📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸

𑀧𑀸𑀭𑀸𑀬𑀦𑀯𑀕𑁆𑀕𑀦𑀺𑀤𑁆𑀤𑁂𑀲𑁄

𑁧. 𑀅𑀚𑀺𑀢𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲 ¶ ¶ ¶ 𑀧𑀞𑀫𑁂 𑀅𑀚𑀺𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋

𑁧.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, (𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,)

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. 𑁋

𑀅𑀚𑀺𑀢𑀫𑀸𑀡𑀯𑀲𑁆𑀲 𑀧𑀼𑀘𑁆𑀙𑀺𑀢𑁂 𑀧𑀞𑀫𑀧𑀜𑁆𑀳𑁂 𑀘 𑀉𑀧𑀭𑀽𑀧𑀭𑀺𑀧𑀜𑁆𑀳𑁂 𑀘 𑀦𑀺𑀤𑁆𑀤𑁂𑀲𑁂𑀲𑀼 𑀘 𑀯𑀼𑀢𑁆𑀢𑀜𑁆𑀘 𑀉𑀢𑁆𑀢𑀸𑀦𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀯𑀺𑀲𑁂𑀲𑀫𑁂𑀯 𑀯𑀓𑁆𑀔𑀸𑀫. 𑀢𑀢𑁆𑀣 𑀦𑀺𑀯𑀼𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑁄. 𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻𑀢𑀺 𑀓𑀺𑀁 𑀅𑀲𑁆𑀲 𑀮𑁄𑀓𑀲𑁆𑀲 𑀅𑀪𑀺𑀮𑁂𑀧𑀦𑀁 𑀯𑀤𑁂𑀲𑀺?

𑀆𑀯𑀼𑀢𑁄𑀢𑀺 ¶ 𑀆𑀯𑀭𑀺𑀢𑁄. 𑀦𑀺𑀯𑀼𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑁄. 𑀑𑀯𑀼𑀢𑁄𑀢𑀺 𑀳𑁂𑀝𑁆𑀞𑀸 𑀧𑀝𑀺𑀘𑁆𑀙𑀸𑀤𑀺𑀢𑁄. 𑀧𑀺𑀳𑀺𑀢𑁄𑀢𑀺 𑀉𑀧𑀭𑀺𑀪𑀸𑀕𑁂𑀦 𑀙𑀸𑀤𑀺𑀢𑁄. 𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀅𑀯𑀺𑀯𑀝𑁄. 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑀅𑀥𑁄𑀫𑀼𑀔𑀁 𑀙𑀸𑀤𑀺𑀢𑁄.

𑀦𑀧𑁆𑀧𑀓𑀸𑀲𑀢𑀻𑀢𑀺 𑀦𑀧𑁆𑀧𑀓𑀸𑀲𑁄 𑀳𑁄𑀢𑀺. 𑀦𑀧𑁆𑀧𑀪𑀸𑀲𑀢𑀻𑀢𑀺 𑀜𑀸𑀡𑀧𑁆𑀧𑀪𑀸𑀲𑀁 𑀦 𑀓𑀭𑁄𑀢𑀺. 𑀦 𑀢𑀧𑀢𑀻𑀢𑀺 𑀜𑀸𑀡𑀢𑀧𑀁 𑀦 𑀓𑀭𑁄𑀢𑀺. 𑀦 𑀯𑀺𑀭𑁄𑀘𑀢𑀻𑀢𑀺 𑀜𑀸𑀡𑀯𑀺𑀭𑁄𑀘𑀦𑀁 𑀦 𑀓𑀭𑁄𑀢𑀺. 𑀦 𑀜𑀸𑀬𑀢𑀻𑀢𑀺 𑀦 𑀚𑀸𑀦𑀻𑀬𑀢𑀺. 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀦𑀧𑁆𑀧𑀜𑁆𑀜𑀸𑀬𑀢𑁂.

𑀓𑁂𑀦 ¶ 𑀮𑀺𑀢𑁆𑀢𑁄𑀢𑀺 𑀓𑁂𑀦 𑀮𑀺𑀫𑁆𑀧𑀺𑀢𑁄. 𑀲𑀁𑀮𑀺𑀢𑁆𑀢𑁄 𑀉𑀧𑀮𑀺𑀢𑁆𑀢𑁄𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀆𑀘𑀺𑀓𑁆𑀔𑀲𑀺 𑀦𑀺𑀤𑁆𑀤𑁂𑀲𑀯𑀲𑁂𑀦. 𑀤𑁂𑀲𑁂𑀲𑀺 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 ¶ . 𑀧𑀜𑁆𑀜𑀧𑁂𑀲𑀺 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀅𑀢𑁆𑀣𑀁 𑀩𑁄𑀥𑁂𑀦𑁆𑀢𑁄 𑀧𑀝𑁆𑀞𑀧𑁂𑀲𑀺. 𑀢𑀲𑁆𑀲𑀢𑁆𑀣𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀯𑀭𑀲𑀺. 𑀩𑁆𑀬𑀜𑁆𑀚𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀪𑀚𑀲𑀺. 𑀦𑀺𑀓𑀼𑀚𑁆𑀚𑀺𑀢𑀪𑀸𑀯𑀁 𑀕𑀫𑁆𑀪𑀻𑀭𑀪𑀸𑀯𑀜𑁆𑀘 𑀳𑀭𑀺𑀢𑁆𑀯𑀸 𑀲𑁄𑀢𑀽𑀦𑀁 𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀁 𑀚𑀦𑀬𑀦𑁆𑀢𑁄 𑀉𑀢𑁆𑀢𑀸𑀦𑀻𑀓𑀭𑁄𑀲𑀺. 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀲𑁄𑀢𑀽𑀦𑀁 𑀅𑀜𑁆𑀜𑀸𑀡𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀧𑀓𑀸𑀲𑁂𑀲𑀻𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁨. 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻𑀢𑀺 𑀫𑀘𑁆𑀙𑀭𑀺𑀬𑀳𑁂𑀢𑀼 𑀘 𑀧𑀫𑀸𑀤𑀳𑁂𑀢𑀼 𑀘 𑀦𑀧𑁆𑀧𑀓𑀸𑀲𑀢𑀺. 𑀫𑀘𑁆𑀙𑀭𑀺𑀬𑀁 𑀳𑀺𑀲𑁆𑀲 𑀤𑀸𑀦𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀓𑀸𑀲𑀺𑀢𑀼𑀁 𑀦 𑀤𑁂𑀢𑀺, 𑀧𑀫𑀸𑀤𑁄 𑀲𑀻𑀮𑀸𑀤𑀻𑀳𑀺. 𑀚𑀧𑁆𑀧𑀸𑀪𑀺𑀮𑁂𑀧𑀦𑀦𑁆𑀢𑀺 𑀢𑀡𑁆𑀳𑀸 𑀅𑀲𑁆𑀲 𑀮𑁄𑀓𑀲𑁆𑀲 𑀫𑀓𑁆𑀓𑀝𑀮𑁂𑀧𑁄 𑀯𑀺𑀬 𑀫𑀓𑁆𑀓𑀝𑀲𑁆𑀲 𑀅𑀪𑀺𑀮𑁂𑀧𑀦𑀁. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀆𑀤𑀺𑀓𑀁 𑀤𑀼𑀓𑁆𑀔𑀁.

𑀬𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀲𑀁 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁. 𑀆𑀤𑀺𑀢𑁄 𑀲𑀫𑀼𑀤𑀸𑀕𑀫𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀧𑀞𑀫𑀢𑁄 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀅𑀢𑁆𑀣𑀗𑁆𑀕𑀫𑀢𑁄 𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀻𑀢𑀺 𑀪𑀗𑁆𑀕𑀢𑁄 𑀦𑀺𑀭𑀼𑀚𑁆𑀛𑀦𑀁 𑀧𑀜𑁆𑀜𑀸𑀬𑀢𑀺. 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑁄 𑀓𑀫𑁆𑀫𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀸𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀺𑀧𑀸𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀦𑁆𑀢𑀺 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀁 𑀦𑀸𑀫𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫𑀦𑁆𑀢𑀺 𑀧𑀜𑁆𑀘𑀯𑁄𑀓𑀸𑀭𑁂 𑀦𑀸𑀫𑀁 𑀭𑀽𑀧𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁩. 𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺 𑀲𑀩𑁆𑀩𑁂𑀲𑀼 𑀭𑀽𑀧𑀸𑀤𑀺𑀆𑀬𑀢𑀦𑁂𑀲𑀼 𑀢𑀡𑁆𑀳𑀸𑀤𑀺𑀓𑀸 𑀲𑁄𑀢𑀸 𑀲𑀦𑁆𑀤𑀦𑁆𑀢𑀺. 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀢𑁂𑀲𑀁 𑀓𑀺𑀁 𑀆𑀯𑀭𑀡𑀁 𑀓𑀸 𑀭𑀓𑁆𑀔𑀸. 𑀲𑀁𑀯𑀭𑀁 𑀩𑁆𑀭𑀽𑀳𑀻𑀢𑀺 𑀢𑀁 𑀢𑁂𑀲𑀁 𑀦𑀺𑀯𑀸𑀭𑀡𑀲𑀗𑁆𑀔𑀸𑀢𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺. 𑀏𑀢𑁂𑀦 𑀲𑀸𑀯𑀲𑁂𑀲𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀺. 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂𑀢𑀺 𑀓𑁂𑀦 𑀥𑀫𑁆𑀫𑁂𑀦 𑀏𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺. 𑀏𑀢𑁂𑀦 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀧𑀼𑀘𑁆𑀙𑀢𑀺.

𑀲𑀯𑀦𑁆𑀢𑀻𑀢𑀺 ¶ 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀆𑀲𑀯𑀦𑁆𑀢𑀻𑀢𑀺 𑀅𑀥𑁄𑀕𑀸𑀫𑀺𑀦𑁄 𑀳𑀼𑀢𑁆𑀯𑀸 𑀲𑀯𑀦𑁆𑀢𑀺. 𑀲𑀦𑁆𑀤𑀦𑁆𑀢𑀻𑀢𑀺 𑀦𑀺𑀭𑀦𑁆𑀢𑀭𑀕𑀸𑀫𑀺𑀦𑁄 𑀳𑀼𑀢𑁆𑀯𑀸 𑀲𑀦𑁆𑀤𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀺. 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀦𑁆𑀢𑀺.

𑁪. 𑀲𑀢𑀺 ¶ 𑀢𑁂𑀲𑀁 𑀦𑀺𑀯𑀸𑀭𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸 𑀲𑀢𑀺 𑀢𑁂𑀲𑀁 𑀲𑁄𑀢𑀸𑀦𑀁 𑀦𑀺𑀯𑀸𑀭𑀡𑀁 ¶ . 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀢𑀫𑁂𑀯𑀸𑀳𑀁 𑀲𑀢𑀺𑀁 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂𑀢𑀺 𑀭𑀽𑀧𑀸𑀤𑀻𑀲𑀼 𑀧𑀦 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀯𑁂𑀥𑀲𑀸𑀥𑀺𑀓𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀏𑀢𑁂 𑀲𑁄𑀢𑀸 𑀲𑀩𑁆𑀩𑀲𑁄 𑀧𑀺𑀥𑀻𑀬𑀦𑁆𑀢𑀺.

𑀧𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀉𑀘𑁆𑀙𑀺𑀚𑁆𑀚𑀦𑁆𑀢𑀺. 𑀲𑀫𑀼𑀤𑀬𑀜𑁆𑀘𑀸𑀢𑀺 𑀧𑀘𑁆𑀘𑀬𑀜𑁆𑀘. 𑀅𑀢𑁆𑀣𑀗𑁆𑀕𑀫𑀜𑁆𑀘𑀸𑀢𑀺 𑀉𑀧𑁆𑀧𑀦𑁆𑀦𑀸𑀦𑀁 𑀅𑀪𑀸𑀯𑀕𑀫𑀦𑀜𑁆𑀘, 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀧𑁆𑀧𑀸𑀤𑀁 𑀯𑀸. 𑀅𑀲𑁆𑀲𑀸𑀤𑀜𑁆𑀘𑀸𑀢𑀺 𑀆𑀦𑀺𑀲𑀁𑀲𑀜𑁆𑀘. 𑀆𑀤𑀻𑀦𑀯𑀜𑁆𑀘𑀸𑀢𑀺 𑀤𑁄𑀲𑀜𑁆𑀘. 𑀦𑀺𑀲𑁆𑀲𑀭𑀡𑀜𑁆𑀘𑀸𑀢𑀺 𑀦𑀺𑀓𑁆𑀔𑀫𑀦𑀜𑁆𑀘.

𑁫. 𑀧𑀜𑁆𑀜𑀸 𑀘𑁂𑀯𑀸𑀢𑀺 𑀧𑀜𑁆𑀳𑀸𑀕𑀸𑀣𑀸𑀬 𑀬𑀸 𑀘𑀸𑀬𑀁 𑀢𑀬𑀸 𑀯𑀼𑀢𑁆𑀢𑀸 𑀧𑀜𑁆𑀜𑀸, 𑀬𑀸 𑀘 𑀲𑀢𑀺, 𑀬𑀜𑁆𑀘 𑀢𑀤𑀯𑀲𑁂𑀲𑀁 𑀦𑀸𑀫𑀭𑀽𑀧𑀁, 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀓𑀢𑁆𑀣 𑀦𑀺𑀭𑀼𑀚𑁆𑀛𑀢𑀺. 𑀏𑀢𑀁 𑀫𑁂 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀏𑀢𑀁 𑀦𑀸𑀫𑀭𑀽𑀧𑀁 𑀓𑀢𑁆𑀣 𑀦 𑀪𑀯𑀢𑀺. 𑀯𑀽𑀧𑀲𑀫𑁆𑀫𑀢𑀻𑀢𑀺 𑀦𑀺𑀩𑁆𑀩𑀸𑀢𑀺. 𑀅𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀅𑀪𑀸𑀯𑀁 𑀕𑀘𑁆𑀙𑀢𑀺. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀲𑀦𑁆𑀦𑀺𑀲𑀻𑀤𑀢𑀺.

𑁬. 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 𑀧𑀦𑀲𑁆𑀲 𑀬𑀲𑁆𑀫𑀸 𑀧𑀜𑁆𑀜𑀸𑀲𑀢𑀺𑀬𑁄 𑀦𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀫𑀁 𑀢𑁆𑀯𑀁, 𑀅𑀚𑀺𑀢, 𑀏𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺, 𑀢𑀤𑁂𑀢𑀁 𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺, 𑀢𑀁 𑀢𑁂 𑀯𑀤𑀸𑀫𑀺. 𑀢𑀲𑁆𑀲 𑀢𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀳𑁂𑀯 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺, 𑀏𑀢𑁆𑀣𑁂𑀯 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺 𑀏𑀢𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀢𑀲𑁆𑀲 𑀢𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺, 𑀢𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀧𑀜𑁆𑀜𑀸𑀬 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀯𑀲𑁂𑀦 𑀦𑀺𑀭𑀼𑀚𑁆𑀛𑀦𑁂𑀦. 𑀢𑀢𑁆𑀣 𑀤𑀼𑀯𑀺𑀥𑁄 𑀦𑀺𑀭𑁄𑀥𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀦𑀺𑀭𑁄𑀥𑁄 𑀉𑀧𑀸𑀤𑀺𑀦𑁆𑀦𑀓𑀦𑀺𑀭𑁄𑀥𑁄𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀳𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀦𑁆𑀢𑀺 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀸𑀦𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 ¶ . 𑀢𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀭𑀽𑀧𑀓𑁆𑀔𑀦𑁆𑀥𑁄 ¶ , 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀢𑀢𑁆𑀣 𑀲𑀘𑁂 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲𑀸, 𑀢𑀸𑀦𑀺 𑀧𑀜𑁆𑀘 ¶ 𑀘𑀺𑀢𑁆𑀢𑀸𑀦𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀸𑀧𑀼𑀡𑁂𑀬𑁆𑀬𑀼𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀧𑀦 𑀦𑁂𑀲𑀁 𑀧𑀭𑀺𑀬𑀼𑀝𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀁 𑀯𑀸𑀭𑀬𑀫𑀸𑀦𑁄 𑀲𑁂𑀢𑀼𑀲𑀫𑀼𑀕𑁆𑀖𑀸𑀢𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀪𑀸𑀯𑀁 𑀓𑀼𑀭𑀼𑀫𑀸𑀦𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀦𑀺𑀭𑁄𑀥𑁂𑀢𑀺 𑀦𑀸𑀫. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀻𑀢𑀺 𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀯𑀲𑁂𑀦 𑀙 𑀘𑀺𑀢𑁆𑀢𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀯𑀲𑁂𑀦 𑀢𑀸𑀦𑀺 𑀏𑀯 𑀙 𑀘𑀺𑀢𑁆𑀢𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀢𑁆𑀣 𑀲𑀘𑁂 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀢𑁂 𑀫𑀕𑁆𑀕𑀸 𑀅𑀪𑀸𑀯𑀺𑀢𑀸 𑀅𑀲𑁆𑀲𑀼, 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀸𑀧𑀼𑀡𑁂𑀬𑁆𑀬𑀼𑀁. 𑀢𑁂 𑀧𑀦 𑀢𑁂𑀲𑀁 𑀫𑀕𑁆𑀕𑀸 𑀧𑀭𑀺𑀬𑀼𑀝𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀁 𑀯𑀸𑀭𑀬𑀫𑀸𑀦𑀸 𑀲𑁂𑀢𑀼𑀲𑀫𑀼𑀕𑁆𑀖𑀸𑀢𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀪𑀸𑀯𑀁 𑀓𑀼𑀭𑀼𑀫𑀸𑀦𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀦𑀺𑀭𑁄𑀥𑁂𑀦𑁆𑀢𑀺 𑀦𑀸𑀫. 𑀏𑀯𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁂 𑀧𑀦 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲𑀸, 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀧𑀜𑁆𑀘 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀏𑀯𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀁 𑀦𑀺𑀭𑁄𑀥𑁂𑀢𑀺 𑀦𑀸𑀫.

𑀲𑀘𑁂 𑀲𑀓𑀤𑀸𑀕𑀸𑀫𑀺𑀲𑁆𑀲 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲𑀸, 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀪𑀯𑁂 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀑𑀴𑀸𑀭𑀺𑀓𑀸𑀦𑀺 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀸𑀦𑀺 𑀑𑀴𑀸𑀭𑀺𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺 ¶ . 𑀏𑀯𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀁 𑀦𑀺𑀭𑁄𑀥𑁂𑀢𑀺 𑀦𑀸𑀫.

𑀲𑀘𑁂 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲𑀸, 𑀞𑀧𑁂𑀢𑁆𑀯𑀸 𑀏𑀓𑀁 𑀪𑀯𑀁 𑀤𑀼𑀢𑀺𑀬𑀪𑀯𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 ¶ 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀅𑀡𑀼𑀲𑀳𑀕𑀢𑀸𑀦𑀺 𑀓𑀸𑀫𑀭𑀸𑀕𑀧𑀝𑀺𑀖𑀲𑀜𑁆𑀜𑁄𑀚𑀦𑀸𑀦𑀺 𑀅𑀡𑀼𑀲𑀳𑀕𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀅𑀦𑀸𑀕𑀸𑀫𑀺𑀲𑁆𑀲 𑀏𑀓𑀁 ¶ 𑀪𑀯𑀁 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀪𑀯𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀏𑀯𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀁 𑀦𑀺𑀭𑁄𑀥𑁂𑀢𑀺 𑀦𑀸𑀫.

𑀲𑀘𑁂 𑀅𑀭𑀳𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀪𑀸𑀯𑀺𑀢𑁄 𑀅𑀪𑀯𑀺𑀲𑁆𑀲𑀸, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀲𑁆𑀫𑀸? 𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀳𑁂𑀢𑀽𑀦𑀁 𑀅𑀢𑁆𑀣𑀺𑀢𑀸𑀬. 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸 𑀫𑀸𑀦𑀸𑀦𑀼𑀲𑀬𑁄 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺 𑀇𑀫𑁂 𑀧𑀦 𑀅𑀝𑁆𑀞 𑀓𑀺𑀮𑁂𑀲𑁂 𑀲𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀤𑀸𑀦𑀺 𑀓𑀼𑀢𑁄 𑀔𑀻𑀡𑀸𑀲𑀯𑀲𑁆𑀲 𑀧𑀼𑀦𑀩𑁆𑀪𑀯𑁂 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀺? 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀉𑀧𑀸𑀤𑀺𑀦𑁆𑀦𑀓𑀁 𑀦𑀺𑀭𑁄𑀥𑁂𑀢𑀺 𑀦𑀸𑀫.

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀘𑁂𑀢𑁆𑀣 𑀅𑀧𑀸𑀬𑀪𑀯𑀁 𑀦𑀺𑀭𑁄𑀥𑁂𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀓𑀸𑀫𑀪𑀯𑁂𑀓𑀤𑁂𑀲𑀁. 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀸𑀫𑀪𑀯𑀁. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀭𑀽𑀧𑀸𑀭𑀽𑀧𑀪𑀯𑀁, 𑀲𑀩𑁆𑀩𑀪𑀯𑁂𑀧𑀺 𑀦𑀺𑀭𑁄𑀥𑁂𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀉𑀧𑀸𑀤𑀺𑀦𑁆𑀦𑀓𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘‘𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸’’𑀢𑀺 𑀏𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺. ‘‘𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀦 𑀉𑀧𑀸𑀤𑀺𑀦𑁆𑀦𑀓𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸𑀢𑀺 𑀓𑀸𑀫𑀪𑀯𑀢𑁄 𑀓𑀸𑀫𑀪𑀯𑀁 𑀲𑀁𑀲𑀭𑀦𑁆𑀢𑀲𑁆𑀲 𑀲𑀢𑁆𑀢 𑀪𑀯𑁂 𑀯𑀚𑁆𑀚𑁂𑀢𑁆𑀯𑀸. 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂𑀢𑀺 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, ‘𑀲𑀁𑀲𑀸𑀭𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁭; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪, 𑁫𑁮; 𑀉𑀤𑀸. 𑀅𑀝𑁆𑀞. 𑁩𑁯) 𑁋

𑀏𑀯𑀁 ¶ 𑀯𑀡𑁆𑀡𑀺𑀢𑁂 𑀲𑀁𑀲𑀸𑀭𑀯𑀝𑁆𑀝𑁂. 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀦𑀫𑀦𑀮𑀓𑁆𑀔𑀡𑀁 𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀦𑀸𑀫𑀜𑁆𑀘 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀪𑀽𑀢𑁄𑀧𑀸𑀤𑀸𑀬𑀲𑀗𑁆𑀔𑀸𑀢𑀁 𑀭𑀽𑀧𑀜𑁆𑀘 𑀏𑀢𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑀲𑁆𑀫𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀏𑀢𑁂 ¶ 𑀦𑀸𑀫𑀭𑀽𑀧𑀥𑀫𑁆𑀫𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀯𑀲𑁂𑀦 𑀦𑀺𑀭𑁄𑀥𑀁 𑀕𑀘𑁆𑀙𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦𑀸𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀁𑀬𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻 ¶ , 𑀢𑀲𑁆𑀲 𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄. 𑀢𑁂𑀦 𑀫𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀦. 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸𑀢𑀺 𑀓𑀸𑀫𑀥𑀸𑀢𑀼𑀬𑀸𑀬𑁂𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑁂 𑀪𑀯𑁂 𑀯𑀚𑁆𑀚𑁂𑀢𑁆𑀯𑀸. 𑀧𑀜𑁆𑀘𑀲𑀼 𑀪𑀯𑁂𑀲𑀽𑀢𑀺 𑀢𑀤𑀯𑀲𑀺𑀝𑁆𑀞𑁂𑀲𑀼 𑀧𑀜𑁆𑀘𑀲𑀼 𑀪𑀯𑁂𑀲𑀼. 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀣 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀏𑀢𑁂 𑀥𑀫𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀓𑀁 𑀪𑀯𑀁 𑀞𑀧𑁂𑀢𑁆𑀯𑀸𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸 𑀏𑀓𑀁 𑀪𑀯𑀁 𑀯𑀚𑁆𑀚𑁂𑀢𑁆𑀯𑀸. 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸𑀢𑀺 𑀤𑀼𑀢𑀺𑀬𑀓𑀪𑀯𑁂 𑀭𑀽𑀧𑀥𑀸𑀢𑀼𑀬𑀸 𑀘𑁂𑀯 𑀅𑀭𑀽𑀧𑀥𑀸𑀢𑀼𑀬𑀸 𑀘. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀏𑀢𑁆𑀣 𑀭𑀽𑀧𑀪𑀯𑁂 𑀦𑀸𑀫𑀭𑀽𑀧𑀁, 𑀅𑀭𑀽𑀧𑀪𑀯𑁂 𑀦𑀸𑀫𑀫𑁂𑀯. 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀣 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀏𑀢𑁂 𑀦𑀸𑀫𑀭𑀽𑀧𑀥𑀫𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀺.

𑀅𑀭𑀳𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 ‘‘𑀅𑀭𑀳𑀸’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀤𑀼𑀯𑀺𑀥𑀸 𑀳𑀺 𑀦𑀺𑀩𑁆𑀩𑀸𑀦𑀥𑀸𑀢𑀼 𑀲𑀉𑀧𑀸𑀤𑀺𑀲𑁂𑀲𑀸 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘. 𑀢𑀢𑁆𑀣 𑀉𑀧𑀸𑀤𑀻𑀬𑀢𑀺 ‘‘𑀅𑀳𑀁 𑀫𑀫𑀸’’𑀢𑀺 𑀪𑀼𑀲𑀁 𑀕𑀡𑁆𑀳𑀻𑀬𑀢𑀻𑀢𑀺 𑀉𑀧𑀸𑀤𑀺, 𑀔𑀦𑁆𑀥𑀧𑀜𑁆𑀘𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀧𑀸𑀤𑀺𑀬𑁂𑀯 𑀲𑁂𑀲𑁄 𑀅𑀯𑀲𑀺𑀝𑁆𑀞𑁄 𑀉𑀧𑀸𑀤𑀺𑀲𑁂𑀲𑁄, 𑀲𑀳 𑀉𑀧𑀸𑀤𑀺𑀲𑁂𑀲𑁂𑀦 𑀯𑀢𑁆𑀢𑀢𑀻𑀢𑀺 𑀲𑀉𑀧𑀸𑀤𑀺𑀲𑁂𑀲𑀸. 𑀦𑀢𑁆𑀣𑁂𑀢𑁆𑀣 𑀉𑀧𑀸𑀤𑀺𑀲𑁂𑀲𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸. 𑀢𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸. 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲𑀸𑀢𑀺 𑀦𑀺𑀭𑀺𑀦𑁆𑀥𑀦𑀲𑁆𑀲 𑀯𑀺𑀬 𑀚𑀸𑀢𑀯𑁂𑀤𑀲𑁆𑀲 𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀁 𑀧𑀯𑀺𑀲𑀦𑁆𑀢𑀲𑁆𑀲. 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸𑀢𑀺 𑀏𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀦𑀺𑀭𑁄𑀥𑀯𑀲𑁂𑀦. 𑀢𑀬𑁄 𑀘𑀭𑀺𑀫𑀸 𑀪𑀯𑀘𑀭𑀺𑀫𑁄 𑀛𑀸𑀦𑀘𑀭𑀺𑀫𑁄 𑀘𑀼𑀢𑀺𑀘𑀭𑀺𑀫𑁄𑀢𑀺. 𑀪𑀯𑁂𑀲𑀼 𑀳𑀺 𑀓𑀸𑀫𑀪𑀯𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀯𑀢𑁆𑀢𑀦𑁆𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀪𑀯𑀘𑀭𑀺𑀫𑁄. 𑀛𑀸𑀦𑁂𑀲𑀼 𑀧𑀼𑀭𑀺𑀫𑀛𑀸𑀦𑀢𑁆𑀢𑀬𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀘𑀢𑀼𑀢𑁆𑀣𑁂 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀛𑀸𑀦𑀘𑀭𑀺𑀫𑁄. 𑀬𑁂 𑀧𑀦 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀼𑀭𑀢𑁄 𑀲𑁄𑀴𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀸, 𑀢𑁂 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄 𑀘𑀼𑀢𑀺𑀘𑀭𑀺𑀫𑁄 𑀦𑀸𑀫. 𑀅𑀬𑀁 𑀇𑀥 𑀘𑀭𑀺𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑁂 𑀳𑀺 𑀓𑁂𑀘𑀺 ¶ 𑀩𑀼𑀤𑁆𑀥𑀸 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀸 𑀅𑀭𑀺𑀬𑀲𑀸𑀯𑀓𑀸 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀪𑀯𑀗𑁆𑀕𑀘𑀺𑀢𑁆𑀢𑁂𑀦𑁂𑀯 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀜𑀸 ¶ 𑀘 𑀲𑀢𑀺 𑀘 𑀦𑀸𑀫𑀜𑁆𑀘𑀸𑀢𑀺 𑀏𑀢𑁂𑀳𑀺 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀕𑀳𑀡𑀁 𑀧𑀘𑁆𑀘𑁂𑀢𑀩𑁆𑀩𑀁. 𑀭𑀽𑀧𑀜𑁆𑀘𑀸𑀢𑀺 𑀏𑀢𑁂𑀦 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀘𑀢𑀼𑀯𑀻𑀲𑀢𑀺𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀕𑀳𑀡𑀁 𑀧𑀘𑁆𑀘𑁂𑀢𑀩𑁆𑀩𑀁. 𑀇𑀤𑀸𑀦𑀺 𑀢𑀲𑁆𑀲 𑀦𑀺𑀭𑀼𑀚𑁆𑀛𑀦𑀽𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀆𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀭𑀺𑀫𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀫𑁆𑀧𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀧𑀳𑀻𑀦𑀦𑀺𑀭𑁄𑀥𑁂𑀦 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺 𑀦𑀺𑀭𑀼𑀚𑁆𑀛𑀢𑀺 𑀤𑀻𑀧𑀲𑀺𑀔𑀸 𑀯𑀺𑀬 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀬𑀸𑀢𑀺, 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀼𑀧𑁆𑀧𑀸𑀤𑀧𑀘𑁆𑀘𑀬𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀅𑀦𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀉𑀧𑀭𑀼𑀚𑁆𑀛𑀢𑀻𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁯𑁯).

𑁭. 𑀏𑀢𑁆𑀢𑀸𑀯𑀢𑀸 ¶ 𑀘 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑀁 𑀤𑀼𑀓𑁆𑀔𑀲𑀘𑁆𑀘𑀁, ‘‘𑀬𑀸𑀦𑀺 𑀲𑁄𑀢𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀫𑀼𑀤𑀬𑀲𑀘𑁆𑀘𑀁, ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀇𑀫𑀺𑀦𑀸 𑀫𑀕𑁆𑀕𑀲𑀘𑁆𑀘𑀁, ‘‘𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀼𑀢𑁆𑀯𑀸𑀧𑀺 𑀅𑀭𑀺𑀬𑀪𑀽𑀫𑀺𑀁 𑀅𑀦𑀥𑀺𑀕𑀢𑁄 𑀧𑀼𑀦 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀧𑀤𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀗𑁆𑀔𑀸𑀢𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀯𑀻𑀫𑀁𑀲𑀺𑀢𑀥𑀫𑁆𑀫𑀸, 𑀅𑀭𑀳𑀦𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀓𑁆𑀔𑀸𑀢𑀺 𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀫𑀸𑀦𑀸 𑀅𑀯𑀲𑁂𑀲𑀸 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀧𑀼𑀣𑀽𑀢𑀺 𑀩𑀳𑀽 𑀲𑀢𑁆𑀢𑀚𑀦𑀸. 𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺 𑀢𑁂𑀲𑀁 𑀫𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀢𑁆𑀯𑀁 𑀧𑀼𑀝𑁆𑀞𑁄 𑀧𑀝𑀺𑀧𑀢𑁆𑀢𑀺𑀁 𑀩𑁆𑀭𑀽𑀳𑀻𑀢𑀺.

𑀢𑁂𑀲𑀁 𑀔𑀦𑁆𑀥𑀸 𑀲𑀗𑁆𑀔𑀸𑀢𑀸𑀢𑀺 𑀢𑁂𑀲𑀁 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀓𑀢𑁆𑀯𑀸 𑀤𑁂𑀲𑀺𑀢𑀸, 𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀞𑀧𑀺𑀢𑀸 𑀯𑀸. 𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀭𑀺𑀬𑀦𑁆𑀢𑀺 𑀧𑀬𑁄𑀕𑀁. 𑀘𑀭𑀺𑀬𑀦𑁆𑀢𑀺 𑀓𑀺𑀭𑀺𑀬𑀁. 𑀯𑀼𑀢𑁆𑀢𑀺𑀦𑁆𑀢𑀺 𑀧𑀯𑀢𑁆𑀢𑀺𑀁. 𑀆𑀘𑀭𑀦𑁆𑀢𑀺 𑀘𑀭𑀡𑀁. 𑀕𑁄𑀘𑀭𑀦𑁆𑀢𑀺 𑀧𑀘𑁆𑀘𑀬𑀁. 𑀯𑀺𑀳𑀸𑀭𑀦𑁆𑀢𑀺 𑀇𑀭𑀺𑀬𑀸𑀧𑀣𑀧𑀯𑀢𑁆𑀢𑀦𑀁. 𑀧𑀝𑀺𑀧𑀤𑀦𑁆𑀢𑀺 𑀯𑀺𑀧𑀲𑁆𑀲𑀦𑀁.

𑁮. 𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀲𑁂𑀓𑁆𑀔𑁂𑀦 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑀸 𑀧𑀳𑀸𑀢𑀩𑁆𑀩𑀸 𑀏𑀯, 𑀢𑀲𑁆𑀫𑀸 ‘‘𑀓𑀸𑀫𑁂𑀲𑀽𑀢𑀺 ¶ 𑀉𑀧𑀟𑁆𑀠𑀕𑀸𑀣𑀸𑀬 𑀲𑁂𑀓𑁆𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀫𑀦𑀲𑁄 𑀆𑀯𑀺𑀮𑀪𑀸𑀯𑀓𑀭𑁂 𑀥𑀫𑁆𑀫𑁂 𑀧𑀚𑀳𑀦𑁆𑀢𑁄 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑁂𑀓𑁆𑀔𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀭𑀺𑀢𑀼𑀮𑀺𑀢𑀢𑁆𑀢𑀸 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀆𑀤𑀻𑀳𑀺 𑀘 𑀲𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀢𑁄 𑀳𑀼𑀢𑁆𑀯𑀸 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀧𑀭𑀺𑀩𑁆𑀩𑀚𑀢𑀺, 𑀢𑀲𑁆𑀫𑀸 ‘‘𑀓𑀼𑀲𑀮𑁄’’𑀢𑀺 𑀉𑀧𑀟𑁆𑀠𑀕𑀸𑀣𑀸𑀬 𑀅𑀲𑁂𑀓𑁆𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺.

𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺 ¶ 𑀕𑁂𑀥𑀁 𑀦𑀸𑀧𑀚𑁆𑀚𑁂𑀬𑁆𑀬. 𑀦 𑀧𑀮𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺 𑀮𑁄𑀪𑀁 𑀦𑀸𑀧𑀚𑁆𑀚𑁂𑀬𑁆𑀬. 𑀦 𑀧𑀮𑀺𑀩𑀼𑀦𑁆𑀥𑁂𑀬𑁆𑀬𑀸𑀢𑀺 𑀮𑁄𑀪𑀯𑀲𑁂𑀦 𑀦 𑀅𑀮𑁆𑀮𑀻𑀬𑁂𑀬𑁆𑀬.

𑀆𑀯𑀺𑀮𑀓𑀭𑁂 𑀓𑀺𑀮𑁂𑀲𑁂 𑀚𑀳𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀸𑀮𑀼𑀴𑀓𑀭𑁂 𑀉𑀧𑀢𑀸𑀧𑀲𑀗𑁆𑀔𑀸𑀢𑁂 𑀓𑀺𑀮𑁂𑀲𑁂 𑀚𑀳𑁂𑀬𑁆𑀬.

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀲𑀧𑁆𑀧𑀘𑁆𑀘𑀬𑀲𑀪𑀸𑀯𑀁.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸𑀢𑀺 𑀕𑀸𑀣𑀸𑀯𑀲𑀸𑀦𑁂𑀦𑁂𑀯 𑀲𑀤𑁆𑀥𑀺𑀁. 𑀬𑁂𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸𑀢𑀺 𑀬𑁂 𑀏𑀢𑁂 ¶ 𑀅𑀚𑀺𑀢𑀫𑀸𑀡𑀯𑁂𑀦 𑀓𑀮𑁆𑀬𑀸𑀡𑀙𑀦𑁆𑀤𑁂𑀦 𑀏𑀓𑀚𑁆𑀛𑀸𑀲𑀬𑀸. 𑀏𑀓𑀧𑁆𑀧𑀬𑁄𑀕𑀸𑀢𑀺 𑀓𑀸𑀬𑀯𑀘𑀻𑀫𑀦𑁄𑀧𑀬𑁄𑀕𑁂𑀳𑀺 𑀏𑀓𑀧𑁆𑀧𑀬𑁄𑀕𑀸. 𑀏𑀓𑀸𑀥𑀺𑀧𑁆𑀧𑀸𑀬𑀸𑀢𑀺 𑀏𑀓𑁄 𑀅𑀥𑀺𑀧𑁆𑀧𑀸𑀬𑁄 𑀭𑀼𑀘𑀺 𑀏𑀢𑁂𑀲𑀦𑁆𑀢𑀺 𑀏𑀓𑀸𑀥𑀺𑀧𑁆𑀧𑀸𑀬𑀸, 𑀏𑀓𑀭𑀼𑀘𑀺𑀓𑀸𑀢𑀺 𑀅𑀢𑁆𑀣𑁄. 𑀏𑀓𑀯𑀸𑀲𑀦𑀯𑀸𑀲𑀺𑀢𑀸𑀢𑀺 𑀅𑀢𑀻𑀢𑀩𑀼𑀤𑁆𑀥𑀲𑀸𑀲𑀦𑁂 𑀢𑁂𑀦 𑀲𑀤𑁆𑀥𑀺𑀁 𑀪𑀸𑀯𑀺𑀢𑀪𑀸𑀯𑀦𑀸. 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀦𑁂𑀓𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸𑀦𑀁 𑀧𑀸𑀡𑀲𑀳𑀲𑁆𑀲𑀸𑀦𑀁. 𑀯𑀺𑀭𑀚𑀁 𑀯𑀻𑀢𑀫𑀮𑀦𑁆𑀢𑀺 𑀭𑀸𑀕𑀸𑀤𑀺𑀭𑀚𑀯𑀺𑀭𑀳𑀺𑀢𑀁 𑀭𑀸𑀕𑀸𑀤𑀺𑀫𑀮𑀯𑀺𑀭𑀳𑀺𑀢𑀜𑁆𑀘.

𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀇𑀥 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀜𑁆𑀜𑀢𑁆𑀣 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑀁. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀆𑀳. 𑀢𑀜𑁆𑀳𑀺 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀯𑀲𑁂𑀦 𑀏𑀯𑀁 𑀲𑀩𑁆𑀩𑀲𑀗𑁆𑀔𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻𑀢𑀺 𑀢𑀲𑁆𑀲 𑀘 𑀅𑀚𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀲𑀳𑀲𑁆𑀲𑀸𑀦𑀜𑁆𑀘 𑀢𑀡𑁆𑀳𑀸𑀤𑀻𑀳𑀺 𑀅𑀕𑁆𑀕𑀳𑁂𑀢𑁆𑀯𑀸 𑀓𑀸𑀫𑀸𑀲𑀯𑀸𑀤𑀻𑀳𑀺 𑀫𑀕𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀁 𑀨𑀮𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀺. 𑀲𑀳 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀘 𑀲𑀳𑁂𑀯 𑀆𑀬𑀲𑁆𑀫𑀢𑁄 𑀅𑀚𑀺𑀢𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀲𑀳𑀲𑁆𑀲𑀲𑁆𑀲 𑀘 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀆𑀤𑀬𑁄 ¶ 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀲𑀩𑁆𑀩𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀤𑁆𑀯𑀗𑁆𑀕𑀼𑀮𑀓𑁂𑀲𑀸 𑀏𑀳𑀺𑀪𑀺𑀓𑁆𑀔𑀽 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸 𑀧𑀜𑁆𑀚𑀮𑀺𑀓𑀸 𑀦𑀺𑀲𑀻𑀤𑀺𑀁𑀲𑀼. 𑀧𑀸𑀴𑀺𑀬𑀁 𑀧𑀦 𑀅𑀚𑀺𑀢𑀢𑁆𑀣𑁂𑀭𑁄𑀯 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀬𑀁 𑀧𑀘𑁆𑀘𑀸𑀲𑀻𑀲𑀺𑀢𑀮𑀤𑁆𑀥𑀧𑀝𑀺𑀧𑀢𑁆𑀢𑀺𑀬𑀸, 𑀦𑀺𑀩𑁆𑀩𑀸𑀦𑀮𑀤𑁆𑀥𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯. 𑀏𑀯𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀅𑀚𑀺𑀢𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯. 𑀤𑀼𑀢𑀺𑀬𑁂 ¶ ¶ 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀓𑁄𑀥 𑀲𑀦𑁆𑀢𑀼𑀲𑀺𑀢𑁄𑀢𑀺 𑀦𑀺𑀝𑁆𑀞𑀺𑀢𑁂 𑀧𑀦 𑀅𑀚𑀺𑀢𑀲𑀼𑀢𑁆𑀢𑁂 ‘‘𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺 (𑀲𑀼. 𑀦𑀺. 𑁧𑁧𑁨𑁪; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸 𑁧𑁪𑁩) 𑀏𑀯𑀁 𑀫𑁄𑀖𑀭𑀸𑀚𑀸 𑀧𑀼𑀘𑁆𑀙𑀺𑀢𑀼𑀁 𑀆𑀭𑀪𑀺. ‘‘𑀦 𑀢𑀸𑀯𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀧𑀸𑀓𑀁 𑀕𑀢𑀸𑀦𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀸 ‘‘𑀢𑀺𑀝𑁆𑀞 𑀢𑁆𑀯𑀁, 𑀫𑁄𑀖𑀭𑀸𑀚, 𑀅𑀜𑁆𑀜𑁄 𑀧𑀼𑀘𑁆𑀙𑀢𑀽’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄 𑀅𑀢𑁆𑀢𑀦𑁄 𑀲𑀁𑀲𑀬𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑁄𑀥𑀸𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑁄𑀥 𑀲𑀦𑁆𑀢𑀼𑀲𑀺𑀢𑁄𑀢𑀺 𑀓𑁄 𑀇𑀥 𑀲𑀢𑁆𑀢𑁄 𑀢𑀼𑀝𑁆𑀞𑁄. 𑀇𑀜𑁆𑀚𑀺𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺. 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬𑀸𑀢𑀺 𑀉𑀪𑁄 𑀅𑀦𑁆𑀢𑁂 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀧𑀜𑁆𑀜𑀸𑀬 𑀦 𑀮𑀺𑀧𑁆𑀧𑀢𑀺.

𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄𑀢𑀺 ¶ 𑀦𑁂𑀓𑁆𑀔𑀫𑁆𑀫𑀸𑀤𑀺𑀯𑀺𑀢𑀓𑁆𑀓𑁂𑀳𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑁄.

𑀢𑀡𑁆𑀳𑀺𑀜𑁆𑀚𑀺𑀢𑀦𑁆𑀢𑀺 𑀢𑀡𑁆𑀳𑀸𑀬 𑀘𑀮𑀺𑀢𑀁. 𑀤𑀺𑀝𑁆𑀞𑀺𑀜𑁆𑀚𑀺𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀺𑀜𑁆𑀚𑀺𑀢𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀇𑀜𑁆𑀚𑀺𑀢𑀁 𑀨𑀦𑁆𑀤𑀺𑀢𑀁. ‘‘𑀓𑀫𑁆𑀫𑀺𑀜𑁆𑀚𑀺𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀁 𑀦 𑀲𑀼𑀦𑁆𑀤𑀭𑀁.

𑀫𑀳𑀦𑁆𑀢𑁄 𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑁄. 𑀉𑀢𑁆𑀢𑀫𑁄 𑀧𑀼𑀭𑀺𑀲𑁄𑀢𑀺 𑀅𑀕𑁆𑀕𑀧𑀼𑀭𑀺𑀲𑁄. 𑀧𑀥𑀸𑀦𑁄 𑀧𑀼𑀭𑀺𑀲𑁄𑀢𑀺 𑀲𑁂𑀝𑁆𑀞𑀧𑀼𑀭𑀺𑀲𑁄. 𑀅𑀮𑀸𑀫𑀓𑁄 𑀧𑀼𑀭𑀺𑀲𑁄𑀢𑀺 𑀯𑀺𑀲𑀺𑀝𑁆𑀞𑀧𑀼𑀭𑀺𑀲𑁄. 𑀚𑁂𑀝𑁆𑀞𑀓𑁄 𑀧𑀼𑀭𑀺𑀲𑁄𑀢𑀺 𑀧𑀸𑀫𑁄𑀓𑁆𑀔𑀧𑀼𑀭𑀺𑀲𑁄. 𑀦 𑀳𑁂𑀝𑁆𑀞𑀺𑀫𑀓𑁄 𑀧𑀼𑀭𑀺𑀲𑁄𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑁄. 𑀧𑀼𑀭𑀺𑀲𑀸𑀦𑀁 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀼𑀭𑀺𑀲𑁄𑀢𑀺 𑀧𑀥𑀸𑀦𑀧𑀼𑀭𑀺𑀲𑁄. 𑀲𑀩𑁆𑀩𑁂𑀲𑀁 𑀇𑀘𑁆𑀙𑀺𑀢𑁄 𑀧𑀼𑀭𑀺𑀲𑁄𑀢𑀺 𑀧𑀯𑀭𑀧𑀼𑀭𑀺𑀲𑁄.

𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸𑀢𑀺 𑀢𑀡𑁆𑀳𑀁 𑀅𑀢𑀺𑀅𑀕𑀸, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀉𑀧𑀘𑁆𑀘𑀕𑀸𑀢𑀺 𑀪𑀼𑀲𑀁 𑀅𑀢𑀺𑀅𑀕𑀸.

𑁧𑁦. 𑀢𑀲𑁆𑀲𑁂𑀢𑀫𑀢𑁆𑀣𑀁 𑀪𑀕𑀯𑀸 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀓𑀸𑀫𑁂𑀲𑀽’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀢𑀺 𑀓𑀸𑀫𑀦𑀺𑀫𑀺𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀦𑁆𑀢𑀼𑀲𑀺𑀢𑀢𑀁 𑀤𑀲𑁆𑀲𑁂𑀢𑀺. ‘‘𑀯𑀻𑀢𑀢𑀡𑁆𑀳𑁄’’𑀢𑀺𑀆𑀤𑀻𑀳𑀺 𑀅𑀦𑀺𑀜𑁆𑀚𑀺𑀢𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀥𑀫𑁆𑀫𑁂 𑀯𑀻𑀫𑀁𑀲𑀺𑀢𑁆𑀯𑀸 𑀭𑀸𑀕𑀸𑀤𑀺𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄.

𑀅𑀲𑀤𑁆𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸𑀢𑀺 ¶ ¶ 𑀦𑀻𑀘𑀥𑀫𑁆𑀫𑀲𑀫𑀸𑀬𑁄𑀕𑀢𑁄. 𑀆𑀭𑀢𑀻𑀢𑀺 𑀆𑀭𑀓𑀸 𑀭𑀫𑀦𑀁. 𑀯𑀺𑀭𑀢𑀻𑀢𑀺 𑀢𑀸𑀬 𑀯𑀺𑀦𑀸 𑀭𑀫𑀦𑀁. 𑀧𑀝𑀺𑀯𑀺𑀭𑀢𑀻𑀢𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀸𑀬 𑀯𑀺𑀦𑀸 𑀭𑀫𑀦𑀁. 𑀯𑁂𑀭𑀫𑀡𑀻𑀢𑀺 𑀯𑁂𑀭𑀯𑀺𑀦𑀸𑀲𑀦𑀁. 𑀅𑀓𑀺𑀭𑀺𑀬𑀸𑀢𑀺 𑀓𑀺𑀭𑀺𑀬𑀸𑀧𑀘𑁆𑀙𑀺𑀦𑁆𑀤𑀦𑀁. 𑀅𑀓𑀭𑀡𑀦𑁆𑀢𑀺 𑀓𑀭𑀡𑀧𑀭𑀺𑀘𑁆𑀙𑀺𑀦𑁆𑀤𑀦𑀁. 𑀅𑀦𑀚𑁆𑀛𑀸𑀧𑀢𑁆𑀢𑀻𑀢𑀺 𑀅𑀦𑀸𑀧𑀚𑁆𑀚𑀦𑀢𑀸. 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄𑀢𑀺 𑀲𑀻𑀫𑀸𑀅𑀦𑀢𑀺𑀓𑁆𑀓𑀫𑁄. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀳𑀲𑁆𑀲𑁂𑀦, 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺. 𑀲𑁂𑀲𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀼𑀡𑁆𑀡𑀓𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨. 𑀢𑀢𑀺𑀬𑁂 ¶ ¶ 𑀧𑀼𑀡𑁆𑀡𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀅𑀦𑁂𑀚𑀦𑁆𑀢𑀺 𑀇𑀤𑀫𑁆𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑁄𑀖𑀭𑀸𑀚𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀸𑀤𑀺𑀤𑀲𑁆𑀲𑀸𑀯𑀺𑀁. 𑀇𑀲𑀬𑁄𑀢𑀺 𑀇𑀲𑀺𑀦𑀸𑀫𑀓𑀸 𑀚𑀝𑀺𑀮𑀸. 𑀬𑀜𑁆𑀜𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀁. 𑀅𑀓𑀧𑁆𑀧𑀬𑀺𑀁𑀲𑀽𑀢𑀺 𑀧𑀭𑀺𑀬𑁂𑀲𑀺𑀁𑀲𑀼.

𑀳𑁂𑀢𑀼𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑁂𑀯. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀨𑀮𑀢𑁆𑀣𑀸𑀬 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀢𑀁 𑀨𑀮𑀁 𑀦𑀺𑀤𑁂𑀢𑀺 ‘𑀳𑀦𑁆𑀤, 𑀕𑀡𑁆𑀳𑀣 𑀦’𑀦𑁆𑀢𑀺 𑀅𑀧𑁆𑀧𑁂𑀢𑀺 𑀯𑀺𑀬, 𑀢𑀲𑁆𑀫𑀸 𑀦𑀺𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀪𑀯𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑀸𑀦𑀺 𑀏𑀯. 𑀬𑀲𑁆𑀫𑀸 𑀢𑀁 𑀧𑀝𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀺, 𑀢𑀜𑁆𑀘 𑀨𑀮𑀁 𑀢𑀢𑁄 𑀲𑀫𑀼𑀤𑁂𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑁄𑀢𑀺 𑀘 𑀲𑀫𑀼𑀤𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺.

𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄𑀢𑀺 𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀓𑀸 𑀉𑀢𑁆𑀢𑀭𑀫𑀸𑀢𑀸𑀤𑀬𑁄 𑀅𑀧𑁆𑀧𑁂𑀲𑀓𑁆𑀔𑀸 𑀓𑀧𑀡𑀫𑀦𑀼𑀲𑁆𑀲𑀸 𑀘 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑀸 𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄𑀢𑀺 𑀬𑀫𑀭𑀸𑀚𑀦𑀸𑀕𑀲𑀼𑀧𑀡𑁆𑀡𑀧𑁂𑀢𑀫𑀳𑀺𑀤𑁆𑀥𑀺𑀓𑀸𑀤𑀬𑁄 𑀧𑀘𑁆𑀘𑁂𑀢𑀩𑁆𑀩𑀸. 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 ¶ 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀢𑁆𑀣𑀸𑀬. 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀸𑀢𑀺. 𑀧𑀲𑁆𑀲𑀢𑀻𑀢𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺.

𑀅𑀓𑀼𑀲𑀮𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸. 𑀅𑀓𑀼𑀲𑀮𑀁 𑀪𑀚𑀦𑁆𑀢𑀻𑀢𑀺 𑀅𑀓𑀼𑀲𑀮𑀪𑀸𑀕𑀺𑀬𑀸. 𑀅𑀓𑀼𑀲𑀮𑀧𑀓𑁆𑀔𑁂 𑀪𑀯𑀸𑀢𑀺 𑀅𑀓𑀼𑀲𑀮𑀧𑀓𑁆𑀔𑀺𑀓𑀸. 𑀲𑀩𑁆𑀩𑁂 𑀢𑁂 𑀅𑀯𑀺𑀚𑁆𑀚𑀸 𑀫𑀽𑀮𑀁 𑀓𑀸𑀭𑀡𑀁 𑀏𑀢𑁂𑀲𑀦𑁆𑀢𑀺 𑀅𑀯𑀺𑀚𑁆𑀚𑀸𑀫𑀽𑀮𑀓𑀸. 𑀅𑀯𑀺𑀚𑁆𑀚𑀸𑀬 𑀲𑀫𑁄𑀲𑀭𑀦𑁆𑀢𑀺 𑀲𑀫𑁆𑀫𑀸 𑀑𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀲𑀫𑁄𑀲𑀭𑀡𑀸. 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀬 𑀳𑀢𑀸𑀬. 𑀲𑀩𑁆𑀩𑁂 𑀢𑁂 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀅𑀓𑀼𑀲𑀮𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂 𑀳𑀢𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺.

𑀅𑀧𑁆𑀧𑀫𑀸𑀤𑀫𑀽𑀮𑀓𑀸𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁄 𑀅𑀧𑁆𑀧𑀫𑀸𑀤𑁄 𑀫𑀽𑀮𑀁 𑀓𑀸𑀭𑀡𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀤𑀫𑀽𑀮𑀓𑀸. 𑀅𑀧𑁆𑀧𑀫𑀸𑀤𑁂𑀲𑀼 𑀲𑀫𑁆𑀫𑀸 𑀑𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸. 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 ¶ 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀲𑀬𑀁 𑀓𑀸𑀫𑀸𑀯𑀘𑀭𑁄𑀧𑀺 𑀲𑀫𑀸𑀦𑁄 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀅𑀮𑀫𑀢𑁆𑀢𑁄𑀢𑀺 𑀲𑀫𑀢𑁆𑀣𑀘𑀺𑀢𑁆𑀢𑁄. 𑀫𑀬𑀸 𑀧𑀼𑀘𑁆𑀙𑀺𑀢𑀦𑁆𑀢𑀺 𑀫𑀬𑀸 𑀧𑀼𑀝𑁆𑀞𑀁. 𑀯𑀳𑀲𑁆𑀲𑁂𑀢𑀁 𑀪𑀸𑀭𑀦𑁆𑀢𑀺 𑀏𑀢𑀁 𑀆𑀪𑀢𑀪𑀸𑀭𑀁 ¶ 𑀯𑀳𑀲𑁆𑀲𑀼. 𑀬𑁂 𑀓𑁂𑀘𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸. ‘‘𑀇𑀲𑀺𑀧𑀩𑁆𑀩𑀚𑁆𑀚𑀸 𑀧𑀩𑁆𑀩𑀚𑀺𑀢𑀸’’𑀢𑀺𑀧𑀺 𑀧𑀸𑀞𑁄.

𑀆𑀚𑀻𑀯𑀓𑀲𑀸𑀯𑀓𑀸𑀦𑀁 𑀆𑀚𑀻𑀯𑀓𑀸 𑀤𑁂𑀯𑀢𑀸𑀢𑀺 𑀬𑁂 𑀆𑀚𑀻𑀯𑀓𑀯𑀘𑀦𑀁 𑀲𑀼𑀡𑀦𑁆𑀢𑀺 𑀲𑀼𑀲𑁆𑀲𑀼𑀲𑀦𑁆𑀢𑀺, 𑀢𑁂 𑀆𑀚𑀻𑀯𑀓𑀲𑀸𑀯𑀓𑀸, 𑀢𑁂𑀲𑀁 𑀆𑀚𑀻𑀯𑀓𑀲𑀸𑀯𑀓𑀸𑀦𑀁. 𑀆𑀚𑀻𑀯𑀓𑀸 𑀘 𑀢𑁂𑀲𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑁂 𑀏𑀯 𑀆𑀚𑀻𑀯𑀓𑀸 𑀤𑁂𑀯𑀢𑀸. 𑀏𑀯𑀁 𑀲𑀩𑁆𑀩𑀢𑁆𑀣. 𑀬𑁂 𑀬𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀬𑁂 𑀆𑀚𑀻𑀯𑀓𑀸𑀤𑀬𑁄 𑀤𑀺𑀲𑀸𑀧𑀭𑀺𑀬𑁄𑀲𑀸𑀦𑀸 𑀬𑁂𑀲𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀤𑁂𑀬𑁆𑀬𑀥𑀫𑁆𑀫𑀸𑀦𑀼𑀘𑁆𑀙𑀯𑀺𑀓𑀸. 𑀢𑁂 𑀢𑁂𑀲𑀁 𑀤𑁂𑀯𑀢𑀸𑀢𑀺 𑀢𑁂 𑀆𑀚𑀻𑀯𑀓𑀸𑀤𑀬𑁄 𑀢𑁂𑀲𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀤𑁂𑀯𑀢𑀸.

𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀇𑀘𑁆𑀙𑀦𑁆𑀢𑀺. 𑀕𑀯𑁂𑀲𑀦𑁆𑀢𑀻𑀢𑀺 𑀑𑀮𑁄𑀓𑁂𑀦𑁆𑀢𑀺. 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽𑀢𑀺 𑀬𑀜𑁆𑀜𑀸 𑀏𑀯 𑀯𑀸 𑀏𑀢𑁂 𑀧𑀼𑀣𑀼𑀓𑀸. 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀬𑀸𑀚𑀦𑀓𑀸 𑀏𑀯 𑀯𑀸 𑀏𑀢𑁂 𑀧𑀼𑀣𑀼𑀓𑀸. 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽𑀢𑀺 𑀤𑁂𑀬𑁆𑀬𑀥𑀫𑁆𑀫𑀸𑀦𑀼𑀘𑁆𑀙𑀯𑀺𑀓𑀸 𑀏𑀯 𑀯𑀸 𑀏𑀢𑁂 𑀧𑀼𑀣𑀼𑀓𑀸. 𑀢𑁂 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀣𑀁 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀺.

𑁧𑁩. 𑀆𑀲𑀻𑀲𑀫𑀸𑀦𑀸𑀢𑀺 ¶ 𑀭𑀽𑀧𑀸𑀤𑀻𑀦𑀺 𑀧𑀢𑁆𑀣𑀬𑀫𑀸𑀦𑀸. 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀢𑁆𑀣𑀪𑀸𑀯𑀜𑁆𑀘 𑀧𑀢𑁆𑀣𑀬𑀫𑀸𑀦𑀸, 𑀫𑀦𑀼𑀲𑁆𑀲𑀸𑀤𑀺𑀪𑀸𑀯𑀁 𑀇𑀘𑁆𑀙𑀦𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀭𑀁 𑀲𑀺𑀢𑀸𑀢𑀺 𑀚𑀭𑀁 𑀦𑀺𑀲𑁆𑀲𑀺𑀢𑀸. 𑀚𑀭𑀸𑀫𑀼𑀔𑁂𑀦 𑀘𑁂𑀢𑁆𑀣 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑁂𑀦 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀺𑀢𑀸 𑀢𑀢𑁄 𑀅𑀧𑀭𑀺𑀫𑀼𑀘𑁆𑀘𑀫𑀸𑀦𑀸𑀬𑁂𑀯 𑀓𑀧𑁆𑀧𑀬𑀺𑀁𑀲𑀽𑀢𑀺 𑀤𑀻𑀧𑁂𑀢𑀺.

𑀭𑀽𑀧𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸𑀢𑀺 𑀯𑀡𑁆𑀡𑀸𑀬𑀢𑀦𑀲𑀫𑁆𑀧𑀢𑁆𑀢𑀺𑀮𑀸𑀪𑀁 𑀧𑀢𑁆𑀣𑀬𑀫𑀸𑀦𑀸. 𑀲𑀤𑁆𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀦𑁆𑀢𑀺 𑀲𑀸𑀭𑀧𑁆𑀧𑀢𑁆𑀢𑁂 𑀔𑀢𑁆𑀢𑀺𑀬𑀸𑀦𑀁 𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀮𑀸𑀪𑀁 𑀧𑀝𑀺𑀲𑀦𑁆𑀥𑀺𑀁 𑀧𑀢𑁆𑀣𑀬𑀫𑀸𑀦𑀸. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀽𑀢𑀺 𑀏𑀢𑁆𑀣 𑀧𑀼𑀩𑁆𑀩𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼.

𑀚𑀭𑀸𑀦𑀺𑀲𑁆𑀲𑀺𑀢𑀸𑀢𑀺 𑀚𑀭𑀁 𑀅𑀲𑁆𑀲𑀺𑀢𑀸. 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸𑀢𑀺𑀆𑀤𑀻𑀲𑀼𑀧𑀺 ¶ 𑀏𑀲𑁂𑀯 𑀦𑀬𑁄. 𑀏𑀢𑁂𑀳𑀺 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁧𑁪. 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸, 𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀏𑀢𑁆𑀣 𑀬𑀜𑁆𑀜𑁄 𑀏𑀯 𑀬𑀜𑁆𑀜𑀧𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀘𑁆𑀘𑀺 𑀢𑁂 𑀬𑀜𑁆𑀜𑁂 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀬𑀜𑁆𑀜𑀁 𑀓𑀧𑁆𑀧𑀬𑀦𑁆𑀢𑀸 𑀯𑀝𑁆𑀝𑀤𑀼𑀓𑁆𑀔𑀫𑀼𑀢𑁆𑀢𑀭𑀺𑀁𑀲𑀽𑀢𑀺.

𑀬𑁂𑀧𑀺 ¶ 𑀬𑀜𑁆𑀜𑀁 𑀤𑁂𑀦𑁆𑀢𑀺 𑀬𑀚𑀦𑁆𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀤𑀸𑀦𑀯𑀲𑁂𑀦 𑀬𑀚𑀦𑁆𑀢𑀺. 𑀧𑀭𑀺𑀘𑁆𑀘𑀚𑀦𑁆𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺.

𑁧𑁫. 𑀆𑀲𑀻𑀲𑀦𑁆𑀢𑀻𑀢𑀺 𑀭𑀽𑀧𑀧𑀝𑀺𑀮𑀸𑀪𑀸𑀤𑀬𑁄 𑀧𑀢𑁆𑀣𑁂𑀦𑁆𑀢𑀺. 𑀣𑁄𑀫𑀬𑀦𑁆𑀢𑀻𑀢𑀺 ‘‘𑀲𑀼𑀘𑀺𑀁 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀜𑁆𑀜𑀸𑀤𑀻𑀦𑀺 𑀧𑀲𑀁𑀲𑀦𑁆𑀢𑀺. 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑀭𑀽𑀧𑀸𑀤𑀺𑀧𑀝𑀺𑀮𑀸𑀪𑀸𑀬 𑀯𑀸𑀘𑀁 𑀕𑀻𑀭𑀦𑁆𑀢𑀺. 𑀚𑀼𑀳𑀦𑁆𑀢𑀻𑀢𑀺 𑀤𑁂𑀦𑁆𑀢𑀺. 𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀦𑁆𑀢𑀺 𑀭𑀽𑀧𑀸𑀤𑀺𑀮𑀸𑀪𑀁 𑀧𑀝𑀺𑀘𑁆𑀘 𑀧𑀼𑀦𑀧𑁆𑀧𑀼𑀦𑀁 𑀓𑀸𑀫𑁂 𑀏𑀯 𑀅𑀪𑀺𑀚𑀧𑁆𑀧𑀦𑁆𑀢𑀺, ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀫𑁆𑀧𑀺 𑀲𑀺𑀬𑁆𑀬𑀼’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀡𑁆𑀳𑀜𑁆𑀘 𑀢𑀢𑁆𑀣 𑀯𑀟𑁆𑀠𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀚𑀬𑁄𑀕𑀸𑀢𑀺 𑀬𑀸𑀕𑀸𑀥𑀺𑀫𑀼𑀢𑁆𑀢𑀸. 𑀪𑀯𑀭𑀸𑀕𑀭𑀢𑁆𑀢𑀸𑀢𑀺 𑀏𑀯𑀫𑀺𑀫𑁂𑀳𑀺 𑀆𑀲𑀻𑀲𑀦𑀸𑀤𑀻𑀳𑀺 𑀪𑀯𑀭𑀸𑀕𑁂𑀦𑁂𑀯 𑀭𑀢𑁆𑀢𑀸, 𑀪𑀯𑀭𑀸𑀕𑀭𑀢𑁆𑀢𑀸 𑀯𑀸 𑀳𑀼𑀢𑁆𑀯𑀸 𑀏𑀢𑀸𑀦𑀺 𑀆𑀲𑀻𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀆𑀤𑀺𑀯𑀝𑁆𑀝𑀤𑀼𑀓𑁆𑀔𑀁 𑀦 𑀉𑀢𑁆𑀢𑀭𑀺𑀁𑀲𑀼.

𑀬𑀜𑁆𑀜𑀁 𑀯𑀸 𑀣𑁄𑀫𑁂𑀦𑁆𑀢𑀻𑀢𑀺 𑀤𑀸𑀦𑀁 𑀯𑀸 𑀯𑀡𑁆𑀡𑁂𑀦𑁆𑀢𑀺. 𑀨𑀮𑀁 𑀯𑀸𑀢𑀺 𑀭𑀽𑀧𑀸𑀤𑀺𑀧𑀝𑀺𑀮𑀸𑀪𑀁. 𑀤𑀓𑁆𑀔𑀺𑀡𑁂𑀬𑁆𑀬𑁂 𑀯𑀸𑀢𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀤𑀻𑀲𑀼. 𑀲𑀼𑀘𑀺𑀁 𑀤𑀺𑀦𑁆𑀦𑀦𑁆𑀢𑀺 𑀲𑀼𑀘𑀺𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁. 𑀫𑀦𑀸𑀧𑀦𑁆𑀢𑀺 𑀫𑀦𑀯𑀟𑁆𑀠𑀦𑀓𑀁. 𑀧𑀡𑀻𑀢𑀦𑁆𑀢𑀺 𑀑𑀚𑀯𑀦𑁆𑀢𑀁. 𑀓𑀸𑀮𑁂𑀦𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀓𑀸𑀮𑁂 ¶ . 𑀓𑀧𑁆𑀧𑀺𑀬𑀦𑁆𑀢𑀺 𑀅𑀓𑀧𑁆𑀧𑀺𑀬𑀁 𑀯𑀚𑁆𑀚𑁂𑀢𑁆𑀯𑀸 𑀤𑀺𑀦𑁆𑀦𑀁. 𑀅𑀦𑀯𑀚𑁆𑀚𑀦𑁆𑀢𑀺 𑀦𑀺𑀤𑁆𑀤𑁄𑀲𑀁. 𑀅𑀪𑀺𑀡𑁆𑀳𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀺𑀢𑀦𑁆𑀢𑀺 𑀤𑀤𑀢𑁄 𑀫𑀼𑀜𑁆𑀘𑀦𑀘𑀺𑀢𑁆𑀢𑀁 𑀧𑀲𑀸𑀤𑀺𑀢𑀦𑁆𑀢𑀺. 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀻𑀢𑀺 𑀕𑀼𑀡𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀯𑀡𑁆𑀡𑁂𑀦𑁆𑀢𑀻𑀢𑀺 𑀯𑀡𑁆𑀡𑀁 𑀪𑀡𑀦𑁆𑀢𑀺. 𑀧𑀲𑀁𑀲𑀦𑁆𑀢𑀻𑀢𑀺 𑀧𑀲𑀸𑀤𑀁 𑀧𑀸𑀧𑁂𑀦𑁆𑀢𑀺.

𑀇𑀢𑁄 𑀦𑀺𑀤𑀸𑀦𑀦𑁆𑀢𑀺 𑀇𑀢𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀤𑀺𑀦𑁆𑀦𑀓𑀸𑀭𑀡𑀸. 𑀅𑀚𑁆𑀛𑀸𑀬𑀓𑀸𑀢𑀺 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑀸. 𑀫𑀦𑁆𑀢𑀥𑀭𑀸𑀢𑀺 𑀫𑀦𑁆𑀢𑁂 𑀥𑀸𑀭𑁂𑀦𑁆𑀢𑀸. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀦𑀁. 𑀑𑀝𑁆𑀞𑀧𑀳𑀝𑀓𑀭𑀡𑀯𑀲𑁂𑀦 𑀧𑀸𑀭𑀁 𑀕𑀢𑀸𑀢𑀺 𑀧𑀸𑀭𑀕𑀽. 𑀲𑀳 𑀦𑀺𑀖𑀡𑁆𑀟𑀼𑀦𑀸 𑀘 𑀓𑁂𑀝𑀼𑀪𑁂𑀦 𑀘 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁. 𑀦𑀺𑀖𑀡𑁆𑀟𑀽𑀢𑀺 𑀦𑀺𑀖𑀡𑁆𑀟𑀼𑀭𑀼𑀓𑁆𑀔𑀸𑀤𑀻𑀦𑀁 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀁 𑀲𑀢𑁆𑀣𑀁. 𑀓𑁂𑀝𑀼𑀪𑀦𑁆𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀉𑀧𑀓𑀸𑀭𑀸𑀯𑀳𑀁 𑀲𑀢𑁆𑀣𑀁 ¶ . 𑀲𑀳 𑀅𑀓𑁆𑀔𑀭𑀧𑁆𑀧𑀪𑁂𑀤𑁂𑀦 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁. 𑀅𑀓𑁆𑀔𑀭𑀧𑁆𑀧𑀪𑁂𑀤𑁄𑀢𑀺 𑀲𑀺𑀓𑁆𑀔𑀸 𑀘 𑀦𑀺𑀭𑀼𑀢𑁆𑀢𑀺 𑀘. 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀦𑁆𑀢𑀺 𑀆𑀣𑀩𑁆𑀩𑀡𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 ‘‘𑀇𑀢𑀺𑀳 𑀆𑀲, 𑀇𑀢𑀺𑀳 𑀆𑀲𑀸’’𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸, 𑀢𑁂𑀲𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀯𑁂𑀤𑀸𑀦𑀁.

𑀧𑀤𑀁 𑀢𑀤𑀯𑀲𑁂𑀲𑀜𑁆𑀘 𑀩𑁆𑀬𑀸𑀓𑀭𑀡𑀁 𑀅𑀥𑀺𑀬𑀦𑁆𑀢𑀺, 𑀯𑁂𑀤𑁂𑀦𑁆𑀢𑀺 𑀯𑀸𑀢𑀺 𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸. 𑀮𑁄𑀓𑀸𑀬𑀢𑀁 𑀯𑀼𑀘𑁆𑀘𑀢𑀺 𑀯𑀺𑀢𑀡𑁆𑀟𑀯𑀸𑀤𑀲𑀢𑁆𑀣𑀁. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀮𑀓𑁆𑀔𑀡𑀤𑀻𑀧𑀓𑀁 𑀤𑁆𑀯𑀸𑀤𑀲𑀲𑀳𑀲𑁆𑀲𑀕𑀦𑁆𑀣𑀧𑁆𑀧𑀫𑀸𑀡𑀁 𑀲𑀢𑁆𑀣𑀁. 𑀬𑀢𑁆𑀣 𑀲𑁄𑀴𑀲𑀲𑀳𑀲𑁆𑀲𑀕𑀸𑀣𑀸𑀧𑀤𑀧𑀭𑀺𑀫𑀸𑀡𑀸 𑀩𑀼𑀤𑁆𑀥𑀫𑀦𑁆𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀬𑁂𑀲𑀁 𑀯𑀲𑁂𑀦 ‘‘𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀩𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀫𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀅𑀕𑁆𑀕𑀲𑀸𑀯𑀓𑀸 ¶ , 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁧𑁨𑁮𑁮), 𑀩𑀼𑀤𑁆𑀥𑀫𑀸𑀢𑀸, 𑀩𑀼𑀤𑁆𑀥𑀧𑀺𑀢𑀸, 𑀅𑀕𑁆𑀕𑀼𑀧𑀝𑁆𑀞𑀸𑀓𑁄, 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀜𑀸𑀬𑀢𑀺. 𑀅𑀦𑀯𑀬𑀸𑀢𑀺 𑀇𑀫𑁂𑀲𑀼 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀽𑀦𑀸 𑀧𑀭𑀺𑀧𑀽𑀭𑀓𑀸𑀭𑀺𑀦𑁄, 𑀅𑀯𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀬𑀸 𑀦𑀸𑀫 𑀬𑁂 𑀢𑀸𑀦𑀺 𑀅𑀢𑁆𑀣𑀢𑁄 𑀘 𑀕𑀦𑁆𑀣𑀢𑁄 𑀘 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀯𑀻𑀢𑀭𑀸𑀕𑀸𑀢𑀺 𑀧𑀳𑀻𑀦𑀭𑀸𑀕𑀸. 𑀏𑀢𑁂𑀦 𑀅𑀭𑀳𑀢𑁆𑀢𑀨𑀮𑀝𑁆𑀞𑀸 𑀯𑀼𑀢𑁆𑀢𑀸. 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸𑀢𑀺 𑀏𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸. 𑀯𑀻𑀢𑀤𑁄𑀲𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑀝𑁆𑀞𑀸. 𑀤𑁄𑀲𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸𑀢𑀺 𑀏𑀢𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀸. 𑀯𑀻𑀢𑀫𑁄𑀳𑀸𑀢𑀺 𑀅𑀭𑀳𑀢𑁆𑀢𑀨𑀮𑀝𑁆𑀞𑀸. 𑀫𑁄𑀳𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀸𑀢𑀺 ¶ 𑀏𑀢𑁂𑀳𑀺 𑀘𑀢𑀽𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀫𑁆𑀧𑀦𑁆𑀦𑀸. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸𑀢𑀺 𑀏𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑀫𑁆𑀧𑀦𑁆𑀦𑀸 𑀯𑀼𑀢𑁆𑀢𑀸𑀢𑀺 𑀜𑀸𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀮𑁄𑀓𑀺𑀬𑀫𑁂𑀯. 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀚𑀧𑁆𑀧𑀦𑁆𑀢𑀻𑀢𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀧𑀚𑀧𑁆𑀧𑀦𑁆𑀢𑀻𑀢𑀺 𑀅𑀢𑀻𑀯 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀬𑀸𑀚𑀬𑁄𑀕𑁂𑀲𑀼 𑀬𑀼𑀢𑁆𑀢𑀸𑀢𑀺 𑀅𑀦𑀼𑀬𑁄𑀕𑁂 𑀤𑁂𑀬𑁆𑀬𑀥𑀫𑁆𑀫𑁂 𑀤𑀺𑀬𑁆𑀬𑀫𑀸𑀦𑁂 𑀅𑀪𑀺𑀬𑁄𑀕𑀯𑀲𑁂𑀦 𑀬𑀼𑀢𑁆𑀢𑀸.

𑁧𑁬. 𑀅𑀣 𑀓𑁄 𑀘𑀭𑀳𑀻𑀢𑀺 𑀅𑀣 𑀇𑀤𑀸𑀦𑀺 𑀓𑁄 𑀅𑀜𑁆𑀜𑁄 𑀅𑀢𑀸𑀭𑀺.

𑁧𑁭. 𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦 𑀯𑀻𑀫𑀁𑀲𑀺𑀢𑁆𑀯𑀸. 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘, 𑀧𑀭𑀢𑁆𑀢𑀪𑀸𑀯𑀲𑀓𑀢𑁆𑀢𑀪𑀸𑀯𑀸𑀤𑀻𑀦𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀥𑀽𑀫𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀽𑀫𑀯𑀺𑀭𑀳𑀺𑀢𑁄 ¶ . 𑀅𑀦𑀻𑀖𑁄𑀢𑀺 𑀭𑀸𑀕𑀸𑀤𑀺𑀈𑀖𑀯𑀺𑀭𑀳𑀺𑀢𑁄. 𑀅𑀢𑀸𑀭𑀺 𑀲𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀅𑀭𑀳𑀸 𑀚𑀸𑀢𑀺𑀚𑀭𑀁 𑀅𑀢𑀸𑀭𑀺.

𑀲𑀓𑀭𑀽𑀧𑀸𑀢𑀺 𑀅𑀢𑁆𑀢𑀦𑁄 𑀭𑀽𑀧𑀸. 𑀧𑀭𑀭𑀽𑀧𑀸𑀢𑀺 𑀧𑀭𑁂𑀲𑀁 𑀭𑀽𑀧𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀺𑀥𑀽𑀫𑀺𑀢𑀦𑁆𑀢𑀺 𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀺𑀥𑀽𑀫𑀁 𑀓𑀢𑀁. 𑀯𑀺𑀥𑀫𑀺𑀢𑀦𑁆𑀢𑀺 𑀦𑀸𑀲𑀺𑀢𑀁.

𑀫𑀸𑀦𑁄 𑀳𑀺 𑀢𑁂, 𑀩𑁆𑀭𑀸𑀳𑁆𑀫𑀡, 𑀔𑀸𑀭𑀺𑀪𑀸𑀭𑁄𑀢𑀺 𑀬𑀣𑀸 𑀔𑀸𑀭𑀺𑀪𑀸𑀭𑁄 𑀔𑀦𑁆𑀥𑁂𑀦 𑀯𑀬𑁆𑀳𑀫𑀸𑀦𑁄 𑀉𑀧𑀭𑀺𑀝𑁆𑀞𑀺𑀢𑁄𑀧𑀺 𑀅𑀓𑁆𑀓𑀦𑁆𑀢𑀓𑁆𑀓𑀦𑁆𑀢𑀝𑁆𑀞𑀸𑀦𑀁 𑀧𑀣𑀯𑀺𑀬𑀸 𑀲𑀤𑁆𑀥𑀺𑀁 𑀨𑀲𑁆𑀲𑁂𑀢𑀺 𑀯𑀺𑀬, 𑀏𑀯𑀁 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀸𑀤𑀻𑀦𑀺 𑀫𑀸𑀦𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀲𑁆𑀲𑀸𑀧𑀺𑀢𑁄 𑀫𑀸𑀦𑁄, 𑀢𑀢𑁆𑀣 𑀢𑀢𑁆𑀣 𑀇𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀁𑀲𑀻𑀤𑀸𑀧𑁂𑀢𑀺. 𑀢𑁂𑀦𑀸𑀳 𑁋 ‘‘𑀫𑀸𑀦𑁄 𑀳𑀺 𑀢𑁂, 𑀩𑁆𑀭𑀸𑀳𑁆𑀫𑀡, 𑀔𑀸𑀭𑀺𑀪𑀸𑀭𑁄’’𑀢𑀺. 𑀓𑁄𑀥𑁄 𑀥𑀽𑀫𑁄𑀢𑀺 𑀢𑀯 𑀜𑀸𑀡𑀕𑁆𑀕𑀺𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀓𑁄𑀥𑁄 𑀥𑀽𑀫𑁄. 𑀢𑁂𑀦 𑀳𑀺 𑀢𑁂 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀜𑀸𑀡𑀕𑁆𑀕𑀺 𑀦 𑀯𑀺𑀭𑁄𑀘𑀢𑀺. 𑀪𑀲𑁆𑀫𑀦𑀺 𑀫𑁄𑀲𑀯𑀚𑁆𑀚𑀦𑁆𑀢𑀺 𑀦𑀺𑀭𑁄𑀚𑀝𑁆𑀞𑁂𑀦 𑀫𑀼𑀲𑀸𑀯𑀸𑀤𑁄 𑀙𑀸𑀭𑀺𑀓𑀸 𑀦𑀸𑀫. 𑀬𑀣𑀸 𑀳𑀺 𑀙𑀸𑀭𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑁄 𑀅𑀕𑁆𑀕𑀺 𑀦 𑀚𑁄𑀢𑀢𑀺, 𑀏𑀯𑀁 𑀢𑁂 𑀫𑀼𑀲𑀸𑀯𑀸𑀤𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀚𑀺𑀯𑁆𑀳𑀸 𑀲𑀼𑀚𑀸𑀢𑀺 𑀬𑀣𑀸 𑀢𑀼𑀬𑁆𑀳𑀁 𑀲𑀼𑀯𑀡𑁆𑀡𑀭𑀚𑀢𑀮𑁄𑀳𑀓𑀝𑁆𑀞𑀫𑀢𑁆𑀢𑀺𑀓𑀸𑀲𑀼 𑀅𑀜𑁆𑀜𑀢𑀭𑀫𑀬𑀸 𑀬𑀸𑀕𑀬𑀚𑀦𑀢𑁆𑀣𑀸𑀬 𑀲𑀼𑀚𑀸 𑀳𑁄𑀢𑀺, 𑀏𑀯𑀁 𑀫𑀬𑁆𑀳𑀁 𑀥𑀫𑁆𑀫𑀬𑀸𑀕𑀬𑀚𑀦𑀢𑁆𑀣𑀸𑀬 ¶ 𑀧𑀳𑀼𑀢𑀚𑀺𑀯𑁆𑀳𑀸 𑀲𑀼𑀚𑀸𑀢𑀺 𑀯𑀤𑀢𑀺. 𑀬𑀣𑀸 𑀢𑀼𑀬𑁆𑀳𑀁 𑀦𑀤𑀻𑀢𑀻𑀭𑁂 𑀬𑀚𑀦𑀝𑁆𑀞𑀸𑀦𑀁, 𑀏𑀯𑀁 𑀥𑀫𑁆𑀫𑀬𑀸𑀕𑀬𑀚𑀦𑀝𑁆𑀞𑀸𑀦𑀝𑁆𑀞𑁂𑀦 𑀳𑀤𑀬𑀁 𑀚𑁄𑀢𑀺𑀝𑁆𑀞𑀸𑀦𑀁. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁.

𑀚𑀸𑀢𑀻𑀢𑀺 𑀚𑀸𑀬𑀦𑀓𑀯𑀲𑁂𑀦 𑀚𑀸𑀢𑀺. 𑀇𑀤𑀫𑁂𑀢𑁆𑀣 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀲𑀜𑁆𑀚𑀸𑀬𑀦𑀯𑀲𑁂𑀦 𑀲𑀜𑁆𑀚𑀸𑀢𑀺, 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀑𑀓𑁆𑀓𑀫𑀦𑀯𑀲𑁂𑀦 𑀑𑀓𑁆𑀓𑀦𑁆𑀢𑀺. 𑀚𑀸𑀬𑀦𑀝𑁆𑀞𑁂𑀦 ¶ 𑀯𑀸 𑀚𑀸𑀢𑀺. 𑀲𑀸 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀲𑀜𑁆𑀚𑀸𑀬𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺. 𑀲𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀑𑀓𑁆𑀓𑀫𑀦𑀝𑁆𑀞𑁂𑀦 𑀑𑀓𑁆𑀓𑀦𑁆𑀢𑀺. 𑀲𑀸 𑀅𑀡𑁆𑀟𑀚𑀚𑀮𑀸𑀩𑀼𑀚𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀅𑀡𑁆𑀟𑀓𑁄𑀲𑀜𑁆𑀘 𑀯𑀢𑁆𑀣𑀺𑀓𑁄𑀲𑀜𑁆𑀘 𑀑𑀓𑁆𑀓𑀫𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀑𑀓𑁆𑀓𑀫𑀦𑁆𑀢𑀸 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀧𑀸𑀓𑀝𑀸 𑀏𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀬𑀁 𑀢𑀸𑀯 𑀲𑀫𑁆𑀫𑀼𑀢𑀺𑀓𑀣𑀸.

𑀇𑀤𑀸𑀦𑀺 𑀧𑀭𑀫𑀢𑁆𑀣𑀓𑀣𑀸 𑀳𑁄𑀢𑀺. 𑀔𑀦𑁆𑀥𑀸 𑀏𑀯 𑀳𑀺 𑀧𑀭𑀫𑀢𑁆𑀣𑀢𑁄 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀲𑀢𑁆𑀢𑀸. 𑀢𑀢𑁆𑀣 𑀘 𑀔𑀦𑁆𑀥𑀸𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑁂 𑀏𑀓𑀲𑁆𑀲, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀘𑀢𑀼𑀦𑁆𑀦𑀁, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 ¶ 𑀧𑀜𑁆𑀘𑀦𑁆𑀦𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀢𑀼𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺. 𑀆𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀢𑀢𑁆𑀭 𑀢𑀢𑁆𑀭 𑀉𑀧𑀧𑀚𑁆𑀚𑀫𑀸𑀦𑀸𑀬𑀢𑀦𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀮𑀸𑀪𑁄𑀢𑀺 𑀲𑀦𑁆𑀢𑀢𑀺𑀬𑀸 𑀧𑀸𑀢𑀼𑀪𑀸𑀯𑁄𑀬𑁂𑀯. 𑀧𑀸𑀢𑀼𑀪𑀯𑀦𑁆𑀢𑀸𑀦𑁂𑀯 𑀳𑀺 𑀢𑀸𑀦𑀺 𑀧𑀝𑀺𑀮𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑀸 𑀧𑀦𑁂𑀲𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸 𑀚𑀸𑀢𑀺, 𑀦𑀺𑀬𑁆𑀬𑀸𑀢𑀦𑀭𑀲𑀸, 𑀅𑀢𑀻𑀢𑀪𑀯𑀢𑁄 𑀇𑀥 𑀉𑀫𑁆𑀫𑀼𑀚𑁆𑀚𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀨𑀮𑀯𑀲𑁂𑀦 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸.

𑀚𑀭𑀸𑀢𑀺 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀚𑀻𑀭𑀡𑀢𑀸𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸, 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸. 𑀅𑀬𑀜𑁆𑀳𑀺 𑀚𑀭𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀪𑀸𑀯𑀢𑁄 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀸 𑀇𑀤𑀁 𑀲𑀪𑀸𑀯𑀧𑀘𑁆𑀘𑀢𑁆𑀢𑀁. 𑀚𑀻𑀭𑀡𑀢𑀸𑀢𑀺 𑀇𑀫𑀺𑀦𑀸 𑀆𑀓𑀸𑀭𑀢𑁄, 𑀢𑁂𑀦𑀲𑁆𑀲𑀸𑀬𑀁 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑀸𑀮𑀸𑀢𑀺𑀓𑁆𑀓𑀫𑁂 𑀤𑀦𑁆𑀢𑀦𑀔𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀧𑀸𑀮𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑁂𑀲𑀮𑁄𑀫𑀸𑀦𑀁 𑀧𑀮𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀯𑀮𑀺𑀢𑁆𑀢𑀘𑀢𑀸𑀢𑀺 𑀇𑀫𑀺𑀦𑀸 𑀫𑀁𑀲𑀁 𑀫𑀺𑀮𑀸𑀧𑁂𑀢𑁆𑀯𑀸 𑀢𑀘𑁂 𑀯𑀮𑀺𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀢𑁂𑀦𑀲𑁆𑀲𑀸 𑀇𑀫𑁂 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀢𑁂𑀳𑀺 𑀇𑀫𑁂𑀲𑀁 𑀯𑀺𑀓𑀸𑀭𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑀸 𑀧𑀸𑀓𑀝𑀚𑀭𑀸 𑀤𑀲𑁆𑀲𑀺𑀢𑀸. 𑀬𑀣𑁂𑀯 𑀳𑀺 𑀉𑀤𑀓𑀲𑁆𑀲 𑀯𑀸 𑀯𑀸𑀢𑀲𑁆𑀲 𑀯𑀸 𑀅𑀕𑁆𑀕𑀺𑀦𑁄 𑀯𑀸 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀲𑀁𑀪𑀕𑁆𑀕𑀧𑀮𑀺𑀪𑀕𑁆𑀕𑀢𑀸𑀬 𑀯𑀸 𑀛𑀸𑀫𑀢𑀸𑀬 𑀯𑀸 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀘 𑀲𑁄 𑀕𑀢𑀫𑀕𑁆𑀕𑁄 𑀢𑀸𑀦𑁂𑀯 𑀉𑀤𑀓𑀸𑀤𑀻𑀦𑀺, 𑀏𑀯𑀫𑁂𑀯 𑀚𑀭𑀸𑀬 𑀤𑀦𑁆𑀢𑀸𑀤𑀻𑀦𑀁 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸𑀧𑀺 𑀕𑀬𑁆𑀳𑀢𑀺, 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸. 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺.

𑀆𑀬𑀼𑀦𑁄 ¶ ¶ 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄𑀢𑀺 𑀇𑀫𑁂𑀳𑀺 𑀧𑀦 𑀧𑀤𑁂𑀳𑀺 𑀓𑀸𑀮𑀸𑀢𑀺𑀓𑁆𑀓𑀫𑁂𑀬𑁂𑀯 𑀅𑀪𑀺𑀩𑁆𑀬𑀢𑁆𑀢𑀸𑀬 𑀆𑀬𑀼𑀓𑁆𑀔𑀬𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀲𑀗𑁆𑀔𑀸𑀢𑀸𑀬 𑀧𑀓𑀢𑀺𑀬𑀸 𑀤𑀻𑀧𑀺𑀢𑀸, 𑀢𑁂𑀦𑀲𑁆𑀲𑀺𑀫𑁂 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀲𑁆𑀫𑀸 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺, 𑀢𑀲𑁆𑀫𑀸 𑀚𑀭𑀸 ‘‘𑀆𑀬𑀼𑀦𑁄 𑀲𑀁𑀳𑀸𑀦𑀻’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀘 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀲𑀦𑁆𑀦𑀸𑀦𑀺 𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀲𑀼𑀔𑁂𑀦𑁂𑀯 𑀕𑀡𑁆𑀳𑀦𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀭𑀁 𑀧𑀢𑁆𑀢𑀲𑁆𑀲 𑀧𑀭𑀺𑀧𑀓𑁆𑀓𑀸𑀦𑀺 𑀆𑀮𑀼𑀴𑀺𑀢𑀸𑀦𑀺 𑀅𑀯𑀺𑀲𑀤𑀸𑀦𑀺, 𑀑𑀴𑀸𑀭𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄’’𑀢𑀺 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀸.

𑀲𑀸 𑀧𑀦𑁂𑀲𑀸 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀲𑀩𑁆𑀩𑀸𑀧𑀺 𑀚𑀭𑀸 𑀧𑀸𑀓𑀝𑀸 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 ¶ 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁄 𑀭𑀽𑀧𑀥𑀫𑁆𑀫𑁂𑀲𑀼 𑀚𑀭𑀸 𑀧𑀸𑀓𑀝𑀚𑀭𑀸 𑀦𑀸𑀫. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀚𑀭𑀸 𑀢𑀸𑀤𑀺𑀲𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀝𑀺𑀘𑁆𑀙𑀦𑁆𑀦𑀚𑀭𑀸 𑀦𑀸𑀫. 𑀢𑀢𑁆𑀣 𑀬𑁆𑀯𑀸𑀬𑀁 𑀔𑀡𑁆𑀟𑀸𑀤𑀺𑀪𑀸𑀯𑁄 𑀤𑀺𑀲𑁆𑀲𑀢𑀺, 𑀲𑁄 𑀢𑀸𑀤𑀺𑀲𑀸𑀦𑀁 𑀤𑀦𑁆𑀢𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀡𑁆𑀡𑁄𑀬𑁂𑀯. 𑀢𑀜𑁆𑀘 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑁂 𑀤𑀦𑁆𑀢𑀸 𑀚𑀭𑀸𑀬 𑀧𑀳𑀝𑀸’’𑀢𑀺 𑀚𑀭𑀁 𑀚𑀸𑀦𑀸𑀢𑀺. 𑀉𑀤𑀓𑀝𑁆𑀞𑀸𑀦𑁂 𑀩𑀤𑁆𑀥𑀸𑀦𑀺 𑀕𑁄𑀲𑀺𑀗𑁆𑀕𑀸𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀚𑀸𑀦𑀦𑀁 𑀯𑀺𑀬.

𑀧𑀼𑀦 𑀅𑀯𑀻𑀘𑀺 𑀲𑀯𑀻𑀘𑀻𑀢𑀺 𑀏𑀯𑀫𑁆𑀧𑀺 𑀅𑀬𑀁 𑀚𑀭𑀸 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀫𑀡𑀺𑀓𑀦𑀓𑀭𑀚𑀢𑀧𑀯𑀸𑀴𑀘𑀦𑁆𑀤𑀲𑀽𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀧𑀸𑀡𑀻𑀦𑀁 𑀯𑀺𑀬 𑀘 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀅𑀧𑀸𑀡𑀻𑀦𑀁 𑀯𑀺𑀬 𑀘 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀅𑀯𑀻𑀘𑀺𑀚𑀭𑀸 𑀦𑀸𑀫, 𑀦𑀺𑀭𑀦𑁆𑀢𑀭𑀚𑀭𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀲𑀯𑀻𑀘𑀺𑀚𑀭𑀸 𑀦𑀸𑀫.

𑀢𑀢𑁆𑀣 𑀲𑀯𑀻𑀘𑀺𑀚𑀭𑀸 𑀉𑀧𑀸𑀤𑀺𑀦𑁆𑀦𑀓𑀅𑀦𑀼𑀧𑀸𑀤𑀺𑀦𑁆𑀦𑀓𑀯𑀲𑁂𑀦 𑀏𑀯𑀁 𑀤𑀻𑀧𑁂𑀢𑀩𑁆𑀩𑀸 𑁋 𑀤𑀳𑀭𑀓𑀼𑀫𑀸𑀭𑀓𑀸𑀦𑀜𑁆𑀳𑀺 𑀧𑀞𑀫𑀫𑁂𑀯 𑀔𑀻𑀭𑀤𑀦𑁆𑀢𑀸 𑀦𑀸𑀫 𑀉𑀝𑁆𑀞𑀳𑀦𑁆𑀢𑀺, 𑀦 𑀢𑁂 𑀣𑀺𑀭𑀸. 𑀢𑁂𑀲𑀼 𑀧𑀦 𑀧𑀢𑀺𑀢𑁂𑀲𑀼 𑀧𑀼𑀦 𑀤𑀦𑁆𑀢𑀸 𑀉𑀝𑁆𑀞𑀳𑀦𑁆𑀢𑀺, 𑀢𑁂 𑀧𑀞𑀫𑀫𑁂𑀯 𑀲𑁂𑀢𑀸 𑀳𑁄𑀦𑁆𑀢𑀺, 𑀚𑀭𑀸𑀯𑀸𑀢𑁂𑀦 𑀧𑀦 𑀧𑀳𑀝𑀓𑀸𑀮𑁂 𑀓𑀸𑀴𑀓𑀸 𑀳𑁄𑀦𑁆𑀢𑀺. 𑀓𑁂𑀲𑀸 𑀧𑀦 𑀧𑀞𑀫𑀫𑁂𑀯 𑀢𑀫𑁆𑀩𑀸𑀧𑀺 𑀳𑁄𑀦𑁆𑀢𑀺 𑀓𑀸𑀴𑀓𑀸𑀧𑀺 𑀲𑁂𑀢𑀓𑀸𑀧𑀺. 𑀙𑀯𑀺 𑀧𑀦 𑀲𑀮𑁄𑀳𑀺𑀢𑀓𑀸 𑀳𑁄𑀢𑀺. 𑀯𑀟𑁆𑀠𑀦𑁆𑀢𑀸𑀦𑀁 𑀯𑀟𑁆𑀠𑀦𑁆𑀢𑀸𑀦𑀁 𑀑𑀤𑀸𑀢𑀸𑀦𑀁 𑀑𑀤𑀸𑀢𑀪𑀸𑀯𑁄, 𑀓𑀸𑀴𑀓𑀸𑀦𑀁 𑀓𑀸𑀴𑀓𑀪𑀸𑀯𑁄 𑀧𑀜𑁆𑀜𑀸𑀬𑀢𑀺. 𑀚𑀭𑀸𑀯𑀸𑀢𑁂𑀦 𑀧𑀳𑀝𑀓𑀸𑀮𑁂 𑀘 𑀯𑀮𑀺𑀁 𑀕𑀡𑁆𑀳𑀸𑀢𑀺. 𑀲𑀩𑁆𑀩𑀫𑁆𑀧𑀺 𑀲𑀲𑁆𑀲𑀁 𑀯𑀧𑀺𑀢𑀓𑀸𑀮𑁂 𑀲𑁂𑀢𑀁 𑀳𑁄𑀢𑀺, 𑀧𑀘𑁆𑀙𑀸 𑀦𑀻𑀮𑀁. 𑀚𑀭𑀸𑀯𑀸𑀢𑁂𑀦 𑀧𑀦 𑀧𑀳𑀝𑀓𑀸𑀮𑁂 𑀧𑀡𑁆𑀟𑀭𑀁 ¶ 𑀳𑁄𑀢𑀺. 𑀅𑀫𑁆𑀩𑀗𑁆𑀓𑀼𑀭𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀲𑀸 𑀧𑀦𑁂𑀲𑀸 𑀔𑀦𑁆𑀥𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀫𑀭𑀡𑀽𑀧𑀦𑀬𑀦𑀭𑀲𑀸, 𑀬𑁄𑀩𑁆𑀩𑀦𑀯𑀺𑀦𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯. 𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 ¶ 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀳𑀲𑁆𑀲𑁂𑀦. 𑀅𑀜𑁆𑀜𑁂𑀲𑀜𑁆𑀘 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀧𑀼𑀡𑁆𑀡𑀓𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑁂𑀢𑁆𑀢𑀕𑀽𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮. 𑀘𑀢𑀼𑀢𑁆𑀣𑁂 ¶ 𑀫𑁂𑀢𑁆𑀢𑀕𑀽𑀲𑀼𑀢𑁆𑀢𑁂 𑁋 𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀽 𑀪𑀸𑀯𑀺𑀢𑀢𑁆𑀢𑀦𑁆𑀢𑀺 ‘‘𑀅𑀬𑀁 𑀯𑁂𑀤𑀕𑀽’’𑀢𑀺 𑀘 ‘‘𑀪𑀸𑀯𑀺𑀢𑀢𑁆𑀢𑁄’’𑀢𑀺 𑀘 𑀏𑀯𑀁 𑀢𑀁 𑀫𑀜𑁆𑀜𑀸𑀫𑀺.

𑀅𑀧𑀭𑀺𑀢𑁆𑀢𑁄𑀢𑀺 𑀦 𑀅𑀧𑁆𑀧𑁄. 𑀫𑀳𑀦𑁆𑀢𑁄𑀢𑀺 𑀦 𑀔𑀼𑀤𑁆𑀤𑀓𑁄. 𑀕𑀫𑁆𑀪𑀻𑀭𑁄𑀢𑀺 𑀦 𑀉𑀢𑁆𑀢𑀸𑀦𑁄. 𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀫𑀺𑀦𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑁄. 𑀤𑀼𑀧𑁆𑀧𑀭𑀺𑀬𑁄𑀕𑀸𑀴𑁆𑀳𑁄𑀢𑀺 𑀅𑀯𑀕𑀸𑀳𑀺𑀢𑀼𑀁 𑀑𑀢𑀭𑀺𑀢𑀼𑀁 𑀤𑀼𑀓𑁆𑀔𑁄. 𑀩𑀳𑀼𑀭𑀢𑀦𑁄 𑀲𑀸𑀕𑀭𑀽𑀧𑀫𑁄𑀢𑀺 𑀩𑀳𑀽𑀦𑀁 𑀥𑀫𑁆𑀫𑀭𑀢𑀦𑀸𑀦𑀁 𑀆𑀓𑀭𑀢𑁆𑀢𑀸 𑀅𑀦𑁂𑀓𑀯𑀺𑀥𑀭𑀢𑀦𑀲𑀫𑁆𑀧𑀦𑁆𑀦𑁄 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀩𑀳𑀼𑀭𑀢𑀦𑁄 𑀲𑀸𑀕𑀭𑀲𑀤𑀺𑀲𑁄.

𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺 𑀦 𑀯𑀺𑀓𑀼𑀡𑀺𑀢𑀫𑀼𑀔𑁄 𑀳𑁄𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀤𑁄𑀲𑀯𑀲𑁂𑀦 𑀦 𑀖𑀦𑀻𑀪𑀽𑀢𑀘𑀺𑀢𑁆𑀢𑁄. 𑀅𑀮𑀻𑀦𑀫𑀦𑀲𑁄𑀢𑀺 𑀦 𑀲𑀗𑁆𑀓𑀼𑀘𑀺𑀢𑀘𑀺𑀢𑁆𑀢𑁄. 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄𑀢𑀺 𑀦 𑀧𑀽𑀢𑀺𑀘𑀺𑀢𑁆𑀢𑁄.

𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑁄𑀢𑀺 𑀘𑀓𑁆𑀔𑀼𑀯𑀺𑀲𑀬𑁂 𑀭𑀽𑀧𑀸𑀭𑀫𑁆𑀫𑀡𑁂 𑀤𑀺𑀝𑁆𑀞𑀫𑀢𑁆𑀢𑁄𑀬𑁂𑀯 𑀢𑀁 𑀆𑀭𑀫𑁆𑀫𑀡𑀁 𑀪𑀯𑀺𑀲𑁆𑀲𑀢𑀺, 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦𑀢𑁆𑀣𑀺. 𑀬𑀁 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀯𑀡𑁆𑀡𑀸𑀬𑀢𑀦𑀫𑁂𑀯. 𑀲𑀼𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺 𑀘 𑀤𑀺𑀝𑁆𑀞𑁂𑀢𑀺 𑀤𑀲𑁆𑀲𑀦𑀬𑁄𑀕𑁂𑀦 𑀯𑀡𑁆𑀡𑀸𑀬𑀢𑀦𑀁, 𑀲𑀯𑀦𑀬𑁄𑀕𑁂𑀦 𑀲𑀤𑁆𑀤𑀸𑀬𑀢𑀦𑀁, 𑀫𑀼𑀢𑀬𑁄𑀕𑁂𑀦 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀸𑀦𑀺 𑀤𑀲𑁆𑀲𑁂𑀢𑀺. 𑀖𑀸𑀦𑀲𑁆𑀲 𑀕𑀦𑁆𑀥𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬 𑀭𑀲𑀸𑀬𑀢𑀦𑀁, 𑀓𑀸𑀬𑀲𑁆𑀲 𑀧𑀣𑀯𑀻 𑀢𑁂𑀚𑁄 𑀯𑀸𑀬𑀽𑀢𑀺 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀯𑀺𑀜𑁆𑀜𑀸𑀢𑀬𑁄𑀕𑁂𑀦 𑀥𑀫𑁆𑀫𑀸𑀬𑀢𑀦𑀁 𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑁂 𑀅𑀦𑀽𑀧𑀬𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑁂 𑀭𑀸𑀕𑀽𑀧𑀬𑀯𑀺𑀭𑀳𑀺𑀢𑁄. 𑀅𑀦𑀧𑀸𑀬𑁄𑀢𑀺 𑀓𑁄𑀥𑀯𑀺𑀭𑀳𑀺𑀢𑁄 𑀅𑀧𑁆𑀧𑀝𑀺𑀖𑁄 ¶ . 𑀅𑀦𑀺𑀲𑁆𑀲𑀺𑀢𑁄𑀢𑀺 𑀢𑀡𑁆𑀳𑀸𑀬 𑀅𑀦𑀮𑁆𑀮𑀻𑀦𑁄. 𑀅𑀧𑁆𑀧𑀝𑀺𑀩𑀤𑁆𑀥𑁄𑀢𑀺 𑀫𑀸𑀦𑁂𑀦 𑀦 𑀩𑀤𑁆𑀥𑁄. 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀲𑀩𑁆𑀩𑀸𑀭𑀫𑁆𑀫𑀡𑀢𑁄 𑀫𑀼𑀢𑁆𑀢𑁄. 𑀯𑀺𑀲𑀜𑁆𑀜𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀞𑀺𑀢𑁄.

𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀘𑀓𑁆𑀔𑀽𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀓𑀢𑀺𑀫𑀁𑀲𑀘𑀓𑁆𑀔𑀼 ¶ 𑀉𑀧𑀮𑀩𑁆𑀪𑀢𑀺. 𑀧𑀲𑁆𑀲𑀢𑀻𑀢𑀺 ¶ 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀸𑀭𑀫𑁆𑀫𑀡𑀁. 𑀙𑀦𑁆𑀤𑀭𑀸𑀕𑁄𑀢𑀺 𑀢𑀡𑁆𑀳𑀸𑀙𑀦𑁆𑀤𑁄.

𑀤𑀦𑁆𑀢𑀁 𑀦𑀬𑀦𑁆𑀢𑀺 𑀲𑀫𑀺𑀢𑀺𑀦𑁆𑀢𑀺 𑀉𑀬𑁆𑀬𑀸𑀦𑀓𑀻𑀴𑀸𑀫𑀡𑁆𑀟𑀮𑀸𑀤𑀻𑀲𑀼 𑀳𑀺 𑀫𑀳𑀸𑀚𑀦𑀫𑀚𑁆𑀛𑀁 𑀕𑀘𑁆𑀙𑀦𑁆𑀢𑀸 𑀤𑀦𑁆𑀢𑀫𑁂𑀯 𑀕𑁄𑀡𑀁 𑀯𑀸 𑀤𑀦𑁆𑀢𑀁 𑀅𑀲𑁆𑀲𑀸𑀚𑀸𑀦𑀻𑀬𑀁 𑀯𑀸 𑀬𑀸𑀦𑁂 𑀬𑁄𑀚𑁂𑀢𑁆𑀯𑀸 𑀦𑀬𑀦𑁆𑀢𑀺. 𑀭𑀸𑀚𑀸𑀢𑀺 𑀢𑀣𑀸𑀭𑀽𑀧𑀸𑀦𑁂𑀯 𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑁄 𑀭𑀸𑀚𑀸𑀧𑀺 𑀤𑀦𑁆𑀢𑀫𑁂𑀯 𑀅𑀪𑀺𑀭𑀼𑀳𑀢𑀺. 𑀫𑀦𑀼𑀲𑁆𑀲𑁂𑀲𑀽𑀢𑀺 𑀫𑀦𑀼𑀲𑁆𑀲𑁂𑀲𑀼𑀧𑀺 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄𑀯 𑀲𑁂𑀝𑁆𑀞𑁄. 𑀬𑁄𑀢𑀺𑀯𑀸𑀓𑁆𑀬𑀦𑁆𑀢𑀺 𑀏𑀯𑀭𑀽𑀧𑀁 𑀅𑀢𑀺𑀓𑁆𑀓𑀫𑁆𑀫𑀯𑀘𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀢𑀺𑀢𑀺𑀓𑁆𑀔𑀢𑀺 𑀦𑀧𑁆𑀧𑀢𑀺𑀧𑁆𑀨𑀭𑀢𑀺 𑀦 𑀯𑀺𑀳𑀜𑁆𑀜𑀢𑀺, 𑀏𑀯𑀭𑀽𑀧𑁄 𑀤𑀦𑁆𑀢𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄.

𑀅𑀲𑁆𑀲𑀢𑀭𑀸𑀢𑀺 𑀯𑀴𑀯𑀸𑀬 𑀕𑀤𑁆𑀭𑀪𑁂𑀦 𑀚𑀸𑀢𑀸. 𑀆𑀚𑀸𑀦𑀻𑀬𑀸𑀢𑀺 𑀬𑀁 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺 𑀓𑀸𑀭𑀡𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀔𑀺𑀧𑁆𑀧𑀁 𑀚𑀸𑀦𑀦𑀲𑀫𑀢𑁆𑀣𑀸. 𑀲𑀺𑀦𑁆𑀥𑀯𑀸𑀢𑀺 𑀲𑀺𑀦𑁆𑀥𑀯𑀭𑀝𑁆𑀞𑁂 𑀚𑀸𑀢𑀸 𑀅𑀲𑁆𑀲𑀸. 𑀫𑀳𑀸𑀦𑀸𑀕𑀸𑀢𑀺 𑀓𑀼𑀜𑁆𑀚𑀭𑀲𑀗𑁆𑀔𑀸𑀢𑀸 𑀫𑀳𑀸𑀳𑀢𑁆𑀣𑀺𑀦𑁄. 𑀅𑀢𑁆𑀢𑀤𑀦𑁆𑀢𑁄𑀢𑀺 𑀏𑀢𑁂 𑀅𑀲𑁆𑀲𑀢𑀭𑀸 𑀯𑀸 𑀲𑀺𑀦𑁆𑀥𑀯𑀸 𑀯𑀸 𑀓𑀼𑀜𑁆𑀚𑀭𑀸 𑀯𑀸 𑀤𑀦𑁆𑀢𑀸𑀯, 𑀦 𑀅𑀤𑀦𑁆𑀢𑀸. 𑀬𑁄 𑀧𑀦 𑀘𑀢𑀼𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀤𑀦𑁆𑀢𑀢𑀸𑀬 𑀅𑀢𑁆𑀢𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄, 𑀅𑀬𑀁 𑀢𑀢𑁄𑀧𑀺 𑀯𑀭𑀁, 𑀲𑀩𑁆𑀩𑁂𑀳𑀺𑀧𑀺 𑀏𑀢𑁂𑀳𑀺 𑀉𑀢𑁆𑀢𑀭𑀺𑀢𑀭𑁄𑀢𑀺 𑀅𑀢𑁆𑀣𑁄.

𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀻𑀢𑀺 𑀬𑀸𑀦𑀺 𑀏𑀢𑀸𑀦𑀺 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺 𑀉𑀢𑁆𑀢𑀫𑀬𑀸𑀦𑀸𑀦𑀺, 𑀏𑀢𑁂𑀳𑀺 𑀬𑀸𑀦𑁂𑀳𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀅𑀕𑀢𑀧𑀼𑀩𑁆𑀩𑀢𑁆𑀢𑀸 ‘‘𑀅𑀕𑀢’’𑀦𑁆𑀢𑀺 𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀤𑀺𑀲𑀁 𑀢𑀣𑀸 𑀦 𑀕𑀘𑁆𑀙𑁂𑀬𑁆𑀬. 𑀬𑀣𑀸 𑀧𑀼𑀩𑁆𑀩𑀪𑀸𑀕𑁂 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀤𑀦𑁆𑀢𑁂𑀦, 𑀅𑀧𑀭𑀪𑀸𑀕𑁂 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀲𑀼𑀤𑀦𑁆𑀢𑁂𑀦 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄 𑀲𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀢𑀁 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀤𑀦𑁆𑀢𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀤𑀫𑀦𑀫𑁂𑀯 𑀯𑀭𑀢𑀭𑀦𑁆𑀢𑀺 𑀅𑀢𑁆𑀣𑁄 (𑀥. 𑀧. 𑀅𑀝𑁆𑀞. 𑁨.𑁩𑁨𑁨; 𑀫𑀳𑀸𑀦𑀺. 𑀅𑀝𑁆𑀞. 𑁯𑁦).

𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀦𑁆𑀢𑀻𑀢𑀺 𑀦𑀯𑀯𑀺𑀥𑀫𑀸𑀦𑀓𑁄𑀝𑁆𑀞𑀸𑀲𑁂𑀲𑀼 𑀦 𑀘𑀮𑀦𑁆𑀢𑀺 𑀦 𑀯𑁂𑀥𑁂𑀦𑁆𑀢𑀺. 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀼𑀦𑀩𑁆𑀪𑀯𑀸𑀢𑀺 𑀓𑀫𑁆𑀫𑀓𑀺𑀮𑁂𑀲𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸. 𑀤𑀦𑁆𑀢𑀪𑀽𑀫𑀺𑀁 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 ¶ 𑀅𑀭𑀳𑀢𑁆𑀢𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑀸. 𑀢𑁂 𑀮𑁄𑀓𑁂 𑀯𑀺𑀚𑀺𑀢𑀸𑀯𑀺𑀦𑁄𑀢𑀺 ¶ 𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀔𑀻𑀡𑀸𑀲𑀯𑀸 𑀲𑀢𑁆𑀢𑀮𑁄𑀓𑁂 𑀯𑀺𑀚𑀺𑀢𑀯𑀺𑀚𑀬𑀸 𑀦𑀸𑀫 (𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁬; 𑀫𑀳𑀸𑀦𑀺. 𑀅𑀝𑁆𑀞. 𑁯𑁦).

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀻𑀢𑀺 𑀬𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀲𑀤𑁆𑀥𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀨𑀮𑀁 𑀧𑀸𑀧𑁂𑀢𑁆𑀯𑀸 𑀯𑀟𑁆𑀠𑀺𑀢𑀸𑀦𑀺. 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀘𑀓𑁆𑀔𑀸𑀤𑀺𑀅𑀚𑁆𑀛𑀢𑁆𑀢𑀸𑀬𑀢𑀦𑀸𑀦𑀺 𑀘 𑀭𑀽𑀧𑀸𑀤𑀺𑀩𑀳𑀺𑀤𑁆𑀥𑀸𑀬𑀢𑀦𑀸𑀦𑀺 𑀘 𑀦𑀺𑀩𑁆𑀩𑀺𑀲𑁂𑀯𑀦𑀸𑀦𑀺 𑀓𑀢𑀸𑀦𑀺. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀓𑀮𑀢𑁂𑀥𑀸𑀢𑀼𑀓𑁂 𑀮𑁄𑀓𑁂 𑀘. 𑀦𑀺𑀩𑁆𑀩𑀺𑀚𑁆𑀛 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀦𑁆𑀢𑀺 𑀇𑀫𑀜𑁆𑀘 𑀅𑀢𑁆𑀢𑀪𑀸𑀯𑀁 𑀧𑀭𑀮𑁄𑀓𑁂 𑀘 𑀅𑀢𑁆𑀢𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀔𑀻𑀡𑀸𑀲𑀯𑁄 ¶ . 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲 𑀤𑀦𑁆𑀢𑁄𑀢𑀺 𑀲𑁄 𑀔𑀻𑀡𑀸𑀲𑀯𑁄 𑀘𑀓𑁆𑀔𑀸𑀤𑀺𑀢𑁄 𑀤𑀦𑁆𑀢𑁄 𑀯𑀟𑁆𑀠𑀺𑀢𑀘𑀺𑀢𑁆𑀢𑁄 𑀫𑀭𑀡𑀓𑀸𑀮𑀁 𑀧𑀢𑁆𑀣𑁂𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁨; 𑀫𑀳𑀸𑀦𑀺. 𑀅𑀝𑁆𑀞. 𑁯𑁦).

𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀤𑀺𑀢𑁄 𑀲𑀫𑀼𑀤𑀸𑀕𑀫𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀬𑁂𑀲𑀁 𑀔𑀦𑁆𑀥𑀸𑀤𑀺𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀜𑁆𑀜𑀸𑀬𑀢𑀺. 𑀅𑀢𑁆𑀣𑀗𑁆𑀕𑀫𑀢𑁄 𑀦𑀺𑀭𑁄𑀥𑁄𑀢𑀺 𑀅𑀢𑁆𑀣𑀗𑁆𑀕𑀫𑀦𑀯𑀲𑁂𑀦 𑀢𑁂𑀲𑀁𑀬𑁂𑀯 𑀅𑀪𑀸𑀯𑁄 𑀧𑀜𑁆𑀜𑀸𑀬𑀢𑀺. 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄 𑀓𑀫𑁆𑀫𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀯𑀺𑀧𑀸𑀓𑁄𑀧𑀺 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄𑀯 𑀦𑀸𑀫. 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀦𑁆𑀢𑀺 𑀲𑀩𑁆𑀩𑀭𑀽𑀧𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫 𑀚𑀸𑀢𑀁. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀦𑁆𑀢𑀺 𑀲𑀩𑁆𑀩𑀁 𑀓𑀫𑁆𑀫𑀸𑀤𑀺𑀓𑀁 𑀚𑀸𑀢𑀺𑀬𑀸 𑀅𑀦𑀼𑀧𑀯𑀺𑀝𑁆𑀞𑀁. 𑀚𑀭𑀸𑀬 𑀅𑀦𑀼𑀲𑀝𑀦𑁆𑀢𑀺 𑀚𑀭𑀸𑀬 𑀧𑀢𑁆𑀣𑀝𑀁. 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀦𑁆𑀢𑀺 𑀩𑁆𑀬𑀸𑀥𑀺𑀤𑀼𑀓𑁆𑀔𑁂𑀦 𑀅𑀪𑀺𑀫𑀤𑁆𑀤𑀺𑀢𑀁. 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀦𑁆𑀢𑀺 𑀫𑀘𑁆𑀘𑀼𑀦𑀸 𑀅𑀪𑀺𑀳𑀝𑀁 𑀧𑀳𑀝𑀁. 𑀅𑀢𑀸𑀡𑀦𑁆𑀢𑀺 𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀢𑀸𑀬𑀦𑀲𑁆𑀲 𑀅𑀪𑀸𑀯𑀢𑁄 𑀅𑀢𑀸𑀬𑀦𑀁 𑀅𑀦𑀸𑀭𑀓𑁆𑀔𑀁 𑀅𑀮𑀩𑁆𑀪𑀡𑁂𑀬𑁆𑀬𑀁 𑀔𑁂𑀫𑀁 𑀯𑀸. 𑀅𑀮𑁂𑀡𑀦𑁆𑀢𑀺 𑀅𑀮𑁆𑀮𑀻𑀬𑀺𑀢𑀼𑀁 𑀦𑀺𑀲𑁆𑀲𑀬𑀺𑀢𑀼𑀁 𑀅𑀦𑀭𑀳𑀁, 𑀅𑀮𑁆𑀮𑀻𑀦𑀸𑀦𑀫𑁆𑀧𑀺 𑀦 𑀮𑁂𑀡𑀓𑀺𑀘𑁆𑀘𑀓𑀭𑀡𑀁. 𑀅𑀲𑀭𑀡𑀦𑁆𑀢𑀺 𑀦𑀺𑀲𑁆𑀲𑀺𑀢𑀸𑀦𑀁 𑀦 𑀪𑀬𑀳𑀸𑀭𑀓𑀁, 𑀦 𑀪𑀬𑀯𑀺𑀦𑀸𑀲𑀓𑀁. 𑀅𑀲𑀭𑀡𑀻𑀪𑀽𑀢𑀦𑁆𑀢𑀺 𑀧𑀼𑀭𑁂 𑀉𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀅𑀪𑀸𑀯𑁂𑀦𑁂𑀯 𑀅𑀲𑀭𑀡𑀁, 𑀉𑀧𑁆𑀧𑀢𑁆𑀢𑀺𑀲𑀫𑀓𑀸𑀮𑀫𑁂𑀯 𑀅𑀲𑀭𑀡𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁯. 𑀅𑀧𑀼𑀘𑁆𑀙𑀲𑀻𑀢𑀺 𑀏𑀢𑁆𑀣 𑀅-𑀇𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄, 𑀧𑀼𑀘𑁆𑀙𑀲𑀺𑀢𑁆𑀯𑁂𑀯 𑀅𑀢𑁆𑀣𑁄. 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀦𑁆𑀢𑀺 𑀬𑀣𑀸 𑀧𑀚𑀸𑀦𑀦𑁆𑀢𑁄 𑀆𑀘𑀺𑀓𑁆𑀔𑀢𑀺, 𑀏𑀯𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺. 𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸𑀢𑀺 𑀢𑀡𑁆𑀳𑀸𑀤𑀺𑀉𑀧𑀥𑀺𑀦𑀺𑀤𑀸𑀦𑀸 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀯𑀺𑀲𑁂𑀲𑀸 𑀧𑀪𑀯𑀦𑁆𑀢𑀺.

𑀢𑀡𑁆𑀳𑀽𑀧𑀥𑀻𑀢𑀺 ¶ ¶ 𑀢𑀡𑁆𑀳𑀸 𑀏𑀯 𑀢𑀡𑁆𑀳𑀽𑀧𑀥𑀺. 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀽𑀧𑀥𑀺. 𑀭𑀸𑀕𑀸𑀤𑀺𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀽𑀧𑀥𑀺. 𑀧𑀼𑀜𑁆𑀜𑀸𑀤𑀺𑀓𑀫𑁆𑀫𑀸𑀦𑀺 𑀏𑀯 𑀓𑀫𑁆𑀫𑀽𑀧𑀥𑀺. 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀸𑀦𑀺𑀬𑁂𑀯 𑀤𑀼𑀘𑁆𑀘𑀭𑀺𑀢𑀽𑀧𑀥𑀺. 𑀓𑀩𑀴𑀻𑀓𑀸𑀭𑀸𑀤𑀬𑁄 𑀆𑀳𑀸𑀭𑀸 𑀏𑀯 𑀆𑀳𑀸𑀭𑀽𑀧𑀥𑀺. 𑀤𑁄𑀲𑀧𑀝𑀺𑀖𑁄 𑀏𑀯 𑀧𑀝𑀺𑀖𑀽𑀧𑀥𑀺. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀓𑀫𑁆𑀫𑁂𑀦𑁂𑀯 𑀕𑀳𑀺𑀢𑀸 𑀧𑀣𑀯𑀸𑀤𑀬𑁄 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄𑀯 𑀘𑀢𑀲𑁆𑀲𑁄 𑀉𑀧𑀸𑀤𑀺𑀦𑁆𑀦𑀥𑀸𑀢𑀼𑀬𑁄 𑀉𑀧𑀥𑀻. 𑀘𑀓𑁆𑀔𑀸𑀤𑀺𑀙𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀯 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀉𑀧𑀥𑀻. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀙𑀯𑀺𑀜𑁆𑀜𑀸𑀡𑀓𑀸𑀬𑀸𑀯 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀉𑀧𑀥𑀻. 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀤𑀼𑀓𑁆𑀔𑀫𑀦𑀝𑁆𑀞𑁂𑀦𑀸𑀢𑀺 𑀲𑀩𑁆𑀩𑀢𑁂𑀪𑀽𑀫𑀓𑀁 𑀤𑀼𑀓𑁆𑀔𑀁 𑀤𑀼𑀲𑁆𑀲𑀳𑀦𑀝𑁆𑀞𑁂𑀦 𑀉𑀧𑀥𑀺.

𑁨𑁦. 𑀏𑀯𑀁 𑀉𑀧𑀥𑀺𑀦𑀺𑀤𑀸𑀦𑀢𑁄 𑀧𑀪𑀯𑀦𑁆𑀢𑁂𑀲𑀼 𑀤𑀼𑀓𑁆𑀔𑁂𑀲𑀼 𑁋 𑀬𑁄 𑀯𑁂 𑀅𑀯𑀺𑀤𑁆𑀯𑀸𑀢𑀺 𑀕𑀸𑀣𑀸. 𑀢𑀢𑁆𑀣 𑀧𑀚𑀸𑀦𑀦𑁆𑀢𑀺 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀚𑀸𑀦𑀦𑁆𑀢𑁄. 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀓𑀸𑀭𑀡𑀁 ‘‘𑀉𑀧𑀥𑀻’’𑀢𑀺 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁨𑁧. 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘𑀸𑀢𑀺 ¶ 𑀲𑁄𑀓𑀜𑁆𑀘 𑀧𑀭𑀺𑀤𑁂𑀯𑀜𑁆𑀘. 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀬𑀣𑀸 𑀬𑀣𑀸 𑀲𑀢𑁆𑀢𑀸 𑀚𑀸𑀦𑀦𑁆𑀢𑀺, 𑀢𑀣𑀸 𑀢𑀣𑀸 𑀜𑀸𑀧𑀦𑀯𑀲𑁂𑀦 𑀯𑀺𑀤𑀺𑀢𑁄 𑀏𑀲 𑀢𑀬𑀸 𑀥𑀫𑁆𑀫𑁄𑀢𑀺.

𑀢𑀢𑁆𑀣 𑀢𑀭𑀦𑁆𑀢𑀻𑀢𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑁄𑀖𑀁 𑀢𑀭𑀦𑁆𑀢𑀺. 𑀉𑀢𑁆𑀢𑀭𑀦𑁆𑀢𑀻𑀢𑀺 𑀤𑀼𑀢𑀺𑀬𑀫𑀕𑁆𑀕𑁂𑀦 𑀓𑀸𑀫𑁄𑀖𑀁 𑀢𑀦𑀼𑀓𑀭𑀡𑀯𑀲𑁂𑀦 𑀉𑀕𑁆𑀕𑀦𑁆𑀢𑁆𑀯𑀸 𑀢𑀭𑀦𑁆𑀢𑀺. 𑀧𑀢𑀭𑀦𑁆𑀢𑀻𑀢𑀺 𑀢𑀫𑁂𑀯 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀯𑀲𑁂𑀦 𑀢𑀢𑀺𑀬𑀫𑀕𑁆𑀕𑁂𑀦 𑀯𑀺𑀲𑁂𑀲𑁂𑀦 𑀢𑀭𑀦𑁆𑀢𑀺. 𑀲𑀫𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀪𑀯𑁄𑀖𑀅𑀯𑀺𑀚𑁆𑀚𑁄𑀖𑀧𑁆𑀧𑀳𑀸𑀦𑀯𑀲𑁂𑀦 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀲𑀫𑁆𑀫𑀸 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀯𑀻𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺.

𑁨𑁨. 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀥𑀫𑁆𑀫𑀜𑁆𑀘 𑀢𑁂 𑀤𑁂𑀲𑀬𑀺𑀲𑁆𑀲𑀸𑀫𑀺. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀤𑀺𑀝𑁆𑀞𑁂𑀯 𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀯𑀸 𑀅𑀢𑁆𑀢𑀪𑀸𑀯𑁂. 𑀅𑀦𑀻𑀢𑀺𑀳𑀦𑁆𑀢𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀁. 𑀬𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑀁 𑀥𑀫𑁆𑀫𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭; 𑀣𑁂𑀭𑀕𑀸. 𑁬𑁭𑁬; 𑀓𑀣𑀸. 𑁭𑁫𑁩) 𑀦𑀬𑁂𑀦 𑀲𑀫𑁆𑀫𑀲𑀦𑁆𑀢𑁄 𑀯𑀺𑀤𑀺𑀢𑁆𑀯𑀸.

𑀢𑀢𑁆𑀣 𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺 𑀳𑀺𑀢𑁆𑀯𑀸𑀧𑀺 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀁 𑀥𑀫𑁆𑀫𑀁 𑀢𑀯 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀢𑀜𑁆𑀘 𑀔𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀓𑀺𑀢𑁆𑀢𑀬𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺. 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 ¶ . 𑀫𑀚𑁆𑀛𑁂𑀧𑀺. 𑀧𑀭𑀺𑀬𑁄𑀲𑀸𑀦𑁂𑀧𑀺 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀪𑀕𑀯𑀸 𑀏𑀓𑀕𑀸𑀣𑀫𑁆𑀧𑀺 𑀤𑁂𑀲𑁂𑀲𑀺, 𑀲𑀸 𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸 𑀥𑀫𑁆𑀫𑀲𑁆𑀲 𑀧𑀞𑀫𑀧𑀸𑀤𑁂𑀦 𑀆𑀤𑀺𑀓𑀮𑁆𑀬𑀸𑀡𑀸, 𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀸, 𑀧𑀘𑁆𑀙𑀺𑀫𑀧𑀸𑀤𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸. 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀦𑀺𑀤𑀸𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, 𑀦𑀺𑀕𑀫𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀧𑀞𑀫𑀸𑀦𑀼𑀲𑀦𑁆𑀥𑀺𑀦𑀸 𑀆𑀤𑀺𑀓𑀮𑁆𑀬𑀸𑀡𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀁.

𑀅𑀧𑀺 𑀘 𑀲𑀦𑀺𑀤𑀸𑀦𑀉𑀧𑁆𑀧𑀢𑁆𑀢𑀺𑀢𑁆𑀢𑀸 𑀆𑀤𑀺𑀓𑀮𑁆𑀬𑀸𑀡𑀁, 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀭𑀽𑀧𑀢𑁄 𑀅𑀢𑁆𑀣𑀲𑁆𑀲 𑀅𑀯𑀺𑀧𑀭𑀻𑀢𑀢𑀸𑀬 𑀘 𑀳𑁂𑀢𑀼𑀤𑀸𑀳𑀭𑀡𑀬𑀼𑀢𑁆𑀢𑀢𑁄 𑀘 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀲𑁄𑀢𑀽𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑀚𑀦𑀦𑁂𑀦 𑀦𑀺𑀕𑀫𑀦𑁂𑀦 𑀘 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁.

𑀲𑀓𑀮𑁄 𑀳𑀺 𑀲𑀸𑀲𑀦𑀥𑀫𑁆𑀫𑁄 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑁂𑀦 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀻𑀮𑀲𑀫𑀸𑀥𑀻𑀳𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 ¶ . 𑀢𑀁 𑀲𑀼𑀢𑁆𑀯𑀸 𑀢𑀣𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀸𑀬 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀸𑀯𑀓𑀩𑁄𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄.

𑀲𑀼𑀬𑁆𑀬𑀫𑀸𑀦𑁄 𑀘𑁂𑀲 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄 𑀪𑀯𑀦𑁂𑀦𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀝𑀺𑀧𑀚𑁆𑀚𑀺𑀬𑀫𑀸𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀢𑀣𑀸𑀧𑀝𑀺𑀧𑀦𑁆𑀦𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁧) 𑀘 𑀧𑀝𑀺𑀧𑀢𑁆𑀢𑀺𑀨𑀮𑁂 𑀦𑀺𑀝𑁆𑀞𑀺𑀢𑁂 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀨𑀮𑁂𑀦𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄𑀢𑀺.

𑀬𑀁 𑀧𑀦𑁂𑀲 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀧𑀓𑀸𑀲𑁂𑀢𑀺, 𑀦𑀸𑀦𑀸𑀦𑀬𑁂𑀳𑀺 𑀤𑀻𑀧𑁂𑀢𑀺. 𑀢𑀁 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀁. 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣𑀁 ¶ . 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀸𑀢𑁆𑀣𑀁. 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 ¶ 𑀲𑀩𑁆𑀬𑀜𑁆𑀚𑀦𑀁. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑁄 𑀲𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀸𑀢𑁆𑀣𑀁. 𑀲𑀤𑁆𑀥𑁂𑀬𑁆𑀬𑀢𑁄 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀩𑁆𑀬𑀜𑁆𑀚𑀦𑀁. 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀢𑁄 𑀲𑀸𑀢𑁆𑀣𑀁. 𑀉𑀢𑁆𑀢𑀸𑀦𑀧𑀤𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀉𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁. 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁.

𑀅𑀧𑀺 𑀘 𑁋 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀸𑀢𑁆𑀣𑀁. 𑀧𑀭𑀺𑀬𑀢𑁆𑀢𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀬𑀼𑀢𑁆𑀢𑀢𑁄 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑁄 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑁄 𑀘 𑀧𑀭𑀺𑀲𑀼𑀤𑁆𑀥𑀁. 𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀪𑀽𑀢𑁂𑀳𑀺 𑀲𑁂𑀝𑁆𑀞𑁂𑀳𑀺 𑀘𑀭𑀺𑀢𑀩𑁆𑀩𑀢𑁄, 𑀢𑁂𑀲𑀜𑁆𑀘 𑀘𑀭𑀺𑀬𑀪𑀸𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧).

𑀏𑀯𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺 𑀆𑀳. 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀤𑀲𑁆𑀲𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸’’𑀢𑀺 𑀆𑀳. 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀜𑁆𑀘 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺.

𑀤𑀼𑀓𑁆𑀔𑁂 𑀤𑀺𑀝𑁆𑀞𑁂𑀢𑀺 𑀤𑀼𑀓𑁆𑀔𑀲𑀘𑁆𑀘𑁂 𑀲𑀭𑀲𑀮𑀓𑁆𑀔𑀡𑁂𑀦 𑀤𑀺𑀝𑁆𑀞𑁂 𑀤𑀼𑀓𑁆𑀔𑀲𑀘𑁆𑀘𑀁 𑀧𑀓𑀸𑀲𑁂𑀲𑁆𑀲𑀸𑀫𑀺. 𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁩. 𑀢𑀜𑁆𑀘𑀸𑀳𑀁 ¶ 𑀅𑀪𑀺𑀦𑀦𑁆𑀤𑀸𑀫𑀻𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀥𑀫𑁆𑀫𑀚𑁄𑀢𑀓𑀁 𑀢𑀯 𑀯𑀘𑀦𑀁 𑀅𑀳𑀁 𑀧𑀢𑁆𑀣𑀬𑀸𑀫𑀺. 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺 𑀢𑀜𑁆𑀘 𑀥𑀫𑁆𑀫𑀫𑀼𑀢𑁆𑀢𑀫𑀁 𑀅𑀪𑀺𑀦𑀦𑁆𑀤𑀸𑀫𑀺.

𑀢𑀢𑁆𑀣 𑀫𑀳𑀢𑁄 𑀢𑀫𑁄𑀓𑀸𑀬𑀲𑁆𑀲 𑀧𑀤𑀸𑀮𑀦𑀦𑁆𑀢𑀺 𑀫𑀳𑀢𑁄 𑀅𑀯𑀺𑀚𑁆𑀚𑀸𑀭𑀸𑀲𑀺𑀲𑁆𑀲 𑀙𑁂𑀤𑀦𑀁. 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀲𑁂𑀦 𑀏𑀲𑀻. 𑀤𑀼𑀓𑁆𑀔𑀮𑀓𑁆𑀔𑀡𑀯𑀲𑁂𑀦 𑀕𑀯𑁂𑀲𑀻. 𑀅𑀦𑀢𑁆𑀢𑀮𑀓𑁆𑀔𑀡𑀯𑀲𑁂𑀦 𑀲𑀫𑀦𑁆𑀢𑀢𑁄 𑀧𑀭𑀺𑀬𑁂𑀲𑀻. 𑀫𑀳𑀢𑁄 𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀪𑁂𑀤𑀦𑀦𑁆𑀢𑀺 𑀫𑀳𑀦𑁆𑀢𑀲𑁆𑀲 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺𑀆𑀤𑀺𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀪𑁂𑀤𑀦𑀁. 𑀫𑀳𑀢𑁄 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀅𑀩𑁆𑀩𑀳𑀦𑀦𑁆𑀢𑀺 𑀫𑀳𑀦𑁆𑀢𑀲𑁆𑀲 𑀅𑀦𑁆𑀢𑁄𑀢𑀼𑀤𑀦𑀝𑁆𑀞𑁂𑀦 𑀢𑀡𑁆𑀳𑀸𑀓𑀡𑁆𑀝𑀓𑀲𑁆𑀲 𑀮𑀼𑀜𑁆𑀘𑀦𑀁. 𑀤𑀺𑀝𑁆𑀞𑀺𑀲𑀗𑁆𑀖𑀸𑀝𑀲𑁆𑀲 𑀯𑀺𑀦𑀺𑀯𑁂𑀞𑀦𑀦𑁆𑀢𑀺 𑀤𑀺𑀝𑁆𑀞𑀺𑀬𑁂𑀯 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀢𑁄 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑁄, 𑀢𑀲𑁆𑀲 𑀤𑀺𑀝𑁆𑀞𑀺𑀲𑀗𑁆𑀖𑀸𑀝𑀲𑁆𑀲 𑀦𑀺𑀯𑀢𑁆𑀢𑀦𑀁. 𑀫𑀸𑀦𑀥𑀚𑀲𑁆𑀲 𑀧𑀸𑀢𑀦𑀦𑁆𑀢𑀺 𑀉𑀲𑁆𑀲𑀺𑀢𑀝𑁆𑀞𑁂𑀦 𑀉𑀦𑁆𑀦𑀢𑀺𑀮𑀓𑁆𑀔𑀡𑀲𑁆𑀲 𑀫𑀸𑀦𑀤𑁆𑀥𑀚𑀲𑁆𑀲 𑀧𑀸𑀢𑀦𑀁. 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀽𑀧𑀲𑀫𑀦𑁆𑀢𑀺 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀲𑁆𑀲 ¶ 𑀉𑀧𑀲𑀫𑀦𑀁. 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀦𑁆𑀢𑀺 𑀯𑀝𑁆𑀝𑁂 𑀑𑀲𑀻𑀤𑀸𑀧𑀦𑀲𑁆𑀲 𑀓𑀸𑀫𑁄𑀖𑀸𑀤𑀺𑀑𑀖𑀲𑁆𑀲 ¶ 𑀦𑀺𑀢𑁆𑀣𑀭𑀡𑀁 𑀦𑀺𑀓𑁆𑀔𑀫𑀦𑀁. 𑀪𑀸𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀭𑀽𑀧𑀸𑀤𑀺𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀭𑀲𑁆𑀲 𑀔𑀺𑀧𑀦𑀁 𑀙𑀟𑁆𑀟𑀦𑀁. 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑀦𑁆𑀢𑀺 𑀔𑀦𑁆𑀥𑀸𑀤𑀺𑀧𑀝𑀺𑀧𑀸𑀝𑀺𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀳𑁂𑀢𑀼𑀦𑀲𑁆𑀲𑀦𑁂𑀦 𑀉𑀘𑁆𑀙𑀺𑀚𑁆𑀚𑀦𑀁. 𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀸𑀧𑀦𑀦𑁆𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀼𑀢𑀺𑀁. 𑀧𑀭𑀺𑀴𑀸𑀳𑀲𑁆𑀲 𑀧𑀝𑀺𑀧𑀲𑁆𑀲𑀤𑁆𑀥𑀦𑁆𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀲𑁆𑀲 𑀯𑀽𑀧𑀲𑀫𑀁 𑀧𑀝𑀺𑀧𑀲𑁆𑀲𑀫𑁆𑀪𑀦𑀁. 𑀥𑀫𑁆𑀫𑀥𑀚𑀲𑁆𑀲 𑀉𑀲𑁆𑀲𑀸𑀧𑀦𑀦𑁆𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀦𑀁. 𑀧𑀭𑀫𑀢𑁆𑀣𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀉𑀢𑁆𑀢𑀫𑀝𑁆𑀞𑁂𑀦 𑀧𑀭𑀫𑀢𑁆𑀣𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀫𑀭𑀡𑀲𑀗𑁆𑀔𑀸𑀢𑀁 𑀫𑀢𑀦𑁆𑀢𑀺 𑀅𑀫𑀢𑀁. 𑀓𑀺𑀮𑁂𑀲𑀯𑀺𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀕𑀤𑀦𑁆𑀢𑀺𑀧𑀺 𑀅𑀫𑀢𑀁. 𑀲𑀁𑀲𑀸𑀭𑀤𑀼𑀓𑁆𑀔𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀦𑀢𑁆𑀣𑁂𑀢𑁆𑀣 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀯𑀸𑀦𑀦𑁆𑀢𑀺𑀧𑀺 𑀦𑀺𑀩𑁆𑀩𑀸𑀦𑀁.

𑀫𑀳𑁂𑀲𑀓𑁆𑀔𑁂𑀳𑀺 𑀲𑀢𑁆𑀢𑁂𑀳𑀻𑀢𑀺 𑀫𑀳𑀸𑀦𑀼𑀪𑀸𑀯𑁂𑀳𑀺 𑀲𑀓𑁆𑀓𑀸𑀤𑀻𑀳𑀺 𑀲𑀢𑁆𑀢𑁂𑀳𑀺. 𑀧𑀭𑀺𑀬𑁂𑀲𑀺𑀢𑁄𑀢𑀺 𑀧𑀭𑀺𑀬𑀺𑀝𑁆𑀞𑁄. 𑀓𑀳𑀁 𑀤𑁂𑀯𑀤𑁂𑀯𑁄𑀢𑀺 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀓𑀼𑀳𑀺𑀁. 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑁄.

𑁨𑁪. 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀏𑀢𑁆𑀣 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀤𑁆𑀥𑀸 𑀯𑀼𑀘𑁆𑀘𑀢𑀺. 𑀅𑀥𑁄𑀢𑀺 𑀅𑀢𑀻𑀢𑀤𑁆𑀥𑀸. 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀸. 𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁂𑀲𑀼 𑀉𑀤𑁆𑀥𑀸𑀤𑀻𑀲𑀼 𑀢𑀡𑁆𑀳𑀜𑁆𑀘 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀜𑁆𑀘 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀜𑁆𑀘 𑀧𑀦𑀼𑀤𑁂𑀳𑀺. 𑀧𑀦𑀼𑀤𑀺𑀢𑁆𑀯𑀸 𑀘 𑀪𑀯𑁂 𑀦 𑀢𑀺𑀝𑁆𑀞𑁂𑀢𑀺 𑀏𑀯𑀁 𑀲𑀦𑁆𑀢𑁂 𑀤𑀼𑀯𑀺𑀥𑁂𑀧𑀺 𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬. 𑀏𑀯𑀁 𑀢𑀸𑀯 𑀧𑀦𑀼𑀚𑁆𑀚𑀲𑀤𑁆𑀤𑀲𑁆𑀲 𑀧𑀦𑀼𑀤𑁂𑀳𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀫𑁆𑀩𑀦𑁆𑀥𑁄. 𑀧𑀦𑀼𑀤𑀺𑀢𑁆𑀯𑀸𑀢𑀺 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀪𑀯𑁂 𑀦 𑀢𑀺𑀝𑁆𑀞𑁂𑀢𑀺 𑀅𑀬𑀫𑁂𑀯 𑀲𑀫𑁆𑀩𑀦𑁆𑀥𑁄. 𑀏𑀢𑀸𑀦𑀺 𑀦𑀦𑁆𑀤𑀻𑀦𑀺𑀯𑁂𑀲𑀦𑀯𑀺𑀜𑁆𑀜𑀸𑀡𑀸𑀦𑀺 𑀧𑀦𑀼𑀤𑀺𑀢𑁆𑀯𑀸 𑀤𑀼𑀯𑀺𑀥𑁂𑀧𑀺 𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺.

𑀲𑀳𑁄𑀓𑀸𑀲𑀯𑀲𑁂𑀦 𑀤𑁂𑀯𑀮𑁄𑀓𑁄 𑀉𑀤𑁆𑀥𑀁. 𑀅𑀧𑀸𑀬𑀮𑁄𑀓𑁄 𑀅𑀥𑁄. 𑀫𑀦𑀼𑀲𑁆𑀲𑀮𑁄𑀓𑁄 𑀫𑀚𑁆𑀛𑁂. 𑀢𑀢𑁆𑀣 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀅𑀧𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀭𑀺 𑀧𑀝𑀺𑀲𑀦𑁆𑀥𑀺𑀤𑀸𑀦𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀓𑀼𑀲𑀮𑀸 ¶ 𑀥𑀫𑁆𑀫𑀸 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺𑀤𑀸𑀦𑀢𑁄 𑀅𑀥𑁄𑀢𑀺. 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑁄𑀧𑀭𑀺𑀯𑀲𑁂𑀦 𑀅𑀭𑀽𑀧𑀥𑀸𑀢𑀼 𑀉𑀤𑁆𑀥𑀁. 𑀲𑀩𑁆𑀩𑀅𑀥𑁄𑀯𑀲𑁂𑀦 𑀓𑀸𑀫𑀥𑀸𑀢𑀼 𑀅𑀥𑁄. 𑀢𑀤𑀼𑀪𑀬𑀦𑁆𑀢𑀭𑀯𑀲𑁂𑀦 𑀭𑀽𑀧𑀥𑀸𑀢𑀼 𑀫𑀚𑁆𑀛𑁂. 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀔𑀦𑀦𑀯𑀲𑁂𑀦 𑀲𑀼𑀔𑀸 𑀯𑁂𑀤𑀦𑀸 𑀉𑀤𑁆𑀥𑀁 ¶ . 𑀤𑀼𑀓𑁆𑀔𑀫𑀦𑀯𑀲𑁂𑀦 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀥𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀫𑀚𑁆𑀛𑁂. 𑀅𑀢𑁆𑀢𑀪𑀸𑀯𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑁆𑀥𑀁 𑀧𑀸𑀤𑀢𑀮𑀸𑀢𑀺 𑀧𑀸𑀤𑀢𑀮𑀢𑁄 𑀉𑀧𑀭𑀺. 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸𑀢𑀺 𑀓𑁂𑀲𑀫𑀢𑁆𑀣𑀓𑀢𑁄 𑀅𑀥𑁄. 𑀫𑀚𑁆𑀛𑁂𑀢𑀺 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀁.

𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 ¶ 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑁂𑀭𑀲𑀯𑀺𑀥𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀫𑁆𑀧𑀬𑀼𑀢𑁆𑀢𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀤𑁆𑀯𑀸𑀤𑀲𑀯𑀺𑀥𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀫𑁆𑀧𑀬𑀼𑀢𑁆𑀢𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀦𑀼𑀚𑁆𑀚𑀸𑀢𑀺 𑀔𑀺𑀧. 𑀧𑀦𑀼𑀚𑁆𑀚𑀸𑀢𑀺 𑀅𑀢𑀻𑀯 𑀔𑀺𑀧. 𑀦𑀼𑀤𑀸𑀢𑀺 𑀮𑀼𑀜𑁆𑀘. 𑀧𑀦𑀼𑀤𑀸𑀢𑀺 𑀅𑀢𑀻𑀯 𑀮𑀼𑀜𑁆𑀘. 𑀧𑀚𑀳𑀸𑀢𑀺 𑀙𑀟𑁆𑀟𑁂𑀳𑀺. 𑀯𑀺𑀦𑁄𑀤𑁂𑀳𑀻𑀢𑀺 𑀤𑀽𑀭𑀁 𑀓𑀭𑁄𑀳𑀺.

𑀓𑀫𑁆𑀫𑀪𑀯𑀜𑁆𑀘𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀘𑁂𑀢𑀦𑀸𑀯. 𑀧𑀝𑀺𑀲𑀦𑁆𑀥𑀺𑀓𑀜𑁆𑀘 𑀧𑀼𑀦𑀩𑁆𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀭𑀽𑀧𑀸𑀤𑀺𑀧𑀼𑀦𑀩𑁆𑀪𑀯𑀜𑁆𑀘. 𑀧𑀚𑀳𑀦𑁆𑀢𑁄 𑀧𑀞𑀫𑀫𑀕𑁆𑀕𑁂𑀦, 𑀯𑀺𑀦𑁄𑀤𑁂𑀦𑁆𑀢𑁄 𑀤𑀼𑀢𑀺𑀬𑀫𑀕𑁆𑀕𑁂𑀦, 𑀩𑁆𑀬𑀦𑁆𑀢𑀻 𑀓𑀭𑁄𑀦𑁆𑀢𑁄 𑀢𑀢𑀺𑀬𑀫𑀕𑁆𑀕𑁂𑀦, 𑀅𑀦𑀪𑀸𑀯𑀁 𑀕𑀫𑁂𑀦𑁆𑀢𑁄 𑀘𑀢𑀼𑀢𑁆𑀣𑀫𑀕𑁆𑀕𑁂𑀦. 𑀓𑀫𑁆𑀫𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑁂 𑀦 𑀢𑀺𑀝𑁆𑀞𑁂𑀬𑁆𑀬.

𑁨𑁫. 𑀏𑀢𑀸𑀦𑀺 𑀯𑀺𑀦𑁄𑀤𑁂𑀢𑁆𑀯𑀸 𑀪𑀯𑁂 𑀅𑀢𑀺𑀝𑁆𑀞𑀦𑁆𑀢𑁄 𑀏𑀲𑁄 𑁋 𑀏𑀯𑀁 𑀯𑀺𑀳𑀸𑀭𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀯𑀸 𑀅𑀢𑁆𑀢𑀪𑀸𑀯𑁂. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀯.

𑁨𑁬. 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀦𑁆𑀢𑀺 𑀏𑀢𑁆𑀣 𑀅𑀦𑀽𑀧𑀥𑀻𑀓𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳 𑁋 ‘‘𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓’’𑀦𑁆𑀢𑀺.

𑀦𑀺𑀤𑁆𑀤𑁂𑀲𑁂 𑀓𑀺𑀮𑁂𑀲𑀸 𑀘𑀸𑀢𑀺 𑀉𑀧𑀢𑀸𑀧𑀦𑀝𑁆𑀞𑁂𑀦 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀘 𑀭𑀸𑀲𑀝𑁆𑀞𑁂𑀦 𑀯𑀺𑀧𑀸𑀓𑀪𑀽𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘 𑀓𑀼𑀲𑀮𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸 𑀘𑁂𑀢𑀦𑀸 𑀘 ‘‘𑀉𑀧𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀣𑀻𑀬𑀦𑁆𑀢𑀺. 𑀉𑀧𑀥𑀺𑀧𑁆𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦, 𑀉𑀧𑀥𑀺𑀯𑀽𑀧𑀲𑀫𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦, 𑀉𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀉𑀧𑀥𑀺𑀧𑀝𑀺𑀧𑀲𑁆𑀲𑀤𑁆𑀥𑀁 𑀨𑀮𑁂𑀦𑀸𑀢𑀺.

𑁨𑁭. 𑀦 𑀓𑁂𑀯𑀮𑀁 𑀤𑀼𑀓𑁆𑀔𑀫𑁂𑀯 𑀧𑀳𑀸𑀲𑀺 𑁋 𑀢𑁂 𑀘𑀸𑀧𑀻𑀢𑀺 𑀕𑀸𑀣𑀸. 𑀢𑀢𑁆𑀣 𑀅𑀝𑁆𑀞𑀺𑀢𑀦𑁆𑀢𑀺 𑀲𑀓𑁆𑀓𑀘𑁆𑀘𑀁, 𑀲𑀤𑀸 ¶ 𑀯𑀸. 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 ¶ 𑀢𑀁 𑀦𑀫𑀲𑁆𑀲𑀸𑀫𑀺. 𑀲𑀫𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀦𑀸𑀕𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳.

𑀦𑀺𑀤𑁆𑀤𑁂𑀲𑁂 𑀲𑀫𑁂𑀘𑁆𑀘𑀸𑀢𑀺 𑀚𑀸𑀦𑀺𑀢𑁆𑀯𑀸, 𑀏𑀓𑀢𑁄 𑀳𑀼𑀢𑁆𑀯𑀸 𑀯𑀸. 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀲𑀫𑁆𑀫𑀼𑀔𑀸 𑀳𑀼𑀢𑁆𑀯𑀸. 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸. 𑀲𑀫𑁆𑀫𑀼𑀔𑀸𑀢𑀺 𑀲𑀫𑁆𑀫𑀼𑀔𑁂. 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀧𑀸𑀧𑀁 𑀦 𑀓𑀭𑁄𑀢𑀺.

𑁨𑁮. 𑀇𑀤𑀸𑀦𑀺 𑀦𑀁 𑀪𑀕𑀯𑀸 ‘‘𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀁 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀯𑀺𑀤𑀺𑀢𑁄𑀧𑀺 𑀅𑀢𑁆𑀢𑀸𑀦𑀁 𑀅𑀦𑀼𑀧𑀦𑁂𑀢𑁆𑀯𑀸𑀯 𑀧𑀳𑀻𑀦𑀤𑀼𑀓𑁆𑀔𑁂𑀦 𑀧𑀼𑀕𑁆𑀕𑀮𑁂𑀦 𑀑𑀯𑀤𑀦𑁆𑀢𑁄 ¶ ‘‘𑀬𑀁 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀢𑀁 𑀅𑀪𑀺𑀚𑀸𑀦𑀦𑁆𑀢𑁄 ‘‘𑀅𑀬𑀁 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀯𑁂𑀤𑁂𑀳𑀺 𑀕𑀢𑀢𑁆𑀢𑀸 𑀯𑁂𑀤𑀕𑀽, 𑀓𑀺𑀜𑁆𑀘𑀦𑀸𑀪𑀸𑀯𑀸 𑀅𑀓𑀺𑀜𑁆𑀘𑀦𑁄, 𑀓𑀸𑀫𑁂𑀲𑀼 𑀘 𑀪𑀯𑁂𑀲𑀼 𑀘 𑀅𑀲𑀢𑁆𑀢𑀢𑁆𑀢𑀸 𑀓𑀸𑀫𑀪𑀯𑁂 𑀅𑀲𑀢𑁆𑀢𑁄’’𑀢𑀺 𑀚𑀜𑁆𑀜𑀸 𑀚𑀸𑀦𑁂𑀬𑁆𑀬𑀸𑀲𑀺. 𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀺, 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄.

𑀦𑀺𑀤𑁆𑀤𑁂𑀲𑁂 𑀭𑀸𑀕𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀧𑀮𑀺𑀩𑁄𑀥𑀁. 𑀤𑁄𑀲𑀓𑀺𑀜𑁆𑀘𑀦𑀦𑁆𑀢𑀺𑀆𑀤𑀺𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦. 𑀪𑀯𑁄𑀖𑀁 𑀢𑀺𑀡𑁆𑀡𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑁆𑀧𑀪𑁂𑀤𑁂𑀦𑀸𑀢𑀺. 𑀉𑀢𑁆𑀢𑀺𑀡𑁆𑀡𑁄 𑀧𑀞𑀫𑀫𑀕𑁆𑀕𑁂𑀦. 𑀦𑀺𑀢𑁆𑀢𑀺𑀡𑁆𑀡𑁄 𑀤𑀼𑀢𑀺𑀬𑀫𑀕𑁆𑀕𑁂𑀦. 𑀅𑀢𑀺𑀓𑁆𑀓𑀦𑁆𑀢𑁄 𑀢𑀢𑀺𑀬𑀫𑀕𑁆𑀕𑁂𑀦. 𑀲𑀫𑀢𑀺𑀓𑁆𑀓𑀦𑁆𑀢𑁄 𑀘𑀢𑀼𑀢𑁆𑀣𑀫𑀕𑁆𑀕𑁂𑀦.𑀯𑀻𑀢𑀺𑀯𑀢𑁆𑀢𑁄 𑀨𑀮𑁂𑀦.

𑁨𑁯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀯𑀺𑀤𑁆𑀯𑀸 𑀘 𑀬𑁄𑀢𑀺 𑀕𑀸𑀣𑀸. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀅𑀢𑁆𑀢𑀪𑀸𑀯𑁂 𑀯𑀸. 𑀯𑀺𑀲𑀚𑁆𑀚𑀸𑀢𑀺 𑀯𑁄𑀲𑀚𑁆𑀚𑀺𑀢𑁆𑀯𑀸.

𑀦𑀺𑀤𑁆𑀤𑁂𑀲𑁂 𑀲𑀚𑁆𑀚𑀦𑁆𑀢𑀺 𑀫𑀼𑀜𑁆𑀘𑀦𑀁. 𑀯𑀺𑀲𑀚𑁆𑀚𑀦𑁆𑀢𑀺 𑀯𑁄𑀲𑀚𑁆𑀚𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯. 𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀫𑁂𑀢𑁆𑀢𑀕𑀽𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀥𑁄𑀢𑀓𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦. 𑀧𑀜𑁆𑀘𑀫𑁂 ¶ ¶ 𑀥𑁄𑀢𑀓𑀲𑀼𑀢𑁆𑀢𑁂 𑁋 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀻𑀢𑀺 𑀯𑀸𑀘𑀁 𑀅𑀪𑀺𑀓𑀗𑁆𑀔𑀸𑀫𑀺. 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀭𑀸𑀕𑀸𑀤𑀻𑀦𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀅𑀥𑀺𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑁂𑀬𑁆𑀬. 𑀦𑀺𑀤𑁆𑀤𑁂𑀲𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑁩𑁧.

𑀇𑀢𑁄𑀢𑀺 𑀫𑀫 𑀫𑀼𑀔𑀢𑁄.

𑀦𑀺𑀤𑁆𑀤𑁂𑀲𑁂 𑀆𑀢𑀧𑁆𑀧𑀦𑁆𑀢𑀺 𑀓𑀺𑀮𑁂𑀲𑀢𑀸𑀧𑀦𑀁. 𑀉𑀲𑁆𑀲𑀸𑀳𑀦𑁆𑀢𑀺 𑀅𑀲𑀗𑁆𑀓𑁄𑀘𑀁. 𑀉𑀲𑁆𑀲𑁄𑀴𑁆𑀳𑀻𑀦𑁆𑀢𑀺 𑀩𑀮𑀯𑀯𑀻𑀭𑀺𑀬𑀁. 𑀣𑀸𑀫𑀦𑁆𑀢𑀺 𑀅𑀲𑀺𑀣𑀺𑀮𑀁. 𑀥𑀺𑀢𑀺𑀦𑁆𑀢𑀺 𑀥𑀸𑀭𑀡𑀁. 𑀯𑀻𑀭𑀺𑀬𑀁 𑀓𑀭𑁄𑀳𑀻𑀢𑀺 𑀧𑀭𑀓𑁆𑀓𑀫𑀁 𑀓𑀭𑁄𑀳𑀺. 𑀙𑀦𑁆𑀤𑀁 𑀚𑀦𑁂𑀳𑀻𑀢𑀺 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀳𑀺.

𑁩𑁨. 𑀏𑀯𑀁 ¶ 𑀯𑀼𑀢𑁆𑀢𑁂 𑀅𑀢𑁆𑀢𑀫𑀦𑁄 𑀥𑁄𑀢𑀓𑁄 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀫𑀸𑀦𑁄 𑀓𑀣𑀁𑀓𑀣𑀸𑀧𑀫𑁄𑀓𑁆𑀔𑀁 𑀬𑀸𑀘𑀦𑁆𑀢𑁄 ‘‘𑀧𑀲𑁆𑀲𑀸𑀫𑀳’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀧𑀲𑁆𑀲𑀸𑀫𑀺 𑀅𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂. 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀢𑀁 𑀦𑀫𑀲𑁆𑀲𑀸𑀫𑀺. 𑀧𑀫𑀼𑀜𑁆𑀘𑀸𑀢𑀺 𑀧𑀫𑁄𑀘𑁂𑀳𑀺.

𑀦𑀺𑀤𑁆𑀤𑁂𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀢𑀺 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀧𑀸𑀝𑀺𑀬𑁂𑀓𑁆𑀓𑀁 𑀘𑀢𑀼𑀲𑀘𑁆𑀘𑀁 𑀲𑀬𑀫𑁂𑀯 𑀩𑀼𑀤𑁆𑀥𑀸 𑀧𑀝𑀺𑀯𑁂𑀥𑀧𑁆𑀧𑀢𑁆𑀢𑀸𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀲𑀻𑀳𑀲𑀻𑀳𑁄𑀢𑀺 𑀅𑀙𑀫𑁆𑀪𑀺𑀢𑀝𑁆𑀞𑁂𑀦 𑀲𑀻𑀳𑀸𑀦𑀁 𑀅𑀢𑀺𑀲𑀻𑀳𑁄. 𑀦𑀸𑀕𑀦𑀸𑀕𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑀝𑁆𑀞𑁂𑀦, 𑀫𑀳𑀦𑁆𑀢𑀝𑁆𑀞𑁂𑀦 𑀯𑀸 𑀦𑀸𑀕𑀸𑀦𑀁 𑀅𑀢𑀺𑀦𑀸𑀕𑁄. 𑀕𑀡𑀺𑀕𑀡𑀻𑀢𑀺 𑀕𑀡𑀯𑀦𑁆𑀢𑀸𑀦𑀁 𑀅𑀢𑀻𑀯 𑀕𑀡𑀯𑀸. 𑀫𑀼𑀦𑀺𑀫𑀼𑀦𑀻𑀢𑀺 𑀜𑀸𑀡𑀯𑀦𑁆𑀢𑀸𑀦𑀁 𑀅𑀢𑀻𑀯 𑀜𑀸𑀡𑀯𑀸. 𑀭𑀸𑀚𑀭𑀸𑀚𑀸𑀢𑀺 𑀉𑀢𑁆𑀢𑀫𑀭𑀸𑀚𑀸. 𑀫𑀼𑀜𑁆𑀘 𑀫𑀦𑁆𑀢𑀺 𑀫𑁄𑀘𑁂𑀳𑀺 𑀫𑀁. 𑀧𑀫𑀼𑀜𑁆𑀘 𑀫𑀦𑁆𑀢𑀺 𑀦𑀸𑀦𑀸𑀯𑀺𑀥𑁂𑀦 𑀫𑀼𑀜𑁆𑀘𑁂𑀳𑀺 𑀫𑀁. 𑀫𑁄𑀘𑁂𑀳𑀺 𑀫𑀦𑁆𑀢𑀺 𑀲𑀺𑀣𑀺𑀮𑀁 𑀓𑀭𑁄𑀳𑀺 𑀫𑀁. 𑀧𑀫𑁄𑀘𑁂𑀳𑀺 𑀫𑀦𑁆𑀢𑀺 𑀅𑀢𑀻𑀯 𑀲𑀺𑀣𑀺𑀮𑀁 𑀓𑀭𑁄𑀳𑀺 𑀫𑀁. 𑀉𑀤𑁆𑀥𑀭 𑀫𑀦𑁆𑀢𑀺 𑀫𑀁 𑀲𑀁𑀲𑀸𑀭𑀧𑀗𑁆𑀓𑀸 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀳𑀺. 𑀲𑀫𑀼𑀤𑁆𑀥𑀭 𑀫𑀦𑁆𑀢𑀺 𑀲𑀫𑁆𑀫𑀸 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀳𑀺 𑀫𑀁. 𑀯𑀼𑀝𑁆𑀞𑀸𑀧𑁂𑀳𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀮𑁆𑀮𑀢𑁄 𑀅𑀧𑀦𑁂𑀢𑁆𑀯𑀸 𑀯𑀺𑀲𑀼𑀁 𑀓𑀭𑀡𑀯𑀲𑁂𑀦 𑀉𑀝𑁆𑀞𑀸𑀧𑁂𑀳𑀺.

𑁩𑁩. 𑀅𑀣𑀲𑁆𑀲 𑀪𑀕𑀯𑀸 𑀅𑀢𑁆𑀢𑀸𑀥𑀻𑀦𑀫𑁂𑀯 𑀓𑀣𑀁𑀓𑀣𑀸𑀧𑀫𑁄𑀓𑁆𑀔𑀁 𑀑𑀖𑀢𑀭𑀡𑀫𑀼𑀔𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀳’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 ¶ 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀦 𑀲𑀳𑀺𑀲𑁆𑀲𑀸𑀫𑀺 𑀦 𑀲𑀓𑁆𑀓𑁄𑀫𑀺. 𑀦 𑀯𑀸𑀬𑀫𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀫𑁄𑀘𑀦𑀸𑀬𑀸𑀢𑀺 𑀧𑀫𑁄𑀘𑁂𑀢𑀼𑀁. 𑀓𑀣𑀁𑀓𑀣𑀺𑀦𑁆𑀢𑀺 𑀲𑀓𑀗𑁆𑀔𑀁. 𑀢𑀭𑁂𑀲𑀻𑀢𑀺 𑀢𑀭𑁂𑀬𑁆𑀬𑀸𑀲𑀺.

𑀦𑀺𑀤𑁆𑀤𑁂𑀲𑁂 ¶ 𑀦 𑀈𑀳𑀸𑀫𑀻𑀢𑀺 𑀧𑀬𑁄𑀕𑀁 𑀦 𑀓𑀭𑁄𑀫𑀺. 𑀦 𑀲𑀫𑀻𑀳𑀸𑀫𑀻𑀢𑀺 𑀅𑀢𑀻𑀯 𑀧𑀬𑁄𑀕𑀁 𑀦 𑀓𑀭𑁄𑀫𑀺. 𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂𑀢𑀺 𑀭𑀢𑀦𑀢𑁆𑀢𑀬𑁂 𑀲𑀤𑁆𑀥𑀸𑀯𑀺𑀭𑀳𑀺𑀢𑁂 𑀧𑀼𑀕𑁆𑀕𑀮𑁂. 𑀅𑀘𑁆𑀙𑀦𑁆𑀤𑀺𑀓𑁂𑀢𑀺 𑀫𑀕𑁆𑀕𑀨𑀮𑀢𑁆𑀣𑀁 𑀭𑀼𑀘𑀺𑀯𑀺𑀭𑀳𑀺𑀢𑁂. 𑀓𑀼𑀲𑀻𑀢𑁂𑀢𑀺 𑀲𑀫𑀸𑀥𑀺𑀯𑀺𑀭𑀳𑀺𑀢𑁂. 𑀳𑀻𑀦𑀯𑀻𑀭𑀺𑀬𑁂𑀢𑀺 𑀦𑀺𑀩𑁆𑀩𑀻𑀭𑀺𑀬𑁂. 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁂𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀦 𑀧𑀝𑀺𑀧𑀚𑁆𑀚𑀫𑀸𑀦𑁂.

𑁩𑁪. 𑀏𑀯𑀁 𑀯𑀼𑀢𑁆𑀢𑁂 𑀅𑀢𑁆𑀢𑀫𑀦𑀢𑀭𑁄 𑀥𑁄𑀢𑀓𑁄 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀫𑀸𑀦𑁄 𑀅𑀦𑀼𑀲𑀸𑀲𑀦𑀺𑀁 𑀬𑀸𑀘𑀦𑁆𑀢𑁄 ‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀩𑁆𑀭𑀳𑁆𑀫𑁂𑀢𑀺 𑀲𑁂𑀝𑁆𑀞𑀯𑀘𑀦𑀫𑁂𑀢𑀁. 𑀢𑁂𑀦 𑀪𑀕𑀯𑀦𑁆𑀢𑀁 𑀆𑀫𑀦𑁆𑀢𑀬𑀫𑀸𑀦𑁄 𑀆𑀳 ‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂’’𑀢𑀺. 𑀯𑀺𑀯𑁂𑀓𑀥𑀫𑁆𑀫𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀯𑁂𑀓𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁. 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀦𑀸𑀧𑀚𑁆𑀚𑀫𑀸𑀦𑁄. 𑀇𑀥𑁂𑀯 𑀲𑀦𑁆𑀢𑁄𑀢𑀺 𑀇𑀥𑁂𑀯 𑀲𑀫𑀸𑀦𑁄. 𑀅𑀲𑀺𑀢𑁄𑀢𑀺 𑀅𑀦𑀺𑀲𑁆𑀲𑀺𑀢𑁄.

𑁩𑁫-𑁭. 𑀇𑀢𑁄 ¶ 𑀧𑀭𑀸 𑀤𑁆𑀯𑁂 𑀕𑀸𑀣𑀸 𑀫𑁂𑀢𑁆𑀢𑀕𑀽𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀸 𑀏𑀯. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀥𑀫𑁆𑀫𑀁, 𑀇𑀥 𑀲𑀦𑁆𑀢𑀺𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀢𑀢𑀺𑀬𑀕𑀸𑀣𑀸𑀬𑀧𑀺 𑀧𑀼𑀩𑁆𑀩𑀟𑁆𑀠𑀁 𑀢𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀧𑀭𑀟𑁆𑀠𑁂 𑀲𑀗𑁆𑀕𑁄𑀢𑀺 𑀲𑀚𑁆𑀚𑀦𑀝𑁆𑀞𑀸𑀦𑀁, 𑀮𑀕𑁆𑀕𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀥𑁄𑀢𑀓𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀉𑀧𑀲𑀻𑀯𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁮. 𑀙𑀝𑁆𑀞𑁂 ¶ 𑀉𑀧𑀲𑀻𑀯𑀲𑀼𑀢𑁆𑀢𑁂 𑁋 𑀫𑀳𑀦𑁆𑀢𑀫𑁄𑀖𑀦𑁆𑀢𑀺 𑀫𑀳𑀦𑁆𑀢𑀁 𑀑𑀖𑀁. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀧𑀼𑀕𑁆𑀕𑀮𑀁 𑀯𑀸 𑀥𑀫𑁆𑀫𑀁 𑀯𑀸 𑀅𑀦𑀮𑁆𑀮𑀻𑀦𑁄. 𑀦𑁄 𑀯𑀺𑀲𑀳𑀸𑀫𑀻𑀢𑀺 𑀦 𑀲𑀓𑁆𑀓𑁄𑀫𑀺. 𑀆𑀭𑀫𑁆𑀫𑀡𑀦𑁆𑀢𑀺 𑀦𑀺𑀲𑁆𑀲𑀬𑀁. 𑀬𑀁 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀥𑀫𑁆𑀫𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀲𑁆𑀲𑀺𑀢𑁄.

𑀦𑀺𑀤𑁆𑀤𑁂𑀲𑁂 𑀓𑀸𑀫𑁄𑀖𑀦𑁆𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑀸𑀫𑁄𑀖𑀁. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀯𑁄𑀖𑀁. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑁄𑀖𑀁. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀮𑀫𑁆𑀩𑀡𑀦𑁆𑀢𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀞𑀸𑀦𑀁. 𑀦𑀺𑀲𑁆𑀲𑀬𑀦𑁆𑀢𑀺 𑀅𑀮𑁆𑀮𑀻𑀬𑀦𑀁. 𑀉𑀧𑀦𑀺𑀲𑁆𑀲𑀬𑀦𑁆𑀢𑀺 𑀅𑀧𑀲𑁆𑀲𑀬𑀦𑀁.

𑁩𑁯. 𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀻 𑀢𑀜𑁆𑀘 𑀲𑀦𑁆𑀢𑀫𑁆𑀧𑀺 𑀦𑀺𑀲𑁆𑀲𑀬𑀁 𑀦 𑀚𑀸𑀦𑀸𑀢𑀺. 𑀢𑁂𑀦𑀲𑁆𑀲 𑀪𑀕𑀯𑀸 𑀢𑀜𑁆𑀘 𑀦𑀺𑀲𑁆𑀲𑀬𑀁 𑀉𑀢𑁆𑀢𑀭𑀺𑀜𑁆𑀘 𑀦𑀺𑀬𑁆𑀬𑀸𑀦𑀧𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀓𑀺𑀜𑁆𑀘𑀜𑁆𑀜’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀲𑁆𑀲𑀫𑀸𑀦𑁄. 𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀯𑀢𑁆𑀢𑀁 𑀲𑀫𑀸𑀧𑀢𑁆𑀢𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀢𑀭𑀲𑁆𑀲𑀼 𑀑𑀖𑀦𑁆𑀢𑀺 𑀢𑀢𑁄 𑀧𑀪𑀼𑀢𑀺 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀬𑀣𑀸𑀦𑀼𑀭𑀽𑀧𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀢𑀭𑀲𑁆𑀲𑀼. 𑀓𑀣𑀸𑀳𑀻𑀢𑀺 𑀓𑀣𑀁𑀓𑀣𑀸𑀳𑀺. 𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲𑀸𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑀺𑀩𑁆𑀩𑀸𑀦𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀧𑀲𑁆𑀲. 𑀏𑀢𑁂𑀦𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀓𑀣𑁂𑀲𑀺.

𑀦𑀺𑀤𑁆𑀤𑁂𑀲𑁂 ¶ 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀻𑀢𑀺 𑀆𑀓𑀸𑀲𑀸𑀮𑀫𑁆𑀩𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀳𑀕𑁆𑀕𑀢𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀺 𑀅𑀪𑀸𑀯𑀁 𑀕𑀫𑁂𑀢𑀺. 𑀯𑀺𑀪𑀸𑀯𑁂𑀢𑀻𑀢𑀺 𑀯𑀺𑀯𑀺𑀥𑀸 𑀅𑀪𑀸𑀯𑀁 𑀕𑀫𑁂𑀢𑀺. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺. 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑀻𑀢𑀺 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺𑀲𑁆𑀲 𑀦𑀢𑁆𑀣𑀻𑀢𑀺 𑀧𑀲𑁆𑀲𑀢𑀺.

𑁪𑁦. 𑀇𑀤𑀸𑀦𑀺 ‘‘𑀓𑀸𑀫𑁂 𑀧𑀳𑀸𑀬𑀸’’𑀢𑀺 𑀲𑀼𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀅𑀢𑁆𑀢𑀦𑀸 𑀧𑀳𑀻𑀦𑁂 𑀓𑀸𑀫𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 ‘‘𑀲𑀩𑁆𑀩𑁂𑀲𑀽’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀳𑀺𑀢𑁆𑀯𑀸 ¶ 𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀢𑀢𑁄 𑀳𑁂𑀝𑁆𑀞𑀸 𑀙𑀩𑁆𑀩𑀺𑀥𑀫𑁆𑀧𑀺 𑀲𑀫𑀸𑀧𑀢𑁆𑀢𑀺𑀁 𑀳𑀺𑀢𑁆𑀯𑀸. 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀢𑀺 𑀲𑀢𑁆𑀢𑀲𑀼 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂𑀲𑀼 𑀉𑀢𑁆𑀢𑀫𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂. 𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀩𑁆𑀭𑀳𑁆𑀫𑀮𑁄𑀓𑁂 𑀅𑀯𑀺𑀕𑀘𑁆𑀙𑀫𑀸𑀦𑁄 𑀢𑀺𑀝𑁆𑀞𑁂𑀬𑁆𑀬 𑀦𑀽𑀢𑀺 𑀧𑀼𑀘𑁆𑀙𑀢𑀺.

𑀦𑀺𑀤𑁆𑀤𑁂𑀲𑁂 𑀅𑀯𑀺𑀘𑁆𑀘𑀫𑀸𑀦𑁄𑀢𑀺 𑀅𑀯𑀺𑀬𑀼𑀚𑁆𑀚𑀫𑀸𑀦𑁄. 𑀅𑀯𑀺𑀕𑀘𑁆𑀙𑀫𑀸𑀦𑁄𑀢𑀺 𑀯𑀺𑀬𑁄𑀕𑀁 𑀅𑀦𑀸𑀧𑀚𑁆𑀚𑀫𑀸𑀦𑁄. 𑀅𑀦𑀦𑁆𑀢𑀭𑀥𑀸𑀬𑀫𑀸𑀦𑁄𑀢𑀺 𑀅𑀦𑁆𑀢𑀭𑀥𑀸𑀦𑀁 𑀅𑀦𑀸𑀧𑀚𑁆𑀚𑀫𑀸𑀦𑁄. 𑀅𑀧𑀭𑀺𑀳𑀸𑀬𑀫𑀸𑀦𑁄𑀢𑀺 𑀅𑀦𑀦𑁆𑀢𑀭𑀸 𑀧𑀭𑀺𑀳𑀸𑀦𑀁 𑀅𑀦𑀸𑀧𑀚𑁆𑀚𑀫𑀸𑀦𑁄.

𑁪𑁧-𑁨. 𑀅𑀣𑀲𑁆𑀲 𑀪𑀕𑀯𑀸 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑀢𑁆𑀢𑀓𑀁𑀬𑁂𑀯 𑀞𑀸𑀦𑀁 𑀅𑀦𑀼𑀚𑀸𑀦𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳. 𑀏𑀯𑀁 𑀢𑀲𑁆𑀲 𑀢𑀢𑁆𑀣 𑀞𑀸𑀦𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀢𑀺𑀝𑁆𑀞𑁂 𑀘𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀦𑁆𑀢𑀺 𑀅𑀦𑁂𑀓𑀲𑀗𑁆𑀔𑁆𑀬𑀫𑁆𑀧𑀺 𑀯𑀲𑁆𑀲𑀸𑀦𑀁, 𑀕𑀡𑀦𑀭𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀻’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 𑀲𑀸𑀫𑀺𑀯𑀘𑀦𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀁 𑀓𑀸𑀢𑀩𑁆𑀩𑀁, 𑀧𑀽𑀕𑀦𑁆𑀢𑀺 𑀯𑀸 𑀏𑀢𑀲𑁆𑀲 𑀩𑀳𑀽𑀦𑀻𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. ‘‘𑀧𑀽𑀕𑀸𑀦𑀻’’𑀢𑀺 𑀯𑀸𑀧𑀺 𑀧𑀞𑀦𑁆𑀢𑀺, 𑀧𑀼𑀭𑀺𑀫𑀧𑀸𑀞𑁄𑀬𑁂𑀯 𑀲𑀩𑁆𑀩𑀲𑀼𑀦𑁆𑀤𑀭𑁄. 𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺 𑀲𑀺𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑀢𑁆𑀣𑁂𑀯𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀸𑀦𑀸𑀤𑀼𑀓𑁆𑀔𑁂𑀳𑀺 𑀯𑀺𑀫𑀼𑀢𑁆𑀢𑁄 𑀲𑀻𑀢𑀺𑀪𑀸𑀯𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀲𑀲𑁆𑀲𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 ‘‘𑀉𑀤𑀸𑀳𑀼 𑀢𑀣𑀸𑀯𑀺𑀥𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺 ¶ 𑀉𑀘𑁆𑀙𑁂𑀤𑀁 𑀧𑀼𑀘𑁆𑀙𑀢𑀺, ‘‘𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁆𑀣𑀁 𑀯𑀸𑀧𑀺 𑀪𑀯𑁂𑀬𑁆𑀬𑀸’’𑀢𑀺 𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀢𑀲𑁆𑀲 𑀧𑀼𑀘𑁆𑀙𑀢𑀺.

𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀯𑁂𑀬𑁆𑀬𑀸𑀢𑀺 𑀢𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀉𑀧𑁆𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀼𑀢𑀺𑀁 𑀧𑀸𑀧𑀼𑀡𑁂𑀬𑁆𑀬. 𑀉𑀘𑁆𑀙𑀺𑀚𑁆𑀚𑁂𑀬𑁆𑀬𑀸𑀢𑀺 𑀉𑀘𑁆𑀙𑁂𑀤𑀁 𑀪𑀯𑁂𑀬𑁆𑀬. 𑀯𑀺𑀦𑀲𑁆𑀲𑁂𑀬𑁆𑀬𑀸𑀢𑀺 𑀯𑀺𑀦𑀸𑀲𑀁 𑀧𑀸𑀧𑀼𑀡𑁂𑀬𑁆𑀬. 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀪𑀸𑀯𑀁 𑀕𑀫𑁂𑀬𑁆𑀬. 𑀉𑀧𑀧𑀦𑁆𑀦𑀲𑁆𑀲𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀧𑀦𑁆𑀦𑀲𑁆𑀲.

𑁪𑁩. 𑀅𑀣𑀲𑁆𑀲 ¶ 𑀪𑀕𑀯𑀸 𑀉𑀘𑁆𑀙𑁂𑀤𑀲𑀲𑁆𑀲𑀢𑀁 𑀅𑀦𑀼𑀧𑀕𑀫𑁆𑀫 𑀢𑀢𑁆𑀣𑀼𑀧𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀘𑁆𑀘𑀻 𑀬𑀣𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀁 𑀧𑀮𑁂𑀢𑀻𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀤𑀺𑀲𑀁 𑀕𑀢𑁄’’𑀢𑀺 ¶ 𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺. 𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀢𑀢𑁆𑀣 𑀉𑀧𑁆𑀧𑀦𑁆𑀦𑁄 𑀲𑁂𑀓𑁆𑀔𑀫𑀼𑀦𑀺 𑀧𑀓𑀢𑀺𑀬𑀸 𑀧𑀼𑀩𑁆𑀩𑁂𑀯 𑀭𑀽𑀧𑀓𑀸𑀬𑀸 𑀯𑀺𑀫𑀼𑀢𑁆𑀢𑁄, 𑀢𑀢𑁆𑀣 𑀘𑀢𑀼𑀢𑁆𑀣𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀥𑀫𑁆𑀫𑀓𑀸𑀬𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀧𑀼𑀦 𑀦𑀸𑀫𑀓𑀸𑀬𑀸𑀧𑀺 𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀔𑀻𑀡𑀸𑀲𑀯𑁄 𑀳𑀼𑀢𑁆𑀯𑀸 𑀅𑀦𑀼𑀧𑀸𑀤𑀸𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁 ‘‘𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸’’𑀢𑀺 𑀏𑀯𑀫𑀸𑀤𑀺𑀓𑀁.

𑀦𑀺𑀤𑁆𑀤𑁂𑀲𑁂 𑀔𑀺𑀢𑁆𑀢𑀸𑀢𑀺 𑀘𑀮𑀺𑀢𑀸. 𑀉𑀓𑁆𑀔𑀺𑀢𑁆𑀢𑀸𑀢𑀺 𑀅𑀢𑀺𑀘𑀮𑀺𑀢𑀸. 𑀦𑀼𑀦𑁆𑀦𑀸𑀢𑀺 𑀧𑀧𑁆𑀨𑁄𑀝𑀺𑀬𑀸. 𑀧𑀡𑀼𑀦𑁆𑀦𑀸𑀢𑀺 𑀤𑀽𑀭𑀻𑀓𑀢𑀸. 𑀔𑀫𑁆𑀪𑀺𑀢𑀸𑀢𑀺 𑀧𑀝𑀺𑀓𑁆𑀓𑀫𑀸𑀧𑀺𑀢𑀸. 𑀯𑀺𑀓𑁆𑀔𑀫𑁆𑀪𑀺𑀢𑀸𑀢𑀺 𑀦 𑀲𑀦𑁆𑀢𑀺𑀓𑁂 𑀓𑀢𑀸.

𑁪𑁪. 𑀇𑀤𑀸𑀦𑀺 ‘‘𑀅𑀢𑁆𑀣𑀁 𑀧𑀮𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲 𑀬𑁄𑀦𑀺𑀲𑁄 𑀅𑀢𑁆𑀣𑀫𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀅𑀢𑁆𑀣𑀗𑁆𑀕𑀢𑁄 𑀲𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑁄 𑀅𑀢𑁆𑀣𑀗𑁆𑀕𑀢𑁄 𑀉𑀤𑀸𑀳𑀼 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀲𑀲𑁆𑀲𑀢𑀪𑀸𑀯𑁂𑀦 𑀅𑀭𑁄𑀕𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑁄𑀢𑀺 𑀏𑀯𑀁 𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀩𑁆𑀬𑀸𑀓𑀭𑁄𑀳𑀺. 𑀓𑀺𑀁𑀓𑀸𑀭𑀡𑀸? 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺.

𑀦𑀺𑀤𑁆𑀤𑁂𑀲𑁂 𑀦𑀺𑀭𑀼𑀤𑁆𑀥𑁄𑀢𑀺 𑀦𑀺𑀭𑁄𑀥𑀁 𑀧𑀢𑁆𑀢𑁄. 𑀉𑀘𑁆𑀙𑀺𑀦𑁆𑀦𑁄𑀢𑀺 𑀉𑀘𑁆𑀙𑀺𑀦𑁆𑀦𑀲𑀦𑁆𑀢𑀸𑀦𑁄. 𑀯𑀺𑀦𑀝𑁆𑀞𑁄𑀢𑀺 𑀯𑀺𑀦𑀸𑀲𑀁 𑀧𑀢𑁆𑀢𑁄.

𑁪𑁫. 𑀅𑀣𑀲𑁆𑀲 𑀪𑀕𑀯𑀸 𑀢𑀣𑀸 𑀅𑀯𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀗𑁆𑀕𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀗𑁆𑀕𑀢𑀲𑁆𑀲𑀸𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲. 𑀦 𑀧𑀫𑀸𑀡𑀫𑀢𑁆𑀣𑀻𑀢𑀺 𑀭𑀽𑀧𑀸𑀤𑀺𑀧𑀫𑀸𑀡𑀁 𑀦𑀢𑁆𑀣𑀺. 𑀬𑁂𑀦 𑀦𑀁 𑀯𑀚𑁆𑀚𑀼𑀦𑁆𑀢𑀺 𑀬𑁂𑀦 𑀭𑀸𑀕𑀸𑀤𑀺𑀦𑀸 𑀦𑀁 𑀯𑀤𑁂𑀬𑁆𑀬𑀼𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼.

𑀦𑀺𑀤𑁆𑀤𑁂𑀲𑁂 ¶ 𑀅𑀥𑀺𑀯𑀘𑀦𑀸𑀦𑀺 𑀘𑀸𑀢𑀺 𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄𑀢𑀺𑀆𑀤𑀬𑁄 𑀳𑀺 𑀯𑀘𑀦𑀫𑀢𑁆𑀢𑀁𑀬𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸 𑀦𑀸𑀫. 𑀅𑀥𑀺𑀯𑀘𑀦𑀸𑀦𑀁 𑀧𑀣𑀸 𑀅𑀥𑀺𑀯𑀘𑀦𑀧𑀣𑀸 𑀦𑀸𑀫. ‘‘𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀏𑀯𑀁 𑀦𑀺𑀤𑁆𑀥𑀸𑀭𑀺𑀢𑁆𑀯𑀸 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀅𑀪𑀺𑀮𑀸𑀧𑀸 𑀦𑀺𑀭𑀼𑀢𑁆𑀢𑀺 𑀦𑀸𑀫. 𑀦𑀺𑀭𑀼𑀢𑁆𑀢𑀻𑀦𑀁 𑀧𑀣𑀸 𑀦𑀺𑀭𑀼𑀢𑁆𑀢𑀺𑀧𑀣𑀸 𑀦𑀸𑀫. ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄’’𑀢𑀺 ¶ (𑀥. 𑀲. 𑁭) 𑀏𑀯𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀧𑀜𑁆𑀜𑀢𑁆𑀢𑀻𑀦𑀁 𑀧𑀣𑀸 𑀧𑀜𑁆𑀜𑀢𑁆𑀢𑀺𑀧𑀣𑀸 (𑀥. 𑀲. 𑀅𑀝𑁆𑀞. 𑁧𑁦𑁧-𑁧𑁦𑁮) 𑀦𑀸𑀫. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀉𑀧𑀲𑀻𑀯𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀦𑁆𑀤𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁬. 𑀲𑀢𑁆𑀢𑀫𑁂 ¶ 𑀦𑀦𑁆𑀤𑀲𑀼𑀢𑁆𑀢𑁂 𑁋 𑀧𑀞𑀫𑀕𑀸𑀣𑀸𑀬𑀢𑁆𑀣𑁄 𑁋 𑀮𑁄𑀓𑁂 𑀔𑀢𑁆𑀢𑀺𑀬𑀸𑀤𑀬𑁄𑀚𑀦𑀸 𑀆𑀚𑀻𑀯𑀓𑀦𑀺𑀕𑀡𑁆𑀞𑀸𑀤𑀺𑀓𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄’’𑀢𑀺 𑀯𑀤𑀦𑁆𑀢𑀺. 𑀢𑀬𑀺𑀤𑀁 𑀓𑀣𑀁𑀲𑀽𑀢𑀺 𑀓𑀺𑀁 𑀦𑀼 𑀔𑁄 𑀢𑁂 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀜𑀸𑀡𑁂𑀦 𑀉𑀧𑀧𑀦𑁆𑀦𑀢𑁆𑀢𑀸 𑀜𑀸𑀡𑀽𑀧𑀧𑀦𑁆𑀦𑀁 𑀫𑀼𑀦𑀺 𑀦𑁄 𑀯𑀤𑀦𑁆𑀢𑀺, 𑀏𑀯𑀁𑀯𑀺𑀥𑀁 𑀦𑀼 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀯𑁂 𑀦𑀸𑀦𑀧𑁆𑀧𑀓𑀸𑀭𑀓𑁂𑀦 𑀮𑀽𑀔𑀚𑀻𑀯𑀺𑀢𑀲𑀗𑁆𑀔𑀸𑀢𑁂𑀦 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀦𑁆𑀢𑀺.

𑀦𑀺𑀤𑁆𑀤𑁂𑀲𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀦 𑀯𑀸. 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀺𑀚𑀸𑀦𑀦𑀜𑀸𑀡𑁂𑀦 𑀯𑀸.

𑁪𑁭. 𑀅𑀣𑀲𑁆𑀲 𑀪𑀕𑀯𑀸 𑀢𑀤𑀼𑀪𑀬𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀦𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀤𑀺𑀝𑁆𑀞𑀺𑀬𑀸’’𑀢𑀺 𑀕𑀸𑀣𑀫𑀸𑀳.

𑁪𑁮. 𑀇𑀤𑀸𑀦𑀺 ‘‘𑀤𑀺𑀝𑁆𑀞𑀸𑀤𑀻𑀳𑀺 𑀲𑀼𑀤𑁆𑀥𑀻’’𑀢𑀺 𑀯𑀤𑀦𑁆𑀢𑀸𑀦𑀁 𑀯𑀸𑀤𑁂 𑀓𑀗𑁆𑀔𑀸𑀧𑀳𑀸𑀦𑀢𑁆𑀣𑀁 ‘‘𑀬𑁂 𑀓𑁂𑀘𑀺𑀫𑁂’’𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀅𑀦𑁂𑀓𑀭𑀽𑀧𑁂𑀦𑀸𑀢𑀺 𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀤𑀺𑀦𑀸𑀧𑀺. 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸𑀢𑀺 𑀢𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀕𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀸.

𑁪𑁯. 𑀅𑀣𑀲𑁆𑀲 ¶ 𑀢𑀣𑀸 𑀲𑀼𑀤𑁆𑀥𑀺𑀅𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀪𑀕𑀯𑀸 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳.

𑁫𑁦. 𑀏𑀯𑀁 ‘‘𑀦𑀸𑀢𑀭𑀺𑀁𑀲𑀽’’𑀢𑀺 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀬𑁄 𑀅𑀢𑀭𑀺, 𑀢𑀁 𑀲𑁄𑀢𑀼𑀓𑀸𑀫𑁄 ‘‘𑀬𑁂 𑀓𑁂𑀘𑀺𑀫𑁂’’𑀢𑀺 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀑𑀖𑀢𑀺𑀡𑁆𑀡𑀫𑀼𑀔𑁂𑀦 𑀚𑀸𑀢𑀺𑀚𑀭𑀸𑀢𑀺𑀡𑁆𑀡𑁂 𑀤𑀲𑁆𑀲𑁂𑀦𑁆𑀢𑁄 𑀙𑀝𑁆𑀞𑀁 𑀕𑀸𑀣𑀫𑀸𑀳.

𑁫𑁧. 𑀢𑀢𑁆𑀣 ¶ 𑀦𑀺𑀯𑀼𑀢𑀸𑀢𑀺 𑀑𑀯𑀼𑀝𑀸 𑀧𑀭𑀺𑀬𑁄𑀦𑀤𑁆𑀥𑀸. 𑀬𑁂 𑀲𑀻𑀥𑀸𑀢𑀺 𑀬𑁂 𑀲𑀼 𑀇𑀥, 𑀏𑀢𑁆𑀣 𑀘 𑀲𑀼-𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀢𑀡𑁆𑀳𑀁 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯.

𑁫𑁨. 𑀏𑀯𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀦 𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀫𑀸𑀦𑁄 𑀏𑀢𑀸𑀪𑀺𑀦𑀦𑁆𑀤𑀸𑀫𑀻𑀢𑀺 𑀕𑀸𑀣𑀫𑀸𑀳. 𑀇𑀥𑀸𑀧𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀦𑀦𑁆𑀤𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀳𑁂𑀫𑀓𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁩. 𑀅𑀝𑁆𑀞𑀫𑁂 ¶ 𑀳𑁂𑀫𑀓𑀲𑀼𑀢𑁆𑀢𑁂 𑁋 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀽𑀢𑀺 𑀬𑁂 𑀩𑀸𑀯𑀭𑀺𑀆𑀤𑀬𑁄 𑀧𑀼𑀩𑁆𑀩𑁂 𑀫𑀬𑁆𑀳𑀁 𑀲𑀓𑀁 𑀮𑀤𑁆𑀥𑀺𑀁 𑀯𑀺𑀬𑀸𑀓𑀁𑀲𑀼. 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸𑀢𑀺 𑀕𑁄𑀢𑀫𑀲𑀸𑀲𑀦𑀢𑁄 𑀧𑀼𑀩𑁆𑀩𑀢𑀭𑀁. 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀟𑁆𑀠𑀦𑀁.

𑀬𑁂 𑀘𑀜𑁆𑀜𑁂 𑀢𑀲𑁆𑀲 𑀆𑀘𑀭𑀺𑀬𑀸𑀢𑀺 𑀬𑁂 𑀘 𑀅𑀜𑁆𑀜𑁂 𑀢𑀲𑁆𑀲 𑀩𑀸𑀯𑀭𑀺𑀬𑀲𑁆𑀲 𑀆𑀘𑀸𑀭𑁂 𑀲𑀺𑀓𑁆𑀔𑀸𑀧𑀓𑀸 𑀆𑀘𑀭𑀺𑀬𑀸. 𑀢𑁂 𑀲𑀓𑀁 𑀤𑀺𑀝𑁆𑀞𑀺𑀦𑁆𑀢𑀺 𑀢𑁂 𑀆𑀘𑀭𑀺𑀬𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁. 𑀲𑀓𑀁 𑀔𑀦𑁆𑀢𑀺𑀦𑁆𑀢𑀺 𑀅𑀢𑁆𑀢𑀦𑁄 𑀔𑀫𑀦𑀁. 𑀲𑀓𑀁 𑀭𑀼𑀘𑀺𑀦𑁆𑀢𑀺 𑀅𑀢𑁆𑀢𑀦𑁄 𑀭𑁄𑀘𑀦𑀁. 𑀯𑀺𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀺𑀢𑀓𑁆𑀓𑀸𑀦𑀁 𑀉𑀧𑁆𑀧𑀸𑀤𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀦𑀁. 𑀲𑀗𑁆𑀓𑀧𑁆𑀧𑀯𑀟𑁆𑀠𑀦𑀦𑁆𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀯𑀟𑁆𑀠𑀦𑀁. 𑀇𑀫𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀇𑀤𑀸𑀦𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀯𑀺𑀢𑀓𑁆𑀓𑀯𑀟𑁆𑀠𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀯𑀯𑀺𑀢𑀓𑁆𑀓𑁂 𑀤𑀲𑁆𑀲𑁂𑀲𑀺.

𑁫𑁪. 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀦𑁆𑀢𑀺 ¶ 𑀢𑀡𑁆𑀳𑀸𑀯𑀺𑀦𑀸𑀲𑀦𑀁.

𑁫𑁫-𑁬. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀥𑀫𑁆𑀫𑀁 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀇𑀥𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸𑀢𑀺 𑀏𑀢𑀁 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭; 𑀣𑁂𑀭𑀕𑀸. 𑁬𑁭𑁬; 𑀓𑀣𑀸. 𑁭𑁫𑁩) 𑀦𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀚𑀸𑀦𑀺𑀢𑁆𑀯𑀸 𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀆𑀤𑀻𑀳𑀺 ¶ 𑀲𑀢𑀸. 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀯𑀺𑀤𑀺𑀢𑀥𑀫𑁆𑀫𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀸 𑀘 𑀭𑀸𑀕𑀸𑀤𑀺𑀦𑀺𑀩𑁆𑀩𑀸𑀦𑁂𑀦 𑀘 𑀅𑀪𑀺𑀦𑀺𑀩𑁆𑀩𑀼𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀳𑁂𑀫𑀓𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑁄𑀤𑁂𑀬𑁆𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁭. 𑀦𑀯𑀫𑁂 ¶ 𑀢𑁄𑀤𑁂𑀬𑁆𑀬𑀲𑀼𑀢𑁆𑀢𑁂 𑁋 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄𑀢𑀺 𑀢𑀲𑁆𑀲 𑀓𑀻𑀤𑀺𑀲𑁄 𑀯𑀺𑀫𑁄𑀓𑁆𑀔𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀧𑀼𑀘𑁆𑀙𑀢𑀺.

𑁫𑁮. 𑀇𑀤𑀸𑀦𑀺𑀲𑁆𑀲 𑀅𑀜𑁆𑀜𑀯𑀺𑀫𑁄𑀓𑁆𑀔𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄𑀢𑀺 𑀢𑀲𑁆𑀲 𑀅𑀜𑁆𑀜𑁄 𑀯𑀺𑀫𑁄𑀓𑁆𑀔𑁄 𑀦𑀢𑁆𑀣𑀺.

𑁫𑁯. 𑀏𑀯𑀁 ‘‘𑀢𑀡𑁆𑀳𑀓𑁆𑀔𑀬𑁄 𑀏𑀯 𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄’’𑀢𑀺 𑀧𑀼𑀦 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀉𑀤 𑀧𑀜𑁆𑀜𑀓𑀧𑁆𑀧𑀻𑀢𑀺 𑀉𑀤𑀸𑀳𑀼 𑀲𑀫𑀸𑀧𑀢𑁆𑀢𑀺𑀜𑀸𑀡𑀸𑀤𑀺𑀦𑀸 𑀜𑀸𑀡𑁂𑀦 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀓𑀧𑁆𑀧𑀬𑀢𑀺.

𑁬𑁦. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀸𑀫𑀪𑀯𑁂𑀢𑀺 𑀓𑀸𑀫𑁂 𑀘 𑀪𑀯𑁂 𑀘.

𑀭𑀽𑀧𑁂 𑀦𑀸𑀲𑀻𑀲𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑁂 𑀭𑀽𑀧𑀸𑀭𑀫𑁆𑀫𑀡𑁂 𑀙𑀦𑁆𑀤𑀭𑀸𑀕𑀯𑀲𑁂𑀦 𑀦 𑀧𑀢𑁆𑀣𑁂𑀢𑀺. 𑀲𑀤𑁆𑀥𑀸𑀤𑀻𑀲𑀼𑀧𑀺 𑀏𑀲𑁂𑀯 ¶ 𑀦𑀬𑁄. 𑀧𑀮𑀺𑀩𑁄𑀥𑀝𑁆𑀞𑁂𑀦 𑀭𑀸𑀕𑁄 𑀏𑀯 𑀓𑀺𑀜𑁆𑀘𑀦𑀁 𑀭𑀸𑀕𑀓𑀺𑀜𑁆𑀘𑀦𑀁 𑀫𑀤𑀦𑀝𑁆𑀞𑁂𑀦 𑀯𑀸. 𑀤𑁄𑀲𑀓𑀺𑀜𑁆𑀘𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀢𑁄𑀤𑁂𑀬𑁆𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀧𑁆𑀧𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁧. 𑀤𑀲𑀫𑁂 ¶ ¶ 𑀓𑀧𑁆𑀧𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀫𑀚𑁆𑀛𑁂 𑀲𑀭𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑁄𑀝𑀺𑀧𑀜𑁆𑀜𑀸𑀡𑀸𑀪𑀸𑀯𑀢𑁄 𑀫𑀚𑁆𑀛𑀪𑀽𑀢𑁂 𑀲𑀁𑀲𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀝𑁆𑀞𑀢𑀦𑁆𑀢𑀺 𑀢𑀺𑀝𑁆𑀞𑀫𑀸𑀦𑀸𑀦𑀁. 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸𑀢𑀺 𑀬𑀣𑀸 𑀇𑀤𑀁 𑀤𑀼𑀓𑁆𑀔𑀁 𑀧𑀼𑀦 𑀦 𑀪𑀯𑁂𑀬𑁆𑀬.

𑀆𑀕𑀫𑀦𑀦𑁆𑀢𑀺 𑀧𑀼𑀩𑁆𑀩𑀦𑁆𑀢𑀢𑁄 𑀇𑀥𑀸𑀕𑀫𑀦𑀁. 𑀕𑀫𑀦𑀦𑁆𑀢𑀺 𑀇𑀢𑁄 𑀧𑀭𑀮𑁄𑀓𑀕𑀫𑀦𑀁. 𑀕𑀫𑀦𑀸𑀕𑀫𑀦𑀦𑁆𑀢𑀺 𑀢𑀤𑀼𑀪𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀮𑀦𑁆𑀢𑀺 𑀫𑀭𑀡𑀓𑀸𑀮𑀁. 𑀕𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺. 𑀪𑀯𑀸𑀪𑀯𑁄𑀢𑀺 𑀪𑀯𑀢𑁄 𑀪𑀯𑁄. 𑀘𑀼𑀢𑀺 𑀘𑀸𑀢𑀺 𑀪𑀯𑀢𑁄 𑀘𑀯𑀦𑀜𑁆𑀘. 𑀉𑀧𑀧𑀢𑁆𑀢𑀺 𑀘𑀸𑀢𑀺 𑀘𑀼𑀢𑀲𑁆𑀲 𑀉𑀧𑀧𑀢𑁆𑀢𑀺 𑀘. 𑀦𑀺𑀩𑁆𑀩𑀢𑁆𑀢𑀺 𑀘𑀸𑀢𑀺 𑀧𑀸𑀢𑀼𑀪𑀸𑀯𑁄 𑀘. 𑀪𑁂𑀤𑁄 𑀘𑀸𑀢𑀺 𑀔𑀦𑁆𑀥𑀪𑁂𑀤𑁄 𑀘. 𑀚𑀸𑀢𑀺 𑀘𑀸𑀢𑀺 𑀚𑀦𑀦𑀜𑁆𑀘. 𑀚𑀭𑀸 𑀘𑀸𑀢𑀺 𑀳𑀸𑀦𑀺 𑀘. 𑀫𑀭𑀡𑀜𑁆𑀘𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀸𑀕𑁄 𑀘. 𑀧𑀼𑀭𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀧𑀼𑀩𑁆𑀩𑀸𑀧𑀺 𑀓𑁄𑀝𑀺 𑀦𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀢𑀣𑀸 𑀧𑀘𑁆𑀙𑀺𑀫𑀸𑀧𑀺 𑀓𑁄𑀝𑀺.

𑀏𑀢𑁆𑀢𑀓𑀸 𑀚𑀸𑀢𑀺𑀬𑁄𑀢𑀺 𑀏𑀢𑀧𑀭𑀫𑀸 𑀚𑀸𑀢𑀺𑀬𑁄. 𑀯𑀝𑁆𑀝𑀁 𑀯𑀢𑁆𑀢𑀻𑀢𑀺 𑀲𑀁𑀲𑀸𑀭𑀧𑀯𑀢𑁆𑀢𑀺. 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀢𑀢𑁄 𑀉𑀤𑁆𑀥𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀳𑁂𑀯𑀁 𑀦𑀢𑁆𑀣𑀻𑀢𑀺 𑀏𑀯𑀁 𑀦𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀳𑀺-𑀇𑀢𑀺 𑀦𑀺𑀧𑀸𑀢𑁄. 𑀅𑀦𑀫𑀢𑀕𑁆𑀕𑁄𑀬𑀦𑁆𑀢𑀺 𑀅𑀬𑀁 𑀲𑀁𑀲𑀸𑀭𑁄 𑀅𑀯𑀺𑀤𑀺𑀢𑀕𑁆𑀕𑁄.

𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀆𑀯𑀭𑀺𑀢𑀸𑀦𑀁. 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑀢𑀡𑁆𑀳𑀸𑀩𑀦𑁆𑀥𑀦𑀩𑀤𑁆𑀥𑀸𑀦𑀁. 𑀲𑀦𑁆𑀥𑀸𑀯𑀢𑀦𑁆𑀢𑀺 𑀓𑀸𑀫𑀥𑀸𑀢𑀼𑀬𑀸 𑀧𑀼𑀦𑀧𑁆𑀧𑀼𑀦𑀁 𑀥𑀸𑀯𑀦𑁆𑀢𑀸𑀦𑀁. 𑀲𑀁𑀲𑀭𑀢𑀦𑁆𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀸 𑀲𑀁𑀲𑀭𑀦𑁆𑀢𑀸𑀦𑀁. 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁 𑀯𑀺𑀦𑁆𑀤𑀺𑀢𑀁. 𑀢𑀺𑀩𑁆𑀩𑀦𑁆𑀢𑀺 𑀩𑀳𑀮𑀁. 𑀩𑁆𑀬𑀲𑀦𑀦𑁆𑀢𑀺 𑀅𑀯𑀟𑁆𑀠𑀺 𑀯𑀺𑀦𑀸𑀲𑁄. 𑀓𑀝𑀲𑀻 𑀯𑀟𑁆𑀠𑀺𑀢𑀸𑀢𑀺 𑀲𑀼𑀲𑀸𑀦𑀯𑀟𑁆𑀠𑀺𑀢𑀁. 𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯 ¶ . 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀽𑀢𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀼. 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀦𑁆𑀢𑀺 𑀉𑀓𑁆𑀓𑀡𑁆𑀞𑀺𑀢𑀼𑀁. 𑀯𑀺𑀭𑀚𑁆𑀚𑀺𑀢𑀼𑀦𑁆𑀢𑀺 𑀯𑀺𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀯𑀺𑀫𑀼𑀘𑁆𑀘𑀺𑀢𑀼𑀦𑁆𑀢𑀺 𑀫𑁄𑀘𑁂𑀢𑀼𑀁. 𑀯𑀝𑁆𑀝𑀁 𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀲𑀁𑀲𑀸𑀭𑀧𑀯𑀢𑁆𑀢𑀁 𑀢𑁂𑀪𑀽𑀫𑀓𑀯𑀝𑁆𑀝𑀁 𑀅𑀦𑀸𑀕𑀢𑁂 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀢𑀢𑁄 𑀉𑀤𑁆𑀥𑀁 𑀅𑀦𑀸𑀕𑀢𑁂 𑀲𑀁𑀲𑀸𑀭𑀧𑀯𑀢𑁆𑀢𑀁 𑀦𑀧𑁆𑀧𑀯𑀢𑁆𑀢𑀺𑀲𑁆𑀲𑀢𑀺. 𑀚𑀸𑀢𑀺𑀪𑀬𑁂𑀢𑀺 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑁂. 𑀚𑀭𑀸𑀪𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬𑁨-𑁩. 𑀅𑀣𑀲𑁆𑀲 ¶ 𑀪𑀕𑀯𑀸 𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀉𑀧𑀭𑀽𑀧𑀭𑀺𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀤𑀼𑀢𑀺𑀬𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀢𑀢𑀺𑀬𑀕𑀸𑀣𑀸𑀬 𑀅𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀦𑀧𑀝𑀺𑀧𑀓𑁆𑀔𑀁. 𑀅𑀦𑀸𑀤𑀸𑀦𑀦𑁆𑀢𑀺 𑀆𑀤𑀸𑀦𑀧𑀝𑀺𑀧𑀓𑁆𑀔𑀁, 𑀓𑀺𑀜𑁆𑀘𑀦𑀸𑀤𑀸𑀦𑀯𑀽𑀧𑀲𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀸𑀧𑀭𑀦𑁆𑀢𑀺 𑀅𑀧𑀭𑀧𑀝𑀺𑀪𑀸𑀕𑀤𑀻𑀧𑀯𑀺𑀭𑀳𑀺𑀢𑀁, 𑀲𑁂𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁪. 𑀘𑀢𑀼𑀢𑁆𑀣𑀕𑀸𑀣𑀸𑀬 ¶ 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽𑀢𑀺 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀘𑀭𑀸 𑀧𑀭𑀺𑀘𑀸𑀭𑀺𑀓𑀸 𑀲𑀺𑀲𑁆𑀲𑀸 𑀦 𑀳𑁄𑀦𑁆𑀢𑀺.

𑀫𑀳𑀸𑀚𑀦𑀁 𑀧𑀸𑀲𑁂 𑀦𑀺𑀬𑁄𑀚𑁂𑀢𑁆𑀯𑀸 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀅𑀓𑀼𑀲𑀮𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀢𑁆𑀢𑀸 𑀓𑀡𑁆𑀳𑁄. 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀅𑀥𑀺𑀧𑀢𑀺𑀢𑁆𑀢𑀸 𑀅𑀥𑀺𑀧𑀢𑀺. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀁 𑀕𑀢𑀢𑁆𑀢𑀸 𑀅𑀦𑁆𑀢𑀕𑀽. 𑀧𑀸𑀧𑀚𑀦𑀁 𑀦 𑀫𑀼𑀜𑁆𑀘𑀢𑀻𑀢𑀺 𑀦𑀫𑀼𑀘𑀺. 𑀲𑀢𑀺𑀯𑀺𑀧𑁆𑀧𑀯𑀸𑀲𑀧𑁆𑀧𑀫𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀜𑀸𑀢𑀓𑁄𑀢𑀺 𑀧𑀫𑀢𑁆𑀢𑀩𑀦𑁆𑀥𑀼. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀓𑀧𑁆𑀧𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁫. 𑀏𑀓𑀸𑀤𑀲𑀫𑁂 ¶ 𑀚𑀢𑀼𑀓𑀡𑁆𑀡𑀺𑀲𑀼𑀢𑁆𑀢𑁂 𑁋 𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀦𑁆𑀢𑀺 𑀅𑀳𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁧; 𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫, 𑁩𑁦𑁧; 𑀅. 𑀦𑀺. 𑁬.𑁧𑁦; 𑀲𑀁. 𑀦𑀺. 𑁫.𑁯𑁯𑁭) 𑀦𑀬𑁂𑀦 𑀯𑀻𑀭 𑀓𑀸𑀫𑀸𑀦𑀁 𑀅𑀓𑀸𑀫𑀦𑀢𑁄 𑀅𑀓𑀸𑀫𑀓𑀸𑀫𑀺𑀁 𑀩𑀼𑀤𑁆𑀥𑀁 𑀲𑀼𑀢𑁆𑀯𑀸. 𑀅𑀓𑀸𑀫𑀫𑀸𑀕𑀫𑀦𑁆𑀢𑀺 𑀦𑀺𑀓𑁆𑀓𑀸𑀫𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀢𑀼𑀁 𑀆𑀕𑀢𑁄𑀫𑁆𑀳𑀺. 𑀲𑀳𑀚𑀦𑁂𑀢𑁆𑀢𑀸𑀢𑀺 𑀲𑀳𑀚𑀸𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀘𑀓𑁆𑀔𑀼 ¶ . 𑀬𑀣𑀸𑀢𑀘𑁆𑀙𑀦𑁆𑀢𑀺 𑀬𑀣𑀸𑀢𑀣𑀁. 𑀩𑁆𑀭𑀽𑀳𑀺 𑀫𑁂𑀢𑀺 𑀧𑀼𑀦 𑀬𑀸𑀘𑀦𑁆𑀢𑁄 𑀪𑀡𑀢𑀺. 𑀬𑀸𑀘𑀦𑁆𑀢𑁄 𑀳𑀺 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀪𑀡𑁂𑀬𑁆𑀬, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁.

𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀯𑀺𑀚𑁆𑀚𑀸𑀳𑀺 𑀧𑀦 𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄. 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀢𑀺𑀲𑁆𑀲𑁄𑀧𑀺 𑀯𑀺𑀚𑁆𑀚𑀸 𑀅𑀝𑁆𑀞𑀧𑀺 𑀯𑀺𑀚𑁆𑀚𑀸. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀪𑀬𑀪𑁂𑀭𑀯𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀅𑀝𑁆𑀞 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁨𑁫𑁪 𑀆𑀤𑀬𑁄). 𑀢𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀘 𑀲𑀳 𑀙 𑀅𑀪𑀺𑀜𑁆𑀜𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀯𑀺𑀚𑁆𑀚𑀸 𑀯𑀼𑀢𑁆𑀢𑀸. 𑀘𑀭𑀡𑀦𑁆𑀢𑀺 𑀲𑀻𑀮𑀲𑀁𑀯𑀭𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀻𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀬𑁂𑀯 𑀳𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀬𑀲𑁆𑀫𑀸 𑀏𑀢𑁂𑀳𑀺 ¶ 𑀘𑀭𑀢𑀺 𑀅𑀭𑀺𑀬𑀲𑀸𑀯𑀓𑁄 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀁, 𑀢𑀲𑁆𑀫𑀸 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀫. 𑀦𑀺. 𑁨.𑁨𑁪) 𑀲𑀩𑁆𑀩𑀁 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀸 𑀇𑀫𑀸𑀳𑀺 𑀯𑀺𑀚𑁆𑀚𑀸𑀳𑀺 𑀇𑀫𑀺𑀦𑀸 𑀘 𑀘𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺. 𑀢𑀢𑁆𑀣 𑀯𑀺𑀚𑁆𑀚𑀸𑀲𑀫𑁆𑀧𑀤𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸, 𑀘𑀭𑀡𑀲𑀫𑁆𑀧𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀁. 𑀲𑁄 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀸𑀦𑀢𑁆𑀣𑀁 𑀜𑀢𑁆𑀯𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀣𑁂 𑀦𑀺𑀬𑁄𑀚𑁂𑀢𑀺, 𑀬𑀣𑀸 𑀢𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄. 𑀢𑁂𑀦𑀲𑁆𑀲 ¶ 𑀲𑀸𑀯𑀓𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀦𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑀸, 𑀯𑀺𑀚𑁆𑀚𑀸𑀘𑀭𑀡𑀯𑀺𑀧𑀦𑁆𑀦𑀸𑀦𑀜𑁆𑀳𑀺 𑀲𑀸𑀯𑀓𑀸 𑀅𑀢𑁆𑀢𑀦𑁆𑀢𑀧𑀸𑀤𑀬𑁄 𑀯𑀺𑀬 (𑀧𑀸𑀭𑀸. 𑀅𑀝𑁆𑀞. 𑁧.𑁧).

𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀫𑁆𑀫𑀸 𑀕𑀢𑀢𑁆𑀢𑀸 𑀲𑀫𑁆𑀫𑀸 𑀘 𑀕𑀤𑀢𑁆𑀢𑀸 𑀲𑀼𑀕𑀢𑁄. 𑀕𑀫𑀦𑀫𑁆𑀧𑀺 𑀳𑀺 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀪𑀕𑀯𑀢𑁄 𑀲𑁄𑀪𑀦𑀁 𑀧𑀭𑀺𑀲𑀼𑀤𑁆𑀥𑀫𑀦𑀯𑀚𑁆𑀚𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀅𑀭𑀺𑀬𑀫𑀕𑁆𑀕𑁄. 𑀢𑁂𑀦 𑀳𑁂𑀲 𑀕𑀫𑀦𑁂𑀦 𑀔𑁂𑀫𑀁 𑀤𑀺𑀲𑀁 𑀅𑀲𑀚𑁆𑀚𑀫𑀸𑀦𑁄 𑀕𑀢𑁄𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀕𑀢𑁄. 𑀲𑀼𑀦𑁆𑀤𑀭𑀜𑁆𑀘𑁂𑀲 𑀞𑀸𑀦𑀁 𑀕𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸𑀧𑀺 𑀲𑀼𑀕𑀢𑁄. 𑀲𑀫𑁆𑀫𑀸 𑀘 𑀕𑀢𑁄 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄’’𑀢𑀺 (𑀫𑀳𑀸𑀦𑀺. 𑁩𑁮; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁭).

𑀲𑀫𑁆𑀫𑀸 𑀯𑀸 𑀕𑀢𑁄 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀪𑀼𑀢𑀺 𑀬𑀸𑀯 𑀩𑁄𑀥𑀺𑀫𑀡𑁆𑀟𑀸 𑀢𑀸𑀯 𑀲𑀫𑀢𑀺𑀁𑀲𑀧𑀸𑀭𑀫𑀻𑀧𑀽𑀭𑀺𑀓𑀸𑀬 ¶ 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑁄 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀁 𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀦𑁆𑀢𑀺 𑀇𑀫𑁂 𑀘 𑀅𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀕𑀢𑁄𑀢𑀺 𑀲𑀫𑁆𑀫𑀸 𑀕𑀢𑀢𑁆𑀢𑀸𑀧𑀺 𑀲𑀼𑀕𑀢𑁄. 𑀲𑀫𑁆𑀫𑀸 𑀘𑁂𑀲 𑀕𑀤𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀬𑀼𑀢𑁆𑀢𑀫𑁂𑀯 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀲𑀫𑁆𑀫𑀸 𑀕𑀤𑀢𑁆𑀢𑀸𑀧𑀺 𑀲𑀼𑀕𑀢𑁄.

𑀢𑀢𑁆𑀭𑀺𑀤𑀁 𑀲𑀸𑀥𑀓𑀲𑀼𑀢𑁆𑀢𑀁 𑁋

‘‘𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 ¶ 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀢𑁆𑀭 𑀓𑀸𑀮𑀜𑁆𑀜𑀽 ¶ 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺 (𑀫. 𑀦𑀺. 𑁨.𑁮𑁬).

𑀏𑀯𑀁 𑀲𑀫𑁆𑀫𑀸 𑀕𑀤𑀢𑁆𑀢𑀸𑀧𑀺 𑀲𑀼𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀧𑀦 𑀮𑁄𑀓𑀯𑀺𑀤𑀽. 𑀲𑁄 𑀳𑀺 𑀪𑀕𑀯𑀸 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀦𑀺𑀭𑁄𑀥𑀢𑁄 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 𑀲𑀩𑁆𑀩𑀣𑀸 𑀮𑁄𑀓𑀁 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀬𑀣𑀸𑀳 𑁋

‘‘𑀬𑀢𑁆𑀣 𑀔𑁄, 𑀆𑀯𑀼𑀲𑁄, 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀺. 𑀦 𑀘𑀸𑀳𑀁, 𑀆𑀯𑀼𑀲𑁄, 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀧𑀺 𑀘𑀸𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀮𑁄𑀓𑀦𑀺𑀭𑁄𑀥𑀜𑁆𑀘 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫).

‘‘𑀕𑀫𑀦𑁂𑀦 ¶ 𑀦 𑀧𑀢𑁆𑀢𑀩𑁆𑀩𑁄, 𑀮𑁄𑀓𑀲𑁆𑀲𑀦𑁆𑀢𑁄 𑀓𑀼𑀤𑀸𑀘𑀦𑀁;

𑀦 𑀘 𑀅𑀧𑁆𑀧𑀢𑁆𑀯𑀸 𑀮𑁄𑀓𑀦𑁆𑀢𑀁, 𑀤𑀼𑀓𑁆𑀔𑀸 𑀅𑀢𑁆𑀣𑀺 𑀧𑀫𑁄𑀘𑀦𑀁.

‘‘𑀢𑀲𑁆𑀫𑀸 𑀳𑀯𑁂 𑀮𑁄𑀓𑀯𑀺𑀤𑀽 𑀲𑀼𑀫𑁂𑀥𑁄, 𑀮𑁄𑀓𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀫𑀺𑀢𑀸𑀯𑀺 𑀜𑀢𑁆𑀯𑀸, 𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫);

𑀅𑀧𑀺 ¶ 𑀘 𑁋 𑀢𑀬𑁄 𑀮𑁄𑀓𑀸 𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺. 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀧𑀝𑀺. 𑀫. 𑁧.𑁧𑁧𑁨) 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸’’𑀢𑀺 (𑀤𑀻. 𑀦𑀺. 𑁧.𑁪𑁨𑁧; 𑀫. 𑀦𑀺. 𑁧.𑁨𑁬𑁯; 𑀲𑀁. 𑀦𑀺. 𑁪.𑁪𑁧𑁬; 𑀯𑀺𑀪. 𑁯𑁩𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺. (𑀫. 𑀦𑀺. 𑁧.𑁫𑁦𑁩) 𑁋

𑀆𑀕𑀢𑀝𑁆𑀞𑀸𑀦𑁂 𑀑𑀓𑀸𑀲𑀮𑁄𑀓𑁄. 𑀢𑀫𑁆𑀧𑀺 𑀪𑀕𑀯𑀸 𑀲𑀩𑁆𑀩𑀣𑀸 𑀅𑀯𑁂𑀤𑀺. 𑀢𑀣𑀸 𑀳𑀺𑀲𑁆𑀲 ‘‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 ¶ 𑀮𑁄𑀓𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲𑀮𑁄𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’𑀢𑀺 (𑀧𑀝𑀺. 𑀫. 𑁧.𑁧𑁧𑁨) 𑀅𑀬𑀁 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄.

𑀬𑀲𑁆𑀫𑀸 𑀧𑀦𑁂𑀲 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂, 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂, 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀪𑀩𑁆𑀩𑁂 𑀅𑀪𑀩𑁆𑀩𑁂 𑀲𑀢𑁆𑀢𑁂 𑀚𑀸𑀦𑀸𑀢𑀺. 𑀢𑀲𑁆𑀫𑀸𑀲𑁆𑀲 𑀲𑀢𑁆𑀢𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄. 𑀬𑀣𑀸 𑀘 𑀲𑀢𑁆𑀢𑀮𑁄𑀓𑁄, 𑀏𑀯𑀁 𑀑𑀓𑀸𑀲𑀮𑁄𑀓𑁄𑀧𑀺. 𑀢𑀣𑀸 𑀳𑁂𑀲 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑀼𑀢𑀺𑀁𑀲 𑀲𑀢𑀸𑀦𑀺 𑀘 𑀧𑀜𑁆𑀜𑀸𑀲𑀜𑁆𑀘 𑀬𑁄𑀚𑀦𑀸𑀦𑀺. 𑀧𑀭𑀺𑀓𑁆𑀔𑁂𑀧𑀢𑁄 𑁋

𑀲𑀩𑁆𑀩𑀁 ¶ 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲 𑀧𑀭𑀺𑀫𑀡𑁆𑀟𑀮𑀁;

𑀤𑀲 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀘.

𑀢𑀢𑁆𑀣 ¶ 𑁋

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸.

𑀢𑀲𑁆𑀲𑀸𑀬𑁂𑀯 𑀲𑀦𑁆𑀥𑀸𑀭𑀓𑀁 𑁋

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀝𑁆𑀞𑁂𑀯 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀚𑀮𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁.

𑀢𑀲𑁆𑀲𑀸𑀧𑀺 𑀲𑀦𑁆𑀥𑀸𑀭𑀓𑁄 𑁋

𑀦𑀯 𑀲𑀢𑀲𑀳𑀲𑁆𑀲𑀸𑀦𑀺, 𑀫𑀸𑀮𑀼𑀢𑁄 𑀦𑀪𑀫𑀼𑀕𑁆𑀕𑀢𑁄;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀏𑀲𑀸 𑀮𑁄𑀓𑀲𑁆𑀲 𑀲𑀡𑁆𑀞𑀺𑀢𑀺.

𑀏𑀯𑀁 ¶ 𑀲𑀡𑁆𑀞𑀺𑀢𑁂 𑀘𑁂𑀢𑁆𑀣 𑀬𑁄𑀚𑀦𑀸𑀦𑀁 𑁋

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀲𑀺𑀦𑁂𑀭𑀼 𑀧𑀩𑁆𑀩𑀢𑀼𑀢𑁆𑀢𑀫𑁄.

𑀢𑀢𑁄 𑀉𑀧𑀟𑁆𑀠𑀼𑀧𑀟𑁆𑀠𑁂𑀦, 𑀧𑀫𑀸𑀡𑁂𑀦 𑀬𑀣𑀸𑀓𑁆𑀓𑀫𑀁;

𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸 𑀤𑀺𑀩𑁆𑀩𑀸, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑀸.

𑀬𑀼𑀕𑀦𑁆𑀥𑀭𑁄 𑀈𑀲𑀥𑀭𑁄, 𑀓𑀭𑀯𑀻𑀓𑁄 𑀲𑀼𑀤𑀲𑁆𑀲𑀦𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀺 𑀩𑁆𑀭𑀳𑀸.

𑀏𑀢𑁂 ¶ 𑀲𑀢𑁆𑀢 𑀫𑀳𑀸𑀲𑁂𑀮𑀸, 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄;

𑀫𑀳𑀸𑀭𑀸𑀚𑀸𑀦𑀫𑀸𑀯𑀸𑀲𑀸, 𑀤𑁂𑀯𑀬𑀓𑁆𑀔𑀦𑀺𑀲𑁂𑀯𑀺𑀢𑀸.

𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄;

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺 𑀆𑀬𑀢𑀯𑀺𑀢𑁆𑀣𑀢𑁄.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺, 𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄;

𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥-𑀧𑀭𑀺𑀓𑁆𑀔𑁂𑀧𑀸 𑀦𑀕𑀯𑁆𑀳𑀬𑀸.

𑀧𑀜𑁆𑀜𑀸𑀲𑀬𑁄𑀚𑀦𑀓𑁆𑀔𑀦𑁆𑀥-𑀲𑀸𑀔𑀸𑀬𑀸𑀫𑀸 𑀲𑀫𑀦𑁆𑀢𑀢𑁄;

𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸;

𑀚𑀫𑁆𑀩𑀽 𑀬𑀲𑁆𑀲𑀸𑀦𑀼𑀪𑀸𑀯𑁂𑀦, 𑀚𑀫𑁆𑀩𑀼𑀤𑀻𑀧𑁄 𑀧𑀓𑀸𑀲𑀺𑀢𑁄. (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭; 𑀥. 𑀲. 𑀅𑀝𑁆𑀞. 𑁫𑁮𑁪);

𑀬𑀜𑁆𑀘𑁂𑀢𑀁 ¶ 𑀚𑀫𑁆𑀩𑀼𑀬𑀸 𑀧𑀫𑀸𑀡𑀁, 𑀏𑀢𑀤𑁂𑀯 𑀅𑀲𑀼𑀭𑀸𑀦𑀁 𑀘𑀺𑀢𑁆𑀢𑀧𑀸𑀝𑀮𑀺𑀬𑀸, 𑀕𑀭𑀼𑀴𑀸𑀦𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀲𑁆𑀲, 𑀅𑀧𑀭𑀕𑁄𑀬𑀸𑀦𑁂 𑀓𑀤𑀫𑁆𑀩𑀲𑁆𑀲, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀓𑀧𑁆𑀧𑀭𑀼𑀓𑁆𑀔𑀲𑁆𑀲, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀲𑀺𑀭𑀻𑀲𑀲𑁆𑀲, 𑀢𑀸𑀯𑀢𑀺𑀁𑀲𑁂𑀲𑀼 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲𑀸𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀧𑀸𑀝𑀮𑀻 ¶ 𑀲𑀺𑀫𑁆𑀩𑀮𑀻 𑀚𑀫𑁆𑀩𑀽, 𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄;

𑀓𑀤𑀫𑁆𑀩𑁄 𑀓𑀧𑁆𑀧𑀭𑀼𑀓𑁆𑀔𑁄 𑀘, 𑀲𑀺𑀭𑀻𑀲𑁂𑀦 𑀪𑀯𑀢𑀺 𑀲𑀢𑁆𑀢𑀫𑀁.

‘‘𑀤𑁆𑀯𑁂 𑀅𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄;

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀮𑁄𑀓𑀥𑀸𑀢𑀼𑀫𑀬𑀁 𑀞𑀺𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭; 𑀥. 𑀲. 𑀅𑀝𑁆𑀞. 𑁫𑁮𑁪);

𑀢𑀢𑁆𑀣 𑀘𑀦𑁆𑀤𑀫𑀡𑁆𑀟𑀮𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀲𑀬𑁄𑀚𑀦𑀁, 𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀁, 𑀢𑀣𑀸 𑀅𑀲𑀼𑀭𑀪𑀯𑀦𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀚𑀫𑁆𑀩𑀼𑀤𑀻𑀧𑁄 𑀘. 𑀅𑀧𑀭𑀕𑁄𑀬𑀸𑀦𑀁 𑀲𑀢𑁆𑀢𑀲𑀳𑀲𑁆𑀲𑀬𑁄𑀚𑀦𑀁. 𑀢𑀣𑀸 𑀧𑀼𑀩𑁆𑀩𑀯𑀺𑀤𑁂𑀳𑁄. 𑀉𑀢𑁆𑀢𑀭𑀓𑀼𑀭𑀼 𑀅𑀝𑁆𑀞𑀲𑀳𑀲𑁆𑀲𑀬𑁄𑀚𑀦𑁄. 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀫𑀳𑀸𑀤𑀻𑀧𑁄 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀏𑀓𑀸 𑀮𑁄𑀓𑀥𑀸𑀢𑀼. 𑀢𑀤𑀦𑁆𑀢𑀭𑁂𑀲𑀼 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸 ¶ . 𑀏𑀯𑀁 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄 𑀪𑀕𑀯𑀸 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀏𑀯𑀫𑀲𑁆𑀲 𑀑𑀓𑀸𑀲𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄. 𑀏𑀯𑀫𑁆𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽.

𑀅𑀢𑁆𑀢𑀦𑁄 𑀧𑀦 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀢𑀭𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑁄𑀢𑀺 𑀅𑀦𑀼𑀢𑁆𑀢𑀭𑁄. 𑀢𑀣𑀸 𑀳𑁂𑀲 𑀲𑀻𑀮𑀕𑀼𑀡𑁂𑀦𑀧𑀺 𑀲𑀩𑁆𑀩𑀁 𑀮𑁄𑀓𑀁 𑀅𑀪𑀺𑀪𑀯𑀢𑀺 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸… 𑀯𑀺𑀫𑀼𑀢𑁆𑀢𑀺… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀦𑀧𑀺. 𑀲𑀻𑀮𑀕𑀼𑀡𑁂𑀦𑀧𑀺 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀦𑀧𑀺. 𑀬𑀣𑀸𑀳 𑁋 ‘‘𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁭𑁩; 𑀅. 𑀦𑀺. 𑁪.𑁨𑁧) 𑀯𑀺𑀢𑁆𑀣𑀸𑀭𑁄.

𑀏𑀯𑀁 𑀅𑀕𑁆𑀕𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀓𑀸 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫𑀺. 𑀧. 𑁪.𑁫.𑁧𑁧) 𑀕𑀸𑀣𑀸𑀬𑁄 𑀘 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀧𑀼𑀭𑀺𑀲𑀤𑀫𑁆𑀫𑁂 ¶ 𑀲𑀸𑀭𑁂𑀢𑀻𑀢𑀺 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺, 𑀤𑀫𑁂𑀢𑀺 𑀯𑀺𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀲𑀤𑀫𑁆𑀫𑀸𑀢𑀺 𑀅𑀤𑀦𑁆𑀢𑀸 𑀤𑀫𑁂𑀢𑀼𑀁 𑀬𑀼𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀧𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 ¶ . 𑀢𑀣𑀸 𑀳𑀺 𑀪𑀕𑀯𑀢𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀧𑀺 𑀅𑀧𑀮𑀸𑀮𑁄 𑀦𑀸𑀕𑀭𑀸𑀚𑀸 𑀘𑀽𑀴𑁄𑀤𑀭𑁄 𑀫𑀳𑁄𑀤𑀭𑁄 𑀅𑀕𑁆𑀕𑀺𑀲𑀺𑀔𑁄 𑀥𑀽𑀫𑀲𑀺𑀔𑁄 𑀅𑀭𑀯𑀸𑀴𑁄 𑀦𑀸𑀕𑀭𑀸𑀚𑀸 𑀥𑀦𑀧𑀸𑀮𑀓𑁄 𑀳𑀢𑁆𑀣𑀻𑀢𑀺 𑀏𑀯𑀫𑀸𑀤𑀬𑁄 𑀤𑀫𑀺𑀢𑀸 𑀦𑀺𑀩𑁆𑀩𑀺𑀲𑀸 𑀓𑀢𑀸, 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀺𑀢𑀸. 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀲𑀘𑁆𑀘𑀓𑀦𑀺𑀕𑀡𑁆𑀞𑀧𑀼𑀢𑁆𑀢𑀅𑀫𑁆𑀩𑀝𑁆𑀞𑀫𑀸𑀡𑀯𑀧𑁄𑀓𑁆𑀔𑀭𑀲𑀸𑀢𑀺𑀲𑁄𑀡𑀤𑀦𑁆𑀢𑀓𑀽𑀝𑀤𑀦𑁆𑀢𑀸𑀤𑀬𑁄. 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀆𑀴𑀯𑀓𑀲𑀽𑀘𑀺𑀮𑁄𑀫𑀔𑀭𑀮𑁄𑀫𑀬𑀓𑁆𑀔𑀲𑀓𑁆𑀓𑀤𑁂𑀯𑀭𑀸𑀚𑀸𑀤𑀬𑁄 𑀤𑀫𑀺𑀢𑀸 𑀯𑀺𑀦𑀻𑀢𑀸 𑀯𑀺𑀘𑀺𑀢𑁆𑀭𑁂𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀺. ‘‘𑀅𑀳𑀁 𑀔𑁄 𑀓𑁂𑀲𑀺 𑀧𑀼𑀭𑀺𑀲𑀤𑀫𑁆𑀫𑁂 𑀲𑀡𑁆𑀳𑁂𑀦𑀧𑀺 𑀯𑀺𑀦𑁂𑀫𑀺, 𑀨𑀭𑀼𑀲𑁂𑀦𑀧𑀺 𑀯𑀺𑀦𑁂𑀫𑀺, 𑀲𑀡𑁆𑀳𑀨𑀭𑀼𑀲𑁂𑀦𑀧𑀺 𑀯𑀺𑀦𑁂𑀫𑀻’’𑀢𑀺 (𑀅. 𑀦𑀺. 𑁪.𑁧𑁧𑁧) 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀧𑀺 𑀘 𑀪𑀕𑀯𑀸 𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀻𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀘 𑀉𑀢𑁆𑀢𑀭𑀺𑀫𑀕𑁆𑀕𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑁄 𑀤𑀦𑁆𑀢𑁂𑀧𑀺 𑀤𑀫𑁂𑀢𑀺𑀬𑁂𑀯.

𑀅𑀣 𑀯𑀸 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻𑀢𑀺 𑀏𑀓𑀫𑁂𑀯𑀺𑀤𑀁 𑀅𑀢𑁆𑀣𑀧𑀤𑀁. 𑀪𑀕𑀯𑀸 𑀳𑀺 𑀢𑀣𑀸 𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀺, 𑀬𑀣𑀸 𑀏𑀓𑀧𑀮𑁆𑀮𑀗𑁆𑀓𑁂𑀦𑁂𑀯 𑀦𑀺𑀲𑀺𑀦𑁆𑀦𑀸 𑀅𑀝𑁆𑀞 𑀤𑀺𑀲𑀸 𑀅𑀲𑀚𑁆𑀚𑀫𑀸𑀦𑀸 𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀳𑀢𑁆𑀣𑀺𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺 𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀻’’𑀢𑀺 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁩𑁧𑁨) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀯𑀻𑀭𑀺𑀬𑀯𑀸𑀢𑀺 ¶ 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀧𑀸𑀧𑀓𑁂𑀳𑀺 𑀯𑀺𑀭𑀢𑁄. 𑀧𑀳𑀽𑀢𑀺 𑀧𑀪𑀽. 𑀯𑀺𑀲𑀯𑀻𑀢𑀺 𑀧𑀭𑀲𑀦𑁆𑀢𑀸𑀦𑁂 𑀯𑀻𑀭𑀺𑀬𑀼𑀧𑁆𑀧𑀸𑀤𑀓𑁄. 𑀅𑀮𑀫𑀢𑁆𑀢𑁄𑀢𑀺 𑀲𑀫𑀢𑁆𑀣𑀘𑀺𑀢𑁆𑀢𑁄.

𑀯𑀺𑀭𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀯𑀺𑀭𑀢𑀢𑁆𑀢𑀸 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄. 𑀲𑀩𑁆𑀩𑀧𑀸𑀧𑀓𑁂𑀳𑀺 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘𑀸𑀢𑀺 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀢𑀸𑀬 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀞𑀺𑀢𑁄. 𑀯𑀻𑀭𑀺𑀬𑀯𑀸𑀲𑁄𑀢𑀺 𑀯𑀻𑀭𑀺𑀬𑀦𑀺𑀓𑁂𑀢𑁄. 𑀲𑁄 𑀯𑀻𑀭𑀺𑀬𑀯𑀸𑀢𑀺 𑀲𑁄 𑀔𑀻𑀡𑀸𑀲𑀯𑁄 ‘‘𑀯𑀻𑀭𑀺𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀧𑀥𑀸𑀦𑀯𑀸 𑀯𑀻𑀭𑁄 𑀢𑀸𑀤𑀻𑀢𑀺 𑀇𑀫𑀸𑀦𑀺 𑀧𑀦𑀲𑁆𑀲 𑀣𑀼𑀢𑀺𑀯𑀘𑀦𑀸𑀦𑀺. 𑀲𑁄 𑀳𑀺 𑀧𑀥𑀸𑀦𑀯𑀸 𑀫𑀕𑁆𑀕𑀚𑁆𑀛𑀸𑀦𑀧𑀥𑀸𑀦𑁂𑀦, 𑀯𑀻𑀭𑁄 𑀓𑀺𑀮𑁂𑀲𑀸𑀭𑀺𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀢𑀸𑀬, 𑀢𑀸𑀤𑀺 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺 𑀢𑀣𑀸𑀭𑀽𑀧𑁄 ‘‘𑀯𑀻𑀭𑀺𑀬𑀯𑀸’’𑀢𑀺 𑀧𑀯𑀼𑀘𑁆𑀘𑀢𑀺.

𑀢𑁂 𑀓𑀸𑀫𑀓𑀸𑀫𑀺𑀦𑁄𑀢𑀺 𑀏𑀢𑁂 𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸𑀫𑁂 𑀇𑀘𑁆𑀙𑀦𑁆𑀢𑀸. 𑀭𑀸𑀕𑀭𑀸𑀕𑀺𑀦𑁄𑀢𑀺 𑀭𑀸𑀕𑁂𑀦 𑀭𑀜𑁆𑀚𑀺𑀢𑀸. 𑀲𑀜𑁆𑀜𑀸𑀲𑀜𑁆𑀜𑀺𑀦𑁄𑀢𑀺 𑀭𑀸𑀕𑀲𑀜𑁆𑀜𑀸𑀬 𑀲𑀜𑁆𑀜𑀺𑀦𑁄. 𑀦 ¶ 𑀓𑀸𑀫𑁂 𑀓𑀸𑀫𑁂𑀢𑀻𑀢𑀺 𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸𑀫𑁂 𑀦 𑀧𑀢𑁆𑀣𑁂𑀢𑀺. 𑀅𑀓𑀸𑀫𑁄𑀢𑀺 𑀓𑀸𑀫𑁂𑀳𑀺 𑀯𑀺𑀭𑀳𑀺𑀢𑁄. 𑀦𑀺𑀓𑁆𑀓𑀸𑀫𑁄𑀢𑀺 𑀦𑀺𑀓𑁆𑀓𑀦𑁆𑀢𑀓𑀸𑀫𑁄.

𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺 ¶ 𑀢𑀺𑀬𑀤𑁆𑀥𑀕𑀢𑀁 𑀲𑀩𑁆𑀩𑀦𑁂𑀬𑁆𑀬𑀧𑀣𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀽, 𑀢𑀲𑁆𑀲 𑀪𑀸𑀯𑁄 𑀲𑀩𑁆𑀩𑀜𑁆𑀜𑀼𑀢𑀸, 𑀲𑀩𑁆𑀩𑀜𑁆𑀜𑀼𑀢𑀸 𑀏𑀯 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀦𑁂𑀢𑁆𑀢𑀜𑁆𑀘 𑀯𑀸𑀲𑀦𑀸𑀬 𑀲𑀳 𑀓𑀺𑀮𑁂𑀲𑁂 𑀧𑀭𑀸𑀚𑁂𑀢𑁆𑀯𑀸 𑀚𑀺𑀢𑀢𑁆𑀢𑀸 𑀚𑀺𑀦𑀪𑀸𑀯𑁄 𑀘 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀅𑀧𑀼𑀭𑁂 𑀅𑀧𑀘𑁆𑀙𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀦𑁆𑀦𑁄 𑀧𑀼𑀩𑁆𑀩𑀦𑁆𑀢𑀢𑁄 𑀉𑀤𑁆𑀥𑀁 𑀧𑀦𑁆𑀦𑁄𑀢𑀺 𑀉𑀧𑁆𑀧𑀦𑁆𑀦𑁄.

𑁬𑁬. 𑀢𑁂𑀚𑀻 𑀢𑁂𑀚𑀲𑀸𑀢𑀺 𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀢𑁂𑀚𑀲𑀸 𑀅𑀪𑀺𑀪𑀼𑀬𑁆𑀬. 𑀬𑀫𑀳𑀁 𑀯𑀺𑀚𑀜𑁆𑀜𑀁 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀬𑀁 𑀅𑀳𑀁 𑀚𑀸𑀢𑀺𑀚𑀭𑀸𑀬 𑀧𑀳𑀸𑀦𑀪𑀽𑀢𑀁 𑀥𑀫𑁆𑀫𑀁 𑀇𑀥𑁂𑀯 𑀚𑀸𑀦𑁂𑀬𑁆𑀬𑀁.

𑀚𑀕𑀢𑀻𑀢𑀺 𑀧𑀣𑀯𑀻. 𑀲𑀩𑁆𑀩𑀁 𑀆𑀓𑀸𑀲𑀕𑀢𑀦𑁆𑀢𑀺 𑀲𑀓𑀮𑀁 𑀆𑀓𑀸𑀲𑁂 𑀧𑀯𑀢𑁆𑀢𑀁 𑀧𑀢𑁆𑀣𑀝𑀁. 𑀢𑀫𑀕𑀢𑀦𑁆𑀢𑀺 𑀢𑀫𑀫𑁂𑀯 𑀢𑀫𑀕𑀢𑀁 𑀅𑀦𑁆𑀥𑀓𑀸𑀭𑀁 𑀬𑀣𑀸 𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢𑀦𑁆𑀢𑀺. 𑀅𑀪𑀺𑀯𑀺𑀳𑀘𑁆𑀘𑀸𑀢𑀺 𑀦𑀸𑀲𑁂𑀢𑁆𑀯𑀸. 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀓𑀁 𑀅𑀦𑁆𑀥𑀓𑀸𑀭𑀁 𑀧𑀮𑀸𑀧𑁂𑀢𑁆𑀯𑀸. 𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸𑀢𑀺 𑀲𑀽𑀭𑀺𑀬𑀸𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸. 𑀆𑀓𑀸𑀲𑁂𑀢𑀺 𑀅𑀚𑀝𑀸𑀓𑀸𑀲𑁂. 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀅𑀦𑁆𑀢𑀭𑀥𑀸𑀢𑀼𑀲𑀫𑀢𑁆𑀣𑀢𑀼𑀘𑁆𑀙𑁄𑀓𑀸𑀲𑁂. 𑀕𑀕𑀦𑀧𑀣𑁂𑀢𑀺 𑀤𑁂𑀯𑀢𑀸𑀦𑀁 𑀕𑀫𑀦𑀫𑀕𑁆𑀕𑁂 𑀕𑀘𑁆𑀙𑀢𑀺. 𑀲𑀩𑁆𑀩𑀁 𑀅𑀪𑀺𑀲𑀗𑁆𑀔𑀸𑀭𑀲𑀫𑀼𑀤𑀬𑀦𑁆𑀢𑀺 𑀲𑀓𑀮𑀁 𑀓𑀫𑁆𑀫𑀁 𑀲𑀫𑀼𑀤𑀬𑀁 𑀉𑀧𑁆𑀧𑀸𑀤𑀁, 𑀢𑀡𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀢𑀫𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸𑀢𑀺 𑀓𑀺𑀮𑁂𑀲𑀢𑀫𑀲𑀗𑁆𑀔𑀸𑀢𑀁 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀦𑀻𑀳𑀭𑀺𑀢𑁆𑀯𑀸 𑀦𑀸𑀲𑁂𑀢𑁆𑀯𑀸. 𑀜𑀸𑀡𑀸𑀮𑁄𑀓𑀁 𑀧𑀜𑁆𑀜𑀸𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸. 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸𑀢𑀺 ¶ 𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸𑀫𑁂 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬𑀸𑀢𑀺 𑀉𑀧𑀢𑀸𑀧𑀦𑀲𑀗𑁆𑀔𑀸𑀢𑁂 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀚𑀳𑀺𑀢𑁆𑀯𑀸.

𑁬𑁭. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀥𑀫𑁆𑀫𑀁 𑀆𑀘𑀺𑀓𑁆𑀔𑀦𑁆𑀢𑁄 𑀉𑀧𑀭𑀽𑀧𑀭𑀺𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 ‘‘𑀔𑁂𑀫’’𑀦𑁆𑀢𑀺 𑀤𑀺𑀲𑁆𑀯𑀸. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁. 𑀦𑀺𑀭𑀢𑁆𑀢𑀁 𑀯𑀸𑀢𑀺 𑀦𑀺𑀭𑀲𑁆𑀲𑀺𑀢𑀩𑁆𑀩𑀁 𑀯𑀸, 𑀫𑀼𑀜𑁆𑀘𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣𑀸𑀢𑀺 𑀫𑀸 𑀢𑁂 𑀅𑀳𑁄𑀲𑀺. 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁, 𑀢𑀫𑁆𑀧𑀺 𑀢𑁂 𑀫𑀸 𑀯𑀺𑀚𑁆𑀚𑀺𑀢𑁆𑀣.

𑀫𑀼𑀜𑁆𑀘𑀺𑀢𑀩𑁆𑀩𑀦𑁆𑀢𑀺 𑀫𑀼𑀜𑁆𑀘𑀺𑀢𑁆𑀯𑀸 𑀦 𑀧𑀼𑀦 𑀕𑀳𑁂𑀢𑀩𑁆𑀩𑀁. 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀘𑀚𑀺𑀢𑀩𑁆𑀩𑀁. 𑀯𑀺𑀦𑁄𑀤𑁂𑀢𑀩𑁆𑀩𑀦𑁆𑀢𑀺 𑀔𑀺𑀧𑀺𑀢𑀩𑁆𑀩𑀁. 𑀩𑁆𑀬𑀦𑁆𑀢𑀻𑀓𑀸𑀢𑀩𑁆𑀩𑀦𑁆𑀢𑀺 𑀯𑀺𑀕𑀢𑀦𑁆𑀢𑀁 𑀓𑀸𑀢𑀩𑁆𑀩𑀁 ¶ . 𑀅𑀦𑀪𑀸𑀯𑀁 𑀕𑀫𑁂𑀢𑀩𑁆𑀩𑀦𑁆𑀢𑀺 𑀅𑀦𑀼 𑀅𑀦𑀼 𑀅𑀪𑀸𑀯𑀁 𑀕𑀫𑁂𑀢𑀩𑁆𑀩𑀁.

𑁬𑁮-𑁯. 𑀧𑀼𑀩𑁆𑀩𑁂𑀢𑀺 ¶ 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀪𑀕𑀯𑀸 𑀚𑀢𑀼𑀓𑀡𑁆𑀡𑀺𑀁 𑀆𑀮𑀧𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁦. 𑀤𑁆𑀯𑀸𑀤𑀲𑀫𑁂 ¶ 𑀪𑀤𑁆𑀭𑀸𑀯𑀼𑀥𑀲𑀼𑀢𑁆𑀢𑁂 𑁋 𑀑𑀓𑀜𑁆𑀚𑀳𑀦𑁆𑀢𑀺 𑀆𑀮𑀬𑀁 𑀚𑀳𑀁. 𑀢𑀡𑁆𑀳𑀘𑁆𑀙𑀺𑀤𑀦𑁆𑀢𑀺 𑀢𑀡𑁆𑀳𑀸𑀓𑀸𑀬𑀘𑁆𑀙𑀺𑀤𑀁. 𑀅𑀦𑁂𑀚𑀦𑁆𑀢𑀺 𑀮𑁄𑀓𑀥𑀫𑁆𑀫𑁂𑀲𑀼 𑀦𑀺𑀓𑁆𑀓𑀫𑁆𑀧𑀁. 𑀦𑀦𑁆𑀤𑀺𑀜𑁆𑀚𑀳𑀦𑁆𑀢𑀺 𑀅𑀦𑀸𑀕𑀢𑀭𑀽𑀧𑀸𑀤𑀺𑀧𑀢𑁆𑀣𑀦𑀸𑀚𑀳𑀁. 𑀏𑀓𑀸 𑀏𑀯 𑀳𑀺 𑀲𑀸 𑀢𑀡𑁆𑀳𑀸, 𑀣𑀼𑀢𑀺𑀯𑀲𑁂𑀦 𑀇𑀥 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀼𑀢𑁆𑀢𑀸. 𑀓𑀧𑁆𑀧𑀜𑁆𑀚𑀳𑀦𑁆𑀢𑀺 𑀤𑀼𑀯𑀺𑀥𑀁 𑀓𑀧𑁆𑀧𑀚𑀳𑀁. 𑀅𑀪𑀺𑀬𑀸𑀘𑁂𑀢𑀺 𑀅𑀢𑀺𑀯𑀺𑀬 𑀬𑀸𑀘𑀸𑀫𑀺. 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄𑀢𑀺 𑀦𑀸𑀕𑀲𑁆𑀲 𑀢𑀯 𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀢𑁄 𑀧𑀸𑀲𑀸𑀡𑀓𑀘𑁂𑀢𑀺𑀬𑀢𑁄 𑀩𑀳𑀼𑀚𑀦𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑁂 ¶ 𑀉𑀧𑀬𑀼𑀧𑀸𑀤𑀸𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑀕𑀦𑁆𑀢𑁆𑀯𑀸 𑀕𑀳𑀺𑀢𑀸. 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀢𑀺 𑀘𑀺𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑀸. 𑀅𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀢𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀬𑀺𑀢𑀸.

𑁭𑁧. 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸𑀢𑀺 𑀅𑀗𑁆𑀕𑀸𑀤𑀻𑀳𑀺 𑀚𑀦𑀧𑀤𑁂𑀳𑀺 𑀇𑀥 𑀲𑀫𑀸𑀕𑀢𑀸. 𑀯𑀺𑀬𑀸𑀓𑀭𑁄𑀳𑀻𑀢𑀺 𑀥𑀫𑁆𑀫𑀁 𑀤𑁂𑀲𑁂𑀳𑀺.

𑀲𑀗𑁆𑀕𑀢𑀸𑀢𑀺 𑀏𑀢𑁂 𑀔𑀢𑁆𑀢𑀺𑀬𑀸𑀤𑀬𑁄 𑀏𑀓𑀻𑀪𑀽𑀢𑀸. 𑀲𑀫𑀸𑀕𑀢𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀚𑀦𑀧𑀤𑁂𑀳𑀺 𑀆𑀕𑀢𑀸. 𑀲𑀫𑁄𑀳𑀺𑀢𑀸𑀢𑀺 𑀭𑀸𑀲𑀻𑀪𑀽𑀢𑀸. 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀅𑀥𑀺𑀬𑁄𑀕𑀸.

𑁭𑁨. 𑀅𑀣𑀲𑁆𑀲 𑀆𑀲𑀬𑀸𑀦𑀼𑀮𑁄𑀫𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 𑀉𑀧𑀭𑀽𑀧𑀭𑀺𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀆𑀤𑀸𑀦𑀢𑀡𑁆𑀳𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀆𑀤𑀸𑀬𑀺𑀓𑀁 𑀕𑀳𑀡𑀢𑀡𑁆𑀳𑀁, 𑀢𑀡𑁆𑀳𑀼𑀧𑀸𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀻𑀢𑀺 𑀏𑀢𑁂𑀲𑀼 𑀉𑀤𑁆𑀥𑀸𑀤𑀺𑀪𑁂𑀤𑁂𑀲𑀼 𑀬𑀁 𑀬𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀦𑁆𑀢𑀺 ¶ 𑀢𑁂𑀦𑁂𑀯 𑀉𑀧𑀸𑀤𑀸𑀦𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀦𑀺𑀩𑁆𑀩𑀢𑁆𑀢𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀫𑀸𑀭𑁄 𑀢𑀁 𑀲𑀢𑁆𑀢𑀁 𑀅𑀦𑀼𑀕𑀘𑁆𑀙𑀢𑀺.

𑁭𑁩. 𑀢𑀲𑁆𑀫𑀸 𑀧𑀚𑀸𑀦𑀦𑁆𑀢𑀺 𑀢𑀲𑁆𑀫𑀸 𑀏𑀢𑀫𑀸𑀤𑀻𑀦𑀯𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀸 𑀲𑀗𑁆𑀔𑀸𑀭𑁂 𑀧𑀚𑀸𑀦𑀦𑁆𑀢𑁄. 𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀦𑁆𑀢𑀺 𑀆𑀤𑀸𑀢𑀩𑁆𑀩𑀝𑁆𑀞𑁂𑀦 𑀆𑀤𑀸𑀦𑁂𑀲𑀼 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑁂 𑀲𑀩𑁆𑀩𑀮𑁄𑀓𑁂 𑀇𑀫𑀁 𑀧𑀚𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀮𑀕𑁆𑀕𑀁 𑀧𑁂𑀓𑁆𑀔𑀫𑀸𑀦𑁄 ¶ , 𑀆𑀤𑀸𑀦𑀲𑀢𑁆𑀢𑁂 𑀯𑀸 𑀆𑀤𑀸𑀦𑀸𑀪𑀺𑀦𑀺𑀯𑀺𑀝𑁆𑀞𑁂 𑀧𑀼𑀕𑁆𑀕𑀮𑁂 𑀆𑀤𑀸𑀦𑀲𑀗𑁆𑀕𑀳𑁂𑀢𑀼𑀜𑁆𑀘 𑀇𑀫𑀁 𑀧𑀚𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀮𑀕𑁆𑀕𑀁 𑀢𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀫𑀢𑁆𑀣𑀁 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂 𑀦 𑀉𑀧𑀸𑀤𑀺𑀬𑁂𑀣𑀸𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀪𑀤𑁆𑀭𑀸𑀯𑀼𑀥𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀉𑀤𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁪. 𑀢𑁂𑀭𑀲𑀫𑁂 ¶ ¶ 𑀉𑀤𑀬𑀲𑀼𑀢𑁆𑀢𑁂 𑁋 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀧𑀜𑁆𑀜𑀸𑀦𑀼𑀪𑀸𑀯𑀦𑀺𑀚𑁆𑀛𑀸𑀦𑀁 𑀢𑀁 𑀯𑀺𑀫𑁄𑀓𑁆𑀔𑀁 𑀧𑀼𑀘𑁆𑀙𑀢𑀺.

𑀧𑀞𑀫𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑁂𑀦 𑀧𑀜𑁆𑀘𑀗𑁆𑀕𑀺𑀓𑁂𑀦 𑀧𑀞𑀫𑀚𑁆𑀛𑀸𑀦𑁂𑀦 𑀛𑀸𑀬𑀢𑀻𑀢𑀺 𑀛𑀸𑀬𑀻. 𑀤𑀼𑀢𑀺𑀬𑁂𑀦𑀸𑀢𑀺 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑁂𑀦. 𑀢𑀢𑀺𑀬𑁂𑀦𑀸𑀢𑀺 𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑁂𑀦. 𑀘𑀢𑀼𑀢𑁆𑀣𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀫𑁆𑀧𑀬𑀼𑀢𑁆𑀢𑁂𑀦. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻𑀢𑀺 𑀘𑀢𑀼𑀓𑁆𑀓𑀦𑀬𑀧𑀜𑁆𑀘𑀓𑀦𑀬𑁂𑀲𑀼 𑀧𑀞𑀫𑀚𑁆𑀛𑀸𑀦𑁂𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀢𑀻𑀢𑀺 𑀛𑀸𑀬𑀻. 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀦𑀸𑀢𑀺 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂𑀦𑀸𑀢𑀺 𑀤𑀼𑀢𑀺𑀬𑀢𑀢𑀺𑀬𑀸𑀤𑀺𑀅𑀯𑀲𑁂𑀲𑀛𑀸𑀦𑁂𑀦. 𑀲𑀧𑁆𑀧𑀻𑀢𑀺𑀓𑁂𑀦𑀸𑀢𑀺 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀤𑀼𑀓𑀢𑀺𑀓𑀛𑀸𑀦𑁂𑀦. 𑀦𑀺𑀧𑁆𑀧𑀻𑀢𑀺𑀓𑁂𑀦𑀸𑀢𑀺 𑀧𑀻𑀢𑀺𑀯𑀺𑀭𑀳𑀺𑀢𑁂𑀦 𑀢𑀤𑀯𑀲𑁂𑀲𑀛𑀸𑀦𑁂𑀦. 𑀲𑀸𑀢𑀲𑀳𑀕𑀢𑁂𑀦𑀸𑀢𑀺 𑀲𑀼𑀔𑀲𑀳𑀕𑀢𑁂𑀦 𑀢𑀺𑀓𑀘𑀢𑀼𑀓𑁆𑀓𑀛𑀸𑀦𑁂𑀦. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀸𑀢𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑁂𑀦. 𑀲𑀼𑀜𑁆𑀜𑀢𑁂𑀦𑀧𑀻𑀢𑀺 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑁂𑀦. 𑀅𑀦𑀺𑀫𑀺𑀢𑁆𑀢𑁂𑀦𑀧𑀻𑀢𑀺 𑀅𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀥𑀼𑀯𑀦𑀺𑀫𑀺𑀢𑁆𑀢𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀉𑀕𑁆𑀖𑀸𑀝𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑁂𑀦 ¶ 𑀅𑀦𑀺𑀫𑀺𑀢𑁆𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀢𑀻𑀢𑀺 𑀛𑀸𑀬𑀻. 𑀅𑀧𑁆𑀧𑀡𑀺𑀳𑀺𑀢𑁂𑀦𑀧𑀻𑀢𑀺 𑀫𑀕𑁆𑀕𑀸𑀕𑀫𑀦𑀯𑀲𑁂𑀦 𑀧𑀡𑀺𑀥𑀺𑀁 𑀲𑁄𑀥𑁂𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑁂𑀦𑀧𑀺. 𑀮𑁄𑀓𑀺𑀬𑁂𑀦𑀧𑀻𑀢𑀺 𑀮𑁄𑀓𑀺𑀬𑁂𑀦 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑁂𑀦.

𑀮𑁄𑀓𑀼𑀢𑁆𑀢𑀭𑁂𑀦𑀧𑀻𑀢𑀺 𑀢𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀬𑀼𑀢𑁆𑀢𑁂𑀦. 𑀛𑀸𑀦𑀭𑀢𑁄𑀢𑀺 𑀛𑀸𑀦𑁂𑀲𑀼 𑀅𑀪𑀺𑀭𑀢𑁄. 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄𑀢𑀺 𑀏𑀓𑀢𑁆𑀢𑀁 𑀏𑀓𑀻𑀪𑀸𑀯𑀁 𑀅𑀦𑀼𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄. 𑀲𑀤𑀢𑁆𑀣𑀕𑀭𑀼𑀓𑁄𑀢𑀺 𑀲𑀓𑀢𑁆𑀣𑀕𑀭𑀼𑀓𑁄, 𑀓-𑀓𑀸𑀭𑀲𑁆𑀲𑀸𑀬𑀁 𑀤-𑀓𑀸𑀭𑁄 𑀓𑀢𑁄. 𑀲𑀤𑀢𑁆𑀣𑁄𑀢𑀺 𑀘 𑀅𑀭𑀳𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀅𑀢𑁆𑀢𑀽𑀧𑀦𑀺𑀩𑀤𑁆𑀥𑀝𑁆𑀞𑁂𑀦 𑀅𑀢𑁆𑀢𑀸𑀦𑀁 𑀅𑀯𑀺𑀚𑀳𑀦𑀝𑁆𑀞𑁂𑀦 𑀅𑀢𑁆𑀢𑀦𑁄 𑀧𑀭𑀫𑀢𑁆𑀣𑀝𑁆𑀞𑁂𑀦 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀢𑁆𑀢𑀸 𑀲𑀓𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀲𑀓𑀢𑁆𑀣𑀕𑀭𑀼𑀓𑁄, ‘‘𑀦𑀺𑀩𑁆𑀩𑀸𑀦𑀕𑀭𑀼𑀓𑁄’’𑀢𑀺 𑀏𑀓𑁂. 𑀅𑀭𑀚𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄. 𑀯𑀺𑀭𑀚𑁄𑀢𑀺 𑀯𑀺𑀕𑀢𑀓𑀺𑀮𑁂𑀲𑁄. 𑀦𑀺𑀭𑀚𑁄𑀢𑀺 𑀅𑀧𑀦𑀻𑀢𑀓𑀺𑀮𑁂𑀲𑁄 ¶ , ‘‘𑀯𑀺𑀢𑀭𑀚𑁄’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀭𑀚𑀸𑀧𑀕𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀤𑀽𑀭𑀻𑀪𑀽𑀢𑁄. 𑀭𑀚𑀯𑀺𑀧𑁆𑀧𑀳𑀻𑀦𑁄𑀢𑀺 𑀓𑀺𑀮𑁂𑀲𑀧𑁆𑀧𑀳𑀻𑀦𑁄. 𑀭𑀚𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑁄.

𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂𑀢𑀺 𑀧𑀸𑀲𑀸𑀡𑀧𑀺𑀝𑁆𑀞𑁂 𑀧𑀸𑀭𑀸𑀬𑀦𑀲𑀼𑀢𑁆𑀢𑀦𑁆𑀢𑀤𑁂𑀲𑀺𑀢𑀝𑁆𑀞𑀸𑀦𑁂. 𑀲𑀩𑁆𑀩𑁄𑀲𑁆𑀲𑀼𑀓𑁆𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸𑀢𑀺 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀉𑀲𑁆𑀲𑀼𑀓𑁆𑀓𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸, 𑀦𑀸𑀲𑀺𑀢𑀢𑁆𑀢𑀸 𑀆𑀲𑀻𑀦𑁄.

𑀓𑀺𑀘𑁆𑀘𑀸𑀓𑀺𑀘𑁆𑀘𑀦𑁆𑀢𑀺 ¶ ‘‘𑀇𑀤𑀁 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀫𑀦𑀲𑀸 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀓𑀭𑀡𑀻𑀬𑀸𑀓𑀭𑀡𑀻𑀬𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂𑀦 𑀅𑀯𑀲𑁆𑀲𑀁 𑀇𑀤𑀁 𑀓𑀭𑀡𑀻𑀬𑀁, 𑀇𑀤𑀁 𑀦 𑀓𑀭𑀡𑀻𑀬𑀦𑁆𑀢𑀺 𑀏𑀯𑀁 𑀓𑀭𑀡𑀻𑀬𑀸𑀓𑀭𑀡𑀻𑀬𑀁. 𑀧𑀳𑀻𑀦𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀁. 𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀧𑀕𑀼𑀡𑀪𑀸𑀯𑀧𑁆𑀧𑀢𑁆𑀢𑁄.

𑁭𑁫. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀉𑀤𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻, 𑀢𑀲𑁆𑀫𑀸𑀲𑁆𑀲 𑀧𑀝𑀺𑀮𑀤𑁆𑀥𑀛𑀸𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 𑀉𑀧𑀭𑀽𑀧𑀭𑀺𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀦𑁆𑀢𑀺 𑀬𑀤𑀺𑀤𑀁 𑀧𑀞𑀫𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀧𑀳𑀸𑀦𑀁, 𑀢𑀫𑁆𑀧𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀧𑀩𑁆𑀭𑀽𑀫𑀺. 𑀏𑀯𑀁 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀪𑀸𑀯𑁄. 𑀕𑀺𑀮𑀸𑀦𑁄 𑀳𑀺 𑀅𑀓𑀮𑁆𑀮𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀬𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀓𑀮𑁆𑀮𑀓𑁄’’𑀢𑀺 (𑀧𑀸𑀭𑀸. 𑁧𑁫𑁧). 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 ¶ 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁄𑀯 𑀅𑀓𑀫𑁆𑀫𑀜𑁆𑀜𑀢𑀸𑀓𑀸𑀭𑁄. 𑀑𑀮𑀻𑀬𑀦𑀸𑀢𑀺 𑀑𑀮𑀻𑀬𑀦𑀸𑀓𑀸𑀭𑁄. 𑀇𑀭𑀺𑀬𑀸𑀧𑀣𑀺𑀓𑀘𑀺𑀢𑁆𑀢𑀜𑁆𑀳𑀺 𑀇𑀭𑀺𑀬𑀸𑀧𑀣𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺 𑀯𑀺𑀬 𑀔𑀻𑀮𑁂 𑀮𑀕𑁆𑀕𑀺𑀢𑀨𑀸𑀡𑀺𑀢𑀯𑀸𑀭𑀓𑁄 𑀯𑀺𑀬 𑀘 𑀑𑀮𑀻𑀬𑀢𑀺, 𑀢𑀲𑁆𑀲 𑀢𑀁 𑀆𑀓𑀸𑀭𑀁 𑀲𑀦𑁆𑀥𑀸𑀬 ‘‘𑀑𑀮𑀻𑀬𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀁. 𑀮𑀻𑀦𑀸𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀧𑀝𑀺𑀓𑀼𑀝𑀺𑀢𑀁. 𑀇𑀢𑀭𑁂 𑀤𑁆𑀯𑁂 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀣𑀺𑀦𑀦𑁆𑀢𑀺 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀖𑀦𑀪𑀸𑀯𑁂𑀦 𑀞𑀺𑀢𑀁. 𑀣𑀺𑀬𑀦𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀣𑀺𑀬𑀺𑀢𑀪𑀸𑀯𑁄 𑀣𑀺𑀬𑀺𑀢𑀢𑁆𑀢𑀁, 𑀅𑀯𑀺𑀧𑁆𑀨𑀸𑀭𑀯𑀲𑁂𑀦𑁂𑀯 𑀣𑀤𑁆𑀥𑀢𑀸𑀢𑀺 𑀅𑀢𑁆𑀣𑁄 (𑀥. 𑀲. 𑀅𑀝𑁆𑀞. 𑁧𑁧𑁬𑁨).

𑁭𑁬. 𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀉𑀧𑁂𑀓𑁆𑀔𑀸𑀲𑀢𑀻𑀳𑀺 𑀲𑀁𑀲𑀼𑀤𑁆𑀥𑀁. 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀫𑁄𑀓𑁆𑀔𑁂 𑀞𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑀁 ¶ 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀁 𑀯𑀤𑀢𑀺. 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀪𑁂𑀤𑁄 𑀥𑀫𑁆𑀫𑀢𑀓𑁆𑀓𑁄 𑀧𑀼𑀭𑁂𑀚𑀯𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯’’𑀦𑁆𑀢𑀺. 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑀺 𑀏𑀢𑀫𑁂𑀯 𑀘 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀅𑀯𑀺𑀚𑁆𑀚𑀸𑀧𑀪𑁂𑀤𑀦𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀺𑀲𑁆𑀲𑀸𑀬 𑀚𑀸𑀢𑀢𑁆𑀢𑀸 𑀓𑀸𑀭𑀡𑁄𑀧𑀘𑀸𑀭𑁂𑀦 ‘‘𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦’’𑀦𑁆𑀢𑀺 𑀩𑁆𑀭𑀽𑀫𑀻𑀢𑀺.

𑀬𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀸𑀢𑀺 𑀏𑀢𑁆𑀣 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀲𑀫𑀁 𑀧𑀲𑁆𑀲𑀢𑀺 𑀅𑀧𑀓𑁆𑀔𑀧𑀢𑀺𑀢𑀸 𑀳𑀼𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁂𑀓𑁆𑀔𑀦𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀘𑀺𑀢𑁆𑀢𑀲𑀫𑀢𑀸𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀪𑀸𑀯𑁄. 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀊𑀦𑀸𑀢𑀺𑀭𑀺𑀢𑁆𑀢𑀯𑀚𑁆𑀚𑀺𑀢𑀪𑀸𑀯𑁄. 𑀫𑀚𑁆𑀛𑀢𑁆𑀢𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀫𑀚𑁆𑀛𑁂 𑀞𑀺𑀢𑀪𑀸𑀯𑁄.

𑁭𑁭. 𑀏𑀯𑀁 ¶ 𑀅𑀯𑀺𑀚𑁆𑀚𑀸𑀧𑀪𑁂𑀤𑀯𑀘𑀦𑁂𑀦 𑀯𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 ‘‘𑀢𑀁 𑀓𑀺𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦 𑀯𑀼𑀘𑁆𑀘𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀁𑀲𑀼 𑀲𑀁𑀬𑁄𑀚𑀦𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀺𑀁𑀲𑀼 𑀲𑀁𑀬𑁄𑀚𑀦𑁄𑀢𑀺 𑀓𑀺𑀁𑀲𑀁𑀬𑁄𑀚𑀦𑁄. 𑀯𑀺𑀘𑀸𑀭𑀡𑀦𑁆𑀢𑀺 𑀯𑀺𑀘𑀸𑀭𑀡𑀓𑀸𑀭𑀡𑀁. 𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦𑀸𑀢𑀺 𑀓𑀺𑀁𑀦𑀸𑀫𑀓𑀲𑁆𑀲 𑀅𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦.

𑁭𑁮. 𑀅𑀣𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀦𑀦𑁆𑀤𑀺𑀲𑀁𑀬𑁄𑀚𑀦𑁄’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀢𑀓𑁆𑀓𑀲𑁆𑀲𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁄 𑀯𑀺𑀢𑀓𑁆𑀓𑁄 𑀅𑀲𑁆𑀲.

𑁭𑁯. 𑀇𑀤𑀸𑀦𑀺 ¶ 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀲𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁.

𑁮𑁦.

𑀅𑀣𑀲𑁆𑀲 𑀫𑀕𑁆𑀕𑀁 𑀓𑀣𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀚𑁆𑀛𑀢𑁆𑀢𑀜𑁆𑀘𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀯𑀁 𑀲𑀢𑀲𑁆𑀲𑀸𑀢𑀺 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀉𑀤𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀧𑁄𑀲𑀸𑀮𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧. 𑀘𑀼𑀤𑁆𑀤𑀲𑀫𑁂 ¶ 𑀧𑁄𑀲𑀸𑀮𑀲𑀼𑀢𑁆𑀢𑁂 𑁋 𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀻𑀢𑀺 𑀬𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 ‘‘𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀪𑁂𑀤𑀁 𑀅𑀢𑀻𑀢𑀁 𑀆𑀤𑀺𑀲𑀢𑀺.

𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑀽𑀮𑀓𑀁 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁. 𑀏𑀲 𑀦𑀬𑁄 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺𑀆𑀤𑀻𑀲𑀼. 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺𑀆𑀤𑀻𑀲𑀼 𑀧𑀦 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀓𑀧𑁆𑀧𑁄, 𑀢𑀤𑀸 𑀲𑀩𑁆𑀩𑁂𑀲𑀁 𑀩𑁆𑀭𑀳𑁆𑀫𑀮𑁄𑀓𑁂 𑀲𑀦𑁆𑀦𑀺𑀧𑀢𑀦𑀢𑁄. 𑀯𑀟𑁆𑀠𑀫𑀸𑀦𑁄 𑀓𑀧𑁆𑀧𑁄 𑀯𑀺𑀯𑀝𑁆𑀝𑀓𑀧𑁆𑀧𑁄, 𑀢𑀤𑀸 𑀩𑁆𑀭𑀳𑁆𑀫𑀮𑁄𑀓𑀢𑁄 𑀲𑀢𑁆𑀢𑀸𑀦𑀁 𑀯𑀺𑀯𑀝𑁆𑀝𑀦𑀢𑁄. 𑀢𑀢𑁆𑀣 𑀲𑀁𑀯𑀝𑁆𑀝𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀕𑀳𑀺𑀢𑁄 𑀳𑁄𑀢𑀺 𑀢𑀁𑀫𑀽𑀮𑀓𑀢𑁆𑀢𑀸, 𑀯𑀺𑀯𑀝𑁆𑀝𑁂𑀦 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 ¶ 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻’’𑀢𑀺 𑀯𑀼𑀢𑁆𑀢𑀸𑀦𑀺 (𑀅. 𑀦𑀺. 𑁪.𑁧𑁫𑁬), 𑀢𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀲𑀁𑀯𑀝𑁆𑀝𑀓𑀧𑁆𑀧𑁂 𑀯𑀺𑀯𑀝𑁆𑀝𑀓𑀧𑁆𑀧𑁂𑀢𑀺 𑀘 𑀓𑀧𑁆𑀧𑀲𑁆𑀲 𑀅𑀤𑁆𑀥𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂𑀢𑀺 𑀲𑀓𑀮𑀁 𑀓𑀧𑁆𑀧𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀣𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀘𑁂? 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦. 𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀳𑀁 𑀅𑀫𑀼𑀫𑁆𑀳𑀺 𑀪𑀯𑁂 𑀯𑀸 𑀬𑁄𑀦𑀺𑀬𑀸 𑀯𑀸 𑀕𑀢𑀺𑀬𑀸 𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀆𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺 𑀢𑀺𑀲𑁆𑀲𑁄 𑀯𑀸 𑀨𑀼𑀲𑁆𑀲𑁄 𑀯𑀸. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀓𑀘𑁆𑀘𑀸𑀦𑁄 𑀯𑀸 𑀓𑀲𑁆𑀲𑀧𑁄 𑀯𑀸 ¶ . 𑀇𑀤𑀫𑀲𑁆𑀲 𑀅𑀢𑀻𑀢𑀪𑀯𑁂 𑀅𑀢𑁆𑀢𑀦𑁄 𑀦𑀸𑀫𑀕𑁄𑀢𑁆𑀢𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀢𑀦𑁄 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁 𑀯𑀸 𑀮𑀽𑀔𑀧𑀡𑀻𑀢𑀚𑀻𑀯𑀺𑀢𑀪𑀸𑀯𑀁 𑀯𑀸 𑀲𑀼𑀔𑀤𑀼𑀓𑁆𑀔𑀩𑀳𑀼𑀮𑀢𑀁 𑀯𑀸 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀪𑀸𑀯𑀁 𑀯𑀸 𑀅𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑁄, 𑀢𑀫𑁆𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯. 𑀢𑁂𑀦𑀸𑀳 𑁋 ‘‘𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺. 𑀢𑀢𑁆𑀣 𑀏𑀯𑀁𑀯𑀡𑁆𑀡𑁄𑀢𑀺 𑀑𑀤𑀸𑀢𑁄 𑀯𑀸 𑀲𑀸𑀫𑁄 𑀯𑀸. 𑀏𑀯𑀫𑀸𑀳𑀸𑀭𑁄𑀢𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸. 𑀏𑀯𑀁 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀻𑀢𑀺 ¶ 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀝𑀺𑀲𑀁𑀯𑁂𑀤𑀻. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸 𑀘𑀢𑀼𑀭𑀸𑀲𑀻𑀢𑀺 𑀓𑀧𑁆𑀧𑀲𑀳𑀲𑁆𑀲𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸.

𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀲𑁄 𑀅𑀳𑀁 𑀢𑀢𑁄 𑀪𑀯𑀢𑁄 𑀬𑁄𑀦𑀺𑀢𑁄 𑀕𑀢𑀺𑀢𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀢𑁄 𑀲𑀢𑁆𑀢𑀸𑀯𑀸𑀲𑀢𑁄 𑀲𑀢𑁆𑀢𑀦𑀺𑀓𑀸𑀬𑀢𑁄 𑀯𑀸 𑀘𑀼𑀢𑁄 𑀧𑀼𑀦 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀅𑀣 𑀢𑀢𑁆𑀭𑀸𑀧𑀺 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀧𑀼𑀦 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺𑀆𑀤𑀺𑀯𑀼𑀢𑁆𑀢𑀦𑀬𑀫𑁂𑀯.

𑀅𑀧𑀺 𑀘 𑁋 𑀬𑀲𑁆𑀫𑀸 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀅𑀦𑀼𑀲𑁆𑀲𑀭𑀡𑀁. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁. 𑀢𑀲𑁆𑀫𑀸 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀫𑀺𑀲𑁆𑀲𑀸 𑀇𑀥𑀽𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀫𑁂𑀯𑀲𑁆𑀲 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀏𑀯𑀫𑀸𑀤𑀺 𑀧𑀦𑀲𑁆𑀲 𑀢𑀢𑁆𑀭𑀸 𑀇𑀫𑀺𑀲𑁆𑀲𑀸 𑀉𑀧𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑁂 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀦𑀸𑀫𑀕𑁄𑀢𑁆𑀢𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺 𑀲𑁆𑀯𑀸𑀳𑀁 𑀢𑀢𑁄 𑀅𑀦𑀦𑁆𑀢𑀭𑀽𑀧𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀘𑀼𑀢𑁄 𑀇𑀥 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑁄.

𑀇𑀢𑀺𑀢𑀺 𑀏𑀯𑀁. 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀲𑀉𑀤𑁆𑀤𑁂𑀲𑀁, 𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀸𑀓𑀸𑀭𑀁. 𑀦𑀸𑀫𑀕𑁄𑀢𑁆𑀢𑁂𑀦 𑀳𑀺 𑀲𑀢𑁆𑀢𑁄 ‘‘𑀢𑀺𑀲𑁆𑀲𑁄 𑀓𑀲𑁆𑀲𑀧𑁄’’𑀢𑀺 𑀉𑀤𑁆𑀤𑀺𑀲𑀺𑀬𑀢𑀺, 𑀯𑀡𑁆𑀡𑀸𑀤𑀻𑀳𑀺 ‘‘𑀑𑀤𑀸𑀢𑁄 𑀲𑀸𑀫𑁄’’𑀢𑀺 𑀦𑀸𑀦𑀢𑁆𑀢𑀢𑁄 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀦𑀸𑀫𑀕𑁄𑀢𑁆𑀢𑀁 𑀉𑀤𑁆𑀤𑁂𑀲𑁄, 𑀇𑀢𑀭𑁂 𑀆𑀓𑀸𑀭𑀸𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 ¶ 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 ¶ 𑀦𑀺𑀯𑀼𑀝𑁆𑀞𑀓𑁆𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑁄. 𑀦𑀺𑀯𑀼𑀝𑁆𑀞𑀸𑀢𑀺 𑀅𑀚𑁆𑀛𑀸𑀯𑀼𑀝𑁆𑀞𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸, 𑀦𑀺𑀯𑀼𑀝𑁆𑀞𑀥𑀫𑁆𑀫𑀸 𑀯𑀸. 𑀦𑀺𑀯𑀼𑀝𑁆𑀞𑀸𑀢𑀺 𑀕𑁄𑀘𑀭𑀦𑀺𑀯𑀸𑀲𑁂𑀦 𑀦𑀺𑀯𑀼𑀝𑁆𑀞𑀸, 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀧𑀭𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼. 𑀢𑁂 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀆𑀤𑀺𑀲𑀢𑀺 𑀓𑀣𑁂𑀢𑀺. 𑀧𑀭𑁂𑀲𑀁 𑀅𑀢𑀻𑀢𑀦𑁆𑀢𑀺 𑀅𑀜𑁆𑀜𑁂𑀲𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀤𑀺𑀲𑀢𑀺.

𑀫𑀳𑀸𑀧𑀤𑀸𑀦𑀺𑀬𑀲𑀼𑀢𑁆𑀢𑀦𑁆𑀢𑀦𑁆𑀢𑀺 ¶ 𑀫𑀳𑀸𑀧𑀼𑀭𑀺𑀲𑀸𑀦𑀁 𑀅𑀧𑀤𑀸𑀦𑀦𑀺𑀬𑀼𑀢𑁆𑀢𑀁 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁧 𑀆𑀤𑀬𑁄). 𑀫𑀳𑀸𑀲𑀼𑀤𑀲𑁆𑀲𑀦𑀺𑀬𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀁 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁨𑁪𑁧 𑀆𑀤𑀬𑁄). 𑀫𑀳𑀸𑀕𑁄𑀯𑀺𑀦𑁆𑀤𑀺𑀬𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀧𑀤𑀸𑀦𑀦𑀺𑀬𑀼𑀢𑁆𑀢𑀁 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁨𑁯𑁩 𑀆𑀤𑀬𑁄). 𑀫𑀸𑀖𑀤𑁂𑀯𑀺𑀬𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀫𑀖𑀤𑁂𑀯𑀭𑀜𑁆𑀜𑁄 𑀅𑀧𑀤𑀸𑀦𑀦𑀺𑀬𑀼𑀢𑁆𑀢𑀁 𑀫𑀖𑀤𑁂𑀯𑀲𑀼𑀢𑁆𑀢𑀁 (𑀫. 𑀦𑀺. 𑁨.𑁩𑁦𑁮 𑀆𑀤𑀬𑁄). 𑀲𑀢𑀸𑀦𑀼𑀲𑀸𑀭𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁 𑀳𑁄𑀢𑀺.

𑀬𑀸𑀯𑀢𑀓𑀁 𑀆𑀓𑀗𑁆𑀔𑀢𑀻𑀢𑀺 𑀬𑀢𑁆𑀢𑀓𑀁 𑀜𑀸𑀢𑀼𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀜𑀸𑀡𑀁 𑀧𑁂𑀲𑁂𑀢𑀺. 𑀅𑀣𑀲𑁆𑀲 𑀤𑀼𑀩𑁆𑀩𑀮𑀧𑀢𑁆𑀢𑀧𑀼𑀝𑁂 𑀧𑀓𑁆𑀔𑀦𑁆𑀤𑀦𑀸𑀭𑀸𑀥𑁄 𑀯𑀺𑀬 𑀅𑀧𑁆𑀧𑀝𑀺𑀳𑀢𑀁 𑀅𑀦𑀺𑀯𑀸𑀭𑀺𑀢𑀁 𑀜𑀸𑀡𑀁 𑀕𑀘𑁆𑀙𑀢𑀺. 𑀢𑁂𑀦 𑀬𑀸𑀯𑀢𑀓𑀁 𑀆𑀓𑀗𑁆𑀔𑀢𑀺, 𑀢𑀸𑀯𑀢𑀓𑀁 𑀅𑀦𑀼𑀲𑁆𑀲𑀭𑀢𑀺. 𑀩𑁄𑀥𑀺𑀚𑀦𑁆𑀢𑀺 𑀩𑁄𑀥𑀺𑀬𑀸 𑀫𑀽𑀮𑁂 𑀚𑀸𑀢𑀁. 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻𑀢𑀺 𑀢𑁂𑀦 𑀜𑀸𑀡𑁂𑀦 𑀚𑀸𑀢𑀺𑀫𑀽𑀮𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀼𑀦 ‘‘𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 (𑀤𑀻. 𑀦𑀺. 𑁨.𑁩𑁧) 𑀅𑀧𑀭𑀫𑁆𑀧𑀺 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀦𑁆𑀢𑀺 𑀏𑀢𑁆𑀣 𑀉𑀧𑀭𑀺 ‘‘𑀲𑀢𑁆𑀢𑀸𑀦’’𑀦𑁆𑀢𑀺 𑀧𑀤𑀁 𑀇𑀥𑁂𑀯 𑀆𑀳𑀭𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀭𑀸𑀦𑀺 𑀘 𑀅𑀧𑀭𑀸𑀦𑀺 𑀘 ‘‘𑀧𑀭𑀸𑀧𑀭𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀦𑁆𑀥𑀺𑀯𑀲𑁂𑀦 𑀭𑁄-𑀓𑀸𑀭𑀁 𑀓𑀢𑁆𑀯𑀸 ‘‘𑀧𑀭𑁄𑀧𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑁄𑀧𑀭𑀸𑀦𑀁 𑀪𑀸𑀯𑁄 𑀧𑀭𑁄𑀧𑀭𑀺𑀬𑀁, 𑀧𑀭𑁄𑀧𑀭𑀺𑀬𑀫𑁂𑀯 𑀧𑀭𑁄𑀧𑀭𑀺𑀬𑀢𑁆𑀢𑀁, 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀺𑀬𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀲𑁆𑀲 𑀜𑀸𑀡𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀢𑁆𑀢𑀫𑀸𑀦𑀼𑀢𑁆𑀢𑀫𑀪𑀸𑀯𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀦𑁆𑀤𑁆𑀭𑀺𑀬𑀯𑀭𑁄𑀯𑀭𑀺𑀬𑀢𑁆𑀢𑀜𑀸𑀡’’𑀦𑁆𑀢𑀺𑀧𑀺 𑀧𑀸𑀞𑁄, 𑀯𑀭𑀸𑀦𑀺 𑀘 𑀅𑀯𑀭𑀸𑀦𑀺 𑀘 𑀯𑀭𑁄𑀯𑀭𑀺𑀬𑀸𑀦𑀺, 𑀯𑀭𑁄𑀯𑀭𑀺𑀬𑀸𑀦𑀁 𑀪𑀸𑀯𑁄 𑀯𑀭𑁄𑀯𑀭𑀺𑀬𑀢𑁆𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀯𑀭𑀺𑀬𑀸𑀦𑀻𑀢𑀺 𑀘 𑀉𑀢𑁆𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑁋 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 ¶ 𑀘 𑀧𑀭𑁄𑀧𑀭𑀸𑀦𑀺, 𑀢𑁂𑀲𑀁 𑀪𑀸𑀯𑁄 𑀧𑀭𑁄𑀧𑀭𑀺𑀬𑀢𑁆𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀑𑀧𑀭𑀸𑀦𑀻𑀢𑀺 𑀘 𑀑𑀭𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀮𑀸𑀫𑀓𑀸𑀦𑀻𑀢𑀺 𑀅𑀢𑁆𑀣𑁄 ‘‘𑀧𑀭𑁄𑀧𑀭𑀸𑀬𑀲𑁆𑀲 𑀲𑀫𑁂𑀘𑁆𑀘 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫; 𑀲𑀼. 𑀦𑀺. 𑁪𑁭𑁯) 𑀯𑀺𑀬. ‘‘𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀜𑀸𑀡’’𑀦𑁆𑀢𑀺 𑀪𑀼𑀫𑁆𑀫𑀯𑀘𑀦𑁂𑀦𑀧𑀺 𑀧𑀸𑀞𑁄 (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁬𑁮).

𑀢𑀣𑀸𑀕𑀢𑀲𑁆𑀲𑀸𑀢𑀺 ¶ ¶ 𑀬𑀣𑀸 𑀯𑀺𑀧𑀲𑁆𑀲𑀺𑀆𑀤𑀬𑁄 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀆𑀕𑀢𑀸, 𑀢𑀣𑀸 𑀆𑀕𑀢𑀲𑁆𑀲. 𑀬𑀣𑀸 𑀘 𑀢𑁂 𑀕𑀢𑀸, 𑀢𑀣𑀸 𑀕𑀢𑀲𑁆𑀲. 𑀢𑀣𑀸𑀕𑀢𑀩𑀮𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀁. 𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀁 𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀁, 𑀢𑀣𑀸 𑀆𑀕𑀢𑀩𑀮𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀢𑀣𑀸𑀕𑀢𑀲𑁆𑀲 𑀩𑀮𑀁 𑀓𑀸𑀬𑀩𑀮𑀜𑁆𑀘 𑀜𑀸𑀡𑀩𑀮𑀜𑁆𑀘. 𑀢𑁂𑀲𑀼 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁨𑁨; 𑀅. 𑀦𑀺. 𑀅𑀝𑁆𑀞. 𑁩.𑁧𑁦.𑁨𑁧; 𑀯𑀺𑀪. 𑀅𑀝𑁆𑀞. 𑁭𑁬𑁦; 𑀉𑀤𑀸. 𑀅𑀝𑁆𑀞. 𑁭𑁫; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪);

𑀬𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑁆𑀕𑀡𑀦𑀸𑀬 𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀲𑁆𑀲, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺, 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁. 𑀜𑀸𑀡𑀩𑀮𑀁 𑀧𑀦 𑀫𑀳𑀸𑀲𑀻𑀳𑀦𑀸𑀤𑁂 (𑀫. 𑀦𑀺. 𑁧.𑁧𑁪𑁬 𑀆𑀤𑀬𑁄) 𑀆𑀕𑀢𑀁 𑀤𑀲𑀩𑀮𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀲𑀁𑀬𑀼𑀢𑁆𑀢𑀓𑁂 (𑀲𑀁. 𑀦𑀺. 𑁨.𑁩𑁩-𑁩𑁪) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻𑀢𑀺 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀅𑀦𑁂𑀓𑀸𑀦𑀺 𑀜𑀸𑀡𑀲𑀳𑀲𑁆𑀲𑀸𑀦𑀺, 𑀏𑀢𑀁 𑀜𑀸𑀡𑀩𑀮𑀁 𑀦𑀸𑀫. 𑀇𑀥𑀸𑀧𑀺 𑀜𑀸𑀡𑀩𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀜𑀸𑀡𑀜𑁆𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀣𑀫𑁆𑀪𑀓𑀝𑁆𑀞𑁂𑀦 𑀘 𑀩𑀮𑀦𑁆𑀢𑀺 (𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪) 𑀯𑀼𑀢𑁆𑀢𑀁.

𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑁂 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀭𑀽𑀧𑀸𑀤𑀻𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑁂𑀦 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸𑀢𑀺 𑀲𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀽𑀧𑁂 𑀔𑁄, 𑀭𑀸𑀥, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄, 𑀢𑀲𑁆𑀫𑀸 ‘𑀲𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀺 ¶ . 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄, 𑀢𑀲𑁆𑀫𑀸 ‘𑀲𑀢𑁆𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁬𑁧; 𑀫𑀳𑀸𑀦𑀺. 𑁭).

𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀅𑀢𑁆𑀣𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 ‘‘𑀦𑀸𑀫𑀫𑀢𑁆𑀢𑀫𑁂𑀢’’𑀦𑁆𑀢𑀺 𑀇𑀘𑁆𑀙𑀦𑁆𑀢𑀺. 𑀬𑁂𑀧𑀺 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑀺, 𑀢𑁂 𑀲𑀢𑁆𑀯𑀬𑁄𑀕𑁂𑀦 𑀲𑀢𑁆𑀢𑀸𑀢𑀺 𑀇𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀦𑁆𑀢𑀺 𑀦𑀺𑀲𑁆𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄 ¶ , 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀸 𑀓𑀸𑀫𑀸𑀤𑀻𑀳𑀺 𑀦𑁂𑀓𑁆𑀔𑀫𑁆𑀫𑀸𑀤𑀻𑀳𑀺 𑀯𑀸 𑀧𑀭𑀺𑀪𑀸𑀯𑀺𑀢𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀺 𑀅𑀦𑀼𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀣𑀸𑀫𑀕𑀢𑀸𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀆𑀲𑀬𑁄 𑀘 𑀅𑀦𑀼𑀲𑀬𑁄 ¶ 𑀘 𑀆𑀲𑀬𑀸𑀦𑀼𑀲𑀬𑁄. 𑀚𑀸𑀢𑀺𑀕𑁆𑀕𑀳𑀡𑁂𑀦 𑀘 𑀤𑁆𑀯𑀦𑁆𑀤𑀲𑀫𑀸𑀲𑀯𑀲𑁂𑀦 𑀘 𑀏𑀓𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀬𑁄 𑀆𑀲𑀬𑀸𑀦𑀼𑀲𑀬𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀉𑀤𑁆𑀤𑁂𑀲𑁂 𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀻𑀲𑀼 𑀜𑀸𑀡𑀸𑀦𑀺 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀆𑀲𑀬𑀸𑀦𑀼𑀲𑀬𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀫𑀓𑀧𑀸𑀝𑀺𑀳𑀻𑀭𑁂 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀅𑀕𑁆𑀕𑀺𑀓𑁆𑀔𑀦𑁆𑀥𑀉𑀤𑀓𑀥𑀸𑀭𑀸𑀤𑀻𑀦𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀲𑀓𑀺𑀁𑀬𑁂𑀯 𑀧𑀯𑀢𑁆𑀢𑀺𑀢𑁄 𑀬𑀫𑀓𑀁, 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀳𑀭𑀡𑀢𑁄 𑀧𑀸𑀝𑀺𑀳𑀻𑀭𑀁, 𑀬𑀫𑀓𑀜𑁆𑀘 𑀢𑀁 𑀧𑀸𑀝𑀺𑀳𑀻𑀭𑀜𑁆𑀘𑀸𑀢𑀺 𑀬𑀫𑀓𑀧𑀸𑀝𑀺𑀳𑀻𑀭𑀁.

𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀦𑀸𑀢𑀺 𑀯𑀸 𑀧𑀭𑀤𑀼𑀓𑁆𑀔𑀁 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀓𑀭𑀼𑀡𑀸, 𑀓𑀺𑀭𑀻𑀬𑀢𑀺 𑀯𑀸 𑀤𑀼𑀓𑁆𑀔𑀺𑀢𑁂𑀲𑀼 𑀨𑀭𑀡𑀯𑀲𑁂𑀦 𑀧𑀲𑀸𑀭𑀻𑀬𑀢𑀻𑀢𑀺 𑀓𑀭𑀼𑀡𑀸, 𑀨𑀭𑀡𑀓𑀫𑁆𑀫𑀯𑀲𑁂𑀦 𑀓𑀫𑁆𑀫𑀕𑀼𑀡𑀯𑀲𑁂𑀦 𑀘 𑀫𑀳𑀢𑀻 𑀓𑀭𑀼𑀡𑀸 𑀫𑀳𑀸𑀓𑀭𑀼𑀡𑀸, 𑀲𑀫𑀸𑀧𑀚𑁆𑀚𑀦𑁆𑀢𑀺 𑀏𑀢𑀁 𑀫𑀳𑀸𑀓𑀸𑀭𑀼𑀡𑀺𑀓𑀸𑀢𑀺 𑀲𑀫𑀸𑀧𑀢𑁆𑀢𑀺, 𑀫𑀳𑀸𑀓𑀭𑀼𑀡𑀸 𑀘 𑀲𑀸 𑀲𑀫𑀸𑀧𑀢𑁆𑀢𑀺 𑀘𑀸𑀢𑀺 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺, 𑀢𑀲𑁆𑀲𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀁. 𑀢𑀁 𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀜𑀸𑀡𑀁.

𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀦𑁂𑀬𑁆𑀬𑀧𑀣𑀧𑁆𑀧𑀪𑁂𑀤𑀁 𑀲𑀩𑁆𑀩𑀁 𑀅𑀜𑁆𑀜𑀸𑀲𑀻𑀢𑀺 𑀲𑀩𑁆𑀩𑀜𑁆𑀜𑀽, 𑀲𑀩𑁆𑀩𑀜𑁆𑀜𑀼𑀲𑁆𑀲 𑀪𑀸𑀯𑁄 𑀲𑀩𑁆𑀩𑀜𑁆𑀜𑀼𑀢𑀸, 𑀲𑀩𑁆𑀩𑀜𑁆𑀜𑀼𑀢𑀸 𑀏𑀯 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀸𑀜𑀸𑀡𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑀢𑀸𑀲𑀗𑁆𑀔𑀢𑀸𑀤𑀺𑀪𑁂𑀤𑀸 𑀲𑀩𑁆𑀩𑀥𑀫𑁆𑀫𑀸 𑀳𑀺 𑀲𑀗𑁆𑀔𑀸𑀭𑁄 𑀯𑀺𑀓𑀸𑀭𑁄 𑀮𑀓𑁆𑀔𑀡𑀁 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀢𑁆𑀢𑀻𑀢𑀺 𑀧𑀜𑁆𑀘𑁂𑀯 𑀦𑁂𑀬𑁆𑀬𑀧𑀣𑀸 𑀳𑁄𑀦𑁆𑀢𑀺. 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀭𑀡𑀦𑁆𑀢𑀺 𑀢𑀤𑁂𑀯 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺 (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁬𑁮).

𑀲𑀩𑁆𑀩𑀢𑁆𑀣 ¶ 𑀅𑀲𑀗𑁆𑀕𑀫𑀧𑁆𑀧𑀝𑀺𑀳𑀢𑀫𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀏𑀢𑁆𑀣 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀲𑀗𑁆𑀕𑀁 𑀲𑀗𑁆𑀕𑀯𑀺𑀭𑀳𑀺𑀢𑀁 𑀅𑀧𑁆𑀧𑀝𑀺𑀳𑀢𑀁 𑀧𑀝𑀺𑀧𑀓𑁆𑀔𑀯𑀺𑀭𑀳𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀆𑀯𑀭𑀡𑀯𑀺𑀭𑀳𑀺𑀢𑀁 𑀜𑀸𑀡𑀁.

𑀅𑀦𑀸𑀕𑀢𑀫𑁆𑀧𑀺 𑀆𑀤𑀺𑀲𑀢𑀻𑀢𑀺 𑁋

‘‘𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀢𑀬𑁄 𑀆𑀲𑀺𑀁𑀲𑀼 𑀦𑀸𑀬𑀓𑀸;

𑀅𑀳𑀫𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀫𑁂𑀢𑁆𑀢𑁂𑀬𑁆𑀬𑁄 𑀘𑀸𑀧𑀺 𑀳𑁂𑀲𑁆𑀲𑀢𑀻’’𑀢𑀺. 𑀘 𑁋

‘‘𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 ¶ ¶ , 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑁂𑀲𑀼 𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’’𑀢𑀺 𑀘 (𑀤𑀻. 𑀦𑀺. 𑁩.𑁧𑁦𑁭) 𑁋

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸 𑀬𑁄 𑀲𑁄 𑀬𑀽𑀧𑁄 𑀭𑀜𑁆𑀜𑀸 𑀫𑀳𑀸𑀧𑀦𑀸𑀤𑁂𑀦 𑀓𑀸𑀭𑀸𑀧𑀺𑀢𑁄, 𑀢𑀁 𑀬𑀽𑀧𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀚𑁆𑀛𑀸𑀯𑀲𑀺𑀢𑁆𑀯𑀸 𑀢𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀤𑀸𑀦𑀁 𑀤𑀢𑁆𑀯𑀸 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀘 (𑀤𑀻. 𑀦𑀺. 𑁩.𑁧𑁦𑁮) 𑁋

‘‘𑀅𑀦𑀸𑀕𑀢𑁂 𑀅𑀝𑁆𑀞𑀺𑀲𑁆𑀲𑀭𑁄 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 (𑀫𑀺. 𑀧. 𑁪.𑁧.𑁩) 𑀘, ‘‘𑀲𑀼𑀫𑀦𑀺𑀲𑁆𑀲𑀭𑁄 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘 𑁋

𑀆𑀤𑀺𑀦𑀸 𑀦𑀬𑁂𑀦 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀅𑀦𑀸𑀕𑀢𑀁 𑀆𑀘𑀺𑀓𑁆𑀔𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀆𑀤𑀺𑀲𑀢𑀻𑀢𑀺 𑀇𑀤𑀁 𑀧𑀸𑀓𑀝𑀫𑁂𑀯.

𑁮𑁨. 𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲𑀸𑀢𑀺 𑀲𑀫𑀢𑀺𑀓𑁆𑀓𑀦𑁆𑀢𑀭𑀽𑀧𑀲𑀜𑁆𑀜𑀺𑀲𑁆𑀲. 𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀩𑁆𑀩𑀭𑀽𑀧𑀓𑀸𑀬𑀧𑀳𑀸𑀬𑀺𑀦𑁄, 𑀧𑀳𑀻𑀦𑀭𑀽𑀧𑀪𑀯𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄𑀢𑀺 𑀯𑀺𑀜𑁆𑀜𑀸𑀡𑀸𑀪𑀸𑀯𑀤𑀲𑁆𑀲𑀦𑁂𑀦 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀲𑁆𑀲𑀢𑁄, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀻𑀢𑀺 𑀲𑀓𑁆𑀓𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀁 𑀧𑀼𑀘𑁆𑀙𑀸𑀫𑀺, 𑀓𑀻𑀤𑀺𑀲𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺. 𑀓𑀣𑀁 𑀦𑁂𑀬𑁆𑀬𑀸𑀢𑀺 𑀓𑀣𑀜𑁆𑀘 𑀲𑁄 𑀦𑁂𑀢𑀩𑁆𑀩𑁄, 𑀓𑀣𑀫𑀲𑁆𑀲 𑀉𑀢𑁆𑀢𑀭𑀺𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺.

𑀓𑀢𑀫𑀸 ¶ 𑀭𑀽𑀧𑀲𑀜𑁆𑀜𑀸𑀢𑀺 𑀏𑀢𑁆𑀣 𑀭𑀽𑀧𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀛𑀸𑀦𑀜𑁆𑀘𑁂𑀯 𑀢𑀤𑀸𑀭𑀫𑁆𑀫𑀡𑀜𑁆𑀘. 𑀭𑀽𑀧𑀸𑀯𑀘𑀭𑀛𑀸𑀦𑀫𑁆𑀧𑀺 𑀳𑀺 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁪𑁮; 𑀧𑀝𑀺. 𑀫. 𑁧.𑁨𑁦𑁯). 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁨𑁩). 𑀢𑀲𑁆𑀫𑀸 𑀇𑀥 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀭𑀽𑀧𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀸, 𑀭𑀽𑀧𑀫𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀧𑀜𑁆𑀘𑀤𑀲𑀛𑀸𑀦𑀲𑀗𑁆𑀔𑀸𑀢𑀸 𑀭𑀽𑀧𑀲𑀜𑁆𑀜𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸 ¶ . 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 ¶ 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀢𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲. 𑀉𑀧𑀧𑀦𑁆𑀦𑀲𑁆𑀲 𑀯𑀸𑀢𑀺 𑀯𑀺𑀧𑀸𑀓𑀚𑁆𑀛𑀸𑀦𑀯𑀲𑁂𑀦 𑀢𑀲𑁆𑀫𑀺𑀁 𑀪𑀯𑁂 𑀉𑀧𑀧𑀦𑁆𑀦𑀲𑁆𑀲. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀓𑀺𑀭𑀺𑀬𑀸𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀼𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀦𑀺. 𑀧𑀝𑀺𑀮𑀤𑁆𑀥𑀲𑁆𑀲𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀞𑀺𑀢𑀲𑁆𑀲. 𑀭𑀽𑀧𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀦𑁆𑀢𑀻𑀢𑀺 𑀭𑀽𑀧𑀲𑀜𑁆𑀜𑀸 𑀅𑀧𑀕𑀢𑀸 𑀳𑁄𑀦𑁆𑀢𑀺. 𑀯𑀺𑀕𑀢𑀸𑀢𑀺 𑀯𑀺𑀦𑀸𑀲𑀺𑀢𑀸. ‘‘𑀅𑀪𑀸𑀯𑀺𑀢𑀸’’𑀢𑀺𑀧𑀺 𑀧𑀸𑀞𑁄, 𑀲𑀼𑀦𑁆𑀤𑀭𑁄.

𑀢𑀤𑀗𑁆𑀕𑀲𑀫𑀢𑀺𑀓𑁆𑀓𑀫𑀸𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀅𑀢𑀺𑀓𑁆𑀓𑀫𑁂𑀦. 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑁄𑀢𑀺 𑀅𑀭𑀽𑀧𑀚𑁆𑀛𑀸𑀦𑀧𑀝𑀺𑀮𑀸𑀪𑁂𑀦 𑀯𑀺𑀓𑁆𑀔𑀫𑁆𑀪𑀦𑁂𑀦 𑀧𑀳𑀻𑀦𑁄. 𑀢𑀲𑁆𑀲 𑀭𑀽𑀧𑀓𑀸𑀬𑁄𑀢𑀺 𑀢𑀲𑁆𑀲 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀦𑁄 𑀅𑀭𑀽𑀧𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀯𑀘𑀭𑀓𑀸𑀬𑁄.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀅𑀦𑁆𑀢𑀫𑀲𑁄 𑀲𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀜𑁆𑀘𑀦𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀸𑀧𑀕𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀆𑀓𑀺𑀜𑁆𑀘𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀇𑀫𑀺𑀲𑁆𑀲𑀸 𑀲𑀜𑁆𑀜𑀸𑀬 𑀆𑀬𑀢𑀦𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀧𑀕𑀫𑀸𑀭𑀫𑁆𑀫𑀡𑀲𑁆𑀲 𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀢𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀢𑁄𑀓𑀸𑀭𑀻 𑀳𑀼𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸. 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀲𑀢𑁄𑀓𑀸𑀭𑀻 𑀳𑀼𑀢𑁆𑀯𑀸 𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀬. 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀁 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀁 𑀫𑀳𑀕𑁆𑀕𑀢𑀯𑀺𑀜𑁆𑀜𑀸𑀡𑀁. 𑀅𑀪𑀸𑀯𑁂𑀢𑀻𑀢𑀺 𑀯𑀺𑀦𑀸𑀲𑁂𑀢𑀺. 𑀯𑀺𑀪𑀸𑀯𑁂𑀢𑀻𑀢𑀺 𑀯𑀺𑀯𑀺𑀥𑀸 𑀦𑀸𑀲𑁂𑀢𑀺. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺.

𑀓𑀣𑀁 ¶ 𑀲𑁄 𑀦𑁂𑀢𑀩𑁆𑀩𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀓𑁂𑀦𑀧𑁆𑀧𑀓𑀸𑀭𑁂𑀦 𑀚𑀸𑀦𑀺𑀢𑀩𑁆𑀩𑁄. 𑀯𑀺𑀦𑁂𑀢𑀩𑁆𑀩𑁄𑀢𑀺 𑀦𑀸𑀦𑀸𑀯𑀺𑀥𑁂𑀦 𑀚𑀸𑀦𑀺𑀢𑀩𑁆𑀩𑁄. 𑀅𑀦𑀼𑀦𑁂𑀢𑀩𑁆𑀩𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑁂𑀦 𑀓𑀣𑀁 𑀕𑀫𑀬𑀺𑀢𑀩𑁆𑀩𑁄.

𑁮𑁩.

𑀅𑀣𑀲𑁆𑀲 𑀪𑀕𑀯𑀸 𑀢𑀸𑀤𑀺𑀲𑁂 𑀧𑀼𑀕𑁆𑀕𑀮𑁂 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀁 𑀧𑀓𑀸𑀲𑁂𑀢𑁆𑀯𑀸 𑀢𑀁 𑀜𑀸𑀡𑀁 𑀩𑁆𑀬𑀸𑀓𑀸𑀢𑀼𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸, 𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀢𑀲𑁆𑀲𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢𑀸𑀢𑀺 𑀏𑀯𑀁 𑀲𑀩𑁆𑀩𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀅𑀪𑀺𑀚𑀸𑀦𑀦𑁆𑀢𑁄 𑀢𑀣𑀸𑀕𑀢𑁄. 𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀻𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀢𑀺𑀝𑁆𑀞𑀫𑁂𑀢𑀁 𑀧𑀼𑀕𑁆𑀕𑀮𑀁 𑀚𑀸𑀦𑀸𑀢𑀺 ¶ 𑁋 ‘‘𑀆𑀬𑀢𑀺𑀁 𑀅𑀬𑀁 𑀏𑀯𑀁𑀕𑀢𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀥𑀺𑀫𑀼𑀢𑁆𑀢𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀤𑀻𑀲𑀼 𑀅𑀥𑀺𑀫𑀼𑀢𑁆𑀢𑀁. 𑀢𑀧𑁆𑀧𑀭𑀸𑀬𑀡𑀦𑁆𑀢𑀺 𑀢𑀫𑁆𑀫𑀬𑀁.

𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 ¶ 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀞𑀸𑀦𑀸𑀦𑀺 𑀲𑀯𑀺𑀜𑁆𑀜𑀸𑀡𑀓𑀸 𑀔𑀦𑁆𑀥𑀸 𑀏𑀯. 𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄 𑀬𑀣𑀸 𑀫𑀦𑀼𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀫𑀸𑀡𑁂𑀲𑀼𑀧𑀺 𑀳𑀺 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀤𑁆𑀯𑁂𑀧𑀺 𑀏𑀓𑀲𑀤𑀺𑀲𑀸 𑀦𑀢𑁆𑀣𑀺. 𑀬𑁂𑀧𑀺 𑀳𑀺 𑀓𑀢𑁆𑀣𑀘𑀺 𑀬𑀫𑀓𑀪𑀸𑀢𑀭𑁄 𑀯𑀡𑁆𑀡𑁂𑀦 𑀯𑀸 𑀲𑀡𑁆𑀞𑀸𑀦𑁂𑀦 𑀯𑀸 𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂𑀧𑀺 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀤𑀻𑀳𑀺 𑀯𑀺𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 ‘‘𑀦𑀸𑀦𑀢𑁆𑀢𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀸. 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀦𑁂𑀲𑀁 𑀢𑀺𑀳𑁂𑀢𑀼𑀓𑀸𑀧𑀺 𑀤𑀼𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺 𑀳𑁄𑀢𑀺. 𑀢𑀲𑁆𑀫𑀸 ‘‘𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺 𑀯𑀼𑀢𑁆𑀢𑀸. 𑀏𑀓𑀘𑁆𑀘𑁂 𑀘 𑀤𑁂𑀯𑀸𑀢𑀺 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀢𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀓𑀸𑀬𑁄 𑀦𑀻𑀮𑁄 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀧𑀻𑀢𑀓𑀸𑀤𑀺𑀯𑀡𑁆𑀡𑁄. 𑀲𑀜𑁆𑀜𑀸 𑀧𑀦 𑀦𑁂𑀲𑀁 𑀢𑀺𑀳𑁂𑀢𑀼𑀓𑀸𑀧𑀺 𑀤𑀼𑀳𑁂𑀢𑀼𑀓𑀸𑀧𑀺 𑀳𑁄𑀢𑀺, 𑀅𑀳𑁂𑀢𑀼𑀓𑀸 𑀦 𑀳𑁄𑀢𑀺. 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀸 𑀧𑀼𑀦𑀩𑁆𑀩𑀲𑀼𑀫𑀸𑀢𑀸 𑀬𑀓𑁆𑀔𑀺𑀦𑀻 𑀧𑀺𑀬𑀗𑁆𑀓𑀭𑀫𑀸𑀢𑀸 𑀨𑀼𑀲𑁆𑀲𑀫𑀺𑀢𑁆𑀢𑀸 𑀥𑀫𑁆𑀫𑀕𑀼𑀢𑁆𑀢𑀸𑀢𑀺 𑀏𑀯𑀫𑀸𑀤𑀬𑁄 𑀅𑀜𑁆𑀜𑁂 𑀘 𑀯𑁂𑀫𑀸𑀦𑀺𑀓𑀸 𑀧𑁂𑀢𑀸. 𑀏𑀢𑁂𑀲𑀜𑁆𑀳𑀺 𑀑𑀤𑀸𑀢𑀓𑀸𑀴𑀫𑀗𑁆𑀕𑀼𑀭𑀘𑁆𑀙𑀯𑀺𑀲𑀸𑀫𑀯𑀡𑁆𑀡𑀸𑀤𑀺𑀯𑀲𑁂𑀦 𑀘𑁂𑀯 𑀓𑀺𑀲𑀣𑀽𑀮𑀭𑀲𑁆𑀲𑀤𑀻𑀖𑀯𑀲𑁂𑀦 𑀘 𑀓𑀸𑀬𑁄 𑀦𑀸𑀦𑀸 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀺𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀲𑀜𑁆𑀜𑀸𑀧𑀺. 𑀢𑁂 𑀧𑀦 𑀤𑁂𑀯𑀸 𑀯𑀺𑀬 𑀦 𑀫𑀳𑁂𑀲𑀓𑁆𑀔𑀸, 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀧𑁆𑀧𑁂𑀲𑀓𑁆𑀔𑀸 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑀸 𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑀺𑀳𑀭𑀦𑁆𑀢𑀺. 𑀏𑀓𑀘𑁆𑀘𑁂 𑀓𑀸𑀴𑀧𑀓𑁆𑀔𑁂 𑀤𑀼𑀓𑁆𑀔𑀺𑀢𑀸 𑀚𑀼𑀡𑁆𑀳𑀧𑀓𑁆𑀔𑁂 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀬𑁂 𑀧𑀦𑁂𑀢𑁆𑀣 𑀢𑀺𑀳𑁂𑀢𑀼𑀓𑀸, 𑀢𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄𑀧𑀺 𑀳𑁄𑀢𑀺 𑀧𑀺𑀬𑀗𑁆𑀓𑀭𑀫𑀸𑀢𑀸𑀤𑀻𑀦𑀁 𑀯𑀺𑀬.

𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀢𑀺 ¶ 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀧𑀦 𑀧𑀭𑀺𑀢𑁆𑀢𑁂𑀦, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸 𑀫𑀚𑁆𑀛𑀺𑀫𑁂𑀦, 𑀓𑀸𑀬𑁄𑀯 𑀦𑁂𑀲𑀁 𑀯𑀺𑀧𑁆𑀨𑀸𑀭𑀺𑀓𑀢𑀭𑁄 𑀳𑁄𑀢𑀺. 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀧𑀡𑀻𑀢𑁂𑀦, 𑀓𑀸𑀬𑁄 𑀧𑀦 𑀦𑁂𑀲𑀁 𑀅𑀢𑀺𑀯𑀺𑀧𑁆𑀨𑀸𑀭𑀺𑀓𑀢𑀭𑁄 𑀳𑁄𑀢𑀺. 𑀇𑀢𑀺 𑀢𑁂 𑀓𑀸𑀬𑀲𑁆𑀲 𑀦𑀸𑀦𑀢𑁆𑀢𑀸, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀜𑁆𑀜𑀸𑀬 𑀏𑀓𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀘 𑀢𑁂, 𑀏𑀯𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸. 𑀦𑀺𑀭𑀬𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀕𑀸𑀯𑀼𑀢𑀁, 𑀓𑁂𑀲𑀜𑁆𑀘𑀺 𑀅𑀟𑁆𑀠𑀬𑁄𑀚𑀦𑀁, 𑀓𑁂𑀲𑀜𑁆𑀘𑀺 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀤𑁂𑀯𑀤𑀢𑁆𑀢𑀲𑁆𑀲 ¶ 𑀧𑀦 𑀬𑁄𑀚𑀦𑀲𑀢𑀺𑀓𑁄 𑀚𑀸𑀢𑁄. 𑀢𑀺𑀭𑀘𑁆𑀙𑀸𑀦𑁂𑀲𑀼𑀧𑀺 𑀓𑁂𑀘𑀺 𑀔𑀼𑀤𑁆𑀤𑀓𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀫𑀳𑀦𑁆𑀢𑀸. 𑀧𑁂𑀢𑁆𑀢𑀺𑀯𑀺𑀲𑀬𑁂𑀲𑀼𑀧𑀺 𑀓𑁂𑀘𑀺 𑀲𑀝𑁆𑀞𑀺𑀳𑀢𑁆𑀣𑀸, 𑀓𑁂𑀘𑀺 𑀅𑀲𑀻𑀢𑀺𑀳𑀢𑁆𑀣𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀲𑀼𑀯𑀡𑁆𑀡𑀸, 𑀓𑁂𑀘𑀺 𑀤𑀼𑀩𑁆𑀩𑀡𑁆𑀡𑀸. 𑀢𑀣𑀸 𑀓𑀸𑀮𑀓𑀜𑁆𑀘𑀺𑀓𑀸 𑀅𑀲𑀼𑀭𑀸. 𑀅𑀧𑀺 𑀘𑁂𑀢𑁆𑀣 𑀤𑀻𑀖𑀧𑀺𑀝𑁆𑀞𑀺𑀓𑀧𑁂𑀢𑀸 𑀦𑀸𑀫 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀧𑀺 𑀳𑁄𑀦𑁆𑀢𑀺. 𑀲𑀜𑁆𑀜𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀸𑀯 𑀳𑁄𑀢𑀺. 𑀇𑀢𑀺 𑀆𑀧𑀸𑀬𑀺𑀓𑀸𑀧𑀺 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺.

𑀆𑀪𑀲𑁆𑀲𑀭𑀸𑀢𑀺 𑀤𑀡𑁆𑀟𑀉𑀓𑁆𑀓𑀸𑀬 𑀅𑀘𑁆𑀘𑀺 𑀯𑀺𑀬 𑀏𑀢𑁂𑀲𑀁 𑀲𑀭𑀻𑀭𑀢𑁄 𑀆𑀪𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀻 𑀯𑀺𑀬 𑀲𑀭𑀢𑀺 𑀯𑀺𑀲𑀭𑀢𑀻𑀢𑀺 𑀆𑀪𑀲𑁆𑀲𑀭𑀸. 𑀢𑁂𑀲𑀼 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀤𑁆𑀯𑀬𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 ¶ 𑀉𑀧𑀧𑀦𑁆𑀦𑀸 𑀧𑀭𑀺𑀢𑁆𑀢𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺. 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀅𑀧𑁆𑀧𑀫𑀸𑀡𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀆𑀪𑀲𑁆𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀇𑀥 𑀧𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑁂 𑀕𑀳𑀺𑀢𑀸. 𑀲𑀩𑁆𑀩𑁂𑀲𑀜𑁆𑀳𑀺 𑀢𑁂𑀲𑀁 𑀓𑀸𑀬𑁄 𑀏𑀓𑀯𑀺𑀧𑁆𑀨𑀸𑀭𑁄𑀯 𑀳𑁄𑀢𑀺, 𑀲𑀜𑁆𑀜𑀸 𑀧𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀘 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀘𑀸𑀢𑀺 𑀦𑀸𑀦𑀸.

𑀲𑀼𑀪𑀓𑀺𑀡𑁆𑀳𑀸𑀢𑀺 𑀲𑀼𑀪𑁂𑀦 𑀯𑁄𑀓𑀺𑀡𑁆𑀡𑀸, 𑀲𑀼𑀪𑁂𑀦 𑀲𑀭𑀻𑀭𑀧𑁆𑀧𑀪𑀸𑀯𑀡𑁆𑀡𑁂𑀦 𑀏𑀓𑀕𑁆𑀖𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀲𑀜𑁆𑀳𑀺 𑀦 𑀆𑀪𑀲𑁆𑀲𑀭𑀸𑀦𑀁 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀪𑀸 𑀕𑀘𑁆𑀙𑀢𑀻𑀢𑀺. 𑀘𑀢𑀼𑀓𑁆𑀓𑀦𑀬𑁂 𑀢𑀢𑀺𑀬𑀲𑁆𑀲 𑀧𑀜𑁆𑀘𑀓𑀦𑀬𑁂 𑀘𑀢𑀼𑀓𑁆𑀓𑀲𑁆𑀲 𑀧𑀭𑀺𑀢𑁆𑀢𑀫𑀚𑁆𑀛𑀺𑀫𑀧𑀡𑀻𑀢𑀲𑁆𑀲 𑀛𑀸𑀦𑀲𑁆𑀲 𑀯𑀲𑁂𑀦 𑀧𑀭𑀺𑀢𑁆𑀢𑀲𑀼𑀪𑀅𑀧𑁆𑀧𑀫𑀸𑀡𑀲𑀼𑀪𑀲𑀼𑀪𑀓𑀺𑀡𑁆𑀳𑀸 𑀦𑀸𑀫 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀏𑀓𑀢𑁆𑀢𑀓𑀸𑀬𑀸 𑀘𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀜𑁆𑀜𑀸𑀬 𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀳𑀧𑁆𑀨𑀮𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀫𑁂𑀯 𑀪𑀚𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀸𑀪𑀸𑀯𑀸 𑀏𑀢𑁆𑀣 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺, 𑀲𑀢𑁆𑀢𑀸𑀯𑀸𑀲𑁂𑀲𑀼 𑀕𑀘𑁆𑀙𑀦𑁆𑀢𑀺.

𑀲𑀼𑀤𑁆𑀥𑀸𑀯𑀸𑀲𑀸 ¶ 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀸, 𑀦 𑀲𑀩𑁆𑀩𑀓𑀸𑀮𑀺𑀓𑀸, 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁆𑀧𑀺 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁂 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀺𑀲𑁆𑀲 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀪𑀕𑀯𑀢𑁄 𑀔𑀦𑁆𑀥𑀸𑀯𑀸𑀭𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁, 𑀦 𑀘 𑀲𑀢𑁆𑀢𑀸𑀯𑀸𑀲𑀁 𑀪𑀚𑀦𑁆𑀢𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀦 𑀔𑁄 𑀧𑀦 𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀆𑀯𑀸𑀲𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀫𑀬𑀸 𑀅𑀦𑀸𑀯𑀼𑀝𑁆𑀞𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑁂𑀯𑁂𑀳𑀻𑀢𑀺 𑀇𑀫𑀺𑀦𑀸 ¶ 𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁧𑁬𑁦) 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀘𑀢𑀼𑀢𑁆𑀣𑀲𑀢𑁆𑀢𑀸𑀯𑀸𑀲𑀜𑁆𑀘 𑀪𑀚𑀦𑁆𑀢𑀻’’𑀢𑀺 𑀯𑀤𑀢𑀺, 𑀢𑀁 𑀅𑀧𑁆𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀲𑀼𑀢𑁆𑀢𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 (𑀅. 𑀦𑀺. 𑀅𑀝𑁆𑀞. 𑁩.𑁭.𑁪𑁪-𑁪𑁫; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁨𑁧).

𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦, 𑀲𑀩𑁆𑀩𑀸𑀲𑀁 𑀯𑀸 𑀅𑀦𑀯𑀲𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀜𑁆𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀜𑁆𑀘. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀳𑀺 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁪𑁮; 𑀧𑀝𑀺. 𑀫. 𑁧.𑁨𑁦𑁯), 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁨𑁩). 𑀢𑀲𑁆𑀫𑀸 𑀇𑀥 ‘‘𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸’’𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀭𑀽𑀧𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀸, 𑀭𑀽𑀧𑀫𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀢𑀺𑀓𑁆𑀓𑀫𑀸𑀢𑀺 ¶ 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀏𑀢𑀸𑀲𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀧𑀜𑁆𑀘𑀤𑀲𑀦𑁆𑀦𑀁 𑀛𑀸𑀦𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀲𑀜𑁆𑀜𑀸𑀦𑀁 𑀏𑀢𑁂𑀲𑀜𑁆𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀯𑀲𑁂𑀦 𑀅𑀝𑁆𑀞𑀦𑁆𑀦𑀁 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀲𑀜𑁆𑀜𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀅𑀦𑀯𑀲𑁂𑀲𑀸𑀦𑀁 𑀯𑀸 𑀯𑀺𑀭𑀸𑀕𑀸 𑀘 𑀦𑀺𑀭𑁄𑀥𑀸 𑀘 𑀯𑀺𑀭𑀸𑀕𑀳𑁂𑀢𑀼 𑀘𑁂𑀯 𑀦𑀺𑀭𑁄𑀥𑀳𑁂𑀢𑀼 𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀲𑁄 𑀅𑀦𑀢𑀺𑀓𑁆𑀓𑀦𑁆𑀢𑀭𑀽𑀧𑀲𑀜𑁆𑀜𑁂𑀦 𑀏𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀦𑁆𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀆𑀭𑀫𑁆𑀫𑀡𑁂 𑀅𑀯𑀺𑀭𑀢𑁆𑀢𑀲𑁆𑀲 𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁄 𑀦 𑀳𑁄𑀢𑀺, 𑀲𑀫𑀢𑀺𑀓𑁆𑀓𑀦𑁆𑀢𑀸𑀲𑀼 𑀘 𑀲𑀜𑁆𑀜𑀸𑀲𑀼 𑀆𑀭𑀫𑁆𑀫𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀁 𑀅𑀯𑀢𑁆𑀯𑀸 𑁋

‘‘𑀢𑀢𑁆𑀣 𑀓𑀢𑀫𑀸 𑀭𑀽𑀧𑀲𑀜𑁆𑀜𑀸? 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, ¶ 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀲𑀜𑁆𑀜𑀸𑀬𑁄. 𑀇𑀫𑀸 𑀭𑀽𑀧𑀲𑀜𑁆𑀜𑀸𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺 𑀯𑀻𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺 𑁋

𑀏𑀯𑀁 𑀯𑀺𑀪𑀗𑁆𑀕𑁂 (𑀯𑀺𑀪. 𑁬𑁦𑁨) 𑀲𑀜𑁆𑀜𑀸𑀦𑀁𑀬𑁂𑀯 𑀲𑀫𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀸 𑀏𑀢𑀸 𑀲𑀫𑀸𑀧𑀢𑁆𑀢𑀺𑀬𑁄, 𑀦 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬, 𑀢𑀲𑁆𑀫𑀸 𑀅𑀬𑀁 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀯𑀲𑁂𑀦𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀖𑀲𑀜𑁆𑀜𑀸𑀦𑀁 ¶ 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀧𑀝𑀺𑀖𑀸𑀢𑁂𑀦 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸, 𑀭𑀽𑀧𑀲𑀜𑁆𑀜𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑀸 𑀧𑀝𑀺𑀖𑀲𑀜𑁆𑀜𑀸? 𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸 𑀕𑀦𑁆𑀥𑀲𑀜𑁆𑀜𑀸 𑀭𑀲𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀖𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁩). 𑀢𑀸𑀲𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀜𑁆𑀘𑀦𑁆𑀦𑀦𑁆𑀢𑀺 𑀲𑀩𑁆𑀩𑀲𑁄 𑀤𑀲𑀦𑁆𑀦𑀁 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀧𑀳𑀸𑀦𑀸 𑀅𑀲𑀫𑀼𑀧𑁆𑀧𑀸𑀤𑀸, 𑀅𑀧𑁆𑀧𑀯𑀢𑁆𑀢𑀺𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀸𑀫𑀜𑁆𑀘𑁂𑀢𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑀫𑀸𑀧𑀦𑁆𑀦𑀲𑁆𑀲𑀸𑀧𑀺 𑀦 𑀲𑀦𑁆𑀢𑀺, 𑀦 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀜𑁆𑀜𑀢𑁆𑀣 𑀧𑀳𑀻𑀦𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀯𑀺𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀢𑀢𑀺𑀬𑀫𑀕𑁆𑀕𑁂 𑀯𑀺𑀬 𑀘 𑀇𑀫𑀲𑁆𑀫𑀺𑀁𑀬𑁂𑀯 𑀛𑀸𑀦𑁂 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀧𑀲𑀁𑀲𑀸𑀯𑀲𑁂𑀦 𑀏𑀢𑀸𑀲𑀁 𑀏𑀢𑁆𑀣 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑁋 𑀓𑀺𑀜𑁆𑀘𑀸𑀧𑀺 𑀢𑀸 𑀭𑀽𑀧𑀸𑀯𑀘𑀭𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦 𑀲𑀦𑁆𑀢𑀺, 𑀅𑀣 𑀔𑁄 𑀦 𑀧𑀳𑀻𑀦𑀢𑁆𑀢𑀸 𑀦 𑀲𑀦𑁆𑀢𑀺, 𑀦 𑀳𑀺 𑀭𑀽𑀧𑀯𑀺𑀭𑀸𑀕𑀸𑀬 𑀭𑀽𑀧𑀸𑀯𑀘𑀭𑀪𑀸𑀯𑀦𑀸 𑀲𑀁𑀯𑀢𑁆𑀢𑀢𑀺, 𑀭𑀽𑀧𑀸𑀬𑀢𑁆𑀢𑀸 𑀘 𑀏𑀢𑀸𑀲𑀁 𑀧𑀯𑀢𑁆𑀢𑀺, 𑀅𑀬𑀁 𑀧𑀦 𑀪𑀸𑀯𑀦𑀸 𑀭𑀽𑀧𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀢𑀺 ¶ . 𑀢𑀲𑁆𑀫𑀸 𑀢𑀸 𑀏𑀢𑁆𑀣 ‘‘𑀧𑀳𑀻𑀦𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦 𑀓𑁂𑀯𑀮𑀜𑁆𑀘 𑀯𑀢𑁆𑀢𑀼𑀁, 𑀏𑀓𑀁𑀲𑁂𑀦𑁂𑀯 𑀏𑀯𑀁 𑀥𑀸𑀭𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀸𑀲𑀜𑁆𑀳𑀺 𑀇𑀢𑁄 𑀧𑀼𑀩𑁆𑀩𑁂 𑀅𑀧𑁆𑀧𑀳𑀻𑀦𑀢𑁆𑀢𑀸𑀬𑁂𑀯 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄’’𑀢𑀺 (𑀅. 𑀦𑀺. 𑁧𑁦.𑁭𑁨) 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀇𑀥 𑀘 𑀧𑀳𑀻𑀦𑀢𑁆𑀢𑀸𑀬𑁂𑀯 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑁂𑀜𑁆𑀚𑀢𑀸 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸 𑀘 𑀯𑀼𑀢𑁆𑀢𑀸 𑁋 ‘‘𑀆𑀴𑀸𑀭𑁄 𑀘 𑀓𑀸𑀮𑀸𑀫𑁄 𑀅𑀭𑀽𑀧𑀁 𑀲𑀫𑀸𑀧𑀦𑁆𑀦𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑁂𑀯 𑀅𑀤𑁆𑀤𑀲, 𑀦 𑀧𑀦 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻’’𑀢𑀺 (𑀤𑀻. 𑀦𑀺. 𑁨.𑁧𑁯𑁨).

𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸𑀢𑀺 𑀦𑀸𑀦𑀢𑁆𑀢𑁂 𑀕𑁄𑀘𑀭𑁂 𑀧𑀯𑀢𑁆𑀢𑀸𑀦𑀁 𑀲𑀜𑁆𑀜𑀸𑀦𑀁, 𑀦𑀸𑀦𑀢𑁆𑀢𑀸𑀦𑀁 𑀯𑀸 𑀲𑀜𑁆𑀜𑀸𑀦𑀁. 𑀬𑀲𑁆𑀫𑀸 𑀳𑀺 𑀏𑀢𑀸 𑁋

‘‘𑀢𑀢𑁆𑀣 ¶ 𑀓𑀢𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸? 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑀗𑁆𑀕𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁, 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄’’𑀢𑀺 (𑀯𑀺𑀪. 𑁬𑁦𑁪) 𑁋

𑀏𑀯𑀁 𑀯𑀺𑀪𑀗𑁆𑀕𑁂 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀸𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀅𑀲𑀫𑀸𑀧𑀦𑁆𑀦𑀲𑁆𑀲 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀕𑀳𑀺𑀢𑀸 𑀲𑀜𑁆𑀜𑀸 𑀭𑀽𑀧𑀲𑀤𑁆𑀤𑀸𑀤𑀺𑀪𑁂𑀤𑁂 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺. 𑀬𑀲𑁆𑀫𑀸 𑀘𑁂𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀲𑀜𑁆𑀜𑀸 𑀏𑀓𑀸𑀤𑀲 ¶ 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸 𑀤𑁆𑀯𑁂 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀜𑁆𑀜𑀸𑀢𑀺 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀲𑀜𑁆𑀜𑀸 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸, 𑀢𑀲𑁆𑀫𑀸 ‘‘𑀦𑀸𑀦𑀢𑁆𑀢𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸. 𑀢𑀸𑀲𑀁 𑀲𑀩𑁆𑀩𑀲𑁄 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀸𑀯𑀚𑁆𑀚𑀦𑀸 𑀅𑀲𑀫𑀦𑁆𑀦𑀸𑀳𑀸𑀭𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸. 𑀬𑀲𑁆𑀫𑀸 𑀢𑀸 𑀦𑀸𑀯𑀚𑁆𑀚𑀢𑀺 𑀦 𑀫𑀦𑀲𑀺𑀓𑀭𑁄𑀢𑀺 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀲𑁆𑀫𑀸 𑀘𑁂𑀢𑁆𑀣 𑀧𑀼𑀭𑀺𑀫𑀸 𑀭𑀽𑀧𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸 𑀘 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁂 𑀪𑀯𑁂𑀧𑀺 𑀦 𑀯𑀺𑀚𑁆𑀚𑀦𑁆𑀢𑀺, 𑀧𑀕𑁂𑀯 𑀢𑀲𑁆𑀫𑀺𑀁 𑀪𑀯𑁂 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀓𑀸𑀮𑁂, 𑀢𑀲𑁆𑀫𑀸 𑀢𑀸𑀲𑀁 ‘‘𑀲𑀫𑀢𑀺𑀓𑁆𑀓𑀫𑀸 𑀅𑀢𑁆𑀣𑀗𑁆𑀕𑀫𑀸’’𑀢𑀺 𑀤𑁆𑀯𑁂𑀥𑀸𑀧𑀺 𑀅𑀪𑀸𑀯𑁄𑀬𑁂𑀯 𑀯𑀼𑀢𑁆𑀢𑁄. 𑀦𑀸𑀦𑀢𑁆𑀢𑀲𑀜𑁆𑀜𑀸𑀲𑀼 𑀧𑀦 𑀬𑀲𑁆𑀫𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸 𑀦𑀯 𑀓𑀺𑀭𑀺𑀬𑀲𑀜𑁆𑀜𑀸 𑀤𑀲 𑀅𑀓𑀼𑀲𑀮𑀲𑀜𑁆𑀜𑀸𑀢𑀺, 𑀇𑀫𑀸 𑀲𑀢𑁆𑀢𑀯𑀻𑀲𑀢𑀺 𑀲𑀜𑁆𑀜𑀸 𑀇𑀫𑀺𑀦𑀸 𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁂 𑀪𑀯𑁂 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀲𑀁 ‘‘𑀅𑀫𑀦𑀲𑀺𑀓𑀸𑀭𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀳𑀺 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑁄 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑀸𑀬𑁂𑀯 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀸 𑀧𑀦 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀲𑀫𑀸𑀧𑀦𑁆𑀦𑁄 𑀳𑁄𑀢𑀻𑀢𑀺. 𑀲𑀗𑁆𑀔𑁂𑀧𑀢𑁄 𑀘𑁂𑀢𑁆𑀣 ‘‘𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀯𑀼𑀢𑁆𑀢𑀁. ‘‘𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’’𑀢𑀺 ¶ 𑀇𑀫𑀺𑀦𑀸 𑀲𑀩𑁆𑀩𑁂𑀲𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀜𑁆𑀘 𑀧𑀳𑀸𑀦𑀁 𑀅𑀫𑀦𑀲𑀺𑀓𑀸𑀭𑁄 𑀘 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 (𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁨𑁧𑁩).

𑀇𑀢𑀺 𑀪𑀕𑀯𑀸 𑀧𑀦𑁆𑀦𑀭𑀲𑀦𑁆𑀦𑀁 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑁂𑀦 𑀤𑀲𑀦𑁆𑀦𑀁 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑁂𑀦 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀓𑀣𑁂𑀲𑀺. 𑀓𑀺𑀁 𑀓𑀸𑀭𑀡𑀸𑀢𑀺 𑀘𑁂? 𑀲𑁄𑀢𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀜𑁆𑀘𑁂𑀯 𑀧𑀮𑁄𑀪𑀦𑀢𑁆𑀣𑀜𑁆𑀘. 𑀲𑀘𑁂 𑀳𑀺 𑀓𑁂𑀘𑀺 ¶ 𑀅𑀧𑀡𑁆𑀟𑀺𑀢𑀸 𑀯𑀤𑁂𑀬𑁆𑀬𑀼𑀁 𑁋 ‘‘𑀲𑀢𑁆𑀣𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀣𑀸𑀢𑀺 𑀯𑀤𑀢𑀺, 𑀓𑁄 𑀦𑀼 𑀔𑁄 𑀏𑀢𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀸𑀬 𑀅𑀢𑁆𑀣𑁄, 𑀓𑁄 𑀆𑀦𑀺𑀲𑀁𑀲𑁄’’𑀢𑀺. ‘‘𑀢𑁂 𑀏𑀯𑀁 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽’’𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀓𑀣𑁂𑀲𑀺. 𑀢𑀜𑁆𑀳𑀺 𑀦𑁂𑀲𑀁 𑀲𑀼𑀢𑁆𑀯𑀸 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘‘𑀏𑀯𑀁 𑀲𑀦𑁆𑀢𑀸 𑀓𑀺𑀭 𑀅𑀬𑀁 𑀲𑀫𑀸𑀧𑀢𑁆𑀢𑀺 𑀏𑀯𑀁 𑀧𑀡𑀻𑀢𑀸, 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫 𑀦’’𑀦𑁆𑀢𑀺, 𑀅𑀣𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺.

𑀧𑀮𑁄𑀪𑀦𑀢𑁆𑀣𑀜𑁆𑀘𑀸𑀧𑀺 𑀢𑁂𑀲𑀁 𑀏𑀢𑀺𑀲𑁆𑀲𑀸 𑀯𑀡𑁆𑀡𑀁 𑀓𑀣𑁂𑀲𑀺 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄𑀯𑀺𑀬, 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄 𑀦𑀸𑀫 𑀕𑀼𑀴𑀯𑀸𑀡𑀺𑀚𑁄 𑀯𑀼𑀘𑁆𑀘𑀢𑀺. 𑀲𑁄 𑀓𑀺𑀭 𑀕𑀼𑀴𑀨𑀸𑀡𑀺𑀢𑀔𑀡𑁆𑀟𑀲𑀓𑁆𑀓𑀭𑀸𑀤𑀻𑀦𑀺 ¶ 𑀲𑀓𑀝𑁂𑀦 𑀆𑀤𑀸𑀬 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣, 𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀸𑀫𑀺𑀓𑀸 ‘‘𑀯𑀺𑀲𑀁 𑀦𑀸𑀫 𑀓𑀓𑁆𑀔𑀴𑀁, 𑀬𑁄 𑀦𑀁 𑀔𑀸𑀤𑀢𑀺, 𑀲𑁄 𑀫𑀭𑀢𑀺, 𑀓𑀡𑁆𑀝𑀓𑁄𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀢𑀺, 𑀉𑀪𑁄𑀧𑁂𑀢𑁂 𑀓𑀓𑁆𑀔𑀴𑀸, 𑀓𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄’’𑀢𑀺 𑀕𑁂𑀳𑀤𑁆𑀯𑀸𑀭𑀸𑀦𑀺 𑀣𑀓𑁂𑀲𑀼𑀁, 𑀤𑀸𑀭𑀓𑁂 𑀘 𑀧𑀮𑀸𑀧𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑁄 ‘‘𑀅𑀯𑁄𑀳𑀸𑀭𑀓𑀼𑀲𑀮𑀸 𑀇𑀫𑁂 𑀕𑀸𑀫𑀺𑀓𑀸, 𑀳𑀦𑁆𑀤 𑀦𑁂 𑀉𑀧𑀸𑀬𑁂𑀦 𑀕𑀡𑁆𑀳𑀸𑀧𑁂𑀫𑀻’’𑀢𑀺 ‘‘𑀅𑀢𑀺𑀫𑀥𑀼𑀭𑀁 𑀕𑀡𑁆𑀳𑀣, 𑀅𑀢𑀺𑀲𑀸𑀤𑀼𑀁 𑀕𑀡𑁆𑀳𑀣, 𑀕𑀼𑀴𑀁 𑀨𑀸𑀡𑀺𑀢𑀁 𑀲𑀓𑁆𑀓𑀭𑀁 𑀲𑀫𑀕𑁆𑀖𑀁 𑀮𑀩𑁆𑀪𑀢𑀺, 𑀓𑀽𑀝𑀫𑀸𑀲𑀓𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺𑀧𑀺 𑀮𑀩𑁆𑀪𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀸𑀫𑀺𑀓𑀸 𑀳𑀝𑁆𑀞𑀧𑀳𑀝𑁆𑀞𑀸 𑀦𑀺𑀓𑁆𑀔𑀦𑁆𑀢𑀸 𑀩𑀳𑀼𑀫𑁆𑀧𑀺 𑀫𑀽𑀮𑀁 𑀤𑀢𑁆𑀯𑀸 𑀕𑀳𑁂𑀲𑀼𑀁.

𑀢𑀢𑁆𑀣 𑀯𑀸𑀡𑀺𑀚𑀲𑁆𑀲 ‘‘𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣𑀸’’𑀢𑀺 𑀉𑀕𑁆𑀖𑁄𑀲𑀦𑀁 𑀯𑀺𑀬 𑀪𑀕𑀯𑀢𑁄 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀣𑀸’’𑀢𑀺 𑀯𑀘𑀦𑀁. ‘‘𑀉𑀪𑁄𑀧𑁂𑀢𑁂 𑀓𑀓𑁆𑀔𑀴𑀸, 𑀓𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄’’𑀢𑀺 𑀕𑀸𑀫𑀺𑀓𑀸𑀦𑀁 𑀘𑀺𑀦𑁆𑀢𑀦𑀁 𑀯𑀺𑀬 ‘‘𑀪𑀕𑀯𑀸 ‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀣𑀸’𑀢𑀺 𑀆𑀳, 𑀓𑁄 𑀦𑀼 𑀔𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄, 𑀦𑀸𑀲𑁆𑀲 𑀕𑀼𑀡𑀁 𑀚𑀸𑀦𑀸𑀫𑀸’’𑀢𑀺 𑀲𑁄𑀢𑀽𑀦𑀁 𑀘𑀺𑀦𑁆𑀢𑀦𑀁. 𑀅𑀣𑀲𑁆𑀲 𑀯𑀸𑀡𑀺𑀚𑀲𑁆𑀲 ‘‘𑀅𑀢𑀺𑀫𑀥𑀼𑀭𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀺𑀬 𑀪𑀕𑀯𑀢𑁄 𑀭𑀽𑀧𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀓𑀁 𑀆𑀦𑀺𑀲𑀁𑀲𑀧𑁆𑀧𑀓𑀸𑀲𑀦𑀁. 𑀇𑀤𑀜𑁆𑀳𑀺 𑀲𑀼𑀢𑁆𑀯𑀸 𑀢𑁂 𑀩𑀳𑀼𑀫𑁆𑀧𑀺 𑀫𑀽𑀮𑀁 𑀤𑀢𑁆𑀯𑀸 𑀕𑀸𑀫𑀺𑀓𑀸 𑀯𑀺𑀬 𑀕𑀼𑀴𑀁 ‘‘𑀇𑀫𑀺𑀦𑀸 𑀆𑀦𑀺𑀲𑀁𑀲𑁂𑀦 𑀧𑀮𑁄𑀪𑀺𑀢𑀘𑀺𑀢𑁆𑀢𑀸 𑀫𑀳𑀦𑁆𑀢𑀫𑁆𑀧𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀇𑀫𑀁 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀦𑁆𑀢𑀻’’𑀢𑀺 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀧𑀮𑁄𑀪𑀦𑀢𑁆𑀣𑀜𑁆𑀘 𑀓𑀣𑁂𑀲𑀺.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀢𑀺 ¶ ¶ 𑀏𑀢𑁆𑀣 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁, 𑀆𑀓𑀸𑀲𑀁 𑀅𑀦𑀦𑁆𑀢𑀁 𑀆𑀓𑀸𑀲𑀸𑀦𑀦𑁆𑀢𑀁, 𑀆𑀓𑀸𑀲𑀸𑀦𑀦𑁆𑀢𑀁 𑀏𑀯 𑀆𑀓𑀸𑀲𑀸𑀦𑀜𑁆𑀘𑀁, 𑀢𑀁 𑀆𑀓𑀸𑀲𑀸𑀦𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀫𑀲𑁆𑀲 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀛𑀸𑀦𑀲𑁆𑀲 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀯𑀁 𑀉𑀧𑀕𑀢𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸. 𑀇𑀢𑁄 𑀧𑀭𑁂𑀲𑀼 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫 (𑀥. 𑀲. 𑀅𑀝𑁆𑀞. 𑁨𑁬𑁫, 𑁧𑁪𑁩𑁬-𑁭).

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣 𑀢𑀸𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀆𑀓𑀸𑀲𑀸𑀦𑀜𑁆𑀘𑀁 𑀆𑀬𑀢𑀦𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀛𑀸𑀦𑀫𑁆𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑀫𑁆𑀫𑀡𑀫𑁆𑀧𑀺. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 ¶ 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸𑀢𑀺 𑀏𑀢𑁆𑀣 𑀧𑀦 ‘‘𑀅𑀦𑀦𑁆𑀢’’𑀦𑁆𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀯𑀲𑁂𑀦 𑀦𑀸𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁, 𑀅𑀦𑀦𑁆𑀢𑀫𑁂𑀯 𑀆𑀦𑀜𑁆𑀘𑀁, 𑀯𑀺𑀜𑁆𑀜𑀸𑀡𑀁 𑀆𑀦𑀜𑁆𑀘𑀁 ‘‘𑀯𑀺𑀜𑁆𑀜𑀸𑀡𑀸𑀦𑀜𑁆𑀘’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀯𑀺𑀜𑁆𑀜𑀸𑀡𑀜𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀭𑀼𑀴𑁆𑀳𑀻𑀲𑀤𑁆𑀤𑁄. 𑀢𑀤𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁. 𑀢𑀢𑁆𑀣 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀪𑀯𑀁 𑀉𑀧𑀕𑀢𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸.

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀁 𑀆𑀬𑀢𑀦𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀛𑀸𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘 𑀆𑀭𑀫𑁆𑀫𑀡𑀫𑁆𑀧𑀺. 𑀏𑀯𑀫𑁂𑀢𑀁 𑀛𑀸𑀦𑀜𑁆𑀘 𑀆𑀭𑀫𑁆𑀫𑀡𑀜𑁆𑀘𑀸𑀢𑀺 𑀉𑀪𑀬𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀫𑀦𑀲𑀺𑀓𑀭𑀡𑁂𑀦 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀬𑀲𑁆𑀫𑀸 𑀇𑀤𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁆𑀲 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀜𑁆𑀘𑀦𑀲𑁆𑀲 𑀪𑀸𑀯𑁄 𑀆𑀓𑀺𑀜𑁆𑀘𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀸𑀧𑀕𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀓𑀺𑀜𑁆𑀘𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀢𑀢𑁆𑀣 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀯𑀁 𑀉𑀧𑀕𑀢𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀲𑀢𑁆𑀢𑀫𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀢𑀺 ¶ 𑀇𑀫𑀁 𑀲𑀢𑁆𑀢𑀫𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀞𑀸𑀦𑀁 𑀚𑀸𑀦𑀸𑀢𑀺 ¶ . 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀬𑀣𑁂𑀯 𑀲𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀲𑀼𑀔𑀼𑀫𑀢𑁆𑀢𑀸 𑀦𑁂𑀯 𑀯𑀺𑀜𑁆𑀜𑀸𑀡𑀁 𑀦𑀸𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦 𑀯𑀼𑀢𑁆𑀢𑀁.

𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀢𑁆𑀣𑀁 ‘‘𑀭𑀽𑀧𑀁 𑀅𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁. 𑀢𑀁 𑀯𑀺𑀧𑀮𑁆𑀮𑀸𑀲𑀪𑀸𑀯𑀢𑁄 𑀅𑀢𑀘𑁆𑀙𑀁. 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀢𑁄 𑀅𑀦𑀢𑁆𑀣𑀲𑀜𑁆𑀳𑀺𑀢𑀁. 𑀅𑀣 𑀯𑀸 𑀅𑀪𑀽𑀢𑀦𑁆𑀢𑀺 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀘𑁄𑀭𑀲𑁆𑀲𑁂𑀯 ‘‘𑀇𑀤𑀁 𑀢𑁂 𑀘𑁄𑀭𑀺𑀓𑀸𑀬 𑀆𑀪𑀢𑀁, 𑀦 𑀇𑀤𑀁 𑀢𑀼𑀬𑁆𑀳𑀁 𑀖𑀭𑁂 𑀥𑀦’’𑀦𑁆𑀢𑀺𑀆𑀤𑀺𑀯𑀘𑀦𑀁. 𑀅𑀢𑀘𑁆𑀙𑀦𑁆𑀢𑀺 𑀅𑀢𑀣𑀸𑀓𑀸𑀭𑀁 𑀅𑀜𑁆𑀜𑀣𑀸 𑀲𑀦𑁆𑀢𑀁. 𑀅𑀦𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀦 𑀇𑀥𑀮𑁄𑀓𑀢𑁆𑀣𑀁 𑀯𑀸 𑀧𑀭𑀮𑁄𑀓𑀢𑁆𑀣𑀁 ¶ 𑀯𑀸 𑀦𑀺𑀲𑁆𑀲𑀺𑀢𑀁. 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀻𑀢𑀺 𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀢𑀣𑀸𑀕𑀢𑁄 𑀦 𑀓𑀣𑁂𑀢𑀺. 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀭𑀸𑀚𑀓𑀣𑀸𑀤𑀺𑀢𑀺𑀭𑀘𑁆𑀙𑀸𑀦𑀓𑀣𑀁. 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀁. 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀢𑀢𑀺𑀬𑀩𑁆𑀬𑀸𑀓𑀭𑀡𑁂 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀩𑁆𑀬𑀸𑀓𑀭𑀡𑀢𑁆𑀣𑀸𑀬 𑀢𑀣𑀸𑀕𑀢𑁄 𑀓𑀸𑀮𑀜𑁆𑀜𑀽 𑀳𑁄𑀢𑀺. 𑀫𑀳𑀸𑀚𑀦𑀲𑁆𑀲 𑀆𑀤𑀸𑀦𑀓𑀸𑀮𑀁 𑀕𑀳𑀡𑀓𑀸𑀮𑀁 𑀚𑀸𑀦𑀺𑀢𑁆𑀯𑀸 𑀲𑀳𑁂𑀢𑀼𑀓𑀁 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀬𑁂𑀯 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀯𑀤𑀢𑀻𑀢𑀺 𑀓𑀸𑀮𑀯𑀸𑀤𑀻. 𑀪𑀽𑀢𑀁 𑀲𑀪𑀸𑀯𑀁 𑀯𑀤𑀢𑀻𑀢𑀺 𑀪𑀽𑀢𑀯𑀸𑀤𑀻. 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀫𑀕𑁆𑀕𑀨𑀮𑀥𑀫𑁆𑀫𑀁 𑀯𑀤𑀢𑀻𑀢𑀺 𑀥𑀫𑁆𑀫𑀯𑀸𑀤𑀻. 𑀲𑀁𑀯𑀭𑀸𑀤𑀺𑀯𑀺𑀦𑀬𑀁 𑀯𑀤𑀢𑀻𑀢𑀺 𑀯𑀺𑀦𑀬𑀯𑀸𑀤𑀻. 𑀢𑀢𑁆𑀣 𑀤𑀺𑀝𑁆𑀞𑀦𑁆𑀢𑀺 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑁂𑀲𑀼 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀁 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀘 𑀢𑁂𑀦 𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀯𑀲𑁂𑀦 𑀯𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦 𑀯𑀸 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁬𑁧𑁭-𑁬𑁧𑁮) 𑀦𑀬𑁂𑀦 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀢𑁂𑀭𑀲𑀳𑀺 𑀯𑀸𑀭𑁂𑀳𑀺 𑀤𑁆𑀯𑀺𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀺 𑀯𑀺𑀪𑀚𑁆𑀚𑀫𑀸𑀦𑀁 𑀢𑀣𑀫𑁂𑀯 𑀳𑁄𑀢𑀺 𑀯𑀺𑀢𑀣𑀁 𑀦𑀢𑁆𑀣𑀺. 𑀏𑀲 𑀦𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺. 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑁂𑀲𑀼 𑀲𑀤𑁆𑀤𑀸𑀤𑀻𑀲𑀼 𑀢𑁂𑀲𑀁 𑀯𑀺𑀯𑀺𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀁 𑀲𑀼𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁. 𑀫𑀼𑀢𑀦𑁆𑀢𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑀸𑀭𑀫𑁆𑀫𑀡𑀁. 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 ¶ 𑀧𑀢𑁆𑀢𑀁 𑀯𑀸 𑀅𑀧𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀢𑀁. 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀁.

𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀇𑀫𑀺𑀦𑀸 𑀏𑀢𑀁 𑀤𑀲𑁆𑀲𑁂𑀢𑀺 𑁋 𑀬𑀜𑁆𑀳𑀺 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺𑀆𑀤𑀺 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀲𑀼𑀫𑀦𑁄 ¶ 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 ¶ 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀣𑀸 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄𑀢𑀺𑀆𑀤𑀺 𑀲𑀤𑁆𑀤𑀸𑀭𑀫𑁆𑀫𑀡𑀁 𑀲𑁄𑀢𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀫𑀽𑀮𑀕𑀦𑁆𑀥𑁄 𑀢𑀘𑀕𑀦𑁆𑀥𑁄𑀢𑀺𑀆𑀤𑀺 𑀕𑀦𑁆𑀥𑀸𑀭𑀫𑁆𑀫𑀡𑀁 𑀖𑀸𑀦𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄𑀢𑀺𑀆𑀤𑀺 𑀭𑀲𑀸𑀭𑀫𑁆𑀫𑀡𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀓𑀓𑁆𑀔𑀴𑀁 𑀫𑀼𑀤𑀼𑀓𑀦𑁆𑀢𑀺𑀆𑀤𑀺 𑀧𑀣𑀯𑀻𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑁂𑀤𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀓𑀸𑀬𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀨𑀼𑀲𑀺𑀢𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀣𑀸 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀼𑀔𑀤𑀼𑀓𑁆𑀔𑀸𑀤𑀺𑀪𑁂𑀤𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀫𑀦𑁄𑀤𑁆𑀯𑀸𑀭𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀚𑀸𑀦𑀺𑀢𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁.

𑀬𑀜𑁆𑀳𑀺, 𑀘𑀼𑀦𑁆𑀤, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁, 𑀢𑀢𑁆𑀣 𑀢𑀣𑀸𑀕𑀢𑁂𑀦 𑀅𑀤𑀺𑀝𑁆𑀞𑀁 𑀯𑀸 𑀅𑀲𑀼𑀢𑀁 𑀯𑀸 𑀅𑀫𑀼𑀢𑀁 𑀯𑀸 𑀅𑀯𑀺𑀜𑁆𑀜𑀸𑀢𑀁 𑀯𑀸 𑀦𑀢𑁆𑀣𑀺, 𑀇𑀫𑀲𑁆𑀲 𑀧𑀦 𑀫𑀳𑀸𑀚𑀦𑀲𑁆𑀲 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀲𑀩𑁆𑀩𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀅𑀲𑀫𑁆𑀧𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺 𑀜𑀸𑀡𑁂𑀦 𑀅𑀲𑀘𑁆𑀙𑀺𑀓𑀢𑀁. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀁 𑀢𑀣𑀸 𑀮𑁄𑀓𑁂𑀦 𑀕𑀢𑀁, 𑀢𑀲𑁆𑀲 𑀢𑀣𑁂𑀯 𑀕𑀢𑀢𑁆𑀢𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀕𑀢𑀲𑀤𑁆𑀤𑁂𑀦 𑀏𑀓𑀢𑁆𑀣𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀢𑀣𑀸𑀕𑀢𑁄𑀢𑀺 𑀦𑀺𑀕𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁮𑁮; 𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁩).

‘‘𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 ¶ 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺, 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑁋

𑀏𑀢𑁆𑀣 𑀬𑀁 𑀭𑀢𑁆𑀢𑀺𑀁 𑀪𑀕𑀯𑀸 𑀩𑁄𑀥𑀺𑀫𑀡𑁆𑀟𑁂 𑀅𑀧𑁆𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀡𑁆𑀡𑀁 ¶ 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀬𑀜𑁆𑀘 𑀭𑀢𑁆𑀢𑀺𑀁 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀧𑀭𑀺𑀫𑀸𑀡𑁂 𑀓𑀸𑀮𑁂 𑀧𑀞𑀫𑀩𑁄𑀥𑀺𑀬𑀸𑀧𑀺 𑀫𑀚𑁆𑀛𑀺𑀫𑀩𑁄𑀥𑀺𑀬𑀸𑀧𑀺 𑀧𑀘𑁆𑀙𑀺𑀫𑀩𑁄𑀥𑀺𑀬𑀸𑀧𑀺 𑀬𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀯𑁂𑀤𑀮𑁆𑀮𑀁, 𑀢𑀁 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀦𑀼𑀧𑀯𑀚𑁆𑀚𑀁 𑀅𑀦𑀽𑀦𑀫𑀦𑀥𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀭𑀸𑀕𑀫𑀤𑀦𑀺𑀫𑁆𑀫𑀤𑀦𑀁 𑀤𑁄𑀲𑀫𑁄𑀳𑀫𑀤𑀦𑀺𑀫𑁆𑀫𑀤𑀦𑀁 𑀦𑀢𑁆𑀣𑀺, 𑀢𑀢𑁆𑀣 𑀯𑀸𑀴𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀯𑀓𑁆𑀔𑀮𑀺𑀢𑀁, 𑀲𑀩𑁆𑀩𑀁 𑀢𑀁 𑀏𑀓𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑀁 𑀯𑀺𑀬, 𑀏𑀓𑀦𑀸𑀴𑀺𑀬𑀸 𑀫𑀺𑀢𑀁 𑀯𑀺𑀬, 𑀏𑀓𑀢𑀼𑀮𑀸𑀬 𑀢𑀼𑀮𑀺𑀢𑀁 𑀯𑀺𑀬 𑀘 𑀢𑀣𑀫𑁂𑀯 𑀳𑁄𑀢𑀺 ¶ 𑀯𑀺𑀢𑀣𑀁 𑀦𑀢𑁆𑀣𑀺. 𑀢𑁂𑀦𑀸𑀳 𑁋 ‘‘𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄…𑀧𑁂… 𑀲𑀩𑁆𑀩𑀁 𑀢𑀁 𑀢𑀣𑀫𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀕𑀤𑀅𑀢𑁆𑀣𑁄 𑀳𑀺 𑀏𑀢𑁆𑀣 𑀕𑀢𑀲𑀤𑁆𑀤𑁄.

𑀅𑀧𑀺 𑀘 𑁋 𑀆𑀕𑀤𑀦𑀁 𑀆𑀕𑀤𑁄, 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀆𑀕𑀤𑁄 𑀅𑀲𑁆𑀲𑀸𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀕𑀢𑁄𑀢𑀺 𑀏𑀯𑀫𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀬𑀣𑀸𑀯𑀸𑀤𑀻, 𑀘𑀼𑀦𑁆𑀤…𑀧𑁂… 𑀯𑀼𑀘𑁆𑀘𑀢𑀻’’𑀢𑀺 𑀏𑀢𑁆𑀣 𑀪𑀕𑀯𑀢𑁄 𑀯𑀸𑀘𑀸𑀬 𑀓𑀸𑀬𑁄 𑀅𑀦𑀼𑀮𑁄𑀫𑁂𑀢𑀺 𑀓𑀸𑀬𑀲𑁆𑀲𑀧𑀺 𑀯𑀸𑀘𑀸, 𑀢𑀲𑁆𑀫𑀸 𑀪𑀕𑀯𑀸 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀘 𑀳𑁄𑀢𑀺, 𑀏𑀯𑀁𑀪𑀽𑀢𑀲𑁆𑀲 𑀘𑀲𑁆𑀲 𑀬𑀣𑀸 𑀯𑀸𑀘𑀸, 𑀓𑀸𑀬𑁄𑀧𑀺 𑀢𑀣𑀸 𑀕𑀢𑁄 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀓𑀸𑀬𑁄, 𑀯𑀸𑀘𑀸𑀧𑀺 𑀢𑀣𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄𑀢𑀺 𑀉𑀧𑀭𑀺 𑀪𑀯𑀕𑁆𑀕𑀁 𑀳𑁂𑀝𑁆𑀞𑀸 𑀅𑀯𑀻𑀘𑀺𑀧𑀭𑀺𑀬𑀦𑁆𑀢𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀲𑀻𑀮𑁂𑀦𑀧𑀺 𑀲𑀫𑀸𑀥𑀺𑀦𑀸𑀧𑀺 𑀧𑀜𑁆𑀜𑀸𑀬𑀧𑀺 𑀯𑀺𑀫𑀼𑀢𑁆𑀢𑀺𑀬𑀸𑀧𑀺 𑀦 𑀢𑀲𑁆𑀲 𑀢𑀼𑀮𑀸 𑀯𑀸 𑀧𑀫𑀸𑀡𑀁 𑀯𑀸 𑀅𑀢𑁆𑀣𑀺. 𑀅𑀢𑀼𑀮𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀼𑀢𑁆𑀢𑀭𑁄 𑀭𑀸𑀚𑀭𑀸𑀚𑀸 𑀤𑁂𑀯𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀓𑁆𑀔𑀢𑀻𑀢𑀺 𑀤𑀲𑁄. 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻.

𑀢𑀢𑁆𑀭𑀸𑀬𑀁 ¶ 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀕𑀤𑁄 𑀯𑀺𑀬 𑀅𑀕𑀤𑁄, 𑀓𑁄 𑀧𑀦𑁂𑀲? 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘. 𑀢𑁂𑀦 𑀳𑁂𑀲 𑀫𑀳𑀸𑀦𑀼𑀪𑀸𑀯𑁄 𑀪𑀺𑀲𑀓𑁆𑀓𑁄 𑀤𑀺𑀩𑁆𑀩𑀸𑀕𑀤𑁂𑀦 𑀲𑀧𑁆𑀧𑁂 𑀯𑀺𑀬 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀺𑀦𑁄 ¶ 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀅𑀪𑀺𑀪𑀯𑀢𑀺. 𑀇𑀢𑀺 𑀲𑀩𑁆𑀩𑀮𑁄𑀓𑀸𑀪𑀺𑀪𑀯𑀦𑁂 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑀫𑀬𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘 𑀅𑀕𑀤𑁄 𑀅𑀲𑁆𑀲𑀸𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁭).

𑀇𑀥𑀢𑁆𑀣𑀜𑁆𑀜𑁂𑀯 𑀚𑀸𑀦𑀸𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀢𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀇𑀥𑀢𑁆𑀣𑀜𑁆𑀜𑁂𑀯 𑀚𑀸𑀦𑀸𑀢𑀺. 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸𑀢𑀺 𑀉𑀧𑀸𑀤𑀺𑀦𑁆𑀦𑀔𑀦𑁆𑀥𑀪𑁂𑀤𑀸 𑀫𑀭𑀡𑀢𑁄 𑀧𑀭𑀁. 𑀅𑀧𑀸𑀬𑀦𑁆𑀢𑀺𑀆𑀤𑀻𑀲𑀼 𑀯𑀼𑀟𑁆𑀠𑀺𑀲𑀗𑁆𑀔𑀸𑀢𑀲𑀼𑀔𑀲𑀸𑀢𑀢𑁄 𑀅𑀬𑀸 𑀅𑀧𑁂𑀢𑀢𑁆𑀢𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺. 𑀤𑀼𑀓𑁆𑀓𑀭𑀓𑀸𑀭𑀺𑀦𑁄 𑀏𑀢𑁆𑀣 𑀯𑀺𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀺𑀭𑀢𑀺𑀅𑀝𑁆𑀞𑁂𑀦 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀦𑀺𑀭𑀬𑁄. 𑀢𑀁 𑀅𑀧𑀸𑀬𑀁…𑀧𑁂… 𑀦𑀺𑀭𑀬𑀁. 𑀉𑀧𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀦𑁆𑀢𑀺 𑀢𑀺𑀭𑀺𑀬𑀁 𑀅𑀜𑁆𑀘𑀦𑁆𑀢𑀻𑀢𑀺 𑀢𑀺𑀭𑀘𑁆𑀙𑀸𑀦𑀸, 𑀢𑁂𑀲𑀁 𑀬𑁄𑀦𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀢𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁. 𑀧𑁂𑀢𑁆𑀢𑀺𑀯𑀺𑀲𑀬𑀦𑁆𑀢𑀺 𑀧𑀘𑁆𑀘𑀪𑀸𑀯𑀁 𑀧𑀢𑁆𑀢𑀸𑀦𑀁 𑀯𑀺𑀲𑀬𑁄𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀢𑀁 𑀧𑁂𑀢𑁆𑀢𑀺𑀯𑀺𑀲𑀬𑀁. 𑀫𑀦𑀲𑁄 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸 ¶ , 𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼. 𑀇𑀢𑁄 𑀧𑀭𑀁 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀆𑀲𑀯𑀸𑀦𑀁 𑀔𑀬𑀸𑀢𑀺 𑀆𑀲𑀯𑀸𑀦𑀁 𑀯𑀺𑀦𑀸𑀲𑁂𑀦. 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀆𑀲𑀯𑀯𑀺𑀭𑀳𑀺𑀢𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀁. 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀡𑁆𑀳𑀸𑀘𑀭𑀺𑀢𑁂𑀦 𑀯𑀸 𑀅𑀧𑁆𑀧𑀦𑀸𑀛𑀸𑀦𑀩𑀮𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀨𑀮𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀫𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀨𑀮𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀓𑀸𑀫𑀭𑀸𑀕𑀁 𑀲𑀦𑁆𑀥𑀸𑀬 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀭𑀳𑀢𑁆𑀢𑀨𑀮𑀁 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀥𑀺𑀫𑀼𑀢𑁆𑀢𑀦𑁆𑀢𑀺 𑀯𑀺𑀫𑁄𑀓𑁆𑀔𑁂𑀦𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄𑀢𑀺? 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦. 𑀓𑁄 𑀅𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 ¶ 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀝𑁆𑀞𑁄, 𑀆𑀭𑀫𑁆𑀫𑀡𑁂 𑀘 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀝𑁆𑀞𑁄, 𑀧𑀺𑀢𑀼 ¶ 𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀭𑀽𑀧𑁂𑀦 𑀯𑀺𑀫𑁄𑀓𑁆𑀔𑁂𑀦 𑀥𑀺𑀫𑀼𑀢𑁆𑀢𑀦𑁆𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀺𑀭𑀸𑀲𑀗𑁆𑀓𑀯𑀲𑁂𑀦 𑀥𑀺𑀫𑀼𑀢𑁆𑀢𑀁 𑀅𑀮𑁆𑀮𑀻𑀦𑀁. 𑀢𑀢𑁆𑀭𑀸𑀥𑀺𑀫𑀼𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀲𑀫𑀸𑀥𑀺𑀫𑁆𑀳𑀺 𑀅𑀮𑁆𑀮𑀻𑀦𑀁. 𑀢𑀤𑀥𑀺𑀫𑀼𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀛𑀸𑀦𑁂 𑀅𑀥𑀺𑀫𑀼𑀢𑁆𑀢𑀁. 𑀢𑀤𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀢𑀁 𑀛𑀸𑀦𑀁 𑀚𑁂𑀝𑁆𑀞𑀓𑀁. 𑀭𑀽𑀧𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀧𑀜𑁆𑀘 𑀓𑀸𑀫𑀕𑀼𑀡𑀕𑀭𑀼𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀓𑀼𑀮𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀢𑀻𑀡𑀺 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀕𑀭𑀼𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀮𑀸𑀪𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀅𑀝𑁆𑀞 𑀮𑁄𑀓𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀥𑀻𑀯𑀭𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀼𑀢𑁆𑀢𑀦𑁆𑀢𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀧𑀺𑀝𑀓𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀆𑀭𑀜𑁆𑀜𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀧𑀞𑀫𑀚𑁆𑀛𑀸𑀦𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀦𑀺 𑀧𑀝𑀺𑀮𑀸𑀪𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀓𑀫𑁆𑀫𑀧𑀭𑀸𑀬𑀡𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦. 𑀯𑀺𑀧𑀸𑀓𑀧𑀭𑀸𑀬𑀡𑀦𑁆𑀢𑀺 𑀧𑀯𑀢𑁆𑀢𑀺𑀯𑀲𑁂𑀦. 𑀓𑀫𑁆𑀫𑀕𑀭𑀼𑀓𑀦𑁆𑀢𑀺 𑀘𑁂𑀢𑀦𑀸𑀕𑀭𑀼𑀓𑀁. 𑀧𑀝𑀺𑀲𑀦𑁆𑀥𑀺𑀕𑀭𑀼𑀓𑀦𑁆𑀢𑀺 𑀉𑀧𑀧𑀢𑁆𑀢𑀺𑀕𑀭𑀼𑀓𑀁.

𑁮𑁪. 𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑀁 𑀜𑀢𑁆𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑀦𑀓𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀁 𑀜𑀢𑁆𑀯𑀸 ‘‘𑀓𑀺𑀦𑁆𑀢𑀺 𑀧𑀮𑀺𑀩𑁄𑀥𑁄 𑀅𑀬’’𑀦𑁆𑀢𑀺. 𑀦𑀦𑁆𑀤𑀺𑀲𑀁𑀬𑁄𑀚𑀦𑀁 𑀇𑀢𑀻𑀢𑀺 𑀬𑀸 𑀘𑀢𑀼𑀢𑁆𑀣𑀅𑀭𑀽𑀧𑀭𑀸𑀕𑀲𑀗𑁆𑀔𑀸𑀢𑀸 𑀦𑀦𑁆𑀤𑀻 𑀢𑀜𑁆𑀘 𑀲𑀁𑀬𑁄𑀚𑀦𑀁 𑀜𑀢𑁆𑀯𑀸. 𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀻𑀢𑀺 𑀅𑀣 ¶ 𑀢𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀢𑀺. 𑀏𑀢𑀁 𑀜𑀸𑀡𑀁 𑀢𑀣𑀁 𑀢𑀲𑁆𑀲𑀸𑀢𑀺 𑀏𑀢𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀯𑀺𑀧𑀲𑁆𑀲𑀢𑁄 𑀅𑀦𑀼𑀓𑁆𑀓𑀫𑁂𑀦 𑀉𑀧𑁆𑀧𑀦𑁆𑀦𑀁 𑀅𑀭𑀳𑀢𑁆𑀢𑀜𑀸𑀡𑀁 𑀅𑀯𑀺𑀧𑀭𑀻𑀢𑀁. 𑀯𑀼𑀲𑀻𑀫𑀢𑁄𑀢𑀺 𑀯𑀼𑀲𑀺𑀢𑀯𑀦𑁆𑀢𑀲𑁆𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀼𑀩𑁆𑀩𑀲𑀤𑀺𑀲𑁄 𑀏𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀧𑁄𑀲𑀸𑀮𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀫𑁄𑀖𑀭𑀸𑀚𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁫. 𑀧𑀦𑁆𑀦𑀭𑀲𑀫𑁂 ¶ ¶ 𑀫𑁄𑀖𑀭𑀸𑀚𑀲𑀼𑀢𑁆𑀢𑁂 𑁋 𑀤𑁆𑀯𑀸𑀳𑀦𑁆𑀢𑀺 𑀤𑁆𑀯𑁂 𑀯𑀸𑀭𑁂 𑀅𑀳𑀁. 𑀲𑁄 𑀳𑀺 𑀧𑀼𑀩𑁆𑀩𑁂 𑀅𑀚𑀺𑀢𑀲𑀼𑀢𑁆𑀢𑀲𑁆𑀲 (𑀲𑀼. 𑀦𑀺. 𑁧𑁦𑁩𑁮 𑀆𑀤𑀬𑁄) 𑀘 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀲𑁆𑀲 (𑀲𑀼. 𑀦𑀺. 𑁧𑁦𑁪𑁬 𑀆𑀤𑀬𑁄) 𑀘 𑀅𑀯𑀲𑀸𑀦𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺, 𑀪𑀕𑀯𑀸 𑀧𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀦 𑀩𑁆𑀬𑀸𑀓𑀸𑀲𑀺. 𑀢𑁂𑀦𑀸𑀳 𑁋 ‘‘𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲’’𑀦𑁆𑀢𑀺. 𑀬𑀸𑀯𑀢𑀢𑀺𑀬𑀜𑁆𑀘 𑀤𑁂𑀯𑀻𑀲𑀺, 𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀬𑀸𑀯𑀢𑀢𑀺𑀬𑀜𑁆𑀘 𑀲𑀳𑀥𑀫𑁆𑀫𑀺𑀓𑀁 𑀧𑀼𑀝𑁆𑀞𑁄 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀽𑀢𑁄 𑀇𑀲𑀺 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀬𑀸𑀓𑀭𑁄𑀢𑀻𑀢𑀺 𑀏𑀯𑀁 𑀫𑁂 𑀲𑀼𑀢𑀁. 𑀕𑁄𑀥𑀸𑀯𑀭𑀻𑀢𑀻𑀭𑁂𑀬𑁂𑀯 𑀓𑀺𑀭 𑀲𑁄 𑀏𑀯𑀫𑀲𑁆𑀲𑁄𑀲𑀺. 𑀢𑁂𑀦𑀸𑀳 𑁋 ‘‘𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢’’𑀦𑁆𑀢𑀺. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀁 𑀏𑀯.

𑁮𑁬. 𑀅𑀬𑀁 𑀮𑁄𑀓𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀧𑀭𑁄 𑀮𑁄𑀓𑁄𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄. 𑀲𑀤𑁂𑀯𑀓𑁄𑀢𑀺 𑀩𑁆𑀭𑀳𑁆𑀫𑀮𑁄𑀓𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀉𑀧𑀧𑀢𑁆𑀢𑀺𑀤𑁂𑀯𑀲𑀫𑁆𑀫𑀼𑀢𑀺𑀤𑁂𑀯𑀬𑀼𑀢𑁆𑀢𑁄. ‘‘𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄’’𑀢𑀺 𑀏𑀢𑀁 𑀯𑀸 ‘‘𑀲𑀤𑁂𑀯𑀓𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀬𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀢𑁂𑀦 𑀲𑀩𑁆𑀩𑁄𑀧𑀺 𑀢𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁭. 𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀦𑁆𑀢𑀺 𑀏𑀯𑀁 𑀅𑀕𑁆𑀕𑀤𑀲𑁆𑀲𑀸𑀯𑀺𑀁, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀕𑀢𑀺𑀧𑀭𑀸𑀬𑀡𑀸𑀤𑀻𑀦𑀺 𑀧𑀲𑁆𑀲𑀺𑀢𑀼𑀁 𑀲𑀫𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁮𑁮. 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀅𑀯𑀲𑀺𑀬𑀧𑀯𑀢𑁆𑀢𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀯𑀸 𑀢𑀼𑀘𑁆𑀙𑀲𑀗𑁆𑀔𑀸𑀭𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 ¶ 𑀯𑀸𑀢𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀧𑀲𑁆𑀲. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀉𑀤𑁆𑀥𑀭𑀺𑀢𑁆𑀯𑀸.

𑀮𑀼𑀚𑁆𑀚𑀢𑀻𑀢𑀺 𑀪𑀺𑀚𑁆𑀚𑀢𑀺. 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼. 𑀢𑀤𑁂𑀢𑀁 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁄 𑀲𑁂𑀢𑀫𑀡𑁆𑀟𑀮𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑀪𑀽𑀢𑁂 𑀤𑀺𑀝𑁆𑀞𑀫𑀡𑁆𑀟𑀮𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀭𑀽𑀧𑀬𑀦𑁆𑀢𑀻𑀢𑀺 𑀭𑀽𑀧𑀸, 𑀯𑀡𑁆𑀡𑀯𑀺𑀓𑀸𑀭𑀫𑀸𑀧𑀚𑁆𑀚𑀦𑁆𑀢𑀸 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀢𑁄 𑀧𑀯𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 ¶ , 𑀘𑀓𑁆𑀔𑀼𑀲𑁆𑀲 𑀯𑀸 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀢𑁄 𑀧𑀯𑀢𑁆𑀢𑁄 𑀲𑀫𑁆𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀧𑀘𑁆𑀘𑀬𑀸. 𑀯𑁂𑀤𑀬𑀺𑀢𑀦𑁆𑀢𑀺 ¶ 𑀯𑀺𑀦𑁆𑀤𑀦𑀁, 𑀯𑁂𑀤𑀦𑀸𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀁. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀤𑀼𑀓𑁆𑀔𑀁 𑀦 𑀲𑀼𑀔𑀦𑁆𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀁. 𑀫-𑀓𑀸𑀭𑁄 𑀲𑀦𑁆𑀥𑀺𑀧𑀤𑀯𑀲𑁂𑀦 𑀯𑀼𑀢𑁆𑀢𑁄. 𑀲𑁄 𑀧𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀬 𑀯𑁂𑀤𑀦𑀸𑀬 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀅𑀝𑁆𑀞𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀬𑀼𑀢𑁆𑀢𑀸𑀬 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑀥𑀸, 𑀲𑀦𑁆𑀢𑀻𑀭𑀡𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺.

𑀲𑀼𑀡𑀸𑀢𑀻𑀢𑀺 𑀲𑁄𑀢𑀁, 𑀢𑀁 𑀲𑀲𑀫𑁆𑀪𑀸𑀭𑀲𑁄𑀢𑀩𑀺𑀮𑀲𑁆𑀲 𑀅𑀦𑁆𑀢𑁄 𑀢𑀦𑀼𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀅𑀗𑁆𑀕𑀼𑀮𑀺𑀯𑁂𑀥𑀓𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀲𑀤𑁆𑀤𑀻𑀬𑀦𑁆𑀢𑀻𑀢𑀺 𑀲𑀤𑁆𑀤𑀸, 𑀉𑀤𑀸𑀳𑀭𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀖𑀸𑀬𑀢𑀻𑀢𑀺 𑀖𑀸𑀦𑀁, 𑀢𑀁 𑀲𑀲𑀫𑁆𑀪𑀸𑀭𑀖𑀸𑀦𑀩𑀺𑀮𑀲𑁆𑀲 𑀅𑀦𑁆𑀢𑁄 𑀅𑀚𑀧𑀤𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀖𑀸𑀦𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁 𑀢𑀺𑀝𑁆𑀞𑀢𑀺. 𑀕𑀦𑁆𑀥𑀺𑀬𑀦𑁆𑀢𑀻𑀢𑀺 𑀕𑀦𑁆𑀥𑀸, 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀺𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸, 𑀲𑀸𑀬𑀦𑀝𑁆𑀞𑁂𑀦 𑀯𑀸 𑀚𑀺𑀯𑁆𑀳𑀸. 𑀲𑀸 𑀲𑀲𑀫𑁆𑀪𑀸𑀭𑀚𑀺𑀯𑁆𑀳𑀸𑀬 𑀅𑀢𑀺𑀅𑀕𑁆𑀕𑀫𑀽𑀮𑀧𑀲𑁆𑀲𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀉𑀧𑀭𑀺𑀫𑀢𑀮𑀫𑀚𑁆𑀛𑁂 𑀪𑀺𑀦𑁆𑀦𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀸 𑀢𑀺𑀝𑁆𑀞𑀢𑀺. 𑀭𑀲𑀦𑁆𑀢𑀺 𑀢𑁂 𑀲𑀢𑁆𑀢𑀸𑀢𑀺 𑀭𑀲𑀸, 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀓𑀼𑀘𑁆𑀙𑀺𑀢𑀸𑀦𑀁 𑀆𑀲𑀯𑀥𑀫𑁆𑀫𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀲𑁄 𑀬𑀸𑀯𑀢𑀸 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀤𑀺𑀦𑁆𑀦𑀧𑀯𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀧𑁆𑀧𑀲𑀸𑀤𑁄 𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀬𑀣𑀸𑀭𑀳𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑁄 𑀢𑀺𑀝𑁆𑀞𑀢𑀺. 𑀨𑀼𑀲𑀺𑀬𑀦𑁆𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀸. 𑀫𑀦𑀢𑀻𑀢𑀺 𑀫𑀦𑁄, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀫𑀦𑁄𑀢𑀺 𑀲𑀳𑀸𑀯𑀚𑁆𑀚𑀦𑀪𑀯𑀗𑁆𑀕𑀁. 𑀥𑀫𑁆𑀫𑀸𑀢𑀺 𑀦𑀺𑀩𑁆𑀩𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 ¶ 𑀅𑀯𑀲𑁂𑀲𑀸 𑀥𑀫𑁆𑀫𑀸𑀭𑀫𑁆𑀫𑀡𑀥𑀫𑁆𑀫𑀸. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 ¶ 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀁. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁄, 𑀲𑁄 𑀲𑀫𑁆𑀧𑀬𑀼𑀢𑁆𑀢𑀸𑀬 𑀯𑁂𑀤𑀦𑀸𑀬 𑀯𑀺𑀧𑀸𑀓𑀧𑀘𑁆𑀘𑀬𑀯𑀚𑁆𑀚𑁂𑀳𑀺 𑀲𑁂𑀲𑁂𑀳𑀺 𑀲𑀢𑁆𑀢𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀦𑀦𑁆𑀢𑀭𑀸𑀬 𑀢𑁂𑀳𑁂𑀯 𑀲𑁂𑀲𑀸𑀦𑀁 𑀉𑀧𑀦𑀺𑀲𑁆𑀲𑀬𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀯𑀲𑀺𑀬𑀧𑀯𑀢𑁆𑀢𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀯𑀸𑀢𑀺 𑀅𑀯𑀲𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀲𑀗𑁆𑀔𑀸𑀭𑁂 𑀧𑀲𑁆𑀲𑀦𑀯𑀲𑁂𑀦 𑀑𑀮𑁄𑀓𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀭𑀽𑀧𑁂 𑀯𑀲𑁄 𑀦 𑀮𑀩𑁆𑀪𑀢𑀻𑀢𑀺 𑀭𑀽𑀧𑀲𑁆𑀫𑀺𑀁 ¶ 𑀯𑀲𑀯𑀢𑁆𑀢𑀺𑀪𑀸𑀯𑁄 𑀇𑀲𑁆𑀲𑀭𑀪𑀸𑀯𑁄 𑀦 𑀮𑀩𑁆𑀪𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑁄 𑀢𑀼𑀫𑁆𑀳𑀸𑀓𑀦𑁆𑀢𑀺 𑀅𑀢𑁆𑀢𑀦𑀺 𑀲𑀢𑀺 𑀅𑀢𑁆𑀢𑀦𑀺𑀬𑀁 𑀦𑀸𑀫 𑀳𑁄𑀢𑀺, 𑀅𑀢𑁆𑀢𑀸𑀬𑁂𑀯 𑀘 𑀦𑀢𑁆𑀣𑀺. 𑀢𑀲𑁆𑀫𑀸 ‘‘𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑁄 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀆𑀳. 𑀦𑀸𑀧𑀺 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁄 𑀦𑀸𑀫 𑀧𑀭𑁂𑀲𑀁 𑀅𑀢𑁆𑀢𑀸. 𑀢𑀲𑁆𑀫𑀺𑀁 𑀲𑀢𑀺 𑀅𑀜𑁆𑀜𑁂𑀲𑀁 𑀦𑀸𑀫 𑀲𑀺𑀬𑀸, 𑀲𑁄𑀧𑀺 𑀦𑀢𑁆𑀣𑀺. 𑀢𑀲𑁆𑀫𑀸 ‘‘𑀦𑀸𑀧𑀺 𑀅𑀜𑁆𑀜𑁂𑀲’’𑀦𑁆𑀢𑀺 𑀆𑀳. 𑀧𑀼𑀭𑀸𑀡𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀦𑁆𑀢𑀺 𑀦𑀬𑀺𑀤𑀁 𑀧𑀼𑀭𑀸𑀡𑀓𑀫𑁆𑀫𑀫𑁂𑀯, 𑀧𑀼𑀭𑀸𑀡𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀧𑀦𑁂𑀲 𑀓𑀸𑀬𑁄. 𑀢𑀲𑁆𑀫𑀸 𑀧𑀘𑁆𑀘𑀬𑀯𑁄𑀳𑀸𑀭𑁂𑀦 𑀏𑀯𑀁 𑀯𑀼𑀢𑁆𑀢𑁄. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺𑀆𑀤𑀺 𑀓𑀫𑁆𑀫𑀯𑁄𑀳𑀸𑀭𑀲𑁆𑀲𑁂𑀯 𑀯𑀲𑁂𑀦 𑀧𑀼𑀭𑀺𑀫𑀮𑀺𑀗𑁆𑀕𑀲𑀪𑀸𑀯𑀢𑀸𑀬 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀧𑀘𑁆𑀘𑀬𑁂𑀳𑀺 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘𑁂𑀢𑀦𑀸𑀯𑀢𑁆𑀣𑀼𑀓𑁄, 𑀘𑁂𑀢𑀦𑀸𑀫𑀽𑀮𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑁂𑀤𑀦𑀺𑀬𑀦𑁆𑀢𑀺 𑀯𑁂𑀤𑀦𑀸𑀬 𑀯𑀢𑁆𑀣𑀽𑀢𑀺 𑀤𑀝𑁆𑀞𑀩𑁆𑀩𑁄.

𑀭𑀽𑀧𑁂 𑀲𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 𑀭𑀽𑀧𑀲𑁆𑀫𑀺𑀁 𑀦𑀺𑀘𑁆𑀘𑀸𑀤𑀺𑀲𑀸𑀭𑁄 𑀦 𑀮𑀩𑁆𑀪𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑀽𑀧𑀁 𑀅𑀲𑁆𑀲𑀸𑀭𑀁 𑀦𑀺𑀲𑁆𑀲𑀸𑀭𑀦𑁆𑀢𑀺 𑀭𑀽𑀧𑀁 𑀅𑀲𑁆𑀲𑀸𑀭𑀁 𑀲𑀸𑀭𑀯𑀺𑀭𑀳𑀺𑀢𑀜𑁆𑀘. 𑀲𑀸𑀭𑀸𑀧𑀕𑀢𑀦𑁆𑀢𑀺 𑀲𑀸𑀭𑀢𑁄 𑀅𑀧𑀕𑀢𑀁. 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸𑀢𑀺 𑀪𑀗𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀦 𑀦𑀺𑀘𑁆𑀘𑀲𑀸𑀭𑁂𑀦 𑀯𑀸. 𑀓𑀲𑁆𑀲𑀘𑀺 𑀦𑀺𑀘𑁆𑀘𑀲𑀸𑀭𑀲𑁆𑀲 𑀅𑀪𑀸𑀯𑀢𑁄 𑀦𑀺𑀘𑁆𑀘𑀲𑀸𑀭𑁂𑀦 𑀲𑀸𑀭𑁄 𑀦𑀢𑁆𑀣𑀺. 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸𑀢𑀺 𑀞𑀺𑀢𑀺𑀲𑀼𑀔𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀲𑀼𑀔𑀲𑀸𑀭𑀲𑁆𑀲 𑀅𑀪𑀸𑀯𑀢𑁄 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸. 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀲𑀸𑀭𑀲𑀸𑀭𑁂𑀦 𑀯𑀸. 𑀦𑀺𑀘𑁆𑀘𑁂𑀦 𑀯𑀸𑀢𑀺 𑀪𑀗𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀦𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀦𑀺𑀘𑁆𑀘𑁂𑀦 𑀯𑀸. 𑀥𑀼𑀯𑁂𑀦 𑀯𑀸𑀢𑀺 𑀯𑀺𑀚𑁆𑀚𑀫𑀸𑀦𑀓𑀸𑀮𑁂𑀧𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀣𑀺𑀭𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀥𑀼𑀯𑁂𑀦 𑀯𑀸. 𑀲𑀲𑁆𑀲𑀢𑁂𑀦 𑀯𑀸𑀢𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀲𑁆𑀲 𑀲𑀩𑁆𑀩𑀓𑀸𑀮𑁂 𑀯𑀺𑀚𑁆𑀚𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀲𑀲𑁆𑀲𑀢𑁂𑀦 𑀯𑀸. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸𑀢𑀺 𑀚𑀭𑀸𑀪𑀗𑁆𑀕𑀯𑀲𑁂𑀦 𑀅𑀯𑀺𑀧𑀭𑀺𑀡𑀸𑀫𑀧𑀓𑀢𑀺𑀓𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸.

𑀘𑀓𑁆𑀔𑀼 ¶ 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸𑀢𑀺 ‘‘𑀓𑀸𑀭𑀓𑁄 𑀯𑁂𑀤𑀓𑁄 𑀲𑀬𑀁𑀯𑀲𑀻’’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀓𑁂𑀦 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀪𑀸𑀯𑀢𑁄𑀬𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀘 𑀲𑀼𑀜𑁆𑀜𑀁. 𑀲𑀩𑁆𑀩𑀁 𑀘𑀓𑁆𑀔𑀸𑀤𑀺𑀮𑁄𑀓𑀺𑀬𑀥𑀫𑁆𑀫𑀚𑀸𑀢𑀁 ¶ 𑀬𑀲𑁆𑀫𑀸 𑀅𑀢𑁆𑀢𑀸 𑀘 𑀏𑀢𑁆𑀣 𑀦𑀢𑁆𑀣𑀺, 𑀅𑀢𑁆𑀢𑀦𑀺𑀬𑀜𑁆𑀘 𑀏𑀢𑁆𑀣 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀲𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄 ¶ . 𑀮𑁄𑀓𑀼𑀢𑁆𑀢𑀭𑀸𑀧𑀺 𑀥𑀫𑁆𑀫𑀸 𑀅𑀢𑁆𑀢𑀢𑁆𑀢𑀦𑀺𑀬𑁂𑀳𑀺 𑀲𑀼𑀜𑁆𑀜𑀸𑀬𑁂𑀯, 𑀲𑀼𑀜𑁆𑀜𑀸𑀢𑀻𑀢𑀥𑀫𑁆𑀫𑀸 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀢𑁆𑀢𑀢𑁆𑀢𑀦𑀺𑀬𑀲𑀸𑀭𑀲𑁆𑀲 𑀦𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀮𑁄𑀓𑁂 𑀘 ‘‘𑀲𑀼𑀜𑁆𑀜𑀁 𑀖𑀭𑀁 𑀲𑀼𑀜𑁆𑀜𑁄 𑀖𑀝𑁄’’𑀢𑀺 𑀯𑀼𑀢𑁆𑀢𑁄 𑀖𑀭𑀲𑁆𑀲 𑀖𑀝𑀲𑁆𑀲 𑀘 𑀦𑀢𑁆𑀣𑀺𑀪𑀸𑀯𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀝𑁂 𑀘 𑀅𑀜𑁆𑀜𑀲𑁆𑀲 𑀦𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀪𑀕𑀯𑀢𑀸 𑀘 𑀇𑀢𑀺 𑀬𑀫𑁆𑀧𑀺 𑀓𑁄𑀘𑀺 𑀢𑀢𑁆𑀣 𑀦 𑀳𑁄𑀢𑀺, 𑀢𑁂𑀦 𑀢𑀁 𑀲𑀼𑀜𑁆𑀜𑀁. 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀢𑀁 𑀲𑀦𑁆𑀢𑀁 𑀇𑀤𑀫𑀢𑁆𑀣𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀣𑀸 𑀜𑀸𑀬𑀕𑀦𑁆𑀣𑁂 𑀲𑀤𑁆𑀤𑀕𑀦𑁆𑀣𑁂 𑀘 𑀅𑀬𑀫𑁂𑀯𑀢𑁆𑀣𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁. 𑀅𑀦𑀺𑀲𑁆𑀲𑀭𑀺𑀬𑀢𑁄𑀢𑀺 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂 𑀅𑀯𑀲𑀯𑀢𑁆𑀢𑀦𑀢𑁄. 𑀅𑀓𑀸𑀫𑀓𑀸𑀭𑀺𑀬𑀢𑁄𑀢𑀺 𑀅𑀢𑁆𑀢𑀦𑁄 𑀅𑀓𑀸𑀫𑀁 𑀅𑀭𑀼𑀘𑀺𑀓𑀭𑀡𑀯𑀲𑁂𑀦. 𑀅𑀧𑀸𑀧𑀼𑀡𑀺𑀬𑀢𑁄𑀢𑀺 𑀞𑀸𑀢𑀼𑀁 𑀧𑀢𑀺𑀝𑁆𑀞𑀸𑀪𑀸𑀯𑀢𑁄. 𑀅𑀯𑀲𑀯𑀢𑁆𑀢𑀦𑀢𑁄𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀅𑀯𑀢𑁆𑀢𑀦𑀢𑁄. 𑀧𑀭𑀢𑁄𑀢𑀺 𑀅𑀦𑀺𑀘𑁆𑀘𑀢𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄. 𑀯𑀺𑀯𑀺𑀢𑁆𑀢𑀢𑁄𑀢𑀺 𑀦𑀺𑀲𑁆𑀲𑀭𑀢𑁄.

𑀲𑀼𑀤𑁆𑀥𑀦𑁆𑀢𑀺 𑀓𑁂𑀯𑀮𑀁 𑀇𑀲𑁆𑀲𑀭𑀓𑀸𑀮𑀧𑀓𑀢𑀻𑀳𑀺 𑀯𑀺𑀦𑀸 𑀓𑁂𑀯𑀮𑀁 𑀧𑀘𑁆𑀘𑀬𑀸𑀬𑀢𑁆𑀢𑀧𑀯𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀼𑀤𑁆𑀥𑀁 𑀦𑀸𑀫. 𑀅𑀢𑁆𑀢𑀦𑀺𑀬𑀯𑀺𑀭𑀳𑀺𑀢𑁄 𑀲𑀼𑀤𑁆𑀥𑀥𑀫𑁆𑀫𑀧𑀼𑀜𑁆𑀚𑁄𑀢𑀺 𑀘. 𑀲𑀼𑀤𑁆𑀥𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀁, 𑀲𑀼𑀤𑁆𑀥𑀁 𑀲𑀗𑁆𑀔𑀸𑀭𑀲𑀦𑁆𑀢𑀢𑀺𑀦𑁆𑀢𑀺 𑀲𑀼𑀤𑁆𑀥𑀁 𑀧𑀲𑁆𑀲𑀦𑁆𑀢𑀲𑁆𑀲 𑀚𑀸𑀦𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑀺𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀲𑀗𑁆𑀔𑀸𑀭𑀲𑀦𑁆𑀢𑀢𑀺𑀁. 𑀢𑀣𑁂𑀯 𑀲𑀼𑀤𑁆𑀥𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑀸𑀤𑀻𑀦𑀺, 𑀏𑀓𑀝𑁆𑀞𑀸𑀦𑀺 𑀆𑀤𑀭𑁂𑀦 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀸𑀦𑀺. 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀫𑀭𑀡𑀫𑀼𑀔𑁂 𑀪𑀬𑀁 𑀦 𑀳𑁄𑀢𑀺. 𑀕𑀸𑀫𑀡𑀻𑀢𑀺 𑀆𑀮𑀧𑀦𑀁. 𑀢𑀺𑀡𑀓𑀝𑁆𑀞𑀲𑀫𑀁 𑀮𑁄𑀓𑀦𑁆𑀢𑀺 𑀇𑀫𑀁 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀮𑁄𑀓𑀁. 𑀬𑀤𑀸 𑀢𑀺𑀡𑀓𑀝𑁆𑀞𑀲𑀫𑀁 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀬𑀣𑀸 𑀅𑀭𑀜𑁆𑀜𑁂 𑀢𑀺𑀡𑀓𑀝𑁆𑀞𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀅𑀢𑁆𑀢𑀸𑀦𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀕𑀡𑁆𑀳𑀸𑀢𑀻𑀢𑀺 𑀦 𑀳𑁄𑀢𑀺, 𑀢𑁂𑀲𑀼 𑀯𑀸 𑀢𑀺𑀡𑀓𑀝𑁆𑀞𑀸𑀤𑀻𑀲𑀼 𑀲𑀬𑀫𑁂𑀯 𑀦𑀲𑁆𑀲𑀦𑁆𑀢𑁂𑀲𑀼𑀧𑀺 ¶ 𑀯𑀺𑀦𑀲𑁆𑀲𑀦𑁆𑀢𑁂𑀲𑀼𑀧𑀺 𑀅𑀢𑁆𑀢𑀸 𑀦𑀲𑁆𑀲𑀢𑀺, 𑀅𑀢𑁆𑀢𑀦𑀺𑀬𑁄 𑀦𑀲𑁆𑀲𑀢𑀻𑀢𑀺 𑀦 𑀳𑁄𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀓𑀸𑀬𑁂𑀧𑀺 𑀦𑀲𑁆𑀲𑀦𑁆𑀢𑁂 𑀯𑀸 𑀯𑀺𑀦𑀲𑁆𑀲𑀦𑁆𑀢𑁂 𑀯𑀸 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀪𑀺𑀚𑁆𑀚𑀢𑀻𑀢𑀺 𑀅𑀧𑀲𑁆𑀲𑀦𑁆𑀢𑁄 𑀧𑀜𑁆𑀜𑀸𑀬 𑀢𑀺𑀡𑀓𑀝𑁆𑀞𑀲𑀫𑀁 𑀧𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀜𑁆𑀜𑀁 𑀧𑀢𑁆𑀣𑀬𑀢𑁂 𑀓𑀺𑀜𑁆𑀘𑀺, 𑀅𑀜𑁆𑀜𑀢𑁆𑀭𑀧𑁆𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀯𑀁 𑀯𑀸 𑀅𑀢𑁆𑀢𑀪𑀸𑀯𑀁 𑀯𑀸 𑀦 𑀧𑀢𑁆𑀣𑁂𑀢𑀺.

𑀭𑀽𑀧𑀁 𑀲𑀫𑀦𑁆𑀦𑁂𑀲𑀢𑀻𑀢𑀺 𑀭𑀽𑀧𑀲𑁆𑀲 𑀲𑀸𑀭𑀁 𑀧𑀭𑀺𑀬𑁂𑀲𑀢𑀺. 𑀅𑀳𑀦𑁆𑀢𑀺 𑀯𑀸𑀢𑀺 𑀤𑀺𑀝𑁆𑀞𑀺𑀯𑀲𑁂𑀦. 𑀫𑀫𑀦𑁆𑀢𑀺 𑀯𑀸𑀢𑀺 𑀢𑀡𑁆𑀳𑀸𑀯𑀲𑁂𑀦. 𑀅𑀲𑁆𑀫𑀻𑀢𑀺 𑀯𑀸𑀢𑀺 𑀫𑀸𑀦𑀯𑀲𑁂𑀦. 𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦 𑀳𑁄𑀢𑀺.

𑀇𑀥𑀸𑀢𑀺 ¶ 𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄, 𑀲𑁆𑀯𑀸𑀬𑀁 𑀓𑀢𑁆𑀣𑀘𑀺 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁪.𑁩𑁩). 𑀓𑀢𑁆𑀣𑀘𑀺 𑀲𑀸𑀲𑀦𑀁 ¶ . 𑀬𑀣𑀸𑀳 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀤𑀻. 𑀦𑀺. 𑁨.𑁨𑁧𑁪). 𑀓𑀢𑁆𑀣𑀘𑀺 𑀑𑀓𑀸𑀲𑀁. 𑀬𑀣𑀸𑀳 𑁋

‘‘𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺. (𑀤𑀻. 𑀦𑀺. 𑁨.𑁩𑁬𑁯);

𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯. 𑀬𑀣𑀸𑀳 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄’’𑀢𑀺 (𑀫. 𑀦𑀺. 𑁧.𑁩𑁦). 𑀇𑀥 𑀧𑀦 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀏𑀢𑁆𑀣 𑀧𑀦 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 ‘‘𑀅𑀲𑁆𑀲𑀼𑀢𑀯𑀸’’𑀇𑀢𑀺. 𑀬𑀲𑁆𑀲 𑀳𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀺𑀦𑀺𑀘𑁆𑀙𑀬𑀭𑀳𑀺𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑀝𑀺𑀲𑁂𑀥𑀓𑁄 𑀦𑁂𑀯 𑀆𑀕𑀫𑁄, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀦𑁂𑀯 𑀅𑀥𑀺𑀕𑀫𑁄 𑀅𑀢𑁆𑀣𑀺, 𑀲𑁄 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 ‘‘𑀅𑀲𑁆𑀲𑀼𑀢𑀯𑀸’’ 𑀇𑀢𑀺. 𑀲𑁆𑀯𑀸𑀬𑀁 𑁋

𑀧𑀼𑀣𑀽𑀦𑀁 𑀚𑀦𑀦𑀸𑀤𑀻𑀳𑀺, 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄;

𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸, 𑀧𑀼𑀣𑀼𑀯𑀸𑀬𑀁 𑀚𑀦𑁄 𑀇𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦);

𑀲𑁄 𑀳𑀺 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀬𑀣𑀸𑀳 𑁋 𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸 ¶ , 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑁆𑀧𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀜𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀝𑀸 𑀦𑀺𑀯𑀼𑀝𑀸 𑀑𑀯𑀼𑀝𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸 (𑀫𑀳𑀸𑀦𑀺. 𑁫𑁧, 𑁯𑁪), 𑀧𑀼𑀣𑀽𑀦𑀁 𑀯𑀸 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀭𑀫𑁆𑀫𑀼𑀔𑀸𑀦𑀁 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑀸𑀦𑀁 𑀚𑀦𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼𑀯 𑀅𑀬𑀁 𑀯𑀺𑀲𑀼𑀁𑀬𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄, 𑀯𑀺𑀲𑀁𑀲𑀝𑁆𑀞𑁄 ¶ 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑀚𑀦𑁄𑀢𑀺𑀧𑀺 𑀧𑀼𑀣𑀼𑀚𑁆𑀚𑀦𑁄. 𑀏𑀯𑀫𑁂𑀢𑁂𑀳𑀺 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑁂 𑀢𑁂 𑁋

‘‘𑀤𑀼𑀯𑁂 ¶ 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁧; 𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦; 𑀥. 𑀲. 𑀅𑀝𑁆𑀞. 𑁧𑁦𑁦𑁭) 𑁋

𑀤𑁆𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀲𑀼 𑀅𑀭𑀺𑀬𑀸𑀢𑀺 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀇𑀭𑀺𑀬𑀦𑀢𑁄, 𑀲𑀤𑁂𑀯𑀓𑁂𑀦 𑀘 𑀮𑁄𑀓𑁂𑀦 𑀅𑀭𑀡𑀻𑀬𑀢𑁄 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀯𑀼𑀘𑁆𑀘𑀦𑁆𑀢𑀺, 𑀩𑀼𑀤𑁆𑀥𑀸 𑀏𑀯 𑀯𑀸 𑀇𑀥 𑀅𑀭𑀺𑀬𑀸. 𑀬𑀣𑀸𑀳 𑁋 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀢𑀣𑀸𑀕𑀢𑁄 𑀅𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁮).

𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀢𑁆𑀣 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘 ‘‘𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀬𑁄𑀕𑁂𑀦 𑀲𑁄𑀪𑀦𑀸 𑀧𑀼𑀭𑀺𑀲𑀸𑀢𑀺 𑀲𑀧𑁆𑀧𑀼𑀭𑀺𑀲𑀸. 𑀲𑀩𑁆𑀩𑁂𑀯 𑀯𑀸 𑀏𑀢𑁂 𑀤𑁆𑀯𑀺𑀥𑀸𑀧𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀧𑀺 𑀳𑀺 𑀅𑀭𑀺𑀬𑀸 𑀘 𑀲𑀧𑁆𑀧𑀼𑀭𑀺𑀲𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺 𑀩𑀼𑀤𑁆𑀥𑀲𑀸𑀯𑀓𑀸𑀧𑀺. 𑀬𑀣𑀸𑀳 𑁋

‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;

𑀤𑀼𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁, 𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀻’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦; 𑀥. 𑀲. 𑀅𑀝𑁆𑀞. 𑁧𑁦𑁦𑁭);

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 ¶ 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀳𑀺 𑀩𑀼𑀤𑁆𑀥𑀲𑀸𑀯𑀓𑁄 𑀯𑀼𑀢𑁆𑀢𑁄. 𑀓𑀢𑀜𑁆𑀜𑀼𑀢𑀸𑀤𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀢𑀺, 𑀬𑁄 𑀇𑀫𑁂𑀲𑀁 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑁄, 𑀦 𑀘 𑀤𑀲𑁆𑀲𑀦𑁂 𑀲𑀸𑀥𑀼𑀓𑀸𑀭𑀻, 𑀲𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘𑀓𑁆𑀔𑀼𑀦𑀸 𑀅𑀤𑀲𑁆𑀲𑀸𑀯𑀻, 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻𑀢𑀺 𑀤𑀼𑀯𑀺𑀥𑁄, 𑀢𑁂𑀲𑀼 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀫𑀁𑀲𑀘𑀓𑁆𑀔𑀼𑀦𑀸 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀭𑀺𑀬𑀸 𑀤𑀺𑀝𑁆𑀞𑀸𑀧𑀺 𑀅𑀤𑀺𑀝𑁆𑀞𑀸𑀯 𑀳𑁄𑀦𑁆𑀢𑀺 𑀢𑁂𑀲𑀁 𑀘𑀓𑁆𑀔𑀼𑀦𑀸 𑀯𑀡𑁆𑀡𑀫𑀢𑁆𑀢𑀕𑀳𑀡𑀢𑁄, 𑀦 𑀅𑀭𑀺𑀬𑀪𑀸𑀯𑀕𑁄𑀘𑀭𑀢𑁄. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀘𑀓𑁆𑀔𑀼𑀦𑀸 𑀅𑀭𑀺𑀬𑁂 𑀧𑀲𑁆𑀲𑀦𑁆𑀢𑀺, 𑀦 𑀘 𑀢𑁂 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀺𑀦𑁄.

𑀢𑀢𑁆𑀭𑀺𑀤𑀁 ¶ 𑀯𑀢𑁆𑀣𑀼 𑁋 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀸𑀲𑀺𑀦𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 ¶ 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀭𑀺𑀬𑀸 𑀦𑀸𑀫, 𑀪𑀦𑁆𑀢𑁂, 𑀓𑀻𑀤𑀺𑀲𑀸’’𑀢𑀺? 𑀣𑁂𑀭𑁄 𑀆𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀫𑀳𑀮𑁆𑀮𑀓𑁄 𑀅𑀭𑀺𑀬𑀸𑀦𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀳 𑀘𑀭𑀦𑁆𑀢𑁄𑀧𑀺 𑀦𑁂𑀯 𑀅𑀭𑀺𑀬𑁂 𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀚𑁆𑀚𑀸𑀦𑀸, 𑀆𑀯𑀼𑀲𑁄, 𑀅𑀭𑀺𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀦𑁂𑀯 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀁 𑀦 𑀤𑀲𑁆𑀲𑀦𑀁, 𑀜𑀸𑀡𑁂𑀦 𑀤𑀲𑁆𑀲𑀦𑀫𑁂𑀯 𑀤𑀲𑁆𑀲𑀦𑀁. 𑀬𑀣𑀸𑀳 𑁋 ‘‘𑀅𑀮𑀁 𑀢𑁂, 𑀯𑀓𑁆𑀓𑀮𑀺, 𑀓𑀺𑀁 𑀢𑁂 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭). 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄𑀧𑀺 𑀜𑀸𑀡𑁂𑀦 𑀅𑀭𑀺𑀬𑁂𑀳𑀺 𑀤𑀺𑀝𑁆𑀞𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀅𑀧𑀲𑁆𑀲𑀦𑁆𑀢𑁄, 𑀅𑀭𑀺𑀬𑀸𑀦𑀁 𑀅𑀥𑀺𑀕𑀢𑀜𑁆𑀘 𑀥𑀫𑁆𑀫𑀁 𑀅𑀦𑀥𑀺𑀕𑀘𑁆𑀙𑀦𑁆𑀢𑁄, 𑀅𑀭𑀺𑀬𑀓𑀭𑀥𑀫𑁆𑀫𑀸𑀦𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀅𑀤𑀺𑀝𑁆𑀞𑀢𑁆𑀢𑀸 ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀅𑀭𑀺𑀬𑀥𑀫𑁆𑀫𑁂 𑀅𑀓𑀼𑀲𑀮𑁄. 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣 𑀧𑀦 𑁋

𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫, 𑀏𑀓𑀫𑁂𑀓𑁂𑀢𑁆𑀣 𑀧𑀜𑁆𑀘𑀥𑀸;

𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁, ‘‘𑀅𑀯𑀺𑀦𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨; 𑀲𑀼. 𑀦𑀺. 𑀅𑀝𑁆𑀞. 𑁧.𑀉𑀭𑀕𑀲𑀼𑀢𑁆𑀢𑀯𑀡𑁆𑀡𑀦𑀸; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦; 𑀥. 𑀲. 𑀅𑀝𑁆𑀞. 𑁧𑁦𑁦𑁭);

𑀅𑀬𑀜𑁆𑀳𑀺 ¶ 𑀲𑀁𑀯𑀭𑀯𑀺𑀦𑀬𑁄 𑀧𑀳𑀸𑀦𑀯𑀺𑀦𑀬𑁄𑀢𑀺 𑀤𑀼𑀯𑀺𑀥𑁄 𑀯𑀺𑀦𑀬𑁄. 𑀏𑀢𑁆𑀣 𑀘 𑀤𑀼𑀯𑀺𑀥𑁂𑀧𑀺 𑀯𑀺𑀦𑀬𑁂 𑀏𑀓𑀫𑁂𑀓𑁄𑀧𑀺 𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀲𑀁𑀯𑀭𑀯𑀺𑀦𑀬𑁄𑀧𑀺 𑀳𑀺 𑀲𑀻𑀮𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀧𑀳𑀸𑀦𑀯𑀺𑀦𑀬𑁄𑀧𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑁄.

𑀢𑀢𑁆𑀣 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀅𑀬𑀁 𑀲𑀻𑀮𑀲𑀁𑀯𑀭𑁄. ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁨𑁯𑁫; 𑀲𑀁. 𑀦𑀺. 𑁪.𑁨𑁩𑁯; 𑀅. 𑀦𑀺. 𑁩.𑁧𑁬) 𑀅𑀬𑀁 𑀲𑀢𑀺𑀲𑀁𑀯𑀭𑁄.

‘‘𑀬𑀸𑀦𑀺 ¶ 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸,)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁧; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪; 𑀦𑁂𑀢𑁆𑀢𑀺. 𑁧𑁧, 𑁪𑁫; 𑀥. 𑀲. 𑀅𑀝𑁆𑀞. 𑁧𑁦𑁦𑁭) 𑁋

𑀅𑀬𑀁 ¶ 𑀜𑀸𑀡𑀲𑀁𑀯𑀭𑁄. ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁪; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀔𑀦𑁆𑀢𑀺𑀲𑀁𑀯𑀭𑁄. ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀯𑀻𑀭𑀺𑀬𑀲𑀁𑀯𑀭𑁄. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 ‘‘𑀲𑀁𑀯𑀭𑁄’’, 𑀯𑀺𑀦𑀬𑀦𑀢𑁄 ‘‘𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀲𑀁𑀯𑀭𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲, 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀦𑀢𑁆𑀣𑀲𑁆𑀲 𑀧𑀳𑀸𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀻𑀪𑀸𑀯𑀲𑁆𑀲, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀸𑀳𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀭𑀢𑀺𑀲𑀜𑁆𑀜𑀸𑀬 ¶ , 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀅𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸𑀬, 𑀉𑀧𑁂𑀓𑁆𑀔𑀸𑀜𑀸𑀡𑁂𑀦 𑀅𑀦𑀼𑀧𑁂𑀓𑁆𑀔𑀸𑀬, 𑀅𑀦𑀼𑀮𑁄𑀫𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀧𑀝𑀺𑀮𑁄𑀫𑀪𑀸𑀯𑀲𑁆𑀲, 𑀕𑁄𑀢𑁆𑀭𑀪𑀼𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲 𑀧𑀳𑀸𑀦𑀁. 𑀏𑀢𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫.

𑀬𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁄 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀉𑀤𑀓𑀧𑀺𑀝𑁆𑀞𑁂 𑀲𑁂𑀯𑀸𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀏𑀢𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭; 𑀯𑀺𑀪. 𑁬𑁨𑁮) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀬𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀳𑀸𑀦𑀁, 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀓𑀺𑀮𑁂𑀲𑀸𑀦𑀁, 𑀏𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 ¶ 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁, 𑀏𑀢𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀢𑀁 𑀧𑀳𑀸𑀦𑀯𑀢𑁄 𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀪𑀯𑀢𑁄𑀧𑁂𑀢𑀁 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀳𑀸𑀦𑀯𑀺𑀦𑀬𑁄𑀧𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄 (𑀫. 𑀦𑀺. 𑀅𑀝𑁆𑀞. 𑁧.𑁨; 𑀲𑀼. 𑀦𑀺. 𑀅𑀝𑁆𑀞. 𑁧.𑀉𑀭𑀕𑀲𑀼𑀢𑁆𑀢𑀯𑀡𑁆𑀡𑀦𑀸; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦).

𑀏𑀯𑀫𑀬𑀁 ¶ 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁄 𑀪𑁂𑀤𑀢𑁄 𑀘 𑀤𑀲𑀯𑀺𑀥𑁄 𑀯𑀺𑀦𑀬𑁄 𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸, 𑀧𑀳𑀸𑀢𑀩𑁆𑀩𑀲𑁆𑀲 𑀘 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑀲𑁆𑀫𑀸 𑀏𑀢𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁 ‘‘𑀅𑀯𑀺𑀦𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀲𑁂𑀯 𑀦𑀬𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄, 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣𑀧𑀺. 𑀦𑀺𑀦𑁆𑀦𑀸𑀦𑀸𑀓𑀭𑀡𑀜𑁆𑀳𑀺 𑀏𑀢𑀫𑀢𑁆𑀣𑀢𑁄. 𑀬𑀣𑀸𑀳 𑁋 ‘‘𑀬𑁂𑀯 𑀢𑁂 𑀅𑀭𑀺𑀬𑀸, 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸. 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸, 𑀢𑁂𑀯 𑀢𑁂 𑀅𑀭𑀺𑀬𑀸. 𑀬𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄, 𑀲𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄. 𑀬𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄, 𑀲𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄. 𑀬𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸, 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸. 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸, 𑀢𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸. 𑀅𑀭𑀺𑀬𑁂𑀢𑀺 𑀯𑀸, 𑀲𑀧𑁆𑀧𑀼𑀭𑀺𑀲𑁂𑀢𑀺 𑀯𑀸, 𑀅𑀭𑀺𑀬𑀥𑀫𑁆𑀫𑁂𑀢𑀺 ¶ 𑀯𑀸, 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀢𑀺 𑀯𑀸, 𑀅𑀭𑀺𑀬𑀯𑀺𑀦𑀬𑁂𑀢𑀺 𑀯𑀸, 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑁂𑀢𑀺 𑀯𑀸 𑀏𑀲𑁂𑀲𑁂 𑀏𑀓𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂𑀯𑀸𑀢𑀺 (𑀥. 𑀲. 𑀅𑀝𑁆𑀞. 𑁧𑁦𑁦𑁭; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦).

𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, ‘‘𑀬𑀁 𑀭𑀽𑀧𑀁, 𑀲𑁄 𑀅𑀳𑀁, 𑀬𑁄 𑀅𑀳𑀁, 𑀢𑀁 𑀭𑀽𑀧’’𑀦𑁆𑀢𑀺 𑀭𑀽𑀧𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 ‘‘𑀬𑀸 𑀅𑀘𑁆𑀘𑀺, 𑀲𑁄 𑀯𑀡𑁆𑀡𑁄. 𑀬𑁄 𑀯𑀡𑁆𑀡𑁄, 𑀲𑀸 𑀅𑀘𑁆𑀘𑀻’’𑀢𑀺 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄…𑀧𑁂… 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 (𑀧𑀝𑀺. 𑀫. 𑁧.𑁧𑁩𑁦-𑁧𑁩𑁧) 𑀏𑀯𑀁 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀯𑀺𑀬 𑀢𑀁 𑀭𑀽𑀧𑀯𑀦𑁆𑀢𑀁 ‘‘𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀽𑀧𑀫𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀯𑀺𑀬 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀫𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀓𑀭𑀡𑁆𑀟𑀓𑁂 𑀫𑀡𑀺𑀁 𑀯𑀺𑀬 𑀢𑀁 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀫𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 ¶ ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀲𑀼𑀤𑁆𑀥𑀭𑀽𑀧𑀁𑀬𑁂𑀯 ‘‘𑀅𑀢𑁆𑀢𑀸’’𑀢𑀺 𑀓𑀣𑀺𑀢𑀁. ‘‘𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁩𑁧) 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀅𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀓𑀣𑀺𑀢𑀁, ‘‘𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦’’𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸 𑀓𑀣𑀺𑀢𑁄. 𑀢𑀢𑁆𑀣 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸. 𑀅𑀯𑀲𑁂𑀲𑁂𑀲𑀼 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀏𑀯𑀫𑁂𑀢𑁆𑀣 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀫𑀕𑁆𑀕𑀸𑀯𑀭𑀡𑀸, 𑀦 𑀲𑀕𑁆𑀕𑀸𑀯𑀭𑀡𑀸, 𑀧𑀞𑀫𑀫𑀕𑁆𑀕𑀯𑀚𑁆𑀛𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀆𑀭𑀜𑁆𑀜𑀺𑀓𑁄𑀢𑀺 ¶ 𑀅𑀭𑀜𑁆𑀜𑁂 𑀦𑀺𑀯𑀸𑀲𑀁. 𑀧𑀯𑀦𑁂𑀢𑀺 𑀫𑀳𑀦𑁆𑀢𑁂 𑀕𑀫𑁆𑀪𑀻𑀭𑀯𑀦𑁂. 𑀘𑀭𑀫𑀸𑀦𑁄𑀢𑀺 𑀢𑀳𑀺𑀁 𑀢𑀳𑀺𑀁 𑀯𑀺𑀘𑀭𑀫𑀸𑀦𑁄. 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀻𑀢𑀺 𑀦𑀺𑀩𑁆𑀪𑀬𑁄 𑀦𑀺𑀭𑀸𑀲𑀗𑁆𑀓𑁄 𑀘𑀭𑀢𑀺. 𑀅𑀦𑀸𑀧𑀸𑀣𑀕𑀢𑁄 𑀮𑀼𑀤𑁆𑀤𑀲𑁆𑀲𑀸𑀢𑀺 ¶ 𑀫𑀺𑀕𑀮𑀼𑀤𑁆𑀤𑀲𑁆𑀲 𑀧𑀭𑀫𑁆𑀫𑀼𑀔𑀕𑀢𑁄. 𑀅𑀦𑁆𑀢𑀫𑀓𑀸𑀲𑀺 𑀫𑀸𑀭𑀦𑁆𑀢𑀺 𑀓𑀺𑀮𑁂𑀲𑀫𑀸𑀭𑀁 𑀯𑀸 𑀤𑁂𑀯𑀧𑀼𑀢𑁆𑀢𑀫𑀸𑀭𑀁 𑀯𑀸 𑀅𑀦𑁆𑀢𑀁 𑀅𑀓𑀸𑀲𑀺. 𑀅𑀧𑀤𑀁 𑀯𑀥𑀺𑀢𑁆𑀯𑀸𑀢𑀺 𑀓𑀺𑀮𑁂𑀲𑀧𑀤𑀁 𑀳𑀦𑁆𑀢𑁆𑀯𑀸 𑀦𑀸𑀲𑁂𑀢𑁆𑀯𑀸. 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄𑀢𑀺 𑀫𑀸𑀭𑀲𑁆𑀲 𑀅𑀤𑀲𑁆𑀲𑀦𑀯𑀺𑀲𑀬𑀁 𑀧𑀢𑁆𑀢𑁄. 𑀅𑀦𑀸𑀧𑀸𑀣𑀕𑀢𑁄𑀢𑀺 𑀫𑀸𑀭𑀲𑁆𑀲 𑀧𑀭𑀫𑁆𑀫𑀼𑀔𑀁 𑀧𑀢𑁆𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀫𑁄𑀖𑀭𑀸𑀚𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀧𑀺𑀗𑁆𑀕𑀺𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁯. 𑀲𑁄𑀴𑀲𑀫𑁂 ¶ 𑀧𑀺𑀗𑁆𑀕𑀺𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑁋 𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄𑀢𑀺 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀚𑀭𑀸𑀪𑀺𑀪𑀽𑀢𑁄 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀚𑀸𑀢𑀺𑀬𑀸, 𑀤𑀼𑀩𑁆𑀩𑀮𑁄 𑀘 ‘‘𑀇𑀥 𑀧𑀸𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀢𑁆𑀭𑁂𑀯 𑀓𑀭𑁄𑀢𑀺, 𑀯𑀺𑀦𑀝𑁆𑀞𑀧𑀼𑀭𑀺𑀫𑀙𑀯𑀺𑀯𑀡𑁆𑀡𑁄 𑀘. 𑀢𑁂𑀦𑀸𑀳 𑁋 ‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄’’𑀢𑀺. 𑀫𑀸𑀳𑀁 ¶ 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯𑀸𑀢𑀺 𑀫𑀸𑀳𑀁 𑀢𑀼𑀬𑁆𑀳𑀁 𑀥𑀫𑁆𑀫𑀁 𑀅𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑁆𑀢𑀭𑀸 𑀏𑀯 𑀅𑀯𑀺𑀤𑁆𑀯𑀸 𑀳𑀼𑀢𑁆𑀯𑀸 𑀅𑀦𑀲𑁆𑀲𑀺𑀁. 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀢𑀯 𑀧𑀸𑀤𑀫𑀽𑀮𑁂 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂 𑀯𑀸 𑀚𑀸𑀢𑀺𑀚𑀭𑀸𑀬 𑀯𑀺𑀧𑁆𑀧𑀳𑀸𑀦𑀁 𑀦𑀺𑀩𑁆𑀩𑀸𑀦𑀁 𑀥𑀫𑁆𑀫𑀭𑀲𑀁 𑀅𑀳𑀁 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀆𑀘𑀺𑀓𑁆𑀔.

