📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀫𑀺𑀮𑀺𑀦𑁆𑀤𑀧𑀜𑁆𑀳𑀧𑀸𑀴𑀺

𑁧.

𑀫𑀺𑀮𑀺𑀦𑁆𑀤𑁄 𑀦𑀸𑀫 𑀲𑁄 𑀭𑀸𑀚𑀸, 𑀲𑀸𑀕𑀮𑀸𑀬𑀁 𑀧𑀼𑀭𑀼𑀢𑁆𑀢𑀫𑁂;

𑀉𑀧𑀕𑀜𑁆𑀙𑀺 𑀦𑀸𑀕𑀲𑁂𑀦𑀁, 𑀕𑀗𑁆𑀕𑀸 𑀘 [𑀕𑀗𑁆𑀕𑀸𑀯 (𑀲𑀻. 𑀧𑀻.)] 𑀬𑀣𑀸 𑀲𑀸𑀕𑀭𑀁.

𑀆𑀲𑀚𑁆𑀚 𑀭𑀸𑀚𑀸 𑀘𑀺𑀢𑁆𑀭𑀓𑀣𑀺𑀁, 𑀉𑀓𑁆𑀓𑀸𑀥𑀸𑀭𑀁 𑀢𑀫𑁄𑀦𑀼𑀤𑀁;

𑀅𑀧𑀼𑀘𑁆𑀙𑀺 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀞𑀸𑀦𑀸𑀝𑁆𑀞𑀸𑀦𑀕𑀢𑁂 𑀧𑀼𑀣𑀽.

𑀧𑀼𑀘𑁆𑀙𑀸 𑀯𑀺𑀲𑀚𑁆𑀚𑀦𑀸 [𑀯𑀺𑀲𑁆𑀲𑀚𑁆𑀚𑀦𑀸 (𑀲𑀻. 𑀧𑀻.)] 𑀘𑁂𑀯, 𑀕𑀫𑁆𑀪𑀻𑀭𑀢𑁆𑀣𑀽𑀧𑀦𑀺𑀲𑁆𑀲𑀺𑀢𑀸;

𑀳𑀤𑀬𑀗𑁆𑀕𑀫𑀸 𑀓𑀡𑁆𑀡𑀲𑀼𑀔𑀸, 𑀅𑀩𑁆𑀪𑀼𑀢𑀸 𑀮𑁄𑀫𑀳𑀁𑀲𑀦𑀸.

𑀅𑀪𑀺𑀥𑀫𑁆𑀫𑀯𑀺𑀦𑀬𑁄𑀕𑀸𑀴𑁆𑀳𑀸, 𑀲𑀼𑀢𑁆𑀢𑀚𑀸𑀮𑀲𑀫𑀢𑁆𑀢𑀺𑀢𑀸;

𑀦𑀸𑀕𑀲𑁂𑀦𑀓𑀣𑀸 𑀘𑀺𑀢𑁆𑀭𑀸, 𑀑𑀧𑀫𑁆𑀫𑁂𑀳𑀺 𑀦𑀬𑁂𑀳𑀺 𑀘.

𑀢𑀢𑁆𑀣 𑀜𑀸𑀡𑀁 𑀧𑀡𑀺𑀥𑀸𑀬, 𑀳𑀸𑀲𑀬𑀺𑀢𑁆𑀯𑀸𑀦 𑀫𑀸𑀦𑀲𑀁;

𑀲𑀼𑀡𑀸𑀣 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀓𑀗𑁆𑀔𑀸𑀝𑁆𑀞𑀸𑀦𑀯𑀺𑀤𑀸𑀮𑀦𑁂𑀢𑀺.

𑁨. 𑀢𑀁 𑀬𑀣𑀸𑀦𑀼𑀲𑀽𑀬𑀢𑁂 𑁋 𑀅𑀢𑁆𑀣𑀺 𑀬𑁄𑀦𑀓𑀸𑀦𑀁 𑀦𑀸𑀦𑀸𑀧𑀼𑀝𑀪𑁂𑀤𑀦𑀁 𑀲𑀸𑀕𑀮𑀁 𑀦𑀸𑀫 𑀦𑀕𑀭𑀁 𑀦𑀤𑀻𑀧𑀩𑁆𑀩𑀢𑀲𑁄𑀪𑀺𑀢𑀁 𑀭𑀫𑀡𑀻𑀬𑀪𑀽𑀫𑀺𑀧𑁆𑀧𑀤𑁂𑀲𑀪𑀸𑀕𑀁 𑀆𑀭𑀸𑀫𑀼𑀬𑁆𑀬𑀸𑀦𑁄𑀧𑀯𑀦𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀲𑀫𑁆𑀧𑀦𑁆𑀦𑀁 𑀦𑀤𑀻𑀧𑀩𑁆𑀩𑀢𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀲𑀼𑀢𑀯𑀦𑁆𑀢𑀦𑀺𑀫𑁆𑀫𑀺𑀢𑀁 𑀦𑀺𑀳𑀢𑀧𑀘𑁆𑀘𑀢𑁆𑀣𑀺𑀓𑀁 [𑀦𑀺𑀧𑁆𑀧𑀘𑁆𑀘𑀢𑁆𑀣𑀺𑀓𑀁 (𑀓.)] 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀼𑀧𑀧𑀻𑀴𑀺𑀢𑀁 𑀯𑀺𑀯𑀺𑀥𑀯𑀺𑀘𑀺𑀢𑁆𑀭𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀁 𑀯𑀭𑀧𑀯𑀭𑀕𑁄𑀧𑀼𑀭 [𑀧𑀯𑀭𑀧𑀘𑀼𑀭𑀕𑁄𑀧𑀼𑀭 (𑀲𑀻.)] 𑀢𑁄𑀭𑀡𑀁 𑀕𑀫𑁆𑀪𑀻𑀭𑀧𑀭𑀺𑀔𑀸𑀧𑀡𑁆𑀟𑀭𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑁂𑀧𑀼𑀭𑀁. 𑀲𑀼𑀯𑀺𑀪𑀢𑁆𑀢𑀯𑀻𑀣𑀺𑀘𑀘𑁆𑀘𑀭𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀁 𑀲𑀼𑀧𑁆𑀧𑀲𑀸𑀭𑀺𑀢𑀸𑀦𑁂𑀓𑀯𑀺𑀥𑀯𑀭𑀪𑀡𑁆𑀟𑀧𑀭𑀺𑀧𑀽𑀭𑀺𑀢𑀦𑁆𑀢𑀭𑀸𑀧𑀡𑀁 𑀯𑀺𑀯𑀺𑀥𑀤𑀸𑀦𑀕𑁆𑀕𑀲𑀢𑀲𑀫𑀼𑀧𑀲𑁄𑀪𑀺𑀢𑀁 [𑀲𑀢𑀲𑀫𑀼𑀧𑀲𑁄𑀪𑀺𑀢𑀁 (𑀲𑀻. 𑀧𑀻.)] 𑀳𑀺𑀫𑀕𑀺𑀭𑀺𑀲𑀺𑀔𑀭𑀲𑀗𑁆𑀓𑀸𑀲𑀯𑀭𑀪𑀯𑀦𑀲𑀢𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀕𑀚𑀳𑀬𑀭𑀣𑀧𑀢𑁆𑀢𑀺𑀲𑀫𑀸𑀓𑀼𑀮𑀁 𑀅𑀪𑀺𑀭𑀽𑀧𑀦𑀭𑀦𑀸𑀭𑀺𑀕𑀡𑀸𑀦𑀼𑀘𑀭𑀺𑀢𑀁 𑀆𑀓𑀺𑀡𑁆𑀡𑀚𑀦𑀫𑀦𑀼𑀲𑁆𑀲𑀁 𑀧𑀼𑀣𑀼𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀁 𑀯𑀺𑀯𑀺𑀥𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀪𑀸𑀚𑀦 [𑀲𑀪𑀸𑀚𑀦 (𑀲𑀻. 𑀧𑀻.), 𑀲𑀫𑁆𑀫𑀸𑀪𑀸𑀚𑀦 (𑀓.)] 𑀲𑀗𑁆𑀖𑀝𑀺𑀢𑀁 𑀩𑀳𑀼𑀯𑀺𑀥𑀯𑀺𑀚𑁆𑀚𑀸𑀯𑀦𑁆𑀢 [𑀯𑀺𑀚𑁆𑀚𑀸𑀥𑀭 (𑀓.)] 𑀦𑀭𑀘𑀺𑀭 [𑀦𑀭𑀯𑀺𑀭 (𑀲𑀻. 𑀧𑀻.)] 𑀦𑀺𑀲𑁂𑀯𑀺𑀢𑀁 𑀓𑀸𑀲𑀺𑀓𑀓𑁄𑀝𑀼𑀫𑁆𑀩𑀭𑀺𑀓𑀸𑀤𑀺𑀦𑀸𑀦𑀸𑀯𑀺𑀥𑀯𑀢𑁆𑀣𑀸𑀧𑀡𑀲𑀫𑁆𑀧𑀦𑁆𑀦𑀁 𑀲𑀼𑀧𑁆𑀧𑀲𑀸𑀭𑀺𑀢𑀭𑀼𑀘𑀺𑀭𑀩𑀳𑀼𑀯𑀺𑀥𑀧𑀼𑀧𑁆𑀨𑀕𑀦𑁆𑀥𑀸𑀧𑀡𑀁 𑀕𑀦𑁆𑀥𑀕𑀦𑁆𑀥𑀺𑀢𑀁 𑀆𑀲𑀻𑀲𑀦𑀻𑀬𑀩𑀳𑀼𑀭𑀢𑀦𑀧𑀭𑀺𑀧𑀽𑀭𑀺𑀢𑀁 𑀤𑀺𑀲𑀸𑀫𑀼𑀔𑀲𑀼𑀧𑁆𑀧𑀲𑀸𑀭𑀺𑀢𑀸𑀧𑀡𑀁 𑀲𑀺𑀗𑁆𑀕𑀸𑀭𑀯𑀸𑀡𑀺𑀚𑀕𑀡𑀸𑀦𑀼𑀘𑀭𑀺𑀢𑀁 𑀓𑀳𑀸𑀧𑀡𑀭𑀚𑀢𑀲𑀼𑀯𑀡𑁆𑀡𑀓𑀁𑀲𑀧𑀢𑁆𑀣𑀭𑀧𑀭𑀺𑀧𑀽𑀭𑀁 𑀧𑀚𑁆𑀚𑁄𑀢𑀫𑀸𑀦𑀦𑀺𑀥𑀺𑀦𑀺𑀓𑁂𑀢𑀁 𑀧𑀳𑀽𑀢𑀥𑀦𑀥𑀜𑁆𑀜𑀯𑀺𑀢𑁆𑀢𑀽𑀧𑀓𑀭𑀡𑀁 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑀁 𑀩𑀳𑁆𑀯𑀦𑁆𑀦𑀧𑀸𑀦𑀁 𑀩𑀳𑀼𑀯𑀺𑀥𑀔𑀚𑁆𑀚𑀪𑁄𑀚𑁆𑀚𑀮𑁂𑀬𑁆𑀬𑀧𑁂𑀬𑁆𑀬𑀲𑀸𑀬𑀦𑀻𑀬𑀁 𑀉𑀢𑁆𑀢𑀭𑀓𑀼𑀭𑀼𑀲𑀗𑁆𑀓𑀸𑀲𑀁 𑀲𑀫𑁆𑀧𑀦𑁆𑀦𑀲𑀲𑁆𑀲𑀁 𑀆𑀴𑀓𑀫𑀦𑁆𑀤𑀸 𑀯𑀺𑀬 𑀤𑁂𑀯𑀧𑀼𑀭𑀁.

𑀏𑀢𑁆𑀣 𑀞𑀢𑁆𑀯𑀸 𑀢𑁂𑀲𑀁 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑀩𑁆𑀩𑀁, 𑀓𑀣𑁂𑀦𑁆𑀢𑁂𑀦 𑀘 𑀙𑀥𑀸 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀲𑁂𑀬𑁆𑀬𑀣𑀻𑀤𑀁 𑁋 𑀧𑀼𑀩𑁆𑀩𑀬𑁄𑀕𑁄 𑀫𑀺𑀮𑀺𑀦𑁆𑀤𑀧𑀜𑁆𑀳𑀁 𑀮𑀓𑁆𑀔𑀡𑀧𑀜𑁆𑀳𑀁 𑀫𑁂𑀡𑁆𑀟𑀓𑀧𑀜𑁆𑀳𑀁 𑀅𑀦𑀼𑀫𑀸𑀦𑀧𑀜𑁆𑀳𑀁 𑀑𑀧𑀫𑁆𑀫𑀓𑀣𑀸𑀧𑀜𑁆𑀳𑀦𑁆𑀢𑀺.

𑀢𑀢𑁆𑀣 𑀫𑀺𑀮𑀺𑀦𑁆𑀤𑀧𑀜𑁆𑀳𑁄 𑀮𑀓𑁆𑀔𑀡𑀧𑀜𑁆𑀳𑁄, 𑀯𑀺𑀫𑀢𑀺𑀘𑁆𑀙𑁂𑀤𑀦𑀧𑀜𑁆𑀳𑁄𑀢𑀺 𑀤𑀼𑀯𑀺𑀥𑁄. 𑀫𑁂𑀡𑁆𑀟𑀓𑀧𑀜𑁆𑀳𑁄𑀧𑀺 𑀫𑀳𑀸𑀯𑀕𑁆𑀕𑁄, 𑀬𑁄𑀕𑀺𑀓𑀣𑀸𑀧𑀜𑁆𑀳𑁄𑀢𑀺 𑀤𑀼𑀯𑀺𑀥𑁄.

𑀧𑀼𑀩𑁆𑀩𑀬𑁄𑀕𑁄𑀢𑀺 𑀢𑁂𑀲𑀁 𑀧𑀼𑀩𑁆𑀩𑀓𑀫𑁆𑀫𑀁.

𑁧. 𑀩𑀸𑀳𑀺𑀭𑀓𑀣𑀸

𑀧𑀼𑀩𑁆𑀩𑀬𑁄𑀕𑀸𑀤𑀺

𑁩. 𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀢𑁆𑀢𑀫𑀸𑀦𑁂 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀯𑀢𑁆𑀢𑀲𑀻𑀮𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀽 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀬𑀝𑁆𑀞𑀺𑀲𑀫𑁆𑀫𑀚𑁆𑀚𑀦𑀺𑀬𑁄 [𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄 (𑀲𑀻. 𑀧𑀻.)] 𑀆𑀤𑀸𑀬 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀦𑁆𑀢𑀸 𑀅𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀓𑀘𑀯𑀭𑀩𑁆𑀬𑀽𑀳𑀁 𑀓𑀭𑁄𑀦𑁆𑀢𑀺. 𑀅𑀣𑁂𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀲𑀸𑀫𑀡𑁂𑀭𑀁 ‘‘𑀏𑀳𑀺 𑀲𑀸𑀫𑀡𑁂𑀭, 𑀇𑀫𑀁 𑀓𑀘𑀯𑀭𑀁 𑀙𑀟𑁆𑀟𑁂𑀳𑀻’’𑀢𑀺 𑀆𑀳, 𑀲𑁄 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀕𑀘𑁆𑀙𑀢𑀺, 𑀲𑁄 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀆𑀫𑀦𑁆𑀢𑀺𑀬𑀫𑀸𑀦𑁄 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀕𑀘𑁆𑀙𑀢𑁂𑀯. 𑀢𑀢𑁄 𑀲𑁄 𑀪𑀺𑀓𑁆𑀔𑀼 ‘‘𑀤𑀼𑀩𑁆𑀩𑀘𑁄 𑀯𑀢𑀸𑀬𑀁 𑀲𑀸𑀫𑀡𑁂𑀭𑁄’’𑀢𑀺 𑀓𑀼𑀤𑁆𑀥𑁄 𑀲𑀫𑁆𑀫𑀚𑁆𑀚𑀦𑀺𑀤𑀡𑁆𑀟𑁂𑀦 𑀧𑀳𑀸𑀭𑀁 𑀅𑀤𑀸𑀲𑀺. 𑀢𑀢𑁄 𑀲𑁄 𑀭𑁄𑀤𑀦𑁆𑀢𑁄 𑀪𑀬𑁂𑀦 𑀓𑀘𑀯𑀭𑀁 𑀙𑀟𑁆𑀟𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀓𑀘𑀯𑀭𑀙𑀟𑁆𑀟𑀦𑀧𑀼𑀜𑁆𑀜𑀓𑀫𑁆𑀫𑁂𑀦 𑀬𑀸𑀯𑀸𑀳𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀫𑀺 [𑀦 𑀧𑀸𑀧𑀼𑀡𑀸𑀫𑀺 (𑀲𑁆𑀬𑀸.)], 𑀏𑀢𑁆𑀣𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑀚𑁆𑀛𑀦𑁆𑀳𑀺𑀓𑀲𑀽𑀭𑀺𑀬𑁄 [𑀲𑀼𑀭𑀺𑀬𑁄 (𑀲𑀻. 𑀧𑀻.)] 𑀯𑀺𑀬 𑀫𑀳𑁂𑀲𑀓𑁆𑀔𑁄 𑀫𑀳𑀸𑀢𑁂𑀚𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀞𑀫𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀓𑀘𑀯𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦𑀳𑀸𑀦𑀢𑁆𑀣𑀸𑀬 𑀕𑀗𑁆𑀕𑀸𑀢𑀺𑀢𑁆𑀣𑀁 𑀕𑀢𑁄 𑀕𑀗𑁆𑀕𑀸𑀬 𑀊𑀫𑀺𑀯𑁂𑀕𑀁 𑀕𑀕𑁆𑀕𑀭𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀬𑀸𑀯𑀸𑀳𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀫𑀺 [𑀦 𑀧𑀸𑀧𑀼𑀡𑀸𑀫𑀺 (𑀲𑁆𑀬𑀸.)], 𑀏𑀢𑁆𑀣𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀬𑀁 𑀊𑀫𑀺𑀯𑁂𑀕𑁄 𑀯𑀺𑀬 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁄 𑀪𑀯𑁂𑀬𑁆𑀬𑀁 𑀅𑀓𑁆𑀔𑀬𑀧𑀝𑀺𑀪𑀸𑀦𑁄’’𑀢𑀺 𑀤𑀼𑀢𑀺𑀬𑀫𑁆𑀧𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺.

𑀲𑁄𑀧𑀺 𑀪𑀺𑀓𑁆𑀔𑀼 𑀲𑀫𑁆𑀫𑀚𑁆𑀚𑀦𑀺𑀲𑀸𑀮𑀸𑀬 𑀲𑀫𑁆𑀫𑀚𑁆𑀚𑀦𑀺𑀁 𑀞𑀧𑁂𑀢𑁆𑀯𑀸 𑀦𑀳𑀸𑀦𑀢𑁆𑀣𑀸𑀬 𑀕𑀗𑁆𑀕𑀸𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑁄 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀣𑀦𑀁 𑀲𑀼𑀢𑁆𑀯𑀸 ‘‘𑀏𑀲 𑀫𑀬𑀸 𑀧𑀬𑁄𑀚𑀺𑀢𑁄𑀧𑀺 𑀢𑀸𑀯 𑀏𑀯𑀁 𑀧𑀢𑁆𑀣𑁂𑀢𑀺, 𑀫𑀬𑁆𑀳𑀁 𑀓𑀺𑀁 𑀦 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀬𑀸𑀯𑀸𑀳𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀫𑀺 [𑀦 𑀧𑀸𑀧𑀼𑀡𑀸𑀫𑀺 (𑀲𑁆𑀬𑀸.)], 𑀏𑀢𑁆𑀣𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀬𑀁 𑀕𑀗𑁆𑀕𑀸𑀊𑀫𑀺𑀯𑁂𑀕𑁄 𑀯𑀺𑀬 𑀅𑀓𑁆𑀔𑀬𑀧𑀝𑀺𑀪𑀸𑀦𑁄 𑀪𑀯𑁂𑀬𑁆𑀬𑀁, 𑀇𑀫𑀺𑀦𑀸 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀲𑀩𑁆𑀩𑀁 𑀧𑀜𑁆𑀳𑀧𑀝𑀺𑀪𑀸𑀦𑀁 𑀯𑀺𑀚𑀝𑁂𑀢𑀼𑀁 𑀦𑀺𑀩𑁆𑀩𑁂𑀞𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺.

𑀢𑁂 𑀉𑀪𑁄𑀧𑀺 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀲𑀼𑀁. 𑀅𑀣 𑀅𑀫𑁆𑀳𑀸𑀓𑀁 𑀪𑀕𑀯𑀢𑀸𑀧𑀺 𑀬𑀣𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀤𑀺𑀲𑁆𑀲𑀢𑀺, 𑀏𑀯𑀫𑁂𑀢𑁂𑀧𑀺 𑀤𑀺𑀲𑁆𑀲𑀦𑁆𑀢𑀺 𑀫𑀫 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀜𑁆𑀘𑀯𑀲𑁆𑀲𑀲𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀏𑀢𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀬𑀁 𑀫𑀬𑀸 𑀲𑀼𑀔𑀼𑀫𑀁 𑀓𑀢𑁆𑀯𑀸 𑀤𑁂𑀲𑀺𑀢𑀁 𑀥𑀫𑁆𑀫𑀯𑀺𑀦𑀬𑀁, 𑀢𑀁 𑀏𑀢𑁂 𑀧𑀜𑁆𑀳𑀧𑀼𑀘𑁆𑀙𑀦𑀑𑀧𑀫𑁆𑀫𑀬𑀼𑀢𑁆𑀢𑀺𑀯𑀲𑁂𑀦 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀯𑀺𑀪𑀚𑀺𑀲𑁆𑀲𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀸.

𑁪. 𑀢𑁂𑀲𑀼 𑀲𑀸𑀫𑀡𑁂𑀭𑁄 𑀚𑀫𑁆𑀩𑀼𑀤𑀻𑀧𑁂 𑀲𑀸𑀕𑀮𑀦𑀕𑀭𑁂 𑀫𑀺𑀮𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀫𑀦𑁆𑀢𑀬𑁄𑀕𑀯𑀺𑀥𑀸𑀦𑀓𑀺𑀭𑀺𑀬𑀸𑀦𑀁 [𑀲𑀫𑀦𑁆𑀢𑀬𑁄𑀕 … (𑀲𑀻. 𑀧𑀻.)], 𑀓𑀭𑀡𑀓𑀸𑀮𑁂 𑀦𑀺𑀲𑀫𑁆𑀫𑀓𑀸𑀭𑀻 𑀳𑁄𑀢𑀺, 𑀩𑀳𑀽𑀦𑀺 𑀘𑀲𑁆𑀲 𑀲𑀢𑁆𑀣𑀸𑀦𑀺 𑀉𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀲𑀼𑀢𑀺 𑀲𑀫𑁆𑀫𑀼𑀢𑀺 𑀲𑀗𑁆𑀔𑁆𑀬𑀸 𑀬𑁄𑀕𑀸 𑀦𑀻𑀢𑀺 𑀯𑀺𑀲𑁂𑀲𑀺𑀓𑀸 𑀕𑀡𑀺𑀓𑀸 𑀕𑀦𑁆𑀥𑀩𑁆𑀩𑀸 𑀢𑀺𑀓𑀺𑀘𑁆𑀙𑀸 𑀥𑀦𑀼𑀩𑁆𑀩𑁂𑀤𑀸 [𑀘𑀢𑀼𑀩𑁆𑀩𑁂𑀤𑀸 (𑀲𑀻. 𑀧𑀻.)] 𑀧𑀼𑀭𑀸𑀡𑀸 𑀇𑀢𑀺𑀳𑀸𑀲𑀸 𑀚𑁄𑀢𑀺𑀲𑀸 𑀫𑀸𑀬𑀸 𑀓𑁂𑀢𑀼 [𑀳𑁂𑀢𑀼 (𑀲𑀻. 𑀧𑀻.)] 𑀫𑀦𑁆𑀢𑀦𑀸 𑀬𑀼𑀤𑁆𑀥𑀸 𑀙𑀦𑁆𑀤𑀲𑀸 𑀩𑀼𑀤𑁆𑀥𑀯𑀘𑀦𑁂𑀦 [𑀙𑀦𑁆𑀤𑀲𑀸𑀫𑀼𑀤𑁆𑀤𑀯𑀘𑀦𑁂𑀦 (𑀲𑀻. 𑀧𑀻.)] 𑀏𑀓𑀽𑀦𑀯𑀻𑀲𑀢𑀺, 𑀯𑀺𑀢𑀡𑁆𑀟𑀯𑀸𑀤𑀻 [𑀯𑀸𑀤𑀻 (𑀲𑀻. 𑀧𑀻.)] 𑀤𑀼𑀭𑀸𑀲𑀤𑁄 𑀤𑀼𑀧𑁆𑀧𑀲𑀳𑁄 𑀧𑀼𑀣𑀼𑀢𑀺𑀢𑁆𑀣𑀓𑀭𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀲𑀫𑁄 𑀓𑁄𑀘𑀺 𑀦𑀸𑀳𑁄𑀲𑀺 𑀬𑀤𑀺𑀤𑀁 𑀣𑀸𑀫𑁂𑀦 𑀚𑀯𑁂𑀦 𑀲𑀽𑀭𑁂𑀦 𑀧𑀜𑁆𑀜𑀸𑀬, 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀅𑀦𑀦𑁆𑀢𑀩𑀮𑀯𑀸𑀳𑀦𑁄.

𑁫. 𑀅𑀣𑁂𑀓𑀤𑀺𑀯𑀲𑀁 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀅𑀦𑀦𑁆𑀢𑀩𑀮𑀯𑀸𑀳𑀦𑀁 𑀘𑀢𑀼𑀭𑀗𑁆𑀕𑀺𑀦𑀺𑀁 𑀩𑀮𑀕𑁆𑀕𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑀦𑀓𑀫𑁆𑀬𑀢𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀦𑀕𑀭𑁂 𑀲𑁂𑀦𑀗𑁆𑀕𑀤𑀲𑁆𑀲𑀦𑀁 𑀓𑀢𑁆𑀯𑀸 [𑀲𑁂𑀦𑀸𑀕𑀡𑀦𑀁 𑀓𑀸𑀭𑁂𑀢𑁆𑀯𑀸 (𑀲𑀻. 𑀧𑀻.)] 𑀲𑀸𑀭𑁂𑀢𑁆𑀯𑀸 𑀲𑁄 𑀭𑀸𑀚𑀸 𑀪𑀲𑁆𑀲𑀧𑁆𑀧𑀯𑀸𑀤𑀓𑁄 𑀮𑁄𑀓𑀸𑀬𑀢𑀯𑀺𑀢𑀡𑁆𑀟 [𑀧𑀯𑀢𑁆𑀢 (𑀲𑀻. 𑀧𑀻.)] 𑀚𑀦𑀲𑀮𑁆𑀮𑀸𑀧𑀧𑁆𑀮𑀯 𑀘𑀺𑀢𑁆𑀢𑀓𑁄𑀢𑀽𑀳𑀮𑁄 𑀯𑀺𑀲𑀸𑀭𑀤𑁄 𑀯𑀺𑀚𑀫𑁆𑀪𑀓𑁄 𑀲𑀽𑀭𑀺𑀬𑀁 𑀑𑀮𑁄𑀓𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀲𑀺 ‘‘𑀩𑀳𑀼 𑀪𑀡𑁂 𑀢𑀸𑀯 𑀤𑀺𑀯𑀲𑀸𑀯𑀲𑁂𑀲𑁄 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀇𑀤𑀸𑀦𑁂𑀯 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀣𑀺 𑀓𑁄𑀘𑀺 𑀧𑀡𑁆𑀟𑀺𑀢𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀗𑁆𑀖𑀻 𑀕𑀡𑀻 𑀕𑀡𑀸𑀘𑀭𑀺𑀬𑁄 𑀅𑀧𑀺 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀝𑀺𑀚𑀸𑀦𑀫𑀸𑀦𑁄, 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀲𑀓𑁆𑀓𑁄𑀢𑀺 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼𑀁, 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫, 𑀓𑀗𑁆𑀔𑀁 𑀧𑀝𑀺𑀯𑀺𑀦𑀬𑀺𑀲𑁆𑀲𑀸𑀫𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀲𑀢𑀸 𑀬𑁄𑀦𑀓𑀸 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀙 𑀲𑀢𑁆𑀣𑀸𑀭𑁄 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 [𑀦𑀸𑀣𑀧𑀼𑀢𑁆𑀢𑁄 (𑀲𑀻. 𑀧𑀻.)] 𑀲𑀜𑁆𑀚𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄, 𑀢𑁂 𑀲𑀗𑁆𑀖𑀺𑀦𑁄 𑀕𑀡𑀺𑀦𑁄 𑀕𑀡𑀸𑀘𑀭𑀺𑀬𑀓𑀸 𑀜𑀸𑀢𑀸 𑀬𑀲𑀲𑁆𑀲𑀺𑀦𑁄 𑀢𑀺𑀢𑁆𑀣𑀓𑀭𑀸 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲, 𑀕𑀘𑁆𑀙 𑀢𑁆𑀯𑀁 𑀫𑀳𑀸𑀭𑀸𑀚, 𑀢𑁂 𑀧𑀜𑁆𑀳𑀁 𑀧𑀼𑀘𑁆𑀙𑀲𑁆𑀲𑀼, 𑀓𑀗𑁆𑀔𑀁 𑀧𑀝𑀺𑀯𑀺𑀦𑀬𑀲𑁆𑀲𑀽’’𑀢𑀺.

𑁬. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀜𑁆𑀘𑀳𑀺 𑀬𑁄𑀦𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀪𑀤𑁆𑀭𑀯𑀸𑀳𑀦𑀁 𑀭𑀣𑀯𑀭𑀫𑀸𑀭𑀼𑀬𑁆𑀳 𑀬𑁂𑀦 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 ‘‘𑀓𑁄, 𑀪𑀦𑁆𑀢𑁂 𑀓𑀲𑁆𑀲𑀧, 𑀮𑁄𑀓𑀁 𑀧𑀸𑀮𑁂𑀢𑀻’’𑀢𑀺? ‘‘𑀧𑀣𑀯𑀻, 𑀫𑀳𑀸𑀭𑀸𑀚, 𑀮𑁄𑀓𑀁 𑀧𑀸𑀮𑁂𑀢𑀻’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀓𑀲𑁆𑀲𑀧, 𑀧𑀣𑀯𑀻 [𑀧𑀞𑀯𑀻 (𑀲𑀻. 𑀲𑁆𑀬𑀸. 𑀧𑀻.)] 𑀮𑁄𑀓𑀁 𑀧𑀸𑀮𑁂𑀢𑀺, 𑀅𑀣 𑀓𑀲𑁆𑀫𑀸 𑀅𑀯𑀻𑀘𑀺𑀦𑀺𑀭𑀬𑀁 𑀕𑀘𑁆𑀙𑀦𑁆𑀢𑀸 𑀲𑀢𑁆𑀢𑀸 𑀧𑀣𑀯𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀦𑁂𑀯 𑀲𑀓𑁆𑀔𑀺 𑀑𑀕𑀺𑀮𑀺𑀢𑀼𑀁, 𑀦𑁄 𑀲𑀓𑁆𑀔𑀺 𑀉𑀕𑁆𑀕𑀺𑀮𑀺𑀢𑀼𑀁, 𑀅𑀥𑁄𑀫𑀼𑀔𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀢𑀼𑀡𑁆𑀳𑀻𑀪𑀽𑀢𑁄 𑀧𑀚𑁆𑀛𑀸𑀬𑀦𑁆𑀢𑁄 𑀦𑀺𑀲𑀻𑀤𑀺.

𑁭. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺, 𑀪𑀦𑁆𑀢𑁂 𑀕𑁄𑀲𑀸𑀮, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀓𑀫𑁆𑀫𑀸𑀦𑀺, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀓𑀫𑁆𑀫𑀸𑀦𑀺, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄. 𑀬𑁂 𑀢𑁂, 𑀫𑀳𑀸𑀭𑀸𑀚, 𑀇𑀥 𑀮𑁄𑀓𑁂 𑀔𑀢𑁆𑀢𑀺𑀬𑀸, 𑀢𑁂 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸𑀧𑀺 𑀧𑀼𑀦 𑀔𑀢𑁆𑀢𑀺𑀬𑀸𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀸 𑀧𑀼𑀓𑁆𑀓𑀼𑀲𑀸, 𑀢𑁂 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸𑀧𑀺 𑀧𑀼𑀦 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀸 𑀧𑀼𑀓𑁆𑀓𑀼𑀲𑀸𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀓𑀺𑀁 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺? ‘‘𑀬𑀤𑀺, 𑀪𑀦𑁆𑀢𑁂 𑀕𑁄𑀲𑀸𑀮, 𑀇𑀥 𑀮𑁄𑀓𑁂 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀸 𑀧𑀼𑀓𑁆𑀓𑀼𑀲𑀸, 𑀢𑁂 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸𑀧𑀺 𑀧𑀼𑀦 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀸 𑀧𑀼𑀓𑁆𑀓𑀼𑀲𑀸𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀦𑀢𑁆𑀣𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀓𑀭𑀡𑀻𑀬𑀁. 𑀢𑁂𑀦 𑀳𑀺, 𑀪𑀦𑁆𑀢𑁂 𑀕𑁄𑀲𑀸𑀮, 𑀬𑁂 𑀢𑁂 𑀇𑀥 𑀮𑁄𑀓𑁂 𑀳𑀢𑁆𑀣𑀘𑁆𑀙𑀺𑀦𑁆𑀦𑀸, 𑀢𑁂 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸𑀧𑀺 𑀧𑀼𑀦 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀧𑀸𑀤𑀘𑁆𑀙𑀺𑀦𑁆𑀦𑀸, 𑀢𑁂 𑀧𑀸𑀤𑀘𑁆𑀙𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑀸, 𑀢𑁂 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀓𑀡𑁆𑀡𑀘𑁆𑀙𑀺𑀦𑁆𑀦𑀸, 𑀢𑁂 𑀓𑀡𑁆𑀡𑀘𑁆𑀙𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀦𑀸𑀲𑀘𑁆𑀙𑀺𑀦𑁆𑀦𑀸, 𑀢𑁂 𑀦𑀸𑀲𑀘𑁆𑀙𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀸, 𑀢𑁂 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀸𑀯 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀕𑁄𑀲𑀸𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 ‘‘𑀢𑀼𑀘𑁆𑀙𑁄 𑀯𑀢 𑀪𑁄 𑀚𑀫𑁆𑀩𑀼𑀤𑀻𑀧𑁄, 𑀧𑀮𑀸𑀧𑁄 𑀯𑀢 𑀪𑁄 𑀚𑀫𑁆𑀩𑀼𑀤𑀻𑀧𑁄, 𑀦𑀢𑁆𑀣𑀺 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀲𑀓𑁆𑀓𑁄𑀢𑀺 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀅𑀫𑀘𑁆𑀘𑁂 𑀆𑀫𑀦𑁆𑀢𑁂𑀲𑀺 ‘‘𑀭𑀫𑀡𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀓𑀁 𑀦𑀼 𑀔𑁆𑀯𑀚𑁆𑀚 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁, 𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀲𑀓𑁆𑀓𑁄𑀢𑀺 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀅𑀫𑀘𑁆𑀘𑀸 𑀢𑀼𑀡𑁆𑀳𑀻𑀪𑀽𑀢𑀸 𑀭𑀜𑁆𑀜𑁄 𑀫𑀼𑀔𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀕𑀮𑀦𑀕𑀭𑀁 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀲𑀼𑀜𑁆𑀜𑀁 𑀅𑀳𑁄𑀲𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀧𑀡𑁆𑀟𑀺𑀢𑁂𑀳𑀺, 𑀬𑀢𑁆𑀣 𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀧𑀝𑀺𑀯𑀲𑀦𑁆𑀢𑀻𑀢𑀺 𑀲𑀼𑀡𑀸𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀸𑀚𑀸 𑀢𑁂 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀧𑀜𑁆𑀳𑀯𑀺𑀲𑀚𑁆𑀚𑀦𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀬𑁂 𑀅𑀜𑁆𑀜𑀁 𑀤𑀺𑀲𑀁 𑀦 𑀧𑀓𑁆𑀓𑀫𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀢𑀼𑀡𑁆𑀳𑀻𑀪𑀽𑀢𑀸 𑀅𑀘𑁆𑀙𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀳𑀺𑀫𑀯𑀦𑁆𑀢𑀫𑁂𑀯 𑀕𑀘𑁆𑀙𑀦𑁆𑀢𑀺.

𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀭𑀓𑁆𑀔𑀺𑀢𑀢𑀮𑁂 𑀧𑀝𑀺𑀯𑀲𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 ‘‘𑀅𑀢𑁆𑀣𑀸𑀯𑀼𑀲𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀧𑀝𑀺𑀩𑀮𑁄 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺?

𑀏𑀯𑀁 𑀯𑀼𑀢𑁆𑀢𑁂 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀧𑀼𑀝𑁆𑀞𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀸𑀯𑀼𑀲𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀘𑀻𑀦𑀢𑁄 𑀓𑁂𑀢𑀼𑀫𑀢𑀻 𑀦𑀸𑀫 𑀯𑀺𑀫𑀸𑀦𑀁, 𑀢𑀢𑁆𑀣 𑀫𑀳𑀸𑀲𑁂𑀦𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀧𑀝𑀺𑀯𑀲𑀢𑀺, 𑀲𑁄 𑀧𑀝𑀺𑀩𑀮𑁄 𑀢𑁂𑀦 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺.

𑀅𑀣 𑀔𑁄 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀤𑁆𑀤𑀲𑀸 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀫𑀳𑀸 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀳𑀁 𑀲𑀗𑁆𑀖𑀲𑁆𑀲 𑀆𑀭𑀸𑀫𑀺𑀓𑁄, 𑀓𑁂𑀦𑀢𑁆𑀣𑁄, 𑀓𑀺𑀁 𑀫𑀬𑀸 𑀓𑀭𑀡𑀻𑀬’’𑀦𑁆𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀅𑀬𑀁 𑀔𑁄, 𑀫𑀳𑀸𑀭𑀸𑀚, 𑀚𑀫𑁆𑀩𑀼𑀤𑀻𑀧𑁂 𑀲𑀸𑀕𑀮𑀦𑀕𑀭𑁂 𑀫𑀺𑀮𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀯𑀺𑀢𑀡𑁆𑀟𑀯𑀸𑀤𑀻 𑀤𑀼𑀭𑀸𑀲𑀤𑁄 𑀤𑀼𑀧𑁆𑀧𑀲𑀳𑁄 𑀧𑀼𑀣𑀼𑀢𑀺𑀢𑁆𑀣𑀓𑀭𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀝𑁆𑀞𑀺𑀯𑀸𑀤𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀳𑁂𑀞𑁂𑀢𑀻’’𑀢𑀺.

𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀬𑀁 𑀔𑁄, 𑀪𑀦𑁆𑀢𑁂, 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀇𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑁄, 𑀏𑀲𑁄 𑀔𑁄, 𑀪𑀦𑁆𑀢𑁂, 𑀓𑁂𑀢𑀼𑀫𑀢𑀺𑀯𑀺𑀫𑀸𑀦𑁂 𑀫𑀳𑀸𑀲𑁂𑀦𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀧𑀝𑀺𑀯𑀲𑀢𑀺, 𑀲𑁄 𑀧𑀝𑀺𑀩𑀮𑁄 𑀢𑁂𑀦 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼𑀁, 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀬𑀸𑀘𑀺𑀲𑁆𑀲𑀸𑀫 𑀫𑀦𑀼𑀲𑁆𑀲𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺.

𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀢𑀼𑀫𑀢𑀺𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀲𑁂𑀦𑀁 𑀤𑁂𑀯𑀧𑀼𑀢𑁆𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀬𑀸𑀘𑀢𑀺 𑀢𑀁, 𑀫𑀸𑀭𑀺𑀲, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑀦𑀼𑀲𑁆𑀲𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺. ‘‘𑀦 𑀫𑁂, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀮𑁄𑀓𑁂𑀦𑀢𑁆𑀣𑁄 𑀓𑀫𑁆𑀫𑀩𑀳𑀼𑀮𑁂𑀦, 𑀢𑀺𑀩𑁆𑀩𑁄 𑀫𑀦𑀼𑀲𑁆𑀲𑀮𑁄𑀓𑁄, 𑀇𑀥𑁂𑀯𑀸𑀳𑀁, 𑀪𑀦𑁆𑀢𑁂, 𑀤𑁂𑀯𑀮𑁄𑀓𑁂 𑀉𑀧𑀭𑀽𑀧𑀭𑀽𑀧𑀧𑀢𑁆𑀢𑀺𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀬𑀸𑀘𑀺𑀢𑁄 𑀫𑀳𑀸𑀲𑁂𑀦𑁄 𑀤𑁂𑀯𑀧𑀼𑀢𑁆𑀢𑁄 𑀏𑀯𑀫𑀸𑀳 ‘‘𑀦 𑀫𑁂, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀮𑁄𑀓𑁂𑀦𑀢𑁆𑀣𑁄 𑀓𑀫𑁆𑀫𑀩𑀳𑀼𑀮𑁂𑀦, 𑀢𑀺𑀩𑁆𑀩𑁄 𑀫𑀦𑀼𑀲𑁆𑀲𑀮𑁄𑀓𑁄, 𑀇𑀥𑁂𑀯𑀸𑀳𑀁, 𑀪𑀦𑁆𑀢𑁂, 𑀤𑁂𑀯𑀮𑁄𑀓𑁂 𑀉𑀧𑀭𑀽𑀧𑀭𑀽𑀧𑀧𑀢𑁆𑀢𑀺𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀫𑀳𑀸𑀲𑁂𑀦𑀁 𑀤𑁂𑀯𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀇𑀥 𑀫𑀬𑀁, 𑀫𑀸𑀭𑀺𑀲, 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀦𑀼𑀯𑀺𑀮𑁄𑀓𑀬𑀫𑀸𑀦𑀸 𑀅𑀜𑁆𑀜𑀢𑁆𑀭 𑀢𑀬𑀸 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀁 𑀅𑀜𑁆𑀜𑀁 𑀓𑀜𑁆𑀘𑀺 𑀦 𑀧𑀲𑁆𑀲𑀸𑀫, 𑀬𑀸𑀘𑀢𑀺 𑀢𑀁, 𑀫𑀸𑀭𑀺𑀲, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀲𑀸𑀥𑀼 𑀲𑀧𑁆𑀧𑀼𑀭𑀺𑀲 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀸𑀳𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀫𑀳𑀸𑀲𑁂𑀦𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀅𑀳𑀁 𑀓𑀺𑀭 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀳𑀼𑀢𑁆𑀯𑀸 ‘‘𑀲𑀸𑀥𑀼, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺.

𑁯. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀤𑁂𑀯𑀮𑁄𑀓𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀅𑀦𑁆𑀢𑀭𑀳𑀺𑀢𑀸 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀭𑀓𑁆𑀔𑀺𑀢𑀢𑀮𑁂 𑀧𑀸𑀢𑀼𑀭𑀳𑁂𑀲𑀼𑀁.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀸𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀲𑀦𑁆𑀦𑀺𑀧𑀸𑀢𑀁 𑀅𑀦𑀸𑀕𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀭𑁄𑀳𑀡𑁄 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀣𑀸’’𑀢𑀺. 𑀆𑀬𑀲𑁆𑀫𑀸𑀧𑀺 𑀭𑁄𑀳𑀡𑁄 𑀢𑀗𑁆𑀔𑀡𑀜𑁆𑀜𑁂𑀯 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 ‘‘𑀲𑀗𑁆𑀖𑁄 𑀫𑀁 𑀧𑀝𑀺𑀫𑀸𑀦𑁂𑀢𑀻’’𑀢𑀺 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑁄 𑀭𑀓𑁆𑀔𑀺𑀢𑀢𑀮𑁂 𑀓𑁄𑀝𑀺𑀲𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀏𑀢𑀤𑀯𑁄𑀘 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀭𑁄𑀳𑀡 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀚𑁆𑀚𑀦𑁆𑀢𑁂 [𑀧𑀮𑀼𑀚𑁆𑀚𑀦𑁆𑀢𑁂 (𑀲𑀻. 𑀧𑀻.)] 𑀦 𑀧𑀲𑁆𑀲𑀲𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑀸𑀦𑀻’’𑀢𑀺. ‘‘𑀅𑀫𑀦𑀲𑀺𑀓𑀸𑀭𑁄 𑀫𑁂, 𑀪𑀦𑁆𑀢𑁂, 𑀅𑀳𑁄𑀲𑀻’’𑀢𑀺.

‘‘𑀢𑁂𑀦, 𑀳𑀸𑀯𑀼𑀲𑁄 𑀭𑁄𑀳𑀡, 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀓𑀭𑁄𑀫𑀻’’𑀢𑀺? ‘‘𑀅𑀢𑁆𑀣𑀸𑀯𑀼𑀲𑁄 𑀭𑁄𑀳𑀡, 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀧𑀲𑁆𑀲𑁂 𑀕𑀚𑀗𑁆𑀕𑀮𑀁 [𑀓𑀚𑀗𑁆𑀕𑀮𑀁 (𑀲𑀻. 𑀧𑀻.)] 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁆𑀣 𑀲𑁄𑀡𑀼𑀢𑁆𑀢𑀭𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺, 𑀢𑀲𑁆𑀲 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀸𑀕𑀲𑁂𑀦𑁄𑀢𑀺 𑀦𑀸𑀫 𑀤𑀸𑀭𑀓𑁄, 𑀢𑁂𑀦 𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀭𑁄𑀳𑀡, 𑀤𑀲𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀢𑀁 𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀸𑀕𑀲𑁂𑀦𑀁 𑀤𑀸𑀭𑀓𑀁 𑀦𑀻𑀳𑀭𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀳𑀺, 𑀧𑀩𑁆𑀩𑀚𑀺𑀢𑁂𑀯 𑀢𑀲𑁆𑀫𑀺𑀁 𑀤𑀡𑁆𑀟𑀓𑀫𑁆𑀫𑀢𑁄 𑀫𑀼𑀘𑁆𑀘𑀺𑀲𑁆𑀲𑀲𑀻’’𑀢𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀭𑁄𑀳𑀡𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑁧𑁦. 𑀫𑀳𑀸𑀲𑁂𑀦𑁄𑀧𑀺 𑀔𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀲𑁄𑀡𑀼𑀢𑁆𑀢𑀭𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺, 𑀲𑀳 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀸 𑀢𑀬𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀧𑀸𑀢𑀼𑀭𑀳𑁂𑀲𑀼𑀁, 𑀆𑀯𑀼𑀥𑀪𑀡𑁆𑀟𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀅𑀕𑁆𑀕𑀲𑀲𑁆𑀲𑀁 𑀅𑀪𑀺𑀦𑀺𑀧𑁆𑀨𑀦𑁆𑀦𑀁, 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀲𑁆𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀭𑁄𑀳𑀡𑁄 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀤𑀲𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀢𑀁 𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀏𑀓𑀤𑀺𑀯𑀲𑀫𑁆𑀧𑀺 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀯𑀸 𑀉𑀴𑀼𑀗𑁆𑀓𑀫𑀢𑁆𑀢𑀁 𑀬𑀸𑀕𑀼𑀁 𑀯𑀸 𑀅𑀪𑀺𑀯𑀸𑀤𑀦𑀁 𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀁 𑀯𑀸 𑀲𑀸𑀫𑀻𑀘𑀺𑀓𑀫𑁆𑀫𑀁 𑀯𑀸 𑀦𑀸𑀮𑀢𑁆𑀣, 𑀅𑀣 𑀔𑁄 𑀅𑀓𑁆𑀓𑁄𑀲𑀜𑁆𑀜𑁂𑀯 𑀧𑀭𑀺𑀪𑀸𑀲𑀜𑁆𑀜𑁂𑀯 𑀧𑀝𑀺𑀮𑀪𑀢𑀺 ‘‘𑀅𑀢𑀺𑀘𑁆𑀙𑀣 𑀪𑀦𑁆𑀢𑁂’’𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀯𑀢𑁆𑀢𑀸 𑀦𑀸𑀫 𑀦𑀸𑀳𑁄𑀲𑀺, 𑀤𑀲𑀫𑀸𑀲𑀸𑀥𑀺𑀓𑀸𑀦𑀁 𑀧𑀦 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀓𑀤𑀺𑀯𑀲𑀁 ‘‘𑀅𑀢𑀺𑀘𑁆𑀙𑀣 𑀪𑀦𑁆𑀢𑁂’’𑀢𑀺 𑀯𑀘𑀦𑀫𑀢𑁆𑀢𑀁 𑀅𑀮𑀢𑁆𑀣. 𑀢𑀁 𑀤𑀺𑀯𑀲𑀫𑁂𑀯 𑀩𑁆𑀭𑀸𑀳𑁆𑀫𑀡𑁄𑀧𑀺 𑀩𑀳𑀺 𑀓𑀫𑁆𑀫𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑁄 𑀧𑀝𑀺𑀧𑀣𑁂 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑁄 𑀧𑀩𑁆𑀩𑀚𑀺𑀢, 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀆𑀳. ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀅𑀕𑀫𑀫𑁆𑀳𑀸’’𑀢𑀺. ‘‘𑀅𑀧𑀺 𑀓𑀺𑀜𑁆𑀘𑀺 𑀮𑀪𑀺𑀢𑁆𑀣𑀸’’𑀢𑀺. ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀮𑀪𑀺𑀫𑁆𑀳𑀸’’𑀢𑀺. 𑀲𑁄 𑀅𑀦𑀢𑁆𑀢𑀫𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀓𑀺𑀜𑁆𑀘𑀺 𑀅𑀤𑀢𑁆𑀣𑀸’’𑀢𑀺. ‘‘𑀦 𑀓𑀺𑀜𑁆𑀘𑀺 𑀅𑀤𑀫𑁆𑀳𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀤𑀺𑀯𑀲𑁂 𑀖𑀭𑀤𑁆𑀯𑀸𑀭𑁂 𑀬𑁂𑀯 𑀦𑀺𑀲𑀻𑀤𑀺 ‘‘𑀅𑀚𑁆𑀚 𑀧𑀩𑁆𑀩𑀚𑀺𑀢𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀤𑀼𑀢𑀺𑀬𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄.

𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀏𑀯𑀫𑀸𑀳 ‘‘𑀢𑀼𑀫𑁆𑀳𑁂 𑀳𑀺𑀬𑁆𑀬𑁄 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸𑀯 ‘‘𑀮𑀪𑀺𑀫𑁆𑀳𑀸’’𑀢𑀺 𑀅𑀯𑁄𑀘𑀼𑀢𑁆𑀣, 𑀯𑀝𑁆𑀝𑀢𑀺 𑀦𑀼 𑀔𑁄 𑀢𑀼𑀫𑁆𑀳𑀸𑀓𑀁 𑀫𑀼𑀲𑀸𑀯𑀸𑀤𑁄’’𑀢𑀺. 𑀣𑁂𑀭𑁄 𑀆𑀳 ‘‘𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 ( ) [(𑀧𑀯𑀺𑀲𑀦𑁆𑀢𑀸) (𑀓.)] 𑀤𑀲𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 ‘𑀅𑀢𑀺𑀘𑁆𑀙𑀣𑀸’𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀳𑀺𑀬𑁆𑀬𑁄 ‘𑀅𑀢𑀺𑀘𑁆𑀙𑀣𑀸’𑀢𑀺 𑀯𑀘𑀦𑀫𑀢𑁆𑀢𑀁 𑀮𑀪𑀺𑀫𑁆𑀳𑀸, 𑀅𑀣𑁂𑀢𑀁 𑀯𑀸𑀘𑀸𑀧𑀝𑀺𑀲𑀦𑁆𑀥𑀸𑀭𑀁 [𑀧𑀝𑀺𑀲𑀦𑁆𑀢𑀸𑀭𑀁 (𑀲𑀻. 𑀧𑀻.)] 𑀉𑀧𑀸𑀤𑀸𑀬 𑀏𑀯𑀫𑀯𑁄𑀘𑀼𑀫𑁆𑀳𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀯𑀸𑀘𑀸𑀧𑀝𑀺𑀲𑀦𑁆𑀥𑀸𑀭𑀫𑀢𑁆𑀢𑀫𑁆𑀧𑀺 𑀮𑀪𑀺𑀢𑁆𑀯𑀸 𑀚𑀦𑀫𑀚𑁆𑀛𑁂 ‘𑀮𑀪𑀺𑀫𑁆𑀳𑀸’𑀢𑀺 𑀧𑀲𑀁𑀲𑀦𑁆𑀢𑀺, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀓𑀲𑁆𑀫𑀸 𑀦𑀧𑁆𑀧𑀲𑀁𑀲𑀦𑁆𑀢𑀻’’𑀢𑀺 𑀧𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀝𑀺𑀬𑀸𑀤𑀺𑀢𑀪𑀢𑁆𑀢𑀢𑁄 𑀓𑀝𑀘𑁆𑀙𑀼𑀪𑀺𑀓𑁆𑀔𑀁, 𑀢𑀤𑀼𑀧𑀺𑀬𑀜𑁆𑀘 𑀩𑁆𑀬𑀜𑁆𑀚𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀪𑀺𑀓𑁆𑀔𑀁 𑀲𑀩𑁆𑀩𑀓𑀸𑀮𑀁 𑀢𑀼𑀫𑁆𑀳𑁂 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳.

𑀲𑁄 𑀧𑀼𑀦𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀉𑀧𑀲𑀫𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀁 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀢𑀦𑁄 𑀖𑀭𑁂 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀭𑀡𑀢𑁆𑀣𑀸𑀬 𑀬𑀸𑀘𑀺. 𑀣𑁂𑀭𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀣𑁄𑀓𑀁 𑀣𑁄𑀓𑀁 𑀩𑀼𑀤𑁆𑀥𑀯𑀘𑀦𑀁 𑀓𑀣𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑀸𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀻 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, ‘‘𑀦𑀸𑀕𑀲𑁂𑀦𑁄’’𑀢𑀺𑀲𑁆𑀲 𑀦𑀸𑀫𑀫𑀓𑀁𑀲𑀼, 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀦𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑁄.

𑁧𑁧. 𑀅𑀣 𑀔𑁄 𑀦𑀸𑀕𑀲𑁂𑀦𑀲𑁆𑀲 𑀤𑀸𑀭𑀓𑀲𑁆𑀲 𑀧𑀺𑀢𑀸 𑀦𑀸𑀕𑀲𑁂𑀦𑀁 𑀤𑀸𑀭𑀓𑀁 𑀏𑀢𑀤𑀯𑁄𑀘 ‘‘𑀇𑀫𑀲𑁆𑀫𑀺𑀁 𑀔𑁄, 𑀢𑀸𑀢 𑀦𑀸𑀕𑀲𑁂𑀦, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀲𑀺𑀓𑁆𑀔𑀸𑀦𑀺 𑀲𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺. ‘‘𑀓𑀢𑀫𑀸𑀦𑀺, 𑀢𑀸𑀢, 𑀇𑀫𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀲𑀺𑀓𑁆𑀔𑀸𑀦𑀺 𑀦𑀸𑀫𑀸’’𑀢𑀺? ‘‘𑀢𑀬𑁄 𑀔𑁄, 𑀢𑀸𑀢 𑀦𑀸𑀕𑀲𑁂𑀦, 𑀯𑁂𑀤𑀸 𑀲𑀺𑀓𑁆𑀔𑀸𑀦𑀺 𑀦𑀸𑀫, 𑀅𑀯𑀲𑁂𑀲𑀸𑀦𑀺 𑀲𑀺𑀧𑁆𑀧𑀸𑀦𑀺 𑀲𑀺𑀧𑁆𑀧𑀁 𑀦𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢, 𑀲𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀲𑁄𑀡𑀼𑀢𑁆𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀘𑀭𑀺𑀬𑀪𑀸𑀕𑀁 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀦𑁆𑀢𑁄𑀧𑀸𑀲𑀸𑀤𑁂 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂 𑀏𑀓𑀢𑁄 𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 ‘‘𑀲𑀚𑁆𑀛𑀸𑀧𑁂𑀳𑀺 𑀔𑁄, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀇𑀫𑀁 𑀤𑀸𑀭𑀓𑀁 𑀫𑀦𑁆𑀢𑀸𑀦𑀻𑀢𑀺. 𑀢𑁂𑀦 𑀳𑀺 ‘𑀢𑀸𑀢 𑀤𑀸𑀭𑀓’ 𑀉𑀕𑁆𑀕𑀡𑁆𑀳𑀸𑀳𑀺 𑀫𑀦𑁆𑀢𑀸𑀦𑀻’’𑀢𑀺. 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄 𑀲𑀚𑁆𑀛𑀸𑀬𑀢𑀺 𑀦𑀸𑀕𑀲𑁂𑀦𑀲𑁆𑀲 𑀤𑀸𑀭𑀓𑀲𑁆𑀲 𑀏𑀓𑁂𑀦𑁂𑀯 𑀉𑀤𑁆𑀤𑁂𑀲𑁂𑀦 𑀢𑀬𑁄 𑀯𑁂𑀤𑀸 𑀳𑀤𑀬𑀗𑁆𑀕𑀢𑀸 𑀯𑀸𑀘𑀼𑀕𑁆𑀕𑀢𑀸 𑀲𑀽𑀧𑀥𑀸𑀭𑀺𑀢𑀸 𑀲𑀼𑀯𑀯𑀢𑁆𑀣𑀸𑀧𑀺𑀢𑀸 𑀲𑀼𑀫𑀦𑀲𑀺𑀓𑀢𑀸 𑀅𑀳𑁂𑀲𑀼𑀁, 𑀲𑀓𑀺𑀫𑁂𑀯 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀢𑀻𑀲𑀼 𑀯𑁂𑀤𑁂𑀲𑀼 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑁂𑀲𑀼 [𑀲𑀦𑀺𑀖𑀡𑁆𑀝𑀼𑀓𑁂𑀝𑀼𑀪𑁂𑀲𑀼 (𑀓.)] 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑁂𑀲𑀼 𑀇𑀢𑀺𑀳𑀸𑀲𑀧𑀜𑁆𑀘𑀫𑁂𑀲𑀼 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄 𑀅𑀳𑁄𑀲𑀺.

𑀅𑀣 𑀔𑁄 𑀦𑀸𑀕𑀲𑁂𑀦𑁄 𑀤𑀸𑀭𑀓𑁄 𑀧𑀺𑀢𑀭𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢, 𑀇𑀫𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀇𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀺, 𑀉𑀤𑀸𑀳𑀼 𑀏𑀢𑁆𑀢𑀓𑀸𑀦𑁂𑀯𑀸’’𑀢𑀺. ‘‘𑀦𑀢𑁆𑀣𑀺, 𑀢𑀸𑀢 𑀦𑀸𑀕𑀲𑁂𑀦, 𑀇𑀫𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀇𑀢𑁄 𑀉𑀢𑁆𑀢𑀭𑀺𑀁 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀺, 𑀏𑀢𑁆𑀢𑀓𑀸𑀦𑁂𑀯 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀻’’𑀢𑀺.

𑀅𑀣 𑀔𑁄 𑀦𑀸𑀕𑀲𑁂𑀦𑁄 𑀤𑀸𑀭𑀓𑁄 𑀆𑀘𑀭𑀺𑀬𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀧𑀼𑀩𑁆𑀩𑀯𑀸𑀲𑀦𑀸𑀬 𑀘𑁄𑀤𑀺𑀢𑀳𑀤𑀬𑁄 𑀭𑀳𑁄𑀕𑀢𑁄 𑀧𑀝𑀺𑀲𑀮𑁆𑀮𑀻𑀦𑁄 𑀅𑀢𑁆𑀢𑀦𑁄 𑀲𑀺𑀧𑁆𑀧𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀆𑀤𑀺𑀫𑁆𑀳𑀺 𑀯𑀸 𑀫𑀚𑁆𑀛𑁂 𑀯𑀸 𑀧𑀭𑀺𑀬𑁄𑀲𑀸𑀦𑁂 𑀯𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑀸𑀭𑀁 𑀅𑀤𑀺𑀲𑁆𑀯𑀸 ‘‘𑀢𑀼𑀘𑁆𑀙𑀸 𑀯𑀢 𑀪𑁄 𑀇𑀫𑁂 𑀯𑁂𑀤𑀸, 𑀧𑀮𑀸𑀧𑀸 𑀯𑀢 𑀪𑁄 𑀇𑀫𑁂 𑀯𑁂𑀤𑀸 𑀅𑀲𑀸𑀭𑀸 𑀦𑀺𑀲𑁆𑀲𑀸𑀭𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺.

𑁧𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀭𑁄𑀳𑀡𑁄 𑀯𑀢𑁆𑀢𑀦𑀺𑀬𑁂 𑀲𑁂𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀦𑀸𑀕𑀲𑁂𑀦𑀲𑁆𑀲 𑀤𑀸𑀭𑀓𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀢𑁆𑀢𑀦𑀺𑀬𑁂 𑀲𑁂𑀦𑀸𑀲𑀦𑁂 𑀅𑀦𑁆𑀢𑀭𑀳𑀺𑀢𑁄 𑀕𑀚𑀗𑁆𑀕𑀮𑀩𑁆𑀭𑀸𑀳𑁆𑀫𑀡𑀕𑀸𑀫𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀤𑁆𑀤𑀲𑀸 𑀔𑁄 𑀦𑀸𑀕𑀲𑁂𑀦𑁄 𑀤𑀸𑀭𑀓𑁄 𑀅𑀢𑁆𑀢𑀦𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀅𑀧𑁆𑀧𑁂𑀯 𑀦𑀸𑀫𑀸𑀬𑀁 𑀧𑀩𑁆𑀩𑀚𑀺𑀢𑁄 𑀓𑀜𑁆𑀘𑀺 𑀲𑀸𑀭𑀁 𑀚𑀸𑀦𑁂𑀬𑁆𑀬𑀸’’𑀢𑀺 𑀬𑁂𑀦𑀸𑀬𑀲𑁆𑀫𑀸 𑀭𑁄𑀳𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀏𑀢𑀤𑀯𑁄𑀘 ‘‘𑀓𑁄 𑀦𑀼 𑀔𑁄, 𑀢𑁆𑀯𑀁 𑀫𑀸𑀭𑀺𑀲, 𑀏𑀤𑀺𑀲𑁄 𑀪𑀡𑁆𑀟𑀼𑀓𑀸𑀲𑀸𑀯𑀯𑀲𑀦𑁄’’𑀢𑀺. ‘‘𑀧𑀩𑁆𑀩𑀚𑀺𑀢𑁄 [𑀧𑀸𑀧𑀓𑀸𑀦𑀁 𑀫𑀮𑀸𑀦𑀁 𑀧𑀩𑁆𑀩𑀸𑀚𑁂𑀢𑀼𑀁 𑀧𑀩𑁆𑀩𑀚𑀺𑀢𑁄 (𑀲𑀻. 𑀧𑀻.)] 𑀦𑀸𑀫𑀸𑀳𑀁 𑀤𑀸𑀭𑀓𑀸’’𑀢𑀺. ‘‘𑀓𑁂𑀦, 𑀢𑁆𑀯𑀁 𑀫𑀸𑀭𑀺𑀲, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸𑀲𑀻’’𑀢𑀺? ‘‘𑀧𑀸𑀧𑀓𑀸𑀦𑀺 𑀫𑀮𑀸𑀦𑀺 𑀧𑀩𑁆𑀩𑀸𑀚𑁂𑀢𑀺, 𑀢𑀲𑁆𑀫𑀸𑀳𑀁, 𑀤𑀸𑀭𑀓, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸, 𑀫𑀸𑀭𑀺𑀲, 𑀓𑁂𑀲𑀸 𑀢𑁂 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺? ‘‘𑀲𑁄𑀴𑀲𑀺𑀫𑁂, 𑀤𑀸𑀭𑀓, 𑀧𑀮𑀺𑀩𑁄𑀥𑁂 𑀤𑀺𑀲𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. ‘‘𑀓𑀢𑀫𑁂 𑀲𑁄𑀴𑀲’’? ‘‘𑀅𑀮𑀗𑁆𑀓𑀸𑀭𑀧𑀮𑀺𑀩𑁄𑀥𑁄 𑀫𑀡𑁆𑀟𑀦𑀧𑀮𑀺𑀩𑁄𑀥𑁄 𑀢𑁂𑀮𑀫𑀓𑁆𑀔𑀦𑀧𑀮𑀺𑀩𑁄𑀥𑁄 𑀥𑁄𑀯𑀦𑀧𑀮𑀺𑀩𑁄𑀥𑁄 𑀫𑀸𑀮𑀸𑀧𑀮𑀺𑀩𑁄𑀥𑁄 𑀕𑀦𑁆𑀥𑀧𑀮𑀺𑀩𑁄𑀥𑁄 𑀯𑀸𑀲𑀦𑀧𑀮𑀺𑀩𑁄𑀥𑁄 𑀳𑀭𑀻𑀝𑀓𑀧𑀮𑀺𑀩𑁄𑀥𑁄 𑀆𑀫𑀮𑀓𑀧𑀮𑀺𑀩𑁄𑀥𑁄 𑀭𑀗𑁆𑀕𑀧𑀮𑀺𑀩𑁄𑀥𑁄 𑀩𑀦𑁆𑀥𑀦𑀧𑀮𑀺𑀩𑁄𑀥𑁄 𑀓𑁄𑀘𑁆𑀙𑀧𑀮𑀺𑀩𑁄𑀥𑁄 𑀓𑀧𑁆𑀧𑀓𑀧𑀮𑀺𑀩𑁄𑀥𑁄 𑀯𑀺𑀚𑀝𑀦𑀧𑀮𑀺𑀩𑁄𑀥𑁄 𑀊𑀓𑀸𑀧𑀮𑀺𑀩𑁄𑀥𑁄, 𑀓𑁂𑀲𑁂𑀲𑀼 𑀯𑀺𑀮𑀽𑀦𑁂𑀲𑀼 𑀲𑁄𑀘𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀺, 𑀇𑀫𑁂𑀲𑀼 𑀔𑁄, 𑀤𑀸𑀭𑀓, 𑀲𑁄𑀴𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀧𑀮𑀺𑀕𑀼𑀡𑁆𑀞𑀺𑀢𑀸 𑀫𑀦𑀼𑀲𑁆𑀲𑀸 𑀲𑀩𑁆𑀩𑀸𑀦𑀺 𑀅𑀢𑀺𑀲𑀼𑀔𑀼𑀫𑀸𑀦𑀺 𑀲𑀺𑀧𑁆𑀧𑀸𑀦𑀺 𑀦𑀸𑀲𑁂𑀦𑁆𑀢𑀻’’𑀢𑀺. ‘‘𑀓𑀺𑀁𑀓𑀸𑀭𑀡𑀸, 𑀫𑀸𑀭𑀺𑀲, 𑀯𑀢𑁆𑀣𑀸𑀦𑀺𑀧𑀺 𑀢𑁂 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺? ‘‘𑀓𑀸𑀫𑀦𑀺𑀲𑁆𑀲𑀺𑀢𑀸𑀦𑀺 𑀔𑁄, 𑀤𑀸𑀭𑀓, 𑀯𑀢𑁆𑀣𑀸𑀦𑀺, 𑀓𑀸𑀫𑀦𑀺𑀲𑁆𑀲𑀺𑀢𑀸𑀦𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀪𑀡𑁆𑀟𑀸𑀦𑀺 [𑀓𑀫𑀦𑀻𑀬𑀸𑀦𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 (𑀲𑀻. 𑀧𑀻.)], 𑀬𑀸𑀦𑀺 𑀓𑀸𑀦𑀺𑀘𑀺 𑀔𑁄 𑀪𑀬𑀸𑀦𑀺 𑀯𑀢𑁆𑀣𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀓𑀸𑀲𑀸𑀯𑀯𑀲𑀦𑀲𑁆𑀲 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀢𑁆𑀣𑀸𑀦𑀺𑀧𑀺 𑀫𑁂 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺. ‘‘𑀚𑀸𑀦𑀸𑀲𑀺 𑀔𑁄, 𑀢𑁆𑀯𑀁 𑀫𑀸𑀭𑀺𑀲, 𑀲𑀺𑀧𑁆𑀧𑀸𑀦𑀺 𑀦𑀸𑀫𑀸’’𑀢𑀺? ‘‘𑀆𑀫, 𑀤𑀸𑀭𑀓, 𑀚𑀸𑀦𑀸𑀫𑀳𑀁 𑀲𑀺𑀧𑁆𑀧𑀸𑀦𑀺, 𑀬𑀁 𑀮𑁄𑀓𑁂 𑀉𑀢𑁆𑀢𑀫𑀁 𑀫𑀦𑁆𑀢𑀁, 𑀢𑀫𑁆𑀧𑀺 𑀚𑀸𑀦𑀸𑀫𑀻’’𑀢𑀺. ‘‘𑀫𑀬𑁆𑀳𑀫𑁆𑀧𑀺 𑀢𑀁, 𑀫𑀸𑀭𑀺𑀲, 𑀤𑀸𑀢𑀼𑀁 𑀲𑀓𑁆𑀓𑀸’’𑀢𑀺? ‘‘𑀆𑀫, 𑀤𑀸𑀭𑀓, 𑀲𑀓𑁆𑀓𑀸’’𑀢𑀺. ‘‘𑀢𑁂𑀦 𑀳𑀺 𑀫𑁂 𑀤𑁂𑀳𑀻’’𑀢𑀺. ‘‘𑀅𑀓𑀸𑀮𑁄 𑀔𑁄, 𑀤𑀸𑀭𑀓, 𑀅𑀦𑁆𑀢𑀭𑀖𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀫𑁆𑀳𑀸’’𑀢𑀺.

𑀅𑀣 𑀔𑁄 𑀦𑀸𑀕𑀲𑁂𑀦𑁄 𑀤𑀸𑀭𑀓𑁄 𑀆𑀬𑀲𑁆𑀫𑀢𑁄 𑀭𑁄𑀳𑀡𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀢𑀤𑀯𑁄𑀘 ‘‘𑀤𑁂𑀳𑀺 𑀫𑁂 𑀤𑀸𑀦𑀺, 𑀫𑀸𑀭𑀺𑀲, 𑀫𑀦𑁆𑀢’’𑀦𑁆𑀢𑀺. ‘‘𑀬𑀤𑀸 𑀔𑁄 𑀢𑁆𑀯𑀁, 𑀤𑀸𑀭𑀓, 𑀦𑀺𑀧𑁆𑀧𑀮𑀺𑀩𑁄𑀥𑁄 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀬𑀸 𑀕𑀳𑀺𑀢𑀁 𑀧𑀩𑁆𑀩𑀚𑀺𑀢𑀯𑁂𑀲𑀁 𑀕𑀡𑁆𑀳𑀺𑀲𑁆𑀲𑀲𑀺, 𑀢𑀤𑀸 𑀤𑀲𑁆𑀲𑀸𑀫𑀻’’𑀢𑀺 𑀆𑀳.

𑀅𑀣 𑀔𑁄 𑀦𑀸𑀕𑀲𑁂𑀦𑁄 𑀤𑀸𑀭𑀓𑁄 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ‘‘𑀅𑀫𑁆𑀫𑀢𑀸𑀢𑀸, 𑀅𑀬𑀁 𑀧𑀩𑁆𑀩𑀚𑀺𑀢𑁄 ‘𑀬𑀁 𑀮𑁄𑀓𑁂 𑀉𑀢𑁆𑀢𑀫𑀁 𑀫𑀦𑁆𑀢𑀁, 𑀢𑀁 𑀚𑀸𑀦𑀸𑀫𑀻’𑀢𑀺 𑀯𑀤𑀢𑀺, 𑀦 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀅𑀧𑀩𑁆𑀩𑀚𑀺𑀢𑀲𑁆𑀲 𑀤𑁂𑀢𑀺, 𑀅𑀳𑀁 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀁 𑀉𑀢𑁆𑀢𑀫𑀁 𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀦𑁄 𑀧𑀼𑀢𑁆𑀢𑁄 𑀫𑀦𑁆𑀢𑀁 𑀕𑀡𑁆𑀳𑀢𑀼, 𑀕𑀳𑁂𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀕𑀡𑁆𑀳 𑀧𑀼𑀢𑁆𑀢𑀸’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼.

𑁧𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁄𑀳𑀡𑁄 𑀦𑀸𑀕𑀲𑁂𑀦𑀁 𑀤𑀸𑀭𑀓𑀁 𑀆𑀤𑀸𑀬 𑀬𑁂𑀦 𑀯𑀢𑁆𑀢𑀦𑀺𑀬𑀁 𑀲𑁂𑀦𑀸𑀲𑀦𑀁, 𑀬𑁂𑀦 𑀯𑀺𑀚𑀫𑁆𑀪𑀯𑀢𑁆𑀣𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀯𑀢𑁆𑀣𑀼𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀏𑀓𑀭𑀢𑁆𑀢𑀁 𑀯𑀲𑀺𑀢𑁆𑀯𑀸 𑀬𑁂𑀦 𑀭𑀓𑁆𑀔𑀺𑀢𑀢𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑁄𑀝𑀺𑀲𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀫𑀚𑁆𑀛𑁂 𑀦𑀸𑀕𑀲𑁂𑀦𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀲𑀺. 𑀧𑀩𑁆𑀩𑀚𑀺𑀢𑁄 𑀘 𑀧𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀏𑀢𑀤𑀯𑁄𑀘 ‘‘𑀕𑀳𑀺𑀢𑁄 𑀫𑁂, 𑀪𑀦𑁆𑀢𑁂, 𑀢𑀯 𑀯𑁂𑀲𑁄, 𑀤𑁂𑀣 𑀫𑁂 𑀤𑀸𑀦𑀺 𑀫𑀦𑁆𑀢’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁄𑀳𑀡𑁄 ‘‘𑀓𑀺𑀫𑁆𑀳𑀺 𑀦𑀼 𑀔𑁄𑀳𑀁 𑀦𑀸𑀕𑀲𑁂𑀦𑀁 𑀯𑀺𑀦𑁂𑀬𑁆𑀬𑀁 𑀧𑀞𑀫𑀁 𑀯𑀺𑀦𑀬𑁂 𑀯𑀸 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀅𑀪𑀺𑀥𑀫𑁆𑀫𑁂 𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀧𑀡𑁆𑀟𑀺𑀢𑁄 𑀔𑁄 𑀅𑀬𑀁 𑀦𑀸𑀕𑀲𑁂𑀦𑁄, 𑀲𑀓𑁆𑀓𑁄𑀢𑀺 𑀲𑀼𑀔𑁂𑀦𑁂𑀯 𑀅𑀪𑀺𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑀼’’𑀦𑁆𑀢𑀺 𑀧𑀞𑀫𑀁 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀲𑀺.

𑀆𑀬𑀲𑁆𑀫𑀸 𑀘 𑀦𑀸𑀕𑀲𑁂𑀦𑁄 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀢𑀺𑀓𑀤𑀼𑀓𑀧𑀝𑀺𑀫𑀡𑁆𑀟𑀺𑀢𑀁 𑀥𑀫𑁆𑀫𑀲𑀗𑁆𑀕𑀡𑀻𑀧𑀓𑀭𑀡𑀁, 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀺 𑀅𑀝𑁆𑀞𑀸𑀭𑀲 𑀯𑀺𑀪𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑀁, ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀆𑀤𑀺𑀦𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀥𑀸𑀢𑀼𑀓𑀣𑀸𑀧𑀓𑀭𑀡𑀁, ‘‘𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀆𑀬𑀢𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀆𑀤𑀺𑀦𑀸 𑀙𑀩𑁆𑀩𑀺𑀥𑁂𑀦 𑀯𑀺𑀪𑀢𑁆𑀢𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑁆𑀧𑀓𑀭𑀡𑀁, 𑀲𑀓𑀯𑀸𑀤𑁂 𑀧𑀜𑁆𑀘𑀲𑀼𑀢𑁆𑀢𑀲𑀢𑀸𑀦𑀺 𑀧𑀭𑀯𑀸𑀤𑁂 𑀧𑀜𑁆𑀘𑀲𑀼𑀢𑁆𑀢𑀲𑀢𑀸𑀦𑀻𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀪𑀢𑁆𑀢𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁, ‘‘𑀫𑀽𑀮𑀬𑀫𑀓𑀁 𑀔𑀦𑁆𑀥𑀬𑀫𑀓’’𑀦𑁆𑀢𑀺 𑀆𑀤𑀺𑀦𑀸 𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀬𑀫𑀓𑀧𑁆𑀧𑀓𑀭𑀡𑀁, ‘‘𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄’’𑀢𑀺 𑀆𑀤𑀺𑀦𑀸 𑀘𑀢𑀼𑀯𑀻𑀲𑀢𑀺𑀯𑀺𑀥𑁂𑀦 𑀯𑀺𑀪𑀢𑁆𑀢𑀁 𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀏𑀓𑁂𑀦𑁂𑀯 𑀲𑀚𑁆𑀛𑀸𑀬𑁂𑀦 𑀧𑀕𑀼𑀡𑀁 𑀓𑀢𑁆𑀯𑀸 ‘‘𑀢𑀺𑀝𑁆𑀞𑀣 𑀪𑀦𑁆𑀢𑁂, 𑀦 𑀧𑀼𑀦 𑀑𑀲𑀸𑀭𑁂𑀣, 𑀏𑀢𑁆𑀢𑀓𑁂𑀦𑁂𑀯𑀸𑀳𑀁 𑀲𑀚𑁆𑀛𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑁧𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀬𑁂𑀦 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑁄𑀝𑀺𑀲𑀢𑁂 𑀅𑀭𑀳𑀦𑁆𑀢𑁂 𑀏𑀢𑀤𑀯𑁄𑀘 ‘‘𑀅𑀳𑀁 𑀔𑁄 𑀪𑀦𑁆𑀢𑁂 ‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀢𑁆𑀣𑀸𑀭𑁂𑀦 𑀑𑀲𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀦𑀸𑀕𑀲𑁂𑀦, 𑀑𑀲𑀸𑀭𑁂𑀳𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀲𑀢𑁆𑀢 𑀫𑀸𑀲𑀸𑀦𑀺 𑀲𑀢𑁆𑀢 𑀧𑀓𑀭𑀡𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀑𑀲𑀸𑀭𑁂𑀲𑀺, 𑀧𑀣𑀯𑀻 𑀉𑀦𑁆𑀦𑀤𑀺, 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼, 𑀩𑁆𑀭𑀳𑁆𑀫𑀸𑀦𑁄 𑀅𑀧𑁆𑀨𑁄𑀝𑁂𑀲𑀼𑀁, 𑀤𑀺𑀩𑁆𑀩𑀸𑀦𑀺 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀤𑀺𑀩𑁆𑀩𑀸𑀦𑀺 𑀘 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀸𑀦𑀺 𑀅𑀪𑀺𑀧𑁆𑀧𑀯𑀲𑁆𑀲𑀺𑀁𑀲𑀼.

𑁧𑁫. 𑀅𑀣 𑀔𑁄 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀭𑀓𑁆𑀔𑀺𑀢𑀢𑀮𑁂 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀉𑀧𑀲𑀫𑁆𑀧𑀦𑁆𑀦𑁄 𑀘 𑀧𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀏𑀯𑀭𑀽𑀧𑀁 𑀧𑀭𑀺𑀯𑀺𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀲𑀺 ‘‘𑀢𑀼𑀘𑁆𑀙𑁄 𑀯𑀢 𑀫𑁂 𑀉𑀧𑀚𑁆𑀛𑀸𑀬𑁄, 𑀩𑀸𑀮𑁄 𑀯𑀢 𑀫𑁂 𑀉𑀧𑀚𑁆𑀛𑀸𑀬𑁄, 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀧𑀞𑀫𑀁 𑀫𑀁 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁄𑀳𑀡𑁄 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 𑀔𑁄 𑀦𑀸𑀕𑀲𑁂𑀦 𑀧𑀭𑀺𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀺, 𑀦 𑀔𑁄 𑀧𑀦𑁂𑀢𑀁 𑀦𑀸𑀕𑀲𑁂𑀦 𑀢𑀯𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀬𑀢𑁆𑀭 𑀳𑀺 𑀦𑀸𑀫 𑀫𑁂 𑀉𑀧𑀚𑁆𑀛𑀸𑀬𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀁 𑀚𑀸𑀦𑀺𑀲𑁆𑀲𑀢𑀺, 𑀧𑀡𑁆𑀟𑀺𑀢𑁄 𑀯𑀢 𑀫𑁂 𑀉𑀧𑀚𑁆𑀛𑀸𑀬𑁄, 𑀬𑀁𑀦𑀽𑀦𑀸𑀳𑀁 𑀉𑀧𑀚𑁆𑀛𑀸𑀬𑀁 𑀔𑀫𑀸𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀏𑀢𑀤𑀯𑁄𑀘 ‘‘𑀔𑀫𑀣 𑀫𑁂, 𑀪𑀦𑁆𑀢𑁂, 𑀦 𑀧𑀼𑀦 𑀏𑀯𑀭𑀽𑀧𑀁 𑀯𑀺𑀢𑀓𑁆𑀓𑁂𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁄𑀳𑀡𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀦 𑀔𑁄 𑀢𑁆𑀬𑀸𑀳𑀁 𑀦𑀸𑀕𑀲𑁂𑀦 𑀏𑀢𑁆𑀢𑀸𑀯𑀢𑀸 𑀔𑀫𑀸𑀫𑀺, 𑀅𑀢𑁆𑀣𑀺 𑀔𑁄 𑀦𑀸𑀕𑀲𑁂𑀦 𑀲𑀸𑀕𑀮𑀁 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀫𑀺𑀮𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀲𑁄 𑀤𑀺𑀝𑁆𑀞𑀺𑀯𑀸𑀤𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀳𑁂𑀞𑁂𑀢𑀺, 𑀲𑀘𑁂 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀤𑀫𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀸𑀤𑁂𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀔𑀫𑀺𑀲𑁆𑀲𑀸𑀫𑀻’’𑀢𑀺.

‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀏𑀓𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸; 𑀲𑀘𑁂, 𑀪𑀦𑁆𑀢𑁂, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀲𑀩𑁆𑀩𑀁 𑀢𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀲𑀫𑁆𑀧𑀤𑀸𑀮𑁂𑀲𑁆𑀲𑀸𑀫𑀺, ‘𑀔𑀫𑀣 𑀫𑁂 𑀪𑀦𑁆𑀢𑁂’𑀢𑀺 𑀯𑀢𑁆𑀯𑀸, ‘𑀦 𑀔𑀫𑀸𑀫𑀻’𑀢𑀺 𑀯𑀼𑀢𑁆𑀢𑁂 ‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀇𑀫𑀁 𑀢𑁂𑀫𑀸𑀲𑀁 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀺𑀲𑁆𑀲𑀸𑀫𑀻’𑀢𑀺 𑀆𑀳’’. 𑀅𑀬𑀁 𑀔𑁄, 𑀦𑀸𑀕𑀲𑁂𑀦, 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀯𑀢𑁆𑀢𑀦𑀺𑀬𑁂 𑀲𑁂𑀦𑀸𑀲𑀦𑁂 𑀯𑀺𑀳𑀭𑀢𑀺, 𑀕𑀘𑁆𑀙 𑀢𑁆𑀯𑀁, 𑀦𑀸𑀕𑀲𑁂𑀦, 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀆𑀬𑀲𑁆𑀫𑀢𑁄 𑀅𑀲𑁆𑀲𑀕𑀼𑀢𑁆𑀢𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤, 𑀏𑀯𑀜𑁆𑀘 𑀦𑀁 𑀯𑀤𑁂𑀳𑀺 ‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺, 𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀇𑀫𑀁 𑀢𑁂𑀫𑀸𑀲𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀼𑀁 𑀫𑀁 𑀧𑀳𑀺𑀡𑀻’𑀢𑀺, ‘𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’𑀢𑀺 𑀘 𑀯𑀼𑀢𑁆𑀢𑁂 ‘𑀭𑁄𑀳𑀡𑀢𑁆𑀣𑁂𑀭𑁄 𑀦𑀸𑀫 𑀪𑀦𑁆𑀢𑁂’’𑀢𑀺 𑀯𑀤𑁂𑀬𑁆𑀬𑀸𑀲𑀺, ‘𑀅𑀳𑀁 𑀓𑁄𑀦𑀸𑀫𑁄’𑀢𑀺 𑀯𑀼𑀢𑁆𑀢𑁂 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 ‘𑀫𑀫 𑀉𑀧𑀚𑁆𑀛𑀸𑀬𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀦𑀸𑀫𑀁 𑀚𑀸𑀦𑀸𑀢𑀻’’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀭𑁄𑀳𑀡𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑀢𑁆𑀢𑀦𑀺𑀬𑀁 𑀲𑁂𑀦𑀸𑀲𑀦𑀁, 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺, 𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀇𑀫𑀁 𑀢𑁂𑀫𑀸𑀲𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀼𑀁 𑀫𑀁 𑀧𑀳𑀺𑀡𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀢𑁆𑀯𑀁 𑀓𑀺𑀦𑁆𑀦𑀸𑀫𑁄𑀲𑀻’’𑀢𑀺. ‘‘𑀅𑀳𑀁, 𑀪𑀦𑁆𑀢𑁂, 𑀦𑀸𑀕𑀲𑁂𑀦𑁄 𑀦𑀸𑀫𑀸’’𑀢𑀺. ‘‘𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺? ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀭𑁄𑀳𑀡𑁄 𑀦𑀸𑀫𑀸’’𑀢𑀺. ‘‘𑀅𑀳𑀁 𑀓𑁄𑀦𑀸𑀫𑁄’’𑀢𑀺. ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀦𑀸𑀫𑀁 𑀚𑀸𑀦𑀸𑀢𑀻’’𑀢𑀺.

‘‘𑀲𑀸𑀥𑀼, 𑀦𑀸𑀕𑀲𑁂𑀦, 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀳𑀻’’𑀢𑀺. ‘‘𑀲𑀸𑀥𑀼 𑀪𑀦𑁆𑀢𑁂’’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀼𑀔𑁄𑀤𑀓𑀁 𑀤𑀦𑁆𑀢𑀧𑁄𑀡𑀁 𑀉𑀧𑀝𑁆𑀞𑀧𑁂𑀲𑀺. 𑀣𑁂𑀭𑁄 𑀲𑀫𑁆𑀫𑀚𑁆𑀚𑀺𑀢𑀝𑁆𑀞𑀸𑀦𑀁 𑀧𑀝𑀺𑀲𑀫𑁆𑀫𑀚𑁆𑀚𑀺, 𑀢𑀁 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑀓𑀁 𑀆𑀳𑀭𑀺, 𑀢𑀜𑁆𑀘 𑀤𑀦𑁆𑀢𑀓𑀝𑁆𑀞𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀤𑀦𑁆𑀢𑀓𑀝𑁆𑀞𑀁 𑀕𑀡𑁆𑀳𑀺, 𑀦 𑀆𑀮𑀸𑀧𑀲𑀮𑁆𑀮𑀸𑀧𑀁 𑀅𑀓𑀸𑀲𑀺, 𑀏𑀯𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀢𑁂𑀦 𑀢𑀣𑁂𑀯 𑀯𑀼𑀢𑁆𑀢𑁂 𑀯𑀲𑁆𑀲𑀯𑀸𑀲𑀁 𑀅𑀦𑀼𑀚𑀸𑀦𑀺.

𑁧𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀏𑀓𑀸 𑀫𑀳𑀸𑀉𑀧𑀸𑀲𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀢𑀺𑀁𑀲𑀫𑀢𑁆𑀢𑀸𑀦𑀺 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀲𑀺. 𑀅𑀣 𑀔𑁄 𑀲𑀸 𑀫𑀳𑀸𑀉𑀧𑀸𑀲𑀺𑀓𑀸 𑀢𑁂𑀫𑀸𑀲𑀘𑁆𑀘𑀬𑁂𑀦 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀅𑀜𑁆𑀜𑁄 𑀪𑀺𑀓𑁆𑀔𑀽’’𑀢𑀺. ‘‘𑀅𑀢𑁆𑀣𑀺, 𑀫𑀳𑀸𑀉𑀧𑀸𑀲𑀺𑀓𑁂, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀦𑀸𑀕𑀲𑁂𑀦𑁄 𑀦𑀸𑀫 𑀪𑀺𑀓𑁆𑀔𑀽’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢 𑀅𑀲𑁆𑀲𑀕𑀼𑀢𑁆𑀢, 𑀅𑀥𑀺𑀯𑀸𑀲𑁂𑀳𑀺 𑀦𑀸𑀕𑀲𑁂𑀦𑁂𑀦 𑀲𑀤𑁆𑀥𑀺𑀁 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀬𑀲𑁆𑀫𑀢𑀸 𑀦𑀸𑀕𑀲𑁂𑀦𑁂𑀦 𑀲𑀤𑁆𑀥𑀺𑀁 𑀧𑀘𑁆𑀙𑀸𑀲𑀫𑀡𑁂𑀦 𑀬𑁂𑀦 𑀫𑀳𑀸𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀸 𑀫𑀳𑀸𑀉𑀧𑀸𑀲𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀸𑀕𑀲𑁂𑀦𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀢𑁆𑀯𑀁, 𑀦𑀸𑀕𑀲𑁂𑀦, 𑀫𑀳𑀸𑀉𑀧𑀸𑀲𑀺𑀓𑀸𑀬 𑀅𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺 𑀇𑀤𑀁 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀲𑀸 𑀫𑀳𑀸𑀉𑀧𑀸𑀲𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀫𑀳𑀮𑁆𑀮𑀺𑀓𑀸 𑀔𑁄𑀳𑀁, 𑀢𑀸𑀢 𑀦𑀸𑀕𑀲𑁂𑀦, 𑀕𑀫𑁆𑀪𑀻𑀭𑀸𑀬 𑀥𑀫𑁆𑀫𑀓𑀣𑀸𑀬 𑀫𑀬𑁆𑀳𑀁 𑀅𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑀲𑁆𑀲𑀸 𑀫𑀳𑀸𑀉𑀧𑀸𑀲𑀺𑀓𑀸𑀬 𑀕𑀫𑁆𑀪𑀻𑀭𑀸𑀬 𑀥𑀫𑁆𑀫𑀓𑀣𑀸𑀬 𑀮𑁄𑀓𑀼𑀢𑁆𑀢𑀭𑀸𑀬 𑀲𑀼𑀜𑁆𑀜𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀅𑀣 𑀔𑁄 𑀢𑀲𑁆𑀲𑀸 𑀫𑀳𑀸𑀉𑀧𑀸𑀲𑀺𑀓𑀸𑀬 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀦𑀸𑀕𑀲𑁂𑀦𑁄 𑀢𑀲𑁆𑀲𑀸 𑀫𑀳𑀸𑀉𑀧𑀸𑀲𑀺𑀓𑀸𑀬 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀫𑀡𑁆𑀟𑀮𑀫𑀸𑀴𑁂 𑀦𑀺𑀲𑀺𑀦𑁆𑀦𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑀁 𑀜𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀺 ‘‘𑀲𑀸𑀥𑀼 𑀲𑀸𑀥𑀼 𑀦𑀸𑀕𑀲𑁂𑀦, 𑀏𑀓𑁂𑀦 𑀓𑀡𑁆𑀟𑀧𑁆𑀧𑀳𑀸𑀭𑁂𑀦 𑀤𑁆𑀯𑁂 𑀫𑀳𑀸𑀓𑀸𑀬𑀸 𑀧𑀤𑀸𑀮𑀺𑀢𑀸’’𑀢𑀺, 𑀅𑀦𑁂𑀓𑀸𑀦𑀺 𑀘 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀼𑀁.

𑁧𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀆𑀬𑀲𑁆𑀫𑀸 𑀅𑀲𑁆𑀲𑀕𑀼𑀢𑁆𑀢𑁄 𑀏𑀢𑀤𑀯𑁄𑀘 ‘‘𑀕𑀘𑁆𑀙, 𑀢𑁆𑀯𑀁 𑀦𑀸𑀕𑀲𑁂𑀦, 𑀧𑀸𑀝𑀮𑀺𑀧𑀼𑀢𑁆𑀢𑀁, 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀅𑀲𑁄𑀓𑀸𑀭𑀸𑀫𑁂 𑀆𑀬𑀲𑁆𑀫𑀸 𑀥𑀫𑁆𑀫𑀭𑀓𑁆𑀔𑀺𑀢𑁄 𑀧𑀝𑀺𑀯𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀸𑀳𑀻’’𑀢𑀺. ‘‘𑀓𑀻𑀯 𑀤𑀽𑀭𑁄, 𑀪𑀦𑁆𑀢𑁂, 𑀇𑀢𑁄 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭’’𑀦𑁆𑀢𑀺? ‘‘𑀬𑁄𑀚𑀦𑀲𑀢𑀸𑀦𑀺 𑀔𑁄 𑀦𑀸𑀕𑀲𑁂𑀦𑀸’’𑀢𑀺. ‘‘𑀤𑀽𑀭𑁄 𑀔𑁄, 𑀪𑀦𑁆𑀢𑁂, 𑀫𑀕𑁆𑀕𑁄. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀺𑀓𑁆𑀔𑀸 𑀤𑀼𑀮𑁆𑀮𑀪𑀸, 𑀓𑀣𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺? ‘‘𑀕𑀘𑁆𑀙, 𑀢𑁆𑀯𑀁 𑀦𑀸𑀕𑀲𑁂𑀦, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀲𑁆𑀲𑀲𑀺 𑀲𑀸𑀮𑀻𑀦𑀁 𑀑𑀤𑀦𑀁 𑀯𑀺𑀕𑀢𑀓𑀸𑀴𑀓𑀁 𑀅𑀦𑁂𑀓𑀲𑀽𑀧𑀁 𑀅𑀦𑁂𑀓𑀩𑁆𑀬𑀜𑁆𑀚𑀦’’𑀦𑁆𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀕𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑁧𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀧𑀸𑀝𑀮𑀺𑀧𑀼𑀢𑁆𑀢𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺 𑀢𑀸𑀢𑀸’’𑀢𑀺 𑀆𑀳. ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀳𑀧𑀢𑀻’’𑀢𑀺. ‘‘𑀲𑀸𑀥𑀼 𑀢𑀸𑀢, 𑀫𑀬𑀫𑁆𑀧𑀺 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀘𑁆𑀙𑀸𑀫. 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑀼𑀔𑀁 𑀕𑀘𑁆𑀙𑀣𑀸’’𑀢𑀺.

𑀅𑀣 𑀔𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀓𑀺𑀦𑁆𑀦𑀸𑀫𑁄𑀲𑀺 𑀢𑁆𑀯𑀁 𑀢𑀸𑀢𑀸’’𑀢𑀺. ‘‘𑀅𑀳𑀁, 𑀕𑀳𑀧𑀢𑀺, 𑀦𑀸𑀕𑀲𑁂𑀦𑁄 𑀦𑀸𑀫𑀸’’𑀢𑀺. ‘‘𑀚𑀸𑀦𑀸𑀲𑀺 𑀔𑁄, 𑀢𑁆𑀯𑀁 𑀢𑀸𑀢, 𑀩𑀼𑀤𑁆𑀥𑀯𑀘𑀦𑀁 𑀦𑀸𑀫𑀸’’𑀢𑀺? ‘‘𑀚𑀸𑀦𑀸𑀫𑀺 𑀔𑁄𑀳𑀁, 𑀕𑀳𑀧𑀢𑀺, 𑀅𑀪𑀺𑀥𑀫𑁆𑀫𑀧𑀤𑀸𑀦𑀻’’𑀢𑀺. ‘‘𑀮𑀸𑀪𑀸 𑀦𑁄 𑀢𑀸𑀢, 𑀲𑀼𑀮𑀤𑁆𑀥𑀁 𑀦𑁄 𑀢𑀸𑀢, 𑀅𑀳𑀫𑁆𑀧𑀺 𑀔𑁄, 𑀢𑀸𑀢, 𑀆𑀪𑀺𑀥𑀫𑁆𑀫𑀺𑀓𑁄, 𑀢𑁆𑀯𑀫𑁆𑀧𑀺 𑀆𑀪𑀺𑀥𑀫𑁆𑀫𑀺𑀓𑁄, 𑀪𑀡, 𑀢𑀸𑀢, 𑀅𑀪𑀺𑀥𑀫𑁆𑀫𑀧𑀤𑀸𑀦𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑁂𑀦𑁆𑀢𑁂 𑀬𑁂𑀯 𑀧𑀸𑀝𑀮𑀺𑀧𑀼𑀢𑁆𑀢𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑀅𑀣 𑀔𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀧𑀼𑀭𑀢𑁄 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀬𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀤𑁆𑀯𑁂𑀥𑀸𑀧𑀣𑁂 𑀞𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀅𑀬𑀁 𑀔𑁄, 𑀢𑀸𑀢 𑀦𑀸𑀕𑀲𑁂𑀦, 𑀅𑀲𑁄𑀓𑀸𑀭𑀸𑀫𑀲𑁆𑀲 𑀫𑀕𑁆𑀕𑁄, 𑀇𑀤𑀁 𑀔𑁄, 𑀢𑀸𑀢, 𑀅𑀫𑁆𑀳𑀸𑀓𑀁 𑀓𑀫𑁆𑀩𑀮𑀭𑀢𑀦𑀁 𑀲𑁄𑀴𑀲𑀳𑀢𑁆𑀣𑀁 𑀆𑀬𑀸𑀫𑁂𑀦, 𑀅𑀝𑁆𑀞𑀳𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦, 𑀧𑀝𑀺𑀕𑁆𑀕𑀡𑁆𑀳𑀸𑀳𑀺 𑀔𑁄, 𑀢𑀸𑀢, 𑀇𑀤𑀁 𑀓𑀫𑁆𑀩𑀮𑀭𑀢𑀦𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑀁 𑀓𑀫𑁆𑀩𑀮𑀭𑀢𑀦𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀅𑀣 𑀔𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀬𑁂𑀦 𑀅𑀲𑁄𑀓𑀸𑀭𑀸𑀫𑁄 𑀬𑁂𑀦𑀸𑀬𑀲𑁆𑀫𑀸 𑀥𑀫𑁆𑀫𑀭𑀓𑁆𑀔𑀺𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀭𑀓𑁆𑀔𑀺𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀏𑀓𑁂𑀦𑁂𑀯 𑀉𑀤𑁆𑀤𑁂𑀲𑁂𑀦 𑀢𑀻𑀳𑀺 𑀫𑀸𑀲𑁂𑀳𑀺 𑀩𑁆𑀬𑀜𑁆𑀚𑀦𑀲𑁄 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀧𑀼𑀦 𑀢𑀻𑀳𑀺 𑀫𑀸𑀲𑁂𑀳𑀺 𑀅𑀢𑁆𑀣𑀲𑁄 𑀫𑀦𑀲𑀸𑀓𑀸𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀲𑁂𑀬𑁆𑀬𑀣𑀸𑀧𑀺, 𑀦𑀸𑀕𑀲𑁂𑀦, 𑀕𑁄𑀧𑀸𑀮𑀓𑁄 𑀕𑀸𑀯𑁄 𑀭𑀓𑁆𑀔𑀢𑀺, 𑀅𑀜𑁆𑀜𑁂 𑀕𑁄𑀭𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀢𑁆𑀯𑀁 𑀦𑀸𑀕𑀲𑁂𑀦, 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀥𑀸𑀭𑁂𑀦𑁆𑀢𑁄𑀧𑀺 𑀦 𑀪𑀸𑀕𑀻 𑀲𑀸𑀫𑀜𑁆𑀜𑀲𑁆𑀲𑀸’’𑀢𑀺. ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀮𑀁 𑀏𑀢𑁆𑀢𑀓𑁂𑀦𑀸’’𑀢𑀺. 𑀢𑁂𑀦𑁂𑀯 𑀤𑀺𑀯𑀲𑀪𑀸𑀕𑁂𑀦 𑀢𑁂𑀦 𑀭𑀢𑁆𑀢𑀺𑀪𑀸𑀕𑁂𑀦 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀲𑀳 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁂𑀦 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀲𑀩𑁆𑀩𑁂 𑀤𑁂𑀯𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼, 𑀧𑀣𑀯𑀻 𑀉𑀦𑁆𑀦𑀤𑀺, 𑀩𑁆𑀭𑀳𑁆𑀫𑀸𑀦𑁄 𑀅𑀧𑁆𑀨𑁄𑀝𑁂𑀲𑀼𑀁, 𑀤𑀺𑀩𑁆𑀩𑀸𑀦𑀺 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀤𑀺𑀩𑁆𑀩𑀸𑀦𑀺 𑀘 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀸𑀦𑀺 𑀅𑀪𑀺𑀧𑁆𑀧𑀯𑀲𑁆𑀲𑀺𑀁𑀲𑀼.

