📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀘𑀽𑀴𑀦𑀺𑀤𑁆𑀤𑁂𑀲𑀧𑀸𑀴𑀺

𑀧𑀸𑀭𑀸𑀬𑀦𑀯𑀕𑁆𑀕𑁄

𑀯𑀢𑁆𑀣𑀼𑀕𑀸𑀣𑀸

𑁧.

𑀓𑁄𑀲𑀮𑀸𑀦𑀁 𑀧𑀼𑀭𑀸 𑀭𑀫𑁆𑀫𑀸, 𑀅𑀕𑀫𑀸 𑀤𑀓𑁆𑀔𑀺𑀡𑀸𑀧𑀣𑀁;

𑀆𑀓𑀺𑀜𑁆𑀘𑀜𑁆𑀜𑀁 𑀧𑀢𑁆𑀣𑀬𑀸𑀦𑁄, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽.

𑁨.

𑀲𑁄 𑀅𑀲𑁆𑀲𑀓𑀲𑁆𑀲 𑀯𑀺𑀲𑀬𑁂, 𑀫𑀴𑀓𑀲𑁆𑀲 [𑀅𑀴𑀓𑀲𑁆𑀲 (𑀲𑀼. 𑀦𑀺. 𑁯𑁮𑁩) 𑀫𑀼𑀴𑀓𑀲𑁆𑀲 (𑀲𑁆𑀬𑀸.), 𑀫𑀽𑀴𑁆𑀳𑀓𑀲𑁆𑀲 (𑀓.)] 𑀲𑀫𑀸𑀲𑀦𑁂 [𑀲𑀫𑀸𑀲𑀦𑁆𑀦𑁂 (𑀓.)];

𑀯𑀲𑀺 𑀕𑁄𑀥𑀸𑀯𑀭𑀻𑀓𑀽𑀮𑁂, 𑀉𑀜𑁆𑀙𑁂𑀦 𑀘 𑀨𑀮𑁂𑀦 𑀘.

𑁩.

𑀢𑀲𑁆𑀲𑁂𑀯 [𑀢𑀁𑀬𑁂𑀯 (𑀓.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀉𑀧𑀦𑀺𑀲𑁆𑀲𑀸𑀬, 𑀕𑀸𑀫𑁄 𑀘 𑀯𑀺𑀧𑀼𑀮𑁄 𑀅𑀳𑀼;

𑀢𑀢𑁄 𑀚𑀸𑀢𑁂𑀦 𑀆𑀬𑁂𑀦, 𑀫𑀳𑀸𑀬𑀜𑁆𑀜𑀫𑀓𑀧𑁆𑀧𑀬𑀺.

𑁪.

𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀧𑀼𑀦 𑀧𑀸𑀯𑀺𑀲𑀺 𑀅𑀲𑁆𑀲𑀫𑀁;

𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄.

𑁫.

𑀉𑀕𑁆𑀖𑀝𑁆𑀝𑀧𑀸𑀤𑁄 𑀢𑀲𑀺𑀢𑁄 [𑀢𑀲𑁆𑀲𑀺𑀢𑁄 (𑀓.)], 𑀧𑀗𑁆𑀓𑀤𑀦𑁆𑀢𑁄 𑀭𑀚𑀲𑁆𑀲𑀺𑀭𑁄;

𑀲𑁄 𑀘 𑀦𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀢𑀸𑀦𑀺 𑀧𑀜𑁆𑀘 𑀬𑀸𑀘𑀢𑀺.

𑁬.

𑀢𑀫𑁂𑀦𑀁 𑀩𑀸𑀯𑀭𑀻 𑀤𑀺𑀲𑁆𑀯𑀸, 𑀆𑀲𑀦𑁂𑀦 𑀦𑀺𑀫𑀦𑁆𑀢𑀬𑀺;

𑀲𑀼𑀔𑀜𑁆𑀘 𑀓𑀼𑀲𑀮𑀁 𑀧𑀼𑀘𑁆𑀙𑀺, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺 [𑀯𑀘𑀦𑀫𑀩𑁆𑀭𑀼𑀯𑀺 (𑀲𑀻.)].

𑁭.

‘‘𑀬𑀁 𑀔𑁄 𑀫𑀫 𑀤𑁂𑀬𑁆𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀯𑀺𑀲𑀚𑁆𑀚𑀺𑀢𑀁 𑀫𑀬𑀸;

𑀅𑀦𑀼𑀚𑀸𑀦𑀸𑀳𑀺 𑀫𑁂 𑀩𑁆𑀭𑀳𑁆𑀫𑁂, 𑀦𑀢𑁆𑀣𑀺 𑀧𑀜𑁆𑀘𑀲𑀢𑀸𑀦𑀺 𑀫𑁂’’.

𑁮.

‘‘𑀲𑀘𑁂 𑀫𑁂 𑀬𑀸𑀘𑀫𑀸𑀦𑀲𑁆𑀲, 𑀪𑀯𑀁 𑀦𑀸𑀦𑀼𑀧𑀤𑀲𑁆𑀲𑀢𑀺 [𑀧𑀤𑁂𑀲𑁆𑀲𑀢𑀺 (𑀓.)];

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀼𑀬𑁆𑀳𑀁, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸’’.

𑁯.

𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀼𑀳𑀓𑁄, 𑀪𑁂𑀭𑀯𑀁 𑀲𑁄 𑀅𑀓𑀺𑀢𑁆𑀢𑀬𑀺;

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀩𑀸𑀯𑀭𑀻 𑀤𑀼𑀓𑁆𑀔𑀺𑀢𑁄 𑀅𑀳𑀼.

𑁧𑁦.

𑀉𑀲𑁆𑀲𑀼𑀲𑁆𑀲𑀢𑀺 𑀅𑀦𑀸𑀳𑀸𑀭𑁄, 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄;

𑀅𑀣𑁄𑀧𑀺 𑀏𑀯𑀁 𑀘𑀺𑀢𑁆𑀢𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑀻 𑀫𑀦𑁄.

𑁧𑁧.

𑀉𑀢𑁆𑀭𑀲𑁆𑀢𑀁 𑀤𑀼𑀓𑁆𑀔𑀺𑀢𑀁 𑀤𑀺𑀲𑁆𑀯𑀸, 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀺𑀦𑀻;

𑀩𑀸𑀯𑀭𑀺𑀁 𑀉𑀧𑀲𑀗𑁆𑀓𑀫𑁆𑀫, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁨.

‘‘𑀦 𑀲𑁄 𑀫𑀼𑀤𑁆𑀥𑀁 𑀧𑀚𑀸𑀦𑀸𑀢𑀺, 𑀓𑀼𑀳𑀓𑁄 𑀲𑁄 𑀥𑀦𑀢𑁆𑀣𑀺𑀓𑁄;

𑀫𑀼𑀤𑁆𑀥𑀦𑀺 𑀫𑀼𑀤𑁆𑀥𑀧𑀸𑀢𑁂 [𑀫𑀼𑀤𑁆𑀥𑀦𑀺𑀫𑁆𑀫𑀼𑀤𑁆𑀥𑀧𑀸𑀢𑁂 (𑀓.)] 𑀯𑀸, 𑀜𑀸𑀡𑀁 𑀢𑀲𑁆𑀲 𑀦 𑀯𑀺𑀚𑁆𑀚𑀢𑀺’’.

𑁧𑁩.

‘‘𑀪𑁄𑀢𑀻 [𑀪𑁄𑀢𑀺 (𑀓.)] 𑀘𑀭𑀳𑀺 𑀚𑀸𑀦𑀸𑀢𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸;

𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘 [𑀫𑀼𑀤𑁆𑀥𑀸𑀢𑀺𑀧𑀸𑀢𑀜𑁆𑀘 (𑀓.)], 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯’’.

𑁧𑁪.

‘‘𑀅𑀳𑀫𑁆𑀧𑁂𑀢𑀁 𑀦 𑀚𑀸𑀦𑀸𑀫𑀺, 𑀜𑀸𑀡𑀁 𑀫𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀫𑀼𑀤𑁆𑀥𑀦𑀺 𑀫𑀼𑀤𑁆𑀥𑀸𑀥𑀺𑀧𑀸𑀢𑁂 𑀘, 𑀚𑀺𑀦𑀸𑀦𑀜𑁆𑀳𑁂𑀢𑁆𑀣 [𑀚𑀦𑀸𑀦𑀜𑁆𑀳𑁂𑀢𑁆𑀣 (𑀓.)] 𑀤𑀲𑁆𑀲𑀦𑀁’’.

𑁧𑁫.

‘‘𑀅𑀣 𑀓𑁄 𑀘𑀭𑀳𑀺 [𑀬𑁄 𑀘𑀭𑀢𑀺 (𑀓.)] 𑀚𑀸𑀦𑀸𑀢𑀺, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂 [𑀧𑀼𑀣𑀯𑀺𑀫𑀡𑁆𑀟𑀮𑁂 (𑀲𑀻.)];

𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀤𑁂𑀯𑀢𑁂’’.

𑁧𑁬.

‘‘𑀧𑀼𑀭𑀸 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀸, 𑀦𑀺𑀓𑁆𑀔𑀦𑁆𑀢𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀘𑁆𑀘𑁄 𑀑𑀓𑁆𑀓𑀸𑀓𑀭𑀸𑀚𑀲𑁆𑀲, 𑀲𑀓𑁆𑀬𑀧𑀼𑀢𑁆𑀢𑁄 𑀧𑀪𑀗𑁆𑀓𑀭𑁄.

𑁧𑁭.

‘‘𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡 𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 [𑀨𑀮𑀧𑁆𑀧𑀢𑁆𑀢𑁄 (𑀓.)], 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄 𑀉𑀧𑀥𑀺𑀓𑁆𑀔𑀬𑁂.

𑁧𑁮.

‘‘𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸 𑀮𑁄𑀓𑁂, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸;

𑀢𑀁 𑀢𑁆𑀯𑀁 𑀕𑀦𑁆𑀢𑁆𑀯𑀸𑀦 𑀧𑀼𑀘𑁆𑀙𑀲𑁆𑀲𑀼, 𑀲𑁄 𑀢𑁂 𑀢𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺’’.

𑁧𑁯.

𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀘𑁄 𑀲𑀼𑀢𑁆𑀯𑀸, 𑀉𑀤𑀕𑁆𑀕𑁄 𑀩𑀸𑀯𑀭𑀻 𑀅𑀳𑀼;

𑀲𑁄𑀓𑀲𑁆𑀲 𑀢𑀦𑀼𑀓𑁄 𑀆𑀲𑀺, 𑀧𑀻𑀢𑀺𑀜𑁆𑀘 𑀯𑀺𑀧𑀼𑀮𑀁 𑀮𑀪𑀺.

𑁨𑁦.

𑀲𑁄 𑀩𑀸𑀯𑀭𑀻 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄, 𑀢𑀁 𑀤𑁂𑀯𑀢𑀁 𑀧𑀼𑀘𑁆𑀙𑀢𑀺 𑀯𑁂𑀤𑀚𑀸𑀢𑁄;

‘‘𑀓𑀢𑀫𑀫𑁆𑀳𑀺 𑀕𑀸𑀫𑁂 𑀦𑀺𑀕𑀫𑀫𑁆𑀳𑀺 𑀯𑀸 𑀧𑀦, 𑀓𑀢𑀫𑀫𑁆𑀳𑀺 𑀯𑀸 𑀚𑀦𑀧𑀤𑁂 𑀮𑁄𑀓𑀦𑀸𑀣𑁄;

𑀬𑀢𑁆𑀣 𑀕𑀦𑁆𑀢𑁆𑀯𑀸𑀦 𑀧𑀲𑁆𑀲𑁂𑀫𑀼, 𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁’’.

𑁨𑁧.

‘‘𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀫𑀦𑁆𑀤𑀺𑀭𑁂 𑀚𑀺𑀦𑁄, 𑀧𑀳𑀽𑀢𑀧𑀜𑁆𑀜𑁄 𑀯𑀭𑀪𑀽𑀭𑀺𑀫𑁂𑀥𑀲𑁄;

𑀲𑁄 𑀲𑀓𑁆𑀬𑀧𑀼𑀢𑁆𑀢𑁄 𑀯𑀺𑀥𑀼𑀭𑁄 𑀅𑀦𑀸𑀲𑀯𑁄, 𑀫𑀼𑀤𑁆𑀥𑀸𑀥𑀺𑀧𑀸𑀢𑀲𑁆𑀲 𑀯𑀺𑀤𑀽 𑀦𑀭𑀸𑀲𑀪𑁄’’.

𑁨𑁨.

𑀢𑀢𑁄 𑀆𑀫𑀦𑁆𑀢𑀬𑀻 𑀲𑀺𑀲𑁆𑀲𑁂, 𑀩𑁆𑀭𑀸𑀳𑁆𑀫𑀡𑁂 𑀫𑀦𑁆𑀢𑀧𑀸𑀭𑀕𑀽 [𑀧𑀸𑀭𑀕𑁂 (𑀲𑁆𑀬𑀸.)];

‘‘𑀏𑀣 𑀫𑀸𑀡𑀯𑀸 𑀅𑀓𑁆𑀔𑀺𑀲𑁆𑀲𑀁, 𑀲𑀼𑀡𑀸𑀣 𑀯𑀘𑀦𑀁 𑀫𑀫.

𑁨𑁩.

‘‘𑀬𑀲𑁆𑀲𑁂𑀲𑁄 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀧𑀸𑀢𑀼𑀪𑀸𑀯𑁄 𑀅𑀪𑀺𑀡𑁆𑀳𑀲𑁄;

𑀲𑁆𑀯𑀸𑀚𑁆𑀚 𑀮𑁄𑀓𑀫𑁆𑀳𑀺 𑀉𑀧𑁆𑀧𑀦𑁆𑀦𑁄, 𑀲𑀫𑁆𑀩𑀼𑀤𑁆𑀥𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸𑀦 𑀲𑀸𑀯𑀢𑁆𑀣𑀺𑀁, 𑀧𑀲𑁆𑀲𑀯𑁆𑀳𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑀁’’.

𑁨𑁪.

‘‘𑀓𑀣𑀁 𑀘𑀭𑀳𑀺 𑀚𑀸𑀦𑁂𑀫𑀼, 𑀤𑀺𑀲𑁆𑀯𑀸 𑀩𑀼𑀤𑁆𑀥𑁄𑀢𑀺 𑀩𑁆𑀭𑀸𑀳𑁆𑀫𑀡;

𑀅𑀚𑀸𑀦𑀢𑀁 𑀦𑁄 𑀧𑀩𑁆𑀭𑀽𑀳𑀺, 𑀬𑀣𑀸 𑀚𑀸𑀦𑁂𑀫𑀼 𑀢𑀁 𑀫𑀬𑀁’’.

𑁨𑁫.

‘‘𑀆𑀕𑀢𑀸𑀦𑀺 𑀳𑀺 𑀫𑀦𑁆𑀢𑁂𑀲𑀼, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸;

𑀤𑁆𑀯𑀢𑁆𑀢𑀺𑀁𑀲𑀸𑀦𑀺 𑀘 𑀩𑁆𑀬𑀸𑀓𑁆𑀔𑀸𑀢𑀸, 𑀲𑀫𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑀲𑁄.

𑁨𑁬.

‘‘𑀬𑀲𑁆𑀲𑁂𑀢𑁂 𑀳𑁄𑀦𑁆𑀢𑀺 𑀕𑀢𑁆𑀢𑁂𑀲𑀼, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸;

𑀤𑁆𑀯𑁂𑀬𑁂𑀯 𑀢𑀲𑁆𑀲 𑀕𑀢𑀺𑀬𑁄, 𑀢𑀢𑀺𑀬𑀸 𑀳𑀺 𑀦 𑀯𑀺𑀚𑁆𑀚𑀢𑀺.

𑁨𑁭.

‘‘𑀲𑀘𑁂 𑀅𑀕𑀸𑀭𑀁 𑀆𑀯𑀲𑀢𑀺, 𑀯𑀺𑀚𑁂𑀬𑁆𑀬 𑀧𑀣𑀯𑀺𑀁 𑀇𑀫𑀁;

𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀥𑀫𑁆𑀫𑁂𑀦 𑀅𑀦𑀼𑀲𑀸𑀲𑀢𑀺.

𑁨𑁮.

‘‘𑀲𑀘𑁂 𑀘 𑀲𑁄 𑀧𑀩𑁆𑀩𑀚𑀢𑀺, 𑀅𑀕𑀸𑀭𑀸 𑀅𑀦𑀕𑀸𑀭𑀺𑀬𑀁;

𑀯𑀺𑀯𑀝𑁆𑀝𑀘𑁆𑀙𑀤𑁄 [𑀯𑀺𑀯𑀢𑁆𑀢𑀘𑁆𑀙𑀤𑁆𑀤𑁄 (𑀲𑀻.)] 𑀲𑀫𑁆𑀩𑀼𑀤𑁆𑀥𑁄, 𑀅𑀭𑀳𑀸 𑀪𑀯𑀢𑀺 𑀅𑀦𑀼𑀢𑁆𑀢𑀭𑁄.

𑁨𑁯.

‘‘𑀚𑀸𑀢𑀺𑀁 𑀕𑁄𑀢𑁆𑀢𑀜𑁆𑀘 𑀮𑀓𑁆𑀔𑀡𑀁, 𑀫𑀦𑁆𑀢𑁂 𑀲𑀺𑀲𑁆𑀲𑁂 𑀧𑀼𑀦𑀸𑀧𑀭𑁂;

𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀫𑀦𑀲𑀸𑀬𑁂𑀯 𑀧𑀼𑀘𑁆𑀙𑀣.

𑁩𑁦.

‘‘𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻, 𑀬𑀤𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺;

𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂, 𑀯𑀸𑀘𑀸𑀬 𑀯𑀺𑀲𑀚𑁆𑀚𑀺𑀲𑁆𑀲𑀢𑀺’’ [𑀯𑀺𑀲𑁆𑀲𑀚𑀺𑀲𑁆𑀲𑀢𑀺 (𑀓.)].

𑁩𑁧.

𑀩𑀸𑀯𑀭𑀺𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀲𑀺𑀲𑁆𑀲𑀸 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀸;

𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽.

𑁩𑁨.

𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄;

𑀢𑁄𑀤𑁂𑀬𑁆𑀬-𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄.

𑁩𑁩.

𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑁩𑁪.

𑀧𑀘𑁆𑀘𑁂𑀓𑀕𑀡𑀺𑀦𑁄 𑀲𑀩𑁆𑀩𑁂, 𑀲𑀩𑁆𑀩𑀮𑁄𑀓𑀲𑁆𑀲 𑀯𑀺𑀲𑁆𑀲𑀼𑀢𑀸;

𑀛𑀸𑀬𑀻 𑀛𑀸𑀦𑀭𑀢𑀸 𑀥𑀻𑀭𑀸, 𑀧𑀼𑀩𑁆𑀩𑀯𑀸𑀲𑀦𑀯𑀸𑀲𑀺𑀢𑀸.

𑁩𑁫.

𑀩𑀸𑀯𑀭𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;

𑀚𑀝𑀸𑀚𑀺𑀦𑀥𑀭𑀸 𑀲𑀩𑁆𑀩𑁂, 𑀧𑀓𑁆𑀓𑀸𑀫𑀼𑀁 𑀉𑀢𑁆𑀢𑀭𑀸𑀫𑀼𑀔𑀸.

𑁩𑁬.

𑀫𑀴𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀁, 𑀧𑀼𑀭𑀫𑀸𑀳𑀺𑀲𑁆𑀲𑀢𑀺𑀁 [𑀧𑀼𑀭𑀫𑀸𑀳𑀺𑀬𑀢𑀺 (𑀓.)] 𑀢𑀤𑀸 [𑀲𑀤𑀸 (𑀓.)];

𑀉𑀚𑁆𑀚𑁂𑀦𑀺𑀜𑁆𑀘𑀸𑀧𑀺 𑀕𑁄𑀦𑀤𑁆𑀥𑀁, 𑀯𑁂𑀤𑀺𑀲𑀁 𑀯𑀦𑀲𑀯𑁆𑀳𑀬𑀁.

𑁩𑁭.

𑀓𑁄𑀲𑀫𑁆𑀩𑀺𑀜𑁆𑀘𑀸𑀧𑀺 𑀲𑀸𑀓𑁂𑀢𑀁, 𑀲𑀸𑀯𑀢𑁆𑀣𑀺𑀜𑁆𑀘 𑀧𑀼𑀭𑀼𑀢𑁆𑀢𑀫𑀁;

𑀲𑁂𑀢𑀩𑁆𑀬𑀁 𑀓𑀧𑀺𑀮𑀯𑀢𑁆𑀣𑀼𑀁, 𑀓𑀼𑀲𑀺𑀦𑀸𑀭𑀜𑁆𑀘 𑀫𑀦𑁆𑀤𑀺𑀭𑀁.

𑁩𑁮.

𑀧𑀸𑀯𑀜𑁆𑀘 𑀪𑁄𑀕𑀦𑀕𑀭𑀁, 𑀯𑁂𑀲𑀸𑀮𑀺𑀁 𑀫𑀸𑀕𑀥𑀁 𑀧𑀼𑀭𑀁;

𑀧𑀸𑀲𑀸𑀡𑀓𑀁 𑀘𑁂𑀢𑀺𑀬𑀜𑁆𑀘, 𑀭𑀫𑀡𑀻𑀬𑀁 𑀫𑀦𑁄𑀭𑀫𑀁.

𑁩𑁯.

𑀢𑀲𑀺𑀢𑁄𑀯𑀼𑀤𑀓𑀁 𑀲𑀻𑀢𑀁, 𑀫𑀳𑀸𑀮𑀸𑀪𑀁𑀯 𑀯𑀸𑀡𑀺𑀚𑁄;

𑀙𑀸𑀬𑀁 𑀖𑀫𑁆𑀫𑀸𑀪𑀺𑀢𑀢𑁆𑀢𑁄𑀯 𑀢𑀼𑀭𑀺𑀢𑀸 𑀧𑀩𑁆𑀩𑀢𑀫𑀸𑀭𑀼𑀳𑀼𑀁.

𑁪𑁦.

𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀻𑀳𑁄𑀯 𑀦𑀤𑀢𑀻 𑀯𑀦𑁂.

𑁪𑁧.

𑀅𑀚𑀺𑀢𑁄 𑀅𑀤𑁆𑀤𑀲 𑀩𑀼𑀤𑁆𑀥𑀁, 𑀧𑀻𑀢𑀭𑀁𑀲𑀺𑀁𑀯 [𑀚𑀺𑀢𑀭𑀁𑀲𑀺𑀁 𑀲𑀻𑀢𑀭𑀁𑀲𑀺𑀁 (𑀓.), 𑀯𑀻𑀢𑀭𑀁𑀲𑀺𑀁 (𑀲𑀻. 𑀲𑁆𑀬𑀸.)] 𑀪𑀸𑀡𑀼𑀫𑀁;

𑀘𑀦𑁆𑀤𑀁 𑀬𑀣𑀸 𑀧𑀦𑁆𑀦𑀭𑀲𑁂, 𑀧𑀭𑀺𑀧𑀽𑀭𑀁 [𑀧𑀸𑀭𑀺𑀧𑀽𑀭𑀺𑀁 (𑀲𑀻. 𑀲𑁆𑀬𑀸.)] 𑀉𑀧𑀸𑀕𑀢𑀁.

𑁪𑁨.

𑀅𑀣𑀲𑁆𑀲 𑀕𑀢𑁆𑀢𑁂 𑀤𑀺𑀲𑁆𑀯𑀸𑀦, 𑀧𑀭𑀺𑀧𑀽𑀭𑀜𑁆𑀘 𑀩𑁆𑀬𑀜𑁆𑀚𑀦𑀁;

𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄, 𑀫𑀦𑁄𑀧𑀜𑁆𑀳𑁂 𑀅𑀧𑀼𑀘𑁆𑀙𑀣.

𑁪𑁩.

‘‘𑀆𑀤𑀺𑀲𑁆𑀲 𑀚𑀫𑁆𑀫𑀦𑀁 𑀩𑁆𑀭𑀽𑀳𑀺, 𑀕𑁄𑀢𑁆𑀢𑀁 𑀩𑁆𑀭𑀽𑀳𑀺 𑀲𑀮𑀓𑁆𑀔𑀡𑀁;

𑀫𑀦𑁆𑀢𑁂𑀲𑀼 𑀧𑀸𑀭𑀫𑀺𑀁 𑀩𑁆𑀭𑀽𑀳𑀺, 𑀓𑀢𑀺 𑀯𑀸𑀘𑁂𑀢𑀺 𑀩𑁆𑀭𑀸𑀳𑁆𑀫𑀡𑁄’’.

𑁪𑁪.

‘‘𑀯𑀻𑀲𑀁 𑀯𑀲𑁆𑀲𑀲𑀢𑀁 𑀆𑀬𑀼, 𑀲𑁄 𑀘 𑀕𑁄𑀢𑁆𑀢𑁂𑀦 𑀩𑀸𑀯𑀭𑀻;

𑀢𑀻𑀡𑀺𑀲𑁆𑀲 𑀮𑀓𑁆𑀔𑀡𑀸 𑀕𑀢𑁆𑀢𑁂, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁪𑁫.

‘‘𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀦𑀺𑀖𑀡𑁆𑀟𑀼𑀲𑀓𑁂𑀝𑀼𑀪𑁂;

𑀧𑀜𑁆𑀘𑀲𑀢𑀸𑀦𑀺 𑀯𑀸𑀘𑁂𑀢𑀺, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄’’.

𑁪𑁬.

‘‘𑀮𑀓𑁆𑀔𑀡𑀸𑀦𑀁 𑀧𑀯𑀺𑀘𑀬𑀁, 𑀩𑀸𑀯𑀭𑀺𑀲𑁆𑀲 𑀦𑀭𑀼𑀢𑁆𑀢𑀫;

𑀢𑀡𑁆𑀳𑀘𑁆𑀙𑀺𑀤 [𑀓𑀗𑁆𑀔𑀘𑁆𑀙𑀺𑀤 (𑀓.)] 𑀧𑀓𑀸𑀲𑁂𑀳𑀺, 𑀫𑀸 𑀦𑁄 𑀓𑀗𑁆𑀔𑀸𑀬𑀺𑀢𑀁 𑀅𑀳𑀼’’.

𑁪𑁭.

‘‘𑀫𑀼𑀔𑀁 𑀚𑀺𑀯𑁆𑀳𑀸𑀬 𑀙𑀸𑀤𑁂𑀢𑀺, 𑀉𑀡𑁆𑀡𑀲𑁆𑀲 𑀪𑀫𑀼𑀓𑀦𑁆𑀢𑀭𑁂;

𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀡𑀯’’.

𑁪𑁮.

𑀧𑀼𑀘𑁆𑀙𑀜𑁆𑀳𑀺 𑀓𑀺𑀜𑁆𑀘𑀺 𑀅𑀲𑀼𑀡𑀦𑁆𑀢𑁄, 𑀲𑀼𑀢𑁆𑀯𑀸 𑀧𑀜𑁆𑀳𑁂 𑀯𑀺𑀬𑀸𑀓𑀢𑁂;

𑀯𑀺𑀘𑀺𑀦𑁆𑀢𑁂𑀢𑀺 𑀚𑀦𑁄 𑀲𑀩𑁆𑀩𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻.

𑁪𑁯.

‘‘𑀓𑁄 𑀦𑀼 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸, 𑀇𑀦𑁆𑀤𑁄 𑀯𑀸𑀧𑀺 𑀲𑀼𑀚𑀫𑁆𑀧𑀢𑀺;

𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂, 𑀓𑀫𑁂𑀢𑀁 𑀧𑀝𑀺𑀪𑀸𑀲𑀢𑀺.

𑁫𑁦.

‘‘𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀩𑀸𑀯𑀭𑀻 𑀧𑀭𑀺𑀧𑀼𑀘𑁆𑀙𑀢𑀺;

𑀢𑀁 𑀩𑁆𑀬𑀸𑀓𑀭𑁄𑀳𑀺 𑀪𑀕𑀯𑀸, 𑀓𑀗𑁆𑀔𑀁 𑀯𑀺𑀦𑀬 𑀦𑁄 𑀇𑀲𑁂’’.

𑁫𑁧.

‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀢𑀺 𑀚𑀸𑀦𑀸𑀳𑀺, 𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀥𑀺𑀧𑀸𑀢𑀺𑀦𑀻;

𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀻𑀳𑀺, 𑀙𑀦𑁆𑀤𑀯𑀻𑀭𑀺𑀬𑁂𑀦 𑀲𑀁𑀬𑀼𑀢𑀸’’.

𑁫𑁨.

𑀢𑀢𑁄 𑀯𑁂𑀤𑁂𑀦 𑀫𑀳𑀢𑀸, 𑀲𑀦𑁆𑀣𑀫𑁆𑀪𑁂𑀢𑁆𑀯𑀸𑀦 𑀫𑀸𑀡𑀯𑁄;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀧𑀢𑀺.

𑁫𑁩.

‘‘𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀪𑁄𑀢𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀫𑀸𑀭𑀺𑀲;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀸𑀤𑁂 𑀯𑀦𑁆𑀤𑀢𑀺 𑀘𑀓𑁆𑀔𑀼𑀫’’.

𑁫𑁪.

‘‘𑀲𑀼𑀔𑀺𑀢𑁄 𑀩𑀸𑀯𑀭𑀻 𑀳𑁄𑀢𑀼, 𑀲𑀳 𑀲𑀺𑀲𑁆𑀲𑁂𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀢𑁆𑀯𑀜𑁆𑀘𑀸𑀧𑀺 𑀲𑀼𑀔𑀺𑀢𑁄 𑀳𑁄𑀳𑀺, 𑀘𑀺𑀭𑀁 𑀚𑀻𑀯𑀸𑀳𑀺 𑀫𑀸𑀡𑀯.

𑁫𑁫.

‘‘𑀩𑀸𑀯𑀭𑀺𑀲𑁆𑀲 𑀘 𑀢𑀼𑀬𑁆𑀳𑀁 𑀯𑀸, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀲𑀁𑀲𑀬𑀁;

𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣’’.

𑁫𑁬.

𑀲𑀫𑁆𑀩𑀼𑀤𑁆𑀥𑁂𑀦 𑀓𑀢𑁄𑀓𑀸𑀲𑁄, 𑀦𑀺𑀲𑀻𑀤𑀺𑀢𑁆𑀯𑀸𑀦 𑀧𑀜𑁆𑀚𑀮𑀻;

𑀅𑀚𑀺𑀢𑁄 𑀧𑀞𑀫𑀁 𑀧𑀜𑁆𑀳𑀁, 𑀢𑀢𑁆𑀣 𑀧𑀼𑀘𑁆𑀙𑀺 𑀢𑀣𑀸𑀕𑀢𑀁.

𑀯𑀢𑁆𑀣𑀼𑀕𑀸𑀣𑀸 𑀦𑀺𑀝𑁆𑀞𑀺𑀢𑀸.

𑁧. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸

𑁫𑁭.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀁’’.

𑁫𑁮.

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁’’.

𑁫𑁯.

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂’’.

𑁬𑁦.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’.

𑁬𑁧.

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀺 [𑀲𑀢𑀻 𑀘𑁂𑀯 (𑀲𑀻.)], [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺’’.

𑁬𑁨.

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺’’.

𑁬𑁩.

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 [𑀲𑁂𑀓𑁆𑀔𑀸 (𑀓.)] 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲’’.

𑁬𑁪.

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑀧𑀞𑀫𑀸.

𑁨. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸

𑁬𑁫.

‘‘𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄]

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸;

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺 [𑀦 𑀧𑀺𑀫𑁆𑀧𑀢𑀺 (𑀩𑀳𑀽𑀲𑀼)];

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺 [𑀲𑀺𑀩𑁆𑀩𑀦𑀺𑀫𑀘𑁆𑀘𑀕𑀸 (𑀲𑀻. 𑀲𑁆𑀬𑀸.)].

𑁬𑁬.

‘‘𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄;

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸.

𑁬𑁭.

‘‘𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸 𑀤𑀼𑀢𑀺𑀬𑀸.

𑁩. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸

𑁬𑁮.

‘‘𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁’’.

𑁬𑁯.

‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁;

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼’’.

𑁭𑁦.

‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸;

𑀅𑀢𑀸𑀭𑀼𑀁 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁’’.

𑁭𑁧.

‘‘𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺, 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺; [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁, 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸;

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺’’.

𑁭𑁨.

‘‘𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁’’.

𑁭𑁩.

‘‘𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀺, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸 𑀢𑀢𑀺𑀬𑀸.

𑁪. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸

𑁭𑁪.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀫𑁂𑀢𑁆𑀢𑀕𑀽]

𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀼𑀁 𑀪𑀸𑀯𑀺𑀢𑀢𑁆𑀢𑀁;

𑀓𑀼𑀢𑁄 𑀦𑀼 𑀤𑀼𑀓𑁆𑀔𑀸 𑀲𑀫𑀼𑀤𑀸𑀕𑀢𑀸 𑀇𑀫𑁂, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸’’.

𑁭𑁫.

‘‘𑀤𑀼𑀓𑁆𑀔𑀲𑁆𑀲 𑀯𑁂 𑀫𑀁 𑀧𑀪𑀯𑀁 𑀅𑀧𑀼𑀘𑁆𑀙𑀲𑀺, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁;

𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸.

𑁭𑁬.

‘‘𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄;

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸, 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻’’.

𑁭𑁭.

‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

‘𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘’;

𑀢𑀁 𑀫𑁂 𑀫𑀼𑀦𑀺 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’.

𑁭𑁮.

‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀁, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁭𑁯.

‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁮𑁦.

‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁 𑀪𑀯𑁂 𑀦 𑀢𑀺𑀝𑁆𑀞𑁂.

𑁮𑁧.

‘‘𑀏𑀯𑀁𑀯𑀺𑀳𑀸𑀭𑀻 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄, 𑀪𑀺𑀓𑁆𑀔𑀼 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺;

𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔𑀁’’.

𑁮𑁨.

‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔𑀁, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑁮𑁩.

‘‘𑀢𑁂 𑀘𑀸𑀧𑀺 𑀦𑀽𑀦𑀧𑁆𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀁, 𑀬𑁂 𑀢𑁆𑀯𑀁 𑀫𑀼𑀦𑀺 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑁂𑀘𑁆𑀘 𑀦𑀸𑀕, 𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬’’.

𑁮𑁪.

‘‘𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁;

𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀺, 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄.

𑁮𑁫.

‘‘𑀯𑀺𑀤𑁆𑀯𑀸 𑀘 𑀬𑁄 𑀯𑁂𑀤𑀕𑀽 𑀦𑀭𑁄 𑀇𑀥, 𑀪𑀯𑀸𑀪𑀯𑁂 𑀲𑀗𑁆𑀕𑀫𑀺𑀫𑀁 𑀯𑀺𑀲𑀚𑁆𑀚;

𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸 𑀘𑀢𑀼𑀢𑁆𑀣𑀻.

𑁫. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸

𑁮𑁬.

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄]

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁;

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’.

𑁮𑁭.

‘‘𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄;

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’.

𑁮𑁮.

‘‘𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀺’’.

𑁮𑁯.

‘‘𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀅𑀪𑀺𑀚𑀸𑀦𑀫𑀸𑀦𑁄 [𑀆𑀚𑀸𑀦𑀫𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀺’’.

𑁯𑁦.

‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄, 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀬𑀣𑀸𑀳𑀁 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄, 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀁’’.

𑁯𑁧.

‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁯𑁨.

‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁯𑁩.

‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂, 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳’’𑀦𑁆𑀢𑀺.

𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸 𑀧𑀜𑁆𑀘𑀫𑀻.

𑁬. 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸

𑁯𑁪.

‘‘𑀏𑀓𑁄 𑀅𑀳𑀁 𑀲𑀓𑁆𑀓 𑀫𑀳𑀦𑁆𑀢𑀫𑁄𑀖𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄]

𑀅𑀦𑀺𑀲𑁆𑀲𑀺𑀢𑁄 𑀦𑁄 𑀯𑀺𑀲𑀳𑀸𑀫𑀺 𑀢𑀸𑀭𑀺𑀢𑀼𑀁;

𑀆𑀭𑀫𑁆𑀫𑀡𑀁 𑀩𑁆𑀭𑀽𑀳𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀬𑀁 𑀦𑀺𑀲𑁆𑀲𑀺𑀢𑁄 𑀑𑀖𑀫𑀺𑀫𑀁 𑀢𑀭𑁂𑀬𑁆𑀬𑀁’’.

𑁯𑁫.

‘‘𑀆𑀓𑀺𑀜𑁆𑀘𑀜𑁆𑀜𑀁 𑀧𑁂𑀓𑁆𑀔𑀫𑀸𑀦𑁄 𑀲𑀢𑀺𑀫𑀸, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬 𑀢𑀭𑀲𑁆𑀲𑀼 𑀑𑀖𑀁;

𑀓𑀸𑀫𑁂 𑀧𑀳𑀸𑀬 𑀯𑀺𑀭𑀢𑁄 𑀓𑀣𑀸𑀳𑀺, 𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲’’.

𑁯𑁬.

‘‘𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄]

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁;

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂 𑀯𑀺𑀫𑀼𑀢𑁆𑀢𑁄 [𑀥𑀺𑀫𑀼𑀢𑁆𑀢𑁄 (𑀓.)], 𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻’’ [𑀅𑀦𑀸𑀦𑀼𑀯𑀸𑀬𑀻 (𑀲𑁆𑀬𑀸. 𑀓.)].

𑁯𑁭.

‘‘𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁;

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂 𑀯𑀺𑀫𑀼𑀢𑁆𑀢𑁄, 𑀢𑀺𑀝𑁆𑀞𑁂𑀬𑁆𑀬 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻’’.

𑁯𑁮.

‘‘𑀢𑀺𑀝𑁆𑀞𑁂 𑀘𑁂 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻, 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀁 𑀲𑀫𑀦𑁆𑀢𑀘𑀓𑁆𑀔𑀼;

𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺𑀲𑀺𑀬𑀸 𑀯𑀺𑀫𑀼𑀢𑁆𑀢𑁄, 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲’’.

𑁯𑁯.

‘‘𑀅𑀘𑁆𑀘𑀺 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄, 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁’’.

𑁧𑁦𑁦.

‘‘𑀅𑀢𑁆𑀣𑀗𑁆𑀕𑀢𑁄 𑀲𑁄 𑀉𑀤 𑀯𑀸 𑀲𑁄 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀅𑀭𑁄𑀕𑁄;

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’.

𑁧𑁦𑁧.

‘‘𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀺, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀢𑀁 𑀢𑀲𑁆𑀲 𑀦𑀢𑁆𑀣𑀺;

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀽𑀳𑀢𑁂𑀲𑀼, 𑀲𑀫𑀽𑀳𑀢𑀸 𑀯𑀸𑀤𑀧𑀣𑀸𑀧𑀺 𑀲𑀩𑁆𑀩𑁂’’𑀢𑀺.

𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸 𑀙𑀝𑁆𑀞𑀻.

𑁭. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁨.

‘‘𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀚𑀦𑀸 𑀯𑀤𑀦𑁆𑀢𑀺 𑀢𑀬𑀺𑀤𑀁 𑀓𑀣𑀁𑀲𑀼;

𑀜𑀸𑀡𑀽𑀧𑀧𑀦𑁆𑀦𑀁 𑀫𑀼𑀦𑀺 𑀦𑁄 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀯𑁂 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀁’’.

𑁧𑁦𑁩.

‘‘𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, 𑀫𑀼𑀦𑀻𑀥 𑀦𑀦𑁆𑀤 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀯𑀺𑀲𑁂𑀦𑀺𑀓𑀢𑁆𑀯𑀸 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀺’’.

𑁧𑁦𑁪.

‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁,

𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸,

𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁’’.

𑁧𑁦𑁫.

‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀦𑀦𑁆𑀤𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀓𑀺𑀜𑁆𑀘𑀸𑀧𑀺 𑀢𑁂 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀺, 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺’’.

𑁧𑁦𑁬.

‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀢𑁂 𑀘𑁂 𑀫𑀼𑀦𑀺 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂, 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂;

𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁’’.

𑁧𑁦𑁭.

‘‘𑀦𑀸𑀳𑀁 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀦𑀦𑁆𑀤𑀸𑀢𑀺 𑀪𑀕𑀯𑀸]

𑀚𑀸𑀢𑀺𑀚𑀭𑀸𑀬 𑀦𑀺𑀯𑀼𑀢𑀸𑀢𑀺 𑀩𑁆𑀭𑀽𑀫𑀺;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁;

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀺’’.

𑁧𑁦𑁮.

‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁;

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻’’𑀢𑀺.

𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸 𑀲𑀢𑁆𑀢𑀫𑀸.

𑁮. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁯.

‘‘𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, [𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄]

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁;

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁, 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁.

𑁧𑁧𑁦.

‘‘𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺, 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁧𑁧𑁧.

‘‘𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼, 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓;

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁, 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁.

𑁧𑁧𑁨.

‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸 𑀅𑀝𑁆𑀞𑀫𑀸.

𑁯. 𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸

𑁧𑁧𑁩.

‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄’’.

𑁧𑁧𑁪.

‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄’’.

𑁧𑁧𑁫.

‘‘𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄 [𑀆𑀲𑀬𑀸𑀦𑁄 (𑀓.)], 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻;

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀼’’.

𑁧𑁧𑁬.

‘‘𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻;

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢’’𑀦𑁆𑀢𑀺.

𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸 𑀦𑀯𑀫𑀸.

𑁧𑁦. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸

𑁧𑁧𑁭.

‘‘𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄]

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀢𑁆𑀯𑀜𑁆𑀘 𑀫𑁂 𑀤𑀻𑀧𑀫𑀓𑁆𑀔𑀸𑀳𑀺, 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸’’.

𑁧𑁧𑁮.

‘‘𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, [𑀓𑀧𑁆𑀧𑀸𑀢𑀺 𑀪𑀕𑀯𑀸]

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀫𑀺 𑀓𑀧𑁆𑀧 𑀢𑁂.

𑁧𑁧𑁯.

‘‘𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀏𑀢𑀁 𑀤𑀻𑀧𑀁 𑀅𑀦𑀸𑀧𑀭𑀁;

𑀦𑀺𑀩𑁆𑀩𑀸𑀦𑀁 𑀇𑀢𑀺 𑀦𑀁 𑀩𑁆𑀭𑀽𑀫𑀺, 𑀚𑀭𑀸𑀫𑀘𑁆𑀘𑀼𑀧𑀭𑀺𑀓𑁆𑀔𑀬𑀁.

𑁧𑁨𑁦.

‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸, 𑀦 𑀢𑁂 𑀫𑀸𑀭𑀲𑁆𑀲 𑀧𑀝𑁆𑀞𑀕𑀽’’𑀢𑀺 [𑀧𑀤𑁆𑀥𑀕𑀽 (𑀲𑀻.)].

𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑀤𑀲𑀫𑀸.

𑁧𑁧. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸

𑁧𑁨𑁧.

‘‘𑀲𑀼𑀢𑁆𑀯𑀸𑀦𑀳𑀁 𑀯𑀻𑀭𑀫𑀓𑀸𑀫𑀓𑀸𑀫𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺]

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁;

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢, 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑁧𑁨𑁨.

‘‘𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸;

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁’’.

𑁧𑁨𑁩.

‘‘𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁, [𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸]

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸, 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀁.

𑁧𑁨𑁪.

‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑁧𑁨𑁫.

‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂’’𑀢𑀺.

𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸 𑀏𑀓𑀸𑀤𑀲𑀫𑀸.

𑁧𑁨. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸

𑁧𑁨𑁬.

‘‘𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄]

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁;

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁, 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄.

𑁧𑁨𑁭.

‘‘𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸,

𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸;

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’.

𑁧𑁨𑁮.

‘‘𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁, [𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀁.

𑁧𑁨𑁯.

‘‘𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣, 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂;

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢’’𑀦𑁆𑀢𑀺.

𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸 𑀤𑁆𑀯𑀸𑀤𑀲𑀫𑀸.

𑁧𑁩. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸

𑁧𑁩𑁦.

‘‘𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀤𑀬𑁄]

𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀁;

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁’’.

𑁧𑁩𑁧.

‘‘𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀁, [𑀉𑀤𑀬𑀸𑀢𑀺 𑀪𑀕𑀯𑀸]

𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀁;

𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀁, 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀁.

𑁧𑁩𑁨.

‘‘𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀁, 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁’’.

𑁧𑁩𑁩.

‘‘𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁;

𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺’’.

𑁧𑁩𑁪.

‘‘𑀦𑀦𑁆𑀤𑀺𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺’’.

𑁧𑁩𑁫.

‘‘𑀓𑀣𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀺;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯’’.

𑁧𑁩𑁬.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑁄;

𑀏𑀯𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸 𑀢𑁂𑀭𑀲𑀫𑀸.

𑁧𑁪. 𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸

𑁧𑁩𑁭.

‘‘𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀧𑁄𑀲𑀸𑀮𑁄]

𑀅𑀦𑁂𑀚𑁄 𑀙𑀺𑀦𑁆𑀦𑀲𑀁𑀲𑀬𑁄;

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑁧𑁩𑁮.

‘‘𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲, 𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄;

𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀺, 𑀓𑀣𑀁 𑀦𑁂𑀬𑁆𑀬𑁄 𑀢𑀣𑀸𑀯𑀺𑀥𑁄’’.

𑁧𑁩𑁯.

‘‘𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸, [𑀧𑁄𑀲𑀸𑀮𑀸𑀢𑀺 𑀪𑀕𑀯𑀸]

𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄;

𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀺, 𑀯𑀺𑀫𑀼𑀢𑁆𑀢𑀁 𑀢𑀧𑁆𑀧𑀭𑀸𑀬𑀡𑀁.

𑁧𑁪𑁦.

‘‘𑀆𑀓𑀺𑀜𑁆𑀘𑀜𑁆𑀜𑀲𑀫𑁆𑀪𑀯𑀁 𑀜𑀢𑁆𑀯𑀸, 𑀦𑀦𑁆𑀤𑀻 𑀲𑀁𑀬𑁄𑀚𑀦𑀁 𑀇𑀢𑀺;

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀏𑀢𑀁 [𑀏𑀯𑀁 (𑀲𑁆𑀬𑀸. 𑀓.)] 𑀜𑀸𑀡𑀁 𑀢𑀣𑀁 𑀢𑀲𑁆𑀲, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄’’𑀢𑀺.

𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸 𑀘𑀼𑀤𑁆𑀤𑀲𑀫𑀸.

𑁧𑁫. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸

𑁧𑁪𑁧.

‘‘𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸]

𑀦 𑀫𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸;

𑀬𑀸𑀯𑀢𑀢𑀺𑀬𑀜𑁆𑀘 𑀤𑁂𑀯𑀻𑀲𑀺, 𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢𑀁.

𑁧𑁪𑁨.

‘‘𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄, 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄;

𑀤𑀺𑀝𑁆𑀞𑀺𑀁 𑀢𑁂 𑀦𑀸𑀪𑀺𑀚𑀸𑀦𑀸𑀢𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁪𑁩.

‘‘𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺’’.

𑁧𑁪𑁪.

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺.

𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸 𑀧𑀦𑁆𑀦𑀭𑀲𑀫𑀸.

𑁧𑁬. 𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸

𑁧𑁪𑁫.

‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼;

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁’’.

𑁧𑁪𑁬.

‘‘𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬’’.

𑁧𑁪𑁭.

‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀫𑀼𑀢𑀁 [𑀅𑀲𑀼𑀢𑀁 𑀅𑀫𑀼𑀢𑀁 𑀯𑀸 (𑀲𑀻.), 𑀅𑀲𑀼𑀢𑀸𑀫𑀼𑀢𑀁 𑀯𑀸 (𑀲𑁆𑀬𑀸.), 𑀅𑀲𑀼𑀢𑀁’𑀫𑀼𑀢𑀁 𑀯𑀸 (𑀧𑀻.)], 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀦𑀫𑀢𑁆𑀣𑀺 [𑀓𑀜𑁆𑀘𑀺 𑀫𑀢𑁆𑀣𑀺 (𑀲𑁆𑀬𑀸.), 𑀓𑀺𑀜𑁆𑀘𑀺 𑀦𑀢𑁆𑀣𑀺 (𑀧𑀻.), 𑀓𑀺𑀜𑁆𑀘𑀺𑀦𑀫𑀢𑁆𑀣𑀺 (𑀓.)] 𑀮𑁄𑀓𑁂;

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁’’.

𑁧𑁪𑁮.

‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸 𑀲𑁄𑀴𑀲𑀫𑀸.

𑁧𑁭. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸

𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 [𑀧𑀭𑀺𑀘𑀸𑀭𑀓𑀲𑁄𑀴𑀲𑀦𑁆𑀦𑀁 (𑀲𑁆𑀬𑀸. 𑀓.)] 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 [𑀧𑀜𑁆𑀳𑁂 (𑀲𑀻. 𑀧𑀻.)] 𑀩𑁆𑀬𑀸𑀓𑀸𑀲𑀺. 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. ‘‘𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸’’𑀢𑀺 𑁋 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 𑀧𑀸𑀭𑀸𑀬𑀦𑀦𑁆𑀢𑁂𑀯 [𑀧𑀸𑀭𑀸𑀬𑀡𑀁𑀢𑁆𑀯𑁂𑀯 (𑀲𑀻. 𑀅𑀝𑁆𑀞.)] 𑀅𑀥𑀺𑀯𑀘𑀦𑀁.

𑁧𑁪𑁯.

𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽;

𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄.

𑁧𑁫𑁦.

𑀢𑁄𑀤𑁂𑀬𑁆𑀬𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄;

𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑁧𑁫𑁧.

𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁, 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁;

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀁.

𑁧𑁫𑁨.

𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺, 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦, 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀺.

𑁧𑁫𑁩.

𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁫𑁪.

𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄.

𑁧𑁫𑁫.

𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬, 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀺.

𑁧𑁮. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸

𑁧𑁫𑁬.

‘‘𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀬𑀣𑀸𑀤𑁆𑀤𑀓𑁆𑀔𑀺 𑀢𑀣𑀸𑀓𑁆𑀔𑀸𑀲𑀺, 𑀯𑀺𑀫𑀮𑁄 𑀪𑀽𑀭𑀺𑀫𑁂𑀥𑀲𑁄;

𑀦𑀺𑀓𑁆𑀓𑀸𑀫𑁄 𑀦𑀺𑀩𑁆𑀩𑀦𑁄 [𑀦𑀺𑀩𑁆𑀩𑀼𑀢𑁄 (𑀲𑁆𑀬𑀸.)] 𑀦𑀸𑀕𑁄, 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂.

𑁧𑁫𑁭.

‘‘𑀧𑀳𑀻𑀦𑀫𑀮𑀫𑁄𑀳𑀲𑁆𑀲, 𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀺𑀦𑁄;

𑀳𑀦𑁆𑀤𑀸𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀁 𑀯𑀡𑁆𑀡𑀽𑀧𑀲𑀜𑁆𑀳𑀺𑀢𑀁.

𑁧𑁫𑁮.

‘‘𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼, 𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄;

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄, 𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂.

𑁧𑁫𑁯.

‘‘𑀤𑀺𑀚𑁄 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬, 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬;

𑀏𑀯𑀫𑁆𑀧𑀳𑀁 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬, 𑀫𑀳𑁄𑀤𑀥𑀺𑀁 𑀳𑀁𑀲𑁄𑀭𑀺𑀯 𑀅𑀚𑁆𑀛𑀧𑀢𑁆𑀢𑁄.

𑁧𑁬𑁦.

‘‘𑀬𑁂𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺;

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁, 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁.

𑁧𑁬𑁧.

‘‘𑀏𑀓𑁄 𑀢𑀫𑀦𑀼𑀤𑀸𑀲𑀺𑀦𑁄, 𑀚𑀼𑀢𑀺𑀫𑀸 𑀲𑁄 𑀧𑀪𑀗𑁆𑀓𑀭𑁄;

𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄, 𑀕𑁄𑀢𑀫𑁄 𑀪𑀽𑀭𑀺𑀫𑁂𑀥𑀲𑁄.

𑁧𑁬𑁨.

‘‘𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺’’.

𑁧𑁬𑁩.

‘‘𑀓𑀺𑀁 𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀲𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀺𑀗𑁆𑀕𑀺𑀬;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑁧𑁬𑁪.

‘‘𑀬𑁄 𑀢𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺’’.

𑁧𑁬𑁫.

‘‘𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀩𑁆𑀭𑀸𑀳𑁆𑀫𑀡;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑁧𑁬𑁬.

‘‘𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺.

𑁧𑁬𑁭.

‘‘𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄.

𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀁, 𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀁.

𑁧𑁬𑁮.

‘‘𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘,

𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸;

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀺.

𑁧𑁬𑁯.

‘‘𑀚𑀺𑀡𑁆𑀡𑀲𑁆𑀲 𑀫𑁂 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲, 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀺 𑀢𑀢𑁆𑀣;

𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬 [𑀲𑀁𑀓𑀧𑁆𑀧𑀬𑀢𑁆𑀢𑀸𑀬 (𑀲𑀻.)] 𑀯𑀚𑀸𑀫𑀺 𑀦𑀺𑀘𑁆𑀘𑀁, 𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄.

𑁧𑁭𑁦.

‘‘𑀧𑀗𑁆𑀓𑁂 𑀲𑀬𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄, 𑀤𑀻𑀧𑀸 𑀤𑀻𑀧𑀁 𑀉𑀧𑀮𑁆𑀮𑀯𑀺𑀁;

𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

𑁧𑁭𑁧.

‘‘𑀬𑀣𑀸 𑀅𑀳𑀽 𑀯𑀓𑁆𑀓𑀮𑀺 𑀫𑀼𑀢𑁆𑀢𑀲𑀤𑁆𑀥𑁄, 𑀪𑀤𑁆𑀭𑀸𑀯𑀼𑀥𑁄 𑀆𑀴𑀯𑀺𑀕𑁄𑀢𑀫𑁄 𑀘;

𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁, 𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁’’ [𑀫𑀘𑁆𑀘𑀼𑀥𑁂𑀬𑁆𑀬𑀧𑀸𑀭𑀁 (𑀲𑀻.)].

𑁧𑁭𑁨.

‘‘𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄;

𑀯𑀺𑀯𑀝𑁆𑀝𑀘𑁆𑀙𑀤𑁄 𑀲𑀫𑁆𑀩𑀼𑀤𑁆𑀥𑁄, 𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸.

𑁧𑁭𑁩.

‘‘𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀁 𑀯𑁂𑀤𑀺 𑀧𑀭𑁄𑀧𑀭𑀁;

𑀧𑀜𑁆𑀳𑀸𑀦𑀦𑁆𑀢𑀓𑀭𑁄 𑀲𑀢𑁆𑀣𑀸, 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀁.

𑁧𑁭𑁪.

‘‘𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺;

𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺 𑀦 𑀫𑁂𑀢𑁆𑀣 𑀓𑀗𑁆𑀔𑀸, 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢’’𑀦𑁆𑀢𑀺 [𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀬 𑀧𑀝𑁆𑀞𑀸𑀬 𑀬𑀸𑀯𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀢𑀸𑀧𑀭𑀺𑀬𑁄𑀲𑀸𑀦𑀸 𑀲𑁆𑀬𑀸. … 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺].

𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀬𑀦𑀯𑀕𑁆𑀕𑀦𑀺𑀤𑁆𑀤𑁂𑀲𑁄

𑁧. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁧.

𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺 [𑀩𑁆𑀭𑀽𑀳𑀺 (𑀲𑁆𑀬𑀸.)], 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀁.

𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺. 𑀮𑁄𑀓𑁄𑀢𑀺 𑀦𑀺𑀭𑀬𑀮𑁄𑀓𑁄 𑀢𑀺𑀭𑀘𑁆𑀙𑀸𑀦𑀮𑁄𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀤𑁂𑀯𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀤𑁂𑀯𑀮𑁄𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀓𑁄. 𑀅𑀬𑀁 𑀮𑁄𑀓𑁄 𑀓𑁂𑀦 𑀆𑀯𑀼𑀢𑁄 𑀦𑀺𑀯𑀼𑀢𑁄 𑀑𑀯𑀼𑀢𑁄 [𑀑𑀨𑀼𑀢𑁄 (𑀲𑁆𑀬𑀸.)] 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑁋 𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄?

𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 [𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀫𑁂𑀢𑀁 (𑀩𑀳𑀽𑀲𑀼)] 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀸𑀢𑀺. 𑀅𑀚𑀺𑀢𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄.

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻𑀢𑀺 𑀓𑁂𑀦 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀺 𑀦 𑀪𑀸𑀲𑀢𑀺 𑀦 𑀢𑀧𑀢𑀺 𑀦 𑀯𑀺𑀭𑁄𑀘𑀢𑀺 𑀦 𑀜𑀸𑀬𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑁋 𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺.

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻𑀢𑀺 𑀓𑀺𑀁 𑀮𑁄𑀓𑀲𑁆𑀲 𑀮𑁂𑀧𑀦𑀁 𑀮𑀕𑁆𑀕𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄. 𑀓𑁂𑀦 𑀮𑁄𑀓𑁄 𑀮𑀺𑀢𑁆𑀢𑁄 𑀲𑀁𑀮𑀺𑀢𑁆𑀢𑁄 𑀉𑀧𑀮𑀺𑀢𑁆𑀢𑁄 𑀓𑀺𑀮𑀺𑀝𑁆𑀞𑁄 𑀲𑀁𑀓𑀺𑀮𑀺𑀝𑁆𑀞𑁄 𑀫𑀓𑁆𑀔𑀺𑀢𑁄 𑀲𑀁𑀲𑀝𑁆𑀞𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄, 𑀩𑁆𑀭𑀽𑀲𑀺 𑀆𑀘𑀺𑀓𑁆𑀔𑀲𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 [𑀧𑀜𑁆𑀜𑀸𑀧𑁂𑀲𑀺 (𑀓.)] 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀲𑀺 𑀯𑀺𑀪𑀚𑀲𑀺 𑀉𑀢𑁆𑀢𑀸𑀦𑀻𑀓𑀭𑁄𑀲𑀺 [𑀉𑀢𑁆𑀢𑀸𑀦𑀺𑀁 𑀓𑀭𑁄𑀲𑀺 (𑀓.)] 𑀧𑀓𑀸𑀲𑁂𑀲𑀻𑀢𑀺 𑁋 𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺.

𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺 𑀓𑀺𑀁 𑀮𑁄𑀓𑀲𑁆𑀲 𑀪𑀬𑀁 𑀫𑀳𑀩𑁆𑀪𑀬𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑁄 𑀉𑀧𑀲𑀕𑁆𑀕𑁄𑀢𑀺 𑁋 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑁨.

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁.

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺. 𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁, 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀁𑀕𑀸𑀳𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀅𑀲𑀫𑀧𑁂𑀓𑁆𑀔𑀦𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 [𑀅𑀧𑀘𑁆𑀘𑀯𑁂𑀓𑁆𑀔𑀦𑀸 (𑀲𑁆𑀬𑀸.)] 𑀅𑀧𑀘𑁆𑀘𑀯𑁂𑀓𑁆𑀔𑀡𑀓𑀫𑁆𑀫𑀁 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑁋 𑀅𑀯𑀺𑀚𑁆𑀚𑀸.

𑀮𑁄𑀓𑁄𑀢𑀺 𑀦𑀺𑀭𑀬𑀮𑁄𑀓𑁄 𑀢𑀺𑀭𑀘𑁆𑀙𑀸𑀦𑀮𑁄𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀤𑁂𑀯𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀤𑁂𑀯𑀮𑁄𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀓𑁄. 𑀅𑀬𑀁 𑀮𑁄𑀓𑁄 𑀇𑀫𑀸𑀬 𑀅𑀯𑀺𑀚𑁆𑀚𑀸𑀬 𑀆𑀯𑀼𑀢𑁄 𑀦𑀺𑀯𑀼𑀢𑁄 𑀑𑀯𑀼𑀢𑁄 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑁋 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄.

𑀅𑀚𑀺𑀢𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘, 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸; 𑀪𑀕𑁆𑀕𑀓𑀡𑁆𑀝𑀓𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸; 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸; 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸; 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 [𑀪𑀸𑀯𑀺𑀢𑀓𑀸𑀬𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀲𑀻𑀮𑁄𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑁄𑀢𑀺 (𑀲𑁆𑀬𑀸.)] 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸; 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑁆𑀬𑀸.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸; 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀅𑀚𑀺𑀢𑀸𑀢𑀺 𑀪𑀕𑀯𑀸.

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻𑀢𑀺. 𑀯𑁂𑀯𑀺𑀘𑁆𑀙𑀁 𑀯𑀼𑀘𑁆𑀘𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑁂𑀭𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀕𑀸𑀳𑁄 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀧𑀫𑀸𑀤𑁄 𑀯𑀢𑁆𑀢𑀩𑁆𑀩𑁄 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 [𑀯𑁄𑀲𑁆𑀲𑀕𑁆𑀕𑁄 (𑀩𑀳𑀽𑀲𑀼)] 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 [𑀅𑀦𑀺𑀝𑁆𑀞𑀺𑀢𑀓𑀺𑀭𑀺𑀬𑀢𑀸 (𑀓.) 𑀯𑀺𑀪. 𑁮𑁪𑁬] 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀧𑀫𑀸𑀤𑁄. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄. 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻𑀢𑀺 𑀇𑀫𑀺𑀦𑀸 𑀘 𑀫𑀘𑁆𑀙𑀭𑀺𑀬𑁂𑀦 𑀇𑀫𑀺𑀦𑀸 𑀘 𑀧𑀫𑀸𑀤𑁂𑀦 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀺 𑀦 𑀪𑀸𑀲𑀢𑀺 𑀦 𑀢𑀧𑀢𑀺 𑀦 𑀯𑀺𑀭𑁄𑀘𑀢𑀺 𑀦 𑀜𑀸𑀬𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑁋 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺.

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻𑀢𑀺 𑀚𑀧𑁆𑀧𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 [𑀦𑀦𑁆𑀤𑀺 (𑀲𑁆𑀬𑀸.)] 𑀦𑀦𑁆𑀤𑀺𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 𑀲𑀗𑁆𑀕𑁄 𑀧𑀗𑁆𑀓𑁄 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸 𑀲𑀼𑀢𑁆𑀢𑀁 𑀯𑀺𑀲𑀝𑀸 [𑀲𑁄𑀢𑁆𑀢𑀁 𑀯𑀺𑀲𑀢𑀸 (𑀲𑁆𑀬𑀸.)] 𑀆𑀬𑀽𑀳𑀦𑀻 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺 𑀯𑀦𑀁 𑀯𑀦𑀣𑁄 𑀲𑀦𑁆𑀣𑀯𑁄 [𑀲𑀦𑁆𑀥𑀯𑁄 (𑀓.) 𑀯𑀺𑀪. 𑁯𑁦𑁯] 𑀲𑀺𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼 𑀆𑀲𑀸 𑀆𑀲𑀻𑀲𑀦𑀸 [𑀆𑀲𑀺𑀁𑀲𑀦𑀸 (𑀲𑁆𑀬𑀸.)] 𑀆𑀲𑀻𑀲𑀺𑀢𑀢𑁆𑀢𑀁 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸 𑀮𑀸𑀪𑀸𑀲𑀸 𑀥𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀸𑀫𑀺𑀲𑀁 𑀫𑀸𑀭𑀯𑀺𑀲𑀬𑁄 𑀫𑀸𑀭𑀦𑀺𑀯𑀸𑀲𑁄 𑀫𑀸𑀭𑀕𑁄𑀘𑀭𑁄 𑀫𑀸𑀭𑀩𑀦𑁆𑀥𑀦𑀁 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀧𑁆𑀧𑀸. 𑀮𑁄𑀓𑀲𑁆𑀲 𑀮𑁂𑀧𑀦𑀁 𑀮𑀕𑁆𑀕𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀇𑀫𑀸𑀬 𑀚𑀧𑁆𑀧𑀸𑀬 𑀮𑁄𑀓𑁄 𑀮𑀺𑀢𑁆𑀢𑁄 𑀲𑀁𑀮𑀺𑀢𑁆𑀢𑁄 𑀉𑀧𑀮𑀺𑀢𑁆𑀢𑁄 𑀓𑀺𑀮𑀺𑀝𑁆𑀞𑁄 𑀲𑀁𑀓𑀺𑀮𑀺𑀝𑁆𑀞𑁄 𑀫𑀓𑁆𑀔𑀺𑀢𑁄 𑀲𑀁𑀲𑀝𑁆𑀞𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺.

𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀦𑁂𑀭𑀬𑀺𑀓𑀁 𑀤𑀼𑀓𑁆𑀔𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀁 𑀤𑀼𑀓𑁆𑀔𑀁 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀁 𑀤𑀼𑀓𑁆𑀔𑀁 𑀫𑀸𑀦𑀼𑀲𑀺𑀓𑀁 𑀤𑀼𑀓𑁆𑀔𑀁 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑀁 [𑀕𑀩𑁆𑀪𑁂𑀞𑀺𑀢𑀺𑀫𑀽𑀮𑀓𑀁 (𑀲𑁆𑀬𑀸. 𑀓.)] 𑀤𑀼𑀓𑁆𑀔𑀁 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑀁 𑀤𑀼𑀓𑁆𑀔𑀁 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑀁 𑀤𑀼𑀓𑁆𑀔𑀁 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑀁 𑀤𑀼𑀓𑁆𑀔𑀁 𑀅𑀢𑁆𑀢𑀽𑀧𑀓𑁆𑀓𑀫𑀤𑀼𑀓𑁆𑀔𑀁 𑀧𑀭𑀽𑀧𑀓𑁆𑀓𑀫𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 [𑀟𑀳𑁄 (𑀲𑁆𑀬𑀸.)] 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 [𑀭𑀓𑁆𑀔𑀲𑀸 (𑀓.)] 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁 [𑀮𑁄𑀳𑀺𑀢𑀁 𑀧𑀺𑀢𑁆𑀢𑀁 (𑀩𑀳𑀽𑀲𑀼)] 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀁 𑀫𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀧𑀺𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀪𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀪𑀕𑀺𑀦𑀺𑀫𑀭𑀡𑀁 𑀤𑀼𑀓𑁆𑀔𑀁 𑀧𑀼𑀢𑁆𑀢𑀫𑀭𑀡𑀁 𑀤𑀼𑀓𑁆𑀔𑀁 𑀥𑀻𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀜𑀸𑀢𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀭𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀪𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀲𑀻𑀮𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀤𑀺𑀢𑁄 𑀲𑀫𑀼𑀤𑀸𑀕𑀫𑀦𑀁 𑀧𑀜𑁆𑀜𑀸𑀬𑀢𑀺. 𑀅𑀢𑁆𑀣𑀗𑁆𑀕𑀫𑀢𑁄 𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀺. 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄. 𑀯𑀺𑀧𑀸𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀁, 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀁 𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁 𑀚𑀭𑀸𑀬 𑀅𑀦𑀼𑀲𑀝𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁 𑀅𑀢𑀸𑀡𑀁 𑀅𑀮𑁂𑀡𑀁 𑀅𑀲𑀭𑀡𑀁 𑀅𑀲𑀭𑀡𑀻𑀪𑀽𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀁. 𑀇𑀤𑀁 𑀤𑀼𑀓𑁆𑀔𑀁 𑀮𑁄𑀓𑀲𑁆𑀲 𑀪𑀬𑀁 𑀫𑀳𑀸𑀪𑀬𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑁄 𑀉𑀧𑀲𑀕𑁆𑀕𑁄𑀢𑀺 𑁋 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑁩.

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂 [𑀧𑀺𑀣𑀺𑀬𑁆𑀬𑀭𑁂 (𑀲𑁆𑀬𑀸.), 𑀧𑀺𑀣𑀻𑀬𑀭𑁂 (𑀲𑀻. 𑀅𑀝𑁆𑀞.)] .

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺. 𑀲𑁄𑀢𑀸𑀢𑀺 𑀢𑀡𑁆𑀳𑀸𑀲𑁄𑀢𑁄 𑀤𑀺𑀝𑁆𑀞𑀺𑀲𑁄𑀢𑁄 𑀓𑀺𑀮𑁂𑀲𑀲𑁄𑀢𑁄 𑀤𑀼𑀘𑁆𑀘𑀭𑀺𑀢𑀲𑁄𑀢𑁄 𑀅𑀯𑀺𑀚𑁆𑀚𑀸𑀲𑁄𑀢𑁄. 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑁂𑀲𑀼 𑀆𑀬𑀢𑀦𑁂𑀲𑀼. 𑀲𑀯𑀦𑁆𑀢𑀻𑀢𑀺 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀘𑀓𑁆𑀔𑀼𑀢𑁄 𑀭𑀽𑀧𑁂 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀲𑁄𑀢𑀢𑁄 𑀲𑀤𑁆𑀤𑁂 𑀲𑀯𑀦𑁆𑀢𑀺…𑀧𑁂… 𑀖𑀸𑀦𑀢𑁄 𑀕𑀦𑁆𑀥𑁂 𑀲𑀯𑀦𑁆𑀢𑀺… 𑀚𑀺𑀯𑁆𑀳𑀸𑀢𑁄 𑀭𑀲𑁂 𑀲𑀯𑀦𑁆𑀢𑀺… 𑀓𑀸𑀬𑀢𑁄 𑀨𑁄𑀝𑁆𑀞𑀩𑁆𑀩𑁂 𑀲𑀯𑀦𑁆𑀢𑀺… 𑀫𑀦𑀢𑁄 𑀥𑀫𑁆𑀫𑁂 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀘𑀓𑁆𑀔𑀼𑀢𑁄 𑀭𑀽𑀧𑀢𑀡𑁆𑀳𑀸 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀲𑁄𑀢𑀢𑁄 𑀲𑀤𑁆𑀤𑀢𑀡𑁆𑀳𑀸 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀖𑀸𑀦𑀢𑁄 𑀕𑀦𑁆𑀥𑀢𑀡𑁆𑀳𑀸 𑀲𑀯𑀦𑁆𑀢𑀺… 𑀚𑀺𑀯𑁆𑀳𑀸𑀢𑁄 𑀭𑀲𑀢𑀡𑁆𑀳𑀸 𑀲𑀯𑀦𑁆𑀢𑀺… 𑀓𑀸𑀬𑀢𑁄 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀲𑀯𑀦𑁆𑀢𑀺… 𑀫𑀦𑀢𑁄 𑀥𑀫𑁆𑀫𑀢𑀡𑁆𑀳𑀸 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑁋 𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸.

𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀘𑁆𑀘𑀸𑀢𑀺…𑀧𑁂… 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄.

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀲𑁄𑀢𑀸𑀦𑀁 𑀓𑀺𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀦𑁆𑀢𑀺 𑁋 𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁.

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀻𑀢𑀺 𑀲𑁄𑀢𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺.

𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂𑀢𑀺 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑁋 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂’’.

𑁪.

𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂.

𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀦𑁆𑀢𑀺 𑀬𑀸𑀦𑀺 𑀏𑀢𑀸𑀦𑀺 𑀲𑁄𑀢𑀸𑀦𑀺 𑀫𑀬𑀸 𑀓𑀺𑀢𑁆𑀢𑀺𑀢𑀸𑀦𑀺 𑀧𑀓𑀺𑀢𑁆𑀢𑀺𑀢𑀸𑀦𑀺 𑀆𑀘𑀺𑀓𑁆𑀔𑀺𑀢𑀸𑀦𑀺 𑀤𑁂𑀲𑀺𑀢𑀸𑀦𑀺 𑀧𑀜𑁆𑀜𑀧𑀺𑀢𑀸𑀦𑀺 𑀧𑀝𑁆𑀞𑀧𑀺𑀢𑀸𑀦𑀺 𑀯𑀺𑀯𑀭𑀺𑀢𑀸𑀦𑀺 𑀯𑀺𑀪𑀚𑀺𑀢𑀸𑀦𑀺 [𑀯𑀺𑀪𑀢𑁆𑀢𑀸𑀦𑀺 (𑀓.)] 𑀉𑀢𑁆𑀢𑀸𑀦𑀻𑀓𑀢𑀸𑀦𑀺 𑀧𑀓𑀸𑀲𑀺𑀢𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 [𑀲𑁂𑀬𑁆𑀬𑀣𑀻𑀤𑀁 (𑀲𑁆𑀬𑀸.)] 𑁋 𑀢𑀡𑁆𑀳𑀸𑀲𑁄𑀢𑁄 𑀤𑀺𑀝𑁆𑀞𑀺𑀲𑁄𑀢𑁄 𑀓𑀺𑀮𑁂𑀲𑀲𑁄𑀢𑁄 𑀤𑀼𑀘𑁆𑀘𑀭𑀺𑀢𑀲𑁄𑀢𑁄 𑀅𑀯𑀺𑀚𑁆𑀚𑀸𑀲𑁄𑀢𑁄. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁. 𑀅𑀚𑀺𑀢𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺.

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀦𑁆𑀢𑀺. 𑀲𑀢𑀻𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀦𑀺𑀯𑀸𑀭𑀡𑀦𑁆𑀢𑀺 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀦𑁆𑀢𑀺 𑁋 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁.

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀲𑁄𑀢𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀁 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺…𑀧𑁂… 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺.

𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺. 𑀧𑀜𑁆𑀜𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺 𑁋 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺…𑀧𑁂… ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺… ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺… ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺… ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺… ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺… ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺… ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺… ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺… ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’𑀢𑀺… ‘‘𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’’𑀢𑀺… ‘‘𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’’𑀢𑀺… ‘‘𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’’𑀢𑀺… ‘‘𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺… ‘‘𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’’𑀢𑀺… ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺… ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺… ‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’’𑀢𑀺… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀆𑀲𑀯𑀸’’𑀢𑀺…𑀧𑁂… ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺…𑀧𑁂… ‘‘𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀚𑀸𑀦𑀢𑁄 𑀧𑀲𑁆𑀲𑀢𑁄… 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀚𑀸𑀦𑀢𑁄 𑀧𑀲𑁆𑀲𑀢𑁄… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺.

𑁫.

𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺.

𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀻𑀢𑀺. 𑀧𑀜𑁆𑀜𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻 [𑀪𑀽𑀭𑀺 (𑀓.)] 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀢𑀻𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀻𑀢𑀺 𑁋 𑀧𑀜𑁆𑀜𑀸 𑀘𑁂𑀯 𑀲𑀢𑀺𑀘𑀸𑀧𑀺, 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄.

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲𑀸𑀢𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲.

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺. 𑀏𑀢𑀁 𑀫𑁂𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀧𑀩𑁆𑀭𑀽𑀳𑀻𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 [𑀯𑀺𑀯𑀭𑁂𑀳𑀺 𑀯𑀺𑀪𑀚𑁂𑀳𑀺 (𑀓.)] 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺.

𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀓𑀢𑁆𑀣𑁂𑀢𑀁 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑁆𑀫𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺. 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀯𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑁬.

𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺.

𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻𑀢𑀺. 𑀬𑀫𑁂𑀢𑀦𑁆𑀢𑀺 𑀧𑀜𑁆𑀜𑀜𑁆𑀘 𑀲𑀢𑀺𑀜𑁆𑀘 𑀦𑀸𑀫𑀭𑀽𑀧𑀜𑁆𑀘. 𑀅𑀧𑀼𑀘𑁆𑀙𑀻𑀢𑀺 𑀅𑀧𑀼𑀘𑁆𑀙𑀲𑀺 𑀬𑀸𑀘𑀲𑀺 𑀅𑀚𑁆𑀛𑁂𑀲𑀢𑀺 [𑀅𑀚𑁆𑀛𑁂𑀲𑀺 (𑀓.)] 𑀧𑀲𑀸𑀤𑁂𑀲𑀻𑀢𑀺 𑁋 𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺.

𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂𑀢𑀺. 𑀅𑀚𑀺𑀢𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀢𑀦𑁆𑀢𑀺 𑀧𑀜𑁆𑀜𑀜𑁆𑀘 𑀲𑀢𑀺𑀜𑁆𑀘 𑀦𑀸𑀫𑀭𑀽𑀧𑀜𑁆𑀘. 𑀯𑀤𑀸𑀫𑀻𑀢𑀺 𑀯𑀤𑀸𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺. 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂.

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀅𑀲𑁂𑀲𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 [𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 (𑀲𑁆𑀬𑀸. 𑀓.)] 𑀅𑀲𑁂𑀲𑀦𑁆𑀢𑀺. 𑀉𑀧𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑁆𑀫𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺. 𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺.

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀏𑀓𑀁 𑀪𑀯𑀁 𑀞𑀧𑁂𑀢𑁆𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀭𑀳𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑁭.

𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 [𑀲𑁂𑀓𑁆𑀔𑀸 (𑀲𑁆𑀬𑀸. 𑀓.)] 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲.

𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀓𑀺𑀁𑀓𑀸𑀭𑀡𑀸 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸? 𑀢𑁂 𑀲𑀗𑁆𑀔𑀸𑀢𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. 𑀅𑀣 𑀯𑀸 𑀢𑁂𑀲𑀁 𑀔𑀦𑁆𑀥𑀸 𑀲𑀗𑁆𑀔𑀸𑀢𑀸 𑀥𑀸𑀢𑀼𑀬𑁄 𑀲𑀗𑁆𑀔𑀸𑀢𑀸 𑀆𑀬𑀢𑀦𑀸𑀦𑀺 𑀲𑀗𑁆𑀔𑀸𑀢𑀸 𑀕𑀢𑀺𑀬𑁄 𑀲𑀗𑁆𑀔𑀸𑀢𑀸 𑀉𑀧𑀧𑀢𑁆𑀢𑀺𑀬𑁄 𑀲𑀗𑁆𑀔𑀸𑀢𑀸 𑀧𑀝𑀺𑀲𑀦𑁆𑀥𑀺 𑀲𑀗𑁆𑀔𑀸𑀢𑀸 𑀪𑀯𑀸 𑀲𑀗𑁆𑀔𑀸𑀢𑀸 𑀲𑀁𑀲𑀸𑀭𑀸 𑀲𑀗𑁆𑀔𑀸𑀢𑀸 𑀯𑀝𑁆𑀝𑀸 𑀲𑀗𑁆𑀔𑀸𑀢𑀸. 𑀅𑀣 𑀯𑀸 𑀢𑁂 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀅𑀦𑁆𑀢𑀺𑀫𑁂 𑀪𑀯𑁂 𑀞𑀺𑀢𑀸 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑀸 𑀅𑀦𑁆𑀢𑀺𑀫𑀤𑁂𑀳𑀥𑀭𑀸 𑀅𑀭𑀳𑀦𑁆𑀢𑁄.

𑀢𑁂𑀲𑀁 𑀘𑀸𑀬𑀁 [𑀬𑀸𑀬𑀁 (𑀓.)] 𑀧𑀘𑁆𑀙𑀺𑀫𑀓𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀦𑁂𑀲𑀁 𑀧𑀼𑀦𑀩𑁆𑀪𑀯𑁄𑀢𑀺.

𑀢𑀁𑀓𑀸𑀭𑀡𑀸 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸𑀢𑀺. 𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥𑀸𑀢𑀺. 𑀲𑁂𑀔𑀸𑀢𑀺 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀲𑁂𑀔𑀸? 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀔𑀸. 𑀓𑀺𑀜𑁆𑀘 𑀲𑀺𑀓𑁆𑀔𑀦𑁆𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀇𑀫𑁂 𑀆𑀲𑀯𑀸’’𑀢𑀺…𑀧𑁂… ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸’’… 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀲𑁆𑀲𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑁆𑀬𑀸.)] 𑀧𑀕𑁆𑀕𑀡𑁆𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀆𑀘𑀭𑀦𑁆𑀢𑀺 𑀲𑀫𑀸𑀘𑀭𑀦𑁆𑀢𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑁋 𑀲𑁂𑀔𑀸. 𑀧𑀼𑀣𑀽𑀢𑀺 𑀩𑀳𑀼𑀓𑀸. 𑀏𑀢𑁂 𑀲𑁂𑀔𑀸 𑀲𑁄𑀢𑀸𑀧𑀦𑁆𑀦𑀸 𑀘 𑀧𑀝𑀺𑀧𑀦𑁆𑀦𑀸 𑀘 𑀲𑀓𑀤𑀸𑀕𑀸𑀫𑀺𑀦𑁄 𑀘 𑀧𑀝𑀺𑀧𑀦𑁆𑀦𑀸 𑀘 𑀅𑀦𑀸𑀕𑀸𑀫𑀺𑀦𑁄 𑀘 𑀧𑀝𑀺𑀧𑀦𑁆𑀦𑀸 𑀘 𑀅𑀭𑀳𑀦𑁆𑀢𑁄 𑀘 𑀧𑀝𑀺𑀧𑀦𑁆𑀦𑀸 𑀘. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥.

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸𑀢𑀺 𑀢𑁆𑀯𑀫𑁆𑀧𑀺 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀫𑁂𑀥𑀸𑀯𑀻. 𑀢𑁂𑀲𑀁 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀜𑁆𑀘 𑀲𑁂𑀓𑁆𑀔𑀸𑀦𑀜𑁆𑀘 𑀇𑀭𑀺𑀬𑀁 𑀘𑀭𑀺𑀬𑀁 𑀯𑀼𑀢𑁆𑀢𑀺 𑀧𑀯𑀢𑁆𑀢𑀺 𑀆𑀘𑀭𑀁 𑀕𑁄𑀘𑀭𑀁 𑀯𑀺𑀳𑀸𑀭𑀁 𑀧𑀝𑀺𑀧𑀤𑀁. 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀧𑀩𑁆𑀭𑀽𑀳𑀻𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

𑁮.

𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 [𑀧𑀸𑀧𑀼𑀭𑀡𑀸 (𑀲𑁆𑀬𑀸.)] 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 [𑀭𑀸𑀚𑀞𑀸𑀦𑀺𑀬𑁄 (𑀓.)] 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑁋 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀯𑀢𑁆𑀣𑀼 𑀯𑀢𑁆𑀣𑀼𑀓𑀸𑀫𑀸.

𑀅𑀧𑀺 𑀘 𑀅𑀢𑀻𑀢𑀸 𑀓𑀸𑀫𑀸 𑀅𑀦𑀸𑀕𑀢𑀸 𑀓𑀸𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀸 𑀓𑀸𑀫𑀸 𑀩𑀳𑀺𑀤𑁆𑀥𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀫𑀸, 𑀳𑀻𑀦𑀸 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀓𑀸𑀫𑀸 𑀧𑀡𑀻𑀢𑀸 𑀓𑀸𑀫𑀸, 𑀆𑀧𑀸𑀬𑀺𑀓𑀸 𑀓𑀸𑀫𑀸 𑀫𑀸𑀦𑀼𑀲𑀺𑀓𑀸 𑀓𑀸𑀫𑀸 𑀤𑀺𑀩𑁆𑀩𑀸 𑀓𑀸𑀫𑀸, 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸, 𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸, 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸 𑀅𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸, 𑀫𑀫𑀸𑀬𑀺𑀢𑀸 𑀓𑀸𑀫𑀸 𑀅𑀫𑀫𑀸𑀬𑀺𑀢𑀸 𑀓𑀸𑀫𑀸, 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀢𑀡𑁆𑀳𑀸𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀭𑀫𑁆𑀫𑀡𑀸, 𑀓𑀸𑀫𑀦𑀻𑀬𑀝𑁆𑀞𑁂𑀦 𑀭𑀚𑀦𑀻𑀬𑀝𑁆𑀞𑁂𑀦 𑀫𑀤𑀦𑀻𑀬𑀝𑁆𑀞𑁂𑀦 𑀭𑀫𑀡𑀻𑀬𑀝𑁆𑀞𑁂𑀦 [𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂 𑀫𑀳𑀸𑀦𑀺. 𑁧] 𑀓𑀸𑀫𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀕𑁂𑀥𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑁋

𑀅𑀤𑁆𑀤𑀲𑀁 𑀓𑀸𑀫 𑀢𑁂 𑀫𑀽𑀮𑀁, 𑀲𑀗𑁆𑀓𑀧𑁆𑀧𑀸 𑀓𑀸𑀫 𑀚𑀸𑀬𑀲𑀺;

𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀓𑀸𑀫 𑀦 𑀳𑁂𑀳𑀺𑀲𑀻𑀢𑀺.

𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬 𑀦 𑀧𑀮𑀺𑀩𑀼𑀦𑁆𑀥𑁂𑀬𑁆𑀬 [𑀧𑀮𑀺𑀩𑀼𑀚𑁆𑀛𑁂𑀬𑁆𑀬 (𑀲𑁆𑀬𑀸.)] 𑀅𑀕𑀺𑀤𑁆𑀥𑁄 𑀅𑀲𑁆𑀲 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 [𑀅𑀦𑀚𑁆𑀛𑁄𑀧𑀦𑁆𑀦𑁄 (𑀲𑁆𑀬𑀸.)] 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄 𑀯𑀦𑁆𑀢𑀕𑁂𑀥𑁄 𑀫𑀼𑀢𑁆𑀢𑀕𑁂𑀥𑁄 𑀧𑀳𑀻𑀦𑀕𑁂𑀥𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬.

𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀳𑁄𑀢𑀺 𑀮𑀼𑀴𑀺𑀢𑀁 𑀏𑀭𑀺𑀢𑀁 𑀖𑀝𑁆𑀝𑀺𑀢𑀁 𑀘𑀮𑀺𑀢𑀁 𑀪𑀦𑁆𑀢𑀁 𑀅𑀯𑀽𑀧𑀲𑀦𑁆𑀢𑀁. 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦… 𑀭𑀸𑀕𑁂𑀦… 𑀤𑁄𑀲𑁂𑀦… 𑀫𑁄𑀳𑁂𑀦… 𑀓𑁄𑀥𑁂𑀦… 𑀉𑀧𑀦𑀸𑀳𑁂𑀦… 𑀫𑀓𑁆𑀔𑁂𑀦… 𑀧𑀴𑀸𑀲𑁂𑀦… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑁂𑀦… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑁂𑀦… 𑀣𑀫𑁆𑀪𑁂𑀦… 𑀲𑀸𑀭𑀫𑁆𑀪𑁂𑀦… 𑀫𑀸𑀦𑁂𑀦… 𑀅𑀢𑀺𑀫𑀸𑀦𑁂𑀦… 𑀫𑀤𑁂𑀦… 𑀧𑀫𑀸𑀤𑁂𑀦… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀟𑀸𑀳𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀳𑁄𑀢𑀺 𑀮𑀼𑀴𑀺𑀢𑀁 𑀏𑀭𑀺𑀢𑀁 𑀖𑀝𑁆𑀝𑀺𑀢𑀁 𑀘𑀮𑀺𑀢𑀁 𑀪𑀦𑁆𑀢𑀁 𑀅𑀯𑀽𑀧𑀲𑀦𑁆𑀢𑀁. 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀸𑀯𑀺𑀮𑁄 𑀲𑀺𑀬𑀸 𑁋 𑀅𑀮𑀼𑀴𑀺𑀢𑁄 𑀅𑀦𑁂𑀭𑀺𑀢𑁄 𑀅𑀖𑀝𑁆𑀝𑀺𑀢𑁄 𑀅𑀘𑀮𑀺𑀢𑁄 𑀅𑀪𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀆𑀯𑀺𑀮𑀓𑀭𑁂 𑀓𑀺𑀮𑁂𑀲𑁂 𑀚𑀳𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 [𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 (𑀓.)] 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀆𑀯𑀺𑀮𑀓𑀭𑁂𑀳𑀺 𑀓𑀺𑀮𑁂𑀲𑁂𑀳𑀺 𑀘 𑀆𑀭𑀢𑁄 [𑀆𑀭𑀢𑁄 𑀅𑀲𑁆𑀲 (𑀓.) 𑀫𑀳𑀸𑀦𑀺. 𑁧𑁮 𑀧𑀲𑁆𑀲] 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸.

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁. 𑀏𑀯𑀫𑁆𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀣 𑀯𑀸, 𑀅𑀦𑀺𑀘𑁆𑀘𑀢𑁄 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀤𑀼𑀓𑁆𑀔𑀢𑁄…𑀧𑁂… 𑀭𑁄𑀕𑀢𑁄… 𑀕𑀡𑁆𑀟𑀢𑁄… 𑀲𑀮𑁆𑀮𑀢𑁄… 𑀅𑀖𑀢𑁄… 𑀆𑀩𑀸𑀥𑀢𑁄… 𑀧𑀭𑀢𑁄… 𑀧𑀮𑁄𑀓𑀢𑁄… 𑀈𑀢𑀺𑀢𑁄… 𑀉𑀧𑀤𑁆𑀤𑀯𑀢𑁄… 𑀪𑀬𑀢𑁄… 𑀉𑀧𑀲𑀕𑁆𑀕𑀢𑁄… 𑀘𑀮𑀢𑁄… 𑀧𑀪𑀗𑁆𑀕𑀼𑀢𑁄… 𑀅𑀤𑁆𑀥𑀼𑀯𑀢𑁄 [𑀅𑀥𑀼𑀯𑀢𑁄 (𑀓.) 𑀫𑀳𑀸𑀦𑀺. 𑁧𑁩] … 𑀅𑀢𑀸𑀡𑀢𑁄… 𑀅𑀮𑁂𑀡𑀢𑁄… 𑀅𑀲𑀭𑀡𑀢𑁄… 𑀅𑀲𑀭𑀡𑀻𑀪𑀽𑀢𑀢𑁄… 𑀭𑀺𑀢𑁆𑀢𑀢𑁄… 𑀢𑀼𑀘𑁆𑀙𑀢𑁄… 𑀲𑀼𑀜𑁆𑀜𑀢𑁄… 𑀅𑀦𑀢𑁆𑀢𑀢𑁄… 𑀆𑀤𑀻𑀦𑀯𑀢𑁄… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄… 𑀅𑀲𑀸𑀭𑀓𑀢𑁄… 𑀅𑀖𑀫𑀽𑀮𑀢𑁄… 𑀯𑀥𑀓𑀢𑁄… 𑀯𑀺𑀪𑀯𑀢𑁄… 𑀲𑀸𑀲𑀯𑀢𑁄… 𑀲𑀗𑁆𑀔𑀢𑀢𑁄… 𑀫𑀸𑀭𑀸𑀫𑀺𑀲𑀢𑁄… 𑀚𑀸𑀢𑀺𑀥𑀫𑁆𑀫𑀢𑁄… 𑀚𑀭𑀸𑀥𑀫𑁆𑀫𑀢𑁄… 𑀩𑁆𑀬𑀸𑀥𑀺𑀥𑀫𑁆𑀫𑀢𑁄… 𑀫𑀭𑀡𑀥𑀫𑁆𑀫𑀢𑁄… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀢𑁄 … 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄… 𑀲𑀫𑀼𑀤𑀬𑀢𑁄… 𑀅𑀢𑁆𑀣𑀗𑁆𑀕𑀫𑀢𑁄… 𑀅𑀲𑁆𑀲𑀸𑀤𑀢𑁄… 𑀆𑀤𑀻𑀦𑀯𑀢𑁄… 𑀦𑀺𑀲𑁆𑀲𑀭𑀡𑀢𑁄 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁. 𑀏𑀯𑀫𑁆𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀣 𑀯𑀸, 𑀔𑀦𑁆𑀥𑀓𑀼𑀲𑀮𑁄 𑀥𑀸𑀢𑀼𑀓𑀼𑀲𑀮𑁄 𑀆𑀬𑀢𑀦𑀓𑀼𑀲𑀮𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑁄 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑁄 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑁄 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑁄 𑀩𑀮𑀓𑀼𑀲𑀮𑁄 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑁄 𑀫𑀕𑁆𑀕𑀓𑀼𑀲𑀮𑁄 𑀨𑀮𑀓𑀼𑀲𑀮𑁄 𑀦𑀺𑀩𑁆𑀩𑀸𑀦𑀓𑀼𑀲𑀮𑁄. 𑀏𑀯𑀫𑁆𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀣 𑀯𑀸, 𑀲𑀩𑁆𑀩𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀼 𑀘𑁂𑀯 [𑀘𑀓𑁆𑀔𑀼𑀜𑁆𑀘𑁂𑀯 (𑀓.)] 𑀭𑀽𑀧𑀸 𑀘, 𑀲𑁄𑀢𑀜𑁆𑀘 𑀲𑀤𑁆𑀤𑀸 𑀘, 𑀖𑀸𑀦𑀜𑁆𑀘 𑀕𑀦𑁆𑀥𑀸 𑀘, 𑀚𑀺𑀯𑁆𑀳𑀸 𑀘 𑀭𑀲𑀸 𑀘, 𑀓𑀸𑀬𑁄 𑀘 𑀨𑁄𑀝𑁆𑀞𑀩𑁆𑀩𑀸 𑀘, 𑀫𑀦𑁄 𑀘 𑀥𑀫𑁆𑀫𑀸 𑀘. 𑀬𑀢𑁄 𑀘 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 [𑀅𑀦𑀪𑀸𑀯𑀗𑁆𑀕𑀢𑁄 (𑀲𑁆𑀬𑀸.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀏𑀢𑁆𑀢𑀸𑀯𑀢𑀸𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑁋 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀅𑀲𑀢𑀺𑀧𑀭𑀺𑀯𑀚𑁆𑀚𑀦𑀸𑀬 𑀲𑀢𑁄, 𑀲𑀢𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀓𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀧𑀭𑀺𑀩𑀦𑁆𑀥𑀸𑀦𑀁 [𑀲𑀢𑀺𑀧𑀝𑀺𑀧𑀓𑁆𑀔𑀸𑀦𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁩] 𑀥𑀫𑁆𑀫𑀸𑀦𑀁 𑀳𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑁆𑀢𑀸 [𑀅𑀧𑁆𑀧𑀫𑀼𑀝𑁆𑀞𑀢𑁆𑀢𑀸 (𑀲𑁆𑀬𑀸.)] 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀯𑀲𑀺𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀧𑀸𑀕𑀼𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀅𑀧𑀘𑁆𑀘𑁄𑀭𑁄𑀳𑀡𑀢𑀸𑀬 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀢𑁆𑀢𑀸 𑀲𑀢𑁄, 𑀲𑀫𑀺𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀲𑀢𑁄, 𑀫𑀭𑀡𑀲𑁆𑀲𑀢𑀺𑀬𑀸 𑀲𑀢𑁄, 𑀓𑀸𑀬𑀕𑀢𑀸𑀲𑀢𑀺𑀬𑀸 𑀲𑀢𑁄, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄. 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 [𑀲𑀫𑁆𑀧𑀦𑁆𑀦𑁄 (𑀓.)] 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀪𑀺𑀓𑁆𑀔𑀽𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀪𑀺𑀦𑁆𑀦𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀪𑀺𑀦𑁆𑀦𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀭𑀸𑀕𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀤𑁄𑀲𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀫𑁄𑀳𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀫𑀸𑀦𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀲𑁆𑀬𑀸. 𑀓.)] 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀧𑀚𑁆𑀚𑁂𑀦 𑀓𑀢𑁂𑀦 [𑀧𑀚𑁆𑀚𑁄𑀢𑀓𑀢𑁂𑀦 (𑀓.) 𑀲𑀼. 𑀦𑀺. 𑁫𑁧𑁯] 𑀅𑀢𑁆𑀢𑀦𑀸, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀪𑀯𑀜𑁆𑀘 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬, 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀽𑀢𑀺.

𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂, 𑀲𑀢𑁄 𑀕𑀘𑁆𑀙𑁂𑀬𑁆𑀬, 𑀲𑀢𑁄 𑀢𑀺𑀝𑁆𑀞𑁂𑀬𑁆𑀬, 𑀲𑀢𑁄 𑀦𑀺𑀲𑀻𑀤𑁂𑀬𑁆𑀬, 𑀲𑀢𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀲𑀢𑁄 𑀅𑀪𑀺𑀓𑁆𑀓𑀫𑁂𑀬𑁆𑀬, 𑀲𑀢𑁄 𑀧𑀝𑀺𑀓𑁆𑀓𑀫𑁂𑀬𑁆𑀬, 𑀲𑀢𑁄 𑀆𑀮𑁄𑀓𑁂𑀬𑁆𑀬, 𑀲𑀢𑁄 𑀯𑀺𑀮𑁄𑀓𑁂𑀬𑁆𑀬, 𑀲𑀢𑁄 𑀲𑀫𑀺𑀜𑁆𑀚𑁂𑀬𑁆𑀬, 𑀲𑀢𑁄 𑀧𑀲𑀸𑀭𑁂𑀬𑁆𑀬, 𑀲𑀢𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀁 𑀥𑀸𑀭𑁂𑀬𑁆𑀬, 𑀲𑀢𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀏𑀓𑀧𑀬𑁄𑀕𑀸 𑀏𑀓𑀸𑀥𑀺𑀧𑁆𑀧𑀸𑀬𑀸 𑀏𑀓𑀯𑀸𑀲𑀦𑀯𑀸𑀲𑀺𑀢𑀸, 𑀢𑁂𑀲𑀁 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀲𑀳 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀅𑀦𑁆𑀢𑀭𑀳𑀺𑀢𑀸, 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀧𑀞𑀫𑁄.

𑁨. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁯.

𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄]

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸;

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸.

𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂𑀢𑀺 𑀓𑁄 𑀮𑁄𑀓𑁂 𑀢𑀼𑀝𑁆𑀞𑁄 𑀲𑀦𑁆𑀢𑀼𑀝𑁆𑀞𑁄 𑀅𑀢𑁆𑀢𑀫𑀦𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄𑀢𑀺 𑁋 𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂.

𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀢𑀺𑀲𑁆𑀲𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀫𑁂𑀢𑁆𑀢𑁂𑀬𑁆𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁄𑀢𑁆𑀢𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄.

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸𑀢𑀺 𑀢𑀡𑁆𑀳𑀺𑀜𑁆𑀚𑀺𑀢𑀁 𑀤𑀺𑀝𑁆𑀞𑀺𑀜𑁆𑀚𑀺𑀢𑀁 𑀫𑀸𑀦𑀺𑀜𑁆𑀚𑀺𑀢𑀁 𑀓𑀺𑀮𑁂𑀲𑀺𑀜𑁆𑀚𑀺𑀢𑀁 𑀓𑀸𑀫𑀺𑀜𑁆𑀚𑀺𑀢𑀁. 𑀓𑀲𑁆𑀲𑀺𑀫𑁂 𑀇𑀜𑁆𑀚𑀺𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸.

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬𑀸𑀢𑀺 𑀓𑁄 𑀉𑀪𑁄 𑀅𑀦𑁆𑀢𑁂 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬.

𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀫𑀚𑁆𑀛𑁂 𑀫𑀦𑁆𑀢𑀸𑀬 𑀦 𑀮𑀺𑀧𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺.

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑁄 𑀅𑀕𑁆𑀕𑀧𑀼𑀭𑀺𑀲𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀯𑀺𑀲𑁂𑀝𑁆𑀞𑀧𑀼𑀭𑀺𑀲𑁄 𑀧𑀸𑀫𑁄𑀓𑁆𑀔𑀧𑀼𑀭𑀺𑀲𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀥𑀸𑀦𑀧𑀼𑀭𑀺𑀲𑁄 𑀧𑀯𑀭𑀧𑀼𑀭𑀺𑀲𑁄𑀢𑀺. 𑀓𑀁 𑀩𑁆𑀭𑀽𑀲𑀺 𑀓𑀁 𑀓𑀣𑁂𑀲𑀺 𑀓𑀁 𑀫𑀜𑁆𑀜𑀲𑀺 𑀓𑀁 𑀪𑀡𑀲𑀺 𑀓𑀁 𑀧𑀲𑁆𑀲𑀢𑀺 𑀓𑀁 𑀯𑁄𑀳𑀭𑀲𑀻𑀢𑀺 𑁋 𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺.

𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸𑀢𑀺 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀁 𑀢𑀡𑁆𑀳𑀁 𑀅𑀚𑁆𑀛𑀕𑀸 𑀉𑀧𑀘𑁆𑀘𑀕𑀸 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄]

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸;

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺.

𑁧𑁦.

𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄;

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸.

𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀲𑀤𑁆𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄. 𑀅𑀧𑀺 𑀘, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀬𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸. 𑀬𑀣𑀸 𑀘 𑀥𑀦𑁂𑀦 𑀥𑀦𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀪𑁄𑀕𑁂𑀦 𑀪𑁄𑀕𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀬𑀲𑁂𑀦 𑀬𑀲𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀺𑀧𑁆𑀧𑁂𑀦 𑀲𑀺𑀧𑁆𑀧𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀻𑀮𑁂𑀦 𑀲𑀻𑀮𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀯𑀻𑀭𑀺𑀬𑁂𑀦 𑀯𑀻𑀭𑀺𑀬𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀧𑀜𑁆𑀜𑀸𑀬 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀯𑀺𑀚𑁆𑀚𑀸𑀬 𑀯𑀺𑀚𑁆𑀚𑀯𑀸𑀢𑀺 𑀯𑀼𑀘𑁆𑀘𑀢𑀺 𑁋 𑀏𑀯𑀫𑁂𑀯 𑀬𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀢𑀺 𑁋 𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸.

𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸.

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀬𑀲𑁆𑀲𑁂𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀯𑀻𑀢𑀢𑀡𑁆𑀳𑁄 𑀘𑀢𑁆𑀢𑀢𑀡𑁆𑀳𑁄 𑀯𑀦𑁆𑀢𑀢𑀡𑁆𑀳𑁄 𑀫𑀼𑀢𑁆𑀢𑀢𑀡𑁆𑀳𑁄 𑀧𑀳𑀻𑀦𑀢𑀡𑁆𑀳𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑀡𑁆𑀳𑁄 𑀯𑀻𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 [𑀧𑁄𑀔𑀸𑀦𑀼𑀧𑁄𑀔𑀁 (𑀲𑁆𑀬𑀸.)] 𑀉𑀤𑀓𑀽𑀫𑀺𑀓𑀚𑀸𑀢𑀁 𑀅𑀯𑀻𑀘𑀺𑀲𑀦𑁆𑀢𑀢𑀺𑀲𑀳𑀺𑀢𑀁 [𑀅𑀯𑀻𑀘𑀺 𑀲𑀫𑀗𑁆𑀕𑀺𑀲𑀳𑀺𑀢𑀁 (𑀲𑁆𑀬𑀸.)] 𑀨𑀲𑁆𑀲𑀺𑀢𑀁 [𑀨𑀼𑀲𑀺𑀢𑀁 (𑀲𑁆𑀬𑀸.)] 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄.

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀽𑀢𑀺 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀗𑁆𑀔𑀸𑀬𑀸𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸.

𑀅𑀣 𑀯𑀸, 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸…𑀧𑁂… 𑀤𑀼𑀓𑁆𑀔𑀢𑁄… 𑀭𑁄𑀕𑀢𑁄… 𑀕𑀡𑁆𑀟𑀢𑁄… 𑀲𑀮𑁆𑀮𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀦𑀺𑀩𑁆𑀩𑀼𑀢𑁄𑀢𑀺 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄, 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁 … 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀪𑀺𑀓𑁆𑀔𑀽𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼…𑀧𑁂… 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀽𑀢𑀺 𑁋 𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼.

𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀇𑀜𑁆𑀚𑀺𑀢𑀸𑀢𑀺 𑀢𑀡𑁆𑀳𑀺𑀜𑁆𑀚𑀺𑀢𑀁 𑀤𑀺𑀝𑁆𑀞𑀺𑀜𑁆𑀚𑀺𑀢𑀁 𑀫𑀸𑀦𑀺𑀜𑁆𑀚𑀺𑀢𑀁 𑀓𑀺𑀮𑁂𑀲𑀺𑀜𑁆𑀚𑀺𑀢𑀁 𑀓𑀸𑀫𑀺𑀜𑁆𑀚𑀺𑀢𑀁. 𑀢𑀲𑁆𑀲𑀺𑀫𑁂 𑀇𑀜𑁆𑀚𑀺𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄;

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸’’𑀢𑀺.

𑁧𑁧.

𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸.

𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺. 𑀅𑀦𑁆𑀢𑀸𑀢𑀺 𑀨𑀲𑁆𑀲𑁄 𑀏𑀓𑁄 𑀅𑀦𑁆𑀢𑁄, 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀨𑀲𑁆𑀲𑀦𑀺𑀭𑁄𑀥𑁄 𑀫𑀚𑁆𑀛𑁂; 𑀅𑀢𑀻𑀢𑀁 𑀏𑀓𑁄 𑀅𑀦𑁆𑀢𑁄, 𑀅𑀦𑀸𑀕𑀢𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀫𑀚𑁆𑀛𑁂; 𑀲𑀼𑀔𑀸 𑀯𑁂𑀤𑀦𑀸 𑀏𑀓𑁄 𑀅𑀦𑁆𑀢𑁄, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀫𑀚𑁆𑀛𑁂; 𑀦𑀸𑀫𑀁 𑀏𑀓𑁄 𑀅𑀦𑁆𑀢𑁄, 𑀭𑀽𑀧𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂; 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀓𑁄 𑀅𑀦𑁆𑀢𑁄, 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂; 𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀫𑀚𑁆𑀛𑁂. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺.

𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀮𑁂𑀧𑁄? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀑𑀥𑀺𑀓𑀢𑀁 [𑀫𑀭𑀺𑀬𑀸𑀤𑀺𑀓𑀢𑀁 𑀑𑀥𑀺𑀓𑀢𑀁 (𑀲𑁆𑀬𑀸.)] 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 ‘‘𑀇𑀤𑀁 𑀫𑀫, 𑀏𑀢𑀁 𑀫𑀫, 𑀏𑀢𑁆𑀢𑀓𑀁 𑀫𑀫, 𑀏𑀢𑁆𑀢𑀸𑀯𑀢𑀸 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘’’. 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺. 𑀬𑀸𑀯𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄.

𑀓𑀢𑀫𑁄 𑀤𑀺𑀝𑁆𑀞𑀺𑀮𑁂𑀧𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺, 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 [𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 (𑀩𑀳𑀽𑀲𑀼)] 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄.

𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀲𑁄 𑀉𑀪𑁄 𑀘 𑀅𑀦𑁆𑀢𑁂 𑀫𑀚𑁆𑀛𑀜𑁆𑀘 𑀫𑀦𑁆𑀢𑀸𑀬 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀦 𑀮𑀺𑀧𑁆𑀧𑀢𑀺 𑀦 𑀧𑀮𑀺𑀧𑁆𑀧𑀢𑀺 𑀦 𑀉𑀧𑀮𑀺𑀧𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀲𑀁𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺.

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑁄 𑀅𑀕𑁆𑀕𑀧𑀼𑀭𑀺𑀲𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀯𑀺𑀲𑁂𑀝𑁆𑀞𑀧𑀼𑀭𑀺𑀲𑁄 𑀧𑀸𑀫𑁄𑀓𑁆𑀔𑀧𑀼𑀭𑀺𑀲𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀯𑀭𑀧𑀼𑀭𑀺𑀲𑁄, 𑀢𑀁 𑀩𑁆𑀭𑀽𑀫𑀺 𑀢𑀁 𑀓𑀣𑁂𑀫𑀺 𑀢𑀁 𑀪𑀡𑀸𑀫𑀺 𑀢𑀁 𑀤𑀻𑀧𑁂𑀫𑀺 𑀢𑀁 𑀯𑁄𑀳𑀭𑀸𑀫𑀺.

𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 [𑀧𑀲𑁆𑀲 𑀲𑀁. 𑀦𑀺. 𑁫.𑁩𑁭𑁭] 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀧𑀼𑀭𑀺𑀲𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀫𑀳𑀸𑀧𑀼𑀭𑀺𑀲𑁄 𑀳𑁄𑀢𑀻’’𑀢𑀺? ‘‘𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀔𑁆𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀦𑁄 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀺.

‘‘𑀓𑀣𑀜𑁆𑀘, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀢𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀺 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀢𑀲𑁆𑀲 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀺 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺. 𑀏𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀔𑁆𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀦𑁄 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀻’’𑀢𑀺 𑁋 𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺.

𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸𑀢𑀺 𑀲𑀺𑀩𑁆𑀩𑀺𑀦𑀻 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀬𑀲𑁆𑀲𑁂𑀲𑀸 𑀲𑀺𑀩𑁆𑀩𑀺𑀦𑀻 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀲𑁄 𑀲𑀺𑀩𑁆𑀩𑀺𑀦𑀺𑀁 𑀢𑀡𑁆𑀳𑀁 𑀅𑀘𑁆𑀘𑀕𑀸 𑀉𑀧𑀘𑁆𑀘𑀕𑀸 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀏𑀓𑀧𑀬𑁄𑀕𑀸 𑀏𑀓𑀸𑀥𑀺𑀧𑁆𑀧𑀸𑀬𑀸 𑀏𑀓𑀯𑀸𑀲𑀦𑀯𑀸𑀲𑀺𑀢𑀸, 𑀢𑁂𑀲𑀁 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀲𑀳 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀅𑀦𑁆𑀢𑀭𑀳𑀺𑀢𑀸. 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀤𑀼𑀢𑀺𑀬𑁄.

𑁩. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁧𑁨.

𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀲𑀸 𑀏𑀚𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄. 𑀪𑀕𑀯𑀸 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀻𑀢𑀺 𑁋 𑀅𑀦𑁂𑀚𑀁. 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻 𑀳𑁂𑀢𑀼𑀤𑀲𑁆𑀲𑀸𑀯𑀻 𑀦𑀺𑀤𑀸𑀦𑀤𑀲𑁆𑀲𑀸𑀯𑀻 𑀲𑀫𑁆𑀪𑀯𑀤𑀲𑁆𑀲𑀸𑀯𑀻 𑀧𑀪𑀯𑀤𑀲𑁆𑀲𑀸𑀯𑀻 𑀲𑀫𑀼𑀝𑁆𑀞𑀸𑀦𑀤𑀲𑁆𑀲𑀸𑀯𑀻 𑀆𑀳𑀸𑀭𑀤𑀲𑁆𑀲𑀸𑀯𑀻 𑀆𑀭𑀫𑁆𑀫𑀡𑀤𑀲𑁆𑀲𑀸𑀯𑀻 𑀧𑀘𑁆𑀘𑀬𑀤𑀲𑁆𑀲𑀸𑀯𑀻 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 [𑀧𑀲𑁆𑀲 𑀅. 𑀦𑀺. 𑁩.𑁧𑁧𑁨] ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀦, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄 𑀦𑀺𑀭𑀬𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’. 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻. 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑁋 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀡𑀺𑀫𑀸𑀦𑀺…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀅𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀅𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀅𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀅𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸 𑀲𑀩𑁆𑀩𑁂 𑀢𑁂 𑀅𑀯𑀺𑀚𑁆𑀚𑀸𑀫𑀽𑀮𑀓𑀸 𑀅𑀯𑀺𑀚𑁆𑀚𑀸𑀲𑀫𑁄𑀲𑀭𑀡𑀸 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑀸’’. 𑀲𑀩𑁆𑀩𑁂 𑀢𑁂 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀪𑀸𑀕𑀺𑀬𑀸 𑀓𑀼𑀲𑀮𑀧𑀓𑁆𑀔𑀺𑀓𑀸, 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸. 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀅𑀣 𑀯𑀸, 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. ‘‘𑀅𑀯𑀺𑀚𑁆𑀚𑀸 𑀫𑀽𑀮𑀁 𑀲𑀗𑁆𑀔𑀸𑀭𑀸𑀦𑀁, 𑀲𑀗𑁆𑀔𑀸𑀭𑀸 𑀫𑀽𑀮𑀁 𑀯𑀺𑀜𑁆𑀜𑀸𑀡𑀲𑁆𑀲, 𑀯𑀺𑀜𑁆𑀜𑀸𑀡𑀁 𑀫𑀽𑀮𑀁 𑀦𑀸𑀫𑀭𑀽𑀧𑀲𑁆𑀲, 𑀦𑀸𑀫𑀭𑀽𑀧𑀁 𑀫𑀽𑀮𑀁 𑀲𑀴𑀸𑀬𑀢𑀦𑀲𑁆𑀲, 𑀲𑀴𑀸𑀬𑀢𑀦𑀁 𑀫𑀽𑀮𑀁 𑀨𑀲𑁆𑀲𑀲𑁆𑀲, 𑀨𑀲𑁆𑀲𑁄 𑀫𑀽𑀮𑀁 𑀯𑁂𑀤𑀦𑀸𑀬, 𑀯𑁂𑀤𑀦𑀸 𑀫𑀽𑀮𑀁 𑀢𑀡𑁆𑀳𑀸𑀬, 𑀢𑀡𑁆𑀳𑀸 𑀫𑀽𑀮𑀁 𑀉𑀧𑀸𑀤𑀸𑀦𑀲𑁆𑀲, 𑀉𑀧𑀸𑀤𑀸𑀦𑀁 𑀫𑀽𑀮𑀁 𑀪𑀯𑀲𑁆𑀲, 𑀪𑀯𑁄 𑀫𑀽𑀮𑀁 𑀚𑀸𑀢𑀺𑀬𑀸, 𑀚𑀸𑀢𑀺 𑀫𑀽𑀮𑀁 𑀚𑀭𑀸𑀫𑀭𑀡𑀲𑁆𑀲𑀸’’𑀢𑀺 𑁋 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀅𑀣 𑀯𑀸, 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. ‘‘𑀘𑀓𑁆𑀔𑀼 𑀫𑀽𑀮𑀁 𑀘𑀓𑁆𑀔𑀼𑀭𑁄𑀕𑀸𑀦𑀁, 𑀲𑁄𑀢𑀁 𑀫𑀽𑀮𑀁 𑀲𑁄𑀢𑀭𑁄𑀕𑀸𑀦𑀁, 𑀖𑀸𑀦𑀁 𑀫𑀽𑀮𑀁 𑀖𑀸𑀦𑀭𑁄𑀕𑀸𑀦𑀁, 𑀚𑀺𑀯𑁆𑀳𑀸 𑀫𑀽𑀮𑀁 𑀚𑀺𑀯𑁆𑀳𑀸𑀭𑁄𑀕𑀸𑀦𑀁, 𑀓𑀸𑀬𑁄 𑀫𑀽𑀮𑀁 𑀓𑀸𑀬𑀭𑁄𑀕𑀸𑀦𑀁, 𑀫𑀦𑁄 𑀫𑀽𑀮𑀁 𑀘𑁂𑀢𑀲𑀺𑀓𑀸𑀦𑀁 𑀤𑀼𑀓𑁆𑀔𑀸𑀦’’𑀦𑁆𑀢𑀺 𑁋 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻 𑀳𑁂𑀢𑀼𑀤𑀲𑁆𑀲𑀸𑀯𑀻 𑀦𑀺𑀤𑀸𑀦𑀤𑀲𑁆𑀲𑀸𑀯𑀻 𑀲𑀫𑁆𑀪𑀯𑀤𑀲𑁆𑀲𑀸𑀯𑀻 𑀧𑀪𑀯𑀤𑀲𑁆𑀲𑀸𑀯𑀻 𑀲𑀫𑀼𑀝𑁆𑀞𑀸𑀦𑀤𑀲𑁆𑀲𑀸𑀯𑀻 𑀆𑀳𑀸𑀭𑀤𑀲𑁆𑀲𑀸𑀯𑀻 𑀆𑀭𑀫𑁆𑀫𑀡𑀤𑀲𑁆𑀲𑀸𑀯𑀻 𑀧𑀘𑁆𑀘𑀬𑀤𑀲𑁆𑀲𑀸𑀯𑀻 𑀲𑀫𑀼𑀤𑀬𑀤𑀲𑁆𑀲𑀸𑀯𑀻𑀢𑀺 𑁋 𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀻.

𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄𑀢𑀺 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸 𑀧𑀼𑀡𑁆𑀡𑀓𑁄.

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺, [𑀧𑀜𑁆𑀳𑀢𑁆𑀣𑀺𑀓𑀸𑀫𑁆𑀳 𑀆𑀕𑀢𑀸 (𑀩𑀳𑀽𑀲𑀼) 𑀧𑀲𑁆𑀲 𑀫𑀳𑀸𑀦𑀺. 𑁧𑁯𑁨] 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀺, 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸, 𑀧𑀜𑁆𑀳𑀢𑁆𑀣𑀺𑀓𑀸𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸𑀦𑀁 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀸𑀦𑀁 𑀆𑀕𑀫𑀦𑀁 𑀅𑀪𑀺𑀓𑁆𑀓𑀫𑀦𑀁 𑀉𑀧𑀲𑀗𑁆𑀓𑀫𑀦𑀁 𑀧𑀬𑀺𑀭𑀼𑀧𑀸𑀲𑀦𑀁 𑀅𑀢𑁆𑀣𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸, 𑀧𑀜𑁆𑀳𑀸𑀕𑀫𑁄 𑀢𑀼𑀬𑁆𑀳𑀁 𑀅𑀢𑁆𑀣𑀺, 𑀢𑁆𑀯𑀫𑁆𑀧𑀺 𑀧𑀳𑀼 𑀢𑁆𑀯𑀫𑀲𑀺 𑀅𑀮𑀫𑀢𑁆𑀢𑁄. 𑀫𑀬𑀸 𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀼𑀁 𑀯𑀺𑀲𑀚𑁆𑀚𑁂𑀢𑀼𑀁 𑀯𑀳𑀲𑁆𑀲𑁂𑀢𑀁 𑀪𑀸𑀭𑀦𑁆𑀢𑀺 [𑀯𑀺𑀲𑀚𑁆𑀚𑁂𑀢𑀼𑀁 𑀲𑀦𑁆𑀤𑀲𑁆𑀲𑁂𑀢𑀼𑀁 𑀪𑀡𑀺𑀢𑀼𑀦𑁆𑀢𑀺 (𑀲𑁆𑀬𑀸.) 𑀯𑀳𑀲𑁆𑀲𑀼 + 𑀏𑀢𑀁] 𑁋 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸𑀢𑀺 𑀓𑀺𑀁 𑀦𑀺𑀲𑁆𑀲𑀺𑀢𑀸 𑀆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. 𑀇𑀲𑀬𑁄𑀢𑀺 𑀇𑀲𑀺𑀦𑀸𑀫𑀓𑀸 𑀬𑁂 𑀓𑁂𑀘𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀆𑀚𑀻𑀯𑀓𑀸 𑀦𑀺𑀕𑀡𑁆𑀞𑀸 𑀚𑀝𑀺𑀮𑀸 𑀢𑀸𑀧𑀲𑀸. 𑀫𑀦𑀼𑀚𑀸𑀢𑀺 𑀫𑀦𑀼𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑁋 𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸.

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀦𑁆𑀢𑀺. 𑀔𑀢𑁆𑀢𑀺𑀬𑀸𑀢𑀺 𑀬𑁂 𑀓𑁂𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸. 𑀤𑁂𑀯𑀢𑀸𑀦𑀦𑁆𑀢𑀺 𑀆𑀚𑀻𑀯𑀓𑀲𑀸𑀯𑀓𑀸𑀦𑀁 𑀆𑀚𑀻𑀯𑀓𑀸 𑀤𑁂𑀯𑀢𑀸, 𑀦𑀺𑀕𑀡𑁆𑀞𑀲𑀸𑀯𑀓𑀸𑀦𑀁 𑀦𑀺𑀕𑀡𑁆𑀞𑀸 𑀤𑁂𑀯𑀢𑀸, 𑀚𑀝𑀺𑀮𑀲𑀸𑀯𑀓𑀸𑀦𑀁 𑀚𑀝𑀺𑀮𑀸 𑀤𑁂𑀯𑀢𑀸, 𑀧𑀭𑀺𑀩𑁆𑀩𑀸𑀚𑀓𑀲𑀸𑀯𑀓𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸 𑀤𑁂𑀯𑀢𑀸, 𑀅𑀯𑀺𑀭𑀼𑀤𑁆𑀥𑀓𑀲𑀸𑀯𑀓𑀸𑀦𑀁 𑀅𑀯𑀺𑀭𑀼𑀤𑁆𑀥𑀓𑀸 [𑀅𑀯𑀭𑀼𑀤𑁆𑀥𑀓𑀲𑀸𑀯𑀓𑀸𑀦𑀁 𑀅𑀯𑀭𑀼𑀤𑁆𑀥𑀓𑀸 (𑀲𑁆𑀬𑀸.)] 𑀤𑁂𑀯𑀢𑀸, 𑀳𑀢𑁆𑀣𑀺𑀯𑀢𑀺𑀓𑀸𑀦𑀁 𑀳𑀢𑁆𑀣𑀻 𑀤𑁂𑀯𑀢𑀸, 𑀅𑀲𑁆𑀲𑀯𑀢𑀺𑀓𑀸𑀦𑀁 𑀅𑀲𑁆𑀲𑀸 𑀤𑁂𑀯𑀢𑀸, 𑀕𑁄𑀯𑀢𑀺𑀓𑀸𑀦𑀁 𑀕𑀸𑀯𑁄 𑀤𑁂𑀯𑀢𑀸, 𑀓𑀼𑀓𑁆𑀓𑀼𑀭𑀯𑀢𑀺𑀓𑀸𑀦𑀁 𑀓𑀼𑀓𑁆𑀓𑀼𑀭𑀸 𑀤𑁂𑀯𑀢𑀸, 𑀓𑀸𑀓𑀯𑀢𑀺𑀓𑀸𑀦𑀁 𑀓𑀸𑀓𑀸 𑀤𑁂𑀯𑀢𑀸, 𑀯𑀸𑀲𑀼𑀤𑁂𑀯𑀯𑀢𑀺𑀓𑀸𑀦𑀁 𑀯𑀸𑀲𑀼𑀤𑁂𑀯𑁄 𑀤𑁂𑀯𑀢𑀸, 𑀩𑀮𑀤𑁂𑀯𑀯𑀢𑀺𑀓𑀸𑀦𑀁 𑀩𑀮𑀤𑁂𑀯𑁄 𑀤𑁂𑀯𑀢𑀸, 𑀧𑀼𑀡𑁆𑀡𑀪𑀤𑁆𑀤𑀯𑀢𑀺𑀓𑀸𑀦𑀁 𑀧𑀼𑀡𑁆𑀡𑀪𑀤𑁆𑀤𑁄 𑀤𑁂𑀯𑀢𑀸, 𑀫𑀡𑀺𑀪𑀤𑁆𑀤𑀯𑀢𑀺𑀓𑀸𑀦𑀁 𑀫𑀡𑀺𑀪𑀤𑁆𑀤𑁄 𑀤𑁂𑀯𑀢𑀸, 𑀅𑀕𑁆𑀕𑀺𑀯𑀢𑀺𑀓𑀸𑀦𑀁 𑀅𑀕𑁆𑀕𑀺 𑀤𑁂𑀯𑀢𑀸, 𑀦𑀸𑀕𑀯𑀢𑀺𑀓𑀸𑀦𑀁 𑀦𑀸𑀕𑀸 𑀤𑁂𑀯𑀢𑀸, 𑀲𑀼𑀧𑀡𑁆𑀡𑀯𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸 𑀤𑁂𑀯𑀢𑀸, 𑀬𑀓𑁆𑀔𑀯𑀢𑀺𑀓𑀸𑀦𑀁 𑀬𑀓𑁆𑀔𑀸 𑀤𑁂𑀯𑀢𑀸, 𑀅𑀲𑀼𑀭𑀯𑀢𑀺𑀓𑀸𑀦𑀁 𑀅𑀲𑀼𑀭𑀸 𑀤𑁂𑀯𑀢𑀸, 𑀕𑀦𑁆𑀥𑀩𑁆𑀩𑀯𑀢𑀺𑀓𑀸𑀦𑀁 𑀕𑀦𑁆𑀥𑀩𑁆𑀩𑀸 𑀤𑁂𑀯𑀢𑀸, 𑀫𑀳𑀸𑀭𑀸𑀚𑀯𑀢𑀺𑀓𑀸𑀦𑀁 𑀫𑀳𑀸𑀭𑀸𑀚𑀸𑀦𑁄 𑀤𑁂𑀯𑀢𑀸, 𑀘𑀦𑁆𑀤𑀯𑀢𑀺𑀓𑀸𑀦𑀁 𑀘𑀦𑁆𑀤𑁄 𑀤𑁂𑀯𑀢𑀸, 𑀲𑀽𑀭𑀺𑀬𑀯𑀢𑀺𑀓𑀸𑀦𑀁 𑀲𑀽𑀭𑀺𑀬𑁄 𑀤𑁂𑀯𑀢𑀸, 𑀇𑀦𑁆𑀤𑀯𑀢𑀺𑀓𑀸𑀦𑀁 𑀇𑀦𑁆𑀤𑁄 𑀤𑁂𑀯𑀢𑀸, 𑀩𑁆𑀭𑀳𑁆𑀫𑀯𑀢𑀺𑀓𑀸𑀦𑀁 𑀩𑁆𑀭𑀳𑁆𑀫𑀸 𑀤𑁂𑀯𑀢𑀸, 𑀤𑁂𑀯𑀯𑀢𑀺𑀓𑀸𑀦𑀁 𑀤𑁂𑀯𑁄 𑀤𑁂𑀯𑀢𑀸, 𑀤𑀺𑀲𑀸𑀯𑀢𑀺𑀓𑀸𑀦𑀁 𑀤𑀺𑀲𑀸 𑀤𑁂𑀯𑀢𑀸, 𑀬𑁂 𑀬𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀢𑁂 𑀢𑁂𑀲𑀁 𑀤𑁂𑀯𑀢𑀸𑀢𑀺 𑁋 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁.

