀧𑀲𑀁𑀲𑀁 𑀦𑀺𑀦𑁆𑀤𑀸𑀬 𑀑𑀲𑀺𑀢𑀁, 𑀲𑀩𑁆𑀩𑀁 𑀲𑀼𑀔𑀁 𑀤𑀼𑀓𑁆𑀔𑁂𑀦 𑀑𑀲𑀺𑀢𑀁.

‘‘𑀮𑀸𑀪𑁄 ¶ 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀘, 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀘 𑀲𑀼𑀔𑀁 𑀤𑀼𑀔𑀜𑁆𑀘;

𑀏𑀢𑁂 𑀅𑀦𑀺𑀘𑁆𑀘𑀸 𑀫𑀦𑀼𑀚𑁂𑀲𑀼 𑀥𑀫𑁆𑀫𑀸, 𑀅𑀲𑀲𑁆𑀲𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺.

‘‘𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄, 𑀤𑀺𑀲𑀸 𑀲𑀩𑁆𑀩𑀸 𑀲𑀫𑁂𑀭𑀺𑀢𑀸;

𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄, 𑀦𑀸𑀤𑁆𑀤𑀲𑀸𑀲𑀺𑀁 𑀅𑀦𑁄𑀲𑀺𑀢’’𑀦𑁆𑀢𑀺.

𑀑𑀲𑀸𑀦𑁂 ¶ 𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑁂 𑀅𑀭𑀢𑀻 𑀅𑀳𑀼;

𑀅𑀣𑁂𑀢𑁆𑀣 𑀲𑀮𑁆𑀮𑀫𑀤𑁆𑀤𑀓𑁆𑀔𑀺𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀁.

𑀑𑀲𑀸𑀦𑁂 𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂𑀢𑀺. 𑀑𑀲𑀸𑀦𑁂 𑀢𑁆𑀯𑁂𑀯𑀸𑀢𑀺 𑀲𑀩𑁆𑀩𑀁 𑀬𑁄𑀩𑁆𑀩𑀜𑁆𑀜𑀁 𑀚𑀭𑀸 𑀑𑀲𑀸𑀧𑁂𑀢𑀺, 𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀩𑁆𑀬𑀸𑀥𑀺 𑀑𑀲𑀸𑀧𑁂𑀢𑀺, 𑀲𑀩𑁆𑀩𑀁 𑀚𑀻𑀯𑀺𑀢𑀁 𑀫𑀭𑀡𑀁 𑀑𑀲𑀸𑀧𑁂𑀢𑀺, 𑀲𑀩𑁆𑀩𑀁 𑀮𑀸𑀪𑀁 𑀅𑀮𑀸𑀪𑁄 𑀑𑀲𑀸𑀧𑁂𑀢𑀺, 𑀲𑀩𑁆𑀩𑀁 𑀬𑀲𑀁 𑀅𑀬𑀲𑁄 𑀑𑀲𑀸𑀧𑁂𑀢𑀺, 𑀲𑀩𑁆𑀩𑀁 𑀧𑀲𑀁𑀲𑀁 𑀦𑀺𑀦𑁆𑀤𑀸 𑀑𑀲𑀸𑀧𑁂𑀢𑀺, 𑀲𑀩𑁆𑀩𑀁 𑀲𑀼𑀔𑀁 𑀤𑀼𑀓𑁆𑀔𑀁 𑀑𑀲𑀸𑀧𑁂𑀢𑀻𑀢𑀺 𑁋 𑀑𑀲𑀸𑀦𑁂 𑀢𑁆𑀯𑁂𑀯. 𑀩𑁆𑀬𑀸𑀭𑀼𑀤𑁆𑀥𑁂𑀢𑀺 𑀬𑁄𑀩𑁆𑀩𑀜𑁆𑀜𑀓𑀸𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀝𑀺𑀯𑀺𑀭𑀼𑀤𑁆𑀥𑀸, 𑀆𑀭𑁄𑀕𑁆𑀬𑀓𑀸𑀫𑀸 𑀲𑀢𑁆𑀢𑀸 𑀩𑁆𑀬𑀸𑀥𑀺𑀦𑀸 𑀧𑀝𑀺𑀯𑀺𑀭𑀼𑀤𑁆𑀥𑀸, 𑀚𑀻𑀯𑀺𑀢𑀼𑀓𑀸𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀸, 𑀮𑀸𑀪𑀓𑀸𑀫𑀸 𑀲𑀢𑁆𑀢𑀸 𑀅𑀮𑀸𑀪𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀸, 𑀬𑀲𑀓𑀸𑀫𑀸 𑀲𑀢𑁆𑀢𑀸 𑀅𑀬𑀲𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀸, 𑀧𑀲𑀁𑀲𑀓𑀸𑀫𑀸 𑀲𑀢𑁆𑀢𑀸 𑀦𑀺𑀦𑁆𑀤𑀸𑀬 𑀧𑀝𑀺𑀯𑀺𑀭𑀼𑀤𑁆𑀥𑀸, 𑀲𑀼𑀔𑀓𑀸𑀫𑀸 𑀲𑀢𑁆𑀢𑀸 𑀤𑀼𑀓𑁆𑀔𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀸 𑀆𑀳𑀢𑀸 𑀧𑀘𑁆𑀘𑀸𑀳𑀢𑀸 𑀆𑀖𑀸𑀢𑀺𑀢𑀸 𑀧𑀘𑁆𑀘𑀸𑀖𑀸𑀢𑀺𑀢𑀸𑀢𑀺 𑁋 𑀑𑀲𑀸𑀦𑁂 𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂.

𑀤𑀺𑀲𑁆𑀯𑀸 ¶ ¶ 𑀫𑁂 𑀅𑀭𑀢𑀻 𑀅𑀳𑀽𑀢𑀺. 𑀤𑀺𑀲𑁆𑀯𑀸𑀢𑀺 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀤𑀺𑀲𑁆𑀯𑀸. 𑀫𑁂 𑀅𑀭𑀢𑀻𑀢𑀺 𑀬𑀸 𑀅𑀭𑀢𑀺 𑀬𑀸 𑀅𑀦𑀪𑀺𑀭𑀢𑀺 𑀬𑀸 𑀅𑀦𑀪𑀺𑀭𑀫𑀦𑀸 𑀬𑀸 𑀉𑀓𑁆𑀓𑀡𑁆𑀞𑀺𑀢𑀸 𑀬𑀸 𑀧𑀭𑀺𑀢𑀲𑀺𑀢𑀸 𑀅𑀳𑀽𑀢𑀺 𑁋 𑀤𑀺𑀲𑁆𑀯𑀸 𑀫𑁂 𑀅𑀭𑀢𑀻 𑀅𑀳𑀼.

𑀅𑀣𑁂𑀢𑁆𑀣 𑀲𑀮𑁆𑀮𑀫𑀤𑁆𑀤𑀓𑁆𑀔𑀺𑀦𑁆𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀏𑀢𑁆𑀣𑀸𑀢𑀺 ¶ 𑀲𑀢𑁆𑀢𑁂𑀲𑀼. 𑀲𑀮𑁆𑀮𑀦𑁆𑀢𑀺 𑀲𑀢𑁆𑀢 𑀲𑀮𑁆𑀮𑀸𑀦𑀺 𑁋 𑀭𑀸𑀕𑀲𑀮𑁆𑀮𑀁, 𑀤𑁄𑀲𑀲𑀮𑁆𑀮𑀁, 𑀫𑁄𑀳𑀲𑀮𑁆𑀮𑀁, 𑀫𑀸𑀦𑀲𑀮𑁆𑀮𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁, 𑀲𑁄𑀓𑀲𑀮𑁆𑀮𑀁, 𑀓𑀣𑀁𑀓𑀣𑀸𑀲𑀮𑁆𑀮𑀁. 𑀅𑀤𑁆𑀤𑀓𑁆𑀔𑀺𑀦𑁆𑀢𑀺 𑀅𑀤𑁆𑀤𑀲𑀁 𑀅𑀤𑀓𑁆𑀔𑀺𑀁 𑀅𑀧𑀲𑁆𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑁋 𑀅𑀣𑁂𑀢𑁆𑀣 𑀲𑀮𑁆𑀮𑀫𑀤𑁆𑀤𑀓𑁆𑀔𑀺𑀁.

𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀦𑁆𑀢𑀺. 𑀤𑀼𑀤𑁆𑀤𑀲𑀦𑁆𑀢𑀺 𑀤𑀼𑀤𑁆𑀤𑀲𑀁 𑀤𑀼𑀤𑁆𑀤𑀓𑁆𑀔𑀁 𑀤𑀼𑀧𑁆𑀧𑀲𑁆𑀲𑀁 𑀤𑀼𑀩𑁆𑀩𑀼𑀚𑁆𑀛𑀁 𑀤𑀼𑀭𑀦𑀼𑀩𑀼𑀚𑁆𑀛𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑁋 𑀤𑀼𑀤𑁆𑀤𑀲𑀁. 𑀳𑀤𑀬𑀲𑁆𑀲𑀺𑀢𑀦𑁆𑀢𑀺 𑀳𑀤𑀬𑀁 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁. 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀳𑀤𑀬𑀲𑁆𑀲𑀺𑀢𑀦𑁆𑀢𑀺 𑀳𑀤𑀬𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀲𑀺𑀢𑀁 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑁂𑀦 𑀲𑀳𑀕𑀢𑀁 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁 𑀏𑀓𑀼𑀧𑁆𑀧𑀸𑀤𑀁 𑀏𑀓𑀦𑀺𑀭𑁄𑀥𑀁 𑀏𑀓𑀯𑀢𑁆𑀣𑀼𑀓𑀁 ¶ 𑀏𑀓𑀸𑀭𑀫𑁆𑀫𑀡𑀦𑁆𑀢𑀺 𑁋 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢𑀁.

‘‘𑀑𑀲𑀸𑀦𑁂 𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑁂 𑀅𑀭𑀢𑀻 𑀅𑀳𑀼;

𑀅𑀣𑁂𑀢𑁆𑀣 𑀲𑀮𑁆𑀮𑀫𑀤𑁆𑀤𑀓𑁆𑀔𑀺𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀲𑁆𑀲𑀺𑀢’’𑀦𑁆𑀢𑀺.

𑀬𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀺;

𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀺.

𑀬𑁂𑀦 ¶ 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀻𑀢𑀺. 𑀲𑀮𑁆𑀮𑀦𑁆𑀢𑀺. 𑀲𑀢𑁆𑀢 𑀲𑀮𑁆𑀮𑀸𑀦𑀺 𑁋 𑀭𑀸𑀕𑀲𑀮𑁆𑀮𑀁, 𑀤𑁄𑀲𑀲𑀮𑁆𑀮𑀁, 𑀫𑁄𑀳𑀲𑀮𑁆𑀮𑀁, 𑀫𑀸𑀦𑀲𑀮𑁆𑀮𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁, 𑀲𑁄𑀓𑀲𑀮𑁆𑀮𑀁, 𑀓𑀣𑀁𑀓𑀣𑀸𑀲𑀮𑁆𑀮𑀁. 𑀓𑀢𑀫𑀁 𑀭𑀸𑀕𑀲𑀮𑁆𑀮𑀁? 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀺𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀇𑀤𑀁 𑀭𑀸𑀕𑀲𑀮𑁆𑀮𑀁.

𑀓𑀢𑀫𑀁 𑀤𑁄𑀲𑀲𑀮𑁆𑀮𑀁? ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺 ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺…𑀧𑁂… 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀤𑁄𑀲𑀲𑀮𑁆𑀮𑀁.

𑀓𑀢𑀫𑀁 𑀫𑁄𑀳𑀲𑀮𑁆𑀮𑀁? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁 ¶ , 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁. 𑀬𑀁 𑀏𑀯𑀭𑀽𑀧𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀗𑁆𑀕𑀸𑀳𑀡𑀸 𑀅𑀧𑀭𑀺𑀬𑁄𑀕𑀸𑀳𑀡𑀸 [𑀅𑀲𑀗𑁆𑀕𑀸𑀳𑀢𑀸 𑀅𑀧𑀭𑀺𑀬𑁄𑀕𑀸𑀳𑀢𑀸 (𑀲𑁆𑀬𑀸.), 𑀅𑀲𑀗𑁆𑀕𑀸𑀳𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 (𑀓.)] 𑀅𑀲𑀫𑀧𑁂𑀓𑁆𑀔𑀦𑀸 𑀅𑀧𑀘𑁆𑀘𑀯𑁂𑀓𑁆𑀔𑀦𑀸 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁 ¶ 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀇𑀤𑀁 𑀫𑁄𑀳𑀲𑀮𑁆𑀮𑀁.

𑀓𑀢𑀫𑀁 𑀫𑀸𑀦𑀲𑀮𑁆𑀮𑀁? ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 ¶ 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀫𑀸𑀦𑀲𑀮𑁆𑀮𑀁.

𑀓𑀢𑀫𑀁 𑀤𑀺𑀝𑁆𑀞𑀺𑀲𑀮𑁆𑀮𑀁? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 ¶ 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 [𑀓𑀼𑀫𑀕𑁆𑀕𑁄 (𑀓.) 𑀫𑀳𑀸𑀦𑀺. 𑁩𑁮] 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 ‘‘𑀬𑀸𑀣𑀸𑀯𑀓’’𑀦𑁆𑀢𑀺 𑀕𑀸𑀳𑁄 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀇𑀤𑀁 𑀤𑀺𑀝𑁆𑀞𑀺𑀲𑀮𑁆𑀮𑀁.

𑀓𑀢𑀫𑀁 𑀲𑁄𑀓𑀲𑀮𑁆𑀮𑀁? 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄 𑀅𑀦𑁆𑀢𑁄𑀟𑀸𑀳𑁄 𑀅𑀦𑁆𑀢𑁄𑀧𑀭𑀺𑀟𑀸𑀳𑁄 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸 𑀤𑁄𑀫𑀦𑀲𑁆𑀲𑀁 𑁋 𑀇𑀤𑀁 𑀲𑁄𑀓𑀲𑀮𑁆𑀮𑀁.

𑀓𑀢𑀫𑀁 𑀓𑀣𑀁𑀓𑀣𑀸𑀲𑀮𑁆𑀮𑀁? 𑀤𑀼𑀓𑁆𑀔𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀸, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀸. 𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 ¶ 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀡𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄 𑁋 𑀇𑀤𑀁 𑀓𑀣𑀁𑀓𑀣𑀸𑀲𑀮𑁆𑀮𑀁.

𑀬𑁂𑀦 ¶ 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀻𑀢𑀺. 𑀭𑀸𑀕𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺; 𑀏𑀯𑀫𑁆𑀧𑀺 𑀭𑀸𑀕𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 ¶ 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺. 𑀅𑀣 𑀯𑀸 𑀭𑀸𑀕𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀪𑁄𑀕𑁂 𑀧𑀭𑀺𑀬𑁂𑀲𑀦𑁆𑀢𑁄 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀢𑀺. 𑀲𑀻𑀢𑀲𑁆𑀲 ¶ 𑀧𑀼𑀭𑀓𑁆𑀔𑀢𑁄 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀧𑀻𑀴𑀺𑀬𑀫𑀸𑀦𑁄 [𑀭𑀺𑀲𑁆𑀲𑀫𑀸𑀦𑁄 (𑀲𑀻. 𑀲𑁆𑀬𑀸.)] 𑀔𑀼𑀧𑁆𑀧𑀺𑀧𑀸𑀲𑀸𑀬 𑀫𑀺𑀬𑁆𑀬𑀫𑀸𑀦𑁄 𑀢𑀺𑀕𑀼𑀫𑁆𑀩𑀁 𑀕𑀘𑁆𑀙𑀢𑀺, 𑀢𑀓𑁆𑀓𑁄𑀮𑀁 𑀕𑀘𑁆𑀙𑀢𑀺, 𑀢𑀓𑁆𑀓𑀲𑀻𑀮𑀁 𑀕𑀘𑁆𑀙𑀢𑀺, 𑀓𑀸𑀴𑀫𑀼𑀔𑀁 𑀕𑀘𑁆𑀙𑀢𑀺, 𑀧𑀼𑀭𑀧𑀽𑀭𑀁 𑀕𑀘𑁆𑀙𑀢𑀺, 𑀯𑁂𑀲𑀼𑀗𑁆𑀕𑀁 𑀕𑀘𑁆𑀙𑀢𑀺, 𑀯𑁂𑀭𑀸𑀧𑀣𑀁 𑀕𑀘𑁆𑀙𑀢𑀺, 𑀚𑀯𑀁 𑀕𑀘𑁆𑀙𑀢𑀺, 𑀢𑀸𑀫𑀮𑀺𑀁 𑀕𑀘𑁆𑀙𑀢𑀺, 𑀯𑀗𑁆𑀓𑀁 𑀕𑀘𑁆𑀙𑀢𑀺, 𑀏𑀴𑀩𑀦𑁆𑀥𑀦𑀁 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀓𑀽𑀝𑀁 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀢𑀺, 𑀢𑀫𑁆𑀩𑀧𑀡𑁆𑀡𑀺𑀁 𑀕𑀘𑁆𑀙𑀢𑀺, 𑀲𑀼𑀧𑁆𑀧𑀸𑀤𑀓𑀁 [𑀲𑀼𑀧𑁆𑀧𑀸𑀭𑀓𑀁 (𑀲𑀻. 𑀓.), 𑀲𑀼𑀧𑁆𑀧𑀸𑀭𑀁 (𑀲𑁆𑀬𑀸.)] 𑀕𑀘𑁆𑀙𑀢𑀺, 𑀪𑀸𑀭𑀼𑀓𑀘𑁆𑀙𑀁 𑀕𑀘𑁆𑀙𑀢𑀺, 𑀲𑀼𑀭𑀝𑁆𑀞𑀁 𑀕𑀘𑁆𑀙𑀢𑀺, 𑀪𑀗𑁆𑀕𑀮𑁄𑀓𑀁 [𑀅𑀗𑁆𑀕𑀮𑁄𑀓𑀁 (𑀲𑀻.), 𑀅𑀗𑁆𑀕𑀡𑁂𑀓𑀁 (𑀲𑁆𑀬𑀸.)] 𑀕𑀘𑁆𑀙𑀢𑀺, 𑀪𑀗𑁆𑀕𑀡𑀁 [𑀕𑀗𑁆𑀕𑀡𑀁 (𑀲𑀻. 𑀲𑁆𑀬𑀸.)] 𑀕𑀘𑁆𑀙𑀢𑀺, 𑀧𑀭𑀫𑀪𑀗𑁆𑀕𑀡𑀁 𑀕𑀘𑁆𑀙𑀢𑀺, 𑀬𑁄𑀦𑀁 𑀕𑀘𑁆𑀙𑀢𑀺, 𑀧𑀭𑀫𑀬𑁄𑀦𑀁 𑀕𑀘𑁆𑀙𑀢𑀺, 𑀯𑀺𑀦𑀓𑀁 𑀕𑀘𑁆𑀙𑀢𑀺, 𑀫𑀽𑀮𑀧𑀤𑀁 𑀕𑀘𑁆𑀙𑀢𑀺, 𑀫𑀭𑀼𑀓𑀦𑁆𑀢𑀸𑀭𑀁 𑀕𑀘𑁆𑀙𑀢𑀺, 𑀚𑀡𑁆𑀡𑀼𑀧𑀣𑀁 𑀕𑀘𑁆𑀙𑀢𑀺, 𑀅𑀚𑀧𑀣𑀁 𑀕𑀘𑁆𑀙𑀢𑀺 ¶ , 𑀫𑁂𑀡𑁆𑀟𑀧𑀣𑀁 𑀕𑀘𑁆𑀙𑀢𑀺, 𑀲𑀗𑁆𑀓𑀼𑀧𑀣𑀁 𑀕𑀘𑁆𑀙𑀢𑀺, 𑀙𑀢𑁆𑀢𑀧𑀣𑀁 𑀕𑀘𑁆𑀙𑀢𑀺, 𑀯𑀁𑀲𑀧𑀣𑀁 𑀕𑀘𑁆𑀙𑀢𑀺, 𑀲𑀓𑀼𑀡𑀧𑀣𑀁 𑀕𑀘𑁆𑀙𑀢𑀺, 𑀫𑀽𑀲𑀺𑀓𑀧𑀣𑀁 𑀕𑀘𑁆𑀙𑀢𑀺, 𑀤𑀭𑀺𑀧𑀣𑀁 𑀕𑀘𑁆𑀙𑀢𑀺, 𑀯𑁂𑀢𑁆𑀢𑀸𑀘𑀸𑀭𑀁 𑀕𑀘𑁆𑀙𑀢𑀺; 𑀧𑀭𑀺𑀬𑁂𑀲𑀦𑁆𑀢𑁄 𑀦 𑀮𑀪𑀢𑀺, 𑀅𑀮𑀸𑀪𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀧𑀭𑀺𑀬𑁂𑀲𑀦𑁆𑀢𑁄 𑀮𑀪𑀢𑀺, 𑀮𑀤𑁆𑀥𑀸 𑀆𑀭𑀓𑁆𑀔𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 ‘‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁 𑀦 𑀅𑀕𑁆𑀕𑀺 𑀤𑀳𑁂𑀬𑁆𑀬 𑀦 𑀉𑀤𑀓𑀁 𑀯𑀳𑁂𑀬𑁆𑀬 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀆𑀭𑀓𑁆𑀔𑀢𑁄 𑀕𑁄𑀧𑀬𑀢𑁄 𑀢𑁂 𑀪𑁄𑀕𑀸 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀺 ¶ , 𑀲𑁄 𑀯𑀺𑀧𑁆𑀧𑀬𑁄𑀕𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀭𑀸𑀕𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺.

𑀤𑁄𑀲𑀲𑀮𑁆𑀮𑁂𑀦…𑀧𑁂… 𑀫𑁄𑀳𑀲𑀮𑁆𑀮𑁂𑀦… 𑀫𑀸𑀦𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 ¶ 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺. 𑀏𑀯𑀁 𑀫𑀸𑀦𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺.

𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀘𑁂𑀮𑀓𑁄 𑀳𑁄𑀢𑀺 𑀫𑀼𑀢𑁆𑀢𑀸𑀘𑀸𑀭𑁄 𑀳𑀢𑁆𑀣𑀸𑀧𑀮𑁂𑀔𑀦𑁄 [𑀳𑀢𑁆𑀣𑀸𑀯𑀮𑁂𑀔𑀦𑁄 (𑀲𑁆𑀬𑀸.)], 𑀦 𑀏𑀳𑀺𑀪𑀤𑀦𑁆𑀢𑀺𑀓𑁄 ¶ , 𑀦 𑀢𑀺𑀝𑁆𑀞𑀪𑀤𑀦𑁆𑀢𑀺𑀓𑁄; 𑀦𑀸𑀪𑀺𑀳𑀝𑀁, 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁, 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀴𑁄𑀧𑀺𑀫𑀼𑀔𑀸 [𑀔𑀴𑁄𑀧𑀺𑀫𑀼𑀔𑀸 (𑀲𑀻.)] 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀏𑀴𑀓𑀫𑀦𑁆𑀢𑀭𑀁, 𑀦 𑀤𑀡𑁆𑀟𑀫𑀦𑁆𑀢𑀭𑀁, 𑀦 𑀫𑀼𑀲𑀮𑀫𑀦𑁆𑀢𑀭𑀁, 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀦 𑀕𑀩𑁆𑀪𑀺𑀦𑀺𑀬𑀸, 𑀦 𑀧𑀸𑀬𑀫𑀸𑀦𑀸𑀬, 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬, 𑀦 𑀲𑀁𑀓𑀺𑀢𑁆𑀢𑀻𑀲𑀼, 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻. 𑀦 𑀫𑀘𑁆𑀙𑀁 𑀦 𑀫𑀁𑀲𑀁 𑀦 𑀲𑀼𑀭𑀁 𑀦 𑀫𑁂𑀭𑀬𑀁 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀺. 𑀲𑁄 ¶ 𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀏𑀓𑀸𑀮𑁄𑀧𑀺𑀓𑁄, 𑀤𑁆𑀯𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀤𑁆𑀯𑀸𑀮𑁄𑀧𑀺𑀓𑁄…𑀧𑁂… 𑀲𑀢𑁆𑀢𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑁄. 𑀏𑀓𑀺𑀲𑁆𑀲𑀸𑀧𑀺 𑀪𑀢𑁆𑀢𑀺𑀬𑀸 𑀬𑀸𑀧𑁂𑀢𑀺, 𑀤𑁆𑀯𑀻𑀳𑀺𑀧𑀺 𑀪𑀢𑁆𑀢𑀻𑀳𑀺 𑀬𑀸𑀧𑁂𑀢𑀺…𑀧𑁂… 𑀲𑀢𑁆𑀢𑀳𑀺𑀧𑀺 𑀪𑀢𑁆𑀢𑀻𑀳𑀺 𑀬𑀸𑀧𑁂𑀢𑀺. 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀤𑁆𑀯𑀻𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺…𑀧𑁂… 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀟𑁆𑀠𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀫𑁆𑀧𑀺 𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺.

𑀅𑀣 𑀯𑀸 𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀲𑁄 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀦𑀻𑀯𑀸𑀭𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀤𑀤𑁆𑀤𑀼𑀮𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀳𑀝𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀓𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀆𑀘𑀸𑀫𑀪𑀓𑁆𑀔𑁄 𑀯𑀸 ¶ 𑀳𑁄𑀢𑀺, 𑀧𑀺𑀜𑁆𑀜𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀢𑀺𑀮𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀢𑀺𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀕𑁄𑀫𑀬𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀦𑁄. 𑀲𑁄 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 ¶ 𑀥𑀸𑀭𑁂𑀢𑀺, 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀢𑀺, 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀓𑀘𑀻𑀭𑀫𑁆𑀧𑀺 ¶ 𑀥𑀸𑀭𑁂𑀢𑀺, 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀉𑀮𑀽𑀓𑀧𑀓𑁆𑀔𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀫𑀲𑁆𑀲𑀼𑀮𑁄𑀘𑀓𑁄𑀧𑀺 𑀳𑁄𑀢𑀺, 𑀓𑁂𑀲𑀫𑀲𑁆𑀲𑀼𑀮𑁄𑀘𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀉𑀩𑁆𑀪𑀝𑁆𑀞𑀓𑁄𑀧𑀺 𑀳𑁄𑀢𑀺 𑀆𑀲𑀦𑀧𑀝𑀺𑀓𑁆𑀔𑀺𑀢𑁆𑀢𑁄, 𑀉𑀓𑁆𑀓𑀼𑀝𑀺𑀓𑁄𑀧𑀺 𑀳𑁄𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄, 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄 𑀳𑁄𑀢𑀺, 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀨𑀮𑀓𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀣𑀡𑁆𑀟𑀺𑀮𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀏𑀓𑀸𑀧𑀲𑁆𑀲𑀬𑀺𑀓𑁄 𑀳𑁄𑀢𑀺 𑀭𑀚𑁄𑀚𑀮𑁆𑀮𑀥𑀭𑁄, 𑀅𑀩𑁆𑀪𑁄𑀓𑀸𑀲𑀺𑀓𑁄𑀧𑀺 𑀳𑁄𑀢𑀺 𑀬𑀣𑀸𑀲𑀦𑁆𑀣𑀢𑀺𑀓𑁄, 𑀯𑁂𑀓𑀝𑀺𑀓𑁄𑀧𑀺 𑀳𑁄𑀢𑀺 𑀯𑀺𑀓𑀝𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀅𑀧𑀸𑀦𑀓𑁄𑀧𑀺 𑀳𑁄𑀢𑀺 𑀅𑀧𑀸𑀦𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄, 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀦𑁂𑀓𑀯𑀺𑀳𑀺𑀢𑀁 𑀓𑀸𑀬𑀲𑁆𑀲 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀫𑁆𑀧𑀺 𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺.

𑀲𑁄𑀓𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀅𑀜𑁆𑀜𑀢𑀭𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀲𑀸 𑀢𑀲𑁆𑀲𑀸 𑀓𑀸𑀮𑀁 𑀓𑀺𑀭𑀺𑀬𑀸𑀬 𑀉𑀫𑁆𑀫𑀢𑁆𑀢𑀺𑀓𑀸 𑀔𑀺𑀢𑁆𑀢𑀘𑀺𑀢𑁆𑀢𑀸 𑀭𑀣𑀺𑀬𑀸𑀬 𑀭𑀣𑀺𑀬𑀁, 𑀲𑀺𑀗𑁆𑀖𑀸𑀝𑀓𑁂𑀦 ¶ 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑀺 𑀫𑁂 𑀫𑀸𑀢𑀭𑀁 𑀅𑀤𑁆𑀤𑀲𑁆𑀲𑀣, 𑀅𑀧𑀺 𑀫𑁂 𑀫𑀸𑀢𑀭𑀁 𑀅𑀤𑁆𑀤𑀲𑁆𑀲𑀣𑀸’𑀢𑀺 ¶ .

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀅𑀜𑁆𑀜𑀢𑀭𑀺𑀲𑁆𑀲𑀸 ¶ 𑀇𑀢𑁆𑀣𑀺𑀬𑀸 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺… 𑀪𑀸𑀢𑀸 𑀓𑀸𑀮𑀫𑀓𑀸𑀲𑀺… 𑀪𑀕𑀺𑀦𑀻 𑀓𑀸𑀮𑀫𑀓𑀸𑀲𑀺… 𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺… 𑀥𑀻𑀢𑀸 𑀓𑀸𑀮𑀫𑀓𑀸𑀲𑀺… 𑀲𑀸𑀫𑀺𑀓𑁄 𑀓𑀸𑀮𑀫𑀓𑀸𑀲𑀺. 𑀲𑀸 𑀢𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸𑀬 𑀉𑀫𑁆𑀫𑀢𑁆𑀢𑀺𑀓𑀸 𑀔𑀺𑀢𑁆𑀢𑀘𑀺𑀢𑁆𑀢𑀸 𑀭𑀣𑀺𑀬𑀸𑀬 𑀭𑀣𑀺𑀬𑀁, 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑀺 𑀫𑁂 𑀲𑀸𑀫𑀺𑀓𑀁 𑀅𑀤𑁆𑀤𑀲𑁆𑀲𑀣, 𑀅𑀧𑀺 𑀫𑁂 𑀲𑀸𑀫𑀺𑀓𑀁 𑀅𑀤𑁆𑀤𑀲𑁆𑀲𑀣𑀸’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀢𑀲𑁆𑀲𑀸 𑀓𑀸𑀮𑀁 𑀓𑀺𑀭𑀺𑀬𑀸𑀬 𑀉𑀫𑁆𑀫𑀢𑁆𑀢𑀓𑁄 𑀔𑀺𑀢𑁆𑀢𑀘𑀺𑀢𑁆𑀢𑁄 𑀭𑀣𑀺𑀬𑀸𑀬 𑀭𑀣𑀺𑀬𑀁, 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑀺 𑀫𑁂 𑀫𑀸𑀢𑀭𑀁 𑀅𑀤𑁆𑀤𑀲𑁆𑀲𑀣, 𑀅𑀧𑀺 𑀫𑁂 𑀫𑀸𑀢𑀭𑀁 𑀅𑀤𑁆𑀤𑀲𑁆𑀲𑀣𑀸’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁 ¶ , 𑀩𑁆𑀭𑀸𑀳𑁆𑀫𑀡, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺… 𑀪𑀸𑀢𑀸 𑀓𑀸𑀮𑀫𑀓𑀸𑀲𑀺… 𑀪𑀕𑀺𑀦𑀻 𑀓𑀸𑀮𑀫𑀓𑀸𑀲𑀺… 𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺… 𑀥𑀻𑀢𑀸 𑀓𑀸𑀮𑀫𑀓𑀸𑀲𑀺… 𑀧𑀚𑀸𑀧𑀢𑀺 𑀓𑀸𑀮𑀫𑀓𑀸𑀲𑀺. 𑀲𑁄 𑀢𑀲𑁆𑀲𑀸 𑀓𑀸𑀮𑀁 𑀓𑀺𑀭𑀺𑀬𑀸𑀬 𑀉𑀫𑁆𑀫𑀢𑁆𑀢𑀓𑁄 𑀔𑀺𑀢𑁆𑀢𑀘𑀺𑀢𑁆𑀢𑁄 𑀭𑀣𑀺𑀬𑀸𑀬 𑀭𑀣𑀺𑀬𑀁, 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑀺 𑀫𑁂 𑀧𑀚𑀸𑀧𑀢𑀺𑀁 𑀅𑀤𑁆𑀤𑀲𑁆𑀲𑀣, 𑀅𑀧𑀺 𑀫𑁂 𑀧𑀚𑀸𑀧𑀢𑀺𑀁 𑀅𑀤𑁆𑀤𑀲𑁆𑀲𑀣𑀸’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀜𑀸𑀢𑀺𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀢𑁂 𑀜𑀸𑀢𑀓𑀸 𑀲𑀸𑀫𑀺𑀓𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀼𑀓𑀸𑀫𑀸, 𑀲𑀸 𑀘 𑀦𑀁 𑀦 𑀇𑀘𑁆𑀙𑀢𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀲𑀸𑀫𑀺𑀓𑀁 𑀏𑀢𑀤𑀯𑁄𑀘 𑁋 ‘𑀇𑀫𑁂, 𑀅𑀬𑁆𑀬𑀧𑀼𑀢𑁆𑀢, 𑀜𑀸𑀢𑀓𑀸 𑀢𑀯 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀼𑀓𑀸𑀫𑀸, 𑀉𑀪𑁄 𑀫𑀬𑀁 ¶ 𑀫𑀭𑀺𑀲𑁆𑀲𑀸𑀫𑀸’𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀢𑀁 𑀇𑀢𑁆𑀣𑀺𑀁 𑀤𑁆𑀯𑀺𑀥𑀸 𑀙𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀑𑀧𑀸𑀢𑁂𑀢𑀺 𑁋 ‘𑀉𑀪𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀸’’’𑀢𑀺. 𑀏𑀯𑀁 𑀲𑁄𑀓𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺.

𑀓𑀣𑀁𑀓𑀣𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑁋 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 ¶ , 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦𑀦𑀼 ¶ 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀏𑀢𑀭𑀳𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀳𑁄𑀢𑀺, 𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀓𑀣𑀁𑀓𑀣𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀯𑀺𑀤𑁆𑀥𑁄 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺.

𑀢𑁂 𑀲𑀮𑁆𑀮𑁂 𑀅𑀪𑀺𑀲𑀗𑁆𑀔𑀭𑁄𑀢𑀺; 𑀢𑁂 𑀲𑀮𑁆𑀮𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀥𑀸𑀯𑀢𑀺, 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀥𑀸𑀯𑀢𑀺, 𑀉𑀢𑁆𑀢𑀭𑀁 𑀤𑀺𑀲𑀁 𑀥𑀸𑀯𑀢𑀺, 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀥𑀸𑀯𑀢𑀺. 𑀢𑁂 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀸 𑀅𑀧𑁆𑀧𑀳𑀻𑀦𑀸; 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀥𑀸𑀯𑀢𑀺, 𑀦𑀺𑀭𑀬𑁂 𑀥𑀸𑀯𑀢𑀺 ¶ , 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀥𑀸𑀯𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀥𑀸𑀯𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀥𑀸𑀯𑀢𑀺, 𑀤𑁂𑀯𑀮𑁄𑀓𑁂 𑀥𑀸𑀯𑀢𑀺, 𑀕𑀢𑀺𑀬𑀸 ¶ 𑀕𑀢𑀺𑀁, 𑀉𑀧𑀧𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀁, 𑀧𑀝𑀺𑀲𑀦𑁆𑀥𑀺𑀬𑀸 𑀧𑀝𑀺𑀲𑀦𑁆𑀥𑀺𑀁, 𑀪𑀯𑁂𑀦 𑀪𑀯𑀁, 𑀲𑀁𑀲𑀸𑀭𑁂𑀦 𑀲𑀁𑀲𑀸𑀭𑀁, 𑀯𑀝𑁆𑀝𑁂𑀦 𑀯𑀝𑁆𑀝𑀁 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑁋 𑀬𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀺.

𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀻𑀢𑀺. 𑀢𑀫𑁂𑀯 𑀭𑀸𑀕𑀲𑀮𑁆𑀮𑀁 𑀤𑁄𑀲𑀲𑀮𑁆𑀮𑀁 𑀫𑁄𑀳𑀲𑀮𑁆𑀮𑀁 𑀫𑀸𑀦𑀲𑀮𑁆𑀮𑀁 𑀤𑀺𑀝𑁆𑀞𑀺𑀲𑀮𑁆𑀮𑀁 𑀲𑁄𑀓𑀲𑀮𑁆𑀮𑀁 𑀓𑀣𑀁𑀓𑀣𑀸𑀲𑀮𑁆𑀮𑀁 𑀅𑀩𑁆𑀩𑀼𑀬𑁆𑀳 𑀅𑀩𑁆𑀩𑀼𑀳𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀉𑀧𑁆𑀧𑀸𑀝𑀬𑀺𑀢𑁆𑀯𑀸 𑀲𑀫𑀼𑀧𑁆𑀧𑀸𑀝𑀬𑀺𑀢𑁆𑀯𑀸 [𑀉𑀧𑁆𑀧𑀸𑀤𑀬𑀺𑀢𑁆𑀯𑀸 𑀲𑀫𑀼𑀧𑁆𑀧𑀸𑀤𑀬𑀺𑀢𑁆𑀯𑀸 (𑀲𑁆𑀬𑀸. 𑀓.)] 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀦𑁂𑀯 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀥𑀸𑀯𑀢𑀺 𑀦 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀥𑀸𑀯𑀢𑀺 𑀦 𑀉𑀢𑁆𑀢𑀭𑀁 𑀤𑀺𑀲𑀁 𑀥𑀸𑀯𑀢𑀺 𑀦 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀥𑀸𑀯𑀢𑀺. 𑀢𑁂 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸; 𑀲𑀮𑁆𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀦 𑀥𑀸𑀯𑀢𑀺, 𑀦𑀺𑀭𑀬𑁂 𑀦 𑀥𑀸𑀯𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀦 𑀥𑀸𑀯𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦 𑀥𑀸𑀯𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀦 𑀥𑀸𑀯𑀢𑀺, 𑀤𑁂𑀯𑀮𑁄𑀓𑁂 𑀦 𑀥𑀸𑀯𑀢𑀺, 𑀦 𑀕𑀢𑀺𑀬𑀸 𑀕𑀢𑀺𑀁, 𑀦 𑀉𑀧𑀧𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀁, 𑀦 𑀧𑀝𑀺𑀲𑀦𑁆𑀥𑀺𑀬𑀸 𑀧𑀝𑀺𑀲𑀦𑁆𑀥𑀺𑀁, 𑀦 𑀪𑀯𑁂𑀦 𑀪𑀯𑀁, 𑀦 𑀲𑀁𑀲𑀸𑀭𑁂𑀦 𑀲𑀁𑀲𑀸𑀭𑀁, 𑀦 𑀯𑀝𑁆𑀝𑁂𑀦 𑀯𑀝𑁆𑀝𑀁 𑀥𑀸𑀯𑀢𑀺 𑀯𑀺𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑁋 𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳 𑀦 𑀥𑀸𑀯𑀢𑀺. 𑀦 𑀲𑀻𑀤𑀢𑀻𑀢𑀺 ¶ 𑀓𑀸𑀫𑁄𑀖𑁂 𑀦 𑀲𑀻𑀤𑀢𑀺, 𑀪𑀯𑁄𑀖𑁂 𑀦 𑀲𑀻𑀤𑀢𑀺, 𑀤𑀺𑀝𑁆𑀞𑁄𑀖𑁂 𑀦 𑀲𑀻𑀤𑀢𑀺, 𑀅𑀯𑀺𑀚𑁆𑀚𑁄𑀖𑁂 𑀦 𑀲𑀻𑀤𑀢𑀺, 𑀦 𑀲𑀁𑀲𑀻𑀤𑀢𑀺 𑀦 𑀑𑀲𑀻𑀤𑀢𑀺 𑀦 𑀅𑀯𑀲𑀻𑀤𑀢𑀺 𑀦 𑀕𑀘𑁆𑀙𑀢𑀺 𑀦 𑀅𑀯𑀕𑀘𑁆𑀙𑀢𑀻𑀢𑀺 𑁋 𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀺.

‘‘𑀬𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀺;

𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀻’’𑀢𑀺.

𑀢𑀢𑁆𑀣 ¶ 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀺;

𑀦 𑀢𑁂𑀲𑀼 𑀧𑀲𑀼𑀢𑁄 𑀲𑀺𑀬𑀸, 𑀦𑀺𑀩𑁆𑀩𑀺𑀚𑁆𑀛 𑀲𑀩𑁆𑀩𑀲𑁄 𑀓𑀸𑀫𑁂;

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑀢𑀢𑁆𑀣 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀻𑀢𑀺. 𑀲𑀺𑀓𑁆𑀔𑀸𑀢𑀺 𑀳𑀢𑁆𑀣𑀺𑀲𑀺𑀓𑁆𑀔𑀸 𑀅𑀲𑁆𑀲𑀲𑀺𑀓𑁆𑀔𑀸 𑀭𑀣𑀲𑀺𑀓𑁆𑀔𑀸 𑀥𑀦𑀼𑀲𑀺𑀓𑁆𑀔𑀸 𑀲𑀸𑀮𑀸𑀓𑀺𑀬𑀁 𑀲𑀮𑁆𑀮𑀓𑀢𑁆𑀢𑀺𑀬𑀁 𑀓𑀸𑀬𑀢𑀺𑀓𑀺𑀘𑁆𑀙𑀁 𑀪𑀽𑀢𑀺𑀬𑀁 𑀓𑁄𑀫𑀸𑀭𑀪𑀘𑁆𑀘𑀁 [𑀓𑁄𑀫𑀸𑀭𑀢𑀺𑀓𑀺𑀘𑁆𑀙𑀁 (𑀲𑁆𑀬𑀸.), 𑀓𑁄𑀫𑀸𑀭𑀲𑀘𑁆𑀘𑀁 (𑀓.)]. 𑀅𑀦𑀼𑀕𑀻𑀬𑀦𑁆𑀢𑀻𑀢𑀺 𑀕𑀻𑀬𑀦𑁆𑀢𑀺 𑀦𑀺𑀕𑁆𑀕𑀻𑀬𑀦𑁆𑀢𑀺 𑀓𑀣𑀻𑀬𑀦𑁆𑀢𑀺 𑀪𑀡𑀻𑀬𑀦𑁆𑀢𑀺 𑀤𑀻𑀧𑀻𑀬𑀦𑁆𑀢𑀺 𑀯𑁄𑀳𑀭𑀻𑀬𑀦𑁆𑀢𑀺. 𑀅𑀣 𑀯𑀸 𑀕𑀻𑀬𑀦𑁆𑀢𑀺 𑀕𑀡𑁆𑀳𑀻𑀬𑀦𑁆𑀢𑀺 𑀉𑀕𑁆𑀕𑀡𑁆𑀳𑀻𑀬𑀦𑁆𑀢𑀺 ¶ 𑀥𑀸𑀭𑀻𑀬𑀦𑁆𑀢𑀺 𑀉𑀧𑀥𑀸𑀭𑀻𑀬𑀦𑁆𑀢𑀺 𑀉𑀧𑀮𑀓𑁆𑀔𑀻𑀬𑀦𑁆𑀢𑀺 𑀕𑀥𑀺𑀢𑀧𑀝𑀺𑀮𑀸𑀪𑀸𑀬. 𑀕𑀥𑀺𑀢𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸 𑁋 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸 𑀭𑀚𑀦𑀻𑀬𑀸. 𑀓𑀺𑀁𑀓𑀸𑀭𑀡𑀸 𑀕𑀥𑀺𑀢𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸? 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀫𑀦𑀼𑀲𑁆𑀲𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺 𑀢𑀁𑀓𑀸𑀭𑀡𑀸 𑀕𑀥𑀺𑀢𑀸 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀢𑀢𑁆𑀣 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀺.

𑀦 𑀢𑁂𑀲𑀼 𑀧𑀲𑀼𑀢𑁄 𑀲𑀺𑀬𑀸𑀢𑀺. 𑀢𑀸𑀲𑀼 𑀯𑀸 𑀲𑀺𑀓𑁆𑀔𑀸𑀲𑀼 𑀢𑁂𑀲𑀼 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀦 𑀧𑀲𑀼𑀢𑁄 𑀲𑀺𑀬𑀸, 𑀦 𑀢𑀦𑁆𑀦𑀺𑀦𑁆𑀦𑁄 𑀅𑀲𑁆𑀲, 𑀦 𑀢𑀧𑁆𑀧𑁄𑀡𑁄, 𑀦 𑀢𑀧𑁆𑀧𑀩𑁆𑀪𑀸𑀭𑁄, 𑀦 𑀢𑀤𑀥𑀺𑀫𑀼𑀢𑁆𑀢𑁄, 𑀦 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀦 𑀢𑁂𑀲𑀼 𑀧𑀲𑀼𑀢𑁄 𑀲𑀺𑀬𑀸.

𑀦𑀺𑀩𑁆𑀩𑀺𑀚𑁆𑀛 ¶ 𑀲𑀩𑁆𑀩𑀲𑁄 𑀓𑀸𑀫𑁂𑀢𑀺. 𑀦𑀺𑀩𑁆𑀩𑀺𑀚𑁆𑀛𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 ¶ 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀲𑀩𑁆𑀩𑀲𑁄𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸𑀢𑀺 𑁋 𑀦𑀺𑀩𑁆𑀩𑀺𑀚𑁆𑀛 𑀲𑀩𑁆𑀩𑀲𑁄 𑀓𑀸𑀫𑁂.

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺. 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 ¶ 𑀲𑀫𑀸𑀬 𑀉𑀧𑀲𑀫𑀸𑀬 𑀯𑀽𑀧𑀲𑀫𑀸𑀬 𑀦𑀺𑀩𑁆𑀩𑀸𑀧𑀦𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

‘‘𑀢𑀢𑁆𑀣 ¶ 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀺;

𑀦 𑀢𑁂𑀲𑀼 𑀧𑀲𑀼𑀢𑁄 𑀲𑀺𑀬𑀸, 𑀦𑀺𑀩𑁆𑀩𑀺𑀚𑁆𑀛 𑀲𑀩𑁆𑀩𑀲𑁄 𑀓𑀸𑀫𑁂;

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’𑀢𑀺.

𑀲𑀘𑁆𑀘𑁄 ¶ 𑀲𑀺𑀬𑀸 𑀅𑀧𑁆𑀧𑀕𑀩𑁆𑀪𑁄, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀅𑀓𑁆𑀓𑁄𑀥𑀦𑁄 𑀮𑁄𑀪𑀧𑀸𑀧𑀁, 𑀯𑁂𑀯𑀺𑀘𑁆𑀙𑀁 𑀯𑀺𑀢𑀭𑁂 𑀫𑀼𑀦𑀺.