𑁨𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀭𑀓𑁆𑀔𑀺𑀢𑀢𑀮𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀼𑀁 ‘‘𑀆𑀕𑀘𑁆𑀙𑀢𑀼 𑀦𑀸𑀕𑀲𑁂𑀦𑁄, 𑀤𑀲𑁆𑀲𑀦𑀓𑀸𑀫𑀸 𑀫𑀬𑀁 𑀦𑀸𑀕𑀲𑁂𑀦’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀤𑀽𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑁂 𑀅𑀦𑁆𑀢𑀭𑀳𑀺𑀢𑁄 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀭𑀓𑁆𑀔𑀺𑀢𑀢𑀮𑁂 𑀓𑁄𑀝𑀺𑀲𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺.

𑀅𑀣 𑀔𑁄 𑀓𑁄𑀝𑀺𑀲𑀢𑀸 𑀅𑀭𑀳𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘𑀼𑀁 ‘‘𑀏𑀲𑁄 𑀔𑁄, 𑀦𑀸𑀕𑀲𑁂𑀦, 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀳𑁂𑀞𑁂𑀢𑀺 𑀯𑀸𑀤𑀧𑁆𑀧𑀝𑀺𑀯𑀸𑀤𑁂𑀦 𑀧𑀜𑁆𑀳𑀧𑀼𑀘𑁆𑀙𑀸𑀬. 𑀲𑀸𑀥𑀼, 𑀦𑀸𑀕𑀲𑁂𑀦, 𑀕𑀘𑁆𑀙 𑀢𑁆𑀯𑀁 𑀫𑀺𑀮𑀺𑀦𑁆𑀤𑀁 𑀭𑀸𑀚𑀸𑀦𑀁 𑀤𑀫𑁂𑀳𑀻’’𑀢𑀺. ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀏𑀓𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸; 𑀲𑀘𑁂, 𑀪𑀦𑁆𑀢𑁂, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀲𑀩𑁆𑀩𑀁 𑀢𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀲𑀫𑁆𑀧𑀤𑀸𑀮𑁂𑀲𑁆𑀲𑀸𑀫𑀺, 𑀕𑀘𑁆𑀙𑀣 𑀯𑁄, 𑀪𑀦𑁆𑀢𑁂, 𑀅𑀘𑁆𑀙𑀫𑁆𑀪𑀺𑀢𑀸 𑀲𑀸𑀕𑀮𑀦𑀕𑀭’’𑀦𑁆𑀢𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀲𑀸𑀕𑀮𑀦𑀕𑀭𑀁 𑀓𑀸𑀲𑀸𑀯𑀧𑁆𑀧𑀚𑁆𑀚𑁄𑀢𑀁 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀁 𑀅𑀓𑀁𑀲𑀼.

𑁨𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀬𑀼𑀧𑀸𑀮𑁄 𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑁂 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀅𑀫𑀘𑁆𑀘𑁂 𑀏𑀢𑀤𑀯𑁄𑀘 ‘‘𑀭𑀫𑀡𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀓𑀦𑁆𑀦𑀼 𑀔𑁆𑀯𑀚𑁆𑀚 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀲𑀸𑀓𑀘𑁆𑀙𑀸𑀬 𑀧𑀜𑁆𑀳𑀧𑀼𑀘𑁆𑀙𑀦𑀸𑀬, 𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀉𑀲𑁆𑀲𑀳𑀢𑀺 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀲𑀢𑀸 𑀬𑁄𑀦𑀓𑀸 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀆𑀬𑀼𑀧𑀸𑀮𑁄 𑀦𑀸𑀫 𑀣𑁂𑀭𑁄 𑀢𑁂𑀧𑀺𑀝𑀓𑁄 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄, 𑀲𑁄 𑀏𑀢𑀭𑀳𑀺 𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑁂 𑀧𑀝𑀺𑀯𑀲𑀢𑀺; 𑀕𑀘𑁆𑀙, 𑀢𑁆𑀯𑀁 𑀫𑀳𑀸𑀭𑀸𑀚, 𑀆𑀬𑀲𑁆𑀫𑀦𑁆𑀢𑀁 𑀆𑀬𑀼𑀧𑀸𑀮𑀁 𑀧𑀜𑁆𑀳𑀁 𑀧𑀼𑀘𑁆𑀙𑀲𑁆𑀲𑀽’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀪𑀤𑀦𑁆𑀢𑀲𑁆𑀲 𑀆𑀭𑁄𑀘𑁂𑀣𑀸’’𑀢𑀺.

𑀅𑀣 𑀔𑁄 𑀦𑁂𑀫𑀺𑀢𑁆𑀢𑀺𑀓𑁄 𑀆𑀬𑀲𑁆𑀫𑀢𑁄 𑀆𑀬𑀼𑀧𑀸𑀮𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 ‘‘𑀭𑀸𑀚𑀸, 𑀪𑀦𑁆𑀢𑁂, 𑀫𑀺𑀮𑀺𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀆𑀬𑀼𑀧𑀸𑀮𑀁 𑀤𑀲𑁆𑀲𑀦𑀓𑀸𑀫𑁄’’𑀢𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀆𑀬𑀼𑀧𑀸𑀮𑁄 𑀏𑀯𑀫𑀸𑀳 ‘‘𑀢𑁂𑀦 𑀳𑀺 𑀆𑀕𑀘𑁆𑀙𑀢𑀽’’𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀬𑁄𑀦𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀭𑀣𑀯𑀭𑀫𑀸𑀭𑀼𑀬𑁆𑀳 𑀬𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑀁 𑀬𑁂𑀦𑀸𑀬𑀲𑁆𑀫𑀸 𑀆𑀬𑀼𑀧𑀸𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀬𑀼𑀧𑀸𑀮𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀆𑀬𑀼𑀧𑀸𑀮𑀁 𑀏𑀢𑀤𑀯𑁄𑀘 ‘‘𑀓𑀺𑀫𑀢𑁆𑀣𑀺𑀬𑀸, 𑀪𑀦𑁆𑀢𑁂 𑀆𑀬𑀼𑀧𑀸𑀮, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸, 𑀓𑁄 𑀘 𑀢𑀼𑀫𑁆𑀳𑀸𑀓𑀁 𑀧𑀭𑀫𑀢𑁆𑀣𑁄’’𑀢𑀺. 𑀣𑁂𑀭𑁄 𑀆𑀳 ‘‘𑀥𑀫𑁆𑀫𑀘𑀭𑀺𑀬𑀲𑀫𑀘𑀭𑀺𑀬𑀢𑁆𑀣𑀸 𑀔𑁄, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑁆𑀚𑀸, 𑀲𑀸𑀫𑀜𑁆𑀜𑀨𑀮𑀁 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑀧𑀭𑀫𑀢𑁆𑀣𑁄’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀓𑁄𑀘𑀺 𑀕𑀺𑀳𑀻𑀧𑀺 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀕𑀺𑀳𑀻𑀧𑀺 𑀥𑀫𑁆𑀫𑀘𑀸𑀭𑀻 𑀲𑀫𑀘𑀸𑀭𑀻, 𑀪𑀕𑀯𑀢𑀺 𑀔𑁄, 𑀫𑀳𑀸𑀭𑀸𑀚, 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂 𑀅𑀝𑁆𑀞𑀸𑀭𑀲𑀦𑁆𑀦𑀁 𑀩𑁆𑀭𑀳𑁆𑀫𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀤𑁂𑀯𑀢𑀸𑀦𑀁 𑀧𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑁄, 𑀲𑀩𑁆𑀩𑁂𑀢𑁂 𑀕𑀺𑀳𑀺𑀪𑀽𑀢𑀸, 𑀦 𑀧𑀩𑁆𑀩𑀚𑀺𑀢𑀸.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀔𑁄 𑀫𑀳𑀸𑀲𑀫𑀬𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂, 𑀫𑀳𑀸𑀫𑀗𑁆𑀕𑀮𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂, 𑀲𑀫𑀘𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂, 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂, 𑀧𑀭𑀸𑀪𑀯𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀲𑀩𑁆𑀩𑁂𑀢𑁂 𑀕𑀺𑀳𑀺𑀪𑀽𑀢𑀸, 𑀦 𑀧𑀩𑁆𑀩𑀚𑀺𑀢𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀆𑀬𑀼𑀧𑀸𑀮, 𑀦𑀺𑀭𑀢𑁆𑀣𑀺𑀓𑀸 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸, 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀧𑀩𑁆𑀩𑀚𑀦𑁆𑀢𑀺 𑀥𑀼𑀢𑀗𑁆𑀕𑀸𑀦𑀺 𑀘 𑀧𑀭𑀺𑀳𑀭𑀦𑁆𑀢𑀺. 𑀬𑁂 𑀔𑁄 𑀢𑁂, 𑀪𑀦𑁆𑀢𑁂 𑀆𑀬𑀼𑀧𑀸𑀮, 𑀪𑀺𑀓𑁆𑀔𑀽 𑀏𑀓𑀸𑀲𑀦𑀺𑀓𑀸, 𑀦𑀽𑀦 𑀢𑁂 𑀧𑀼𑀩𑁆𑀩𑁂 𑀧𑀭𑁂𑀲𑀁 𑀪𑁄𑀕𑀳𑀸𑀭𑀓𑀸 𑀘𑁄𑀭𑀸, 𑀢𑁂 𑀧𑀭𑁂𑀲𑀁 𑀪𑁄𑀕𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀏𑀢𑀭𑀳𑀺 𑀏𑀓𑀸𑀲𑀦𑀺𑀓𑀸 𑀪𑀯𑀦𑁆𑀢𑀺, 𑀦 𑀮𑀪𑀦𑁆𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀦𑀢𑁆𑀣𑀺 𑀢𑁂𑀲𑀁 𑀲𑀻𑀮𑀁, 𑀦𑀢𑁆𑀣𑀺 𑀢𑀧𑁄, 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑁂 𑀔𑁄 𑀧𑀦 𑀢𑁂, 𑀪𑀦𑁆𑀢𑁂 𑀆𑀬𑀼𑀧𑀸𑀮, 𑀪𑀺𑀓𑁆𑀔𑀽 𑀅𑀩𑁆𑀪𑁄𑀓𑀸𑀲𑀺𑀓𑀸, 𑀦𑀽𑀦 𑀢𑁂 𑀧𑀼𑀩𑁆𑀩𑁂 𑀕𑀸𑀫𑀖𑀸𑀢𑀓𑀸 𑀘𑁄𑀭𑀸, 𑀢𑁂 𑀧𑀭𑁂𑀲𑀁 𑀕𑁂𑀳𑀸𑀦𑀺 𑀯𑀺𑀦𑀸𑀲𑁂𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀏𑀢𑀭𑀳𑀺 𑀅𑀩𑁆𑀪𑁄𑀓𑀸𑀲𑀺𑀓𑀸 𑀪𑀯𑀦𑁆𑀢𑀺, 𑀦 𑀮𑀪𑀦𑁆𑀢𑀺 𑀲𑁂𑀦𑀸𑀲𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀦𑀢𑁆𑀣𑀺 𑀢𑁂𑀲𑀁 𑀲𑀻𑀮𑀁, 𑀦𑀢𑁆𑀣𑀺 𑀢𑀧𑁄, 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑁂 𑀔𑁄 𑀧𑀦 𑀢𑁂, 𑀪𑀦𑁆𑀢𑁂 𑀆𑀬𑀼𑀧𑀸𑀮, 𑀪𑀺𑀓𑁆𑀔𑀽 𑀦𑁂𑀲𑀚𑁆𑀚𑀺𑀓𑀸, 𑀦𑀽𑀦 𑀢𑁂 𑀧𑀼𑀩𑁆𑀩𑁂 𑀧𑀦𑁆𑀣𑀤𑀽𑀲𑀓𑀸 𑀘𑁄𑀭𑀸, 𑀢𑁂 𑀧𑀭𑁂𑀲𑀁 𑀧𑀣𑀺𑀓𑁂 𑀚𑀦𑁂 𑀕𑀳𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀏𑀢𑀭𑀳𑀺 𑀦𑁂𑀲𑀚𑁆𑀚𑀺𑀓𑀸 𑀪𑀯𑀦𑁆𑀢𑀺, 𑀦 𑀮𑀪𑀦𑁆𑀢𑀺 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀼𑀁, 𑀦𑀢𑁆𑀣𑀺 𑀢𑁂𑀲𑀁 𑀲𑀻𑀮𑀁, 𑀦𑀢𑁆𑀣𑀺 𑀢𑀧𑁄, 𑀦𑀢𑁆𑀣𑀺 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀆𑀳.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀬𑀼𑀧𑀸𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺, 𑀦 𑀓𑀺𑀜𑁆𑀘𑀺 𑀧𑀝𑀺𑀪𑀸𑀲𑀺. 𑀅𑀣 𑀔𑁄 𑀧𑀜𑁆𑀘𑀲𑀢𑀸 𑀬𑁄𑀦𑀓𑀸 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 ‘‘𑀧𑀡𑁆𑀟𑀺𑀢𑁄, 𑀫𑀳𑀸𑀭𑀸𑀚, 𑀣𑁂𑀭𑁄, 𑀅𑀧𑀺 𑀘 𑀔𑁄 𑀅𑀯𑀺𑀲𑀸𑀭𑀤𑁄 𑀦 𑀓𑀺𑀜𑁆𑀘𑀺 𑀧𑀝𑀺𑀪𑀸𑀲𑀢𑀻’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀆𑀬𑀼𑀧𑀸𑀮𑀁 𑀢𑀼𑀡𑁆𑀳𑀻𑀪𑀽𑀢𑀁 𑀤𑀺𑀲𑁆𑀯𑀸 𑀅𑀧𑁆𑀨𑁄𑀝𑁂𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀢𑁆𑀯𑀸 𑀬𑁄𑀦𑀓𑁂 𑀏𑀢𑀤𑀯𑁄𑀘 ‘‘𑀢𑀼𑀘𑁆𑀙𑁄 𑀯𑀢 𑀪𑁄 𑀚𑀫𑁆𑀩𑀼𑀤𑀻𑀧𑁄, 𑀧𑀮𑀸𑀧𑁄 𑀯𑀢 𑀪𑁄 𑀚𑀫𑁆𑀩𑀼𑀤𑀻𑀧𑁄, 𑀦𑀢𑁆𑀣𑀺 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀉𑀲𑁆𑀲𑀳𑀢𑀺 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺.

𑁨𑁨. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀲𑀩𑁆𑀩𑀁 𑀢𑀁 𑀧𑀭𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑀲𑁆𑀲 𑀅𑀪𑀻𑀢𑁂 𑀅𑀫𑀗𑁆𑀓𑀼𑀪𑀽𑀢𑁂 𑀬𑁄𑀦𑀓𑁂 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 ‘‘𑀦𑀺𑀲𑁆𑀲𑀁𑀲𑀬𑀁 𑀅𑀢𑁆𑀣𑀺 𑀫𑀜𑁆𑀜𑁂 𑀅𑀜𑁆𑀜𑁄 𑀓𑁄𑀘𑀺 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼, 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀉𑀲𑁆𑀲𑀳𑀢𑀺, 𑀬𑁂𑀦𑀺𑀫𑁂 𑀬𑁄𑀦𑀓𑀸 𑀦 𑀫𑀗𑁆𑀓𑀼𑀪𑀽𑀢𑀸’’𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀬𑁄𑀦𑀓𑁂 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺, 𑀪𑀡𑁂, 𑀅𑀜𑁆𑀜𑁄 𑀓𑁄𑀘𑀺 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼, 𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀉𑀲𑁆𑀲𑀳𑀢𑀺 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀲𑀫𑀡𑀕𑀡𑀧𑀭𑀺𑀯𑀼𑀢𑁄 𑀲𑀗𑁆𑀖𑀻 𑀕𑀡𑀻 𑀕𑀡𑀸𑀘𑀭𑀺𑀬𑁄 𑀜𑀸𑀢𑁄 𑀬𑀲𑀲𑁆𑀲𑀻 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀦𑀺𑀧𑀼𑀡𑁄 𑀯𑀺𑀜𑁆𑀜𑀽 𑀯𑀺𑀪𑀸𑀯𑀻 𑀯𑀺𑀦𑀻𑀢𑁄 𑀯𑀺𑀲𑀸𑀭𑀤𑁄 𑀩𑀳𑀼𑀲𑁆𑀲𑀼𑀢𑁄 𑀢𑁂𑀧𑀺𑀝𑀓𑁄 𑀯𑁂𑀤𑀕𑀽 𑀧𑀪𑀺𑀦𑁆𑀦𑀩𑀼𑀤𑁆𑀥𑀺𑀫𑀸 𑀆𑀕𑀢𑀸𑀕𑀫𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑁂 𑀧𑀭𑀺𑀬𑀢𑁆𑀢𑀺𑀥𑀭𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀚𑀺𑀦𑀯𑀘𑀦𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀓𑀼𑀲𑀮𑁄 𑀅𑀓𑁆𑀔𑀬𑀯𑀺𑀘𑀺𑀢𑁆𑀭𑀧𑀝𑀺𑀪𑀸𑀦𑁄 𑀘𑀺𑀢𑁆𑀭𑀓𑀣𑀻 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀤𑀼𑀭𑀸𑀲𑀤𑁄 𑀤𑀼𑀧𑁆𑀧𑀲𑀳𑁄 𑀤𑀼𑀭𑀼𑀢𑁆𑀢𑀭𑁄 𑀤𑀼𑀭𑀸𑀯𑀭𑀡𑁄 𑀤𑀼𑀦𑁆𑀦𑀺𑀯𑀸𑀭𑀬𑁄, 𑀲𑀸𑀕𑀭𑁄 𑀯𑀺𑀬 𑀅𑀓𑁆𑀔𑁄𑀪𑁄, 𑀕𑀺𑀭𑀺𑀭𑀸𑀚𑀸 𑀯𑀺𑀬 𑀦𑀺𑀘𑁆𑀘𑀮𑁄, 𑀭𑀡𑀜𑁆𑀚𑀳𑁄 𑀢𑀫𑁄𑀦𑀼𑀤𑁄 𑀧𑀪𑀗𑁆𑀓𑀭𑁄 𑀫𑀳𑀸𑀓𑀣𑀻 𑀧𑀭𑀕𑀡𑀺𑀕𑀡𑀫𑀣𑀦𑁄 𑀧𑀭𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀯𑀼𑀤𑁆𑀥𑀸𑀦𑀁 𑀯𑀺𑀜𑁆𑀜𑀽𑀦𑀁 𑀲𑁄𑀢𑀸𑀯𑀥𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 𑀲𑀦𑁆𑀤𑀲𑁆𑀲𑁂𑀦𑁆𑀢𑁄 𑀦𑀯𑀗𑁆𑀕𑀁 𑀚𑀺𑀦𑀲𑀸𑀲𑀦𑀭𑀢𑀦𑀁, 𑀉𑀧𑀤𑀺𑀲𑀦𑁆𑀢𑁄 𑀥𑀫𑁆𑀫𑀫𑀕𑁆𑀕𑀁, 𑀥𑀸𑀭𑁂𑀦𑁆𑀢𑁄 𑀥𑀫𑁆𑀫𑀧𑁆𑀧𑀚𑁆𑀚𑁄𑀢𑀁, 𑀉𑀲𑁆𑀲𑀸𑀧𑁂𑀦𑁆𑀢𑁄 𑀥𑀫𑁆𑀫𑀬𑀽𑀧𑀁, 𑀬𑀚𑀦𑁆𑀢𑁄 𑀥𑀫𑁆𑀫𑀬𑀸𑀕𑀁, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀥𑀫𑁆𑀫𑀤𑁆𑀥𑀚𑀁, 𑀉𑀲𑁆𑀲𑀸𑀧𑁂𑀦𑁆𑀢𑁄 𑀥𑀫𑁆𑀫𑀓𑁂𑀢𑀼𑀁, 𑀥𑀫𑁂𑀦𑁆𑀢𑁄 [𑀉𑀧𑁆𑀧𑀴𑀸𑀲𑁂𑀦𑁆𑀢𑁄 (𑀲𑀻. 𑀧𑀻.)] 𑀥𑀫𑁆𑀫𑀲𑀗𑁆𑀔𑀁, 𑀆𑀳𑀦𑀦𑁆𑀢𑁄 𑀥𑀫𑁆𑀫𑀪𑁂𑀭𑀺𑀁, 𑀦𑀤𑀦𑁆𑀢𑁄 𑀲𑀻𑀳𑀦𑀸𑀤𑀁, 𑀕𑀚𑁆𑀚𑀦𑁆𑀢𑁄 𑀇𑀦𑁆𑀤𑀕𑀚𑁆𑀚𑀺𑀢𑀁, 𑀫𑀥𑀼𑀭𑀕𑀺𑀭𑀕𑀚𑁆𑀚𑀺𑀢𑁂𑀦 𑀜𑀸𑀡𑀯𑀭𑀯𑀺𑀚𑁆𑀚𑀼𑀚𑀸𑀮𑀧𑀭𑀺𑀯𑁂𑀞𑀺𑀢𑁂𑀦 𑀓𑀭𑀼𑀡𑀸𑀚𑀮𑀪𑀭𑀺𑀢𑁂𑀦 𑀫𑀳𑀢𑀸 𑀥𑀫𑁆𑀫𑀸𑀫𑀢𑀫𑁂𑀖𑁂𑀦 𑀲𑀓𑀮𑀮𑁄𑀓𑀫𑀪𑀺𑀢𑀧𑁆𑀧𑀬𑀦𑁆𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀕𑀮𑀦𑀕𑀭𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀅𑀲𑀻𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑁂 𑀧𑀝𑀺𑀯𑀲𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀭𑀓𑀣𑀻, 𑀦𑀺𑀧𑀼𑀡𑁄 𑀘 𑀯𑀺𑀲𑀸𑀭𑀤𑁄;

𑀲𑀸𑀫𑀬𑀺𑀓𑁄 𑀘 𑀓𑀼𑀲𑀮𑁄, 𑀧𑀝𑀺𑀪𑀸𑀦𑁂 𑀘 𑀓𑁄𑀯𑀺𑀤𑁄.

‘‘𑀢𑁂 𑀘 𑀢𑁂𑀧𑀺𑀝𑀓𑀸 𑀪𑀺𑀓𑁆𑀔𑀽, 𑀧𑀜𑁆𑀘𑀦𑁂𑀓𑀸𑀬𑀺𑀓𑀸𑀧𑀺 𑀘;

𑀘𑀢𑀼𑀦𑁂𑀓𑀸𑀬𑀺𑀓𑀸 𑀘𑁂𑀯, 𑀦𑀸𑀕𑀲𑁂𑀦𑀁 𑀧𑀼𑀭𑀓𑁆𑀔𑀭𑀼𑀁.

‘‘𑀕𑀫𑁆𑀪𑀻𑀭𑀧𑀜𑁆𑀜𑁄 𑀫𑁂𑀥𑀸𑀯𑀻, 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑁄;

𑀉𑀢𑁆𑀢𑀫𑀢𑁆𑀣𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀦𑀸𑀕𑀲𑁂𑀦𑁄 𑀯𑀺𑀲𑀸𑀭𑀤𑁄.

‘‘𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄, 𑀦𑀺𑀧𑀼𑀡𑁂𑀳𑀺 𑀲𑀘𑁆𑀘𑀯𑀸𑀤𑀺𑀪𑀺;

𑀘𑀭𑀦𑁆𑀢𑁄 𑀕𑀸𑀫𑀦𑀺𑀕𑀫𑀁, 𑀲𑀸𑀕𑀮𑀁 𑀉𑀧𑀲𑀗𑁆𑀓𑀫𑀺.

‘‘𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑀲𑁆𑀫𑀺𑀁, 𑀦𑀸𑀕𑀲𑁂𑀦𑁄 𑀢𑀤𑀸 𑀯𑀲𑀺;

𑀓𑀣𑁂𑀢𑀺 𑀲𑁄 𑀫𑀦𑀼𑀲𑁆𑀲𑁂𑀳𑀺, 𑀧𑀩𑁆𑀩𑀢𑁂 𑀓𑁂𑀲𑀭𑀻 𑀬𑀣𑀸’’𑀢𑀺.

𑁨𑁩. 𑀅𑀣 𑀔𑁄 𑀤𑁂𑀯𑀫𑀦𑁆𑀢𑀺𑀬𑁄 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀆𑀕𑀫𑁂𑀳𑀺, 𑀢𑁆𑀯𑀁 𑀫𑀳𑀸𑀭𑀸𑀚; 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀦𑀸𑀕𑀲𑁂𑀦𑁄 𑀦𑀸𑀫 𑀣𑁂𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀯𑀺𑀦𑀻𑀢𑁄 𑀯𑀺𑀲𑀸𑀭𑀤𑁄 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀭𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀲𑁄 𑀏𑀢𑀭𑀳𑀺 𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑁂 𑀧𑀝𑀺𑀯𑀲𑀢𑀺, 𑀕𑀘𑁆𑀙, 𑀢𑁆𑀯𑀁 𑀫𑀳𑀸𑀭𑀸𑀚, 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀲𑁆𑀲𑀼, 𑀉𑀲𑁆𑀲𑀳𑀢𑀺 𑀲𑁄 𑀢𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀓𑀗𑁆𑀔𑀁 𑀧𑀝𑀺𑀯𑀺𑀦𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀲𑀳𑀲𑀸 ‘‘𑀦𑀸𑀕𑀲𑁂𑀦𑁄’’𑀢𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀅𑀳𑀼𑀤𑁂𑀯 𑀪𑀬𑀁, 𑀅𑀳𑀼𑀤𑁂𑀯 𑀙𑀫𑁆𑀪𑀺𑀢𑀢𑁆𑀢𑀁, 𑀅𑀳𑀼𑀤𑁂𑀯 𑀮𑁄𑀫𑀳𑀁𑀲𑁄. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀤𑁂𑀯𑀫𑀦𑁆𑀢𑀺𑀬𑀁 𑀏𑀢𑀤𑀯𑁄𑀘 ‘‘𑀉𑀲𑁆𑀲𑀳𑀢𑀺 𑀪𑁄 𑀦𑀸𑀕𑀲𑁂𑀦𑁄 𑀪𑀺𑀓𑁆𑀔𑀼 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼’’𑀦𑁆𑀢𑀺? ‘‘𑀉𑀲𑁆𑀲𑀳𑀢𑀺, 𑀫𑀳𑀸𑀭𑀸𑀚, 𑀅𑀧𑀺 𑀇𑀦𑁆𑀤𑀬𑀫𑀯𑀭𑀼𑀡𑀓𑀼𑀯𑁂𑀭𑀧𑀚𑀸𑀧𑀢𑀺 𑀲𑀼𑀬𑀸𑀫 𑀲𑀦𑁆𑀢𑀼𑀲𑀺𑀢𑀮𑁄𑀓𑀧𑀸𑀮𑁂𑀳𑀺𑀧𑀺 𑀧𑀺𑀢𑀼𑀧𑀺𑀢𑀸𑀫𑀳𑁂𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑀸𑀧𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁, 𑀓𑀺𑀫𑀗𑁆𑀕𑀁 𑀧𑀦 𑀫𑀦𑀼𑀲𑁆𑀲𑀪𑀽𑀢𑁂𑀦𑀸’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀤𑁂𑀯𑀫𑀦𑁆𑀢𑀺𑀬𑀁 𑀏𑀢𑀤𑀯𑁄𑀘 ‘‘𑀢𑁂𑀦 𑀳𑀺, 𑀢𑁆𑀯𑀁 𑀤𑁂𑀯𑀫𑀦𑁆𑀢𑀺𑀬, 𑀪𑀤𑀦𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑁂𑀲𑁂𑀳𑀻’’𑀢𑀺. ‘‘𑀏𑀯𑀁 𑀤𑁂𑀯𑀸’’𑀢𑀺 𑀔𑁄 𑀤𑁂𑀯𑀫𑀦𑁆𑀢𑀺𑀬𑁄 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 ‘‘𑀭𑀸𑀚𑀸, 𑀪𑀦𑁆𑀢𑁂, 𑀫𑀺𑀮𑀺𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀤𑀲𑁆𑀲𑀦𑀓𑀸𑀫𑁄’’𑀢𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀦𑀸𑀕𑀲𑁂𑀦𑁄 𑀏𑀯𑀫𑀸𑀳 ‘‘𑀢𑁂𑀦 𑀳𑀺 𑀆𑀕𑀘𑁆𑀙𑀢𑀽’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀬𑁄𑀦𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀭𑀣𑀯𑀭𑀫𑀸𑀭𑀼𑀬𑁆𑀳 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀯𑁂𑀡𑀁 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀅𑀲𑀻𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀫𑀡𑁆𑀟𑀮𑀫𑀸𑀴𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀧𑀭𑀺𑀲𑀁 𑀤𑀽𑀭𑀢𑁄𑀯, 𑀤𑀺𑀲𑁆𑀯𑀸𑀦 𑀤𑁂𑀯𑀫𑀦𑁆𑀢𑀺𑀬𑀁 𑀏𑀢𑀤𑀯𑁄𑀘 ‘‘𑀓𑀲𑁆𑀲𑁂𑀲𑀸, 𑀤𑁂𑀯𑀫𑀦𑁆𑀢𑀺𑀬, 𑀫𑀳𑀢𑀻 𑀧𑀭𑀺𑀲𑀸’’𑀢𑀺? ‘‘𑀆𑀬𑀲𑁆𑀫𑀢𑁄 𑀔𑁄, 𑀫𑀳𑀸𑀭𑀸𑀚, 𑀦𑀸𑀕𑀲𑁂𑀦𑀲𑁆𑀲 𑀧𑀭𑀺𑀲𑀸’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀧𑀭𑀺𑀲𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀅𑀳𑀼𑀤𑁂𑀯 𑀪𑀬𑀁, 𑀅𑀳𑀼𑀤𑁂𑀯 𑀙𑀫𑁆𑀪𑀺𑀢𑀢𑁆𑀢𑀁, 𑀅𑀳𑀼𑀤𑁂𑀯 𑀮𑁄𑀫𑀳𑀁𑀲𑁄. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀔𑀕𑁆𑀕𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀕𑀚𑁄, 𑀕𑀭𑀼𑀴𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀦𑀸𑀕𑁄, 𑀅𑀚𑀕𑀭𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀓𑁄𑀢𑁆𑀣𑀼𑀓𑁄 [𑀓𑁄𑀢𑁆𑀣𑀼𑀓𑁄 (𑀲𑀻. 𑀧𑀻.)], 𑀫𑀳𑀺𑀁𑀲𑀧𑀭𑀺𑀯𑀼𑀢𑁄 𑀯𑀺𑀬 𑀅𑀘𑁆𑀙𑁄, 𑀦𑀸𑀕𑀸𑀦𑀼𑀩𑀤𑁆𑀥𑁄 𑀯𑀺𑀬 𑀫𑀡𑁆𑀟𑀽𑀓𑁄, 𑀲𑀤𑁆𑀤𑀽𑀮𑀸𑀦𑀼𑀩𑀤𑁆𑀥𑁄 𑀯𑀺𑀬 𑀫𑀺𑀕𑁄, 𑀅𑀳𑀺𑀢𑀼𑀡𑁆𑀟𑀺𑀓𑀲𑀫𑀸𑀕𑀢𑁄 [𑀅𑀪𑀺𑀕𑀼𑀡𑁆𑀞𑀺𑀓𑀲𑀫𑀸𑀕𑀢𑁄 (𑀲𑀻. 𑀧𑀻.)] 𑀯𑀺𑀬 𑀧𑀦𑁆𑀦𑀕𑁄, 𑀫𑀚𑁆𑀚𑀸𑀭𑀲𑀫𑀸𑀕𑀢𑁄 𑀯𑀺𑀬 𑀉𑀦𑁆𑀤𑀽𑀭𑁄, 𑀪𑀽𑀢𑀯𑁂𑀚𑁆𑀚𑀲𑀫𑀸𑀕𑀢𑁄 𑀯𑀺𑀬 𑀧𑀺𑀲𑀸𑀘𑁄, 𑀭𑀸𑀳𑀼𑀫𑀔𑀕𑀢𑁄 𑀯𑀺𑀬 𑀘𑀦𑁆𑀤𑁄, 𑀧𑀦𑁆𑀦𑀕𑁄 𑀯𑀺𑀬 𑀧𑁂𑀴𑀦𑁆𑀢𑀭𑀕𑀢𑁄, 𑀲𑀓𑀼𑀡𑁄 𑀯𑀺𑀬 𑀧𑀜𑁆𑀚𑀭𑀦𑁆𑀢𑀭𑀕𑀢𑁄, 𑀫𑀘𑁆𑀙𑁄 𑀯𑀺𑀬 𑀚𑀸𑀮𑀦𑁆𑀢𑀭𑀕𑀢𑁄, 𑀯𑀸𑀴𑀯𑀦𑀫𑀦𑀼𑀧𑁆𑀧𑀯𑀺𑀝𑁆𑀞𑁄 𑀯𑀺𑀬 𑀧𑀼𑀭𑀺𑀲𑁄, 𑀯𑁂𑀲𑁆𑀲𑀯𑀡𑀸𑀧𑀭𑀸𑀥𑀺𑀓𑁄 𑀯𑀺𑀬 𑀬𑀓𑁆𑀔𑁄, 𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑁄 𑀯𑀺𑀬 𑀤𑁂𑀯𑀧𑀼𑀢𑁆𑀢𑁄 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀢𑁆𑀭𑀲𑁆𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀯𑀺𑀫𑀦𑁄 𑀤𑀼𑀫𑁆𑀫𑀦𑁄 𑀪𑀦𑁆𑀢𑀘𑀺𑀢𑁆𑀢𑁄 𑀯𑀺𑀧𑀭𑀺𑀡𑀢𑀫𑀸𑀦𑀲𑁄 ‘‘𑀫𑀸 𑀫𑀁 𑀅𑀬𑀁 𑀧𑀭𑀺𑀚𑀦𑁄 𑀧𑀭𑀺𑀪𑀯𑀻’’𑀢𑀺 𑀲𑀢𑀺𑀁 [𑀥𑀻𑀢𑀺𑀁 (𑀲𑀻. 𑀧𑀻.)] 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑁂𑀯𑀫𑀦𑁆𑀢𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄, 𑀢𑁆𑀯𑀁 𑀤𑁂𑀯𑀫𑀦𑁆𑀢𑀺𑀬, 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀫𑀬𑁆𑀳𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺, 𑀅𑀦𑀓𑁆𑀔𑀸𑀢𑀜𑁆𑀜𑁂𑀯𑀸𑀳𑀁 𑀦𑀸𑀕𑀲𑁂𑀦𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀢𑁆𑀯𑀜𑁆𑀜𑁂𑀯 𑀚𑀸𑀦𑀸𑀳𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑀲𑁆𑀲𑀸 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀧𑀼𑀭𑀢𑁄 𑀘𑀢𑁆𑀢𑀸𑀮𑀻𑀲𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀦𑀯𑀓𑀢𑀭𑁄 𑀳𑁄𑀢𑀺 𑀧𑀘𑁆𑀙𑀢𑁄 𑀘𑀢𑁆𑀢𑀸𑀮𑀻𑀲𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀯𑀼𑀟𑁆𑀠𑀢𑀭𑁄.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀲𑀩𑁆𑀩𑀁 𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀫𑀚𑁆𑀛𑀢𑁄 𑀘 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀤𑀽𑀭𑀢𑁄𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀁 𑀓𑁂𑀲𑀭𑀲𑀻𑀳𑀁 𑀯𑀺𑀬 𑀯𑀺𑀕𑀢𑀪𑀬𑀪𑁂𑀭𑀯𑀁 𑀯𑀺𑀕𑀢𑀮𑁄𑀫𑀳𑀁𑀲𑀁 𑀯𑀺𑀕𑀢𑀪𑀬𑀲𑀸𑀭𑀚𑁆𑀚𑀁, 𑀤𑀺𑀲𑁆𑀯𑀸𑀦 𑀆𑀓𑀸𑀭𑁂𑀦𑁂𑀯 𑀅𑀜𑁆𑀜𑀸𑀲𑀺 ‘‘𑀏𑀲𑁄 𑀔𑁄 𑀏𑀢𑁆𑀣 𑀦𑀸𑀕𑀲𑁂𑀦𑁄’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀤𑁂𑀯𑀫𑀦𑁆𑀢𑀺𑀬𑀁 𑀏𑀢𑀤𑀯𑁄𑀘 ‘‘𑀏𑀲𑁄 𑀔𑁄, 𑀤𑁂𑀯𑀫𑀦𑁆𑀢𑀺𑀬, 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚, 𑀏𑀲𑁄 𑀔𑁄 𑀦𑀸𑀕𑀲𑁂𑀦𑁄, 𑀲𑀼𑀝𑁆𑀞𑀼 𑀔𑁄, 𑀢𑁆𑀯𑀁 𑀫𑀳𑀸𑀭𑀸𑀚, 𑀦𑀸𑀕𑀲𑁂𑀦𑀁 𑀅𑀜𑁆𑀜𑀸𑀲𑀻’’𑀢𑀺. 𑀢𑀢𑁄 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀳𑁄𑀲𑀺 ‘‘𑀅𑀦𑀓𑁆𑀔𑀸𑀢𑁄𑀯 𑀫𑀬𑀸 𑀦𑀸𑀕𑀲𑁂𑀦𑁄 𑀅𑀜𑁆𑀜𑀸𑀢𑁄’’𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀤𑀺𑀲𑁆𑀯𑀸𑀯 𑀅𑀳𑀼𑀤𑁂𑀯 𑀪𑀬𑀁, 𑀅𑀳𑀼𑀤𑁂𑀯 𑀙𑀫𑁆𑀪𑀺𑀢𑀢𑁆𑀢𑀁, 𑀅𑀳𑀼𑀤𑁂𑀯 𑀮𑁄𑀫𑀳𑀁𑀲𑁄.

𑀢𑁂𑀦𑀸𑀳𑀼 𑁋

‘‘𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑀁, 𑀲𑀼𑀤𑀦𑁆𑀢𑀁 𑀉𑀢𑁆𑀢𑀫𑁂 𑀤𑀫𑁂;

𑀤𑀺𑀲𑁆𑀯𑀸 𑀭𑀸𑀚𑀸 𑀦𑀸𑀕𑀲𑁂𑀦𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

‘‘𑀓𑀣𑀺𑀢𑀸 [𑀓𑀣𑀺𑀓𑀸 (𑀲𑀻. 𑀧𑀻.)] 𑀫𑀬𑀸 𑀩𑀳𑀽 𑀤𑀺𑀝𑁆𑀞𑀸, 𑀲𑀸𑀓𑀘𑁆𑀙𑀸 𑀑𑀲𑀝𑀸 𑀩𑀳𑀽;

𑀦 𑀢𑀸𑀤𑀺𑀲𑀁 𑀪𑀬𑀁 𑀆𑀲𑀺, 𑀅𑀚𑁆𑀚 𑀢𑀸𑀲𑁄 𑀬𑀣𑀸 𑀫𑀫.

‘‘𑀦𑀺𑀲𑁆𑀲𑀁𑀲𑀬𑀁 𑀧𑀭𑀸𑀚𑀬𑁄, 𑀫𑀫 𑀅𑀚𑁆𑀚 𑀪𑀯𑀺𑀲𑁆𑀲𑀢𑀺;

𑀚𑀬𑁄 𑀘 𑀦𑀸𑀕𑀲𑁂𑀦𑀲𑁆𑀲, 𑀬𑀣𑀸 𑀘𑀺𑀢𑁆𑀢𑀁 𑀦 𑀲𑀡𑁆𑀞𑀺𑀢’’𑀦𑁆𑀢𑀺.

𑀩𑀸𑀳𑀺𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀫𑀺𑀮𑀺𑀦𑁆𑀤𑀧𑀜𑁆𑀳𑁄

𑁧. 𑀫𑀳𑀸𑀯𑀕𑁆𑀕𑁄

𑁧. 𑀧𑀜𑁆𑀜𑀢𑁆𑀢𑀺𑀧𑀜𑁆𑀳𑁄

𑁧. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀦𑀸𑀕𑀲𑁂𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀦𑀸𑀕𑀲𑁂𑀦𑁄 𑀧𑀝𑀺𑀲𑀫𑁆𑀫𑁄𑀤𑀦𑀻𑀬𑁂𑀦𑁂𑀯 [𑀧𑀝𑀺𑀲𑀫𑁆𑀫𑁄𑀤𑀺, 𑀢𑁂𑀦𑁂𑀯 (𑀲𑀻.)] 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀓𑀣𑀁 𑀪𑀤𑀦𑁆𑀢𑁄 𑀜𑀸𑀬𑀢𑀺, 𑀓𑀺𑀦𑁆𑀦𑀸𑀫𑁄𑀲𑀺 𑀪𑀦𑁆𑀢𑁂’’𑀢𑀺? ‘‘𑀦𑀸𑀕𑀲𑁂𑀦𑁄’’𑀢𑀺 𑀔𑁄 𑀅𑀳𑀁, 𑀫𑀳𑀸𑀭𑀸𑀚, 𑀜𑀸𑀬𑀸𑀫𑀺, ‘‘𑀦𑀸𑀕𑀲𑁂𑀦𑁄’’𑀢𑀺 𑀔𑁄 𑀫𑀁, 𑀫𑀳𑀸𑀭𑀸𑀚, 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀧𑀺 𑀘 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫𑀁 𑀓𑀭𑁄𑀦𑁆𑀢𑀺 ‘‘𑀦𑀸𑀕𑀲𑁂𑀦𑁄’’𑀢𑀺 𑀯𑀸 ‘‘𑀲𑀽𑀭𑀲𑁂𑀦𑁄’’𑀢𑀺 𑀯𑀸 ‘‘𑀯𑀻𑀭𑀲𑁂𑀦𑁄’’𑀢𑀺 𑀯𑀸 ‘‘𑀲𑀻𑀳𑀲𑁂𑀦𑁄’’𑀢𑀺 𑀯𑀸, 𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀫𑀢𑁆𑀢𑀁 𑀬𑀤𑀺𑀤𑀁 𑀦𑀸𑀕𑀲𑁂𑀦𑁄𑀢𑀺, 𑀦 𑀳𑁂𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀏𑀯𑀫𑀸𑀳 ‘‘𑀲𑀼𑀡𑀦𑁆𑀢𑀼 𑀫𑁂 𑀪𑁄𑀦𑁆𑀢𑁄 𑀧𑀜𑁆𑀘𑀲𑀢𑀸 𑀬𑁄𑀦𑀓𑀸 𑀅𑀲𑀻𑀢𑀺𑀲𑀳𑀲𑁆𑀲𑀸 𑀘 𑀪𑀺𑀓𑁆𑀔𑀽, 𑀅𑀬𑀁 𑀦𑀸𑀕𑀲𑁂𑀦𑁄 𑀏𑀯𑀫𑀸𑀳 ‘𑀦 𑀳𑁂𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀲𑀘𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀕𑁆𑀕𑀮𑁄 𑀦𑀽𑀧𑀮𑀩𑁆𑀪𑀢𑀺, 𑀓𑁄 𑀘𑀭𑀳𑀺 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑁂𑀢𑀺, 𑀓𑁄 𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀓𑁄 𑀲𑀻𑀮𑀁 𑀭𑀓𑁆𑀔𑀢𑀺, 𑀓𑁄 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀢𑀺, 𑀓𑁄 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀓𑁄 𑀧𑀸𑀡𑀁 𑀳𑀦𑀢𑀺, 𑀓𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀓𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑀺, 𑀓𑁄 𑀫𑀼𑀲𑀸 𑀪𑀡𑀢𑀺, 𑀓𑁄 𑀫𑀚𑁆𑀚𑀁 𑀧𑀺𑀯𑀢𑀺, 𑀓𑁄 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀓𑀼𑀲𑀮𑀁, 𑀦𑀢𑁆𑀣𑀺 𑀅𑀓𑀼𑀲𑀮𑀁, 𑀦𑀢𑁆𑀣𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀲𑀘𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀢𑀼𑀫𑁆𑀳𑁂 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀢𑀲𑁆𑀲𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑁄, 𑀢𑀼𑀫𑁆𑀳𑀸𑀓𑀫𑁆𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀢𑁆𑀣𑀺 𑀆𑀘𑀭𑀺𑀬𑁄, 𑀦𑀢𑁆𑀣𑀺 𑀉𑀧𑀚𑁆𑀛𑀸𑀬𑁄, 𑀦𑀢𑁆𑀣𑀺 𑀉𑀧𑀲𑀫𑁆𑀧𑀤𑀸. ‘𑀦𑀸𑀕𑀲𑁂𑀦𑁄𑀢𑀺 𑀫𑀁, 𑀫𑀳𑀸𑀭𑀸𑀚, 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀫𑀼𑀤𑀸𑀘𑀭𑀦𑁆𑀢𑀻’𑀢𑀺 𑀬𑀁 𑀯𑀤𑁂𑀲𑀺, ‘𑀓𑀢𑀫𑁄 𑀏𑀢𑁆𑀣 𑀦𑀸𑀕𑀲𑁂𑀦𑁄? 𑀓𑀺𑀦𑁆𑀦𑀼 𑀔𑁄, 𑀪𑀦𑁆𑀢𑁂, 𑀓𑁂𑀲𑀸 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀮𑁄𑀫𑀸 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀦𑀔𑀸…𑀧𑁂… 𑀤𑀦𑁆𑀢𑀸…𑀧𑁂… 𑀢𑀘𑁄…𑀧𑁂… 𑀫𑀁𑀲𑀁…𑀧𑁂… 𑀦𑁆𑀳𑀸𑀭𑀼…𑀧𑁂… 𑀅𑀝𑁆𑀞𑀺…𑀧𑁂… 𑀅𑀝𑁆𑀞𑀺𑀫𑀺𑀜𑁆𑀚𑀁…𑀧𑁂… 𑀯𑀓𑁆𑀓𑀁…𑀧𑁂… 𑀳𑀤𑀬𑀁…𑀧𑁂… 𑀬𑀓𑀦𑀁…𑀧𑁂… 𑀓𑀺𑀮𑁄𑀫𑀓𑀁…𑀧𑁂… 𑀧𑀺𑀳𑀓𑀁…𑀧𑁂… 𑀧𑀧𑁆𑀨𑀸𑀲𑀁…𑀧𑁂… 𑀅𑀦𑁆𑀢𑀁…𑀧𑁂… 𑀅𑀦𑁆𑀢𑀕𑀼𑀡𑀁…𑀧𑁂… 𑀉𑀤𑀭𑀺𑀬𑀁…𑀧𑁂… 𑀓𑀭𑀻𑀲𑀁…𑀧𑁂… 𑀧𑀺𑀢𑁆𑀢𑀁…𑀧𑁂… 𑀲𑁂𑀫𑁆𑀳𑀁…𑀧𑁂… 𑀧𑀼𑀩𑁆𑀩𑁄…𑀧𑁂… 𑀮𑁄𑀳𑀺𑀢𑀁…𑀧𑁂… 𑀲𑁂𑀤𑁄…𑀧𑁂… 𑀫𑁂𑀤𑁄…𑀧𑁂… 𑀅𑀲𑁆𑀲𑀼…𑀧𑁂… 𑀯𑀲𑀸…𑀧𑁂… 𑀔𑁂𑀴𑁄…𑀧𑁂… 𑀲𑀺𑀗𑁆𑀖𑀸𑀡𑀺𑀓𑀸…𑀧𑁂… 𑀮𑀲𑀺𑀓𑀸…𑀧𑁂… 𑀫𑀼𑀢𑁆𑀢𑀁…𑀧𑁂… 𑀫𑀢𑁆𑀣𑀓𑁂 𑀫𑀢𑁆𑀣𑀮𑀼𑀗𑁆𑀕𑀁 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀭𑀽𑀧𑀁 𑀦𑀸𑀕𑀲𑁂𑀦𑁄’’𑀢𑀺? ‘‘𑀦𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀯𑁂𑀤𑀦𑀸 𑀦𑀸𑀕𑀲𑁂𑀦𑁄’’𑀢𑀺?‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀜𑁆𑀜𑀸 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀗𑁆𑀔𑀸𑀭𑀸 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀯𑀺𑀜𑁆𑀜𑀸𑀡𑀁 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑀢𑁆𑀭 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑀫𑀳𑀁 𑀪𑀦𑁆𑀢𑁂, 𑀧𑀼𑀘𑁆𑀙𑀦𑁆𑀢𑁄 𑀧𑀼𑀘𑁆𑀙𑀦𑁆𑀢𑁄 𑀦 𑀧𑀲𑁆𑀲𑀸𑀫𑀺 𑀦𑀸𑀕𑀲𑁂𑀦𑀁. 𑀦𑀸𑀕𑀲𑁂𑀦𑀲𑀤𑁆𑀤𑁄 𑀬𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀦𑀸𑀕𑀲𑁂𑀦𑁄’’𑀢𑀺? ‘‘𑀦 𑀳𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀧𑀦𑁂𑀢𑁆𑀣 𑀦𑀸𑀕𑀲𑁂𑀦𑁄, 𑀅𑀮𑀺𑀓𑀁 𑀢𑁆𑀯𑀁, 𑀪𑀦𑁆𑀢𑁂, 𑀪𑀸𑀲𑀲𑀺 𑀫𑀼𑀲𑀸𑀯𑀸𑀤𑀁, 𑀦𑀢𑁆𑀣𑀺 𑀦𑀸𑀕𑀲𑁂𑀦𑁄’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀫𑀺𑀮𑀺𑀦𑁆𑀤𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 ‘‘𑀢𑁆𑀯𑀁 𑀔𑁄𑀲𑀺, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑁄, 𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀢𑀢𑁆𑀢𑀸𑀬 𑀪𑀽𑀫𑀺𑀬𑀸 𑀉𑀡𑁆𑀳𑀸𑀬 𑀯𑀸𑀮𑀺𑀓𑀸𑀬 𑀔𑀭𑀸𑀬 𑀲𑀓𑁆𑀔𑀭𑀓𑀣𑀮𑀺𑀓𑀸𑀬 [𑀔𑀭𑀸 𑀲𑀓𑁆𑀔𑀭𑀓𑀞𑀮𑀯𑀸𑀮𑀺𑀓𑀸 (𑀲𑀻. 𑀧𑀻.)] 𑀫𑀤𑁆𑀤𑀺𑀢𑁆𑀯𑀸 𑀧𑀸𑀤𑁂𑀦𑀸𑀕𑀘𑁆𑀙𑀦𑁆𑀢𑀲𑁆𑀲 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀺, 𑀓𑀸𑀬𑁄 𑀓𑀺𑀮𑀫𑀢𑀺, 𑀘𑀺𑀢𑁆𑀢𑀁 𑀉𑀧𑀳𑀜𑁆𑀜𑀢𑀺, 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀁 𑀦𑀼 𑀔𑁄 𑀢𑁆𑀯𑀁 𑀧𑀸𑀤𑁂𑀦𑀸𑀕𑀢𑁄𑀲𑀺, 𑀉𑀤𑀸𑀳𑀼 𑀯𑀸𑀳𑀦𑁂𑀦𑀸’’𑀢𑀺? ‘‘𑀦𑀸𑀳𑀁, 𑀪𑀦𑁆𑀢𑁂, 𑀧𑀸𑀤𑁂𑀦𑀸𑀕𑀘𑁆𑀙𑀸𑀫𑀺, 𑀭𑀣𑁂𑀦𑀸𑀳𑀁 𑀆𑀕𑀢𑁄𑀲𑁆𑀫𑀻’’𑀢𑀺. ‘‘𑀲𑀘𑁂, 𑀢𑁆𑀯𑀁 𑀫𑀳𑀸𑀭𑀸𑀚, 𑀭𑀣𑁂𑀦𑀸𑀕𑀢𑁄𑀲𑀺, 𑀭𑀣𑀁 𑀫𑁂 𑀆𑀭𑁄𑀘𑁂𑀳𑀺, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀈𑀲𑀸 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀅𑀓𑁆𑀔𑁄 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀘𑀓𑁆𑀓𑀸𑀦𑀺 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀭𑀣𑀧𑀜𑁆𑀚𑀭𑀁 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀭𑀣𑀤𑀡𑁆𑀟𑀓𑁄 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑀼𑀕𑀁 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀭𑀲𑁆𑀫𑀺𑀬𑁄 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀧𑀢𑁄𑀤𑀮𑀝𑁆𑀞𑀺 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀈𑀲𑀸𑀅𑀓𑁆𑀔𑀘𑀓𑁆𑀓𑀭𑀣𑀧𑀜𑁆𑀚𑀭𑀭𑀣𑀤𑀡𑁆𑀟𑀬𑀼𑀕𑀭𑀲𑁆𑀫𑀺𑀧𑀢𑁄𑀤𑀸 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀅𑀜𑁆𑀜𑀢𑁆𑀭 𑀈𑀲𑀸𑀅𑀓𑁆𑀔𑀘𑀓𑁆𑀓𑀭𑀣𑀧𑀜𑁆𑀚𑀭𑀭𑀣𑀤𑀡𑁆𑀟𑀬𑀼𑀕𑀭𑀲𑁆𑀫𑀺𑀧𑀢𑁄𑀤𑀸 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀢𑀫𑀳𑀁, 𑀫𑀳𑀸𑀭𑀸𑀚, 𑀧𑀼𑀘𑁆𑀙𑀦𑁆𑀢𑁄 𑀧𑀼𑀘𑁆𑀙𑀦𑁆𑀢𑁄 𑀦 𑀧𑀲𑁆𑀲𑀸𑀫𑀺 𑀭𑀣𑀁. 𑀭𑀣𑀲𑀤𑁆𑀤𑁄𑀬𑁂𑀯 𑀦𑀼 𑀔𑁄, 𑀫𑀳𑀸𑀭𑀸𑀚, 𑀭𑀣𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁄 𑀧𑀦𑁂𑀢𑁆𑀣 𑀭𑀣𑁄, 𑀅𑀮𑀺𑀓𑀁, 𑀢𑁆𑀯𑀁 𑀫𑀳𑀸𑀭𑀸𑀚, 𑀪𑀸𑀲𑀲𑀺 𑀫𑀼𑀲𑀸𑀯𑀸𑀤𑀁, 𑀦𑀢𑁆𑀣𑀺 𑀭𑀣𑁄, 𑀢𑁆𑀯𑀁𑀲𑀺, 𑀫𑀳𑀸𑀭𑀸𑀚, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸, 𑀓𑀲𑁆𑀲 𑀧𑀦 𑀢𑁆𑀯𑀁 𑀪𑀸𑀬𑀺𑀢𑁆𑀯𑀸 𑀫𑀼𑀲𑀸𑀯𑀸𑀤𑀁 𑀪𑀸𑀲𑀲𑀺, 𑀲𑀼𑀡𑀦𑁆𑀢𑀼 𑀫𑁂 𑀪𑁄𑀦𑁆𑀢𑁄 𑀧𑀜𑁆𑀘𑀲𑀢𑀸 𑀬𑁄𑀦𑀓𑀸 𑀅𑀲𑀻𑀢𑀺𑀲𑀳𑀲𑁆𑀲𑀸 𑀘 𑀪𑀺𑀓𑁆𑀔𑀽, 𑀅𑀬𑀁 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀏𑀯𑀫𑀸𑀳 ‘𑀭𑀣𑁂𑀦𑀸𑀳𑀁 𑀆𑀕𑀢𑁄𑀲𑁆𑀫𑀻’𑀢𑀺, 𑀲𑀘𑁂 𑀢𑁆𑀯𑀁, 𑀫𑀳𑀸𑀭𑀸𑀚, 𑀭𑀣𑁂𑀦𑀸𑀕𑀢𑁄‘𑀲𑀺, 𑀭𑀣𑀁 𑀫𑁂 𑀆𑀭𑁄𑀘𑁂𑀳𑀻’𑀢𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀭𑀣𑀁 𑀦 𑀲𑀫𑁆𑀧𑀸𑀤𑁂𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀲𑀢𑀸 𑀬𑁄𑀦𑀓𑀸 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀫𑀺𑀮𑀺𑀦𑁆𑀤𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 ‘‘𑀇𑀤𑀸𑀦𑀺 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀲𑀓𑁆𑀓𑁄𑀦𑁆𑀢𑁄 𑀪𑀸𑀲𑀲𑁆𑀲𑀽’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀦𑀸𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀼𑀲𑀸 𑀪𑀡𑀸𑀫𑀺, 𑀈𑀲𑀜𑁆𑀘 𑀧𑀝𑀺𑀘𑁆𑀘 𑀅𑀓𑁆𑀔𑀜𑁆𑀘 𑀧𑀝𑀺𑀘𑁆𑀘 𑀘𑀓𑁆𑀓𑀸𑀦𑀺 𑀘 𑀧𑀝𑀺𑀘𑁆𑀘 𑀭𑀣𑀧𑀜𑁆𑀚𑀭𑀜𑁆𑀘 𑀧𑀝𑀺𑀘𑁆𑀘 𑀭𑀣𑀤𑀡𑁆𑀟𑀓𑀜𑁆𑀘 𑀧𑀝𑀺𑀘𑁆𑀘 ‘𑀭𑀣𑁄’𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀫𑀢𑁆𑀢𑀁 𑀧𑀯𑀢𑁆𑀢𑀢𑀻’’𑀢𑀺.

‘‘𑀲𑀸𑀥𑀼 𑀔𑁄, 𑀢𑁆𑀯𑀁 𑀫𑀳𑀸𑀭𑀸𑀚, 𑀭𑀣𑀁 𑀚𑀸𑀦𑀸𑀲𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀬𑁆𑀳𑀫𑁆𑀧𑀺 𑀓𑁂𑀲𑁂 𑀘 𑀧𑀝𑀺𑀘𑁆𑀘 𑀮𑁄𑀫𑁂 𑀘 𑀧𑀝𑀺𑀘𑁆𑀘…𑀧𑁂… 𑀫𑀢𑁆𑀣𑀓𑁂 𑀫𑀢𑁆𑀣𑀮𑀼𑀗𑁆𑀕𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑀜𑁆𑀘 𑀧𑀝𑀺𑀘𑁆𑀘 𑀯𑁂𑀤𑀦𑀜𑁆𑀘 𑀧𑀝𑀺𑀘𑁆𑀘 𑀲𑀜𑁆𑀜𑀜𑁆𑀘 𑀧𑀝𑀺𑀘𑁆𑀘 𑀲𑀗𑁆𑀔𑀸𑀭𑁂 𑀘 𑀧𑀝𑀺𑀘𑁆𑀘 𑀯𑀺𑀜𑁆𑀜𑀸𑀡𑀜𑁆𑀘 𑀧𑀝𑀺𑀘𑁆𑀘 ‘𑀦𑀸𑀕𑀲𑁂𑀦𑁄’𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀫𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀧𑀭𑀫𑀢𑁆𑀣𑀢𑁄 𑀧𑀦𑁂𑀢𑁆𑀣 𑀧𑀼𑀕𑁆𑀕𑀮𑁄 𑀦𑀽𑀧𑀮𑀩𑁆𑀪𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀯𑀚𑀺𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑁋

‘‘‘𑀬𑀣𑀸 𑀳𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 ‘‘𑀲𑀢𑁆𑀢𑁄’’𑀢𑀺 𑀲𑀫𑁆𑀫𑀼𑀢𑀻’’’𑀢𑀺 [𑀧𑀲𑁆𑀲 𑀲𑀁. 𑀦𑀺. 𑁧.𑁧𑁭𑁧].

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀘𑀺𑀢𑁆𑀭𑀸𑀦𑀺 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀺 𑀯𑀺𑀲𑀚𑁆𑀚𑀺𑀢𑀸𑀦𑀺, 𑀬𑀤𑀺 𑀩𑀼𑀤𑁆𑀥𑁄 𑀢𑀺𑀝𑁆𑀞𑁂𑀬𑁆𑀬 𑀲𑀸𑀥𑀼𑀓𑀸𑀭𑀁 𑀤𑀤𑁂𑀬𑁆𑀬, 𑀲𑀸𑀥𑀼 𑀲𑀸𑀥𑀼 𑀦𑀸𑀕𑀲𑁂𑀦, 𑀅𑀢𑀺𑀘𑀺𑀢𑁆𑀭𑀸𑀦𑀺 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀺 𑀯𑀺𑀲𑀚𑁆𑀚𑀺𑀢𑀸𑀦𑀻’’𑀢𑀺.

𑀧𑀜𑁆𑀜𑀢𑁆𑀢𑀺𑀧𑀜𑁆𑀳𑁄 𑀧𑀞𑀫𑁄.

𑁨. 𑀯𑀲𑁆𑀲𑀕𑀡𑀦𑀧𑀜𑁆𑀳𑁄

𑁨. ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺? ‘‘𑀲𑀢𑁆𑀢𑀯𑀲𑁆𑀲𑁄𑀳𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁂 𑀢𑁂, 𑀪𑀦𑁆𑀢𑁂, 𑀲𑀢𑁆𑀢, 𑀢𑁆𑀯𑀁 𑀯𑀸 𑀲𑀢𑁆𑀢, 𑀕𑀡𑀦𑀸 𑀯𑀸 𑀲𑀢𑁆𑀢𑀸’’𑀢𑀺?

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀲𑁆𑀲 𑀧𑀣𑀯𑀺𑀬𑀁 𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀉𑀤𑀓𑀫𑀡𑀺𑀓𑁂 𑀘 𑀙𑀸𑀬𑀸 𑀤𑀺𑀲𑁆𑀲𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀫𑀺𑀮𑀺𑀦𑁆𑀤𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 ‘‘𑀅𑀬𑀁 𑀢𑁂, 𑀫𑀳𑀸𑀭𑀸𑀚, 𑀙𑀸𑀬𑀸 𑀧𑀣𑀯𑀺𑀬𑀁 𑀉𑀤𑀓𑀫𑀡𑀺𑀓𑁂 𑀘 𑀤𑀺𑀲𑁆𑀲𑀢𑀺, 𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀢𑁆𑀯𑀁 𑀯𑀸 𑀭𑀸𑀚𑀸, 𑀙𑀸𑀬𑀸 𑀯𑀸 𑀭𑀸𑀚𑀸’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀸𑀚𑀸, 𑀦𑀸𑀬𑀁 𑀙𑀸𑀬𑀸 𑀭𑀸𑀚𑀸, 𑀫𑀁 𑀧𑀦 𑀦𑀺𑀲𑁆𑀲𑀸𑀬 𑀙𑀸𑀬𑀸 𑀧𑀯𑀢𑁆𑀢𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑀲𑁆𑀲𑀸𑀦𑀁 𑀕𑀡𑀦𑀸 𑀲𑀢𑁆𑀢, 𑀦 𑀧𑀦𑀸𑀳𑀁 𑀲𑀢𑁆𑀢, 𑀫𑀁 𑀧𑀦 𑀦𑀺𑀲𑁆𑀲𑀸𑀬 𑀲𑀢𑁆𑀢 𑀧𑀯𑀢𑁆𑀢𑀢𑀺, 𑀙𑀸𑀬𑀽𑀧𑀫𑀁 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀘𑀺𑀢𑁆𑀭𑀸𑀦𑀺 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀺 𑀯𑀺𑀲𑀚𑁆𑀚𑀺𑀢𑀸𑀦𑀻’’𑀢𑀺.

𑀯𑀲𑁆𑀲𑀕𑀡𑀦𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀯𑀻𑀫𑀁𑀲𑀦𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀮𑁆𑀮𑀧𑀺𑀲𑁆𑀲𑀲𑀺 𑀫𑀬𑀸 𑀲𑀤𑁆𑀥𑀺’’𑀦𑁆𑀢𑀺? ‘‘𑀲𑀘𑁂, 𑀢𑁆𑀯𑀁 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑀯𑀸𑀤𑀁 [𑀧𑀡𑁆𑀟𑀺𑀢𑀯𑀸𑀤𑀸 (𑀲𑀻. 𑀧𑀻.)] 𑀲𑀮𑁆𑀮𑀧𑀺𑀲𑁆𑀲𑀲𑀺 𑀲𑀮𑁆𑀮𑀧𑀺𑀲𑁆𑀲𑀸𑀫𑀺, 𑀲𑀘𑁂 𑀧𑀦 𑀭𑀸𑀚𑀯𑀸𑀤𑀁 𑀲𑀮𑁆𑀮𑀧𑀺𑀲𑁆𑀲𑀲𑀺 𑀦 𑀲𑀮𑁆𑀮𑀧𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀡𑁆𑀟𑀺𑀢𑀸 𑀲𑀮𑁆𑀮𑀧𑀦𑁆𑀢𑀻’’𑀢𑀺? ‘‘𑀧𑀡𑁆𑀟𑀺𑀢𑀸𑀦𑀁 𑀔𑁄, 𑀫𑀳𑀸𑀭𑀸𑀚, 𑀲𑀮𑁆𑀮𑀸𑀧𑁂 𑀆𑀯𑁂𑀞𑀦𑀫𑁆𑀧𑀺 𑀓𑀬𑀺𑀭𑀢𑀺, 𑀦𑀺𑀩𑁆𑀩𑁂𑀞𑀦𑀫𑁆𑀧𑀺 𑀓𑀬𑀺𑀭𑀢𑀺, 𑀦𑀺𑀕𑁆𑀕𑀳𑁄𑀧𑀺 𑀓𑀬𑀺𑀭𑀢𑀺, 𑀧𑀝𑀺𑀓𑀫𑁆𑀫𑀫𑁆𑀧𑀺 𑀓𑀬𑀺𑀭𑀢𑀺, 𑀯𑀺𑀲𑁆𑀲𑀸𑀲𑁄𑀧𑀺 [𑀯𑀺𑀲𑁂𑀲𑁄𑀧𑀺 (𑀲𑀻. 𑀧𑀻.)] 𑀓𑀬𑀺𑀭𑀢𑀺, 𑀧𑀝𑀺𑀯𑀺𑀲𑁆𑀲𑀸𑀲𑁄𑀧𑀺 𑀓𑀬𑀺𑀭𑀢𑀺, 𑀦 𑀘 𑀢𑁂𑀦 𑀧𑀡𑁆𑀟𑀺𑀢𑀸 𑀓𑀼𑀧𑁆𑀧𑀦𑁆𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑀸 𑀲𑀮𑁆𑀮𑀧𑀦𑁆𑀢𑀻’’𑀢𑀺. ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀭𑀸𑀚𑀸𑀦𑁄 𑀲𑀮𑁆𑀮𑀧𑀦𑁆𑀢𑀻’’𑀢𑀺? ‘‘𑀭𑀸𑀚𑀸𑀦𑁄 𑀔𑁄, 𑀫𑀳𑀸𑀭𑀸𑀚, 𑀲𑀮𑁆𑀮𑀸𑀧𑁂 𑀏𑀓𑀁 𑀯𑀢𑁆𑀣𑀼𑀁 𑀧𑀝𑀺𑀚𑀸𑀦𑀦𑁆𑀢𑀺, 𑀬𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀮𑁄𑀫𑁂𑀢𑀺, 𑀢𑀲𑁆𑀲 𑀤𑀡𑁆𑀟𑀁 𑀆𑀡𑀸𑀧𑁂𑀦𑁆𑀢𑀺 ‘𑀇𑀫𑀲𑁆𑀲 𑀤𑀡𑁆𑀟𑀁 𑀧𑀡𑁂𑀣𑀸’𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀭𑀸𑀚𑀸𑀦𑁄 𑀲𑀮𑁆𑀮𑀧𑀦𑁆𑀢𑀻’’𑀢𑀺. ‘‘𑀧𑀡𑁆𑀟𑀺𑀢𑀯𑀸𑀤𑀸𑀳𑀁, 𑀪𑀦𑁆𑀢𑁂, 𑀲𑀮𑁆𑀮𑀧𑀺𑀲𑁆𑀲𑀸𑀫𑀺, 𑀦𑁄 𑀭𑀸𑀚𑀯𑀸𑀤𑀁, 𑀯𑀺𑀲𑁆𑀲𑀝𑁆𑀞𑁄 𑀪𑀤𑀦𑁆𑀢𑁄 𑀲𑀮𑁆𑀮𑀧𑀢𑀼 𑀬𑀣𑀸 𑀪𑀺𑀓𑁆𑀔𑀼𑀦𑀸 𑀯𑀸 𑀲𑀸𑀫𑀡𑁂𑀭𑁂𑀦 𑀯𑀸 𑀉𑀧𑀸𑀲𑀓𑁂𑀦 𑀯𑀸 𑀆𑀭𑀸𑀫𑀺𑀓𑁂𑀦 𑀯𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀺, 𑀏𑀯𑀁 𑀯𑀺𑀲𑁆𑀲𑀝𑁆𑀞𑁄 𑀪𑀤𑀦𑁆𑀢𑁄 𑀲𑀮𑁆𑀮𑀧𑀢𑀼 𑀫𑀸 𑀪𑀸𑀬𑀢𑀽’’𑀢𑀺. ‘‘𑀲𑀼𑀝𑁆𑀞𑀼 𑀫𑀳𑀸𑀭𑀸𑀚𑀸’’𑀢𑀺 𑀣𑁂𑀭𑁄 𑀅𑀩𑁆𑀪𑀸𑀦𑀼𑀫𑁄𑀤𑀺.

𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. ‘‘𑀧𑀼𑀘𑁆𑀙 𑀫𑀳𑀸𑀭𑀸𑀚𑀸’’𑀢𑀺. ‘‘𑀧𑀼𑀘𑁆𑀙𑀺𑀢𑁄𑀲𑀺 𑀫𑁂 𑀪𑀦𑁆𑀢𑁂’’𑀢𑀺. ‘‘𑀯𑀺𑀲𑀚𑁆𑀚𑀺𑀢𑀁 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑀬𑀸 𑀯𑀺𑀲𑀚𑁆𑀚𑀺𑀢’’𑀦𑁆𑀢𑀺? ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀢𑀬𑀸 𑀧𑀼𑀘𑁆𑀙𑀺𑀢’’𑀦𑁆𑀢𑀺.

𑀯𑀻𑀫𑀁𑀲𑀦𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀅𑀦𑀦𑁆𑀢𑀓𑀸𑀬𑀧𑀜𑁆𑀳𑁄

𑁪. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 ‘‘𑀧𑀡𑁆𑀟𑀺𑀢𑁄 𑀔𑁄 𑀅𑀬𑀁 𑀪𑀺𑀓𑁆𑀔𑀼 𑀧𑀝𑀺𑀩𑀮𑁄 𑀫𑀬𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁, 𑀩𑀳𑀼𑀓𑀸𑀦𑀺 𑀘 𑀫𑁂 𑀞𑀸𑀦𑀸𑀦𑀺 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀅𑀧𑀼𑀘𑁆𑀙𑀺𑀢𑀸𑀦𑀺 𑀬𑁂𑀯 𑀢𑀸𑀦𑀺 𑀞𑀸𑀦𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀣 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀫𑀺𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀲𑁆𑀯𑁂 𑀅𑀦𑁆𑀢𑁂𑀧𑀼𑀭𑁂 𑀲𑀮𑁆𑀮𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀤𑁂𑀯𑀫𑀦𑁆𑀢𑀺𑀬𑀁 𑀏𑀢𑀤𑀯𑁄𑀘 ‘‘𑀢𑁂𑀦 𑀳𑀺, 𑀢𑁆𑀯𑀁 𑀤𑁂𑀯𑀫𑀦𑁆𑀢𑀺𑀬, 𑀪𑀤𑀦𑁆𑀢𑀲𑁆𑀲 𑀆𑀭𑁄𑀘𑁂𑀬𑁆𑀬𑀸𑀲𑀺 ‘𑀲𑁆𑀯𑁂 𑀅𑀦𑁆𑀢𑁂𑀧𑀼𑀭𑁂 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀸𑀧𑁄 𑀪𑀯𑀺𑀲𑁆𑀲𑀢𑀻’’’𑀢𑀺. 𑀇𑀤𑀁 𑀯𑀢𑁆𑀯𑀸 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀉𑀝𑁆𑀞𑀸𑀬𑀸𑀲𑀦𑀸 𑀣𑁂𑀭𑀁 𑀦𑀸𑀕𑀲𑁂𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀭𑀣𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 ‘‘𑀦𑀸𑀕𑀲𑁂𑀦𑁄 𑀦𑀸𑀕𑀲𑁂𑀦𑁄’’𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀤𑁂𑀯𑀫𑀦𑁆𑀢𑀺𑀬𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀭𑀸𑀚𑀸, 𑀪𑀦𑁆𑀢𑁂, 𑀫𑀺𑀮𑀺𑀦𑁆𑀤𑁄 𑀏𑀯𑀫𑀸𑀳 ‘𑀲𑁆𑀯𑁂 𑀅𑀦𑁆𑀢𑁂𑀧𑀼𑀭𑁂 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀸𑀧𑁄 𑀪𑀯𑀺𑀲𑁆𑀲𑀢𑀻’’’𑀢𑀺. ‘‘𑀲𑀼𑀝𑁆𑀞𑀽’’𑀢𑀺 𑀣𑁂𑀭𑁄 𑀅𑀩𑁆𑀪𑀸𑀦𑀼𑀫𑁄𑀤𑀺. 𑀅𑀣 𑀔𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀤𑁂𑀯𑀫𑀦𑁆𑀢𑀺𑀬𑁄 𑀘 𑀅𑀦𑀦𑁆𑀢𑀓𑀸𑀬𑁄 𑀘 𑀫𑀗𑁆𑀓𑀼𑀭𑁄 𑀘 𑀲𑀩𑁆𑀩𑀤𑀺𑀦𑁆𑀦𑁄 𑀘 𑀬𑁂𑀦 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 ‘‘𑀆𑀕𑀘𑁆𑀙𑀢𑀼, 𑀫𑀳𑀸𑀭𑀸𑀚, 𑀪𑀤𑀦𑁆𑀢𑁄 𑀦𑀸𑀕𑀲𑁂𑀦𑁄’’𑀢𑀺? ‘‘𑀆𑀫 𑀆𑀕𑀘𑁆𑀙𑀢𑀽’’𑀢𑀺. ‘‘𑀓𑀺𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’𑀢𑀺? ‘‘𑀬𑀢𑁆𑀢𑀓𑁂 𑀪𑀺𑀓𑁆𑀔𑀽 𑀇𑀘𑁆𑀙𑀢𑀺, 𑀢𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’𑀢𑀺.

𑀅𑀣 𑀔𑁄 𑀲𑀩𑁆𑀩𑀤𑀺𑀦𑁆𑀦𑁄 𑀆𑀳 ‘‘𑀆𑀕𑀘𑁆𑀙𑀢𑀼, 𑀫𑀳𑀸𑀭𑀸𑀚, 𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺’’𑀦𑁆𑀢𑀺, 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀭𑀸𑀚𑀸 𑀆𑀳 ‘‘𑀬𑀢𑁆𑀢𑀓𑁂 𑀪𑀺𑀓𑁆𑀔𑀽 𑀇𑀘𑁆𑀙𑀢𑀺, 𑀢𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀩𑁆𑀩𑀤𑀺𑀦𑁆𑀦𑁄 𑀆𑀳 ‘‘𑀆𑀕𑀘𑁆𑀙𑀢𑀼, 𑀫𑀳𑀸𑀭𑀸𑀚, 𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀭𑀸𑀚𑀸 𑀆𑀳 ‘‘𑀬𑀢𑁆𑀢𑀓𑁂 𑀪𑀺𑀓𑁆𑀔𑀽 𑀇𑀘𑁆𑀙𑀢𑀺, 𑀢𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀩𑁆𑀩𑀤𑀺𑀦𑁆𑀦𑁄 𑀆𑀳 ‘‘𑀆𑀕𑀘𑁆𑀙𑀢𑀼, 𑀫𑀳𑀸𑀭𑀸𑀚, 𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺’’𑀦𑁆𑀢𑀺. ‘‘𑀲𑀩𑁆𑀩𑁄 𑀧𑀦𑀸𑀬𑀁 𑀲𑀓𑁆𑀓𑀸𑀭𑁄 𑀧𑀝𑀺𑀬𑀸𑀤𑀺𑀢𑁄, 𑀅𑀳𑀁 𑀪𑀡𑀸𑀫𑀺 ‘𑀬𑀢𑁆𑀢𑀓𑁂 𑀪𑀺𑀓𑁆𑀔𑀽 𑀇𑀘𑁆𑀙𑀢𑀺, 𑀢𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’𑀢𑀺. 𑀅𑀬𑀁, 𑀪𑀡𑁂 𑀲𑀩𑁆𑀩𑀤𑀺𑀦𑁆𑀦𑁄, 𑀅𑀜𑁆𑀜𑀣𑀸 𑀪𑀡𑀢𑀺, 𑀓𑀺𑀁 𑀦𑀼 𑀫𑀬𑀁 𑀦𑀧𑁆𑀧𑀝𑀺𑀩𑀮𑀸 𑀪𑀺𑀓𑁆𑀔𑀽𑀦𑀁 𑀪𑁄𑀚𑀦𑀁 𑀤𑀸𑀢𑀼’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑀩𑁆𑀩𑀤𑀺𑀦𑁆𑀦𑁄 𑀫𑀗𑁆𑀓𑀼 𑀅𑀳𑁄𑀲𑀺.

𑀅𑀣 𑀔𑁄 𑀤𑁂𑀯𑀫𑀦𑁆𑀢𑀺𑀬𑁄 𑀘 𑀅𑀦𑀦𑁆𑀢𑀓𑀸𑀬𑁄 𑀘 𑀫𑀗𑁆𑀓𑀼𑀭𑁄 𑀘 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘𑀼𑀁 ‘‘𑀭𑀸𑀚𑀸, 𑀪𑀦𑁆𑀢𑁂, 𑀫𑀺𑀮𑀺𑀦𑁆𑀤𑁄 𑀏𑀯𑀫𑀸𑀳 ‘𑀬𑀢𑁆𑀢𑀓𑁂 𑀪𑀺𑀓𑁆𑀔𑀽 𑀇𑀘𑁆𑀙𑀢𑀺, 𑀢𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀢𑀽’’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀲𑀻𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀸𑀕𑀮𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀅𑀦𑀦𑁆𑀢𑀓𑀸𑀬𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀦𑀺𑀲𑁆𑀲𑀸𑀬 𑀕𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀦𑀸𑀕𑀲𑁂𑀦𑁄’𑀢𑀺, 𑀓𑀢𑀫𑁄 𑀏𑀢𑁆𑀣, 𑀦𑀸𑀕𑀲𑁂𑀦𑁄’’𑀢𑀺? 𑀣𑁂𑀭𑁄 𑀆𑀳 ‘‘𑀓𑁄 𑀧𑀦𑁂𑀢𑁆𑀣 ‘𑀦𑀸𑀕𑀲𑁂𑀦𑁄’𑀢𑀺 𑀫𑀜𑁆𑀜𑀲𑀻’’𑀢𑀺? ‘‘𑀬𑁄 𑀲𑁄, 𑀪𑀦𑁆𑀢𑁂, 𑀅𑀩𑁆𑀪𑀦𑁆𑀢𑀭𑁂 𑀯𑀸𑀢𑁄 𑀚𑀻𑀯𑁄 𑀧𑀯𑀺𑀲𑀢𑀺 𑀘 𑀦𑀺𑀓𑁆𑀔𑀫𑀢𑀺 𑀘, 𑀲𑁄 ‘𑀦𑀸𑀕𑀲𑁂𑀦𑁄’𑀢𑀺 𑀫𑀜𑁆𑀜𑀸𑀫𑀻’’𑀢𑀺. ‘‘𑀬𑀤𑀺 𑀧𑀦𑁂𑀲𑁄 𑀯𑀸𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀧𑁆𑀧𑀯𑀺𑀲𑁂𑀬𑁆𑀬, 𑀧𑀯𑀺𑀲𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑁂𑀬𑁆𑀬, 𑀚𑀻𑀯𑁂𑀬𑁆𑀬 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑁂 𑀧𑀦𑀺𑀫𑁂 𑀲𑀗𑁆𑀔𑀥𑀫𑀓𑀸 𑀲𑀗𑁆𑀔𑀁 𑀥𑀫𑁂𑀦𑁆𑀢𑀺, 𑀢𑁂𑀲𑀁 𑀯𑀸𑀢𑁄 𑀧𑀼𑀦 𑀧𑀯𑀺𑀲𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑁂 𑀧𑀦𑀺𑀫𑁂 𑀯𑀁𑀲𑀥𑀫𑀓𑀸 𑀯𑀁𑀲𑀁 𑀥𑀫𑁂𑀦𑁆𑀢𑀺, 𑀢𑁂𑀲𑀁 𑀯𑀸𑀢𑁄 𑀧𑀼𑀦 𑀧𑀯𑀺𑀲𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑁂 𑀧𑀦𑀺𑀫𑁂 𑀲𑀺𑀗𑁆𑀕𑀥𑀫𑀓𑀸 𑀲𑀺𑀗𑁆𑀕𑀁 𑀥𑀫𑁂𑀦𑁆𑀢𑀺, 𑀢𑁂𑀲𑀁 𑀯𑀸𑀢𑁄 𑀧𑀼𑀦 𑀧𑀯𑀺𑀲𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀅𑀣 𑀓𑀺𑀲𑁆𑀲 𑀧𑀦 𑀢𑁂𑀦 𑀦 𑀫𑀭𑀦𑁆𑀢𑀻’’𑀢𑀺. ‘‘𑀦𑀸𑀳𑀁 𑀧𑀝𑀺𑀩𑀮𑁄 𑀢𑀬𑀸 𑀯𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁, 𑀲𑀸𑀥𑀼, 𑀪𑀦𑁆𑀢𑁂, 𑀅𑀢𑁆𑀣𑀁 𑀚𑀧𑁆𑀧𑁂𑀳𑀻’’𑀢𑀺. ‘‘𑀦𑁂𑀲𑁄 𑀚𑀻𑀯𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀸𑀫𑁂𑀢𑁂 𑀓𑀸𑀬𑀲𑀗𑁆𑀔𑀸𑀭𑀸’’𑀢𑀺 𑀣𑁂𑀭𑁄 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀅𑀣 𑀅𑀦𑀦𑁆𑀢𑀓𑀸𑀬𑁄 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀻𑀢𑀺.

𑀅𑀦𑀦𑁆𑀢𑀓𑀸𑀬𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀧𑀩𑁆𑀩𑀚𑁆𑀚𑀧𑀜𑁆𑀳𑁄

𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀬𑁂𑀦 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀲𑀧𑀭𑀺𑀲𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀏𑀓𑀫𑁂𑀓𑀁 𑀪𑀺𑀓𑁆𑀔𑀼𑀁 𑀏𑀓𑀫𑁂𑀓𑁂𑀦 𑀤𑀼𑀲𑁆𑀲𑀬𑀼𑀕𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦 𑀤𑀲𑀳𑀺, 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀇𑀥 𑀦𑀺𑀲𑀻𑀤𑀣, 𑀅𑀯𑀲𑁂𑀲𑀸 𑀕𑀘𑁆𑀙𑀦𑁆𑀢𑀽’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀯𑀺𑀤𑀺𑀢𑁆𑀯𑀸 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀫𑁆𑀳𑀺 𑀳𑁄𑀢𑀺 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺? ‘‘𑀅𑀢𑁆𑀣𑁂𑀦 𑀫𑀬𑀁, 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀓𑀸, 𑀅𑀢𑁆𑀣𑁂 𑀳𑁄𑀢𑀼 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺.

𑀭𑀸𑀚𑀸 𑀆𑀳 ‘‘𑀓𑀺𑀫𑀢𑁆𑀣𑀺𑀬𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸, 𑀓𑁄 𑀘 𑀢𑀼𑀫𑁆𑀳𑀸𑀓𑀁 𑀧𑀭𑀫𑀢𑁆𑀣𑁄’’𑀢𑀺. 𑀣𑁂𑀭𑁄 𑀆𑀳 ‘‘𑀓𑀺𑀦𑁆𑀢𑀺, 𑀫𑀳𑀸𑀭𑀸𑀚, 𑀇𑀤𑀁 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀏𑀢𑀤𑀢𑁆𑀣𑀸, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸, 𑀅𑀦𑀼𑀧𑀸𑀤𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑀧𑀭𑀫𑀢𑁆𑀣𑁄’’𑀢𑀺.

‘‘𑀓𑀺𑀁 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂 𑀏𑀢𑀤𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀓𑁂𑀘𑀺 𑀏𑀢𑀤𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀺, 𑀓𑁂𑀘𑀺 𑀭𑀸𑀚𑀸𑀪𑀺𑀦𑀻𑀢𑀸 [𑀭𑀸𑀚𑀪𑀻𑀢𑀺𑀢𑀸 (𑀲𑀻.)] 𑀧𑀩𑁆𑀩𑀚𑀦𑁆𑀢𑀺, 𑀓𑁂𑀘𑀺 𑀘𑁄𑀭𑀸𑀪𑀺𑀦𑀻𑀢𑀸 [𑀘𑁄𑀭𑀪𑀻𑀢𑀺𑀢𑀸 (𑀲𑀻.)] 𑀧𑀩𑁆𑀩𑀚𑀦𑁆𑀢𑀺, 𑀓𑁂𑀘𑀺 𑀇𑀡𑀝𑁆𑀝𑀸 𑀧𑀩𑁆𑀩𑀚𑀦𑁆𑀢𑀺, 𑀓𑁂𑀘𑀺 𑀆𑀚𑀻𑀯𑀺𑀓𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀺, 𑀬𑁂 𑀧𑀦 𑀲𑀫𑁆𑀫𑀸 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀏𑀢𑀤𑀢𑁆𑀣𑀸𑀬 𑀧𑀩𑁆𑀩𑀚𑀦𑁆𑀢𑀻’’𑀢𑀺.

‘‘𑀢𑁆𑀯𑀁 𑀧𑀦, 𑀪𑀦𑁆𑀢𑁂, 𑀏𑀢𑀤𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺? ‘‘𑀅𑀳𑀁 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑀓𑁄 𑀲𑀦𑁆𑀢𑁄 𑀧𑀩𑁆𑀩𑀚𑀺𑀢𑁄, 𑀦 𑀚𑀸𑀦𑀸𑀫𑀺 𑀇𑀫𑀲𑁆𑀲 𑀦𑀸𑀫𑀢𑁆𑀣𑀸𑀬 𑀧𑀩𑁆𑀩𑀚𑀸𑀫𑀻𑀢𑀺, 𑀅𑀧𑀺 𑀘 𑀔𑁄 𑀫𑁂 𑀏𑀯𑀁 𑀅𑀳𑁄𑀲𑀺 ‘𑀧𑀡𑁆𑀟𑀺𑀢𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸, 𑀢𑁂 𑀫𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀦𑁆𑀢𑀻’𑀢𑀺, 𑀲𑁆𑀯𑀸𑀳𑀁 𑀢𑁂𑀳𑀺 𑀲𑀺𑀓𑁆𑀔𑀸𑀧𑀺𑀢𑁄 𑀚𑀸𑀦𑀸𑀫𑀺 𑀘 𑀧𑀲𑁆𑀲𑀸𑀫𑀺 𑀘 ‘𑀇𑀫𑀲𑁆𑀲 𑀦𑀸𑀫𑀢𑁆𑀣𑀸𑀬 𑀧𑀩𑁆𑀩𑀚𑁆𑀚𑀸’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀩𑁆𑀩𑀚𑁆𑀚𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀧𑀝𑀺𑀲𑀦𑁆𑀥𑀺𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁄𑀘𑀺 𑀫𑀢𑁄 𑀦 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. 𑀣𑁂𑀭𑁄 𑀆𑀳 ‘‘𑀓𑁄𑀘𑀺 𑀧𑀝𑀺𑀲𑀦𑁆𑀤𑀳𑀢𑀺, 𑀓𑁄𑀘𑀺 𑀦 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. ‘‘𑀓𑁄 𑀧𑀝𑀺𑀲𑀦𑁆𑀤𑀳𑀢𑀺, 𑀓𑁄 𑀦 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺? ‘‘𑀲𑀓𑀺𑀮𑁂𑀲𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀺, 𑀦𑀺𑀓𑁆𑀓𑀺𑀮𑁂𑀲𑁄 𑀦 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. ‘‘𑀢𑁆𑀯𑀁 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀲𑀻’’𑀢𑀺? ‘‘𑀲𑀘𑁂, 𑀫𑀳𑀸𑀭𑀸𑀚, 𑀲𑀉𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀦𑀼𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺 𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀝𑀺𑀲𑀦𑁆𑀥𑀺𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀦𑀦𑀼 𑀲𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀦 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺? ‘‘𑀬𑁄𑀦𑀺𑀲𑁄 𑀘 𑀫𑀳𑀸𑀭𑀸𑀚, 𑀫𑀦𑀲𑀺𑀓𑀸𑀭𑁂𑀦 𑀧𑀜𑁆𑀜𑀸𑀬 𑀘 𑀅𑀜𑁆𑀜𑁂𑀳𑀺 𑀘 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀬𑁂𑀯 𑀧𑀜𑁆𑀜𑀸’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀅𑀜𑁆𑀜𑁄 𑀫𑀦𑀲𑀺𑀓𑀸𑀭𑁄, 𑀅𑀜𑁆𑀜𑀸 𑀧𑀜𑁆𑀜𑀸, 𑀇𑀫𑁂𑀲𑀁 𑀔𑁄, 𑀫𑀳𑀸𑀭𑀸𑀚, 𑀅𑀚𑁂𑀴𑀓𑀕𑁄𑀡𑀫𑀳𑀺𑀁𑀲𑀑𑀝𑁆𑀞𑀕𑀤𑁆𑀭𑀪𑀸𑀦𑀫𑁆𑀧𑀺 𑀫𑀦𑀲𑀺𑀓𑀸𑀭𑁄 𑀅𑀢𑁆𑀣𑀺, 𑀧𑀜𑁆𑀜𑀸 𑀧𑀦 𑀢𑁂𑀲𑀁 𑀦𑀢𑁆𑀣𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀓𑀺𑀁𑀮𑀓𑁆𑀔𑀡𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀦𑀲𑀺𑀓𑀸𑀭𑁄, 𑀓𑀺𑀁𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺? ‘‘𑀊𑀳𑀦𑀮𑀓𑁆𑀔𑀡𑁄 𑀔𑁄, 𑀫𑀳𑀸𑀭𑀸𑀚, 𑀫𑀦𑀲𑀺𑀓𑀸𑀭𑁄, 𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺.

‘‘𑀓𑀣𑀁 𑀊𑀳𑀦𑀮𑀓𑁆𑀔𑀡𑁄 𑀫𑀦𑀲𑀺𑀓𑀸𑀭𑁄, 𑀓𑀣𑀁 𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀚𑀸𑀦𑀸𑀲𑀺, 𑀢𑁆𑀯𑀁 𑀫𑀳𑀸𑀭𑀸𑀚, 𑀬𑀯𑀮𑀸𑀯𑀓𑁂’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀻’’𑀢𑀺. ‘‘𑀓𑀣𑀁, 𑀫𑀳𑀸𑀭𑀸𑀚, 𑀬𑀯𑀮𑀸𑀯𑀓𑀸 𑀬𑀯𑀁 𑀮𑀼𑀦𑀦𑁆𑀢𑀻’’𑀢𑀺? ‘‘𑀯𑀸𑀫𑁂𑀦, 𑀪𑀦𑁆𑀢𑁂, 𑀳𑀢𑁆𑀣𑁂𑀦 𑀬𑀯𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀤𑀸𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑀸𑀢𑁆𑀢𑁂𑀦 𑀙𑀺𑀦𑁆𑀤𑀦𑁆𑀢𑀻’’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑀯𑀮𑀸𑀯𑀓𑁄 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀬𑀯𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀤𑀸𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀯𑀁 𑀙𑀺𑀦𑁆𑀤𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀫𑀦𑀲𑀺𑀓𑀸𑀭𑁂𑀦 𑀫𑀸𑀦𑀲𑀁 𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀊𑀳𑀦𑀮𑀓𑁆𑀔𑀡𑁄 𑀫𑀦𑀲𑀺𑀓𑀸𑀭𑁄, 𑀏𑀯𑀁 𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀲𑀻𑀮𑀮𑀓𑁆𑀔𑀡𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀅𑀜𑁆𑀜𑁂𑀳𑀺 𑀘 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺, 𑀓𑀢𑀫𑁂 𑀢𑁂 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺? ‘‘𑀲𑀻𑀮𑀁, 𑀫𑀳𑀸𑀭𑀸𑀚, 𑀲𑀤𑁆𑀥𑀸 𑀯𑀻𑀭𑀺𑀬𑀁 𑀲𑀢𑀺 𑀲𑀫𑀸𑀥𑀺, 𑀇𑀫𑁂 𑀢𑁂 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺. ‘‘𑀓𑀺𑀁𑀮𑀓𑁆𑀔𑀡𑀁, 𑀪𑀦𑁆𑀢𑁂, 𑀲𑀻𑀮’’𑀦𑁆𑀢𑀺? ‘‘𑀧𑀢𑀺𑀝𑁆𑀞𑀸𑀦𑀮𑀓𑁆𑀔𑀡𑀁, 𑀫𑀳𑀸𑀭𑀸𑀚, 𑀲𑀻𑀮𑀁 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀛𑀸𑀦𑀯𑀺𑀫𑁄𑀓𑁆𑀔𑀲- 𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀻𑀮𑀁 𑀧𑀢𑀺𑀝𑁆𑀞𑀁, 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺, 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺. ‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀬𑀺𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀓𑀬𑀺𑀭𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀕𑀭𑀯𑀟𑁆𑀠𑀓𑀻 𑀦𑀕𑀭𑀁 𑀫𑀸𑀧𑁂𑀢𑀼𑀓𑀸𑀫𑁄 𑀧𑀞𑀫𑀁 𑀦𑀕𑀭𑀝𑁆𑀞𑀸𑀦𑀁 𑀲𑁄𑀥𑀸𑀧𑁂𑀢𑁆𑀯𑀸 𑀔𑀸𑀡𑀼𑀓𑀡𑁆𑀝𑀓𑀁 𑀅𑀧𑀓𑀟𑁆𑀠𑀸𑀧𑁂𑀢𑁆𑀯𑀸 𑀪𑀽𑀫𑀺𑀁 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁄 𑀅𑀧𑀭𑀪𑀸𑀕𑁂 𑀯𑀻𑀣𑀺𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀮𑀗𑁆𑀖𑀓𑁄 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀧𑀣𑀯𑀺𑀁 𑀔𑀡𑀸𑀧𑁂𑀢𑁆𑀯𑀸 𑀲𑀓𑁆𑀔𑀭𑀓𑀣𑀮𑀁 𑀅𑀧𑀓𑀟𑁆𑀠𑀸𑀧𑁂𑀢𑁆𑀯𑀸 𑀪𑀽𑀫𑀺𑀁 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀼𑀤𑀼𑀓𑀸𑀬 𑀪𑀽𑀫𑀺𑀬𑀸 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋

‘‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’𑀦𑁆𑀢𑀺 [𑀧𑀲𑁆𑀲 𑀲𑀁. 𑀦𑀺. 𑁧.𑁨𑁩].