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂𑀢𑀺 𑀬𑀜𑁆𑀜𑀁 𑀯𑀼𑀘𑁆𑀘𑀢𑀺 𑀤𑁂𑀬𑁆𑀬𑀥𑀫𑁆𑀫𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 [𑀫𑀸𑀮𑀸𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 (𑀲𑁆𑀬𑀸.) 𑀇𑀢𑀺𑀯𑀼. 𑁭𑁫] 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀬𑁂𑀧𑀺 𑀬𑀜𑁆𑀜𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀬𑁂𑀧𑀺 𑀬𑀜𑁆𑀜𑀁 𑀤𑁂𑀦𑁆𑀢𑀺 𑀬𑀚𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀼𑀣𑀽𑀢𑀺 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽, 𑀬𑀜𑁆𑀜𑀬𑀸𑀚𑀓𑀸 [𑀬𑀜𑁆𑀜𑀬𑀚𑀓𑀸 (𑀲𑁆𑀬𑀸.)] 𑀯𑀸 𑀏𑀢𑁂 𑀧𑀼𑀣𑀽, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽. 𑀓𑀣𑀁 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽? 𑀩𑀳𑀼𑀓𑀸𑀦𑀁 𑀏𑀢𑁂 𑀬𑀜𑁆𑀜𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀁 𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑁋 𑀏𑀯𑀁 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽.

𑀓𑀣𑀁 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽? 𑀩𑀳𑀼𑀓𑀸 𑀏𑀢𑁂 𑀬𑀜𑁆𑀜𑀬𑀸𑀚𑀓𑀸 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑁋 𑀏𑀯𑀁 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽.

𑀓𑀣𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽? 𑀩𑀳𑀼𑀓𑀸 𑀏𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸 [… 𑀯𑀡𑀺𑀩𑁆𑀩𑀓𑀲𑀸𑀯𑀓𑀸 (𑀲𑁆𑀬𑀸.) 𑀇𑀢𑀺𑀯𑀼. 𑁭𑁫] 𑁋 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽. 𑀇𑀥 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑁋 𑀧𑀼𑀣𑀽𑀥 𑀮𑁄𑀓𑁂.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀢𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁, 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀢𑁆𑀣𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁. 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 [𑀲𑀁𑀲𑀬𑀧𑀓𑁆𑀔𑀦𑁆𑀦𑁄 (𑀲𑁆𑀬𑀸.)] 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺! 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀓𑀢𑀫𑀸 𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀓𑀸 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀺𑀓𑀸𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀔𑀢𑁆𑀢𑀺𑀬𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀯𑁂𑀲𑁆𑀲𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀤𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀳𑀝𑁆𑀞𑀸 𑀧𑀼𑀘𑁆𑀙𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀫𑀦𑀼𑀲𑁆𑀲𑀧𑀼𑀘𑁆𑀙𑀸.

𑀓𑀢𑀫𑀸 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀅𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀦𑀸𑀕𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀧𑀡𑁆𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀬𑀓𑁆𑀔𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀲𑀼𑀭𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀦𑁆𑀥𑀩𑁆𑀩𑀸 𑀧𑀼𑀘𑁆𑀙𑀦𑁆𑀢𑀺, 𑀫𑀳𑀸𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀇𑀦𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀳𑁆𑀫𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀤𑁂𑀯𑀢𑀸𑀬𑁄 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸.

𑀓𑀢𑀫𑀸 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸? 𑀬𑀁 𑀪𑀕𑀯𑀸 𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁, 𑀲𑁄 𑀦𑀺𑀫𑁆𑀫𑀺𑀢𑁄 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺; 𑀪𑀕𑀯𑀸 𑀯𑀺𑀲𑀚𑁆𑀚𑁂𑀢𑀺 [𑀯𑀺𑀲𑁆𑀲𑀚𑁆𑀚𑁂𑀢𑀺 (𑀓.)] 𑁋 𑀅𑀬𑀁 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑁆𑀢𑀢𑁆𑀣𑀧𑀼𑀘𑁆𑀙𑀸, 𑀧𑀭𑀢𑁆𑀣𑀧𑀼𑀘𑁆𑀙𑀸, 𑀉𑀪𑀬𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀧𑀼𑀘𑁆𑀙𑀸, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀧𑀼𑀘𑁆𑀙𑀸, 𑀧𑀭𑀫𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀦𑀯𑀚𑁆𑀚𑀢𑁆𑀣𑀧𑀼𑀘𑁆𑀙𑀸, 𑀦𑀺𑀓𑁆𑀓𑀺𑀮𑁂𑀲𑀢𑁆𑀣𑀧𑀼𑀘𑁆𑀙𑀸, 𑀯𑁄𑀤𑀸𑀦𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑀻𑀢𑀧𑀼𑀘𑁆𑀙𑀸, 𑀅𑀦𑀸𑀕𑀢𑀧𑀼𑀘𑁆𑀙𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀚𑁆𑀛𑀢𑁆𑀢𑀧𑀼𑀘𑁆𑀙𑀸, 𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀓𑀼𑀲𑀮𑀧𑀼𑀘𑁆𑀙𑀸, 𑀅𑀓𑀼𑀲𑀮𑀧𑀼𑀘𑁆𑀙𑀸, 𑀅𑀩𑁆𑀬𑀸𑀓𑀢𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀔𑀦𑁆𑀥𑀧𑀼𑀘𑁆𑀙𑀸, 𑀥𑀸𑀢𑀼𑀧𑀼𑀘𑁆𑀙𑀸, 𑀆𑀬𑀢𑀦𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀲𑀢𑀺𑀧𑀝𑁆𑀞𑀸𑀦𑀧𑀼𑀘𑁆𑀙𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀼𑀘𑁆𑀙𑀸, 𑀇𑀤𑁆𑀥𑀺𑀧𑀸𑀤𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀇𑀦𑁆𑀤𑁆𑀭𑀺𑀬𑀧𑀼𑀘𑁆𑀙𑀸, 𑀩𑀮𑀧𑀼𑀘𑁆𑀙𑀸, 𑀩𑁄𑀚𑁆𑀛𑀗𑁆𑀕𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀕𑁆𑀕𑀧𑀼𑀘𑁆𑀙𑀸, 𑀨𑀮𑀧𑀼𑀘𑁆𑀙𑀸, 𑀦𑀺𑀩𑁆𑀩𑀸𑀦𑀧𑀼𑀘𑁆𑀙𑀸.

𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 ‘‘𑀓𑀣𑀬𑀲𑁆𑀲𑀼 𑀫𑁂’’𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁧𑁩.

𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁 [𑀇𑀢𑁆𑀣𑀢𑀁 (𑀲𑁆𑀬𑀸.), 𑀇𑀢𑁆𑀣𑀪𑀸𑀯𑀁 (𑀓.)] ;

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼.

𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀇𑀲𑀬𑁄𑀢𑀺 𑀇𑀲𑀺𑀦𑀸𑀫𑀓𑀸 𑀬𑁂 𑀓𑁂𑀘𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀆𑀚𑀻𑀯𑀓𑀸 𑀦𑀺𑀕𑀡𑁆𑀞𑀸 𑀚𑀝𑀺𑀮𑀸 𑀢𑀸𑀧𑀲𑀸. 𑀫𑀦𑀼𑀚𑀸𑀢𑀺 𑀫𑀦𑀼𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑁋 𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸.

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀦𑁆𑀢𑀺. 𑀔𑀢𑁆𑀢𑀺𑀬𑀸𑀢𑀺 𑀬𑁂 𑀓𑁂𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸. 𑀤𑁂𑀯𑀢𑀸𑀦𑀦𑁆𑀢𑀺 𑀆𑀚𑀻𑀯𑀓𑀲𑀸𑀯𑀓𑀸𑀦𑀁 𑀆𑀚𑀻𑀯𑀓𑀸 𑀤𑁂𑀯𑀢𑀸…𑀧𑁂… 𑀤𑀺𑀲𑀸𑀯𑀢𑀺𑀓𑀸𑀦𑀁 𑀤𑀺𑀲𑀸 𑀤𑁂𑀯𑀢𑀸. 𑀬𑁂 𑀬𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀸, 𑀢𑁂 𑀢𑁂𑀲𑀁 𑀤𑁂𑀯𑀢𑀸𑀢𑀺 𑁋 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁.

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂𑀢𑀺. 𑀬𑀜𑁆𑀜𑀁 𑀯𑀼𑀘𑁆𑀘𑀢𑀺 𑀤𑁂𑀬𑁆𑀬𑀥𑀫𑁆𑀫𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀼𑀣𑀽𑀢𑀺 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽, 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽…𑀧𑁂… 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽. 𑀇𑀥 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑁋 𑀧𑀼𑀣𑀽𑀥 𑀮𑁄𑀓𑁂.

𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀦𑁆𑀢𑀺. 𑀆𑀲𑀻𑀲𑀫𑀸𑀦𑀸𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀕𑀦𑁆𑀥𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀭𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀨𑁄𑀝𑁆𑀞𑀩𑁆𑀩𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀧𑀼𑀢𑁆𑀢𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀤𑀸𑀭𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀥𑀦𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀬𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀇𑀲𑁆𑀲𑀭𑀺𑀬𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑁂𑀲𑀼 (𑀲𑁆𑀬𑀸.)] 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼 𑀬𑀸𑀫𑁂𑀲𑀼 𑀤𑁂𑀯𑁂𑀲𑀼 𑀢𑀼𑀲𑀺𑀢𑁂𑀲𑀼 𑀤𑁂𑀯𑁂𑀲𑀼 𑀦𑀺𑀫𑁆𑀫𑀸𑀦𑀭𑀢𑀻𑀲𑀼 𑀤𑁂𑀯𑁂𑀲𑀼 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸 𑀇𑀘𑁆𑀙𑀫𑀸𑀦𑀸 𑀲𑀸𑀤𑀺𑀬𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸 𑀅𑀪𑀺𑀚𑀧𑁆𑀧𑀫𑀸𑀦𑀸𑀢𑀺 𑀆𑀲𑀻𑀲𑀫𑀸𑀦𑀸.

𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀆𑀲𑀻𑀲𑀫𑀸𑀦𑀸 𑀏𑀢𑁆𑀣 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀆𑀲𑀻𑀲𑀫𑀸𑀦𑀸…𑀧𑁂… 𑀏𑀢𑁆𑀣 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀆𑀲𑀻𑀲𑀫𑀸𑀦𑀸 𑀇𑀘𑁆𑀙𑀫𑀸𑀦𑀸 𑀲𑀸𑀤𑀺𑀬𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸 𑀅𑀪𑀺𑀚𑀧𑁆𑀧𑀫𑀸𑀦𑀸𑀢𑀺 𑀆𑀲𑀻𑀲𑀫𑀸𑀦𑀸 𑁋 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁.

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀚𑀭𑀸𑀦𑀺𑀲𑁆𑀲𑀺𑀢𑀸 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸 𑀫𑀭𑀡𑀦𑀺𑀲𑁆𑀲𑀺𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀚𑀸𑀢𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀚𑀭𑀸𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀚𑀭𑀸𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀫𑀭𑀡𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀫𑀭𑀡𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀕𑀢𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀕𑀢𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀉𑀧𑀧𑀢𑁆𑀢𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀉𑀧𑀧𑀢𑁆𑀢𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀧𑀝𑀺𑀲𑀦𑁆𑀥𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀧𑀝𑀺𑀲𑀦𑁆𑀥𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀪𑀯𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀪𑀯𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀲𑀁𑀲𑀸𑀭𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀲𑀁𑀲𑀸𑀭𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀯𑀝𑁆𑀝𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁;

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽’’𑀢𑀺.

𑁧𑁪.

𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸;

𑀅𑀢𑀸𑀭𑀼𑀁 [𑀅𑀢𑀸𑀭𑀼𑀁 (𑀲𑁆𑀬𑀸. 𑀓.)] 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸𑀢𑀺. 𑀬𑁂 𑀓𑁂𑀘𑀻𑀢𑀺…𑀧𑁂….

𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸𑀢𑀺. 𑀓𑀘𑁆𑀘𑀺𑀲𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀓𑀘𑁆𑀘𑀺𑀲𑀼. 𑀢𑁂𑀢𑀺 𑀬𑀜𑁆𑀜𑀬𑀸𑀚𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸. 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸𑀢𑀺 𑀬𑀜𑁆𑀜𑁄𑀬𑁂𑀯 𑀯𑀼𑀘𑁆𑀘𑀢𑀺 𑀬𑀜𑁆𑀜𑀧𑀣𑁄. 𑀬𑀣𑀸 𑀅𑀭𑀺𑀬𑀫𑀕𑁆𑀕𑁄 𑀅𑀭𑀺𑀬𑀧𑀣𑁄 𑀤𑁂𑀯𑀫𑀕𑁆𑀕𑁄 𑀤𑁂𑀯𑀧𑀣𑁄 𑀩𑁆𑀭𑀳𑁆𑀫𑀫𑀕𑁆𑀕𑁄 𑀩𑁆𑀭𑀳𑁆𑀫𑀧𑀣𑁄, 𑀏𑀯𑀫𑁂𑀯 𑀬𑀜𑁆𑀜𑁄𑀬𑁂𑀯 𑀯𑀼𑀘𑁆𑀘𑀢𑀺 𑀬𑀜𑁆𑀜𑀧𑀣𑁄. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄 𑀲𑀸𑀢𑀘𑁆𑀘𑀓𑀸𑀭𑀺𑀦𑁄 𑀅𑀝𑁆𑀞𑀺𑀢𑀓𑀸𑀭𑀺𑀦𑁄 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀦𑁄 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸𑀢𑀺 𑁋 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸. 𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄…𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸. 𑀬𑁂𑀧𑀺 𑀬𑀜𑁆𑀜𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄…𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸. 𑀬𑁂𑀧𑀺 𑀬𑀜𑁆𑀜𑀁 𑀤𑁂𑀦𑁆𑀢𑀺 𑀬𑀚𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄 …𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸𑀢𑀺 𑁋 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸.

𑀅𑀢𑀸𑀭𑀼𑀁 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀚𑀭𑀸𑀫𑀭𑀡𑀁 𑀅𑀢𑀭𑀺𑀁𑀲𑀼 𑀉𑀢𑁆𑀢𑀭𑀺𑀁𑀲𑀼 𑀧𑀢𑀭𑀺𑀁𑀲𑀼 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀯𑀻𑀢𑀺𑀯𑀢𑁆𑀢𑀺𑀁𑀲𑀼. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 𑀓𑀣𑀬𑀲𑁆𑀲𑀼 𑀫𑁂𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸;

𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁧𑁫.

𑀆𑀲𑀻𑀲𑀦𑁆𑀢𑀺 [𑀆𑀲𑀺𑀁𑀲𑀦𑁆𑀢𑀺 (𑀲𑁆𑀬𑀸.)] 𑀣𑁄𑀫𑀬𑀦𑁆𑀢𑀺, 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺; [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁, 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸;

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺.

𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀻𑀢𑀺. 𑀆𑀲𑀻𑀲𑀦𑁆𑀢𑀻𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀕𑀦𑁆𑀥𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀭𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀨𑁄𑀝𑁆𑀞𑀩𑁆𑀩𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀧𑀼𑀢𑁆𑀢𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀤𑀸𑀭𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀥𑀦𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀬𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀇𑀲𑁆𑀲𑀭𑀺𑀬𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂…𑀧𑁂… 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀤𑁂𑀯𑁂𑀲𑀼…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀻𑀢𑀺 𑁋 𑀆𑀲𑀻𑀲𑀦𑁆𑀢𑀺.

𑀣𑁄𑀫𑀬𑀦𑁆𑀢𑀻𑀢𑀺 𑀬𑀜𑁆𑀜𑀁 𑀯𑀸 𑀣𑁄𑀫𑁂𑀦𑁆𑀢𑀺 𑀨𑀮𑀁 𑀯𑀸 𑀣𑁄𑀫𑁂𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁂 𑀯𑀸 𑀣𑁄𑀫𑁂𑀦𑁆𑀢𑀺. 𑀓𑀣𑀁 𑀬𑀜𑁆𑀜𑀁 𑀣𑁄𑀫𑁂𑀦𑁆𑀢𑀺? 𑀲𑀼𑀘𑀺𑀁 𑀤𑀺𑀦𑁆𑀦𑀁 [𑀯𑀺𑀬𑀁 𑀤𑀺𑀦𑁆𑀦𑀁 (𑀲𑁆𑀬𑀸.)], 𑀫𑀦𑀸𑀧𑀁 𑀤𑀺𑀦𑁆𑀦𑀁, 𑀧𑀡𑀻𑀢𑀁 𑀤𑀺𑀦𑁆𑀦𑀁, 𑀓𑀸𑀮𑁂𑀦 𑀤𑀺𑀦𑁆𑀦𑀁, 𑀓𑀧𑁆𑀧𑀺𑀬𑀁 𑀤𑀺𑀦𑁆𑀦𑀁, 𑀯𑀺𑀘𑁂𑀬𑁆𑀬 𑀤𑀺𑀦𑁆𑀦𑀁, 𑀅𑀦𑀯𑀚𑁆𑀚𑀁 𑀤𑀺𑀦𑁆𑀦𑀁, 𑀅𑀪𑀺𑀡𑁆𑀳𑀁 𑀤𑀺𑀦𑁆𑀦𑀁 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀺𑀢𑀦𑁆𑀢𑀺 𑁋 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀏𑀯𑀁 𑀬𑀜𑁆𑀜𑀁 𑀣𑁄𑀫𑁂𑀦𑁆𑀢𑀺.

𑀓𑀣𑀁 𑀨𑀮𑀁 𑀣𑁄𑀫𑁂𑀦𑁆𑀢𑀺? 𑀇𑀢𑁄 𑀦𑀺𑀤𑀸𑀦𑀁 𑀭𑀽𑀧𑀧𑀝𑀺𑀮𑀸𑀪𑁄 𑀪𑀯𑀺𑀲𑁆𑀲𑀢𑀺…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀏𑀯𑀁 𑀨𑀮𑀁 𑀣𑁄𑀫𑁂𑀦𑁆𑀢𑀺.

𑀓𑀣𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀣𑁄𑀫𑁂𑀦𑁆𑀢𑀺? 𑀤𑀓𑁆𑀔𑀺𑀡𑁂𑀬𑁆𑀬𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀕𑁄𑀢𑁆𑀢𑀲𑀫𑁆𑀧𑀦𑁆𑀦𑀸 𑀅𑀚𑁆𑀛𑀸𑀬𑀓𑀸 𑀫𑀦𑁆𑀢𑀥𑀭𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑀸𑀢𑀺, 𑀯𑀻𑀢𑀭𑀸𑀕𑀸 𑀯𑀸 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀤𑁄𑀲𑀸 𑀯𑀸 𑀤𑁄𑀲𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀫𑁄𑀳𑀸 𑀯𑀸 𑀫𑁄𑀳𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸𑀢𑀺 𑁋 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀣𑁄𑀫𑁂𑀦𑁆𑀢𑀻𑀢𑀺 𑁋 𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺.

𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀕𑀦𑁆𑀥𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀭𑀲𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑁋 𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺. 𑀚𑀼𑀳𑀦𑁆𑀢𑀻𑀢𑀺 𑀚𑀼𑀳𑀦𑁆𑀢𑀺 𑀤𑁂𑀦𑁆𑀢𑀺 𑀬𑀚𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑁋 𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸.

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀦𑁆𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺 𑀧𑀚𑀧𑁆𑀧𑀦𑁆𑀢𑀻𑀢𑀺 𑁋 𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁.

𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀢𑁂𑀢𑀺 𑀬𑀜𑁆𑀜𑀬𑀸𑀚𑀓𑀸 𑀯𑀼𑀘𑁆𑀘𑀦𑁆𑀢𑀺, 𑀬𑀸𑀚𑀬𑁄𑀕𑀸𑀢𑀺 𑀬𑀸𑀚𑀬𑁄𑀕𑁂𑀲𑀼 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸 𑀆𑀬𑀼𑀢𑁆𑀢𑀸 𑀲𑀫𑀸𑀬𑀼𑀢𑁆𑀢𑀸 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸𑀢𑀺 𑁋 𑀢𑁂 𑀬𑀸𑀚𑀬𑁄𑀕𑀸, 𑀪𑀯𑀭𑀸𑀕𑀭𑀢𑁆𑀢𑀸𑀢𑀺 𑀪𑀯𑀭𑀸𑀕𑁄 𑀯𑀼𑀘𑁆𑀘𑀢𑀺 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄 𑀪𑀯𑀭𑀸𑀕𑁄 𑀪𑀯𑀦𑀦𑁆𑀤𑀻 𑀪𑀯𑀢𑀡𑁆𑀳𑀸 𑀪𑀯𑀲𑀺𑀦𑁂𑀳𑁄 𑀪𑀯𑀧𑀭𑀺𑀴𑀸𑀳𑁄 𑀪𑀯𑀫𑀼𑀘𑁆𑀙𑀸 𑀪𑀯𑀚𑁆𑀛𑁄𑀲𑀸𑀦𑀁. 𑀪𑀯𑀭𑀸𑀕𑁂𑀦 𑀪𑀯𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑁋 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸.

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀁 𑀦𑀸𑀢𑀭𑀺𑀁𑀲𑀼 𑀦 𑀉𑀢𑁆𑀢𑀭𑀺𑀁𑀲𑀼 𑀦 𑀧𑀢𑀭𑀺𑀁𑀲𑀼 𑀦 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀻𑀢𑀺𑀯𑀢𑁆𑀢𑀺𑀁𑀲𑀼, 𑀚𑀸𑀢𑀺𑀚𑀭𑀸𑀫𑀭𑀡𑀸 𑀅𑀦𑀺𑀓𑁆𑀔𑀦𑁆𑀢𑀸 𑀅𑀦𑀺𑀲𑁆𑀲𑀝𑀸 𑀅𑀦𑀢𑀺𑀓𑁆𑀓𑀦𑁆𑀢𑀸 𑀅𑀲𑀫𑀢𑀺𑀓𑁆𑀓𑀦𑁆𑀢𑀸 𑀅𑀯𑀻𑀢𑀺𑀯𑀢𑁆𑀢𑀸 𑀅𑀦𑁆𑀢𑁄𑀚𑀸𑀢𑀺𑀚𑀭𑀸𑀫𑀭𑀡𑁂 𑀧𑀭𑀺𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀲𑀁𑀲𑀸𑀭𑀧𑀣𑁂 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸 𑀚𑀭𑀸𑀬 𑀅𑀦𑀼𑀲𑀝𑀸 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸𑀢𑀺; 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺, 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺; [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁, 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸;

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑁧𑁬.

𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸𑀢𑀺 𑀢𑁂 𑀬𑀜𑁆𑀜𑀬𑀸𑀚𑀓𑀸 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀁 𑀦𑀸𑀢𑀭𑀺𑀁𑀲𑀼 𑀦 𑀉𑀢𑁆𑀢𑀭𑀺𑀁𑀲𑀼 𑀦 𑀧𑀢𑀭𑀺𑀁𑀲𑀼 𑀦 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀻𑀢𑀺𑀯𑀢𑁆𑀢𑀺𑀁𑀲𑀼, 𑀚𑀸𑀢𑀺𑀚𑀭𑀸𑀫𑀭𑀡𑀸 𑀅𑀦𑀺𑀓𑁆𑀔𑀦𑁆𑀢𑀸 𑀅𑀦𑀺𑀲𑁆𑀲𑀝𑀸 𑀅𑀦𑀢𑀺𑀓𑁆𑀓𑀦𑁆𑀢𑀸 𑀅𑀲𑀫𑀢𑀺𑀓𑁆𑀓𑀦𑁆𑀢𑀸 𑀅𑀯𑀻𑀢𑀺𑀯𑀢𑁆𑀢𑀸 𑀅𑀦𑁆𑀢𑁄𑀚𑀸𑀢𑀺𑀚𑀭𑀸𑀫𑀭𑀡𑁂 𑀧𑀭𑀺𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀲𑀁𑀲𑀸𑀭𑀧𑀣𑁂 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸 𑀚𑀭𑀸𑀬 𑀅𑀦𑀼𑀲𑀝𑀸 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸𑀢𑀺 𑁋 𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸.

𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸 𑀧𑀼𑀡𑁆𑀡𑀓𑁄.

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺. 𑀬𑀜𑁆𑀜𑁂𑀳𑀻𑀢𑀺 𑀬𑀜𑁆𑀜𑁂𑀳𑀺 𑀧𑀳𑀽𑀢𑁂𑀳𑀺 𑀬𑀜𑁆𑀜𑁂𑀳𑀺 𑀯𑀺𑀯𑀺𑀥𑁂𑀳𑀺 𑀬𑀜𑁆𑀜𑁂𑀳𑀺 𑀧𑀼𑀣𑀽𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀅𑀣 𑀓𑁄 𑀏𑀲𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀺 [𑀯𑀻𑀢𑀺𑀯𑀢𑁆𑀢𑀺 (𑀓.)]. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑁆𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 𑀓𑀣𑀬𑀲𑁆𑀲𑀼 𑀫𑁂𑀢𑀦𑁆𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁧𑁭.

𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 [𑀮𑁄𑀓𑀲𑁆𑀫𑀺𑀁 (𑀲𑁆𑀬𑀸. 𑀓.)] 𑀧𑀭𑁄𑀧𑀭𑀸𑀦𑀺, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺.

𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀻𑀢𑀺 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀭𑁄𑀧𑀭𑀸𑀦𑀻𑀢𑀺 𑀑𑀭𑀁 𑀯𑀼𑀘𑁆𑀘𑀢𑀺 𑀲𑀓𑀢𑁆𑀢𑀪𑀸𑀯𑁄, 𑀧𑀭𑀁 𑀯𑀼𑀘𑁆𑀘𑀢𑀺 𑀧𑀭𑀢𑁆𑀢𑀪𑀸𑀯𑁄 𑀑𑀭𑀁 𑀯𑀼𑀘𑁆𑀘𑀢𑀺 𑀲𑀓𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀧𑀭𑀁 𑀯𑀼𑀘𑁆𑀘𑀢𑀺 𑀧𑀭𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁; 𑀑𑀭𑀁 𑀯𑀼𑀘𑁆𑀘𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀧𑀭𑀁 𑀯𑀼𑀘𑁆𑀘𑀢𑀺 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀑𑀭𑀁 𑀯𑀼𑀘𑁆𑀘𑀢𑀺 𑀫𑀦𑀼𑀲𑁆𑀲𑀮𑁄𑀓𑁄, 𑀧𑀭𑀁 𑀯𑀼𑀘𑁆𑀘𑀢𑀺 𑀤𑁂𑀯𑀮𑁄𑀓𑁄; 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀧𑀭𑀁 𑀯𑀼𑀘𑁆𑀘𑀢𑀺 𑀭𑀽𑀧𑀥𑀸𑀢𑀼 𑀅𑀭𑀽𑀧𑀥𑀸𑀢𑀼; 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼 𑀭𑀽𑀧𑀥𑀸𑀢𑀼, 𑀧𑀭𑀁 𑀯𑀼𑀘𑁆𑀘𑀢𑀺 𑀅𑀭𑀽𑀧𑀥𑀸𑀢𑀼. 𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑁄𑀧𑀭𑀸𑀦𑀺 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀬 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀺. 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸𑀢𑀺. 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸.

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀇𑀜𑁆𑀚𑀺𑀢𑀦𑁆𑀢𑀺 𑀢𑀡𑁆𑀳𑀺𑀜𑁆𑀚𑀺𑀢𑀁 𑀤𑀺𑀝𑁆𑀞𑀺𑀜𑁆𑀚𑀺𑀢𑀁 𑀫𑀸𑀦𑀺𑀜𑁆𑀚𑀺𑀢𑀁 𑀓𑀺𑀮𑁂𑀲𑀺𑀜𑁆𑀚𑀺𑀢𑀁 𑀓𑀸𑀫𑀺𑀜𑁆𑀚𑀺𑀢𑀁. 𑀬𑀲𑁆𑀲𑀺𑀫𑁂 𑀇𑀜𑁆𑀚𑀺𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲…𑀧𑁂… 𑀫𑁄𑀳𑀲𑁆𑀲… 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 [𑀦𑀺𑀚𑁆𑀛𑀸𑀢𑀢𑁆𑀢𑀸 (𑀓.) 𑀫𑀳𑀸𑀦𑀺. 𑁧𑁮] 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑀲𑀦𑁆𑀢𑁄; 𑀯𑀺𑀥𑀽𑀫𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀺𑀥𑀽𑀫𑀺𑀢𑀁 𑀯𑀺𑀥𑀫𑀺𑀢𑀁 𑀲𑁄𑀲𑀺𑀢𑀁 𑀯𑀺𑀲𑁄𑀲𑀺𑀢𑀁 𑀩𑁆𑀬𑀦𑁆𑀢𑀻𑀓𑀢𑀁 [𑀩𑁆𑀬𑀦𑁆𑀢𑀺𑀓𑀢𑀁 (𑀓.)], 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀯𑀺𑀥𑀽𑀫𑀺𑀢𑀁 𑀯𑀺𑀥𑀫𑀺𑀢𑀁 𑀲𑁄𑀲𑀺𑀢𑀁 𑀯𑀺𑀲𑁄𑀲𑀺𑀢𑀁 𑀩𑁆𑀬𑀦𑁆𑀢𑀻𑀓𑀢𑀁, 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄 𑀯𑀺𑀥𑀽𑀫𑀺𑀢𑁄 𑀯𑀺𑀥𑀫𑀺𑀢𑁄 𑀲𑁄𑀲𑀺𑀢𑁄 𑀯𑀺𑀲𑁄𑀲𑀺𑀢𑁄 𑀩𑁆𑀬𑀦𑁆𑀢𑀻𑀓𑀢𑁄, 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀯𑀺𑀥𑀽𑀫𑀺𑀢𑀸 𑀯𑀺𑀥𑀫𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀩𑁆𑀬𑀦𑁆𑀢𑀻𑀓𑀢𑀸. 𑀅𑀣 𑀯𑀸, 𑀓𑁄𑀥𑁄 𑀯𑀼𑀘𑁆𑀘𑀢𑀺 𑀥𑀽𑀫𑁄 𑁋

𑀫𑀸𑀦𑁄 𑀳𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀔𑀸𑀭𑀺𑀪𑀸𑀭𑁄, 𑀓𑁄𑀥𑁄 𑀥𑀽𑀫𑁄 𑀪𑀲𑁆𑀫𑀦𑀺 [𑀕𑀫𑁆𑀫𑀦𑀺 (𑀲𑁆𑀬𑀸.)] 𑀫𑁄𑀲𑀯𑀚𑁆𑀚𑀁;

𑀚𑀺𑀯𑁆𑀳𑀸 𑀲𑀼𑀚𑀸 𑀳𑀤𑀬𑀁 [𑀢𑀧𑁆𑀧𑀭𑀲𑁆𑀲 (𑀲𑁆𑀬𑀸.)] 𑀚𑁄𑀢𑀺𑀝𑁆𑀞𑀸𑀦𑀁, 𑀅𑀢𑁆𑀢𑀸 𑀲𑀼𑀤𑀦𑁆𑀢𑁄 𑀧𑀼𑀭𑀺𑀲𑀲𑁆𑀲 𑀚𑁄𑀢𑀺.

𑀅𑀧𑀺 𑀘, 𑀤𑀲𑀳𑀸𑀓𑀸𑀭𑁂𑀳𑀺 𑀓𑁄𑀥𑁄 𑀚𑀸𑀬𑀢𑀺 𑁋 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺, 𑀅𑀦𑀢𑁆𑀣𑀁 𑀘𑀭𑀢𑀺, 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺, 𑀅𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀓𑁄𑀥𑁄 𑀚𑀸𑀬𑀢𑀺. 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 [𑀅𑀲𑁆𑀲𑀼𑀭𑁄𑀧𑁄 (𑀲𑁆𑀬𑀸.)] 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀓𑁄𑀥𑁄.

𑀅𑀧𑀺 𑀘, 𑀓𑁄𑀥𑀲𑁆𑀲 𑀅𑀥𑀺𑀫𑀢𑁆𑀢𑀧𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀺 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.) 𑀫𑀳𑀸𑀦𑀺. 𑁮𑁫] 𑀓𑀸𑀮𑀁 𑀓𑁄𑀥𑁄 𑀘𑀺𑀢𑁆𑀢𑀸𑀯𑀺𑀮𑀓𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀳𑀦𑀼𑀲𑀜𑁆𑀘𑁄𑀧𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀳𑀦𑀼𑀲𑀜𑁆𑀘𑁄𑀧𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑁄 [𑀨𑀭𑀼𑀲𑀯𑀸𑀘𑀦𑀺𑀘𑁆𑀙𑀸𑀭𑀡𑁄 (𑀲𑁆𑀬𑀸.)] 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑁄 [𑀚𑀻𑀯𑀺𑀢𑀧𑀦𑀸𑀲𑀦𑁄 (𑀲𑁆𑀬𑀸.) 𑀫𑀳𑀸𑀦𑀺. 𑁮𑁫] 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀲𑀩𑁆𑀩𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀬 𑀲𑀡𑁆𑀞𑀺𑀢𑁄 𑀳𑁄𑀢𑀺. 𑀬𑀢𑁄 𑀓𑁄𑀥𑁄 𑀧𑀭𑀁 𑀧𑀼𑀕𑁆𑀕𑀮𑀁 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀓𑁄𑀥𑁄 𑀧𑀭𑀫𑀼𑀲𑁆𑀲𑀤𑀕𑀢𑁄 𑀧𑀭𑀫𑀯𑁂𑀧𑀼𑀮𑁆𑀮𑀧𑀢𑁆𑀢𑁄 𑀳𑁄𑀢𑀺. 𑀬𑀲𑁆𑀲 𑀲𑁄 𑀳𑁄𑀢𑀺 𑀓𑁄𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑁋 𑀯𑀺𑀥𑀽𑀫𑁄.

𑀓𑁄𑀥𑀲𑁆𑀲 𑀧𑀳𑀻𑀦𑀢𑁆𑀢𑀸 𑀯𑀺𑀥𑀽𑀫𑁄, 𑀓𑁄𑀥𑀯𑀢𑁆𑀣𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀯𑀺𑀥𑀽𑀫𑁄, 𑀓𑁄𑀥𑀳𑁂𑀢𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀯𑀺𑀥𑀽𑀫𑁄, 𑀓𑁄𑀥𑀳𑁂𑀢𑀼𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀥𑀽𑀫𑁄. 𑀅𑀦𑀻𑀖𑁄𑀢𑀺 𑀭𑀸𑀕𑁄 𑀦𑀻𑀖𑁄, 𑀤𑁄𑀲𑁄 𑀦𑀻𑀖𑁄, 𑀫𑁄𑀳𑁄 𑀦𑀻𑀖𑁄, 𑀓𑁄𑀥𑁄 𑀦𑀻𑀖𑁄, 𑀉𑀧𑀦𑀸𑀳𑁄 𑀦𑀻𑀖𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀦𑀻𑀖𑀸. 𑀬𑀲𑁆𑀲𑁂𑀢𑁂 𑀦𑀻𑀖𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀻𑀖𑁄.

𑀦𑀺𑀭𑀸𑀲𑁄𑀢𑀺 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀆𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀦𑀺𑀭𑀸𑀲𑁄. 𑀚𑀸𑀢𑀻𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄. 𑀚𑀭𑀸𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄. 𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀬𑁄 𑀲𑀦𑁆𑀢𑁄 𑀘 𑀯𑀺𑀥𑀽𑀫𑁄 𑀘 𑀅𑀦𑀻𑀖𑁄 𑀘 𑀦𑀺𑀭𑀸𑀲𑁄 𑀘, 𑀲𑁄 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀻𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀺, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀲𑀳𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀢𑀢𑀺𑀬𑁄.

𑁪. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁧𑁮.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀫𑁂𑀢𑁆𑀢𑀕𑀽]

𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀽 𑀪𑀸𑀯𑀺𑀢𑀢𑁆𑀢𑀁;

𑀓𑀼𑀢𑁄 𑀦𑀼 𑀤𑀼𑀓𑁆𑀔𑀸 𑀲𑀫𑀼𑀤𑀸𑀕𑀢𑀸 𑀇𑀫𑁂, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀻𑀢𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁. 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀢𑁆𑀣𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁. 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺? 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀓𑀢𑀫𑀸 𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀓𑀸 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀺𑀓𑀸𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺 𑀔𑀢𑁆𑀢𑀺𑀬𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀯𑁂𑀲𑁆𑀲𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀤𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀳𑀝𑁆𑀞𑀸 𑀧𑀼𑀘𑁆𑀙𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀫𑀦𑀼𑀲𑁆𑀲𑀧𑀼𑀘𑁆𑀙𑀸.

𑀓𑀢𑀫𑀸 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀅𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀦𑀸𑀕𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀧𑀡𑁆𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀬𑀓𑁆𑀔𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀲𑀼𑀭𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀦𑁆𑀥𑀩𑁆𑀩𑀸 𑀧𑀼𑀘𑁆𑀙𑀦𑁆𑀢𑀺, 𑀫𑀳𑀸𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀇𑀦𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀳𑁆𑀫𑀸 𑀧𑀼𑀘𑁆𑀙𑀦𑁆𑀢𑀺, 𑀤𑁂𑀯𑀸 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸.

𑀓𑀢𑀫𑀸 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸? 𑀪𑀕𑀯𑀸 𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑁄 𑀦𑀺𑀫𑁆𑀫𑀺𑀢𑁄 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀪𑀕𑀯𑀸 𑀯𑀺𑀲𑀚𑁆𑀚𑁂𑀢𑀺. 𑀅𑀬𑀁 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑁆𑀢𑀢𑁆𑀣𑀧𑀼𑀘𑁆𑀙𑀸, 𑀧𑀭𑀢𑁆𑀣𑀧𑀼𑀘𑁆𑀙𑀸, 𑀉𑀪𑀬𑀢𑁆𑀣𑀧𑀼𑀘𑁆𑀙𑀸…𑀧𑁂… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀧𑀼𑀘𑁆𑀙𑀸, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀧𑀼𑀘𑁆𑀙𑀸, 𑀧𑀭𑀫𑀢𑁆𑀣𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀦𑀯𑀚𑁆𑀚𑀢𑁆𑀣𑀧𑀼𑀘𑁆𑀙𑀸, 𑀦𑀺𑀓𑁆𑀓𑀺𑀮𑁂𑀲𑀢𑁆𑀣𑀧𑀼𑀘𑁆𑀙𑀸, 𑀯𑁄𑀤𑀸𑀦𑀢𑁆𑀣𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑀻𑀢𑀧𑀼𑀘𑁆𑀙𑀸, 𑀅𑀦𑀸𑀕𑀢𑀧𑀼𑀘𑁆𑀙𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀚𑁆𑀛𑀢𑁆𑀢𑀧𑀼𑀘𑁆𑀙𑀸, 𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀓𑀼𑀲𑀮𑀧𑀼𑀘𑁆𑀙𑀸, 𑀅𑀓𑀼𑀲𑀮𑀧𑀼𑀘𑁆𑀙𑀸, 𑀅𑀩𑁆𑀬𑀸𑀓𑀢𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀔𑀦𑁆𑀥𑀧𑀼𑀘𑁆𑀙𑀸, 𑀥𑀸𑀢𑀼𑀧𑀼𑀘𑁆𑀙𑀸 𑀆𑀬𑀢𑀦𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀲𑀢𑀺𑀧𑀝𑁆𑀞𑀸𑀦𑀧𑀼𑀘𑁆𑀙𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀼𑀘𑁆𑀙𑀸, 𑀇𑀤𑁆𑀥𑀺𑀧𑀸𑀤𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀇𑀦𑁆𑀤𑁆𑀭𑀺𑀬𑀧𑀼𑀘𑁆𑀙𑀸, 𑀩𑀮𑀧𑀼𑀘𑁆𑀙𑀸, 𑀩𑁄𑀚𑁆𑀛𑀗𑁆𑀕𑀧𑀼𑀘𑁆𑀙𑀸… 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀕𑁆𑀕𑀧𑀼𑀘𑁆𑀙𑀸, 𑀨𑀮𑀧𑀼𑀘𑁆𑀙𑀸, 𑀦𑀺𑀩𑁆𑀩𑀸𑀦𑀧𑀼𑀘𑁆𑀙𑀸….

𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 ‘‘𑀓𑀣𑀬𑀲𑁆𑀲𑀼 𑀫𑁂’’𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀫𑁂𑀢𑁆𑀢𑀕𑀽𑀢𑀺 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀇𑀘𑁆𑀘𑀸𑀬𑀲𑁆𑀫𑀸 𑀫𑁂𑀢𑁆𑀢𑀕𑀽.

𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀽 𑀪𑀸𑀯𑀺𑀢𑀢𑁆𑀢𑀦𑁆𑀢𑀺. 𑀯𑁂𑀤𑀕𑀽𑀢𑀺 𑀢𑀁 𑀫𑀜𑁆𑀜𑀸𑀫𑀺, 𑀪𑀸𑀯𑀺𑀢𑀢𑁆𑀢𑁄𑀢𑀺 𑀢𑀁 𑀫𑀜𑁆𑀜𑀸𑀫𑀺, 𑀏𑀯𑀁 𑀚𑀸𑀦𑀸𑀫𑀺, 𑀏𑀯𑀁 𑀆𑀚𑀸𑀦𑀸𑀫𑀺 𑀏𑀯𑀁 𑀧𑀝𑀺𑀚𑀸𑀦𑀸𑀫𑀺 𑀏𑀯𑀁 𑀧𑀝𑀺𑀯𑀺𑀚𑁆𑀛𑀸𑀫𑀺. 𑀯𑁂𑀤𑀕𑀽 𑀪𑀸𑀯𑀺𑀢𑀢𑁆𑀢𑁄𑀢𑀺 𑀓𑀣𑀜𑁆𑀘 𑀪𑀕𑀯𑀸 𑀯𑁂𑀤𑀕𑀽? 𑀯𑁂𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁…𑀧𑁂… 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀢𑁂𑀳𑀺 𑀯𑁂𑀤𑁂𑀳𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽; 𑀯𑁂𑀤𑁂𑀳𑀺 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽; 𑀲𑀢𑁆𑀢𑀦𑁆𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀯𑁂𑀤𑀕𑀽; 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀤𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀤𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀯𑀺𑀤𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀡𑀸𑀦𑀁 𑀬𑀸𑀦𑀻𑀥𑀢𑁆𑀣𑀺 [𑀬𑀸𑀦𑀺 𑀧𑀢𑁆𑀣𑀺 (𑀲𑁆𑀬𑀸.), 𑀬𑀸𑀦𑀺 𑀅𑀢𑁆𑀣𑀺 (𑀓.) 𑀲𑀼. 𑀦𑀺. 𑁫𑁩𑁪] 𑀩𑁆𑀭𑀸𑀳𑁆𑀫𑀡𑀸𑀦𑀁;

𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄;

𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺.

𑀏𑀯𑀁 𑀪𑀕𑀯𑀸 𑀯𑁂𑀤𑀕𑀽.

𑀓𑀣𑀁 𑀪𑀕𑀯𑀸 𑀪𑀸𑀯𑀺𑀢𑀢𑁆𑀢𑁄? 𑀪𑀕𑀯𑀸 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄 𑀪𑀸𑀯𑀺𑀢𑀲𑀢𑀺𑀧𑀝𑁆𑀞𑀸𑀦𑁄 𑀪𑀸𑀯𑀺𑀢𑀲𑀫𑁆𑀫𑀧𑁆𑀧𑀥𑀸𑀦𑁄 𑀪𑀸𑀯𑀺𑀢𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑀺𑀢𑀇𑀦𑁆𑀤𑁆𑀭𑀺𑀬𑁄 𑀪𑀸𑀯𑀺𑀢𑀩𑀮𑁄 𑀪𑀸𑀯𑀺𑀢𑀩𑁄𑀚𑁆𑀛𑀗𑁆𑀕𑁄 𑀪𑀸𑀯𑀺𑀢𑀫𑀕𑁆𑀕𑁄, 𑀧𑀳𑀻𑀦𑀓𑀺𑀮𑁂𑀲𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄. 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀅𑀧𑀭𑀺𑀢𑁆𑀢𑁄 𑀫𑀳𑀦𑁆𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀴𑁆𑀳𑁄 𑀩𑀳𑀼𑀭𑀢𑀦𑁄 𑀲𑀸𑀕𑀭𑀽𑀧𑀫𑁄 [𑀲𑀸𑀕𑀭𑀲𑀫𑁄 (𑀓.)] 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄; 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄; 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀫𑀦𑀸𑀧𑀁 𑀭𑀽𑀧𑀁 𑀦𑀸𑀪𑀺𑀕𑀺𑀚𑁆𑀛𑀢𑀺 𑀦𑀸𑀪𑀺𑀳𑀁𑀲𑀢𑀺 [𑀦𑀸𑀪𑀺𑀧𑀺𑀳𑀬𑀢𑀺 (𑀲𑁆𑀬𑀸.) 𑀫𑀳𑀸𑀦𑀺. 𑁯𑁦] 𑀦 𑀭𑀸𑀕𑀁 𑀚𑀦𑁂𑀢𑀺. 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀘𑀓𑁆𑀔𑀼𑀦𑀸 𑀔𑁄 𑀧𑀦𑁂𑀯 𑀭𑀽𑀧𑀁 𑀤𑀺𑀲𑁆𑀯𑀸 𑀅𑀫𑀦𑀸𑀧𑀁 𑀦 𑀫𑀗𑁆𑀓𑀼 𑀳𑁄𑀢𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 [𑀅𑀧𑁆𑀧𑀢𑀺𑀝𑁆𑀞𑀻𑀦𑀘𑀺𑀢𑁆𑀢𑁄 (𑀲𑁆𑀬𑀸.)] 𑀅𑀮𑀻𑀦𑀫𑀦𑀲𑁄 [𑀆𑀤𑀺𑀦𑀫𑀦𑀲𑁄 (𑀲𑁆𑀬𑀸.) 𑀫𑀳𑀸𑀦𑀺. 𑁯𑁦] 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄. 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀫𑀦𑀸𑀧𑀁 𑀦𑀸𑀪𑀺𑀕𑀺𑀚𑁆𑀛𑀢𑀺 𑀦𑀸𑀪𑀺𑀳𑀁𑀲𑀢𑀺 𑀦 𑀭𑀸𑀕𑀁 𑀚𑀦𑁂𑀢𑀺. 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀫𑀦𑀲𑀸𑀬𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀅𑀫𑀦𑀸𑀧𑀁 𑀦 𑀫𑀗𑁆𑀓𑀼 𑀳𑁄𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀮𑀻𑀦𑀫𑀦𑀲𑁄 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄 𑀢𑀲𑁆𑀲 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀭𑀽𑀧𑁂𑀲𑀼 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀫𑀦𑀸𑀧𑀸𑀫𑀦𑀸𑀧𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄𑀯 𑀓𑀸𑀬𑁄 𑀳𑁄𑀢𑀺 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀲𑀼𑀲𑀡𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀭𑀚𑀦𑀻𑀬𑁂 𑀦 𑀭𑀚𑁆𑀚𑀢𑀺, 𑀤𑀼𑀲𑁆𑀲𑀦𑀻𑀬𑁂 [𑀤𑁄𑀲𑀦𑀻𑀬𑁂 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁯𑁦] 𑀦 𑀤𑀼𑀲𑁆𑀲𑀢𑀺, 𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀢𑀺, 𑀓𑁄𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺, 𑀫𑀤𑀦𑀻𑀬𑁂 𑀦 𑀫𑀚𑁆𑀚𑀢𑀺, 𑀓𑀺𑀮𑁂𑀲𑀦𑀻𑀬𑁂 𑀦 𑀓𑀺𑀮𑀺𑀲𑁆𑀲𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀭𑀚𑀦𑀻𑀬𑁂 𑀦 𑀭𑀚𑁆𑀚𑀢𑀺, 𑀤𑀼𑀲𑁆𑀲𑀦𑀻𑀬𑁂 𑀦 𑀤𑀼𑀲𑁆𑀲𑀢𑀺, 𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀢𑀺, 𑀓𑁄𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺, 𑀫𑀤𑀦𑀻𑀬𑁂 𑀦 𑀫𑀚𑁆𑀚𑀢𑀺, 𑀓𑀺𑀮𑁂𑀲𑀦𑀻𑀬𑁂 𑀦 𑀓𑀺𑀮𑀺𑀲𑁆𑀲𑀢𑀺.

𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑁄, 𑀲𑀼𑀢𑁂 𑀲𑀼𑀢𑀫𑀢𑁆𑀢𑁄, 𑀫𑀼𑀢𑁂 𑀫𑀼𑀢𑀫𑀢𑁆𑀢𑁄, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑁄. 𑀤𑀺𑀝𑁆𑀞𑁂 𑀦 𑀮𑀺𑀫𑁆𑀧𑀢𑀺, 𑀲𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀫𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀯𑀺𑀜𑁆𑀜𑀸𑀢𑁂 𑀦 𑀮𑀺𑀫𑁆𑀧𑀢𑀺. 𑀤𑀺𑀝𑁆𑀞𑁂 𑀅𑀦𑀽𑀧𑀬𑁄 [𑀅𑀦𑀼𑀧𑀬𑁄 (𑀲𑁆𑀬𑀸.), 𑀅𑀦𑀼𑀲𑀬𑁄 (𑀓.) 𑀫𑀳𑀸𑀦𑀺. 𑁯𑁦] 𑀅𑀦𑀧𑀸𑀬𑁄 𑀅𑀦𑀺𑀲𑁆𑀲𑀺𑀢𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺. 𑀲𑀼𑀢𑁂…𑀧𑁂… 𑀫𑀼𑀢𑁂 … 𑀯𑀺𑀜𑁆𑀜𑀸𑀢𑁂 𑀅𑀦𑀽𑀧𑀬𑁄 [𑀅𑀦𑀼𑀧𑀬𑁄 (𑀲𑁆𑀬𑀸.), 𑀅𑀦𑀼𑀲𑀬𑁄 (𑀓.) 𑀫𑀳𑀸𑀦𑀺. 𑁯𑁦] 𑀅𑀦𑀧𑀸𑀬𑁄 𑀅𑀦𑀺𑀲𑁆𑀲𑀺𑀢𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺.

𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀘𑀓𑁆𑀔𑀼, 𑀧𑀲𑁆𑀲𑀢𑀺 𑀪𑀕𑀯𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀲𑁄𑀢𑀁, 𑀲𑀼𑀡𑀸𑀢𑀺 𑀪𑀕𑀯𑀸 𑀲𑁄𑀢𑁂𑀦 𑀲𑀤𑁆𑀤𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀖𑀸𑀦𑀁, 𑀖𑀸𑀬𑀢𑀺 𑀪𑀕𑀯𑀸 𑀖𑀸𑀦𑁂𑀦 𑀕𑀦𑁆𑀥𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀚𑀺𑀯𑁆𑀳𑀸, 𑀲𑀸𑀬𑀢𑀺 𑀪𑀕𑀯𑀸 𑀚𑀺𑀯𑁆𑀳𑀸𑀬 𑀭𑀲𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀓𑀸𑀬𑁄, 𑀨𑀼𑀲𑀢𑀺 𑀪𑀕𑀯𑀸 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀪𑀕𑀯𑀢𑁄 𑀫𑀦𑁄, 𑀯𑀺𑀚𑀸𑀦𑀸𑀢𑀺 𑀪𑀕𑀯𑀸 𑀫𑀦𑀲𑀸 𑀥𑀫𑁆𑀫𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸.

𑀘𑀓𑁆𑀔𑀼 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢𑀁, 𑀢𑀁 𑀪𑀕𑀯𑀢𑁄 [𑀪𑀕𑀯𑀢𑀸 (𑀲𑁆𑀬𑀸.) 𑀫𑀳𑀸𑀦𑀺. 𑁯𑁦] 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀭𑀓𑁆𑀔𑀺𑀢𑀁 𑀲𑀁𑀯𑀼𑀢𑀁; 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑁄𑀢𑀁 𑀲𑀤𑁆𑀤𑀸𑀭𑀸𑀫𑀁 𑀲𑀤𑁆𑀤𑀭𑀢𑀁…𑀧𑁂… 𑀖𑀸𑀦𑀁 𑀕𑀦𑁆𑀥𑀸𑀭𑀸𑀫𑀁 𑀕𑀦𑁆𑀥𑀭𑀢𑀁… 𑀚𑀺𑀯𑁆𑀳𑀸 𑀭𑀲𑀸𑀭𑀸𑀫𑀸 𑀭𑀲𑀭𑀢𑀸 𑀭𑀲𑀲𑀫𑁆𑀫𑀼𑀤𑀺𑀢𑀸, 𑀲𑀸 𑀪𑀕𑀯𑀢𑁄 𑀤𑀦𑁆𑀢𑀸 𑀕𑀼𑀢𑁆𑀢𑀸 𑀭𑀓𑁆𑀔𑀺𑀢𑀸 𑀲𑀁𑀯𑀼𑀢𑀸; 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀓𑀸𑀬𑁄 𑀨𑁄𑀝𑁆𑀞𑀩𑁆𑀩𑀸𑀭𑀸𑀫𑁄 𑀨𑁄𑀝𑁆𑀞𑀩𑁆𑀩𑀭𑀢𑁄 𑀨𑁄𑀝𑁆𑀞𑀩𑁆𑀩𑀲𑀫𑁆𑀫𑀼𑀤𑀺𑀢𑁄… 𑀫𑀦𑁄 𑀥𑀫𑁆𑀫𑀸𑀭𑀸𑀫𑁄 𑀥𑀫𑁆𑀫𑀭𑀢𑁄 𑀥𑀫𑁆𑀫𑀲𑀫𑁆𑀫𑀼𑀤𑀺𑀢𑁄, 𑀲𑁄 𑀪𑀕𑀯𑀢𑁄 𑀤𑀦𑁆𑀢𑁄 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄 𑀲𑀁𑀯𑀼𑀢𑁄; 𑀢𑀲𑁆𑀲 𑀘 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋

‘‘𑀤𑀦𑁆𑀢𑀁 𑀦𑀬𑀦𑁆𑀢𑀺 𑀲𑀫𑀺𑀢𑀺𑀁, 𑀤𑀦𑁆𑀢𑀁 𑀭𑀸𑀚𑀸𑀪𑀺𑀭𑀽𑀳𑀢𑀺;

𑀤𑀦𑁆𑀢𑁄 𑀲𑁂𑀝𑁆𑀞𑁄 𑀫𑀦𑀼𑀲𑁆𑀲𑁂𑀲𑀼, 𑀬𑁄𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀢𑀺.

‘‘𑀯𑀭𑀫𑀲𑁆𑀲𑀢𑀭𑀸 𑀤𑀦𑁆𑀢𑀸, 𑀆𑀚𑀸𑀦𑀻𑀬𑀸 𑀘 [𑀆𑀚𑀸𑀦𑀺𑀬𑀸𑀯 (𑀲𑁆𑀬𑀸.) 𑀥. 𑀧. 𑁩𑁨𑁨] 𑀲𑀺𑀦𑁆𑀥𑀯𑀸;

𑀓𑀼𑀜𑁆𑀚𑀭𑀸 𑀘 [𑀓𑀼𑀜𑁆𑀚𑀭𑀸𑀯 (𑀲𑁆𑀬𑀸.)] 𑀫𑀳𑀸𑀦𑀸𑀕𑀸, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭𑀁.

‘‘𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺, 𑀕𑀘𑁆𑀙𑁂𑀬𑁆𑀬 𑀅𑀕𑀢𑀁 𑀤𑀺𑀲𑀁;

𑀬𑀣𑀸𑀢𑁆𑀢𑀦𑀸 𑀲𑀼𑀤𑀦𑁆𑀢𑁂𑀦, 𑀤𑀦𑁆𑀢𑁄 𑀤𑀦𑁆𑀢𑁂𑀦 𑀕𑀘𑁆𑀙𑀢𑀺.

‘‘𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀦𑁆𑀢𑀺, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀼𑀦𑀩𑁆𑀪𑀯𑀸;

𑀤𑀦𑁆𑀢𑀪𑀽𑀫𑀺𑀁 𑀅𑀦𑀼𑀧𑁆𑀧𑀢𑁆𑀢𑀸, 𑀢𑁂 𑀮𑁄𑀓𑁂 𑀯𑀺𑀚𑀺𑀢𑀸𑀯𑀺𑀦𑁄.

‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺, 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀦𑀺𑀩𑁆𑀩𑀺𑀚𑁆𑀛 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁, 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲 𑀤𑀦𑁆𑀢𑁄’’𑀢𑀺 [𑀲𑀼𑀤𑀦𑁆𑀢𑁄𑀢𑀺 (𑀲𑁆𑀬𑀸.) 𑀲𑀼. 𑀦𑀺. 𑁫𑁨𑁧; 𑀫𑀳𑀸𑀦𑀺. 𑁯𑁦].

𑀏𑀯𑀁 𑀪𑀕𑀯𑀸 𑀪𑀸𑀯𑀺𑀢𑀢𑁆𑀢𑁄𑀢𑀺.

𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀽 𑀪𑀸𑀯𑀺𑀢𑀢𑁆𑀢𑀁, 𑀓𑀼𑀢𑁄 𑀦𑀼 𑀤𑀼𑀓𑁆𑀔𑀸 𑀲𑀫𑀼𑀤𑀸𑀕𑀢𑀸 𑀇𑀫𑁂𑀢𑀺. 𑀓𑀼𑀢𑁄 𑀦𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀓𑀼𑀢𑁄 𑀦𑀼. 𑀤𑀼𑀓𑁆𑀔𑀸𑀢𑀺 𑀚𑀸𑀢𑀺𑀤𑀼𑀓𑁆𑀔𑀁, 𑀚𑀭𑀸𑀤𑀼𑀓𑁆𑀔𑀁, 𑀩𑁆𑀬𑀸𑀥𑀺𑀤𑀼𑀓𑁆𑀔𑀁, 𑀫𑀭𑀡𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁, 𑀩𑁆𑀬𑀲𑀦𑀁 𑀤𑀼𑀓𑁆𑀔𑀁, 𑀦𑁂𑀭𑀬𑀺𑀓𑀁 𑀤𑀼𑀓𑁆𑀔𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀁 𑀤𑀼𑀓𑁆𑀔𑀁, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀁 𑀤𑀼𑀓𑁆𑀔𑀁, 𑀫𑀸𑀦𑀼𑀲𑀺𑀓𑀁 𑀤𑀼𑀓𑁆𑀔𑀁, 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑀁 𑀤𑀼𑀓𑁆𑀔𑀁, 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑀁 𑀤𑀼𑀓𑁆𑀔𑀁, 𑀅𑀢𑁆𑀢𑀽𑀧𑀓𑁆𑀓𑀫𑀁 𑀤𑀼𑀓𑁆𑀔𑀁, 𑀧𑀭𑀽𑀧𑀓𑁆𑀓𑀫𑀁 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀤𑀼𑀓𑁆𑀔𑀁, 𑀲𑀗𑁆𑀔𑀸𑀭𑀤𑀼𑀓𑁆𑀔𑀁, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀁, 𑀫𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁, 𑀧𑀺𑀢𑀼𑀫𑀭𑀡𑀁 𑀤𑀼𑀓𑁆𑀔𑀁, 𑀪𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁, 𑀪𑀕𑀺𑀦𑀺𑀫𑀭𑀡𑀁 𑀤𑀼𑀓𑁆𑀔𑀁, 𑀧𑀼𑀢𑁆𑀢𑀫𑀭𑀡𑀁 𑀤𑀼𑀓𑁆𑀔𑀁, 𑀥𑀻𑀢𑀼𑀫𑀭𑀡𑀁 𑀤𑀼𑀓𑁆𑀔𑀁, 𑀜𑀸𑀢𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁, 𑀭𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁, 𑀪𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁, 𑀲𑀻𑀮𑀩𑁆𑀬𑀲𑀦𑀁 𑀤𑀼𑀓𑁆𑀔𑀁, 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁; 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀤𑀺𑀢𑁄 𑀲𑀫𑀼𑀤𑀸𑀕𑀫𑀦𑀁 𑀧𑀜𑁆𑀜𑀸𑀬𑀢𑀺, 𑀅𑀢𑁆𑀣𑀗𑁆𑀕𑀫𑀢𑁄 𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀺, 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄, 𑀯𑀺𑀧𑀸𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀁, 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀁, 𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁, 𑀚𑀭𑀸𑀬 𑀅𑀦𑀼𑀲𑀝𑀁, 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁, 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁, 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁, 𑀅𑀢𑀸𑀡𑀁 𑀅𑀮𑁂𑀡𑀁 𑀅𑀲𑀭𑀡𑀁 𑀅𑀲𑀭𑀡𑀻𑀪𑀽𑀢𑀁 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀸. 𑀇𑀫𑁂 𑀤𑀼𑀓𑁆𑀔𑀸 𑀓𑀼𑀢𑁄 𑀲𑀫𑀼𑀤𑀸𑀕𑀢𑀸 𑀓𑀼𑀢𑁄 𑀚𑀸𑀢𑀸 𑀓𑀼𑀢𑁄 𑀲𑀜𑁆𑀚𑀸𑀢𑀸 𑀓𑀼𑀢𑁄 𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀓𑀼𑀢𑁄 𑀧𑀸𑀢𑀼𑀪𑀽𑀢𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀲𑀫𑀼𑀤𑀬𑀸 𑀓𑀺𑀁𑀚𑀸𑀢𑀺𑀓𑀸 𑀓𑀺𑀁𑀧𑀪𑀯𑀸𑀢𑀺, 𑀇𑀫𑁂𑀲𑀁 𑀤𑀼𑀓𑁆𑀔𑀸𑀦𑀁 𑀫𑀽𑀮𑀁 𑀧𑀼𑀘𑁆𑀙𑀢𑀺 𑀳𑁂𑀢𑀼𑀁 𑀧𑀼𑀘𑁆𑀙𑀢𑀺 𑀦𑀺𑀤𑀸𑀦𑀁 𑀧𑀼𑀘𑁆𑀙𑀢𑀺 𑀲𑀫𑁆𑀪𑀯𑀁 𑀧𑀼𑀘𑁆𑀙𑀢𑀺 𑀧𑀪𑀯𑀁 𑀧𑀼𑀘𑁆𑀙𑀢𑀺 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 𑀆𑀳𑀸𑀭𑀁 𑀧𑀼𑀘𑁆𑀙𑀢𑀺 𑀆𑀭𑀫𑁆𑀫𑀡𑀁 𑀧𑀼𑀘𑁆𑀙𑀢𑀺 𑀧𑀘𑁆𑀘𑀬𑀁 𑀧𑀼𑀘𑁆𑀙𑀢𑀺 𑀲𑀫𑀼𑀤𑀬𑀁 𑀧𑀼𑀘𑁆𑀙𑀢𑀺 𑀧𑀧𑀼𑀘𑁆𑀙𑀢𑀺 𑀬𑀸𑀘𑀢𑀺 𑀅𑀚𑁆𑀛𑁂𑀲𑀢𑀺 𑀧𑀲𑀸𑀤𑁂𑀢𑀻𑀢𑀺 𑁋 𑀓𑀼𑀢𑁄 𑀦𑀼 𑀤𑀼𑀓𑁆𑀔𑀸 𑀲𑀫𑀼𑀤𑀸𑀕𑀢𑀸 𑀇𑀫𑁂.

𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀅𑀦𑁂𑀓𑀭𑀽𑀧𑀸𑀢𑀺 𑀅𑀦𑁂𑀓𑀯𑀺𑀥𑀸 𑀦𑀸𑀦𑀸𑀧𑁆𑀧𑀓𑀸𑀭𑀸 𑀤𑀼𑀓𑁆𑀔𑀸𑀢𑀺 𑁋 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀫𑁂𑀢𑁆𑀢𑀕𑀽]

𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀽 𑀪𑀸𑀯𑀺𑀢𑀢𑁆𑀢𑀁;

𑀓𑀼𑀢𑁄 𑀦𑀼 𑀤𑀼𑀓𑁆𑀔𑀸 𑀲𑀫𑀼𑀤𑀸𑀕𑀢𑀸 𑀇𑀫𑁂, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸’’𑀢𑀺.

𑁧𑁯.

𑀤𑀼𑀓𑁆𑀔𑀲𑁆𑀲 𑀯𑁂 𑀫𑀁 𑀧𑀪𑀯𑀁 𑀅𑀧𑀼𑀘𑁆𑀙𑀲𑀺, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁;

𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸.

𑀤𑀼𑀓𑁆𑀔𑀲𑁆𑀲 𑀯𑁂 𑀫𑀁 𑀧𑀪𑀯𑀁 𑀅𑀧𑀼𑀘𑁆𑀙𑀲𑀻𑀢𑀺. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀚𑀸𑀢𑀺𑀤𑀼𑀓𑁆𑀔𑀲𑁆𑀲 𑀚𑀭𑀸𑀤𑀼𑀓𑁆𑀔𑀲𑁆𑀲 𑀩𑁆𑀬𑀸𑀥𑀺𑀤𑀼𑀓𑁆𑀔𑀲𑁆𑀲 𑀫𑀭𑀡𑀤𑀼𑀓𑁆𑀔𑀲𑁆𑀲 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀲𑁆𑀲. 𑀧𑀪𑀯𑀁 𑀅𑀧𑀼𑀘𑁆𑀙𑀲𑀻𑀢𑀺 𑀤𑀼𑀓𑁆𑀔𑀲𑁆𑀲 𑀫𑀽𑀮𑀁 𑀧𑀼𑀘𑁆𑀙𑀲𑀺 𑀳𑁂𑀢𑀼𑀁 𑀧𑀼𑀘𑁆𑀙𑀲𑀺 𑀦𑀺𑀤𑀸𑀦𑀁 𑀧𑀼𑀘𑁆𑀙𑀲𑀺 𑀲𑀫𑁆𑀪𑀯𑀁 𑀧𑀼𑀘𑁆𑀙𑀲𑀺 𑀧𑀪𑀯𑀁 𑀧𑀼𑀘𑁆𑀙𑀲𑀺 𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀲𑀺 𑀆𑀳𑀸𑀭𑀁 𑀧𑀼𑀘𑁆𑀙𑀲𑀺 𑀆𑀭𑀫𑁆𑀫𑀡𑀁 𑀧𑀼𑀘𑁆𑀙𑀲𑀺 𑀧𑀘𑁆𑀘𑀬𑀁 𑀧𑀼𑀘𑁆𑀙𑀲𑀺 𑀲𑀫𑀼𑀤𑀬𑀁 𑀧𑀼𑀘𑁆𑀙𑀲𑀺 𑀬𑀸𑀘𑀲𑀺 𑀅𑀚𑁆𑀛𑁂𑀲𑀲𑀺 𑀧𑀲𑀸𑀤𑁂𑀲𑀻𑀢𑀺 𑁋 𑀤𑀼𑀓𑁆𑀔𑀲𑁆𑀲 𑀯𑁂 𑀫𑀁 𑀧𑀪𑀯𑀁 𑀅𑀧𑀼𑀘𑁆𑀙𑀲𑀺. 𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸.

𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀦𑁆𑀢𑀺. 𑀢𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀫𑀽𑀮𑀁 𑀧𑀯𑀓𑁆𑀔𑀸𑀫𑀺 𑀳𑁂𑀢𑀼𑀁 𑀧𑀯𑀓𑁆𑀔𑀸𑀫𑀺 𑀦𑀺𑀤𑀸𑀦𑀁 𑀧𑀯𑀓𑁆𑀔𑀸𑀫𑀺 𑀲𑀫𑁆𑀪𑀯𑀁 𑀧𑀯𑀓𑁆𑀔𑀸𑀫𑀺 𑀧𑀪𑀯𑀁 𑀧𑀯𑀓𑁆𑀔𑀸𑀫𑀺 𑀲𑀫𑀼𑀝𑁆𑀞𑀸𑀦𑀁 𑀧𑀯𑀓𑁆𑀔𑀸𑀫𑀺 𑀆𑀳𑀸𑀭𑀁 𑀧𑀯𑀓𑁆𑀔𑀸𑀫𑀺 𑀆𑀭𑀫𑁆𑀫𑀡𑀁 𑀧𑀯𑀓𑁆𑀔𑀸𑀫𑀺 𑀧𑀘𑁆𑀘𑀬𑀁 𑀧𑀯𑀓𑁆𑀔𑀸𑀫𑀺 𑀲𑀫𑀼𑀤𑀬𑀁 𑀧𑀯𑀓𑁆𑀔𑀸𑀫𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑁂𑀲𑁆𑀲𑀸𑀫𑀻𑀢𑀺 𑁋 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺. 𑀬𑀣𑀸 𑀧𑀚𑀸𑀦𑀦𑁆𑀢𑀺 𑀬𑀣𑀸 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀦 𑀇𑀢𑀺𑀳𑀻𑀢𑀺𑀳𑀁 𑀦 𑀇𑀢𑀺𑀓𑀺𑀭𑀸𑀬 𑀦 𑀧𑀭𑀫𑁆𑀧𑀭𑀸𑀬 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬 [𑀦 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦 (𑀓.) 𑀫𑀳𑀸𑀦𑀺. 𑁧𑁫𑁬] 𑀦 𑀢𑀓𑁆𑀓𑀳𑁂𑀢𑀼 𑀦 𑀦𑀬𑀳𑁂𑀢𑀼 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁 𑀢𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑁋 𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁.

𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸𑀢𑀺. 𑀉𑀧𑀥𑀻𑀢𑀺 𑀤𑀲 𑀉𑀧𑀥𑀻 𑁋 𑀢𑀡𑁆𑀳𑀽𑀧𑀥𑀺, 𑀤𑀺𑀝𑁆𑀞𑀽𑀧𑀥𑀺, 𑀓𑀺𑀮𑁂𑀲𑀽𑀧𑀥𑀺, 𑀓𑀫𑁆𑀫𑀽𑀧𑀥𑀺, 𑀤𑀼𑀘𑁆𑀘𑀭𑀺𑀢𑀽𑀧𑀥𑀺, 𑀆𑀳𑀸𑀭𑀽𑀧𑀥𑀺, 𑀧𑀝𑀺𑀖𑀽𑀧𑀥𑀺, 𑀘𑀢𑀲𑁆𑀲𑁄 𑀉𑀧𑀸𑀤𑀺𑀦𑁆𑀦𑀥𑀸𑀢𑀼𑀬𑁄 𑀉𑀧𑀥𑀻, 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀉𑀧𑀥𑀻, 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀉𑀧𑀥𑀻, 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀤𑀼𑀓𑁆𑀔𑀫𑀦𑀝𑁆𑀞𑁂𑀦 [𑀤𑀼𑀓𑁆𑀔𑀝𑁆𑀞𑁂𑀦 (𑀲𑁆𑀬𑀸.)] 𑀉𑀧𑀥𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀤𑀲 𑀉𑀧𑀥𑀻. 𑀤𑀼𑀓𑁆𑀔𑀸𑀢𑀺 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀦𑁂𑀭𑀬𑀺𑀓𑀁 𑀤𑀼𑀓𑁆𑀔𑀁…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁. 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀤𑀺𑀢𑁄 𑀲𑀫𑀼𑀤𑀸𑀕𑀫𑀦𑀁 𑀧𑀜𑁆𑀜𑀸𑀬𑀢𑀺, 𑀅𑀢𑁆𑀣𑀗𑁆𑀕𑀫𑀢𑁄 𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀺, 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄, 𑀯𑀺𑀧𑀸𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀁, 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀁, 𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁, 𑀚𑀭𑀸𑀬 𑀅𑀦𑀼𑀲𑀝𑀁, 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁, 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁, 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁, 𑀅𑀢𑀸𑀡𑀁 𑀅𑀮𑁂𑀡𑀁 𑀅𑀲𑀭𑀡𑀁 𑀅𑀲𑀭𑀡𑀻𑀪𑀽𑀢𑀁 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀸. 𑀇𑀫𑁂 𑀤𑀼𑀓𑁆𑀔𑀸 𑀉𑀧𑀥𑀺𑀦𑀺𑀤𑀸𑀦𑀸 𑀉𑀧𑀥𑀺𑀳𑁂𑀢𑀼𑀓𑀸 𑀉𑀧𑀥𑀺𑀧𑀘𑁆𑀘𑀬𑀸 𑀉𑀧𑀥𑀺𑀓𑀸𑀭𑀡𑀸 𑀳𑁄𑀦𑁆𑀢𑀺 𑀧𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑁋 𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸.

𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀅𑀦𑁂𑀓𑀭𑀽𑀧𑀸𑀢𑀺 𑀅𑀦𑁂𑀓𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑀸 𑀤𑀼𑀓𑁆𑀔𑀸𑀢𑀺 𑁋 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀼𑀓𑁆𑀔𑀲𑁆𑀲 𑀯𑁂 𑀫𑀁 𑀧𑀪𑀯𑀁 𑀅𑀧𑀼𑀘𑁆𑀙𑀲𑀺, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁;

𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸’’𑀢𑀺.

𑁨𑁦.

𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄;

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸, 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻.

𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀻𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁𑀞𑀸𑀦𑀧𑁆𑀧𑀢𑁆𑀢𑁄 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀅𑀯𑀺𑀤𑁆𑀯𑀸𑀢𑀺 𑀅𑀯𑀺𑀚𑁆𑀚𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀯𑀺𑀪𑀸𑀯𑀻 𑀤𑀼𑀧𑁆𑀧𑀜𑁆𑀜𑁄. 𑀉𑀧𑀥𑀺𑀁 𑀓𑀭𑁄𑀢𑀻𑀢𑀺 𑀢𑀡𑁆𑀳𑀽𑀧𑀥𑀺𑀁 𑀓𑀭𑁄𑀢𑀺, 𑀤𑀺𑀝𑁆𑀞𑀽𑀧𑀥𑀺𑀁 𑀓𑀭𑁄𑀢𑀺, 𑀓𑀺𑀮𑁂𑀲𑀽𑀧𑀥𑀺𑀁 𑀓𑀭𑁄𑀢𑀺, 𑀓𑀫𑁆𑀫𑀽𑀧𑀥𑀺𑀁 𑀓𑀭𑁄𑀢𑀺, 𑀤𑀼𑀘𑁆𑀘𑀭𑀺𑀢𑀽𑀧𑀥𑀺𑀁 𑀓𑀭𑁄𑀢𑀺, 𑀆𑀳𑀸𑀭𑀽𑀧𑀥𑀺𑀁 𑀓𑀭𑁄𑀢𑀺, 𑀧𑀝𑀺𑀖𑀽𑀧𑀥𑀺𑀁 𑀓𑀭𑁄𑀢𑀺, 𑀘𑀢𑀲𑁆𑀲𑁄 𑀉𑀧𑀸𑀤𑀺𑀦𑁆𑀦𑀥𑀸𑀢𑀼𑀬𑁄 𑀉𑀧𑀥𑀻 𑀓𑀭𑁄𑀢𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀉𑀧𑀥𑀻 𑀓𑀭𑁄𑀢𑀺, 𑀙 𑀯𑀺𑀜𑁆𑀜𑀸𑀡𑀓𑀸𑀬𑁂 𑀉𑀧𑀥𑀻 𑀓𑀭𑁄𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺.

𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀏𑀢𑀺 𑀲𑀫𑀼𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑁋 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺. 𑀫𑀦𑁆𑀤𑁄𑀢𑀺 𑀫𑀦𑁆𑀤𑁄 𑀫𑁄𑀫𑀼𑀳𑁄 𑀅𑀯𑀺𑀤𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀯𑀺𑀪𑀸𑀯𑀻 𑀤𑀼𑀧𑁆𑀧𑀜𑁆𑀜𑁄𑀢𑀺 𑁋 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄.

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀉𑀧𑀥𑀻𑀲𑀽𑀢𑀺 𑀢𑀲𑁆𑀫𑀸. 𑀧𑀚𑀸𑀦𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀉𑀧𑀥𑀺𑀁 𑀦 𑀓𑀬𑀺𑀭𑀸𑀢𑀺 𑀢𑀡𑁆𑀳𑀽𑀧𑀥𑀺𑀁 𑀦 𑀓𑀭𑁂𑀬𑁆𑀬, 𑀤𑀺𑀝𑁆𑀞𑀽𑀧𑀥𑀺𑀁 𑀦 𑀓𑀭𑁂𑀬𑁆𑀬, 𑀓𑀺𑀮𑁂𑀲𑀽𑀧𑀥𑀺𑀁 𑀦 𑀓𑀭𑁂𑀬𑁆𑀬, 𑀤𑀼𑀘𑁆𑀘𑀭𑀺𑀢𑀽𑀧𑀥𑀺𑀁 𑀦 𑀓𑀭𑁂𑀬𑁆𑀬, 𑀆𑀳𑀸𑀭𑀽𑀧𑀥𑀺𑀁 𑀦 𑀓𑀭𑁂𑀬𑁆𑀬, 𑀧𑀝𑀺𑀖𑀽𑀧𑀥𑀺𑀁 𑀦 𑀓𑀭𑁂𑀬𑁆𑀬, 𑀘𑀢𑀲𑁆𑀲𑁄 𑀉𑀧𑀸𑀤𑀺𑀦𑁆𑀦𑀥𑀸𑀢𑀼𑀬𑁄 𑀉𑀧𑀥𑀻 𑀦 𑀓𑀭𑁂𑀬𑁆𑀬, 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀉𑀧𑀥𑀻 𑀦 𑀓𑀭𑁂𑀬𑁆𑀬, 𑀙 𑀯𑀺𑀜𑁆𑀜𑀸𑀡𑀓𑀸𑀬𑁂 𑀉𑀧𑀥𑀻 𑀦 𑀓𑀭𑁂𑀬𑁆𑀬, 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸.

𑀤𑀼𑀓𑁆𑀔𑀲𑁆𑀲𑀸𑀢𑀺 𑀚𑀸𑀢𑀺𑀤𑀼𑀓𑁆𑀔𑀲𑁆𑀲 𑀚𑀭𑀸𑀤𑀼𑀓𑁆𑀔𑀲𑁆𑀲 𑀩𑁆𑀬𑀸𑀥𑀺𑀤𑀼𑀓𑁆𑀔𑀲𑁆𑀲 𑀫𑀭𑀡𑀤𑀼𑀓𑁆𑀔𑀲𑁆𑀲 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀲𑁆𑀲. 𑀧𑀪𑀯𑀸𑀦𑀼𑀧𑀲𑁆𑀲𑀻𑀢𑀺 𑀤𑀼𑀓𑁆𑀔𑀲𑁆𑀲 𑀫𑀽𑀮𑀸𑀦𑀼𑀧𑀲𑁆𑀲𑀻 𑀳𑁂𑀢𑀸𑀦𑀼𑀧𑀲𑁆𑀲𑀻 𑀦𑀺𑀤𑀸𑀦𑀸𑀦𑀼𑀧𑀲𑁆𑀲𑀻 𑀲𑀫𑁆𑀪𑀯𑀸𑀦𑀼𑀧𑀲𑁆𑀲𑀻 𑀧𑀪𑀯𑀸𑀦𑀼𑀧𑀲𑁆𑀲𑀻 𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀻 𑀆𑀳𑀸𑀭𑀸𑀦𑀼𑀧𑀲𑁆𑀲𑀻 𑀆𑀭𑀫𑁆𑀫𑀡𑀸𑀦𑀼𑀧𑀲𑁆𑀲𑀻 𑀧𑀘𑁆𑀘𑀬𑀸𑀦𑀼𑀧𑀲𑁆𑀲𑀻 𑀲𑀫𑀼𑀤𑀬𑀸𑀦𑀼𑀧𑀲𑁆𑀲𑀻. 𑀅𑀦𑀼𑀧𑀲𑁆𑀲𑀦𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀇𑀫𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀬 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀼𑀧𑀲𑁆𑀲𑀻𑀢𑀺 𑁋 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄;

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸, 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻’’𑀢𑀺.

𑁨𑁧.

𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘;

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄𑀢𑀺 𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀬𑀸𑀘𑀺𑀫𑁆𑀳 𑀅𑀚𑁆𑀛𑁂𑀲𑀺𑀫𑁆𑀳 𑀧𑀲𑀸𑀤𑀬𑀺𑀫𑁆𑀳. 𑀅𑀓𑀺𑀢𑁆𑀢𑀬𑀻 𑀦𑁄𑀢𑀺 𑀓𑀺𑀢𑁆𑀢𑀺𑀢𑀁 [𑀅𑀓𑀺𑀢𑁆𑀢𑀺 𑀢𑀁 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀧𑀤𑁂𑀲𑀼 𑀅𑀢𑀻𑀢𑀯𑀺𑀪𑀢𑁆𑀢𑀺𑀯𑀲𑁂𑀦 𑀫𑀳𑀸𑀦𑀺. 𑁧𑁧𑁦] 𑀧𑀓𑀺𑀢𑁆𑀢𑀺𑀢𑀁 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀧𑀺𑀢𑀁 [𑀧𑀜𑁆𑀜𑀸𑀧𑀺𑀢𑀁 (𑀓.)] 𑀧𑀝𑁆𑀞𑀧𑀺𑀢𑀁 𑀯𑀺𑀯𑀭𑀺𑀢𑀁 𑀯𑀺𑀪𑀢𑁆𑀢𑀁 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑁋 𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄.

𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻𑀢𑀺 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫, 𑀅𑀜𑁆𑀜𑀁 𑀢𑀁 𑀬𑀸𑀘𑀸𑀫, 𑀅𑀜𑁆𑀜𑀁 𑀢𑀁 𑀅𑀚𑁆𑀛𑁂𑀲𑀸𑀫, 𑀅𑀜𑁆𑀜𑀁 𑀢𑀁 𑀧𑀲𑀸𑀤𑁂𑀫, 𑀉𑀢𑁆𑀢𑀭𑀺 𑀢𑀁 𑀧𑀼𑀘𑁆𑀙𑀸𑀫. 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻𑀢𑀺 𑀇𑀗𑁆𑀖 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺.

𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘𑀸𑀢𑀺. 𑀓𑀣𑀁 𑀦𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸 𑁋 ‘‘𑀏𑀯𑀁 𑀦𑀼 𑀔𑁄, 𑀦𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀓𑀣𑀁 𑀦𑀼. 𑀥𑀻𑀭𑀸𑀢𑀺 𑀥𑀻𑀭𑀸 𑀧𑀡𑁆𑀟𑀺𑀢𑀸 𑀧𑀜𑁆𑀜𑀯𑀦𑁆𑀢𑁄 𑀩𑀼𑀤𑁆𑀥𑀺𑀫𑀦𑁆𑀢𑁄 𑀜𑀸𑀡𑀺𑀦𑁄 𑀯𑀺𑀪𑀸𑀯𑀺𑀦𑁄 𑀫𑁂𑀥𑀸𑀯𑀺𑀦𑁄. 𑀑𑀖𑀦𑁆𑀢𑀺 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁. 𑀚𑀸𑀢𑀻𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄. 𑀚𑀭𑀸𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄. 𑀲𑁄𑀓𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄 𑀅𑀦𑁆𑀢𑁄𑀟𑀸𑀳𑁄 𑀅𑀦𑁆𑀢𑁄𑀧𑀭𑀺𑀟𑀸𑀳𑁄 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸 𑀤𑁄𑀫𑀦𑀲𑁆𑀲𑀁 𑀲𑁄𑀓𑀲𑀮𑁆𑀮𑀁. 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑁄 [𑀮𑀸𑀧𑁄 𑀧𑀮𑀸𑀧𑁄 (𑀲𑁆𑀬𑀸.) 𑀥𑀫𑁆𑀫𑀲𑀗𑁆𑀕𑀡𑀺𑀬𑁂] 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀦𑀸 𑀮𑀸𑀮𑀧𑁆𑀧𑀺𑀢𑀢𑁆𑀢𑀁 [𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁 (𑀩𑀳𑀽𑀲𑀼) 𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸].

𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘𑀸𑀢𑀺 𑀥𑀻𑀭𑀸 𑀓𑀣𑀁 𑀑𑀖𑀜𑁆𑀘 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀲𑁄𑀓𑀜𑁆𑀘 𑀧𑀭𑀺𑀤𑁂𑀯𑀜𑁆𑀘 𑀢𑀭𑀦𑁆𑀢𑀺 𑀉𑀢𑁆𑀢𑀭𑀦𑁆𑀢𑀺 𑀧𑀢𑀭𑀦𑁆𑀢𑀺 𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑁋 𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘.

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺. 𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀺 𑀫𑁄𑀦𑀧𑁆𑀧𑀢𑁆𑀢𑁄. 𑀢𑀻𑀡𑀺 𑀫𑁄𑀦𑁂𑀬𑁆𑀬𑀸𑀦𑀺 𑁋 𑀓𑀸𑀬𑀫𑁄𑀦𑁂𑀬𑁆𑀬𑀁 𑀯𑀘𑀻𑀫𑁄𑀦𑁂𑀬𑁆𑀬𑀁 𑀫𑀦𑁄𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 𑀓𑀸𑀬𑀫𑁄𑀦𑁂𑀬𑁆𑀬𑀁? 𑀢𑀺𑀯𑀺𑀥𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀓𑀸𑀬𑀸𑀭𑀫𑁆𑀫𑀡𑁂 𑀜𑀸𑀡𑀁 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀓𑀸𑀬𑀧𑀭𑀺𑀜𑁆𑀜𑀸 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀓𑀸𑀬𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀓𑀸𑀬𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀇𑀤𑀁 𑀓𑀸𑀬𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 𑀯𑀘𑀻𑀫𑁄𑀦𑁂𑀬𑁆𑀬𑀁? 𑀘𑀢𑀼𑀩𑁆𑀩𑀺𑀥𑀸𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀯𑀸𑀘𑀸𑀭𑀫𑁆𑀫𑀡𑁂 𑀜𑀸𑀡𑀁 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀯𑀸𑀘𑀸𑀧𑀭𑀺𑀜𑁆𑀜𑀸 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀯𑀸𑀘𑀸𑀬 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀯𑀘𑀻𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀯𑀘𑀻𑀫𑁄𑀦𑁂𑀬𑁆𑀬𑀁. 𑀇𑀤𑀁 𑀯𑀘𑀻𑀫𑁄𑀦𑁂𑀬𑁆𑀬𑀁.

𑀓𑀢𑀫𑀁 𑀫𑀦𑁄𑀫𑁄𑀦𑁂𑀬𑁆𑀬𑀁? 𑀢𑀺𑀯𑀺𑀥𑀸𑀦𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀳𑀸𑀦𑀁 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀘𑀺𑀢𑁆𑀢𑀸𑀭𑀫𑁆𑀫𑀡𑁂 𑀜𑀸𑀡𑀁 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀘𑀺𑀢𑁆𑀢𑀧𑀭𑀺𑀜𑁆𑀜𑀸 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀘𑀺𑀢𑁆𑀢𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀦𑁄𑀫𑁄𑀦𑁂𑀬𑁆𑀬𑀁. 𑀇𑀤𑀁 𑀫𑀦𑁄𑀫𑁄𑀦𑁂𑀬𑁆𑀬𑀁.

𑀓𑀸𑀬𑀫𑀼𑀦𑀺𑀁 𑀯𑀘𑀻𑀫𑀼𑀦𑀺𑀁 [𑀯𑀸𑀘𑀸𑀫𑀼𑀦𑀺𑀁 (𑀩𑀳𑀽𑀲𑀼) 𑀇𑀢𑀺𑀯𑀼. 𑁬𑁭], 𑀫𑀦𑁄𑀫𑀼𑀦𑀺𑀫𑀦𑀸𑀲𑀯𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀆𑀳𑀼 𑀲𑀩𑁆𑀩𑀧𑁆𑀧𑀳𑀸𑀬𑀺𑀦𑀁.

𑀓𑀸𑀬𑀫𑀼𑀦𑀺𑀁 𑀯𑀘𑀻𑀫𑀼𑀦𑀺𑀁, 𑀫𑀦𑁄𑀫𑀼𑀦𑀺𑀫𑀦𑀸𑀲𑀯𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀆𑀳𑀼 𑀦𑀺𑀦𑁆𑀳𑀸𑀢𑀧𑀸𑀧𑀓𑀦𑁆𑀢𑀺.

𑀇𑀫𑁂𑀳𑀺 𑀢𑀻𑀳𑀺 𑀫𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀙 𑀫𑀼𑀦𑀺𑀦𑁄 [𑀫𑀼𑀦𑀬𑁄 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁪] 𑁋 𑀅𑀕𑀸𑀭𑀫𑀼𑀦𑀺𑀦𑁄, 𑀅𑀦𑀕𑀸𑀭𑀫𑀼𑀦𑀺𑀦𑁄, 𑀲𑁂𑀔𑀫𑀼𑀦𑀺𑀦𑁄 [𑀲𑁂𑀓𑁆𑀔𑀫𑀼𑀦𑀺𑀦𑁄 (𑀲𑁆𑀬𑀸. 𑀓.)], 𑀅𑀲𑁂𑀔𑀫𑀼𑀦𑀺𑀦𑁄, 𑀧𑀘𑁆𑀘𑁂𑀓𑀫𑀼𑀦𑀺𑀦𑁄 𑀫𑀼𑀦𑀺𑀫𑀼𑀦𑀺𑀦𑁄𑀢𑀺. 𑀓𑀢𑀫𑁂 𑀅𑀕𑀸𑀭𑀫𑀼𑀦𑀺𑀦𑁄? 𑀬𑁂 𑀢𑁂 𑀅𑀕𑀸𑀭𑀺𑀓𑀸 𑀤𑀺𑀝𑁆𑀞𑀧𑀤𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑁋 𑀇𑀫𑁂 𑀅𑀕𑀸𑀭𑀫𑀼𑀦𑀺𑀦𑁄. 𑀓𑀢𑀫𑁂 𑀅𑀦𑀕𑀸𑀭𑀫𑀼𑀦𑀺𑀦𑁄? 𑀬𑁂 𑀢𑁂 𑀧𑀩𑁆𑀩𑀚𑀺𑀢𑀸 𑀤𑀺𑀝𑁆𑀞𑀧𑀤𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑁋 𑀇𑀫𑁂 𑀅𑀦𑀕𑀸𑀭𑀫𑀼𑀦𑀺𑀦𑁄. 𑀲𑀢𑁆𑀢 𑀲𑁂𑀔𑀸 𑀲𑁂𑀔𑀫𑀼𑀦𑀺𑀦𑁄. 𑀅𑀭𑀳𑀦𑁆𑀢𑁄 𑀅𑀲𑁂𑀔𑀫𑀼𑀦𑀺𑀦𑁄. 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀫𑀼𑀦𑀺𑀦𑁄. 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀫𑀼𑀦𑀺𑀫𑀼𑀦𑀺𑀦𑁄.

𑀦 𑀫𑁄𑀦𑁂𑀦 𑀫𑀼𑀦𑀻 [𑀫𑀼𑀦𑀺 (𑀲𑁆𑀬𑀸. 𑀓.) 𑀥. 𑀧. 𑁨𑁬𑁮] 𑀳𑁄𑀢𑀺, 𑀫𑀽𑀴𑁆𑀳𑀭𑀽𑀧𑁄 𑀅𑀯𑀺𑀤𑁆𑀤𑀲𑀼;

𑀬𑁄 𑀘 𑀢𑀼𑀮𑀁𑀯 𑀧𑀕𑁆𑀕𑀬𑁆𑀳, 𑀯𑀭𑀫𑀸𑀤𑀸𑀬 𑀧𑀡𑁆𑀟𑀺𑀢𑁄.

𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀲 𑀫𑀼𑀦𑀻 𑀢𑁂𑀦 𑀲𑁄 𑀫𑀼𑀦𑀺;

𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀺.

𑀅𑀲𑀢𑀜𑁆𑀘 𑀲𑀢𑀜𑁆𑀘 𑀜𑀢𑁆𑀯𑀸 𑀥𑀫𑁆𑀫𑀁, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀦𑀻𑀬𑁄 [𑀧𑀽𑀚𑀺𑀢𑁄 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁪], 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 [𑀲𑀗𑁆𑀕 𑀚𑀸𑀮𑀫𑀢𑀺𑀘𑁆𑀘, 𑀲𑀼. 𑀦𑀺. 𑁫𑁩𑁨] 𑀲𑁄 𑀫𑀼𑀦𑀻𑀢𑀺.

𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺 𑀢𑀁 𑀲𑀸𑀥𑀼 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺. 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀢𑀼𑀮𑀺𑀢𑁄 𑀢𑀻𑀭𑀺𑀢𑁄 𑀯𑀺𑀪𑀽𑀢𑁄 𑀯𑀺𑀪𑀸𑀯𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑁋 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘;

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’𑀢𑀺.

𑁨𑁨.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀁, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀜𑁆𑀘, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺 𑁋 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀁. 𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺.

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀦𑁆𑀢𑀺. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁂 𑀢𑀼𑀮𑀺𑀢𑁂 𑀥𑀫𑁆𑀫𑁂 𑀢𑀻𑀭𑀺𑀢𑁂 𑀥𑀫𑁆𑀫𑁂 𑀯𑀺𑀪𑀽𑀢𑁂 𑀥𑀫𑁆𑀫𑁂 𑀯𑀺𑀪𑀸𑀯𑀺𑀢𑁂 𑀥𑀫𑁆𑀫𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺…𑀧𑁂… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁂 𑀢𑀼𑀮𑀺𑀢𑁂 𑀥𑀫𑁆𑀫𑁂 𑀢𑀻𑀭𑀺𑀢𑁂 𑀥𑀫𑁆𑀫𑁂 𑀯𑀺𑀪𑀽𑀢𑁂 𑀥𑀫𑁆𑀫𑁂 𑀯𑀺𑀪𑀸𑀯𑀺𑀢𑁂 𑀥𑀫𑁆𑀫𑁂𑀢𑀺 𑁋 𑀏𑀯𑀫𑁆𑀧𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀓𑀣𑀬𑀺𑀲𑁆𑀲𑀸𑀫𑀺. 𑀅𑀣 𑀯𑀸, 𑀤𑀼𑀓𑁆𑀔𑁂 𑀤𑀺𑀝𑁆𑀞𑁂 𑀤𑀼𑀓𑁆𑀔𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀲𑀫𑀼𑀤𑀬𑁂 𑀤𑀺𑀝𑁆𑀞𑁂 𑀲𑀫𑀼𑀤𑀬𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀫𑀕𑁆𑀕𑁂 𑀤𑀺𑀝𑁆𑀞𑁂 𑀫𑀕𑁆𑀕𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀦𑀺𑀭𑁄𑀥𑁂 𑀤𑀺𑀝𑁆𑀞𑁂 𑀦𑀺𑀭𑁄𑀥𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑁋 𑀏𑀯𑀫𑁆𑀧𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀓𑀣𑀬𑀺𑀲𑁆𑀲𑀸𑀫𑀺. 𑀅𑀣 𑀯𑀸, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂. 𑀅𑀦𑀻𑀢𑀺𑀳𑀦𑁆𑀢𑀺 𑀦 𑀇𑀢𑀺𑀳𑀻𑀢𑀺𑀳𑀁 𑀦 𑀇𑀢𑀺𑀓𑀺𑀭𑀸𑀬 𑀦 𑀧𑀭𑀫𑁆𑀧𑀭𑀸𑀬 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬 𑀦 𑀢𑀓𑁆𑀓𑀳𑁂𑀢𑀼 𑀦 𑀦𑀬𑀳𑁂𑀢𑀼 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁, 𑀢𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀓𑀼𑀮𑁂 𑀕𑀡𑁂 𑀆𑀯𑀸𑀲𑁂 𑀮𑀸𑀪𑁂 𑀬𑀲𑁂 𑀧𑀲𑀁𑀲𑀸𑀬 𑀲𑀼𑀔𑁂 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀲𑁂𑀦𑀸𑀲𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂 𑀓𑀸𑀫𑀥𑀸𑀢𑀼𑀬𑀸 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂 𑀲𑀜𑁆𑀜𑀸𑀪𑀯𑁂 𑀅𑀲𑀜𑁆𑀜𑀸𑀪𑀯𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀏𑀓𑀯𑁄𑀓𑀸𑀭𑀪𑀯𑁂 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸 [𑀬𑀸 𑀲𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸 (𑀲𑁆𑀬𑀸.) 𑀓𑀸𑀫𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸], 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀁, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁨𑁩.

𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺. 𑀢𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 [𑀩𑁆𑀬𑀧𑀣𑀁 (𑀲𑁆𑀬𑀸. 𑀓.)] 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 [𑀤𑁂𑀲𑀦𑀁 𑀅𑀦𑀼𑀲𑀦𑁆𑀥𑀺 (𑀲𑁆𑀬𑀸.)]. 𑀦𑀦𑁆𑀤𑀸𑀫𑀻𑀢𑀺 𑀅𑀪𑀺𑀦𑀦𑁆𑀤𑀸𑀫𑀺 𑀫𑁄𑀤𑀸𑀫𑀺 𑀅𑀦𑀼𑀫𑁄𑀤𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀬𑀸𑀘𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀻𑀢𑀺 𑁋 𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺.

𑀫𑀳𑁂𑀲𑀺 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺. 𑀫𑀳𑁂𑀲𑀻𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸, 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 [𑀏𑀲𑀺 𑀕𑀯𑁂𑀲𑀺 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁫𑁦] 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀦𑁆𑀢𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀫𑀳𑀦𑁆𑀢𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀢𑀫𑁄𑀓𑀸𑀬𑀲𑁆𑀲 𑀧𑀤𑀸𑀮𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀪𑁂𑀤𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀅𑀩𑁆𑀩𑀳𑀦𑀁 [𑀅𑀩𑁆𑀩𑀽𑀳𑀦𑀁 (𑀩𑀳𑀽𑀲𑀼), 𑀅𑀩𑁆𑀩𑀽𑀳𑀁 (𑀲𑀻. 𑀅𑀝𑁆𑀞.)] 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀤𑀺𑀝𑁆𑀞𑀺𑀲𑀗𑁆𑀖𑀸𑀢𑀲𑁆𑀲 𑀯𑀺𑀦𑀺𑀯𑁂𑀞𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀫𑀸𑀦𑀥𑀚𑀲𑁆𑀲 𑀧𑀧𑀸𑀢𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀽𑀧𑀲𑀫𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀪𑀸𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀸𑀧𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀧𑀭𑀺𑀴𑀸𑀳𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀢𑁄 𑀥𑀫𑁆𑀫𑀥𑀚𑀲𑁆𑀲 𑀉𑀲𑁆𑀲𑀸𑀧𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂…𑀧𑁂… 𑀫𑀳𑀦𑁆𑀢𑁂 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀫𑀳𑀦𑁆𑀢𑁂 𑀇𑀤𑁆𑀥𑀺𑀧𑀸𑀤𑁂… 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺… 𑀫𑀳𑀦𑁆𑀢𑀸𑀦𑀺 𑀩𑀮𑀸𑀦𑀺… 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂… 𑀫𑀳𑀦𑁆𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁… 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑁂𑀲𑀓𑁆𑀔𑁂𑀳𑀺 𑀲𑀢𑁆𑀢𑁂𑀳𑀺 𑀏𑀲𑀺𑀢𑁄 𑀕𑀯𑁂𑀲𑀺𑀢𑁄 𑀧𑀭𑀺𑀬𑁂𑀲𑀺𑀢𑁄 𑁋 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄, 𑀓𑀳𑀁 𑀦𑀭𑀸𑀲𑀪𑁄’’𑀢𑀺 𑀫𑀳𑁂𑀲𑀺. 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺 𑀥𑀫𑁆𑀫𑀫𑀼𑀢𑁆𑀢𑀁𑀫𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀉𑀢𑁆𑀢𑀫𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀥𑀫𑁆𑀫𑀦𑁆𑀢𑀺 𑁋 𑀫𑀳𑁂𑀲𑀺 𑀥𑀫𑁆𑀫𑀫𑀼𑀢𑁆𑀢𑀫𑀁.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼… 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁨𑁪.

𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁 𑀪𑀯𑁂 𑀦 𑀢𑀺𑀝𑁆𑀞𑁂.

𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀚𑀸𑀦𑀸𑀲𑀺 𑀆𑀚𑀸𑀦𑀸𑀲𑀺 𑀯𑀺𑀚𑀸𑀦𑀸𑀲𑀺 𑀧𑀝𑀺𑀯𑀺𑀚𑀸𑀦𑀸𑀲𑀺 𑀧𑀝𑀺𑀯𑀺𑀚𑁆𑀛𑀲𑀻𑀢𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺. 𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸.

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺. 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁 [𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀁 (𑀲𑁆𑀬𑀸. 𑀓.)]; 𑀅𑀥𑁄𑀢𑀺 𑀅𑀢𑀻𑀢𑀁; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑁄; 𑀅𑀥𑁄𑀢𑀺 𑀦𑀺𑀭𑀬𑀮𑁄𑀓𑁄; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀅𑀣 𑀯𑀸, 𑀉𑀤𑁆𑀥𑀦𑁆𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸; 𑀅𑀥𑁄𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀉𑀤𑁆𑀥𑀦𑁆𑀢𑀺 𑀅𑀭𑀽𑀧𑀥𑀸𑀢𑀼; 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀭𑀽𑀧𑀥𑀸𑀢𑀼. 𑀉𑀤𑁆𑀥𑀦𑁆𑀢𑀺 𑀲𑀼𑀔𑀸 𑀯𑁂𑀤𑀦𑀸; 𑀅𑀥𑁄𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸; 𑀅𑀥𑁄𑀢𑀺 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀯𑁂𑀫𑀚𑁆𑀛𑁂𑀢𑀺 𑁋 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂.

𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁 𑀪𑀯𑁂 𑀦 𑀢𑀺𑀝𑁆𑀞𑁂𑀢𑀺 𑀏𑀢𑁂𑀲𑀽𑀢𑀺 𑀆𑀘𑀺𑀓𑁆𑀔𑀺𑀢𑁂𑀲𑀼 𑀤𑁂𑀲𑀺𑀢𑁂𑀲𑀼 𑀧𑀜𑁆𑀜𑀧𑀺𑀢𑁂𑀲𑀼 𑀧𑀝𑁆𑀞𑀧𑀺𑀢𑁂𑀲𑀼 𑀯𑀺𑀯𑀭𑀺𑀢𑁂𑀲𑀼 𑀯𑀺𑀪𑀚𑀺𑀢𑁂𑀲𑀼 𑀉𑀢𑁆𑀢𑀸𑀦𑀻𑀓𑀢𑁂𑀲𑀼 𑀧𑀓𑀸𑀲𑀺𑀢𑁂𑀲𑀼. 𑀦𑀦𑁆𑀤𑀻 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀦𑀺𑀯𑁂𑀲𑀦𑀦𑁆𑀢𑀺 𑀤𑁆𑀯𑁂 𑀦𑀺𑀯𑁂𑀲𑀦𑀸 𑁋 𑀢𑀡𑁆𑀳𑀸𑀦𑀺𑀯𑁂𑀲𑀦𑀸 𑀘 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸 𑀘. 𑀓𑀢𑀫𑀸 𑀢𑀡𑁆𑀳𑀸 𑀦𑀺𑀯𑁂𑀲𑀦𑀸? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 …𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀯𑁂𑀲𑀦𑀸. 𑀓𑀢𑀫𑀸 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 …𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸.

𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁. 𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘 𑀅𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀜𑁆𑀘 𑀯𑀺𑀜𑁆𑀜𑀸𑀡𑀁 𑀦𑀼𑀚𑁆𑀚 𑀧𑀦𑀼𑀚𑁆𑀚 𑀦𑀼𑀤 𑀧𑀦𑀼𑀤 𑀚𑀳 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁.

𑀪𑀯𑁂 𑀦 𑀢𑀺𑀝𑁆𑀞𑁂𑀢𑀺. 𑀪𑀯𑀸𑀢𑀺 𑀤𑁆𑀯𑁂 𑀪𑀯𑀸 𑁋 𑀓𑀫𑁆𑀫𑀪𑀯𑁄 𑀘 𑀧𑀝𑀺𑀲𑀦𑁆𑀥𑀺𑀓𑁄 𑀘 𑀧𑀼𑀦𑀩𑁆𑀪𑀯𑁄. 𑀓𑀢𑀫𑁄 𑀓𑀫𑁆𑀫𑀪𑀯𑁄? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑁋 𑀅𑀬𑀁 𑀓𑀫𑁆𑀫𑀪𑀯𑁄. 𑀓𑀢𑀫𑁄 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄? 𑀧𑀝𑀺𑀲𑀦𑁆𑀥𑀺𑀓𑀸 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑁋 𑀅𑀬𑀁 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄. 𑀪𑀯𑁂 𑀦 𑀢𑀺𑀝𑁆𑀞𑁂𑀢𑀺 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘 𑀅𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀜𑁆𑀘 𑀓𑀫𑁆𑀫𑀪𑀯𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑀜𑁆𑀘 𑀧𑀼𑀦𑀩𑁆𑀪𑀯𑀁 𑀧𑀚𑀳𑀦𑁆𑀢𑁄 𑀯𑀺𑀦𑁄𑀤𑁂𑀦𑁆𑀢𑁄 𑀩𑁆𑀬𑀦𑁆𑀢𑀻𑀓𑀭𑁄𑀦𑁆𑀢𑁄 𑀅𑀦𑀪𑀸𑀯𑀁 𑀕𑀫𑁂𑀦𑁆𑀢𑁄 𑀓𑀫𑁆𑀫𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬 𑀧𑀝𑀺𑀲𑀦𑁆𑀥𑀺𑀓𑁂 𑀧𑀼𑀦𑀩𑁆𑀪𑀯𑁂 𑀦 𑀢𑀺𑀝𑁆𑀞𑁂𑀬𑁆𑀬 𑀦 𑀲𑀦𑁆𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑁋 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁 𑀪𑀯𑁂 𑀦 𑀢𑀺𑀝𑁆𑀞𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁 𑀪𑀯𑁂 𑀦 𑀢𑀺𑀝𑁆𑀞𑁂’’𑀢𑀺.

𑁨𑁫.

𑀏𑀯𑀁𑀯𑀺𑀳𑀸𑀭𑀻 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄,

𑀪𑀺𑀓𑁆𑀔𑀼 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺;

𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔𑀁.

𑀏𑀯𑀁𑀯𑀺𑀳𑀸𑀭𑀻 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄𑀢𑀺. 𑀏𑀯𑀁𑀯𑀺𑀳𑀸𑀭𑀻𑀢𑀺 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘 𑀅𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀯𑀺𑀜𑁆𑀜𑀸𑀡𑀜𑁆𑀘 𑀓𑀫𑁆𑀫𑀪𑀯𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑀜𑁆𑀘 𑀧𑀼𑀦𑀩𑁆𑀪𑀯𑀁 𑀧𑀚𑀳𑀦𑁆𑀢𑁄 𑀯𑀺𑀦𑁄𑀤𑁂𑀦𑁆𑀢𑁄 𑀩𑁆𑀬𑀦𑁆𑀢𑀻𑀓𑀭𑁄𑀦𑁆𑀢𑁄 𑀅𑀦𑀪𑀸𑀯𑀁 𑀕𑀫𑁂𑀦𑁆𑀢𑁄𑀢𑀺 𑁋 𑀏𑀯𑀁𑀯𑀺𑀳𑀸𑀭𑀻. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻 𑀲𑀸𑀢𑀘𑁆𑀘𑀓𑀸𑀭𑀻 𑀅𑀝𑁆𑀞𑀺𑀢𑀓𑀸𑀭𑀻 𑀅𑀦𑁄𑀮𑀻𑀦𑀯𑀼𑀢𑁆𑀢𑀻 [𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 (𑀓.) 𑀫𑀳𑀸𑀦𑀺. 𑁧𑁪] 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀅𑀧𑁆𑀧𑀫𑀢𑁆𑀢𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑁋 ‘‘𑀓𑀣𑀸𑀳𑀁 [𑀓𑀤𑀸𑀳𑀁 (𑀲𑁆𑀬𑀸.)] 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁, 𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 [𑀅𑀧𑁆𑀧𑀝𑀺𑀯𑀸𑀦𑀺 (𑀓.) 𑀫𑀳𑀸𑀦𑀺. 𑁧𑁪] 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀢𑁆𑀢𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀣𑀸𑀳𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀬𑁆𑀬𑀁 𑀧𑀭𑀺𑀧𑀽𑀭𑀁 𑀯𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀢𑁆𑀢𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀓𑀣𑀸𑀳𑀁 𑀅𑀧𑀭𑀺𑀜𑁆𑀜𑀸𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑁂𑀬𑁆𑀬𑀁, 𑀅𑀧𑁆𑀧𑀳𑀻𑀦𑁂 𑀯𑀸 𑀓𑀺𑀮𑁂𑀲𑁂 𑀧𑀚𑀳𑁂𑀬𑁆𑀬𑀁, 𑀅𑀪𑀸𑀯𑀺𑀢𑀁 𑀯𑀸 𑀫𑀕𑁆𑀕𑀁 𑀪𑀸𑀯𑁂𑀬𑁆𑀬𑀁, 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀢𑀧𑁆𑀧𑀁 𑀧𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑀼𑀬𑁄𑀕𑁄 𑀅𑀧𑁆𑀧𑀫𑀢𑁆𑀢𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀏𑀯𑀁𑀯𑀺𑀳𑀸𑀭𑀻 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄.

𑀪𑀺𑀓𑁆𑀔𑀼 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀻𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 [𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 (𑀲𑁆𑀬𑀸.), 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀯𑀸 𑀪𑀺𑀓𑁆𑀔𑀼 𑀲𑁂𑀓𑁆𑀔𑁄 𑀯𑀸 𑀪𑀺𑀓𑁆𑀔𑀼. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁… 𑀢𑀡𑁆𑀳𑀸𑀫𑀫𑀢𑁆𑀢𑀁 𑀧𑀳𑀸𑀬 𑀤𑀺𑀝𑁆𑀞𑀺𑀫𑀫𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫𑀢𑁆𑀢𑁂 𑀚𑀳𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀪𑀺𑀓𑁆𑀔𑀼 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺.

𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔𑀦𑁆𑀢𑀺. 𑀚𑀸𑀢𑀻𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀚𑀭𑀦𑁆𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀲𑁄𑀓𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲…𑀧𑁂… 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲…𑀧𑁂… 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸…𑀧𑁂… 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂. 𑀯𑀺𑀤𑁆𑀯𑀸𑀢𑀺 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀤𑀼𑀓𑁆𑀔𑀁…𑀧𑁂… 𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁. 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔𑀦𑁆𑀢𑀺 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻 𑀇𑀥𑁂𑀯 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀯𑀁𑀯𑀺𑀳𑀸𑀭𑀻 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄, 𑀪𑀺𑀓𑁆𑀔𑀼 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺;

𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔’’𑀦𑁆𑀢𑀺.

𑁨𑁬.

𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔𑀁, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄𑀢𑀺. 𑀏𑀢𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀦𑀦𑁆𑀤𑀸𑀫𑀺 𑀅𑀪𑀺𑀦𑀦𑁆𑀤𑀸𑀫𑀺 𑀫𑁄𑀤𑀸𑀫𑀺 𑀅𑀦𑀼𑀫𑁄𑀤𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀺. 𑀫𑀳𑁂𑀲𑀺𑀦𑁄𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸? 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺…𑀧𑁂… 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀻𑀢𑀺 𑁋 𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄.

𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀦𑁆𑀢𑀺. 𑀲𑀼𑀓𑀺𑀢𑁆𑀢𑀺𑀢𑀦𑁆𑀢𑀺 𑀲𑀼𑀓𑀺𑀢𑁆𑀢𑀺𑀢𑀁 𑀲𑀼𑀆𑀘𑀺𑀓𑁆𑀔𑀺𑀢𑀁 𑀲𑀼𑀤𑁂𑀲𑀺𑀢𑀁 𑀲𑀼𑀧𑀜𑁆𑀜𑀧𑀺𑀢𑀁 𑀲𑀼𑀧𑀝𑁆𑀞𑀧𑀺𑀢𑀁 𑀲𑀼𑀯𑀺𑀯𑀭𑀺𑀢𑀁 𑀲𑀼𑀯𑀺𑀪𑀚𑀺𑀢𑀁 𑀲𑀼𑀉𑀢𑁆𑀢𑀸𑀦𑀻𑀓𑀢𑀁 𑀲𑀼𑀧𑀓𑀸𑀲𑀺𑀢𑀦𑁆𑀢𑀺 𑁋 𑀲𑀼𑀓𑀺𑀢𑁆𑀢𑀺𑀢𑀁. 𑀕𑁄𑀢𑀫𑀦𑀽𑀧𑀥𑀻𑀓𑀦𑁆𑀢𑀺 𑀉𑀧𑀥𑀻 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀉𑀧𑀥𑀺𑀧𑁆𑀧𑀳𑀸𑀦𑀁 𑀉𑀧𑀥𑀺𑀯𑀽𑀧𑀲𑀫𑀁 𑀉𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀉𑀧𑀥𑀺𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁.

𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔𑀦𑁆𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁 𑀦𑀺𑀲𑁆𑀲𑀁𑀲𑀬𑀯𑀘𑀦𑀁 𑀦𑀺𑀓𑁆𑀓𑀗𑁆𑀔𑀸𑀯𑀘𑀦𑀁 𑀅𑀤𑁆𑀯𑁂𑀚𑁆𑀛𑀯𑀘𑀦𑀁 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀁 𑀦𑀺𑀭𑁄𑀥𑀯𑀘𑀦𑀁 𑀅𑀧𑁆𑀧𑀡𑀓𑀯𑀘𑀦𑀁 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 𑁋 𑀅𑀤𑁆𑀥𑀸𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀧𑀳𑀸𑀲𑀺 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀧𑀳𑀸𑀲𑀺 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀻𑀓𑀭𑁄𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀻𑀢𑀺 𑁋 𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔𑀁.

𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀢𑀼𑀮𑀺𑀢𑁄 𑀢𑀻𑀭𑀺𑀢𑁄 𑀯𑀺𑀪𑀽𑀢𑁄 𑀯𑀺𑀪𑀸𑀯𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑁋 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔𑀁, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’𑀢𑀺.

𑁨𑁭.

𑀢𑁂 𑀘𑀸𑀧𑀺 𑀦𑀽𑀦𑀧𑁆𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀁, 𑀬𑁂 𑀢𑁆𑀯𑀁 𑀫𑀼𑀦𑀻 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑁂𑀘𑁆𑀘 𑀦𑀸𑀕, 𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬.

𑀢𑁂 𑀘𑀸𑀧𑀺 𑀦𑀽𑀦𑀧𑁆𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀦𑁆𑀢𑀺. 𑀢𑁂 𑀘𑀸𑀧𑀻𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀧𑀚𑀳𑁂𑀬𑁆𑀬𑀼𑀁 𑀯𑀺𑀦𑁄𑀤𑁂𑀬𑁆𑀬𑀼𑀁 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬𑀼𑀁 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀼𑀦𑁆𑀢𑀺 𑁋 𑀢𑁂 𑀘𑀸𑀧𑀺 𑀦𑀽𑀦𑀧𑁆𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀁.

𑀬𑁂 𑀢𑁆𑀯𑀁 𑀫𑀼𑀦𑀻 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬𑀸𑀢𑀺. 𑀬𑁂𑀢𑀺 𑀔𑀢𑁆𑀢𑀺𑀬𑁂 𑀘 𑀩𑁆𑀭𑀸𑀳𑁆𑀫𑀡𑁂 𑀘 𑀯𑁂𑀲𑁆𑀲𑁂 𑀘 𑀲𑀼𑀤𑁆𑀤𑁂 𑀘 𑀕𑀳𑀝𑁆𑀞𑁂 𑀘 𑀧𑀩𑁆𑀩𑀚𑀺𑀢𑁂 𑀘 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘. 𑀢𑁆𑀯𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬𑀸𑀢𑀺 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬 𑀲𑀓𑁆𑀓𑀘𑁆𑀘𑀁 𑀑𑀯𑀤𑁂𑀬𑁆𑀬 𑀅𑀪𑀺𑀡𑁆𑀳𑀁 𑀑𑀯𑀤𑁂𑀬𑁆𑀬 𑀧𑀼𑀦𑀧𑁆𑀧𑀼𑀦𑀁 𑀑𑀯𑀤𑁂𑀬𑁆𑀬 𑀅𑀦𑀼𑀲𑀸𑀲𑁂𑀬𑁆𑀬𑀸𑀢𑀺 𑁋 𑀬𑁂 𑀢𑁆𑀯𑀁 𑀫𑀼𑀦𑀻 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬.

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑁂𑀘𑁆𑀘 𑀦𑀸𑀕𑀸𑀢𑀺. 𑀢𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀦𑀫𑀲𑁆𑀲𑀸𑀫𑀻𑀢𑀺 𑀓𑀸𑀬𑁂𑀦 𑀯𑀸 𑀦𑀫𑀲𑁆𑀲𑀸𑀫𑀺, 𑀯𑀸𑀘𑀸𑀬 𑀯𑀸 𑀦𑀫𑀲𑁆𑀲𑀸𑀫𑀺, 𑀘𑀺𑀢𑁆𑀢𑁂𑀦 𑀯𑀸 𑀦𑀫𑀲𑁆𑀲𑀸𑀫𑀺, 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀸𑀫𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀸𑀫𑀺, 𑀲𑀓𑁆𑀓𑀭𑁄𑀫𑀺 𑀕𑀭𑀼𑀁 𑀓𑀭𑁄𑀫𑀺 [𑀕𑀭𑀼𑀓𑀭𑁄𑀫𑀺 (𑀲𑁆𑀬𑀸.)] 𑀫𑀸𑀦𑁂𑀫𑀺 𑀧𑀽𑀚𑁂𑀫𑀺. 𑀲𑀫𑁂𑀘𑁆𑀘𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀲𑀫𑀸𑀕𑀦𑁆𑀢𑁆𑀯𑀸 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸 𑀲𑀫𑁆𑀫𑀼𑀔𑀸 𑀢𑀁 𑀦𑀫𑀲𑁆𑀲𑀸𑀫𑀺. 𑀦𑀸𑀕𑀸𑀢𑀺 𑀦𑀸𑀕𑁄 𑀘 𑀪𑀕𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑁋 𑀦𑀸𑀕𑁄, 𑀦 𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄, 𑀦 𑀆𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄. 𑀓𑀣𑀁 𑀪𑀕𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑁋 𑀦𑀸𑀕𑁄? 𑀆𑀕𑀼 𑀯𑀼𑀘𑁆𑀘𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀩𑁆𑀩𑀲𑀁𑀬𑁄𑀕𑁂 [𑀲𑀩𑁆𑀩𑀬𑁄𑀕𑁂 (𑀓.), 𑀲𑀼. 𑀦𑀺. 𑁫𑁨𑁭] 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀻 𑀯𑀺𑀫𑀼𑀢𑁆𑀢𑁄, 𑀦𑀸𑀕𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺.

𑀏𑀯𑀁 𑀪𑀕𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑁋 𑀦𑀸𑀕𑁄.

𑀓𑀣𑀁 𑀪𑀕𑀯𑀸 𑀦 𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄. 𑀪𑀕𑀯𑀸 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀻𑀬𑀢𑀺 [𑀦𑀺𑀬𑁆𑀬𑀢𑀺 (𑀲𑁆𑀬𑀸. 𑀓.)] 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺. 𑀏𑀯𑀁 𑀪𑀕𑀯𑀸 𑀦 𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄.

𑀓𑀣𑀁 𑀪𑀕𑀯𑀸 𑀦 𑀆𑀕𑀘𑁆𑀙𑀢𑀻𑀢𑀺 𑁋 𑀦𑀸𑀕𑁄. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀏𑀯𑀁 𑀪𑀕𑀯𑀸 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄𑀢𑀺 𑁋 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑁂𑀘𑁆𑀘 𑀦𑀸𑀕.

𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬𑀸𑀢𑀺 𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬 𑀲𑀓𑁆𑀓𑀘𑁆𑀘𑀁 𑀑𑀯𑀤𑁂𑀬𑁆𑀬 𑀅𑀪𑀺𑀡𑁆𑀳𑀁 𑀑𑀯𑀤𑁂𑀬𑁆𑀬 𑀧𑀼𑀦𑀧𑁆𑀧𑀼𑀦𑀁 𑀑𑀯𑀤𑁂𑀬𑁆𑀬 𑀅𑀦𑀼𑀲𑀸𑀲𑁂𑀬𑁆𑀬𑀸𑀢𑀺 𑁋 𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑁂 𑀘𑀸𑀧𑀺 𑀦𑀽𑀦𑀧𑁆𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀁, 𑀬𑁂 𑀢𑁆𑀯𑀁 𑀫𑀼𑀦𑀻 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑁂𑀘𑁆𑀘 𑀦𑀸𑀕, 𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬𑀸’’𑀢𑀺.

𑁨𑁮.

𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁;

𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀺, 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄.

𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀩𑀸𑀳𑀺𑀢𑁄 𑀳𑁄𑀢𑀺. 𑀩𑀸𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀯𑀺𑀫𑀮𑁄 𑀲𑀸𑀥𑀼𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀲𑀁𑀲𑀸𑀭𑀫𑀢𑀺𑀘𑁆𑀘 𑀓𑁂𑀯𑀮𑀻 𑀲𑁄, 𑀅𑀲𑀺𑀢𑁄 [𑀅𑀦𑀺𑀲𑁆𑀲𑀺𑀢𑁄 (𑀲𑁆𑀬𑀸.) 𑀲𑀼. 𑀦𑀺. 𑁫𑁨𑁪] 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸.

𑀯𑁂𑀤𑀕𑀽𑀢𑀺 𑀯𑁂𑀤𑁄 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁…𑀧𑁂… 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺. 𑀅𑀪𑀺𑀚𑀜𑁆𑀜𑀸𑀢𑀺 𑀅𑀪𑀺𑀚𑀸𑀦𑁂𑀬𑁆𑀬 𑀆𑀚𑀸𑀦𑁂𑀬𑁆𑀬 𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑀸𑀦𑁂𑀬𑁆𑀬 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑁋 𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸.

𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁, 𑀬𑀲𑁆𑀲𑁂𑀢𑁂 𑀓𑀺𑀜𑁆𑀘𑀦𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀺𑀜𑁆𑀘𑀦𑁄. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀪𑀯𑀸𑀢𑀺 𑀤𑁆𑀯𑁂 𑀪𑀯𑀸 𑁋 𑀓𑀫𑁆𑀫𑀪𑀯𑁄 𑀘 𑀧𑀝𑀺𑀲𑀦𑁆𑀥𑀺𑀓𑁄 𑀘 𑀧𑀼𑀦𑀩𑁆𑀪𑀯𑁄 …𑀧𑁂… 𑀅𑀬𑀁 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄. 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺 𑀅𑀓𑀺𑀜𑁆𑀘𑀦𑀁 𑀧𑀼𑀕𑁆𑀕𑀮𑀁 𑀓𑀸𑀫𑀪𑀯𑁂 𑀘 𑀅𑀲𑀢𑁆𑀢𑀁 𑀅𑀮𑀕𑁆𑀕𑀁 𑀅𑀮𑀕𑁆𑀕𑀺𑀢𑀁 𑀅𑀧𑀮𑀺𑀩𑀼𑀤𑁆𑀥𑀁 𑀦𑀺𑀓𑁆𑀔𑀦𑁆𑀢𑀁 𑀦𑀺𑀲𑁆𑀲𑀝𑀁 𑀯𑀺𑀧𑁆𑀧𑀫𑀼𑀢𑁆𑀢𑀁 𑀯𑀺𑀲𑀜𑁆𑀜𑀼𑀢𑁆𑀢𑀁 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁.

𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀻𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁…𑀧𑁂… 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 𑁋 𑀅𑀤𑁆𑀥𑀸𑀢𑀺. 𑀑𑀖𑀦𑁆𑀢𑀺 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁. 𑀅𑀢𑀸𑀭𑀻𑀢𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀻𑀢𑀺 𑁋 𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀺.

𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄𑀢𑀺. 𑀢𑀺𑀡𑁆𑀡𑁄𑀢𑀺 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄, 𑀪𑀯𑁄𑀖𑀁 𑀢𑀺𑀡𑁆𑀡𑁄, 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄, 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄, 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 [𑀦𑀺𑀢𑁆𑀢𑀺𑀡𑁆𑀡𑁄 (𑀲𑁆𑀬𑀸.)] 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀢𑁆𑀣𑀯𑀸𑀲𑁄 [𑀯𑀼𑀝𑁆𑀞𑀯𑀸𑀲𑁄 (𑀲𑁆𑀬𑀸.) 𑀫𑀳𑀸𑀦𑀺. 𑁬] 𑀘𑀺𑀡𑁆𑀡𑀘𑀭𑀡𑁄 𑀕𑀢𑀤𑁆𑀥𑁄 𑀕𑀢𑀤𑀺𑀲𑁄 𑀕𑀢𑀓𑁄𑀝𑀺𑀓𑁄 𑀧𑀸𑀮𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀪𑀸𑀯𑀺𑀢𑀫𑀕𑁆𑀕𑁄, 𑀧𑀳𑀻𑀦𑀓𑀺𑀮𑁂𑀲𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄. 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁. 𑀲𑁄 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀅𑀩𑁆𑀩𑀼𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 [𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑁄 (𑀓.)] 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑁄. 𑀲𑁄 𑀦𑁂𑀯 𑀆𑀘𑀺𑀦𑀸𑀢𑀺 𑀦 𑀅𑀧𑀘𑀺𑀦𑀸𑀢𑀺, 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺, 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀯𑀺𑀲𑀺𑀦𑁂𑀢𑀺 𑀦 𑀉𑀲𑁆𑀲𑀺𑀦𑁂𑀢𑀺, 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺, 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄. 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦…𑀧𑁂… 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄. 𑀲𑀘𑁆𑀘𑀁 𑀲𑀫𑁆𑀧𑀝𑀺𑀧𑀸𑀤𑀬𑀺𑀢𑁆𑀯𑀸 [𑀧𑀝𑀺𑀧𑀸𑀤𑀬𑀺𑀢𑁆𑀯𑀸 (𑀲𑁆𑀬𑀸.)] 𑀞𑀺𑀢𑁄. 𑀏𑀚𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀓𑀺𑀮𑁂𑀲𑀕𑁆𑀕𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄. 𑀅𑀧𑀭𑀺𑀕𑀫𑀦𑀢𑀸𑀬 𑀞𑀺𑀢𑁄. 𑀓𑀣𑀁 [𑀓𑀝𑀁 (𑀲𑁆𑀬𑀸.) 𑀓𑀸𑀫𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀲𑀫𑀸𑀤𑀸𑀬 𑀞𑀺𑀢𑁄? 𑀯𑀺𑀫𑀼𑀢𑁆𑀢𑀺𑀧𑀝𑀺𑀲𑁂𑀯𑀦𑀢𑀸𑀬 𑀞𑀺𑀢𑁄. 𑀫𑁂𑀢𑁆𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄. 𑀓𑀭𑀼𑀡𑀸𑀬 …𑀧𑁂… 𑀫𑀼𑀤𑀺𑀢𑀸𑀬… 𑀉𑀧𑁂𑀓𑁆𑀔𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄. 𑀅𑀘𑁆𑀘𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄. 𑀅𑀢𑀫𑁆𑀫𑀬𑀢𑀸𑀬 [𑀅𑀓𑀫𑁆𑀫𑀜𑁆𑀜𑀢𑀸𑀬 (𑀲𑁆𑀬𑀸.)] 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄. 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑁄. 𑀲𑀦𑁆𑀢𑀼𑀲𑁆𑀲𑀺𑀢𑀢𑁆𑀢𑀸 𑀞𑀺𑀢𑁄. 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑁄. 𑀅𑀦𑁆𑀢𑀺𑀫𑀪𑀯𑁂 𑀞𑀺𑀢𑁄. 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑁄. 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀅𑀭𑀳𑀸.

𑀢𑀲𑁆𑀲𑀸𑀬𑀁 𑀧𑀘𑁆𑀙𑀺𑀫𑀓𑁄 𑀪𑀯𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺.

𑀢𑀺𑀡𑁆𑀡𑁄 𑀘 𑀧𑀸𑀭𑀦𑁆𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑁄 𑀧𑀸𑀭𑀕𑀢𑁄 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀲𑁄 𑀯𑀼𑀢𑁆𑀢𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀢𑀺𑀡𑁆𑀡𑁄 𑀘 𑀧𑀸𑀭𑀁.

𑀅𑀔𑀺𑀮𑁄𑀢𑀺 𑀭𑀸𑀕𑁄 𑀔𑀺𑀮𑁄, 𑀤𑁄𑀲𑁄 𑀔𑀺𑀮𑁄, 𑀫𑁄𑀳𑁄 𑀔𑀺𑀮𑁄, 𑀓𑁄𑀥𑁄 𑀔𑀺𑀮𑁄, 𑀉𑀧𑀦𑀸𑀳𑁄 𑀔𑀺𑀮𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀔𑀺𑀮𑀸. 𑀬𑀲𑁆𑀲𑁂𑀢𑁂 𑀔𑀺𑀮𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸 𑀲𑁄 𑀯𑀼𑀘𑁆𑀘𑀢𑀺 𑀅𑀔𑀺𑀮𑁄. 𑀅𑀓𑀗𑁆𑀔𑁄𑀢𑀺 𑀤𑀼𑀓𑁆𑀔𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀸, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀸, 𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄. 𑀬𑀲𑁆𑀲𑁂𑀢𑁂 𑀓𑀗𑁆𑀔𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀗𑁆𑀔𑁄𑀢𑀺 𑁋 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁;

𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀺, 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄’’𑀢𑀺.

𑁨𑁯.

𑀯𑀺𑀤𑁆𑀯𑀸 𑀘 𑀬𑁄 𑀯𑁂𑀤𑀕𑀽 𑀦𑀭𑁄 𑀇𑀥, 𑀪𑀯𑀸𑀪𑀯𑁂 𑀲𑀗𑁆𑀕𑀫𑀺𑀫𑀁 𑀯𑀺𑀲𑀚𑁆𑀚;

𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺.

𑀯𑀺𑀤𑁆𑀯𑀸 𑀘 𑀬𑁄 𑀯𑁂𑀤𑀕𑀽 𑀦𑀭𑁄 𑀇𑀥𑀸𑀢𑀺. 𑀯𑀺𑀤𑁆𑀯𑀸𑀢𑀺 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀫𑀦𑀼𑀲𑁆𑀲𑁄 𑀯𑀸. 𑀯𑁂𑀤𑀕𑀽𑀢𑀺 𑀯𑁂𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 [𑀜𑀸𑀡𑀁…𑀧𑁂… 𑀲𑀩𑁆𑀩𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺. (𑀲𑁆𑀬𑀸.) 𑀧𑀲𑁆𑀲 𑀫𑀳𑀸𑀦𑀺. 𑁮𑁧]. 𑀢𑁂𑀳𑀺 𑀯𑁂𑀤𑁂𑀳𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽, 𑀯𑁂𑀤𑁂𑀳𑀺 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽, 𑀲𑀢𑁆𑀢𑀦𑁆𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀯𑁂𑀤𑀕𑀽. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀤𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸…𑀧𑁂… 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄… 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄… 𑀫𑀸𑀦𑁄 𑀯𑀺𑀤𑀺𑀢𑁄 𑀳𑁄𑀢𑀺. 𑀯𑀺𑀤𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀡𑀸𑀦𑀁 𑀬𑀸𑀦𑀻𑀥𑀢𑁆𑀣𑀺 𑀩𑁆𑀭𑀸𑀳𑁆𑀫𑀡𑀸𑀦𑀁;

𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄, 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄.

𑀦𑀭𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 [𑀚𑀸𑀢𑀼 (𑀲𑁆𑀬𑀸.)] 𑀚𑀦𑁆𑀢𑀼 𑀇𑀦𑁆𑀤𑀕𑀼 [𑀇𑀦𑁆𑀤𑀕𑀽 (𑀲𑁆𑀬𑀸.)] 𑀫𑀦𑀼𑀚𑁄. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸…𑀧𑁂… 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀯𑀺𑀤𑁆𑀯𑀸 𑀘 𑀬𑁄 𑀯𑁂𑀤𑀕𑀽 𑀦𑀭𑁄 𑀇𑀥.

𑀪𑀯𑀸𑀪𑀯𑁂 𑀲𑀗𑁆𑀕𑀫𑀺𑀫𑀁 𑀯𑀺𑀲𑀚𑁆𑀚𑀸𑀢𑀺. 𑀪𑀯𑀸𑀪𑀯𑁂𑀢𑀺 𑀪𑀯𑀸𑀪𑀯𑁂 𑀓𑀫𑁆𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀓𑀸𑀫𑀪𑀯𑁂, 𑀓𑀫𑁆𑀫𑀪𑀯𑁂 𑀓𑀸𑀫𑀪𑀯𑁂 𑀧𑀼𑀦𑀩𑁆𑀪𑀯𑁂 𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀅𑀭𑀽𑀧𑀪𑀯𑁂, 𑀓𑀫𑁆𑀫𑀪𑀯𑁂 𑀅𑀭𑀽𑀧𑀪𑀯𑁂 𑀧𑀼𑀦𑀩𑁆𑀪𑀯𑁂 𑀧𑀼𑀦𑀧𑁆𑀧𑀼𑀦𑀪𑀯𑁂, 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀲𑀗𑁆𑀕𑀸𑀢𑀺 𑀲𑀢𑁆𑀢 𑀲𑀗𑁆𑀕𑀸 𑁋 𑀭𑀸𑀕𑀲𑀗𑁆𑀕𑁄, 𑀤𑁄𑀲𑀲𑀗𑁆𑀕𑁄, 𑀫𑁄𑀳𑀲𑀗𑁆𑀕𑁄, 𑀫𑀸𑀦𑀲𑀗𑁆𑀕𑁄, 𑀤𑀺𑀝𑁆𑀞𑀺𑀲𑀗𑁆𑀕𑁄, 𑀓𑀺𑀮𑁂𑀲𑀲𑀗𑁆𑀕𑁄, 𑀤𑀼𑀘𑁆𑀘𑀭𑀺𑀢𑀲𑀗𑁆𑀕𑁄. 𑀯𑀺𑀲𑀚𑁆𑀚𑀸𑀢𑀺 𑀲𑀗𑁆𑀕𑁂 𑀯𑁄𑀲𑀚𑁆𑀚𑁂𑀢𑁆𑀯𑀸 𑀯𑀸 𑀯𑀺𑀲𑀚𑁆𑀚. 𑀅𑀣 𑀯𑀸, 𑀲𑀗𑁆𑀕𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀨𑁄𑀝𑀬𑀺𑀢𑁆𑀯𑀸 [𑀫𑁄𑀘𑀬𑀺𑀢𑁆𑀯𑀸 (𑀲𑁆𑀬𑀸.)] 𑀯𑀸 𑀯𑀺𑀲𑀚𑁆𑀚. 𑀬𑀣𑀸 𑀬𑀸𑀦𑀁 𑀯𑀸 𑀯𑀬𑁆𑀳𑀁 𑀯𑀸 𑀭𑀣𑀁 𑀯𑀸 𑀲𑀓𑀝𑀁 𑀯𑀸 𑀲𑀦𑁆𑀤𑀫𑀸𑀦𑀺𑀓𑀁 𑀯𑀸 𑀲𑀚𑁆𑀚𑀁 𑀯𑀺𑀲𑀚𑁆𑀚𑀁 𑀓𑀭𑁄𑀦𑁆𑀢𑀺 𑀯𑀺𑀓𑁄𑀧𑁂𑀦𑁆𑀢𑀺 𑁋 𑀏𑀯𑀫𑁂𑀯 𑀢𑁂 𑀲𑀗𑁆𑀕𑁂 𑀯𑁄𑀲𑀚𑁆𑀚𑁂𑀢𑁆𑀯𑀸 𑀯𑀸 𑀯𑀺𑀲𑀚𑁆𑀚. 𑀅𑀣 𑀯𑀸, 𑀲𑀗𑁆𑀕𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀨𑁄𑀝𑀬𑀺𑀢𑁆𑀯𑀸 𑀯𑀸 𑀯𑀺𑀲𑀚𑁆𑀚𑀸𑀢𑀺 𑁋 𑀪𑀯𑀸𑀪𑀯𑁂 𑀲𑀗𑁆𑀕𑀫𑀺𑀫𑀁 𑀯𑀺𑀲𑀚𑁆𑀚.

𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸… 𑀬𑀲𑁆𑀲𑁂𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀯𑀻𑀢𑀢𑀡𑁆𑀳𑁄 𑀯𑀺𑀕𑀢𑀢𑀡𑁆𑀳𑁄 𑀘𑀢𑁆𑀢𑀢𑀡𑁆𑀳𑁄 𑀯𑀦𑁆𑀢𑀢𑀡𑁆𑀳𑁄 𑀫𑀼𑀢𑁆𑀢𑀢𑀡𑁆𑀳𑁄 𑀧𑀳𑀻𑀦𑀢𑀡𑁆𑀳𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑀡𑁆𑀳𑁄 𑀯𑀻𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀲𑁄 𑀯𑀻𑀢𑀢𑀡𑁆𑀳𑁄. 𑀅𑀦𑀻𑀖𑁄𑀢𑀺 𑀭𑀸𑀕𑁄 𑀦𑀻𑀖𑁄, 𑀤𑁄𑀲𑁄 𑀦𑀻𑀖𑁄, 𑀫𑁄𑀳𑁄 𑀦𑀻𑀖𑁄, 𑀓𑁄𑀥𑁄 𑀦𑀻𑀖𑁄, 𑀉𑀧𑀦𑀸𑀳𑁄 𑀦𑀻𑀖𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀦𑀻𑀖𑀸. 𑀬𑀲𑁆𑀲𑁂𑀢𑁂 𑀦𑀻𑀖𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀻𑀖𑁄. 𑀦𑀺𑀭𑀸𑀲𑁄𑀢𑀺 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀆𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀦𑀺𑀭𑀸𑀲𑁄. 𑀚𑀸𑀢𑀻𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄. 𑀚𑀭𑀸𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 …𑀧𑁂… 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀭𑀸. 𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀬𑁄 𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀘 𑀦𑀺𑀭𑀸𑀲𑁄 𑀘, 𑀲𑁄 𑀔𑁄 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀻𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀯𑀺𑀤𑁆𑀯𑀸 𑀘 𑀬𑁄 𑀯𑁂𑀤𑀕𑀽 𑀦𑀭𑁄 𑀇𑀥, 𑀪𑀯𑀸𑀪𑀯𑁂 𑀲𑀗𑁆𑀕𑀫𑀺𑀫𑀁 𑀯𑀺𑀲𑀚𑁆𑀚;

𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀘𑀢𑀼𑀢𑁆𑀣𑁄.

𑁫. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁩𑁦.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄]

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁;

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀻𑀢𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸…𑀧𑁂… 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸…𑀧𑁂… 𑀦𑀺𑀩𑁆𑀩𑀸𑀦𑀧𑀼𑀘𑁆𑀙𑀸. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁, 𑀓𑀣𑀬𑀲𑁆𑀲𑀼 𑀫𑁂𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀸𑀢𑀺. 𑀥𑁄𑀢𑀓𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄.

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀓𑀗𑁆𑀔𑀸𑀫𑀺 𑀅𑀪𑀺𑀓𑀗𑁆𑀔𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀺. 𑀫𑀳𑁂𑀲𑀻𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸? 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺…𑀧𑁂… 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀻𑀢𑀺 𑁋 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁.

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁.

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺. 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀓𑁄𑀥𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀉𑀧𑀦𑀸𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀫𑀸𑀬 𑀉𑀧𑀲𑀫𑀸𑀬 𑀯𑀽𑀧𑀲𑀫𑀸𑀬 𑀦𑀺𑀩𑁆𑀩𑀸𑀧𑀦𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀧𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄]

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁;

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’𑀢𑀺.

𑁩𑁧.

𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄;

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀻𑀢𑀺 𑀆𑀢𑀧𑁆𑀧𑀁 𑀓𑀭𑁄𑀳𑀺, 𑀉𑀲𑁆𑀲𑀸𑀳𑀁 𑀓𑀭𑁄𑀳𑀺, 𑀉𑀲𑁆𑀲𑁄𑀴𑁆𑀳𑀺𑀁 𑀓𑀭𑁄𑀳𑀺, 𑀣𑀸𑀫𑀁 𑀓𑀭𑁄𑀳𑀺, 𑀥𑀺𑀢𑀺𑀁 𑀓𑀭𑁄𑀳𑀺, 𑀯𑀻𑀭𑀺𑀬𑀁 𑀓𑀭𑁄𑀳𑀺, 𑀙𑀦𑁆𑀤𑀁 𑀚𑀦𑁂𑀳𑀺 𑀲𑀜𑁆𑀚𑀦𑁂𑀳𑀺 𑀉𑀧𑀝𑁆𑀞𑀧𑁂𑀳𑀺 𑀲𑀫𑀼𑀝𑁆𑀞𑀧𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀳𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀳𑀻𑀢𑀺 𑁋 𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺.

𑀥𑁄𑀢𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀥𑁄𑀢𑀓𑀸𑀢𑀺 𑀪𑀕𑀯𑀸.

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄𑀢𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂. 𑀦𑀺𑀧𑀓𑁄𑀢𑀺 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄.

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀦𑁆𑀢𑀺 𑀇𑀢𑁄 𑀫𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁.

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺. 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀓𑁄𑀥𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀉𑀧𑀦𑀸𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀫𑀸𑀬 𑀉𑀧𑀲𑀫𑀸𑀬 𑀯𑀽𑀧𑀲𑀫𑀸𑀬 𑀦𑀺𑀩𑁆𑀩𑀸𑀧𑀦𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄;

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’𑀢𑀺.

𑁩𑁨.

𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀺.

𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀢𑀺. 𑀤𑁂𑀯𑀸𑀢𑀺 𑀢𑀬𑁄 𑀤𑁂𑀯𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀓𑀢𑀫𑁂 𑀲𑀫𑁆𑀫𑀼𑀢𑀺𑀤𑁂𑀯𑀸? 𑀲𑀫𑁆𑀫𑀼𑀢𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄 𑀘 𑀭𑀸𑀚𑀓𑀼𑀫𑀸𑀭𑀸 𑀘 𑀤𑁂𑀯𑀺𑀬𑁄 𑀘. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸. 𑀓𑀢𑀫𑁂 𑀉𑀧𑀧𑀢𑁆𑀢𑀺𑀤𑁂𑀯𑀸? 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀬𑀸𑀫𑀸 𑀤𑁂𑀯𑀸 𑀢𑀼𑀲𑀺𑀢𑀸 𑀤𑁂𑀯𑀸 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀬𑁂 𑀘 𑀤𑁂𑀯𑀸 𑀢𑀤𑀼𑀢𑁆𑀢𑀭𑀺 [𑀢𑀢𑁆𑀭𑀼𑀧𑀭𑀺 (𑀲𑁆𑀬𑀸.)]. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸. 𑀓𑀢𑀫𑁂 𑀯𑀺𑀲𑀼𑀤𑁆𑀥𑀺𑀤𑁂𑀯𑀸? 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀢𑀣𑀸𑀕𑀢𑀲𑀸𑀯𑀓𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀬𑁂 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀪𑀕𑀯𑀸 𑀲𑀫𑁆𑀫𑀼𑀢𑀺𑀤𑁂𑀯𑀸𑀦𑀜𑁆𑀘 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀜𑁆𑀘 𑀤𑁂𑀯𑁄 𑀘 𑀅𑀢𑀺𑀤𑁂𑀯𑁄 𑀘 𑀤𑁂𑀯𑀸𑀢𑀺𑀤𑁂𑀯𑁄 𑀘 𑀲𑀻𑀳𑀲𑀻𑀳𑁄 𑀦𑀸𑀕𑀦𑀸𑀕𑁄 𑀕𑀡𑀺𑀕𑀡𑀻 𑀫𑀼𑀦𑀺𑀫𑀼𑀦𑀻 𑀭𑀸𑀚𑀭𑀸𑀚𑀸. 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀁 𑀧𑀲𑁆𑀲𑀸𑀫𑀺 𑀅𑀢𑀺𑀤𑁂𑀯𑀁 𑀧𑀲𑁆𑀲𑀸𑀫𑀺 𑀤𑁂𑀯𑀸𑀢𑀺𑀤𑁂𑀯𑀁 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺 𑀦𑀺𑀚𑁆𑀛𑀸𑀬𑀸𑀫𑀺 𑀉𑀧𑀧𑀭𑀺𑀓𑁆𑀔𑀸𑀫𑀻𑀢𑀺 𑁋 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂.

𑀆𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀦𑁆𑀢𑀺. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁, 𑀢𑁂 𑀓𑀺𑀜𑁆𑀘𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀺𑀜𑁆𑀘𑀦𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀪𑀕𑀯𑀸 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀩𑀸𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀯𑀺𑀫𑀮𑁄 𑀲𑀸𑀥𑀼𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀲𑀁𑀲𑀸𑀭𑀫𑀢𑀺𑀘𑁆𑀘 𑀓𑁂𑀯𑀮𑀻 𑀲𑁄, 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸𑀢𑀺.

𑀇𑀭𑀺𑀬𑀫𑀸𑀦𑀦𑁆𑀢𑀺 𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀇𑀭𑀺𑀬𑀦𑁆𑀢𑀁 𑀯𑀢𑁆𑀢𑁂𑀦𑁆𑀢𑀁 𑀧𑀸𑀮𑁂𑀦𑁆𑀢𑀁 𑀬𑀧𑁂𑀦𑁆𑀢𑀁 𑀬𑀸𑀧𑁂𑀦𑁆𑀢𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁.

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀢𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀦𑀫𑀲𑁆𑀲𑀸𑀫𑀻𑀢𑀺 𑀓𑀸𑀬𑁂𑀦 𑀯𑀸 𑀦𑀫𑀲𑁆𑀲𑀸𑀫𑀺, 𑀯𑀸𑀘𑀸𑀬 𑀯𑀸 𑀦𑀫𑀲𑁆𑀲𑀸𑀫𑀺, 𑀘𑀺𑀢𑁆𑀢𑁂𑀦 𑀯𑀸 𑀦𑀫𑀲𑁆𑀲𑀸𑀫𑀺, 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀸𑀫𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀸𑀫𑀺 𑀲𑀓𑁆𑀓𑀭𑁄𑀫𑀺 𑀕𑀭𑀼𑀁 𑀓𑀭𑁄𑀫𑀺 𑀫𑀸𑀦𑁂𑀫𑀺 𑀧𑀽𑀚𑁂𑀫𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.

‘‘𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 [𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁫𑁬] 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼.

𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀻𑀢𑀺. 𑀲𑀓𑁆𑀓𑀸𑀢𑀺 𑀲𑀓𑁆𑀓𑁄 𑀪𑀕𑀯𑀸 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀅𑀟𑁆𑀠𑁄 [𑀅𑀤𑁆𑀥𑁄 (𑀲𑁆𑀬𑀸. 𑀓.)] 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁 𑀲𑀢𑀺𑀧𑀝𑁆𑀞𑀸𑀦𑀥𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀥𑀦𑀁 𑀇𑀤𑁆𑀥𑀺𑀧𑀸𑀤𑀥𑀦𑀁 𑀇𑀦𑁆𑀤𑁆𑀭𑀺𑀬𑀥𑀦𑀁 𑀩𑀮𑀥𑀦𑀁 𑀩𑁄𑀚𑁆𑀛𑀗𑁆𑀕𑀥𑀦𑀁 𑀫𑀕𑁆𑀕𑀥𑀦𑀁 𑀨𑀮𑀥𑀦𑀁 𑀦𑀺𑀩𑁆𑀩𑀸𑀦𑀥𑀦𑀁. 𑀇𑀫𑁂𑀳𑀺 𑀅𑀦𑁂𑀓𑀯𑀺𑀥𑁂𑀳𑀺 𑀥𑀦𑀭𑀢𑀦𑁂𑀳𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀲𑀓𑁆𑀓𑁄 𑀧𑀳𑀼 𑀯𑀺𑀲𑀯𑀻 𑀅𑀮𑀫𑀢𑁆𑀢𑁄 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄. 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀤𑀼𑀓𑁆𑀔𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀸, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀸. 𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄. 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀻𑀢𑀺 𑀫𑀼𑀜𑁆𑀘 𑀫𑀁 𑀧𑀫𑀼𑀜𑁆𑀘 𑀫𑀁 𑀫𑁄𑀘𑁂𑀳𑀺 𑀫𑀁 𑀧𑀫𑁄𑀘𑁂𑀳𑀺 𑀫𑀁 𑀉𑀤𑁆𑀥𑀭 𑀫𑀁 𑀲𑀫𑀼𑀤𑁆𑀥𑀭 𑀫𑀁 𑀯𑀼𑀝𑁆𑀞𑀸𑀧𑁂𑀳𑀺 𑀫𑀁 𑀓𑀣𑀁𑀓𑀣𑀸𑀲𑀮𑁆𑀮𑀢𑁄𑀢𑀺 𑁋 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀻’’𑀢𑀺.

𑁩𑁩.

𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄, 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀺.

𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 [𑀲𑀫𑀻𑀳𑀸𑀫𑀺 (𑀓.)] 𑀧𑀫𑁄𑀘𑀦𑀸𑀬𑀸𑀢𑀺 𑀦𑀸𑀳𑀁 𑀢𑀁 𑀲𑀓𑁆𑀓𑁄𑀫𑀺 𑀫𑀼𑀜𑁆𑀘𑀺𑀢𑀼𑀁 𑀧𑀫𑀼𑀜𑁆𑀘𑀺𑀢𑀼𑀁 𑀫𑁄𑀘𑁂𑀢𑀼𑀁 𑀧𑀫𑁄𑀘𑁂𑀢𑀼𑀁 𑀉𑀤𑁆𑀥𑀭𑀺𑀢𑀼𑀁 𑀲𑀫𑀼𑀤𑁆𑀥𑀭𑀺𑀢𑀼𑀁 𑀉𑀝𑁆𑀞𑀸𑀧𑁂𑀢𑀼𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀓𑀣𑀁𑀓𑀣𑀸𑀲𑀮𑁆𑀮𑀢𑁄𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬. 𑀅𑀣 𑀯𑀸, 𑀦 𑀈𑀳𑀸𑀫𑀺 𑀦 𑀲𑀫𑀻𑀳𑀸𑀫𑀺 𑀦 𑀉𑀲𑁆𑀲𑀳𑀸𑀫𑀺 𑀦 𑀯𑀸𑀬𑀫𑀸𑀫𑀺 𑀦 𑀉𑀲𑁆𑀲𑀸𑀳𑀁 𑀓𑀭𑁄𑀫𑀺 𑀦 𑀉𑀲𑁆𑀲𑁄𑀴𑁆𑀳𑀺𑀁 𑀓𑀭𑁄𑀫𑀺 𑀦 𑀣𑀸𑀫𑀁 𑀓𑀭𑁄𑀫𑀺 𑀦 𑀥𑀺𑀢𑀺𑀁 𑀓𑀭𑁄𑀫𑀺 𑀦 𑀯𑀻𑀭𑀺𑀬𑀁 𑀓𑀭𑁄𑀫𑀺 𑀦 𑀙𑀦𑁆𑀤𑀁 𑀚𑀦𑁂𑀫𑀺 𑀦 𑀲𑀜𑁆𑀚𑀦𑁂𑀫𑀺 𑀦 𑀦𑀺𑀩𑁆𑀩𑀢𑁆𑀢𑁂𑀫𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀫𑀺 𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀅𑀘𑁆𑀙𑀦𑁆𑀤𑀺𑀓𑁂 𑀓𑀼𑀲𑀻𑀢𑁂 𑀳𑀻𑀦𑀯𑀻𑀭𑀺𑀬𑁂 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁂 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬. 𑀅𑀣 𑀯𑀸, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀫𑁄𑀘𑁂𑀢𑀸. 𑀢𑁂 𑀬𑀤𑀺 𑀫𑁄𑀘𑁂𑀬𑁆𑀬𑀼𑀁 𑀲𑀓𑁂𑀦 𑀣𑀸𑀫𑁂𑀦 𑀲𑀓𑁂𑀦 𑀩𑀮𑁂𑀦 𑀲𑀓𑁂𑀦 𑀯𑀻𑀭𑀺𑀬𑁂𑀦 𑀲𑀓𑁂𑀦 𑀧𑀭𑀓𑁆𑀓𑀫𑁂𑀦 𑀲𑀓𑁂𑀦 𑀧𑀼𑀭𑀺𑀲𑀣𑀸𑀫𑁂𑀦 𑀲𑀓𑁂𑀦 𑀧𑀼𑀭𑀺𑀲𑀩𑀮𑁂𑀦 𑀲𑀓𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀲𑀓𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀅𑀢𑁆𑀢𑀦𑀸 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑁄𑀘𑁂𑀬𑁆𑀬𑀼𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀁 𑀤𑀫𑁂𑀲𑁆𑀲𑀢𑀺 𑀯𑀺𑀦𑁂𑀲𑁆𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀅𑀢𑁆𑀢𑀦𑀸 𑀳𑀺 [𑀅𑀢𑁆𑀢𑀦𑀸𑀯 (𑀩𑀳𑀽𑀲𑀼) 𑀥. 𑀧. 𑁧𑁬𑁫] 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸 𑀲𑀁𑀓𑀺𑀮𑀺𑀲𑁆𑀲𑀢𑀺;

𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺;

𑀲𑀼𑀤𑁆𑀥𑀺 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁, 𑀦𑀸𑀜𑁆𑀜𑁄 𑀅𑀜𑁆𑀜𑀁 𑀯𑀺𑀲𑁄𑀥𑀬𑁂’’𑀢𑀺.

𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀝𑁆𑀞𑀢𑁂𑀯 𑀦𑀺𑀩𑁆𑀩𑀸𑀦𑀁 𑀢𑀺𑀝𑁆𑀞𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄 𑀢𑀺𑀝𑁆𑀞𑀸𑀫𑀳𑀁 𑀲𑀫𑀸𑀤𑀧𑁂𑀢𑀸, 𑀅𑀣 𑀘 𑀧𑀦 𑀫𑀫 𑀲𑀸𑀯𑀓𑀸 𑀫𑀬𑀸 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸 𑀅𑀧𑁆𑀧𑁂𑀓𑀘𑁆𑀘𑁂 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀦𑁆𑀢𑀺 𑀏𑀓𑀘𑁆𑀘𑁂 𑀦𑀸𑀭𑀸𑀥𑁂𑀦𑁆𑀢𑀻𑀢𑀺. 𑀏𑀢𑁆𑀣 𑀓𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡 𑀓𑀭𑁄𑀫𑀺? 𑀫𑀕𑁆𑀕𑀓𑁆𑀔𑀸𑀬𑀻, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄. 𑀫𑀕𑁆𑀕𑀁 𑀩𑀼𑀤𑁆𑀥𑁄 𑀆𑀘𑀺𑀓𑁆𑀔𑀢𑀺. 𑀅𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺 [𑀫𑀼𑀜𑁆𑀘𑁂𑀬𑁆𑀬𑀼𑀦𑁆𑀢𑀺 (𑀲𑁆𑀬𑀸.)]. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬’’.

𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂𑀢𑀺 𑀓𑀣𑀁𑀓𑀣𑀺𑀁 𑀧𑀼𑀕𑁆𑀕𑀮𑀁 𑀲𑀓𑀗𑁆𑀔𑀁 𑀲𑀔𑀺𑀮𑀁 𑀲𑀤𑁆𑀯𑁂𑀴𑁆𑀳𑀓𑀁 𑀲𑀯𑀺𑀘𑀺𑀓𑀺𑀘𑁆𑀙𑀁. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀔𑀢𑁆𑀢𑀺𑀬𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑁂𑀲𑁆𑀲𑀁 𑀯𑀸 𑀲𑀼𑀤𑁆𑀤𑀁 𑀯𑀸 𑀕𑀳𑀝𑁆𑀞𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀤𑁂𑀯𑀁 𑀯𑀸 𑀫𑀦𑀼𑀲𑁆𑀲𑀁 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂.

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄𑀢𑀺 𑀥𑀫𑁆𑀫𑀁 𑀲𑁂𑀝𑁆𑀞𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑁂𑀝𑁆𑀞𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀥𑀫𑁆𑀫𑀁 𑀆𑀚𑀸𑀦𑀫𑀸𑀦𑁄 𑀯𑀺𑀚𑀸𑀦𑀫𑀸𑀦𑁄 𑀧𑀝𑀺𑀯𑀺𑀚𑀸𑀦𑀫𑀸𑀦𑁄 𑀧𑀝𑀺𑀯𑀺𑀚𑁆𑀛𑀫𑀸𑀦𑁄𑀢𑀺 𑁋 𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄.

𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀻𑀢𑀺 𑀏𑀯𑀁 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬𑀸𑀲𑀺 𑀉𑀢𑁆𑀢𑀭𑁂𑀬𑁆𑀬𑀸𑀲𑀺 𑀧𑀢𑀭𑁂𑀬𑁆𑀬𑀸𑀲𑀺 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀸𑀲𑀺 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀲𑀻𑀢𑀺 𑁋 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄, 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀻’’𑀢𑀺.

𑁩𑁪.

𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄, 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀬𑀣𑀸𑀳𑀁 𑀆𑀓𑀸𑀲𑁄𑀯 [𑀆𑀓𑀸𑀲𑁄 𑀘 (𑀲𑁆𑀬𑀸.)] 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄 [𑀅𑀩𑁆𑀬𑀸𑀧𑀚𑁆𑀛𑀫𑀸𑀦𑁄 (𑀲𑁆𑀬𑀸.)], 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀁.

𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄𑀢𑀺 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀅𑀦𑀼𑀕𑁆𑀕𑀡𑁆𑀳 𑀩𑁆𑀭𑀳𑁆𑀫𑁂 𑀅𑀦𑀼𑀓𑀫𑁆𑀧 𑀩𑁆𑀭𑀳𑁆𑀫𑁂𑀢𑀺 𑁋 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂. 𑀓𑀭𑀼𑀡𑀸𑀬𑀫𑀸𑀦𑁄𑀢𑀺 𑀓𑀭𑀼𑀡𑀸𑀬𑀫𑀸𑀦𑁄 𑀅𑀦𑀼𑀤𑀬𑀫𑀸𑀦𑁄 [𑀅𑀦𑀼𑀤𑁆𑀤𑀬𑀫𑀸𑀦𑁄 (𑀩𑀳𑀽𑀲𑀼)] 𑀅𑀦𑀼𑀭𑀓𑁆𑀔𑀫𑀸𑀦𑁄 𑀅𑀦𑀼𑀕𑁆𑀕𑀡𑁆𑀳𑀫𑀸𑀦𑁄 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑁋 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄.

𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀯𑀺𑀯𑁂𑀓𑀥𑀫𑁆𑀫𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀬𑀣𑀸𑀳𑀁 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄𑀢𑀺 𑀬𑀣𑀸 𑀆𑀓𑀸𑀲𑁄 𑀦 𑀧𑀚𑁆𑀚𑀢𑀺 𑀦 𑀕𑀡𑁆𑀳𑀢𑀺 [𑀦𑀢𑁆𑀣𑀺… 𑀲𑁆𑀬𑀸. … 𑀧𑁄𑀢𑁆𑀣𑀓𑁂] 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺, 𑀏𑀯𑀁 𑀅𑀧𑀚𑁆𑀚𑀫𑀸𑀦𑁄 𑀅𑀕𑀡𑁆𑀳𑀫𑀸𑀦𑁄 𑀅𑀩𑀚𑁆𑀛𑀫𑀸𑀦𑁄 𑀅𑀧𑀮𑀺𑀩𑀚𑁆𑀛𑀫𑀸𑀦𑁄𑀢𑀺 𑁋 𑀏𑀯𑀫𑁆𑀧𑀺 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄. 𑀬𑀣𑀸 𑀆𑀓𑀸𑀲𑁄 𑀦 𑀭𑀚𑁆𑀚𑀢𑀺 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 [𑀳𑀮𑀺𑀤𑁆𑀤𑁂𑀦 (𑀲𑁆𑀬𑀸.)] 𑀯𑀸 𑀦𑀻𑀮𑀺𑀬𑀸 [𑀦𑀻𑀮𑁂𑀦 (𑀲𑁆𑀬𑀸.)] 𑀯𑀸 𑀫𑀜𑁆𑀚𑁂𑀝𑁆𑀞𑀸𑀬 𑀯𑀸 𑀏𑀯𑀁 𑀅𑀭𑀚𑁆𑀚𑀫𑀸𑀦𑁄 𑀅𑀤𑀼𑀲𑁆𑀲𑀫𑀸𑀦𑁄 𑀅𑀫𑀼𑀬𑁆𑀳𑀫𑀸𑀦𑁄 𑀅𑀓𑀺𑀮𑀺𑀲𑁆𑀲𑀫𑀸𑀦𑁄𑀢𑀺 [𑀅𑀓𑀺𑀮𑀺𑀬𑀫𑀸𑀦𑁄 (𑀲𑁆𑀬𑀸.)] 𑁋 𑀏𑀯𑀫𑁆𑀧𑀺 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄. 𑀬𑀣𑀸 𑀆𑀓𑀸𑀲𑁄 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀮𑀻𑀬𑀢𑀺 [𑀧𑀢𑀺𑀝𑁆𑀞𑀺𑀬𑀢𑀺 (𑀓.)] 𑀦 𑀧𑀝𑀺𑀳𑀜𑁆𑀜𑀢𑀺, 𑀏𑀯𑀁 𑀅𑀓𑀼𑀧𑁆𑀧𑀫𑀸𑀦𑁄 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄 𑀅𑀧𑁆𑀧𑀢𑀺𑀮𑀻𑀬𑀫𑀸𑀦𑁄 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑁄 𑀅𑀧𑁆𑀧𑀝𑀺𑀳𑀢𑀫𑀸𑀦𑁄𑀢𑀺 𑁋 𑀏𑀯𑀫𑁆𑀧𑀺 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄.

𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀦𑁆𑀢𑀺. 𑀇𑀥𑁂𑀯 𑀲𑀦𑁆𑀢𑁄𑀢𑀺 𑀇𑀥𑁂𑀯 𑀲𑀦𑁆𑀢𑁄 𑀇𑀥𑁂𑀯 𑀲𑀫𑀸𑀦𑁄 𑀇𑀥𑁂𑀯 𑀦𑀺𑀲𑀺𑀦𑁆𑀦𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑀫𑀸𑀦𑁄 𑀇𑀫𑀺𑀲𑁆𑀲𑀸𑀬𑁂𑀯 𑀧𑀭𑀺𑀲𑀸𑀬 𑀦𑀺𑀲𑀺𑀦𑁆𑀦𑁄 𑀲𑀫𑀸𑀦𑁄𑀢𑀺, 𑀏𑀯𑀫𑁆𑀧𑀺 𑁋 𑀇𑀥𑁂𑀯 𑀲𑀦𑁆𑀢𑁄. 𑀅𑀣 𑀯𑀸, 𑀇𑀥𑁂𑀯 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄𑀢𑀺, 𑀏𑀯𑀫𑁆𑀧𑀺 𑁋 𑀇𑀥𑁂𑀯 𑀲𑀦𑁆𑀢𑁄. 𑀅𑀲𑀺𑀢𑁄𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄… 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄, 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄, 𑀖𑀸𑀦𑀁 𑀅𑀦𑀺𑀲𑁆𑀲𑀺𑀢𑁄, 𑀚𑀺𑀯𑁆𑀳𑀁 𑀅𑀦𑀺𑀲𑁆𑀲𑀺𑀢𑁄, 𑀓𑀸𑀬𑀁 𑀅𑀦𑀺𑀲𑁆𑀲𑀺𑀢𑁄, 𑀫𑀦𑀁 𑀅𑀦𑀺𑀲𑁆𑀲𑀺𑀢𑁄, 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂 … 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀥𑀫𑁆𑀫𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 [𑀤𑀺𑀝𑁆𑀞𑀁, 𑀲𑀼𑀢𑀁, 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀁, 𑀲𑀩𑁆𑀩𑁂. 𑀫𑀳𑀸𑀦𑀺. 𑁪𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀥𑀫𑁆𑀫𑁂 𑀅𑀲𑀺𑀢𑁄 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 [𑀦𑀺𑀲𑁆𑀲𑀝𑁆𑀞𑁄 (𑀲𑁆𑀬𑀸.)] 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸. 𑀘𑀭𑁂𑀬𑁆𑀬𑀦𑁆𑀢𑀺 𑀘𑀭𑁂𑀬𑁆𑀬𑀁 𑀯𑀺𑀳𑀭𑁂𑀬𑁆𑀬𑀁 𑀇𑀭𑀺𑀬𑁂𑀬𑁆𑀬𑀁 𑀯𑀢𑁆𑀢𑁂𑀬𑁆𑀬𑀁 𑀬𑀧𑁂𑀬𑁆𑀬𑀁 𑀬𑀸𑀧𑁂𑀬𑁆𑀬𑀦𑁆𑀢𑀺 𑁋 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄, 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀬𑀣𑀸𑀳𑀁 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄, 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬’’𑀦𑁆𑀢𑀺.

𑁩𑁫.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀦𑁆𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀺𑀁, 𑀤𑁄𑀲𑀲𑁆𑀲 𑀲𑀦𑁆𑀢𑀺𑀁, 𑀫𑁄𑀳𑀲𑁆𑀲 𑀲𑀦𑁆𑀢𑀺𑀁, 𑀓𑁄𑀥𑀲𑁆𑀲 𑀲𑀦𑁆𑀢𑀺𑀁, 𑀉𑀧𑀦𑀸𑀳𑀲𑁆𑀲…𑀧𑁂… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁… 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀺𑀁 𑀉𑀧𑀲𑀦𑁆𑀢𑀺𑀁 𑀯𑀽𑀧𑀲𑀦𑁆𑀢𑀺𑀁 𑀦𑀺𑀩𑁆𑀩𑀼𑀢𑀺𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀧𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺 𑁋 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁.

𑀥𑁄𑀢𑀓𑀸𑀢𑀺 𑀪𑀕𑀯𑀸𑀢𑀺. 𑀥𑁄𑀢𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀥𑁄𑀢𑀓𑀸𑀢𑀺 𑀪𑀕𑀯𑀸.

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀦𑁆𑀢𑀺. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁂 𑀢𑀼𑀮𑀺𑀢𑁂 𑀥𑀫𑁆𑀫𑁂 𑀢𑀻𑀭𑀺𑀢𑁂 𑀥𑀫𑁆𑀫𑁂 𑀯𑀺𑀪𑀽𑀢𑁂 𑀥𑀫𑁆𑀫𑁂 𑀯𑀺𑀪𑀸𑀯𑀺𑀢𑁂 𑀥𑀫𑁆𑀫𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺…𑀧𑁂… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁂 𑀢𑀼𑀮𑀺𑀢𑁂 𑀥𑀫𑁆𑀫𑁂 𑀢𑀻𑀭𑀺𑀢𑁂 𑀥𑀫𑁆𑀫𑁂 𑀯𑀺𑀪𑀸𑀯𑀺𑀢𑁂 𑀥𑀫𑁆𑀫𑁂 𑀯𑀺𑀪𑀽𑀢𑁂 𑀥𑀫𑁆𑀫𑁂𑀢𑀺, 𑀏𑀯𑀫𑁆𑀧𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂…𑀧𑁂…. 𑀅𑀣 𑀯𑀸, 𑀤𑀼𑀓𑁆𑀔𑁂 𑀤𑀺𑀝𑁆𑀞𑁂 𑀤𑀼𑀓𑁆𑀔𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀲𑀫𑀼𑀤𑀬𑁂 𑀤𑀺𑀝𑁆𑀞𑁂 𑀲𑀫𑀼𑀤𑀬𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀫𑀕𑁆𑀕𑁂 𑀤𑀺𑀝𑁆𑀞𑁂 𑀫𑀕𑁆𑀕𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀦𑀺𑀭𑁄𑀥𑁂 𑀤𑀺𑀝𑁆𑀞𑁂 𑀦𑀺𑀭𑁄𑀥𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺, 𑀏𑀯𑀫𑁆𑀧𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂…𑀧𑁂…. 𑀅𑀣 𑀯𑀸, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 [𑀑𑀧𑀦𑀬𑀺𑀓𑀁 (𑀲𑁆𑀬𑀸. 𑀓.)] 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻𑀢𑀺, 𑀏𑀯𑀫𑁆𑀧𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂. 𑀅𑀦𑀻𑀢𑀺𑀳𑀦𑁆𑀢𑀺 𑀦 𑀇𑀢𑀺𑀳𑀻𑀢𑀺𑀳𑀁 𑀦 𑀇𑀢𑀺𑀓𑀺𑀭𑀸𑀬 𑀦 𑀧𑀭𑀫𑁆𑀧𑀭𑀸𑀬 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬 𑀦 𑀢𑀓𑁆𑀓𑀳𑁂𑀢𑀼 𑀦 𑀦𑀬𑀳𑁂𑀢𑀼 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁, 𑀢𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁩𑁬.

𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺. 𑀢𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀦𑀦𑁆𑀤𑀸𑀫𑀺 𑀅𑀪𑀺𑀦𑀦𑁆𑀤𑀸𑀫𑀺 𑀫𑁄𑀤𑀸𑀫𑀺 𑀅𑀦𑀼𑀫𑁄𑀤𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀻𑀢𑀺 𑁋 𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺.

𑀫𑀳𑁂𑀲𑀺𑀲𑀦𑁆𑀢𑀺𑀫𑀼𑀢𑁆𑀢𑀫𑀦𑁆𑀢𑀺. 𑀫𑀳𑁂𑀲𑀻𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸? 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀦𑁆𑀢𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀺. 𑀲𑀦𑁆𑀢𑀺𑀫𑀼𑀢𑁆𑀢𑀫𑀦𑁆𑀢𑀺 𑀲𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀉𑀢𑁆𑀢𑀫𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑁋 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸…𑀧𑁂… ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄…𑀧𑁂… 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺. 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬𑀁 𑀉𑀢𑁆𑀢𑀭𑁂𑀬𑁆𑀬𑀁…𑀧𑁂… 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁩𑁭.

𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂, 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳𑀁.

𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺 𑀆𑀚𑀸𑀦𑀸𑀲𑀺 𑀧𑀝𑀺𑀯𑀺𑀚𑀸𑀦𑀸𑀲𑀺 𑀧𑀝𑀺𑀯𑀺𑀚𑁆𑀛𑀲𑀻𑀢𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺. 𑀥𑁄𑀢𑀓𑀸𑀢𑀺 𑀪𑀕𑀯𑀸𑀢𑀺. 𑀥𑁄𑀢𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀥𑁄𑀢𑀓𑀸𑀢𑀺 𑀪𑀕𑀯𑀸.

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺. 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁; 𑀅𑀥𑁄𑀢𑀺 𑀅𑀢𑀻𑀢𑀁; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑁄; 𑀅𑀥𑁄𑀢𑀺 𑀅𑀧𑀸𑀬𑀮𑁄𑀓𑁄; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀅𑀣 𑀯𑀸, 𑀉𑀤𑁆𑀥𑀦𑁆𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸; 𑀅𑀥𑁄𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀉𑀤𑁆𑀥𑀦𑁆𑀢𑀺 𑀅𑀭𑀽𑀧𑀥𑀸𑀢𑀼; 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀭𑀽𑀧𑀥𑀸𑀢𑀼. 𑀉𑀤𑁆𑀥𑀦𑁆𑀢𑀺 𑀲𑀼𑀔𑀸 𑀯𑁂𑀤𑀦𑀸; 𑀅𑀥𑁄𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸; 𑀅𑀥𑁄𑀢𑀺 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀯𑁂𑀫𑀚𑁆𑀛𑁂𑀢𑀺 𑁋 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂.

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂𑀢𑀺 𑀲𑀗𑁆𑀕𑁄 𑀏𑀲𑁄 𑀮𑀕𑁆𑀕𑀦𑀁 𑀏𑀢𑀁 𑀩𑀦𑁆𑀥𑀦𑀁 𑀏𑀢𑀁 𑀧𑀮𑀺𑀩𑁄𑀥𑁄 𑀏𑀲𑁄𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂.

𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀪𑀯𑀸𑀪𑀯𑀸𑀬𑀸𑀢𑀺 𑀪𑀯𑀸𑀪𑀯𑀸𑀬 𑀓𑀫𑁆𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀓𑀸𑀫𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀓𑀸𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀅𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀅𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑀸𑀬, 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀢𑀡𑁆𑀳𑀁 𑀫𑀸𑀓𑀸𑀲𑀺 𑀫𑀸 𑀚𑀦𑁂𑀲𑀺 𑀫𑀸 𑀲𑀜𑁆𑀚𑀦𑁂𑀲𑀺 𑀫𑀸 𑀦𑀺𑀩𑁆𑀩𑀢𑁆𑀢𑁂𑀲𑀺 𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀺, 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂, 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳’’𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.

𑁬. 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁩𑁮.

𑀏𑀓𑁄 𑀅𑀳𑀁 𑀲𑀓𑁆𑀓 𑀫𑀳𑀦𑁆𑀢𑀫𑁄𑀖𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄]

𑀅𑀦𑀺𑀲𑁆𑀲𑀺𑀢𑁄 𑀦𑁄 𑀯𑀺𑀲𑀳𑀸𑀫𑀺 𑀢𑀸𑀭𑀺𑀢𑀼𑀁;

𑀆𑀭𑀫𑁆𑀫𑀡𑀁 [𑀆𑀭𑀫𑀡𑀁 (𑀓.)] 𑀩𑁆𑀭𑀽𑀳𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀬𑀁 𑀦𑀺𑀲𑁆𑀲𑀺𑀢𑁄 𑀑𑀖𑀫𑀺𑀫𑀁 𑀢𑀭𑁂𑀬𑁆𑀬𑀁.

𑀏𑀓𑁄 𑀅𑀳𑀁 𑀲𑀓𑁆𑀓 𑀫𑀳𑀦𑁆𑀢𑀫𑁄𑀖𑀦𑁆𑀢𑀺. 𑀏𑀓𑁄𑀢𑀺 𑀧𑀼𑀕𑁆𑀕𑀮𑁄 𑀯𑀸 𑀫𑁂 𑀤𑀼𑀢𑀺𑀬𑁄 𑀦𑀢𑁆𑀣𑀺, 𑀥𑀫𑁆𑀫𑁄 𑀯𑀸 𑀫𑁂 𑀤𑀼𑀢𑀺𑀬𑁄 𑀦𑀢𑁆𑀣𑀺, 𑀬𑀁 𑀯𑀸 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀯𑀸 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬𑀁 𑀉𑀢𑁆𑀢𑀭𑁂𑀬𑁆𑀬𑀁 𑀧𑀢𑀭𑁂𑀬𑁆𑀬𑀁 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀁 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺. 𑀲𑀓𑁆𑀓𑀸𑀢𑀺 𑀲𑀓𑁆𑀓𑁄. 𑀪𑀕𑀯𑀸 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁 𑀲𑀢𑀺𑀧𑀝𑁆𑀞𑀸𑀦𑀥𑀦𑀁…𑀧𑁂… 𑀦𑀺𑀩𑁆𑀩𑀸𑀦𑀥𑀦𑀁. 𑀇𑀫𑁂𑀳𑀺 𑀅𑀦𑁂𑀓𑁂𑀳𑀺 𑀥𑀦𑀭𑀢𑀦𑁂𑀳𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀲𑀓𑁆𑀓𑁄 𑀧𑀳𑀼 𑀯𑀺𑀲𑀯𑀻 𑀅𑀮𑀫𑀢𑁆𑀢𑁄 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄𑀢𑀺 𑁋 𑀏𑀓𑁄 𑀅𑀳𑀁 𑀲𑀓𑁆𑀓 𑀫𑀳𑀦𑁆𑀢𑀫𑁄𑀖𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀉𑀧𑀲𑀻𑀯𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄.

𑀅𑀦𑀺𑀲𑁆𑀲𑀺𑀢𑁄 𑀦𑁄 𑀯𑀺𑀲𑀳𑀸𑀫𑀺 𑀢𑀸𑀭𑀺𑀢𑀼𑀦𑁆𑀢𑀺. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀧𑀼𑀕𑁆𑀕𑀮𑀁 𑀯𑀸 𑀅𑀦𑀺𑀲𑁆𑀲𑀺𑀢𑁄 𑀥𑀫𑁆𑀫𑀁 𑀯𑀸 𑀅𑀦𑀺𑀲𑁆𑀲𑀺𑀢𑁄 𑀦𑁄 𑀯𑀺𑀲𑀳𑀸𑀫𑀺 𑀦 𑀉𑀲𑁆𑀲𑀳𑀸𑀫𑀺 𑀦 𑀲𑀓𑁆𑀓𑁄𑀫𑀺 𑀦 𑀧𑀝𑀺𑀩𑀮𑁄 𑀫𑀳𑀦𑁆𑀢𑀁 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑀺𑀢𑀼𑀁 𑀉𑀢𑁆𑀢𑀭𑀺𑀢𑀼𑀁 𑀧𑀢𑀭𑀺𑀢𑀼𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀯𑀻𑀢𑀺𑀯𑀢𑁆𑀢𑀺𑀢𑀼𑀦𑁆𑀢𑀺 𑁋 𑀅𑀦𑀺𑀲𑁆𑀲𑀺𑀢𑁄 𑀦𑁄 𑀯𑀺𑀲𑀳𑀸𑀫𑀺 𑀢𑀸𑀭𑀺𑀢𑀼𑀁.

𑀆𑀭𑀫𑁆𑀫𑀡𑀁 𑀩𑁆𑀭𑀽𑀳𑀺 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀆𑀭𑀫𑁆𑀫𑀡𑀁 𑀆𑀮𑀫𑁆𑀩𑀡𑀁 𑀦𑀺𑀲𑁆𑀲𑀬𑀁 𑀉𑀧𑀦𑀺𑀲𑁆𑀲𑀬𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.

𑀦 𑀢𑀲𑁆𑀲 𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽𑀢𑀺.

𑀆𑀭𑀫𑁆𑀫𑀡𑀁 𑀩𑁆𑀭𑀽𑀳𑀺 𑀲𑀫𑀦𑁆𑀢𑀘𑀓𑁆𑀔𑀼.

𑀬𑀁 𑀦𑀺𑀲𑁆𑀲𑀺𑀢𑁄 𑀑𑀖𑀫𑀺𑀫𑀁 𑀢𑀭𑁂𑀬𑁆𑀬𑀦𑁆𑀢𑀺. 𑀬𑀁 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀥𑀫𑁆𑀫𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀫𑀳𑀦𑁆𑀢𑀁 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬𑀁 𑀉𑀢𑁆𑀢𑀭𑁂𑀬𑁆𑀬𑀁 𑀧𑀢𑀭𑁂𑀬𑁆𑀬𑀁 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀁 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑁄 𑀑𑀖𑀫𑀺𑀫𑀁 𑀢𑀭𑁂𑀬𑁆𑀬𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀏𑀓𑁄 𑀅𑀳𑀁 𑀲𑀓𑁆𑀓 𑀫𑀳𑀦𑁆𑀢𑀫𑁄𑀖𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄]

𑀅𑀦𑀺𑀲𑁆𑀲𑀺𑀢𑁄 𑀦𑁄 𑀯𑀺𑀲𑀳𑀸𑀫𑀺 𑀢𑀸𑀭𑀺𑀢𑀼𑀁;

𑀆𑀭𑀫𑁆𑀫𑀡𑀁 𑀩𑁆𑀭𑀽𑀳𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀬𑀁 𑀦𑀺𑀲𑁆𑀲𑀺𑀢𑁄 𑀑𑀖𑀫𑀺𑀫𑀁 𑀢𑀭𑁂𑀬𑁆𑀬’’𑀦𑁆𑀢𑀺.

𑁩𑁯.

𑀆𑀓𑀺𑀜𑁆𑀘𑀜𑁆𑀜𑀁 𑀧𑁂𑀓𑁆𑀔𑀫𑀸𑀦𑁄 𑀲𑀢𑀺𑀫𑀸, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬 𑀢𑀭𑀲𑁆𑀲𑀼 𑀑𑀖𑀁;

𑀓𑀸𑀫𑁂 𑀧𑀳𑀸𑀬 𑀯𑀺𑀭𑀢𑁄 𑀓𑀣𑀸𑀳𑀺, 𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲 [𑀭𑀢𑁆𑀢𑀫𑀳𑀸𑀪𑀺𑀧𑀲𑁆𑀲 (𑀲𑁆𑀬𑀸.) 𑀧𑀲𑁆𑀲 𑀅𑀪𑀺𑀥𑀸𑀦𑀕𑀦𑁆𑀣𑁂 𑀅𑀩𑁆𑀬𑀬𑀯𑀕𑁆𑀕𑁂] .

𑀆𑀓𑀺𑀜𑁆𑀘𑀜𑁆𑀜𑀁 𑀧𑁂𑀓𑁆𑀔𑀫𑀸𑀦𑁄 𑀲𑀢𑀺𑀫𑀸𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀧𑀓𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀮𑀸𑀪𑀻𑀬𑁂𑀯 𑀦𑀺𑀲𑁆𑀲𑀬𑀁 𑀦 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀫𑁂 𑀦𑀺𑀲𑁆𑀲𑀬𑁄’’𑀢𑀺. 𑀢𑀲𑁆𑀲 𑀪𑀕𑀯𑀸 𑀦𑀺𑀲𑁆𑀲𑀬𑀜𑁆𑀘 𑀆𑀘𑀺𑀓𑁆𑀔𑀢𑀺 𑀉𑀢𑁆𑀢𑀭𑀺𑀜𑁆𑀘 𑀦𑀺𑀬𑁆𑀬𑀸𑀦𑀧𑀣𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣 𑀚𑀸𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀢𑁄 𑀧𑁂𑀓𑁆𑀔𑀫𑀸𑀦𑁄, 𑀤𑀼𑀓𑁆𑀔𑀢𑁄…𑀧𑁂… 𑀭𑁄𑀕𑀢𑁄… 𑀕𑀡𑁆𑀟𑀢𑁄… 𑀲𑀮𑁆𑀮𑀢𑁄… 𑀅𑀖𑀢𑁄… 𑀆𑀩𑀸𑀥𑀢𑁄… 𑀧𑀭𑀢𑁄… 𑀧𑀮𑁄𑀓𑀢𑁄… 𑀈𑀢𑀺𑀢𑁄… 𑀉𑀧𑀤𑁆𑀤𑀯𑀢𑁄… 𑀪𑀬𑀢𑁄… 𑀉𑀧𑀲𑀕𑁆𑀕𑀢𑁄… 𑀘𑀮𑀢𑁄… 𑀧𑀪𑀗𑁆𑀕𑀼𑀢𑁄… 𑀅𑀤𑁆𑀥𑀼𑀯𑀢𑁄… 𑀅𑀢𑀸𑀡𑀢𑁄… 𑀅𑀮𑁂𑀡𑀢𑁄… 𑀅𑀲𑀭𑀡𑀢𑁄… 𑀅𑀲𑀭𑀡𑀻𑀪𑀽𑀢𑀢𑁄… 𑀭𑀺𑀢𑁆𑀢𑀢𑁄… 𑀢𑀼𑀘𑁆𑀙𑀢𑁄… 𑀲𑀼𑀜𑁆𑀜𑀢𑁄… 𑀅𑀦𑀢𑁆𑀢𑀢𑁄… 𑀆𑀤𑀻𑀦𑀯𑀢𑁄… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄… 𑀅𑀲𑀸𑀭𑀓𑀢𑁄… 𑀅𑀖𑀫𑀽𑀮𑀢𑁄… 𑀪𑀯𑀢𑁄… 𑀯𑀺𑀪𑀯𑀢𑁄… 𑀲𑀸𑀲𑀯𑀢𑁄… 𑀲𑀗𑁆𑀔𑀢𑀢𑁄… 𑀫𑀸𑀭𑀸𑀫𑀺𑀲𑀢𑁄… 𑀚𑀸𑀢𑀺𑀥𑀫𑁆𑀫𑀢𑁄… 𑀚𑀭𑀸𑀥𑀫𑁆𑀫𑀢𑁄… 𑀩𑁆𑀬𑀸𑀥𑀺𑀥𑀫𑁆𑀫𑀢𑁄… 𑀫𑀭𑀡𑀥𑀫𑁆𑀫𑀢𑁄… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀢𑁄 … 𑀲𑀫𑀼𑀤𑀬𑀥𑀫𑁆𑀫𑀢𑁄… 𑀅𑀢𑁆𑀣𑀗𑁆𑀕𑀫𑀢𑁄… 𑀅𑀲𑁆𑀲𑀸𑀤𑀢𑁄… 𑀆𑀤𑀻𑀦𑀯𑀢𑁄… 𑀦𑀺𑀲𑁆𑀲𑀭𑀡𑀢𑁄 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄.

𑀲𑀢𑀺𑀫𑀸𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀳𑁄𑀢𑀺…𑀧𑁂… 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀢𑀺𑀫𑀸𑀢𑀺 𑁋 𑀆𑀓𑀺𑀜𑁆𑀘𑀜𑁆𑀜𑀁 𑀧𑁂𑀓𑁆𑀔𑀫𑀸𑀦𑁄 𑀲𑀢𑀺𑀫𑀸.

𑀉𑀧𑀲𑀻𑀯𑀸𑀢𑀺 𑀪𑀕𑀯𑀸𑀢𑀺. 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸.

𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬 𑀢𑀭𑀲𑁆𑀲𑀼 𑀑𑀖𑀦𑁆𑀢𑀺 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺? 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀺, 𑀯𑀺𑀪𑀸𑀯𑁂𑀢𑀺, 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑀺. 𑀢𑀁𑀓𑀸𑀭𑀡𑀸 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑀦𑀺𑀲𑁆𑀲𑀸𑀬 𑀆𑀮𑀫𑁆𑀩𑀡𑀁 𑀓𑀭𑀺𑀢𑁆𑀯𑀸 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑀲𑁆𑀲𑀼 𑀉𑀢𑁆𑀢𑀭𑀲𑁆𑀲𑀼 𑀧𑀢𑀭𑀲𑁆𑀲𑀼 𑀲𑀫𑀢𑀺𑀓𑁆𑀓𑀫𑀲𑁆𑀲𑀼 𑀯𑀻𑀢𑀺𑀯𑀢𑁆𑀢𑀲𑁆𑀲𑀽𑀢𑀺 𑁋 𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬 𑀢𑀭𑀲𑁆𑀲𑀼 𑀑𑀖𑀁.

𑀓𑀸𑀫𑁂 𑀧𑀳𑀸𑀬 𑀯𑀺𑀭𑀢𑁄 𑀓𑀣𑀸𑀳𑀻𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸 …𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑁂 𑀧𑀳𑀸𑀬𑀸𑀢𑀺 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀓𑀸𑀫𑁂 𑀧𑀳𑀸𑀬. 𑀯𑀺𑀭𑀢𑁄 𑀓𑀣𑀸𑀳𑀻𑀢𑀺 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀤𑀼𑀓𑁆𑀔𑁂 𑀓𑀗𑁆𑀔𑀸…𑀧𑁂… 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄 𑀓𑀣𑀁𑀓𑀣𑀸𑀬 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀯𑀺𑀭𑀢𑁄 𑀓𑀣𑀸𑀳𑀺…𑀧𑁂… 𑀅𑀣 𑀯𑀸, 𑀤𑁆𑀯𑀢𑁆𑀢𑀺𑀁𑀲𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑀏𑀯𑀫𑁆𑀧𑀺 𑀯𑀺𑀭𑀢𑁄 𑀓𑀣𑀸𑀳𑀻𑀢𑀺 𑁋 𑀓𑀸𑀫𑁂 𑀧𑀳𑀸𑀬 𑀯𑀺𑀭𑀢𑁄 𑀓𑀣𑀸𑀳𑀺.

𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲𑀸𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀦𑀢𑁆𑀢𑀁 𑀯𑀼𑀘𑁆𑀘𑀢𑀺 𑀭𑀢𑁆𑀢𑀺. 𑀅𑀳𑁄𑀢𑀺 𑀤𑀺𑀯𑀲𑁄. 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀢𑀡𑁆𑀳𑀓𑁆𑀔𑀬𑀁 𑀭𑀸𑀕𑀓𑁆𑀔𑀬𑀁 𑀤𑁄𑀲𑀓𑁆𑀔𑀬𑀁 𑀫𑁄𑀳𑀓𑁆𑀔𑀬𑀁 𑀕𑀢𑀺𑀓𑁆𑀔𑀬𑀁 𑀉𑀧𑀧𑀢𑁆𑀢𑀺𑀓𑁆𑀔𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀬𑀁 𑀪𑀯𑀓𑁆𑀔𑀬𑀁 𑀲𑀁𑀲𑀸𑀭𑀓𑁆𑀔𑀬𑀁 𑀯𑀝𑁆𑀝𑀓𑁆𑀔𑀬𑀁 𑀧𑀲𑁆𑀲 𑀅𑀪𑀺𑀧𑀲𑁆𑀲 𑀤𑀓𑁆𑀔 𑀑𑀮𑁄𑀓𑀬 𑀦𑀺𑀚𑁆𑀛𑀸𑀬 𑀉𑀧𑀧𑀭𑀺𑀓𑁆𑀔𑀸𑀢𑀺 𑁋 𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀆𑀓𑀺𑀜𑁆𑀘𑀜𑁆𑀜𑀁 𑀧𑁂𑀓𑁆𑀔𑀫𑀸𑀦𑁄 𑀲𑀢𑀺𑀫𑀸, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀦𑀢𑁆𑀣𑀻𑀢𑀺 𑀦𑀺𑀲𑁆𑀲𑀸𑀬 𑀢𑀭𑀲𑁆𑀲𑀼 𑀑𑀖𑀁;

𑀓𑀸𑀫𑁂 𑀧𑀳𑀸𑀬 𑀯𑀺𑀭𑀢𑁄 𑀓𑀣𑀸𑀳𑀺, 𑀢𑀡𑁆𑀳𑀓𑁆𑀔𑀬𑀁 𑀦𑀢𑁆𑀢𑀫𑀳𑀸𑀪𑀺𑀧𑀲𑁆𑀲𑀸’’𑀢𑀺.

𑁪𑁦.

𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄]

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁;

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄, 𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻.

𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑀲𑀩𑁆𑀩𑁂𑀲𑀽𑀢𑀺. 𑀓𑀸𑀫𑁂𑀲𑀽𑀢𑀺 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄𑀢𑀺. 𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀯𑀺𑀓𑁆𑀔𑀫𑁆𑀪𑀦𑀢𑁄𑀢𑀺 𑁋 𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄.

𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀉𑀧𑀲𑀻𑀯𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄.

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀦𑁆𑀢𑀺. 𑀳𑁂𑀝𑁆𑀞𑀺𑀫𑀸 𑀙 𑀲𑀫𑀸𑀧𑀢𑁆𑀢𑀺𑀬𑁄 𑀳𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀺𑀢𑁄 𑀅𑀮𑁆𑀮𑀻𑀦𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 𑁋 𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁.

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄. 𑀢𑀸𑀲𑀁 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀺𑀫𑁄𑀓𑁆𑀔𑁄 [𑀯𑀺𑀫𑁄𑀓𑁆𑀔𑀸 (𑀓.) 𑀏𑀯𑀫𑀜𑁆𑀜𑁂𑀲𑀼 𑀧𑀤𑁂𑀲𑀼 𑀩𑀳𑀼𑀯𑀘𑀦𑁂𑀦] 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀯𑀺𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘, 𑀧𑀭𑀫𑁂 𑀅𑀕𑁆𑀕𑁂 𑀲𑁂𑀝𑁆𑀞𑁂 𑀯𑀺𑀲𑁂𑀝𑁆𑀞𑁂 𑀧𑀸𑀫𑁄𑀓𑁆𑀔𑁂 𑀉𑀢𑁆𑀢𑀫𑁂 𑀧𑀯𑀭𑁂 𑀅𑀥𑀺𑀫𑀼𑀢𑁆𑀢𑀺𑀯𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀢𑁆𑀢𑁄 𑀢𑀢𑁆𑀭𑀸𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄.

𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻𑀢𑀺. 𑀢𑀺𑀝𑁆𑀞𑁂 𑀦𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸, ‘‘𑀏𑀯𑀁 𑀦𑀼 𑀔𑁄, 𑀦𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀢𑀺𑀝𑁆𑀞𑁂 𑀦𑀼. 𑀢𑀢𑁆𑀣𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂. 𑀅𑀦𑀸𑀦𑀼𑀬𑀸𑀬𑀻𑀢𑀺 𑀅𑀦𑀸𑀦𑀼𑀬𑀸𑀬𑀻 𑀅𑀯𑀺𑀘𑁆𑀘𑀫𑀸𑀦𑁄 [𑀅𑀯𑁂𑀥𑀫𑀸𑀦𑁄 (𑀲𑁆𑀬𑀸.)] 𑀅𑀯𑀺𑀕𑀘𑁆𑀙𑀫𑀸𑀦𑁄 𑀅𑀦𑀦𑁆𑀢𑀭𑀥𑀸𑀬𑀫𑀸𑀦𑁄 𑀅𑀧𑀭𑀺𑀳𑀸𑀬𑀫𑀸𑀦𑁄…𑀧𑁂…. 𑀅𑀣 𑀯𑀸, 𑀅𑀭𑀚𑁆𑀚𑀫𑀸𑀦𑁄 𑀅𑀤𑀼𑀲𑁆𑀲𑀫𑀸𑀦𑁄 𑀅𑀫𑀼𑀬𑁆𑀳𑀫𑀸𑀦𑁄 𑀅𑀓𑀺𑀮𑀺𑀲𑁆𑀲𑀫𑀸𑀦𑁄𑀢𑀺 𑁋 𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀧𑀲𑀻𑀯𑁄]

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁;

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄, 𑀢𑀺𑀝𑁆𑀞𑁂 𑀦𑀼 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻’’𑀢𑀺.

𑁪𑁧.

𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁;

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄, 𑀢𑀺𑀝𑁆𑀞𑁂𑀬𑁆𑀬 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻.

𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑀲𑀩𑁆𑀩𑁂𑀲𑀽𑀢𑀺. 𑀓𑀸𑀫𑁂𑀲𑀽𑀢𑀺 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄𑀢𑀺 𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀯𑀺𑀓𑁆𑀔𑀫𑁆𑀪𑀦𑀢𑁄𑀢𑀺 𑁋 𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄.

𑀉𑀧𑀲𑀻𑀯𑀸𑀢𑀺 𑀪𑀕𑀯𑀸𑀢𑀺. 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸.

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀦𑁆𑀢𑀺. 𑀳𑁂𑀝𑁆𑀞𑀺𑀫𑀸 𑀙 𑀲𑀫𑀸𑀧𑀢𑁆𑀢𑀺𑀬𑁄 𑀳𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀺𑀢𑁄 𑀅𑀮𑁆𑀮𑀻𑀦𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 𑁋 𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁.

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄. 𑀢𑀸𑀲𑀁 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀯𑀺𑀫𑁄𑀓𑁆𑀔𑁄 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀯𑀺𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘, 𑀧𑀭𑀫𑁂 𑀅𑀕𑁆𑀕𑁂 𑀲𑁂𑀝𑁆𑀞𑁂 𑀯𑀺𑀲𑁂𑀝𑁆𑀞𑁂 𑀧𑀸𑀫𑁄𑀓𑁆𑀔𑁂 𑀉𑀢𑁆𑀢𑀫𑁂 𑀧𑀯𑀭𑁂 𑀅𑀥𑀺𑀫𑀼𑀢𑁆𑀢𑀺𑀯𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀢𑁆𑀢𑁄 𑀢𑀢𑁆𑀭𑀸𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀫𑀼𑀢𑁆𑀢𑁄…𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄.

𑀢𑀺𑀝𑁆𑀞𑁂𑀬𑁆𑀬 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻𑀢𑀺. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀢𑀺𑀝𑁆𑀞𑁂𑀬𑁆𑀬 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺. 𑀢𑀢𑁆𑀣𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂. 𑀅𑀦𑀸𑀦𑀼𑀬𑀸𑀬𑀻𑀢𑀺 𑀅𑀦𑀸𑀦𑀼𑀬𑀸𑀬𑀻 𑀅𑀯𑀺𑀘𑁆𑀘𑀫𑀸𑀦𑁄 𑀅𑀯𑀺𑀕𑀘𑁆𑀙𑀫𑀸𑀦𑁄 𑀅𑀦𑀦𑁆𑀢𑀭𑀥𑀸𑀬𑀫𑀸𑀦𑁄 𑀅𑀧𑀭𑀺𑀳𑀸𑀬𑀫𑀸𑀦𑁄. 𑀅𑀣 𑀯𑀸, 𑀅𑀭𑀚𑁆𑀚𑀫𑀸𑀦𑁄 𑀅𑀤𑀼𑀲𑁆𑀲𑀫𑀸𑀦𑁄 𑀅𑀫𑀼𑀬𑁆𑀳𑀫𑀸𑀦𑁄 𑀅𑀓𑀺𑀮𑀺𑀲𑁆𑀲𑀫𑀸𑀦𑁄𑀢𑀺 𑁋 𑀢𑀺𑀝𑁆𑀞𑁂𑀬𑁆𑀬 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀬𑁄 𑀯𑀻𑀢𑀭𑀸𑀕𑁄, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀆𑀓𑀺𑀜𑁆𑀘𑀜𑁆𑀜𑀁 𑀦𑀺𑀲𑁆𑀲𑀺𑀢𑁄 𑀳𑀺𑀢𑁆𑀯𑀸 𑀫𑀜𑁆𑀜𑀁;

𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁂 𑀧𑀭𑀫𑁂𑀥𑀺𑀫𑀼𑀢𑁆𑀢𑁄, 𑀢𑀺𑀝𑁆𑀞𑁂𑀬𑁆𑀬 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻’’𑀢𑀺.

𑁪𑁨.

𑀢𑀺𑀝𑁆𑀞𑁂 𑀘𑁂 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻, 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀺 [𑀯𑀲𑁆𑀲𑀸𑀦𑀁 (𑀲𑁆𑀬𑀸. 𑀓.)] 𑀲𑀫𑀦𑁆𑀢𑀘𑀓𑁆𑀔𑀼;

𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺𑀲𑀺𑀬𑀸 𑀯𑀺𑀫𑀼𑀢𑁆𑀢𑁄, 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲.

𑀢𑀺𑀝𑁆𑀞𑁂 𑀘𑁂 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻𑀢𑀺 𑀲𑀘𑁂 𑀲𑁄 𑀢𑀺𑀝𑁆𑀞𑁂𑀬𑁆𑀬 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺. 𑀢𑀢𑁆𑀣𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂. 𑀅𑀦𑀸𑀦𑀼𑀬𑀸𑀬𑀻𑀢𑀺 𑀅𑀦𑀸𑀦𑀼𑀬𑀸𑀬𑀻 𑀅𑀯𑀺𑀘𑁆𑀘𑀫𑀸𑀦𑁄 𑀅𑀯𑀺𑀕𑀘𑁆𑀙𑀫𑀸𑀦𑁄 𑀅𑀦𑀦𑁆𑀢𑀭𑀥𑀸𑀬𑀫𑀸𑀦𑁄 𑀅𑀧𑀭𑀺𑀳𑀸𑀬𑀫𑀸𑀦𑁄. 𑀅𑀣 𑀯𑀸, 𑀅𑀭𑀚𑁆𑀚𑀫𑀸𑀦𑁄 𑀅𑀤𑀼𑀲𑁆𑀲𑀫𑀸𑀦𑁄 𑀅𑀫𑀼𑀬𑁆𑀳𑀫𑀸𑀦𑁄 𑀅𑀓𑀺𑀮𑀺𑀲𑁆𑀲𑀫𑀸𑀦𑁄𑀢𑀺 𑁋 𑀢𑀺𑀝𑁆𑀞𑁂 𑀘𑁂 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻.

𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀻𑀢𑀺 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 [𑀩𑀳𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 (𑀲𑁆𑀬𑀸.)] 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀓𑀧𑁆𑀧𑀸𑀦𑀺 𑀩𑀳𑀽𑀦𑀺 𑀓𑀧𑁆𑀧𑀲𑀢𑀸𑀦𑀺 𑀩𑀳𑀽𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁…𑀧𑁂… 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑁋 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼.

𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺𑀲𑀺𑀬𑀸 𑀯𑀺𑀫𑀼𑀢𑁆𑀢𑁄, 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺𑀪𑀸𑀯𑀫𑀦𑀼𑀧𑁆𑀧𑀢𑁆𑀢𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀢𑀺𑀝𑁆𑀞𑁂𑀬𑁆𑀬. 𑀅𑀣 𑀯𑀸, 𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀯𑁂𑀬𑁆𑀬 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀦𑀲𑁆𑀲𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬 𑀦 𑀪𑀯𑁂𑀬𑁆𑀬𑀸𑀢𑀺 𑀧𑀼𑀦𑀩𑁆𑀪𑀯𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀲𑁆𑀲𑀢𑀜𑁆𑀘 𑀉𑀘𑁆𑀙𑁂𑀤𑀜𑁆𑀘 𑀧𑀼𑀘𑁆𑀙𑀢𑀺. 𑀉𑀤𑀸𑀳𑀼 𑀢𑀢𑁆𑀣𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬. 𑀅𑀣 𑀯𑀸, 𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀯𑁂𑀬𑁆𑀬 𑀧𑀼𑀦 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀧𑀦𑁆𑀦𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀜𑁆𑀘 𑀧𑀼𑀘𑁆𑀙𑀢𑀺. 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 𑀢𑀣𑀸𑀯𑀺𑀥𑀲𑁆𑀲 𑀢𑀸𑀤𑀺𑀲𑀲𑁆𑀲 𑀢𑀲𑁆𑀲𑀡𑁆𑀞𑀺𑀢𑀲𑁆𑀲 𑀢𑀧𑁆𑀧𑀓𑀸𑀭𑀲𑁆𑀲 𑀢𑀧𑁆𑀧𑀝𑀺𑀪𑀸𑀕𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀧𑀦𑁆𑀦𑀲𑁆𑀲𑀸𑀢𑀺 𑁋 𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺𑀲𑀺𑀬𑀸 𑀯𑀺𑀫𑀼𑀢𑁆𑀢𑁄, 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑀺𑀝𑁆𑀞𑁂 𑀘𑁂 𑀲𑁄 𑀢𑀢𑁆𑀣 𑀅𑀦𑀸𑀦𑀼𑀬𑀸𑀬𑀻, 𑀧𑀽𑀕𑀫𑁆𑀧𑀺 𑀯𑀲𑁆𑀲𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼;

𑀢𑀢𑁆𑀣𑁂𑀯 𑀲𑁄 𑀲𑀻𑀢𑀺𑀲𑀺𑀬𑀸 𑀯𑀺𑀫𑀼𑀢𑁆𑀢𑁄, 𑀘𑀯𑁂𑀣 𑀯𑀺𑀜𑁆𑀜𑀸𑀡𑀁 𑀢𑀣𑀸𑀯𑀺𑀥𑀲𑁆𑀲𑀸’’𑀢𑀺.

𑁪𑁩.

𑀅𑀘𑁆𑀘𑀺 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄, 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁.

𑀅𑀘𑁆𑀘𑀺 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸𑀢𑀺 𑀅𑀘𑁆𑀘𑀺 𑀯𑀼𑀘𑁆𑀘𑀢𑀺 𑀚𑀸𑀮𑀲𑀺𑀔𑀸. 𑀯𑀸𑀢𑀸𑀢𑀺 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀸 𑀧𑀘𑁆𑀙𑀺𑀫𑀸 𑀯𑀸𑀢𑀸 𑀉𑀢𑁆𑀢𑀭𑀸 𑀯𑀸𑀢𑀸 𑀤𑀓𑁆𑀔𑀺𑀡𑀸 𑀯𑀸𑀢𑀸 𑀲𑀭𑀚𑀸 𑀯𑀸𑀢𑀸 𑀅𑀭𑀚𑀸 𑀯𑀸𑀢𑀸 𑀲𑀻𑀢𑀸 𑀯𑀸𑀢𑀸 𑀉𑀡𑁆𑀳𑀸 𑀯𑀸𑀢𑀸 𑀧𑀭𑀺𑀢𑁆𑀢𑀸 𑀯𑀸𑀢𑀸 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 [𑀓𑀸𑀴𑀯𑀸𑀢𑀸 (𑀓.)] 𑀯𑁂𑀭𑀫𑁆𑀪𑀯𑀸𑀢𑀸 𑀧𑀓𑁆𑀔𑀯𑀸𑀢𑀸 𑀲𑀼𑀧𑀡𑁆𑀡𑀯𑀸𑀢𑀸 𑀢𑀸𑀮𑀧𑀡𑁆𑀡𑀯𑀸𑀢𑀸 𑀯𑀺𑀥𑀽𑀧𑀦𑀯𑀸𑀢𑀸. 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸𑀢𑀺 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸 [𑀔𑀺𑀢𑁆𑀢𑀁 (𑀲𑁆𑀬𑀸.) 𑀏𑀯𑀫𑀜𑁆𑀜𑁂𑀲𑀼 𑀧𑀤𑁂𑀲𑀼 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦] 𑀉𑀓𑁆𑀔𑀺𑀢𑁆𑀢𑀸 𑀦𑀼𑀦𑁆𑀦𑀸 𑀧𑀡𑀼𑀦𑁆𑀦𑀸 𑀔𑀫𑁆𑀪𑀺𑀢𑀸 𑀯𑀺𑀓𑁆𑀔𑀫𑁆𑀪𑀺𑀢𑀸𑀢𑀺 𑁋 𑀅𑀘𑁆𑀘𑀺 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸. 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸𑀢𑀺. 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸.

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺. 𑀅𑀢𑁆𑀣𑀁 𑀧𑀮𑁂𑀢𑀻𑀢𑀺 𑀅𑀢𑁆𑀣𑀁 𑀧𑀮𑁂𑀢𑀺, 𑀅𑀢𑁆𑀣𑀁 𑀕𑀫𑁂𑀢𑀺, 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺 𑀲𑀗𑁆𑀔𑀁 [𑀅𑀫𑀼𑀓𑀁 𑀦𑀸𑀫 𑀤𑀺𑀲𑀁 𑀕𑀢𑁄𑀢𑀺 𑀲𑀗𑁆𑀔𑀁 (𑀲𑁆𑀬𑀸.)] 𑀦 𑀉𑀧𑁂𑀢𑀺, 𑀉𑀤𑁆𑀤𑁂𑀲𑀁 𑀦 𑀉𑀧𑁂𑀢𑀺, 𑀕𑀡𑀦𑀁 𑀦 𑀉𑀧𑁂𑀢𑀺, 𑀧𑀡𑁆𑀡𑀢𑁆𑀢𑀺𑀁 𑀦 𑀉𑀧𑁂𑀢𑀺, ‘‘𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀕𑀢𑀸, 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀕𑀢𑀸, 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀕𑀢𑀸, 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀕𑀢𑀸 𑀉𑀤𑁆𑀥𑀁 𑀯𑀸 𑀕𑀢𑀸, 𑀅𑀥𑁄 𑀯𑀸 𑀕𑀢𑀸, 𑀢𑀺𑀭𑀺𑀬𑀁 𑀯𑀸 𑀕𑀢𑀸, 𑀯𑀺𑀤𑀺𑀲𑀁 𑀯𑀸 𑀕𑀢𑀸’’𑀢𑀺, 𑀲𑁄 𑀳𑁂𑀢𑀼 𑀦𑀢𑁆𑀣𑀺, 𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑁋 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁.

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁 …𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑁄 𑀫𑀼𑀦𑀺 𑀧𑀓𑀢𑀺𑀬𑀸 𑀧𑀼𑀩𑁆𑀩𑁂𑀯 𑀭𑀽𑀧𑀓𑀸𑀬𑀸 𑀯𑀺𑀫𑀼𑀢𑁆𑀢𑁄. 𑀢𑀤𑀗𑁆𑀕𑀁 𑀲𑀫𑀢𑀺𑀓𑁆𑀓𑀫𑀸 [𑀢𑀤𑀗𑁆𑀕𑀁 𑀲𑀫𑀢𑀺𑀓𑁆𑀓𑀫𑁆𑀫 (𑀓.)] 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑁄. 𑀢𑀲𑁆𑀲 𑀫𑀼𑀦𑀺𑀦𑁄 𑀪𑀯𑀦𑁆𑀢𑀁 𑀆𑀕𑀫𑁆𑀫 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀧𑀝𑀺𑀮𑀤𑁆𑀥𑀸 𑀳𑁄𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀧𑀝𑀺𑀮𑀤𑁆𑀥𑀢𑁆𑀢𑀸 𑀦𑀸𑀫𑀓𑀸𑀬𑁄 𑀘 𑀭𑀽𑀧𑀓𑀸𑀬𑁄 𑀘 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀦𑀸𑀫𑀓𑀸𑀬𑀲𑁆𑀲 𑀘 𑀭𑀽𑀧𑀓𑀸𑀬𑀲𑁆𑀲 𑀘 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀦𑀸𑀫𑀓𑀸𑀬𑀸 𑀘 𑀭𑀽𑀧𑀓𑀸𑀬𑀸 𑀘 𑀫𑀼𑀢𑁆𑀢𑁄 𑀯𑀺𑀫𑀼𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑁄 𑀅𑀘𑁆𑀘𑀦𑁆𑀢𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁂𑀦𑀸𑀢𑀺 𑁋 𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄.

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺. 𑀅𑀢𑁆𑀣𑀁 𑀧𑀮𑁂𑀢𑀻𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀦 𑀉𑀧𑁂𑀢𑀺 𑀲𑀗𑁆𑀔𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀗𑁆𑀔𑀁 𑀦 𑀉𑀧𑁂𑀢𑀺, 𑀉𑀤𑁆𑀤𑁂𑀲𑀁 𑀦 𑀉𑀧𑁂𑀢𑀺, 𑀕𑀡𑀦𑀁 𑀦 𑀉𑀧𑁂𑀢𑀺, 𑀧𑀡𑁆𑀡𑀢𑁆𑀢𑀺𑀁 𑀦 𑀉𑀧𑁂𑀢𑀺 𑁋 𑀔𑀢𑁆𑀢𑀺𑀬𑁄𑀢𑀺 𑀯𑀸 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀸 𑀯𑁂𑀲𑁆𑀲𑁄𑀢𑀺 𑀯𑀸 𑀲𑀼𑀤𑁆𑀤𑁄𑀢𑀺 𑀯𑀸 𑀕𑀳𑀝𑁆𑀞𑁄𑀢𑀺 𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺 𑀬𑁂𑀦 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑁋 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀘𑁆𑀘𑀺 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄, 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔’’𑀦𑁆𑀢𑀺.

𑁪𑁪.

𑀅𑀢𑁆𑀣𑀗𑁆𑀕𑀢𑁄 𑀲𑁄 𑀉𑀤 𑀯𑀸 𑀲𑁄 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀅𑀭𑁄𑀕𑁄;

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑀅𑀢𑁆𑀣𑀗𑁆𑀕𑀢𑁄 𑀲𑁄 𑀉𑀤 𑀯𑀸 𑀲𑁄 𑀦𑀢𑁆𑀣𑀻𑀢𑀺 𑀲𑁄 𑀅𑀢𑁆𑀣𑀗𑁆𑀕𑀢𑁄 𑀉𑀤𑀸𑀳𑀼 𑀦𑀢𑁆𑀣𑀺 𑀲𑁄 𑀦𑀺𑀭𑀼𑀤𑁆𑀥𑁄 𑀉𑀘𑁆𑀙𑀺𑀦𑁆𑀦𑁄 𑀯𑀺𑀦𑀝𑁆𑀞𑁄𑀢𑀺 𑁋 𑀅𑀢𑁆𑀣𑀗𑁆𑀕𑀢𑁄 𑀲𑁄 𑀉𑀤 𑀯𑀸 𑀲𑁄 𑀦𑀢𑁆𑀣𑀺.

𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀅𑀭𑁄𑀕𑁄𑀢𑀺 𑀉𑀤𑀸𑀳𑀼 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑁋 𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀅𑀭𑁄𑀕𑁄.

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺. 𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺 𑀲𑀸𑀥𑀼 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺.

𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀢𑀼𑀮𑀺𑀢𑁄 𑀢𑀻𑀭𑀺𑀢𑁄 𑀯𑀺𑀪𑀽𑀢𑁄 𑀯𑀺𑀪𑀸𑀯𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑁋 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀅𑀢𑁆𑀣𑀗𑁆𑀕𑀢𑁄 𑀲𑁄 𑀉𑀤 𑀯𑀸 𑀲𑁄 𑀦𑀢𑁆𑀣𑀺, 𑀉𑀤𑀸𑀳𑀼 𑀯𑁂 𑀲𑀲𑁆𑀲𑀢𑀺𑀬𑀸 𑀅𑀭𑁄𑀕𑁄;

𑀢𑀁 𑀫𑁂 𑀫𑀼𑀦𑀻 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’𑀢𑀺.

𑁪𑁫.

𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀺, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀢𑀁 𑀢𑀲𑁆𑀲 𑀦𑀢𑁆𑀣𑀺;

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀽𑀳𑀢𑁂𑀲𑀼, 𑀲𑀫𑀽𑀳𑀢𑀸 𑀯𑀸𑀤𑀧𑀣𑀸𑀧𑀺 𑀲𑀩𑁆𑀩𑁂.

𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀻𑀢𑀺 𑀅𑀢𑁆𑀣𑀗𑁆𑀕𑀢𑀲𑁆𑀲 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀭𑀽𑀧𑀧𑀫𑀸𑀡𑀁 𑀦𑀢𑁆𑀣𑀺, 𑀯𑁂𑀤𑀦𑀸𑀧𑀫𑀸𑀡𑀁 𑀦𑀢𑁆𑀣𑀺, 𑀲𑀜𑁆𑀜𑀸𑀧𑀫𑀸𑀡𑀁 𑀦𑀢𑁆𑀣𑀺, 𑀲𑀗𑁆𑀔𑀸𑀭𑀧𑀫𑀸𑀡𑀁 𑀦𑀢𑁆𑀣𑀺, 𑀯𑀺𑀜𑁆𑀜𑀸𑀡𑀧𑀫𑀸𑀡𑀁 𑀦𑀢𑁆𑀣𑀺, 𑀦 𑀅𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀺. 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸𑀢𑀺 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀉𑀧𑀲𑀻𑀯𑀸𑀢𑀺 𑀪𑀕𑀯𑀸.

𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀢𑀁 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀬𑁂𑀦 𑀢𑀁 𑀭𑀸𑀕𑁂𑀦 [𑀬𑁂𑀦 𑀭𑀸𑀕𑁂𑀦 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁯𑁪] 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀤𑁄𑀲𑁂𑀦 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀫𑁄𑀳𑁂𑀦 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀫𑀸𑀦𑁂𑀦 𑀯𑀤𑁂𑀬𑁆𑀬𑀼𑀁, 𑀬𑀸𑀬 𑀤𑀺𑀝𑁆𑀞𑀺𑀬𑀸 𑀯𑀤𑁂𑀬𑁆𑀬𑀼𑀁, 𑀬𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀤𑁂𑀬𑁆𑀬𑀼𑀁, 𑀬𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀤𑁂𑀬𑁆𑀬𑀼𑀁, 𑀬𑁂𑀳𑀺 𑀅𑀦𑀼𑀲𑀬𑁂𑀳𑀺 𑀯𑀤𑁂𑀬𑁆𑀬𑀼𑀁 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 [𑀅𑀦𑀺𑀝𑁆𑀞𑀸𑀕𑀢𑁄𑀢𑀺 (𑀓.)] 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸, 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑀸 𑀬𑁂𑀦 𑀢𑀁 𑀯𑀤𑁂𑀬𑁆𑀬𑀼𑀁 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸, 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺 𑀬𑁂𑀦 𑀯𑀤𑁂𑀬𑁆𑀬𑀼𑀁 𑀓𑀣𑁂𑀬𑁆𑀬𑀼𑀁 𑀪𑀡𑁂𑀬𑁆𑀬𑀼𑀁 𑀤𑀻𑀧𑁂𑀬𑁆𑀬𑀼𑀁 𑀯𑁄𑀳𑀭𑁂𑀬𑁆𑀬𑀼𑀦𑁆𑀢𑀺 𑁋 𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀢𑀁 𑀢𑀲𑁆𑀲 𑀦𑀢𑁆𑀣𑀺.

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀽𑀳𑀢𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑁂𑀲𑀼 𑀔𑀦𑁆𑀥𑁂𑀲𑀼 𑀲𑀩𑁆𑀩𑁂𑀲𑀼 𑀆𑀬𑀢𑀦𑁂𑀲𑀼 𑀲𑀩𑁆𑀩𑀸𑀲𑀼 𑀥𑀸𑀢𑀽𑀲𑀼 𑀲𑀩𑁆𑀩𑀸𑀲𑀼 𑀕𑀢𑀻𑀲𑀼 𑀲𑀩𑁆𑀩𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀲𑀩𑁆𑀩𑀸𑀲𑀼 𑀧𑀝𑀺𑀲𑀦𑁆𑀥𑀻𑀲𑀼 𑀲𑀩𑁆𑀩𑁂𑀲𑀼 𑀪𑀯𑁂𑀲𑀼 𑀲𑀩𑁆𑀩𑁂𑀲𑀼 𑀲𑀁𑀲𑀸𑀭𑁂𑀲𑀼 𑀲𑀩𑁆𑀩𑁂𑀲𑀼 𑀯𑀝𑁆𑀝𑁂𑀲𑀼 𑀊𑀳𑀢𑁂𑀲𑀼 𑀲𑀫𑀽𑀳𑀢𑁂𑀲𑀼 𑀉𑀤𑁆𑀥𑀢𑁂𑀲𑀼 𑀲𑀫𑀼𑀤𑁆𑀥𑀢𑁂𑀲𑀼 𑀉𑀧𑁆𑀧𑀸𑀝𑀺𑀢𑁂𑀲𑀼 𑀲𑀫𑀼𑀧𑁆𑀧𑀸𑀝𑀺𑀢𑁂𑀲𑀼 𑀧𑀳𑀻𑀦𑁂𑀲𑀼 𑀲𑀫𑀼𑀘𑁆𑀙𑀺𑀦𑁆𑀦𑁂𑀲𑀼 𑀯𑀽𑀧𑀲𑀦𑁆𑀢𑁂𑀲𑀼 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂𑀲𑀼 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁂𑀲𑀼 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁂𑀲𑀽𑀢𑀺 𑁋 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀽𑀳𑀢𑁂𑀲𑀼.

𑀲𑀫𑀽𑀳𑀢𑀸 𑀯𑀸𑀤𑀧𑀣𑀸𑀧𑀺 𑀲𑀩𑁆𑀩𑁂𑀢𑀺 𑀯𑀸𑀤𑀧𑀣𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀢𑀲𑁆𑀲 𑀯𑀸𑀤𑀸 𑀘 𑀯𑀸𑀤𑀧𑀣𑀸 𑀘 𑀅𑀥𑀺𑀯𑀘𑀦𑀸𑀦𑀺 𑀘 𑀅𑀥𑀺𑀯𑀘𑀦𑀧𑀣𑀸 𑀘 𑀦𑀺𑀭𑀼𑀢𑁆𑀢𑀺 𑀘 𑀦𑀺𑀭𑀼𑀢𑁆𑀢𑀺𑀧𑀣𑀸 𑀘 𑀧𑀜𑁆𑀜𑀢𑁆𑀢𑀺 𑀘 𑀧𑀜𑁆𑀜𑀢𑁆𑀢𑀺𑀧𑀣𑀸 𑀘 𑀊𑀳𑀢𑀸 𑀲𑀫𑀽𑀳𑀢𑀸 𑀉𑀤𑁆𑀥𑀢𑀸 𑀲𑀫𑀼𑀤𑁆𑀥𑀢𑀸 𑀉𑀧𑁆𑀧𑀸𑀝𑀺𑀢𑀸 𑀲𑀫𑀼𑀧𑁆𑀧𑀸𑀝𑀺𑀢𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀲𑀫𑀽𑀳𑀢𑀸 𑀯𑀸𑀤𑀧𑀣𑀸𑀧𑀺 𑀲𑀩𑁆𑀩𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀺, [𑀉𑀧𑀲𑀻𑀯𑀸𑀢𑀺 𑀪𑀕𑀯𑀸]

𑀬𑁂𑀦 𑀦𑀁 𑀯𑀚𑁆𑀚𑀼𑀁 𑀢𑀁 𑀢𑀲𑁆𑀲 𑀦𑀢𑁆𑀣𑀺;

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀽𑀳𑀢𑁂𑀲𑀼, 𑀲𑀫𑀽𑀳𑀢𑀸 𑀯𑀸𑀤𑀧𑀣𑀸𑀧𑀺 𑀲𑀩𑁆𑀩𑁂’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁…𑀧𑁂… 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑁄.

𑁭. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁪𑁬.

𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀚𑀦𑀸 𑀯𑀤𑀦𑁆𑀢𑀺 𑀢𑀬𑀺𑀤𑀁 𑀓𑀣𑀁𑀲𑀼;

𑀜𑀸𑀡𑀽𑀧𑀧𑀦𑁆𑀦𑀁 𑀫𑀼𑀦𑀺 𑀦𑁄 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀯𑁂 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀁 [𑀚𑀻𑀯𑀺𑀓𑁂𑀦𑀽𑀧𑀧𑀦𑁆𑀦𑀁 (𑀲𑁆𑀬𑀸.)] .

𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄𑀢𑀺. 𑀲𑀦𑁆𑀢𑀻𑀢𑀺 𑀲𑀦𑁆𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀫𑀼𑀦𑀬𑁄𑀢𑀺 𑀫𑀼𑀦𑀺𑀦𑀸𑀫𑀓𑀸 𑀆𑀚𑀻𑀯𑀓𑀸 𑀦𑀺𑀕𑀡𑁆𑀞𑀸 𑀚𑀝𑀺𑀮𑀸 𑀢𑀸𑀧𑀲𑀸. (𑀤𑁂𑀯𑀸 𑀮𑁄𑀓𑁂 𑀫𑀼𑀦𑀬𑁄𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀦 𑀘 𑀢𑁂 𑀫𑀼𑀦𑀬𑁄) [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂] 𑀢𑀺. 𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄. 𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀦𑀦𑁆𑀤𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄.

𑀚𑀦𑀸 𑀯𑀤𑀦𑁆𑀢𑀺 𑀢𑀬𑀺𑀤𑀁 𑀓𑀣𑀁𑀲𑀽𑀢𑀺. 𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀯𑀤𑀦𑁆𑀢𑀻𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀢𑀬𑀺𑀤𑀁 𑀓𑀣𑀁𑀲𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀚𑀦𑀸 𑀯𑀤𑀦𑁆𑀢𑀺 𑀢𑀬𑀺𑀤𑀁 𑀓𑀣𑀁𑀲𑀼.

𑀜𑀸𑀡𑀽𑀧𑀧𑀦𑁆𑀦𑀁 𑀫𑀼𑀦𑀺 𑀦𑁄 𑀯𑀤𑀦𑁆𑀢𑀻𑀢𑀺. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀉𑀧𑀸𑀕𑀢𑀁 𑀲𑀫𑀼𑀧𑀸𑀕𑀢𑀁 𑀉𑀧𑀧𑀦𑁆𑀦𑀁 𑀲𑀫𑀼𑀧𑀧𑀦𑁆𑀦𑀁 𑀲𑀫𑀦𑁆𑀦𑀸𑀕𑀢𑀁 𑀫𑀼𑀦𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀜𑀸𑀡𑀽𑀧𑀧𑀦𑁆𑀦𑀁 𑀫𑀼𑀦𑀺 𑀦𑁄 𑀯𑀤𑀦𑁆𑀢𑀺.

𑀉𑀤𑀸𑀳𑀼 𑀯𑁂 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀦𑁆𑀢𑀺 𑀉𑀤𑀸𑀳𑀼 𑀅𑀦𑁂𑀓𑀯𑀺𑀯𑀺𑀥𑀅𑀢𑀺𑀧𑀭𑀫𑀤𑀼𑀓𑁆𑀓𑀭𑀓𑀸𑀭𑀺𑀓𑀮𑀽𑀔𑀚𑀻𑀯𑀺𑀢𑀸𑀦𑀼𑀬𑁄𑀕𑁂𑀦 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀉𑀧𑀸𑀕𑀢𑀁 𑀲𑀫𑀼𑀧𑀸𑀕𑀢𑀁 𑀉𑀧𑀧𑀦𑁆𑀦𑀁 𑀲𑀫𑀼𑀧𑀧𑀦𑁆𑀦𑀁 𑀲𑀫𑀦𑁆𑀦𑀸𑀕𑀢𑀁 𑀫𑀼𑀦𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀉𑀤𑀸𑀳𑀼 𑀯𑁂 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀚𑀦𑀸 𑀯𑀤𑀦𑁆𑀢𑀺 𑀢𑀬𑀺𑀤𑀁 𑀓𑀣𑀁𑀲𑀼;

𑀜𑀸𑀡𑀽𑀧𑀧𑀦𑁆𑀦𑀁 𑀫𑀼𑀦𑀺 𑀦𑁄 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀯𑁂 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦’’𑀦𑁆𑀢𑀺.

𑁪𑁭.

𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦,

𑀫𑀼𑀦𑀻𑀥 𑀦𑀦𑁆𑀤 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀯𑀺𑀲𑁂𑀦𑀺𑀓𑀢𑁆𑀯𑀸 [𑀯𑀺𑀲𑁂𑀦𑀺𑀁𑀓𑀢𑁆𑀯𑀸 (𑀓.) 𑀫𑀳𑀸𑀦𑀺. 𑁬𑁮] 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀺.

𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦𑀸𑀢𑀺. 𑀦 𑀤𑀺𑀝𑁆𑀞𑀺𑀬𑀸𑀢𑀺 𑀦 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸. 𑀦 𑀲𑀼𑀢𑀺𑀬𑀸𑀢𑀺 𑀦 𑀲𑀼𑀢𑀲𑀼𑀤𑁆𑀥𑀺𑀬𑀸. 𑀦 𑀜𑀸𑀡𑁂𑀦𑀸𑀢𑀺 𑀦𑀧𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀦𑀧𑀺 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀦𑀧𑀺 𑀫𑀺𑀘𑁆𑀙𑀸𑀜𑀸𑀡𑁂𑀦𑀸𑀢𑀺 𑁋 𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦.

𑀫𑀼𑀦𑀻𑀥 𑀦𑀦𑁆𑀤 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸 𑀯𑀸 𑀲𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀉𑀧𑀸𑀕𑀢𑀁 𑀲𑀫𑀼𑀧𑀸𑀕𑀢𑀁 𑀉𑀧𑀧𑀦𑁆𑀦𑀁 𑀲𑀫𑀼𑀧𑀧𑀦𑁆𑀦𑀁 𑀲𑀫𑀦𑁆𑀦𑀸𑀕𑀢𑀁 𑀫𑀼𑀦𑀺𑀁 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀦 𑀪𑀡𑀦𑁆𑀢𑀺 𑀦 𑀤𑀻𑀧𑀬𑀦𑁆𑀢𑀺 𑀦 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀫𑀼𑀦𑀻𑀥 𑀦𑀦𑁆𑀤 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀯𑀺𑀲𑁂𑀦𑀺𑀓𑀢𑁆𑀯𑀸 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀻𑀢𑀺 𑀲𑁂𑀦𑀸 𑀯𑀼𑀘𑁆𑀘𑀢𑀺 𑀫𑀸𑀭𑀲𑁂𑀦𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀭𑀸𑀕𑁄 𑀫𑀸𑀭𑀲𑁂𑀦𑀸, 𑀤𑁄𑀲𑁄 𑀫𑀸𑀭𑀲𑁂𑀦𑀸, 𑀫𑁄𑀳𑁄 𑀫𑀸𑀭𑀲𑁂𑀦𑀸, 𑀓𑁄𑀥𑁄…𑀧𑁂… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀸𑀭𑀲𑁂𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀧𑀯𑀼𑀘𑁆𑀘𑀢𑀺.

‘‘𑀧𑀜𑁆𑀘𑀫𑀁 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄;

𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄.

‘‘𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂, 𑀧𑀭𑁂 𑀘 𑀅𑀯𑀚𑀸𑀦𑀸𑀢𑀺;

𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸 [𑀏𑀲𑀸 𑀢𑁂 𑀦𑀫𑀼𑀘𑀺 𑀲𑁂𑀦𑀸 (𑀲𑁆𑀬𑀸. 𑀓.) 𑀲𑀼. 𑀦𑀺. 𑁪𑁪𑁧], 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀩𑁆𑀩𑀸 𑀘 𑀫𑀸𑀭𑀲𑁂𑀦𑀸 𑀲𑀩𑁆𑀩𑁂 𑀘 𑀧𑀝𑀺𑀲𑁂𑀦𑀺𑀓𑀭𑀸 [𑀯𑀺𑀲𑁂𑀦𑀺𑀁𑀓𑀢𑁆𑀯𑀸 (𑀓.) 𑀫𑀳𑀸𑀦𑀺. 𑁬𑁮] 𑀓𑀺𑀮𑁂𑀲𑀸 𑀚𑀺𑀢𑀸 𑀘 𑀧𑀭𑀸𑀚𑀺𑀢𑀸 𑀘 𑀪𑀕𑁆𑀕𑀸 𑀯𑀺𑀧𑁆𑀧𑀮𑀼𑀕𑁆𑀕𑀸 [𑀯𑀺𑀧𑁆𑀧𑀮𑀼𑀕𑁆𑀕𑀢𑀸 (𑀲𑁆𑀬𑀸.) 𑀧𑀲𑁆𑀲 𑀫𑀳𑀸𑀦𑀺. 𑁨𑁮] 𑀧𑀭𑀫𑁆𑀫𑀼𑀔𑀸, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 𑀯𑀺𑀲𑁂𑀦𑀺𑀓𑀢𑁆𑀯𑀸. 𑀅𑀦𑀻𑀖𑀸𑀢𑀺 𑀭𑀸𑀕𑁄 𑀦𑀻𑀖𑁄, 𑀤𑁄𑀲𑁄 𑀦𑀻𑀖𑁄, 𑀫𑁄𑀳𑁄 𑀦𑀻𑀖𑁄, 𑀓𑁄𑀥𑁄 𑀦𑀻𑀖𑁄, 𑀉𑀧𑀦𑀸𑀳𑁄 𑀦𑀻𑀖𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀦𑀻𑀖𑀸. 𑀬𑁂𑀲𑀁 𑀏𑀢𑁂 𑀦𑀻𑀖𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀅𑀦𑀻𑀖𑀸. 𑀦𑀺𑀭𑀸𑀲𑀸𑀢𑀺 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀯𑀺𑀚𑁆𑀚𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑁂𑀲𑀁 𑀏𑀲𑀸 𑀆𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀦𑀺𑀭𑀸𑀲𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀯𑀺𑀲𑁂𑀦𑀺𑀓𑀢𑁆𑀯𑀸 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀻𑀢𑀺 𑀬𑁂 𑀢𑁂 𑀯𑀺𑀲𑁂𑀦𑀺𑀓𑀢𑁆𑀯𑀸𑀯 𑀅𑀦𑀻𑀖𑀸 𑀘 𑀦𑀺𑀭𑀸𑀲𑀸 𑀘 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀢𑁂 𑀮𑁄𑀓𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀯𑀺𑀲𑁂𑀦𑀺𑀓𑀢𑁆𑀯𑀸 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, 𑀫𑀼𑀦𑀻𑀥 𑀦𑀦𑁆𑀤 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀯𑀺𑀲𑁂𑀦𑀺𑀓𑀢𑁆𑀯𑀸 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀻’’𑀢𑀺.

𑁪𑁮.

𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸, 𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀲𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑁆𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸𑀢𑀺 𑁋 𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂. 𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀦𑀦𑁆𑀤𑁄𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄.

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀤𑀺𑀝𑁆𑀞𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀲𑀼𑀢𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀲𑀻𑀮𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀯𑀢𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀅𑀦𑁂𑀓𑀯𑀺𑀥𑀓𑁄𑀢𑀽𑀳𑀮𑀫𑀗𑁆𑀕𑀮𑁂𑀦 [𑀅𑀦𑁂𑀓𑀯𑀺𑀥𑀯𑀢𑁆𑀢 𑀓𑀼𑀢𑀽𑀳𑀮𑀫𑀗𑁆𑀕𑀮𑁂𑀦 (𑀲𑁆𑀬𑀸.)] 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸𑀢𑀺. 𑀓𑀘𑁆𑀘𑀺𑀲𑁆𑀲𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸, ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀓𑀘𑁆𑀘𑀺𑀲𑁆𑀲𑀼. 𑀢𑁂𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸. 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸𑀢𑀺. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀬𑀢𑀸𑀢𑀺 𑀬𑀢𑁆𑀢𑀸 𑀧𑀝𑀺𑀬𑀢𑁆𑀢𑀸 [𑀬𑀢𑀸 𑀧𑀝𑀺𑀬𑀢𑀸 (𑀲𑁆𑀬𑀸.)] 𑀕𑀼𑀢𑁆𑀢𑀸 𑀕𑁄𑀧𑀺𑀢𑀸 𑀭𑀓𑁆𑀔𑀺𑀢𑀸 𑀲𑀁𑀯𑀼𑀢𑀸. 𑀘𑀭𑀦𑁆𑀢𑀸𑀢𑀺 𑀘𑀭𑀦𑁆𑀢𑀸 𑀯𑀺𑀳𑀭𑀦𑁆𑀢𑀸 𑀇𑀭𑀺𑀬𑀦𑁆𑀢𑀸 𑀯𑀢𑁆𑀢𑁂𑀦𑁆𑀢𑀸 𑀧𑀸𑀮𑁂𑀦𑁆𑀢𑀸 𑀬𑀧𑁂𑀦𑁆𑀢𑀸 𑀬𑀸𑀧𑁂𑀦𑁆𑀢𑀸𑀢𑀺 𑁋 𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸.

𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺𑀁𑀲𑀼 𑀉𑀢𑁆𑀢𑀭𑀺𑀁𑀲𑀼 𑀧𑀢𑀭𑀺𑀁𑀲𑀼 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀯𑀻𑀢𑀺𑀯𑀢𑁆𑀢𑀺𑀁𑀲𑀼. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑁋 𑀫𑀸𑀭𑀺𑀲𑀸𑀢𑀺 𑁋 𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁, 𑀓𑀣𑀬𑀲𑁆𑀲𑀼 𑀫𑁂𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

‘‘𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸,

𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁪𑁯.

𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀦𑀦𑁆𑀤𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀓𑀺𑀜𑁆𑀘𑀸𑀧𑀺 𑀢𑁂 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀺, 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺.

𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀲𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑁆𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸𑀢𑀺 𑁋 𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂. 𑀦𑀦𑁆𑀤𑀸𑀢𑀺 𑀪𑀕𑀯𑀸𑀢𑀺. 𑀦𑀦𑁆𑀤𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀦𑀦𑁆𑀤𑀸𑀢𑀺 𑀪𑀕𑀯𑀸.

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀤𑀺𑀝𑁆𑀞𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀲𑀼𑀢𑁂𑀦𑀧𑀺 𑀲𑀼𑀤𑁆𑀥𑀺𑀁…𑀧𑁂… 𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀲𑀻𑀮𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀯𑀢𑁂𑀦𑀧𑀺 𑀲𑀼𑀤𑁆𑀥𑀺𑀁…𑀧𑁂… 𑀯𑁄𑀳𑀭𑀦𑁆𑀢𑀺; 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀅𑀦𑁂𑀓𑀯𑀺𑀥𑀓𑁄𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀓𑀺𑀜𑁆𑀘𑀸𑀧𑀺 𑀢𑁂 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀻𑀢𑀺. 𑀓𑀺𑀜𑁆𑀘𑀸𑀧𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀓𑀺𑀜𑁆𑀘𑀸𑀧𑀻𑀢𑀺. 𑀢𑁂𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀬𑀢𑀸𑀢𑀺 𑀬𑀢𑁆𑀢𑀸 𑀧𑀝𑀺𑀬𑀢𑁆𑀢𑀸 𑀕𑀼𑀢𑁆𑀢𑀸 𑀕𑁄𑀧𑀺𑀢𑀸 𑀭𑀓𑁆𑀔𑀺𑀢𑀸 𑀲𑀁𑀯𑀼𑀢𑀸. 𑀘𑀭𑀦𑁆𑀢𑀻𑀢𑀺 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀻𑀢𑀺 𑁋 𑀓𑀺𑀜𑁆𑀘𑀸𑀧𑀺 𑀢𑁂 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀺.

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀁 𑀦 𑀢𑀭𑀺𑀁𑀲𑀼 𑀦 𑀉𑀢𑁆𑀢𑀭𑀺𑀁𑀲𑀼 𑀦 𑀧𑀢𑀭𑀺𑀁𑀲𑀼 𑀦 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀻𑀢𑀺𑀯𑀢𑁆𑀢𑀺𑀁𑀲𑀼, 𑀚𑀸𑀢𑀺𑀚𑀭𑀸𑀫𑀭𑀡𑀸 𑀅𑀦𑀺𑀓𑁆𑀔𑀦𑁆𑀢𑀸 𑀅𑀦𑀺𑀲𑁆𑀲𑀝𑀸 𑀅𑀦𑀢𑀺𑀓𑁆𑀓𑀦𑁆𑀢𑀸 𑀅𑀲𑀫𑀢𑀺𑀓𑁆𑀓𑀦𑁆𑀢𑀸 𑀅𑀯𑀻𑀢𑀺𑀯𑀢𑁆𑀢𑀸, 𑀅𑀦𑁆𑀢𑁄𑀚𑀸𑀢𑀺𑀚𑀭𑀸𑀫𑀭𑀡𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀅𑀦𑁆𑀢𑁄𑀲𑀁𑀲𑀸𑀭𑀧𑀣𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸, 𑀚𑀭𑀸𑀬 𑀅𑀦𑀼𑀲𑀝𑀸, 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸, 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀦𑀦𑁆𑀤𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀓𑀺𑀜𑁆𑀘𑀸𑀧𑀺 𑀢𑁂 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀺, 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑁫𑁦.

𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀢𑁂 𑀘𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂, 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂;

𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀲𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑁆𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸𑀢𑀺 𑁋 𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂. 𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄.

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀤𑀺𑀝𑁆𑀞𑁂𑀦𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀲𑀼𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁…𑀧𑁂… 𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀲𑀻𑀮𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺; 𑀯𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁…𑀧𑁂… 𑀯𑁄𑀳𑀭𑀦𑁆𑀢𑀺; 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀦𑁆𑀢𑀺 𑀅𑀦𑁂𑀓𑀯𑀺𑀥𑀓𑁄𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀢𑁂 𑀘𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂𑀢𑀺. 𑀢𑁂 𑀘𑁂𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁂. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂𑀢𑀺 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀅𑀢𑀺𑀡𑁆𑀡𑁂 𑀅𑀦𑀢𑀺𑀓𑁆𑀓𑀦𑁆𑀢𑁂 𑀅𑀲𑀫𑀢𑀺𑀓𑁆𑀓𑀦𑁆𑀢𑁂 𑀅𑀯𑀻𑀢𑀺𑀯𑀢𑁆𑀢𑁂 𑀅𑀦𑁆𑀢𑁄𑀚𑀸𑀢𑀺𑀚𑀭𑀸𑀫𑀭𑀡𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑁂 𑀅𑀦𑁆𑀢𑁄𑀲𑀁𑀲𑀸𑀭𑀧𑀣𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑁂 𑀚𑀸𑀢𑀺𑀬𑀸 𑀅𑀦𑀼𑀕𑀢𑁂 𑀚𑀭𑀸𑀬 𑀅𑀦𑀼𑀲𑀝𑁂 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁂 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑁂 𑀅𑀢𑀸𑀡𑁂 𑀅𑀮𑁂𑀡𑁂 𑀅𑀲𑀭𑀡𑁂 𑀅𑀲𑀭𑀡𑀻𑀪𑀽𑀢𑁂. 𑀩𑁆𑀭𑀽𑀲𑀻𑀢𑀺 𑀩𑁆𑀭𑀽𑀲𑀺 𑀆𑀘𑀺𑀓𑁆𑀔𑀲𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀲𑀺 𑀯𑀺𑀪𑀚𑀲𑀺 𑀉𑀢𑁆𑀢𑀸𑀦𑀻𑀓𑀭𑁄𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀢𑁂 𑀘𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂.

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀅𑀣 𑀓𑁄 𑀏𑀲𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄]

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑀢𑁂 𑀘𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂, 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂;

𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁫𑁧.

𑀦𑀸𑀳𑀁 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀦𑀦𑁆𑀤𑀸𑀢𑀺 𑀪𑀕𑀯𑀸]

𑀚𑀸𑀢𑀺𑀚𑀭𑀸𑀬 𑀦𑀺𑀯𑀼𑀢𑀸𑀢𑀺 𑀩𑁆𑀭𑀽𑀫𑀺;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂 [𑀅𑀦𑀸𑀲𑀯𑀸 𑀬𑁂 (𑀲𑁆𑀬𑀸. 𑀓.)] ;

𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀺.

𑀦𑀸𑀳𑀁 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, 𑀦𑀦𑁆𑀤𑀸𑀢𑀺 𑀪𑀕𑀯𑀸 𑀚𑀸𑀢𑀺𑀚𑀭𑀸𑀬 𑀦𑀺𑀯𑀼𑀢𑀸𑀢𑀺 𑀩𑁆𑀭𑀽𑀫𑀻𑀢𑀺 𑀦𑀸𑀳𑀁, 𑀦𑀦𑁆𑀤, 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀺𑀚𑀭𑀸𑀬 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀯𑀤𑀸𑀫𑀺. 𑀅𑀢𑁆𑀣𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀬𑁂𑀲𑀁 𑀚𑀸𑀢𑀺 𑀘 𑀚𑀭𑀸𑀫𑀭𑀡𑀜𑁆𑀘 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀦𑀸𑀳𑀁 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂 𑀦𑀦𑁆𑀤𑀸𑀢𑀺 𑀪𑀕𑀯𑀸 𑀚𑀸𑀢𑀺𑀚𑀭𑀸𑀬 𑀦𑀺𑀯𑀼𑀢𑀸𑀢𑀺 𑀩𑁆𑀭𑀽𑀫𑀺.

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺 𑀬𑁂 𑀲𑀩𑁆𑀩𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸. 𑀬𑁂 𑀲𑀩𑁆𑀩𑀸 𑀲𑀼𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬…𑀧𑁂… 𑀬𑁂 𑀲𑀩𑁆𑀩𑀸 𑀫𑀼𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬, 𑀬𑁂 𑀲𑀩𑁆𑀩𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀬𑁂 𑀲𑀩𑁆𑀩𑀸 𑀲𑀻𑀮𑀲𑀼𑀤𑁆𑀥𑀺𑀬𑁄 𑀧𑀳𑀸𑀬, 𑀬𑁂 𑀲𑀩𑁆𑀩𑀸 𑀯𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬, 𑀬𑁂 𑀲𑀩𑁆𑀩𑀸 𑀲𑀻𑀮𑀩𑁆𑀩𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀬𑁂 𑀲𑀻𑀥 𑀤𑀺𑀝𑁆𑀞𑀁𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺 𑀅𑀦𑁂𑀓𑀯𑀺𑀥𑀓𑁄𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸 𑀲𑁂, 𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀡𑁆𑀳𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸 𑁋 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬, 𑀧𑀳𑀸𑀦𑀧𑀭𑀺𑀜𑁆𑀜𑀸𑀬. 𑀓𑀢𑀫𑀸 𑀜𑀸𑀢𑀧𑀭𑀺𑀜𑁆𑀜𑀸? 𑀢𑀡𑁆𑀳𑀁 𑀚𑀸𑀦𑀸𑀢𑀺 [𑀧𑀚𑀸𑀦𑀸𑀢𑀺 (𑀲𑁆𑀬𑀸.) 𑀧𑀭𑀺𑀚𑀸𑀦𑀸𑀢𑀺 (𑀓.) 𑀫𑀳𑀸𑀦𑀺. 𑁧𑁩] ‘‘𑀅𑀬𑀁 𑀭𑀽𑀧𑀢𑀡𑁆𑀳𑀸, 𑀅𑀬𑀁 𑀲𑀤𑁆𑀤𑀢𑀡𑁆𑀳𑀸, 𑀅𑀬𑀁 𑀕𑀦𑁆𑀥𑀢𑀡𑁆𑀳𑀸, 𑀅𑀬𑀁 𑀭𑀲𑀢𑀡𑁆𑀳𑀸, 𑀅𑀬𑀁 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸, 𑀅𑀬𑀁 𑀥𑀫𑁆𑀫𑀢𑀡𑁆𑀳𑀸’’𑀢𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀢𑀡𑁆𑀳𑀁 𑀢𑀻𑀭𑁂𑀢𑀺 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀢𑀻𑀭𑁂𑀢𑀺 𑁋 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀢𑀡𑁆𑀳𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀬 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’. 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀡𑁆𑀳𑀁 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀅𑀦𑀸𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀬𑁂𑀲𑀁 𑀇𑀫𑁂 𑀆𑀲𑀯𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀅𑀦𑀸𑀲𑀯𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑁋 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸.

𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻𑀢𑀺 𑀬𑁂 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸, 𑀢𑁂 𑀓𑀸𑀫𑁄𑀖𑀁 𑀢𑀺𑀡𑁆𑀡𑀸 𑀪𑀯𑁄𑀖𑀁 𑀢𑀺𑀡𑁆𑀡𑀸 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑀸 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑀸 𑀲𑀩𑁆𑀩𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑀸 𑀉𑀢𑁆𑀢𑀺𑀡𑁆𑀡𑀸 𑀦𑀺𑀢𑁆𑀢𑀺𑀡𑁆𑀡𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀫𑀢𑀺𑀓𑁆𑀓𑀦𑁆𑀢𑀸 𑀯𑀻𑀢𑀺𑀯𑀢𑁆𑀢𑀸𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂 𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀳𑀁 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, [𑀦𑀦𑁆𑀤𑀸𑀢𑀺 𑀪𑀕𑀯𑀸]

𑀚𑀸𑀢𑀺𑀚𑀭𑀸𑀬 𑀦𑀺𑀯𑀼𑀢𑀸𑀢𑀺 𑀩𑁆𑀭𑀽𑀫𑀺;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻’’𑀢𑀺.

𑁫𑁨.

𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀺.

𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄𑀢𑀺. 𑀏𑀢𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀦𑀦𑁆𑀤𑀸𑀫𑀺 𑀅𑀪𑀺𑀦𑀦𑁆𑀤𑀸𑀫𑀺 𑀫𑁄𑀤𑀸𑀫𑀺 𑀅𑀦𑀼𑀫𑁄𑀤𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀺. 𑀫𑀳𑁂𑀲𑀺𑀦𑁄𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸? 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺…𑀧𑁂… 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀻𑀢𑀺 𑁋 𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄.

𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀦𑁆𑀢𑀺. 𑀲𑀼𑀓𑀺𑀢𑁆𑀢𑀺𑀢𑀦𑁆𑀢𑀺 𑀲𑀼𑀓𑀺𑀢𑁆𑀢𑀺𑀢𑀁 𑀲𑀼𑀆𑀘𑀺𑀓𑁆𑀔𑀺𑀢𑀁 [𑀲𑁆𑀯𑀸𑀘𑀺𑀓𑁆𑀔𑀺𑀢𑀁 (𑀓.)] 𑀲𑀼𑀤𑁂𑀲𑀺𑀢𑀁 𑀲𑀼𑀧𑀜𑁆𑀜𑀧𑀺𑀢𑀁 𑀲𑀼𑀧𑀝𑁆𑀞𑀧𑀺𑀢𑀁 𑀲𑀼𑀯𑀺𑀯𑀝𑀁 𑀲𑀼𑀯𑀺𑀪𑀢𑁆𑀢𑀁 𑀲𑀼𑀉𑀢𑁆𑀢𑀸𑀦𑀻𑀓𑀢𑀁 𑀲𑀼𑀧𑀓𑀸𑀲𑀺𑀢𑀁. 𑀕𑁄𑀢𑀫𑀦𑀽𑀧𑀥𑀻𑀓𑀦𑁆𑀢𑀺 𑀉𑀧𑀥𑀻 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀉𑀧𑀥𑀺𑀧𑁆𑀧𑀳𑀸𑀦𑀁 𑀉𑀧𑀥𑀺𑀯𑀽𑀧𑀲𑀫𑀁 𑀉𑀧𑀥𑀺𑀦𑀺𑀲𑁆𑀲𑀕𑁆𑀕𑀁 𑀉𑀧𑀥𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁.