𑀲𑀘𑁆𑀘𑁄 𑀲𑀺𑀬𑀸 𑀅𑀧𑁆𑀧𑀕𑀩𑁆𑀪𑁄𑀢𑀺. 𑀲𑀘𑁆𑀘𑁄 𑀲𑀺𑀬𑀸𑀢𑀺 𑀲𑀘𑁆𑀘𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑀺𑀬𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀺𑀬𑀸, 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀺𑀬𑀸𑀢𑀺 𑁋 𑀲𑀘𑁆𑀘𑁄 𑀲𑀺𑀬𑀸. 𑀅𑀧𑁆𑀧𑀕𑀩𑁆𑀪𑁄𑀢𑀺 𑀢𑀻𑀡𑀺 𑀧𑀸𑀕𑀩𑁆𑀪𑀺𑀬𑀸𑀦𑀺 𑁋 𑀓𑀸𑀬𑀺𑀓𑀁 𑀧𑀸𑀕𑀩𑁆𑀪𑀺𑀬𑀁, 𑀯𑀸𑀘𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁, 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁…𑀧𑁂… 𑀇𑀤𑀁 𑀘𑁂𑀢𑀲𑀺𑀓𑀁 𑀧𑀸𑀕𑀩𑁆𑀪𑀺𑀬𑀁. 𑀬𑀲𑁆𑀲𑀺𑀫𑀸𑀦𑀺 𑀢𑀻𑀡𑀺 𑀧𑀸𑀕𑀩𑁆𑀪𑀺𑀬𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 ¶ 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀲𑁄 𑀯𑀼𑀘𑁆𑀘𑀢𑀺 𑀅𑀧𑁆𑀧𑀕𑀩𑁆𑀪𑁄𑀢𑀺 𑁋 𑀲𑀘𑁆𑀘𑁄 𑀲𑀺𑀬𑀸 𑀅𑀧𑁆𑀧𑀕𑀩𑁆𑀪𑁄.

𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄𑀢𑀺. 𑀫𑀸𑀬𑀸 𑀯𑀼𑀘𑁆𑀘𑀢𑀺 𑀯𑀜𑁆𑀘𑀦𑀺𑀓𑀸 𑀘𑀭𑀺𑀬𑀸. 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀇𑀘𑁆𑀙𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀲𑀗𑁆𑀓𑀧𑁆𑀧𑁂𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀯𑀸𑀘𑀁 𑀪𑀸𑀲𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺. 𑀬𑀸 𑀏𑀯𑀭𑀽𑀧𑀸 𑀫𑀸𑀬𑀸 𑀫𑀸𑀬𑀸𑀯𑀺𑀢𑀸 𑀅𑀘𑁆𑀘𑀲𑀭𑀸 𑀯𑀜𑁆𑀘𑀦𑀸 𑀦𑀺𑀓𑀢𑀺 𑀦𑀺𑀓𑀺𑀭𑀡𑀸 𑀧𑀭𑀺𑀳𑀭𑀡𑀸 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸 𑀙𑀸𑀤𑀦𑀸 𑀧𑀭𑀺𑀘𑁆𑀙𑀸𑀤𑀦𑀸 𑀅𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀁 𑀅𑀦𑀸𑀯𑀺𑀓𑀫𑁆𑀫𑀁 𑀯𑁄𑀘𑁆𑀙𑀸𑀤𑀦𑀸 𑀧𑀸𑀧𑀓𑀺𑀭𑀺𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀬𑀸. 𑀬𑀲𑁆𑀲𑁂𑀲𑀸 𑀫𑀸𑀬𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 ¶ 𑀅𑀫𑀸𑀬𑁄. 𑀭𑀺𑀢𑁆𑀢𑀧𑁂𑀲𑀼𑀡𑁄𑀢𑀺 𑀧𑁂𑀲𑀼𑀜𑁆𑀜𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺…𑀧𑁂… 𑀏𑀯𑀁 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀬𑀲𑁆𑀲𑁂𑀢𑀁 𑀧𑁂𑀲𑀼𑀜𑁆𑀜𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 ¶ 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀭𑀺𑀢𑁆𑀢𑀧𑁂𑀲𑀼𑀡𑁄 𑀯𑀺𑀯𑀺𑀢𑁆𑀢𑀧𑁂𑀲𑀼𑀡𑁄 𑀧𑀯𑀺𑀯𑀺𑀢𑁆𑀢𑀧𑁂𑀲𑀼𑀡𑁄𑀢𑀺 𑁋 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄.

𑀅𑀓𑁆𑀓𑁄𑀥𑀦𑁄 𑀮𑁄𑀪𑀧𑀸𑀧𑀁, 𑀯𑁂𑀯𑀺𑀘𑁆𑀙𑀁 𑀯𑀺𑀢𑀭𑁂 𑀫𑀼𑀦𑀻𑀢𑀺. 𑀅𑀓𑁆𑀓𑁄𑀥𑀦𑁄𑀢𑀺 𑀳𑀺 𑀔𑁄 𑀯𑀼𑀢𑁆𑀢𑀁, 𑀅𑀧𑀺 𑀘 𑀓𑁄𑀥𑁄 𑀢𑀸𑀯 𑀯𑀢𑁆𑀢𑀩𑁆𑀩𑁄. 𑀤𑀲𑀳𑀸𑀓𑀸𑀭𑁂𑀳𑀺 𑀓𑁄𑀥𑁄 ¶ 𑀚𑀸𑀬𑀢𑀺. ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺 𑀓𑁄𑀥𑁄 𑀚𑀸𑀬𑀢𑀺…𑀧𑁂… 𑀬𑀲𑁆𑀲𑁂𑀲𑁄 𑀓𑁄𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑁆𑀓𑁄𑀥𑀦𑁄. 𑀓𑁄𑀥𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀓𑁆𑀓𑁄𑀥𑀦𑁄, 𑀓𑁄𑀥𑀯𑀢𑁆𑀣𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀅𑀓𑁆𑀓𑁄𑀥𑀦𑁄, 𑀓𑁄𑀥𑀳𑁂𑀢𑀼𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀓𑁆𑀓𑁄𑀥𑀦𑁄. 𑀮𑁄𑀪𑁄𑀢𑀺 𑀬𑁄 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑁂𑀯𑀺𑀘𑁆𑀙𑀁 𑀯𑀼𑀘𑁆𑀘𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁…𑀧𑁂… 𑀕𑀸𑀳𑁄 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀅𑀓𑁆𑀓𑁄𑀥𑀦𑁄 𑀮𑁄𑀪𑀧𑀸𑀧𑀁, 𑀯𑁂𑀯𑀺𑀘𑁆𑀙𑀁 𑀯𑀺𑀢𑀭𑁂 𑀫𑀼𑀦𑀻𑀢𑀺. 𑀫𑀼𑀦𑀺 𑀮𑁄𑀪𑀧𑀸𑀧𑀜𑁆𑀘 𑀯𑁂𑀯𑀺𑀘𑁆𑀙𑀜𑁆𑀘 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀻𑀢𑀺 ¶ [𑀯𑀻𑀢𑀺𑀯𑀢𑁆𑀢𑀻𑀢𑀺 (𑀓.)] 𑁋 𑀅𑀓𑁆𑀓𑁄𑀥𑀦𑁄 𑀮𑁄𑀪𑀧𑀸𑀧𑀁, 𑀯𑁂𑀯𑀺𑀘𑁆𑀙𑀁 𑀯𑀺𑀢𑀭𑁂 𑀫𑀼𑀦𑀺.

‘‘𑀲𑀘𑁆𑀘𑁄 𑀲𑀺𑀬𑀸 𑀅𑀧𑁆𑀧𑀕𑀩𑁆𑀪𑁄, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀅𑀓𑁆𑀓𑁄𑀥𑀦𑁄 𑀮𑁄𑀪𑀧𑀸𑀧𑀁, 𑀯𑁂𑀯𑀺𑀘𑁆𑀙𑀁 𑀯𑀺𑀢𑀭𑁂 𑀫𑀼𑀦𑀻’’𑀢𑀺.

𑀦𑀺𑀤𑁆𑀤𑀁 ¶ 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀁, 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂;

𑀅𑀢𑀺𑀫𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬, 𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄.

𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀦𑁆𑀢𑀺. 𑀦𑀺𑀤𑁆𑀤𑀸𑀢𑀺 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄 𑀅𑀦𑁆𑀢𑁄𑀲𑀫𑁄𑀭𑁄𑀥𑁄 𑀫𑀺𑀤𑁆𑀥𑀁 𑀲𑀼𑀧𑁆𑀧𑀁 𑀧𑀘𑀮𑀸𑀬𑀺𑀓𑀸 𑀲𑀼𑀧𑁆𑀧𑀁 𑀲𑀼𑀧𑁆𑀧𑀦𑀸 𑀲𑀼𑀧𑁆𑀧𑀺𑀢𑀢𑁆𑀢𑀁. 𑀢𑀦𑁆𑀤𑀺𑀦𑁆𑀢𑀺 𑀬𑀸 𑀢𑀦𑁆𑀤𑀻 [𑀢𑀦𑁆𑀤𑀺 (𑀲𑀻. 𑀲𑁆𑀬𑀸. 𑀓.)] 𑀢𑀦𑁆𑀤𑀺𑀬𑀦𑀸 𑀢𑀦𑁆𑀤𑀺𑀬𑀺𑀢𑀢𑁆𑀢𑀁 𑀢𑀦𑁆𑀤𑀺𑀫𑀦𑀓𑀢𑀸 𑀆𑀮𑀲𑁆𑀬𑀁 𑀆𑀮𑀲𑁆𑀬𑀸𑀬𑀢𑀸 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁. 𑀣𑀻𑀦𑀦𑁆𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸 𑀮𑀻𑀦𑀁 𑀮𑀻𑀬𑀦𑀸 𑀮𑀻𑀬𑀺𑀢𑀢𑁆𑀢𑀁, 𑀣𑀺𑀦𑀁 𑀣𑀺𑀬𑀦𑀸 𑀣𑀺𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲. 𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀦𑁆𑀢𑀺. 𑀦𑀺𑀤𑁆𑀤𑀜𑁆𑀘 𑀢𑀦𑁆𑀤𑀺𑀜𑁆𑀘 𑀣𑀺𑀦𑀜𑁆𑀘 𑀲𑀳𑁂 𑀲𑀳𑁂𑀬𑁆𑀬 𑀧𑀭𑀺𑀲𑀳𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀁.

𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂𑀢𑀺. 𑀧𑀫𑀸𑀤𑁄 𑀯𑀢𑁆𑀢𑀩𑁆𑀩𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀯𑀸 𑀓𑀸𑀫𑀕𑀼𑀡𑁂𑀲𑀼. 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀸𑀤𑀦𑀁 [𑀯𑁄𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀸𑀤𑀦𑀁 (𑀩𑀳𑀽𑀲𑀼)] 𑀯𑀸 𑀓𑀼𑀲𑀮𑀸𑀦𑀁 𑀯𑀸 ¶ 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀧𑀫𑀸𑀤𑁄. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 ¶ 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄. 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂𑀢𑀺 𑀧𑀫𑀸𑀤𑁂𑀦 𑀦 𑀯𑀲𑁂𑀬𑁆𑀬 𑀦 𑀲𑀁𑀯𑀲𑁂𑀬𑁆𑀬 𑀦 𑀆𑀯𑀲𑁂𑀬𑁆𑀬 𑀦 𑀧𑀭𑀺𑀯𑀲𑁂𑀬𑁆𑀬, 𑀧𑀫𑀸𑀤𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀧𑀫𑀸𑀤𑀸 𑀆𑀭𑀢𑁄 𑀅𑀲𑁆𑀲 ¶ 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂.

𑀅𑀢𑀺𑀫𑀸𑀦𑁂 ¶ 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺. 𑀅𑀢𑀺𑀫𑀸𑀦𑁄𑀢𑀺 𑀇𑀥𑁂𑀓𑀘𑁆𑀘𑁄 𑀧𑀭𑀁 𑀅𑀢𑀺𑀫𑀜𑁆𑀜𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀢𑀺𑀫𑀸𑀦𑁄. 𑀅𑀢𑀺𑀫𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺. 𑀅𑀢𑀺𑀫𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬 𑀦 𑀲𑀁𑀢𑀺𑀝𑁆𑀞𑁂𑀬𑁆𑀬, 𑀅𑀢𑀺𑀫𑀸𑀦𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀅𑀢𑀺𑀫𑀸𑀦𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀅𑀢𑀺𑀫𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬.

𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀤𑀸𑀦𑀁 𑀤𑁂𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀺𑀬𑀦𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀦𑁆𑀢𑁄 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑁄 𑀘𑁂𑀢𑀺𑀬𑁂 𑀕𑀦𑁆𑀥𑀫𑀸𑀮𑀁 𑀆𑀭𑁄𑀧𑁂𑀦𑁆𑀢𑁄 𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀬𑀁 𑀓𑀺𑀜𑁆𑀘𑀺 𑀢𑁂𑀥𑀸𑀢𑀼𑀓𑀁 𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀦 𑀕𑀢𑀺𑀳𑁂𑀢𑀼 𑀦 𑀉𑀧𑀧𑀢𑁆𑀢𑀺𑀳𑁂𑀢𑀼 𑀦 𑀧𑀝𑀺𑀲𑀦𑁆𑀥𑀺𑀳𑁂𑀢𑀼 𑀦 𑀪𑀯𑀳𑁂𑀢𑀼 𑀦 𑀲𑀁𑀲𑀸𑀭𑀳𑁂𑀢𑀼 𑀦 𑀯𑀝𑁆𑀝𑀳𑁂𑀢𑀼, 𑀲𑀩𑁆𑀩𑀁 𑀢𑀁 𑀯𑀺𑀲𑀁𑀬𑁄𑀕𑀸𑀥𑀺𑀧𑁆𑀧𑀸𑀬𑁄 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀧𑁄𑀡𑁄 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑁄 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺. 𑀏𑀯𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄. 𑀅𑀣 𑀯𑀸 𑀲𑀩𑁆𑀩𑀲𑀗𑁆𑀔𑀸𑀭𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀧𑀝𑀺𑀯𑀸𑀧𑁂𑀢𑁆𑀯𑀸 [𑀧𑀝𑀺𑀯𑀸𑀲𑁂𑀢𑁆𑀯𑀸 (𑀓.)] 𑀅𑀫𑀢𑀸𑀬 𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀏𑀢𑀁 𑀲𑀦𑁆𑀢𑀁 ¶ 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄.

‘‘𑀦 𑀧𑀡𑁆𑀟𑀺𑀢𑀸 𑀉𑀧𑀥𑀺𑀲𑀼𑀔𑀲𑁆𑀲 𑀳𑁂𑀢𑀼, 𑀤𑀤𑀦𑁆𑀢𑀺 𑀤𑀸𑀦𑀸𑀦𑀺 𑀧𑀼𑀦𑀩𑁆𑀪𑀯𑀸𑀬;

𑀓𑀸𑀫𑀜𑁆𑀘 𑀢𑁂 𑀉𑀧𑀥𑀺𑀧𑀭𑀺𑀓𑁆𑀔𑀬𑀸𑀬, 𑀤𑀤𑀦𑁆𑀢𑀺 𑀤𑀸𑀦𑀁 𑀅𑀧𑀼𑀦𑀩𑁆𑀪𑀯𑀸𑀬.

‘‘𑀦 ¶ 𑀧𑀡𑁆𑀟𑀺𑀢𑀸 𑀉𑀧𑀥𑀺𑀲𑀼𑀔𑀲𑁆𑀲 𑀳𑁂𑀢𑀼, 𑀪𑀸𑀯𑁂𑀦𑁆𑀢𑀺 𑀛𑀸𑀦𑀸𑀦𑀺 𑀧𑀼𑀦𑀩𑁆𑀪𑀯𑀸𑀬;

𑀓𑀸𑀫𑀜𑁆𑀘 𑀢𑁂 𑀉𑀧𑀥𑀺𑀧𑀭𑀺𑀓𑁆𑀔𑀬𑀸𑀬, 𑀪𑀸𑀯𑁂𑀦𑁆𑀢𑀺 𑀛𑀸𑀦𑀁 𑀅𑀧𑀼𑀦𑀩𑁆𑀪𑀯𑀸𑀬.

‘‘𑀢𑁂 ¶ ¶ 𑀦𑀺𑀩𑁆𑀩𑀼𑀢𑁆𑀢𑀺𑀁 𑀆𑀲𑀺𑀲𑀫𑀸𑀦𑀲𑀸 [𑀆𑀲𑀺𑀁𑀲𑀫𑀸𑀦𑀸 (𑀲𑀻.), 𑀅𑀪𑀺𑀫𑀸𑀦𑀸 (𑀲𑁆𑀬𑀸.)] 𑀤𑀤𑀦𑁆𑀢𑀺, 𑀢𑀦𑁆𑀦𑀺𑀦𑁆𑀦𑀘𑀺𑀢𑁆𑀢𑀸 [𑀢𑀦𑁆𑀦𑀺𑀦𑁆𑀦𑀸 𑀢𑀜𑁆𑀘𑀺𑀢𑁆𑀢𑀸 (𑀓.)] 𑀢𑀤𑀥𑀺𑀫𑀼𑀢𑁆𑀢𑀸;

𑀦𑀚𑁆𑀚𑁄 𑀬𑀣𑀸 𑀲𑀸𑀕𑀭𑀫𑀚𑁆𑀛𑀼𑀧𑁂𑀢𑀸 [𑀲𑀸𑀕𑀭𑀫𑀚𑁆𑀛𑀕𑀢𑀸 (𑀲𑁆𑀬𑀸.)], 𑀪𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀭𑀸𑀬𑀦𑀸 𑀢𑁂’’𑀢𑀺.

𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀺𑀤𑁆𑀤𑀁 𑀢𑀦𑁆𑀤𑀺 𑀲𑀳𑁂 𑀣𑀻𑀦𑀁, 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂;

𑀅𑀢𑀺𑀫𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬, 𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄’’𑀢𑀺.

𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣, [𑀦𑀻𑀬𑁂𑀣 (𑀓.)] 𑀭𑀽𑀧𑁂 𑀲𑁆𑀦𑁂𑀳𑀁 𑀦 𑀓𑀼𑀩𑁆𑀩𑀬𑁂;

𑀫𑀸𑀦𑀜𑁆𑀘 𑀧𑀭𑀺𑀚𑀸𑀦𑁂𑀬𑁆𑀬, 𑀲𑀸𑀳𑀲𑀸 𑀯𑀺𑀭𑀢𑁄 𑀘𑀭𑁂.

𑀫𑁄𑀲𑀯𑀚𑁆𑀚𑁂 ¶ 𑀦 𑀦𑀺𑀬𑁆𑀬𑁂𑀣𑀸𑀢𑀺. 𑀫𑁄𑀲𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀫𑀼𑀲𑀸𑀯𑀸𑀤𑁄. 𑀇𑀥𑁂𑀓𑀘𑁆𑀘𑁄 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀻’’𑀢𑀺, 𑀚𑀸𑀦𑀁 𑀯𑀸 𑀆𑀳 𑁋 ‘‘𑀦 𑀚𑀸𑀦𑀸𑀫𑀻’’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀧𑀲𑁆𑀲𑀸𑀫𑀻’’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀦 𑀧𑀲𑁆𑀲𑀸𑀫𑀻’’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑁄𑀲𑀯𑀚𑁆𑀚𑀁. 𑀅𑀧𑀺 𑀘 𑀢𑀻𑀳𑀸𑀓𑀸𑀭𑁂𑀳𑀺…𑀧𑁂… 𑀘𑀢𑀽𑀳𑀸𑀓𑀸𑀭𑁂𑀳𑀺… 𑀧𑀜𑁆𑀘𑀳𑀸𑀓𑀸𑀭𑁂𑀳𑀺… 𑀙𑀳𑀸𑀓𑀸𑀭𑁂𑀳𑀺… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺… 𑀅𑀝𑁆𑀞𑀳𑀸𑀓𑀸𑀭𑁂𑀳𑀺…𑀧𑁂… 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣𑀸𑀢𑀺. 𑀫𑁄𑀲𑀯𑀚𑁆𑀚𑁂 𑀦 𑀬𑀸𑀬𑁂𑀬𑁆𑀬 𑀦 𑀦𑀺𑀬𑁆𑀬𑀸𑀬𑁂𑀬𑁆𑀬 𑀦 𑀯𑀳𑁂𑀬𑁆𑀬 𑀦 𑀲𑀁𑀳𑀭𑁂𑀬𑁆𑀬, 𑀫𑁄𑀲𑀯𑀚𑁆𑀚𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀫𑁄𑀲𑀯𑀚𑁆𑀚𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣.

𑀭𑀽𑀧𑁂 ¶ 𑀲𑁆𑀦𑁂𑀳𑀁 𑀦 𑀓𑀼𑀩𑁆𑀩𑀬𑁂𑀢𑀺. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 ¶ , 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀭𑀽𑀧𑁂 𑀲𑁆𑀦𑁂𑀳𑀁 𑀦 𑀓𑀼𑀩𑁆𑀩𑀬𑁂𑀢𑀺. 𑀭𑀽𑀧𑁂 𑀲𑁆𑀦𑁂𑀳𑀁 𑀦 𑀓𑀭𑁂𑀬𑁆𑀬 𑀙𑀦𑁆𑀤𑀁 𑀦 𑀓𑀭𑁂𑀬𑁆𑀬 𑀧𑁂𑀫𑀁 𑀦 𑀓𑀭𑁂𑀬𑁆𑀬 𑀭𑀸𑀕𑀁 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑁋 𑀭𑀽𑀧𑁂 𑀲𑁆𑀦𑁂𑀳𑀁 𑀦 𑀓𑀼𑀩𑁆𑀩𑀬𑁂.

𑀫𑀸𑀦𑀜𑁆𑀘 ¶ 𑀧𑀭𑀺𑀚𑀸𑀦𑁂𑀬𑁆𑀬𑀸𑀢𑀺. 𑀫𑀸𑀦𑁄𑀢𑀺 𑀏𑀓𑀯𑀺𑀥𑁂𑀦 𑀫𑀸𑀦𑁄 𑁋 𑀬𑀸 𑀘𑀺𑀢𑁆𑀢𑀲𑁆𑀲 ¶ 𑀉𑀦𑁆𑀦𑀢𑀺. 𑀤𑀼𑀯𑀺𑀥𑁂𑀦 𑀫𑀸𑀦𑁄 𑁋 𑀅𑀢𑁆𑀢𑀼𑀓𑁆𑀓𑀁𑀲𑀦𑀫𑀸𑀦𑁄, 𑀧𑀭𑀯𑀫𑁆𑀪𑀦𑀫𑀸𑀦𑁄. 𑀢𑀺𑀯𑀺𑀥𑁂𑀦 𑀫𑀸𑀦𑁄 𑁋 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄. 𑀘𑀢𑀼𑀯𑀺𑀥𑁂𑀦 𑀫𑀸𑀦𑁄 𑁋 𑀮𑀸𑀪𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀬𑀲𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀧𑀲𑀁𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀲𑀼𑀔𑁂𑀦 𑀫𑀸𑀦𑀁 𑀚𑀦𑁂𑀢𑀺. 𑀧𑀜𑁆𑀘𑀯𑀺𑀥𑁂𑀦 𑀫𑀸𑀦𑁄 𑁋 ‘‘𑀮𑀸𑀪𑀺𑀫𑁆𑀳𑀺 𑀫𑀦𑀸𑀧𑀺𑀓𑀸𑀦𑀁 𑀭𑀽𑀧𑀸𑀦’’𑀦𑁆𑀢𑀺 𑀫𑀸𑀦𑀁 𑀚𑀦𑁂𑀢𑀺, ‘‘𑀮𑀸𑀪𑀺𑀫𑁆𑀳𑀺 𑀫𑀦𑀸𑀧𑀺𑀓𑀸𑀦𑀁 𑀲𑀤𑁆𑀤𑀸𑀦𑀁…𑀧𑁂… 𑀕𑀦𑁆𑀥𑀸𑀦𑀁… 𑀭𑀲𑀸𑀦𑀁… 𑀨𑁄𑀝𑁆𑀞𑀩𑁆𑀩𑀸𑀦’’𑀦𑁆𑀢𑀺 𑀫𑀸𑀦𑀁 𑀚𑀦𑁂𑀢𑀺. 𑀙𑀩𑁆𑀩𑀺𑀥𑁂𑀦 𑀫𑀸𑀦𑁄 𑁋 𑀘𑀓𑁆𑀔𑀼𑀲𑀫𑁆𑀧𑀤𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀲𑁄𑀢𑀲𑀫𑁆𑀧𑀤𑀸𑀬…𑀧𑁂… 𑀖𑀸𑀦𑀲𑀫𑁆𑀧𑀤𑀸𑀬… 𑀚𑀺𑀯𑁆𑀳𑀸𑀲𑀫𑁆𑀧𑀤𑀸𑀬… 𑀓𑀸𑀬𑀲𑀫𑁆𑀧𑀤𑀸𑀬… 𑀫𑀦𑁄𑀲𑀫𑁆𑀧𑀤𑀸𑀬 𑀫𑀸𑀦𑀁 𑀚𑀦𑁂𑀢𑀺. 𑀲𑀢𑁆𑀢𑀯𑀺𑀥𑁂𑀦 𑀫𑀸𑀦𑁄 𑁋 𑀅𑀢𑀺𑀫𑀸𑀦𑁄, 𑀫𑀸𑀦𑀸𑀢𑀺𑀫𑀸𑀦𑁄, 𑀑𑀫𑀸𑀦𑁄, 𑀲𑀤𑀺𑀲𑀫𑀸𑀦𑁄, 𑀅𑀥𑀺𑀫𑀸𑀦𑁄, 𑀅𑀲𑁆𑀫𑀺𑀫𑀸𑀦𑁄, 𑀫𑀺𑀘𑁆𑀙𑀸𑀫𑀸𑀦𑁄. 𑀅𑀝𑁆𑀞𑀯𑀺𑀥𑁂𑀦 𑀫𑀸𑀦𑁄 𑁋 𑀮𑀸𑀪𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀅𑀮𑀸𑀪𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺, 𑀬𑀲𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀅𑀬𑀲𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺, 𑀧𑀲𑀁𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀦𑀺𑀦𑁆𑀤𑀸𑀬 𑀑𑀫𑀸𑀦𑀁 𑀚𑀦𑁂𑀢𑀺, 𑀲𑀼𑀔𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀤𑀼𑀓𑁆𑀔𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺. 𑀦𑀯𑀯𑀺𑀥𑁂𑀦 𑀫𑀸𑀦𑁄 𑁋 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄. 𑀤𑀲𑀯𑀺𑀥𑁂𑀦 𑀫𑀸𑀦𑁄 𑁋 𑀇𑀥𑁂𑀓𑀘𑁆𑀘𑁄 𑀫𑀸𑀦𑀁 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀬𑁄 ¶ 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀦𑁄.

𑀫𑀸𑀦𑀜𑁆𑀘 𑀧𑀭𑀺𑀚𑀸𑀦𑁂𑀬𑁆𑀬𑀸𑀢𑀺. 𑀫𑀸𑀦𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑁂𑀬𑁆𑀬 𑁋 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬, 𑀧𑀳𑀸𑀦𑀧𑀭𑀺𑀜𑁆𑀜𑀸𑀬. 𑀓𑀢𑀫𑀸 ¶ 𑀜𑀸𑀢𑀧𑀭𑀺𑀜𑁆𑀜𑀸? 𑀫𑀸𑀦𑀁 𑀚𑀸𑀦𑀸𑀢𑀺 𑀅𑀬𑀁 𑀏𑀓𑀯𑀺𑀥𑁂𑀦 𑀫𑀸𑀦𑁄 𑁋 𑀬𑀸 𑀘𑀺𑀢𑁆𑀢𑀲𑁆𑀲 𑀉𑀦𑁆𑀦𑀢𑀺. 𑀅𑀬𑀁 𑀤𑀼𑀯𑀺𑀥𑁂𑀦 𑀫𑀸𑀦𑁄 𑁋 𑀅𑀢𑁆𑀢𑀼𑀓𑁆𑀓𑀁𑀲𑀦𑀫𑀸𑀦𑁄 𑀧𑀭𑀯𑀫𑁆𑀪𑀦𑀫𑀸𑀦𑁄…𑀧𑁂… 𑀅𑀬𑀁 𑀤𑀲𑀯𑀺𑀥𑁂𑀦 𑀫𑀸𑀦𑁄 ¶ 𑁋 𑀇𑀥𑁂𑀓𑀘𑁆𑀘𑁄 𑀫𑀸𑀦𑀁 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀢𑀁 𑀜𑀸𑀢𑀁 𑀓𑀢𑁆𑀯𑀸 𑀫𑀸𑀦𑀁 𑀢𑀻𑀭𑁂𑀢𑀺 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀢𑀻𑀭𑁂𑀢𑀺 𑁋 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀫𑀸𑀦𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 ¶ 𑀕𑀫𑁂𑀢𑀺 𑁋 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀫𑀸𑀦𑀜𑁆𑀘 𑀧𑀭𑀺𑀚𑀸𑀦𑁂𑀬𑁆𑀬𑀸𑀢𑀺 𑀫𑀸𑀦𑀁 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑁂𑀬𑁆𑀬𑀸𑀢𑀺 𑁋 𑀫𑀸𑀦𑀜𑁆𑀘 𑀧𑀭𑀺𑀚𑀸𑀦𑁂𑀬𑁆𑀬.

𑀲𑀸𑀳𑀲𑀸 𑀯𑀺𑀭𑀢𑁄 𑀘𑀭𑁂𑀢𑀺. 𑀓𑀢𑀫𑀸 𑀲𑀸𑀳𑀲𑀸 𑀘𑀭𑀺𑀬𑀸? 𑀭𑀢𑁆𑀢𑀲𑁆𑀲 𑀭𑀸𑀕𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀤𑀼𑀝𑁆𑀞𑀲𑁆𑀲 𑀤𑁄𑀲𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀫𑀽𑀴𑁆𑀳𑀲𑁆𑀲 𑀫𑁄𑀳𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀯𑀺𑀦𑀺𑀩𑀤𑁆𑀥𑀲𑁆𑀲 𑀫𑀸𑀦𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀧𑀭𑀸𑀫𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀯𑀺𑀓𑁆𑀔𑁂𑀧𑀕𑀢𑀲𑁆𑀲 𑀉𑀤𑁆𑀥𑀘𑁆𑀘𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀅𑀦𑀺𑀝𑁆𑀞𑀗𑁆𑀕𑀢𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸, 𑀣𑀸𑀫𑀕𑀢𑀲𑁆𑀲 𑀅𑀦𑀼𑀲𑀬𑀘𑀭𑀺𑀬𑀸 𑀲𑀸𑀳𑀲𑀸 𑀘𑀭𑀺𑀬𑀸 𑁋 𑀅𑀬𑀁 𑀲𑀸𑀳𑀲𑀸 𑀘𑀭𑀺𑀬𑀸. 𑀲𑀸𑀳𑀲𑀸 𑀯𑀺𑀭𑀢𑁄 ¶ 𑀘𑀭𑁂𑀢𑀺 𑀲𑀸𑀳𑀲𑀸 𑀘𑀭𑀺𑀬𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬 𑀘𑀭𑁂𑀬𑁆𑀬 𑀯𑀺𑀘𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀲𑀸𑀳𑀲𑀸 𑀯𑀺𑀭𑀢𑁄 𑀘𑀭𑁂.

‘‘𑀫𑁄𑀲𑀯𑀚𑁆𑀚𑁂 𑀦 𑀦𑀺𑀬𑁆𑀬𑁂𑀣, 𑀭𑀽𑀧𑁂 𑀲𑁆𑀦𑁂𑀳𑀁 𑀦 𑀓𑀼𑀩𑁆𑀩𑀬𑁂;

𑀫𑀸𑀦𑀜𑁆𑀘 𑀧𑀭𑀺𑀚𑀸𑀦𑁂𑀬𑁆𑀬, 𑀲𑀸𑀳𑀲𑀸 𑀯𑀺𑀭𑀢𑁄 𑀘𑀭𑁂’’𑀢𑀺.

𑀧𑀼𑀭𑀸𑀡𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀦𑀯𑁂 𑀔𑀦𑁆𑀢𑀺𑀁 𑀦 𑀓𑀼𑀩𑁆𑀩𑀬𑁂 [𑀔𑀦𑁆𑀢𑀺𑀫𑀓𑀼𑀩𑁆𑀩𑀬𑁂 (𑀩𑀳𑀽𑀲𑀼)] ;

𑀳𑀻𑀬𑀫𑀸𑀦𑁂 𑀦 𑀲𑁄𑀘𑁂𑀬𑁆𑀬, 𑀆𑀓𑀸𑀲𑀁 [𑀆𑀓𑀲𑁆𑀲𑀁 (𑀲𑁆𑀬𑀸.)] 𑀦 𑀲𑀺𑀢𑁄 𑀲𑀺𑀬𑀸.

𑀧𑀼𑀭𑀸𑀡𑀁 ¶ 𑀦𑀸𑀪𑀺𑀦𑀦𑁆𑀤𑁂𑀬𑁆𑀬𑀸𑀢𑀺. 𑀧𑀼𑀭𑀸𑀡𑀁 𑀯𑀼𑀘𑁆𑀘𑀢𑀺 𑀅𑀢𑀻𑀢𑀸 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸. 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀦𑀸𑀪𑀺𑀦𑀦𑁆𑀤𑁂𑀬𑁆𑀬 𑀦𑀸𑀪𑀺𑀯𑀤𑁂𑀬𑁆𑀬 𑀦 𑀅𑀚𑁆𑀛𑁄𑀲𑁂𑀬𑁆𑀬, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 ¶ 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀧𑀼𑀭𑀸𑀡𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬.

𑀦𑀯𑁂 𑀔𑀦𑁆𑀢𑀺𑀁 𑀦 𑀓𑀼𑀩𑁆𑀩𑀬𑁂𑀢𑀺. 𑀦𑀯𑀸 𑀯𑀼𑀘𑁆𑀘𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀗𑁆𑀔𑀸𑀭𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀔𑀦𑁆𑀢𑀺𑀁 𑀦 𑀓𑀭𑁂𑀬𑁆𑀬 𑀙𑀦𑁆𑀤𑀁 𑀦 𑀓𑀭𑁂𑀬𑁆𑀬 𑀧𑁂𑀫𑀁 𑀦 𑀓𑀭𑁂𑀬𑁆𑀬 𑀭𑀸𑀕𑀁 𑀦 𑀓𑀭𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑁋 𑀦𑀯𑁂 𑀔𑀦𑁆𑀢𑀺𑀁 𑀦 𑀓𑀼𑀩𑁆𑀩𑀬𑁂.

𑀳𑀻𑀬𑀫𑀸𑀦𑁂 ¶ 𑀦 𑀲𑁄𑀘𑁂𑀬𑁆𑀬𑀸𑀢𑀺. 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 ¶ 𑀯𑁂𑀫𑀸𑀦𑁂 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀦 𑀲𑁄𑀘𑁂𑀬𑁆𑀬 𑀦 𑀓𑀺𑀮𑀫𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦 𑀧𑀭𑀺𑀤𑁂𑀯𑁂𑀬𑁆𑀬 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬. 𑀘𑀓𑁆𑀔𑀼𑀲𑁆𑀫𑀺𑀁 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑁂𑀫𑀸𑀦𑁂 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂, 𑀲𑁄𑀢𑀲𑁆𑀫𑀺𑀁…𑀧𑁂… 𑀖𑀸𑀦𑀲𑁆𑀫𑀺𑀁… 𑀚𑀺𑀯𑁆𑀳𑀸𑀬… 𑀓𑀸𑀬𑀲𑁆𑀫𑀺𑀁… 𑀭𑀽𑀧𑀲𑁆𑀫𑀺𑀁… 𑀲𑀤𑁆𑀤𑀲𑁆𑀫𑀺𑀁… 𑀕𑀦𑁆𑀥𑀲𑁆𑀫𑀺𑀁… 𑀭𑀲𑀲𑁆𑀫𑀺𑀁… 𑀨𑁄𑀝𑁆𑀞𑀩𑁆𑀩𑀲𑁆𑀫𑀺𑀁… 𑀓𑀼𑀮𑀲𑁆𑀫𑀺𑀁… 𑀕𑀡𑀲𑁆𑀫𑀺𑀁… 𑀆𑀯𑀸𑀲𑀲𑁆𑀫𑀺𑀁… 𑀮𑀸𑀪𑀲𑁆𑀫𑀺𑀁… 𑀬𑀲𑀲𑁆𑀫𑀺𑀁… 𑀧𑀲𑀁𑀲𑀸𑀬… 𑀲𑀼𑀔𑀲𑁆𑀫𑀺𑀁… 𑀘𑀻𑀯𑀭𑀲𑁆𑀫𑀺𑀁… 𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀁… 𑀲𑁂𑀦𑀸𑀲𑀦𑀲𑁆𑀫𑀺𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑁆𑀫𑀺𑀁 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑁂𑀫𑀸𑀦𑁂 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀦 𑀲𑁄𑀘𑁂𑀬𑁆𑀬 𑀦 𑀓𑀺𑀮𑀫𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦 𑀧𑀭𑀺𑀤𑁂𑀯𑁂𑀬𑁆𑀬 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑁋 𑀳𑀻𑀬𑀫𑀸𑀦𑁂 𑀦 𑀲𑁄𑀘𑁂𑀬𑁆𑀬.

𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸𑀢𑀺. 𑀆𑀓𑀸𑀲𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀺𑀁𑀓𑀸𑀭𑀡𑀸 𑀆𑀓𑀸𑀲𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸? 𑀬𑀸𑀬 𑀢𑀡𑁆𑀳𑀸𑀬 𑀭𑀽𑀧𑀁 𑀆𑀓𑀲𑁆𑀲𑀢𑀺 𑀲𑀫𑀸𑀓𑀲𑁆𑀲𑀢𑀺 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀺, 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀆𑀓𑀲𑁆𑀲𑀢𑀺 𑀲𑀫𑀸𑀓𑀲𑁆𑀲𑀢𑀺 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀺; 𑀢𑀁𑀓𑀸𑀭𑀡𑀸 𑀆𑀓𑀸𑀲𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸𑀢𑀺. 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑁄 𑀦 𑀲𑀺𑀬𑀸. 𑀢𑀡𑁆𑀳𑀁 ¶ 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀢𑀡𑁆𑀳𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 ¶ 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸.

‘‘𑀧𑀼𑀭𑀸𑀡𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀦𑀯𑁂 𑀔𑀦𑁆𑀢𑀺𑀁 𑀦 𑀓𑀼𑀩𑁆𑀩𑀬𑁂;

𑀳𑀻𑀬𑀫𑀸𑀦𑁂 𑀦 𑀲𑁄𑀘𑁂𑀬𑁆𑀬, 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸’’𑀢𑀺.

𑀕𑁂𑀥𑀁 ¶ 𑀩𑁆𑀭𑀽𑀫𑀺 𑀫𑀳𑁄𑀖𑁄𑀢𑀺, 𑀆𑀚𑀯𑀁 [𑀆𑀘𑀫𑀁 (𑀲𑁆𑀬𑀸. 𑀓.)] 𑀩𑁆𑀭𑀽𑀫𑀺 𑀚𑀧𑁆𑀧𑀦𑀁;

𑀆𑀭𑀫𑁆𑀫𑀡𑀁 𑀧𑀓𑀫𑁆𑀧𑀦𑀁, [𑀧𑀓𑀧𑁆𑀧𑀦𑀁 (𑀲𑁆𑀬𑀸. 𑀓.)] 𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄.

𑀕𑁂𑀥𑀁 𑀩𑁆𑀭𑀽𑀫𑀺 𑀫𑀳𑁄𑀖𑁄𑀢𑀻𑀢𑀺. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀫𑀳𑁄𑀖𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀕𑁂𑀥𑀁 𑀩𑁆𑀭𑀽𑀫𑀺 𑀫𑀳𑁄𑀖𑁄𑀢𑀻𑀢𑀺. 𑀕𑁂𑀥𑀁 ‘‘𑀫𑀳𑁄𑀖𑁄’’𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀕𑁂𑀥𑀁 𑀩𑁆𑀭𑀽𑀫𑀺 𑀫𑀳𑁄𑀖𑁄𑀢𑀺.

𑀆𑀚𑀯𑀁 ¶ 𑀩𑁆𑀭𑀽𑀫𑀺 𑀚𑀧𑁆𑀧𑀦𑀦𑁆𑀢𑀺. 𑀆𑀚𑀯𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀚𑀧𑁆𑀧𑀦𑀸𑀧𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀆𑀚𑀯𑀁 𑀩𑁆𑀭𑀽𑀫𑀺 𑀚𑀧𑁆𑀧𑀦𑀦𑁆𑀢𑀺 𑀆𑀚𑀯𑀁 ‘‘𑀚𑀧𑁆𑀧𑀦𑀸’’𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺…𑀧𑁂… 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀆𑀚𑀯𑀁 𑀩𑁆𑀭𑀽𑀫𑀺 𑀚𑀧𑁆𑀧𑀦𑀁.

𑀆𑀭𑀫𑁆𑀫𑀡𑀁 𑀧𑀓𑀫𑁆𑀧𑀦𑀦𑁆𑀢𑀺. 𑀆𑀭𑀫𑁆𑀫𑀡𑀫𑁆𑀧𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 ¶ 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀧𑀓𑀫𑁆𑀧𑀦𑀸𑀧𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑁋 𑀆𑀭𑀫𑁆𑀫𑀡𑀁 𑀧𑀓𑀫𑁆𑀧𑀦𑀁.

𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄𑀢𑀺. 𑀓𑀸𑀫𑀧𑀗𑁆𑀓𑁄 𑀓𑀸𑀫𑀓𑀤𑁆𑀤𑀫𑁄 𑀓𑀸𑀫𑀓𑀺𑀮𑁂𑀲𑁄 𑀓𑀸𑀫𑀧𑀮𑀺𑀧𑁄 𑀓𑀸𑀫𑀧𑀮𑀺𑀩𑁄𑀥𑁄 [𑀓𑀸𑀫𑀧𑀮𑀺𑀭𑁄𑀥𑁄 (𑀲𑀻. 𑀓.)] 𑀤𑀼𑀭𑀘𑁆𑀘𑀬𑁄 𑀤𑀼𑀭𑀢𑀺𑀯𑀢𑁆𑀢𑁄 𑀤𑀼𑀢𑁆𑀢𑀭𑁄 𑀤𑀼𑀧𑁆𑀧𑀢𑀭𑁄 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑁄 𑀤𑀼𑀩𑁆𑀩𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄.

‘‘𑀕𑁂𑀥𑀁 ¶ 𑀩𑁆𑀭𑀽𑀫𑀺 𑀫𑀳𑁄𑀖𑁄𑀢𑀺, 𑀆𑀚𑀯𑀁 𑀩𑁆𑀭𑀽𑀫𑀺 𑀚𑀧𑁆𑀧𑀦𑀁;

𑀆𑀭𑀫𑁆𑀫𑀡𑀁 𑀧𑀓𑀫𑁆𑀧𑀦𑀁, 𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄’’𑀢𑀺.

𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑀁 𑀫𑀼𑀦𑀺, 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀩𑁆𑀩𑀁 𑀲𑁄 𑀧𑀝𑀺𑀦𑀺𑀲𑁆𑀲𑀚𑁆𑀚, 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑀁 𑀫𑀼𑀦𑀻𑀢𑀺. 𑀲𑀘𑁆𑀘𑀯𑀸𑀘𑀸𑀬 𑀅𑀯𑁄𑀓𑁆𑀓𑀫𑀦𑁆𑀢𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀯𑁄𑀓𑁆𑀓𑀫𑀦𑁆𑀢𑁄, 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀅𑀯𑁄𑀓𑁆𑀓𑀫𑀦𑁆𑀢𑁄. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺 𑁋 𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑀁 𑀫𑀼𑀦𑀺.

𑀣𑀮𑁂 ¶ 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀣𑀮𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀣𑀮𑁂 𑀢𑀺𑀝𑁆𑀞𑀢𑀺 𑀤𑀻𑀧𑁂 𑀢𑀺𑀝𑁆𑀞𑀢𑀺 𑀢𑀸𑀡𑁂 ¶ 𑀢𑀺𑀝𑁆𑀞𑀢𑀺 𑀮𑁂𑀡𑁂 𑀢𑀺𑀝𑁆𑀞𑀢𑀺 𑀲𑀭𑀡𑁂 𑀢𑀺𑀝𑁆𑀞𑀢𑀺 𑀅𑀪𑀬𑁂 𑀢𑀺𑀝𑁆𑀞𑀢𑀺 𑀅𑀘𑁆𑀘𑀼𑀢𑁂 𑀢𑀺𑀝𑁆𑀞𑀢𑀺 𑀅𑀫𑀢𑁂 𑀢𑀺𑀝𑁆𑀞𑀢𑀺 𑀦𑀺𑀩𑁆𑀩𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑁋 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄.

𑀲𑀩𑁆𑀩𑀁 𑀲𑁄 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀢𑀺. 𑀲𑀩𑁆𑀩𑀁 𑀯𑀼𑀘𑁆𑀘𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀼 𑀘𑁂𑀯 𑀭𑀽𑀧𑀸 𑀘 ¶ …𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘. 𑀬𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀏𑀢𑁆𑀢𑀸𑀯𑀢𑀸𑀧𑀺 𑀲𑀩𑁆𑀩𑀁 𑀘𑀢𑁆𑀢𑀁 𑀳𑁄𑀢𑀺 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀬𑀢𑁄 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘 𑀫𑀸𑀦𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀏𑀢𑁆𑀢𑀸𑀯𑀢𑀸𑀧𑀺 𑀲𑀩𑁆𑀩𑀁 𑀘𑀢𑁆𑀢𑀁 𑀳𑁄𑀢𑀺 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸 ¶ , 𑀏𑀢𑁆𑀢𑀸𑀯𑀢𑀸𑀧𑀺 𑀲𑀩𑁆𑀩𑀁 𑀘𑀢𑁆𑀢𑀁 𑀳𑁄𑀢𑀺 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑁋 𑀲𑀩𑁆𑀩𑀁 𑀲𑁄 𑀧𑀝𑀺𑀦𑀺𑀲𑁆𑀲𑀚𑁆𑀚.

𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑁄 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑁋 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑀁 𑀫𑀼𑀦𑀺, 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀩𑁆𑀩𑀁 𑀲𑁄 𑀧𑀝𑀺𑀦𑀺𑀲𑁆𑀲𑀚𑁆𑀚, 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀲 ¶ 𑀯𑁂 𑀯𑀺𑀤𑁆𑀯𑀸 [𑀯𑀺𑀤𑁆𑀥𑀸 (𑀲𑁆𑀬𑀸.)] 𑀲 𑀯𑁂𑀤𑀕𑀽, 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄;

𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄, 𑀦 𑀧𑀺𑀳𑁂𑀢𑀻𑀥 𑀓𑀲𑁆𑀲𑀘𑀺.