‘‘‘𑀅𑀬𑀁 𑀧𑀢𑀺𑀝𑁆𑀞𑀸 𑀥𑀭𑀡𑀻𑀯 𑀧𑀸𑀡𑀺𑀦𑀁, 𑀇𑀤𑀜𑁆𑀘 𑀫𑀽𑀮𑀁 𑀓𑀼𑀲𑀮𑀸𑀪𑀺𑀯𑀼𑀟𑁆𑀠𑀺𑀬𑀸;

𑀫𑀼𑀔𑀜𑁆𑀘𑀺𑀤𑀁 𑀲𑀩𑁆𑀩𑀚𑀺𑀦𑀸𑀦𑀼𑀲𑀸𑀲𑀦𑁂, 𑀬𑁄 𑀲𑀻𑀮𑀓𑁆𑀔𑀦𑁆𑀥𑁄 𑀯𑀭𑀧𑀸𑀢𑀺𑀫𑁄𑀓𑁆𑀔𑀺𑀬𑁄’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀻𑀮𑀮𑀓𑁆𑀔𑀡𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀲𑀤𑁆𑀥𑀸𑀧𑀜𑁆𑀳𑁄

𑁧𑁦. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀲𑀤𑁆𑀥𑀸’’𑀢𑀺? ‘‘𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀘, 𑀫𑀳𑀸𑀭𑀸𑀚, 𑀲𑀤𑁆𑀥𑀸, 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀘𑀸’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸’’𑀢𑀺? ‘‘𑀲𑀤𑁆𑀥𑀸 𑀔𑁄, 𑀫𑀳𑀸𑀭𑀸𑀚, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀯𑀺𑀦𑀻𑀯𑀭𑀡𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀢𑀭𑁂𑀬𑁆𑀬, 𑀢𑀁 𑀉𑀤𑀓𑀁 𑀳𑀢𑁆𑀣𑀻𑀳𑀺 𑀘 𑀅𑀲𑁆𑀲𑁂𑀳𑀺 𑀘 𑀭𑀣𑁂𑀳𑀺 𑀘 𑀧𑀢𑁆𑀢𑀻𑀳𑀺 𑀘 𑀔𑀼𑀪𑀺𑀢𑀁 𑀪𑀯𑁂𑀬𑁆𑀬 𑀆𑀯𑀺𑀮𑀁 𑀮𑀼𑀴𑀺𑀢𑀁 𑀓𑀮𑀮𑀻𑀪𑀽𑀢𑀁. 𑀉𑀢𑁆𑀢𑀺𑀡𑁆𑀡𑁄 𑀘 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀬𑁆𑀬 ‘𑀧𑀸𑀦𑀻𑀬𑀁, 𑀪𑀡𑁂, 𑀆𑀳𑀭𑀣, 𑀧𑀺𑀯𑀺𑀲𑁆𑀲𑀸𑀫𑀻’𑀢𑀺, 𑀭𑀜𑁆𑀜𑁄 𑀘 𑀉𑀤𑀓𑀧𑁆𑀧𑀲𑀸𑀤𑀓𑁄 𑀫𑀡𑀺 𑀪𑀯𑁂𑀬𑁆𑀬. ‘𑀏𑀯𑀁 𑀤𑁂𑀯𑀸’𑀢𑀺 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀉𑀤𑀓𑀧𑁆𑀧𑀲𑀸𑀤𑀓𑀁 𑀫𑀡𑀺𑀁 𑀉𑀤𑀓𑁂 𑀧𑀓𑁆𑀔𑀺𑀧𑁂𑀬𑁆𑀬𑀼𑀁, 𑀢𑀲𑁆𑀫𑀺𑀁 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀲𑀗𑁆𑀔𑀲𑁂𑀯𑀸𑀮𑀧𑀡𑀓𑀁 𑀯𑀺𑀕𑀘𑁆𑀙𑁂𑀬𑁆𑀬, 𑀓𑀤𑁆𑀤𑀫𑁄 𑀘 𑀲𑀦𑁆𑀦𑀺𑀲𑀻𑀤𑁂𑀬𑁆𑀬, 𑀅𑀘𑁆𑀙𑀁 𑀪𑀯𑁂𑀬𑁆𑀬 𑀉𑀤𑀓𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁. 𑀢𑀢𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀦𑀻𑀬𑀁 𑀉𑀧𑀦𑀸𑀫𑁂𑀬𑁆𑀬𑀼𑀁 ‘𑀧𑀺𑀯𑀢𑀼, 𑀤𑁂𑀯, 𑀧𑀸𑀦𑀻𑀬’𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁, 𑀏𑀯𑀁 𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄, 𑀬𑀣𑀸 𑀲𑀗𑁆𑀔𑀲𑁂𑀯𑀸𑀮𑀧𑀡𑀓𑀁 𑀓𑀤𑁆𑀤𑀫𑁄 𑀘, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀉𑀤𑀓𑀧𑁆𑀧𑀲𑀸𑀤𑀓𑁄 𑀫𑀡𑀺, 𑀏𑀯𑀁 𑀲𑀤𑁆𑀥𑀸 𑀤𑀝𑁆𑀞𑀩𑁆𑀩𑀸, 𑀬𑀣𑀸 𑀉𑀤𑀓𑀧𑁆𑀧𑀲𑀸𑀤𑀓𑁂 𑀫𑀡𑀺𑀫𑁆𑀳𑀺 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀲𑀗𑁆𑀔𑀲𑁂𑀯𑀸𑀮𑀧𑀡𑀓𑀁 𑀯𑀺𑀕𑀘𑁆𑀙𑁂𑀬𑁆𑀬, 𑀓𑀤𑁆𑀤𑀫𑁄 𑀘 𑀲𑀦𑁆𑀦𑀺𑀲𑀻𑀤𑁂𑀬𑁆𑀬, 𑀅𑀘𑁆𑀙𑀁 𑀪𑀯𑁂𑀬𑁆𑀬 𑀉𑀤𑀓𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀯𑀺𑀦𑀻𑀯𑀭𑀡𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀲𑀤𑁆𑀥𑀸𑀧𑀜𑁆𑀳𑁄 𑀤𑀲𑀫𑁄.

𑁧𑁧. 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀲𑀤𑁆𑀥𑀸𑀧𑀜𑁆𑀳𑁄

𑁧𑁧. ‘‘𑀓𑀣𑀁, 𑀪𑀦𑁆𑀢𑁂, 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸’’𑀢𑀺,? ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀯𑀸 𑀅𑀭𑀳𑀢𑁆𑀢𑁂 𑀯𑀸 𑀲𑀫𑁆𑀧𑀓𑁆𑀔𑀦𑁆𑀤𑀢𑀺 𑀬𑁄𑀕𑀁 𑀓𑀭𑁄𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀧𑀭𑀺𑀧𑀩𑁆𑀩𑀢𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀲𑁆𑀲𑁂𑀬𑁆𑀬, 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑁆𑀯𑀸 𑀦𑀤𑀺𑀁 𑀧𑀭𑀺𑀧𑀽𑀭𑁂𑀬𑁆𑀬, 𑀲𑀸 𑀉𑀪𑀢𑁄 𑀓𑀽𑀮𑀸𑀦𑀺 𑀲𑀁𑀯𑀺𑀲𑁆𑀲𑀦𑁆𑀤𑀦𑁆𑀢𑀻 𑀕𑀘𑁆𑀙𑁂𑀬𑁆𑀬, 𑀅𑀣 𑀫𑀳𑀸𑀚𑀦𑀓𑀸𑀬𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀦𑀤𑀺𑀬𑀸 𑀉𑀢𑁆𑀢𑀸𑀦𑀢𑀁 𑀯𑀸 𑀕𑀫𑁆𑀪𑀻𑀭𑀢𑀁 𑀯𑀸 𑀅𑀚𑀸𑀦𑀦𑁆𑀢𑁄 𑀪𑀻𑀢𑁄 𑀯𑀺𑀢𑁆𑀣𑀢𑁄 𑀢𑀻𑀭𑁂 𑀢𑀺𑀝𑁆𑀞𑁂𑀬𑁆𑀬, 𑀅𑀣𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀲𑀫𑁆𑀧𑀲𑁆𑀲𑀦𑁆𑀢𑁄 𑀕𑀸𑀴𑁆𑀳𑀁 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀢𑀭𑁂𑀬𑁆𑀬, 𑀢𑀁 𑀢𑀺𑀡𑁆𑀡𑀁 𑀧𑀲𑁆𑀲𑀺𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑁄𑀧𑀺 𑀢𑀭𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀯𑀸 𑀅𑀭𑀳𑀢𑁆𑀢𑁂 𑀯𑀸 𑀲𑀫𑁆𑀧𑀓𑁆𑀔𑀦𑁆𑀤𑀢𑀺 𑀬𑁄𑀕𑀁 𑀓𑀭𑁄𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑁋

‘‘‘𑀲𑀤𑁆𑀥𑀸𑀬 𑀢𑀭𑀢𑀻 𑀑𑀖𑀁, 𑀅𑀧𑁆𑀧𑀫𑀸𑀤𑁂𑀦 𑀅𑀡𑁆𑀡𑀯𑀁;

𑀯𑀻𑀭𑀺𑀬𑁂𑀦 𑀤𑀼𑀓𑁆𑀔𑀫𑀘𑁆𑀘𑁂𑀢𑀺, 𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀻’’’𑀢𑀺 [𑀧𑀲𑁆𑀲 𑀲𑀁. 𑀦𑀺. 𑁧.𑁨𑁪𑁬].

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀲𑀤𑁆𑀥𑀸𑀧𑀜𑁆𑀳𑁄 𑀏𑀓𑀸𑀤𑀲𑀫𑁄.

𑁧𑁨. 𑀯𑀻𑀭𑀺𑀬𑀮𑀓𑁆𑀔𑀡𑀧𑀜𑁆𑀳𑁄

𑁧𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀁 𑀯𑀻𑀭𑀺𑀬’’𑀦𑁆𑀢𑀺? ‘‘𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁, 𑀫𑀳𑀸𑀭𑀸𑀚, 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑀺𑀢𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀕𑁂𑀳𑁂 𑀧𑀢𑀦𑁆𑀢𑁂 𑀅𑀜𑁆𑀜𑁂𑀦 𑀤𑀸𑀭𑀼𑀦𑀸 𑀉𑀧𑀢𑁆𑀣𑀫𑁆𑀪𑁂𑀬𑁆𑀬, 𑀉𑀧𑀢𑁆𑀣𑀫𑁆𑀪𑀺𑀢𑀁 𑀲𑀦𑁆𑀢𑀁 𑀏𑀯𑀁 𑀢𑀁 𑀕𑁂𑀳𑀁 𑀦 𑀧𑀢𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑀺𑀢𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀓𑀁 𑀲𑁂𑀦𑀁 𑀫𑀳𑀢𑀻 𑀲𑁂𑀦𑀸 𑀪𑀜𑁆𑀚𑁂𑀬𑁆𑀬, 𑀢𑀢𑁄 𑀭𑀸𑀚𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀼𑀲𑁆𑀲𑀸𑀭𑁂𑀬𑁆𑀬 𑀅𑀦𑀼𑀧𑁂𑀲𑁂𑀬𑁆𑀬 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀓𑀸𑀬 𑀲𑁂𑀦𑀸𑀬 𑀩𑀮𑀁 𑀅𑀦𑀼𑀧𑀤𑀁 𑀤𑀤𑁂𑀬𑁆𑀬, 𑀢𑀸𑀬 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀓𑀸 𑀲𑁂𑀦𑀸 𑀫𑀳𑀢𑀺𑀁 𑀲𑁂𑀦𑀁 𑀪𑀜𑁆𑀚𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑀺𑀢𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀯𑀻𑀭𑀺𑀬𑀯𑀸 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺. 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺. 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑀻𑀭𑀺𑀬𑀮𑀓𑁆𑀔𑀡𑀧𑀜𑁆𑀳𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀲𑀢𑀺𑀮𑀓𑁆𑀔𑀡𑀧𑀜𑁆𑀳𑁄

𑁧𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀲𑀢𑀻’’𑀢𑀺? ‘‘𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸, 𑀫𑀳𑀸𑀭𑀸𑀚, 𑀲𑀢𑀺, 𑀉𑀧𑀕𑁆𑀕𑀡𑁆𑀳𑀦𑀮𑀓𑁆𑀔𑀡𑀸 𑀘𑀸’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺? ‘‘𑀲𑀢𑀺, 𑀫𑀳𑀸𑀭𑀸𑀚, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀳𑀻𑀦𑀧𑁆𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑁂 𑀅𑀧𑀺𑀮𑀸𑀧𑁂𑀢𑀺 ‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺, 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀅𑀬𑀁 𑀲𑀫𑀣𑁄, 𑀅𑀬𑀁 𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀯𑀺𑀚𑁆𑀚𑀸, 𑀅𑀬𑀁 𑀯𑀺𑀫𑀼𑀢𑁆𑀢𑀻’𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 𑀲𑁂𑀯𑀺𑀢𑀩𑁆𑀩𑁂 𑀥𑀫𑁆𑀫𑁂 𑀲𑁂𑀯𑀢𑀺, 𑀅𑀲𑁂𑀯𑀺𑀢𑀩𑁆𑀩𑁂 𑀥𑀫𑁆𑀫𑁂 𑀦 𑀲𑁂𑀯𑀢𑀺. 𑀪𑀚𑀺𑀢𑀩𑁆𑀩𑁂 𑀥𑀫𑁆𑀫𑁂 𑀪𑀚𑀢𑀺 𑀅𑀪𑀚𑀺𑀢𑁆𑀢𑀩𑁆𑀩𑁂 𑀥𑀫𑁆𑀫𑁂 𑀦 𑀪𑀚𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀪𑀡𑁆𑀟𑀸𑀕𑀸𑀭𑀺𑀓𑁄 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀲𑀸𑀬𑀁 𑀧𑀸𑀢𑀁 𑀬𑀲𑀁 𑀲𑀭𑀸𑀧𑁂𑀢𑀺 ‘𑀏𑀢𑁆𑀢𑀓𑀸, 𑀤𑁂𑀯, 𑀢𑁂 𑀳𑀢𑁆𑀣𑀻, 𑀏𑀢𑁆𑀢𑀓𑀸 𑀅𑀲𑁆𑀲𑀸, 𑀏𑀢𑁆𑀢𑀓𑀸 𑀭𑀣𑀸, 𑀏𑀢𑁆𑀢𑀓𑀸 𑀧𑀢𑁆𑀢𑀻, 𑀏𑀢𑁆𑀢𑀓𑀁 𑀳𑀺𑀭𑀜𑁆𑀜𑀁, 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡𑀁, 𑀏𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁, 𑀢𑀁 𑀤𑁂𑀯𑁄 𑀲𑀭𑀢𑀽’𑀢𑀺 𑀭𑀜𑁆𑀜𑁄 𑀲𑀸𑀧𑀢𑁂𑀬𑁆𑀬𑀁 𑀅𑀧𑀺𑀮𑀸𑀧𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀳𑀻𑀦𑀧𑁆𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑁂 𑀅𑀧𑀺𑀮𑀸𑀧𑁂𑀢𑀺 ‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺, 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀅𑀬𑀁 𑀲𑀫𑀣𑁄, 𑀅𑀬𑀁 𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀯𑀺𑀚𑁆𑀚𑀸, 𑀅𑀬𑀁 𑀯𑀺𑀫𑀼𑀢𑁆𑀢𑀻’𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 𑀲𑁂𑀯𑀺𑀢𑀩𑁆𑀩𑁂 𑀥𑀫𑁆𑀫𑁂 𑀲𑁂𑀯𑀢𑀺, 𑀅𑀲𑁂𑀯𑀺𑀢𑀩𑁆𑀩𑁂 𑀥𑀫𑁆𑀫𑁂 𑀦 𑀲𑁂𑀯𑀢𑀺. 𑀪𑀚𑀺𑀢𑀩𑁆𑀩𑁂 𑀥𑀫𑁆𑀫𑁂 𑀪𑀚𑀢𑀺, 𑀅𑀪𑀚𑀺𑀢𑀩𑁆𑀩𑁂 𑀥𑀫𑁆𑀫𑁂 𑀦 𑀪𑀚𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂, 𑀉𑀧𑀕𑁆𑀕𑀡𑁆𑀳𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺? ‘‘𑀲𑀢𑀺, 𑀫𑀳𑀸𑀭𑀸𑀚, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑀺𑀢𑀸𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀢𑀺 ‘𑀇𑀫𑁂 𑀥𑀫𑁆𑀫𑀸 𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀅𑀳𑀺𑀢𑀸. 𑀇𑀫𑁂 𑀥𑀫𑁆𑀫𑀸 𑀉𑀧𑀓𑀸𑀭𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑀓𑀸𑀭𑀸’𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 𑀅𑀳𑀺𑀢𑁂 𑀥𑀫𑁆𑀫𑁂 𑀅𑀧𑀦𑀼𑀤𑁂𑀢𑀺, 𑀳𑀺𑀢𑁂 𑀥𑀫𑁆𑀫𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀅𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀅𑀧𑀦𑀼𑀤𑁂𑀢𑀺, 𑀉𑀧𑀓𑀸𑀭𑁂 𑀥𑀫𑁆𑀫𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀉𑀧𑀕𑁆𑀕𑀡𑁆𑀳𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀜𑁆𑀜𑁄 𑀳𑀺𑀢𑀸𑀳𑀺𑀢𑁂 𑀚𑀸𑀦𑀸𑀢𑀺 ‘𑀇𑀫𑁂 𑀭𑀜𑁆𑀜𑁄 𑀳𑀺𑀢𑀸, 𑀇𑀫𑁂 𑀅𑀳𑀺𑀢𑀸. 𑀇𑀫𑁂 𑀉𑀧𑀓𑀸𑀭𑀸, 𑀇𑀫𑁂 𑀅𑀦𑀼𑀧𑀓𑀸𑀭𑀸’𑀢𑀺. 𑀢𑀢𑁄 𑀅𑀳𑀺𑀢𑁂 𑀅𑀧𑀦𑀼𑀤𑁂𑀢𑀺, 𑀳𑀺𑀢𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀅𑀦𑀼𑀧𑀓𑀸𑀭𑁂 𑀅𑀧𑀦𑀼𑀤𑁂𑀢𑀺, 𑀉𑀧𑀓𑀸𑀭𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑀺𑀢𑀸𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀢𑀺 ‘𑀇𑀫𑁂 𑀥𑀫𑁆𑀫𑀸 𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀅𑀳𑀺𑀢𑀸. 𑀇𑀫𑁂 𑀥𑀫𑁆𑀫𑀸 𑀉𑀧𑀓𑀸𑀭𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑀓𑀸𑀭𑀸’𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 𑀅𑀳𑀺𑀢𑁂 𑀥𑀫𑁆𑀫𑁂 𑀅𑀧𑀦𑀼𑀤𑁂𑀢𑀺, 𑀳𑀺𑀢𑁂 𑀥𑀫𑁆𑀫𑁂 𑀉𑀧𑀕𑁆𑀕𑀡𑁆𑀳𑀸’𑀢𑀺. 𑀅𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀅𑀧𑀦𑀼𑀤𑁂𑀢𑀺, 𑀉𑀧𑀓𑀸𑀭𑁂 𑀤𑀫𑁆𑀫𑁂 𑀉𑀧𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀉𑀧𑀕𑁆𑀕𑀡𑁆𑀳𑀦𑀮𑀓𑁆𑀔𑀡𑀸 𑀲𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀢𑀺𑀮𑀓𑁆𑀔𑀡𑀧𑀜𑁆𑀳𑁄 𑀢𑁂𑀭𑀲𑀫𑁄.

𑁧𑁪. 𑀲𑀫𑀸𑀥𑀺𑀧𑀜𑁆𑀳𑁄

𑁧𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑁄 𑀲𑀫𑀸𑀥𑀻’’𑀢𑀺? ‘‘𑀧𑀫𑀼𑀔𑀮𑀓𑁆𑀔𑀡𑁄, 𑀫𑀳𑀸𑀭𑀸𑀚, 𑀲𑀫𑀸𑀥𑀺, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀲𑀫𑀸𑀥𑀺𑀧𑀫𑀼𑀔𑀸 𑀳𑁄𑀦𑁆𑀢𑀺 𑀲𑀫𑀸𑀥𑀺𑀦𑀺𑀦𑁆𑀦𑀸 𑀲𑀫𑀸𑀥𑀺𑀧𑁄𑀡𑀸 𑀲𑀫𑀸𑀥𑀺𑀧𑀩𑁆𑀪𑀸𑀭𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀽𑀝𑀸𑀕𑀸𑀭𑀲𑁆𑀲 𑀬𑀸 𑀬𑀸𑀘𑀺 𑀕𑁄𑀧𑀸𑀦𑀲𑀺𑀬𑁄, 𑀲𑀩𑁆𑀩𑀸 𑀢𑀸 𑀓𑀽𑀝𑀗𑁆𑀕𑀫𑀸 𑀳𑁄𑀦𑁆𑀢𑀺 𑀓𑀽𑀝𑀦𑀺𑀦𑁆𑀦𑀸 𑀓𑀽𑀝𑀲𑀫𑁄𑀲𑀭𑀡𑀸, 𑀓𑀽𑀝𑀁 𑀢𑀸𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀲𑀫𑀸𑀥𑀺𑀧𑀫𑀼𑀔𑀸 𑀳𑁄𑀦𑁆𑀢𑀺 𑀲𑀫𑀸𑀥𑀺𑀦𑀺𑀦𑁆𑀦𑀸 𑀲𑀫𑀸𑀥𑀺𑀧𑁄𑀡𑀸 𑀲𑀫𑀸𑀥𑀺𑀧𑀩𑁆𑀪𑀸𑀭𑀸𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀭𑀸𑀚𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀁 𑀑𑀢𑀭𑁂𑀬𑁆𑀬, 𑀲𑀩𑁆𑀩𑀸𑀯 𑀲𑁂𑀦𑀸 𑀳𑀢𑁆𑀣𑀻 𑀘 𑀅𑀲𑁆𑀲𑀸 𑀘 𑀭𑀣𑀸 𑀘 𑀧𑀢𑁆𑀢𑀻 𑀘 𑀢𑀧𑁆𑀧𑀫𑀼𑀔𑀸 [𑀢𑀫𑁆𑀧𑀫𑀼𑀔𑀸 (𑀲𑁆𑀬𑀸. 𑀓.)] 𑀪𑀯𑁂𑀬𑁆𑀬𑀼𑀁 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀁 𑀬𑁂𑀯 𑀅𑀦𑀼𑀧𑀭𑀺𑀬𑀸𑀬𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀲𑀫𑀸𑀥𑀺𑀧𑀫𑀼𑀔𑀸 𑀳𑁄𑀦𑁆𑀢𑀺 𑀲𑀫𑀸𑀥𑀺𑀦𑀺𑀦𑁆𑀦𑀸 𑀲𑀫𑀸𑀥𑀺𑀧𑁄𑀡𑀸 𑀲𑀫𑀸𑀥𑀺𑀧𑀩𑁆𑀪𑀸𑀭𑀸. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀧𑀫𑀼𑀔𑀮𑀓𑁆𑀔𑀡𑁄 𑀲𑀫𑀸𑀥𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘‘𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣, 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀫𑀸𑀥𑀺𑀧𑀜𑁆𑀳𑁄 𑀘𑀼𑀤𑁆𑀤𑀲𑀫𑁄.

𑁧𑁫. 𑀧𑀜𑁆𑀜𑀸𑀮𑀓𑁆𑀔𑀡𑀧𑀜𑁆𑀳𑁄

𑁧𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺? ‘‘𑀧𑀼𑀩𑁆𑀩𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀬𑀸 𑀯𑀼𑀢𑁆𑀢𑀁 ‘𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’𑀢𑀺, 𑀅𑀧𑀺 𑀘 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺? ‘‘𑀧𑀜𑁆𑀜𑀸, 𑀫𑀳𑀸𑀭𑀸𑀚, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑀺, 𑀯𑀺𑀚𑁆𑀚𑁄𑀪𑀸𑀲𑀁 𑀚𑀦𑁂𑀢𑀺, 𑀜𑀸𑀡𑀸𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀦𑁆𑀥𑀓𑀸𑀭𑁂 𑀕𑁂𑀳𑁂 𑀧𑀤𑀻𑀧𑀁 𑀧𑀯𑁂𑀲𑁂𑀬𑁆𑀬, 𑀧𑀯𑀺𑀝𑁆𑀞𑁄 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑀺, 𑀑𑀪𑀸𑀲𑀁 𑀚𑀦𑁂𑀢𑀺, 𑀆𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀭𑀽𑀧𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑀺, 𑀯𑀺𑀚𑁆𑀚𑁄𑀪𑀸𑀲𑀁 𑀚𑀦𑁂𑀢𑀺, 𑀜𑀸𑀡𑀸𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀜𑁆𑀜𑀸𑀮𑀓𑁆𑀔𑀡𑀧𑀜𑁆𑀳𑁄 𑀧𑀦𑁆𑀦𑀭𑀲𑀫𑁄.

𑁧𑁬. 𑀦𑀸𑀦𑀸𑀥𑀫𑁆𑀫𑀸𑀦𑀁 𑀏𑀓𑀓𑀺𑀘𑁆𑀘𑀅𑀪𑀺𑀦𑀺𑀧𑁆𑀨𑀸𑀤𑀦𑀧𑀜𑁆𑀳𑁄

𑁧𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸 𑀲𑀦𑁆𑀢𑀸 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸 𑀲𑀦𑁆𑀢𑀸 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀓𑀺𑀮𑁂𑀲𑁂 𑀳𑀦𑀦𑁆𑀢𑀻’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸 𑀲𑀦𑁆𑀢𑀸 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀓𑀺𑀮𑁂𑀲𑁂 𑀳𑀦𑀦𑁆𑀢𑀺? 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑁂𑀦𑀸 𑀦𑀸𑀦𑀸 𑀲𑀦𑁆𑀢𑀸 𑀳𑀢𑁆𑀣𑀻 𑀘 𑀅𑀲𑁆𑀲𑀸 𑀘 𑀭𑀣𑀸 𑀘 𑀧𑀢𑁆𑀢𑀻 𑀘 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀲𑀗𑁆𑀕𑀸𑀫𑁂 𑀧𑀭𑀲𑁂𑀦𑀁 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀸 𑀲𑀦𑁆𑀢𑀸 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀓𑀺𑀮𑁂𑀲𑁂 𑀳𑀦𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀸𑀦𑀸𑀥𑀫𑁆𑀫𑀸𑀦𑀁 𑀏𑀓𑀓𑀺𑀘𑁆𑀘𑀅𑀪𑀺𑀦𑀺𑀧𑁆𑀨𑀸𑀤𑀦𑀧𑀜𑁆𑀳𑁄 𑀲𑁄𑀴𑀲𑀫𑁄.

𑀫𑀳𑀸𑀯𑀕𑁆𑀕𑁄 𑀧𑀞𑀫𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀲𑁄𑀴𑀲 𑀧𑀜𑁆𑀳𑀸.

𑁨. 𑀅𑀤𑁆𑀥𑀸𑀦𑀯𑀕𑁆𑀕𑁄

𑁧. 𑀥𑀫𑁆𑀫𑀲𑀦𑁆𑀢𑀢𑀺𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀏𑀯 𑀲𑁄, 𑀉𑀤𑀸𑀳𑀼 𑀅𑀜𑁆𑀜𑁄’’𑀢𑀺? 𑀣𑁂𑀭𑁄 𑀆𑀳 ‘‘𑀦 𑀘 𑀲𑁄, 𑀦 𑀘 𑀅𑀜𑁆𑀜𑁄’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁆𑀯𑀁 𑀤𑀳𑀭𑁄 𑀢𑀭𑀼𑀡𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀅𑀳𑁄𑀲𑀺, 𑀲𑁄 𑀬𑁂𑀯 𑀢𑁆𑀯𑀁 𑀏𑀢𑀭𑀳𑀺 𑀫𑀳𑀦𑁆𑀢𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀜𑁆𑀜𑁄 𑀲𑁄 𑀤𑀳𑀭𑁄 𑀢𑀭𑀼𑀡𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀅𑀳𑁄𑀲𑀺, 𑀅𑀜𑁆𑀜𑁄 𑀅𑀳𑀁 𑀏𑀢𑀭𑀳𑀺 𑀫𑀳𑀦𑁆𑀢𑁄’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀔𑁄, 𑀫𑀳𑀸𑀭𑀸𑀚, 𑀫𑀸𑀢𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀧𑀺𑀢𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀆𑀘𑀭𑀺𑀬𑁄𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀲𑀺𑀧𑁆𑀧𑀯𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀲𑀻𑀮𑀯𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀧𑀜𑁆𑀜𑀯𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺. 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑀸 𑀏𑀯 𑀓𑀮𑀮𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀅𑀩𑁆𑀩𑀼𑀤𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀧𑁂𑀲𑀺𑀬𑀸 𑀫𑀸𑀢𑀸, 𑀅𑀜𑁆𑀜𑀸 𑀖𑀦𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀔𑀼𑀤𑁆𑀤𑀓𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀫𑀳𑀦𑁆𑀢𑀲𑁆𑀲 𑀫𑀸𑀢𑀸, 𑀅𑀜𑁆𑀜𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀢𑀺, 𑀅𑀜𑁆𑀜𑁄 𑀲𑀺𑀓𑁆𑀔𑀺𑀢𑁄 𑀪𑀯𑀢𑀺, 𑀅𑀜𑁆𑀜𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀤𑀸 𑀙𑀺𑀚𑁆𑀚𑀦𑁆𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂. 𑀢𑁆𑀯𑀁 𑀧𑀦, 𑀪𑀦𑁆𑀢𑁂, 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀁 𑀯𑀤𑁂𑀬𑁆𑀬𑀸𑀲𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀅𑀳𑀜𑁆𑀜𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑁄 𑀅𑀳𑁄𑀲𑀺𑀁 𑀢𑀭𑀼𑀡𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄, 𑀅𑀳𑀜𑁆𑀜𑁂𑀯 𑀏𑀢𑀭𑀳𑀺 𑀫𑀳𑀦𑁆𑀢𑁄, 𑀇𑀫𑀫𑁂𑀯 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂 𑀢𑁂 𑀏𑀓𑀲𑀗𑁆𑀕𑀳𑀺𑀢𑀸’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀤𑀻𑀧𑀁 𑀧𑀤𑀻𑀧𑁂𑀬𑁆𑀬, 𑀓𑀺𑀁 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀧𑀤𑀻𑀧𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀧𑀤𑀻𑀧𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀬𑀸 𑀧𑀼𑀭𑀺𑀫𑁂 𑀬𑀸𑀫𑁂 𑀅𑀘𑁆𑀘𑀺, 𑀲𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀅𑀘𑁆𑀘𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀅𑀘𑁆𑀘𑀺, 𑀲𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀅𑀘𑁆𑀘𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑁄 𑀲𑁄 𑀅𑀳𑁄𑀲𑀺 𑀧𑀼𑀭𑀺𑀫𑁂 𑀬𑀸𑀫𑁂 𑀧𑀤𑀻𑀧𑁄, 𑀅𑀜𑁆𑀜𑁄 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀧𑀤𑀻𑀧𑁄, 𑀅𑀜𑁆𑀜𑁄 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀧𑀤𑀻𑀧𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂, 𑀢𑀁 𑀬𑁂𑀯 𑀦𑀺𑀲𑁆𑀲𑀸𑀬 𑀲𑀩𑁆𑀩𑀭𑀢𑁆𑀢𑀺𑀁 𑀧𑀤𑀻𑀧𑀺𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀲𑀦𑁆𑀢𑀢𑀺 𑀲𑀦𑁆𑀤𑀳𑀢𑀺, 𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀦𑀺𑀭𑀼𑀚𑁆𑀛𑀢𑀺, 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀬 𑀲𑀦𑁆𑀤𑀳𑀢𑀺, 𑀢𑁂𑀦 𑀦 𑀘 𑀲𑁄, 𑀦 𑀘 𑀅𑀜𑁆𑀜𑁄, 𑀧𑀼𑀭𑀺𑀫𑀯𑀺𑀜𑁆𑀜𑀸𑀡𑁂 𑀧𑀘𑁆𑀙𑀺𑀫𑀯𑀺𑀜𑁆𑀜𑀸𑀡𑀁 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀔𑀻𑀭𑀁 𑀤𑀼𑀬𑁆𑀳𑀫𑀸𑀦𑀁 𑀓𑀸𑀮𑀦𑁆𑀢𑀭𑁂𑀦 𑀤𑀥𑀺 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀤𑀥𑀺𑀢𑁄 𑀦𑀯𑀦𑀻𑀢𑀁, 𑀦𑀯𑀦𑀻𑀢𑀢𑁄 𑀖𑀢𑀁 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀬𑁄 𑀦𑀼 𑀔𑁄, 𑀫𑀳𑀸𑀭𑀸𑀚, 𑀏𑀯𑀁 𑀯𑀤𑁂𑀬𑁆𑀬 ‘𑀬𑀁 𑀬𑁂𑀯 𑀔𑀻𑀭𑀁 𑀢𑀁 𑀬𑁂𑀯 𑀤𑀥𑀺, 𑀬𑀁 𑀬𑁂𑀯 𑀤𑀥𑀺 𑀢𑀁 𑀬𑁂𑀯 𑀦𑀯𑀦𑀻𑀢𑀁, 𑀬𑀁 𑀬𑁂𑀯 𑀦𑀯𑀦𑀻𑀢𑀁 𑀢𑀁 𑀬𑁂𑀯 𑀖𑀢’𑀦𑁆𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂, 𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀲𑀫𑁆𑀪𑀽𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀲𑀦𑁆𑀢𑀢𑀺 𑀲𑀦𑁆𑀤𑀳𑀢𑀺, 𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀦𑀺𑀭𑀼𑀚𑁆𑀛𑀢𑀺, 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀬 𑀲𑀦𑁆𑀤𑀳𑀢𑀺, 𑀢𑁂𑀦 𑀦 𑀘 𑀲𑁄, 𑀦 𑀘 𑀅𑀜𑁆𑀜𑁄, 𑀧𑀼𑀭𑀺𑀫𑀯𑀺𑀜𑁆𑀜𑀸𑀡𑁂 𑀧𑀘𑁆𑀙𑀺𑀫𑀯𑀺𑀜𑁆𑀜𑀸𑀡𑀁 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀥𑀫𑁆𑀫𑀲𑀦𑁆𑀢𑀢𑀺𑀧𑀜𑁆𑀳𑁄 𑀧𑀞𑀫𑁄.

𑁨. 𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀚𑀸𑀦𑀸𑀢𑀻’’𑀢𑀺? ‘‘𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀦𑀸𑀬, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀓𑀲𑀺𑀢𑁆𑀯𑀸 𑀘 𑀯𑀧𑀺𑀢𑁆𑀯𑀸 𑀘 𑀥𑀜𑁆𑀜𑀸𑀕𑀸𑀭𑀁 𑀧𑀭𑀺𑀧𑀽𑀭𑁂𑀬𑁆𑀬. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀦𑁂𑀯 𑀓𑀲𑁆𑀲𑁂𑀬𑁆𑀬 𑀦 𑀯𑀧𑁆𑀧𑁂𑀬𑁆𑀬, 𑀬𑀣𑀸𑀲𑀫𑁆𑀪𑀢𑀜𑁆𑀘 𑀥𑀜𑁆𑀜𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀯𑀸 𑀯𑀺𑀲𑀚𑁆𑀚𑁂𑀬𑁆𑀬 𑀯𑀸 𑀬𑀣𑀸 𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬, 𑀚𑀸𑀦𑁂𑀬𑁆𑀬 𑀲𑁄, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 ‘𑀦 𑀫𑁂 𑀥𑀜𑁆𑀜𑀸𑀕𑀸𑀭𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸’’𑀢𑀺. ‘‘𑀓𑀣𑀁 𑀚𑀸𑀦𑁂𑀬𑁆𑀬𑀸’’𑀢𑀺? ‘‘𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀥𑀜𑁆𑀜𑀸𑀕𑀸𑀭𑀲𑁆𑀲 𑀧𑀭𑀺𑀧𑀽𑀭𑀡𑀸𑀬, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀚𑀸𑀦𑀸𑀢𑀺 ‘𑀦 𑀫𑁂 𑀥𑀜𑁆𑀜𑀸𑀕𑀸𑀭𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀤𑀳𑀦𑀸𑀬, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀜𑀸𑀡𑀧𑀜𑁆𑀜𑀸𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀲𑁆𑀲 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀲𑁆𑀲 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀬𑀜𑁆𑀜𑁂𑀯 𑀜𑀸𑀡𑀁 𑀲𑀸 𑀬𑁂𑀯 𑀧𑀜𑁆𑀜𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀜𑁆𑀜𑁂𑀯 𑀜𑀸𑀡𑀁 𑀲𑀸 𑀬𑁂𑀯 𑀧𑀜𑁆𑀜𑀸’’𑀢𑀺. ‘‘𑀬𑀲𑁆𑀲 𑀧𑀦, 𑀪𑀦𑁆𑀢𑁂, 𑀢𑀜𑁆𑀜𑁂𑀯 𑀜𑀸𑀡𑀁 𑀲𑀸 𑀬𑁂𑀯 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸, 𑀓𑀺𑀁 𑀲𑀫𑁆𑀫𑀼𑀬𑁆𑀳𑁂𑀬𑁆𑀬 𑀲𑁄, 𑀉𑀤𑀸𑀳𑀼 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺? ‘‘𑀓𑀢𑁆𑀣𑀘𑀺, 𑀫𑀳𑀸𑀭𑀸𑀚, 𑀲𑀫𑁆𑀫𑀼𑀬𑁆𑀳𑁂𑀬𑁆𑀬, 𑀓𑀢𑁆𑀣𑀘𑀺 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺? ‘‘𑀅𑀜𑁆𑀜𑀸𑀢𑀧𑀼𑀩𑁆𑀩𑁂𑀲𑀼 𑀯𑀸, 𑀫𑀳𑀸𑀭𑀸𑀚, 𑀲𑀺𑀧𑁆𑀧𑀝𑁆𑀞𑀸𑀦𑁂𑀲𑀼, 𑀅𑀕𑀢𑀧𑀼𑀩𑁆𑀩𑀸𑀬 𑀯𑀸 𑀤𑀺𑀲𑀸𑀬, 𑀅𑀲𑁆𑀲𑀼𑀢𑀧𑀼𑀩𑁆𑀩𑀸𑀬 𑀯𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀓𑀼𑀳𑀺𑀁 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺? ‘‘𑀬𑀁 𑀔𑁄 𑀧𑀦, 𑀫𑀳𑀸𑀭𑀸𑀚, 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀳𑀺𑀁 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀫𑁄𑀳𑁄 𑀧𑀦𑀲𑁆𑀲, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺? ‘‘𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀜𑀸𑀡𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀦𑁆𑀥𑀓𑀸𑀭𑀕𑁂𑀳𑁂 𑀧𑀤𑀻𑀧𑀁 𑀆𑀭𑁄𑀧𑁂𑀬𑁆𑀬, 𑀢𑀢𑁄 𑀅𑀦𑁆𑀥𑀓𑀸𑀭𑁄 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀆𑀮𑁄𑀓𑁄 𑀧𑀸𑀢𑀼𑀪𑀯𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀜𑀸𑀡𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀫𑁄𑀳𑁄 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀧𑀜𑁆𑀜𑀸 𑀧𑀦, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺? ‘‘𑀧𑀜𑁆𑀜𑀸𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’𑀢𑀺, 𑀢𑀲𑁆𑀲 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀭𑀢𑁆𑀢𑀺𑀁 𑀮𑁂𑀔𑀁 𑀧𑁂𑀲𑁂𑀢𑀼𑀓𑀸𑀫𑁄 𑀮𑁂𑀔𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀮𑁂𑀔𑀁 𑀮𑀺𑀔𑀸𑀧𑁂𑀬𑁆𑀬, 𑀮𑀺𑀔𑀺𑀢𑁂 𑀧𑀦 𑀮𑁂𑀔𑁂 𑀧𑀤𑀻𑀧𑀁 𑀯𑀺𑀚𑁆𑀛𑀸𑀧𑁂𑀬𑁆𑀬, 𑀯𑀺𑀚𑁆𑀛𑀸𑀧𑀺𑀢𑁂𑀧𑀺 𑀧𑀤𑀻𑀧𑁂 𑀮𑁂𑀔𑀁 𑀦 𑀯𑀺𑀦𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀢𑁆𑀣𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀫𑀦𑀼𑀲𑁆𑀲𑀸 𑀅𑀦𑀼𑀖𑀭𑀁 𑀧𑀜𑁆𑀘 𑀧𑀜𑁆𑀘 𑀉𑀤𑀓𑀖𑀝𑀓𑀸𑀦𑀺 𑀞𑀧𑁂𑀦𑁆𑀢𑀺 𑀆𑀮𑀺𑀫𑁆𑀧𑀦𑀁 𑀯𑀺𑀚𑁆𑀛𑀸𑀧𑁂𑀢𑀼𑀁, 𑀖𑀭𑁂 𑀧𑀤𑀺𑀢𑁆𑀢𑁂 𑀢𑀸𑀦𑀺 𑀧𑀜𑁆𑀘 𑀉𑀤𑀓𑀖𑀝𑀓𑀸𑀦𑀺 𑀖𑀭𑀲𑁆𑀲𑀽𑀧𑀭𑀺 𑀔𑀺𑀧𑀦𑁆𑀢𑀺, 𑀢𑀢𑁄 𑀅𑀕𑁆𑀕𑀺 𑀯𑀺𑀚𑁆𑀛𑀸𑀬𑀢𑀺, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀏𑀯𑀁 𑀳𑁄𑀢𑀺 ‘𑀧𑀼𑀦 𑀢𑁂𑀳𑀺 𑀖𑀝𑁂𑀳𑀺 𑀖𑀝𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀸’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀮𑀁 𑀢𑁂𑀳𑀺 𑀖𑀝𑁂𑀳𑀺, 𑀓𑀺𑀁 𑀢𑁂𑀳𑀺 𑀖𑀝𑁂𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀜𑁆𑀘 𑀉𑀤𑀓𑀖𑀝𑀓𑀸𑀦𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀅𑀕𑁆𑀕𑀺, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀜𑁆𑀘𑀳𑀺 𑀉𑀤𑀓𑀖𑀝𑀓𑁂𑀳𑀺 𑀅𑀕𑁆𑀕𑀺 𑀯𑀺𑀚𑁆𑀛𑀸𑀧𑀻𑀬𑀢𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀺𑀮𑁂𑀲𑀸 𑀯𑀺𑀚𑁆𑀛𑀸𑀧𑀺𑀬𑀦𑁆𑀢𑀺, 𑀯𑀺𑀚𑁆𑀛𑀸𑀧𑀺𑀢𑀸𑀧𑀺 𑀓𑀺𑀮𑁂𑀲𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑁂𑀚𑁆𑀚𑁄 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑀸𑀦𑀺 𑀕𑀳𑁂𑀢𑁆𑀯𑀸 𑀕𑀺𑀮𑀸𑀦𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑀸𑀦𑀺 𑀧𑀺𑀲𑀺𑀢𑁆𑀯𑀸 [𑀧𑀺𑀁𑀲𑀺𑀢𑁆𑀯𑀸 (𑀲𑀻. 𑀧𑀻.)] 𑀕𑀺𑀮𑀸𑀦𑀓𑀁 𑀧𑀸𑀬𑁂𑀬𑁆𑀬, 𑀢𑁂𑀳𑀺 𑀘 𑀤𑁄𑀲𑀸 𑀦𑀺𑀤𑁆𑀥𑀫𑁂𑀬𑁆𑀬𑀼𑀁, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀯𑁂𑀚𑁆𑀚𑀲𑁆𑀲 𑀏𑀯𑀁 𑀳𑁄𑀢𑀺 ‘𑀧𑀼𑀦 𑀢𑁂𑀳𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀮𑀁 𑀢𑁂𑀳𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀺, 𑀓𑀺𑀁 𑀢𑁂𑀳𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑀸𑀦𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀬𑀣𑀸 𑀯𑁂𑀚𑁆𑀚𑁄, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀩𑁆𑀬𑀸𑀥𑀺, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀩𑁆𑀬𑀸𑀥𑀺𑀢𑁄 𑀧𑀼𑀭𑀺𑀲𑁄, 𑀏𑀯𑀁 𑀧𑀼𑀣𑀼𑀚𑁆𑀚𑀦𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀺 𑀕𑀺𑀮𑀸𑀦𑀲𑁆𑀲 𑀤𑁄𑀲𑀸 𑀦𑀺𑀤𑁆𑀥𑀦𑁆𑀢𑀸, 𑀤𑁄𑀲𑁂 𑀦𑀺𑀤𑁆𑀥𑀦𑁆𑀢𑁂 𑀕𑀺𑀮𑀸𑀦𑁄 𑀅𑀭𑁄𑀕𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀺𑀮𑁂𑀲𑀸 𑀦𑀺𑀤𑁆𑀥𑀫𑀻𑀬𑀦𑁆𑀢𑀺, 𑀦𑀺𑀤𑁆𑀥𑀫𑀺𑀢𑀸 𑀘 𑀓𑀺𑀮𑁂𑀲𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀗𑁆𑀕𑀸𑀫𑀸𑀯𑀘𑀭𑁄 𑀬𑁄𑀥𑁄 𑀧𑀜𑁆𑀘 𑀓𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀲𑀗𑁆𑀕𑀸𑀫𑀁 𑀑𑀢𑀭𑁂𑀬𑁆𑀬 𑀧𑀭𑀲𑁂𑀦𑀁 𑀯𑀺𑀚𑁂𑀢𑀼𑀁, 𑀲𑁄 𑀲𑀗𑁆𑀕𑀸𑀫𑀕𑀢𑁄 𑀢𑀸𑀦𑀺 𑀧𑀜𑁆𑀘 𑀓𑀡𑁆𑀟𑀸𑀦𑀺 𑀔𑀺𑀧𑁂𑀬𑁆𑀬, 𑀢𑁂𑀳𑀺 𑀘 𑀧𑀭𑀲𑁂𑀦𑀸 𑀪𑀺𑀚𑁆𑀚𑁂𑀬𑁆𑀬, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀲𑀗𑁆𑀕𑀸𑀫𑀸𑀯𑀘𑀭𑀲𑁆𑀲 𑀬𑁄𑀥𑀲𑁆𑀲 𑀏𑀯𑀁 𑀳𑁄𑀢𑀺 ‘𑀧𑀼𑀦 𑀢𑁂𑀳𑀺 𑀓𑀡𑁆𑀟𑁂𑀳𑀺 𑀓𑀡𑁆𑀟𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀮𑀁 𑀢𑁂𑀳𑀺 𑀓𑀡𑁆𑀟𑁂𑀳𑀺, 𑀓𑀺𑀁 𑀢𑁂𑀳𑀺 𑀓𑀡𑁆𑀟𑁂𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀜𑁆𑀘 𑀓𑀡𑁆𑀟𑀸𑀦𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀣𑀸, 𑀫𑀳𑀸𑀭𑀸𑀚, 𑀲𑀗𑁆𑀕𑀸𑀫𑀸𑀯𑀘𑀭𑁄 𑀬𑁄𑀥𑁄, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀭𑀲𑁂𑀦𑀸, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀜𑁆𑀘𑀳𑀺 𑀓𑀡𑁆𑀟𑁂𑀳𑀺 𑀧𑀭𑀲𑁂𑀦𑀸 𑀪𑀺𑀚𑁆𑀚𑀢𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀺𑀮𑁂𑀲𑀸 𑀪𑀺𑀚𑁆𑀚𑀦𑁆𑀢𑀺, 𑀪𑀕𑁆𑀕𑀸 𑀘 𑀓𑀺𑀮𑁂𑀲𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀜𑀸𑀡𑀧𑀜𑁆𑀜𑀸𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀧𑀝𑀺𑀲𑀦𑁆𑀤𑀳𑀦𑀧𑀼𑀕𑁆𑀕𑀮𑀯𑁂𑀤𑀺𑀬𑀦𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀯𑁂𑀤𑁂𑀢𑀺 𑀲𑁄 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀯𑁂𑀤𑀦’’𑀦𑁆𑀢𑀺? 𑀣𑁂𑀭𑁄 𑀆𑀳 ‘‘𑀓𑀺𑀜𑁆𑀘𑀺 𑀯𑁂𑀤𑁂𑀢𑀺, 𑀓𑀺𑀜𑁆𑀘𑀺 𑀦 𑀯𑁂𑀤𑁂𑀢𑀻’’𑀢𑀺. ‘‘𑀓𑀺𑀁 𑀯𑁂𑀤𑁂𑀢𑀺, 𑀓𑀺𑀁 𑀦 𑀯𑁂𑀤𑁂𑀢𑀻’’𑀢𑀺? ‘‘𑀓𑀸𑀬𑀺𑀓𑀁, 𑀫𑀳𑀸𑀭𑀸𑀚, 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀘𑁂𑀢𑀲𑀺𑀓𑀁 𑀯𑁂𑀤𑀦𑀁 𑀦 𑀯𑁂𑀤𑁂𑀢𑀻’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀓𑀸𑀬𑀺𑀓𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀓𑀣𑀁 𑀘𑁂𑀢𑀲𑀺𑀓𑀁 𑀯𑁂𑀤𑀦𑀁 𑀦 𑀯𑁂𑀤𑁂𑀢𑀻’’𑀢𑀺? ‘‘𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀓𑀸𑀬𑀺𑀓𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀦𑀼𑀧𑀭𑀫𑀸 𑀓𑀸𑀬𑀺𑀓𑀁 𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀘𑁂𑀢𑀲𑀺𑀓𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀯𑁂𑀤𑀦𑀁 𑀦 𑀯𑁂𑀤𑁂𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀲𑁄 𑀏𑀓𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀓𑀸𑀬𑀺𑀓𑀁 𑀦 𑀘𑁂𑀢𑀲𑀺𑀓’’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀓𑀲𑁆𑀫𑀸 𑀲𑁄 𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀅𑀦𑀼𑀦𑀬𑁄 𑀯𑀸 𑀧𑀝𑀺𑀖𑁄 𑀯𑀸, 𑀦 𑀘 𑀅𑀭𑀳𑀦𑁆𑀢𑁄 𑀅𑀧𑀓𑁆𑀓𑀁 𑀧𑀸𑀢𑁂𑀦𑁆𑀢𑀺 𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸.

‘‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺 [𑀧𑀲𑁆𑀲 𑀣𑁂𑀭𑀕𑀸. 𑁬𑁫𑁪].

𑀧𑀝𑀺𑀲𑀦𑁆𑀤𑀳𑀦𑀧𑀼𑀕𑁆𑀕𑀮𑀯𑁂𑀤𑀺𑀬𑀦𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀯𑁂𑀤𑀦𑀸𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀔𑀸 𑀯𑁂𑀤𑀦𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀅𑀩𑁆𑀬𑀸𑀓𑀢𑀸 𑀯𑀸’’𑀢𑀺? ‘‘𑀲𑀺𑀬𑀸, 𑀫𑀳𑀸𑀭𑀸𑀚, 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂, 𑀓𑀼𑀲𑀮𑀸 𑀦 𑀤𑀼𑀓𑁆𑀔𑀸, 𑀬𑀤𑀺 𑀤𑀼𑀓𑁆𑀔𑀸 𑀦 𑀓𑀼𑀲𑀮𑀸, 𑀓𑀼𑀲𑀮𑀁 𑀤𑀼𑀓𑁆𑀔𑀦𑁆𑀢𑀺 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀲𑀻𑀢𑀁 𑀳𑀺𑀫𑀧𑀺𑀡𑁆𑀟𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀢𑁂 𑀤𑀳𑁂𑀬𑁆𑀬𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀉𑀪𑁄𑀧𑀺 𑀢𑁂 𑀤𑀳𑁂𑀬𑁆𑀬𑀼’’𑀦𑁆𑀢𑀺. ‘‘𑀓𑀺𑀁 𑀦𑀼 𑀔𑁄, 𑀢𑁂 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀉𑀡𑁆𑀳𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀲𑀻𑀢𑀮𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑀬𑀤𑀺 𑀢𑀢𑁆𑀢𑀁 𑀤𑀳𑀢𑀺, 𑀦 𑀘 𑀢𑁂 𑀉𑀪𑁄𑀧𑀺 𑀉𑀡𑁆𑀳𑀸, 𑀢𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀲𑀻𑀢𑀮𑀁 𑀤𑀳𑀢𑀺, 𑀦 𑀘 𑀢𑁂 𑀉𑀪𑁄𑀧𑀺 𑀲𑀻𑀢𑀮𑀸, 𑀢𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀺𑀲𑁆𑀲 𑀧𑀦 𑀢𑁂, 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀤𑀳𑀦𑁆𑀢𑀺, 𑀦 𑀘 𑀢𑁂 𑀉𑀪𑁄𑀧𑀺 𑀉𑀡𑁆𑀳𑀸, 𑀦 𑀘 𑀢𑁂 𑀉𑀪𑁄𑀧𑀺 𑀲𑀻𑀢𑀮𑀸? 𑀏𑀓𑀁 𑀉𑀡𑁆𑀳𑀁, 𑀏𑀓𑀁 𑀲𑀻𑀢𑀮𑀁, 𑀉𑀪𑁄𑀧𑀺 𑀢𑁂 𑀤𑀳𑀦𑁆𑀢𑀺, 𑀢𑁂𑀦 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀦𑀸𑀳𑀁 𑀧𑀝𑀺𑀩𑀮𑁄 𑀢𑀬𑀸 𑀯𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁, 𑀲𑀸𑀥𑀼 𑀅𑀢𑁆𑀣𑀁 𑀚𑀧𑁆𑀧𑁂𑀳𑀻’’𑀢𑀺. 𑀢𑀢𑁄 𑀣𑁂𑀭𑁄 𑀅𑀪𑀺𑀥𑀫𑁆𑀫𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀲𑀜𑁆𑀜𑀸𑀧𑁂𑀲𑀺 𑁋

‘‘𑀙𑀬𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀕𑁂𑀳𑀦𑀺𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀦𑀺𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺, 𑀇𑀫𑀸𑀦𑀺 𑀙 𑀙𑀓𑁆𑀓𑀸𑀦𑀺, 𑀅𑀢𑀻𑀢𑀸𑀧𑀺 𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑁂𑀤𑀦𑀸, 𑀅𑀦𑀸𑀕𑀢𑀸𑀧𑀺 𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑁂𑀤𑀦𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑁂𑀤𑀦𑀸, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀼𑀳𑀺𑀢𑁆𑀯𑀸 𑀅𑀪𑀺𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀝𑁆𑀞𑀲𑀢𑀁 𑀯𑁂𑀤𑀦𑀸 𑀳𑁄𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑁂𑀤𑀦𑀸𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀦𑀸𑀫𑀭𑀽𑀧𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀦𑀸𑀫𑀭𑀽𑀧𑀁 𑀔𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. ‘‘𑀓𑀺𑀁 𑀇𑀫𑀁 𑀬𑁂𑀯 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺? ‘‘𑀦 𑀔𑁄, 𑀫𑀳𑀸𑀭𑀸𑀚, 𑀇𑀫𑀁 𑀬𑁂𑀯 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀇𑀫𑀺𑀦𑀸 𑀧𑀦, 𑀫𑀳𑀸𑀭𑀸𑀚, 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀧𑀸𑀧𑀓𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂, 𑀦 𑀇𑀫𑀁 𑀬𑁂𑀯 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀦𑀦𑀼 𑀲𑁄 𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀬𑀤𑀺 𑀦 𑀧𑀝𑀺𑀲𑀦𑁆𑀤𑀳𑁂𑀬𑁆𑀬, 𑀫𑀼𑀢𑁆𑀢𑁄 𑀪𑀯𑁂𑀬𑁆𑀬 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀺. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀁 𑀅𑀯𑀳𑀭𑁂𑀬𑁆𑀬, 𑀢𑀫𑁂𑀦𑀁 𑀅𑀫𑁆𑀩𑀲𑀸𑀫𑀺𑀓𑁄 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬 ‘𑀇𑀫𑀺𑀦𑀸 𑀤𑁂𑀯 𑀧𑀼𑀭𑀺𑀲𑁂𑀦 𑀫𑀬𑁆𑀳𑀁 𑀅𑀫𑁆𑀩𑀸 𑀅𑀯𑀳𑀝𑀸’𑀢𑀺, 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁, 𑀤𑁂𑀯, 𑀇𑀫𑀲𑁆𑀲 𑀅𑀫𑁆𑀩𑁂 𑀅𑀯𑀳𑀭𑀸𑀫𑀺, 𑀅𑀜𑁆𑀜𑁂 𑀢𑁂 𑀅𑀫𑁆𑀩𑀸, 𑀬𑁂 𑀇𑀫𑀺𑀦𑀸 𑀭𑁄𑀧𑀺𑀢𑀸, 𑀅𑀜𑁆𑀜𑁂 𑀢𑁂 𑀅𑀫𑁆𑀩𑀸, 𑀬𑁂 𑀫𑀬𑀸 𑀅𑀯𑀳𑀝𑀸, 𑀦𑀸𑀳𑀁 𑀤𑀡𑁆𑀟𑀧𑁆𑀧𑀢𑁆𑀢𑁄’𑀢𑀺. 𑀓𑀺𑀁 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀧𑀼𑀭𑀺𑀫𑀁, 𑀪𑀦𑁆𑀢𑁂, 𑀅𑀫𑁆𑀩𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀧𑀘𑁆𑀙𑀺𑀫𑁂𑀦 𑀅𑀫𑁆𑀩𑁂𑀦 𑀲𑁄 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀧𑀸𑀧𑀓𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀸𑀮𑀺𑀁 𑀅𑀯𑀳𑀭𑁂𑀬𑁆𑀬…𑀧𑁂… 𑀉𑀘𑁆𑀙𑀼𑀁 𑀅𑀯𑀳𑀭𑁂𑀬𑁆𑀬…𑀧𑁂… 𑀬𑀣𑀸 𑀫𑀳𑀸𑀭𑀸𑀚 𑀓𑁄𑀘𑀺 𑀧𑀼𑀭𑀺𑀲𑁄 𑀳𑁂𑀫𑀦𑁆𑀢𑀓𑀸𑀮𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 [𑀯𑀺𑀲𑀻𑀯𑁂𑀢𑁆𑀯𑀸 (𑀲𑀻. 𑀧𑀻.)] 𑀅𑀯𑀺𑀚𑁆𑀛𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬, 𑀅𑀣 𑀔𑁄 𑀲𑁄 𑀅𑀕𑁆𑀕𑀺 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀔𑁂𑀢𑁆𑀢𑀁 𑀟𑀳𑁂𑀬𑁆𑀬 [𑀉𑀧𑀟𑀳𑁂𑀬𑁆𑀬 (𑀓.)], 𑀢𑀫𑁂𑀦𑀁 𑀔𑁂𑀢𑁆𑀢𑀲𑀸𑀫𑀺𑀓𑁄 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬 ‘𑀇𑀫𑀺𑀦𑀸, 𑀤𑁂𑀯, 𑀧𑀼𑀭𑀺𑀲𑁂𑀦 𑀫𑀬𑁆𑀳𑀁 𑀔𑁂𑀢𑁆𑀢𑀁 𑀤𑀟𑁆𑀠’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁, 𑀤𑁂𑀯, 𑀇𑀫𑀲𑁆𑀲 𑀔𑁂𑀢𑁆𑀢𑀁 𑀛𑀸𑀧𑁂𑀫𑀺, 𑀅𑀜𑁆𑀜𑁄 𑀲𑁄 𑀅𑀕𑁆𑀕𑀺, 𑀬𑁄 𑀫𑀬𑀸 𑀅𑀯𑀺𑀚𑁆𑀛𑀸𑀧𑀺𑀢𑁄, 𑀅𑀜𑁆𑀜𑁄 𑀲𑁄 𑀅𑀕𑁆𑀕𑀺, 𑀬𑁂𑀦𑀺𑀫𑀲𑁆𑀲 𑀔𑁂𑀢𑁆𑀢𑀁 𑀤𑀟𑁆𑀠𑀁, 𑀦𑀸𑀳𑀁 𑀤𑀡𑁆𑀟𑀧𑁆𑀧𑀢𑁆𑀢𑁄’𑀢𑀺. 𑀓𑀺𑀁 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀧𑀼𑀭𑀺𑀫𑀁, 𑀪𑀦𑁆𑀢𑁂, 𑀅𑀕𑁆𑀕𑀺𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀧𑀘𑁆𑀙𑀺𑀫𑁂𑀦 𑀅𑀕𑁆𑀕𑀺𑀦𑀸 𑀲𑁄 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀧𑀸𑀧𑀓𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀤𑀻𑀧𑀁 𑀆𑀤𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀤𑀻𑀧𑁄 𑀛𑀸𑀬𑀫𑀸𑀦𑁄 𑀢𑀺𑀡𑀁 𑀛𑀸𑀧𑁂𑀬𑁆𑀬, 𑀢𑀺𑀡𑀁 𑀛𑀸𑀬𑀫𑀸𑀦𑀁 𑀖𑀭𑀁 𑀛𑀸𑀧𑁂𑀬𑁆𑀬, 𑀖𑀭𑀁 𑀛𑀸𑀬𑀫𑀸𑀦𑀁 𑀕𑀸𑀫𑀁 𑀛𑀸𑀧𑁂𑀬𑁆𑀬, 𑀕𑀸𑀫𑀚𑀦𑁄 𑀢𑀁 𑀧𑀼𑀭𑀺𑀲𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀓𑀺𑀲𑁆𑀲 𑀢𑁆𑀯𑀁, 𑀪𑁄 𑀧𑀼𑀭𑀺𑀲, 𑀕𑀸𑀫𑀁 𑀛𑀸𑀧𑁂𑀲𑀻’𑀢𑀺, 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁, 𑀪𑁄, 𑀕𑀸𑀫𑀁 𑀛𑀸𑀧𑁂𑀫𑀺, 𑀅𑀜𑁆𑀜𑁄 𑀲𑁄 𑀧𑀤𑀻𑀧𑀕𑁆𑀕𑀺, 𑀬𑀲𑁆𑀲𑀸𑀳𑀁 𑀆𑀮𑁄𑀓𑁂𑀦 𑀪𑀼𑀜𑁆𑀚𑀺𑀁, 𑀅𑀜𑁆𑀜𑁄 𑀲𑁄 𑀅𑀕𑁆𑀕𑀺, 𑀬𑁂𑀦 𑀕𑀸𑀫𑁄 𑀛𑀸𑀧𑀺𑀢𑁄’𑀢𑀺, 𑀢𑁂 𑀯𑀺𑀯𑀤𑀫𑀸𑀦𑀸 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀓𑀲𑁆𑀲 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀝𑁆𑀝𑀁 [𑀅𑀢𑁆𑀣𑀁 (𑀲𑀻. 𑀧𑀻.)] 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀕𑀸𑀫𑀚𑀦𑀲𑁆𑀲 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀅𑀧𑀺 𑀘 𑀢𑀢𑁄 𑀏𑀯 𑀲𑁄 𑀅𑀕𑁆𑀕𑀺 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀁 𑀫𑀸𑀭𑀡𑀦𑁆𑀢𑀺𑀓𑀁 𑀦𑀸𑀫𑀭𑀽𑀧𑀁, 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀲𑁆𑀫𑀺𑀁 𑀦𑀸𑀫𑀭𑀽𑀧𑀁, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀤𑀳𑀭𑀺𑀁 𑀤𑀸𑀭𑀺𑀓𑀁 𑀯𑀸𑀭𑁂𑀢𑁆𑀯𑀸 𑀲𑀼𑀗𑁆𑀓𑀁 𑀤𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀫𑀳𑀢𑀻 𑀅𑀲𑁆𑀲 𑀯𑀬𑀧𑁆𑀧𑀢𑁆𑀢𑀸, 𑀢𑀢𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀲𑀼𑀗𑁆𑀓𑀁 𑀤𑀢𑁆𑀯𑀸 𑀯𑀺𑀯𑀸𑀳𑀁 𑀓𑀭𑁂𑀬𑁆𑀬, 𑀇𑀢𑀭𑁄 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀓𑀺𑀲𑁆𑀲 𑀧𑀦 𑀫𑁂 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀪𑀭𑀺𑀬𑀁 𑀦𑁂𑀲𑀻’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁 𑀢𑀯 𑀪𑀭𑀺𑀬𑀁 𑀦𑁂𑀫𑀺, 𑀅𑀜𑁆𑀜𑀸 𑀲𑀸 𑀤𑀸𑀭𑀺𑀓𑀸 𑀤𑀳𑀭𑀻 𑀢𑀭𑀼𑀡𑀻, 𑀬𑀸 𑀢𑀬𑀸 𑀯𑀸𑀭𑀺𑀢𑀸 𑀘 𑀤𑀺𑀦𑁆𑀦𑀲𑀼𑀗𑁆𑀓𑀸 𑀘, 𑀅𑀜𑁆𑀜𑀸𑀬𑀁 𑀤𑀸𑀭𑀺𑀓𑀸 𑀫𑀳𑀢𑀻 𑀯𑀬𑀧𑁆𑀧𑀢𑁆𑀢𑀸 𑀫𑀬𑀸 𑀯𑀸𑀭𑀺𑀢𑀸 𑀘 𑀤𑀺𑀦𑁆𑀦𑀲𑀼𑀗𑁆𑀓𑀸 𑀘𑀸’𑀢𑀺, 𑀢𑁂 𑀯𑀺𑀯𑀤𑀫𑀸𑀦𑀸 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁. 𑀓𑀲𑁆𑀲 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀝𑁆𑀝𑀁 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀧𑀼𑀭𑀺𑀫𑀲𑁆𑀲 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀅𑀧𑀺 𑀘 𑀢𑀢𑁄 𑀬𑁂𑀯 𑀲𑀸 𑀫𑀳𑀢𑀻 𑀦𑀺𑀩𑁆𑀩𑀢𑁆𑀢𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀁 𑀫𑀸𑀭𑀡𑀦𑁆𑀢𑀺𑀓𑀁 𑀦𑀸𑀫𑀭𑀽𑀧𑀁, 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀲𑁆𑀫𑀺𑀁 𑀦𑀸𑀫𑀭𑀽𑀧𑀁, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀦𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀕𑁄𑀧𑀸𑀮𑀓𑀲𑁆𑀲 𑀳𑀢𑁆𑀣𑀢𑁄 𑀔𑀻𑀭𑀖𑀝𑀁 𑀓𑀺𑀡𑀺𑀢𑁆𑀯𑀸 𑀢𑀲𑁆𑀲𑁂𑀯 𑀳𑀢𑁆𑀣𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬 ‘𑀲𑁆𑀯𑁂 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺, 𑀢𑀁 𑀅𑀧𑀭𑀚𑁆𑀚𑀼 𑀤𑀥𑀺 𑀲𑀫𑁆𑀧𑀚𑁆𑀚𑁂𑀬𑁆𑀬. 𑀲𑁄 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀤𑁂𑀳𑀺 𑀫𑁂 𑀔𑀻𑀭𑀖𑀝’𑀦𑁆𑀢𑀺. 𑀲𑁄 𑀤𑀥𑀺𑀁 𑀤𑀲𑁆𑀲𑁂𑀬𑁆𑀬. 𑀇𑀢𑀭𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁 𑀢𑀯 𑀳𑀢𑁆𑀣𑀢𑁄 𑀤𑀥𑀺𑀁 𑀓𑀺𑀡𑀸𑀫𑀺, 𑀤𑁂𑀳𑀺 𑀫𑁂 𑀔𑀻𑀭𑀖𑀝’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀅𑀚𑀸𑀦𑀢𑁄 𑀢𑁂 𑀔𑀻𑀭𑀁 𑀤𑀥𑀺𑀪𑀽𑀢’𑀦𑁆𑀢𑀺 𑀢𑁂 𑀯𑀺𑀯𑀤𑀫𑀸𑀦𑀸 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀓𑀲𑁆𑀲 𑀢𑁆𑀯𑀁 𑀫𑀳𑀸𑀭𑀸𑀚, 𑀅𑀝𑁆𑀝𑀁 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀕𑁄𑀧𑀸𑀮𑀓𑀲𑁆𑀲 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀁 𑀫𑀸𑀭𑀡𑀦𑁆𑀢𑀺𑀓𑀁 𑀦𑀸𑀫𑀭𑀽𑀧𑀁, 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀲𑁆𑀫𑀺𑀁 𑀦𑀸𑀫𑀭𑀽𑀧𑀁, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀦 𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀸𑀫𑀭𑀽𑀧𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀣𑁂𑀭𑀧𑀝𑀺𑀲𑀦𑁆𑀤𑀳𑀦𑀸𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁆𑀯𑀁 𑀧𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀲𑀻’’𑀢𑀺? ‘‘𑀅𑀮𑀁, 𑀫𑀳𑀸𑀭𑀸𑀚, 𑀓𑀺𑀁 𑀢𑁂 𑀢𑁂𑀦 𑀧𑀼𑀘𑁆𑀙𑀺𑀢𑁂𑀦, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 ‘𑀲𑀘𑁂, 𑀫𑀳𑀸𑀭𑀸𑀚, 𑀲𑀉𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀦𑀼𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀅𑀥𑀺𑀓𑀸𑀭𑀁 𑀓𑀭𑁂𑀬𑁆𑀬. 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀥𑀺𑀓𑀸𑀭𑀁 𑀤𑀤𑁂𑀬𑁆𑀬, 𑀲𑁄 𑀢𑁂𑀦 𑀅𑀥𑀺𑀓𑀸𑀭𑁂𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀺𑀪𑀽𑀢𑁄 𑀧𑀭𑀺𑀘𑀭𑁂𑀬𑁆𑀬, 𑀲𑁄 𑀘𑁂 𑀚𑀦𑀲𑁆𑀲 𑀆𑀭𑁄𑀘𑁂𑀬𑁆𑀬 ‘𑀦 𑀫𑁂 𑀭𑀸𑀚𑀸 𑀓𑀺𑀜𑁆𑀘𑀺 𑀧𑀝𑀺𑀓𑀭𑁄𑀢𑀻’ 𑀢𑀺. 𑀓𑀺𑀁 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀬𑀼𑀢𑁆𑀢𑀓𑀸𑀭𑀻 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀁 𑀢𑁂 𑀢𑁂𑀦 𑀧𑀼𑀘𑁆𑀙𑀺𑀢𑁂𑀦, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 ‘𑀲𑀘𑁂 𑀲𑀉𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀦𑀼𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀣𑁂𑀭𑀧𑀝𑀺𑀲𑀦𑁆𑀤𑀳𑀦𑀸𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀦𑀸𑀫𑀭𑀽𑀧𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀦𑀸𑀫𑀭𑀽𑀧’𑀦𑁆𑀢𑀺, 𑀢𑀢𑁆𑀣 𑀓𑀢𑀫𑀁 𑀦𑀸𑀫𑀁, 𑀓𑀢𑀫𑀁 𑀭𑀽𑀧’’𑀦𑁆𑀢𑀺. ‘‘𑀬𑀁 𑀢𑀢𑁆𑀣, 𑀫𑀳𑀸𑀭𑀸𑀚, 𑀑𑀴𑀸𑀭𑀺𑀓𑀁, 𑀏𑀢𑀁 𑀭𑀽𑀧𑀁, 𑀬𑁂 𑀢𑀢𑁆𑀣 𑀲𑀼𑀔𑀼𑀫𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀏𑀢𑀁 𑀦𑀸𑀫’’𑀦𑁆𑀢𑀺. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀦𑀸𑀫𑀁 𑀬𑁂𑀯 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀭𑀽𑀧𑀁 𑀬𑁂𑀯 𑀯𑀸’’𑀢𑀺? ‘‘𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸, 𑀫𑀳𑀸𑀭𑀸𑀚, 𑀏𑀢𑁂 𑀥𑀫𑁆𑀫𑀸 𑀏𑀓𑀢𑁄𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀺𑀬𑀸 𑀓𑀮𑀮𑀁 𑀦 𑀪𑀯𑁂𑀬𑁆𑀬, 𑀅𑀡𑁆𑀟𑀫𑁆𑀧𑀺 𑀦 𑀪𑀯𑁂𑀬𑁆𑀬, 𑀬𑀜𑁆𑀘 𑀢𑀢𑁆𑀣 𑀓𑀮𑀮𑀁, 𑀬𑀜𑁆𑀘 𑀅𑀡𑁆𑀟𑀁, 𑀉𑀪𑁄𑀧𑁂𑀢𑁂 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸, 𑀏𑀓𑀢𑁄𑀯 𑀦𑁂𑀲𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀢𑀢𑁆𑀣 𑀦𑀸𑀫𑀁 𑀦 𑀪𑀯𑁂𑀬𑁆𑀬, 𑀭𑀽𑀧𑀫𑁆𑀧𑀺 𑀦 𑀪𑀯𑁂𑀬𑁆𑀬, 𑀬𑀜𑁆𑀘𑁂𑀯 𑀢𑀢𑁆𑀣 𑀦𑀸𑀫𑀁, 𑀬𑀜𑁆𑀘𑁂𑀯 𑀭𑀽𑀧𑀁, 𑀉𑀪𑁄𑀧𑁂𑀢𑁂 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸, 𑀏𑀓𑀢𑁄𑀯 𑀦𑁂𑀲𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀫𑁂𑀢𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀸𑀫𑀭𑀽𑀧𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀅𑀤𑁆𑀥𑀸𑀦𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀤𑀻𑀖𑀫𑀤𑁆𑀥𑀸𑀦’𑀦𑁆𑀢𑀺, 𑀓𑀺𑀫𑁂𑀢𑀁 𑀅𑀤𑁆𑀥𑀸𑀦𑀁 𑀦𑀸𑀫𑀸’’𑀢𑀺? ‘‘𑀅𑀢𑀻𑀢𑁄, 𑀫𑀳𑀸𑀭𑀸𑀚, 𑀅𑀤𑁆𑀥𑀸, 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀩𑁆𑀩𑁂 𑀅𑀤𑁆𑀥𑀸 𑀅𑀢𑁆𑀣𑀻’’𑀢𑀺? ‘‘𑀓𑁄𑀘𑀺, 𑀫𑀳𑀸𑀭𑀸𑀚, 𑀅𑀤𑁆𑀥𑀸 𑀅𑀢𑁆𑀣𑀺, 𑀓𑁄𑀘𑀺 𑀦𑀢𑁆𑀣𑀻’’𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀅𑀢𑁆𑀣𑀺, 𑀓𑀢𑀫𑁄 𑀦𑀢𑁆𑀣𑀻’’𑀢𑀺? ‘‘𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸 𑀯𑀺𑀕𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀧𑀭𑀺𑀡𑀢𑀸, 𑀲𑁄 𑀅𑀤𑁆𑀥𑀸 𑀦𑀢𑁆𑀣𑀺, 𑀬𑁂 𑀥𑀫𑁆𑀫𑀸 𑀯𑀺𑀧𑀸𑀓𑀸, 𑀬𑁂 𑀘 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀬𑁂 𑀘 𑀅𑀜𑁆𑀜𑀢𑁆𑀭 𑀧𑀝𑀺𑀲𑀦𑁆𑀥𑀺𑀁 𑀤𑁂𑀦𑁆𑀢𑀺, 𑀲𑁄 𑀅𑀤𑁆𑀥𑀸 𑀅𑀢𑁆𑀣𑀺. 𑀬𑁂 𑀲𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀅𑀜𑁆𑀜𑀢𑁆𑀭 𑀉𑀧𑁆𑀧𑀦𑁆𑀦𑀸, 𑀲𑁄 𑀘 𑀅𑀤𑁆𑀥𑀸 𑀅𑀢𑁆𑀣𑀺. 𑀬𑁂 𑀲𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀅𑀜𑁆𑀜𑀢𑁆𑀭 𑀅𑀦𑀼𑀧𑁆𑀧𑀦𑁆𑀦𑀸, 𑀲𑁄 𑀅𑀤𑁆𑀥𑀸 𑀦𑀢𑁆𑀣𑀺. 𑀬𑁂 𑀘 𑀲𑀢𑁆𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸, 𑀲𑁄 𑀘 𑀅𑀤𑁆𑀥𑀸 𑀦𑀢𑁆𑀣𑀺 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀤𑁆𑀥𑀸𑀦𑀧𑀜𑁆𑀳𑁄 𑀦𑀯𑀫𑁄.

𑀅𑀤𑁆𑀥𑀸𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀦𑀯 𑀧𑀜𑁆𑀳𑀸.

𑁩. 𑀯𑀺𑀘𑀸𑀭𑀯𑀕𑁆𑀕𑁄

𑁧. 𑀅𑀤𑁆𑀥𑀸𑀦𑀫𑀽𑀮𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀻𑀢𑀲𑁆𑀲 𑀅𑀤𑁆𑀥𑀸𑀦𑀲𑁆𑀲 𑀓𑀺𑀁 𑀫𑀽𑀮𑀁, 𑀅𑀦𑀸𑀕𑀢𑀲𑁆𑀲 𑀅𑀤𑁆𑀥𑀸𑀦𑀲𑁆𑀲 𑀓𑀺𑀁 𑀫𑀽𑀮𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀅𑀤𑁆𑀥𑀸𑀦𑀲𑁆𑀲 𑀓𑀺𑀁 𑀫𑀽𑀮’’𑀦𑁆𑀢𑀺? ‘‘𑀅𑀢𑀻𑀢𑀲𑁆𑀲 𑀘, 𑀫𑀳𑀸𑀭𑀸𑀚, 𑀅𑀤𑁆𑀥𑀸𑀦𑀲𑁆𑀲 𑀅𑀦𑀸𑀕𑀢𑀲𑁆𑀲 𑀘 𑀅𑀤𑁆𑀥𑀸𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀤𑁆𑀥𑀸𑀦𑀲𑁆𑀲 𑀅𑀯𑀺𑀚𑁆𑀚𑀸 𑀫𑀽𑀮𑀁. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀤𑁆𑀥𑀸𑀦𑀲𑁆𑀲 [𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀤𑁆𑀥𑀸𑀦𑀲𑁆𑀲 (𑀲𑀻.)] 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀤𑁆𑀥𑀸𑀦𑀫𑀽𑀮𑀧𑀜𑁆𑀳𑁄 𑀧𑀞𑀫𑁄.

𑁨. 𑀧𑀼𑀭𑀺𑀫𑀓𑁄𑀝𑀺𑀧𑀜𑁆𑀳𑁄

𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’𑀢𑀺, 𑀢𑀲𑁆𑀲 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 [𑀧𑀭𑀺𑀧𑀓𑁆𑀓𑀁 (𑀓.)] 𑀩𑀻𑀚𑀁 𑀧𑀣𑀯𑀺𑀬𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀢𑀢𑁄 𑀅𑀗𑁆𑀓𑀼𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀢𑁆𑀯𑀸 𑀨𑀮𑀁 𑀤𑀤𑁂𑀬𑁆𑀬. 𑀢𑀢𑁄 𑀩𑀻𑀚𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀭𑁄𑀧𑁂𑀬𑁆𑀬, 𑀢𑀢𑁄𑀧𑀺 𑀅𑀗𑁆𑀓𑀼𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀢𑁆𑀯𑀸 𑀨𑀮𑀁 𑀤𑀤𑁂𑀬𑁆𑀬. 𑀏𑀯𑀫𑁂𑀢𑀺𑀲𑁆𑀲𑀸 𑀲𑀦𑁆𑀢𑀢𑀺𑀬𑀸 𑀅𑀢𑁆𑀣𑀺 𑀅𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀤𑁆𑀥𑀸𑀦𑀲𑁆𑀲𑀸𑀧𑀺 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀁 𑀪𑀯𑁂𑀬𑁆𑀬, 𑀅𑀡𑁆𑀟𑀢𑁄 𑀓𑀼𑀓𑁆𑀓𑀼𑀝𑀻 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀦𑁆𑀢𑀺. 𑀏𑀯𑀫𑁂𑀢𑀺𑀲𑁆𑀲𑀸 𑀲𑀦𑁆𑀢𑀢𑀺𑀬𑀸 𑀅𑀢𑁆𑀣𑀺 𑀅𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀤𑁆𑀥𑀸𑀦𑀲𑁆𑀲𑀸𑀧𑀺 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. 𑀣𑁂𑀭𑁄 𑀧𑀣𑀯𑀺𑀬𑀸 𑀘𑀓𑁆𑀓𑀁 𑀮𑀺𑀔𑀺𑀢𑁆𑀯𑀸 𑀫𑀺𑀮𑀺𑀦𑁆𑀤𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀲 𑀘𑀓𑁆𑀓𑀲𑁆𑀲 𑀅𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀸𑀦𑀺 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 ‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀫𑁆𑀫𑀁, 𑀓𑀫𑁆𑀫𑀢𑁄 𑀧𑀼𑀦 𑀘𑀓𑁆𑀔𑀼𑀁 𑀚𑀸𑀬𑀢𑀻’𑀢𑀺. 𑀏𑀯𑀫𑁂𑀢𑀺𑀲𑁆𑀲𑀸 𑀲𑀦𑁆𑀢𑀢𑀺𑀬𑀸 𑀅𑀢𑁆𑀣𑀺 𑀅𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂’’𑀢𑀺.

‘‘‘𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀫𑁆𑀫𑀁, 𑀓𑀫𑁆𑀫𑀢𑁄 𑀧𑀼𑀦 𑀫𑀦𑁄 𑀚𑀸𑀬𑀢𑀻’𑀢𑀺. 𑀏𑀯𑀫𑁂𑀢𑀺𑀲𑁆𑀲𑀸 𑀲𑀦𑁆𑀢𑀢𑀺𑀬𑀸 𑀅𑀢𑁆𑀣𑀺 𑀅𑀦𑁆𑀢𑁄’’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀤𑁆𑀥𑀸𑀦𑀲𑁆𑀲𑀸𑀧𑀺 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀼𑀭𑀺𑀫𑀓𑁄𑀝𑀺𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀓𑁄𑀝𑀺𑀧𑀜𑁆𑀜𑀸𑀬𑀦𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’𑀢𑀺, 𑀓𑀢𑀫𑀸 𑀘 𑀲𑀸 𑀧𑀼𑀭𑀺𑀫𑀸 𑀓𑁄𑀝𑀻’’𑀢𑀺? ‘‘𑀬𑁄 𑀔𑁄, 𑀫𑀳𑀸𑀭𑀸𑀚, 𑀅𑀢𑀻𑀢𑁄 𑀅𑀤𑁆𑀥𑀸, 𑀏𑀲𑀸 𑀧𑀼𑀭𑀺𑀫𑀸 𑀓𑁄𑀝𑀻’’𑀢𑀺. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’𑀢𑀺, 𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀩𑁆𑀩𑀸𑀧𑀺 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺? ‘‘𑀓𑀸𑀘𑀺, 𑀫𑀳𑀸𑀭𑀸𑀚, 𑀧𑀜𑁆𑀜𑀸𑀬𑀢𑀺, 𑀓𑀸𑀘𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺. ‘‘𑀓𑀢𑀫𑀸, 𑀪𑀦𑁆𑀢𑁂, 𑀧𑀜𑁆𑀜𑀸𑀬𑀢𑀺, 𑀓𑀢𑀫𑀸 𑀦 𑀧𑀜𑁆𑀜𑀸𑀬𑀢𑀻’’𑀢𑀺? ‘‘𑀇𑀢𑁄 𑀧𑀼𑀩𑁆𑀩𑁂, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀻𑀢𑀺 𑀏𑀲𑀸 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀬𑀁 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀏𑀲𑀧 𑀧𑀼𑀭𑀺𑀫𑀸 𑀓𑁄𑀝𑀺 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑀺𑀕𑀘𑁆𑀙𑀢𑀺, 𑀦𑀦𑀼 𑀢𑀁 𑀉𑀪𑀢𑁄 𑀙𑀺𑀦𑁆𑀦𑀁 𑀅𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺? ‘‘𑀬𑀤𑀺, 𑀫𑀳𑀸𑀭𑀸𑀚, 𑀉𑀪𑀢𑁄 𑀙𑀺𑀦𑁆𑀦𑀁 𑀅𑀢𑁆𑀣𑀁 𑀕𑀘𑁆𑀙𑀢𑀺, 𑀉𑀪𑀢𑁄 𑀙𑀺𑀦𑁆𑀦𑀸 𑀲𑀓𑁆𑀓𑀸 𑀯𑀟𑁆𑀠𑁂𑀢𑀼’’𑀦𑁆𑀢𑀺? ‘‘𑀆𑀫, 𑀲𑀸𑀧𑀺 𑀲𑀓𑁆𑀓𑀸 𑀯𑀟𑁆𑀠𑁂𑀢𑀼’’𑀦𑁆𑀢𑀺.’’𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀁 𑀧𑀼𑀘𑁆𑀙𑀸𑀫𑀺 𑀓𑁄𑀝𑀺𑀢𑁄 𑀲𑀓𑁆𑀓𑀸 𑀯𑀟𑁆𑀠𑁂𑀢𑀼’’𑀦𑁆𑀢𑀺? ‘‘𑀆𑀫 𑀲𑀓𑁆𑀓𑀸 𑀯𑀟𑁆𑀠𑁂𑀢𑀼’’𑀦𑁆𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. 𑀣𑁂𑀭𑁄 𑀢𑀲𑁆𑀲 𑀭𑀼𑀓𑁆𑀔𑀽𑀧𑀫𑀁 𑀅𑀓𑀸𑀲𑀺, 𑀔𑀦𑁆𑀥𑀸 𑀘 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀩𑀻𑀚𑀸𑀦𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀓𑁄𑀝𑀺𑀧𑀜𑁆𑀜𑀸𑀬𑀦𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀲𑀗𑁆𑀔𑀸𑀭𑀚𑀸𑀬𑀫𑀸𑀦𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀚𑀸𑀬𑀦𑁆𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸, 𑀬𑁂 𑀚𑀸𑀬𑀦𑁆𑀢𑀻’’𑀢𑀺. ‘‘𑀓𑀢𑀫𑁂 𑀢𑁂, 𑀪𑀦𑁆𑀢𑁂’’𑀢𑀺? ‘‘𑀘𑀓𑁆𑀔𑀼𑀲𑁆𑀫𑀺𑀜𑁆𑀘 𑀔𑁄, 𑀫𑀳𑀸𑀭𑀸𑀚, 𑀲𑀢𑀺 𑀭𑀽𑀧𑁂𑀲𑀼 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀳𑁄𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂 𑀲𑀢𑀺 𑀯𑁂𑀤𑀦𑀸 𑀳𑁄𑀢𑀺, 𑀯𑁂𑀤𑀦𑀸𑀬 𑀲𑀢𑀺 𑀢𑀡𑁆𑀳𑀸 𑀳𑁄𑀢𑀺, 𑀢𑀡𑁆𑀳𑀸𑀬 𑀲𑀢𑀺 𑀉𑀧𑀸𑀤𑀸𑀦𑀁 𑀳𑁄𑀢𑀺, 𑀉𑀧𑀸𑀤𑀸𑀦𑁂 𑀲𑀢𑀺 𑀪𑀯𑁄 𑀳𑁄𑀢𑀺, 𑀪𑀯𑁂 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀚𑀸𑀢𑀺𑀬𑀸 𑀲𑀢𑀺 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀘𑀓𑁆𑀔𑀼𑀲𑁆𑀫𑀺𑀜𑁆𑀘 𑀔𑁄, 𑀫𑀳𑀸𑀭𑀸𑀚, 𑀅𑀲𑀢𑀺 𑀭𑀽𑀧𑁂𑀲𑀼 𑀘 𑀅𑀲𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀅𑀲𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀦 𑀳𑁄𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂 𑀅𑀲𑀢𑀺 𑀯𑁂𑀤𑀦𑀸 𑀦 𑀳𑁄𑀢𑀺, 𑀯𑁂𑀤𑀦𑀸𑀬 𑀅𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺, 𑀢𑀡𑁆𑀳𑀸𑀬 𑀅𑀲𑀢𑀺 𑀉𑀧𑀸𑀤𑀸𑀦𑀁 𑀦 𑀳𑁄𑀢𑀺, 𑀉𑀧𑀸𑀤𑀸𑀦𑁂 𑀅𑀲𑀢𑀺 𑀪𑀯𑁄 𑀦 𑀳𑁄𑀢𑀺, 𑀪𑀯𑁂 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺, 𑀚𑀸𑀢𑀺𑀬𑀸 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦 𑀳𑁄𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀗𑁆𑀔𑀸𑀭𑀚𑀸𑀬𑀫𑀸𑀦𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀪𑀯𑀦𑁆𑀢𑀲𑀗𑁆𑀔𑀸𑀭𑀚𑀸𑀬𑀫𑀸𑀦𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀻’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀤𑀁 𑀕𑁂𑀳𑀁 𑀅𑀪𑀯𑀦𑁆𑀢𑀁 𑀚𑀸𑀢𑀁, 𑀬𑀢𑁆𑀣 𑀢𑁆𑀯𑀁 𑀦𑀺𑀲𑀺𑀦𑁆𑀦𑁄𑀲𑀻’’𑀢𑀺? ‘‘𑀦𑀢𑁆𑀣𑀺 𑀓𑀺𑀜𑁆𑀘𑀺, 𑀪𑀦𑁆𑀢𑁂, 𑀇𑀥 𑀅𑀪𑀯𑀦𑁆𑀢𑀁 𑀚𑀸𑀢𑀁, 𑀪𑀯𑀦𑁆𑀢𑀁 𑀬𑁂𑀯 𑀚𑀸𑀢𑀁, 𑀇𑀫𑀸𑀦𑀺 𑀔𑁄, 𑀪𑀦𑁆𑀢𑁂, 𑀤𑀸𑀭𑀽𑀦𑀺 𑀯𑀦𑁂 𑀅𑀳𑁂𑀲𑀼𑀁, 𑀅𑀬𑀜𑁆𑀘 𑀫𑀢𑁆𑀢𑀺𑀓𑀸 𑀧𑀣𑀯𑀺𑀬𑀁 𑀅𑀳𑁄𑀲𑀺, 𑀇𑀢𑁆𑀣𑀻𑀦𑀜𑁆𑀘 𑀧𑀼𑀭𑀺𑀲𑀸𑀦𑀜𑁆𑀘 𑀢𑀚𑁆𑀚𑁂𑀦 𑀯𑀸𑀬𑀸𑀫𑁂𑀦 𑀏𑀯𑀫𑀺𑀤𑀁 𑀕𑁂𑀳𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀧𑀣𑀯𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀫𑀸𑀦𑀸 𑀧𑀼𑀧𑁆𑀨𑀸𑀦𑀺 𑀘 𑀨𑀮𑀸𑀦𑀺 𑀘 𑀤𑀤𑁂𑀬𑁆𑀬𑀼𑀁, 𑀦 𑀢𑁂 𑀭𑀼𑀓𑁆𑀔𑀸 𑀅𑀪𑀯𑀦𑁆𑀢𑀸 𑀚𑀸𑀢𑀸, 𑀪𑀯𑀦𑁆𑀢𑀸 𑀬𑁂𑀯 𑀢𑁂 𑀭𑀼𑀓𑁆𑀔𑀸 𑀚𑀸𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀢𑁂 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀫𑁆𑀪𑀓𑀸𑀭𑁄 𑀧𑀣𑀯𑀺𑀬𑀸 𑀫𑀢𑁆𑀢𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀦𑀸𑀦𑀸𑀪𑀸𑀚𑀦𑀸𑀦𑀺 𑀓𑀭𑁄𑀢𑀺, 𑀦 𑀢𑀸𑀦𑀺 𑀪𑀸𑀚𑀦𑀸𑀦𑀺 𑀅𑀪𑀯𑀦𑁆𑀢𑀸𑀦𑀺 𑀚𑀸𑀢𑀸𑀦𑀺, 𑀪𑀯𑀦𑁆𑀢𑀸𑀦𑀺 𑀬𑁂𑀯 𑀚𑀸𑀢𑀸𑀦𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀻𑀡𑀸𑀬 𑀧𑀢𑁆𑀢𑀁 𑀦 𑀲𑀺𑀬𑀸, 𑀘𑀫𑁆𑀫𑀁 𑀦 𑀲𑀺𑀬𑀸, 𑀤𑁄𑀡𑀺 𑀦 𑀲𑀺𑀬𑀸, 𑀤𑀡𑁆𑀟𑁄 𑀦 𑀲𑀺𑀬𑀸, 𑀉𑀧𑀯𑀻𑀡𑁄 𑀦 𑀲𑀺𑀬𑀸, 𑀢𑀦𑁆𑀢𑀺𑀬𑁄 𑀦 𑀲𑀺𑀬𑀼𑀁, 𑀓𑁄𑀡𑁄 𑀦 𑀲𑀺𑀬𑀸, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑁄 𑀯𑀸𑀬𑀸𑀫𑁄 𑀦 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀲𑀤𑁆𑀤𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑀢𑁄 𑀘 𑀔𑁄, 𑀫𑀳𑀸𑀭𑀸𑀚, 𑀯𑀻𑀡𑀸𑀬 𑀧𑀢𑁆𑀢𑀁 𑀲𑀺𑀬𑀸, 𑀘𑀫𑁆𑀫𑀁 𑀲𑀺𑀬𑀸, 𑀤𑁄𑀡𑀺 𑀲𑀺𑀬𑀸, 𑀤𑀡𑁆𑀟𑁄 𑀲𑀺𑀬𑀸, 𑀉𑀧𑀯𑀻𑀡𑁄 𑀲𑀺𑀬𑀸, 𑀢𑀦𑁆𑀢𑀺𑀬𑁄 𑀲𑀺𑀬𑀼𑀁, 𑀓𑁄𑀡𑁄 𑀲𑀺𑀬𑀸, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑁄 𑀯𑀸𑀬𑀸𑀫𑁄 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀲𑀤𑁆𑀤𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀬𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀔𑁄 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀭𑀡𑀺 𑀦 𑀲𑀺𑀬𑀸, 𑀅𑀭𑀡𑀺𑀧𑁄𑀢𑀓𑁄 𑀦 𑀲𑀺𑀬𑀸, 𑀅𑀭𑀡𑀺𑀬𑁄𑀢𑁆𑀢𑀓𑀁 𑀦 𑀲𑀺𑀬𑀸, 𑀉𑀢𑁆𑀢𑀭𑀸𑀭𑀡𑀺 𑀦 𑀲𑀺𑀬𑀸, 𑀘𑁄𑀴𑀓𑀁 𑀦 𑀲𑀺𑀬𑀸, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑁄 𑀯𑀸𑀬𑀸𑀫𑁄 𑀦 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀲𑁄 𑀅𑀕𑁆𑀕𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑀢𑁄 𑀘 𑀔𑁄, 𑀫𑀳𑀸𑀭𑀸𑀚, 𑀅𑀭𑀡𑀺 𑀲𑀺𑀬𑀸, 𑀅𑀭𑀡𑀺𑀧𑁄𑀢𑀓𑁄 𑀲𑀺𑀬𑀸, 𑀅𑀭𑀡𑀺𑀬𑁄𑀢𑁆𑀢𑀓𑀁 𑀲𑀺𑀬𑀸, 𑀉𑀢𑁆𑀢𑀭𑀸𑀭𑀡𑀺 𑀲𑀺𑀬𑀸, 𑀘𑁄𑀴𑀓𑀁 𑀲𑀺𑀬𑀸, 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑁄 𑀯𑀸𑀬𑀸𑀫𑁄 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀲𑁄 𑀅𑀕𑁆𑀕𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀬𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀔𑁄 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀡𑀺 𑀦 𑀲𑀺𑀬𑀸, 𑀆𑀢𑀧𑁄 𑀦 𑀲𑀺𑀬𑀸, 𑀕𑁄𑀫𑀬𑀁 𑀦 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀲𑁄 𑀅𑀕𑁆𑀕𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑀢𑁄 𑀘 𑀔𑁄, 𑀫𑀳𑀸𑀭𑀸𑀚, 𑀫𑀡𑀺 𑀲𑀺𑀬𑀸, 𑀆𑀢𑀧𑁄 𑀲𑀺𑀬𑀸, 𑀕𑁄𑀫𑀬𑀁 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀲𑁄 𑀅𑀕𑁆𑀕𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀬𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀔𑁄 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀆𑀤𑀸𑀲𑁄 𑀦 𑀲𑀺𑀬𑀸, 𑀆𑀪𑀸 𑀦 𑀲𑀺𑀬𑀸, 𑀫𑀼𑀔𑀁 𑀦 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀅𑀢𑁆𑀢𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀬𑀢𑁄 𑀘 𑀔𑁄, 𑀫𑀳𑀸𑀭𑀸𑀚, 𑀆𑀤𑀸𑀲𑁄 𑀲𑀺𑀬𑀸, 𑀆𑀪𑀸 𑀲𑀺𑀬𑀸, 𑀫𑀼𑀔𑀁 𑀲𑀺𑀬𑀸, 𑀚𑀸𑀬𑁂𑀬𑁆𑀬 𑀅𑀢𑁆𑀢𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀬𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑁂 𑀅𑀪𑀯𑀦𑁆𑀢𑀸 𑀚𑀸𑀬𑀦𑁆𑀢𑀺, 𑀪𑀯𑀦𑁆𑀢𑀸 𑀬𑁂𑀯 𑀔𑁄 𑀲𑀗𑁆𑀔𑀸𑀭𑀸 𑀚𑀸𑀬𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀪𑀯𑀦𑁆𑀢𑀲𑀗𑁆𑀔𑀸𑀭𑀚𑀸𑀬𑀫𑀸𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀯𑁂𑀤𑀕𑀽𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑁂𑀤𑀕𑀽 𑀉𑀧𑀮𑀩𑁆𑀪𑀢𑀻’’𑀢𑀺? ‘‘𑀓𑁄 𑀧𑀦𑁂𑀲, 𑀫𑀳𑀸𑀭𑀸𑀚, 𑀯𑁂𑀤𑀕𑀽 𑀦𑀸𑀫𑀸’’𑀢𑀺? ‘‘𑀬𑁄, 𑀪𑀦𑁆𑀢𑁂, 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀬𑀣𑀸 𑀫𑀬𑀁 𑀇𑀥 𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑀸 𑀬𑁂𑀦 𑀬𑁂𑀦 𑀯𑀸𑀢𑀧𑀸𑀦𑁂𑀦 𑀇𑀘𑁆𑀙𑁂𑀬𑁆𑀬𑀸𑀫 𑀧𑀲𑁆𑀲𑀺𑀢𑀼𑀁, 𑀢𑁂𑀦 𑀢𑁂𑀦 𑀯𑀸𑀢𑀧𑀸𑀦𑁂𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀧𑀼𑀭𑀢𑁆𑀣𑀺𑀫𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀧𑀘𑁆𑀙𑀺𑀫𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀉𑀢𑁆𑀢𑀭𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀤𑀓𑁆𑀔𑀺𑀡𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀧𑀲𑁆𑀲𑁂𑀬𑁆𑀬𑀸𑀫. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀅𑀬𑀁 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄 𑀬𑁂𑀦 𑀬𑁂𑀦 𑀤𑁆𑀯𑀸𑀭𑁂𑀦 𑀇𑀘𑁆𑀙𑀢𑀺 𑀧𑀲𑁆𑀲𑀺𑀢𑀼𑀁, 𑀢𑁂𑀦 𑀢𑁂𑀦 𑀤𑁆𑀯𑀸𑀭𑁂𑀦 𑀧𑀲𑁆𑀲𑀢𑀻’’𑀢𑀺.