𑀅𑀩𑀮𑁄𑀢𑀺 𑀩𑀮𑀯𑀺𑀭𑀳𑀺𑀢𑁄. 𑀤𑀼𑀩𑁆𑀩𑀮𑁄𑀢𑀺 𑀤𑀼𑀩𑁆𑀩𑀮𑀩𑀮𑁄. 𑀅𑀧𑁆𑀧𑀩𑀮𑁄𑀢𑀺 𑀧𑀭𑀺𑀢𑁆𑀢𑀩𑀮𑁄. 𑀅𑀧𑁆𑀧𑀣𑀸𑀫𑁄𑀢𑀺 𑀧𑀭𑀺𑀢𑁆𑀢𑀯𑀻𑀭𑀺𑀬𑁄. 𑀯𑀻𑀢𑀯𑀡𑁆𑀡𑁄𑀢𑀺 𑀧𑀭𑀺𑀯𑀢𑁆𑀢𑀺𑀢𑀙𑀯𑀺𑀯𑀡𑁆𑀡𑁄. 𑀯𑀺𑀕𑀢𑀯𑀡𑁆𑀡𑁄𑀢𑀺 𑀅𑀧𑀕𑀢𑀙𑀯𑀺𑀯𑀡𑁆𑀡𑁄. 𑀯𑀺𑀕𑀘𑁆𑀙𑀺𑀢𑀯𑀡𑁆𑀡𑁄𑀢𑀺 𑀤𑀽𑀭𑀻𑀪𑀽𑀢𑀙𑀯𑀺𑀯𑀡𑁆𑀡𑁄. 𑀬𑀸 𑀲𑀸 𑀧𑀼𑀭𑀺𑀫𑀸 𑀲𑀼𑀪𑀸 𑀯𑀡𑁆𑀡𑀦𑀺𑀪𑀸𑀢𑀺 𑀬𑀸 𑀲𑀸 𑀲𑀼𑀪𑀸 𑀲𑀼𑀦𑁆𑀤𑀭𑀸 𑀧𑀼𑀭𑀺𑀫𑀓𑀸𑀮𑁂 𑀲𑀢𑀺, 𑀲𑀸 𑀯𑀡𑁆𑀡𑀦𑀺𑀪𑀸 𑀏𑀢𑀭𑀳𑀺 𑀅𑀦𑁆𑀢𑀭𑀳𑀺𑀢𑀸 𑀯𑀺𑀕𑀢𑀸. 𑀆𑀤𑀻𑀦𑀯𑁄 𑀧𑀸𑀢𑀼𑀪𑀽𑀢𑁄𑀢𑀺 𑀉𑀧𑀤𑁆𑀤𑀯𑁄 𑀧𑀸𑀢𑀼𑀭𑀳𑁄𑀲𑀺. ‘‘𑀬𑀸 𑀲𑀸 𑀧𑀼𑀭𑀺𑀫𑀸 𑀲𑀼𑀪𑀸 𑀯𑀡𑁆𑀡𑀦𑀺𑀪𑀸’’𑀢𑀺 𑀧𑀸𑀞𑀁 𑀞𑀧𑁂𑀢𑁆𑀯𑀸 ‘‘𑀬𑀸 𑀲𑀼𑀪𑀸 𑀅𑀲𑁆𑀲𑀸’’𑀢𑀺 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺.

𑀅𑀲𑀼𑀤𑁆𑀥𑀸𑀢𑀺 𑀧𑀝𑀮𑀸𑀤𑀻𑀳𑀺 𑀅𑀲𑀼𑀤𑁆𑀥𑀸. 𑀅𑀯𑀺𑀲𑀼𑀤𑁆𑀥𑀸𑀢𑀺 𑀢𑀺𑀫𑀺𑀭𑀸𑀤𑀻𑀳𑀺 𑀅𑀯𑀺𑀲𑀼𑀤𑁆𑀥𑀸. 𑀅𑀧𑀭𑀺𑀲𑀼𑀤𑁆𑀥𑀸𑀢𑀺 𑀲𑀫𑀦𑁆𑀢𑀢𑁄 𑀨𑁄𑀝𑀧𑀝𑀮𑀸𑀤𑀻𑀳𑀺 𑀧𑀭𑀺𑀬𑁄𑀦𑀤𑁆𑀥𑀢𑁆𑀢𑀸 𑀅𑀧𑀭𑀺𑀲𑀼𑀤𑁆𑀥𑀸. 𑀅𑀯𑁄𑀤𑀸𑀢𑀸𑀢𑀺 𑀦𑀧𑁆𑀧𑀲𑀦𑁆𑀦𑀸 𑀧𑀲𑀦𑁆𑀦𑀲𑀤𑀺𑀲𑀸. 𑀦𑁄 𑀢𑀣𑀸 𑀘𑀓𑁆𑀔𑀼𑀦𑀸 𑀭𑀽𑀧𑁂 𑀧𑀲𑁆𑀲𑀸𑀫𑀻𑀢𑀺 𑀬𑀣𑀸 𑀧𑁄𑀭𑀸𑀡𑀘𑀓𑁆𑀔𑀼𑀦𑀸 𑀭𑀽𑀧𑀸𑀭𑀫𑁆𑀫𑀡𑀁 𑀧𑀲𑁆𑀲𑀸𑀫𑀺 𑀑𑀮𑁄𑀓𑁂𑀫𑀺, 𑀢𑀣𑀸 ¶ 𑀢𑁂𑀦 𑀧𑀓𑀸𑀭𑁂𑀦 𑀇𑀤𑀸𑀦𑀺 𑀦 𑀧𑀲𑁆𑀲𑀸𑀫𑀺. 𑀲𑁄𑀢𑀁 𑀅𑀲𑀼𑀤𑁆𑀥𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀸𑀳𑀁 𑀦𑀲𑁆𑀲𑀦𑁆𑀢𑀺 𑀅𑀳𑀁 𑀫𑀸 𑀯𑀺𑀦𑀲𑁆𑀲𑀁.

𑁯𑁦. 𑀇𑀤𑀸𑀦𑀺 𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄 𑀓𑀸𑀬𑁂 𑀲𑀸𑀧𑁂𑀓𑁆𑀔𑀢𑀸𑀬 ‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀫𑀸𑀳 ¶ . 𑀢𑁂𑀦𑀲𑁆𑀲 𑀪𑀕𑀯𑀸 𑀓𑀸𑀬𑁂 𑀲𑀺𑀦𑁂𑀳𑀧𑁆𑀧𑀳𑀸𑀦𑀢𑁆𑀣𑀁 ‘‘𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀭𑀽𑀧𑁂𑀲𑀽𑀢𑀺 𑀭𑀽𑀧𑀳𑁂𑀢𑀼 𑀭𑀽𑀧𑀧𑀘𑁆𑀘𑀬𑀸. 𑀯𑀺𑀳𑀜𑁆𑀜𑀫𑀸𑀦𑁂𑀢𑀺 𑀓𑀫𑁆𑀫𑀓𑀸𑀭𑀡𑀸𑀤𑀻𑀳𑀺 𑀉𑀧𑀳𑀜𑁆𑀜𑀫𑀸𑀦𑁂. 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀽𑀢𑀺 𑀘𑀓𑁆𑀔𑀼𑀭𑁄𑀕𑀸𑀤𑀻𑀳𑀺 𑀘 𑀭𑀽𑀧𑀳𑁂𑀢𑀼𑀬𑁂𑀯 𑀚𑀦𑀸 𑀭𑀼𑀧𑁆𑀧𑀦𑁆𑀢𑀺 𑀩𑀸𑀥𑀺𑀬𑀦𑁆𑀢𑀺.

𑀳𑀜𑁆𑀜𑀦𑁆𑀢𑀻𑀢𑀺 𑀖𑀝𑀻𑀬𑀦𑁆𑀢𑀺. 𑀯𑀺𑀳𑀜𑁆𑀜𑀦𑁆𑀢𑀻𑀢𑀺 𑀯𑀺𑀳𑁂𑀲𑀺𑀬𑀦𑁆𑀢𑀺. 𑀉𑀧𑀯𑀺𑀳𑀜𑁆𑀜𑀦𑁆𑀢𑀻𑀢𑀺 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀸𑀤𑀺𑀁 𑀮𑀪𑀦𑁆𑀢𑀺. 𑀉𑀧𑀖𑀸𑀢𑀺𑀬𑀦𑁆𑀢𑀻𑀢𑀺 𑀫𑀭𑀡𑀁 𑀮𑀪𑀦𑁆𑀢𑀺. 𑀓𑀼𑀧𑁆𑀧𑀦𑁆𑀢𑀻𑀢𑀺 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀧𑀻𑀴𑀬𑀦𑁆𑀢𑀻𑀢𑀺 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀖𑀝𑁆𑀝𑀬𑀦𑁆𑀢𑀻𑀢𑀺 𑀖𑀝𑁆𑀝𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀩𑁆𑀬𑀸𑀥𑀺𑀢𑀸𑀢𑀺 𑀪𑀻𑀢𑀸. 𑀤𑁄𑀫𑀦𑀲𑁆𑀲𑀺𑀢𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑀁 𑀧𑀢𑁆𑀢𑀸. 𑀯𑁂𑀫𑀸𑀦𑁂𑀢𑀺 𑀦𑀲𑁆𑀲𑀫𑀸𑀦𑁂.

𑁯𑁧. 𑀏𑀯𑀁 ¶ 𑀪𑀕𑀯𑀢𑀸 𑀬𑀸𑀯 𑀅𑀭𑀳𑀢𑁆𑀢𑀁, 𑀢𑀸𑀯 𑀓𑀣𑀺𑀢𑀁 𑀧𑀝𑀺𑀧𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀺𑀗𑁆𑀕𑀺𑀬𑁄 𑀚𑀭𑀸𑀤𑀼𑀩𑁆𑀩𑀮𑀢𑀸𑀬 𑀯𑀺𑀲𑁂𑀲𑀁 𑀅𑀦𑀥𑀺𑀕𑀦𑁆𑀢𑁆𑀯𑀸 𑀘 𑀧𑀼𑀦 ‘‘𑀤𑀺𑀲𑀸 𑀘𑀢𑀲𑁆𑀲𑁄’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀤𑁂𑀲𑀦𑀁 𑀬𑀸𑀘𑀢𑀺.

𑁯𑁨. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀦𑀧𑀺 𑀬𑀸𑀯 𑀅𑀭𑀳𑀢𑁆𑀢𑀁, 𑀢𑀸𑀯 𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑁂’’𑀢𑀺 𑀕𑀸𑀣𑀫𑀸𑀳.

𑀢𑀡𑁆𑀳𑀸𑀥𑀺𑀧𑀦𑁆𑀦𑁂𑀢𑀺 𑀢𑀡𑁆𑀳𑀸𑀬 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀞𑀺𑀢𑁂. 𑀢𑀡𑁆𑀳𑀸𑀦𑀼𑀕𑁂𑀢𑀺 𑀢𑀡𑁆𑀳𑀸𑀬 𑀲𑀳 𑀕𑀘𑁆𑀙𑀦𑁆𑀢𑁂. 𑀢𑀡𑁆𑀳𑀸𑀦𑀼𑀕𑀢𑁂𑀢𑀺 𑀢𑀡𑁆𑀳𑀸𑀬 𑀅𑀦𑀼𑀩𑀦𑁆𑀥𑀦𑁆𑀢𑁂. 𑀢𑀡𑁆𑀳𑀸𑀦𑀼𑀲𑀝𑁂𑀢𑀺 𑀢𑀡𑁆𑀳𑀸𑀬 𑀲𑀳 𑀥𑀸𑀯𑀦𑁆𑀢𑁂. 𑀢𑀡𑁆𑀳𑀸𑀬 𑀧𑀦𑁆𑀦𑁂𑀢𑀺 𑀢𑀡𑁆𑀳𑀸𑀬 𑀦𑀺𑀫𑀼𑀕𑁆𑀕𑁂. 𑀧𑀝𑀺𑀧𑀦𑁆𑀦𑁂𑀢𑀺 𑀢𑀡𑁆𑀳𑀸𑀬 𑀅𑀯𑀢𑁆𑀣𑀝𑁂. 𑀅𑀪𑀺𑀪𑀽𑀢𑁂𑀢𑀺 𑀫𑀤𑁆𑀤𑀺𑀢𑁂. 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁂𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀳𑀺𑀢𑀓𑀼𑀲𑀮𑀘𑀺𑀢𑁆𑀢𑁂.

𑀲𑀦𑁆𑀢𑀸𑀧𑀚𑀸𑀢𑁂𑀢𑀺 𑀲𑀜𑁆𑀚𑀸𑀢𑀘𑀺𑀢𑁆𑀢𑀲𑀦𑁆𑀢𑀸𑀧𑁂. 𑀈𑀢𑀺𑀚𑀸𑀢𑁂𑀢𑀺 𑀭𑁄𑀕𑀼𑀧𑁆𑀧𑀦𑁆𑀦𑁂. 𑀉𑀧𑀤𑁆𑀤𑀯𑀚𑀸𑀢𑁂𑀢𑀺 𑀆𑀤𑀻𑀦𑀯𑀚𑀸𑀢𑁂. 𑀉𑀧𑀲𑀕𑁆𑀕𑀚𑀸𑀢𑁂𑀢𑀺 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀚𑀸𑀢𑁂.

𑀯𑀺𑀭𑀚𑀁 𑀯𑀻𑀢𑀫𑀮𑀦𑁆𑀢𑀺 𑀏𑀢𑁆𑀣 𑀯𑀺𑀭𑀚𑀦𑁆𑀢𑀺 𑀯𑀺𑀕𑀢𑀭𑀸𑀕𑀸𑀤𑀺𑀭𑀚𑀁. 𑀯𑀻𑀢𑀫𑀮𑀦𑁆𑀢𑀺 𑀯𑀻𑀢𑀭𑀸𑀕𑀸𑀤𑀺𑀫𑀮𑀁. 𑀭𑀸𑀕𑀸𑀤𑀬𑁄 𑀳𑀺 𑀅𑀚𑁆𑀛𑁄𑀢𑁆𑀣𑀭𑀡𑀝𑁆𑀞𑁂𑀦 𑀭𑀚𑁄 𑀦𑀸𑀫, 𑀤𑀽𑀲𑀝𑁆𑀞𑁂𑀦 𑀫𑀮𑀁 𑀦𑀸𑀫. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀓𑀢𑁆𑀣𑀘𑀺 𑀧𑀞𑀫𑀫𑀕𑁆𑀕𑀜𑀸𑀡𑀁 ¶ , 𑀓𑀢𑁆𑀣𑀘𑀺 𑀆𑀤𑀻𑀦𑀺 𑀢𑀻𑀡𑀺 𑀫𑀕𑁆𑀕𑀜𑀸𑀡𑀸𑀦𑀺, 𑀓𑀢𑁆𑀣𑀘𑀺 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀫𑁆𑀧𑀺. 𑀇𑀥 𑀧𑀦 𑀚𑀝𑀺𑀮𑀲𑀳𑀲𑁆𑀲𑀲𑁆𑀲 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀁. 𑀧𑀺𑀗𑁆𑀕𑀺𑀬𑀲𑁆𑀲 𑀢𑀢𑀺𑀬𑀫𑀕𑁆𑀕𑀜𑀸𑀡𑀫𑁂𑀯. 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀏𑀯𑀁 ¶ 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀧𑀺𑀗𑁆𑀕𑀺𑀬𑁄 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀅𑀦𑁆𑀢𑀭𑀦𑁆𑀢𑀭𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑀁 𑀦𑀸𑀫 𑀤𑁂𑀲𑀦𑀁 𑀦 𑀮𑀪𑀢𑀺 𑀫𑀬𑁆𑀳𑀁 𑀫𑀸𑀢𑀼𑀮𑁄 𑀩𑀸𑀯𑀭𑀻 𑀲𑀯𑀦𑀸𑀬𑀸’’𑀢𑀺. 𑀢𑁂𑀦 𑀲𑀺𑀦𑁂𑀳𑀯𑀺𑀓𑁆𑀔𑁂𑀧𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀦𑀲𑁆𑀲 𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀩𑁆𑀩𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀏𑀳𑀺𑀪𑀺𑀓𑁆𑀔𑀼𑀦𑁄 𑀅𑀳𑁂𑀲𑀼𑀦𑁆𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀧𑀺𑀗𑁆𑀕𑀺𑀬𑀫𑀸𑀡𑀯𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁩. 𑀇𑀢𑁄 ¶ ¶ 𑀧𑀭𑀁 𑀲𑀗𑁆𑀕𑀻𑀢𑀺𑀓𑀸𑀭𑀸 𑀤𑁂𑀲𑀦𑀁 𑀣𑁄𑀫𑁂𑀦𑁆𑀢𑀸 ‘‘𑀇𑀤𑀫𑀯𑁄𑀘 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀇𑀤𑀫𑀯𑁄𑀘𑀸𑀢𑀺 𑀇𑀤𑀁 𑀧𑀸𑀭𑀸𑀬𑀦𑀁 𑀅𑀯𑁄𑀘. 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀦𑁆𑀢𑀺 𑀩𑀸𑀯𑀭𑀺𑀲𑁆𑀲 𑀧𑀭𑀺𑀘𑀸𑀭𑀓𑁂𑀦 𑀧𑀺𑀗𑁆𑀕𑀺𑀬𑁂𑀦 𑀲𑀳 𑀲𑁄𑀴𑀲𑀸𑀦𑀁, 𑀩𑀼𑀤𑁆𑀥𑀲𑁆𑀲 𑀯𑀸 𑀪𑀕𑀯𑀢𑁄 𑀧𑀭𑀺𑀘𑀸𑀭𑀓𑀸𑀦𑀁 𑀲𑁄𑀴𑀲𑀸𑀦𑀦𑁆𑀢𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁. 𑀢𑁂 𑀏𑀯 𑀘 𑀩𑁆𑀭𑀸𑀳𑁆𑀫𑀡𑀸 𑀢𑀢𑁆𑀣 𑀲𑁄𑀴𑀲𑀲𑀼 𑀤𑀺𑀲𑀸𑀲𑀼 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀯𑀸𑀫𑀧𑀲𑁆𑀲𑀢𑁄 𑀘 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀘 𑀙 𑀙 𑀬𑁄𑀚𑀦𑀸 𑀦𑀺𑀲𑀺𑀦𑁆𑀦𑀸 𑀉𑀚𑀼𑀓𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀅𑀳𑁄𑀲𑀺. 𑀅𑀚𑁆𑀛𑀺𑀝𑁆𑀞𑁄𑀢𑀺 𑀬𑀸𑀘𑀺𑀢𑁄.

𑁯𑁪-𑁯𑁭. 𑀅𑀢𑁆𑀣𑀫𑀜𑁆𑀜𑀸𑀬𑀸𑀢𑀺 𑀧𑀸𑀴𑀺𑀅𑀢𑁆𑀣𑀫𑀜𑁆𑀜𑀸𑀬. 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀧𑀸𑀴𑀺𑀫𑀜𑁆𑀜𑀸𑀬. 𑀧𑀸𑀭𑀸𑀬𑀦𑀦𑁆𑀢𑀺 𑀏𑀯𑀁 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 𑀅𑀥𑀺𑀯𑀘𑀦𑀁 𑀆𑀭𑁄𑀧𑁂𑀢𑁆𑀯𑀸 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀸𑀫𑀸𑀦𑀺 𑀓𑀺𑀢𑁆𑀢𑀬𑀦𑁆𑀢𑁄 ‘‘𑀅𑀚𑀺𑀢𑁄…𑀧𑁂… 𑀩𑀼𑀤𑁆𑀥𑀲𑁂𑀝𑁆𑀞𑀫𑀼𑀧𑀸𑀕𑀫𑀼’’𑀦𑁆𑀢𑀺 𑀆𑀳𑀁𑀲𑀼. 𑀢𑀢𑁆𑀣 𑀲𑀫𑁆𑀧𑀦𑁆𑀦𑀘𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀤𑀝𑁆𑀞𑀸𑀦𑀪𑀽𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀸𑀤𑀺𑀦𑀸 𑀲𑀫𑁆𑀧𑀦𑁆𑀦𑀁. 𑀇𑀲𑀺𑀦𑁆𑀢𑀺 𑀫𑀳𑁂𑀲𑀺𑀁.

𑀦𑀺𑀤𑁆𑀤𑁂𑀲𑁂 𑀉𑀧𑀸𑀕𑀫𑀺𑀁𑀲𑀽𑀢𑀺 𑀲𑀫𑀻𑀧𑀁 𑀕𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀅𑀯𑀺𑀤𑀽𑀭𑀝𑁆𑀞𑀸𑀦𑀁 𑀕𑀫𑀺𑀁𑀲𑀼. 𑀧𑀬𑀺𑀭𑀼𑀧𑀸𑀲𑀺𑀁𑀲𑀽𑀢𑀺 ¶ 𑀲𑀫𑀻𑀧𑁂 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀧𑀼𑀘𑁆𑀙𑀺𑀁𑀲𑀽𑀢𑀺 𑀧𑀭𑀺𑀧𑀼𑀘𑁆𑀙𑀁 𑀆𑀳𑀭𑀺𑀁𑀲𑀼. 𑀧𑀭𑀺𑀕𑀡𑁆𑀳𑀺𑀁𑀲𑀽𑀢𑀺 𑀢𑀼𑀮𑀬𑀺𑀁𑀲𑀼. ‘‘𑀘𑁄𑀤𑀬𑀺𑀁𑀲𑀽’’𑀢𑀺 𑀓𑁂𑀘𑀺.

𑀲𑀻𑀮𑀸𑀘𑀸𑀭𑀦𑀺𑀩𑁆𑀩𑀢𑁆𑀢𑀻𑀢𑀺 𑀉𑀢𑁆𑀢𑀫𑀲𑀻𑀮𑀸𑀘𑀸𑀭𑀦𑀺𑀩𑁆𑀩𑀢𑁆𑀢𑀺, 𑀫𑀕𑁆𑀕𑁂𑀦 𑀦𑀺𑀧𑁆𑀨𑀦𑁆𑀦𑀲𑀻𑀮𑀦𑁆𑀢𑀺 𑀅𑀢𑁆𑀣𑁄.

𑀕𑀫𑁆𑀪𑀻𑀭𑁂𑀢𑀺 𑀉𑀢𑁆𑀢𑀸𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀤𑀼𑀤𑁆𑀤𑀲𑁂𑀢𑀺 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑁂, 𑀤𑀼𑀓𑁆𑀔𑁂𑀦 𑀤𑀝𑁆𑀞𑀩𑁆𑀩𑁂, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀝𑁆𑀞𑀼𑀁. 𑀤𑀼𑀤𑁆𑀤𑀲𑀢𑁆𑀢𑀸𑀯 𑀤𑀼𑀭𑀦𑀼𑀩𑁄𑀥𑁂, 𑀤𑀼𑀓𑁆𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀩𑁆𑀩𑁂, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀼𑀁. 𑀲𑀦𑁆𑀢𑁂𑀢𑀺 𑀦𑀺𑀩𑁆𑀩𑀼𑀢𑁂. 𑀧𑀡𑀻𑀢𑁂𑀢𑀺 𑀅𑀢𑀧𑁆𑀧𑀓𑁂. 𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀓𑁆𑀓𑀸𑀯𑀘𑀭𑁂𑀢𑀺 𑀢𑀓𑁆𑀓𑁂𑀦 𑀦 𑀅𑀯𑀘𑀭𑀺𑀢𑀩𑁆𑀩𑁂 ¶ 𑀦 𑀑𑀕𑀸𑀳𑀺𑀢𑀩𑁆𑀩𑁂 𑀜𑀸𑀡𑁂𑀦𑁂𑀯 𑀅𑀯𑀘𑀭𑀺𑀢𑀩𑁆𑀩𑁂. 𑀦𑀺𑀧𑀼𑀡𑁂𑀢𑀺 𑀲𑀡𑁆𑀳𑁂. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁂𑀢𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀺𑀢𑀩𑁆𑀩𑁂.

𑁯𑁮. 𑀢𑁄𑀲𑁂𑀲𑀻𑀢𑀺 𑀢𑀼𑀝𑁆𑀞𑀺𑀁 𑀆𑀧𑀸𑀤𑁂𑀲𑀺. 𑀯𑀺𑀢𑁄𑀲𑁂𑀲𑀻𑀢𑀺 𑀯𑀺𑀯𑀺𑀥𑀸 𑀢𑁂𑀲𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺. 𑀧𑀲𑀸𑀤𑁂𑀲𑀻𑀢𑀺 𑀢𑁂𑀲𑀁 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀅𑀓𑀸𑀲𑀺 ¶ . 𑀆𑀭𑀸𑀥𑁂𑀲𑀻𑀢𑀺 𑀆𑀭𑀸𑀥𑀬𑀺 𑀲𑀺𑀤𑁆𑀥𑀺𑀁 𑀧𑀸𑀧𑁂𑀲𑀺. 𑀅𑀢𑁆𑀢𑀫𑀦𑁂 𑀅𑀓𑀸𑀲𑀻𑀢𑀺 𑀲𑁄𑀫𑀦𑀲𑁆𑀲𑀯𑀲𑁂𑀦 𑀲𑀓𑀫𑀦𑁂 𑀅𑀓𑀸𑀲𑀺.

𑁯𑁯. 𑀢𑀢𑁄 𑀧𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀽𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀁𑀲𑀼.

𑁧𑁦𑁧. 𑀢𑀲𑁆𑀫𑀸 𑀧𑀸𑀭𑀸𑀬𑀦𑀦𑁆𑀢𑀺 𑀢𑀲𑁆𑀲 𑀧𑀸𑀭𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀆𑀬𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦𑁨. 𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀦𑁆𑀢𑀺 𑀅𑀲𑁆𑀲 𑀅𑀬𑀁 𑀲𑀫𑁆𑀩𑀦𑁆𑀥𑁄 𑁋 𑀪𑀕𑀯𑀢𑀸 𑀳𑀺 𑀧𑀸𑀭𑀸𑀬𑀦𑁂 𑀤𑁂𑀲𑀺𑀢𑁂 𑀲𑁄𑀴𑀲𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀅𑀯𑀲𑁂𑀲𑀸𑀦𑀜𑁆𑀘 𑀘𑀼𑀤𑁆𑀤𑀲𑀓𑁄𑀝𑀺𑀲𑀗𑁆𑀔𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀢𑀢𑁄 ¶ 𑀧𑀸𑀲𑀸𑀡𑀓𑁂 𑀭𑀫𑁆𑀫𑁂, 𑀧𑀸𑀭𑀸𑀬𑀦𑀲𑀫𑀸𑀕𑀫𑁂;

𑀅𑀫𑀢𑀁 𑀧𑀸𑀧𑀬𑀻 𑀩𑀼𑀤𑁆𑀥𑁄, 𑀘𑀼𑀤𑁆𑀤𑀲 𑀧𑀸𑀡𑀓𑁄𑀝𑀺𑀬𑁄’’𑀢𑀺. (𑀲𑀼. 𑀦𑀺. 𑀅𑀝𑁆𑀞. 𑁨.𑁧𑁧𑁩𑁮);

𑀦𑀺𑀝𑁆𑀞𑀺𑀢𑀸𑀬 𑀧𑀦 𑀥𑀫𑁆𑀫𑀤𑁂𑀲𑀦𑀸𑀬 𑀢𑀢𑁄 𑀢𑀢𑁄 𑀆𑀕𑀢𑀸 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀸𑀫𑀦𑀺𑀕𑀫𑀸𑀤𑀻𑀲𑁆𑀯𑁂𑀯 𑀧𑀸𑀢𑀼𑀭𑀳𑁂𑀲𑀼𑀁. 𑀪𑀕𑀯𑀸𑀧𑀺 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄. 𑀢𑀢𑁆𑀣 𑀧𑀺𑀗𑁆𑀕𑀺𑀬𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀩𑀸𑀯𑀭𑀺𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀆𑀭𑁄𑀘𑁂𑀢𑀼𑀁, 𑀧𑀝𑀺𑀲𑁆𑀲𑀼𑀢𑀜𑁆𑀳𑀺 𑀢𑀲𑁆𑀲𑁂𑀯 𑀫𑀬𑀸’’𑀢𑀺. 𑀅𑀣 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄 𑀜𑀸𑀡𑀕𑀫𑀦𑁂𑀦𑁂𑀯 𑀕𑁄𑀥𑀸𑀯𑀭𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀧𑀸𑀤𑀕𑀫𑀦𑁂𑀦 𑀅𑀲𑁆𑀲𑀫𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀫𑁂𑀦𑀁 𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀤𑀽𑀭𑀢𑁄𑀯 𑀢𑀁 𑀔𑀸𑀭𑀺𑀚𑀝𑀸𑀤𑀺𑀯𑀺𑀭𑀳𑀺𑀢𑀁 𑀪𑀺𑀓𑁆𑀔𑀼𑀯𑁂𑀲𑁂𑀦𑀸𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀦𑀺𑀝𑁆𑀞𑀫𑀕𑀫𑀸𑀲𑀺. 𑀲𑀫𑁆𑀧𑀢𑁆𑀢𑀜𑁆𑀘𑀸𑀧𑀺 𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀧𑀺𑀗𑁆𑀕𑀺𑀬, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺? ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀉𑀧𑁆𑀧𑀦𑁆𑀦𑁄, 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂 𑀦𑀺𑀲𑀺𑀦𑁆𑀦𑁄 𑀅𑀫𑁆𑀳𑀸𑀓𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀫𑀳𑀁 𑀢𑀼𑀬𑁆𑀳𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀩𑀸𑀯𑀭𑀻 𑀫𑀳𑀢𑀸 ¶ 𑀲𑀓𑁆𑀓𑀸𑀭𑁂𑀦 ¶ 𑀲𑀧𑀭𑀺𑀲𑁄 𑀢𑀁 𑀧𑀽𑀚𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀗𑁆𑀕𑀺𑀬𑁄 ‘‘𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀦𑀼𑀕𑀸𑀬𑀺𑀲𑁆𑀲𑀦𑁆𑀢𑀺 𑀪𑀕𑀯𑀢𑁄 𑀕𑀻𑀢𑀁 𑀅𑀦𑀼𑀕𑀸𑀬𑀺𑀲𑁆𑀲𑀁. 𑀬𑀣𑀸𑀤𑁆𑀤𑀓𑁆𑀔𑀻𑀢𑀺 𑀬𑀣𑀸 𑀲𑀸𑀫𑀁 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁂𑀦 𑀅𑀲𑀸𑀥𑀸𑀭𑀡𑀜𑀸𑀡𑁂𑀦 𑀘 𑀅𑀤𑁆𑀤𑀓𑁆𑀔𑀺. 𑀦𑀺𑀓𑁆𑀓𑀸𑀫𑁄𑀢𑀺 𑀧𑀳𑀻𑀦𑀓𑀸𑀫𑁄. ‘‘𑀦𑀺𑀓𑁆𑀓𑀫𑁄’’𑀢𑀺𑀧𑀺 𑀧𑀸𑀞𑁄, 𑀯𑀻𑀭𑀺𑀬𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀦𑁆𑀢𑁄 𑀯𑀸 𑀅𑀓𑀼𑀲𑀮𑀧𑀓𑁆𑀔𑀸. 𑀦𑀺𑀩𑁆𑀩𑀦𑁄𑀢𑀺 𑀓𑀺𑀮𑁂𑀲𑀯𑀦𑀯𑀺𑀭𑀳𑀺𑀢𑁄, 𑀢𑀡𑁆𑀳𑀸𑀯𑀺𑀭𑀳𑀺𑀢𑁄 𑀏𑀯 𑀯𑀸. 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂𑀢𑀺 𑀬𑁂𑀳𑀺 𑀓𑀺𑀮𑁂𑀲𑁂𑀳𑀺 𑀫𑀼𑀲𑀸 𑀪𑀡𑁂𑀬𑁆𑀬, 𑀏𑀢𑁂 𑀢𑀲𑁆𑀲 𑀧𑀳𑀻𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁨.𑁧𑁧𑁩𑁮).

𑀅𑀫𑀮𑁄𑀢𑀺 𑀓𑀺𑀮𑁂𑀲𑀫𑀮𑀯𑀺𑀭𑀳𑀺𑀢𑁄. 𑀯𑀺𑀫𑀮𑁄𑀢𑀺 𑀯𑀺𑀕𑀢𑀓𑀺𑀮𑁂𑀲𑀫𑀮𑁄. 𑀦𑀺𑀫𑁆𑀫𑀮𑁄𑀢𑀺 𑀓𑀺𑀮𑁂𑀲𑀫𑀮𑀲𑀼𑀤𑁆𑀥𑁄. 𑀫𑀮𑀸𑀧𑀕𑀢𑁄𑀢𑀺 𑀓𑀺𑀮𑁂𑀲𑀫𑀮𑀸 𑀤𑀽𑀭𑀻𑀪𑀽𑀢𑁄 𑀳𑀼𑀢𑁆𑀯𑀸 𑀘𑀭𑀢𑀺. 𑀫𑀮𑀯𑀺𑀧𑁆𑀧𑀳𑀻𑀦𑁄𑀢𑀺 𑀓𑀺𑀮𑁂𑀲𑀫𑀮𑀧𑁆𑀧𑀳𑀻𑀦𑁄. 𑀫𑀮𑀯𑀺𑀫𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀲𑀩𑁆𑀩𑀫𑀮𑀯𑀻𑀢𑀺𑀯𑀢𑁆𑀢𑁄𑀢𑀺 𑀯𑀸𑀲𑀦𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑀫𑀮𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀢𑁂 𑀯𑀦𑀸𑀢𑀺 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀓𑀺𑀮𑁂𑀲𑀸.

𑁧𑁦𑁩. 𑀯𑀡𑁆𑀡𑀽𑀧𑀲𑀁𑀳𑀺𑀢𑀦𑁆𑀢𑀺 𑀕𑀼𑀡𑀽𑀧𑀲𑀁𑀳𑀺𑀢𑀁.

𑁧𑁦𑁪. 𑀲𑀘𑁆𑀘𑀯𑁆𑀳𑀬𑁄𑀢𑀺 ¶ 𑀩𑀼𑀤𑁆𑀥𑁄 𑀳𑀺 𑀲𑀘𑁆𑀘𑁂𑀦𑁂𑀯 𑀅𑀯𑁆𑀳𑀸𑀦𑁂𑀦 𑀦𑀸𑀫𑁂𑀦 𑀬𑀼𑀢𑁆𑀢𑁄. 𑀩𑁆𑀭𑀳𑁆𑀫𑁂𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀮𑀧𑀢𑀺.

𑀢𑀢𑁆𑀣 𑀮𑁄𑀓𑁄𑀢𑀺 𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄. 𑀏𑀓𑁄 𑀮𑁄𑀓𑁄 𑀪𑀯𑀮𑁄𑀓𑁄𑀢𑀺 𑀢𑁂𑀪𑀽𑀫𑀓𑀯𑀺𑀧𑀸𑀓𑁄. 𑀲𑁄 𑀳𑀺 𑀪𑀯𑀢𑀻𑀢𑀺 𑀪𑀯𑁄, 𑀪𑀯𑁄 𑀏𑀯 𑀮𑁄𑀓𑁄 𑀪𑀯𑀮𑁄𑀓𑁄. 𑀪𑀯𑀮𑁄𑀓𑁄 𑀘 𑀲𑀫𑁆𑀪𑀯𑀮𑁄𑀓𑁄 𑀘𑀸𑀢𑀺 𑀏𑀢𑁆𑀣 𑀏𑀓𑁂𑀓𑁄 𑀤𑁆𑀯𑁂 𑀤𑁆𑀯𑁂 𑀳𑁄𑀢𑀺. 𑀪𑀯𑀮𑁄𑀓𑁄 𑀳𑀺 𑀲𑀫𑁆𑀧𑀢𑁆𑀢𑀺𑀪𑀯𑀯𑀺𑀧𑀢𑁆𑀢𑀺𑀪𑀯𑀯𑀲𑁂𑀦 𑀤𑀼𑀯𑀺𑀥𑁄. 𑀲𑀫𑁆𑀪𑀯𑀮𑁄𑀓𑁄𑀧𑀺 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄𑀢𑀺 𑀲𑀼𑀕𑀢𑀺𑀮𑁄𑀓𑁄. 𑀲𑁄 𑀳𑀺 𑀇𑀝𑁆𑀞𑀨𑀮𑀢𑁆𑀢𑀸 𑀲𑀼𑀦𑁆𑀤𑀭𑁄 𑀮𑁄𑀓𑁄𑀢𑀺 𑀲𑀫𑁆𑀧𑀢𑁆𑀢𑀺, 𑀪𑀯𑀢𑀻𑀢𑀺 𑀪𑀯𑁄, 𑀲𑀫𑁆𑀧𑀢𑁆𑀢𑀺 𑀏𑀯 𑀪𑀯𑁄 𑀲𑀫𑁆𑀧𑀢𑁆𑀢𑀺𑀪𑀯𑁄, 𑀲𑁄 𑀏𑀯 𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄. 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄𑀢𑀺 𑀲𑀼𑀕𑀢𑀽𑀧𑀕𑀁 𑀓𑀫𑁆𑀫𑀁. 𑀢𑀜𑁆𑀳𑀺 𑀲𑀫𑁆𑀪𑀯𑀢𑀺 ¶ 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀲𑀫𑁆𑀪𑀯𑁄, 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀪𑀯𑁄 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑁄, 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑁄 𑀏𑀯 𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄𑀢𑀺.

𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄𑀢𑀺 𑀅𑀧𑀸𑀬𑀮𑁄𑀓𑁄. 𑀲𑁄 𑀳𑀺 𑀅𑀦𑀺𑀝𑁆𑀞𑀨𑀮𑀢𑁆𑀢𑀸 𑀯𑀺𑀭𑀽𑀧𑁄 𑀮𑁄𑀓𑁄𑀢𑀺 𑀯𑀺𑀧𑀢𑁆𑀢𑀺, 𑀪𑀯𑀢𑀻𑀢𑀺 𑀪𑀯𑁄, 𑀯𑀺𑀧𑀢𑁆𑀢𑀺 𑀏𑀯 𑀪𑀯𑁄 𑀯𑀺𑀧𑀢𑁆𑀢𑀺𑀪𑀯𑁄, 𑀯𑀺𑀧𑀢𑁆𑀢𑀺𑀪𑀯𑁄 𑀏𑀯 𑀮𑁄𑀓𑁄 ¶ 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄. 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄𑀢𑀺 𑀅𑀧𑀸𑀬𑀽𑀧𑀕𑀁 𑀓𑀫𑁆𑀫𑀁. 𑀢𑀜𑁆𑀳𑀺 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀲𑀫𑁆𑀪𑀯𑁄, 𑀯𑀺𑀧𑀢𑁆𑀢𑀺𑀬𑀸 𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑁄, 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑁄 𑀏𑀯 𑀮𑁄𑀓𑁄 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄𑀢𑀺. 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀮𑁄𑀓𑀺𑀬𑀸 𑀏𑀯. 𑀆𑀳𑀸𑀭𑀸𑀢𑀺 𑀧𑀘𑁆𑀘𑀬𑀸. 𑀧𑀘𑁆𑀘𑀬𑀸 𑀳𑀺 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀦𑁆𑀢𑀻𑀢𑀺 𑀆𑀳𑀸𑀭𑀸. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀨𑀲𑁆𑀲𑀸𑀳𑀸𑀭𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑀺 𑀘𑀢𑁆𑀢𑀸𑀭𑁄. 𑀯𑀢𑁆𑀣𑀼𑀯𑀲𑁂𑀦 𑀓𑀩𑀴𑀻𑀓𑀢𑁆𑀢𑀩𑁆𑀩𑀢𑁆𑀢𑀸 𑀓𑀩𑀴𑀻𑀓𑀸𑀭𑁄, 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀢𑁆𑀢𑀸 𑀆𑀳𑀸𑀭𑁄, 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺𑀯𑀢𑁆𑀣𑀼𑀓𑀸𑀬 𑀑𑀚𑀸𑀬𑁂𑀢𑀁 𑀦𑀸𑀫𑀁. 𑀲𑀸 𑀳𑀺 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑁄 𑀙𑀩𑁆𑀩𑀺𑀥𑁄 𑀨𑀲𑁆𑀲𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀫𑀦𑀲𑁄 𑀲𑀜𑁆𑀘𑁂𑀢𑀦𑀸 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀫𑀦𑁄𑀲𑀜𑁆𑀘𑁂𑀢𑀦𑀸 𑀬𑀣𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀫𑀦𑀲𑀸 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀘𑁂𑀢𑀦𑀸 𑀫𑀦𑁄𑀲𑀜𑁆𑀘𑁂𑀢𑀦𑀸 𑀬𑀣𑀸 𑀆𑀚𑀜𑁆𑀜𑀭𑀣𑁄, 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀲𑀸 𑀳𑀺 𑀢𑀬𑁄 𑀪𑀯𑁂 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄.

𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀉𑀧𑀸𑀤𑀸𑀦𑀕𑁄𑀘𑀭𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀫𑀚𑁆𑀛𑁂 𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀉𑀧𑀸𑀤𑀸𑀦𑀲𑀫𑁆𑀪𑀽𑀢𑀸 𑀯𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀬𑀣𑀸 𑀢𑀺𑀡𑀕𑁆𑀕𑀺, 𑀣𑀼𑀲𑀕𑁆𑀕𑀺. 𑀉𑀧𑀸𑀤𑀸𑀦𑀯𑀺𑀥𑁂𑀬𑁆𑀬𑀸 𑀯𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀬𑀣𑀸 𑀭𑀸𑀚𑀧𑀼𑀭𑀺𑀲𑁄. 𑀉𑀧𑀸𑀤𑀸𑀦𑀧𑁆𑀧𑀪𑀯𑀸 𑀯𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀬𑀣𑀸 𑀧𑀼𑀧𑁆𑀨𑀭𑀼𑀓𑁆𑀔𑁄, 𑀨𑀮𑀭𑀼𑀓𑁆𑀔𑁄. 𑀉𑀧𑀸𑀤𑀸𑀦𑀸𑀦𑀺 𑀧𑀦 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 ¶ 𑀘𑀢𑁆𑀢𑀸𑀭𑀺. 𑀅𑀢𑁆𑀣𑀢𑁄 𑀧𑀦 𑀪𑀼𑀲𑀁 𑀆𑀤𑀸𑀦𑀦𑁆𑀢𑀺 𑀉𑀧𑀸𑀤𑀸𑀦𑀁. 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄𑀢𑀺 𑀧𑀜𑁆𑀘. 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻𑀢𑀺 𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁. 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀯𑀼𑀢𑁆𑀢𑀦𑀬𑀸 𑀏𑀯. 𑀢𑀣𑀸 𑀅𑀝𑁆𑀞 ¶ 𑀮𑁄𑀓𑀥𑀫𑁆𑀫𑀸. 𑀅𑀧𑀺 𑀘 𑁋 𑀮𑀸𑀪𑁄, 𑀅𑀮𑀸𑀪𑁄, 𑀬𑀲𑁄, 𑀅𑀬𑀲𑁄, 𑀦𑀺𑀦𑁆𑀤𑀸, 𑀧𑀲𑀁𑀲𑀸, 𑀲𑀼𑀔𑀁, 𑀤𑀼𑀓𑁆𑀔𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀦𑀥𑀫𑁆𑀫𑀓𑀢𑁆𑀢𑀸 ¶ 𑀮𑁄𑀓𑀲𑁆𑀲 𑀥𑀫𑁆𑀫𑀸𑀢𑀺 𑀮𑁄𑀓𑀥𑀫𑁆𑀫𑀸. 𑀏𑀢𑁂𑀳𑀺 𑀫𑀼𑀢𑁆𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀬𑀣𑀸𑀳 𑁋

‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑀥𑀫𑁆𑀫𑀸 𑀮𑁄𑀓𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀮𑁄𑀓𑁄 𑀘 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀦𑀼𑀧𑀭𑀺𑀯𑀢𑁆𑀢𑀢𑀺. 𑀓𑀢𑀫𑁂 𑀅𑀝𑁆𑀞? 𑀮𑀸𑀪𑁄 𑀘 𑀅𑀮𑀸𑀪𑁄 𑀘…𑀧𑁂… 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀮𑁄𑀓𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀮𑁄𑀓𑁄 𑀘 𑀇𑀫𑁂 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀦𑀼𑀧𑀭𑀺𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁮.𑁬).

𑀢𑀢𑁆𑀣 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀩𑀦𑁆𑀥𑀦𑁆𑀢𑀺 𑀦𑀧𑁆𑀧𑀚𑀳𑀦𑁆𑀢𑀺, 𑀮𑁄𑀓𑀢𑁄 𑀦 𑀦𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀮𑀸𑀪𑁄𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀘𑀻𑀯𑀭𑀸𑀤𑀺, 𑀕𑀳𑀝𑁆𑀞𑀲𑁆𑀲 𑀥𑀦𑀥𑀜𑁆𑀜𑀸𑀤𑀺𑀮𑀸𑀪𑁄. 𑀲𑁄𑀬𑁂𑀯 𑀅𑀮𑀩𑁆𑀪𑀫𑀸𑀦𑁄 𑀮𑀸𑀪𑁄 𑀅𑀮𑀸𑀪𑁄 𑀦 𑀮𑀸𑀪𑁄 𑀅𑀮𑀸𑀪𑁄𑀢𑀺 𑀯𑀼𑀘𑁆𑀘𑀢𑀺, 𑀦𑁄 𑀘 𑀅𑀢𑁆𑀢𑀸𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑁄 𑀲𑀺𑀬𑀸. 𑀬𑀲𑁄𑀢𑀺 𑀧𑀭𑀺𑀯𑀸𑀭𑁄. 𑀲𑁄𑀬𑁂𑀯 𑀅𑀮𑀩𑁆𑀪𑀫𑀸𑀦𑁄 𑀬𑀲𑁄 𑀅𑀬𑀲𑁄. 𑀦𑀺𑀦𑁆𑀤𑀸𑀢𑀺 𑀅𑀯𑀡𑁆𑀡𑀪𑀡𑀦𑀁. 𑀧𑀲𑀁𑀲𑀸𑀢𑀺 𑀯𑀡𑁆𑀡𑀪𑀡𑀦𑀁. 𑀲𑀼𑀔𑀦𑁆𑀢𑀺 𑀓𑀸𑀫𑀸𑀯𑀘𑀭𑀓𑀸𑀬𑀺𑀓𑀘𑁂𑀢𑀲𑀺𑀓𑀁. 𑀤𑀼𑀓𑁆𑀔𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀁, 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀁 𑀓𑀸𑀬𑀺𑀓𑀫𑁂𑀯. 𑀲𑀢𑁆𑀢𑀸𑀯𑀸𑀲𑀸𑀢𑀺 𑀲𑀢𑁆𑀢𑀸𑀦𑀁 𑀆𑀯𑀸𑀲𑀸, 𑀯𑀲𑀦𑀝𑁆𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀧𑀦 𑀢𑀣𑀸 𑀧𑀓𑀸𑀲𑀺𑀢𑀸 𑀔𑀦𑁆𑀥𑀸 𑀏𑀯. 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀅𑀲𑀜𑁆𑀜𑀲𑀢𑁆𑀢𑁂𑀦 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀦 𑀘 𑀲𑀤𑁆𑀥𑀺𑀁 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲𑀸𑀬𑀢𑀦𑀸𑀦𑀻𑀢𑀺 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀦𑁆𑀢𑀺 𑀏𑀯𑀁 𑀤𑀲. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀁 𑀏𑀯𑀁 𑀤𑁆𑀯𑀸𑀤𑀲. 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄𑀢𑀺 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼, 𑀥𑀫𑁆𑀫𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀓𑁂𑀓𑀲𑁆𑀫𑀺𑀁 𑀢𑀻𑀡𑀺 𑀢𑀻𑀡𑀺 𑀓𑀢𑁆𑀯𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄.

𑀲𑀤𑀺𑀲𑀦𑀸𑀫𑁄𑀢𑀺 𑀢𑁂𑀲𑀁 𑀲𑀤𑀺𑀲𑀦𑀸𑀫𑁄 𑀏𑀓𑀕𑀼𑀡𑀯𑀡𑁆𑀡𑀦𑀸𑀫𑁄. 𑀲𑀤𑀺𑀲𑀯𑁆𑀳𑀬𑁄𑀢𑀺 𑀏𑀓𑀕𑀼𑀡𑀯𑀡𑁆𑀡𑀦𑀸𑀫𑁂𑀦 𑀅𑀯𑁆𑀳𑀸𑀬𑀦𑁄. 𑀲𑀘𑁆𑀘𑀲𑀤𑀺𑀲𑀯𑁆𑀳𑀬𑁄𑀢𑀺 𑀅𑀯𑀺𑀢𑀣𑀏𑀓𑀕𑀼𑀡𑀯𑀡𑁆𑀡𑀦𑀸𑀫𑁂𑀦 𑀅𑀯𑀺𑀧𑀭𑀻𑀢𑁂𑀦 𑀅𑀯𑁆𑀳𑀸𑀬𑀦𑁄.

𑀆𑀲𑀺𑀢𑁄𑀢𑀺 ¶ ¶ 𑀉𑀧𑀲𑀗𑁆𑀓𑀫𑀺𑀢𑁄. 𑀉𑀧𑀸𑀲𑀺𑀢𑁄𑀢𑀺 𑀉𑀧𑀕𑀦𑁆𑀢𑁆𑀯𑀸 𑀲𑁂𑀯𑀺𑀢𑁄. 𑀧𑀬𑀺𑀭𑀼𑀧𑀸𑀲𑀺𑀢𑁄𑀢𑀺 𑀪𑀢𑁆𑀢𑀺𑀯𑀲𑁂𑀦 𑀅𑀢𑀻𑀯 𑀲𑁂𑀯𑀺𑀢𑁄.

𑁧𑁦𑁫. 𑀓𑀼𑀩𑁆𑀩𑀦𑀓𑀦𑁆𑀢𑀺 ¶ 𑀧𑀭𑀺𑀢𑁆𑀢𑀯𑀦𑀁. 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬𑀸𑀢𑀺 𑀅𑀦𑁂𑀓𑀨𑀮𑀸𑀤𑀺𑀯𑀺𑀓𑀢𑀺𑀪𑀭𑀺𑀢𑀓𑀸𑀦𑀦𑀁 𑀆𑀕𑀫𑁆𑀫 𑀯𑀲𑁂𑀬𑁆𑀬. 𑀅𑀧𑁆𑀧𑀤𑀲𑁆𑀲𑁂𑀢𑀺 𑀩𑀸𑀯𑀭𑀺𑀧𑁆𑀧𑀪𑀼𑀢𑀺𑀓𑁂 𑀧𑀭𑀺𑀢𑁆𑀢𑀧𑀜𑁆𑀜𑁂. 𑀫𑀳𑁄𑀤𑀥𑀺𑀦𑁆𑀢𑀺 𑀅𑀦𑁄𑀢𑀢𑁆𑀢𑀸𑀤𑀺𑀁 𑀫𑀳𑀦𑁆𑀢𑀁 𑀉𑀤𑀓𑀭𑀸𑀲𑀺𑀁.

𑀅𑀧𑁆𑀧𑀤𑀲𑁆𑀲𑀸𑀢𑀺 𑀫𑀦𑁆𑀤𑀤𑀲𑁆𑀲𑀺𑀦𑁄. 𑀧𑀭𑀺𑀢𑁆𑀢𑀤𑀲𑁆𑀲𑀸𑀢𑀺 𑀅𑀢𑀺𑀫𑀦𑁆𑀤𑀤𑀲𑁆𑀲𑀺𑀦𑁄. 𑀣𑁄𑀓𑀤𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑀢𑁄𑀧𑀺 𑀅𑀢𑀺𑀧𑀭𑀺𑀢𑁆𑀢𑀤𑀲𑁆𑀲𑀺𑀦𑁄. 𑀑𑀫𑀓𑀤𑀲𑁆𑀲𑀸𑀢𑀺 𑀳𑁂𑀝𑁆𑀞𑀺𑀫𑀤𑀲𑁆𑀲𑀺𑀦𑁄. 𑀮𑀸𑀫𑀓𑀤𑀲𑁆𑀲𑀸𑀢𑀺 𑀅𑀧𑁆𑀧𑀥𑀸𑀦𑀤𑀲𑁆𑀲𑀺𑀦𑁄. 𑀙𑀢𑀼𑀓𑁆𑀓𑀤𑀲𑁆𑀲𑀸𑀢𑀺 𑀦 𑀉𑀢𑁆𑀢𑀫𑀤𑀲𑁆𑀲𑀺𑀦𑁄. 𑀅𑀧𑁆𑀧𑀫𑀸𑀡𑀤𑀲𑁆𑀲𑀦𑁆𑀢𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀫𑀸𑀡𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀁. 𑀅𑀕𑁆𑀕𑀤𑀲𑁆𑀲𑀦𑁆𑀢𑀺 ‘‘𑀅𑀕𑁆𑀕𑀢𑁄 𑀯𑁂 𑀧𑀲𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀦𑀬𑁂𑀦 𑀅𑀕𑁆𑀕𑀥𑀫𑁆𑀫𑀤𑀲𑁆𑀲𑀁. 𑀲𑁂𑀝𑁆𑀞𑀤𑀲𑁆𑀲𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀲𑁂𑀝𑁆𑀞𑁄𑀢𑀺 𑀲𑁂𑀝𑁆𑀞𑀤𑀲𑁆𑀲𑀁. 𑀯𑀺𑀲𑁂𑀝𑁆𑀞𑀤𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀸𑀦𑀺. 𑀅𑀲𑀫𑀦𑁆𑀢𑀺 𑀦 𑀲𑀫𑀁 𑀅𑀲𑀫𑀁 𑀲𑀩𑁆𑀩𑀜𑁆𑀜𑀼𑀁. 𑀅𑀲𑀫𑀲𑀫𑀦𑁆𑀢𑀺 𑀅𑀲𑀫𑁂𑀳𑀺 𑀅𑀢𑀻𑀢𑀩𑀼𑀤𑁆𑀥𑁂𑀳𑀺 𑀲𑀫𑀁 𑀅𑀲𑀫𑀲𑀫𑀁. 𑀅𑀧𑁆𑀧𑀝𑀺𑀲𑀫𑀦𑁆𑀢𑀺 𑀅𑀢𑁆𑀢𑀦𑁄 𑀲𑀤𑀺𑀲𑀯𑀺𑀭𑀳𑀺𑀢𑀁. 𑀅𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀅𑀢𑁆𑀢𑀦𑁄 𑀧𑀝𑀺𑀩𑀺𑀫𑁆𑀩𑀯𑀺𑀭𑀳𑀺𑀢𑀁. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀦𑁆𑀢𑀺 𑀧𑀝𑀺𑀫𑀮𑁆𑀮𑀧𑀼𑀕𑁆𑀕𑀮𑀯𑀺𑀭𑀳𑀺𑀢𑀁. 𑀤𑁂𑀯𑀸𑀢𑀺𑀤𑁂𑀯𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀫𑁆𑀧𑀺 𑀅𑀢𑀺𑀤𑁂𑀯𑀁. 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦 𑀉𑀲𑀪𑀁. 𑀅𑀙𑀫𑁆𑀪𑀺𑀢𑀝𑁆𑀞𑁂𑀦 𑀧𑀼𑀭𑀺𑀲𑀲𑀻𑀳𑀁. 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀧𑀼𑀭𑀺𑀲𑀦𑀸𑀕𑀁. 𑀉𑀢𑁆𑀢𑀫𑀝𑁆𑀞𑁂𑀦 𑀧𑀼𑀭𑀺𑀲𑀸𑀚𑀜𑁆𑀜𑀁. 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁂 𑀅𑀘𑀮𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑀝𑁆𑀞𑁂𑀦 𑀧𑀼𑀭𑀺𑀲𑀦𑀺𑀲𑀪𑀁. 𑀥𑀫𑁆𑀫𑀤𑁂𑀲𑀦𑀸𑀥𑀼𑀭𑀯𑀳𑀦𑀝𑁆𑀞𑁂𑀦 𑀧𑀼𑀭𑀺𑀲𑀥𑁄𑀭𑀬𑁆𑀳𑀁.

𑀫𑀸𑀦𑀲𑀓𑀁 𑀯𑀸 𑀲𑀭𑀦𑁆𑀢𑀺 𑀫𑀦𑀲𑀸 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑀁 𑀧𑀮𑁆𑀮𑀁 𑀯𑀸 𑀦𑀸𑀫𑀫𑁂𑀯 𑀯𑀸. 𑀅𑀦𑁄𑀢𑀢𑁆𑀢𑀁 𑀯𑀸 𑀤𑀳𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀉𑀢𑁆𑀢𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀸 𑀧𑀩𑁆𑀩𑀢𑀦𑁆𑀢𑀭𑁂𑀦 𑀢𑀁 𑀑𑀪𑀸𑀲𑁂𑀦𑁆𑀢𑀺, 𑀉𑀚𑀼𑀁 𑀕𑀘𑁆𑀙𑀦𑁆𑀢𑀸 𑀦 𑀑𑀪𑀸𑀲𑁂𑀦𑁆𑀢𑀺, 𑀢𑁂𑀦𑁂𑀯𑀲𑁆𑀲 ‘‘𑀅𑀦𑁄𑀢𑀢𑁆𑀢’’𑀦𑁆𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺. 𑀏𑀯𑀭𑀽𑀧𑀁 𑀅𑀦𑁄𑀢𑀢𑁆𑀢𑀁 𑀯𑀸 𑀤𑀳𑀁. 𑀅𑀓𑁆𑀔𑁄𑀪𑀁 𑀅𑀫𑀺𑀢𑁄𑀤𑀓𑀦𑁆𑀢𑀺 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀧𑀭𑀺𑀫𑀺𑀢𑀁 ¶ 𑀉𑀤𑀓𑀚𑀮𑀭𑀸𑀲𑀺𑀁. 𑀏𑀯𑀫𑁂𑀯𑀸𑀢𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁, 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀅𑀓𑁆𑀔𑁄𑀪𑀁 𑀆𑀲𑀪𑀁 𑀞𑀸𑀦𑀝𑁆𑀞𑀸𑀦𑁂𑀦 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁. 𑀅𑀫𑀺𑀢𑀢𑁂𑀚𑀦𑁆𑀢𑀺 𑀅𑀧𑀭𑀺𑀫𑀺𑀢𑀜𑀸𑀡𑀢𑁂𑀚𑀁. 𑀧𑀪𑀺𑀦𑁆𑀦𑀜𑀸𑀡𑀦𑁆𑀢𑀺 𑀤𑀲𑀩𑀮𑀜𑀸𑀡𑀸𑀤𑀺𑀯𑀲𑁂𑀦 𑀧𑀪𑁂𑀤𑀕𑀢𑀜𑀸𑀡𑀁. 𑀯𑀺𑀯𑀝𑀘𑀓𑁆𑀔𑀼𑀦𑁆𑀢𑀺 𑀲𑀫𑀦𑁆𑀢𑀘𑀓𑁆𑀔𑀼𑀁.

𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑀦𑁆𑀢𑀺 ¶ ¶ ‘‘𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬; 𑀯𑀺𑀪. 𑁫𑁨𑁫) 𑀦𑀬𑁂𑀦 𑀧𑀜𑁆𑀜𑀸𑀬 𑀧𑀪𑁂𑀤𑀚𑀸𑀦𑀦𑁂 𑀙𑁂𑀓𑀁. 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀦𑁆𑀢𑀺 𑀧𑀝𑀺𑀮𑀤𑁆𑀥𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀁. 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀲𑀸𑀭𑀤𑀪𑀸𑀯𑀧𑁆𑀧𑀢𑁆𑀢𑀁. 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑁂 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑁂 𑀅𑀥𑀺𑀫𑀼𑀢𑁆𑀢𑀁, 𑀢𑀢𑁆𑀣 𑀧𑀯𑀺𑀝𑁆𑀞𑀁. 𑀲𑁂𑀢𑀧𑀘𑁆𑀘𑀢𑁆𑀢𑀦𑁆𑀢𑀺 𑀯𑀸𑀲𑀦𑀸𑀬 𑀯𑀺𑀧𑁆𑀧𑀳𑀻𑀦𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀁 𑀆𑀯𑁂𑀡𑀺𑀓𑀅𑀢𑁆𑀢𑀪𑀸𑀯𑀁. 𑀅𑀤𑁆𑀯𑀬𑀪𑀸𑀡𑀺𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀯𑀘𑀦𑀢𑁆𑀢𑀸 𑀤𑁆𑀯𑀺𑀯𑀘𑀦𑀯𑀺𑀭𑀳𑀺𑀢𑀁. 𑀢𑀸𑀤𑀺𑀦𑁆𑀢𑀺 𑀢𑀸𑀤𑀺𑀲𑀁, 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀦𑀁 𑀯𑀸. 𑀢𑀣𑀸 𑀧𑀝𑀺𑀜𑁆𑀜𑀸 𑀅𑀲𑁆𑀲𑀸𑀢𑀺 𑀢𑀣𑀸𑀧𑀝𑀺𑀜𑁆𑀜𑁄, 𑀢𑀁. 𑀅𑀧𑀭𑀺𑀢𑁆𑀢𑀦𑁆𑀢𑀺 𑀦 𑀔𑀼𑀤𑁆𑀤𑀓𑀁. 𑀫𑀳𑀦𑁆𑀢𑀦𑁆𑀢𑀺 𑀢𑁂𑀥𑀸𑀢𑀼𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀦𑁆𑀢𑀧𑁆𑀧𑀢𑁆𑀢𑀁.

𑀕𑀫𑁆𑀪𑀻𑀭𑀦𑁆𑀢𑀺 𑀅𑀜𑁆𑀜𑁂𑀲𑀁 𑀤𑀼𑀧𑁆𑀧𑀯𑁂𑀲𑀁. 𑀅𑀧𑁆𑀧𑀫𑁂𑀬𑁆𑀬𑀦𑁆𑀢𑀺 𑀅𑀢𑀼𑀮𑀝𑁆𑀞𑁂𑀦 𑀅𑀧𑁆𑀧𑀫𑁂𑀬𑁆𑀬𑀁. 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑀦𑁆𑀢𑀺 𑀧𑀭𑀺𑀬𑁄𑀕𑀸𑀳𑀺𑀢𑀼𑀁 𑀤𑀼𑀓𑁆𑀔𑀧𑁆𑀧𑀯𑁂𑀲𑀁. 𑀧𑀳𑀽𑀢𑀭𑀢𑀦𑀦𑁆𑀢𑀺 𑀲𑀤𑁆𑀥𑀸𑀤𑀺𑀭𑀢𑀦𑁂𑀳𑀺 𑀧𑀳𑀽𑀢𑀭𑀢𑀦𑀁. 𑀲𑀸𑀕𑀭𑀲𑀫𑀦𑁆𑀢𑀺 𑀭𑀢𑀦𑀸𑀓𑀭𑀢𑁄 𑀲𑀫𑀼𑀤𑁆𑀤𑀲𑀤𑀺𑀲𑀁. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄’’𑀢𑀺 (𑀅. 𑀦𑀺. 𑁬.𑁧) 𑀯𑀼𑀢𑁆𑀢𑀦𑀬𑁂𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀧𑀭𑀺𑀧𑀼𑀡𑁆𑀡𑀁. 𑀅𑀢𑀼𑀮𑀦𑁆𑀢𑀺 𑀢𑀼𑀮𑀯𑀺𑀭𑀳𑀺𑀢𑀁, 𑀢𑀼𑀮𑀬𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁. 𑀯𑀺𑀧𑀼𑀮𑀦𑁆𑀢𑀺 𑀅𑀢𑀺𑀫𑀳𑀦𑁆𑀢𑀁. 𑀅𑀧𑁆𑀧𑀫𑁂𑀬𑁆𑀬𑀦𑁆𑀢𑀺 𑀧𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁. 𑀢𑀁 𑀢𑀸𑀤𑀺𑀲𑀦𑁆𑀢𑀺 𑀢𑀁 𑀪𑀕𑀯𑀦𑁆𑀢𑀁 𑀢𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀁. 𑀧𑀯𑀤𑀢𑀁 𑀫𑀕𑁆𑀕𑀯𑀸𑀤𑀺𑀦𑀦𑁆𑀢𑀺 𑀧𑀯𑀤𑀦𑁆𑀢𑀸𑀦𑀁 𑀓𑀣𑁂𑀦𑁆𑀢𑀸𑀦𑀁 𑀉𑀢𑁆𑀢𑀫𑀁 𑀓𑀣𑀬𑀦𑁆𑀢𑀁 𑀯𑀤𑀦𑁆𑀢𑀁 𑀅𑀥𑀺𑀕𑀘𑁆𑀙𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑁂𑀭𑀼𑀫𑀺𑀯 𑀦𑀕𑀸𑀦𑀦𑁆𑀢𑀺 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑁂 𑀲𑀺𑀦𑁂𑀭𑀼𑀁 𑀯𑀺𑀬. 𑀕𑀭𑀼𑀴𑀫𑀺𑀯 𑀤𑀺𑀚𑀸𑀦𑀦𑁆𑀢𑀺 ¶ 𑀧𑀓𑁆𑀔𑀺𑀚𑀸𑀢𑀸𑀦𑀁 𑀅𑀦𑁆𑀢𑀭𑁂 𑀲𑀼𑀧𑀡𑁆𑀡𑀁 𑀯𑀺𑀬. 𑀲𑀻𑀳𑀫𑀺𑀯 𑀫𑀺𑀕𑀸𑀦𑀦𑁆𑀢𑀺 𑀘𑀢𑀼𑀧𑁆𑀧𑀤𑀸𑀦𑀫𑀦𑁆𑀢𑀭𑁂 𑀲𑀻𑀳𑀁 𑀯𑀺𑀬. 𑀉𑀤𑀥𑀺𑀫𑀺𑀯 𑀅𑀡𑁆𑀡𑀯𑀸𑀦𑀦𑁆𑀢𑀺 𑀯𑀺𑀢𑁆𑀣𑀺𑀡𑁆𑀡𑀅𑀡𑁆𑀡𑀯𑀸𑀦𑀁 𑀅𑀦𑁆𑀢𑀭𑁂 𑀲𑀫𑀼𑀤𑁆𑀤𑀁 𑀯𑀺𑀬 𑀅𑀥𑀺𑀕𑀘𑁆𑀙𑀺𑀁. 𑀚𑀺𑀦𑀧𑀯𑀭𑀦𑁆𑀢𑀺 𑀩𑀼𑀤𑁆𑀥𑀼𑀢𑁆𑀢𑀫𑀁.

𑁧𑁦𑁬. 𑀬𑁂𑀫𑁂 𑀧𑀼𑀩𑁆𑀩𑁂𑀢𑀺 𑀬𑁂 𑀇𑀫𑁂 𑀧𑀼𑀩𑁆𑀩𑁂.

𑁧𑁦𑁭. 𑀢𑀫𑁄𑀦𑀼𑀤𑀸𑀲𑀻𑀦𑁄𑀢𑀺 𑀢𑀫𑁄𑀦𑀼𑀤𑁄 𑀆𑀲𑀻𑀦𑁄. 𑀪𑀽𑀭𑀺𑀧𑀜𑁆𑀜𑀸𑀡𑁄𑀢𑀺 𑀜𑀸𑀡𑀤𑁆𑀥𑀚𑁄. 𑀪𑀽𑀭𑀺𑀫𑁂𑀥𑀲𑁄𑀢𑀺 𑀯𑀺𑀧𑀼𑀮𑀧𑀜𑁆𑀜𑁄.

𑀦𑀺𑀤𑁆𑀤𑁂𑀲𑁂 𑀧𑀪𑀗𑁆𑀓𑀭𑁄𑀢𑀺 𑀢𑁂𑀚𑀁𑀓𑀭𑁄. 𑀆𑀮𑁄𑀓𑀓𑀭𑁄𑀢𑀺 𑀅𑀦𑀦𑁆𑀥𑀓𑀸𑀭𑀓𑀭𑁄. 𑀑𑀪𑀸𑀲𑀓𑀭𑁄𑀢𑀺 𑀑𑀪𑀸𑀲𑀁 𑀚𑁄𑀢𑀺𑀁 𑀓𑀭𑁄𑀢𑀻𑀢𑀺 𑀑𑀪𑀸𑀲𑀓𑀭𑁄. 𑀤𑀻𑀧𑀲𑀤𑀺𑀲𑀁 𑀆𑀮𑁄𑀓𑀁 𑀓𑀭𑁄𑀢𑀻𑀢𑀺 𑀤𑀻𑀧𑀗𑁆𑀓𑀭𑁄. 𑀧𑀤𑀻𑀧𑀲𑀤𑀺𑀲𑀁 𑀆𑀮𑁄𑀓𑀁 𑀓𑀭𑁄𑀢𑀻𑀢𑀺 ¶ 𑀧𑀤𑀻𑀧𑀓𑀭𑁄. 𑀉𑀚𑁆𑀚𑁄𑀢𑀓𑀭𑁄𑀢𑀺 𑀧𑀢𑀸𑀧𑀓𑀭𑁄. 𑀧𑀚𑁆𑀚𑁄𑀢𑀓𑀭𑁄𑀢𑀺 𑀤𑀺𑀲𑀸𑀯𑀺𑀤𑀺𑀲𑀸 𑀧𑀢𑀸𑀧𑀓𑀭𑁄.

𑀪𑀽𑀭𑀺𑀧𑀜𑁆𑀜𑀸𑀡𑁄𑀢𑀺 ¶ 𑀧𑀼𑀣𑀼𑀮𑀜𑀸𑀡𑁄. 𑀜𑀸𑀡𑀧𑀜𑁆𑀜𑀸𑀡𑁄𑀢𑀺 𑀜𑀸𑀡𑁂𑀦 𑀧𑀸𑀓𑀝𑁄. 𑀧𑀜𑁆𑀜𑀸𑀥𑀚𑁄𑀢𑀺 𑀉𑀲𑁆𑀲𑀺𑀢𑀝𑁆𑀞𑁂𑀦 𑀧𑀜𑁆𑀜𑀸𑀯 𑀥𑀚𑁄 𑀅𑀲𑁆𑀲𑀸𑀢𑀺 𑀧𑀜𑁆𑀜𑀸𑀥𑀚𑁄, 𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁮𑁪𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭) 𑀯𑀺𑀬. 𑀯𑀺𑀪𑀽𑀢𑀯𑀺𑀳𑀸𑀭𑀻𑀢𑀺 𑀧𑀸𑀓𑀝𑀯𑀺𑀳𑀸𑀭𑁄.

𑁧𑁦𑁮. 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀦𑁆𑀢𑀺 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑀁 𑀨𑀮𑀁, 𑀦 𑀘 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀨𑀮𑀁. 𑀅𑀦𑀻𑀢𑀺𑀓𑀦𑁆𑀢𑀺 𑀓𑀺𑀮𑁂𑀲𑀸𑀤𑀺𑀈𑀢𑀺𑀯𑀺𑀭𑀳𑀺𑀢𑀁.

𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀬𑁂𑀦 𑀅𑀥𑀺𑀕𑀢𑁄 𑀳𑁄𑀢𑀺, 𑀢𑁂𑀦 𑀧𑀭𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀢𑀁 𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀲𑀬𑀁 𑀤𑀝𑁆𑀞𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄, 𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀢𑁆𑀢𑀦𑁄 𑀨𑀮𑀁𑀤𑀸𑀦𑀁 𑀲𑀦𑁆𑀥𑀸𑀬 𑀦𑀸𑀲𑁆𑀲 𑀓𑀸𑀮𑁄𑀢𑀺 𑀅𑀓𑀸𑀮𑁄, 𑀅𑀓𑀸𑀮𑁄𑀬𑁂𑀯 𑀅𑀓𑀸𑀮𑀺𑀓𑁄. 𑀬𑁄 𑀏𑀢𑁆𑀣 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁄, 𑀲𑁄 𑀅𑀢𑁆𑀢𑀦𑁄 𑀲𑀫𑀦𑀦𑁆𑀢𑀭𑀫𑁂𑀯 𑀨𑀮𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀅𑀓𑀸𑀮𑀺𑀓𑀁. 𑀏𑀳𑀺 𑀧𑀲𑁆𑀲 𑀇𑀫𑀁 𑀥𑀫𑁆𑀫𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄, 𑀢𑀁 𑀏𑀳𑀺𑀧𑀲𑁆𑀲𑀺𑀓𑀁. 𑀆𑀤𑀺𑀢𑁆𑀢𑀁 𑀘𑁂𑀮𑀁 𑀯𑀸 𑀲𑀻𑀲𑀁 𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀬𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄, 𑀢𑀁 𑀑𑀧𑀦𑁂𑀬𑁆𑀬𑀺𑀓𑀁. 𑀲𑀩𑁆𑀩𑁂𑀳𑀺𑀧𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀳𑀺 ‘‘𑀪𑀸𑀯𑀺𑀢𑁄 𑀫𑁂 𑀫𑀕𑁆𑀕𑁄, 𑀅𑀥𑀺𑀕𑀢𑀁 𑀨𑀮𑀁, 𑀲𑀘𑁆𑀙𑀺𑀓𑀢𑁄 𑀦𑀺𑀭𑁄𑀥𑁄’’𑀢𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀺.

𑁧𑁦𑁯. 𑀅𑀣 𑀦𑀁 𑀩𑀸𑀯𑀭𑀻 𑀆𑀳 ‘‘𑀓𑀺𑀁 𑀦𑀼 𑀢𑀫𑁆𑀳𑀸’’𑀢𑀺 𑀤𑁆𑀯𑁂 𑀕𑀸𑀣𑀸.

𑀫𑀼𑀳𑀼𑀢𑁆𑀢𑀫𑁆𑀧𑀻𑀢𑀺 ¶ 𑀣𑁄𑀓𑀫𑁆𑀧𑀺. 𑀔𑀡𑀫𑁆𑀧𑀻𑀢𑀺 𑀦 𑀩𑀳𑀼𑀓𑀫𑁆𑀧𑀺. 𑀮𑀬𑀫𑁆𑀧𑀻𑀢𑀺 𑀫𑀦𑀫𑁆𑀧𑀺. 𑀯𑀬𑀫𑁆𑀧𑀻𑀢𑀺 𑀓𑁄𑀝𑁆𑀞𑀸𑀲𑀫𑁆𑀧𑀺. 𑀅𑀤𑁆𑀥𑀫𑁆𑀧𑀻𑀢𑀺 𑀤𑀺𑀯𑀲𑀫𑁆𑀧𑀺.

𑁧𑁧𑁧-𑁧𑁧𑁩. 𑀢𑀢𑁄 𑀧𑀺𑀗𑁆𑀕𑀺𑀬𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀅𑀯𑀺𑀧𑁆𑀧𑀯𑀸𑀲𑀫𑁂𑀯 𑀤𑀻𑀧𑁂𑀦𑁆𑀢𑁄 ‘‘𑀦𑀸𑀳𑀁 𑀢𑀫𑁆𑀳𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀳𑀁 𑀬𑁄 𑀫𑁂…𑀧𑁂… 𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯𑀸𑀢𑀺 𑀢𑀁 𑀩𑀼𑀤𑁆𑀥𑀁 𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀫𑀦𑀲𑀸 𑀧𑀲𑁆𑀲𑀸𑀫𑀺. 𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀦𑁆𑀢𑀺 𑀦𑀫𑀲𑁆𑀲𑀫𑀸𑀦𑁄𑀯 𑀭𑀢𑁆𑀢𑀺𑀁 𑀅𑀢𑀺𑀦𑀸𑀫𑁂𑀫𑀺.

𑁧𑁧𑁪. 𑀢𑁂𑀦 ¶ 𑀢𑁂𑀦𑁂𑀯 𑀦𑀢𑁄𑀢𑀺 𑀬𑁂𑀦 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀩𑀼𑀤𑁆𑀥𑁄, 𑀢𑁂𑀦 𑀢𑁂𑀦𑁂𑀯𑀸𑀳𑀫𑁆𑀧𑀺 𑀦𑀢𑁄, 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁧𑁫. 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲𑀸𑀢𑀺 𑀅𑀧𑁆𑀧𑀣𑀸𑀫𑀓𑀲𑁆𑀲. 𑀅𑀣 𑀯𑀸 𑀤𑀼𑀩𑁆𑀩𑀮𑀲𑁆𑀲 𑀤𑀼𑀢𑁆𑀣𑀸𑀫𑀓𑀲𑁆𑀲 𑀘, 𑀩𑀮𑀯𑀻𑀭𑀺𑀬𑀳𑀻𑀦𑀲𑁆𑀲𑀸𑀧𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀻𑀢𑀺 𑀢𑁂𑀦𑁂𑀯 𑀤𑀼𑀩𑁆𑀩𑀮𑀢𑁆𑀣𑀸𑀫𑀓𑀢𑁆𑀢𑁂𑀦 𑀓𑀸𑀬𑁄 𑀦 𑀕𑀘𑁆𑀙𑀢𑀺, 𑀬𑁂𑀦 𑀩𑀼𑀤𑁆𑀥𑁄, 𑀦 𑀢𑁂𑀦 𑀕𑀘𑁆𑀙𑀢𑀺. ‘‘𑀦 𑀧𑀭𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂. 𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬𑀸𑀢𑀺 𑀲𑀗𑁆𑀓𑀧𑁆𑀧𑀕𑀫𑀦𑁂𑀦. 𑀢𑁂𑀦 𑀬𑀼𑀢𑁆𑀢𑁄𑀢𑀺 𑀬𑁂𑀦 𑀩𑀼𑀤𑁆𑀥𑁄, 𑀢𑁂𑀦 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀅𑀦𑀼𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀬𑁂𑀦 𑀩𑀼𑀤𑁆𑀥𑁄𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀩𑀼𑀤𑁆𑀥𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀦 𑀧𑀮𑁂𑀢𑀺. 𑀅𑀣 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀬𑀢𑁆𑀣 𑀩𑀼𑀤𑁆𑀥𑁄 𑀢𑀢𑁆𑀣 𑀦 𑀧𑀮𑁂𑀢𑀺 𑀦 𑀕𑀘𑁆𑀙𑀢𑀺. 𑀦 𑀯𑀚𑀢𑀻𑀢𑀺 𑀧𑀼𑀭𑀢𑁄 𑀦 𑀬𑀸𑀢𑀺. 𑀦 𑀕𑀘𑁆𑀙𑀢𑀻𑀢𑀺 𑀦𑀺𑀯𑀢𑁆𑀢𑀢𑀺. 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀦 𑀉𑀧𑀲𑀗𑁆𑀓𑀫𑀢𑀺.

𑁧𑁧𑁬. 𑀧𑀗𑁆𑀓𑁂 𑀲𑀬𑀸𑀦𑁄𑀢𑀺 𑀓𑀸𑀫𑀓𑀤𑁆𑀤𑀫𑁂 𑀲𑀬𑀫𑀸𑀦𑁄. 𑀤𑀻𑀧𑀸 𑀤𑀻𑀧𑀁 𑀉𑀧𑀮𑁆𑀮𑀯𑀺𑀦𑁆𑀢𑀺 𑀲𑀢𑁆𑀣𑀸𑀭𑀸𑀤𑀺𑀢𑁄 𑀲𑀢𑁆𑀣𑀸𑀭𑀸𑀤𑀺𑀁 𑀅𑀥𑀺𑀕𑀘𑁆𑀙𑀺𑀁. 𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑁄𑀳𑀁 𑀏𑀯𑀁 𑀤𑀼𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀯𑀸𑀳𑀺𑀡𑁆𑀟𑀦𑁆𑀢𑁄 𑀅𑀣 𑀧𑀸𑀲𑀸𑀡𑀓𑀘𑁂𑀢𑀺𑀬𑁂 𑀩𑀼𑀤𑁆𑀥𑀫𑀤𑁆𑀤𑀓𑁆𑀔𑀺𑀁.

𑀢𑀢𑁆𑀣 𑀲𑁂𑀫𑀸𑀦𑁄𑀢𑀺 𑀦𑀺𑀲𑀚𑁆𑀚𑀫𑀸𑀦𑁄. 𑀲𑀬𑀫𑀸𑀦𑁄𑀢𑀺 𑀲𑁂𑀬𑁆𑀬𑀁 𑀓𑀧𑁆𑀧𑀬𑀫𑀸𑀦𑁄. 𑀆𑀯𑀲𑀫𑀸𑀦𑁄𑀢𑀺 𑀯𑀲𑀫𑀸𑀦𑁄. 𑀧𑀭𑀺𑀯𑀲𑀫𑀸𑀦𑁄𑀢𑀺 𑀦𑀺𑀘𑁆𑀘𑀁 𑀯𑀲𑀫𑀸𑀦𑁄.

𑀧𑀮𑁆𑀮𑀯𑀺𑀦𑁆𑀢𑀺 𑀉𑀕𑁆𑀕𑀫𑀺𑀁. 𑀉𑀧𑀮𑁆𑀮𑀯𑀺𑀦𑁆𑀢𑀺 𑀉𑀢𑁆𑀢𑀭𑀺𑀁 ¶ , 𑀲𑀫𑁆𑀧𑀮𑁆𑀮𑀯𑀺𑀦𑁆𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀅𑀤𑁆𑀤𑀲𑀦𑁆𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀅𑀤𑁆𑀤𑀲𑀦𑁆𑀢𑀺 𑀧𑀲𑁆𑀲𑀺𑀁. 𑀅𑀤𑁆𑀤𑀓𑁆𑀔𑀺𑀦𑁆𑀢𑀺 𑀑𑀮𑁄𑀓𑁂𑀲𑀺𑀁. 𑀅𑀧𑀲𑁆𑀲𑀺𑀦𑁆𑀢𑀺 𑀏𑀲𑀺𑀁. 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀁.

𑁧𑁧𑁭. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀯𑀲𑀸𑀦𑁂 𑀧𑀺𑀗𑁆𑀕𑀺𑀬𑀲𑁆𑀲 𑀘 𑀩𑀸𑀯𑀭𑀺𑀲𑁆𑀲 𑀘 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀞𑀺𑀢𑁄𑀬𑁂𑀯 𑀲𑀼𑀯𑀡𑁆𑀡𑁄𑀪𑀸𑀲𑀁 𑀫𑀼𑀜𑁆𑀘𑀺. 𑀧𑀺𑀗𑁆𑀕𑀺𑀬𑁄 𑀩𑀸𑀯𑀭𑀺𑀲𑁆𑀲 𑀩𑀼𑀤𑁆𑀥𑀕𑀼𑀡𑁂 𑀯𑀡𑁆𑀡𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀏𑀯 𑀢𑀁 𑀑𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀞𑀺𑀢𑀁 𑀯𑀺𑀬 𑀤𑀺𑀲𑁆𑀯𑀸 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 ‘‘𑀩𑀼𑀤𑁆𑀥𑁄 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 ¶ 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀪𑀕𑀯𑀸𑀧𑀺 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀉𑀪𑀺𑀦𑁆𑀦𑀫𑁆𑀧𑀺 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀧𑀺𑀗𑁆𑀕𑀺𑀬𑀫𑁂𑀯 𑀆𑀮𑀧𑀫𑀸𑀦𑁄 ‘‘𑀬𑀣𑀸 𑀅𑀳𑀽, 𑀯𑀓𑁆𑀓𑀮𑀻’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀯𑀓𑁆𑀓𑀮𑀺𑀢𑁆𑀣𑁂𑀭𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀤𑁆𑀥𑀸𑀥𑀼𑀭𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀬𑀣𑀸 𑀘 𑀲𑁄𑀴𑀲𑀦𑁆𑀦𑀁 𑀏𑀓𑁄 𑀪𑀤𑁆𑀭𑀸𑀯𑀼𑀥𑁄 𑀦𑀸𑀫, 𑀬𑀣𑀸 𑀘 𑀆𑀴𑀯𑀺𑀕𑁄𑀢𑀫𑁄 𑀘. 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁 ¶ , 𑀢𑀢𑁄 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭; 𑀣𑁂𑀭𑀕𑀸. 𑁬𑁭𑁬; 𑀧𑀝𑀺. 𑀫. 𑁧.𑁩𑁧; 𑀓𑀣𑀸. 𑁭𑁫𑁩) 𑀦𑀬𑁂𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀫𑀺𑀲𑁆𑀲𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀺𑀗𑁆𑀕𑀺𑀬𑁄 𑀅𑀭𑀳𑀢𑁆𑀢𑁂, 𑀩𑀸𑀯𑀭𑀻 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀺𑀲𑁆𑀲𑀸 𑀧𑀦 𑀧𑀜𑁆𑀘𑀲𑀢𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁.

𑀢𑀢𑁆𑀣 𑀫𑀼𑀜𑁆𑀘𑀲𑁆𑀲𑀽𑀢𑀺 𑀫𑁄𑀘𑀲𑁆𑀲𑀼. 𑀧𑀫𑀼𑀜𑁆𑀘𑀲𑁆𑀲𑀽𑀢𑀺 𑀫𑁄𑀘𑁂𑀳𑀺. 𑀅𑀥𑀺𑀫𑀼𑀜𑁆𑀘𑀲𑁆𑀲𑀽𑀢𑀺 𑀢𑀢𑁆𑀣 𑀅𑀥𑀺𑀫𑁄𑀓𑁆𑀔𑀁 𑀓𑀭𑀲𑁆𑀲𑀼. 𑀑𑀓𑀧𑁆𑀧𑁂𑀳𑀻𑀢𑀺 𑀩𑀳𑀼𑀫𑀸𑀦𑀁 𑀉𑀧𑁆𑀧𑀸𑀤𑁂𑀳𑀻𑀢𑀺. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀫𑀝𑁆𑀞𑁂𑀦. 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦.

𑁧𑁧𑁮. 𑀇𑀤𑀸𑀦𑀺 𑀧𑀺𑀗𑁆𑀕𑀺𑀬𑁄 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀦𑀺𑀯𑁂𑀤𑁂𑀦𑁆𑀢𑁄 ‘‘𑀏𑀲 𑀪𑀺𑀬𑁆𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀪𑀸𑀦𑀯𑀸𑀢𑀺 𑀧𑀝𑀺𑀪𑀸𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀬 𑀉𑀧𑁂𑀢𑁄.

𑀪𑀺𑀬𑁆𑀬𑁄 𑀪𑀺𑀬𑁆𑀬𑁄𑀢𑀺 𑀉𑀧𑀭𑀽𑀧𑀭𑀺.

𑁧𑁧𑁯. 𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬𑀸𑀢𑀺 𑀅𑀥𑀺𑀤𑁂𑀯𑀓𑀭𑁂 𑀥𑀫𑁆𑀫𑁂 𑀜𑀢𑁆𑀯𑀸. 𑀧𑀭𑁄𑀧𑀭𑀦𑁆𑀢𑀺 𑀳𑀻𑀦𑀧𑀡𑀻𑀢𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀅𑀥𑀺𑀤𑁂𑀯𑀢𑁆𑀢𑀓𑀭𑀁 𑀲𑀩𑁆𑀩𑀥𑀫𑁆𑀫𑀚𑀸𑀢𑀁 𑀅𑀯𑁂𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀦𑁆𑀢𑀺 ¶ 𑀓𑀗𑁆𑀔𑀻𑀦𑀁𑀬𑁂𑀯 𑀲𑀢𑀁 ‘‘𑀦𑀺𑀓𑁆𑀓𑀗𑁆𑀔𑀫𑁆𑀳𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀸𑀦𑀁.

𑀦𑀺𑀤𑁆𑀤𑁂𑀲𑁂 𑀧𑀸𑀭𑀸𑀬𑀦𑀺𑀓𑀧𑀜𑁆𑀳𑀸𑀦𑀦𑁆𑀢𑀺 𑀧𑀸𑀭𑀸𑀬𑀦𑀺𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀘𑁆𑀙𑀸𑀦𑀁. 𑀅𑀯𑀲𑀸𑀦𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑀭𑁄. 𑀓𑁄𑀝𑀺𑀁 𑀓𑀭𑁄𑀢𑀻𑀢𑀺 𑀧𑀭𑀺𑀬𑀦𑁆𑀢𑀓𑀭𑁄. 𑀲𑀻𑀫𑀁 𑀫𑀭𑀺𑀬𑀸𑀤𑀁 𑀓𑀭𑁄𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑀓𑀭𑁄. 𑀦𑀺𑀕𑀫𑀁 𑀓𑀭𑁄𑀢𑀻𑀢𑀺 𑀧𑀭𑀺𑀯𑀝𑀼𑀫𑀓𑀭𑁄. 𑀲𑀪𑀺𑀬𑀧𑀜𑁆𑀳𑀸𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀧𑀸𑀭𑀸𑀬𑀦𑀺𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀜𑁆𑀳𑀸𑀦𑀁 𑀏𑀯, 𑀅𑀣 𑀔𑁄 𑀲𑀪𑀺𑀬𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀫𑁆𑀧𑀺 𑀧𑀜𑁆𑀳𑀸𑀦𑀁 𑀅𑀦𑁆𑀢𑀁 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀪𑀺𑀬𑀧𑀜𑁆𑀳𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑁧𑁨𑁦. 𑀅𑀲𑀁𑀳𑀻𑀭𑀦𑁆𑀢𑀺 ¶ 𑀭𑀸𑀕𑀸𑀤𑀻𑀳𑀺 𑀅𑀲𑀁𑀳𑀸𑀭𑀺𑀬𑀁. 𑀅𑀲𑀗𑁆𑀓𑀼𑀧𑁆𑀧𑀦𑁆𑀢𑀺 𑀅𑀲𑀗𑁆𑀓𑀼𑀧𑁆𑀧𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀁 𑀪𑀡𑀢𑀺. 𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀏𑀓𑀁𑀲𑁂𑀦𑁂𑀯 𑀢𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀕𑀫𑀺𑀲𑁆𑀲𑀸𑀫𑀺. 𑀦 𑀫𑁂𑀢𑁆𑀣 𑀓𑀗𑁆𑀔𑀸𑀢𑀺 𑀦𑀢𑁆𑀣𑀺 𑀫𑁂 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂 𑀓𑀗𑁆𑀔𑀸. 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀧𑀺𑀗𑁆𑀕𑀺𑀬𑁄 ‘‘𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀪𑀕𑀯𑀢𑁄 𑀑𑀯𑀸𑀤𑁂𑀦 𑀅𑀢𑁆𑀢𑀦𑀺 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀤𑁆𑀥𑀸𑀥𑀼𑀭𑁂𑀦𑁂𑀯 𑀘 𑀯𑀺𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀏𑀯𑀁 𑀫𑀁 ¶ 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢’’𑀦𑁆𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ‘‘𑀬𑀣𑀸 𑀫𑀁 𑀢𑁆𑀯𑀁 𑀅𑀯𑀘, 𑀏𑀯𑀫𑁂𑀯 𑀫𑀁 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀥𑀸𑀭𑁂𑀳𑀻’’𑀢𑀺.

𑀦 𑀲𑀁𑀳𑀭𑀺𑀬𑀢𑀻𑀢𑀺 𑀕𑀳𑁂𑀢𑁆𑀯𑀸 𑀲𑀁𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀦𑀺𑀬𑁄𑀕𑀯𑀘𑀦𑀦𑁆𑀢𑀺 𑀬𑀼𑀢𑁆𑀢𑀯𑀘𑀦𑀁. 𑀅𑀯𑀢𑁆𑀣𑀸𑀧𑀦𑀯𑀘𑀦𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀯𑀘𑀦𑀁. 𑀇𑀫𑀲𑁆𑀫𑀺𑀁 𑀧𑀸𑀭𑀸𑀬𑀦𑀯𑀕𑁆𑀕𑁂 𑀬𑀁 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀬𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸

𑁧𑁨𑁧. 𑀇𑀢𑁄 ¶ ¶ ¶ 𑀧𑀭𑀁 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀢𑁆𑀣 ‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟’’𑀦𑁆𑀢𑀺 𑀇𑀢𑁄 𑀧𑀭𑀁 𑀅𑀢𑀺𑀭𑁂𑀓𑀧𑀤𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀩𑁆𑀩𑁂𑀲𑀽𑀢𑀺 𑀅𑀦𑀯𑀲𑁂𑀲𑁂𑀲𑀼. 𑀪𑀽𑀢𑁂𑀲𑀽𑀢𑀺 𑀲𑀢𑁆𑀢𑁂𑀲𑀼. 𑀏𑀢𑁆𑀣 𑀪𑀽𑀢𑁂𑀲𑀽𑀢𑀺 𑀓𑀺𑀜𑁆𑀘𑀸𑀧𑀺 𑀪𑀽𑀢𑀲𑀤𑁆𑀤𑁄 ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁬𑁯) 𑀯𑀺𑀚𑁆𑀚𑀫𑀸𑀦𑁂, ‘‘𑀪𑀽𑀢𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀔𑀦𑁆𑀥𑀧𑀜𑁆𑀘𑀓𑁂, ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀼, 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀘𑀢𑀼𑀩𑁆𑀩𑀺𑀥𑁂 𑀧𑀣𑀯𑀻𑀥𑀸𑀢𑁆𑀯𑀸𑀤𑀺𑀭𑀽𑀧𑁂, ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁧.𑁨.𑁧𑁯𑁦) 𑀔𑀻𑀡𑀸𑀲𑀯𑁂, ‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁦) 𑀲𑀩𑁆𑀩𑀲𑀢𑁆𑀢𑁂, ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀘𑀺. 𑁯𑁦) 𑀭𑀼𑀓𑁆𑀔𑀸𑀤𑀺𑀓𑁂, ‘‘𑀪𑀽𑀢𑀁 𑀪𑀽𑀢𑀢𑁄 𑀧𑀚𑀸𑀦𑀸𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩) 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀳𑁂𑀝𑁆𑀞𑀸 𑀲𑀢𑁆𑀢𑀦𑀺𑀓𑀸𑀬𑀁 𑀉𑀧𑀸𑀤𑀸𑀬 𑀯𑀢𑁆𑀢𑀢𑀺. 𑀇𑀥 𑀧𑀦 𑀅𑀯𑀺𑀲𑁂𑀲𑀢𑁄 𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀲𑀼 𑀚𑀸𑀢𑀸 𑀲𑀢𑁆𑀢𑀸 𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼 𑀪𑀽𑀢𑁂𑀲𑀼. 𑀦𑀺𑀥𑀸𑀬𑀸𑀢𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸.

𑀤𑀡𑁆𑀟𑀦𑁆𑀢𑀺 𑀓𑀸𑀬𑀯𑀘𑀻𑀫𑀦𑁄𑀤𑀡𑁆𑀟𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀜𑁆𑀳𑀺 𑀤𑀡𑁆𑀟𑀬𑀢𑀻𑀢𑀺 𑀤𑀡𑁆𑀟𑁄, 𑀩𑀸𑀥𑁂𑀢𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀜𑁆𑀘 𑀫𑀦𑁄𑀤𑀼𑀘𑁆𑀘𑀭𑀺𑀢𑀜𑁆𑀘. 𑀧𑀳𑀭𑀡𑀤𑀡𑁆𑀟𑁄 𑀏𑀯 𑀯𑀸 𑀤𑀡𑁆𑀟𑁄, 𑀢𑀁 𑀦𑀺𑀥𑀸𑀬𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀳𑁂𑀞𑀬𑀦𑁆𑀢𑀺 𑀅𑀯𑀺𑀳𑁂𑀞𑀬𑀦𑁆𑀢𑁄. 𑀅𑀜𑁆𑀜𑀢𑀭𑀫𑁆𑀧𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺. 𑀢𑁂𑀲𑀫𑁆𑀧𑀻𑀢𑀺 𑀢𑁂𑀲𑀁 𑀲𑀩𑁆𑀩𑀪𑀽𑀢𑀸𑀦𑀁. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀭𑀚𑁄 𑀔𑁂𑀢𑁆𑀢𑀚𑁄 𑀤𑀺𑀦𑁆𑀦𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀼𑀢𑁆𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀼𑀢𑁆𑀢𑀁 𑀦 𑀇𑀘𑁆𑀙𑁂𑀬𑁆𑀬. 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀲𑀳𑀸𑀬𑀁 𑀧𑀦 𑀇𑀘𑁆𑀙𑁂𑀬𑁆𑀬𑀸𑀢𑀺 𑀓𑀼𑀢𑁄 𑀏𑀯 𑀏𑀢𑀁.

𑀏𑀓𑁄𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 ¶ 𑀏𑀓𑁄, 𑀏𑀓𑀦𑁆𑀢𑀯𑀺𑀕𑀢𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄. 𑀲𑀫𑀡𑀲𑀳𑀲𑁆𑀲𑀲𑁆𑀲𑀧𑀺 𑀳𑀺 ¶ 𑀫𑀚𑁆𑀛𑁂 𑀯𑀢𑁆𑀢𑀫𑀸𑀦𑁄 𑀕𑀺𑀳𑀺𑀲𑀜𑁆𑀜𑁄𑀚𑀦𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀏𑀓𑁄, 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄 ¶ . 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀇𑀭𑀺𑀬𑀢𑀺 𑀯𑀢𑁆𑀢𑀢𑀻𑀢𑀺 𑀏𑀓𑁄. 𑀏𑀯𑀁 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺. (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭) 𑁋

𑀏𑀯𑀁 𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 𑀏𑀓𑁄. 𑀲𑀩𑁆𑀩𑀓𑀺𑀮𑁂𑀲𑀸𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀏𑀯𑀁 𑀏𑀓𑀦𑁆𑀢𑀯𑀺𑀕𑀢𑀓𑀺𑀮𑁂𑀲𑁄𑀢𑀺 𑀏𑀓𑁄. 𑀅𑀦𑀸𑀘𑀭𑀺𑀬𑀓𑁄 𑀳𑀼𑀢𑁆𑀯𑀸 𑀲𑀬𑀫𑁆𑀪𑀽 𑀲𑀸𑀫𑀜𑁆𑀜𑁂𑀯 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀯𑀁 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀘𑀭𑁂𑀢𑀺 𑀬𑀸 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀬𑀸 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀆𑀬𑀢𑀦𑀘𑀭𑀺𑀬𑀸, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀢𑀺𑀘𑀭𑀺𑀬𑀸, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺𑀘𑀭𑀺𑀬𑀸, 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀜𑀸𑀡𑀘𑀭𑀺𑀬𑀸, 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀦𑀁 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼 𑀫𑀕𑁆𑀕𑀘𑀭𑀺𑀬𑀸, 𑀅𑀥𑀺𑀕𑀢𑀨𑀮𑀸𑀦𑀁 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼 𑀧𑀝𑀺𑀧𑀢𑁆𑀢𑀺𑀘𑀭𑀺𑀬𑀸, 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀢𑀢𑁆𑀣 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀭𑀺𑀬𑀸𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑀬𑀸 𑀇𑀭𑀺𑀬𑀸𑀧𑀣𑀘𑀭𑀺𑀬𑀸’’𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧; 𑀧𑀝𑀺. 𑀫. 𑁧.𑁧𑁯𑁭; 𑁩.𑁨𑁮) 𑀯𑀺𑀢𑁆𑀣𑀸𑀭𑁄. 𑀢𑀸𑀳𑀺 𑀘𑀭𑀺𑀬𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀸 𑀇𑀫𑀸 ‘‘𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀳𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑁄 𑀲𑀫𑀸𑀥𑀺𑀦𑀸 ¶ 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑁂𑀦 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀸𑀧𑁂𑀦𑁆𑀢𑀻𑀢𑀺 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀻’’𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧; 𑀧𑀝𑀺. 𑀫. 𑁧.𑁧𑁯𑁭; 𑁩.𑁨𑁯) 𑀏𑀯𑀁 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸 𑀯𑀼𑀢𑁆𑀢𑀸. 𑀢𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀔𑀕𑁆𑀕𑀯𑀺𑀲𑀸𑀡𑁄 𑀦𑀸𑀫 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀁.