𑀲 𑀯𑁂 𑀯𑀺𑀤𑁆𑀯𑀸 𑀲 𑀯𑁂𑀤𑀕𑀽𑀢𑀺. 𑀯𑀺𑀤𑁆𑀯𑀸𑀢𑀺 𑀯𑀺𑀤𑁆𑀯𑀸 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀯𑁂𑀤𑀕𑀽𑀢𑀺. 𑀯𑁂𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁…𑀧𑁂… 𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄 𑀲𑀩𑁆𑀩𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺 𑁋 𑀲 𑀯𑁂 𑀯𑀺𑀤𑁆𑀯𑀸 𑀲 𑀯𑁂𑀤𑀕𑀽.

𑀜𑀢𑁆𑀯𑀸 ¶ 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄𑀢𑀺. 𑀜𑀢𑁆𑀯𑀸𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄… 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄… 𑀖𑀸𑀦𑀁 𑀅𑀦𑀺𑀲𑁆𑀲𑀺𑀢𑁄…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 ¶ 𑀥𑀫𑁆𑀫𑁂 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄.

𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄𑀢𑀺. 𑀬𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 ¶ 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀏𑀢𑁆𑀢𑀸𑀯𑀢𑀸𑀧𑀺 𑀲𑀫𑁆𑀫𑀸 ¶ 𑀲𑁄 𑀮𑁄𑀓𑁂 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺…𑀧𑁂… 𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀏𑀢𑁆𑀢𑀸𑀯𑀢𑀸𑀧𑀺 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄.

𑀦 𑀧𑀺𑀳𑁂𑀢𑀻𑀥 𑀓𑀲𑁆𑀲𑀘𑀻𑀢𑀺. 𑀧𑀺𑀳𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀧𑀺𑀳𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀓𑀲𑁆𑀲𑀘𑀺 𑀦 𑀧𑀺𑀳𑁂𑀢𑀺 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸𑀢𑀺 𑁋 𑀦 𑀧𑀺𑀳𑁂𑀢𑀻𑀥 𑀓𑀲𑁆𑀲𑀘𑀺.

‘‘𑀲 𑀯𑁂 𑀯𑀺𑀤𑁆𑀯𑀸 𑀲 𑀯𑁂𑀤𑀕𑀽, 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄;

𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄, 𑀦 𑀧𑀺𑀳𑁂𑀢𑀻𑀥 𑀓𑀲𑁆𑀲𑀘𑀻’’𑀢𑀺.

𑀬𑁄𑀥 𑀓𑀸𑀫𑁂 𑀅𑀘𑁆𑀘𑀢𑀭𑀺, 𑀲𑀗𑁆𑀕𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀦 𑀲𑁄 𑀲𑁄𑀘𑀢𑀺 𑀦𑀸𑀚𑁆𑀛𑁂𑀢𑀺, 𑀙𑀺𑀦𑁆𑀦𑀲𑁄𑀢𑁄 𑀅𑀩𑀦𑁆𑀥𑀦𑁄.

𑀬𑁄𑀥 ¶ 𑀓𑀸𑀫𑁂 𑀅𑀘𑁆𑀘𑀢𑀭𑀺, 𑀲𑀗𑁆𑀕𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀦𑁆𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁 𑀞𑀸𑀦𑀧𑁆𑀧𑀢𑁆𑀢𑁄 𑀬𑀁 ¶ 𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀲𑀗𑁆𑀕𑀸𑀢𑀺 𑀲𑀢𑁆𑀢 𑀲𑀗𑁆𑀕𑀸 𑁋 𑀭𑀸𑀕𑀲𑀗𑁆𑀕𑁄, 𑀤𑁄𑀲𑀲𑀗𑁆𑀕𑁄, 𑀫𑁄𑀳𑀲𑀗𑁆𑀕𑁄, 𑀫𑀸𑀦𑀲𑀗𑁆𑀕𑁄, 𑀤𑀺𑀝𑁆𑀞𑀺𑀲𑀗𑁆𑀕𑁄, 𑀓𑀺𑀮𑁂𑀲𑀲𑀗𑁆𑀕𑁄, 𑀤𑀼𑀘𑁆𑀘𑀭𑀺𑀢𑀲𑀗𑁆𑀕𑁄. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 ¶ 𑀆𑀬𑀢𑀦𑀮𑁄𑀓𑁂. 𑀲𑀗𑁆𑀕𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀦𑁆𑀢𑀺. 𑀬𑁄 𑀓𑀸𑀫𑁂 𑀘 𑀲𑀗𑁆𑀕𑁂 𑀘 𑀮𑁄𑀓𑁂 𑀤𑀼𑀭𑀘𑁆𑀘𑀬𑁂 𑀤𑀼𑀭𑀢𑀺𑀯𑀢𑁆𑀢𑁂 𑀤𑀼𑀢𑁆𑀢𑀭𑁂 𑀤𑀼𑀧𑁆𑀧𑀢𑀭𑁂 𑀤𑀼𑀲𑁆𑀲𑀫𑀢𑀺𑀓𑁆𑀓𑀫𑁂 𑀤𑀼𑀩𑁆𑀩𑀻𑀢𑀺𑀯𑀢𑁆𑀢𑁂 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀻𑀢𑀺 𑁋 𑀬𑁄𑀥 𑀓𑀸𑀫𑁂 𑀅𑀘𑁆𑀘𑀢𑀭𑀺, 𑀲𑀗𑁆𑀕𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁.

𑀦 ¶ 𑀲𑁄 𑀲𑁄𑀘𑀢𑀺 𑀦𑀸𑀚𑁆𑀛𑁂𑀢𑀻𑀢𑀺. 𑀯𑀺𑀧𑀭𑀺𑀡𑀢𑀁 𑀯𑀸 𑀯𑀢𑁆𑀣𑀼𑀁 𑀦 𑀲𑁄𑀘𑀢𑀺, 𑀯𑀺𑀧𑀭𑀺𑀡𑀢𑀲𑁆𑀫𑀺𑀁 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑁄𑀘𑀢𑀺. ‘‘𑀘𑀓𑁆𑀔𑀼 𑀫𑁂 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀦 𑀲𑁄𑀘𑀢𑀺…𑀧𑁂… 𑀲𑁄𑀢𑀁 𑀫𑁂… 𑀖𑀸𑀦𑀁 𑀫𑁂… 𑀚𑀺𑀯𑁆𑀳𑀸 𑀫𑁂… 𑀓𑀸𑀬𑁄 𑀫𑁂… 𑀭𑀽𑀧𑀸 𑀫𑁂… 𑀲𑀤𑁆𑀤𑀸 𑀫𑁂… 𑀕𑀦𑁆𑀥𑀸 𑀫𑁂… 𑀭𑀲𑀸 𑀫𑁂… 𑀨𑁄𑀝𑁆𑀞𑀩𑁆𑀩𑀸 𑀫𑁂… 𑀓𑀼𑀮𑀁 𑀫𑁂… 𑀕𑀡𑁄 𑀫𑁂… 𑀆𑀯𑀸𑀲𑁄 𑀫𑁂… 𑀮𑀸𑀪𑁄 𑀫𑁂… 𑀬𑀲𑁄 𑀫𑁂… 𑀧𑀲𑀁𑀲𑀸 𑀫𑁂… 𑀲𑀼𑀔𑀁 𑀫𑁂… 𑀘𑀻𑀯𑀭𑀁 𑀫𑁂… 𑀧𑀺𑀡𑁆𑀟𑀧𑀸𑀢𑁄 𑀫𑁂… 𑀲𑁂𑀦𑀸𑀲𑀦𑀁 𑀫𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀫𑁂… 𑀫𑀸𑀢𑀸 𑀫𑁂… 𑀧𑀺𑀢𑀸 𑀫𑁂… 𑀪𑀸𑀢𑀸 𑀫𑁂… 𑀪𑀕𑀺𑀦𑀻 𑀫𑁂… 𑀧𑀼𑀢𑁆𑀢𑁄 𑀫𑁂… 𑀥𑀻𑀢𑀸 𑀫𑁂… 𑀫𑀺𑀢𑁆𑀢𑀸 𑀫𑁂… 𑀅𑀫𑀘𑁆𑀘𑀸 𑀫𑁂… 𑀜𑀸𑀢𑀻 𑀫𑁂… ‘‘𑀲𑀸𑀮𑁄𑀳𑀺𑀢𑀸 𑀫𑁂 𑀯𑀺𑀧𑀭𑀺𑀡𑀢𑀸’’𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 ¶ 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀦 𑀲𑁄𑀘𑀢𑀺. 𑀦𑀸𑀚𑁆𑀛𑁂𑀢𑀻𑀢𑀺 𑀦𑀚𑁆𑀛𑁂𑀢𑀺 𑀦 𑀅𑀚𑁆𑀛𑁂𑀢𑀺 𑀦 𑀉𑀧𑀦𑀺𑀚𑁆𑀛𑀸𑀬𑀢𑀺 𑀦 𑀦𑀺𑀚𑁆𑀛𑀸𑀬𑀢𑀺 𑀦 𑀧𑀚𑁆𑀛𑀸𑀬𑀢𑀺. 𑀅𑀣 𑀯𑀸 𑀦 𑀚𑀸𑀬𑀢𑀺 𑀦 𑀚𑀺𑀬𑁆𑀬𑀢𑀺 𑀦 𑀫𑀺𑀬𑁆𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻𑀢𑀺 𑁋 𑀦𑀸𑀚𑁆𑀛𑁂𑀢𑀻𑀢𑀺 𑁋 𑀦 𑀲𑁄 𑀲𑁄𑀘𑀢𑀺 𑀦𑀸𑀚𑁆𑀛𑁂𑀢𑀺.

𑀙𑀺𑀦𑁆𑀦𑀲𑁄𑀢𑁄 𑀅𑀩𑀦𑁆𑀥𑀦𑁄𑀢𑀺. 𑀲𑁄𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀲𑁄𑀢𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀙𑀺𑀦𑁆𑀦𑀲𑁄𑀢𑁄. 𑀅𑀩𑀦𑁆𑀥𑀦𑁄𑀢𑀺 𑀭𑀸𑀕𑀩𑀦𑁆𑀥𑀦𑀁 𑀤𑁄𑀲𑀩𑀦𑁆𑀥𑀦𑀁 𑀫𑁄𑀳𑀩𑀦𑁆𑀥𑀦𑀁 𑀫𑀸𑀦𑀩𑀦𑁆𑀥𑀦𑀁 𑀤𑀺𑀝𑁆𑀞𑀺𑀩𑀦𑁆𑀥𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀤𑀼𑀘𑁆𑀘𑀭𑀺𑀢𑀩𑀦𑁆𑀥𑀦𑀁, 𑀬𑀲𑁆𑀲𑁂𑀢𑁂 𑀩𑀦𑁆𑀥𑀦𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 ¶ 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀩𑀦𑁆𑀥𑀦𑁄𑀢𑀺 𑁋 𑀙𑀺𑀦𑁆𑀦𑀲𑁄𑀢𑁄 𑀅𑀩𑀦𑁆𑀥𑀦𑁄.

‘‘𑀬𑁄𑀥 𑀓𑀸𑀫𑁂 𑀅𑀘𑁆𑀘𑀢𑀭𑀺, 𑀲𑀗𑁆𑀕𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀦 𑀲𑁄 𑀲𑁄𑀘𑀢𑀺 𑀦𑀸𑀚𑁆𑀛𑁂𑀢𑀺, 𑀙𑀺𑀦𑁆𑀦𑀲𑁄𑀢𑁄 𑀅𑀩𑀦𑁆𑀥𑀦𑁄’’𑀢𑀺.

𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑀬𑀁 ¶ ¶ 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀻𑀢𑀺. 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀬𑁂 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀢𑁂 𑀓𑀺𑀮𑁂𑀲𑁂 𑀲𑁄𑀲𑁂𑀳𑀺 𑀯𑀺𑀲𑁄𑀲𑁂𑀳𑀺 𑀲𑀼𑀓𑁆𑀔𑀸𑀧𑁂𑀳𑀺 𑀯𑀺𑀲𑀼𑀓𑁆𑀔𑀸𑀧𑁂𑀳𑀺 𑀅𑀩𑀻𑀚𑀁 𑀓𑀭𑁄𑀳𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺. 𑀏𑀯𑀫𑁆𑀧𑀺 𑀬𑀁 𑀧𑀼𑀩𑁆𑀩𑁂 𑀢𑀁 ¶ 𑀯𑀺𑀲𑁄𑀲𑁂𑀳𑀺. 𑀅𑀣 𑀯𑀸 𑀬𑁂 𑀅𑀢𑀻𑀢𑀸 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀢𑁂 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂 𑀲𑁄𑀲𑁂𑀳𑀺 𑀯𑀺𑀲𑁄𑀲𑁂𑀳𑀺 𑀲𑀼𑀓𑁆𑀔𑀸𑀧𑁂𑀳𑀺 𑀯𑀺𑀲𑀼𑀓𑁆𑀔𑀸𑀧𑁂𑀳𑀺 𑀅𑀩𑀻𑀚𑀁 𑀓𑀭𑁄𑀳𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺. 𑀏𑀯𑀫𑁆𑀧𑀺 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺.

𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀦𑁆𑀢𑀺. 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀁. 𑀅𑀦𑀸𑀕𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀬𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁, 𑀇𑀫𑀸𑀦𑀺 𑀓𑀺𑀜𑁆𑀘𑀦𑀸𑀦𑀺 [𑀇𑀫𑁂 𑀓𑀺𑀜𑁆𑀘𑀦𑀸 (𑀓.) 𑀧𑀲𑁆𑀲 𑀤𑀻. 𑀦𑀺. 𑁩.𑁩𑁦𑁫] 𑀢𑀼𑀬𑁆𑀳𑀁 𑀫𑀸 𑀅𑀳𑀼 𑀫𑀸 𑀅𑀓𑀸𑀲𑀺 𑀫𑀸 𑀚𑀦𑁂𑀲𑀺 𑀫𑀸 𑀲𑀜𑁆𑀚𑀦𑁂𑀲𑀺 𑀫𑀸 𑀦𑀺𑀩𑁆𑀩𑀢𑁆𑀢𑁂𑀲𑀺 𑀫𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁.

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀻𑀢𑀺. 𑀫𑀚𑁆𑀛𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀗𑁆𑀔𑀸𑀭𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀕𑀳𑁂𑀲𑁆𑀲𑀲𑀺 𑀦 𑀉𑀕𑁆𑀕𑀳𑁂𑀲𑁆𑀲𑀲𑀺 𑀦 𑀕𑀡𑁆𑀳𑀺𑀲𑁆𑀲𑀲𑀺 𑀦 𑀧𑀭𑀸𑀫𑀲𑀺𑀲𑁆𑀲𑀲𑀺 𑀦𑀸𑀪𑀺𑀦𑀦𑁆𑀤𑀺𑀲𑁆𑀲𑀲𑀺 𑀦𑀸𑀪𑀺𑀘𑀭𑀺𑀲𑁆𑀲𑀲𑀺 𑀦 𑀅𑀚𑁆𑀛𑁄𑀲𑀺𑀲𑁆𑀲𑀲𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀺𑀲𑁆𑀲𑀲𑀺 𑀯𑀺𑀦𑁄𑀤𑁂𑀲𑁆𑀲𑀲𑀺 𑀩𑁆𑀬𑀦𑁆𑀢𑀺𑀁 𑀓𑀭𑀺𑀲𑁆𑀲𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑁆𑀲𑀲𑀻𑀢𑀺 𑁋 𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺.

𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻𑀢𑀺. 𑀭𑀸𑀕𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀉𑀧𑀲𑀫𑀺𑀢𑀢𑁆𑀢𑀸, 𑀤𑁄𑀲𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀉𑀧𑀲𑀫𑀺𑀢𑀢𑁆𑀢𑀸…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀉𑀧𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 ¶ 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 ¶ 𑀘𑀭𑀺𑀲𑁆𑀲𑀲𑀺 𑀯𑀺𑀳𑀭𑀺𑀲𑁆𑀲𑀲𑀺 𑀇𑀭𑀺𑀬𑀺𑀲𑁆𑀲𑀲𑀺 𑀯𑀢𑁆𑀢𑀺𑀲𑁆𑀲𑀲𑀺 𑀧𑀸𑀮𑀺𑀲𑁆𑀲𑀲𑀺 ¶ 𑀬𑀧𑀺𑀲𑁆𑀲𑀲𑀺 𑀬𑀸𑀧𑀺𑀲𑁆𑀲𑀲𑀻𑀢𑀺 𑁋 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺.

𑀲𑀩𑁆𑀩𑀲𑁄 ¶ 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁;

𑀅𑀲𑀢𑀸 𑀘 𑀦 𑀲𑁄𑀘𑀢𑀺, 𑀲 𑀯𑁂 𑀮𑁄𑀓𑁂 𑀦 𑀚𑀻𑀬𑀢𑀺.

𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀦𑁆𑀢𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀲𑀩𑁆𑀩𑀲𑁄𑀢𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸, 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀫𑀫𑀸𑀬𑀺𑀢𑀦𑁆𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀦𑁆𑀢𑀺 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀫𑀫𑀢𑁆𑀢𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁.

𑀅𑀲𑀢𑀸 𑀘 𑀦 𑀲𑁄𑀘𑀢𑀻𑀢𑀺. 𑀯𑀺𑀧𑀭𑀺𑀡𑀢𑀁 𑀯𑀸 𑀯𑀢𑁆𑀣𑀼𑀁 𑀦 𑀲𑁄𑀘𑀢𑀺, 𑀯𑀺𑀧𑀭𑀺𑀡𑀢𑀲𑁆𑀫𑀺𑀁 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑁄𑀘𑀢𑀺. ‘‘𑀘𑀓𑁆𑀔𑀼 𑀫𑁂 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀦 𑀲𑁄𑀘𑀢𑀺, 𑀲𑁄𑀢𑀁 𑀫𑁂… 𑀖𑀸𑀦𑀁 𑀫𑁂… 𑀚𑀺𑀯𑁆𑀳𑀸 𑀫𑁂… 𑀓𑀸𑀬𑁄 𑀫𑁂… 𑀭𑀽𑀧𑀸 𑀫𑁂… 𑀲𑀤𑁆𑀤𑀸 ¶ 𑀫𑁂… 𑀕𑀦𑁆𑀥𑀸 𑀫𑁂… 𑀭𑀲𑀸 𑀫𑁂… 𑀨𑁄𑀝𑁆𑀞𑀩𑁆𑀩𑀸 𑀫𑁂… 𑀓𑀼𑀮𑀁 𑀫𑁂… 𑀕𑀡𑁄 𑀫𑁂… 𑀆𑀯𑀸𑀲𑁄 𑀫𑁂… 𑀮𑀸𑀪𑁄 𑀫𑁂…𑀧𑁂… ‘‘𑀲𑀸𑀮𑁄𑀳𑀺𑀢𑀸 𑀫𑁂 𑀯𑀺𑀧𑀭𑀺𑀡𑀢𑀸’’𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀅𑀲𑀢𑀸 𑀘 𑀦 𑀲𑁄𑀘𑀢𑀺.

𑀅𑀣 𑀯𑀸 𑀅𑀲𑀢𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀅𑀲𑀢𑀸 𑀘 𑀦 𑀲𑁄𑀘𑀢𑀺. 𑀅𑀣 𑀯𑀸 𑀘𑀓𑁆𑀔𑀼𑀭𑁄𑀕𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄…𑀧𑁂… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄𑀘𑀢𑀺 𑀦 ¶ 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀅𑀲𑀢𑀸 𑀘 𑀦 𑀲𑁄𑀘𑀢𑀺. 𑀅𑀣 𑀯𑀸 𑀅𑀲𑀦𑁆𑀢𑁂 𑀅𑀲𑀁𑀯𑀺𑀚𑁆𑀚𑀫𑀸𑀦𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 ‘‘𑀅𑀳𑀼 𑀯𑀢 𑀫𑁂, 𑀢𑀁 𑀯𑀢 𑀫𑁂 𑀦𑀢𑁆𑀣𑀺 ¶ , 𑀲𑀺𑀬𑀸 𑀯𑀢 𑀫𑁂, 𑀢𑀁 𑀯𑀢𑀸𑀳𑀁 𑀦 𑀮𑀪𑀸𑀫𑀻’’𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀅𑀲𑀢𑀸 𑀘 𑀦 𑀲𑁄𑀘𑀢𑀺.

𑀲 𑀯𑁂 𑀮𑁄𑀓𑁂 𑀦 𑀚𑀻𑀬𑀢𑀻𑀢𑀺. 𑀬𑀲𑁆𑀲 ‘‘𑀫𑀬𑁆𑀳𑀁 𑀯𑀸 𑀇𑀤𑀁 𑀧𑀭𑁂𑀲𑀁 𑀯𑀸 𑀇𑀤’’𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 ¶ 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀅𑀢𑁆𑀣𑀺, 𑀢𑀲𑁆𑀲 𑀚𑀸𑀦𑀺 𑀅𑀢𑁆𑀣𑀺.

‘‘𑀚𑀻𑀦𑁄 [𑀚𑀺𑀡𑁆𑀡𑁂 (𑀲𑀻.), 𑀚𑀺𑀦𑁆𑀦𑁄 (𑀲𑁆𑀬𑀸.)] 𑀭𑀣𑀲𑁆𑀲𑀁 [𑀭𑀣𑀲𑁆𑀲𑁂 (𑀲𑀻.) 𑀧𑀜𑁆𑀘𑀓𑀦𑀺𑀧𑀸𑀢𑁂 (𑀆𑀤𑀺𑀫𑁆𑀳𑀺) 𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀫𑀡𑀺𑀓𑀼𑀡𑁆𑀟𑀮𑁂 𑀘, 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘 𑀢𑀣𑁂𑀯 𑀚𑀻𑀦𑁄;

𑀲𑀩𑁆𑀩𑁂𑀲𑀼 ¶ 𑀪𑁄𑀕𑁂𑀲𑀼 𑀅𑀲𑁂𑀯𑀺𑀢𑁂𑀲𑀼, 𑀓𑀲𑁆𑀫𑀸 𑀦 𑀲𑀦𑁆𑀢𑀧𑁆𑀧𑀲𑀺 𑀲𑁄𑀓𑀓𑀸𑀮𑁂.

‘‘𑀧𑀼𑀩𑁆𑀩𑁂𑀯 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄 𑀥𑀦𑁂 𑀧𑀼𑀩𑁆𑀩𑀢𑀭𑀁 𑀚𑀳𑀸𑀲𑀺;

𑀅𑀲𑀲𑁆𑀲𑀢𑀸 [𑀅𑀲𑀲𑁆𑀲𑀓𑀸 (𑀲𑀻.), 𑀅𑀲𑁆𑀲𑀓𑀸 (𑀲𑁆𑀬𑀸.)] 𑀪𑀸𑀯𑀺𑀦𑁄 𑀓𑀸𑀫𑀓𑀸𑀫𑀻, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

‘‘𑀉𑀤𑁂𑀢𑀺 𑀆𑀧𑀽𑀭𑀢𑀺 𑀯𑁂𑀢𑀺 𑀘𑀦𑁆𑀤𑁄, 𑀅𑀦𑁆𑀥𑀁 𑀢𑀧𑁂𑀢𑁆𑀯𑀸𑀦 [𑀅𑀢𑁆𑀣𑀁 𑀕𑀫𑀺𑀢𑁆𑀯𑀸𑀦 (𑀩𑀳𑀽𑀲𑀼)] 𑀧𑀮𑁂𑀢𑀺 𑀲𑀽𑀭𑀺𑀬𑁄;

𑀯𑀺𑀤𑀺𑀢𑀸 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂’’𑀢𑀺.

𑀬𑀲𑁆𑀲 ‘‘𑀫𑀬𑁆𑀳𑀁 𑀯𑀸 𑀇𑀤𑀁 𑀧𑀭𑁂𑀲𑀁 𑀯𑀸 𑀇𑀤’’𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀲 𑀚𑀸𑀦𑀺 𑀦𑀢𑁆𑀣𑀺. 𑀪𑀸𑀲𑀺𑀢𑀫𑁆𑀧𑀺 𑀳𑁂𑀢𑀁 𑁋 ‘‘‘𑀦𑀦𑁆𑀤𑀲𑀺, 𑀲𑀫𑀡𑀸’𑀢𑀺. ‘𑀓𑀺𑀁 𑀮𑀤𑁆𑀥𑀸, 𑀆𑀯𑀼𑀲𑁄’𑀢𑀺? ‘𑀢𑁂𑀦 𑀳𑀺, 𑀲𑀫𑀡, 𑀲𑁄𑀘𑀲𑀻’𑀢𑀺. ‘𑀓𑀺𑀁 𑀚𑀻𑀬𑀺𑀢𑁆𑀣, 𑀆𑀯𑀼𑀲𑁄’𑀢𑀺? ‘𑀢𑁂𑀦 𑀳𑀺, 𑀲𑀫𑀡, 𑀦𑁂𑀯 𑀦𑀦𑁆𑀤𑀲𑀺 𑀦 𑀲𑁄𑀘𑀲𑀻’𑀢𑀺. ‘𑀏𑀯𑀫𑀸𑀯𑀼𑀲𑁄’’’𑀢𑀺.

‘‘𑀘𑀺𑀭𑀲𑁆𑀲𑀁 ¶ ¶ 𑀯𑀢 𑀧𑀲𑁆𑀲𑀸𑀫, 𑀩𑁆𑀭𑀸𑀳𑁆𑀫𑀡𑀁 𑀧𑀭𑀺𑀦𑀺𑀩𑁆𑀩𑀼𑀢𑀁;

𑀅𑀦𑀦𑁆𑀤𑀺𑀁 𑀅𑀦𑀻𑀖𑀁 𑀪𑀺𑀓𑁆𑀔𑀼𑀁, 𑀢𑀺𑀡𑁆𑀡𑀁 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀲 𑀯𑁂 𑀮𑁄𑀓𑁂 𑀦 𑀚𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑀲𑁄 ¶ 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁;

𑀅𑀲𑀢𑀸 𑀘 𑀦 𑀲𑁄𑀘𑀢𑀺, 𑀲 𑀯𑁂 𑀮𑁄𑀓𑁂 𑀦 𑀚𑀻𑀬𑀢𑀻’’𑀢𑀺.

𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁;

𑀫𑀫𑀢𑁆𑀢𑀁 𑀲𑁄 𑀅𑀲𑀁𑀯𑀺𑀦𑁆𑀤𑀁, 𑀦𑀢𑁆𑀣𑀺 𑀫𑁂𑀢𑀺 𑀦 𑀲𑁄𑀘𑀢𑀺.

𑀬𑀲𑁆𑀲 ¶ 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀦𑁆𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀬𑀲𑁆𑀲 ‘‘𑀫𑀬𑁆𑀳𑀁 𑀯𑀸 𑀇𑀤𑀁 𑀧𑀭𑁂𑀲𑀁 𑀯𑀸 𑀇𑀤’’𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺. 𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑁄 𑀢𑀼𑀫𑁆𑀳𑀸𑀓𑀁, 𑀦𑀧𑀺 𑀅𑀜𑁆𑀜𑁂𑀲𑀁. 𑀧𑀼𑀭𑀸𑀡𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀁 𑀯𑁂𑀤𑀦𑀻𑀬𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁𑀬𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑀺 𑁋 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺, 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺. 𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁.

𑀯𑀼𑀢𑁆𑀢𑀫𑁆𑀧𑀺 ¶ 𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀼𑀜𑁆𑀜𑀢𑁄 ¶ 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘 [𑀉𑀳𑀘𑁆𑀘 (𑀓.) 𑀲𑀼. 𑀦𑀺. 𑁧𑁧𑁨𑁫], 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺.

𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁.

𑀯𑀼𑀢𑁆𑀢𑀫𑁆𑀧𑀺 ¶ 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀬𑀁 𑀇𑀫𑀲𑁆𑀫𑀺𑀁 𑀚𑁂𑀢𑀯𑀦𑁂 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁, 𑀢𑀁 𑀚𑀦𑁄 𑀳𑀭𑁂𑀬𑁆𑀬 𑀯𑀸 𑀟𑀳𑁂𑀬𑁆𑀬 [𑀤𑀳𑁂𑀬𑁆𑀬 (𑀲𑀻. 𑀓.) 𑀲𑀁. 𑀦𑀺. 𑁩.𑁩𑁩] 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬, 𑀅𑀧𑀺 𑀦𑀼 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀫𑁆𑀳𑁂 𑀚𑀦𑁄 𑀳𑀭𑀢𑀺 𑀯𑀸 𑀟𑀳𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀢𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀦 𑀳𑀺 𑀦𑁄 𑀏𑀢𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 ¶ 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 ¶ 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁. 𑀪𑀸𑀲𑀺𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀲𑀼𑀤𑁆𑀥𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀁, 𑀲𑀼𑀤𑁆𑀥𑀲𑀗𑁆𑀔𑀸𑀭𑀲𑀦𑁆𑀢𑀢𑀺𑀁;

𑀧𑀲𑁆𑀲𑀦𑁆𑀢𑀲𑁆𑀲 𑀬𑀣𑀸𑀪𑀽𑀢𑀁, 𑀦 𑀪𑀬𑀁 𑀳𑁄𑀢𑀺 𑀕𑀸𑀫𑀡𑀺.

‘‘𑀢𑀺𑀡𑀓𑀝𑁆𑀞𑀲𑀫𑀁 𑀮𑁄𑀓𑀁, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀦𑀸𑀜𑁆𑀜𑀁 𑀧𑀢𑁆𑀣𑀬𑀢𑁂 𑀓𑀺𑀜𑁆𑀘𑀺, 𑀅𑀜𑁆𑀜𑀢𑁆𑀭 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑀸’’𑀢𑀺 [𑀧𑀝𑀺𑀲𑀦𑁆𑀥𑀺𑀬𑀸𑀢𑀺 (𑀲𑀻.)].

𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁. 𑀯𑀚𑀺𑀭𑀸 ¶ 𑀪𑀺𑀓𑁆𑀔𑀼𑀦𑀻 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀁 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀺.

‘‘𑀬𑀣𑀸 𑀳𑀺 [𑀬𑀣𑀸𑀧𑀺 (𑀩𑀳𑀽𑀲𑀼) 𑀲𑀁. 𑀦𑀺. 𑁧.𑁧𑁭𑁧] 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺 (𑀲𑁆𑀬𑀸.)].

‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀏𑀯𑀫𑁆𑀧𑀺 ¶ 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁. 𑀯𑀼𑀢𑁆𑀢𑀁𑀜𑁆𑀳𑁂𑀢𑀁 𑀪𑀕𑀯𑀢𑀸

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺. 𑀢𑀲𑁆𑀲 𑀭𑀽𑀧𑀁 𑀲𑀫𑀦𑁆𑀦𑁂𑀲𑀢𑁄 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀦𑁂𑀲𑀢𑁄 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺 ¶ , 𑀬𑀫𑁆𑀧𑀺𑀲𑁆𑀲 𑀢𑀁 𑀳𑁄𑀢𑀺 ‘𑀅𑀳’𑀦𑁆𑀢𑀺 𑀯𑀸 ‘𑀫𑀫’𑀦𑁆𑀢𑀺 𑀯𑀸, ‘𑀅𑀲𑁆𑀫𑀻’𑀢𑀺 ¶ 𑀯𑀸, 𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻’’𑀢𑀺. 𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁.

𑀆𑀬𑀲𑁆𑀫𑀸, 𑀆𑀦𑀦𑁆𑀤𑁄, 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀼𑀜𑁆𑀜𑁄 𑀮𑁄𑀓𑁄, 𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀬𑀲𑁆𑀫𑀸 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸? 𑀘𑀓𑁆𑀔𑀼 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀭𑀽𑀧𑀸 𑀲𑀼𑀜𑁆𑀜𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄, 𑀬𑀤𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀲𑀼𑀜𑁆𑀜𑀁… 𑀲𑁄𑀢𑀁 𑀲𑀼𑀜𑁆𑀜𑀁… 𑀲𑀤𑁆𑀤𑀸 𑀲𑀼𑀜𑁆𑀜𑀸… 𑀖𑀸𑀦𑀁 𑀲𑀼𑀜𑁆𑀜𑀁… 𑀕𑀦𑁆𑀥𑀸 𑀲𑀼𑀜𑁆𑀜𑀸… 𑀚𑀺𑀯𑁆𑀳𑀸 𑀲𑀼𑀜𑁆𑀜𑀸… 𑀭𑀲𑀸 𑀲𑀼𑀜𑁆𑀜𑀸… 𑀓𑀸𑀬𑁄 𑀲𑀼𑀜𑁆𑀜𑁄… 𑀨𑁄𑀝𑁆𑀞𑀩𑁆𑀩𑀸 𑀲𑀼𑀜𑁆𑀜𑀸… 𑀫𑀦𑁄 𑀲𑀼𑀜𑁆𑀜𑁄… 𑀥𑀫𑁆𑀫𑀸 𑀲𑀼𑀜𑁆𑀜𑀸… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄, 𑀬𑀤𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 ¶ 𑀯𑀸 𑀢𑀫𑁆𑀧𑀺 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀬𑀲𑁆𑀫𑀸 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀏𑀯𑀫𑁆𑀧𑀺 𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁.

𑀫𑀫𑀢𑁆𑀢𑀁 𑀲𑁄 𑀅𑀲𑀁𑀯𑀺𑀦𑁆𑀤𑀦𑁆𑀢𑀺. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 ¶ 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀢𑀡𑁆𑀳𑀸𑀫𑀫𑀢𑁆𑀢𑀁 𑀧𑀳𑀸𑀬 𑀤𑀺𑀝𑁆𑀞𑀺𑀫𑀫𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫𑀢𑁆𑀢𑀁 𑀅𑀯𑀺𑀦𑁆𑀤𑀦𑁆𑀢𑁄 𑀅𑀲𑀁𑀯𑀺𑀦𑁆𑀤𑀦𑁆𑀢𑁄 𑀅𑀦𑀥𑀺𑀕𑀘𑁆𑀙𑀦𑁆𑀢𑁄 𑀅𑀧𑁆𑀧𑀝𑀺𑀮𑀪𑀦𑁆𑀢𑁄𑀢𑀺 𑁋 𑀫𑀫𑀢𑁆𑀢𑀁 𑀲𑁄 𑀅𑀲𑀁𑀯𑀺𑀦𑁆𑀤𑀁.

𑀦𑀢𑁆𑀣𑀺 𑀫𑁂𑀢𑀺 𑀦 𑀲𑁄𑀘𑀢𑀻𑀢𑀺. 𑀯𑀺𑀧𑀭𑀺𑀡𑀢𑀁 𑀯𑀸 𑀯𑀢𑁆𑀣𑀼𑀁 𑀦 𑀲𑁄𑀘𑀢𑀺, 𑀯𑀺𑀧𑀭𑀺𑀡𑀢𑀲𑁆𑀫𑀺𑀁 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀦 𑀲𑁄𑀘𑀢𑀺. ‘‘𑀘𑀓𑁆𑀔𑀼 𑀫𑁂 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀦 𑀲𑁄𑀘𑀢𑀺, ‘‘𑀲𑁄𑀢𑀁 𑀫𑁂…𑀧𑁂… 𑀲𑀸𑀮𑁄𑀳𑀺𑀢𑀸 𑀫𑁂 𑀯𑀺𑀧𑀭𑀺𑀡𑀢𑀸’’𑀢𑀺 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀦𑀢𑁆𑀣𑀺 𑀫𑁂𑀢𑀺 𑀦 𑀲𑁄𑀘𑀢𑀺.

‘‘𑀬𑀲𑁆𑀲 ¶ 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁;

𑀫𑀫𑀢𑁆𑀢𑀁 𑀲𑁄 𑀅𑀲𑀁𑀯𑀺𑀦𑁆𑀤𑀁, 𑀦𑀢𑁆𑀣𑀺 𑀫𑁂𑀢𑀺 𑀦 𑀲𑁄𑀘𑀢𑀻’’𑀢𑀺.

𑀅𑀦𑀺𑀝𑁆𑀞𑀼𑀭𑀻 ¶ 𑀅𑀦𑀦𑀼𑀕𑀺𑀤𑁆𑀥𑁄, 𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄;

𑀢𑀫𑀸𑀦𑀺𑀲𑀁𑀲𑀁 𑀧𑀩𑁆𑀭𑀽𑀫𑀺, 𑀧𑀼𑀘𑁆𑀙𑀺𑀢𑁄 𑀅𑀯𑀺𑀓𑀫𑁆𑀧𑀺𑀦𑀁.

𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄 𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄𑀢𑀺. 𑀓𑀢𑀫𑀁 𑀦𑀺𑀝𑁆𑀞𑀼𑀭𑀺𑀬𑀁? 𑀇𑀥𑁂𑀓𑀘𑁆𑀘𑁄 𑀦𑀺𑀝𑁆𑀞𑀼𑀭𑀺𑀬𑁄 𑀳𑁄𑀢𑀺, 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀇𑀲𑁆𑀲𑀢𑀺 𑀉𑀲𑀽𑀬𑀢𑀺 [𑀉𑀲𑁆𑀲𑀼𑀬𑁆𑀬𑀢𑀺 (𑀲𑁆𑀬𑀸.), 𑀉𑀲𑁆𑀲𑀽𑀬𑀢𑀺 (𑀓.)] 𑀇𑀲𑁆𑀲𑀁 𑀩𑀦𑁆𑀥𑀢𑀺. 𑀬𑀁 𑀏𑀯𑀭𑀽𑀧𑀁 𑀦𑀺𑀝𑁆𑀞𑀼𑀭𑀺𑀬𑀁 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀁 𑀇𑀲𑁆𑀲𑀸 𑀇𑀲𑁆𑀲𑀸𑀬𑀦𑀸 𑀇𑀲𑁆𑀲𑀸𑀬𑀺𑀢𑀢𑁆𑀢𑀁 𑀉𑀲𑀽𑀬𑀸 𑀉𑀲𑀽𑀬𑀦𑀸 𑀉𑀲𑀽𑀬𑀺𑀢𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀺𑀝𑁆𑀞𑀼𑀭𑀺𑀬𑀁. 𑀬𑀲𑁆𑀲𑁂𑀢𑀁 𑀦𑀺𑀝𑁆𑀞𑀼𑀭𑀺𑀬𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀺𑀝𑁆𑀞𑀼𑀭𑀻𑀢𑀺. 𑀅𑀦𑀦𑀼𑀕𑀺𑀤𑁆𑀥𑁄𑀢𑀺. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑁄 ¶ 𑀕𑁂𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄…𑀧𑁂… ¶ 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀦𑀼𑀕𑀺𑀤𑁆𑀥𑁄. 𑀲𑁄 𑀭𑀽𑀧𑁂 𑀅𑀕𑀺𑀤𑁆𑀥𑁄 𑀲𑀤𑁆𑀤𑁂…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀕𑀺𑀤𑁆𑀥𑁄 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀦𑁆𑀦𑁄, 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄 𑀯𑀦𑁆𑀢𑀕𑁂𑀥𑁄 𑀫𑀼𑀢𑁆𑀢𑀕𑁂𑀥𑁄 𑀧𑀳𑀻𑀦𑀕𑁂𑀥𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄, 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄, 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄.

𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄𑀢𑀺. 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀏𑀚𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄. 𑀲𑁄 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀅𑀦𑁂𑀚𑁄. 𑀲𑀩𑁆𑀩𑀥𑀻 𑀲𑀫𑁄𑀢𑀺 𑀲𑀩𑁆𑀩𑀁 𑀯𑀼𑀘𑁆𑀘𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀘𑀓𑁆𑀔𑀼 𑀘𑁂𑀯 𑀭𑀽𑀧𑀸 𑀘…𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘. 𑀬𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀩𑁆𑀩𑀥𑀺 𑀲𑀫𑁄. 𑀲𑁄 𑀲𑀩𑁆𑀩𑀢𑁆𑀣 𑀢𑀸𑀤𑀺 𑀲𑀩𑁆𑀩𑀢𑁆𑀣 𑀫𑀚𑁆𑀛𑀢𑁆𑀢𑁄 𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀓𑁄𑀢𑀺 𑁋 𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄.

𑀢𑀫𑀸𑀦𑀺𑀲𑀁𑀲𑀁 ¶ ¶ 𑀧𑀩𑁆𑀭𑀽𑀫𑀺, 𑀧𑀼𑀘𑁆𑀙𑀺𑀢𑁄 𑀅𑀯𑀺𑀓𑀫𑁆𑀧𑀺𑀦𑀦𑁆𑀢𑀺. 𑀅𑀯𑀺𑀓𑀫𑁆𑀧𑀺𑀦𑀁 𑀧𑀼𑀕𑁆𑀕𑀮𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑁂 𑀧𑀩𑁆𑀭𑀽𑀫𑀺. 𑀬𑁄 𑀲𑁄 𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄 𑀅𑀦𑁂𑀚𑁄 𑀲𑀩𑁆𑀩𑀥𑀺 𑀲𑀫𑁄𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺…𑀧𑁂… 𑀧𑀓𑀸𑀲𑁂𑀫𑀻𑀢𑀺 𑁋 𑀢𑀫𑀸𑀦𑀺𑀲𑀁𑀲𑀁 𑀧𑀩𑁆𑀭𑀽𑀫𑀺 𑀧𑀼𑀘𑁆𑀙𑀺𑀢𑁄 𑀅𑀯𑀺𑀓𑀫𑁆𑀧𑀺𑀦𑀁.

‘‘𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄, 𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄;

𑀢𑀫𑀸𑀦𑀺𑀲𑀁𑀲𑀁 𑀧𑀩𑁆𑀭𑀽𑀫𑀺, 𑀧𑀼𑀘𑁆𑀙𑀺𑀢𑁄 𑀅𑀯𑀺𑀓𑀫𑁆𑀧𑀺𑀦’’𑀦𑁆𑀢𑀺.

𑀅𑀦𑁂𑀚𑀲𑁆𑀲 ¶ 𑀯𑀺𑀚𑀸𑀦𑀢𑁄, 𑀦𑀢𑁆𑀣𑀺 𑀓𑀸𑀘𑀺 𑀦𑀺𑀲𑀗𑁆𑀔𑀢𑀺 [𑀦𑀺𑀲𑀗𑁆𑀔𑀺𑀢𑀺 (𑀩𑀳𑀽𑀲𑀼)] ;

𑀯𑀺𑀭𑀢𑁄 𑀲𑁄 𑀯𑀺𑀬𑀸𑀭𑀩𑁆𑀪𑀸, [𑀯𑀺𑀬𑀸𑀭𑀫𑁆𑀪𑀸 (𑀩𑀳𑀽𑀲𑀼)] 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀥𑀺.

𑀅𑀦𑁂𑀚𑀲𑁆𑀲 𑀯𑀺𑀚𑀸𑀦𑀢𑁄𑀢𑀺. 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀏𑀚𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄. 𑀲𑁄 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑁋 𑀅𑀦𑁂𑀚𑀲𑁆𑀲. 𑀯𑀺𑀚𑀸𑀦𑀢𑁄𑀢𑀺 𑀚𑀸𑀦𑀢𑁄 𑀆𑀚𑀸𑀦𑀢𑁄 𑀯𑀺𑀚𑀸𑀦𑀢𑁄 𑀧𑀝𑀺𑀯𑀺𑀚𑀸𑀦𑀢𑁄 𑀧𑀝𑀺𑀯𑀺𑀚𑁆𑀛𑀢𑁄. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀚𑀸𑀦𑀢𑁄 𑀆𑀚𑀸𑀦𑀢𑁄 𑀯𑀺𑀚𑀸𑀦𑀢𑁄 𑀧𑀝𑀺𑀯𑀺𑀚𑀸𑀦𑀢𑁄 𑀧𑀝𑀺𑀯𑀺𑀚𑁆𑀛𑀢𑁄, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 ¶ 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀚𑀸𑀦𑀢𑁄 𑀆𑀚𑀸𑀦𑀢𑁄 𑀯𑀺𑀚𑀸𑀦𑀢𑁄 𑀧𑀝𑀺𑀯𑀺𑀚𑀸𑀦𑀢𑁄 𑀧𑀝𑀺𑀯𑀺𑀚𑁆𑀛𑀢𑁄𑀢𑀺 𑁋 𑀅𑀦𑁂𑀚𑀲𑁆𑀲 𑀯𑀺𑀚𑀸𑀦𑀢𑁄.

𑀦𑀢𑁆𑀣𑀺 𑀓𑀸𑀘𑀺 𑀦𑀺𑀲𑀗𑁆𑀔𑀢𑀻𑀢𑀺. 𑀦𑀺𑀲𑀗𑁆𑀔𑀢𑀺𑀬𑁄𑀯𑀼𑀘𑁆𑀘𑀦𑁆𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀏𑀢𑁆𑀢𑀸𑀯𑀢𑀸 𑀦𑀺𑀲𑀗𑁆𑀔𑀢𑀺𑀬𑁄 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀦𑀢𑁆𑀣𑀺 𑀓𑀸𑀘𑀺 𑀦𑀺𑀲𑀗𑁆𑀔𑀢𑀺.

𑀯𑀺𑀭𑀢𑁄 𑀲𑁄 𑀯𑀺𑀬𑀸𑀭𑀩𑁆𑀪𑀸𑀢𑀺. 𑀯𑀺𑀬𑀸𑀭𑀩𑁆𑀪𑁄 𑀯𑀼𑀘𑁆𑀘𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 ¶ 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 ¶ 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀏𑀢𑁆𑀢𑀸𑀯𑀢𑀸 𑀆𑀭𑀩𑁆𑀪𑀸 𑀯𑀺𑀬𑀸𑀭𑀩𑁆𑀪𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀺𑀭𑀢𑁄 𑀲𑁄 𑀯𑀺𑀬𑀸𑀭𑀩𑁆𑀪𑀸.