𑀣𑁂𑀭𑁄 𑀆𑀳 ‘‘𑀧𑀜𑁆𑀘𑀤𑁆𑀯𑀸𑀭𑀁, 𑀫𑀳𑀸𑀭𑀸𑀚, 𑀪𑀡𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑁄𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺, 𑀬𑀤𑀺 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀬𑀣𑀸 𑀫𑀬𑀁 𑀇𑀥 𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑀸 𑀬𑁂𑀦 𑀬𑁂𑀦 𑀯𑀸𑀢𑀧𑀸𑀦𑁂𑀦 𑀇𑀘𑁆𑀙𑁂𑀬𑁆𑀬𑀸𑀫 𑀧𑀲𑁆𑀲𑀺𑀢𑀼𑀁, 𑀢𑁂𑀦 𑀢𑁂𑀦 𑀯𑀸𑀢𑀧𑀸𑀦𑁂𑀦 𑀭𑀽𑀧𑀁 𑀬𑁂𑀯 𑀧𑀲𑁆𑀲𑁂𑀬𑁆𑀬𑀸𑀫, 𑀧𑀼𑀭𑀢𑁆𑀣𑀺𑀫𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀭𑀽𑀧𑀁 𑀬𑁂𑀯 𑀧𑀲𑁆𑀲𑁂𑀬𑁆𑀬𑀸𑀫, 𑀧𑀘𑁆𑀙𑀺𑀫𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀭𑀽𑀧𑀁 𑀬𑁂𑀯 𑀧𑀲𑁆𑀲𑁂𑀬𑁆𑀬𑀸𑀫, 𑀉𑀢𑁆𑀢𑀭𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀭𑀽𑀧𑀁 𑀬𑁂𑀯 𑀧𑀲𑁆𑀲𑁂𑀬𑁆𑀬𑀸𑀫, 𑀤𑀓𑁆𑀔𑀺𑀡𑁂𑀦𑀧𑀺 𑀯𑀸𑀢𑀧𑀸𑀦𑁂𑀦 𑀭𑀽𑀧𑀁 𑀬𑁂𑀯 𑀧𑀲𑁆𑀲𑁂𑀬𑁆𑀬𑀸𑀫, 𑀏𑀯𑀫𑁂𑀢𑁂𑀦 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁂𑀦 𑀲𑁄𑀢𑁂𑀦𑀧𑀺 𑀭𑀽𑀧𑀁 𑀬𑁂𑀯 𑀧𑀲𑁆𑀲𑀺𑀢𑀩𑁆𑀩𑀁, 𑀖𑀸𑀦𑁂𑀦𑀧𑀺 𑀭𑀽𑀧𑀁 𑀬𑁂𑀯 𑀧𑀲𑁆𑀲𑀺𑀢𑀩𑁆𑀩𑀁, 𑀚𑀺𑀯𑁆𑀳𑀸𑀬𑀧𑀺 𑀭𑀽𑀧𑀁 𑀬𑁂𑀯 𑀧𑀲𑁆𑀲𑀺𑀢𑀩𑁆𑀩𑀁, 𑀓𑀸𑀬𑁂𑀦𑀧𑀺 𑀭𑀽𑀧𑀁 𑀬𑁂𑀯 𑀧𑀲𑁆𑀲𑀺𑀢𑀩𑁆𑀩𑀁, 𑀫𑀦𑀲𑀸𑀧𑀺 𑀭𑀽𑀧𑀁 𑀬𑁂𑀯 𑀧𑀲𑁆𑀲𑀺𑀢𑀩𑁆𑀩𑀁; 𑀘𑀓𑁆𑀔𑀼𑀦𑀸𑀧𑀺 𑀲𑀤𑁆𑀤𑁄 𑀬𑁂𑀯 𑀲𑁄𑀢𑀩𑁆𑀩𑁄, 𑀖𑀸𑀦𑁂𑀦𑀧𑀺 𑀲𑀤𑁆𑀤𑁄 𑀬𑁂𑀯 𑀲𑁄𑀢𑀩𑁆𑀩𑁄, 𑀚𑀺𑀯𑁆𑀳𑀸𑀬𑀧𑀺 𑀲𑀤𑁆𑀤𑁄 𑀬𑁂𑀯 𑀲𑁄𑀢𑀩𑁆𑀩𑁄, 𑀓𑀸𑀬𑁂𑀦𑀧𑀺 𑀲𑀤𑁆𑀤𑁄 𑀬𑁂𑀯 𑀲𑁄𑀢𑀩𑁆𑀩𑁄, 𑀫𑀦𑀲𑀸𑀧𑀺 𑀲𑀤𑁆𑀤𑁄 𑀬𑁂𑀯 𑀲𑁄𑀢𑀩𑁆𑀩𑁄; 𑀘𑀓𑁆𑀔𑀼𑀦𑀸𑀧𑀺 𑀕𑀦𑁆𑀥𑁄 𑀬𑁂𑀯 𑀖𑀸𑀬𑀺𑀢𑀩𑁆𑀩𑁄, 𑀲𑁄𑀢𑁂𑀦𑀧𑀺 𑀕𑀦𑁆𑀥𑁄 𑀬𑁂𑀯 𑀖𑀸𑀬𑀺𑀢𑀩𑁆𑀩𑁄, 𑀚𑀺𑀯𑁆𑀳𑀸𑀬𑀧𑀺 𑀕𑀦𑁆𑀥𑁄 𑀬𑁂𑀯 𑀖𑀸𑀬𑀺𑀢𑀩𑁆𑀩𑁄, 𑀓𑀸𑀬𑁂𑀦𑀧𑀺 𑀕𑀦𑁆𑀥𑁄 𑀬𑁂𑀯 𑀖𑀸𑀬𑀺𑀢𑀩𑁆𑀩𑁄, 𑀫𑀦𑀲𑀸𑀧𑀺 𑀕𑀦𑁆𑀥𑁄 𑀬𑁂𑀯 𑀖𑀸𑀬𑀺𑀢𑀩𑁆𑀩𑁄; 𑀘𑀓𑁆𑀔𑀼𑀦𑀸𑀧𑀺 𑀭𑀲𑁄 𑀬𑁂𑀯 𑀲𑀸𑀬𑀺𑀢𑀩𑁆𑀩𑁄, 𑀲𑁄𑀢𑁂𑀦𑀧𑀺 𑀭𑀲𑁄 𑀬𑁂𑀯 𑀲𑀸𑀬𑀺𑀢𑀩𑁆𑀩𑁄, 𑀖𑀸𑀦𑁂𑀦𑀧𑀺 𑀭𑀲𑁄 𑀬𑁂𑀯 𑀲𑀸𑀬𑀺𑀢𑀩𑁆𑀩𑁄, 𑀓𑀸𑀬𑁂𑀦𑀧𑀺 𑀭𑀲𑁄 𑀬𑁂𑀯 𑀲𑀸𑀬𑀺𑀢𑀩𑁆𑀩𑁄, 𑀫𑀦𑀲𑀸𑀧𑀺 𑀭𑀲𑁄 𑀬𑁂𑀯 𑀲𑀸𑀬𑀺𑀢𑀩𑁆𑀩𑁄; 𑀘𑀓𑁆𑀔𑀼𑀦𑀸𑀧𑀺 𑀨𑁄𑀝𑁆𑀞𑀩𑁆𑀩𑀁 𑀬𑁂𑀯 𑀨𑀼𑀲𑀺𑀢𑀩𑁆𑀩𑀁, 𑀲𑁄𑀢𑁂𑀦𑀧𑀺 𑀨𑁄𑀝𑁆𑀞𑀩𑁆𑀩𑀁 𑀬𑁂𑀯 𑀨𑀼𑀲𑀺𑀢𑀩𑁆𑀩𑀁, 𑀖𑀸𑀦𑁂𑀦𑀧𑀺 𑀨𑁄𑀝𑁆𑀞𑀩𑁆𑀩𑀁 𑀬𑁂𑀯 𑀨𑀼𑀲𑀺𑀢𑀩𑁆𑀩𑀁, 𑀚𑀺𑀯𑁆𑀳𑀸𑀬𑀧𑀺 𑀨𑁄𑀝𑁆𑀞𑀩𑁆𑀩𑀁 𑀬𑁂𑀯 𑀨𑀼𑀲𑀺𑀢𑀩𑁆𑀩𑀁, 𑀫𑀦𑀲𑀸𑀧𑀺 𑀨𑁄𑀝𑁆𑀞𑀩𑁆𑀩𑀁 𑀬𑁂𑀯 𑀨𑀼𑀲𑀺𑀢𑀩𑁆𑀩𑀁; 𑀘𑀓𑁆𑀔𑀼𑀦𑀸𑀧𑀺 𑀥𑀫𑁆𑀫𑀁 𑀬𑁂𑀯 𑀯𑀺𑀚𑀸𑀦𑀺𑀢𑀩𑁆𑀩𑀁, 𑀲𑁄𑀢𑁂𑀦𑀧𑀺 𑀥𑀫𑁆𑀫𑀁 𑀬𑁂𑀯 𑀯𑀺𑀚𑀸𑀦𑀺𑀢𑀩𑁆𑀩𑀁, 𑀖𑀸𑀦𑁂𑀦𑀧𑀺 𑀥𑀫𑁆𑀫𑀁 𑀬𑁂𑀯 𑀯𑀺𑀚𑀸𑀦𑀺𑀢𑀩𑁆𑀩𑀁, 𑀚𑀺𑀯𑁆𑀳𑀸𑀬𑀧𑀺 𑀥𑀫𑁆𑀫𑀁 𑀬𑁂𑀯 𑀯𑀺𑀚𑀸𑀦𑀺𑀢𑀩𑁆𑀩𑀁, 𑀓𑀸𑀬𑁂𑀦𑀧𑀺 𑀥𑀫𑁆𑀫𑀁 𑀬𑁂𑀯 𑀯𑀺𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺.

‘‘𑀦 𑀔𑁄 𑀢𑁂, 𑀫𑀳𑀸𑀭𑀸𑀚, 𑀬𑀼𑀚𑁆𑀚𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁, 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀬𑀁 𑀇𑀥 𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑀸 𑀇𑀫𑁂𑀲𑀼 𑀚𑀸𑀮𑀯𑀸𑀢𑀧𑀸𑀦𑁂𑀲𑀼 𑀉𑀕𑁆𑀖𑀸𑀝𑀺𑀢𑁂𑀲𑀼 𑀫𑀳𑀦𑁆𑀢𑁂𑀦 𑀆𑀓𑀸𑀲𑁂𑀦 𑀩𑀳𑀺𑀫𑀼𑀔𑀸 𑀲𑀼𑀝𑁆𑀞𑀼𑀢𑀭𑀁 𑀭𑀽𑀧𑀁 𑀧𑀲𑁆𑀲𑀸𑀫, 𑀏𑀯𑀫𑁂𑀢𑁂𑀦 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁂𑀦𑀸𑀧𑀺 𑀘𑀓𑁆𑀔𑀼𑀤𑁆𑀯𑀸𑀭𑁂𑀲𑀼 𑀉𑀕𑁆𑀖𑀸𑀝𑀺𑀢𑁂𑀲𑀼 𑀫𑀳𑀦𑁆𑀢𑁂𑀦 𑀆𑀓𑀸𑀲𑁂𑀦 𑀲𑀼𑀝𑁆𑀞𑀼𑀢𑀭𑀁 𑀭𑀽𑀧𑀁 𑀧𑀲𑁆𑀲𑀺𑀢𑀩𑁆𑀩𑀁, 𑀲𑁄𑀢𑁂𑀲𑀼 𑀉𑀕𑁆𑀖𑀸𑀝𑀺𑀢𑁂𑀲𑀼…𑀧𑁂… 𑀖𑀸𑀦𑁂 𑀉𑀕𑁆𑀖𑀸𑀝𑀺𑀢𑁂…𑀧𑁂… 𑀚𑀺𑀯𑁆𑀳𑀸𑀬 𑀉𑀕𑁆𑀖𑀸𑀝𑀺𑀢𑀸𑀬…𑀧𑁂… 𑀓𑀸𑀬𑁂 𑀉𑀕𑁆𑀖𑀸𑀝𑀺𑀢𑁂 𑀫𑀳𑀦𑁆𑀢𑁂𑀦 𑀆𑀓𑀸𑀲𑁂𑀦 𑀲𑀼𑀝𑁆𑀞𑀼𑀢𑀭𑀁 𑀲𑀤𑁆𑀤𑁄 𑀲𑁄𑀢𑀩𑁆𑀩𑁄, 𑀕𑀦𑁆𑀥𑁄 𑀖𑀸𑀬𑀺𑀢𑀩𑁆𑀩𑁄, 𑀭𑀲𑁄 𑀲𑀸𑀬𑀺𑀢𑀩𑁆𑀩𑁄, 𑀨𑁄𑀝𑁆𑀞𑀩𑁆𑀩𑁄 𑀨𑀼𑀲𑀺𑀢𑀩𑁆𑀩𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺.

‘‘𑀦 𑀔𑁄 𑀢𑁂, 𑀫𑀳𑀸𑀭𑀸𑀚, 𑀬𑀼𑀚𑁆𑀚𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁, 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀬𑀁 𑀤𑀺𑀦𑁆𑀦𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀢𑀺𑀝𑁆𑀞𑁂𑀬𑁆𑀬, 𑀚𑀸𑀦𑀸𑀲𑀺 𑀢𑁆𑀯𑀁, 𑀫𑀳𑀸𑀭𑀸𑀚, ‘𑀅𑀬𑀁 𑀤𑀺𑀦𑁆𑀦𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄’’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀻’’𑀢𑀺. ‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀬𑀁 𑀤𑀺𑀦𑁆𑀦𑁄 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀢𑀯 𑀧𑀼𑀭𑀢𑁄 𑀢𑀺𑀝𑁆𑀞𑁂𑀬𑁆𑀬, 𑀚𑀸𑀦𑀸𑀲𑀺 𑀢𑁆𑀯𑀁, 𑀫𑀳𑀸𑀭𑀸𑀚, ‘𑀅𑀬𑀁 𑀤𑀺𑀦𑁆𑀦𑁄 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀫𑀫 𑀧𑀼𑀭𑀢𑁄 𑀞𑀺𑀢𑁄’’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀪𑀦𑁆𑀢𑀭𑁂 𑀲𑁄 𑀚𑀻𑀯𑁄 𑀚𑀺𑀯𑁆𑀳𑀸𑀬 𑀭𑀲𑁂 𑀦𑀺𑀓𑁆𑀔𑀺𑀢𑁆𑀢𑁂 𑀚𑀸𑀦𑁂𑀬𑁆𑀬 𑀅𑀫𑁆𑀩𑀺𑀮𑀢𑁆𑀢𑀁 𑀯𑀸 𑀮𑀯𑀡𑀢𑁆𑀢𑀁 𑀯𑀸 𑀢𑀺𑀢𑁆𑀢𑀓𑀢𑁆𑀢𑀁 𑀯𑀸 𑀓𑀝𑀼𑀓𑀢𑁆𑀢𑀁 𑀯𑀸 𑀓𑀲𑀸𑀬𑀢𑁆𑀢𑀁 𑀯𑀸 𑀫𑀥𑀼𑀭𑀢𑁆𑀢𑀁 𑀯𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸’’𑀢𑀺. ‘‘𑀢𑁂 𑀭𑀲𑁂 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂 𑀚𑀸𑀦𑁂𑀬𑁆𑀬 𑀅𑀫𑁆𑀩𑀺𑀮𑀢𑁆𑀢𑀁 𑀯𑀸 𑀮𑀯𑀡𑀢𑁆𑀢𑀁 𑀯𑀸 𑀢𑀺𑀢𑁆𑀢𑀓𑀢𑁆𑀢𑀁 𑀯𑀸 𑀓𑀝𑀼𑀓𑀢𑁆𑀢𑀁 𑀯𑀸 𑀓𑀲𑀸𑀬𑀢𑁆𑀢𑀁 𑀯𑀸 𑀫𑀥𑀼𑀭𑀢𑁆𑀢𑀁 𑀯𑀸’’𑀢𑀺. ‘‘𑀦 𑀳𑀺 𑀪𑀦𑁆𑀢𑁂’’𑀢𑀺.

‘‘𑀦 𑀔𑁄 𑀢𑁂, 𑀫𑀳𑀸𑀭𑀸𑀚, 𑀬𑀼𑀚𑁆𑀚𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀁, 𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀫𑀥𑀼𑀖𑀝𑀲𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀫𑀥𑀼𑀤𑁄𑀡𑀺𑀁 𑀧𑀽𑀭𑀸𑀧𑁂𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 [𑀧𑀺𑀤𑀳𑀺𑀢𑁆𑀯𑀸𑀯 (𑀓.)] 𑀫𑀥𑀼𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑁂𑀬𑁆𑀬, 𑀚𑀸𑀦𑁂𑀬𑁆𑀬, 𑀫𑀳𑀸𑀭𑀸𑀚, 𑀲𑁄 𑀧𑀼𑀭𑀺𑀲𑁄 𑀫𑀥𑀼𑀁 𑀲𑀫𑁆𑀧𑀦𑁆𑀦𑀁 𑀯𑀸 𑀦 𑀲𑀫𑁆𑀧𑀦𑁆𑀦𑀁 𑀯𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺. ‘‘𑀦 𑀳𑀺 𑀢𑀲𑁆𑀲, 𑀪𑀦𑁆𑀢𑁂, 𑀫𑀼𑀔𑁂 𑀫𑀥𑀼 𑀧𑀯𑀺𑀝𑁆𑀞’’𑀦𑁆𑀢𑀺.

‘‘𑀦 𑀔𑁄 𑀢𑁂, 𑀫𑀳𑀸𑀭𑀸𑀚, 𑀬𑀼𑀚𑁆𑀚𑀢𑀺 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀁, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫’’𑀦𑁆𑀢𑀺. ‘‘𑀦𑀸𑀳𑀁 𑀧𑀝𑀺𑀩𑀮𑁄 𑀢𑀬𑀸 𑀯𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁; 𑀲𑀸𑀥𑀼, 𑀪𑀦𑁆𑀢𑁂, 𑀅𑀢𑁆𑀣𑀁 𑀚𑀧𑁆𑀧𑁂𑀳𑀻’’𑀢𑀺.

𑀣𑁂𑀭𑁄 𑀅𑀪𑀺𑀥𑀫𑁆𑀫𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀲𑀜𑁆𑀜𑀸𑀧𑁂𑀲𑀺 𑁋 ‘‘𑀇𑀥, 𑀫𑀳𑀸𑀭𑀸𑀚, 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀁𑀲𑀳𑀚𑀸𑀢𑀸 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀏𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀦𑀲𑀺𑀓𑀸𑀭𑁄𑀢𑀺 𑀏𑀯𑀫𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀢𑁄 𑀚𑀸𑀬𑀦𑁆𑀢𑀺, 𑀦 𑀳𑁂𑀢𑁆𑀣 𑀯𑁂𑀤𑀕𑀽 𑀉𑀧𑀮𑀩𑁆𑀪𑀢𑀺, 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀢𑀁𑀲𑀳𑀚𑀸𑀢𑀸 𑀨𑀲𑁆𑀲𑁄 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀏𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀦𑀲𑀺𑀓𑀸𑀭𑁄𑀢𑀺 𑀏𑀯𑀫𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀢𑁄 𑀚𑀸𑀬𑀦𑁆𑀢𑀺, 𑀦 𑀳𑁂𑀢𑁆𑀣 𑀯𑁂𑀤𑀕𑀽 𑀉𑀧𑀮𑀩𑁆𑀪𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑁂𑀤𑀕𑀽𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀞𑀫𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀉𑀤𑀸𑀳𑀼 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀧𑀞𑀫𑀁, 𑀫𑀳𑀸𑀭𑀸𑀚, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣𑀸𑀳𑀁 𑀉𑀧𑁆𑀧𑀚𑁆𑀚𑀸𑀫𑀺, 𑀢𑁆𑀯𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀸𑀳𑀻’𑀢𑀺, 𑀉𑀤𑀸𑀳𑀼 𑀫𑀦𑁄𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣 𑀢𑁆𑀯𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀻’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀦𑀺𑀦𑁆𑀦𑀢𑁆𑀢𑀸 𑀘, 𑀫𑀳𑀸𑀭𑀸𑀚, 𑀤𑁆𑀯𑀸𑀭𑀢𑁆𑀢𑀸 𑀘 𑀘𑀺𑀡𑁆𑀡𑀢𑁆𑀢𑀸 𑀘 𑀲𑀫𑀼𑀤𑀸𑀘𑀭𑀺𑀢𑀢𑁆𑀢𑀸 𑀘𑀸’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀦𑁆𑀦𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺? 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀓𑀢𑀫𑁂𑀦 𑀉𑀤𑀓𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀬𑁂𑀦, 𑀪𑀦𑁆𑀢𑁂, 𑀦𑀺𑀦𑁆𑀦𑀁, 𑀢𑁂𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀤𑁂𑀯𑁄 𑀯𑀲𑁆𑀲𑁂𑀬𑁆𑀬, 𑀓𑀢𑀫𑁂𑀦 𑀢𑀁 𑀉𑀤𑀓𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀬𑁂𑀦, 𑀪𑀦𑁆𑀢𑁂, 𑀧𑀼𑀭𑀺𑀫𑀁 𑀉𑀤𑀓𑀁 𑀕𑀢𑀁, 𑀢𑀫𑁆𑀧𑀺 𑀢𑁂𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀓𑀺𑀁 𑀦𑀼𑀁 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀫𑀁 𑀉𑀤𑀓𑀁 𑀧𑀘𑁆𑀙𑀺𑀫𑀁 𑀉𑀤𑀓𑀁 𑀆𑀡𑀸𑀧𑁂𑀢𑀺 ‘𑀬𑁂𑀦𑀸𑀳𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀫𑁆𑀧𑀺 𑀢𑁂𑀦 𑀕𑀘𑁆𑀙𑀸𑀳𑀻’𑀢𑀺, 𑀧𑀘𑁆𑀙𑀺𑀫𑀁 𑀯𑀸 𑀉𑀤𑀓𑀁 𑀧𑀼𑀭𑀺𑀫𑀁 𑀉𑀤𑀓𑀁 𑀆𑀡𑀸𑀧𑁂𑀢𑀺 ‘𑀬𑁂𑀦 𑀢𑁆𑀯𑀁 𑀕𑀘𑁆𑀙𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑁂𑀦 𑀕𑀘𑁆𑀙𑀺𑀲𑁆𑀲𑀸𑀫𑀻’’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀦𑀺𑀦𑁆𑀦𑀢𑁆𑀢𑀸 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀦𑁆𑀦𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣𑀸𑀳𑀁 𑀉𑀧𑁆𑀧𑀚𑁆𑀚𑀸𑀫𑀺, 𑀢𑁆𑀯𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀸𑀳𑀻’𑀢𑀺, 𑀦𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣 𑀢𑁆𑀯𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀦𑀺𑀦𑁆𑀦𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁆𑀯𑀸𑀭𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺? 𑀅𑀧𑁂𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀅𑀲𑁆𑀲 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁 𑀏𑀓𑀤𑁆𑀯𑀸𑀭𑀁, 𑀢𑀢𑁄 𑀧𑀼𑀭𑀺𑀲𑁄 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄 𑀪𑀯𑁂𑀬𑁆𑀬, 𑀓𑀢𑀫𑁂𑀦 𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺? ‘‘𑀤𑁆𑀯𑀸𑀭𑁂𑀦, 𑀪𑀦𑁆𑀢𑁂, 𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺. ‘‘𑀅𑀣𑀸𑀧𑀭𑁄 𑀧𑀼𑀭𑀺𑀲𑁄 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄 𑀪𑀯𑁂𑀬𑁆𑀬, 𑀓𑀢𑀫𑁂𑀦 𑀲𑁄 𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺? ‘‘𑀬𑁂𑀦, 𑀪𑀦𑁆𑀢𑁂, 𑀧𑀼𑀭𑀺𑀫𑁄 𑀧𑀼𑀭𑀺𑀲𑁄 𑀦𑀺𑀓𑁆𑀔𑀦𑁆𑀢𑁄, 𑀲𑁄𑀧𑀺 𑀢𑁂𑀦 𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀫𑁄 𑀧𑀼𑀭𑀺𑀲𑁄 𑀧𑀘𑁆𑀙𑀺𑀫𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀢𑀺 ‘𑀬𑁂𑀦𑀸𑀳𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀫𑁆𑀧𑀺 𑀢𑁂𑀦 𑀕𑀘𑁆𑀙𑀸𑀳𑀻’𑀢𑀺, 𑀧𑀘𑁆𑀙𑀺𑀫𑁄 𑀯𑀸 𑀧𑀼𑀭𑀺𑀲𑁄 𑀧𑀼𑀭𑀺𑀫𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀢𑀺 ‘𑀬𑁂𑀦 𑀢𑁆𑀯𑀁 𑀕𑀘𑁆𑀙𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑁂𑀦 𑀕𑀘𑁆𑀙𑀺𑀲𑁆𑀲𑀸𑀫𑀻’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀤𑁆𑀯𑀸𑀭𑀢𑁆𑀢𑀸 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑁆𑀯𑀸𑀭𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣𑀸𑀳𑀁 𑀉𑀧𑁆𑀧𑀚𑁆𑀚𑀸𑀫𑀺, 𑀢𑁆𑀯𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀸𑀳𑀻’𑀢𑀺, 𑀦𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣 𑀢𑁆𑀯𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀤𑁆𑀯𑀸𑀭𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀘𑀺𑀡𑁆𑀡𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺?𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀧𑀞𑀫𑀁 𑀏𑀓𑀁 𑀲𑀓𑀝𑀁 𑀕𑀘𑁆𑀙𑁂𑀬𑁆𑀬, 𑀅𑀣 𑀤𑀼𑀢𑀺𑀬𑀁 𑀲𑀓𑀝𑀁 𑀓𑀢𑀫𑁂𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀬𑁂𑀦, 𑀪𑀦𑁆𑀢𑁂, 𑀧𑀼𑀭𑀺𑀫𑀁 𑀲𑀓𑀝𑀁 𑀕𑀢𑀁, 𑀢𑀫𑁆𑀧𑀺 𑀢𑁂𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀫𑀁 𑀲𑀓𑀝𑀁 𑀧𑀘𑁆𑀙𑀺𑀫𑀁 𑀲𑀓𑀝𑀁 𑀆𑀡𑀸𑀧𑁂𑀢𑀺 ‘𑀬𑁂𑀦𑀸𑀳𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀫𑁆𑀧𑀺 𑀢𑁂𑀦 𑀕𑀘𑁆𑀙𑀸𑀳𑀻’𑀢𑀺, 𑀧𑀘𑁆𑀙𑀺𑀫𑀁 𑀯𑀸 𑀲𑀓𑀝𑀁 𑀧𑀼𑀭𑀺𑀫𑀁 𑀲𑀓𑀝𑀁 𑀆𑀡𑀸𑀧𑁂𑀢𑀺 ‘𑀬𑁂𑀦 𑀢𑁆𑀯𑀁 𑀕𑀘𑁆𑀙𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑁂𑀦 𑀕𑀘𑁆𑀙𑀺𑀲𑁆𑀲𑀸𑀫𑀻’’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀘𑀺𑀡𑁆𑀡𑀢𑁆𑀢𑀸 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀘𑀺𑀡𑁆𑀡𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣𑀸𑀳𑀁 𑀉𑀧𑁆𑀧𑀚𑁆𑀚𑀸𑀫𑀺, 𑀢𑁆𑀯𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀸𑀳𑀻’𑀢𑀺, 𑀦𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣 𑀢𑁆𑀯𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀘𑀺𑀡𑁆𑀡𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀫𑀼𑀤𑀸𑀘𑀭𑀺𑀢𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺? 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀼𑀤𑁆𑀤𑀸𑀕𑀡𑀦𑀸𑀲𑀗𑁆𑀔𑁆𑀬𑀸𑀮𑁂𑀔𑀸𑀲𑀺𑀧𑁆𑀧𑀝𑁆𑀞𑀸𑀦𑁂𑀲𑀼 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀤𑀦𑁆𑀥𑀸𑀬𑀦𑀸 𑀪𑀯𑀢𑀺, 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀦𑀺𑀲𑀫𑁆𑀫𑀓𑀺𑀭𑀺𑀬𑀸𑀬 𑀲𑀫𑀼𑀤𑀸𑀘𑀭𑀺𑀢𑀢𑁆𑀢𑀸 𑀅𑀤𑀦𑁆𑀥𑀸𑀬𑀦𑀸 𑀪𑀯𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑀼𑀤𑀸𑀘𑀭𑀺𑀢𑀢𑁆𑀢𑀸 𑀬𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣𑀸𑀳𑀁 𑀉𑀧𑁆𑀧𑀚𑁆𑀚𑀸𑀫𑀺, 𑀢𑁆𑀯𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀸𑀳𑀻’𑀢𑀺, 𑀦𑀸𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀡𑀸𑀧𑁂𑀢𑀺 ‘𑀬𑀢𑁆𑀣 𑀢𑁆𑀯𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀅𑀳𑀫𑁆𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺, 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀲𑀫𑀼𑀤𑀸𑀘𑀭𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀢𑁆𑀣 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺…𑀧𑁂… 𑀬𑀢𑁆𑀣 𑀖𑀸𑀦𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀢𑁆𑀣 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 …𑀧𑁂… 𑀬𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀞𑀫𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀉𑀤𑀸𑀳𑀼 𑀫𑀦𑁄𑀯𑀺𑀜𑁆𑀜𑀸𑀡𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀓𑀸𑀬𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀳𑀸𑀭𑀸𑀚, 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦,…𑀧𑁂… 𑀅𑀦𑀸𑀮𑀸𑀧𑁄 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑁂𑀳𑀺, 𑀲𑀫𑀼𑀤𑀸𑀘𑀭𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀨𑀲𑁆𑀲𑀮𑀓𑁆𑀔𑀡𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀨𑀲𑁆𑀲𑁄𑀧𑀺 𑀯𑁂𑀤𑀦𑀸𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀢𑁆𑀣 𑀫𑀦𑁄𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀨𑀲𑁆𑀲𑁄𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀤𑀦𑀸𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀜𑀸𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀘𑁂𑀢𑀦𑀸𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀢𑀓𑁆𑀓𑁄𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀘𑀸𑀭𑁄𑀧𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑁂𑀧𑀺 𑀨𑀲𑁆𑀲𑀧𑁆𑀧𑀫𑀼𑀔𑀸 𑀥𑀫𑁆𑀫𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑁄 𑀨𑀲𑁆𑀲𑁄’’𑀢𑀺? ‘‘𑀨𑀼𑀲𑀦𑀮𑀓𑁆𑀔𑀡𑁄, 𑀫𑀳𑀸𑀭𑀸𑀚, 𑀨𑀲𑁆𑀲𑁄’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀫𑁂𑀡𑁆𑀟𑀸 𑀬𑀼𑀚𑁆𑀛𑁂𑀬𑁆𑀬𑀼𑀁, 𑀢𑁂𑀲𑀼 𑀬𑀣𑀸 𑀏𑀓𑁄 𑀫𑁂𑀡𑁆𑀟𑁄, 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁 𑀬𑀣𑀸 𑀤𑀼𑀢𑀺𑀬𑁄 𑀫𑁂𑀡𑁆𑀟𑁄, 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄, 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀧𑀸𑀡𑀻 𑀯𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀼 𑀬𑀣𑀸 𑀏𑀓𑁄 𑀧𑀸𑀡𑀺, 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀤𑀼𑀢𑀺𑀬𑁄 𑀧𑀸𑀡𑀺, 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄, 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸 𑀯𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀼 𑀬𑀣𑀸 𑀏𑀓𑁄 𑀲𑀫𑁆𑀫𑁄, 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀤𑀼𑀢𑀺𑀬𑁄 𑀲𑀫𑁆𑀫𑁄, 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄, 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀨𑀲𑁆𑀲𑀮𑀓𑁆𑀔𑀡𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀯𑁂𑀤𑀦𑀸𑀮𑀓𑁆𑀔𑀡𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀯𑁂𑀤𑀦𑀸’’𑀢𑀺? ‘‘𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀫𑀳𑀸𑀭𑀸𑀚, 𑀯𑁂𑀤𑀦𑀸 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀘𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀅𑀥𑀺𑀓𑀸𑀭𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀥𑀺𑀓𑀸𑀭𑀁 𑀤𑀤𑁂𑀬𑁆𑀬, 𑀲𑁄 𑀢𑁂𑀦 𑀅𑀥𑀺𑀓𑀸𑀭𑁂𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀺𑀪𑀽𑀢𑁄 𑀧𑀭𑀺𑀘𑀭𑁂𑀬𑁆𑀬, 𑀢𑀲𑁆𑀲 𑀏𑀯𑀫𑀲𑁆𑀲 ‘𑀫𑀬𑀸 𑀔𑁄 𑀧𑀼𑀩𑁆𑀩𑁂 𑀭𑀜𑁆𑀜𑁄 𑀅𑀥𑀺𑀓𑀸𑀭𑁄 𑀓𑀢𑁄, 𑀢𑀲𑁆𑀲 𑀫𑁂 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀥𑀺𑀓𑀸𑀭𑀁 𑀅𑀤𑀸𑀲𑀺, 𑀲𑁆𑀯𑀸𑀳𑀁 𑀢𑀢𑁄𑀦𑀺𑀤𑀸𑀦𑀁 𑀇𑀫𑀁 𑀏𑀯𑀭𑀽𑀧𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀓𑀼𑀲𑀮𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬, 𑀲𑁄 𑀘 𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀺𑀪𑀽𑀢𑁄 𑀧𑀭𑀺𑀘𑀭𑁂𑀬𑁆𑀬, 𑀢𑀲𑁆𑀲 𑀏𑀯𑀫𑀲𑁆𑀲 ‘𑀲𑁆𑀯𑀸𑀳𑀁 𑀔𑁄 𑀧𑀼𑀩𑁆𑀩𑁂 𑀓𑀼𑀲𑀮𑀁 𑀓𑀫𑁆𑀫𑀁 𑀅𑀓𑀸𑀲𑀺𑀁, 𑀲𑁄𑀳𑀁 𑀢𑀢𑁄𑀦𑀺𑀤𑀸𑀦𑀁 𑀇𑀫𑀁 𑀏𑀯𑀭𑀽𑀧𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀯𑁂𑀤𑀦𑀸 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀘𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑁂𑀤𑀦𑀸𑀮𑀓𑁆𑀔𑀡𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀲𑀜𑁆𑀜𑀸𑀮𑀓𑁆𑀔𑀡𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀲𑀜𑁆𑀜𑀸’’𑀢𑀺? ‘‘𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸, 𑀫𑀳𑀸𑀭𑀸𑀚, 𑀲𑀜𑁆𑀜𑀸. 𑀓𑀺𑀁 𑀲𑀜𑁆𑀚𑀸𑀦𑀸𑀢𑀺? 𑀦𑀻𑀮𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀧𑀻𑀢𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀮𑁄𑀳𑀺𑀢𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀑𑀤𑀸𑀢𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀫𑀜𑁆𑀚𑀺𑀝𑁆𑀞𑀫𑁆𑀧𑀺 [𑀫𑀜𑁆𑀚𑁂𑀝𑁆𑀞𑀫𑁆𑀧𑀺 (𑀲𑀻. 𑀧𑀻.)] 𑀲𑀜𑁆𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀪𑀡𑁆𑀟𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀸𑀦𑀺 [𑀫𑀜𑁆𑀚𑁂𑀝𑁆𑀞𑀸𑀦𑀺 (𑀲𑀻. 𑀧𑀻.)] 𑀭𑀸𑀚𑀪𑁄𑀕𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀲𑀜𑁆𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀜𑁆𑀜𑀸𑀮𑀓𑁆𑀔𑀡𑀧𑀜𑁆𑀳𑁄 𑀤𑀲𑀫𑁄.

𑁧𑁧. 𑀘𑁂𑀢𑀦𑀸𑀮𑀓𑁆𑀔𑀡𑀧𑀜𑁆𑀳𑁄

𑁧𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀘𑁂𑀢𑀦𑀸’’𑀢𑀺? ‘‘𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀫𑀳𑀸𑀭𑀸𑀚, 𑀘𑁂𑀢𑀦𑀸 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀘𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀯𑀺𑀲𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀢𑁆𑀢𑀦𑀸 𑀘 𑀧𑀺𑀯𑁂𑀬𑁆𑀬, 𑀧𑀭𑁂 𑀘 𑀧𑀸𑀬𑁂𑀬𑁆𑀬, 𑀲𑁄 𑀅𑀢𑁆𑀢𑀦𑀸𑀧𑀺 𑀤𑀼𑀓𑁆𑀔𑀺𑀢𑁄 𑀪𑀯𑁂𑀬𑁆𑀬, 𑀧𑀭𑁂𑀧𑀺 𑀤𑀼𑀓𑁆𑀔𑀺𑀢𑀸 𑀪𑀯𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑁂𑀧𑀺 𑀢𑀲𑁆𑀲 𑀅𑀦𑀼𑀲𑀺𑀓𑁆𑀔𑀦𑁆𑀢𑀺, 𑀢𑁂𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀁 𑀏𑀓𑀚𑁆𑀛𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀢𑁆𑀢𑀦𑀸 𑀘 𑀧𑀺𑀯𑁂𑀬𑁆𑀬, 𑀧𑀭𑁂 𑀘 𑀧𑀸𑀬𑁂𑀬𑁆𑀬, 𑀲𑁄 𑀅𑀢𑁆𑀢𑀦𑀸 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬, 𑀧𑀭𑁂𑀧𑀺 𑀲𑀼𑀔𑀺𑀢𑀸 𑀪𑀯𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑀼𑀲𑀮𑀁 𑀓𑀫𑁆𑀫𑀁 𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀬𑁂𑀧𑀺 𑀢𑀲𑁆𑀲 𑀅𑀦𑀼𑀲𑀺𑀓𑁆𑀔𑀦𑁆𑀢𑀺, 𑀢𑁂𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀘𑁂𑀢𑀬𑀺𑀢𑀮𑀓𑁆𑀔𑀡𑀸 𑀘𑁂𑀢𑀦𑀸 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀘𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀘𑁂𑀢𑀦𑀸𑀮𑀓𑁆𑀔𑀡𑀧𑀜𑁆𑀳𑁄 𑀏𑀓𑀸𑀤𑀲𑀫𑁄.

𑁧𑁨. 𑀯𑀺𑀜𑁆𑀜𑀸𑀡𑀮𑀓𑁆𑀔𑀡𑀧𑀜𑁆𑀳𑁄

𑁧𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀫𑀳𑀸𑀭𑀸𑀚, 𑀯𑀺𑀜𑁆𑀜𑀸𑀡’’𑀦𑁆𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀕𑀭𑀕𑀼𑀢𑁆𑀢𑀺𑀓𑁄 𑀫𑀚𑁆𑀛𑁂 𑀦𑀕𑀭𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁄 𑀧𑀲𑁆𑀲𑁂𑀬𑁆𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁, 𑀧𑀲𑁆𑀲𑁂𑀬𑁆𑀬 𑀤𑀓𑁆𑀔𑀺𑀡𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁, 𑀧𑀲𑁆𑀲𑁂𑀬𑁆𑀬 𑀧𑀘𑁆𑀙𑀺𑀫𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁, 𑀧𑀲𑁆𑀲𑁂𑀬𑁆𑀬 𑀉𑀢𑁆𑀢𑀭𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀜𑁆𑀘 𑀧𑀼𑀭𑀺𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺. 𑀬𑀜𑁆𑀘 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺. 𑀬𑀜𑁆𑀘 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺. 𑀬𑀜𑁆𑀘 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺. 𑀬𑀜𑁆𑀘 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺, 𑀬𑀜𑁆𑀘 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑀺𑀜𑁆𑀜𑀸𑀡𑀮𑀓𑁆𑀔𑀡𑀧𑀜𑁆𑀳𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀯𑀺𑀢𑀓𑁆𑀓𑀮𑀓𑁆𑀔𑀡𑀧𑀜𑁆𑀳𑁄

𑁧𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄’’𑀢𑀺? ‘‘𑀅𑀧𑁆𑀧𑀦𑀸𑀮𑀓𑁆𑀔𑀡𑁄 𑀫𑀳𑀸𑀭𑀸𑀚, 𑀯𑀺𑀢𑀓𑁆𑀓𑁄’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀟𑁆𑀠𑀓𑀻 𑀲𑀼𑀧𑀭𑀺𑀓𑀫𑁆𑀫𑀓𑀢𑀁 𑀤𑀸𑀭𑀼𑀁 𑀲𑀦𑁆𑀥𑀺𑀲𑁆𑀫𑀺𑀁 𑀅𑀧𑁆𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀧𑁆𑀧𑀦𑀸𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑀺𑀢𑀓𑁆𑀓𑀮𑀓𑁆𑀔𑀡𑀧𑀜𑁆𑀳𑁄 𑀢𑁂𑀭𑀲𑀫𑁄.

𑁧𑁪. 𑀯𑀺𑀘𑀸𑀭𑀮𑀓𑁆𑀔𑀡𑀧𑀜𑁆𑀳𑁄

𑁧𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑁄 𑀯𑀺𑀘𑀸𑀭𑁄’’𑀢𑀺? ‘‘𑀅𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀫𑀳𑀸𑀭𑀸𑀚, 𑀯𑀺𑀘𑀸𑀭𑁄’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀁𑀲𑀣𑀸𑀮𑀁 𑀆𑀓𑁄𑀝𑀺𑀢𑀁 𑀧𑀘𑁆𑀙𑀸 𑀅𑀦𑀼𑀭𑀯𑀢𑀺 𑀅𑀦𑀼𑀲𑀦𑁆𑀤𑀳𑀢𑀺 [𑀅𑀦𑀼𑀲𑀤𑁆𑀤𑀸𑀬𑀢𑀺 (𑀓.)], 𑀬𑀣𑀸, 𑀫𑀳𑀸𑀭𑀸𑀚, 𑀆𑀓𑁄𑀝𑀦𑀸, 𑀏𑀯𑀁 𑀯𑀺𑀢𑀓𑁆𑀓𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀅𑀦𑀼𑀭𑀯𑀦𑀸 [𑀅𑀦𑀼𑀫𑀚𑁆𑀚𑀦𑀸 (𑀓.)], 𑀏𑀯𑀁 𑀯𑀺𑀘𑀸𑀭𑁄 𑀤𑀝𑁆𑀞𑀩𑁆𑀩𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑀺𑀘𑀸𑀭𑀮𑀓𑁆𑀔𑀡𑀧𑀜𑁆𑀳𑁄 𑀘𑀼𑀤𑁆𑀤𑀲𑀫𑁄.

𑀯𑀺𑀘𑀸𑀭𑀯𑀕𑁆𑀕𑁄 𑀢𑀢𑀺𑀬𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀘𑀼𑀤𑁆𑀤𑀲 𑀧𑀜𑁆𑀳𑀸.

𑁪. 𑀦𑀺𑀩𑁆𑀩𑀸𑀦𑀯𑀕𑁆𑀕𑁄

𑁧. 𑀨𑀲𑁆𑀲𑀸𑀤𑀺𑀯𑀺𑀦𑀺𑀩𑁆𑀪𑀼𑀚𑀦𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀓𑁆𑀓𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀢𑁄𑀪𑀸𑀯𑀕𑀢𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁 ‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑀺𑀢𑀓𑁆𑀓𑁄, 𑀅𑀬𑀁 𑀯𑀺𑀘𑀸𑀭𑁄’𑀢𑀺’’? ‘‘𑀦 𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀢𑁄𑀪𑀸𑀯𑀕𑀢𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁 ‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑀺𑀢𑀓𑁆𑀓𑁄, 𑀅𑀬𑀁 𑀯𑀺𑀘𑀸𑀭𑁄’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀲𑀽𑀤𑁄 𑀅𑀭𑀲𑀁 𑀯𑀸 𑀭𑀲𑀁 𑀯𑀸 [𑀬𑀽𑀲𑀁 𑀯𑀸 𑀭𑀲𑀁 𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀓𑀭𑁂𑀬𑁆𑀬, 𑀲𑁄 𑀢𑀢𑁆𑀣 𑀤𑀥𑀺𑀫𑁆𑀧𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀮𑁄𑀡𑀫𑁆𑀧𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀺𑀗𑁆𑀕𑀺𑀯𑁂𑀭𑀫𑁆𑀧𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀚𑀻𑀭𑀓𑀫𑁆𑀧𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀭𑀺𑀘𑀫𑁆𑀧𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀜𑁆𑀜𑀸𑀦𑀺𑀧𑀺 𑀧𑀓𑀸𑀭𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬, ‘𑀤𑀥𑀺𑀲𑁆𑀲 𑀫𑁂 𑀭𑀲𑀁 𑀆𑀳𑀭, 𑀮𑁄𑀡𑀲𑁆𑀲 𑀫𑁂 𑀭𑀲𑀁 𑀆𑀳𑀭, 𑀲𑀺𑀗𑁆𑀕𑀺𑀯𑁂𑀭𑀲𑁆𑀲 𑀫𑁂 𑀭𑀲𑀁 𑀆𑀳𑀭, 𑀚𑀻𑀭𑀓𑀲𑁆𑀲 𑀫𑁂 𑀭𑀲𑀁 𑀆𑀳𑀭, 𑀫𑀭𑀺𑀘𑀲𑁆𑀲 𑀫𑁂 𑀭𑀲𑀁 𑀆𑀳𑀭, 𑀲𑀩𑁆𑀩𑁂𑀲𑀁 𑀫𑁂 𑀧𑀓𑁆𑀔𑀺𑀢𑁆𑀢𑀸𑀦𑀁 𑀭𑀲𑀁 𑀆𑀳𑀭𑀸’𑀢𑀺. 𑀲𑀓𑁆𑀓𑀸 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀭𑀲𑀸𑀦𑀁 𑀏𑀓𑀢𑁄𑀪𑀸𑀯𑀕𑀢𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀭𑀲𑀁 𑀆𑀳𑀭𑀺𑀢𑀼𑀁 𑀅𑀫𑁆𑀩𑀺𑀮𑀢𑁆𑀢𑀁 𑀯𑀸 𑀮𑀯𑀡𑀢𑁆𑀢𑀁 𑀯𑀸 𑀢𑀺𑀢𑁆𑀢𑀓𑀢𑁆𑀢𑀁 𑀯𑀸 𑀓𑀝𑀼𑀓𑀢𑁆𑀢𑀁 𑀯𑀸 𑀓𑀲𑀸𑀬𑀢𑁆𑀢𑀁 𑀯𑀸 𑀫𑀥𑀼𑀭𑀢𑁆𑀢𑀁 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀓𑁆𑀓𑀸 𑀢𑁂𑀲𑀁 𑀭𑀲𑀸𑀦𑀁 𑀏𑀓𑀢𑁄𑀪𑀸𑀯𑀕𑀢𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀭𑀲𑀁 𑀆𑀳𑀭𑀺𑀢𑀼𑀁 𑀅𑀫𑁆𑀩𑀺𑀮𑀢𑁆𑀢𑀁 𑀯𑀸 𑀮𑀯𑀡𑀢𑁆𑀢𑀁 𑀯𑀸 𑀢𑀺𑀢𑁆𑀢𑀓𑀢𑁆𑀢𑀁 𑀯𑀸 𑀓𑀝𑀼𑀓𑀢𑁆𑀢𑀁 𑀯𑀸 𑀓𑀲𑀸𑀬𑀢𑁆𑀢𑀁 𑀯𑀸 𑀫𑀥𑀼𑀭𑀢𑁆𑀢𑀁 𑀯𑀸, 𑀅𑀧𑀺 𑀘 𑀔𑁄 𑀧𑀦 𑀲𑀓𑁂𑀦 𑀲𑀓𑁂𑀦 𑀮𑀓𑁆𑀔𑀡𑁂𑀦 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀲𑀓𑁆𑀓𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀢𑁄𑀪𑀸𑀯𑀕𑀢𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁 ‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑀺𑀢𑀓𑁆𑀓𑁄, 𑀅𑀬𑀁 𑀯𑀺𑀘𑀸𑀭𑁄’𑀢𑀺, 𑀅𑀧𑀺 𑀘 𑀔𑁄 𑀧𑀦 𑀲𑀓𑁂𑀦 𑀲𑀓𑁂𑀦 𑀮𑀓𑁆𑀔𑀡𑁂𑀦 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀨𑀲𑁆𑀲𑀸𑀤𑀺𑀯𑀺𑀦𑀺𑀩𑁆𑀪𑀼𑀚𑀦𑀧𑀜𑁆𑀳𑁄 𑀧𑀞𑀫𑁄.

𑁨. 𑀦𑀸𑀕𑀲𑁂𑀦𑀧𑀜𑁆𑀳𑁄

𑁨. 𑀣𑁂𑀭𑁄 𑀆𑀳 ‘‘𑀮𑁄𑀡𑀁, 𑀫𑀳𑀸𑀭𑀸𑀚, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺. ‘‘𑀆𑀫, 𑀪𑀦𑁆𑀢𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺. ‘‘𑀲𑀼𑀝𑁆𑀞𑀼 𑀔𑁄, 𑀫𑀳𑀸𑀭𑀸𑀚, 𑀚𑀸𑀦𑀸𑀳𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀩𑁆𑀩𑀁 𑀮𑁄𑀡𑀁 𑀚𑀺𑀯𑁆𑀳𑀸𑀬 𑀯𑀺𑀚𑀸𑀦𑀸𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀲𑀩𑁆𑀩𑀁 𑀮𑁄𑀡𑀁 𑀚𑀺𑀯𑁆𑀳𑀸𑀬 𑀯𑀺𑀚𑀸𑀦𑀸𑀢𑀺’’.

‘‘𑀬𑀤𑀺, 𑀪𑀦𑁆𑀢𑁂, 𑀲𑀩𑁆𑀩𑀁 𑀮𑁄𑀡𑀁 𑀚𑀺𑀯𑁆𑀳𑀸𑀬 𑀯𑀺𑀚𑀸𑀦𑀸𑀢𑀺, 𑀓𑀺𑀲𑁆𑀲 𑀧𑀦 𑀢𑀁 𑀲𑀓𑀝𑁂𑀳𑀺 𑀩𑀮𑀻𑀩𑀤𑁆𑀤𑀸 [𑀩𑀮𑀺𑀩𑀤𑁆𑀤𑀸 (𑀲𑀻. 𑀧𑀻.)] 𑀆𑀳𑀭𑀦𑁆𑀢𑀺, 𑀦𑀦𑀼 𑀮𑁄𑀡𑀫𑁂𑀯 𑀆𑀳𑀭𑀺𑀢𑀩𑁆𑀩’’𑀦𑁆𑀢𑀺? ‘‘𑀦 𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀮𑁄𑀡𑀫𑁂𑀯 𑀆𑀳𑀭𑀺𑀢𑀼𑀁 𑀏𑀓𑀢𑁄𑀪𑀸𑀯𑀕𑀢𑀸 𑀏𑀢𑁂 𑀥𑀫𑁆𑀫𑀸 𑀕𑁄𑀘𑀭𑀦𑀸𑀦𑀢𑁆𑀢𑀕𑀢𑀸 𑀮𑁄𑀡𑀁 𑀕𑀭𑀼𑀪𑀸𑀯𑁄 𑀘𑀸𑀢𑀺. 𑀲𑀓𑁆𑀓𑀸 𑀧𑀦, 𑀫𑀳𑀸𑀭𑀸𑀚, 𑀮𑁄𑀡𑀁 𑀢𑀼𑀮𑀸𑀬 𑀢𑀼𑀮𑀬𑀺𑀢𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀓𑁆𑀓𑀸’’𑀢𑀺. ‘‘𑀦 𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀮𑁄𑀡𑀁 𑀢𑀼𑀮𑀸𑀬 𑀢𑀼𑀮𑀬𑀺𑀢𑀼𑀁, 𑀕𑀭𑀼𑀪𑀸𑀯𑁄 𑀢𑀼𑀮𑀸𑀬 𑀢𑀼𑀮𑀺𑀬𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀸𑀕𑀲𑁂𑀦𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀧𑀜𑁆𑀘𑀸𑀬𑀢𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀸𑀦𑀺𑀫𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺, 𑀓𑀺𑀁 𑀦𑀼 𑀢𑀸𑀦𑀺 𑀦𑀸𑀦𑀸𑀓𑀫𑁆𑀫𑁂𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀉𑀤𑀸𑀳𑀼 𑀏𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺? ‘‘𑀦𑀸𑀦𑀸𑀓𑀫𑁆𑀫𑁂𑀳𑀺, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀦 𑀏𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀏𑀓𑀲𑁆𑀫𑀺𑀁 𑀔𑁂𑀢𑁆𑀢𑁂 𑀦𑀸𑀦𑀸𑀩𑀻𑀚𑀸𑀦𑀺 𑀯𑀧𑁆𑀧𑁂𑀬𑁆𑀬𑀼𑀁, 𑀢𑁂𑀲𑀁 𑀦𑀸𑀦𑀸𑀩𑀻𑀚𑀸𑀦𑀁 𑀦𑀸𑀦𑀸𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀸𑀦𑀺 𑀬𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀦𑀸𑀦𑀸𑀓𑀫𑁆𑀫𑁂𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀦 𑀏𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀜𑁆𑀘𑀸𑀬𑀢𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀓𑀫𑁆𑀫𑀦𑀸𑀦𑀸𑀓𑀭𑀡𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀫𑀦𑀼𑀲𑁆𑀲𑀸 𑀦 𑀲𑀩𑁆𑀩𑁂 𑀲𑀫𑀓𑀸, 𑀅𑀜𑁆𑀜𑁂 𑀅𑀧𑁆𑀧𑀸𑀬𑀼𑀓𑀸, 𑀅𑀜𑁆𑀜𑁂 𑀤𑀻𑀖𑀸𑀬𑀼𑀓𑀸, 𑀅𑀜𑁆𑀜𑁂 𑀩𑀳𑁆𑀯𑀸𑀩𑀸𑀥𑀸 𑀅𑀜𑁆𑀜𑁂 𑀅𑀧𑁆𑀧𑀸𑀩𑀸𑀥𑀸, 𑀅𑀜𑁆𑀜𑁂 𑀤𑀼𑀩𑁆𑀩𑀡𑁆𑀡𑀸, 𑀅𑀜𑁆𑀜𑁂 𑀯𑀡𑁆𑀡𑀯𑀦𑁆𑀢𑁄, 𑀅𑀜𑁆𑀜𑁂 𑀅𑀧𑁆𑀧𑁂𑀲𑀓𑁆𑀔𑀸, 𑀅𑀜𑁆𑀜𑁂 𑀫𑀳𑁂𑀲𑀓𑁆𑀔𑀸, 𑀅𑀜𑁆𑀜𑁂 𑀅𑀧𑁆𑀧𑀪𑁄𑀕𑀸, 𑀅𑀜𑁆𑀜𑁂 𑀫𑀳𑀸𑀪𑁄𑀕𑀸, 𑀅𑀜𑁆𑀜𑁂 𑀦𑀻𑀘𑀓𑀼𑀮𑀻𑀦𑀸, 𑀅𑀜𑁆𑀜𑁂 𑀫𑀳𑀸𑀓𑀼𑀮𑀻𑀦𑀸, 𑀅𑀜𑁆𑀜𑁂 𑀤𑀼𑀧𑁆𑀧𑀜𑁆𑀜𑀸, 𑀅𑀜𑁆𑀜𑁂 𑀧𑀜𑁆𑀜𑀯𑀦𑁆𑀢𑁄’’𑀢𑀺?

𑀣𑁂𑀭𑁄 𑀆𑀳 ‘‘𑀓𑀺𑀲𑁆𑀲 𑀧𑀦, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑀸 𑀦 𑀲𑀩𑁆𑀩𑁂 𑀲𑀫𑀓𑀸, 𑀅𑀜𑁆𑀜𑁂 𑀅𑀫𑁆𑀩𑀺𑀮𑀸, 𑀅𑀜𑁆𑀜𑁂 𑀮𑀯𑀡𑀸, 𑀅𑀜𑁆𑀜𑁂 𑀢𑀺𑀢𑁆𑀢𑀓𑀸, 𑀅𑀜𑁆𑀜𑁂 𑀓𑀝𑀼𑀓𑀸, 𑀅𑀜𑁆𑀜𑁂 𑀓𑀲𑀸𑀯𑀸, 𑀅𑀜𑁆𑀜𑁂 𑀫𑀥𑀼𑀭𑀸’’𑀢𑀺? ‘‘𑀫𑀜𑁆𑀜𑀸𑀫𑀺, 𑀪𑀦𑁆𑀢𑁂, 𑀩𑀻𑀚𑀸𑀦𑀁 𑀦𑀸𑀦𑀸𑀓𑀭𑀡𑁂𑀦𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀫𑁆𑀫𑀸𑀦𑀁 𑀦𑀸𑀦𑀸𑀓𑀭𑀡𑁂𑀦 𑀫𑀦𑀼𑀲𑁆𑀲𑀸 𑀦 𑀲𑀩𑁆𑀩𑁂 𑀲𑀫𑀓𑀸, 𑀅𑀜𑁆𑀜𑁂 𑀅𑀧𑁆𑀧𑀸𑀬𑀼𑀓𑀸, 𑀅𑀜𑁆𑀜𑁂 𑀤𑀻𑀖𑀸𑀬𑀼𑀓𑀸, 𑀅𑀜𑁆𑀜𑁂 𑀩𑀳𑁆𑀯𑀸𑀩𑀸𑀥𑀸, 𑀅𑀜𑁆𑀜𑁂 𑀅𑀧𑁆𑀧𑀸𑀩𑀸𑀥𑀸, 𑀅𑀜𑁆𑀜𑁂 𑀤𑀼𑀩𑁆𑀩𑀡𑁆𑀡𑀸, 𑀅𑀜𑁆𑀜𑁂 𑀯𑀡𑁆𑀡𑀯𑀦𑁆𑀢𑁄, 𑀅𑀜𑁆𑀜𑁂 𑀅𑀧𑁆𑀧𑁂𑀲𑀓𑁆𑀔𑀸, 𑀅𑀜𑁆𑀜𑁂 𑀫𑀳𑁂𑀲𑀓𑁆𑀔𑀸, 𑀅𑀜𑁆𑀜𑁂 𑀅𑀧𑁆𑀧𑀪𑁄𑀕𑀸, 𑀅𑀜𑁆𑀜𑁂 𑀫𑀳𑀸𑀪𑁄𑀕𑀸, 𑀅𑀜𑁆𑀜𑁂 𑀦𑀻𑀘𑀓𑀼𑀮𑀻𑀦𑀸, 𑀅𑀜𑁆𑀜𑁂 𑀫𑀳𑀸𑀓𑀼𑀮𑀻𑀦𑀸, 𑀅𑀜𑁆𑀜𑁂 𑀤𑀼𑀧𑁆𑀧𑀜𑁆𑀜𑀸, 𑀅𑀜𑁆𑀜𑁂 𑀧𑀜𑁆𑀜𑀯𑀦𑁆𑀢𑁄. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀪𑀕𑀯𑀢𑀸 𑁋 ‘𑀓𑀫𑁆𑀫𑀲𑁆𑀲𑀓𑀸, 𑀫𑀸𑀡𑀯, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑁆𑀧𑀝𑀺𑀲𑀭𑀡𑀸, 𑀓𑀫𑁆𑀫𑀁 𑀲𑀢𑁆𑀢𑁂 𑀯𑀺𑀪𑀚𑀢𑀺 𑀬𑀤𑀺𑀤𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬𑀸’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀓𑀫𑁆𑀫𑀦𑀸𑀦𑀸𑀓𑀭𑀡𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀯𑀸𑀬𑀸𑀫𑀓𑀭𑀡𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀓𑀺𑀦𑁆𑀢𑀺 𑀇𑀫𑀁 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺. 𑀏𑀢𑀤𑀢𑁆𑀣𑀸, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸’’𑀢𑀺. ‘‘𑀓𑀺𑀁 𑀧𑀝𑀺𑀓𑀘𑁆𑀘𑁂𑀯 𑀯𑀸𑀬𑀫𑀺𑀢𑁂𑀦, 𑀦𑀦𑀼 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀯𑀸𑀬𑀫𑀺𑀢𑀩𑁆𑀩’’𑀦𑁆𑀢𑀺? 𑀣𑁂𑀭𑁄 𑀆𑀳 ‘‘𑀲𑀫𑁆𑀧𑀢𑁆𑀢𑁂 𑀓𑀸𑀮𑁂, 𑀫𑀳𑀸𑀭𑀸𑀚, 𑀯𑀸𑀬𑀸𑀫𑁄 𑀅𑀓𑀺𑀘𑁆𑀘𑀓𑀭𑁄 𑀪𑀯𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀯𑀸𑀬𑀸𑀫𑁄 𑀓𑀺𑀘𑁆𑀘𑀓𑀭𑁄 𑀪𑀯𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁆𑀯𑀁 𑀧𑀺𑀧𑀸𑀲𑀺𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀢𑀤𑀸 𑀢𑁆𑀯𑀁 𑀉𑀤𑀧𑀸𑀦𑀁 𑀔𑀡𑀸𑀧𑁂𑀬𑁆𑀬𑀸𑀲𑀺, 𑀢𑀴𑀸𑀓𑀁 𑀔𑀡𑀸𑀧𑁂𑀬𑁆𑀬𑀸𑀲𑀺 ‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀯𑀸𑀬𑀸𑀫𑁄 𑀅𑀓𑀺𑀘𑁆𑀘𑀓𑀭𑁄 𑀪𑀯𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀯𑀸𑀬𑀸𑀫𑁄 𑀓𑀺𑀘𑁆𑀘𑀓𑀭𑁄 𑀪𑀯𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁆𑀯𑀁 𑀩𑀼𑀪𑀼𑀓𑁆𑀔𑀺𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀢𑀤𑀸 𑀢𑁆𑀯𑀁 𑀔𑁂𑀢𑁆𑀢𑀁 𑀓𑀲𑀸𑀧𑁂𑀬𑁆𑀬𑀸𑀲𑀺, 𑀲𑀸𑀮𑀺𑀁 𑀭𑁄𑀧𑀸𑀧𑁂𑀬𑁆𑀬𑀸𑀲𑀺, 𑀥𑀜𑁆𑀜𑀁 𑀅𑀢𑀺𑀳𑀭𑀸𑀧𑁂𑀬𑁆𑀬𑀸𑀲𑀺 ‘𑀪𑀢𑁆𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀯𑀸𑀬𑀸𑀫𑁄 𑀅𑀓𑀺𑀘𑁆𑀘𑀓𑀭𑁄 𑀪𑀯𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀯𑀸𑀬𑀸𑀫𑁄 𑀓𑀺𑀘𑁆𑀘𑀓𑀭𑁄 𑀪𑀯𑀢𑀻𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁂 𑀲𑀗𑁆𑀕𑀸𑀫𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀪𑀯𑁂𑀬𑁆𑀬, 𑀢𑀤𑀸 𑀢𑁆𑀯𑀁 𑀧𑀭𑀺𑀔𑀁 𑀔𑀡𑀸𑀧𑁂𑀬𑁆𑀬𑀸𑀲𑀺, 𑀧𑀸𑀓𑀸𑀭𑀁 𑀓𑀸𑀭𑀸𑀧𑁂𑀬𑁆𑀬𑀸𑀲𑀺, 𑀕𑁄𑀧𑀼𑀭𑀁 𑀓𑀸𑀭𑀸𑀧𑁂𑀬𑁆𑀬𑀸𑀲𑀺, 𑀅𑀝𑁆𑀝𑀸𑀮𑀓𑀁 𑀓𑀸𑀭𑀸𑀧𑁂𑀬𑁆𑀬𑀸𑀲𑀺, 𑀥𑀜𑁆𑀜𑀁 𑀅𑀢𑀺𑀳𑀭𑀸𑀧𑁂𑀬𑁆𑀬𑀸𑀲𑀺, 𑀢𑀤𑀸 𑀢𑁆𑀯𑀁 𑀳𑀢𑁆𑀣𑀺𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀲𑀺, 𑀅𑀲𑁆𑀲𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀲𑀺, 𑀭𑀣𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀲𑀺, 𑀥𑀦𑀼𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀲𑀺, 𑀣𑀭𑀼𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀯𑀸𑀬𑀸𑀫𑁄 𑀅𑀓𑀺𑀘𑁆𑀘𑀓𑀭𑁄 𑀪𑀯𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀯𑀸𑀬𑀸𑀫𑁄 𑀓𑀺𑀘𑁆𑀘𑀓𑀭𑁄 𑀪𑀯𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀪𑀕𑀯𑀢𑀸 𑁋

‘‘‘𑀧𑀝𑀺𑀓𑀘𑁆𑀘𑁂𑀯 𑀢𑀁 𑀓𑀬𑀺𑀭𑀸, 𑀬𑀁 𑀚𑀜𑁆𑀜𑀸 𑀳𑀺𑀢𑀫𑀢𑁆𑀢𑀦𑁄;

𑀦 𑀲𑀸𑀓𑀝𑀺𑀓𑀘𑀺𑀦𑁆𑀢𑀸𑀬, 𑀫𑀦𑁆𑀢𑀸 𑀥𑀻𑀭𑁄 𑀧𑀭𑀓𑁆𑀓𑀫𑁂.

‘‘‘𑀬𑀣𑀸 𑀲𑀸𑀓𑀝𑀺𑀓𑁄 𑀫𑀝𑁆𑀞𑀁 [𑀦𑀸𑀫 (𑀲𑀻. 𑀧𑀻. 𑀓.) 𑀲𑀁. 𑀦𑀺. 𑁧.𑁧𑁦𑁩], 𑀲𑀫𑀁 𑀳𑀺𑀢𑁆𑀯𑀸 𑀫𑀳𑀸𑀧𑀣𑀁;

𑀯𑀺𑀲𑀫𑀁 𑀫𑀕𑁆𑀕𑀫𑀸𑀭𑀼𑀬𑁆𑀳, 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯 𑀛𑀸𑀬𑀢𑀺.

‘‘‘𑀏𑀯𑀁 𑀥𑀫𑁆𑀫𑀸 𑀅𑀧𑀓𑁆𑀓𑀫𑁆𑀫, 𑀅𑀥𑀫𑁆𑀫𑀫𑀦𑀼𑀯𑀢𑁆𑀢𑀺𑀬;

𑀫𑀦𑁆𑀤𑁄 𑀫𑀘𑁆𑀘𑀼 𑀫𑀼𑀔𑀁 𑀧𑀢𑁆𑀢𑁄, 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯 𑀛𑀸𑀬𑀢𑀻’’’𑀢𑀺 [𑀲𑁄𑀘𑀢𑀻𑀢𑀺 (𑀲𑀩𑁆𑀩𑀢𑁆𑀣)].

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑀸𑀬𑀸𑀫𑀓𑀭𑀡𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀦𑁂𑀭𑀬𑀺𑀓𑀕𑁆𑀕𑀺𑀉𑀡𑁆𑀳𑀪𑀸𑀯𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀧𑀸𑀓𑀢𑀺𑀓𑀅𑀕𑁆𑀕𑀺𑀢𑁄 𑀦𑁂𑀭𑀬𑀺𑀓𑁄 𑀅𑀕𑁆𑀕𑀺 𑀫𑀳𑀸𑀪𑀺𑀢𑀸𑀧𑀢𑀭𑁄 𑀳𑁄𑀢𑀺, 𑀔𑀼𑀤𑁆𑀤𑀓𑁄𑀧𑀺 𑀧𑀸𑀲𑀸𑀡𑁄 𑀧𑀸𑀓𑀢𑀺𑀓𑁂 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑁄 𑀤𑀺𑀯𑀲𑀫𑁆𑀧𑀺 𑀧𑀘𑁆𑀘𑀫𑀸𑀦𑁄 [𑀥𑀫𑀫𑀸𑀦𑁄 (𑀲𑀻. 𑀧𑀻.)] 𑀦 𑀯𑀺𑀮𑀬𑀁 𑀕𑀘𑁆𑀙𑀢𑀺, 𑀓𑀽𑀝𑀸𑀕𑀸𑀭𑀫𑀢𑁆𑀢𑁄𑀧𑀺 𑀧𑀸𑀲𑀸𑀡𑁄 𑀦𑁂𑀭𑀬𑀺𑀓𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑁄 𑀔𑀡𑁂𑀦 𑀯𑀺𑀮𑀬𑀁 𑀕𑀘𑁆𑀙𑀢𑀻’𑀢𑀺, 𑀏𑀢𑀁 𑀯𑀘𑀦𑀁 𑀦 𑀲𑀤𑁆𑀤𑀳𑀸𑀫𑀺, 𑀏𑀯𑀜𑁆𑀘 𑀧𑀦 𑀯𑀤𑁂𑀣 ‘𑀬𑁂 𑀘 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸 𑀲𑀢𑁆𑀢𑀸, 𑀢𑁂 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸 𑀦 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’𑀢𑀺, 𑀢𑀫𑁆𑀧𑀺 𑀯𑀘𑀦𑀁 𑀦 𑀲𑀤𑁆𑀤𑀳𑀸𑀫𑀻’’𑀢𑀺.

𑀣𑁂𑀭𑁄 𑀆𑀳 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀸 𑀢𑀸 𑀲𑀦𑁆𑀢𑀺 𑀫𑀓𑀭𑀺𑀦𑀺𑀬𑁄𑀧𑀺 𑀲𑀼𑀲𑀼𑀫𑀸𑀭𑀺𑀦𑀺𑀬𑁄𑀧𑀺 𑀓𑀘𑁆𑀙𑀧𑀺𑀦𑀺𑀬𑁄𑀧𑀺 𑀫𑁄𑀭𑀺𑀦𑀺𑀬𑁄𑀧𑀺 𑀓𑀧𑁄𑀢𑀺𑀦𑀺𑀬𑁄𑀧𑀺, 𑀓𑀺𑀁𑀦𑀼 𑀢𑀸 𑀓𑀓𑁆𑀔𑀴𑀸𑀦𑀺 𑀧𑀸𑀲𑀸𑀡𑀸𑀦𑀺 𑀲𑀓𑁆𑀔𑀭𑀸𑀬𑁄 𑀘 𑀔𑀸𑀤𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀔𑀸𑀤𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑀸𑀦𑀺 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀕𑀢𑀸𑀦𑀺 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀬𑁄 𑀧𑀦 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄, 𑀲𑁄𑀧𑀺 𑀯𑀺𑀮𑀬𑀁 𑀕𑀘𑁆𑀙𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀫𑀜𑁆𑀜𑀸𑀫𑀺, 𑀪𑀦𑁆𑀢𑁂, 𑀓𑀫𑁆𑀫𑀸𑀥𑀺𑀓𑀢𑁂𑀦 𑀦 𑀯𑀺𑀮𑀬𑀁 𑀕𑀘𑁆𑀙𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀫𑁆𑀫𑀸𑀥𑀺𑀓𑀢𑁂𑀦 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸 𑀦 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀲𑁄 𑀦 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀻’’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀸 𑀢𑀸 𑀲𑀦𑁆𑀢𑀺 𑀲𑀻𑀳𑀺𑀦𑀺𑀬𑁄𑀧𑀺 𑀩𑁆𑀬𑀕𑁆𑀖𑀺𑀦𑀺𑀬𑁄𑀧𑀺 𑀤𑀻𑀧𑀺𑀦𑀺𑀬𑁄𑀧𑀺 𑀓𑀼𑀓𑁆𑀓𑀼𑀭𑀺𑀦𑀺𑀬𑁄𑀧𑀺, 𑀓𑀺𑀁𑀦𑀼 𑀢𑀸 𑀓𑀓𑁆𑀔𑀴𑀸𑀦𑀺 𑀅𑀝𑁆𑀞𑀺𑀓𑀸𑀦𑀺 𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀻𑀢𑀺? ‘‘𑀆𑀫, 𑀪𑀦𑁆𑀢𑁂, 𑀔𑀸𑀤𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑀸𑀦𑀺 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀕𑀢𑀸𑀦𑀺 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀬𑁄 𑀧𑀦 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄, 𑀲𑁄𑀧𑀺 𑀯𑀺𑀮𑀬𑀁 𑀕𑀘𑁆𑀙𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀫𑀜𑁆𑀜𑀸𑀫𑀺, 𑀪𑀦𑁆𑀢𑁂, 𑀓𑀫𑁆𑀫𑀸𑀥𑀺𑀓𑀢𑁂𑀦 𑀦 𑀯𑀺𑀮𑀬𑀁 𑀕𑀘𑁆𑀙𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀫𑁆𑀫𑀸𑀥𑀺𑀓𑀢𑁂𑀦 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸 𑀦 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀸 𑀢𑀸 𑀲𑀦𑁆𑀢𑀺 𑀬𑁄𑀦𑀓𑀲𑀼𑀔𑀼𑀫𑀸𑀮𑀺𑀦𑀺𑀬𑁄𑀧𑀺 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑀺𑀦𑀺𑀬𑁄𑀧𑀺 𑀩𑁆𑀭𑀸𑀳𑁆𑀫𑀡𑀲𑀼𑀔𑀼𑀫𑀸𑀮𑀺𑀦𑀺𑀬𑁄𑀧𑀺 𑀕𑀳𑀧𑀢𑀺𑀲𑀼𑀔𑀼𑀫𑀸𑀮𑀺𑀦𑀺𑀬𑁄𑀧𑀺, 𑀓𑀺𑀁𑀦𑀼 𑀢𑀸 𑀓𑀓𑁆𑀔𑀴𑀸𑀦𑀺 𑀔𑀚𑁆𑀚𑀓𑀸𑀦𑀺 𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀔𑀸𑀤𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑀸𑀦𑀺 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀕𑀢𑀸𑀦𑀺 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀬𑁄 𑀧𑀦 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀲𑁄𑀧𑀺 𑀯𑀺𑀮𑀬𑀁 𑀕𑀘𑁆𑀙𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺. ‘‘𑀫𑀜𑁆𑀜𑀸𑀫𑀺, 𑀪𑀦𑁆𑀢𑁂, 𑀓𑀫𑁆𑀫𑀸𑀥𑀺𑀓𑀢𑁂𑀦 𑀦 𑀯𑀺𑀮𑀬𑀁 𑀕𑀘𑁆𑀙𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀫𑁆𑀫𑀸𑀥𑀺𑀓𑀢𑁂𑀦 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸 𑀦 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘‘𑀲𑁄 𑀦 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑁂𑀭𑀬𑀺𑀓𑀕𑁆𑀕𑀺𑀉𑀡𑁆𑀳𑀪𑀸𑀯𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀧𑀣𑀯𑀺𑀲𑀦𑁆𑀥𑀸𑀭𑀓𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀅𑀬𑀁 𑀫𑀳𑀸 𑀧𑀣𑀯𑀻 𑀉𑀤𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀉𑀤𑀓𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁, 𑀯𑀸𑀢𑁄 𑀆𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑁄’𑀢𑀺, 𑀏𑀢𑀫𑁆𑀧𑀺 𑀯𑀘𑀦𑀁 𑀦 𑀲𑀤𑁆𑀤𑀳𑀸𑀫𑀻’’𑀢𑀺. 𑀣𑁂𑀭𑁄 𑀥𑀫𑁆𑀫𑀓𑀭𑀓𑁂𑀦 [𑀥𑀫𑁆𑀫𑀓𑀭𑀡𑁂𑀦 (𑀓.)] 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀲𑀜𑁆𑀜𑀸𑀧𑁂𑀲𑀺 ‘‘𑀬𑀣𑀸, 𑀫𑀳𑀸𑀭𑀸𑀚, 𑀇𑀫𑀁 𑀉𑀤𑀓𑀁 𑀯𑀸𑀢𑁂𑀦 𑀆𑀥𑀸𑀭𑀺𑀢𑀁, 𑀏𑀯𑀁 𑀢𑀫𑁆𑀧𑀺 𑀉𑀤𑀓𑀁 𑀯𑀸𑀢𑁂𑀦 𑀆𑀥𑀸𑀭𑀺𑀢’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀣𑀯𑀺𑀲𑀦𑁆𑀥𑀸𑀭𑀓𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀦𑀺𑀭𑁄𑀥𑀦𑀺𑀩𑁆𑀩𑀸𑀦𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀦𑀸𑀕𑀲𑁂𑀦, 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺? ‘‘𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀔𑁄, 𑀫𑀳𑀸𑀭𑀸𑀚, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀆𑀬𑀢𑀦𑁂 𑀅𑀪𑀺𑀦𑀦𑁆𑀤𑀦𑁆𑀢𑀺 𑀅𑀪𑀺𑀯𑀤𑀦𑁆𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀢𑁂 𑀢𑁂𑀦 𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑀺, 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀦 𑀧𑀭𑀺𑀤𑁂𑀯𑁂𑀦 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀲𑀼𑀢𑀯𑀸 𑀘 𑀔𑁄, 𑀫𑀳𑀸𑀭𑀸𑀚, 𑀅𑀭𑀺𑀬𑀲𑀸𑀯𑀓𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀆𑀬𑀢𑀦𑁂 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀅𑀦𑀪𑀺𑀦𑀦𑁆𑀤𑀢𑁄 𑀅𑀦𑀪𑀺𑀯𑀤𑀢𑁄 𑀅𑀦𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀢𑀡𑁆𑀳𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀺𑀭𑁄𑀥𑀦𑀺𑀩𑁆𑀩𑀸𑀦𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀦𑀺𑀩𑁆𑀩𑀸𑀦𑀮𑀪𑀦𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀯 𑀮𑀪𑀦𑁆𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺? ‘‘𑀦 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀯 𑀮𑀪𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀬𑁄 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀧𑀭𑀺𑀚𑀸𑀦𑀸𑀢𑀺, 𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀧𑀚𑀳𑀢𑀺, 𑀪𑀸𑀯𑁂𑀢𑀩𑁆𑀩𑁂 𑀥𑀫𑁆𑀫𑁂 𑀪𑀸𑀯𑁂𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀥𑀫𑁆𑀫𑁂 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀮𑀪𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀺𑀩𑁆𑀩𑀸𑀦𑀮𑀪𑀦𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀦𑀺𑀩𑁆𑀩𑀸𑀦𑀲𑀼𑀔𑀚𑀸𑀦𑀦𑀧𑀜𑁆𑀳𑁄

𑁧𑁦. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀦 𑀮𑀪𑀢𑀺 𑀦𑀺𑀩𑁆𑀩𑀸𑀦𑀁, 𑀚𑀸𑀦𑀸𑀢𑀺 𑀲𑁄 ‘𑀲𑀼𑀔𑀁 𑀦𑀺𑀩𑁆𑀩𑀸𑀦’’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑁄 𑀦 𑀮𑀪𑀢𑀺 𑀦𑀺𑀩𑁆𑀩𑀸𑀦𑀁, 𑀚𑀸𑀦𑀸𑀢𑀺 𑀲𑁄 ‘𑀲𑀼𑀔𑀁 𑀦𑀺𑀩𑁆𑀩𑀸𑀦’’’𑀦𑁆𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀮𑀪𑀦𑁆𑀢𑁄 𑀚𑀸𑀦𑀸𑀢𑀺 ‘𑀲𑀼𑀔𑀁 𑀦𑀺𑀩𑁆𑀩𑀸𑀦’’’𑀦𑁆𑀢𑀺? ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑁂𑀲𑀁 𑀦𑀘𑁆𑀙𑀺𑀦𑁆𑀦𑀸 𑀳𑀢𑁆𑀣𑀧𑀸𑀤𑀸, 𑀚𑀸𑀦𑁂𑀬𑁆𑀬𑀼𑀁 𑀢𑁂, 𑀫𑀳𑀸𑀭𑀸𑀚, ‘𑀤𑀼𑀓𑁆𑀔𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦’’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺. ‘‘𑀓𑀣𑀁 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺? ‘‘𑀅𑀜𑁆𑀜𑁂𑀲𑀁, 𑀪𑀦𑁆𑀢𑁂, 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑀸𑀦𑀁 𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀚𑀸𑀦𑀦𑁆𑀢𑀺 ‘𑀤𑀼𑀓𑁆𑀔𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦’’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂𑀲𑀁 𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁, 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀚𑀸𑀦𑀸𑀢𑀺 ‘𑀲𑀼𑀔𑀁 𑀦𑀺𑀩𑁆𑀩𑀸𑀦’’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀺𑀩𑁆𑀩𑀸𑀦𑀲𑀼𑀔𑀚𑀸𑀦𑀦𑀧𑀜𑁆𑀳𑁄 𑀤𑀲𑀫𑁄.

𑀦𑀺𑀩𑁆𑀩𑀸𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀤𑀲 𑀧𑀜𑁆𑀳𑀸.

𑁫. 𑀩𑀼𑀤𑁆𑀥𑀯𑀕𑁆𑀕𑁄

𑁧. 𑀩𑀼𑀤𑁆𑀥𑀲𑁆𑀲 𑀅𑀢𑁆𑀣𑀺𑀦𑀢𑁆𑀣𑀺𑀪𑀸𑀯𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀢𑀬𑀸 𑀤𑀺𑀝𑁆𑀞𑁄’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀣 𑀢𑁂 𑀆𑀘𑀭𑀺𑀬𑁂𑀳𑀺 𑀩𑀼𑀤𑁆𑀥𑁄 𑀤𑀺𑀝𑁆𑀞𑁄’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀢𑁆𑀣𑀺 𑀩𑀼𑀤𑁆𑀥𑁄’’𑀢𑀺. ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀳𑀺𑀫𑀯𑀢𑀺 𑀊𑀳𑀸 𑀦𑀤𑀻 𑀢𑀬𑀸 𑀤𑀺𑀝𑁆𑀞𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀅𑀣 𑀢𑁂 𑀧𑀺𑀢𑀭𑀸 𑀊𑀳𑀸 𑀦𑀤𑀻 𑀤𑀺𑀝𑁆𑀞𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀊𑀳𑀸 𑀦𑀤𑀻’’𑀢𑀺. ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀓𑀺𑀜𑁆𑀘𑀸𑀧𑀺 𑀫𑀬𑀸 𑀊𑀳𑀸 𑀦𑀤𑀻 𑀦 𑀤𑀺𑀝𑁆𑀞𑀸, 𑀧𑀺𑀢𑀭𑀸𑀧𑀺 𑀫𑁂 𑀊𑀳𑀸 𑀦𑀤𑀻 𑀦 𑀤𑀺𑀝𑁆𑀞𑀸, 𑀅𑀧𑀺 𑀘 𑀅𑀢𑁆𑀣𑀺 𑀊𑀳𑀸 𑀦𑀤𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀫𑀬𑀸 𑀪𑀕𑀯𑀸 𑀦 𑀤𑀺𑀝𑁆𑀞𑁄, 𑀆𑀘𑀭𑀺𑀬𑁂𑀳𑀺𑀧𑀺 𑀫𑁂 𑀪𑀕𑀯𑀸 𑀦 𑀤𑀺𑀝𑁆𑀞𑁄, 𑀅𑀧𑀺 𑀘 𑀅𑀢𑁆𑀣𑀺 𑀪𑀕𑀯𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑀼𑀤𑁆𑀥𑀲𑁆𑀲 𑀅𑀢𑁆𑀣𑀺𑀦𑀢𑁆𑀣𑀺𑀪𑀸𑀯𑀧𑀜𑁆𑀳𑁄 𑀧𑀞𑀫𑁄.

𑁨. 𑀩𑀼𑀤𑁆𑀥𑀲𑁆𑀲 𑀅𑀦𑀼𑀢𑁆𑀢𑀭𑀪𑀸𑀯𑀧𑀜𑁆𑀳𑁄

𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀅𑀦𑀼𑀢𑁆𑀢𑀭𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀦𑀼𑀢𑁆𑀢𑀭𑁄’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀚𑀸𑀦𑀸𑀲𑀺 ‘𑀩𑀼𑀤𑁆𑀥𑁄 𑀅𑀦𑀼𑀢𑁆𑀢𑀭𑁄’’’𑀢𑀺? ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑁂𑀳𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑁄 𑀫𑀳𑀸𑀲𑀫𑀼𑀤𑁆𑀤𑁄, 𑀚𑀸𑀦𑁂𑀬𑁆𑀬𑀼𑀁 𑀢𑁂, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑁄 𑀔𑁄 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄, 𑀬𑀢𑁆𑀣𑀺𑀫𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀲𑀢𑀢𑀁 𑀲𑀫𑀺𑀢𑀁 𑀅𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁, 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻, 𑀦𑁂𑀯 𑀢𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀸𑀯𑀓𑁂 𑀫𑀳𑀦𑁆𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀲𑁆𑀲𑀺𑀢𑁆𑀯𑀸 𑀚𑀸𑀦𑀸𑀫𑀺 ‘𑀪𑀕𑀯𑀸 𑀅𑀦𑀼𑀢𑁆𑀢𑀭𑁄’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑀼𑀤𑁆𑀥𑀲𑁆𑀲 𑀅𑀦𑀼𑀢𑁆𑀢𑀭𑀪𑀸𑀯𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀩𑀼𑀤𑁆𑀥𑀲𑁆𑀲 𑀅𑀦𑀼𑀢𑁆𑀢𑀭𑀪𑀸𑀯𑀚𑀸𑀦𑀦𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 ‘𑀩𑀼𑀤𑁆𑀥𑁄 𑀅𑀦𑀼𑀢𑁆𑀢𑀭𑁄’’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 ‘𑀪𑀕𑀯𑀸 𑀅𑀦𑀼𑀢𑁆𑀢𑀭𑁄’’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 ‘𑀩𑀼𑀤𑁆𑀥𑁄 𑀅𑀦𑀼𑀢𑁆𑀢𑀭𑁄’’’𑀢𑀺. ‘‘𑀪𑀽𑀢𑀧𑀼𑀩𑁆𑀩𑀁, 𑀫𑀳𑀸𑀭𑀸𑀚, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀮𑁂𑀔𑀸𑀘𑀭𑀺𑀬𑁄 𑀅𑀳𑁄𑀲𑀺, 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀅𑀩𑁆𑀪𑀢𑀻𑀢𑀸𑀦𑀺 𑀓𑀸𑀮𑀗𑁆𑀓𑀢𑀲𑁆𑀲 𑀓𑀣𑀁 𑀲𑁄 𑀜𑀸𑀬𑀢𑀻’’𑀢𑀺. ‘‘𑀮𑁂𑀔𑁂𑀦 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀪𑀕𑀯𑀦𑁆𑀢𑀁 𑀧𑀲𑁆𑀲𑀢𑀺, 𑀥𑀫𑁆𑀫𑁄 𑀳𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀲𑀺𑀢𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑀼𑀤𑁆𑀥𑀲𑁆𑀲 𑀅𑀦𑀼𑀢𑁆𑀢𑀭𑀪𑀸𑀯𑀚𑀸𑀦𑀦𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀥𑀫𑁆𑀫𑀤𑀺𑀝𑁆𑀞𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀥𑀫𑁆𑀫𑁄 𑀢𑀬𑀸 𑀤𑀺𑀝𑁆𑀞𑁄’’𑀢𑀺. ‘‘𑀩𑀼𑀤𑁆𑀥𑀦𑁂𑀢𑁆𑀢𑀺𑀬𑀸 𑀔𑁄, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀬𑀸𑀯𑀚𑀻𑀯𑀁 𑀲𑀸𑀯𑀓𑁂𑀳𑀺 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀥𑀫𑁆𑀫𑀤𑀺𑀝𑁆𑀞𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀅𑀲𑀗𑁆𑀓𑀫𑀦𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘, 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀤𑀻𑀧𑀢𑁄 𑀧𑀤𑀻𑀧𑀁 𑀧𑀤𑀻𑀧𑁂𑀬𑁆𑀬, 𑀓𑀺𑀁𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀤𑀻𑀧𑁄 𑀧𑀤𑀻𑀧𑀫𑁆𑀳𑀸 𑀲𑀗𑁆𑀓𑀦𑁆𑀢𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀅𑀪𑀺𑀚𑀸𑀦𑀸𑀲𑀺 𑀦𑀼, 𑀢𑁆𑀯𑀁 𑀫𑀳𑀸𑀭𑀸𑀚, 𑀤𑀳𑀭𑀓𑁄 𑀲𑀦𑁆𑀢𑁄 𑀲𑀺𑀮𑁄𑀓𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀲𑀺𑀮𑁄𑀓𑀁 𑀕𑀳𑀺𑀢’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀲𑀺𑀮𑁄𑀓𑁄 𑀆𑀘𑀭𑀺𑀬𑀫𑁆𑀳𑀸 𑀲𑀗𑁆𑀓𑀦𑁆𑀢𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀲𑀗𑁆𑀓𑀫𑀦𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀯𑁂𑀤𑀕𑀽𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑁂𑀤𑀕𑀽 𑀉𑀧𑀮𑀩𑁆𑀪𑀢𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀧𑀭𑀫𑀢𑁆𑀣𑁂𑀦 𑀔𑁄, 𑀫𑀳𑀸𑀭𑀸𑀚, 𑀯𑁂𑀤𑀕𑀽 𑀦𑀼𑀧𑀮𑀩𑁆𑀪𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑁂𑀤𑀕𑀽𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀅𑀜𑁆𑀜𑀓𑀸𑀬𑀲𑀗𑁆𑀓𑀫𑀦𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁄𑀘𑀺 𑀲𑀢𑁆𑀢𑁄 𑀬𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀲𑀗𑁆𑀓𑀫𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀲𑀗𑁆𑀓𑀫𑀦𑁆𑀢𑁄 𑀦𑀢𑁆𑀣𑀺, 𑀦𑀦𑀼 𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀤𑀺 𑀦 𑀧𑀝𑀺𑀲𑀦𑁆𑀤𑀳𑁂𑀬𑁆𑀬, 𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻𑀢𑀺, 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀁 𑀅𑀯𑀳𑀭𑁂𑀬𑁆𑀬, 𑀓𑀺𑀁 𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀦 𑀔𑁄 𑀲𑁄, 𑀫𑀳𑀸𑀭𑀸𑀚, 𑀢𑀸𑀦𑀺 𑀅𑀫𑁆𑀩𑀸𑀦𑀺 𑀅𑀯𑀳𑀭𑀺, 𑀬𑀸𑀦𑀺 𑀢𑁂𑀦 𑀭𑁄𑀧𑀺𑀢𑀸𑀦𑀺, 𑀓𑀲𑁆𑀫𑀸 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀢𑀸𑀦𑀺, 𑀪𑀦𑁆𑀢𑁂, 𑀅𑀫𑁆𑀩𑀸𑀦𑀺 𑀦𑀺𑀲𑁆𑀲𑀸𑀬 𑀚𑀸𑀢𑀸𑀦𑀺, 𑀢𑀲𑁆𑀫𑀸 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀅𑀲𑁄𑀪𑀦𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀜𑁆𑀜𑀓𑀸𑀬𑀲𑀗𑁆𑀓𑀫𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀓𑀫𑁆𑀫𑀨𑀮𑀅𑀢𑁆𑀣𑀺𑀪𑀸𑀯𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀢𑀁 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸, 𑀓𑀼𑀳𑀺𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’𑀢𑀺? ‘‘𑀅𑀦𑀼𑀩𑀦𑁆𑀥𑁂𑀬𑁆𑀬𑀼𑀁 𑀔𑁄, 𑀫𑀳𑀸𑀭𑀸𑀚, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺 [𑀅𑀦𑀼𑀧𑀸𑀬𑀺𑀦𑀻𑀢𑀺 (𑀓.)]. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’’𑀢𑀺? ‘‘𑀦 𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀸𑀦𑀺𑀫𑀸𑀦𑀺 𑀭𑀼𑀓𑁆𑀔𑀸𑀦𑀺 𑀅𑀦𑀺𑀩𑁆𑀩𑀢𑁆𑀢𑀨𑀮𑀸𑀦𑀺, 𑀲𑀓𑁆𑀓𑀸 𑀢𑁂𑀲𑀁 𑀨𑀮𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀨𑀮𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀸𑀬 𑀲𑀦𑁆𑀢𑀢𑀺𑀬𑀸 𑀦 𑀲𑀓𑁆𑀓𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀓𑀫𑁆𑀫𑀨𑀮𑀅𑀢𑁆𑀣𑀺𑀪𑀸𑀯𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀉𑀧𑁆𑀧𑀚𑁆𑀚𑀢𑀺𑀚𑀸𑀦𑀦𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀚𑀸𑀦𑀸𑀢𑀺 𑀲𑁄 ‘𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑁄 𑀉𑀧𑁆𑀧𑀚𑁆𑀚𑀢𑀺 𑀚𑀸𑀦𑀸𑀢𑀺 𑀲𑁄 ‘𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’’𑀢𑀺. ‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀩𑀻𑀚𑀸𑀦𑀺 𑀧𑀣𑀯𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑁆𑀫𑀸 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀚𑀸𑀦𑀸𑀢𑀺 ‘𑀥𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀚𑀸𑀦𑀸𑀢𑀺 𑀲𑁄 ‘𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀉𑀧𑁆𑀧𑀚𑁆𑀚𑀢𑀺𑀚𑀸𑀦𑀦𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀩𑀼𑀤𑁆𑀥𑀦𑀺𑀤𑀲𑁆𑀲𑀦𑀧𑀜𑁆𑀳𑁄

𑁧𑁦. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀅𑀢𑁆𑀣𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀢𑁆𑀣𑀻’’𑀢𑀺. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀦𑀺𑀤𑀲𑁆𑀲𑁂𑀢𑀼𑀁 𑀇𑀥𑀯𑀸 𑀇𑀥𑀯𑀸’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸, 𑀦 𑀲𑀓𑁆𑀓𑀸 𑀪𑀕𑀯𑀸 𑀦𑀺𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀫𑀳𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑁆𑀲 𑀚𑀮𑀫𑀸𑀦𑀲𑁆𑀲 𑀬𑀸 𑀅𑀘𑁆𑀘𑀺 𑀅𑀢𑁆𑀣𑀗𑁆𑀕𑀢𑀸, 𑀲𑀓𑁆𑀓𑀸 𑀲𑀸 𑀅𑀘𑁆𑀘𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀦𑀺𑀭𑀼𑀤𑁆𑀥𑀸 𑀲𑀸 𑀅𑀘𑁆𑀘𑀺 𑀅𑀧𑁆𑀧𑀜𑁆𑀜𑀢𑁆𑀢𑀺𑀁 𑀕𑀢𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀅𑀢𑁆𑀣𑀗𑁆𑀕𑀢𑁄, 𑀦 𑀲𑀓𑁆𑀓𑀸 𑀪𑀕𑀯𑀸 𑀦𑀺𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸’ 𑀢𑀺, 𑀥𑀫𑁆𑀫𑀓𑀸𑀬𑁂𑀦 𑀧𑀦 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀪𑀕𑀯𑀸 𑀦𑀺𑀤𑀲𑁆𑀲𑁂𑀢𑀼𑀁. 𑀥𑀫𑁆𑀫𑁄 𑀳𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀲𑀺𑀢𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑀼𑀤𑁆𑀥𑀦𑀺𑀤𑀲𑁆𑀲𑀦𑀧𑀜𑁆𑀳𑁄 𑀤𑀲𑀫𑁄.

𑀩𑀼𑀤𑁆𑀥𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀤𑀲 𑀧𑀜𑁆𑀳𑀸.

𑁬. 𑀲𑀢𑀺𑀯𑀕𑁆𑀕𑁄

𑁧. 𑀓𑀸𑀬𑀧𑀺𑀬𑀸𑀬𑀦𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀺𑀬𑁄 𑀧𑀩𑁆𑀩𑀚𑀺𑀢𑀸𑀦𑀁 𑀓𑀸𑀬𑁄’’𑀢𑀺? ‘‘𑀦 𑀔𑁄, 𑀫𑀳𑀸𑀭𑀸𑀚, 𑀧𑀺𑀬𑁄 𑀧𑀩𑁆𑀩𑀚𑀺𑀢𑀸𑀦𑀁 𑀓𑀸𑀬𑁄’’𑀢𑀺. ‘‘𑀅𑀣 𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀓𑁂𑀮𑀸𑀬𑀣 𑀫𑀫𑀸𑀬𑀣𑀸’’𑀢𑀺? ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀓𑀤𑀸𑀘𑀺 𑀓𑀭𑀳𑀘𑀺 𑀲𑀗𑁆𑀕𑀸𑀫𑀕𑀢𑀲𑁆𑀲 𑀓𑀡𑁆𑀟𑀧𑁆𑀧𑀳𑀸𑀭𑁄 𑀳𑁄𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀳𑁄𑀢𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀯𑀡𑁄 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀧𑀺𑀬𑁄 𑀢𑁂 𑀯𑀡𑁄, 𑀢𑁂𑀦 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺? ‘‘𑀦 𑀫𑁂, 𑀪𑀦𑁆𑀢𑁂, 𑀧𑀺𑀬𑁄 𑀯𑀡𑁄, 𑀅𑀧𑀺 𑀘 𑀫𑀁𑀲𑀲𑁆𑀲 𑀭𑀼𑀳𑀦𑀢𑁆𑀣𑀸𑀬 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀧𑁆𑀧𑀺𑀬𑁄 𑀧𑀩𑁆𑀩𑀚𑀺𑀢𑀸𑀦𑀁 𑀓𑀸𑀬𑁄, 𑀅𑀣 𑀘 𑀧𑀩𑁆𑀩𑀚𑀺𑀢𑀸 𑀅𑀦𑀚𑁆𑀛𑁄𑀲𑀺𑀢𑀸 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀯𑀡𑀽𑀧𑀫𑁄 𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀢𑁂𑀦 𑀧𑀩𑁆𑀩𑀚𑀺𑀢𑀸 𑀯𑀡𑀫𑀺𑀯 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑀺 𑀅𑀦𑀚𑁆𑀛𑁄𑀲𑀺𑀢𑀸. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀪𑀕𑀯𑀢𑀸 𑁋

‘‘‘𑀅𑀮𑁆𑀮𑀘𑀫𑁆𑀫𑀧𑀝𑀺𑀘𑁆𑀙𑀦𑁆𑀦𑁄, 𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄;

𑀲𑀫𑀦𑁆𑀢𑀢𑁄 𑀧𑀕𑁆𑀖𑀭𑀢𑀺, 𑀅𑀲𑀼𑀘𑀺𑀧𑀽𑀢𑀺𑀕𑀦𑁆𑀥𑀺𑀬𑁄’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀓𑀸𑀬𑀧𑀺𑀬𑀸𑀬𑀦𑀧𑀜𑁆𑀳𑁄 𑀧𑀞𑀫𑁄.