𑀓𑀧𑁆𑀧 ¶ ¶ -𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀘𑁆𑀙𑁂𑀤𑀯𑀺𑀓𑀧𑁆𑀧𑀮𑁂𑀲𑀲𑀫𑀦𑁆𑀢𑀪𑀸𑀯𑀲𑀤𑀺𑀲𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀻𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲. 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀪𑀺𑀲𑀤𑁆𑀤𑀳𑀦𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁦) 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁧𑁦𑁯𑁮; 𑀘𑀽𑀴𑀦𑀺. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑁧𑁧𑁭, 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁧) 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁨.𑁨𑁨.𑁧𑁩𑁬𑁮) 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁪𑁪𑁬) 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁮𑁦) 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁄. ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀓𑀺𑀭, 𑀪𑁄, 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁬𑁦) 𑀲𑀤𑀺𑀲𑁄, 𑀧𑀝𑀺𑀪𑀸𑀕𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀲𑀤𑀺𑀲𑁄 𑀧𑀝𑀺𑀪𑀸𑀕𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀔𑀕𑁆𑀕𑀯𑀺𑀲𑀸𑀡𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀢𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀅𑀥𑀺𑀧𑁆𑀧𑀸𑀬𑀸𑀦𑀼𑀲𑀦𑁆𑀥𑀺𑀢𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁆𑀯𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀤𑀡𑁆𑀟𑁄 𑀪𑀽𑀢𑁂𑀲𑀼 𑀧𑀯𑀢𑁆𑀢𑀺𑀬𑀫𑀸𑀦𑁄 𑀅𑀳𑀺𑀢𑁄 𑀳𑁄𑀢𑀺, 𑀢𑀁 𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀬𑀫𑀸𑀦𑁂𑀲𑀼 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀫𑁂𑀢𑁆𑀢𑀸𑀬 𑀳𑀺𑀢𑀽𑀧𑀲𑀁𑀳𑀸𑀭𑁂𑀦 𑀘 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀏𑀯 𑀘 𑀬𑀣𑀸 𑀅𑀦𑀺𑀳𑀺𑀢𑀤𑀡𑁆𑀟𑀸 𑀲𑀢𑁆𑀢𑀸 𑀪𑀽𑀢𑀸𑀦𑀺 𑀤𑀡𑁆𑀟𑁂𑀦 𑀯𑀸 ¶ 𑀲𑀢𑁆𑀣𑁂𑀦 𑀯𑀸 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀯𑀺𑀳𑁂𑀞𑁂𑀦𑁆𑀢𑀺, 𑀢𑀣𑀸 𑀅𑀯𑀺𑀳𑁂𑀞𑀬𑀁, 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁 𑀇𑀫𑀁 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀫𑀸𑀕𑀫𑁆𑀫 𑀬𑀤𑁂𑀯 𑀢𑀢𑁆𑀣 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀕𑀢𑀁 𑀢𑀜𑁆𑀘 𑀢𑀤𑀦𑀼𑀲𑀸𑀭𑁂𑀦𑁂𑀯 𑀢𑀤𑀜𑁆𑀜𑀜𑁆𑀘 𑀲𑀗𑁆𑀔𑀸𑀭𑀕𑀢𑀁 𑀯𑀺𑀧𑀲𑁆𑀲𑀺𑀢𑁆𑀯𑀸 𑀇𑀫𑀁 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻’’𑀢𑀺 𑀅𑀬𑀁 𑀢𑀸𑀯 𑀅𑀥𑀺𑀧𑁆𑀧𑀸𑀬𑁄.

𑀅𑀬𑀁 𑀧𑀦 𑀅𑀦𑀼𑀲𑀦𑁆𑀥𑀺 𑁋 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺? 𑀢𑀢𑁄 𑀢𑁂𑀦 ‘‘𑀧𑀼𑀩𑁆𑀩𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀜𑀢𑁆𑀯𑀸 ‘‘𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦𑀸𑀳𑀁𑀲𑀼 𑁋 ‘‘𑀅𑀫𑁆𑀳𑁂 𑀤𑀸𑀦𑀺, 𑀪𑀦𑁆𑀢𑁂, 𑀧𑀚𑀳𑀣, 𑀦 𑀇𑀘𑁆𑀙𑀣𑀸’’𑀢𑀺. 𑀅𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋 ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬𑀸’’𑀢𑀺 𑀲𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀳𑀁 𑀇𑀤𑀸𑀦𑀺 𑀅𑀢𑁆𑀭𑀚𑀸𑀤𑀻𑀲𑀼 𑀬𑀁 ¶ 𑀓𑀺𑀜𑁆𑀘𑀺 𑀧𑀼𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑁂𑀬𑁆𑀬𑀁, 𑀓𑀼𑀢𑁄 𑀧𑀦 𑀢𑀼𑀫𑁆𑀳𑀸𑀤𑀺𑀲𑀁 𑀲𑀳𑀸𑀬𑀁. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀲𑀼𑀧𑀺 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 𑀫𑀸𑀤𑀺𑀲𑁄 𑀯𑀸 𑀳𑁄𑀢𑀼𑀁 𑀇𑀘𑁆𑀙𑀢𑀺, 𑀲𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀅𑀣 𑀯𑀸 𑀢𑁂𑀳𑀺 ‘‘𑀅𑀫𑁆𑀳𑁂 𑀤𑀸𑀦𑀺, 𑀪𑀦𑁆𑀢𑁂, 𑀧𑀚𑀳𑀣, 𑀦 𑀇𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬, 𑀓𑀼𑀢𑁄 𑀲𑀳𑀸𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀬𑀣𑀸𑀯𑀼𑀢𑁆𑀢𑁂𑀦𑀝𑁆𑀞𑁂𑀦 𑀏𑀓𑀘𑀭𑀺𑀬𑀸𑀬 ¶ 𑀕𑀼𑀡𑀁 𑀤𑀺𑀲𑁆𑀯𑀸 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁫).

𑀢𑀢𑁆𑀣 𑀢𑀲𑀸𑀢𑀺 𑀯𑀺𑀧𑀸𑀲𑀓𑀺𑀭𑀺𑀬𑀸. 𑀣𑀸𑀯𑀭𑀸𑀢𑀺 𑀔𑀻𑀡𑀸𑀲𑀯𑀸. 𑀪𑀬𑀪𑁂𑀭𑀯𑀸𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀘𑀺𑀢𑁆𑀢𑀼𑀢𑁆𑀭𑀸𑀲𑀸. 𑀦𑀺𑀥𑀸𑀬𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀦𑀺𑀤𑀳𑀺𑀢𑁆𑀯𑀸𑀢𑀺 𑀞𑀧𑁂𑀢𑁆𑀯𑀸. 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 𑀅𑀥𑁄𑀓𑀭𑀺𑀢𑁆𑀯𑀸. 𑀲𑀫𑁄𑀭𑁄𑀧𑀬𑀺𑀢𑁆𑀯𑀸𑀢𑀺 𑀅𑀥𑁄𑀕𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀢𑀢𑁄 𑀅𑀧𑀦𑁂𑀢𑁆𑀯𑀸. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀢𑁆𑀯𑀸𑀢𑀺 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸.

𑀆𑀮𑀧𑀦𑀦𑁆𑀢𑀺 𑀆𑀤𑀺𑀢𑁄 𑀮𑀧𑀦𑀁. 𑀲𑀮𑁆𑀮𑀧𑀦𑀦𑁆𑀢𑀺 𑀲𑀫𑁆𑀫𑀸 𑀮𑀧𑀦𑀁. 𑀉𑀮𑁆𑀮𑀧𑀦𑀦𑁆𑀢𑀺 𑀉𑀤𑁆𑀥𑀁 𑀓𑀢𑁆𑀯𑀸 𑀮𑀧𑀦𑀁. 𑀲𑀫𑀼𑀮𑁆𑀮𑀧𑀦𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀤𑁆𑀥𑀁 𑀓𑀢𑁆𑀯𑀸 𑀮𑀧𑀦𑀁.

𑀇𑀭𑀺𑀬𑀸𑀧𑀣𑀘𑀭𑀺𑀬𑀸𑀢𑀺 𑀇𑀭𑀺𑀬𑀸𑀧𑀣𑀸𑀦𑀁 𑀘𑀭𑀺𑀬𑀸, 𑀧𑀯𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀬𑀢𑀦𑀘𑀭𑀺𑀬𑀸 𑀧𑀦 𑀆𑀬𑀢𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀘𑀭𑀺𑀬𑀸. 𑀧𑀢𑁆𑀢𑀻𑀢𑀺 𑀨𑀮𑀸𑀦𑀺. 𑀢𑀸𑀦𑀺 𑀳𑀺 𑀧𑀸𑀧𑀼𑀡𑀻𑀬𑀦𑁆𑀢𑀻𑀢𑀺 ‘‘𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀢𑁆𑀢𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸 𑀅𑀢𑁆𑀣𑀸 𑀮𑁄𑀓𑀢𑁆𑀣𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀇𑀤𑀸𑀦𑀺 𑀢𑀸𑀲𑀁 𑀘𑀭𑀺𑀬𑀸𑀦𑀁 𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀽’’𑀢𑀺𑀆𑀤𑀺𑀫𑀸𑀳 ¶ . 𑀲𑀢𑀺𑀧𑀝𑁆𑀞𑀸𑀦𑁂𑀲𑀽𑀢𑀺 𑀆𑀭𑀫𑁆𑀫𑀡𑀲𑀢𑀺𑀧𑀝𑁆𑀞𑀸𑀦𑁂𑀲𑀼𑀧𑀺 𑀯𑀼𑀘𑁆𑀘𑀫𑀸𑀦𑁂𑀲𑀼 𑀲𑀢𑀺𑀢𑁄 𑀅𑀦𑀜𑁆𑀜𑀸𑀦𑀺, 𑀯𑁄𑀳𑀸𑀭𑀯𑀲𑁂𑀦 𑀧𑀦 𑀅𑀜𑁆𑀜𑀸𑀦𑀺 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀭𑀺𑀬𑀲𑀘𑁆𑀘𑁂𑀲𑀽𑀢𑀺 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑀲𑀘𑁆𑀘𑀜𑀸𑀡𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀘𑁆𑀘𑀧𑀭𑀺𑀕𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀭𑀺𑀬𑀫𑀕𑁆𑀕𑁂𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀽𑀢𑀺 𑀘 𑀯𑁄𑀳𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀧𑀤𑁂𑀲𑀢𑁄𑀢𑀺 𑀮𑁄𑀓𑀢𑁆𑀣𑀘𑀭𑀺𑀬𑀸𑀬 𑀏𑀓𑀤𑁂𑀲𑁂. 𑀦𑀺𑀧𑁆𑀧𑀤𑁂𑀲𑀢𑁄 𑀳𑀺 𑀮𑁄𑀓𑀢𑁆𑀣𑀘𑀭𑀺𑀬𑀁 𑀩𑀼𑀤𑁆𑀥𑀸 𑀏𑀯 𑀓𑀭𑁄𑀦𑁆𑀢𑀺. 𑀧𑀼𑀦 𑀢𑀸 𑀏𑀯 𑀘𑀭𑀺𑀬𑀸𑀬𑁄 𑀓𑀸𑀭𑀓𑀧𑀼𑀕𑁆𑀕𑀮𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸 𑀦𑀸𑀫 𑀇𑀭𑀺𑀬𑀸𑀧𑀣𑀸𑀦𑀁 𑀲𑀦𑁆𑀢𑀢𑁆𑀢𑀸 𑀇𑀭𑀺𑀬𑀸𑀧𑀣𑀸𑀯 𑀞𑀺𑀢𑀺𑀬𑀸 𑀲𑀫𑁆𑀧𑀦𑁆𑀦𑀸 𑀅𑀓𑀫𑁆𑀧𑀺𑀢𑀇𑀭𑀺𑀬𑀸𑀧𑀣𑀸 𑀪𑀺𑀓𑁆𑀔𑀼𑀪𑀸𑀯𑀸𑀦𑀼𑀭𑀽𑀧𑁂𑀦 𑀲𑀦𑁆𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀲𑀫𑁆𑀧𑀦𑁆𑀦𑀸.

𑀇𑀦𑁆𑀤𑁆𑀭𑀺𑀬𑁂𑀲𑀼 ¶ 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀲𑀼 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀁 𑀏𑀓𑁂𑀓𑀤𑁆𑀯𑀸𑀭𑀯𑀲𑁂𑀦 𑀕𑀼𑀢𑁆𑀢𑀁 𑀤𑁆𑀯𑀸𑀭𑀁 𑀏𑀢𑁂𑀲𑀦𑁆𑀢𑀺 𑀕𑀼𑀢𑁆𑀢𑀤𑁆𑀯𑀸𑀭𑀸, 𑀢𑁂𑀲𑀁 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁. 𑀤𑁆𑀯𑀸𑀭𑀦𑁆𑀢𑀺 𑀘𑁂𑀢𑁆𑀣 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀯𑀲𑁂𑀦 𑀘𑀓𑁆𑀔𑀸𑀤𑀬𑁄 𑀏𑀯. 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀦𑁆𑀢𑀺 𑀲𑀻𑀮𑀸𑀤𑀻𑀲𑀼 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀯𑀢𑀁. 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀸𑀯𑁂𑀦 𑀅𑀥𑀺𑀘𑀺𑀢𑁆𑀢𑀲𑀗𑁆𑀔𑀸𑀢𑀁 𑀲𑀫𑀸𑀥𑀺𑀁 𑀅𑀦𑀼𑀬𑀼𑀢𑁆𑀢𑀸𑀦𑀁. 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀦𑁆𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀕𑁄𑀢𑁆𑀭𑀪𑀼, 𑀢𑀸𑀯 𑀧𑀯𑀢𑁆𑀢𑁂𑀦 𑀜𑀸𑀡𑁂𑀦 𑀲𑀫𑁆𑀧𑀦𑁆𑀦𑀸𑀦𑀁 ¶ . 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀦𑀦𑁆𑀢𑀺 𑀘𑀢𑀼𑀫𑀕𑁆𑀕𑀓𑁆𑀔𑀡𑁂. 𑀅𑀥𑀺𑀕𑀢𑀨𑀮𑀸𑀦𑀦𑁆𑀢𑀺 𑀘𑀢𑀼𑀨𑀮𑀓𑁆𑀔𑀡𑁂. 𑀢𑀣𑀸𑀕𑀢𑀸𑀦𑀦𑁆𑀢𑀺 𑀢𑀣𑀸 𑀆𑀕𑀢𑀸𑀦𑀁. 𑀅𑀭𑀳𑀦𑁆𑀢𑀸𑀦𑀦𑁆𑀢𑀺 𑀤𑀽𑀭𑀓𑀺𑀮𑁂𑀲𑀸𑀦𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀦𑁆𑀢𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀩𑀼𑀤𑁆𑀥𑀸𑀦𑀁. 𑀇𑀫𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑁄 𑀏𑀯.

𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀦𑁆𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸𑀦𑀁 𑀏𑀓𑀤𑁂𑀲𑀢𑁄. 𑀲𑀸𑀯𑀓𑀸𑀦𑀦𑁆𑀢𑀺 𑀲𑀸𑀯𑀓𑀸𑀦𑀫𑁆𑀧𑀺 𑀏𑀓𑀤𑁂𑀲𑀢𑁄. 𑀅𑀥𑀺𑀫𑀼𑀘𑁆𑀘𑀦𑁆𑀢𑁄𑀢𑀺 𑀅𑀥𑀺𑀫𑁄𑀓𑁆𑀔𑀁 𑀓𑀭𑁄𑀦𑁆𑀢𑁄. 𑀲𑀤𑁆𑀥𑀸𑀬 𑀘𑀭𑀢𑀻𑀢𑀺 𑀲𑀤𑁆𑀥𑀸𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀧𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑁂𑀦 𑀧𑀤𑀳𑀦𑁆𑀢𑁄. 𑀉𑀧𑀝𑁆𑀞𑀧𑁂𑀦𑁆𑀢𑁄𑀢𑀺 𑀲𑀢𑀺𑀬𑀸 𑀆𑀭𑀫𑁆𑀫𑀡𑀁 𑀉𑀧𑀝𑁆𑀞𑀧𑁂𑀦𑁆𑀢𑁄. 𑀅𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄𑀢𑀺 𑀲𑀫𑀸𑀥𑀺𑀯𑀲𑁂𑀦 𑀯𑀺𑀓𑁆𑀔𑁂𑀧𑀁 𑀅𑀓𑀭𑁄𑀦𑁆𑀢𑁄. 𑀧𑀚𑀸𑀦𑀦𑁆𑀢𑁄𑀢𑀺 𑀘𑀢𑀼𑀲𑀘𑁆𑀘𑀚𑀸𑀦𑀦𑀧𑀜𑁆𑀜𑀸𑀬 𑀧𑀓𑀸𑀭𑁂𑀦 𑀚𑀸𑀦𑀦𑁆𑀢𑁄. 𑀯𑀺𑀚𑀸𑀦𑀦𑁆𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀧𑀼𑀩𑁆𑀩𑀗𑁆𑀕𑀫𑁂𑀦 ¶ 𑀆𑀯𑀚𑁆𑀚𑀦𑀯𑀺𑀜𑁆𑀜𑀸𑀡𑁂𑀦 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀦𑁆𑀢𑁄. 𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀬𑀸𑀢𑀺 𑀆𑀯𑀚𑁆𑀚𑀦𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀯𑀲𑁂𑀦. 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀲𑀳𑀸𑀯𑀚𑁆𑀚𑀦𑀸𑀬 𑀇𑀦𑁆𑀤𑁆𑀭𑀺𑀬𑀘𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲. 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀸𑀧𑁂𑀦𑁆𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀼𑀲𑀁 𑀬𑀸𑀧𑁂𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀬𑀢𑀦𑀘𑀭𑀺𑀬𑀸𑀬𑀸𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀼𑀲𑀁 𑀬𑀢𑀦𑀘𑀭𑀺𑀬𑀸𑀬, 𑀧𑀯𑀢𑁆𑀢𑀦𑀘𑀭𑀺𑀬𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺.

𑀤𑀲𑁆𑀲𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀢𑀺𑀆𑀤𑀻𑀲𑀼 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀲𑀫𑁆𑀫𑀸 𑀯𑀸 𑀢𑀸𑀬 𑀧𑀲𑁆𑀲𑀦𑁆𑀢𑀺, 𑀧𑀲𑀝𑁆𑀞𑀸 𑀲𑀼𑀦𑁆𑀤𑀭𑀸 𑀯𑀸 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀲𑁆𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀦𑀺𑀩𑁆𑀩𑀸𑀦𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀤𑀲𑁆𑀲𑀦𑀘𑀭𑀺𑀬𑀸. 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑁂𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀲𑀗𑁆𑀓𑀧𑁆𑀧𑁂𑀦𑁆𑀢𑀺, 𑀧𑀲𑀝𑁆𑀞𑁄 𑀲𑀼𑀦𑁆𑀤𑀭𑁄 𑀯𑀸 𑀲𑀗𑁆𑀓𑀧𑁆𑀧𑁄𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀢𑀲𑁆𑀲 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀘𑀭𑀺𑀬𑀸. 𑀲𑀫𑁆𑀫𑀸 𑀯𑀤𑀢𑀺, 𑀲𑀫𑁆𑀫𑀸 𑀯𑀸 𑀢𑀸𑀬 𑀯𑀤𑀦𑁆𑀢𑀺, 𑀧𑀲𑀝𑁆𑀞𑀸 𑀲𑀼𑀦𑁆𑀤𑀭𑀸 𑀯𑀸 𑀯𑀸𑀘𑀸𑀢𑀺 𑀲𑀫𑁆𑀫𑀸𑀯𑀸𑀘𑀸, 𑀫𑀺𑀘𑁆𑀙𑀸𑀯𑀸𑀘𑀸𑀯𑀺𑀭𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀢𑀲𑁆𑀲𑀸 𑀘𑀢𑀼𑀩𑁆𑀩𑀺𑀥𑀯𑀘𑀻𑀲𑀁𑀯𑀭𑀧𑀭𑀺𑀕𑁆𑀕𑀳𑀘𑀭𑀺𑀬𑀸. 𑀲𑀫𑁆𑀫𑀸 𑀓𑀭𑁄𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 ¶ 𑀓𑀭𑁄𑀦𑁆𑀢𑀺, 𑀧𑀲𑀝𑁆𑀞𑀁 𑀲𑀼𑀦𑁆𑀤𑀭𑀁 𑀯𑀸 𑀓𑀫𑁆𑀫𑀦𑁆𑀢𑀺 𑀲𑀫𑁆𑀫𑀸𑀓𑀫𑁆𑀫𑀁, 𑀲𑀫𑁆𑀫𑀸𑀓𑀫𑁆𑀫𑀫𑁂𑀯 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀯𑀺𑀭𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀢𑀲𑁆𑀲 𑀢𑀺𑀯𑀺𑀥𑀓𑀸𑀬𑀲𑀁𑀯𑀭𑀲𑀫𑀼𑀝𑁆𑀞𑀸𑀦𑀘𑀭𑀺𑀬𑀸. 𑀲𑀫𑁆𑀫𑀸 𑀆𑀚𑀻𑀯𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀆𑀚𑀻𑀯𑀦𑁆𑀢𑀺, 𑀧𑀲𑀝𑁆𑀞𑁄 𑀲𑀼𑀦𑁆𑀤𑀭𑁄 𑀯𑀸 𑀆𑀚𑀻𑀯𑁄𑀢𑀺 𑀲𑀫𑁆𑀫𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀆𑀚𑀻𑀯𑀯𑀺𑀭𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀢𑀲𑁆𑀲 𑀯𑁄𑀤𑀸𑀦𑀘𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀘𑀭𑀺𑀬𑀸. 𑀲𑀫𑁆𑀫𑀸 𑀯𑀸𑀬𑀫𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀯𑀸𑀬𑀫𑀦𑁆𑀢𑀺, 𑀧𑀲𑀝𑁆𑀞𑁄 𑀲𑀼𑀦𑁆𑀤𑀭𑁄 𑀯𑀸 𑀯𑀸𑀬𑀸𑀫𑁄𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀢𑀲𑁆𑀲 𑀧𑀕𑁆𑀕𑀳𑀘𑀭𑀺𑀬𑀸. 𑀲𑀫𑁆𑀫𑀸 𑀲𑀭𑀢𑀺, 𑀲𑀫𑁆𑀫𑀸 𑀯𑀸 𑀢𑀸𑀬 𑀲𑀭𑀦𑁆𑀢𑀺, 𑀧𑀲𑀝𑁆𑀞𑀸 𑀲𑀼𑀦𑁆𑀤𑀭𑀸 𑀯𑀸 𑀲𑀢𑀻𑀢𑀺 𑀲𑀫𑁆𑀫𑀸𑀲𑀢𑀺, 𑀢𑀲𑁆𑀲𑀸 𑀉𑀧𑀝𑁆𑀞𑀸𑀦𑀘𑀭𑀺𑀬𑀸. 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀸 𑀢𑁂𑀦 𑀲𑀫𑀸𑀥𑀺𑀬𑀦𑁆𑀢𑀺, 𑀧𑀲𑀝𑁆𑀞𑁄 𑀲𑀼𑀦𑁆𑀤𑀭𑁄 𑀯𑀸 𑀲𑀫𑀸𑀥𑀻𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀢𑀲𑁆𑀲 𑀅𑀯𑀺𑀓𑁆𑀔𑁂𑀧𑀘𑀭𑀺𑀬𑀸.

𑀢𑀓𑁆𑀓𑀧𑁆𑀧𑁄𑀢𑀺 𑀢𑁂𑀦 𑀓𑀧𑁆𑀧𑁄, 𑀏𑀯𑀭𑀽𑀧𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀤𑀺𑀲𑁄𑀢𑀺 𑀢𑁂𑀦 𑀲𑀤𑀺𑀲𑁄, ‘‘𑀢𑀲𑁆𑀲𑀤𑀺𑀓𑁄’’𑀢𑀺 ¶ 𑀯𑀸 𑀧𑀸𑀞𑁄. 𑀢𑀧𑁆𑀧𑀝𑀺𑀪𑀸𑀕𑁄𑀢𑀺 𑀢𑁂𑀦 𑀧𑀝𑀺𑀪𑀸𑀕𑁄 𑀢𑀧𑁆𑀧𑀝𑀺𑀪𑀸𑀕𑁄, 𑀏𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀲𑀸𑀤𑀼𑀭𑀲𑀁 𑀅𑀢𑀺𑀓𑁆𑀓𑀦𑁆𑀢𑀁 𑀮𑁄𑀡𑀁 𑀅𑀢𑀺𑀮𑁄𑀡𑀁. 𑀮𑁄𑀡𑀓𑀧𑁆𑀧𑁄𑀢𑀺 𑀮𑁄𑀡𑀲𑀤𑀺𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀢𑀺𑀢𑀺𑀢𑁆𑀢𑀓𑀦𑁆𑀢𑀺 ¶ 𑀅𑀢𑀺𑀓𑁆𑀓𑀦𑁆𑀢𑀢𑀺𑀢𑁆𑀢𑀓𑀁, 𑀧𑀼𑀘𑀺𑀫𑀦𑁆𑀤𑀸𑀤𑀺𑀓𑀧𑁆𑀧𑁄 𑀢𑀺𑀢𑁆𑀢𑀓𑀲𑀤𑀺𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀢𑀺𑀫𑀥𑀼𑀭𑀦𑁆𑀢𑀺 𑀔𑀻𑀭𑀧𑀸𑀬𑀸𑀲𑀸𑀤𑀺𑀓𑀁. 𑀳𑀺𑀫𑀓𑀧𑁆𑀧𑁄𑀢𑀺 𑀳𑀺𑀫𑁄𑀤𑀓𑀲𑀤𑀺𑀲𑁄. 𑀲𑀢𑁆𑀣𑀼𑀓𑀧𑁆𑀧𑁄𑀢𑀺 𑀲𑀢𑁆𑀣𑀼𑀦𑀸 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄. 𑀏𑀯𑀫𑁂𑀯𑀸𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁.

𑀢𑀢𑁆𑀭𑀸𑀬𑀁 𑀏𑀢𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀗𑁆𑀔𑁂𑀧𑁂𑀦 𑀯𑀺𑀧𑀲𑁆𑀲𑀦𑀸𑀆𑀘𑀺𑀓𑁆𑀔𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫. 𑀢𑀢𑁆𑀣 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀁 𑀓𑀸𑀢𑀼𑀓𑀸𑀫𑁄 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁄 𑀭𑀽𑀧𑀸𑀭𑀽𑀧𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀯𑀺𑀢𑀓𑁆𑀓𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑁂 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀲𑀩𑁆𑀩𑀫𑁆𑀧𑁂𑀢𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀦𑀫𑀦𑀝𑁆𑀞𑁂𑀦 𑀦𑀸𑀫’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀢𑁄 𑀢𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 ‘‘𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻’’𑀢𑀺 𑀧𑀲𑁆𑀲𑀢𑀺. 𑀧𑀼𑀦 𑀯𑀢𑁆𑀣𑀼𑀲𑁆𑀲 𑀧𑀘𑁆𑀘𑀬𑀪𑀽𑀢𑀸𑀦𑀺 𑀘 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘 𑀧𑀲𑁆𑀲𑀺𑀢𑁆𑀯𑀸 ‘‘𑀇𑀤𑀁 𑀲𑀩𑁆𑀩𑀁 𑀭𑀼𑀧𑁆𑀧𑀦𑀢𑁄 𑀭𑀽𑀧’’𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀧𑀼𑀦 𑀢𑀤𑀼𑀪𑀬𑀁 ‘‘𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧’’𑀦𑁆𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺. 𑀲𑀫𑀣𑀬𑀸𑀦𑀺𑀓𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁄 𑀧𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀫𑀼𑀔𑁂𑀦 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀲𑀩𑁆𑀩𑀫𑁆𑀧𑁂𑀢𑀁 𑀭𑀼𑀧𑁆𑀧𑀦𑀢𑁄 𑀭𑀽𑀧’’𑀦𑁆𑀢𑀺 𑀧𑀲𑁆𑀲𑀢𑀺. 𑀢𑀢𑁄 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀲𑁆𑀲 𑀘𑀓𑁆𑀔𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀫𑀸𑀦𑀸 𑀅𑀭𑀽𑀧𑀥𑀫𑁆𑀫𑀸 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺. 𑀢𑀢𑁄 𑀲𑀩𑁆𑀩𑁂𑀧𑀺 𑀢𑁂 𑀅𑀭𑀽𑀧𑀥𑀫𑁆𑀫𑁂 𑀦𑀫𑀦𑀮𑀓𑁆𑀔𑀡𑁂𑀦 𑀏𑀓𑀢𑁄 𑀓𑀢𑁆𑀯𑀸 ‘‘𑀇𑀤𑀁 𑀦𑀸𑀫’’𑀦𑁆𑀢𑀺 𑀧𑀲𑁆𑀲𑀢𑀺, 𑀲𑁄 ¶ ‘‘𑀇𑀤𑀁 𑀦𑀸𑀫𑀁, 𑀇𑀤𑀁 𑀭𑀽𑀧’’𑀦𑁆𑀢𑀺 𑀤𑁆𑀯𑁂𑀥𑀸 𑀯𑀯𑀢𑁆𑀣𑀧𑁂𑀢𑀺. 𑀏𑀯𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 ‘‘𑀦𑀸𑀫𑀭𑀽𑀧𑀢𑁄 𑀉𑀤𑁆𑀥𑀁 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀦𑀢𑁆𑀣𑀻’’𑀢𑀺 𑀧𑀲𑁆𑀲𑀢𑀺.

𑀬𑀣𑀸 𑀳𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 ‘‘𑀲𑀢𑁆𑀢𑁄’’𑀢𑀺 𑀲𑀫𑁆𑀫𑀼𑀢𑀺. (𑀲𑀁. 𑀦𑀺. 𑁧.𑁧𑁭𑁧; 𑀫𑀺. 𑀧. 𑁨.𑁧.𑁧; 𑀓𑀣𑀸. 𑁨𑁩𑁩);

𑀏𑀯𑀫𑁂𑀯 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀦𑀸𑀫𑀭𑀽𑀧𑀸𑀦𑀁 𑀬𑀸𑀣𑀸𑀯𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀪𑀽𑀢𑁂𑀦 𑀜𑀸𑀡𑁂𑀦 ¶ 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀧𑀘𑁆𑀘𑀬𑀫𑁆𑀧𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀼𑀢𑁆𑀢𑀦𑀬𑁂𑀦 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀳𑁂𑀢𑀽’’𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀅𑀳𑁂𑀢𑀼𑀯𑀸𑀤𑀯𑀺𑀲𑀫𑀳𑁂𑀢𑀼𑀯𑀸𑀤𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸 𑀭𑁄𑀕𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀦𑀺𑀤𑀸𑀦𑀁 𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀧𑀭𑀺𑀬𑁂𑀲𑀦𑁆𑀢𑁄 𑀯𑁂𑀚𑁆𑀚𑁄 𑀯𑀺𑀬 𑀢𑀲𑁆𑀲 𑀳𑁂𑀢𑀼𑀜𑁆𑀘 𑀧𑀘𑁆𑀘𑀬𑀜𑁆𑀘 𑀧𑀭𑀺𑀬𑁂𑀲𑀦𑁆𑀢𑁄 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁 𑀓𑀫𑁆𑀫𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀦𑀸𑀫𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑀧𑀘𑁆𑀘𑀬𑀢𑁆𑀢𑀸 ‘‘𑀳𑁂𑀢𑀽’’𑀢𑀺 ¶ . 𑀆𑀳𑀸𑀭𑀁 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀬𑀢𑁆𑀢𑀸 ‘‘𑀧𑀘𑁆𑀘𑀬𑁄’’𑀢𑀺 𑀘 𑀧𑀲𑁆𑀲𑀢𑀺. 𑀇𑀫𑀲𑁆𑀲 𑀳𑀺 𑀓𑀸𑀬𑀲𑁆𑀲 𑀅𑀯𑀺𑀚𑁆𑀚𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸 𑀫𑀸𑀢𑀸 𑀯𑀺𑀬 𑀤𑀸𑀭𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀁 𑀧𑀺𑀢𑀸 𑀯𑀺𑀬 𑀧𑀼𑀢𑁆𑀢𑀲𑁆𑀲 𑀚𑀦𑀓𑀁, 𑀆𑀳𑀸𑀭𑁄 𑀥𑀸𑀢𑀺 𑀯𑀺𑀬 𑀤𑀸𑀭𑀓𑀲𑁆𑀲 𑀲𑀦𑁆𑀥𑀸𑀭𑀓𑁄𑀢𑀺. 𑀏𑀯𑀁 𑀭𑀽𑀧𑀓𑀸𑀬𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀢𑁆𑀯𑀸 𑀧𑀼𑀦 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁬𑁦; 𑀓𑀣𑀸. 𑁪𑁬𑁫) 𑀦𑀬𑁂𑀦 𑀦𑀸𑀫𑀓𑀸𑀬𑀲𑁆𑀲𑀧𑀺 𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀅𑀢𑀻𑀢𑀸𑀦𑀸𑀕𑀢𑀸𑀧𑀺 𑀥𑀫𑁆𑀫𑀸 𑀏𑀯𑀫𑁂𑀯 𑀯𑀢𑁆𑀢𑀦𑁆𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺.

𑀢𑀲𑁆𑀲 𑀬𑀸 𑀲𑀸 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦 𑀦𑀼 𑀔𑁄 𑀅𑀳𑁄𑀲𑀺𑀁, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀧𑀜𑁆𑀘𑀯𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸.

𑀬𑀸𑀧𑀺 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 ‘‘𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀧𑀜𑁆𑀘𑀯𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸.

𑀬𑀸𑀧𑀺 ¶ 𑀏𑀢𑀭𑀳𑀺 𑀯𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁𑀓𑀣𑀻 𑀳𑁄𑀢𑀺 ‘‘𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺, 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀙𑀩𑁆𑀩𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸, 𑀲𑀸 𑀲𑀩𑁆𑀩𑀸𑀧𑀺 𑀧𑀳𑀺𑀬𑁆𑀬𑀢𑀺. 𑀏𑀯𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀡𑁂𑀦 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀗𑁆𑀔𑀁 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁 ‘‘𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀻’’𑀢𑀺𑀧𑀺 ‘‘𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺𑀧𑀺 ‘‘𑀬𑀣𑀸𑀪𑀽𑀢𑀜𑀸𑀡’’𑀦𑁆𑀢𑀺𑀧𑀺 ‘‘𑀲𑀫𑁆𑀫𑀸𑀤𑀲𑁆𑀲𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀏𑀢𑁆𑀣 𑀧𑀦 𑀢𑀺𑀲𑁆𑀲𑁄 𑀳𑀺 𑀮𑁄𑀓𑀺𑀬𑀧𑀭𑀺𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺. 𑀢𑀢𑁆𑀣 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀯𑁂𑀤𑀦𑀸’’𑀢𑀺 𑀏𑀯𑀁 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀯𑀲𑁂𑀦 ¶ 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫. ‘‘𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀦𑀸𑀫. 𑀢𑁂𑀲𑀼 𑀏𑀯 𑀧𑀦 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯 𑀧𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀦𑀸𑀫.

𑀢𑀢𑁆𑀣 ¶ 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀸 𑀜𑀸𑀢𑀧𑀭𑀺𑀜𑁆𑀜𑀸𑀬 𑀪𑀽𑀫𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑁂𑀯 𑀆𑀥𑀺𑀧𑀘𑁆𑀘𑀁 𑀳𑁄𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀪𑀽𑀫𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲𑁂𑀯 𑀆𑀥𑀺𑀧𑀘𑁆𑀘𑀁 𑀳𑁄𑀢𑀺. 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀪𑀽𑀫𑀺. 𑀢𑀢𑁄 𑀘 𑀧𑀝𑁆𑀞𑀸𑀬 𑀳𑀺 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀻𑀢𑀺 𑀏𑀯𑀁 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀳𑀸𑀦𑀲𑀸𑀥𑀺𑀓𑀸𑀦𑀁 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀆𑀥𑀺𑀧𑀘𑁆𑀘𑀁. 𑀇𑀢𑀺 𑀇𑀫𑀸𑀲𑀼 𑀢𑀻𑀲𑀼 𑀧𑀭𑀺𑀜𑁆𑀜𑀸𑀲𑀼 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀲𑁆𑀲 𑀘𑁂𑀯 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲 𑀘 𑀲𑀸𑀥𑀺𑀢𑀢𑁆𑀢𑀸 𑀇𑀫𑀺𑀦𑀸 𑀬𑁄𑀕𑀺𑀦𑀸 𑀜𑀸𑀢𑀧𑀭𑀺𑀜𑁆𑀜𑀸𑀯 𑀅𑀥𑀺𑀕𑀢𑀸.

𑀧𑀼𑀦 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀺𑀢𑁆𑀢𑀸 𑀅𑀦𑀢𑁆𑀢𑀸. 𑀬𑀸 𑀓𑀸𑀘𑀺 𑀯𑁂𑀤𑀦𑀸… 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸 ¶ … 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀺𑀢𑁆𑀢𑀸 𑀅𑀦𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 (𑀲𑀁. 𑀦𑀺. 𑁩.𑁪𑁮; 𑀧𑀝𑀺. 𑀫. 𑁧.𑁪𑁮) 𑀦𑀬𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑀁 𑀓𑀭𑁄𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺.

𑀏𑀯𑀁 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀯𑀲𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑀁 𑀓𑀢𑁆𑀯𑀸 𑀧𑀼𑀦 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑀫𑁂𑀯 𑀧𑀲𑁆𑀲𑀢𑀺. 𑀓𑀣𑀁 ¶ ? ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀢𑀡𑁆𑀳𑀸𑀓𑀫𑁆𑀫𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦). 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀬𑀸𑀬𑀢𑁆𑀢𑀢𑀸𑀤𑀲𑁆𑀲𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. 𑀏𑀯𑀁 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄, 𑀢𑀡𑁆𑀳𑀸𑀓𑀫𑁆𑀫𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀻𑀢𑀺 𑀏𑀯𑀁 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺.

𑀢𑀣𑀸 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄, 𑀢𑀡𑁆𑀳𑀸𑀓𑀫𑁆𑀫𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀸𑀬𑀢𑁆𑀢𑀢𑀸𑀤𑀲𑁆𑀲𑀦𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀓𑀫𑁆𑀫𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀏𑀯𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀨𑀲𑁆𑀲𑀝𑁆𑀞𑀸𑀦𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀧𑀘𑁆𑀘𑀬𑀲𑀫𑀼𑀤𑀬𑀯𑀲𑁂𑀦 𑀘 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀯𑀲𑁂𑀦 𑀘 𑀧𑀘𑁆𑀘𑀬𑀦𑀺𑀭𑁄𑀥𑀯𑀲𑁂𑀦 𑀘 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀯𑀲𑁂𑀦 𑀘 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀘 𑀤𑀲 𑀤𑀲 𑀓𑀢𑁆𑀯𑀸 𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀯𑀲𑁂𑀦 ‘‘𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀉𑀤𑀬𑁄, 𑀏𑀯𑀫𑁆𑀧𑀺 𑀭𑀽𑀧𑀲𑁆𑀲 𑀯𑀬𑁄’’𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀔𑀡𑀢𑁄 𑀘 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀺.

𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 ‘‘𑀇𑀢𑀺 𑀓𑀺𑀭 𑀇𑀫𑁂 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺 𑀜𑀸𑀡𑀁 𑀯𑀺𑀲𑀤𑀁 𑀳𑁄𑀢𑀺. ‘‘𑀏𑀯𑀁 𑀓𑀺𑀭 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀸 ¶ 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀦𑀺𑀘𑁆𑀘𑀦𑀯𑀸 𑀳𑀼𑀢𑁆𑀯𑀸 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀦𑀺𑀘𑁆𑀘𑀦𑀯𑀸, 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼 𑀯𑀺𑀬 𑀉𑀤𑀓𑀩𑀼𑀩𑁆𑀩𑀼𑀴𑁄 𑀯𑀺𑀬 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀆𑀭𑀕𑁆𑀕𑁂 𑀲𑀸𑀲𑀧𑁄 𑀯𑀺𑀬 𑀯𑀺𑀚𑁆𑀚𑀼𑀧𑁆𑀧𑀸𑀤𑁄 𑀯𑀺𑀬 𑀘 𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀦𑁄, 𑀫𑀸𑀬𑀸𑀫𑀭𑀻𑀘𑀺𑀲𑀼𑀧𑀺𑀦𑀸𑀮𑀸𑀢𑀘𑀓𑁆𑀓𑀕𑀦𑁆𑀥𑀩𑁆𑀩𑀦𑀕𑀭𑀨𑁂𑀡𑀓𑀤𑀮𑀺𑀆𑀤𑀬𑁄 𑀯𑀺𑀬 𑀅𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀅𑀦𑁂𑀦 ‘‘𑀯𑀬𑀥𑀫𑁆𑀫𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀯𑀬𑀁 𑀉𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀲𑀫𑁆𑀫𑀲𑀦𑀧𑀜𑁆𑀜𑀸𑀬 𑀮𑀓𑁆𑀔𑀡𑀸𑀦𑀺 ¶ 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀁 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀁 𑀦𑀸𑀫 𑀧𑀞𑀫𑀁 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀬𑀲𑁆𑀲𑀸𑀥𑀺𑀕𑀫𑀸 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄’’𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀅𑀣𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀑𑀪𑀸𑀲𑁄 𑀜𑀸𑀡𑀁 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀼𑀔𑀁 𑀅𑀥𑀺𑀫𑁄𑀓𑁆𑀔𑁄 𑀧𑀕𑁆𑀕𑀳𑁄 𑀉𑀧𑀝𑁆𑀞𑀸𑀦𑀁 𑀉𑀧𑁂𑀓𑁆𑀔𑀸 𑀦𑀺𑀓𑀦𑁆𑀢𑀻𑀢𑀺 𑀤𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁆𑀣 𑀑𑀪𑀸𑀲𑁄 𑀦𑀸𑀫 𑀯𑀺𑀧𑀲𑁆𑀲𑀦𑀓𑁆𑀔𑀡𑁂 𑀜𑀸𑀡𑀲𑁆𑀲 𑀩𑀮𑀯𑀢𑁆𑀢𑀸 𑀮𑁄𑀳𑀺𑀢𑀁 𑀲𑀦𑁆𑀦𑀺𑀲𑀻𑀤𑀢𑀺, 𑀢𑁂𑀦 𑀘 𑀘𑀺𑀢𑁆𑀢𑁄𑀪𑀸𑀲𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀁 𑀤𑀺𑀲𑁆𑀯𑀸 𑀅𑀓𑀼𑀲𑀮𑁄 𑀬𑁄𑀕𑀻 ‘‘𑀫𑀕𑁆𑀕𑁄 𑀫𑁂 𑀧𑀢𑁆𑀢𑁄’’𑀢𑀺 𑀢𑀫𑁂𑀯 𑀑𑀪𑀸𑀲𑀁 𑀅𑀲𑁆𑀲𑀸𑀤𑁂𑀢𑀺. 𑀜𑀸𑀡𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁂𑀯. 𑀢𑀁 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀼𑀤𑁆𑀥𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀢𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑁂 𑀯𑀺𑀬 ‘‘𑀫𑀕𑁆𑀕𑁄’’𑀢𑀺 𑀅𑀲𑁆𑀲𑀸𑀤𑁂𑀢𑀺. 𑀧𑀻𑀢𑀺𑀧𑀺 𑀯𑀺𑀧𑀲𑁆𑀲𑀦𑀸𑀧𑀻𑀢𑀺 𑀏𑀯. 𑀢𑀲𑁆𑀲 𑀳𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀲𑁆𑀲𑀤𑁆𑀥𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀦𑁂𑀯 𑀓𑀸𑀬𑀘𑀺𑀢𑁆𑀢𑀸𑀦𑀁 𑀤𑀭𑀣𑁄, 𑀦 𑀕𑀸𑀭𑀯𑀁, 𑀦 𑀓𑀓𑁆𑀔𑀴𑀢𑀸, 𑀦 𑀅𑀓𑀫𑁆𑀫𑀜𑁆𑀜𑀢𑀸, 𑀦 𑀕𑁂𑀮𑀜𑁆𑀜𑀢𑀸, 𑀦 ¶ 𑀯𑀗𑁆𑀓𑀢𑀸 𑀳𑁄𑀢𑀺. 𑀲𑀼𑀔𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀲𑀼𑀔𑀫𑁂𑀯. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀓𑀮𑀲𑀭𑀻𑀭𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀅𑀢𑀺𑀧𑀡𑀻𑀢𑀁 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀥𑀺𑀫𑁄𑀓𑁆𑀔𑁄 𑀦𑀸𑀫 𑀯𑀺𑀧𑀲𑁆𑀲𑀦𑀓𑁆𑀔𑀡𑁂 𑀧𑀯𑀢𑁆𑀢𑀸 𑀲𑀤𑁆𑀥𑀸. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀢𑀺𑀯𑀺𑀬 𑀧𑀲𑀸𑀤𑀪𑀽𑀢𑀸 𑀩𑀮𑀯𑀢𑀻 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑀺. 𑀧𑀕𑁆𑀕𑀳𑁄 𑀦𑀸𑀫 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀅𑀲𑀺𑀣𑀺𑀮𑀁 𑀅𑀦𑀘𑁆𑀘𑀸𑀭𑀤𑁆𑀥𑀁 𑀲𑀼𑀧𑀕𑁆𑀕𑀳𑀺𑀢𑀁 𑀯𑀻𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀲𑀼𑀧𑀝𑁆𑀞𑀺𑀢𑀸 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁂𑀓𑁆𑀔𑀸 𑀤𑀼𑀯𑀺𑀥𑀸 𑀯𑀺𑀧𑀲𑁆𑀲𑀦𑀸𑀯𑀚𑁆𑀚𑀦𑀯𑀲𑁂𑀦. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀲𑀩𑁆𑀩𑀲𑀗𑁆𑀔𑀸𑀭𑀕𑀳𑀡𑁂 𑀫𑀚𑁆𑀛𑀢𑁆𑀢𑀪𑀽𑀢𑀁 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀁 𑀜𑀸𑀡𑀁 𑀩𑀮𑀯𑀦𑁆𑀢𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀼𑀧𑁂𑀓𑁆𑀔𑀸 𑀘. 𑀲𑀸 𑀘 𑀢𑀁 𑀢𑀁 ¶ 𑀞𑀸𑀦𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀲𑀽𑀭𑀸 𑀢𑀺𑀔𑀺𑀡𑀸 𑀳𑀼𑀢𑁆𑀯𑀸 𑀯𑀳𑀢𑀺. 𑀦𑀺𑀓𑀦𑁆𑀢𑀻𑀢𑀺 ¶ 𑀯𑀺𑀧𑀲𑁆𑀲𑀦𑀸𑀦𑀺𑀓𑀦𑁆𑀢𑀺. 𑀑𑀪𑀸𑀲𑀸𑀤𑀻𑀲𑀼 𑀳𑀺 𑀆𑀮𑀬𑀁 𑀓𑀼𑀭𑀼𑀫𑀸𑀦𑀸 𑀲𑀼𑀔𑀼𑀫𑀸 𑀲𑀦𑁆𑀢𑀸𑀓𑀸𑀭𑀸 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀢𑁆𑀣 𑀑𑀪𑀸𑀲𑀸𑀤𑀬𑁄 𑀓𑀺𑀮𑁂𑀲𑀯𑀢𑁆𑀣𑀼𑀢𑀸𑀬 ‘‘𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀯𑀼𑀢𑁆𑀢𑀸 𑀦 𑀅𑀓𑀼𑀲𑀮𑀢𑁆𑀢𑀸. 𑀦𑀺𑀓𑀦𑁆𑀢𑀺 𑀧𑀦 𑀉𑀧𑀓𑁆𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀯𑀢𑁆𑀣𑀼 𑀘.

𑀧𑀡𑁆𑀟𑀺𑀢𑁄 𑀧𑀦 𑀪𑀺𑀓𑁆𑀔𑀼 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑀺𑀓𑁆𑀔𑁂𑀧𑀁 𑀅𑀕𑀘𑁆𑀙𑀦𑁆𑀢𑁄 ‘‘𑀑𑀪𑀸𑀲𑀸𑀤𑀬𑁄 𑀥𑀫𑁆𑀫𑀸 𑀦 𑀫𑀕𑁆𑀕𑁄, 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑁄’’𑀢𑀺 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀢𑀲𑁆𑀲𑁂𑀯𑀁 ‘‘𑀅𑀬𑀁 𑀫𑀕𑁆𑀕𑁄, 𑀅𑀬𑀁 𑀦 𑀫𑀕𑁆𑀕𑁄’’𑀢𑀺 𑀜𑀢𑁆𑀯𑀸 𑀞𑀺𑀢𑀁 𑀜𑀸𑀡𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀁 𑀯𑀲𑁂𑀦 𑀲𑀺𑀔𑀸𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑀯𑀫𑀜𑁆𑀘 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀦𑁆𑀢𑀺 𑀅𑀬𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀺. 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀜𑀸𑀡𑀸𑀦𑀺 𑀦𑀸𑀫. 𑀦𑀯𑀫𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀦𑁆𑀢𑀺 𑀅𑀦𑀼𑀮𑁄𑀫𑀲𑁆𑀲𑁂𑀢𑀁 𑀦𑀸𑀫𑀁.

𑀢𑀲𑁆𑀫𑀸 𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀆𑀤𑀺𑀁𑀓𑀢𑁆𑀯𑀸 𑀏𑀢𑁂𑀲𑀼 𑀜𑀸𑀡𑁂𑀲𑀼 𑀬𑁄𑀕𑁄 𑀓𑀭𑀡𑀻𑀬𑁄. 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑀲𑁆𑀲 𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀬𑀣𑀸𑀪𑀽𑀢𑀁 𑀉𑀧𑀝𑁆𑀞𑀸𑀢𑀺, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀁 𑀧𑀲𑁆𑀲𑀢𑁄 𑀤𑀼𑀓𑁆𑀔𑀮𑀓𑁆𑀔𑀡𑀜𑁆𑀘, ‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘𑀸’’𑀢𑀺 (𑀲𑀁. 𑀦𑀺. 𑁧.𑁧𑁭𑁧; 𑀓𑀣𑀸. 𑁨𑁩𑁩) 𑀧𑀲𑁆𑀲𑀢𑁄 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘.

𑀏𑀢𑁆𑀣 𑀘 𑀅𑀦𑀺𑀘𑁆𑀘𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀦𑀢𑁆𑀢𑀸 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀅𑀬𑀁 ¶ 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀯𑀸. 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀚𑀭𑀸. 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀳𑀼𑀢𑁆𑀯𑀸 𑀅𑀪𑀸𑀯𑀲𑀗𑁆𑀔𑀸𑀢𑁄 𑀯𑀸 𑀆𑀓𑀸𑀭𑀯𑀺𑀓𑀸𑀭𑁄. ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀘𑀦𑀢𑁄 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀁. 𑀓𑀲𑁆𑀫𑀸? 𑀅𑀪𑀺𑀡𑁆𑀳𑀁 𑀧𑀝𑀺𑀧𑀻𑀴𑀦𑀢𑁄. 𑀅𑀪𑀺𑀡𑁆𑀳𑀁 𑀧𑀝𑀺𑀧𑀻𑀴𑀦𑀸𑀓𑀸𑀭𑁄 𑀤𑀼𑀓𑁆𑀔𑀮𑀓𑁆𑀔𑀡𑀁. ‘‘𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫-𑁧𑁬) 𑀯𑀘𑀦𑀢𑁄 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀢𑁆𑀢𑀸. 𑀓𑀲𑁆𑀫𑀸? 𑀅𑀯𑀲𑀯𑀢𑁆𑀢𑀦𑀢𑁄 ¶ . 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀅𑀦𑀢𑁆𑀢𑀮𑀓𑁆𑀔𑀡𑀁. 𑀇𑀫𑀸𑀦𑀺 𑀢𑀻𑀡𑀺𑀧𑀺 𑀮𑀓𑁆𑀔𑀡𑀸𑀦𑀺 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺.

𑀧𑀼𑀦𑀧𑀺 ¶ 𑀲𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀏𑀯𑀁 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀺𑀧𑀲𑁆𑀲𑀢𑀺, 𑀢𑀲𑁆𑀲 𑀲𑀗𑁆𑀔𑀸𑀭𑀸 𑀮𑀳𑀼𑀁 𑀮𑀳𑀼𑀁 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁄 𑀉𑀧𑁆𑀧𑀸𑀤𑀁 𑀯𑀸 𑀞𑀺𑀢𑀺𑀁 𑀯𑀸 𑀧𑀯𑀢𑁆𑀢𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀅𑀓𑀢𑁆𑀯𑀸 𑀢𑁂𑀲𑀁 𑀔𑀬𑀯𑀬𑀦𑀺𑀭𑁄𑀥𑁂 𑀏𑀯 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀇𑀤𑀁 𑀪𑀗𑁆𑀕𑀜𑀸𑀡𑀁 𑀦𑀸𑀫. 𑀇𑀫𑀲𑁆𑀲 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀅𑀬𑀁 𑀬𑁄𑀕𑀻 ‘‘𑀬𑀣𑀸 𑀇𑀫𑁂 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀲𑀗𑁆𑀔𑀸𑀭𑀕𑀢𑀁 𑀪𑀺𑀚𑁆𑀚𑀺, 𑀅𑀦𑀸𑀕𑀢𑁂𑀧𑀺 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀦𑀺𑀭𑁄𑀥𑀫𑁂𑀯 𑀧𑀲𑁆𑀲𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀪𑀯𑀬𑁄𑀦𑀺 𑀕𑀢𑀺𑀝𑁆𑀞𑀺𑀢𑀺 𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀪𑁂𑀤𑀓𑀸 𑀲𑀗𑁆𑀔𑀸𑀭𑀸 𑀚𑀮𑀺𑀢𑀅𑀗𑁆𑀕𑀸𑀭𑀓𑀸𑀲𑀼𑀆𑀤𑀬𑁄 𑀯𑀺𑀬 𑀫𑀳𑀸𑀪𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀏𑀢𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀦𑀸𑀫.

𑀢𑀲𑁆𑀲 𑀢𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀆𑀲𑁂𑀯𑀦𑁆𑀢𑀲𑁆𑀲 𑀲𑀩𑁆𑀩𑁂 𑀪𑀯𑀸𑀤𑀬𑁄 𑀆𑀤𑀺𑀢𑁆𑀢𑀅𑀗𑁆𑀕𑀸𑀭𑀁 𑀯𑀺𑀬 𑀲𑀫𑀼𑀲𑁆𑀲𑀺𑀢𑀔𑀕𑁆𑀕𑁄 𑀯𑀺𑀬 𑀧𑀘𑁆𑀘𑀢𑁆𑀣𑀺𑀓𑁄 𑀅𑀧𑁆𑀧𑀝𑀺𑀲𑀭𑀡𑀸 𑀲𑀸𑀤𑀻𑀦𑀯𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀇𑀤𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀸𑀫. 𑀢𑀲𑁆𑀲 𑀏𑀯𑀁 𑀲𑀗𑁆𑀔𑀸𑀭𑁂 𑀆𑀤𑀻𑀦𑀯𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀪𑀯𑀸𑀤𑀻𑀲𑀼𑀧𑀺 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑀢𑁆𑀢𑀸 𑀲𑀗𑁆𑀔𑀸𑀭𑁂𑀲𑀼 𑀉𑀓𑁆𑀓𑀡𑁆𑀞𑀦𑀸 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀸𑀫.

𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀲𑁆𑀲 𑀉𑀓𑁆𑀓𑀡𑁆𑀞𑀦𑁆𑀢𑀲𑁆𑀲 𑀢𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀫𑀼𑀜𑁆𑀘𑀺𑀢𑀼𑀓𑀸𑀫𑀢𑀸 𑀦𑀺𑀲𑁆𑀲𑀭𑀺𑀢𑀼𑀓𑀸𑀫𑀢𑀸 𑀳𑁄𑀢𑀺. 𑀇𑀤𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀦𑀸𑀫. 𑀧𑀼𑀦 𑀢𑀲𑁆𑀫𑀸 𑀲𑀗𑁆𑀔𑀸𑀭𑀕𑀢𑀸 𑀫𑀼𑀜𑁆𑀘𑀺𑀢𑀼𑀁 𑀧𑀦 𑀢𑁂 𑀏𑀯 𑀲𑀗𑁆𑀔𑀸𑀭𑁂 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀢𑀻𑀭𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀸𑀫.

𑀲𑁄 𑀏𑀯𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑁂𑀲𑀼 𑀅𑀦𑀢𑁆𑀢𑀮𑀓𑁆𑀔𑀡𑀲𑁆𑀲 𑀲𑀼𑀤𑀺𑀝𑁆𑀞𑀢𑁆𑀢𑀸 ‘‘𑀅𑀢𑁆𑀢𑀸’’𑀢𑀺 𑀯𑀸 ‘‘𑀅𑀢𑁆𑀢𑀦𑀺𑀬’’𑀦𑁆𑀢𑀺 𑀯𑀸 𑀅𑀕𑀡𑁆𑀳𑀦𑁆𑀢𑁄 𑀲𑀗𑁆𑀔𑀸𑀭𑁂𑀲𑀼 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀧𑀳𑀸𑀬 𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑁄 𑀳𑁄𑀢𑀺 𑀫𑀚𑁆𑀛𑀢𑁆𑀢𑁄, ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀦 𑀕𑀡𑁆𑀳𑀸𑀢𑀺, 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁂𑀓𑁆𑀔𑀓𑁄, 𑀇𑀤𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀦𑀸𑀫.

𑀢𑀁 ¶ 𑀧𑀦𑁂𑀲 𑀘𑁂 𑀲𑀦𑁆𑀢𑀺𑀧𑀤𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑀧𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁 𑀧𑀓𑁆𑀔𑀦𑁆𑀤𑀁 𑀳𑁄𑀢𑀺. 𑀦𑁄 𑀘𑁂 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀧𑀼𑀦𑀧𑁆𑀧𑀼𑀦𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸 ‘‘𑀅𑀦𑀢𑁆𑀢𑀸’’𑀢𑀺 𑀯𑀸 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 ¶ 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑀜𑁆𑀘 𑀏𑀢𑀁 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀺𑀲𑁆𑀲𑁄 𑀳𑀺 𑀅𑀦𑀼𑀧𑀲𑁆𑀲𑀦𑀸 ‘‘𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 ¶ 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺.

𑀏𑀢𑁆𑀣 𑀘 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀅𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀳𑀺 𑀅𑀦𑀺𑀫𑀺𑀢𑁆𑀢𑀸𑀬 𑀥𑀸𑀢𑀼𑀬𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑁄, 𑀓𑀺𑀮𑁂𑀲𑁂𑀳𑀺 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑁄𑀓𑁆𑀔𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀅𑀧𑁆𑀧𑀡𑀺𑀳𑀺𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄, 𑀲𑀼𑀜𑁆𑀜𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀲𑀼𑀜𑁆𑀜𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀅𑀥𑀺𑀕𑀢𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀲𑀺𑀔𑀸𑀧𑁆𑀧𑀢𑁆𑀢𑀸 𑀳𑁄𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀢𑀺 𑀏𑀢𑀤𑁂𑀯. 𑀅𑀲𑁆𑀲 𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀆𑀲𑁂𑀯𑀦𑁆𑀢𑀲𑁆𑀲 𑀢𑀺𑀓𑁆𑀔𑀢𑀭𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 ‘‘𑀇𑀤𑀸𑀦𑀺 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀔𑀸𑀭𑁂 ‘‘𑀅𑀦𑀺𑀘𑁆𑀘𑀸’’𑀢𑀺 𑀯𑀸 ‘‘𑀤𑀼𑀓𑁆𑀔𑀸’’𑀢𑀺 𑀯𑀸 ‘‘𑀅𑀦𑀢𑁆𑀢𑀸’’𑀢𑀺 𑀯𑀸 𑀲𑀫𑁆𑀫𑀲𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀪𑀯𑀗𑁆𑀕𑀸𑀦𑀦𑁆𑀢𑀭𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀓𑀣𑀺𑀢𑀦𑀬𑁂𑀦𑁂𑀯 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁂𑀦 𑀫𑀦𑀲𑀺𑀓𑀭𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀢𑀣𑁂𑀯 𑀫𑀦𑀲𑀺𑀓𑀭𑁄𑀢𑁄 𑀧𑀞𑀫𑀁 𑀚𑀯𑀦𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀤𑁂𑀯 𑀤𑀼𑀢𑀺𑀬𑀚𑀯𑀦𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀉𑀧𑀘𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀦𑀦𑁆𑀢𑀭𑀫𑁆𑀧𑀺 𑀢𑀤𑁂𑀯 𑀉𑀧𑁆𑀧𑀚𑁆𑀚𑀢𑀺 𑀢𑀢𑀺𑀬𑀁 𑀚𑀯𑀦𑀘𑀺𑀢𑁆𑀢𑀁. 𑀬𑀁 𑀅𑀦𑀼𑀮𑁄𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀢𑁂𑀲𑀁 𑀧𑀸𑀝𑀺𑀏𑀓𑁆𑀓𑀁 𑀦𑀸𑀫.

𑀅𑀯𑀺𑀲𑁂𑀲𑁂𑀦 𑀧𑀦 𑀢𑀺𑀯𑀺𑀥𑀫𑁆𑀧𑁂𑀢𑀁 ‘‘𑀆𑀲𑁂𑀯𑀦’’𑀦𑁆𑀢𑀺𑀧𑀺 ‘‘𑀧𑀭𑀺𑀓𑀫𑁆𑀫’’𑀦𑁆𑀢𑀺𑀧𑀺 ‘‘𑀉𑀧𑀘𑀸𑀭’’𑀦𑁆𑀢𑀺𑀧𑀺 ‘‘𑀅𑀦𑀼𑀮𑁄𑀫’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀧𑀦 𑀅𑀦𑀼𑀮𑁄𑀫𑀜𑀸𑀡𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀁 𑀳𑁄𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀕𑁄𑀢𑁆𑀭𑀪𑀼𑀜𑀸𑀡𑀫𑁂𑀯 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀧𑀭𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀼𑀭𑀼𑀫𑀸𑀦𑀁 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀁 𑀅𑀢𑀺𑀓𑁆𑀓𑀫𑀫𑀸𑀦𑀁 𑀅𑀭𑀺𑀬𑀕𑁄𑀢𑁆𑀢𑀁 𑀑𑀓𑁆𑀓𑀫𑀫𑀸𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀪𑀽𑀢𑀁 𑀅𑀧𑀼𑀦𑀭𑀸𑀯𑀝𑁆𑀝𑀓𑀁 ¶ 𑀕𑁄𑀢𑁆𑀭𑀪𑀼𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀧𑀦 𑀜𑀸𑀡𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀜𑁆𑀘 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀜𑁆𑀘 𑀦 𑀪𑀚𑀢𑀺. 𑀅𑀦𑁆𑀢𑀭𑀸 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸𑀲𑁄𑀢𑁂 𑀧𑀢𑀺𑀢𑀢𑁆𑀢𑀸 ‘‘𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀸 ‘‘𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀸 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀕𑁄𑀢𑁆𑀭𑀪𑀼𑀜𑀸𑀡𑁂 𑀦𑀺𑀭𑀼𑀤𑁆𑀥𑁂 𑀢𑁂𑀦 𑀤𑀺𑀦𑁆𑀦𑀲𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 ¶ ¶ 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀦𑁆𑀢𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀲𑁆𑀲𑁂𑀯 𑀯𑀺𑀧𑀸𑀓𑀪𑀽𑀢𑀸𑀦𑀺 𑀤𑁆𑀯𑁂 𑀢𑀻𑀡𑀺 𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀦𑀦𑁆𑀢𑀭𑀯𑀺𑀧𑀸𑀓𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁, 𑀨𑀮𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 𑀉𑀧𑁆𑀧𑀦𑁆𑀦𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀸𑀬 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀳𑀺 ‘‘𑀇𑀫𑀺𑀦𑀸 𑀯𑀢𑀸𑀳𑀁 𑀫𑀕𑁆𑀕𑁂𑀦 𑀆𑀕𑀢𑁄’’𑀢𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀫𑁂 𑀅𑀬𑀁 𑀆𑀦𑀺𑀲𑀁𑀲𑁄 𑀮𑀤𑁆𑀥𑁄’’𑀢𑀺 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀇𑀫𑁂 𑀦𑀸𑀫 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑀢𑁄 ‘‘𑀇𑀫𑁂 𑀦𑀸𑀫 𑀓𑀺𑀮𑁂𑀲𑀸 𑀅𑀯𑀲𑀺𑀝𑁆𑀞𑀸’’𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀯𑀲𑀸𑀦𑁂 𑀘 ‘‘𑀅𑀬𑀁 𑀥𑀫𑁆𑀫𑁄 𑀫𑀬𑀸 𑀧𑀝𑀺𑀯𑀺𑀤𑁆𑀥𑁄’’𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀸𑀯𑀲𑀸𑀦𑁂. 𑀅𑀭𑀳𑀢𑁆𑀢𑀨𑀮𑀸𑀯𑀲𑀸𑀦𑁂 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀏𑀓𑀽𑀦𑀯𑀻𑀲𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺.

𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑁄 𑀬𑁄𑀕𑀸𑀯𑀘𑀭𑁄 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑀲𑁆𑀲𑀺𑀢𑁆𑀯𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀁 𑀓𑀭𑁄𑀦𑁆𑀢𑁄 𑀤𑀼𑀢𑀺𑀬𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺, 𑀢𑀤𑀦𑀦𑁆𑀢𑀭𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀨𑀮𑀜𑁆𑀘. 𑀢𑀢𑁄 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑀲𑁆𑀲𑀺𑀢𑁆𑀯𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀓𑀭𑁄𑀦𑁆𑀢𑁄 𑀢𑀢𑀺𑀬𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀨𑀮𑀜𑁆𑀘. 𑀢𑀢𑁄 𑀢𑀲𑁆𑀫𑀺𑀁𑀬𑁂𑀯𑀸𑀲𑀦𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑀲𑁆𑀲𑀺𑀢𑁆𑀯𑀸 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀫𑀸𑀦𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀓𑀭𑁄𑀦𑁆𑀢𑁄 𑀘𑀢𑀼𑀢𑁆𑀣𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀨𑀮𑀜𑁆𑀘. 𑀏𑀢𑁆𑀢𑀸𑀯𑀢𑀸 𑀘𑁂𑀲 𑀳𑁄𑀢𑀺 𑀅𑀭𑀳𑀸 𑀫𑀳𑀸𑀔𑀻𑀡𑀸𑀲𑀯𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀇𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫.

𑀏𑀢𑁆𑀢𑀸𑀯𑀢𑀸 ‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 ¶ 𑀢𑁂𑀲’’𑀦𑁆𑀢𑀺 𑀏𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀲𑀻𑀮𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑀻𑀮𑀯𑀺𑀲𑀼𑀤𑁆𑀥𑀺. ‘‘𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬’’𑀦𑁆𑀢𑀺 𑀏𑀢𑁂𑀦 𑀧𑀝𑀺𑀖𑀸𑀦𑀼𑀦𑀬𑀯𑀺𑀯𑀚𑁆𑀚𑀦𑀯𑀲𑁂𑀦 𑀫𑁂𑀢𑁆𑀢𑀸𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺. ‘‘𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺 𑀇𑀫𑀺𑀦𑀸 𑀧𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁, 𑀯𑀺𑀢𑁆𑀣𑀸𑀭𑀁 𑀧𑀦 𑀇𑀘𑁆𑀙𑀦𑁆𑀢𑁂𑀦 ¶ 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 (𑀯𑀺𑀲𑀼𑀤𑁆𑀥𑀺. 𑁨.𑁬𑁬𑁨, 𑁬𑁭𑁮, 𑁬𑁯𑁨, 𑁭𑁩𑁭, 𑁮𑁦𑁬 𑀆𑀤𑀬𑁄) 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘𑁂𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑁋

‘‘𑀘𑀸𑀢𑀼𑀤𑁆𑀤𑀺𑀲𑁄 ¶ 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺, 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. (𑀲𑀼. 𑀦𑀺. 𑁪𑁨; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑁋

𑀧𑀲𑀁𑀲𑀺𑀬𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀉𑀧𑀲𑁄𑀪𑀬𑀫𑀸𑀦𑁄 𑀯𑀺𑀳𑀸𑀲𑀺𑀦𑁆𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣.

𑀧𑀞𑀫𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁨. 𑀤𑀼𑀢𑀺𑀬𑁂 𑀲𑀁𑀲𑀕𑁆𑀕𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀲𑀁𑀲𑀕𑁆𑀕𑀲𑁆𑀲. 𑀢𑀢𑁆𑀣 𑀤𑀲𑁆𑀲𑀦𑀲𑀯𑀦𑀓𑀸𑀬𑀲𑀫𑀼𑀮𑁆𑀮𑀧𑀦𑀲𑀫𑁆𑀪𑁄𑀕𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀲𑀁𑀲𑀕𑁆𑀕𑁄. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀤𑀺𑀲𑁆𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀣 𑀲𑀻𑀳𑀴𑀤𑀻𑀧𑁂 𑀓𑀸𑀴𑀤𑀻𑀖𑀯𑀸𑀧𑀻𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀓𑀮𑁆𑀬𑀸𑀡𑀯𑀺𑀳𑀸𑀭𑀯𑀸𑀲𑀺𑀁 𑀤𑀳𑀭𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑀁 𑀅𑀮𑀪𑀺𑀢𑁆𑀯𑀸 𑀓𑀸𑀮𑀓𑀢𑀸 𑀓𑀼𑀝𑀼𑀫𑁆𑀩𑀺𑀬𑀥𑀻𑀢𑀸 𑀢𑀲𑁆𑀲𑀸 𑀦𑀺𑀯𑀸𑀲𑀦𑀘𑁄𑀴𑀓𑁆𑀔𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀸𑀬 𑀯𑀢𑁆𑀣𑀥𑀸𑀭𑀺𑀦𑀺𑀬𑀸 𑀦𑀸𑀫 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦𑀸𑀮𑀢𑁆𑀣’’𑀦𑁆𑀢𑀺 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀓𑀸𑀮𑀓𑀢𑁄 𑀲𑁄 𑀏𑀯 𑀘 𑀤𑀳𑀭𑁄 𑀦𑀺𑀤𑀲𑁆𑀲𑀦𑀁.

𑀧𑀭𑁂𑀳𑀺 𑀧𑀦 𑀓𑀣𑀺𑀬𑀫𑀸𑀦𑀁 𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀯𑀸 𑀳𑀲𑀺𑀢𑀮𑀧𑀺𑀢𑀕𑀻𑀢𑀲𑀤𑁆𑀤𑀁 ¶ 𑀲𑀼𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀭𑀸𑀧𑀺 𑀕𑀺𑀭𑀺𑀕𑀸𑀫𑀯𑀸𑀲𑀻𑀓𑀫𑁆𑀫𑀸𑀭𑀥𑀻𑀢𑀸𑀬 𑀧𑀜𑁆𑀘𑀳𑀺 𑀓𑀼𑀫𑀸𑀭𑀻𑀳𑀺 𑀲𑀤𑁆𑀥𑀺𑀁 𑀧𑀤𑀼𑀫𑀲𑁆𑀲𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀫𑀸𑀮𑀁 𑀲𑀻𑀲𑁂 𑀆𑀭𑁄𑀧𑁂𑀢𑁆𑀯𑀸 𑀉𑀘𑁆𑀘𑀸𑀲𑀤𑁆𑀤𑁂𑀦 𑀕𑀸𑀬𑀦𑁆𑀢𑀺𑀬𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀸𑀫𑀭𑀸𑀕𑁂𑀦 𑀛𑀸𑀦𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄 𑀧𑀜𑁆𑀘𑀕𑁆𑀕𑀴𑀮𑁂𑀡𑀯𑀸𑀲𑀻 𑀢𑀺𑀲𑁆𑀲𑀤𑀳𑀭𑁄 𑀦𑀺𑀤𑀲𑁆𑀲𑀦𑀁.

𑀅𑀜𑁆𑀜𑀫𑀜𑁆𑀜𑀁 𑀅𑀗𑁆𑀕𑀧𑀭𑀸𑀫𑀲𑀦𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫. 𑀥𑀫𑁆𑀫𑀕𑀸𑀬𑀦𑀤𑀳𑀭𑀪𑀺𑀓𑁆𑀔𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀫𑀳𑀸𑀯𑀺𑀳𑀸𑀭𑁂 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀢𑁆𑀣 𑀫𑀳𑀸𑀚𑀦𑁂 𑀆𑀕𑀢𑁂 𑀭𑀸𑀚𑀸𑀧𑀺 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀧𑀼𑀭𑁂𑀦. 𑀢𑀢𑁄 𑀭𑀸𑀚𑀥𑀻𑀢𑀸𑀬 𑀢𑀲𑁆𑀲 𑀭𑀽𑀧𑀜𑁆𑀘 𑀲𑀤𑁆𑀤𑀜𑁆𑀘 𑀆𑀕𑀫𑁆𑀫 𑀩𑀮𑀯𑀭𑀸𑀕𑁄 𑀉𑀧𑁆𑀧𑀦𑁆𑀦𑁄 𑀢𑀲𑁆𑀲 𑀘 𑀤𑀳𑀭𑀲𑁆𑀲𑀸𑀧𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺, ¶ 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀭𑀸𑀫𑀲𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀲𑀼. 𑀧𑀼𑀦 𑀲𑀸𑀡𑀺𑀧𑀸𑀓𑀸𑀭𑀁 𑀅𑀧𑀦𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑀸 𑀤𑁆𑀯𑁂𑀧𑀺 𑀓𑀸𑀮𑀓𑀢𑁂𑀬𑁂𑀯 𑀅𑀤𑁆𑀤𑀲𑀁𑀲𑀽𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀆𑀮𑀧𑀦𑀲𑀫𑀼𑀮𑁆𑀮𑀧𑀦𑁂 𑀉𑀧𑁆𑀧𑀦𑁆𑀦𑀭𑀸𑀕𑁄 𑀧𑀦 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀓𑀭𑀡𑁂 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀤𑁆𑀯𑀻𑀲𑀼𑀧𑀺 𑀘 𑀏𑀢𑁂𑀲𑀼 𑀫𑀭𑀺𑀘𑀯𑀝𑁆𑀝𑀺𑀯𑀺𑀳𑀸𑀭𑁂 ¶ 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀻 𑀘 𑀦𑀺𑀤𑀲𑁆𑀲𑀦𑀁. 𑀫𑀭𑀺𑀘𑀯𑀝𑁆𑀝𑀺𑀫𑀳𑀸𑀯𑀺𑀳𑀸𑀭𑀫𑀳𑁂 𑀓𑀺𑀭 𑀤𑀼𑀝𑁆𑀞𑀕𑀸𑀫𑀡𑀺 𑀅𑀪𑀬𑀫𑀳𑀸𑀭𑀸𑀚𑀸 𑀫𑀳𑀸𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀉𑀪𑀢𑁄𑀲𑀗𑁆𑀖𑀁 𑀧𑀭𑀺𑀯𑀺𑀲𑀢𑀺. 𑀢𑀢𑁆𑀣 𑀉𑀡𑁆𑀳𑀬𑀸𑀕𑀼𑀬𑀸 𑀤𑀺𑀦𑁆𑀦𑀸𑀬 𑀲𑀗𑁆𑀖𑀦𑀯𑀓𑀲𑀸𑀫𑀡𑁂𑀭𑀻 𑀅𑀦𑀸𑀥𑀸𑀭𑀓𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀲𑀗𑁆𑀖𑀦𑀯𑀓𑀲𑀸𑀫𑀡𑁂𑀭𑀲𑁆𑀲 𑀤𑀦𑁆𑀢𑀯𑀮𑀬𑀁 𑀤𑀢𑁆𑀯𑀸 𑀲𑀫𑀼𑀮𑁆𑀮𑀸𑀧𑀁 𑀅𑀓𑀸𑀲𑀺, 𑀢𑁂 𑀉𑀪𑁄𑀧𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀸 𑀳𑀼𑀢𑁆𑀯𑀸 𑀧𑀭𑀢𑀻𑀭𑀁 𑀕𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀼𑀮𑁆𑀮𑀸𑀧𑁂𑀦 𑀧𑀼𑀩𑁆𑀩𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀸𑀯𑀤𑁂𑀯 𑀚𑀸𑀢𑀲𑀺𑀦𑁂𑀳𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀸 𑀅𑀳𑁂𑀲𑀼𑀦𑁆𑀢𑀺.

𑀏𑀯𑀁 𑀧𑀜𑁆𑀘𑀯𑀺𑀥𑁂 𑀲𑀁𑀲𑀕𑁆𑀕𑁂 𑀬𑁂𑀦 𑀓𑁂𑀦𑀘𑀺 𑀲𑀁𑀲𑀕𑁆𑀕𑁂𑀦 𑀚𑀸𑀢𑀲𑀁𑀲𑀕𑁆𑀕𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀧𑀼𑀭𑀺𑀫𑀭𑀸𑀕𑀧𑀘𑁆𑀘𑀬𑀸 𑀩𑀮𑀯𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻𑀢𑀺 𑀢𑀫𑁂𑀯 𑀲𑁆𑀦𑁂𑀳𑀁 𑀅𑀦𑀼𑀕𑀘𑁆𑀙𑀦𑁆𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑁄𑀓𑀧𑀭𑀺𑀤𑁂𑀯𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀢𑀺 ¶ 𑀚𑀸𑀬𑀢𑀺. 𑀅𑀧𑀭𑁂 𑀧𑀦 ‘‘𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀯𑁄𑀲𑀕𑁆𑀕𑁄 𑀲𑀁𑀲𑀕𑁆𑀕𑁄’’𑀢𑀺 𑀪𑀡𑀦𑁆𑀢𑀺. 𑀢𑀢𑁄 𑀲𑁆𑀦𑁂𑀳𑁄 𑀲𑁆𑀦𑁂𑀳𑀤𑀼𑀓𑁆𑀔𑀦𑁆𑀢𑀺.

𑀏𑀯𑀫𑀢𑁆𑀣𑀧𑁆𑀧𑀪𑁂𑀤𑀁 𑀇𑀫𑀁 𑀅𑀟𑁆𑀠𑀕𑀸𑀣𑀁 𑀯𑀢𑁆𑀯𑀸 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀳 𑁋 ‘‘𑀲𑁆𑀯𑀸𑀳𑀁 𑀬𑀫𑀺𑀤𑀁 𑀲𑁆𑀦𑁂𑀳𑀦𑁆𑀯𑀬𑀁 𑀲𑁄𑀓𑀸𑀤𑀺𑀤𑀼𑀓𑁆𑀔𑀁 𑀧𑀳𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮𑀁 𑀔𑀦𑀦𑁆𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀫𑀘𑁆𑀘𑀸 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑁂𑀳𑀺 𑀤𑀸𑀦𑀺, 𑀪𑀦𑁆𑀢𑁂, 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺? 𑀢𑀢𑁄 𑀲𑁄 𑀆𑀳 𑁋 ‘‘𑀢𑀼𑀫𑁆𑀳𑁂 𑀯𑀸 𑀅𑀜𑁆𑀜𑁂 𑀯𑀸 𑀬𑁄 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄, 𑀲𑁄 𑀲𑀩𑁆𑀩𑁄𑀧𑀺 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀏𑀢𑁆𑀣 𑀘 𑀬𑀁 𑀢𑀁 ‘‘𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀲𑀦𑁆𑀥𑀸𑀬 ‘‘𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺, 𑀏𑀯𑀁 𑀬𑀣𑀸𑀪𑀽𑀢𑀁 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄 𑀅𑀳𑀁 𑀅𑀥𑀺𑀕𑀢𑁄𑀢𑀺 𑀏𑀯𑀫𑁆𑀧𑀺 𑀅𑀪𑀺𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀲𑀩𑁆𑀩𑀁 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁬).

𑀦𑀺𑀤𑁆𑀤𑁂𑀲𑁂 ¶ 𑀅𑀦𑀼𑀧𑁆𑀧𑀸𑀤𑁂𑀢𑀻𑀢𑀺 𑀭𑀽𑀧𑀲𑁆𑀫𑀺𑀁 𑀅𑀦𑀼𑀩𑁆𑀬𑀜𑁆𑀚𑀦𑀁 𑀤𑀺𑀲𑁆𑀯𑀸 𑀅𑀮𑁆𑀮𑀻𑀬𑀢𑀺. 𑀅𑀦𑀼𑀩𑀦𑁆𑀥𑀢𑀻𑀢𑀺 𑀭𑀽𑀧𑀲𑁆𑀫𑀺𑀁 𑀲𑁆𑀦𑁂𑀳𑀯𑀲𑁂𑀦 𑀩𑀦𑁆𑀥𑀢𑀺. 𑀪𑀯𑀦𑁆𑀢𑀻𑀢𑀺 𑀳𑁄𑀦𑁆𑀢𑀺. 𑀚𑀸𑀬𑀦𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀯𑀢𑁆𑀢𑀦𑁆𑀢𑀺. 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀲𑀫𑁆𑀪𑀯𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀢𑀻𑀡𑀺 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀸𑀦𑀺. 𑀇𑀢𑁄 𑀧𑀭𑀁 𑀅𑀝𑁆𑀞𑀓𑀯𑀕𑁆𑀕𑁂 (𑀫𑀳𑀸𑀦𑀺. 𑁧 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁩. 𑀢𑀢𑀺𑀬𑁂 ¶ 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀫𑀺𑀢𑁆𑀢𑀸. 𑀲𑀼𑀳𑀤𑀪𑀸𑀯𑁂𑀦 𑀲𑀼𑀳𑀚𑁆𑀚𑀸. 𑀓𑁂𑀘𑀺 𑀳𑀺 𑀏𑀓𑀦𑁆𑀢𑀳𑀺𑀢𑀓𑀸𑀫𑀢𑀸𑀬 𑀫𑀺𑀢𑁆𑀢𑀸𑀯 𑀳𑁄𑀦𑁆𑀢𑀺, 𑀦 𑀲𑀼𑀳𑀚𑁆𑀚𑀸. 𑀓𑁂𑀘𑀺 𑀕𑀫𑀦𑀸𑀕𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀲𑀫𑀼𑀮𑁆𑀮𑀸𑀧𑀸𑀤𑀻𑀲𑀼 𑀳𑀤𑀬𑀲𑀼𑀔𑀚𑀦𑀦𑁂𑀦 𑀲𑀼𑀳𑀚𑁆𑀚𑀸𑀯 𑀳𑁄𑀦𑁆𑀢𑀺, 𑀦 𑀫𑀺𑀢𑁆𑀢𑀸. 𑀓𑁂𑀘𑀺 𑀢𑀤𑀼𑀪𑀬𑀯𑀲𑁂𑀦 𑀲𑀼𑀳𑀚𑁆𑀚𑀸 𑀘𑁂𑀯 𑀫𑀺𑀢𑁆𑀢𑀸 𑀘. 𑀢𑁂 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀅𑀕𑀸𑀭𑀺𑀬𑀸 𑀘 𑀅𑀦𑀕𑀸𑀭𑀺𑀬𑀸 𑀘. 𑀢𑀢𑁆𑀣 𑀅𑀕𑀸𑀭𑀺𑀬𑀸 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀉𑀧𑀓𑀸𑀭𑀸 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀸 𑀅𑀦𑀼𑀓𑀫𑁆𑀧𑀓𑀸𑀢𑀺. 𑀅𑀦𑀕𑀸𑀭𑀺𑀬𑀸 𑀯𑀺𑀲𑁂𑀲𑁂𑀦 𑀅𑀢𑁆𑀣𑀓𑁆𑀔𑀸𑀬𑀺𑀦𑁄 ¶ . 𑀏𑀯𑀁 𑀢𑁂 𑀘𑀢𑀽𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺.

𑀬𑀣𑀸𑀳 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀫𑀢𑁆𑀢𑀁 𑀭𑀓𑁆𑀔𑀢𑀺, 𑀧𑀫𑀢𑁆𑀢𑀲𑁆𑀲 𑀲𑀸𑀧𑀢𑁂𑀬𑁆𑀬𑀁 𑀭𑀓𑁆𑀔𑀢𑀺, 𑀪𑀻𑀢𑀲𑁆𑀲 𑀲𑀭𑀡𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀢𑀤𑁆𑀤𑀺𑀕𑀼𑀡𑀁 𑀪𑁄𑀕𑀁 𑀅𑀦𑀼𑀧𑁆𑀧𑀤𑁂𑀢𑀺 (𑀤𑀻. 𑀦𑀺. 𑁩.𑁨𑁬𑁧).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀺, 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀺, 𑀚𑀻𑀯𑀺𑀢𑀫𑁆𑀧𑀺𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺 (𑀤𑀻. 𑀦𑀺. 𑁩.𑁨𑁬𑁨).

𑀢𑀣𑀸 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀦𑀼𑀓𑀫𑁆𑀧𑀓𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀯𑁂𑀦𑀲𑁆𑀲 𑀦 𑀦𑀦𑁆𑀤𑀢𑀺, 𑀪𑀯𑁂𑀦𑀲𑁆𑀲 𑀦𑀦𑁆𑀤𑀢𑀺, 𑀅𑀯𑀡𑁆𑀡𑀁 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀯𑀡𑁆𑀡𑀁 𑀪𑀡𑀫𑀸𑀦𑀁 𑀧𑀲𑀁𑀲𑀢𑀺 (𑀤𑀻. 𑀦𑀺. 𑁩.𑁨𑁬𑁪).

𑀢𑀣𑀸 ¶ 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀢𑁆𑀣𑀓𑁆𑀔𑀸𑀬𑀻 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀧𑀸 𑀦𑀺𑀯𑀸𑀭𑁂𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀢𑀺, 𑀅𑀲𑁆𑀲𑀼𑀢𑀁 𑀲𑀸𑀯𑁂𑀢𑀺, 𑀲𑀕𑁆𑀕𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁩).

𑀢𑁂𑀲𑀼 𑀇𑀥 𑀅𑀕𑀸𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸, 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑁂𑀧𑀺 𑀬𑀼𑀚𑁆𑀚𑀦𑁆𑀢𑀺. 𑀢𑁂 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂. 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀅𑀦𑀼𑀤𑀬𑀫𑀸𑀦𑁄, 𑀢𑁂𑀲𑀁 𑀲𑀼𑀔𑀁 𑀉𑀧𑀲𑀁𑀳𑀭𑀺𑀢𑀼𑀓𑀸𑀫𑁄 𑀤𑀼𑀓𑁆𑀔𑀁 𑀅𑀧𑀳𑀭𑀺𑀢𑀼𑀓𑀸𑀫𑁄.

𑀳𑀸𑀧𑁂𑀢𑀺 ¶ 𑀅𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀯𑀲𑁂𑀦 𑀢𑀺𑀯𑀺𑀥𑀁, 𑀢𑀣𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀉𑀪𑀬𑀢𑁆𑀣𑀯𑀲𑁂𑀦𑀸𑀧𑀺 𑀢𑀺𑀯𑀺𑀥𑀁 𑀅𑀢𑁆𑀣𑀁 𑀮𑀤𑁆𑀥𑀯𑀺𑀦𑀸𑀲𑀦𑁂𑀦 𑀅𑀮𑀤𑁆𑀥𑀸𑀦𑀼𑀧𑁆𑀧𑀸𑀤𑀦𑁂𑀦𑀸𑀢𑀺 𑀤𑁆𑀯𑀺𑀥𑀸𑀧𑀺 𑀳𑀸𑀧𑁂𑀢𑀺 𑀯𑀺𑀦𑀸𑀲𑁂𑀢𑀺. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 ‘‘𑀅𑀳𑀁 𑀇𑀫𑀁 𑀯𑀺𑀦𑀸 𑀦 𑀚𑀻𑀯𑀸𑀫𑀺, 𑀏𑀲𑁄 𑀫𑁂 𑀕𑀢𑀺, 𑀏𑀲𑁄 𑀫𑁂 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄𑀧𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. ‘‘𑀇𑀫𑁂 𑀫𑀁 𑀯𑀺𑀦𑀸 𑀦 𑀚𑀻𑀯𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀕𑀢𑀺, 𑀅𑀳𑀁 𑀢𑁂𑀲𑀁 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑁄𑀧𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀇𑀥 𑀧𑀦 𑀏𑀯𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄.

𑀏𑀢𑀁 𑀪𑀬𑀦𑁆𑀢𑀺 𑀏𑀢𑀁 𑀅𑀢𑁆𑀣𑀳𑀸𑀧𑀦𑀪𑀬𑀁, 𑀅𑀢𑁆𑀢𑀦𑁄 𑀲𑀫𑀸𑀧𑀢𑁆𑀢𑀺𑀳𑀸𑀦𑀺𑀁 𑀲𑀦𑁆𑀥𑀸𑀬 𑀪𑀡𑀢𑀺. 𑀲𑀦𑁆𑀣𑀯𑁂𑀢𑀺 𑀢𑀺𑀯𑀺𑀥𑁄 𑀲𑀦𑁆𑀣𑀯𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦. 𑀢𑀢𑁆𑀣 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸𑀧𑀺 𑀢𑀡𑁆𑀳𑀸 𑀢𑀡𑁆𑀳𑀸𑀲𑀦𑁆𑀣𑀯𑁄, 𑀤𑁆𑀯𑀸𑀲𑀝𑁆𑀞𑀺𑀧𑁆𑀧𑀪𑁂𑀤𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀲𑀦𑁆𑀣𑀯𑁄, 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸𑀬 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀦𑀸 𑀫𑀺𑀢𑁆𑀢𑀲𑀦𑁆𑀣𑀯𑁄. 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄 ¶ . 𑀢𑁂𑀦 𑀳𑀺𑀲𑁆𑀲 𑀲𑀫𑀸𑀧𑀢𑁆𑀢𑀺 𑀧𑀭𑀺𑀳𑀻𑀦𑀸. 𑀢𑁂𑀦𑀸𑀳 𑁋 ‘‘𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄’’𑀢𑀺. 𑀲𑁂𑀲𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀤𑁆𑀤𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁭; 𑀅𑀧. 𑀅𑀝𑁆𑀞. 𑁧.𑁧.𑁯𑁩-𑁯𑁪).

𑀢𑀢𑀺𑀬𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁪. 𑀘𑀢𑀼𑀢𑁆𑀣𑁂 𑀯𑀁𑀲𑁄𑀢𑀺 𑀯𑁂𑀴𑀼. 𑀯𑀺𑀲𑀸𑀮𑁄𑀢𑀺 𑀯𑀺𑀢𑁆𑀣𑀺𑀡𑁆𑀡𑁄. 𑀯-𑀓𑀸𑀭𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀏𑀯𑀓𑀸𑀭𑁄 𑀯𑀸 𑀅𑀬𑀁. 𑀲𑀦𑁆𑀥𑀺𑀯𑀲𑁂𑀦𑁂𑀢𑁆𑀣 𑀏-𑀓𑀸𑀭𑁄 𑀦𑀝𑁆𑀞𑁄. 𑀢𑀲𑁆𑀲 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑁄, 𑀢𑀁 𑀧𑀘𑁆𑀙𑀸 𑀬𑁄𑀚𑁂𑀲𑁆𑀲𑀸𑀫. 𑀬𑀣𑀸𑀢𑀺 𑀧𑀝𑀺𑀪𑀸𑀕𑁂. 𑀯𑀺𑀲𑀢𑁆𑀢𑁄𑀢𑀺 𑀮𑀕𑁆𑀕𑁄 𑀚𑀝𑀺𑀢𑁄 𑀲𑀁𑀲𑀺𑀩𑁆𑀩𑀺𑀢𑁄. 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘𑀸𑀢𑀺 𑀧𑀼𑀢𑁆𑀢𑀥𑀻𑀢𑀼𑀪𑀭𑀺𑀬𑀸𑀲𑀼. 𑀬𑀸 𑀅𑀧𑁂𑀓𑁆𑀔𑀸𑀢𑀺 𑀬𑀸 𑀢𑀡𑁆𑀳𑀸 𑀬𑁄 𑀲𑁆𑀦𑁂𑀳𑁄 ¶ . 𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄𑀢𑀺 𑀯𑀁𑀲𑀓𑀴𑀻𑀭𑁄 𑀯𑀺𑀬 𑀅𑀮𑀕𑁆𑀕𑀫𑀸𑀦𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀯𑀁𑀲𑁄 𑀯𑀺𑀲𑀸𑀮𑁄 𑀯𑀺𑀲𑀢𑁆𑀢𑁄 𑀏𑀯 𑀳𑁄𑀢𑀺, 𑀧𑀼𑀢𑁆𑀢𑁂𑀲𑀼 𑀘 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸, 𑀲𑀸𑀧𑀺 𑀏𑀯𑀁 𑀢𑀸𑀦𑀺 𑀯𑀢𑁆𑀣𑀽𑀦𑀺 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀺𑀲𑀢𑁆𑀢𑀸 𑀏𑀯. 𑀲𑁆𑀯𑀸𑀳𑀁 𑀢𑀸𑀬 𑀅𑀧𑁂𑀓𑁆𑀔𑀸𑀬 𑀅𑀧𑁂𑀓𑁆𑀔𑀯𑀸 𑀯𑀺𑀲𑀸𑀮𑁄 𑀯𑀁𑀲𑁄 𑀯𑀺𑀬 𑀯𑀺𑀲𑀢𑁆𑀢𑁄𑀢𑀺 𑀏𑀯𑀁 𑀅𑀧𑁂𑀓𑁆𑀔𑀸𑀬 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀅𑀧𑁂𑀓𑁆𑀔𑀁 𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀦𑁆𑀢𑁄 𑀅𑀬𑀁 𑀯𑀁𑀲𑀓𑀴𑀻𑀭𑁄𑀯 𑀭𑀽𑀧𑀸𑀤𑀻𑀲𑀼 𑀯𑀸 𑀤𑀺𑀝𑁆𑀞𑀸𑀤𑀻𑀲𑀼 𑀯𑀸 𑀮𑀸𑀪𑀸𑀤𑀻𑀲𑀼 𑀯𑀸 𑀓𑀸𑀫𑀪𑀯𑀸𑀤𑀻𑀲𑀼 𑀯𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀅𑀲𑀚𑁆𑀚𑀫𑀸𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀬𑀧𑀺 𑀦𑀺𑀤𑁆𑀤𑁂𑀲𑁂 𑀅𑀢𑀺𑀭𑁂𑀓𑀁 𑀦𑀢𑁆𑀣𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁮).

𑀘𑀢𑀼𑀢𑁆𑀣𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁫. 𑀧𑀜𑁆𑀘𑀫𑁂 𑀫𑀺𑀕𑁄𑀢𑀺 𑀲𑀩𑁆𑀩𑁂𑀲𑀁 𑀆𑀭𑀜𑁆𑀜𑀺𑀓𑀘𑀢𑀼𑀧𑁆𑀧𑀤𑀸𑀦𑀁 𑀏𑀯 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀧𑀲𑀤𑀫𑀺𑀕𑁄 ¶ 𑀅𑀥𑀺𑀧𑁆𑀧𑁂𑀢𑁄. 𑀅𑀭𑀜𑁆𑀜𑀫𑁆𑀳𑀻𑀢𑀺 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁, 𑀇𑀥 𑀧𑀦 𑀉𑀬𑁆𑀬𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀉𑀬𑁆𑀬𑀸𑀦𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀢𑀺 𑀧𑀝𑀺𑀪𑀸𑀕𑁂. 𑀅𑀩𑀤𑁆𑀥𑁄𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀩𑀤𑁆𑀥𑁄. 𑀏𑀢𑁂𑀦 𑀯𑀺𑀲𑁆𑀲𑀝𑁆𑀞𑀘𑀭𑀺𑀬𑀁 𑀤𑀻𑀧𑁂𑀢𑀺. 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬𑀸𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀦𑁆𑀢𑀼𑀁 𑀇𑀘𑁆𑀙𑀢𑀺, 𑀢𑁂𑀦 𑀕𑁄𑀘𑀭𑀢𑁆𑀣𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺 𑀕𑀦𑁆𑀢𑀼𑀁, 𑀢𑀢𑁆𑀢𑀓𑀁 𑀕𑀘𑁆𑀙𑀢𑀺. 𑀬𑀁 𑀇𑀘𑁆𑀙𑀢𑀺 𑀔𑀸𑀤𑀺𑀢𑀼𑀁, 𑀢𑀁 𑀔𑀸𑀤𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀺𑀜𑁆𑀜𑀽 𑀦𑀭𑁄𑀢𑀺 𑀧𑀡𑁆𑀟𑀺𑀢𑀧𑀼𑀭𑀺𑀲𑁄. 𑀲𑁂𑀭𑀺𑀢𑀦𑁆𑀢𑀺 ¶ 𑀲𑀘𑁆𑀙𑀦𑁆𑀤𑀯𑀼𑀢𑁆𑀢𑀺𑀢𑀁 𑀅𑀧𑀭𑀸𑀬𑀢𑁆𑀢𑀪𑀸𑀯𑀁. 𑀧𑁂𑀓𑁆𑀔𑀫𑀸𑀦𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀑𑀮𑁄𑀓𑀬𑀫𑀸𑀦𑁄. 𑀅𑀣 𑀯𑀸 𑀥𑀫𑁆𑀫𑀲𑁂𑀭𑀺𑀢𑀁 𑀧𑀼𑀕𑁆𑀕𑀮𑀲𑁂𑀭𑀺𑀢𑀜𑁆𑀘. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀳𑀺 𑀓𑀺𑀮𑁂𑀲𑀯𑀲𑀁 𑀅𑀕𑀫𑀦𑀢𑁄 𑀲𑁂𑀭𑀺𑀦𑁄 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀧𑀼𑀕𑁆𑀕𑀮𑀸 𑀘, 𑀢𑁂𑀲𑀁 𑀪𑀸𑀯𑀦𑀺𑀤𑁆𑀤𑁂𑀲𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬. 𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀢𑀡𑁆𑀳𑀸𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀏𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑀇𑀢𑀺 𑀫𑁂 𑀢𑀼𑀫𑁆𑀳𑁂𑀳𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀳𑀺 𑀩𑀤𑁆𑀥𑀲𑁆𑀲 𑀬𑁂𑀦𑀺𑀘𑁆𑀙𑀓𑀁 𑀕𑀦𑁆𑀢𑀼𑀁 𑀅𑀮𑀪𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀬𑁂𑀦𑀺𑀘𑁆𑀙𑀓𑀕𑀫𑀦𑀸𑀪𑀸𑀯𑁂 𑀆𑀤𑀻𑀦𑀯𑀁 𑀬𑁂𑀦𑀺𑀘𑁆𑀙𑀓𑀕𑀫𑀦𑁂 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀧𑀽𑀭𑀺𑀁 𑀅𑀕𑀫𑀺𑀁. 𑀢𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁯 𑀆𑀤𑀬𑁄).

𑀧𑀜𑁆𑀘𑀫𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁬. 𑀙𑀝𑁆𑀞𑁂 ¶ 𑀅𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀲𑀳𑀸𑀬𑀫𑀚𑁆𑀛𑁂 𑀞𑀺𑀢𑀲𑁆𑀲 𑀤𑀺𑀯𑀸𑀲𑁂𑀬𑁆𑀬𑀲𑀗𑁆𑀔𑀸𑀢𑁂 𑀯𑀸𑀲𑁂 𑀘 𑀫𑀳𑀸𑀉𑀧𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀞𑀸𑀦𑁂 𑀘 𑀉𑀬𑁆𑀬𑀸𑀦𑀕𑀫𑀦𑀲𑀗𑁆𑀔𑀸𑀢𑁂 𑀕𑀫𑀦𑁂 𑀘 𑀚𑀦𑀧𑀤𑀘𑀸𑀭𑀺𑀓𑀲𑀗𑁆𑀔𑀸𑀢𑀸𑀬 𑀘𑀸𑀭𑀺𑀓𑀸𑀬 𑀘 ‘‘𑀇𑀤𑀁 𑀫𑁂 𑀲𑀼𑀡, 𑀇𑀤𑀁 𑀫𑁂 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀣𑀸 𑀢𑀣𑀸 𑀆𑀫𑀦𑁆𑀢𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀳𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀬𑀸𑀬𑀁 𑀅𑀭𑀺𑀬𑀚𑀦𑀲𑁂𑀯𑀺𑀢𑀸 𑀅𑀦𑁂𑀓𑀸𑀦𑀺𑀲𑀁𑀲𑀸 𑀏𑀓𑀦𑁆𑀢𑀲𑀼𑀔𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀮𑁄𑀪𑀸𑀪𑀺𑀪𑀽𑀢𑁂𑀳𑀺 𑀲𑀩𑁆𑀩𑀓𑀸𑀧𑀼𑀭𑀺𑀲𑁂𑀳𑀺 𑀅𑀦𑀪𑀺𑀚𑁆𑀛𑀺𑀢𑀸 𑀅𑀧𑀢𑁆𑀣𑀺𑀢𑀸 𑀧𑀩𑁆𑀩𑀚𑁆𑀚𑀸, 𑀢𑀁 𑀅𑀦𑀪𑀺𑀚𑁆𑀛𑀺𑀢𑀁 𑀧𑀭𑁂𑀲𑀁 𑀅𑀯𑀲𑀯𑀢𑁆𑀢𑀦𑁂𑀦 𑀪𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀘 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁯-𑁪𑁨).

𑀙𑀝𑁆𑀞𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁭. 𑀲𑀢𑁆𑀢𑀫𑁂 𑀔𑀺𑀟𑁆𑀟𑀸𑀢𑀺 𑀓𑀻𑀴𑀦𑀸. 𑀲𑀸 𑀤𑀼𑀯𑀺𑀥𑀸 𑀳𑁄𑀢𑀺 𑀓𑀸𑀬𑀺𑀓𑀸 𑀘 𑀯𑀸𑀘𑀲𑀺𑀓𑀸 𑀘. 𑀢𑀢𑁆𑀣 ¶ 𑀓𑀸𑀬𑀺𑀓𑀸 𑀦𑀸𑀫 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀲𑁆𑀲𑁂𑀳𑀺𑀧𑀺 𑀭𑀣𑁂𑀳𑀺𑀧𑀺 𑀥𑀦𑀽𑀳𑀺𑀧𑀺 𑀣𑀭𑀽𑀳𑀺𑀧𑀻𑀢𑀺 𑀏𑀯𑀫𑀸𑀤𑀺. 𑀯𑀸𑀘𑀲𑀺𑀓𑀸 𑀦𑀸𑀫 𑀕𑀻𑀢𑀁 𑀲𑀺𑀮𑁄𑀓𑀪𑀡𑀦𑀁 ¶ 𑀫𑀼𑀔𑀪𑁂𑀭𑀺𑀓𑀦𑁆𑀢𑀺 𑀏𑀯𑀫𑀸𑀤𑀺. 𑀭𑀢𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺. 𑀯𑀺𑀧𑀼𑀮𑀦𑁆𑀢𑀺 𑀬𑀸𑀯 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀞𑀸𑀦𑁂𑀦 𑀲𑀓𑀮𑀢𑁆𑀢𑀪𑀸𑀯𑀩𑁆𑀬𑀸𑀧𑀓𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀅𑀦𑀼𑀲𑀦𑁆𑀥𑀺𑀬𑁄𑀚𑀦𑀸𑀧𑀺 𑀘𑁂𑀢𑁆𑀣 𑀲𑀁𑀲𑀕𑁆𑀕𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁧).

𑀲𑀢𑁆𑀢𑀫𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁮. 𑀅𑀝𑁆𑀞𑀫𑁂 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀬𑀣𑀸𑀲𑀼𑀔𑀯𑀺𑀳𑀸𑀭𑀻, ‘‘𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀅. 𑀦𑀺. 𑁪.𑁧𑁨𑁫; 𑀯𑀺𑀪. 𑁬𑁪𑁩; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑀯𑀸 𑀦𑀬𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀨𑀭𑀺𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺𑀧𑀺 𑀘𑀸𑀢𑀼𑀤𑁆𑀤𑀺𑀲𑁄. 𑀢𑀸𑀲𑀼 𑀤𑀺𑀲𑀸𑀲𑀼 𑀓𑀢𑁆𑀣𑀘𑀺 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀧𑁆𑀧𑀝𑀺𑀖𑁄. 𑀲𑀦𑁆𑀢𑀼𑀲𑁆𑀲𑀫𑀸𑀦𑁄𑀢𑀺 𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀲𑀦𑁆𑀢𑁄𑀲𑀲𑁆𑀲 𑀯𑀲𑁂𑀦 𑀲𑀦𑁆𑀢𑀼𑀲𑁆𑀲𑀓𑁄. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀦 𑀧𑀘𑁆𑀘𑀬𑁂𑀦. 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻𑀢𑀺 𑀏𑀢𑁆𑀣 𑀧𑀭𑀺𑀲𑁆𑀲𑀬𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀺, 𑀧𑀭𑀺𑀳𑀸𑀧𑁂𑀦𑁆𑀢𑀺 𑀯𑀸 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀁, 𑀢𑀸𑀦𑀺 𑀯𑀸 𑀧𑀝𑀺𑀘𑁆𑀘 𑀲𑀬𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀩𑀸𑀳𑀺𑀭𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑀸𑀦𑀜𑁆𑀘 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀓𑀸𑀬𑀘𑀺𑀢𑁆𑀢𑀼𑀧𑀤𑁆𑀤𑀯𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀧𑀭𑀺𑀲𑁆𑀲𑀬𑁂 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀘 𑀯𑀻𑀭𑀺𑀬𑀸𑀤𑀻𑀳𑀺 𑀘 𑀥𑀫𑁆𑀫𑁂𑀳𑀺 𑀲𑀳𑀢𑀻𑀢𑀺 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀣𑀤𑁆𑀥𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 ¶ 𑀅𑀙𑀫𑁆𑀪𑀻. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑁂 𑀘𑀢𑁆𑀢𑀸𑀭𑁄 𑀲𑀫𑀡𑀸, 𑀏𑀯𑀁 𑀇𑀢𑀭𑀻𑀢𑀭𑁂𑀦 𑀧𑀘𑁆𑀘𑀬𑁂𑀦 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀏𑀢𑁆𑀣 𑀧𑀝𑀺𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑁂 𑀲𑀦𑁆𑀢𑁄𑀲𑁂 𑀞𑀺𑀢𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀘𑀸𑀢𑀼𑀤𑁆𑀤𑀺𑀲𑁄, 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀧𑀝𑀺𑀳𑀦𑀦𑀓𑀭𑀪𑀬𑀸𑀪𑀸𑀯𑁂𑀦 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺. 𑀲𑁄 𑀘𑀸𑀢𑀼𑀤𑁆𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸, 𑀅𑀧𑁆𑀧𑀝𑀺𑀖𑀢𑁆𑀢𑀸 𑀅𑀙𑀫𑁆𑀪𑀻 𑀘 𑀳𑁄𑀢𑀻𑀢𑀺 𑀏𑀢𑀁 𑀧𑀝𑀺𑀧𑀢𑁆𑀢𑀺𑀕𑀼𑀡𑀁 𑀤𑀺𑀲𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺.