𑀔𑁂𑀫𑀁 ¶ 𑀧𑀲𑁆𑀲𑀢𑀺 𑀲𑀩𑁆𑀩𑀥𑀻𑀢𑀺. 𑀪𑀬𑀓𑀭𑁄 𑀭𑀸𑀕𑁄 𑀪𑀬𑀓𑀭𑁄 𑀤𑁄𑀲𑁄 𑀪𑀬𑀓𑀭𑁄 𑀫𑁄𑀳𑁄…𑀧𑁂… 𑀪𑀬𑀓𑀭𑀸 𑀓𑀺𑀮𑁂𑀲𑀸. 𑀪𑀬𑀓𑀭𑀲𑁆𑀲 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸…𑀧𑁂… 𑀪𑀬𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀢𑁆𑀣 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀢𑁆𑀣 𑀅𑀪𑀬𑀁 𑀧𑀲𑁆𑀲𑀢𑀺 𑀲𑀩𑁆𑀩𑀢𑁆𑀣 𑀅𑀦𑀻𑀢𑀺𑀓𑀁 𑀧𑀲𑁆𑀲𑀢𑀺 𑀲𑀩𑁆𑀩𑀢𑁆𑀣 ¶ 𑀅𑀦𑀼𑀧𑀤𑁆𑀤𑀯𑀁 𑀧𑀲𑁆𑀲𑀢𑀺 𑀲𑀩𑁆𑀩𑀢𑁆𑀣 𑀅𑀦𑀼𑀧𑀲𑀕𑁆𑀕𑀁 𑀧𑀲𑁆𑀲𑀢𑀺 𑀲𑀩𑁆𑀩𑀢𑁆𑀣 𑀅𑀦𑀼𑀧𑀲𑀝𑁆𑀞𑀢𑁆𑀢𑀁 [𑀧𑀲𑁆𑀲𑀤𑁆𑀥𑀁 (𑀲𑁆𑀬𑀸.)] 𑀧𑀲𑁆𑀲𑀢𑀻𑀢𑀺 𑁋 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀥𑀺.

‘‘𑀅𑀦𑁂𑀚𑀲𑁆𑀲 𑀯𑀺𑀚𑀸𑀦𑀢𑁄, 𑀦𑀢𑁆𑀣𑀺 𑀓𑀸𑀘𑀺 𑀦𑀺𑀲𑀗𑁆𑀔𑀢𑀺;

𑀯𑀺𑀭𑀢𑁄 𑀲𑁄 𑀯𑀺𑀬𑀸𑀭𑀩𑁆𑀪𑀸, 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀥𑀻’’𑀢𑀺.

𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺;

𑀲𑀦𑁆𑀢𑁄 𑀲𑁄 𑀯𑀻𑀢𑀫𑀘𑁆𑀙𑀭𑁄, [𑀯𑀻𑀢𑀫𑀘𑁆𑀙𑁂𑀭𑁄 (𑀲𑀻.)] 𑀦𑀸𑀤𑁂𑀢𑀺 𑀦 𑀦𑀺𑀭𑀲𑁆𑀲𑀢𑀺. [𑀇𑀢𑀺 𑀪𑀕𑀯𑀸]

𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀻𑀢𑀺. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀯𑀸 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀯𑀸 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀯𑀸 𑀦 𑀯𑀤𑀢𑀺 𑀦 𑀓𑀣𑁂𑀢𑀺 𑀦 𑀪𑀡𑀢𑀺 𑀦 𑀤𑀻𑀧𑀬𑀢𑀺 𑀦 𑀯𑁄𑀳𑀭𑀢𑀻𑀢𑀺 𑁋 𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺.

𑀲𑀦𑁆𑀢𑁄 𑀲𑁄 𑀯𑀻𑀢𑀫𑀘𑁆𑀙𑀭𑁄𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲…𑀧𑁂… 𑀫𑁄𑀳𑀲𑁆𑀲… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 ¶ 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑁋 𑀲𑀦𑁆𑀢𑁄. 𑀲𑁄 𑀯𑀻𑀢𑀫𑀘𑁆𑀙𑀭𑁄𑀢𑀺. 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀁…𑀧𑁂… 𑀕𑀸𑀳𑁄 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀬𑀲𑁆𑀲𑁂𑀢𑀁 𑀫𑀘𑁆𑀙𑀭𑀺𑀬𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁, 𑀲𑁄 𑀯𑀼𑀘𑁆𑀘𑀢𑀺 𑀯𑀻𑀢𑀫𑀘𑁆𑀙𑀭𑁄 𑀯𑀺𑀕𑀢𑀫𑀘𑁆𑀙𑀭𑁄 𑀘𑀢𑁆𑀢𑀫𑀘𑁆𑀙𑀭𑁄 𑀯𑀦𑁆𑀢𑀫𑀘𑁆𑀙𑀭𑁄 𑀫𑀼𑀢𑁆𑀢𑀫𑀘𑁆𑀙𑀭𑁄 𑀧𑀳𑀻𑀦𑀫𑀘𑁆𑀙𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀫𑀘𑁆𑀙𑀭𑁄𑀢𑀺 𑁋 𑀲𑀦𑁆𑀢𑁄 𑀲𑁄 𑀯𑀻𑀢𑀫𑀘𑁆𑀙𑀭𑁄.

𑀦𑀸𑀤𑁂𑀢𑀺 ¶ ¶ 𑀦 𑀦𑀺𑀭𑀲𑁆𑀲𑀢𑀺, 𑀇𑀢𑀺 𑀪𑀕𑀯𑀸𑀢𑀺. 𑀦𑀸𑀤𑁂𑀢𑀻𑀢𑀺 𑀭𑀽𑀧𑀁 𑀦𑀸𑀤𑀺𑀬𑀢𑀺 𑀦 𑀉𑀧𑀸𑀤𑀺𑀬𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀦𑀸𑀤𑀺𑀬𑀢𑀺 𑀦 𑀉𑀧𑀸𑀤𑀺𑀬𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺 𑀦𑀸𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀦𑀸𑀤𑁂𑀢𑀺. 𑀦 𑀦𑀺𑀭𑀲𑁆𑀲𑀢𑀻𑀢𑀺 𑀭𑀽𑀧𑀁 𑀦 𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁 ¶ … 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀦 𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺.

‘‘𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺;

𑀲𑀦𑁆𑀢𑁄 𑀲𑁄 𑀯𑀻𑀢𑀫𑀘𑁆𑀙𑀭𑁄, 𑀦𑀸𑀤𑁂𑀢𑀺 𑀦 𑀦𑀺𑀭𑀲𑁆𑀲𑀢𑀺’’. [𑀇𑀢𑀺 𑀪𑀕𑀯𑀸]

𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀧𑀦𑁆𑀦𑀭𑀲𑀫𑁄.

𑁧𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 ¶ 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑀦 ¶ ¶ 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄]

𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸, 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.

𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂𑀢𑀺. 𑀇𑀢𑁄 𑀧𑀼𑀩𑁆𑀩𑁂 𑀫𑁂 𑀫𑀬𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄 𑀲𑁄 𑀪𑀕𑀯𑀸 𑀇𑀫𑀺𑀦𑀸 𑀘𑀓𑁆𑀔𑀼𑀦𑀸 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦. 𑀬𑀤𑀸 𑀪𑀕𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁𑀯𑀼𑀢𑁆𑀣𑁄 [𑀯𑀲𑁆𑀲𑀁𑀯𑀼𑀝𑁆𑀞𑁄 (𑀲𑁆𑀬𑀸.)] 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀫𑀚𑁆𑀛𑁂 𑀫𑀡𑀺𑀫𑀬𑁂𑀦 𑀲𑁄𑀧𑀸𑀡𑁂𑀦 𑀲𑀗𑁆𑀓𑀲𑁆𑀲𑀦𑀕𑀭𑀁 𑀑𑀢𑀺𑀡𑁆𑀡𑁄 𑀇𑀫𑀁 𑀤𑀲𑁆𑀲𑀦𑀁 𑀧𑀼𑀩𑁆𑀩𑁂 𑀦 𑀤𑀺𑀝𑁆𑀞𑁄𑀢𑀺 𑁋 𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂.

𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 ¶ 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄.

𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀻𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀉𑀤𑀸𑀢𑀺 𑀧𑀤𑀲𑀦𑁆𑀥𑀺 ¶ 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀉𑀤𑀸𑀢𑀺. 𑀓𑀲𑁆𑀲𑀘𑀻𑀢𑀺 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸𑀢𑀺 𑁋 𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀺.

𑀏𑀯𑀁 ¶ 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸𑀢𑀺. 𑀏𑀯𑀁 𑀯𑀕𑁆𑀕𑀼𑀯𑀤𑁄 𑀫𑀥𑀼𑀭𑀯𑀤𑁄 𑀧𑁂𑀫𑀦𑀻𑀬𑀯𑀤𑁄 𑀳𑀤𑀬𑀗𑁆𑀕𑀫𑀯𑀤𑁄 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀖𑁄𑀲𑁄 [𑀓𑀭𑀯𑀺𑀓𑀭𑀼𑀤𑀫𑀜𑁆𑀚𑀼𑀲𑁆𑀲𑀭𑁄 (𑀲𑁆𑀬𑀸.)]. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀫𑀼𑀔𑀢𑁄 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺 ¶ 𑁋 𑀯𑀺𑀲𑀝𑁆𑀞𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀘 𑀫𑀜𑁆𑀚𑀼 𑀘 𑀲𑀯𑀦𑀻𑀬𑁄 𑀘 𑀩𑀺𑀦𑁆𑀤𑀼 𑀘 𑀅𑀯𑀺𑀲𑀸𑀭𑀻 𑀘 𑀕𑀫𑁆𑀪𑀻𑀭𑁄 𑀘 𑀦𑀺𑀦𑁆𑀦𑀸𑀤𑀺 𑀘. 𑀬𑀣𑀸 𑀧𑀭𑀺𑀲𑀁 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀅𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺, 𑀩𑁆𑀭𑀳𑁆𑀫𑀲𑁆𑀲𑀭𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀓𑀭𑀯𑀻𑀓𑀪𑀸𑀡𑀻𑀢𑀺 𑁋 𑀏𑀯𑀁 𑀯𑀕𑁆𑀕𑀼𑀯𑀤𑁄.

𑀲𑀢𑁆𑀣𑀸𑀢𑀺 𑀲𑀢𑁆𑀣𑀸 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. 𑀬𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀘𑁄𑀭𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀯𑀸𑀴𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀚𑀸𑀢𑀺𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀚𑀭𑀸𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀩𑁆𑀬𑀸𑀥𑀺𑀓𑀦𑁆𑀢𑀸𑀭𑀁…𑀧𑁂… 𑀫𑀭𑀡𑀓𑀦𑁆𑀢𑀸𑀭𑀁… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀭𑀸𑀕𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀤𑁄𑀲𑀓𑀦𑁆𑀢𑀸𑀭𑀁… 𑀫𑁄𑀳𑀓𑀦𑁆𑀢𑀸𑀭𑀁… 𑀫𑀸𑀦𑀓𑀦𑁆𑀢𑀸𑀭𑀁… 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁… 𑀓𑀺𑀮𑁂𑀲𑀓𑀦𑁆𑀢𑀸𑀭𑀁… 𑀤𑀼𑀘𑁆𑀘𑀭𑀺𑀢𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀭𑀸𑀕𑀕𑀳𑀦𑀁 𑀢𑀸𑀭𑁂𑀢𑀺, 𑀤𑁄𑀲𑀕𑀳𑀦𑀁… 𑀫𑁄𑀳𑀕𑀳𑀦𑀁… 𑀫𑀸𑀦𑀕𑀳𑀦𑀁… 𑀤𑀺𑀝𑁆𑀞𑀺𑀕𑀳𑀦𑀁… 𑀓𑀺𑀮𑁂𑀲𑀕𑀳𑀦𑀁… 𑀤𑀼𑀘𑁆𑀘𑀭𑀺𑀢𑀕𑀳𑀦𑀁 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 𑀔𑁂𑀫𑀦𑁆𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑁂𑀢𑀻𑀢𑀺 ¶ . 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄.

𑀅𑀣 𑀯𑀸 𑀪𑀕𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄.

𑀅𑀣 ¶ 𑀯𑀸 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄𑀢𑀺 𑁋 𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸.

𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄𑀢𑀺. 𑀪𑀕𑀯𑀸 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.

𑀅𑀣 𑀯𑀸 ¶ 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀢𑀼𑀲𑀺𑀢𑀸. 𑀢𑁂 𑀢𑀼𑀝𑁆𑀞𑀸 𑀲𑀦𑁆𑀢𑀼𑀝𑁆𑀞𑀸 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀤𑁂𑀯𑀮𑁄𑀓𑀢𑁄 𑀕𑀡𑀺𑀁 𑀆𑀕𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄. 𑀅𑀣 𑀯𑀸 𑀅𑀭𑀳𑀦𑁆𑀢𑁄 𑀯𑀼𑀘𑁆𑀘𑀦𑁆𑀢𑀺 𑀢𑀼𑀲𑀺𑀢𑀸. 𑀢𑁂 𑀢𑀼𑀝𑁆𑀞𑀸 𑀲𑀦𑁆𑀢𑀼𑀝𑁆𑀞𑀸 𑀅𑀢𑁆𑀢𑀫𑀦𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀅𑀭𑀳𑀦𑁆𑀢𑀸𑀦𑀁 𑀕𑀡𑀺𑀁 𑀆𑀕𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄. 𑀕𑀡𑀻𑀢𑀺 𑀕𑀡𑀻 𑀪𑀕𑀯𑀸. 𑀕𑀡𑀸𑀘𑀭𑀺𑀬𑁄𑀢𑀺 𑀕𑀡𑀻, 𑀕𑀡𑀲𑁆𑀲 ¶ 𑀲𑀢𑁆𑀣𑀸𑀢𑀺 𑀕𑀡𑀻, 𑀕𑀡𑀁 𑀧𑀭𑀺𑀳𑀭𑀢𑀻𑀢𑀺 𑀕𑀡𑀻, 𑀕𑀡𑀁 𑀑𑀯𑀤𑀢𑀻𑀢𑀺 𑀕𑀡𑀻, 𑀕𑀡𑀫𑀦𑀼𑀲𑀸𑀲𑀢𑀻𑀢𑀺 𑀕𑀡𑀻, 𑀯𑀺𑀲𑀸𑀭𑀤𑁄 𑀕𑀡𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀕𑀡𑀻, 𑀕𑀡𑀲𑁆𑀲 [𑀕𑀡𑁄𑀲𑁆𑀲 (𑀲𑀻.)] 𑀲𑀼𑀲𑁆𑀲𑀽𑀲𑀢𑀺 𑀲𑁄𑀢𑀁 𑀑𑀤𑀳𑀢𑀺 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀻𑀢𑀺 𑀕𑀡𑀻, 𑀕𑀡𑀁 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀕𑀡𑀻, 𑀪𑀺𑀓𑁆𑀔𑀼𑀕𑀡𑀲𑁆𑀲 𑀕𑀡𑀻, 𑀪𑀺𑀓𑁆𑀔𑀼𑀦𑀺𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀓𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀺𑀓𑀸𑀕𑀡𑀲𑁆𑀲 𑀕𑀡𑀻 ¶ , 𑀭𑀸𑀚𑀕𑀡𑀲𑁆𑀲 𑀕𑀡𑀻, 𑀔𑀢𑁆𑀢𑀺𑀬𑀕𑀡𑀲𑁆𑀲… 𑀩𑁆𑀭𑀸𑀳𑁆𑀫𑀡𑀕𑀡𑀲𑁆𑀲… 𑀯𑁂𑀲𑁆𑀲𑀕𑀡𑀲𑁆𑀲… 𑀲𑀼𑀤𑁆𑀤𑀕𑀡𑀲𑁆𑀲… 𑀤𑁂𑀯𑀕𑀡𑀲𑁆𑀲… 𑀩𑁆𑀭𑀳𑁆𑀫𑀕𑀡𑀲𑁆𑀲 𑀕𑀡𑀻, 𑀲𑀗𑁆𑀖𑀻 𑀕𑀡𑀻 𑀕𑀡𑀸𑀘𑀭𑀺𑀬𑁄. 𑀆𑀕𑀢𑁄𑀢𑀺 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑀼𑀧𑀧𑀦𑁆𑀦𑁄 [𑀲𑀫𑁆𑀧𑀢𑁆𑀢𑁄 (𑀲𑁆𑀬𑀸. 𑀓.)] 𑀲𑀗𑁆𑀓𑀲𑁆𑀲𑀦𑀕𑀭𑀦𑁆𑀢𑀺 𑁋 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.

𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄]

𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸, 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄’’𑀢𑀺.

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;

𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸.

𑀲𑀤𑁂𑀯𑀓𑀲𑁆𑀲 ¶ 𑀮𑁄𑀓𑀲𑁆𑀲𑀸𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑁋 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲.

𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸𑀢𑀺 𑀬𑀣𑀸 𑀪𑀕𑀯𑀦𑁆𑀢𑀁 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑁂𑀯𑀢𑀸 𑀧𑀲𑁆𑀲𑀦𑁆𑀢𑀺 𑀢𑀣𑀸 𑀫𑀦𑀼𑀲𑁆𑀲𑀸 𑀧𑀲𑁆𑀲𑀦𑁆𑀢𑀺 ¶ . 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀲𑁆𑀲𑀦𑁆𑀢𑀺 𑀢𑀣𑀸 𑀤𑁂𑀯𑀢𑀸 𑀧𑀲𑁆𑀲𑀦𑁆𑀢𑀺. 𑀬𑀣𑀸 𑀤𑁂𑀯𑀸𑀦𑀁 𑀤𑀺𑀲𑁆𑀲𑀢𑀺 𑀢𑀣𑀸 𑀫𑀦𑀼𑀲𑁆𑀲𑀸𑀦𑀁 𑀤𑀺𑀲𑁆𑀲𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸𑀦𑀁 𑀤𑀺𑀲𑁆𑀲𑀢𑀺 𑀢𑀣𑀸 𑀤𑁂𑀯𑀸𑀦𑀁 𑀤𑀺𑀲𑁆𑀲𑀢𑀻𑀢𑀺. 𑀏𑀯𑀫𑁆𑀧𑀺 ¶ 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸. 𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀤𑀦𑁆𑀢𑀸 𑀤𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺, 𑀅𑀲𑀦𑁆𑀢𑀸 𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺, 𑀅𑀦𑀼𑀧𑀲𑀦𑁆𑀢𑀸 𑀉𑀧𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺, 𑀅𑀦𑀺𑀩𑁆𑀩𑀼𑀢𑀸 𑀦𑀺𑀩𑁆𑀩𑀼𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺.

‘‘𑀧𑀢𑀺𑀭𑀽𑀧𑀓𑁄 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯, 𑀮𑁄𑀳𑀟𑁆𑀠𑀫𑀸𑀲𑁄𑀯 [𑀮𑁄𑀳𑀫𑀸𑀲𑁄𑀯 (𑀲𑁆𑀬𑀸.)] 𑀲𑀼𑀯𑀡𑁆𑀡𑀙𑀦𑁆𑀦𑁄;

𑀘𑀭𑀦𑁆𑀢𑀺 𑀮𑁄𑀓𑁂 𑀧𑀭𑀺𑀯𑀸𑀭𑀙𑀦𑁆𑀦𑀸, 𑀅𑀦𑁆𑀢𑁄 𑀅𑀲𑀼𑀤𑁆𑀥𑀸 𑀩𑀳𑀺 𑀲𑁄𑀪𑀫𑀸𑀦𑀸’’𑀢𑀺 [𑀅𑀬𑀁 𑀕𑀸𑀣𑀸 𑀲𑀁. 𑀦𑀺. 𑁧.𑁧𑁨𑁨 𑀤𑀺𑀲𑁆𑀲𑀢𑀺].

𑀦 𑀪𑀕𑀯𑀸 𑀏𑀯𑀁 𑀤𑀺𑀲𑁆𑀲𑀢𑀺. 𑀪𑀕𑀯𑀸 𑀪𑀽𑀢𑁂𑀦 𑀢𑀘𑁆𑀙𑁂𑀦 𑀢𑀣𑁂𑀦 𑀬𑀸𑀣𑀸𑀯𑁂𑀦 𑀅𑀯𑀺𑀧𑀭𑀻𑀢𑁂𑀦 𑀲𑀪𑀸𑀯𑁂𑀦 𑀤𑀦𑁆𑀢𑁄 ¶ 𑀤𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀲𑀦𑁆𑀢𑁄 𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀉𑀧𑀲𑀦𑁆𑀢𑁄 𑀉𑀧𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀦𑀺𑀩𑁆𑀩𑀼𑀢𑁄 𑀦𑀺𑀩𑁆𑀩𑀼𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀅𑀓𑀧𑁆𑀧𑀺𑀢𑀇𑀭𑀺𑀬𑀸𑀧𑀣𑀸 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑀅𑀣 𑀯𑀸 𑀪𑀕𑀯𑀸 𑀯𑀺𑀲𑀼𑀤𑁆𑀥𑀲𑀤𑁆𑀤𑁄 𑀕𑀢𑀓𑀺𑀢𑁆𑀢𑀺𑀲𑀤𑁆𑀤𑀲𑀺𑀮𑁄𑀓𑁄 [𑀪𑀝𑀓𑀺𑀢𑁆𑀢𑀺𑀲𑀤𑁆𑀤𑀲𑀺𑀮𑁄𑀓𑁄 (𑀲𑁆𑀬𑀸.)] 𑀦𑀸𑀕𑀪𑀯𑀦𑁂 𑀘 𑀲𑀼𑀧𑀡𑁆𑀡𑀪𑀯𑀦𑁂 𑀘 𑀬𑀓𑁆𑀔𑀪𑀯𑀦𑁂 𑀘 𑀅𑀲𑀼𑀭𑀪𑀯𑀦𑁂 𑀘 𑀕𑀦𑁆𑀥𑀩𑁆𑀩𑀪𑀯𑀦𑁂 𑀘 𑀫𑀳𑀸𑀭𑀸𑀚𑀪𑀯𑀦𑁂 𑀘 𑀇𑀦𑁆𑀤𑀪𑀯𑀦𑁂 𑀘 𑀩𑁆𑀭𑀳𑁆𑀫𑀪𑀯𑀦𑁂 𑀘 𑀤𑁂𑀯𑀪𑀯𑀦𑁂 𑀘 𑀏𑀤𑀺𑀲𑁄 𑀘 𑀢𑀸𑀤𑀺𑀲𑁄 𑀘 𑀢𑀢𑁄 𑀘 𑀪𑀺𑀬𑁆𑀬𑁄𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑀅𑀣 𑀯𑀸 𑀪𑀕𑀯𑀸 𑀤𑀲𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺, 𑀘𑀢𑀽𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀳𑀺, 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺, 𑀙𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺, 𑀢𑁂𑀚𑁂𑀦 𑀘 𑀩𑀮𑁂𑀦 𑀘 𑀕𑀼𑀡𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀧𑀜𑁆𑀜𑀸𑀬 𑀘 𑀤𑀺𑀲𑁆𑀲𑀢𑀺 𑀜𑀸𑀬𑀢𑀺 𑀧𑀜𑁆𑀜𑀸𑀬𑀢𑀺.

‘‘𑀤𑀽𑀭𑁂 ¶ ¶ 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 [𑀭𑀢𑁆𑀢𑀺𑀔𑀺𑀢𑁆𑀢𑀸 (𑀲𑀻.) 𑀥. 𑀧. 𑁩𑁦𑁪] 𑀬𑀣𑀸 𑀲𑀭𑀸’’𑀢𑀺.

𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑀘𑀓𑁆𑀔𑀼𑀫𑀸𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑁋 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 ¶ 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀫𑀁𑀲𑀘𑀓𑁆𑀔𑀼𑀫𑁆𑀳𑀺 𑀪𑀕𑀯𑀢𑁄 𑀧𑀜𑁆𑀘 𑀯𑀡𑁆𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑁋 𑀦𑀻𑀮𑁄 𑀘 𑀯𑀡𑁆𑀡𑁄, 𑀧𑀻𑀢𑀓𑁄 𑀘 𑀯𑀡𑁆𑀡𑁄, 𑀮𑁄𑀳𑀺𑀢𑀓𑁄 𑀘 𑀯𑀡𑁆𑀡𑁄, 𑀓𑀡𑁆𑀳𑁄 𑀘 𑀯𑀡𑁆𑀡𑁄, 𑀑𑀤𑀸𑀢𑁄 𑀘 𑀯𑀡𑁆𑀡𑁄. 𑀅𑀓𑁆𑀔𑀺𑀮𑁄𑀫𑀸𑀦𑀺 𑀘 𑀪𑀕𑀯𑀢𑁄. 𑀬𑀢𑁆𑀣 𑀘 𑀅𑀓𑁆𑀔𑀺𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺 𑀢𑀁 𑀦𑀻𑀮𑀁 𑀳𑁄𑀢𑀺 𑀲𑀼𑀦𑀻𑀮𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀉𑀫𑀸𑀧𑀼𑀧𑁆𑀨𑀲𑀫𑀸𑀦𑀁. 𑀢𑀲𑁆𑀲 𑀧𑀭𑀢𑁄 𑀧𑀻𑀢𑀓𑀁 𑀳𑁄𑀢𑀺 𑀲𑀼𑀧𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑀸𑀦𑀁. 𑀉𑀪𑀢𑁄 𑀅𑀓𑁆𑀔𑀺𑀓𑀽𑀝𑀸𑀦𑀺 𑀪𑀕𑀯𑀢𑁄 𑀮𑁄𑀳𑀺𑀢𑀓𑀸𑀦𑀺 𑀳𑁄𑀦𑁆𑀢𑀺 𑀲𑀼𑀮𑁄𑀳𑀺𑀢𑀓𑀸𑀦𑀺 𑀧𑀸𑀲𑀸𑀤𑀺𑀓𑀸𑀦𑀺 𑀤𑀲𑁆𑀲𑀦𑁂𑀬𑁆𑀬𑀸𑀦𑀺 𑀇𑀦𑁆𑀤𑀕𑁄𑀧𑀓𑀲𑀫𑀸𑀦𑀸𑀦𑀺. 𑀫𑀚𑁆𑀛𑁂 𑀓𑀡𑁆𑀳𑀁 𑀳𑁄𑀢𑀺 𑀲𑀼𑀓𑀡𑁆𑀳𑀁 𑀅𑀮𑀽𑀔𑀁 𑀲𑀼𑀤𑁆𑀥𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀫𑀸𑀦𑀁. 𑀢𑀲𑁆𑀲 𑀧𑀭𑀢𑁄 𑀑𑀤𑀸𑀢𑀁 𑀳𑁄𑀢𑀺 𑀲𑀼𑀑𑀤𑀸𑀢𑀁 𑀲𑁂𑀢𑀁 𑀧𑀡𑁆𑀟𑀭𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀑𑀲𑀥𑀺𑀢𑀸𑀭𑀓𑀲𑀫𑀸𑀦𑀁 ¶ . 𑀢𑁂𑀦 𑀪𑀕𑀯𑀸 𑀧𑀸𑀓𑀢𑀺𑀓𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂𑀦 𑀧𑀼𑀭𑀺𑀫𑀲𑀼𑀘𑀭𑀺𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘. 𑀬𑀤𑀸𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀲𑀽𑀭𑀺𑀬𑁄 𑀘 𑀅𑀢𑁆𑀣𑀗𑁆𑀕𑀢𑁄 𑀳𑁄𑀢𑀺 ¶ ; 𑀓𑀸𑀴𑀧𑀓𑁆𑀔𑁄 𑀘 𑀉𑀧𑁄𑀲𑀣𑁄 𑀳𑁄𑀢𑀺, 𑀢𑀺𑀩𑁆𑀩𑁄 𑀘 𑀯𑀦𑀲𑀡𑁆𑀟𑁄 𑀳𑁄𑀢𑀺, 𑀫𑀳𑀸 𑀘 𑀓𑀸𑀴𑀫𑁂𑀖𑁄 𑀅𑀩𑁆𑀪𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀏𑀯𑀭𑀽𑀧𑁂𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺. 𑀦𑀢𑁆𑀣𑀺 𑀲𑁄 𑀓𑀼𑀝𑁆𑀝𑁄 𑀯𑀸 𑀓𑀯𑀸𑀝𑀁 𑀯𑀸 𑀧𑀸𑀓𑀸𑀭𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀆𑀯𑀭𑀡𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬. 𑀏𑀓𑀜𑁆𑀘𑁂 𑀢𑀺𑀮𑀨𑀮𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀺𑀮𑀯𑀸𑀳𑁂 𑀧𑀓𑁆𑀔𑀺𑀧𑁂𑀬𑁆𑀬, 𑀢𑀜𑁆𑀜𑁂𑀯 𑀢𑀺𑀮𑀨𑀮𑀁 𑀉𑀤𑁆𑀥𑀭𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀧𑀸𑀓𑀢𑀺𑀓𑀫𑀁𑀲𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 ¶ 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂; 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 ¶ 𑁋 ‘‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 ¶ 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂; 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀆𑀓𑀗𑁆𑀔𑀫𑀸𑀦𑁄 𑀘 𑀪𑀕𑀯𑀸 𑀏𑀓𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑁂𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀘𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀤𑀲𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀯𑀻𑀲𑀫𑁆𑀧𑀺 [𑀯𑀻𑀲𑀢𑀺𑀫𑁆𑀧𑀺 (𑀲𑀻.)] 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀁𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀜𑀸𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀲𑀢𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀲𑀳𑀲𑁆𑀲𑀺𑀫𑁆𑀧𑀺 𑀘𑀽𑀴𑀦𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑀺𑀲𑀳𑀲𑁆𑀲𑀺𑀫𑁆𑀧𑀺 𑀫𑀚𑁆𑀛𑀺𑀫𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀢𑀺𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀫𑀳𑀸𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀬𑀸𑀯𑀢𑀓𑀁 𑀧𑀦 𑀆𑀓𑀗𑁆𑀔𑁂𑀬𑁆𑀬 𑀢𑀸𑀯𑀢𑀓𑀁 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀤𑀺𑀩𑁆𑀩𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 ¶ 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄 ¶ 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 ¶ 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 ¶ 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀲𑁄 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀚𑀸𑀦𑀺𑀢𑀩𑁆𑀩𑀁 [𑀅𑀢𑁆𑀣𑀺 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁 (𑀓.) 𑀫𑀳𑀸𑀦𑀺. 𑁧𑁫𑁬] 𑀅𑀢𑁆𑀢𑀢𑁆𑀣𑁄 𑀯𑀸, 𑀧𑀭𑀢𑁆𑀣𑁄 𑀯𑀸, 𑀉𑀪𑀬𑀢𑁆𑀣𑁄 𑀯𑀸, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄, 𑀦𑀻𑀢𑁄 𑀯𑀸 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁… 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺; 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸𑀨𑀼𑀲𑀺𑀢𑀸𑀦𑀁 ¶ 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 ¶ . 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦 𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺; 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸.

𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 ¶ 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 ¶ 𑀪𑀕𑀯𑀸 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 𑀉𑀧𑀸𑀤𑀸𑀬 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀻 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀬𑁂𑀧𑀺 𑀢𑁂 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 ¶ 𑀧𑀜𑁆𑀜𑀸𑀬 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸 𑀯𑁄𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸𑀯 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘. 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸𑀯 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 ¶ , 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺. 𑀏𑀯𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 [𑀑𑀮𑁄𑀓𑁂𑀦𑁆𑀢𑁄 (𑀲𑀻.)] 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀢𑀺𑀝𑁆𑀞𑀦𑁆𑀢𑀺 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 ¶ 𑀉𑀤𑀓𑁂𑀦; 𑀏𑀯𑀫𑁂𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 ¶ 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀚𑀸𑀦𑀸𑀢𑀺 𑀪𑀕𑀯𑀸 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀤𑁄𑀲𑀘𑀭𑀺𑀢𑁄, 𑀅𑀬𑀁 𑀫𑁄𑀳𑀘𑀭𑀺𑀢𑁄, 𑀅𑀬𑀁 𑀯𑀺𑀢𑀓𑁆𑀓𑀘𑀭𑀺𑀢𑁄, 𑀅𑀬𑀁 𑀲𑀤𑁆𑀥𑀸𑀘𑀭𑀺𑀢𑁄, 𑀅𑀬𑀁 𑀜𑀸𑀡𑀘𑀭𑀺𑀢𑁄’’𑀢𑀺. 𑀭𑀸𑀕𑀘𑀭𑀺𑀢𑀲𑁆𑀲 𑀪𑀕𑀯𑀸 ¶ 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺; 𑀤𑁄𑀲𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀁 𑀆𑀘𑀺𑀓𑁆𑀔𑀢𑀺; 𑀫𑁄𑀳𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀕𑀭𑀼𑀲𑀁𑀯𑀸𑀲𑁂 𑀦𑀺𑀯𑁂𑀲𑁂𑀢𑀺; 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀘𑀺𑀓𑁆𑀔𑀢𑀺; 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀲𑀸𑀤𑀦𑀻𑀬𑀁 𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀩𑀼𑀤𑁆𑀥𑀲𑀼𑀩𑁄𑀥𑀺𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀲𑀻𑀮𑀸𑀦𑀺 𑀘 𑀅𑀢𑁆𑀢𑀦𑁄; 𑀜𑀸𑀡𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀁 𑀤𑀼𑀓𑁆𑀔𑀸𑀓𑀸𑀭𑀁 𑀅𑀦𑀢𑁆𑀢𑀸𑀓𑀸𑀭𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 ¶ 𑀲𑀫𑀦𑁆𑀢𑀘𑀓𑁆𑀔𑀼;

𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 ¶ 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.

‘‘𑀦 𑀢𑀲𑁆𑀲 𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀏𑀯𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸𑀢𑀺 𑁋 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑀲𑀩𑁆𑀩𑀁 ¶ 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀲𑀩𑁆𑀩𑀁 𑀭𑀸𑀕𑀢𑀫𑀁 𑀤𑁄𑀲𑀢𑀫𑀁 𑀫𑁄𑀳𑀢𑀫𑀁 𑀫𑀸𑀦𑀢𑀫𑀁 𑀤𑀺𑀝𑁆𑀞𑀺𑀢𑀫𑀁 𑀓𑀺𑀮𑁂𑀲𑀢𑀫𑀁 𑀤𑀼𑀘𑁆𑀘𑀭𑀺𑀢𑀢𑀫𑀁 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁 𑀦𑀼𑀤𑀺𑀢𑁆𑀯𑀸 𑀧𑀦𑀼𑀤𑀺𑀢𑁆𑀯𑀸 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸.

𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸𑀢𑀺. 𑀏𑀓𑁄𑀢𑀺 𑀪𑀕𑀯𑀸 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 ¶ 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀓𑀣𑀁 𑀪𑀕𑀯𑀸 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄? 𑀪𑀕𑀯𑀸 𑀤𑀳𑀭𑁄𑀯 𑀲𑀫𑀸𑀦𑁄 𑀲𑀼𑀲𑀼 𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 [𑀪𑀤𑁆𑀤𑁂𑀦 (𑀲𑁆𑀬𑀸.)] 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸 ¶ 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑀼𑀤𑀦𑁆𑀢𑀸𑀦𑀁 𑀯𑀺𑀮𑀧𑀦𑁆𑀢𑀸𑀦𑀁 𑀜𑀸𑀢𑀺𑀲𑀗𑁆𑀖𑀁 𑀧𑀳𑀸𑀬 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 ¶ 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀏𑀯𑀁 𑀪𑀕𑀯𑀸 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄.

𑀓𑀣𑀁 𑀪𑀕𑀯𑀸 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀘𑀭𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀏𑀯𑀁 𑀪𑀕𑀯𑀸 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀪𑀕𑀯𑀸 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 ¶ 𑀢𑀻𑀭𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀫𑀸𑀭𑀁 𑀲𑀲𑁂𑀦𑀁 𑀓𑀡𑁆𑀳𑀁 𑀦𑀫𑀼𑀘𑀺𑀁 𑀧𑀫𑀢𑁆𑀢𑀩𑀦𑁆𑀥𑀼𑀁 𑀯𑀺𑀥𑀫𑀺𑀢𑁆𑀯𑀸 𑀢𑀡𑁆𑀳𑀸𑀚𑀸𑀮𑀺𑀦𑀺𑀁 𑀯𑀺𑀲𑀭𑀺𑀢𑀁 𑀯𑀺𑀲𑀢𑁆𑀢𑀺𑀓𑀁 𑀧𑀚𑀳𑀲𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀺𑀁 𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀺.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 ¶ 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁 [𑀇𑀢𑁆𑀣𑀁 𑀪𑀸𑀯𑀜𑁆𑀜𑀣𑀸𑀪𑀸𑀯𑀁 (𑀓.) 𑀇𑀢𑀺𑀯𑀼. 𑁧𑁫, 𑁧𑁦𑁫], 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀏𑀯𑀁 𑀪𑀕𑀯𑀸 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄.

𑀓𑀣𑀁 ¶ 𑀪𑀕𑀯𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄? 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄.

𑀓𑀣𑀁 𑀪𑀕𑀯𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄? 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 ¶ 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 [𑀅𑀢𑀭𑀺𑀁𑀲𑀼 (𑀲𑁆𑀬𑀸.)] 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺.

𑀏𑀯𑀁 𑀪𑀕𑀯𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄.

𑀓𑀣𑀁 𑀪𑀕𑀯𑀸 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄? 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 ¶ 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀩𑀼𑀚𑁆𑀛𑀺; ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺; ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 ¶ 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀆𑀲𑀯𑀸’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀩𑀼𑀚𑁆𑀛𑀺… 𑀧𑀳𑀸𑀢𑀩𑁆𑀩𑀸𑀢𑀺… 𑀪𑀸𑀯𑁂𑀢𑀩𑁆𑀩𑀸𑀢𑀺… 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺 𑀩𑀼𑀚𑁆𑀛𑀺, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑀼𑀚𑁆𑀛𑀺.

𑀅𑀣 𑀯𑀸 𑀬𑀁 ¶ 𑀓𑀺𑀜𑁆𑀘𑀺 𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀦𑀼𑀩𑀼𑀚𑁆𑀛𑀺𑀢𑀩𑁆𑀩𑀁 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀨𑀲𑁆𑀲𑀺𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀺 𑀅𑀦𑀼𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀺 ¶ 𑀲𑀫𑁆𑀩𑀼𑀚𑁆𑀛𑀺 𑀲𑀫𑁆𑀫𑀸𑀩𑀼𑀚𑁆𑀛𑀺 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 ¶ 𑀲𑀘𑁆𑀙𑀸𑀓𑀸𑀲𑀺. 𑀏𑀯𑀁 𑀪𑀕𑀯𑀸 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀭𑀢𑀺𑀫𑀚𑁆𑀛𑀕𑀸𑀢𑀺. 𑀭𑀢𑀺𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀭𑀢𑀺𑀁 𑀯𑀺𑀯𑁂𑀓𑀭𑀢𑀺𑀁 𑀉𑀧𑀲𑀫𑀭𑀢𑀺𑀁 𑀲𑀫𑁆𑀩𑁄𑀥𑀺𑀭𑀢𑀺𑀁 𑀅𑀚𑁆𑀛𑀕𑀸 𑀲𑀫𑀚𑁆𑀛𑀕𑀸 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀻𑀢𑀺 𑁋 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸.

𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;

𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸’’𑀢𑀺.

𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁, 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁;

𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺 [𑀧𑀢𑁆𑀢𑁄 (𑀲𑁆𑀬𑀸.)], 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀺. 𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄? 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 ¶ 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀢𑀸 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 ¶ 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 ¶ 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺 𑁋 𑀢𑀁 𑀩𑀼𑀤𑁆𑀥𑀁. 𑀅𑀲𑀺𑀢𑀦𑁆𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀦𑀺𑀲𑁆𑀲𑀬𑁄? 𑀬𑀸𑀯 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀑𑀥𑀺𑀓𑀢𑀁 [𑀧𑀭𑀺𑀬𑀸𑀤𑀺𑀓𑀢𑀁 (𑀲𑁆𑀬𑀸.)] 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 𑀇𑀤𑀁 𑀫𑀫, 𑀏𑀢𑀁 𑀫𑀫, 𑀏𑀢𑁆𑀢𑀓𑀁 𑀫𑀫, 𑀏𑀢𑁆𑀢𑀸𑀯𑀢𑀸 𑀫𑀫, 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁, 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀬𑀸𑀯𑀢𑀸 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄.

𑀓𑀢𑀫𑁄 ¶ 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 ¶ 𑀫𑀺𑀘𑁆𑀙𑀸𑀕𑀸𑀳𑁄 ‘‘𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓’’𑀦𑁆𑀢𑀺 𑀕𑀸𑀳𑁄 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄.

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀸𑀦𑀺𑀲𑁆𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀪𑀕𑀯𑀸 𑀘𑀓𑁆𑀔𑀼𑀁 𑀅𑀲𑀺𑀢𑁄, 𑀲𑁄𑀢𑀁… 𑀖𑀸𑀦𑀁… 𑀚𑀺𑀯𑁆𑀳𑀁… 𑀓𑀸𑀬𑀁… 𑀫𑀦𑀁 𑀅𑀲𑀺𑀢𑁄, 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁 ¶ … 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀅𑀲𑀺𑀢𑁄 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁.

𑀢𑀸𑀤𑀺𑀦𑁆𑀢𑀺 ¶ 𑀪𑀕𑀯𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑁋 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻.

𑀓𑀣𑀁 𑀪𑀕𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀪𑀕𑀯𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻; 𑀏𑀓𑀘𑁆𑀘𑁂 𑀩𑀸𑀳𑀁 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀘𑁆𑀘𑁂 𑀩𑀸𑀳𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀁, 𑀅𑀫𑀼𑀓𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄 ¶ , 𑀅𑀫𑀼𑀓𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀁, 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄 𑀉𑀕𑁆𑀖𑀸𑀢𑀺𑀦𑀺𑀕𑁆𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀢𑀺𑀓𑁆𑀓𑀦𑁆𑀢𑁄. 𑀏𑀯𑀁 𑀪𑀕𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻.

𑀓𑀣𑀁 𑀪𑀕𑀯𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀪𑀕𑀯𑀢𑀸 [𑀪𑀕𑀯𑀢𑁄 (𑀲𑁆𑀬𑀸.)] 𑀭𑀸𑀕𑁄 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄, 𑀤𑁄𑀲𑁄…𑀧𑁂… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 ¶ … 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀢𑁆𑀢𑀸 𑀯𑀦𑁆𑀢𑀸 𑀫𑀼𑀢𑁆𑀢𑀸 𑀧𑀳𑀻𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸. 𑀏𑀯𑀁 𑀪𑀕𑀯𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀪𑀕𑀯𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻? 𑀪𑀕𑀯𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄, 𑀪𑀯𑁄𑀖𑀁 𑀢𑀺𑀡𑁆𑀡𑁄, 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄, 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄, 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀕𑀢𑀤𑁆𑀥𑁄 𑀕𑀢𑀤𑀺𑀲𑁄 𑀕𑀢𑀓𑁄𑀝𑀺𑀬𑁄 𑀧𑀸𑀮𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀳𑀻𑀦𑀓𑀺𑀮𑁂𑀲𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄. 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁 ¶ , 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁. 𑀲𑁄 𑀉𑀓𑁆𑀔𑀺𑀢𑁆𑀢𑀧𑀴𑀺𑀖𑁄 [𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁬] 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 ¶ 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑁄. 𑀲𑁄 𑀦𑁂𑀯𑀸𑀘𑀺𑀦𑀢𑀺, 𑀦𑀸𑀧𑀘𑀺𑀦𑀢𑀺; 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄 ¶ 𑀦𑁂𑀯 𑀧𑀚𑀳𑀢𑀺, 𑀦 𑀉𑀧𑀸𑀤𑀺𑀬𑀢𑀺; 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀲𑀁𑀲𑀺𑀩𑁆𑀩𑀢𑀺, 𑀦 𑀉𑀲𑀺𑀦𑁂𑀢𑀺; 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀯𑀺𑀥𑀽𑀧𑁂𑀢𑀺, 𑀦 𑀲𑀦𑁆𑀥𑀽𑀧𑁂𑀢𑀺; 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀲𑀘𑁆𑀘𑀁 𑀲𑀫𑁆𑀧𑀝𑀺𑀧𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄, 𑀏𑀚𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄, 𑀓𑀺𑀮𑁂𑀲𑀕𑁆𑀕𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄, 𑀅𑀧𑀭𑀺𑀕𑀫𑀦𑀢𑀸𑀬 𑀞𑀺𑀢𑁄, 𑀓𑀝𑀁 𑀲𑀫𑀸𑀤𑀸𑀬 𑀞𑀺𑀢𑁄, 𑀫𑀼𑀢𑁆𑀢𑀧𑀝𑀺𑀲𑁂𑀯𑀦𑀢𑀸𑀬 𑀞𑀺𑀢𑁄, 𑀫𑁂𑀢𑁆𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀓𑀭𑀼𑀡𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀫𑀼𑀤𑀺𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀉𑀧𑁂𑀓𑁆𑀔𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀘𑁆𑀘𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀢𑀫𑁆𑀫𑀬𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑁄, 𑀲𑀦𑁆𑀢𑀼𑀲𑀺𑀢𑀢𑁆𑀢𑀸 𑀞𑀺𑀢𑁄, 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀅𑀦𑁆𑀢𑀺𑀫𑁂 𑀪𑀯𑁂 𑀞𑀺𑀢𑁄, 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑁄, 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀪𑀕𑀯𑀸.

‘‘𑀢𑀲𑁆𑀲𑀸𑀬𑀁 ¶ 𑀧𑀘𑁆𑀙𑀺𑀫𑀓𑁄 𑀪𑀯𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.

𑀏𑀯𑀁 ¶ 𑀪𑀕𑀯𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 ¶ 𑀪𑀕𑀯𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀪𑀕𑀯𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸 𑀘𑀺𑀢𑁆𑀢𑀁… 𑀫𑁄𑀳𑀸 𑀘𑀺𑀢𑁆𑀢𑀁… 𑀓𑁄𑀥𑀸… 𑀉𑀧𑀦𑀸𑀳𑀸… 𑀫𑀓𑁆𑀔𑀸… 𑀧𑀴𑀸𑀲𑀸… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀸… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀸… 𑀣𑀫𑁆𑀪𑀸… 𑀲𑀸𑀭𑀫𑁆𑀪𑀸… 𑀫𑀸𑀦𑀸… 𑀅𑀢𑀺𑀫𑀸𑀦𑀸… 𑀫𑀤𑀸… 𑀧𑀫𑀸𑀤𑀸… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀏𑀯𑀁 𑀪𑀕𑀯𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀪𑀕𑀯𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻? 𑀪𑀕𑀯𑀸 𑀲𑀻𑀮𑁂 𑀲𑀢𑀺 𑀲𑀻𑀮𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀯𑀻𑀭𑀺𑀬𑁂 𑀲𑀢𑀺 𑀯𑀻𑀭𑀺𑀬𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀲𑀢𑀺𑀬𑀸 𑀲𑀢𑀺 𑀲𑀢𑀺𑀫𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀢𑀺 𑀲𑀫𑀸𑀳𑀺𑀢𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀧𑀜𑁆𑀜𑀸𑀬 𑀲𑀢𑀺 𑀧𑀜𑁆𑀜𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀯𑀺𑀚𑁆𑀚𑀸𑀬 𑀲𑀢𑀺 𑀢𑁂𑀯𑀺𑀚𑁆𑀚𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀅𑀪𑀺𑀜𑁆𑀜𑀸𑀬 ¶ 𑀲𑀢𑀺 𑀙𑀴𑀪𑀺𑀜𑁆𑀜𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀤𑀲𑀩𑀮𑁂 𑀲𑀢𑀺 𑀤𑀲𑀩𑀮𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻. 𑀏𑀯𑀁 𑀪𑀕𑀯𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻𑀢𑀺 𑁋 𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁.

𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀦𑁆𑀢𑀺. 𑀅𑀓𑀼𑀳𑁄𑀢𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑁋 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 ¶ 𑀓𑀼𑀳𑀦𑀯𑀢𑁆𑀣𑀼, 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥 𑀕𑀳𑀧𑀢𑀺𑀓𑀸 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀢𑁆𑀣𑀺𑀓𑁄 [𑀅𑀢𑀺𑀢𑁆𑀢𑀺𑀓𑁄 (𑀲𑀻.), 𑀇𑀢𑁆𑀣𑀺𑀓𑁄 (𑀲𑁆𑀬𑀸.), 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀧𑀸𑀞𑀦𑀸𑀦𑀢𑁆𑀢𑀁 𑀦𑀢𑁆𑀣𑀺] 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁂𑀦𑀸𑀲𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀘𑀻𑀯𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀲𑀼𑀲𑀸𑀦𑀸 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀭𑀺𑀢𑁆𑀯𑀸 𑀥𑀸𑀭𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀧𑀺𑀡𑁆𑀟𑀧𑀸𑀢𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀬𑁆𑀬 ¶ . 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀲𑁂𑀦𑀸𑀲𑀦𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀅𑀲𑁆𑀲 𑀲𑁄𑀲𑀸𑀦𑀺𑀓𑁄 𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑁄 𑀯𑀸. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀧𑀽𑀢𑀺𑀫𑀼𑀢𑁆𑀢𑁂𑀦 𑀳𑀭𑀺𑀢𑀓𑀻𑀔𑀡𑁆𑀟𑁂𑀦 𑀑𑀲𑀥𑀁 𑀓𑀭𑁂𑀬𑁆𑀬𑀸’’𑀢𑀺 𑀢𑀤𑀼𑀧𑀸𑀤𑀸𑀬 𑀮𑀽𑀔𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀮𑀽𑀔𑀁 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺, 𑀮𑀽𑀔𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺. 𑀢𑀫𑁂𑀦𑀁 ¶ 𑀕𑀳𑀧𑀢𑀺𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀥𑀼𑀢𑀯𑀸𑀤𑁄’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺 ¶ . 𑀲𑁄 𑀏𑀯𑀫𑀸𑀳 𑁋 ‘‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀼𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀲𑀤𑁆𑀥𑀸 𑀅𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀲𑀁𑀯𑀺𑀚𑁆𑀚𑀢𑀺, 𑀅𑀳𑀜𑁆𑀘 𑀧𑀝𑀺𑀕𑁆𑀕𑀸𑀳𑀓𑁄. 𑀲𑀘𑁂 𑀅𑀳𑀁 𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺 ¶ , 𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 [𑀧𑀝𑀺𑀩𑀸𑀳𑀺𑀭𑀸 (𑀓.)] 𑀪𑀯𑀺𑀲𑁆𑀲𑀣, 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀅𑀧𑀺 𑀘 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺. 𑀢𑀤𑀼𑀧𑀸𑀤𑀸𑀬 𑀩𑀳𑀼𑀫𑁆𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 [𑀧𑀝𑀺𑀕𑀡𑁆𑀳𑀢𑀺 (𑀲𑀻.)], 𑀩𑀳𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀲𑁂𑀦𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄, ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀕𑀫𑀦𑀁 𑀲𑀡𑁆𑀞𑀧𑁂𑀢𑀺, 𑀞𑀸𑀦𑀁 𑀲𑀡𑁆𑀞𑀧𑁂𑀢𑀺, 𑀦𑀺𑀲𑀚𑁆𑀚𑀁 𑀲𑀡𑁆𑀞𑀧𑁂𑀢𑀺, 𑀲𑀬𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀡𑀺𑀥𑀸𑀬 𑀕𑀘𑁆𑀙𑀢𑀺, 𑀧𑀡𑀺𑀥𑀸𑀬 𑀢𑀺𑀝𑁆𑀞𑀢𑀺, 𑀧𑀡𑀺𑀥𑀸𑀬 𑀦𑀺𑀲𑀻𑀤𑀢𑀺, 𑀧𑀡𑀺𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀺, 𑀲𑀫𑀸𑀳𑀺𑀢𑁄 ¶ 𑀯𑀺𑀬 𑀢𑀺𑀝𑁆𑀞𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀸𑀣𑀓𑀚𑁆𑀛𑀸𑀬𑀻𑀯 𑀳𑁄𑀢𑀺. 𑀬𑀸 𑀏𑀯𑀭𑀽𑀧𑀸 𑀇𑀭𑀺𑀬𑀸𑀧𑀣𑀲𑁆𑀲 𑀆𑀞𑀧𑀦𑀸 𑀞𑀧𑀦𑀸 ¶ 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺, 𑀅𑀭𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺. ‘‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀥𑀸𑀭𑁂𑀢𑀺… 𑀮𑁄𑀳𑀣𑀸𑀮𑀓𑀁 𑀥𑀸𑀭𑁂𑀢𑀺… 𑀥𑀫𑁆𑀫𑀓𑀭𑀡𑀁 [𑀥𑀫𑁆𑀫𑀓𑀭𑀓𑀁 (𑀲𑀻. 𑀲𑁆𑀬𑀸.) 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀪𑀺𑀦𑀯𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀥𑀸𑀭𑁂𑀢𑀺… 𑀧𑀭𑀺𑀲𑁆𑀲𑀸𑀯𑀦𑀁 𑀥𑀸𑀭𑁂𑀢𑀺… 𑀓𑀼𑀜𑁆𑀘𑀺𑀓𑀁 𑀥𑀸𑀭𑁂𑀢𑀺… 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺… 𑀓𑀸𑀬𑀩𑀦𑁆𑀥𑀦𑀁 𑀥𑀸𑀭𑁂𑀢𑀺… 𑀆𑀬𑁄𑀕𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑁄 𑀉𑀧𑀚𑁆𑀛𑀸𑀬𑁄 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑁄 𑀆𑀘𑀭𑀺𑀬𑁄… 𑀏𑀯𑀭𑀽𑀧𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸… 𑀲𑀫𑀸𑀦𑀸𑀘𑀭𑀺𑀬𑀓𑀸… 𑀫𑀺𑀢𑁆𑀢𑀸… 𑀲𑀦𑁆𑀤𑀺𑀝𑁆𑀞𑀸… 𑀲𑀫𑁆𑀪𑀢𑁆𑀢𑀸… 𑀲𑀳𑀸𑀬𑀸, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑁂 𑀅𑀟𑁆𑀠𑀬𑁄𑀕𑁂 𑀯𑀲𑀢𑀺… 𑀧𑀸𑀲𑀸𑀤𑁂 𑀯𑀲𑀢𑀺… 𑀳𑀫𑁆𑀫𑀺𑀬𑁂 𑀯𑀲𑀢𑀺… 𑀕𑀼𑀳𑀸𑀬𑀁 𑀯𑀲𑀢𑀺… 𑀮𑁂𑀡𑁂 𑀯𑀲𑀢𑀺… 𑀓𑀼𑀝𑀺𑀬𑀸 𑀯𑀲𑀢𑀺… 𑀓𑀽𑀝𑀸𑀕𑀸𑀭𑁂 𑀯𑀲𑀢𑀺… 𑀅𑀝𑁆𑀝𑁂 𑀯𑀲𑀢𑀺 ¶ … 𑀫𑀸𑀴𑁂 𑀯𑀲𑀢𑀺… 𑀉𑀤𑁆𑀤𑀡𑁆𑀟𑁂 𑀯𑀲𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀯𑀲𑀢𑀺… 𑀫𑀡𑁆𑀟𑀧𑁂 ¶ 𑀯𑀲𑀢𑀺… 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺.

𑀅𑀣 𑀯𑀸 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄, 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄, 𑀓𑀼𑀳𑀓𑀓𑀼𑀳𑀓𑁄, 𑀮𑀧𑀓𑀮𑀧𑀓𑁄, 𑀫𑀼𑀔𑀲𑀫𑁆𑀪𑀸𑀯𑀺𑀢𑁄 ‘‘𑀅𑀬𑀁 𑀲𑀫𑀡𑁄 𑀇𑀫𑀸𑀲𑀁 𑀏𑀯𑀭𑀽𑀧𑀸𑀦𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’’𑀢𑀺. 𑀢𑀸𑀤𑀺𑀲𑀁 𑀕𑀫𑁆𑀪𑀻𑀭𑀁 𑀕𑀽𑀴𑁆𑀳𑀁 𑀦𑀺𑀧𑀼𑀡𑀁 𑀧𑀝𑀺𑀘𑁆𑀙𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀓𑀣𑀁 ¶ 𑀓𑀣𑁂𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 ¶ 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀼𑀳𑁄𑀢𑀺 𑁋 𑀅𑀓𑀼𑀳𑀁.

𑀕𑀡𑀺𑀫𑀸𑀕𑀢𑀦𑁆𑀢𑀺. 𑀕𑀡𑀻𑀢𑀺 𑀕𑀡𑀻 𑀪𑀕𑀯𑀸. 𑀕𑀡𑀸𑀘𑀭𑀺𑀬𑁄𑀢𑀺 𑀕𑀡𑀻, 𑀕𑀡𑀲𑁆𑀲 𑀲𑀢𑁆𑀣𑀸𑀢𑀺 𑀕𑀡𑀻, 𑀕𑀡𑀁 𑀧𑀭𑀺𑀳𑀭𑀢𑀻𑀢𑀺 𑀕𑀡𑀻, 𑀕𑀡𑀁 𑀑𑀯𑀤𑀢𑀻𑀢𑀺 𑀕𑀡𑀻, 𑀕𑀡𑀁 𑀅𑀦𑀼𑀲𑀸𑀲𑀢𑀻𑀢𑀺 𑀕𑀡𑀻, 𑀯𑀺𑀲𑀸𑀭𑀤𑁄 𑀕𑀡𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀕𑀡𑀻, 𑀕𑀡𑀲𑁆𑀲 𑀲𑀼𑀲𑁆𑀲𑀽𑀲𑀢𑀺 𑀲𑁄𑀢𑀁 𑀑𑀤𑀳𑀢𑀺 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀻𑀢𑀺 𑀕𑀡𑀻, 𑀕𑀡𑀁 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀕𑀡𑀻, 𑀪𑀺𑀓𑁆𑀔𑀼𑀕𑀡𑀲𑁆𑀲 𑀕𑀡𑀻, 𑀪𑀺𑀓𑁆𑀔𑀼𑀦𑀻𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀓𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀺𑀓𑀸𑀕𑀡𑀲𑁆𑀲 𑀕𑀡𑀻, 𑀭𑀸𑀚𑀕𑀡𑀲𑁆𑀲 𑀕𑀡𑀻, 𑀔𑀢𑁆𑀢𑀺𑀬𑀕𑀡𑀲𑁆𑀲 𑀕𑀡𑀻, 𑀩𑁆𑀭𑀸𑀳𑁆𑀫𑀡𑀕𑀡𑀲𑁆𑀲 𑀕𑀡𑀻, 𑀯𑁂𑀲𑁆𑀲𑀕𑀡𑀲𑁆𑀲 𑀕𑀡𑀻, 𑀲𑀼𑀤𑁆𑀤𑀕𑀡𑀲𑁆𑀲 𑀕𑀡𑀻, 𑀩𑁆𑀭𑀳𑁆𑀫𑀕𑀡𑀲𑁆𑀲 𑀕𑀡𑀻, 𑀤𑁂𑀯𑀕𑀡𑀲𑁆𑀲 𑀕𑀡𑀻, 𑀲𑀗𑁆𑀖𑀺𑀁 [𑀲𑀁𑀖𑀕𑀡𑀲𑁆𑀲 𑀕𑀡𑀻 (𑀲𑀻.)] 𑀕𑀡𑀺𑀁 𑀕𑀡𑀸𑀘𑀭𑀺𑀬𑀁. 𑀆𑀕𑀢𑀦𑁆𑀢𑀺 𑀉𑀧𑀕𑀢𑀁 𑀲𑀫𑀼𑀧𑀕𑀢𑀁 𑀲𑀫𑀼𑀧𑀧𑀦𑁆𑀦𑀁 [𑀲𑀫𑁆𑀧𑀢𑁆𑀢𑀁 (𑀩𑀳𑀽𑀲𑀼)] 𑀲𑀗𑁆𑀓𑀲𑁆𑀲𑀦𑀕𑀭𑀦𑁆𑀢𑀺 𑁋 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁.

𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀦𑁆𑀢𑀺. 𑀩𑀳𑀽𑀦𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀩𑀤𑁆𑀥𑀸𑀦𑀦𑁆𑀢𑀺 𑀩𑀤𑁆𑀥𑀸𑀦𑀁 𑀩𑀤𑁆𑀥𑀘𑀭𑀸𑀦𑀁 𑀧𑀭𑀺𑀘𑀸𑀭𑀓𑀸𑀦𑀁 𑀲𑀺𑀲𑁆𑀲𑀸𑀦𑀦𑁆𑀢𑀺 𑁋 𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁.

𑀅𑀢𑁆𑀣𑀺 ¶ 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺. 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺 [𑀅𑀢𑁆𑀣𑀺𑀓𑀸𑀫𑁆𑀳 𑀆𑀕𑀢𑀸 (𑀲𑀻. 𑀓.) 𑀏𑀯𑀫𑀻𑀤𑀺𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼𑀧𑀺 𑀩𑀳𑀼𑀯𑀘𑀦𑁂𑀦], 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀺, 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀻𑀢𑀺. 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸 𑀧𑀜𑁆𑀳𑀢𑁆𑀣𑀺𑀓𑀸𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸𑀦𑀁 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀸𑀦𑀁 𑀆𑀕𑀫𑀦𑀁 𑀅𑀪𑀺𑀓𑁆𑀓𑀫𑀦𑀁 𑀉𑀧𑀲𑀗𑁆𑀓𑀫𑀦𑀁 𑀧𑀬𑀺𑀭𑀼𑀧𑀸𑀲𑀦𑀁 [𑀧𑀬𑀺𑀭𑀼𑀧𑀸𑀲𑀦𑀸 (𑀲𑁆𑀬𑀸. 𑀓.)] 𑀲𑀺𑀬𑀸 𑀅𑀢𑁆𑀣𑀻𑀢𑀺. 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸 𑀧𑀜𑁆𑀳𑀸𑀕𑀫𑁄 𑀢𑀼𑀬𑁆𑀳𑀁 𑀅𑀢𑁆𑀣𑀺, 𑀢𑁆𑀯𑀫𑁆𑀧𑀺 𑀧𑀳𑀼 ¶ [𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂], 𑀢𑁆𑀯𑀫𑀲𑀺 𑀅𑀮𑀫𑀢𑁆𑀣𑁄 𑀫𑀬𑀸 𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀼𑀁 𑀯𑀺𑀲𑀚𑁆𑀚𑁂𑀢𑀼𑀁 ‘‘𑀯𑀳𑀲𑁆𑀲𑁂𑀢𑀁 𑀪𑀸𑀭’’𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀢𑁂𑀦𑀸𑀳 ¶ 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀢𑀁 ¶ 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁, 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁;

𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫’’𑀦𑁆𑀢𑀺.

𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁;

𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸, 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸.

𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀲𑁂𑀓𑁆𑀔𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄. 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺 𑀚𑀸𑀢𑀺𑀬𑀸 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀚𑀭𑀸𑀬… 𑀩𑁆𑀬𑀸𑀥𑀺𑀦𑀸… 𑀫𑀭𑀡𑁂𑀦… 𑀲𑁄𑀓𑁂𑀳𑀺… 𑀧𑀭𑀺𑀤𑁂𑀯𑁂𑀳𑀺… 𑀤𑀼𑀓𑁆𑀔𑁂𑀳𑀺… 𑀤𑁄𑀫𑀦𑀲𑁆𑀲𑁂𑀳𑀺… 𑀉𑀧𑀸𑀬𑀸𑀲𑁂𑀳𑀺 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦… 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁂𑀦 𑀤𑀼𑀓𑁆𑀔𑁂𑀦… 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀦𑀼𑀲𑀺𑀓𑁂𑀦 [𑀫𑀸𑀦𑀼𑀲𑀓𑁂𑀦 (𑀲𑀻. 𑀲𑁆𑀬𑀸.) 𑀫𑀳𑀸𑀦𑀺. 𑁧𑁭𑁧] 𑀤𑀼𑀓𑁆𑀔𑁂𑀦… 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑁂𑀦 𑀤𑀼𑀓𑁆𑀔𑁂𑀦… 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀧𑀭𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀤𑀼𑀓𑁆𑀔𑀤𑀼𑀓𑁆𑀔𑁂𑀦… 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀦 ¶ … 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀦… 𑀘𑀓𑁆𑀔𑀼𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑁄𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀖𑀸𑀦𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀸𑀬𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑀻𑀲𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀡𑁆𑀡𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀫𑀼𑀔𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀤𑀦𑁆𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀟𑀸𑀳𑁂𑀦… 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑀸𑀬… 𑀯𑀺𑀲𑀽𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦… 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸… 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬… 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑁂𑀦… 𑀧𑀺𑀢𑁆𑀢𑁂𑀦… 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀺𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦… 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦… 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦… 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬… 𑀧𑀺𑀧𑀸𑀲𑀸𑀬… 𑀉𑀘𑁆𑀘𑀸𑀭𑁂𑀦 ¶ … 𑀧𑀲𑁆𑀲𑀸𑀯𑁂𑀦… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀺𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑀸𑀢𑀼𑀫𑀭𑀡𑁂𑀦… 𑀪𑀕𑀺𑀦𑀺𑀫𑀭𑀡𑁂𑀦… 𑀧𑀼𑀢𑁆𑀢𑀫𑀭𑀡𑁂𑀦 ¶ … 𑀥𑀻𑀢𑀼𑀫𑀭𑀡𑁂𑀦… 𑀜𑀸𑀢𑀺𑀩𑁆𑀬𑀲𑀦𑁂𑀦… 𑀪𑁄𑀕𑀩𑁆𑀬𑀲𑀦𑁂𑀦… 𑀭𑁄𑀕𑀩𑁆𑀬𑀲𑀦𑁂𑀦… 𑀲𑀻𑀮𑀩𑁆𑀬𑀲𑀦𑁂𑀦… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀯𑀺𑀚𑀺𑀕𑀼𑀘𑁆𑀙𑀢𑁄 𑀅𑀝𑁆𑀝𑀻𑀬𑀢𑁄 𑀳𑀭𑀸𑀬𑀢𑁄 𑀚𑀺𑀕𑀼𑀘𑁆𑀙𑀢𑁄𑀢𑀺 𑁋 𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄.

𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀦𑁆𑀢𑀺. 𑀆𑀲𑀦𑀁 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀦𑀺𑀲𑀻𑀤𑀢𑀺 𑁋 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄 [𑀧𑀮𑀸𑀲𑀲𑀦𑁆𑀣𑀸𑀭𑁄 (𑀲𑀻. 𑀲𑁆𑀬𑀸.)]. 𑀢𑀁 𑀆𑀲𑀦𑀁 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁 ¶ , 𑀅𑀲𑀧𑁆𑀧𑀸𑀬𑀲𑀤𑁆𑀤𑀲𑁆𑀲𑀯𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 ¶ 𑀧𑀯𑀺𑀯𑀺𑀢𑁆𑀢𑀁. 𑀢𑀁 𑀧𑀯𑀺𑀯𑀺𑀢𑁆𑀢𑀁 𑀆𑀲𑀦𑀁 𑀪𑀚𑀢𑁄 𑀲𑀫𑁆𑀪𑀚𑀢𑁄 𑀲𑁂𑀯𑀢𑁄 𑀦𑀺𑀲𑁂𑀯𑀢𑁄 𑀲𑀁𑀲𑁂𑀯𑀢𑁄 𑀧𑀝𑀺𑀲𑁂𑀯𑀢𑁄𑀢𑀺 𑁋 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁.

𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸𑀢𑀺. 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀭𑀼𑀓𑁆𑀔𑀫𑀽𑀮𑀁, 𑀲𑀼𑀲𑀸𑀦𑀁𑀬𑁂𑀯 𑀲𑀼𑀲𑀸𑀦𑀦𑁆𑀢𑀺 𑁋 𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸. 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸𑀢𑀺. 𑀧𑀩𑁆𑀩𑀢𑀸𑀬𑁂𑀯 𑀧𑀩𑁆𑀩𑀢𑀸, 𑀓𑀦𑁆𑀤𑀭𑀸𑀬𑁂𑀯 𑀓𑀦𑁆𑀤𑀭𑀸, 𑀕𑀺𑀭𑀺𑀕𑀼𑀳𑀸𑀬𑁂𑀯 𑀕𑀺𑀭𑀺𑀕𑀼𑀳𑀸. 𑀧𑀩𑁆𑀩𑀢𑀦𑁆𑀢𑀭𑀺𑀓𑀸𑀬𑁄 𑀯𑀼𑀘𑁆𑀘𑀦𑁆𑀢𑀺 𑀧𑀩𑁆𑀩𑀢𑀧𑀩𑁆𑀪𑀸𑀭𑀸𑀢𑀺 𑁋 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸.

𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁;

𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸, 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸’’𑀢𑀺.

𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼, 𑀓𑀺𑀯𑀦𑁆𑀢𑁄 [𑀕𑀻𑀯𑀦𑁆𑀢𑁄 (𑀲𑁆𑀬𑀸.) 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀢𑀢𑁆𑀣 𑀪𑁂𑀭𑀯𑀸;

𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬, 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂.

𑀉𑀘𑁆𑀘𑀸𑀯𑀘𑁂𑀲𑀼 ¶ 𑀲𑀬𑀦𑁂𑀲𑀽𑀢𑀺. 𑀉𑀘𑁆𑀘𑀸𑀯𑀘𑁂𑀲𑀽𑀢𑀺 𑀉𑀘𑁆𑀘𑀸𑀯𑀘𑁂𑀲𑀼 𑀳𑀻𑀦𑀧𑁆𑀧𑀡𑀻𑀢𑁂𑀲𑀼 𑀙𑁂𑀓𑀧𑀸𑀧𑀓𑁂𑀲𑀼. 𑀲𑀬𑀦𑀁 𑀯𑀼𑀘𑁆𑀘𑀢𑀺 𑀲𑁂𑀦𑀸𑀲𑀦𑀁 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸𑀢𑀺 𑁋 𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼. 𑀓𑀺𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸𑀢𑀺. 𑀓𑀺𑀯𑀦𑁆𑀢𑁄𑀢𑀺 𑀓𑀺𑀯𑀦𑁆𑀢𑁄 [𑀓𑀼𑀯𑀦𑁆𑀢𑁄 (𑀲𑀻.), 𑀕𑀻𑀯𑀦𑁆𑀢𑁄 (𑀲𑁆𑀬𑀸.)] 𑀓𑀽𑀚𑀦𑁆𑀢𑁄 𑀦𑀤𑀦𑁆𑀢𑁄 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄. 𑀅𑀣 𑀯𑀸 𑀓𑀺𑀯𑀦𑁆𑀢𑁄𑀢𑀺 𑀓𑀢𑀺 𑀓𑀺𑀢𑁆𑀢𑀓𑀸 𑀓𑀻𑀯𑀢𑀓𑀸 𑀓𑀻𑀯𑀩𑀳𑀼𑀓𑀸 𑀢𑁂. 𑀪𑁂𑀭𑀯𑀸𑀢𑀺 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 ¶ 𑀳𑀢𑁆𑀣𑀻 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸𑀢𑀺 𑁋 𑀓𑀺𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸.

𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬𑀸𑀢𑀺. 𑀬𑁂 𑀳𑀻𑀢𑀺 𑀬𑁂 𑀳𑀺 𑀪𑁂𑀭𑀯𑁂 𑀧𑀲𑁆𑀲𑀺𑀢𑁆𑀯𑀸 𑀯𑀸 𑀲𑀼𑀡𑀺𑀢𑁆𑀯𑀸 𑀯𑀸 𑀦 𑀯𑁂𑀥𑁂𑀬𑁆𑀬 𑀦𑀧𑁆𑀧𑀯𑁂𑀥𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬 𑀦 𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 ¶ 𑀦 𑀧𑀭𑀺𑀢𑁆𑀢𑀲𑁂𑀬𑁆𑀬 𑀦 𑀪𑀸𑀬𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀪𑀻𑀭𑀽 𑀅𑀲𑁆𑀲 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻, 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬.

𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂𑀢𑀺. 𑀅𑀧𑁆𑀧𑀲𑀤𑁆𑀤𑁂 𑀅𑀧𑁆𑀧𑀦𑀺𑀕𑁆𑀖𑁄𑀲𑁂 𑀯𑀺𑀚𑀦𑀯𑀸𑀢𑁂 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑁂 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑁂 𑀲𑁂𑀦𑀸𑀲𑀦𑁂𑀢𑀺 𑁋 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂.

𑀢𑁂𑀦𑀸𑀳 ¶ 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼, 𑀓𑀺𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸;

𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬, 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂’’𑀢𑀺.

𑀓𑀢𑀺 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂, 𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀁;

𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂, 𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂.

𑀓𑀢𑀺 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂𑀢𑀺. 𑀓𑀢𑀻𑀢𑀺 𑀓𑀢𑀺 𑀓𑀺𑀢𑁆𑀢𑀓𑀸 𑀓𑀻𑀯𑀢𑀓𑀸 𑀓𑀻𑀯𑀩𑀳𑀼𑀓𑀸. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 𑀳𑀢𑁆𑀣𑀻 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 ¶ 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 ¶ 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀁 𑀧𑀺𑀢𑁆𑀢𑀁 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸…𑀧𑁂… 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.

𑀓𑀢𑀫𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀸𑀢𑀺 ¶ 𑀓𑁂𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑀸? 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸.

𑀓𑀣𑀁 ¶ 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀏𑀯𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 ¶ 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 ¶ 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺; 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 ¶ 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 ¶ 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄, 𑀤𑁄𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑁄𑀳𑁄 ¶ , 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸’’.

‘‘𑀅𑀦𑀢𑁆𑀣𑀚𑀦𑀦𑁄 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁫𑁬; 𑀇𑀢𑀺𑀯𑀼. 𑁮𑁮] 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀫𑀽𑀴𑁆𑀳𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀫𑀽𑀴𑁆𑀳𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄 ¶ ? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬; 𑀤𑁄𑀲𑁄 𑀔𑁄 ¶ , 𑀫𑀳𑀸𑀭𑀸𑀚…𑀧𑁂… 𑀫𑁄𑀳𑁄 ¶ 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 ¶ 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺.

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀓𑀢𑀺 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂.

𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀦𑁆𑀢𑀺. 𑀅𑀕𑀢𑀸 𑀤𑀺𑀲𑀸 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀕𑀢𑀧𑀼𑀩𑁆𑀩𑀸 𑀲𑀸 𑀤𑀺𑀲𑀸 𑀦 𑀲𑀸 𑀤𑀺𑀲𑀸 𑀕𑀢𑀧𑀼𑀩𑁆𑀩𑀸 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸.

‘‘𑀲𑀫𑀢𑀺𑀢𑁆𑀢𑀺𑀓𑀁 𑀅𑀦𑀯𑀲𑁂𑀲𑀁, 𑀢𑁂𑀮𑀧𑀢𑁆𑀢𑀁 𑀬𑀣𑀸 𑀧𑀭𑀺𑀳𑀭𑁂𑀬𑁆𑀬;

𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂, 𑀧𑀢𑁆𑀣𑀬𑀸𑀦𑁄 [𑀧𑀢𑁆𑀣𑀬𑀫𑀸𑀦𑁄 (𑀲𑁆𑀬𑀸.)] 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩𑀁’’.

𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀯𑀚𑀢𑁄 ¶ 𑀕𑀘𑁆𑀙𑀢𑁄 𑀅𑀪𑀺𑀓𑁆𑀓𑀫𑀢𑁄𑀢𑀺 𑁋 𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀁.

𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂𑀢𑀺. 𑀬𑁂𑀢𑀺 𑀬𑁂 𑀧𑀭𑀺𑀲𑁆𑀲𑀬𑁂 𑀅𑀪𑀺𑀲𑀫𑁆𑀪𑀯𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂.

𑀧𑀦𑁆𑀢𑀫𑁆𑀳𑀺 ¶ 𑀲𑀬𑀦𑀸𑀲𑀦𑁂𑀢𑀺. 𑀅𑀦𑁆𑀢𑁂 𑀧𑀦𑁆𑀢𑁂 𑀧𑀭𑀺𑀬𑀦𑁆𑀢𑁂 𑀲𑁂𑀮𑀦𑁆𑀢𑁂 𑀯𑀸 𑀯𑀦𑀦𑁆𑀢𑁂 𑀯𑀸 𑀦𑀤𑀦𑁆𑀢𑁂 𑀯𑀸 𑀉𑀤𑀓𑀦𑁆𑀢𑁂 𑀯𑀸 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀺, 𑀚𑀦𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑁂 𑀲𑁂𑀦𑀸𑀲𑀦𑁂𑀢𑀺 𑁋 𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂.

𑀢𑁂𑀦𑀸𑀳 ¶ 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀓𑀢𑀺 ¶ 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂, 𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀁;

𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂, 𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂’’𑀢𑀺.

𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀼, 𑀓𑁆𑀬𑀸𑀲𑁆𑀲𑀲𑁆𑀲𑀼 𑀇𑀥 𑀕𑁄𑀘𑀭𑀸;

𑀓𑀸𑀦𑀺 𑀲𑀻𑀮𑀩𑁆𑀩𑀢𑀸𑀦𑀸𑀲𑁆𑀲𑀼, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀽𑀢𑀺. 𑀓𑀻𑀤𑀺𑀲𑁂𑀦 𑀩𑁆𑀬𑀧𑁆𑀧𑀣𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲 𑀓𑀺𑀁𑀲𑀡𑁆𑀞𑀺𑀢𑁂𑀦 𑀓𑀺𑀁𑀧𑀓𑀸𑀭𑁂𑀦 𑀓𑀺𑀁𑀧𑀝𑀺𑀪𑀸𑀕𑁂𑀦𑀸𑀢𑀺 𑀯𑀘𑀻𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀼𑀘𑁆𑀙𑀢𑀺. 𑀓𑀢𑀫𑀸 𑀯𑀘𑀻𑀧𑀸𑀭𑀺𑀲𑀼𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲. 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬, 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 ¶ 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀘𑀢𑀽𑀳𑀺 𑀯𑀘𑀻𑀲𑀼𑀘𑀭𑀺𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀤𑁄𑀲𑀸𑀧𑀕𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀩𑀸𑀢𑁆𑀢𑀺𑀁𑀲𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺. 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀓𑀣𑁂𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀁 𑀲𑀦𑁆𑀢𑀼𑀝𑁆𑀞𑀺𑀓𑀣𑀁 𑀧𑀯𑀺𑀯𑁂𑀓𑀓𑀣𑀁 𑀅𑀲𑀁𑀲𑀕𑁆𑀕𑀓𑀣𑀁 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀁 𑀲𑀻𑀮𑀓𑀣𑀁 𑀲𑀫𑀸𑀥𑀺𑀓𑀣𑀁 𑀧𑀜𑁆𑀜𑀸𑀓𑀣𑀁 𑀯𑀺𑀫𑀼𑀢𑁆𑀢𑀺𑀓𑀣𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀁 𑀲𑀢𑀺𑀧𑀝𑁆𑀞𑀸𑀦𑀓𑀣𑀁 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀁 𑀇𑀤𑁆𑀥𑀺𑀧𑀸𑀤𑀓𑀣𑀁 𑀇𑀦𑁆𑀤𑁆𑀭𑀺𑀬𑀓𑀣𑀁 𑀩𑀮𑀓𑀣𑀁 𑀩𑁄𑀚𑁆𑀛𑀗𑁆𑀕𑀓𑀣𑀁 𑀫𑀕𑁆𑀕𑀓𑀣𑀁 𑀨𑀮𑀓𑀣𑀁 ¶ 𑀦𑀺𑀩𑁆𑀩𑀸𑀦𑀓𑀣𑀁 𑀓𑀣𑁂𑀢𑀺 ¶ . 𑀯𑀸𑀘𑀸𑀬 𑀬𑀢𑁄 𑀬𑀢𑁆𑀢𑁄 𑀧𑀝𑀺𑀬𑀢𑁆𑀢𑁄 𑀕𑀼𑀢𑁆𑀢𑁄 𑀕𑁄𑀧𑀺𑀢𑁄 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄 𑁋 𑀅𑀬𑀁 𑀯𑀘𑀻𑀧𑀸𑀭𑀺𑀲𑀼𑀤𑁆𑀥𑀺. 𑀏𑀤𑀺𑀲𑀸𑀬 𑀯𑀘𑀻𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸𑀢𑀺 𑁋 𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀼.

𑀓𑁆𑀬𑀸𑀲𑁆𑀲𑀲𑁆𑀲𑀼 𑀇𑀥 𑀕𑁄𑀘𑀭𑀸𑀢𑀺. 𑀓𑀻𑀤𑀺𑀲𑁂𑀦 𑀕𑁄𑀘𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲 𑀓𑀺𑀁𑀲𑀡𑁆𑀞𑀺𑀢𑁂𑀦 𑀓𑀺𑀁𑀧𑀓𑀸𑀭𑁂𑀦 𑀓𑀺𑀁𑀧𑀝𑀺𑀪𑀸𑀕𑁂𑀦𑀸𑀢𑀺 𑀕𑁄𑀘𑀭𑀁 𑀧𑀼𑀘𑁆𑀙𑀢𑀺. 𑀅𑀢𑁆𑀣𑀺 𑀕𑁄𑀘𑀭𑁄, 𑀅𑀢𑁆𑀣𑀺 𑀅𑀕𑁄𑀘𑀭𑁄.

𑀓𑀢𑀫𑁄 ¶ 𑀅𑀕𑁄𑀘𑀭𑁄? 𑀇𑀥𑁂𑀓𑀘𑁆𑀘𑁄 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀯𑀺𑀥𑀯𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀓𑀼𑀫𑀸𑀭𑀻𑀕𑁄𑀘𑀭𑁄 ¶ [𑀣𑀽𑀮𑀓𑀼𑀫𑀸𑀭𑀻𑀕𑁄𑀘𑀭𑁄 (𑀲𑁆𑀬𑀸. 𑀓.)] 𑀯𑀸 𑀳𑁄𑀢𑀺, 𑀧𑀡𑁆𑀟𑀓𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀻𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀧𑀸𑀦𑀸𑀕𑀸𑀭𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀲𑀁𑀲𑀕𑁆𑀕𑁂𑀦. 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑀤𑁆𑀥𑀸𑀦𑀺 𑀅𑀧𑁆𑀧𑀲𑀦𑁆𑀦𑀸𑀦𑀺 𑀅𑀦𑁄𑀧𑀸𑀦𑀪𑀽𑀢𑀸𑀦𑀺 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀺 𑀅𑀦𑀢𑁆𑀣𑀓𑀸𑀫𑀸𑀦𑀺 𑀅𑀳𑀺𑀢𑀓𑀸𑀫𑀸𑀦𑀺 𑀅𑀨𑀸𑀲𑀼𑀓𑀸𑀫𑀸𑀦𑀺 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

𑀅𑀣 𑀯𑀸 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀅𑀲𑀁𑀯𑀼𑀢𑁄 𑀕𑀘𑁆𑀙𑀢𑀺, 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄, 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀇𑀢𑁆𑀣𑀺𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀧𑀼𑀭𑀺𑀲𑁂 𑀑𑀮𑁄𑀓𑁂𑀦𑁆𑀢𑁄, 𑀓𑀼𑀫𑀸𑀭𑀺𑀓𑀸𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀓𑀼𑀫𑀸𑀭𑀓𑁂 𑀑𑀮𑁄𑀓𑁂𑀦𑁆𑀢𑁄, 𑀅𑀦𑁆𑀢𑀭𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄, 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄, 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 [𑀉𑀮𑁆𑀮𑁄𑀓𑁂𑀦𑁆𑀢𑁄 (𑀲𑀻. 𑀓.) 𑀫𑀳𑀸𑀦𑀺. 𑁧𑁫𑁭 𑀦𑀢𑁆𑀣𑀺 𑀧𑀸𑀞𑀦𑀸𑀦𑀢𑁆𑀢𑀁], 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

𑀅𑀣 𑀯𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸 𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀦 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

𑀬𑀣𑀸 ¶ 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 ¶ 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 𑀯𑁂𑀢𑀸𑀴𑀁 𑀓𑀼𑀫𑁆𑀪𑀣𑀽𑀡𑀁 𑀲𑁄𑀪𑀦𑀓𑀁 𑀘𑀡𑁆𑀟𑀸𑀮𑀁 ¶ 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 𑀫𑀳𑀺𑀁𑀲𑀬𑀼𑀤𑁆𑀥𑀁 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸 𑀇𑀢𑀺, 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

𑀧𑀜𑁆𑀘𑀧𑀺 𑀓𑀸𑀫𑀕𑀼𑀡𑀸 𑀅𑀕𑁄𑀘𑀭𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀫𑀸, 𑀪𑀺𑀓𑁆𑀔𑀯𑁂, 𑀅𑀕𑁄𑀘𑀭𑁂 𑀘𑀭𑀣 𑀧𑀭𑀯𑀺𑀲𑀬𑁂. 𑀅𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀢𑀁 𑀧𑀭𑀯𑀺𑀲𑀬𑁂 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄? 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 ¶ 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄’’ 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀅𑀕𑁄𑀘𑀭𑁄.

𑀓𑀢𑀫𑁄 𑀕𑁄𑀘𑀭𑁄? 𑀇𑀥 𑀪𑀺𑀓𑁆𑀔𑀼 𑀦 𑀯𑁂𑀲𑀺𑀬𑀸𑀕𑁄𑀘𑀭𑁄 𑀳𑁄𑀢𑀺, 𑀦 𑀯𑀺𑀥𑀯𑀸𑀕𑁄𑀘𑀭𑁄 𑀳𑁄𑀢𑀺, 𑀦 𑀣𑀼𑀮𑁆𑀮𑀓𑀼𑀫𑀸𑀭𑀻𑀕𑁄𑀘𑀭𑁄 𑀳𑁄𑀢𑀺, 𑀦 𑀧𑀡𑁆𑀟𑀓𑀕𑁄𑀘𑀭𑁄 𑀳𑁄𑀢𑀺, 𑀦 𑀪𑀺𑀓𑁆𑀔𑀼𑀦𑀻𑀕𑁄𑀘𑀭𑁄 𑀳𑁄𑀢𑀺, 𑀦 𑀧𑀸𑀦𑀸𑀕𑀸𑀭𑀕𑁄𑀘𑀭𑁄 𑀳𑁄𑀢𑀺, 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 ¶ 𑀲𑀁𑀲𑀕𑁆𑀕𑁂𑀦. 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀓𑀼𑀮𑀸𑀦𑀺 𑀲𑀤𑁆𑀥𑀸𑀦𑀺 𑀧𑀲𑀦𑁆𑀦𑀸𑀦𑀺 𑀑𑀧𑀸𑀦𑀪𑀽𑀢𑀸𑀦𑀺 𑀓𑀸𑀲𑀸𑀯𑀧𑀚𑁆𑀚𑁄𑀢𑀸𑀦𑀺 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸𑀦𑀺 𑀅𑀢𑁆𑀣𑀓𑀸𑀫𑀸𑀦𑀺 𑀳𑀺𑀢𑀓𑀸𑀫𑀸𑀦𑀺 𑀨𑀸𑀲𑀼𑀓𑀸𑀫𑀸𑀦𑀺 𑀬𑁄𑀕𑀓𑁆𑀔𑁂𑀫𑀓𑀸𑀫𑀸𑀦𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀢𑀣𑀸𑀭𑀽𑀧𑀸𑀦𑀺 𑀓𑀼𑀮𑀸𑀦𑀺 𑀲𑁂𑀯𑀢𑀺 𑀪𑀚𑀢𑀺 𑀧𑀬𑀺𑀭𑀼𑀧𑀸𑀲𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀕𑁄𑀘𑀭𑁄.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀲𑀁𑀯𑀼𑀢𑁄 𑀕𑀘𑁆𑀙𑀢𑀺, 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄…𑀧𑁂… 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀕𑁄𑀘𑀭𑁄.

𑀅𑀣 ¶ 𑀯𑀸 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 ¶ 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀕𑁄𑀘𑀭𑁄.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁…𑀧𑁂… 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸 𑀇𑀢𑀺, 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀕𑁄𑀘𑀭𑁄.

𑀘𑀢𑁆𑀢𑀸𑀭𑁄𑀧𑀺 𑀲𑀢𑀺𑀧𑀝𑁆𑀞𑀸𑀦𑀸 𑀕𑁄𑀘𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂. 𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀢𑀁 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂 𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄? 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑁂𑀤𑀦𑀸𑀲𑀼…𑀧𑁂. ¶ … 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄 𑁋 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀕𑁄𑀘𑀭𑁄. 𑀏𑀤𑀺𑀲𑁂𑀦 𑀕𑁄𑀘𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸’’𑀢𑀺 𑁋 𑀓𑁆𑀬𑀸𑀲𑁆𑀲𑀲𑁆𑀲𑀼 𑀇𑀥 𑀕𑁄𑀘𑀭𑀸.

𑀓𑀸𑀦𑀺 ¶ 𑀲𑀻𑀮𑀩𑁆𑀩𑀢𑀸𑀦𑀸𑀲𑁆𑀲𑀽𑀢𑀺. 𑀓𑀻𑀤𑀺𑀲𑁂𑀦 𑀲𑀻𑀮𑀩𑁆𑀩𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲 𑀓𑀺𑀁𑀲𑀡𑁆𑀞𑀺𑀢𑁂𑀦 𑀓𑀺𑀁𑀧𑀓𑀸𑀭𑁂𑀦 𑀓𑀺𑀁𑀧𑀝𑀺𑀪𑀸𑀕𑁂𑀦𑀸𑀢𑀺 𑀲𑀻𑀮𑀩𑁆𑀩𑀢𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀼𑀘𑁆𑀙𑀢𑀺. 𑀓𑀢𑀫𑀸 𑀲𑀻𑀮𑀩𑁆𑀩𑀢𑀧𑀸𑀭𑀺𑀲𑀼𑀤𑁆𑀥𑀺? 𑀅𑀢𑁆𑀣𑀺 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘, 𑀅𑀢𑁆𑀣𑀺 𑀯𑀢𑀁 𑀦 𑀲𑀻𑀮𑀁. 𑀓𑀢𑀫𑀁 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑁄 𑀢𑀢𑁆𑀣 𑀲𑀜𑁆𑀜𑀫𑁄 𑀲𑀁𑀯𑀭𑁄 𑀅𑀯𑀻𑀢𑀺𑀓𑁆𑀓𑀫𑁄 𑁋 𑀇𑀤𑀁 𑀲𑀻𑀮𑀁. 𑀬𑀁 𑀲𑀫𑀸𑀤𑀸𑀦𑀁 𑁋 𑀢𑀁 𑀯𑀢𑀁 ¶ . 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀁, 𑀲𑀫𑀸𑀤𑀸𑀦𑀝𑁆𑀞𑁂𑀦 𑀯𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘.

𑀓𑀢𑀫𑀁 𑀯𑀢𑀁 𑀦 𑀲𑀻𑀮𑀁? 𑀅𑀝𑁆𑀞 𑀥𑀼𑀢𑀗𑁆𑀕𑀸𑀦𑀺 𑁋 𑀆𑀭𑀜𑁆𑀜𑀺𑀓𑀗𑁆𑀕𑀁, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁, 𑀢𑁂𑀘𑀻𑀯𑀭𑀺𑀓𑀗𑁆𑀕𑀁, 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁, 𑀦𑁂𑀲𑀚𑁆𑀚𑀺𑀓𑀗𑁆𑀕𑀁, 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀢𑀁 𑀦 𑀲𑀻𑀮𑀁. 𑀯𑀻𑀭𑀺𑀬𑀲𑀫𑀸𑀤𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺 𑀯𑀢𑀁 𑀦 𑀲𑀻𑀮𑀁. 𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 ¶ 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼, 𑀲𑀭𑀻𑀭𑁂 𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢𑀁, 𑀬𑀁 𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀩𑀮𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 ¶ 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁 𑀦 𑀲𑀻𑀮𑀁.

‘‘𑀦𑀸𑀲𑀺𑀲𑁆𑀲𑀁 𑀦 𑀧𑀺𑀯𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀢𑁄 𑀦 𑀦𑀺𑀓𑁆𑀔𑀫𑁂 [𑀦 𑀦𑀺𑀓𑁆𑀔𑀫𑀺𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁭];

𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀁, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂’’𑀢𑀺.

𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁 𑀦 𑀲𑀻𑀮𑀁. 𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. 𑀦 𑀢𑀸𑀯𑀸𑀳𑀁 𑀇𑀫𑀫𑁆𑀳𑀸 𑀆𑀲𑀦𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺… 𑀦 𑀢𑀸𑀯𑀸𑀳𑀁 𑀇𑀫𑀫𑁆𑀳𑀸 𑀘𑀗𑁆𑀓𑀫𑀸 𑀑𑀭𑁄𑀳𑀺𑀲𑁆𑀲𑀸𑀫𑀺… 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀅𑀟𑁆𑀠𑀬𑁄𑀕𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀧𑀸𑀲𑀸𑀤𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀳𑀫𑁆𑀫𑀺𑀬𑀸… 𑀕𑀼𑀳𑀸𑀬… 𑀮𑁂𑀡𑀸… 𑀓𑀼𑀝𑀺𑀬𑀸… 𑀓𑀽𑀝𑀸𑀕𑀸𑀭𑀸… 𑀅𑀝𑁆𑀝𑀸… 𑀫𑀸𑀴𑀸… 𑀉𑀤𑁆𑀤𑀡𑁆𑀟𑀸… 𑀉𑀧𑀝𑁆𑀞𑀸𑀦𑀲𑀸𑀮𑀸𑀬… 𑀫𑀡𑁆𑀟𑀧𑀸… 𑀭𑀼𑀓𑁆𑀔𑀫𑀽𑀮𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀭𑀺𑀬𑀥𑀫𑁆𑀫𑀁 𑀆𑀳𑀭𑀺𑀲𑁆𑀲𑀸𑀫𑀺 𑀲𑀫𑀸𑀳𑀭𑀺𑀲𑁆𑀲𑀸𑀫𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 ¶ 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 ¶ 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁… 𑀲𑀸𑀬𑀦𑁆𑀳𑀲𑀫𑀬𑀁 ¶ … 𑀧𑀼𑀭𑁂𑀪𑀢𑁆𑀢𑀁… 𑀧𑀘𑁆𑀙𑀸𑀪𑀢𑁆𑀢𑀁… 𑀧𑀼𑀭𑀺𑀫𑀬𑀸𑀫𑀁… 𑀫𑀚𑁆𑀛𑀺𑀫𑀬𑀸𑀫𑀁… 𑀧𑀘𑁆𑀙𑀺𑀫𑀬𑀸𑀫𑀁… 𑀓𑀸𑀴𑁂… 𑀚𑀼𑀡𑁆𑀳𑁂… 𑀯𑀲𑁆𑀲𑁂… 𑀳𑁂𑀫𑀦𑁆𑀢𑁂… 𑀕𑀺𑀫𑁆𑀳𑁂… 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂… 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂… 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂 𑀅𑀭𑀺𑀬𑀥𑀫𑁆𑀫𑀁 𑀆𑀳𑀭𑀺𑀲𑁆𑀲𑀸𑀫𑀺 𑀲𑀫𑀸𑀳𑀭𑀺𑀲𑁆𑀲𑀸𑀫𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑁋 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀭𑀽𑀧𑀫𑁆𑀧𑀺 𑀯𑀻𑀭𑀺𑀬𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀢𑀁, 𑀦 𑀲𑀻𑀮𑀁 𑁋 𑀅𑀬𑀁 𑀲𑀻𑀮𑀩𑁆𑀩𑀢𑀧𑀸𑀭𑀺𑀲𑀼𑀤𑁆𑀥𑀺. 𑀏𑀤𑀺𑀲𑀸𑀬 [𑀓𑀻𑀤𑀺𑀲𑀸𑀬 (𑀲𑀻.), 𑀈𑀤𑀺𑀲𑀸𑀬 (𑀲𑁆𑀬𑀸.)] 𑀲𑀻𑀮𑀩𑁆𑀩𑀢𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸𑀢𑀺 𑁋 𑀓𑀸𑀦𑀺 𑀲𑀻𑀮𑀩𑁆𑀩𑀢𑀸𑀦𑀸𑀲𑁆𑀲𑀼.

𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺. 𑀧𑀳𑀺𑀢𑀢𑁆𑀢𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀣𑀸𑀫𑀕𑀢𑀲𑁆𑀲 𑀤𑀴𑁆𑀳𑀧𑀭𑀓𑁆𑀓𑀫𑀲𑁆𑀲 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀲𑁆𑀲 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀲𑁆𑀲 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀅𑀣 𑀯𑀸 𑀧𑁂𑀲𑀺𑀢𑀢𑁆𑀢𑀲𑁆𑀲 𑀬𑀲𑁆𑀲𑀢𑁆𑀣𑀸𑀬 𑀧𑁂𑀲𑀺𑀢𑁄 𑀅𑀢𑁆𑀢𑀢𑁆𑀣𑁂 𑀘 𑀜𑀸𑀬𑁂 𑀘 𑀮𑀓𑁆𑀔𑀡𑁂 𑀘 𑀓𑀸𑀭𑀡𑁂 𑀘 𑀞𑀸𑀦𑀸𑀞𑀸𑀦𑁂 𑀘. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲 ¶ …𑀧𑁂… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲…𑀧𑁂… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀇𑀫𑁂 𑀆𑀲𑀯𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀇𑀫𑁂 ¶ 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲…𑀧𑁂… ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀲𑁆𑀲, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀧𑁂𑀲𑀺𑀢𑀢𑁆𑀢𑀲𑁆𑀲, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁… 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀧𑁂𑀲𑀺𑀢𑀢𑁆𑀢𑀲𑁆𑀲, ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 ¶ 𑀧𑁂𑀲𑀺𑀢𑀢𑁆𑀢𑀲𑁆𑀲. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀲𑁂𑀓𑁆𑀔𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄𑀢𑀺 𑁋 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀼, 𑀓𑁆𑀬𑀸𑀲𑁆𑀲𑀲𑁆𑀲𑀼 𑀇𑀥 𑀕𑁄𑀘𑀭𑀸;

𑀓𑀸𑀦𑀺 𑀲𑀻𑀮𑀩𑁆𑀩𑀢𑀸𑀦𑀸𑀲𑁆𑀲𑀼, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺.

𑀓𑀁 𑀲𑁄 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄.

𑀓𑀁 ¶ 𑀲𑁄 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬𑀸𑀢𑀺 𑀓𑀁 𑀲𑁄 𑀲𑀺𑀓𑁆𑀔𑀁 𑀆𑀤𑀸𑀬 𑀲𑀫𑀸𑀤𑀸𑀬 𑀆𑀤𑀺𑀬𑀺𑀢𑁆𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀓𑀁 𑀲𑁄 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬.

𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄𑀢𑀺. 𑀏𑀓𑁄𑀤𑀻𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑁄 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀦𑀺𑀧𑀓𑁄𑀢𑀺 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄. 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀲𑀢𑁄. 𑀓𑀁 𑀲𑁄 ¶ 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀧𑀼𑀘𑁆𑀙𑀢𑀺. 𑀏𑀓𑁄𑀤𑀻𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀁 𑀧𑀼𑀘𑁆𑀙𑀢𑀺. 𑀦𑀺𑀧𑀓𑁄𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁 𑀧𑀼𑀘𑁆𑀙𑀢𑀺. 𑀲𑀢𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀼𑀘𑁆𑀙𑀢𑀻𑀢𑀺 𑁋 𑀓𑀁 𑀲𑁄 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄.

𑀓𑀫𑁆𑀫𑀸𑀭𑁄 ¶ 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄𑀢𑀺. 𑀓𑀫𑁆𑀫𑀸𑀭𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀓𑀸𑀭𑁄, 𑀭𑀚𑀢𑀁 𑀯𑀼𑀘𑁆𑀘𑀢𑀺 𑀚𑀸𑀢𑀭𑀽𑀧𑀁. 𑀬𑀣𑀸 𑀲𑀼𑀯𑀡𑁆𑀡𑀓𑀸𑀭𑁄 𑀚𑀸𑀢𑀭𑀽𑀧𑀲𑁆𑀲 𑀑𑀴𑀸𑀭𑀺𑀓𑀫𑁆𑀧𑀺 𑀫𑀮𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺, 𑀫𑀚𑁆𑀛𑀺𑀫𑀓𑀫𑁆𑀧𑀺 𑀫𑀮𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺, 𑀲𑀼𑀔𑀼𑀫𑀓𑀫𑁆𑀧𑀺 𑀫𑀮𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺; 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀑𑀴𑀸𑀭𑀺𑀓𑁂𑀧𑀺 𑀓𑀺𑀮𑁂𑀲𑁂 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀫𑀚𑁆𑀛𑀺𑀫𑀓𑁂𑀧𑀺 𑀓𑀺𑀮𑁂𑀲𑁂… 𑀲𑀼𑀔𑀼𑀫𑀓𑁂𑀧𑀺 𑀓𑀺𑀮𑁂𑀲𑁂 𑀥𑀫𑀢𑀺 ¶ 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀭𑀸𑀕𑀫𑀮𑀁 𑀤𑁄𑀲𑀫𑀮𑀁 𑀫𑁄𑀳𑀫𑀮𑀁 𑀫𑀸𑀦𑀫𑀮𑀁 𑀤𑀺𑀝𑁆𑀞𑀺𑀫𑀮𑀁 𑀓𑀺𑀮𑁂𑀲𑀫𑀮𑀁 𑀤𑀼𑀘𑁆𑀘𑀭𑀺𑀢𑀫𑀮𑀁 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺.

𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁…𑀧𑁂… 𑀲𑀫𑁆𑀫𑀸𑀯𑀸𑀘𑀸𑀬 𑀫𑀺𑀘𑁆𑀙𑀸𑀯𑀸𑀘𑀁… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁… 𑀲𑀫𑁆𑀫𑀸𑀆𑀚𑀻𑀯𑁂𑀦 ¶ 𑀫𑀺𑀘𑁆𑀙𑀸𑀆𑀚𑀻𑀯𑀁… 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀫𑀺𑀘𑁆𑀙𑀸𑀯𑀸𑀬𑀸𑀫𑀁… 𑀲𑀫𑁆𑀫𑀸𑀲𑀢𑀺𑀬𑀸 𑀫𑀺𑀘𑁆𑀙𑀸𑀲𑀢𑀺𑀁… 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀫𑀺𑀘𑁆𑀙𑀸𑀲𑀫𑀸𑀥𑀺𑀁… 𑀲𑀫𑁆𑀫𑀸𑀜𑀸𑀡𑁂𑀦 𑀫𑀺𑀘𑁆𑀙𑀸𑀜𑀸𑀡𑀁… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀁 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺.

𑀅𑀣 ¶ 𑀯𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂 𑀲𑀩𑁆𑀩𑁂 𑀤𑀭𑀣𑁂 𑀲𑀩𑁆𑀩𑁂 𑀧𑀭𑀺𑀴𑀸𑀳𑁂 𑀲𑀩𑁆𑀩𑁂 𑀲𑀦𑁆𑀢𑀸𑀧𑁂 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂 𑀥𑀫𑀢𑀺 𑀲𑀦𑁆𑀥𑀫𑀢𑀺 𑀦𑀺𑀤𑁆𑀥𑀫𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄.

𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋

‘‘𑀓𑀁 𑀲𑁄 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄’’𑀢𑀺.

𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 𑀬𑀤𑀺𑀤𑀁 𑀨𑀸𑀲𑀼, [𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀪𑀕𑀯𑀸]

𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀯𑁂;

𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 𑀬𑀣𑀸𑀦𑀼𑀥𑀫𑁆𑀫𑀁, 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁.

𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 ¶ 𑀬𑀤𑀺𑀤𑀁 𑀨𑀸𑀲𑀽𑀢𑀺. 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲𑀸𑀢𑀺 𑀚𑀸𑀢𑀺𑀬𑀸 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲, 𑀚𑀭𑀸𑀬… 𑀩𑁆𑀬𑀸𑀥𑀺𑀦𑀸… 𑀫𑀭𑀡𑁂𑀦… 𑀲𑁄𑀓𑁂𑀳𑀺 ¶ … 𑀧𑀭𑀺𑀤𑁂𑀯𑁂𑀳𑀺… 𑀤𑀼𑀓𑁆𑀔𑁂𑀳𑀺… 𑀤𑁄𑀫𑀦𑀲𑁆𑀲𑁂𑀳𑀺… 𑀉𑀧𑀸𑀬𑀸𑀲𑁂𑀳𑀺…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 𑀅𑀝𑁆𑀝𑀻𑀬𑀫𑀸𑀦𑀲𑁆𑀲 [𑀅𑀝𑁆𑀝𑀺𑀬𑀫𑀸𑀦𑀲𑁆𑀲 (𑀲𑁆𑀬𑀸. 𑀓.)] 𑀳𑀭𑀸𑀬𑀫𑀸𑀦𑀲𑁆𑀲𑀸𑀢𑀺 𑁋 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲. 𑀬𑀤𑀺𑀤𑀁 𑀨𑀸𑀲𑀽𑀢𑀺 𑀬𑀁 𑀨𑀸𑀲𑀼𑀯𑀺𑀳𑀸𑀭𑀁 𑀢𑀁 𑀓𑀣𑀬𑀺𑀲𑁆𑀲𑀸𑀫𑀺. 𑀓𑀢𑀫𑁄 𑀨𑀸𑀲𑀼𑀯𑀺𑀳𑀸𑀭𑁄? 𑀲𑀫𑁆𑀫𑀸𑀧𑀝𑀺𑀧𑀤𑀸 𑀅𑀦𑀼𑀮𑁄𑀫𑀧𑀝𑀺𑀧𑀤𑀸 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸 ¶ 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀘 𑀧𑀝𑀺𑀧𑀤𑀸 𑁋 𑀅𑀬𑀁 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑁋 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 𑀬𑀤𑀺𑀤𑀁 𑀨𑀸𑀲𑀼.

𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀪𑀕𑀯𑀸𑀢𑀺. 𑀢𑀁 𑀣𑁂𑀭𑀁 𑀦𑀸𑀫𑁂𑀦𑀸𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀡𑁆𑀟𑀓𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 [𑀧𑀝𑀺𑀪𑀚𑀺 (𑀲𑀻. 𑀲𑁆𑀬𑀸.) 𑀫𑀳𑀸𑀦𑀺. 𑁫𑁦 𑀦𑀢𑁆𑀣𑀺 𑀧𑀸𑀞𑀦𑀸𑀦𑀢𑁆𑀢𑀁] 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸; 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 ¶ 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀜𑁆𑀜𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 ¶ 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 ¶ 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸 ¶ ; 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁; 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀪𑀕𑀯𑀸.

𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀯𑁂𑀢𑀺. 𑀆𑀲𑀦𑀁 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀦𑀺𑀲𑀻𑀤𑀢𑀺 𑁋 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄. 𑀲𑀬𑀦𑀁 𑀯𑀼𑀘𑁆𑀘𑀢𑀺 𑀲𑁂𑀦𑀸𑀲𑀦𑀁 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸. 𑀢𑀁 𑀲𑀬𑀦𑀸𑀲𑀦𑀁 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑀲𑀤𑁆𑀤𑀲𑁆𑀲𑀯𑀦𑁂𑀦…𑀧𑁂… 𑀅𑀲𑀧𑁆𑀧𑀸𑀬𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁. 𑀢𑀁 𑀲𑀬𑀦𑀸𑀲𑀦𑀁 𑀲𑁂𑀯𑀢𑁄 𑀦𑀺𑀲𑁂𑀯𑀢𑁄 𑀲𑀁𑀲𑁂𑀯𑀢𑁄 𑀧𑀝𑀺𑀲𑁂𑀯𑀢𑁄𑀢𑀺 𑁋 𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀯𑁂.

𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 ¶ 𑀬𑀣𑀸𑀦𑀼𑀥𑀫𑁆𑀫𑀦𑁆𑀢𑀺. 𑀲𑀫𑁆𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁…𑀧𑁂… 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑀁 𑀲𑀫𑁆𑀩𑁄𑀥𑀺𑀁 𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲 𑀅𑀦𑀼𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲 𑀧𑀝𑀺𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲 𑀲𑀫𑁆𑀩𑀼𑀚𑁆𑀛𑀺𑀢𑀼𑀓𑀸𑀫𑀲𑁆𑀲 𑀅𑀥𑀺𑀕𑀦𑁆𑀢𑀼𑀓𑀸𑀫𑀲𑁆𑀲 𑀨𑀲𑁆𑀲𑀺𑀢𑀼𑀓𑀸𑀫𑀲𑁆𑀲 𑀲𑀘𑁆𑀙𑀺𑀓𑀸𑀢𑀼𑀓𑀸𑀫𑀲𑁆𑀲𑀸𑀢𑀺 𑁋 𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲.

𑀬𑀣𑀸𑀦𑀼𑀥𑀫𑁆𑀫𑀦𑁆𑀢𑀺 𑀓𑀢𑀫𑁂 𑀩𑁄𑀥𑀺𑀬𑀸 𑀅𑀦𑀼𑀥𑀫𑁆𑀫𑀸? 𑀲𑀫𑁆𑀫𑀸𑀧𑀝𑀺𑀧𑀤𑀸 𑀅𑀦𑀼𑀮𑁄𑀫𑀧𑀝𑀺𑀧𑀤𑀸 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 ¶ 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀩𑁄𑀥𑀺𑀬𑀸 𑀅𑀦𑀼𑀥𑀫𑁆𑀫𑀸. 𑀅𑀣 𑀯𑀸 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀩𑁄𑀥𑀺𑀬𑀸 𑀅𑀦𑀼𑀥𑀫𑁆𑀫𑀸𑀢𑀺 𑁋 𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 𑀬𑀣𑀸𑀦𑀼𑀥𑀫𑁆𑀫𑀁.

𑀢𑀁 ¶ 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀦𑁆𑀢𑀺. 𑀢𑀦𑁆𑀢𑀺 𑀩𑁄𑀥𑀺𑀬𑀸 𑀅𑀦𑀼𑀥𑀫𑁆𑀫𑀁. 𑀧𑀯𑀓𑁆𑀔𑀸𑀫𑀻𑀢𑀺 𑀧𑀯𑀓𑁆𑀔𑀸𑀫𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑀺𑀲𑁆𑀲𑀸𑀫𑀺. 𑀬𑀣𑀸 𑀧𑀚𑀸𑀦𑀦𑁆𑀢𑀺 𑀬𑀣𑀸 𑀧𑀚𑀸𑀦𑀁 𑀬𑀣𑀸 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀦 𑀇𑀢𑀺𑀳𑀺𑀢𑀺𑀳𑀁 𑀦 𑀇𑀢𑀺𑀓𑀺𑀭𑀸𑀬 𑀦 𑀧𑀭𑀫𑁆𑀧𑀭𑀸𑀬 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬 𑀦 𑀢𑀓𑁆𑀓𑀳𑁂𑀢𑀼 𑀦 𑀦𑀬𑀳𑁂𑀢𑀼 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀁, 𑀢𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑁋 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁.

‘‘𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 ¶ ¶ 𑀬𑀤𑀺𑀤𑀁 𑀨𑀸𑀲𑀼, [𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀪𑀕𑀯𑀸]

𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀯𑁂;

𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 𑀬𑀣𑀸𑀦𑀼𑀥𑀫𑁆𑀫𑀁, 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦’’𑀦𑁆𑀢𑀺.

𑀧𑀜𑁆𑀘𑀦𑁆𑀦𑀁 𑀥𑀻𑀭𑁄 𑀪𑀬𑀸𑀦𑀁 𑀦 𑀪𑀸𑀬𑁂, 𑀪𑀺𑀓𑁆𑀔𑀼 𑀲𑀢𑁄 𑀲𑀧𑀭𑀺𑀬𑀦𑁆𑀢𑀘𑀸𑀭𑀻;

𑀟𑀁𑀲𑀸𑀥𑀺𑀧𑀸𑀢𑀸𑀦𑀁 𑀲𑀭𑀻𑀲𑀧𑀸𑀦𑀁 [𑀲𑀺𑀭𑀺𑀁𑀲𑀧𑀸𑀦𑀁 (𑀲𑀻. 𑀓.)], 𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁.

𑀧𑀜𑁆𑀘𑀦𑁆𑀦𑀁 𑀥𑀻𑀭𑁄 𑀪𑀬𑀸𑀦𑀁 𑀦 𑀪𑀸𑀬𑁂𑀢𑀺. 𑀥𑀻𑀭𑁄𑀢𑀺 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀥𑀻𑀭𑁄 𑀧𑀜𑁆𑀘𑀦𑁆𑀦𑀁 𑀪𑀬𑀸𑀦𑀁 𑀦 𑀪𑀸𑀬𑁂𑀬𑁆𑀬 𑀦 𑀢𑀲𑁂𑀬𑁆𑀬 𑀦 𑀲𑀦𑁆𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 𑀦 𑀧𑀭𑀺𑀢𑁆𑀢𑀲𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬 ¶ , 𑀅𑀪𑀻𑀭𑀽 𑀅𑀲𑁆𑀲 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀧𑀜𑁆𑀘𑀦𑁆𑀦𑀁 𑀥𑀻𑀭𑁄 𑀪𑀬𑀸𑀦𑀁 𑀦 𑀪𑀸𑀬𑁂.

𑀪𑀺𑀓𑁆𑀔𑀼 𑀲𑀢𑁄 𑀲𑀧𑀭𑀺𑀬𑀦𑁆𑀢𑀘𑀸𑀭𑀻𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀯𑀸 𑀪𑀺𑀓𑁆𑀔𑀼 𑀲𑁂𑀓𑁆𑀔𑁄 𑀯𑀸 𑀪𑀺𑀓𑁆𑀔𑀼. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄 𑁋 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀲𑀧𑀭𑀺𑀬𑀦𑁆𑀢𑀘𑀸𑀭𑀻𑀢𑀺 𑀘𑀢𑁆𑀢𑀸𑀭𑁄 𑀧𑀭𑀺𑀬𑀦𑁆𑀢𑀸 𑁋 𑀲𑀻𑀮𑀲𑀁𑀯𑀭𑀧𑀭𑀺𑀬𑀦𑁆𑀢𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀭𑀺𑀬𑀦𑁆𑀢𑁄, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀧𑀭𑀺𑀬𑀦𑁆𑀢𑁄, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀧𑀭𑀺𑀬𑀦𑁆𑀢𑁄.

𑀓𑀢𑀫𑁄 ¶ 𑀲𑀻𑀮𑀲𑀁𑀯𑀭𑀧𑀭𑀺𑀬𑀦𑁆𑀢𑁄? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 ¶ . 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀦𑁆𑀢𑁄 𑀲𑀻𑀮𑀲𑀁𑀯𑀭𑀧𑀭𑀺𑀬𑀦𑁆𑀢𑁂 𑀘𑀭𑀢𑀺, 𑀫𑀭𑀺𑀬𑀸𑀤𑀁 𑀦 𑀪𑀺𑀦𑁆𑀤𑀢𑀺 𑁋 𑀅𑀬𑀁 𑀲𑀻𑀮𑀲𑀁𑀯𑀭𑀧𑀭𑀺𑀬𑀦𑁆𑀢𑁄.

𑀓𑀢𑀫𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀭𑀺𑀬𑀦𑁆𑀢𑁄? 𑀇𑀥 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁…𑀧𑁂… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 ¶ 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑀼𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀭𑀺𑀬𑀦𑁆𑀢𑁂 𑀘𑀭𑀢𑀺, 𑀫𑀭𑀺𑀬𑀸𑀤𑀁 𑀦 𑀪𑀺𑀦𑁆𑀤𑀢𑀺 𑁋 𑀅𑀬𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀭𑀺𑀬𑀦𑁆𑀢𑁄.

𑀓𑀢𑀫𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀧𑀭𑀺𑀬𑀦𑁆𑀢𑁄? 𑀇𑀥 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 ¶ 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 ¶ 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺. 𑀅𑀓𑁆𑀔𑀩𑁆𑀪𑀜𑁆𑀚𑀦𑀯𑀡𑀧𑀝𑀺𑀘𑁆𑀙𑀸𑀤𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀦𑁆𑀢𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀧𑀭𑀺𑀬𑀦𑁆𑀢𑁂 𑀘𑀭𑀢𑀺, 𑀫𑀭𑀺𑀬𑀸𑀤𑀁 𑀦 𑀪𑀺𑀦𑁆𑀤𑀢𑀺 𑁋 𑀅𑀬𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀧𑀭𑀺𑀬𑀦𑁆𑀢𑁄.

𑀓𑀢𑀫𑁄 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀧𑀭𑀺𑀬𑀦𑁆𑀢𑁄? 𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀧𑀘𑁆𑀘𑀼𑀝𑁆𑀞𑀸𑀬 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀪𑀤𑁆𑀤𑁂𑀓𑀭𑀢𑁆𑀢𑀯𑀺𑀳𑀸𑀭𑀁 [𑀪𑀤𑁆𑀤𑁂𑀓𑀭𑀢𑁆𑀢𑀺𑀯𑀺𑀳𑀸𑀭𑀁 (𑀲𑀻. 𑀓.)] 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀦𑁆𑀢𑁄 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀧𑀭𑀺𑀬𑀦𑁆𑀢𑁂 𑀘𑀭𑀢𑀺, 𑀫𑀭𑀺𑀬𑀸𑀤𑀁 𑀦 𑀪𑀺𑀦𑁆𑀤𑀢𑀺 𑁋 𑀅𑀬𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀧𑀭𑀺𑀬𑀦𑁆𑀢𑁄𑀢𑀺 𑁋 𑀪𑀺𑀓𑁆𑀔𑀼 𑀲𑀢𑁄 𑀲𑀧𑀭𑀺𑀬𑀦𑁆𑀢𑀘𑀸𑀭𑀻.

𑀟𑀁𑀲𑀸𑀥𑀺𑀧𑀸𑀢𑀸𑀦𑀁 𑀲𑀭𑀻𑀲𑀧𑀸𑀦𑀦𑁆𑀢𑀺. 𑀟𑀁𑀲𑀸 𑀯𑀼𑀘𑁆𑀘𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀬𑁄. 𑀅𑀥𑀺𑀧𑀸𑀢𑀓𑀸 𑀯𑀼𑀘𑁆𑀘𑀦𑁆𑀢𑀺 𑀲𑀩𑁆𑀩𑀸𑀧𑀺 𑀫𑀓𑁆𑀔𑀺𑀓𑀸𑀬𑁄. 𑀓𑀺𑀁𑀓𑀸𑀭𑀡𑀸 𑀅𑀥𑀺𑀧𑀸𑀢𑀓𑀸 𑀯𑀼𑀘𑁆𑀘𑀦𑁆𑀢𑀺 𑀲𑀩𑁆𑀩𑀸𑀧𑀺 𑀫𑀓𑁆𑀔𑀺𑀓𑀸𑀬𑁄? 𑀢𑀸 𑀉𑀧𑁆𑀧𑀢𑀺𑀢𑁆𑀯𑀸 ¶ 𑀉𑀧𑁆𑀧𑀢𑀺𑀢𑁆𑀯𑀸 𑀔𑀸𑀤𑀦𑁆𑀢𑀺; 𑀢𑀁𑀓𑀸𑀭𑀡𑀸 𑀅𑀥𑀺𑀧𑀸𑀢𑀓𑀸 𑀯𑀼𑀘𑁆𑀘𑀦𑁆𑀢𑀺 𑀲𑀩𑁆𑀩𑀸𑀧𑀺 𑀫𑀓𑁆𑀔𑀺𑀓𑀸𑀬𑁄. 𑀲𑀭𑀻𑀲𑀧𑀸 𑀯𑀼𑀘𑁆𑀘𑀦𑁆𑀢𑀺 𑀅𑀳𑀻𑀢𑀺 𑁋 𑀟𑀁𑀲𑀸𑀥𑀺𑀧𑀸𑀢𑀸𑀦𑀁 𑀲𑀭𑀻𑀲𑀧𑀸𑀦𑀁.

𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀁 ¶ ¶ 𑀘𑀢𑀼𑀧𑁆𑀧𑀤𑀸𑀦𑀦𑁆𑀢𑀺. 𑀫𑀦𑀼𑀲𑁆𑀲𑀨𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀺 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸. 𑀢𑁂 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑁂𑀬𑁆𑀬𑀼𑀁 𑀯𑀸𑀤𑀁 𑀯𑀸 𑀆𑀭𑁄𑀧𑁂𑀬𑁆𑀬𑀼𑀁 𑀅𑀓𑁆𑀓𑁄𑀲𑁂𑀬𑁆𑀬𑀼𑀁 𑀧𑀭𑀺𑀪𑀸𑀲𑁂𑀬𑁆𑀬𑀼𑀁 𑀭𑁄𑀲𑁂𑀬𑁆𑀬𑀼𑀁 𑀯𑀺𑀭𑁄𑀲𑁂𑀬𑁆𑀬𑀼𑀁 𑀳𑀺𑀁𑀲𑁂𑀬𑁆𑀬𑀼𑀁 𑀯𑀺𑀳𑀺𑀁𑀲𑁂𑀬𑁆𑀬𑀼𑀁 𑀳𑁂𑀞𑁂𑀬𑁆𑀬𑀼𑀁 𑀯𑀺𑀳𑁂𑀞𑁂𑀬𑁆𑀬𑀼𑀁 𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑀁 𑀯𑀸 𑀓𑀭𑁂𑀬𑁆𑀬𑀼𑀁. 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀢𑁄 𑀉𑀧𑀖𑀸𑀢𑁄 𑁋 𑀫𑀦𑀼𑀲𑁆𑀲𑀨𑀲𑁆𑀲𑁄. 𑀘𑀢𑀼𑀧𑁆𑀧𑀤𑀸𑀦𑀦𑁆𑀢𑀺 𑀲𑀻𑀳𑀸 𑀩𑁆𑀬𑀕𑁆𑀖𑀸 ¶ 𑀤𑀻𑀧𑀺 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 𑀳𑀢𑁆𑀣𑀻. 𑀢𑁂 𑀪𑀺𑀓𑁆𑀔𑀼𑀁 𑀫𑀤𑁆𑀤𑁂𑀬𑁆𑀬𑀼𑀁 𑀔𑀸𑀤𑁂𑀬𑁆𑀬𑀼𑀁 𑀳𑀺𑀁𑀲𑁂𑀬𑁆𑀬𑀼𑀁 𑀯𑀺𑀳𑀺𑀁𑀲𑁂𑀬𑁆𑀬𑀼𑀁 𑀳𑁂𑀞𑁂𑀬𑁆𑀬𑀼𑀁 𑀯𑀺𑀳𑁂𑀞𑁂𑀬𑁆𑀬𑀼𑀁 𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑀁 𑀯𑀸 𑀓𑀭𑁂𑀬𑁆𑀬𑀼𑀁. 𑀘𑀢𑀼𑀧𑁆𑀧𑀤𑀢𑁄 𑀉𑀧𑀖𑀸𑀢𑁄 𑀬𑀁 𑀓𑀺𑀜𑁆𑀘𑀺 𑀘𑀢𑀼𑀧𑁆𑀧𑀤𑀪𑀬𑀦𑁆𑀢𑀺 𑁋 𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁.

‘‘𑀧𑀜𑁆𑀘𑀦𑁆𑀦𑀁 𑀥𑀻𑀭𑁄 𑀪𑀬𑀸𑀦𑀁 𑀦 𑀪𑀸𑀬𑁂, 𑀪𑀺𑀓𑁆𑀔𑀼 𑀲𑀢𑁄 𑀲𑀧𑀭𑀺𑀬𑀦𑁆𑀢𑀘𑀸𑀭𑀻;

𑀟𑀁𑀲𑀸𑀥𑀺𑀧𑀸𑀢𑀸𑀦𑀁 𑀲𑀭𑀻𑀲𑀧𑀸𑀦𑀁, 𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀁 𑀘𑀢𑀼𑀧𑁆𑀧𑀤𑀸𑀦’’𑀦𑁆𑀢𑀺.

𑀧𑀭𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀦 𑀲𑀦𑁆𑀢𑀲𑁂𑀬𑁆𑀬, 𑀤𑀺𑀲𑁆𑀯𑀸𑀧𑀺 𑀢𑁂𑀲𑀁 𑀩𑀳𑀼𑀪𑁂𑀭𑀯𑀸𑀦𑀺;

𑀅𑀣𑀸𑀧𑀭𑀸𑀦𑀺 𑀅𑀪𑀺𑀲𑀫𑁆𑀪𑀯𑁂𑀬𑁆𑀬, 𑀧𑀭𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀸𑀦𑀼𑀏𑀲𑀻.

𑀧𑀭𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀦 𑀲𑀦𑁆𑀢𑀲𑁂𑀬𑁆𑀬, 𑀤𑀺𑀲𑁆𑀯𑀸𑀧𑀺 𑀢𑁂𑀲𑀁 𑀩𑀳𑀼𑀪𑁂𑀭𑀯𑀸𑀦𑀻𑀢𑀺. 𑀧𑀭𑀥𑀫𑁆𑀫𑀺𑀓𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑀳𑀥𑀫𑁆𑀫𑀺𑀓𑁂 𑀞𑀧𑁂𑀢𑁆𑀯𑀸 𑀬𑁂 𑀓𑁂𑀘𑀺 𑀩𑀼𑀤𑁆𑀥𑁂 𑀥𑀫𑁆𑀫𑁂 𑀲𑀗𑁆𑀖𑁂 𑀅𑀧𑁆𑀧𑀲𑀦𑁆𑀦𑀸 ¶ . 𑀢𑁂 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑁂𑀬𑁆𑀬𑀼𑀁 𑀯𑀸𑀤𑀁 𑀯𑀸 𑀆𑀭𑁄𑀧𑁂𑀬𑁆𑀬𑀼𑀁 𑀅𑀓𑁆𑀓𑁄𑀲𑁂𑀬𑁆𑀬𑀼𑀁 𑀧𑀭𑀺𑀪𑀸𑀲𑁂𑀬𑁆𑀬𑀼𑀁 𑀭𑁄𑀲𑁂𑀬𑁆𑀬𑀼𑀁 𑀯𑀺𑀭𑁄𑀲𑁂𑀬𑁆𑀬𑀼𑀁 𑀳𑀺𑀁𑀲𑁂𑀬𑁆𑀬𑀼𑀁 𑀯𑀺𑀳𑀺𑀁𑀲𑁂𑀬𑁆𑀬𑀼𑀁 𑀳𑁂𑀞𑁂𑀬𑁆𑀬𑀼𑀁 𑀯𑀺𑀳𑁂𑀞𑁂𑀬𑁆𑀬𑀼𑀁 𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑁂𑀬𑁆𑀬𑀼𑀁 𑀉𑀧𑀖𑀸𑀢𑀁 𑀯𑀸 𑀓𑀭𑁂𑀬𑁆𑀬𑀼𑀁. 𑀢𑁂𑀲𑀁 𑀩𑀳𑀼𑀪𑁂𑀭𑀯𑁂 𑀧𑀲𑁆𑀲𑀺𑀢𑁆𑀯𑀸 𑀯𑀸 𑀲𑀼𑀡𑀺𑀢𑁆𑀯𑀸 𑀯𑀸 𑀦 𑀯𑁂𑀥𑁂𑀬𑁆𑀬 𑀦 𑀧𑀯𑁂𑀥𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬 𑀦 𑀢𑀲𑁂𑀬𑁆𑀬 𑀦 𑀲𑀦𑁆𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 𑀦 𑀧𑀭𑀺𑀢𑁆𑀢𑀲𑁂𑀬𑁆𑀬 𑀦 𑀪𑀸𑀬𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀪𑀻𑀭𑀽 𑀅𑀲𑁆𑀲 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀧𑀭𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀦 𑀲𑀦𑁆𑀢𑀲𑁂𑀬𑁆𑀬 𑀤𑀺𑀲𑁆𑀯𑀸𑀧𑀺 𑀢𑁂𑀲𑀁 𑀩𑀳𑀼𑀪𑁂𑀭𑀯𑀸𑀦𑀺.

𑀅𑀣𑀸𑀧𑀭𑀸𑀦𑀺 𑀅𑀪𑀺𑀲𑀫𑁆𑀪𑀯𑁂𑀬𑁆𑀬, 𑀧𑀭𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀸𑀦𑀼𑀏𑀲𑀻𑀢𑀺. 𑀅𑀣𑀸𑀧𑀭𑀸𑀦𑀺𑀧𑀺 𑀅𑀢𑁆𑀣𑀺 𑀅𑀪𑀺𑀲𑀫𑁆𑀪𑁄𑀢𑀩𑁆𑀩𑀸𑀦𑀺 𑀅𑀪𑀺𑀪𑀯𑀺𑀢𑀩𑁆𑀩𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑀩𑁆𑀩𑀸𑀦𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀺 ¶ 𑀫𑀤𑁆𑀤𑀺𑀢𑀩𑁆𑀩𑀸𑀦𑀺. 𑀧𑀭𑀺𑀲𑁆𑀲𑀬𑀸𑀢𑀺 ¶ 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘…𑀧𑁂… 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 ¶ 𑁋 𑀧𑀭𑀺𑀲𑁆𑀲𑀬𑀸. 𑀓𑀼𑀲𑀮𑀸𑀦𑀼𑀏𑀲𑀻𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁…𑀧𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀏𑀲𑀦𑁆𑀢𑁂𑀦 𑀕𑀯𑁂𑀲𑀦𑁆𑀢𑁂𑀦 𑀧𑀭𑀺𑀬𑁂𑀲𑀦𑁆𑀢𑁂𑀦 𑀧𑀭𑀺𑀲𑁆𑀲𑀬𑀸 𑀅𑀪𑀺𑀲𑀫𑁆𑀪𑁄𑀢𑀩𑁆𑀩𑀸 𑀅𑀪𑀺𑀪𑀯𑀺𑀢𑀩𑁆𑀩𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑀩𑁆𑀩𑀸 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸 𑀫𑀤𑁆𑀤𑀺𑀢𑀩𑁆𑀩𑀸𑀢𑀺 𑁋 𑀅𑀣𑀸𑀧𑀭𑀸𑀦𑀺 𑀅𑀪𑀺𑀲𑀫𑁆𑀪𑀯𑁂𑀬𑁆𑀬 𑀧𑀭𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀸𑀦𑀼𑀏𑀲𑀻.

‘‘𑀧𑀭𑀥𑀫𑁆𑀫𑀺𑀓𑀸𑀦𑀫𑁆𑀧𑀺 ¶ 𑀦 𑀲𑀦𑁆𑀢𑀲𑁂𑀬𑁆𑀬, 𑀤𑀺𑀲𑁆𑀯𑀸𑀧𑀺 𑀢𑁂𑀲𑀁 𑀩𑀳𑀼𑀪𑁂𑀭𑀯𑀸𑀦𑀺;

𑀅𑀣𑀸𑀧𑀭𑀸𑀦𑀺 𑀅𑀪𑀺𑀲𑀫𑁆𑀪𑀯𑁂𑀬𑁆𑀬, 𑀧𑀭𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀸𑀦𑀼𑀏𑀲𑀻’’𑀢𑀺.

𑀆𑀢𑀗𑁆𑀓𑀨𑀲𑁆𑀲𑁂𑀦 𑀔𑀼𑀤𑀸𑀬 𑀨𑀼𑀝𑁆𑀞𑁄, 𑀲𑀻𑀢𑀁 𑀅𑀣𑀼𑀡𑁆𑀳𑀁 [𑀅𑀢𑀼𑀡𑁆𑀳𑀁 (𑀲𑀻. 𑀓.)] 𑀅𑀥𑀺𑀯𑀸𑀲𑀬𑁂𑀬𑁆𑀬;

𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸 𑀅𑀦𑁄𑀓𑁄, 𑀯𑀻𑀭𑀺𑀬𑀧𑀭𑀓𑁆𑀓𑀫𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬.

𑀆𑀢𑀗𑁆𑀓𑀨𑀲𑁆𑀲𑁂𑀦 𑀔𑀼𑀤𑀸𑀬 𑀨𑀼𑀝𑁆𑀞𑁄𑀢𑀺. 𑀆𑀢𑀗𑁆𑀓𑀨𑀲𑁆𑀲𑁄 𑀯𑀼𑀘𑁆𑀘𑀢𑀺 𑀭𑁄𑀕𑀨𑀲𑁆𑀲𑁄. 𑀭𑁄𑀕𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲; 𑀘𑀓𑁆𑀔𑀼𑀭𑁄𑀕𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲, 𑀲𑁄𑀢𑀭𑁄𑀕𑁂𑀦… 𑀖𑀸𑀦𑀭𑁄𑀕𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦… 𑀓𑀸𑀬𑀭𑁄𑀕𑁂𑀦…𑀧𑁂… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲. 𑀔𑀼𑀤𑀸 𑀯𑀼𑀘𑁆𑀘𑀢𑀺 𑀙𑀸𑀢𑀓𑁄. 𑀙𑀸𑀢𑀓𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸𑀢𑀺 𑁋 𑀆𑀢𑀗𑁆𑀓𑀨𑀲𑁆𑀲𑁂𑀦 𑀔𑀼𑀤𑀸𑀬 𑀨𑀼𑀝𑁆𑀞𑁄.

𑀲𑀻𑀢𑀁 𑀅𑀣𑀼𑀡𑁆𑀳𑀁 𑀅𑀥𑀺𑀯𑀸𑀲𑀬𑁂𑀬𑁆𑀬𑀸𑀢𑀺. 𑀲𑀻𑀢𑀦𑁆𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀻𑀢𑀁 𑀳𑁄𑀢𑀺 𑁋 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀧𑁆𑀧𑀓𑁄𑀧𑀯𑀲𑁂𑀦 [𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀲𑀗𑁆𑀓𑁄𑀧𑀯𑀲𑁂𑀦 (𑀲𑁆𑀬𑀸.)] 𑀯𑀸 𑀲𑀻𑀢𑀁 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀉𑀢𑀼𑀯𑀲𑁂𑀦 𑀯𑀸 𑀲𑀻𑀢𑀁 𑀳𑁄𑀢𑀺. 𑀉𑀡𑁆𑀳𑀦𑁆𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀡𑁆𑀳𑀁 𑀳𑁄𑀢𑀺 𑁋 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀧𑁆𑀧𑀓𑁄𑀧𑀯𑀲𑁂𑀦 𑀯𑀸 𑀉𑀡𑁆𑀳𑀁 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀉𑀢𑀼𑀯𑀲𑁂𑀦 𑀯𑀸 𑀉𑀡𑁆𑀳𑀁 𑀳𑁄𑀢𑀻𑀢𑀺 𑁋 𑀲𑀻𑀢𑀁 𑀅𑀣𑀼𑀡𑁆𑀳𑀁 ¶ . 𑀅𑀥𑀺𑀯𑀸𑀲𑀬𑁂𑀬𑁆𑀬𑀸𑀢𑀺 𑀔𑀫𑁄 𑀅𑀲𑁆𑀲 ¶ 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 ¶ 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 [𑀢𑀺𑀧𑁆𑀧𑀸𑀦𑀁 (𑀲𑀻. 𑀲𑁆𑀬𑀸.)] 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀅𑀲𑁆𑀲𑀸𑀢𑀺 𑁋 𑀲𑀻𑀢𑀁 𑀅𑀣𑀼𑀡𑁆𑀳𑀁 𑀅𑀥𑀺𑀯𑀸𑀲𑀬𑁂𑀬𑁆𑀬.

𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸 𑀅𑀦𑁄𑀓𑁄𑀢𑀺. 𑀲𑁄 𑀢𑁂𑀳𑀻𑀢𑀺 𑀆𑀢𑀗𑁆𑀓𑀨𑀲𑁆𑀲𑁂𑀦 𑀘 𑀔𑀼𑀤𑀸𑀬 𑀘 𑀲𑀻𑀢𑁂𑀦 𑀘 𑀉𑀡𑁆𑀳𑁂𑀦 𑀘 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸𑀢𑀺 𑁋 𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄. 𑀩𑀳𑀼𑀥𑀸𑀢𑀺 𑀅𑀦𑁂𑀓𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀸𑀢𑀺 𑁋 𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸 ¶ . 𑀅𑀦𑁄𑀓𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀯𑀺𑀜𑁆𑀜𑀸𑀡𑀲𑁆𑀲 𑀑𑀓𑀸𑀲𑀁 𑀦 𑀓𑀭𑁄𑀢𑀻𑀢𑀺𑀧𑀺 𑁋 𑀅𑀦𑁄𑀓𑁄. 𑀅𑀣 𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑁆𑀲 𑀑𑀓𑀸𑀲𑀁 𑀦 𑀓𑀭𑁄𑀢𑀻𑀢𑀺𑀧𑀺 𑁋 𑀅𑀦𑁄𑀓𑁄𑀢𑀺 𑁋 𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸 𑀅𑀦𑁄𑀓𑁄.

𑀯𑀻𑀭𑀺𑀬𑀧𑀭𑀓𑁆𑀓𑀫𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬𑀸𑀢𑀺. 𑀯𑀻𑀭𑀺𑀬𑀧𑀭𑀓𑁆𑀓𑀫𑁄 𑀯𑀼𑀘𑁆𑀘𑀢𑀺 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑁆𑀓𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀅𑀧𑁆𑀧𑀝𑀺𑀯𑀸𑀦𑀻 𑀣𑀸𑀫𑁄 𑀥𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮𑀁 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀯𑀻𑀭𑀺𑀬𑀧𑀭𑀓𑁆𑀓𑀫𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬𑀸𑀢𑀺. 𑀯𑀻𑀭𑀺𑀬𑀁 𑀧𑀭𑀓𑁆𑀓𑀫𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬 𑀣𑀺𑀭𑀁 𑀓𑀭𑁂𑀬𑁆𑀬, 𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀲𑁆𑀲 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄𑀢𑀺 𑁋 𑀯𑀻𑀭𑀺𑀬𑀧𑀭𑀓𑁆𑀓𑀫𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬.

‘‘𑀆𑀢𑀗𑁆𑀓𑀨𑀲𑁆𑀲𑁂𑀦 ¶ 𑀔𑀼𑀤𑀸𑀬 𑀨𑀼𑀝𑁆𑀞𑁄, 𑀲𑀻𑀢𑀁 𑀅𑀣𑀼𑀡𑁆𑀳𑀁 𑀅𑀥𑀺𑀯𑀸𑀲𑀬𑁂𑀬𑁆𑀬;

𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸 𑀅𑀦𑁄𑀓𑁄, 𑀯𑀻𑀭𑀺𑀬𑀧𑀭𑀓𑁆𑀓𑀫𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬𑀸’’𑀢𑀺.

𑀣𑁂𑀬𑁆𑀬𑀁 𑀦 𑀓𑀸𑀭𑁂 𑀦 𑀫𑀼𑀲𑀸 𑀪𑀡𑁂𑀬𑁆𑀬, 𑀫𑁂𑀢𑁆𑀢𑀸𑀬 𑀨𑀲𑁆𑀲𑁂 𑀢𑀲𑀣𑀸𑀯𑀭𑀸𑀦𑀺;

𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸, 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄𑀢𑀺 𑀯𑀺𑀦𑁄𑀤𑀬𑁂𑀬𑁆𑀬.

𑀣𑁂𑀬𑁆𑀬𑀁 ¶ 𑀦 𑀓𑀸𑀭𑁂 𑀦 𑀫𑀼𑀲𑀸 𑀪𑀡𑁂𑀬𑁆𑀬𑀸𑀢𑀺. 𑀣𑁂𑀬𑁆𑀬𑀁 𑀦 𑀓𑀸𑀭𑁂𑀢𑀺 𑀇𑀥 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀅𑀲𑁆𑀲 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 ¶ 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀣𑁂𑀬𑁆𑀬𑀁 𑀦 𑀓𑀸𑀭𑁂. 𑀦 𑀫𑀼𑀲𑀸 𑀪𑀡𑁂𑀬𑁆𑀬𑀸𑀢𑀺 𑀇𑀥 𑀪𑀺𑀓𑁆𑀔𑀼 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀅𑀲𑁆𑀲 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸𑀢𑀺 𑁋 𑀣𑁂𑀬𑁆𑀬𑀁 𑀦 𑀓𑀸𑀭𑁂 𑀦 𑀫𑀼𑀲𑀸 𑀪𑀡𑁂𑀬𑁆𑀬.