𑁨. 𑀲𑀩𑁆𑀩𑀜𑁆𑀜𑀽𑀪𑀸𑀯𑀧𑀜𑁆𑀳𑁄

𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻’’𑀢𑀺. ‘‘𑀅𑀣 𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀸𑀯𑀓𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻’’𑀢𑀺? ‘‘𑀅𑀢𑁆𑀣𑀺 𑀧𑀦 𑀢𑁂 𑀫𑀳𑀸𑀭𑀸𑀚, 𑀓𑁄𑀘𑀺 𑀯𑁂𑀚𑁆𑀚𑁄, 𑀬𑁄 𑀇𑀫𑀺𑀲𑁆𑀲𑀁 𑀧𑀣𑀯𑀺𑀬𑀁 𑀲𑀩𑁆𑀩𑀪𑁂𑀲𑀚𑁆𑀚𑀸𑀦𑀺 𑀚𑀸𑀦𑀸𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀯𑁂𑀚𑁆𑀚𑁄 𑀕𑀺𑀮𑀸𑀦𑀓𑀁 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀪𑁂𑀲𑀚𑁆𑀚𑀁 𑀧𑀸𑀬𑁂𑀢𑀺, 𑀉𑀤𑀸𑀳𑀼 𑀅𑀲𑀫𑁆𑀧𑀢𑁆𑀢𑁂 𑀓𑀸𑀮𑁂’’𑀢𑀺? ‘‘𑀲𑀫𑁆𑀧𑀢𑁆𑀢𑁂 𑀓𑀸𑀮𑁂, 𑀪𑀦𑁆𑀢𑁂, 𑀕𑀺𑀮𑀸𑀦𑀓𑀁 𑀪𑁂𑀲𑀚𑁆𑀚𑀁 𑀧𑀸𑀬𑁂𑀢𑀺, 𑀦𑁄 𑀅𑀲𑀫𑁆𑀧𑀢𑁆𑀢𑁂 𑀓𑀸𑀮𑁂’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀦 𑀅𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑀺, 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀢𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀩𑁆𑀩𑀜𑁆𑀜𑀽𑀪𑀸𑀯𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑀩𑁆𑀬𑀸𑀫𑀧𑁆𑀧𑀪𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑀩𑁆𑀬𑀸𑀫𑀧𑁆𑀧𑀪𑁄’’𑀢𑀺.

‘‘𑀓𑀺𑀁 𑀧𑀦𑀲𑁆𑀲, 𑀪𑀦𑁆𑀢𑁂, 𑀫𑀸𑀢𑀸𑀧𑀺𑀢𑀭𑁄𑀧𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀸 𑀩𑁆𑀬𑀸𑀫𑀧𑁆𑀧𑀪𑀸’’𑀢𑀺? ‘‘𑀦𑁄 𑀘𑀲𑁆𑀲, 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀸 𑀩𑁆𑀬𑀸𑀫𑀧𑁆𑀧𑀪𑀸’’𑀢𑀺.

‘‘𑀏𑀯𑀁 𑀲𑀦𑁆𑀢𑁂 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀉𑀧𑁆𑀧𑀚𑁆𑀚𑀢𑀺 𑀩𑀼𑀤𑁆𑀥𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑀩𑁆𑀬𑀸𑀫𑀧𑁆𑀧𑀪𑁄𑀢𑀺, 𑀅𑀧𑀺 𑀘 𑀫𑀸𑀢𑀼𑀲𑀤𑀺𑀲𑁄 𑀯𑀸 𑀧𑀼𑀢𑁆𑀢𑁄 𑀳𑁄𑀢𑀺 𑀫𑀸𑀢𑀼𑀧𑀓𑁆𑀔𑁄 𑀯𑀸, 𑀧𑀺𑀢𑀼𑀲𑀤𑀺𑀲𑁄 𑀯𑀸 𑀧𑀼𑀢𑁆𑀢𑁄 𑀳𑁄𑀢𑀺 𑀧𑀺𑀢𑀼𑀧𑀓𑁆𑀔𑁄 𑀯𑀸’’𑀢𑀺. 𑀣𑁂𑀭𑁄 𑀆𑀳 ‘‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀺 𑀧𑀤𑀼𑀫𑀁 𑀲𑀢𑀧𑀢𑁆𑀢’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀻’’𑀢𑀺. ‘‘𑀢𑀲𑁆𑀲 𑀧𑀦 𑀓𑀼𑀳𑀺𑀁 𑀲𑀫𑁆𑀪𑀯𑁄’’𑀢𑀺? ‘‘𑀓𑀤𑁆𑀤𑀫𑁂 𑀚𑀸𑀬𑀢𑀺 𑀉𑀤𑀓𑁂 𑀆𑀲𑀻𑀬𑀢𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀧𑀤𑀼𑀫𑀁 𑀓𑀤𑁆𑀤𑀫𑁂𑀦 𑀲𑀤𑀺𑀲𑀁 𑀯𑀡𑁆𑀡𑁂𑀦 𑀯𑀸 𑀕𑀦𑁆𑀥𑁂𑀦 𑀯𑀸 𑀭𑀲𑁂𑀦 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀅𑀣 𑀉𑀤𑀓𑁂𑀦 𑀯𑀸 𑀕𑀦𑁆𑀥𑁂𑀦 𑀯𑀸 𑀭𑀲𑁂𑀦 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑀩𑁆𑀬𑀸𑀫𑀧𑁆𑀧𑀪𑁄, 𑀦𑁄 𑀘𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀲𑀻𑀢𑀺𑀬𑀸 𑀘 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀭𑀜𑁆𑀚𑀺𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀸 𑀩𑁆𑀬𑀸𑀫𑀧𑁆𑀧𑀪𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀸𑀭𑀺𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀩𑁆𑀭𑀳𑁆𑀫𑀼𑀦𑁄 𑀲𑀺𑀲𑁆𑀲𑁄’’𑀢𑀺? ‘‘𑀅𑀢𑁆𑀣𑀺 𑀧𑀦 𑀢𑁂, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀧𑀸𑀫𑁄𑀓𑁆𑀔𑁄’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀳𑀢𑁆𑀣𑀻 𑀓𑀤𑀸𑀘𑀺 𑀓𑀭𑀳𑀘𑀺 𑀓𑁄𑀜𑁆𑀘𑀦𑀸𑀤𑀁 𑀦𑀤𑀢𑀻𑀢𑀺? ‘‘𑀆𑀫, 𑀪𑀦𑁆𑀢𑁂, 𑀦𑀤𑀢𑀻’’𑀢𑀺 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑁄 𑀳𑀢𑁆𑀣𑀻 𑀓𑁄𑀜𑁆𑀘𑀲𑀓𑀼𑀡𑀲𑁆𑀲 𑀲𑀺𑀲𑁆𑀲𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑀸 𑀲𑀩𑀼𑀤𑁆𑀥𑀺𑀓𑁄 𑀅𑀩𑀼𑀤𑁆𑀥𑀺𑀓𑁄’’𑀢𑀺? ‘‘𑀲𑀩𑀼𑀤𑁆𑀥𑀺𑀓𑁄, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑀸 𑀪𑀕𑀯𑀢𑁄 𑀲𑀺𑀲𑁆𑀲𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀸𑀭𑀺𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀪𑀕𑀯𑀢𑁄 𑀉𑀧𑀲𑀫𑁆𑀧𑀤𑀸𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀉𑀧𑀲𑀫𑁆𑀧𑀤𑀸 𑀲𑀼𑀦𑁆𑀤𑀭𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀉𑀧𑀲𑀫𑁆𑀧𑀤𑀸 𑀲𑀼𑀦𑁆𑀤𑀭𑀸’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀩𑀼𑀤𑁆𑀥𑀲𑁆𑀲 𑀉𑀧𑀲𑀫𑁆𑀧𑀤𑀸, 𑀉𑀤𑀸𑀳𑀼 𑀦𑀢𑁆𑀣𑀻’’𑀢𑀺? ‘‘𑀉𑀧𑀲𑀫𑁆𑀧𑀦𑁆𑀦𑁄 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦, 𑀦𑀢𑁆𑀣𑀺 𑀪𑀕𑀯𑀢𑁄 𑀉𑀧𑀲𑀫𑁆𑀧𑀤𑀸 𑀅𑀜𑁆𑀜𑁂𑀳𑀺 𑀤𑀺𑀦𑁆𑀦𑀸, 𑀬𑀣𑀸 𑀲𑀸𑀯𑀓𑀸𑀦𑀁, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀪𑀕𑀯𑀢𑁄 𑀉𑀧𑀲𑀫𑁆𑀧𑀤𑀸𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀅𑀲𑁆𑀲𑀼𑀪𑁂𑀲𑀚𑁆𑀚𑀸𑀪𑁂𑀲𑀚𑁆𑀚𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀘 𑀫𑀸𑀢𑀭𑀺 𑀫𑀢𑀸𑀬 𑀭𑁄𑀤𑀢𑀺, 𑀬𑁄 𑀘 𑀥𑀫𑁆𑀫𑀧𑁂𑀫𑁂𑀦 𑀭𑁄𑀤𑀢𑀺, 𑀉𑀪𑀺𑀦𑁆𑀦𑀁 𑀢𑁂𑀲𑀁 𑀭𑁄𑀤𑀦𑁆𑀢𑀸𑀦𑀁 𑀓𑀲𑁆𑀲 𑀅𑀲𑁆𑀲𑀼 𑀪𑁂𑀲𑀚𑁆𑀚𑀁, 𑀓𑀲𑁆𑀲 𑀦 𑀪𑁂𑀲𑀚𑁆𑀚’’𑀦𑁆𑀢𑀺? ‘‘𑀏𑀓𑀲𑁆𑀲 𑀔𑁄, 𑀫𑀳𑀸𑀭𑀸𑀚, 𑀅𑀲𑁆𑀲𑀼 𑀭𑀸𑀕𑀤𑁄𑀲𑀫𑁄𑀳𑁂𑀳𑀺 𑀲𑀫𑀮𑀁 𑀉𑀡𑁆𑀳𑀁, 𑀏𑀓𑀲𑁆𑀲 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀯𑀺𑀫𑀮𑀁 𑀲𑀻𑀢𑀮𑀁. 𑀬𑀁 𑀔𑁄, 𑀫𑀳𑀸𑀭𑀸𑀚, 𑀲𑀻𑀢𑀮𑀁, 𑀢𑀁 𑀪𑁂𑀲𑀚𑁆𑀚𑀁, 𑀬𑀁 𑀉𑀡𑁆𑀳𑀁, 𑀢𑀁 𑀦 𑀪𑁂𑀲𑀚𑁆𑀚’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀲𑁆𑀲𑀼𑀪𑁂𑀲𑀚𑁆𑀚𑀸𑀪𑁂𑀲𑀚𑁆𑀚𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀲𑀭𑀸𑀕𑀯𑀻𑀢𑀭𑀸𑀕𑀦𑀸𑀦𑀸𑀓𑀭𑀡𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀭𑀸𑀕𑀲𑁆𑀲 𑀘 𑀯𑀻𑀢𑀭𑀸𑀕𑀲𑁆𑀲 𑀘𑀸’’𑀢𑀺? ‘‘𑀏𑀓𑁄 𑀔𑁄, 𑀫𑀳𑀸𑀭𑀸𑀚, 𑀅𑀚𑁆𑀛𑁄𑀲𑀺𑀢𑁄, 𑀏𑀓𑁄 𑀅𑀦𑀚𑁆𑀛𑁄𑀲𑀺𑀢𑁄’’𑀢𑀺. ‘‘𑀓𑀺𑀁 𑀏𑀢𑀁, 𑀪𑀦𑁆𑀢𑁂, 𑀅𑀚𑁆𑀛𑁄𑀲𑀺𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀦𑀸𑀫𑀸’’𑀢𑀺? ‘‘𑀏𑀓𑁄 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀓𑁄, 𑀏𑀓𑁄 𑀅𑀦𑀢𑁆𑀣𑀺𑀓𑁄’’𑀢𑀺. ‘‘𑀧𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀬𑁄 𑀘 𑀲𑀭𑀸𑀕𑁄, 𑀬𑁄 𑀘 𑀯𑀻𑀢𑀭𑀸𑀕𑁄, 𑀲𑀩𑁆𑀩𑁄𑀧𑁂𑀲𑁄 𑀲𑁄𑀪𑀦𑀁 𑀬𑁂𑀯 𑀇𑀘𑁆𑀙𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸, 𑀦 𑀓𑁄𑀘𑀺 𑀧𑀸𑀧𑀓𑀁 𑀇𑀘𑁆𑀙𑀢𑀻’’𑀢𑀺. ‘‘𑀅𑀯𑀻𑀢𑀭𑀸𑀕𑁄 𑀔𑁄, 𑀫𑀳𑀸𑀭𑀸𑀚, 𑀭𑀲𑀧𑀝𑀺𑀲𑀁𑀯𑁂𑀤𑀻 𑀘 𑀭𑀲𑀭𑀸𑀕𑀧𑀝𑀺𑀲𑀁𑀯𑁂𑀤𑀻 𑀘 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀯𑀻𑀢𑀭𑀸𑀕𑁄 𑀧𑀦 𑀭𑀲𑀧𑀝𑀺𑀲𑀁𑀯𑁂𑀤𑀻 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀦𑁄 𑀘 𑀔𑁄 𑀭𑀲𑀭𑀸𑀕𑀧𑀝𑀺𑀲𑀁𑀯𑁂𑀤𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀭𑀸𑀕𑀯𑀻𑀢𑀭𑀸𑀕𑀦𑀸𑀦𑀸𑀓𑀭𑀡𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀧𑀜𑁆𑀜𑀸𑀧𑀢𑀺𑀝𑁆𑀞𑀸𑀦𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀜𑀸 𑀓𑀼𑀳𑀺𑀁 𑀧𑀝𑀺𑀯𑀲𑀢𑀻’’𑀢𑀺? ‘‘𑀦 𑀓𑀢𑁆𑀣𑀘𑀺 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀢𑁆𑀣𑀺 𑀧𑀜𑁆𑀜𑀸’’𑀢𑀺. ‘‘𑀯𑀸𑀢𑁄, 𑀫𑀳𑀸𑀭𑀸𑀚, 𑀓𑀼𑀳𑀺𑀁 𑀧𑀝𑀺𑀯𑀲𑀢𑀻’’𑀢𑀺? ‘‘𑀦 𑀓𑀢𑁆𑀣𑀘𑀺 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀯𑀸𑀢𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀜𑁆𑀜𑀸𑀧𑀢𑀺𑀝𑁆𑀞𑀸𑀦𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀲𑀁𑀲𑀸𑀭𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀲𑀁𑀲𑀸𑀭𑁄’𑀢𑀺, 𑀓𑀢𑀫𑁄 𑀲𑁄 𑀲𑀁𑀲𑀸𑀭𑁄’’𑀢𑀺? ‘‘𑀇𑀥, 𑀫𑀳𑀸𑀭𑀸𑀚, 𑀚𑀸𑀢𑁄 𑀇𑀥𑁂𑀯 𑀫𑀭𑀢𑀺, 𑀇𑀥 𑀫𑀢𑁄 𑀅𑀜𑁆𑀜𑀢𑁆𑀭 𑀉𑀧𑁆𑀧𑀚𑁆𑀚𑀢𑀺, 𑀢𑀳𑀺𑀁 𑀚𑀸𑀢𑁄 𑀢𑀳𑀺𑀁 𑀬𑁂𑀯 𑀫𑀭𑀢𑀺, 𑀢𑀳𑀺𑀁 𑀫𑀢𑁄 𑀅𑀜𑁆𑀜𑀢𑁆𑀭 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀁𑀲𑀸𑀭𑁄 𑀳𑁄𑀢𑀻’’𑀢𑀺. ‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀓𑁆𑀓𑀁 𑀅𑀫𑁆𑀩𑀁 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀺𑀁 𑀭𑁄𑀧𑁂𑀬𑁆𑀬, 𑀢𑀢𑁄 𑀫𑀳𑀦𑁆𑀢𑁄 𑀅𑀫𑁆𑀩𑀭𑀼𑀓𑁆𑀔𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀨𑀮𑀸𑀦𑀺 𑀤𑀤𑁂𑀬𑁆𑀬, 𑀅𑀣 𑀲𑁄 𑀧𑀼𑀭𑀺𑀲𑁄 𑀢𑀢𑁄𑀧𑀺 𑀧𑀓𑁆𑀓𑀁 𑀅𑀫𑁆𑀩𑀁 𑀔𑀸𑀤𑀺𑀢𑁆𑀯𑀸 𑀅𑀝𑁆𑀞𑀺𑀁 𑀭𑁄𑀧𑁂𑀬𑁆𑀬, 𑀢𑀢𑁄𑀧𑀺 𑀫𑀳𑀦𑁆𑀢𑁄 𑀅𑀫𑁆𑀩𑀭𑀼𑀓𑁆𑀔𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀨𑀮𑀸𑀦𑀺 𑀤𑀤𑁂𑀬𑁆𑀬, 𑀏𑀯𑀫𑁂𑀢𑁂𑀲𑀁 𑀭𑀼𑀓𑁆𑀔𑀸𑀦𑀁 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀥 𑀚𑀸𑀢𑁄 𑀇𑀥𑁂𑀯 𑀫𑀭𑀢𑀺, 𑀇𑀥 𑀫𑀢𑁄 𑀅𑀜𑁆𑀜𑀢𑁆𑀭 𑀉𑀧𑁆𑀧𑀚𑁆𑀚𑀢𑀺, 𑀢𑀳𑀺𑀁 𑀚𑀸𑀢𑁄 𑀢𑀳𑀺𑀁 𑀬𑁂𑀯 𑀫𑀭𑀢𑀺, 𑀢𑀳𑀺𑀁 𑀫𑀢𑁄 𑀅𑀜𑁆𑀜𑀢𑁆𑀭 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀁𑀲𑀸𑀭𑁄 𑀳𑁄𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀁𑀲𑀸𑀭𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀘𑀺𑀭𑀓𑀢𑀲𑀭𑀡𑀧𑀜𑁆𑀳𑁄

𑁧𑁦. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀅𑀢𑀻𑀢𑀁 𑀘𑀺𑀭𑀓𑀢𑀁 𑀲𑀭𑀢𑀻’’𑀢𑀺? ‘‘𑀲𑀢𑀺𑀬𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀘𑀺𑀢𑁆𑀢𑁂𑀦 𑀲𑀭𑀢𑀺 𑀦𑁄 𑀲𑀢𑀺𑀬𑀸’’𑀢𑀺? ‘‘𑀅𑀪𑀺𑀚𑀸𑀦𑀸𑀲𑀺 𑀦𑀼, 𑀢𑁆𑀯𑀁 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀺𑀤𑁂𑀯 𑀓𑀭𑀡𑀻𑀬𑀁 𑀓𑀢𑁆𑀯𑀸 𑀧𑀫𑀼𑀝𑁆𑀞’’𑀦𑁆𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀢𑁆𑀯𑀁 𑀫𑀳𑀸𑀭𑀸𑀚, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀘𑀺𑀢𑁆𑀢𑀓𑁄 𑀅𑀳𑁄𑀲𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀦𑀸𑀳𑁄𑀲𑀻’’𑀢𑀺. ‘‘𑀅𑀣 𑀓𑀲𑁆𑀫𑀸, 𑀢𑁆𑀯𑀁 𑀫𑀳𑀸𑀭𑀸𑀚, 𑀏𑀯𑀫𑀸𑀳 ‘𑀘𑀺𑀢𑁆𑀢𑁂𑀦 𑀲𑀭𑀢𑀺, 𑀦𑁄 𑀲𑀢𑀺𑀬𑀸’’’𑀢𑀺?

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀘𑀺𑀭𑀓𑀢𑀲𑀭𑀡𑀧𑀜𑁆𑀳𑁄 𑀤𑀲𑀫𑁄.

𑁧𑁧. 𑀅𑀪𑀺𑀚𑀸𑀦𑀦𑁆𑀢𑀲𑀢𑀺𑀧𑀜𑁆𑀳𑁄

𑁧𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑀸 𑀲𑀢𑀺 𑀅𑀪𑀺𑀚𑀸𑀦𑀦𑁆𑀢𑀻 𑀉𑀧𑁆𑀧𑀚𑁆𑀚𑀢𑀺, 𑀉𑀤𑀸𑀳𑀼 𑀓𑀝𑀼𑀫𑀺𑀓𑀸𑀯 𑀲𑀢𑀻’’𑀢𑀺? ‘‘𑀅𑀪𑀺𑀚𑀸𑀦𑀦𑁆𑀢𑀻𑀧𑀺, 𑀫𑀳𑀸𑀭𑀸𑀚, 𑀓𑀝𑀼𑀫𑀺𑀓𑀸𑀧𑀺 𑀲𑀢𑀻’’𑀢𑀺. ‘‘𑀏𑀯𑀜𑁆𑀳𑀺 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑀸 𑀲𑀢𑀺 𑀅𑀪𑀺𑀚𑀸𑀦𑀦𑁆𑀢𑀻, 𑀦𑀢𑁆𑀣𑀺 𑀓𑀝𑀼𑀫𑀺𑀓𑀸 𑀲𑀢𑀻’’𑀢𑀺? ‘‘𑀬𑀤𑀺 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀓𑀝𑀼𑀫𑀺𑀓𑀸 𑀲𑀢𑀺, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀲𑀺𑀧𑁆𑀧𑀺𑀓𑀸𑀦𑀁 𑀓𑀫𑁆𑀫𑀸𑀬𑀢𑀦𑁂𑀳𑀺 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀳𑀺 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀳𑀺 𑀯𑀸 𑀓𑀭𑀡𑀻𑀬𑀁, 𑀦𑀺𑀭𑀢𑁆𑀣𑀓𑀸 𑀆𑀘𑀭𑀺𑀬𑀸, 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀓𑀝𑀼𑀫𑀺𑀓𑀸 𑀲𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀺 𑀓𑀫𑁆𑀫𑀸𑀬𑀢𑀦𑁂𑀳𑀺 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀳𑀺 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀳𑀺 𑀯𑀸 𑀓𑀭𑀡𑀻𑀬𑀁, 𑀅𑀢𑁆𑀣𑁄 𑀘 𑀆𑀘𑀭𑀺𑀬𑁂𑀳𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀪𑀺𑀚𑀸𑀦𑀦𑁆𑀢𑀲𑀢𑀺𑀧𑀜𑁆𑀳𑁄 𑀏𑀓𑀸𑀤𑀲𑀫𑁄.

𑀲𑀢𑀺𑀯𑀕𑁆𑀕𑁄 𑀙𑀝𑁆𑀞𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀏𑀓𑀸𑀤𑀲 𑀧𑀜𑁆𑀳𑀸.

𑁭. 𑀅𑀭𑀽𑀧𑀥𑀫𑁆𑀫𑀯𑀯𑀢𑁆𑀢𑀦𑀯𑀕𑁆𑀕𑁄

𑁧. 𑀲𑀢𑀺𑀉𑀧𑁆𑀧𑀚𑁆𑀚𑀦𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀲𑀢𑁆𑀢𑀭𑀲𑀳𑀸𑀓𑀸𑀭𑁂𑀳𑀺, 𑀫𑀳𑀸𑀭𑀸𑀚, 𑀲𑀢𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀓𑀢𑀫𑁂𑀳𑀺 𑀲𑀢𑁆𑀢𑀭𑀲𑀳𑀸𑀓𑀸𑀭𑁂𑀳𑀻’’𑀢𑀺? ‘‘𑀅𑀪𑀺𑀚𑀸𑀦𑀢𑁄𑀧𑀺, 𑀫𑀳𑀸𑀭𑀸𑀚, 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀝𑀼𑀫𑀺𑀓𑀸𑀬𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀑𑀴𑀸𑀭𑀺𑀓𑀯𑀺𑀜𑁆𑀜𑀸𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀳𑀺𑀢𑀯𑀺𑀜𑁆𑀜𑀸𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀺𑀢𑀯𑀺𑀜𑁆𑀜𑀸𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀪𑀸𑀕𑀦𑀺𑀫𑀺𑀢𑁆𑀢𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀲𑀪𑀸𑀕𑀦𑀺𑀫𑀺𑀢𑁆𑀢𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀣𑀸𑀪𑀺𑀜𑁆𑀜𑀸𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀮𑀓𑁆𑀔𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀸𑀭𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀫𑀼𑀤𑁆𑀤𑀸𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀕𑀡𑀦𑀸𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀥𑀸𑀭𑀡𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀪𑀸𑀯𑀦𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑁄𑀢𑁆𑀣𑀓𑀦𑀺𑀩𑀦𑁆𑀥𑀦𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀦𑀺𑀓𑁆𑀔𑁂𑀧𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀼𑀪𑀽𑀢𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺.

‘‘𑀓𑀣𑀁 𑀅𑀪𑀺𑀚𑀸𑀦𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑀣𑀸, 𑀫𑀳𑀸𑀭𑀸𑀚, 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸, 𑀬𑁂 𑀯𑀸 𑀧𑀦 𑀅𑀜𑁆𑀜𑁂𑀧𑀺 𑀓𑁂𑀘𑀺 𑀚𑀸𑀢𑀺𑀲𑁆𑀲𑀭𑀸 𑀚𑀸𑀢𑀺𑀁 𑀲𑀭𑀦𑁆𑀢𑀺, 𑀏𑀯𑀁 𑀅𑀪𑀺𑀚𑀸𑀦𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀓𑀝𑀼𑀫𑀺𑀓𑀸𑀬 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑁄 𑀧𑀓𑀢𑀺𑀬𑀸 𑀫𑀼𑀝𑁆𑀞𑀲𑁆𑀲𑀢𑀺𑀓𑁄, 𑀧𑀭𑁂 𑀘 𑀢𑀁 𑀲𑀭𑀸𑀧𑀦𑀢𑁆𑀣𑀁 𑀦𑀺𑀩𑀦𑁆𑀥𑀦𑁆𑀢𑀺, 𑀏𑀯𑀁 𑀓𑀝𑀼𑀫𑀺𑀓𑀸𑀬 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀑𑀴𑀸𑀭𑀺𑀓𑀯𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑀤𑀸 𑀭𑀚𑁆𑀚𑁂 𑀯𑀸 𑀅𑀪𑀺𑀲𑀺𑀢𑁆𑀢𑁄 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀧𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀑𑀴𑀸𑀭𑀺𑀓𑀯𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀳𑀺𑀢𑀯𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑀫𑁆𑀳𑀺 𑀲𑀼𑀔𑀸𑀧𑀺𑀢𑁄, ‘𑀅𑀫𑀼𑀓𑀲𑁆𑀫𑀺𑀁 𑀏𑀯𑀁 𑀲𑀼𑀔𑀸𑀧𑀺𑀢𑁄’𑀢𑀺 𑀲𑀭𑀢𑀺, 𑀏𑀯𑀁 𑀳𑀺𑀢𑀯𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀅𑀳𑀺𑀢𑀯𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑀫𑁆𑀳𑀺 𑀤𑀼𑀓𑁆𑀔𑀸𑀧𑀺𑀢𑁄, ‘𑀅𑀫𑀼𑀓𑀲𑁆𑀫𑀺𑀁 𑀏𑀯𑀁 𑀤𑀼𑀓𑁆𑀔𑀸𑀧𑀺𑀢𑁄’𑀢𑀺 𑀲𑀭𑀢𑀺, 𑀏𑀯𑀁 𑀅𑀳𑀺𑀢𑀯𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀲𑀪𑀸𑀕𑀦𑀺𑀫𑀺𑀢𑁆𑀢𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀲𑀤𑀺𑀲𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀪𑀸𑀢𑀭𑀁 𑀯𑀸 𑀪𑀕𑀺𑀦𑀺𑀁 𑀯𑀸 𑀲𑀭𑀢𑀺, 𑀑𑀝𑁆𑀞𑀁 𑀯𑀸 𑀕𑁄𑀡𑀁 𑀯𑀸 𑀕𑀤𑁆𑀭𑀪𑀁 𑀯𑀸 𑀤𑀺𑀲𑁆𑀯𑀸 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀑𑀝𑁆𑀞𑀁 𑀯𑀸 𑀕𑁄𑀡𑀁 𑀯𑀸 𑀕𑀤𑁆𑀭𑀪𑀁 𑀯𑀸 𑀲𑀭𑀢𑀺, 𑀏𑀯𑀁 𑀲𑀪𑀸𑀕𑀦𑀺𑀫𑀺𑀢𑁆𑀢𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀯𑀺𑀲𑀪𑀸𑀕𑀦𑀺𑀫𑀢𑁆𑀢𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀅𑀲𑀼𑀓𑀲𑁆𑀲 𑀦𑀸𑀫 𑀯𑀡𑁆𑀡𑁄 𑀏𑀤𑀺𑀲𑁄, 𑀲𑀤𑁆𑀤𑁄 𑀏𑀤𑀺𑀲𑁄, 𑀕𑀦𑁆𑀥𑁄 𑀏𑀤𑀺𑀲𑁄, 𑀭𑀲𑁄 𑀏𑀤𑀺𑀲𑁄, 𑀨𑁄𑀝𑁆𑀞𑀩𑁆𑀩𑁄 𑀏𑀤𑀺𑀲𑁄𑀢𑀺 𑀲𑀭𑀢𑀺, 𑀏𑀯𑀫𑁆𑀧𑀺 𑀯𑀺𑀲𑀪𑀸𑀕𑀦𑀺𑀫𑀺𑀢𑁆𑀢𑀢𑁄𑀧𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀓𑀣𑀸𑀪𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑁄 𑀧𑀓𑀢𑀺𑀬𑀸 𑀫𑀼𑀝𑁆𑀞𑀲𑁆𑀲𑀢𑀺𑀓𑁄 𑀳𑁄𑀢𑀺, 𑀢𑀁 𑀧𑀭𑁂 𑀲𑀭𑀸𑀧𑁂𑀦𑁆𑀢𑀺, 𑀢𑁂𑀦 𑀲𑁄 𑀲𑀭𑀢𑀺, 𑀏𑀯𑀁 𑀓𑀣𑀸𑀪𑀺𑀜𑁆𑀜𑀸𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀮𑀓𑁆𑀔𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑁄 𑀧𑀓𑀢𑀺𑀬𑀸 𑀩𑀮𑀻𑀩𑀤𑁆𑀤𑀸𑀦𑀁 𑀅𑀗𑁆𑀕𑁂𑀦 𑀚𑀸𑀦𑀸𑀢𑀺, 𑀮𑀓𑁆𑀔𑀡𑁂𑀦 𑀚𑀸𑀦𑀸𑀢𑀺, 𑀏𑀯𑀁 𑀮𑀓𑁆𑀔𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀲𑀸𑀭𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀬𑁄 𑀧𑀓𑀢𑀺𑀬𑀸 𑀫𑀼𑀝𑁆𑀞𑀲𑁆𑀲𑀢𑀺𑀓𑁄 𑀳𑁄𑀢𑀺, 𑀬𑁄 𑀢𑀁 ‘𑀲𑀭𑀸𑀳𑀺 𑀪𑁄, 𑀲𑀭𑀸𑀳𑀺 𑀪𑁄’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀭𑀸𑀧𑁂𑀢𑀺, 𑀏𑀯𑀁 𑀲𑀸𑀭𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀫𑀼𑀤𑁆𑀤𑀸𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀮𑀺𑀧𑀺𑀬𑀸 𑀲𑀺𑀓𑁆𑀔𑀺𑀢𑀢𑁆𑀢𑀸 𑀚𑀸𑀦𑀸𑀢𑀺 ‘𑀇𑀫𑀲𑁆𑀲 𑀅𑀓𑁆𑀔𑀭𑀲𑁆𑀲 𑀅𑀦𑀦𑁆𑀢𑀭𑀁 𑀇𑀫𑀁 𑀅𑀓𑁆𑀔𑀭𑀁 𑀓𑀸𑀢𑀩𑁆𑀩’𑀦𑁆𑀢𑀺 𑀏𑀯𑀁 𑀫𑀼𑀤𑁆𑀤𑀸𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀕𑀡𑀦𑀸𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀕𑀡𑀦𑀸𑀬 𑀲𑀺𑀓𑁆𑀔𑀺𑀢𑀢𑁆𑀢𑀸 𑀕𑀡𑀓𑀸 𑀩𑀳𑀼𑀫𑁆𑀧𑀺 𑀕𑀡𑁂𑀦𑁆𑀢𑀺, 𑀏𑀯𑀁 𑀕𑀡𑀦𑀸𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀥𑀸𑀭𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀥𑀸𑀭𑀡𑀸𑀬 𑀲𑀺𑀓𑁆𑀔𑀺𑀢𑀢𑁆𑀢𑀸 𑀥𑀸𑀭𑀡𑀓𑀸 𑀩𑀳𑀼𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀏𑀯𑀁 𑀥𑀸𑀭𑀡𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀪𑀸𑀯𑀦𑀸𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀇𑀥 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀻𑀤𑀁, 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀏𑀯𑀁 𑀪𑀸𑀯𑀦𑀸𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀧𑁄𑀢𑁆𑀣𑀓𑀦𑀺𑀩𑀦𑁆𑀥𑀦𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀭𑀸𑀚𑀸𑀦𑁄 𑀅𑀦𑀼𑀲𑀸𑀲𑀦𑀺𑀬𑀁 𑀅𑀲𑁆𑀲𑀭𑀦𑁆𑀢𑀸 [𑀅𑀦𑀼𑀲𑁆𑀲𑀭𑀦𑁆𑀢𑀸 (𑀲𑀩𑁆𑀩𑀢𑁆𑀣)] 𑀏𑀢𑀁 𑀧𑁄𑀢𑁆𑀣𑀓𑀁 𑀆𑀳𑀭𑀣𑀸𑀢𑀺, 𑀢𑁂𑀦 𑀧𑁄𑀢𑁆𑀣𑀓𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀏𑀯𑀁 𑀧𑁄𑀢𑁆𑀣𑀓𑀦𑀺𑀩𑀦𑁆𑀥𑀦𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀉𑀧𑀦𑀺𑀓𑁆𑀔𑁂𑀧𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀲𑀭𑀢𑀺, 𑀏𑀯𑀁 𑀉𑀧𑀦𑀺𑀓𑁆𑀔𑁂𑀧𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀓𑀣𑀁 𑀅𑀦𑀼𑀪𑀽𑀢𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺? 𑀤𑀺𑀝𑁆𑀞𑀢𑁆𑀢𑀸 𑀭𑀽𑀧𑀁 𑀲𑀭𑀢𑀺, 𑀲𑀼𑀢𑀢𑁆𑀢𑀸 𑀲𑀤𑁆𑀤𑀁 𑀲𑀭𑀢𑀺, 𑀖𑀸𑀬𑀺𑀢𑀢𑁆𑀢𑀸 𑀕𑀦𑁆𑀥𑀁 𑀲𑀭𑀢𑀺, 𑀲𑀸𑀬𑀺𑀢𑀢𑁆𑀢𑀸 𑀭𑀲𑀁 𑀲𑀭𑀢𑀺, 𑀨𑀼𑀝𑁆𑀞𑀢𑁆𑀢𑀸 𑀨𑁄𑀝𑁆𑀞𑀩𑁆𑀩𑀁 𑀲𑀭𑀢𑀺, 𑀯𑀺𑀜𑁆𑀜𑀸𑀢𑀢𑁆𑀢𑀸 𑀥𑀫𑁆𑀫𑀁 𑀲𑀭𑀢𑀺, 𑀏𑀯𑀁 𑀅𑀦𑀼𑀪𑀽𑀢𑀢𑁄 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀲𑀢𑁆𑀢𑀭𑀲𑀳𑀸𑀓𑀸𑀭𑁂𑀳𑀺 𑀲𑀢𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀢𑀺𑀉𑀧𑁆𑀧𑀚𑁆𑀚𑀦𑀧𑀜𑁆𑀳𑁄 𑀧𑀞𑀫𑁄.

𑁨. 𑀩𑀼𑀤𑁆𑀥𑀕𑀼𑀡𑀲𑀢𑀺𑀧𑀝𑀺𑀮𑀸𑀪𑀧𑀜𑁆𑀳𑁄

𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀏𑀢𑀁 𑀪𑀡𑀣 ‘𑀬𑁄 𑀯𑀲𑁆𑀲𑀲𑀢𑀁 𑀅𑀓𑀼𑀲𑀮𑀁 𑀓𑀭𑁂𑀬𑁆𑀬, 𑀫𑀭𑀡𑀓𑀸𑀮𑁂 𑀘 𑀏𑀓𑀁 𑀩𑀼𑀤𑁆𑀥𑀕𑀼𑀡𑀁 𑀲𑀢𑀺𑀁 𑀧𑀝𑀺𑀮𑀪𑁂𑀬𑁆𑀬, 𑀲𑁄 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺 𑀏𑀢𑀁 𑀦 𑀲𑀤𑁆𑀤𑀳𑀸𑀫𑀺, 𑀏𑀯𑀜𑁆𑀘 𑀧𑀦 𑀯𑀤𑁂𑀣 ‘𑀏𑀢𑁂𑀦 𑀧𑀸𑀡𑀸𑀢𑀺𑀧𑀸𑀢𑁂𑀦 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺 𑀏𑀢𑀫𑁆𑀧𑀺 𑀦 𑀲𑀤𑁆𑀤𑀳𑀸𑀫𑀻’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀔𑀼𑀤𑁆𑀤𑀓𑁄𑀧𑀺 𑀧𑀸𑀲𑀸𑀡𑁄 𑀯𑀺𑀦𑀸 𑀦𑀸𑀯𑀸𑀬 𑀉𑀤𑀓𑁂 𑀉𑀧𑁆𑀧𑀺𑀮𑀯𑁂𑀬𑁆𑀬𑀸’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀯𑀸𑀳𑀲𑀢𑀫𑁆𑀧𑀺 𑀧𑀸𑀲𑀸𑀡𑀸𑀦𑀁 𑀦𑀸𑀯𑀸𑀬 𑀆𑀭𑁄𑀧𑀺𑀢𑀁 𑀉𑀤𑀓𑁂 𑀉𑀧𑁆𑀧𑀺𑀮𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸, 𑀏𑀯𑀁 𑀓𑀼𑀲𑀮𑀸𑀦𑀺 𑀓𑀫𑁆𑀫𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑀼𑀤𑁆𑀥𑀕𑀼𑀡𑀲𑀢𑀺𑀧𑀝𑀺𑀮𑀸𑀪𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀤𑀼𑀓𑁆𑀔𑀧𑁆𑀧𑀳𑀸𑀦𑀯𑀸𑀬𑀫𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁 𑀢𑀼𑀫𑁆𑀳𑁂 𑀅𑀢𑀻𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀣𑀸’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀦𑀸𑀕𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀣𑀸’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀣𑀸’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀬𑀤𑀺 𑀢𑀼𑀫𑁆𑀳𑁂 𑀦 𑀅𑀢𑀻𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀣, 𑀦 𑀅𑀦𑀸𑀕𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀣, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀣, 𑀅𑀣 𑀓𑀺𑀫𑀢𑁆𑀣𑀸𑀬 𑀯𑀸𑀬𑀫𑀣𑀸’’𑀢𑀺. 𑀣𑁂𑀭𑁄 𑀆𑀳 ‘𑀓𑀺𑀦𑁆𑀢𑀺, 𑀫𑀳𑀸𑀭𑀸𑀚, 𑀇𑀤𑀜𑁆𑀘 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺 𑀏𑀢𑀤𑀢𑁆𑀣𑀸𑀬 𑀯𑀸𑀬𑀫𑀸𑀫𑀸’’𑀢𑀺.

‘‘𑀅𑀢𑁆𑀣𑀺 𑀧𑀦 𑀢𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀦𑀸𑀕𑀢𑀁 𑀤𑀼𑀓𑁆𑀔’’𑀦𑁆𑀢𑀺? ‘‘𑀦𑀢𑁆𑀣𑀺 [𑀓𑀣𑀸. 𑁮𑁨𑁮, 𑁮𑁨𑁯 𑀧𑀲𑁆𑀲𑀺𑀢𑀩𑁆𑀩𑀁], 𑀫𑀳𑀸𑀭𑀸𑀚𑀸’’𑀢𑀺 ‘‘𑀢𑀼𑀫𑁆𑀳𑁂 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀧𑀡𑁆𑀟𑀺𑀢𑀸, 𑀬𑁂 𑀢𑀼𑀫𑁆𑀳𑁂 𑀅𑀲𑀦𑁆𑀢𑀸𑀦𑀁 𑀅𑀦𑀸𑀕𑀢𑀸𑀦𑀁 𑀤𑀼𑀓𑁆𑀔𑀸𑀦𑀁 𑀧𑀳𑀸𑀦𑀸𑀬 𑀯𑀸𑀬𑀫𑀣𑀸’’𑀢𑀺? ‘‘𑀅𑀢𑁆𑀣𑀺 𑀧𑀦 𑀢𑁂, 𑀫𑀳𑀸𑀭𑀸𑀚, 𑀓𑁂𑀘𑀺 𑀧𑀝𑀺𑀭𑀸𑀚𑀸𑀦𑁄 𑀧𑀘𑁆𑀘𑀢𑁆𑀣𑀺𑀓𑀸 𑀧𑀘𑁆𑀘𑀸𑀫𑀺𑀢𑁆𑀢𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀤𑀸 𑀢𑀼𑀫𑁆𑀳𑁂 𑀧𑀭𑀺𑀔𑀁 𑀔𑀡𑀸𑀧𑁂𑀬𑁆𑀬𑀸𑀣, 𑀧𑀸𑀓𑀸𑀭𑀁 𑀘𑀺𑀦𑀸𑀧𑁂𑀬𑁆𑀬𑀸𑀣 𑀕𑁄𑀧𑀼𑀭𑀁 𑀓𑀸𑀭𑀸𑀧𑁂𑀬𑁆𑀬𑀸𑀣, 𑀅𑀝𑁆𑀝𑀸𑀮𑀓𑀁 𑀓𑀸𑀭𑀸𑀧𑁂𑀬𑁆𑀬𑀸𑀣, 𑀥𑀜𑁆𑀜𑀁 𑀅𑀢𑀺𑀳𑀭𑀸𑀧𑁂𑀬𑁆𑀬𑀸𑀣𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀧𑀝𑀺𑀓𑀘𑁆𑀘𑁂𑀯 𑀢𑀁 𑀧𑀝𑀺𑀬𑀢𑁆𑀢𑀁 𑀳𑁄𑀢𑀻’’𑀢𑀺. ‘‘𑀓𑀺𑀁 𑀢𑀼𑀫𑁆𑀳𑁂, 𑀫𑀳𑀸𑀭𑀸𑀚, 𑀢𑀤𑀸 𑀳𑀢𑁆𑀣𑀺𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀣, 𑀅𑀲𑁆𑀲𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀣, 𑀭𑀣𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀣, 𑀥𑀦𑀼𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀣, 𑀣𑀭𑀼𑀲𑁆𑀫𑀺𑀁 𑀲𑀺𑀓𑁆𑀔𑁂𑀬𑁆𑀬𑀸𑀣𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀧𑀝𑀺𑀓𑀘𑁆𑀘𑁂𑀯 𑀢𑀁 𑀲𑀺𑀓𑁆𑀔𑀺𑀢𑀁 𑀳𑁄𑀢𑀻’’𑀢𑀺. ‘‘𑀓𑀺𑀲𑁆𑀲𑀢𑁆𑀣𑀸𑀬𑀸’’𑀢𑀺? ‘‘𑀅𑀦𑀸𑀕𑀢𑀸𑀦𑀁, 𑀪𑀦𑁆𑀢𑁂, 𑀪𑀬𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀅𑀦𑀸𑀕𑀢𑀁 𑀪𑀬’’𑀦𑁆𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀢𑀼𑀫𑁆𑀳𑁂 𑀘 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀧𑀡𑁆𑀟𑀺𑀢𑀸, 𑀬𑁂 𑀢𑀼𑀫𑁆𑀳𑁂 𑀅𑀲𑀦𑁆𑀢𑀸𑀦𑀁 𑀅𑀦𑀸𑀕𑀢𑀸𑀦𑀁 𑀪𑀬𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬 𑀧𑀝𑀺𑀬𑀸𑀤𑁂𑀣𑀸’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁆𑀯𑀁 𑀧𑀺𑀧𑀸𑀲𑀺𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀢𑀤𑀸 𑀢𑁆𑀯𑀁 𑀉𑀤𑀧𑀸𑀦𑀁 𑀔𑀡𑀸𑀧𑁂𑀬𑁆𑀬𑀸𑀲𑀺, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀬𑁆𑀬𑀸𑀲𑀺, 𑀢𑀴𑀸𑀓𑀁 𑀔𑀡𑀸𑀧𑁂𑀬𑁆𑀬𑀸𑀲𑀺 ‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀧𑀝𑀺𑀓𑀘𑁆𑀘𑁂𑀯 𑀢𑀁 𑀧𑀝𑀺𑀬𑀢𑁆𑀢𑀁 𑀳𑁄𑀢𑀻’’𑀢𑀺. ‘‘𑀓𑀺𑀲𑁆𑀲𑀢𑁆𑀣𑀸𑀬𑀸’’𑀢𑀺? ‘‘𑀅𑀦𑀸𑀕𑀢𑀸𑀦𑀁, 𑀪𑀦𑁆𑀢𑁂, 𑀧𑀺𑀧𑀸𑀲𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀁 𑀳𑁄𑀢𑀻’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀅𑀦𑀸𑀕𑀢𑀸 𑀧𑀺𑀧𑀸𑀲𑀸’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀢𑀼𑀫𑁆𑀳𑁂 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀧𑀡𑁆𑀟𑀺𑀢𑀸, 𑀬𑁂 𑀢𑀼𑀫𑁆𑀳𑁂 𑀅𑀲𑀦𑁆𑀢𑀸𑀦𑀁 𑀅𑀦𑀸𑀕𑀢𑀸𑀦𑀁 𑀧𑀺𑀧𑀸𑀲𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬 𑀢𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁆𑀯𑀁 𑀩𑀼𑀪𑀼𑀓𑁆𑀔𑀺𑀢𑁄 𑀪𑀯𑁂𑀬𑁆𑀬𑀸𑀲𑀺, 𑀢𑀤𑀸 𑀢𑁆𑀯𑀁 𑀔𑁂𑀢𑁆𑀢𑀁 𑀓𑀲𑀸𑀧𑁂𑀬𑁆𑀬𑀸𑀲𑀺, 𑀲𑀸𑀮𑀺𑀁 𑀯𑀧𑀸𑀧𑁂𑀬𑁆𑀬𑀸𑀲𑀺 ‘𑀪𑀢𑁆𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀧𑀝𑀺𑀓𑀘𑁆𑀘𑁂𑀯 𑀢𑀁 𑀧𑀝𑀺𑀬𑀢𑁆𑀢𑀁 𑀳𑁄𑀢𑀻’’𑀢𑀺. ‘‘𑀓𑀺𑀲𑁆𑀲𑀢𑁆𑀣𑀸𑀬𑀸’’𑀢𑀺. ‘‘𑀅𑀦𑀸𑀕𑀢𑀸𑀦𑀁, 𑀪𑀦𑁆𑀢𑁂, 𑀩𑀼𑀪𑀼𑀓𑁆𑀔𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬𑀸’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀅𑀦𑀸𑀕𑀢𑀸 𑀩𑀼𑀪𑀼𑀓𑁆𑀔𑀸’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀢𑀼𑀫𑁆𑀳𑁂 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀧𑀡𑁆𑀟𑀺𑀢𑀸, 𑀬𑁂 𑀢𑀼𑀫𑁆𑀳𑁂 𑀅𑀲𑀦𑁆𑀢𑀸𑀦𑀁 𑀅𑀦𑀸𑀕𑀢𑀸𑀦𑀁 𑀩𑀼𑀪𑀼𑀓𑁆𑀔𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬 𑀧𑀝𑀺𑀬𑀸𑀤𑁂𑀣𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀤𑀼𑀓𑁆𑀔𑀧𑁆𑀧𑀳𑀸𑀦𑀯𑀸𑀬𑀫𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀩𑁆𑀭𑀳𑁆𑀫𑀮𑁄𑀓𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀻𑀯𑀤𑀽𑀭𑁄 𑀇𑀢𑁄 𑀩𑁆𑀭𑀳𑁆𑀫𑀮𑁄𑀓𑁄’’𑀢𑀺? ‘‘𑀤𑀽𑀭𑁄 𑀔𑁄, 𑀫𑀳𑀸𑀭𑀸𑀚, 𑀇𑀢𑁄 𑀩𑁆𑀭𑀳𑁆𑀫𑀮𑁄𑀓𑁄 𑀓𑀽𑀝𑀸𑀕𑀸𑀭𑀫𑀢𑁆𑀢𑀸 𑀲𑀺𑀮𑀸 𑀢𑀫𑁆𑀳𑀸 𑀧𑀢𑀺𑀢𑀸 𑀅𑀳𑁄𑀭𑀢𑁆𑀢𑁂𑀦 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀪𑀲𑁆𑀲𑀫𑀸𑀦𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑁂𑀬𑁆𑀬𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀏𑀯𑀁 𑀪𑀡𑀣 ‘𑀲𑁂𑀬𑁆𑀬𑀣𑀸𑀧𑀺 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀚𑀫𑁆𑀩𑀼𑀤𑀻𑀧𑁂 𑀅𑀦𑁆𑀢𑀭𑀳𑀺𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀪𑀯𑁂𑀬𑁆𑀬𑀸’𑀢𑀺 𑀏𑀢𑀁 𑀯𑀘𑀦𑀁 𑀦 𑀲𑀤𑁆𑀤𑀳𑀸𑀫𑀺, 𑀏𑀯𑀁 𑀅𑀢𑀺𑀲𑀻𑀖𑀁 𑀢𑀸𑀯 𑀩𑀳𑀽𑀦𑀺 𑀬𑁄𑀚𑀦𑀲𑀢𑀸𑀦𑀺 𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺.

𑀣𑁂𑀭𑁄 𑀆𑀳 ‘‘𑀓𑀼𑀳𑀺𑀁 𑀧𑀦, 𑀫𑀳𑀸𑀭𑀸𑀚, 𑀢𑀯 𑀚𑀸𑀢𑀪𑀽𑀫𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀮𑀲𑀦𑁆𑀤𑁄 𑀦𑀸𑀫 𑀤𑀻𑀧𑁄, 𑀢𑀢𑁆𑀣𑀸𑀳𑀁 𑀚𑀸𑀢𑁄’’𑀢𑀺. ‘‘𑀓𑀻𑀯 𑀤𑀽𑀭𑁄, 𑀫𑀳𑀸𑀭𑀸𑀚, 𑀇𑀢𑁄 𑀅𑀮𑀲𑀦𑁆𑀤𑁄 𑀳𑁄𑀢𑀻’’𑀢𑀺? ‘‘𑀤𑁆𑀯𑀺𑀫𑀢𑁆𑀢𑀸𑀦𑀺, 𑀪𑀦𑁆𑀢𑁂, 𑀬𑁄𑀚𑀦𑀲𑀢𑀸𑀦𑀻’’𑀢𑀺. ‘‘𑀅𑀪𑀺𑀚𑀸𑀦𑀸𑀲𑀺 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀢𑀢𑁆𑀣 𑀓𑀺𑀜𑁆𑀘𑀺𑀤𑁂𑀯 𑀓𑀭𑀡𑀻𑀬𑀁 𑀓𑀭𑀺𑀢𑁆𑀯𑀸 𑀲𑀭𑀺𑀢𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀭𑀸𑀫𑀻’’𑀢𑀺. ‘‘𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀕𑀢𑁄𑀲𑀺 𑀤𑁆𑀯𑀺𑀫𑀢𑁆𑀢𑀸𑀦𑀺 𑀬𑁄𑀚𑀦𑀲𑀢𑀸𑀦𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑁆𑀭𑀳𑁆𑀫𑀮𑁄𑀓𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀤𑁆𑀯𑀺𑀦𑁆𑀦𑀁 𑀮𑁄𑀓𑀼𑀧𑁆𑀧𑀦𑁆𑀦𑀸𑀦𑀁 𑀲𑀫𑀓𑀪𑀸𑀯𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀇𑀥 𑀓𑀸𑀮𑀗𑁆𑀓𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀬𑁄 𑀘 𑀇𑀥 𑀓𑀸𑀮𑀗𑁆𑀓𑀢𑁄 𑀓𑀲𑁆𑀫𑀻𑀭𑁂 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀓𑁄 𑀘𑀺𑀭𑀢𑀭𑀁 𑀓𑁄 𑀲𑀻𑀖𑀢𑀭’’𑀦𑁆𑀢𑀺? ‘‘𑀲𑀫𑀓𑀁, 𑀫𑀳𑀸𑀭𑀸𑀚𑀸’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀓𑀼𑀳𑀺𑀁 𑀧𑀦, 𑀫𑀳𑀸𑀭𑀸𑀚, 𑀢𑀯 𑀚𑀸𑀢𑀦𑀕𑀭’’𑀦𑁆𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀓𑀮𑀲𑀺𑀕𑀸𑀫𑁄 𑀦𑀸𑀫, 𑀢𑀢𑁆𑀣𑀸𑀳𑀁 𑀚𑀸𑀢𑁄’’𑀢𑀺. ‘‘𑀓𑀻𑀯 𑀤𑀽𑀭𑁄, 𑀫𑀳𑀸𑀭𑀸𑀚, 𑀇𑀢𑁄 𑀓𑀮𑀲𑀺𑀕𑀸𑀫𑁄 𑀳𑁄𑀢𑀻’’𑀢𑀺. ‘‘𑀤𑁆𑀯𑀺𑀫𑀢𑁆𑀢𑀸𑀦𑀺, 𑀪𑀦𑁆𑀢𑁂, 𑀬𑁄𑀚𑀦𑀲𑀢𑀸𑀦𑀻’’𑀢𑀺. ‘‘𑀓𑀻𑀯 𑀤𑀽𑀭𑀁, 𑀫𑀳𑀸𑀭𑀸𑀚, 𑀇𑀢𑁄 𑀓𑀲𑁆𑀫𑀻𑀭𑀁 𑀳𑁄𑀢𑀻’’𑀢𑀺? ‘‘𑀤𑁆𑀯𑀸𑀤𑀲, 𑀪𑀦𑁆𑀢𑁂, 𑀬𑁄𑀚𑀦𑀸𑀦𑀻’’𑀢𑀺. ‘‘𑀇𑀗𑁆𑀖, 𑀢𑁆𑀯𑀁 𑀫𑀳𑀸𑀭𑀸𑀚, 𑀓𑀮𑀲𑀺𑀕𑀸𑀫𑀁 𑀘𑀺𑀦𑁆𑀢𑁂𑀳𑀻’’𑀢𑀺. ‘‘𑀘𑀺𑀦𑁆𑀢𑀺𑀢𑁄, 𑀪𑀦𑁆𑀢𑁂’’𑀢𑀺. ‘‘𑀇𑀗𑁆𑀖, 𑀢𑁆𑀯𑀁 𑀫𑀳𑀸𑀭𑀸𑀚, 𑀓𑀲𑁆𑀫𑀻𑀭𑀁 𑀘𑀺𑀦𑁆𑀢𑁂𑀳𑀻’’𑀢𑀺. ‘‘𑀘𑀺𑀦𑁆𑀢𑀺𑀢𑀁 𑀪𑀦𑁆𑀢𑁂’’𑀢𑀺. ‘‘𑀓𑀢𑀫𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀘𑀺𑀭𑁂𑀦 𑀘𑀺𑀦𑁆𑀢𑀺𑀢𑀁, 𑀓𑀢𑀫𑀁 𑀲𑀻𑀖𑀢𑀭’’𑀦𑁆𑀢𑀺? ‘‘𑀲𑀫𑀓𑀁 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀇𑀥 𑀓𑀸𑀮𑀗𑁆𑀓𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀬𑁄 𑀘 𑀇𑀥 𑀓𑀸𑀮𑀗𑁆𑀓𑀢𑁄 𑀓𑀲𑁆𑀫𑀻𑀭𑁂 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀫𑀓𑀁 𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀼𑀡𑀸 𑀆𑀓𑀸𑀲𑁂𑀦 𑀕𑀘𑁆𑀙𑁂𑀬𑁆𑀬𑀼𑀁, 𑀢𑁂𑀲𑀼 𑀏𑀓𑁄 𑀉𑀘𑁆𑀘𑁂 𑀭𑀼𑀓𑁆𑀔𑁂 𑀦𑀺𑀲𑀻𑀤𑁂𑀬𑁆𑀬, 𑀏𑀓𑁄 𑀦𑀻𑀘𑁂 𑀭𑀼𑀓𑁆𑀔𑁂 𑀦𑀺𑀲𑀻𑀤𑁂𑀬𑁆𑀬, 𑀢𑁂𑀲𑀁 𑀲𑀫𑀓𑀁 𑀧𑀢𑀺𑀝𑁆𑀞𑀺𑀢𑀸𑀦𑀁 𑀓𑀢𑀫𑀲𑁆𑀲 𑀙𑀸𑀬𑀸 𑀧𑀞𑀫𑀢𑀭𑀁 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑁂𑀬𑁆𑀬, 𑀓𑀢𑀫𑀲𑁆𑀲 𑀙𑀸𑀬𑀸 𑀘𑀺𑀭𑁂𑀦 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑁂𑀬𑁆𑀬𑀸’’𑀢𑀺? ‘‘𑀲𑀫𑀓𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀇𑀥 𑀓𑀸𑀮𑀗𑁆𑀓𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀬𑁄 𑀘 𑀇𑀥 𑀓𑀸𑀮𑀗𑁆𑀓𑀢𑁄 𑀓𑀲𑁆𑀫𑀻𑀭𑁂 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀫𑀓𑀁 𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀤𑁆𑀯𑀺𑀦𑁆𑀦𑀁 𑀮𑁄𑀓𑀼𑀧𑁆𑀧𑀦𑁆𑀦𑀸𑀦𑀁 𑀲𑀫𑀓𑀪𑀸𑀯𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀩𑁄𑀚𑁆𑀛𑀗𑁆𑀕𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀚𑁆𑀛𑀗𑁆𑀕𑀸’’𑀢𑀺? ‘‘𑀲𑀢𑁆𑀢 𑀔𑁄, 𑀫𑀳𑀸𑀭𑀸𑀚, 𑀩𑁄𑀚𑁆𑀛𑀗𑁆𑀕𑀸’’𑀢𑀺. ‘‘𑀓𑀢𑀺𑀳𑀺 𑀧𑀦, 𑀪𑀦𑁆𑀢𑁂, 𑀩𑁄𑀚𑁆𑀛𑀗𑁆𑀕𑁂𑀳𑀺 𑀩𑀼𑀚𑁆𑀛𑀢𑀻’’𑀢𑀺? ‘‘𑀏𑀓𑁂𑀦 𑀔𑁄, 𑀫𑀳𑀸𑀭𑀸𑀚, 𑀩𑁄𑀚𑁆𑀛𑀗𑁆𑀕𑁂𑀦 𑀩𑀼𑀚𑁆𑀛𑀢𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀦𑀸’’𑀢𑀺. ‘‘𑀅𑀣 𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺 ‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’’𑀢𑀺? ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀅𑀲𑀺 𑀓𑁄𑀲𑀺𑀬𑀸 𑀧𑀓𑁆𑀔𑀺𑀢𑁆𑀢𑁄 𑀅𑀕𑁆𑀕𑀳𑀺𑀢𑁄 𑀳𑀢𑁆𑀣𑁂𑀦 𑀉𑀲𑁆𑀲𑀳𑀢𑀺 𑀙𑁂𑀚𑁆𑀚𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺. ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀦 𑀯𑀺𑀦𑀸 𑀙𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀦 𑀩𑀼𑀚𑁆𑀛𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑁄𑀚𑁆𑀛𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀧𑀸𑀧𑀧𑀼𑀜𑁆𑀜𑀸𑀦𑀁 𑀅𑀧𑁆𑀧𑀸𑀦𑀧𑁆𑀧𑀪𑀸𑀯𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀭𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸’’𑀢𑀺? ‘‘𑀧𑀼𑀜𑁆𑀜𑀁 𑀔𑁄, 𑀫𑀳𑀸𑀭𑀸𑀚, 𑀩𑀳𑀼𑀢𑀭𑀁, 𑀅𑀧𑀼𑀜𑁆𑀜𑀁 𑀣𑁄𑀓’’𑀦𑁆𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀅𑀧𑀼𑀜𑁆𑀜𑀁 𑀔𑁄, 𑀫𑀳𑀸𑀭𑀸𑀚, 𑀓𑀭𑁄𑀦𑁆𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺 ‘𑀧𑀸𑀧𑀓𑀫𑁆𑀫𑀁 𑀫𑀬𑀸 𑀓𑀢’𑀦𑁆𑀢𑀺, 𑀢𑁂𑀦 𑀧𑀸𑀧𑀁 𑀦 𑀯𑀟𑁆𑀠𑀢𑀺. 𑀧𑀼𑀜𑁆𑀜𑀁 𑀔𑁄, 𑀫𑀳𑀸𑀭𑀸𑀚, 𑀓𑀭𑁄𑀦𑁆𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺. 𑀧𑀼𑀭𑀺𑀲𑁄 𑀔𑁄, 𑀫𑀳𑀸𑀭𑀸𑀚, 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑁄 𑀪𑀕𑀯𑀢𑁄 𑀏𑀓𑀁 𑀉𑀧𑁆𑀧𑀮𑀳𑀢𑁆𑀣𑀁 𑀤𑀢𑁆𑀯𑀸 𑀏𑀓𑀦𑀯𑀼𑀢𑀺𑀓𑀧𑁆𑀧𑀸𑀦𑀺 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀺𑀲𑁆𑀲𑀢𑀺. 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀪𑀡𑀸𑀫𑀺 ‘𑀧𑀼𑀜𑁆𑀜𑀁 𑀩𑀳𑀼𑀢𑀭𑀁, 𑀅𑀧𑀼𑀜𑁆𑀜𑀁 𑀣𑁄𑀓’’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀸𑀧𑀧𑀼𑀜𑁆𑀜𑀸𑀦𑀁 𑀅𑀧𑁆𑀧𑀸𑀦𑀧𑁆𑀧𑀪𑀸𑀯𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀚𑀸𑀦𑀦𑁆𑀢𑀸𑀚𑀸𑀦𑀦𑁆𑀢𑀧𑀸𑀧𑀓𑀭𑀡𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀬𑁄 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀓𑀲𑁆𑀲 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜’’𑀦𑁆𑀢𑀺? 𑀣𑁂𑀭𑁄 𑀆𑀳 ‘‘𑀬𑁄 𑀔𑁄, 𑀫𑀳𑀸𑀭𑀸𑀚, 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀅𑀫𑁆𑀳𑀸𑀓𑀁 𑀭𑀸𑀚𑀧𑀼𑀢𑁆𑀢𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁 𑀫𑀬𑀁 𑀤𑀺𑀕𑀼𑀡𑀁 𑀤𑀡𑁆𑀟𑁂𑀫𑀸’’𑀢𑀺? ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀏𑀓𑁄 𑀚𑀸𑀦𑀦𑁆𑀢𑁄 𑀕𑀡𑁆𑀳𑁂𑀬𑁆𑀬, 𑀏𑀓𑁄 𑀅𑀚𑀸𑀦𑀦𑁆𑀢𑁄 𑀕𑀡𑁆𑀳𑁂𑀬𑁆𑀬, 𑀓𑀢𑀫𑁄 [𑀓𑀲𑁆𑀲 (𑀓.)] 𑀩𑀮𑀯𑀢𑀭𑀁 𑀟𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀬𑁄 𑀔𑁄, 𑀪𑀦𑁆𑀢𑁂, 𑀅𑀚𑀸𑀦𑀦𑁆𑀢𑁄 𑀕𑀡𑁆𑀳𑁂𑀬𑁆𑀬, 𑀲𑁄 [𑀢𑀲𑁆𑀲 (𑀧𑀻. 𑀓.)] 𑀩𑀮𑀯𑀢𑀭𑀁 𑀟𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀚𑀸𑀦𑀦𑁆𑀢𑀸𑀚𑀸𑀦𑀦𑁆𑀢𑀧𑀸𑀧𑀓𑀭𑀡𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀉𑀢𑁆𑀢𑀭𑀓𑀼𑀭𑀼𑀓𑀸𑀤𑀺𑀕𑀫𑀦𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁄𑀘𑀺, 𑀬𑁄 𑀇𑀫𑀺𑀦𑀸 𑀲𑀭𑀻𑀭𑁂𑀦 𑀉𑀢𑁆𑀢𑀭𑀓𑀼𑀭𑀼𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀩𑁆𑀭𑀳𑁆𑀫𑀮𑁄𑀓𑀁 𑀯𑀸, 𑀅𑀜𑁆𑀜𑀁 𑀯𑀸 𑀧𑀦 𑀤𑀻𑀧’’𑀦𑁆𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀬𑁄 𑀇𑀫𑀺𑀦𑀸 𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑁂𑀦 𑀓𑀸𑀬𑁂𑀦 𑀉𑀢𑁆𑀢𑀭𑀓𑀼𑀭𑀼𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀩𑁆𑀭𑀳𑁆𑀫𑀮𑁄𑀓𑀁 𑀯𑀸, 𑀅𑀜𑁆𑀜𑀁 𑀯𑀸 𑀧𑀦 𑀤𑀻𑀧’’𑀦𑁆𑀢𑀺.

‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀺𑀦𑀸 𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑁂𑀦 𑀓𑀸𑀬𑁂𑀦 𑀉𑀢𑁆𑀢𑀭𑀓𑀼𑀭𑀼𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀩𑁆𑀭𑀳𑁆𑀫𑀮𑁄𑀓𑀁 𑀯𑀸, 𑀅𑀜𑁆𑀜𑀁 𑀯𑀸 𑀧𑀦 𑀤𑀻𑀧’’𑀦𑁆𑀢𑀺? ‘‘𑀅𑀪𑀺𑀚𑀸𑀦𑀸𑀲𑀺 𑀦𑀼, 𑀢𑁆𑀯𑀁 𑀫𑀳𑀸𑀭𑀸𑀚, 𑀇𑀫𑀺𑀲𑁆𑀲𑀸 𑀧𑀣𑀯𑀺𑀬𑀸 𑀯𑀺𑀤𑀢𑁆𑀣𑀺𑀁 𑀯𑀸 𑀭𑀢𑀦𑀁 𑀯𑀸 𑀮𑀗𑁆𑀖𑀺𑀢𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫𑀺 ‘𑀅𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀝𑁆𑀞𑀧𑀺 𑀭𑀢𑀦𑀺𑀬𑁄 𑀮𑀗𑁆𑀖𑁂𑀫𑀻’’’𑀢𑀺. ‘‘𑀓𑀣𑀁, 𑀢𑁆𑀯𑀁 𑀫𑀳𑀸𑀭𑀸𑀚, 𑀅𑀝𑁆𑀞𑀧𑀺 𑀭𑀢𑀦𑀺𑀬𑁄 𑀮𑀗𑁆𑀖𑁂𑀲𑀻’’𑀢𑀺? ‘‘𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀫𑀺 ‘𑀏𑀢𑁆𑀣 𑀦𑀺𑀧𑀢𑀺𑀲𑁆𑀲𑀸𑀫𑀻’𑀢𑀺 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀓𑀸𑀬𑁄 𑀫𑁂 𑀮𑀳𑀼𑀓𑁄 𑀳𑁄𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀓𑀸𑀬𑀁 𑀘𑀺𑀢𑁆𑀢𑁂 𑀲𑀫𑀸𑀭𑁄𑀧𑁂𑀢𑁆𑀯𑀸 𑀘𑀺𑀢𑁆𑀢𑀯𑀲𑁂𑀦 𑀯𑁂𑀳𑀸𑀲𑀁 𑀕𑀘𑁆𑀙𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀉𑀢𑁆𑀢𑀭𑀓𑀼𑀭𑀼𑀓𑀸𑀤𑀺𑀕𑀫𑀦𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀤𑀻𑀖𑀝𑁆𑀞𑀺𑀧𑀜𑁆𑀳𑁄

𑁧𑁦. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀏𑀯𑀁 𑀪𑀡𑀣 ‘𑀅𑀝𑁆𑀞𑀺𑀓𑀸𑀦𑀺 𑀤𑀻𑀖𑀸𑀦𑀺 𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀻’𑀢𑀺, 𑀭𑀼𑀓𑁆𑀔𑁄𑀧𑀺 𑀢𑀸𑀯 𑀦𑀢𑁆𑀣𑀺 𑀬𑁄𑀚𑀦𑀲𑀢𑀺𑀓𑁄, 𑀓𑀼𑀢𑁄 𑀧𑀦 𑀅𑀝𑁆𑀞𑀺𑀓𑀸𑀦𑀺 𑀤𑀻𑀖𑀸𑀦𑀺 𑀬𑁄𑀚𑀦𑀲𑀢𑀺𑀓𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺?

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀲𑀼𑀢𑀁 𑀢𑁂 ‘𑀫𑀳𑀸𑀲𑀫𑀼𑀤𑁆𑀤𑁂 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀫𑀘𑁆𑀙𑀸 𑀅𑀢𑁆𑀣𑀻’’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀢’’𑀦𑁆𑀢𑀺. ‘‘𑀦𑀦𑀼 𑀫𑀳𑀸𑀭𑀸𑀚, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀲𑁆𑀲 𑀫𑀘𑁆𑀙𑀲𑁆𑀲 𑀅𑀝𑁆𑀞𑀺𑀓𑀸𑀦𑀺 𑀤𑀻𑀖𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺 𑀬𑁄𑀚𑀦𑀲𑀢𑀺𑀓𑀸𑀦𑀺𑀧𑀻’’𑀢𑀺?

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀤𑀻𑀖𑀝𑁆𑀞𑀺𑀧𑀜𑁆𑀳𑁄 𑀤𑀲𑀫𑁄.

𑁧𑁧. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀧𑀜𑁆𑀳𑁄

𑁧𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀏𑀯𑀁 𑀪𑀡𑀣 ‘𑀲𑀓𑁆𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑁄𑀥𑁂𑀢𑀼’’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑁄𑀥𑁂𑀢𑀼’’𑀦𑁆𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀓𑁆𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑁄𑀥𑁂𑀢𑀼’’𑀦𑁆𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀲𑀼𑀢𑀧𑀼𑀩𑁆𑀩𑁄 𑀢𑁂 𑀓𑁄𑀘𑀺 𑀓𑀸𑀓𑀘𑁆𑀙𑀫𑀸𑀦𑁄’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀲𑀼𑀢𑀧𑀼𑀩𑁆𑀩𑁄’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀲𑀤𑁆𑀤𑁄 𑀓𑀸𑀬𑁂 𑀦𑀫𑀺𑀢𑁂 𑀯𑀺𑀭𑀫𑁂𑀬𑁆𑀬𑀸’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀯𑀺𑀭𑀫𑁂𑀬𑁆𑀬𑀸’’𑀢𑀺. ‘‘𑀲𑁄 𑀳𑀺 𑀦𑀸𑀫, 𑀫𑀳𑀸𑀭𑀸𑀚, 𑀲𑀤𑁆𑀤𑁄 𑀅𑀪𑀸𑀯𑀺𑀢𑀓𑀸𑀬𑀲𑁆𑀲 𑀅𑀪𑀸𑀯𑀺𑀢𑀲𑀻𑀮𑀲𑁆𑀲 𑀅𑀪𑀸𑀯𑀺𑀢𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀺𑀢𑀧𑀜𑁆𑀜𑀲𑁆𑀲 𑀓𑀸𑀬𑁂 𑀦𑀫𑀺𑀢𑁂 𑀯𑀺𑀭𑀫𑀺𑀲𑁆𑀲𑀢𑀺, 𑀓𑀺𑀁 𑀧𑀦 𑀪𑀸𑀯𑀺𑀢𑀓𑀸𑀬𑀲𑁆𑀲 𑀪𑀸𑀯𑀺𑀢𑀲𑀻𑀮𑀲𑁆𑀲 𑀪𑀸𑀯𑀺𑀢𑀘𑀺𑀢𑁆𑀢𑀲𑁆𑀲 𑀪𑀸𑀯𑀺𑀢𑀧𑀜𑁆𑀜𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀧𑀜𑁆𑀳𑁄 𑀏𑀓𑀸𑀤𑀲𑀫𑁄.

𑁧𑁨. 𑀲𑀫𑀼𑀤𑁆𑀤𑀧𑀜𑁆𑀳𑁄

𑁧𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀫𑀼𑀤𑁆𑀤𑁄 𑀲𑀫𑀼𑀤𑁆𑀤𑁄’𑀢𑀺 𑀯𑀼𑀘𑁆𑀘𑀢𑀺, 𑀓𑁂𑀦 𑀓𑀸𑀭𑀡𑁂𑀦 𑀉𑀤𑀓𑀁 ‘𑀲𑀫𑀼𑀤𑁆𑀤𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀬𑀢𑁆𑀢𑀓𑀁, 𑀫𑀳𑀸𑀭𑀸𑀚, 𑀉𑀤𑀓𑀁, 𑀢𑀢𑁆𑀢𑀓𑀁 𑀮𑁄𑀡𑀁. 𑀬𑀢𑁆𑀢𑀓𑀁 𑀮𑁄𑀡𑀁, 𑀢𑀢𑁆𑀢𑀓𑀁 𑀉𑀤𑀓𑀁. 𑀢𑀲𑁆𑀫𑀸 ‘𑀲𑀫𑀼𑀤𑁆𑀤𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀫𑀼𑀤𑁆𑀤𑀧𑀜𑁆𑀳𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀲𑀫𑀼𑀤𑁆𑀤𑀏𑀓𑀭𑀲𑀧𑀜𑁆𑀳𑁄

𑁧𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄’’𑀢𑀺? ‘‘𑀘𑀺𑀭𑀲𑀡𑁆𑀞𑀺𑀢𑀢𑁆𑀢𑀸 𑀔𑁄, 𑀫𑀳𑀸𑀭𑀸𑀚, 𑀉𑀤𑀓𑀲𑁆𑀲 𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀫𑀼𑀤𑁆𑀤𑀏𑀓𑀭𑀲𑀧𑀜𑁆𑀳𑁄 𑀢𑁂𑀭𑀲𑀫𑁄.

𑁧𑁪. 𑀲𑀼𑀔𑀼𑀫𑀧𑀜𑁆𑀳𑁄

𑁧𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀓𑁆𑀓𑀸 𑀲𑀩𑁆𑀩𑀁 𑀲𑀼𑀔𑀼𑀫𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀲𑀩𑁆𑀩𑀁 𑀲𑀼𑀔𑀼𑀫𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀩𑁆𑀩𑀁 𑀲𑀼𑀔𑀼𑀫’’𑀦𑁆𑀢𑀺? ‘‘𑀥𑀫𑁆𑀫𑁄 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀼𑀔𑀼𑀫𑁄, 𑀦 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀸 𑀲𑀩𑁆𑀩𑁂 𑀲𑀼𑀔𑀼𑀫𑀸, ‘𑀲𑀼𑀔𑀼𑀫’𑀦𑁆𑀢𑀺 𑀯𑀸 ‘𑀣𑀽𑀮’𑀦𑁆𑀢𑀺 𑀯𑀸 𑀥𑀫𑁆𑀫𑀸𑀦𑀫𑁂𑀢𑀫𑀥𑀺𑀯𑀘𑀦𑀁. 𑀬𑀁 𑀓𑀺𑀜𑁆𑀘𑀺 𑀙𑀺𑀦𑁆𑀤𑀺𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀧𑀜𑁆𑀜𑀸𑀬 𑀙𑀺𑀦𑁆𑀤𑀢𑀺, 𑀦𑀢𑁆𑀣𑀺 𑀤𑀼𑀢𑀺𑀬𑀁 𑀧𑀜𑁆𑀜𑀸𑀬 𑀙𑁂𑀤𑀦’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀼𑀔𑀼𑀫𑀧𑀜𑁆𑀳𑁄 𑀘𑀼𑀤𑁆𑀤𑀲𑀫𑁄.

𑁧𑁫. 𑀯𑀺𑀜𑁆𑀜𑀸𑀡𑀦𑀸𑀦𑀢𑁆𑀣𑀧𑀜𑁆𑀳𑁄

𑁧𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀸 ‘𑀧𑀜𑁆𑀜𑀸’𑀢𑀺 𑀯𑀸 ‘𑀪𑀽𑀢𑀲𑁆𑀫𑀺𑀁 𑀚𑀻𑀯𑁄’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺? ‘‘𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀫𑀳𑀸𑀭𑀸𑀚, 𑀯𑀺𑀜𑁆𑀜𑀸𑀡𑀁, 𑀧𑀚𑀸𑀦𑀦𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀪𑀽𑀢𑀲𑁆𑀫𑀺𑀁 𑀚𑀻𑀯𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺. ‘‘𑀬𑀤𑀺 𑀚𑀻𑀯𑁄 𑀦𑀼𑀧𑀮𑀩𑁆𑀪𑀢𑀺, 𑀅𑀣 𑀓𑁄 𑀘𑀭𑀳𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀬𑀤𑀺 𑀚𑀻𑀯𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀲𑁄 𑀚𑀻𑀯𑁄 𑀘𑀓𑁆𑀔𑀼𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀸𑀝𑀺𑀢𑁂𑀲𑀼 𑀫𑀳𑀦𑁆𑀢𑁂𑀦 𑀆𑀓𑀸𑀲𑁂𑀦 𑀩𑀳𑀺𑀫𑀼𑀔𑁄 𑀲𑀼𑀝𑁆𑀞𑀼𑀢𑀭𑀁 𑀭𑀽𑀧𑀁 𑀧𑀲𑁆𑀲𑁂𑀬𑁆𑀬, 𑀲𑁄𑀢𑁂𑀲𑀼 𑀉𑀧𑁆𑀧𑀸𑀝𑀺𑀢𑁂𑀲𑀼, 𑀖𑀸𑀦𑁂 𑀉𑀧𑁆𑀧𑀸𑀝𑀺𑀢𑁂, 𑀚𑀺𑀯𑁆𑀳𑀸𑀬 𑀉𑀧𑁆𑀧𑀸𑀝𑀺𑀢𑀸𑀬, 𑀓𑀸𑀬𑁂 𑀉𑀧𑁆𑀧𑀸𑀝𑀺𑀢𑁂 𑀫𑀳𑀦𑁆𑀢𑁂𑀦 𑀆𑀓𑀸𑀲𑁂𑀦 𑀲𑀼𑀝𑁆𑀞𑀼𑀢𑀭𑀁 𑀲𑀤𑁆𑀤𑀁 𑀲𑀼𑀡𑁂𑀬𑁆𑀬, 𑀕𑀦𑁆𑀥𑀁 𑀖𑀸𑀬𑁂𑀬𑁆𑀬, 𑀭𑀲𑀁 𑀲𑀸𑀬𑁂𑀬𑁆𑀬, 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀪𑀽𑀢𑀲𑁆𑀫𑀺𑀁 𑀚𑀻𑀯𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑀺𑀜𑁆𑀜𑀸𑀡𑀦𑀸𑀦𑀢𑁆𑀣𑀧𑀜𑁆𑀳𑁄 𑀧𑀦𑁆𑀦𑀭𑀲𑀫𑁄.

𑁧𑁬. 𑀅𑀭𑀽𑀧𑀥𑀫𑁆𑀫𑀯𑀯𑀢𑁆𑀣𑀸𑀦𑀤𑀼𑀓𑁆𑀓𑀭𑀧𑀜𑁆𑀳𑁄

𑁧𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀼𑀓𑁆𑀓𑀭𑀁 𑀦𑀼 𑀔𑁄 𑀪𑀕𑀯𑀢𑀸 𑀓𑀢’’𑀦𑁆𑀢𑀺? 𑀣𑁂𑀭𑁄 𑀆𑀳 ‘‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢’’𑀦𑁆𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀤𑀼𑀓𑁆𑀓𑀭𑀁 𑀓𑀢’’𑀦𑁆𑀢𑀺. ‘‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀢𑀁 ‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀘𑀺𑀢𑁆𑀢’’’𑀦𑁆𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀢𑁆𑀣𑀧𑀼𑀝𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀸𑀬𑀺𑀢𑁆𑀯𑀸 𑀚𑀸𑀦𑁂𑀬𑁆𑀬 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀧𑀼𑀭𑀺𑀲𑁄 ‘‘𑀇𑀤𑀁 𑀕𑀗𑁆𑀕𑀸𑀬 𑀉𑀤𑀓𑀁, 𑀇𑀤𑀁 𑀬𑀫𑀼𑀦𑀸𑀬 𑀉𑀤𑀓𑀁, 𑀇𑀤𑀁 𑀅𑀘𑀺𑀭𑀯𑀢𑀺𑀬𑀸 𑀉𑀤𑀓𑀁, 𑀇𑀤𑀁 𑀲𑀭𑀪𑀼𑀬𑀸 𑀉𑀤𑀓𑀁, 𑀇𑀤𑀁 𑀫𑀳𑀺𑀬𑀸 𑀉𑀤𑀓’’’𑀦𑁆𑀢𑀺? ‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀚𑀸𑀦𑀺𑀢𑀼’’𑀦𑁆𑀢𑀺. ‘‘𑀇𑀢𑁄 𑀤𑀼𑀓𑁆𑀓𑀭𑀢𑀭𑀁 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀢𑀁 ‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀘𑀺𑀢𑁆𑀢’’’𑀦𑁆𑀢𑀺. ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀅𑀩𑁆𑀪𑀸𑀦𑀼𑀫𑁄𑀤𑀻𑀢𑀺.

𑀅𑀭𑀽𑀧𑀥𑀫𑁆𑀫𑀯𑀯𑀢𑁆𑀣𑀸𑀦𑀤𑀼𑀓𑁆𑀓𑀭𑀧𑀜𑁆𑀳𑁄 𑀲𑁄𑀴𑀲𑀫𑁄.

𑀅𑀭𑀽𑀧𑀥𑀫𑁆𑀫𑀯𑀯𑀢𑁆𑀣𑀸𑀦𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀲𑁄𑀴𑀲 𑀧𑀜𑁆𑀳𑀸.

𑀫𑀺𑀮𑀺𑀦𑁆𑀤𑀧𑀜𑁆𑀳𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀸

𑀣𑁂𑀭𑁄 𑀆𑀳 ‘‘𑀚𑀸𑀦𑀸𑀲𑀺 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀢𑀺 𑀓𑀸 𑀯𑁂𑀮𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀺 ‘𑀲𑀫𑁆𑀧𑀢𑀺 𑀧𑀞𑀫𑁄 𑀬𑀸𑀫𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀫𑀚𑁆𑀛𑀺𑀫𑁄 𑀬𑀸𑀫𑁄 𑀧𑀯𑀢𑁆𑀢𑀢𑀺, 𑀉𑀓𑁆𑀓𑀸 𑀧𑀤𑀻𑀧𑀻𑀬𑀦𑁆𑀢𑀺, 𑀘𑀢𑁆𑀢𑀸𑀭𑀺 𑀧𑀝𑀸𑀓𑀸𑀦𑀺 𑀆𑀡𑀢𑁆𑀢𑀸𑀦𑀺 𑀕𑀫𑀺𑀲𑁆𑀲𑀦𑁆𑀢𑀺 𑀪𑀡𑁆𑀟𑀢𑁄 𑀭𑀸𑀚𑀤𑁂𑀬𑁆𑀬𑀸𑀦𑀻’’’𑀢𑀺.

𑀬𑁄𑀦𑀓𑀸 𑀏𑀯𑀫𑀸𑀳𑀁𑀲𑀼 ‘‘𑀓𑀮𑁆𑀮𑁄𑀲𑀺, 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑁄 𑀣𑁂𑀭𑁄’’𑀢𑀺. ‘‘𑀆𑀫, 𑀪𑀡𑁂, 𑀧𑀡𑁆𑀟𑀺𑀢𑁄 𑀣𑁂𑀭𑁄, 𑀏𑀤𑀺𑀲𑁄 𑀆𑀘𑀭𑀺𑀬𑁄 𑀪𑀯𑁂𑀬𑁆𑀬 𑀫𑀸𑀤𑀺𑀲𑁄 𑀘 𑀅𑀦𑁆𑀢𑁂𑀯𑀸𑀲𑀻, 𑀦𑀘𑀺𑀭𑀲𑁆𑀲𑁂𑀯 𑀧𑀡𑁆𑀟𑀺𑀢𑁄 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬𑀸’’𑀢𑀺. 𑀢𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄 𑀭𑀸𑀚𑀸 𑀣𑁂𑀭𑀁 𑀦𑀸𑀕𑀲𑁂𑀦𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀓𑀫𑁆𑀩𑀮𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀚𑁆𑀚𑀢𑀕𑁆𑀕𑁂 𑀢𑁂 𑀅𑀝𑁆𑀞𑀲𑀢𑀁 𑀪𑀢𑁆𑀢𑀁 𑀧𑀜𑁆𑀜𑀧𑁂𑀫𑀺, 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑁂𑀧𑀼𑀭𑁂 𑀓𑀧𑁆𑀧𑀺𑀬𑀁, 𑀢𑁂𑀦 𑀘 𑀧𑀯𑀸𑀭𑁂𑀫𑀻’’𑀢𑀺 𑀆𑀳. 𑀅𑀮𑀁 𑀫𑀳𑀸𑀭𑀸𑀚 𑀚𑀻𑀯𑀸𑀫𑀻’’𑀢𑀺. ‘‘𑀚𑀸𑀦𑀸𑀫𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀻𑀯𑀲𑀺, 𑀅𑀧𑀺 𑀘 𑀅𑀢𑁆𑀢𑀸𑀦𑀜𑁆𑀘 𑀭𑀓𑁆𑀔, 𑀫𑀫𑀜𑁆𑀘 𑀭𑀓𑁆𑀔𑀸𑀳𑀻’’𑀢𑀺. ‘‘𑀓𑀣𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑀲𑀺, ‘𑀦𑀸𑀕𑀲𑁂𑀦𑁄 𑀫𑀺𑀮𑀺𑀦𑁆𑀤𑀁 𑀭𑀸𑀚𑀸𑀦𑀁 𑀧𑀲𑀸𑀤𑁂𑀢𑀺, 𑀦 𑀘 𑀓𑀺𑀜𑁆𑀘𑀺 𑀅𑀮𑀪𑀻’𑀢𑀺 𑀧𑀭𑀸𑀧𑀯𑀸𑀤𑁄 [𑀧𑀭𑀧𑁆𑀧𑀯𑀸𑀤𑁄 (𑀓.)] 𑀆𑀕𑀘𑁆𑀙𑁂𑀬𑁆𑀬𑀸𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔. 𑀓𑀣𑀁 𑀫𑀫𑀁 𑀭𑀓𑁆𑀔𑀲𑀺, ‘𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀦 𑀓𑀭𑁄𑀢𑀻’𑀢𑀺 𑀧𑀭𑀸𑀧𑀯𑀸𑀤𑁄 𑀆𑀕𑀘𑁆𑀙𑁂𑀬𑁆𑀬𑀸𑀢𑀺, 𑀏𑀯𑀁 𑀫𑀫𑀁 𑀭𑀓𑁆𑀔𑀸𑀳𑀻’’𑀢𑀺. ‘‘𑀢𑀣𑀸 𑀳𑁄𑀢𑀼, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀲𑀼𑀯𑀡𑁆𑀡𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑁄𑀧𑀺 𑀩𑀳𑀺𑀫𑀼𑀔𑁄 𑀬𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀔𑁄 𑀅𑀳𑀁, 𑀪𑀦𑁆𑀢𑁂, 𑀓𑀺𑀜𑁆𑀘𑀸𑀧𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀸𑀫𑀺 𑀩𑀳𑀺𑀫𑀼𑀔𑁄 𑀬𑁂𑀯 𑀧𑀦 𑀅𑀘𑁆𑀙𑀸𑀫𑀺. 𑀲𑀘𑁂 𑀅𑀳𑀁, 𑀪𑀦𑁆𑀢𑁂, 𑀅𑀕𑀸𑀭𑀲𑁆𑀫𑀸 𑀅𑀦𑀸𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬𑀁, 𑀦 𑀘𑀺𑀭𑀁 𑀚𑀻𑀯𑁂𑀬𑁆𑀬𑀁, 𑀩𑀳𑀽 𑀫𑁂 𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀗𑁆𑀖𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀘 𑀆𑀬𑀲𑁆𑀫𑀦𑁆𑀢𑁂 𑀦𑀸𑀕𑀲𑁂𑀦𑁂 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 ‘‘𑀓𑀺𑀁 𑀫𑀬𑀸 𑀧𑀼𑀘𑁆𑀙𑀺𑀢𑀁, 𑀓𑀺𑀁 𑀪𑀤𑀦𑁆𑀢𑁂𑀦 𑀦𑀸𑀕𑀲𑁂𑀦𑁂𑀦 𑀯𑀺𑀲𑀚𑁆𑀚𑀺𑀢’’𑀦𑁆𑀢𑀺? 𑀅𑀣 𑀔𑁄 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 ‘‘𑀲𑀩𑁆𑀩𑀁 𑀫𑀬𑀸 𑀲𑀼𑀧𑀼𑀘𑁆𑀙𑀺𑀢𑀁, 𑀲𑀩𑁆𑀩𑀁 𑀪𑀤𑀦𑁆𑀢𑁂𑀦 𑀦𑀸𑀕𑀲𑁂𑀦𑁂𑀦 𑀲𑀼𑀯𑀺𑀲𑀚𑁆𑀚𑀺𑀢’’𑀦𑁆𑀢𑀺. 𑀆𑀬𑀲𑁆𑀫𑀢𑁄𑀧𑀺 𑀦𑀸𑀕𑀲𑁂𑀦𑀲𑁆𑀲 𑀲𑀗𑁆𑀖𑀸𑀭𑀸𑀫𑀕𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀓𑀺𑀁 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑀁, 𑀓𑀺𑀁 𑀫𑀬𑀸 𑀯𑀺𑀲𑀚𑁆𑀚𑀺𑀢’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀦𑀸𑀕𑀲𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑀩𑁆𑀩𑀁 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀲𑀼𑀧𑀼𑀘𑁆𑀙𑀺𑀢𑀁, 𑀲𑀩𑁆𑀩𑀁 𑀫𑀬𑀸 𑀲𑀼𑀯𑀺𑀲𑀚𑁆𑀚𑀺𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 𑁋

‘‘𑀫𑀸 𑀔𑁄 𑀪𑀤𑀦𑁆𑀢𑀲𑁆𑀲 𑀏𑀯𑀁 𑀅𑀳𑁄𑀲𑀺 ‘𑀦𑀸𑀕𑀲𑁂𑀦𑁄 𑀫𑀬𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁄’𑀢𑀺 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀢𑀁 𑀭𑀢𑁆𑀢𑀸𑀯𑀲𑁂𑀲𑀁 𑀯𑀻𑀢𑀺𑀦𑀸𑀫𑁂𑀲𑀻𑀢𑀺 𑀦 𑀢𑁂 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀁 𑀭𑀢𑁆𑀢𑀸𑀯𑀲𑁂𑀲𑀁 𑀏𑀢𑀤𑀳𑁄𑀲𑀺 ‘𑀓𑀺𑀁 𑀫𑀬𑀸 𑀧𑀼𑀘𑁆𑀙𑀺𑀢𑀁, 𑀓𑀺𑀁 𑀪𑀤𑀦𑁆𑀢𑁂𑀦 𑀯𑀺𑀲𑀚𑁆𑀚𑀺𑀢’𑀦𑁆𑀢𑀺, ‘𑀲𑀩𑁆𑀩𑀁 𑀫𑀬𑀸 𑀲𑀼𑀧𑀼𑀘𑁆𑀙𑀺𑀢𑀁, 𑀲𑀩𑁆𑀩𑀁 𑀪𑀤𑀦𑁆𑀢𑁂𑀦 𑀲𑀼𑀯𑀺𑀲𑀚𑁆𑀚𑀺𑀢’’’𑀦𑁆𑀢𑀺.

𑀣𑁂𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀫𑀸 𑀔𑁄 𑀫𑀳𑀸𑀭𑀸𑀚𑀲𑁆𑀲 𑀏𑀯𑀁 𑀅𑀳𑁄𑀲𑀺 ‘𑀫𑀺𑀮𑀺𑀦𑁆𑀤𑀲𑁆𑀲 𑀭𑀜𑁆𑀜𑁄 𑀫𑀬𑀸 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄’𑀢𑀺 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀢𑀁 𑀭𑀢𑁆𑀢𑀸𑀯𑀲𑁂𑀲𑀁 𑀯𑀻𑀢𑀺𑀦𑀸𑀫𑁂𑀲𑀻𑀢𑀺 𑀦 𑀢𑁂 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀢𑀁 𑀭𑀢𑁆𑀢𑀸𑀯𑀲𑁂𑀲𑀁 𑀏𑀢𑀤𑀳𑁄𑀲𑀺 ‘𑀓𑀺𑀁 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑀁, 𑀓𑀺𑀁 𑀫𑀬𑀸 𑀯𑀺𑀲𑀚𑁆𑀚𑀺𑀢’𑀦𑁆𑀢𑀺, ‘𑀲𑀩𑁆𑀩𑀁 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀲𑀼𑀧𑀼𑀘𑁆𑀙𑀺𑀢𑀁, 𑀲𑀩𑁆𑀩𑀁 𑀫𑀬𑀸 𑀲𑀼𑀯𑀺𑀲𑀚𑁆𑀚𑀺𑀢’’’𑀦𑁆𑀢𑀺 𑀇𑀢𑀺𑀳 𑀢𑁂 𑀫𑀳𑀸𑀦𑀸𑀕𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀫𑀦𑀼𑀫𑁄𑀤𑀺𑀁𑀲𑀽𑀢𑀺.

𑀫𑀺𑀮𑀺𑀦𑁆𑀤𑀧𑀜𑁆𑀳𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀸 𑀦𑀺𑀝𑁆𑀞𑀺𑀢𑀸.

𑀫𑁂𑀡𑁆𑀟𑀓𑀧𑀜𑁆𑀳𑀸𑀭𑀫𑁆𑀪𑀓𑀣𑀸

𑀅𑀝𑁆𑀞𑀫𑀦𑁆𑀢𑀧𑀭𑀺𑀯𑀚𑁆𑀚𑀦𑀻𑀬𑀝𑁆𑀞𑀸𑀦𑀸𑀦𑀺

𑀪𑀲𑁆𑀲𑀧𑁆𑀧𑀯𑀸𑀤𑁄 [𑀪𑀲𑁆𑀲𑀧𑁆𑀧𑀯𑁂𑀤𑀻 (𑀲𑀻. 𑀧𑀻.)] 𑀯𑁂𑀢𑀡𑁆𑀟𑀻, 𑀅𑀢𑀺𑀩𑀼𑀤𑁆𑀥𑀺 𑀯𑀺𑀘𑀓𑁆𑀔𑀡𑁄;

𑀫𑀺𑀮𑀺𑀦𑁆𑀤𑁄 𑀜𑀸𑀡𑀪𑁂𑀤𑀸𑀬, 𑀦𑀸𑀕𑀲𑁂𑀦𑀫𑀼𑀧𑀸𑀕𑀫𑀺.

𑀯𑀲𑀦𑁆𑀢𑁄 𑀢𑀲𑁆𑀲 𑀙𑀸𑀬𑀸𑀬, 𑀧𑀭𑀺𑀧𑀼𑀘𑁆𑀙𑀁 𑀧𑀼𑀦𑀧𑁆𑀧𑀼𑀦𑀁;

𑀧𑀪𑀺𑀦𑁆𑀦𑀩𑀼𑀤𑁆𑀥𑀺 𑀳𑀼𑀢𑁆𑀯𑀸𑀦, 𑀲𑁄𑀧𑀺 𑀆𑀲𑀺 𑀢𑀺𑀧𑁂𑀝𑀓𑁄.

𑀦𑀯𑀗𑁆𑀕𑀁 𑀅𑀦𑀼𑀫𑀚𑁆𑀚𑀦𑁆𑀢𑁄, 𑀭𑀢𑁆𑀢𑀺𑀪𑀸𑀕𑁂 𑀭𑀳𑁄𑀕𑀢𑁄;

𑀅𑀤𑁆𑀤𑀓𑁆𑀔𑀺 𑀫𑁂𑀡𑁆𑀟𑀓𑁂 𑀧𑀜𑁆𑀳𑁂, 𑀤𑀼𑀦𑁆𑀦𑀺𑀯𑁂𑀞𑁂 𑀲𑀦𑀺𑀕𑁆𑀕𑀳𑁂.

‘‘𑀧𑀭𑀺𑀬𑀸𑀬𑀪𑀸𑀲𑀺𑀢𑀁 𑀅𑀢𑁆𑀣𑀺, 𑀅𑀢𑁆𑀣𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀁;

𑀲𑀪𑀸𑀯𑀪𑀸𑀲𑀺𑀢𑀁 𑀅𑀢𑁆𑀣𑀺, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀲𑀦𑁂.

‘‘𑀢𑁂𑀲𑀫𑀢𑁆𑀣𑀁 𑀅𑀯𑀺𑀜𑁆𑀜𑀸𑀬, 𑀫𑁂𑀡𑁆𑀟𑀓𑁂 𑀚𑀺𑀦𑀪𑀸𑀲𑀺𑀢𑁂;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀯𑀺𑀕𑁆𑀕𑀳𑁄 𑀢𑀢𑁆𑀣 𑀳𑁂𑀲𑁆𑀲𑀢𑀺.