𑀅𑀣 𑀯𑀸 𑀢𑁂 𑀲𑀫𑀡𑀸 𑀯𑀺𑀬 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀸𑀢𑀼𑀤𑁆𑀤𑀺𑀲𑁄 𑀳𑁄𑀢𑀻𑀢𑀺 𑀜𑀢𑁆𑀯𑀸 𑀏𑀯𑀁 𑀘𑀸𑀢𑀼𑀤𑁆𑀤𑀺𑀲𑀪𑀸𑀯𑀁 𑀧𑀢𑁆𑀣𑀬𑀦𑁆𑀢𑁄 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀕𑀢𑁄𑀫𑁆𑀳𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀈𑀤𑀺𑀲𑀁 𑀞𑀸𑀦𑀁 𑀧𑀢𑁆𑀣𑀬𑀫𑀸𑀦𑁄 𑀘𑀸𑀢𑀼𑀤𑁆𑀤𑀺𑀲𑀢𑀸𑀬 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀧𑁆𑀧𑀝𑀺𑀖𑀢𑀸𑀬 𑀘 𑀅𑀙𑀫𑁆𑀪𑀻 𑀳𑀼𑀢𑁆𑀯𑀸 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁨).

𑀦𑀺𑀤𑁆𑀤𑁂𑀲𑁂 𑀫𑁂𑀢𑁆𑀢𑀸𑀢𑀺 𑀅𑀢𑁆𑀣𑀢𑁄 𑀢𑀸𑀯 𑀫𑀺𑀚𑁆𑀚𑀢𑀻𑀢𑀺 𑀫𑁂𑀢𑁆𑀢𑀸, 𑀲𑀺𑀦𑁂𑀳𑀢𑀻𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑁂 𑀯𑀸 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀯𑀸 𑀏𑀲𑀸 𑀧𑀯𑀢𑁆𑀢𑀻𑀢𑀺𑀧𑀺 𑀫𑁂𑀢𑁆𑀢𑀸. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺 ¶ 𑀫𑁂𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁂𑀦. 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦. 𑀏𑀓𑀁 𑀤𑀺𑀲𑀦𑁆𑀢𑀺 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀧𑀞𑀫𑀧𑀭𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀁 𑀉𑀧𑀸𑀤𑀸𑀬 𑀏𑀓𑀁 𑀤𑀺𑀲𑀁 𑀧𑀭𑀺𑀬𑀸𑀧𑀦𑁆𑀦𑀲𑀢𑁆𑀢𑀨𑀭𑀡𑀯𑀲𑁂𑀦 ¶ 𑀯𑀼𑀢𑁆𑀢𑀁. 𑀨𑀭𑀺𑀢𑁆𑀯𑀸𑀢𑀺 𑀨𑀼𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀯𑀺𑀳𑀭𑀢𑀻𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀥𑀺𑀝𑁆𑀞𑀺𑀢𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀁 𑀧𑀯𑀢𑁆𑀢𑁂𑀢𑀺. 𑀢𑀣𑀸 𑀤𑀼𑀢𑀺𑀬𑀦𑁆𑀢𑀺 𑀬𑀣𑀸 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑁂𑀯 𑀢𑀤𑀦𑀦𑁆𑀢𑀭𑀁 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀜𑁆𑀘𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀉𑀤𑁆𑀥𑀦𑁆𑀢𑀺 𑀏𑀢𑁂𑀦𑁂𑀯 𑀘 𑀦𑀬𑁂𑀦 𑀉𑀧𑀭𑀺𑀫𑀁 𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀅𑀥𑁄𑀤𑀺𑀲𑀫𑁆𑀧𑀺 𑀢𑀺𑀭𑀺𑀬𑀁 𑀤𑀺𑀲𑀫𑁆𑀧𑀺 𑀏𑀯𑀫𑁂𑀯. 𑀢𑀢𑁆𑀣 𑀘 𑀅𑀥𑁄𑀢𑀺 𑀳𑁂𑀝𑁆𑀞𑀸. 𑀢𑀺𑀭𑀺𑀬𑀦𑁆𑀢𑀺 𑀅𑀦𑀼𑀤𑀺𑀲𑀸. 𑀏𑀯𑀁 𑀲𑀩𑁆𑀩𑀤𑀺𑀲𑀸𑀲𑀼 𑀅𑀲𑁆𑀲𑀫𑀡𑁆𑀟𑀮𑁂 𑀅𑀲𑁆𑀲𑀫𑀺𑀯 𑀫𑁂𑀢𑁆𑀢𑀸𑀲𑀳𑀕𑀢𑀁 𑀘𑀺𑀢𑁆𑀢𑀁 𑀲𑀸𑀭𑁂𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀢𑀺𑀧𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀓𑀫𑁂𑀓𑀁 𑀤𑀺𑀲𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀑𑀥𑀺𑀲𑁄 𑀫𑁂𑀢𑁆𑀢𑀸𑀨𑀭𑀡𑀁 𑀤𑀲𑁆𑀲𑀺𑀢𑀁. 𑀲𑀩𑁆𑀩𑀥𑀻𑀢𑀺𑀆𑀤𑀺 𑀧𑀦 𑀅𑀦𑁄𑀥𑀺𑀲𑁄 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀲𑀼 𑀳𑀻𑀦𑀫𑀚𑁆𑀛𑀺𑀫𑀉𑀓𑁆𑀓𑀝𑁆𑀞𑀫𑀺𑀢𑁆𑀢𑀲𑀧𑀢𑁆𑀢𑀫𑀚𑁆𑀛𑀢𑁆𑀢𑀸𑀦𑀺𑀧𑁆𑀧𑀪𑁂𑀤𑁂𑀲𑀼 𑀅𑀢𑁆𑀢𑀢𑀸𑀬, ‘‘𑀅𑀬𑀁 𑀧𑀭𑀲𑀢𑁆𑀢𑁄’’𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀢𑁆𑀢𑀲𑀫𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 ¶ 𑀯𑀸 𑀲𑀩𑁆𑀩𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑁂𑀦 𑀘𑀺𑀢𑁆𑀢𑀪𑀸𑀯𑁂𑀦, 𑀈𑀲𑀓𑀫𑁆𑀧𑀺 𑀩𑀳𑀺 𑀅𑀯𑀺𑀓𑁆𑀔𑀺𑀧𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁, 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀯𑀺𑀧𑀼𑀮𑁂𑀦𑀸𑀢𑀺 𑀏𑀯𑀫𑀸𑀤𑀺𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁄 𑀧𑀦𑁂𑀢𑁆𑀣 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀏𑀢𑁆𑀣 𑀑𑀥𑀺𑀲𑁄 𑀨𑀭𑀡𑁂 𑀯𑀺𑀬 𑀧𑀼𑀦 𑀢𑀣𑀸-𑀲𑀤𑁆𑀤𑁄 𑀇𑀢𑀺-𑀲𑀤𑁆𑀤𑁄 𑀯𑀸 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀕𑀫𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀯𑀺𑀧𑀼𑀮𑁂𑀦𑀸𑀢𑀺 𑀏𑀢𑁆𑀣 𑀘 𑀨𑀭𑀡𑀯𑀲𑁂𑀦 𑀯𑀺𑀧𑀼𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀪𑀽𑀫𑀺𑀯𑀲𑁂𑀦 𑀧𑀦 𑀢𑀁 𑀫𑀳𑀕𑁆𑀕𑀢𑀁. 𑀧𑀕𑀼𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀯𑀲𑁂𑀦 𑀘 𑀅𑀧𑁆𑀧𑀫𑀸𑀡𑀁. 𑀩𑁆𑀬𑀸𑀧𑀸𑀤𑀧𑀘𑁆𑀘𑀢𑁆𑀣𑀺𑀓𑀧𑁆𑀧𑀳𑀸𑀦𑁂𑀦 𑀅𑀯𑁂𑀭𑀁. 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑁂𑀦 𑀅𑀩𑁆𑀬𑀸𑀧𑀚𑁆𑀚𑀁. 𑀦𑀺𑀤𑁆𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁫𑁪). 𑀓𑀭𑀼𑀡𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀫𑁄𑀤𑀦𑁆𑀢𑀺 𑀢𑀸𑀬 𑀢𑀁𑀲𑀫𑀗𑁆𑀕𑀺𑀦𑁄, 𑀲𑀬𑀁 𑀯𑀸 𑀫𑁄𑀤𑀢𑀺, 𑀫𑁄𑀤𑀦𑀫𑀢𑁆𑀢𑀫𑁂𑀯 𑀯𑀸 𑀲𑀸𑀢𑀺 𑀫𑀼𑀤𑀺𑀢𑀸. ‘‘𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀩𑁆𑀬𑀸𑀧𑀸𑀤𑀧𑁆𑀧𑀳𑀸𑀦𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑀽𑀧𑀕𑀫𑀦𑁂𑀦 𑀘 𑀉𑀧𑁂𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸.

𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀢𑁆𑀣 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀫𑁂𑀢𑁆𑀢𑀸, 𑀳𑀺𑀢𑀽𑀧𑀲𑀁𑀳𑀸𑀭𑀭𑀲𑀸 ¶ , 𑀆𑀖𑀸𑀢𑀯𑀺𑀦𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀩𑁆𑀬𑀸𑀧𑀸𑀤𑀽𑀧𑀲𑀫𑁄 𑀏𑀢𑀺𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀲𑀺𑀦𑁂𑀳𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺. 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀸𑀲𑀳𑀦𑀭𑀲𑀸, 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀯𑀺𑀳𑀺𑀁𑀲𑀽𑀧𑀲𑀫𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀲𑁄𑀓𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺. 𑀧𑀫𑁄𑀤𑀮𑀓𑁆𑀔𑀡𑀸 𑀫𑀼𑀤𑀺𑀢𑀸, 𑀅𑀦𑀺𑀲𑁆𑀲𑀸𑀬𑀦𑀭𑀲𑀸, 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀅𑀭𑀢𑀺𑀯𑀽𑀧𑀲𑀫𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀧𑀳𑀸𑀦𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺. 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀲𑀢𑁆𑀢𑁂𑀲𑀼 𑀲𑀫𑀪𑀸𑀯𑀤𑀲𑁆𑀲𑀦𑀭𑀲𑀸, 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸 ¶ , ‘‘𑀓𑀫𑁆𑀫𑀲𑁆𑀲𑀓𑀸 𑀲𑀢𑁆𑀢𑀸, 𑀢𑁂 𑀓𑀲𑁆𑀲 𑀭𑀼𑀘𑀺𑀬𑀸 𑀲𑀼𑀔𑀺𑀢𑀸 𑀯𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀤𑀼𑀓𑁆𑀔𑀢𑁄 𑀯𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺, 𑀧𑀢𑁆𑀢𑀲𑀫𑁆𑀧𑀢𑁆𑀢𑀺𑀢𑁄 𑀯𑀸 𑀦 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑁄 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺, 𑀕𑁂𑀳𑀲𑁆𑀲𑀺𑀢𑀸𑀬 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀬 𑀲𑀫𑁆𑀪𑀯𑁄 𑀯𑀺𑀧𑀢𑁆𑀢𑀺.

𑀢𑀢𑁆𑀣 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀧𑀘𑁆𑀘𑀬𑀲𑀦𑁆𑀢𑁄𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺. 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦𑀸𑀢𑀺 𑀦 𑀣𑀽𑀮𑀲𑀼𑀔𑀼𑀫𑀮𑀽𑀔𑀧𑀡𑀻𑀢𑀣𑀺𑀭𑀚𑀺𑀡𑁆𑀡𑀸𑀦𑀁 𑀬𑁂𑀦 ¶ 𑀓𑁂𑀦𑀘𑀺 𑀘𑀻𑀯𑀭𑁂𑀦, 𑀅𑀣 𑀔𑁄 𑀬𑀣𑀸𑀮𑀤𑁆𑀥𑀸𑀦𑀁 𑀇𑀢𑀭𑀻𑀢𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀲𑁆𑀫𑀺𑀜𑁆𑀳𑀺 𑀢𑀬𑁄 𑀲𑀦𑁆𑀢𑁄𑀲𑀸 𑁋 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀇𑀫𑁂 𑀢𑀬𑁄 𑀲𑀦𑁆𑀢𑁄𑀲𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦. 𑀬𑀣𑀸𑀮𑀤𑁆𑀥𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀘𑀻𑀯𑀭𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀁, 𑀘𑀻𑀯𑀭𑀔𑁂𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀧𑀁𑀲𑀼𑀓𑀽𑀮𑀁 𑀚𑀸𑀦𑀺𑀢𑀩𑁆𑀩𑀁, 𑀘𑀻𑀯𑀭𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀔𑁄𑀫𑀸𑀤𑀻𑀦𑀺 𑀙 𑀘𑀻𑀯𑀭𑀸𑀦𑀺 𑀤𑀼𑀓𑀽𑀮𑀸𑀤𑀻𑀦𑀺 𑀙 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀺𑀧𑀺 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀇𑀫𑀸𑀦𑀺 𑀤𑁆𑀯𑀸𑀤𑀲 𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺. 𑀓𑀼𑀲𑀘𑀻𑀭𑀁 𑀯𑀸𑀓𑀘𑀻𑀭𑀁 𑀨𑀮𑀓𑀘𑀻𑀭𑀁 𑀓𑁂𑀲𑀓𑀫𑁆𑀩𑀮𑀁 𑀯𑀸𑀴𑀓𑀫𑁆𑀩𑀮𑀁 𑀧𑁄𑀢𑁆𑀣𑀓𑁄 𑀘𑀫𑁆𑀫𑀁 𑀉𑀮𑀽𑀓𑀧𑀓𑁆𑀔𑀁 𑀭𑀼𑀓𑁆𑀔𑀤𑀼𑀲𑁆𑀲𑀁 𑀮𑀢𑀸𑀤𑀼𑀲𑁆𑀲𑀁 𑀏𑀭𑀓𑀤𑀼𑀲𑁆𑀲𑀁 𑀓𑀤𑀮𑀺𑀤𑀼𑀲𑁆𑀲𑀁 𑀯𑁂𑀴𑀼𑀤𑀼𑀲𑁆𑀲𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀧𑀦 𑀅𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺.

𑀘𑀻𑀯𑀭𑀔𑁂𑀢𑁆𑀢𑀦𑁆𑀢𑀺 ¶ ‘‘𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦 𑀧𑀁𑀲𑀼𑀓𑀽𑀮𑀁 𑀯𑀸’’𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀦𑀢𑁄 𑀙 𑀔𑁂𑀢𑁆𑀢𑀸𑀦𑀺, 𑀅𑀝𑁆𑀞𑀦𑁆𑀦𑀜𑁆𑀘 𑀫𑀸𑀢𑀺𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞 𑀔𑁂𑀢𑁆𑀢𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺.

𑀧𑀁𑀲𑀼𑀓𑀽𑀮𑀦𑁆𑀢𑀺 𑀲𑁄𑀲𑀸𑀦𑀺𑀓𑀁 𑀧𑀸𑀧𑀡𑀺𑀓𑀁 𑀭𑀣𑀺𑀬𑀁 𑀲𑀗𑁆𑀓𑀸𑀭𑀓𑀽𑀝𑀁 𑀲𑁄𑀢𑁆𑀣𑀺𑀬𑀁 𑀲𑀺𑀦𑀸𑀦𑀁 𑀢𑀺𑀢𑁆𑀣𑀁 𑀕𑀢𑀧𑀘𑁆𑀘𑀸𑀕𑀢𑀁 𑀅𑀕𑁆𑀕𑀺𑀟𑀟𑁆𑀠𑀁 𑀕𑁄𑀔𑀸𑀬𑀺𑀢𑀁 𑀉𑀧𑀘𑀺𑀓𑀸𑀔𑀸𑀬𑀺𑀢𑀁 𑀉𑀦𑁆𑀤𑀽𑀭𑀔𑀸𑀬𑀺𑀢𑀁 𑀅𑀦𑁆𑀢𑀘𑁆𑀙𑀺𑀦𑁆𑀦𑀁 𑀤𑀲𑀘𑁆𑀙𑀺𑀦𑁆𑀦𑀁 𑀥𑀚𑀸𑀳𑀝𑀁 𑀣𑀽𑀧𑀁 𑀲𑀫𑀡𑀘𑀻𑀯𑀭𑀁 𑀲𑀸𑀫𑀼𑀤𑁆𑀤𑀺𑀬𑀁 𑀆𑀪𑀺𑀲𑁂𑀓𑀺𑀬𑀁 𑀧𑀦𑁆𑀣𑀺𑀓𑀁 𑀯𑀸𑀢𑀸𑀳𑀝𑀁 𑀇𑀤𑁆𑀥𑀺𑀫𑀬𑀁 𑀤𑁂𑀯𑀤𑀢𑁆𑀢𑀺𑀬𑀦𑁆𑀢𑀺 𑀢𑁂𑀯𑀻𑀲𑀢𑀺 𑀧𑀁𑀲𑀼𑀓𑀽𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀲𑁄𑀢𑁆𑀣𑀺𑀬𑀦𑁆𑀢𑀺 𑀕𑀩𑁆𑀪𑀫𑀮𑀳𑀭𑀡𑀁. 𑀕𑀢𑀧𑀘𑁆𑀘𑀸𑀕𑀢𑀦𑁆𑀢𑀺 𑀫𑀢𑀓𑀲𑀭𑀻𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀆𑀦𑀻𑀢𑀘𑀻𑀯𑀭𑀁. 𑀥𑀚𑀸𑀳𑀝𑀦𑁆𑀢𑀺 𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀢𑁄 𑀆𑀦𑀻𑀢𑀁. 𑀣𑀽𑀧𑀦𑁆𑀢𑀺 𑀯𑀫𑁆𑀫𑀺𑀓𑁂 𑀧𑀽𑀚𑀺𑀢𑀘𑀻𑀯𑀭𑀁. 𑀲𑀸𑀫𑀼𑀤𑁆𑀤𑀺𑀬𑀦𑁆𑀢𑀺 𑀲𑀫𑀼𑀤𑁆𑀤𑀯𑀻𑀘𑀻𑀳𑀺 𑀣𑀮𑀁 𑀧𑀸𑀧𑀺𑀢𑀁. 𑀧𑀦𑁆𑀣𑀺𑀓𑀦𑁆𑀢𑀺 𑀧𑀦𑁆𑀣𑀁 𑀕𑀘𑁆𑀙𑀦𑁆𑀢𑁂𑀳𑀺 𑀘𑁄𑀭𑀪𑀬𑁂𑀦 𑀧𑀸𑀲𑀸𑀡𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀧𑀸𑀭𑀼𑀢𑀘𑀻𑀯𑀭𑀁. 𑀇𑀤𑁆𑀥𑀺𑀫𑀬𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀼𑀘𑀻𑀯𑀭𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀘𑀻𑀯𑀭𑀲𑀦𑁆𑀢𑁄𑀲𑁄𑀢𑀺 ¶ 𑀯𑀻𑀲𑀢𑀺 𑀘𑀻𑀯𑀭𑀲𑀦𑁆𑀢𑁄𑀲𑀸 𑁋 𑀘𑀻𑀯𑀭𑁂 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀕𑀫𑀦𑀲𑀦𑁆𑀢𑁄𑀲𑁄 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 ¶ 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄 𑀉𑀤𑀓𑀲𑀦𑁆𑀢𑁄𑀲𑁄 𑀥𑁄𑀯𑀦𑀲𑀦𑁆𑀢𑁄𑀲𑁄 𑀓𑀭𑀡𑀲𑀦𑁆𑀢𑁄𑀲𑁄 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄 𑀲𑀼𑀢𑁆𑀢𑀲𑀦𑁆𑀢𑁄𑀲𑁄 𑀲𑀺𑀩𑁆𑀩𑀦𑀲𑀦𑁆𑀢𑁄𑀲𑁄 𑀭𑀚𑀦𑀲𑀦𑁆𑀢𑁄𑀲𑁄 𑀓𑀧𑁆𑀧𑀲𑀦𑁆𑀢𑁄𑀲𑁄 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄𑀢𑀺. 𑀢𑀢𑁆𑀣 𑀲𑀸𑀤𑀓𑀪𑀺𑀓𑁆𑀔𑀼𑀦𑁄 𑀢𑁂𑀫𑀸𑀲𑀁 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺𑀢𑁆𑀯𑀸 𑀏𑀓𑀫𑀸𑀲𑀫𑀢𑁆𑀢𑀁 𑀯𑀺𑀢𑀓𑁆𑀓𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁄 𑀳𑀺 𑀧𑀯𑀸𑀭𑁂𑀢𑁆𑀯𑀸 𑀘𑀻𑀯𑀭𑀫𑀸𑀲𑁂 𑀘𑀻𑀯𑀭𑀁 𑀓𑀭𑁄𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄 𑀅𑀤𑁆𑀥𑀫𑀸𑀲𑁂𑀦𑁂𑀯 𑀓𑀭𑁄𑀢𑀺. 𑀇𑀤𑀁 𑀫𑀸𑀲𑀤𑁆𑀥𑀫𑀸𑀲𑀫𑀢𑁆𑀢𑀁 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄. 𑀘𑀻𑀯𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 ‘‘𑀓𑀢𑁆𑀣 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀕𑀫𑀦𑀁 𑀕𑀫𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀧𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀲𑀤𑁆𑀥𑀺𑀁 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀚𑁆𑀚𑀺𑀁 𑀧𑁂𑀲𑀮𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀏𑀯𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀆𑀳𑀭𑀺𑀬𑀫𑀸𑀦𑀁 𑀘𑀻𑀯𑀭𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀦𑀸𑀧𑀁 𑀪𑀯𑀺𑀲𑁆𑀲𑀢𑀺, 𑀏𑀢𑀁 𑀅𑀫𑀦𑀸𑀧’’𑀦𑁆𑀢𑀺 𑀏𑀯𑀁 𑀅𑀯𑀺𑀢𑀓𑁆𑀓𑁂𑀢𑁆𑀯𑀸 ¶ 𑀣𑀽𑀮𑀲𑀼𑀔𑀼𑀫𑀸𑀤𑀻𑀲𑀼 𑀬𑀣𑀸𑀮𑀤𑁆𑀥𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀦𑀁 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀦𑀸𑀫. 𑀏𑀯𑀁 𑀮𑀤𑁆𑀥𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 ‘‘𑀏𑀢𑁆𑀢𑀓𑀁 𑀤𑀼𑀧𑀝𑁆𑀝𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀏𑀓𑀧𑀝𑁆𑀝𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀧𑀳𑁄𑀦𑀓𑀫𑀢𑁆𑀢𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀦𑀁 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀧𑀦 ‘‘𑀅𑀲𑀼𑀓𑀲𑁆𑀲 𑀖𑀭𑀤𑁆𑀯𑀸𑀭𑁂 𑀫𑀦𑀸𑀧𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀡𑀁 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫.

𑀮𑀽𑀔𑀧𑀡𑀻𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀬𑀣𑀸𑀮𑀤𑁆𑀥𑁂𑀦𑁂𑀯 𑀬𑀸𑀧𑀦𑀁 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀦𑀸𑀫. 𑀅𑀢𑁆𑀢𑀦𑁄 𑀣𑀸𑀫𑀁 𑀚𑀸𑀦𑀺𑀢𑁆𑀯𑀸 𑀬𑁂𑀦 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑁂𑀦 𑀬𑀸𑀧𑀦𑀁 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀦𑀸𑀫. 𑀫𑀦𑀸𑀧𑀁 𑀅𑀜𑁆𑀜𑀲𑁆𑀲 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀬𑁂𑀦 𑀓𑁂𑀦𑀘𑀺 𑀬𑀸𑀧𑀦𑀁 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄 𑀦𑀸𑀫. ‘‘𑀓𑀢𑁆𑀣 𑀉𑀤𑀓𑀁 𑀫𑀦𑀸𑀧𑀁, 𑀓𑀢𑁆𑀣 𑀅𑀫𑀦𑀸𑀧’’𑀦𑁆𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀥𑁄𑀯𑀦𑀼𑀧𑀕𑁂𑀦 𑀉𑀤𑀓𑁂𑀦 𑀥𑁄𑀯𑀦𑀁 𑀉𑀤𑀓𑀲𑀦𑁆𑀢𑁄𑀲𑁄 𑀦𑀸𑀫. 𑀢𑀣𑀸 𑀧𑀡𑁆𑀟𑀼𑀫𑀢𑁆𑀢𑀺𑀓𑀕𑁂𑀭𑀼𑀓𑀧𑀽𑀢𑀺𑀧𑀡𑁆𑀡𑀭𑀲𑀓𑀺𑀮𑀺𑀝𑁆𑀞𑀸𑀦𑀺 𑀧𑀦 𑀉𑀤𑀓𑀸𑀦𑀺 𑀯𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀥𑁄𑀯𑀦𑁆𑀢𑀲𑁆𑀲 𑀧𑀦 𑀫𑀼𑀕𑁆𑀕𑀭𑀸𑀤𑀻𑀳𑀺 𑀅𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀥𑁄𑀯𑀦𑀁 𑀥𑁄𑀯𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀢𑀣𑀸 𑀅𑀲𑀼𑀚𑁆𑀛𑀦𑁆𑀢𑀁 𑀧𑀡𑁆𑀡𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀧𑀺𑀢𑀉𑀤𑀓𑁂𑀦𑀸𑀧𑀺 𑀥𑁄𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀥𑁄𑀯𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 ‘‘𑀇𑀤𑀁 𑀣𑀽𑀮𑀁, 𑀇𑀤𑀁 𑀲𑀼𑀔𑀼𑀫’’𑀦𑁆𑀢𑀺 𑀅𑀓𑁄𑀧𑁂𑀢𑁆𑀯𑀸 𑀧𑀳𑁄𑀦𑀓𑀦𑀻𑀳𑀸𑀭𑁂𑀦𑁂𑀯 𑀓𑀭𑀡𑀁 𑀓𑀭𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀢𑀺𑀫𑀡𑁆𑀟𑀮𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀲𑁆𑀲𑁂𑀯 𑀓𑀭𑀡𑀁 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄 ¶ 𑀦𑀸𑀫. 𑀘𑀻𑀯𑀭𑀓𑀭𑀡𑀢𑁆𑀣𑀸𑀬 𑀧𑀦 ‘‘𑀫𑀦𑀸𑀧𑀁 𑀲𑀼𑀢𑁆𑀢𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀭𑀣𑀺𑀓𑀸𑀤𑀻𑀲𑀼 𑀯𑀸 𑀤𑁂𑀯𑀝𑁆𑀞𑀸𑀦𑁂 𑀯𑀸 𑀆𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀯𑀸 𑀞𑀧𑀺𑀢𑀁 𑀬𑀁 𑀓𑀺𑀜𑁆𑀘𑀺𑀤𑁂𑀯 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀭𑀡𑀁 𑀲𑀼𑀢𑁆𑀢𑀲𑀦𑁆𑀢𑁄𑀲𑁄 𑀦𑀸𑀫.

𑀓𑀼𑀲𑀺𑀩𑀦𑁆𑀥𑀦𑀓𑀸𑀮𑁂 𑀧𑀦 𑀅𑀗𑁆𑀕𑀼𑀮𑀺𑀫𑀢𑁆𑀢𑁂 𑀲𑀢𑁆𑀢𑀯𑀸𑀭𑁂 𑀦 𑀯𑀺𑀚𑁆𑀛𑀺𑀢𑀩𑁆𑀩𑀁. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀬𑁄 𑀪𑀺𑀓𑁆𑀔𑀼 𑀲𑀳𑀸𑀬𑁄 𑀦 𑀳𑁄𑀢𑀺, 𑀢𑀲𑁆𑀲 𑀯𑀢𑁆𑀢𑀪𑁂𑀤𑁄𑀧𑀺 𑀦𑀢𑁆𑀣𑀺. 𑀢𑀺𑀯𑀗𑁆𑀕𑀼𑀮𑀫𑀢𑁆𑀢𑁂 𑀧𑀦 𑀲𑀢𑁆𑀢𑀯𑀸𑀭𑁂 𑀯𑀺𑀚𑁆𑀛𑀺𑀢𑀩𑁆𑀩𑀁. 𑀏𑀯𑀁 ¶ 𑀓𑀭𑁄𑀦𑁆𑀢𑀲𑁆𑀲 𑀫𑀕𑁆𑀕𑀧𑀝𑀺𑀧𑀦𑁆𑀦𑁂𑀦𑀸𑀧𑀺 𑀲𑀳𑀸𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀬𑁄 𑀦 𑀳𑁄𑀢𑀺, 𑀢𑀲𑁆𑀲 𑀯𑀢𑁆𑀢𑀪𑁂𑀤𑁄. 𑀅𑀬𑀁 𑀲𑀺𑀩𑁆𑀩𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀭𑀚𑀦𑁆𑀢𑁂𑀦 𑀧𑀦 𑀓𑀸𑀴𑀓𑀘𑁆𑀙𑀓𑀸𑀤𑀻𑀦𑀺 𑀧𑀭𑀺𑀬𑁂𑀲𑀦𑁆𑀢𑁂𑀦 𑀦 𑀭𑀚𑀺𑀢𑀩𑁆𑀩𑀁, 𑀲𑁄𑀫𑀯𑀓𑁆𑀓𑀮𑀸𑀤𑀻𑀲𑀼 𑀬𑀁 𑀮𑀪𑀢𑀺, 𑀢𑁂𑀦 𑀭𑀚𑀺𑀢𑀩𑁆𑀩𑀁. 𑀅𑀮𑀪𑀦𑁆𑀢𑁂𑀦 ¶ 𑀧𑀦 𑀫𑀦𑀼𑀲𑁆𑀲𑁂𑀳𑀺 𑀅𑀭𑀜𑁆𑀜𑁂 𑀯𑀸𑀓𑀁 𑀕𑀳𑁂𑀢𑁆𑀯𑀸 𑀙𑀟𑁆𑀟𑀺𑀢𑀭𑀚𑀦𑀁 𑀯𑀸 𑀪𑀺𑀓𑁆𑀔𑀽𑀳𑀺 𑀧𑀘𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁 𑀯𑀸 𑀕𑀳𑁂𑀢𑁆𑀯𑀸 𑀭𑀚𑀺𑀢𑀩𑁆𑀩𑀁. 𑀅𑀬𑀁 𑀭𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀦𑀻𑀮𑀓𑀤𑁆𑀤𑀫𑀓𑀸𑀴𑀲𑀸𑀫𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀜𑁆𑀜𑀸𑀬𑀫𑀸𑀦𑀓𑀧𑁆𑀧𑀓𑀭𑀡𑀁 𑀓𑀧𑁆𑀧𑀲𑀦𑁆𑀢𑁄𑀲𑁄 𑀦𑀸𑀫.

𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀦𑀁 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄 𑀦𑀸𑀫. 𑀤𑀼𑀲𑁆𑀲𑀁 𑀧𑀦 𑀮𑀪𑀺𑀢𑁆𑀯𑀸 𑀲𑀼𑀢𑁆𑀢𑀁 𑀯𑀸 𑀲𑀽𑀘𑀺𑀁 𑀯𑀸 𑀓𑀸𑀭𑀓𑀁 𑀯𑀸 𑀅𑀮𑀪𑀦𑁆𑀢𑁂𑀦 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀮𑀪𑀦𑁆𑀢𑁂𑀦 𑀦 𑀯𑀝𑁆𑀝𑀢𑀺. 𑀓𑀢𑀫𑁆𑀧𑀺 𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂 𑀘 𑀅𑀲𑀦𑁆𑀦𑀺𑀳𑀺𑀢𑀸, 𑀬𑀸𑀯 𑀆𑀕𑀫𑀦𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀆𑀕𑀢𑀫𑀢𑁆𑀢𑁂𑀲𑀼 𑀢𑁂𑀲𑀼 𑀤𑀸𑀢𑀩𑁆𑀩𑀁. 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀲𑀢𑀺 𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀥𑀺𑀝𑁆𑀞𑀺𑀢𑀫𑁂𑀯 𑀳𑀺 𑀲𑀦𑁆𑀦𑀺𑀥𑀺 𑀳𑁄𑀢𑀺. 𑀅𑀥𑀺𑀝𑁆𑀞𑀺𑀢𑀁 𑀦 𑀳𑁄𑀢𑀻𑀢𑀺 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀆𑀳. 𑀅𑀬𑀁 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀧𑀦 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁, 𑀲𑀸𑀭𑀡𑀻𑀬𑀥𑀫𑁆𑀫𑁂 𑀞𑀢𑁆𑀯𑀸𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫.

𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀜𑁆𑀘𑁂𑀯 𑀢𑁂𑀘𑀻𑀯𑀭𑀺𑀓𑀗𑁆𑀕𑀜𑁆𑀘. 𑀇𑀢𑀺 𑀘𑀻𑀯𑀭𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀁 𑀧𑀽𑀭𑀬𑀫𑀸𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀇𑀫𑀸𑀦𑀺 𑀤𑁆𑀯𑁂 𑀥𑀼𑀢𑀗𑁆𑀕𑀸𑀦𑀺 𑀕𑁄𑀧𑁂𑀢𑀺, 𑀇𑀫𑀸𑀦𑀺 𑀕𑁄𑀧𑁂𑀦𑁆𑀢𑁄 𑀘𑀻𑀯𑀭𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺.

𑀯𑀡𑁆𑀡𑀯𑀸𑀤𑀻𑀢𑀺 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀦 𑀓𑀣𑁂𑀢𑀺. 𑀏𑀓𑁄 𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺 ¶ . 𑀏𑀓𑁄 𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺. 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀘 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀘 𑀯𑀡𑁆𑀡𑀁 𑀓𑀣𑁂𑀢𑀺. 𑀢𑀣𑀸𑀭𑀽𑀧𑁄 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁.

𑀅𑀦𑁂𑀲𑀦𑀦𑁆𑀢𑀺 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑀁 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁. 𑀅𑀧𑁆𑀧𑀢𑀺𑀭𑀽𑀧𑀦𑁆𑀢𑀺 𑀅𑀬𑀼𑀢𑁆𑀢𑀁. 𑀅𑀮𑀤𑁆𑀥𑀸 𑀘𑀸𑀢𑀺 𑀅𑀮𑀪𑀺𑀢𑁆𑀯𑀸. 𑀬𑀣𑀸 𑀏𑀓𑀘𑁆𑀘𑁄 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀜𑁆𑀜𑀯𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑁄𑀳𑀜𑁆𑀜𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀲𑀢𑀺 𑀧𑀭𑀺𑀢𑀲𑁆𑀲𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀯𑀁 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀮𑀤𑁆𑀥𑀸 ¶ 𑀘𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀪𑀺𑀢𑁆𑀯𑀸. 𑀅𑀥𑀺𑀕𑀢𑁄𑀢𑀺 𑀯𑀺𑀕𑀢𑀮𑁄𑀪𑀕𑀺𑀤𑁆𑀥𑁄. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀫𑀢𑁆𑀢𑀢𑀡𑁆𑀳𑀸𑀬 𑀫𑀼𑀘𑁆𑀙𑀦𑀁 𑀅𑀦𑀸𑀧𑀦𑁆𑀦𑁄. 𑀅𑀦𑀚𑁆𑀛𑀸𑀧𑀦𑁆𑀦𑁄𑀢𑀺 ¶ 𑀢𑀡𑁆𑀳𑀸𑀬 𑀅𑀦𑁄𑀢𑁆𑀣𑀝𑁄 𑀅𑀧𑀭𑀺𑀬𑁄𑀦𑀤𑁆𑀥𑁄. 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀅𑀦𑁂𑀲𑀦𑀸𑀧𑀢𑁆𑀢𑀺𑀬𑀜𑁆𑀘 𑀕𑀥𑀺𑀢𑀧𑀭𑀺𑀪𑁄𑀕𑁂 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀫𑀸𑀦𑁄. 𑀦𑀺𑀲𑁆𑀲𑀭𑀡𑀧𑀜𑁆𑀜𑁄𑀢𑀺 ‘‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀯𑀼𑀢𑁆𑀢𑀁 𑀦𑀺𑀲𑁆𑀲𑀭𑀡𑀫𑁂𑀯 𑀧𑀚𑀸𑀦𑀦𑁆𑀢𑁄.

𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀘𑀻𑀯𑀭𑁂𑀦 𑀲𑀦𑁆𑀢𑀼𑀝𑁆𑀞𑀺𑀬𑀸. 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀻𑀢𑀺 𑀬𑀣𑀸 𑀧𑀦𑀺𑀥𑁂𑀓𑀘𑁆𑀘𑁄 ‘‘𑀅𑀳𑀁 𑀧𑀁𑀲𑀼𑀓𑀽𑀮𑀺𑀓𑁄, 𑀫𑀬𑀸 𑀉𑀧𑀲𑀫𑁆𑀧𑀤𑀫𑀸𑀴𑁂𑀬𑁂𑀯 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀕𑀳𑀺𑀢𑀁, 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀁 𑀓𑀭𑁄𑀢𑀺. 𑀏𑀯𑀁 𑀲𑁄 𑀅𑀢𑁆𑀢𑀼𑀓𑁆𑀓𑀁𑀲𑀦𑀁 𑀦 𑀓𑀭𑁄𑀢𑀺. 𑀦 𑀧𑀭𑀁 𑀯𑀫𑁆𑀪𑁂𑀢𑀻𑀢𑀺 ‘‘𑀇𑀫𑁂 𑀧𑀦𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀧𑀁𑀲𑀼𑀓𑀽𑀮𑀺𑀓𑀸𑀢𑀺 𑀯𑀸 𑀧𑀁𑀲𑀼𑀓𑀽𑀮𑀺𑀓𑀫𑀢𑁆𑀢𑀫𑁆𑀧𑀺 𑀏𑀢𑁂𑀲𑀁 𑀦𑀢𑁆𑀣𑀻’’𑀢𑀺 𑀯𑀸 𑀏𑀯𑀁 𑀧𑀭𑀁 𑀦 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄𑀢𑀺 𑀬𑁄 𑀢𑀲𑁆𑀫𑀺𑀁 𑀘𑀻𑀯𑀭𑀲𑀦𑁆𑀢𑁄𑀲𑁂 𑀯𑀡𑁆𑀡𑀯𑀸𑀤𑀻. 𑀢𑀸𑀲𑀼 𑀯𑀸 𑀤𑀓𑁆𑀔𑁄 𑀙𑁂𑀓𑁄 𑀩𑁆𑀬𑀢𑁆𑀢𑁄. 𑀅𑀦𑀮𑀲𑁄𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀆𑀮𑀲𑀺𑀬𑀯𑀺𑀭𑀳𑀺𑀢𑁄. 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄𑀢𑀺 𑀲𑀫𑁆𑀧𑀚𑀸𑀦𑀧𑀜𑁆𑀜𑀸𑀬 𑀘𑁂𑀯 𑀲𑀢𑀺𑀬𑀸 𑀘 𑀬𑀼𑀢𑁆𑀢𑁄. 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑀅𑀭𑀺𑀬𑀯𑀁𑀲𑁂 𑀧𑀢𑀺𑀝𑁆𑀞𑀺𑀢𑁄.

𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀺𑀡𑁆𑀟𑀧𑀸𑀢𑁂𑀦. 𑀏𑀢𑁆𑀣𑀧𑀺 𑀧𑀺𑀡𑁆𑀟𑀧𑀸𑀢𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀺𑀡𑁆𑀟𑀧𑀸𑀢𑀔𑁂𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀼𑀢𑀗𑁆𑀕𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀺𑀡𑁆𑀟𑀧𑀸𑀢𑁄𑀢𑀺 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀁 𑀔𑀻𑀭𑀁 𑀤𑀥𑀺 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀬𑀸𑀕𑀼 𑀔𑀸𑀤𑀦𑀻𑀬𑀁 𑀲𑀸𑀬𑀦𑀻𑀬𑀁 𑀮𑁂𑀳𑀦𑀻𑀬𑀦𑁆𑀢𑀺 𑀲𑁄𑀴𑀲 𑀧𑀺𑀡𑁆𑀟𑀧𑀸𑀢𑀸.

𑀧𑀺𑀡𑁆𑀟𑀧𑀸𑀢𑀔𑁂𑀢𑁆𑀢𑀦𑁆𑀢𑀺 ¶ 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀕𑀫𑀺𑀓𑀪𑀢𑁆𑀢𑀁 𑀕𑀺𑀮𑀸𑀦𑀪𑀢𑁆𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁 𑀓𑀼𑀝𑀺𑀪𑀢𑁆𑀢𑀁 𑀯𑀸𑀭𑀪𑀢𑁆𑀢𑀁 𑀯𑀺𑀳𑀸𑀭𑀪𑀢𑁆𑀢𑀦𑁆𑀢𑀺 𑀧𑀦𑁆𑀦𑀭𑀲 𑀧𑀺𑀡𑁆𑀟𑀧𑀸𑀢𑀔𑁂𑀢𑁆𑀢𑀸𑀦𑀺.

𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁄𑀢𑀺 𑀧𑀺𑀡𑁆𑀟𑀧𑀸𑀢𑁂 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀕𑀫𑀦𑀲𑀦𑁆𑀢𑁄𑀲𑁄 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄 𑀉𑀧𑀓𑀸𑀭𑀲𑀦𑁆𑀢𑁄𑀲𑁄 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 ¶ 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄𑀢𑀺 𑀧𑀦𑁆𑀦𑀭𑀲 𑀲𑀦𑁆𑀢𑁄𑀲𑀸. 𑀢𑀢𑁆𑀣 𑀲𑀸𑀤𑀓𑁄 𑀪𑀺𑀓𑁆𑀔𑀼 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑀺. 𑀧𑀺𑀡𑁆𑀟𑀧𑀸𑀢𑀺𑀓𑁂𑀦 𑀧𑀦 𑀕𑀡𑁂𑀦 𑀲𑀤𑁆𑀥𑀺𑀁 𑀘𑀭𑀢𑀸 𑀲𑀸𑀬𑀁 𑀣𑁂𑀭𑀼𑀧𑀝𑁆𑀞𑀸𑀦𑀓𑀸𑀮𑁂 ‘‘𑀲𑁆𑀯𑁂 𑀓𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 ‘‘𑀅𑀲𑀼𑀓𑀕𑀸𑀫𑁂, 𑀪𑀦𑁆𑀢𑁂’’𑀢𑀺 𑀏𑀢𑁆𑀢𑀓𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀢𑀓𑁆𑀓𑁂𑀢𑀩𑁆𑀩𑀁. 𑀏𑀓𑀘𑀸𑀭𑀺𑀓𑁂𑀦 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀯𑀺𑀢𑀓𑁆𑀓𑁂𑀦𑁆𑀢𑁄 𑀧𑀦 𑀅𑀭𑀺𑀬𑀯𑀁𑀲𑀸 𑀘𑀼𑀢𑁄 𑀳𑁄𑀢𑀺 𑀧𑀭𑀺𑀩𑀸𑀳𑀺𑀭𑁄. 𑀅𑀬𑀁 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀺𑀡𑁆𑀟𑀸𑀬 ¶ 𑀧𑀯𑀺𑀲𑀦𑁆𑀢𑁂𑀦 𑀧𑀦 ‘‘𑀓𑀼𑀳𑀺𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀕𑀦𑁆𑀢𑀩𑁆𑀩𑀁. 𑀅𑀬𑀁 𑀕𑀫𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀭𑀺𑀬𑁂𑀲𑀦𑁆𑀢𑁂𑀦 𑀬𑀁 𑀯𑀸 𑀢𑀁 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀮𑀚𑁆𑀚𑀺𑀁 𑀧𑁂𑀲𑀮𑀫𑁂𑀯 𑀕𑀳𑁂𑀢𑁆𑀯𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀅𑀬𑀁 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀤𑀽𑀭𑀢𑁄𑀯 𑀆𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀦𑀸𑀧𑀁, 𑀏𑀢𑀁 𑀅𑀫𑀦𑀸𑀧’’𑀦𑁆𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀅𑀬𑀁 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀦𑀸𑀫. ‘‘𑀇𑀤𑀁 𑀫𑀦𑀸𑀧𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀇𑀤𑀁 𑀅𑀫𑀦𑀸𑀧𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑀩𑁆𑀩𑀫𑁂𑀯. 𑀅𑀬𑀁 𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀦𑀸𑀫.

𑀏𑀢𑁆𑀣 𑀧𑀦 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀅𑀧𑁆𑀧𑀁 𑀕𑀳𑁂𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀤𑀸𑀢𑀼𑀓𑀸𑀫𑁄, 𑀧𑀫𑀸𑀡𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀦 𑀩𑀳𑀼, 𑀤𑀸𑀬𑀓𑁄𑀧𑀺 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀅𑀧𑁆𑀧𑀁 𑀕𑀳𑁂𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀩𑀳𑀼, 𑀤𑀸𑀬𑀓𑁄 𑀧𑀦 𑀩𑀳𑀼𑀤𑀸𑀢𑀼𑀓𑀸𑀫𑁄, 𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀡𑀲𑁆𑀫𑀺𑀜𑁆𑀳𑀺 𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀁 𑀫𑀓𑁆𑀔𑁂𑀢𑀺, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺, 𑀲𑀸𑀲𑀦𑀁 𑀦 𑀓𑀭𑁄𑀢𑀺. 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀅𑀟𑁆𑀠𑀓𑀼𑀮𑀸𑀦𑀺𑀬𑁂𑀯 𑀅𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 ¶ 𑀕𑀦𑁆𑀢𑀩𑁆𑀩𑀁. 𑀅𑀬𑀁 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑀸𑀤𑀬𑁄 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑀸 𑀏𑀯.

𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀲𑀫𑀡𑀥𑀫𑁆𑀫𑀁 𑀅𑀦𑀼𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀉𑀧𑀓𑀸𑀭𑀁 𑀜𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀁 𑀉𑀧𑀓𑀸𑀭𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀆𑀦𑀻𑀢𑀁 𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀲𑀢𑀺 𑀢𑁂𑀦 𑀕𑀸𑀳𑀸𑀧𑁂𑀢𑀩𑁆𑀩𑀁, 𑀅𑀲𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀧𑀭𑀺𑀫𑀸𑀡𑀫𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀅𑀬𑀁 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀚𑀺𑀖𑀘𑁆𑀙𑀸𑀬 𑀧𑀝𑀺𑀯𑀺𑀦𑁄𑀤𑀦𑀁 ‘‘𑀦 𑀇𑀤𑀫𑁂𑀢𑁆𑀣 𑀦𑀺𑀲𑁆𑀲𑀭𑀡’’𑀦𑁆𑀢𑀺 ¶ 𑀏𑀯𑀁 𑀧𑀭𑀺𑀪𑀼𑀜𑁆𑀚𑀦𑀁 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄 𑀦𑀸𑀫. 𑀦𑀺𑀤𑀳𑀺𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀬𑀁 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀫𑀼𑀔𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀸𑀭𑀡𑀻𑀬𑀥𑀫𑁆𑀫𑁂 𑀞𑀺𑀢𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫.

𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀦 𑀧𑀜𑁆𑀘 𑀥𑀼𑀢𑀗𑁆𑀕𑀸𑀦𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁 𑀏𑀓𑀸𑀲𑀦𑀺𑀓𑀗𑁆𑀕𑀁 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀦𑁆𑀢𑀺. 𑀇𑀢𑀺 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀁 𑀧𑀽𑀭𑀬𑀫𑀸𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀇𑀫𑀸𑀦𑀺 𑀧𑀜𑁆𑀘 𑀥𑀼𑀢𑀗𑁆𑀕𑀸𑀦𑀺 𑀕𑁄𑀧𑁂𑀢𑀺, 𑀇𑀫𑀸𑀦𑀺 𑀕𑁄𑀧𑁂𑀦𑁆𑀢𑁄 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺. 𑀯𑀡𑁆𑀡𑀯𑀸𑀤𑀻𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑁂𑀦𑀸𑀲𑀦𑀸𑀦𑀻𑀢𑀺 𑀇𑀥 𑀲𑁂𑀦𑀸𑀲𑀦𑀁 𑀚𑀸𑀦𑀺𑀢𑀩𑁆𑀩𑀁, 𑀲𑁂𑀦𑀸𑀲𑀦𑀔𑁂𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀥𑀼𑀢𑀗𑁆𑀕𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀲𑁂𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀫𑁆𑀩𑁄𑀳𑀦𑀁 ¶ 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸 𑀮𑁂𑀡𑀁 𑀅𑀝𑁆𑀝𑁄 𑀫𑀸𑀴𑁄 𑀯𑁂𑀴𑀼𑀕𑀼𑀫𑁆𑀩𑁄 𑀭𑀼𑀓𑁆𑀔𑀫𑀽𑀮𑀁 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀇𑀫𑀸𑀦𑀺 𑀧𑀦𑁆𑀦𑀭𑀲 𑀲𑁂𑀦𑀸𑀲𑀦𑀸𑀦𑀺.

𑀲𑁂𑀦𑀸𑀲𑀦𑀔𑁂𑀢𑁆𑀢𑀦𑁆𑀢𑀺 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦 𑀧𑀁𑀲𑀼𑀓𑀽𑀮𑀁 𑀯𑀸𑀢𑀺 𑀙 𑀔𑁂𑀢𑁆𑀢𑀸𑀦𑀺.

𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑁄𑀢𑀺 𑀲𑁂𑀦𑀸𑀲𑀦𑁂 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑀸𑀤𑀬𑁄 𑀧𑀦𑁆𑀦𑀭𑀲 𑀲𑀦𑁆𑀢𑁄𑀲𑀸. 𑀢𑁂 𑀧𑀺𑀡𑁆𑀟𑀧𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀦 𑀧𑀜𑁆𑀘 𑀥𑀼𑀢𑀗𑁆𑀕𑀸𑀦𑀺 𑀆𑀭𑀜𑁆𑀜𑀺𑀓𑀗𑁆𑀕𑀁 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁 𑀲𑁄𑀲𑀸𑀦𑀺𑀓𑀗𑁆𑀕𑀁 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀦𑁆𑀢𑀺. 𑀇𑀢𑀺 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑀁 𑀫𑀳𑀸𑀅𑀭𑀺𑀬𑀯𑀁𑀲𑀁 𑀧𑀽𑀭𑀬𑀫𑀸𑀦𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀇𑀫𑀸𑀦𑀺 𑀧𑀜𑁆𑀘 𑀥𑀼𑀢𑀗𑁆𑀕𑀸𑀦𑀺 𑀕𑁄𑀧𑁂𑀢𑀺, 𑀇𑀫𑀸𑀦𑀺 𑀕𑁄𑀧𑁂𑀦𑁆𑀢𑁄 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺.

𑀇𑀢𑀺 ¶ 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀣𑀯𑀺𑀁 𑀧𑀢𑁆𑀣𑀭𑀫𑀸𑀦𑁄 𑀯𑀺𑀬 𑀲𑀸𑀕𑀭𑀓𑀼𑀘𑁆𑀙𑀺𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀆𑀓𑀸𑀲𑀁 𑀯𑀺𑀢𑁆𑀣𑀸𑀭𑀬𑀫𑀸𑀦𑁄 𑀯𑀺𑀬 𑀘 𑀧𑀞𑀫𑀁 𑀘𑀻𑀯𑀭𑀲𑀦𑁆𑀢𑁄𑀲𑀁 𑀅𑀭𑀺𑀬𑀯𑀁𑀲𑀁 𑀓𑀣𑁂𑀢𑁆𑀯𑀸 𑀘𑀦𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀲𑀽𑀭𑀺𑀬𑀁 𑀉𑀮𑁆𑀮𑀗𑁆𑀖𑁂𑀦𑁆𑀢𑁄 𑀯𑀺𑀬 𑀘 𑀤𑀼𑀢𑀺𑀬𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀁 𑀓𑀣𑁂𑀢𑁆𑀯𑀸 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑁂𑀦𑁆𑀢𑁄 𑀯𑀺𑀬 𑀢𑀢𑀺𑀬𑀁 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑀁 𑀅𑀭𑀺𑀬𑀯𑀁𑀲𑀁 𑀓𑀣𑁂𑀢𑁆𑀯𑀸 ¶ 𑀇𑀤𑀸𑀦𑀺 𑀕𑀺𑀮𑀸𑀦𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀅𑀭𑀺𑀬𑀯𑀁𑀲𑀁 𑀓𑀣𑁂𑀢𑀼𑀁 ‘‘𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀧𑀺𑀡𑁆𑀟𑀧𑀸𑀢𑀕𑀢𑀺𑀓𑀫𑁂𑀯. 𑀢𑀢𑁆𑀣 𑀬𑀣𑀸𑀮𑀸𑀪𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀺𑀢𑀩𑁆𑀩𑀁. 𑀪𑀸𑀯𑀦𑀸𑀭𑀸𑀫𑀅𑀭𑀺𑀬𑀯𑀁𑀲𑁄 𑀧𑀦 𑀇𑀥 𑀅𑀦𑀸𑀕𑀢𑁄, 𑀦𑁂𑀲𑀚𑁆𑀚𑀺𑀓𑀗𑁆𑀕𑀁 𑀪𑀸𑀯𑀦𑀸𑀭𑀸𑀫𑀅𑀭𑀺𑀬𑀯𑀁𑀲𑀁 𑀪𑀚𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁯; 𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁮). 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀧𑀜𑁆𑀘 𑀲𑁂𑀦𑀸𑀲𑀦𑁂 𑀯𑀼𑀢𑁆𑀢𑀸, 𑀧𑀜𑁆𑀘 𑀆𑀳𑀸𑀭𑀦𑀺𑀲𑁆𑀲𑀺𑀢𑀸;

𑀏𑀓𑁄 𑀯𑀻𑀭𑀺𑀬𑀲𑀁𑀬𑀼𑀢𑁆𑀢𑁄, 𑀤𑁆𑀯𑁂 𑀘 𑀘𑀻𑀯𑀭𑀦𑀺𑀲𑁆𑀲𑀺𑀢𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁯; 𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁮);

𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑀏𑀢𑁆𑀣 𑀧𑁄𑀭𑀸𑀡𑁂𑀢𑀺 𑀦 𑀅𑀥𑀼𑀦𑀼𑀧𑁆𑀧𑀢𑁆𑀢𑀺𑀓𑁂. 𑀅𑀕𑁆𑀕𑀜𑁆𑀜𑁂𑀢𑀺 𑀅𑀕𑁆𑀕𑁂𑀳𑀺 𑀚𑀸𑀦𑀺𑀢𑀩𑁆𑀩𑁂. 𑀅𑀭𑀺𑀬𑀯𑀁𑀲𑁂𑀢𑀺 𑀅𑀭𑀺𑀬𑀸𑀦𑀁 𑀯𑀁𑀲𑁂. 𑀬𑀣𑀸 𑀳𑀺 𑀔𑀢𑁆𑀢𑀺𑀬𑀯𑀁𑀲𑁄 𑀩𑁆𑀭𑀸𑀳𑁆𑀫𑀡𑀯𑀁𑀲𑁄 𑀯𑁂𑀲𑁆𑀲𑀯𑀁𑀲𑁄 𑀲𑀼𑀤𑁆𑀤𑀯𑀁𑀲𑁄 𑀲𑀫𑀡𑀯𑀁𑀲𑁄 𑀓𑀼𑀮𑀯𑀁𑀲𑁄 𑀭𑀸𑀚𑀯𑀁𑀲𑁄, 𑀏𑀯𑀫𑀬𑀫𑁆𑀧𑀺 𑀅𑀝𑁆𑀞𑀫𑁄 𑀅𑀭𑀺𑀬𑀯𑀁𑀲𑁄, 𑀅𑀭𑀺𑀬𑀢𑀦𑁆𑀢𑀺 𑀅𑀭𑀺𑀬𑀧𑀯𑁂𑀡𑀺 𑀦𑀸𑀫 𑀳𑁄𑀢𑀺. 𑀲𑁄 𑀔𑁄 𑀧𑀦𑀸𑀬𑀁 𑀯𑀁𑀲𑁄 𑀇𑀫𑁂𑀲𑀁 𑀯𑀁𑀲𑀸𑀦𑀁 𑀫𑀽𑀮𑀕𑀦𑁆𑀥𑀸𑀤𑀻𑀦𑀁 𑀓𑀸𑀮𑀸𑀦𑀼𑀲𑀸𑀭𑀺𑀕𑀦𑁆𑀥𑀸𑀤𑀬𑁄 𑀯𑀺𑀬 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑁂 𑀧𑀦 𑀢𑁂 𑀅𑀭𑀺𑀬𑀸, 𑀬𑁂𑀲𑀁 𑀏𑀲𑁄 𑀯𑀁𑀲𑁄𑀢𑀺? 𑀅𑀭𑀺𑀬𑀸 ¶ 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀢𑀣𑀸𑀕𑀢𑀲𑀸𑀯𑀓𑀸 𑀘, 𑀏𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄. 𑀇𑀢𑁄 𑀧𑀼𑀩𑁆𑀩𑁂 𑀳𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀢𑀡𑁆𑀳𑀗𑁆𑀓𑀭𑁄 𑀫𑁂𑀥𑀗𑁆𑀓𑀭𑁄 𑀲𑀭𑀡𑀗𑁆𑀓𑀭𑁄 𑀤𑀻𑀧𑀗𑁆𑀓𑀭𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑁂 𑀅𑀭𑀺𑀬𑀸, 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀧𑀭𑀪𑀸𑀕𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄…𑀧𑁂… 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀕𑁄𑀢𑀫𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄. 𑀅𑀧𑀺 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀯𑀁𑀲𑁄𑀢𑀺 𑀅𑀭𑀺𑀬𑀯𑀁𑀲𑁄, 𑀢𑀲𑁆𑀫𑀺𑀁 𑀅𑀭𑀺𑀬𑀯𑀁𑀲𑁂 (𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁮). 𑀞𑀺𑀢𑁄𑀢𑀺 𑀧𑀢𑀺𑀝𑁆𑀞𑀺𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀫𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁨𑁯. 𑀦𑀯𑀫𑁂 ¶ ¶ 𑀅𑀬𑀁 𑀬𑁄𑀚𑀦𑀸 𑁋 𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀬𑁂 𑀅𑀲𑀦𑁆𑀢𑁄𑀲𑀸𑀪𑀺𑀪𑀽𑀢𑀸, 𑀢𑀣𑀸𑀯𑀺𑀥𑀸 𑀏𑀯 𑀘 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸. 𑀏𑀢𑀫𑀳𑀁 𑀤𑀼𑀲𑁆𑀲𑀗𑁆𑀕𑀳𑀪𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀤𑁆𑀤𑁂𑀲𑁂 𑀅𑀦𑀲𑁆𑀲𑀯𑀸𑀢𑀺 𑀯𑀘𑀦𑀁 𑀅𑀲𑁆𑀲𑀯𑀦𑀓𑀸. 𑀅𑀯𑀘𑀦𑀓𑀭𑀸𑀢𑀺 𑀤𑀼𑀩𑁆𑀩𑀘𑀸. 𑀧𑀝𑀺𑀮𑁄𑀫𑀯𑀼𑀢𑁆𑀢𑀺𑀦𑁄𑀢𑀺 𑀧𑀘𑁆𑀘𑀦𑀻𑀓𑀁 𑀓𑀣𑀦𑀲𑀻𑀮𑀸, 𑀧𑀝𑀺𑀫𑀮𑁆𑀮𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀦𑁂𑀯 𑀫𑀼𑀔𑀁 𑀓𑀭𑁄𑀦𑁆𑀢𑀻𑀢𑀺 𑀑𑀯𑀸𑀤𑀤𑀸𑀬𑀓𑁂 𑀤𑀺𑀲𑁆𑀯𑀸 𑀫𑀼𑀔𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀁 𑀤𑀺𑀲𑀸𑀪𑀸𑀕𑀁 𑀑𑀮𑁄𑀓𑁂𑀦𑁆𑀢𑀺. 𑀅𑀩𑁆𑀬𑀸𑀯𑀝𑁄 𑀳𑀼𑀢𑁆𑀯𑀸𑀢𑀺 𑀅𑀯𑀸𑀯𑀝𑁄 𑀳𑀼𑀢𑁆𑀯𑀸. 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸𑀢𑀺 𑀅𑀦𑀮𑁆𑀮𑀻𑀦𑁄 𑀳𑀼𑀢𑁆𑀯𑀸.

𑀦𑀯𑀫𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁧𑁩𑁦. 𑀤𑀲𑀫𑁂 𑀑𑀭𑁄𑀧𑀬𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀓𑁂𑀲𑀫𑀲𑁆𑀲𑀼𑀑𑀤𑀸𑀢𑀯𑀢𑁆𑀣𑀸𑀮𑀗𑁆𑀓𑀸𑀭𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀇𑀢𑁆𑀣𑀺𑀧𑀼𑀢𑁆𑀢𑀤𑀸𑀲𑀺𑀤𑀸𑀲𑀸𑀤𑀻𑀦𑀺. 𑀏𑀢𑀸𑀦𑀺 𑀕𑀺𑀳𑀺𑀪𑀸𑀯𑀁 𑀩𑁆𑀬𑀜𑁆𑀚𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄𑀢𑀺 𑀧𑀢𑀺𑀢𑀧𑀢𑁆𑀢𑁄. 𑀙𑁂𑀢𑁆𑀯𑀸𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀺𑀢𑁆𑀯𑀸. 𑀯𑀻𑀭𑁄𑀢𑀺 𑀫𑀕𑁆𑀕𑀯𑀻𑀭𑀺𑀬𑀲𑀫𑀦𑁆𑀦𑀸𑀕𑀢𑁄. 𑀕𑀺𑀳𑀺𑀩𑀦𑁆𑀥𑀦𑀸𑀦𑀻𑀢𑀺 𑀓𑀸𑀫𑀩𑀦𑁆𑀥𑀦𑀸𑀦𑀺. 𑀓𑀸𑀫𑀸 𑀳𑀺 𑀕𑀺𑀳𑀻𑀦𑀁 𑀩𑀦𑁆𑀥𑀦𑀸𑀦𑀺. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄.

𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 ¶ 𑀓𑁄𑀯𑀺𑀴𑀸𑀭𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀜𑁆𑀳𑀺 𑀘𑀺𑀦𑁆𑀢𑀬𑀫𑀸𑀦𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁪). 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀚𑀸𑀦𑀺𑀢𑀩𑁆𑀩𑀁.

𑀦𑀺𑀤𑁆𑀤𑁂𑀲𑁂 𑀲𑀸𑀭𑀸𑀲𑀦𑀜𑁆𑀘𑀸𑀢𑀺 𑀲𑀸𑀭𑀁 𑀆𑀲𑀦𑀁. 𑀙𑀺𑀦𑁆𑀦𑀸𑀦𑀻𑀢𑀺 𑀕𑀴𑀺𑀢𑀸𑀦𑀺. 𑀲𑀜𑁆𑀙𑀺𑀦𑁆𑀦𑀸𑀦𑀻𑀢𑀺 𑀦𑀺𑀧𑀡𑁆𑀡𑀸𑀦𑀺. 𑀧𑀢𑀺𑀢𑀸𑀦𑀻𑀢𑀺 𑀯𑀡𑁆𑀝𑀢𑁄 𑀫𑀼𑀢𑁆𑀢𑀸𑀦𑀺. 𑀧𑀭𑀺𑀧𑀢𑀺𑀢𑀸𑀦𑀻𑀢𑀺 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺.

𑀤𑀲𑀫𑀕𑀸𑀣𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁧𑁩𑁧-𑁨. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 ¶ ¶ 𑀧𑀞𑀫𑀤𑁆𑀯𑀬𑁂 𑀦𑀺𑀧𑀓𑀦𑁆𑀢𑀺 𑀧𑀓𑀢𑀺𑀦𑀺𑀧𑀼𑀡𑀁 𑀧𑀡𑁆𑀟𑀺𑀢𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀲𑀼 𑀓𑀼𑀲𑀮𑀁. 𑀲𑀸𑀥𑀼𑀯𑀺𑀳𑀸𑀭𑀺𑀦𑁆𑀢𑀺 𑀅𑀧𑁆𑀧𑀦𑀸𑀯𑀺𑀳𑀸𑀭𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀁. 𑀥𑀻𑀭𑀦𑁆𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑀁. 𑀢𑀢𑁆𑀣 𑀦𑀺𑀧𑀓𑀢𑁆𑀢𑁂𑀦 𑀥𑀺𑀢𑀺𑀲𑀫𑁆𑀧𑀤𑀸 𑀯𑀼𑀢𑁆𑀢𑀸. 𑀇𑀥 𑀧𑀦 𑀥𑀺𑀢𑀺𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀥𑀺𑀢𑀺 𑀦𑀸𑀫 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸, ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀧𑀯𑀢𑁆𑀢𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀺 𑀘 𑀥𑀺𑀓𑁆𑀓𑀢𑀧𑀸𑀧𑁄𑀢𑀺𑀧𑀺 𑀥𑀻𑀭𑁄. 𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬𑀸𑀢𑀺 𑀬𑀣𑀸 𑀧𑀝𑀺𑀭𑀸𑀚𑀸 ‘‘𑀯𑀺𑀚𑀺𑀢𑀁 𑀭𑀝𑁆𑀞𑀁 𑀅𑀦𑀢𑁆𑀣𑀸𑀯𑀳’’𑀦𑁆𑀢𑀺 𑀜𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀏𑀓𑁄 𑀘𑀭𑀢𑀺 𑀏𑀯𑀁 𑀩𑀸𑀮𑀲𑀳𑀸𑀬𑀁 𑀧𑀳𑀸𑀬 𑀏𑀓𑁄 𑀘𑀭𑁂. 𑀅𑀣 𑀯𑀸 𑀭𑀸𑀚𑀸𑀯 𑀭𑀝𑁆𑀞𑀦𑁆𑀢𑀺 𑀬𑀣𑀸 𑀲𑀼𑀢𑀲𑁄𑀫𑁄 𑀭𑀸𑀚𑀸 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀧𑀳𑀸𑀬 𑀏𑀓𑁄 𑀘𑀭𑀺, 𑀬𑀣𑀸 𑀘 𑀫𑀳𑀸𑀚𑀦𑀓𑁄 𑀏𑀯𑀁 𑀏𑀓𑁄𑀯 𑀘𑀭𑁂𑀢𑀺 𑀅𑀬𑀫𑁆𑀧𑀺 𑀏𑀢𑀲𑁆𑀲𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁫-𑁪𑁬). 𑀦𑀺𑀤𑁆𑀤𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑀧𑀞𑀫𑀤𑁆𑀯𑀬𑀁.

𑁧𑁩𑁩. 𑀢𑀢𑀺𑀬𑀕𑀸𑀣𑀸 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀸 𑀏𑀯. 𑀓𑁂𑀯𑀮𑀜𑁆𑀘 𑀧𑀦 𑀲𑀳𑀸𑀬𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣 𑀅𑀲𑁂𑀓𑁆𑀔𑁂𑀳𑀺 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀦𑁆𑀦𑀸 𑀲𑀳𑀸𑀬𑀸 𑀏𑀯 ‘‘𑀲𑀳𑀸𑀬𑀲𑀫𑁆𑀧𑀤𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀬𑀸 𑀅𑀬𑀁 𑀯𑀼𑀢𑁆𑀢𑀸 𑀲𑀳𑀸𑀬𑀲𑀫𑁆𑀧𑀤𑀸, 𑀢𑀁 𑀲𑀳𑀸𑀬𑀲𑀫𑁆𑀧𑀤𑀁 𑀅𑀤𑁆𑀥𑀸 𑀧𑀲𑀁𑀲𑀸𑀫, 𑀏𑀓𑀁𑀲𑁂𑀦𑁂𑀯 𑀣𑁄𑀫𑁂𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁? 𑀲𑁂𑀝𑁆𑀞𑀸 𑀲𑀫𑀸𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸𑀢𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀲𑀻𑀮𑀸𑀤𑀻𑀳𑀺 𑀲𑁂𑀝𑁆𑀞𑁂 𑀲𑁂𑀯𑀫𑀸𑀦𑀲𑁆𑀲 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀦𑁆𑀢𑀺. 𑀲𑀫𑁂 𑀲𑁂𑀯𑀫𑀸𑀦𑀲𑁆𑀲 𑀅𑀜𑁆𑀜𑀫𑀜𑁆𑀜𑀲𑀫𑀥𑀸𑀭𑀡𑁂𑀦 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑁂𑀦 𑀘 𑀮𑀤𑁆𑀥𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺 ¶ . 𑀏𑀢𑁂 𑀧𑀦 𑀲𑀳𑀸𑀬𑀓𑁂 𑀲𑁂𑀝𑁆𑀞𑁂 𑀘 𑀲𑀫𑁂 𑀘 𑀅𑀮𑀤𑁆𑀥𑀸 𑀓𑀼𑀳𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀢𑀢𑁆𑀣 𑀘 𑀧𑀝𑀺𑀖𑀸𑀦𑀼𑀦𑀬𑀁 ¶ 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀅𑀦𑀯𑀚𑁆𑀚𑀪𑁄𑀚𑀻 𑀳𑀼𑀢𑁆𑀯𑀸 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀅𑀳𑀫𑁆𑀧𑀺 𑀳𑀺 𑀏𑀯𑀁 𑀘𑀭𑀦𑁆𑀢𑁄 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁭). 𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑀦𑀬𑁄 𑀏𑀯.

𑀢𑀢𑀺𑀬𑀁.

𑁧𑁩𑁪. 𑀘𑀢𑀼𑀢𑁆𑀣𑁂 ¶ 𑀤𑀺𑀲𑁆𑀯𑀸𑀢𑀺 𑀑𑀮𑁄𑀓𑁂𑀢𑁆𑀯𑀸. 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀓𑀜𑁆𑀘𑀦𑀲𑁆𑀲. ‘‘𑀯𑀮𑀬𑀸𑀦𑀻’’𑀢𑀺 𑀧𑀸𑀞𑀲𑁂𑀲𑁄. 𑀲𑀸𑀯𑀲𑁂𑀲𑀧𑀸𑀞𑁄 𑀳𑀺 𑀅𑀬𑀁 𑀅𑀢𑁆𑀣𑁄. 𑀧𑀪𑀲𑁆𑀲𑀭𑀸𑀦𑀻𑀢𑀺 𑀧𑀪𑀸𑀲𑀦𑀲𑀻𑀮𑀸𑀦𑀺, 𑀚𑀼𑀢𑀺𑀫𑀦𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯. 𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀤𑀺𑀲𑁆𑀯𑀸 𑀪𑀼𑀚𑀲𑁆𑀫𑀺𑀁 𑀲𑀼𑀯𑀡𑁆𑀡𑀲𑁆𑀲 𑀯𑀮𑀬𑀸𑀦𑀺 ‘‘𑀕𑀡𑀯𑀸𑀲𑁂 𑀲𑀢𑀺 𑀲𑀗𑁆𑀖𑀝𑁆𑀝𑀦𑀸, 𑀏𑀓𑀯𑀸𑀲𑁂 𑀲𑀢𑀺 𑀅𑀖𑀝𑁆𑀝𑀦𑀸’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁮). 𑀦𑀽𑀧𑀼𑀭𑀸𑀦𑀻𑀢𑀺 𑀯𑀮𑀬𑀸𑀦𑀺. ‘‘𑀦𑀺𑀬𑀼𑀭𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀖𑀝𑁆𑀝𑁂𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀳𑀦𑀦𑁆𑀢𑀺.

𑀘𑀢𑀼𑀢𑁆𑀣𑀁.

𑁧𑁩𑁫. 𑀧𑀜𑁆𑀘𑀫𑀕𑀸𑀣𑀸 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀸 𑀏𑀯. 𑀅𑀬𑀁 𑀧𑀦 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁆𑀯𑀸𑀬𑀁 𑀏𑀢𑁂𑀦 𑀤𑀼𑀢𑀻𑀬𑁂𑀦 𑀓𑀼𑀫𑀸𑀭𑁂𑀦 𑀲𑀻𑀢𑀼𑀡𑁆𑀳𑀸𑀤𑀻𑀦𑀺 𑀦𑀺𑀯𑁂𑀤𑁂𑀦𑁆𑀢𑁂𑀦 𑀲𑀳𑀯𑀸𑀲𑁂𑀦 𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀫𑀫 𑀯𑀸𑀘𑀸𑀪𑀺𑀮𑀸𑀧𑁄, 𑀢𑀲𑁆𑀫𑀺𑀁 𑀲𑀺𑀦𑁂𑀳𑀯𑀲𑁂𑀦 𑀅𑀪𑀺𑀲𑀚𑁆𑀚𑀦𑀸 𑀯𑀸 𑀚𑀸𑀢𑀸. 𑀲𑀘𑁂 𑀅𑀳𑀁 𑀇𑀫𑀁 𑀦 𑀧𑀭𑀺𑀘𑁆𑀘𑀚𑀸𑀫𑀺, 𑀢𑀢𑁄 𑀆𑀬𑀢𑀺𑀫𑁆𑀧𑀺 𑀢𑀣𑁂𑀯 𑀳𑁂𑀲𑁆𑀲𑀢𑀺. 𑀬𑀣𑀸 𑀇𑀤𑀸𑀦𑀺, 𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳 𑀫𑀫𑀲𑁆𑀲, 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑁆𑀢𑀭𑀸𑀬𑀓𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲𑀸𑀢𑀺 𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁯). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀜𑁆𑀘𑀫𑀁.

𑁧𑁩𑁬. 𑀙𑀝𑁆𑀞𑁂 𑀓𑀸𑀫𑀸𑀢𑀺 𑀤𑁆𑀯𑁂 𑀓𑀸𑀫𑀸 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀬𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸, 𑀓𑀺𑀮𑁂𑀲𑀓𑀸𑀫𑀸 𑀙𑀦𑁆𑀤𑀸𑀤𑀬𑁄 𑀲𑀩𑁆𑀩𑁂𑀧𑀺 𑀭𑀸𑀕𑀧𑁆𑀧𑀪𑁂𑀤𑀸. 𑀇𑀥 𑀧𑀦 𑀯𑀢𑁆𑀣𑀼𑀓𑀸𑀫𑀸 𑀅𑀥𑀺𑀧𑁆𑀧𑁂𑀢𑀸 ¶ . 𑀭𑀽𑀧𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀭𑀸. 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀫𑀥𑀼𑀭𑀸. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀫𑀦𑀁 𑀭𑀫𑁂𑀦𑁆𑀢𑀻𑀢𑀺 𑀫𑀦𑁄𑀭𑀫𑀸. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀭𑀽𑀧𑁂𑀦 𑀭𑀽𑀧𑁂𑀦, 𑀅𑀦𑁂𑀓𑀯𑀺𑀥𑁂𑀦 𑀲𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 ¶ 𑀳𑀺 𑀭𑀽𑀧𑀸𑀤𑀺𑀯𑀲𑁂𑀦 𑀘𑀺𑀢𑁆𑀭𑀸, 𑀭𑀽𑀧𑀸𑀤𑀻𑀲𑀼𑀧𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀭𑀽𑀧𑀸. 𑀏𑀯𑀁 𑀢𑁂𑀦 𑀯𑀺𑀭𑀽𑀧𑀭𑀽𑀧𑁂𑀦 𑀢𑀣𑀸 𑀢𑀣𑀸 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁, 𑀧𑀩𑁆𑀩𑀚𑁆𑀚𑀸𑀬 𑀅𑀪𑀺𑀭𑀫𑀺𑀢𑀼𑀁 𑀦 𑀤𑁂𑀦𑁆𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀯𑀸 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀧𑀼𑀭𑀺𑀫𑀕𑀸𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁫𑁦).

𑀓𑀸𑀫𑀕𑀼𑀡𑀸𑀢𑀺 ¶ 𑀓𑀸𑀫𑀬𑀺𑀢𑀩𑁆𑀩𑀝𑁆𑀞𑁂𑀦 𑀓𑀸𑀫𑀸. 𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀏𑀢𑁆𑀣 𑀧𑀝𑀮𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁪) 𑀏𑀢𑁆𑀣 𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀏𑀢𑁆𑀣 𑀆𑀦𑀺𑀲𑀁𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭), 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽’’𑀢𑀺 𑀏𑀢𑁆𑀣 𑀩𑀦𑁆𑀥𑀦𑀝𑁆𑀞𑁄 𑀕𑀼𑀡𑀝𑁆𑀞𑁄. 𑀇𑀥𑀸𑀧𑀺 𑀏𑀲𑁂𑀯 𑀅𑀥𑀺𑀧𑁆𑀧𑁂𑀢𑁄, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀝𑁆𑀞𑀸𑀢𑀺 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼, 𑀫𑀸 𑀯𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀓𑀦𑁆𑀢𑀸𑀢𑀺 𑀓𑀸𑀫𑀦𑀻𑀬𑀸. 𑀫𑀦𑀸𑀧𑀸𑀢𑀺 𑀫𑀦𑀯𑀟𑁆𑀠𑀦𑀓𑀸. 𑀧𑀺𑀬𑀭𑀽𑀧𑀸𑀢𑀺 𑀧𑀺𑀬𑀚𑀸𑀢𑀺𑀓𑀸. 𑀓𑀸𑀫𑀽𑀧𑀲𑀁𑀳𑀺𑀢𑀸𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑀸𑀫𑁂𑀦 𑀉𑀧𑀲𑀁𑀳𑀺𑀢𑀸. 𑀭𑀚𑀦𑀻𑀬𑀸𑀢𑀺 𑀭𑀚𑁆𑀚𑀦𑀺𑀬𑀸, 𑀭𑀸𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄.

𑀬𑀤𑀺 𑀫𑀼𑀤𑁆𑀤𑀸𑀬𑀸𑀢𑀺𑀆𑀤𑀻𑀲𑀼 𑀫𑀼𑀤𑁆𑀤𑀸𑀢𑀺 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀲𑀼 𑀲𑀜𑁆𑀜𑀁 𑀞𑀧𑁂𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸. 𑀕𑀡𑀦𑀸𑀢𑀺 𑀅𑀘𑁆𑀙𑀺𑀤𑁆𑀤𑀕𑀡𑀦𑀸. 𑀲𑀗𑁆𑀔𑀸𑀦𑀦𑁆𑀢𑀺 𑀧𑀺𑀡𑁆𑀟𑀕𑀡𑀦𑀸. 𑀬𑀸𑀬 𑀔𑁂𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀥 𑀏𑀢𑁆𑀢𑀓𑀸 𑀯𑀻𑀳𑀻 𑀪𑀯𑀺𑀲𑁆𑀲𑀦𑁆𑀢𑀺’’, 𑀭𑀼𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀥 𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺’’, 𑀆𑀓𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀫𑁂 𑀆𑀓𑀸𑀲𑁂 𑀲𑀓𑀼𑀡𑀸 𑀏𑀢𑁆𑀢𑀓𑀸 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀦𑁆𑀢𑀺. 𑀓𑀲𑀻𑀢𑀺 𑀓𑀲𑀺𑀓𑀫𑁆𑀫𑀁. 𑀯𑀡𑀺𑀚𑁆𑀚𑀸𑀢𑀺 𑀚𑀗𑁆𑀖𑀯𑀡𑀺𑀚𑁆𑀚𑀣𑀮𑀯𑀡𑀺𑀚𑁆𑀚𑀸𑀤𑀺𑀯𑀡𑀺𑀧𑁆𑀧𑀣𑁄. 𑀕𑁄𑀭𑀓𑁆𑀔𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀕𑀸𑀯𑁄 𑀭𑀓𑁆𑀔𑀺𑀢𑁆𑀯𑀸 𑀧𑀜𑁆𑀘𑀕𑁄𑀭𑀲𑀯𑀺𑀓𑁆𑀓𑀬𑁂𑀦 𑀚𑀻𑀯𑀦𑀓𑀫𑁆𑀫𑀁. 𑀇𑀲𑁆𑀲𑀢𑁆𑀣𑁄 𑀯𑀼𑀘𑁆𑀘𑀢𑀺 𑀆𑀯𑀼𑀥𑀁 ¶ 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀸𑀦𑀓𑀫𑁆𑀫𑀁. 𑀭𑀸𑀚𑀧𑁄𑀭𑀺𑀲𑀦𑁆𑀢𑀺 𑀯𑀺𑀦𑀸 𑀆𑀯𑀼𑀥𑁂𑀦 𑀭𑀸𑀚𑀓𑀫𑁆𑀫𑀁 𑀓𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀁. 𑀲𑀺𑀧𑁆𑀧𑀜𑁆𑀜𑀢𑀭𑀦𑁆𑀢𑀺 𑀕𑀳𑀺𑀢𑀸𑀯𑀲𑁂𑀲𑀳𑀢𑁆𑀣𑀺𑀅𑀲𑁆𑀲𑀲𑀺𑀧𑁆𑀧𑀸𑀤𑀺.

𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀮𑀓𑁆𑀔𑀁 𑀯𑀺𑀬 𑀲𑀭𑀲𑁆𑀲 𑀲𑀻𑀢𑀲𑁆𑀲 𑀧𑀼𑀭𑀢𑁄 𑀞𑀺𑀢𑁄, 𑀲𑀻𑀢𑁂𑀦 𑀩𑀸𑀥𑀺𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀉𑀡𑁆𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀟𑀁𑀲𑀸𑀤𑀻𑀲𑀼 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀫𑀓𑀲𑀸𑀢𑀺 𑀲𑀩𑁆𑀩𑀫𑀓𑁆𑀔𑀺𑀓𑀸. 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀲𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀭𑀺𑀲𑁆𑀲𑀫𑀸𑀦𑁄𑀢𑀺 𑀧𑀻𑀴𑀺𑀬𑀫𑀸𑀦𑁄 𑀭𑀼𑀧𑁆𑀧𑀫𑀸𑀦𑁄 𑀖𑀝𑁆𑀝𑀺𑀬𑀫𑀸𑀦𑁄. 𑀫𑀻𑀬𑀫𑀸𑀦𑁄𑀢𑀺 𑀫𑀭𑀫𑀸𑀦𑁄. 𑀅𑀬𑀁, 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀯𑁂, 𑀅𑀬𑀁 𑀫𑀼𑀤𑁆𑀤𑀸𑀤𑀻𑀳𑀺 𑀚𑀻𑀯𑀺𑀓𑀓𑀧𑁆𑀧𑀦𑀁 𑀆𑀕𑀫𑁆𑀫 𑀲𑀻𑀢𑀸𑀤𑀺𑀧𑀘𑁆𑀘𑀬𑁄 ¶ 𑀆𑀩𑀸𑀥𑁄. 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄𑀢𑀺 𑀓𑀸𑀫𑁂𑀲𑀼 ¶ 𑀉𑀧𑀤𑁆𑀤𑀯𑁄, 𑀉𑀧𑀲𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄𑀢𑀺 𑀧𑀘𑁆𑀘𑀓𑁆𑀔𑁄 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑁄. 𑀤𑀼𑀓𑁆𑀔𑀓𑁆𑀔𑀦𑁆𑀥𑁄𑀢𑀺 𑀤𑀼𑀓𑁆𑀔𑀭𑀸𑀲𑀺. 𑀓𑀸𑀫𑀳𑁂𑀢𑀽𑀢𑀺𑀆𑀤𑀻𑀲𑀼 𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀫𑀸 𑀅𑀲𑁆𑀲 𑀳𑁂𑀢𑀽𑀢𑀺 𑀓𑀸𑀫𑀳𑁂𑀢𑀼. 𑀫𑀽𑀮𑀝𑁆𑀞𑁂𑀦 𑀓𑀸𑀫𑀸 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀓𑀸𑀫𑀦𑀺𑀤𑀸𑀦𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀧𑀦 ‘‘𑀓𑀸𑀫𑀦𑀺𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀓𑀸𑀭𑀡𑀝𑁆𑀞𑁂𑀦 𑀓𑀸𑀫𑀸 𑀅𑀥𑀺𑀓𑀭𑀡𑀁 𑀅𑀲𑁆𑀲𑀸𑀢𑀺 𑀓𑀸𑀫𑀸𑀥𑀺𑀓𑀭𑀡𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦𑁂𑀯 𑀧𑀦 ‘‘𑀓𑀸𑀫𑀸𑀥𑀺𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑁄. 𑀓𑀸𑀫𑀸𑀦𑀫𑁂𑀯 𑀳𑁂𑀢𑀽𑀢𑀺 𑀇𑀤𑀁 𑀦𑀺𑀬𑀫𑀯𑀘𑀦𑀁 𑀓𑀸𑀫𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀉𑀝𑁆𑀞𑀳𑀢𑁄𑀢𑀺 𑀆𑀚𑀻𑀯𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑁂𑀦 𑀉𑀝𑁆𑀞𑀳𑀦𑁆𑀢𑀲𑁆𑀲. 𑀖𑀝𑀢𑁄𑀢𑀺 𑀢𑀁 𑀯𑀻𑀭𑀺𑀬𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀖𑀝𑁂𑀦𑁆𑀢𑀲𑁆𑀲. 𑀯𑀸𑀬𑀫𑀢𑁄𑀢𑀺 𑀯𑀸𑀬𑀸𑀫𑀁 𑀧𑀭𑀓𑁆𑀓𑀫𑀁 𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀦𑀸𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀻𑀢𑀺 𑀦 𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀳𑀢𑁆𑀣𑀁 𑀦𑀸𑀪𑀺𑀭𑀼𑀳𑀦𑁆𑀢𑀺. 𑀲𑁄𑀘𑀢𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀲𑁄𑀘𑀢𑀺. 𑀓𑀺𑀮𑀫𑀢𑀻𑀢𑀺 𑀓𑀸𑀬𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦 𑀓𑀺𑀮𑀫𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 𑀯𑀸𑀘𑀸𑀬 𑀧𑀭𑀺𑀤𑁂𑀯𑀢𑀺. 𑀉𑀭𑀢𑁆𑀢𑀸𑀴𑀺𑀦𑁆𑀢𑀺 𑀉𑀭𑀁 𑀢𑀸𑀴𑁂𑀢𑁆𑀯𑀸. 𑀓𑀦𑁆𑀤𑀢𑀻𑀢𑀺 𑀭𑁄𑀤𑀢𑀺. 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑀯𑀺𑀲𑀜𑁆𑀜𑀻 𑀯𑀺𑀬 𑀲𑀫𑁆𑀫𑀽𑀴𑁆𑀳𑁄 𑀳𑁄𑀢𑀺. 𑀫𑁄𑀖𑀦𑁆𑀢𑀺 𑀢𑀼𑀘𑁆𑀙𑀁. 𑀅𑀨𑀮𑁄𑀢𑀺 𑀦𑀺𑀧𑁆𑀨𑀮𑁄.

𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀆𑀭𑀓𑁆𑀔𑀓𑀸𑀭𑀡𑀸. 𑀓𑀺𑀦𑁆𑀢𑀺 𑀫𑁂𑀢𑀺 𑀓𑁂𑀦 𑀦𑀼 𑀔𑁄 𑀫𑁂 𑀉𑀧𑀸𑀬𑁂𑀦. 𑀬𑀫𑁆𑀧𑀺 𑀫𑁂𑀢𑀺 𑀬𑀫𑁆𑀧𑀺 𑀫𑀬𑁆𑀳𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀁 𑀥𑀦𑀁 𑀅𑀳𑁄𑀲𑀺. 𑀢𑀫𑁆𑀧𑀺 𑀦𑁄 𑀦𑀢𑁆𑀣𑀻𑀢𑀺 𑀢𑀫𑁆𑀧𑀺 𑀅𑀫𑁆𑀳𑀸𑀓𑀁 𑀇𑀤𑀸𑀦𑀺 𑀦𑀢𑁆𑀣𑀺.

𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀽𑀢𑀺𑀆𑀤𑀺𑀦𑀸𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸𑀯 𑀆𑀤𑀻𑀦𑀯𑀁 𑀤𑀻𑀧𑁂𑀢𑀺. 𑀢𑀢𑁆𑀣 𑀓𑀸𑀫𑀳𑁂𑀢𑀽𑀢𑀺 𑀓𑀸𑀫𑀧𑀘𑁆𑀘𑀬𑀸 𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀦𑀺𑀤𑀸𑀦𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀓𑀸𑀫𑁂 𑀦𑀺𑀤𑀸𑀦𑀁 𑀓𑀢𑁆𑀯𑀸 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀥𑀺𑀓𑀭𑀡𑀦𑁆𑀢𑀺𑀧𑀺 ¶ 𑀪𑀸𑀯𑀦𑀧𑀼𑀁𑀲𑀓𑀫𑁂𑀯, 𑀓𑀸𑀫𑁂 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀦𑀫𑁂𑀯 𑀳𑁂𑀢𑀽𑀢𑀺 𑀕𑀸𑀫𑀦𑀺𑀕𑀫𑀲𑁂𑀦𑀸𑀧𑀢𑀺𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀦𑁆𑀢𑀭𑀸𑀤𑀻𑀦𑀁 𑀓𑀸𑀫𑀸𑀦𑀁𑀬𑁂𑀯 𑀳𑁂𑀢𑀼 𑀯𑀺𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀓𑁆𑀓𑀫𑀦𑁆𑀢𑀻𑀢𑀺 𑀧𑀳𑀭𑀦𑁆𑀢𑀺.

𑀅𑀲𑀺𑀘𑀫𑁆𑀫𑀦𑁆𑀢𑀺 𑀅𑀲𑀺𑀜𑁆𑀘𑁂𑀯 𑀔𑁂𑀝𑀓𑀨𑀮𑀓𑀸𑀤𑀻𑀦𑀺 𑀘.

𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀲𑀭𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸. 𑀉𑀪𑀢𑁄𑀩𑁆𑀬𑀽𑀴𑁆𑀳𑀦𑁆𑀢𑀺 𑀉𑀪𑀢𑁄𑀭𑀸𑀲𑀺𑀪𑀽𑀢𑀁. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀧𑀯𑀺𑀲𑀦𑁆𑀢𑀺. 𑀉𑀲𑀽𑀲𑀽𑀢𑀺 𑀓𑀡𑁆𑀟𑁂𑀲𑀼. 𑀯𑀺𑀚𑁆𑀚𑁄𑀢𑀮𑀦𑁆𑀢𑁂𑀲𑀽𑀢𑀺 𑀧𑀭𑀺𑀯𑀢𑁆𑀢𑀫𑀸𑀦𑁂𑀲𑀼. 𑀢𑁂 𑀢𑀢𑁆𑀣𑀸𑀢𑀺 𑀢𑁂 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂.

𑀅𑀤𑁆𑀤𑀸𑀯𑀮𑁂𑀧𑀦𑀸 ¶ ¶ 𑀉𑀧𑀓𑀸𑀭𑀺𑀬𑁄𑀢𑀺 𑀘𑁂𑀢𑁆𑀣 𑀫𑀦𑀼𑀲𑁆𑀲𑀸 𑀧𑀸𑀓𑀸𑀭𑀧𑀸𑀤𑀁 𑀅𑀲𑁆𑀲𑀔𑀼𑀭𑀲𑀡𑁆𑀞𑀸𑀦𑁂𑀦 𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑁆𑀯𑀸 𑀉𑀧𑀭𑀺 𑀲𑀼𑀥𑀸𑀬 𑀮𑀺𑀫𑁆𑀧𑀦𑁆𑀢𑀺. 𑀏𑀯𑀁 𑀓𑀢𑀧𑀸𑀓𑀸𑀭𑀧𑀸𑀤𑀸 ‘‘𑀉𑀧𑀓𑀸𑀭𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸 𑀢𑀺𑀦𑁆𑀢𑁂𑀦 𑀓𑀮𑀮𑁂𑀦 𑀲𑀺𑀢𑁆𑀢𑀸 𑀅𑀤𑁆𑀤𑀸𑀯𑀮𑁂𑀧𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀢𑀸𑀲𑀁 𑀳𑁂𑀝𑁆𑀞𑀸 𑀢𑀺𑀔𑀺𑀡𑀅𑀬𑀲𑀽𑀮𑀭𑀼𑀓𑁆𑀔𑀲𑀽𑀮𑀸𑀤𑀻𑀳𑀺 𑀯𑀺𑀚𑁆𑀛𑀺𑀬𑀫𑀸𑀦𑀸 𑀧𑀸𑀓𑀸𑀭𑀲𑁆𑀲 𑀧𑀺𑀘𑁆𑀙𑀺𑀮𑁆𑀮𑀪𑀸𑀯𑁂𑀦 𑀆𑀭𑁄𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀉𑀧𑀥𑀸𑀯𑀦𑁆𑀢𑀺𑀬𑁂𑀯. 𑀙𑀓𑀡𑀓𑀸𑀬𑀸𑀢𑀺 𑀓𑀼𑀣𑀺𑀢𑀕𑁄𑀫𑀬𑁂𑀦. 𑀅𑀪𑀺𑀯𑀕𑁆𑀕𑁂𑀦𑀸𑀢𑀺 𑀲𑀢𑀤𑀦𑁆𑀢𑁂𑀦. 𑀢𑀁 𑀅𑀝𑁆𑀞𑀤𑀦𑁆𑀢𑀸𑀓𑀸𑀭𑁂𑀦 𑀓𑀢𑁆𑀯𑀸 ‘‘𑀦𑀕𑀭𑀤𑁆𑀯𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑁂 𑀉𑀧𑀭𑀺𑀤𑁆𑀯𑀸𑀭𑁂 𑀞𑀺𑀢𑀸 𑀢𑀲𑁆𑀲 𑀩𑀦𑁆𑀥𑀦𑀬𑁄𑀢𑁆𑀢𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀢𑁂𑀦 𑀅𑀪𑀺𑀯𑀕𑁆𑀕𑁂𑀦 𑀑𑀫𑀤𑁆𑀤𑀦𑁆𑀢𑀺.

𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀖𑀭𑀲𑀦𑁆𑀥𑀺𑀫𑁆𑀧𑀺. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀕𑀸𑀫𑁂 𑀧𑀳𑀭𑀺𑀢𑁆𑀯𑀸 𑀫𑀳𑀸𑀯𑀺𑀮𑁄𑀧𑀁 𑀓𑀭𑁄𑀦𑁆𑀢𑀺. 𑀏𑀓𑀸𑀕𑀸𑀭𑀺𑀓𑀦𑁆𑀢𑀺 𑀧𑀡𑁆𑀡𑀸𑀲𑀫𑀢𑁆𑀢𑀸𑀧𑀺 𑀲𑀝𑁆𑀞𑀺𑀫𑀢𑁆𑀢𑀸𑀧𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀚𑀻𑀯𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀥𑀦𑀁 𑀆𑀳𑀭𑀸𑀧𑁂𑀦𑁆𑀢𑀺. 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀟𑁆𑀠𑀤𑀡𑁆𑀟𑀓𑁂𑀳𑀻𑀢𑀺 𑀫𑀼𑀕𑁆𑀕𑀭𑁂𑀳𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁬𑁯). 𑀲𑁂𑀲𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀙𑀝𑁆𑀞𑀁.

𑁧𑁩𑁭. 𑀲𑀢𑁆𑀢𑀫𑁂 𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀪𑀸𑀕𑀺𑀬𑀸𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸𑀧𑀺 𑀏𑀢𑁂 𑀅𑀦𑁂𑀓𑀩𑁆𑀬𑀲𑀦𑀸𑀯𑀳𑀝𑁆𑀞𑁂𑀦 𑀤𑀴𑁆𑀳𑀲𑀦𑁆𑀦𑀺𑀧𑀸𑀢𑀝𑁆𑀞𑁂𑀦 𑀘 𑀈𑀢𑀺. 𑀕𑀡𑁆𑀟𑁄𑀧𑀺 𑀅𑀲𑀼𑀘𑀺𑀁 𑀧𑀕𑁆𑀖𑀭𑀢𑀺, 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀭𑀺𑀪𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀸 ¶ 𑀏𑀢𑁂 𑀓𑀺𑀮𑁂𑀲𑀸 𑀅𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀭𑀺𑀧𑀓𑁆𑀓𑀧𑀭𑀺𑀪𑀺𑀦𑁆𑀦𑀪𑀸𑀯𑀢𑁄 𑀘 𑀕𑀡𑁆𑀟𑁄. 𑀉𑀧𑀤𑁆𑀤𑀯𑀢𑀻𑀢𑀺 𑀉𑀧𑀤𑁆𑀤𑀯𑁄, 𑀅𑀦𑀢𑁆𑀣𑀁 𑀚𑀦𑁂𑀦𑁆𑀢𑁄 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄, 𑀭𑀸𑀕𑀕𑀡𑁆𑀟𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸𑀧𑁂𑀢𑁂 𑀅𑀯𑀺𑀤𑀺𑀢𑀦𑀺𑀩𑁆𑀩𑀸𑀦𑀢𑁆𑀣𑀸𑀯𑀳𑀳𑁂𑀢𑀼𑀢𑀸𑀬 𑀲𑀩𑁆𑀩𑀼𑀧𑀤𑁆𑀤𑀯𑀯𑀢𑁆𑀣𑀼𑀢𑀸𑀬 𑀘 𑀉𑀧𑀤𑁆𑀤𑀯𑁄. 𑀬𑀲𑁆𑀫𑀸 𑀧𑀦𑁂𑀢𑁂 𑀓𑀺𑀮𑁂𑀲𑀸𑀢𑀼𑀭𑀪𑀸𑀯𑀁 𑀚𑀦𑁂𑀦𑁆𑀢𑀸 𑀲𑀻𑀮𑀲𑀗𑁆𑀔𑀸𑀢𑀫𑀸𑀭𑁄𑀕𑁆𑀬𑀁 𑀮𑁄𑀮𑀼𑀧𑁆𑀧𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀸 𑀧𑀸𑀓𑀢𑀺𑀓𑀫𑁂𑀯 𑀆𑀭𑁄𑀕𑁆𑀬𑀁 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀆𑀭𑁄𑀕𑁆𑀬𑀯𑀺𑀮𑀼𑀫𑁆𑀧𑀦𑀝𑁆𑀞𑁂𑀦 𑀭𑁄𑀕𑁄. 𑀅𑀩𑁆𑀪𑀦𑁆𑀢𑀭𑀫𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀧𑀦 𑀅𑀦𑁆𑀢𑁄𑀢𑀼𑀤𑀦𑀝𑁆𑀞𑁂𑀦 𑀤𑀼𑀦𑁆𑀦𑀻𑀳𑀭𑀡𑀻𑀬𑀝𑁆𑀞𑁂𑀦 𑀘 𑀲𑀮𑁆𑀮𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑀬𑀸𑀯𑀳𑀦𑀢𑁄 𑀪𑀬𑀁. 𑀫𑁂𑀢𑀦𑁆𑀢𑀺 𑀏𑀢𑀁 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁫𑁧).

𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀦𑁆𑀢𑀺 ¶ 𑀓𑀸𑀫𑀭𑀸𑀕𑁂𑀦 𑀭𑀢𑁆𑀢𑁄 𑀅𑀬𑀁. 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄𑀢𑀺 𑀙𑀦𑁆𑀤𑀭𑀸𑀕𑁂𑀦 𑀲𑁆𑀦𑁂𑀳𑁂𑀦 𑀩𑀤𑁆𑀥𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀕𑀩𑁆𑀪𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀢𑁆𑀢𑀫𑀸𑀦𑀲𑀴𑀸𑀬𑀢𑀦𑀕𑀩𑁆𑀪𑀸. 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀕𑀩𑁆𑀪𑀸𑀢𑀺 𑀧𑀭𑀮𑁄𑀓𑁂𑀧𑀺 𑀲𑀴𑀸𑀬𑀢𑀦𑀕𑀩𑁆𑀪𑀸. 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑀧𑀭𑀺𑀫𑀼𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀑𑀢𑀺𑀡𑁆𑀡𑁄 𑀲𑀸𑀢𑀭𑀽𑀧𑁂𑀦𑀸𑀢𑀺 ¶ 𑀫𑀥𑀼𑀭𑀲𑀪𑀸𑀯𑁂𑀦 𑀭𑀸𑀕𑁂𑀦 𑀑𑀢𑀺𑀡𑁆𑀡𑁄 𑀑𑀕𑀸𑀳𑀺𑀢𑁄. 𑀧𑀮𑀺𑀧𑀣𑀦𑁆𑀢𑀺 𑀓𑀸𑀫𑀓𑀮𑀮𑀫𑀕𑁆𑀕𑀁. 𑀤𑀼𑀕𑁆𑀕𑀦𑁆𑀢𑀺 𑀤𑀼𑀕𑁆𑀕𑀫𑀁.

𑀲𑀢𑁆𑀢𑀫𑀁.

𑁧𑁩𑁮. 𑀅𑀝𑁆𑀞𑀫𑁂 𑀲𑀻𑀢𑀁 𑀤𑀼𑀩𑁆𑀩𑀺𑀥𑀁 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀜𑁆𑀘 𑀩𑀸𑀳𑀺𑀭𑀥𑀸𑀢𑀼𑀓𑁆𑀔𑁄𑀪𑀧𑀘𑁆𑀘𑀬𑀜𑁆𑀘. 𑀢𑀣𑀸 𑀉𑀡𑁆𑀳𑀁. 𑀢𑀢𑁆𑀣 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀤𑀻𑀖𑀚𑀸𑀢𑀺𑀓𑀸 𑀲𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀦𑀺𑀕𑀫𑀦𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀫𑀁.