𑀫𑁂𑀢𑁆𑀢𑀸𑀬 𑀨𑀲𑁆𑀲𑁂 𑀢𑀲𑀣𑀸𑀯𑀭𑀸𑀦𑀻𑀢𑀺. 𑀫𑁂𑀢𑁆𑀢𑀸𑀢𑀺 𑀬𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀅𑀦𑀼𑀤𑀬𑀸 𑀅𑀦𑀼𑀤𑀬𑀦𑀸 𑀅𑀦𑀼𑀤𑀬𑀺𑀢𑀢𑁆𑀢𑀁 [𑀅𑀦𑀼𑀤𑁆𑀤𑀬𑀸 (𑀲𑀻.) 𑀏𑀯𑀫𑀻𑀤𑀺𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼𑀧𑀺 𑀤𑁆𑀯𑀺𑀪𑀸𑀯𑀯𑀲𑁂𑀦. 𑀅𑀦𑀼𑀤𑀸 𑀅𑀦𑀼𑀤𑀸𑀬𑀦𑀸 𑀅𑀦𑀼𑀤𑀸𑀬𑀺𑀢𑀢𑁆𑀢𑀁 (𑀲𑁆𑀬𑀸. 𑀓.)] 𑀳𑀺𑀢𑁂𑀲𑀺𑀢𑀸 𑀅𑀦𑀼𑀓𑀫𑁆𑀧𑀸 𑀅𑀩𑁆𑀬𑀸𑀧𑀸𑀤𑁄 𑀅𑀩𑁆𑀬𑀸𑀧𑀚𑁆𑀚𑁄 [𑀅𑀩𑁆𑀬𑀸𑀧𑀚𑁆𑀛𑁄 (𑀲𑁆𑀬𑀸. 𑀓.)] 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀢𑀲𑀸𑀢𑀺 𑀬𑁂𑀲𑀁 𑀢𑀲𑀺𑀢𑀸 𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀅𑀧𑁆𑀧𑀳𑀻𑀦𑀸. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸? 𑀢𑁂 𑀢𑀲𑀦𑁆𑀢𑀺 𑀉𑀢𑁆𑀢𑀲𑀦𑁆𑀢𑀺 𑀧𑀭𑀺𑀢𑀲𑀦𑁆𑀢𑀺 ¶ 𑀪𑀸𑀬𑀦𑁆𑀢𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺; 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸. 𑀣𑀸𑀯𑀭𑀸𑀢𑀺 𑀬𑁂𑀲𑀁 𑀢𑀲𑀺𑀢𑀸 𑀢𑀡𑁆𑀳𑀸 𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀧𑀳𑀻𑀦𑀸. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸? 𑀢𑁂 𑀦 𑀢𑀲𑀦𑁆𑀢𑀺 𑀦 𑀉𑀢𑁆𑀢𑀲𑀦𑁆𑀢𑀺 𑀦 𑀧𑀭𑀺𑀢𑀲𑀦𑁆𑀢𑀺 𑀦 𑀪𑀸𑀬𑀦𑁆𑀢𑀺 𑀲𑀦𑁆𑀢𑀸𑀲𑀁 𑀦 𑀆𑀧𑀚𑁆𑀚𑀦𑁆𑀢𑀺; 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸. 𑀫𑁂𑀢𑁆𑀢𑀸𑀬 𑀨𑀲𑁆𑀲𑁂 𑀢𑀲𑀣𑀸𑀯𑀭𑀸𑀦𑀻𑀢𑀺. 𑀢𑀲𑁂 ¶ 𑀘 𑀣𑀸𑀯𑀭𑁂 𑀘 𑀫𑁂𑀢𑁆𑀢𑀸𑀬 𑀨𑀲𑁆𑀲𑁂𑀬𑁆𑀬 𑀨𑀭𑁂𑀬𑁆𑀬, 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀫𑁂𑀢𑁆𑀢𑀸𑀬 𑀨𑀲𑁆𑀲𑁂 𑀢𑀲𑀣𑀸𑀯𑀭𑀸𑀦𑀺.

𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸𑀢𑀺. 𑀬𑀤𑀸𑀢𑀺 𑀬𑀤𑀸. 𑀫𑀦𑀲𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀳𑁄𑀢𑀺 𑀮𑀼𑀴𑀺𑀢𑀁 𑀏𑀭𑀺𑀢𑀁 𑀖𑀝𑁆𑀝𑀺𑀢𑀁 𑀘𑀮𑀺𑀢𑀁 𑀪𑀦𑁆𑀢𑀁 𑀅𑀯𑀽𑀧𑀲𑀦𑁆𑀢𑀁. 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦… 𑀭𑀸𑀕𑁂𑀦… 𑀤𑁄𑀲𑁂𑀦… 𑀫𑁄𑀳𑁂𑀦… 𑀓𑁄𑀥𑁂𑀦… 𑀉𑀧𑀦𑀸𑀳𑁂𑀦… 𑀫𑀓𑁆𑀔𑁂𑀦… 𑀧𑀴𑀸𑀲𑁂𑀦… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑁂𑀦… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑁂𑀦… 𑀣𑀫𑁆𑀪𑁂𑀦… 𑀲𑀸𑀭𑀫𑁆𑀪𑁂𑀦… 𑀫𑀸𑀦𑁂𑀦… 𑀅𑀢𑀺𑀫𑀸𑀦𑁂𑀦… 𑀫𑀤𑁂𑀦… 𑀧𑀫𑀸𑀤𑁂𑀦… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀳𑁄𑀢𑀺 𑀮𑀼𑀴𑀺𑀢𑀁 𑀏𑀭𑀺𑀢𑀁 𑀖𑀝𑁆𑀝𑀺𑀢𑀁 ¶ 𑀘𑀮𑀺𑀢𑀁 𑀪𑀦𑁆𑀢𑀁 𑀅𑀯𑀽𑀧𑀲𑀦𑁆𑀢𑀁. 𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸𑀢𑀺. 𑀘𑀺𑀢𑁆𑀢𑀲𑁆𑀲 ¶ 𑀆𑀯𑀺𑀮𑀪𑀸𑀯𑀁 𑀚𑀸𑀦𑁂𑀬𑁆𑀬 𑀆𑀚𑀸𑀦𑁂𑀬𑁆𑀬 𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑁋 𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸.

𑀓𑀡𑁆𑀳𑀲𑁆𑀲 ¶ 𑀧𑀓𑁆𑀔𑁄𑀢𑀺 𑀯𑀺𑀦𑁄𑀤𑀬𑁂𑀬𑁆𑀬𑀸𑀢𑀺. 𑀓𑀡𑁆𑀳𑁄𑀢𑀺 𑀬𑁄 𑀲𑁄 𑀫𑀸𑀭𑁄 𑀓𑀡𑁆𑀳𑁄 𑀅𑀥𑀺𑀧𑀢𑀺 𑀅𑀦𑁆𑀢𑀕𑀼 𑀦𑀫𑀼𑀘𑀺 𑀧𑀫𑀢𑁆𑀢𑀩𑀦𑁆𑀥𑀼. 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄 𑀫𑀸𑀭𑀧𑀓𑁆𑀔𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀸𑀫𑀺𑀲𑀁 𑀫𑀸𑀭𑀯𑀺𑀲𑀬𑁄 𑀫𑀸𑀭𑀦𑀺𑀯𑀸𑀲𑁄 𑀫𑀸𑀭𑀕𑁄𑀘𑀭𑁄 𑀫𑀸𑀭𑀩𑀦𑁆𑀥𑀦𑀦𑁆𑀢𑀺 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺. 𑀏𑀯𑀫𑁆𑀧𑀺 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄𑀢𑀺 𑀯𑀺𑀦𑁄𑀤𑀬𑁂𑀬𑁆𑀬. 𑀅𑀣 𑀯𑀸 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄 𑀫𑀸𑀭𑀧𑀓𑁆𑀔𑁄 𑀅𑀓𑀼𑀲𑀮𑀧𑀓𑁆𑀔𑁄 𑀤𑀼𑀓𑁆𑀔𑀼𑀤𑁆𑀤𑀬𑁄 𑀤𑀼𑀓𑁆𑀔𑀯𑀺𑀧𑀸𑀓𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀲𑀁𑀯𑀢𑁆𑀢𑀦𑀺𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀲𑀁𑀯𑀢𑁆𑀢𑀦𑀺𑀓𑁄𑀢𑀺 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺. 𑀏𑀯𑀫𑁆𑀧𑀺 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄𑀢𑀺 𑀯𑀺𑀦𑁄𑀤𑀬𑁂𑀬𑁆𑀬.

‘‘𑀣𑁂𑀬𑁆𑀬𑀁 𑀦 𑀓𑀸𑀭𑁂 𑀦 𑀫𑀼𑀲𑀸 𑀪𑀡𑁂𑀬𑁆𑀬, 𑀫𑁂𑀢𑁆𑀢𑀸𑀬 𑀨𑀲𑁆𑀲𑁂 𑀢𑀲𑀣𑀸𑀯𑀭𑀸𑀦𑀺;

𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸, 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄𑀢𑀺 𑀯𑀺𑀦𑁄𑀤𑀬𑁂𑀬𑁆𑀬𑀸’’𑀢𑀺.

𑀓𑁄𑀥𑀸𑀢𑀺𑀫𑀸𑀦𑀲𑁆𑀲 𑀯𑀲𑀁 𑀦 𑀕𑀘𑁆𑀙𑁂, 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂;

𑀅𑀣𑀧𑁆𑀧𑀺𑀬𑀁 𑀯𑀸 𑀧𑀦 𑀅𑀧𑁆𑀧𑀺𑀬𑀁 𑀯𑀸, 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬.

𑀓𑁄𑀥𑀸𑀢𑀺𑀫𑀸𑀦𑀲𑁆𑀲 𑀯𑀲𑀁 𑀦 𑀕𑀘𑁆𑀙𑁂𑀢𑀺. 𑀓𑁄𑀥𑁄𑀢𑀺 𑀬𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 ¶ 𑀧𑀝𑀺𑀖𑀸𑀢𑁄…𑀧𑁂… 𑀘𑀡𑁆𑀟𑀺𑀓𑁆𑀓𑀁 ¶ 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲. 𑀅𑀢𑀺𑀫𑀸𑀦𑁄𑀢𑀺 𑀇𑀥𑁂𑀓𑀘𑁆𑀘𑁄 𑀧𑀭𑀁 𑀅𑀢𑀺𑀫𑀜𑁆𑀜𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀓𑁄𑀥𑀸𑀢𑀺𑀫𑀸𑀦𑀲𑁆𑀲 𑀯𑀲𑀁 𑀦 𑀕𑀘𑁆𑀙𑁂𑀢𑀺. 𑀓𑁄𑀥𑀲𑁆𑀲 𑀘 𑀅𑀢𑀺𑀫𑀸𑀦𑀲𑁆𑀲 𑀘 𑀯𑀲𑀁 𑀦 𑀕𑀘𑁆𑀙𑁂𑀬𑁆𑀬, 𑀓𑁄𑀥𑀜𑁆𑀘 𑀅𑀢𑀺𑀫𑀸𑀦𑀜𑁆𑀘 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀓𑁄𑀥𑀸𑀢𑀺𑀫𑀸𑀦𑀲𑁆𑀲 𑀯𑀲𑀁 𑀦 𑀕𑀘𑁆𑀙𑁂.

𑀫𑀽𑀮𑀫𑁆𑀧𑀺 ¶ 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂𑀢𑀺. 𑀓𑀢𑀫𑀁 𑀓𑁄𑀥𑀲𑁆𑀲 𑀫𑀽𑀮𑀁? 𑀅𑀯𑀺𑀚𑁆𑀚𑀸 𑀫𑀽𑀮𑀁, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀫𑀽𑀮𑀁, 𑀅𑀲𑁆𑀫𑀺𑀫𑀸𑀦𑁄 𑀫𑀽𑀮𑀁, 𑀅𑀳𑀺𑀭𑀺𑀓𑀁 𑀫𑀽𑀮𑀁, 𑀅𑀦𑁄𑀢𑁆𑀢𑀧𑁆𑀧𑀁 𑀫𑀽𑀮𑀁, 𑀉𑀤𑁆𑀥𑀘𑁆𑀘𑀁 𑀫𑀽𑀮𑀁 𑁋 𑀇𑀤𑀁 𑀓𑁄𑀥𑀲𑁆𑀲 𑀫𑀽𑀮𑀁. 𑀓𑀢𑀫𑀁 𑀅𑀢𑀺𑀫𑀸𑀦𑀲𑁆𑀲 𑀫𑀽𑀮𑀁? 𑀅𑀯𑀺𑀚𑁆𑀚𑀸 𑀫𑀽𑀮𑀁, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀫𑀽𑀮𑀁, 𑀅𑀲𑁆𑀫𑀺𑀫𑀸𑀦𑁄 𑀫𑀽𑀮𑀁, 𑀅𑀳𑀺𑀭𑀺𑀓𑀁 𑀫𑀽𑀮𑀁 ¶ , 𑀅𑀦𑁄𑀢𑁆𑀢𑀧𑁆𑀧𑀁 𑀫𑀽𑀮𑀁, 𑀉𑀤𑁆𑀥𑀘𑁆𑀘𑀁 𑀫𑀽𑀮𑀁 𑁋 𑀇𑀤𑀁 𑀅𑀢𑀺𑀫𑀸𑀦𑀲𑁆𑀲 𑀫𑀽𑀮𑀁. 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂𑀢𑀺. 𑀓𑁄𑀥𑀲𑁆𑀲 𑀘 𑀅𑀢𑀺𑀫𑀸𑀦𑀲𑁆𑀲 𑀘 𑀫𑀽𑀮𑀁 𑀧𑀮𑀺𑀔𑀡𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀉𑀧𑁆𑀧𑀸𑀝𑀬𑀺𑀢𑁆𑀯𑀸 𑀲𑀫𑀼𑀧𑁆𑀧𑀸𑀝𑀬𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬 𑀲𑀦𑁆𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑁋 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂.

𑀅𑀣𑀧𑁆𑀧𑀺𑀬𑀁 𑀯𑀸 𑀧𑀦 𑀅𑀧𑁆𑀧𑀺𑀬𑀁 𑀯𑀸, 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁆ै𑀬𑁆𑀬𑀸𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀧𑀺𑀬𑀸𑀢𑀺 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸? 𑀇𑀥 𑀬𑀸𑀲𑁆𑀲 [𑀬𑀲𑁆𑀲 (𑀲𑁆𑀬𑀸.) 𑀲𑀼𑀢𑁆𑀢𑀫𑀸𑀮𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 ¶ 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀼𑀢𑁆𑀢𑀸 𑀯𑀸 𑀥𑀻𑀢𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑁋 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸… 𑀕𑀦𑁆𑀥𑀸… 𑀭𑀲𑀸… 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸. 𑀅𑀧𑁆𑀧𑀺𑀬𑀸𑀢𑀺 𑀤𑁆𑀯𑁂 𑀅𑀧𑁆𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀅𑀧𑁆𑀧𑀺𑀬𑀸? 𑀇𑀥 𑀬𑀸𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸 𑀅𑀨𑀸𑀲𑀼𑀓𑀸𑀫𑀸 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀓𑀸𑀫𑀸 𑁋 𑀇𑀫𑁂 𑀲𑀢𑁆𑀢𑀸 𑀅𑀧𑁆𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀅𑀧𑁆𑀧𑀺𑀬𑀸? 𑀅𑀫𑀦𑀸𑀧𑀺𑀓𑀸 𑀭𑀽𑀧𑀸 𑀅𑀫𑀦𑀸𑀧𑀺𑀓𑀸 𑀲𑀤𑁆𑀤𑀸, 𑀕𑀦𑁆𑀥𑀸… 𑀭𑀲𑀸… 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀧𑁆𑀧𑀺𑀬𑀸. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁 𑀦𑀺𑀲𑁆𑀲𑀁𑀲𑀬𑀯𑀘𑀦𑀁 𑀦𑀺𑀓𑁆𑀓𑀗𑁆𑀔𑀯𑀘𑀦𑀁 𑀅𑀤𑁆𑀯𑁂𑀚𑁆𑀛𑀯𑀘𑀦𑀁 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀁 𑀦𑀺𑀬𑁆𑀬𑀸𑀦𑀺𑀓𑀯𑀘𑀦𑀁 𑀅𑀧𑀡𑁆𑀡𑀓𑀯𑀘𑀦𑀁 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 𑁋 𑀅𑀤𑁆𑀥𑀸𑀢𑀺. 𑀅𑀣𑀧𑁆𑀧𑀺𑀬𑀁 𑀯𑀸 𑀧𑀦 𑀅𑀧𑁆𑀧𑀺𑀬𑀁 𑀯𑀸, 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀧𑀺𑀬𑀸𑀧𑁆𑀧𑀺𑀬𑀁 𑀲𑀸𑀢𑀸𑀲𑀸𑀢𑀁 𑀲𑀼𑀔𑀤𑀼𑀓𑁆𑀔𑀁 ¶ 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀇𑀝𑁆𑀞𑀸𑀦𑀺𑀝𑁆𑀞𑀁 𑀅𑀪𑀺𑀲𑀫𑁆𑀪𑀯𑀦𑁆𑀢𑁄 𑀯𑀸 𑀅𑀪𑀺𑀪𑀯𑁂𑀬𑁆𑀬 𑀅𑀥𑀺𑀪𑀯𑀦𑁆𑀢𑁄 𑀯𑀸 𑀅𑀪𑀺𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑁋 𑀅𑀣𑀧𑁆𑀧𑀺𑀬𑀁 𑀯𑀸 𑀧𑀦 𑀅𑀧𑁆𑀧𑀺𑀬𑀁 𑀯𑀸 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬.

‘‘𑀓𑁄𑀥𑀸𑀢𑀺𑀫𑀸𑀦𑀲𑁆𑀲 𑀯𑀲𑀁 𑀦 𑀕𑀘𑁆𑀙𑁂, 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂;

𑀅𑀣𑀧𑁆𑀧𑀺𑀬𑀁 𑀯𑀸 𑀧𑀦 𑀅𑀧𑁆𑀧𑀺𑀬𑀁 𑀯𑀸, 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬𑀸’’𑀢𑀺.

𑀧𑀜𑁆𑀜𑀁 ¶ ¶ 𑀧𑀼𑀭𑀓𑁆𑀔𑀢𑁆𑀯𑀸 𑀓𑀮𑁆𑀬𑀸𑀡𑀧𑀻𑀢𑀺, 𑀯𑀺𑀓𑁆𑀔𑀫𑁆𑀪𑀬𑁂 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺;

𑀅𑀭𑀢𑀺𑀁 𑀲𑀳𑁂𑀣 𑀲𑀬𑀦𑀫𑁆𑀳𑀺 𑀧𑀦𑁆𑀢𑁂, 𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂.

𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸 𑀓𑀮𑁆𑀬𑀸𑀡𑀧𑀻𑀢𑀻𑀢𑀺. 𑀧𑀜𑁆𑀜𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄…𑀧𑁂… 𑀅𑀫𑁄𑀳𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀺 𑀧𑀜𑁆𑀜𑀸𑀥𑀚𑁄 𑀧𑀜𑁆𑀜𑀸𑀓𑁂𑀢𑀼 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄 𑀯𑀺𑀘𑀬𑀩𑀳𑀼𑀮𑁄 𑀧𑀯𑀺𑀘𑀬𑀩𑀳𑀼𑀮𑁄 𑀧𑁂𑀓𑁆𑀔𑀸𑀬𑀦𑀩𑀳𑀼𑀮𑁄 [𑀑𑀓𑁆𑀔𑀸𑀬𑀦𑀩𑀳𑀼𑀮𑁄 (𑀩𑀳𑀽𑀲𑀼)] 𑀲𑀫𑁆𑀧𑁂𑀓𑁆𑀔𑀸𑀬𑀦𑀩𑀳𑀼𑀮𑁄 [𑀲𑀫𑁄𑀓𑁆𑀔𑀸𑀬𑀦𑀩𑀳𑀼𑀮𑁄 (𑀲𑀻. 𑀲𑁆𑀬𑀸.)] 𑀯𑀺𑀪𑀽𑀢𑀯𑀺𑀳𑀸𑀭𑀻 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺. 𑀏𑀯𑀫𑁆𑀧𑀺 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸.

𑀅𑀣 𑀯𑀸 𑀕𑀘𑁆𑀙𑀦𑁆𑀢𑁄 𑀯𑀸 ‘‘𑀕𑀘𑁆𑀙𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺, 𑀞𑀺𑀢𑁄 𑀯𑀸 ‘‘𑀞𑀺𑀢𑁄𑀫𑁆𑀳𑀻’’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀲𑀺𑀦𑁆𑀦𑁄 𑀯𑀸 ‘‘𑀦𑀺𑀲𑀺𑀦𑁆𑀦𑁄𑀫𑁆𑀳𑀻’’𑀢𑀺 𑀧𑀚𑀸𑀦𑀸𑀢𑀺, 𑀲𑀬𑀸𑀦𑁄 𑀯𑀸 ‘‘𑀲𑀬𑀸𑀦𑁄𑀫𑁆𑀳𑀻’’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀬𑀣𑀸 𑀯𑀸 𑀧𑀦𑀲𑁆𑀲 𑀓𑀸𑀬𑁄 𑀧𑀡𑀺𑀳𑀺𑀢𑁄 𑀳𑁄𑀢𑀺 𑀢𑀣𑀸 𑀢𑀣𑀸 𑀦𑀁 𑀧𑀚𑀸𑀦𑀸𑀢𑀻𑀢𑀺. 𑀏𑀯𑀫𑁆𑀧𑀺 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸.

𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀺𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 ¶ 𑀳𑁄𑀢𑀻𑀢𑀺. 𑀏𑀯𑀫𑁆𑀧𑀺 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸.

𑀓𑀮𑁆𑀬𑀸𑀡𑀧𑀻𑀢𑀻𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺 𑀧𑀻𑀢𑀺 𑀧𑀸𑀫𑁄𑀚𑁆𑀚𑀁 [𑀧𑀸𑀫𑀼𑀚𑁆𑀚𑀁 (𑀲𑁆𑀬𑀸.)] 𑁋 𑀓𑀮𑁆𑀬𑀸𑀡𑀧𑀻𑀢𑀻𑀢𑀺. 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 ¶ 𑀆𑀦𑀸𑀧𑀸𑀦𑀲𑁆𑀲𑀢𑀺 𑀫𑀭𑀡𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀺𑀯𑀲𑁂𑀦 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺 𑀧𑀻𑀢𑀺 𑀧𑀸𑀫𑁄𑀚𑁆𑀚𑀁 𑁋 𑀓𑀮𑁆𑀬𑀸𑀡𑀧𑀻𑀢𑀻𑀢𑀺 𑁋 𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸 𑀓𑀮𑁆𑀬𑀸𑀡𑀧𑀻𑀢𑀺.

𑀯𑀺𑀓𑁆𑀔𑀫𑁆𑀪𑀬𑁂 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 ¶ 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸…𑀧𑁂… 𑀇𑀫𑁂 ¶ 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸…𑀧𑁂… 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀯𑀺𑀓𑁆𑀔𑀫𑁆𑀪𑀬𑁂 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺. 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀯𑀺𑀓𑁆𑀔𑀫𑁆𑀪𑀬𑁂 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺.

𑀅𑀭𑀢𑀺𑀁 𑀲𑀳𑁂𑀣 𑀲𑀬𑀦𑀫𑁆𑀳𑀺 𑀧𑀦𑁆𑀢𑁂𑀢𑀺. 𑀅𑀭𑀢𑀻𑀢𑀺 𑀬𑀸 𑀅𑀭𑀢𑀺 𑀅𑀭𑀢𑀺𑀢𑀸 𑀅𑀦𑀪𑀺𑀭𑀢𑀺 𑀅𑀦𑀪𑀺𑀭𑀫𑀡𑀸 [𑀅𑀦𑀪𑀺𑀭𑀫𑀦𑀸 (𑀩𑀳𑀽𑀲𑀼) 𑀯𑀺𑀪. 𑁮𑁫𑁬] 𑀉𑀓𑁆𑀓𑀡𑁆𑀞𑀺𑀢𑀸 𑀧𑀭𑀺𑀢𑀲𑁆𑀲𑀺𑀢𑀸. 𑀲𑀬𑀦𑀫𑁆𑀳𑀺 𑀧𑀦𑁆𑀢𑁂𑀢𑀺 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺𑀁 𑀲𑀳𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀅𑀭𑀢𑀺𑀁 𑀲𑀳𑁂𑀣 𑀲𑀬𑀦𑀫𑁆𑀳𑀺 𑀧𑀦𑁆𑀢𑁂.

𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂𑀢𑀺. 𑀘𑀢𑁆𑀢𑀸𑀭𑁄 𑀧𑀭𑀺𑀤𑁂𑀯𑀦𑀻𑀬𑁂 𑀥𑀫𑁆𑀫𑁂 𑀲𑀳𑁂𑀬𑁆𑀬 𑀧𑀭𑀺𑀲𑀳𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂.

‘‘𑀧𑀜𑁆𑀜𑀁 ¶ 𑀧𑀼𑀭𑀓𑁆𑀔𑀢𑁆𑀯𑀸 𑀓𑀮𑁆𑀬𑀸𑀡𑀧𑀻𑀢𑀺, 𑀯𑀺𑀓𑁆𑀔𑀫𑁆𑀪𑀬𑁂 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺;

𑀅𑀭𑀢𑀺𑀁 𑀲𑀳𑁂𑀣 𑀲𑀬𑀦𑀫𑁆𑀳𑀺 𑀧𑀦𑁆𑀢𑁂, 𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂’’𑀢𑀺.

𑀓𑀺𑀁𑀲𑀽 𑀅𑀲𑀺𑀲𑁆𑀲𑀁 𑀓𑀼𑀯 𑀯𑀸 [𑀓𑀼𑀳𑀺𑀁 𑀯𑀸 (𑀲𑀻.), 𑀓𑀼𑀯𑀁 𑀯𑀸 (𑀲𑁆𑀬𑀸.), 𑀓𑀼𑀣 𑀯𑀸 (𑀓.)] 𑀅𑀲𑀺𑀲𑁆𑀲𑀁, 𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑀼𑀯𑀚𑁆𑀚 𑀲𑁂𑀲𑁆𑀲𑀁;

𑀏𑀢𑁂 𑀯𑀺𑀢𑀓𑁆𑀓𑁂 𑀧𑀭𑀺𑀤𑁂𑀯𑀦𑁂𑀬𑁆𑀬𑁂, 𑀯𑀺𑀦𑀬𑁂𑀣 𑀲𑁂𑀔𑁄 𑀅𑀦𑀺𑀓𑁂𑀢𑀘𑀸𑀭𑀻 [𑀅𑀦𑀺𑀓𑁂𑀢𑀲𑀸𑀭𑀻 (𑀲𑁆𑀬𑀸.)] .

𑀓𑀺𑀁𑀲𑀽 ¶ 𑀅𑀲𑀺𑀲𑁆𑀲𑀁 𑀓𑀼𑀯 𑀯𑀸 𑀅𑀲𑀺𑀲𑁆𑀲𑀦𑁆𑀢𑀺. 𑀓𑀺𑀁𑀲𑀽 𑀅𑀲𑀺𑀲𑁆𑀲𑀸𑀫𑀻𑀢𑀺 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀺 𑀑𑀤𑀦𑀁 𑀯𑀸 𑀓𑀼𑀫𑁆𑀫𑀸𑀲𑀁 𑀯𑀸 𑀲𑀢𑁆𑀢𑀼𑀁 𑀯𑀸 𑀫𑀘𑁆𑀙𑀁 𑀯𑀸 𑀫𑀁𑀲𑀁 𑀯𑀸𑀢𑀺 𑁋 𑀓𑀺𑀁𑀲𑀽 𑀅𑀲𑀺𑀲𑁆𑀲𑀁. 𑀓𑀼𑀯 𑀯𑀸 𑀅𑀲𑀺𑀲𑁆𑀲𑀦𑁆𑀢𑀺 𑀓𑀢𑁆𑀣 𑀪𑀼𑀜𑁆𑀚𑀺𑀲𑁆𑀲𑀸𑀫𑀺 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀯𑁂𑀲𑁆𑀲𑀓𑀼𑀮𑁂 𑀯𑀸 𑀲𑀼𑀤𑁆𑀤𑀓𑀼𑀮𑁂 𑀯𑀸𑀢𑀺 𑁋 𑀓𑀺𑀁𑀲𑀽 𑀅𑀲𑀺𑀲𑁆𑀲𑀁 𑀓𑀼𑀯 𑀯𑀸 𑀅𑀲𑀺𑀲𑁆𑀲𑀁.

𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑀼𑀯𑀚𑁆𑀚 𑀲𑁂𑀲𑁆𑀲𑀦𑁆𑀢𑀺 𑀇𑀫𑀁 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁 𑀲𑀬𑀺𑀢𑁆𑀣 𑀨𑀮𑀓𑁂 𑀯𑀸 𑀢𑀝𑁆𑀝𑀺𑀓𑀸𑀬 𑀯𑀸 𑀘𑀫𑁆𑀫𑀔𑀡𑁆𑀟𑁂 𑀯𑀸 𑀢𑀺𑀡𑀲𑀦𑁆𑀣𑀸𑀭𑁂 𑀯𑀸 𑀧𑀡𑁆𑀡𑀲𑀦𑁆𑀣𑀸𑀭𑁂 𑀯𑀸 𑀧𑀮𑀸𑀮𑀲𑀦𑁆𑀣𑀸𑀭𑁂 𑀯𑀸. 𑀆𑀕𑀸𑀫𑀺𑀭𑀢𑁆𑀢𑀺𑀁 [𑀆𑀕𑀫𑀦𑀭𑀢𑁆𑀢𑀺𑀁 (𑀲𑁆𑀬𑀸.)] 𑀓𑀢𑁆𑀣 𑀲𑀼𑀔𑀁 𑀲𑀬𑀺𑀲𑁆𑀲𑀸𑀫𑀺 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀪𑀺𑀲𑀺𑀬𑀸 ¶ 𑀯𑀸 𑀩𑀺𑀫𑁆𑀩𑁄𑀳𑀦𑁂 𑀯𑀸 𑀯𑀺𑀳𑀸𑀭𑁂 𑀯𑀸 𑀅𑀟𑁆𑀠𑀬𑁄𑀕𑁂 𑀯𑀸 𑀧𑀸𑀲𑀸𑀤𑁂 𑀯𑀸 𑀳𑀫𑁆𑀫𑀺𑀬𑁂 𑀯𑀸 𑀕𑀼𑀳𑀸𑀬 𑀯𑀸𑀢𑀺 𑁋 𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑀼𑀯𑀚𑁆𑀚 𑀲𑁂𑀲𑁆𑀲𑀁.

𑀏𑀢𑁂 ¶ 𑀯𑀺𑀢𑀓𑁆𑀓𑁂 𑀧𑀭𑀺𑀤𑁂𑀯𑀦𑁂𑀬𑁆𑀬𑁂𑀢𑀺. 𑀏𑀢𑁂 𑀯𑀺𑀢𑀓𑁆𑀓𑁂𑀢𑀺 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀜𑁆𑀜𑀼𑀢𑁆𑀢𑁂 ¶ 𑀯𑀺𑀢𑀓𑁆𑀓𑁂, 𑀤𑁆𑀯𑁂 𑀲𑁂𑀦𑀸𑀲𑀦𑀧𑀝𑀺𑀲𑀜𑁆𑀜𑀼𑀢𑁆𑀢𑁂 𑀯𑀺𑀢𑀓𑁆𑀓𑁂. 𑀧𑀭𑀺𑀤𑁂𑀯𑀦𑁂𑀬𑁆𑀬𑁂𑀢𑀺 𑀆𑀤𑁂𑀯𑀦𑁂𑀬𑁆𑀬𑁂 𑀧𑀭𑀺𑀤𑁂𑀯𑀦𑁂𑀬𑁆𑀬𑁂𑀢𑀺 𑁋 𑀏𑀢𑁂 𑀯𑀺𑀢𑀓𑁆𑀓𑁂 𑀧𑀭𑀺𑀤𑁂𑀯𑀦𑁂𑀬𑁆𑀬𑁂.

𑀯𑀺𑀦𑀬𑁂𑀣 𑀲𑁂𑀔𑁄 𑀅𑀦𑀺𑀓𑁂𑀢𑀘𑀸𑀭𑀻𑀢𑀺. 𑀲𑁂𑀔𑁄𑀢𑀺 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀲𑁂𑀔𑁄? 𑀲𑀺𑀓𑁆𑀔𑀢𑀻𑀢𑀺 𑁋 𑀲𑁂𑀔𑁄. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀺, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀢𑀺, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑀺. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀚𑀸𑀦𑀦𑁆𑀢𑁄 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 ¶ 𑀲𑀺𑀓𑁆𑀔𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑀢𑀺 𑀆𑀘𑀭𑀢𑀺 𑀲𑀫𑀸𑀘𑀭𑀢𑀺 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑁋 𑀲𑁂𑀔𑁄. 𑀯𑀺𑀦𑀬𑀸𑀬 𑀧𑀝𑀺𑀯𑀺𑀦𑀬𑀸𑀬 𑀧𑀳𑀸𑀦𑀸𑀬 𑀯𑀽𑀧𑀲𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀚𑀸𑀦𑀦𑁆𑀢𑁄…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀯𑀺𑀦𑀬𑁂𑀣 𑀲𑁂𑀔𑁄.

𑀅𑀦𑀺𑀓𑁂𑀢𑀘𑀸𑀭𑀻𑀢𑀺 ¶ . 𑀓𑀣𑀁 𑀦𑀺𑀓𑁂𑀢𑀘𑀸𑀭𑀻 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀓𑀼𑀮𑀧𑀮𑀺𑀩𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀕𑀡𑀧𑀮𑀺𑀩𑁄𑀥𑁂𑀦… 𑀆𑀯𑀸𑀲𑀧𑀮𑀺𑀩𑁄𑀥𑁂𑀦… 𑀘𑀻𑀯𑀭𑀧𑀮𑀺𑀩𑁄𑀥𑁂𑀦… 𑀧𑀺𑀡𑁆𑀟𑀧𑀸𑀢𑀧𑀮𑀺𑀩𑁄𑀥𑁂𑀦… 𑀲𑁂𑀦𑀸𑀲𑀦𑀧𑀮𑀺𑀩𑁄𑀥𑁂𑀦… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀧𑀮𑀺𑀩𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀦𑀺𑀓𑁂𑀢𑀘𑀸𑀭𑀻 𑀳𑁄𑀢𑀺. 𑀓𑀣𑀁 𑀅𑀦𑀺𑀓𑁂𑀢𑀘𑀸𑀭𑀻 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀼 𑀦 𑀓𑀼𑀮𑀧𑀮𑀺𑀩𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀕𑀡𑀧𑀮𑀺𑀩𑁄𑀥𑁂𑀦… 𑀦 𑀆𑀯𑀸𑀲𑀧𑀮𑀺𑀩𑁄𑀥𑁂𑀦… 𑀦 𑀘𑀻𑀯𑀭𑀧𑀮𑀺𑀩𑁄𑀥𑁂𑀦… 𑀦 𑀧𑀺𑀡𑁆𑀟𑀧𑀸𑀢𑀧𑀮𑀺𑀩𑁄𑀥𑁂𑀦… 𑀦 𑀲𑁂𑀦𑀸𑀲𑀦𑀧𑀮𑀺𑀩𑁄𑀥𑁂𑀦… 𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀧𑀮𑀺𑀩𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀅𑀦𑀺𑀓𑁂𑀢𑀘𑀸𑀭𑀻 𑀳𑁄𑀢𑀺.

‘‘𑀫𑀕𑀥𑀁 ¶ 𑀕𑀢𑀸 𑀓𑁄𑀲𑀮𑀁 𑀕𑀢𑀸, 𑀏𑀓𑀘𑁆𑀘𑀺𑀬𑀸 𑀧𑀦 𑀯𑀚𑁆𑀚𑀺𑀪𑀽𑀫𑀺𑀬𑀸;

𑀫𑀺𑀕𑀸 𑀯𑀺𑀬 𑀅𑀲𑀗𑁆𑀖𑀘𑀸𑀭𑀺𑀦𑁄 [𑀫𑀸𑀕𑀥𑀸 𑀯𑀺𑀲𑀗𑁆𑀖𑀘𑀸𑀭𑀺𑀦𑁄 (𑀲𑁆𑀬𑀸.)], 𑀅𑀦𑀺𑀓𑁂𑀢𑀸 𑀯𑀺𑀳𑀭𑀦𑁆𑀢𑀺 𑀪𑀺𑀓𑁆𑀔𑀯𑁄.

‘‘𑀲𑀸𑀥𑀼 ¶ 𑀘𑀭𑀺𑀢𑀓𑀁 𑀲𑀸𑀥𑀼 𑀲𑀼𑀘𑀭𑀺𑀢𑀁, 𑀲𑀸𑀥𑀼 𑀲𑀤𑀸 𑀅𑀦𑀺𑀓𑁂𑀢𑀯𑀺𑀳𑀸𑀭𑁄;

𑀅𑀢𑁆𑀣𑀧𑀼𑀘𑁆𑀙𑀦𑀁 𑀧𑀤𑀓𑁆𑀔𑀺𑀡𑀁 𑀓𑀫𑁆𑀫𑀁, 𑀏𑀢𑀁 𑀲𑀸𑀫𑀜𑁆𑀜𑀁 𑀅𑀓𑀺𑀜𑁆𑀘𑀦𑀲𑁆𑀲𑀸’’𑀢𑀺.

𑀯𑀺𑀦𑀬𑁂𑀣 ¶ 𑀲𑁂𑀔𑁄 𑀅𑀦𑀺𑀓𑁂𑀢𑀘𑀸𑀭𑀻. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀺𑀁𑀲𑀽 𑀅𑀲𑀺𑀲𑁆𑀲𑀁 𑀓𑀼𑀯 𑀯𑀸 𑀅𑀲𑀺𑀲𑁆𑀲𑀁, 𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑀼𑀯𑀚𑁆𑀚 𑀲𑁂𑀲𑁆𑀲𑀁;

𑀏𑀢𑁂 ¶ 𑀯𑀺𑀢𑀓𑁆𑀓𑁂 𑀧𑀭𑀺𑀤𑁂𑀯𑀦𑁂𑀬𑁆𑀬𑁂, 𑀯𑀺𑀦𑀬𑁂𑀣 𑀲𑁂𑀔𑁄 𑀅𑀦𑀺𑀓𑁂𑀢𑀘𑀸𑀭𑀻’’𑀢𑀺.

𑀅𑀦𑁆𑀦𑀜𑁆𑀘 𑀮𑀤𑁆𑀥𑀸 𑀯𑀲𑀦𑀜𑁆𑀘 𑀓𑀸𑀮𑁂, 𑀫𑀢𑁆𑀢𑀁 𑀲 𑀚𑀜𑁆𑀜𑀸 [𑀫𑀢𑁆𑀢𑀁 𑀲𑁄 𑀚𑀜𑁆𑀜𑀸 (𑀲𑁆𑀬𑀸.)] 𑀇𑀥 𑀢𑁄𑀲𑀦𑀢𑁆𑀣𑀁;

𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄 𑀬𑀢𑀘𑀸𑀭𑀺 𑀕𑀸𑀫𑁂, 𑀭𑀼𑀲𑀺𑀢𑁄𑀧𑀺 [𑀤𑀽𑀲𑀺𑀢𑁄𑀧𑀺 (𑀓.)] 𑀯𑀸𑀘𑀁 𑀨𑀭𑀼𑀲𑀁 𑀦 𑀯𑀚𑁆𑀚𑀸.

𑀅𑀦𑁆𑀦𑀜𑁆𑀘 𑀮𑀤𑁆𑀥𑀸 𑀯𑀲𑀦𑀜𑁆𑀘 𑀓𑀸𑀮𑁂𑀢𑀺. 𑀅𑀦𑁆𑀦𑀦𑁆𑀢𑀺 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀁. 𑀯𑀲𑀦𑀦𑁆𑀢𑀺 𑀙 𑀘𑀻𑀯𑀭𑀸𑀦𑀺 𑁋 𑀔𑁄𑀫𑀁, 𑀓𑀧𑁆𑀧𑀸𑀲𑀺𑀓𑀁, 𑀓𑁄𑀲𑁂𑀬𑁆𑀬𑀁, 𑀓𑀫𑁆𑀩𑀮𑀁, 𑀲𑀸𑀡𑀁, 𑀪𑀗𑁆𑀕𑀁. 𑀅𑀦𑁆𑀦𑀜𑁆𑀘 𑀮𑀤𑁆𑀥𑀸 𑀯𑀲𑀦𑀜𑁆𑀘 𑀓𑀸𑀮𑁂𑀢𑀺. 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 𑀦 𑀓𑀼𑀳𑀦𑀸𑀬, 𑀦 𑀮𑀧𑀦𑀸𑀬, 𑀦 𑀦𑁂𑀫𑀺𑀢𑁆𑀢𑀺𑀓𑀢𑀸𑀬, 𑀦 𑀦𑀺𑀧𑁆𑀧𑁂𑀲𑀺𑀓𑀢𑀸𑀬, 𑀦 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀬, 𑀦 𑀤𑀸𑀭𑀼𑀤𑀸𑀦𑁂𑀦, 𑀦 𑀯𑁂𑀴𑀼𑀤𑀸𑀦𑁂𑀦, 𑀦 𑀧𑀢𑁆𑀢𑀤𑀸𑀦𑁂𑀦, 𑀦 𑀧𑀼𑀧𑁆𑀨𑀤𑀸𑀦𑁂𑀦, 𑀦 𑀨𑀮𑀤𑀸𑀦𑁂𑀦, 𑀦 𑀲𑀺𑀦𑀸𑀦𑀤𑀸𑀦𑁂𑀦, 𑀦 𑀘𑀼𑀡𑁆𑀡𑀤𑀸𑀦𑁂𑀦, 𑀦 𑀫𑀢𑁆𑀢𑀺𑀓𑀸𑀤𑀸𑀦𑁂𑀦, 𑀦 𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦, 𑀦 𑀫𑀼𑀔𑁄𑀤𑀓𑀤𑀸𑀦𑁂𑀦, 𑀦 𑀘𑀸𑀢𑀼𑀓𑀫𑁆𑀬𑀢𑀸𑀬, 𑀦 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬, 𑀦 𑀧𑀸𑀭𑀺𑀪𑀝𑁆𑀬𑀢𑀸𑀬, 𑀦 𑀧𑀻𑀞𑀫𑀤𑁆𑀤𑀺𑀓𑀢𑀸𑀬, 𑀦 𑀯𑀢𑁆𑀣𑀼𑀯𑀺𑀚𑁆𑀚𑀸𑀬, 𑀦 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬, 𑀦 𑀅𑀗𑁆𑀕𑀯𑀺𑀚𑁆𑀚𑀸𑀬, 𑀦 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀬, 𑀦 𑀤𑀽𑀢𑀕𑀫𑀦𑁂𑀦, 𑀦 𑀧𑀳𑀺𑀡𑀕𑀫𑀦𑁂𑀦, 𑀦 𑀚𑀗𑁆𑀖𑀧𑁂𑀲𑀦𑀺𑀓𑁂𑀦, 𑀦 𑀯𑁂𑀚𑁆𑀚𑀓𑀫𑁆𑀫𑁂𑀦, 𑀦 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑁂𑀦, 𑀦 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀸 ¶ 𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑁋 𑀅𑀦𑁆𑀦𑀜𑁆𑀘 𑀮𑀤𑁆𑀥𑀸 𑀯𑀲𑀦𑀜𑁆𑀘 𑀓𑀸𑀮𑁂.

𑀫𑀢𑁆𑀢𑀁 ¶ 𑀲 𑀚𑀜𑁆𑀜𑀸 𑀇𑀥 𑀢𑁄𑀲𑀦𑀢𑁆𑀣𑀦𑁆𑀢𑀺. 𑀫𑀢𑁆𑀢𑀁 𑀲 𑀚𑀜𑁆𑀜𑀸𑀢𑀺 ¶ 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬 𑁋 𑀧𑀝𑀺𑀕𑁆𑀕𑀳𑀡𑀢𑁄 𑀯𑀸 𑀧𑀭𑀺𑀪𑁄𑀕𑀢𑁄 𑀯𑀸. 𑀓𑀣𑀁 𑀧𑀝𑀺𑀕𑁆𑀕𑀳𑀡𑀢𑁄 𑀫𑀢𑁆𑀢𑀁 𑀚𑀸𑀦𑀸𑀢𑀺? 𑀣𑁄𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀓𑀼𑀮𑀸𑀦𑀼𑀤𑀬𑀸𑀬 [𑀓𑀼𑀮𑀸𑀦𑀼𑀤𑁆𑀤𑀬𑀸𑀬 (𑀲𑀻. 𑀓.)] 𑀓𑀼𑀮𑀸𑀦𑀼𑀭𑀓𑁆𑀔𑀸𑀬 𑀓𑀼𑀮𑀸𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀓𑀸𑀬𑀧𑀭𑀺𑀳𑀸𑀭𑀺𑀓𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀝𑀺𑀕𑁆𑀕𑀳𑀡𑀢𑁄 𑀫𑀢𑁆𑀢𑀁 𑀚𑀸𑀦𑀸𑀢𑀺. 𑀓𑀣𑀁 𑀧𑀭𑀺𑀪𑁄𑀕𑀢𑁄 𑀫𑀢𑁆𑀢𑀁 𑀚𑀸𑀦𑀸𑀢𑀺?

𑀧𑀝𑀺𑀲𑀗𑁆𑀔𑀸 ¶ 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺 𑀬𑀸𑀯𑀤𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑁂𑀬𑁆𑀬𑀸𑀩𑁆𑀬𑀸𑀥𑀺𑀓𑀸𑀦𑀁 [𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀁 (𑀲𑀻. 𑀲𑁆𑀬𑀸.)] 𑀯𑁂𑀤𑀦𑀸𑀦𑀁 𑀧𑀝𑀺𑀖𑀸𑀢𑀸𑀬 𑀅𑀩𑁆𑀬𑀸𑀧𑀚𑁆𑀚𑀧𑀭𑀫𑀢𑀸𑀬.

𑀏𑀯𑀁 𑀧𑀭𑀺𑀪𑁄𑀕𑀢𑁄 𑀫𑀢𑁆𑀢𑀁 𑀚𑀸𑀦𑀸𑀢𑀺. 𑀫𑀢𑁆𑀢𑀁 ¶ 𑀲 𑀚𑀜𑁆𑀜𑀸𑀢𑀺. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀫𑀢𑁆𑀢𑀁 𑀚𑀸𑀦𑁂𑀬𑁆𑀬 𑀆𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑁋 𑀫𑀢𑁆𑀢𑀁 𑀲 𑀚𑀜𑁆𑀜𑀸.