‘‘𑀳𑀦𑁆𑀤 𑀓𑀣𑀺𑀁 𑀧𑀲𑀸𑀤𑁂𑀢𑁆𑀯𑀸, 𑀙𑁂𑀚𑁆𑀚𑀸𑀧𑁂𑀲𑁆𑀲𑀸𑀫𑀺 𑀫𑁂𑀡𑁆𑀟𑀓𑁂;

𑀢𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀫𑀕𑁆𑀕𑁂𑀦, 𑀦𑀺𑀤𑁆𑀤𑀺𑀲𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀉𑀤𑁆𑀥𑀲𑁆𑀢𑁂 [𑀉𑀝𑁆𑀞𑀺𑀢𑁂 (𑀲𑁆𑀬𑀸.), 𑀉𑀕𑁆𑀕𑀢𑁂 (𑀲𑀻. 𑀧𑀻.)] 𑀅𑀭𑀼𑀡𑁂 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀝𑁆𑀞 𑀯𑀢𑁆𑀢𑀧𑀤𑀸𑀦𑀺 𑀲𑀫𑀸𑀤𑀺𑀬𑀺 ‘‘𑀇𑀢𑁄 𑀫𑁂 𑀅𑀦𑀸𑀕𑀢𑀸𑀦𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀝𑁆𑀞 𑀕𑀼𑀡𑁂 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀧𑁄 𑀘𑀭𑀺𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀲𑁄𑀳𑀁 𑀘𑀺𑀡𑁆𑀡𑀢𑀧𑁄 𑀲𑀫𑀸𑀦𑁄 𑀆𑀘𑀭𑀺𑀬𑀁 𑀆𑀭𑀸𑀥𑁂𑀢𑁆𑀯𑀸 𑀫𑁂𑀡𑁆𑀟𑀓𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀧𑀓𑀢𑀺𑀤𑀼𑀲𑁆𑀲𑀬𑀼𑀕𑀁 𑀅𑀧𑀦𑁂𑀢𑁆𑀯𑀸 𑀆𑀪𑀭𑀡𑀸𑀦𑀺 𑀘 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑀼𑀡𑁆𑀟𑀓𑀧𑀝𑀺𑀲𑀻𑀲𑀓𑀁 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀫𑀼𑀦𑀺𑀪𑀸𑀯𑀫𑀼𑀧𑀕𑀦𑁆𑀢𑁆𑀯𑀸 𑀅𑀝𑁆𑀞 𑀕𑀼𑀡𑁂 𑀲𑀫𑀸𑀤𑀺𑀬𑀺 ‘‘𑀇𑀫𑀁 𑀲𑀢𑁆𑀢𑀸𑀳𑀁 𑀫𑀬𑀸 𑀦 𑀭𑀸𑀚𑀢𑁆𑀣𑁄 𑀅𑀦𑀼𑀲𑀸𑀲𑀺𑀢𑀩𑁆𑀩𑁄, 𑀦 𑀭𑀸𑀕𑀽𑀧𑀲𑀜𑁆𑀳𑀺𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀤𑁄𑀲𑀽𑀧𑀲𑀜𑁆𑀳𑀺𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀫𑁄𑀳𑀽𑀧𑀲𑀜𑁆𑀳𑀺𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀚𑀦𑁂𑀧𑀺 𑀦𑀺𑀯𑀸𑀢𑀯𑀼𑀢𑁆𑀢𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀁 𑀅𑀦𑀼𑀭𑀓𑁆𑀔𑀺𑀢𑀩𑁆𑀩𑀁, 𑀙𑀧𑀺 𑀆𑀬𑀢𑀦𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀅𑀦𑀼𑀭𑀓𑁆𑀔𑀺𑀢𑀩𑁆𑀩𑀸𑀦𑀺, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀸𑀦𑀲𑀁 𑀧𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺. 𑀇𑀫𑁂 𑀅𑀝𑁆𑀞 𑀕𑀼𑀡𑁂 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑁂𑀲𑁆𑀯𑁂𑀯 𑀅𑀝𑁆𑀞𑀲𑀼 𑀕𑀼𑀡𑁂𑀲𑀼 𑀫𑀸𑀦𑀲𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀩𑀳𑀺 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀕𑁂𑀯 𑀧𑀸𑀢𑀭𑀸𑀲𑀁 𑀓𑀢𑁆𑀯𑀸 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀫𑀺𑀢𑀪𑀸𑀡𑀻 𑀲𑀼𑀲𑀡𑁆𑀞𑀺𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀳𑀝𑁆𑀞𑁂𑀦 𑀉𑀤𑀕𑁆𑀕𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀣𑁂𑀭𑀁 𑀦𑀸𑀕𑀲𑁂𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀇𑀤𑀫𑀯𑁄𑀘 𑁋

‘‘𑀅𑀢𑁆𑀣𑀺 𑀫𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄𑀘𑀺 𑀅𑀢𑁆𑀣𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀢𑀩𑁆𑀩𑁄, 𑀦 𑀢𑀢𑁆𑀣 𑀅𑀜𑁆𑀜𑁄 𑀓𑁄𑀘𑀺 𑀢𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀲𑀼𑀜𑁆𑀜𑁂 𑀑𑀓𑀸𑀲𑁂 𑀧𑀯𑀺𑀯𑀺𑀢𑁆𑀢𑁂 𑀅𑀭𑀜𑁆𑀜𑁂 𑀅𑀝𑁆𑀞𑀗𑁆𑀕𑀼𑀧𑀸𑀕𑀢𑁂 𑀲𑀫𑀡𑀲𑀸𑀭𑀼𑀧𑁆𑀧𑁂. 𑀢𑀢𑁆𑀣 𑀲𑁄 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀫𑁂 𑀕𑀼𑀬𑁆𑀳𑀁 𑀦 𑀓𑀸𑀢𑀩𑁆𑀩𑀁 𑀦 𑀭𑀳𑀲𑁆𑀲𑀓𑀁, 𑀅𑀭𑀳𑀸𑀫𑀳𑀁 𑀭𑀳𑀲𑁆𑀲𑀓𑀁 𑀲𑀼𑀡𑀺𑀢𑀼𑀁 𑀲𑀼𑀫𑀦𑁆𑀢𑀦𑁂 𑀉𑀧𑀕𑀢𑁂, 𑀉𑀧𑀫𑀸𑀬𑀧𑀺 𑀲𑁄 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄, 𑀬𑀣𑀸 𑀓𑀺𑀁 𑀯𑀺𑀬, 𑀬𑀣𑀸 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀳𑀸𑀧𑀣𑀯𑀻 𑀦𑀺𑀓𑁆𑀔𑁂𑀧𑀁 𑀅𑀭𑀳𑀢𑀺 𑀦𑀺𑀓𑁆𑀔𑁂𑀧𑁂 𑀉𑀧𑀕𑀢𑁂. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀸𑀫𑀳𑀁 𑀭𑀳𑀲𑁆𑀲𑀓𑀁 𑀲𑀼𑀡𑀺𑀢𑀼𑀁 𑀲𑀼𑀫𑀦𑁆𑀢𑀦𑁂 𑀉𑀧𑀕𑀢𑁂’’𑀢𑀺. 𑀕𑀭𑀼𑀦𑀸 𑀲𑀳 𑀧𑀯𑀺𑀯𑀺𑀢𑁆𑀢𑀧𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀇𑀤𑀫𑀯𑁄𑀘 𑁋 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀥 𑀧𑀼𑀭𑀺𑀲𑁂𑀦 𑀫𑀦𑁆𑀢𑀬𑀺𑀢𑀼𑀓𑀸𑀫𑁂𑀦 𑀅𑀝𑁆𑀞 𑀞𑀸𑀦𑀸𑀦𑀺 𑀧𑀭𑀺𑀯𑀚𑁆𑀚𑀬𑀺𑀢𑀩𑁆𑀩𑀸𑀦𑀺 𑀪𑀯𑀦𑁆𑀢𑀺, 𑀦 𑀢𑁂𑀲𑀼 𑀞𑀸𑀦𑁂𑀲𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀢𑁆𑀣𑀁 𑀫𑀦𑁆𑀢𑁂𑀢𑀺, 𑀫𑀦𑁆𑀢𑀺𑀢𑁄𑀧𑀺 𑀅𑀢𑁆𑀣𑁄 𑀧𑀭𑀺𑀧𑀢𑀢𑀺 𑀦 𑀲𑀫𑁆𑀪𑀯𑀢𑀺. 𑀓𑀢𑀫𑀸𑀦𑀺 𑀅𑀝𑁆𑀞 𑀞𑀸𑀦𑀸𑀦𑀺? 𑀯𑀺𑀲𑀫𑀝𑁆𑀞𑀸𑀦𑀁 𑀧𑀭𑀺𑀯𑀚𑁆𑀚𑀦𑀻𑀬𑀁, 𑀲𑀪𑀬𑀁 𑀧𑀭𑀺𑀯𑀚𑁆𑀚𑀦𑀻𑀬𑀁, 𑀅𑀢𑀺𑀯𑀸𑀢𑀝𑁆𑀞𑀸𑀦𑀁 𑀧𑀭𑀺𑀯𑀚𑁆𑀚𑀦𑀻𑀬𑀁, 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀧𑀭𑀺𑀯𑀚𑁆𑀚𑀦𑀻𑀬𑀁, 𑀤𑁂𑀯𑀝𑁆𑀞𑀸𑀦𑀁 𑀧𑀭𑀺𑀯𑀚𑁆𑀚𑀦𑀻𑀬𑀁, 𑀧𑀦𑁆𑀣𑁄 𑀧𑀭𑀺𑀯𑀚𑁆𑀚𑀦𑀻𑀬𑁄, 𑀲𑀗𑁆𑀕𑀸𑀫𑁄 [𑀲𑀗𑁆𑀓𑀫𑁄 (𑀲𑀻. 𑀧𑀻.)] 𑀧𑀭𑀺𑀯𑀚𑁆𑀚𑀦𑀻𑀬𑁄, 𑀉𑀤𑀓𑀢𑀺𑀢𑁆𑀣𑀁 𑀧𑀭𑀺𑀯𑀚𑁆𑀚𑀦𑀻𑀬𑀁. 𑀇𑀫𑀸𑀦𑀺 𑀅𑀝𑁆𑀞 𑀞𑀸𑀦𑀸𑀦𑀺 𑀧𑀭𑀺𑀯𑀚𑁆𑀚𑀦𑀻𑀬𑀸𑀦𑀻’’𑀢𑀺.

𑀣𑁂𑀭𑁄 𑀆𑀳 ‘‘𑀓𑁄 𑀤𑁄𑀲𑁄 𑀯𑀺𑀲𑀫𑀝𑁆𑀞𑀸𑀦𑁂, 𑀲𑀪𑀬𑁂, 𑀅𑀢𑀺𑀯𑀸𑀢𑁂, 𑀧𑀝𑀺𑀘𑁆𑀙𑀦𑁆𑀦𑁂, 𑀤𑁂𑀯𑀝𑁆𑀞𑀸𑀦𑁂, 𑀧𑀦𑁆𑀣𑁂, 𑀲𑀗𑁆𑀕𑀸𑀫𑁂, 𑀉𑀤𑀓𑀢𑀺𑀢𑁆𑀣𑁂’’𑀢𑀺? ‘‘𑀯𑀺𑀲𑀫𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀦𑁆𑀢𑀺𑀢𑁄 𑀅𑀢𑁆𑀣𑁄 𑀯𑀺𑀓𑀺𑀭𑀢𑀺 𑀯𑀺𑀥𑀫𑀢𑀺 𑀧𑀕𑁆𑀖𑀭𑀢𑀺 𑀦 𑀲𑀫𑁆𑀪𑀯𑀢𑀺, 𑀲𑀪𑀬𑁂 𑀫𑀦𑁄 𑀲𑀦𑁆𑀢𑀲𑁆𑀲𑀢𑀺, 𑀲𑀦𑁆𑀢𑀲𑁆𑀲𑀺𑀢𑁄 𑀦 𑀲𑀫𑁆𑀫𑀸 𑀅𑀢𑁆𑀣𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀢𑀺𑀯𑀸𑀢𑁂 𑀲𑀤𑁆𑀤𑁄 𑀅𑀯𑀺𑀪𑀽𑀢𑁄 𑀳𑁄𑀢𑀺, 𑀧𑀝𑀺𑀘𑁆𑀙𑀦𑁆𑀦𑁂 𑀉𑀧𑀲𑁆𑀲𑀼𑀢𑀺𑀁 𑀢𑀺𑀝𑁆𑀞𑀦𑁆𑀢𑀺, 𑀤𑁂𑀯𑀝𑁆𑀞𑀸𑀦𑁂 𑀫𑀦𑁆𑀢𑀺𑀢𑁄 𑀅𑀢𑁆𑀣𑁄 𑀕𑀭𑀼𑀓𑀁 𑀧𑀭𑀺𑀡𑀫𑀢𑀺, 𑀧𑀦𑁆𑀣𑁂 𑀫𑀦𑁆𑀢𑀺𑀢𑁄 𑀅𑀢𑁆𑀣𑁄 𑀢𑀼𑀘𑁆𑀙𑁄 𑀪𑀯𑀢𑀺, 𑀲𑀗𑁆𑀕𑀸𑀫𑁂 𑀘𑀜𑁆𑀘𑀮𑁄 𑀪𑀯𑀢𑀺, 𑀉𑀤𑀓𑀢𑀺𑀢𑁆𑀣𑁂 𑀧𑀸𑀓𑀝𑁄 𑀪𑀯𑀢𑀺. 𑀪𑀯𑀢𑀻𑀳 𑁋

‘‘‘𑀯𑀺𑀲𑀫𑀁 𑀲𑀪𑀬𑀁 𑀅𑀢𑀺𑀯𑀸𑀢𑁄, 𑀧𑀝𑀺𑀘𑁆𑀙𑀦𑁆𑀦𑀁 𑀤𑁂𑀯𑀦𑀺𑀲𑁆𑀲𑀺𑀢𑀁;

𑀧𑀦𑁆𑀣𑁄 𑀘 𑀲𑀗𑁆𑀕𑀸𑀫𑁄 𑀢𑀺𑀢𑁆𑀣𑀁, 𑀅𑀝𑁆𑀞𑁂𑀢𑁂 𑀧𑀭𑀺𑀯𑀚𑁆𑀚𑀺𑀬𑀸’’’𑀢𑀺.

𑀅𑀝𑁆𑀞 𑀫𑀦𑁆𑀢𑀦𑀲𑁆𑀲 𑀧𑀭𑀺𑀯𑀚𑁆𑀚𑀦𑀻𑀬𑀝𑁆𑀞𑀸𑀦𑀸𑀦𑀺.

𑀅𑀝𑁆𑀞𑀫𑀦𑁆𑀢𑀯𑀺𑀦𑀸𑀲𑀓𑀧𑀼𑀕𑁆𑀕𑀮𑀸

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀝𑁆𑀞𑀺𑀫𑁂 𑀧𑀼𑀕𑁆𑀕𑀮𑀸 𑀫𑀦𑁆𑀢𑀺𑀬𑀫𑀸𑀦𑀸 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞? 𑀭𑀸𑀕𑀘𑀭𑀺𑀢𑁄 𑀤𑁄𑀲𑀘𑀭𑀺𑀢𑁄 𑀫𑁄𑀳𑀘𑀭𑀺𑀢𑁄 𑀫𑀸𑀦𑀘𑀭𑀺𑀢𑁄 𑀮𑀼𑀤𑁆𑀥𑁄 𑀅𑀮𑀲𑁄 𑀏𑀓𑀘𑀺𑀦𑁆𑀢𑀻 𑀩𑀸𑀮𑁄𑀢𑀺. 𑀇𑀫𑁂 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀦𑁆𑀢𑀻’’𑀢𑀺.

𑀣𑁂𑀭𑁄 𑀆𑀳 ‘‘𑀢𑁂𑀲𑀁 𑀓𑁄 𑀤𑁄𑀲𑁄’’𑀢𑀺? ‘‘𑀭𑀸𑀕𑀘𑀭𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀸𑀕𑀯𑀲𑁂𑀦 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀤𑁄𑀲𑀘𑀭𑀺𑀢𑁄 𑀤𑁄𑀲𑀯𑀲𑁂𑀦 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀫𑁄𑀳𑀘𑀭𑀺𑀢𑁄 𑀫𑁄𑀳𑀯𑀲𑁂𑀦 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀫𑀸𑀦𑀘𑀭𑀺𑀢𑁄 𑀫𑀸𑀦𑀯𑀲𑁂𑀦 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀮𑀼𑀤𑁆𑀥𑁄 𑀮𑁄𑀪𑀯𑀲𑁂𑀦 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀅𑀮𑀲𑁄 𑀅𑀮𑀲𑀢𑀸𑀬 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀏𑀓𑀘𑀺𑀦𑁆𑀢𑀻 𑀏𑀓𑀘𑀺𑀦𑁆𑀢𑀺𑀢𑀸𑀬 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺, 𑀩𑀸𑀮𑁄 𑀩𑀸𑀮𑀢𑀸𑀬 𑀫𑀦𑁆𑀢𑀺𑀢𑀁 𑀅𑀢𑁆𑀣𑀁 𑀩𑁆𑀬𑀸𑀧𑀸𑀤𑁂𑀢𑀺. 𑀪𑀯𑀢𑀻𑀳 𑁋

‘‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘, 𑀫𑀸𑀦𑀻 𑀮𑀼𑀤𑁆𑀥𑁄 𑀢𑀣𑀸𑀮𑀲𑁄;

𑀏𑀓𑀘𑀺𑀦𑁆𑀢𑀻 𑀘 𑀩𑀸𑀮𑁄 𑀘, 𑀏𑀢𑁂 𑀅𑀢𑁆𑀣𑀯𑀺𑀦𑀸𑀲𑀓𑀸’’’𑀢𑀺.

𑀅𑀝𑁆𑀞 𑀫𑀦𑁆𑀢𑀯𑀺𑀦𑀸𑀲𑀓𑀧𑀼𑀕𑁆𑀕𑀮𑀸.

𑀦𑀯𑀕𑀼𑀬𑁆𑀳𑀫𑀦𑁆𑀢𑀯𑀺𑀥𑀁𑀲𑀓𑀁

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀯𑀺𑀫𑁂 𑀧𑀼𑀕𑁆𑀕𑀮𑀸 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀦𑁆𑀢𑀺 𑀦 𑀥𑀸𑀭𑁂𑀦𑁆𑀢𑀺. 𑀓𑀢𑀫𑁂 𑀦𑀯? 𑀭𑀸𑀕𑀘𑀭𑀺𑀢𑁄 𑀤𑁄𑀲𑀘𑀭𑀺𑀢𑁄 𑀫𑁄𑀳𑀘𑀭𑀺𑀢𑁄 𑀪𑀻𑀭𑀼𑀓𑁄 𑀆𑀫𑀺𑀲𑀕𑀭𑀼𑀓𑁄 𑀇𑀢𑁆𑀣𑀻 𑀲𑁄𑀡𑁆𑀟𑁄 𑀧𑀡𑁆𑀟𑀓𑁄 𑀤𑀸𑀭𑀓𑁄’’𑀢𑀺.

𑀣𑁂𑀭𑁄 𑀆𑀳 ‘‘𑀢𑁂𑀲𑀁 𑀓𑁄 𑀤𑁄𑀲𑁄’’𑀢𑀺? ‘‘𑀭𑀸𑀕𑀘𑀭𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀸𑀕𑀯𑀲𑁂𑀦 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀤𑁄𑀲𑀘𑀭𑀺𑀢𑁄, 𑀪𑀦𑁆𑀢𑁂, 𑀤𑁄𑀲𑀯𑀲𑁂𑀦 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀪𑀻𑀭𑀼𑀓𑁄 𑀪𑀬𑀯𑀲𑁂𑀦 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀆𑀫𑀺𑀲𑀕𑀭𑀼𑀓𑁄 𑀆𑀫𑀺𑀲𑀳𑁂𑀢𑀼 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀇𑀢𑁆𑀣𑀻 𑀧𑀜𑁆𑀜𑀸𑀬 𑀇𑀢𑁆𑀢𑀭𑀢𑀸𑀬 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀲𑁄𑀡𑁆𑀟𑀺𑀓𑁄 𑀲𑀼𑀭𑀸𑀮𑁄𑀮𑀢𑀸𑀬 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀧𑀡𑁆𑀟𑀓𑁄 𑀅𑀦𑁂𑀓𑀁𑀲𑀺𑀓𑀢𑀸𑀬 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺, 𑀤𑀸𑀭𑀓𑁄 𑀘𑀧𑀮𑀢𑀸𑀬 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁 𑀯𑀺𑀯𑀭𑀢𑀺 𑀦 𑀥𑀸𑀭𑁂𑀢𑀺. 𑀪𑀯𑀢𑀻𑀳 𑁋

‘‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘, 𑀪𑀻𑀭𑀼 𑀆𑀫𑀺𑀲𑀕𑀭𑀼𑀓𑁄 [𑀆𑀫𑀺𑀲𑀘𑀓𑁆𑀔𑀼𑀓𑁄 (𑀲𑀻. 𑀧𑀻.)];

𑀇𑀢𑁆𑀣𑀻 𑀲𑁄𑀡𑁆𑀟𑁄 𑀧𑀡𑁆𑀟𑀓𑁄 𑀘, 𑀦𑀯𑀫𑁄 𑀪𑀯𑀢𑀺 𑀤𑀸𑀭𑀓𑁄.

‘‘𑀦𑀯𑁂𑀢𑁂 𑀧𑀼𑀕𑁆𑀕𑀮𑀸 𑀮𑁄𑀓𑁂, 𑀇𑀢𑁆𑀢𑀭𑀸 𑀘𑀮𑀺𑀢𑀸 𑀘𑀮𑀸;

𑀏𑀢𑁂𑀳𑀺 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁, 𑀔𑀺𑀧𑁆𑀧𑀁 𑀪𑀯𑀢𑀺 𑀧𑀸𑀓𑀝’’’𑀦𑁆𑀢𑀺.

𑀦𑀯 𑀕𑀼𑀬𑁆𑀳𑀫𑀦𑁆𑀢𑀯𑀺𑀥𑀁𑀲𑀓𑀸 𑀧𑀼𑀕𑁆𑀕𑀮𑀸.

𑀅𑀝𑁆𑀞 𑀧𑀜𑁆𑀜𑀸𑀧𑀝𑀺𑀮𑀸𑀪𑀓𑀸𑀭𑀡𑀁

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀯𑀬𑀧𑀭𑀺𑀡𑀸𑀫𑁂𑀦 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀬𑀲𑀧𑀭𑀺𑀡𑀸𑀫𑁂𑀦 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀧𑀭𑀺𑀧𑀼𑀘𑁆𑀙𑀸𑀬 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀢𑀺𑀢𑁆𑀣𑀲𑀁𑀯𑀸𑀲𑁂𑀦 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀲𑀸𑀓𑀘𑁆𑀙𑀸𑀬 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀲𑁆𑀦𑁂𑀳𑀽𑀧𑀲𑁂𑀯𑀦𑁂𑀦 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁂𑀦 𑀩𑀼𑀤𑁆𑀥𑀺 𑀧𑀭𑀺𑀡𑀫𑀢𑀺 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺. 𑀪𑀯𑀢𑀻𑀳 𑁋

‘‘‘𑀯𑀬𑁂𑀦 𑀬𑀲𑀧𑀼𑀘𑁆𑀙𑀸𑀳𑀺, 𑀢𑀺𑀢𑁆𑀣𑀯𑀸𑀲𑁂𑀦 𑀬𑁄𑀦𑀺𑀲𑁄;

𑀲𑀸𑀓𑀘𑁆𑀙𑀸 𑀲𑁆𑀦𑁂𑀳𑀲𑀁𑀲𑁂𑀯𑀸, 𑀧𑀢𑀺𑀭𑀽𑀧𑀯𑀲𑁂𑀦 𑀘.

‘‘𑀏𑀢𑀸𑀦𑀺 𑀅𑀝𑁆𑀞 𑀞𑀸𑀦𑀸𑀦𑀺, 𑀩𑀼𑀤𑁆𑀥𑀺𑀯𑀺𑀲𑀤𑀓𑀸𑀭𑀡𑀸;

𑀬𑁂𑀲𑀁 𑀏𑀢𑀸𑀦𑀺 𑀲𑀫𑁆𑀪𑁄𑀦𑁆𑀢𑀺, 𑀢𑁂𑀲𑀁 𑀩𑀼𑀤𑁆𑀥𑀺 𑀧𑀪𑀺𑀚𑁆𑀚𑀢𑀻’’’𑀢𑀺.

𑀅𑀝𑁆𑀞 𑀧𑀜𑁆𑀜𑀸𑀧𑀝𑀺𑀮𑀸𑀪𑀓𑀸𑀭𑀡𑀸𑀦𑀺.

𑀆𑀘𑀭𑀺𑀬𑀕𑀼𑀡𑀁

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀬𑀁 𑀪𑀽𑀫𑀺𑀪𑀸𑀕𑁄 𑀅𑀝𑁆𑀞 𑀫𑀦𑁆𑀢𑀤𑁄𑀲𑀯𑀺𑀯𑀚𑁆𑀚𑀺𑀢𑁄, 𑀅𑀳𑀜𑁆𑀘 𑀮𑁄𑀓𑁂 𑀧𑀭𑀫𑁄 𑀫𑀦𑁆𑀢𑀺𑀲𑀳𑀸𑀬𑁄 [𑀫𑀦𑁆𑀢𑀲𑀳𑀸𑀬𑁄 (𑀲𑀻.)], 𑀕𑀼𑀬𑁆𑀳𑀫𑀦𑀼𑀭𑀓𑁆𑀔𑀻 𑀘𑀸𑀳𑀁 𑀬𑀸𑀯𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀺 𑀢𑀸𑀯 𑀕𑀼𑀬𑁆𑀳𑀫𑀦𑀼𑀭𑀓𑁆𑀔𑀺𑀲𑁆𑀲𑀸𑀫𑀺, 𑀅𑀝𑁆𑀞𑀳𑀺 𑀘 𑀫𑁂 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀺 𑀧𑀭𑀺𑀡𑀸𑀫𑀁 𑀕𑀢𑀸, 𑀤𑀼𑀮𑁆𑀮𑀪𑁄 𑀏𑀢𑀭𑀳𑀺 𑀫𑀸𑀤𑀺𑀲𑁄 𑀅𑀦𑁆𑀢𑁂𑀯𑀸𑀲𑀻, 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀬𑁂 𑀆𑀘𑀭𑀺𑀬𑀸𑀦𑀁 𑀧𑀜𑁆𑀘𑀯𑀻𑀲𑀢𑀺 𑀆𑀘𑀭𑀺𑀬𑀕𑀼𑀡𑀸, 𑀢𑁂𑀳𑀺 𑀕𑀼𑀡𑁂𑀳𑀺 𑀆𑀘𑀭𑀺𑀬𑁂𑀦 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀓𑀢𑀫𑁂 𑀧𑀜𑁆𑀘𑀯𑀻𑀲𑀢𑀺 𑀕𑀼𑀡𑀸?

‘‘𑀇𑀥, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀫𑁆𑀳𑀺 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀓𑁆𑀔𑀸 𑀉𑀧𑀝𑁆𑀞𑀧𑁂𑀢𑀩𑁆𑀩𑀸, 𑀅𑀲𑁂𑀯𑀦𑀲𑁂𑀯𑀦𑀸 𑀚𑀸𑀦𑀺𑀢𑀩𑁆𑀩𑀸, 𑀧𑀫𑀢𑁆𑀢𑀸𑀧𑁆𑀧𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸, 𑀲𑁂𑀬𑁆𑀬𑀯𑀓𑀸𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀕𑁂𑀮𑀜𑁆𑀜𑀁 𑀚𑀸𑀦𑀺𑀢𑀩𑁆𑀩𑀁, 𑀪𑁄𑀚𑀦𑀲𑁆𑀲 [𑀪𑁄𑀚𑀦𑀻𑀬𑀁 (𑀲𑁆𑀬𑀸.)] 𑀮𑀤𑁆𑀥𑀸𑀮𑀤𑁆𑀥𑀁 𑀚𑀸𑀦𑀺𑀢𑀩𑁆𑀩𑀁, 𑀯𑀺𑀲𑁂𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀢𑁆𑀢𑀕𑀢𑀁 𑀲𑀁𑀯𑀺𑀪𑀚𑀺𑀢𑀩𑁆𑀩𑀁, 𑀅𑀲𑁆𑀲𑀸𑀲𑀺𑀢𑀩𑁆𑀩𑁄 ‘𑀫𑀸 𑀪𑀸𑀬𑀺, 𑀅𑀢𑁆𑀣𑁄 𑀢𑁂 𑀅𑀪𑀺𑀓𑁆𑀓𑀫𑀢𑀻’𑀢𑀺, ‘𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀧𑀝𑀺𑀘𑀭𑀢𑀻’𑀢𑀺 [𑀧𑀝𑀺𑀘𑀭𑀸𑀳𑀻𑀢𑀺 (𑀓.)] 𑀧𑀝𑀺𑀘𑀸𑀭𑁄 𑀚𑀸𑀦𑀺𑀢𑀩𑁆𑀩𑁄, 𑀕𑀸𑀫𑁂 𑀧𑀝𑀺𑀘𑀸𑀭𑁄 𑀚𑀸𑀦𑀺𑀢𑀩𑁆𑀩𑁄, 𑀯𑀺𑀳𑀸𑀭𑁂 𑀧𑀝𑀺𑀘𑀸𑀭𑁄 𑀚𑀸𑀦𑀺𑀢𑀩𑁆𑀩𑁄, 𑀦 𑀢𑁂𑀦 𑀳𑀸𑀲𑁄 𑀤𑀯𑁄 𑀓𑀸𑀢𑀩𑁆𑀩𑁄 [𑀦 𑀢𑁂𑀦 𑀲𑀳 𑀲𑀮𑁆𑀮𑀸𑀧𑁄 𑀓𑀸𑀢𑀩𑁆𑀩𑁄 (𑀲𑀻. 𑀧𑀻.)], 𑀢𑁂𑀦 𑀲𑀳 𑀆𑀮𑀸𑀧𑁄 𑀓𑀸𑀢𑀩𑁆𑀩𑁄, 𑀙𑀺𑀤𑁆𑀤𑀁 𑀤𑀺𑀲𑁆𑀯𑀸 𑀅𑀥𑀺𑀯𑀸𑀲𑁂𑀢𑀩𑁆𑀩𑀁, 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀅𑀔𑀡𑁆𑀟𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀅𑀭𑀳𑀲𑁆𑀲𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦𑀺𑀭𑀯𑀲𑁂𑀲𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁, ‘𑀚𑀦𑁂𑀫𑀺𑀫𑀁 [𑀚𑀸𑀦𑁂𑀫𑀺𑀫𑀁 (𑀲𑁆𑀬𑀸.)] 𑀲𑀺𑀧𑁆𑀧𑁂𑀲𑀽’𑀢𑀺 𑀚𑀦𑀓𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁, ‘𑀓𑀣𑀁 𑀅𑀬𑀁 𑀦 𑀧𑀭𑀺𑀳𑀸𑀬𑁂𑀬𑁆𑀬𑀸’𑀢𑀺 𑀯𑀟𑁆𑀠𑀺𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁, ‘𑀩𑀮𑀯𑀁 𑀇𑀫𑀁 𑀓𑀭𑁄𑀫𑀺 𑀲𑀺𑀓𑁆𑀔𑀸𑀩𑀮𑁂𑀦𑀸’𑀢𑀺 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁, 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁, 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀺𑀢𑀩𑁆𑀩𑀁, 𑀓𑀭𑀡𑀻𑀬𑁂 𑀦𑀧𑁆𑀧𑀫𑀚𑁆𑀚𑀺𑀢𑀩𑁆𑀩𑀁, 𑀔𑀮𑀺𑀢𑁂 𑀥𑀫𑁆𑀫𑁂𑀦 𑀧𑀕𑁆𑀕𑀳𑁂𑀢𑀩𑁆𑀩𑁄𑀢𑀺. 𑀇𑀫𑁂 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀯𑀻𑀲𑀢𑀺 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀕𑀼𑀡𑀸, 𑀢𑁂𑀳𑀺 𑀕𑀼𑀡𑁂𑀳𑀺 𑀫𑀬𑀺 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀲𑀁𑀲𑀬𑁄 𑀫𑁂, 𑀪𑀦𑁆𑀢𑁂, 𑀉𑀧𑁆𑀧𑀦𑁆𑀦𑁄, 𑀅𑀢𑁆𑀣𑀺 𑀫𑁂𑀡𑁆𑀟𑀓𑀧𑀜𑁆𑀳𑀸 𑀚𑀺𑀦𑀪𑀸𑀲𑀺𑀢𑀸, 𑀅𑀦𑀸𑀕𑀢𑁂 𑀅𑀤𑁆𑀥𑀸𑀦𑁂 𑀢𑀢𑁆𑀣 𑀯𑀺𑀕𑁆𑀕𑀳𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀘 𑀅𑀤𑁆𑀥𑀸𑀦𑁂 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀦𑁆𑀢𑀺 𑀢𑀼𑀫𑁆𑀳𑀸𑀤𑀺𑀲𑀸 𑀩𑀼𑀤𑁆𑀥𑀺𑀫𑀦𑁆𑀢𑁄, 𑀢𑁂𑀲𑀼 𑀫𑁂 𑀧𑀜𑁆𑀳𑁂𑀲𑀼 𑀘𑀓𑁆𑀔𑀼𑀁 𑀤𑁂𑀳𑀺 𑀧𑀭𑀯𑀸𑀤𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺.

𑀉𑀧𑀸𑀲𑀓𑀕𑀼𑀡𑀁

𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀲 𑀉𑀧𑀸𑀲𑀓𑀲𑁆𑀲 𑀉𑀧𑀸𑀲𑀓𑀕𑀼𑀡𑁂 𑀧𑀭𑀺𑀤𑀻𑀧𑁂𑀲𑀺. ‘‘𑀤𑀲 𑀇𑀫𑁂, 𑀫𑀳𑀸𑀭𑀸𑀚, 𑀉𑀧𑀸𑀲𑀓𑀲𑁆𑀲 𑀉𑀧𑀸𑀲𑀓𑀕𑀼𑀡𑀸. 𑀓𑀢𑀫𑁂 𑀤𑀲, 𑀇𑀥, 𑀫𑀳𑀸𑀭𑀸𑀚, 𑀉𑀧𑀸𑀲𑀓𑁄 𑀲𑀗𑁆𑀖𑁂𑀦 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀳𑁄𑀢𑀺, 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀬𑀣𑀸𑀩𑀮𑀁 𑀲𑀁𑀯𑀺𑀪𑀸𑀕𑀭𑀢𑁄 𑀳𑁄𑀢𑀺, 𑀚𑀺𑀦𑀲𑀸𑀲𑀦𑀧𑀭𑀺𑀳𑀸𑀦𑀺𑀁 𑀤𑀺𑀲𑁆𑀯𑀸 𑀅𑀪𑀺𑀯𑀟𑁆𑀠𑀺𑀬𑀸 𑀯𑀸𑀬𑀫𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀅𑀧𑀕𑀢𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑀜𑁆𑀘𑀲𑁆𑀲 𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀲𑀫𑀕𑁆𑀕𑀸𑀭𑀸𑀫𑁄 𑀳𑁄𑀢𑀺 𑀲𑀫𑀕𑁆𑀕𑀭𑀢𑁄, 𑀅𑀦𑀼𑀲𑀽𑀬𑀓𑁄 𑀳𑁄𑀢𑀺, 𑀦 𑀘 𑀓𑀼𑀳𑀦𑀯𑀲𑁂𑀦 𑀲𑀸𑀲𑀦𑁂 𑀘𑀭𑀢𑀺, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑀲 𑀉𑀧𑀸𑀲𑀓𑀲𑁆𑀲 𑀉𑀧𑀸𑀲𑀓𑀕𑀼𑀡𑀸, 𑀢𑁂 𑀲𑀩𑁆𑀩𑁂 𑀕𑀼𑀡𑀸 𑀢𑀬𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀢𑁂 𑀬𑀼𑀢𑁆𑀢𑀁 𑀧𑀢𑁆𑀢𑀁 𑀅𑀦𑀼𑀘𑁆𑀙𑀯𑀺𑀓𑀁 𑀧𑀢𑀺𑀭𑀽𑀧𑀁 𑀬𑀁 𑀢𑁆𑀯𑀁 𑀚𑀺𑀦𑀲𑀸𑀲𑀦𑀧𑀭𑀺𑀳𑀸𑀦𑀺𑀁 𑀤𑀺𑀲𑁆𑀯𑀸 𑀅𑀪𑀺𑀯𑀟𑁆𑀠𑀺𑀁 𑀇𑀘𑁆𑀙𑀲𑀺, 𑀓𑀭𑁄𑀫𑀺 𑀢𑁂 𑀑𑀓𑀸𑀲𑀁, 𑀧𑀼𑀘𑁆𑀙 𑀫𑀁 𑀢𑁆𑀯𑀁 𑀬𑀣𑀸𑀲𑀼𑀔’’𑀦𑁆𑀢𑀺.

𑀫𑁂𑀡𑁆𑀟𑀓𑀧𑀜𑁆𑀳𑀸𑀭𑀫𑁆𑀪𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑁂𑀡𑁆𑀟𑀓𑀧𑀜𑁆𑀳𑁄

𑁧. 𑀇𑀤𑁆𑀥𑀺𑀩𑀮𑀯𑀕𑁆𑀕𑁄

𑁧. 𑀓𑀢𑀸𑀥𑀺𑀓𑀸𑀭𑀲𑀨𑀮𑀧𑀜𑁆𑀳𑁄

𑁧. 𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀓𑀢𑀸𑀯𑀓𑀸𑀲𑁄 𑀦𑀺𑀧𑀘𑁆𑀘 𑀕𑀭𑀼𑀦𑁄 𑀧𑀸𑀤𑁂 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑁂 𑀢𑀺𑀢𑁆𑀣𑀺𑀬𑀸 𑀏𑀯𑀁 𑀪𑀡𑀦𑁆𑀢𑀺 [𑀯𑀜𑁆𑀘𑁄 𑀪𑀯𑀢𑀺 𑀅𑀨𑀮𑁄 (𑀲𑀻. 𑀧𑀻. 𑀓.)] ‘𑀬𑀤𑀺 𑀩𑀼𑀤𑁆𑀥𑁄 𑀧𑀽𑀚𑀁 𑀲𑀸𑀤𑀺𑀬𑀢𑀺, 𑀦 𑀧𑀭𑀺𑀦𑀺𑀩𑁆𑀩𑀼𑀢𑁄 𑀩𑀼𑀤𑁆𑀥𑁄 𑀲𑀁𑀬𑀼𑀢𑁆𑀢𑁄 𑀮𑁄𑀓𑁂𑀦 𑀅𑀦𑁆𑀢𑁄𑀪𑀯𑀺𑀓𑁄 𑀮𑁄𑀓𑀲𑁆𑀫𑀺𑀁 𑀮𑁄𑀓𑀲𑀸𑀥𑀸𑀭𑀡𑁄, 𑀢𑀲𑁆𑀫𑀸 𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄. 𑀬𑀤𑀺 𑀧𑀭𑀺𑀦𑀺𑀩𑁆𑀩𑀼𑀢𑁄 𑀯𑀺𑀲𑀁𑀬𑀼𑀢𑁆𑀢𑁄 𑀮𑁄𑀓𑁂𑀦 𑀦𑀺𑀲𑁆𑀲𑀝𑁄 𑀲𑀩𑁆𑀩𑀪𑀯𑁂𑀳𑀺, 𑀢𑀲𑁆𑀲 𑀧𑀽𑀚𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀬𑀢𑀺, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀯𑀜𑁆𑀛𑁄 𑀪𑀯𑀢𑀺 𑀅𑀨𑀮𑁄’𑀢𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀏𑀲𑁄 𑀧𑀜𑁆𑀳𑁄, 𑀦𑁂𑀲𑁄 𑀯𑀺𑀲𑀬𑁄 𑀅𑀧𑁆𑀧𑀢𑁆𑀢𑀫𑀸𑀦𑀲𑀸𑀦𑀁, 𑀫𑀳𑀦𑁆𑀢𑀸𑀦𑀁 𑀬𑁂𑀯𑁂𑀲𑁄 𑀯𑀺𑀲𑀬𑁄, 𑀪𑀺𑀦𑁆𑀤𑁂𑀢𑀁 𑀤𑀺𑀝𑁆𑀞𑀺𑀚𑀸𑀮𑀁 𑀏𑀓𑀁𑀲𑁂 𑀞𑀧𑀬, 𑀢𑀯𑁂𑀲𑁄 𑀧𑀜𑁆𑀳𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀦𑀸𑀕𑀢𑀸𑀦𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀘𑀓𑁆𑀔𑀼𑀁 𑀤𑁂𑀳𑀺 𑀧𑀭𑀯𑀸𑀤𑀦𑀺𑀕𑁆𑀕𑀳𑀸𑀬𑀸’’𑀢𑀺.

𑀣𑁂𑀭𑁄 𑀆𑀳 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀫𑀳𑀸𑀭𑀸𑀚, 𑀪𑀕𑀯𑀸, 𑀦 𑀘 𑀪𑀕𑀯𑀸 𑀧𑀽𑀚𑀁 𑀲𑀸𑀤𑀺𑀬𑀢𑀺, 𑀩𑁄𑀥𑀺𑀫𑀽𑀮𑁂 𑀬𑁂𑀯 𑀢𑀣𑀸𑀕𑀢𑀲𑁆𑀲 𑀲𑀸𑀤𑀺𑀬𑀦𑀸 𑀧𑀳𑀻𑀦𑀸, 𑀓𑀺𑀁 𑀧𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀧𑀽𑀚𑀺𑀬𑀦𑁆𑀢𑀸 [𑀧𑀽𑀚𑀺𑀢𑀸 (𑀲𑁆𑀬𑀸.)] 𑀅𑀲𑀫𑀲𑀫𑀸, 𑀲𑀤𑁂𑀯𑀫𑀸𑀦𑀼𑀲𑁂𑀳𑀺 𑀢𑁂;

𑀦 𑀲𑀸𑀤𑀺𑀬𑀦𑁆𑀢𑀺 𑀲𑀓𑁆𑀓𑀸𑀭𑀁, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸’’’𑀢𑀺.

𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀢𑁆𑀢𑁄 𑀯𑀸 𑀧𑀺𑀢𑀼𑀦𑁄 𑀯𑀡𑁆𑀡𑀁 𑀪𑀸𑀲𑀢𑀺, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀦 𑀘𑁂𑀢𑀁 𑀓𑀸𑀭𑀡𑀁 𑀧𑀭𑀯𑀸𑀤𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀧𑀲𑀸𑀤𑀧𑁆𑀧𑀓𑀸𑀲𑀦𑀁 𑀦𑀸𑀫𑁂𑀢𑀁, 𑀇𑀗𑁆𑀖 𑀫𑁂 𑀢𑁆𑀯𑀁 𑀢𑀢𑁆𑀣 𑀓𑀸𑀭𑀡𑀁 𑀲𑀫𑁆𑀫𑀸 𑀩𑁆𑀭𑀽𑀳𑀺 𑀲𑀓𑀯𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀸𑀬 𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀸𑀬𑀸’’𑀢𑀺.

𑀣𑁂𑀭𑁄 𑀆𑀳 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀫𑀳𑀸𑀭𑀸𑀚, 𑀪𑀕𑀯𑀸, 𑀦 𑀘 𑀪𑀕𑀯𑀸 𑀧𑀽𑀚𑀁 𑀲𑀸𑀤𑀺𑀬𑀢𑀺, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀤𑁂𑀯𑀫𑀦𑀼𑀲𑁆𑀲𑀸 𑀥𑀸𑀢𑀼𑀭𑀢𑀦𑀁 𑀯𑀢𑁆𑀣𑀼𑀁 𑀓𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀜𑀸𑀡𑀭𑀢𑀦𑀸𑀭𑀫𑁆𑀫𑀡𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀲𑁂𑀯𑀦𑁆𑀢𑀸 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀮𑀪𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀚𑁆𑀚𑀮𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀸𑀤𑀺𑀬𑀢𑀺 𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦’’𑀦𑁆𑀢𑀺? ‘‘𑀚𑀮𑀫𑀸𑀦𑁄𑀧𑀺 𑀲𑁄, 𑀪𑀦𑁆𑀢𑁂, 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑀁 𑀦 𑀲𑀸𑀤𑀺𑀬𑀢𑀺, 𑀓𑀺𑀁 𑀧𑀦 𑀦𑀺𑀩𑁆𑀩𑀼𑀢𑁄 𑀉𑀧𑀲𑀦𑁆𑀢𑁄 𑀅𑀘𑁂𑀢𑀦𑁄 𑀲𑀸𑀤𑀺𑀬𑀢𑀺? ‘‘𑀢𑀲𑁆𑀫𑀺𑀁 𑀧𑀦, 𑀫𑀳𑀸𑀭𑀸𑀚, 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀉𑀧𑀭𑀢𑁂 𑀉𑀧𑀲𑀦𑁆𑀢𑁂 𑀮𑁄𑀓𑁂 𑀅𑀕𑁆𑀕𑀺 𑀲𑀼𑀜𑁆𑀜𑁄 𑀳𑁄𑀢𑀻’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂, 𑀓𑀝𑁆𑀞𑀁 𑀅𑀕𑁆𑀕𑀺𑀲𑁆𑀲 𑀯𑀢𑁆𑀣𑀼 𑀳𑁄𑀢𑀺 𑀉𑀧𑀸𑀤𑀸𑀦𑀁, 𑀬𑁂 𑀓𑁂𑀘𑀺 𑀫𑀦𑀼𑀲𑁆𑀲𑀸 𑀅𑀕𑁆𑀕𑀺𑀓𑀸𑀫𑀸, 𑀢𑁂 𑀅𑀢𑁆𑀢𑀦𑁄 𑀣𑀸𑀫𑀩𑀮𑀯𑀻𑀭𑀺𑀬𑁂𑀦 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀓𑀝𑁆𑀞𑀁 𑀫𑀦𑁆𑀣𑀬𑀺𑀢𑁆𑀯𑀸 [𑀫𑀤𑁆𑀤𑀺𑀢𑁆𑀯𑀸 (𑀓.)] 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀦 𑀅𑀕𑁆𑀕𑀺𑀦𑀸 𑀅𑀕𑁆𑀕𑀺𑀓𑀭𑀡𑀻𑀬𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑀁 𑀫𑀺𑀘𑁆𑀙𑀸 𑀪𑀯𑀢𑀺 ‘𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀯𑀜𑁆𑀛𑁄 𑀪𑀯𑀢𑀺 𑀅𑀨𑀮𑁄’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀚𑁆𑀚𑀮𑀺, 𑀏𑀯𑀫𑁂𑀯 𑀪𑀕𑀯𑀸 𑀤𑀲𑀲𑀳𑀲𑁆𑀲𑀺𑀬𑀸 [𑀤𑀲𑀲𑀳𑀲𑁆𑀲𑀺𑀫𑁆𑀳𑀺 (𑀲𑀻. 𑀧𑀻. 𑀓.)] 𑀮𑁄𑀓𑀥𑀸𑀢𑀼𑀬𑀸 𑀩𑀼𑀤𑁆𑀥𑀲𑀺𑀭𑀺𑀬𑀸 𑀧𑀚𑁆𑀚𑀮𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀚𑁆𑀚𑀮𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑁄, 𑀏𑀯𑀫𑁂𑀯 𑀪𑀕𑀯𑀸 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀩𑀼𑀤𑁆𑀥𑀲𑀺𑀭𑀺𑀬𑀸 𑀧𑀚𑁆𑀚𑀮𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀬𑀣𑀸, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀼𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑀁 𑀦 𑀲𑀸𑀤𑀺𑀬𑀢𑀺, 𑀏𑀯𑀫𑁂𑀯 𑀔𑁄 𑀮𑁄𑀓𑀳𑀺𑀢𑀲𑁆𑀲 𑀲𑀸𑀤𑀺𑀬𑀦𑀸 𑀧𑀳𑀻𑀦𑀸 𑀉𑀧𑀲𑀦𑁆𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀦𑀺𑀩𑁆𑀩𑀼𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀅𑀦𑀼𑀧𑀸𑀤𑀸𑀦𑁂 𑀅𑀢𑁆𑀢𑀦𑁄 𑀣𑀸𑀫𑀩𑀮𑀯𑀻𑀭𑀺𑀬𑁂𑀦 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀓𑀝𑁆𑀞𑀁 𑀫𑀦𑁆𑀣𑀬𑀺𑀢𑁆𑀯𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀦 𑀅𑀕𑁆𑀕𑀺𑀦𑀸 𑀅𑀕𑁆𑀕𑀺𑀓𑀭𑀡𑀻𑀬𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯 𑀔𑁄 𑀤𑁂𑀯𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀥𑀸𑀢𑀼𑀭𑀢𑀦𑀁 𑀯𑀢𑁆𑀣𑀼𑀁 𑀓𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀜𑀸𑀡𑀭𑀢𑀦𑀸𑀭𑀫𑁆𑀫𑀡𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀲𑁂𑀯𑀦𑁆𑀢𑀸 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀮𑀪𑀦𑁆𑀢𑀺, 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀯𑀸𑀢𑁄 𑀯𑀸𑀬𑀺𑀢𑁆𑀯𑀸 𑀉𑀧𑀭𑀫𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀉𑀧𑀭𑀢𑁄 𑀯𑀸𑀢𑁄 𑀲𑀸𑀤𑀺𑀬𑀢𑀺 𑀧𑀼𑀦 𑀦𑀺𑀩𑁆𑀩𑀢𑁆𑀢𑀸𑀧𑀦’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀉𑀧𑀭𑀢𑀲𑁆𑀲 𑀯𑀸𑀢𑀲𑁆𑀲 𑀆𑀪𑁄𑀕𑁄 𑀯𑀸 𑀫𑀦𑀲𑀺𑀓𑀸𑀭𑁄 𑀯𑀸 𑀧𑀼𑀦 𑀦𑀺𑀩𑁆𑀩𑀢𑁆𑀢𑀸𑀧𑀦𑀸𑀬’’. ‘‘𑀓𑀺𑀁 𑀓𑀸𑀭𑀡𑀁’’? ‘‘𑀅𑀘𑁂𑀢𑀦𑀸 𑀲𑀸 𑀯𑀸𑀬𑁄𑀥𑀸𑀢𑀽’’𑀢𑀺. ‘‘𑀅𑀧𑀺 𑀦𑀼 𑀢𑀲𑁆𑀲, 𑀫𑀳𑀸𑀭𑀸𑀚, 𑀉𑀧𑀭𑀢𑀲𑁆𑀲 𑀯𑀸𑀢𑀲𑁆𑀲 𑀯𑀸𑀢𑁄𑀢𑀺 𑀲𑀫𑀜𑁆𑀜𑀸 𑀅𑀧𑀕𑀘𑁆𑀙𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀢𑀸𑀮𑀯𑀡𑁆𑀝𑀯𑀺𑀥𑀽𑀧𑀦𑀸𑀦𑀺 𑀯𑀸𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀸, 𑀬𑁂 𑀓𑁂𑀘𑀺 𑀫𑀦𑀼𑀲𑁆𑀲𑀸 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀧𑀭𑀺𑀴𑀸𑀳𑀧𑀭𑀺𑀧𑀻𑀴𑀺𑀢𑀸, 𑀢𑁂 𑀢𑀸𑀮𑀯𑀡𑁆𑀝𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀅𑀢𑁆𑀢𑀦𑁄 𑀣𑀸𑀫𑀩𑀮𑀯𑀻𑀭𑀺𑀬𑁂𑀦 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀦 𑀯𑀸𑀢𑁂𑀦 𑀉𑀡𑁆𑀳𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑀺 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑀁 𑀫𑀺𑀘𑁆𑀙𑀸 𑀪𑀯𑀢𑀺 ‘𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀯𑀜𑁆𑀛𑁄 𑀪𑀯𑀢𑀺 𑀅𑀨𑀮𑁄’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀯𑀸𑀢𑁄 𑀯𑀸𑀬𑀺, 𑀏𑀯𑀫𑁂𑀯 𑀪𑀕𑀯𑀸 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀲𑀻𑀢𑀮𑀫𑀥𑀼𑀭𑀲𑀦𑁆𑀢𑀲𑀼𑀔𑀼𑀫𑀫𑁂𑀢𑁆𑀢𑀸𑀯𑀸𑀢𑁂𑀦 𑀉𑀧𑀯𑀸𑀬𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀯𑀸𑀢𑁄 𑀯𑀸𑀬𑀺𑀢𑁆𑀯𑀸 𑀉𑀧𑀭𑀢𑁄, 𑀏𑀯𑀫𑁂𑀯 𑀪𑀕𑀯𑀸 𑀲𑀻𑀢𑀮𑀫𑀥𑀼𑀭𑀲𑀦𑁆𑀢𑀲𑀼𑀔𑀼𑀫𑀫𑁂𑀢𑁆𑀢𑀸𑀯𑀸𑀢𑁂𑀦 𑀉𑀧𑀯𑀸𑀬𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀬𑀣𑀸, 𑀫𑀳𑀸𑀭𑀸𑀚, 𑀉𑀧𑀭𑀢𑁄 𑀯𑀸𑀢𑁄 𑀧𑀼𑀦 𑀦𑀺𑀩𑁆𑀩𑀢𑁆𑀢𑀸𑀧𑀦𑀁 𑀦 𑀲𑀸𑀤𑀺𑀬𑀢𑀺, 𑀏𑀯𑀫𑁂𑀯 𑀮𑁄𑀓𑀳𑀺𑀢𑀲𑁆𑀲 𑀲𑀸𑀤𑀺𑀬𑀦𑀸 𑀧𑀳𑀻𑀦𑀸 𑀉𑀧𑀲𑀦𑁆𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀢𑁂 𑀫𑀦𑀼𑀲𑁆𑀲𑀸 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀧𑀭𑀺𑀴𑀸𑀳𑀧𑀭𑀺𑀧𑀻𑀴𑀺𑀢𑀸, 𑀏𑀯𑀫𑁂𑀯 𑀤𑁂𑀯𑀫𑀦𑀼𑀲𑁆𑀲𑀸 𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀧𑀭𑀺𑀧𑀻𑀴𑀺𑀢𑀸. 𑀬𑀣𑀸 𑀢𑀸𑀮𑀯𑀡𑁆𑀝𑀯𑀺𑀥𑀽𑀧𑀦𑀸𑀦𑀺 𑀯𑀸𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀢𑀣𑀸𑀕𑀢𑀲𑁆𑀲 𑀥𑀸𑀢𑀼 𑀘 𑀜𑀸𑀡𑀭𑀢𑀦𑀜𑁆𑀘 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀺𑀲𑁆𑀲𑀦𑁆𑀦𑀁 𑀲𑀫𑁆𑀧𑀢𑁆𑀢𑀻𑀦𑀁 𑀧𑀝𑀺𑀮𑀸𑀪𑀸𑀬. 𑀬𑀣𑀸 𑀫𑀦𑀼𑀲𑁆𑀲𑀸 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀧𑀭𑀺𑀴𑀸𑀳𑀧𑀭𑀺𑀧𑀻𑀴𑀺𑀢𑀸 𑀢𑀸𑀮𑀯𑀡𑁆𑀝𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀯𑀸𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀡𑁆𑀳𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑀺 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀦𑁆𑀢𑀺, 𑀏𑀯𑀫𑁂𑀯 𑀤𑁂𑀯𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀥𑀸𑀢𑀼𑀜𑁆𑀘 𑀜𑀸𑀡𑀭𑀢𑀦𑀜𑁆𑀘 𑀧𑀽𑀚𑁂𑀢𑁆𑀯𑀸 𑀓𑀼𑀲𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀦 𑀓𑀼𑀲𑀮𑁂𑀦 𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀺. 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀧𑀭𑀯𑀸𑀤𑀸𑀦𑀁 𑀦𑀺𑀕𑁆𑀕𑀳𑀸𑀬. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀪𑁂𑀭𑀺𑀁 𑀆𑀓𑁄𑀝𑁂𑀢𑁆𑀯𑀸 𑀲𑀤𑁆𑀤𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀬𑁄 𑀲𑁄 𑀪𑁂𑀭𑀺𑀲𑀤𑁆𑀤𑁄 𑀧𑀼𑀭𑀺𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄, 𑀲𑁄 𑀲𑀤𑁆𑀤𑁄 𑀅𑀦𑁆𑀢𑀭𑀥𑀸𑀬𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑀤𑁆𑀤𑁄 𑀲𑀸𑀤𑀺𑀬𑀢𑀺 𑀧𑀼𑀦 𑀦𑀺𑀩𑁆𑀩𑀢𑁆𑀢𑀸𑀧𑀦’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀦𑁆𑀢𑀭𑀳𑀺𑀢𑁄 𑀲𑁄 𑀲𑀤𑁆𑀤𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦 𑀉𑀧𑁆𑀧𑀸𑀤𑀸𑀬 𑀆𑀪𑁄𑀕𑁄 𑀯𑀸 𑀫𑀦𑀲𑀺𑀓𑀸𑀭𑁄 𑀯𑀸, 𑀲𑀓𑀺𑀁 𑀦𑀺𑀩𑁆𑀩𑀢𑁆𑀢𑁂 𑀪𑁂𑀭𑀺𑀲𑀤𑁆𑀤𑁂 𑀅𑀦𑁆𑀢𑀭𑀳𑀺𑀢𑁂 𑀲𑁄 𑀪𑁂𑀭𑀺𑀲𑀤𑁆𑀤𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀪𑁂𑀭𑀻 𑀧𑀦, 𑀪𑀦𑁆𑀢𑁂, 𑀧𑀘𑁆𑀘𑀬𑁄 𑀳𑁄𑀢𑀺 𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸, 𑀅𑀣 𑀧𑀼𑀭𑀺𑀲𑁄 𑀧𑀘𑁆𑀘𑀬𑁂 𑀲𑀢𑀺 𑀅𑀢𑁆𑀢𑀚𑁂𑀦 𑀯𑀸𑀬𑀸𑀫𑁂𑀦 𑀪𑁂𑀭𑀺𑀁 𑀅𑀓𑁄𑀝𑁂𑀢𑁆𑀯𑀸 𑀲𑀤𑁆𑀤𑀁 𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀧𑀭𑀺𑀪𑀸𑀯𑀺𑀢𑀁 𑀥𑀸𑀢𑀼𑀭𑀢𑀦𑀜𑁆𑀘 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀅𑀦𑀼𑀲𑀺𑀝𑁆𑀞𑀜𑁆𑀘 [𑀅𑀦𑀼𑀲𑀢𑁆𑀣𑀺𑀜𑁆𑀘 (𑀲𑀻. 𑀧𑀻.)] 𑀲𑀢𑁆𑀣𑀸𑀭𑀁 𑀞𑀧𑀬𑀺𑀢𑁆𑀯𑀸 𑀲𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀘 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀫𑁆𑀧𑀢𑁆𑀢𑀺𑀮𑀸𑀪𑁄 𑀉𑀧𑀘𑁆𑀙𑀺𑀦𑁆𑀦𑁄 𑀳𑁄𑀢𑀺, 𑀪𑀯𑀤𑀼𑀓𑁆𑀔𑀧𑀝𑀺𑀧𑀻𑀴𑀺𑀢𑀸 𑀲𑀢𑁆𑀢𑀸 𑀥𑀸𑀢𑀼𑀭𑀢𑀦𑀜𑁆𑀘 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀅𑀦𑀼𑀲𑀺𑀝𑁆𑀞𑀜𑁆𑀘 𑀧𑀘𑁆𑀘𑀬𑀁 𑀓𑀭𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀓𑀸𑀫𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀮𑀪𑀦𑁆𑀢𑀺, 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺.

‘‘𑀤𑀺𑀝𑁆𑀞𑀜𑁆𑀘𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀅𑀦𑀸𑀕𑀢𑀫𑀤𑁆𑀥𑀸𑀦𑀁. 𑀓𑀣𑀺𑀢𑀜𑁆𑀘 𑀪𑀡𑀺𑀢𑀜𑁆𑀘 𑀆𑀘𑀺𑀓𑁆𑀔𑀺𑀢𑀜𑁆𑀘 ‘𑀲𑀺𑀬𑀸 𑀔𑁄 𑀧𑀦𑀸𑀦𑀦𑁆𑀤, 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁 𑀦𑀢𑁆𑀣𑀺 𑀦𑁄 𑀲𑀢𑁆𑀣𑀸𑀢𑀺, 𑀦 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀯𑀜𑁆𑀛𑁄 𑀪𑀯𑀢𑀺 𑀅𑀨𑀮𑁄𑀢𑀺, 𑀢𑀁 𑀢𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑀁 𑀫𑀺𑀘𑁆𑀙𑀸 𑀅𑀪𑀽𑀢𑀁 𑀯𑀺𑀢𑀣𑀁 𑀅𑀮𑀺𑀓𑀁 𑀯𑀺𑀭𑀼𑀤𑁆𑀥𑀁 𑀯𑀺𑀧𑀭𑀻𑀢𑀁 𑀤𑀼𑀓𑁆𑀔𑀤𑀸𑀬𑀓𑀁 𑀤𑀼𑀓𑁆𑀔𑀯𑀺𑀧𑀸𑀓𑀁 𑀅𑀧𑀸𑀬𑀕𑀫𑀦𑀻𑀬𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄. 𑀲𑀸𑀤𑀺𑀬𑀢𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀫𑀳𑀸𑀧𑀣𑀯𑀻 ‘𑀲𑀩𑁆𑀩𑀩𑀻𑀚𑀸𑀦𑀺 𑀫𑀬𑀺 𑀲𑀁𑀯𑀺𑀭𑀼𑀳𑀦𑁆𑀢𑀽’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑀸𑀦𑀺, 𑀫𑀳𑀸𑀭𑀸𑀚, 𑀩𑀻𑀚𑀸𑀦𑀺 𑀅𑀲𑀸𑀤𑀺𑀬𑀦𑁆𑀢𑀺𑀬𑀸 𑀫𑀳𑀸𑀧𑀣𑀯𑀺𑀬𑀸 𑀲𑀁𑀯𑀺𑀭𑀼𑀳𑀺𑀢𑁆𑀯𑀸 𑀤𑀴𑁆𑀳𑀫𑀽𑀮𑀚𑀝𑀸𑀧𑀢𑀺𑀝𑁆𑀞𑀺𑀢𑀸 𑀔𑀦𑁆𑀥𑀲𑀸𑀭𑀲𑀸𑀔𑀸𑀧𑀭𑀺𑀯𑀺𑀢𑁆𑀣𑀺𑀡𑁆𑀡𑀸 𑀧𑀼𑀧𑁆𑀨𑀨𑀮𑀥𑀭𑀸 𑀳𑁄𑀦𑁆𑀢𑀻’’𑀢𑀺? ‘‘𑀅𑀲𑀸𑀤𑀺𑀬𑀦𑁆𑀢𑀻𑀧𑀺, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀻 𑀢𑁂𑀲𑀁 𑀩𑀻𑀚𑀸𑀦𑀁 𑀯𑀢𑁆𑀣𑀼𑀁 𑀳𑁄𑀢𑀺 𑀧𑀘𑁆𑀘𑀬𑀁 𑀤𑁂𑀢𑀺 𑀯𑀺𑀭𑀼𑀳𑀦𑀸𑀬, 𑀢𑀸𑀦𑀺 𑀩𑀻𑀚𑀸𑀦𑀺 𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀢𑁂𑀦 𑀧𑀘𑁆𑀘𑀬𑁂𑀦 𑀲𑀁𑀯𑀺𑀭𑀼𑀳𑀺𑀢𑁆𑀯𑀸 𑀤𑀴𑁆𑀳𑀫𑀽𑀮𑀚𑀝𑀸𑀧𑀢𑀺𑀝𑁆𑀞𑀺𑀢𑀸 𑀔𑀦𑁆𑀥𑀲𑀸𑀭𑀲𑀸𑀔𑀸𑀧𑀭𑀺𑀯𑀺𑀢𑁆𑀣𑀺𑀡𑁆𑀡𑀸 𑀧𑀼𑀧𑁆𑀨𑀨𑀮𑀥𑀭𑀸 𑀳𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀺𑀢𑁆𑀣𑀺𑀬𑀸 𑀲𑀓𑁂 𑀯𑀸𑀤𑁂 𑀦𑀝𑁆𑀞𑀸 𑀳𑁄𑀦𑁆𑀢𑀺 𑀳𑀢𑀸 𑀯𑀺𑀭𑀼𑀤𑁆𑀥𑀸, 𑀲𑀘𑁂 𑀢𑁂 𑀪𑀡𑀦𑁆𑀢𑀺 ‘𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀯𑀜𑁆𑀛𑁄 𑀪𑀯𑀢𑀺 𑀅𑀨𑀮𑁄’ 𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻, 𑀏𑀯𑀁 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀬𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀬𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀢𑀸𑀦𑀺 𑀩𑀻𑀚𑀸𑀦𑀺 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀲𑀁𑀯𑀺𑀭𑀼𑀳𑀺𑀢𑁆𑀯𑀸 𑀤𑀴𑁆𑀳𑀫𑀽𑀮𑀚𑀝𑀸𑀧𑀢𑀺𑀝𑁆𑀞𑀺𑀢𑀸 𑀔𑀦𑁆𑀥𑀲𑀸𑀭𑀲𑀸𑀔𑀸𑀧𑀭𑀺𑀯𑀺𑀢𑁆𑀣𑀺𑀡𑁆𑀡𑀸 𑀧𑀼𑀧𑁆𑀨𑀨𑀮𑀥𑀭𑀸 𑀳𑁄𑀦𑁆𑀢𑀺, 𑀏𑀯𑀁 𑀤𑁂𑀯𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀥𑀸𑀢𑀼𑀜𑁆𑀘 𑀜𑀸𑀡𑀭𑀢𑀦𑀜𑁆𑀘 𑀦𑀺𑀲𑁆𑀲𑀸𑀬 𑀤𑀴𑁆𑀳𑀓𑀼𑀲𑀮𑀫𑀽𑀮𑀧𑀢𑀺𑀝𑁆𑀞𑀺𑀢𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀥𑀫𑁆𑀫𑀲𑀸𑀭𑀲𑀻𑀮𑀲𑀸𑀔𑀸𑀧𑀭𑀺𑀯𑀺𑀢𑁆𑀣𑀺𑀡𑁆𑀡𑀸 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀲𑀸𑀫𑀜𑁆𑀜𑀨𑀮𑀥𑀭𑀸 𑀳𑁄𑀦𑁆𑀢𑀺, 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄. 𑀲𑀸𑀤𑀺𑀬𑀦𑁆𑀢𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀇𑀫𑁂 𑀑𑀝𑁆𑀞𑀸 𑀕𑁄𑀡𑀸 𑀕𑀤𑁆𑀭𑀪𑀸 𑀅𑀚𑀸 𑀧𑀲𑀽 𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀓𑀼𑀘𑁆𑀙𑀺𑀲𑁆𑀫𑀺𑀁 𑀓𑀺𑀫𑀺𑀓𑀼𑀮𑀸𑀦𑀁 𑀲𑀫𑁆𑀪𑀯’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁂, 𑀫𑀳𑀸𑀭𑀸𑀚, 𑀓𑀺𑀫𑀬𑁄 𑀢𑁂𑀲𑀁 𑀅𑀲𑀸𑀤𑀺𑀬𑀦𑁆𑀢𑀸𑀦𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀫𑁆𑀪𑀯𑀺𑀢𑁆𑀯𑀸 𑀩𑀳𑀼𑀧𑀼𑀢𑁆𑀢𑀦𑀢𑁆𑀢𑀸 𑀯𑁂𑀧𑀼𑀮𑁆𑀮𑀢𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺? ‘‘𑀧𑀸𑀧𑀲𑁆𑀲, 𑀪𑀦𑁆𑀢𑁂, 𑀓𑀫𑁆𑀫𑀲𑁆𑀲 𑀩𑀮𑀯𑀢𑀸𑀬 𑀅𑀲𑀸𑀤𑀺𑀬𑀦𑁆𑀢𑀸𑀦𑀁 𑀬𑁂𑀯 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀲𑁆𑀫𑀺𑀁 𑀓𑀺𑀫𑀬𑁄 𑀲𑀫𑁆𑀪𑀯𑀺𑀢𑁆𑀯𑀸 𑀩𑀳𑀼𑀧𑀼𑀢𑁆𑀢𑀦𑀢𑁆𑀢𑀸 𑀯𑁂𑀧𑀼𑀮𑁆𑀮𑀢𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀥𑀸𑀢𑀼𑀲𑁆𑀲 𑀘 𑀜𑀸𑀡𑀸𑀭𑀫𑁆𑀫𑀡𑀲𑁆𑀲 𑀘 𑀩𑀮𑀯𑀢𑀸𑀬 𑀢𑀣𑀸𑀕𑀢𑁂 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄. 𑀲𑀸𑀤𑀺𑀬𑀦𑁆𑀢𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀇𑀫𑁂 𑀫𑀦𑀼𑀲𑁆𑀲𑀸 𑀇𑀫𑁂 𑀅𑀝𑁆𑀞𑀦𑀯𑀼𑀢𑀺 𑀭𑁄𑀕𑀸 𑀓𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀽’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁂, 𑀫𑀳𑀸𑀭𑀸𑀚, 𑀭𑁄𑀕𑀸 𑀅𑀲𑀸𑀤𑀺𑀬𑀦𑁆𑀢𑀸𑀦𑀁 𑀓𑀸𑀬𑁂 𑀦𑀺𑀧𑀢𑀦𑁆𑀢𑀻’’𑀢𑀺? ‘‘𑀧𑀼𑀩𑁆𑀩𑁂 𑀓𑀢𑁂𑀦, 𑀪𑀦𑁆𑀢𑁂, 𑀤𑀼𑀘𑁆𑀘𑀭𑀺𑀢𑁂𑀦𑀸’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀓𑀢𑀁 𑀅𑀓𑀼𑀲𑀮𑀁 𑀇𑀥 𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂 𑀓𑀢𑀫𑁆𑀧𑀺 𑀇𑀥 𑀓𑀢𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀅𑀯𑀜𑁆𑀛𑀁 𑀪𑀯𑀢𑀺 𑀲𑀨𑀮𑀦𑁆𑀢𑀺. 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, 𑀦𑀦𑁆𑀤𑀓𑁄 𑀦𑀸𑀫 𑀬𑀓𑁆𑀔𑁄 𑀣𑁂𑀭𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀲𑀸𑀤𑀬𑀺𑀢𑁆𑀯𑀸 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺, 𑀮𑁄𑀓𑁂 𑀧𑀸𑀓𑀝𑁄 𑀏𑀲𑁄’’𑀢𑀺. ‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀤𑀺𑀬𑀺 𑀦𑀦𑁆𑀤𑀓𑀲𑁆𑀲 𑀬𑀓𑁆𑀔𑀲𑁆𑀲 𑀫𑀳𑀸𑀧𑀣𑀯𑀺𑀕𑀺𑀮𑀦’’𑀦𑁆𑀢𑀺 [𑀧𑀯𑀢𑁆𑀢𑀫𑀸𑀦𑁂𑀧𑀺 (𑀲𑁆𑀬𑀸.)]. ‘‘𑀉𑀩𑁆𑀩𑀢𑁆𑀢𑀺𑀬𑀦𑁆𑀢𑁂𑀧𑀺, 𑀪𑀦𑁆𑀢𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀧𑀢𑀫𑀸𑀦𑁂𑀧𑀺 𑀙𑀫𑀸𑀬𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀯𑀺𑀓𑀺𑀭𑀦𑁆𑀢𑁂𑀧𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑁂 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀧𑀭𑀲𑁆𑀲 𑀤𑀼𑀓𑁆𑀔𑀁 𑀲𑀸𑀤𑀺𑀬𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑁂𑀦 𑀳𑁂𑀢𑀼𑀦𑀸 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑀓𑀼𑀚𑁆𑀛𑁂𑀬𑁆𑀬 𑀯𑀸 𑀤𑀼𑀲𑁆𑀲𑁂𑀬𑁆𑀬 𑀯𑀸, 𑀲𑁄 𑀳𑁂𑀢𑀼 𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀽𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀳𑁂𑀢𑀼𑀦𑁄 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸, 𑀪𑀦𑁆𑀢𑁂, 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑀚𑀻𑀯𑀺𑀢𑀳𑀸𑀭𑀓𑁂𑀧𑀺 𑀓𑁄𑀧𑀁 𑀦 𑀓𑀭𑁂𑀬𑁆𑀬𑀸’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑀦𑀦𑁆𑀤𑀓𑀲𑁆𑀲 𑀬𑀓𑁆𑀔𑀲𑁆𑀲 𑀧𑀣𑀯𑀺𑀕𑀺𑀮𑀦𑀁 𑀦 𑀲𑀸𑀤𑀺𑀬𑀺, 𑀓𑀺𑀲𑁆𑀲 𑀧𑀦 𑀦𑀦𑁆𑀤𑀓𑁄 𑀬𑀓𑁆𑀔𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺? ‘‘𑀅𑀓𑀼𑀲𑀮𑀲𑁆𑀲, 𑀪𑀦𑁆𑀢𑁂, 𑀓𑀫𑁆𑀫𑀲𑁆𑀲 𑀩𑀮𑀯𑀢𑀸𑀬𑀸’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀩𑀮𑀯𑀢𑀸𑀬 𑀦𑀦𑁆𑀤𑀓𑁄 𑀬𑀓𑁆𑀔𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺 𑀓𑀢𑁄 𑀅𑀧𑀭𑀸𑀥𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀅𑀓𑀼𑀲𑀮𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀩𑀮𑀯𑀢𑀸𑀬 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺. 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄𑀢𑀺.

‘‘𑀓𑀢𑀺 𑀦𑀼 𑀔𑁄 𑀢𑁂, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸, 𑀬𑁂 𑀏𑀢𑀭𑀳𑀺 𑀫𑀳𑀸𑀧𑀣𑀯𑀺𑀁 𑀧𑀯𑀺𑀝𑁆𑀞𑀸, 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀲𑀯𑀡’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀻’’𑀢𑀺. ‘‘𑀇𑀗𑁆𑀖 𑀢𑁆𑀯𑀁, 𑀫𑀳𑀸𑀭𑀸𑀚, 𑀲𑀸𑀯𑁂𑀳𑀻’’𑀢𑀺? ‘‘𑀘𑀺𑀜𑁆𑀘𑀫𑀸𑀡𑀯𑀺𑀓𑀸, 𑀪𑀦𑁆𑀢𑁂, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀘 𑀲𑀓𑁆𑀓𑁄, 𑀤𑁂𑀯𑀤𑀢𑁆𑀢𑁄 𑀘 𑀣𑁂𑀭𑁄, 𑀦𑀦𑁆𑀤𑀓𑁄 𑀘 𑀬𑀓𑁆𑀔𑁄, 𑀦𑀦𑁆𑀤𑁄 𑀘 𑀫𑀸𑀡𑀯𑀓𑁄𑀢𑀺. 𑀲𑀼𑀢𑀫𑁂𑀢𑀁, 𑀪𑀦𑁆𑀢𑁂, 𑀇𑀫𑁂 𑀧𑀜𑁆𑀘 𑀚𑀦𑀸 𑀫𑀳𑀸𑀧𑀣𑀯𑀺𑀁 𑀧𑀯𑀺𑀝𑁆𑀞𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀢𑁂, 𑀫𑀳𑀸𑀭𑀸𑀚, 𑀅𑀧𑀭𑀤𑁆𑀥𑀸’’𑀢𑀺? ‘‘𑀪𑀕𑀯𑀢𑀺 𑀘, 𑀪𑀦𑁆𑀢𑁂, 𑀲𑀸𑀯𑀓𑁂𑀲𑀼 𑀘𑀸’’𑀢𑀺. ‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀯𑀸 𑀲𑀸𑀯𑀓𑀸 𑀯𑀸 𑀲𑀸𑀤𑀺𑀬𑀺𑀁𑀲𑀼 𑀇𑀫𑁂𑀲𑀁 𑀫𑀳𑀸𑀧𑀣𑀯𑀺𑀧𑀯𑀺𑀲𑀦’’𑀦𑁆𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀓𑀢𑁄 𑀅𑀥𑀺𑀓𑀸𑀭𑁄 𑀅𑀯𑀜𑁆𑀛𑁄 𑀪𑀯𑀢𑀺 𑀲𑀨𑀮𑁄’’𑀢𑀺. ‘‘𑀲𑀼𑀯𑀺𑀜𑁆𑀜𑀸𑀧𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑀻𑀓𑀢𑁄, 𑀕𑀼𑀬𑁆𑀳𑀁 𑀯𑀺𑀤𑀁𑀲𑀺𑀢𑀁, 𑀕𑀡𑁆𑀞𑀺 𑀪𑀺𑀦𑁆𑀦𑁄, 𑀕𑀳𑀦𑀁 𑀅𑀕𑀳𑀦𑀁 𑀓𑀢𑀁, 𑀦𑀝𑁆𑀞𑀸 𑀧𑀭𑀯𑀸𑀤𑀸, 𑀪𑀕𑁆𑀕𑀸 𑀓𑀼𑀤𑀺𑀝𑁆𑀞𑀻, 𑀦𑀺𑀧𑁆𑀧𑀪𑀸 𑀚𑀸𑀢𑀸 𑀓𑀼𑀢𑀺𑀢𑁆𑀣𑀺𑀬𑀸, 𑀢𑁆𑀯𑀁 𑀕𑀡𑀻𑀯𑀭𑀧𑀯𑀭𑀫𑀸𑀲𑀚𑁆𑀚𑀸’’𑀢𑀺.

𑀓𑀢𑀸𑀥𑀺𑀓𑀸𑀭𑀲𑀨𑀮𑀧𑀜𑁆𑀳𑁄 𑀧𑀞𑀫𑁄.

𑁨. 𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽, 𑀦 𑀘 𑀪𑀕𑀯𑀢𑁄 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁, 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀆𑀯𑀚𑁆𑀚𑀺𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀅𑀲𑀩𑁆𑀩𑀜𑁆𑀜𑀽𑀢𑀺. 𑀬𑀤𑀺 𑀢𑀲𑁆𑀲 𑀧𑀭𑀺𑀬𑁂𑀲𑀦𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀳𑁄𑀢𑀻’’𑀢𑀺. ‘‘𑀯𑀸𑀳𑀲𑀢𑀁 𑀔𑁄, 𑀫𑀳𑀸𑀭𑀸𑀚, 𑀯𑀻𑀳𑀻𑀦𑀁 𑀅𑀟𑁆𑀠𑀘𑀽𑀴𑀜𑁆𑀘 𑀯𑀸𑀳𑀸 𑀯𑀻𑀳𑀺𑀲𑀢𑁆𑀢𑀫𑁆𑀩𑀡𑀸𑀦𑀺 𑀤𑁆𑀯𑁂 𑀘 𑀢𑀼𑀫𑁆𑀩𑀸 𑀏𑀓𑀘𑁆𑀙𑀭𑀸𑀓𑁆𑀔𑀡𑁂 𑀧𑀯𑀢𑁆𑀢𑀘𑀺𑀢𑁆𑀢𑀲𑁆𑀲 𑀏𑀢𑁆𑀢𑀓𑀸 𑀯𑀻𑀳𑀻 𑀮𑀓𑁆𑀔𑀁 𑀞𑀧𑀻𑀬𑀫𑀸𑀦𑀸 [𑀞𑀧𑀻𑀬𑀫𑀸𑀦𑁂 (𑀲𑀻. 𑀧𑀻.)] 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀼𑀁?

‘‘𑀢𑀢𑁆𑀭𑀺𑀫𑁂 𑀲𑀢𑁆𑀢𑀯𑀺𑀥𑀸 𑀘𑀺𑀢𑁆𑀢𑀸 𑀧𑀯𑀢𑁆𑀢𑀦𑁆𑀢𑀺, 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀭𑀸𑀕𑀸 𑀲𑀤𑁄𑀲𑀸 𑀲𑀫𑁄𑀳𑀸 𑀲𑀓𑀺𑀮𑁂𑀲𑀸 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲. 𑀬𑀣𑀸, 𑀫𑀳𑀸𑀭𑀸𑀚, 𑀯𑀁𑀲𑀦𑀸𑀴𑀲𑁆𑀲 𑀯𑀺𑀢𑀢𑀲𑁆𑀲 𑀯𑀺𑀲𑀸𑀮𑀲𑁆𑀲 𑀯𑀺𑀢𑁆𑀣𑀺𑀡𑁆𑀡𑀲𑁆𑀲 𑀲𑀁𑀲𑀺𑀩𑁆𑀩𑀺𑀢𑀯𑀺𑀲𑀺𑀩𑁆𑀩𑀺𑀢𑀲𑁆𑀲 𑀲𑀸𑀔𑀸𑀚𑀝𑀸𑀚𑀝𑀺𑀢𑀲𑁆𑀲 𑀆𑀓𑀟𑁆𑀠𑀺𑀬𑀦𑁆𑀢𑀲𑁆𑀲 𑀕𑀭𑀼𑀓𑀁 𑀳𑁄𑀢𑀺 𑀆𑀕𑀫𑀦𑀁 𑀤𑀦𑁆𑀥𑀁. 𑀓𑀺𑀁 𑀓𑀸𑀭𑀡𑀸? 𑀲𑀁𑀲𑀺𑀩𑁆𑀩𑀺𑀢𑀯𑀺𑀲𑀺𑀩𑁆𑀩𑀺𑀢𑀢𑁆𑀢𑀸 𑀲𑀸𑀔𑀸𑀦𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀭𑀸𑀕𑀸 𑀲𑀤𑁄𑀲𑀸 𑀲𑀫𑁄𑀳𑀸 𑀲𑀓𑀺𑀮𑁂𑀲𑀸 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀁𑀲𑀺𑀩𑁆𑀩𑀺𑀢𑀯𑀺𑀲𑀺𑀩𑁆𑀩𑀺𑀢𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀇𑀤𑀁 𑀧𑀞𑀫𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭𑀺𑀤𑀁 𑀤𑀼𑀢𑀺𑀬𑀁 𑀘𑀺𑀢𑁆𑀢𑀁 𑀯𑀺𑀪𑀢𑁆𑀢𑀫𑀸𑀧𑀚𑁆𑀚𑀢𑀺 𑁋 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑁄𑀢𑀸𑀧𑀦𑁆𑀦𑀸 𑀧𑀺𑀳𑀺𑀢𑀸𑀧𑀸𑀬𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸 𑀯𑀺𑀜𑁆𑀜𑀸𑀢𑀲𑀢𑁆𑀣𑀼𑀲𑀸𑀲𑀦𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺. 𑀉𑀧𑀭𑀺𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀢𑀻𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀯𑀁𑀲𑀦𑀸𑀴𑀲𑁆𑀲 𑀢𑀺𑀧𑀩𑁆𑀩𑀕𑀡𑁆𑀞𑀺𑀧𑀭𑀺𑀲𑀼𑀤𑁆𑀥𑀲𑁆𑀲 𑀉𑀧𑀭𑀺 𑀲𑀸𑀔𑀸𑀚𑀝𑀸𑀚𑀝𑀺𑀢𑀲𑁆𑀲 𑀆𑀓𑀟𑁆𑀠𑀺𑀬𑀦𑁆𑀢𑀲𑁆𑀲 𑀬𑀸𑀯 𑀢𑀺𑀧𑀩𑁆𑀩𑀁 𑀢𑀸𑀯 𑀮𑀳𑀼𑀓𑀁 𑀏𑀢𑀺, 𑀢𑀢𑁄 𑀉𑀧𑀭𑀺 𑀣𑀤𑁆𑀥𑀁. 𑀓𑀺𑀁 𑀓𑀸𑀭𑀡𑀸? 𑀳𑁂𑀝𑁆𑀞𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀲𑀸𑀔𑀸𑀚𑀝𑀸𑀚𑀝𑀺𑀢𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸 𑀧𑀺𑀳𑀺𑀢𑀸𑀧𑀸𑀬𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸 𑀯𑀺𑀜𑁆𑀜𑀸𑀢𑀲𑀢𑁆𑀣𑀼𑀲𑀸𑀲𑀦𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀢𑀻𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀇𑀤𑀁 𑀤𑀼𑀢𑀺𑀬𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭𑀺𑀤𑀁 𑀢𑀢𑀺𑀬𑀁 𑀘𑀺𑀢𑁆𑀢𑀁 𑀯𑀺𑀪𑀢𑁆𑀢𑀫𑀸𑀧𑀚𑁆𑀚𑀢𑀺 𑁋 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀓𑀤𑀸𑀕𑀸𑀫𑀺𑀦𑁄, 𑀬𑁂𑀲𑀁 𑀭𑀸𑀕𑀤𑁄𑀲𑀫𑁄𑀳𑀸 𑀢𑀦𑀼𑀪𑀽𑀢𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀯𑀁𑀲𑀦𑀸𑀴𑀲𑁆𑀲 𑀧𑀜𑁆𑀘𑀧𑀩𑁆𑀩𑀕𑀡𑁆𑀞𑀺𑀧𑀭𑀺𑀲𑀼𑀤𑁆𑀥𑀲𑁆𑀲 𑀉𑀧𑀭𑀺 𑀲𑀸𑀔𑀸𑀚𑀝𑀸𑀚𑀝𑀺𑀢𑀲𑁆𑀲 𑀆𑀓𑀟𑁆𑀠𑀺𑀬𑀦𑁆𑀢𑀲𑁆𑀲 𑀬𑀸𑀯 𑀧𑀜𑁆𑀘𑀧𑀩𑁆𑀩𑀁 𑀢𑀸𑀯 𑀮𑀳𑀼𑀓𑀁 𑀏𑀢𑀺, 𑀢𑀢𑁄 𑀉𑀧𑀭𑀺 𑀣𑀤𑁆𑀥𑀁. 𑀓𑀺𑀁 𑀓𑀸𑀭𑀡𑀸? 𑀳𑁂𑀝𑁆𑀞𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀲𑀸𑀔𑀸𑀚𑀝𑀸𑀚𑀝𑀺𑀢𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀓𑀤𑀸𑀕𑀸𑀫𑀺𑀦𑁄, 𑀬𑁂𑀲𑀁 𑀭𑀸𑀕𑀤𑁄𑀲𑀫𑁄𑀳𑀸 𑀢𑀦𑀼𑀪𑀽𑀢𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀇𑀤𑀁 𑀢𑀢𑀺𑀬𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭𑀺𑀤𑀁 𑀘𑀢𑀼𑀢𑁆𑀣𑀁 𑀘𑀺𑀢𑁆𑀢𑀁 𑀯𑀺𑀪𑀢𑁆𑀢𑀫𑀸𑀧𑀚𑁆𑀚𑀢𑀺 𑁋 𑀬𑁂 𑀢𑁂, 𑀫𑀳𑀸𑀭𑀸𑀚, 𑀅𑀦𑀸𑀕𑀸𑀫𑀺𑀦𑁄, 𑀬𑁂𑀲𑀁 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀤𑀲𑀲𑀼 𑀞𑀸𑀦𑁂𑀲𑀼 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀤𑀲𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀯𑀁𑀲𑀦𑀸𑀴𑀲𑁆𑀲 𑀤𑀲𑀧𑀩𑁆𑀩𑀕𑀡𑁆𑀞𑀺𑀧𑀭𑀺𑀲𑀼𑀤𑁆𑀥𑀲𑁆𑀲 𑀉𑀧𑀭𑀺 𑀲𑀸𑀔𑀸𑀚𑀝𑀸𑀚𑀝𑀺𑀢𑀲𑁆𑀲 𑀆𑀓𑀟𑁆𑀠𑀺𑀬𑀦𑁆𑀢𑀲𑁆𑀲 𑀬𑀸𑀯 𑀤𑀲𑀧𑀩𑁆𑀩𑀁 𑀢𑀸𑀯 𑀮𑀳𑀼𑀓𑀁 𑀏𑀢𑀺, 𑀢𑀢𑁄 𑀉𑀧𑀭𑀺 𑀣𑀤𑁆𑀥𑀁. 𑀓𑀺𑀁 𑀓𑀸𑀭𑀡𑀸? 𑀳𑁂𑀝𑁆𑀞𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀲𑀸𑀔𑀸𑀚𑀝𑀸𑀚𑀝𑀺𑀢𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀅𑀦𑀸𑀕𑀸𑀫𑀺𑀦𑁄, 𑀬𑁂𑀲𑀁 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀤𑀲𑀲𑀼 𑀞𑀸𑀦𑁂𑀲𑀼 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀤𑀲𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀉𑀧𑀭𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀇𑀤𑀁 𑀘𑀢𑀼𑀢𑁆𑀣𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭𑀺𑀤𑀁 𑀧𑀜𑁆𑀘𑀫𑀁 𑀘𑀺𑀢𑁆𑀢𑀁 𑀯𑀺𑀪𑀢𑁆𑀢𑀫𑀸𑀧𑀚𑁆𑀚𑀢𑀺 𑁋 𑀬𑁂 𑀢𑁂, 𑀫𑀳𑀸𑀭𑀸𑀚, 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀥𑁄𑀢𑀫𑀮𑀸 𑀯𑀦𑁆𑀢𑀓𑀺𑀮𑁂𑀲𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀜𑁆𑀜𑁄𑀚𑀦𑀸 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀪𑀽𑀫𑀻𑀲𑀼 𑀧𑀭𑀺𑀲𑀼𑀤𑁆𑀥𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀲𑀸𑀯𑀓𑀯𑀺𑀲𑀬𑁂 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀲𑀸𑀯𑀓𑀯𑀺𑀲𑀬𑁂, 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑀺𑀲𑀬𑁂. 𑀬𑀣𑀸, 𑀫𑀳𑀸𑀭𑀸𑀚, 𑀯𑀁𑀲𑀦𑀸𑀴𑀲𑁆𑀲 𑀲𑀩𑁆𑀩𑀧𑀩𑁆𑀩𑀕𑀡𑁆𑀞𑀺𑀧𑀭𑀺𑀲𑀼𑀤𑁆𑀥𑀲𑁆𑀲 𑀆𑀓𑀟𑁆𑀠𑀺𑀬𑀦𑁆𑀢𑀲𑁆𑀲 𑀮𑀳𑀼𑀓𑀁 𑀳𑁄𑀢𑀺 𑀆𑀕𑀫𑀦𑀁 𑀅𑀤𑀦𑁆𑀥𑀁. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑀧𑀩𑁆𑀩𑀕𑀡𑁆𑀞𑀺𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀅𑀕𑀳𑀦𑀢𑁆𑀢𑀸 𑀯𑀁𑀲𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀥𑁄𑀢𑀫𑀮𑀸 𑀯𑀦𑁆𑀢𑀓𑀺𑀮𑁂𑀲𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀜𑁆𑀜𑁄𑀚𑀦𑀸 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀪𑀽𑀫𑀻𑀲𑀼 𑀧𑀭𑀺𑀲𑀼𑀤𑁆𑀥𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀲𑀸𑀯𑀓𑀯𑀺𑀲𑀬𑁂 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀲𑀸𑀯𑀓𑀯𑀺𑀲𑀬𑁂, 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑀺𑀲𑀬𑁂, 𑀇𑀤𑀁 𑀧𑀜𑁆𑀘𑀫𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭𑀺𑀤𑀁 𑀙𑀝𑁆𑀞𑀁 𑀘𑀺𑀢𑁆𑀢𑀁 𑀯𑀺𑀪𑀢𑁆𑀢𑀫𑀸𑀧𑀚𑁆𑀚𑀢𑀺 𑁋 𑀬𑁂 𑀢𑁂, 𑀫𑀳𑀸𑀭𑀸𑀚, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀬𑀫𑁆𑀪𑀼𑀦𑁄 𑀅𑀦𑀸𑀘𑀭𑀺𑀬𑀓𑀸 𑀏𑀓𑀘𑀸𑀭𑀺𑀦𑁄 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀸 𑀲𑀓𑀯𑀺𑀲𑀬𑁂 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀘𑀺𑀢𑁆𑀢𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀲𑀓𑀯𑀺𑀲𑀬𑁂 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀲𑀓𑀯𑀺𑀲𑀬𑁂 𑀫𑀳𑀦𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀯𑀺𑀲𑀬𑀲𑁆𑀲. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀓𑀯𑀺𑀲𑀬𑀁 𑀧𑀭𑀺𑀢𑁆𑀢𑀁 𑀦𑀤𑀺𑀁 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀬𑀤𑀺𑀘𑁆𑀙𑀓 𑀅𑀘𑁆𑀙𑀫𑁆𑀪𑀺𑀢𑁄 𑀑𑀢𑀭𑁂𑀬𑁆𑀬, 𑀅𑀣 𑀧𑀭𑀢𑁄 𑀫𑀳𑀸𑀲𑀫𑀼𑀤𑁆𑀤𑀁 𑀕𑀫𑁆𑀪𑀻𑀭𑀁 𑀯𑀺𑀢𑁆𑀣𑀢𑀁 𑀅𑀕𑀸𑀥𑀫𑀧𑀸𑀭𑀁 𑀤𑀺𑀲𑁆𑀯𑀸 𑀪𑀸𑀬𑁂𑀬𑁆𑀬, 𑀤𑀦𑁆𑀥𑀸𑀬𑁂𑀬𑁆𑀬 𑀦 𑀯𑀺𑀲𑀳𑁂𑀬𑁆𑀬 𑀑𑀢𑀭𑀺𑀢𑀼𑀁. 𑀓𑀺𑀁 𑀓𑀸𑀭𑀡𑀸? 𑀢𑀺𑀡𑁆𑀡𑀢𑁆𑀢𑀸 [𑀘𑀺𑀡𑁆𑀡𑀢𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀲𑀓𑀯𑀺𑀲𑀬𑀲𑁆𑀲, 𑀫𑀳𑀦𑁆𑀢𑀢𑁆𑀢𑀸 𑀘 𑀫𑀳𑀸𑀲𑀫𑀼𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀬𑀫𑁆𑀪𑀼𑀦𑁄 𑀅𑀦𑀸𑀘𑀭𑀺𑀬𑀓𑀸 𑀏𑀓𑀘𑀸𑀭𑀺𑀦𑁄 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀸 𑀲𑀓𑀯𑀺𑀲𑀬𑁂 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀘𑀺𑀢𑁆𑀢𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀲𑀓𑀯𑀺𑀲𑀬𑁂 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀽𑀫𑀻𑀲𑀼 𑀕𑀭𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀤𑀦𑁆𑀥𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀲𑀓𑀯𑀺𑀲𑀬𑁂 𑀫𑀳𑀦𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀯𑀺𑀲𑀬𑀲𑁆𑀲, 𑀇𑀤𑀁 𑀙𑀝𑁆𑀞𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭𑀺𑀤𑀁 𑀲𑀢𑁆𑀢𑀫𑀁 𑀘𑀺𑀢𑁆𑀢𑀁 𑀯𑀺𑀪𑀢𑁆𑀢𑀫𑀸𑀧𑀚𑁆𑀚𑀢𑀺 𑁋 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀦𑁄 𑀤𑀲𑀩𑀮𑀥𑀭𑀸 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀸 𑀅𑀝𑁆𑀞𑀸𑀭𑀲𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀦𑀦𑁆𑀢𑀚𑀺𑀦𑀸 𑀅𑀦𑀸𑀯𑀭𑀡𑀜𑀸𑀡𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀲𑀩𑁆𑀩𑀢𑁆𑀣 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑀢𑁆𑀣 𑀧𑀭𑀺𑀲𑀼𑀤𑁆𑀥𑀢𑁆𑀢𑀸. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀦𑀸𑀭𑀸𑀘𑀲𑁆𑀲 𑀲𑀼𑀥𑁄𑀢𑀲𑁆𑀲 𑀯𑀺𑀫𑀮𑀲𑁆𑀲 𑀦𑀺𑀕𑁆𑀕𑀡𑁆𑀞𑀺𑀲𑁆𑀲 𑀲𑀼𑀔𑀼𑀫𑀥𑀸𑀭𑀲𑁆𑀲 𑀅𑀚𑀺𑀫𑁆𑀳𑀲𑁆𑀲 𑀅𑀯𑀗𑁆𑀓𑀲𑁆𑀲 𑀅𑀓𑀼𑀝𑀺𑀮𑀲𑁆𑀲 𑀤𑀴𑁆𑀳𑀘𑀸𑀧𑀲𑀫𑀸𑀭𑀽𑀴𑁆𑀳𑀲𑁆𑀲 𑀔𑁄𑀫𑀲𑀼𑀔𑀼𑀫𑁂 𑀯𑀸 𑀓𑀧𑁆𑀧𑀸𑀲𑀲𑀼𑀔𑀼𑀫𑁂 𑀯𑀸 𑀓𑀫𑁆𑀩𑀮𑀲𑀼𑀔𑀼𑀫𑁂 𑀯𑀸 𑀩𑀮𑀯𑀦𑀺𑀧𑀸𑀢𑀺𑀢𑀲𑁆𑀲 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀸 𑀮𑀕𑁆𑀕𑀦𑀁 𑀯𑀸 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, ‘‘𑀓𑀺𑀁 𑀓𑀸𑀭𑀡𑀸’’? ‘‘𑀲𑀼𑀔𑀼𑀫𑀢𑁆𑀢𑀸 𑀯𑀢𑁆𑀣𑀸𑀦𑀁 𑀲𑀼𑀥𑁄𑀢𑀢𑁆𑀢𑀸 𑀦𑀸𑀭𑀸𑀘𑀲𑁆𑀲 𑀦𑀺𑀧𑀸𑀢𑀲𑁆𑀲 𑀘 𑀩𑀮𑀯𑀢𑁆𑀢𑀸’’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀦𑁄 𑀤𑀲𑀩𑀮𑀥𑀭𑀸 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀸 𑀅𑀝𑁆𑀞𑀸𑀭𑀲𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀦𑀦𑁆𑀢𑀚𑀺𑀦𑀸 𑀅𑀦𑀸𑀯𑀭𑀡𑀜𑀸𑀡𑀸, 𑀢𑁂𑀲𑀁 𑀢𑀁 𑀘𑀺𑀢𑁆𑀢𑀁 𑀲𑀩𑁆𑀩𑀢𑁆𑀣 𑀮𑀳𑀼𑀓𑀁 𑀉𑀧𑁆𑀧𑀚𑁆𑀚𑀢𑀺 𑀮𑀳𑀼𑀓𑀁 𑀧𑀯𑀢𑁆𑀢𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑀢𑁆𑀣 𑀧𑀭𑀺𑀲𑀼𑀤𑁆𑀥𑀢𑁆𑀢𑀸, 𑀇𑀤𑀁 𑀲𑀢𑁆𑀢𑀫𑀁 𑀘𑀺𑀢𑁆𑀢𑀁.