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺 𑀬𑁂 𑀲𑀩𑁆𑀩𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸. 𑀬𑁂 𑀲𑀩𑁆𑀩𑀸 𑀲𑀼𑀢𑀲𑀼𑀤𑁆𑀥𑀺𑀬𑁄…𑀧𑁂… 𑀬𑁂 𑀲𑀩𑁆𑀩𑀸 𑀫𑀼𑀢𑀲𑀼𑀤𑁆𑀥𑀺𑀬𑁄… 𑀬𑁂 𑀲𑀩𑁆𑀩𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀲𑀼𑀤𑁆𑀥𑀺𑀬𑁄… 𑀬𑁂 𑀲𑀩𑁆𑀩𑀸 𑀲𑀻𑀮𑀲𑀼𑀤𑁆𑀥𑀺𑀬𑁄… 𑀬𑁂 𑀲𑀩𑁆𑀩𑀸 𑀯𑀢𑀲𑀼𑀤𑁆𑀥𑀺𑀬𑁄… 𑀬𑁂 𑀲𑀩𑁆𑀩𑀸 𑀲𑀻𑀮𑀩𑁆𑀩𑀢𑀲𑀼𑀤𑁆𑀥𑀺𑀬𑁄 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀦𑁆𑀢𑀺 𑀅𑀦𑁂𑀓𑀯𑀺𑀥𑀓𑁄𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂, 𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀡𑁆𑀳𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸 𑁋 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 [𑀢𑀺𑀭𑀡𑀧𑀭𑀺𑀜𑁆𑀜𑀸𑀬 (𑀲𑁆𑀬𑀸.)], 𑀧𑀳𑀸𑀦𑀧𑀭𑀺𑀜𑁆𑀜𑀸𑀬. 𑀓𑀢𑀫𑀸 𑀜𑀸𑀢𑀧𑀭𑀺𑀜𑁆𑀜𑀸? 𑀢𑀡𑁆𑀳𑀁 𑀚𑀸𑀦𑀸𑀢𑀺 𑁋 𑀅𑀬𑀁 𑀭𑀽𑀧𑀢𑀡𑁆𑀳𑀸, 𑀅𑀬𑀁 𑀲𑀤𑁆𑀤𑀢𑀡𑁆𑀳𑀸, 𑀅𑀬𑀁 𑀕𑀦𑁆𑀥𑀢𑀡𑁆𑀳𑀸, 𑀅𑀬𑀁 𑀭𑀲𑀢𑀡𑁆𑀳𑀸, 𑀅𑀬𑀁 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸, 𑀅𑀬𑀁 𑀥𑀫𑁆𑀫𑀢𑀡𑁆𑀳𑀸𑀢𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀢𑀡𑁆𑀳𑀁 𑀢𑀻𑀭𑁂𑀢𑀺 [𑀢𑀺𑀭𑁂𑀢𑀺 (𑀲𑁆𑀬𑀸.)] 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄 𑀧𑀭𑀢𑁄 𑀧𑀮𑁄𑀓𑀢𑁄 𑀈𑀢𑀺𑀢𑁄 𑀉𑀧𑀤𑁆𑀤𑀯𑀢𑁄 𑀪𑀬𑀢𑁄 𑀉𑀧𑀲𑀕𑁆𑀕𑀢𑁄 𑀘𑀮𑀢𑁄 𑀧𑀪𑀗𑁆𑀕𑀼𑀢𑁄 𑀅𑀤𑁆𑀥𑀼𑀯𑀢𑁄 𑀅𑀢𑀸𑀡𑀢𑁄 𑀅𑀮𑁂𑀡𑀢𑁄 𑀅𑀲𑀭𑀡𑀢𑁄 𑀅𑀲𑀭𑀡𑀻𑀪𑀽𑀢𑀢𑁄 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀆𑀤𑀻𑀦𑀯𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄 𑀅𑀲𑀸𑀭𑀓𑀢𑁄 𑀅𑀖𑀫𑀽𑀮𑀢𑁄 𑀯𑀥𑀓𑀢𑁄 𑀯𑀺𑀪𑀯𑀢𑁄 𑀲𑀸𑀲𑀯𑀢𑁄 𑀲𑀗𑁆𑀔𑀢𑀢𑁄 𑀫𑀸𑀭𑀸𑀫𑀺𑀲𑀢𑁄 𑀚𑀸𑀢𑀺𑀥𑀫𑁆𑀫𑀢𑁄 𑀚𑀭𑀸𑀥𑀫𑁆𑀫𑀢𑁄 𑀩𑁆𑀬𑀸𑀥𑀺𑀥𑀫𑁆𑀫𑀢𑁄 𑀫𑀭𑀡𑀥𑀫𑁆𑀫𑀢𑁄 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀢𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀢𑀻𑀭𑁂𑀢𑀺 𑁋 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸.

𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀢𑀡𑁆𑀳𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺 𑁋 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸.

𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀡𑁆𑀳𑀁 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀅𑀦𑀸𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀬𑁂𑀲𑀁 𑀇𑀫𑁂 𑀆𑀲𑀯𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀅𑀦𑀸𑀲𑀯𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂, 𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺. 𑀩𑁆𑀭𑀽𑀫𑀻𑀢𑀺 𑀬𑁂 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸, 𑀅𑀳𑀫𑁆𑀧𑀺 𑀢𑁂 𑀓𑀸𑀫𑁄𑀖𑀁 𑀢𑀺𑀡𑁆𑀡𑀸 𑀪𑀯𑁄𑀖𑀁 𑀢𑀺𑀡𑁆𑀡𑀸 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑀸 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑀸 𑀲𑀩𑁆𑀩𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑀸 𑀉𑀢𑁆𑀢𑀺𑀡𑁆𑀡𑀸 𑀦𑀺𑀢𑁆𑀢𑀺𑀡𑁆𑀡𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀫𑀢𑀺𑀓𑁆𑀓𑀦𑁆𑀢𑀸 𑀯𑀻𑀢𑀺𑀯𑀢𑁆𑀢𑀸𑀢𑀺 𑀩𑁆𑀭𑀽𑀫𑀺 𑀯𑀤𑀸𑀫𑀺𑀢𑀺 𑁋 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂, 𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁.

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻’’𑀢𑀺.

𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀫𑁄.

𑁮. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁫𑁩.

𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, [𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄]

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁;

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁, 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁.

𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀽𑀢𑀺 𑀬𑁄 𑀘 𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀬𑁂 𑀘𑀜𑁆𑀜𑁂 𑀢𑀲𑁆𑀲 𑀆𑀘𑀭𑀺𑀬𑀸, 𑀢𑁂 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀔𑀦𑁆𑀢𑀺𑀁 𑀲𑀓𑀁 𑀭𑀼𑀘𑀺𑀁 𑀲𑀓𑀁 𑀮𑀤𑁆𑀥𑀺𑀁 𑀲𑀓𑀁 𑀅𑀚𑁆𑀛𑀸𑀲𑀬𑀁 𑀲𑀓𑀁 𑀅𑀥𑀺𑀧𑁆𑀧𑀸𑀬𑀁 𑀩𑁆𑀬𑀸𑀓𑀁𑀲𑀼 𑀆𑀘𑀺𑀓𑁆𑀔𑀺𑀁𑀲𑀼 𑀤𑁂𑀲𑀬𑀺𑀁𑀲𑀼 𑀧𑀜𑁆𑀜𑀧𑀺𑀁𑀲𑀼 𑀧𑀝𑁆𑀞𑀧𑀺𑀁𑀲𑀼 𑀯𑀺𑀯𑀭𑀺𑀁𑀲𑀼 𑀯𑀺𑀪𑀚𑀺𑀁𑀲𑀼 𑀉𑀢𑁆𑀢𑀸𑀦𑀻𑀅𑀓𑀁𑀲𑀼 𑀧𑀓𑀸𑀲𑁂𑀲𑀼𑀦𑁆𑀢𑀺 𑁋 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼. 𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀳𑁂𑀫𑀓𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄.

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸𑀢𑀺 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸 𑀧𑀭𑀁 𑀕𑁄𑀢𑀫𑀲𑀸𑀲𑀦𑀸 𑀧𑀼𑀭𑁂 𑀕𑁄𑀢𑀫𑀲𑀸𑀲𑀦𑀸 𑀧𑀞𑀫𑀢𑀭𑀁 𑀕𑁄𑀢𑀫𑀲𑀸𑀲𑀦𑀸 𑀩𑀼𑀤𑁆𑀥𑀲𑀸𑀲𑀦𑀸 𑀚𑀺𑀦𑀲𑀸𑀲𑀦𑀸 𑀢𑀣𑀸𑀕𑀢𑀲𑀸𑀲𑀦𑀸 [𑀢𑀣𑀸𑀕𑀢𑀲𑀸𑀲𑀦𑀸 𑀤𑁂𑀯𑀲𑀸𑀲𑀦𑀸 (𑀓.)] 𑀅𑀭𑀳𑀦𑁆𑀢𑀲𑀸𑀲𑀦𑀸𑀢𑀺 𑁋 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸.

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀓𑀺𑀭 𑀆𑀲𑀺, 𑀏𑀯𑀁 𑀓𑀺𑀭 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺.

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁 𑀇𑀢𑀺𑀓𑀺𑀭𑀸𑀬 𑀧𑀭𑀁𑀧𑀭𑀸𑀬 𑀧𑀺𑀝𑀓𑀲𑀫𑁆𑀧𑀤𑀸𑀬 𑀢𑀓𑁆𑀓𑀳𑁂𑀢𑀼 𑀦𑀬𑀳𑁂𑀢𑀼 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀦 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁 𑀓𑀣𑀬𑀺𑀁𑀲𑀽𑀢𑀺 𑁋 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁.

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁 𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀲𑀗𑁆𑀓𑀧𑁆𑀧𑀯𑀟𑁆𑀠𑀦𑀁 𑀓𑀸𑀫𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀜𑀸𑀢𑀺𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀚𑀦𑀧𑀤𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀅𑀫𑀭𑀸𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀧𑀭𑀸𑀦𑀼𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑁋 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁.

𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀦𑁆𑀢𑀺 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁 𑀦 𑀯𑀺𑀦𑁆𑀤𑀺𑀁 𑀦𑀸𑀥𑀺𑀕𑀘𑁆𑀙𑀺𑀁 𑀦 𑀧𑀝𑀺𑀮𑀪𑀺𑀦𑁆𑀢𑀺 𑁋 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, [𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄]

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁;

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁, 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺’’𑀦𑁆𑀢𑀺.

𑁫𑁪.

𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺, 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀻𑀢𑀺. 𑀢𑁆𑀯𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀥𑀫𑁆𑀫𑀫𑀓𑁆𑀔𑀸𑀳𑀻𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀅𑀓𑁆𑀔𑀸𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺.

𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀻𑀢𑀺. 𑀢𑀡𑁆𑀳𑀸𑀢𑀺 𑁋 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀢𑀡𑁆𑀳𑀸𑀧𑀳𑀸𑀦𑀁 𑀢𑀡𑁆𑀳𑀸𑀯𑀽𑀧𑀲𑀫𑀁 𑀢𑀡𑁆𑀳𑀸𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀢𑀡𑁆𑀳𑀸𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺 𑁋 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬𑀁 𑀉𑀢𑁆𑀢𑀭𑁂𑀬𑁆𑀬𑀁 𑀧𑀢𑀭𑁂𑀬𑁆𑀬𑀁 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀁 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺, 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁫𑁫.

𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼, 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓;

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁, 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁.

𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀽𑀢𑀺. 𑀤𑀺𑀝𑁆𑀞𑀦𑁆𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁; 𑀲𑀼𑀢𑀦𑁆𑀢𑀺 𑀲𑁄𑀢𑁂𑀦 𑀲𑀼𑀢𑀁; 𑀫𑀼𑀢𑀦𑁆𑀢𑀺 𑀖𑀸𑀦𑁂𑀦 𑀖𑀸𑀬𑀺𑀢𑀁 𑀚𑀺𑀯𑁆𑀳𑀸𑀬 𑀲𑀸𑀬𑀺𑀢𑀁 𑀓𑀸𑀬𑁂𑀦 𑀨𑀼𑀝𑁆𑀞𑀁; 𑀯𑀺𑀜𑁆𑀜𑀸𑀢𑀦𑁆𑀢𑀺 𑀫𑀦𑀲𑀸 𑀯𑀺𑀜𑁆𑀜𑀸𑀢𑀦𑁆𑀢𑀺 𑁋 𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼.

𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓𑀸𑀢𑀺 𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 [𑀘𑀓𑁆𑀔𑀼𑀁 (𑀲𑁆𑀬𑀸. 𑀓.)] 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑀤𑁆𑀤𑀸 𑀮𑁄𑀓𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁… 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀲𑀜𑁆𑀜𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂 … 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑁋 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓.

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀦𑁆𑀢𑀺. 𑀙𑀦𑁆𑀤𑀭𑀸𑀕𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀦𑁆𑀢𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀙𑀦𑁆𑀤𑀭𑀸𑀕𑀯𑀽𑀧𑀲𑀫𑀁 𑀙𑀦𑁆𑀤𑀭𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀙𑀦𑁆𑀤𑀭𑀸𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁.

𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀤𑀁 𑀢𑀸𑀡𑀧𑀤𑀁 𑀮𑁂𑀡𑀧𑀤𑀁 𑀲𑀭𑀡𑀧𑀤𑀁 𑀅𑀪𑀬𑀧𑀤𑀁. 𑀅𑀘𑁆𑀘𑀼𑀢𑀦𑁆𑀢𑀺 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑁋 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼, 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓;

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁, 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢’’𑀦𑁆𑀢𑀺.

𑁫𑁬.

𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸𑀢𑀺. 𑀏𑀢𑀦𑁆𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀜𑁆𑀜𑀸𑀬𑀸𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀬𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀲𑀢𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑀸 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀲𑀢𑀸…𑀧𑁂… 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀲𑀢𑀸𑀢𑀺 𑁋 𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸.

𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺. 𑀤𑀺𑀝𑁆𑀞𑀥𑀫𑁆𑀫𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀤𑀺𑀝𑁆𑀞𑀥𑀫𑁆𑀫𑀸…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. 𑀅𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀓𑁄𑀥𑀲𑁆𑀲…𑀧𑁂… 𑀉𑀧𑀦𑀸𑀳𑀲𑁆𑀲… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑀸 𑀉𑀧𑀲𑀦𑁆𑀢𑀸 𑀯𑀽𑀧𑀲𑀦𑁆𑀢𑀸 𑀦𑀺𑀩𑁆𑀩𑀼𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸.

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸𑀢𑀺. 𑀉𑀧𑀲𑀦𑁆𑀢𑀸𑀢𑀺 𑀭𑀸𑀕𑀲𑁆𑀲 𑀉𑀧𑀲𑀫𑀺𑀢𑀢𑁆𑀢𑀸 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀉𑀧𑀲𑀦𑁆𑀢𑀸…𑀧𑁂… 𑀤𑁄𑀲𑀲𑁆𑀲… 𑀫𑁄𑀳𑀲𑁆𑀲… 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑀸 𑀉𑀧𑀲𑀦𑁆𑀢𑀸 𑀯𑀽𑀧𑀲𑀦𑁆𑀢𑀸 𑀦𑀺𑀩𑁆𑀩𑀼𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑀉𑀧𑀲𑀦𑁆𑀢𑀸. 𑀢𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀤𑀓𑀽𑀫𑀺𑀓𑀚𑀸𑀢𑀁 𑀅𑀯𑀻𑀘𑀺𑀲𑀦𑁆𑀢𑀢𑀺𑀲𑀳𑀺𑀢𑀁 𑀨𑀲𑁆𑀲𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂𑀢𑀺 𑁋 𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸.

𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀢𑀺𑀡𑁆𑀡𑀸 𑀉𑀢𑁆𑀢𑀺𑀡𑁆𑀡𑀸 𑀦𑀺𑀢𑁆𑀣𑀺𑀡𑁆𑀡𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀫𑀢𑀺𑀓𑁆𑀓𑀦𑁆𑀢𑀸 𑀯𑀻𑀢𑀺𑀯𑀢𑁆𑀢𑀸𑀢𑀺 𑁋 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀫𑁄.

𑁯. 𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁫𑁭.

𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄.

𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺 𑀦 𑀲𑀁𑀯𑀲𑀦𑁆𑀢𑀺 𑀦 𑀆𑀯𑀲𑀦𑁆𑀢𑀺 𑀦 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺. 𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀢𑁄𑀤𑁂𑀬𑁆𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄.

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀡𑁆𑀳𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄𑀢𑀺 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄.

𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄𑀢𑀺 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄 𑀓𑀺𑀁𑀲𑀡𑁆𑀞𑀺𑀢𑁄 𑀓𑀺𑀁𑀧𑀓𑀸𑀭𑁄 𑀓𑀺𑀁𑀧𑀝𑀺𑀪𑀸𑀕𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀺𑀫𑁄𑀓𑁆𑀔𑀁 𑀧𑀼𑀘𑁆𑀙𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄’’𑀢𑀺.

𑁫𑁮.

𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄.

𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀻𑀢𑀺. 𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺 𑀦 𑀲𑀁𑀯𑀲𑀦𑁆𑀢𑀺 𑀦 𑀆𑀯𑀲𑀦𑁆𑀢𑀺 𑀦 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺.

𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸𑀢𑀺. 𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸.

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀡𑁆𑀳𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄𑀢𑀺 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀤𑀼𑀓𑁆𑀔𑁂 𑀓𑀗𑁆𑀔𑀸…𑀧𑁂… 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄. 𑀬𑁄𑀢𑀺 𑀬𑁄 𑀲𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄. 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄𑀢𑀺 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄.

𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄𑀢𑀺 𑀦𑀢𑁆𑀣𑀺 𑀢𑀲𑁆𑀲 𑀅𑀧𑀭𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑁂𑀬𑁆𑀬 𑀯𑀺𑀫𑀼𑀢𑁆𑀢𑁄 𑀲𑁄. 𑀓𑀢𑀁 𑀢𑀲𑁆𑀲 𑀯𑀺𑀫𑁄𑀓𑁆𑀔𑁂𑀦 𑀓𑀭𑀡𑀻𑀬𑀦𑁆𑀢𑀺 𑁋 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄’’𑀢𑀺.

𑁫𑁯.

𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻;

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀼.

𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄𑀢𑀺 𑀦𑀺𑀢𑁆𑀢𑀡𑁆𑀳𑁄 𑀲𑁄, 𑀉𑀤𑀸𑀳𑀼 𑀲𑀢𑀡𑁆𑀳𑁄 𑀭𑀽𑀧𑁂 𑀆𑀲𑀻𑀲𑀢𑀺 [𑀆𑀲𑀺𑀁𑀲𑀢𑀺 (𑀲𑁆𑀬𑀸.)], 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁 … 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀆𑀲𑀻𑀲𑀢𑀺 𑀲𑀸𑀤𑀺𑀬𑀢𑀺 𑀧𑀢𑁆𑀣𑁂𑀢𑀺 𑀧𑀺𑀳𑁂𑀢𑀺 𑀅𑀪𑀺𑀚𑀧𑁆𑀧𑀢𑀻𑀢𑀺 𑁋 𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄.

𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻𑀢𑀺. 𑀧𑀜𑁆𑀜𑀸𑀡𑀯𑀸 𑀲𑁄𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀉𑀤 𑀧𑀜𑁆𑀜𑀓𑀧𑁆𑀧𑀻𑀢𑀺 𑀉𑀤𑀸𑀳𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀓𑀧𑁆𑀧𑁂𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻.

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀦𑁆𑀢𑀺. 𑀲𑀓𑁆𑀓𑀸𑀢𑀺 𑀲𑀓𑁆𑀓𑁄 𑀪𑀕𑀯𑀸. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁 𑀲𑀢𑀺𑀧𑀝𑁆𑀞𑀸𑀦𑀥𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀥𑀦𑀁 𑀇𑀤𑁆𑀥𑀺𑀧𑀸𑀤𑀥𑀦𑀁 𑀇𑀦𑁆𑀤𑁆𑀭𑀺𑀬𑀥𑀦𑀁 𑀩𑀮𑀥𑀦𑀁 𑀩𑁄𑀚𑁆𑀛𑀗𑁆𑀕𑀥𑀦𑀁 𑀫𑀕𑁆𑀕𑀥𑀦𑀁 𑀨𑀮𑀥𑀦𑀁 𑀦𑀺𑀩𑁆𑀩𑀸𑀦𑀥𑀦𑀦𑁆𑀢𑀺. 𑀢𑁂𑀳𑀺 𑀅𑀦𑁂𑀓𑀯𑀺𑀥𑁂𑀳𑀺 𑀥𑀦𑀭𑀢𑀦𑁂𑀳𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀧𑀳𑀼 𑀯𑀺𑀲𑀯𑀻 𑀅𑀮𑀫𑀢𑁆𑀢𑁄 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄. 𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀦𑁆𑀢𑀺 𑀲𑀓𑁆𑀓 𑀬𑀣𑀸𑀳𑀁 𑀫𑀼𑀦𑀺𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀦𑁆𑀢𑀺 𑁋 𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁.

𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀯𑀺𑀬𑀸𑀘𑀺𑀓𑁆𑀔𑀸𑀢𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁…𑀧𑁂… 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑁋 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀼. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻;

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑁬𑁦.

𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻;

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁.

𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄𑀢𑀺 𑀦𑀺𑀢𑁆𑀢𑀡𑁆𑀳𑁄 𑀲𑁄. 𑀦 𑀲𑁄 𑀲𑀢𑀡𑁆𑀳𑁄 𑀭𑀽𑀧𑁂 𑀦𑀸𑀲𑀻𑀲𑀢𑀺. 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀦𑀸𑀲𑀻𑀲𑀢𑀺 𑀦 𑀇𑀘𑁆𑀙𑀢𑀺 𑀦 𑀲𑀸𑀤𑀺𑀬𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀧𑀺𑀳𑁂𑀢𑀺 𑀦𑀸𑀪𑀺𑀚𑀧𑁆𑀧𑀢𑀻𑀢𑀺 𑁋 𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄.

𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻𑀢𑀺. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀦 𑀘 𑀧𑀜𑁆𑀜𑀓𑀧𑁆𑀧𑀻𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀢𑀺 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻.

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦𑀸𑀢𑀺. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦𑀸𑀢𑀺 𑀢𑁄𑀤𑁂𑀬𑁆𑀬, 𑀏𑀯𑀁 𑀫𑀼𑀦𑀺𑀁 𑀚𑀸𑀦 𑀧𑀝𑀺𑀚𑀸𑀦 𑀧𑀝𑀺𑀯𑀺𑀚𑀸𑀦 𑀧𑀝𑀺𑀯𑀺𑀚𑁆𑀛𑀸𑀢𑀺 𑁋 𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦.

𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁. 𑀬𑀲𑁆𑀲𑁂𑀢𑀸𑀦𑀺 [𑀬𑀲𑁆𑀲𑁂𑀢𑁂 (𑀲𑁆𑀬𑀸.)] 𑀓𑀺𑀜𑁆𑀘𑀦𑀸𑀦𑀺 [𑀓𑀺𑀜𑁆𑀘𑀦𑀸 (𑀲𑁆𑀬𑀸.)] 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀺𑀜𑁆𑀘𑀦𑁄. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀪𑀯𑀸𑀢𑀺 𑀤𑁆𑀯𑁂 𑀪𑀯𑀸 𑁋 𑀓𑀫𑁆𑀫𑀪𑀯𑁄 𑀘 𑀧𑀝𑀺𑀲𑀦𑁆𑀥𑀺𑀓𑁄 𑀘 𑀧𑀼𑀦𑀩𑁆𑀪𑀯𑁄…𑀧𑁂… 𑀅𑀬𑀁 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄.

𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺 𑀅𑀓𑀺𑀜𑁆𑀘𑀦𑀁 𑀧𑀼𑀕𑁆𑀕𑀮𑀁 𑀓𑀸𑀫𑁂 𑀘 𑀪𑀯𑁂 𑀘 𑀅𑀲𑀢𑁆𑀢𑀁 𑀅𑀮𑀕𑁆𑀕𑀁 𑀅𑀮𑀕𑁆𑀕𑀺𑀢𑀁 𑀅𑀧𑀮𑀺𑀩𑀼𑀤𑁆𑀥𑀁 𑀦𑀺𑀓𑁆𑀔𑀦𑁆𑀢𑀁 𑀦𑀺𑀲𑁆𑀲𑀝𑀁 𑀯𑀺𑀧𑁆𑀧𑀫𑀼𑀢𑁆𑀢𑀁 𑀯𑀺𑀲𑀜𑁆𑀜𑀼𑀢𑁆𑀢𑀁 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻;

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀦𑀯𑀫𑁄.

𑁧𑁦. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁬𑁧.

𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄]

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀢𑁆𑀯𑀜𑁆𑀘 𑀫𑁂 𑀤𑀻𑀧𑀫𑀓𑁆𑀔𑀸𑀳𑀺, 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸.

𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀦𑁆𑀢𑀺 𑀲𑀭𑁄 𑀯𑀼𑀘𑁆𑀘𑀢𑀺 𑀲𑀁𑀲𑀸𑀭𑁄 𑀆𑀕𑀫𑀦𑀁 𑀕𑀫𑀦𑀁 𑀕𑀫𑀦𑀸𑀕𑀫𑀦𑀁 𑀓𑀸𑀮𑀁 𑀕𑀢𑀺 𑀪𑀯𑀸𑀪𑀯𑁄 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘 𑀦𑀺𑀩𑁆𑀩𑀢𑁆𑀢𑀺 𑀘 𑀪𑁂𑀤𑁄 𑀘 𑀚𑀸𑀢𑀺 𑀘 𑀚𑀭𑀸 𑀘 𑀫𑀭𑀡𑀜𑁆𑀘. 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺; 𑀫𑀚𑁆𑀛𑁂𑀯 𑀲𑀁𑀲𑀸𑀭𑁂 𑀲𑀢𑁆𑀢𑀸 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸.

𑀓𑀣𑀁 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺? 𑀏𑀢𑁆𑀢𑀓𑀸 𑀚𑀸𑀢𑀺𑀬𑁄 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀢𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸 𑀚𑀸𑀢𑀺𑀓𑁄𑀝𑀺𑀬𑁄 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀓𑁄𑀝𑀺𑀲𑀢𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺, 𑀳𑁂𑀯𑀁 𑀦𑀢𑁆𑀣𑀺. 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺.

𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸 𑀯𑀲𑁆𑀲𑀓𑁄𑀝𑀺𑀬𑁄 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀢𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺.

𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸 𑀓𑀧𑁆𑀧𑀓𑁄𑀝𑀺𑀬𑁄 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀁 𑀢𑀺𑀩𑁆𑀩𑀁 𑀧𑀘𑁆𑀘𑀦𑀼𑀪𑀽𑀢𑀁 𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀓𑀝𑀲𑀻 𑀯𑀟𑁆𑀠𑀺𑀢𑀸 [𑀓𑀝𑀲𑀻𑀯𑀯𑀟𑁆𑀠𑀺𑀢𑀁 (𑀲𑁆𑀬𑀸.) 𑀧𑀲𑁆𑀲 𑀲𑀁. 𑀦𑀺. 𑁨.𑁧𑁨𑁪]. 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺. 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺.

𑀓𑀣𑀁 𑀲𑀁𑀲𑀸𑀭𑀲𑁆𑀲 𑀧𑀘𑁆𑀙𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺? 𑀏𑀢𑁆𑀢𑀓𑀸 𑀚𑀸𑀢𑀺𑀬𑁄 𑀯𑀝𑁆𑀝𑀁 𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀘𑁆𑀙𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸 𑀚𑀸𑀢𑀺𑀓𑁄𑀝𑀺𑀬𑁄, 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀓𑁄𑀝𑀺𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸 𑀯𑀲𑁆𑀲𑀓𑁄𑀝𑀺𑀬𑁄, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸 𑀓𑀧𑁆𑀧𑀓𑁄𑀝𑀺𑀬𑁄, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀯𑀝𑁆𑀝𑀁 𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀧𑀭𑀁 𑀦 𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀳𑁂𑀯𑀁 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀘𑁆𑀙𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀯𑀫𑁆𑀧𑀺 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀫𑀚𑁆𑀛𑁂𑀯 𑀲𑀁𑀲𑀸𑀭𑁂 𑀲𑀢𑁆𑀢𑀸 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁. 𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀓𑀧𑁆𑀧𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄.

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂𑀢𑀺 𑀓𑀸𑀫𑁄𑀖𑁂 𑀪𑀯𑁄𑀖𑁂 𑀤𑀺𑀝𑁆𑀞𑁄𑀖𑁂 𑀅𑀯𑀺𑀚𑁆𑀚𑁄𑀖𑁂 𑀚𑀸𑀢𑁂 𑀲𑀜𑁆𑀚𑀸𑀢𑁂 𑀦𑀺𑀩𑁆𑀩𑀢𑁆𑀢𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀧𑀸𑀢𑀼𑀪𑀽𑀢𑁂. 𑀫𑀳𑀩𑁆𑀪𑀬𑁂𑀢𑀺 𑀚𑀸𑀢𑀺𑀪𑀬𑁂 𑀚𑀭𑀸𑀪𑀬𑁂 𑀩𑁆𑀬𑀸𑀥𑀺𑀪𑀬𑁂 𑀫𑀭𑀡𑀪𑀬𑁂𑀢𑀺 𑁋 𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂.

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀦𑁆𑀢𑀺 𑀚𑀭𑀸𑀬 𑀨𑀼𑀝𑁆𑀞𑀸𑀦𑀁 𑀧𑀭𑁂𑀢𑀸𑀦𑀁 𑀲𑀫𑁄𑀳𑀺𑀢𑀸𑀦𑀁 𑀲𑀫𑀦𑁆𑀦𑀸𑀕𑀢𑀸𑀦𑀁. 𑀫𑀘𑁆𑀘𑀼𑀦𑀸 𑀨𑀼𑀝𑁆𑀞𑀸𑀦𑀁 𑀧𑀭𑁂𑀢𑀸𑀦𑀁 𑀲𑀫𑁄𑀳𑀺𑀢𑀸𑀦𑀁 𑀲𑀫𑀦𑁆𑀦𑀸𑀕𑀢𑀸𑀦𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸𑀦𑀁 𑀚𑀭𑀸𑀬 𑀅𑀦𑀼𑀲𑀝𑀸𑀦𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸𑀦𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸𑀦𑀁 𑀅𑀢𑀸𑀡𑀸𑀦𑀁 𑀅𑀮𑁂𑀡𑀸𑀦𑀁 𑀅𑀲𑀭𑀡𑀸𑀦𑀁 𑀅𑀲𑀭𑀡𑀻𑀪𑀽𑀢𑀸𑀦𑀦𑁆𑀢𑀺 𑁋 𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁.

𑀤𑀻𑀧𑀁 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸𑀢𑀺 𑀤𑀻𑀧𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀕𑀢𑀺𑀁 𑀧𑀭𑀸𑀬𑀦𑀁 [𑀕𑀢𑀺𑀧𑀭𑀸𑀬𑀦𑀁 (𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺] 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀤𑀻𑀧𑀁 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲.

𑀢𑁆𑀯𑀜𑁆𑀘 𑀫𑁂 𑀤𑀻𑀧𑀫𑀓𑁆𑀔𑀸𑀳𑀻𑀢𑀺. 𑀢𑁆𑀯𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀤𑀻𑀧𑀫𑀓𑁆𑀔𑀸𑀳𑀻𑀢𑀺 𑀤𑀻𑀧𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀕𑀢𑀺𑀁 𑀧𑀭𑀸𑀬𑀦𑀁 𑀅𑀓𑁆𑀔𑀸𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑁆𑀯𑀜𑁆𑀘 𑀫𑁂 𑀤𑀻𑀧𑀫𑀓𑁆𑀔𑀸𑀳𑀺.

𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸𑀢𑀺 𑀬𑀣𑀬𑀺𑀤𑀁 𑀤𑀼𑀓𑁆𑀔𑀁 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀁 𑀕𑀘𑁆𑀙𑁂𑀬𑁆𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬 𑀧𑀼𑀦𑀧𑀝𑀺𑀲𑀦𑁆𑀥𑀺𑀓𑀁 𑀤𑀼𑀓𑁆𑀔𑀁 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸 𑀓𑀸𑀫𑀪𑀯𑁂 𑀯𑀸 𑀭𑀽𑀧𑀪𑀯𑁂 𑀯𑀸 𑀅𑀭𑀽𑀧𑀪𑀯𑁂 𑀯𑀸 𑀲𑀜𑁆𑀜𑀸𑀪𑀯𑁂 𑀯𑀸 𑀅𑀲𑀜𑁆𑀜𑀸𑀪𑀯𑁂 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀯𑀸 𑀏𑀓𑀯𑁄𑀓𑀸𑀭𑀪𑀯𑁂 𑀯𑀸 𑀘𑀢𑀼𑀯𑁄𑀓𑀸𑀭𑀪𑀯𑁂 𑀯𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀸 𑀧𑀼𑀦𑀕𑀢𑀺𑀬𑀸 𑀯𑀸 𑀉𑀧𑀧𑀢𑁆𑀢𑀺𑀬𑀸 𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀸 𑀪𑀯𑁂 𑀯𑀸 𑀲𑀁𑀲𑀸𑀭𑁂 𑀯𑀸 𑀯𑀝𑁆𑀝𑁂 𑀯𑀸 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀁 𑀕𑀘𑁆𑀙𑁂𑀬𑁆𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄]

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀢𑁆𑀯𑀜𑁆𑀘 𑀫𑁂 𑀤𑀻𑀧𑀫𑀓𑁆𑀔𑀸𑀳𑀺, 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸’’𑀢𑀺.

𑁬𑁨.

𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, [𑀓𑀧𑁆𑀧𑀸𑀢𑀺 𑀪𑀕𑀯𑀸]

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀫𑀺 𑀓𑀧𑁆𑀧 𑀢𑁂.

𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀦𑁆𑀢𑀺 𑀲𑀭𑁄 𑀯𑀼𑀘𑁆𑀘𑀢𑀺 𑀲𑀁𑀲𑀸𑀭𑁄 𑀆𑀕𑀫𑀦𑀁 𑀕𑀫𑀦𑀁 𑀕𑀫𑀦𑀸𑀕𑀫𑀦𑀁 𑀓𑀸𑀮𑀁 𑀕𑀢𑀺 𑀪𑀯𑀸𑀪𑀯𑁄, 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘 𑀦𑀺𑀩𑁆𑀩𑀢𑁆𑀢𑀺 𑀘 𑀪𑁂𑀤𑁄 𑀘 𑀚𑀸𑀢𑀺 𑀘 𑀚𑀭𑀸 𑀘 𑀫𑀭𑀡𑀜𑁆𑀘. 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀫𑀚𑁆𑀛𑁂𑀯 𑀲𑀁𑀲𑀸𑀭𑁂 𑀲𑀢𑁆𑀢𑀸 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸.

𑀓𑀣𑀁 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺…𑀧𑁂… 𑀏𑀯𑀁 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀓𑀣𑀁 𑀲𑀁𑀲𑀸𑀭𑀲𑁆𑀲 𑀧𑀘𑁆𑀙𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺…𑀧𑁂… 𑀏𑀯𑀁 𑀲𑀁𑀲𑀸𑀭𑀲𑁆𑀲 𑀧𑀘𑁆𑀙𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀫𑀚𑁆𑀛𑁂𑀯 𑀲𑀁𑀲𑀸𑀭𑁂 𑀲𑀢𑁆𑀢𑀸 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁. 𑀓𑀧𑁆𑀧𑀸𑀢𑀺 𑀪𑀕𑀯𑀸𑀢𑀺. 𑀓𑀧𑁆𑀧𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀓𑀧𑁆𑀧𑀸𑀢𑀺 𑀪𑀕𑀯𑀸.

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂𑀢𑀺 𑀓𑀸𑀫𑁄𑀖𑁂 𑀪𑀯𑁄𑀖𑁂 𑀤𑀺𑀝𑁆𑀞𑁄𑀖𑁂 𑀅𑀯𑀺𑀚𑁆𑀚𑁄𑀖𑁂 𑀚𑀸𑀢𑁂 𑀲𑀜𑁆𑀚𑀸𑀢𑁂 𑀦𑀺𑀩𑁆𑀩𑀢𑁆𑀢𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀧𑀸𑀢𑀼𑀪𑀽𑀢𑁂. 𑀫𑀳𑀩𑁆𑀪𑀬𑁂𑀢𑀺 𑀚𑀸𑀢𑀺𑀪𑀬𑁂 𑀚𑀭𑀸𑀪𑀬𑁂 𑀩𑁆𑀬𑀸𑀥𑀺𑀪𑀬𑁂 𑀫𑀭𑀡𑀪𑀬𑁂𑀢𑀺 𑁋 𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂.

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀦𑁆𑀢𑀺 𑀚𑀭𑀸𑀬 𑀨𑀼𑀝𑁆𑀞𑀸𑀦𑀁 𑀧𑀭𑁂𑀢𑀸𑀦𑀁 𑀲𑀫𑁄𑀳𑀺𑀢𑀸𑀦𑀁 𑀲𑀫𑀦𑁆𑀦𑀸𑀕𑀢𑀸𑀦𑀁, 𑀫𑀘𑁆𑀘𑀼𑀦𑀸 𑀨𑀼𑀝𑁆𑀞𑀸𑀦𑀁 𑀧𑀭𑁂𑀢𑀸𑀦𑀁 𑀲𑀫𑁄𑀳𑀺𑀢𑀸𑀦𑀁 𑀲𑀫𑀦𑁆𑀦𑀸𑀕𑀢𑀸𑀦𑀁 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸𑀦𑀁 𑀚𑀭𑀸𑀬 𑀅𑀦𑀼𑀲𑀝𑀸𑀦𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸𑀦𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸𑀦𑀁 𑀅𑀢𑀸𑀡𑀸𑀦𑀁 𑀅𑀮𑁂𑀡𑀸𑀦𑀁 𑀅𑀲𑀭𑀡𑀸𑀦𑀁 𑀅𑀲𑀭𑀡𑀻𑀪𑀽𑀢𑀸𑀦𑀦𑁆𑀢𑀺 𑁋 𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁.

𑀤𑀻𑀧𑀁 𑀧𑀩𑁆𑀭𑀽𑀫𑀺 𑀓𑀧𑁆𑀧 𑀢𑁂𑀢𑀺 𑀤𑀻𑀧𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀕𑀢𑀺𑀁 𑀧𑀭𑀸𑀬𑀦𑀁 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀤𑀻𑀧𑀁 𑀧𑀩𑁆𑀭𑀽𑀫𑀺 𑀓𑀧𑁆𑀧 𑀢𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, [𑀓𑀧𑁆𑀧𑀸𑀢𑀺 𑀪𑀕𑀯𑀸]

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀫𑀺 𑀓𑀧𑁆𑀧 𑀢𑁂’’𑀢𑀺.

𑁬𑁩.

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀏𑀢𑀁 𑀤𑀻𑀧𑀁 𑀅𑀦𑀸𑀧𑀭𑀁;

𑀦𑀺𑀩𑁆𑀩𑀸𑀦𑀁 𑀇𑀢𑀺 𑀦𑀁 𑀩𑁆𑀭𑀽𑀫𑀺, 𑀚𑀭𑀸𑀫𑀘𑁆𑀘𑀼𑀧𑀭𑀺𑀓𑁆𑀔𑀬𑀁.

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀦𑁆𑀢𑀺. 𑀓𑀺𑀜𑁆𑀘𑀦𑀦𑁆𑀢𑀺 𑁋 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁; 𑀓𑀺𑀜𑁆𑀘𑀦𑀧𑁆𑀧𑀳𑀸𑀦𑀁 𑀓𑀺𑀜𑁆𑀘𑀦𑀯𑀽𑀧𑀲𑀫𑀁 [𑀓𑀺𑀜𑁆𑀘𑀦𑀯𑀽𑀧𑀲𑀫𑁄 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀓𑀺𑀜𑁆𑀘𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑀁 [𑀓𑀺𑀜𑁆𑀘𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 (𑀲𑁆𑀬𑀸.)] 𑀓𑀺𑀜𑁆𑀘𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁. 𑀅𑀦𑀸𑀤𑀸𑀦𑀦𑁆𑀢𑀺 𑀆𑀤𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀆𑀤𑀸𑀦𑀧𑁆𑀧𑀳𑀸𑀦𑀁 𑀆𑀤𑀸𑀦𑀯𑀽𑀧𑀲𑀫𑀁 𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀆𑀤𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁.

𑀏𑀢𑀁 𑀤𑀻𑀧𑀁 𑀅𑀦𑀸𑀧𑀭𑀦𑁆𑀢𑀺 𑀏𑀢𑀁 𑀤𑀻𑀧𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀕𑀢𑀺 𑀧𑀭𑀸𑀬𑀦𑀁. 𑀅𑀦𑀸𑀧𑀭𑀦𑁆𑀢𑀺 𑀢𑀫𑁆𑀳𑀸 𑀧𑀭𑁄 𑀅𑀜𑁆𑀜𑁄 𑀤𑀻𑀧𑁄 𑀦𑀢𑁆𑀣𑀺. 𑀅𑀣 𑀔𑁄 𑀲𑁄 𑀏𑀯𑀁 𑀤𑀻𑀧𑁄 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀯𑀺𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸𑀢𑀺 𑁋 𑀏𑀢𑀁 𑀤𑀻𑀧𑀁 𑀅𑀦𑀸𑀧𑀭𑀁.

𑀦𑀺𑀩𑁆𑀩𑀸𑀦𑀁 𑀇𑀢𑀺 𑀦𑀁 𑀩𑁆𑀭𑀽𑀫𑀻𑀢𑀺 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀸𑀦𑀧𑁆𑀧𑀳𑀸𑀦𑀁 𑀯𑀸𑀦𑀯𑀽𑀧𑀲𑀫𑀁 𑀯𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀯𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀢𑀻𑀢𑀺. 𑀩𑁆𑀭𑀽𑀫𑀻𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀦𑀁 𑀩𑁆𑀭𑀽𑀫𑀺.

𑀚𑀭𑀸𑀫𑀘𑁆𑀘𑀼𑀧𑀭𑀺𑀓𑁆𑀔𑀬𑀦𑁆𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀭𑀸𑀫𑀘𑁆𑀘𑀼𑀧𑀭𑀺𑀓𑁆𑀔𑀬𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀏𑀢𑀁 𑀤𑀻𑀧𑀁 𑀅𑀦𑀸𑀧𑀭𑀁;

𑀦𑀺𑀩𑁆𑀩𑀸𑀦𑀁 𑀇𑀢𑀺 𑀦𑀁 𑀩𑁆𑀭𑀽𑀫𑀺, 𑀚𑀭𑀸𑀫𑀘𑁆𑀘𑀼𑀧𑀭𑀺𑀓𑁆𑀔𑀬’’𑀦𑁆𑀢𑀺.

𑁬𑁪.

𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸, 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽 [𑀧𑀝𑁆𑀞𑀕𑀽 (𑀲𑁆𑀬𑀸. 𑀓.)] .

𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸𑀢𑀺. 𑀏𑀢𑀦𑁆𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀜𑁆𑀜𑀸𑀬𑀸𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀬𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀲𑀢𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑀸 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑀸 [𑀪𑀸𑀯𑀺𑀢𑀢𑁆𑀢𑀸 (𑀓.)] 𑀲𑀢𑀸…𑀧𑁂… 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀲𑀢𑀸𑀢𑀺 𑁋 𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸.

𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺. 𑀤𑀺𑀝𑁆𑀞𑀥𑀫𑁆𑀫𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. 𑀅𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀤𑁄𑀲𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑀸 𑀉𑀧𑀲𑀦𑁆𑀢𑀸 𑀯𑀽𑀧𑀲𑀦𑁆𑀢𑀸 𑀦𑀺𑀩𑁆𑀩𑀼𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸.

𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸𑀢𑀺. 𑀫𑀸𑀭𑁄𑀢𑀺 𑀬𑁄 𑀲𑁄 𑀫𑀸𑀭𑁄 𑀓𑀡𑁆𑀳𑁄 𑀅𑀥𑀺𑀧𑀢𑀺 𑀅𑀦𑁆𑀢𑀕𑀽 𑀦𑀫𑀼𑀘𑀺 𑀧𑀫𑀢𑁆𑀢𑀩𑀦𑁆𑀥𑀼. 𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸𑀢𑀺 𑀦 𑀢𑁂 𑀫𑀸𑀭𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀦𑀸𑀧𑀺 𑀫𑀸𑀭𑁄 𑀢𑁂𑀲𑀼 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑁂 𑀫𑀸𑀭𑀜𑁆𑀘 𑀫𑀸𑀭𑀧𑀓𑁆𑀔𑀜𑁆𑀘 𑀫𑀸𑀭𑀧𑀸𑀲𑀜𑁆𑀘 𑀫𑀸𑀭𑀩𑀴𑀺𑀲𑀜𑁆𑀘 [𑀫𑀸𑀭𑀩𑀮𑀺𑀲𑀜𑁆𑀘 (𑀓.)] 𑀫𑀸𑀭𑀸𑀫𑀺𑀲𑀜𑁆𑀘 𑀫𑀸𑀭𑀯𑀺𑀲𑀬𑀜𑁆𑀘 𑀫𑀸𑀭𑀦𑀺𑀯𑀸𑀲𑀜𑁆𑀘 𑀫𑀸𑀭𑀕𑁄𑀘𑀭𑀜𑁆𑀘 𑀫𑀸𑀭𑀩𑀦𑁆𑀥𑀦𑀜𑁆𑀘 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀻𑀢𑀺 𑁋 𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸.

𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽𑀢𑀺 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀸 𑀧𑀤𑁆𑀥𑀘𑀭𑀸 [𑀧𑀝𑁆𑀞𑀸 𑀧𑀝𑁆𑀞𑀘𑀭𑀸 (𑀲𑁆𑀬𑀸. 𑀓.)] 𑀧𑀭𑀺𑀘𑀸𑀭𑀺𑀓𑀸 𑀲𑀺𑀬𑀸; 𑀩𑀼𑀤𑁆𑀥𑀲𑁆𑀲 𑀢𑁂 𑀪𑀕𑀯𑀢𑁄 𑀧𑀤𑁆𑀥𑀸 𑀧𑀤𑁆𑀥𑀘𑀭𑀸 𑀧𑀭𑀺𑀘𑀸𑀭𑀺𑀓𑀸 𑀲𑀺𑀬𑀸𑀢𑀺 𑁋 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸, 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀤𑀲𑀫𑁄.

𑁧𑁧. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁬𑁫.

𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺]

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁;

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢, 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀦𑁆𑀢𑀺 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸. 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑁋 𑀲𑀼𑀢𑁆𑀯𑀸𑀦𑀳𑀁. 𑀯𑀻𑀭𑀸𑀢𑀺 𑀯𑀻𑀭𑁄 𑀪𑀕𑀯𑀸. 𑀯𑀻𑀭𑀺𑀬𑀯𑀸𑀢𑀺 𑀯𑀻𑀭𑁄, 𑀧𑀳𑀽𑀢𑀺 𑀯𑀻𑀭𑁄, 𑀯𑀺𑀲𑀯𑀻𑀢𑀺 𑀯𑀻𑀭𑁄, 𑀅𑀮𑀫𑀢𑁆𑀢𑁄𑀢𑀺 𑀯𑀻𑀭𑁄, 𑀲𑀽𑀭𑁄𑀢𑀺 𑀯𑀻𑀭𑁄, 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺 𑀯𑀻𑀭𑁄.

𑀯𑀺𑀭𑀢𑁄 𑀇𑀥 𑀲𑀩𑁆𑀩𑀧𑀸𑀧𑀓𑁂𑀳𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀯𑀻𑀭𑀺𑀬𑀯𑀸 [𑀯𑀺𑀭𑀺𑀬𑀯𑀸 (𑀲𑁆𑀬𑀸.) 𑀲𑀼. 𑀦𑀺. 𑁫𑁩𑁬] 𑀲𑁄;

𑀲𑁄 𑀯𑀻𑀭𑀺𑀬𑀯𑀸 𑀧𑀥𑀸𑀦𑀯𑀸, 𑀯𑀻𑀭𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺.

𑀲𑀼𑀢𑁆𑀯𑀸𑀦𑀳𑀁 𑀯𑀻𑀭. 𑀅𑀓𑀸𑀫𑀓𑀸𑀫𑀺𑀦𑁆𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀢𑁆𑀣𑀼𑀓𑀸𑀫𑀸 𑀧𑀭𑀺𑀜𑁆𑀜𑀸𑀢𑀸, 𑀓𑀺𑀮𑁂𑀲𑀓𑀸𑀫𑀸 𑀧𑀳𑀻𑀦𑀸. 𑀯𑀢𑁆𑀣𑀼𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀓𑀺𑀮𑁂𑀲𑀓𑀸𑀫𑀸𑀦𑀁 𑀧𑀳𑀻𑀦𑀢𑁆𑀢𑀸 𑀪𑀕𑀯𑀸 𑀦 𑀓𑀸𑀫𑁂 𑀓𑀸𑀫𑁂𑀢𑀺, 𑀦 𑀓𑀸𑀫𑁂 𑀧𑀢𑁆𑀣𑁂𑀢𑀺, 𑀦 𑀓𑀸𑀫𑁂 𑀧𑀺𑀳𑁂𑀢𑀺, 𑀦 𑀓𑀸𑀫𑁂 𑀅𑀪𑀺𑀚𑀧𑁆𑀧𑀢𑀺. 𑀬𑁂 𑀓𑀸𑀫𑁂 𑀓𑀸𑀫𑁂𑀦𑁆𑀢𑀺, 𑀓𑀸𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀓𑀸𑀫𑁂 𑀧𑀺𑀳𑁂𑀦𑁆𑀢𑀺, 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀢𑁂 𑀓𑀸𑀫𑀓𑀸𑀫𑀺𑀦𑁄 𑀭𑀸𑀕𑀭𑀸𑀕𑀺𑀦𑁄 𑀲𑀜𑁆𑀜𑀸𑀲𑀜𑁆𑀜𑀺𑀦𑁄. 𑀪𑀕𑀯𑀸 𑀦 𑀓𑀸𑀫𑁂 𑀓𑀸𑀫𑁂𑀢𑀺, 𑀦 𑀓𑀸𑀫𑁂 𑀧𑀢𑁆𑀣𑁂𑀢𑀺, 𑀦 𑀓𑀸𑀫𑁂 𑀧𑀺𑀳𑁂𑀢𑀺, 𑀦 𑀓𑀸𑀫𑁂 𑀅𑀪𑀺𑀚𑀧𑁆𑀧𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀸𑀫𑁄 𑀦𑀺𑀓𑁆𑀓𑀸𑀫𑁄 𑀘𑀢𑁆𑀢𑀓𑀸𑀫𑁄 𑀯𑀦𑁆𑀢𑀓𑀸𑀫𑁄 𑀫𑀼𑀢𑁆𑀢𑀓𑀸𑀫𑁄 𑀧𑀳𑀻𑀦𑀓𑀸𑀫𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀫𑀓𑀸𑀫𑀓𑀸𑀫𑀺𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀻𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀸𑀢𑀺. 𑀚𑀢𑀼𑀓𑀡𑁆𑀡𑀻𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁄𑀢𑁆𑀢𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺.

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀦𑁆𑀢𑀺. 𑀑𑀖𑀸𑀢𑀺𑀕𑀦𑁆𑀢𑀺 𑀑𑀖𑀸𑀢𑀺𑀕𑀁 𑀑𑀖𑀁 𑀅𑀢𑀺𑀓𑁆𑀓𑀦𑁆𑀢𑀁 𑀲𑀫𑀢𑀺𑀓𑁆𑀓𑀦𑁆𑀢𑀁 𑀯𑀻𑀢𑀺𑀯𑀢𑁆𑀢𑀦𑁆𑀢𑀺 𑁋 𑀑𑀖𑀸𑀢𑀺𑀕𑀁. 𑀧𑀼𑀝𑁆𑀞𑀼𑀦𑁆𑀢𑀺 𑀧𑀼𑀝𑁆𑀞𑀼𑀁 𑀧𑀼𑀘𑁆𑀙𑀺𑀢𑀼𑀁 𑀬𑀸𑀘𑀺𑀢𑀼𑀁 𑀅𑀚𑁆𑀛𑁂𑀲𑀺𑀢𑀼𑀁 𑀧𑀲𑀸𑀤𑁂𑀢𑀼𑀁. 𑀅𑀓𑀸𑀫𑀫𑀸𑀕𑀫𑀦𑁆𑀢𑀺 𑀅𑀓𑀸𑀫𑀁 𑀧𑀼𑀝𑁆𑀞𑀼𑀁 𑀦𑀺𑀓𑁆𑀓𑀸𑀫𑀁 𑀘𑀢𑁆𑀢𑀓𑀸𑀫𑀁 𑀯𑀦𑁆𑀢𑀓𑀸𑀫𑀁 𑀫𑀼𑀢𑁆𑀢𑀓𑀸𑀫𑀁 𑀧𑀳𑀻𑀦𑀓𑀸𑀫𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑀁 𑀯𑀻𑀢𑀭𑀸𑀕𑀁 𑀯𑀺𑀕𑀢𑀭𑀸𑀕𑀁 𑀘𑀢𑁆𑀢𑀭𑀸𑀕𑀁 𑀯𑀦𑁆𑀢𑀭𑀸𑀕𑀁 𑀫𑀼𑀢𑁆𑀢𑀭𑀸𑀕𑀁 𑀧𑀳𑀻𑀦𑀭𑀸𑀕𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑀁 𑀆𑀕𑀫𑁆𑀳𑀸 𑀆𑀕𑀢𑀫𑁆𑀳𑀸 𑀉𑀧𑀸𑀕𑀢𑀫𑁆𑀳𑀸 𑀲𑀫𑁆𑀧𑀢𑁆𑀢𑀫𑁆𑀳𑀸 𑀢𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀢𑀫𑁆𑀳𑀸𑀢𑀺 𑁋 𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁.

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢𑀸𑀢𑀺. 𑀲𑀦𑁆𑀢𑀻𑀢𑀺 𑀏𑀓𑁂𑀦 𑀆𑀓𑀸𑀭𑁂𑀦 𑀲𑀦𑁆𑀢𑀺𑀧𑀺 𑀲𑀦𑁆𑀢𑀺𑀧𑀤𑀫𑁆𑀧𑀺 [𑀲𑀦𑁆𑀢𑀺𑀧𑀤𑀦𑁆𑀢𑀺 (𑀓.)] 𑀢𑀁𑀬𑁂𑀯 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀫𑁂𑀢𑀁 𑀧𑀤𑀁, 𑀧𑀡𑀻𑀢𑀫𑁂𑀢𑀁 𑀧𑀤𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀅𑀣𑀸𑀧𑀭𑁂𑀦𑀸𑀓𑀸𑀭𑁂𑀦 𑀬𑁂 𑀥𑀫𑁆𑀫𑀸 𑀲𑀦𑁆𑀢𑀸𑀥𑀺𑀕𑀫𑀸𑀬 𑀲𑀦𑁆𑀢𑀺𑀨𑀼𑀲𑀦𑀸𑀬 𑀲𑀦𑁆𑀢𑀺𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀦𑁆𑀢𑀺𑀧𑀤𑀸. 𑀲𑀦𑁆𑀢𑀺𑀧𑀤𑀁 𑀢𑀸𑀡𑀧𑀤𑀁 𑀮𑁂𑀡𑀧𑀤𑀁 𑀲𑀭𑀡𑀧𑀤𑀁 𑀅𑀪𑀬𑀧𑀤𑀁 𑀅𑀘𑁆𑀘𑀼𑀢𑀧𑀤𑀁 𑀅𑀫𑀢𑀧𑀤𑀁 𑀦𑀺𑀩𑁆𑀩𑀸𑀦𑀧𑀤𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀲𑀳𑀚𑀦𑁂𑀢𑁆𑀢𑀸𑀢𑀺 𑀦𑁂𑀢𑁆𑀢𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀢𑁆𑀢𑀜𑁆𑀘 𑀚𑀺𑀦𑀪𑀸𑀯𑁄 𑀘 𑀩𑁄𑀥𑀺𑀬𑀸 𑀫𑀽𑀮𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀳𑀚𑀦𑁂𑀢𑁆𑀢𑁄𑀢𑀺 𑁋 𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢.

𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀬𑀣𑀸𑀢𑀘𑁆𑀙𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺…𑀧𑁂… 𑀧𑀓𑀸𑀲𑁂𑀳𑀻𑀢𑀺 𑁋 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺]

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁;

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢, 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁬𑁬.

𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸;

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁.

𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀻𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀪𑀕𑀯𑀸 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺.

𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸𑀢𑀺 𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄 [𑀲𑀼𑀭𑀺𑀬𑁄 (𑀲𑁆𑀬𑀸.)]. 𑀧𑀣𑀯𑀻 𑀯𑀼𑀘𑁆𑀘𑀢𑀺 𑀚𑀕𑀢𑀻 [𑀚𑀭𑀸 (𑀲𑁆𑀬𑀸.)]. 𑀬𑀣𑀸 𑀲𑀽𑀭𑀺𑀬𑁄 𑀢𑁂𑀚𑀻 𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀣𑀯𑀺𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀦𑁆𑀢𑀸𑀧𑀬𑀺𑀢𑁆𑀯𑀸 𑀲𑀩𑁆𑀩𑀁 𑀆𑀓𑀸𑀲𑀕𑀢𑀁 𑀢𑀫𑀕𑀢𑀁 𑀅𑀪𑀺𑀯𑀺𑀳𑀘𑁆𑀘 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀕𑀕𑀦𑀧𑀣𑁂 [𑀕𑀫𑀦𑀧𑀣𑁂 (𑀲𑁆𑀬𑀸.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀜𑀸𑀡𑀢𑁂𑀚𑀻 𑀜𑀸𑀡𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀁 𑀅𑀪𑀺𑀲𑀗𑁆𑀔𑀸𑀭𑀲𑀫𑀼𑀤𑀬𑀁…𑀧𑁂… 𑀓𑀺𑀮𑁂𑀲𑀢𑀫𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸.

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄𑀢𑀺 𑀅𑀳𑀫𑀲𑁆𑀫𑀺 𑀧𑀭𑀺𑀢𑁆𑀢𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄. 𑀢𑁆𑀯𑀫𑁆𑀧𑀺 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄.

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂…𑀧𑁂… 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀚𑀸𑀢𑀺𑀚𑀭𑀸𑀬 𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸;

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦’’𑀦𑁆𑀢𑀺.

𑁬𑁭.

𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁, [𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸]

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸, 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀁.

𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀦𑁆𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀕𑁂𑀥𑀦𑁆𑀢𑀺 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀦𑁆𑀢𑀺 𑀓𑀸𑀫𑁂𑀲𑀼 𑀕𑁂𑀥𑀁 𑀯𑀺𑀦𑀬 𑀧𑀝𑀺𑀯𑀺𑀦𑀬 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁. 𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸.

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀔𑁂𑀫𑀢𑁄 𑀢𑀸𑀡𑀢𑁄 𑀮𑁂𑀡𑀢𑁄 𑀲𑀭𑀡𑀢𑁄 𑀲𑀭𑀡𑀻𑀪𑀽𑀢𑀢𑁄 𑀅𑀪𑀬𑀢𑁄 𑀅𑀘𑁆𑀘𑀼𑀢𑀢𑁄 𑀅𑀫𑀢𑀢𑁄 𑀦𑀺𑀩𑁆𑀩𑀸𑀦𑀢𑁄 𑀤𑀝𑁆𑀞𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄.

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸𑀢𑀺. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁. 𑀦𑀺𑀭𑀢𑁆𑀢𑀁 𑀯𑀸𑀢𑀺 𑀦𑀺𑀭𑀢𑁆𑀢𑀁 𑀯𑀸 𑀫𑀼𑀜𑁆𑀘𑀺𑀢𑀩𑁆𑀩𑀁 𑀯𑀺𑀚𑀳𑀺𑀢𑀩𑁆𑀩𑀁 𑀯𑀺𑀦𑁄𑀤𑀺𑀢𑀩𑁆𑀩𑀁 𑀩𑁆𑀬𑀦𑁆𑀢𑀻𑀓𑀸𑀢𑀩𑁆𑀩𑀁 𑀅𑀦𑀪𑀸𑀯𑀁 𑀕𑀫𑁂𑀢𑀩𑁆𑀩𑀦𑁆𑀢𑀺 𑁋 𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸.

𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁. 𑀇𑀤𑀁 𑀓𑀺𑀜𑁆𑀘𑀦𑀁 [𑀇𑀫𑁂 𑀓𑀺𑀜𑁆𑀘𑀦𑀸 (𑀓.)] 𑀢𑀼𑀬𑁆𑀳𑀁 𑀫𑀸 𑀯𑀺𑀚𑁆𑀚𑀺𑀢𑁆𑀣 𑀫𑀸 𑀧𑀯𑀺𑀚𑁆𑀚𑀺𑀢𑁆𑀣 𑀫𑀸 𑀲𑀁𑀯𑀺𑀚𑁆𑀚𑀺𑀢𑁆𑀣 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁, [𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸]

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸, 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦’’𑀦𑁆𑀢𑀺.

𑁬𑁮.

𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀻𑀢𑀺 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀬𑁂 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀢𑁂 𑀓𑀺𑀮𑁂𑀲𑁂 𑀲𑁄𑀲𑁂𑀳𑀺 𑀯𑀺𑀲𑁄𑀲𑁂𑀳𑀺 𑀲𑀼𑀓𑁆𑀔𑀸𑀧𑁂𑀳𑀺 𑀯𑀺𑀲𑀼𑀓𑁆𑀔𑀸𑀧𑁂𑀳𑀺 𑀅𑀩𑀻𑀚𑀁 𑀓𑀭𑁄𑀳𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺. 𑀅𑀣 𑀯𑀸, 𑀬𑁂 𑀅𑀢𑀻𑀢𑀸 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀢𑁂 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂 𑀲𑁄𑀲𑁂𑀳𑀺 𑀯𑀺𑀲𑁄𑀲𑁂𑀳𑀺 𑀲𑀼𑀓𑁆𑀔𑀸𑀧𑁂𑀳𑀺 𑀯𑀺𑀲𑀼𑀓𑁆𑀔𑀸𑀧𑁂𑀳𑀺 𑀅𑀩𑀻𑀚𑀁 [𑀅𑀯𑀻𑀚𑀁 (𑀲𑁆𑀬𑀸.)] 𑀓𑀭𑁄𑀳𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺.

𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀦𑁆𑀢𑀺 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁. 𑀇𑀤𑀁 𑀓𑀺𑀜𑁆𑀘𑀦𑀁 𑀢𑀼𑀬𑁆𑀳𑀁 𑀫𑀸 𑀅𑀳𑀼 𑀫𑀸 𑀅𑀳𑁄𑀲𑀺 𑀫𑀸 𑀚𑀦𑁂𑀲𑀺 [𑀫𑀸 𑀚𑀦𑁂𑀳𑀺 (𑀲𑁆𑀬𑀸.) 𑀢𑀣𑀸𑀯𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼𑀧𑀺] 𑀫𑀸 𑀲𑀜𑁆𑀚𑀦𑁂𑀲𑀺 𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁.

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀻𑀢𑀺 𑀫𑀚𑁆𑀛𑁂 𑀯𑀼𑀘𑁆𑀘𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀗𑁆𑀔𑀸𑀭𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀕𑀳𑁂𑀲𑁆𑀲𑀲𑀺 𑀦 𑀢𑀡𑁆𑀳𑀺𑀲𑁆𑀲𑀲𑀺 𑀦 𑀧𑀭𑀸𑀫𑀲𑀺𑀲𑁆𑀲𑀲𑀺 𑀦 𑀦𑀦𑁆𑀤𑀺𑀲𑁆𑀲𑀲𑀺 𑀦𑀸𑀪𑀺𑀦𑀦𑁆𑀤𑀺𑀲𑁆𑀲𑀲𑀺 𑀦 𑀅𑀚𑁆𑀛𑁄𑀲𑀺𑀲𑁆𑀲𑀲𑀺. 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀺𑀲𑁆𑀲𑀲𑀺 𑀯𑀺𑀦𑁄𑀤𑁂𑀲𑁆𑀲𑀲𑀺 𑀩𑁆𑀬𑀦𑁆𑀢𑀻𑀓𑀭𑀺𑀲𑁆𑀲𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑁆𑀲𑀲𑀻𑀢𑀺 𑁋 𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺.

𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻𑀢𑀺 𑀭𑀸𑀕𑀲𑁆𑀲 𑀉𑀧𑀲𑀫𑀺𑀢𑀢𑁆𑀢𑀸 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺, 𑀤𑁄𑀲𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀉𑀧𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀘𑀭𑀺𑀲𑁆𑀲𑀲𑀺 𑀯𑀺𑀳𑀭𑀺𑀲𑁆𑀲𑀲𑀺 𑀇𑀭𑀺𑀬𑀺𑀲𑁆𑀲𑀲𑀺 𑀯𑀢𑁆𑀢𑀺𑀲𑁆𑀲𑀲𑀺 𑀧𑀸𑀮𑁂𑀲𑁆𑀲𑀲𑀺 𑀬𑀧𑁂𑀲𑁆𑀲𑀲𑀺 𑀬𑀸𑀧𑁂𑀲𑁆𑀲𑀲𑀻𑀢𑀺 𑁋 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺.

𑁬𑁯.

𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂.

𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑀲𑀩𑁆𑀩𑀲𑁄𑀢𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡𑀸𑀢𑀺 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀯𑀺𑀕𑀢𑀕𑁂𑀥𑀲𑁆𑀲 𑀘𑀢𑁆𑀢𑀕𑁂𑀥𑀲𑁆𑀲 𑀯𑀦𑁆𑀢𑀕𑁂𑀥𑀲𑁆𑀲 𑀫𑀼𑀢𑁆𑀢𑀕𑁂𑀥𑀲𑁆𑀲 𑀧𑀳𑀻𑀦𑀕𑁂𑀥𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑀲𑁆𑀲 𑀯𑀻𑀢𑀭𑀸𑀕𑀲𑁆𑀲 𑀯𑀺𑀕𑀢𑀭𑀸𑀕𑀲𑁆𑀲 𑀘𑀢𑁆𑀢𑀭𑀸𑀕𑀲𑁆𑀲 𑀯𑀦𑁆𑀢𑀭𑀸𑀕𑀲𑁆𑀲 𑀫𑀼𑀢𑁆𑀢𑀭𑀸𑀕𑀲𑁆𑀲 𑀧𑀳𑀻𑀦𑀭𑀸𑀕𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑀲𑁆𑀲𑀸𑀢𑀺 𑁋 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡.

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀆𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀅𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 𑀇𑀫𑁂 𑀆𑀲𑀯𑀸 𑀢𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺.

𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂𑀢𑀺 𑀬𑁂𑀳𑀺 𑀆𑀲𑀯𑁂𑀳𑀺 𑀫𑀘𑁆𑀘𑀼𑀦𑁄 𑀯𑀸 𑀯𑀲𑀁 𑀕𑀘𑁆𑀙𑁂𑀬𑁆𑀬, 𑀫𑀭𑀡𑀲𑁆𑀲 𑀯𑀸 𑀯𑀲𑀁 𑀕𑀘𑁆𑀙𑁂𑀬𑁆𑀬, 𑀫𑀸𑀭𑀧𑀓𑁆𑀔𑀲𑁆𑀲 𑀯𑀸 𑀯𑀲𑀁 𑀕𑀘𑁆𑀙𑁂𑀬𑁆𑀬; 𑀢𑁂 𑀆𑀲𑀯𑀸 𑀢𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀏𑀓𑀸𑀤𑀲𑀫𑁄.

𑁧𑁨. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁭𑁦.

𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄]

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁;

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁, 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 [𑀅𑀧𑀕𑀫𑀺𑀲𑁆𑀲𑀦𑁆𑀢𑀺 (𑀓.)] 𑀇𑀢𑁄.

𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀦𑁆𑀢𑀺. 𑀑𑀓𑀜𑁆𑀚𑀳𑀦𑁆𑀢𑀺 𑀭𑀽𑀧𑀥𑀸𑀢𑀼𑀬𑀸 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀸𑀬𑀼𑀧𑀸𑀤𑀸𑀦𑀸 [𑀉𑀧𑀬𑀼𑀧𑀸𑀤𑀸𑀦𑀸 (𑀓.)] 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀑𑀓𑀜𑁆𑀚𑀳𑁄. 𑀯𑁂𑀤𑀦𑀸𑀥𑀸𑀢𑀼𑀬𑀸…𑀧𑁂… 𑀲𑀜𑁆𑀜𑀸𑀥𑀸𑀢𑀼𑀬𑀸… 𑀲𑀗𑁆𑀔𑀸𑀭𑀥𑀸𑀢𑀼𑀬𑀸… 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀸𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀑𑀓𑀜𑁆𑀚𑀳𑁄.

𑀢𑀡𑁆𑀳𑀘𑁆𑀙𑀺𑀤𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀲𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀙𑀺𑀦𑁆𑀦𑀸 𑀉𑀘𑁆𑀙𑀺𑀦𑁆𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀢𑀡𑁆𑀳𑀘𑁆𑀙𑀺𑀤𑁄. 𑀅𑀦𑁂𑀚𑁄𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 …𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀏𑀚𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄 𑀪𑀕𑀯𑀸 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦 𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄𑀢𑀺 𑁋 𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁. 𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺, 𑀧𑀺𑀬𑀯𑀘𑀦𑀁…𑀧𑁂… 𑀪𑀤𑁆𑀭𑀸𑀯𑀼𑀥𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄.

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀦𑁆𑀢𑀺 𑀦𑀦𑁆𑀤𑀻 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀦𑀦𑁆𑀤𑀻 𑀲𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀦𑀦𑁆𑀤𑀺𑀜𑁆𑀚𑀳𑁄. 𑀑𑀖𑀢𑀺𑀡𑁆𑀡𑀦𑁆𑀢𑀺 𑀪𑀕𑀯𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄 𑀪𑀯𑁄𑀖𑀁 𑀢𑀺𑀡𑁆𑀡𑁄 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄 𑀲𑀩𑁆𑀩𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸 𑀘𑀺𑀢𑁆𑀢𑀁… 𑀫𑁄𑀳𑀸 𑀘𑀺𑀢𑁆𑀢𑀁…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑁋 𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁.

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀦𑁆𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀓𑀧𑁆𑀧𑀜𑁆𑀚𑀳𑁄. 𑀅𑀪𑀺𑀬𑀸𑀘𑁂𑀢𑀺 𑀬𑀸𑀘𑀸𑀫𑀺 𑀅𑀪𑀺𑀬𑀸𑀘𑀸𑀫𑀺 𑀅𑀚𑁆𑀛𑁂𑀲𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀚𑀧𑁆𑀧𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀺. 𑀲𑀼𑀫𑁂𑀥𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀇𑀫𑀸𑀬 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀼𑀫𑁂𑀥𑁄𑀢𑀺 𑁋 𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁.

𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄𑀢𑀺. 𑀦𑀸𑀕𑀲𑁆𑀲𑀸𑀢𑀺 𑀦𑀸𑀕𑁄. 𑀪𑀕𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄, 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄, 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄…𑀧𑁂… 𑀏𑀯𑀁 𑀪𑀕𑀯𑀸 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄. 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸 𑀇𑀢𑁄 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀯𑀚𑀺𑀲𑁆𑀲𑀦𑁆𑀢𑀺 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺 𑀤𑀺𑀲𑀸𑀯𑀺𑀤𑀺𑀲𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑁋 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄]

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁;

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁, 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄’’𑀢𑀺.

𑁭𑁧.

𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸, 𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸;

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸𑀢𑀺. 𑀦𑀸𑀦𑀸𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸𑀢𑀺 𑀅𑀗𑁆𑀕𑀸 𑀘 𑀫𑀕𑀥𑀸 𑀘 𑀓𑀮𑀺𑀗𑁆𑀕𑀸 𑀘 𑀓𑀸𑀲𑀺𑀬𑀸 𑀘 𑀓𑁄𑀲𑀮𑀸 𑀘 𑀯𑀚𑁆𑀚𑀺𑀬𑀸 𑀘 𑀫𑀮𑁆𑀮𑀸 𑀘 𑀘𑁂𑀢𑀺𑀬𑀫𑁆𑀳𑀸 𑀘 [𑀘𑁂𑀢𑀺𑀬𑀫𑁆𑀳𑀸 𑀘 𑀲𑀸𑀕𑀭𑀫𑁆𑀳𑀸 𑀘 (𑀲𑁆𑀬𑀸.)] 𑀯𑀁𑀲𑀸 𑀘 𑀓𑀼𑀭𑀼𑀫𑁆𑀳𑀸 𑀘 𑀧𑀜𑁆𑀘𑀸𑀮𑀸 𑀘 𑀫𑀘𑁆𑀙𑀸 𑀘 𑀲𑀼𑀭𑀲𑁂𑀦𑀸 𑀘 𑀅𑀲𑁆𑀲𑀓𑀸 𑀘 𑀅𑀯𑀦𑁆𑀢𑀺𑀬𑀸 𑀘 𑀬𑁄𑀦𑀸 [𑀬𑁄𑀦𑀓𑀸 (𑀓.) 𑀫𑀳𑀸𑀦𑀺. 𑁫𑁫] 𑀘 𑀓𑀫𑁆𑀩𑁄𑀚𑀸 𑀘. 𑀲𑀗𑁆𑀕𑀢𑀸𑀢𑀺 𑀲𑀗𑁆𑀕𑀢𑀸 𑀲𑀫𑀸𑀕𑀢𑀸 𑀲𑀫𑁄𑀳𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑁋 𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸.

𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸𑀢𑀺. 𑀯𑀻𑀭𑀸𑀢𑀺 𑀯𑀻𑀭𑁄. 𑀪𑀕𑀯𑀸 𑀯𑀻𑀭𑀺𑀬𑀯𑀸𑀢𑀺 𑀯𑀻𑀭𑁄, 𑀧𑀳𑀽𑀢𑀺 𑀯𑀻𑀭𑁄, 𑀯𑀺𑀲𑀯𑀻𑀢𑀺 𑀯𑀻𑀭𑁄, 𑀅𑀮𑀫𑀢𑁆𑀢𑁄𑀢𑀺 𑀯𑀻𑀭𑁄, 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀯𑀻𑀭𑁄.

𑀯𑀺𑀭𑀢𑁄 𑀇𑀥 𑀲𑀩𑁆𑀩𑀧𑀸𑀧𑀓𑁂𑀳𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀯𑀻𑀭𑀺𑀬𑀯𑀸 𑀲𑁄;

𑀲𑁄 𑀯𑀻𑀭𑀺𑀬𑀯𑀸 𑀧𑀥𑀸𑀦𑀯𑀸, 𑀯𑀻𑀭𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺.

𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁. 𑀅𑀪𑀺𑀓𑀗𑁆𑀔𑀫𑀸𑀦𑀸𑀢𑀺 𑀅𑀪𑀺𑀓𑀗𑁆𑀔𑀫𑀸𑀦𑀸 𑀇𑀘𑁆𑀙𑀫𑀸𑀦𑀸 𑀲𑀸𑀤𑀺𑀬𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸 𑀅𑀪𑀺𑀚𑀧𑁆𑀧𑀫𑀸𑀦𑀸𑀢𑀺 𑁋 𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸.

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀢𑀼𑀯𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺 𑀲𑀸𑀥𑀼 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺.

𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀢𑀼𑀮𑀺𑀢𑁄 𑀢𑀻𑀭𑀺𑀢𑁄 𑀯𑀺𑀪𑀽𑀢𑁄 𑀯𑀺𑀪𑀸𑀯𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑁋 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸, 𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸;

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’𑀢𑀺.

𑁭𑁨.

𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁, [𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀁.

𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀦𑁆𑀢𑀺 𑀆𑀤𑀸𑀦𑀢𑀡𑁆𑀳𑀁 𑀯𑀼𑀘𑁆𑀘𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀆𑀤𑀸𑀦𑀢𑀡𑁆𑀳𑀸𑀢𑀺 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀢𑀡𑁆𑀳𑀸? 𑀢𑀸𑀬 𑀢𑀡𑁆𑀳𑀸𑀬 𑀭𑀽𑀧𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀢𑀡𑁆𑀳𑀸. 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀬𑁆𑀬 𑀧𑀝𑀺𑀯𑀺𑀦𑀬𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁. 𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸𑀢𑀺. 𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸.

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺. 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁; 𑀅𑀥𑁄𑀢𑀺 𑀅𑀢𑀻𑀢𑀁; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑁄; 𑀅𑀥𑁄𑀢𑀺 𑀦𑀺𑀭𑀬𑀮𑁄𑀓𑁄; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀅𑀣 𑀯𑀸, 𑀉𑀤𑁆𑀥𑀦𑁆𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸; 𑀅𑀥𑁄𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀉𑀤𑁆𑀥𑀦𑁆𑀢𑀺 𑀅𑀭𑀽𑀧𑀥𑀸𑀢𑀼; 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀭𑀽𑀧𑀥𑀸𑀢𑀼. 𑀉𑀤𑁆𑀥𑀦𑁆𑀢𑀺 𑀲𑀼𑀔𑀸 𑀯𑁂𑀤𑀦𑀸; 𑀅𑀥𑁄𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸; 𑀅𑀥𑁄𑀢𑀺 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀯𑁂𑀫𑀚𑁆𑀛𑁂𑀢𑀺 𑁋 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂.

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀻𑀢𑀺 𑀬𑀁 𑀬𑀁 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺.

𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀦𑁆𑀢𑀺 𑀢𑁂𑀦𑁂𑀯 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀓𑁄 𑀔𑀦𑁆𑀥𑀫𑀸𑀭𑁄 𑀥𑀸𑀢𑀼𑀫𑀸𑀭𑁄 𑀆𑀬𑀢𑀦𑀫𑀸𑀭𑁄 𑀕𑀢𑀺𑀫𑀸𑀭𑁄 𑀉𑀧𑀧𑀢𑁆𑀢𑀺𑀫𑀸𑀭𑁄 𑀧𑀝𑀺𑀲𑀦𑁆𑀥𑀺𑀫𑀸𑀭𑁄 𑀪𑀯𑀫𑀸𑀭𑁄 𑀲𑀁𑀲𑀸𑀭𑀫𑀸𑀭𑁄 𑀯𑀝𑁆𑀝𑀫𑀸𑀭𑁄 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑁄 𑀳𑁄𑀢𑀺. 𑀚𑀦𑁆𑀢𑀼𑀦𑁆𑀢𑀺 𑀲𑀢𑁆𑀢𑀁 𑀚𑀦𑀁 𑀦𑀭𑀁 𑀫𑀸𑀡𑀯𑀁 [𑀫𑀸𑀦𑀯𑀁 (𑀲𑁆𑀬𑀸.)] 𑀧𑁄𑀲𑀁 𑀧𑀼𑀕𑁆𑀕𑀮𑀁 𑀚𑀻𑀯𑀁 𑀚𑀸𑀕𑀼𑀁 𑀚𑀦𑁆𑀢𑀼𑀁 𑀇𑀦𑁆𑀤𑀕𑀼𑀁 𑀫𑀦𑀼𑀚𑀦𑁆𑀢𑀺 𑁋 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁, [𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼’’𑀦𑁆𑀢𑀺.

𑁭𑁩.

𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣, 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂;

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀁.

𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸, 𑀏𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀆𑀤𑀸𑀦𑀢𑀡𑁆𑀳𑀸𑀬𑀸𑀢𑀺 𑁋 𑀢𑀲𑁆𑀫𑀸. 𑀧𑀚𑀸𑀦𑀦𑁆𑀢𑀺 𑀚𑀸𑀦𑀦𑁆𑀢𑁄 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀚𑀸𑀦𑀦𑁆𑀢𑁄 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀦 𑀉𑀧𑀸𑀤𑀺𑀬𑁂𑀣𑀸𑀢𑀺 𑀭𑀽𑀧𑀁 𑀦𑀸𑀤𑀺𑀬𑁂𑀬𑁆𑀬 𑀦 𑀉𑀧𑀸𑀤𑀺𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁 … 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀦𑀸𑀤𑀺𑀬𑁂𑀬𑁆𑀬 𑀦 𑀉𑀧𑀸𑀤𑀺𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬𑀸𑀢𑀺 𑁋 𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣.

𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀯𑀸 𑀪𑀺𑀓𑁆𑀔𑀼, 𑀲𑁂𑀓𑁆𑀔𑁄 𑀯𑀸 𑀪𑀺𑀓𑁆𑀔𑀼. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀪𑀺𑀓𑁆𑀔𑀼 𑀲𑀢𑁄. 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀩𑁆𑀩𑀅𑀧𑀸𑀬𑀮𑁄𑀓𑁂 𑀲𑀩𑁆𑀩𑀫𑀦𑀼𑀲𑁆𑀲𑀮𑁄𑀓𑁂 𑀲𑀩𑁆𑀩𑀤𑁂𑀯𑀮𑁄𑀓𑁂 𑀲𑀩𑁆𑀩𑀔𑀦𑁆𑀥𑀮𑁄𑀓𑁂 𑀲𑀩𑁆𑀩𑀥𑀸𑀢𑀼𑀮𑁄𑀓𑁂 𑀲𑀩𑁆𑀩𑀆𑀬𑀢𑀦𑀮𑁄𑀓𑁂𑀢𑀺 𑁋 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂.

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄𑀢𑀺 𑀆𑀤𑀸𑀦𑀲𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀭𑀽𑀧𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀢𑀻𑀢𑀺. 𑀧𑁂𑀓𑁆𑀔𑀫𑀸𑀦𑁄𑀢𑀺 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀤𑀺𑀲𑁆𑀲𑀫𑀸𑀦𑁄 𑀧𑀲𑁆𑀲𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄.

𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀦𑁆𑀢𑀺. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁 𑀫𑀘𑁆𑀘𑀼𑀥𑁂𑀬𑁆𑀬𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀧𑀚𑀸 𑀫𑀘𑁆𑀘𑀼𑀥𑁂𑀬𑁆𑀬𑁂 𑀫𑀸𑀭𑀥𑁂𑀬𑁆𑀬𑁂 𑀫𑀭𑀡𑀥𑁂𑀬𑁆𑀬𑁂 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀬𑀣𑀸 𑀪𑀺𑀢𑁆𑀢𑀺𑀔𑀺𑀮𑁂 𑀯𑀸 𑀦𑀸𑀕𑀤𑀦𑁆𑀢𑁂 𑀯𑀸 𑀪𑀡𑁆𑀟𑀁 𑀲𑀢𑁆𑀢𑀁 𑀯𑀺𑀲𑀢𑁆𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀁 𑀮𑀕𑁆𑀕𑀺𑀢𑀁 𑀧𑀮𑀺𑀩𑀼𑀤𑁆𑀥𑀁, 𑀏𑀯𑀫𑁂𑀯 𑀧𑀚𑀸 𑀫𑀘𑁆𑀘𑀼𑀥𑁂𑀬𑁆𑀬𑁂 𑀫𑀸𑀭𑀥𑁂𑀬𑁆𑀬𑁂 𑀫𑀭𑀡𑀥𑁂𑀬𑁆𑀬𑁂 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑁋 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣, 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂;

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢’’𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁭𑁪.

𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀤𑀬𑁄]

𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀁;

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀺 [𑀲𑀁𑀩𑁆𑀭𑀽𑀳𑀺 (𑀲𑁆𑀬𑀸.)], 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁.

𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀦𑁆𑀢𑀺. 𑀛𑀸𑀬𑀺𑀦𑁆𑀢𑀺 𑀛𑀸𑀬𑀻 𑀪𑀕𑀯𑀸. 𑀧𑀞𑀫𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀤𑀼𑀢𑀺𑀬𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀢𑀢𑀺𑀬𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀘𑀢𑀼𑀢𑁆𑀣𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀧𑁆𑀧𑀻𑀢𑀺𑀓𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀦𑀺𑀧𑁆𑀧𑀻𑀢𑀺𑀓𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀸𑀢𑀲𑀳𑀕𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀲𑀼𑀜𑁆𑀜𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀦𑀺𑀫𑀺𑀢𑁆𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀅𑀧𑁆𑀧𑀡𑀺𑀳𑀺𑀢𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀮𑁄𑀓𑀺𑀬𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻, 𑀮𑁄𑀓𑀼𑀢𑁆𑀢𑀭𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀻 𑀛𑀸𑀦𑀭𑀢𑁄 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀲𑀤𑀢𑁆𑀣𑀕𑀭𑀼𑀓𑁄𑀢𑀺 𑁋 𑀛𑀸𑀬𑀺𑀁. 𑀯𑀺𑀭𑀚𑀦𑁆𑀢𑀺 𑀭𑀸𑀕𑁄 𑀭𑀚𑁄, 𑀤𑁄𑀲𑁄 𑀭𑀚𑁄, 𑀫𑁄𑀳𑁄 𑀭𑀚𑁄, 𑀓𑁄𑀥𑁄 𑀭𑀚𑁄, 𑀉𑀧𑀦𑀸𑀳𑁄 𑀭𑀚𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀭𑀚𑀸. 𑀢𑁂 𑀭𑀚𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀭𑀚𑁄 𑀯𑀺𑀭𑀚𑁄 𑀦𑀺𑀭𑀚𑁄 𑀭𑀚𑀸𑀧𑀕𑀢𑁄 𑀭𑀚𑀯𑀺𑀧𑁆𑀧𑀳𑀻𑀦𑁄 𑀭𑀚𑀯𑀺𑀧𑁆𑀧𑀬𑀼𑀢𑁆𑀢𑁄 𑀲𑀩𑁆𑀩𑀭𑀚𑀯𑀻𑀢𑀺𑀯𑀢𑁆𑀢𑁄.

𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 [𑀧𑀝𑀺𑀯𑀺𑀦𑁄𑀤𑀺𑀢𑁆𑀯𑀸 (𑀓.) 𑀫𑀳𑀸𑀦𑀺. 𑁨𑁦𑁯] 𑀘𑀓𑁆𑀔𑀼𑀫𑀸, 𑀢𑀲𑁆𑀫𑀸 𑀚𑀺𑀦𑁄 𑀯𑀺𑀕𑀢𑀭𑀚𑁄𑀢𑀺 𑀯𑀼𑀘𑁆𑀘𑀢𑀺.

𑀤𑁄𑀲𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 𑀘𑀓𑁆𑀔𑀼𑀫𑀸, 𑀢𑀲𑁆𑀫𑀸 𑀚𑀺𑀦𑁄 𑀯𑀺𑀕𑀢𑀭𑀚𑁄𑀢𑀺 𑀯𑀼𑀘𑁆𑀘𑀢𑀺.

𑀫𑁄𑀳𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺, 𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸 𑀘𑀓𑁆𑀔𑀼𑀫𑀸, 𑀢𑀲𑁆𑀫𑀸 𑀚𑀺𑀦𑁄 𑀯𑀺𑀕𑀢𑀭𑀚𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑁋

𑀯𑀺𑀭𑀚𑀁 …𑀧𑁂….

𑀆𑀲𑀻𑀦𑀦𑁆𑀢𑀺 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂𑀢𑀺 𑁋 𑀆𑀲𑀻𑀦𑁄.

𑀦𑀕𑀲𑁆𑀲 [𑀦𑀕𑀭𑀲𑁆𑀲 (𑀓.)] 𑀧𑀲𑁆𑀲𑁂 𑀆𑀲𑀻𑀦𑀁, 𑀫𑀼𑀦𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄𑀢𑀺.

𑀏𑀯𑀫𑁆𑀧𑀺 𑀪𑀕𑀯𑀸 𑀆𑀲𑀻𑀦𑁄. 𑀅𑀣 𑀯𑀸, 𑀪𑀕𑀯𑀸 𑀲𑀩𑁆𑀩𑁄𑀲𑁆𑀲𑀼𑀓𑁆𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀆𑀲𑀻𑀦𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀆𑀲𑀻𑀦𑁄𑀢𑀺 𑁋 𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀉𑀤𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂… 𑀉𑀤𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀉𑀤𑀬𑁄.

𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀺𑀘𑁆𑀘𑀸𑀓𑀺𑀘𑁆𑀘𑀁 𑀓𑀭𑀡𑀻𑀬𑀸𑀓𑀭𑀡𑀻𑀬𑀁 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀓𑀢𑀓𑀺𑀘𑁆𑀘𑁄.

𑀬𑀲𑁆𑀲 𑀘 𑀯𑀺𑀲𑀢𑀸 [𑀬𑀲𑁆𑀲 𑀧𑀭𑀺𑀧𑀢𑀸 (𑀲𑁆𑀬𑀸.) 𑀧𑀲𑁆𑀲 𑀫𑀳𑀸𑀦𑀺. 𑁨𑁦𑁨] 𑀦𑀢𑁆𑀣𑀺, 𑀙𑀺𑀦𑁆𑀦𑀲𑁄𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀓𑀺𑀘𑁆𑀘𑀸𑀓𑀺𑀘𑁆𑀘𑀧𑁆𑀧𑀳𑀻𑀦𑀲𑁆𑀲, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀻𑀢𑀺.

𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀦𑁆𑀢𑀺. 𑀆𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀢𑁂 𑀆𑀲𑀯𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑀸𑀲𑀯𑁄𑀢𑀺 𑁋 𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀁.

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀧𑀳𑀸𑀦𑀧𑀸𑀭𑀕𑀽 𑀪𑀸𑀯𑀦𑀸𑀧𑀸𑀭𑀕𑀽 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽. 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀤𑀼𑀓𑁆𑀔𑀸𑀦𑀁, 𑀧𑀳𑀸𑀦𑀧𑀸𑀭𑀕𑀽 𑀲𑀩𑁆𑀩𑀓𑀺𑀮𑁂𑀲𑀸𑀦𑀁, 𑀪𑀸𑀯𑀦𑀸𑀧𑀸𑀭𑀕𑀽 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀦𑀺𑀭𑁄𑀥𑀲𑁆𑀲, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽 𑀲𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑁄 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀲𑁆𑀫𑀺𑀁 𑀲𑀻𑀮𑀲𑁆𑀫𑀺𑀁; 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀲𑁆𑀫𑀺𑀁 𑀲𑀫𑀸𑀥𑀺𑀲𑁆𑀫𑀺𑀁; 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬; 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀲𑁄 𑀧𑀸𑀭𑀕𑀢𑁄 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀲𑁄 𑀯𑀼𑀢𑁆𑀢𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀺, 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀻𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸, 𑀧𑀜𑁆𑀳𑀢𑁆𑀣𑀺𑀓𑀸𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸𑀦𑀁 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀸𑀦𑀁 𑀆𑀕𑀫𑀦𑀁 𑀅𑀪𑀺𑀓𑁆𑀓𑀫𑀦𑀁 𑀉𑀧𑀲𑀗𑁆𑀓𑀫𑀦𑀁 𑀧𑀬𑀺𑀭𑀼𑀧𑀸𑀲𑀦𑀁 𑀅𑀢𑁆𑀣𑀻𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸, 𑀧𑀜𑁆𑀳𑀸𑀕𑀫𑁄 𑀢𑀼𑀬𑁆𑀳𑀁 𑀅𑀢𑁆𑀣𑀺, 𑀢𑁆𑀯𑀫𑁆𑀧𑀺 𑀧𑀳𑀼 𑀢𑁆𑀯𑀫𑀲𑀺 𑀅𑀮𑀫𑀢𑁆𑀢𑁄 𑀫𑀬𑀸 𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀼𑀁 𑀯𑀺𑀲𑀚𑁆𑀚𑁂𑀢𑀼𑀁, 𑀯𑀳𑀲𑁆𑀲𑁂𑀢𑀁 𑀪𑀸𑀭𑀦𑁆𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀻𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑁄. 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀺.

𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀪𑁂𑀤𑀦𑀁 𑀧𑀪𑁂𑀤𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀤𑀬𑁄]

𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀁;

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦’’𑀦𑁆𑀢𑀺.

𑁭𑁫.

𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀁, [𑀉𑀤𑀬𑀸𑀢𑀺 𑀪𑀕𑀯𑀸]

𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀁;

𑀣𑀺𑀦𑀲𑁆𑀲 [𑀣𑀻𑀦𑀲𑁆𑀲 (𑀲𑁆𑀬𑀸.)] 𑀘 𑀧𑀦𑀽𑀤𑀦𑀁, 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀁.

𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀦𑁆𑀢𑀺. 𑀙𑀦𑁆𑀤𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀁. 𑀉𑀤𑀬𑀸𑀢𑀺 𑀪𑀕𑀯𑀸𑀢𑀺. 𑀉𑀤𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀉𑀤𑀬𑀸𑀢𑀺 𑀪𑀕𑀯𑀸.

𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀦𑁆𑀢𑀺. 𑀤𑁄𑀫𑀦𑀲𑁆𑀲𑀸𑀢𑀺 𑀬𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁, 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀘 𑀉𑀪𑀺𑀦𑁆𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀁.

𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀦𑁆𑀢𑀺. 𑀣𑀺𑀦𑀦𑁆𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸 𑀮𑀻𑀦𑀸 𑀮𑀻𑀬𑀦𑀸 𑀮𑀻𑀬𑀺𑀢𑀢𑁆𑀢𑀁 𑀣𑀺𑀦𑀁 𑀣𑀺𑀬𑀦𑀸 [𑀣𑀻𑀦𑀁 𑀣𑀻𑀬𑀦𑀸 (𑀲𑁆𑀬𑀸.)] 𑀣𑀺𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲. 𑀧𑀦𑀽𑀤𑀦𑀦𑁆𑀢𑀺 𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀁.

𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀦𑁆𑀢𑀺. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁, 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀁. 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸…𑀧𑁂… 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸, 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸. 𑀬𑀁 𑀏𑀯𑀭𑀽𑀧𑀁 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀢𑁆𑀢𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀼𑀓𑁆𑀓𑀼𑀘𑁆𑀘𑀁. 𑀅𑀧𑀺 𑀘, 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄 𑁋 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄? ‘‘𑀓𑀢𑀁 𑀫𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. ‘‘𑀓𑀢𑀁 𑀫𑁂 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀯𑀘𑀻𑀲𑀼𑀘𑀭𑀺𑀢’’𑀦𑁆𑀢𑀺…𑀧𑁂… ‘‘𑀓𑀢𑀁 𑀫𑁂 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀅𑀓𑀢𑀁 𑀫𑁂 𑀫𑀦𑁄𑀲𑀼𑀘𑀭𑀺𑀢’’𑀦𑁆𑀢𑀺…𑀧𑁂… ‘‘𑀓𑀢𑁄 𑀫𑁂 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀓𑀢𑀸 𑀫𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑀁 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀅𑀓𑀢𑀸 𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑁄 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀅𑀓𑀢𑀸 𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑁄 𑀫𑁂 𑀫𑀼𑀲𑀸𑀯𑀸𑀤𑁄, 𑀅𑀓𑀢𑀸 𑀫𑁂 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑀸 𑀫𑁂 𑀧𑀺𑀲𑀼𑀡𑀸 𑀯𑀸𑀘𑀸 [𑀧𑀺𑀲𑀼𑀡𑀯𑀸𑀘𑀸 (𑀓.)], 𑀅𑀓𑀢𑀸 𑀫𑁂 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑀸 𑀫𑁂 𑀨𑀭𑀼𑀲𑀸 𑀯𑀸𑀘𑀸, 𑀅𑀓𑀢𑀸 𑀫𑁂 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑁄 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀓𑀢𑀸 𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻’’𑀢𑀺…𑀧𑁂… ‘‘𑀓𑀢𑀸 𑀫𑁂 𑀅𑀪𑀺𑀚𑁆𑀛𑀸, 𑀅𑀓𑀢𑀸 𑀫𑁂 𑀅𑀦𑀪𑀺𑀚𑁆𑀛𑀸’’𑀢𑀺…𑀧𑁂… ‘‘𑀓𑀢𑁄 𑀫𑁂 𑀩𑁆𑀬𑀸𑀧𑀸𑀤𑁄, 𑀅𑀓𑀢𑁄 𑀫𑁂 𑀅𑀩𑁆𑀬𑀸𑀧𑀸𑀤𑁄’’𑀢𑀺…𑀧𑁂… ‘‘𑀓𑀢𑀸 𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺, 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄. 𑀏𑀯𑀁 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄.

𑀅𑀣 𑀯𑀸, ‘‘𑀲𑀻𑀮𑁂𑀲𑀼𑀫𑁆𑀳𑀺 𑀅𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄; ‘‘𑀇𑀦𑁆𑀤𑁆𑀭𑀺𑀬𑁂𑀲𑀼𑀫𑁆𑀳𑀺 𑀅𑀕𑀼𑀢𑁆𑀢𑀤𑁆𑀯𑀸𑀭𑁄’’𑀢𑀺…𑀧𑁂… ‘‘𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀫𑁆𑀳𑀻’’𑀢𑀺… ‘‘𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁄𑀫𑁆𑀳𑀻’’𑀢𑀺… ‘‘𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺… ‘‘𑀅𑀪𑀸𑀯𑀺𑀢𑀸 𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺, 𑀧𑀜𑁆𑀘 𑀩𑀮𑀸𑀦𑀻𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺… ‘‘𑀤𑀼𑀓𑁆𑀔𑀁 𑀫𑁂 𑀅𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀫𑁂 𑀅𑀧𑁆𑀧𑀳𑀻𑀦𑁄, 𑀫𑀕𑁆𑀕𑁄 𑀫𑁂 𑀅𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀫𑁂 𑀅𑀲𑀘𑁆𑀙𑀺𑀓𑀢𑁄’’𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀘𑁂𑀢𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀫𑀦𑁄𑀯𑀺𑀮𑁂𑀔𑁄.

𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀧𑀳𑀸𑀦𑀁 𑀉𑀧𑀲𑀫𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀁, [𑀉𑀤𑀬𑀸𑀢𑀺 𑀪𑀕𑀯𑀸]

𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀁;

𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀁, 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡’’𑀦𑁆𑀢𑀺.

𑁭𑁬.

𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀁, 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁.

𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀦𑁆𑀢𑀺. 𑀉𑀧𑁂𑀓𑁆𑀔𑀸𑀢𑀺 𑀬𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀦𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀘𑀺𑀢𑁆𑀢𑀲𑀫𑀢𑀸 [𑀘𑀺𑀢𑁆𑀢𑀲𑀫𑀣𑁄 (𑀲𑁆𑀬𑀸.) 𑀫𑀳𑀸𑀦𑀺. 𑁨𑁦𑁭] 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀢𑀸 𑀫𑀚𑁆𑀛𑀢𑁆𑀢𑀢𑀸 𑀘𑀺𑀢𑁆𑀢𑀲𑁆𑀲. 𑀲𑀢𑀻𑀢𑀺 𑀬𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀁 𑀆𑀭𑀩𑁆𑀪 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺. 𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀉𑀧𑁂𑀓𑁆𑀔𑀸 𑀘 𑀲𑀢𑀺 𑀘 𑀲𑀼𑀤𑁆𑀥𑀸 𑀳𑁄𑀦𑁆𑀢𑀺 𑀯𑀺𑀲𑀼𑀤𑁆𑀥𑀸 𑀲𑀁𑀲𑀼𑀤𑁆𑀥𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸 𑀅𑀦𑀗𑁆𑀕𑀡𑀸 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀸 𑀫𑀼𑀤𑀼𑀪𑀽𑀢𑀸 𑀓𑀫𑁆𑀫𑀦𑀺𑀬𑀸 𑀞𑀺𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀸𑀢𑀺 𑁋 𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀁.

𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀥𑀫𑁆𑀫𑀢𑀓𑁆𑀓𑁄 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑁄 𑀆𑀤𑀺𑀢𑁄 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀲𑁆𑀲𑀸𑀢𑀺, 𑀏𑀯𑀫𑁆𑀧𑀺 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁. 𑀅𑀣 𑀯𑀸, 𑀥𑀫𑁆𑀫𑀢𑀓𑁆𑀓𑁄 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀸 𑀆𑀤𑀺𑀢𑁄 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀲𑁆𑀲𑀸𑀢𑀺, 𑀏𑀯𑀫𑁆𑀧𑀺 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁. 𑀅𑀣 𑀯𑀸, 𑀥𑀫𑁆𑀫𑀢𑀓𑁆𑀓𑁄 𑀯𑀼𑀘𑁆𑀘𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸. 𑀲𑀸 𑀆𑀤𑀺𑀢𑁄 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀲𑁆𑀲𑀸𑀢𑀺 𑁋 𑀏𑀯𑀫𑁆𑀧𑀺 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁.

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀻𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑁄. 𑀅𑀭𑀳𑀢𑁆𑀢𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺.

𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑀺. 𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀅𑀯𑀺𑀚𑁆𑀚𑀸 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀧𑀪𑁂𑀤𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀁, 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦’’𑀦𑁆𑀢𑀺.

𑁭𑁭.

𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁;

𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺.

𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄𑀢𑀺 𑀮𑁄𑀓𑀲𑁆𑀲 𑀲𑀁𑀬𑁄𑀚𑀦𑀁 𑀮𑀕𑁆𑀕𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄. 𑀓𑁂𑀦 𑀮𑁄𑀓𑁄 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄𑀢𑀺 𑁋 𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄.

𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀦𑁆𑀢𑀺 𑀓𑀺𑀁𑀲𑀼 𑀢𑀲𑁆𑀲 𑀘𑀸𑀭𑀡𑀁 𑀯𑀺𑀘𑀸𑀭𑀡𑀁 𑀧𑀝𑀺𑀯𑀺𑀘𑀸𑀭𑀡𑀁. 𑀓𑁂𑀦 𑀮𑁄𑀓𑁄 𑀘𑀭𑀢𑀺 𑀯𑀺𑀘𑀭𑀢𑀺 𑀧𑀝𑀺𑀯𑀺𑀘𑀭𑀢𑀻𑀢𑀺 𑁋 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁. 𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺 𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦 𑀯𑀽𑀧𑀲𑀫𑁂𑀦 𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑁋 𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁;

𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑁭𑁮.

𑀦𑀦𑁆𑀤𑀺𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀸;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺.

𑀦𑀦𑁆𑀤𑀺𑀲𑀁𑀬𑁄𑀚𑀦𑁄 𑀮𑁄𑀓𑁄𑀢𑀺 𑀦𑀦𑁆𑀤𑀻 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀦𑁆𑀤𑀻. 𑀬𑀸 𑀦𑀦𑁆𑀤𑀻 𑀮𑁄𑀓𑀲𑁆𑀲 𑀲𑀁𑀬𑁄𑀚𑀦𑀁 𑀮𑀕𑁆𑀕𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀇𑀫𑀸𑀬 𑀦𑀦𑁆𑀤𑀺𑀬𑀸 𑀮𑁄𑀓𑁄 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄𑀢𑀺 𑁋 𑀦𑀦𑁆𑀤𑀺𑀲𑀁𑀬𑁄𑀚𑀦𑁄 𑀮𑁄𑀓𑁄.

𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀸𑀢𑀺. 𑀯𑀺𑀢𑀓𑁆𑀓𑀸𑀢𑀺 𑀦𑀯 𑀯𑀺𑀢𑀓𑁆𑀓𑀸 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀜𑀸𑀢𑀺𑀯𑀺𑀢𑀓𑁆𑀓𑁄 𑀚𑀦𑀧𑀤𑀯𑀺𑀢𑀓𑁆𑀓𑁄, 𑀅𑀫𑀭𑀸𑀯𑀺𑀢𑀓𑁆𑀓𑁄, 𑀧𑀭𑀸𑀦𑀼𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀦𑀯 𑀯𑀺𑀢𑀓𑁆𑀓𑀸. 𑀇𑀫𑁂 𑀦𑀯 𑀯𑀺𑀢𑀓𑁆𑀓𑀸 𑀮𑁄𑀓𑀲𑁆𑀲 𑀘𑀸𑀭𑀡𑀸 𑀯𑀺𑀘𑀸𑀭𑀡𑀸 𑀧𑀝𑀺𑀯𑀺𑀘𑀸𑀭𑀡𑀸. 𑀇𑀫𑁂𑀳𑀺 𑀦𑀯𑀳𑀺 𑀯𑀺𑀢𑀓𑁆𑀓𑁂𑀳𑀺 𑀮𑁄𑀓𑁄 𑀘𑀭𑀢𑀺 𑀯𑀺𑀘𑀭𑀢𑀺 𑀧𑀝𑀺𑀯𑀺𑀘𑀭𑀢𑀻𑀢𑀺 𑁋 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀸.

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦 𑀯𑀽𑀧𑀲𑀫𑁂𑀦 𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑁋 𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀦𑁆𑀤𑀺𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀸;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑁭𑁯.

𑀓𑀣𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀺;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑀸, 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯.

𑀓𑀣𑀁 𑀲𑀢𑀲𑁆𑀲 𑀘𑀭𑀢𑁄𑀢𑀺 𑀓𑀣𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀘𑀭𑀢𑁄 𑀯𑀺𑀳𑀭𑀢𑁄 𑀇𑀭𑀺𑀬𑀢𑁄 𑀯𑀢𑁆𑀢𑀬𑀢𑁄 𑀧𑀸𑀮𑀬𑀢𑁄 𑀬𑀧𑀬𑀢𑁄 𑀬𑀸𑀧𑀬𑀢𑁄𑀢𑀺 𑁋 𑀓𑀣𑀁 𑀲𑀢𑀲𑁆𑀲 𑀘𑀭𑀢𑁄.

𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀯𑀺𑀜𑁆𑀜𑀸𑀡𑀁 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑁆𑀫𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀺.

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑀸𑀢𑀺 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀁 𑀧𑀼𑀘𑁆𑀙𑀺𑀢𑀼𑀁 𑀬𑀸𑀘𑀺𑀢𑀼𑀁 𑀅𑀚𑁆𑀛𑁂𑀲𑀺𑀢𑀼𑀁 𑀧𑀲𑀸𑀤𑁂𑀢𑀼𑀁 𑀆𑀕𑀫𑁆𑀳𑀸 𑀆𑀕𑀢𑀫𑁆𑀳𑀸 𑀉𑀧𑀸𑀕𑀢𑀫𑁆𑀳𑀸 𑀲𑀫𑁆𑀧𑀢𑁆𑀢𑀫𑁆𑀳𑀸, ‘‘𑀢𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀢𑀫𑁆𑀳𑀸’’𑀢𑀺 𑁋 𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑀸.

𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯𑀸𑀢𑀺. 𑀢𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀡𑁄𑀫 𑀉𑀕𑁆𑀕𑀡𑁆𑀳𑀸𑀫 𑀥𑀸𑀭𑁂𑀫 𑀉𑀧𑀥𑀸𑀭𑁂𑀫 𑀉𑀧𑀮𑀓𑁆𑀔𑁂𑀫𑀸𑀢𑀺 𑁋 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑀣𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀺;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑀸, 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯𑀸’’𑀢𑀺.

𑁮𑁦.

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑁄;

𑀏𑀯𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀺.

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑁄𑀢𑀺 𑀅𑀚𑁆𑀛𑀢𑁆𑀢𑀁 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺 [𑀦 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺 (𑀲𑁆𑀬𑀸.)], 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺; 𑀩𑀳𑀺𑀤𑁆𑀥𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺; 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 [𑀇𑀤𑀁 𑀧𑀤𑀁 𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂] 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺; 𑀅𑀚𑁆𑀛𑀢𑁆𑀢𑀁 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀅𑀚𑁆𑀛𑀢𑁆𑀢𑀁 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀩𑀳𑀺𑀤𑁆𑀥𑀸 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺; 𑀩𑀳𑀺𑀤𑁆𑀥𑀸 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀩𑀳𑀺𑀤𑁆𑀥𑀸 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄…𑀧𑁂… 𑀅𑀦𑀪𑀸𑀯𑀁 𑀕𑀫𑁂𑀢𑀺.

𑀅𑀣 𑀯𑀸, 𑀯𑁂𑀤𑀦𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀯𑁂𑀤𑀦𑀁 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀇𑀫𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 [𑀤𑁆𑀯𑀸𑀘𑀢𑁆𑀢𑀸𑀴𑀻𑀲𑀸𑀬 (𑀲𑁆𑀬𑀸.)] 𑀆𑀓𑀸𑀭𑁂𑀳𑀺 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦 𑀅𑀚𑁆𑀛𑁄𑀲𑁂𑀢𑀺, 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑁄.

𑀏𑀯𑀁 𑀲𑀢𑀲𑁆𑀲 𑀘𑀭𑀢𑁄𑀢𑀺 𑀏𑀯𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀘𑀭𑀢𑁄 𑀯𑀺𑀳𑀭𑀢𑁄 𑀇𑀭𑀺𑀬𑀢𑁄 𑀯𑀢𑁆𑀢𑀬𑀢𑁄 𑀧𑀸𑀮𑀬𑀢𑁄 𑀬𑀧𑀬𑀢𑁄 𑀬𑀸𑀧𑀬𑀢𑁄𑀢𑀺 𑁋 𑀏𑀯𑀁 𑀲𑀢𑀲𑁆𑀲 𑀘𑀭𑀢𑁄.

𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑁆𑀫𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀻. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑁄;

𑀏𑀯𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀢𑁂𑀭𑀲𑀫𑁄.

𑁧𑁪. 𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁮𑁧.

𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀧𑁄𑀲𑀸𑀮𑁄]

𑀅𑀦𑁂𑀚𑁄 𑀙𑀺𑀦𑁆𑀦𑀲𑀁𑀲𑀬𑁄;

𑀧𑀸𑀭𑀕𑀼𑀁 [𑀧𑀸𑀭𑀕𑀽 (𑀲𑁆𑀬𑀸. 𑀓.)] 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀻𑀢𑀺. 𑀬𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽. 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀅𑀢𑀻𑀢𑀁 𑀆𑀤𑀺𑀲𑀢𑀻𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀫𑁆𑀧𑀺 𑀆𑀤𑀺𑀲𑀢𑀺, 𑀅𑀦𑀸𑀕𑀢𑀫𑁆𑀧𑀺 𑀆𑀤𑀺𑀲𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀆𑀤𑀺𑀲𑀢𑀺.

𑀓𑀣𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀢𑀻𑀢𑀁 𑀆𑀤𑀺𑀲𑀢𑀺? 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀢𑀻𑀢𑀁 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀆𑀤𑀺𑀲𑀢𑀺, 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀤𑀲𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺, 𑀚𑀸𑀢𑀺𑀲𑀢𑀫𑁆𑀧𑀺…𑀧𑁂… 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺… 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺… 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂… 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂… 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀆𑀤𑀺𑀲𑀢𑀺 𑁋 ‘‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀆𑀤𑀺𑀲𑀢𑀺. 𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀢𑀻𑀢𑀁 𑀆𑀤𑀺𑀲𑀢𑀺.

𑀓𑀣𑀁 𑀪𑀕𑀯𑀸 𑀧𑀭𑁂𑀲𑀁 𑀅𑀢𑀻𑀢𑀁 𑀆𑀤𑀺𑀲𑀢𑀺? 𑀪𑀕𑀯𑀸 𑀧𑀭𑁂𑀲𑀁 𑀅𑀢𑀻𑀢𑀁 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀆𑀤𑀺𑀲𑀢𑀺, 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀆𑀤𑀺𑀲𑀢𑀺…𑀧𑁂… 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀆𑀤𑀺𑀲𑀢𑀺 𑁋 ‘‘𑀅𑀫𑀼𑀢𑁆𑀭𑀸𑀲𑀺 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺; 𑀢𑀢𑁆𑀭𑀸𑀧𑀸𑀲𑀺 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀆𑀤𑀺𑀲𑀢𑀺. 𑀏𑀯𑀁 𑀪𑀕𑀯𑀸 𑀧𑀭𑁂𑀲𑀁 𑀅𑀢𑀻𑀢𑀁 𑀆𑀤𑀺𑀲𑀢𑀺.

𑀪𑀕𑀯𑀸 𑀧𑀜𑁆𑀘 𑀚𑀸𑀢𑀓𑀲𑀢𑀸𑀦𑀺 𑀪𑀸𑀲𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀁 𑀆𑀤𑀺𑀲𑀢𑀺, 𑀫𑀳𑀸𑀧𑀤𑀸𑀦𑀺𑀬𑀲𑀼𑀢𑁆𑀢𑀦𑁆𑀢𑀁 [𑀫𑀳𑀸𑀥𑀦𑀺𑀬𑀲𑀼𑀢𑁆𑀢𑀁 (𑀲𑁆𑀬𑀸.)] 𑀪𑀸𑀲𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀁 𑀆𑀤𑀺𑀲𑀢𑀺, 𑀫𑀳𑀸𑀲𑀼𑀤𑀲𑁆𑀲𑀦𑀺𑀬𑀲𑀼𑀢𑁆𑀢𑀦𑁆𑀢𑀁 𑀪𑀸𑀲𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀁 𑀆𑀤𑀺𑀲𑀢𑀺, 𑀫𑀳𑀸𑀕𑁄𑀯𑀺𑀦𑁆𑀤𑀺𑀬𑀲𑀼𑀢𑁆𑀢𑀦𑁆𑀢𑀁 𑀪𑀸𑀲𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀁 𑀆𑀤𑀺𑀲𑀢𑀺, 𑀫𑀖𑀤𑁂𑀯𑀺𑀬𑀲𑀼𑀢𑁆𑀢𑀦𑁆𑀢𑀁 𑀪𑀸𑀲𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀁 𑀆𑀤𑀺𑀲𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑀻𑀢𑀁 𑀔𑁄, 𑀘𑀼𑀦𑁆𑀤, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀢𑀣𑀸𑀕𑀢𑀲𑁆𑀲 𑀲𑀢𑀸𑀦𑀼𑀲𑀸𑀭𑀺𑀜𑀸𑀡𑀁 [𑀲𑀢𑀸𑀦𑀼𑀲𑁆𑀲𑀭𑀺𑀬𑀜𑀸𑀡𑀁 (𑀓.) 𑀧𑀲𑁆𑀲 𑀤𑀻. 𑀦𑀺. 𑁩.𑁧𑁮𑁭] 𑀳𑁄𑀢𑀺. 𑀲𑁄 𑀬𑀸𑀯𑀢𑀓𑀁 𑀆𑀓𑀗𑁆𑀔𑀢𑀺 𑀢𑀸𑀯𑀢𑀓𑀁 𑀅𑀦𑀼𑀲𑁆𑀲𑀭𑀢𑀺. 𑀅𑀦𑀸𑀕𑀢𑀜𑁆𑀘 𑀔𑁄, 𑀘𑀼𑀦𑁆𑀤…𑀧𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀔𑁄, 𑀘𑀼𑀦𑁆𑀤, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀚𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑁋 ‘𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺.

𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀁 [𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁 (𑀓.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁, 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁, 𑀬𑀫𑀓𑀧𑀸𑀝𑀺𑀳𑀻𑀭𑁂 𑀜𑀸𑀡𑀁 [𑀬𑀫𑀓𑀧𑀸𑀝𑀺𑀳𑀺𑀭𑀺𑀬𑀜𑀸𑀡𑀁 (𑀲𑁆𑀬𑀸.)] 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁, 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁, 𑀅𑀦𑀸𑀯𑀭𑀡𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁, 𑀲𑀩𑁆𑀩𑀢𑁆𑀣 𑀅𑀲𑀗𑁆𑀕𑀫𑀧𑁆𑀧𑀝𑀺𑀳𑀢𑀫𑀦𑀸𑀯𑀭𑀡𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁. 𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑀻𑀢𑀫𑁆𑀧𑀺 𑀆𑀤𑀺𑀲𑀢𑀺 𑀅𑀦𑀸𑀕𑀢𑀫𑁆𑀧𑀺 𑀆𑀤𑀺𑀲𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀆𑀤𑀺𑀲𑀢𑀺 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺 𑀧𑀓𑀸𑀲𑁂𑀢𑀻𑀢𑀺 𑁋 𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀺.

𑀇𑀘𑁆𑀘𑀸𑀬𑀲𑁆𑀫𑀸 𑀧𑁄𑀲𑀸𑀮𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂… 𑀧𑁄𑀲𑀸𑀮𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀧𑁄𑀲𑀸𑀮𑁄.

𑀅𑀦𑁂𑀚𑁄 𑀙𑀺𑀦𑁆𑀦𑀲𑀁𑀲𑀬𑁄𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀏𑀚𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄. 𑀪𑀕𑀯𑀸 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺…𑀧𑁂… 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺 𑀅𑀦𑁂𑀚𑁄. 𑀙𑀺𑀦𑁆𑀦𑀲𑀁𑀲𑀬𑁄𑀢𑀺 𑀲𑀁𑀲𑀬𑁄 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀤𑀼𑀓𑁆𑀔𑁂 𑀓𑀗𑁆𑀔𑀸…𑀧𑁂… 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄. 𑀲𑁄 𑀲𑀁𑀲𑀬𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑁄 𑀙𑀺𑀦𑁆𑀦𑁄 𑀉𑀘𑁆𑀙𑀺𑀦𑁆𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀙𑀺𑀦𑁆𑀦𑀲𑀁𑀲𑀬𑁄𑀢𑀺 𑁋 𑀅𑀦𑁂𑀚𑁄 𑀙𑀺𑀦𑁆𑀦𑀲𑀁𑀲𑀬𑁄.

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀧𑀳𑀸𑀦𑀧𑀸𑀭𑀕𑀽 𑀪𑀸𑀯𑀦𑀸𑀧𑀸𑀭𑀕𑀽 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺…𑀧𑁂… ‘‘𑀯𑀳𑀲𑁆𑀲𑁂𑀢𑀁 𑀪𑀸𑀭’’𑀦𑁆𑀢𑀺 𑁋 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁄 𑀅𑀢𑀻𑀢𑀁 𑀆𑀤𑀺𑀲𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀧𑁄𑀲𑀸𑀮𑁄]

𑀅𑀦𑁂𑀚𑁄 𑀙𑀺𑀦𑁆𑀦𑀲𑀁𑀲𑀬𑁄;

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫’’𑀦𑁆𑀢𑀺.

𑁮𑁨.

𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲, 𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄;

𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀺, 𑀓𑀣𑀁 𑀦𑁂𑀬𑁆𑀬𑁄 𑀢𑀣𑀸𑀯𑀺𑀥𑁄.

𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲𑀸𑀢𑀺 𑀓𑀢𑀫𑀸 𑀭𑀽𑀧𑀲𑀜𑁆𑀜𑀸? 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸 𑀉𑀧𑀧𑀦𑁆𑀦𑀲𑁆𑀲 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲 𑀯𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀲𑀜𑁆𑀚𑀸𑀦𑀺𑀢𑀢𑁆𑀢𑀁 𑁋 𑀅𑀬𑀁 𑀭𑀽𑀧𑀲𑀜𑁆𑀜𑀸. 𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲𑀸𑀢𑀺 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀧𑀝𑀺𑀮𑀤𑁆𑀥𑀲𑁆𑀲 [𑀮𑀸𑀪𑀺𑀲𑁆𑀲 (𑀲𑁆𑀬𑀸.)] 𑀭𑀽𑀧𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀦𑁆𑀢𑀺 𑀯𑀺𑀕𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀫𑀢𑀺𑀓𑁆𑀓𑀦𑁆𑀢𑀸 𑀯𑀻𑀢𑀺𑀯𑀢𑁆𑀢𑀸𑀢𑀺 𑁋 𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲.

𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄𑀢𑀺 𑀲𑀩𑁆𑀩𑁄 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁄 𑀭𑀽𑀧𑀓𑀸𑀬𑁄 𑀧𑀳𑀻𑀦𑁄, 𑀢𑀤𑀗𑁆𑀕𑀲𑀫𑀢𑀺𑀓𑁆𑀓𑀫𑀸 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑁄 𑀢𑀲𑁆𑀲 𑀭𑀽𑀧𑀓𑀸𑀬𑁄𑀢𑀺 𑁋 𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄.

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄𑀢𑀺. 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺. 𑀬𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀺, 𑀯𑀺𑀪𑀸𑀯𑁂𑀢𑀺, 𑀅𑀦𑁆𑀢𑀭𑀥𑀸𑀧𑁂𑀢𑀺, ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀧𑀲𑁆𑀲𑀢𑀺 𑁋 𑀢𑀁𑀓𑀸𑀭𑀡𑀸 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀻𑀢𑀺 𑁋 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄.

𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀻𑀢𑀺. 𑀲𑀓𑁆𑀓𑀸𑀢𑀺 𑁋 𑀲𑀓𑁆𑀓𑁄. 𑀪𑀕𑀯𑀸 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄 …𑀧𑁂… 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄. 𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀻𑀢𑀺 𑀢𑀲𑁆𑀲 𑀜𑀸𑀡𑀁 𑀧𑀼𑀘𑁆𑀙𑀸𑀫𑀺, 𑀧𑀜𑁆𑀜𑀁 𑀧𑀼𑀘𑁆𑀙𑀸𑀫𑀺, 𑀲𑀫𑁆𑀩𑀼𑀤𑁆𑀥𑀁 𑀧𑀼𑀘𑁆𑀙𑀸𑀫𑀺. ‘‘𑀓𑀻𑀤𑀺𑀲𑀁 𑀓𑀺𑀁𑀲𑀡𑁆𑀞𑀺𑀢𑀁 𑀓𑀺𑀁𑀧𑀓𑀸𑀭𑀁 𑀓𑀺𑀁𑀧𑀝𑀺𑀪𑀸𑀕𑀁 𑀜𑀸𑀡𑀁 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑁋 𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀺.

𑀓𑀣𑀁 𑀦𑁂𑀬𑁆𑀬𑁄 𑀢𑀣𑀸𑀯𑀺𑀥𑁄𑀢𑀺 𑀓𑀣𑀁 𑀲𑁄 𑀦𑁂𑀢𑀩𑁆𑀩𑁄 𑀯𑀺𑀦𑁂𑀢𑀩𑁆𑀩𑁄 𑀅𑀦𑀼𑀦𑁂𑀢𑀩𑁆𑀩𑁄 𑀧𑀜𑁆𑀜𑀧𑁂𑀢𑀩𑁆𑀩𑁄 𑀦𑀺𑀚𑁆𑀛𑀸𑀧𑁂𑀢𑀩𑁆𑀩𑁄 𑀧𑁂𑀓𑁆𑀔𑁂𑀢𑀩𑁆𑀩𑁄 𑀧𑀲𑀸𑀤𑁂𑀢𑀩𑁆𑀩𑁄? 𑀓𑀣𑀁 𑀢𑁂𑀦 [𑀓𑀣𑀫𑀲𑁆𑀲 (𑀲𑁆𑀬𑀸.)] 𑀉𑀢𑁆𑀢𑀭𑀺 𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁? 𑀢𑀣𑀸𑀯𑀺𑀥𑁄𑀢𑀺 𑀢𑀣𑀸𑀯𑀺𑀥𑁄 𑀢𑀸𑀤𑀺𑀲𑁄 𑀢𑀲𑁆𑀲𑀡𑁆𑀞𑀺𑀢𑁄 𑀢𑀧𑁆𑀧𑀓𑀸𑀭𑁄 𑀢𑀧𑁆𑀧𑀝𑀺𑀪𑀸𑀕𑁄 𑀬𑁄 𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀢𑀺 𑁋 𑀓𑀣𑀁 𑀦𑁂𑀬𑁆𑀬𑁄 𑀢𑀣𑀸𑀯𑀺𑀥𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀺𑀲𑁆𑀲, 𑀲𑀩𑁆𑀩𑀓𑀸𑀬𑀧𑁆𑀧𑀳𑀸𑀬𑀺𑀦𑁄;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀧𑀲𑁆𑀲𑀢𑁄;

𑀜𑀸𑀡𑀁 𑀲𑀓𑁆𑀓𑀸𑀦𑀼𑀧𑀼𑀘𑁆𑀙𑀸𑀫𑀺, 𑀓𑀣𑀁 𑀦𑁂𑀬𑁆𑀬𑁄 𑀢𑀣𑀸𑀯𑀺𑀥𑁄’’𑀢𑀺.

𑁮𑁩.

𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸, [𑀧𑁄𑀲𑀸𑀮𑀸𑀢𑀺 𑀪𑀕𑀯𑀸]

𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄;

𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀺, 𑀥𑀺𑀫𑀼𑀢𑁆𑀢𑀁 𑀢𑀧𑁆𑀧𑀭𑀸𑀬𑀡𑀁;

𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸𑀢𑀺 𑀪𑀕𑀯𑀸 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀚𑀸𑀦𑀸𑀢𑀺, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀚𑀸𑀦𑀸𑀢𑀺. 𑀓𑀣𑀁 𑀪𑀕𑀯𑀸 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀚𑀸𑀦𑀸𑀢𑀺? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀭𑀽𑀧𑀼𑀧𑀬𑀁 [𑀭𑀽𑀧𑀽𑀧𑀸𑀬𑀁 (𑀲𑁆𑀬𑀸. 𑀓.) 𑀧𑀲𑁆𑀲 𑀲𑀁. 𑀦𑀺. 𑁩.𑁫𑁩] 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬 [𑀢𑀺𑀝𑁆𑀞𑀢𑀺 (𑀲𑁆𑀬𑀸. 𑀓.)], 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬. 𑀯𑁂𑀤𑀦𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂…𑀧𑁂… 𑀲𑀜𑁆𑀜𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂…𑀧𑁂… 𑀲𑀗𑁆𑀔𑀸𑀭𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺. 𑀏𑀯𑀁 𑀪𑀕𑀯𑀸 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀚𑀸𑀦𑀸𑀢𑀺.

𑀓𑀣𑀁 𑀪𑀕𑀯𑀸 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀚𑀸𑀦𑀸𑀢𑀺? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸. 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀆𑀪𑀲𑁆𑀲𑀭𑀸. 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸. 𑀅𑀬𑀁 𑀘𑀢𑀼𑀢𑁆𑀣𑀻 [𑀘𑀢𑀼𑀢𑁆𑀣𑀸 (𑀲𑁆𑀬𑀸.) 𑀧𑀲𑁆𑀲 𑀅. 𑀦𑀺. 𑁭.𑁪𑁪] 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸, 𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀧𑀜𑁆𑀘𑀫𑀻 [𑀧𑀜𑁆𑀘𑀫𑀸 (𑀲𑁆𑀬𑀸.)] 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫, 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀙𑀝𑁆𑀞𑀻 [𑀙𑀝𑁆𑀞𑁄 (𑀲𑁆𑀬𑀸.)] 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫, 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀲𑀢𑁆𑀢𑀫𑀻 [𑀲𑀢𑁆𑀢𑀫𑀸 (𑀲𑁆𑀬𑀸.)] 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺’’. 𑀏𑀯𑀁 𑀪𑀕𑀯𑀸 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀚𑀸𑀦𑀸𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸.

𑀧𑁄𑀲𑀸𑀮𑀸𑀢𑀺 𑀪𑀕𑀯𑀸𑀢𑀺. 𑀧𑁄𑀲𑀸𑀮𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑁄𑀲𑀸𑀮𑀸𑀢𑀺 𑀪𑀕𑀯𑀸.

𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄𑀢𑀺. 𑀅𑀪𑀺𑀚𑀸𑀦𑀦𑁆𑀢𑀺 𑀅𑀪𑀺𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀣𑀸𑀕𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑀻𑀢𑀁 𑀘𑁂𑀧𑀺 𑀔𑁄, 𑀘𑀼𑀦𑁆𑀤, 𑀳𑁄𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀜𑁆𑀳𑀺𑀢𑀁, 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀺. 𑀅𑀢𑀻𑀢𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀜𑁆𑀳𑀺𑀢𑀁, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀦 𑀩𑁆𑀬𑀸𑀓𑀭𑁄𑀢𑀺. 𑀅𑀢𑀻𑀢𑀁 𑀘𑁂𑀧𑀺 𑀔𑁄, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀜𑁆𑀳𑀺𑀢𑀁, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀅𑀦𑀸𑀕𑀢𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺…𑀧𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀜𑁆𑀳𑀺𑀢𑀁, 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀜𑁆𑀳𑀺𑀢𑀁, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀦 𑀩𑁆𑀬𑀸𑀓𑀭𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀜𑁆𑀳𑀺𑀢𑀁, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀇𑀢𑀺 𑀔𑁄, 𑀘𑀼𑀦𑁆𑀤, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑁄 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀁 𑀔𑁄, 𑀘𑀼𑀦𑁆𑀤, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺 𑀦𑁄 𑀅𑀜𑁆𑀜𑀣𑀸. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀯𑀸𑀤𑀻, 𑀘𑀼𑀦𑁆𑀤, 𑀢𑀣𑀸𑀕𑀢𑁄 𑀢𑀣𑀸𑀓𑀸𑀭𑀻; 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀤𑁂𑀯𑀓𑁂, 𑀘𑀼𑀦𑁆𑀤, 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑁋 𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄.

𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀻𑀢𑀺 𑀪𑀕𑀯𑀸 𑀇𑀥𑀢𑁆𑀣𑀜𑁆𑀜𑁂𑀯 [𑀇𑀥𑀝𑁆𑀞𑀜𑁆𑀜𑁂𑀯 (𑀲𑁆𑀬𑀸.)] 𑀚𑀸𑀦𑀸𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀸 𑀇𑀥𑀢𑁆𑀣𑀜𑁆𑀜𑁂𑀯 𑀚𑀸𑀦𑀸𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀸 𑀇𑀥𑀢𑁆𑀣𑀜𑁆𑀜𑁂𑀯 𑀚𑀸𑀦𑀸𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀸 𑀇𑀥𑀢𑁆𑀣𑀜𑁆𑀜𑁂𑀯 𑀚𑀸𑀦𑀸𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀸 𑀇𑀥𑀢𑁆𑀣𑀜𑁆𑀜𑁂𑀯 𑀚𑀸𑀦𑀸𑀢𑀺 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀇𑀥 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄, 𑀢𑀣𑀸 𑀘 𑀇𑀭𑀺𑀬𑀢𑀺, 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀬𑀣𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’𑀢𑀺.

‘‘𑀇𑀥 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄 𑀢𑀣𑀸 𑀘 𑀇𑀭𑀺𑀬𑀢𑀺 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀬𑀣𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’𑀢𑀺.

‘‘𑀇𑀥 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄 𑀢𑀣𑀸 𑀘 𑀇𑀭𑀺𑀬𑀢𑀺 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀬𑀣𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’𑀢𑀺.

‘‘𑀇𑀥 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄 𑀢𑀣𑀸 𑀘 𑀇𑀭𑀺𑀬𑀢𑀺 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀬𑀣𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺.

‘‘𑀇𑀥 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄 𑀢𑀣𑀸 𑀘 𑀇𑀭𑀺𑀬𑀢𑀺 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀬𑀣𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’𑀢𑀺.

‘‘𑀇𑀥 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄 𑀢𑀣𑀸 𑀘 𑀇𑀭𑀺𑀬𑀢𑀺 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄, 𑀬𑀣𑀸 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’’𑀢𑀺 𑁋 𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀺.

𑀥𑀺𑀫𑀼𑀢𑁆𑀢𑀁 𑀢𑀧𑁆𑀧𑀭𑀸𑀬𑀡𑀦𑁆𑀢𑀺. 𑀥𑀺𑀫𑀼𑀢𑁆𑀢𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀥𑀺𑀫𑀼𑀢𑁆𑀢𑀦𑁆𑀢𑀺 𑀯𑀺𑀫𑁄𑀓𑁆𑀔𑁂𑀦 𑀥𑀺𑀫𑀼𑀢𑁆𑀢𑀁 𑀢𑀢𑁆𑀭𑀸𑀥𑀺𑀫𑀼𑀢𑁆𑀢𑀁 𑀢𑀤𑀥𑀺𑀫𑀼𑀢𑁆𑀢𑀁 𑀢𑀤𑀸𑀥𑀺𑀧𑀢𑁂𑀬𑁆𑀬𑀁. 𑀅𑀣 𑀯𑀸, 𑀪𑀕𑀯𑀸 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀽𑀧𑀸𑀥𑀺𑀫𑀼𑀢𑁆𑀢𑁄 𑀲𑀤𑁆𑀤𑀸𑀥𑀺𑀫𑀼𑀢𑁆𑀢𑁄 𑀕𑀦𑁆𑀥𑀸𑀥𑀺𑀫𑀼𑀢𑁆𑀢𑁄 𑀭𑀲𑀸𑀥𑀺𑀫𑀼𑀢𑁆𑀢𑁄 𑀨𑁄𑀝𑁆𑀞𑀩𑁆𑀩𑀸𑀥𑀺𑀫𑀼𑀢𑁆𑀢𑁄 𑀓𑀼𑀮𑀸𑀥𑀺𑀫𑀼𑀢𑁆𑀢𑁄 𑀕𑀡𑀸𑀥𑀺𑀫𑀼𑀢𑁆𑀢𑁄 𑀆𑀯𑀸𑀲𑀸𑀥𑀺𑀫𑀼𑀢𑁆𑀢𑁄 𑀮𑀸𑀪𑀸𑀥𑀺𑀫𑀼𑀢𑁆𑀢𑁄 𑀬𑀲𑀸𑀥𑀺𑀫𑀼𑀢𑁆𑀢𑁄 𑀧𑀲𑀁𑀲𑀸𑀥𑀺𑀫𑀼𑀢𑁆𑀢𑁄 𑀲𑀼𑀔𑀸𑀥𑀺𑀫𑀼𑀢𑁆𑀢𑁄 𑀘𑀻𑀯𑀭𑀸𑀥𑀺𑀫𑀼𑀢𑁆𑀢𑁄 𑀧𑀺𑀡𑁆𑀟𑀧𑀸𑀢𑀸𑀥𑀺𑀫𑀼𑀢𑁆𑀢𑁄 𑀲𑁂𑀦𑀸𑀲𑀦𑀸𑀥𑀺𑀫𑀼𑀢𑁆𑀢𑁄 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀥𑀺𑀫𑀼𑀢𑁆𑀢𑁄 𑀲𑀼𑀢𑁆𑀢𑀦𑁆𑀢𑀸𑀥𑀺𑀫𑀼𑀢𑁆𑀢𑁄 𑀯𑀺𑀦𑀬𑀸𑀥𑀺𑀫𑀼𑀢𑁆𑀢𑁄 𑀅𑀪𑀺𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀆𑀭𑀜𑁆𑀜𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀢𑁂𑀘𑀻𑀯𑀭𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀦𑁂𑀲𑀚𑁆𑀚𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀸𑀥𑀺𑀫𑀼𑀢𑁆𑀢𑁄 𑀧𑀞𑀫𑀚𑁆𑀛𑀸𑀦𑀸𑀥𑀺𑀫𑀼𑀢𑁆𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀫𑀼𑀢𑁆𑀢𑁄 𑀢𑀢𑀺𑀬𑀚𑁆𑀛𑀸𑀦𑀸𑀥𑀺𑀫𑀼𑀢𑁆𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀥𑀺𑀫𑀼𑀢𑁆𑀢𑁄𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀸𑀥𑀺𑀫𑀼𑀢𑁆𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀸𑀥𑀺𑀫𑀼𑀢𑁆𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀸𑀥𑀺𑀫𑀼𑀢𑁆𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀸𑀥𑀺𑀫𑀼𑀢𑁆𑀢𑁄’’𑀢𑀺𑀥𑀺𑀫𑀼𑀢𑁆𑀢𑀁.

𑀢𑀧𑁆𑀧𑀭𑀸𑀬𑀡𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑀬𑀁 𑀢𑀧𑁆𑀧𑀭𑀸𑀬𑀡𑀁 𑀓𑀫𑁆𑀫𑀧𑀭𑀸𑀬𑀡𑀁 𑀯𑀺𑀧𑀸𑀓𑀧𑀭𑀸𑀬𑀡𑀁 𑀓𑀫𑁆𑀫𑀕𑀭𑀼𑀓𑀁 𑀧𑀝𑀺𑀲𑀦𑁆𑀥𑀺𑀕𑀭𑀼𑀓𑀁. 𑀅𑀣 𑀯𑀸, 𑀪𑀕𑀯𑀸 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀽𑀧𑀧𑀭𑀸𑀬𑀡𑁄…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀭𑀸𑀬𑀡𑁄’’𑀢𑀺 𑁋 𑀥𑀺𑀫𑀼𑀢𑁆𑀢𑀁 𑀢𑀧𑁆𑀧𑀭𑀸𑀬𑀡𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀩𑁆𑀩𑀸, [𑀧𑁄𑀲𑀸𑀮𑀸𑀢𑀺 𑀪𑀕𑀯𑀸]

𑀅𑀪𑀺𑀚𑀸𑀦𑀁 𑀢𑀣𑀸𑀕𑀢𑁄;

𑀢𑀺𑀝𑁆𑀞𑀦𑁆𑀢𑀫𑁂𑀦𑀁 𑀚𑀸𑀦𑀸𑀢𑀺, 𑀥𑀺𑀫𑀼𑀢𑁆𑀢𑀁 𑀢𑀧𑁆𑀧𑀭𑀸𑀬𑀡’’𑀦𑁆𑀢𑀺.

𑁮𑁪.

𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑀁 𑀜𑀢𑁆𑀯𑀸, 𑀦𑀦𑁆𑀤𑀺𑀲𑀁𑀬𑁄𑀚𑀦𑀁 𑀇𑀢𑀺;

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀏𑀢𑀁 𑀜𑀸𑀡𑀁 𑀢𑀣𑀁 𑀢𑀲𑁆𑀲, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄.

𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑀁 𑀜𑀢𑁆𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑁄𑀢𑀺 𑀯𑀼𑀘𑁆𑀘𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀁𑀯𑀢𑁆𑀢𑀦𑀺𑀓𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁄. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀁 𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑁄𑀢𑀺 𑀜𑀢𑁆𑀯𑀸, 𑀮𑀕𑁆𑀕𑀦𑀦𑁆𑀢𑀺 𑀜𑀢𑁆𑀯𑀸, 𑀩𑀦𑁆𑀥𑀦𑀦𑁆𑀢𑀺 𑀜𑀢𑁆𑀯𑀸, 𑀧𑀮𑀺𑀩𑁄𑀥𑁄𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑀁 𑀜𑀢𑁆𑀯𑀸.

𑀦𑀦𑁆𑀤𑀺𑀲𑀁𑀬𑁄𑀚𑀦𑀁 𑀇𑀢𑀻𑀢𑀺 𑀦𑀦𑁆𑀤𑀺𑀲𑀁𑀬𑁄𑀚𑀦𑀁 𑀯𑀼𑀘𑁆𑀘𑀢𑀺 𑀅𑀭𑀽𑀧𑀭𑀸𑀕𑁄. 𑀅𑀭𑀽𑀧𑀭𑀸𑀕𑁂𑀦 𑀢𑀁 𑀓𑀫𑁆𑀫𑀁 𑀮𑀕𑁆𑀕𑀁 𑀮𑀕𑁆𑀕𑀺𑀢𑀁 𑀧𑀮𑀺𑀩𑀼𑀤𑁆𑀥𑀁 𑀅𑀭𑀽𑀧𑀭𑀸𑀕𑀁 𑀦𑀦𑁆𑀤𑀺𑀲𑀁𑀬𑁄𑀚𑀦𑀦𑁆𑀢𑀺 𑀜𑀢𑁆𑀯𑀸, 𑀮𑀕𑁆𑀕𑀦𑀦𑁆𑀢𑀺 𑀜𑀢𑁆𑀯𑀸, 𑀩𑀦𑁆𑀥𑀦𑀦𑁆𑀢𑀺 𑀜𑀢𑁆𑀯𑀸, 𑀧𑀮𑀺𑀩𑁄𑀥𑁄𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀢𑀻𑀢𑀺 𑁋 𑀦𑀦𑁆𑀤𑀺𑀲𑀁𑀬𑁄𑀚𑀦𑀁 𑀇𑀢𑀺.

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬𑀸𑀢𑀺 𑀏𑀯𑀁 𑀏𑀢𑀁 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬.

𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣 𑀚𑀸𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀢𑁄 𑀯𑀺𑀧𑀲𑁆𑀲𑀢𑀺, 𑀤𑀼𑀓𑁆𑀔𑀢𑁄 𑀯𑀺𑀧𑀲𑁆𑀲𑀢𑀺, 𑀭𑁄𑀕𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀯𑀺𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺.

𑀏𑀢𑀁 𑀜𑀸𑀡𑀁 𑀢𑀣𑀁 𑀢𑀲𑁆𑀲𑀸𑀢𑀺 𑀏𑀢𑀁 𑀜𑀸𑀡𑀁 𑀢𑀘𑁆𑀙𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢𑀁 𑀢𑀲𑁆𑀲𑀸𑀢𑀺 𑁋 𑀏𑀢𑀁 𑀜𑀸𑀡𑀁 𑀢𑀣𑀁 𑀢𑀲𑁆𑀲.

𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸𑀢𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀁 𑀉𑀧𑀸𑀤𑀸𑀬 𑀲𑀢𑁆𑀢 𑀲𑁂𑀓𑁆𑀔𑀸 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀲𑀦𑁆𑀢𑀺 𑀲𑀁𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀺; 𑀅𑀭𑀳𑀸 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄; 𑀲𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄; 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑁆𑀪𑀯𑀁 𑀜𑀢𑁆𑀯𑀸, 𑀦𑀦𑁆𑀤𑀺𑀲𑀁𑀬𑁄𑀚𑀦𑀁 𑀇𑀢𑀺;

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀢𑀢𑁄 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀏𑀢𑀁 𑀜𑀸𑀡𑀁 𑀢𑀣𑀁 𑀢𑀲𑁆𑀲, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀘𑀼𑀤𑁆𑀤𑀲𑀫𑁄.

𑁧𑁫. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁮𑁫.

𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸]

𑀦 𑀫𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸;

𑀬𑀸𑀯𑀢𑀢𑀺𑀬𑀜𑁆𑀘 𑀤𑁂𑀯𑀻𑀲𑀺 [𑀤𑁂𑀯𑀺𑀲𑀺 (𑀲𑁆𑀬𑀸.)], 𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢𑀁.

𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀸𑀲𑀺 𑁋 ‘‘𑀢𑀤𑀦𑁆𑀢𑀭𑀸 [𑀘𑀓𑁆𑀔𑀼𑀲𑀫𑀦𑀦𑁆𑀢𑀭𑀸 (𑀲𑁆𑀬𑀸.)] 𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀓𑁆𑀓𑀦𑁆𑀢𑀺 𑀲𑀓𑁆𑀓𑁄. 𑀪𑀕𑀯𑀸 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁 𑀲𑀢𑀺𑀧𑀝𑁆𑀞𑀸𑀦𑀥𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀥𑀦𑀁 𑀇𑀤𑁆𑀥𑀺𑀧𑀸𑀤𑀥𑀦𑀁 𑀇𑀦𑁆𑀤𑁆𑀭𑀺𑀬𑀥𑀦𑀁 𑀩𑀮𑀥𑀦𑀁 𑀩𑁄𑀚𑁆𑀛𑀗𑁆𑀕𑀥𑀦𑀁 𑀫𑀕𑁆𑀕𑀥𑀦𑀁 𑀨𑀮𑀥𑀦𑀁 𑀦𑀺𑀩𑁆𑀩𑀸𑀦𑀥𑀦𑀁. 𑀇𑀫𑁂𑀳𑀺 𑀅𑀦𑁂𑀓𑀯𑀺𑀥𑁂𑀳𑀺 𑀥𑀦𑀭𑀢𑀦𑁂𑀳𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀲𑀓𑁆𑀓𑁄 𑀧𑀳𑀼 𑀯𑀺𑀲𑀯𑀻 𑀅𑀮𑀫𑀢𑁆𑀢𑁄 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄. 𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀁 𑀅𑀬𑀸𑀘𑀺𑀲𑁆𑀲𑀁 𑀅𑀚𑁆𑀛𑁂𑀲𑀺𑀲𑁆𑀲𑀁 𑀧𑀲𑀸𑀤𑀬𑀺𑀲𑁆𑀲𑀦𑁆𑀢𑀺 𑁋 𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂… 𑀫𑁄𑀖𑀭𑀸𑀚𑀸𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸.

𑀦 𑀫𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸𑀢𑀺. 𑀦 𑀫𑁂 𑀩𑁆𑀬𑀸𑀓𑀸𑀲𑀻𑀢𑀺 𑀦 𑀫𑁂 𑀩𑁆𑀬𑀸𑀓𑀸𑀲𑀺 𑀦 𑀆𑀘𑀺𑀓𑁆𑀔𑀺 𑀦 𑀤𑁂𑀲𑁂𑀲𑀺 𑀦 𑀧𑀜𑁆𑀜𑀧𑁂𑀲𑀺 𑀦 𑀧𑀝𑁆𑀞𑀧𑁂𑀲𑀺 𑀦 𑀯𑀺𑀯𑀭𑀺 𑀦 𑀯𑀺𑀪𑀚𑀺 𑀦 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀦 𑀧𑀓𑀸𑀲𑁂𑀲𑀺. 𑀘𑀓𑁆𑀔𑀼𑀫𑀸𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑁋 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 [𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 (𑀓.)] 𑀘𑀓𑁆𑀔𑀼𑀫𑀸, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀫𑀁𑀲𑀘𑀓𑁆𑀔𑀼𑀫𑁆𑀳𑀺 𑀪𑀕𑀯𑀢𑁄 𑀧𑀜𑁆𑀘 𑀯𑀡𑁆𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑁋 𑀦𑀻𑀮𑁄 𑀘 𑀯𑀡𑁆𑀡𑁄, 𑀧𑀻𑀢𑀓𑁄 𑀘 𑀯𑀡𑁆𑀡𑁄, 𑀮𑁄𑀳𑀺𑀢𑀓𑁄 𑀘 𑀯𑀡𑁆𑀡𑁄, 𑀓𑀡𑁆𑀳𑁄 𑀘 𑀯𑀡𑁆𑀡𑁄, 𑀑𑀤𑀸𑀢𑁄 𑀘 𑀯𑀡𑁆𑀡𑁄. 𑀬𑀢𑁆𑀣 𑀘 𑀅𑀓𑁆𑀔𑀺𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺 𑀢𑀁 𑀦𑀻𑀮𑀁 𑀳𑁄𑀢𑀺 𑀲𑀼𑀦𑀻𑀮𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀉𑀫𑀸𑀧𑀼𑀧𑁆𑀨𑀲𑀫𑀸𑀦𑀁 [𑀉𑀫𑁆𑀫𑀸𑀭𑀧𑀼𑀧𑁆𑀨𑀲𑀫𑀸𑀦𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁫𑁬]. 𑀢𑀲𑁆𑀲 𑀧𑀭𑀢𑁄 𑀧𑀻𑀢𑀓𑀁 𑀳𑁄𑀢𑀺 𑀲𑀼𑀧𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑀸𑀦𑀁. 𑀉𑀪𑀢𑁄 𑀘 𑀅𑀓𑁆𑀔𑀺𑀓𑀽𑀝𑀸𑀦𑀺 𑀪𑀕𑀯𑀢𑁄 𑀮𑁄𑀳𑀺𑀢𑀓𑀸𑀦𑀺 𑀳𑁄𑀦𑁆𑀢𑀺 𑀲𑀼𑀮𑁄𑀳𑀺𑀢𑀓𑀸𑀦𑀺 𑀧𑀸𑀲𑀸𑀤𑀺𑀓𑀸𑀦𑀺 𑀤𑀲𑁆𑀲𑀦𑁂𑀬𑁆𑀬𑀸𑀦𑀺 𑀇𑀦𑁆𑀤𑀕𑁄𑀧𑀓𑀲𑀫𑀸𑀦𑀸𑀦𑀺. 𑀫𑀚𑁆𑀛𑁂 𑀓𑀡𑁆𑀳𑀁 𑀳𑁄𑀢𑀺 𑀲𑀼𑀓𑀡𑁆𑀳𑀁 𑀅𑀮𑀽𑀔𑀁 𑀲𑀺𑀦𑀺𑀤𑁆𑀥𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀫𑀸𑀦𑀁 [𑀅𑀴𑀸𑀭𑀺𑀝𑁆𑀞𑀓𑀲𑀫𑀸𑀦𑀁 (𑀲𑁆𑀬𑀸.)]. 𑀢𑀲𑁆𑀲 𑀧𑀭𑀢𑁄 𑀑𑀤𑀸𑀢𑀁 𑀳𑁄𑀢𑀺 𑀲𑀼𑀑𑀤𑀸𑀢𑀁 𑀲𑁂𑀢𑀁 𑀧𑀡𑁆𑀟𑀭𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀑𑀲𑀥𑀺𑀢𑀸𑀭𑀓𑀲𑀫𑀸𑀦𑀁. 𑀢𑁂𑀦 𑀪𑀕𑀯𑀸 𑀧𑀸𑀓𑀢𑀺𑀓𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂𑀦 𑀧𑀼𑀭𑀺𑀫𑀲𑀼𑀘𑀭𑀺𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘. 𑀬𑀤𑀸 𑀳𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀲𑀽𑀭𑀺𑀬𑁄 𑀘 𑀅𑀢𑁆𑀣𑀗𑁆𑀕𑀢𑁄 [𑀅𑀢𑁆𑀣𑀗𑁆𑀕𑀫𑀺𑀢𑁄 (𑀲𑁆𑀬𑀸. 𑀓.)] 𑀳𑁄𑀢𑀺; 𑀓𑀸𑀴𑀧𑀓𑁆𑀔𑁄 𑀘 𑀉𑀧𑁄𑀲𑀣𑁄 𑀳𑁄𑀢𑀺, 𑀢𑀺𑀩𑁆𑀩𑁄 𑀘 𑀯𑀦𑀲𑀡𑁆𑀟𑁄 𑀳𑁄𑀢𑀺, 𑀫𑀳𑀸 𑀘 𑀓𑀸𑀴𑀫𑁂𑀖𑁄 [𑀅𑀓𑀸𑀮𑀫𑁂𑀖𑁄 (𑀲𑁆𑀬𑀸. 𑀓.) 𑀧𑀲𑁆𑀲 𑀫𑀳𑀸𑀦𑀺. 𑁧𑁫𑁬] 𑀅𑀩𑁆𑀪𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀏𑀯𑀭𑀽𑀧𑁂 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺. 𑀦𑀢𑁆𑀣𑀺 𑀲𑁄 𑀓𑀼𑀝𑁆𑀝𑁄 𑀯𑀸 𑀓𑀯𑀸𑀝𑀁 𑀯𑀸 𑀧𑀸𑀓𑀸𑀭𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀆𑀯𑀭𑀡𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬. 𑀏𑀓𑀁 𑀘𑁂 𑀢𑀺𑀮𑀨𑀮𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀺𑀮𑀯𑀸𑀳𑁂 𑀧𑀓𑁆𑀔𑀺𑀧𑁂𑀬𑁆𑀬, 𑀢𑀁𑀬𑁂𑀯 𑀢𑀺𑀮𑀨𑀮𑀁 𑀉𑀤𑁆𑀥𑀭𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀧𑀸𑀓𑀢𑀺𑀓𑀁 𑀫𑀁𑀲𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂; 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀆𑀓𑀗𑁆𑀔𑀫𑀸𑀦𑁄 𑀘 𑀪𑀕𑀯𑀸 𑀏𑀓𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑁂𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀘𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀤𑀲𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀯𑀻𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀁𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀜𑀸𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀲𑀢𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀲𑀳𑀲𑁆𑀲𑀺𑀫𑁆𑀧𑀺 𑀘𑀽𑀴𑀦𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑀺𑀲𑀳𑀲𑁆𑀲𑀺𑀫𑁆𑀧𑀺 𑀫𑀚𑁆𑀛𑀺𑀫𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀢𑀺𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀫𑀳𑀸𑀲𑀳𑀲𑁆𑀲𑀺𑀫𑁆𑀧𑀺 [𑀢𑀺𑀲𑀳𑀲𑁆𑀲𑀺𑀁 𑀫𑀳𑀸𑀲𑀳𑀲𑁆𑀲𑀫𑁆𑀧𑀺 (𑀓.)] 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀬𑀸𑀯𑀢𑀓𑀁 𑀯𑀸 [𑀬𑀸𑀯𑀢𑀸 (𑀲𑀻. 𑀓.)] 𑀧𑀦 𑀆𑀓𑀗𑁆𑀔𑁂𑀬𑁆𑀬 𑀢𑀸𑀯𑀢𑀓𑀁 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀤𑀺𑀩𑁆𑀩𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀸𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀲𑁄 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 [𑀥𑀫𑁆𑀫𑀲𑀸𑀫𑀺 (𑀲𑁆𑀬𑀸. 𑀓.)] 𑀢𑀣𑀸𑀕𑀢𑁄. 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 [𑀅𑀨𑀼𑀲𑀺𑀢𑀁 (𑀲𑁆𑀬𑀸. 𑀓.)] 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 [𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 (𑀲𑁆𑀬𑀸.)] 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀚𑀸𑀦𑀺𑀢𑀩𑁆𑀩𑀁 [𑀅𑀢𑁆𑀣𑀺 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁 (𑀓.)] 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄 𑀦𑀻𑀢𑁄 𑀯𑀸 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 [𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄 (𑀓.)], 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄 𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸.

𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀸 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 [𑀢𑀺𑀫𑀺𑀢𑀺𑀧𑀺𑀗𑁆𑀕𑀮𑀁 (𑀓.)] 𑀉𑀧𑀸𑀤𑀸𑀬 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀏𑀯𑀫𑁂𑀯 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀮𑁄𑀓𑁄 𑀲𑀩𑁆𑀭𑀳𑁆𑀫𑀓𑁄 𑀮𑁄𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀻 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀏𑀯𑀫𑁂𑀯 𑀬𑁂𑀧𑀺 𑀢𑁂 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸 𑀯𑁄𑀪𑀺𑀦𑁆𑀤𑀦𑁆𑀢𑀸 [𑀢𑁂 𑀪𑀺𑀦𑁆𑀤𑀦𑁆𑀢𑀸 (𑀲𑁆𑀬𑀸. 𑀓.)] 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸 𑀘 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 [𑀪𑀕𑀯𑀢𑁄 (𑀓.)] 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸. 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸𑀯 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑁋 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺. 𑀏𑀯𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 [𑀑𑀮𑁄𑀓𑁂𑀦𑁆𑀢𑁄 (𑀓.)] 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 [𑀧𑀭 … 𑀤𑀲𑁆𑀲𑀸𑀯𑀺𑀦𑁂 (𑀓.)] 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺 [𑀅𑀦𑁆𑀢𑁄𑀦𑀺𑀫𑁆𑀫𑀼𑀕𑁆𑀕𑀧𑁄𑀲𑀻𑀦𑀺 (𑀓.)], 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸 𑀅𑀘𑁆𑀘𑀼𑀕𑁆𑀕𑀫𑁆𑀫 𑀢𑀺𑀝𑁆𑀞𑀦𑁆𑀢𑀺 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦; 𑀏𑀯𑀫𑁂𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀚𑀸𑀦𑀸𑀢𑀺 𑀪𑀕𑀯𑀸 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀤𑁄𑀲𑀘𑀭𑀺𑀢𑁄, 𑀅𑀬𑀁 𑀫𑁄𑀳𑀘𑀭𑀺𑀢𑁄, 𑀅𑀬𑀁 𑀯𑀺𑀢𑀓𑁆𑀓𑀘𑀭𑀺𑀢𑁄, 𑀅𑀬𑀁 𑀲𑀤𑁆𑀥𑀸𑀘𑀭𑀺𑀢𑁄, 𑀅𑀬𑀁 𑀜𑀸𑀡𑀘𑀭𑀺𑀢𑁄’’𑀢𑀺. 𑀭𑀸𑀕𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺; 𑀤𑁄𑀲𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀁 𑀆𑀘𑀺𑀓𑁆𑀔𑀢𑀺; 𑀫𑁄𑀳𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀕𑀭𑀼𑀲𑀁𑀯𑀸𑀲𑁂 𑀦𑀺𑀯𑁂𑀲𑁂𑀢𑀺; 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀘𑀺𑀓𑁆𑀔𑀢𑀺; 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀲𑀸𑀤𑀦𑀻𑀬𑀁 𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀩𑀼𑀤𑁆𑀥𑀲𑀼𑀩𑁄𑀥𑀺𑀁 [𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 (𑀓.)] 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀲𑀻𑀮𑀸𑀦𑀺 𑀘; 𑀅𑀢𑁆𑀢𑀦𑁄 𑀜𑀸𑀡𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀁 𑀤𑀼𑀓𑁆𑀔𑀸𑀓𑀸𑀭𑀁 𑀅𑀦𑀢𑁆𑀢𑀸𑀓𑀸𑀭𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 [𑀲𑁄𑀓𑀸𑀯𑀓𑀺𑀡𑁆𑀡𑀁 (𑀲𑁆𑀬𑀸.)] 𑀚𑀦𑀢𑀫𑀧𑁂𑀢𑀲𑁄𑀓𑁄, 𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢’’𑀦𑁆𑀢𑀺.

𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.

𑀓𑀣𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.

‘‘𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑀏𑀯𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸𑀢𑀺 𑁋 𑀦 𑀫𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸.

𑀬𑀸𑀯𑀢𑀢𑀺𑀬𑀜𑁆𑀘 𑀤𑁂𑀯𑀻𑀲𑀺, 𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀬𑀸𑀯𑀢𑀢𑀺𑀬𑀁 𑀩𑀼𑀤𑁆𑀥𑁄 𑀲𑀳𑀥𑀫𑁆𑀫𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺 𑀦𑁄 𑀲𑀁𑀲𑀸𑀭𑁂𑀢𑀻𑀢𑀺 [𑀲𑀫𑁆𑀧𑀸𑀬𑀢𑀻𑀢𑀺 (𑀲𑁆𑀬𑀸.)] 𑁋 𑀏𑀯𑀁 𑀫𑀬𑀸 𑀉𑀕𑁆𑀕𑀳𑀺𑀢𑀁, 𑀏𑀯𑀁 𑀫𑀬𑀸 𑀉𑀧𑀥𑀸𑀭𑀺𑀢𑀁, 𑀏𑀯𑀁 𑀫𑀬𑀸 𑀉𑀧𑀮𑀓𑁆𑀔𑀺𑀢𑀁. 𑀤𑁂𑀯𑀻𑀲𑀻𑀢𑀺 𑀪𑀕𑀯𑀸 𑀘𑁂𑀯 𑀇𑀲𑀺 𑀘𑀸𑀢𑀺 𑁋 𑀤𑁂𑀯𑀻𑀲𑀺. 𑀬𑀣𑀸 𑀭𑀸𑀚𑀸 𑀧𑀩𑁆𑀩𑀚𑀺𑀢𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀺𑀲𑀬𑁄, 𑀩𑁆𑀭𑀸𑀳𑁆𑀫𑀡𑀸 𑀧𑀩𑁆𑀩𑀚𑀺𑀢𑀸 𑀯𑀼𑀘𑁆𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀺𑀲𑀬𑁄, 𑀏𑀯𑀫𑁂𑀯 𑀪𑀕𑀯𑀸 𑀤𑁂𑀯𑁄 𑀘𑁂𑀯 𑀇𑀲𑀺 𑀘𑀸𑀢𑀺 𑁋 𑀤𑁂𑀯𑀻𑀲𑀺.

𑀅𑀣 𑀯𑀸, 𑀪𑀕𑀯𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀇𑀲𑀺. 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺𑀧𑀺 𑀇𑀲𑀺. 𑀫𑀳𑀦𑁆𑀢𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀫𑀳𑀦𑁆𑀢𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀫𑀳𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺𑀧𑀺 𑀇𑀲𑀺. 𑀫𑀳𑀢𑁄 𑀢𑀫𑁄𑀓𑀸𑀬𑀲𑁆𑀲 𑀧𑀤𑀸𑀮𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺𑀧𑀺 𑀇𑀲𑀺. 𑀫𑀳𑀢𑁄 𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀪𑁂𑀤𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺𑀧𑀺 𑀇𑀲𑀺. 𑀫𑀳𑀢𑁄 𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀅𑀩𑁆𑀩𑀳𑀦𑀁… 𑀫𑀳𑀢𑁄 𑀤𑀺𑀝𑁆𑀞𑀺𑀲𑀗𑁆𑀖𑀸𑀝𑀲𑁆𑀲 𑀯𑀺𑀦𑀺𑀯𑁂𑀞𑀦𑀁… 𑀫𑀳𑀢𑁄 𑀫𑀸𑀦𑀤𑁆𑀥𑀚𑀲𑁆𑀲 𑀧𑀧𑀸𑀢𑀦𑀁… 𑀫𑀳𑀢𑁄 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀽𑀧𑀲𑀫𑀁… 𑀫𑀳𑀢𑁄 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀁… 𑀫𑀳𑀢𑁄 𑀪𑀸𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀁… 𑀫𑀳𑀢𑁄 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑀁… 𑀫𑀳𑀢𑁄 𑀲𑀦𑁆𑀢𑀸𑀧𑀲𑁆𑀲 𑀦𑀺𑀩𑁆𑀩𑀸𑀧𑀦𑀁… 𑀫𑀳𑀢𑁄 𑀧𑀭𑀺𑀴𑀸𑀳𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁… 𑀫𑀳𑀢𑁄 𑀥𑀫𑁆𑀫𑀤𑁆𑀥𑀚𑀲𑁆𑀲 𑀉𑀲𑁆𑀲𑀸𑀧𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺𑀧𑀺 𑀇𑀲𑀺. 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂… 𑀫𑀳𑀦𑁆𑀢𑁂 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺… 𑀫𑀳𑀦𑁆𑀢𑀸𑀦𑀺 𑀩𑀮𑀸𑀦𑀺… 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂… 𑀫𑀳𑀦𑁆𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁… 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺𑀧𑀺 𑀇𑀲𑀺. 𑀫𑀳𑁂𑀲𑀓𑁆𑀔𑁂𑀳𑀺 𑀯𑀸 𑀲𑀢𑁆𑀢𑁂𑀳𑀺 𑀏𑀲𑀺𑀢𑁄 𑀕𑀯𑁂𑀲𑀺𑀢𑁄 𑀧𑀭𑀺𑀬𑁂𑀲𑀺𑀢𑁄 𑁋 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄, 𑀓𑀳𑀁 𑀦𑀭𑀸𑀲𑀪𑁄’’𑀢𑀺𑀧𑀺 𑀇𑀲𑀻𑀢𑀺 𑁋 𑀬𑀸𑀯𑀢𑀢𑀺𑀬𑀜𑁆𑀘 𑀤𑁂𑀯𑀻𑀲𑀺 𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀤𑁆𑀯𑀸𑀳𑀁 𑀲𑀓𑁆𑀓𑀁 𑀅𑀧𑀼𑀘𑁆𑀙𑀺𑀲𑁆𑀲𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸]

𑀦 𑀫𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸;

𑀬𑀸𑀯𑀢𑀢𑀺𑀬𑀜𑁆𑀘 𑀤𑁂𑀯𑀻𑀲𑀺, 𑀩𑁆𑀬𑀸𑀓𑀭𑁄𑀢𑀻𑀢𑀺 𑀫𑁂 𑀲𑀼𑀢’’𑀦𑁆𑀢𑀺.

𑁮𑁬.

𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄, 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄;

𑀤𑀺𑀝𑁆𑀞𑀺𑀁 𑀢𑁂 𑀦𑀸𑀪𑀺𑀚𑀸𑀦𑀸𑀢𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄𑀢𑀺. 𑀅𑀬𑀁 𑀮𑁄𑀓𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀧𑀭𑁄 𑀮𑁄𑀓𑁄𑀢𑀺 𑀫𑀦𑀼𑀲𑁆𑀲𑀮𑁄𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀧𑀭𑁄 𑀮𑁄𑀓𑁄𑀢𑀺 𑁋 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄.

𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄𑀢𑀺 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀢𑀺 𑁋 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄.

𑀤𑀺𑀝𑁆𑀞𑀺𑀁 𑀢𑁂 𑀦𑀸𑀪𑀺𑀚𑀸𑀦𑀸𑀢𑀻𑀢𑀺 𑀢𑀼𑀬𑁆𑀳𑀁 𑀤𑀺𑀝𑁆𑀞𑀺𑀁 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀮𑀤𑁆𑀥𑀺𑀁 𑀅𑀚𑁆𑀛𑀸𑀲𑀬𑀁 𑀅𑀥𑀺𑀧𑁆𑀧𑀸𑀬𑀁 𑀮𑁄𑀓𑁄 𑀦 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀏𑀯𑀁𑀤𑀺𑀝𑁆𑀞𑀺𑀓𑁄 𑀏𑀯𑀁𑀔𑀦𑁆𑀢𑀺𑀓𑁄 𑀏𑀯𑀁𑀭𑀼𑀘𑀺𑀓𑁄 𑀏𑀯𑀁𑀮𑀤𑁆𑀥𑀺𑀓𑁄 𑀏𑀯𑀁𑀅𑀚𑁆𑀛𑀸𑀲𑀬𑁄 𑀏𑀯𑀁𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺 𑀦 𑀤𑀓𑁆𑀔𑀢𑀺 𑀦𑀸𑀥𑀺𑀕𑀘𑁆𑀙𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀻𑀢𑀺 𑁋 𑀤𑀺𑀝𑁆𑀞𑀺𑀁 𑀢𑁂 𑀦𑀸𑀪𑀺𑀚𑀸𑀦𑀸𑀢𑀺.

𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄𑀢𑀺 𑀪𑀕𑀯𑀸 𑀬𑀲𑀧𑁆𑀧𑀢𑁆𑀢𑁄𑀢𑀺 𑀬𑀲𑀲𑁆𑀲𑀻. 𑀅𑀣 𑀯𑀸, 𑀪𑀕𑀯𑀸 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺𑀧𑀺 𑀬𑀲𑀲𑁆𑀲𑀻𑀢𑀺 𑁋 𑀕𑁄𑀢𑀫𑀲𑁆𑀲 𑀬𑀲𑁆𑀲𑀺𑀦𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄, 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄;

𑀤𑀺𑀝𑁆𑀞𑀺𑀁 𑀢𑁂 𑀦𑀸𑀪𑀺𑀚𑀸𑀦𑀸𑀢𑀺, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄’’𑀢𑀺.

𑁮𑁭.

𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺.

𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀦𑁆𑀢𑀺 𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀁 𑀅𑀕𑁆𑀕𑀤𑀲𑁆𑀲𑀸𑀯𑀺𑀁 𑀲𑁂𑀝𑁆𑀞𑀤𑀲𑁆𑀲𑀸𑀯𑀺𑀁 𑀯𑀺𑀲𑁂𑀝𑁆𑀞𑀤𑀲𑁆𑀲𑀸𑀯𑀺𑀁 𑀧𑀸𑀫𑁄𑀓𑁆𑀔𑀤𑀲𑁆𑀲𑀸𑀯𑀺𑀁 𑀉𑀢𑁆𑀢𑀫𑀤𑀲𑁆𑀲𑀸𑀯𑀺𑀁 𑀧𑀭𑀫𑀤𑀲𑁆𑀲𑀸𑀯𑀺𑀦𑁆𑀢𑀺 𑁋 𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀁.

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺…𑀧𑁂… 𑀯𑀳𑀲𑁆𑀲𑁂𑀢𑀁 𑀪𑀸𑀭𑀦𑁆𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀦𑁆𑀢𑀺 𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀁 𑀢𑀼𑀮𑀬𑀦𑁆𑀢𑀁 𑀢𑀻𑀭𑀬𑀦𑁆𑀢𑀁 𑀯𑀺𑀪𑀸𑀯𑀬𑀦𑁆𑀢𑀁 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑀦𑁆𑀢𑀺 𑁋 𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁.

𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻𑀢𑀺 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺 𑀦 𑀤𑀓𑁆𑀔𑀢𑀺 𑀦𑀸𑀥𑀺𑀕𑀘𑁆𑀙𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀻𑀢𑀺 𑁋 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀏𑀯𑀁 𑀅𑀪𑀺𑀓𑁆𑀓𑀦𑁆𑀢𑀤𑀲𑁆𑀲𑀸𑀯𑀺𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺.

𑁮𑁮.

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺.

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺. 𑀮𑁄𑀓𑁄𑀢𑀺 𑀦𑀺𑀭𑀬𑀮𑁄𑀓𑁄 𑀢𑀺𑀭𑀘𑁆𑀙𑀸𑀦𑀮𑁄𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀤𑁂𑀯𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄 [𑀲𑀤𑁂𑀯𑀓𑁄 𑀮𑁄𑀓𑁄 (𑀓.)]. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑁄𑀓𑁄 𑀮𑁄𑀓𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀮𑀼𑀚𑁆𑀚𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀮𑀼𑀚𑁆𑀚𑀢𑀺? 𑀘𑀓𑁆𑀔𑀼 𑀔𑁄 𑀪𑀺𑀓𑁆𑀔𑀼 𑀮𑀼𑀚𑁆𑀚𑀢𑀺, 𑀭𑀽𑀧𑀸 𑀮𑀼𑀚𑁆𑀚𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑀸𑀡𑀁 𑀮𑀼𑀚𑁆𑀚𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑀼𑀚𑁆𑀚𑀢𑀺, 𑀬𑀫𑁆𑀧𑀺𑀤𑀁 [𑀬𑀫𑀺𑀤𑀁 (𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁮𑁨] 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀮𑀼𑀚𑁆𑀚𑀢𑀺; 𑀲𑁄𑀢𑀁 𑀮𑀼𑀚𑁆𑀚𑀢𑀺, 𑀕𑀦𑁆𑀥𑀸 𑀮𑀼𑀚𑁆𑀚𑀦𑁆𑀢𑀺…𑀧𑁂… 𑀓𑀸𑀬𑁄 𑀮𑀼𑀚𑁆𑀚𑀢𑀺, 𑀨𑁄𑀝𑁆𑀞𑀩𑁆𑀩𑀸 𑀮𑀼𑀚𑁆𑀚𑀦𑁆𑀢𑀺; 𑀫𑀦𑁄 𑀮𑀼𑀚𑁆𑀚𑀢𑀺, 𑀥𑀫𑁆𑀫𑀸 𑀮𑀼𑀚𑁆𑀚𑀦𑁆𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑀼𑀚𑁆𑀚𑀢𑀺, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑀼𑀚𑁆𑀚𑀢𑀺; 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀮𑀼𑀚𑁆𑀚𑀢𑀺. 𑀮𑀼𑀚𑁆𑀚𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺’’.

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺 𑁋 𑀅𑀯𑀲𑀺𑀬𑀧𑀯𑀢𑁆𑀢𑀲𑀮𑁆𑀮𑀓𑁆𑀔𑀡𑀯𑀲𑁂𑀦 [𑀅𑀯𑀲𑁆𑀲𑀺𑀬𑀧𑀯𑀢𑁆𑀢 … (𑀲𑁆𑀬𑀸.)] 𑀯𑀸 𑀢𑀼𑀘𑁆𑀙𑀲𑀗𑁆𑀔𑀸𑀭𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀸. 𑀓𑀣𑀁 𑀅𑀯𑀲𑀺𑀬𑀧𑀯𑀢𑁆𑀢𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺? 𑀭𑀽𑀧𑁂 𑀯𑀲𑁄 𑀦 𑀮𑀩𑁆𑀪𑀢𑀺, 𑀯𑁂𑀤𑀦𑀸𑀬 𑀯𑀲𑁄 𑀦 𑀮𑀩𑁆𑀪𑀢𑀺, 𑀲𑀜𑁆𑀜𑀸𑀬 𑀯𑀲𑁄 𑀦 𑀮𑀩𑁆𑀪𑀢𑀺, 𑀲𑀗𑁆𑀔𑀸𑀭𑁂𑀲𑀼 𑀯𑀲𑁄 𑀦 𑀮𑀩𑁆𑀪𑀢𑀺, 𑀯𑀺𑀜𑁆𑀜𑀸𑀡𑁂 𑀯𑀲𑁄 𑀦 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁. 𑀦𑀺. 𑁩.𑁫𑁯] 𑁋 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸. 𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬; 𑀮𑀩𑁆𑀪𑁂𑀣 𑀘 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺 𑀦 𑀘 𑀮𑀩𑁆𑀪𑀢𑀺 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺.

‘‘𑀯𑁂𑀤𑀦𑀸 𑀅𑀦𑀢𑁆𑀢𑀸. 𑀯𑁂𑀤𑀦𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬; 𑀮𑀩𑁆𑀪𑁂𑀣 𑀘 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺.

‘‘𑀲𑀜𑁆𑀜𑀸 𑀅𑀦𑀢𑁆𑀢𑀸. 𑀲𑀜𑁆𑀜𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀜𑁆𑀜𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬; 𑀮𑀩𑁆𑀪𑁂𑀣 𑀘 𑀲𑀜𑁆𑀜𑀸𑀬 𑁋 ‘𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀜𑁆𑀜𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀜𑁆𑀜𑀸𑀬 𑁋 ‘𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’𑀢𑀺.

‘‘𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸. 𑀲𑀗𑁆𑀔𑀸𑀭𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀦𑀬𑀺𑀤𑀁 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀁; 𑀮𑀩𑁆𑀪𑁂𑀣 𑀘 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺.

‘‘𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬; 𑀮𑀩𑁆𑀪𑁂𑀣 𑀘 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’’’𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑁄 𑀢𑀼𑀫𑁆𑀳𑀸𑀓𑀁, 𑀦𑀧𑀺 𑀅𑀜𑁆𑀜𑁂𑀲𑀁 [𑀧𑀭𑁂𑀲𑀁 (𑀲𑁆𑀬𑀸.) 𑀧𑀲𑁆𑀲 𑀲𑀁. 𑀦𑀺. 𑁨.𑁩𑁭]. 𑀧𑀼𑀭𑀸𑀡𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀁 𑀯𑁂𑀤𑀦𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁𑀬𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺; 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺, 𑀬𑀤𑀺𑀤𑀁 𑁋 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺 𑁋 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺’’’.

‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄 …𑀧𑁂… 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀏𑀯𑀁 𑀅𑀯𑀲𑀺𑀬𑀧𑀯𑀢𑁆𑀢𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀓𑀣𑀁 𑀢𑀼𑀘𑁆𑀙𑀲𑀗𑁆𑀔𑀸𑀭𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺? 𑀭𑀽𑀧𑁂 𑀲𑀸𑀭𑁄 𑀦 𑀮𑀩𑁆𑀪𑀢𑀺, 𑀯𑁂𑀤𑀦𑀸𑀬 𑀲𑀸𑀭𑁄 𑀦 𑀮𑀩𑁆𑀪𑀢𑀺, 𑀲𑀜𑁆𑀜𑀸𑀬 𑀲𑀸𑀭𑁄 𑀦 𑀮𑀩𑁆𑀪𑀢𑀺, 𑀲𑀗𑁆𑀔𑀸𑀭𑁂𑀲𑀼 𑀲𑀸𑀭𑁄 𑀦 𑀮𑀩𑁆𑀪𑀢𑀺, 𑀯𑀺𑀜𑁆𑀜𑀸𑀡𑁂 𑀲𑀸𑀭𑁄 𑀦 𑀮𑀩𑁆𑀪𑀢𑀺; 𑀭𑀽𑀧𑀁 𑀅𑀲𑁆𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀯𑁂𑀤𑀦𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸…𑀧𑁂… 𑀲𑀜𑁆𑀜𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸… 𑀲𑀗𑁆𑀔𑀸𑀭𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸… 𑀯𑀺𑀜𑁆𑀜𑀸𑀡𑀁 𑀅𑀲𑁆𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀬𑀣𑀸 𑀦𑀴𑁄 𑀅𑀲𑁆𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀘 𑀏𑀭𑀡𑁆𑀟𑁄…𑀧𑁂… 𑀬𑀣𑀸 𑀘 𑀉𑀤𑀼𑀫𑁆𑀩𑀭𑁄 𑀅𑀲𑁆𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀘 𑀲𑁂𑀢𑀕𑀘𑁆𑀙𑁄 [𑀲𑁂𑀢𑀯𑀘𑁆𑀙𑁄 (𑀓.)] 𑀅𑀲𑁆𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀘 𑀧𑀸𑀮𑀺𑀪𑀤𑁆𑀤𑀓𑁄 [𑀧𑀸𑀴𑀺𑀪𑀤𑁆𑀤𑀓𑁄 (𑀓.)] 𑀅𑀲𑁆𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀘 𑀨𑁂𑀡𑀧𑀺𑀡𑁆𑀟𑁄 [𑀨𑁂𑀡𑀼𑀧𑀺𑀡𑁆𑀟𑁄 (𑀲𑁆𑀬𑀸.)] 𑀅𑀲𑁆𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀘 𑀉𑀤𑀓𑀧𑀼𑀩𑁆𑀩𑀼𑀴𑀁 [𑀧𑀼𑀩𑁆𑀩𑀼𑀮𑀓𑀁 (𑀲𑁆𑀬𑀸.)] 𑀅𑀲𑁆𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁, 𑀬𑀣𑀸 𑀘 𑀫𑀭𑀻𑀘𑀺 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸, 𑀬𑀣𑀸 𑀓𑀤𑀮𑀺𑀓𑁆𑀔𑀦𑁆𑀥𑁄 𑀅𑀲𑁆𑀲𑀸𑀭𑁄 𑀦𑀺𑀲𑁆𑀲𑀸𑀭𑁄 𑀲𑀸𑀭𑀸𑀧𑀕𑀢𑁄, 𑀬𑀣𑀸 𑀫𑀸𑀬𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸 𑁋 𑀏𑀯𑀫𑁂𑀯 𑀭𑀽𑀧𑀁 𑀅𑀲𑁆𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀯𑁂𑀤𑀦𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸…𑀧𑁂… 𑀲𑀜𑁆𑀜𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸… 𑀲𑀗𑁆𑀔𑀸𑀭𑀸 𑀅𑀲𑁆𑀲𑀸𑀭𑀸 𑀦𑀺𑀲𑁆𑀲𑀸𑀭𑀸 𑀲𑀸𑀭𑀸𑀧𑀕𑀢𑀸… 𑀯𑀺𑀜𑁆𑀜𑀸𑀡𑀁 𑀅𑀲𑁆𑀲𑀸𑀭𑀁 𑀦𑀺𑀲𑁆𑀲𑀸𑀭𑀁 𑀲𑀸𑀭𑀸𑀧𑀕𑀢𑀁 𑀦𑀺𑀘𑁆𑀘𑀲𑀸𑀭𑀲𑀸𑀭𑁂𑀦 𑀯𑀸 𑀲𑀼𑀔𑀲𑀸𑀭𑀲𑀸𑀭𑁂𑀦 𑀯𑀸 𑀅𑀢𑁆𑀢𑀲𑀸𑀭𑀲𑀸𑀭𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀏𑀯𑀁 𑀢𑀼𑀘𑁆𑀙𑀲𑀗𑁆𑀔𑀸𑀭𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀅𑀧𑀺 𑀘, 𑀙𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺. 𑀘𑀓𑁆𑀔𑀼 𑀲𑀼𑀜𑁆𑀜𑀁 [𑀲𑁆𑀬𑀸. … 𑀧𑁄𑀢𑁆𑀣𑀓𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑀣𑀸 𑀤𑀺𑀲𑁆𑀲𑀢𑀺] 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸, 𑀲𑁄𑀢𑀁 𑀲𑀼𑀜𑁆𑀜𑀁…𑀧𑁂… 𑀖𑀸𑀦𑀁 𑀲𑀼𑀜𑁆𑀜𑀁… 𑀚𑀺𑀯𑁆𑀳𑀸 𑀲𑀼𑀜𑁆𑀜𑀸… 𑀓𑀸𑀬𑁄 𑀲𑀼𑀜𑁆𑀜𑁄… 𑀫𑀦𑁄 𑀲𑀼𑀜𑁆𑀜𑁄 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀭𑀽𑀧𑀸 𑀲𑀼𑀜𑁆𑀜𑀸…𑀧𑁂… 𑀲𑀤𑁆𑀤𑀸 𑀲𑀼𑀜𑁆𑀜𑀸… 𑀕𑀦𑁆𑀥𑀸 𑀲𑀼𑀜𑁆𑀜𑀸… 𑀭𑀲𑀸 𑀲𑀼𑀜𑁆𑀜𑀸… 𑀨𑁄𑀝𑁆𑀞𑀩𑁆𑀩𑀸 𑀲𑀼𑀜𑁆𑀜𑀸… 𑀥𑀫𑁆𑀫𑀸 𑀲𑀼𑀜𑁆𑀜𑀸 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄 … 𑀫𑀦𑁄𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀲𑀼𑀜𑁆𑀜𑀸… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀲𑀼𑀜𑁆𑀜𑀸… 𑀭𑀽𑀧𑀲𑀜𑁆𑀜𑀸 𑀲𑀼𑀜𑁆𑀜𑀸… 𑀥𑀫𑁆𑀫𑀲𑀜𑁆𑀜𑀸 𑀲𑀼𑀜𑁆𑀜𑀸… 𑀭𑀽𑀧𑀲𑀜𑁆𑀘𑁂𑀢𑀦𑀸 𑀲𑀼𑀜𑁆𑀜𑀸… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀲𑀼𑀜𑁆𑀜𑀸… 𑀭𑀽𑀧𑀢𑀡𑁆𑀳𑀸 𑀲𑀼𑀜𑁆𑀜𑀸… 𑀭𑀽𑀧𑀯𑀺𑀢𑀓𑁆𑀓𑁄 𑀲𑀼𑀜𑁆𑀜𑁄… 𑀭𑀽𑀧𑀯𑀺𑀘𑀸𑀭𑁄 𑀲𑀼𑀜𑁆𑀜𑁄… 𑀥𑀫𑁆𑀫𑀯𑀺𑀘𑀸𑀭𑁄 𑀲𑀼𑀜𑁆𑀜𑁄 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀦𑀺𑀘𑁆𑀘𑁂𑀦 𑀯𑀸 𑀥𑀼𑀯𑁂𑀦 𑀯𑀸 𑀲𑀲𑁆𑀲𑀢𑁂𑀦 𑀯𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸. 𑀏𑀯𑀁 𑀙𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀅𑀧𑀺 𑀘, 𑀤𑀲𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺. 𑀭𑀽𑀧𑀁 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀅𑀲𑀸𑀭𑀓𑀢𑁄 𑀯𑀥𑀓𑀢𑁄 𑀯𑀺𑀪𑀯𑀢𑁄 𑀅𑀖𑀫𑀽𑀮𑀢𑁄 𑀲𑀸𑀲𑀯𑀢𑁄 𑀲𑀗𑁆𑀔𑀢𑀢𑁄; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀘𑀼𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀯𑀝𑁆𑀝𑀁 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀅𑀲𑀸𑀭𑀓𑀢𑁄 𑀯𑀥𑀓𑀢𑁄 𑀯𑀺𑀪𑀯𑀢𑁄 𑀅𑀖𑀫𑀽𑀮𑀢𑁄 𑀲𑀸𑀲𑀯𑀢𑁄 𑀲𑀗𑁆𑀔𑀢𑀢𑁄. 𑀏𑀯𑀁 𑀤𑀲𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀅𑀧𑀺 𑀘, 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺. 𑀭𑀽𑀧𑀁 𑀦 𑀲𑀢𑁆𑀢𑁄 𑀦 𑀚𑀻𑀯𑁄 𑀦 𑀦𑀭𑁄 𑀦 𑀫𑀸𑀡𑀯𑁄 𑀦 𑀇𑀢𑁆𑀣𑀻 𑀦 𑀧𑀼𑀭𑀺𑀲𑁄 𑀦 𑀅𑀢𑁆𑀢𑀸 𑀦 𑀅𑀢𑁆𑀢𑀦𑀺𑀬𑀁 𑀦𑀸𑀳𑀁 𑀦 𑀫𑀫 𑀦 𑀓𑁄𑀘𑀺 𑀦 𑀓𑀲𑁆𑀲𑀘𑀺; 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦 𑀲𑀢𑁆𑀢𑁄 𑀦 𑀚𑀻𑀯𑁄 𑀦 𑀦𑀭𑁄 𑀦 𑀫𑀸𑀡𑀯𑁄 𑀦 𑀇𑀢𑁆𑀣𑀻 𑀦 𑀧𑀼𑀭𑀺𑀲𑁄 𑀦 𑀅𑀢𑁆𑀢𑀸 𑀦 𑀅𑀢𑁆𑀢𑀦𑀺𑀬𑀁 𑀦𑀸𑀳𑀁 𑀦 𑀫𑀫 𑀦 𑀓𑁄𑀘𑀺 𑀦 𑀓𑀲𑁆𑀲𑀘𑀺. 𑀏𑀯𑀁 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑀁 𑀧𑀚𑀳𑀣. 𑀲𑀸 𑀯𑁄 𑀧𑀳𑀻𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑀁 𑀧𑀚𑀳𑀣. 𑀲𑀸 𑀯𑁄 𑀧𑀳𑀻𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑀗𑁆𑀔𑀸𑀭𑀸, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑁂 𑀧𑀚𑀳𑀣. 𑀢𑁂 𑀯𑁄 𑀧𑀳𑀻𑀦𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 [𑀢𑀁 𑀓𑀺𑀁 𑀫𑀜𑁆𑀜𑀣 (𑀲𑁆𑀬𑀸. 𑀓.) 𑀧𑀲𑁆𑀲 𑀲𑀁. 𑀦𑀺. 𑁩.𑁩𑁩], 𑀪𑀺𑀓𑁆𑀔𑀯𑁂, 𑀬𑀁 𑀇𑀫𑀲𑁆𑀫𑀺𑀁 𑀚𑁂𑀢𑀯𑀦𑁂 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀢𑀁 𑀚𑀦𑁄 𑀳𑀭𑁂𑀬𑁆𑀬 𑀯𑀸 𑀟𑀳𑁂𑀬𑁆𑀬 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬. 𑀅𑀧𑀺 𑀦𑀼 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀫𑁆𑀳𑁂 𑀚𑀦𑁄 𑀳𑀭𑀢𑀺 𑀯𑀸 𑀟𑀳𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀢𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀢𑀁 𑀓𑀺𑀲𑁆𑀲 𑀳𑁂𑀢𑀼’? ‘𑀦 𑀳𑀺 𑀦𑁄 𑀏𑀢𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣; 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁; 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀫𑁆𑀧𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀼𑀜𑁆𑀜𑁄 [𑀲𑀼𑀜𑁆𑀜𑀢𑁄 (𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁮𑁫] 𑀮𑁄𑀓𑁄, 𑀲𑀼𑀜𑁆𑀜𑁄 𑀮𑁄𑀓𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? ‘‘𑀬𑀲𑁆𑀫𑀸 𑀘 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸? 𑀘𑀓𑁆𑀔𑀼 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀭𑀽𑀧𑀸 𑀲𑀼𑀜𑁆𑀜𑀸…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄… 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀲𑁄𑀢𑀁 𑀲𑀼𑀜𑁆𑀜𑀁… 𑀲𑀤𑁆𑀤𑀸 𑀲𑀼𑀜𑁆𑀜𑀸… 𑀖𑀸𑀦𑀁 𑀲𑀼𑀜𑁆𑀜𑀁… 𑀕𑀦𑁆𑀥𑀸 𑀲𑀼𑀜𑁆𑀜𑀸… 𑀚𑀺𑀯𑁆𑀳𑀸 𑀲𑀼𑀜𑁆𑀜𑀸… 𑀭𑀲𑀸 𑀲𑀼𑀜𑁆𑀜𑀸… 𑀓𑀸𑀬𑁄 𑀲𑀼𑀜𑁆𑀜𑁄 … 𑀨𑁄𑀝𑁆𑀞𑀩𑁆𑀩𑀸 𑀲𑀼𑀜𑁆𑀜𑀸… 𑀫𑀦𑁄 𑀲𑀼𑀜𑁆𑀜𑁄… 𑀥𑀫𑁆𑀫𑀸 𑀲𑀼𑀜𑁆𑀜𑀸… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀲𑀼𑀜𑁆𑀜𑀁… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑁄… 𑀬𑀫𑁆𑀧𑀺𑀤𑀁 𑀲𑀼𑀜𑁆𑀜𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸. 𑀬𑀲𑁆𑀫𑀸 𑀘 𑀔𑁄, 𑀆𑀦𑀦𑁆𑀤, 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸, 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀏𑀯𑀫𑁆𑀧𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

‘‘𑀲𑀼𑀤𑁆𑀥𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀁, 𑀲𑀼𑀤𑁆𑀥𑀲𑀗𑁆𑀔𑀸𑀭𑀲𑀦𑁆𑀢𑀢𑀺𑀁;

𑀧𑀲𑁆𑀲𑀦𑁆𑀢𑀲𑁆𑀲 𑀬𑀣𑀸𑀪𑀽𑀢𑀁, 𑀦 𑀪𑀬𑀁 𑀳𑁄𑀢𑀺 𑀕𑀸𑀫𑀡𑀺.

‘‘𑀢𑀺𑀡𑀓𑀝𑁆𑀞𑀲𑀫𑀁 𑀮𑁄𑀓𑀁, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀦𑀸𑀜𑁆𑀜𑀁 [𑀦 𑀅𑀜𑁆𑀜𑀁 (𑀲𑀻. 𑀲𑁆𑀬𑀸. 𑀓.)] 𑀧𑀢𑁆𑀣𑀬𑀢𑁂 𑀓𑀺𑀜𑁆𑀘𑀺, 𑀅𑀜𑁆𑀜𑀢𑁆𑀭𑀧𑁆𑀧𑀝𑀺𑀲𑀦𑁆𑀥𑀺𑀬𑀸’’𑀢𑀺.

𑀏𑀯𑀫𑁆𑀧𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁. 𑀦𑀺. 𑁪.𑁨𑁪𑁬] 𑁋 ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀺, 𑀯𑁂𑀤𑀦𑀁 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀯𑁂𑀤𑀦𑀸𑀬 𑀕𑀢𑀺, 𑀲𑀜𑁆𑀜𑀁 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀲𑀜𑁆𑀜𑀸𑀬 𑀕𑀢𑀺, 𑀲𑀗𑁆𑀔𑀸𑀭𑁂 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀲𑀗𑁆𑀔𑀸𑀭𑀸𑀦𑀁 𑀕𑀢𑀺, 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀦𑁂𑀲𑀢𑀺 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺. 𑀢𑀲𑁆𑀲 𑀭𑀽𑀧𑀁 [𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀽𑀧𑀁 (𑀲𑁆𑀬𑀸.)] 𑀲𑀫𑀦𑁆𑀦𑁂𑀲𑀢𑁄 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀺, 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀦𑁂𑀲𑀢𑁄 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺, 𑀬𑀫𑁆𑀧𑀺𑀲𑁆𑀲 𑀢𑀁 𑀳𑁄𑀢𑀺 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀅𑀲𑁆𑀫𑀻𑀢𑀺 𑀯𑀸, 𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻’’𑀢𑀺. 𑀏𑀯𑀫𑁆𑀧𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀢𑀺.

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼 𑀧𑀘𑁆𑀘𑀯𑁂𑀓𑁆𑀔𑀲𑁆𑀲𑀼 𑀤𑀓𑁆𑀔𑀲𑁆𑀲𑀼 𑀢𑀼𑀮𑁂𑀳𑀺 𑀢𑀻𑀭𑁂𑀳𑀺 𑀯𑀺𑀪𑀸𑀯𑁂𑀳𑀺 𑀯𑀺𑀪𑀽𑀢𑀁 𑀓𑀭𑁄𑀳𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼.

𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄𑀢𑀺. 𑀫𑁄𑀖𑀭𑀸𑀚𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁…𑀧𑁂… 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄.

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘𑀸𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀯𑀼𑀘𑁆𑀘𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁, 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀅𑀬𑀁 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘𑀸𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘 𑀲𑀫𑀽𑀳𑀘𑁆𑀘 [𑀉𑀳𑀘𑁆𑀘 𑀲𑀫𑀼𑀳𑀘𑁆𑀘 (𑀓.) 𑀲𑀤𑁆𑀤𑀦𑀻𑀢𑀺𑀬𑀸 𑀧𑀦 𑀲𑀫𑁂𑀢𑀺] 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀉𑀧𑁆𑀧𑀸𑀝𑀬𑀺𑀢𑁆𑀯𑀸 𑀲𑀫𑀼𑀧𑁆𑀧𑀸𑀝𑀬𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘.

𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸𑀢𑀺 𑀏𑀯𑀁 𑀫𑀘𑁆𑀘𑀼𑀧𑀺 𑀢𑀭𑁂𑀬𑁆𑀬𑀸𑀲𑀺, 𑀚𑀭𑀸𑀧𑀺 𑀢𑀭𑁂𑀬𑁆𑀬𑀸𑀲𑀺, 𑀫𑀭𑀡𑀫𑁆𑀧𑀺 𑀢𑀭𑁂𑀬𑁆𑀬𑀸𑀲𑀺 𑀉𑀢𑁆𑀢𑀭𑁂𑀬𑁆𑀬𑀸𑀲𑀺 𑀧𑀢𑀭𑁂𑀬𑁆𑀬𑀸𑀲𑀺 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀸𑀲𑀺 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀲𑀻𑀢𑀺 𑁋 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸.

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀦𑁆𑀢𑀺 𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀁 𑀢𑀼𑀮𑀬𑀦𑁆𑀢𑀁 𑀢𑀻𑀭𑀬𑀦𑁆𑀢𑀁 𑀯𑀺𑀪𑀸𑀯𑀬𑀦𑁆𑀢𑀁 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑀦𑁆𑀢𑀺 𑁋 𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁.

𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻𑀢𑀺 𑀫𑀘𑁆𑀘𑀼𑀧𑀺 𑀫𑀘𑁆𑀘𑀼𑀭𑀸𑀚𑀸, 𑀫𑀸𑀭𑁄𑀧𑀺 𑀫𑀘𑁆𑀘𑀼𑀭𑀸𑀚𑀸, 𑀫𑀭𑀡𑀫𑁆𑀧𑀺 𑀫𑀘𑁆𑀘𑀼𑀭𑀸𑀚𑀸. 𑀦 𑀧𑀲𑁆𑀲𑀢𑀻𑀢𑀺 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻 𑀦 𑀤𑀓𑁆𑀔𑀢𑀺 𑀦𑀸𑀥𑀺𑀕𑀘𑁆𑀙𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 [𑀯𑀺𑀲𑁆𑀲𑀝𑁆𑀞𑁄 (𑀓.)] 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄 [𑀅𑀦𑀸𑀧𑀸𑀢𑀕𑀢𑁄 (𑀓.)], 𑀪𑀺𑀓𑁆𑀔𑀯𑁂, 𑀮𑀼𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 [𑀅𑀦𑁆𑀢𑀫𑀓𑀸𑀲𑀺 (𑀓.) 𑀧𑀲𑁆𑀲 𑀫. 𑀦𑀺. 𑁧.𑁨𑁭𑁧] 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸, 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸, 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸, 𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄, 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’𑀦𑁆𑀢𑀺. 𑀲𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄 𑀪𑀺𑀓𑁆𑀔𑀼 𑀧𑀸𑀧𑀺𑀫𑀢𑁄’’𑀢𑀺 𑁋 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀧𑀦𑁆𑀦𑀭𑀲𑀫𑁄.

𑁧𑁬. 𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁮𑁯.

𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄 [𑀯𑀺𑀯𑀡𑁆𑀡𑁄 (𑀲𑁆𑀬𑀸.)], [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼;

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯 [𑀅𑀦𑁆𑀢𑀭𑀸𑀬 (𑀲𑁆𑀬𑀸. 𑀓.)], 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁.

𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄𑀢𑀺. 𑀚𑀺𑀡𑁆𑀡𑁄𑀳𑀫𑀲𑁆𑀫𑀻𑀢𑀺 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀚𑀸𑀢𑀺𑀬𑀸. 𑀅𑀩𑀮𑁄𑀢𑀺 𑀤𑀼𑀩𑁆𑀩𑀮𑁄 𑀅𑀧𑁆𑀧𑀩𑀮𑁄 𑀅𑀧𑁆𑀧𑀣𑀸𑀫𑁄. 𑀯𑀻𑀢𑀯𑀡𑁆𑀡𑁄𑀢𑀺 𑀯𑀻𑀢𑀯𑀡𑁆𑀡𑁄 𑀯𑀺𑀕𑀢𑀯𑀡𑁆𑀡𑁄 𑀯𑀺𑀕𑀘𑁆𑀙𑀺𑀢𑀯𑀡𑁆𑀡𑁄. 𑀬𑀸 𑀲𑀸 𑀧𑀼𑀭𑀺𑀫𑀸 𑀲𑀼𑀪𑀸 𑀯𑀡𑁆𑀡𑀦𑀺𑀪𑀸 𑀲𑀸 𑀅𑀦𑁆𑀢𑀭𑀳𑀺𑀢𑀸, 𑀆𑀤𑀻𑀦𑀯𑁄 𑀧𑀸𑀢𑀼𑀪𑀽𑀢𑁄𑀢𑀺 𑁋 𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄.

𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀧𑀺𑀗𑁆𑀕𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄.

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀽𑀢𑀺 𑀦𑁂𑀢𑁆𑀢𑀸 𑀅𑀲𑀼𑀤𑁆𑀥𑀸 𑀅𑀯𑀺𑀲𑀼𑀤𑁆𑀥𑀸 𑀅𑀧𑀭𑀺𑀲𑀼𑀤𑁆𑀥𑀸 𑀅𑀯𑁄𑀤𑀸𑀢𑀸. 𑀦𑁄 𑀢𑀣𑀸 𑀘𑀓𑁆𑀔𑀼𑀦𑀸 𑀭𑀽𑀧𑁂 𑀧𑀲𑁆𑀲𑀸𑀫𑀻𑀢𑀺 𑁋 𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸. 𑀲𑀯𑀦𑀁 𑀦 𑀨𑀸𑀲𑀽𑀢𑀺 𑀲𑁄𑀢𑀁 𑀅𑀲𑀼𑀤𑁆𑀥𑀁 𑀅𑀯𑀺𑀲𑀼𑀤𑁆𑀥𑀁 𑀅𑀧𑀭𑀺𑀲𑀼𑀤𑁆𑀥𑀁 𑀅𑀯𑁄𑀤𑀸𑀢𑀁. 𑀦𑁄 𑀢𑀣𑀸 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑁄𑀫𑀻𑀢𑀺 𑁋 𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼.

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯𑀸𑀢𑀺. 𑀫𑀸𑀳𑀁 𑀦𑀲𑁆𑀲𑀦𑁆𑀢𑀺 𑀫𑀸𑀳𑀁 𑀦𑀲𑁆𑀲 𑀫𑀸𑀳𑀁 𑀯𑀺𑀦𑀲𑁆𑀲𑀁 𑀫𑀸𑀳𑀁 𑀧𑀦𑀲𑁆𑀲𑀁. 𑀫𑁄𑀫𑀼𑀳𑁄𑀢𑀺 𑀫𑁄𑀳𑀫𑀼𑀳𑁄 𑀅𑀯𑀺𑀚𑁆𑀚𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀯𑀺𑀪𑀸𑀯𑀻 𑀤𑀼𑀧𑁆𑀧𑀜𑁆𑀜𑁄. 𑀅𑀦𑁆𑀢𑀭𑀸𑀯𑀸𑀢𑀺 𑀢𑀼𑀬𑁆𑀳𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀅𑀦𑀜𑁆𑀜𑀸𑀬 𑀅𑀦𑀥𑀺𑀕𑀦𑁆𑀢𑁆𑀯𑀸 𑀅𑀯𑀺𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀮𑀪𑀺𑀢𑁆𑀯𑀸 𑀅𑀨𑀲𑁆𑀲𑀬𑀺𑀢𑁆𑀯𑀸 𑀅𑀲𑀘𑁆𑀙𑀺𑀓𑀭𑀺𑀢𑁆𑀯𑀸 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀗𑁆𑀓𑀭𑁂𑀬𑁆𑀬𑀦𑁆𑀢𑀺 𑁋 𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯.

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼;

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦’’𑀦𑁆𑀢𑀺.

𑁯𑁦.

𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬.

𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂𑀢𑀺. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀲𑀢𑁆𑀢𑀸 𑀭𑀽𑀧𑀳𑁂𑀢𑀼 𑀭𑀽𑀧𑀧𑁆𑀧𑀘𑁆𑀘𑀬𑀸 𑀭𑀽𑀧𑀓𑀸𑀭𑀡𑀸 𑀳𑀜𑁆𑀜𑀦𑁆𑀢𑀺 𑀯𑀺𑀳𑀜𑁆𑀜𑀦𑁆𑀢𑀺 𑀉𑀧𑀳𑀜𑁆𑀜𑀦𑁆𑀢𑀺 𑀉𑀧𑀖𑀸𑀢𑀺𑀬𑀦𑁆𑀢𑀺 [𑀉𑀧𑀖𑀸𑀢𑀬𑀦𑁆𑀢𑀺 (𑀲𑁆𑀬𑀸. 𑀓.)]. 𑀭𑀽𑀧𑁂 𑀲𑀢𑀺 𑀯𑀺𑀯𑀺𑀥𑀓𑀫𑁆𑀫𑀓𑀸𑀭𑀡𑀸 [𑀯𑀺𑀯𑀺𑀥𑀓𑀫𑁆𑀫𑀓𑀭𑀡𑀸𑀦𑀺 (𑀓.)] 𑀓𑀸𑀭𑁂𑀦𑁆𑀢𑀺. 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀅𑀟𑁆𑀠𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀺𑀓𑀫𑁆𑀧𑀺 (𑀓.)] 𑀓𑀭𑁄𑀦𑁆𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀸 𑀭𑀽𑀧𑀳𑁂𑀢𑀼 𑀭𑀽𑀧𑀧𑁆𑀧𑀘𑁆𑀘𑀬𑀸 𑀭𑀽𑀧𑀓𑀸𑀭𑀡𑀸 𑀳𑀜𑁆𑀜𑀦𑁆𑀢𑀺 𑀯𑀺𑀳𑀜𑁆𑀜𑀦𑁆𑀢𑀺 𑀉𑀧𑀳𑀜𑁆𑀜𑀦𑁆𑀢𑀺 𑀉𑀧𑀖𑀸𑀢𑀺𑀬𑀦𑁆𑀢𑀺. 𑀏𑀯𑀁 𑀳𑀜𑁆𑀜𑀫𑀸𑀦𑁂 𑀯𑀺𑀳𑀜𑁆𑀜𑀫𑀸𑀦𑁂 𑀉𑀧𑀳𑀜𑁆𑀜𑀫𑀸𑀦𑁂 𑀉𑀧𑀖𑀸𑀢𑀺𑀬𑀫𑀸𑀦𑁂 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂.

𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸𑀢𑀺. 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸.

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸𑀢𑀺. 𑀭𑀼𑀧𑁆𑀧𑀦𑁆𑀢𑀻𑀢𑀺 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 [𑀧𑀻𑀴𑀺𑀬𑀦𑁆𑀢𑀺 (𑀲𑁆𑀬𑀸. 𑀓.)] 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀘𑀓𑁆𑀔𑀼𑀭𑁄𑀕𑁂𑀦 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀲𑁄𑀢𑀭𑁄𑀕𑁂𑀦…𑀧𑁂… 𑀓𑀸𑀬𑀭𑁄𑀕𑁂𑀦…𑀧𑁂… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼.

𑀅𑀣 𑀯𑀸, 𑀘𑀓𑁆𑀔𑀼𑀲𑁆𑀫𑀺𑀁 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑁂𑀫𑀸𑀦𑁂 [𑀯𑀺𑀳𑀸𑀬𑀫𑀸𑀦𑁂 (𑀓.)] 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀭𑀼𑀧𑁆𑀧𑀦𑁆𑀢𑀺…𑀧𑁂… 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀲𑁄𑀢𑀲𑁆𑀫𑀺𑀁…𑀧𑁂… 𑀖𑀸𑀦𑀲𑁆𑀫𑀺𑀁… 𑀚𑀺𑀯𑁆𑀳𑀸𑀬… 𑀓𑀸𑀬𑀲𑁆𑀫𑀺𑀁… 𑀭𑀽𑀧𑀲𑁆𑀫𑀺𑀁… 𑀲𑀤𑁆𑀤𑀲𑁆𑀫𑀺𑀁… 𑀕𑀦𑁆𑀥𑀲𑁆𑀫𑀺𑀁… 𑀭𑀲𑀲𑁆𑀫𑀺𑀁… 𑀨𑁄𑀝𑁆𑀞𑀩𑁆𑀩𑀲𑁆𑀫𑀺𑀁… 𑀓𑀼𑀮𑀲𑁆𑀫𑀺𑀁… 𑀕𑀡𑀲𑁆𑀫𑀺𑀁… 𑀆𑀯𑀸𑀲𑀲𑁆𑀫𑀺𑀁… 𑀮𑀸𑀪𑀲𑁆𑀫𑀺𑀁… 𑀬𑀲𑀲𑁆𑀫𑀺𑀁… 𑀧𑀲𑀁𑀲𑀸𑀬… 𑀲𑀼𑀔𑀲𑁆𑀫𑀺𑀁… 𑀘𑀻𑀯𑀭𑀲𑁆𑀫𑀺𑀁… 𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀁… 𑀲𑁂𑀦𑀸𑀲𑀦𑀲𑁆𑀫𑀺𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑁆𑀫𑀺𑀁 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑁂𑀫𑀸𑀦𑁂 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼.

𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀧𑀫𑀢𑁆𑀢𑀸𑀢𑀺 𑀧𑀫𑀸𑀤𑁄 𑀯𑀢𑁆𑀢𑀩𑁆𑀩𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 [𑀅𑀩𑀳𑀼𑀮𑀺𑀓𑀫𑁆𑀫𑀁 (𑀓.)] 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀧𑀫𑀸𑀤𑁄. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄. 𑀇𑀫𑀺𑀦𑀸 𑀧𑀫𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀚𑀦𑀸 𑀧𑀫𑀢𑁆𑀢𑀸𑀢𑀺 𑁋 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸.

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀯𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀭𑀽𑀧𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻 𑀲𑀸𑀢𑀘𑁆𑀘𑀓𑀸𑀭𑀻…𑀧𑁂… 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄.

𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀚𑀳𑀲𑁆𑀲𑀼 𑀭𑀽𑀧𑀦𑁆𑀢𑀺 𑀚𑀳𑀲𑁆𑀲𑀼 𑀭𑀽𑀧𑀁, 𑀧𑀚𑀳𑀲𑁆𑀲𑀼 𑀭𑀽𑀧𑀁, 𑀯𑀺𑀦𑁄𑀤𑁂𑀳𑀺 𑀭𑀽𑀧𑀁, 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀭𑀽𑀧𑀁, 𑀅𑀦𑀪𑀸𑀯𑀁 𑀕𑀫𑁂𑀳𑀺 𑀭𑀽𑀧𑀁. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀬𑀣𑀸 𑀢𑁂 𑀭𑀽𑀧𑀁 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀧𑀼𑀦𑀧𑀝𑀺𑀲𑀦𑁆𑀥𑀺𑀓𑁄 𑀪𑀯𑁄 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸, 𑀓𑀸𑀫𑀪𑀯𑁂 𑀯𑀸 𑀭𑀽𑀧𑀪𑀯𑁂 𑀯𑀸 𑀅𑀭𑀽𑀧𑀪𑀯𑁂 𑀯𑀸, 𑀲𑀜𑁆𑀜𑀸𑀪𑀯𑁂 𑀯𑀸 𑀅𑀲𑀜𑁆𑀜𑀸𑀪𑀯𑁂 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀯𑀸, 𑀏𑀓𑀯𑁄𑀓𑀸𑀭𑀪𑀯𑁂 𑀯𑀸 𑀘𑀢𑀼𑀯𑁄𑀓𑀸𑀭𑀪𑀯𑁂 𑀯𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀸, 𑀧𑀼𑀦 𑀕𑀢𑀺𑀬𑀸 𑀯𑀸 𑀉𑀧𑀧𑀢𑁆𑀢𑀺𑀬𑀸 𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀸 𑀪𑀯𑁂 𑀯𑀸 𑀲𑀁𑀲𑀸𑀭𑁂 𑀯𑀸 𑀯𑀝𑁆𑀝𑁂 𑀯𑀸 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀁 𑀕𑀘𑁆𑀙𑁂𑀬𑁆𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑁯𑁧.

𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂;

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁.

𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄𑀢𑀺 𑀤𑀲 𑀤𑀺𑀲𑀸.

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂𑀢𑀺 𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄 𑀦𑀻𑀢𑁄 𑀯𑀸 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀻𑀢𑀺 𑁋 𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂.

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂;

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦’’𑀦𑁆𑀢𑀺.

𑁯𑁨.

𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬.

𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀸𑀥𑀺𑀧𑀦𑁆𑀦𑁂𑀢𑀺 𑀢𑀡𑁆𑀳𑀸𑀥𑀺𑀧𑀦𑁆𑀦𑁂 [𑀢𑀡𑁆𑀳𑀸𑀬 𑀅𑀥𑀺𑀧𑀦𑁆𑀦𑁂 (𑀓.)] 𑀢𑀡𑁆𑀳𑀸𑀦𑀼𑀕𑁂 𑀢𑀡𑁆𑀳𑀸𑀦𑀼𑀕𑀢𑁂 𑀢𑀡𑁆𑀳𑀸𑀦𑀼𑀲𑀝𑁂 𑀢𑀡𑁆𑀳𑀸𑀬 𑀧𑀦𑁆𑀦𑁂 𑀧𑀝𑀺𑀧𑀦𑁆𑀦𑁂 𑀅𑀪𑀺𑀪𑀽𑀢𑁂 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁂. 𑀫𑀦𑀼𑀚𑁂𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁. 𑀧𑁂𑀓𑁆𑀔𑀫𑀸𑀦𑁄𑀢𑀺 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄. 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸𑀢𑀺. 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸.

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂𑀢𑀺. 𑀲𑀦𑁆𑀢𑀸𑀧𑀚𑀸𑀢𑁂𑀢𑀺 𑀚𑀸𑀢𑀺𑀬𑀸 𑀲𑀦𑁆𑀢𑀸𑀧𑀚𑀸𑀢𑁂, 𑀚𑀭𑀸𑀬 𑀲𑀦𑁆𑀢𑀸𑀧𑀚𑀸𑀢𑁂, 𑀩𑁆𑀬𑀸𑀥𑀺𑀦𑀸 𑀲𑀦𑁆𑀢𑀸𑀧𑀚𑀸𑀢𑁂, 𑀫𑀭𑀡𑁂𑀦 𑀲𑀦𑁆𑀢𑀸𑀧𑀚𑀸𑀢𑁂, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀲𑀦𑁆𑀢𑀸𑀧𑀚𑀸𑀢𑁂, 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀲𑀦𑁆𑀢𑀸𑀧𑀚𑀸𑀢𑁂…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀲𑀦𑁆𑀢𑀸𑀧𑀚𑀸𑀢𑁂 𑀈𑀢𑀺𑀚𑀸𑀢𑁂 𑀉𑀧𑀤𑁆𑀤𑀯𑀚𑀸𑀢𑁂 𑀉𑀧𑀲𑀕𑁆𑀕𑀚𑀸𑀢𑁂𑀢𑀺 𑁋 𑀲𑀦𑁆𑀢𑀸𑀧𑀚𑀸𑀢𑁂. 𑀚𑀭𑀲𑀸 𑀧𑀭𑁂𑀢𑁂𑀢𑀺 𑀚𑀭𑀸𑀬 𑀨𑀼𑀝𑁆𑀞𑁂 𑀧𑀭𑁂𑀢𑁂 𑀲𑀫𑁄𑀳𑀺𑀢𑁂 𑀲𑀫𑀦𑁆𑀦𑀸𑀕𑀢𑁂. 𑀚𑀸𑀢𑀺𑀬𑀸 𑀅𑀦𑀼𑀕𑀢𑁂 𑀚𑀭𑀸𑀬 𑀅𑀦𑀼𑀲𑀝𑁂 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁂 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑁂 𑀅𑀢𑀸𑀡𑁂 𑀅𑀮𑁂𑀡𑁂 𑀅𑀲𑀭𑀡𑁂 𑀅𑀲𑀭𑀡𑀻𑀪𑀽𑀢𑁂𑀢𑀺 𑁋 𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂.

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀯𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀢𑀡𑁆𑀳𑀸𑀬𑀸𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻…𑀧𑁂… 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄.

𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀚𑀳𑀲𑁆𑀲𑀼 𑀢𑀡𑁆𑀳𑀦𑁆𑀢𑀺 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀧𑀚𑀳𑀲𑁆𑀲𑀼 𑀢𑀡𑁆𑀳𑀁 𑀯𑀺𑀦𑁄𑀤𑁂𑀳𑀺 𑀢𑀡𑁆𑀳𑀁 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀢𑀡𑁆𑀳𑀁 𑀅𑀦𑀪𑀸𑀯𑀁 𑀕𑀫𑁂𑀳𑀺 𑀢𑀡𑁆𑀳𑀁. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀬𑀣𑀸 𑀢𑁂…𑀧𑁂… 𑀧𑀼𑀦𑀧𑀝𑀺𑀲𑀦𑁆𑀥𑀺𑀓𑁄 𑀪𑀯𑁄 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸, 𑀓𑀸𑀫𑀪𑀯𑁂 𑀯𑀸 𑀭𑀽𑀧𑀪𑀯𑁂 𑀯𑀸 𑀅𑀭𑀽𑀧𑀪𑀯𑁂 𑀯𑀸, 𑀲𑀜𑁆𑀜𑀸𑀪𑀯𑁂 𑀯𑀸 𑀅𑀲𑀜𑁆𑀜𑀸𑀪𑀯𑁂 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀯𑀸, 𑀏𑀓𑀯𑁄𑀓𑀸𑀭𑀪𑀯𑁂 𑀯𑀸 𑀘𑀢𑀼𑀯𑁄𑀓𑀸𑀭𑀪𑀯𑁂 𑀯𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀸, 𑀧𑀼𑀦𑀕𑀢𑀺𑀬𑀸 𑀯𑀸 𑀉𑀧𑀧𑀢𑁆𑀢𑀺𑀬𑀸 𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀸 𑀪𑀯𑁂 𑀯𑀸 𑀲𑀁𑀲𑀸𑀭𑁂 𑀯𑀸 𑀯𑀝𑁆𑀝𑁂 𑀯𑀸 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀁 𑀕𑀘𑁆𑀙𑁂𑀬𑁆𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀏𑀓𑀧𑀬𑁄𑀕𑀸 𑀏𑀓𑀸𑀥𑀺𑀧𑁆𑀧𑀸𑀬𑀸 𑀏𑀓𑀯𑀸𑀲𑀦𑀯𑀸𑀲𑀺𑀢𑀸, 𑀢𑁂𑀲𑀁 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀲𑀳 𑀥𑀫𑁆𑀫𑀘𑀓𑁆𑀔𑀼𑀲𑁆𑀲 𑀧𑀝𑀺𑀮𑀸𑀪𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀅𑀦𑁆𑀢𑀭𑀳𑀺𑀢𑀸 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 [𑀲𑀺𑀗𑁆𑀕𑀺𑀬𑀧𑀜𑁆𑀳𑀁 (𑀓.)] 𑀲𑁄𑀴𑀲𑀫𑁄.

𑁧𑁭. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄

𑁯𑁩. 𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 [𑀧𑀭𑀺𑀘𑀸𑀭𑀺𑀢𑀲𑁄𑀴𑀲𑀦𑁆𑀦𑀁 (𑀲𑁆𑀬𑀸. 𑀓.)] 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀧𑀸𑀭𑀸𑀬𑀦𑀁 𑀅𑀯𑁄𑀘. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀇𑀤𑀫𑀯𑁄𑀘 𑀪𑀕𑀯𑀸. 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄𑀢𑀺 𑀫𑀕𑀥𑀦𑀸𑀫𑀓𑁂 𑀚𑀦𑀧𑀤𑁂 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄. 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂𑀢𑀺 𑀧𑀸𑀲𑀸𑀡𑀓𑀘𑁂𑀢𑀺𑀬𑀁 𑀯𑀼𑀘𑁆𑀘𑀢𑀺 𑀩𑀼𑀤𑁆𑀥𑀸𑀲𑀦𑀦𑁆𑀢𑀺 𑁋 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂. 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀧𑀺𑀗𑁆𑀕𑀺𑀬𑁄 [𑀲𑀺𑀗𑁆𑀕𑀺𑀬𑁄 (𑀓.)] 𑀩𑁆𑀭𑀸𑀳𑁆𑀫𑀡𑁄 𑀩𑀸𑀯𑀭𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀤𑁆𑀥𑁄 𑀧𑀤𑁆𑀥𑀘𑀭𑁄 𑀧𑀭𑀺𑀘𑀸𑀭𑀓𑁄 [𑀧𑀭𑀺𑀘𑀸𑀭𑀺𑀓𑁄 (𑀲𑁆𑀬𑀸. 𑀓.)] 𑀲𑀺𑀲𑁆𑀲𑁄. 𑀧𑀺𑀗𑁆𑀕𑀺𑀬𑁂𑀦 [𑀢𑁂𑀦 (𑀓.)] 𑀢𑁂 𑀲𑁄𑀴𑀲𑀸𑀢𑀺 𑁋 𑀏𑀯𑀫𑁆𑀧𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀅𑀣 𑀯𑀸, 𑀢𑁂 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀤𑁆𑀥𑀸 𑀧𑀤𑁆𑀥𑀘𑀭𑀸 𑀧𑀭𑀺𑀘𑀸𑀭𑀓𑀸 𑀲𑀺𑀲𑁆𑀲𑀸𑀢𑀺 𑁋 𑀏𑀯𑀫𑁆𑀧𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁.

𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻𑀢𑀺. 𑀅𑀚𑁆𑀛𑀺𑀝𑁆𑀞𑁄𑀢𑀺 𑀅𑀚𑁆𑀛𑀺𑀝𑁆𑀞𑁄 𑀅𑀚𑁆𑀛𑁂𑀲𑀺𑀢𑁄. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄𑀢𑀺 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀘𑁆𑀙𑀺𑀢𑁄 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄 𑀧𑀲𑀸𑀤𑀺𑀢𑁄. 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻𑀢𑀺 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀆𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻’’𑀢𑀺.

𑁯𑁪. 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 ‘‘𑀧𑀸𑀭𑀸𑀬𑀦’’𑀦𑁆𑀢𑁂𑀯 𑀅𑀥𑀺𑀯𑀘𑀦𑀁.

𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲𑀸𑀢𑀺 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀅𑀚𑀺𑀢𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀼𑀡𑁆𑀡𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀫𑁂𑀢𑁆𑀢𑀕𑀽𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀥𑁄𑀢𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀉𑀧𑀲𑀻𑀯𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀦𑀦𑁆𑀤𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀳𑁂𑀫𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀢𑁄𑀤𑁂𑀬𑁆𑀬𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀓𑀧𑁆𑀧𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀚𑀢𑀼𑀓𑀡𑁆𑀡𑀺𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀪𑀤𑁆𑀭𑀸𑀯𑀼𑀥𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀉𑀤𑀬𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑁄𑀲𑀸𑀮𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀫𑁄𑀖𑀭𑀸𑀚𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀺𑀗𑁆𑀕𑀺𑀬𑀧𑀜𑁆𑀳𑀲𑁆𑀲𑀸𑀢𑀺 𑁋 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲.

𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀲𑁆𑀯𑁂𑀯 𑀧𑀜𑁆𑀳𑁄 𑀥𑀫𑁆𑀫𑁄, 𑀯𑀺𑀲𑀚𑁆𑀚𑀦𑀁 [𑀯𑀺𑀲𑁆𑀲𑀚𑁆𑀚𑀦𑀁 (𑀓.)] 𑀅𑀢𑁆𑀣𑁄𑀢𑀺 𑀅𑀢𑁆𑀣𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀅𑀢𑁆𑀣𑀫𑀜𑁆𑀜𑀸𑀬. 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀥𑀫𑁆𑀫𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑁋 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬. 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑁋 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀦𑁆𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀦𑁆𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀨𑀲𑁆𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑁋 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀧𑀸𑀭𑀗𑁆𑀕𑀫𑀦𑀻𑀬𑀸. 𑀧𑀸𑀭𑀁 𑀧𑀸𑀧𑁂𑀦𑁆𑀢𑀺 𑀧𑀸𑀭𑀁 𑀲𑀫𑁆𑀧𑀸𑀧𑁂𑀦𑁆𑀢𑀺 𑀧𑀸𑀭𑀁 𑀲𑀫𑀦𑀼𑀧𑀸𑀧𑁂𑀦𑁆𑀢𑀺, 𑀚𑀭𑀸𑀫𑀡𑀲𑁆𑀲 𑀢𑀭𑀡𑀸𑀬 [𑀢𑀸𑀭𑀡𑀸𑀬 (𑀲𑁆𑀬𑀸.)] 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺.

𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸𑀢𑀺 𑁋 𑀢𑀲𑁆𑀫𑀸. 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀲 𑀧𑀸𑀭𑀸𑀬𑀦𑀲𑁆𑀲𑀸𑀢𑀺 𑁋 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲. 𑀧𑀸𑀭𑀸𑀬𑀦𑀦𑁆𑀢𑁂𑀯 𑀅𑀥𑀺𑀯𑀘𑀦𑀦𑁆𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀬𑀦𑀁 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀥𑀺𑀯𑀘𑀦𑀦𑁆𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀧𑀸𑀭𑀸𑀬𑀦𑀦𑁆𑀢𑁂𑀯 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 ‘𑀧𑀸𑀭𑀸𑀬𑀦’𑀦𑁆𑀢𑁂𑀯 𑀅𑀥𑀺𑀯𑀘𑀦’’𑀦𑁆𑀢𑀺.

𑁯𑁫.

𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽;

𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄.

𑁯𑁬.

𑀢𑁄𑀤𑁂𑀬𑁆𑀬𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄;

𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑁯𑁭.

𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁, 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁;

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀁.

𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀦𑁆𑀢𑀺. 𑀏𑀢𑁂𑀢𑀺 𑀲𑁄𑀴𑀲 𑀧𑀸𑀭𑀸𑀬𑀦𑀺𑀬𑀸 𑀩𑁆𑀭𑀸𑀳𑁆𑀫𑀡𑀸. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄? 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀪𑀺𑀜𑁆𑀜𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸𑀢𑀺 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀦𑁆𑀢𑀺 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀫𑀺𑀁𑀲𑀼 𑀉𑀧𑀲𑀗𑁆𑀓𑀫𑀺𑀁𑀲𑀼 𑀧𑀬𑀺𑀭𑀼𑀧𑀸𑀲𑀺𑀁𑀲𑀼 𑀧𑀭𑀺𑀧𑀼𑀘𑁆𑀙𑀺𑀁𑀲𑀼 𑀧𑀭𑀺𑀧𑀜𑁆𑀳𑀺𑀁𑀲𑀽𑀢𑀺 𑁋 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁.

𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀦𑁆𑀢𑀺 𑀘𑀭𑀡𑀁 𑀯𑀼𑀘𑁆𑀘𑀢𑀺 𑀲𑀻𑀮𑀸𑀘𑀸𑀭𑀦𑀺𑀩𑁆𑀩𑀢𑁆𑀢𑀺. 𑀲𑀻𑀮𑀲𑀁𑀯𑀭𑁄𑀧𑀺 𑀘𑀭𑀡𑀁, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀧𑀺 𑀘𑀭𑀡𑀁, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀘𑀭𑀡𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀧𑀺 𑀘𑀭𑀡𑀁, 𑀲𑀢𑁆𑀢𑀧𑀺 𑀲𑀤𑁆𑀥𑀫𑁆𑀫𑀸 𑀘𑀭𑀡𑀁, 𑀘𑀢𑁆𑀢𑀸𑀭𑀺𑀧𑀺 𑀛𑀸𑀦𑀸𑀦𑀺 𑀘𑀭𑀡𑀁. 𑀲𑀫𑁆𑀧𑀦𑁆𑀦𑀘𑀭𑀡𑀦𑁆𑀢𑀺 𑀲𑀫𑁆𑀧𑀦𑁆𑀦𑀘𑀭𑀡𑀁 𑀲𑁂𑀝𑁆𑀞𑀘𑀭𑀡𑀁 𑀯𑀺𑀲𑁂𑀝𑁆𑀞𑀘𑀭𑀡𑀁 [𑀯𑀺𑀲𑀺𑀝𑁆𑀞𑀘𑀭𑀡𑀁 (𑀓.)] 𑀧𑀸𑀫𑁄𑀓𑁆𑀔𑀘𑀭𑀡𑀁 𑀉𑀢𑁆𑀢𑀫𑀘𑀭𑀡𑀁 𑀧𑀯𑀭𑀘𑀭𑀡𑀁. 𑀇𑀲𑀻𑀢𑀺 𑀇𑀲𑀺 𑀪𑀕𑀯𑀸 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀇𑀲𑀺…𑀧𑁂… 𑀫𑀳𑁂𑀲𑀓𑁆𑀔𑁂𑀳𑀺 𑀯𑀸 𑀲𑀢𑁆𑀢𑁂𑀳𑀺 𑀏𑀲𑀺𑀢𑁄 𑀕𑀯𑁂𑀲𑀺𑀢𑁄 𑀧𑀭𑀺𑀬𑁂𑀲𑀺𑀢𑁄 𑁋 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄 𑀓𑀳𑀁 𑀦𑀭𑀸𑀲𑀪𑁄’’𑀢𑀺 𑁋 𑀇𑀲𑀻𑀢𑀺 𑁋 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁.

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂𑀢𑀺. 𑀧𑀼𑀘𑁆𑀙𑀦𑁆𑀢𑀸𑀢𑀺 𑀧𑀼𑀘𑁆𑀙𑀦𑁆𑀢𑀸 𑀬𑀸𑀘𑀦𑁆𑀢𑀸 𑀅𑀚𑁆𑀛𑁂𑀲𑀦𑁆𑀢𑀸 𑀧𑀲𑀸𑀤𑁂𑀦𑁆𑀢𑀸. 𑀦𑀺𑀧𑀼𑀡𑁂 𑀧𑀜𑁆𑀳𑁂𑀢𑀺 𑀕𑀫𑁆𑀪𑀻𑀭𑁂 𑀤𑀼𑀤𑁆𑀤𑀲𑁂 𑀤𑀼𑀭𑀦𑀼𑀩𑁄𑀥𑁂 𑀲𑀦𑁆𑀢𑁂 𑀧𑀡𑀻𑀢𑁂 𑀅𑀢𑀓𑁆𑀓𑀸𑀯𑀘𑀭𑁂 𑀦𑀺𑀧𑀼𑀡𑁂 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁂 𑀧𑀜𑁆𑀳𑁂𑀢𑀺 𑁋 𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂.

𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀲𑁂𑀝𑁆𑀞𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀩𑀼𑀤𑁆𑀥𑀁 𑀉𑀧𑀸𑀕𑀫𑀼𑀁 𑀉𑀧𑀸𑀕𑀫𑀺𑀁𑀲𑀼 𑀉𑀧𑀲𑀗𑁆𑀓𑀫𑀺𑀁𑀲𑀼 𑀧𑀬𑀺𑀭𑀼𑀧𑀸𑀲𑀺𑀁𑀲𑀼 𑀧𑀭𑀺𑀧𑀼𑀘𑁆𑀙𑀺𑀁𑀲𑀼 𑀧𑀭𑀺𑀧𑀜𑁆𑀳𑀺𑀁𑀲𑀽𑀢𑀺 𑁋 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀁. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁, 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁;

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼’’𑀦𑁆𑀢𑀺.

𑁯𑁮.

𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦, 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀺.

𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀻𑀢𑀺. 𑀢𑁂𑀲𑀦𑁆𑀢𑀺 𑀲𑁄𑀴𑀲𑀸𑀦𑀁 𑀧𑀸𑀭𑀸𑀬𑀦𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀧𑀩𑁆𑀬𑀸𑀓𑀸𑀲𑀻𑀢𑀺 𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺.

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀦𑁆𑀢𑀺. 𑀧𑀜𑁆𑀳𑀁 𑀧𑀼𑀝𑁆𑀞𑁄𑀢𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀬𑀣𑀸𑀢𑀣𑀦𑁆𑀢𑀺 𑀬𑀣𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀢𑀣𑀸 𑀆𑀘𑀺𑀓𑁆𑀔𑀺, 𑀬𑀣𑀸 𑀤𑁂𑀲𑀺𑀢𑀩𑁆𑀩𑀁 𑀢𑀣𑀸 𑀤𑁂𑀲𑁂𑀲𑀺, 𑀬𑀣𑀸 𑀧𑀜𑁆𑀜𑀧𑁂𑀢𑀩𑁆𑀩𑀁 𑀢𑀣𑀸 𑀧𑀜𑁆𑀜𑀧𑁂𑀲𑀺, 𑀬𑀣𑀸 𑀧𑀝𑁆𑀞𑀧𑁂𑀢𑀩𑁆𑀩𑀁 𑀢𑀣𑀸 𑀧𑀝𑁆𑀞𑀧𑁂𑀲𑀺, 𑀬𑀣𑀸 𑀯𑀺𑀯𑀭𑀺𑀢𑀩𑁆𑀩𑀁 𑀢𑀣𑀸 𑀯𑀺𑀯𑀭𑀺, 𑀬𑀣𑀸 𑀯𑀺𑀪𑀚𑀺𑀢𑀩𑁆𑀩𑀁 𑀢𑀣𑀸 𑀯𑀺𑀪𑀚𑀺, 𑀬𑀣𑀸 𑀉𑀢𑁆𑀢𑀸𑀦𑀻𑀓𑀸𑀢𑀩𑁆𑀩𑀁 𑀢𑀣𑀸 𑀉𑀢𑁆𑀢𑀸𑀦𑀻𑀅𑀓𑀸𑀲𑀺, 𑀬𑀣𑀸 𑀧𑀓𑀸𑀲𑀺𑀢𑀩𑁆𑀩𑀁 𑀢𑀣𑀸 𑀧𑀓𑀸𑀲𑁂𑀲𑀻𑀢𑀺 𑁋 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁.

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦𑀸𑀢𑀺 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀆𑀘𑀺𑀓𑁆𑀔𑀦𑁂𑀦 𑀤𑁂𑀲𑀦𑁂𑀦 𑀧𑀜𑁆𑀜𑀧𑀦𑁂𑀦 𑀧𑀝𑁆𑀞𑀧𑀦𑁂𑀦 𑀯𑀺𑀯𑀭𑀡𑁂𑀦 𑀯𑀺𑀪𑀚𑀦𑁂𑀦 𑀉𑀢𑁆𑀢𑀸𑀦𑀻𑀓𑀫𑁆𑀫𑁂𑀦 𑀧𑀓𑀸𑀲𑀦𑁂𑀦𑀸𑀢𑀺 𑁋 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦.

𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀻𑀢𑀺. 𑀢𑁄𑀲𑁂𑀲𑀻𑀢𑀺 𑀢𑁄𑀲𑁂𑀲𑀺 𑀯𑀺𑀢𑁄𑀲𑁂𑀲𑀺 𑀧𑀲𑀸𑀤𑁂𑀲𑀺 𑀆𑀭𑀸𑀥𑁂𑀲𑀺 𑀅𑀢𑁆𑀢𑀫𑀦𑁂 𑀅𑀓𑀸𑀲𑀺. 𑀩𑁆𑀭𑀸𑀳𑁆𑀫𑀡𑁂𑀢𑀺 𑀲𑁄𑀴𑀲 𑀧𑀸𑀭𑀸𑀬𑀦𑀺𑀬𑁂 𑀩𑁆𑀭𑀸𑀳𑁆𑀫𑀡𑁂. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺 𑁋 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦, 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀻’’𑀢𑀺.

𑁯𑁯.

𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂.

𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸𑀢𑀺. 𑀢𑁂𑀢𑀺 𑀲𑁄𑀴𑀲 𑀧𑀸𑀭𑀸𑀬𑀦𑀺𑀬𑀸 𑀩𑁆𑀭𑀸𑀳𑁆𑀫𑀡𑀸. 𑀢𑁄𑀲𑀺𑀢𑀸𑀢𑀺 𑀢𑁄𑀲𑀺𑀢𑀸 𑀯𑀺𑀢𑁄𑀲𑀺𑀢𑀸 𑀧𑀲𑀸𑀤𑀺𑀢𑀸 𑀆𑀭𑀸𑀥𑀺𑀢𑀸 𑀅𑀢𑁆𑀢𑀫𑀦𑀸 𑀓𑀢𑀸𑀢𑀺 𑁋 𑀢𑁂 𑀢𑁄𑀲𑀺𑀢𑀸. 𑀘𑀓𑁆𑀔𑀼𑀫𑀢𑀸𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑁋 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸. 𑀓𑀣𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸…𑀧𑁂… 𑀏𑀯𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸𑀢𑀺 𑁋 𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸.

𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺 𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄. 𑀲𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸𑀧𑀺 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸 𑀲𑀽𑀭𑀺𑀬𑀲𑁆𑀲 𑀕𑁄𑀢𑁆𑀢𑀜𑀸𑀢𑀓𑁄 𑀕𑁄𑀢𑁆𑀢𑀩𑀦𑁆𑀥𑀼. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺 𑁋 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀽𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀲𑀤𑁆𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀯𑀺𑀭𑀫𑀡𑀁 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄. 𑀅𑀧𑀺 𑀘, 𑀦𑀺𑀧𑁆𑀧𑀭𑀺𑀬𑀸𑀬𑀯𑀲𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀽𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁𑀲𑀼 𑀅𑀘𑀭𑀺𑀁𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀺𑀁𑀲𑀽𑀢𑀺 𑁋 𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼.

𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀯𑀭𑀧𑀜𑁆𑀜𑀲𑁆𑀲 𑀅𑀕𑁆𑀕𑀧𑀜𑁆𑀜𑀲𑁆𑀲 𑀲𑁂𑀝𑁆𑀞𑀧𑀜𑁆𑀜𑀲𑁆𑀲 𑀯𑀺𑀲𑁂𑀝𑁆𑀞𑀧𑀜𑁆𑀜𑀲𑁆𑀲 𑀧𑀸𑀫𑁄𑀓𑁆𑀔𑀧𑀜𑁆𑀜𑀲𑁆𑀲 𑀉𑀢𑁆𑀢𑀫𑀧𑀜𑁆𑀜𑀲𑁆𑀲 𑀧𑀯𑀭𑀧𑀜𑁆𑀜𑀲𑁆𑀲. 𑀲𑀦𑁆𑀢𑀺𑀓𑁂𑀢𑀺 𑀲𑀦𑁆𑀢𑀺𑀓𑁂 𑀲𑀸𑀫𑀦𑁆𑀢𑀸 𑀆𑀲𑀦𑁆𑀦𑁂 𑀅𑀯𑀺𑀤𑀽𑀭𑁂 𑀉𑀧𑀓𑀝𑁆𑀞𑁂𑀢𑀺 𑁋 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺.

𑁧𑁦𑁦.

𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄.

𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲𑀸𑀢𑀺 𑀏𑀓𑀫𑁂𑀓𑀲𑁆𑀲 𑀅𑀚𑀺𑀢𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑀲𑁆𑀲…𑀧𑁂… 𑀏𑀓𑀫𑁂𑀓𑀲𑁆𑀲 𑀧𑀺𑀗𑁆𑀕𑀺𑀬𑀧𑀜𑁆𑀳𑀲𑁆𑀲𑀸𑀢𑀺 𑁋 𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲.

𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀦𑁆𑀢𑀺 𑀬𑀣𑀸 𑀩𑀼𑀤𑁆𑀥𑁂𑀦 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀭𑀺𑀢𑀁 𑀯𑀺𑀪𑀚𑀺𑀢𑀁 [𑀯𑀺𑀪𑀢𑁆𑀢𑀁 (𑀲𑁆𑀬𑀸.)] 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑁋 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁.

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑁋 𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬.

𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁; 𑀅𑀧𑀸𑀭𑀁 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄𑀢𑀺 𑀅𑀧𑀸𑀭𑀢𑁄 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀨𑀲𑁆𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑁋 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄’’𑀢𑀺.

𑁧𑁦𑁧.

𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬, 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀺.

𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀧𑀸𑀭𑀁 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘; 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀨𑀲𑁆𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑁋 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬.

𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀦𑁆𑀢𑀺 𑀫𑀕𑁆𑀕𑀫𑀼𑀢𑁆𑀢𑀫𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀫𑀕𑁆𑀕𑀫𑀼𑀢𑁆𑀢𑀫𑀦𑁆𑀢𑀺 𑀫𑀕𑁆𑀕𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁. 𑀪𑀸𑀯𑁂𑀦𑁆𑀢𑁄𑀢𑀺 𑀪𑀸𑀯𑁂𑀦𑁆𑀢𑁄 𑀆𑀲𑁂𑀯𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄𑀢𑀺 𑁋 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁.

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬𑀸𑀢𑀺 𑁋

𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄 [𑀅𑀤𑁆𑀥𑁄 (𑀓.)], 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄 [𑀲𑀗𑁆𑀕𑀫𑁄 (𑀲𑁆𑀬𑀸. 𑀓.) 𑀧𑀲𑁆𑀲-𑀥𑀸𑀢𑀼𑀫𑀸𑀮𑀸𑀬𑀁 𑀫𑀕𑁆𑀕𑀥𑀸𑀢𑀼𑀯𑀡𑁆𑀡𑀦𑀸𑀬𑀁].

𑀧𑀸𑀭𑀁 𑀕𑀫𑀦𑀸𑀬𑀸𑀢𑀺 𑀧𑀸𑀭𑀁 𑀕𑀫𑀦𑀸𑀬 𑀧𑀸𑀭𑀁 𑀲𑀫𑁆𑀧𑀸𑀧𑀦𑀸𑀬 𑀧𑀸𑀭𑀁 𑀲𑀫𑀦𑀼𑀧𑀸𑀧𑀦𑀸𑀬 𑀚𑀭𑀸𑀫𑀭𑀡𑀲𑁆𑀲 𑀢𑀭𑀡𑀸𑀬𑀸𑀢𑀺 𑁋 𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬.

𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀬𑀦𑀁 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀢𑀻𑀢𑀺 𑁋 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬, 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀻’’𑀢𑀺.

𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀭𑀲𑀫𑁄.

𑁧𑁮. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄

𑁧𑁦𑁨.

𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀬𑀣𑀸𑀤𑁆𑀤𑀓𑁆𑀔𑀺 𑀢𑀣𑀸𑀓𑁆𑀔𑀸𑀲𑀺, 𑀯𑀺𑀫𑀮𑁄 𑀪𑀽𑀭𑀺𑀫𑁂𑀥𑀲𑁄;

𑀦𑀺𑀓𑁆𑀓𑀸𑀫𑁄 𑀦𑀺𑀩𑁆𑀩𑀦𑁄 𑀦𑀸𑀕𑁄, 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂.

𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀦𑁆𑀢𑀺 𑀕𑀻𑀢𑀫𑀦𑀼𑀕𑀸𑀬𑀺𑀲𑁆𑀲𑀁 𑀓𑀣𑀺𑀢𑀫𑀦𑀼𑀓𑀣𑀬𑀺𑀲𑁆𑀲𑀁 [𑀓𑀣𑀺𑀢𑀫𑀦𑀼𑀕𑀸𑀬𑀺𑀲𑁆𑀲𑀁 (𑀲𑁆𑀬𑀸.) 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀦𑀼𑀕𑀸𑀬𑀺𑀲𑁆𑀲𑀦𑁆𑀢𑀺 𑀆𑀕𑀢𑀁] 𑀪𑀡𑀺𑀢𑀫𑀦𑀼𑀪𑀡𑀺𑀲𑁆𑀲𑀁 𑀮𑀧𑀺𑀢𑀫𑀦𑀼𑀮𑀧𑀺𑀲𑁆𑀲𑀁 𑀪𑀸𑀲𑀺𑀢𑀫𑀦𑀼𑀪𑀸𑀲𑀺𑀲𑁆𑀲𑀦𑁆𑀢𑀺 𑁋 𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀁. 𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀧𑀺𑀗𑁆𑀕𑀺𑀬𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄.

𑀬𑀣𑀸𑀤𑁆𑀤𑀓𑁆𑀔𑀺 𑀢𑀣𑀸𑀓𑁆𑀔𑀸𑀲𑀻𑀢𑀺 𑀬𑀣𑀸 𑀅𑀤𑁆𑀤𑀓𑁆𑀔𑀺 𑀢𑀣𑀸 𑀅𑀓𑁆𑀔𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀬𑀣𑀸 𑀅𑀤𑁆𑀤𑀓𑁆𑀔𑀺 𑀢𑀣𑀸 𑀅𑀓𑁆𑀔𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀬𑀣𑀸 𑀅𑀤𑁆𑀤𑀓𑁆𑀔𑀺 𑀢𑀣𑀸 𑀅𑀓𑁆𑀔𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀬𑀣𑀸𑀤𑁆𑀤𑀓𑁆𑀔𑀺 𑀢𑀣𑀸𑀓𑁆𑀔𑀸𑀲𑀺.

𑀯𑀺𑀫𑀮𑁄 𑀪𑀽𑀭𑀺𑀫𑁂𑀥𑀲𑁄𑀢𑀺. 𑀯𑀺𑀫𑀮𑁄𑀢𑀺 𑀭𑀸𑀕𑁄 𑀫𑀮𑀁, 𑀤𑁄𑀲𑁄 𑀫𑀮𑀁, 𑀫𑁄𑀳𑁄 𑀫𑀮𑀁, 𑀓𑁄𑀥𑁄… 𑀉𑀧𑀦𑀸𑀳𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀮𑀸. 𑀢𑁂 𑀫𑀮𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀫𑀮𑁄 𑀩𑀼𑀤𑁆𑀥𑁄 𑀯𑀺𑀫𑀮𑁄 𑀦𑀺𑀫𑁆𑀫𑀮𑁄 𑀫𑀮𑀸𑀧𑀕𑀢𑁄 𑀫𑀮𑀯𑀺𑀧𑁆𑀧𑀳𑀻𑀦𑁄 𑀫𑀮𑀯𑀺𑀫𑀼𑀢𑁆𑀢𑁄 𑀲𑀩𑁆𑀩𑀫𑀮𑀯𑀻𑀢𑀺𑀯𑀢𑁆𑀢𑁄. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 [𑀪𑀕𑀯𑀸 𑀇𑀫𑀸𑀬 (𑀲𑁆𑀬𑀸.)] 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑁂𑀥𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀇𑀫𑀸𑀬 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀼𑀫𑁂𑀥𑀲𑁄𑀢𑀺 𑁋 𑀯𑀺𑀫𑀮𑁄 𑀪𑀽𑀭𑀺𑀫𑁂𑀥𑀲𑁄.

𑀦𑀺𑀓𑁆𑀓𑀸𑀫𑁄 𑀦𑀺𑀩𑁆𑀩𑀦𑁄 𑀦𑀸𑀕𑁄𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀢𑁆𑀣𑀼𑀓𑀸𑀫𑀸 𑀧𑀭𑀺𑀜𑁆𑀜𑀸𑀢𑀸 𑀓𑀺𑀮𑁂𑀲𑀓𑀸𑀫𑀸 𑀧𑀳𑀻𑀦𑀸 𑀯𑀢𑁆𑀣𑀼𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀓𑀺𑀮𑁂𑀲𑀓𑀸𑀫𑀸𑀦𑀁 𑀧𑀳𑀻𑀦𑀢𑁆𑀢𑀸. 𑀪𑀕𑀯𑀸 𑀦 𑀓𑀸𑀫𑁂 𑀓𑀸𑀫𑁂𑀢𑀺 𑀦 𑀓𑀸𑀫𑁂 𑀇𑀘𑁆𑀙𑀢𑀺 𑀦 𑀓𑀸𑀫𑁂 𑀧𑀢𑁆𑀣𑁂𑀢𑀺 𑀦 𑀓𑀸𑀫𑁂 𑀧𑀺𑀳𑁂𑀢𑀺 𑀦 𑀓𑀸𑀫𑁂 𑀅𑀪𑀺𑀚𑀧𑁆𑀧𑀢𑀺. 𑀬𑁂 𑀓𑀸𑀫𑁂 𑀓𑀸𑀫𑁂𑀦𑁆𑀢𑀺 𑀓𑀸𑀫𑁂 𑀇𑀘𑁆𑀙𑀦𑁆𑀢𑀺 𑀓𑀸𑀫𑁂 𑀧𑀢𑁆𑀣𑁂𑀦𑁆𑀢𑀺 𑀓𑀸𑀫𑁂 𑀧𑀺𑀳𑁂𑀦𑁆𑀢𑀺 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺 𑀢𑁂 𑀓𑀸𑀫𑀓𑀸𑀫𑀺𑀦𑁄 𑀭𑀸𑀕𑀭𑀸𑀕𑀺𑀦𑁄 𑀲𑀜𑁆𑀜𑀲𑀜𑁆𑀜𑀺𑀦𑁄. 𑀪𑀕𑀯𑀸 𑀦 𑀓𑀸𑀫𑁂 𑀓𑀸𑀫𑁂𑀢𑀺 𑀦 𑀓𑀸𑀫𑁂 𑀇𑀘𑁆𑀙𑀢𑀺 𑀦 𑀓𑀸𑀫𑁂 𑀧𑀢𑁆𑀣𑁂𑀢𑀺 𑀦 𑀓𑀸𑀫𑁂 𑀧𑀺𑀳𑁂𑀢𑀺 𑀦 𑀓𑀸𑀫𑁂 𑀅𑀪𑀺𑀚𑀧𑁆𑀧𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀸𑀫𑁄 𑀦𑀺𑀓𑁆𑀓𑀸𑀫𑁄 𑀘𑀢𑁆𑀢𑀓𑀸𑀫𑁄 𑀯𑀦𑁆𑀢𑀓𑀸𑀫𑁄 𑀫𑀼𑀢𑁆𑀢𑀓𑀸𑀫𑁄 𑀧𑀳𑀻𑀦𑀓𑀸𑀫𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀦𑀺𑀓𑁆𑀓𑀸𑀫𑁄.

𑀦𑀺𑀩𑁆𑀩𑀦𑁄𑀢𑀺 𑀭𑀸𑀕𑁄 𑀯𑀦𑀁, 𑀤𑁄𑀲𑁄 𑀯𑀦𑀁, 𑀫𑁄𑀳𑁄 𑀯𑀦𑀁, 𑀓𑁄𑀥𑁄 𑀯𑀦𑀁, 𑀉𑀧𑀦𑀸𑀳𑁄 𑀯𑀦𑀁…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀯𑀦𑀸. 𑀢𑁂 𑀯𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀯𑀦𑁄 𑀯𑀺𑀯𑀦𑁄 𑀦𑀺𑀩𑁆𑀩𑀦𑁄 𑀯𑀦𑀸𑀧𑀕𑀢𑁄 𑀯𑀦𑀯𑀺𑀧𑁆𑀧𑀳𑀻𑀦𑁄 𑀯𑀦𑀯𑀺𑀫𑀼𑀢𑁆𑀢𑁄 𑀲𑀩𑁆𑀩𑀯𑀦𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀦𑀺𑀩𑁆𑀩𑀦𑁄. 𑀦𑀸𑀕𑁄𑀢𑀺 𑀦𑀸𑀕𑁄; 𑀪𑀕𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄, 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄, 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄…𑀧𑁂… 𑀏𑀯𑀁 𑀪𑀕𑀯𑀸 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄𑀢𑀺 𑁋 𑀦𑀺𑀓𑁆𑀓𑀸𑀫𑁄 𑀦𑀺𑀩𑁆𑀩𑀦𑁄 𑀦𑀸𑀕𑁄.

𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂𑀢𑀺. 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀓𑀺𑀲𑁆𑀲 𑀳𑁂𑀢𑀼 𑀓𑀺𑀁𑀳𑁂𑀢𑀼 𑀓𑀺𑀁𑀓𑀸𑀭𑀡𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀧𑀘𑁆𑀘𑀬𑀸𑀢𑀺 𑁋 𑀓𑀺𑀲𑁆𑀲 𑀳𑁂𑀢𑀼. 𑀫𑀼𑀲𑀸 𑀪𑀡𑁂𑀢𑀺 𑀫𑀼𑀲𑀸 𑀪𑀡𑁂𑀬𑁆𑀬 𑀓𑀣𑁂𑀬𑁆𑀬 𑀤𑀻𑀧𑁂𑀬𑁆𑀬 𑀯𑁄𑀳𑀭𑁂𑀬𑁆𑀬; 𑀫𑀼𑀲𑀸 𑀪𑀡𑁂𑀢𑀺 𑀫𑁄𑀲𑀯𑀚𑁆𑀚𑀁 𑀪𑀡𑁂𑀬𑁆𑀬, 𑀫𑀼𑀲𑀸𑀯𑀸𑀤𑀁 𑀪𑀡𑁂𑀬𑁆𑀬, 𑀅𑀦𑀭𑀺𑀬𑀯𑀸𑀤𑀁 𑀪𑀡𑁂𑀬𑁆𑀬. 𑀇𑀥𑁂𑀓𑀘𑁆𑀘𑁄 𑀲𑀪𑀸𑀕𑀢𑁄 [𑀲𑀪𑀕𑁆𑀕𑀢𑁄 (𑀲𑁆𑀬𑀸.)] 𑀯𑀸 𑀧𑀭𑀺𑀲𑀸𑀕𑀢𑁄 [𑀧𑀭𑀺𑀲𑀕𑁆𑀕𑀢𑁄 (𑀲𑁆𑀬𑀸.)] 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘‘𑀏𑀳𑀫𑁆𑀪𑁄 [𑀏𑀳𑀺 𑀪𑁄 (𑀲𑁆𑀬𑀸.) 𑀧𑀲𑁆𑀲 𑀫. 𑀦𑀺. 𑁩.𑁧𑁧𑁨] 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀻’’𑀢𑀺, 𑀚𑀸𑀦𑀁 𑀯𑀸 𑀆𑀳 𑁋 ‘‘𑀦 𑀚𑀸𑀦𑀸𑀫𑀻’’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀧𑀲𑁆𑀲𑀸𑀫𑀻’’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀦 𑀧𑀲𑁆𑀲𑀸𑀫𑀻’’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑁄𑀲𑀯𑀚𑁆𑀚𑀁.

𑀅𑀧𑀺 𑀘, 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑁋 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘, 𑀘𑀢𑀽𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑁋 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘, 𑀧𑀜𑁆𑀘𑀳𑀸𑀓𑀸𑀭𑁂𑀳𑀺…𑀧𑁂… 𑀙𑀳𑀸𑀓𑀸𑀭𑁂𑀳𑀺… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺… 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀲𑀜𑁆𑀜𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺 𑀫𑁄𑀲𑀯𑀚𑁆𑀚𑀁. 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂𑀬𑁆𑀬 𑀓𑀣𑁂𑀬𑁆𑀬 𑀤𑀻𑀧𑁂𑀬𑁆𑀬 𑀯𑁄𑀳𑀭𑁂𑀬𑁆𑀬𑀸𑀢𑀺 𑁋 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀬𑀣𑀸𑀤𑁆𑀤𑀓𑁆𑀔𑀺 𑀢𑀣𑀸𑀓𑁆𑀔𑀸𑀲𑀺, 𑀯𑀺𑀫𑀮𑁄 𑀪𑀽𑀭𑀺𑀫𑁂𑀥𑀲𑁄;

𑀦𑀺𑀓𑁆𑀓𑀸𑀫𑁄 𑀦𑀺𑀩𑁆𑀩𑀦𑁄 𑀦𑀸𑀕𑁄, 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂’’𑀢𑀺.

𑁧𑁦𑁩.

𑀧𑀳𑀻𑀦𑀫𑀮𑀫𑁄𑀳𑀲𑁆𑀲, 𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀺𑀦𑁄;

𑀳𑀦𑁆𑀤𑀸𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀁 𑀯𑀡𑁆𑀡𑀽𑀧𑀲𑀁𑀳𑀺𑀢𑀁.

𑀧𑀳𑀻𑀦𑀫𑀮𑀫𑁄𑀳𑀲𑁆𑀲𑀸𑀢𑀺. 𑀫𑀮𑀦𑁆𑀢𑀺 𑀭𑀸𑀕𑁄 𑀫𑀮𑀁, 𑀤𑁄𑀲𑁄 𑀫𑀮𑀁, 𑀫𑁄𑀳𑁄 𑀫𑀮𑀁, 𑀫𑀸𑀦𑁄 𑀫𑀮𑀁, 𑀤𑀺𑀝𑁆𑀞𑀺 𑀫𑀮𑀁, 𑀓𑀺𑀮𑁂𑀲𑁄 𑀫𑀮𑀁, 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀁 𑀫𑀮𑀁, 𑀲𑀩𑁆𑀩𑀪𑀯𑀕𑀸𑀫𑀺𑀓𑀫𑁆𑀫𑀁 𑀫𑀮𑀁.