𑁧𑁩𑁯. 𑀦𑀯𑀫𑀕𑀸𑀣𑀸 𑀧𑀤𑀢𑁆𑀣𑀢𑁄 𑀧𑀸𑀓𑀝𑀸 𑀏𑀯. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀲𑀸 𑀘 𑀔𑁄 𑀬𑀼𑀢𑁆𑀢𑀺𑀯𑀲𑁂𑀦, 𑀦 𑀅𑀦𑀼𑀲𑁆𑀲𑀯𑀯𑀲𑁂𑀦. 𑀬𑀣𑀸 𑀅𑀬𑀁 𑀳𑀢𑁆𑀣𑀻 𑀫𑀦𑀼𑀲𑁆𑀲𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀤𑀦𑁆𑀢𑀢𑁆𑀢𑀸 𑀅𑀤𑀦𑁆𑀢𑀪𑀽𑀫𑀺𑀁 𑀦𑀸𑀕𑀘𑁆𑀙𑀢𑀻𑀢𑀺 𑀯𑀸, 𑀲𑀭𑀻𑀭𑀫𑀳𑀦𑁆𑀢𑀢𑀸𑀬 𑀯𑀸 𑀦𑀸𑀕𑁄. 𑀏𑀯𑀁 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀅𑀭𑀺𑀬𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀤𑀦𑁆𑀢𑀢𑁆𑀢𑀸 ¶ 𑀅𑀤𑀦𑁆𑀢𑀪𑀽𑀫𑀺𑀁 𑀦𑀸𑀕𑀫𑀦𑁂𑀦, 𑀆𑀕𑀼𑀁 𑀅𑀓𑀭𑀡𑁂𑀦, 𑀧𑀼𑀦 𑀇𑀢𑁆𑀣𑀢𑁆𑀢𑀁 𑀅𑀦𑀸𑀕𑀫𑀦𑁂𑀦 𑀘 𑀕𑀼𑀡𑀲𑀭𑀻𑀭𑀫𑀳𑀦𑁆𑀢𑀢𑀸𑀬 𑀯𑀸 𑀦𑀸𑀕𑁄 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸 𑀏𑀓𑀘𑀭𑀺𑀬𑀲𑀼𑀔𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑁂 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀕𑀡𑀁 𑀯𑀺𑀯𑀚𑁆𑀚𑀬𑀺𑀢𑁆𑀯𑀸 𑀏𑀓𑀢𑁆𑀢𑀸𑀪𑀺𑀭𑀢𑀺𑀲𑀼𑀔𑁂𑀦 𑀛𑀸𑀦𑀲𑀼𑀔𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀅𑀢𑁆𑀢𑀦𑁄 𑀬𑀣𑀸 𑀬𑀣𑀸 𑀲𑀼𑀔𑀁, 𑀢𑀣𑀸 𑀢𑀣𑀸 𑀬𑀢𑁆𑀢𑀓𑀁 𑀯𑀸 𑀇𑀘𑁆𑀙𑀸𑀫𑀺, 𑀢𑀢𑁆𑀢𑀓𑀁 𑀅𑀭𑀜𑁆𑀜𑁂 𑀦𑀺𑀯𑀸𑀲𑀁 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀏𑀓𑁄 𑀘𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀘𑁂𑀲 𑀲𑀼𑀲𑀡𑁆𑀞𑀺𑀢𑀓𑁆𑀔𑀦𑁆𑀥𑀫𑀳𑀦𑁆𑀢𑀢𑀸𑀬 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀅𑀲𑁂𑀓𑁆𑀔𑀲𑀻𑀮𑀓𑁆𑀔𑀦𑁆𑀥𑀫𑀳𑀦𑁆𑀢𑀢𑀸𑀬 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀧𑀤𑀼𑀫𑀲𑀤𑀺𑀲𑀕𑀢𑁆𑀢𑀢𑀸𑀬 𑀯𑀸, 𑀧𑀤𑀼𑀫𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑀸𑀬 𑀯𑀸 𑀧𑀤𑀼𑀫𑀻, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀧𑀤𑀼𑀫𑀲𑀤𑀺𑀲𑀩𑁄𑀚𑁆𑀛𑀗𑁆𑀕𑀫𑀳𑀦𑁆𑀢𑀢𑀸𑀬 𑀯𑀸, 𑀅𑀭𑀺𑀬𑀚𑀸𑀢𑀺𑀧𑀤𑀼𑀫𑁂 𑀉𑀧𑁆𑀧𑀦𑁆𑀦𑀢𑀸𑀬 𑀯𑀸 𑀧𑀤𑀼𑀫𑀻 𑀪𑀯𑁂𑀬𑁆𑀬𑀁. 𑀬𑀣𑀸 𑀘𑁂𑀲 𑀣𑀸𑀫𑀩𑀮𑀚𑀯𑀸𑀤𑀻𑀳𑀺 𑀉𑀴𑀸𑀭𑁄, 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀫𑁆𑀧𑀺 𑀏𑀯𑀁 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸𑀤𑀻𑀳𑀺 𑀲𑀻𑀮𑀲𑀫𑀸𑀥𑀺𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀤𑀻𑀳𑀺 ¶ 𑀯𑀸 𑀉𑀴𑀸𑀭𑁄 𑀪𑀯𑁂𑀬𑁆𑀬𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀅𑀥𑀺𑀕𑀢𑁄𑀫𑁆𑀳𑀻𑀢𑀺.

𑀦𑀯𑀫𑀁.

𑁧𑁪𑁦. 𑀤𑀲𑀫𑁂 𑀅𑀝𑁆𑀞𑀸𑀦𑀢𑀦𑁆𑀢𑀺 𑀅𑀝𑁆𑀞𑀸𑀦𑀁 𑀢𑀁, 𑀅𑀓𑀸𑀭𑀡𑀁 𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀦𑀸𑀲𑀺𑀓𑀲𑁆𑀲 𑀮𑁄𑀧𑁄 ¶ 𑀓𑀢𑁄 ‘‘𑀅𑀭𑀺𑀬𑀲𑀘𑁆𑀘𑀸𑀦 𑀤𑀲𑁆𑀲𑀦’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁫.𑁧𑁧; 𑀲𑀼. 𑀦𑀺. 𑁨𑁭𑁦) 𑀯𑀺𑀬. 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲𑀸𑀢𑀺 𑀕𑀡𑀸𑀪𑀺𑀭𑀢𑀲𑁆𑀲. 𑀬𑀦𑁆𑀢𑀺 𑀓𑀸𑀭𑀡𑀯𑀘𑀦𑀫𑁂𑀢𑀁 ‘‘𑀬𑀁 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁩𑁦) 𑀯𑀺𑀬. 𑀨𑀲𑁆𑀲𑀬𑁂𑀢𑀺 𑀅𑀥𑀺𑀕𑀘𑁆𑀙𑁂. 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀁. 𑀲𑀸 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀲𑀫𑀬𑁂 𑀏𑀯 𑀧𑀘𑁆𑀘𑀦𑀻𑀓𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 ‘‘𑀲𑀸𑀫𑀬𑀺𑀓𑀸 𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁. ‘‘𑀅𑀝𑁆𑀞𑀸𑀦𑀁 𑀢𑀁, 𑀦 𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑁂𑀦 𑀓𑀸𑀭𑀡𑁂𑀦 𑀨𑀲𑁆𑀲𑀬𑁂 𑀇𑀢𑀺 𑀏𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫 𑀲𑀗𑁆𑀕𑀡𑀺𑀓𑀸𑀭𑀢𑀺𑀁 𑀧𑀳𑀸𑀬 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑁄 𑀅𑀥𑀺𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯 (𑀲𑀼. 𑀦𑀺. 𑀅𑀝𑁆𑀞. 𑁧.𑁫𑁪; 𑀅𑀧. 𑀅𑀝𑁆𑀞. 𑁧.𑁧.𑁧𑁧𑁦).

𑀦𑀺𑀤𑁆𑀤𑁂𑀲𑁂 ¶ 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀲𑀼𑀔𑀁. 𑀧𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂 𑀲𑀼𑀔𑀁. 𑀉𑀧𑀲𑀫𑀲𑀼𑀔𑀦𑁆𑀢𑀺 𑀓𑀺𑀮𑁂𑀲𑀼𑀧𑀲𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀲𑀫𑁆𑀩𑁄𑀥𑀺𑀲𑀼𑀔𑀦𑁆𑀢𑀺 𑀫𑀕𑁆𑀕𑀲𑀼𑀔𑀁. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀬𑀣𑀸𑀓𑀸𑀫𑀮𑀸𑀪𑀻. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀅𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻. 𑀅𑀲𑀸𑀫𑀬𑀺𑀓𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀅𑀓𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀯𑀺𑀭𑀳𑀺𑀢𑀁 𑀅𑀘𑀮𑀺𑀢𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁.

𑀤𑀲𑀫𑀁.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁧𑁪𑁧. 𑀢𑀢𑀺𑀬𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑀸𑀦𑀺 𑀳𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀲𑀽𑀓𑀝𑁆𑀞𑁂𑀦 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀮𑁄𑀫𑀝𑁆𑀞𑁂𑀦 𑀘 𑀯𑀺𑀲𑀽𑀓𑀸𑀦𑀺. 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀯𑀺𑀲𑀽𑀓𑀸𑀦𑀻𑀢𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺, 𑀤𑀺𑀝𑁆𑀞𑀺𑀬𑁄 𑀏𑀯 𑀯𑀸 𑀯𑀺𑀲𑀽𑀓𑀸𑀦𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺. 𑀉𑀧𑀸𑀢𑀺𑀯𑀢𑁆𑀢𑁄𑀢𑀺 ¶ 𑀤𑀲𑁆𑀲𑀦𑀫𑀕𑁆𑀕𑁂𑀦 𑀅𑀢𑀺𑀓𑁆𑀓𑀦𑁆𑀢𑁄. 𑀧𑀢𑁆𑀢𑁄 𑀦𑀺𑀬𑀸𑀫𑀦𑁆𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑀸𑀬 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑀢𑀸𑀬 𑀘 𑀦𑀺𑀬𑀢𑀪𑀸𑀯𑀁 𑀅𑀥𑀺𑀕𑀢𑁄, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀯𑀸 𑀧𑀞𑀫𑀫𑀕𑁆𑀕𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀞𑀫𑀫𑀕𑁆𑀕𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀘 𑀢𑀲𑁆𑀲 𑀧𑀝𑀺𑀮𑀸𑀪𑁄 𑀘 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀧𑀝𑀺𑀮𑀤𑁆𑀥𑀫𑀕𑁆𑀕𑁄𑀢𑀺 𑀇𑀫𑀺𑀦𑀸 𑀲𑁂𑀲𑀫𑀕𑁆𑀕𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀻𑀢𑀺 𑀉𑀧𑁆𑀧𑀦𑁆𑀦𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄 𑀅𑀫𑁆𑀳𑀺. 𑀏𑀢𑁂𑀦 𑀨𑀮𑀁 𑀤𑀲𑁆𑀲𑁂𑀢𑀺. 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺 𑀅𑀜𑁆𑀜𑁂𑀳𑀺 ‘‘𑀇𑀤𑀁 𑀲𑀘𑁆𑀘𑀁 𑀇𑀤𑀁 𑀲𑀘𑁆𑀘’’𑀦𑁆𑀢𑀺 𑀦𑀦𑁂𑀢𑀩𑁆𑀩𑁄. 𑀏𑀢𑁂𑀦 𑀲𑀬𑀫𑁆𑀪𑀼𑀢𑀁 𑀤𑀻𑀧𑁂𑀢𑀺. 𑀧𑀢𑁆𑀢𑁂 𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂 𑀅𑀜𑁆𑀜𑀦𑁂𑀬𑁆𑀬𑀢𑀸𑀬 𑀅𑀪𑀸𑀯𑀸 𑀲𑀬𑀁𑀯𑀲𑀺𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀯𑀸 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀆𑀤𑀺𑀫𑀕𑁆𑀕𑁂𑀦 𑀧𑀢𑁆𑀢𑁄 𑀦𑀺𑀬𑀸𑀫𑀁, 𑀲𑁂𑀲𑁂𑀳𑀺 𑀧𑀝𑀺𑀮𑀤𑁆𑀥𑀫𑀕𑁆𑀕𑁄, 𑀨𑀮𑀜𑀸𑀡𑁂𑀦 ¶ 𑀉𑀧𑁆𑀧𑀦𑁆𑀦𑀜𑀸𑀡𑁄, 𑀢𑀁 𑀲𑀩𑁆𑀩𑀁 𑀅𑀢𑁆𑀢𑀦𑀸𑀯 𑀅𑀥𑀺𑀕𑀢𑁄𑀢𑀺 𑀅𑀦𑀜𑁆𑀜𑀦𑁂𑀬𑁆𑀬𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁫𑁪; 𑀅𑀧. 𑀅𑀝𑁆𑀞. 𑁧.𑁧.𑁧𑁧𑁧).

𑀦 𑀧𑀭𑀦𑁂𑀬𑁆𑀬𑁄𑀢𑀺 𑀦 𑀅𑀜𑁆𑀜𑁂𑀳𑀺 𑀦𑁂𑀢𑀩𑁆𑀩𑁄. 𑀦 𑀧𑀭𑀧𑁆𑀧𑀢𑁆𑀢𑀺𑀬𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑀢𑁆𑀢𑀸 𑀦 𑀅𑀜𑁆𑀜𑁂𑀳𑀺 𑀲𑀤𑁆𑀤𑀳𑀸𑀧𑁂𑀢𑀩𑁆𑀩𑁄. 𑀦 𑀧𑀭𑀧𑁆𑀧𑀘𑁆𑀘𑀬𑁄𑀢𑀺 𑀦 𑀅𑀲𑁆𑀲 𑀧𑀭𑁄 𑀧𑀘𑁆𑀘𑀬𑁄, 𑀦 𑀧𑀭𑀲𑁆𑀲 𑀲𑀤𑁆𑀥𑀸𑀬 𑀯𑀢𑁆𑀢𑀢𑀻𑀢𑀺 𑀦 𑀧𑀭𑀧𑁆𑀧𑀘𑁆𑀘𑀬𑁄. 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽𑀢𑀺 𑀦 𑀅𑀜𑁆𑀜𑁂𑀲𑀁 𑀧𑀝𑀺𑀩𑀤𑁆𑀥𑀜𑀸𑀡𑀕𑀫𑀦𑁄.

𑀧𑀞𑀫𑀁.

𑁧𑁪𑁨. 𑀤𑀼𑀢𑀺𑀬𑁂 𑀦𑀺𑀮𑁆𑀮𑁄𑀮𑀼𑀧𑁄𑀢𑀺 𑀅𑀮𑁄𑀮𑀼𑀧𑁄. 𑀬𑁄 𑀳𑀺 𑀭𑀲𑀢𑀡𑁆𑀳𑀸𑀪𑀺𑀪𑀽𑀢𑁄 𑀳𑁄𑀢𑀺, 𑀲𑁄 𑀪𑀼𑀲𑀁 𑀮𑀼𑀧𑁆𑀧𑀢𑀺 𑀧𑀼𑀦𑀧𑁆𑀧𑀼𑀦𑀜𑁆𑀘 𑀮𑀼𑀧𑁆𑀧𑀢𑀺, 𑀢𑁂𑀦 ‘‘𑀮𑁄𑀮𑀼𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀏𑀲 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀦𑀺𑀮𑁆𑀮𑁄𑀮𑀼𑀧𑁄’’𑀢𑀺. 𑀦𑀺𑀓𑁆𑀓𑀼𑀳𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑀲𑁆𑀲 𑀢𑀺𑀯𑀺𑀥𑀓𑀼𑀳𑀦𑀯𑀢𑁆𑀣𑀼 𑀦𑀢𑁆𑀣𑀺, 𑀲𑁄 ‘‘𑀦𑀺𑀓𑁆𑀓𑀼𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀇𑀫𑀺𑀲𑁆𑀲𑀸 𑀧𑀦 𑀕𑀸𑀣𑀸𑀬 𑀫𑀦𑀼𑀜𑁆𑀜𑀪𑁄𑀚𑀦𑀸𑀤𑀻𑀲𑀼 ¶ 𑀯𑀺𑀫𑁆𑀳𑀬𑀫𑀦𑀸𑀧𑀚𑁆𑀚𑀦𑀢𑁄 𑀦𑀺𑀓𑁆𑀓𑀼𑀳𑁄𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀧𑀺𑀧𑀸𑀲𑁄𑀢𑀺 𑀏𑀢𑁆𑀣 𑀧𑀸𑀢𑀼𑀫𑀺𑀘𑁆𑀙𑀸 𑀧𑀺𑀧𑀸𑀲𑀸, 𑀢𑀲𑁆𑀲𑀸 𑀅𑀪𑀸𑀯𑁂𑀦 𑀦𑀺𑀧𑁆𑀧𑀺𑀧𑀸𑀲𑁄, 𑀲𑀸𑀤𑀼𑀭𑀲𑀮𑁄𑀪𑁂𑀦 𑀪𑁄𑀢𑁆𑀢𑀼𑀓𑀫𑁆𑀬𑀢𑀸𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀫𑁆𑀫𑀓𑁆𑀔𑁄𑀢𑀺 𑀏𑀢𑁆𑀣 𑀧𑀭𑀕𑀼𑀡𑀯𑀺𑀦𑀸𑀲𑀦𑀮𑀓𑁆𑀔𑀡𑁄 𑀫𑀓𑁆𑀔𑁄, 𑀢𑀲𑁆𑀲 𑀅𑀪𑀸𑀯𑁂𑀦 𑀦𑀺𑀫𑁆𑀫𑀓𑁆𑀔𑁄. 𑀅𑀢𑁆𑀢𑀦𑁄 𑀕𑀳𑀝𑁆𑀞𑀓𑀸𑀮𑁂 𑀲𑀽𑀤𑀲𑁆𑀲 𑀕𑀼𑀡𑀫𑀓𑁆𑀔𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀆𑀳. 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄 𑀢𑀬𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀘 𑀢𑀻𑀡𑀻𑀢𑀺 𑀙 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 ¶ 𑀅𑀧𑁆𑀧𑀲𑀦𑁆𑀦𑀝𑁆𑀞𑁂𑀦 𑀲𑀓𑀪𑀸𑀯𑀁 𑀯𑀺𑀚𑀳𑀸𑀧𑁂𑀢𑁆𑀯𑀸 𑀧𑀭𑀪𑀸𑀯𑀁 𑀕𑀡𑁆𑀳𑀸𑀧𑀦𑀝𑁆𑀞𑁂𑀦 𑀓𑀲𑀝𑀝𑁆𑀞𑁂𑀦 𑀘 ‘‘𑀓𑀲𑀸𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀓𑀲𑀸𑀯𑀸? 𑀭𑀸𑀕𑀓𑀲𑀸𑀯𑁄 𑀤𑁄𑀲𑀓𑀲𑀸𑀯𑁄 𑀫𑁄𑀳𑀓𑀲𑀸𑀯𑁄, 𑀇𑀫𑁂 𑀢𑀬𑁄 𑀓𑀲𑀸𑀯𑀸. 𑀢𑀢𑁆𑀣 𑀓𑀢𑀫𑁂 𑀅𑀧𑀭𑁂𑀧𑀺 𑀢𑀬𑁄 𑀓𑀲𑀸𑀯𑀸? 𑀓𑀸𑀬𑀓𑀲𑀸𑀯𑁄 𑀯𑀘𑀻𑀓𑀲𑀸𑀯𑁄 𑀫𑀦𑁄𑀓𑀲𑀸𑀯𑁄’’𑀢𑀺 (𑀯𑀺𑀪. 𑁯𑁨𑁪).

𑀢𑁂𑀲𑀼 𑀫𑁄𑀳𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀓𑀲𑀸𑀯𑀸𑀦𑀁 𑀢𑁂𑀲𑀜𑁆𑀘 𑀲𑀩𑁆𑀩𑁂𑀲𑀁 𑀫𑀽𑀮𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀦𑀺𑀤𑁆𑀥𑀦𑁆𑀢𑀢𑁆𑀢𑀸 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄, 𑀢𑀺𑀡𑁆𑀡𑀁 𑀏𑀯 𑀯𑀸 𑀓𑀸𑀬𑀯𑀘𑀻𑀫𑀦𑁄𑀓𑀲𑀸𑀯𑀸𑀦𑀁 𑀫𑁄𑀳𑀲𑁆𑀲 𑀘 𑀦𑀺𑀤𑁆𑀥𑀦𑁆𑀢𑀢𑁆𑀢𑀸 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄. 𑀇𑀢𑀭𑁂𑀲𑀼 𑀦𑀺𑀮𑁆𑀮𑁄𑀮𑀼𑀧𑀢𑀸𑀤𑀻𑀳𑀺 𑀭𑀸𑀕𑀓𑀲𑀸𑀯𑀲𑁆𑀲, 𑀦𑀺𑀫𑁆𑀫𑀓𑁆𑀔𑀢𑀸𑀬 𑀤𑁄𑀲𑀓𑀲𑀸𑀯𑀲𑁆𑀲 𑀦𑀺𑀤𑁆𑀥𑀦𑁆𑀢𑀪𑀸𑀯𑁄 𑀲𑀺𑀤𑁆𑀥𑁄 𑀏𑀯. 𑀦𑀺𑀭𑀸𑀲𑀲𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀓𑀮𑀮𑁄𑀓𑁂, 𑀢𑀻𑀲𑀼 𑀪𑀯𑁂𑀲𑀼 𑀤𑁆𑀯𑀸𑀤𑀲𑀲𑀼 𑀯𑀸 𑀆𑀬𑀢𑀦𑁂𑀲𑀼 𑀪𑀯𑀯𑀺𑀪𑀯𑀢𑀡𑁆𑀳𑀸𑀯𑀺𑀭𑀳𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 ¶ . 𑀅𑀣 𑀯𑀸 𑀢𑀬𑁄𑀧𑀺 𑀧𑀸𑀤𑁂 𑀯𑀢𑁆𑀯𑀸 𑀏𑀓𑁄 𑀘𑀭𑁂𑀢𑀺 𑀏𑀓𑁄 𑀘𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀏𑀯𑀫𑁆𑀧𑀺 𑀏𑀢𑁆𑀣 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄 (𑀲𑀼. 𑀦𑀺. 𑀅𑀝𑁆𑀞. 𑁧.𑁯𑁬).

𑀤𑀼𑀢𑀺𑀬𑀁.

𑁧𑁪𑁩. 𑀢𑀢𑀺𑀬𑁂 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀤𑀲𑀯𑀢𑁆𑀣𑀼𑀓𑀸𑀬 𑀧𑀸𑀧𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀸𑀧𑁄. 𑀧𑀭𑁂𑀲𑀫𑁆𑀧𑀺 𑀅𑀦𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀅𑀦𑀢𑁆𑀣𑀤𑀲𑁆𑀲𑀻. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀫𑁆𑀳𑀺 𑀘 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑁄. 𑀢𑀁 𑀅𑀢𑁆𑀣𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄 𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁. 𑀲𑀬𑀁 𑀦 𑀲𑁂𑀯𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂𑀦 𑀢𑀁 𑀦 𑀲𑁂𑀯𑁂𑀬𑁆𑀬. 𑀬𑀤𑀺 𑀧𑀦 𑀧𑀭𑀯𑀲𑁄 𑀳𑁄𑀢𑀺, 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀧𑀲𑀼𑀢𑀦𑁆𑀢𑀺 𑀧𑀲𑀝𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀧𑀫𑀢𑁆𑀢𑀦𑁆𑀢𑀺 𑀓𑀸𑀫𑀕𑀼𑀡𑁂𑀲𑀼 𑀯𑁄𑀲𑁆𑀲𑀝𑁆𑀞𑀘𑀺𑀢𑁆𑀢𑀁, 𑀓𑀼𑀲𑀮𑀪𑀸𑀯𑀦𑀸𑀭𑀳𑀺𑀢𑀁 𑀯𑀸. 𑀢𑀁 𑀏𑀯𑀭𑀽𑀧𑀁 𑀦 𑀲𑁂𑀯𑁂 𑀦 𑀪𑀚𑁂 𑀦 𑀧𑀬𑀺𑀭𑀼𑀧𑀸𑀲𑁂, 𑀅𑀜𑁆𑀜𑀤𑀢𑁆𑀣𑀼 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑀦𑀺𑀤𑁆𑀤𑁂𑀲𑁂 𑀲𑀬𑀁 𑀦 𑀲𑁂𑀯𑁂𑀬𑁆𑀬𑀸𑀢𑀺 𑀲𑀸𑀫𑀁 𑀦 𑀉𑀧𑀲𑀗𑁆𑀓𑀫𑁂𑀬𑁆𑀬. 𑀲𑀸𑀫𑀁 𑀦 𑀲𑁂𑀯𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑁂𑀦𑀧𑀺 𑀦 𑀉𑀧𑀲𑀗𑁆𑀓𑀫𑁂𑀬𑁆𑀬. 𑀦 𑀲𑁂𑀯𑁂𑀬𑁆𑀬𑀸𑀢𑀺 𑀦 𑀪𑀚𑁂𑀬𑁆𑀬. 𑀦 ¶ 𑀦𑀺𑀲𑁂𑀯𑁂𑀬𑁆𑀬𑀸𑀢𑀺 𑀲𑀫𑀻𑀧𑀫𑁆𑀧𑀺 𑀦 𑀕𑀘𑁆𑀙𑁂𑀬𑁆𑀬. 𑀦 𑀲𑀁𑀲𑁂𑀯𑁂𑀬𑁆𑀬𑀸𑀢𑀺 𑀤𑀽𑀭𑁂 𑀪𑀯𑁂𑀬𑁆𑀬. 𑀦 𑀧𑀭𑀺𑀲𑀁𑀲𑁂𑀯𑁂𑀬𑁆𑀬𑀸𑀢𑀺 𑀧𑀝𑀺𑀓𑁆𑀓𑀫𑁂𑀬𑁆𑀬.

𑀢𑀢𑀺𑀬𑀁.

𑁧𑁪𑁪. 𑀘𑀢𑀼𑀢𑁆𑀣𑁂 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀩𑀳𑀼𑀲𑁆𑀲𑀼𑀢𑀦𑁆𑀢𑀺 𑀤𑀼𑀯𑀺𑀥𑁄 𑀩𑀳𑀼𑀲𑁆𑀲𑀼𑀢𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀅𑀢𑁆𑀣𑀢𑁄 𑀦𑀺𑀔𑀺𑀮𑁄 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁄 𑀘 𑀫𑀕𑁆𑀕𑀨𑀮𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀦𑀁 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁄 𑀘. 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄. 𑀉𑀴𑀸𑀭𑁂𑀳𑀺 𑀧𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀴𑀸𑀭𑁄. 𑀬𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀬𑀼𑀢𑁆𑀢𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀘 𑀧𑀝𑀺𑀪𑀸𑀦𑀯𑀸. 𑀧𑀭𑀺𑀬𑀢𑁆𑀢𑀺𑀧𑀭𑀺𑀧𑀼𑀘𑁆𑀙𑀸𑀥𑀺𑀕𑀫𑀯𑀲𑁂𑀦 𑀯𑀸 𑀢𑀺𑀥𑀸 𑀧𑀝𑀺𑀪𑀸𑀦𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀳𑀺 𑀧𑀭𑀺𑀬𑀢𑁆𑀢𑀺 𑀧𑀝𑀺𑀪𑀸𑀢𑀺, 𑀲𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀅𑀢𑁆𑀣𑀜𑁆𑀘 𑀜𑀸𑀬𑀜𑁆𑀘 𑀮𑀓𑁆𑀔𑀡𑀜𑁆𑀘 𑀞𑀸𑀦𑀸𑀝𑁆𑀞𑀸𑀦𑀜𑁆𑀘 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀭𑀺𑀧𑀼𑀘𑁆𑀙𑀸 𑀧𑀝𑀺𑀪𑀸𑀢𑀺, 𑀲𑁄 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸. 𑀬𑁂𑀦 𑀫𑀕𑁆𑀕𑀸𑀤𑀬𑁄 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀲𑁄 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸. 𑀢𑀁 𑀏𑀯𑀭𑀽𑀧𑀁 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣, 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁. 𑀢𑀢𑁄 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀉𑀪𑀬𑀢𑁆𑀣𑀪𑁂𑀤𑀢𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀪𑁂𑀤𑀢𑁄 𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺, 𑀢𑀢𑁄 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑀓𑀗𑁆𑀔𑀸𑀝𑁆𑀞𑀸𑀦𑁂𑀲𑀼 ¶ 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀦𑁂𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸 𑀏𑀯𑀁 𑀓𑀢𑀲𑀩𑁆𑀩𑀓𑀺𑀘𑁆𑀘𑁄 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁫𑁮).

𑀘𑀢𑀼𑀢𑁆𑀣𑀁.

𑁧𑁪𑁫. 𑀧𑀜𑁆𑀘𑀫𑁂 ¶ 𑀔𑀺𑀟𑁆𑀟𑀸 𑀘 𑀭𑀢𑀺 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀯. 𑀓𑀸𑀫𑀲𑀼𑀔𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀲𑀼𑀔𑀁. 𑀯𑀢𑁆𑀣𑀼𑀓𑀸𑀫𑀸𑀧𑀺 𑀳𑀺 𑀲𑀼𑀔𑀲𑁆𑀲 𑀯𑀺𑀲𑀬𑀸𑀤𑀺𑀪𑀸𑀯𑁂𑀦 𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀅𑀢𑁆𑀣𑀺 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁩.𑁬𑁦). 𑀏𑀯𑀫𑁂𑀢𑀁 𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀇𑀫𑀲𑁆𑀫𑀺𑀁 𑀑𑀓𑀸𑀲𑀮𑁄𑀓𑁂 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀮𑀦𑁆𑀢𑀺 𑀅𑀓𑀢𑁆𑀯𑀸 ‘‘𑀏𑀢𑀁 𑀢𑀧𑁆𑀧𑀓’’𑀦𑁆𑀢𑀺 𑀯𑀸 ‘‘𑀲𑀸𑀭𑀪𑀽𑀢’’𑀦𑁆𑀢𑀺 𑀯𑀸 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀅𑀦𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑁂𑀦 𑀅𑀦𑀮𑀗𑁆𑀓𑀭𑀡𑁂𑀦 𑀅𑀦𑀧𑁂𑀓𑁆𑀔𑀦𑀲𑀻𑀮𑁄 𑀅𑀧𑀺𑀳𑀸𑀮𑀼𑀓𑁄 𑀦𑀺𑀢𑁆𑀢𑀡𑁆𑀳𑁄. 𑀯𑀺𑀪𑀽𑀲𑀝𑁆𑀞𑀸𑀦𑀸𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻 𑀏𑀓𑁄 𑀘𑀭𑁂𑀢𑀺. 𑀢𑀢𑁆𑀣 𑀯𑀺𑀪𑀽𑀲𑀸 𑀤𑀼𑀯𑀺𑀥𑀸 𑀅𑀕𑀸𑀭𑀺𑀓𑀯𑀺𑀪𑀽𑀲𑀸 𑀘 𑀅𑀦𑀕𑀸𑀭𑀺𑀓𑀯𑀺𑀪𑀽𑀲𑀸 𑀘. 𑀢𑀢𑁆𑀣 𑀅𑀕𑀸𑀭𑀺𑀓𑀯𑀺𑀪𑀽𑀲𑀸 𑀲𑀸𑀓𑀝𑀯𑁂𑀞𑀦𑀫𑀸𑀮𑀸𑀕𑀦𑁆𑀥𑀸𑀤𑀺, ¶ 𑀅𑀦𑀕𑀸𑀭𑀺𑀓𑀯𑀺𑀪𑀽𑀲𑀸 𑀘 𑀧𑀢𑁆𑀢𑀫𑀡𑁆𑀟𑀦𑀸𑀤𑀺. 𑀯𑀺𑀪𑀽𑀲𑀸 𑀏𑀯 𑀯𑀺𑀪𑀽𑀲𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀺𑀪𑀽𑀲𑀝𑁆𑀞𑀸𑀦𑀸 𑀢𑀺𑀯𑀺𑀥𑀸𑀬𑀧𑀺 𑀯𑀺𑀭𑀢𑀺𑀬𑀸 𑀯𑀺𑀭𑀢𑁄. 𑀅𑀯𑀺𑀢𑀣𑀯𑀘𑀦𑀢𑁄 𑀲𑀘𑁆𑀘𑀯𑀸𑀤𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 (𑀲𑀼. 𑀦𑀺. 𑀅𑀝𑁆𑀞. 𑁧.𑁫𑁯).

𑀧𑀜𑁆𑀘𑀫𑀁.

𑁧𑁪𑁬. 𑀙𑀝𑁆𑀞𑁂 𑀥𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀭𑀚𑀢𑀚𑀸𑀢𑀭𑀽𑀧𑀸𑀤𑀻𑀦𑀺 𑀭𑀢𑀦𑀸𑀦𑀺. 𑀥𑀜𑁆𑀜𑀸𑀦𑀻𑀢𑀺 𑀲𑀸𑀮𑀺𑀯𑀻𑀳𑀺𑀬𑀯𑀕𑁄𑀥𑀼𑀫𑀓𑀗𑁆𑀓𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑀧𑁆𑀧𑀪𑁂𑀤𑀸𑀦𑀺 𑀲𑀢𑁆𑀢 𑀲𑁂𑀲𑀸𑀧𑀭𑀡𑁆𑀡𑀸𑀦𑀺 𑀘. 𑀩𑀦𑁆𑀥𑀯𑀸𑀦𑀻𑀢𑀺 𑀜𑀸𑀢𑀺𑀩𑀦𑁆𑀥𑀼, 𑀕𑁄𑀢𑁆𑀢𑀩𑀦𑁆𑀥𑀼, 𑀫𑀺𑀢𑁆𑀢𑀩𑀦𑁆𑀥𑀼, 𑀲𑀺𑀧𑁆𑀧𑀩𑀦𑁆𑀥𑀼𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀩𑀦𑁆𑀥𑀯𑁂. 𑀬𑀣𑁄𑀥𑀺𑀓𑀸𑀦𑀻𑀢𑀺 𑀲𑀓𑀲𑀓𑀑𑀥𑀺𑀯𑀲𑁂𑀦 𑀞𑀺𑀢𑀸𑀦𑀺𑀬𑁂𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁦).

𑀙𑀝𑁆𑀞𑀁.

𑁧𑁪𑁭. 𑀲𑀢𑁆𑀢𑀫𑁂 𑀲𑀗𑁆𑀕𑁄 𑀏𑀲𑁄𑀢𑀺 𑀅𑀢𑁆𑀢𑀦𑁄 𑀉𑀧𑀪𑁄𑀕𑀁 𑀦𑀺𑀤𑁆𑀤𑀺𑀲𑀢𑀺. 𑀲𑁄 𑀳𑀺 𑀲𑀚𑁆𑀚𑀦𑁆𑀢𑀺 𑀢𑀢𑁆𑀣 𑀧𑀸𑀡𑀺𑀦𑁄 𑀓𑀤𑁆𑀤𑀫𑁂 𑀧𑀯𑀺𑀝𑁆𑀞𑁄 𑀳𑀢𑁆𑀣𑀻 𑀯𑀺𑀬𑀸𑀢𑀺 𑀲𑀗𑁆𑀕𑁄. 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑀪𑁄𑀕𑀓𑀸𑀮𑁂 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑁂𑀢𑀩𑁆𑀩𑀢𑁄 𑀓𑀸𑀫𑀸𑀯𑀘𑀭𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁄 𑀯𑀸 𑀮𑀸𑀫𑀓𑀝𑁆𑀞𑁂𑀦 𑀲𑁄𑀔𑁆𑀬𑀁 𑀧𑀭𑀺𑀢𑁆𑀢𑀁, 𑀯𑀺𑀚𑁆𑀚𑀼𑀧𑁆𑀧𑀪𑀸𑀬 𑀑𑀪𑀸𑀲𑀺𑀢𑀦𑀘𑁆𑀘𑀤𑀲𑁆𑀲𑀦𑀲𑀼𑀔𑀁 𑀯𑀺𑀬 𑀇𑀢𑁆𑀢𑀭𑀁, 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄𑀢𑀺 𑀏𑀢𑁆𑀣 𑀘 𑀬𑁆𑀯𑀸𑀬𑀁 ‘‘𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 ¶ 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 ¶ 𑀯𑀼𑀢𑁆𑀢𑁄, 𑀲𑁄 𑀬𑀫𑀺𑀤𑀁 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄, 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀬𑀤𑀺 𑀫𑀼𑀤𑁆𑀤𑀸𑀬 𑀬𑀤𑀺 𑀕𑀡𑀦𑀸𑀬𑀸’’𑀢𑀺 (𑀫. 𑀦𑀺. 𑁧.𑁧𑁬𑁨) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁, 𑀢𑀁 𑀉𑀧𑀦𑀺𑀥𑀸𑀬 𑀅𑀧𑁆𑀧𑁄𑀤𑀓𑀩𑀺𑀦𑁆𑀤𑀼𑀫𑀢𑁆𑀢𑁄 𑀳𑁄𑀢𑀺, 𑀅𑀣 𑀔𑁄 𑀤𑀼𑀓𑁆𑀔𑀫𑁂𑀯 𑀪𑀺𑀬𑁆𑀬𑁄 𑀩𑀳𑀼, 𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀲𑀤𑀺𑀲𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄’’𑀢𑀺. 𑀕𑀴𑁄 𑀏𑀲𑁄𑀢𑀺 𑀅𑀲𑁆𑀲𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀆𑀓𑀟𑁆𑀠𑀦𑀯𑀲𑁂𑀦 𑀩𑀴𑀺𑀲𑁄 𑀯𑀺𑀬 𑀏𑀲𑁄, 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸𑀢𑀺 𑀏𑀯𑀁 𑀜𑀢𑁆𑀯𑀸 𑀩𑀼𑀤𑁆𑀥𑀺𑀫𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀲𑀩𑁆𑀩𑀫𑁆𑀧𑁂𑀢𑀁 𑀧𑀳𑀸𑀬 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁧).

𑀲𑀢𑁆𑀢𑀫𑀁.

𑁧𑁪𑁮. 𑀅𑀝𑁆𑀞𑀫𑀕𑀸𑀣𑀸𑀬 ¶ 𑀤𑀼𑀢𑀺𑀬𑀧𑀸𑀤𑁂 𑀚𑀸𑀮𑀦𑁆𑀢𑀺 𑀲𑀼𑀢𑁆𑀢𑀫𑀬𑀁 𑀯𑀼𑀘𑁆𑀘𑀢𑀺. 𑀅𑀫𑁆𑀩𑀽𑀢𑀺 𑀉𑀤𑀓𑀁, 𑀢𑀢𑁆𑀣 𑀘𑀭𑀢𑀻𑀢𑀺 𑀅𑀫𑁆𑀩𑀼𑀘𑀸𑀭𑀻, 𑀫𑀘𑁆𑀙𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀮𑀺𑀮𑁂 𑀅𑀫𑁆𑀩𑀼𑀘𑀸𑀭𑀻 𑀲𑀮𑀺𑀮𑀫𑁆𑀩𑀼𑀘𑀸𑀭𑀻. 𑀢𑀲𑁆𑀫𑀺𑀁 𑀦𑀤𑀻𑀲𑀮𑀺𑀮𑁂 𑀚𑀸𑀮𑀁 𑀪𑁂𑀢𑁆𑀯𑀸 𑀕𑀢𑀅𑀫𑁆𑀩𑀼𑀘𑀸𑀭𑀻𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑀧𑀸𑀤𑁂 𑀤𑀟𑁆𑀠𑀦𑁆𑀢𑀺 𑀤𑀟𑁆𑀠𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺. 𑀬𑀣𑀸 𑀅𑀕𑁆𑀕𑀺 𑀤𑀟𑁆𑀠𑀝𑁆𑀞𑀸𑀦𑀁 𑀧𑀼𑀦 𑀦 𑀦𑀺𑀯𑀢𑁆𑀢𑀢𑀺, 𑀦 𑀢𑀢𑁆𑀣 𑀪𑀺𑀬𑁆𑀬𑁄 𑀆𑀕𑀘𑁆𑀙𑀢𑀺, 𑀏𑀯𑀁 𑀫𑀕𑁆𑀕𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁 𑀓𑀸𑀫𑀕𑀼𑀡𑀝𑁆𑀞𑀸𑀦𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀢𑀢𑁆𑀣 𑀪𑀺𑀬𑁆𑀬𑁄 𑀅𑀦𑀸𑀕𑀘𑁆𑀙𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀁𑀬𑁄𑀚𑀦𑀸𑀦𑀻𑀢𑀺 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺. 𑀇𑀫𑀸𑀦𑀺 𑀧𑀦 𑀲𑀁𑀬𑁄𑀚𑀦𑀸𑀦𑀺 𑀓𑀺𑀮𑁂𑀲𑀧𑀝𑀺𑀧𑀸𑀝𑀺𑀬𑀸𑀧𑀺 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀧𑀺. 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀸𑀦𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀫𑀸𑀦𑀲𑀁𑀬𑁄𑀚𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀓𑀸𑀫𑀭𑀸𑀕𑀧𑀝𑀺𑀖𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀫𑀸𑀦𑀪𑀯𑀭𑀸𑀕𑀅𑀯𑀺𑀚𑁆𑀚𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀪𑁂𑀤𑀁 𑀧𑀸𑀧𑁂𑀢𑁆𑀯𑀸. 𑀧𑀪𑀺𑀦𑁆𑀤𑀺𑀢𑁆𑀯𑀸𑀢𑀺 ¶ 𑀙𑀺𑀦𑁆𑀤𑀁 𑀓𑀢𑁆𑀯𑀸. 𑀤𑀸𑀮𑀬𑀺𑀢𑁆𑀯𑀸𑀢𑀺 𑀨𑀸𑀮𑁂𑀢𑁆𑀯𑀸. 𑀧𑀤𑀸𑀮𑀬𑀺𑀢𑁆𑀯𑀸𑀢𑀺 𑀳𑀻𑀭𑁂𑀢𑁆𑀯𑀸. 𑀲𑀫𑁆𑀧𑀤𑀸𑀮𑀬𑀺𑀢𑁆𑀯𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁.

𑀅𑀝𑁆𑀞𑀫𑀁.

𑁧𑁪𑁯. 𑀦𑀯𑀫𑁂 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀼, 𑀲𑀢𑁆𑀢 𑀕𑀻𑀯𑀝𑁆𑀞𑀻𑀦𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀧𑀭𑀺𑀯𑀚𑁆𑀚𑀦𑀧𑀳𑀸𑀢𑀩𑁆𑀩𑀤𑀲𑁆𑀲𑀦𑀢𑁆𑀣𑀁 ¶ 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑀼 𑀳𑀦𑀼𑀓𑀝𑁆𑀞𑀺𑀦𑀸 𑀳𑀤𑀬𑀝𑁆𑀞𑀺𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑁄. 𑀏𑀯𑀜𑁆𑀳𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸 𑀦 𑀲𑀫𑀡𑀲𑀸𑀭𑀽𑀧𑁆𑀧𑀸 𑀳𑁄𑀢𑀺. 𑀦 𑀘 𑀧𑀸𑀤𑀮𑁄𑀮𑁄𑀢𑀺 𑀏𑀓𑀲𑁆𑀲 𑀤𑀼𑀢𑀺𑀬𑁄 𑀤𑁆𑀯𑀺𑀦𑁆𑀦𑀁 𑀢𑀢𑀺𑀬𑁄𑀢𑀺 𑀏𑀯𑀁 𑀕𑀡𑀫𑀚𑁆𑀛𑀁, 𑀧𑀯𑀺𑀲𑀺𑀢𑀼𑀓𑀸𑀫𑀢𑀸𑀬 𑀓𑀡𑁆𑀟𑀽𑀬𑀫𑀸𑀦𑀧𑀸𑀤𑁄 𑀯𑀺𑀬 𑀅𑀪𑀯𑀦𑁆𑀢𑁄, 𑀤𑀻𑀖𑀘𑀸𑀭𑀺𑀓𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀯𑀺𑀭𑀢𑁄 𑀯𑀸. 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀇𑀥 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀸𑀯𑀲𑁂𑀲𑀯𑀲𑁂𑀦 𑀕𑁄𑀧𑀺𑀢𑀺𑀦𑁆𑀤𑁆𑀭𑀺𑀬𑁄. 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄𑀢𑀺 𑀫𑀸𑀦𑀲𑀁𑀬𑁂𑀯 𑀫𑀸𑀦𑀲𑀸𑀦𑀁, 𑀢𑀁 𑀭𑀓𑁆𑀔𑀺𑀢𑀫𑀲𑁆𑀲𑀸𑀢𑀺 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄. 𑀬𑀣𑀸 𑀓𑀺𑀮𑁂𑀲𑁂𑀢𑀺 𑀦 ¶ 𑀯𑀺𑀮𑀼𑀧𑁆𑀧𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂𑀲𑀼 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀺𑀮𑁂𑀲𑀅𑀦𑁆𑀯𑀸𑀲𑁆𑀲𑀯𑀯𑀺𑀭𑀳𑀺𑀢𑁄. 𑀅𑀧𑀭𑀺𑀟𑀬𑁆𑀳𑀫𑀸𑀦𑁄𑀢𑀺 𑀏𑀯𑀁 𑀅𑀦𑁆𑀯𑀸𑀲𑁆𑀲𑀯𑀯𑀺𑀭𑀳𑀺𑀢𑀸 𑀏𑀯 𑀓𑀺𑀮𑁂𑀲𑀕𑁆𑀕𑀻𑀳𑀺 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀩𑀳𑀺𑀤𑁆𑀥𑀸 𑀯𑀸 𑀅𑀦𑀯𑀲𑁆𑀲𑀼𑀢𑁄, 𑀅𑀚𑁆𑀛𑀢𑁆𑀢𑀁 𑀅𑀧𑀭𑀺𑀟𑀬𑁆𑀳𑀫𑀸𑀦𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁩).

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 ‘‘𑀘𑀓𑁆𑀔𑀽’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋

‘‘𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸, 𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺 𑀅𑀘𑀓𑁆𑀔𑀼𑀓𑀢𑁆𑀢𑀸, 𑀤𑁆𑀯𑀸𑀭𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑁂 𑀧𑀦 𑀧𑀲𑀸𑀤𑀯𑀢𑁆𑀣𑀼𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀈𑀤𑀺𑀲𑀻 𑀧𑀦𑁂𑀲𑀸 ‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀲𑀫𑁆𑀪𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁫; 𑀥. 𑀲. 𑀅𑀝𑁆𑀞. 𑁧𑁩𑁫𑁨).

𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀁 𑀦𑀺𑀫𑀺𑀢𑁆𑀢𑀁 𑀙𑀦𑁆𑀤𑀭𑀸𑀕𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀫𑀢𑁆𑀢𑀯𑀲𑁂𑀦 𑀦 𑀲𑀡𑁆𑀞𑀸𑀢𑀺. 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀪𑀸𑀯𑀓𑀭𑀡𑀢𑁄 ‘‘𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀳𑀢𑁆𑀣𑀧𑀸𑀤𑀳𑀲𑀺𑀢𑀮𑀧𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀪𑁂𑀤𑀁 𑀆𑀓𑀸𑀭𑀁 𑀕𑀡𑁆𑀳𑀸𑀢𑀺.

𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀦𑁆𑀢𑀺𑀆𑀤𑀺𑀫𑁆𑀳𑀺 ¶ 𑀬𑀁𑀓𑀸𑀭𑀡𑀸 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲 𑀳𑁂𑀢𑀼. 𑀏𑀢𑀁 𑀧𑀼𑀕𑁆𑀕𑀮𑀁 𑀲𑀢𑀺𑀓𑀯𑀸𑀝𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀅𑀧𑀺𑀳𑀺𑀢𑀘𑀓𑁆𑀔𑀼𑀤𑁆𑀯𑀸𑀭𑀁 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀏𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁. 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀁𑀪𑀽𑀢𑁄𑀬𑁂𑀯 𑀘 ‘‘𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 ¶ 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀦𑀢𑁆𑀣𑀺. 𑀦 𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀲𑀢𑀺 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀧𑀺 𑀘 𑀬𑀤𑀸 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀢𑀤𑀸 𑀪𑀯𑀗𑁆𑀕𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀢𑀢𑁄 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀢𑀢𑁄 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀢𑀢𑁄 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 ¶ 𑀯𑁄𑀝𑁆𑀞𑀧𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀤𑀦𑀦𑁆𑀢𑀭𑀁 𑀚𑀯𑀦𑀁 𑀚𑀯𑀢𑀺. 𑀢𑀢𑁆𑀭𑀸𑀧𑀺 𑀦𑁂𑀯 𑀪𑀯𑀗𑁆𑀕𑀲𑀫𑀬𑁂, 𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀫𑀬𑁂 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀅𑀢𑁆𑀣𑀺, 𑀚𑀯𑀦𑀓𑁆𑀔𑀡𑁂 𑀧𑀦 𑀲𑀘𑁂 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀯𑀸 𑀅𑀜𑁆𑀜𑀸𑀡𑀁 𑀯𑀸 𑀅𑀓𑁆𑀔𑀦𑁆𑀢𑀺 𑀯𑀸 𑀓𑁄𑀲𑀚𑁆𑀚𑀁 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀁𑀯𑀭𑁄 𑀳𑁄𑀢𑀺. 𑀏𑀯𑀁 𑀳𑁄𑀦𑁆𑀢𑁄 𑀧𑀦 𑀲𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀅𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑁂 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀕𑀩𑁆𑀪𑀸𑀤𑀬𑁄 𑀲𑀼𑀲𑀁𑀯𑀼𑀢𑀸, 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀅𑀭𑀓𑁆𑀔𑀺𑀢𑀁 𑀅𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀦 𑀳𑀺 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀬𑀤𑀺𑀘𑁆𑀙𑀦𑁆𑀢𑀺, 𑀢𑀁 𑀳𑀭𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀻𑀢𑀺.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻𑀢𑀺𑀆𑀤𑀻𑀲𑀼 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀫𑀺𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺. 𑀏𑀯𑀁 𑀲𑁂𑀲𑀧𑀤𑀸𑀦𑀺𑀧𑀺 𑀯𑀼𑀢𑁆𑀢𑀧𑀝𑀺𑀓𑁆𑀔𑁂𑀧𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘 𑀳𑁂𑀝𑁆𑀞𑀸 ‘‘𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀢𑀲𑁆𑀫𑀺𑀁 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 ¶ 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺. 𑀬𑀣𑀸 𑀓𑀺𑀁? 𑀬𑀣𑀸 𑀦𑀕𑀭𑀤𑁆𑀯𑀸𑀭𑁂𑀲𑀼 𑀲𑀁𑀯𑀼𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀖𑀭𑀸𑀤𑀬𑁄 𑀅𑀲𑀁𑀯𑀼𑀢𑀸 𑀳𑁄𑀦𑁆𑀢𑀺. 𑀢𑀣𑀸𑀧𑀺 𑀅𑀦𑁆𑀢𑁄𑀦𑀕𑀭𑁂 𑀲𑀩𑁆𑀩𑀁 𑀪𑀡𑁆𑀟𑀁 𑀲𑀼𑀭𑀓𑁆𑀔𑀺𑀢𑀁 𑀲𑀼𑀕𑁄𑀧𑀺𑀢𑀫𑁂𑀯 𑀳𑁄𑀢𑀺. 𑀦𑀕𑀭𑀤𑁆𑀯𑀸𑀭𑁂𑀲𑀼 𑀧𑀺𑀳𑀺𑀢𑁂𑀲𑀼 𑀘𑁄𑀭𑀸𑀦𑀁 𑀧𑀯𑁂𑀲𑁄 𑀦𑀢𑁆𑀣𑀺. 𑀏𑀯𑀫𑁂𑀯 𑀚𑀯𑀦𑁂 𑀲𑀻𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑁆𑀯𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀳𑁄𑀢𑀺 𑀪𑀯𑀗𑁆𑀕𑀫𑁆𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀧𑀺. 𑀢𑀲𑁆𑀫𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄𑀢𑀺 𑀯𑀼𑀢𑁆𑀢𑁄 (𑀥. 𑀲. 𑀅𑀝𑁆𑀞. 𑁧𑁩𑁫𑁨; 𑀯𑀺𑀲𑀼𑀤𑁆𑀥𑀺. 𑁧.𑁧𑁫).

𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘𑀸𑀢𑀺 𑀓𑀺𑀮𑁂𑀲𑁂𑀳𑀺 𑀢𑀺𑀦𑁆𑀢𑀓𑀸𑀭𑀡𑀜𑁆𑀘. 𑀅𑀦𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘𑀸𑀢𑀺 𑀓𑀺𑀮𑁂𑀲𑁂𑀳𑀺 𑀅𑀢𑀺𑀦𑁆𑀢𑀓𑀸𑀭𑀡𑀜𑁆𑀘.

𑀧𑀺𑀬𑀭𑀽𑀧𑁂 ¶ 𑀭𑀽𑀧𑁂𑀢𑀺 𑀇𑀝𑁆𑀞𑀚𑀸𑀢𑀺𑀓𑁂 𑀭𑀽𑀧𑀸𑀭𑀫𑁆𑀫𑀡𑁂. 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂𑀢𑀺 𑀅𑀦𑀺𑀝𑁆𑀞𑀲𑀪𑀸𑀯𑁂 𑀭𑀽𑀧𑀸𑀭𑀫𑁆𑀫𑀡𑁂. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀤𑁄𑀲𑀯𑀲𑁂𑀦 𑀧𑀽𑀢𑀺𑀪𑀸𑀯𑀫𑀸𑀧𑀚𑁆𑀚𑀢𑀺. 𑀑𑀢𑀸𑀭𑀦𑁆𑀢𑀺 𑀙𑀺𑀤𑁆𑀤𑀁 𑀅𑀦𑁆𑀢𑀭𑀁. 𑀆𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀘𑀬𑀁.

𑀅𑀥𑀺𑀪𑀁𑀲𑀽𑀢𑀺 ¶ 𑀫𑀤𑁆𑀤𑀁𑀲𑀼. 𑀦 𑀅𑀥𑀺𑀪𑁄𑀲𑀻𑀢𑀺 𑀦 𑀫𑀤𑁆𑀤𑀺. 𑀩𑀳𑀮𑀫𑀢𑁆𑀢𑀺𑀓𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀯𑀲𑁂𑀦 𑀉𑀤𑁆𑀥𑀫𑀸𑀬𑀺𑀓𑀸 𑀩𑀳𑀮𑀫𑀢𑁆𑀢𑀺𑀓𑀸. 𑀅𑀤𑁆𑀤𑀸𑀯𑀮𑁂𑀧𑀦𑀸𑀢𑀺 𑀅𑀲𑀼𑀓𑁆𑀔𑀫𑀢𑁆𑀢𑀺𑀓𑀤𑀸𑀦𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀁.

𑀦𑀯𑀫𑀁.

𑁧𑁫𑁦. 𑀤𑀲𑀫𑁂 𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀧𑀸𑀤𑀲𑁆𑀲 𑀕𑁂𑀳𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀲𑀸𑀬𑀯𑀢𑁆𑀣𑁄 𑀳𑀼𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺.

𑀤𑀲𑀫𑀁.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸

𑁧𑁫𑁧. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀭𑀲𑁂𑀲𑀽𑀢𑀺 𑀅𑀫𑁆𑀩𑀺𑀮𑀫𑀥𑀼𑀭𑀢𑀺𑀢𑁆𑀢𑀓𑀓𑀝𑀼𑀓𑀮𑁄𑀡𑀺𑀓𑀔𑀸𑀭𑀺𑀓𑀓𑀲𑀸𑀯𑀸𑀤𑀺𑀪𑁂𑀤𑁂𑀲𑀼 𑀲𑀸𑀬𑀦𑀻𑀬𑁂𑀲𑀼. 𑀕𑁂𑀥𑀁 𑀅𑀓𑀭𑀦𑁆𑀢𑀺 𑀕𑀺𑀤𑁆𑀥𑀺𑀁 𑀅𑀓𑀭𑁄𑀦𑁆𑀢𑁄, 𑀢𑀡𑁆𑀳𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁄𑀮𑁄𑀢𑀺 ‘‘𑀇𑀤𑀁 𑀲𑀸𑀬𑀺𑀲𑁆𑀲𑀸𑀫𑀺, 𑀇𑀤𑀁 𑀲𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀭𑀲𑀯𑀺𑀲𑁂𑀲𑁂𑀲𑀼 𑀅𑀦𑀸𑀓𑀼𑀮𑁄. 𑀅𑀦𑀜𑁆𑀜𑀧𑁄𑀲𑀻𑀢𑀺 𑀧𑁄𑀲𑁂𑀢𑀩𑁆𑀩𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀯𑀺𑀭𑀳𑀺𑀢𑁄, 𑀓𑀸𑀬𑀲𑀦𑁆𑀥𑀸𑀭𑀡𑀫𑀢𑁆𑀢𑁂𑀦 𑀲𑀦𑁆𑀢𑀼𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀯𑀸 𑀧𑀼𑀩𑁆𑀩𑁂 𑀉𑀬𑁆𑀬𑀸𑀦𑁂 𑀭𑀲𑁂𑀲𑀼 𑀕𑁂𑀥𑀓𑀭𑀡𑀮𑁄𑀮𑁄 𑀳𑀼𑀢𑁆𑀯𑀸 𑀅𑀜𑁆𑀜𑀧𑁄𑀲𑀻 𑀆𑀲𑀺𑀁, 𑀏𑀯𑀁 𑀅𑀳𑀼𑀢𑁆𑀯𑀸 𑀬𑀸𑀬 𑀢𑀡𑁆𑀳𑀸𑀬 𑀮𑁄𑀮𑁄 𑀳𑀼𑀢𑁆𑀯𑀸 𑀭𑀲𑁂𑀲𑀼 𑀕𑁂𑀥𑀁 𑀓𑀭𑁄𑀢𑀺, 𑀢𑀁 𑀢𑀡𑁆𑀳𑀁 𑀳𑀺𑀢𑁆𑀯𑀸 𑀆𑀬𑀢𑀺𑀁 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀅𑀜𑁆𑀜𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀜𑁆𑀜𑀧𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀅𑀢𑁆𑀣𑀪𑀜𑁆𑀚𑀦𑀓𑀝𑁆𑀞𑁂𑀦 𑀓𑀺𑀮𑁂𑀲𑀸 ‘‘𑀅𑀜𑁆𑀜𑁂’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀧𑁄𑀲𑀦𑁂𑀦 𑀅𑀦𑀜𑁆𑀜𑀧𑁄𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀧𑀤𑀸𑀦𑀘𑀸𑀭𑀻𑀢𑀺 𑀅𑀯𑁄𑀓𑁆𑀓𑀫𑁆𑀫𑀘𑀸𑀭𑀻 𑀅𑀦𑀼𑀧𑀼𑀩𑁆𑀩𑀘𑀸𑀭𑀻, 𑀖𑀭𑀧𑀝𑀺𑀧𑀸𑀝𑀺𑀁 𑀅𑀙𑀟𑁆𑀟𑁂𑀢𑁆𑀯𑀸 𑀅𑀟𑁆𑀠𑀓𑀼𑀮𑀜𑁆𑀘 𑀤𑀮𑀺𑀤𑁆𑀤𑀓𑀼𑀮𑀜𑁆𑀘 𑀦𑀺𑀭𑀦𑁆𑀢𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀺𑀮𑁂𑀲𑀯𑀲𑁂𑀦 𑀅𑀮𑀕𑁆𑀕𑀘𑀺𑀢𑁆𑀢𑁄, 𑀘𑀦𑁆𑀤𑀽𑀧𑀫𑁄 𑀦𑀺𑀘𑁆𑀘𑀦𑀯𑀓𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁫; 𑀅𑀧. 𑀅𑀝𑁆𑀞. 𑁧.𑁧.𑁧𑁨𑁧).

𑀧𑀞𑀫𑀁.

𑁧𑁫𑁨. 𑀤𑀼𑀢𑀺𑀬𑁂 ¶ ¶ 𑀆𑀯𑀭𑀡𑀸𑀦𑀻𑀢𑀺 𑀦𑀻𑀯𑀭𑀡𑀸𑀦𑁂𑀯, 𑀢𑀸𑀦𑀺 𑀅𑀢𑁆𑀣𑀢𑁄 𑀉𑀭𑀕𑀲𑀼𑀢𑁆𑀢𑁂 (𑀲𑀼. 𑀦𑀺. 𑁧 𑀆𑀤𑀬𑁄) 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀅𑀩𑁆𑀪𑀸𑀤𑀬𑁄 𑀯𑀺𑀬 𑀘𑀦𑁆𑀤𑀁 𑀲𑀽𑀭𑀺𑀬𑀁 𑀯𑀸 𑀘𑁂𑀢𑁄 𑀆𑀯𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀯𑀭𑀡𑀸𑀦𑀺 𑀘𑁂𑀢𑀲𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀧𑀳𑀸𑀬. 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀉𑀧𑀕𑀫𑁆𑀫 𑀘𑀺𑀢𑁆𑀢𑀁 𑀯𑀺𑀩𑀸𑀥𑁂𑀦𑁆𑀢𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂, 𑀯𑀢𑁆𑀣𑁄𑀧𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁭𑁦 𑀆𑀤𑀬𑁄) 𑀯𑀼𑀢𑁆𑀢𑁂 𑀅𑀪𑀺𑀚𑁆𑀛𑀸𑀤𑀬𑁄 𑀯𑀸. 𑀩𑁆𑀬𑀧𑀦𑀼𑀚𑁆𑀚𑀸𑀢𑀺 𑀧𑀦𑀼𑀤𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀧𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄 ¶ . 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑁂. 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀦𑁆𑀦𑁄 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀦𑀺𑀲𑁆𑀲𑀺𑀢𑁄. 𑀲𑁂𑀲𑀫𑀕𑁆𑀕𑁂𑀳𑀺 𑀙𑁂𑀢𑁆𑀯𑀸 𑀢𑁂𑀥𑀸𑀢𑀼𑀓𑀕𑀢𑀁 𑀲𑀺𑀦𑁂𑀳𑀤𑁄𑀲𑀁, 𑀢𑀡𑁆𑀳𑀸𑀭𑀸𑀕𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀦𑁂𑀳𑁄 𑀏𑀯 𑀳𑀺 𑀕𑀼𑀡𑀧𑀝𑀺𑀧𑀓𑁆𑀔𑀢𑁄 𑀲𑀺𑀦𑁂𑀳𑀤𑁄𑀲𑁄𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁬).

𑀤𑀼𑀢𑀺𑀬𑀁.

𑁧𑁫𑁩. 𑀢𑀢𑀺𑀬𑁂 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦𑀸𑀢𑀺 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸, 𑀙𑀟𑁆𑀟𑁂𑀢𑁆𑀯𑀸 𑀚𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀁 𑀤𑀼𑀔𑀜𑁆𑀘𑀸𑀢𑀺 𑀓𑀸𑀬𑀺𑀓𑀁 𑀲𑀸𑀢𑀸𑀲𑀸𑀢𑀁. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀦𑁆𑀢𑀺 𑀘𑁂𑀢𑀲𑀺𑀓𑀁 𑀲𑀸𑀢𑀸𑀲𑀸𑀢𑀁. 𑀉𑀧𑁂𑀓𑁆𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁. 𑀲𑀫𑀣𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀣𑀫𑁂𑀯. 𑀯𑀺𑀲𑀼𑀤𑁆𑀥𑀦𑁆𑀢𑀺 𑀧𑀜𑁆𑀘𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀗𑁆𑀔𑀸𑀢𑁂𑀳𑀺 𑀦𑀯𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀢𑀺𑀲𑀼𑀤𑁆𑀥𑀁, 𑀦𑀺𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀫𑀺𑀯 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀓𑁆𑀔𑀜𑁆𑀘 𑀧𑀼𑀩𑁆𑀩𑁂𑀯, 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑀪𑀽𑀫𑀺𑀬𑀁𑀬𑁂𑀯 𑀤𑀼𑀓𑁆𑀔𑀁, 𑀢𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑀪𑀽𑀫𑀺𑀬𑀜𑁆𑀘 𑀲𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀦 𑀆𑀤𑀺𑀢𑁄 𑀯𑀼𑀢𑁆𑀢𑀁 𑀘-𑀓𑀸𑀭𑀁 𑀧𑀭𑀢𑁄 𑀦𑁂𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀜𑁆𑀘 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀧𑀼𑀩𑁆𑀩𑁂𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀢𑁂𑀦 𑀲𑁄𑀫𑀦𑀲𑁆𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂, 𑀤𑁄𑀫𑀦𑀲𑁆𑀲𑀜𑁆𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀏𑀢𑀸𑀦𑀺 𑀳𑀺 𑀏𑀢𑁂𑀲𑀁 𑀧𑀭𑀺𑀬𑀸𑀬𑀢𑁄 𑀧𑀳𑀸𑀦𑀝𑁆𑀞𑀸𑀦𑀸𑀦𑀺. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀤𑀼𑀓𑁆𑀔𑀲𑁆𑀲 𑀧𑀞𑀫𑀚𑁆𑀛𑀸𑀦𑀁, 𑀤𑁄𑀫𑀦𑀲𑁆𑀲𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀁, 𑀲𑀼𑀔𑀲𑁆𑀲 𑀢𑀢𑀺𑀬𑀚𑁆𑀛𑀸𑀦𑀁, 𑀲𑁄𑀫𑀦𑀲𑁆𑀲𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀳𑀸𑀦𑀝𑁆𑀞𑀸𑀦𑀁. 𑀬𑀣𑀸𑀳 𑁋 ‘‘𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁫𑁧𑁦). 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀭𑀢𑁄 𑀧𑀼𑀩𑁆𑀩𑁂𑀯𑀸𑀢𑀺 𑀢𑀻𑀲𑀼 𑀧𑀞𑀫𑀚𑁆𑀛𑀸𑀦𑀤𑀻𑀲𑀼 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀸𑀦𑀺 ¶ 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸 𑀏𑀢𑁆𑀣𑁂𑀯 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑁄𑀫𑀦𑀲𑁆𑀲𑀁 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁 𑀏𑀓𑁄 𑀘𑀭𑁂 𑀇𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁭; 𑀅𑀧. 𑀅𑀝𑁆𑀞. 𑁧.𑁧.𑁧𑁨𑁩).

𑀢𑀢𑀺𑀬𑀁.

𑁧𑁫𑁪. 𑀘𑀢𑀼𑀢𑁆𑀣𑁂 ¶ ¶ 𑀆𑀭𑀤𑁆𑀥𑀁 𑀯𑀻𑀭𑀺𑀬𑀁 𑀅𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀺𑀭𑀺𑀬𑁄. 𑀏𑀢𑁂𑀦 𑀅𑀢𑁆𑀢𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀁 𑀆𑀤𑀺𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀧𑀭𑀫𑀢𑁆𑀣𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀧𑀢𑁆𑀢𑀺𑀬𑀸 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸. 𑀏𑀢𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀧𑀢𑁆𑀢𑀩𑁆𑀩𑀨𑀮𑀁 𑀤𑀲𑁆𑀲𑁂𑀢𑀺. 𑀅𑀮𑀻𑀦𑀘𑀺𑀢𑁆𑀢𑁄𑀢𑀺 𑀏𑀢𑁂𑀦 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀮𑀻𑀦𑀢𑀁 𑀤𑀲𑁆𑀲𑁂𑀢𑀺. 𑀅𑀓𑀼𑀲𑀻𑀢𑀯𑀼𑀢𑁆𑀢𑀻𑀢𑀺 𑀏𑀢𑁂𑀦 𑀞𑀸𑀦𑀸𑀲𑀦𑀘𑀗𑁆𑀓𑀫𑀸𑀤𑀻𑀲𑀼 𑀓𑀸𑀬𑀲𑁆𑀲 𑀅𑀦𑀯𑀲𑀻𑀤𑀦𑀁. 𑀤𑀴𑁆𑀳𑀦𑀺𑀓𑁆𑀓𑀫𑁄𑀢𑀺 𑀏𑀢𑁂𑀦 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸’’𑀢𑀺 (𑀫. 𑀦𑀺. 𑁧.𑁧𑁮𑁪; 𑀲𑀁. 𑀦𑀺. 𑁨.𑁨𑁨; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀧𑀯𑀢𑁆𑀢𑀁 𑀧𑀤𑀳𑀦𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀬𑀁 𑀢𑀁 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀤𑀻𑀲𑀼 𑀧𑀤𑀳𑀦𑁆𑀢𑁄 ‘‘𑀓𑀸𑀬𑁂𑀦 𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀦𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀏𑀢𑁂𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀢𑀜𑁆𑀳𑀺 𑀤𑀴𑁆𑀳𑀜𑁆𑀘 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀕𑀢𑀢𑁆𑀢𑀸, 𑀦𑀺𑀓𑁆𑀓𑀫𑁄 𑀘 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀸 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄𑀧𑀺 𑀤𑀴𑁆𑀳𑁄 𑀦𑀺𑀓𑁆𑀓𑀫𑁄 𑀅𑀲𑁆𑀲𑀸𑀢𑀺 ‘‘𑀤𑀴𑁆𑀳𑀦𑀺𑀓𑁆𑀓𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀣𑀸𑀫𑀩𑀮𑀽𑀧𑀧𑀦𑁆𑀦𑁄𑀢𑀺 𑀫𑀕𑁆𑀕𑀓𑁆𑀔𑀡𑁂 𑀓𑀸𑀬𑀣𑀸𑀫𑁂𑀦 𑀜𑀸𑀡𑀩𑀮𑁂𑀦 𑀘 𑀉𑀧𑀧𑀦𑁆𑀦𑁄. 𑀅𑀣 𑀯𑀸 𑀣𑀸𑀫𑀪𑀽𑀢𑁂𑀦 𑀩𑀮𑁂𑀦 𑀉𑀧𑀧𑀦𑁆𑀦𑁄𑀢𑀺 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀣𑀺𑀭𑀜𑀸𑀡𑀩𑀮𑀽𑀧𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑁄𑀕𑀁 𑀤𑀻𑀧𑁂𑀦𑁆𑀢𑁄 𑀬𑁄𑀦𑀺𑀲𑁄 𑀧𑀤𑀳𑀦𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀼𑀩𑁆𑀩𑀪𑀸𑀕𑀫𑀚𑁆𑀛𑀺𑀫𑀉𑀓𑁆𑀓𑀝𑁆𑀞𑀯𑀻𑀭𑀺𑀬𑀯𑀲𑁂𑀦 𑀯𑀸 𑀢𑀬𑁄𑀧𑀺 𑀧𑀸𑀤𑀸 𑀬𑁄𑀚𑁂𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁮).

𑀘𑀢𑀼𑀢𑁆𑀣𑀁.

𑁧𑁫𑁫. 𑀧𑀜𑁆𑀘𑀫𑁂 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀮𑁆𑀮𑀻𑀦𑀁, 𑀏𑀓𑀢𑁆𑀢𑀲𑁂𑀯𑀺𑀢𑀸 𑀏𑀓𑀻𑀪𑀸𑀯𑁄 𑀓𑀸𑀬𑀯𑀺𑀯𑁂𑀓𑁄𑀢𑀺 𑀅𑀢𑁆𑀣𑁄. 𑀛𑀸𑀦𑀦𑁆𑀢𑀺 𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 ‘‘𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 ¶ 𑀲𑀢𑁆𑀢𑀲𑀜𑁆𑀜𑀸𑀤𑀺𑀧𑀘𑁆𑀘𑀦𑀻𑀓𑀛𑀸𑀧𑀦𑀢𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑁄 𑀘 ‘‘𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 ¶ . 𑀏𑀯𑀫𑁂𑀢𑀁 𑀧𑀝𑀺𑀲𑀮𑁆𑀮𑀸𑀦𑀜𑁆𑀘 𑀛𑀸𑀦𑀜𑁆𑀘 𑀅𑀭𑀺𑀜𑁆𑀘𑀫𑀸𑀦𑁄𑀢𑀺 𑀅𑀚𑀳𑀫𑀸𑀦𑁄 𑀅𑀦𑀺𑀲𑁆𑀲𑀚𑁆𑀚𑀫𑀸𑀦𑁄. 𑀥𑀫𑁆𑀫𑁂𑀲𑀽𑀢𑀺 𑀯𑀺𑀧𑀲𑁆𑀲𑀦𑀼𑀧𑀕𑁂𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼. 𑀦𑀺𑀘𑁆𑀘𑀦𑁆𑀢𑀺 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁. 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑁂𑀦 𑀅𑀦𑀼𑀕𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀘𑀭𑀫𑀸𑀦𑁄. 𑀅𑀣 𑀯𑀸 𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀥𑀫𑁆𑀫𑀸𑀢𑀺 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑁄 𑀥𑀫𑁆𑀫𑁄𑀢𑀺 𑀅𑀦𑀼𑀥𑀫𑁆𑀫𑁄, 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 ‘‘𑀥𑀫𑁆𑀫𑀸𑀦𑀁 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 ‘‘𑀥𑀫𑁆𑀫𑁂𑀲𑀽’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀽𑀢𑀺 𑀢𑀸𑀬 𑀅𑀦𑀼𑀥𑀫𑁆𑀫𑀘𑀸𑀭𑀺𑀢𑀸𑀲𑀗𑁆𑀔𑀸𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀺𑀤𑁄𑀲𑀁 𑀢𑀻𑀲𑀼 𑀪𑀯𑁂𑀲𑀼 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀏𑀯𑀁 𑀇𑀫𑀸𑀬 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀁 𑀅𑀭𑀺𑀜𑁆𑀘𑀫𑀸𑀦𑁄 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 ¶ 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑁄𑀢𑀺 𑀯𑀢𑁆𑀢𑀩𑁆𑀩𑁄 𑀏𑀓𑁄 𑀘𑀭𑁂𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 (𑀲𑀼. 𑀦𑀺. 𑀅𑀝𑁆𑀞. 𑁧.𑁬𑁯; 𑀅𑀧. 𑀅𑀝𑁆𑀞. 𑁧.𑁧.𑁧𑁨𑁫).

𑀧𑀜𑁆𑀘𑀫𑀁.

𑁧𑁫𑁬. 𑀙𑀝𑁆𑀞𑁂 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀏𑀯𑀁 𑀤𑀺𑀝𑁆𑀞𑀸𑀤𑀻𑀦𑀯𑀸𑀬 𑀢𑀡𑁆𑀳𑀸𑀬 𑀏𑀯 𑀅𑀧𑁆𑀧𑀯𑀢𑁆𑀢𑀺𑀁. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀸𑀢𑀘𑁆𑀘𑀓𑀸𑀭𑀻. 𑀅𑀦𑁂𑀴𑀫𑀽𑀕𑁄𑀢𑀺 𑀅𑀮𑀸𑀮𑀸𑀫𑀼𑀔𑁄. 𑀅𑀣 𑀯𑀸 𑀅𑀦𑁂𑀴𑁄 𑀘 𑀅𑀫𑀽𑀕𑁄 𑀘, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀺𑀢𑀲𑀼𑀔𑀲𑀫𑁆𑀧𑀸𑀧𑀓𑀁 𑀲𑀼𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀢𑀯𑀸, 𑀆𑀕𑀫𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀻𑀫𑀸𑀢𑀺 𑀘𑀺𑀭𑀓𑀢𑀸𑀤𑀻𑀦𑀁 𑀅𑀦𑀼𑀲𑁆𑀲𑀭𑀺𑀢𑀸. 𑀲𑀗𑁆𑀔𑀸𑀢𑀥𑀫𑁆𑀫𑁄𑀢𑀺 𑀥𑀫𑁆𑀫𑀽𑀧𑀧𑀭𑀺𑀓𑁆𑀔𑀸𑀬 𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑁄. 𑀦𑀺𑀬𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀬𑀸𑀫𑀁 𑀧𑀢𑁆𑀢𑁄. 𑀧𑀥𑀸𑀦𑀯𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀏𑀲 𑀧𑀸𑀞𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀫𑁂𑀢𑁂𑀳𑀺 𑀅𑀧𑁆𑀧𑀫𑀸𑀤𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀬𑀸𑀫𑀲𑀫𑁆𑀧𑀸𑀧𑀓𑁂𑀦 𑀧𑀥𑀸𑀦𑁂𑀦 𑀧𑀥𑀸𑀦𑀯𑀸, 𑀢𑁂𑀦 𑀧𑀥𑀸𑀦𑁂𑀦 𑀧𑀢𑁆𑀢𑀦𑀺𑀬𑀸𑀫𑀢𑁆𑀢𑀸 𑀦𑀺𑀬𑀢𑁄, 𑀢𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀢𑀥𑀫𑁆𑀫𑁄. 𑀅𑀭𑀳𑀸 𑀳𑀺 𑀧𑀼𑀦 𑀲𑀗𑁆𑀔𑀸𑀢𑀩𑁆𑀩𑀸𑀪𑀸𑀯𑀢𑁄 ‘‘𑀲𑀗𑁆𑀔𑀸𑀢𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥𑀸’’𑀢𑀺 (𑀲𑀁. 𑀦𑀺. 𑁨.𑁩𑁧; 𑀲𑀼. 𑀦𑀺. 𑁧𑁦𑁪𑁪; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁬𑁩, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭; 𑀦𑁂𑀢𑁆𑀢𑀺. 𑁧𑁪; 𑀧𑁂𑀝𑀓𑁄. 𑁪𑁫). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁦).

𑀙𑀝𑁆𑀞𑀁.

𑁧𑁫𑁭. 𑀲𑀢𑁆𑀢𑀫𑁂 ¶ ¶ 𑀲𑀻𑀳𑁄𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑁋 𑀢𑀺𑀡𑀲𑀻𑀳𑁄, 𑀧𑀡𑁆𑀟𑀼𑀲𑀻𑀳𑁄, 𑀓𑀸𑀴𑀲𑀻𑀳𑁄, 𑀓𑁂𑀲𑀭𑀲𑀻𑀳𑁄𑀢𑀺. 𑀢𑁂𑀲𑀁 𑀓𑁂𑀲𑀭𑀲𑀻𑀳𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀏𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀯𑀸𑀢𑁄 𑀧𑀼𑀭𑀢𑁆𑀣𑀺𑀫𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄. 𑀧𑀤𑀼𑀫𑀁 𑀭𑀢𑁆𑀢𑀲𑁂𑀢𑀸𑀤𑀺𑀯𑀲𑁂𑀦. 𑀢𑁂𑀲𑀼 𑀬𑁄 𑀓𑁄𑀘𑀺 𑀯𑀸𑀢𑁄 𑀬𑀁 𑀓𑀺𑀜𑁆𑀘𑀺 𑀧𑀤𑀼𑀫𑀁 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣 𑀬𑀲𑁆𑀫𑀸 𑀲𑀦𑁆𑀢𑀸𑀲𑁄 𑀅𑀢𑁆𑀢𑀲𑀺𑀦𑁂𑀳𑁂𑀦 𑀳𑁄𑀢𑀺, 𑀅𑀢𑁆𑀢𑀲𑀺𑀦𑁂𑀳𑁄 𑀘 𑀢𑀡𑁆𑀳𑀸𑀮𑁂𑀧𑁄, 𑀲𑁄𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀸 𑀮𑁄𑀪𑁂𑀦 𑀳𑁄𑀢𑀺, 𑀲𑁄𑀧𑀺 𑀘 𑀢𑀡𑁆𑀳𑀸𑀬𑁂𑀯. 𑀲𑀚𑁆𑀚𑀦𑀁 𑀧𑀦 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀸𑀯𑀺𑀭𑀳𑀺𑀢𑀲𑁆𑀲 𑀫𑁄𑀳𑁂𑀦 𑀳𑁄𑀢𑀺, 𑀫𑁄𑀳𑁄 𑀘 𑀅𑀯𑀺𑀚𑁆𑀚𑀸. 𑀢𑀢𑁆𑀣 𑀲𑀫𑀣𑁂𑀦 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀅𑀯𑀺𑀚𑁆𑀚𑀸𑀬. 𑀢𑀲𑁆𑀫𑀸 𑀲𑀫𑀣𑁂𑀦 𑀅𑀢𑁆𑀢𑀲𑀺𑀦𑁂𑀳𑀁 𑀧𑀳𑀸𑀬 𑀲𑀻𑀳𑁄 𑀯𑀺𑀬 𑀲𑀤𑁆𑀤𑁂𑀲𑀼 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀻𑀲𑀼𑀅𑀲𑀦𑁆𑀢𑀲𑀦𑁆𑀢𑁄, 𑀯𑀺𑀧𑀲𑁆𑀲𑀦𑀸𑀬 𑀫𑁄𑀳𑀁 𑀧𑀳𑀸𑀬 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑁄, 𑀲𑀫𑀣𑁂𑀦𑁂𑀯 𑀮𑁄𑀪𑀁, 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀁 𑀏𑀯 𑀤𑀺𑀝𑁆𑀞𑀺𑀜𑁆𑀘 𑀧𑀳𑀸𑀬, 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀲𑀩𑁆𑀩𑀪𑀯𑀪𑁄𑀕𑀮𑁄𑀪𑁂𑀦 𑀅𑀮𑀺𑀧𑁆𑀧𑀫𑀸𑀦𑁄.

𑀏𑀢𑁆𑀣 ¶ 𑀘 𑀲𑀫𑀣𑀲𑁆𑀲 𑀲𑀻𑀮𑀁 𑀧𑀤𑀝𑁆𑀞𑀸𑀦𑀁, 𑀲𑀫𑀣𑁄 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀢𑀺 𑀏𑀯𑀁 𑀢𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀲𑀺𑀤𑁆𑀥𑁂𑀲𑀼 𑀢𑀬𑁄𑀧𑀺 𑀔𑀦𑁆𑀥𑀸 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀼𑀭𑀢𑁄 𑀳𑁄𑀢𑀺, 𑀲𑁄 𑀲𑀻𑀳𑁄𑀯 𑀲𑀤𑁆𑀥𑁂𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀅𑀓𑀼𑀚𑁆𑀛𑀺𑀢𑀼𑀓𑀸𑀫𑀢𑀸𑀬 𑀦 𑀲𑀦𑁆𑀢𑀲𑀢𑀺, 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀧𑀝𑀺𑀯𑀺𑀤𑁆𑀥𑀲𑀪𑀸𑀯𑁄 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑀪𑁂𑀤𑁂 𑀦 𑀲𑀚𑁆𑀚𑀢𑀺, 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀯𑀻𑀢𑀭𑀸𑀕𑁄 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀭𑀸𑀕𑁂𑀦 𑀦 𑀮𑀺𑀧𑁆𑀧𑀢𑀺. 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁, 𑀢𑀺𑀡𑁆𑀡𑀜𑁆𑀘 𑀅𑀓𑀼𑀲𑀮𑀫𑀽𑀮𑀸𑀦𑀁 𑀧𑀳𑀸𑀦𑀯𑀲𑁂𑀦 𑀅𑀲𑀦𑁆𑀢𑀲𑀦𑁆𑀢𑁄 𑀅𑀲𑀚𑁆𑀚𑀫𑀸𑀦𑁄 𑀅𑀮𑀺𑀧𑁆𑀧𑀫𑀸𑀦𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁧; 𑀅𑀧. 𑀅𑀝𑁆𑀞. 𑁧.𑁧.𑁧𑁨𑁭).

𑀲𑀢𑁆𑀢𑀫𑀁.

𑁧𑁫𑁮. 𑀅𑀝𑁆𑀞𑀫𑁂 𑀲𑀳𑀦𑀸 𑀘 𑀳𑀦𑀦𑀸 𑀘 𑀲𑀻𑀖𑀚𑀯𑀢𑁆𑀢𑀸 𑀘 𑀲𑀻𑀳𑁄. 𑀓𑁂𑀲𑀭𑀲𑀻𑀳𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀤𑀸𑀞𑀸 𑀩𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀤𑀸𑀞𑀩𑀮𑀻. 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬𑀸𑀢𑀺 𑀉𑀪𑀬𑀁 𑀘𑀸𑀭𑀻𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑀩𑁆𑀩𑀁 𑀧𑀲𑀬𑁆𑀳𑀘𑀸𑀭𑀻 𑀅𑀪𑀺𑀪𑀼𑀬𑁆𑀬𑀘𑀸𑀭𑀻𑀢𑀺. 𑀢𑀢𑁆𑀣 𑀧𑀲𑀬𑁆𑀳 𑀦𑀺𑀕𑁆𑀕𑀬𑁆𑀳 𑀧𑀯𑀸𑀳𑁂𑀢𑁆𑀯𑀸 𑀘𑀭𑀡𑁂𑀦 𑀧𑀲𑀬𑁆𑀳𑀘𑀸𑀭𑀻 ¶ . 𑀅𑀪𑀺𑀪𑀯𑀺𑀢𑁆𑀯𑀸 ¶ 𑀲𑀦𑁆𑀢𑀸𑀲𑁂𑀢𑁆𑀯𑀸 𑀯𑀲𑀻𑀓𑀢𑁆𑀯𑀸 𑀘𑀭𑀡𑁂𑀦 𑀅𑀪𑀺𑀪𑀼𑀬𑁆𑀳𑀘𑀸𑀭𑀻. 𑀲𑁆𑀯𑀸𑀬𑀁 𑀓𑀸𑀬𑀩𑀮𑁂𑀦 𑀧𑀲𑀬𑁆𑀳𑀘𑀸𑀭𑀻, 𑀢𑁂𑀚𑀲𑀸 𑀅𑀪𑀺𑀪𑀼𑀬𑁆𑀬𑀘𑀸𑀭𑀻. 𑀢𑀢𑁆𑀣 𑀲𑀘𑁂 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀓𑀺𑀁 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬𑀘𑀸𑀭𑀻’’𑀢𑀺. 𑀢𑀢𑁄 𑀫𑀺𑀕𑀸𑀦𑀦𑁆𑀢𑀺 𑀲𑀸𑀫𑀺𑀯𑀘𑀦𑀁 𑀉𑀧𑀬𑁄𑀕𑀢𑁆𑀣𑁂 𑀓𑀢𑁆𑀯𑀸 ‘‘𑀫𑀺𑀕𑁂 𑀧𑀲𑀬𑁆𑀳 𑀅𑀪𑀺𑀪𑀼𑀬𑁆𑀬𑀘𑀸𑀭𑀻’’𑀢𑀺 𑀧𑀝𑀺𑀯𑀢𑁆𑀢𑀩𑁆𑀩𑀁. 𑀧𑀦𑁆𑀢𑀸𑀦𑀻𑀢𑀺 𑀤𑀽𑀭𑀸𑀦𑀺. 𑀲𑁂𑀦𑀸𑀲𑀦𑀸𑀦𑀻𑀢𑀺 𑀯𑀲𑀦𑀝𑁆𑀞𑀸𑀦𑀸𑀦𑀺. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁨).

𑀅𑀝𑁆𑀞𑀫𑀁.

𑁧𑁫𑁯. 𑀦𑀯𑀫𑁂 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀪𑀯𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺𑀢𑀲𑀼𑀔𑀽𑀧𑀦𑀬𑀦𑀓𑀸𑀫𑀢𑀸 𑀫𑁂𑀢𑁆𑀢𑀸. ‘‘𑀅𑀳𑁄 𑀯𑀢 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀯𑀺𑀫𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀳𑀺𑀢𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀓𑀭𑀼𑀡𑀸. ‘‘𑀫𑁄𑀤𑀦𑁆𑀢𑀺 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸, 𑀫𑁄𑀤𑀦𑁆𑀢𑀺 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺𑀢𑀲𑀼𑀔𑀸𑀯𑀺𑀧𑁆𑀧𑀬𑁄𑀕𑀓𑀸𑀫𑀢𑀸 𑀫𑀼𑀤𑀺𑀢𑀸. ‘‘𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺 𑀲𑀼𑀔𑀤𑀼𑀓𑁆𑀔𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀉𑀧𑁂𑀓𑁆𑀔𑀸. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀫𑁂𑀢𑁆𑀢𑀁 𑀯𑀢𑁆𑀯𑀸 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸, 𑀫𑀼𑀤𑀺𑀢𑀸 𑀘 𑀧𑀘𑁆𑀙𑀸. 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀘𑀢𑀲𑁆𑀲𑁄𑀧𑀺 𑀳𑀺 𑀯𑀺𑀫𑀼𑀢𑁆𑀢𑀻. 𑀏𑀢𑀸 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂’’𑀢𑀺.

𑀢𑀢𑁆𑀣 ¶ 𑀆𑀲𑁂𑀯𑀫𑀸𑀦𑁄𑀢𑀺 𑀢𑀺𑀲𑁆𑀲𑁄 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀪𑀸𑀯𑀬𑀫𑀸𑀦𑁄, 𑀉𑀧𑁂𑀓𑁆𑀔𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀪𑀸𑀯𑀬𑀫𑀸𑀦𑁄. 𑀓𑀸𑀮𑁂𑀢𑀺 𑀫𑁂𑀢𑁆𑀢𑀁 𑀆𑀲𑁂𑀯𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀓𑀭𑀼𑀡𑀁, 𑀢𑀢𑁄 𑀯𑀼𑀝𑁆𑀞𑀸𑀬 𑀫𑀼𑀤𑀺𑀢𑀁, 𑀢𑀢𑁄 𑀇𑀢𑀭𑀢𑁄 𑀯𑀸 𑀦𑀺𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀉𑀧𑁂𑀓𑁆𑀔𑀁 𑀆𑀲𑁂𑀯𑀫𑀸𑀦𑁄𑀯 ‘‘𑀓𑀸𑀮𑁂 𑀆𑀲𑁂𑀯𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀆𑀲𑁂𑀯𑀺𑀢𑀼𑀁 𑀨𑀸𑀲𑀼𑀓𑀸𑀮𑁂 𑀯𑀸. 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄𑀢𑀺 𑀤𑀲𑀲𑀼 𑀤𑀺𑀲𑀸𑀲𑀼 𑀲𑀩𑁆𑀩𑁂𑀦 𑀲𑀢𑁆𑀢𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄. 𑀫𑁂𑀢𑁆𑀢𑀸𑀤𑀻𑀦𑀜𑁆𑀳𑀺 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀸 𑀳𑁄𑀦𑁆𑀢𑀺, 𑀲𑀢𑁆𑀢𑁂𑀲𑀼𑀧𑀺 𑀯𑀺𑀭𑁄𑀥𑀪𑀽𑀢𑁄 𑀧𑀝𑀺𑀖𑁄 𑀯𑀽𑀧𑀲𑀫𑁆𑀫𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁩).

𑀦𑀯𑀫𑀁.

𑁧𑁬𑁦. 𑀤𑀲𑀫𑁂 ¶ 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺, 𑀢𑀸𑀦𑀺 𑀘 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦. 𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀻𑀢𑀺 𑀚𑀻𑀯𑀺𑀢𑀲𑀗𑁆𑀔𑀬𑁄 𑀯𑀼𑀘𑁆𑀘𑀢𑀺 ¶ 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀭𑀺𑀪𑁂𑀤𑁄, 𑀢𑀲𑁆𑀫𑀺𑀜𑁆𑀘 𑀚𑀻𑀯𑀺𑀢𑀲𑀗𑁆𑀔𑀬𑁂 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀧𑀳𑀻𑀦𑀢𑁆𑀢𑀸 𑀅𑀲𑀦𑁆𑀢𑀲𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁪).

𑀤𑀲𑀫𑀁.

𑁧𑁬𑁧. 𑀏𑀓𑀸𑀤𑀲𑀫𑁂 𑀪𑀚𑀦𑁆𑀢𑀻𑀢𑀺 𑀲𑀭𑀻𑀭𑁂𑀦 𑀅𑀮𑁆𑀮𑀻𑀬𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀲𑁂𑀯𑀦𑁆𑀢𑀻𑀢𑀺 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀻𑀳𑀺 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀢𑀸𑀬 𑀘 𑀧𑀭𑀺𑀘𑀭𑀦𑁆𑀢𑀺. 𑀓𑀸𑀭𑀡𑀁 𑀅𑀢𑁆𑀣𑁄 𑀏𑀢𑁂𑀲𑀦𑁆𑀢𑀺 𑀓𑀸𑀭𑀡𑀢𑁆𑀣𑀸, 𑀪𑀚𑀦𑀸𑀬 𑀲𑁂𑀯𑀦𑀸𑀬 𑀘 𑀦𑀸𑀜𑁆𑀜𑀁 𑀓𑀸𑀭𑀡𑀫𑀢𑁆𑀣𑀺, 𑀅𑀢𑁆𑀣𑁄 𑀏𑀯 𑀢𑁂𑀲𑀁 𑀓𑀸𑀭𑀡𑀁, 𑀅𑀢𑁆𑀣𑀳𑁂𑀢𑀼 𑀲𑁂𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸𑀢𑀺 ‘‘𑀇𑀢𑁄 𑀓𑀺𑀜𑁆𑀘𑀺 𑀮𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀅𑀢𑁆𑀢𑀧𑀝𑀺𑀮𑀸𑀪𑀓𑀸𑀭𑀡𑁂𑀦 𑀦𑀺𑀓𑁆𑀓𑀸𑀭𑀡𑀸, 𑀓𑁂𑀯𑀮𑀁 𑁋

‘‘𑀉𑀧𑀓𑀸𑀭𑁄 𑀘 𑀬𑁄 𑀫𑀺𑀢𑁆𑀢𑁄, 𑀲𑀼𑀔𑁂 𑀤𑀼𑀓𑁆𑀔𑁂 𑀘 𑀬𑁄 𑀲𑀔𑀸;

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑁄 𑀫𑀺𑀢𑁆𑀢𑁄, 𑀬𑁄 𑀘 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀓𑁄’’𑀢𑀺. (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁫; 𑀅𑀧. 𑀅𑀝𑁆𑀞. 𑁧.𑁧.𑁧𑁩𑁧; 𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀁 𑀯𑀼𑀢𑁆𑀢𑁂𑀦 𑀅𑀭𑀺𑀬𑁂𑀦 𑀫𑀺𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸. 𑀅𑀢𑁆𑀢𑀦𑀺 𑀞𑀺𑀢𑀸 𑀏𑀢𑁂𑀲𑀁 𑀧𑀜𑁆𑀜𑀸, 𑀅𑀢𑁆𑀢𑀸𑀦𑀁𑀬𑁂𑀯 𑀑𑀮𑁄𑀓𑁂𑀦𑁆𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀅𑀢𑁆𑀢𑀝𑁆𑀞𑀧𑀜𑁆𑀜𑀸. ‘‘𑀤𑀺𑀝𑁆𑀞𑀢𑁆𑀣𑀧𑀜𑁆𑀜𑀸’’𑀢𑀺 𑀅𑀬𑀫𑁆𑀧𑀺 𑀓𑀺𑀭 𑀧𑁄𑀭𑀸𑀡𑀧𑀸𑀞𑁄 ¶ . 𑀲𑀫𑁆𑀧𑀢𑀺 𑀤𑀺𑀝𑁆𑀞𑁂𑀬𑁂𑀯 𑀅𑀢𑁆𑀣𑁂 𑀏𑀢𑁂𑀲𑀁 𑀧𑀜𑁆𑀜𑀸, 𑀆𑀬𑀢𑀺𑀁 𑀦 𑀧𑁂𑀓𑁆𑀔𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀺𑀦𑀸 𑀅𑀦𑀭𑀺𑀬𑁂𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀅𑀦𑁆𑀢𑀭𑀦𑁆𑀢𑀭𑀸 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀧𑀸𑀞𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁭𑁫; 𑀅𑀧. 𑀅𑀝𑁆𑀞. 𑁧.𑁧.𑁧𑁩𑁧). 𑀏𑀓𑀸𑀤𑀲𑀫𑀁.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬 𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸𑀬

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀬𑁄 ¶ ¶ ¶ 𑀲𑁄 𑀲𑀼𑀕𑀢𑀧𑀼𑀢𑁆𑀢𑀸𑀦𑀁, 𑀅𑀥𑀺𑀧𑀢𑀺𑀪𑀽𑀢𑁂𑀦 𑀳𑀺𑀢𑀭𑀢𑀺𑀦𑀸;

𑀣𑁂𑀭𑁂𑀦 𑀣𑀺𑀭𑀕𑀼𑀡𑀯𑀢𑀸, 𑀲𑀼𑀯𑀺𑀪𑀢𑁆𑀢𑁄 𑀫𑀳𑀸𑀦𑀺𑀤𑁆𑀤𑁂𑀲𑁄.

𑀢𑀲𑁆𑀲𑀢𑁆𑀣𑀯𑀡𑁆𑀡𑀦𑀸 𑀬𑀸, 𑀧𑀼𑀩𑁆𑀩𑀝𑁆𑀞𑀓𑀣𑀸𑀦𑀬𑀁 𑀢𑀣𑀸;

𑀬𑀼𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀬𑀸𑀭𑀤𑁆𑀥𑀸, 𑀦𑀺𑀝𑁆𑀞𑀸𑀦𑀫𑀼𑀧𑀕𑀢𑀸 𑀏𑀲𑀸.

𑀬𑀁 𑀧𑀼𑀭𑀁 𑀧𑀼𑀭𑀼𑀢𑁆𑀢𑀫𑀁, 𑀅𑀦𑀼𑀭𑀸𑀥𑀧𑀼𑀭𑀯𑁆𑀳𑀬𑀁;

𑀬𑁄 𑀢𑀲𑁆𑀲 𑀤𑀓𑁆𑀔𑀺𑀡𑁂 𑀪𑀸𑀕𑁂, 𑀫𑀳𑀸𑀯𑀺𑀳𑀸𑀭𑁄 𑀧𑀢𑀺𑀝𑁆𑀞𑀺𑀢𑁄.

𑀬𑁄 𑀢𑀲𑁆𑀲 𑀢𑀺𑀮𑀓𑁄 𑀪𑀽𑀢𑁄, 𑀫𑀳𑀸𑀣𑀽𑀧𑁄 𑀲𑀺𑀮𑀼𑀘𑁆𑀘𑀬𑁄;

𑀬𑀁 𑀢𑀲𑁆𑀲 𑀧𑀘𑁆𑀙𑀺𑀫𑁂 𑀪𑀸𑀕𑁂, 𑀮𑁂𑀔𑁄 𑀓𑀣𑀺𑀓𑀲𑀜𑁆𑀜𑀺𑀢𑁄.

𑀓𑀺𑀢𑁆𑀢𑀺𑀲𑁂𑀦𑁄𑀢𑀺 𑀦𑀸𑀫𑁂𑀦, 𑀲𑀚𑀻𑀯𑁄 𑀭𑀸𑀚𑀲𑀫𑁆𑀫𑀢𑁄;

𑀲𑀼𑀘𑀺𑀘𑀸𑀭𑀺𑀢𑁆𑀢𑀲𑀫𑁆𑀧𑀦𑁆𑀦𑁄, 𑀮𑁂𑀔𑁄 𑀓𑀼𑀲𑀮𑀓𑀫𑁆𑀫𑀺𑀓𑁄.

𑀲𑀻𑀢𑀘𑁆𑀙𑀸𑀬𑀢𑀭𑀼𑀧𑁂𑀢𑀁, 𑀲𑀮𑀺𑀮𑀸𑀲𑀬𑀲𑀫𑁆𑀧𑀤𑀁;

𑀘𑀸𑀭𑀼𑀧𑀸𑀓𑀸𑀭𑀲𑀜𑁆𑀘𑀺𑀢𑀁, 𑀧𑀭𑀺𑀯𑁂𑀡𑀫𑀓𑀸𑀭𑀬𑀺.

𑀉𑀧𑀲𑁂𑀦𑁄 𑀫𑀳𑀸𑀣𑁂𑀭𑁄, 𑀫𑀳𑀸𑀧𑀭𑀺𑀯𑁂𑀡𑀯𑀸𑀲𑀺𑀬𑁄;

𑀢𑀲𑁆𑀲𑀸𑀤𑀸𑀲𑀺 𑀧𑀭𑀺𑀯𑁂𑀡𑀁, 𑀮𑁂𑀔𑁄 𑀓𑀼𑀲𑀮𑀓𑀫𑁆𑀫𑀺𑀓𑁄.

𑀯𑀲𑀦𑁆𑀢𑁂𑀦𑁂𑀢𑁆𑀣 𑀣𑁂𑀭𑁂𑀦, 𑀣𑀺𑀭𑀲𑀻𑀮𑁂𑀦 𑀢𑀸𑀤𑀺𑀦𑀸;

𑀉𑀧𑀲𑁂𑀦𑀯𑁆𑀳𑀬𑁂𑀦 𑀲𑀸, 𑀓𑀢𑀸 𑀲𑀤𑁆𑀥𑀫𑁆𑀫𑀚𑁄𑀢𑀺𑀓𑀸.

𑀭𑀜𑁆𑀜𑁄 ¶ ¶ 𑀲𑀺𑀭𑀺𑀦𑀺𑀯𑀸𑀲𑀲𑁆𑀲, 𑀲𑀺𑀭𑀺𑀲𑀗𑁆𑀖𑀲𑁆𑀲 𑀩𑁄𑀥𑀺𑀦𑁄;

𑀙𑀩𑁆𑀩𑀻𑀲𑀢𑀺𑀫𑁆𑀳𑀺 𑀯𑀲𑁆𑀲𑀫𑁆𑀳𑀺, 𑀦𑀺𑀝𑁆𑀞𑀺𑀢𑀸 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑀲𑀫𑀬𑀁 𑀅𑀦𑀼𑀮𑁄𑀫𑁂𑀦𑁆𑀢𑀻, 𑀣𑁂𑀭𑀸𑀦𑀁 𑀣𑁂𑀭𑀯𑀁𑀲𑀤𑀻𑀧𑀸𑀦𑀁;

𑀦𑀺𑀝𑁆𑀞𑀁 𑀕𑀢𑀸 𑀬𑀣𑀸𑀬𑀁, 𑀅𑀝𑁆𑀞𑀓𑀣𑀸 𑀮𑁄𑀓𑀳𑀺𑀢𑀚𑀦𑀦𑀻.

𑀲𑀤𑁆𑀥𑀫𑁆𑀫𑀁 𑀅𑀦𑀼𑀮𑁄𑀫𑁂𑀦𑁆𑀢𑀸, 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀜𑁆𑀘 𑀲𑀸𑀥𑁂𑀦𑁆𑀢𑀸;

𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑀼 𑀢𑀣𑀸, 𑀫𑀦𑁄𑀭𑀣𑀸 𑀲𑀩𑁆𑀩𑀲𑀢𑁆𑀢𑀸𑀦𑀁.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸𑀬, ¶ 𑀅𑀝𑁆𑀞𑀓𑀣𑀸𑀬𑁂𑀢𑁆𑀣 𑀕𑀡𑀺𑀢𑀓𑀼𑀲𑀮𑁂𑀳𑀺;

𑀕𑀡𑀺𑀢𑀸 𑀢𑀼 𑀪𑀸𑀡𑀯𑀸𑀭𑀸, 𑀜𑁂𑀬𑁆𑀬𑀸𑀢𑀺𑀭𑁂𑀓𑀘𑀢𑁆𑀢𑀸𑀭𑀺𑀲𑀸.

𑀆𑀦𑀼𑀝𑁆𑀞𑀼𑀪𑁂𑀦 𑀅𑀲𑁆𑀲𑀸, 𑀙𑀦𑁆𑀤𑁄 𑀩𑀤𑁆𑀥𑁂𑀦 𑀕𑀡𑀺𑀬𑀫𑀸𑀦𑀸 𑀢𑀼;

𑀅𑀢𑀺𑀭𑁂𑀓𑀤𑀲𑀲𑀳𑀲𑁆𑀲-𑀲𑀗𑁆𑀔𑀸 𑀕𑀸𑀣𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀲𑀸𑀲𑀦𑀘𑀺𑀭𑀝𑁆𑀞𑀺𑀢𑀢𑁆𑀣𑀁, 𑀮𑁄𑀓𑀳𑀺𑀢𑀢𑁆𑀣𑀜𑁆𑀘 𑀲𑀸𑀤𑀭𑁂𑀦 𑀫𑀬𑀸;

𑀧𑀼𑀜𑁆𑀜𑀁 𑀇𑀫𑀁 𑀭𑀘𑀬𑀢𑀸, 𑀬𑀁 𑀧𑀢𑁆𑀢𑀫𑀦𑀧𑁆𑀧𑀓𑀁 𑀯𑀺𑀧𑀼𑀮𑀁.

𑀧𑀼𑀜𑁆𑀜𑁂𑀦 𑀢𑁂𑀦 𑀮𑁄𑀓𑁄, 𑀲𑀤𑁆𑀥𑀫𑁆𑀫𑀭𑀲𑀸𑀬𑀦𑀁 𑀤𑀲𑀩𑀮𑀲𑁆𑀲;

𑀉𑀧𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀫𑀮𑀁, 𑀧𑀧𑁆𑀧𑁄𑀢𑀼 𑀲𑀼𑀔𑀁 𑀲𑀼𑀔𑁂𑀦𑁂𑀯𑀸𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀺𑀓𑀸 𑀦𑀸𑀫

𑀘𑀽𑀴𑀦𑀺𑀤𑁆𑀤𑁂𑀲-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.