‘‘𑀢𑀢𑁆𑀭, 𑀫𑀳𑀸𑀭𑀸𑀚, 𑀬𑀤𑀺𑀤𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀘𑀺𑀢𑁆𑀢𑀁, 𑀢𑀁 𑀙𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑀸𑀦𑀁 𑀕𑀡𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀦 𑀕𑀼𑀡𑁂𑀦 𑀧𑀭𑀺𑀲𑀼𑀤𑁆𑀥𑀜𑁆𑀘 𑀮𑀳𑀼𑀓𑀜𑁆𑀘. 𑀬𑀲𑁆𑀫𑀸 𑀘 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀧𑀭𑀺𑀲𑀼𑀤𑁆𑀥𑀜𑁆𑀘 𑀮𑀳𑀼𑀓𑀜𑁆𑀘, 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀪𑀕𑀯𑀸 𑀬𑀫𑀓𑀧𑀸𑀝𑀺𑀳𑀻𑀭𑀁 𑀤𑀲𑁆𑀲𑁂𑀢𑀺. 𑀬𑀫𑀓𑀧𑀸𑀝𑀺𑀳𑀻𑀭𑁂, 𑀫𑀳𑀸𑀭𑀸𑀚, 𑀜𑀸𑀢𑀩𑁆𑀩𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀦 𑀢𑀢𑁆𑀣 𑀲𑀓𑁆𑀓𑀸 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀯𑀢𑁆𑀢𑀼𑀁, 𑀢𑁂𑀧𑀺, 𑀫𑀳𑀸𑀭𑀸𑀚, 𑀧𑀸𑀝𑀺𑀳𑀻𑀭𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀘𑀺𑀢𑁆𑀢𑀁 𑀉𑀧𑀸𑀤𑀸𑀬 𑀕𑀡𑀦𑀫𑁆𑀧𑀺 𑀲𑀗𑁆𑀔𑀫𑁆𑀧𑀺 𑀓𑀮𑀫𑁆𑀧𑀺 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺, 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀆𑀯𑀚𑁆𑀚𑁂𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀳𑀢𑁆𑀣𑁂 𑀞𑀧𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀞𑀧𑁂𑀬𑁆𑀬 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀬𑁆𑀬, 𑀫𑀼𑀔𑀕𑀢𑀁 𑀪𑁄𑀚𑀦𑀁 𑀕𑀺𑀮𑁂𑀬𑁆𑀬, 𑀉𑀫𑁆𑀫𑀻𑀮𑁂𑀢𑁆𑀯𑀸 𑀯𑀸 𑀦𑀺𑀫𑀻𑀮𑁂𑀬𑁆𑀬, 𑀦𑀺𑀫𑀻𑀮𑁂𑀢𑁆𑀯𑀸 𑀯𑀸 𑀉𑀫𑁆𑀫𑀻𑀮𑁂𑀬𑁆𑀬, 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀘𑀺𑀭𑀢𑀭𑀁 𑀏𑀢𑀁, 𑀫𑀳𑀸𑀭𑀸𑀚, 𑀮𑀳𑀼𑀢𑀭𑀁 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀮𑀳𑀼𑀢𑀭𑀁 𑀆𑀯𑀚𑁆𑀚𑀦𑀁, 𑀆𑀯𑀚𑁆𑀚𑁂𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀺, 𑀆𑀯𑀚𑁆𑀚𑀦𑀯𑀺𑀓𑀮𑀫𑀢𑁆𑀢𑀓𑁂𑀦 𑀦 𑀢𑀸𑀯𑀢𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀅𑀲𑀩𑁆𑀩𑀜𑁆𑀜𑀼𑀦𑁄 𑀦𑀸𑀫 𑀳𑁄𑀦𑁆𑀢𑀻’’𑀢𑀺.

‘‘𑀆𑀯𑀚𑁆𑀚𑀦𑀫𑁆𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀭𑀺𑀬𑁂𑀲𑀦𑀸𑀬 𑀓𑀸𑀢𑀩𑁆𑀩𑀁, 𑀇𑀗𑁆𑀖 𑀫𑀁 𑀢𑀢𑁆𑀣 𑀓𑀸𑀭𑀡𑁂𑀦 𑀲𑀜𑁆𑀜𑀸𑀧𑁂𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀅𑀟𑁆𑀠𑀲𑁆𑀲 𑀫𑀳𑀤𑁆𑀥𑀦𑀲𑁆𑀲 𑀫𑀳𑀸𑀪𑁄𑀕𑀲𑁆𑀲 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀲𑁆𑀲 𑀧𑀳𑀽𑀢𑀥𑀦𑀥𑀜𑁆𑀜𑀲𑁆𑀲 𑀲𑀸𑀮𑀺𑀯𑀻𑀳𑀺𑀬𑀯𑀢𑀡𑁆𑀟𑀼𑀮𑀢𑀺𑀮𑀫𑀼𑀕𑁆𑀕𑀫𑀸𑀲𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑀔𑀻𑀭𑀤𑀥𑀺𑀫𑀥𑀼𑀕𑀼𑀴𑀨𑀸𑀡𑀺𑀢𑀸 𑀘 𑀔𑀴𑁄𑀧𑀺𑀓𑀼𑀫𑁆𑀪𑀺𑀧𑀻𑀞𑀭𑀓𑁄𑀝𑁆𑀞𑀪𑀸𑀚𑀦𑀕𑀢𑀸 𑀪𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲 𑀧𑀸𑀳𑀼𑀦𑀓𑁄 𑀆𑀕𑀘𑁆𑀙𑁂𑀬𑁆𑀬 𑀪𑀢𑁆𑀢𑀸𑀭𑀳𑁄 𑀪𑀢𑁆𑀢𑀸𑀪𑀺𑀓𑀗𑁆𑀔𑀻, 𑀢𑀲𑁆𑀲 𑀘 𑀕𑁂𑀳𑁂 𑀬𑀁 𑀭𑀦𑁆𑀥𑀁 𑀪𑁄𑀚𑀦𑀁, 𑀢𑀁 𑀧𑀭𑀺𑀦𑀺𑀝𑁆𑀞𑀺𑀢𑀁 𑀪𑀯𑁂𑀬𑁆𑀬, 𑀓𑀼𑀫𑁆𑀪𑀺𑀢𑁄 𑀢𑀡𑁆𑀟𑀼𑀮𑁂 𑀦𑀻𑀳𑀭𑀺𑀢𑁆𑀯𑀸 𑀪𑁄𑀚𑀦𑀁 𑀭𑀦𑁆𑀥𑁂𑀬𑁆𑀬, 𑀅𑀧𑀺 𑀘 𑀔𑁄 𑀲𑁄, 𑀫𑀳𑀸𑀭𑀸𑀚, 𑀢𑀸𑀯𑀢𑀓𑁂𑀦 𑀪𑁄𑀚𑀦𑀯𑁂𑀓𑀮𑁆𑀮𑀫𑀢𑁆𑀢𑀓𑁂𑀦 𑀅𑀥𑀦𑁄 𑀦𑀸𑀫 𑀓𑀧𑀡𑁄 𑀦𑀸𑀫 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀖𑀭𑁂𑀧𑀺, 𑀪𑀦𑁆𑀢𑁂, 𑀅𑀓𑀸𑀮𑁂 𑀪𑁄𑀚𑀦𑀯𑁂𑀓𑀮𑁆𑀮𑀁 𑀳𑁄𑀢𑀺, 𑀓𑀺𑀁 𑀧𑀦 𑀕𑀳𑀧𑀢𑀺𑀓𑀲𑁆𑀲𑀸’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀆𑀯𑀚𑁆𑀚𑀦𑀯𑀺𑀓𑀮𑀫𑀢𑁆𑀢𑀓𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄 𑀅𑀲𑁆𑀲 𑀨𑀮𑀺𑀢𑁄 𑀑𑀡𑀢𑀯𑀺𑀦𑀢𑁄 𑀧𑀺𑀡𑁆𑀟𑀺𑀪𑀸𑀭𑀪𑀭𑀺𑀢𑁄, 𑀦 𑀓𑀺𑀜𑁆𑀘𑀺 𑀢𑀢𑁆𑀣 𑀧𑀢𑀺𑀢𑀁 𑀨𑀮𑀁 𑀪𑀯𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄 𑀢𑀸𑀯𑀢𑀓𑁂𑀦 𑀧𑀢𑀺𑀢𑀨𑀮𑀯𑁂𑀓𑀮𑁆𑀮𑀫𑀢𑁆𑀢𑀓𑁂𑀦 𑀅𑀨𑀮𑁄 𑀦𑀸𑀫 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀧𑀢𑀦𑀧𑀝𑀺𑀩𑀤𑁆𑀥𑀸𑀦𑀺 𑀢𑀸𑀦𑀺 𑀭𑀼𑀓𑁆𑀔𑀨𑀮𑀸𑀦𑀺, 𑀧𑀢𑀺𑀢𑁂 𑀬𑀤𑀺𑀘𑁆𑀙𑀓𑀁 𑀮𑀪𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀆𑀯𑀚𑁆𑀚𑁂𑀢𑁆𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑁄 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀻’’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀬𑀤𑀸 𑀘𑀓𑁆𑀓𑀭𑀢𑀦𑀁 𑀲𑀭𑀢𑀺 ‘𑀉𑀧𑁂𑀢𑀼 𑀫𑁂 𑀘𑀓𑁆𑀓𑀭𑀢𑀦’𑀦𑁆𑀢𑀺, 𑀲𑀭𑀺𑀢𑁂 𑀘𑀓𑁆𑀓𑀭𑀢𑀦𑀁 𑀉𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀆𑀯𑀚𑁆𑀚𑁂𑀢𑁆𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀚𑀸𑀦𑀸𑀢𑀻’’𑀢𑀺. ‘‘𑀤𑀴𑁆𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁, 𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽, 𑀲𑀫𑁆𑀧𑀝𑀺𑀘𑁆𑀙𑀸𑀫 𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽’’𑀢𑀺.

𑀩𑀼𑀤𑁆𑀥𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀤𑁂𑀯𑀤𑀢𑁆𑀢𑀧𑀩𑁆𑀩𑀚𑁆𑀚𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁂𑀯𑀤𑀢𑁆𑀢𑁄 𑀓𑁂𑀦 𑀧𑀩𑁆𑀩𑀸𑀚𑀺𑀢𑁄’’𑀢𑀺? ‘‘𑀙 𑀬𑀺𑀫𑁂, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑀓𑀼𑀫𑀸𑀭𑀸 𑀪𑀤𑁆𑀤𑀺𑀬𑁄 𑀘 𑀅𑀦𑀼𑀭𑀼𑀤𑁆𑀥𑁄 𑀘 𑀆𑀦𑀦𑁆𑀤𑁄 𑀘 𑀪𑀕𑀼 𑀘 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀧𑀻.) 𑀫. 𑀦𑀺. 𑁨.𑁧𑁬𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀘 𑀤𑁂𑀯𑀤𑀢𑁆𑀢𑁄 𑀘 𑀉𑀧𑀸𑀮𑀺𑀓𑀧𑁆𑀧𑀓𑁄 𑀲𑀢𑁆𑀢𑀫𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁂 𑀲𑀢𑁆𑀣𑀭𑀺 𑀲𑀓𑁆𑀬𑀓𑀼𑀮𑀸𑀦𑀦𑁆𑀤𑀚𑀦𑀦𑁂 𑀪𑀕𑀯𑀦𑁆𑀢𑀁 𑀅𑀦𑀼𑀧𑀩𑁆𑀩𑀚𑀦𑁆𑀢𑀸 𑀦𑀺𑀓𑁆𑀔𑀫𑀺𑀁𑀲𑀼, 𑀢𑁂 𑀪𑀕𑀯𑀸 𑀧𑀩𑁆𑀩𑀸𑀚𑁂𑀲𑀻’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑁂𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄, 𑀦 𑀕𑀺𑀳𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀪𑀺𑀓𑁆𑀔𑀼𑀦𑀻, 𑀦 𑀲𑀺𑀓𑁆𑀔𑀫𑀸𑀦𑀸, 𑀦 𑀲𑀸𑀫𑀡𑁂𑀭𑁄, 𑀦 𑀲𑀸𑀫𑀡𑁂𑀭𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀪𑀺𑀓𑁆𑀔𑀼 𑀧𑀓𑀢𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻𑀢𑀺. 𑀲𑀗𑁆𑀖𑀪𑁂𑀤𑀓𑁄, 𑀪𑀦𑁆𑀢𑁂, 𑀧𑀼𑀕𑁆𑀕𑀮𑁄 𑀓𑀺𑀁 𑀓𑀫𑁆𑀫𑀁 𑀨𑀼𑀲𑀢𑀻’’𑀢𑀺? ‘‘𑀓𑀧𑁆𑀧𑀝𑁆𑀞𑀺𑀢𑀺𑀓𑀁, 𑀫𑀳𑀸𑀭𑀸𑀚, 𑀓𑀫𑁆𑀫𑀁 𑀨𑀼𑀲𑀢𑀻’’𑀢𑀺.

‘‘𑀓𑀺𑀁 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀚𑀸𑀦𑀸𑀢𑀺 ‘𑀤𑁂𑀯𑀤𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀺𑀲𑁆𑀲𑀢𑀻’’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀚𑀸𑀦𑀸𑀢𑀺 ‘𑀤𑁂𑀯𑀤𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀺𑀲𑁆𑀲𑀢𑀻’’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀚𑀸𑀦𑀸𑀢𑀺 ‘𑀤𑁂𑀯𑀤𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀺𑀲𑁆𑀲𑀢𑀻’𑀢𑀺, 𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀓𑀸𑀭𑀼𑀡𑀺𑀓𑁄 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀳𑀺𑀢𑀁 𑀅𑀧𑀦𑁂𑀢𑁆𑀯𑀸 𑀳𑀺𑀢𑀫𑀼𑀧𑀤𑀳𑀢𑀻𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀁 𑀅𑀚𑀸𑀦𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺, 𑀢𑁂𑀦 𑀳𑀺 𑀩𑀼𑀤𑁆𑀥𑁄 𑀅𑀲𑀩𑁆𑀩𑀜𑁆𑀜𑀽𑀢𑀺, 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀯𑀺𑀚𑀝𑁂𑀳𑀺 𑀏𑀢𑀁 𑀫𑀳𑀸𑀚𑀝𑀁, 𑀪𑀺𑀦𑁆𑀤 𑀧𑀭𑀸𑀧𑀯𑀸𑀤𑀁, 𑀅𑀦𑀸𑀕𑀢𑁂 𑀅𑀤𑁆𑀥𑀸𑀦𑁂 𑀢𑀬𑀸 𑀲𑀤𑀺𑀲𑀸 𑀩𑀼𑀤𑁆𑀥𑀺𑀫𑀦𑁆𑀢𑁄 𑀪𑀺𑀓𑁆𑀔𑀽 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀢𑁆𑀣 𑀢𑀯 𑀩𑀮𑀁 𑀧𑀓𑀸𑀲𑁂𑀳𑀻’’𑀢𑀺.

‘‘𑀓𑀸𑀭𑀼𑀡𑀺𑀓𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀘, 𑀓𑀸𑀭𑀼𑀜𑁆𑀜𑁂𑀦, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀤𑁂𑀯𑀤𑀢𑁆𑀢𑀲𑁆𑀲 𑀕𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀤𑁂𑀯𑀤𑀢𑁆𑀢𑀁 𑀆𑀧𑀸𑀬𑀺𑀓𑀁 𑀓𑀫𑁆𑀫𑀁 [𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀁 (𑀲𑀻. 𑀲𑁆𑀬𑀸. 𑀧𑀻.)] 𑀆𑀬𑀽𑀳𑀺𑀢𑁆𑀯𑀸 𑀅𑀦𑁂𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂𑀦 𑀦𑀺𑀭𑀬𑀁 𑀯𑀺𑀦𑀺𑀧𑀸𑀢𑁂𑀦 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀦𑁆𑀢𑀁, 𑀢𑀁 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀇𑀫𑀲𑁆𑀲 𑀅𑀧𑀭𑀺𑀬𑀦𑁆𑀢𑀓𑀢𑀁 𑀓𑀫𑁆𑀫𑀁 𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀲𑁆𑀲 𑀧𑀭𑀺𑀬𑀦𑁆𑀢𑀓𑀢𑀁 𑀪𑀯𑀺𑀲𑁆𑀲𑀢𑀺, 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀧𑀭𑀺𑀬𑀦𑁆𑀢𑀓𑀢𑀁 𑀤𑀼𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀩𑁆𑀩𑀚𑀺𑀢𑁄𑀧𑀺 𑀅𑀬𑀁 𑀫𑁄𑀖𑀧𑀼𑀭𑀺𑀲𑁄 𑀓𑀧𑁆𑀧𑀝𑁆𑀞𑀺𑀬𑀫𑁂𑀯 𑀓𑀫𑁆𑀫𑀁 𑀆𑀬𑀽𑀳𑀺𑀲𑁆𑀲𑀢𑀻𑀢𑀺 𑀓𑀸𑀭𑀼𑀜𑁆𑀜𑁂𑀦 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀯𑀥𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑀺, 𑀧𑀧𑀸𑀢𑁂 𑀧𑀸𑀢𑁂𑀢𑁆𑀯𑀸 𑀳𑀢𑁆𑀣𑀁 𑀤𑁂𑀢𑀺, 𑀫𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀁 𑀧𑀭𑀺𑀬𑁂𑀲𑀢𑀺, 𑀬𑀁 𑀲𑁄 𑀧𑀞𑀫𑀁 𑀤𑀼𑀓𑁆𑀔𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀲𑀼𑀔𑀁 𑀉𑀧𑀤𑀳𑀢𑀻’’𑀢𑀺? ‘‘𑀯𑀥𑁂𑀢𑀺𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀯𑀲𑁂𑀦, 𑀧𑀸𑀢𑁂𑀢𑀺𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀯𑀲𑁂𑀦, 𑀫𑀸𑀭𑁂𑀢𑀺𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀯𑀲𑁂𑀦, 𑀯𑀥𑀺𑀢𑁆𑀯𑀸𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺, 𑀧𑀸𑀢𑁂𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺, 𑀫𑀸𑀭𑁂𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀯𑀥𑀺𑀢𑁆𑀯𑀸𑀧𑀺 𑀧𑀸𑀢𑀬𑀺𑀢𑁆𑀯𑀸𑀧𑀺 𑀧𑀼𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀯𑀥𑁂𑀢𑀺𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀯𑀲𑁂𑀦, 𑀧𑀸𑀢𑁂𑀢𑀺𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀯𑀲𑁂𑀦, 𑀫𑀸𑀭𑁂𑀢𑀺𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀯𑀲𑁂𑀦, 𑀯𑀥𑀺𑀢𑁆𑀯𑀸𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺, 𑀧𑀸𑀢𑁂𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺, 𑀫𑀸𑀭𑁂𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺, 𑀬𑁂𑀦 𑀬𑁂𑀦 𑀬𑁄𑀕𑁂𑀦 𑀲𑀢𑁆𑀢𑀸𑀦𑀁 𑀕𑀼𑀡𑀯𑀼𑀟𑁆𑀠𑀺 𑀳𑁄𑀢𑀺, 𑀢𑁂𑀦 𑀢𑁂𑀦 𑀬𑁄𑀕𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀫𑁂𑀯 𑀉𑀧𑀤𑀳𑀢𑀺. 𑀲𑀘𑁂, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑁄 𑀦 𑀧𑀩𑁆𑀩𑀸𑀚𑁂𑀬𑁆𑀬, 𑀕𑀺𑀳𑀺𑀪𑀽𑀢𑁄 𑀲𑀫𑀸𑀦𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁 𑀩𑀳𑀼𑀁 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀅𑀦𑁂𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂𑀦 𑀦𑀺𑀭𑀬𑀁 𑀯𑀺𑀦𑀺𑀧𑀸𑀢𑁂𑀦 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀦𑁆𑀢𑁄 𑀩𑀳𑀼𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀲𑁆𑀲𑀢𑀺, 𑀢𑀁 𑀪𑀕𑀯𑀸 𑀚𑀸𑀦𑀫𑀸𑀦𑁄 𑀓𑀸𑀭𑀼𑀜𑁆𑀜𑁂𑀦 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺, ‘𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀲𑁆𑀲 𑀤𑀼𑀓𑁆𑀔𑀁 𑀧𑀭𑀺𑀬𑀦𑁆𑀢𑀓𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀓𑀸𑀭𑀼𑀜𑁆𑀜𑁂𑀦 𑀕𑀭𑀼𑀓𑀁 𑀤𑀼𑀓𑁆𑀔𑀁 𑀮𑀳𑀼𑀓𑀁 𑀅𑀓𑀸𑀲𑀺.

‘‘𑀬𑀣𑀸 𑀯𑀸, 𑀫𑀳𑀸𑀭𑀸𑀚, 𑀥𑀦𑀬𑀲𑀲𑀺𑀭𑀺𑀜𑀸𑀢𑀺𑀩𑀮𑁂𑀦 𑀩𑀮𑀯𑀸 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀜𑀸𑀢𑀺𑀁 𑀯𑀸 𑀫𑀺𑀢𑁆𑀢𑀁 𑀯𑀸 𑀭𑀜𑁆𑀜𑀸 𑀕𑀭𑀼𑀓𑀁 𑀤𑀡𑁆𑀟𑀁 𑀥𑀸𑀭𑁂𑀦𑁆𑀢𑀁 𑀅𑀢𑁆𑀢𑀦𑁄 𑀩𑀳𑀼𑀯𑀺𑀲𑁆𑀲𑀢𑁆𑀣𑀪𑀸𑀯𑁂𑀦 𑀲𑀫𑀢𑁆𑀣𑀢𑀸𑀬 𑀕𑀭𑀼𑀓𑀁 𑀤𑀡𑁆𑀟𑀁 𑀮𑀳𑀼𑀓𑀁 𑀅𑀓𑀸𑀲𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀩𑀳𑀽𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀤𑀼𑀓𑁆𑀔𑀁 𑀯𑁂𑀤𑀬𑀫𑀸𑀦𑀁 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀩𑀮𑀲𑀫𑀢𑁆𑀣𑀪𑀸𑀯𑁂𑀦 𑀕𑀭𑀼𑀓𑀁 𑀤𑀼𑀓𑁆𑀔𑀁 𑀮𑀳𑀼𑀓𑀁 𑀅𑀓𑀸𑀲𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀕𑀭𑀼𑀓𑀁 𑀭𑁄𑀕𑀁 𑀩𑀮𑀯𑁄𑀲𑀥𑀩𑀮𑁂𑀦 𑀮𑀳𑀼𑀓𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑀳𑀽𑀦𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀤𑀼𑀓𑁆𑀔𑀁 𑀯𑁂𑀤𑀬𑀫𑀸𑀦𑀁 𑀤𑁂𑀯𑀤𑀢𑁆𑀢𑀁 𑀪𑀕𑀯𑀸 𑀭𑁄𑀕𑀜𑁆𑀜𑀼𑀢𑀸𑀬 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀸𑀭𑀼𑀜𑁆𑀜𑀩𑀮𑁄 𑀧𑀢𑁆𑀣𑀤𑁆𑀥𑀥𑀫𑁆𑀫𑁄𑀲𑀥𑀩𑀮𑁂𑀦 𑀕𑀭𑀼𑀓𑀁 𑀤𑀼𑀓𑁆𑀔𑀁 𑀮𑀳𑀼𑀓𑀁 𑀅𑀓𑀸𑀲𑀺. 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀩𑀳𑀼𑀯𑁂𑀤𑀦𑀻𑀬𑀁 𑀤𑁂𑀯𑀤𑀢𑁆𑀢𑀁 𑀅𑀧𑁆𑀧𑀯𑁂𑀤𑀦𑀻𑀬𑀁 𑀓𑀭𑁄𑀦𑁆𑀢𑁄 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀦 𑀓𑀺𑀜𑁆𑀘𑀺, 𑀪𑀦𑁆𑀢𑁂, 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬 𑀅𑀦𑁆𑀢𑀫𑀲𑁄 𑀕𑀤𑁆𑀤𑀽𑀳𑀦𑀫𑀢𑁆𑀢𑀫𑁆𑀧𑀻’’𑀢𑀺. ‘‘𑀇𑀫𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀬𑀣𑀸, 𑀫𑀳𑀸𑀭𑀸𑀚, 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬𑀼𑀁, ‘𑀅𑀬𑀁 𑀔𑁄, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻, 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺, 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 ‘𑀢𑁂𑀦 𑀳𑀺, 𑀪𑀡𑁂, 𑀇𑀫𑀁 𑀘𑁄𑀭𑀁 𑀩𑀳𑀺𑀦𑀕𑀭𑀁 𑀦𑀻𑀳𑀭𑀺𑀢𑁆𑀯𑀸 𑀆𑀖𑀸𑀢𑀦𑁂 𑀲𑀻𑀲𑀁 𑀙𑀺𑀦𑁆𑀤𑀣𑀸’’𑀢𑀺, ‘𑀏𑀯𑀁 𑀤𑁂𑀯𑀸’𑀢𑀺 𑀔𑁄 𑀢𑁂 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀩𑀳𑀺𑀦𑀕𑀭𑀁 𑀦𑀻𑀳𑀭𑀺𑀢𑁆𑀯𑀸 𑀆𑀖𑀸𑀢𑀦𑀁 𑀦𑀬𑁂𑀬𑁆𑀬𑀼𑀁. 𑀢𑀫𑁂𑀦𑀁 𑀧𑀲𑁆𑀲𑁂𑀬𑁆𑀬 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀮𑀤𑁆𑀥𑀯𑀭𑁄 𑀮𑀤𑁆𑀥𑀬𑀲𑀥𑀦𑀪𑁄𑀕𑁄 𑀆𑀤𑁂𑀬𑁆𑀬𑀯𑀘𑀦𑁄 𑀩𑀮𑀯𑀺𑀘𑁆𑀙𑀺𑀢𑀓𑀸𑀭𑀻, 𑀲𑁄 𑀢𑀲𑁆𑀲 𑀓𑀸𑀭𑀼𑀜𑁆𑀜𑀁 𑀓𑀢𑁆𑀯𑀸 𑀢𑁂 𑀧𑀼𑀭𑀺𑀲𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀮𑀁, 𑀪𑁄, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀇𑀫𑀲𑁆𑀲 𑀲𑀻𑀲𑀘𑁆𑀙𑁂𑀤𑀦𑁂𑀦, 𑀢𑁂𑀦 𑀳𑀺 𑀪𑁄 𑀇𑀫𑀲𑁆𑀲 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀁 𑀭𑀓𑁆𑀔𑀣, 𑀅𑀳𑀫𑁂𑀢𑀲𑁆𑀲 𑀓𑀸𑀭𑀡𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀧𑀝𑀺𑀯𑀘𑀦𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀢𑁂 𑀢𑀲𑁆𑀲 𑀩𑀮𑀯𑀢𑁄 𑀯𑀘𑀦𑁂𑀦 𑀢𑀲𑁆𑀲 𑀘𑁄𑀭𑀲𑁆𑀲 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀁 𑀭𑀓𑁆𑀔𑁂𑀬𑁆𑀬𑀼𑀁. 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀏𑀯𑀁 𑀓𑀸𑀭𑀻 𑀢𑀲𑁆𑀲 𑀘𑁄𑀭𑀲𑁆𑀲 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲𑀸’’𑀢𑀺? ‘‘𑀚𑀻𑀯𑀺𑀢𑀤𑀸𑀬𑀓𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀢𑀲𑁆𑀲 𑀘𑁄𑀭𑀲𑁆𑀲, 𑀚𑀻𑀯𑀺𑀢𑁂 𑀤𑀺𑀦𑁆𑀦𑁂 𑀓𑀺𑀁 𑀢𑀲𑁆𑀲 𑀅𑀓𑀢𑀁 𑀦𑀸𑀫 𑀅𑀢𑁆𑀣𑀻’’𑀢𑀺? ‘‘𑀬𑀸 𑀧𑀦 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑁂 𑀯𑁂𑀤𑀦𑀸, 𑀲𑁄 𑀢𑀸𑀬 𑀯𑁂𑀤𑀦𑀸𑀬 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀅𑀢𑁆𑀢𑀦𑁄 𑀓𑀢𑁂𑀦 𑀲𑁄, 𑀪𑀦𑁆𑀢𑁂, 𑀘𑁄𑀭𑁄 𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀚𑀻𑀯𑀺𑀢𑀤𑀸𑀬𑀓𑁄 𑀧𑀦 𑀧𑀼𑀭𑀺𑀲𑁄 𑀦 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀓𑀸𑀭𑀼𑀜𑁆𑀜𑁂𑀦 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺 ‘𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀲𑁆𑀲 𑀤𑀼𑀓𑁆𑀔𑀁 𑀧𑀭𑀺𑀬𑀦𑁆𑀢𑀓𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀧𑀭𑀺𑀬𑀦𑁆𑀢𑀓𑀢𑀜𑁆𑀘, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑀲𑁆𑀲 𑀤𑀼𑀓𑁆𑀔𑀁, 𑀤𑁂𑀯𑀤𑀢𑁆𑀢𑁄, 𑀫𑀳𑀸𑀭𑀸𑀚, 𑀫𑀭𑀡𑀓𑀸𑀮𑁂 𑁋

‘‘‘𑀇𑀫𑁂𑀳𑀺 𑀅𑀝𑁆𑀞𑀻𑀳𑀺 𑀢𑀫𑀕𑁆𑀕𑀧𑀼𑀕𑁆𑀕𑀮𑀁, 𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀤𑀫𑁆𑀫𑀲𑀸𑀭𑀣𑀺𑀁;

𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁, 𑀧𑀸𑀡𑁂𑀳𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀉𑀧𑁂𑀫𑀻’𑀢𑀺.

‘‘𑀧𑀸𑀡𑀼𑀧𑁂𑀢𑀁 𑀲𑀭𑀡𑀫𑀕𑀫𑀸𑀲𑀺. 𑀤𑁂𑀯𑀤𑀢𑁆𑀢𑁄, 𑀫𑀳𑀸𑀭𑀸𑀚, 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁂 𑀓𑀧𑁆𑀧𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀞𑀫𑀓𑁄𑀝𑁆𑀞𑀸𑀲𑁂 𑀲𑀗𑁆𑀖𑀁 𑀪𑀺𑀦𑁆𑀤𑀺, 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀅𑀝𑁆𑀞𑀺𑀲𑁆𑀲𑀭𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀏𑀯𑀁 𑀓𑀸𑀭𑀻 𑀤𑁂𑀯𑀤𑀢𑁆𑀢𑀲𑁆𑀲 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲𑀸’’𑀢𑀺? ‘‘𑀲𑀩𑁆𑀩𑀤𑀤𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀤𑁂𑀯𑀤𑀢𑁆𑀢𑀲𑁆𑀲, 𑀬𑀁 𑀢𑀣𑀸𑀕𑀢𑁄 𑀤𑁂𑀯𑀤𑀢𑁆𑀢𑀁 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑁂𑀲𑁆𑀲𑀢𑀺, 𑀓𑀺𑀁 𑀢𑀣𑀸𑀕𑀢𑁂𑀦 𑀤𑁂𑀯𑀤𑀢𑁆𑀢𑀲𑁆𑀲 𑀅𑀓𑀢𑀁 𑀦𑀸𑀫 𑀅𑀢𑁆𑀣𑀻’’𑀢𑀺? ‘‘𑀬𑀁 𑀧𑀦, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑀬𑁂 𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀅𑀧𑀺 𑀦𑀼 𑀔𑁄 𑀪𑀕𑀯𑀸 𑀢𑀢𑁄𑀦𑀺𑀤𑀸𑀦𑀁 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀢𑁆𑀢𑀦𑀸 𑀓𑀢𑁂𑀦, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀢𑀺, 𑀤𑀼𑀓𑁆𑀔𑀧𑀭𑀺𑀬𑀦𑁆𑀢𑀓𑀸𑀭𑀓𑁄 𑀲𑀢𑁆𑀣𑀸 𑀦 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑀢𑀻’’𑀢𑀺. ‘‘𑀇𑀫𑀫𑁆𑀧𑀺 𑀔𑁄, 𑀢𑁆𑀯𑀁 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀲𑀦𑁆𑀦𑀺𑀧𑀸𑀢𑀉𑀢𑀼𑀧𑀭𑀺𑀡𑀸𑀫𑀯𑀺𑀲𑀫𑀧𑀭𑀺𑀳𑀸𑀭𑀑𑀧𑀓𑁆𑀓𑀫𑀺𑀓𑁄𑀧𑀓𑁆𑀓𑀦𑁆𑀢𑀁 𑀧𑀽𑀢𑀺𑀓𑀼𑀡𑀧𑀤𑀼𑀕𑁆𑀕𑀦𑁆𑀥𑀸𑀪𑀺𑀲𑀜𑁆𑀙𑀦𑁆𑀦𑀁 𑀅𑀦𑁆𑀢𑁄𑀲𑀮𑁆𑀮𑀁 𑀲𑀼𑀲𑀺𑀭𑀕𑀢𑀁 𑀧𑀼𑀩𑁆𑀩𑀭𑀼𑀳𑀺𑀭𑀲𑀫𑁆𑀧𑀼𑀡𑁆𑀡𑀁 𑀯𑀡𑀁 𑀯𑀽𑀧𑀲𑀫𑁂𑀦𑁆𑀢𑁄 𑀯𑀡𑀫𑀼𑀔𑀁 𑀓𑀓𑁆𑀔𑀴𑀢𑀺𑀔𑀺𑀡𑀔𑀸𑀭𑀓𑀝𑀼𑀓𑁂𑀦 𑀪𑁂𑀲𑀚𑁆𑀚𑁂𑀦 𑀅𑀦𑀼𑀮𑀺𑀫𑁆𑀧𑀢𑀺 𑀧𑀭𑀺𑀧𑀘𑁆𑀘𑀦𑀸𑀬, 𑀧𑀭𑀺𑀧𑀘𑁆𑀘𑀺𑀢𑁆𑀯𑀸 𑀫𑀼𑀤𑀼𑀪𑀸𑀯𑀫𑀼𑀧𑀕𑀢𑀁 𑀲𑀢𑁆𑀣𑁂𑀦 𑀯𑀺𑀓𑀦𑁆𑀢𑀬𑀺𑀢𑁆𑀯𑀸 𑀟𑀳𑀢𑀺 𑀲𑀮𑀸𑀓𑀸𑀬, 𑀤𑀟𑁆𑀠𑁂 𑀔𑀸𑀭𑀮𑀯𑀡𑀁 𑀤𑁂𑀢𑀺, 𑀪𑁂𑀲𑀚𑁆𑀚𑁂𑀦 𑀅𑀦𑀼𑀮𑀺𑀫𑁆𑀧𑀢𑀺 𑀯𑀡𑀭𑀼𑀳𑀦𑀸𑀬 𑀩𑁆𑀬𑀸𑀥𑀺𑀢𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑀫𑀦𑀼𑀧𑁆𑀧𑀢𑁆𑀢𑀺𑀬𑀸, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀅𑀳𑀺𑀢𑀘𑀺𑀢𑁆𑀢𑁄 𑀪𑁂𑀲𑀚𑁆𑀚𑁂𑀦 𑀅𑀦𑀼𑀮𑀺𑀫𑁆𑀧𑀢𑀺, 𑀲𑀢𑁆𑀣𑁂𑀦 𑀯𑀺𑀓𑀦𑁆𑀢𑁂𑀢𑀺, 𑀟𑀳𑀢𑀺 𑀲𑀮𑀸𑀓𑀸𑀬, 𑀔𑀸𑀭𑀮𑀯𑀡𑀁 𑀤𑁂𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀳𑀺𑀢𑀘𑀺𑀢𑁆𑀢𑁄 𑀲𑁄𑀢𑁆𑀣𑀺𑀓𑀸𑀫𑁄 𑀢𑀸𑀦𑀺 𑀓𑀺𑀭𑀺𑀬𑀸𑀦𑀺 𑀓𑀭𑁄𑀢𑀻’’𑀢𑀺. ‘‘𑀬𑀸 𑀧𑀦𑀲𑁆𑀲 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀓𑀭𑀡𑁂𑀦 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀯𑁂𑀤𑀦𑀸, 𑀢𑀢𑁄𑀦𑀺𑀤𑀸𑀦𑀁 𑀲𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀳𑀺𑀢𑀘𑀺𑀢𑁆𑀢𑁄, 𑀪𑀦𑁆𑀢𑁂, 𑀲𑁄𑀢𑁆𑀣𑀺𑀓𑀸𑀫𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀢𑀸𑀦𑀺 𑀓𑀺𑀭𑀺𑀬𑀸𑀦𑀺 𑀓𑀭𑁄𑀢𑀺, 𑀓𑀺𑀁 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬, 𑀲𑀕𑁆𑀕𑀕𑀸𑀫𑀻 𑀲𑁄, 𑀪𑀦𑁆𑀢𑁂, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀸𑀭𑀼𑀜𑁆𑀜𑁂𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺 𑀤𑀼𑀓𑁆𑀔𑀧𑀭𑀺𑀫𑀼𑀢𑁆𑀢𑀺𑀬𑀸.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀓𑀡𑁆𑀝𑀓𑁂𑀦 𑀯𑀺𑀤𑁆𑀥𑁄 𑀅𑀲𑁆𑀲, 𑀅𑀣𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀢𑀲𑁆𑀲 𑀳𑀺𑀢𑀓𑀸𑀫𑁄 𑀲𑁄𑀢𑁆𑀣𑀺𑀓𑀸𑀫𑁄 𑀢𑀺𑀡𑁆𑀳𑁂𑀦 𑀓𑀡𑁆𑀝𑀓𑁂𑀦𑀯𑀸 𑀲𑀢𑁆𑀣𑀫𑀼𑀔𑁂𑀦 𑀯𑀸 𑀲𑀫𑀦𑁆𑀢𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀧𑀕𑁆𑀖𑀭𑀦𑁆𑀢𑁂𑀦 𑀮𑁄𑀳𑀺𑀢𑁂𑀦 𑀢𑀁 𑀓𑀡𑁆𑀝𑀓𑀁 𑀦𑀻𑀳𑀭𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀳𑀺𑀢𑀓𑀸𑀫𑁄 𑀢𑀁 𑀓𑀡𑁆𑀝𑀓𑀁 𑀦𑀻𑀳𑀭𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀳𑀺𑀢𑀓𑀸𑀫𑁄 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀲𑁄𑀢𑁆𑀣𑀺𑀓𑀸𑀫𑁄 𑀢𑀁 𑀓𑀡𑁆𑀝𑀓𑀁 𑀦𑀻𑀳𑀭𑀢𑀺. 𑀲𑀘𑁂 𑀲𑁄, 𑀪𑀦𑁆𑀢𑁂, 𑀢𑀁 𑀓𑀡𑁆𑀝𑀓𑀁 𑀦 𑀦𑀻𑀳𑀭𑁂𑀬𑁆𑀬, 𑀫𑀭𑀡𑀁 𑀯𑀸 𑀲𑁄 𑀢𑁂𑀦 𑀧𑀸𑀧𑀼𑀡𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀓𑀸𑀭𑀼𑀜𑁆𑀜𑁂𑀦 𑀤𑁂𑀯𑀤𑀢𑁆𑀢𑀁 𑀧𑀩𑁆𑀩𑀸𑀚𑁂𑀲𑀺 𑀤𑀼𑀓𑁆𑀔𑀧𑀭𑀺𑀫𑀼𑀢𑁆𑀢𑀺𑀬𑀸. 𑀲𑀘𑁂 𑀫𑀳𑀸𑀭𑀸𑀚, 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬, 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀤𑁂𑀯𑀤𑀢𑁆𑀢𑁄 𑀪𑀯𑀧𑀭𑀫𑁆𑀧𑀭𑀸𑀬 𑀦𑀺𑀭𑀬𑁂 𑀧𑀘𑁆𑀘𑁂𑀬𑁆𑀬𑀸’’𑀢𑀺.

‘‘𑀅𑀦𑀼𑀲𑁄𑀢𑀕𑀸𑀫𑀺𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁂𑀯𑀤𑀢𑁆𑀢𑀁 𑀢𑀣𑀸𑀕𑀢𑁄 𑀧𑀝𑀺𑀲𑁄𑀢𑀁 𑀧𑀸𑀧𑁂𑀲𑀺, 𑀯𑀺𑀧𑀦𑁆𑀣𑀧𑀝𑀺𑀧𑀦𑁆𑀦𑀁 𑀤𑁂𑀯𑀤𑀢𑁆𑀢𑀁 𑀧𑀦𑁆𑀣𑁂 𑀧𑀝𑀺𑀧𑀸𑀤𑁂𑀲𑀺, 𑀧𑀧𑀸𑀢𑁂 𑀧𑀢𑀺𑀢𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀧𑀢𑀺𑀝𑁆𑀞𑀁 𑀅𑀤𑀸𑀲𑀺, 𑀯𑀺𑀲𑀫𑀕𑀢𑀁 𑀤𑁂𑀯𑀤𑀢𑁆𑀢𑀁 𑀢𑀣𑀸𑀕𑀢𑁄 𑀲𑀫𑀁 𑀆𑀭𑁄𑀧𑁂𑀲𑀺, 𑀇𑀫𑁂 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀳𑁂𑀢𑀽 𑀇𑀫𑀸𑀦𑀺 𑀘 𑀓𑀸𑀭𑀡𑀸𑀦𑀺 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀲𑀦𑁆𑀤𑀲𑁆𑀲𑁂𑀢𑀼𑀁 𑀅𑀜𑁆𑀜𑀢𑁆𑀭 𑀢𑀯𑀸𑀤𑀺𑀲𑁂𑀦 𑀩𑀼𑀤𑁆𑀥𑀺𑀫𑀢𑀸’’𑀢𑀺.

𑀤𑁂𑀯𑀤𑀢𑁆𑀢𑀧𑀩𑁆𑀩𑀚𑁆𑀚𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀧𑀣𑀯𑀺𑀘𑀮𑀦𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋 ‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂 [𑀅𑀝𑁆𑀞𑀺𑀫𑁂 𑀆𑀦𑀦𑁆𑀤 (𑀅. 𑀦𑀺. 𑁮.𑁭𑁦)], 𑀳𑁂𑀢𑀽 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’𑀢𑀺. 𑀅𑀲𑁂𑀲𑀯𑀘𑀦𑀁 𑀇𑀤𑀁, 𑀦𑀺𑀲𑁆𑀲𑁂𑀲𑀯𑀘𑀦𑀁 𑀇𑀤𑀁, 𑀦𑀺𑀧𑁆𑀧𑀭𑀺𑀬𑀸𑀬𑀯𑀘𑀦𑀁 𑀇𑀤𑀁, 𑀦𑀢𑁆𑀣𑀜𑁆𑀜𑁄 𑀦𑀯𑀫𑁄 𑀳𑁂𑀢𑀼 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀜𑁆𑀜𑁄 𑀦𑀯𑀫𑁄 𑀳𑁂𑀢𑀼 𑀪𑀯𑁂𑀬𑁆𑀬 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬, 𑀢𑀫𑁆𑀧𑀺 𑀳𑁂𑀢𑀼𑀁 𑀪𑀕𑀯𑀸 𑀓𑀣𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀢𑁆𑀣𑀜𑁆𑀜𑁄 𑀦𑀯𑀫𑁄 𑀳𑁂𑀢𑀼 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬, 𑀢𑀲𑁆𑀫𑀸 𑀅𑀦𑀸𑀘𑀺𑀓𑁆𑀔𑀺𑀢𑁄 𑀪𑀕𑀯𑀢𑀸, 𑀅𑀬𑀜𑁆𑀘 𑀦𑀯𑀫𑁄 𑀳𑁂𑀢𑀼 𑀤𑀺𑀲𑁆𑀲𑀢𑀺 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬, 𑀬𑀁 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀝𑁆𑀞𑁂𑀯 𑀳𑁂𑀢𑀽 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬, 𑀢𑁂𑀦 𑀳𑀺 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀢𑁂𑀦 𑀳𑀺 𑀅𑀝𑁆𑀞𑁂𑀯 𑀳𑁂𑀢𑀽 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀲𑀼𑀔𑀼𑀫𑁄 𑀤𑀼𑀦𑁆𑀦𑀺𑀯𑁂𑀞𑀺𑀬𑁄 𑀅𑀦𑁆𑀥𑀓𑀭𑀡𑁄 𑀘𑁂𑀯 𑀕𑀫𑁆𑀪𑀻𑀭𑁄 𑀘, 𑀲𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀦𑁂𑀲𑁄 𑀅𑀜𑁆𑀜𑁂𑀦 𑀇𑀢𑁆𑀢𑀭𑀧𑀜𑁆𑀜𑁂𑀦 𑀲𑀓𑁆𑀓𑀸 𑀯𑀺𑀲𑀚𑁆𑀚𑁂𑀢𑀼𑀁 𑀅𑀜𑁆𑀜𑀢𑁆𑀭 𑀢𑀯𑀸𑀤𑀺𑀲𑁂𑀦 𑀩𑀼𑀤𑁆𑀥𑀺𑀫𑀢𑀸’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀳𑁂𑀢𑀽 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’𑀢𑀺. 𑀬𑀁 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀢𑀜𑁆𑀘 𑀧𑀦 𑀅𑀓𑀸𑀮𑀺𑀓𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀕𑀡𑀺𑀢𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀢𑀬𑁄 𑀬𑁂𑀯 𑀫𑁂𑀖𑀸 𑀕𑀡𑀻𑀬𑀦𑁆𑀢𑀺 𑀯𑀲𑁆𑀲𑀺𑀓𑁄 𑀳𑁂𑀫𑀦𑁆𑀢𑀺𑀓𑁄 𑀧𑀸𑀯𑀼𑀲𑀓𑁄𑀢𑀺. 𑀬𑀤𑀺 𑀢𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀫𑁂𑀖𑁄 𑀧𑀯𑀲𑁆𑀲𑀢𑀺, 𑀦 𑀲𑁄 𑀫𑁂𑀖𑁄 𑀕𑀡𑀻𑀬𑀢𑀺 𑀲𑀫𑁆𑀫𑀢𑁂𑀳𑀺 𑀫𑁂𑀖𑁂𑀳𑀺, 𑀅𑀓𑀸𑀮𑀫𑁂𑀖𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀅𑀓𑀸𑀮𑀺𑀓𑀁 𑀏𑀢𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀦 𑀢𑀁 𑀕𑀡𑀻𑀬𑀢𑀺 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀸 𑀧𑀩𑁆𑀩𑀢𑀸 𑀧𑀜𑁆𑀘 𑀦𑀤𑀺𑀲𑀢𑀸𑀦𑀺 𑀲𑀦𑁆𑀤𑀦𑁆𑀢𑀺, 𑀢𑁂𑀲𑀁, 𑀫𑀳𑀸𑀭𑀸𑀚, 𑀧𑀜𑁆𑀘𑀦𑁆𑀦𑀁 𑀦𑀤𑀺𑀲𑀢𑀸𑀦𑀁 𑀤𑀲𑁂𑀯 𑀦𑀤𑀺𑀬𑁄 𑀦𑀤𑀺𑀕𑀡𑀦𑀸𑀬 𑀕𑀡𑀻𑀬𑀦𑁆𑀢𑀺. 𑀲𑁂𑀬𑁆𑀬𑀣𑀻𑀤𑀁, 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻 𑀲𑀺𑀦𑁆𑀥𑀼 𑀲𑀭𑀲𑁆𑀲𑀢𑀻 𑀯𑁂𑀢𑁆𑀭𑀯𑀢𑀻 𑀯𑀻𑀢𑀁𑀲𑀸 𑀘𑀦𑁆𑀤𑀪𑀸𑀕𑀸𑀢𑀺, 𑀅𑀯𑀲𑁂𑀲𑀸 𑀦𑀤𑀺𑀬𑁄 𑀦𑀤𑀺𑀕𑀡𑀦𑀸𑀬 𑀅𑀕𑀡𑀺𑀢𑀸. 𑀓𑀺𑀁 𑀓𑀸𑀭𑀡𑀸? 𑀦 𑀢𑀸 𑀦𑀤𑀺𑀬𑁄 𑀥𑀼𑀯𑀲𑀮𑀺𑀮𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀅𑀓𑀸𑀮𑀺𑀓𑀁 𑀏𑀢𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀦 𑀢𑀁 𑀕𑀡𑀻𑀬𑀢𑀺 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀲𑀢𑀫𑁆𑀧𑀺 𑀤𑁆𑀯𑀺𑀲𑀢𑀫𑁆𑀧𑀺 𑀢𑀺𑀲𑀢𑀫𑁆𑀧𑀺 𑀅𑀫𑀘𑁆𑀘𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀙 𑀬𑁂𑀯 𑀚𑀦𑀸 𑀅𑀫𑀘𑁆𑀘𑀕𑀡𑀦𑀸𑀬 𑀕𑀡𑀻𑀬𑀦𑁆𑀢𑀺. 𑀲𑁂𑀬𑁆𑀬𑀣𑀻𑀤𑀁, 𑀲𑁂𑀦𑀸𑀧𑀢𑀺 𑀧𑀼𑀭𑁄𑀳𑀺𑀢𑁄 𑀅𑀓𑁆𑀔𑀤𑀲𑁆𑀲𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀙𑀢𑁆𑀢𑀕𑁆𑀕𑀸𑀳𑀓𑁄 𑀔𑀕𑁆𑀕𑀕𑁆𑀕𑀸𑀳𑀓𑁄. 𑀏𑀢𑁂 𑀬𑁂𑀯 𑀅𑀫𑀘𑁆𑀘𑀕𑀡𑀦𑀸𑀬 𑀕𑀡𑀻𑀬𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀬𑀼𑀢𑁆𑀢𑀢𑁆𑀢𑀸 𑀭𑀸𑀚𑀕𑀼𑀡𑁂𑀳𑀺, 𑀅𑀯𑀲𑁂𑀲𑀸 𑀅𑀕𑀡𑀺𑀢𑀸, 𑀲𑀩𑁆𑀩𑁂 𑀅𑀫𑀘𑁆𑀘𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸, 𑀅𑀓𑀸𑀮𑀺𑀓𑀁 𑀏𑀢𑀁 𑀓𑀤𑀸𑀘𑀼𑀧𑁆𑀧𑀢𑁆𑀢𑀺𑀓𑀁 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀦 𑀢𑀁 𑀕𑀡𑀻𑀬𑀢𑀺 𑀅𑀝𑁆𑀞𑀳𑀺 𑀳𑁂𑀢𑀽𑀳𑀺.

‘‘𑀲𑀼𑀬𑁆𑀬𑀢𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀏𑀢𑀭𑀳𑀺 𑀚𑀺𑀦𑀲𑀸𑀲𑀦𑁂 𑀓𑀢𑀸𑀥𑀺𑀓𑀸𑀭𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑁂𑀤𑀦𑀻𑀬𑀓𑀫𑁆𑀫𑀁, 𑀓𑀺𑀢𑁆𑀢𑀺 𑀘 𑀬𑁂𑀲𑀁 𑀅𑀩𑁆𑀪𑀼𑀕𑁆𑀕𑀢𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀽’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺 𑀏𑀢𑀭𑀳𑀺 𑀚𑀺𑀦𑀲𑀸𑀲𑀦𑁂 𑀓𑀢𑀸𑀥𑀺𑀓𑀸𑀭𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑁂𑀤𑀦𑀻𑀬𑀓𑀫𑁆𑀫𑀁, 𑀓𑀺𑀢𑁆𑀢𑀺 𑀘 𑀬𑁂𑀲𑀁 𑀅𑀩𑁆𑀪𑀼𑀕𑁆𑀕𑀢𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀢𑁆𑀢 𑀚𑀦𑀸𑀢𑀺’’. ‘‘𑀓𑁂 𑀘 𑀢𑁂, 𑀫𑀳𑀸𑀭𑀸𑀚𑀸’’𑀢𑀺? ‘‘𑀲𑀼𑀫𑀦𑁄 𑀘, 𑀪𑀦𑁆𑀢𑁂, 𑀫𑀸𑀮𑀸𑀓𑀸𑀭𑁄, 𑀏𑀓𑀲𑀸𑀝𑀓𑁄 𑀘 𑀩𑁆𑀭𑀸𑀳𑁆𑀫𑀡𑁄, 𑀧𑀼𑀡𑁆𑀡𑁄 𑀘 𑀪𑀢𑀓𑁄, 𑀫𑀮𑁆𑀮𑀺𑀓𑀸 𑀘 𑀤𑁂𑀯𑀻, 𑀕𑁄𑀧𑀸𑀮𑀫𑀸𑀢𑀸 𑀘 𑀤𑁂𑀯𑀻, 𑀲𑀼𑀧𑁆𑀧𑀺𑀬𑀸 𑀘 𑀉𑀧𑀸𑀲𑀺𑀓𑀸, 𑀧𑀼𑀡𑁆𑀡𑀸 𑀘 𑀤𑀸𑀲𑀻𑀢𑀺 𑀇𑀫𑁂 𑀲𑀢𑁆𑀢 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑁂𑀤𑀦𑀻𑀬𑀸 𑀲𑀢𑁆𑀢𑀸, 𑀓𑀺𑀢𑁆𑀢𑀺 𑀘 𑀇𑀫𑁂𑀲𑀁 𑀅𑀩𑁆𑀪𑀼𑀕𑁆𑀕𑀢𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀽’’𑀢𑀺.

‘‘𑀅𑀧𑀭𑁂𑀧𑀺 𑀲𑀼𑀬𑁆𑀬𑀦𑁆𑀢𑀺 𑀦𑀼 𑀔𑁄 𑀅𑀢𑀻𑀢𑁂 𑀫𑀸𑀦𑀼𑀲𑀓𑁂𑀦𑁂𑀯 𑀲𑀭𑀻𑀭𑀤𑁂𑀳𑁂𑀦 𑀢𑀺𑀤𑀲𑀪𑀯𑀦𑀁 𑀕𑀢𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀦𑁆𑀢𑀻’’𑀢𑀺. ‘‘𑀓𑁂 𑀘 𑀢𑁂, 𑀫𑀳𑀸𑀭𑀸𑀚𑀸’’𑀢𑀺? ‘‘𑀕𑀼𑀢𑁆𑀢𑀺𑀮𑁄 𑀘 𑀕𑀦𑁆𑀥𑀩𑁆𑀩𑁄, 𑀲𑀸𑀥𑀻𑀦𑁄 𑀘 𑀭𑀸𑀚𑀸, 𑀦𑀺𑀫𑀺 𑀘 𑀭𑀸𑀚𑀸, 𑀫𑀦𑁆𑀥𑀸𑀢𑀸 𑀘 𑀭𑀸𑀚𑀸𑀢𑀺 𑀇𑀫𑁂 𑀘𑀢𑀼𑀭𑁄 𑀚𑀦𑀸 𑀲𑀼𑀬𑁆𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀦𑀼𑀲𑀓𑁂𑀦 𑀲𑀭𑀻𑀭𑀤𑁂𑀳𑁂𑀦 𑀢𑀺𑀤𑀲𑀪𑀯𑀦𑀁 𑀕𑀢𑀸’’𑀢𑀺. ‘‘𑀲𑀼𑀘𑀺𑀭𑀫𑁆𑀧𑀺 𑀓𑀢𑀁 𑀲𑀼𑀬𑁆𑀬𑀢𑀺 𑀲𑀼𑀓𑀢𑀤𑀼𑀓𑁆𑀓𑀝𑀦𑁆𑀢𑀺? 𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, 𑀅𑀢𑀻𑀢𑁂 𑀯𑀸 𑀅𑀤𑁆𑀥𑀸𑀦𑁂 𑀯𑀢𑁆𑀢𑀫𑀸𑀦𑁂 𑀯𑀸 𑀅𑀤𑁆𑀥𑀸𑀦𑁂 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀅𑀢𑁆𑀣𑀺 𑀫𑁂, 𑀫𑀳𑀸𑀭𑀸𑀚, 𑀆𑀕𑀫𑁄 𑀅𑀥𑀺𑀕𑀫𑁄 𑀧𑀭𑀺𑀬𑀢𑁆𑀢𑀺 𑀲𑀯𑀦𑀁 𑀲𑀺𑀓𑁆𑀔𑀸𑀩𑀮𑀁 𑀲𑀼𑀲𑁆𑀲𑀽𑀲𑀸 𑀧𑀭𑀺𑀧𑀼𑀘𑁆𑀙𑀸 𑀆𑀘𑀭𑀺𑀬𑀼𑀧𑀸𑀲𑀦𑀁, 𑀫𑀬𑀸𑀧𑀺 𑀦 𑀲𑀼𑀢𑀧𑀼𑀩𑁆𑀩𑀁 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸’𑀢𑀺 𑀞𑀧𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀭𑀸𑀚𑀯𑀲𑀪𑀲𑁆𑀲 𑀤𑀸𑀦𑀯𑀭𑀁. 𑀪𑀕𑀯𑀢𑁄 𑀘, 𑀫𑀳𑀸𑀭𑀸𑀚, 𑀓𑀲𑁆𑀲𑀧𑀲𑁆𑀲, 𑀪𑀕𑀯𑀢𑁄 𑀘 𑀲𑀓𑁆𑀬𑀫𑀼𑀦𑀺𑀦𑁄𑀢𑀺 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀦𑁆𑀢𑀭𑁂 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸 𑀯𑀲𑁆𑀲𑀓𑁄𑀝𑀺𑀬𑁄 𑀅𑀢𑀺𑀓𑁆𑀓𑀦𑁆𑀢𑀸, 𑀢𑀢𑁆𑀣𑀧𑀺 𑀫𑁂 𑀲𑀯𑀦𑀁 𑀦𑀢𑁆𑀣𑀺 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸’𑀢𑀺. 𑀦, 𑀫𑀳𑀸𑀭𑀸𑀚, 𑀢𑀸𑀯𑀢𑀓𑁂𑀦 𑀯𑀻𑀭𑀺𑀬𑁂𑀦 𑀢𑀸𑀯𑀢𑀓𑁂𑀦 𑀧𑀭𑀓𑁆𑀓𑀫𑁂𑀦 𑀫𑀳𑀸𑀧𑀣𑀯𑀻 𑀓𑀫𑁆𑀧𑀢𑀺, 𑀕𑀼𑀡𑀪𑀸𑀭𑀪𑀭𑀺𑀢𑀸, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑁄𑀘𑁂𑀬𑁆𑀬𑀓𑀺𑀭𑀺𑀬𑀕𑀼𑀡𑀪𑀸𑀭𑀪𑀭𑀺𑀢𑀸 𑀥𑀸𑀭𑁂𑀢𑀼𑀁 𑀦 𑀯𑀺𑀲𑀳𑀦𑁆𑀢𑀻 𑀫𑀳𑀸𑀧𑀣𑀯𑀻 𑀘𑀮𑀢𑀺 𑀓𑀫𑁆𑀧𑀢𑀺 𑀧𑀯𑁂𑀥𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀓𑀝𑀲𑁆𑀲 𑀅𑀢𑀺𑀪𑀸𑀭𑀪𑀭𑀺𑀢𑀲𑁆𑀲 𑀦𑀸𑀪𑀺𑀬𑁄 𑀘 𑀦𑁂𑀫𑀺𑀬𑁄 𑀘 𑀨𑀮𑀦𑁆𑀢𑀺 𑀅𑀓𑁆𑀔𑁄 𑀪𑀺𑀚𑁆𑀚𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑁄𑀘𑁂𑀬𑁆𑀬𑀓𑀺𑀭𑀺𑀬𑀕𑀼𑀡𑀪𑀸𑀭𑀪𑀭𑀺𑀢𑀸 𑀫𑀳𑀸𑀧𑀣𑀯𑀻 𑀥𑀸𑀭𑁂𑀢𑀼𑀁 𑀦 𑀯𑀺𑀲𑀳𑀦𑁆𑀢𑀻 𑀘𑀮𑀢𑀺 𑀓𑀫𑁆𑀧𑀢𑀺 𑀧𑀯𑁂𑀥𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀕𑀕𑀦𑀁 𑀅𑀦𑀺𑀮𑀚𑀮𑀯𑁂𑀕𑀲𑀜𑁆𑀙𑀸𑀤𑀺𑀢𑀁 𑀉𑀲𑁆𑀲𑀦𑁆𑀦𑀚𑀮𑀪𑀸𑀭𑀪𑀭𑀺𑀢𑀁 𑀅𑀢𑀺𑀯𑀸𑀢𑁂𑀦 𑀨𑀼𑀝𑀺𑀢𑀢𑁆𑀢𑀸 𑀦𑀤𑀢𑀺 𑀭𑀯𑀢𑀺 𑀕𑀴𑀕𑀴𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻 𑀭𑀜𑁆𑀜𑁄 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀦𑀩𑀮𑀯𑀺𑀧𑀼𑀮𑀉𑀲𑁆𑀲𑀦𑁆𑀦𑀪𑀸𑀭𑀪𑀭𑀺𑀢𑀸 𑀥𑀸𑀭𑁂𑀢𑀼𑀁 𑀦 𑀯𑀺𑀲𑀳𑀦𑁆𑀢𑀻 𑀘𑀮𑀢𑀺 𑀓𑀫𑁆𑀧𑀢𑀺 𑀧𑀯𑁂𑀥𑀢𑀺. 𑀦 𑀳𑀺, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀘𑀺𑀢𑁆𑀢𑀁 𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀤𑁄𑀲𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀫𑁄𑀳𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀫𑀸𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀓𑀺𑀮𑁂𑀲𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀯𑀺𑀢𑀓𑁆𑀓𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀅𑀭𑀢𑀺𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀤𑀸𑀦𑀯𑀲𑁂𑀦 𑀩𑀳𑀼𑀮𑀁 𑀧𑀯𑀢𑁆𑀢𑀢𑀺 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀬𑀸𑀘𑀓𑀸 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀬𑀸𑀘𑀓𑀸 𑀬𑀣𑀸𑀓𑀸𑀫𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀫𑀦𑀸 𑀪𑀯𑁂𑀬𑁆𑀬𑀼’𑀦𑁆𑀢𑀺 𑀲𑀢𑀢𑀁 𑀲𑀫𑀺𑀢𑀁 𑀤𑀸𑀦𑀁 𑀧𑀢𑀺 𑀫𑀸𑀦𑀲𑀁 𑀞𑀧𑀺𑀢𑀁 𑀳𑁄𑀢𑀺. 𑀭𑀜𑁆𑀜𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀲𑀢𑀢𑀁 𑀲𑀫𑀺𑀢𑀁 𑀤𑀲𑀲𑀼 𑀞𑀸𑀦𑁂𑀲𑀼 𑀫𑀸𑀦𑀲𑀁 𑀞𑀧𑀺𑀢𑀁 𑀳𑁄𑀢𑀺 𑀤𑀫𑁂 𑀲𑀫𑁂 𑀔𑀦𑁆𑀢𑀺𑀬𑀁 𑀲𑀁𑀯𑀭𑁂 𑀬𑀫𑁂 𑀦𑀺𑀬𑀫𑁂 𑀅𑀓𑁆𑀓𑁄𑀥𑁂 𑀅𑀯𑀺𑀳𑀺𑀁𑀲𑀸𑀬𑀁 𑀲𑀘𑁆𑀘𑁂 𑀲𑁄𑀘𑁂𑀬𑁆𑀬𑁂. 𑀭𑀜𑁆𑀜𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀓𑀸𑀫𑁂𑀲𑀦𑀸 𑀧𑀳𑀻𑀦𑀸, 𑀪𑀯𑁂𑀲𑀦𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀬𑁂𑀯 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄, 𑀭𑀜𑁆𑀜𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀅𑀢𑁆𑀢𑀭𑀓𑁆𑀔𑀸 [𑀧𑀭𑀭𑀓𑁆𑀔𑀸𑀬 (𑀲𑀻. 𑀧𑀻.)] 𑀧𑀳𑀻𑀦𑀸, 𑀲𑀩𑁆𑀩𑀲𑀢𑁆𑀢𑀭𑀓𑁆𑀔𑀸𑀬 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 ‘𑀓𑀺𑀦𑁆𑀢𑀺 𑀇𑀫𑁂 𑀲𑀢𑁆𑀢𑀸 𑀲𑀫𑀕𑁆𑀕𑀸 𑀅𑀲𑁆𑀲𑀼 𑀅𑀭𑁄𑀕𑀸 𑀲𑀥𑀦𑀸 𑀤𑀻𑀖𑀸𑀬𑀼𑀓𑀸’𑀢𑀺 𑀩𑀳𑀼𑀮𑀁 𑀬𑁂𑀯 𑀫𑀸𑀦𑀲𑀁 𑀧𑀯𑀢𑁆𑀢𑀢𑀺. 𑀤𑀤𑀫𑀸𑀦𑁄 𑀘, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀢𑀁 𑀤𑀸𑀦𑀁 𑀦 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼 𑀤𑁂𑀢𑀺, 𑀦 𑀥𑀦𑀳𑁂𑀢𑀼 𑀤𑁂𑀢𑀺, 𑀦 𑀧𑀝𑀺𑀤𑀸𑀦𑀳𑁂𑀢𑀼 𑀤𑁂𑀢𑀺, 𑀦 𑀉𑀧𑀮𑀸𑀧𑀦𑀳𑁂𑀢𑀼 𑀤𑁂𑀢𑀺, 𑀦 𑀆𑀬𑀼𑀳𑁂𑀢𑀼 𑀤𑁂𑀢𑀺, 𑀦 𑀯𑀡𑁆𑀡𑀳𑁂𑀢𑀼 𑀤𑁂𑀢𑀺, 𑀦 𑀲𑀼𑀔𑀳𑁂𑀢𑀼 𑀤𑁂𑀢𑀺, 𑀦 𑀩𑀮𑀳𑁂𑀢𑀼 𑀤𑁂𑀢𑀺, 𑀦 𑀬𑀲𑀳𑁂𑀢𑀼 𑀤𑁂𑀢𑀺, 𑀦 𑀧𑀼𑀢𑁆𑀢𑀳𑁂𑀢𑀼 𑀤𑁂𑀢𑀺, 𑀦 𑀥𑀻𑀢𑀼𑀳𑁂𑀢𑀼 𑀤𑁂𑀢𑀺, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀳𑁂𑀢𑀼 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀭𑀢𑀦𑀲𑁆𑀲 𑀓𑀸𑀭𑀡𑀸 𑀏𑀯𑀭𑀽𑀧𑁂 𑀅𑀢𑀼𑀮𑀯𑀺𑀧𑀼𑀮𑀸𑀦𑀼𑀢𑁆𑀢𑀭𑁂 𑀤𑀸𑀦𑀯𑀭𑁂 𑀅𑀤𑀸𑀲𑀺, 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀘 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘‘𑀚𑀸𑀮𑀺𑀁 𑀓𑀡𑁆𑀳𑀸𑀚𑀺𑀦𑀁 𑀥𑀻𑀢𑀁, 𑀫𑀤𑁆𑀤𑀺𑀤𑁂𑀯𑀺𑀁 𑀧𑀢𑀺𑀩𑁆𑀩𑀢𑀁;

𑀘𑀚𑀫𑀸𑀦𑁄 𑀦 𑀘𑀺𑀦𑁆𑀢𑁂𑀲𑀺𑀁, 𑀩𑁄𑀥𑀺𑀬𑀸 𑀬𑁂𑀯 𑀓𑀸𑀭𑀡𑀸’𑀢𑀺.

‘‘𑀯𑁂𑀲𑁆𑀲𑀦𑁆𑀢𑀭𑁄, 𑀫𑀳𑀸𑀭𑀸𑀚, 𑀭𑀸𑀚𑀸 𑀅𑀓𑁆𑀓𑁄𑀥𑁂𑀦 𑀓𑁄𑀥𑀁 𑀚𑀺𑀦𑀸𑀢𑀺, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑀸𑀢𑀺, 𑀓𑀤𑀭𑀺𑀬𑀁 𑀤𑀸𑀦𑁂𑀦 𑀚𑀺𑀦𑀸𑀢𑀺, 𑀅𑀮𑀺𑀓𑀯𑀸𑀤𑀺𑀦𑀁 𑀲𑀘𑁆𑀘𑁂𑀦 𑀚𑀺𑀦𑀸𑀢𑀺, 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀓𑀼𑀲𑀮𑁂𑀦 𑀚𑀺𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀤𑀤𑀫𑀸𑀦𑀲𑁆𑀲 𑀥𑀫𑁆𑀫𑀸𑀦𑀼𑀕𑀢𑀲𑁆𑀲 𑀥𑀫𑁆𑀫𑀲𑀻𑀲𑀓𑀲𑁆𑀲 [𑀥𑀫𑁆𑀫𑀸𑀲𑀻𑀲𑀓𑀲𑁆𑀲 (𑀓.)] 𑀤𑀸𑀦𑀦𑀺𑀲𑁆𑀲𑀦𑁆𑀤𑀩𑀮𑀯 [𑀤𑀸𑀦𑀦𑀺𑀲𑁆𑀲𑀦𑁆𑀤𑀩𑀮 (𑀲𑀻. 𑀧𑀻.)] 𑀯𑀻𑀭𑀺𑀬𑀯𑀺𑀧𑀼𑀮𑀯𑀺𑀧𑁆𑀨𑀸𑀭𑁂𑀦 𑀳𑁂𑀝𑁆𑀞𑀸 𑀫𑀳𑀸𑀯𑀸𑀢𑀸 𑀲𑀜𑁆𑀘𑀮𑀦𑁆𑀢𑀺 𑀲𑀡𑀺𑀓𑀁 𑀲𑀡𑀺𑀓𑀁 𑀲𑀓𑀺𑀁 𑀲𑀓𑀺𑀁 𑀆𑀓𑀼𑀮𑀸𑀓𑀼𑀮𑀸 𑀯𑀸𑀬𑀦𑁆𑀢𑀺 𑀑𑀦𑀫𑀦𑁆𑀢𑀺 𑀉𑀦𑁆𑀦𑀫𑀦𑁆𑀢𑀺 𑀯𑀺𑀦𑀫𑀦𑁆𑀢𑀺, 𑀙𑀺𑀦𑁆𑀦𑀧𑀢𑁆𑀢𑀧𑀸𑀤𑀧𑀸 [𑀲𑀻𑀦𑁆𑀦𑀧𑁆𑀧𑀢𑁆𑀢𑀧𑀸𑀤𑀧𑀸 (𑀲𑀻.)] 𑀧𑀧𑀢𑀦𑁆𑀢𑀺, 𑀕𑀼𑀫𑁆𑀩𑀁 𑀕𑀼𑀫𑁆𑀩𑀁 𑀯𑀮𑀸𑀳𑀓𑀸 𑀕𑀕𑀦𑁂 𑀲𑀦𑁆𑀥𑀸𑀯𑀦𑁆𑀢𑀺, 𑀭𑀚𑁄𑀲𑀜𑁆𑀘𑀺𑀢𑀸 𑀯𑀸𑀢𑀸 𑀤𑀸𑀭𑀼𑀡𑀸 𑀳𑁄𑀦𑁆𑀢𑀺, 𑀕𑀕𑀦𑀁 𑀉𑀧𑁆𑀧𑀻𑀴𑀺𑀢𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀲𑀳𑀲𑀸 𑀥𑀫𑀥𑀫𑀸𑀬𑀦𑁆𑀢𑀺, 𑀫𑀳𑀸𑀪𑀻𑀫𑁄 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺, 𑀢𑁂𑀲𑀼 𑀯𑀸𑀢𑁂𑀲𑀼 𑀓𑀼𑀧𑀺𑀢𑁂𑀲𑀼 𑀉𑀤𑀓𑀁 𑀲𑀡𑀺𑀓𑀁 𑀲𑀡𑀺𑀓𑀁 𑀘𑀮𑀢𑀺, 𑀉𑀤𑀓𑁂 𑀘𑀮𑀺𑀢𑁂 𑀔𑀼𑀩𑁆𑀪𑀦𑁆𑀢𑀺 𑀫𑀘𑁆𑀙𑀓𑀘𑁆𑀙𑀧𑀸, 𑀬𑀫𑀓𑀬𑀫𑀓𑀸 𑀊𑀫𑀺𑀬𑁄 𑀚𑀸𑀬𑀦𑁆𑀢𑀺, 𑀚𑀮𑀘𑀭𑀸 𑀲𑀢𑁆𑀢𑀸 𑀢𑀲𑀦𑁆𑀢𑀺, 𑀚𑀮𑀯𑀻𑀘𑀺 𑀬𑀼𑀕𑀦𑀤𑁆𑀥𑁄 𑀯𑀢𑁆𑀢𑀢𑀺, 𑀯𑀻𑀘𑀺𑀦𑀸𑀤𑁄 𑀧𑀯𑀢𑁆𑀢𑀢𑀺, 𑀖𑁄𑀭𑀸 𑀩𑀼𑀩𑁆𑀩𑀼𑀴𑀸 [𑀧𑀼𑀩𑁆𑀩𑀼𑀴𑀸 (𑀓.)] 𑀉𑀝𑁆𑀞𑀳𑀦𑁆𑀢𑀺, 𑀨𑁂𑀡𑀫𑀸𑀮𑀸 𑀪𑀯𑀦𑁆𑀢𑀺, 𑀉𑀢𑁆𑀢𑀭𑀢𑀺 𑀫𑀳𑀸𑀲𑀫𑀼𑀤𑁆𑀤𑁄, 𑀤𑀺𑀲𑀸𑀯𑀺𑀤𑀺𑀲𑀁 𑀥𑀸𑀯𑀢𑀺 𑀉𑀤𑀓𑀁, 𑀉𑀤𑁆𑀥𑀁𑀲𑁄𑀢𑀧𑀝𑀺𑀲𑁄𑀢𑀫𑀼𑀔𑀸 𑀲𑀦𑁆𑀤𑀦𑁆𑀢𑀺 𑀲𑀮𑀺𑀮𑀥𑀸𑀭𑀸, 𑀢𑀲𑀦𑁆𑀢𑀺 𑀅𑀲𑀼𑀭𑀸 𑀕𑀭𑀼𑀴𑀸 𑀦𑀸𑀕𑀸 𑀬𑀓𑁆𑀔𑀸, 𑀉𑀩𑁆𑀩𑀺𑀚𑁆𑀚𑀦𑁆𑀢𑀺 ‘𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄, 𑀲𑀸𑀕𑀭𑁄 𑀯𑀺𑀧𑀭𑀺𑀯𑀢𑁆𑀢𑀢𑀻’𑀢𑀺, 𑀕𑀫𑀦𑀧𑀣𑀫𑁂𑀲𑀦𑁆𑀢𑀺 𑀪𑀻𑀢𑀘𑀺𑀢𑁆𑀢𑀸, 𑀔𑀼𑀪𑀺𑀢𑁂 𑀮𑀼𑀴𑀺𑀢𑁂 𑀚𑀮𑀥𑀸𑀭𑁂 𑀧𑀓𑀫𑁆𑀧𑀢𑀺 𑀫𑀳𑀸𑀧𑀣𑀯𑀻 𑀲𑀦𑀕𑀸 𑀲𑀲𑀸𑀕𑀭𑀸, 𑀧𑀭𑀺𑀯𑀢𑁆𑀢𑀢𑀺 𑀲𑀺𑀦𑁂𑀭𑀼𑀕𑀺𑀭𑀺 𑀓𑀽𑀝𑀲𑁂𑀮𑀲𑀺𑀔𑀭𑁄 𑀯𑀺𑀦𑀫𑀫𑀸𑀦𑁄 𑀳𑁄𑀢𑀺, 𑀯𑀺𑀫𑀦𑀸 𑀳𑁄𑀦𑁆𑀢𑀺 𑀅𑀳𑀺𑀦𑀓𑀼𑀮𑀩𑀺𑀴𑀸𑀭𑀓𑁄𑀝𑁆𑀞𑀼𑀓𑀲𑀽𑀓𑀭𑀫𑀺𑀕𑀧𑀓𑁆𑀔𑀺𑀦𑁄, 𑀭𑀼𑀤𑀦𑁆𑀢𑀺 𑀬𑀓𑁆𑀔𑀸 𑀅𑀧𑁆𑀧𑁂𑀲𑀓𑁆𑀔𑀸, 𑀳𑀲𑀦𑁆𑀢𑀺 𑀬𑀓𑁆𑀔𑀸 𑀫𑀳𑁂𑀲𑀓𑁆𑀔𑀸 𑀓𑀫𑁆𑀧𑀫𑀸𑀦𑀸𑀬 𑀫𑀳𑀸𑀧𑀣𑀯𑀺𑀬𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺 𑀫𑀳𑀸𑀧𑀭𑀺𑀬𑁄𑀕𑁂 𑀉𑀤𑁆𑀥𑀦𑀕𑀢𑁂 𑀉𑀤𑀓𑀲𑀫𑁆𑀧𑀼𑀡𑁆𑀡𑁂 𑀆𑀓𑀺𑀡𑁆𑀡𑀢𑀡𑁆𑀟𑀼𑀮𑁂 𑀳𑁂𑀝𑁆𑀞𑀢𑁄 𑀅𑀕𑁆𑀕𑀺 𑀚𑀮𑀫𑀸𑀦𑁄 𑀧𑀞𑀫𑀁 𑀢𑀸𑀯 𑀧𑀭𑀺𑀬𑁄𑀕𑀁 𑀲𑀦𑁆𑀢𑀸𑀧𑁂𑀢𑀺, 𑀧𑀭𑀺𑀬𑁄𑀕𑁄 𑀲𑀦𑁆𑀢𑀢𑁆𑀢𑁄 𑀉𑀤𑀓𑀁 𑀲𑀦𑁆𑀢𑀸𑀧𑁂𑀢𑀺, 𑀉𑀤𑀓𑀁 𑀲𑀦𑁆𑀢𑀢𑁆𑀢𑀁 𑀢𑀡𑁆𑀟𑀼𑀮𑀁 𑀲𑀦𑁆𑀢𑀸𑀧𑁂𑀢𑀺, 𑀢𑀡𑁆𑀟𑀼𑀮𑀁 𑀲𑀦𑁆𑀢𑀢𑁆𑀢𑀁 𑀉𑀫𑁆𑀫𑀼𑀚𑁆𑀚𑀢𑀺 𑀦𑀺𑀫𑀼𑀚𑁆𑀚𑀢𑀺, 𑀩𑀼𑀩𑁆𑀩𑀼𑀴𑀓𑀚𑀸𑀢𑀁 𑀳𑁄𑀢𑀺, 𑀨𑁂𑀡𑀫𑀸𑀮𑀸 𑀉𑀢𑁆𑀢𑀭𑀢𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀬𑀁 𑀮𑁄𑀓𑁂 𑀤𑀼𑀘𑁆𑀘𑀚𑀁, 𑀢𑀁 𑀘𑀚𑀺, 𑀢𑀲𑁆𑀲 𑀢𑀁 𑀤𑀼𑀘𑁆𑀘𑀚𑀁 𑀘𑀚𑀦𑁆𑀢𑀲𑁆𑀲 𑀤𑀸𑀦𑀲𑁆𑀲 𑀲𑀪𑀸𑀯𑀦𑀺𑀲𑁆𑀲𑀦𑁆𑀤𑁂𑀦 𑀳𑁂𑀝𑁆𑀞𑀸 𑀫𑀳𑀸𑀯𑀸𑀢𑀸 𑀥𑀸𑀭𑁂𑀢𑀼𑀁 𑀦 𑀯𑀺𑀲𑀳𑀦𑁆𑀢𑀸 𑀧𑀭𑀺𑀓𑀼𑀧𑁆𑀧𑀺𑀁𑀲𑀼 [𑀧𑀭𑀺𑀓𑀫𑁆𑀧𑀺𑀁𑀲𑀼 (𑀓.)], 𑀫𑀳𑀸𑀯𑀸𑀢𑁂𑀲𑀼 𑀧𑀭𑀺𑀓𑀼𑀧𑀺𑀢𑁂𑀲𑀼 [𑀧𑀭𑀺𑀔𑀼𑀩𑁆𑀪𑀺𑀢𑁂𑀲𑀼 (𑀲𑁆𑀬𑀸.)] 𑀉𑀤𑀓𑀁 𑀓𑀫𑁆𑀧𑀺, 𑀉𑀤𑀓𑁂 𑀓𑀫𑁆𑀧𑀺𑀢𑁂 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺, 𑀇𑀢𑀺 𑀢𑀤𑀸 𑀫𑀳𑀸𑀯𑀸𑀢𑀸 𑀘 𑀉𑀤𑀓𑀜𑁆𑀘 𑀫𑀳𑀸𑀧𑀣𑀯𑀻 𑀘𑀸𑀢𑀺 𑀇𑀫𑁂 𑀢𑀬𑁄 𑀏𑀓𑀫𑀦𑀸 𑀯𑀺𑀬 𑀅𑀳𑁂𑀲𑀼𑀁 𑀫𑀳𑀸𑀤𑀸𑀦𑀦𑀺𑀲𑁆𑀲𑀦𑁆𑀤𑁂𑀦 𑀯𑀺𑀧𑀼𑀮𑀩𑀮𑀯𑀻𑀭𑀺𑀬𑁂𑀦 𑀦𑀢𑁆𑀣𑁂𑀤𑀺𑀲𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑀲𑁆𑀲 𑀤𑀸𑀦𑀸𑀦𑀼𑀪𑀸𑀯𑁄, 𑀬𑀣𑀸 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀭𑀜𑁆𑀜𑁄 𑀫𑀳𑀸𑀤𑀸𑀦𑀸𑀦𑀼𑀪𑀸𑀯𑁄. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀺𑀬𑀸 𑀩𑀳𑀼𑀯𑀺𑀥𑀸 𑀫𑀡𑀬𑁄 𑀯𑀺𑀚𑁆𑀚𑀦𑁆𑀢𑀺. 𑀲𑁂𑀬𑁆𑀬𑀣𑀻𑀤𑀁, 𑀇𑀦𑁆𑀤𑀦𑀻𑀮𑁄 𑀫𑀳𑀸𑀦𑀻𑀮𑁄 𑀚𑁄𑀢𑀺𑀭𑀲𑁄 𑀯𑁂𑀴𑀼𑀭𑀺𑀬𑁄 𑀉𑀫𑁆𑀫𑀸𑀧𑀼𑀧𑁆𑀨𑁄 𑀲𑀺𑀭𑀻𑀲𑀧𑀼𑀧𑁆𑀨𑁄 𑀫𑀦𑁄𑀳𑀭𑁄 𑀲𑀽𑀭𑀺𑀬𑀓𑀦𑁆𑀢𑁄 𑀘𑀦𑁆𑀤𑀓𑀦𑁆𑀢𑁄 𑀯𑀚𑀺𑀭𑁄 𑀔𑀚𑁆𑀚𑁄𑀧𑀦𑀓𑁄 𑀨𑀼𑀲𑁆𑀲𑀭𑀸𑀕𑁄 𑀮𑁄𑀳𑀺𑀢𑀗𑁆𑀕𑁄 𑀫𑀲𑀸𑀭𑀕𑀮𑁆𑀮𑁄𑀢𑀺, 𑀏𑀢𑁂 𑀲𑀩𑁆𑀩𑁂 𑀅𑀢𑀺𑀓𑁆𑀓𑀫𑁆𑀫 𑀘𑀓𑁆𑀓𑀯𑀢𑁆𑀢𑀺𑀫𑀡𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀘𑀓𑁆𑀓𑀯𑀢𑁆𑀢𑀺𑀫𑀡𑀺, 𑀫𑀳𑀸𑀭𑀸𑀚, 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀑𑀪𑀸𑀲𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀁 𑀓𑀺𑀜𑁆𑀘𑀺 𑀫𑀳𑀺𑀬𑀸 𑀤𑀸𑀦𑀁 𑀯𑀺𑀚𑁆𑀚𑀢𑀺 𑀅𑀧𑀺 𑀅𑀲𑀤𑀺𑀲𑀤𑀸𑀦𑀁 𑀧𑀭𑀫𑀁, 𑀢𑀁 𑀲𑀩𑁆𑀩𑀁 𑀅𑀢𑀺𑀓𑁆𑀓𑀫𑁆𑀫 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀭𑀜𑁆𑀜𑁄 𑀫𑀳𑀸𑀤𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀫𑀳𑀸𑀤𑀸𑀦𑁂 𑀤𑀻𑀬𑀫𑀸𑀦𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺𑀢𑀸’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑀸𑀦𑀁, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑀸𑀦𑀁, 𑀬𑀁 𑀢𑀣𑀸𑀕𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀫𑀸𑀦𑁄 𑀅𑀲𑀫𑁄 𑀮𑁄𑀓𑁂𑀦 𑀏𑀯𑀁𑀔𑀦𑁆𑀢𑀺 𑀏𑀯𑀁𑀘𑀺𑀢𑁆𑀢𑁄 𑀏𑀯𑀁𑀅𑀥𑀺𑀫𑀼𑀢𑁆𑀢𑀺 𑀏𑀯𑀁𑀅𑀥𑀺𑀧𑁆𑀧𑀸𑀬𑁄, 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀭𑀓𑁆𑀓𑀫𑁄 𑀤𑀓𑁆𑀔𑀸𑀧𑀺𑀢𑁄, 𑀧𑀸𑀭𑀫𑀻 𑀘 𑀚𑀺𑀦𑀸𑀦𑀁 𑀪𑀺𑀬𑁆𑀬𑁄 𑀑𑀪𑀸𑀲𑀺𑀢𑀸, 𑀘𑀭𑀺𑀬𑀁 𑀘𑀭𑀢𑁄𑀧𑀺 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀲𑀤𑁂𑀯𑀓𑁂 𑀮𑁄𑀓𑁂 𑀲𑁂𑀝𑁆𑀞𑀪𑀸𑀯𑁄 𑀅𑀦𑀼𑀤𑀲𑁆𑀲𑀺𑀢𑁄. 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀣𑁄𑀫𑀺𑀢𑀁 𑀚𑀺𑀦𑀲𑀸𑀲𑀦𑀁, 𑀚𑁄𑀢𑀺𑀢𑀸 𑀚𑀺𑀦𑀧𑀸𑀭𑀫𑀻, 𑀙𑀺𑀦𑁆𑀦𑁄 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸𑀤𑀕𑀡𑁆𑀞𑀺, 𑀪𑀺𑀦𑁆𑀦𑁄 𑀧𑀭𑀸𑀧𑀯𑀸𑀤𑀓𑀼𑀫𑁆𑀪𑁄 [𑀕𑀼𑀫𑁆𑀩𑁄 𑀢𑀬𑀸 𑀯𑀺𑀤𑁆𑀥𑀁𑀲𑀺𑀢𑁄 (𑀲𑁆𑀬𑀸.)], 𑀧𑀜𑁆𑀳𑁄 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑀻𑀓𑀢𑁄, 𑀕𑀳𑀦𑀁 𑀅𑀕𑀳𑀦𑀁 𑀓𑀢𑀁, 𑀲𑀫𑁆𑀫𑀸 𑀮𑀤𑁆𑀥𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀦𑀺𑀩𑁆𑀩𑀸𑀳𑀦𑀁 [𑀦𑀺𑀩𑁆𑀩𑀸𑀬𑀦𑀁 (𑀓.)], 𑀏𑀯𑀫𑁂𑀢𑀁 𑀕𑀡𑀺𑀯𑀭𑀧𑀯𑀭 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀸’’𑀢𑀺.

𑀧𑀣𑀯𑀺𑀘𑀮𑀦𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀲𑀺𑀯𑀺𑀭𑀸𑀚𑀘𑀓𑁆𑀔𑀼𑀤𑀸𑀦𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀏𑀯𑀁 𑀪𑀡𑀣 ‘𑀲𑀺𑀯𑀺𑀭𑀸𑀚𑁂𑀦 𑀬𑀸𑀘𑀓𑀲𑁆𑀲 𑀘𑀓𑁆𑀔𑀽𑀦𑀺 𑀤𑀺𑀦𑁆𑀦𑀸𑀦𑀺, 𑀅𑀦𑁆𑀥𑀲𑁆𑀲 𑀲𑀢𑁄 𑀧𑀼𑀦 𑀤𑀺𑀩𑁆𑀩𑀘𑀓𑁆𑀔𑀽𑀦𑀺 𑀉𑀧𑁆𑀧𑀦𑁆𑀦𑀸𑀦𑀻’𑀢𑀺, 𑀏𑀢𑀫𑁆𑀧𑀺 𑀯𑀘𑀦𑀁 𑀲𑀓𑀲𑀝𑀁 𑀲𑀦𑀺𑀕𑁆𑀕𑀳𑀁 𑀲𑀤𑁄𑀲𑀁 ‘𑀳𑁂𑀢𑀼𑀲𑀫𑀼𑀕𑁆𑀖𑀸𑀢𑁂 𑀅𑀳𑁂𑀢𑀼𑀲𑁆𑀫𑀺𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀦𑀢𑁆𑀣𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁, 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀺𑀯𑀺𑀭𑀸𑀚𑁂𑀦 𑀬𑀸𑀘𑀓𑀲𑁆𑀲 𑀘𑀓𑁆𑀔𑀽𑀦𑀺 𑀤𑀺𑀦𑁆𑀦𑀸𑀦𑀺, 𑀢𑁂𑀦 𑀳𑀺 ‘𑀧𑀼𑀦 𑀤𑀺𑀩𑁆𑀩𑀘𑀓𑁆𑀔𑀽𑀦𑀺 𑀉𑀧𑁆𑀧𑀦𑁆𑀦𑀸𑀦𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸; 𑀬𑀤𑀺 𑀤𑀺𑀩𑁆𑀩𑀘𑀓𑁆𑀔𑀽𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑁂𑀦 𑀳𑀺 ‘𑀲𑀺𑀯𑀺𑀭𑀸𑀚𑁂𑀦 𑀬𑀸𑀘𑀓𑀲𑁆𑀲 𑀘𑀓𑁆𑀔𑀽𑀦𑀺 𑀤𑀺𑀦𑁆𑀦𑀸𑀦𑀻’𑀢𑀺 𑀬𑀁 𑀯𑀘𑀦𑀁, 𑀢𑀫𑁆𑀧𑀺 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀕𑀡𑁆𑀞𑀺𑀢𑁄𑀧𑀺 𑀕𑀡𑁆𑀞𑀺𑀢𑀭𑁄 𑀯𑁂𑀞𑀢𑁄𑀧𑀺 𑀯𑁂𑀞𑀢𑀭𑁄 𑀕𑀳𑀦𑀢𑁄𑀧𑀺 𑀕𑀳𑀦𑀢𑀭𑁄, 𑀲𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀢𑀢𑁆𑀣 𑀙𑀦𑁆𑀤𑀫𑀪𑀺𑀚𑀦𑁂𑀳𑀺 𑀦𑀺𑀩𑁆𑀩𑀸𑀳𑀦𑀸𑀬 𑀧𑀭𑀯𑀸𑀤𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺.

‘‘𑀤𑀺𑀦𑁆𑀦𑀸𑀦𑀺, 𑀫𑀳𑀸𑀭𑀸𑀚, 𑀲𑀺𑀯𑀺𑀭𑀸𑀚𑁂𑀦 𑀬𑀸𑀘𑀓𑀲𑁆𑀲 𑀘𑀓𑁆𑀔𑀽𑀦𑀺, 𑀢𑀢𑁆𑀣 𑀫𑀸 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀳𑀺, 𑀧𑀼𑀦 𑀤𑀺𑀩𑁆𑀩𑀸𑀦𑀺 𑀘 𑀘𑀓𑁆𑀔𑀽𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀢𑁆𑀣𑀸𑀧𑀺 𑀫𑀸 𑀯𑀺𑀫𑀢𑀺𑀁 𑀚𑀦𑁂𑀳𑀻’’𑀢𑀺. ‘‘𑀅𑀧𑀺 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀳𑁂𑀢𑀼𑀲𑀫𑀼𑀕𑁆𑀖𑀸𑀢𑁂 𑀅𑀳𑁂𑀢𑀼𑀲𑁆𑀫𑀺𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀏𑀢𑁆𑀣 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀳𑁂𑀢𑀼𑀲𑀫𑀼𑀕𑁆𑀖𑀸𑀢𑁂 𑀅𑀳𑁂𑀢𑀼𑀲𑁆𑀫𑀺𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀺, 𑀇𑀗𑁆𑀖 𑀢𑀸𑀯 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺?

‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀮𑁄𑀓𑁂 𑀲𑀘𑁆𑀘𑀁 𑀦𑀸𑀫, 𑀬𑁂𑀦 𑀲𑀘𑁆𑀘𑀯𑀸𑀤𑀺𑀦𑁄 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀺 𑀮𑁄𑀓𑁂 𑀲𑀘𑁆𑀘𑀁 𑀦𑀸𑀫, 𑀲𑀘𑁆𑀘𑁂𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀘𑁆𑀘𑀯𑀸𑀤𑀺𑀦𑁄 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀤𑁂𑀯𑀁 𑀯𑀲𑁆𑀲𑀸𑀧𑁂𑀦𑁆𑀢𑀺, 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑀺, 𑀯𑀺𑀲𑀁 𑀧𑀝𑀺𑀳𑀦𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀯𑀺𑀯𑀺𑀥𑀁 𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀬𑀼𑀚𑁆𑀚𑀢𑀺 𑀲𑀫𑁂𑀢𑀺 𑀲𑀺𑀯𑀺𑀭𑀸𑀚𑀲𑁆𑀲 𑀲𑀘𑁆𑀘𑀩𑀮𑁂𑀦 𑀤𑀺𑀩𑁆𑀩𑀘𑀓𑁆𑀔𑀽𑀦𑀺 𑀉𑀧𑁆𑀧𑀦𑁆𑀦𑀸𑀦𑀻𑀢𑀺, 𑀲𑀘𑁆𑀘𑀩𑀮𑁂𑀦, 𑀫𑀳𑀸𑀭𑀸𑀚, 𑀅𑀯𑀢𑁆𑀣𑀼𑀲𑁆𑀫𑀺𑀁 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀺, 𑀲𑀘𑁆𑀘𑀁 𑀬𑁂𑀯 𑀢𑀢𑁆𑀣 𑀯𑀢𑁆𑀣𑀼 𑀪𑀯𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑀸𑀬.

‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀲𑀘𑁆𑀘𑀫𑀦𑀼𑀕𑀸𑀬𑀦𑁆𑀢𑀺 ‘𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀢𑀽’𑀢𑀺, 𑀢𑁂𑀲𑀁 𑀲𑀳 𑀲𑀘𑁆𑀘𑀫𑀦𑀼𑀕𑀻𑀢𑁂𑀦 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀆𑀓𑀸𑀲𑁂 𑀯𑀲𑁆𑀲𑀳𑁂𑀢𑀼 𑀲𑀦𑁆𑀦𑀺𑀘𑀺𑀢𑁄 ‘𑀬𑁂𑀦 𑀳𑁂𑀢𑀼𑀦𑀸 𑀫𑀳𑀸𑀫𑁂𑀖𑁄 𑀧𑀯𑀲𑁆𑀲𑀢𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀘𑁆𑀘𑀁 𑀬𑁂𑀯 𑀢𑀢𑁆𑀣 𑀳𑁂𑀢𑀼 𑀪𑀯𑀢𑀺 𑀫𑀳𑀢𑁄 𑀫𑁂𑀖𑀲𑁆𑀲 𑀧𑀯𑀲𑁆𑀲𑀦𑀸𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀢𑀲𑁆𑀲 𑀧𑀓𑀢𑀺𑀳𑁂𑀢𑀼, 𑀲𑀘𑁆𑀘𑀁 𑀬𑁂𑀯𑁂𑀢𑁆𑀣 𑀯𑀢𑁆𑀣𑀼 𑀪𑀯𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑀸𑀬𑀸𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀲𑀘𑁆𑀘𑀫𑀦𑀼𑀕𑀸𑀬𑀦𑁆𑀢𑀺 ‘𑀚𑀮𑀺𑀢𑀧𑀚𑁆𑀚𑀮𑀺𑀢𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀝𑀺𑀦𑀺𑀯𑀢𑁆𑀢𑀢𑀽’𑀢𑀺, 𑀢𑁂𑀲𑀁 𑀲𑀳 𑀲𑀘𑁆𑀘𑀫𑀦𑀼𑀕𑀻𑀢𑁂𑀦 𑀚𑀮𑀺𑀢𑀧𑀚𑁆𑀚𑀮𑀺𑀢𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀔𑀡𑁂𑀦 𑀧𑀝𑀺𑀦𑀺𑀯𑀢𑁆𑀢𑀢𑀺. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀢𑀲𑁆𑀫𑀺𑀁 𑀚𑀮𑀺𑀢𑀧𑀚𑁆𑀚𑀮𑀺𑀢𑁂 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀳𑁂𑀢𑀼 𑀲𑀦𑁆𑀦𑀺𑀘𑀺𑀢𑁄 ‘𑀬𑁂𑀦 𑀳𑁂𑀢𑀼𑀦𑀸 𑀚𑀮𑀺𑀢𑀧𑀚𑁆𑀚𑀮𑀺𑀢𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀔𑀡𑁂𑀦 𑀧𑀝𑀺𑀦𑀺𑀯𑀢𑁆𑀢𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀘𑁆𑀘𑀁 𑀬𑁂𑀯 𑀢𑀢𑁆𑀣 𑀯𑀢𑁆𑀣𑀼 𑀳𑁄𑀢𑀺 𑀢𑀲𑁆𑀲 𑀚𑀮𑀺𑀢𑀧𑀚𑁆𑀚𑀮𑀺𑀢𑀲𑁆𑀲 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑁆𑀲 𑀔𑀡𑁂𑀦 𑀧𑀝𑀺𑀦𑀺𑀯𑀢𑁆𑀢𑀦𑀸𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀢𑀲𑁆𑀲 𑀧𑀓𑀢𑀺𑀳𑁂𑀢𑀼, 𑀲𑀘𑁆𑀘𑀁 𑀬𑁂𑀯𑁂𑀢𑁆𑀣 𑀯𑀢𑁆𑀣𑀼 𑀪𑀯𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑀸𑀬𑀸𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀲𑀘𑁆𑀘𑀫𑀦𑀼𑀕𑀸𑀬𑀦𑁆𑀢𑀺 ‘𑀯𑀺𑀲𑀁 𑀳𑀮𑀸𑀳𑀮𑀁 𑀅𑀕𑀤𑀁 𑀪𑀯𑀢𑀽’𑀢𑀺. 𑀢𑁂𑀲𑀁 𑀲𑀳 𑀲𑀘𑁆𑀘𑀫𑀦𑀼𑀕𑀻𑀢𑁂𑀦 𑀯𑀺𑀲𑀁 𑀳𑀮𑀸𑀳𑀮𑀁 𑀔𑀡𑁂𑀦 𑀅𑀕𑀤𑀁 𑀪𑀯𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀢𑀲𑁆𑀫𑀺𑀁 𑀳𑀮𑀸𑀳𑀮𑀯𑀺𑀲𑁂 𑀳𑁂𑀢𑀼 𑀲𑀦𑁆𑀦𑀺𑀘𑀺𑀢𑁄 ‘𑀬𑁂𑀦 𑀳𑁂𑀢𑀼𑀦𑀸 𑀯𑀺𑀲𑀁 𑀳𑀮𑀸𑀳𑀮𑀁 𑀔𑀡𑁂𑀦 𑀅𑀕𑀤𑀁 𑀪𑀯𑀢𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀘𑁆𑀘𑀁 𑀬𑁂𑀯 𑀢𑀢𑁆𑀣 𑀳𑁂𑀢𑀼 𑀪𑀯𑀢𑀺 𑀯𑀺𑀲𑀲𑁆𑀲 𑀳𑀮𑀸𑀳𑀮𑀲𑁆𑀲 𑀔𑀡𑁂𑀦 𑀧𑀝𑀺𑀖𑀸𑀢𑀸𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑀺𑀦𑀸 𑀧𑀓𑀢𑀺𑀳𑁂𑀢𑀼𑀁 𑀲𑀘𑁆𑀘𑀁 𑀬𑁂𑀯𑁂𑀢𑁆𑀣 𑀯𑀢𑁆𑀣𑀼 𑀪𑀯𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑀸𑀬𑀸𑀢𑀺.