𑀫𑁄𑀳𑁄𑀢𑀺 𑀬𑀁 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀫𑁄𑀳𑁄. 𑀫𑀮𑀜𑁆𑀘 𑀫𑁄𑀳𑁄 𑀘 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀧𑀳𑀻𑀦𑀫𑀮𑀫𑁄𑀳𑁄𑀢𑀺 𑁋 𑀧𑀳𑀻𑀦𑀫𑀮𑀫𑁄𑀳𑀲𑁆𑀲.

𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀺𑀦𑁄𑀢𑀺. 𑀫𑀸𑀦𑁄𑀢𑀺 𑀏𑀓𑀯𑀺𑀥𑁂𑀦 𑀫𑀸𑀦𑁄 𑁋 𑀬𑀸 𑀘𑀺𑀢𑁆𑀢𑀲𑁆𑀲 𑀉𑀦𑁆𑀦𑀢𑀺 [𑀉𑀡𑁆𑀡𑀢𑀺 (𑀲𑁆𑀬𑀸. 𑀓.)]. 𑀤𑀼𑀯𑀺𑀥𑁂𑀦 𑀫𑀸𑀦𑁄 𑁋 𑀅𑀢𑁆𑀢𑀼𑀓𑁆𑀓𑀁𑀲𑀦𑀫𑀸𑀦𑁄, 𑀧𑀭𑀯𑀫𑁆𑀪𑀦𑀫𑀸𑀦𑁄. 𑀢𑀺𑀯𑀺𑀥𑁂𑀦 𑀫𑀸𑀦𑁄 𑁋 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄. 𑀘𑀢𑀼𑀩𑁆𑀩𑀺𑀥𑁂𑀦 𑀫𑀸𑀦𑁄 𑁋 𑀮𑀸𑀪𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀬𑀲𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀧𑀲𑀁𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀲𑀼𑀔𑁂𑀦 𑀫𑀸𑀦𑀁 𑀚𑀦𑁂𑀢𑀺. 𑀧𑀜𑁆𑀘𑀯𑀺𑀥𑁂𑀦 𑀫𑀸𑀦𑁄 𑁋 𑀮𑀸𑀪𑀺𑀫𑁆𑀳𑀺 𑀫𑀦𑀸𑀧𑀺𑀓𑀸𑀦𑀁 𑀭𑀽𑀧𑀸𑀦𑀦𑁆𑀢𑀺 𑀫𑀸𑀦𑀁 𑀚𑀦𑁂𑀢𑀺, 𑀮𑀸𑀪𑀺𑀫𑁆𑀳𑀺 𑀫𑀦𑀸𑀧𑀺𑀓𑀸𑀦𑀁 𑀲𑀤𑁆𑀤𑀸𑀦𑀁…𑀧𑁂… 𑀕𑀦𑁆𑀥𑀸𑀦𑀁… 𑀭𑀲𑀸𑀦𑀁… 𑀨𑁄𑀝𑁆𑀞𑀩𑁆𑀩𑀸𑀦𑀦𑁆𑀢𑀺 𑀫𑀸𑀦𑀁 𑀚𑀦𑁂𑀢𑀺. 𑀙𑀩𑁆𑀩𑀺𑀥𑁂𑀦 𑀫𑀸𑀦𑁄 𑁋 𑀘𑀓𑁆𑀔𑀼𑀲𑀫𑁆𑀧𑀤𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀲𑁄𑀢𑀲𑀫𑁆𑀧𑀤𑀸𑀬…𑀧𑁂… 𑀖𑀸𑀦𑀲𑀫𑁆𑀧𑀤𑀸𑀬… 𑀚𑀺𑀯𑁆𑀳𑀸𑀲𑀫𑁆𑀧𑀤𑀸𑀬… 𑀓𑀸𑀬𑀲𑀫𑁆𑀧𑀤𑀸𑀬… 𑀫𑀦𑁄𑀲𑀫𑁆𑀧𑀤𑀸𑀬 𑀫𑀸𑀦𑀁 𑀚𑀦𑁂𑀢𑀺. 𑀲𑀢𑁆𑀢𑀯𑀺𑀥𑁂𑀦 𑀫𑀸𑀦𑁄 𑁋 𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀸𑀦𑀸𑀢𑀺𑀫𑀸𑀦𑁄, 𑀑𑀫𑀸𑀦𑁄, 𑀅𑀯𑀫𑀸𑀦𑁄, 𑀅𑀲𑁆𑀫𑀺𑀫𑀸𑀦𑁄, 𑀫𑀺𑀘𑁆𑀙𑀸𑀫𑀸𑀦𑁄. 𑀅𑀝𑁆𑀞𑀯𑀺𑀥𑁂𑀦 𑀫𑀸𑀦𑁄 𑁋 𑀮𑀸𑀪𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀅𑀮𑀸𑀪𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺, 𑀬𑀲𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀅𑀬𑀲𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺, 𑀧𑀲𑀁𑀲𑀸𑀬 𑀫𑀸𑀦𑀁 𑀚𑀦𑁂𑀢𑀺, 𑀦𑀺𑀦𑁆𑀤𑀸𑀬 𑀑𑀫𑀸𑀦𑀁 𑀚𑀦𑁂𑀢𑀺, 𑀲𑀼𑀔𑁂𑀦 𑀫𑀸𑀦𑀁 𑀚𑀦𑁂𑀢𑀺, 𑀤𑀼𑀓𑁆𑀔𑁂𑀦 𑀑𑀫𑀸𑀦𑀁 𑀚𑀦𑁂𑀢𑀺. 𑀦𑀯𑀯𑀺𑀥𑁂𑀦 𑀫𑀸𑀦𑁄 𑁋 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀲𑀻𑀢𑀺 𑀫𑀸𑀦𑁄. 𑀤𑀲𑀯𑀺𑀥𑁂𑀦 𑀫𑀸𑀦𑁄 𑁋 𑀇𑀥𑁂𑀓𑀘𑁆𑀘𑁄 𑀫𑀸𑀦𑀁 𑀚𑀦𑁂𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 [𑀯𑀺𑀚𑁆𑀚𑀸𑀞𑀸𑀦𑁂𑀦 (𑀓.)] 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀦𑁄.

𑀫𑀓𑁆𑀔𑁄𑀢𑀺 𑀬𑁄 𑀫𑀓𑁆𑀔𑁄 𑀫𑀓𑁆𑀔𑀸𑀬𑀦𑀸 𑀫𑀓𑁆𑀔𑀸𑀬𑀺𑀢𑀢𑁆𑀢𑀁 𑀦𑀺𑀝𑁆𑀞𑀼𑀭𑀺𑀬𑀁 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀁 [𑀦𑀺𑀢𑁆𑀣𑀼𑀭𑀺𑀬𑀓𑀫𑁆𑀫𑀁 (𑀓.) 𑀧𑀲𑁆𑀲 𑀯𑀺𑀪. 𑁮𑁯𑁨] 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀓𑁆𑀔𑁄. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀫𑀸𑀦𑁄 𑀘 𑀫𑀓𑁆𑀔𑁄 𑀘 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀻𑀢𑀺 𑁋 𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀺𑀦𑁄.

𑀳𑀦𑁆𑀤𑀸𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀕𑀺𑀭𑀁 𑀯𑀡𑁆𑀡𑀽𑀧𑀲𑀁𑀳𑀺𑀢𑀦𑁆𑀢𑀺. 𑀳𑀦𑁆𑀤𑀸𑀳𑀦𑁆𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀳𑀦𑁆𑀤𑀸𑀳𑀦𑁆𑀢𑀺. 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀕𑀺𑀭𑀁 𑀯𑀡𑁆𑀡𑀽𑀧𑀲𑀁𑀳𑀺𑀢𑀦𑁆𑀢𑀺 𑀯𑀡𑁆𑀡𑁂𑀦 𑀉𑀧𑁂𑀢𑀁 𑀲𑀫𑀼𑀧𑁂𑀢𑀁 𑀉𑀧𑀸𑀕𑀢𑀁 𑀲𑀫𑀼𑀧𑀸𑀕𑀢𑀁 𑀉𑀧𑀧𑀦𑁆𑀦𑀁 𑀲𑀫𑀼𑀧𑀧𑀦𑁆𑀦𑀁 𑀲𑀫𑀦𑁆𑀦𑀸𑀕𑀢𑀁 𑀯𑀸𑀘𑀁 𑀕𑀺𑀭𑀁 𑀩𑁆𑀬𑀧𑁆𑀧𑀣𑀁 𑀉𑀤𑀻𑀭𑀡𑀁 [𑀑𑀤𑀻𑀭𑀡𑀁 (𑀲𑁆𑀬𑀸.)] 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑁂𑀲𑁆𑀲𑀸𑀫𑀻𑀢𑀺 𑁋 𑀳𑀦𑁆𑀤𑀸𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀕𑀺𑀭𑀁 𑀯𑀡𑁆𑀡𑀽𑀧𑀲𑀁𑀳𑀺𑀢𑀁. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀧𑀳𑀻𑀦𑀫𑀮𑀫𑁄𑀳𑀲𑁆𑀲, 𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀺𑀦𑁄;

𑀳𑀦𑁆𑀤𑀸𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀁 𑀯𑀡𑁆𑀡𑀽𑀧𑀲𑀁𑀳𑀺𑀢’’𑀦𑁆𑀢𑀺.

𑁧𑁦𑁪.

𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼, 𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄;

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄, 𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂.

𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀢𑀫𑁄𑀦𑀼𑀤𑁄𑀢𑀺 𑀭𑀸𑀕𑀢𑀫𑀁 𑀤𑁄𑀲𑀢𑀫𑀁 𑀫𑁄𑀳𑀢𑀫𑀁 𑀫𑀸𑀦𑀢𑀫𑀁 𑀤𑀺𑀝𑁆𑀞𑀺𑀢𑀫𑀁 𑀓𑀺𑀮𑁂𑀲𑀢𑀫𑀁 𑀤𑀼𑀘𑁆𑀘𑀭𑀺𑀢𑀢𑀫𑀁 𑀅𑀦𑁆𑀥𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁 𑀦𑀼𑀤𑀺 𑀧𑀦𑀼𑀤𑀺 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀻𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺; 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁…𑀧𑁂… 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑁋 𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼.

𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄𑀢𑀺. 𑀮𑁄𑀓𑁄𑀢𑀺 𑀏𑀓𑁄 𑀮𑁄𑀓𑁄 𑁋 𑀪𑀯𑀮𑁄𑀓𑁄. 𑀤𑁆𑀯𑁂 𑀮𑁄𑀓𑀸 𑁋 𑀪𑀯𑀮𑁄𑀓𑁄 𑀘 𑀲𑀫𑁆𑀪𑀯𑀮𑁄𑀓𑁄 𑀘; 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄 𑀘 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄 𑀘; 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄 𑀘 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄 𑀘 [𑀤𑁆𑀯𑁂 𑀮𑁄𑀓𑀸 𑀲𑀫𑁆𑀧𑀢𑁆𑀢𑀺 𑀘 𑀪𑀯𑀮𑁄𑀓𑁄 𑀯𑀺𑀧𑀢𑁆𑀢𑀺 𑀘 𑀪𑀯𑀮𑁄𑀓𑁄 (𑀲𑁆𑀬𑀸.)]. 𑀢𑀬𑁄 𑀮𑁄𑀓𑀸 𑁋 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑁋 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑁋 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑁋 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑁋 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑁋 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑁋 𑀤𑀲 𑀆𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀮𑁄𑀓𑀦𑁆𑀢𑀕𑀽𑀢𑀺 𑀪𑀕𑀯𑀸 𑀮𑁄𑀓𑀲𑁆𑀲 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄… 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀲𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀮𑁄𑀓𑀦𑁆𑀢𑀕𑀽.

𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄𑀢𑀺. 𑀪𑀯𑀸𑀢𑀺 𑀤𑁆𑀯𑁂 𑀪𑀯𑀸 𑁋 𑀓𑀫𑁆𑀫𑀪𑀯𑁄 𑀘 𑀧𑀝𑀺𑀲𑀦𑁆𑀥𑀺𑀓𑁄 𑀘 𑀧𑀼𑀦𑀩𑁆𑀪𑀯𑁄. 𑀓𑀢𑀫𑁄 𑀓𑀫𑁆𑀫𑀪𑀯𑁄? 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑁋 𑀅𑀬𑀁 𑀓𑀫𑁆𑀫𑀪𑀯𑁄. 𑀓𑀢𑀫𑁄 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄? 𑀧𑀝𑀺𑀲𑀦𑁆𑀥𑀺𑀓𑀸 𑀭𑀽𑀧𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑁋 𑀅𑀬𑀁 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄. 𑀪𑀕𑀯𑀸 𑀓𑀫𑁆𑀫𑀪𑀯𑀜𑁆𑀘 𑀧𑀝𑀺𑀲𑀦𑁆𑀥𑀺𑀓𑀜𑁆𑀘 𑀧𑀼𑀦𑀩𑁆𑀪𑀯𑀁 𑀅𑀢𑀺𑀯𑀢𑁆𑀢𑁄 [𑀉𑀧𑀸𑀢𑀺𑀯𑀢𑁆𑀢𑁄 (𑀓.)] 𑀅𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄.

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄𑀢𑀺. 𑀅𑀦𑀸𑀲𑀯𑁄𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀢𑁂 𑀆𑀲𑀯𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑀸𑀲𑀯𑁄. 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄𑀢𑀺 𑀲𑀩𑁆𑀩𑀁 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑀁 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 …𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑀤𑀼𑀓𑁆𑀔𑀁 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀁. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄𑀢𑀺 𑁋 𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄.

𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂𑀢𑀺. 𑀲𑀘𑁆𑀘𑀯𑁆𑀳𑀬𑁄𑀢𑀺 𑀲𑀘𑁆𑀘𑀯𑁆𑀳𑀬𑁄 𑀲𑀤𑀺𑀲𑀦𑀸𑀫𑁄 𑀲𑀤𑀺𑀲𑀯𑁆𑀳𑀬𑁄 𑀲𑀘𑁆𑀘𑀲𑀤𑀺𑀲𑀯𑁆𑀳𑀬𑁄. 𑀯𑀺𑀧𑀲𑁆𑀲𑀻 𑀪𑀕𑀯𑀸, 𑀲𑀺𑀔𑀻 𑀪𑀕𑀯𑀸, 𑀯𑁂𑀲𑁆𑀲𑀪𑀽 𑀪𑀕𑀯𑀸, 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸, 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸, 𑀓𑀲𑁆𑀲𑀧𑁄 𑀪𑀕𑀯𑀸. 𑀢𑁂 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀤𑀺𑀲𑀦𑀸𑀫𑀸 𑀲𑀤𑀺𑀲𑀯𑁆𑀳𑀬𑀸. 𑀪𑀕𑀯𑀸𑀧𑀺 𑀲𑀓𑁆𑀬𑀫𑀼𑀦𑀺 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀤𑀺𑀲𑀦𑀸𑀫𑁄 𑀲𑀤𑀺𑀲𑀯𑁆𑀳𑀬𑁄𑀢𑀺 𑁋 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀘𑁆𑀘𑀯𑁆𑀳𑀬𑁄.

𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂𑀢𑀺 𑀲𑁄 𑀫𑀬𑀸 𑀪𑀕𑀯𑀸 𑀆𑀲𑀺𑀢𑁄 𑀉𑀧𑀸𑀲𑀺𑀢𑁄 𑀧𑀬𑀺𑀭𑀼𑀧𑀸𑀲𑀺𑀢𑁄 𑀧𑀭𑀺𑀧𑀼𑀘𑁆𑀙𑀺𑀢𑁄 𑀧𑀭𑀺𑀧𑀜𑁆𑀳𑀺𑀢𑁄𑀢𑀺 𑁋 𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼, 𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄;

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄, 𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂’’𑀢𑀺.

𑁧𑁦𑁫.

𑀤𑀺𑀚𑁄 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬, 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬;

𑀏𑀯𑀫𑀳𑀁 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬, 𑀫𑀳𑁄𑀤𑀥𑀺𑀁 𑀳𑀁𑀲𑁄𑀭𑀺𑀯 𑀅𑀚𑁆𑀛𑀧𑀢𑁆𑀢𑁄 [𑀅𑀚𑁆𑀚 𑀧𑀢𑁆𑀢𑁄 (𑀓.)] .

𑀤𑀺𑀚𑁄 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬, 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬𑀸𑀢𑀺. 𑀤𑀺𑀚𑁄 𑀯𑀼𑀘𑁆𑀘𑀢𑀺 𑀧𑀓𑁆𑀔𑀻. 𑀓𑀺𑀁𑀓𑀸𑀭𑀡𑀸 𑀤𑀺𑀚𑁄 𑀯𑀼𑀘𑁆𑀘𑀢𑀺 𑀧𑀓𑁆𑀔𑀻? 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀬𑀢𑀻𑀢𑀺 𑀤𑀺𑀚𑁄, 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀘 𑀅𑀡𑁆𑀟𑀓𑁄𑀲𑀫𑁆𑀳𑀸 𑀘. 𑀢𑀁𑀓𑀸𑀭𑀡𑀸 𑀤𑀺𑀚𑁄 𑀯𑀼𑀘𑁆𑀘𑀢𑀺 𑀧𑀓𑁆𑀔𑀻𑀢𑀺 𑁋 𑀤𑀺𑀚𑁄. 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬𑀸𑀢𑀺 𑀬𑀣𑀸 𑀤𑀺𑀚𑁄 𑀓𑀼𑀩𑁆𑀩𑀦𑀓𑀁 𑀧𑀭𑀺𑀢𑁆𑀢𑀯𑀦𑀓𑀁 𑀅𑀧𑁆𑀧𑀨𑀮𑀁 𑀅𑀧𑁆𑀧𑀪𑀓𑁆𑀔𑀁 𑀅𑀧𑁆𑀧𑁄𑀤𑀓𑀁 𑀧𑀳𑀸𑀬 𑀚𑀳𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀁 𑀩𑀳𑀼𑀧𑁆𑀨𑀮𑀁 𑀩𑀳𑀼𑀪𑀓𑁆𑀔𑀁 𑀩𑀳𑀽𑀤𑀓𑀁 [𑀩𑀳𑀼𑀭𑀼𑀓𑁆𑀔𑀁 (𑀲𑁆𑀬𑀸.)] 𑀫𑀳𑀦𑁆𑀢𑀁 𑀓𑀸𑀦𑀦𑀁 𑀯𑀦𑀲𑀡𑁆𑀟𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑀯𑀺𑀦𑁆𑀤𑁂𑀬𑁆𑀬 𑀧𑀝𑀺𑀮𑀪𑁂𑀬𑁆𑀬, 𑀢𑀲𑁆𑀫𑀺𑀜𑁆𑀘 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑁋 𑀤𑀺𑀚𑁄 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀁 𑀆𑀯𑀲𑁂𑀬𑁆𑀬.

𑀏𑀯𑀫𑀳𑀁 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬, 𑀫𑀳𑁄𑀤𑀥𑀺𑀁 𑀳𑀁𑀲𑁄𑀭𑀺𑀯 𑀅𑀚𑁆𑀛𑀧𑀢𑁆𑀢𑁄𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬𑀸𑀢𑀺 𑀬𑁄 𑀘 𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀬𑁂 𑀘𑀜𑁆𑀜𑁂 𑀢𑀲𑁆𑀲 𑀆𑀘𑀭𑀺𑀬𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀸𑀤𑀸𑀬 𑀅𑀧𑁆𑀧𑀤𑀲𑁆𑀲𑀸 𑀧𑀭𑀺𑀢𑁆𑀢𑀤𑀲𑁆𑀲𑀸 𑀣𑁄𑀓𑀤𑀲𑁆𑀲𑀸 𑀑𑀫𑀓𑀤𑀲𑁆𑀲𑀸 𑀮𑀸𑀫𑀓𑀤𑀲𑁆𑀲𑀸 𑀙𑀢𑀼𑀓𑁆𑀓𑀤𑀲𑁆𑀲𑀸 [𑀚𑀢𑀼𑀓𑁆𑀓𑀤𑀲𑁆𑀲𑀸 (𑀲𑁆𑀬𑀸.), 𑀚𑀢𑀼𑀓𑀤𑀲𑁆𑀲𑀸 (𑀲𑀻. 𑀅𑀝𑁆𑀞.)] 𑀯𑀸. 𑀢𑁂 𑀅𑀧𑁆𑀧𑀤𑀲𑁆𑀲𑁂 𑀧𑀭𑀺𑀢𑁆𑀢𑀤𑀲𑁆𑀲𑁂 𑀣𑁄𑀓𑀤𑀲𑁆𑀲𑁂 𑀑𑀫𑀓𑀤𑀲𑁆𑀲𑁂 𑀮𑀸𑀫𑀓𑀤𑀲𑁆𑀲𑁂 𑀙𑀢𑀼𑀓𑁆𑀓𑀤𑀲𑁆𑀲𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀅𑀧𑁆𑀧𑀫𑀸𑀡𑀤𑀲𑁆𑀲𑀁 𑀅𑀕𑁆𑀕𑀤𑀲𑁆𑀲𑀁 𑀲𑁂𑀝𑁆𑀞𑀤𑀲𑁆𑀲𑀁 𑀯𑀺𑀲𑁂𑀝𑁆𑀞𑀤𑀲𑁆𑀲𑀁 𑀧𑀸𑀫𑁄𑀓𑁆𑀔𑀤𑀲𑁆𑀲𑀁 𑀉𑀢𑁆𑀢𑀫𑀤𑀲𑁆𑀲𑀁 𑀧𑀯𑀭𑀤𑀲𑁆𑀲𑀁 𑀅𑀲𑀫𑀁 𑀅𑀲𑀫𑀲𑀫𑀁 𑀅𑀧𑁆𑀧𑀝𑀺𑀲𑀫𑀁 𑀅𑀧𑁆𑀧𑀝𑀺𑀪𑀸𑀕𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁 𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀸𑀲𑀪𑀁 𑀧𑀼𑀭𑀺𑀲𑀲𑀻𑀳𑀁 𑀧𑀼𑀭𑀺𑀲𑀦𑀸𑀕𑀁 𑀧𑀼𑀭𑀺𑀲𑀸𑀚𑀜𑁆𑀜𑀁 𑀧𑀼𑀭𑀺𑀲𑀦𑀺𑀲𑀪𑀁 𑀧𑀼𑀭𑀺𑀲𑀥𑁄𑀭𑀬𑁆𑀳𑀁 𑀤𑀲𑀩𑀮𑀥𑀸𑀭𑀺𑀁 [𑀤𑀲𑀩𑀮𑀁 𑀢𑀸𑀤𑀺𑀁 (𑀲𑁆𑀬𑀸.)] 𑀅𑀥𑀺𑀕𑀘𑁆𑀙𑀺𑀁 𑀯𑀺𑀦𑁆𑀤𑀺𑀁 𑀧𑀝𑀺𑀮𑀪𑀺𑀁. 𑀬𑀣𑀸 𑀘 𑀳𑀁𑀲𑁄 𑀫𑀳𑀦𑁆𑀢𑀁 𑀫𑀸𑀦𑀲𑀓𑀁 [𑀫𑀸𑀦𑀼𑀲𑀓𑀢𑀁 (𑀲𑁆𑀬𑀸.)] 𑀯𑀸 𑀲𑀭𑀁 𑀅𑀦𑁄𑀢𑀢𑁆𑀢𑀁 𑀯𑀸 𑀤𑀳𑀁 𑀫𑀳𑀸𑀲𑀫𑀼𑀤𑁆𑀤𑀁 𑀯𑀸 𑀅𑀓𑁆𑀔𑁄𑀪𑀁 𑀅𑀫𑀺𑀢𑁄𑀤𑀓𑀁 𑀚𑀮𑀭𑀸𑀲𑀺𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑀯𑀺𑀦𑁆𑀤𑁂𑀬𑁆𑀬 𑀧𑀝𑀺𑀮𑀪𑁂𑀬𑁆𑀬, 𑀏𑀯𑀫𑁂𑀯 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀅𑀓𑁆𑀔𑁄𑀪𑀁 𑀅𑀫𑀺𑀢𑀢𑁂𑀚𑀁 𑀧𑀪𑀺𑀦𑁆𑀦𑀜𑀸𑀡𑀁 𑀯𑀺𑀯𑀝𑀘𑀓𑁆𑀔𑀼𑀁 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑀁 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀁 𑀲𑀼𑀤𑁆𑀥𑀸𑀥𑀺𑀫𑀼𑀢𑁆𑀢𑀁 𑀲𑁂𑀢𑀧𑀘𑁆𑀘𑀢𑁆𑀢𑀁 𑀅𑀤𑁆𑀯𑀬𑀪𑀸𑀡𑀺𑀁 𑀢𑀸𑀤𑀺𑀁 𑀢𑀣𑀸𑀧𑀝𑀺𑀜𑁆𑀜𑀁 𑀅𑀧𑀭𑀺𑀢𑁆𑀢𑀁 𑀫𑀳𑀦𑁆𑀢𑀁 𑀕𑀫𑁆𑀪𑀻𑀭𑀁 𑀅𑀧𑁆𑀧𑀫𑁂𑀬𑁆𑀬𑀁 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑀁 𑀧𑀳𑀽𑀢𑀭𑀢𑀦𑀁 𑀲𑀸𑀕𑀭𑀲𑀫𑀁 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀁 𑀅𑀢𑀼𑀮𑀁 𑀯𑀺𑀧𑀼𑀮𑀁 𑀅𑀧𑁆𑀧𑀫𑁂𑀬𑁆𑀬𑀁, 𑀢𑀁 𑀢𑀸𑀤𑀺𑀲𑀁 𑀧𑀯𑀤𑀢𑀁 𑀫𑀕𑁆𑀕𑀯𑀸𑀤𑀺𑀦𑀁 [𑀧𑀯𑀭𑀫𑀕𑁆𑀕𑀯𑀸𑀤𑀺𑀦𑀁 (𑀓.)] 𑀫𑁂𑀭𑀼𑀫𑀺𑀯 𑀦𑀕𑀸𑀦𑀁 𑀕𑀭𑀼𑀴𑀫𑀺𑀯 𑀤𑀺𑀚𑀸𑀦𑀁 𑀲𑀻𑀳𑀫𑀺𑀯 𑀫𑀺𑀕𑀸𑀦𑀁 𑀉𑀤𑀥𑀺𑀫𑀺𑀯 𑀅𑀡𑁆𑀡𑀯𑀸𑀦𑀁 𑀅𑀥𑀺𑀕𑀘𑁆𑀙𑀺𑀁, 𑀢𑀁 𑀲𑀢𑁆𑀣𑀸𑀭𑀁 𑀚𑀺𑀦𑀧𑀯𑀭𑀁 𑀫𑀳𑁂𑀲𑀺𑀦𑁆𑀢𑀺 𑁋 𑀏𑀯𑀫𑀳𑀁 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬 𑀫𑀳𑁄𑀤𑀥𑀺𑀁 𑀳𑀁𑀲𑁄𑀭𑀺𑀯 𑀅𑀚𑁆𑀛𑀧𑀢𑁆𑀢𑁄. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀤𑀺𑀚𑁄 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬, 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬;

𑀏𑀯𑀫𑀳𑀁 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬, 𑀫𑀳𑁄𑀤𑀥𑀺𑀁 𑀳𑀁𑀲𑁄𑀭𑀺𑀯 𑀅𑀚𑁆𑀛𑀧𑀢𑁆𑀢𑁄’’𑀢𑀺.

𑁧𑁦𑁬.

𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼,

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸 ‘𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺’;

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁, 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁.

𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀽𑀢𑀺. 𑀬𑁂𑀢𑀺 𑀬𑁄 𑀘 𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀬𑁂 𑀘𑀜𑁆𑀜𑁂 𑀢𑀲𑁆𑀲 𑀆𑀘𑀭𑀺𑀬𑀸, 𑀢𑁂 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀔𑀦𑁆𑀢𑀺𑀁 𑀲𑀓𑀁 𑀭𑀼𑀘𑀺𑀁 𑀲𑀓𑀁 𑀮𑀤𑁆𑀥𑀺𑀁 𑀲𑀓𑀁 𑀅𑀚𑁆𑀛𑀸𑀲𑀬𑀁 𑀲𑀓𑀁 𑀅𑀥𑀺𑀧𑁆𑀧𑀸𑀬𑀁 𑀩𑁆𑀬𑀸𑀓𑀁𑀲𑀼 𑀆𑀘𑀺𑀓𑁆𑀔𑀺𑀁𑀲𑀼 𑀤𑁂𑀲𑀬𑀺𑀁𑀲𑀼 𑀧𑀜𑁆𑀜𑀧𑀺𑀁𑀲𑀼 𑀧𑀝𑁆𑀞𑀧𑀺𑀁𑀲𑀼 𑀯𑀺𑀯𑀭𑀺𑀁𑀲𑀼 𑀯𑀺𑀪𑀚𑀺𑀁𑀲𑀼 𑀉𑀢𑁆𑀢𑀸𑀦𑀻𑀅𑀓𑀁𑀲𑀼 𑀧𑀓𑀸𑀲𑁂𑀲𑀼𑀦𑁆𑀢𑀺 𑁋 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼.

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸𑀢𑀺 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸, 𑀧𑀭𑀁 𑀕𑁄𑀢𑀫𑀲𑀸𑀲𑀦𑀸, 𑀧𑀼𑀭𑁂 𑀕𑁄𑀢𑀫𑀲𑀸𑀲𑀦𑀸, 𑀧𑀞𑀫𑀢𑀭𑀁 𑀕𑁄𑀢𑀫𑀲𑀸𑀲𑀦𑀸 𑀩𑀼𑀤𑁆𑀥𑀲𑀸𑀲𑀦𑀸 𑀚𑀺𑀦𑀲𑀸𑀲𑀦𑀸 𑀢𑀣𑀸𑀕𑀢𑀲𑀸𑀲𑀦𑀸 [𑀢𑀣𑀸𑀕𑀢𑀲𑀸𑀲𑀦𑀸 𑀤𑁂𑀯𑀲𑀸𑀲𑀦𑀸 (𑀲𑁆𑀬𑀸. 𑀓.)] 𑀅𑀭𑀳𑀦𑁆𑀢𑀲𑀸𑀲𑀦𑀸𑀢𑀺 𑁋 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸.

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀓𑀺𑀭 𑀆𑀲𑀺, 𑀏𑀯𑀁 𑀓𑀺𑀭 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺.

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁 𑀇𑀢𑀺𑀓𑀺𑀭𑀸𑀬 𑀧𑀭𑀫𑁆𑀧𑀭𑀸𑀬 𑀧𑀺𑀝𑀓𑀲𑀫𑁆𑀧𑀤𑀸𑀬 𑀢𑀓𑁆𑀓𑀳𑁂𑀢𑀼 𑀦𑀬𑀳𑁂𑀢𑀼 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀦 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀥𑀫𑁆𑀫𑀁 𑀬𑀁 𑀓𑀣𑀬𑀺𑀁𑀲𑀽𑀢𑀺 𑁋 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁.

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁 𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀲𑀗𑁆𑀓𑀧𑁆𑀧𑀯𑀟𑁆𑀠𑀦𑀁 𑀓𑀸𑀫𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀜𑀸𑀢𑀺𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀚𑀦𑀧𑀤𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀅𑀫𑀭𑀸𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀧𑀭𑀸𑀦𑀼𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑁋 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

‘𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲’𑀢𑀺;

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁, 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦’’𑀦𑁆𑀢𑀺.

𑁧𑁦𑁭.

𑀏𑀓𑁄 𑀢𑀫𑁄𑀦𑀼𑀤𑀸𑀲𑀻𑀦𑁄, 𑀚𑀼𑀢𑀺𑀫𑀸 𑀲𑁄 𑀧𑀪𑀗𑁆𑀓𑀭𑁄;

𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄, 𑀕𑁄𑀢𑀫𑁄 𑀪𑀽𑀭𑀺𑀫𑁂𑀥𑀲𑁄.

𑀏𑀓𑁄 𑀢𑀫𑁄𑀦𑀼𑀤𑀸𑀲𑀻𑀦𑁄𑀢𑀺. 𑀏𑀓𑁄𑀢𑀺 𑀪𑀕𑀯𑀸 𑀧𑀩𑁆𑀩𑀚𑁆𑀚𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀓𑀣𑀁 𑀪𑀕𑀯𑀸 𑀧𑀩𑁆𑀩𑀚𑁆𑀚𑀲𑀗𑁆𑀔𑀸𑀢𑁂𑀦 𑀏𑀓𑁄? 𑀪𑀕𑀯𑀸 𑀤𑀳𑀭𑁄𑀯 𑀲𑀫𑀸𑀦𑁄 𑀲𑀼𑀲𑀼 𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀯𑀺𑀮𑀧𑀦𑁆𑀢𑀸𑀦𑀁 𑀜𑀸𑀢𑀺𑀲𑀗𑁆𑀖𑀁 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀪𑀕𑀯𑀸 𑀧𑀩𑁆𑀩𑀚𑁆𑀚𑀲𑀗𑁆𑀔𑀸𑀢𑁂𑀦 𑀏𑀓𑁄.

𑀓𑀣𑀁 𑀪𑀕𑀯𑀸 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄? 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑁆𑀬𑀸. 𑀓.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺 [𑀧𑀝𑀺𑀲𑀮𑁆𑀮𑀸𑀡𑀲𑀸𑀭𑀼𑀧𑁆𑀧𑀸𑀦𑀺 (𑀓.)]. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀪𑀕𑀯𑀸 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀪𑀕𑀯𑀸 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀫𑀸𑀭𑀁 𑀲𑀲𑁂𑀦𑀁 𑀓𑀡𑁆𑀳𑀁 𑀦𑀫𑀼𑀘𑀺𑀁 𑀧𑀫𑀢𑁆𑀢𑀩𑀦𑁆𑀥𑀼𑀁 𑀯𑀺𑀥𑀫𑀺𑀢𑁆𑀯𑀸 𑀢𑀡𑁆𑀳𑀸𑀚𑀸𑀮𑀺𑀦𑀺𑀁 [𑀢𑀡𑁆𑀳𑀁 𑀚𑀸𑀮𑀺𑀦𑀺𑀁 (𑀲𑁆𑀬𑀸.)] 𑀯𑀺𑀲𑀝𑀁 [𑀲𑀭𑀺𑀢𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁯𑁧] 𑀯𑀺𑀲𑀢𑁆𑀢𑀺𑀓𑀁 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀻𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀺.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 [𑀏𑀯𑀫𑀸𑀤𑀻𑀦𑀯𑀁 (𑀓.) 𑀧𑀲𑁆𑀲 𑀇𑀢𑀺𑀯𑀼. 𑁧𑁫] 𑀜𑀢𑁆𑀯𑀸, 𑀢𑀡𑁆𑀳𑀁 [𑀢𑀡𑁆𑀳𑀸 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁯𑁧] 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀏𑀯𑀁 𑀪𑀕𑀯𑀸 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀪𑀕𑀯𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄? 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄.

𑀓𑀣𑀁 𑀪𑀕𑀯𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄? 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 [𑀅𑀢𑀭𑀺𑀁𑀲𑀼 (𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁪𑁦𑁯; 𑀫𑀳𑀸𑀦𑀺. 𑁧𑁯𑁧] 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺.

𑀏𑀯𑀁 𑀪𑀕𑀯𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄.

𑀓𑀣𑀁 𑀪𑀕𑀯𑀸 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄. 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑀼𑀚𑁆𑀛𑀺. 𑀅𑀣 𑀯𑀸, 𑀬𑀁 𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀦𑀼𑀩𑀼𑀚𑁆𑀛𑀺𑀢𑀩𑁆𑀩𑀁 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀨𑀲𑁆𑀲𑀺𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀩𑁆𑀩𑀁 𑀢𑀁 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀺 𑀅𑀦𑀼𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀺 𑀲𑀫𑁆𑀩𑀼𑀚𑁆𑀛𑀺 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀺. 𑀏𑀯𑀁 𑀪𑀕𑀯𑀸 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀢𑀫𑁄𑀦𑀼𑀤𑁄𑀢𑀺 𑀪𑀕𑀯𑀸 𑀭𑀸𑀕𑀢𑀫𑀁 𑀤𑁄𑀲𑀢𑀫𑀁 𑀫𑁄𑀳𑀢𑀫𑀁 𑀤𑀺𑀝𑁆𑀞𑀺𑀢𑀫𑀁 𑀓𑀺𑀮𑁂𑀲𑀢𑀫𑀁 𑀤𑀼𑀘𑁆𑀘𑀭𑀺𑀢𑀢𑀫𑀁 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁 𑀦𑀼𑀤𑀺 𑀧𑀦𑀼𑀤𑀺 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀻𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀺. 𑀆𑀲𑀻𑀦𑁄𑀢𑀺 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂𑀢𑀺 𑁋 𑀆𑀲𑀻𑀦𑁄 [𑀆𑀲𑀺𑀦𑁄 (𑀓.)].

𑀦𑀕𑀲𑁆𑀲 𑀧𑀲𑁆𑀲𑁂 𑀆𑀲𑀻𑀦𑀁, 𑀫𑀼𑀦𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄𑀢𑀺.

𑀏𑀯𑀫𑁆𑀧𑀺 𑀪𑀕𑀯𑀸 𑀆𑀲𑀻𑀦𑁄…𑀧𑁂… 𑀅𑀣 𑀯𑀸, 𑀪𑀕𑀯𑀸 𑀲𑀩𑁆𑀩𑁄𑀲𑁆𑀲𑀼𑀓𑁆𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀆𑀲𑀻𑀦𑁄 𑀲𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺, 𑀏𑀯𑀫𑁆𑀧𑀺 𑀪𑀕𑀯𑀸 𑀆𑀲𑀻𑀦𑁄𑀢𑀺 𑁋 𑀏𑀓𑁄 𑀢𑀫𑁄𑀦𑀼𑀤𑀸𑀲𑀻𑀦𑁄.

𑀚𑀼𑀢𑀺𑀫𑀸 𑀲𑁄 𑀧𑀪𑀗𑁆𑀓𑀭𑁄𑀢𑀺. 𑀚𑀼𑀢𑀺𑀫𑀸𑀢𑀺 𑀚𑀼𑀢𑀺𑀫𑀸 𑀫𑀢𑀺𑀫𑀸 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀧𑀪𑀗𑁆𑀓𑀭𑁄𑀢𑀺 𑀧𑀪𑀗𑁆𑀓𑀭𑁄 𑀆𑀮𑁄𑀓𑀓𑀭𑁄 𑀑𑀪𑀸𑀲𑀓𑀭𑁄 𑀤𑀻𑀧𑀗𑁆𑀓𑀭𑁄 𑀧𑀤𑀻𑀧𑀓𑀭𑁄 𑀉𑀚𑁆𑀚𑁄𑀢𑀓𑀭𑁄 𑀧𑀚𑁆𑀚𑁄𑀢𑀓𑀭𑁄𑀢𑀺 𑁋 𑀚𑀼𑀢𑀺𑀫𑀸 𑀲𑁄 𑀧𑀪𑀗𑁆𑀓𑀭𑁄.

𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄𑀢𑀺 𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄 𑀜𑀸𑀡𑀧𑀜𑁆𑀜𑀸𑀡𑁄 𑀧𑀜𑁆𑀜𑀸𑀥𑀚𑁄 𑀧𑀜𑁆𑀜𑀸𑀓𑁂𑀢𑀼 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄 𑀯𑀺𑀘𑀬𑀩𑀳𑀼𑀮𑁄 𑀧𑀯𑀺𑀘𑀬𑀩𑀳𑀼𑀮𑁄 𑀑𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁄𑀓𑁆𑀔𑀸𑀬𑀦𑀥𑀫𑁆𑀫𑁄 𑀯𑀺𑀪𑀽𑀢𑀯𑀺𑀳𑀸𑀭𑀻 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄.

𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡𑀁, 𑀥𑀽𑀫𑁄 [𑀥𑀼𑀫𑁄 (𑀲𑁆𑀬𑀸.)] 𑀧𑀜𑁆𑀜𑀸𑀡𑀫𑀕𑁆𑀕𑀺𑀦𑁄;

𑀭𑀸𑀚𑀸 𑀭𑀝𑁆𑀞𑀲𑁆𑀲 𑀧𑀜𑁆𑀜𑀸𑀡𑀁, 𑀪𑀢𑁆𑀢𑀸 𑀧𑀜𑁆𑀜𑀸𑀡𑀫𑀺𑀢𑁆𑀣𑀺𑀬𑀸𑀢𑀺.

𑀏𑀯𑀫𑁂𑀯 𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄 𑀜𑀸𑀡𑀧𑀜𑁆𑀜𑀸𑀡𑁄 𑀧𑀜𑁆𑀜𑀸𑀥𑀚𑁄 𑀧𑀜𑁆𑀜𑀸𑀓𑁂𑀢𑀼 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄 𑀯𑀺𑀘𑀬𑀩𑀳𑀼𑀮𑁄 𑀧𑀯𑀺𑀘𑀬𑀩𑀳𑀼𑀮𑁄 𑀑𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁄𑀓𑁆𑀔𑀸𑀬𑀦𑀥𑀫𑁆𑀫𑁄 𑀯𑀺𑀪𑀽𑀢𑀯𑀺𑀳𑀸𑀭𑀻 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄.

𑀕𑁄𑀢𑀫𑁄 𑀪𑀽𑀭𑀺𑀫𑁂𑀥𑀲𑁄𑀢𑀺 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑁂𑀥𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀇𑀫𑀸𑀬 𑀫𑁂𑀥𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀼𑀫𑁂𑀥𑀲𑁄𑀢𑀺 [𑀪𑀽𑀭𑀺𑀫𑁂𑀥𑀲𑁄𑀢𑀺 (𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺] 𑁋 𑀕𑁄𑀢𑀫𑁄 𑀪𑀽𑀭𑀺𑀫𑁂𑀥𑀲𑁄. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀏𑀓𑁄 𑀢𑀫𑁄𑀦𑀼𑀤𑀸𑀲𑀻𑀦𑁄, 𑀚𑀼𑀢𑀺𑀫𑀸 𑀲𑁄 𑀧𑀪𑀗𑁆𑀓𑀭𑁄;

𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄, 𑀕𑁄𑀢𑀫𑁄 𑀪𑀽𑀭𑀺𑀫𑁂𑀥𑀲𑁄’’𑀢𑀺.

𑁧𑁦𑁮.

𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺.

𑀬𑁄 𑀫𑁂 𑀥𑀫𑁆𑀫𑀤𑁂𑀲𑁂𑀲𑀻𑀢𑀺. 𑀬𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀥𑀫𑁆𑀫𑀫𑀤𑁂𑀲𑁂𑀲𑀻𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂…𑀧𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺.

𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻𑀢𑀺 𑁋 𑀏𑀯𑀁 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀣 𑀯𑀸, 𑀬𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀲𑀫𑀦𑀦𑁆𑀢𑀭𑀸 𑀅𑀥𑀺𑀕𑀘𑁆𑀙𑀢𑁂𑀯 𑀨𑀮𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺, 𑀏𑀯𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀓𑀸𑀮𑀺𑀓𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸 𑀓𑀸𑀮𑀺𑀓𑀁 𑀥𑀦𑀁 𑀤𑀢𑁆𑀯𑀸 𑀅𑀦𑀦𑁆𑀢𑀭𑀸 𑀦 𑀮𑀪𑀦𑁆𑀢𑀺 𑀓𑀸𑀮𑀁 𑀆𑀕𑀫𑁂𑀦𑁆𑀢𑀺, 𑀦𑁂𑀯𑀸𑀬𑀁 𑀥𑀫𑁆𑀫𑁄. 𑀬𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀲𑀫𑀦𑀦𑁆𑀢𑀭𑀸 𑀅𑀥𑀺𑀕𑀘𑁆𑀙𑀢𑁂𑀯 𑀨𑀮𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀦 𑀧𑀭𑀢𑁆𑀣 𑀦 𑀧𑀭𑀮𑁄𑀓𑁂, 𑀏𑀯𑀁 𑀅𑀓𑀸𑀮𑀺𑀓𑀦𑁆𑀢𑀺 𑁋 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁.

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀢𑀡𑁆𑀳𑀓𑁆𑀔𑀬𑀁 𑀭𑀸𑀕𑀓𑁆𑀔𑀬𑀁 𑀤𑁄𑀲𑀓𑁆𑀔𑀬𑀁 𑀫𑁄𑀳𑀓𑁆𑀔𑀬𑀁 𑀕𑀢𑀺𑀓𑁆𑀔𑀬𑀁 𑀉𑀧𑀧𑀢𑁆𑀢𑀺𑀓𑁆𑀔𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀬𑀁 𑀪𑀯𑀓𑁆𑀔𑀬𑀁 𑀲𑀁𑀲𑀸𑀭𑀓𑁆𑀔𑀬𑀁 𑀯𑀝𑁆𑀝𑀓𑁆𑀔𑀬𑀁. 𑀅𑀦𑀻𑀢𑀺𑀓𑀦𑁆𑀢𑀺 𑀈𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀈𑀢𑀺𑀧𑁆𑀧𑀳𑀸𑀦𑀁 𑀈𑀢𑀺𑀯𑀽𑀧𑀲𑀫𑀁 𑀈𑀢𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀈𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁.

𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻𑀢𑀺. 𑀬𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀦𑀢𑁆𑀣𑀺 𑀉𑀧𑀫𑀸𑀢𑀺 𑀉𑀧𑀫𑀸 𑀦𑀢𑁆𑀣𑀺, 𑀉𑀧𑀦𑀺𑀥𑀸 𑀦𑀢𑁆𑀣𑀺, 𑀲𑀤𑀺𑀲𑀁 𑀦𑀢𑁆𑀣𑀺, 𑀧𑀝𑀺𑀪𑀸𑀕𑁄 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺. 𑀓𑁆𑀯𑀘𑀻𑀢𑀺 𑀓𑁆𑀯𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻’’𑀢𑀺.

𑁧𑁦𑁯.

𑀓𑀺𑀁 𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀺𑀗𑁆𑀕𑀺𑀬;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑀓𑀺𑀁 𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀻𑀢𑀺 𑀓𑀺𑀁 𑀦𑀼 𑀩𑀼𑀤𑁆𑀥𑀫𑁆𑀳𑀸 𑀯𑀺𑀧𑁆𑀧𑀯𑀲𑀺 𑀅𑀧𑁂𑀲𑀺 𑀅𑀧𑀕𑀘𑁆𑀙𑀺 [𑀅𑀧𑀕𑀘𑁆𑀙𑀲𑀺 (𑀲𑁆𑀬𑀸. 𑀓.)] 𑀯𑀺𑀦𑀸 𑀳𑁄𑀲𑀻𑀢𑀺 𑁋 𑀓𑀺𑀁 𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀺.

𑀫𑀼𑀳𑀼𑀢𑁆𑀢𑀫𑀧𑀺 𑀧𑀺𑀗𑁆𑀕𑀺𑀬𑀸𑀢𑀺 𑀫𑀼𑀳𑀼𑀢𑁆𑀢𑀫𑁆𑀧𑀺 𑀔𑀡𑀫𑁆𑀧𑀺 𑀮𑀬𑀫𑁆𑀧𑀺 𑀯𑀬𑀫𑁆𑀧𑀺 𑀅𑀤𑁆𑀥𑀫𑁆𑀧𑀻𑀢𑀺 𑁋 𑀫𑀼𑀳𑀼𑀢𑁆𑀢𑀫𑀧𑀺. 𑀧𑀺𑀗𑁆𑀕𑀺𑀬𑀸𑀢𑀺 𑀩𑀸𑀯𑀭𑀻 𑀢𑀁 𑀦𑀢𑁆𑀢𑀸𑀭𑀁 𑀦𑀸𑀫𑁂𑀦 𑀆𑀮𑀧𑀢𑀺.

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸𑀢𑀺 𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸 𑀜𑀸𑀡𑀧𑀜𑁆𑀜𑀸𑀡𑀸 𑀧𑀜𑁆𑀜𑀸𑀥𑀚𑀸 𑀧𑀜𑁆𑀜𑀸𑀓𑁂𑀢𑀼𑀫𑁆𑀳𑀸 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑀫𑁆𑀳𑀸 𑀯𑀺𑀘𑀬𑀩𑀳𑀼𑀮𑀸 𑀧𑀯𑀺𑀘𑀬𑀩𑀳𑀼𑀮𑀸 𑀑𑀓𑁆𑀔𑀸𑀬𑀦𑀩𑀳𑀼𑀮𑀸 𑀲𑀫𑁄𑀓𑁆𑀔𑀸𑀬𑀦𑀥𑀫𑁆𑀫𑀸 𑀯𑀺𑀪𑀽𑀢𑀯𑀺𑀳𑀸𑀭𑀺𑀫𑁆𑀳𑀸 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀫𑁆𑀳𑀸𑀢𑀺 𑁋 𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸.

𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸𑀢𑀺 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑁂𑀥𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀇𑀫𑀸𑀬 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀼𑀫𑁂𑀥𑀲𑁄𑀢𑀺 𑁋 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑀺𑀁𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀺𑀗𑁆𑀕𑀺𑀬;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸’’𑀢𑀺.

𑁧𑁧𑁦.

𑀬𑁄 𑀢𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺.

𑀬𑁄 𑀢𑁂 𑀥𑀫𑁆𑀫𑀫𑀤𑁂𑀲𑁂𑀲𑀻𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀥𑀫𑁆𑀫𑀫𑀤𑁂𑀲𑁂𑀲𑀻𑀢𑀺 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁…𑀧𑁂… 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀬𑁄 𑀢𑁂 𑀥𑀫𑁆𑀫𑀫𑀤𑁂𑀲𑁂𑀲𑀺.

𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻𑀢𑀺 𑁋 𑀏𑀯𑀁 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀣 𑀯𑀸, 𑀬𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀲𑀫𑀦𑀦𑁆𑀢𑀭𑀸 𑀅𑀥𑀺𑀕𑀘𑁆𑀙𑀢𑁂𑀯 𑀨𑀮𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀓𑀸𑀮𑀺𑀓𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸 𑀓𑀸𑀮𑀺𑀓𑀁 𑀥𑀦𑀁 𑀤𑀢𑁆𑀯𑀸 𑀅𑀦𑀦𑁆𑀢𑀭𑀸 𑀦 𑀮𑀪𑀦𑁆𑀢𑀺, 𑀓𑀸𑀮𑀁 𑀆𑀕𑀫𑁂𑀦𑁆𑀢𑀺, 𑀦𑁂𑀯𑀸𑀬𑀁 𑀥𑀫𑁆𑀫𑁄. 𑀬𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺; 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀲𑀫𑀦𑀦𑁆𑀢𑀭𑀸 𑀅𑀥𑀺𑀕𑀘𑁆𑀙𑀢𑁂𑀯 𑀨𑀮𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀦 𑀧𑀭𑀢𑁆𑀣 𑀦 𑀧𑀭𑀮𑁄𑀓𑁂, 𑀏𑀯𑀁 𑀅𑀓𑀸𑀮𑀺𑀓𑀦𑁆𑀢𑀺 𑁋 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁.

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀢𑀡𑁆𑀳𑀓𑁆𑀔𑀬𑀁 𑀭𑀸𑀕𑀓𑁆𑀔𑀬𑀁 𑀤𑁄𑀲𑀓𑁆𑀔𑀬𑀁 𑀫𑁄𑀳𑀓𑁆𑀔𑀬𑀁 𑀕𑀢𑀺𑀓𑁆𑀔𑀬𑀁 𑀉𑀧𑀧𑀢𑁆𑀢𑀺𑀓𑁆𑀔𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀬𑀁 𑀪𑀯𑀓𑁆𑀔𑀬𑀁 𑀲𑀁𑀲𑀸𑀭𑀓𑁆𑀔𑀬𑀁 𑀯𑀝𑁆𑀝𑀓𑁆𑀔𑀬𑀁. 𑀅𑀦𑀻𑀢𑀺𑀓𑀦𑁆𑀢𑀺 𑀈𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀈𑀢𑀺𑀧𑁆𑀧𑀳𑀸𑀦𑀁 𑀈𑀢𑀺𑀯𑀽𑀧𑀲𑀫𑀁 𑀈𑀢𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀈𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁.

𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻𑀢𑀺. 𑀬𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀦𑀢𑁆𑀣𑀺 𑀉𑀧𑀫𑀸𑀢𑀺 𑀉𑀧𑀫𑀸 𑀦𑀢𑁆𑀣𑀺, 𑀉𑀧𑀦𑀺𑀥𑀸 𑀦𑀢𑁆𑀣𑀺, 𑀲𑀤𑀺𑀲𑀁 𑀦𑀢𑁆𑀣𑀺, 𑀧𑀝𑀺𑀪𑀸𑀕𑁄 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺. 𑀓𑁆𑀯𑀘𑀻𑀢𑀺 𑀓𑁆𑀯𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁄 𑀢𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻’’𑀢𑀺.

𑁧𑁧𑁧.

𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀩𑁆𑀭𑀸𑀳𑁆𑀫𑀡;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀻𑀢𑀺 𑀦𑀸𑀳𑀁 𑀩𑀼𑀤𑁆𑀥𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺 𑀅𑀧𑁂𑀫𑀺 𑀅𑀧𑀕𑀘𑁆𑀙𑀸𑀫𑀺 𑀯𑀺𑀦𑀸 𑀳𑁄𑀫𑀻𑀢𑀺 𑁋 𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺.

𑀫𑀼𑀳𑀼𑀢𑁆𑀢𑀫𑀧𑀺 𑀩𑁆𑀭𑀸𑀳𑁆𑀫𑀡𑀸𑀢𑀺 𑀫𑀼𑀳𑀼𑀢𑁆𑀢𑀫𑁆𑀧𑀺 𑀔𑀡𑀫𑁆𑀧𑀺 𑀮𑀬𑀫𑁆𑀧𑀺 𑀯𑀬𑀫𑁆𑀧𑀺 𑀅𑀤𑁆𑀥𑀫𑁆𑀧𑀻𑀢𑀺 𑀫𑀼𑀳𑀼𑀢𑁆𑀢𑀫𑀧𑀺. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀕𑀸𑀭𑀯𑁂𑀦 𑀫𑀸𑀢𑀼𑀮𑀁 𑀆𑀮𑀧𑀢𑀺.

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸𑀢𑀺 𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸 𑀜𑀸𑀡𑀧𑀜𑁆𑀜𑀸𑀡𑀸 𑀧𑀜𑁆𑀜𑀸𑀥𑀚𑀸 𑀧𑀜𑁆𑀜𑀸𑀓𑁂𑀢𑀼𑀫𑁆𑀳𑀸 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑀫𑁆𑀳𑀸 𑀯𑀺𑀘𑀬𑀩𑀳𑀼𑀮𑀸 𑀧𑀯𑀺𑀘𑀬𑀩𑀳𑀼𑀮𑀸 𑀑𑀓𑁆𑀔𑀸𑀬𑀦𑀩𑀳𑀼𑀮𑀸 𑀲𑀫𑁄𑀓𑁆𑀔𑀸𑀬𑀦𑀥𑀫𑁆𑀫𑀸 𑀯𑀺𑀪𑀽𑀢𑀯𑀺𑀳𑀸𑀭𑀺𑀫𑁆𑀳𑀸 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀫𑁆𑀳𑀸𑀢𑀺 𑁋 𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸.

𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸𑀢𑀺 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑁂𑀥𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀇𑀫𑀸𑀬 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀼𑀫𑁂𑀥𑀲𑁄𑀢𑀺 𑁋 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀩𑁆𑀭𑀸𑀳𑁆𑀫𑀡;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸’’𑀢𑀺.

𑁧𑁧𑁨.

𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺.

𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀻𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀥𑀫𑁆𑀫𑀫𑀤𑁂𑀲𑁂𑀲𑀻𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺.

𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻𑀢𑀺, 𑀏𑀯𑀁 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀣 𑀯𑀸, 𑀬𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀲𑀫𑀦𑀦𑁆𑀢𑀭𑀸 𑀅𑀥𑀺𑀕𑀘𑁆𑀙𑀢𑁂𑀯 𑀨𑀮𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺, 𑀏𑀯𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀓𑀸𑀮𑀺𑀓𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸 𑀓𑀸𑀮𑀺𑀓𑀁 𑀥𑀦𑀁 𑀤𑀢𑁆𑀯𑀸 𑀅𑀦𑀦𑁆𑀢𑀭𑀸 𑀦 𑀮𑀪𑀦𑁆𑀢𑀺, 𑀓𑀸𑀮𑀁 𑀆𑀕𑀫𑁂𑀦𑁆𑀢𑀺, 𑀦𑁂𑀯𑀸𑀬𑀁 𑀥𑀫𑁆𑀫𑁄. 𑀬𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀲𑀫𑀦𑀦𑁆𑀢𑀭𑀸 𑀅𑀥𑀺𑀕𑀘𑁆𑀙𑀢𑁂𑀯 𑀨𑀮𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺, 𑀦 𑀧𑀭𑀢𑁆𑀣 𑀦 𑀧𑀭𑀮𑁄𑀓𑁂, 𑀏𑀯𑀁 𑀅𑀓𑀸𑀮𑀺𑀓𑀦𑁆𑀢𑀺 𑁋 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁.

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀢𑀡𑁆𑀳𑀓𑁆𑀔𑀬𑀁 𑀭𑀸𑀕𑀓𑁆𑀔𑀬𑀁 𑀤𑁄𑀲𑀓𑁆𑀔𑀬𑀁 𑀫𑁄𑀳𑀓𑁆𑀔𑀬𑀁 𑀕𑀢𑀺𑀓𑁆𑀔𑀬𑀁 𑀉𑀧𑀧𑀢𑁆𑀢𑀺𑀓𑁆𑀔𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀬𑀁 𑀪𑀯𑀓𑁆𑀔𑀬𑀁 𑀲𑀁𑀲𑀸𑀭𑀓𑁆𑀔𑀬𑀁 𑀯𑀝𑁆𑀝𑀓𑁆𑀔𑀬𑀁. 𑀅𑀦𑀻𑀢𑀺𑀓𑀦𑁆𑀢𑀺 𑀈𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀈𑀢𑀺𑀧𑁆𑀧𑀳𑀸𑀦𑀁 𑀈𑀢𑀺𑀯𑀽𑀧𑀲𑀫𑀁 𑀈𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁.

𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻𑀢𑀺. 𑀬𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀦𑀢𑁆𑀣𑀺 𑀉𑀧𑀫𑀸𑀢𑀺 𑀉𑀧𑀫𑀸 𑀦𑀢𑁆𑀣𑀺, 𑀉𑀧𑀦𑀺𑀥𑀸 𑀦𑀢𑁆𑀣𑀺, 𑀲𑀤𑀺𑀲𑀁 𑀦𑀢𑁆𑀣𑀺, 𑀧𑀝𑀺𑀪𑀸𑀕𑁄 𑀦𑀢𑁆𑀣𑀺 𑀦 𑀅𑀢𑁆𑀣𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺. 𑀓𑁆𑀯𑀘𑀻𑀢𑀺 𑀓𑁆𑀯𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻’’𑀢𑀺.

𑁧𑁧𑁩.

𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄;

𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 [𑀦𑀫𑀲𑁆𑀲𑀫𑀸𑀦𑁄𑀯 𑀯𑀲𑁂𑀫𑀺 (𑀲𑀻. 𑀅𑀝𑁆𑀞.) … 𑀯𑀺𑀯𑀲𑀸𑀫𑀺 (𑀲𑁆𑀬𑀸.)] 𑀭𑀢𑁆𑀢𑀺𑀁, 𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀁.

𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯𑀸𑀢𑀺 𑀬𑀣𑀸 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀆𑀮𑁄𑀓𑁂 𑀭𑀽𑀧𑀕𑀢𑀸𑀦𑀺 𑀧𑀲𑁆𑀲𑁂𑀬𑁆𑀬 𑀤𑀓𑁆𑀔𑁂𑀬𑁆𑀬 𑀑𑀮𑁄𑀓𑁂𑀬𑁆𑀬 𑀦𑀺𑀚𑁆𑀛𑀸𑀬𑁂𑀬𑁆𑀬 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀏𑀯𑀫𑁂𑀯𑀸𑀳𑀁 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀫𑀦𑀲𑀸 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺 𑀦𑀺𑀚𑁆𑀛𑀸𑀬𑀸𑀫𑀺 𑀉𑀧𑀧𑀭𑀺𑀓𑁆𑀔𑀸𑀫𑀻𑀢𑀺 𑁋 𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯.

𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄𑀢𑀺 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀫𑀦𑀲𑀸 𑀪𑀸𑀯𑁂𑀦𑁆𑀢𑁄 𑀅𑀧𑁆𑀧𑀫𑀢𑁆𑀢𑁄𑀢𑀺 𑁋 𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄.

𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀦𑁆𑀢𑀺. 𑀦𑀫𑀲𑁆𑀲𑀫𑀸𑀦𑁄𑀢𑀺 𑀓𑀸𑀬𑁂𑀦 𑀯𑀸 𑀦𑀫𑀲𑁆𑀲𑀫𑀸𑀦𑁄, 𑀯𑀸𑀘𑀸𑀬 𑀯𑀸 𑀦𑀫𑀲𑁆𑀲𑀫𑀸𑀦𑁄, 𑀘𑀺𑀢𑁆𑀢𑁂𑀦 𑀯𑀸 𑀦𑀫𑀲𑁆𑀲𑀫𑀸𑀦𑁄, 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀫𑀸𑀦𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀫𑀸𑀦𑁄 𑀲𑀓𑁆𑀓𑀸𑀭𑀫𑀸𑀦𑁄 𑀕𑀭𑀼𑀓𑀸𑀭𑀫𑀸𑀦𑁄 𑀫𑀸𑀦𑀬𑀫𑀸𑀦𑁄 𑀧𑀽𑀚𑀬𑀫𑀸𑀦𑁄 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀺𑀯𑀲𑁂𑀫𑀺 𑀅𑀢𑀺𑀦𑀸𑀫𑁂𑀫𑀺 𑀅𑀢𑀺𑀓𑁆𑀓𑀫𑁂𑀫𑀻𑀢𑀺 𑁋 𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀁.

𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀦𑁆𑀢𑀺 𑀢𑀸𑀬 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀪𑀸𑀯𑁂𑀦𑁆𑀢𑁄 𑀅𑀯𑀺𑀧𑁆𑀧𑀯𑀸𑀲𑁄𑀢𑀺 𑀢𑀁 𑀫𑀜𑁆𑀜𑀸𑀫𑀺, 𑀅𑀯𑀺𑀧𑁆𑀧𑀯𑀼𑀝𑁆𑀞𑁄𑀢𑀺 𑀢𑀁 𑀫𑀜𑁆𑀜𑀸𑀫𑀺 𑀚𑀸𑀦𑀸𑀫𑀺. 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀆𑀚𑀸𑀦𑀸𑀫𑀺 𑀏𑀯𑀁 𑀯𑀺𑀚𑀸𑀦𑀸𑀫𑀺 𑀏𑀯𑀁 𑀧𑀝𑀺𑀯𑀺𑀚𑀸𑀦𑀸𑀫𑀺 𑀏𑀯𑀁 𑀧𑀝𑀺𑀯𑀺𑀚𑁆𑀛𑀸𑀫𑀻𑀢𑀺 𑁋 𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀁. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄;

𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀁, 𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲’’𑀦𑁆𑀢𑀺.

𑁧𑁧𑁪.

𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘, 𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸;

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀺.

𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘𑀸𑀢𑀺. 𑀲𑀤𑁆𑀥𑀸𑀢𑀺 𑀬𑀸 𑀘 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 [𑀲𑀤𑁆𑀥𑀳𑀦𑀸 (𑀓.)] 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄 𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀸𑀩𑀮𑀁. 𑀧𑀻𑀢𑀻𑀢𑀺 𑀬𑀸 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀧𑀻𑀢𑀺 𑀧𑀸𑀫𑁄𑀚𑁆𑀚𑀁 [𑀧𑀸𑀫𑀼𑀚𑁆𑀚𑀁 (𑀲𑁆𑀬𑀸.)] 𑀫𑁄𑀤𑀦𑀸 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀺 𑀢𑀼𑀝𑁆𑀞𑀺 𑀑𑀤𑀕𑁆𑀬𑀁 𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲. 𑀫𑀦𑁄𑀢𑀺 𑀬𑀜𑁆𑀘 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀲𑀢𑀻𑀢𑀺 𑀬𑀸 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀲𑀫𑁆𑀫𑀸𑀲𑀢𑀻𑀢𑀺 𑁋 𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘.

𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀕𑁄𑀢𑀫𑀲𑀸𑀲𑀦𑀸 𑀩𑀼𑀤𑁆𑀥𑀲𑀸𑀲𑀦𑀸 𑀚𑀺𑀦𑀲𑀸𑀲𑀦𑀸 𑀢𑀣𑀸𑀕𑀢𑀲𑀸𑀲𑀦𑀸 𑀅𑀭𑀳𑀦𑁆𑀢𑀲𑀸𑀲𑀦𑀸 𑀦𑀸𑀧𑁂𑀦𑁆𑀢𑀺 𑀦 𑀕𑀘𑁆𑀙𑀦𑁆𑀢𑀺 𑀦 𑀯𑀺𑀚𑀳𑀦𑁆𑀢𑀺 𑀦 𑀯𑀺𑀦𑀸𑀲𑁂𑀦𑁆𑀢𑀻𑀢𑀺 𑁋 𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸.

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄𑀢𑀺. 𑀬𑀁 𑀬𑀁 𑀤𑀺𑀲𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀯𑀚𑀢𑀺 𑀕𑀘𑁆𑀙𑀢𑀺 𑀓𑀫𑀢𑀺 𑀅𑀪𑀺𑀓𑁆𑀓𑀫𑀢𑀺. 𑀪𑀽𑀭𑀺𑀧𑀜𑁆𑀜𑁄𑀢𑀺 𑀪𑀽𑀭𑀺𑀧𑀜𑁆𑀜𑁄 𑀫𑀳𑀸𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄.

𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀻𑀢𑀺 𑀲𑁄 𑀬𑁂𑀦 𑀩𑀼𑀤𑁆𑀥𑁄 𑀢𑁂𑀦 𑀢𑁂𑀦𑁂𑀯 𑀦𑀢𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀺. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘, 𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸;

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀻’’𑀢𑀺.

𑁧𑁧𑁫.

𑀚𑀺𑀡𑁆𑀡𑀲𑁆𑀲 𑀫𑁂 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲, 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀺 𑀢𑀢𑁆𑀣;

𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬 𑀯𑀚𑀸𑀫𑀺 𑀦𑀺𑀘𑁆𑀘𑀁, 𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄.

𑀚𑀺𑀡𑁆𑀡𑀲𑁆𑀲 𑀫𑁂 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲𑀸𑀢𑀺 𑀚𑀺𑀡𑁆𑀡𑀲𑁆𑀲 𑀯𑀼𑀟𑁆𑀠𑀲𑁆𑀲 𑀫𑀳𑀮𑁆𑀮𑀓𑀲𑁆𑀲 𑀅𑀤𑁆𑀥𑀕𑀢𑀲𑁆𑀲 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀲𑁆𑀲. 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲𑀸𑀢𑀺 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲 𑀅𑀧𑁆𑀧𑀣𑀸𑀫𑀓𑀲𑁆𑀲 𑀧𑀭𑀺𑀢𑁆𑀢𑀣𑀸𑀫𑀓𑀲𑁆𑀲𑀸𑀢𑀺 𑁋 𑀚𑀺𑀡𑁆𑀡𑀲𑁆𑀲 𑀫𑁂 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲.

𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀺 𑀢𑀢𑁆𑀣𑀸𑀢𑀺 𑀓𑀸𑀬𑁄 𑀬𑁂𑀦 𑀩𑀼𑀤𑁆𑀥𑁄 𑀢𑁂𑀦 𑀦 𑀧𑀮𑁂𑀢𑀺 𑀦 𑀯𑀚𑀢𑀺 𑀦 𑀕𑀘𑁆𑀙𑀢𑀺 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑁋 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀺 𑀢𑀢𑁆𑀣.

𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬 𑀯𑀚𑀸𑀫𑀺 𑀦𑀺𑀘𑁆𑀘𑀦𑁆𑀢𑀺 𑀲𑀗𑁆𑀓𑀧𑁆𑀧𑀕𑀫𑀦𑁂𑀦 𑀯𑀺𑀢𑀓𑁆𑀓𑀕𑀫𑀦𑁂𑀦 𑀜𑀸𑀡𑀕𑀫𑀦𑁂𑀦 𑀧𑀜𑁆𑀜𑀸𑀕𑀫𑀦𑁂𑀦 𑀩𑀼𑀤𑁆𑀥𑀺𑀕𑀫𑀦𑁂𑀦 𑀯𑀚𑀸𑀫𑀺 𑀕𑀘𑁆𑀙𑀸𑀫𑀺 𑀅𑀢𑀺𑀓𑁆𑀓𑀫𑀸𑀫𑀻𑀢𑀺 𑁋 𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬 𑀯𑀚𑀸𑀫𑀺 𑀦𑀺𑀘𑁆𑀘𑀁.

𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄𑀢𑀺. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄𑀢𑀺 𑀫𑀦𑁄 𑀬𑁂𑀦 𑀩𑀼𑀤𑁆𑀥𑁄 𑀢𑁂𑀦 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀲𑀁𑀬𑀼𑀢𑁆𑀢𑁄𑀢𑀺 𑁋 𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀚𑀺𑀡𑁆𑀡𑀲𑁆𑀲 𑀫𑁂 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲, 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀺 𑀢𑀢𑁆𑀣;

𑀲𑀗𑁆𑀓𑀧𑁆𑀧𑀬𑀦𑁆𑀢𑀸𑀬 𑀯𑀚𑀸𑀫𑀺 𑀦𑀺𑀘𑁆𑀘𑀁, 𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄’’𑀢𑀺.

𑁧𑁧𑁬.

𑀧𑀗𑁆𑀓𑁂 𑀲𑀬𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄, 𑀤𑀻𑀧𑀸 𑀤𑀻𑀧𑀁 𑀉𑀧𑀮𑁆𑀮𑀯𑀺𑀁;

𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

𑀧𑀗𑁆𑀓𑁂 𑀲𑀬𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄𑀢𑀺. 𑀧𑀗𑁆𑀓𑁂 𑀲𑀬𑀸𑀦𑁄𑀢𑀺 𑀓𑀸𑀫𑀧𑀗𑁆𑀓𑁂 𑀓𑀸𑀫𑀓𑀤𑁆𑀤𑀫𑁂 𑀓𑀸𑀫𑀓𑀺𑀮𑁂𑀲𑁂 𑀓𑀸𑀫𑀩𑀴𑀺𑀲𑁂 𑀓𑀸𑀫𑀧𑀭𑀺𑀴𑀸𑀳𑁂 𑀓𑀸𑀫𑀧𑀮𑀺𑀩𑁄𑀥𑁂 𑀲𑁂𑀫𑀸𑀦𑁄 𑀲𑀬𑀫𑀸𑀦𑁄 𑀯𑀲𑀫𑀸𑀦𑁄 𑀆𑀯𑀲𑀫𑀸𑀦𑁄 𑀧𑀭𑀺𑀯𑀲𑀫𑀸𑀦𑁄 [𑀅𑀯𑀲𑁂𑀫𑀸𑀦𑁄 𑀧𑀭𑀺𑀲𑁂𑀫𑀸𑀦𑁄 (𑀲𑁆𑀬𑀸.)] 𑀢𑀺 𑁋 𑀧𑀗𑁆𑀓𑁂 𑀲𑀬𑀸𑀦𑁄. 𑀧𑀭𑀺𑀨𑀦𑁆𑀤𑀫𑀸𑀦𑁄𑀢𑀺 𑀢𑀡𑁆𑀳𑀸𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑁄, 𑀤𑀺𑀝𑁆𑀞𑀺𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑁄, 𑀓𑀺𑀮𑁂𑀲𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑁄, 𑀧𑀬𑁄𑀕𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑁄, 𑀯𑀺𑀧𑀸𑀓𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑁄, 𑀫𑀦𑁄𑀤𑀼𑀘𑁆𑀘𑀭𑀺𑀢𑀨𑀦𑁆𑀤𑀦𑀸𑀬 𑀨𑀦𑁆𑀤𑀫𑀸𑀦𑁄, 𑀭𑀢𑁆𑀢𑁄 𑀭𑀸𑀕𑁂𑀦 𑀨𑀦𑁆𑀤𑀫𑀸𑀦𑁄, 𑀤𑀼𑀝𑁆𑀞𑁄 𑀤𑁄𑀲𑁂𑀦 𑀨𑀦𑁆𑀤𑀫𑀸𑀦𑁄, 𑀫𑀽𑀴𑁆𑀳𑁄 𑀫𑁄𑀳𑁂𑀦 𑀨𑀦𑁆𑀤𑀫𑀸𑀦𑁄, 𑀯𑀺𑀦𑀺𑀩𑀦𑁆𑀥𑁄 𑀫𑀸𑀦𑁂𑀦 𑀨𑀦𑁆𑀤𑀫𑀸𑀦𑁄, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀬𑀸 𑀨𑀦𑁆𑀤𑀫𑀸𑀦𑁄, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑁂𑀦 𑀨𑀦𑁆𑀤𑀫𑀸𑀦𑁄, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀨𑀦𑁆𑀤𑀫𑀸𑀦𑁄, 𑀣𑀸𑀫𑀕𑀢𑁄 𑀅𑀦𑀼𑀲𑀬𑁂𑀳𑀺 𑀨𑀦𑁆𑀤𑀫𑀸𑀦𑁄, 𑀮𑀸𑀪𑁂𑀦 𑀨𑀦𑁆𑀤𑀫𑀸𑀦𑁄, 𑀅𑀮𑀸𑀪𑁂𑀦 𑀨𑀦𑁆𑀤𑀫𑀸𑀦𑁄, 𑀬𑀲𑁂𑀦 𑀨𑀦𑁆𑀤𑀫𑀸𑀦𑁄, 𑀅𑀬𑀲𑁂𑀦 𑀨𑀦𑁆𑀤𑀫𑀸𑀦𑁄, 𑀧𑀲𑀁𑀲𑀸𑀬 𑀨𑀦𑁆𑀤𑀫𑀸𑀦𑁄, 𑀦𑀺𑀦𑁆𑀤𑀸𑀬 𑀨𑀦𑁆𑀤𑀫𑀸𑀦𑁄, 𑀲𑀼𑀔𑁂𑀦 𑀨𑀦𑁆𑀤𑀫𑀸𑀦𑁄, 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑁄, 𑀚𑀸𑀢𑀺𑀬𑀸 𑀨𑀦𑁆𑀤𑀫𑀸𑀦𑁄, 𑀚𑀭𑀸𑀬 𑀨𑀦𑁆𑀤𑀫𑀸𑀦𑁄, 𑀩𑁆𑀬𑀸𑀥𑀺𑀦𑀸 𑀨𑀦𑁆𑀤𑀫𑀸𑀦𑁄, 𑀫𑀭𑀡𑁂𑀦 𑀨𑀦𑁆𑀤𑀫𑀸𑀦𑁄, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀨𑀦𑁆𑀤𑀫𑀸𑀦𑁄, 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑁄, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑁄, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑁄, 𑀫𑀸𑀦𑀼𑀲𑀺𑀓𑁂𑀦 𑀤𑀼𑀓𑁆𑀔𑁂𑀦…𑀧𑁂… 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑁂𑀦 𑀤𑀼𑀓𑁆𑀔𑁂𑀦… 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀧𑀭𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀦… 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀦… 𑀘𑀓𑁆𑀔𑀼𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑁄𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀖𑀸𑀦𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀸𑀬𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑀻𑀲𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀡𑁆𑀡𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀫𑀼𑀔𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀤𑀦𑁆𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀑𑀝𑁆𑀞𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀟𑀸𑀳𑁂𑀦 [𑀤𑀸𑀳𑁂𑀦 (𑀓.) 𑀫𑀳𑀸𑀦𑀺. 𑁧𑁧] … 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑀸𑀬… 𑀯𑀺𑀲𑀽𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦 … 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸… 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬… 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑀧𑀺𑀢𑁆𑀢𑁂𑀦 [𑀮𑁄𑀳𑀺𑀢𑁂𑀦. 𑀧𑀺𑀢𑁆𑀢𑁂𑀦 (𑀲𑁆𑀬𑀸. 𑀓.)] … 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀺𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦 [𑀪𑀕𑀦𑁆𑀤𑀮𑀸𑀬 (𑀲𑁆𑀬𑀸.)] … 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦… 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦… 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬 … 𑀧𑀺𑀧𑀸𑀲𑀸𑀬… 𑀉𑀘𑁆𑀘𑀸𑀭𑁂𑀦… 𑀧𑀲𑁆𑀲𑀸𑀯𑁂𑀦… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀺𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀼𑀢𑁆𑀢𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀥𑀻𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀜𑀸𑀢𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀪𑁄𑀕𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀭𑁄𑀕𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀲𑀻𑀮𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀨𑀦𑁆𑀤𑀫𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄 𑀧𑀯𑁂𑀥𑀫𑀸𑀦𑁄 𑀲𑀫𑁆𑀧𑀯𑁂𑀥𑀫𑀸𑀦𑁄𑀢𑀺 𑁋 𑀧𑀗𑁆𑀓𑁂 𑀲𑀬𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄.

𑀤𑀻𑀧𑀸 𑀤𑀻𑀧𑀁 𑀉𑀧𑀮𑁆𑀮𑀯𑀺𑀦𑁆𑀢𑀺 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀢𑁄 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀢𑁄 𑀕𑀡𑀁 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀸𑀬 𑀧𑀝𑀺𑀧𑀤𑀁 𑀫𑀕𑁆𑀕𑀢𑁄 𑀫𑀕𑁆𑀕𑀁 𑀧𑀮𑁆𑀮𑀯𑀺𑀁 𑀉𑀧𑀮𑁆𑀮𑀯𑀺𑀁 𑀲𑀫𑁆𑀧𑀮𑁆𑀮𑀯𑀺𑀦𑁆𑀢𑀺 𑁋 𑀤𑀻𑀧𑀸 𑀤𑀻𑀧𑀁 𑀉𑀧𑀮𑁆𑀮𑀯𑀺𑀁.

𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀦𑁆𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀅𑀤𑁆𑀤𑀲𑀸𑀲𑀺𑀦𑁆𑀢𑀺 𑀅𑀤𑁆𑀤𑀲𑀁 𑀅𑀤𑁆𑀤𑀓𑁆𑀔𑀺𑀁 𑀅𑀧𑀲𑁆𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺 𑁋 𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁.

𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀦𑁆𑀢𑀺. 𑀑𑀖𑀢𑀺𑀡𑁆𑀡𑀦𑁆𑀢𑀺 𑀪𑀕𑀯𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄, 𑀪𑀯𑁄𑀖𑀁 𑀢𑀺𑀡𑁆𑀡𑁄, 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄, 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄, 𑀲𑀩𑁆𑀩𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄, 𑀲𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀑𑀖𑀢𑀺𑀡𑁆𑀡𑀁. 𑀅𑀦𑀸𑀲𑀯𑀦𑁆𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀢𑁂 𑀆𑀲𑀯𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑀸𑀲𑀯𑀸𑀢𑀺 𑁋 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀧𑀗𑁆𑀓𑁂 𑀲𑀬𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄, 𑀤𑀻𑀧𑀸 𑀤𑀻𑀧𑀁 𑀉𑀧𑀮𑁆𑀮𑀯𑀺𑀁;

𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯’’𑀦𑁆𑀢𑀺.

𑁧𑁧𑁭.

𑀬𑀣𑀸 𑀅𑀳𑀽 𑀯𑀓𑁆𑀓𑀮𑀺 𑀫𑀼𑀢𑁆𑀢𑀲𑀤𑁆𑀥𑁄, 𑀪𑀤𑁆𑀭𑀸𑀯𑀼𑀥𑁄 𑀆𑀴𑀯𑀺𑀕𑁄𑀢𑀫𑁄 𑀘;

𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁, 𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁.

𑀬𑀣𑀸 𑀅𑀳𑀽 𑀯𑀓𑁆𑀓𑀮𑀺 𑀫𑀼𑀢𑁆𑀢𑀲𑀤𑁆𑀥𑁄, 𑀪𑀤𑁆𑀭𑀸𑀯𑀼𑀥𑁄 𑀆𑀴𑀯𑀺𑀕𑁄𑀢𑀫𑁄 𑀘𑀸𑀢𑀺 𑀬𑀣𑀸 𑀯𑀓𑁆𑀓𑀮𑀺𑀢𑁆𑀣𑁂𑀭𑁄 [𑀯𑀓𑁆𑀓𑀮𑀺 (𑀲𑁆𑀬𑀸.)] 𑀲𑀤𑁆𑀥𑁄 𑀲𑀤𑁆𑀥𑀸𑀕𑀭𑀼𑀓𑁄 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄, 𑀬𑀣𑀸 𑀪𑀤𑁆𑀭𑀸𑀯𑀼𑀥𑁄 𑀣𑁂𑀭𑁄 𑀲𑀤𑁆𑀥𑁄 𑀲𑀤𑁆𑀥𑀸𑀕𑀭𑀼𑀓𑁄 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄, 𑀬𑀣𑀸 𑀆𑀴𑀯𑀺𑀕𑁄𑀢𑀫𑁄 𑀣𑁂𑀭𑁄 𑀲𑀤𑁆𑀥𑁄 𑀲𑀤𑁆𑀥𑀸𑀕𑀭𑀼𑀓𑁄 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑁄 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄𑀢𑀺 𑁋 𑀬𑀣𑀸 𑀅𑀳𑀽 𑀯𑀓𑁆𑀓𑀮𑀺 𑀫𑀼𑀢𑁆𑀢𑀲𑀤𑁆𑀥𑁄 𑀪𑀤𑁆𑀭𑀸𑀯𑀼𑀥𑁄 𑀆𑀴𑀯𑀺𑀕𑁄𑀢𑀫𑁄 𑀘.

𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀦𑁆𑀢𑀺 𑀏𑀯𑀫𑁂𑀯 𑀢𑁆𑀯𑀁 𑀲𑀤𑁆𑀥𑀁 𑀫𑀼𑀜𑁆𑀘𑀲𑁆𑀲𑀼 𑀧𑀫𑀼𑀜𑁆𑀘𑀲𑁆𑀲𑀼 𑀲𑀫𑁆𑀧𑀫𑀼𑀜𑁆𑀘𑀲𑁆𑀲𑀼 𑀅𑀥𑀺𑀫𑀼𑀜𑁆𑀘𑀲𑁆𑀲𑀼 𑀑𑀓𑀧𑁆𑀧𑁂𑀳𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀤𑁆𑀥𑀁 𑀫𑀼𑀜𑁆𑀘𑀲𑁆𑀲𑀼 𑀧𑀫𑀼𑀜𑁆𑀘𑀲𑁆𑀲𑀼 𑀲𑀫𑁆𑀧𑀫𑀼𑀜𑁆𑀘𑀲𑁆𑀲𑀼 𑀅𑀥𑀺𑀫𑀼𑀜𑁆𑀘𑀲𑁆𑀲𑀼 𑀑𑀓𑀧𑁆𑀧𑁂𑀳𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀲𑀤𑁆𑀥𑀁 𑀫𑀼𑀜𑁆𑀘𑀲𑁆𑀲𑀼 𑀧𑀫𑀼𑀜𑁆𑀘𑀲𑁆𑀲𑀼 𑀲𑀫𑁆𑀧𑀫𑀼𑀜𑁆𑀘𑀲𑁆𑀲𑀼 𑀅𑀥𑀺𑀫𑀼𑀜𑁆𑀘𑀲𑁆𑀲𑀼 𑀑𑀓𑀧𑁆𑀧𑁂𑀳𑀺… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀤𑁆𑀥𑀁 𑀫𑀼𑀜𑁆𑀘𑀲𑁆𑀲𑀼 𑀧𑀫𑀼𑀜𑁆𑀘𑀲𑁆𑀲𑀼, 𑀲𑀫𑁆𑀧𑀫𑀼𑀜𑁆𑀘𑀲𑁆𑀲𑀼 𑀅𑀥𑀺𑀫𑀼𑀜𑁆𑀘𑀲𑁆𑀲𑀼 𑀑𑀓𑀧𑁆𑀧𑁂𑀳𑀻𑀢𑀺 𑁋 𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁.

𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀦𑁆𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀁 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁, 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀦𑁆𑀢𑀺 𑀢𑁆𑀯𑀁 𑀧𑀸𑀭𑀁 𑀕𑀫𑀺𑀲𑁆𑀲𑀲𑀺, 𑀧𑀸𑀭𑀁 𑀅𑀥𑀺𑀕𑀫𑀺𑀲𑁆𑀲𑀲𑀺, 𑀧𑀸𑀭𑀁 𑀨𑀲𑁆𑀲𑀺𑀲𑁆𑀲𑀲𑀺, 𑀧𑀸𑀭𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀲𑀻𑀢𑀺 𑁋 𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀣𑀸 𑀅𑀳𑀽 𑀯𑀓𑁆𑀓𑀮𑀺 𑀫𑀼𑀢𑁆𑀢𑀲𑀤𑁆𑀥𑁄, 𑀪𑀤𑁆𑀭𑀸𑀯𑀼𑀥𑁄 𑀆𑀴𑀯𑀺𑀕𑁄𑀢𑀫𑁄 𑀘;

𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁,

𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭’’𑀦𑁆𑀢𑀺.

𑁧𑁧𑁮.

𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄;

𑀯𑀺𑀯𑀝𑀘𑁆𑀙𑀤𑁄 [𑀯𑀺𑀯𑀝𑀘𑁆𑀙𑀤𑀦𑁄 (𑀓.) 𑀲𑀤𑁆𑀤𑀦𑀻𑀢𑀺𑀧𑀤𑀫𑀸𑀮𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀲𑀫𑁆𑀩𑀼𑀤𑁆𑀥𑁄, 𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸 [𑀧𑀝𑀺𑀪𑀸𑀡𑀯𑀸 (𑀲𑁆𑀬𑀸.)] .

𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀻𑀢𑀺 𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀲𑀤𑁆𑀤𑀳𑀸𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀑𑀓𑀧𑁆𑀧𑁂𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀥𑀺𑀫𑀼𑀘𑁆𑀘𑀸𑀫𑀺; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀲𑀤𑁆𑀤𑀳𑀸𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀑𑀓𑀧𑁆𑀧𑁂𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀥𑀺𑀫𑀼𑀘𑁆𑀘𑀸𑀫𑀺; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀲𑀤𑁆𑀤𑀳𑀸𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀑𑀓𑀧𑁆𑀧𑁂𑀫𑀺, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀥𑀺𑀫𑀼𑀘𑁆𑀘𑀸𑀫𑀻𑀢𑀺 𑁋 𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺.

𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄𑀢𑀺. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸𑀦 𑀉𑀕𑁆𑀕𑀳𑁂𑀢𑁆𑀯𑀸𑀦 𑀉𑀧𑀥𑀸𑀭𑀬𑀺𑀢𑁆𑀯𑀸𑀦 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀦𑀸𑀢𑀺 𑁋 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄.

𑀯𑀺𑀯𑀝𑀘𑁆𑀙𑀤𑁄 𑀲𑀫𑁆𑀩𑀼𑀤𑁆𑀥𑁄𑀢𑀺. 𑀙𑀤𑀦𑀦𑁆𑀢𑀺 𑀧𑀜𑁆𑀘 𑀙𑀤𑀦𑀸𑀦𑀺 𑁋 𑀢𑀡𑁆𑀳𑀸𑀙𑀤𑀦𑀁, 𑀤𑀺𑀝𑁆𑀞𑀺𑀙𑀤𑀦𑀁, 𑀓𑀺𑀮𑁂𑀲𑀙𑀤𑀦𑀁, 𑀤𑀼𑀘𑁆𑀘𑀭𑀺𑀢𑀙𑀤𑀦𑀁, 𑀅𑀯𑀺𑀚𑁆𑀚𑀸𑀙𑀤𑀦𑀁. 𑀢𑀸𑀦𑀺 𑀙𑀤𑀦𑀸𑀦𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀺𑀯𑀝𑀸𑀦𑀺 𑀯𑀺𑀤𑁆𑀥𑀁𑀲𑀺𑀢𑀸𑀦𑀺 𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀯𑀺𑀯𑀝𑀘𑁆𑀙𑀤𑁄. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺 𑁋 𑀯𑀺𑀯𑀝𑀘𑁆𑀙𑀤𑁄 𑀲𑀫𑁆𑀩𑀼𑀤𑁆𑀥𑁄.

𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸𑀢𑀺. 𑀅𑀔𑀺𑀮𑁄𑀢𑀺 𑀭𑀸𑀕𑁄 𑀔𑀺𑀮𑁄, 𑀤𑁄𑀲𑁄 𑀔𑀺𑀮𑁄, 𑀫𑁄𑀳𑁄 𑀔𑀺𑀮𑁄, 𑀓𑁄𑀥𑁄 𑀔𑀺𑀮𑁄, 𑀉𑀧𑀦𑀸𑀳𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀔𑀺𑀮𑀸. 𑀢𑁂 𑀔𑀺𑀮𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀔𑀺𑀮𑁄.

𑀧𑀝𑀺𑀪𑀸𑀦𑀯𑀸𑀢𑀺 𑀢𑀬𑁄 𑀧𑀝𑀺𑀪𑀸𑀦𑀯𑀦𑁆𑀢𑁄 𑁋 𑀧𑀭𑀺𑀬𑀢𑁆𑀢𑀺 𑀧𑀝𑀺𑀪𑀸𑀦𑀯𑀸, 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸, 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸. 𑀓𑀢𑀫𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑀲𑁆𑀲 𑀩𑀼𑀤𑁆𑀥𑀯𑀘𑀦𑀁 [𑀧𑀓𑀢𑀺𑀬𑀸 (𑀓.)] 𑀧𑀭𑀺𑀬𑀸𑀧𑀼𑀢𑀁 [𑀧𑀭𑀺𑀬𑀸𑀧𑀼𑀝𑀁 (𑀲𑁆𑀬𑀸. 𑀓.)] 𑀳𑁄𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀢𑀺 [𑀧𑀝𑀺𑀪𑀸𑀬𑀢𑀺 (𑀓.)] 𑁋 𑀅𑀬𑀁 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸.

𑀓𑀢𑀫𑁄 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑁄 𑀧𑀭𑀺𑀧𑀼𑀘𑁆𑀙𑀺𑀢𑀸 𑀳𑁄𑀢𑀺 𑀅𑀢𑁆𑀣𑁂 𑀘 𑀜𑀸𑀬𑁂 𑀘 𑀮𑀓𑁆𑀔𑀡𑁂 𑀘 𑀓𑀸𑀭𑀡𑁂 𑀘 𑀞𑀸𑀦𑀸𑀞𑀸𑀦𑁂 𑀘. 𑀢𑀲𑁆𑀲 𑀧𑀭𑀺𑀧𑀼𑀘𑁆𑀙𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀢𑀺 𑁋 𑀅𑀬𑀁 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸.

𑀓𑀢𑀫𑁄 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑀲𑁆𑀲 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄, 𑀙 𑀅𑀪𑀺𑀜𑁆𑀜𑀸𑀬𑁄. 𑀢𑀲𑁆𑀲 𑀅𑀢𑁆𑀣𑁄 𑀜𑀸𑀢𑁄, 𑀥𑀫𑁆𑀫𑁄 𑀜𑀸𑀢𑁄, 𑀦𑀺𑀭𑀼𑀢𑁆𑀢𑀺 𑀜𑀸𑀢𑀸. 𑀅𑀢𑁆𑀣𑁂 𑀜𑀸𑀢𑁂 𑀅𑀢𑁆𑀣𑁄 𑀧𑀝𑀺𑀪𑀸𑀢𑀺, 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁄 𑀧𑀝𑀺𑀪𑀸𑀢𑀺, 𑀦𑀺𑀭𑀼𑀢𑁆𑀢𑀺𑀬𑀸 𑀜𑀸𑀢𑀸𑀬 𑀦𑀺𑀭𑀼𑀢𑁆𑀢𑀺 𑀧𑀝𑀺𑀪𑀸𑀢𑀺. 𑀇𑀫𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀪𑀕𑀯𑀸 𑀇𑀫𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀧𑀭𑀺𑀬𑀢𑁆𑀢𑀺 𑀦𑀢𑁆𑀣𑀺, 𑀧𑀭𑀺𑀧𑀼𑀘𑁆𑀙𑀸 𑀦𑀢𑁆𑀣𑀺, 𑀅𑀥𑀺𑀕𑀫𑁄 𑀦𑀢𑁆𑀣𑀺, 𑀓𑀺𑀁 𑀢𑀲𑁆𑀲 𑀧𑀝𑀺𑀪𑀸𑀬𑀺𑀲𑁆𑀲𑀢𑀻𑀢𑀺 𑁋 𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄;

𑀯𑀺𑀯𑀝𑀘𑁆𑀙𑀤𑁄 𑀲𑀫𑁆𑀩𑀼𑀤𑁆𑀥𑁄, 𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸’’𑀢𑀺.

𑁧𑁧𑁯.

𑀅𑀥𑀺𑀤𑁂𑀯𑁂 [𑀅𑀢𑀺𑀤𑁂𑀯𑁂 (𑀓.)] 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀁 𑀯𑁂𑀤𑀺 𑀧𑀭𑁄𑀧𑀭𑀁 [𑀧𑀭𑁄𑀯𑀭𑀁 (𑀲𑀻. 𑀅𑀝𑁆𑀞.)] ;

𑀧𑀜𑁆𑀳𑀸𑀦𑀦𑁆𑀢𑀓𑀭𑁄 𑀲𑀢𑁆𑀣𑀸, 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀁.

𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬𑀸𑀢𑀺. 𑀤𑁂𑀯𑀸𑀢𑀺 𑀢𑀬𑁄 𑀤𑁂𑀯𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸 [𑀲𑀫𑁆𑀫𑀪𑀺𑀤𑁂𑀯𑀸 (𑀲𑁆𑀬𑀸.)], 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀓𑀢𑀫𑁂 𑀲𑀫𑁆𑀫𑀼𑀢𑀺𑀤𑁂𑀯𑀸? 𑀲𑀫𑁆𑀫𑀼𑀢𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄 [𑀓𑀢𑀫𑁂 𑀲𑀫𑁆𑀫𑀢𑀺𑀤𑁂𑀯𑀸 𑀭𑀸𑀚𑀸𑀦𑁄 (𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺] 𑀘 𑀭𑀸𑀚𑀓𑀼𑀫𑀸𑀭𑁄 𑀘 𑀤𑁂𑀯𑀺𑀬𑁄 𑀘. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸. 𑀓𑀢𑀫𑁂 𑀉𑀧𑀧𑀢𑁆𑀢𑀺𑀤𑁂𑀯𑀸? 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸, 𑀬𑁂 𑀘 𑀤𑁂𑀯𑀸 𑀢𑀤𑀼𑀢𑁆𑀢𑀭𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸. 𑀓𑀢𑀫𑁂 𑀯𑀺𑀲𑀼𑀤𑁆𑀥𑀺𑀤𑁂𑀯𑀸? 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀢𑀣𑀸𑀕𑀢𑀸 𑀢𑀣𑀸𑀕𑀢𑀲𑀸𑀯𑀓𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸, 𑀬𑁂 𑀘 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀪𑀕𑀯𑀸 𑀲𑀫𑁆𑀫𑀼𑀢𑀺𑀤𑁂𑀯𑁂 𑀅𑀥𑀺𑀤𑁂𑀯𑀸𑀢𑀺 𑀅𑀪𑀺𑀜𑁆𑀜𑀸𑀬 𑀉𑀧𑀧𑀢𑁆𑀢𑀺𑀤𑁂𑀯𑁂 𑀅𑀥𑀺𑀤𑁂𑀯𑀸𑀢𑀺 𑀅𑀪𑀺𑀜𑁆𑀜𑀸𑀬, 𑀯𑀺𑀲𑀼𑀤𑁆𑀥𑀺𑀤𑁂𑀯𑁂 𑀅𑀥𑀺𑀤𑁂𑀯𑀸𑀢𑀺 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬.

𑀲𑀩𑁆𑀩𑀁 𑀯𑁂𑀤𑀺 𑀧𑀭𑁄𑀧𑀭𑀦𑁆𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀥𑀺𑀤𑁂𑀯𑀓𑀭𑁂 𑀥𑀫𑁆𑀫𑁂 𑀯𑁂𑀤𑀺 𑀅𑀜𑁆𑀜𑀸𑀲𑀺 𑀅𑀨𑀲𑁆𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀓𑀢𑀫𑁂 𑀅𑀢𑁆𑀢𑀦𑁄 𑀅𑀥𑀺𑀤𑁂𑀯𑀓𑀭𑀸 𑀥𑀫𑁆𑀫𑀸? 𑀲𑀫𑁆𑀫𑀸𑀧𑀝𑀺𑀧𑀤𑀸 𑀅𑀦𑀼𑀮𑁄𑀫𑀧𑀝𑀺𑀧𑀤𑀸 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀅𑀢𑁆𑀢𑀦𑁄 𑀅𑀥𑀺𑀤𑁂𑀯𑀓𑀭𑀸 𑀥𑀫𑁆𑀫𑀸.

𑀓𑀢𑀫𑁂 𑀧𑀭𑁂𑀲𑀁 𑀅𑀥𑀺𑀤𑁂𑀯𑀓𑀭𑀸 𑀥𑀫𑁆𑀫𑀸? 𑀲𑀫𑁆𑀫𑀸𑀧𑀝𑀺𑀧𑀤𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀭𑁂𑀲𑀁 𑀅𑀥𑀺𑀤𑁂𑀯𑀓𑀭𑀸 𑀥𑀫𑁆𑀫𑀸. 𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀥𑀺𑀤𑁂𑀯𑀓𑀭𑁂 𑀥𑀫𑁆𑀫𑁂 𑀯𑁂𑀤𑀺 𑀅𑀜𑁆𑀜𑀸𑀲𑀺 𑀅𑀨𑀲𑁆𑀲𑀺 𑀧𑀝𑀺𑀯𑀺𑀚𑁆𑀛𑀻𑀢𑀺 𑁋 𑀲𑀩𑁆𑀩𑀁 𑀯𑁂𑀤𑀺 𑀧𑀭𑁄𑀧𑀭𑀁.

𑀧𑀜𑁆𑀳𑀸𑀦𑀦𑁆𑀢𑀓𑀭𑁄 𑀲𑀢𑁆𑀣𑀸𑀢𑀺 𑀪𑀕𑀯𑀸 𑀧𑀸𑀭𑀸𑀬𑀦𑀺𑀓𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑁄 𑀧𑀭𑀺𑀬𑀦𑁆𑀢𑀓𑀭𑁄 𑀧𑀭𑀺𑀘𑁆𑀙𑁂𑀤𑀓𑀭𑁄 𑀧𑀭𑀺𑀯𑀝𑀼𑀫𑀓𑀭𑁄; 𑀲𑀪𑀺𑀬𑀧𑀜𑁆𑀳𑀸𑀦𑀁 [𑀧𑀭𑀺𑀲𑀧𑀜𑁆𑀳𑀸𑀦𑀁 (𑀲𑁆𑀬𑀸.), 𑀧𑀺𑀗𑁆𑀕𑀺𑀬𑀧𑀜𑁆𑀳𑀸𑀦𑀁 (𑀓.)] 𑀅𑀦𑁆𑀢𑀓𑀭𑁄 𑀧𑀭𑀺𑀬𑀦𑁆𑀢𑀓𑀭𑁄 𑀧𑀭𑀺𑀘𑁆𑀙𑁂𑀤𑀓𑀭𑁄 𑀧𑀭𑀺𑀯𑀝𑀼𑀫𑀓𑀭𑁄; 𑀲𑀓𑁆𑀓𑀧𑀜𑁆𑀳𑀸𑀦𑀁…𑀧𑁂… 𑀲𑀼𑀬𑀸𑀫𑀧𑀜𑁆𑀳𑀸𑀦𑀁… 𑀪𑀺𑀓𑁆𑀔𑀼𑀧𑀜𑁆𑀳𑀸𑀦𑀁… 𑀪𑀺𑀓𑁆𑀔𑀼𑀦𑀻𑀧𑀜𑁆𑀳𑀸𑀦𑀁… 𑀉𑀧𑀸𑀲𑀓𑀧𑀜𑁆𑀳𑀸𑀦𑀁… 𑀉𑀧𑀸𑀲𑀺𑀓𑀸𑀧𑀜𑁆𑀳𑀸𑀦𑀁… 𑀭𑀸𑀚𑀧𑀜𑁆𑀳𑀸𑀦𑀁… 𑀔𑀢𑁆𑀢𑀺𑀬𑀧𑀜𑁆𑀳𑀸𑀦𑀁… 𑀩𑁆𑀭𑀸𑀳𑁆𑀫𑀡𑀧𑀜𑁆𑀳𑀸𑀦𑀁… 𑀯𑁂𑀲𑁆𑀲𑀧𑀜𑁆𑀳𑀸𑀦𑀁… 𑀲𑀼𑀤𑁆𑀤𑀧𑀜𑁆𑀳𑀸𑀦𑀁… 𑀤𑁂𑀯𑀧𑀜𑁆𑀳𑀸𑀦𑀁… 𑀩𑁆𑀭𑀳𑁆𑀫𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑁄 𑀧𑀭𑀺𑀬𑀦𑁆𑀢𑀓𑀭𑁄 𑀧𑀭𑀺𑀘𑁆𑀙𑁂𑀤𑀓𑀭𑁄 𑀧𑀭𑀺𑀯𑀝𑀼𑀫𑀓𑀭𑁄𑀢𑀺 𑁋 𑀧𑀜𑁆𑀳𑀸𑀦𑀦𑁆𑀢𑀓𑀭𑁄. 𑀲𑀢𑁆𑀣𑀸𑀢𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. 𑀬𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀘𑁄𑀭𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀯𑀸𑀴𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀣𑀸𑀭𑁂𑀢𑀺 [𑀦𑀺𑀢𑁆𑀢𑀸𑀭𑁂𑀢𑀺 (𑀲𑁆𑀬𑀸. 𑀓.)] 𑀧𑀢𑀸𑀭𑁂𑀢𑀺, 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀚𑀸𑀢𑀺𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀚𑀭𑀸𑀓𑀦𑁆𑀢𑀸𑀭𑀁…𑀧𑁂… 𑀩𑁆𑀬𑀸𑀥𑀺𑀓𑀦𑁆𑀢𑀸𑀭𑀁… 𑀫𑀭𑀡𑀓𑀦𑁆𑀢𑀸𑀭𑀁… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀭𑀸𑀕𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀤𑁄𑀲𑀓𑀦𑁆𑀢𑀸𑀭𑀁… 𑀫𑁄𑀳𑀓𑀦𑁆𑀢𑀸𑀭𑀁… 𑀫𑀸𑀦𑀓𑀦𑁆𑀢𑀸𑀭𑀁… 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁… 𑀓𑀺𑀮𑁂𑀲𑀓𑀦𑁆𑀢𑀸𑀭𑀁… 𑀤𑀼𑀘𑁆𑀘𑀭𑀺𑀢𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀭𑀸𑀕𑀕𑀳𑀦𑀁 𑀢𑀸𑀭𑁂𑀢𑀺, 𑀤𑁄𑀲𑀕𑀳𑀦𑀁 𑀢𑀸𑀭𑁂𑀢𑀺, 𑀫𑁄𑀳𑀕𑀳𑀦𑀁… 𑀤𑀺𑀝𑁆𑀞𑀺𑀕𑀳𑀦𑀁… 𑀓𑀺𑀮𑁂𑀲𑀕𑀳𑀦𑀁… 𑀤𑀼𑀘𑁆𑀘𑀭𑀺𑀢𑀕𑀳𑀦𑀁 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀣𑀸𑀭𑁂𑀢𑀺 𑀧𑀢𑀸𑀭𑁂𑀢𑀺; 𑀔𑁂𑀫𑀦𑁆𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑁂𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄.

𑀅𑀣 𑀯𑀸, 𑀪𑀕𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑀢𑀸 𑀧𑀲𑀸𑀤𑁂𑀢𑀸𑀢𑀺, 𑀏𑀯𑀁 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. 𑀅𑀣 𑀯𑀸, 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸𑀢𑀺, 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄𑀢𑀺 𑁋 𑀧𑀜𑁆𑀳𑀸𑀦𑀦𑁆𑀢𑀓𑀭𑁄 𑀲𑀢𑁆𑀣𑀸.

𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀦𑁆𑀢𑀺 𑀲𑀓𑀗𑁆𑀔𑀸 𑀆𑀕𑀦𑁆𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀮𑁆𑀮𑁂𑀔𑀸 𑀆𑀕𑀦𑁆𑀢𑁆𑀯𑀸 𑀦𑀺𑀮𑁆𑀮𑁂𑀔𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀤𑁆𑀯𑁂𑀴𑁆𑀳𑀓𑀸 𑀆𑀕𑀦𑁆𑀢𑁆𑀯𑀸 𑀦𑀺𑀤𑁆𑀯𑁂𑀴𑀳𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀯𑀺𑀘𑀺𑀓𑀺𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀭𑀸𑀕𑀸 𑀆𑀕𑀦𑁆𑀢𑁆𑀯𑀸 𑀯𑀻𑀢𑀭𑀸𑀕𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀤𑁄𑀲𑀸 𑀆𑀕𑀦𑁆𑀢𑁆𑀯𑀸 𑀯𑀻𑀢𑀤𑁄𑀲𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀫𑁄𑀳𑀸 𑀆𑀕𑀦𑁆𑀢𑁆𑀯𑀸 𑀯𑀻𑀢𑀫𑁄𑀳𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀓𑀺𑀮𑁂𑀲𑀸 𑀆𑀕𑀦𑁆𑀢𑁆𑀯𑀸 𑀦𑀺𑀓𑁆𑀓𑀺𑀮𑁂𑀲𑀸 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑁋 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀁. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀁 𑀯𑁂𑀤𑀺 𑀧𑀭𑁄𑀧𑀭𑀁;

𑀧𑀜𑁆𑀳𑀸𑀦𑀦𑁆𑀢𑀓𑀭𑁄 𑀲𑀢𑁆𑀣𑀸, 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢’’𑀦𑁆𑀢𑀺.

𑁧𑁨𑁦.

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺;

𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺 𑀦 𑀫𑁂𑀢𑁆𑀣 𑀓𑀗𑁆𑀔𑀸, 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀁.

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀅𑀲𑀁𑀳𑀻𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀲𑀁𑀳𑀻𑀭𑀦𑁆𑀢𑀺 𑀭𑀸𑀕𑁂𑀦 𑀤𑁄𑀲𑁂𑀦 𑀫𑁄𑀳𑁂𑀦 𑀓𑁄𑀥𑁂𑀦 𑀉𑀧𑀦𑀸𑀳𑁂𑀦 𑀫𑀓𑁆𑀔𑁂𑀦 𑀧𑀴𑀸𑀲𑁂𑀦 𑀇𑀲𑁆𑀲𑀸𑀬 𑀫𑀘𑁆𑀙𑀭𑀺𑀬𑁂𑀦 𑀫𑀸𑀬𑀸𑀬 𑀲𑀸𑀞𑁂𑀬𑁆𑀬𑁂𑀦 𑀣𑀫𑁆𑀪𑁂𑀦 𑀲𑀸𑀭𑀫𑁆𑀪𑁂𑀦 𑀫𑀸𑀦𑁂𑀦 𑀅𑀢𑀺𑀫𑀸𑀦𑁂𑀦 𑀫𑀤𑁂𑀦 𑀧𑀫𑀸𑀤𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺 𑀲𑀩𑁆𑀩𑀸𑀲𑀯𑁂𑀳𑀺 𑀲𑀩𑁆𑀩𑀤𑀭𑀣𑁂𑀳𑀺 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀅𑀲𑀁𑀳𑀸𑀭𑀺𑀬𑀁 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑁋 𑀅𑀲𑀁𑀳𑀻𑀭𑀁.

𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀅𑀲𑀁𑀓𑀼𑀧𑁆𑀧𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀦𑀺𑀩𑁆𑀩𑀸𑀦𑀲𑁆𑀲 [𑀬𑀲𑁆𑀲 (𑀲𑁆𑀬𑀸.)] 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀦𑀢𑁆𑀣𑀺, 𑀦 𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 [𑀢𑀲𑁆𑀲 𑀅𑀜𑁆𑀜𑀤𑀢𑁆𑀣𑀼 (𑀲𑁆𑀬𑀸.)] 𑀧𑀜𑁆𑀜𑀸𑀬𑀢𑀺. 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑁋 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁.

𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀻𑀢𑀺. 𑀬𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀦𑀢𑁆𑀣𑀺 𑀉𑀧𑀫𑀸𑀢𑀺 𑀉𑀧𑀫𑀸 𑀦𑀢𑁆𑀣𑀺, 𑀉𑀧𑀦𑀺𑀥𑀸 𑀦𑀢𑁆𑀣𑀺, 𑀲𑀤𑀺𑀲𑀁 𑀦𑀢𑁆𑀣𑀺, 𑀧𑀝𑀺𑀪𑀸𑀕𑁄 𑀦𑀢𑁆𑀣𑀺, 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺. 𑀓𑁆𑀯𑀘𑀻𑀢𑀺 𑀓𑁆𑀯𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑁋 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺.

𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺 𑀦 𑀫𑁂𑀢𑁆𑀣 𑀓𑀗𑁆𑀔𑀸𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁 𑀦𑀺𑀲𑁆𑀲𑀁𑀲𑀬𑀯𑀘𑀦𑀁 𑀦𑀺𑀓𑁆𑀓𑀗𑁆𑀔𑀯𑀘𑀦𑀁 𑀅𑀤𑁆𑀯𑁂𑀚𑁆𑀛𑀯𑀘𑀦𑀁 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀁 𑀦𑀺𑀬𑁄𑀕𑀯𑀘𑀦𑀁 𑀅𑀧𑀡𑁆𑀡𑀓𑀯𑀘𑀦𑀁 𑀅𑀯𑀺𑀭𑀤𑁆𑀥𑀯𑀘𑀦𑀁 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 𑁋 𑀅𑀤𑁆𑀥𑀸𑀢𑀺. 𑀕𑀫𑀺𑀲𑁆𑀲𑀸𑀫𑀻𑀢𑀺 𑀕𑀫𑀺𑀲𑁆𑀲𑀸𑀫𑀺 𑀅𑀥𑀺𑀕𑀫𑀺𑀲𑁆𑀲𑀸𑀫𑀺 𑀨𑀲𑁆𑀲𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑁋 𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺. 𑀦 𑀫𑁂𑀢𑁆𑀣 𑀓𑀗𑁆𑀔𑀸𑀢𑀺. 𑀏𑀢𑁆𑀣𑀸𑀢𑀺 𑀦𑀺𑀩𑁆𑀩𑀸𑀦𑁂 𑀓𑀗𑁆𑀔𑀸 𑀦𑀢𑁆𑀣𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀦𑀢𑁆𑀣𑀺, 𑀤𑁆𑀯𑁂𑀴𑁆𑀳𑀓𑀁 𑀦𑀢𑁆𑀣𑀺, 𑀲𑀁𑀲𑀬𑁄 𑀦𑀢𑁆𑀣𑀺, 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄𑀢𑀺 𑁋 𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺 𑀦 𑀫𑁂𑀢𑁆𑀣 𑀓𑀗𑁆𑀔𑀸.

𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀫𑀁 𑀥𑀸𑀭𑁂𑀳𑀻𑀢𑀺 𑀏𑀯𑀁 𑀫𑀁 𑀉𑀧𑀮𑀓𑁆𑀔𑁂𑀳𑀺. 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀧𑁄𑀡𑀁 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀁 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑀦𑁆𑀢𑀺 𑁋 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 𑀣𑁂𑀭𑁄 𑀧𑀺𑀗𑁆𑀕𑀺𑀬𑁄 𑁋

‘‘𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺;

𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺 𑀦 𑀫𑁂𑀢𑁆𑀣 𑀓𑀗𑁆𑀔𑀸, 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢’’𑀦𑁆𑀢𑀺.

𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀸𑀭𑀲𑀫𑁄.

𑀧𑀸𑀭𑀸𑀬𑀦𑀯𑀕𑁆𑀕𑁄 𑀲𑀫𑀢𑁆𑀢𑁄.

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁄

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀧𑀞𑀫𑀯𑀕𑁆𑀕𑁄

𑁧𑁨𑁧.

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀲𑀩𑁆𑀩𑁂𑀲𑀽𑀢𑀺. 𑀪𑀽𑀢𑁂𑀲𑀽𑀢𑀺 𑀪𑀽𑀢𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸 𑀘 𑀣𑀸𑀯𑀭𑀸 𑀘. 𑀢𑀲𑀸𑀢𑀺 𑀬𑁂𑀲𑀁 𑀢𑀲𑀺𑀢𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀅𑀧𑁆𑀧𑀳𑀻𑀦𑀸. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸? 𑀢𑁂 𑀢𑀲𑀦𑁆𑀢𑀺 𑀉𑀢𑁆𑀢𑀲𑀦𑁆𑀢𑀺 𑀧𑀭𑀺𑀢𑀲𑀦𑁆𑀢𑀺 𑀪𑀸𑀲𑀦𑁆𑀢𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸. 𑀣𑀸𑀯𑀭𑀸𑀢𑀺 𑀬𑁂𑀲𑀁 𑀢𑀲𑀺𑀢𑀢𑀡𑁆𑀳𑀸 𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀧𑀳𑀻𑀦𑀸. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸? 𑀢𑁂 𑀦 𑀢𑀲𑀦𑁆𑀢𑀺 𑀦 𑀉𑀢𑁆𑀢𑀲𑀦𑁆𑀢𑀺 𑀦 𑀧𑀭𑀺𑀢𑀲𑀦𑁆𑀢𑀺 𑀦 𑀪𑀸𑀬𑀦𑁆𑀢𑀺 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸. 𑀤𑀡𑁆𑀟𑀦𑁆𑀢𑀺 𑀢𑀬𑁄 𑀤𑀡𑁆𑀟𑀸 𑁋 𑀓𑀸𑀬𑀤𑀡𑁆𑀟𑁄 𑀯𑀘𑀻𑀤𑀡𑁆𑀟𑁄 𑀫𑀦𑁄𑀤𑀡𑁆𑀟𑁄. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀡𑁆𑀟𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀡𑁆𑀟𑁄, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀡𑁆𑀟𑁄. 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀤𑀡𑁆𑀟𑀁 𑀦𑀺𑀥𑀸𑀬 𑀦𑀺𑀤𑀳𑀺𑀢𑁆𑀯𑀸.

𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀦𑁆𑀢𑀺 𑀏𑀓𑀫𑁂𑀓𑀫𑁆𑀧𑀺 𑀲𑀢𑁆𑀢𑀁 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀦𑁆𑀤𑀼𑀬𑀸 [𑀅𑀭𑀼𑀬𑀸 (𑀲𑁆𑀬𑀸.), 𑀅𑀤𑁆𑀤𑀼𑀬𑀸 (𑀓.)] 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀯𑀺𑀳𑁂𑀞𑀬𑀦𑁆𑀢𑁄, 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀦𑁆𑀤𑀼𑀬𑀸 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀯𑀺𑀳𑁂𑀞𑀬𑀦𑁆𑀢𑁄𑀢𑀺 𑁋 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁.

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄; 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀲𑀳𑀸𑀬𑀦𑁆𑀢𑀺 𑀲𑀳𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼, 𑀕𑀫𑀦𑀁 𑀨𑀸𑀲𑀼, 𑀕𑀫𑀦𑀸𑀕𑀫𑀦𑀁 𑀨𑀸𑀲𑀼, 𑀞𑀸𑀦𑀁 𑀨𑀸𑀲𑀼, 𑀦𑀺𑀲𑀚𑁆𑀚𑀦𑀁 𑀨𑀸𑀲𑀼, 𑀲𑀬𑀦𑀁 [𑀦𑀺𑀧𑀚𑁆𑀚𑀦𑀁 (𑀲𑁆𑀬𑀸.)] 𑀨𑀸𑀲𑀼, 𑀆𑀮𑀧𑀦𑀁 𑀨𑀸𑀲𑀼, 𑀲𑀮𑁆𑀮𑀧𑀦𑀁 𑀨𑀸𑀲𑀼, 𑀉𑀮𑁆𑀮𑀧𑀦𑀁 𑀨𑀸𑀲𑀼, 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀧𑀼𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑁂𑀬𑁆𑀬 𑀦 𑀲𑀸𑀤𑀺𑀬𑁂𑀬𑁆𑀬 𑀦 𑀧𑀢𑁆𑀣𑀬𑁂𑀬𑁆𑀬 𑀦 𑀧𑀺𑀳𑀬𑁂𑀬𑁆𑀬 𑀦𑀸𑀪𑀺𑀚𑀧𑁆𑀧𑁂𑀬𑁆𑀬, 𑀓𑀼𑀢𑁄 𑀫𑀺𑀢𑁆𑀢𑀁 𑀯𑀸 𑀲𑀦𑁆𑀤𑀺𑀝𑁆𑀞𑀁 𑀯𑀸 𑀲𑀫𑁆𑀪𑀢𑁆𑀢𑀁 𑀯𑀸 𑀲𑀳𑀸𑀬𑀁 𑀯𑀸 𑀇𑀘𑁆𑀙𑁂𑀬𑁆𑀬 [𑀇𑀘𑁆𑀙𑀺𑀲𑁆𑀲𑀢𑀺 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀧𑀤𑁂𑀲𑀼 𑀅𑀦𑀸𑀕𑀢𑀯𑀺𑀪𑀢𑁆𑀢𑀺𑀬𑀸] 𑀲𑀸𑀤𑀺𑀬𑁂𑀬𑁆𑀬 𑀧𑀢𑁆𑀣𑀬𑁂𑀬𑁆𑀬 𑀧𑀺𑀳𑀬𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑁋 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁.

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀏𑀓𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 [𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁯𑁧] 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄? 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀫𑀸𑀭𑀁 𑀲𑀲𑁂𑀦𑀓𑀁 𑀦𑀫𑀼𑀘𑀺𑀁 𑀓𑀡𑁆𑀳𑀁 𑀧𑀫𑀢𑁆𑀢𑀩𑀦𑁆𑀥𑀼𑀁 𑀯𑀺𑀥𑀫𑁂𑀢𑁆𑀯𑀸 𑀘 𑀢𑀡𑁆𑀳𑀸𑀚𑀸𑀮𑀺𑀦𑀺𑀁 𑀯𑀺𑀲𑀭𑀺𑀢𑀁 𑀯𑀺𑀲𑀢𑁆𑀢𑀺𑀓𑀁 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀻𑀅𑀓𑀸𑀲𑀺 𑀅𑀦𑀪𑀸𑀯𑀁𑀕𑀫𑁂𑀲𑀺.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄? 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄. 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄? 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺.

𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄? 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁. 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀫𑀕𑁆𑀕𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀜𑀸𑀡𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀩𑀼𑀚𑁆𑀛𑀺, ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀩𑀼𑀚𑁆𑀛𑀺, ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀩𑀼𑀚𑁆𑀛𑀺, ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀩𑀼𑀚𑁆𑀛𑀺, ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀩𑀼𑀚𑁆𑀛𑀺, ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀩𑀼𑀚𑁆𑀛𑀺; ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺; ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀆𑀲𑀯𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺; 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘…𑀧𑁂… 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑀼𑀚𑁆𑀛𑀺.

𑀅𑀣 𑀯𑀸, 𑀬𑀁 𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀦𑀼𑀩𑀼𑀚𑁆𑀛𑀺𑀢𑀩𑁆𑀩𑀁 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀨𑀲𑁆𑀲𑀺𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀺 𑀅𑀦𑀼𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀺 𑀲𑀫𑁆𑀩𑀼𑀚𑁆𑀛𑀺 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀻𑀢𑀺 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑁋 𑀏𑀓𑁄.

𑀘𑀭𑁂𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀆𑀬𑀢𑀦𑀘𑀭𑀺𑀬𑀸, 𑀲𑀢𑀺𑀘𑀭𑀺𑀬𑀸, 𑀲𑀫𑀸𑀥𑀺𑀘𑀭𑀺𑀬𑀸, 𑀜𑀸𑀡𑀘𑀭𑀺𑀬𑀸, 𑀫𑀕𑁆𑀕𑀘𑀭𑀺𑀬𑀸, 𑀧𑀢𑁆𑀢𑀺𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸. 𑀇𑀭𑀺𑀬𑀸𑀧𑀣𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼. 𑀆𑀬𑀢𑀦𑀘𑀭𑀺𑀬𑀸𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. 𑀲𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀜𑀸𑀡𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀫𑀕𑁆𑀕𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼. 𑀧𑀢𑁆𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼. 𑀮𑁄𑀓𑀢𑁆𑀣𑀘𑀭𑀺𑀬𑀸𑀢𑀺 𑀢𑀣𑀸𑀕𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀤𑁂𑀲𑀢𑁄 𑀲𑀸𑀯𑀓𑁂𑀲𑀼. 𑀇𑀭𑀺𑀬𑀸𑀧𑀣𑀘𑀭𑀺𑀬𑀸 𑀘 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁, 𑀆𑀬𑀢𑀦𑀘𑀭𑀺𑀬𑀸 𑀘 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁, 𑀲𑀢𑀺𑀘𑀭𑀺𑀬𑀸 𑀘 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁, 𑀲𑀫𑀸𑀥𑀺𑀘𑀭𑀺𑀬𑀸 𑀘 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁, 𑀜𑀸𑀡𑀘𑀭𑀺𑀬𑀸 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁, 𑀫𑀕𑁆𑀕𑀘𑀭𑀺𑀬𑀸 𑀘 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁, 𑀧𑀢𑁆𑀢𑀺𑀘𑀭𑀺𑀬𑀸 𑀘 𑀅𑀥𑀺𑀕𑀢𑀨𑀮𑀸𑀦𑀁, 𑀮𑁄𑀓𑀢𑁆𑀣𑀘𑀭𑀺𑀬𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀤𑁂𑀲𑀢𑁄 𑀲𑀸𑀯𑀓𑀸𑀦𑀁. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄. 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀬 𑀘𑀭𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀸𑀧𑁂𑀦𑁆𑀢𑀻𑀢𑀺 𑁋 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑁋 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀺. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀤𑀲𑁆𑀲𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀅𑀪𑀺𑀭𑁄𑀧𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀧𑀭𑀺𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸𑀬, 𑀲𑀫𑀼𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀯𑁄𑀤𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀧𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀉𑀧𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀢𑀺𑀬𑀸, 𑀅𑀯𑀺𑀓𑁆𑀔𑁂𑀧𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀬𑀣𑀸 𑀔𑀕𑁆𑀕𑀲𑁆𑀲 𑀦𑀸𑀫 𑀯𑀺𑀲𑀸𑀡𑀁 𑀏𑀓𑀁 𑀳𑁄𑀢𑀺 𑀅𑀤𑀼𑀢𑀺𑀬𑀁, 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀓𑁆𑀓𑀧𑁆𑀧𑁄 𑀢𑀲𑁆𑀲𑀤𑀺𑀲𑁄 𑀢𑀧𑁆𑀧𑀝𑀺𑀪𑀸𑀕𑁄. 𑀬𑀣𑀸 𑀅𑀢𑀺𑀮𑁄𑀡𑀁 𑀯𑀼𑀘𑁆𑀘𑀢𑀺 𑀮𑁄𑀡𑀓𑀧𑁆𑀧𑁄, 𑀅𑀢𑀺𑀢𑀺𑀢𑁆𑀢𑀓𑀁 𑀯𑀼𑀘𑁆𑀘𑀢𑀺 𑀢𑀺𑀢𑁆𑀢𑀓𑀧𑁆𑀧𑁄, 𑀅𑀢𑀺𑀫𑀥𑀼𑀭𑀁 𑀯𑀼𑀘𑁆𑀘𑀢𑀺 𑀫𑀥𑀼𑀭𑀓𑀧𑁆𑀧𑁄, 𑀅𑀢𑀺𑀉𑀡𑁆𑀳𑀁 𑀯𑀼𑀘𑁆𑀘𑀢𑀺 𑀅𑀕𑁆𑀕𑀺𑀓𑀧𑁆𑀧𑁄, 𑀅𑀢𑀺𑀲𑀻𑀢𑀮𑀁 𑀯𑀼𑀘𑁆𑀘𑀢𑀺 𑀳𑀺𑀫𑀓𑀧𑁆𑀧𑁄, 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄 𑀯𑀼𑀘𑁆𑀘𑀢𑀺 𑀲𑀫𑀼𑀤𑁆𑀤𑀓𑀧𑁆𑀧𑁄, 𑀫𑀳𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀲𑀸𑀯𑀓𑁄 𑀯𑀼𑀘𑁆𑀘𑀢𑀺 𑀲𑀢𑁆𑀣𑀼𑀓𑀧𑁆𑀧𑁄𑀢𑀺; 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀢𑁆𑀣 𑀢𑀓𑁆𑀓𑀧𑁆𑀧𑁄 𑀢𑀲𑁆𑀲𑀤𑀺𑀲𑁄 𑀢𑀧𑁆𑀧𑀝𑀺𑀪𑀸𑀕𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀫𑀼𑀢𑁆𑀢𑀩𑀦𑁆𑀥𑀦𑁄 𑀲𑀫𑁆𑀫𑀸 𑀮𑁄𑀓𑁂 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁨.

𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸𑀢𑀺. 𑀲𑀁𑀲𑀕𑁆𑀕𑀸𑀢𑀺 𑀤𑁆𑀯𑁂 𑀲𑀁𑀲𑀕𑁆𑀕𑀸 𑁋 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀘 𑀲𑀯𑀦𑀲𑀁𑀲𑀕𑁆𑀕𑁄 𑀘. 𑀓𑀢𑀫𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄? 𑀇𑀥𑁂𑀓𑀘𑁆𑀘𑁄 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑁋 𑀓𑁂𑀲𑀸 𑀯𑀸 𑀲𑁄𑀪𑀦𑀸 [𑀲𑁄𑀪𑀡𑀸 (𑀲𑁆𑀬𑀸.)] 𑀫𑀼𑀔𑀁 𑀯𑀸 𑀲𑁄𑀪𑀦𑀁 𑀅𑀓𑁆𑀔𑀻 𑀯𑀸 𑀲𑁄𑀪𑀦𑀸 𑀓𑀡𑁆𑀡𑀸 𑀯𑀸 𑀲𑁄𑀪𑀦𑀸 𑀦𑀸𑀲𑀸 𑀯𑀸 𑀲𑁄𑀪𑀦𑀸 𑀑𑀝𑁆𑀞𑀸 𑀯𑀸 𑀲𑁄𑀪𑀦𑀸 𑀤𑀦𑁆𑀢𑀸 𑀯𑀸 𑀲𑁄𑀪𑀦𑀸 𑀫𑀼𑀔𑀁 𑀯𑀸 𑀲𑁄𑀪𑀦𑀁 𑀕𑀻𑀯𑀸 𑀯𑀸 𑀲𑁄𑀪𑀦𑀸 𑀣𑀦𑀸 𑀯𑀸 𑀲𑁄𑀪𑀦𑀸 𑀉𑀭𑀁 𑀯𑀸 𑀲𑁄𑀪𑀦𑀁 𑀉𑀤𑀭𑀁 𑀯𑀸 𑀲𑁄𑀪𑀦𑀁 𑀓𑀝𑀺 𑀯𑀸 𑀲𑁄𑀪𑀦𑀸 𑀊𑀭𑀽 𑀯𑀸 𑀲𑁄𑀪𑀦𑀸 𑀚𑀗𑁆𑀖𑀸 𑀯𑀸 𑀲𑁄𑀪𑀦𑀸 𑀳𑀢𑁆𑀣𑀸 𑀯𑀸 𑀲𑁄𑀪𑀦𑀸 𑀧𑀸𑀤𑀸 𑀯𑀸 𑀲𑁄𑀪𑀦𑀸 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀲𑁄𑀪𑀦𑀸 𑀦𑀔𑀸 𑀯𑀸 𑀲𑁄𑀪𑀦𑀸𑀢𑀺. 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀪𑀺𑀧𑀢𑁆𑀣𑁂𑀢𑀺 𑀅𑀦𑀼𑀧𑁆𑀧𑀸𑀤𑁂𑀢𑀺 [𑀅𑀦𑀼𑀲𑁆𑀲𑀭𑀢𑀺 (𑀓.)] 𑀅𑀦𑀼𑀩𑀦𑁆𑀥𑀢𑀺 𑀭𑀸𑀕𑀩𑀦𑁆𑀥𑀦𑀁 𑁋 𑀅𑀬𑀁 𑀤𑀲𑁆𑀲𑀦𑀲𑀁𑀲𑀕𑁆𑀕𑁄.

𑀓𑀢𑀫𑁄 𑀲𑀯𑀦𑀲𑀁𑀲𑀕𑁆𑀕𑁄? 𑀇𑀥𑁂𑀓𑀘𑁆𑀘𑁄 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀓𑀼𑀫𑀸𑀭𑀻 𑀯𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺. 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀪𑀺𑀧𑀢𑁆𑀣𑁂𑀢𑀺 𑀅𑀦𑀼𑀧𑁆𑀧𑀸𑀤𑁂𑀢𑀺 𑀅𑀦𑀼𑀩𑀦𑁆𑀥𑀢𑀺 𑀭𑀸𑀕𑀩𑀦𑁆𑀥𑀦𑀁 𑁋 𑀅𑀬𑀁 𑀲𑀯𑀦𑀲𑀁𑀲𑀕𑁆𑀕𑁄.

𑀲𑁆𑀦𑁂𑀳𑀸𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀲𑁆𑀦𑁂𑀳𑁄? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 [𑀲𑀻𑀫𑀓𑀢𑀁 𑀫𑀭𑀺𑀬𑀸𑀤𑀺𑀓𑀢𑀁 (𑀲𑁆𑀬𑀸.)] 𑀑𑀥𑀺𑀓𑀢𑀁 𑀧𑀭𑀺𑀬𑀦𑁆𑀢𑀺𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 ‘‘𑀇𑀤𑀁 𑀫𑀫, 𑀏𑀢𑀁 𑀫𑀫, 𑀏𑀢𑁆𑀢𑀓𑀁 𑀫𑀫, 𑀏𑀢𑁆𑀢𑀸𑀯𑀢𑀸 𑀫𑀫’’. 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀬𑀸𑀯𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄.

𑀓𑀢𑀫𑁄 𑀤𑀺𑀝𑁆𑀞𑀺𑀲𑁆𑀦𑁂𑀳𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 [𑀧𑀢𑀺𑀝𑁆𑀞𑀸𑀳𑁄 (𑀓.)] 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄.

𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸𑀢𑀺 𑀤𑀲𑁆𑀲𑀦𑀲𑀁𑀲𑀕𑁆𑀕𑀧𑀘𑁆𑀘𑀬𑀸 𑀘 𑀲𑀯𑀦𑀲𑀁𑀲𑀕𑁆𑀕𑀧𑀘𑁆𑀘𑀬𑀸 𑀘 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘 𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑁋 𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸.

𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻𑀢𑀺. 𑀲𑁆𑀦𑁂𑀳𑁄𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄. 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻𑀢𑀺 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 [𑀯𑀺𑀮𑁄𑀧𑀫𑁆𑀧𑀺 (𑀲𑁆𑀬𑀸.) 𑀧𑀲𑁆𑀲 𑀫𑀳𑀸𑀦𑀺. 𑁧𑁭𑁦] 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺. 𑀢𑀫𑁂𑀦𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺 𑁋 ‘‘𑀅𑀬𑀁, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻. 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀢𑀁 𑀧𑀭𑀺𑀪𑀸𑀲𑀢𑀺. 𑀲𑁄 𑀧𑀭𑀺𑀪𑀸𑀲𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 [𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 (𑀲𑁆𑀬𑀸.)] 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀩𑀦𑁆𑀥𑀸𑀧𑁂𑀢𑀺 𑁋 𑀅𑀦𑁆𑀤𑀼𑀩𑀦𑁆𑀥𑀦𑁂𑀦 𑀯𑀸 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀯𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀯𑀸 𑀯𑁂𑀢𑁆𑀢𑀩𑀦𑁆𑀥𑀦𑁂𑀦 𑀯𑀸 𑀮𑀢𑀸𑀩𑀦𑁆𑀥𑀦𑁂𑀦 𑀯𑀸 𑀧𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀧𑀭𑀺𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀕𑀸𑀫𑀩𑀦𑁆𑀥𑀦𑁂𑀦 𑀯𑀸 𑀦𑀺𑀕𑀫𑀩𑀦𑁆𑀥𑀦𑁂𑀦 𑀯𑀸 𑀭𑀝𑁆𑀞𑀩𑀦𑁆𑀥𑀦𑁂𑀦 𑀯𑀸 𑀚𑀦𑀧𑀤𑀩𑀦𑁆𑀥𑀦𑁂𑀦 𑀯𑀸, 𑀅𑀦𑁆𑀢𑀫𑀲𑁄 𑀲𑀯𑀘𑀦𑀻𑀬𑀫𑁆𑀧𑀺 𑀓𑀭𑁄𑀢𑀺 𑁋 ‘‘𑀦 𑀢𑁂 𑀮𑀩𑁆𑀪𑀸 𑀇𑀢𑁄 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺. 𑀲𑁄 𑀩𑀦𑁆𑀥𑀦𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀢𑀲𑁆𑀲𑁂𑀯 [𑀢𑀲𑁆𑀲 (𑀲𑁆𑀬𑀸.)] 𑀥𑀦𑀁 𑀆𑀳𑀭𑀸𑀧𑁂𑀢𑀺 𑁋 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸. 𑀲𑁄 𑀥𑀦𑀚𑀸𑀦𑀺𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 [𑀯𑀺𑀯𑀺𑀥𑀸𑀦𑀺 𑀓𑀫𑁆𑀫𑀓𑀭𑀡𑀸𑀦𑀺 (𑀓.)] 𑀓𑀸𑀭𑀸𑀧𑁂𑀢𑀺 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀢𑀺, 𑀅𑀟𑁆𑀠𑀤𑀡𑁆𑀟𑁂𑀳𑀺𑀧𑀺 𑀢𑀸𑀴𑁂𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 [𑀏𑀭𑀓𑀯𑀝𑁆𑀝𑀺𑀓𑀫𑁆𑀧𑀺 (𑀲𑁆𑀬𑀸. 𑀓.) 𑀧𑀲𑁆𑀲 𑀫. 𑀦𑀺. 𑁧.𑁧𑁬𑁯] 𑀓𑀭𑁄𑀢𑀺, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀺𑀓𑀫𑁆𑀧𑀺 (𑀓.)] 𑀓𑀭𑁄𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀢𑀺. 𑀲𑁄 𑀓𑀫𑁆𑀫𑀓𑀸𑀭𑀡𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁. 𑀭𑀸𑀚𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀤𑀡𑁆𑀟𑀸𑀦𑀁 𑀇𑀲𑁆𑀲𑀭𑁄.

𑀲𑁄 𑀲𑀓𑁂𑀦 𑀓𑀫𑁆𑀫𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺 [𑀓𑀸𑀭𑁂𑀦𑁆𑀢𑀺 (𑀲𑁆𑀬𑀸. 𑀓.) 𑀧𑀲𑁆𑀲 𑀫. 𑀦𑀺. 𑁩.𑁨𑁬𑁭] 𑁋 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀫𑀚𑁆𑀛𑁂 𑀉𑀭𑀲𑁆𑀫𑀺𑀁 𑀕𑀫𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 [𑀢𑀺𑀧𑁆𑀧𑀸 (𑀲𑁆𑀬𑀸.)] 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀲𑀁𑀯𑁂𑀲𑁂𑀢𑁆𑀯𑀸 [𑀲𑀁𑀯𑁂𑀲𑀺𑀢𑁆𑀯𑀸 (𑀲𑁆𑀬𑀸. 𑀓.) 𑀧𑀲𑁆𑀲 𑀫. 𑀦𑀺. 𑁩.𑁨𑁬𑁭] 𑀓𑀼𑀞𑀸𑀭𑀻𑀳𑀺 [𑀓𑀼𑀥𑀸𑀭𑀻𑀳𑀺 (𑀲𑁆𑀬𑀸. 𑀓.)] 𑀢𑀘𑁆𑀙𑀦𑁆𑀢𑀺…𑀧𑁂… 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑀦𑁆𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀆𑀤𑀺𑀢𑁆𑀢𑀸𑀬 𑀧𑀣𑀯𑀺𑀬𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 [𑀲𑀜𑁆𑀚𑁄𑀢𑀺𑀪𑀽𑀢𑀸𑀬 (𑀲𑁆𑀬𑀸.)] 𑀲𑀸𑀭𑁂𑀦𑁆𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀦𑁆𑀢𑀺𑀧𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀁 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀦𑁆𑀢𑀺 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀢𑀺. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀲𑁄 𑀔𑁄 𑀧𑀦 𑀫𑀳𑀸𑀦𑀺𑀭𑀬𑁄 𑁋

𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

𑀓𑀤𑀭𑀺𑀬𑀸𑀢𑀧𑀦𑀸 [𑀓𑀤𑀭𑀺𑀬𑀸 𑀢𑀸𑀧𑀦𑀸 (𑀓.) 𑀫𑀳𑀸𑀦𑀺. 𑁧𑁭𑁦] 𑀖𑁄𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 𑀤𑀼𑀭𑀸𑀲𑀤𑀸;

𑀮𑁄𑀫𑀳𑀁𑀲𑀦𑀭𑀽𑀧𑀸 𑀘, 𑀪𑁂𑀲𑁆𑀫𑀸 𑀧𑀝𑀺𑀪𑀬𑀸 𑀤𑀼𑀔𑀸.

𑀧𑀼𑀭𑀢𑁆𑀣𑀺𑀫𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀧𑀘𑁆𑀙𑀺𑀫𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀧𑀘𑁆𑀙𑀺𑀫𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀧𑀼𑀭𑀺𑀫𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀤𑀓𑁆𑀔𑀺𑀡𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀉𑀢𑁆𑀢𑀭𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀤𑀓𑁆𑀔𑀺𑀡𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀳𑁂𑀝𑁆𑀞𑀢𑁄 𑀘 𑀲𑀫𑀼𑀝𑁆𑀞𑀸𑀬, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀪𑀬𑀸𑀦𑀓𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀙𑀤𑀦𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺.

𑀙𑀤𑀦𑀫𑁆𑀳𑀸 𑀲𑀫𑀼𑀝𑁆𑀞𑀸𑀬, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀪𑀬𑀸𑀦𑀓𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀪𑀽𑀫𑀺𑀬𑀁 𑀧𑀝𑀺𑀳𑀜𑁆𑀜𑀢𑀺.

𑀅𑀬𑁄𑀓𑀧𑀸𑀮𑀫𑀸𑀤𑀺𑀢𑁆𑀢𑀁, 𑀲𑀦𑁆𑀢𑀢𑁆𑀢𑀁 𑀚𑀮𑀺𑀢𑀁 𑀬𑀣𑀸;

𑀏𑀯𑀁 𑀅𑀯𑀻𑀘𑀺𑀦𑀺𑀭𑀬𑁄, 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀲𑁆𑀲𑀢𑁄.

𑀢𑀢𑁆𑀣 𑀲𑀢𑁆𑀢𑀸 𑀫𑀳𑀸𑀮𑀼𑀤𑁆𑀤𑀸, 𑀫𑀳𑀸𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄;

𑀅𑀘𑁆𑀘𑀦𑁆𑀢𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀘𑁆𑀘𑀦𑁆𑀢𑀺 𑀦 𑀘 𑀫𑀺𑀬𑁆𑀬𑀭𑁂 [𑀫𑀻𑀬𑀭𑁂 (𑀓.)].

𑀚𑀸𑀢𑀯𑁂𑀤𑀲𑀫𑁄 𑀓𑀸𑀬𑁄, 𑀢𑁂𑀲𑀁 𑀦𑀺𑀭𑀬𑀯𑀸𑀲𑀺𑀦𑀁;

𑀧𑀲𑁆𑀲 𑀓𑀫𑁆𑀫𑀸𑀦𑀁 𑀤𑀴𑁆𑀳𑀢𑁆𑀢𑀁, 𑀦 𑀪𑀲𑁆𑀫𑀸 𑀳𑁄𑀢𑀺 𑀦𑀧𑀺 𑀫𑀲𑀺.

𑀧𑀼𑀭𑀢𑁆𑀣𑀺𑀫𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀧𑀘𑁆𑀙𑀺𑀫𑀁;

𑀉𑀢𑁆𑀢𑀭𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀤𑀓𑁆𑀔𑀺𑀡𑀁.

𑀬𑀁 𑀬𑀁 𑀤𑀺𑀲𑀁 𑀧𑀥𑀸𑀯𑀦𑁆𑀢𑀺, 𑀢𑀁 𑀢𑀁 𑀤𑁆𑀯𑀸𑀭𑀁 𑀧𑀺𑀥𑀻𑀬𑀢𑀺;

𑀅𑀪𑀺𑀦𑀺𑀓𑁆𑀔𑀫𑀺𑀢𑀸𑀲𑀸 𑀢𑁂, 𑀲𑀢𑁆𑀢𑀸 𑀫𑁄𑀓𑁆𑀔𑀕𑀯𑁂𑀲𑀺𑀦𑁄.

𑀦 𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑀼𑀁, 𑀮𑀪𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑀸;

𑀢𑁂𑀲𑀜𑁆𑀘 𑀧𑀸𑀧𑀓𑀫𑁆𑀫𑀦𑁆𑀢𑀁, 𑀅𑀯𑀺𑀧𑀓𑁆𑀓𑀁 𑀓𑀢𑀁 𑀩𑀳𑀼𑀦𑁆𑀢𑀺.

𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀬𑀸𑀦𑀺 𑀘 𑀦𑁂𑀭𑀬𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀫𑀸𑀦𑀼𑀲𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺, 𑀢𑀸𑀦𑀺 𑀓𑀼𑀢𑁄 𑀚𑀸𑀢𑀸𑀦𑀺 𑀓𑀼𑀢𑁄 𑀲𑀜𑁆𑀚𑀸𑀢𑀸𑀦𑀺 𑀓𑀼𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀼𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀼𑀢𑁄 𑀧𑀸𑀢𑀼𑀪𑀽𑀢𑀸𑀦𑀺? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑁋 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺.

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀲𑁆𑀦𑁂𑀳𑁄𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄. 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁩.

𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 [𑀧𑀝𑀺𑀩𑀦𑁆𑀥𑀘𑀺𑀢𑁆𑀢𑁄 (𑀓.)] ;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 [𑀲𑀦𑁆𑀥𑀯𑁂 (𑀓.)] 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺. 𑀫𑀺𑀢𑁆𑀢𑀸𑀢𑀺 𑀤𑁆𑀯𑁂 𑀫𑀺𑀢𑁆𑀢𑀸 𑁋 𑀅𑀕𑀸𑀭𑀺𑀓𑀫𑀺𑀢𑁆𑀢𑁄 𑀘 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄 [𑀧𑀩𑁆𑀩𑀚𑀺𑀢𑀫𑀺𑀢𑁆𑀢𑁄 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀘. 𑀓𑀢𑀫𑁄 𑀅𑀕𑀸𑀭𑀺𑀓𑀫𑀺𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀤𑀼𑀤𑁆𑀤𑀤𑀁 𑀤𑀤𑀸𑀢𑀺, 𑀤𑀼𑀘𑁆𑀘𑀚𑀁 𑀘𑀚𑀢𑀺, 𑀤𑀼𑀓𑁆𑀓𑀭𑀁 𑀓𑀭𑁄𑀢𑀺, 𑀤𑀼𑀓𑁆𑀔𑀫𑀁 𑀔𑀫𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀺 [𑀧𑀭𑀺𑀕𑀼𑀬𑁆𑀳𑀢𑀺 (𑀲𑁆𑀬𑀸. 𑀓.)], 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀺, 𑀚𑀻𑀯𑀺𑀢𑀫𑁆𑀧𑀺𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺, 𑀔𑀻𑀡𑁂 𑀦𑀸𑀢𑀺𑀫𑀜𑁆𑀜𑀢𑀺 𑁋 𑀅𑀬𑀁 𑀅𑀕𑀸𑀭𑀺𑀓𑀫𑀺𑀢𑁆𑀢𑁄.

𑀓𑀢𑀫𑁄 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄? 𑀇𑀥 𑀪𑀺𑀓𑁆𑀔𑀼 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄 𑀘 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘 𑀅𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀢𑀺 𑀅𑀥𑀺𑀲𑀻𑀮𑁂 𑀲𑀫𑀸𑀤𑀧𑁂𑀢𑀺, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑁂 𑀲𑀫𑀸𑀤𑀧𑁂𑀢𑀺, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁…𑀧𑁂… 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁… 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑁂 𑀲𑀫𑀸𑀤𑀧𑁂𑀢𑀺 𑁋 𑀅𑀬𑀁 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄.

𑀲𑀼𑀳𑀚𑁆𑀚𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼 𑀕𑀫𑀦𑀁 𑀨𑀸𑀲𑀼 𑀞𑀸𑀦𑀁 𑀨𑀸𑀲𑀼 𑀦𑀺𑀲𑀚𑁆𑀚𑀦𑀁 [𑀦𑀺𑀲𑀚𑁆𑀚𑀸 (𑀓.)] 𑀨𑀸𑀲𑀼 𑀲𑀬𑀦𑀁 𑀨𑀸𑀲𑀼 𑀆𑀮𑀧𑀦𑀁 𑀨𑀸𑀲𑀼 𑀲𑀮𑁆𑀮𑀧𑀦𑀁 𑀨𑀸𑀲𑀼 𑀉𑀮𑁆𑀮𑀧𑀦𑀁 𑀨𑀸𑀲𑀼 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀳𑀸𑀧𑁂𑀢𑀺 𑀅𑀢𑁆𑀣𑀦𑁆𑀢𑀺 𑀫𑀺𑀢𑁆𑀢𑁂 𑀘 𑀲𑀼𑀳𑀚𑁆𑀚𑁂 𑀘 𑀲𑀦𑁆𑀤𑀺𑀝𑁆𑀞𑁂 𑀘 𑀲𑀫𑁆𑀪𑀢𑁆𑀢𑁂 𑀘 𑀲𑀳𑀸𑀬𑁂 𑀘 𑀅𑀦𑀼𑀓𑀫𑁆𑀧𑀫𑀸𑀦𑁄 𑀅𑀦𑀼𑀧𑁂𑀓𑁆𑀔𑀫𑀸𑀦𑁄 𑀅𑀦𑀼𑀕𑀡𑁆𑀳𑀫𑀸𑀦𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀧𑀭𑀢𑁆𑀣𑀫𑁆𑀧𑀺 𑀉𑀪𑀬𑀢𑁆𑀣𑀫𑁆𑀧𑀺 𑀳𑀸𑀧𑁂𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀅𑀢𑁆𑀣𑀁 𑀳𑀸𑀧𑁂𑀢𑀺, 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀢𑁆𑀣𑀁 𑀳𑀸𑀧𑁂𑀢𑀺, 𑀧𑀭𑀫𑀢𑁆𑀣𑀫𑁆𑀧𑀺 𑀳𑀸𑀧𑁂𑀢𑀺 𑀧𑀳𑀸𑀧𑁂𑀢𑀺 𑀧𑀭𑀺𑀳𑀸𑀧𑁂𑀢𑀺 𑀧𑀭𑀺𑀥𑀁𑀲𑁂𑀢𑀺 𑀧𑀭𑀺𑀯𑀚𑁆𑀚𑁂𑀢𑀺 [𑀧𑀭𑀺𑀲𑀚𑁆𑀚𑁂𑀢𑀺 (𑀲𑁆𑀬𑀸.)] 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑁋 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀳𑀸𑀧𑁂𑀢𑀺 𑀅𑀢𑁆𑀣𑀁.

𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀯𑀸 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀓𑀣𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺? 𑀢𑀼𑀫𑁆𑀳𑁂 𑀫𑁂 𑀩𑀳𑀽𑀧𑀓𑀸𑀭𑀸, 𑀅𑀳𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀮𑀪𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀬𑀫𑁆𑀧𑀺 [𑀬𑁂𑀧𑀺 (𑀓.) 𑀏𑀯𑀁 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁫𑁧] 𑀫𑁂 𑀅𑀜𑁆𑀜𑁂 𑀤𑀸𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀫𑀜𑁆𑀜𑀦𑁆𑀢𑀺 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂 𑀲𑀫𑁆𑀧𑀲𑁆𑀲𑀦𑁆𑀢𑀸. 𑀬𑀫𑁆𑀧𑀺 𑀫𑁂 𑀧𑁄𑀭𑀸𑀡𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀁 𑀦𑀸𑀫𑀕𑁄𑀢𑁆𑀢𑀁, 𑀢𑀫𑁆𑀧𑀺 𑀫𑁂 𑀅𑀦𑁆𑀢𑀭𑀳𑀺𑀢𑀁. 𑀢𑀼𑀫𑁆𑀳𑁂𑀳𑀺 𑀅𑀳𑀁 𑀜𑀸𑀬𑀸𑀫𑀺 𑁋 𑀅𑀲𑀼𑀓𑀲𑁆𑀲 𑀓𑀼𑀮𑀼𑀧𑀓𑁄, 𑀅𑀲𑀼𑀓𑀸𑀬 𑀓𑀼𑀮𑀼𑀧𑀓𑁄𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺.

𑀓𑀣𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺? 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄, 𑀢𑀼𑀫𑁆𑀳𑁂 𑀫𑀁 𑀆𑀕𑀫𑁆𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸; 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑁂𑀲𑀁 𑀤𑁂𑀫𑀺, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀫𑀺, 𑀉𑀧𑁄𑀲𑀣𑀁 𑀆𑀘𑀺𑀓𑁆𑀔𑀸𑀫𑀺, 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀫𑀺. 𑀅𑀣 𑀧𑀦 𑀢𑀼𑀫𑁆𑀳𑁂 𑀫𑀁 𑀉𑀚𑁆𑀛𑀺𑀢𑁆𑀯𑀸 [𑀧𑀭𑀺𑀘𑁆𑀘𑀚𑀺𑀢𑁆𑀯𑀸 (𑀲𑁆𑀬𑀸.)] 𑀅𑀜𑁆𑀜𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣𑀸𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀻𑀢𑀺 𑁋 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄.

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀪𑀬𑀦𑁆𑀢𑀺 𑀚𑀸𑀢𑀺𑀪𑀬𑀁 𑀚𑀭𑀸𑀪𑀬𑀁 𑀩𑁆𑀬𑀸𑀥𑀺𑀪𑀬𑀁 𑀫𑀭𑀡𑀪𑀬𑀁 𑀭𑀸𑀚𑀪𑀬𑀁 𑀘𑁄𑀭𑀪𑀬𑀁 𑀅𑀕𑁆𑀕𑀺𑀪𑀬𑀁 𑀉𑀤𑀓𑀪𑀬𑀁 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀧𑀭𑀸𑀦𑀼𑀯𑀸𑀤𑀪𑀬𑀁 𑀤𑀡𑁆𑀟𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀊𑀫𑀺𑀪𑀬𑀁 𑀓𑀼𑀫𑁆𑀪𑀺𑀮𑀪𑀬𑀁 𑀆𑀯𑀝𑁆𑀝𑀪𑀬𑀁 𑀲𑀼𑀲𑀼𑀫𑀸𑀭𑀪𑀬𑀁 [𑀲𑀼𑀁𑀲𑀼𑀫𑀸𑀭𑀪𑀬𑀁 (𑀲𑁆𑀬𑀸.)] 𑀆𑀚𑀻𑀯𑀺𑀓𑀪𑀬𑀁 𑀅𑀲𑀺𑀮𑁄𑀓𑀪𑀬𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀁 𑀫𑀤𑀦𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄. 𑀲𑀦𑁆𑀣𑀯𑁂𑀢𑀺 𑀤𑁆𑀯𑁂 𑀲𑀦𑁆𑀣𑀯𑀸 𑁋 𑀢𑀡𑁆𑀳𑀸𑀲𑀦𑁆𑀣𑀯𑁄 𑀘 𑀤𑀺𑀝𑁆𑀞𑀺𑀲𑀦𑁆𑀣𑀯𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑀦𑁆𑀣𑀯𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑀦𑁆𑀣𑀯𑁄. 𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄𑀢𑀺 𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁪.

𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑀓𑁆𑀓𑀴𑀻𑀭𑁄𑀯 [𑀯𑀁𑀲𑁂 𑀓𑀴𑀻𑀭𑁄𑀯 (𑀓.)] 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄𑀢𑀺 𑀯𑀁𑀲𑁄 𑀯𑀼𑀘𑁆𑀘𑀢𑀺 𑀯𑁂𑀴𑀼𑀕𑀼𑀫𑁆𑀩𑁄. 𑀬𑀣𑀸 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀧𑁄𑀭𑀸𑀡𑀓𑀸 𑀯𑀁𑀲𑀸 𑀲𑀢𑁆𑀢𑀸 [𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀓𑀡𑁆𑀝𑀓𑀸 𑀚𑀝𑀺𑀢𑀸 𑀲𑀁𑀲𑀺𑀩𑁆𑀩𑀺𑀢𑀸 (𑀲𑁆𑀬𑀸.)] 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸, 𑀏𑀯𑀫𑁂𑀯 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀺𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 𑀲𑀗𑁆𑀕𑁄 𑀧𑀗𑁆𑀓𑁄 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸 𑀲𑀼𑀢𑁆𑀢𑀁 𑀯𑀺𑀲𑀝𑀸 𑀆𑀬𑀽𑀳𑀦𑀻 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺 𑀯𑀦𑀁 𑀯𑀦𑀣𑁄 𑀲𑀦𑁆𑀣𑀯𑁄 𑀲𑀺𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼 𑀆𑀲𑀸 𑀆𑀲𑀻𑀲𑀦𑀸 𑀆𑀲𑀻𑀲𑀺𑀢𑀢𑁆𑀢𑀁 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸 𑀮𑀸𑀪𑀸𑀲𑀸 𑀥𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀯𑀺𑀲𑀬𑁄 𑀫𑀸𑀭𑀦𑀺𑀯𑀸𑀲𑁄 𑀫𑀸𑀭𑀩𑀦𑁆𑀥𑀦𑀁 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁.

𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀸𑀮𑀸 𑀯𑀸 𑀧𑀦 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀓𑀼𑀮𑁂 𑀕𑀡𑁂 𑀆𑀯𑀸𑀲𑁂 𑀮𑀸𑀪𑁂 𑀬𑀲𑁂 𑀧𑀲𑀁𑀲𑀸𑀬 𑀲𑀼𑀔𑁂 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀲𑁂𑀦𑀸𑀲𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂 𑀓𑀸𑀫𑀥𑀸𑀢𑀼𑀬𑀸 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂 𑀲𑀜𑁆𑀜𑀸𑀪𑀯𑁂 𑀅𑀲𑀜𑁆𑀜𑀸𑀪𑀯𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀏𑀓𑀯𑁄𑀓𑀸𑀭𑀪𑀯𑁂 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀢𑀸 𑀯𑀺𑀢𑁆𑀣𑀢𑀸𑀢𑀺 𑁋 𑀯𑀺𑀲𑀢𑁆𑀢𑀺𑀓𑀸𑀢𑀺 𑁋 𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄.

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸𑀢𑀺. 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀤𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀪𑀭𑀺𑀬𑀸𑀬𑁄. 𑀅𑀧𑁂𑀓𑁆𑀔𑀸 𑀯𑀼𑀘𑁆𑀘𑀦𑁆𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑁋 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄𑀢𑀺 𑀯𑀁𑀲𑁄 𑀯𑀼𑀘𑁆𑀘𑀢𑀺 𑀯𑁂𑀴𑀼𑀕𑀼𑀫𑁆𑀩𑁄. 𑀬𑀣𑀸 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀢𑀭𑀼𑀡𑀓𑀸 𑀓𑀴𑀻𑀭𑀓𑀸 [𑀢𑀭𑀼𑀡𑀓𑀴𑀻𑀭𑀸 (𑀲𑁆𑀬𑀸.)] 𑀅𑀲𑀢𑁆𑀢𑀸 𑀅𑀮𑀕𑁆𑀕𑀸 𑀅𑀕𑀥𑀺𑀢𑀸 [𑀅𑀧𑀮𑀺𑀯𑁂𑀝𑁆𑀞𑀺𑀢𑀸 (𑀲𑁆𑀬𑀸.)] 𑀅𑀧𑀮𑀺𑀩𑀼𑀤𑁆𑀥𑀸 𑀦𑀺𑀓𑁆𑀔𑀦𑁆𑀢𑀸 𑀦𑀺𑀲𑁆𑀲𑀝𑀸 𑀯𑀺𑀧𑁆𑀧𑀫𑀼𑀢𑁆𑀢𑀸 𑀏𑀯𑀫𑁂𑀯. 𑀲𑀚𑁆𑀚𑀸𑀢𑀺 𑀤𑁆𑀯𑁂 𑀲𑀚𑁆𑀚𑀦𑀸 𑁋 𑀢𑀡𑁆𑀳𑀸𑀲𑀚𑁆𑀚𑀦𑀸 𑀘 𑀤𑀺𑀝𑁆𑀞𑀺𑀲𑀚𑁆𑀚𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑀚𑁆𑀚𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑀚𑁆𑀚𑀦𑀸. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀡𑁆𑀳𑀸𑀲𑀚𑁆𑀚𑀦𑀸 𑀧𑀳𑀻𑀦𑀸, 𑀤𑀺𑀝𑁆𑀞𑀺𑀲𑀚𑁆𑀚𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸. 𑀢𑀡𑁆𑀳𑀸𑀲𑀚𑁆𑀚𑀦𑀸𑀬 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀲𑀚𑁆𑀚𑀦𑀸𑀬 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑁂 𑀦 𑀲𑀚𑁆𑀚𑀢𑀺 𑀲𑀤𑁆𑀤𑁂 𑀦 𑀲𑀚𑁆𑀚𑀢𑀺 𑀕𑀦𑁆𑀥𑁂 𑀦 𑀲𑀚𑁆𑀚𑀢𑀺 𑀭𑀲𑁂 𑀦 𑀲𑀚𑁆𑀚𑀢𑀺 𑀨𑁄𑀝𑁆𑀞𑀩𑁆𑀩𑁂 𑀦 𑀲𑀚𑁆𑀚𑀢𑀺 𑀓𑀼𑀮𑁂…𑀧𑁂… 𑀕𑀡𑁂… 𑀆𑀯𑀸𑀲𑁂… 𑀮𑀸𑀪𑁂… 𑀬𑀲𑁂… 𑀧𑀲𑀁𑀲𑀸𑀬… 𑀲𑀼𑀔𑁂… 𑀘𑀻𑀯𑀭𑁂… 𑀧𑀺𑀡𑁆𑀟𑀧𑀸𑀢𑁂… 𑀲𑁂𑀦𑀸𑀲𑀦𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂… 𑀓𑀸𑀫𑀥𑀸𑀢𑀼𑀬𑀸… 𑀭𑀽𑀧𑀥𑀸𑀢𑀼𑀬𑀸… 𑀅𑀭𑀽𑀧𑀥𑀸𑀢𑀼𑀬𑀸… 𑀓𑀸𑀫𑀪𑀯𑁂… 𑀭𑀽𑀧𑀪𑀯𑁂… 𑀅𑀭𑀽𑀧𑀪𑀯𑁂… 𑀲𑀜𑁆𑀜𑀸𑀪𑀯𑁂… 𑀅𑀲𑀜𑁆𑀜𑀸𑀪𑀯𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂… 𑀏𑀓𑀯𑁄𑀓𑀸𑀭𑀪𑀯𑁂… 𑀘𑀢𑀼𑀯𑁄𑀓𑀸𑀭𑀪𑀯𑁂… 𑀧𑀜𑁆𑀘𑀯𑁄𑀓𑀸𑀭𑀪𑀯𑁂… 𑀅𑀢𑀻𑀢𑁂… 𑀅𑀦𑀸𑀕𑀢𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀚𑁆𑀚𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺 𑀦 𑀫𑀼𑀘𑁆𑀙𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁫.

𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄 [𑀅𑀩𑀦𑁆𑀥𑁄 (𑀲𑁆𑀬𑀸. 𑀓.)], 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬𑀸𑀢𑀺. 𑀫𑀺𑀕𑁄𑀢𑀺 𑀤𑁆𑀯𑁂 𑀫𑀺𑀕𑀸 𑁋 𑀏𑀡𑀺𑀫𑀺𑀕𑁄 𑀘 𑀧𑀲𑀤𑀫𑀺𑀕𑁄 𑀘. 𑀬𑀣𑀸 𑀆𑀭𑀜𑁆𑀜𑀺𑀓𑁄 [𑀆𑀭𑀜𑁆𑀜𑀓𑁄 (𑀲𑁆𑀬𑀸. 𑀓.)] 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 [𑀅𑀭𑀜𑁆𑀜𑁂 𑀯𑀲𑀫𑀸𑀦𑁄 (𑀲𑁆𑀬𑀸.)] 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄, 𑀪𑀺𑀓𑁆𑀔𑀯𑁂, 𑀮𑀼𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 [𑀧𑀭𑀁 (𑀓.) 𑀫. 𑀦𑀺. 𑁧.𑁨𑁭𑁧] 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’, 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀲𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀫𑀢𑁄’’𑀢𑀺 𑁋 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬.

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀯𑀺𑀜𑁆𑀜𑀽𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀦𑀭𑁄𑀢𑀺 𑀲𑀢𑁆𑀢𑁄 𑀫𑀸𑀡𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀲𑁂𑀭𑀻𑀢𑀺 𑀤𑁆𑀯𑁂 𑀲𑁂𑀭𑀻 𑁋 𑀥𑀫𑁆𑀫𑁄𑀧𑀺 𑀲𑁂𑀭𑀻 𑀧𑀼𑀕𑁆𑀕𑀮𑁄𑀧𑀺 𑀲𑁂𑀭𑀻. 𑀓𑀢𑀫𑁄 𑀥𑀫𑁆𑀫𑁄 𑀲𑁂𑀭𑀻? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀅𑀬𑀁 𑀥𑀫𑁆𑀫𑁄 𑀲𑁂𑀭𑀻. 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀲𑁂𑀭𑀻? 𑀬𑁄 𑀇𑀫𑀺𑀦𑀸 𑀲𑁂𑀭𑀺𑀦𑀸 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑁂𑀭𑀻. 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀥𑀫𑁆𑀫𑀁 𑀧𑁂𑀓𑁆𑀔𑀫𑀸𑀦𑁄, 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁬.

𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬𑀸𑀢𑀺 𑀲𑀳𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼 𑀕𑀫𑀦𑀁 𑀨𑀸𑀲𑀼 𑀕𑀫𑀦𑀸𑀕𑀫𑀦𑀁 𑀨𑀸𑀲𑀼 𑀞𑀸𑀦𑀁 𑀨𑀸𑀲𑀼 𑀦𑀺𑀲𑀚𑁆𑀚𑀦𑀁 𑀨𑀸𑀲𑀼 𑀲𑀬𑀦𑀁 𑀨𑀸𑀲𑀼 𑀆𑀮𑀧𑀦𑀁 𑀨𑀸𑀲𑀼 𑀲𑀮𑁆𑀮𑀧𑀦𑀁 𑀨𑀸𑀲𑀼 𑀉𑀮𑁆𑀮𑀧𑀦𑀁 𑀨𑀸𑀲𑀼 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬𑀸𑀢𑀺 𑀲𑀳𑀸𑀬𑀫𑀚𑁆𑀛𑁂 𑀯𑀸𑀲𑁂𑀧𑀺 𑀞𑀸𑀦𑁂𑀧𑀺 𑀕𑀫𑀦𑁂𑀧𑀺 𑀘𑀸𑀭𑀺𑀓𑀸𑀬𑀧𑀺 𑀅𑀢𑁆𑀢𑀢𑁆𑀣𑀫𑀦𑁆𑀢𑀦𑀸 𑀧𑀭𑀢𑁆𑀣𑀫𑀦𑁆𑀢𑀦𑀸 𑀉𑀪𑀬𑀢𑁆𑀣𑀫𑀦𑁆𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀫𑀦𑁆𑀢𑀦𑀸 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀫𑀦𑁆𑀢𑀦𑀸 𑀧𑀭𑀫𑀢𑁆𑀣𑀫𑀦𑁆𑀢𑀦𑀸 [𑀉𑀪𑀬𑀢𑁆𑀣𑀫𑀦𑁆𑀢𑀦𑀸 (𑀓.)] 𑀢𑀺 𑁋 𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬.

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀅𑀦𑀪𑀺𑀚𑁆𑀛𑀺𑀢𑀁 𑀏𑀢𑀁 𑀯𑀢𑁆𑀣𑀼 𑀩𑀸𑀮𑀸𑀦𑀁 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀢𑀺𑀢𑁆𑀣𑀬𑀲𑀸𑀯𑀓𑀸𑀦𑀁, 𑀬𑀤𑀺𑀤𑀁 𑁋 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀢𑀸. 𑀅𑀪𑀺𑀚𑁆𑀛𑀺𑀢𑀁 𑀏𑀢𑀁 𑀯𑀢𑁆𑀣𑀼 𑀧𑀡𑁆𑀟𑀺𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀬𑀤𑀺𑀤𑀁 𑁋 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀢𑀸. 𑀲𑁂𑀭𑀻𑀢𑀺 𑀤𑁆𑀯𑁂 𑀲𑁂𑀭𑀻 𑁋 𑀥𑀫𑁆𑀫𑁄𑀧𑀺 𑀲𑁂𑀭𑀻 𑀧𑀼𑀕𑁆𑀕𑀮𑁄𑀧𑀺 𑀲𑁂𑀭𑀻. 𑀓𑀢𑀫𑁄 𑀥𑀫𑁆𑀫𑁄 𑀲𑁂𑀭𑀻? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 …𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀅𑀬𑀁 𑀥𑀫𑁆𑀫𑁄 𑀲𑁂𑀭𑀻. 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀲𑁂𑀭𑀻? 𑀬𑁄 𑀇𑀫𑀺𑀦𑀸 𑀲𑁂𑀭𑀺𑀦𑀸 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑁂𑀭𑀻. 𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀲𑁂𑀭𑀺𑀢𑀁 𑀥𑀫𑁆𑀫𑀁 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁭.

𑀔𑀺𑀟𑁆𑀟𑀸 [𑀔𑀺𑀝𑁆𑀝𑀸 (𑀓.)] 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 [𑀯𑀺𑀧𑁆𑀧𑀬𑁄𑀕𑀫𑁆𑀧𑀺 (𑀓.)] 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂𑀢𑀺. 𑀔𑀺𑀟𑁆𑀟𑀸𑀢𑀺 𑀤𑁆𑀯𑁂 𑀔𑀺𑀟𑁆𑀟𑀸 𑁋 𑀓𑀸𑀬𑀺𑀓𑀸 𑀘 𑀔𑀺𑀟𑁆𑀟𑀸 𑀯𑀸𑀘𑀲𑀺𑀓𑀸 𑀘 𑀔𑀺𑀟𑁆𑀟𑀸. 𑀓𑀢𑀫𑀸 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸? 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀲𑁆𑀲𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀭𑀣𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀽𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀣𑀭𑀽𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀝𑁆𑀞𑀧𑀤𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺. 𑀅𑀬𑀁 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸.

𑀓𑀢𑀫𑀸 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸? 𑀫𑀼𑀔𑀪𑁂𑀭𑀺𑀓𑀁 𑀫𑀼𑀔𑀸𑀮𑀫𑁆𑀩𑀭𑀁 𑀫𑀼𑀔𑀟𑀺𑀡𑁆𑀟𑀺𑀫𑀓𑀁 [𑀫𑀼𑀔𑀤𑁂𑀡𑁆𑀟𑀺𑀫𑀓𑀁 (𑀲𑁆𑀬𑀸.), 𑀫𑀼𑀔𑀤𑀺𑀦𑁆𑀤𑀺𑀫𑀓𑀁 (𑀓.)] 𑀫𑀼𑀔𑀘𑀮𑀺𑀫𑀓𑀁 𑀫𑀼𑀔𑀓𑁂𑀭𑀓𑀁 [𑀫𑀼𑀔𑀪𑁂𑀭𑀼𑀓𑀁 (𑀲𑁆𑀬𑀸.)] 𑀫𑀼𑀔𑀤𑀤𑁆𑀤𑀭𑀺𑀓𑀁 𑀦𑀸𑀝𑀓𑀁 𑀮𑀸𑀲𑀁 𑀕𑀻𑀢𑀁 𑀤𑀯𑀓𑀫𑁆𑀫𑀁. 𑀅𑀬𑀁 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸.

𑀭𑀢𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀸𑀥𑀺𑀯𑀘𑀦𑀫𑁂𑀢𑀁 𑀭𑀢𑀻𑀢𑀺. 𑀲𑀳𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼 𑀕𑀫𑀦𑀁 𑀨𑀸𑀲𑀼 𑀕𑀫𑀦𑀸𑀕𑀫𑀦𑀁 𑀨𑀸𑀲𑀼 𑀞𑀸𑀦𑀁 𑀨𑀸𑀲𑀼 𑀦𑀺𑀲𑀚𑁆𑀚𑀦𑀁 𑀨𑀸𑀲𑀼 𑀲𑀬𑀦𑀁 𑀨𑀸𑀲𑀼 𑀆𑀮𑀧𑀦𑀁 𑀨𑀸𑀲𑀼 𑀲𑀮𑁆𑀮𑀧𑀦𑀁 𑀨𑀸𑀲𑀼 𑀉𑀮𑁆𑀮𑀧𑀦𑀁 𑀨𑀸𑀲𑀼 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂𑀢𑀺 𑀔𑀺𑀟𑁆𑀟𑀸 𑀘 𑀭𑀢𑀺 𑀘 𑀲𑀳𑀸𑀬𑀫𑀚𑁆𑀛𑁂 𑀳𑁄𑀢𑀻𑀢𑀺 𑁋 𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂.

𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀦𑁆𑀢𑀺. 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺𑀁 𑀧𑁂𑀫𑀦𑁆𑀢𑀺 𑀧𑀼𑀢𑁆𑀢𑁂𑀲𑀼 𑀘 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺 𑀧𑁂𑀫𑀦𑁆𑀢𑀺 𑁋 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁.

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸, 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸.

𑀓𑀢𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸, 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸. 𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀧𑀺𑀬𑀸𑀦𑀁 𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄 𑀅𑀝𑁆𑀝𑀺𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄𑀢𑀺 𑁋 𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁮.

𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺, 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀻𑀢𑀺. 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑁆𑀬𑀸.) 𑀧𑀲𑁆𑀲 𑀤𑀻. 𑀦𑀺. 𑁩.𑁩𑁦𑁮] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁…𑀧𑁂… 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀻𑀢𑀺 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 [𑀅𑀧𑁆𑀧𑀝𑀺𑀓𑀼𑀮𑀸 (𑀩𑀳𑀽𑀲𑀼)] 𑀳𑁄𑀦𑁆𑀢𑀺, 𑀬𑁂 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀼 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺; 𑀓𑀭𑀼𑀡𑀸𑀬 𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀺𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺…𑀧𑁂… 𑀬𑁂 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀼 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀻𑀢𑀺 𑁋 𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺.

𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀘𑀻𑀯𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 [𑀅𑀧𑁆𑀧𑀝𑀺𑀭𑀽𑀧𑀁 (𑀲𑁆𑀬𑀸.)] 𑀆𑀧𑀚𑁆𑀚𑀢𑀺. 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀲𑀦𑁆𑀦𑁄 [𑀅𑀦𑀚𑁆𑀛𑁄𑀧𑀦𑁆𑀦𑁄 (𑀲𑁆𑀬𑀸.)] 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀸𑀬 𑀘 𑀧𑀦 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄. 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦…𑀧𑁂…

𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦…𑀧𑁂… 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺. 𑀅𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀸𑀬 𑀘 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑁋 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦.

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻𑀢𑀺. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 [𑀕𑁄𑀫𑀳𑀺𑀲𑀸 (𑀲𑁆𑀬𑀸.) 𑀫𑀳𑀸𑀦𑀺. 𑁫] 𑀳𑀢𑁆𑀣𑀻 𑀅𑀳𑀻 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑀇𑀢𑀺 𑀯𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.

𑀓𑀢𑀫𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑀸? 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸. 𑀓𑀣𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀏𑀯𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁… 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁… 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 [𑀢𑀢𑁆𑀭 𑀢𑁂 (𑀓.)] 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 [𑀉𑀤𑀓𑁂 𑀉𑀤𑀓𑀸𑀲𑀬𑀸 (𑀲𑁆𑀬𑀸.)] 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺; 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀜𑁆𑀜𑁄𑀚𑀦𑀻𑀬𑀸 [𑀲𑀜𑁆𑀜𑁄𑀚𑀦𑀺𑀓𑀸 (𑀓.)], 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀫𑀼𑀤𑀸𑀘𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀻𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀫𑀼𑀤𑀸𑀘𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺, 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 [𑀅𑀦𑁆𑀢𑀭𑀸𑀫𑀮𑀁 (𑀲𑁆𑀬𑀸. 𑀓.) 𑀧𑀲𑁆𑀲 𑀇𑀢𑀺𑀯𑀼. 𑁮𑁮] 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄, 𑀤𑁄𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑁄𑀳𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺.

𑀅𑀦𑀢𑁆𑀣𑀚𑀦𑀦𑁄 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.

𑀅𑀦𑀢𑁆𑀣𑀚𑀦𑀦𑁄 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑀤𑀼𑀝𑁆𑀞𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.

𑀅𑀦𑀢𑁆𑀣𑀚𑀦𑀦𑁄 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑀫𑀽𑀴𑁆𑀳𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀫𑀽𑀴𑁆𑀳𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭𑀦𑁆𑀢𑀺.

𑀏𑀯𑀫𑁆𑀧𑀺, 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬; 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚…𑀧𑁂… 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬.

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺 [𑀲𑀨𑀮𑀦𑁆𑀢𑀺 (𑀓.) 𑀧𑀲𑁆𑀲 𑀇𑀢𑀺𑀯𑀼. 𑁫𑁦].

𑀏𑀯𑀫𑁆𑀧𑀺, 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺 [𑀘𑀗𑁆𑀓𑀫𑀺𑀯𑁄𑀲𑁆𑀲𑀚𑁆𑀚𑀦𑁆𑀢𑀻𑀢𑀺 (𑀲𑁆𑀬𑀸. 𑀓.) 𑀧𑀲𑁆𑀲 𑀲𑀼. 𑀦𑀺. 𑁨𑁭𑁩-𑁨𑁭𑁪].

𑀏𑀯𑀫𑁆𑀧𑀺, 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸𑀢𑀺 𑀧𑀭𑀺𑀲𑁆𑀲𑀬𑁂 𑀲𑀳𑀺𑀢𑀸 𑀆𑀭𑀸𑀥𑀺𑀢𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑀸 𑀧𑀭𑀺𑀬𑀸𑀤𑀺𑀢𑀸 𑀧𑀝𑀺𑀦𑀺𑀲𑁆𑀲𑀢𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀅𑀙𑀫𑁆𑀪𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀘𑁆𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺, 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁯.

𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂𑀢𑀺 𑀧𑀩𑁆𑀩𑀚𑀺𑀢𑀸𑀧𑀺 𑀇𑀥𑁂𑀓𑀘𑁆𑀘𑁂 𑀦𑀺𑀲𑁆𑀲𑀬𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀉𑀤𑁆𑀤𑁂𑀲𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀧𑀭𑀺𑀧𑀼𑀘𑁆𑀙𑀸𑀬𑀧𑀺 [𑀧𑀭𑀺𑀧𑀼𑀘𑁆𑀙𑁂𑀧𑀺 (𑀓.)] 𑀤𑀺𑀬𑁆𑀬𑀫𑀸𑀦𑁂 𑀘𑀻𑀯𑀭𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀧𑀢𑁆𑀢𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀮𑁄𑀳𑀣𑀸𑀮𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀥𑀫𑁆𑀫𑀓𑀭𑀡𑁂𑀧𑀺 [𑀥𑀫𑁆𑀫𑀓𑀭𑀓𑁂𑀧𑀺 (𑀲𑁆𑀬𑀸.)] 𑀤𑀺𑀬𑁆𑀬𑀫𑀸𑀦𑁂 𑀧𑀭𑀺𑀲𑁆𑀲𑀸𑀯𑀦𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀣𑀯𑀺𑀓𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀉𑀧𑀸𑀳𑀦𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀓𑀸𑀬𑀩𑀦𑁆𑀥𑀦𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀦 𑀲𑀼𑀡𑀦𑁆𑀢𑀺 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺 𑀦 𑀅𑀜𑁆𑀜𑀸𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀅𑀦𑀲𑁆𑀲𑀯𑀸 𑀅𑀯𑀘𑀦𑀓𑀭𑀸 𑀧𑀝𑀺𑀮𑁄𑀫𑀯𑀼𑀢𑁆𑀢𑀺𑀦𑁄 𑀅𑀜𑁆𑀜𑁂𑀦𑁂𑀯 𑀫𑀼𑀔𑀁 𑀓𑀭𑁄𑀦𑁆𑀢𑀻𑀢𑀺 𑁋 𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂.

𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸𑀢𑀺 𑀕𑀳𑀝𑁆𑀞𑀸𑀧𑀺 𑀇𑀥𑁂𑀓𑀘𑁆𑀘𑁂 𑀳𑀢𑁆𑀣𑀺𑀫𑁆𑀳𑀺𑀧𑀺 𑀤𑀺𑀬𑁆𑀬𑀫𑀸𑀦𑁂…𑀧𑁂… 𑀭𑀣𑁂𑀧𑀺 𑀔𑁂𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑁆𑀳𑀺𑀧𑀺 𑀳𑀺𑀭𑀜𑁆𑀜𑁂𑀧𑀺 𑀲𑀼𑀯𑀡𑁆𑀡𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀕𑀸𑀫𑁂𑀧𑀺…𑀧𑁂… 𑀦𑀺𑀕𑀫𑁂𑀧𑀺 𑀦𑀕𑀭𑁂𑀧𑀺… 𑀭𑀝𑁆𑀞𑁂𑀧𑀺… 𑀚𑀦𑀧𑀤𑁂𑀧𑀺 𑀤𑀺𑀬𑁆𑀬𑀫𑀸𑀦𑁂 𑀦 𑀲𑀼𑀡𑀦𑁆𑀢𑀺 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺 𑀦 𑀅𑀜𑁆𑀜𑀸𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀅𑀦𑀲𑁆𑀲𑀯𑀸 𑀅𑀯𑀘𑀦𑀓𑀭𑀸 𑀧𑀝𑀺𑀮𑁄𑀫𑀯𑀼𑀢𑁆𑀢𑀺𑀦𑁄 𑀅𑀜𑁆𑀜𑁂𑀦𑁂𑀯 𑀫𑀼𑀔𑀁 𑀓𑀭𑁄𑀦𑁆𑀢𑀻𑀢𑀺 𑁋 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸𑀢𑀺 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀧𑀭𑀧𑀼𑀢𑁆𑀢𑀸. 𑀢𑁂𑀲𑀼 𑀧𑀭𑀧𑀼𑀢𑁆𑀢𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑀼𑀢𑁆𑀯𑀸 𑀅𑀩𑁆𑀬𑀸𑀯𑀝𑁄 𑀳𑀼𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸𑀢𑀺 𑁋 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀤𑀼𑀲𑁆𑀲𑀗𑁆𑀕𑀳𑀸 𑀧𑀩𑁆𑀩𑀚𑀺𑀢𑀸𑀧𑀺 𑀏𑀓𑁂, 𑀅𑀣𑁄 𑀕𑀳𑀝𑁆𑀞𑀸 𑀖𑀭𑀫𑀸𑀯𑀲𑀦𑁆𑀢𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀭𑀧𑀼𑀢𑁆𑀢𑁂𑀲𑀼 𑀳𑀼𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁩𑁦.

𑀑𑀭𑁄𑀧𑀬𑀺𑀢𑁆𑀯𑀸 [𑀯𑁄𑀭𑁄𑀧𑀬𑀺𑀢𑁆𑀯𑀸 (𑀲𑁆𑀬𑀸.)] 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 [𑀲𑀁𑀲𑀻𑀦𑀧𑀢𑁆𑀢𑁄 (𑀲𑀻. 𑀅𑀝𑁆𑀞.)] 𑀬𑀣𑀸 𑀓𑁄𑀯𑀺𑀴𑀸𑀭𑁄;

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀫𑀸𑀮𑀸 𑀘 𑀕𑀦𑁆𑀥𑀜𑁆𑀘 𑀯𑀺𑀮𑁂𑀧𑀦𑀜𑁆𑀘 𑀆𑀪𑀭𑀡𑀜𑁆𑀘 𑀧𑀺𑀮𑀦𑁆𑀥𑀦𑀜𑁆𑀘 𑀯𑀢𑁆𑀣𑀜𑁆𑀘 𑀧𑀸𑀭𑀼𑀧𑀦𑀜𑁆𑀘 𑀯𑁂𑀞𑀦𑀜𑁆𑀘 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀁 𑀦𑁆𑀳𑀸𑀧𑀦𑀁 [𑀦𑀳𑀸𑀧𑀦𑀁 (𑀲𑁆𑀬𑀸.)] 𑀲𑀫𑁆𑀩𑀸𑀳𑀦𑀁 𑀆𑀤𑀸𑀲𑀁 𑀅𑀜𑁆𑀚𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀫𑀼𑀔𑀘𑀼𑀡𑁆𑀡𑀁 𑀫𑀼𑀔𑀮𑁂𑀧𑀦𑀁 𑀳𑀢𑁆𑀣𑀩𑀦𑁆𑀥𑀁 𑀲𑀺𑀔𑀸𑀩𑀦𑁆𑀥𑀁 𑀤𑀡𑁆𑀟𑀁 𑀦𑀸𑀴𑀺𑀓𑀁 [𑀦𑀸𑀮𑀺𑀓𑀁 (𑀓.) 𑀧𑀲𑁆𑀲 𑀤𑀻. 𑀦𑀺. 𑁧.𑁧𑁬] 𑀔𑀕𑁆𑀕𑀁 𑀙𑀢𑁆𑀢𑀁 𑀘𑀺𑀢𑁆𑀭𑀼𑀧𑀸𑀳𑀦𑀁 𑀉𑀡𑁆𑀳𑀻𑀲𑀁 𑀫𑀡𑀺𑀁 𑀯𑀸𑀴𑀩𑀻𑀚𑀦𑀺𑀁 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀤𑀻𑀖𑀤𑀲𑀸𑀦𑀺 [𑀤𑀻𑀖𑀭𑀲𑁆𑀲𑀸𑀦𑀺 (𑀲𑁆𑀬𑀸.)] 𑀇𑀢𑀺 𑀯𑀸. 𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀑𑀭𑁄𑀧𑀬𑀺𑀢𑁆𑀯𑀸 𑀲𑀫𑁄𑀭𑁄𑀧𑀬𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀧𑀲𑁆𑀲𑀫𑁆𑀪𑀬𑀺𑀢𑁆𑀯𑀸𑀢𑀺 𑁋 𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺.

𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄𑀢𑀺 𑀬𑀣𑀸 𑀓𑁄𑀯𑀺𑀴𑀸𑀭𑀲𑁆𑀲 𑀧𑀢𑁆𑀢𑀸𑀦𑀺 𑀙𑀺𑀦𑁆𑀦𑀸𑀦𑀺 𑀲𑀜𑁆𑀙𑀺𑀦𑁆𑀦𑀸𑀦𑀺 𑀧𑀢𑀺𑀢𑀸𑀦𑀺 𑀧𑀭𑀺𑀧𑀢𑀺𑀢𑀸𑀦𑀺, 𑀏𑀯𑀫𑁂𑀯 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀙𑀺𑀦𑁆𑀦𑀸𑀦𑀺 𑀲𑀜𑁆𑀙𑀺𑀦𑁆𑀦𑀸𑀦𑀺 𑀧𑀢𑀺𑀢𑀸𑀦𑀻𑀢𑀺 𑁋 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄.

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀻𑀢𑀺. 𑀯𑀻𑀭𑁄𑀢𑀺 𑀯𑀻𑀭𑀺𑀬𑀯𑀸𑀢𑀺 𑀯𑀻𑀭𑁄, 𑀧𑀳𑀽𑀢𑀺 𑀯𑀻𑀭𑁄, 𑀯𑀺𑀲𑀯𑀻𑀢𑀺 𑀯𑀻𑀭𑁄, 𑀅𑀮𑀫𑀢𑁆𑀢𑁄𑀢𑀺 𑀯𑀻𑀭𑁄, 𑀲𑀽𑀭𑁄𑀢𑀺 𑀯𑀻𑀭𑁄, 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄𑀢𑀺 𑀯𑀻𑀭𑁄, 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺 𑀯𑀻𑀭𑁄.

𑀯𑀺𑀭𑀢𑁄 𑀇𑀥 [𑀆𑀭𑀢𑁄 𑀇𑀥𑁂𑀯 (𑀲𑁆𑀬𑀸.) 𑀧𑀲𑁆𑀲 𑀲𑀼. 𑀦𑀺. 𑁫𑁩𑁬] 𑀲𑀩𑁆𑀩𑀧𑀸𑀓𑁂𑀳𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀯𑀻𑀭𑀺𑀬𑀯𑀸 𑀲𑁄;

𑀲𑁄 𑀯𑀻𑀭𑀺𑀬𑀯𑀸 𑀧𑀥𑀸𑀦𑀯𑀸, 𑀥𑀻𑀭𑁄 [𑀯𑀻𑀭𑁄 (𑀲𑁆𑀬𑀸. 𑀓.) 𑀧𑀲𑁆𑀲 𑀲𑀼. 𑀦𑀺. 𑁫𑁩𑁬] 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑀕𑀺𑀳𑀺𑀩𑀦𑁆𑀥𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀧𑀼𑀢𑁆𑀢𑀸 𑀘 𑀪𑀭𑀺𑀬𑀸 𑀘 𑀤𑀸𑀲𑀸 𑀘 𑀤𑀸𑀲𑀻 𑀘 𑀅𑀚𑁂𑀴𑀓𑀸 𑀘 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀘 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀘 𑀔𑁂𑀢𑁆𑀢𑀜𑁆𑀘 𑀯𑀢𑁆𑀣𑀼 𑀘 𑀳𑀺𑀭𑀜𑁆𑀜𑀜𑁆𑀘 𑀲𑀼𑀯𑀡𑁆𑀡𑀜𑁆𑀘 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀯𑀢𑁆𑀣𑀼.

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀑𑀭𑁄𑀧𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀺𑀦𑁆𑀦𑀧𑀢𑁆𑀢𑁄 𑀬𑀣𑀸 𑀓𑁄𑀯𑀺𑀴𑀸𑀭𑁄,

𑀙𑁂𑀢𑁆𑀯𑀸𑀦 𑀯𑀻𑀭𑁄 𑀕𑀺𑀳𑀺𑀩𑀦𑁆𑀥𑀦𑀸𑀦𑀺;

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑀤𑀼𑀢𑀺𑀬𑀯𑀕𑁆𑀕𑁄

𑁧𑁩𑁧.

𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀦𑁆𑀢𑀺 𑀲𑀘𑁂 𑀦𑀺𑀧𑀓𑀁 𑀧𑀡𑁆𑀟𑀺𑀢𑀁 𑀧𑀜𑁆𑀜𑀯𑀦𑁆𑀢𑀁 𑀩𑀼𑀤𑁆𑀥𑀺𑀫𑀦𑁆𑀢𑀁 𑀜𑀸𑀡𑀺𑀁 𑀯𑀺𑀪𑀸𑀯𑀺𑀁 𑀫𑁂𑀥𑀸𑀯𑀺𑀁 𑀲𑀳𑀸𑀬𑀁 𑀮𑀪𑁂𑀬𑁆𑀬 𑀧𑀝𑀺𑀮𑀪𑁂𑀬𑁆𑀬 𑀅𑀥𑀺𑀕𑀘𑁆𑀙𑁂𑀬𑁆𑀬 𑀯𑀺𑀦𑁆𑀤𑁂𑀬𑁆𑀬𑀸𑀢𑀺 𑁋 𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀁𑀳𑀸𑀬𑀁.

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀦𑁆𑀢𑀺. 𑀲𑀤𑁆𑀥𑀺𑀁 𑀘𑀭𑀦𑁆𑀢𑀺 𑀏𑀓𑀢𑁄 𑀘𑀭𑀁. 𑀲𑀸𑀥𑀼𑀯𑀺𑀳𑀸𑀭𑀺𑀦𑁆𑀢𑀺 𑀧𑀞𑀫𑁂𑀦𑀧𑀺 𑀛𑀸𑀦𑁂𑀦 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀤𑀼𑀢𑀺𑀬𑁂𑀦𑀧𑀺 𑀛𑀸𑀦𑁂𑀦… 𑀢𑀢𑀺𑀬𑁂𑀦𑀧𑀺 𑀛𑀸𑀦𑁂𑀦… 𑀘𑀢𑀼𑀢𑁆𑀣𑁂𑀦𑀧𑀺 𑀛𑀸𑀦𑁂𑀦 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀫𑁂𑀢𑁆𑀢𑀸𑀬𑀧𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀓𑀭𑀼𑀡𑀸𑀬𑀧𑀺…𑀧𑁂… 𑀫𑀼𑀤𑀺𑀢𑀸𑀬𑀧𑀺… 𑀉𑀧𑁂𑀓𑁆𑀔𑀸𑀬𑀧𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀯𑀺𑀜𑁆𑀜𑀸𑀡𑀜𑁆𑀘 𑀆𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀲𑀸𑀥𑀼𑀯𑀺𑀳𑀸𑀭𑀺𑀁. 𑀥𑀻𑀭𑀦𑁆𑀢𑀺 𑀥𑀻𑀭𑀁 𑀧𑀡𑁆𑀟𑀺𑀢𑀁 𑀧𑀜𑁆𑀜𑀯𑀦𑁆𑀢𑀁 𑀩𑀼𑀤𑁆𑀥𑀺𑀫𑀦𑁆𑀢𑀁 𑀜𑀸𑀡𑀺𑀁 𑀯𑀺𑀪𑀸𑀯𑀺𑀁 𑀫𑁂𑀥𑀸𑀯𑀺𑀦𑁆𑀢𑀺 𑁋 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁.

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸…𑀧𑁂… 𑀏𑀯𑀫𑁆𑀧𑀺, 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀲𑀩𑁆𑀩𑁂 𑀧𑀭𑀺𑀲𑁆𑀲𑀬𑁂 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸𑀢𑀺 𑁋 𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺.

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑁂𑀦 𑀦𑀺𑀧𑀓𑁂𑀦 𑀧𑀡𑁆𑀟𑀺𑀢𑁂𑀦 𑀧𑀜𑁆𑀜𑀯𑀦𑁆𑀢𑁂𑀦 𑀩𑀼𑀤𑁆𑀥𑀺𑀫𑀦𑁆𑀢𑁂𑀦 𑀜𑀸𑀡𑀺𑀦𑀸 𑀯𑀺𑀪𑀸𑀯𑀺𑀦𑀸 𑀫𑁂𑀥𑀸𑀯𑀺𑀦𑀸 𑀲𑀳𑀸𑀬𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀫𑀦𑁄 𑀢𑀼𑀝𑁆𑀞𑀫𑀦𑁄 𑀳𑀝𑁆𑀞𑀫𑀦𑁄 𑀧𑀳𑀝𑁆𑀞𑀫𑀦𑁄 𑀉𑀤𑀕𑁆𑀕𑀫𑀦𑁄 𑀫𑀼𑀤𑀺𑀢𑀫𑀦𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄. 𑀲𑀢𑀻𑀫𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀢𑀺𑀫𑀸 𑀳𑁄𑀢𑀺 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑁋 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸’’𑀢𑀺.

𑁧𑁩𑁨.

𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀦𑁆𑀢𑀺 𑀦𑁄 𑀘𑁂 𑀦𑀺𑀧𑀓𑀁 𑀧𑀡𑁆𑀟𑀺𑀢𑀁 𑀧𑀜𑁆𑀜𑀯𑀦𑁆𑀢𑀁 𑀩𑀼𑀤𑁆𑀥𑀺𑀫𑀦𑁆𑀢𑀁 𑀜𑀸𑀡𑀺𑀁 𑀯𑀺𑀪𑀸𑀯𑀺𑀁 𑀫𑁂𑀥𑀸𑀯𑀺𑀁 𑀲𑀳𑀸𑀬𑀁 𑀮𑀪𑁂𑀬𑁆𑀬 𑀧𑀝𑀺𑀮𑀪𑁂𑀬𑁆𑀬 𑀅𑀥𑀺𑀕𑀘𑁆𑀙𑁂𑀬𑁆𑀬 𑀯𑀺𑀦𑁆𑀤𑁂𑀬𑁆𑀬𑀸𑀢𑀺 𑁋 𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁.

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀦𑁆𑀢𑀺. 𑀲𑀤𑁆𑀥𑀺𑀁 𑀘𑀭𑀦𑁆𑀢𑀺 𑀏𑀓𑀢𑁄 𑀘𑀭𑀁. 𑀲𑀸𑀥𑀼𑀯𑀺𑀳𑀸𑀭𑀺𑀦𑁆𑀢𑀺 𑀧𑀞𑀫𑁂𑀦𑀧𑀺 𑀛𑀸𑀦𑁂𑀦 𑀲𑀸𑀥𑀼𑀯𑀺𑀳𑀸𑀭𑀺𑀁…𑀧𑁂… 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀲𑀸𑀥𑀼𑀯𑀺𑀳𑀸𑀭𑀺𑀁, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀲𑀸𑀥𑀼𑀯𑀺𑀳𑀸𑀭𑀺𑀁. 𑀥𑀻𑀭𑀦𑁆𑀢𑀺 𑀥𑀻𑀭𑀁 𑀧𑀡𑁆𑀟𑀺𑀢𑀁 𑀧𑀜𑁆𑀜𑀯𑀦𑁆𑀢𑀁 𑀩𑀼𑀤𑁆𑀥𑀺𑀫𑀦𑁆𑀢𑀁 𑀜𑀸𑀡𑀺𑀁 𑀯𑀺𑀪𑀸𑀯𑀺𑀁 𑀫𑁂𑀥𑀸𑀯𑀺𑀦𑁆𑀢𑀺 𑁋 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁.

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬𑀸𑀢𑀺 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑁄 𑀮𑀤𑁆𑀥𑀸𑀥𑀺𑀧𑁆𑀧𑀸𑀬𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑀜𑁆𑀘 𑀓𑁄𑀲𑀜𑁆𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀧𑀳𑀽𑀢𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀦𑀕𑀭𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁩𑁩.

𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀁, 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸;

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀦𑁆𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁 𑀦𑀺𑀲𑁆𑀲𑀁𑀲𑀬𑀯𑀘𑀦𑀁 𑀦𑀺𑀓𑁆𑀓𑀗𑁆𑀔𑀯𑀘𑀦𑀁 𑀅𑀤𑁆𑀯𑁂𑀚𑁆𑀛𑀯𑀘𑀦𑀁 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀁 𑀦𑀺𑀬𑁄𑀕𑀯𑀘𑀦𑀁 𑀅𑀧𑀡𑁆𑀡𑀓𑀯𑀘𑀦𑀁 𑀅𑀯𑀺𑀭𑀤𑁆𑀥𑀯𑀘𑀦𑀁 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 𑁋 𑀅𑀤𑁆𑀥𑀸𑀢𑀺. 𑀲𑀳𑀸𑀬𑀲𑀫𑁆𑀧𑀤𑀦𑁆𑀢𑀺 𑀲𑀳𑀸𑀬𑀲𑀫𑁆𑀧𑀤𑀸 𑀯𑀼𑀘𑁆𑀘𑀢𑀺 𑀬𑁄 𑀲𑁄 𑀲𑀳𑀸𑀬𑁄 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 … 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀦𑁆𑀢𑀺 𑀲𑀳𑀸𑀬𑀲𑀫𑁆𑀧𑀤𑀁 𑀧𑀲𑀁𑀲𑀸𑀫 𑀣𑁄𑀫𑁂𑀫 𑀓𑀺𑀢𑁆𑀢𑁂𑀫 𑀯𑀡𑁆𑀡𑁂𑀫𑀸𑀢𑀺 𑁋 𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀁.

𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸𑀢𑀺 𑀲𑁂𑀝𑁆𑀞𑀸 𑀳𑁄𑀦𑁆𑀢𑀺 𑀲𑀳𑀸𑀬𑀸 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦; 𑀲𑀫𑀸 𑀲𑀤𑀺𑀲𑀸 𑀳𑁄𑀦𑁆𑀢𑀺 𑀲𑀳𑀸𑀬𑀸 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦. 𑀲𑁂𑀝𑁆𑀞𑀸 𑀯𑀸 𑀲𑀳𑀸𑀬𑀸 𑀲𑀤𑀺𑀲𑀸 𑀯𑀸 𑀲𑀳𑀸𑀬𑀸 𑀲𑁂𑀯𑀺𑀢𑀩𑁆𑀩𑀸 𑀪𑀚𑀺𑀢𑀩𑁆𑀩𑀸 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀸 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀸 𑀧𑀭𑀺𑀧𑀜𑁆𑀳𑀺𑀢𑀩𑁆𑀩𑀸𑀢𑀺 𑁋 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸.

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻𑀢𑀺 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑀪𑁄𑀚𑀻 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑀪𑁄𑀚𑀻𑀢𑀺. 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑀪𑁄𑀚𑀻? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑀼𑀳𑀦𑀸𑀬 𑀮𑀧𑀦𑀸𑀬 𑀦𑁂𑀫𑀺𑀢𑁆𑀢𑀺𑀓𑀢𑀸𑀬 𑀦𑀺𑀧𑁆𑀧𑁂𑀲𑀺𑀓𑀢𑀸𑀬 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀬 [𑀦𑀺𑀚𑀺𑀕𑀺𑀁𑀲𑀦𑀢𑀸𑀬 (𑀲𑁆𑀬𑀸.)] 𑀤𑀸𑀭𑀼𑀤𑀸𑀦𑁂𑀦 𑀯𑁂𑀴𑀼𑀤𑀸𑀦𑁂𑀦 𑀧𑀢𑁆𑀢𑀤𑀸𑀦𑁂𑀦 𑀧𑀼𑀧𑁆𑀨𑀤𑀸𑀦𑁂𑀦 𑀨𑀮𑀤𑀸𑀦𑁂𑀦 𑀲𑀺𑀦𑀸𑀦𑀤𑀸𑀦𑁂𑀦 𑀘𑀼𑀡𑁆𑀡𑀤𑀸𑀦𑁂𑀦 𑀫𑀢𑁆𑀢𑀺𑀓𑀸𑀤𑀸𑀦𑁂𑀦 𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀫𑀼𑀔𑁄𑀤𑀓𑀤𑀸𑀦𑁂𑀦 𑀘𑀸𑀝𑀼𑀓𑀫𑁆𑀬𑀢𑀸𑀬 [𑀧𑀸𑀢𑀼𑀓𑀫𑁆𑀬𑀢𑀸𑀬 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁫𑁯] 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬 [𑀫𑀼𑀕𑁆𑀕𑀲𑀽𑀧𑀢𑀸𑀬 (𑀲𑁆𑀬𑀸.)] 𑀧𑀸𑀭𑀺𑀪𑀝𑁆𑀬𑀢𑀸𑀬 𑀧𑀻𑀞𑀫𑀤𑁆𑀤𑀺𑀓𑀢𑀸𑀬 𑀯𑀢𑁆𑀣𑀼𑀯𑀺𑀚𑁆𑀚𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀅𑀗𑁆𑀕𑀯𑀺𑀚𑁆𑀚𑀸𑀬 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀬 𑀤𑀽𑀢𑀕𑀫𑀦𑁂𑀦 𑀧𑀳𑀺𑀡𑀕𑀫𑀦𑁂𑀦 𑀚𑀗𑁆𑀖𑀧𑁂𑀲𑀦𑀺𑀬𑁂𑀦 𑀯𑁂𑀚𑁆𑀚𑀓𑀫𑁆𑀫𑁂𑀦 𑀦𑀯𑀓𑀫𑁆𑀫𑁂𑀦 [𑀤𑀽𑀢𑀓𑀫𑁆𑀫𑁂𑀦 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁫𑁯] 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑁂𑀦 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑁂𑀦, 𑀅𑀥𑀫𑁆𑀫𑁂𑀦 𑀯𑀺𑀲𑀫𑁂𑀦 𑀮𑀤𑁆𑀥𑀸 𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀚𑀻𑀯𑀺𑀓𑀁 [𑀚𑀻𑀯𑀺𑀢𑀁 (𑀓.)] 𑀓𑀧𑁆𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑀪𑁄𑀚𑀻.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑀪𑁄𑀚𑀻? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦 𑀓𑀼𑀳𑀦𑀸𑀬 𑀦 𑀮𑀧𑀦𑀸𑀬 𑀦 𑀦𑁂𑀫𑀺𑀢𑁆𑀢𑀺𑀓𑀢𑀸𑀬 𑀦 𑀦𑀺𑀧𑁆𑀧𑁂𑀲𑀺𑀓𑀢𑀸𑀬 𑀦 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀬 𑀦 𑀤𑀸𑀭𑀼𑀤𑀸𑀦𑁂𑀦 𑀦 𑀯𑁂𑀴𑀼𑀤𑀸𑀦𑁂𑀦 𑀦 𑀧𑀢𑁆𑀢𑀤𑀸𑀦𑁂𑀦 𑀦 𑀧𑀼𑀧𑁆𑀨𑀤𑀸𑀦𑁂𑀦 𑀦 𑀨𑀮𑀤𑀸𑀦𑁂𑀦 𑀦 𑀲𑀺𑀦𑀸𑀦𑀤𑀸𑀦𑁂𑀦 𑀦 𑀘𑀼𑀡𑁆𑀡𑀤𑀸𑀦𑁂𑀦 𑀦 𑀫𑀢𑁆𑀢𑀺𑀓𑀸𑀤𑀸𑀦𑁂𑀦 𑀦 𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀦 𑀫𑀼𑀔𑁄𑀤𑀓𑀤𑀸𑀦𑁂𑀦 𑀦 𑀘𑀸𑀝𑀼𑀓𑀫𑁆𑀬𑀢𑀸𑀬 𑀦 𑀫𑀼𑀕𑁆𑀕𑀲𑀽𑀧𑁆𑀬𑀢𑀸𑀬 𑀦 𑀧𑀸𑀭𑀺𑀪𑀝𑁆𑀬𑀢𑀸𑀬 𑀦 𑀧𑀻𑀞𑀫𑀤𑁆𑀤𑀺𑀓𑀢𑀸𑀬 𑀦 𑀯𑀢𑁆𑀣𑀼𑀯𑀺𑀚𑁆𑀚𑀸𑀬 𑀦 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀦 𑀅𑀗𑁆𑀕𑀯𑀺𑀚𑁆𑀚𑀸𑀬 𑀦 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀬 𑀦 𑀤𑀽𑀢𑀕𑀫𑀦𑁂𑀦 𑀦 𑀧𑀳𑀺𑀡𑀕𑀫𑀦𑁂𑀦 𑀦 𑀚𑀗𑁆𑀖𑀧𑁂𑀲𑀦𑀺𑀬𑁂𑀦 𑀦 𑀯𑁂𑀚𑁆𑀚𑀓𑀫𑁆𑀫𑁂𑀦 𑀦 𑀦𑀯𑀓𑀫𑁆𑀫𑁂𑀦 𑀦 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀓𑁂𑀦 𑀦 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑁂𑀦, 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀸 𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑀪𑁄𑀚𑀻.

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻𑀢𑀺 𑀏𑀢𑁂 𑀅𑀦𑀯𑀚𑁆𑀚𑀪𑁄𑀚𑀻 𑀅𑀮𑀤𑁆𑀥𑀸 𑀅𑀮𑀪𑀺𑀢𑁆𑀯𑀸 𑀅𑀦𑀥𑀺𑀕𑀦𑁆𑀢𑁆𑀯𑀸 𑀅𑀯𑀺𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑁋 𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀅𑀤𑁆𑀥𑀸 𑀧𑀲𑀁𑀲𑀸𑀫 𑀲𑀳𑀸𑀬𑀲𑀫𑁆𑀧𑀤𑀁, 𑀲𑁂𑀝𑁆𑀞𑀸 𑀲𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑀳𑀸𑀬𑀸;

𑀏𑀢𑁂 𑀅𑀮𑀤𑁆𑀥𑀸 𑀅𑀦𑀯𑀚𑁆𑀚𑀪𑁄𑀚𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁩𑁪.

𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀧𑀪𑀲𑁆𑀲𑀭𑀸𑀦𑀺, 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀺;

𑀲𑀗𑁆𑀖𑀝𑁆𑀝𑀬𑀦𑁆𑀢𑀸𑀦𑀺 [𑀲𑀁𑀖𑀝𑁆𑀝𑀫𑀸𑀦𑀸𑀦𑀺 (𑀲𑀼. 𑀦𑀺. 𑁪𑁮)] 𑀤𑀼𑀯𑁂 𑀪𑀼𑀚𑀲𑁆𑀫𑀺𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀧𑀪𑀲𑁆𑀲𑀭𑀸𑀦𑀻𑀢𑀺 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀚𑀸𑀢𑀭𑀽𑀧𑀲𑁆𑀲. 𑀧𑀪𑀲𑁆𑀲𑀭𑀸𑀦𑀻𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀧𑀭𑀺𑀬𑁄𑀤𑀸𑀢𑀸𑀦𑀻𑀢𑀺 𑁋 𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀧𑀪𑀲𑁆𑀲𑀭𑀸𑀦𑀺.

𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀻𑀢𑀺 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀓𑀸𑀭𑁄. 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀻𑀢𑀺 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀺 𑀲𑀼𑀓𑀢𑀸𑀦𑀺 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀦𑀻𑀢𑀺 𑁋 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀺.

𑀲𑀗𑁆𑀖𑀝𑁆𑀝𑀬𑀦𑁆𑀢𑀸𑀦𑀺 𑀤𑀼𑀯𑁂 𑀪𑀼𑀚𑀲𑁆𑀫𑀺𑀦𑁆𑀢𑀺 𑀪𑀼𑀚𑁄 𑀯𑀼𑀘𑁆𑀘𑀢𑀺 𑀳𑀢𑁆𑀣𑁄. 𑀬𑀣𑀸 𑀏𑀓𑀲𑁆𑀫𑀺𑀁 𑀳𑀢𑁆𑀣𑁂 𑀤𑁆𑀯𑁂 𑀦𑀽𑀧𑀼𑀭𑀸𑀦𑀺 [𑀥𑀼𑀯𑀭𑀸𑀦𑀺 (𑀲𑁆𑀬𑀸.)] 𑀖𑀝𑁆𑀝𑁂𑀦𑁆𑀢𑀺 [𑀖𑀝𑁂𑀦𑁆𑀢𑀺 (𑀲𑁆𑀬𑀸.)]; 𑀏𑀯𑀫𑁂𑀯 𑀲𑀢𑁆𑀢𑀸 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀦𑀺𑀭𑀬𑁂 𑀖𑀝𑁆𑀝𑁂𑀦𑁆𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀖𑀝𑁆𑀝𑁂𑀦𑁆𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀖𑀝𑁆𑀝𑁂𑀦𑁆𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀖𑀝𑁆𑀝𑁂𑀦𑁆𑀢𑀺, 𑀤𑁂𑀯𑀮𑁄𑀓𑁂 𑀖𑀝𑁆𑀝𑁂𑀦𑁆𑀢𑀺, 𑀕𑀢𑀺𑀬𑀸 𑀕𑀢𑀺𑀁 𑀉𑀧𑀧𑀢𑁆𑀢𑀺𑀬𑀸 𑀉𑀧𑀧𑀢𑁆𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀝𑀺𑀲𑀦𑁆𑀥𑀺𑀁 𑀪𑀯𑁂𑀦 𑀪𑀯𑀁 𑀲𑀁𑀲𑀸𑀭𑁂𑀦 𑀲𑀁𑀲𑀸𑀭𑀁 𑀯𑀝𑁆𑀝𑁂𑀦 𑀯𑀝𑁆𑀝𑀁 𑀖𑀝𑁆𑀝𑁂𑀦𑁆𑀢𑀺 𑀲𑀗𑁆𑀖𑀝𑁆𑀝𑁂𑀦𑁆𑀢𑀺 𑀲𑀗𑁆𑀖𑀝𑁆𑀝𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀻𑀢𑀺 𑁋 𑀲𑀗𑁆𑀖𑀝𑁆𑀝𑀬𑀦𑁆𑀢𑀸𑀦𑀺 𑀤𑀼𑀯𑁂 𑀪𑀼𑀚𑀲𑁆𑀫𑀺𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀤𑀺𑀲𑁆𑀯𑀸 𑀲𑀼𑀯𑀡𑁆𑀡𑀲𑁆𑀲 𑀧𑀪𑀲𑁆𑀲𑀭𑀸𑀦𑀺, 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀲𑀼𑀦𑀺𑀝𑁆𑀞𑀺𑀢𑀸𑀦𑀺;

𑀲𑀗𑁆𑀖𑀝𑁆𑀝𑀬𑀦𑁆𑀢𑀸𑀦𑀺 𑀤𑀼𑀯𑁂 𑀪𑀼𑀚𑀲𑁆𑀫𑀺𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’.

𑁧𑁩𑁫.

𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳𑀸 𑀫𑀫𑀲𑁆𑀲, 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸;

𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳𑀸 𑀫𑀫𑀲𑁆𑀲𑀸𑀢𑀺 𑀢𑀡𑁆𑀳𑀸𑀤𑀼𑀢𑀺𑀬𑁄 𑀯𑀸 𑀳𑁄𑀢𑀺 𑀧𑀼𑀕𑁆𑀕𑀮𑀤𑀼𑀢𑀺𑀬𑁄 𑀯𑀸. 𑀓𑀣𑀁 𑀢𑀡𑁆𑀳𑀸𑀤𑀼𑀢𑀺𑀬𑁄 𑀳𑁄𑀢𑀺? 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀬𑀲𑁆𑀲𑁂𑀲𑀸 𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸, 𑀲𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸𑀤𑀼𑀢𑀺𑀬𑁄.

𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺.

𑀏𑀯𑀁 𑀢𑀡𑁆𑀳𑀸𑀤𑀼𑀢𑀺𑀬𑁄 𑀯𑀸 𑀳𑁄𑀢𑀺.

𑀓𑀣𑀁 𑀧𑀼𑀕𑁆𑀕𑀮𑀤𑀼𑀢𑀺𑀬𑁄 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀦 𑀅𑀢𑁆𑀣𑀳𑁂𑀢𑀼 [𑀅𑀢𑁆𑀢𑀳𑁂𑀢𑀼 (𑀲𑁆𑀬𑀸.)] 𑀦 𑀓𑀸𑀭𑀡𑀳𑁂𑀢𑀼 𑀉𑀤𑁆𑀥𑀢𑁄 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀏𑀓𑀲𑁆𑀲 𑀯𑀸 𑀤𑀼𑀢𑀺𑀬𑁄 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀢𑀺𑀬𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀯𑀸 𑀘𑀢𑀼𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀣 𑀩𑀳𑀼𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀮𑀧𑀢𑀺; 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 [𑀇𑀢𑁆𑀣𑀺𑀓𑀣𑀁 𑀧𑀼𑀭𑀺𑀲𑀓𑀣𑀁 (𑀲𑁆𑀬𑀸. 𑀓.) 𑀤𑀻. 𑀦𑀺. 𑁧.𑁧𑁭, 𑁨𑁦𑁧; 𑀲𑀁. 𑀦𑀺. 𑁫.𑁧𑁦𑁮𑁦 𑀧𑀲𑁆𑀲𑀺𑀢𑀩𑁆𑀩𑀁] 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀓𑀣𑁂𑀢𑀺. 𑀏𑀯𑀁 𑀧𑀼𑀕𑁆𑀕𑀮𑀤𑀼𑀢𑀺𑀬𑁄 𑀳𑁄𑀢𑀻𑀢𑀺 𑁋 𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳𑀸 𑀫𑀫𑀲𑁆𑀲.

𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸𑀢𑀺 𑀯𑀸𑀘𑀸𑀪𑀺𑀮𑀸𑀧𑁄 𑀯𑀼𑀘𑁆𑀘𑀢𑀺 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁. 𑀅𑀪𑀺𑀲𑀚𑁆𑀚𑀦𑀸 𑀯𑀸𑀢𑀺 𑀤𑁆𑀯𑁂 𑀲𑀚𑁆𑀚𑀦𑀸 𑁋 𑀢𑀡𑁆𑀳𑀸𑀲𑀚𑁆𑀚𑀦𑀸 𑀘 𑀤𑀺𑀝𑁆𑀞𑀺𑀲𑀚𑁆𑀚𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑀚𑁆𑀚𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑀚𑁆𑀚𑀦𑀸𑀢𑀺 𑁋 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸.

𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀪𑀬𑀦𑁆𑀢𑀺 𑀚𑀸𑀢𑀺𑀪𑀬𑀁 𑀚𑀭𑀸𑀪𑀬𑀁 𑀩𑁆𑀬𑀸𑀥𑀺𑀪𑀬𑀁 𑀫𑀭𑀡𑀪𑀬𑀁 𑀭𑀸𑀚𑀪𑀬𑀁 𑀘𑁄𑀭𑀪𑀬𑀁 𑀅𑀕𑁆𑀕𑀺𑀪𑀬𑀁 𑀉𑀤𑀓𑀪𑀬𑀁 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀧𑀭𑀸𑀦𑀼𑀯𑀸𑀤𑀪𑀬𑀁 𑀤𑀡𑁆𑀟𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀊𑀫𑀺𑀪𑀬𑀁 𑀓𑀼𑀫𑁆𑀪𑀺𑀮𑀪𑀬𑀁 𑀆𑀯𑀝𑁆𑀝𑀪𑀬𑀁 𑀲𑀼𑀲𑀼𑀫𑀸𑀭𑀪𑀬𑀁 𑀆𑀚𑀻𑀯𑀓𑀪𑀬𑀁 𑀅𑀲𑀺𑀮𑁄𑀓𑀪𑀬𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀁 𑀫𑀤𑀦𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄. 𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀏𑀯𑀁 𑀤𑀼𑀢𑀻𑀬𑁂𑀦 𑀲𑀳𑀸 𑀫𑀫𑀲𑁆𑀲, 𑀯𑀸𑀘𑀸𑀪𑀺𑀮𑀸𑀧𑁄 𑀅𑀪𑀺𑀲𑀚𑁆𑀚𑀦𑀸 𑀯𑀸;

𑀏𑀢𑀁 𑀪𑀬𑀁 𑀆𑀬𑀢𑀺𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’.

𑁧𑁩𑁬.

𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀘𑀺𑀢𑁆𑀭𑀸𑀢𑀺 𑀦𑀸𑀦𑀸𑀯𑀡𑁆𑀡𑀸 𑀭𑀽𑀧𑀸 𑀦𑀸𑀦𑀸𑀯𑀡𑁆𑀡𑀸 𑀲𑀤𑁆𑀤𑀸 𑀦𑀸𑀦𑀸𑀯𑀡𑁆𑀡𑀸 𑀕𑀦𑁆𑀥𑀸 𑀦𑀸𑀦𑀸𑀯𑀡𑁆𑀡𑀸 𑀭𑀲𑀸 𑀦𑀸𑀦𑀸𑀯𑀡𑁆𑀡𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀫𑀥𑀼𑀭𑀸𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 [𑀫. 𑀦𑀺. 𑁧.𑁧𑁬𑁭 𑀧𑀲𑁆𑀲𑀺𑀢𑀩𑁆𑀩𑀁] 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀲𑀼𑀔𑀁 𑀫𑀺𑀴𑁆𑀳𑀲𑀼𑀔𑀁 [𑀫𑀻𑀴𑁆𑀳𑀲𑀼𑀔𑀁 (𑀧𑀲𑁆𑀲 𑀫. 𑀦𑀺. 𑁩.𑁩𑁨𑁮)] 𑀧𑀼𑀣𑀼𑀚𑁆𑀚𑀦𑀲𑀼𑀔𑀁 𑀅𑀦𑀭𑀺𑀬𑀲𑀼𑀔𑀁, 𑀦 𑀲𑁂𑀯𑀺𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀦 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, ‘𑀪𑀸𑀬𑀺𑀢𑀩𑁆𑀩𑀁 𑀏𑀢𑀲𑁆𑀲 𑀲𑀼𑀔𑀲𑁆𑀲𑀸’𑀢𑀺 𑀯𑀤𑀸𑀫𑀻’’𑀢𑀺 𑁋 𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸𑀢𑀺. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁…𑀧𑁂… 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀫𑀦𑁄 𑀭𑀫𑁂𑀦𑁆𑀢𑀺 𑀣𑁄𑀫𑁂𑀦𑁆𑀢𑀺 𑀢𑁄𑀲𑁂𑀦𑁆𑀢𑀺 𑀧𑀳𑀸𑀲𑁂𑀦𑁆𑀢𑀻𑀢𑀺 𑁋 𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸.

𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀦𑁆𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀭𑀽𑀧𑁂𑀳𑀺…𑀧𑁂… 𑀦𑀸𑀦𑀸𑀯𑀡𑁆𑀡𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀺 𑀘𑀺𑀢𑁆𑀢𑀁 𑀫𑀣𑁂𑀦𑁆𑀢𑀺 𑀢𑁄𑀲𑁂𑀦𑁆𑀢𑀺 𑀧𑀳𑀸𑀲𑁂𑀦𑁆𑀢𑀻𑀢𑀺 𑁋 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁.

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄? 𑀇𑀥, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀬𑀤𑀺 𑀫𑀼𑀤𑁆𑀤𑀸𑀬 𑀬𑀤𑀺 𑀕𑀡𑀦𑀸𑀬 𑀬𑀤𑀺 𑀲𑀗𑁆𑀔𑀸𑀦𑁂𑀦 𑀬𑀤𑀺 𑀓𑀲𑀺𑀬𑀸 𑀬𑀤𑀺 𑀯𑀡𑀺𑀚𑁆𑀚𑀸𑀬 𑀬𑀤𑀺 𑀕𑁄𑀭𑀓𑁆𑀔𑁂𑀦 𑀬𑀤𑀺 𑀇𑀲𑁆𑀲𑀢𑁆𑀣𑁂𑀦 [𑀇𑀲𑁆𑀲𑀝𑁆𑀞𑁂𑀦 (𑀲𑁆𑀬𑀸.), 𑀇𑀲𑁆𑀲𑀢𑁆𑀢𑁂𑀦 (𑀓.) 𑀧𑀲𑁆𑀲 𑀫. 𑀦𑀺. 𑁧.𑁧𑁬𑁭] 𑀬𑀤𑀺 𑀭𑀸𑀚𑀧𑁄𑀭𑀺𑀲𑁂𑀦 𑀬𑀤𑀺 𑀲𑀺𑀧𑁆𑀧𑀜𑁆𑀜𑀢𑀭𑁂𑀦, 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀲𑀫𑁆𑀨𑀲𑁆𑀲𑀫𑀸𑀦𑁄 [𑀭𑀺𑀲𑁆𑀲𑀫𑀸𑀦𑁄 (𑀫. 𑀦𑀺. 𑁧.𑁧𑁬𑁭)] 𑀔𑀼𑀧𑁆𑀧𑀺𑀧𑀸𑀲𑀸𑀬 𑀫𑀻𑀬𑀫𑀸𑀦𑁄; 𑀅𑀬𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀯𑀁 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀢𑁂 𑀪𑁄𑀕𑀸 𑀦𑀸𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺 𑁋 ‘𑀫𑁄𑀖𑀁 𑀯𑀢 𑀫𑁂 𑀉𑀝𑁆𑀞𑀸𑀦𑀁, 𑀅𑀨𑀮𑁄 𑀯𑀢 𑀫𑁂 𑀯𑀸𑀬𑀸𑀫𑁄’𑀢𑀺. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀯𑀁 𑀉𑀝𑁆𑀞𑀳𑀢𑁄 𑀖𑀝𑀢𑁄 𑀯𑀸𑀬𑀫𑀢𑁄 𑀢𑁂 𑀪𑁄𑀕𑀸 𑀅𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀲𑁄 𑀢𑁂𑀲𑀁 𑀪𑁄𑀕𑀸𑀦𑀁 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 [𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 (𑀲𑁆𑀬𑀸. 𑀓.)] 𑀧𑀝𑀺𑀲𑀁𑀯𑁂𑀤𑁂𑀢𑀺 𑁋 ‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁, 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁, 𑀦 𑀅𑀕𑁆𑀕𑀺 𑀟𑀳𑁂𑀬𑁆𑀬, 𑀦 𑀉𑀤𑀓𑀁 𑀯𑀳𑁂𑀬𑁆𑀬, 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀆𑀭𑀓𑁆𑀔𑀢𑁄 𑀕𑁄𑀧𑀬𑀢𑁄 𑀢𑁂 𑀪𑁄𑀕𑁂 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺 𑀅𑀕𑁆𑀕𑀺 𑀯𑀸 𑀟𑀳𑀢𑀺 𑀉𑀤𑀓𑀁 𑀯𑀸 𑀯𑀳𑀢𑀺 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺. 𑀲𑁄 𑀲𑁄𑀘𑀢𑀺…𑀧𑁂… 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺 𑁋 ‘𑀬𑀫𑁆𑀧𑀺 𑀫𑁂 𑀅𑀳𑁄𑀲𑀺 𑀢𑀫𑁆𑀧𑀺 𑀦𑁄 𑀦𑀢𑁆𑀣𑀻’𑀢𑀺. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀭𑀸𑀚𑀸𑀦𑁄𑀧𑀺 𑀭𑀸𑀚𑀽𑀳𑀺 𑀯𑀺𑀯𑀤𑀦𑁆𑀢𑀺, 𑀔𑀢𑁆𑀢𑀺𑀬𑀸𑀧𑀺 𑀔𑀢𑁆𑀢𑀺𑀬𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀕𑀳𑀧𑀢𑀻𑀧𑀺 𑀕𑀳𑀧𑀢𑀻𑀳𑀺 𑀯𑀺𑀯𑀤𑀦𑁆𑀢𑀺, 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺. 𑀢𑁂 𑀢𑀢𑁆𑀣 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀧𑀸𑀡𑀻𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺 𑀮𑁂𑀟𑁆𑀟𑀽𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺 𑀤𑀡𑁆𑀟𑁂𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺 𑀲𑀢𑁆𑀣𑁂𑀳𑀺𑀧𑀺 𑀉𑀧𑀓𑁆𑀓𑀫𑀦𑁆𑀢𑀺. 𑀢𑁂 𑀢𑀢𑁆𑀣 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀉𑀪𑀢𑁄𑀩𑁆𑀬𑀽𑀴𑁆𑀳𑀁 [𑀉𑀪𑀢𑁄𑀯𑀺𑀬𑀽𑀴𑁆𑀳𑀁 (𑀲𑁆𑀬𑀸.) 𑀧𑀲𑁆𑀲 𑀫. 𑀦𑀺. 𑁧.𑁧𑁬𑁮] 𑀲𑀗𑁆𑀕𑀸𑀫𑀁 𑀧𑀓𑁆𑀔𑀦𑁆𑀤𑀦𑁆𑀢𑀺, 𑀉𑀲𑀽𑀲𑀼𑀧𑀺 𑀔𑀺𑀧𑁆𑀧𑀫𑀸𑀦𑁂𑀲𑀼 𑀲𑀢𑁆𑀢𑀻𑀲𑀼𑀧𑀺 𑀔𑀺𑀧𑁆𑀧𑀫𑀸𑀦𑀸𑀲𑀼 𑀅𑀲𑀻𑀲𑀼𑀧𑀺 𑀯𑀺𑀚𑁆𑀚𑁄𑀢𑀮𑀦𑁆𑀢𑁂𑀲𑀼. 𑀢𑁂 𑀢𑀢𑁆𑀣 𑀉𑀲𑀽𑀳𑀺𑀧𑀺 𑀯𑀺𑀚𑁆𑀛𑀦𑁆𑀢𑀺 𑀲𑀢𑁆𑀢𑀻𑀳𑀺𑀧𑀺 [𑀲𑀢𑁆𑀢𑀺𑀬𑀸𑀧𑀺 (𑀫. 𑀦𑀺. 𑁧.𑁧𑁬𑁭, 𑁧𑁭𑁮)] 𑀯𑀺𑀚𑁆𑀛𑀦𑁆𑀢𑀺 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀢𑁂 𑀢𑀢𑁆𑀣 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀅𑀤𑁆𑀤𑀸𑀯𑀮𑁂𑀧𑀦𑀸 [𑀅𑀤𑁆𑀥𑀸𑀯𑀮𑁂𑀧𑀦𑀸 (𑀲𑁆𑀬𑀸.)] 𑀉𑀧𑀓𑀸𑀭𑀺𑀬𑁄 𑀧𑀓𑁆𑀔𑀦𑁆𑀤𑀦𑁆𑀢𑀺, 𑀉𑀲𑀽𑀲𑀼𑀧𑀺 𑀔𑀺𑀧𑁆𑀧𑀫𑀸𑀦𑁂𑀲𑀼 𑀲𑀢𑁆𑀢𑀻𑀲𑀼𑀧𑀺 𑀔𑀺𑀧𑁆𑀧𑀫𑀸𑀦𑀸𑀲𑀼, 𑀅𑀲𑀻𑀲𑀼𑀧𑀺 𑀯𑀺𑀚𑁆𑀚𑁄𑀢𑀮𑀦𑁆𑀢𑁂𑀲𑀼. 𑀢𑁂 𑀢𑀢𑁆𑀣 𑀉𑀲𑀽𑀳𑀺𑀧𑀺 𑀯𑀺𑀚𑁆𑀛𑀦𑁆𑀢𑀺 𑀲𑀢𑁆𑀢𑀻𑀳𑀺𑀧𑀺 𑀯𑀺𑀚𑁆𑀛𑀦𑁆𑀢𑀺 𑀙𑀓𑀡𑀓𑀸𑀬𑀧𑀺 [𑀙𑀓𑀡𑀝𑀺𑀬𑀸𑀧𑀺 (𑀲𑁆𑀬𑀸.), 𑀧𑀓𑁆𑀓𑀝𑁆𑀞𑀺𑀬𑀸 (𑀲𑀻. 𑀅𑀝𑁆𑀞.) 𑀧𑀲𑁆𑀲 𑀫. 𑀦𑀺. 𑁧.𑁧𑁬𑁮] 𑀑𑀲𑀺𑀜𑁆𑀘𑀦𑁆𑀢𑀺 𑀅𑀪𑀺𑀯𑀕𑁆𑀕𑁂𑀦𑀧𑀺 𑀑𑀫𑀤𑁆𑀤𑀦𑁆𑀢𑀺 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀢𑁂 𑀢𑀢𑁆𑀣 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀦𑁆𑀢𑀺 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀦𑁆𑀢𑀺 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑀺 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀅𑀟𑁆𑀠𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺…𑀧𑁂… 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀢𑁂 𑀢𑀢𑁆𑀣 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺. 𑀢𑁂 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀅𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀫𑁆𑀧𑀭𑀸𑀬𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀓𑀸𑀫𑀸𑀦𑀫𑁂𑀯 𑀳𑁂𑀢𑀼’’.

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸𑀢𑀺 𑀓𑀸𑀫𑀕𑀼𑀡𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁩𑁭.

𑀈𑀢𑀻 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀁;

𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀈𑀢𑀻 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀪𑀬𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀭𑁄𑀕𑁄𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀕𑀡𑁆𑀟𑁄𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀮𑁆𑀮𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀗𑁆𑀕𑁄𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀗𑁆𑀓𑁄𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀕𑀩𑁆𑀪𑁄𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, 𑀪𑀬𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁? 𑀬𑀲𑁆𑀫𑀸 𑀘 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄 [𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀦𑁆𑀥𑁄 (𑀲𑁆𑀬𑀸. 𑀓.) 𑀧𑀲𑁆𑀲 𑀅. 𑀦𑀺. 𑁮.𑁫𑁬] 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀪𑀬𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀪𑀬𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀪𑀬𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑁆𑀢𑀺…𑀧𑁂… 𑀭𑁄𑀕𑁄𑀢𑀺… 𑀕𑀡𑁆𑀟𑁄𑀢𑀺… 𑀲𑀮𑁆𑀮𑀦𑁆𑀢𑀺… 𑀲𑀗𑁆𑀕𑁄𑀢𑀺… 𑀧𑀗𑁆𑀓𑁄𑀢𑀺… 𑀕𑀩𑁆𑀪𑁄𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁? 𑀬𑀲𑁆𑀫𑀸 𑀘 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀕𑀩𑁆𑀪𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀕𑀩𑁆𑀪𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀕𑀩𑁆𑀪𑁄𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀪𑀬𑀁 𑀤𑀼𑀓𑁆𑀔𑀜𑁆𑀘 𑀭𑁄𑀕𑁄 𑀘, 𑀕𑀡𑁆𑀟𑁄 𑀲𑀮𑁆𑀮𑀜𑁆𑀘 𑀲𑀗𑁆𑀕𑁄 𑀘;

𑀧𑀗𑁆𑀓𑁄 𑀕𑀩𑁆𑀪𑁄 𑀘 𑀉𑀪𑀬𑀁, 𑀏𑀢𑁂 𑀓𑀸𑀫𑀸 𑀧𑀯𑀼𑀘𑁆𑀘𑀦𑁆𑀢𑀺;

𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄.

𑀑𑀢𑀺𑀡𑁆𑀡𑁄 𑀲𑀸𑀢𑀭𑀽𑀧𑁂𑀦, 𑀧𑀼𑀦 𑀕𑀩𑁆𑀪𑀸𑀬 𑀕𑀘𑁆𑀙𑀢𑀺;

𑀬𑀢𑁄 𑀘 𑀪𑀺𑀓𑁆𑀔𑀼 𑀆𑀢𑀸𑀧𑀻, 𑀲𑀫𑁆𑀧𑀚𑀜𑁆𑀜𑀁 𑀦 𑀭𑀺𑀘𑁆𑀘𑀢𑀺 [𑀦 𑀭𑀺𑀜𑁆𑀘𑀢𑀺 (𑀲𑁆𑀬𑀸. 𑀓.) 𑀲𑀁. 𑀦𑀺. 𑁪.𑁨𑁫𑁧].

𑀲𑁄 𑀇𑀫𑀁 𑀧𑀮𑀺𑀧𑀣𑀁 𑀤𑀼𑀕𑁆𑀕𑀁, 𑀅𑀢𑀺𑀓𑁆𑀓𑀫𑁆𑀫 𑀢𑀣𑀸𑀯𑀺𑀥𑁄;

𑀧𑀚𑀁 𑀚𑀸𑀢𑀺𑀚𑀭𑀽𑀧𑁂𑀢𑀁, 𑀨𑀦𑁆𑀤𑀫𑀸𑀦𑀁 𑀅𑀯𑁂𑀓𑁆𑀔𑀢𑀻𑀢𑀺.

𑀈𑀢𑀻 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀁.

𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸𑀢𑀺 𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀈𑀢𑀻 𑀘 𑀕𑀡𑁆𑀟𑁄 𑀘 𑀉𑀧𑀤𑁆𑀤𑀯𑁄 𑀘, 𑀭𑁄𑀕𑁄 𑀘 𑀲𑀮𑁆𑀮𑀜𑁆𑀘 𑀪𑀬𑀜𑁆𑀘 𑀫𑁂𑀢𑀁;

𑀏𑀢𑀁 𑀪𑀬𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁩𑁮.

𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀁, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 [𑀟𑀁𑀲𑀲𑀺𑀭𑀺𑀁𑀲𑀧𑁂 (𑀲𑁆𑀬𑀸.), 𑀟𑀁𑀲𑀫𑀓𑀲𑀲𑀭𑀻𑀲𑀧𑁂 (𑀓.)] 𑀘;

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀲𑀫𑁆𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀦𑁆𑀢𑀺. 𑀲𑀻𑀢𑀦𑁆𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀻𑀢𑀁 𑀳𑁄𑀢𑀺 𑁋 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀧𑁆𑀧𑀓𑁄𑀧𑀯𑀲𑁂𑀦 𑀯𑀸 𑀲𑀻𑀢𑀁 𑀳𑁄𑀢𑀺 𑀩𑀳𑀺𑀤𑁆𑀥𑀸 𑀉𑀢𑀼𑀯𑀲𑁂𑀦 𑀯𑀸 𑀲𑀻𑀢𑀁 𑀳𑁄𑀢𑀺. 𑀉𑀡𑁆𑀳𑀦𑁆𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀡𑁆𑀳𑀁 𑀳𑁄𑀢𑀺 𑁋 𑀅𑀩𑁆𑀪𑀦𑁆𑀢𑀭𑀥𑀸𑀢𑀼𑀧𑁆𑀧𑀓𑁄𑀧𑀯𑀲𑁂𑀦 𑀯𑀸 𑀉𑀡𑁆𑀳𑀁 𑀳𑁄𑀢𑀺 𑀩𑀳𑀺𑀤𑁆𑀥𑀸 𑀉𑀢𑀼𑀯𑀲𑁂𑀦 𑀯𑀸 𑀉𑀡𑁆𑀳𑀁 𑀳𑁄𑀢𑀺. 𑀔𑀼𑀤𑀸 [𑀔𑀼𑀤𑁆𑀤𑀸 (𑀲𑁆𑀬𑀸. 𑀓.)] 𑀯𑀼𑀘𑁆𑀘𑀢𑀺 𑀙𑀸𑀢𑀓𑁄. 𑀧𑀺𑀧𑀸𑀲𑀸 𑀯𑀼𑀘𑁆𑀘𑀢𑀺 𑀉𑀤𑀓𑀧𑀺𑀧𑀸𑀲𑀸𑀢𑀺 𑁋 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀁.

𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘𑀸𑀢𑀺. 𑀯𑀸𑀢𑀸𑀢𑀺 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀸 𑀧𑀘𑁆𑀙𑀺𑀫𑀸 𑀯𑀸𑀢𑀸 𑀉𑀢𑁆𑀢𑀭𑀸 𑀯𑀸𑀢𑀸 𑀤𑀓𑁆𑀔𑀺𑀡𑀸 𑀯𑀸𑀢𑀸 𑀲𑀭𑀚𑀸 𑀯𑀸𑀢𑀸 𑀅𑀭𑀚𑀸 𑀯𑀸𑀢𑀸 𑀲𑀻𑀢𑀸 𑀯𑀸𑀢𑀸 𑀉𑀡𑁆𑀳𑀸 𑀯𑀸𑀢𑀸 𑀧𑀭𑀺𑀢𑁆𑀢𑀸 𑀯𑀸𑀢𑀸 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀯𑁂𑀭𑀫𑁆𑀪𑀯𑀸𑀢𑀸 𑀧𑀓𑁆𑀔𑀯𑀸𑀢𑀸 𑀲𑀼𑀧𑀡𑁆𑀡𑀯𑀸𑀢𑀸 𑀢𑀸𑀮𑀧𑀡𑁆𑀡𑀯𑀸𑀢𑀸 [𑀢𑀸𑀮𑀯𑀡𑁆𑀟𑀯𑀸𑀢𑀸 (𑀓.) 𑀘𑀽𑀴𑀦𑀺. 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁩] 𑀯𑀺𑀥𑀽𑀧𑀦𑀯𑀸𑀢𑀸. 𑀆𑀢𑀧𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑀲𑀦𑁆𑀢𑀸𑀧𑁄. 𑀟𑀁𑀲𑀸 𑀯𑀼𑀘𑁆𑀘𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀲𑀭𑀻𑀲𑀧𑀸 𑀯𑀼𑀘𑁆𑀘𑀦𑁆𑀢𑀺 𑀅𑀳𑀻𑀢𑀺 𑁋 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘.

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀲𑀫𑁆𑀪𑀯𑀺𑀢𑁆𑀯𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸𑀢𑀺 𑁋 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀲𑀫𑁆𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀔𑀼𑀤𑀁 𑀧𑀺𑀧𑀸𑀲𑀁, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘;

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀅𑀪𑀺𑀲𑀫𑁆𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁩𑁯.

𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸, 𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄;

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑁂 [𑀯𑀻𑀳𑀭𑀁 (𑀲𑀼. 𑀦𑀺. 𑁫𑁩)] 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸𑀢𑀺 𑀦𑀸𑀕𑁄 𑀯𑀼𑀘𑁆𑀘𑀢𑀺 𑀳𑀢𑁆𑀣𑀺𑀦𑀸𑀕𑁄. 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀦𑀸𑀕𑁄. 𑀓𑀺𑀁𑀓𑀸𑀭𑀡𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦𑀸𑀕𑁄? 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄; 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄; 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄. 𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄? 𑀆𑀕𑀼 𑀯𑀼𑀘𑁆𑀘𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂, 𑀲𑀩𑁆𑀩𑀲𑀁𑀬𑁄𑀕𑁂 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀺 𑀯𑀺𑀫𑀼𑀢𑁆𑀢𑁄, 𑀦𑀸𑀕𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄? 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺, 𑀦 𑀯𑀕𑁆𑀕𑁂𑀳𑀺 𑀓𑀧𑁆𑀧𑁂𑀳𑀺 𑀬𑀸𑀬𑀢𑀺 𑀦𑀻𑀬𑀢𑀺 [𑀦𑀺𑀬𑁆𑀬𑀢𑀺 (𑀲𑁆𑀬𑀸. 𑀓.)] 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺. 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄.

𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸𑀢𑀺 𑀬𑀣𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑁂𑀢𑁆𑀯𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀅𑀭𑀜𑁆𑀜𑀯𑀦𑀫𑀚𑁆𑀛𑁄𑀕𑀸𑀳𑁂𑀢𑁆𑀯𑀸 [𑀅𑀭𑀜𑁆𑀜𑁂 𑀯𑀦𑀫𑀚𑁆𑀛𑀲𑁆𑀲 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 (𑀲𑁆𑀬𑀸.)] 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀕𑀡𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀪𑀺𑀯𑀚𑁆𑀚𑁂𑀢𑁆𑀯𑀸 𑀏𑀓𑁄 [𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 (𑀲𑁆𑀬𑀸.)] 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺 𑀏𑀓𑁄 𑀢𑀺𑀝𑁆𑀞𑀢𑀺 𑀏𑀓𑁄 𑀦𑀺𑀲𑀻𑀤𑀢𑀺 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸.

𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄𑀢𑀺 𑀬𑀣𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀲𑀢𑁆𑀢𑀭𑀢𑀦𑁄 𑀯𑀸 𑀳𑁄𑀢𑀺 𑀅𑀝𑁆𑀞𑀭𑀢𑀦𑁄 𑀯𑀸, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀲𑀜𑁆𑀚𑀸𑀢𑀓𑁆𑀔𑀦𑁆𑀥𑁄 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦. 𑀬𑀣𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀧𑀤𑀼𑀫𑀻, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀳𑀺 𑀧𑀤𑀼𑀫𑀻, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀼𑀧𑁆𑀨𑁂𑀦. 𑀬𑀣𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀉𑀴𑀸𑀭𑁄 𑀣𑀸𑀫𑁂𑀦 𑀩𑀮𑁂𑀦 𑀚𑀯𑁂𑀦 𑀲𑀽𑀭𑁂𑀦, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀉𑀴𑀸𑀭𑁄 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦𑀸𑀢𑀺 𑁋 𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄.

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑁂 𑀅𑀭𑀜𑁆𑀜𑁂𑀢𑀺 𑀬𑀣𑀸 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀧𑀞𑀫𑁂𑀦𑀧𑀺 𑀛𑀸𑀦𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺, 𑀤𑀼𑀢𑀺𑀬𑁂𑀦𑀧𑀺 𑀛𑀸𑀦𑁂𑀦…𑀧𑁂… 𑀢𑀢𑀺𑀬𑁂𑀦𑀧𑀺 𑀛𑀸𑀦𑁂𑀦… 𑀘𑀢𑀼𑀢𑁆𑀣𑁂𑀦𑀧𑀺 𑀛𑀸𑀦𑁂𑀦 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺; 𑀫𑁂𑀢𑁆𑀢𑀸𑀬𑀧𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺, 𑀓𑀭𑀼𑀡𑀸𑀬𑀧𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸… 𑀫𑀼𑀤𑀺𑀢𑀸𑀬𑀧𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸… 𑀉𑀧𑁂𑀓𑁆𑀔𑀸𑀬𑀧𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺; 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀧𑀺… 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸𑀧𑀺… 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀬𑀣𑀸𑀪𑀺𑀭𑀦𑁆𑀢𑀁 𑀅𑀭𑀜𑁆𑀜𑁂 𑀯𑀺𑀳𑀭𑀢𑀻𑀢𑀺 𑁋 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑁂 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀦𑀸𑀕𑁄𑀯 𑀬𑀽𑀣𑀸𑀦𑀺 𑀯𑀺𑀯𑀚𑁆𑀚𑀬𑀺𑀢𑁆𑀯𑀸, 𑀲𑀜𑁆𑀚𑀸𑀢𑀔𑀦𑁆𑀥𑁄 𑀧𑀤𑀼𑀫𑀻 𑀉𑀴𑀸𑀭𑁄;

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑁂 𑀅𑀭𑀜𑁆𑀜𑁂, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁦.

𑀅𑀝𑁆𑀞𑀸𑀦𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 [𑀨𑀼𑀲𑁆𑀲𑀬𑁂 (𑀲𑁆𑀬𑀸. 𑀓.)] 𑀲𑀸𑀫𑀬𑀺𑀓𑀁 [𑀆𑀲𑀸𑀫𑀸𑀬𑀺𑀓𑀁 (𑀓.)] 𑀯𑀺𑀫𑀼𑀢𑁆𑀢𑀺𑀁;

𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀅𑀝𑁆𑀞𑀸𑀦𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑀸𑀯𑀢𑀸𑀦𑀦𑁆𑀤 [𑀲𑁄 𑀯𑀢𑀸𑀦𑀦𑁆𑀤 (𑀫. 𑀦𑀺. 𑁩.𑁧𑁮𑁬)], 𑀪𑀺𑀓𑁆𑀔𑀼 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀕𑀡𑀸𑀭𑀸𑀫𑁄 𑀕𑀡𑀭𑀢𑁄 𑀕𑀡𑀲𑀫𑁆𑀫𑀼𑀤𑀺𑀢𑁄 (𑀕𑀡𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄) [( ) 𑀦𑀢𑁆𑀣𑀺 𑀫. 𑀦𑀺. 𑁩.𑁧𑁮𑁬], 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀧𑀯𑀺𑀯𑁂𑀓𑀲𑀼𑀔𑀁 𑀉𑀧𑀲𑀫𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁, 𑀢𑀲𑁆𑀲 𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀘 𑀔𑁄 𑀲𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀓𑁄 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑀢𑀺, 𑀢𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁. 𑀬𑀁 𑀢𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀧𑀯𑀺𑀯𑁂𑀓𑀲𑀼𑀔𑀁 𑀉𑀧𑀲𑀫𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁, 𑀢𑀲𑁆𑀲 𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑀸𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀕𑀡𑀸𑀭𑀸𑀫𑁄 𑀕𑀡𑀭𑀢𑁄 𑀕𑀡𑀲𑀫𑁆𑀫𑀼𑀤𑀺𑀢𑁄 (𑀕𑀡𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄,) 𑀲𑀸𑀫𑀸𑀬𑀺𑀓𑀁 [𑀲𑀸𑀫𑀬𑀺𑀓𑀁 (𑀲𑁆𑀬𑀸. 𑀓.)] 𑀯𑀸 𑀓𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀅𑀲𑀸𑀫𑀸𑀬𑀺𑀓𑀁 𑀯𑀸 𑀅𑀓𑀼𑀧𑁆𑀧𑀦𑁆𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁄 𑀘 𑀔𑁄 𑀲𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀓𑁄 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑀢𑀺, 𑀢𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀲𑀸𑀫𑀸𑀬𑀺𑀓𑀁 𑀯𑀸 𑀓𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀅𑀲𑀸𑀫𑀸𑀬𑀺𑀓𑀁 𑀯𑀸 𑀅𑀓𑀼𑀧𑁆𑀧𑀦𑁆𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺 𑁋 𑀅𑀝𑁆𑀞𑀸𑀦𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁.

𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫𑀸𑀢𑀺 𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄. 𑀲𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦. 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀽𑀭𑀺𑀬𑀲𑁆𑀲 𑀕𑁄𑀢𑁆𑀢𑀜𑀸𑀢𑀓𑁄 𑀕𑁄𑀢𑁆𑀢𑀩𑀦𑁆𑀥𑀼, 𑀢𑀲𑁆𑀫𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀆𑀤𑀺𑀘𑁆𑀘𑀩𑀦𑁆𑀥𑀼. 𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫𑀸𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀅𑀝𑁆𑀞𑀸𑀦𑀢𑀁 𑀲𑀗𑁆𑀕𑀡𑀺𑀓𑀸𑀭𑀢𑀲𑁆𑀲, 𑀬𑀁 𑀨𑀲𑁆𑀲𑀬𑁂 𑀲𑀸𑀫𑀬𑀺𑀓𑀁 𑀯𑀺𑀫𑀼𑀢𑁆𑀢𑀺𑀁;

𑀆𑀤𑀺𑀘𑁆𑀘𑀩𑀦𑁆𑀥𑀼𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀢𑀺𑀬𑀯𑀕𑁆𑀕𑁄

𑁧𑁪𑁧.

𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄;

𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀻. 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁, 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄, 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀇𑀫𑀸𑀦𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺. 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄.

𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄𑀢𑀺 𑀦𑀺𑀬𑀸𑀫𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸; 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀬𑀸𑀫𑀁 𑀧𑀢𑁆𑀢𑁄 𑀲𑀫𑁆𑀧𑀢𑁆𑀢𑁄 𑀅𑀥𑀺𑀕𑀢𑁄 𑀨𑀲𑁆𑀲𑀺𑀢𑁄 𑀲𑀘𑁆𑀙𑀺𑀓𑀢𑁄𑀢𑀺 𑁋 𑀧𑀢𑁆𑀢𑁄 𑀦𑀺𑀬𑀸𑀫𑀁. 𑀧𑀝𑀺𑀮𑀤𑁆𑀥𑀫𑀕𑁆𑀕𑁄𑀢𑀺 𑀮𑀤𑁆𑀥𑀫𑀕𑁆𑀕𑁄 𑀧𑀝𑀺𑀮𑀤𑁆𑀥𑀫𑀕𑁆𑀕𑁄 𑀅𑀥𑀺𑀕𑀢𑀫𑀕𑁆𑀕𑁄 𑀨𑀲𑁆𑀲𑀺𑀢𑀫𑀕𑁆𑀕𑁄 𑀲𑀘𑁆𑀙𑀺𑀓𑀢𑀫𑀕𑁆𑀕𑁄𑀢𑀺 𑁋 𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄.

𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀲𑀫𑀼𑀧𑁆𑀧𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀲𑀫𑀼𑀧𑁆𑀧𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀁, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀲𑀫𑀼𑀧𑁆𑀧𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀁 𑀧𑀸𑀢𑀼𑀪𑀽𑀢𑀦𑁆𑀢𑀺 𑁋 𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺. 𑀅𑀦𑀜𑁆𑀜𑀦𑁂𑀬𑁆𑀬𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦 𑀧𑀭𑀦𑁂𑀬𑁆𑀬𑁄

𑀦 𑀧𑀭𑀧𑁆𑀧𑀢𑁆𑀢𑀺𑀬𑁄 𑀦 𑀧𑀭𑀧𑁆𑀧𑀘𑁆𑀘𑀬𑁄 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽, 𑀬𑀣𑀸𑀪𑀽𑀢𑀁 [𑀢𑀁 (𑀓.)] 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀦 𑀧𑀭𑀦𑁂𑀬𑁆𑀬𑁄 𑀦 𑀧𑀭𑀧𑁆𑀧𑀢𑁆𑀢𑀺𑀬𑁄 𑀦 𑀧𑀭𑀧𑁆𑀧𑀘𑁆𑀘𑀬𑁄 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽, 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀦 𑀧𑀭𑀦𑁂𑀬𑁆𑀬𑁄 𑀦 𑀧𑀭𑀧𑁆𑀧𑀢𑁆𑀢𑀺𑀬𑁄 𑀦 𑀧𑀭𑀧𑁆𑀧𑀘𑁆𑀘𑀬𑁄 𑀦 𑀧𑀭𑀧𑀝𑀺𑀩𑀤𑁆𑀥𑀕𑀽, 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄𑀢𑀺 𑁋 𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀤𑀺𑀝𑁆𑀞𑀻𑀯𑀺𑀲𑀽𑀓𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀧𑀢𑁆𑀢𑁄 𑀦𑀺𑀬𑀸𑀫𑀁 𑀧𑀝𑀺𑀮𑀤𑁆𑀥𑀫𑀕𑁆𑀕𑁄;

𑀉𑀧𑁆𑀧𑀦𑁆𑀦𑀜𑀸𑀡𑁄𑀫𑁆𑀳𑀺 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁨.

𑀦𑀺𑀮𑁆𑀮𑁄𑀮𑀼𑀧𑁄 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄, 𑀦𑀺𑀫𑁆𑀫𑀓𑁆𑀔𑁄 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄;

𑀦𑀺𑀭𑀸𑀲𑀲𑁄 [𑀦𑀺𑀭𑀸𑀲𑀬𑁄 (𑀲𑀻. 𑀅𑀝𑁆𑀞.) 𑀲𑀼. 𑀦𑀺. 𑁫𑁬] 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀦𑀺𑀮𑁆𑀮𑁄𑀮𑀼𑀧𑁄 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄𑀢𑀺 𑀮𑁄𑀮𑀼𑀧𑁆𑀧𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀮𑁄𑀮𑀼𑀧𑁆𑀧𑀸 𑀢𑀡𑁆𑀳𑀸 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦𑀺𑀮𑁆𑀮𑁄𑀮𑀼𑀧𑁄.