𑀇𑀥 𑀢𑁄𑀲𑀦𑀢𑁆𑀣𑀦𑁆𑀢𑀺. 𑀇𑀥 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀘𑀻𑀯𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺; 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 ¶ 𑀘 𑀘𑀻𑀯𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄, 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺; 𑀢𑀸𑀬 ¶ 𑀘 𑀧𑀦 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺, 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀼 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦 𑀇𑀢𑀭𑀻𑀢𑀭𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺, 𑀅𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄, 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺; 𑀢𑀸𑀬 𑀘 𑀧𑀦 𑀇𑀢𑀭𑀻𑀢𑀭𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺, 𑀦 𑀧𑀭𑀁 ¶ 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀼 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦 𑀇𑀢𑀭𑀻𑀢𑀭𑀲𑁂𑀦𑀸𑀲𑀦𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀲𑁂𑀦𑀸𑀲𑀦𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺 ¶ , 𑀅𑀮𑀤𑁆𑀥𑀸 𑀘 𑀲𑁂𑀦𑀸𑀲𑀦𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀲𑁂𑀦𑀸𑀲𑀦𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄, 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺; 𑀢𑀸𑀬 𑀘 𑀧𑀦 𑀇𑀢𑀭𑀻𑀢𑀭𑀲𑁂𑀦𑀸𑀲𑀦𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺, 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀼 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄.

𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺, 𑀅𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄, 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺; 𑀢𑀸𑀬 𑀘 𑀧𑀦 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺, 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀼 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑁋 𑀫𑀢𑁆𑀢𑀁 𑀲 𑀚𑀜𑁆𑀜𑀸 𑀇𑀥 𑀢𑁄𑀲𑀦𑀢𑁆𑀣𑀁.

𑀲𑁄 ¶ ¶ 𑀢𑁂𑀲𑀼 𑀕𑀼𑀢𑁆𑀢𑁄 𑀬𑀢𑀘𑀸𑀭𑀺 𑀕𑀸𑀫𑁂𑀢𑀺. 𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄𑀢𑀺 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀲𑁂𑀦𑀸𑀲𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂 𑀕𑀼𑀢𑁆𑀢𑁄 𑀕𑁄𑀧𑀺𑀢𑁄 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄𑀢𑀺. 𑀏𑀯𑀫𑁆𑀧𑀺 𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄. 𑀅𑀣 𑀯𑀸 𑀆𑀬𑀢𑀦𑁂𑀲𑀼 𑀕𑀼𑀢𑁆𑀢𑁄 𑀕𑁄𑀧𑀺𑀢𑁄 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄𑀢𑀺. 𑀏𑀯𑀫𑁆𑀧𑀺 𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄.

𑀬𑀢𑀘𑀸𑀭𑀺 𑀕𑀸𑀫𑁂𑀢𑀺 𑀕𑀸𑀫𑁂 𑀬𑀢𑁄 𑀬𑀢𑁆𑀢𑁄 𑀧𑀝𑀺𑀬𑀢𑁆𑀢𑁄 𑀕𑀼𑀢𑁆𑀢𑁄 𑀕𑁄𑀧𑀺𑀢𑁄 ¶ 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄𑀢𑀺 𑁋 𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄 𑀬𑀢𑀘𑀸𑀭𑀺 𑀕𑀸𑀫𑁂.

𑀭𑀼𑀲𑀺𑀢𑁄𑀧𑀺 𑀯𑀸𑀘𑀁 𑀨𑀭𑀼𑀲𑀁 𑀦 𑀯𑀚𑁆𑀚𑀸𑀢𑀺. 𑀤𑀽𑀲𑀺𑀢𑁄 𑀔𑀼𑀁𑀲𑀺𑀢𑁄 𑀯𑀫𑁆𑀪𑀺𑀢𑁄 𑀖𑀝𑁆𑀝𑀺𑀢𑁄 𑀕𑀭𑀳𑀺𑀢𑁄 𑀉𑀧𑀯𑀤𑀺𑀢𑁄 𑀨𑀭𑀼𑀲𑁂𑀦 𑀓𑀓𑁆𑀔𑀴𑁂𑀦 𑀦𑀧𑁆𑀧𑀝𑀺𑀯𑀚𑁆𑀚𑀸 𑀦𑀧𑁆𑀧𑀝𑀺𑀪𑀡𑁂𑀬𑁆𑀬, 𑀅𑀓𑁆𑀓𑁄𑀲𑀦𑁆𑀢𑀁 𑀦 𑀧𑀘𑁆𑀘𑀓𑁆𑀓𑁄𑀲𑁂𑀬𑁆𑀬, 𑀭𑁄𑀲𑀦𑁆𑀢𑀁 𑀦𑀧𑁆𑀧𑀝𑀺𑀭𑁄𑀲𑁂𑀬𑁆𑀬, 𑀪𑀡𑁆𑀟𑀦𑁆𑀢𑀁 𑀦 𑀧𑀝𑀺𑀪𑀡𑁆𑀟𑁂𑀬𑁆𑀬, 𑀦 𑀓𑀮𑀳𑀁 𑀓𑀭𑁂𑀬𑁆𑀬, 𑀦 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬, 𑀦 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬, 𑀦 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬, 𑀦 𑀫𑁂𑀥𑀕𑀁 𑀓𑀭𑁂𑀬𑁆𑀬, 𑀓𑀮𑀳𑀁 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 ¶ 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀭𑀼𑀲𑀺𑀢𑁄𑀧𑀺 𑀯𑀸𑀘𑀁 𑀨𑀭𑀼𑀲𑀁 𑀦 𑀯𑀚𑁆𑀚𑀸.

‘‘𑀅𑀦𑁆𑀦𑀜𑁆𑀘 𑀮𑀤𑁆𑀥𑀸 𑀯𑀲𑀦𑀜𑁆𑀘 𑀓𑀸𑀮𑁂, 𑀫𑀢𑁆𑀢𑀁 𑀲 𑀚𑀜𑁆𑀜𑀸 𑀇𑀥 𑀢𑁄𑀲𑀦𑀢𑁆𑀣𑀁;

𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄 𑀬𑀢𑀘𑀸𑀭𑀺 𑀕𑀸𑀫𑁂, 𑀭𑀼𑀲𑀺𑀢𑁄𑀧𑀺 𑀯𑀸𑀘𑀁 𑀨𑀭𑀼𑀲𑀁 𑀦 𑀯𑀚𑁆𑀚𑀸’’𑀢𑀺.

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄, 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀩𑀳𑀼𑀚𑀸𑀕𑀭𑀲𑁆𑀲;

𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄, 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀼𑀧𑀘𑁆𑀙𑀺𑀦𑁆𑀤𑁂 [𑀓𑀼𑀓𑁆𑀓𑀼𑀘𑁆𑀘𑀺𑀬𑀽𑀧𑀘𑁆𑀙𑀺𑀦𑁆𑀤𑁂 (𑀲𑁆𑀬𑀸.)] .

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄𑀢𑀺. 𑀓𑀣𑀁 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺 ¶ ? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀘𑀓𑁆𑀔𑀼𑀮𑁄𑀮𑁄, 𑀘𑀓𑁆𑀔𑀼𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, ‘‘𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀁, 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀕𑀸𑀫𑁂𑀦 ¶ 𑀕𑀸𑀫𑀁 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦𑀕𑀭𑁂𑀦 𑀦𑀕𑀭𑀁 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 ¶ 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀘 𑀳𑁄𑀢𑀺 𑀭𑀽𑀧𑀤𑀲𑁆𑀲𑀦𑀸𑀬. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀅𑀲𑀁𑀯𑀼𑀢𑁄 𑀕𑀘𑁆𑀙𑀢𑀺 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄, 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀇𑀢𑁆𑀣𑀺𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀧𑀼𑀭𑀺𑀲𑁂 𑀑𑀮𑁄𑀓𑁂𑀦𑁆𑀢𑁄, 𑀓𑀼𑀫𑀸𑀭𑀓𑁂 𑀑𑀮𑁄𑀓𑁂𑀦𑁆𑀢𑁄, 𑀓𑀼𑀫𑀸𑀭𑀺𑀓𑀸𑀬𑁄 𑀑𑀮𑁄𑀓𑁂𑀦𑁆𑀢𑁄, 𑀅𑀦𑁆𑀢𑀭𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄, 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄, 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄, 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 [𑀧𑁂𑀓𑁆𑀔𑀫𑀸𑀦𑁄 (𑀩𑀳𑀽𑀲𑀼)] 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀦𑀧𑁆𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 ¶ 𑀯𑁂𑀢𑀸𑀴𑀁 𑀓𑀼𑀫𑁆𑀪𑀣𑀽𑀡𑀁 𑀲𑁄𑀪𑀦𑀓𑀁 𑀘𑀡𑁆𑀟𑀸𑀮𑀁 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 𑀫𑀳𑀺𑀁𑀲𑀬𑀼𑀤𑁆𑀥𑀁 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 ¶ 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀓𑀣𑀁 𑀦 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀦 𑀘𑀓𑁆𑀔𑀼𑀮𑁄𑀮𑁄 𑀦 𑀘𑀓𑁆𑀔𑀼𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 ‘‘𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀦 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀦 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀦 𑀕𑀸𑀫𑁂𑀦 𑀕𑀸𑀫𑀁 𑀦 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦 𑀦𑀕𑀭𑁂𑀦 𑀦𑀕𑀭𑀁 𑀦 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀦 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 𑀅𑀦𑀦𑀼𑀬𑀼𑀢𑁆𑀢𑁄 𑀘 𑀳𑁄𑀢𑀺 𑀭𑀽𑀧𑀤𑀲𑁆𑀲𑀦𑀸𑀬 ¶ . 𑀏𑀯𑀫𑁆𑀧𑀺 𑀦 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀲𑀁𑀯𑀼𑀢𑁄 𑀕𑀘𑁆𑀙𑀢𑀺 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄…𑀧𑁂… 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀦 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 ¶ 𑀯𑀸 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺…𑀧𑁂… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀦 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸…𑀧𑁂… 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸. 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀦 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀻𑀢𑀺 𑁋 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼.

𑀦 𑀘 𑀧𑀸𑀤𑀮𑁄𑀮𑁄𑀢𑀺. 𑀓𑀣𑀁 𑀧𑀸𑀤𑀮𑁄𑀮𑁄 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀧𑀸𑀤𑀮𑁄𑀮𑁄 𑀧𑀸𑀤𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀆𑀭𑀸𑀫𑁂𑀦 𑀆𑀭𑀸𑀫𑀁…𑀧𑁂… 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺 𑀭𑀽𑀧𑀤𑀲𑁆𑀲𑀦𑀸𑀬. 𑀏𑀯𑀫𑁆𑀧𑀺 𑀧𑀸𑀤𑀮𑁄𑀮𑁄 𑀳𑁄𑀢𑀺.

𑀅𑀣 𑀯𑀸 𑀪𑀺𑀓𑁆𑀔𑀼 𑀅𑀦𑁆𑀢𑁄𑀧𑀺 𑀲𑀗𑁆𑀖𑀸𑀭𑀸𑀫𑁂 𑀧𑀸𑀤𑀮𑁄𑀮𑁄 𑀧𑀸𑀤𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀢𑁆𑀣𑀳𑁂𑀢𑀼 𑀦 𑀓𑀸𑀭𑀡𑀳𑁂𑀢𑀼 𑀉𑀤𑁆𑀥𑀢𑁄 ¶ 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀧𑀭𑀺𑀯𑁂𑀡𑀢𑁄 𑀧𑀭𑀺𑀯𑁂𑀡𑀁 𑀕𑀘𑁆𑀙𑀢𑀺. 𑀯𑀺𑀳𑀸𑀭𑀢𑁄…𑀧𑁂… 𑀇𑀢𑀺 𑀪𑀯𑀸𑀪𑀯𑀓𑀣𑀁 𑀓𑀣𑁂𑀢𑀺. 𑀏𑀯𑀫𑁆𑀧𑀺 𑀧𑀸𑀤𑀮𑁄𑀮𑁄 𑀳𑁄𑀢𑀺.

𑀦 𑀘 𑀧𑀸𑀤𑀮𑁄𑀮𑁄𑀢𑀺. 𑀧𑀸𑀤𑀮𑁄𑀮𑀺𑀬𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀧𑀸𑀤𑀮𑁄𑀮𑀺𑀬𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 ¶ 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬, 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀅𑀲𑁆𑀲 𑀧𑀝𑀺𑀲𑀮𑁆𑀮𑀸𑀦𑀭𑀢𑁄 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀁 𑀛𑀸𑀬𑀻 𑀛𑀸𑀦𑀭𑀢𑁄 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀲𑀤𑀢𑁆𑀣𑀕𑀭𑀼𑀓𑁄𑀢𑀺 𑁋 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄.

𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀩𑀳𑀼𑀚𑀸𑀕𑀭𑀲𑁆𑀲𑀸𑀢𑀺. 𑀛𑀸𑀦𑀸𑀦𑀼𑀬𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑁋 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲… 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲… 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄𑀢𑀺. 𑀏𑀯𑀫𑁆𑀧𑀺 𑀛𑀸𑀦𑀸𑀦𑀼𑀬𑀼𑀢𑁆𑀢𑁄. 𑀅𑀣 𑀯𑀸 𑀉𑀧𑁆𑀧𑀦𑁆𑀦𑀁 𑀯𑀸 𑀧𑀞𑀫𑀁 𑀛𑀸𑀦𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺 [𑀩𑀳𑀼𑀮𑀺𑀁 𑀓𑀭𑁄𑀢𑀺 (𑀓.)], 𑀉𑀧𑁆𑀧𑀦𑁆𑀦𑀁 𑀯𑀸 𑀤𑀼𑀢𑀺𑀬𑀁 ¶ 𑀛𑀸𑀦𑀁 ¶ … 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀻𑀢𑀺. 𑀏𑀯𑀫𑁆𑀧𑀺 𑀛𑀸𑀦𑀸𑀦𑀼𑀬𑀼𑀢𑁆𑀢𑁄.

𑀩𑀳𑀼𑀚𑀸𑀕𑀭𑀲𑁆𑀲𑀸𑀢𑀺 𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 ¶ 𑀬𑀸𑀫𑀁 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀢𑁆𑀯𑀸, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀧𑀘𑁆𑀘𑀼𑀝𑁆𑀞𑀸𑀬 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻𑀢𑀺 𑁋 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀩𑀳𑀼𑀚𑀸𑀕𑀭𑀲𑁆𑀲.

𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄𑀢𑀺. 𑀉𑀧𑁂𑀓𑁆𑀔𑀸𑀢𑀺 𑀬𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀦𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀘𑀺𑀢𑁆𑀢𑀲𑀫𑀢𑀸 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀢𑀸 𑀫𑀚𑁆𑀛𑀢𑁆𑀢𑀢𑀸 𑀘𑀺𑀢𑁆𑀢𑀲𑁆𑀲. 𑀲𑀫𑀸𑀳𑀺𑀢𑀢𑁆𑀢𑁄𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑀲𑀫𑁆𑀫𑀸𑀲𑀫𑀸𑀥𑀺. 𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄𑀢𑀺. 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀁 𑀆𑀭𑀩𑁆𑀪 𑀏𑀓𑀕𑁆𑀕𑀘𑀺𑀢𑁆𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑁄𑀢𑀺 𑁋 𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄.

𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀼𑀧𑀘𑁆𑀙𑀺𑀦𑁆𑀤𑁂𑀢𑀺. 𑀢𑀓𑁆𑀓𑀸𑀢𑀺 𑀦𑀯 𑀯𑀺𑀢𑀓𑁆𑀓𑀸 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀜𑀸𑀢𑀺𑀯𑀺𑀢𑀓𑁆𑀓𑁄, 𑀚𑀦𑀧𑀤𑀯𑀺𑀢𑀓𑁆𑀓𑁄, 𑀅𑀫𑀭𑀯𑀺𑀢𑀓𑁆𑀓𑁄, 𑀧𑀭𑀸𑀦𑀼𑀤𑀬𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀦𑀯 𑀯𑀺𑀢𑀓𑁆𑀓𑀸. 𑀓𑀸𑀫𑀯𑀺𑀢𑀓𑁆𑀓𑀸𑀦𑀁 𑀓𑀸𑀫𑀲𑀜𑁆𑀜𑀸𑀲𑀬𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀸𑀦𑀁 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀲𑀬𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸𑀦𑀁 𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀲𑀬𑁄. 𑀅𑀣 𑀯𑀸 𑀢𑀓𑁆𑀓𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀲𑀗𑁆𑀓𑀧𑁆𑀧𑀸𑀦𑀁 𑀅𑀯𑀺𑀚𑁆𑀚𑀸𑀲𑀬𑁄, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀆𑀲𑀬𑁄, 𑀅𑀲𑁆𑀫𑀺𑀫𑀸𑀦𑁄 𑀆𑀲𑀬𑁄, 𑀅𑀦𑁄𑀢𑁆𑀢𑀧𑁆𑀧𑀁 𑀆𑀲𑀬𑁄, 𑀉𑀤𑁆𑀥𑀘𑁆𑀘𑀁 𑀆𑀲𑀬𑁄.

𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 ¶ 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 ¶ 𑀓𑀼𑀓𑁆𑀓𑀼𑀘𑁆𑀘𑀁 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸, 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸. 𑀬𑀁 𑀏𑀯𑀭𑀽𑀧𑀁 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀢𑁆𑀢𑀁 ¶ 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀼𑀓𑁆𑀓𑀼𑀘𑁆𑀘𑀁.

𑀅𑀧𑀺 ¶ 𑀘 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑁋 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄? ‘‘𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. ‘‘𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢𑀁… 𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀁… 𑀓𑀢𑁄 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀓𑀢𑀸 𑀫𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. ‘‘𑀓𑀢𑀁 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀁… 𑀓𑀢𑁄 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄… 𑀓𑀢𑁄 𑀫𑁂 𑀫𑀼𑀲𑀸𑀯𑀸𑀤𑁄… 𑀓𑀢𑀸 𑀫𑁂 𑀧𑀺𑀲𑀼𑀡𑀯𑀸𑀘𑀸… 𑀓𑀢𑀸 𑀫𑁂 𑀨𑀭𑀼𑀲𑀯𑀸𑀘𑀸… 𑀓𑀢𑁄 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁄… 𑀓𑀢𑀸 𑀫𑁂 𑀅𑀪𑀺𑀚𑁆𑀛𑀸… 𑀓𑀢𑁄 𑀫𑁂 𑀩𑁆𑀬𑀸𑀧𑀸𑀤𑁄… 𑀓𑀢𑀸 𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄.

𑀅𑀣 𑀯𑀸 ‘‘𑀲𑀻𑀮𑁂𑀲𑀼𑀫𑁆𑀳𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀇𑀦𑁆𑀤𑁆𑀭𑀺𑀬𑁂𑀲𑀼𑀫𑁆𑀳𑀺 𑀅𑀕𑀼𑀢𑁆𑀢𑀤𑁆𑀯𑀸𑀭𑁄’’𑀢𑀺… ‘‘𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀫𑁆𑀳𑀻’’𑀢𑀺… ‘‘𑀚𑀸𑀕𑀭𑀺𑀬𑀁 ¶ 𑀅𑀦𑀦𑀼𑀬𑀼𑀢𑁆𑀢𑁄𑀫𑁆𑀳𑀻’’𑀢𑀺… ‘‘𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸𑀦𑀺 𑀫𑁂 𑀧𑀜𑁆𑀘 𑀩𑀮𑀸𑀦𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺… ‘‘𑀅𑀪𑀸𑀯𑀺𑀢𑁄 𑀫𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺… ‘‘𑀤𑀼𑀓𑁆𑀔𑀁 𑀫𑁂 𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺… ‘‘𑀤𑀼𑀓𑁆𑀔𑀲𑀫𑀼𑀤𑀬𑁄 𑀫𑁂 𑀅𑀧𑁆𑀧𑀳𑀻𑀦𑁄’’𑀢𑀺… ‘‘𑀫𑀕𑁆𑀕𑁄 𑀫𑁂 𑀅𑀪𑀸𑀯𑀺𑀢𑁄’’𑀢𑀺… ‘‘𑀦𑀺𑀭𑁄𑀥𑁄 𑀫𑁂 𑀅𑀲𑀘𑁆𑀙𑀺𑀓𑀢𑁄’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀼𑀧𑀘𑁆𑀙𑀺𑀦𑁆𑀤𑁂𑀢𑀺. 𑀢𑀓𑁆𑀓𑀜𑁆𑀘 𑀢𑀓𑁆𑀓𑀸𑀲𑀬𑀜𑁆𑀘 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀉𑀧𑀘𑁆𑀙𑀺𑀦𑁆𑀤𑁂𑀬𑁆𑀬 𑀙𑀺𑀦𑁆𑀤𑁂𑀬𑁆𑀬 𑀉𑀘𑁆𑀙𑀺𑀦𑁆𑀤𑁂𑀬𑁆𑀬 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀼𑀧𑀘𑁆𑀙𑀺𑀦𑁆𑀤𑁂.

‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄, 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀩𑀳𑀼𑀚𑀸𑀕𑀭𑀲𑁆𑀲;

𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄, 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘𑀼𑀧𑀘𑁆𑀙𑀺𑀦𑁆𑀤𑁂’’𑀢𑀺.

𑀘𑀼𑀤𑀺𑀢𑁄 ¶ ¶ 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀔𑀺𑀮𑀁 𑀧𑀪𑀺𑀦𑁆𑀤𑁂;

𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁, 𑀚𑀦𑀯𑀸𑀤𑀥𑀫𑁆𑀫𑀸𑀬 𑀦 𑀘𑁂𑀢𑀬𑁂𑀬𑁆𑀬.

𑀘𑀼𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂𑀢𑀺. 𑀘𑀼𑀤𑀺𑀢𑁄𑀢𑀺 𑀉𑀧𑀚𑁆𑀛𑀸𑀬𑀸 𑀯𑀸 ¶ 𑀆𑀘𑀭𑀺𑀬𑀸 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀲𑀦𑁆𑀤𑀺𑀝𑁆𑀞𑀸 𑀯𑀸 𑀲𑀫𑁆𑀪𑀢𑁆𑀢𑀸 𑀯𑀸 𑀲𑀳𑀸𑀬𑀸 𑀯𑀸 𑀘𑁄𑀤𑁂𑀦𑁆𑀢𑀺 𑁋 ‘‘𑀇𑀤𑀁 𑀢𑁂, 𑀆𑀯𑀼𑀲𑁄, 𑀅𑀬𑀼𑀢𑁆𑀢𑀁, 𑀇𑀤𑀁 𑀢𑁂 𑀅𑀧𑁆𑀧𑀢𑁆𑀢𑀁, 𑀇𑀤𑀁 𑀢𑁂 𑀅𑀲𑀸𑀭𑀼𑀧𑁆𑀧𑀁, 𑀇𑀤𑀁 𑀢𑁂 𑀅𑀲𑀻𑀮𑀝𑁆𑀞’’𑀦𑁆𑀢𑀺. 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑀁 𑀘𑁄𑀤𑀦𑀁 𑀦𑀦𑁆𑀤𑁂𑀬𑁆𑀬 𑀅𑀪𑀺𑀦𑀦𑁆𑀤𑁂𑀬𑁆𑀬 𑀫𑁄𑀤𑁂𑀬𑁆𑀬 𑀅𑀦𑀼𑀫𑁄𑀤𑁂𑀬𑁆𑀬 𑀇𑀘𑁆𑀙𑁂𑀬𑁆𑀬 𑀲𑀸𑀤𑀺𑀬𑁂𑀬𑁆𑀬 𑀧𑀢𑁆𑀣𑀬𑁂𑀬𑁆𑀬 𑀧𑀺𑀳𑀬𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬. 𑀬𑀣𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀚𑀸𑀢𑀺𑀓𑁄 𑀲𑀻𑀲𑀁𑀦𑁆𑀳𑀸𑀢𑁄 𑀉𑀧𑁆𑀧𑀮𑀫𑀸𑀮𑀁 𑀯𑀸 𑀯𑀲𑁆𑀲𑀺𑀓𑀫𑀸𑀮𑀁 𑀯𑀸 𑀅𑀥𑀺𑀫𑀼𑀢𑁆𑀢𑀓𑀫𑀸𑀮𑀁 𑀯𑀸 𑀮𑀪𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀦𑁆𑀤𑁂𑀬𑁆𑀬 𑀅𑀪𑀺𑀦𑀦𑁆𑀤𑁂𑀬𑁆𑀬 𑀫𑁄𑀤𑁂𑀬𑁆𑀬 𑀅𑀦𑀼𑀫𑁄𑀤𑁂𑀬𑁆𑀬 𑀇𑀘𑁆𑀙𑁂𑀬𑁆𑀬 𑀲𑀸𑀤𑀺𑀬𑁂𑀬𑁆𑀬 𑀧𑀢𑁆𑀣𑀬𑁂𑀬𑁆𑀬 𑀧𑀺𑀳𑀬𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬; 𑀏𑀯𑀫𑁂𑀯 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑀁 𑀘𑁄𑀤𑀦𑀁 𑀦𑀦𑁆𑀤𑁂𑀬𑁆𑀬 𑀅𑀪𑀺𑀦𑀦𑁆𑀤𑁂𑀬𑁆𑀬 𑀫𑁄𑀤𑁂𑀬𑁆𑀬 𑀅𑀦𑀼𑀫𑁄𑀤𑁂𑀬𑁆𑀬 𑀇𑀘𑁆𑀙𑁂𑀬𑁆𑀬 𑀲𑀸𑀤𑀺𑀬𑁂𑀬𑁆𑀬 𑀧𑀢𑁆𑀣𑀬𑁂𑀬𑁆𑀬 𑀧𑀺𑀳𑀬𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬.

‘‘𑀦𑀺𑀥𑀻𑀦𑀁𑀯 [𑀦𑀺𑀥𑀺𑀦𑀁𑀯 (𑀓.) 𑀥. 𑀧. 𑁭𑁬] 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂.

‘‘𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄;

𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬, 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺, 𑀅𑀲𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑁄’’𑀢𑀺.

𑀘𑀼𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀔𑀺𑀮𑀁 𑀧𑀪𑀺𑀦𑁆𑀤𑁂𑀢𑀺. 𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 ¶ 𑀲𑀫𑀲𑀺𑀓𑁆𑀔𑀢𑀸. 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀔𑀺𑀮𑀁 𑀧𑀪𑀺𑀦𑁆𑀤𑁂𑀢𑀺. 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀳𑀢𑀘𑀺𑀢𑁆𑀢𑀢𑀁 𑀔𑀺𑀮𑀚𑀸𑀢𑀢𑀁 𑀧𑀪𑀺𑀦𑁆𑀤𑁂𑀬𑁆𑀬 ¶ , 𑀧𑀜𑁆𑀘𑀧𑀺 𑀘𑁂𑀢𑁄𑀔𑀺𑀮𑁂 𑀪𑀺𑀦𑁆𑀤𑁂𑀬𑁆𑀬, 𑀢𑀬𑁄𑀧𑀺 𑀘𑁂𑀢𑁄𑀔𑀺𑀮𑁂 𑀪𑀺𑀦𑁆𑀤𑁂𑀬𑁆𑀬, 𑀭𑀸𑀕𑀔𑀺𑀮𑀁 𑀤𑁄𑀲𑀔𑀺𑀮𑀁 𑀫𑁄𑀳𑀔𑀺𑀮𑀁 𑀪𑀺𑀦𑁆𑀤𑁂𑀬𑁆𑀬 𑀧𑀪𑀺𑀦𑁆𑀤𑁂𑀬𑁆𑀬 𑀲𑀫𑁆𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑁋 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀔𑀺𑀮𑀁 𑀧𑀪𑀺𑀦𑁆𑀤𑁂.

𑀯𑀸𑀘𑀁 ¶ ¶ 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀦𑁆𑀢𑀺. 𑀜𑀸𑀡𑀲𑀫𑀼𑀝𑁆𑀞𑀺𑀢𑀁 𑀯𑀸𑀘𑀁 𑀫𑀼𑀜𑁆𑀘𑁂𑀬𑁆𑀬, 𑀅𑀢𑁆𑀣𑀽𑀧𑀲𑀁𑀳𑀺𑀢𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀯𑀸𑀘𑀁 𑀫𑀼𑀜𑁆𑀘𑁂𑀬𑁆𑀬 𑀧𑀫𑀼𑀜𑁆𑀘𑁂𑀬𑁆𑀬𑀸𑀢𑀺 𑁋 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁. 𑀦𑀸𑀢𑀺𑀯𑁂𑀮𑀦𑁆𑀢𑀺. 𑀯𑁂𑀮𑀸𑀢𑀺 𑀤𑁆𑀯𑁂 𑀯𑁂𑀮𑀸 𑁋 𑀓𑀸𑀮𑀯𑁂𑀮𑀸 𑀘 𑀲𑀻𑀮𑀯𑁂𑀮𑀸 𑀘. 𑀓𑀢𑀫𑀸 𑀓𑀸𑀮𑀯𑁂𑀮𑀸? 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀓𑀸𑀮𑀯𑁂𑀮𑀸𑀢𑀺𑀓𑁆𑀓𑀦𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀓𑀸𑀮𑀁 𑀅𑀲𑀫𑁆𑀧𑀢𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀯𑁂𑀮𑀁 𑀅𑀲𑀫𑁆𑀧𑀢𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀓𑀸𑀮𑀯𑁂𑀮𑀁 𑀅𑀲𑀫𑁆𑀧𑀢𑁆𑀢𑀁 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬.

‘‘𑀬𑁄 𑀯𑁂 [𑀘 (𑀲𑁆𑀬𑀸.)] 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂, 𑀅𑀢𑀺𑀯𑁂𑀮𑀜𑁆𑀘 𑀪𑀸𑀲𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀓𑁄𑀓𑀺𑀮𑀸𑀬𑁂𑀯 [𑀓𑁄𑀓𑀺𑀮𑀺𑀬𑀸𑀯 (𑀲𑁆𑀬𑀸.)] 𑀅𑀢𑁆𑀭𑀚𑁄’’𑀢𑀺.

𑀅𑀬𑀁 𑀓𑀸𑀮𑀯𑁂𑀮𑀸. 𑀓𑀢𑀫𑀸 𑀲𑀻𑀮𑀯𑁂𑀮𑀸? 𑀭𑀢𑁆𑀢𑁄 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀤𑀼𑀝𑁆𑀞𑁄 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀫𑀽𑀴𑁆𑀳𑁄 𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀫𑀼𑀲𑀸𑀯𑀸𑀤𑀁 𑀦 𑀪𑀸𑀲𑁂𑀬𑁆𑀬, 𑀧𑀺𑀲𑀼𑀡𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀨𑀭𑀼𑀲𑀯𑀸𑀘𑀁 𑀦 𑀪𑀸𑀲𑁂𑀬𑁆𑀬, 𑀲𑀫𑁆𑀨𑀧𑁆𑀧𑀮𑀸𑀧𑀁 𑀦 𑀪𑀸𑀲𑁂𑀬𑁆𑀬 𑀦 𑀓𑀣𑁂𑀬𑁆𑀬 𑀦 𑀪𑀡𑁂𑀬𑁆𑀬 𑀦 𑀤𑀻𑀧𑀬𑁂𑀬𑁆𑀬 𑀦 𑀯𑁄𑀳𑀭𑁂𑀬𑁆𑀬. 𑀅𑀬𑀁 𑀲𑀻𑀮𑀯𑁂𑀮𑀸𑀢𑀺 ¶ 𑁋 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁.

𑀚𑀦𑀯𑀸𑀤𑀥𑀫𑁆𑀫𑀸𑀬 𑀦 𑀘𑁂𑀢𑀬𑁂𑀬𑁆𑀬𑀸𑀢𑀺. 𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 ¶ 𑀘 𑀫𑀦𑀼𑀲𑁆𑀲𑀸 𑀘. 𑀚𑀦𑀲𑁆𑀲 𑀯𑀸𑀤𑀸𑀬 𑀉𑀧𑀯𑀸𑀤𑀸𑀬 𑀦𑀺𑀦𑁆𑀤𑀸𑀬 𑀕𑀭𑀳𑀸𑀬 𑀅𑀓𑀺𑀢𑁆𑀢𑀺𑀬𑀸 𑀅𑀯𑀡𑁆𑀡𑀳𑀸𑀭𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸 𑀦 𑀘𑁂𑀢𑀬𑁂𑀬𑁆𑀬 𑀘𑁂𑀢𑀦𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬 𑀲𑀗𑁆𑀓𑀧𑁆𑀧𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬 𑀫𑀦𑀲𑀺𑀓𑀸𑀭𑀁 𑀦 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑁋 𑀚𑀦𑀯𑀸𑀤𑀥𑀫𑁆𑀫𑀸𑀬 𑀦 𑀘𑁂𑀢𑀬𑁂𑀬𑁆𑀬.

‘‘𑀘𑀼𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀔𑀺𑀮𑀁 𑀧𑀪𑀺𑀦𑁆𑀤𑁂;

𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁, 𑀚𑀦𑀯𑀸𑀤𑀥𑀫𑁆𑀫𑀸𑀬 𑀦 𑀘𑁂𑀢𑀬𑁂𑀬𑁆𑀬𑀸’’𑀢𑀺.

𑀅𑀣𑀸𑀧𑀭𑀁 𑀧𑀜𑁆𑀘 𑀭𑀚𑀸𑀦𑀺 𑀮𑁄𑀓𑁂, 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂;

𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀅𑀣𑁄 𑀭𑀲𑁂𑀲𑀼, 𑀕𑀦𑁆𑀥𑁂𑀲𑀼 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕𑀁.

𑀅𑀣𑀸𑀧𑀭𑀁 ¶ ¶ 𑀧𑀜𑁆𑀘 𑀭𑀚𑀸𑀦𑀺 𑀮𑁄𑀓𑁂𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀧𑀜𑁆𑀘 𑀭𑀚𑀸𑀦𑀻𑀢𑀺 𑀭𑀽𑀧𑀭𑀚𑁄, 𑀲𑀤𑁆𑀤𑀭𑀚𑁄, 𑀕𑀦𑁆𑀥𑀭𑀚𑁄, 𑀭𑀲𑀭𑀚𑁄, 𑀨𑁄𑀝𑁆𑀞𑀩𑁆𑀩𑀭𑀚𑁄.

‘‘𑀭𑀸𑀕𑁄 ¶ 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 [𑀧𑀝𑀺𑀯𑀺𑀦𑁄𑀤𑀺𑀢𑁆𑀯𑀸 (𑀓.)] 𑀧𑀡𑁆𑀟𑀺𑀢𑀸, 𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺…𑀧𑁂…;

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀫𑁄𑀳𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺…𑀧𑁂…;

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂’’.

𑀮𑁄𑀓𑁂𑀢𑀺 ¶ 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀅𑀣𑀸𑀧𑀭𑀁 𑀧𑀜𑁆𑀘 𑀭𑀚𑀸𑀦𑀺 𑀮𑁄𑀓𑁂.

𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺. 𑀬𑁂𑀲𑀦𑁆𑀢𑀺 𑀭𑀽𑀧𑀭𑀸𑀕𑀲𑁆𑀲 𑀲𑀤𑁆𑀤𑀭𑀸𑀕𑀲𑁆𑀲 𑀕𑀦𑁆𑀥𑀭𑀸𑀕𑀲𑁆𑀲 𑀭𑀲𑀭𑀸𑀕𑀲𑁆𑀲 𑀨𑁄𑀝𑁆𑀞𑀩𑁆𑀩𑀭𑀸𑀕𑀲𑁆𑀲. 𑀲𑀢𑀻𑀫𑀸𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀯𑀼𑀘𑁆𑀘𑀢𑀺 𑀲𑀢𑀺𑀫𑀸 ¶ . 𑀲𑀺𑀓𑁆𑀔𑁂𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺. 𑀲𑀢𑀺𑀫𑀸 𑀧𑀼𑀕𑁆𑀕𑀮𑁄 𑀬𑁂𑀲𑀁 𑀭𑀽𑀧𑀭𑀸𑀕𑀲𑁆𑀲 𑀲𑀤𑁆𑀤𑀭𑀸𑀕𑀲𑁆𑀲 𑀕𑀦𑁆𑀥𑀭𑀸𑀕𑀲𑁆𑀲 𑀭𑀲𑀭𑀸𑀕𑀲𑁆𑀲 𑀨𑁄𑀝𑁆𑀞𑀩𑁆𑀩𑀭𑀸𑀕𑀲𑁆𑀲 𑀯𑀺𑀦𑀬𑀸𑀬 𑀧𑀝𑀺𑀯𑀺𑀦𑀬𑀸𑀬 𑀧𑀳𑀸𑀦𑀸𑀬 𑀯𑀽𑀧𑀲𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂.

𑀭𑀽𑀧𑁂𑀲𑀼 ¶ ¶ 𑀲𑀤𑁆𑀤𑁂𑀲𑀼 𑀅𑀣𑁄 𑀭𑀲𑁂𑀲𑀼, 𑀕𑀦𑁆𑀥𑁂𑀲𑀼 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕𑀦𑁆𑀢𑀺. 𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀕𑀦𑁆𑀥𑁂𑀲𑀼 𑀭𑀲𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼 𑀭𑀸𑀕𑀁 𑀲𑀳𑁂𑀬𑁆𑀬 𑀧𑀭𑀺𑀲𑀳𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀅𑀣𑁄 𑀭𑀲𑁂𑀲𑀼 𑀕𑀦𑁆𑀥𑁂𑀲𑀼 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕𑀁.

‘‘𑀅𑀣𑀸𑀧𑀭𑀁 𑀧𑀜𑁆𑀘 𑀭𑀚𑀸𑀦𑀺 𑀮𑁄𑀓𑁂, 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂;

𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀅𑀣𑁄 𑀭𑀲𑁂𑀲𑀼, 𑀕𑀦𑁆𑀥𑁂𑀲𑀼 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕’’𑀦𑁆𑀢𑀺.

𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀪𑀺𑀓𑁆𑀔𑀼 𑀲𑀢𑀺𑀫𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄;

𑀓𑀸𑀮𑁂 ¶ ¶ 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄, 𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄. [𑀇𑀢𑀺 𑀪𑀕𑀯𑀸]

𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀦𑁆𑀢𑀺. 𑀏𑀢𑁂𑀲𑀽𑀢𑀺 𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀕𑀦𑁆𑀥𑁂𑀲𑀼 𑀭𑀲𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼. 𑀙𑀦𑁆𑀤𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁…𑀧𑁂… 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀦𑁆𑀢𑀺. 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑀁 𑀯𑀺𑀦𑁂𑀬𑁆𑀬 𑀧𑀝𑀺𑀯𑀺𑀦𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁.

𑀪𑀺𑀓𑁆𑀔𑀼 𑀲𑀢𑀺𑀫𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀯𑀸 𑀪𑀺𑀓𑁆𑀔𑀼, 𑀲𑁂𑀔𑁄 𑀯𑀸 𑀪𑀺𑀓𑁆𑀔𑀼. 𑀲𑀢𑀺𑀫𑀸𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑀺𑀫𑀸.

𑀪𑀺𑀓𑁆𑀔𑀼 𑀲𑀢𑀺𑀫𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺. 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺𑀬𑀸 𑀘 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁; 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 ¶ 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 ¶ 𑀘𑀺𑀢𑁆𑀢𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁; 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 ¶ 𑀤𑀺𑀝𑁆𑀞𑀸𑀦𑀼𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁 ¶ , 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀅𑀭𑀳𑀢𑁄 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑁋 𑀪𑀺𑀓𑁆𑀔𑀼 𑀲𑀢𑀺𑀫𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄.

𑀓𑀸𑀮𑁂𑀦 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄𑀢𑀺. 𑀓𑀸𑀮𑁂𑀦𑀸𑀢𑀺 𑀉𑀤𑁆𑀥𑀢𑁂 𑀘𑀺𑀢𑁆𑀢𑁂 𑀲𑀫𑀣𑀲𑁆𑀲 [𑀲𑀫𑀸𑀥𑀺𑀲𑁆𑀲 (𑀲𑀻.)] 𑀓𑀸𑀮𑁄, 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀬 𑀓𑀸𑀮𑁄.

‘‘𑀓𑀸𑀮𑁂 𑀧𑀕𑁆𑀕𑀡𑁆𑀳𑀢𑀺 𑀘𑀺𑀢𑁆𑀢𑀁, 𑀦𑀺𑀕𑁆𑀕𑀡𑁆𑀳𑀢𑀺 𑀧𑀼𑀦𑀸𑀧𑀭𑁂 [𑀅𑀣𑀸𑀧𑀭𑁂 (𑀲𑁆𑀬𑀸.)];

𑀲𑀫𑁆𑀧𑀳𑀁𑀲𑀢𑀺 𑀓𑀸𑀮𑁂𑀦, 𑀓𑀸𑀮𑁂 𑀘𑀺𑀢𑁆𑀢𑀁 𑀲𑀫𑀸𑀤𑀳𑁂.

‘‘𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀓𑀸𑀮𑁂𑀦, 𑀲𑁄 𑀬𑁄𑀕𑀻 𑀓𑀸𑀮𑀓𑁄𑀯𑀺𑀤𑁄;

𑀓𑀺𑀫𑁆𑀳𑀺 𑀓𑀸𑀮𑀫𑁆𑀳𑀺 𑀧𑀕𑁆𑀕𑀸𑀳𑁄, 𑀓𑀺𑀫𑁆𑀳𑀺 𑀓𑀸𑀮𑁂 𑀯𑀺𑀦𑀺𑀕𑁆𑀕𑀳𑁄.

‘‘𑀓𑀺𑀫𑁆𑀳𑀺 ¶ 𑀧𑀳𑀁𑀲𑀦𑀸𑀓𑀸𑀮𑁄, 𑀲𑀫𑀣𑀓𑀸𑀮𑁄 𑀘 𑀓𑀻𑀤𑀺𑀲𑁄;

𑀉𑀧𑁂𑀓𑁆𑀔𑀸𑀓𑀸𑀮𑀁 𑀘𑀺𑀢𑁆𑀢𑀲𑁆𑀲, 𑀓𑀣𑀁 𑀤𑀲𑁆𑀲𑁂𑀢𑀺 𑀬𑁄𑀕𑀺𑀦𑁄.

‘‘𑀮𑀻𑀦𑁂 𑀘𑀺𑀢𑁆𑀢𑀫𑁆𑀳𑀺 𑀧𑀕𑁆𑀕𑀸𑀳𑁄, 𑀉𑀤𑁆𑀥𑀢𑀲𑁆𑀫𑀺𑀁 𑀯𑀺𑀦𑀺𑀕𑁆𑀕𑀳𑁄;

𑀦𑀺𑀭𑀲𑁆𑀲𑀸𑀤𑀕𑀢𑀁 𑀘𑀺𑀢𑁆𑀢𑀁, 𑀲𑀫𑁆𑀧𑀳𑀁𑀲𑁂𑀬𑁆𑀬 𑀢𑀸𑀯𑀤𑁂.

‘‘𑀲𑀫𑁆𑀧𑀳𑀝𑁆𑀞𑀁 𑀬𑀤𑀸 𑀘𑀺𑀢𑁆𑀢𑀁, 𑀅𑀮𑀻𑀦𑀁 𑀪𑀯𑀢𑀺𑀦𑀼𑀤𑁆𑀥𑀢𑀁;

𑀲𑀫𑀣𑀲𑁆𑀲 𑀘 𑀲𑁄 [𑀲𑀫𑀣𑀦𑀺𑀫𑀺𑀢𑁆𑀢𑀲𑁆𑀲 𑀲𑁄 (𑀲𑀻. 𑀓.)] 𑀓𑀸𑀮𑁄, 𑀅𑀚𑁆𑀛𑀢𑁆𑀢𑀁 𑀭𑀫𑀬𑁂 𑀫𑀦𑁄.

‘‘𑀏𑀢𑁂𑀦 𑀫𑁂𑀯𑀼𑀧𑀸𑀬𑁂𑀦, 𑀬𑀤𑀸 𑀳𑁄𑀢𑀺 𑀲𑀫𑀸𑀳𑀺𑀢𑀁;

𑀲𑀫𑀸𑀳𑀺𑀢𑀘𑀺𑀢𑁆𑀢𑀫𑀜𑁆𑀜𑀸𑀬, 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬 𑀢𑀸𑀯𑀤𑁂.

‘‘𑀏𑀯𑀁 ¶ ¶ 𑀓𑀸𑀮𑀯𑀺𑀤𑀽 𑀥𑀻𑀭𑁄, 𑀓𑀸𑀮𑀜𑁆𑀜𑀽 𑀓𑀸𑀮𑀓𑁄𑀯𑀺𑀤𑁄;

𑀓𑀸𑀮𑁂𑀦 𑀓𑀸𑀮𑀁 𑀘𑀺𑀢𑁆𑀢𑀲𑁆𑀲, 𑀦𑀺𑀫𑀺𑀢𑁆𑀢𑀫𑀼𑀧𑀮𑀓𑁆𑀔𑀬𑁂’’𑀢𑀺.

𑀓𑀸𑀮𑁂𑀦 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 ¶ 𑀤𑀼𑀓𑁆𑀔𑀸’’𑀢𑀺 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑁋 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄.

𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄, 𑀇𑀢𑀺 𑀪𑀕𑀯𑀸𑀢𑀺. 𑀏𑀓𑁄𑀤𑀻𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑁄 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑁋 𑀏𑀓𑁄𑀤𑀺𑀪𑀽𑀢𑁄. 𑀯𑀺𑀳𑀦𑁂 𑀢𑀫𑀁 𑀲𑁄𑀢𑀺 𑀭𑀸𑀕𑀢𑀫𑀁 𑀤𑁄𑀲𑀢𑀫𑀁 𑀫𑁄𑀳𑀢𑀫𑀁 𑀤𑀺𑀝𑁆𑀞𑀺𑀢𑀫𑀁 𑀫𑀸𑀦𑀢𑀫𑀁 𑀓𑀺𑀮𑁂𑀲𑀢𑀫𑀁 𑀤𑀼𑀘𑁆𑀘𑀭𑀺𑀢𑀢𑀫𑀁 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁 𑀳𑀦𑁂𑀬𑁆𑀬 𑀯𑀺𑀳𑀦𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 ¶ 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬.

𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀡𑁆𑀟𑀓𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 ¶ 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 ¶ 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸 ¶ , 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 ¶ 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁; 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄 𑀇𑀢𑀺 𑀪𑀕𑀯𑀸.

‘‘𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀪𑀺𑀓𑁆𑀔𑀼 𑀲𑀢𑀺𑀫𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄;

𑀓𑀸𑀮𑁂𑀦 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄, 𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄’’. [𑀇𑀢𑀺 𑀪𑀕𑀯𑀸𑀢𑀺]

𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀲𑁄𑀴𑀲𑀫𑁄.

𑀅𑀝𑁆𑀞𑀓𑀯𑀕𑁆𑀕𑀫𑁆𑀳𑀺 𑀲𑁄𑀴𑀲 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀸 𑀲𑀫𑀢𑁆𑀢𑀸.

𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.