𑀦𑀺𑀓𑁆𑀓𑀼𑀳𑁄𑀢𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑁋 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥 𑀕𑀳𑀧𑀢𑀺𑀓𑀸 𑀪𑀺𑀓𑁆𑀔𑀼𑀁 [𑀪𑀺𑀓𑁆𑀔𑀽 (𑀓.) 𑀫𑀳𑀸𑀦𑀺. 𑁮𑁭] 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺, 𑀲𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀢𑁆𑀣𑀺𑀓𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁂𑀦𑀸𑀲𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀘𑀻𑀯𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀲𑀼𑀲𑀸𑀦𑀸 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀓𑀁 𑀓𑀭𑀺𑀢𑁆𑀯𑀸 𑀥𑀸𑀭𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀧𑀺𑀡𑁆𑀟𑀧𑀸𑀢𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀲𑁂𑀦𑀸𑀲𑀦𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀅𑀲𑁆𑀲 𑀲𑁄𑀲𑀸𑀦𑀺𑀓𑁄 𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑁄 𑀯𑀸. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁 𑀬𑀁 𑀲𑀫𑀡𑁄 𑀧𑀽𑀢𑀺𑀫𑀼𑀢𑁆𑀢𑁂𑀦 𑀯𑀸 𑀳𑀭𑀺𑀢𑀓𑀻𑀔𑀡𑁆𑀟𑁂𑀦 𑀯𑀸 𑀑𑀲𑀥𑀁 𑀓𑀭𑁂𑀬𑁆𑀬𑀸’’𑀢𑀺. 𑀢𑀤𑀼𑀧𑀸𑀤𑀸𑀬 𑀮𑀽𑀔𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺 𑀮𑀽𑀔𑀁 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺 𑀮𑀽𑀔𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺. 𑀢𑀫𑁂𑀦𑀁 𑀕𑀳𑀧𑀢𑀺𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀥𑀼𑀢𑀯𑀸𑀤𑁄’’𑀢𑀺. 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀏𑀯𑀫𑀸𑀳 𑁋 ‘‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀼𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀲𑀤𑁆𑀥𑀸 𑀅𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀲𑀁𑀯𑀺𑀚𑁆𑀚𑀢𑀺, 𑀅𑀳𑀜𑁆𑀘 𑀧𑀝𑀺𑀕𑁆𑀕𑀸𑀳𑀓𑁄. 𑀲𑀘𑁂𑀳𑀁 𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀣 [𑀪𑀯𑀺𑀲𑁆𑀲𑀦𑁆𑀢𑀺 (𑀫𑀳𑀸𑀦𑀺. 𑁮𑁭)]. 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄. 𑀅𑀧𑀺 𑀘, 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺. 𑀢𑀤𑀼𑀧𑀸𑀤𑀸𑀬 𑀩𑀳𑀼𑀫𑁆𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀲𑁂𑀦𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀕𑀫𑀦𑀁 𑀲𑀡𑁆𑀞𑀧𑁂𑀢𑀺 𑀞𑀸𑀦𑀁 𑀲𑀡𑁆𑀞𑀧𑁂𑀢𑀺 𑀦𑀺𑀲𑀚𑁆𑀚𑀁 [𑀦𑀺𑀲𑀚𑁆𑀚𑀦𑀁 (𑀓.)] 𑀲𑀡𑁆𑀞𑀧𑁂𑀢𑀺 𑀲𑀬𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀡𑀺𑀥𑀸𑀬 𑀕𑀘𑁆𑀙𑀢𑀺 𑀧𑀡𑀺𑀥𑀸𑀬 𑀢𑀺𑀝𑁆𑀞𑀢𑀺 𑀧𑀡𑀺𑀥𑀸𑀬 𑀦𑀺𑀲𑀻𑀤𑀢𑀺 𑀧𑀡𑀺𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀦𑀺𑀲𑀻𑀤𑀢𑀺 𑀲𑀫𑀸𑀳𑀺𑀢𑁄 𑀯𑀺𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀸𑀣𑀓𑀚𑁆𑀛𑀸𑀬𑀻𑀯 [𑀆𑀧𑀸𑀢𑀓𑀚𑁆𑀛𑀸𑀬𑀻 𑀘 (𑀓.)] 𑀳𑁄𑀢𑀺. 𑀬𑀸 𑀏𑀯𑀭𑀽𑀧𑀸 𑀇𑀭𑀺𑀬𑀸𑀧𑀣𑀲𑁆𑀲 𑀆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 [𑀓𑀼𑀳𑀸𑀬𑀺𑀢𑀢𑁆𑀢𑀁 (𑀲𑁆𑀬𑀸. 𑀓.), 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑁋 𑀇𑀤𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.

𑀓𑀢𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀅𑀭𑀺𑀬𑀥𑀫𑁆𑀫𑁂 𑀲𑀦𑁆𑀦𑀺𑀲𑁆𑀲𑀺𑀢𑀯𑀸𑀘𑀁 𑀪𑀸𑀲𑀢𑀺. ‘‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; 𑀬𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀥𑀸𑀭𑁂𑀢𑀺…𑀧𑁂… 𑀮𑁄𑀳𑀣𑀸𑀮𑀓𑀁 𑀥𑀸𑀭𑁂𑀢𑀺… 𑀥𑀫𑁆𑀫𑀓𑀭𑀡𑀁 𑀥𑀸𑀭𑁂𑀢𑀺… 𑀧𑀭𑀺𑀲𑁆𑀲𑀸𑀯𑀦𑀁 𑀥𑀸𑀭𑁂𑀢𑀺… 𑀓𑀼𑀜𑁆𑀘𑀺𑀓𑀁 𑀥𑀸𑀭𑁂𑀢𑀺… 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺… 𑀓𑀸𑀬𑀩𑀦𑁆𑀥𑀦𑀁 𑀥𑀸𑀭𑁂𑀢𑀺… 𑀆𑀬𑁄𑀕𑀁 [𑀆𑀬𑁄𑀕𑀩𑀦𑁆𑀥𑀦𑀁 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁮𑁭] 𑀥𑀸𑀭𑁂𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑀸 𑀉𑀧𑀚𑁆𑀛𑀸𑀬𑁄 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; 𑀬𑀲𑁆𑀲 𑀏𑀯𑀭𑀽𑀧𑁄 𑀆𑀘𑀭𑀺𑀬𑁄 …𑀧𑁂… 𑀏𑀯𑀭𑀽𑀧𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸… 𑀲𑀫𑀸𑀦𑀸𑀘𑀭𑀺𑀬𑀓𑀸… 𑀫𑀺𑀢𑁆𑀢𑀸… 𑀲𑀦𑁆𑀤𑀺𑀝𑁆𑀞𑀸… 𑀲𑀫𑁆𑀪𑀢𑁆𑀢𑀸… 𑀲𑀳𑀸𑀬𑀸 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄𑀢𑀺 𑀪𑀡𑀢𑀺; 𑀬𑁄 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀢𑀺… 𑀅𑀟𑁆𑀠𑀬𑁄𑀕𑁂 𑀯𑀲𑀢𑀺… 𑀧𑀸𑀲𑀸𑀤𑁂 𑀯𑀲𑀢𑀺… 𑀳𑀫𑁆𑀫𑀺𑀬𑁂 𑀯𑀲𑀢𑀺… 𑀕𑀼𑀳𑀸𑀬𑀁 𑀯𑀲𑀢𑀺… 𑀮𑁂𑀡𑁂 𑀯𑀲𑀢𑀺… 𑀓𑀼𑀝𑀺𑀬𑀁 𑀯𑀲𑀢𑀺… 𑀓𑀽𑀝𑀸𑀕𑀸𑀭𑁂 𑀯𑀲𑀢𑀺… 𑀅𑀝𑁆𑀝𑁂 𑀯𑀲𑀢𑀺… 𑀫𑀸𑀴𑁂 𑀯𑀲𑀢𑀺… 𑀉𑀤𑁆𑀤𑀡𑁆𑀟𑁂 [𑀉𑀝𑁆𑀝𑀡𑁆𑀟𑁂 (𑀓.)] 𑀯𑀲𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀯𑀲𑀢𑀺… 𑀫𑀡𑁆𑀟𑀧𑁂 𑀯𑀲𑀢𑀺… 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺.

𑀅𑀣 𑀯𑀸, 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀓𑀼𑀳𑀓𑀓𑀼𑀳𑀓𑁄 𑀮𑀧𑀓𑀮𑀧𑀓𑁄 𑀫𑀼𑀔𑀲𑀫𑁆𑀪𑀸𑀯𑀺𑀓𑁄 ‘‘𑀅𑀬𑀁 𑀲𑀫𑀡𑁄 𑀇𑀫𑀸𑀲𑀁 𑀏𑀯𑀭𑀽𑀧𑀸𑀦𑀁 𑀲𑀦𑁆𑀢𑀸𑀦𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’’𑀢𑀺 𑀢𑀸𑀤𑀺𑀲𑀁 𑀕𑀫𑁆𑀪𑀻𑀭𑀁 𑀕𑀽𑀴𑁆𑀳𑀁 𑀦𑀺𑀧𑀼𑀡𑀁 𑀧𑀝𑀺𑀘𑁆𑀙𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀓𑀣𑀁 𑀓𑀣𑁂𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁, 𑀇𑀤𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀢𑀲𑁆𑀫𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦𑀺𑀓𑁆𑀓𑀼𑀳𑁄.

𑀦𑀺𑀧𑁆𑀧𑀺𑀧𑀸𑀲𑁄𑀢𑀺 𑀧𑀺𑀧𑀸𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀧𑀺𑀧𑀸𑀲𑀸 𑀢𑀡𑁆𑀳𑀸 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦𑀺𑀧𑁆𑀧𑀺𑀧𑀸𑀲𑁄𑀢𑀺 𑁋 𑀦𑀺𑀮𑁆𑀮𑁄𑀮𑀼𑀧𑁄 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄.

𑀦𑀺𑀫𑁆𑀫𑀓𑁆𑀔𑁄 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄𑀢𑀺. 𑀫𑀓𑁆𑀔𑁄𑀢𑀺 𑀬𑁄 𑀫𑀓𑁆𑀔𑁄 𑀫𑀓𑁆𑀔𑀸𑀬𑀦𑀸 [𑀫𑀓𑁆𑀔𑀺𑀬𑀦𑀸 (𑀓.) 𑀧𑀲𑁆𑀲 𑀯𑀺𑀪. 𑁮𑁯𑁨] 𑀫𑀓𑁆𑀔𑀸𑀬𑀺𑀢𑀢𑁆𑀢𑀁 𑀦𑀺𑀝𑁆𑀞𑀼𑀭𑀺𑀬𑀁 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀁. 𑀓𑀲𑀸𑀯𑁄𑀢𑀺 𑀭𑀸𑀕𑁄 𑀓𑀲𑀸𑀯𑁄, 𑀤𑁄𑀲𑁄 𑀓𑀲𑀸𑀯𑁄, 𑀫𑁄𑀳𑁄 𑀓𑀲𑀸𑀯𑁄, 𑀓𑁄𑀥𑁄…𑀧𑁂… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀓𑀲𑀸𑀯𑀸. 𑀫𑁄𑀳𑁄𑀢𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁. 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀁𑀕𑀸𑀳𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀅𑀲𑀫𑀧𑁂𑀓𑁆𑀔𑀦𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀓𑁆𑀔𑁄 𑀘 𑀓𑀲𑀸𑀯𑁄 𑀘 𑀫𑁄𑀳𑁄 𑀘 𑀯𑀦𑁆𑀢𑀸 𑀲𑀁𑀯𑀦𑁆𑀢𑀸 𑀦𑀺𑀤𑁆𑀥𑀦𑁆𑀢𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀦𑀺𑀫𑁆𑀫𑀓𑁆𑀔𑁄 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄.

𑀦𑀺𑀭𑀸𑀲𑀲𑁄 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸𑀢𑀺 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀩𑁆𑀩𑀅𑀧𑀸𑀬𑀮𑁄𑀓𑁂 𑀲𑀩𑁆𑀩𑀫𑀦𑀼𑀲𑁆𑀲𑀮𑁄𑀓𑁂 𑀲𑀩𑁆𑀩𑀤𑁂𑀯𑀮𑁄𑀓𑁂 𑀲𑀩𑁆𑀩𑀔𑀦𑁆𑀥𑀮𑁄𑀓𑁂 𑀲𑀩𑁆𑀩𑀥𑀸𑀢𑀼𑀮𑁄𑀓𑁂 𑀲𑀩𑁆𑀩𑀆𑀬𑀢𑀦𑀮𑁄𑀓𑁂. 𑀦𑀺𑀭𑀸𑀲𑀲𑁄 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸𑀢𑀺 𑀲𑀩𑁆𑀩𑀮𑁄𑀓𑁂 𑀦𑀺𑀭𑀸𑀲𑀲𑁄 𑀪𑀯𑀺𑀢𑁆𑀯𑀸 𑀦𑀺𑀢𑁆𑀢𑀡𑁆𑀳𑁄 𑀪𑀯𑀺𑀢𑁆𑀯𑀸 𑀦𑀺𑀧𑁆𑀧𑀺𑀧𑀸𑀲𑁄 𑀪𑀯𑀺𑀢𑁆𑀯𑀸𑀢𑀺 𑁋 𑀦𑀺𑀭𑀸𑀲𑀲𑁄 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀦𑀺𑀮𑁆𑀮𑁄𑀮𑀼𑀧𑁄 𑀦𑀺𑀓𑁆𑀓𑀼𑀳𑁄 𑀦𑀺𑀧𑁆𑀧𑀺𑀧𑀸𑀲𑁄, 𑀦𑀺𑀫𑁆𑀫𑀓𑁆𑀔𑁄 𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀫𑁄𑀳𑁄;

𑀦𑀺𑀭𑀸𑀲𑀲𑁄 𑀲𑀩𑁆𑀩𑀮𑁄𑀓𑁂 𑀪𑀯𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁩.

𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁;

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣𑀸𑀢𑀺. 𑀧𑀸𑀧𑀲𑀳𑀸𑀬𑁄 𑀯𑀼𑀘𑁆𑀘𑀢𑀺 𑀬𑁄 𑀲𑁄 𑀲𑀳𑀸𑀬𑁄 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑁋 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺. 𑀅𑀬𑀁 𑀧𑀸𑀧𑀲𑀳𑀸𑀬𑁄. 𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣𑀸𑀢𑀺. 𑀧𑀸𑀧𑀁 𑀲𑀳𑀸𑀬𑀁 𑀯𑀚𑁆𑀚𑁂𑀬𑁆𑀬 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑁋 𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣.

𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀦𑁆𑀢𑀺 𑀅𑀦𑀢𑁆𑀣𑀤𑀲𑁆𑀲𑀻 𑀯𑀼𑀘𑁆𑀘𑀢𑀺 𑀬𑁄 𑀲𑁄 𑀲𑀳𑀸𑀬𑁄 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑁋 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁…𑀧𑁂… 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺. 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀦𑁆𑀢𑀺 𑀯𑀺𑀲𑀫𑁂 𑀓𑀸𑀬𑀓𑀫𑁆𑀫𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀯𑀘𑀻𑀓𑀫𑁆𑀫𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀫𑀦𑁄𑀓𑀫𑁆𑀫𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀧𑀸𑀡𑀸𑀢𑀺𑀧𑀸𑀢𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀅𑀤𑀺𑀦𑁆𑀦𑀸𑀤𑀸𑀦𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀫𑀼𑀲𑀸𑀯𑀸𑀤𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 [𑀧𑀺𑀲𑀼𑀡𑀯𑀸𑀘𑀸𑀬 (𑀓.)] 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 [𑀨𑀭𑀼𑀲𑀯𑀸𑀘𑀸𑀬 (𑀓.)] 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀲𑀫𑁆𑀨𑀧𑁆𑀧𑀮𑀸𑀧𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑀸𑀬 𑀅𑀪𑀺𑀚𑁆𑀛𑀸𑀬 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂 𑀩𑁆𑀬𑀸𑀧𑀸𑀤𑁂 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀦𑀺𑀯𑀺𑀝𑁆𑀞𑀁 𑀯𑀺𑀲𑀫𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀦𑀺𑀯𑀺𑀝𑁆𑀞𑀁, 𑀯𑀺𑀲𑀫𑁂𑀲𑀼 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼 𑀦𑀺𑀯𑀺𑀝𑁆𑀞𑀁 𑀯𑀺𑀦𑀺𑀯𑀺𑀝𑁆𑀞𑀁 𑀲𑀢𑁆𑀢𑀁 𑀅𑀮𑁆𑀮𑀻𑀦𑀁 𑀉𑀧𑀕𑀢𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀦𑁆𑀢𑀺 𑁋 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁.

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀦𑁆𑀢𑀺. 𑀧𑀲𑀼𑀢𑀦𑁆𑀢𑀺 𑀬𑁄𑀧𑀺 𑀓𑀸𑀫𑁂 𑀏𑀲𑀢𑀺 𑀕𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀺 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄, 𑀲𑁄𑀧𑀺 𑀓𑀸𑀫𑀧𑁆𑀧𑀲𑀼𑀢𑁄. 𑀬𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀭𑀺𑀬𑁂𑀲𑀢𑀺, 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀬𑁂𑀲𑀢𑀺 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄, 𑀲𑁄𑀧𑀺 𑀓𑀸𑀫𑀧𑁆𑀧𑀲𑀼𑀢𑁄. 𑀬𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀝𑀺𑀮𑀪𑀢𑀺, 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀝𑀺𑀮𑀪𑀢𑀺 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄, 𑀲𑁄𑀧𑀺 𑀓𑀸𑀫𑀧𑁆𑀧𑀲𑀼𑀢𑁄. 𑀬𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀪𑀼𑀜𑁆𑀚𑀢𑀺 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄, 𑀲𑁄𑀧𑀺 𑀓𑀸𑀫𑀧𑁆𑀧𑀲𑀼𑀢𑁄. 𑀬𑀣𑀸 𑀓𑀮𑀳𑀓𑀸𑀭𑀓𑁄 𑀓𑀮𑀳𑀧𑁆𑀧𑀲𑀼𑀢𑁄, 𑀓𑀫𑁆𑀫𑀓𑀸𑀭𑀓𑁄 𑀓𑀫𑁆𑀫𑀧𑁆𑀧𑀲𑀼𑀢𑁄, 𑀕𑁄𑀘𑀭𑁂 𑀘𑀭𑀦𑁆𑀢𑁄 𑀕𑁄𑀘𑀭𑀧𑁆𑀧𑀲𑀼𑀢𑁄, 𑀛𑀸𑀬𑀻 𑀛𑀸𑀦𑀧𑁆𑀧𑀲𑀼𑀢𑁄; 𑀏𑀯𑀫𑁂𑀯 𑀬𑁄 𑀓𑀸𑀫𑁂 𑀏𑀲𑀢𑀺 𑀕𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀺 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄, 𑀲𑁄𑀧𑀺 𑀓𑀸𑀫𑀧𑁆𑀧𑀲𑀼𑀢𑁄. 𑀬𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀭𑀺𑀬𑁂𑀲𑀢𑀺…𑀧𑁂… 𑀬𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀝𑀺𑀮𑀪𑀢𑀺…𑀧𑁂… 𑀬𑁄𑀧𑀺 𑀢𑀡𑁆𑀳𑀸𑀯𑀲𑁂𑀦 𑀭𑀽𑀧𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂 𑀧𑀭𑀺𑀪𑀼𑀜𑁆𑀚𑀢𑀺 𑀢𑀘𑁆𑀘𑀭𑀺𑀢𑁄 𑀢𑀩𑁆𑀩𑀳𑀼𑀮𑁄 𑀢𑀕𑁆𑀕𑀭𑀼𑀓𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄, 𑀲𑁄𑀧𑀺 𑀓𑀸𑀫𑀧𑁆𑀧𑀲𑀼𑀢𑁄. 𑀧𑀫𑀢𑁆𑀢𑀦𑁆𑀢𑀺. 𑀧𑀫𑀸𑀤𑁄 𑀯𑀢𑁆𑀢𑀩𑁆𑀩𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄, 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄.

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀦𑁆𑀢𑀺 𑀧𑀲𑀼𑀢𑀁 𑀦 𑀲𑁂𑀯𑁂𑀬𑁆𑀬 𑀧𑀫𑀢𑁆𑀢𑀜𑁆𑀘 𑀲𑀬𑀁 𑀦 𑀲𑁂𑀯𑁂𑀬𑁆𑀬 𑀲𑀸𑀫𑀁 𑀦 𑀲𑁂𑀯𑁂𑀬𑁆𑀬 𑀦 𑀦𑀺𑀲𑁂𑀯𑁂𑀬𑁆𑀬 𑀦 𑀲𑀁𑀲𑁂𑀯𑁂𑀬𑁆𑀬 𑀦 𑀧𑀭𑀺𑀲𑀁𑀲𑁂𑀯𑁂𑀬𑁆𑀬 𑀦 𑀆𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀧𑀸𑀧𑀁 𑀲𑀳𑀸𑀬𑀁 𑀧𑀭𑀺𑀯𑀚𑁆𑀚𑀬𑁂𑀣, 𑀅𑀦𑀢𑁆𑀣𑀤𑀲𑁆𑀲𑀺𑀁 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀁;

𑀲𑀬𑀁 𑀦 𑀲𑁂𑀯𑁂 𑀧𑀲𑀼𑀢𑀁 𑀧𑀫𑀢𑁆𑀢𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑁧𑁪𑁪.

𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣, 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁;

𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣𑀸𑀢𑀺 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀫𑀺𑀢𑁆𑀢𑁄 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 [𑀲𑀢𑁆𑀣𑀸 𑀲𑀩𑁆𑀬𑀜𑁆𑀚𑀦𑀸 (𑀲𑁆𑀬𑀸.) 𑀧𑀲𑁆𑀲 𑀫. 𑀦𑀺. 𑁩.𑁮𑁨] 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 [𑀥𑀢𑀸 (𑀲𑁆𑀬𑀸.)] 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀥𑀫𑁆𑀫𑀥𑀭𑀦𑁆𑀢𑀺 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀁 [𑀥𑀸𑀭𑁂𑀢𑀺 (𑀓.)] 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣𑀸𑀢𑀺 𑀩𑀳𑀼𑀲𑁆𑀲𑀼𑀢𑀜𑁆𑀘 𑀥𑀫𑁆𑀫𑀥𑀭𑀜𑁆𑀘 𑀫𑀺𑀢𑁆𑀢𑀁 𑀪𑀚𑁂𑀬𑁆𑀬 𑀲𑀁𑀪𑀚𑁂𑀬𑁆𑀬 𑀲𑁂𑀯𑁂𑀬𑁆𑀬 𑀦𑀺𑀲𑁂𑀯𑁂𑀬𑁆𑀬 𑀲𑀁𑀲𑁂𑀯𑁂𑀬𑁆𑀬 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑁋 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣.

𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀦𑁆𑀢𑀺 𑀉𑀴𑀸𑀭𑁄 𑀳𑁄𑀢𑀺 𑀫𑀺𑀢𑁆𑀢𑁄 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑁂𑀦. 𑀧𑀝𑀺𑀪𑀸𑀦𑀯𑀦𑁆𑀢𑀦𑁆𑀢𑀺 𑀢𑀬𑁄 𑀧𑀝𑀺𑀪𑀸𑀦𑀯𑀦𑁆𑀢𑁄 𑁋 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸, 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸, 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸. 𑀓𑀢𑀫𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑀲𑁆𑀲 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀢𑀁 [𑀧𑀭𑀺𑀬𑀸𑀧𑀼𑀝𑀁 (𑀲𑁆𑀬𑀸. 𑀓.) 𑀧𑀲𑁆𑀲 𑀤𑀻. 𑀦𑀺. 𑁩.𑁨𑁮𑁨] 𑀳𑁄𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀢𑀺 𑁋 𑀅𑀬𑀁 𑀧𑀭𑀺𑀬𑀢𑁆𑀢𑀺𑀧𑀝𑀺𑀪𑀸𑀦𑀯𑀸.

𑀓𑀢𑀫𑁄 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑁄 𑀧𑀭𑀺𑀧𑀼𑀘𑁆𑀙𑀺𑀢𑁄𑀧𑀺 𑀳𑁄𑀢𑀺 𑀅𑀢𑁆𑀣𑁂 𑀘 𑀜𑀸𑀬𑁂 𑀘 𑀮𑀓𑁆𑀔𑀡𑁂 𑀘 𑀓𑀸𑀭𑀡𑁂 𑀘 𑀞𑀸𑀦𑀸𑀝𑁆𑀞𑀸𑀦𑁂 𑀘. 𑀢𑀲𑁆𑀲 𑀧𑀭𑀺𑀧𑀼𑀘𑁆𑀙𑀁 𑀦𑀺𑀲𑁆𑀲𑀸𑀬 𑀧𑀝𑀺𑀪𑀸𑀢𑀺 𑁋 𑀅𑀬𑀁 𑀧𑀭𑀺𑀧𑀼𑀘𑁆𑀙𑀸𑀧𑀝𑀺𑀪𑀸𑀦𑀯𑀸.

𑀓𑀢𑀫𑁄 𑀅𑀥𑀺𑀕𑀫𑀧𑀝𑀺𑀪𑀸𑀦𑀯𑀸? 𑀇𑀥𑁂𑀓𑀘𑁆𑀘𑀲𑁆𑀲 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄 [𑀙𑀴𑀪𑀺𑀜𑁆𑀜𑀸𑀬𑁄 (𑀲𑁆𑀬𑀸.)]. 𑀢𑀲𑁆𑀲 𑀅𑀢𑁆𑀣𑁄 𑀜𑀸𑀢𑁄 𑀥𑀫𑁆𑀫𑁄 𑀜𑀸𑀢𑁄 𑀦𑀺𑀭𑀼𑀢𑁆𑀢𑀺 𑀜𑀸𑀢𑀸. 𑀅𑀢𑁆𑀣𑁂 𑀜𑀸𑀢𑁂 𑀅𑀢𑁆𑀣𑁄 𑀧𑀝𑀺𑀪𑀸𑀢𑀺, 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁄 𑀧𑀝𑀺𑀪𑀸𑀢𑀺, 𑀦𑀺𑀭𑀼𑀢𑁆𑀢𑀺𑀬𑀸 𑀜𑀸𑀢𑀸𑀬 𑀦𑀺𑀭𑀼𑀢𑁆𑀢𑀺 𑀧𑀝𑀺𑀪𑀸𑀢𑀺. 𑀇𑀫𑁂𑀲𑀼 𑀢𑀻𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀇𑀫𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀪𑀸𑀦𑀯𑀸. 𑀬𑀲𑁆𑀲 𑀧𑀭𑀺𑀬𑀢𑁆𑀢𑀺 𑀦𑀢𑁆𑀣𑀺 𑀧𑀭𑀺𑀧𑀼𑀘𑁆𑀙𑀸 𑀦𑀢𑁆𑀣𑀺 𑀅𑀥𑀺𑀕𑀫𑁄 𑀦𑀢𑁆𑀣𑀺, 𑀓𑀺𑀁 𑀢𑀲𑁆𑀲 𑀧𑀝𑀺𑀪𑀸𑀬𑀺𑀲𑁆𑀲𑀢𑀻𑀢𑀺 𑁋 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁.

𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀦𑁆𑀢𑀺 𑀅𑀢𑁆𑀢𑀢𑁆𑀣𑀁 𑀅𑀜𑁆𑀜𑀸𑀬 𑀧𑀭𑀢𑁆𑀣𑀁 𑀅𑀜𑁆𑀜𑀸𑀬 𑀉𑀪𑀬𑀢𑁆𑀣𑀁 𑀅𑀜𑁆𑀜𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀁 𑀅𑀜𑁆𑀜𑀸𑀬 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀁 𑀅𑀜𑁆𑀜𑀸𑀬 𑀧𑀭𑀫𑀢𑁆𑀣𑀁 𑀅𑀜𑁆𑀜𑀸𑀬 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀓𑀗𑁆𑀔𑀁 𑀯𑀺𑀦𑁂𑀬𑁆𑀬 𑀧𑀝𑀺𑀯𑀺𑀦𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀪𑀚𑁂𑀣, 𑀫𑀺𑀢𑁆𑀢𑀁 𑀉𑀴𑀸𑀭𑀁 𑀧𑀝𑀺𑀪𑀸𑀦𑀯𑀦𑁆𑀢𑀁;

𑀅𑀜𑁆𑀜𑀸𑀬 𑀅𑀢𑁆𑀣𑀸𑀦𑀺 𑀯𑀺𑀦𑁂𑀬𑁆𑀬 𑀓𑀗𑁆𑀔𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁫.

𑀔𑀺𑀟𑁆𑀟𑀁 𑀭𑀢𑀺𑀁 [𑀭𑀢𑀻 (𑀲𑁆𑀬𑀸.)] 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂, 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄;

𑀯𑀺𑀪𑀽𑀲𑀝𑁆𑀞𑀸𑀦𑀸 [𑀯𑀺𑀪𑀽𑀲𑀦𑀝𑁆𑀞𑀸𑀦𑀸 (𑀲𑁆𑀬𑀸. 𑀓.), 𑀯𑀺𑀪𑀽𑀲𑀡𑀝𑁆𑀞𑀸𑀦𑀸 (𑀲𑀻. 𑀅𑀝𑁆𑀞.)] 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂𑀢𑀺. 𑀔𑀺𑀟𑁆𑀟𑀸𑀢𑀺 𑀤𑁆𑀯𑁂 𑀔𑀺𑀟𑁆𑀟𑀸 𑁋 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸 𑀘 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸 𑀘…𑀧𑁂… 𑀅𑀬𑀁 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸…𑀧𑁂… 𑀅𑀬𑀁 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸. 𑀭𑀢𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀸𑀥𑀺𑀯𑀘𑀦𑀫𑁂𑀢𑀁 𑁋 𑀭𑀢𑀻𑀢𑀺. 𑀓𑀸𑀫𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀫. 𑀦𑀺. 𑁨.𑁨𑁮𑁦] 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀲𑀼𑀔𑀁’’. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂.

𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄𑀢𑀺 𑀔𑀺𑀟𑁆𑀟𑀜𑁆𑀘 𑀭𑀢𑀺𑀜𑁆𑀘 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄.

𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻𑀢𑀺. 𑀯𑀺𑀪𑀽𑀲𑀸𑀢𑀺 𑀤𑁆𑀯𑁂 𑀯𑀺𑀪𑀽𑀲𑀸 𑁋 𑀅𑀢𑁆𑀣𑀺 𑀅𑀕𑀸𑀭𑀺𑀓𑀯𑀺𑀪𑀽𑀲𑀸 [𑀅𑀕𑀸𑀭𑀺𑀓𑀲𑁆𑀲 𑀯𑀺𑀪𑀽𑀲𑀸 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀅𑀢𑁆𑀣𑀺 𑀅𑀦𑀸𑀕𑀸𑀭𑀺𑀓𑀯𑀺𑀪𑀽𑀲𑀸. 𑀓𑀢𑀫𑀸 𑀅𑀕𑀸𑀭𑀺𑀓𑀯𑀺𑀪𑀽𑀲𑀸? 𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀫𑀸𑀮𑀸𑀕𑀦𑁆𑀥𑀜𑁆𑀘 𑀯𑀺𑀮𑁂𑀧𑀦𑀜𑁆𑀘 𑀆𑀪𑀭𑀡𑀜𑁆𑀘 𑀧𑀺𑀮𑀦𑁆𑀥𑀦𑀜𑁆𑀘 𑀯𑀢𑁆𑀣𑀜𑁆𑀘 𑀧𑀸𑀭𑀼𑀧𑀦𑀜𑁆𑀘 [𑀧𑀲𑀸𑀥𑀦𑀜𑁆𑀘 (𑀲𑁆𑀬𑀸.), 𑀲𑀬𑀦𑀸𑀲𑀦𑀜𑁆𑀘 (𑀓.) 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁩𑁦 𑀦𑀢𑁆𑀣𑀺 𑀧𑀸𑀞𑀦𑀸𑀦𑀢𑁆𑀢𑀁] 𑀯𑁂𑀞𑀦𑀜𑁆𑀘 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀁 𑀦𑁆𑀳𑀸𑀧𑀦𑀁 𑀲𑀫𑁆𑀩𑀸𑀳𑀦𑀁 𑀆𑀤𑀸𑀲𑀁 𑀅𑀜𑁆𑀚𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀫𑀼𑀔𑀘𑀼𑀡𑁆𑀡𑀁 𑀫𑀼𑀔𑀮𑁂𑀧𑀦𑀁 𑀳𑀢𑁆𑀣𑀩𑀦𑁆𑀥𑀁 𑀲𑀺𑀔𑀸𑀩𑀦𑁆𑀥𑀁 𑀤𑀡𑁆𑀟𑀁 𑀦𑀸𑀴𑀺𑀓𑀁 𑀔𑀕𑁆𑀕𑀁 𑀙𑀢𑁆𑀢𑀁 𑀘𑀺𑀢𑁆𑀭𑀼𑀧𑀸𑀳𑀦𑀁 𑀉𑀡𑁆𑀳𑀻𑀲𑀁 𑀫𑀡𑀺𑀁 𑀯𑀸𑀴𑀩𑀻𑀚𑀦𑀺𑀁 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀤𑀻𑀖𑀤𑀲𑀸𑀦𑀺 𑀇𑀢𑀺 𑀯𑀸 𑁋 𑀅𑀬𑀁 𑀅𑀕𑀸𑀭𑀺𑀓𑀯𑀺𑀪𑀽𑀲𑀸.

𑀓𑀢𑀫𑀸 𑀅𑀦𑀸𑀕𑀸𑀭𑀺𑀓𑀯𑀺𑀪𑀽𑀲𑀸? 𑀘𑀻𑀯𑀭𑀫𑀡𑁆𑀟𑀦𑀸 𑀧𑀢𑁆𑀢𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲 𑀩𑀸𑀳𑀺𑀭𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀸𑀦𑀁 𑀫𑀡𑁆𑀟𑀦𑀸 𑀯𑀺𑀪𑀽𑀲𑀦𑀸 𑀓𑁂𑀴𑀦𑀸 𑀧𑀭𑀺𑀓𑁂𑀴𑀦𑀸 𑀕𑀤𑁆𑀥𑀺𑀓𑀢𑀸 𑀕𑀤𑁆𑀥𑀺𑀓𑀢𑁆𑀢𑀁 [𑀕𑁂𑀥𑀺𑀓𑀢𑀸 𑀕𑁂𑀥𑀺𑀓𑀢𑁆𑀢𑀁 (𑀲𑁆𑀬𑀸.) 𑀧𑀲𑁆𑀲 𑀯𑀺𑀪. 𑁮𑁫𑁪] 𑀘𑀧𑀮𑀢𑀸 [𑀘𑀧𑀮𑀦𑀸 (𑀲𑁆𑀬𑀸.)] 𑀘𑀸𑀧𑀮𑁆𑀬𑀁 𑁋 𑀅𑀬𑀁 𑀅𑀦𑀸𑀕𑀸𑀭𑀺𑀓𑀯𑀺𑀪𑀽𑀲𑀸.

𑀲𑀘𑁆𑀘𑀯𑀸𑀤𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲, 𑀯𑀺𑀪𑀽𑀲𑀝𑁆𑀞𑀸𑀦𑀸 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄, 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀔𑀺𑀟𑁆𑀟𑀁 𑀭𑀢𑀺𑀁 𑀓𑀸𑀫𑀲𑀼𑀔𑀜𑁆𑀘 𑀮𑁄𑀓𑁂, 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀫𑀸𑀦𑁄;

𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁬.

𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁, 𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀺;

𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀦𑁆𑀢𑀺. 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 [𑀔𑁂𑀢𑁆𑀭𑀚𑁄 (𑀲𑁆𑀬𑀸. 𑀓.)] 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀤𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀪𑀭𑀺𑀬𑀸𑀬𑁄. 𑀧𑀺𑀢𑀸𑀢𑀺 𑀬𑁄 𑀲𑁄 𑀚𑀦𑀓𑁄. 𑀫𑀸𑀢𑀸𑀢𑀺 𑀬𑀸 𑀲𑀸 𑀚𑀦𑀺𑀓𑀸𑀢𑀺 𑁋 𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁.

𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀻𑀢𑀺 𑀥𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀕𑁄 [𑀮𑁄𑀳𑀺𑀢𑀓𑁄 (?)] 𑀫𑀲𑀸𑀭𑀕𑀮𑁆𑀮𑀁. 𑀥𑀜𑁆𑀜𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀧𑀼𑀩𑁆𑀩𑀡𑁆𑀡𑀁 𑀅𑀧𑀭𑀡𑁆𑀡𑀁. 𑀧𑀼𑀩𑁆𑀩𑀡𑁆𑀡𑀁 𑀦𑀸𑀫 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀕𑁄𑀥𑀼𑀫𑁄 𑀓𑀗𑁆𑀕𑀼 𑀯𑀭𑀓𑁄 𑀓𑀼𑀤𑁆𑀭𑀽𑀲𑀓𑁄 [𑀓𑀼𑀤𑁆𑀭𑀼𑀲𑀓𑁄 (𑀲𑁆𑀬𑀸.)]. 𑀅𑀧𑀭𑀡𑁆𑀡𑀁 𑀦𑀸𑀫 𑀲𑀽𑀧𑁂𑀬𑁆𑀬𑀁. 𑀩𑀦𑁆𑀥𑀯𑀸𑀦𑀻𑀢𑀺 𑀘𑀢𑁆𑀢𑀸𑀭𑁄 𑀩𑀦𑁆𑀥𑀯𑀸 𑁋 𑀜𑀸𑀢𑀺𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀕𑁄𑀢𑁆𑀢𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀫𑀺𑀢𑁆𑀢𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀲𑀺𑀧𑁆𑀧𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀽𑀢𑀺 𑁋 𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀺.

𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀻𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀻𑀢𑀺 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸, 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸. 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺; 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀧𑀼𑀢𑁆𑀢𑀜𑁆𑀘 𑀤𑀸𑀭𑀁 𑀧𑀺𑀢𑀭𑀜𑁆𑀘 𑀫𑀸𑀢𑀭𑀁, 𑀥𑀦𑀸𑀦𑀺 𑀥𑀜𑁆𑀜𑀸𑀦𑀺 𑀘 𑀩𑀦𑁆𑀥𑀯𑀸𑀦𑀺;

𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁭.

𑀲𑀗𑁆𑀕𑁄 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀁, 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄;

𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸 [𑀫𑀼𑀢𑀻𑀫𑀸 (𑀲𑀼. 𑀦𑀺. 𑁬𑁧)], 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀗𑁆𑀕𑁄 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀦𑁆𑀢𑀺 𑀲𑀗𑁆𑀕𑁄𑀢𑀺 𑀯𑀸 𑀩𑀴𑀺𑀲𑀦𑁆𑀢𑀺 𑀯𑀸 𑀆𑀫𑀺𑀲𑀦𑁆𑀢𑀺 𑀯𑀸 𑀮𑀕𑁆𑀕𑀦𑀦𑁆𑀢𑀺 𑀯𑀸 𑀧𑀮𑀺𑀩𑁄𑀥𑁄𑀢𑀺 𑀯𑀸, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀲𑀼𑀔𑀁. 𑀅𑀧𑁆𑀧𑀓𑀁 𑀏𑀢𑀁 𑀲𑀼𑀔𑀁, 𑀧𑀭𑀺𑀢𑁆𑀢𑀓𑀁 𑀏𑀢𑀁 𑀲𑀼𑀔𑀁, 𑀣𑁄𑀓𑀓𑀁 𑀏𑀢𑀁 𑀲𑀼𑀔𑀁, 𑀑𑀫𑀓𑀁 𑀏𑀢𑀁 𑀲𑀼𑀔𑀁, 𑀮𑀸𑀫𑀓𑀁 𑀏𑀢𑀁 𑀲𑀼𑀔𑀁, 𑀙𑀢𑀼𑀓𑁆𑀓𑀁 𑀏𑀢𑀁 𑀲𑀼𑀔’’𑀦𑁆𑀢𑀺 𑁋 𑀲𑀗𑁆𑀕𑁄 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀁.

𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄𑀢𑀺 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 [𑀧𑀲𑁆𑀲 𑀫. 𑀦𑀺. 𑁧.𑁨𑁩𑁭] 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸 [𑀩𑀳𑀽𑀧𑀸𑀬𑀸𑀲𑀸 (𑀲𑁆𑀬𑀸.)]; 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄𑀢𑀺 𑁋 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄.

𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸𑀢𑀺 𑀕𑀴𑁄𑀢𑀺 𑀯𑀸 𑀩𑀴𑀺𑀲𑀦𑁆𑀢𑀺 𑀯𑀸 𑀆𑀫𑀺𑀲𑀦𑁆𑀢𑀺 𑀯𑀸 𑀮𑀕𑁆𑀕𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑀦𑁆𑀢𑀺 𑀯𑀸 𑀧𑀮𑀺𑀩𑁄𑀥𑁄𑀢𑀺 𑀯𑀸, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀢𑀻𑀢𑀺. 𑀫𑀢𑀺𑀫𑀸𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸𑀢𑀺 𑀫𑀢𑀺𑀫𑀸 𑀕𑀴𑁄𑀢𑀺 𑀜𑀢𑁆𑀯𑀸 𑀩𑀴𑀺𑀲𑀦𑁆𑀢𑀺 𑀜𑀢𑁆𑀯𑀸 𑀆𑀫𑀺𑀲𑀁 𑀢𑀺 𑀜𑀢𑁆𑀯𑀸 𑀮𑀕𑁆𑀕𑀦𑀦𑁆𑀢𑀺 𑀜𑀢𑁆𑀯𑀸 𑀩𑀦𑁆𑀥𑀦𑀦𑁆𑀢𑀺 𑀜𑀢𑁆𑀯𑀸 𑀧𑀮𑀺𑀩𑁄𑀥𑁄𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀗𑁆𑀕𑁄 𑀏𑀲𑁄 𑀧𑀭𑀺𑀢𑁆𑀢𑀫𑁂𑀢𑁆𑀣 𑀲𑁄𑀔𑁆𑀬𑀁, 𑀅𑀧𑁆𑀧𑀲𑁆𑀲𑀸𑀤𑁄 𑀤𑀼𑀓𑁆𑀔𑀫𑁂𑀢𑁆𑀣 𑀪𑀺𑀬𑁆𑀬𑁄;

𑀕𑀴𑁄 𑀏𑀲𑁄 𑀇𑀢𑀺 𑀜𑀢𑁆𑀯𑀸 𑀫𑀢𑀺𑀫𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁮.

𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺, 𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻;

𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑁋 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀇𑀲𑁆𑀲𑀸𑀲𑀁𑀬𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁. 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀤𑀸𑀮𑀬𑀺𑀢𑁆𑀯𑀸 𑀲𑀦𑁆𑀤𑀸𑀮𑀬𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺.

𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻𑀢𑀺 𑀚𑀸𑀮𑀁 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀚𑀸𑀮𑀁. 𑀲𑀮𑀺𑀮𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀅𑀫𑁆𑀩𑀼𑀘𑀸𑀭𑀻 𑀯𑀼𑀘𑁆𑀘𑀢𑀺 𑀫𑀘𑁆𑀙𑁄. 𑀬𑀣𑀸 𑀫𑀘𑁆𑀙𑁄 𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀮𑀬𑀺𑀢𑁆𑀯𑀸 𑀧𑀤𑀸𑀮𑀬𑀺𑀢𑁆𑀯𑀸 𑀲𑀫𑁆𑀧𑀤𑀸𑀮𑀬𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺, 𑀏𑀯𑀫𑁂𑀯 𑀤𑁆𑀯𑁂 𑀚𑀸𑀮𑀸 𑁋 𑀢𑀡𑁆𑀳𑀸𑀚𑀸𑀮𑀜𑁆𑀘 𑀤𑀺𑀝𑁆𑀞𑀺𑀚𑀸𑀮𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀚𑀸𑀮𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀚𑀸𑀮𑀁. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀡𑁆𑀳𑀸𑀚𑀸𑀮𑀁 𑀧𑀳𑀻𑀦𑀁, 𑀤𑀺𑀝𑁆𑀞𑀺𑀚𑀸𑀮𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀢𑀡𑁆𑀳𑀸𑀚𑀸𑀮𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀚𑀸𑀮𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑁂 𑀦 𑀲𑀚𑁆𑀚𑀢𑀺 𑀲𑀤𑁆𑀤𑁂 𑀦 𑀲𑀚𑁆𑀚𑀢𑀺 𑀕𑀦𑁆𑀥𑁂 𑀦 𑀲𑀚𑁆𑀚𑀢𑀺…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀚𑁆𑀚𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻.

𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄𑀢𑀺 𑀬𑀣𑀸 𑀅𑀕𑁆𑀕𑀺 𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑀁 𑀤𑀳𑀦𑁆𑀢𑁄 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑁄, 𑀏𑀯𑀫𑁂𑀯 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺, 𑀚𑀸𑀮𑀁𑀯 𑀪𑁂𑀢𑁆𑀯𑀸 𑀲𑀮𑀺𑀮𑀫𑁆𑀩𑀼𑀘𑀸𑀭𑀻;

𑀅𑀕𑁆𑀕𑀻𑀯 𑀤𑀟𑁆𑀠𑀁 𑀅𑀦𑀺𑀯𑀢𑁆𑀢𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁪𑁯.

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄, 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄;

𑀅𑀦𑀯𑀲𑁆𑀲𑀼𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑁄 [𑀅𑀧𑀭𑀺𑀤𑀬𑁆𑀳𑀫𑀸𑀦𑁄 (𑀓.)], 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄𑀢𑀺 𑀓𑀣𑀁 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 [𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂 𑀫𑀳𑀸𑀦𑀺. 𑁧𑁫𑁭] 𑀘𑀓𑁆𑀔𑀼𑀮𑁄𑀮𑁄 𑀘𑀓𑁆𑀔𑀼𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑁋 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀕𑀸𑀫𑁂𑀦 𑀕𑀸𑀫𑀁 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦𑀕𑀭𑁂𑀦 𑀦𑀕𑀭𑀁 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 [𑀅𑀦𑀯𑀢𑁆𑀣𑀘𑀸𑀭𑀺𑀓𑀁 (𑀲𑁆𑀬𑀸.)] 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺 𑀭𑀽𑀧𑀤𑀲𑁆𑀲𑀦𑀸𑀬. 𑀏𑀯𑀁 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸, 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀅𑀲𑀁𑀯𑀼𑀢𑁄 𑀕𑀘𑁆𑀙𑀢𑀺. 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀓𑀼𑀫𑀸𑀭𑀓𑁂 𑀑𑀮𑁄𑀓𑁂𑀦𑁆𑀢𑁄 𑀓𑀼𑀫𑀸𑀭𑀺𑀓𑀸𑀬𑁄 𑀑𑀮𑁄𑀓𑁂𑀦𑁆𑀢𑁄 𑀇𑀢𑁆𑀣𑀺𑀬𑁄 𑀑𑀮𑁄𑀓𑁂𑀦𑁆𑀢𑁄 𑀧𑀼𑀭𑀺𑀲𑁂 𑀑𑀮𑁄𑀓𑁂𑀦𑁆𑀢𑁄 𑀅𑀦𑁆𑀢𑀭𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 [𑀧𑁂𑀓𑁆𑀔𑀫𑀸𑀦𑁄 (𑀲𑁆𑀬𑀸. 𑀓.)] 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 𑀯𑁂𑀢𑀸𑀴𑀁 𑀓𑀼𑀫𑁆𑀪𑀣𑀽𑀡𑀁 𑀲𑁄𑀪𑀦𑀓𑀁 [𑀲𑁄𑀪𑀦𑀕𑀭𑀓𑀁 (𑀲𑁆𑀬𑀸.), 𑀲𑁄𑀪𑀦𑀓𑀭𑀡𑀁 (𑀓.)] 𑀘𑀡𑁆𑀟𑀸𑀮𑀁 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 𑀫𑀳𑀺𑀁𑀲𑀬𑀼𑀤𑁆𑀥𑀁 [𑀫𑀳𑀺𑀲𑀬𑀼𑀤𑁆𑀥𑀁 (𑀲𑁆𑀬𑀸.)] 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸. 𑀇𑀢𑀺 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀓𑀣𑀁 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀦 𑀘𑀓𑁆𑀔𑀼𑀮𑁄𑀮𑁄 𑀦 𑀘𑀓𑁆𑀔𑀼𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑁋 𑀦 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀦 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀦 𑀕𑀸𑀫𑁂𑀦 𑀕𑀸𑀫𑀁 𑀦 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦 𑀦𑀕𑀭𑁂𑀦 𑀦𑀕𑀭𑀁 𑀦 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀦 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺 𑀭𑀽𑀧𑀤𑀲𑁆𑀲𑀦𑀸𑀬. 𑀏𑀯𑀁 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸, 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁄 𑀲𑀁𑀯𑀼𑀢𑁄 𑀕𑀘𑁆𑀙𑀢𑀺. 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀅𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀭𑀣𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀓𑀼𑀫𑀸𑀭𑀓𑁂 𑀑𑀮𑁄𑀓𑁂𑀦𑁆𑀢𑁄 𑀦 𑀓𑀼𑀫𑀸𑀭𑀺𑀓𑀸𑀬𑁄 𑀑𑀮𑁄𑀓𑁂𑀦𑁆𑀢𑁄 𑀦 𑀇𑀢𑁆𑀣𑀺𑀬𑁄 𑀑𑀮𑁄𑀓𑁂𑀦𑁆𑀢𑁄 𑀦 𑀧𑀼𑀭𑀺𑀲𑁂 𑀑𑀮𑁄𑀓𑁂𑀦𑁆𑀢𑁄 𑀦 𑀅𑀦𑁆𑀢𑀭𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀖𑀭𑀫𑀼𑀔𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀦 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄 𑀦 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀅𑀣 𑀯𑀸, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁…𑀧𑁂… 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸. 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄. 𑀏𑀯𑀫𑁆𑀧𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀺.

𑀦 𑀘 𑀧𑀸𑀤𑀮𑁄𑀮𑁄𑀢𑀺 𑀓𑀣𑀁 𑀧𑀸𑀤𑀮𑁄𑀮𑁄 𑀳𑁄𑀢𑀺? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀧𑀸𑀤𑀮𑁄𑀮𑁄 𑀧𑀸𑀤𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀕𑀸𑀫𑁂𑀦 𑀕𑀸𑀫𑀁 𑀦𑀺𑀕𑀫𑁂𑀦 𑀦𑀺𑀕𑀫𑀁 𑀦𑀕𑀭𑁂𑀦 𑀦𑀕𑀭𑀁 𑀭𑀝𑁆𑀞𑁂𑀦 𑀭𑀝𑁆𑀞𑀁 𑀚𑀦𑀧𑀤𑁂𑀦 𑀚𑀦𑀧𑀤𑀁 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀝𑁆𑀞𑀺𑀢𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀧𑀸𑀤𑀮𑁄𑀮𑁄 𑀳𑁄𑀢𑀺.

𑀅𑀣 𑀯𑀸, 𑀪𑀺𑀓𑁆𑀔𑀼 𑀅𑀦𑁆𑀢𑁄𑀲𑀗𑁆𑀖𑀸𑀭𑀸𑀫𑁂 [𑀅𑀦𑁆𑀢𑁄𑀧𑀺 𑀲𑀁𑀖𑀸𑀭𑀸𑀫𑁂 (𑀓.)] 𑀧𑀸𑀤𑀮𑁄𑀮𑁄 𑀧𑀸𑀤𑀮𑁄𑀮𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀢𑁆𑀣𑀳𑁂𑀢𑀼 𑀦 𑀓𑀸𑀭𑀡𑀳𑁂𑀢𑀼 𑀉𑀤𑁆𑀥𑀢𑁄 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀧𑀭𑀺𑀯𑁂𑀡𑀢𑁄 𑀧𑀭𑀺𑀯𑁂𑀡𑀁 𑀕𑀘𑁆𑀙𑀢𑀺, 𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺, 𑀅𑀟𑁆𑀠𑀬𑁄𑀕𑀢𑁄 𑀅𑀟𑁆𑀠𑀬𑁄𑀕𑀁 𑀕𑀘𑁆𑀙𑀢𑀺, 𑀧𑀸𑀲𑀸𑀤𑀢𑁄 𑀧𑀸𑀲𑀸𑀤𑀁 𑀕𑀘𑁆𑀙𑀢𑀺, 𑀳𑀫𑁆𑀫𑀺𑀬𑀢𑁄 𑀳𑀫𑁆𑀫𑀺𑀬𑀁 𑀕𑀘𑁆𑀙𑀢𑀺, 𑀕𑀼𑀳𑀢𑁄 𑀕𑀼𑀳𑀁 𑀕𑀘𑁆𑀙𑀢𑀺, 𑀮𑁂𑀡𑀢𑁄 𑀮𑁂𑀡𑀁 𑀕𑀘𑁆𑀙𑀢𑀺, 𑀓𑀼𑀝𑀺𑀬𑀸 𑀓𑀼𑀝𑀺𑀁 𑀕𑀘𑁆𑀙𑀢𑀺, 𑀓𑀽𑀝𑀸𑀕𑀸𑀭𑀢𑁄 𑀓𑀽𑀝𑀸𑀕𑀸𑀭𑀁 𑀕𑀘𑁆𑀙𑀢𑀺, 𑀅𑀝𑁆𑀝𑀢𑁄 𑀅𑀝𑁆𑀝𑀁 𑀕𑀘𑁆𑀙𑀢𑀺, 𑀫𑀸𑀴𑀢𑁄 𑀫𑀸𑀴𑀁 𑀕𑀘𑁆𑀙𑀢𑀺, 𑀉𑀤𑁆𑀤𑀡𑁆𑀟𑀢𑁄 𑀉𑀤𑁆𑀤𑀡𑁆𑀟𑀁 𑀕𑀘𑁆𑀙𑀢𑀺 [𑀉𑀤𑁆𑀤𑀡𑁆𑀟𑀁 𑀕𑀘𑁆𑀙𑀢𑀺, 𑀉𑀤𑁆𑀥𑁄𑀲𑀺𑀢𑀢𑁄 𑀉𑀤𑁆𑀥𑁄𑀲𑀺𑀢𑀁 𑀕𑀘𑁆𑀙𑀢𑀺 (𑀲𑁆𑀬𑀸.) 𑀧𑀲𑁆𑀲 𑀫𑀳𑀸𑀦𑀺. 𑁧𑁭], 𑀉𑀧𑀝𑁆𑀞𑀸𑀦𑀲𑀸𑀮𑀢𑁄 𑀉𑀧𑀝𑁆𑀞𑀸𑀦𑀲𑀸𑀮𑀁 𑀕𑀘𑁆𑀙𑀢𑀺, 𑀫𑀡𑁆𑀟𑀧𑀢𑁄 𑀫𑀡𑁆𑀟𑀧𑀁 𑀕𑀘𑁆𑀙𑀢𑀺, 𑀭𑀼𑀓𑁆𑀔𑀫𑀽𑀮𑀢𑁄 𑀭𑀼𑀓𑁆𑀔𑀫𑀽𑀮𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀦𑀺𑀲𑀻𑀤𑀦𑁆𑀢𑀺 𑀯𑀸 𑀕𑀘𑁆𑀙𑀦𑁆𑀢𑀺 𑀯𑀸, 𑀢𑀢𑁆𑀣 𑀏𑀓𑀲𑁆𑀲 𑀯𑀸 𑀤𑀼𑀢𑀺𑀬𑁄 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀢𑀺𑀬𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀯𑀸 𑀘𑀢𑀼𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀣 𑀩𑀳𑀼𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀮𑀧𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁…𑀧𑁂… 𑀇𑀢𑀺 𑀪𑀯𑀸𑀪𑀯𑀓𑀣𑀁 𑀓𑀣𑁂𑀢𑀺. 𑀏𑀯𑀫𑁆𑀧𑀺 𑀧𑀸𑀤𑀮𑁄𑀮𑁄 𑀳𑁄𑀢𑀺.

𑀦 𑀘 𑀧𑀸𑀤𑀮𑁄𑀮𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀸𑀤𑀮𑁄𑀮𑀺𑀬𑀸 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀭𑀢𑁄 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀁 𑀛𑀸𑀬𑀻 𑀛𑀸𑀦𑀭𑀢𑁄 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀲𑀤𑀢𑁆𑀣𑀕𑀭𑀼𑀓𑁄𑀢𑀺 𑁋 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄.

𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄𑀢𑀺. 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 … 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄. 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄𑀢𑀺 𑀕𑁄𑀧𑀺𑀢𑀫𑀸𑀦𑀲𑀸𑀦𑁄𑀢𑀺 𑁋 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄.

𑀅𑀦𑀯𑀲𑁆𑀲𑀼𑀢𑁄 𑀧𑀭𑀺𑀟𑀬𑁆𑀳𑀫𑀸𑀦𑁄𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑁋 ‘‘𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘 [𑀧𑀲𑁆𑀲 𑀲𑀁. 𑀦𑀺. 𑁪.𑁨𑁪𑁩] 𑀯𑁄, 𑀆𑀯𑀼𑀲𑁄, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀜𑁆𑀘. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 [𑀫𑀳𑀸𑀫𑁄𑀕𑁆𑀕𑀮𑀸𑀦𑁄 (𑀓.)] 𑀏𑀢𑀤𑀯𑁄𑀘 𑁋

‘‘𑀓𑀣𑀁 𑀘𑀸𑀯𑀼𑀲𑁄, 𑀅𑀯𑀲𑁆𑀲𑀼𑀢𑁄 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 [𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀺 (𑀲𑁆𑀬𑀸. 𑀓.)] 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 [𑀢𑀢𑁆𑀣 𑀬𑁂 (𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁨𑁪𑁩] 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀯𑀲𑁆𑀲𑀼𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼…𑀧𑁂… 𑀅𑀯𑀲𑁆𑀲𑀼𑀢𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁𑀯𑀺𑀳𑀸𑀭𑀺𑀁 𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑁂𑀣𑁂𑀯 [𑀮𑀪𑀢𑁂𑀯 (𑀲𑁆𑀬𑀸. 𑀓.) 𑀏𑀯𑀫𑀼𑀧𑀭𑀺𑀧𑀺] 𑀫𑀸𑀭𑁄 𑀑𑀢𑀸𑀭𑀁 𑀮𑀪𑁂𑀣 [𑀮𑀪𑀢𑀺 (𑀲𑁆𑀬𑀸. 𑀓.) 𑀏𑀯𑀫𑀼𑀧𑀭𑀺𑀧𑀺] 𑀫𑀸𑀭𑁄 𑀆𑀭𑀫𑁆𑀫𑀡𑀁, 𑀲𑁄𑀢𑀢𑁄 𑀘𑁂𑀧𑀺 𑀦𑀁…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑁂𑀣𑁂𑀯 𑀫𑀸𑀭𑁄 𑀑𑀢𑀸𑀭𑀁 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀦𑀴𑀸𑀕𑀸𑀭𑀁 𑀯𑀸 𑀢𑀺𑀡𑀸𑀕𑀸𑀭𑀁 𑀯𑀸 𑀲𑀼𑀓𑁆𑀔𑀁 𑀓𑁄𑀴𑀸𑀧𑀁 [𑀓𑁄𑀮𑀸𑀧𑀁 (𑀲𑁆𑀬𑀸.) 𑀲𑀁. 𑀦𑀺. 𑁪.𑁨𑁪𑁩] 𑀢𑁂𑀭𑁄𑀯𑀲𑁆𑀲𑀺𑀓𑀁. 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀮𑀪𑁂𑀣𑁂𑀯 𑀅𑀕𑁆𑀕𑀺 𑀑𑀢𑀸𑀭𑀁 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁; 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬…𑀧𑁂… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀳𑁂𑀝𑁆𑀞𑀺𑀫𑀢𑁄 [𑀧𑀘𑁆𑀙𑀢𑁄 (𑀲𑁆𑀬𑀸.), 𑀳𑁂𑀝𑁆𑀞𑀺𑀫𑀸𑀬 (𑀓.)] 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀉𑀧𑀭𑀺𑀫𑀢𑁄 [𑀉𑀧𑀭𑀺𑀢𑁄 (𑀲𑁆𑀬𑀸.), 𑀉𑀧𑀭𑀺𑀫𑀸𑀬 (𑀓.)] 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀬𑀢𑁄 𑀓𑀼𑀢𑁄𑀘𑀺 𑀘𑁂𑀧𑀺 𑀦𑀁 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀮𑀪𑁂𑀣𑁂𑀯 𑀅𑀕𑁆𑀕𑀺 𑀑𑀢𑀸𑀭𑀁 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀏𑀯𑀁𑀯𑀺𑀳𑀸𑀭𑀺𑀁 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑁂𑀣𑁂𑀯 𑀫𑀸𑀭𑁄 𑀑𑀢𑀸𑀭𑀁 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁, 𑀲𑁄𑀢𑀢𑁄 𑀘𑁂𑀧𑀺 𑀦𑀁…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀮𑀪𑁂𑀣𑁂𑀯 𑀫𑀸𑀭𑁄 𑀑𑀢𑀸𑀭𑀁 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁.

‘‘𑀏𑀯𑀁𑀯𑀺𑀳𑀸𑀭𑀺𑀁 𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀭𑀽𑀧𑀸 𑀅𑀥𑀺𑀪𑀁𑀲𑀼 [𑀅𑀪𑀺𑀪𑀯𑀺𑀁𑀲𑀼 (𑀲𑁆𑀬𑀸.), 𑀅𑀪𑀺𑀪𑀁𑀲𑀼 (𑀓.) 𑀏𑀯𑀫𑀼𑀧𑀭𑀺𑀧𑀺], 𑀦 𑀪𑀺𑀓𑁆𑀔𑀼 𑀭𑀽𑀧𑁂 𑀅𑀥𑀺𑀪𑁄𑀲𑀺; 𑀲𑀤𑁆𑀤𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀲𑀤𑁆𑀤𑁂 𑀅𑀥𑀺𑀪𑁄𑀲𑀺; 𑀕𑀦𑁆𑀥𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀕𑀦𑁆𑀥𑁂 𑀅𑀥𑀺𑀪𑁄𑀲𑀺; 𑀭𑀲𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀭𑀲𑁂 𑀅𑀥𑀺𑀪𑁄𑀲𑀺; 𑀨𑁄𑀝𑁆𑀞𑀩𑁆𑀩𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀨𑁄𑀝𑁆𑀞𑀩𑁆𑀩𑁂 𑀅𑀥𑀺𑀪𑁄𑀲𑀺; 𑀥𑀫𑁆𑀫𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼, 𑀦 𑀪𑀺𑀓𑁆𑀔𑀼 𑀥𑀫𑁆𑀫𑁂 𑀅𑀥𑀺𑀪𑁄𑀲𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀭𑀽𑀧𑀸𑀥𑀺𑀪𑀽𑀢𑁄 𑀲𑀤𑁆𑀤𑀸𑀥𑀺𑀪𑀽𑀢𑁄 𑀕𑀦𑁆𑀥𑀸𑀥𑀺𑀪𑀽𑀢𑁄 𑀭𑀲𑀸𑀥𑀺𑀪𑀽𑀢𑁄 𑀨𑁄𑀝𑁆𑀞𑀩𑁆𑀩𑀸𑀥𑀺𑀪𑀽𑀢𑁄 𑀥𑀫𑁆𑀫𑀸𑀥𑀺𑀪𑀽𑀢𑁄 𑀅𑀥𑀺𑀪𑀽 𑀅𑀦𑀥𑀺𑀪𑀽𑀢𑁄 𑀅𑀥𑀺𑀪𑀁𑀲𑀼 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀯𑀲𑁆𑀲𑀼𑀢𑁄 𑀳𑁄𑀢𑀺.

‘‘𑀓𑀣𑀁 𑀘𑀸𑀯𑀼𑀲𑁄, 𑀅𑀦𑀯𑀲𑁆𑀲𑀼𑀢𑁄 𑀳𑁄𑀢𑀺? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺; 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀥𑀫𑁆𑀫𑁂 𑀦 𑀩𑁆𑀬𑀸𑀧𑀚𑁆𑀚𑀢𑀺, 𑀉𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀦𑀯𑀲𑁆𑀲𑀼𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼…𑀧𑁂… 𑀅𑀦𑀯𑀲𑁆𑀲𑀼𑀢𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁𑀯𑀺𑀳𑀸𑀭𑀺𑀁 𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑁂𑀣 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁; 𑀲𑁄𑀢𑀢𑁄 𑀘𑁂𑀧𑀺 𑀦𑀁…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑁂𑀣 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀽𑀝𑀸𑀕𑀸𑀭𑀸 𑀯𑀸 𑀓𑀽𑀝𑀸𑀕𑀸𑀭𑀲𑀸𑀮𑀸 [𑀲𑀦𑁆𑀣𑀸𑀕𑀸𑀭𑀲𑀸𑀮𑀸 (𑀲𑁆𑀬𑀸.) 𑀧𑀲𑁆𑀲 𑀲𑀁. 𑀦𑀺. 𑁪.𑁨𑁪𑁩] 𑀯𑀸 𑀩𑀳𑀮𑀫𑀢𑁆𑀢𑀺𑀓𑀸 𑀅𑀤𑁆𑀤𑀸𑀯𑀮𑁂𑀧𑀦𑀸 [𑀅𑀮𑁆𑀮𑀸𑀯𑀮𑁂𑀧𑀦𑀸 (𑀲𑁆𑀬𑀸.)] 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀦𑁂𑀯 𑀮𑀪𑁂𑀣 𑀅𑀕𑁆𑀕𑀺 𑀑𑀢𑀸𑀭𑀁, 𑀦 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁; 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀳𑁂𑀝𑁆𑀞𑀺𑀫𑀢𑁄 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀉𑀧𑀭𑀺𑀫𑀢𑁄 𑀘𑁂𑀧𑀺 𑀦𑀁 𑀤𑀺𑀲𑀸𑀬… 𑀬𑀢𑁄 𑀓𑀼𑀢𑁄𑀘𑀺 𑀘𑁂𑀧𑀺 𑀦𑀁 𑀧𑀼𑀭𑀺𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀦𑁂𑀯 𑀮𑀪𑁂𑀣 𑀅𑀕𑁆𑀕𑀺 𑀑𑀢𑀸𑀭𑀁 𑀦 𑀮𑀪𑁂𑀣 𑀅𑀕𑁆𑀕𑀺 𑀆𑀭𑀫𑁆𑀫𑀡𑀁. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀏𑀯𑀁𑀯𑀺𑀳𑀸𑀭𑀺𑀁 𑀪𑀺𑀓𑁆𑀔𑀼𑀁 𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺, 𑀦𑁂𑀯 𑀮𑀪𑁂𑀣 𑀫𑀸𑀭𑁄 𑀑𑀢𑀸𑀭𑀁 𑀦 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁; 𑀲𑁄𑀢𑀢𑁄 𑀘𑁂𑀧𑀺 𑀦𑀁…𑀧𑁂… 𑀫𑀦𑀢𑁄 𑀘𑁂𑀧𑀺 𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀢𑀺 𑀦𑁂𑀯 𑀮𑀪𑁂𑀣 𑀫𑀸𑀭𑁄 𑀑𑀢𑀸𑀭𑀁 𑀦 𑀮𑀪𑁂𑀣 𑀫𑀸𑀭𑁄 𑀆𑀭𑀫𑁆𑀫𑀡𑀁.

‘‘𑀏𑀯𑀁𑀯𑀺𑀳𑀸𑀭𑀻 𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀭𑀽𑀧𑁂 𑀅𑀥𑀺𑀪𑁄𑀲𑀺 [𑀅𑀪𑀺𑀪𑀯𑀺𑀁𑀲𑀼 (𑀲𑁆𑀬𑀸.), 𑀅𑀪𑀺𑀪𑁄𑀲𑀺 (𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁨𑁪𑁩], 𑀦 𑀭𑀽𑀧𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀲𑀤𑁆𑀤𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀲𑀤𑁆𑀤𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀕𑀦𑁆𑀥𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀕𑀦𑁆𑀥𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀭𑀲𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀭𑀲𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀨𑁄𑀝𑁆𑀞𑀩𑁆𑀩𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀨𑁄𑀝𑁆𑀞𑀩𑁆𑀩𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼; 𑀥𑀫𑁆𑀫𑁂 𑀪𑀺𑀓𑁆𑀔𑀼 𑀅𑀥𑀺𑀪𑁄𑀲𑀺, 𑀦 𑀥𑀫𑁆𑀫𑀸 𑀪𑀺𑀓𑁆𑀔𑀼𑀁 𑀅𑀥𑀺𑀪𑀁𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀭𑀽𑀧𑀸𑀥𑀺𑀪𑀽 𑀲𑀤𑁆𑀤𑀸𑀥𑀺𑀪𑀽 𑀕𑀦𑁆𑀥𑀸𑀥𑀺𑀪𑀽 𑀭𑀲𑀸𑀥𑀺𑀪𑀽 𑀨𑁄𑀝𑁆𑀞𑀩𑁆𑀩𑀸𑀥𑀺𑀪𑀽 𑀥𑀫𑁆𑀫𑀸𑀥𑀺𑀪𑀽 𑀅𑀥𑀺𑀪𑀽 𑀅𑀦𑀥𑀺𑀪𑀽𑀢𑁄 [𑀅𑀦𑀪𑀺𑀪𑀽𑀢𑁄 𑀓𑁂𑀳𑀺 𑀘𑀺 𑀓𑀺𑀮𑁂𑀲𑁂𑀳𑀺 (𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁨𑁪𑁩]. 𑀅𑀥𑀺𑀪𑁄𑀲𑀺 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀲𑀁𑀓𑀺𑀮𑁂𑀲𑀺𑀓𑁂 𑀧𑁄𑀦𑁄𑀪𑀯𑀺𑀓𑁂 𑀲𑀤𑀭𑁂 𑀤𑀼𑀓𑁆𑀔𑀯𑀺𑀧𑀸𑀓𑁂 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑁂. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀯𑀲𑁆𑀲𑀼𑀢𑁄 𑀳𑁄𑀢𑀻’’𑀢𑀺 𑁋 𑀅𑀦𑀯𑀲𑁆𑀲𑀼𑀢𑁄.

𑀅𑀧𑀭𑀺𑀟𑀬𑁆𑀳𑀫𑀸𑀦𑁄𑀢𑀺 𑀭𑀸𑀕𑀚𑁂𑀦 𑀧𑀭𑀺𑀴𑀸𑀳𑁂𑀦 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀤𑁄𑀲𑀚𑁂𑀦 𑀧𑀭𑀺𑀴𑀸𑀳𑁂𑀦 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀫𑁄𑀳𑀚𑁂𑀦 𑀧𑀭𑀺𑀴𑀸𑀳𑁂𑀦 𑀅𑀧𑀭𑀺𑀟𑀬𑁆𑀳𑀫𑀸𑀦𑁄𑀢𑀺 𑁋 𑀅𑀦𑀯𑀲𑁆𑀲𑀼𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄, 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀭𑀓𑁆𑀔𑀺𑀢𑀫𑀸𑀦𑀲𑀸𑀦𑁄;

𑀅𑀦𑀯𑀲𑁆𑀲𑀼𑀢𑁄 𑀅𑀧𑀭𑀺𑀟𑀬𑁆𑀳𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁦.

𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑀓𑁄;

𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀓𑁂𑀲𑀸 𑀘 𑀫𑀲𑁆𑀲𑀽 𑀘…𑀧𑁂… 𑀤𑀻𑀖𑀤𑀲𑀸𑀦𑀺 𑀇𑀢𑀺 𑀯𑀸. 𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀑𑀭𑁄𑀧𑀬𑀺𑀢𑁆𑀯𑀸 𑀲𑀫𑁄𑀭𑁄𑀧𑀬𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀢𑁆𑀯𑀸𑀢𑀺 𑁋 𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺.

𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑀓𑁄𑀢𑀺 𑀬𑀣𑀸 𑀲𑁄 𑀧𑀸𑀭𑀺𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀩𑀳𑀮𑀧𑀢𑁆𑀢𑀧𑀮𑀸𑀲𑁄 [𑀲𑀸𑀔𑀧𑀢𑁆𑀢𑀧𑀮𑀸𑀲𑁄 (𑀓.)] 𑀲𑀦𑁆𑀤𑀘𑁆𑀙𑀸𑀬𑁄 [𑀲𑀡𑁆𑀟𑀘𑁆𑀙𑀸𑀬𑁄 (𑀲𑁆𑀬𑀸.), 𑀲𑀦𑁆𑀢𑀘𑁆𑀙𑀸𑀬𑁄 (𑀓.) 𑀧𑀲𑁆𑀲 𑀫. 𑀦𑀺. 𑁧.𑁧𑁫𑁪], 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀥𑀭𑁄𑀢𑀺 𑁋 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑀓𑁄.

𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 [𑀑𑀳𑀸𑀭𑀬𑀺𑀢𑁆𑀯𑀸 (𑀲𑁆𑀬𑀸. 𑀓.)] 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀑𑀳𑀸𑀭𑀬𑀺𑀢𑁆𑀯𑀸 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺, 𑀲𑀜𑁆𑀙𑀦𑁆𑀦𑀧𑀢𑁆𑀢𑁄 𑀬𑀣𑀸 𑀧𑀸𑀭𑀺𑀙𑀢𑁆𑀢𑀓𑁄;

𑀓𑀸𑀲𑀸𑀬𑀯𑀢𑁆𑀣𑁄 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀢𑀺𑀬𑁄 𑀯𑀕𑁆𑀕𑁄.

𑀘𑀢𑀼𑀢𑁆𑀣𑀯𑀕𑁆𑀕𑁄

𑁧𑁫𑁧.

𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄, 𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻;

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄𑀢𑀺. 𑀭𑀲𑁄𑀢𑀺 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄, 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀓𑀁 [𑀮𑀫𑁆𑀩𑀺𑀮𑀁 (𑀲𑁆𑀬𑀸. 𑀓.) 𑀧𑀲𑁆𑀲 𑀆𑀬𑀢𑀦𑀯𑀺𑀪𑀗𑁆𑀕𑁂] 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼 𑀲𑀻𑀢𑀁 𑀉𑀡𑁆𑀳𑀁. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀭𑀲𑀕𑀺𑀤𑁆𑀥𑀸. 𑀢𑁂 𑀚𑀺𑀯𑁆𑀳𑀕𑁆𑀕𑁂𑀦 𑀭𑀲𑀕𑁆𑀕𑀸𑀦𑀺 𑀧𑀭𑀺𑀬𑁂𑀲𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺. 𑀢𑁂 𑀅𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀦𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀦𑀫𑁆𑀩𑀺𑀮𑀁 𑀮𑀪𑀺𑀢𑁆𑀯𑀸 𑀅𑀫𑁆𑀩𑀺𑀮𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀫𑀥𑀼𑀭𑀁 𑀮𑀪𑀺𑀢𑁆𑀯𑀸 𑀅𑀫𑀥𑀼𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀫𑀥𑀼𑀭𑀁 𑀮𑀪𑀺𑀢𑁆𑀯𑀸 𑀫𑀥𑀼𑀭𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀢𑀺𑀢𑁆𑀢𑀓𑀁 𑀮𑀪𑀺𑀢𑁆𑀯𑀸 𑀅𑀢𑀺𑀢𑁆𑀢𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀢𑀺𑀢𑁆𑀢𑀓𑀁 𑀮𑀪𑀺𑀢𑁆𑀯𑀸 𑀢𑀺𑀢𑁆𑀢𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀓𑀝𑀼𑀓𑀁 𑀮𑀪𑀺𑀢𑁆𑀯𑀸 𑀅𑀓𑀼𑀝𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀓𑀼𑀝𑀓𑀁 𑀮𑀪𑀺𑀢𑁆𑀯𑀸 𑀓𑀝𑀼𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀮𑁄𑀡𑀺𑀓𑀁 𑀮𑀪𑀺𑀢𑁆𑀯𑀸 𑀅𑀮𑁄𑀡𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀮𑁄𑀡𑀺𑀓𑀁 𑀮𑀪𑀺𑀢𑁆𑀯𑀸 𑀮𑁄𑀡𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀔𑀸𑀭𑀺𑀓𑀁 𑀮𑀪𑀺𑀢𑁆𑀯𑀸 𑀅𑀔𑀸𑀭𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀔𑀸𑀭𑀺𑀓𑀁 𑀮𑀪𑀺𑀢𑁆𑀯𑀸 𑀔𑀸𑀭𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀓𑀲𑀸𑀯𑀁 𑀮𑀪𑀺𑀢𑁆𑀯𑀸 𑀅𑀓𑀲𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀓𑀲𑀸𑀯𑀁 𑀮𑀪𑀺𑀢𑁆𑀯𑀸 𑀓𑀲𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀮𑀫𑁆𑀩𑀺𑀓𑀁 𑀮𑀪𑀺𑀢𑁆𑀯𑀸 𑀅𑀮𑀫𑁆𑀩𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀮𑀫𑁆𑀩𑀺𑀓𑀁 𑀮𑀪𑀺𑀢𑁆𑀯𑀸 𑀮𑀫𑁆𑀩𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀲𑀸𑀤𑀼𑀁 𑀮𑀪𑀺𑀢𑁆𑀯𑀸 𑀅𑀲𑀸𑀤𑀼𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀲𑀸𑀤𑀼𑀁 𑀮𑀪𑀺𑀢𑁆𑀯𑀸 𑀲𑀸𑀤𑀼𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀲𑀻𑀢𑀁 𑀮𑀪𑀺𑀢𑁆𑀯𑀸 𑀉𑀡𑁆𑀳𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀉𑀡𑁆𑀳𑀁 𑀮𑀪𑀺𑀢𑁆𑀯𑀸 𑀲𑀻𑀢𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀢𑁂 𑀬𑀁 𑀬𑀁 𑀮𑀪𑀦𑁆𑀢𑀺 𑀢𑁂𑀦 𑀢𑁂𑀦 𑀦 𑀢𑀼𑀲𑁆𑀲𑀦𑁆𑀢𑀺, 𑀅𑀧𑀭𑀸𑀧𑀭𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀫𑀦𑀸𑀧𑀺𑀓𑁂𑀲𑀼 𑀭𑀲𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀣𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀲𑀸 𑀭𑀲𑀢𑀡𑁆𑀳𑀸 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 ‘‘𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬; 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺.

𑀬𑀣𑀸 𑀯𑀡𑀁 𑀆𑀮𑀺𑀫𑁆𑀧𑁂𑀬𑁆𑀬 𑀬𑀸𑀯𑀤𑁂𑀯 𑀆𑀭𑀼𑀳𑀡𑀢𑁆𑀣𑀸𑀬 [𑀭𑁄𑀧𑀦𑀢𑁆𑀣𑀸𑀬 (𑀲𑁆𑀬𑀸.)], 𑀬𑀣𑀸 𑀯𑀸 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑁂𑀬𑁆𑀬 𑀬𑀸𑀯𑀤𑁂𑀯 𑀪𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀬𑀣𑀸 𑀧𑀼𑀢𑁆𑀢𑀫𑀁𑀲𑀁 𑀆𑀳𑀸𑀭𑀁 𑀆𑀳𑀭𑁂𑀬𑁆𑀬 𑀬𑀸𑀯𑀤𑁂𑀯 𑀓𑀦𑁆𑀢𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬; 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 ‘‘𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬; 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺. 𑀭𑀲𑀢𑀡𑁆𑀳𑀸𑀬 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁.

𑀅𑀮𑁄𑀮𑁄𑀢𑀺 𑀮𑁄𑀮𑀼𑀧𑁆𑀧𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀮𑁄𑀮𑀼𑀧𑁆𑀧𑀸 𑀢𑀡𑁆𑀳𑀸 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀮𑁄𑀮𑁄𑀢𑀺 𑁋 𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄.

𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻𑀢𑀺 𑀅𑀦𑀜𑁆𑀜𑀧𑁄𑀲𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀢𑀸𑀦𑀜𑁆𑀜𑁂𑀯 𑀧𑁄𑀲𑁂𑀢𑀺, 𑀦 𑀧𑀭𑀦𑁆𑀢𑀺.

𑀅𑀦𑀜𑁆𑀜𑀧𑁄𑀲𑀺𑀫𑀜𑁆𑀜𑀸𑀢𑀁, 𑀤𑀦𑁆𑀢𑀁 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀁 [𑀲𑀸𑀭𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀁 (𑀲𑁆𑀬𑀸. 𑀓.) 𑀧𑀲𑁆𑀲 𑀉𑀤𑀸. 𑁬];

𑀔𑀻𑀡𑀸𑀲𑀯𑀁 𑀯𑀦𑁆𑀢𑀤𑁄𑀲𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀦𑁆𑀢𑀺.

𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 [𑀧𑀼𑀩𑁆𑀩𑀦𑁆𑀳𑀲𑀫𑀬𑀁 (𑀓.)] 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀓𑀼𑀮𑀸 𑀓𑀼𑀮𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀢𑀻𑀢𑀺 𑁋 𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻.

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀯𑀸 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀓𑀣𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺? ‘‘𑀢𑀼𑀫𑁆𑀳𑁂 𑀫𑁂 𑀩𑀳𑀽𑀧𑀓𑀸𑀭𑀸, 𑀅𑀳𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀮𑀪𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀬𑀫𑁆𑀧𑀺 𑀫𑁂 𑀅𑀜𑁆𑀜𑁂 𑀤𑀸𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀫𑀜𑁆𑀜𑀦𑁆𑀢𑀺 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂 𑀧𑀲𑁆𑀲𑀦𑁆𑀢𑀸. 𑀬𑀫𑁆𑀧𑀺 𑀫𑁂 𑀧𑁄𑀭𑀸𑀡𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀁 𑀦𑀸𑀫𑀕𑁄𑀢𑁆𑀢𑀁 𑀢𑀫𑁆𑀧𑀺 𑀫𑁂 𑀅𑀦𑁆𑀢𑀭𑀳𑀺𑀢𑀁 𑀢𑀼𑀫𑁆𑀳𑁂𑀳𑀺 𑀅𑀳𑀁 𑀜𑀸𑀬𑀸𑀫𑀺 𑁋 ‘𑀅𑀲𑀼𑀓𑀲𑁆𑀲 𑀓𑀼𑀮𑀼𑀧𑀓𑁄, 𑀅𑀲𑀼𑀓𑀸𑀬 𑀓𑀼𑀮𑀼𑀧𑀓𑁄’’’𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺.

𑀓𑀣𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺? ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄, 𑀢𑀼𑀫𑁆𑀳𑁂 𑀫𑀁 𑀆𑀕𑀫𑁆𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀢𑀼𑀫𑁆𑀳𑀸𑀓𑀁 𑀅𑀳𑀁 𑀉𑀤𑁆𑀤𑁂𑀲𑀁 𑀤𑁂𑀫𑀺 𑀧𑀭𑀺𑀧𑀼𑀘𑁆𑀙𑀁 𑀤𑁂𑀫𑀺 𑀉𑀧𑁄𑀲𑀣𑀁 𑀆𑀘𑀺𑀓𑁆𑀔𑀸𑀫𑀺 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀫𑀺; 𑀅𑀣 𑀘 𑀧𑀦 𑀢𑀼𑀫𑁆𑀳𑁂 𑀫𑀁 𑀉𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣𑀸’’𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺.

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀓𑀼𑀮𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀕𑀡𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀆𑀯𑀸𑀲𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀘𑀻𑀯𑀭𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀺𑀡𑁆𑀟𑀧𑀸𑀢𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀲𑁂𑀦𑀸𑀲𑀦𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀧𑀮𑀺𑀩𑁄𑀥𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀻𑀢𑀺 𑁋 𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀭𑀲𑁂𑀲𑀼 𑀕𑁂𑀥𑀁 𑀅𑀓𑀭𑀁 𑀅𑀮𑁄𑀮𑁄, 𑀅𑀦𑀜𑁆𑀜𑀧𑁄𑀲𑀻 𑀲𑀧𑀤𑀸𑀦𑀘𑀸𑀭𑀻;

𑀓𑀼𑀮𑁂 𑀓𑀼𑀮𑁂 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁨.

𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄, 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂;

𑀅𑀦𑀺𑀲𑁆𑀲𑀺𑀢𑁄 𑀙𑁂𑀢𑁆𑀯 [𑀙𑁂𑀢𑁆𑀯𑀸 (𑀲𑁆𑀬𑀸. 𑀓.)] 𑀲𑀺𑀦𑁂𑀳𑀤𑁄𑀲𑀁 [𑀲𑁆𑀦𑁂𑀳𑀤𑁄𑀲𑀁 (𑀲𑁆𑀬𑀸. 𑀓.)], 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸, 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁… 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁… 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑁋 𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄.

𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂𑀢𑀺 𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀫𑁄𑀳𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀓𑁄𑀥𑁄… 𑀉𑀧𑀦𑀸𑀳𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀧𑀦𑀼𑀤𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂.

𑀅𑀦𑀺𑀲𑁆𑀲𑀺𑀢𑁄 𑀙𑁂𑀢𑁆𑀯 𑀲𑀺𑀦𑁂𑀳𑀤𑁄𑀲𑀦𑁆𑀢𑀺. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀲𑀺𑀦𑁂𑀳𑁄𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄. 𑀤𑁄𑀲𑁄𑀢𑀺 𑀬𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲. 𑀅𑀦𑀺𑀲𑁆𑀲𑀺𑀢𑁄 𑀙𑁂𑀢𑁆𑀯 𑀲𑀺𑀦𑁂𑀳𑀤𑁄𑀲𑀦𑁆𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀲𑁆𑀦𑁂𑀳𑀜𑁆𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑀜𑁆𑀘 𑀤𑁄𑀲𑀜𑁆𑀘 𑀙𑁂𑀢𑁆𑀯𑀸 𑀉𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄, 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀅𑀦𑀺𑀲𑁆𑀲𑀺𑀢𑁄 𑀙𑁂𑀢𑁆𑀯 𑀲𑀺𑀦𑁂𑀳𑀤𑁄𑀲𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀧𑀳𑀸𑀬 𑀧𑀜𑁆𑀘𑀸𑀯𑀭𑀡𑀸𑀦𑀺 𑀘𑁂𑀢𑀲𑁄, 𑀉𑀧𑀓𑁆𑀓𑀺𑀮𑁂𑀲𑁂 𑀩𑁆𑀬𑀧𑀦𑀼𑀚𑁆𑀚 𑀲𑀩𑁆𑀩𑁂;

𑀅𑀦𑀺𑀲𑁆𑀲𑀺𑀢𑁄 𑀙𑁂𑀢𑁆𑀯 𑀲𑀺𑀦𑁂𑀳𑀤𑁄𑀲𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁩.

𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀔𑀜𑁆𑀘, 𑀧𑀼𑀩𑁆𑀩𑁂𑀯 𑀘 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁;

𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀔𑀜𑁆𑀘, 𑀧𑀼𑀩𑁆𑀩𑁂𑀯 𑀘 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀦𑁆𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑁋 𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀔𑀜𑁆𑀘, 𑀧𑀼𑀩𑁆𑀩𑁂𑀯 𑀘 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁.

𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀦𑁆𑀢𑀺. 𑀉𑀧𑁂𑀓𑁆𑀔𑀸𑀢𑀺 𑀬𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀦𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀘𑀺𑀢𑁆𑀢𑀲𑀫𑀢𑀸 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀢𑀸 [𑀘𑀺𑀢𑁆𑀢𑀯𑀺𑀲𑀝𑀢𑀸 (𑀓.) 𑀧𑀲𑁆𑀲 𑀫𑀳𑀸𑀦𑀺. 𑁨𑁦𑁭] 𑀫𑀚𑁆𑀛𑀢𑁆𑀢𑀢𑀸 𑀘𑀺𑀢𑁆𑀢𑀲𑁆𑀲. 𑀲𑀫𑀣𑁄𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 [𑀅𑀯𑀺𑀲𑀁𑀳𑀸𑀭𑁄 (𑀓.) 𑀧𑀲𑁆𑀲 𑀥. 𑀲. 𑁧𑁧, 𑁧𑁫] 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 [𑀅𑀯𑀺𑀲𑀁𑀳𑀝𑀫𑀸𑀦𑀲𑀢𑀸 (𑀓.)] 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑀲𑀫𑁆𑀫𑀸𑀲𑀫𑀸𑀥𑀺; 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀉𑀧𑁂𑀓𑁆𑀔𑀸 𑀘 𑀲𑀫𑀣𑁄 𑀘 𑀲𑀼𑀤𑁆𑀥𑀸 𑀳𑁄𑀦𑁆𑀢𑀺 𑀯𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸 𑀅𑀦𑀗𑁆𑀕𑀡𑀸 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀸 𑀫𑀼𑀤𑀼𑀪𑀽𑀢𑀸 𑀓𑀫𑁆𑀫𑀦𑀺𑀬𑀸 𑀞𑀺𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀸. 𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑁂𑀓𑁆𑀔𑀜𑁆𑀘 𑀲𑀫𑀣𑀜𑁆𑀘 𑀮𑀤𑁆𑀥𑀸 𑀮𑀪𑀺𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑁋 𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀲𑀼𑀔𑀁 𑀤𑀼𑀔𑀜𑁆𑀘, 𑀧𑀼𑀩𑁆𑀩𑁂𑀯 𑀘 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁;

𑀮𑀤𑁆𑀥𑀸𑀦𑀼𑀧𑁂𑀓𑁆𑀔𑀁 𑀲𑀫𑀣𑀁 𑀯𑀺𑀲𑀼𑀤𑁆𑀥𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁪.

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸, 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺;

𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸𑀢𑀺 𑀧𑀭𑀫𑀢𑁆𑀣𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀧𑀭𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸 𑀮𑀸𑀪𑀸𑀬 𑀧𑀝𑀺𑀮𑀸𑀪𑀸𑀬 𑀅𑀥𑀺𑀕𑀫𑀸𑀬 𑀨𑀲𑁆𑀲𑀦𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑁆𑀧𑀤𑀸𑀬 𑀣𑀸𑀫𑀯𑀸 [𑀣𑀸𑀫𑀲𑀸 (𑀓.)] 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸.

𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬…𑀧𑁂… 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬…𑀧𑁂… 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 [𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 (𑀲𑁆𑀬𑀸.)] 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀻𑀢𑀺 𑁋 𑀏𑀯𑀁 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

𑀅𑀣 𑀯𑀸, ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼 [𑀅𑀯𑀲𑀼𑀲𑁆𑀲𑀢𑀼 (𑀲𑁆𑀬𑀸.) 𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨 𑀧𑀲𑁆𑀲𑀺𑀢𑀩𑁆𑀩𑀁], 𑀲𑀭𑀻𑀭𑁂 𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢𑀁, 𑀬𑀁 𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀩𑀮𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 [𑀯𑀺𑀭𑀺𑀬𑀲𑁆𑀲 𑀞𑀸𑀦𑀁 (𑀲𑁆𑀬𑀸.)] 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

𑀦𑀸𑀲𑀺𑀲𑁆𑀲𑀁 𑀦 𑀧𑀺𑀯𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀢𑁄 𑀦 𑀦𑀺𑀓𑁆𑀔𑀫𑁂;

𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀁, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂𑀢𑀺.

𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

‘‘𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

‘‘𑀦 𑀢𑀸𑀯𑀸𑀳𑀁 𑀇𑀫𑀫𑁆𑀳𑀸 𑀆𑀲𑀦𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

‘‘𑀦 𑀢𑀸𑀯𑀸𑀳𑀁 𑀇𑀫𑀫𑁆𑀳𑀸 𑀘𑀗𑁆𑀓𑀫𑀸 𑀑𑀭𑁄𑀳𑀺𑀲𑁆𑀲𑀸𑀫𑀺…𑀧𑁂… 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀅𑀟𑁆𑀠𑀬𑁄𑀕𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀧𑀸𑀲𑀸𑀤𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀳𑀫𑁆𑀫𑀺𑀬𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀕𑀼𑀳𑀸𑀬 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀮𑁂𑀡𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀓𑀼𑀝𑀺𑀬𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀓𑀽𑀝𑀸𑀕𑀸𑀭𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀅𑀝𑁆𑀝𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀫𑀸𑀴𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀉𑀤𑁆𑀤𑀡𑁆𑀟𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 … 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀫𑀡𑁆𑀟𑀧𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺… 𑀭𑀼𑀓𑁆𑀔𑀫𑀽𑀮𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

‘‘𑀇𑀫𑀲𑁆𑀫𑀺𑀁𑀬𑁂𑀯 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 [𑀧𑀼𑀩𑁆𑀩𑀡𑁆𑀳𑀲𑀫𑀬𑀁 (𑀓.) 𑀫𑀳𑀸𑀦𑀺. 𑁧𑁭] 𑀅𑀭𑀺𑀬𑀥𑀫𑁆𑀫𑀁 𑀆𑀳𑀭𑀺𑀲𑁆𑀲𑀸𑀫𑀺 𑀲𑀫𑀸𑀳𑀭𑀺𑀲𑁆𑀲𑀸𑀫𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂…𑀧𑁂… 𑀲𑀸𑀬𑀦𑁆𑀳𑀲𑀫𑀬𑁂 …𑀧𑁂… 𑀧𑀼𑀭𑁂𑀪𑀢𑁆𑀢𑀁… 𑀧𑀘𑁆𑀙𑀸𑀪𑀢𑁆𑀢𑀁… 𑀧𑀼𑀭𑀺𑀫𑀬𑀸𑀫𑀁… 𑀫𑀚𑁆𑀛𑀺𑀫𑀬𑀸𑀫𑀁… 𑀧𑀘𑁆𑀙𑀺𑀫𑀬𑀸𑀫𑀁… 𑀓𑀸𑀴𑁂… 𑀚𑀼𑀡𑁆𑀳𑁂… 𑀯𑀲𑁆𑀲𑁂… 𑀳𑁂𑀫𑀦𑁆𑀢𑁂 … 𑀕𑀺𑀫𑁆𑀳𑁂… 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂… 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂… 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂 𑀅𑀭𑀺𑀬𑀥𑀫𑁆𑀫𑀁 𑀆𑀳𑀭𑀺𑀲𑁆𑀲𑀸𑀫𑀺 𑀲𑀫𑀸𑀳𑀭𑀺𑀲𑁆𑀲𑀸𑀫𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀨𑀲𑁆𑀲𑀬𑀺𑀲𑁆𑀲𑀸𑀫𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀫𑁆𑀧𑀺 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺.

𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀝𑁆𑀞𑀺𑀢𑀲𑀫𑀸𑀤𑀸𑀦𑁄 𑀓𑀸𑀬𑀲𑀼𑀘𑀭𑀺𑀢𑁂 𑀯𑀘𑀻𑀲𑀼𑀘𑀭𑀺𑀢𑁂 𑀫𑀦𑁄𑀲𑀼𑀘𑀭𑀺𑀢𑁂 𑀤𑀸𑀦𑀲𑀁𑀯𑀺𑀪𑀸𑀕𑁂 𑀲𑀻𑀮𑀲𑀫𑀸𑀤𑀸𑀦𑁂 𑀉𑀧𑁄𑀲𑀣𑀼𑀧𑀯𑀸𑀲𑁂 𑀫𑀢𑁆𑀢𑁂𑀬𑁆𑀬𑀢𑀸𑀬 [𑀫𑁂𑀢𑁆𑀢𑁂𑀬𑁆𑀬𑀢𑀸𑀬 (𑀲𑁆𑀬𑀸. 𑀓.) 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑁂 𑁪.𑁩𑁯 𑀲𑀼𑀢𑁆𑀢𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀧𑁂𑀢𑁆𑀢𑁂𑀬𑁆𑀬𑀢𑀸𑀬 𑀲𑀸𑀫𑀜𑁆𑀜𑀢𑀸𑀬 𑀩𑁆𑀭𑀳𑁆𑀫𑀜𑁆𑀜𑀢𑀸𑀬 𑀓𑀼𑀮𑁂𑀚𑁂𑀝𑁆𑀞𑀸𑀧𑀘𑀸𑀬𑀺𑀢𑀸𑀬 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀤𑀴𑁆𑀳𑀦𑀺𑀓𑁆𑀓𑀫𑁄. 𑀣𑀸𑀫𑀩𑀮𑀽𑀧𑀧𑀦𑁆𑀦𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀣𑀸𑀫𑁂𑀦 𑀘 𑀩𑀮𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀧𑀭𑀓𑁆𑀓𑀫𑁂𑀦 𑀘 𑀧𑀜𑁆𑀜𑀸𑀬 𑀘 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀫𑀢𑁆𑀣𑀧𑀢𑁆𑀢𑀺𑀬𑀸, 𑀅𑀮𑀻𑀦𑀘𑀺𑀢𑁆𑀢𑁄 𑀅𑀓𑀼𑀲𑀻𑀢𑀯𑀼𑀢𑁆𑀢𑀺;

𑀤𑀴𑁆𑀳𑀦𑀺𑀓𑁆𑀓𑀫𑁄 𑀣𑀸𑀫𑀩𑀮𑀽𑀧𑀧𑀦𑁆𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁫.

𑀧𑀝𑀺𑀲𑀮𑁆𑀮𑀸𑀦𑀁 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀼, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀧𑀝𑀺𑀲𑀮𑁆𑀮𑀸𑀦𑀁 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀭𑀢𑁄 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀁 𑀛𑀸𑀬𑀻 𑀛𑀸𑀦𑀭𑀢𑁄 𑀏𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀲𑀤𑀢𑁆𑀣𑀕𑀭𑀼𑀓𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀁. 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀺 𑁋 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀲𑀁𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲…𑀧𑁂… 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲… 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀲𑀁𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄𑀢𑀺 𑁋 𑀏𑀯𑀫𑁆𑀧𑀺 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀺.

𑀅𑀣 𑀯𑀸, 𑀉𑀧𑁆𑀧𑀦𑁆𑀦𑀁 𑀯𑀸 𑀧𑀞𑀫𑀁 𑀛𑀸𑀦𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺, 𑀉𑀧𑁆𑀧𑀦𑁆𑀦𑀁 𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀸 𑀢𑀢𑀺𑀬𑀁 𑀛𑀸𑀦𑀁… 𑀉𑀧𑁆𑀧𑀦𑁆𑀦𑀁 𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀏𑀯𑀫𑁆𑀧𑀺 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀻𑀢𑀺 𑁋 𑀧𑀝𑀺𑀲𑀮𑁆𑀮𑀸𑀦𑀁 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄.

𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀓𑀢𑀫𑁂 𑀅𑀦𑀼𑀥𑀫𑁆𑀫𑀸? 𑀲𑀫𑁆𑀫𑀸𑀧𑀝𑀺𑀧𑀤𑀸 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀅𑀦𑀼𑀥𑀫𑁆𑀫𑀸. 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀯𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀤𑀓𑀽𑀫𑀺𑀓𑀚𑀸𑀢𑀁 [𑀉𑀤𑀓𑀼𑀫𑁆𑀫𑀺𑀚𑀸𑀢𑀁 (𑀲𑁆𑀬𑀸.), 𑀉𑀤𑀓𑀼𑀫𑁆𑀫𑀺𑀓𑀚𑀸𑀢𑀁 (𑀓.)]

𑀅𑀯𑀻𑀘𑀺𑀲𑀦𑁆𑀢𑀢𑀺𑀲𑀳𑀺𑀢𑀁 𑀨𑀲𑁆𑀲𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻.

𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀽𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀼, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀽𑀢𑀺 𑁋 𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀼, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀧𑀝𑀺𑀲𑀮𑁆𑀮𑀸𑀦𑀁 𑀛𑀸𑀦𑀫𑀭𑀺𑀜𑁆𑀘𑀫𑀸𑀦𑁄, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀁 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀆𑀤𑀻𑀦𑀯𑀁 𑀲𑀫𑁆𑀫𑀲𑀺𑀢𑀸 𑀪𑀯𑁂𑀲𑀼, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁬.

𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄, 𑀅𑀦𑁂𑀴𑀫𑀽𑀕𑁄 [𑀅𑀦𑁂𑀮𑀫𑀽𑀕𑁄 (𑀲𑁆𑀬𑀸. 𑀓.)] 𑀲𑀼𑀢𑀯𑀸 𑀲𑀢𑀻𑀫𑀸;

𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀓𑁆𑀔𑀬𑀦𑁆𑀢𑀺 𑀭𑀸𑀕𑀓𑁆𑀔𑀬𑀁 𑀤𑁄𑀲𑀓𑁆𑀔𑀬𑀁 𑀫𑁄𑀳𑀓𑁆𑀔𑀬𑀁 𑀕𑀢𑀺𑀓𑁆𑀔𑀬𑀁 𑀉𑀧𑀧𑀢𑁆𑀢𑀺𑀓𑁆𑀔𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀬𑀁 𑀪𑀯𑀓𑁆𑀔𑀬𑀁 𑀲𑀁𑀲𑀸𑀭𑀓𑁆𑀔𑀬𑀁 𑀯𑀝𑁆𑀝𑀓𑁆𑀔𑀬𑀁 𑀧𑀢𑁆𑀣𑀬𑀦𑁆𑀢𑁄 𑀇𑀘𑁆𑀙𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄 𑀧𑀺𑀳𑀬𑀦𑁆𑀢𑁄 𑀅𑀪𑀺𑀚𑀧𑁆𑀧𑀦𑁆𑀢𑁄𑀢𑀺 𑁋 𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀁. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀓𑁆𑀓𑀘𑁆𑀘𑀓𑀸𑀭𑀻 𑀲𑀸𑀢𑀘𑁆𑀘𑀓𑀸𑀭𑀻…𑀧𑁂… 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄.

𑀅𑀦𑁂𑀴𑀫𑀽𑀕𑁄 𑀲𑀼𑀢𑀯𑀸 𑀲𑀢𑀻𑀫𑀸𑀢𑀺. 𑀅𑀦𑁂𑀴𑀫𑀽𑀕𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀲𑀼𑀢𑀯𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑁆𑀘𑀬𑁄. 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑀢𑀻𑀫𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀢𑀺𑀫𑀸 𑀳𑁄𑀢𑀺 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑁋 𑀅𑀦𑁂𑀴𑀫𑀽𑀕𑁄 𑀲𑀼𑀢𑀯𑀸 𑀲𑀢𑀻𑀫𑀸.

𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀗𑁆𑀔𑀸𑀢𑀥𑀫𑁆𑀫𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀗𑁆𑀔𑀸𑀢𑀥𑀫𑁆𑀫𑁄 𑀜𑀸𑀢𑀥𑀫𑁆𑀫𑁄 𑀢𑀼𑀮𑀺𑀢𑀥𑀫𑁆𑀫𑁄 𑀢𑀻𑀭𑀺𑀢𑀥𑀫𑁆𑀫𑁄 𑀯𑀺𑀪𑀽𑀢𑀥𑀫𑁆𑀫𑁄 𑀯𑀺𑀪𑀸𑀯𑀺𑀢𑀥𑀫𑁆𑀫𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑁄…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑁄 𑀜𑀸𑀢𑀥𑀫𑁆𑀫𑁄 𑀢𑀼𑀮𑀺𑀢𑀥𑀫𑁆𑀫𑁄 𑀢𑀻𑀭𑀺𑀢𑀥𑀫𑁆𑀫𑁄 𑀯𑀺𑀪𑀽𑀢𑀥𑀫𑁆𑀫𑁄 𑀯𑀺𑀪𑀸𑀯𑀺𑀢𑀥𑀫𑁆𑀫𑁄. 𑀅𑀣 𑀯𑀸, 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀔𑀦𑁆𑀥𑀸 𑀲𑀁𑀔𑀺𑀢𑁆𑀢𑀸 𑀥𑀸𑀢𑀼𑀬𑁄 𑀲𑀁𑀔𑀺𑀢𑁆𑀢𑀸 𑀆𑀬𑀢𑀦𑀸𑀦𑀺 𑀲𑀁𑀔𑀺𑀢𑁆𑀢𑀸𑀦𑀺 𑀕𑀢𑀺𑀬𑁄 𑀲𑀁𑀔𑀺𑀢𑁆𑀢𑀸 𑀉𑀧𑀧𑀢𑁆𑀢𑀺𑀬𑁄 𑀲𑀁𑀔𑀺𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀬𑁄 𑀲𑀁𑀔𑀺𑀢𑁆𑀢𑀸 𑀪𑀯𑀸 𑀲𑀁𑀔𑀺𑀢𑁆𑀢𑀸 𑀲𑀁𑀲𑀸𑀭𑀸 𑀲𑀁𑀔𑀺𑀢𑁆𑀢𑀸 𑀯𑀝𑁆𑀝𑀸 𑀲𑀁𑀔𑀺𑀢𑁆𑀢𑀸. 𑀅𑀣 𑀯𑀸, 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀲𑀗𑁆𑀔𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀅𑀦𑁆𑀢𑀺𑀫𑀪𑀯𑁂 [𑀅𑀦𑁆𑀢𑀺𑀫𑁂 𑀪𑀯𑁂 (𑀓.) 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁮] 𑀞𑀺𑀢𑁄 𑀅𑀦𑁆𑀢𑀺𑀫𑀲𑀫𑀼𑀲𑁆𑀲𑀬𑁂 𑀞𑀺𑀢𑁄 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄.

𑀢𑀲𑁆𑀲𑀸𑀬𑀁 𑀧𑀘𑁆𑀙𑀺𑀫𑀓𑁄 𑀪𑀯𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 [𑀚𑀸𑀢𑀺𑀚𑀭𑀸𑀫𑀭𑀡𑀲𑀁𑀲𑀸𑀭𑁄 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼], 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺.

𑀢𑀁𑀓𑀸𑀭𑀡𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀗𑁆𑀔𑀸𑀢𑀥𑀫𑁆𑀫𑁄. 𑀦𑀺𑀬𑀢𑁄𑀢𑀺 𑀦𑀺𑀬𑀸𑀫𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸. 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀦𑀺𑀬𑀢𑁄. 𑀦𑀺𑀬𑀸𑀫𑀁 𑀧𑀢𑁆𑀢𑁄 𑀲𑀫𑁆𑀧𑀢𑁆𑀢𑁄 𑀅𑀥𑀺𑀕𑀢𑁄 𑀨𑀲𑁆𑀲𑀺𑀢𑁄 𑀲𑀘𑁆𑀙𑀺𑀓𑀢𑁄 𑀧𑀢𑁆𑀢𑁄 𑀦𑀺𑀬𑀸𑀫𑀁. 𑀧𑀥𑀸𑀦𑀯𑀸𑀢𑀺 𑀧𑀥𑀸𑀦𑀁 𑀯𑀼𑀘𑁆𑀘𑀢𑀺 𑀯𑀻𑀭𑀺𑀬𑀁. 𑀲𑁄 𑀘𑁂𑀢𑀲𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑁆𑀓𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀣𑀸𑀫𑁄 𑀥𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮𑀁 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀇𑀫𑀺𑀦𑀸 𑀧𑀥𑀸𑀦𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀥𑀸𑀦𑀯𑀸𑀢𑀺 𑁋 𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀢𑀡𑁆𑀳𑀓𑁆𑀔𑀬𑀁 𑀧𑀢𑁆𑀣𑀬𑀫𑀧𑁆𑀧𑀫𑀢𑁆𑀢𑁄, 𑀅𑀦𑁂𑀴𑀫𑀽𑀕𑁄 𑀲𑀼𑀢𑀯𑀸 𑀲𑀢𑀻𑀫𑀸;

𑀲𑀗𑁆𑀔𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀧𑀥𑀸𑀦𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁭.

𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄;

𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀫𑁆𑀧𑀫𑀸𑀦𑁄 [𑀅𑀮𑀺𑀧𑁆𑀧𑀫𑀸𑀦𑁄, 𑀲𑀼. 𑀦𑀺. 𑁭𑁧], 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄𑀢𑀺 𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀸𑀲𑀻 𑀅𑀧𑀭𑀺𑀲𑀦𑁆𑀢𑀸𑀲𑀻 𑀅𑀦𑀼𑀢𑁆𑀭𑀸𑀲𑀻 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀲𑁆𑀲𑀗𑁆𑀓𑀻 [𑀅𑀦𑀼𑀲𑁆𑀲𑀼𑀓𑀻 (𑀲𑁆𑀬𑀸.)] 𑀅𑀦𑀼𑀢𑁆𑀭𑀸𑀲𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀸𑀲𑀻 𑀅𑀧𑀭𑀺𑀲𑀦𑁆𑀢𑀸𑀲𑀻 𑀅𑀦𑀼𑀢𑁆𑀭𑀸𑀲𑀻 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀲𑁆𑀲𑀗𑁆𑀓𑀻 𑀅𑀦𑀼𑀢𑁆𑀭𑀸𑀲𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑀢𑀻𑀢𑀺 𑁋 𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄.

𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄𑀢𑀺. 𑀯𑀸𑀢𑁄𑀢𑀺 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀸 𑀧𑀘𑁆𑀙𑀺𑀫𑀸 𑀯𑀸𑀢𑀸 𑀉𑀢𑁆𑀢𑀭𑀸 𑀯𑀸𑀢𑀸 𑀤𑀓𑁆𑀔𑀺𑀡𑀸 𑀯𑀸𑀢𑀸 𑀲𑀭𑀚𑀸 𑀯𑀸𑀢𑀸 𑀅𑀭𑀚𑀸 𑀯𑀸𑀢𑀸 𑀲𑀻𑀢𑀸 𑀯𑀸𑀢𑀸 𑀉𑀡𑁆𑀳𑀸 𑀯𑀸𑀢𑀸 𑀧𑀭𑀺𑀢𑁆𑀢𑀸 𑀯𑀸𑀢𑀸 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀯𑁂𑀭𑀫𑁆𑀪𑀯𑀸𑀢𑀸 𑀧𑀓𑁆𑀔𑀯𑀸𑀢𑀸 [𑀧𑀓𑁆𑀔𑀺𑀯𑀸𑀢𑀸 (𑀲𑁆𑀬𑀸.) 𑀘𑀽𑀴𑀦𑀺. 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁩, 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁩𑁮 𑀦𑀢𑁆𑀣𑀺 𑀧𑀸𑀞𑀦𑀸𑀦𑀢𑁆𑀢𑀁] 𑀲𑀼𑀧𑀡𑁆𑀡𑀯𑀸𑀢𑀸 𑀢𑀸𑀮𑀧𑀡𑁆𑀡𑀯𑀸𑀢𑀸 𑀯𑀺𑀥𑀽𑀧𑀦𑀯𑀸𑀢𑀸. 𑀚𑀸𑀮𑀁 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀚𑀸𑀮𑀁. 𑀬𑀣𑀸 𑀯𑀸𑀢𑁄 𑀚𑀸𑀮𑀫𑁆𑀳𑀺 𑀦 𑀲𑀚𑁆𑀚𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺, 𑀏𑀯𑀫𑁂𑀯 𑀤𑁆𑀯𑁂 𑀚𑀸𑀮𑀸 𑁋 𑀢𑀡𑁆𑀳𑀸𑀚𑀸𑀮𑀜𑁆𑀘 𑀤𑀺𑀝𑁆𑀞𑀺𑀚𑀸𑀮𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀚𑀸𑀮𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀚𑀸𑀮𑀁. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀡𑁆𑀳𑀸𑀚𑀸𑀮𑀁 𑀧𑀳𑀻𑀦𑀁 𑀤𑀺𑀝𑁆𑀞𑀺𑀚𑀸𑀮𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀡𑁆𑀳𑀸𑀚𑀸𑀮𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀚𑀸𑀮𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑁂 𑀦 𑀲𑀚𑁆𑀚𑀢𑀺 𑀲𑀤𑁆𑀤𑁂 𑀦 𑀲𑀚𑁆𑀚𑀢𑀺…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀚𑁆𑀚𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄.

𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀫𑁆𑀧𑀫𑀸𑀦𑁄𑀢𑀺 𑀧𑀤𑀼𑀫𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀼𑀧𑁆𑀨𑀁. 𑀢𑁄𑀬𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀬𑀣𑀸 𑀧𑀤𑀼𑀫𑀧𑀼𑀧𑁆𑀨𑀁 𑀢𑁄𑀬𑁂𑀦 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺, 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀁, 𑀏𑀯𑀫𑁂𑀯 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀡𑁆𑀳𑀸𑀮𑁂𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀮𑁂𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀮𑁂𑀧𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀮𑁂𑀧𑀲𑁆𑀲 𑀧𑀝𑀺𑀦𑀺𑀲𑀝𑁆𑀞𑀢𑁆𑀢𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑁂 𑀦 𑀮𑀺𑀫𑁆𑀧𑀢𑀺 𑀲𑀤𑁆𑀤𑁂 𑀦 𑀮𑀺𑀫𑁆𑀧𑀢𑀺…𑀧𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀫𑁆𑀧𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀻𑀳𑁄𑀯 𑀲𑀤𑁆𑀤𑁂𑀲𑀼 𑀅𑀲𑀦𑁆𑀢𑀲𑀦𑁆𑀢𑁄, 𑀯𑀸𑀢𑁄𑀯 𑀚𑀸𑀮𑀫𑁆𑀳𑀺 𑀅𑀲𑀚𑁆𑀚𑀫𑀸𑀦𑁄;

𑀧𑀤𑀼𑀫𑀁𑀯 𑀢𑁄𑀬𑁂𑀦 𑀅𑀮𑀺𑀫𑁆𑀧𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁮.

𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻;

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻𑀢𑀺 𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑀸𑀞𑀩𑀮𑀻 𑀤𑀸𑀞𑀸𑀯𑀼𑀥𑁄 𑀲𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀕𑀢𑁂 𑀧𑀸𑀡𑁂 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀧𑀜𑁆𑀜𑀸𑀩𑀮𑀻 𑀧𑀜𑁆𑀜𑀸𑀯𑀼𑀥𑁄 𑀲𑀩𑁆𑀩𑀧𑀸𑀡𑀪𑀽𑀢𑁂 𑀧𑀼𑀕𑁆𑀕𑀮𑁂 𑀧𑀜𑁆𑀜𑀸𑀬 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻.

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀻𑀢𑀺 𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀅𑀭𑀜𑁆𑀜𑀯𑀦𑀫𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄𑀧𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺 𑀏𑀓𑁄 𑀢𑀺𑀝𑁆𑀞𑀢𑀺 𑀏𑀓𑁄 𑀦𑀺𑀲𑀻𑀤𑀢𑀺 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀻𑀳𑁄 𑀬𑀣𑀸 𑀤𑀸𑀞𑀩𑀮𑀻 𑀧𑀲𑀬𑁆𑀳, 𑀭𑀸𑀚𑀸 𑀫𑀺𑀕𑀸𑀦𑀁 𑀅𑀪𑀺𑀪𑀼𑀬𑁆𑀬 𑀘𑀸𑀭𑀻;

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁫𑁯.

𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂;

𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑁋 𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂.

𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄𑀢𑀺 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸…𑀧𑁂… 𑀬𑁂 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀳𑁂𑀝𑁆𑀞𑀺𑀫𑀸𑀬 [𑀅𑀥𑁄𑀕𑀫𑀸𑀬 (𑀲𑁆𑀬𑀸.)] 𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸… 𑀬𑁂 𑀤𑀲𑀲𑀼 𑀤𑀺𑀲𑀸𑀲𑀼 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀓𑀭𑀼𑀡𑀸𑀬 𑀪𑀸𑀯𑀺𑀢𑀢𑁆𑀢𑀸… 𑀫𑀼𑀤𑀺𑀢𑀸𑀬 𑀪𑀸𑀯𑀺𑀢𑀢𑁆𑀢𑀸… 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸…𑀧𑁂… 𑀬𑁂 𑀤𑀲𑀲𑀼 𑀤𑀺𑀲𑀸𑀲𑀼 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄𑀢𑀺 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀅𑀧𑁆𑀧𑀝𑀺𑀯𑀺𑀭𑀼𑀚𑁆𑀛𑀫𑀸𑀦𑁄 𑀅𑀦𑀸𑀖𑀸𑀢𑀺𑀬𑀫𑀸𑀦𑁄 [𑀅𑀖𑀝𑁆𑀝𑀺𑀬𑀫𑀸𑀦𑁄 (𑀲𑁆𑀬𑀸.)] 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑁄𑀢𑀺 𑁋 𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀫𑁂𑀢𑁆𑀢𑀁 𑀉𑀧𑁂𑀓𑁆𑀔𑀁 𑀓𑀭𑀼𑀡𑀁 𑀯𑀺𑀫𑀼𑀢𑁆𑀢𑀺𑀁, 𑀆𑀲𑁂𑀯𑀫𑀸𑀦𑁄 𑀫𑀼𑀤𑀺𑀢𑀜𑁆𑀘 𑀓𑀸𑀮𑁂;

𑀲𑀩𑁆𑀩𑁂𑀦 𑀮𑁄𑀓𑁂𑀦 𑀅𑀯𑀺𑀭𑀼𑀚𑁆𑀛𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁬𑁦.

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺 [𑀲𑀁𑀬𑁄𑀚𑀦𑀸𑀦𑀺 (𑀓.)] ;

𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀦𑁆𑀢𑀺. 𑀭𑀸𑀕𑁄𑀢𑀺 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀤𑁄𑀲𑁄𑀢𑀺 𑀬𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄…𑀧𑁂… 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲. 𑀫𑁄𑀳𑁄𑀢𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀦𑁆𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀫𑁄𑀳𑀜𑁆𑀘 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁.

𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀻𑀢𑀺. 𑀤𑀲 𑀲𑀁𑀬𑁄𑀚𑀦𑀸𑀦𑀺 𑁋 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀖𑀲𑀁𑀬𑁄𑀚𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁. 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀲𑀦𑁆𑀤𑀸𑀮𑀬𑀺𑀢𑁆𑀯𑀸 𑀧𑀤𑀸𑀮𑀬𑀺𑀢𑁆𑀯𑀸 𑀲𑀫𑁆𑀧𑀤𑀸𑀮𑀬𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀻𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺.

𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀻𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀅𑀲𑀦𑁆𑀢𑀸𑀲𑀻 𑀅𑀦𑀼𑀢𑁆𑀭𑀸𑀲𑀻 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀲𑁆𑀲𑀗𑁆𑀓𑀻 𑀅𑀦𑀼𑀢𑁆𑀭𑀸𑀲𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑀢𑀻𑀢𑀺 𑁋 𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁, 𑀲𑀦𑁆𑀤𑀸𑀮𑀬𑀺𑀢𑁆𑀯𑀸𑀦 𑀲𑀁𑀬𑁄𑀚𑀦𑀸𑀦𑀺;

𑀅𑀲𑀦𑁆𑀢𑀲𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁬𑁧.

𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸, 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸;

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 [𑀅𑀢𑁆𑀢𑀝𑁆𑀞𑀧𑀜𑁆𑀜𑀸 (𑀓.)] 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸𑀢𑀺 𑀅𑀢𑁆𑀢𑀢𑁆𑀣𑀓𑀸𑀭𑀡𑀸 𑀧𑀭𑀢𑁆𑀣𑀓𑀸𑀭𑀡𑀸 𑀉𑀪𑀬𑀢𑁆𑀣𑀓𑀸𑀭𑀡𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀓𑀸𑀭𑀡𑀸 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀓𑀸𑀭𑀡𑀸 𑀧𑀭𑀫𑀢𑁆𑀣𑀓𑀸𑀭𑀡𑀸 𑀪𑀚𑀦𑁆𑀢𑀺 𑀲𑀫𑁆𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀦𑀺𑀲𑁂𑀯𑀦𑁆𑀢𑀺 𑀲𑀁𑀲𑁂𑀯𑀦𑁆𑀢𑀺 𑀧𑀝𑀺𑀲𑁂𑀯𑀦𑁆𑀢𑀻𑀢𑀺 𑁋 𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸.

𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸𑀢𑀺 𑀤𑁆𑀯𑁂 𑀫𑀺𑀢𑁆𑀢𑀸 𑁋 𑀅𑀕𑀸𑀭𑀺𑀓𑀫𑀺𑀢𑁆𑀢𑁄 𑀘 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄 𑀘…𑀧𑁂… 𑀅𑀬𑀁 𑀅𑀕𑀸𑀭𑀺𑀓𑀫𑀺𑀢𑁆𑀢𑁄…𑀧𑁂… 𑀅𑀬𑀁 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄. 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸𑀢𑀺 𑀇𑀫𑁂 𑀤𑁆𑀯𑁂 𑀫𑀺𑀢𑁆𑀢𑀸 𑀅𑀓𑀸𑀭𑀡𑀸 𑀦𑀺𑀓𑁆𑀓𑀸𑀭𑀡𑀸 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀤𑀼𑀮𑁆𑀮𑀪𑀸 (𑀤𑀼𑀮𑁆𑀮𑀤𑁆𑀥𑀸 𑀲𑀼𑀤𑀼𑀮𑁆𑀮𑀤𑁆𑀥𑀸) [( ) 𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂] 𑀢𑀺 𑁋 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸.

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸𑀢𑀺. 𑀅𑀢𑁆𑀢𑀢𑁆𑀣𑀧𑀜𑁆𑀜𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑁂𑀢𑀼 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸 𑀅𑀢𑁆𑀢𑀦𑁄 𑀓𑀸𑀭𑀡𑀸 𑀪𑀚𑀦𑁆𑀢𑀺 𑀲𑀫𑁆𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀦𑀺𑀲𑁂𑀯𑀦𑁆𑀢𑀺 𑀲𑀁𑀲𑁂𑀯𑀦𑁆𑀢𑀺 𑀧𑀝𑀺𑀲𑁂𑀯𑀦𑁆𑀢𑀺 𑀆𑀘𑀭𑀦𑁆𑀢𑀺 𑀲𑀫𑀸𑀘𑀭𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀧𑀭𑀺𑀧𑀜𑁆𑀳𑀦𑁆𑀢𑀻𑀢𑀺 𑁋 𑀅𑀢𑁆𑀢𑀢𑁆𑀣𑀧𑀜𑁆𑀜𑀸. 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸𑀢𑀺 𑀅𑀲𑀼𑀘𑀺𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀦𑀸 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀦𑀸 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑁂𑀦…𑀧𑁂… 𑀅𑀲𑀼𑀘𑀺𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑁂𑀦… 𑀅𑀲𑀼𑀘𑀺𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂𑀦… 𑀅𑀲𑀼𑀘𑀺𑀦𑀸 𑀫𑀼𑀲𑀸𑀯𑀸𑀤𑁂𑀦… 𑀅𑀲𑀼𑀘𑀺𑀬𑀸 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑀸… 𑀅𑀲𑀼𑀘𑀺𑀬𑀸 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑀸… 𑀅𑀲𑀼𑀘𑀺𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁂𑀦 𑀲𑀫𑀦𑁆𑀦𑀸𑀕𑀢𑀸… 𑀅𑀲𑀼𑀘𑀺𑀬𑀸 𑀅𑀪𑀺𑀚𑁆𑀛𑀸𑀬 𑀲𑀫𑀦𑁆𑀦𑀸𑀕𑀢𑀸… 𑀅𑀲𑀼𑀘𑀺𑀦𑀸 𑀩𑁆𑀬𑀸𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀬𑀸 𑀘𑁂𑀢𑀦𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀬𑀸 𑀧𑀢𑁆𑀣𑀦𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀺𑀦𑀸 𑀧𑀡𑀺𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀅𑀲𑀼𑀘𑀻 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸𑀢𑀺 𑁋 𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸.

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀏𑀓𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄…𑀧𑁂… 𑀘𑀭𑁂𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄…𑀧𑁂… 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀬𑀣𑀸 𑀔𑀕𑁆𑀕𑀲𑁆𑀲 𑀦𑀸𑀫 𑀯𑀺𑀲𑀸𑀡𑀁 𑀏𑀓𑀁 𑀳𑁄𑀢𑀺 𑀅𑀤𑀼𑀢𑀺𑀬𑀁…𑀧𑁂… 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀪𑀚𑀦𑁆𑀢𑀺 𑀲𑁂𑀯𑀦𑁆𑀢𑀺 𑀘 𑀓𑀸𑀭𑀡𑀢𑁆𑀣𑀸, 𑀦𑀺𑀓𑁆𑀓𑀸𑀭𑀡𑀸 𑀤𑀼𑀮𑁆𑀮𑀪𑀸 𑀅𑀚𑁆𑀚 𑀫𑀺𑀢𑁆𑀢𑀸;

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀅𑀲𑀼𑀘𑀻 𑀫𑀦𑀼𑀲𑁆𑀲𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀦𑀺𑀝𑁆𑀞𑀺𑀢𑁄.

𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽;

𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄.

𑀢𑁄𑀤𑁂𑀬𑁆𑀬-𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄;

𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑀲𑁄𑀴𑀲𑀸𑀦𑀁 [𑀲𑁄𑀴𑀲𑀦𑁆𑀦𑀁 (𑀲𑁆𑀬𑀸. 𑀓.)] 𑀧𑀦𑁂𑀢𑁂𑀲𑀁, 𑀩𑁆𑀭𑀸𑀳𑁆𑀫𑀡𑀸𑀦𑀁𑀯 𑀲𑀸𑀲𑀦𑀁;

𑀧𑀸𑀭𑀸𑀬𑀦𑀸𑀦𑀁 𑀦𑀺𑀤𑁆𑀤𑁂𑀲𑀸, 𑀢𑀢𑁆𑀢𑀓𑀸 𑀘 𑀪𑀯𑀦𑁆𑀢𑀺 𑀳𑀺 [𑀯𑀸 (𑀓.)].

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀸𑀦𑀁, 𑀦𑀺𑀤𑁆𑀤𑁂𑀲𑀸𑀧𑀺 𑀢𑀣𑁂𑀯 𑀘;

𑀦𑀺𑀤𑁆𑀤𑁂𑀲𑀸 𑀤𑀼𑀯𑀺𑀥𑀸 𑀜𑁂𑀬𑁆𑀬𑀸, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀮𑀓𑁆𑀔𑀺𑀢𑀸𑀢𑀺.

𑀘𑀽𑀴𑀦𑀺𑀤𑁆𑀤𑁂𑀲𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.