‘‘𑀘𑀢𑀼𑀦𑁆𑀦𑀫𑁆𑀧𑀺, 𑀫𑀳𑀸𑀭𑀸𑀚, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑁂𑀥𑀸𑀬 𑀦𑀢𑁆𑀣𑀜𑁆𑀜𑀁 𑀯𑀢𑁆𑀣𑀼, 𑀲𑀘𑁆𑀘𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺. 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀘𑀻𑀦𑀯𑀺𑀲𑀬𑁂 𑀘𑀻𑀦𑀭𑀸𑀚𑀸, 𑀲𑁄 𑀫𑀳𑀸𑀲𑀫𑀼𑀤𑁆𑀤𑁂 𑀓𑀻𑀴𑀺𑀢𑀼𑀓𑀸𑀫𑁄 [𑀩𑀮𑀺𑀁 𑀓𑀸𑀢𑀼𑀓𑀸𑀫𑁄 (𑀲𑀻. 𑀧𑀻.)] 𑀘𑀢𑀼𑀫𑀸𑀲𑁂 𑀘𑀢𑀼𑀫𑀸𑀲𑁂 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀲𑀳 𑀭𑀣𑁂𑀦 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀁 𑀧𑀯𑀺𑀲𑀢𑀺, 𑀢𑀲𑁆𑀲 𑀭𑀣𑀲𑀻𑀲𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀫𑀳𑀸𑀯𑀸𑀭𑀺𑀓𑁆𑀔𑀦𑁆𑀥𑁄 𑀧𑀝𑀺𑀓𑁆𑀓𑀫𑀢𑀺, 𑀦𑀺𑀓𑁆𑀔𑀦𑁆𑀢𑀲𑁆𑀲 𑀧𑀼𑀦 𑀑𑀢𑁆𑀣𑀭𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀫𑀳𑀸𑀲𑀫𑀼𑀤𑁆𑀤𑁄 𑀲𑀤𑁂𑀯𑀫𑀦𑀼𑀲𑁆𑀲𑁂𑀦𑀧𑀺 𑀮𑁄𑀓𑁂𑀦 𑀧𑀓𑀢𑀺𑀓𑀸𑀬𑀩𑀮𑁂𑀦 𑀲𑀓𑁆𑀓𑀸 𑀧𑀝𑀺𑀓𑁆𑀓𑀫𑀸𑀧𑁂𑀢𑀼’’𑀦𑁆𑀢𑀺? ‘‘𑀅𑀢𑀺𑀧𑀭𑀺𑀢𑁆𑀢𑀓𑁂𑀧𑀺, 𑀪𑀦𑁆𑀢𑁂, 𑀢𑀴𑀸𑀓𑁂 𑀉𑀤𑀓𑀁 𑀦 𑀲𑀓𑁆𑀓𑀸 𑀲𑀤𑁂𑀯𑀫𑀦𑀼𑀲𑁆𑀲𑁂𑀦𑀧𑀺 𑀮𑁄𑀓𑁂𑀦 𑀧𑀓𑀢𑀺𑀓𑀸𑀬𑀩𑀮𑁂𑀦 𑀧𑀝𑀺𑀓𑁆𑀓𑀫𑀸𑀧𑁂𑀢𑀼𑀁, 𑀓𑀺𑀁 𑀧𑀦 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓’’𑀦𑁆𑀢𑀺? ‘‘𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀲𑀘𑁆𑀘𑀩𑀮𑀁 𑀜𑀸𑀢𑀩𑁆𑀩𑀁 ‘𑀦𑀢𑁆𑀣𑀺 𑀢𑀁 𑀞𑀸𑀦𑀁, 𑀬𑀁 𑀲𑀘𑁆𑀘𑁂𑀦 𑀦 𑀧𑀢𑁆𑀢𑀩𑁆𑀩’𑀦𑁆𑀢𑀺.

‘‘𑀦𑀕𑀭𑁂, 𑀫𑀳𑀸𑀭𑀸𑀚, 𑀧𑀸𑀝𑀮𑀺𑀧𑀼𑀢𑁆𑀢𑁂 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀲𑀦𑁂𑀕𑀫𑀚𑀸𑀦𑀧𑀤𑀅𑀫𑀘𑁆𑀘𑀪𑀝𑀩𑀮𑀫𑀳𑀸𑀫𑀢𑁆𑀢𑁂𑀳𑀺 𑀧𑀭𑀺𑀯𑀼𑀢𑁄 𑀕𑀗𑁆𑀕𑀁 𑀦𑀤𑀺𑀁 [𑀕𑀗𑁆𑀕𑀸𑀦𑀤𑀺𑀁 (𑀲𑀻.)] 𑀦𑀯𑀲𑀮𑀺𑀮𑀲𑀫𑁆𑀧𑀼𑀡𑁆𑀡𑀁 𑀲𑀫𑀢𑀺𑀢𑁆𑀣𑀺𑀓𑀁 𑀲𑀫𑁆𑀪𑀭𑀺𑀢𑀁 𑀧𑀜𑁆𑀘𑀬𑁄𑀚𑀦𑀲𑀢𑀸𑀬𑀸𑀫𑀁 𑀬𑁄𑀚𑀦𑀧𑀼𑀣𑀼𑀮𑀁 𑀲𑀦𑁆𑀤𑀫𑀸𑀦𑀁 𑀤𑀺𑀲𑁆𑀯𑀸 𑀅𑀫𑀘𑁆𑀘𑁂 𑀏𑀯𑀫𑀸𑀳 ‘𑀅𑀢𑁆𑀣𑀺 𑀓𑁄𑀘𑀺, 𑀪𑀡𑁂, 𑀲𑀫𑀢𑁆𑀣𑁄, 𑀬𑁄 𑀇𑀫𑀁 𑀫𑀳𑀸𑀕𑀗𑁆𑀕𑀁 𑀧𑀝𑀺𑀲𑁄𑀢𑀁 𑀲𑀦𑁆𑀤𑀸𑀧𑁂𑀢𑀼’𑀦𑁆𑀢𑀺. 𑀅𑀫𑀘𑁆𑀘𑀸 𑀆𑀳𑀁𑀲𑀼 ‘𑀤𑀼𑀓𑁆𑀓𑀭𑀁 𑀤𑁂𑀯𑀸’𑀢𑀺.

‘‘𑀢𑀲𑁆𑀫𑀺𑀁 𑀬𑁂𑀯 𑀕𑀗𑁆𑀕𑀸𑀓𑀽𑀮𑁂 𑀞𑀺𑀢𑀸 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀕𑀡𑀺𑀓𑀸 𑀅𑀲𑁆𑀲𑁄𑀲𑀺 𑀭𑀜𑁆𑀜𑀸 𑀓𑀺𑀭 𑀏𑀯𑀁 𑀯𑀼𑀢𑁆𑀢𑀁 ‘𑀲𑀓𑁆𑀓𑀸 𑀦𑀼 𑀔𑁄 𑀇𑀫𑀁 𑀫𑀳𑀸𑀕𑀗𑁆𑀕𑀁 𑀧𑀝𑀺𑀲𑁄𑀢𑀁 𑀲𑀦𑁆𑀤𑀸𑀧𑁂𑀢𑀼’𑀦𑁆𑀢𑀺, 𑀲𑀸 𑀏𑀯𑀫𑀸𑀳 ‘𑀅𑀳𑀜𑁆𑀳𑀺 𑀦𑀕𑀭𑁂 𑀧𑀸𑀝𑀮𑀺𑀧𑀼𑀢𑁆𑀢𑁂 𑀕𑀡𑀺𑀓𑀸 𑀭𑀽𑀧𑀽𑀧𑀚𑀻𑀯𑀺𑀦𑀻 𑀅𑀦𑁆𑀢𑀺𑀫𑀚𑀻𑀯𑀺𑀓𑀸, 𑀫𑀫 𑀢𑀸𑀯 𑀭𑀸𑀚𑀸 𑀲𑀘𑁆𑀘𑀓𑀺𑀭𑀺𑀬𑀁 𑀧𑀲𑁆𑀲𑀢𑀽’𑀢𑀺. 𑀅𑀣 𑀲𑀸 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺, 𑀲𑀳 𑀢𑀲𑁆𑀲𑀸 𑀲𑀘𑁆𑀘𑀓𑀺𑀭𑀺𑀬𑀸𑀬 𑀔𑀡𑁂𑀦 𑀲𑀸 𑀫𑀳𑀸𑀕𑀗𑁆𑀕𑀸 𑀕𑀴𑀕𑀴𑀸𑀬𑀦𑁆𑀢𑀻 𑀧𑀝𑀺𑀲𑁄𑀢𑀁 𑀲𑀦𑁆𑀤𑀺𑀢𑁆𑀣 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀧𑀲𑁆𑀲𑀢𑁄.

‘‘𑀅𑀣 𑀭𑀸𑀚𑀸 𑀕𑀗𑁆𑀕𑀸𑀬 𑀆𑀯𑀝𑁆𑀝𑀊𑀫𑀺𑀯𑁂𑀕𑀚𑀦𑀺𑀢𑀁 𑀳𑀮𑀸𑀳𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑀺𑀫𑁆𑀳𑀺𑀢𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁄 𑀅𑀫𑀘𑁆𑀘𑁂 𑀏𑀯𑀫𑀸𑀳 ‘𑀓𑀺𑀲𑁆𑀲𑀸𑀬𑀁, 𑀪𑀡𑁂, 𑀫𑀳𑀸𑀕𑀗𑁆𑀕𑀸 𑀧𑀝𑀺𑀲𑁄𑀢𑀁 𑀲𑀦𑁆𑀤𑀢𑀻’𑀢𑀺? ‘𑀩𑀦𑁆𑀥𑀼𑀫𑀢𑀻, 𑀫𑀳𑀸𑀭𑀸𑀚, 𑀕𑀡𑀺𑀓𑀸 𑀢𑀯 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺, 𑀢𑀲𑁆𑀲𑀸 𑀲𑀘𑁆𑀘𑀓𑀺𑀭𑀺𑀬𑀸𑀬 𑀫𑀳𑀸𑀕𑀗𑁆𑀕𑀸 𑀉𑀤𑁆𑀥𑀁𑀫𑀼𑀔𑀸 𑀲𑀦𑁆𑀤𑀢𑀻’𑀢𑀺.

‘‘𑀅𑀣 𑀲𑀁𑀯𑀺𑀕𑁆𑀕𑀳𑀤𑀬𑁄 𑀭𑀸𑀚𑀸 𑀢𑀼𑀭𑀺𑀢𑀢𑀼𑀭𑀺𑀢𑁄 𑀲𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀕𑀡𑀺𑀓𑀁 𑀧𑀼𑀘𑁆𑀙𑀺 ‘𑀲𑀘𑁆𑀘𑀁 𑀓𑀺𑀭, 𑀚𑁂, 𑀢𑀬𑀸 𑀲𑀘𑁆𑀘𑀓𑀺𑀭𑀺𑀬𑀸𑀬 𑀅𑀬𑀁 𑀕𑀗𑁆𑀕𑀸 𑀧𑀝𑀺𑀲𑁄𑀢𑀁 𑀲𑀦𑁆𑀤𑀸𑀧𑀺𑀢𑀸’𑀢𑀺? ‘𑀆𑀫 𑀤𑁂𑀯𑀸’𑀢𑀺. 𑀭𑀸𑀚𑀸 𑀆𑀳 ‘𑀓𑀺𑀁 𑀢𑁂 𑀢𑀢𑁆𑀣 𑀩𑀮𑀁 𑀅𑀢𑁆𑀣𑀺, 𑀓𑁄 𑀯𑀸 𑀢𑁂 𑀯𑀘𑀦𑀁 𑀆𑀤𑀺𑀬𑀢𑀺 𑀅𑀦𑀼𑀫𑁆𑀫𑀢𑁆𑀢𑁄, 𑀓𑁂𑀦 𑀢𑁆𑀯𑀁 𑀩𑀮𑁂𑀦 𑀇𑀫𑀁 𑀫𑀳𑀸𑀕𑀗𑁆𑀕𑀁 𑀧𑀝𑀺𑀲𑁄𑀢𑀁 𑀲𑀦𑁆𑀤𑀸𑀧𑁂𑀲𑀻’𑀢𑀺? 𑀲𑀸 𑀆𑀳 ‘𑀲𑀘𑁆𑀘𑀩𑀮𑁂𑀦𑀸𑀳𑀁, 𑀫𑀳𑀸𑀭𑀸𑀚, 𑀇𑀫𑀁 𑀫𑀳𑀸𑀕𑀗𑁆𑀕𑀁 𑀧𑀝𑀺𑀲𑁄𑀢𑀁 𑀲𑀦𑁆𑀤𑀸𑀧𑁂𑀲𑀺’𑀦𑁆𑀢𑀺. 𑀭𑀸𑀚𑀸 𑀆𑀳 ‘𑀓𑀺𑀁 𑀢𑁂 𑀲𑀘𑁆𑀘𑀩𑀮𑀁 𑀅𑀢𑁆𑀣𑀺 𑀘𑁄𑀭𑀺𑀬𑀸 𑀥𑀼𑀢𑁆𑀢𑀺𑀬𑀸 𑀅𑀲𑀢𑀺𑀬𑀸 𑀙𑀺𑀦𑁆𑀦𑀺𑀓𑀸𑀬 𑀧𑀸𑀧𑀺𑀬𑀸 𑀪𑀺𑀦𑁆𑀦𑀲𑀻𑀮𑀸𑀬 [𑀧𑀸𑀧𑀺𑀓𑀸𑀬 𑀪𑀺𑀦𑁆𑀦𑀲𑀻𑀫𑀸𑀬 (𑀲𑀻.)] 𑀳𑀺𑀭𑀺𑀅𑀢𑀺𑀓𑁆𑀓𑀦𑁆𑀢𑀺𑀓𑀸𑀬 𑀅𑀦𑁆𑀥𑀚𑀦𑀧𑀮𑁄𑀪𑀺𑀓𑀸𑀬𑀸’𑀢𑀺. ‘𑀲𑀘𑁆𑀘𑀁, 𑀫𑀳𑀸𑀭𑀸𑀚, 𑀢𑀸𑀤𑀺𑀲𑀺𑀓𑀸 𑀅𑀳𑀁, 𑀢𑀸𑀤𑀺𑀲𑀺𑀓𑀸𑀬𑀧𑀺 𑀫𑁂, 𑀫𑀳𑀸𑀭𑀸𑀚, 𑀲𑀘𑁆𑀘𑀓𑀺𑀭𑀺𑀬𑀸 𑀅𑀢𑁆𑀣𑀺, 𑀬𑀸𑀬𑀸𑀳𑀁 𑀇𑀘𑁆𑀙𑀫𑀸𑀦𑀸 𑀲𑀤𑁂𑀯𑀓𑀫𑁆𑀧𑀺 𑀮𑁄𑀓𑀁 𑀧𑀭𑀺𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀭𑀸𑀚𑀸 𑀆𑀳 ‘𑀓𑀢𑀫𑀸 𑀧𑀦 𑀲𑀸 𑀳𑁄𑀢𑀺 𑀲𑀘𑁆𑀘𑀓𑀺𑀭𑀺𑀬𑀸, 𑀇𑀗𑁆𑀖 𑀫𑀁 𑀲𑀸𑀯𑁂𑀳𑀻’𑀢𑀺. ‘𑀬𑁄 𑀫𑁂, 𑀫𑀳𑀸𑀭𑀸𑀚, 𑀥𑀦𑀁 𑀤𑁂𑀢𑀺 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺, 𑀢𑁂𑀲𑀁 𑀲𑀫𑀓𑀁 𑀬𑁂𑀯 𑀉𑀧𑀝𑁆𑀞𑀳𑀸𑀫𑀺, ‘‘𑀔𑀢𑁆𑀢𑀺𑀬𑁄’’𑀢𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺, ‘‘𑀲𑀼𑀤𑁆𑀤𑁄’’𑀢𑀺 𑀅𑀢𑀺𑀫𑀜𑁆𑀜𑀦𑀸 [𑀅𑀢𑀺𑀫𑀜𑁆𑀜𑀫𑀸𑀦𑁄 (𑀓.)] 𑀦𑀢𑁆𑀣𑀺, 𑀅𑀦𑀼𑀦𑀬𑀧𑁆𑀧𑀝𑀺𑀖𑀯𑀺𑀧𑁆𑀧𑀫𑀼𑀢𑁆𑀢𑀸 𑀥𑀦𑀲𑁆𑀲𑀸𑀫𑀺𑀓𑀁 𑀧𑀭𑀺𑀘𑀭𑀸𑀫𑀺, 𑀏𑀲𑀸 𑀫𑁂 𑀤𑁂𑀯 𑀲𑀘𑁆𑀘𑀓𑀺𑀭𑀺𑀬𑀸, 𑀬𑀸𑀬𑀸𑀳𑀁 𑀇𑀫𑀁 𑀫𑀳𑀸𑀕𑀗𑁆𑀕𑀁 𑀧𑀝𑀺𑀲𑁄𑀢𑀁 𑀲𑀦𑁆𑀤𑀸𑀧𑁂𑀲𑀺’𑀦𑁆𑀢𑀺.

‘‘𑀇𑀢𑀺𑀧𑀺, 𑀫𑀳𑀸𑀭𑀸𑀚, 𑀲𑀘𑁆𑀘𑁂 𑀞𑀺𑀢𑀸 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀦 𑀯𑀺𑀦𑁆𑀤𑀦𑁆𑀢𑀺. 𑀤𑀺𑀦𑁆𑀦𑀸𑀦𑀺 𑀘, 𑀫𑀳𑀸𑀭𑀸𑀚, 𑀲𑀺𑀯𑀺𑀭𑀸𑀚𑁂𑀦 𑀬𑀸𑀘𑀓𑀲𑁆𑀲 𑀘𑀓𑁆𑀔𑀽𑀦𑀺, 𑀤𑀺𑀩𑁆𑀩𑀘𑀓𑁆𑀔𑀽𑀦𑀺 𑀘 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀜𑁆𑀘 𑀲𑀘𑁆𑀘𑀓𑀺𑀭𑀺𑀬𑀸𑀬. 𑀬𑀁 𑀧𑀦 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 ‘𑀫𑀁𑀲𑀘𑀓𑁆𑀔𑀼𑀲𑁆𑀫𑀺𑀁 𑀦𑀝𑁆𑀞𑁂 𑀅𑀳𑁂𑀢𑀼𑀲𑁆𑀫𑀺𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀦𑀢𑁆𑀣𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄’𑀢𑀺. 𑀢𑀁 𑀪𑀸𑀯𑀦𑀸𑀫𑀬𑀁 𑀘𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀥𑀸𑀭𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀦𑀺𑀩𑁆𑀩𑁂𑀞𑀺𑀢𑁄 𑀧𑀜𑁆𑀳𑁄, 𑀲𑀼𑀦𑀺𑀤𑁆𑀤𑀺𑀝𑁆𑀞𑁄 𑀦𑀺𑀕𑁆𑀕𑀳𑁄, 𑀲𑀼𑀫𑀤𑁆𑀤𑀺𑀢𑀸 𑀧𑀭𑀯𑀸𑀤𑀸, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀲𑀺𑀯𑀺𑀭𑀸𑀚𑀘𑀓𑁆𑀔𑀼𑀤𑀸𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 [𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 (𑀫. 𑀦𑀺. 𑁧.𑁪𑁦𑁮)] 𑀳𑁄𑀢𑀺, 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’𑀢𑀺, 𑀅𑀲𑁂𑀲𑀯𑀘𑀦𑀫𑁂𑀢𑀁, 𑀦𑀺𑀲𑁆𑀲𑁂𑀲𑀯𑀘𑀦𑀫𑁂𑀢𑀁, 𑀦𑀺𑀧𑁆𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁, 𑀅𑀭𑀳𑀲𑁆𑀲𑀯𑀘𑀦𑀫𑁂𑀢𑀁, 𑀲𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀡𑀺𑀢𑀁, 𑀅𑀬𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀤𑀺𑀲𑁆𑀲𑀢𑀺, 𑀤𑀼𑀓𑀽𑀮𑁂𑀦 𑀢𑀸𑀧𑀲𑁂𑀦 𑀧𑀸𑀭𑀺𑀓𑀸𑀬 𑀢𑀸𑀧𑀲𑀺𑀬𑀸 𑀉𑀢𑀼𑀦𑀺𑀓𑀸𑀮𑁂 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺 𑀧𑀭𑀸𑀫𑀝𑁆𑀞𑀸, 𑀢𑀲𑁆𑀲 𑀢𑁂𑀦 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀲𑀸𑀫𑀓𑀼𑀫𑀸𑀭𑁄 𑀦𑀺𑀩𑁆𑀩𑀢𑁆𑀢𑁄. 𑀫𑀸𑀢𑀗𑁆𑀕𑁂𑀦𑀸𑀧𑀺 𑀇𑀲𑀺𑀦𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 𑀉𑀢𑀼𑀦𑀺𑀓𑀸𑀮𑁂 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺 𑀧𑀭𑀸𑀫𑀝𑁆𑀞𑀸, 𑀢𑀲𑁆𑀲 𑀢𑁂𑀦 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀫𑀡𑁆𑀟𑀩𑁆𑀬𑁄 𑀦𑀸𑀫 𑀫𑀸𑀡𑀯𑀓𑁄 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’𑀢𑀺. 𑀢𑁂𑀦 𑀳𑀺 𑀲𑀸𑀫𑁄 𑀘 𑀓𑀼𑀫𑀸𑀭𑁄 𑀫𑀡𑁆𑀟𑀩𑁆𑀬𑁄 𑀘 𑀫𑀸𑀡𑀯𑀓𑁄 𑀉𑀪𑁄𑀧𑀺 𑀢𑁂 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀦𑀺𑀩𑁆𑀩𑀢𑁆𑀢𑀸𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺, 𑀪𑀦𑁆𑀢𑁂, 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀲𑀸𑀫𑁄 𑀘 𑀓𑀼𑀫𑀸𑀭𑁄 𑀫𑀡𑁆𑀟𑀩𑁆𑀬𑁄 𑀘 𑀫𑀸𑀡𑀯𑀓𑁄 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀦𑀺𑀩𑁆𑀩𑀢𑁆𑀢𑀸’’𑀢𑀺, 𑀢𑁂𑀦 𑀳𑀺 ‘𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’𑀢𑀺 𑀬𑀁 𑀯𑀘𑀦𑀁, 𑀢𑀫𑁆𑀧𑀺 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀲𑀼𑀕𑀫𑁆𑀪𑀻𑀭𑁄 𑀲𑀼𑀦𑀺𑀧𑀼𑀡𑁄 𑀯𑀺𑀲𑀬𑁄 𑀩𑀼𑀤𑁆𑀥𑀺𑀫𑀦𑁆𑀢𑀸𑀦𑀁, 𑀲𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀙𑀺𑀦𑁆𑀤 𑀯𑀺𑀫𑀢𑀺𑀧𑀣𑀁, 𑀥𑀸𑀭𑁂𑀳𑀺 𑀜𑀸𑀡𑀯𑀭𑀧𑁆𑀧𑀚𑁆𑀚𑁄𑀢’’𑀦𑁆𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀏𑀯𑀁 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’𑀢𑀺. 𑀪𑀡𑀺𑀢𑀜𑁆𑀘 ‘𑀲𑀸𑀫𑁄 𑀘 𑀓𑀼𑀫𑀸𑀭𑁄 𑀫𑀡𑁆𑀟𑀩𑁆𑀬𑁄 𑀘 𑀫𑀸𑀡𑀯𑀓𑁄 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀦𑀺𑀩𑁆𑀩𑀢𑁆𑀢𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁂𑀦 𑀓𑀸𑀭𑀡𑁂𑀦 𑀧𑀜𑁆𑀳𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀳𑁄𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, 𑀲𑀁𑀓𑀺𑀘𑁆𑀘𑁄 𑀘 𑀓𑀼𑀫𑀸𑀭𑁄 𑀇𑀲𑀺𑀲𑀺𑀗𑁆𑀕𑁄 𑀘 𑀢𑀸𑀧𑀲𑁄 𑀣𑁂𑀭𑁄 𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 ‘𑀇𑀫𑀺𑀦𑀸 𑀦𑀸𑀫 𑀢𑁂 𑀦𑀺𑀩𑁆𑀩𑀢𑁆𑀢𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺, 𑀅𑀩𑁆𑀪𑀼𑀕𑁆𑀕𑀢𑀸 𑀢𑁂𑀲𑀁 𑀚𑀸𑀢𑀺, 𑀤𑁆𑀯𑁂 𑀫𑀺𑀕𑀥𑁂𑀦𑀼𑀬𑁄 𑀢𑀸𑀯 𑀉𑀢𑀼𑀦𑀺𑀓𑀸𑀮𑁂 𑀤𑁆𑀯𑀺𑀦𑁆𑀦𑀁 𑀢𑀸𑀧𑀲𑀸𑀦𑀁 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀲𑀲𑀫𑁆𑀪𑀯𑀁 𑀧𑀲𑁆𑀲𑀸𑀯𑀁 𑀧𑀺𑀯𑀺𑀁𑀲𑀼, 𑀢𑁂𑀦 𑀧𑀲𑁆𑀲𑀸𑀯𑀲𑀫𑁆𑀪𑀯𑁂𑀦 𑀲𑀁𑀓𑀺𑀘𑁆𑀘𑁄 𑀘 𑀓𑀼𑀫𑀸𑀭𑁄 𑀇𑀲𑀺𑀲𑀺𑀗𑁆𑀕𑁄 𑀘 𑀢𑀸𑀧𑀲𑁄 𑀦𑀺𑀩𑁆𑀩𑀢𑁆𑀢𑀸. 𑀣𑁂𑀭𑀲𑁆𑀲 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀕𑀢𑀲𑁆𑀲 𑀭𑀢𑁆𑀢𑀘𑀺𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀺𑀬𑀸 𑀅𑀗𑁆𑀕𑀚𑀸𑀢𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀲𑀫𑁆𑀪𑀯𑀁 𑀓𑀸𑀲𑀸𑀯𑁂 𑀫𑀼𑀘𑁆𑀘𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀺 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 ‘𑀕𑀘𑁆𑀙 𑀪𑀕𑀺𑀦𑀺, 𑀉𑀤𑀓𑀁 𑀆𑀳𑀭 𑀅𑀦𑁆𑀢𑀭𑀯𑀸𑀲𑀓𑀁 𑀥𑁄𑀯𑀺𑀲𑁆𑀲𑀸𑀫𑀻’𑀢𑀺. ‘𑀆𑀳𑀭𑀬𑁆𑀬 𑀅𑀳𑀫𑁂𑀯 𑀥𑁄𑀯𑀺𑀲𑁆𑀲𑀸𑀫𑀻’𑀢𑀺. 𑀢𑀢𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀉𑀢𑀼𑀦𑀺𑀲𑀫𑀬𑁂 𑀢𑀁 𑀲𑀫𑁆𑀪𑀯𑀁 𑀏𑀓𑀤𑁂𑀲𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀺, 𑀏𑀓𑀤𑁂𑀲𑀁 𑀅𑀗𑁆𑀕𑀚𑀸𑀢𑁂 𑀧𑀓𑁆𑀔𑀺𑀧𑀺, 𑀢𑁂𑀦 𑀣𑁂𑀭𑁄 𑀓𑀼𑀫𑀸𑀭𑀓𑀲𑁆𑀲𑀧𑁄 𑀦𑀺𑀩𑁆𑀩𑀢𑁆𑀢𑁄𑀢𑀺 𑀏𑀢𑀁 𑀚𑀦𑁄 𑀆𑀳𑀸’’𑀢𑀺.

‘‘𑀅𑀧𑀺 𑀦𑀼 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀲𑀤𑁆𑀤𑀳𑀲𑀺 𑀢𑀁 𑀯𑀘𑀦’’𑀦𑁆𑀢𑀺? ‘‘𑀆𑀫 𑀪𑀦𑁆𑀢𑁂, 𑀩𑀮𑀯𑀁 𑀢𑀢𑁆𑀣 𑀫𑀬𑀁 𑀓𑀸𑀭𑀡𑀁 𑀉𑀧𑀮𑀪𑀸𑀫, 𑀬𑁂𑀦 𑀫𑀬𑀁 𑀓𑀸𑀭𑀡𑁂𑀦 𑀲𑀤𑁆𑀤𑀳𑀸𑀫 ‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀸’’𑀢𑀺. ‘‘𑀓𑀺𑀁 𑀧𑀦𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡’’𑀦𑁆𑀢𑀺? ‘‘𑀲𑀼𑀧𑀭𑀺𑀓𑀫𑁆𑀫𑀓𑀢𑁂, 𑀪𑀦𑁆𑀢𑁂, 𑀓𑀮𑀮𑁂 𑀩𑀻𑀚𑀁 𑀦𑀺𑀧𑀢𑀺𑀢𑁆𑀯𑀸 𑀔𑀺𑀧𑁆𑀧𑀁 𑀲𑀁𑀯𑀺𑀭𑀼𑀳𑀢𑀻’’𑀢𑀺. ‘‘𑀆𑀫 𑀫𑀳𑀸𑀭𑀸𑀚𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀲𑀸 𑀪𑀺𑀓𑁆𑀔𑀼𑀦𑀻 𑀉𑀢𑀼𑀦𑀻 𑀲𑀫𑀸𑀦𑀸 𑀲𑀡𑁆𑀞𑀺𑀢𑁂 𑀓𑀮𑀮𑁂 𑀭𑀼𑀳𑀺𑀭𑁂 𑀧𑀘𑁆𑀙𑀺𑀦𑁆𑀦𑀯𑁂𑀕𑁂 𑀞𑀺𑀢𑀸𑀬 𑀥𑀸𑀢𑀼𑀬𑀸 𑀢𑀁 𑀲𑀫𑁆𑀪𑀯𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀓𑀮𑀮𑁂 𑀧𑀓𑁆𑀔𑀺𑀧𑀺, 𑀢𑁂𑀦 𑀢𑀲𑁆𑀲𑀸 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺, 𑀏𑀯𑀁 𑀢𑀢𑁆𑀣 𑀓𑀸𑀭𑀡𑀁 𑀧𑀘𑁆𑀘𑁂𑀫 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀬𑀸’’𑀢𑀺. ‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀺, 𑀬𑁄𑀦𑀺𑀧𑁆𑀧𑀯𑁂𑀲𑁂𑀦 𑀕𑀩𑁆𑀪𑁄 𑀲𑀫𑁆𑀪𑀯𑀢𑀻𑀢𑀺. 𑀲𑀫𑁆𑀧𑀝𑀺𑀘𑁆𑀙𑀲𑀺 𑀧𑀦, 𑀢𑁆𑀯𑀁 𑀫𑀳𑀸𑀭𑀸𑀚, 𑀣𑁂𑀭𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀕𑀩𑁆𑀪𑀸𑀯𑀓𑁆𑀓𑀫𑀦’’𑀦𑁆𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀧𑀘𑁆𑀘𑀸𑀕𑀢𑁄𑀲𑀺 𑀫𑀫 𑀯𑀺𑀲𑀬𑀁, 𑀏𑀓𑀯𑀺𑀥𑁂𑀦𑀧𑀺 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀁 𑀓𑀣𑀬𑀦𑁆𑀢𑁄 𑀫𑀫𑀸𑀦𑀼𑀩𑀮𑀁 𑀪𑀯𑀺𑀲𑁆𑀲𑀲𑀺, 𑀅𑀣 𑀬𑀸 𑀧𑀦 𑀢𑀸 𑀤𑁆𑀯𑁂 𑀫𑀺𑀕𑀥𑁂𑀦𑀼𑀬𑁄 𑀧𑀲𑁆𑀲𑀸𑀯𑀁 𑀧𑀺𑀯𑀺𑀢𑁆𑀯𑀸 𑀕𑀩𑁆𑀪𑀁 𑀧𑀝𑀺𑀮𑀪𑀺𑀁𑀲𑀼, 𑀢𑀸𑀲𑀁 𑀢𑁆𑀯𑀁 𑀲𑀤𑁆𑀤𑀳𑀲𑀺 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀫𑀦’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀬𑀁 𑀓𑀺𑀜𑁆𑀘𑀺 𑀪𑀼𑀢𑁆𑀢𑀁 𑀧𑀻𑀢𑀁 𑀔𑀸𑀬𑀺𑀢𑀁 𑀮𑁂𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀓𑀮𑀮𑀁 𑀑𑀲𑀭𑀢𑀺, 𑀞𑀸𑀦𑀕𑀢𑀁 𑀯𑀼𑀟𑁆𑀠𑀺𑀫𑀸𑀧𑀚𑁆𑀚𑀢𑀺. 𑀬𑀣𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀸 𑀓𑀸𑀘𑀺 𑀲𑀭𑀺𑀢𑀸 𑀦𑀸𑀫, 𑀲𑀩𑁆𑀩𑀸 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀑𑀲𑀭𑀦𑁆𑀢𑀺, 𑀞𑀸𑀦𑀕𑀢𑀸 𑀯𑀼𑀟𑁆𑀠𑀺𑀫𑀸𑀧𑀚𑁆𑀚𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀓𑀺𑀜𑁆𑀘𑀺 𑀪𑀼𑀢𑁆𑀢𑀁 𑀧𑀻𑀢𑀁 𑀔𑀸𑀬𑀺𑀢𑀁 𑀮𑁂𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀓𑀮𑀮𑀁 𑀑𑀲𑀭𑀢𑀺, 𑀞𑀸𑀦𑀕𑀢𑀁 𑀯𑀼𑀟𑁆𑀠𑀺𑀫𑀸𑀧𑀚𑁆𑀚𑀢𑀺, 𑀢𑁂𑀦𑀸𑀳𑀁 𑀓𑀸𑀭𑀡𑁂𑀦 𑀲𑀤𑁆𑀤𑀳𑀸𑀫𑀺 𑀫𑀼𑀔𑀕𑀢𑁂𑀦𑀧𑀺 𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀕𑀸𑀴𑁆𑀳𑀢𑀭𑀁 𑀉𑀧𑀕𑀢𑁄𑀲𑀺 𑀫𑀫 𑀯𑀺𑀲𑀬𑀁, 𑀫𑀼𑀔𑀧𑀸𑀦𑁂𑀦𑀧𑀺 𑀤𑁆𑀯𑀬𑀲𑀦𑁆𑀦𑀺𑀧𑀸𑀢𑁄 𑀪𑀯𑀢𑀺. 𑀲𑀁𑀓𑀺𑀘𑁆𑀘𑀲𑁆𑀲 𑀘, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑀲𑁆𑀲 𑀇𑀲𑀺𑀲𑀺𑀗𑁆𑀕𑀲𑁆𑀲 𑀘 𑀢𑀸𑀧𑀲𑀲𑁆𑀲 𑀣𑁂𑀭𑀲𑁆𑀲 𑀘 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀕𑀩𑁆𑀪𑀸𑀯𑀓𑁆𑀓𑀫𑀦𑀁 𑀲𑀫𑁆𑀧𑀝𑀺𑀘𑁆𑀙𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀦𑁆𑀦𑀺𑀧𑀸𑀢𑁄 𑀑𑀲𑀭𑀢𑀻’’𑀢𑀺.

‘‘𑀲𑀸𑀫𑁄𑀧𑀺, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑁄 𑀫𑀡𑁆𑀟𑀩𑁆𑀬𑁄𑀧𑀺 𑀫𑀸𑀡𑀯𑀓𑁄 𑀢𑀻𑀲𑀼 𑀲𑀦𑁆𑀦𑀺𑀧𑀸𑀢𑁂𑀲𑀼 𑀅𑀦𑁆𑀢𑁄𑀕𑀥𑀸, 𑀏𑀓𑀭𑀲𑀸 𑀬𑁂𑀯 𑀧𑀼𑀭𑀺𑀫𑁂𑀦, 𑀢𑀢𑁆𑀣 𑀓𑀸𑀭𑀡𑀁 𑀯𑀓𑁆𑀔𑀸𑀫𑀺. 𑀤𑀼𑀓𑀽𑀮𑁄 𑀘, 𑀫𑀳𑀸𑀭𑀸𑀚, 𑀢𑀸𑀧𑀲𑁄 𑀧𑀸𑀭𑀺𑀓𑀸 𑀘 𑀢𑀸𑀧𑀲𑀻 𑀉𑀪𑁄𑀧𑀺 𑀢𑁂 𑀅𑀭𑀜𑁆𑀜𑀯𑀸𑀲𑀸 𑀅𑀳𑁂𑀲𑀼𑀁 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀸 𑀉𑀢𑁆𑀢𑀫𑀢𑁆𑀣𑀕𑀯𑁂𑀲𑀓𑀸, 𑀢𑀧𑀢𑁂𑀚𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀁 𑀲𑀦𑁆𑀢𑀸𑀧𑁂𑀲𑀼𑀁. 𑀢𑁂𑀲𑀁 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀢𑀺. 𑀲𑁄 𑀢𑁂𑀲𑀁 𑀕𑀭𑀼𑀓𑀢𑀫𑁂𑀢𑁆𑀢𑀢𑀸𑀬 𑀉𑀧𑀥𑀸𑀭𑁂𑀦𑁆𑀢𑁄 𑀅𑀤𑁆𑀤𑀲 𑀅𑀦𑀸𑀕𑀢𑀫𑀤𑁆𑀥𑀸𑀦𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀘𑀓𑁆𑀔𑀽𑀦𑀁 𑀅𑀦𑁆𑀢𑀭𑀥𑀸𑀦𑀁, 𑀤𑀺𑀲𑁆𑀯𑀸 𑀢𑁂 𑀏𑀯𑀫𑀸𑀳 ‘𑀏𑀓𑀁 𑀫𑁂, 𑀪𑁄𑀦𑁆𑀢𑁄, 𑀯𑀘𑀦𑀁 𑀓𑀭𑁄𑀣, 𑀲𑀸𑀥𑀼 𑀏𑀓𑀁 𑀧𑀼𑀢𑁆𑀢𑀁 𑀚𑀦𑁂𑀬𑁆𑀬𑀸𑀣, 𑀲𑁄 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑁄 𑀪𑀯𑀺𑀲𑁆𑀲𑀢𑀺 𑀆𑀮𑀫𑁆𑀩𑀦𑁄 𑀘𑀸’𑀢𑀺. ‘𑀅𑀮𑀁, 𑀓𑁄𑀲𑀺𑀬, 𑀫𑀸 𑀏𑀯𑀁 𑀪𑀡𑀻’𑀢𑀺. 𑀢𑁂 𑀢𑀲𑁆𑀲 𑀢𑀁 𑀯𑀘𑀦𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀦𑀼𑀓𑀫𑁆𑀧𑀓𑁄 𑀅𑀢𑁆𑀣𑀓𑀸𑀫𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀢𑁂 𑀏𑀯𑀫𑀸𑀳 ‘𑀏𑀓𑀁 𑀫𑁂, 𑀪𑁄𑀦𑁆𑀢𑁄, 𑀯𑀘𑀦𑀁 𑀓𑀭𑁄𑀣, 𑀲𑀸𑀥𑀼 𑀏𑀓𑀁 𑀧𑀼𑀢𑁆𑀢𑀁 𑀚𑀦𑁂𑀬𑁆𑀬𑀸𑀣, 𑀲𑁄 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑁄 𑀪𑀯𑀺𑀲𑁆𑀲𑀢𑀺 𑀆𑀮𑀫𑁆𑀩𑀦𑁄 𑀘𑀸’𑀢𑀺. 𑀢𑀢𑀺𑀬𑀫𑁆𑀧𑀺 𑀢𑁂 𑀆𑀳𑀁𑀲𑀼 ‘𑀅𑀮𑀁, 𑀓𑁄𑀲𑀺𑀬, 𑀫𑀸 𑀢𑁆𑀯𑀁 𑀔𑁄 𑀅𑀫𑁆𑀳𑁂 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀳𑀺, 𑀓𑀤𑀸𑀬𑀁 𑀓𑀸𑀬𑁄 𑀦 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀪𑀺𑀚𑁆𑀚𑀢𑀼 𑀅𑀬𑀁 𑀓𑀸𑀬𑁄 𑀪𑁂𑀤𑀦𑀥𑀫𑁆𑀫𑁄, 𑀪𑀺𑀚𑁆𑀚𑀦𑁆𑀢𑀺𑀬𑀸𑀧𑀺 𑀥𑀭𑀡𑀺𑀬𑀸 𑀧𑀢𑀦𑁆𑀢𑁂𑀧𑀺 𑀲𑁂𑀮𑀲𑀺𑀔𑀭𑁂 𑀨𑀮𑀦𑁆𑀢𑁂𑀧𑀺 𑀆𑀓𑀸𑀲𑁂 𑀧𑀢𑀦𑁆𑀢𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀦𑁂𑀯 𑀫𑀬𑀁 𑀮𑁄𑀓𑀥𑀫𑁆𑀫𑁂𑀳𑀺 𑀫𑀺𑀲𑁆𑀲𑀬𑀺𑀲𑁆𑀲𑀸𑀫, 𑀫𑀸 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀲𑀫𑁆𑀫𑀼𑀔𑀪𑀸𑀯𑀁 𑀉𑀧𑀕𑀘𑁆𑀙, 𑀉𑀧𑀕𑀢𑀲𑁆𑀲 𑀢𑁂 𑀏𑀲𑁄 𑀯𑀺𑀲𑁆𑀲𑀸𑀲𑁄, 𑀅𑀦𑀢𑁆𑀣𑀘𑀭𑁄 𑀢𑁆𑀯𑀁 𑀫𑀜𑁆𑀜𑁂’𑀢𑀺.

𑀢𑀢𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂𑀲𑀁 𑀫𑀦𑀁 𑀅𑀮𑀪𑀫𑀸𑀦𑁄 𑀕𑀭𑀼𑀓𑀢𑁄 𑀧𑀜𑁆𑀚𑀮𑀺𑀓𑁄 𑀧𑀼𑀦 𑀬𑀸𑀘𑀺 ‘𑀬𑀤𑀺 𑀫𑁂 𑀯𑀘𑀦𑀁 𑀦 𑀉𑀲𑁆𑀲𑀳𑀣 𑀓𑀸𑀢𑀼𑀁, 𑀬𑀤𑀸 𑀢𑀸𑀧𑀲𑀻 𑀉𑀢𑀼𑀦𑀻 𑀳𑁄𑀢𑀺 𑀧𑀼𑀧𑁆𑀨𑀯𑀢𑀻, 𑀢𑀤𑀸 𑀢𑁆𑀯𑀁, 𑀪𑀦𑁆𑀢𑁂, 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺𑀁 𑀧𑀭𑀸𑀫𑀲𑁂𑀬𑁆𑀬𑀸𑀲𑀺, 𑀢𑁂𑀦 𑀲𑀸 𑀕𑀩𑁆𑀪𑀁 𑀮𑀘𑁆𑀙𑀢𑀺, 𑀲𑀦𑁆𑀦𑀺𑀧𑀸𑀢𑁄 𑀬𑁂𑀯𑁂𑀲 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑀸’𑀢𑀺. ‘𑀲𑀓𑁆𑀓𑁄𑀫𑀳𑀁, 𑀓𑁄𑀲𑀺𑀬, 𑀢𑀁 𑀯𑀘𑀦𑀁 𑀓𑀸𑀢𑀼𑀁, 𑀦 𑀢𑀸𑀯𑀢𑀓𑁂𑀦 𑀅𑀫𑁆𑀳𑀸𑀓𑀁 𑀢𑀧𑁄 𑀪𑀺𑀚𑁆𑀚𑀢𑀺, 𑀳𑁄𑀢𑀽’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀢𑀸𑀬 𑀘 𑀧𑀦 𑀯𑁂𑀮𑀸𑀬 𑀤𑁂𑀯𑀪𑀯𑀦𑁂 𑀅𑀢𑁆𑀣𑀺 𑀤𑁂𑀯𑀧𑀼𑀢𑁆𑀢𑁄 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑁄 𑀔𑀻𑀡𑀸𑀬𑀼𑀓𑁄 𑀆𑀬𑀼𑀓𑁆𑀔𑀬𑀧𑁆𑀧𑀢𑁆𑀢𑁄 𑀬𑀤𑀺𑀘𑁆𑀙𑀓𑀁 𑀲𑀫𑀢𑁆𑀣𑁄 𑀑𑀓𑁆𑀓𑀫𑀺𑀢𑀼𑀁 𑀅𑀧𑀺 𑀘𑀓𑁆𑀓𑀯𑀢𑁆𑀢𑀺𑀓𑀼𑀮𑁂𑀧𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 ‘𑀏𑀳𑀺 𑀔𑁄, 𑀫𑀸𑀭𑀺𑀲, 𑀲𑀼𑀧𑀪𑀸𑀢𑁄 𑀢𑁂 𑀤𑀺𑀯𑀲𑁄, 𑀅𑀢𑁆𑀣𑀲𑀺𑀤𑁆𑀥𑀺 𑀉𑀧𑀕𑀢𑀸, 𑀬𑀫𑀳𑀁 𑀢𑁂 𑀉𑀧𑀝𑁆𑀞𑀸𑀦𑀫𑀸𑀕𑀫𑀺𑀁, 𑀭𑀫𑀡𑀻𑀬𑁂 𑀢𑁂 𑀑𑀓𑀸𑀲𑁂 𑀯𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀧𑀢𑀺𑀭𑀽𑀧𑁂 𑀓𑀼𑀮𑁂 𑀧𑀝𑀺𑀲𑀦𑁆𑀥𑀺 𑀪𑀯𑀺𑀲𑁆𑀲𑀢𑀺, 𑀲𑀼𑀦𑁆𑀤𑀭𑁂𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀯𑀟𑁆𑀠𑁂𑀢𑀩𑁆𑀩𑁄, 𑀏𑀳𑀺 𑀫𑁂 𑀯𑀘𑀦𑀁 𑀓𑀭𑁄𑀳𑀻’𑀢𑀺 𑀬𑀸𑀘𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺 𑀲𑀺𑀭𑀲𑀺 𑀧𑀜𑁆𑀚𑀮𑀺𑀓𑀢𑁄.

𑀢𑀢𑁄 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀏𑀯𑀫𑀸𑀳 ‘𑀓𑀢𑀫𑀁 𑀢𑀁, 𑀫𑀸𑀭𑀺𑀲, 𑀓𑀼𑀮𑀁, 𑀬𑀁 𑀢𑁆𑀯𑀁 𑀅𑀪𑀺𑀓𑁆𑀔𑀡𑀁 𑀓𑀺𑀢𑁆𑀢𑀬𑀲𑀺 𑀧𑀼𑀦𑀧𑁆𑀧𑀼𑀦’𑀦𑁆𑀢𑀺. ‘𑀤𑀼𑀓𑀽𑀮𑁄 𑀘 𑀢𑀸𑀧𑀲𑁄 𑀧𑀸𑀭𑀺𑀓𑀸 𑀘 𑀢𑀸𑀧𑀲𑀻’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀲𑀫𑁆𑀧𑀝𑀺𑀘𑁆𑀙𑀺 ‘𑀲𑀸𑀥𑀼, 𑀫𑀸𑀭𑀺𑀲, 𑀬𑁄 𑀢𑀯 𑀙𑀦𑁆𑀤𑁄, 𑀲𑁄 𑀳𑁄𑀢𑀼, 𑀆𑀓𑀗𑁆𑀔𑀫𑀸𑀦𑁄 𑀅𑀳𑀁, 𑀫𑀸𑀭𑀺𑀲, 𑀧𑀢𑁆𑀣𑀺𑀢𑁂 𑀓𑀼𑀮𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀁, 𑀓𑀺𑀫𑁆𑀳𑀺 𑀓𑀼𑀮𑁂 𑀉𑀧𑁆𑀧𑀚𑁆𑀚𑀸𑀫𑀺 𑀅𑀡𑁆𑀟𑀚𑁂 𑀯𑀸 𑀚𑀮𑀸𑀩𑀼𑀚𑁂 𑀯𑀸 𑀲𑀁𑀲𑁂𑀤𑀚𑁂 𑀯𑀸 𑀑𑀧𑀧𑀸𑀢𑀺𑀓𑁂 𑀯𑀸’𑀢𑀺? ‘𑀚𑀮𑀸𑀩𑀼𑀚𑀸𑀬, 𑀫𑀸𑀭𑀺𑀲, 𑀬𑁄𑀦𑀺𑀬𑀸 𑀉𑀧𑁆𑀧𑀚𑁆𑀚𑀸𑀳𑀻’𑀢𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀉𑀧𑁆𑀧𑀢𑁆𑀢𑀺𑀤𑀺𑀯𑀲𑀁 𑀯𑀺𑀕𑀡𑁂𑀢𑁆𑀯𑀸 𑀤𑀼𑀓𑀽𑀮𑀲𑁆𑀲 𑀢𑀸𑀧𑀲𑀲𑁆𑀲 𑀆𑀭𑁄𑀘𑁂𑀲𑀺 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀤𑀺𑀯𑀲𑁂 𑀢𑀸𑀧𑀲𑀻 𑀉𑀢𑀼𑀦𑀻 𑀪𑀯𑀺𑀲𑁆𑀲𑀢𑀺 𑀧𑀼𑀧𑁆𑀨𑀯𑀢𑀻, 𑀢𑀤𑀸 𑀢𑁆𑀯𑀁, 𑀪𑀦𑁆𑀢𑁂, 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺𑀁 𑀧𑀭𑀸𑀫𑀲𑁂𑀬𑁆𑀬𑀸𑀲𑀻’𑀢𑀺. 𑀢𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀤𑀺𑀯𑀲𑁂 𑀢𑀸𑀧𑀲𑀻 𑀘 𑀉𑀢𑀼𑀦𑀻 𑀧𑀼𑀧𑁆𑀨𑀯𑀢𑀻 𑀅𑀳𑁄𑀲𑀺, 𑀤𑁂𑀯𑀧𑀼𑀢𑁆𑀢𑁄 𑀘 𑀢𑀢𑁆𑀣𑀽𑀧𑀕𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀳𑁄𑀲𑀺, 𑀢𑀸𑀧𑀲𑁄 𑀘 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑀗𑁆𑀕𑀼𑀝𑁆𑀞𑁂𑀦 𑀢𑀸𑀧𑀲𑀺𑀬𑀸 𑀦𑀸𑀪𑀺𑀁 𑀧𑀭𑀸𑀫𑀲𑀺, 𑀇𑀢𑀺 𑀢𑁂 𑀢𑀬𑁄 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁, 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀢𑀸𑀧𑀲𑀺𑀬𑀸 𑀭𑀸𑀕𑁄 𑀉𑀤𑀧𑀸𑀤𑀺, 𑀲𑁄 𑀧𑀦𑀲𑁆𑀲𑀸 𑀭𑀸𑀕𑁄 𑀦𑀸𑀪𑀺𑀧𑀭𑀸𑀫𑀲𑀦𑀁 𑀧𑀝𑀺𑀘𑁆𑀘 𑀫𑀸 𑀢𑁆𑀯𑀁 𑀲𑀦𑁆𑀦𑀺𑀧𑀸𑀢𑀁 𑀅𑀚𑁆𑀛𑀸𑀘𑀸𑀭𑀫𑁂𑀯 𑀫𑀜𑁆𑀜𑀺, 𑀊𑀳𑀲𑀦𑀫𑁆𑀧𑀺 [𑀳𑀲𑀦𑀫𑁆𑀧𑀺 (𑀓.)] 𑀲𑀦𑁆𑀦𑀺𑀧𑀸𑀢𑁄, 𑀉𑀮𑁆𑀮𑀧𑀦𑀫𑁆𑀧𑀺 𑀲𑀦𑁆𑀦𑀺𑀧𑀸𑀢𑁄, 𑀉𑀧𑀦𑀺𑀚𑁆𑀛𑀸𑀬𑀦𑀫𑁆𑀧𑀺 𑀲𑀦𑁆𑀦𑀺𑀧𑀸𑀢𑁄, 𑀧𑀼𑀩𑁆𑀩𑀪𑀸𑀕𑀪𑀸𑀯𑀢𑁄 𑀭𑀸𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀫𑀲𑀦𑁂𑀦 𑀲𑀦𑁆𑀦𑀺𑀧𑀸𑀢𑁄 𑀚𑀸𑀬𑀢𑀺, 𑀲𑀦𑁆𑀦𑀺𑀧𑀸𑀢𑀸 𑀑𑀓𑁆𑀓𑀫𑀦𑀁 𑀳𑁄𑀢𑀻𑀢𑀺.

‘‘𑀅𑀦𑀚𑁆𑀛𑀸𑀘𑀸𑀭𑁂𑀧𑀺, 𑀫𑀳𑀸𑀭𑀸𑀚, 𑀧𑀭𑀸𑀫𑀲𑀦𑁂𑀦 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀅𑀕𑁆𑀕𑀺 𑀚𑀮𑀫𑀸𑀦𑁄 𑀅𑀧𑀭𑀸𑀫𑀲𑀦𑁄𑀧𑀺 𑀉𑀧𑀕𑀢𑀲𑁆𑀲 𑀲𑀻𑀢𑀁 𑀩𑁆𑀬𑀧𑀳𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀦𑀚𑁆𑀛𑀸𑀘𑀸𑀭𑁂𑀧𑀺 𑀧𑀭𑀸𑀫𑀲𑀦𑁂𑀦 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺.

‘‘𑀘𑀢𑀼𑀦𑁆𑀦𑀁, 𑀫𑀳𑀸𑀭𑀸𑀚, 𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺 𑀓𑀫𑁆𑀫𑀯𑀲𑁂𑀦 𑀬𑁄𑀦𑀺𑀯𑀲𑁂𑀦 𑀓𑀼𑀮𑀯𑀲𑁂𑀦 𑀆𑀬𑀸𑀘𑀦𑀯𑀲𑁂𑀦, 𑀅𑀧𑀺 𑀘 𑀲𑀩𑁆𑀩𑁂𑀧𑁂𑀢𑁂 𑀲𑀢𑁆𑀢𑀸 𑀓𑀫𑁆𑀫𑀲𑀫𑁆𑀪𑀯𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸.

‘‘𑀓𑀣𑀁, 𑀫𑀳𑀸𑀭𑀸𑀚, 𑀓𑀫𑁆𑀫𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺? 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀸, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀬𑀤𑀺𑀘𑁆𑀙𑀓𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀤𑁂𑀯𑁂𑀲𑀼 𑀯𑀸 𑀅𑀡𑁆𑀟𑀚𑀸𑀬 𑀯𑀸 𑀬𑁄𑀦𑀺𑀬𑀸 𑀚𑀮𑀸𑀩𑀼𑀚𑀸𑀬 𑀯𑀸 𑀬𑁄𑀦𑀺𑀬𑀸 𑀲𑀁𑀲𑁂𑀤𑀚𑀸𑀬 𑀯𑀸 𑀬𑁄𑀦𑀺𑀬𑀸 𑀑𑀧𑀧𑀸𑀢𑀺𑀓𑀸𑀬 𑀯𑀸 𑀬𑁄𑀦𑀺𑀬𑀸. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑁄 𑀧𑀳𑀽𑀢𑀜𑀸𑀢𑀺𑀧𑀓𑁆𑀔𑁄 𑀤𑀸𑀲𑀺𑀁 𑀯𑀸 𑀤𑀸𑀲𑀁 𑀯𑀸 𑀔𑁂𑀢𑁆𑀢𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀚𑀦𑀧𑀤𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀅𑀪𑀺𑀧𑀢𑁆𑀣𑀺𑀢𑀁, 𑀬𑀤𑀺𑀘𑁆𑀙𑀓𑀁 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀫𑁆𑀧𑀺 𑀥𑀦𑀁 𑀤𑀢𑁆𑀯𑀸 𑀓𑀺𑀡𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀸 𑀲𑀢𑁆𑀢𑀸 𑀬𑀤𑀺𑀘𑁆𑀙𑀓𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀤𑁂𑀯𑁂𑀲𑀼 𑀯𑀸 𑀅𑀡𑁆𑀟𑀚𑀸𑀬 𑀯𑀸 𑀬𑁄𑀦𑀺𑀬𑀸 𑀚𑀮𑀸𑀩𑀼𑀚𑀸𑀬 𑀯𑀸 𑀬𑁄𑀦𑀺𑀬𑀸 𑀲𑀁𑀲𑁂𑀤𑀚𑀬 𑀯𑀸 𑀬𑁄𑀦𑀺𑀬𑀸 𑀑𑀧𑀧𑀸𑀢𑀺𑀓𑀸𑀬 𑀯𑀸 𑀬𑁄𑀦𑀺𑀬𑀸. 𑀏𑀯𑀁 𑀓𑀫𑁆𑀫𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺.

‘‘𑀓𑀣𑀁 𑀬𑁄𑀦𑀺𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺? 𑀓𑀼𑀓𑁆𑀓𑀼𑀝𑀸𑀦𑀁, 𑀫𑀳𑀸𑀭𑀸𑀚, 𑀯𑀸𑀢𑁂𑀦 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀩𑀮𑀸𑀓𑀸𑀦𑀁 𑀫𑁂𑀖𑀲𑀤𑁆𑀤𑁂𑀦 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀲𑀩𑁆𑀩𑁂𑀧𑀺 𑀤𑁂𑀯𑀸 𑀅𑀕𑀩𑁆𑀪𑀲𑁂𑀬𑁆𑀬𑀓𑀸 𑀲𑀢𑁆𑀢𑀸 𑀬𑁂𑀯, 𑀢𑁂𑀲𑀁 𑀦𑀸𑀦𑀸𑀯𑀡𑁆𑀡𑁂𑀦 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀦𑀸𑀦𑀸𑀯𑀡𑁆𑀡𑁂𑀦 𑀫𑀳𑀺𑀬𑀸 𑀘𑀭𑀦𑁆𑀢𑀺, 𑀓𑁂𑀘𑀺 𑀧𑀼𑀭𑀢𑁄 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀓𑁂𑀘𑀺 𑀧𑀘𑁆𑀙𑀢𑁄 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀓𑁂𑀘𑀺 𑀦𑀕𑁆𑀕𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀪𑀡𑁆𑀟𑀽 𑀳𑁄𑀦𑁆𑀢𑀺 𑀲𑁂𑀢𑀧𑀝𑀥𑀭𑀸, 𑀓𑁂𑀘𑀺 𑀫𑁄𑀴𑀺𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀪𑀡𑁆𑀟𑀽 𑀓𑀸𑀲𑀸𑀯𑀯𑀲𑀦𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀓𑀸𑀲𑀸𑀯𑀯𑀲𑀦𑀸 𑀫𑁄𑀴𑀺𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀚𑀝𑀺𑀦𑁄 𑀯𑀸𑀓𑀘𑀻𑀭𑀥𑀭𑀸 [𑀯𑀸𑀓𑀘𑀻𑀭𑀸 (𑀓.)] 𑀳𑁄𑀦𑁆𑀢𑀺, 𑀓𑁂𑀘𑀺 𑀘𑀫𑁆𑀫𑀯𑀲𑀦𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀭𑀲𑁆𑀫𑀺𑀬𑁄 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀩𑁆𑀩𑁂𑀧𑁂𑀢𑁂 𑀫𑀦𑀼𑀲𑁆𑀲𑀸 𑀦𑀸𑀦𑀸𑀯𑀡𑁆𑀡𑁂𑀦 𑀫𑀳𑀺𑀬𑀸 𑀘𑀭𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀬𑁂𑀯 𑀢𑁂 𑀲𑀩𑁆𑀩𑁂, 𑀢𑁂𑀲𑀁 𑀦𑀸𑀦𑀸𑀯𑀡𑁆𑀡𑁂𑀦 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀏𑀯𑀁 𑀬𑁄𑀦𑀺𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺.

‘‘𑀓𑀣𑀁 𑀓𑀼𑀮𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺? 𑀓𑀼𑀮𑀁 𑀦𑀸𑀫, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺 𑀅𑀡𑁆𑀟𑀚𑀁 𑀚𑀮𑀸𑀩𑀼𑀚𑀁 𑀲𑀁𑀲𑁂𑀤𑀚𑀁 𑀑𑀧𑀧𑀸𑀢𑀺𑀓𑀁. 𑀬𑀤𑀺 𑀢𑀢𑁆𑀣 𑀕𑀦𑁆𑀥𑀩𑁆𑀩𑁄 𑀬𑀢𑁄 𑀓𑀼𑀢𑁄𑀘𑀺 𑀆𑀕𑀦𑁆𑀢𑁆𑀯𑀸 𑀅𑀡𑁆𑀟𑀚𑁂 𑀓𑀼𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑁆𑀣 𑀅𑀡𑁆𑀟𑀚𑁄 𑀳𑁄𑀢𑀺…𑀧𑁂… 𑀚𑀮𑀸𑀩𑀼𑀚𑁂 𑀓𑀼𑀮𑁂…𑀧𑁂… 𑀲𑀁𑀲𑁂𑀤𑀚𑁂 𑀓𑀼𑀮𑁂…𑀧𑁂… 𑀑𑀧𑀧𑀸𑀢𑀺𑀓𑁂 𑀓𑀼𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑁆𑀣 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺. 𑀢𑁂𑀲𑀼 𑀢𑁂𑀲𑀼 𑀓𑀼𑀮𑁂𑀲𑀼 𑀢𑀸𑀤𑀺𑀲𑀸 𑀬𑁂𑀯 𑀲𑀢𑁆𑀢𑀸 𑀲𑀫𑁆𑀪𑀯𑀦𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀳𑀺𑀫𑀯𑀢𑀺 𑀦𑁂𑀭𑀼𑀧𑀩𑁆𑀩𑀢𑀁 𑀬𑁂 𑀓𑁂𑀘𑀺 𑀫𑀺𑀕𑀧𑀓𑁆𑀔𑀺𑀦𑁄 𑀉𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀲𑀓𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀕𑀦𑁆𑀥𑀩𑁆𑀩𑁄 𑀬𑀢𑁄 𑀓𑀼𑀢𑁄𑀘𑀺 𑀆𑀕𑀦𑁆𑀢𑁆𑀯𑀸 𑀅𑀡𑁆𑀟𑀚𑀁 𑀬𑁄𑀦𑀺𑀁 𑀉𑀧𑀕𑀦𑁆𑀢𑁆𑀯𑀸 𑀲𑀪𑀸𑀯𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀅𑀡𑁆𑀟𑀚𑁄 𑀳𑁄𑀢𑀺…𑀧𑁂… 𑀚𑀮𑀸𑀩𑀼𑀚𑀁…𑀧𑁂… 𑀲𑀁𑀲𑁂𑀤𑀚𑀁…𑀧𑁂… 𑀑𑀧𑀧𑀸𑀢𑀺𑀓𑀁 𑀬𑁄𑀦𑀺𑀁 𑀉𑀧𑀕𑀦𑁆𑀢𑁆𑀯𑀸 𑀲𑀪𑀸𑀯𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺, 𑀏𑀯𑀁 𑀓𑀼𑀮𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺.

‘‘𑀓𑀣𑀁 𑀆𑀬𑀸𑀘𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀓𑀼𑀮𑀁 𑀳𑁄𑀢𑀺 𑀅𑀧𑀼𑀢𑁆𑀢𑀓𑀁 𑀩𑀳𑀼𑀲𑀸𑀧𑀢𑁂𑀬𑁆𑀬𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀢𑀧𑀦𑀺𑀲𑁆𑀲𑀺𑀢𑀁, 𑀤𑁂𑀯𑀧𑀼𑀢𑁆𑀢𑁄 𑀘 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑁄 𑀘𑀯𑀦𑀥𑀫𑁆𑀫𑁄 𑀳𑁄𑀢𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀲𑁆𑀲 𑀓𑀼𑀮𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀆𑀬𑀸𑀘𑀢𑀺 ‘𑀧𑀡𑀺𑀥𑁂𑀳𑀺, 𑀫𑀸𑀭𑀺𑀲, 𑀅𑀲𑀼𑀓𑀲𑁆𑀲 𑀓𑀼𑀮𑀲𑁆𑀲 𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺’𑀦𑁆𑀢𑀺. 𑀲𑁄 𑀢𑀲𑁆𑀲 𑀆𑀬𑀸𑀘𑀦𑀳𑁂𑀢𑀼 𑀢𑀁 𑀓𑀼𑀮𑀁 𑀧𑀡𑀺𑀥𑁂𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀧𑀼𑀜𑁆𑀜𑀓𑀸𑀫𑀸 𑀲𑀫𑀡𑀁 𑀫𑀦𑁄𑀪𑀸𑀯𑀦𑀻𑀬𑀁 𑀆𑀬𑀸𑀘𑀺𑀢𑁆𑀯𑀸 𑀕𑁂𑀳𑀁 𑀉𑀧𑀦𑁂𑀦𑁆𑀢𑀺, 𑀅𑀬𑀁 𑀉𑀧𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑁆𑀲 𑀓𑀼𑀮𑀲𑁆𑀲 𑀲𑀼𑀔𑀸𑀯𑀳𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀆𑀬𑀸𑀘𑀺𑀢𑁆𑀯𑀸 𑀢𑀁 𑀓𑀼𑀮𑀁 𑀉𑀧𑀦𑁂𑀢𑀺. 𑀏𑀯𑀁 𑀆𑀬𑀸𑀘𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺.

‘‘𑀲𑀸𑀫𑁄, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑁄 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀬𑀸𑀘𑀺𑀢𑁄 𑀧𑀸𑀭𑀺𑀓𑀸𑀬 𑀢𑀸𑀧𑀲𑀺𑀬𑀸 𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄. 𑀲𑀸𑀫𑁄, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑁄 𑀓𑀢𑀧𑀼𑀜𑁆𑀜𑁄, 𑀫𑀸𑀢𑀸𑀧𑀺𑀢𑀭𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸, 𑀆𑀬𑀸𑀘𑀓𑁄 𑀲𑀓𑁆𑀓𑁄, 𑀢𑀺𑀡𑁆𑀡𑀁 𑀘𑁂𑀢𑁄𑀧𑀡𑀺𑀥𑀺𑀬𑀸 𑀲𑀸𑀫𑁄 𑀓𑀼𑀫𑀸𑀭𑁄 𑀦𑀺𑀩𑁆𑀩𑀢𑁆𑀢𑁄. 𑀇𑀥, 𑀫𑀳𑀸𑀭𑀸𑀚, 𑀦𑀬𑀓𑀼𑀲𑀮𑁄 𑀧𑀼𑀭𑀺𑀲𑁄 𑀲𑀼𑀓𑀝𑁆𑀞𑁂 𑀅𑀦𑀽𑀧𑀔𑁂𑀢𑁆𑀢𑁂 𑀩𑀻𑀚𑀁 𑀭𑁄𑀧𑁂𑀬𑁆𑀬, 𑀅𑀧𑀺 𑀦𑀼 𑀢𑀲𑁆𑀲 𑀩𑀻𑀚𑀲𑁆𑀲 𑀅𑀦𑁆𑀢𑀭𑀸𑀬𑀁 𑀯𑀺𑀯𑀚𑁆𑀚𑁂𑀦𑁆𑀢𑀲𑁆𑀲 𑀯𑀼𑀟𑁆𑀠𑀺𑀬𑀸 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀦𑀺𑀭𑀼𑀧𑀖𑀸𑀢𑀁 𑀩𑀻𑀚𑀁 𑀔𑀺𑀧𑁆𑀧𑀁 𑀲𑀁𑀯𑀺𑀭𑀼𑀳𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀸𑀫𑁄 𑀓𑀼𑀫𑀸𑀭𑁄 𑀫𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑀦𑁆𑀢𑀭𑀸𑀬𑁂𑀳𑀺 𑀢𑀺𑀡𑁆𑀡𑀁 𑀘𑁂𑀢𑁄𑀧𑀡𑀺𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑁄.

‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑀼𑀢𑀧𑀼𑀩𑁆𑀩𑀁 𑀢𑀬𑀸 𑀇𑀲𑀻𑀦𑀁 𑀫𑀦𑁄𑀧𑀤𑁄𑀲𑁂𑀦 𑀇𑀤𑁆𑀥𑁄 𑀨𑀻𑀢𑁄 𑀫𑀳𑀸𑀚𑀦𑀧𑀤𑁄 𑀲𑀚𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺. 𑀫𑀳𑀺𑀬𑀸 𑀤𑀡𑁆𑀟𑀓𑀸𑀭𑀜𑁆𑀜𑀁 [𑀤𑀡𑁆𑀟𑀓𑀻𑀭𑀜𑁆𑀜𑀁 (𑀫. 𑀦𑀺. 𑁨.𑁬𑁫)] 𑀫𑀚𑁆𑀛𑀸𑀭𑀜𑁆𑀜𑀁 𑀓𑀸𑀮𑀺𑀗𑁆𑀕𑀸𑀭𑀜𑁆𑀜𑀁 𑀫𑀸𑀢𑀗𑁆𑀕𑀸𑀭𑀜𑁆𑀜𑀁, 𑀲𑀩𑁆𑀩𑀁 𑀢𑀁 𑀅𑀭𑀜𑁆𑀜𑀁 𑀅𑀭𑀜𑁆𑀜𑀪𑀽𑀢𑀁, 𑀲𑀩𑁆𑀩𑁂𑀧𑁂𑀢𑁂 𑀚𑀦𑀧𑀤𑀸 𑀇𑀲𑀻𑀦𑀁 𑀫𑀦𑁄𑀧𑀤𑁄𑀲𑁂𑀦 𑀔𑀬𑀁 𑀕𑀢𑀸’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀢𑁂𑀲𑀁 𑀫𑀦𑁄𑀧𑀤𑁄𑀲𑁂𑀦 𑀲𑀼𑀲𑀫𑀺𑀤𑁆𑀥𑀸 𑀚𑀦𑀧𑀤𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀅𑀧𑀺 𑀦𑀼 𑀔𑁄 𑀢𑁂𑀲𑀁 𑀫𑀦𑁄𑀧𑀲𑀸𑀤𑁂𑀦 𑀓𑀺𑀜𑁆𑀘𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’’𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀸𑀫𑁄 𑀓𑀼𑀫𑀸𑀭𑁄 𑀢𑀺𑀡𑁆𑀡𑀁 𑀩𑀮𑀯𑀦𑁆𑀢𑀸𑀦𑀁 𑀘𑁂𑀢𑁄𑀧𑀲𑀸𑀤𑁂𑀦 𑀦𑀺𑀩𑁆𑀩𑀢𑁆𑀢𑁄 𑀇𑀲𑀺𑀦𑀺𑀫𑁆𑀫𑀺𑀢𑁄 𑀤𑁂𑀯𑀦𑀺𑀫𑁆𑀫𑀺𑀢𑁄 𑀧𑀼𑀜𑁆𑀜𑀦𑀺𑀫𑁆𑀫𑀺𑀢𑁄𑀢𑀺. 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀥𑀸𑀭𑁂𑀳𑀺.

‘‘𑀢𑀬𑁄𑀫𑁂, 𑀫𑀳𑀸𑀭𑀸𑀚, 𑀤𑁂𑀯𑀧𑀼𑀢𑁆𑀢𑀸 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀬𑀸𑀘𑀺𑀢𑀸 𑀓𑀼𑀮𑀁 𑀉𑀧𑁆𑀧𑀦𑁆𑀦𑀸. 𑀓𑀢𑀫𑁂 𑀢𑀬𑁄? 𑀲𑀸𑀫𑁄 𑀓𑀼𑀫𑀸𑀭𑁄 𑀫𑀳𑀸𑀧𑀦𑀸𑀤𑁄 𑀓𑀼𑀲𑀭𑀸𑀚𑀸, 𑀢𑀬𑁄𑀧𑁂𑀢𑁂 𑀩𑁄𑀥𑀺𑀲𑀢𑁆𑀢𑀸’’𑀢𑀺. ‘‘𑀲𑀼𑀦𑀺𑀤𑁆𑀤𑀺𑀝𑁆𑀞𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺, 𑀲𑀼𑀓𑀣𑀺𑀢𑀁 𑀓𑀸𑀭𑀡𑀁, 𑀅𑀦𑁆𑀥𑀓𑀸𑀭𑁄 𑀆𑀮𑁄𑀓𑁄 𑀓𑀢𑁄, 𑀚𑀝𑀸 𑀯𑀺𑀚𑀝𑀺𑀢𑀸, 𑀦𑀺𑀘𑁆𑀙𑀼𑀤𑁆𑀥𑀸 𑀧𑀭𑀯𑀸𑀤𑀸, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 [𑀯𑀲𑁆𑀲𑀲𑀳𑀲𑁆𑀲𑀸𑀦𑀺 (𑀲𑀻.) 𑀧𑀲𑁆𑀲 𑀅. 𑀦𑀺. 𑁮.𑁫𑁧] 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺. 𑀧𑀼𑀦 𑀘 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀲𑀼𑀪𑀤𑁆𑀤𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀧𑀜𑁆𑀳𑀁 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀪𑀡𑀺𑀢𑀁 ‘𑀇𑀫𑁂 𑀘, 𑀲𑀼𑀪𑀤𑁆𑀤 [𑀤𑀻. 𑀦𑀺. 𑁨.𑁨𑁧𑁪 𑀧𑀲𑁆𑀲𑀺𑀢𑀩𑁆𑀩𑀁], 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺, 𑀅𑀲𑁂𑀲𑀯𑀘𑀦𑀫𑁂𑀢𑀁, 𑀦𑀺𑀲𑁆𑀲𑁂𑀲𑀯𑀘𑀦𑀫𑁂𑀢𑀁, 𑀦𑀺𑀧𑁆𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺, 𑀢𑁂𑀦 𑀳𑀺 ‘𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺, 𑀢𑁂𑀦 𑀳𑀺 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀕𑀳𑀦𑀢𑁄𑀧𑀺 𑀕𑀳𑀦𑀢𑀭𑁄 𑀩𑀮𑀯𑀢𑁄𑀧𑀺 𑀩𑀮𑀯𑀢𑀭𑁄 𑀕𑀡𑁆𑀞𑀺𑀢𑁄𑀧𑀺 𑀕𑀡𑁆𑀞𑀺𑀢𑀭𑁄, 𑀲𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀢𑀢𑁆𑀣 𑀢𑁂 𑀜𑀸𑀡𑀩𑀮𑀯𑀺𑀧𑁆𑀨𑀸𑀭𑀁 𑀤𑀲𑁆𑀲𑁂𑀳𑀺 𑀫𑀓𑀭𑁄 𑀯𑀺𑀬 𑀲𑀸𑀕𑀭𑀩𑁆𑀪𑀦𑁆𑀢𑀭𑀕𑀢𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀘 𑀲𑀼𑀪𑀤𑁆𑀤𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀪𑀡𑀺𑀢𑀁 ‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺. 𑀢𑀜𑁆𑀘 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀯𑀘𑀦𑀁 𑀦𑀸𑀦𑀢𑁆𑀣𑀜𑁆𑀘𑁂𑀯 𑀳𑁄𑀢𑀺 𑀦𑀸𑀦𑀸𑀩𑁆𑀬𑀜𑁆𑀚𑀦𑀜𑁆𑀘, 𑀅𑀬𑀁 𑀲𑀸𑀲𑀦𑀧𑀭𑀺𑀘𑁆𑀙𑁂𑀤𑁄, 𑀅𑀬𑀁 𑀧𑀝𑀺𑀧𑀢𑁆𑀢𑀺 𑀧𑀭𑀺𑀤𑀻𑀧𑀦𑀸𑀢𑀺 𑀤𑀽𑀭𑀁 𑀯𑀺𑀯𑀚𑁆𑀚𑀺𑀢𑀸 𑀢𑁂 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁. 𑀬𑀣𑀸, 𑀫𑀳𑀸𑀭𑀸𑀚, 𑀦𑀪𑀁 𑀧𑀣𑀯𑀺𑀢𑁄 𑀤𑀽𑀭𑀁 𑀯𑀺𑀯𑀚𑁆𑀚𑀺𑀢𑀁, 𑀦𑀺𑀭𑀬𑀁 𑀲𑀕𑁆𑀕𑀢𑁄 𑀤𑀽𑀭𑀁 𑀯𑀺𑀯𑀚𑁆𑀚𑀺𑀢𑀁, 𑀓𑀼𑀲𑀮𑀁 𑀅𑀓𑀼𑀲𑀮𑀢𑁄 𑀤𑀽𑀭𑀁 𑀯𑀺𑀯𑀚𑁆𑀚𑀺𑀢𑀁, 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀤𑀽𑀭𑀁 𑀯𑀺𑀯𑀚𑁆𑀚𑀺𑀢𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑁂 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀤𑀽𑀭𑀁 𑀯𑀺𑀯𑀚𑁆𑀚𑀺𑀢𑀸.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀫𑀸 𑀢𑁂 𑀧𑀼𑀘𑁆𑀙𑀸 𑀫𑁄𑀖𑀸 𑀅𑀲𑁆𑀲 [𑀅𑀲𑁆𑀲𑀼 (𑀲𑀻. 𑀲𑁆𑀬𑀸.)], 𑀭𑀲𑀢𑁄 𑀢𑁂 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑀬𑀺𑀲𑁆𑀲𑀸𑀫𑀺 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺 𑀬𑀁 𑀪𑀕𑀯𑀸 𑀆𑀳, 𑀢𑀁 𑀔𑀬𑀁 𑀧𑀭𑀺𑀤𑀻𑀧𑀬𑀦𑁆𑀢𑁄 𑀲𑁂𑀲𑀓𑀁 𑀧𑀭𑀺𑀘𑁆𑀙𑀺𑀦𑁆𑀤𑀺, 𑀯𑀲𑁆𑀲𑀲𑀳𑀲𑁆𑀲𑀁, 𑀆𑀦𑀦𑁆𑀤, 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬, 𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼𑀁. 𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻𑀢𑀺. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀏𑀯𑀁 𑀯𑀤𑀦𑁆𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀯𑀸 𑀯𑀤𑁂𑀢𑀺 𑀅𑀪𑀺𑀲𑀫𑀬𑀁 𑀯𑀸 𑀧𑀝𑀺𑀓𑁆𑀓𑁄𑀲𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀦𑀝𑁆𑀞𑀁, 𑀫𑀳𑀸𑀭𑀸𑀚, 𑀧𑀭𑀺𑀓𑀺𑀢𑁆𑀢𑀬𑀦𑁆𑀢𑁄 𑀲𑁂𑀲𑀓𑀁 𑀧𑀭𑀺𑀤𑀻𑀧𑀬𑀦𑁆𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀦𑀝𑁆𑀞𑀸𑀬𑀺𑀓𑁄 𑀲𑀩𑁆𑀩𑀲𑁂𑀲𑀓𑀁 𑀕𑀳𑁂𑀢𑁆𑀯𑀸 𑀚𑀦𑀲𑁆𑀲 𑀧𑀭𑀺𑀤𑀻𑀧𑁂𑀬𑁆𑀬 ‘𑀏𑀢𑁆𑀢𑀓𑀁 𑀫𑁂 𑀪𑀡𑁆𑀟𑀁 𑀦𑀝𑁆𑀞𑀁, 𑀇𑀤𑀁 𑀲𑁂𑀲𑀓’𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀦𑀝𑁆𑀞𑀁 𑀧𑀭𑀺𑀤𑀻𑀧𑀬𑀦𑁆𑀢𑁄 𑀲𑁂𑀲𑀓𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀲𑀺 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺. 𑀬𑀁 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻’𑀢𑀺, 𑀲𑀸𑀲𑀦𑀧𑀭𑀺𑀘𑁆𑀙𑁂𑀤𑁄 𑀏𑀲𑁄.

‘‘𑀬𑀁 𑀧𑀦 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀲𑀼𑀪𑀤𑁆𑀤𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀫𑀡𑁂 𑀧𑀭𑀺𑀓𑀺𑀢𑁆𑀢𑀬𑀦𑁆𑀢𑁄 𑀆𑀳 ‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺, 𑀧𑀝𑀺𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀸 𑀏𑀲𑀸, 𑀢𑁆𑀯𑀁 𑀧𑀦 𑀢𑀁 𑀧𑀭𑀺𑀘𑁆𑀙𑁂𑀤𑀜𑁆𑀘 𑀧𑀭𑀺𑀤𑀻𑀧𑀦𑀜𑁆𑀘 𑀏𑀓𑀭𑀲𑀁 𑀓𑀭𑁄𑀲𑀺. 𑀬𑀤𑀺 𑀧𑀦 𑀢𑁂 𑀙𑀦𑁆𑀤𑁄, 𑀏𑀓𑀭𑀲𑀁 𑀓𑀢𑁆𑀯𑀸 𑀓𑀣𑀬𑀺𑀲𑁆𑀲𑀸𑀫𑀺, 𑀲𑀸𑀥𑀼𑀓𑀁 𑀲𑀼𑀡𑁄𑀳𑀺 𑀫𑀦𑀲𑀺𑀓𑀭𑁄𑀳𑀺 𑀅𑀯𑀺𑀓𑁆𑀔𑀺𑀢𑁆𑀢𑀫𑀸𑀦𑀲𑁄 [𑀅𑀯𑀺𑀘𑀮𑀫𑀸𑀦𑀲𑁄 (𑀲𑀻.) 𑀅𑀯𑀺𑀫𑀸𑀦𑀲𑁄 (𑀧𑀻. 𑀓.)].

‘‘𑀇𑀥, 𑀫𑀳𑀸𑀭𑀸𑀚, 𑀢𑀴𑀸𑀓𑁄 𑀪𑀯𑁂𑀬𑁆𑀬 𑀦𑀯𑀲𑀮𑀺𑀮𑀲𑀫𑁆𑀧𑀼𑀡𑁆𑀡𑁄 𑀲𑀫𑁆𑀫𑀼𑀔𑀫𑀼𑀢𑁆𑀢𑀭𑀺𑀬𑀫𑀸𑀦𑁄 𑀧𑀭𑀺𑀘𑁆𑀙𑀺𑀦𑁆𑀦𑁄 𑀧𑀭𑀺𑀯𑀝𑀼𑀫𑀓𑀢𑁄, 𑀅𑀧𑀭𑀺𑀬𑀸𑀤𑀺𑀡𑁆𑀡𑁂 𑀬𑁂𑀯 𑀢𑀲𑁆𑀫𑀺𑀁 𑀢𑀴𑀸𑀓𑁂 𑀉𑀤𑀓𑀽𑀧𑀭𑀺 𑀫𑀳𑀸𑀫𑁂𑀖𑁄 𑀅𑀧𑀭𑀸𑀧𑀭𑀁 𑀅𑀦𑀼𑀧𑁆𑀧𑀩𑀦𑁆𑀥𑁄 𑀅𑀪𑀺𑀯𑀲𑁆𑀲𑁂𑀬𑁆𑀬, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀫𑀺𑀁 𑀢𑀴𑀸𑀓𑁂 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦 𑀫𑀳𑀸𑀭𑀸𑀚𑀸’’𑀢𑀺? ‘‘𑀫𑁂𑀖𑀲𑁆𑀲, 𑀪𑀦𑁆𑀢𑁂, 𑀅𑀦𑀼𑀧𑁆𑀧𑀩𑀦𑁆𑀥𑀢𑀸𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑀺𑀦𑀲𑀸𑀲𑀦𑀯𑀭𑀲𑀤𑁆𑀥𑀫𑁆𑀫𑀢𑀴𑀸𑀓𑁄 𑀆𑀘𑀸𑀭𑀲𑀻𑀮𑀕𑀼𑀡𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀯𑀺𑀫𑀮𑀦𑀯𑀲𑀮𑀺𑀮𑀲𑀫𑁆𑀧𑀼𑀡𑁆𑀡𑁄 𑀉𑀢𑁆𑀢𑀭𑀺𑀬𑀫𑀸𑀦𑁄 𑀪𑀯𑀕𑁆𑀕𑀫𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀬𑀤𑀺 𑀢𑀢𑁆𑀣 𑀩𑀼𑀤𑁆𑀥𑀧𑀼𑀢𑁆𑀢𑀸 𑀆𑀘𑀸𑀭𑀲𑀻𑀮𑀕𑀼𑀡𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀫𑁂𑀖𑀯𑀲𑁆𑀲𑀁 𑀅𑀧𑀭𑀸𑀧𑀭𑀁 𑀅𑀦𑀼𑀧𑁆𑀧𑀩𑀦𑁆𑀥𑀸𑀧𑁂𑀬𑁆𑀬𑀼𑀁 𑀅𑀪𑀺𑀯𑀲𑁆𑀲𑀸𑀧𑁂𑀬𑁆𑀬𑀼𑀁. 𑀏𑀯𑀫𑀺𑀤𑀁 𑀚𑀺𑀦𑀲𑀸𑀲𑀦𑀯𑀭𑀲𑀤𑁆𑀥𑀫𑁆𑀫𑀢𑀴𑀸𑀓𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀭𑀳𑀦𑁆𑀢𑁂𑀳𑀺 𑀮𑁄𑀓𑁄 𑀅𑀲𑀼𑀜𑁆𑀜𑁄 𑀪𑀯𑁂𑀬𑁆𑀬, 𑀇𑀫𑀫𑀢𑁆𑀣𑀁 𑀪𑀕𑀯𑀢𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺.

‘‘𑀇𑀥 𑀧𑀦, 𑀫𑀳𑀸𑀭𑀸𑀚, 𑀫𑀳𑀢𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀚𑀮𑀫𑀸𑀦𑁂 𑀅𑀧𑀭𑀸𑀧𑀭𑀁 𑀲𑀼𑀓𑁆𑀔𑀢𑀺𑀡𑀓𑀝𑁆𑀞𑀕𑁄𑀫𑀬𑀸𑀦𑀺 𑀉𑀧𑀲𑀁𑀳𑀭𑁂𑀬𑁆𑀬𑀼𑀁, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀲𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀚𑀮𑁂𑀬𑁆𑀬, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀪𑀸𑀲𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑀲𑀲𑀳𑀲𑁆𑀲𑀺𑀬𑀸 [𑀤𑀲𑀲𑀳𑀲𑁆𑀲𑀺𑀫𑁆𑀳𑀺 (𑀩𑀳𑀽𑀲𑀼)] 𑀮𑁄𑀓𑀥𑀸𑀢𑀼𑀬𑀸 𑀚𑀺𑀦𑀲𑀸𑀲𑀦𑀯𑀭𑀫𑁆𑀧𑀺 𑀆𑀘𑀸𑀭𑀲𑀻𑀮𑀕𑀼𑀡𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀚𑀮𑀢𑀺 𑀧𑀪𑀸𑀲𑀢𑀺. 𑀬𑀤𑀺 𑀧𑀦, 𑀫𑀳𑀸𑀭𑀸𑀚, 𑀢𑀤𑀼𑀢𑁆𑀢𑀭𑀺𑀁 𑀩𑀼𑀤𑁆𑀥𑀧𑀼𑀢𑁆𑀢𑀸 𑀧𑀜𑁆𑀘𑀳𑀺 𑀧𑀥𑀸𑀦𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀢𑀢𑀫𑀧𑁆𑀧𑀫𑀢𑁆𑀢𑀸 𑀧𑀤𑀳𑁂𑀬𑁆𑀬𑀼𑀁, 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀙𑀦𑁆𑀤𑀚𑀸𑀢𑀸 𑀲𑀺𑀓𑁆𑀔𑁂𑀬𑁆𑀬𑀼𑀁, 𑀘𑀸𑀭𑀺𑀢𑁆𑀢𑀜𑁆𑀘 𑀲𑀻𑀮𑀁 𑀲𑀫𑀢𑁆𑀢𑀁 𑀧𑀭𑀺𑀧𑀽𑀭𑁂𑀬𑁆𑀬𑀼𑀁, 𑀏𑀯𑀫𑀺𑀤𑀁 𑀚𑀺𑀦𑀲𑀸𑀲𑀦𑀯𑀭𑀁 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀪𑀕𑀯𑀢𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺.

‘‘𑀇𑀥 𑀧𑀦, 𑀫𑀳𑀸𑀭𑀸𑀚, 𑀲𑀺𑀦𑀺𑀤𑁆𑀥𑀲𑀫𑀲𑀼𑀫𑀚𑁆𑀚𑀺𑀢𑀲𑀧𑁆𑀧𑀪𑀸𑀲𑀯𑀺𑀫𑀮𑀸𑀤𑀸𑀲𑀁 [𑀲𑀧𑁆𑀧𑀪𑀁 𑀲𑀼𑀯𑀺𑀫𑀮𑀸𑀤𑀸𑀲𑀁 (𑀲𑀻.)] 𑀲𑀡𑁆𑀳𑀲𑀼𑀔𑀼𑀫𑀕𑁂𑀭𑀼𑀓𑀘𑀼𑀡𑁆𑀡𑁂𑀦 𑀅𑀧𑀭𑀸𑀧𑀭𑀁 𑀫𑀚𑁆𑀚𑁂𑀬𑁆𑀬𑀼𑀁, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀫𑀺𑀁 𑀆𑀤𑀸𑀲𑁂 𑀫𑀮𑀓𑀤𑁆𑀤𑀫𑀭𑀚𑁄𑀚𑀮𑁆𑀮𑀁 𑀚𑀸𑀬𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀫𑀮𑀢𑀭𑀁 𑀬𑁂𑀯 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑀺𑀦𑀲𑀸𑀲𑀦𑀯𑀭𑀁 𑀧𑀓𑀢𑀺𑀦𑀺𑀫𑁆𑀫𑀮𑀁 𑀩𑁆𑀬𑀧𑀕𑀢𑀓𑀺𑀮𑁂𑀲𑀫𑀮𑀭𑀚𑁄𑀚𑀮𑁆𑀮𑀁, 𑀬𑀤𑀺 𑀢𑀁 𑀩𑀼𑀤𑁆𑀥𑀧𑀼𑀢𑁆𑀢𑀸 𑀆𑀘𑀸𑀭𑀲𑀻𑀮𑀕𑀼𑀡𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀲𑀮𑁆𑀮𑁂𑀔𑀥𑀼𑀢𑀕𑀼𑀡𑁂𑀦 𑀚𑀺𑀦𑀲𑀸𑀲𑀦𑀯𑀭𑀁 𑀲𑀮𑁆𑀮𑀓𑁆𑀔𑁂𑀬𑁆𑀬𑀼𑀁 [𑀲𑀮𑁆𑀮𑀺𑀓𑁆𑀔𑁂𑀬𑁆𑀬𑀼𑀁 (𑀲𑀻. 𑀧𑀻.)], 𑀏𑀯𑀫𑀺𑀤𑀁 𑀚𑀺𑀦𑀲𑀸𑀲𑀦𑀯𑀭𑀁 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀲𑀼𑀜𑁆𑀜𑁄 𑀘 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀪𑀕𑀯𑀢𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 ‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’𑀢𑀺. 𑀧𑀝𑀺𑀧𑀢𑁆𑀢𑀺𑀫𑀽𑀮𑀓𑀁, 𑀫𑀳𑀸𑀭𑀸𑀚, 𑀲𑀢𑁆𑀣𑀼𑀲𑀸𑀲𑀦𑀁 𑀧𑀝𑀺𑀧𑀢𑁆𑀢𑀺𑀓𑀸𑀭𑀡𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀳𑀺𑀢𑀸𑀬 𑀢𑀺𑀝𑁆𑀞𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦’’𑀦𑁆𑀢𑀺? ‘‘𑀢𑀻𑀡𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀲𑀸𑀲𑀦𑀦𑁆𑀢𑀭𑀥𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀥𑀺𑀕𑀫𑀦𑁆𑀢𑀭𑀥𑀸𑀦𑀁 𑀧𑀝𑀺𑀧𑀢𑁆𑀢𑀦𑁆𑀢𑀭𑀥𑀸𑀦𑀁 𑀮𑀺𑀗𑁆𑀕𑀦𑁆𑀢𑀭𑀥𑀸𑀦𑀁, 𑀅𑀥𑀺𑀕𑀫𑁂, 𑀫𑀳𑀸𑀭𑀸𑀚, 𑀅𑀦𑁆𑀢𑀭𑀳𑀺𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀮𑀺𑀗𑁆𑀕𑀁𑀬𑁂𑀯 𑀢𑀺𑀝𑁆𑀞𑀢𑀺, 𑀮𑀺𑀗𑁆𑀕𑁂 𑀅𑀦𑁆𑀢𑀭𑀳𑀺𑀢𑁂 𑀧𑀯𑁂𑀡𑀼𑀧𑀘𑁆𑀙𑁂𑀤𑁄 𑀳𑁄𑀢𑀺, 𑀇𑀫𑀸𑀦𑀺 𑀔𑁄, 𑀫𑀳𑀸𑀭𑀸𑀚, 𑀢𑀻𑀡𑀺 𑀅𑀦𑁆𑀢𑀭𑀥𑀸𑀦𑀸𑀦𑀻’’𑀢𑀺.

‘‘𑀲𑀼𑀯𑀺𑀜𑁆𑀜𑀸𑀧𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄, 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑀻𑀓𑀢𑁄, 𑀕𑀡𑁆𑀞𑀺 𑀪𑀺𑀦𑁆𑀦𑁄, 𑀦𑀝𑁆𑀞𑀸 𑀧𑀭𑀯𑀸𑀤𑀸 𑀪𑀕𑁆𑀕𑀸 𑀦𑀺𑀧𑁆𑀧𑀪𑀸 𑀓𑀢𑀸, 𑀢𑁆𑀯𑀁 𑀕𑀡𑀺𑀯𑀭𑀯𑀲𑀪𑀫𑀸𑀲𑀚𑁆𑀚𑀸𑀢𑀺.

𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀅𑀓𑀼𑀲𑀮𑀘𑁆𑀙𑁂𑀤𑀦𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀛𑀸𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀉𑀤𑀸𑀳𑀼 𑀲𑀸𑀯𑀲𑁂𑀲𑁂 𑀅𑀓𑀼𑀲𑀮𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄’’𑀢𑀺? ‘‘𑀲𑀩𑁆𑀩𑀁, 𑀫𑀳𑀸𑀭𑀸𑀚, 𑀅𑀓𑀼𑀲𑀮𑀁 𑀛𑀸𑀧𑁂𑀢𑁆𑀯𑀸 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀦𑀢𑁆𑀣𑀺 𑀪𑀕𑀯𑀢𑁄 𑀲𑁂𑀲𑁂𑀓𑀁 𑀅𑀓𑀼𑀲𑀮’’𑀦𑁆𑀢𑀺.

‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀢𑀣𑀸𑀕𑀢𑀲𑁆𑀲 𑀓𑀸𑀬𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀭𑀸𑀚𑀕𑀳𑁂 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 [𑀲𑀓𑁆𑀔𑀮𑀺𑀓𑀸𑀬 (𑀲𑁆𑀬𑀸. 𑀓.)] 𑀔𑀢𑁄, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀓𑀸𑀬𑁂 𑀅𑀪𑀺𑀲𑀦𑁆𑀦𑁂 𑀚𑀻𑀯𑀓𑁂𑀦 𑀯𑀺𑀭𑁂𑀓𑁄 𑀓𑀸𑀭𑀺𑀢𑁄, 𑀯𑀸𑀢𑀸𑀩𑀸𑀥𑁂 𑀉𑀧𑁆𑀧𑀦𑁆𑀦𑁂 𑀉𑀧𑀝𑁆𑀞𑀸𑀓𑁂𑀦 𑀣𑁂𑀭𑁂𑀦 𑀉𑀡𑁆𑀳𑁄𑀤𑀓𑀁 𑀧𑀭𑀺𑀬𑀺𑀝𑁆𑀞’’𑀦𑁆𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀛𑀸𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀢𑁂𑀦 𑀳𑀺 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀘 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑀲𑁆𑀲 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀘 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀢𑁂𑀦 𑀳𑀺 𑀢𑀣𑀸𑀕𑀢𑁄 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀛𑀸𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀦𑀢𑁆𑀣𑀺, 𑀪𑀦𑁆𑀢𑁂, 𑀯𑀺𑀦𑀸 𑀓𑀫𑁆𑀫𑁂𑀦 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀯𑁂𑀤𑀬𑀺𑀢𑀁 𑀓𑀫𑁆𑀫𑀫𑀽𑀮𑀓𑀁, 𑀢𑀁 𑀓𑀫𑁆𑀫𑁂𑀦𑁂𑀯 𑀯𑁂𑀤𑀬𑀢𑀺, 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺 [𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑁄𑀢𑀺 (𑀓.)].

‘‘𑀦 𑀳𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑀁 𑀢𑀁 𑀯𑁂𑀤𑀬𑀺𑀢𑀁 𑀓𑀫𑁆𑀫𑀫𑀽𑀮𑀓𑀁. 𑀅𑀝𑁆𑀞𑀳𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀳𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀽 𑀲𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀺𑀬𑀦𑁆𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚…𑀧𑁂… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚…𑀧𑁂… 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚…𑀧𑁂… 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚…𑀧𑁂… 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚…𑀧𑁂… 𑀑𑀧𑀓𑁆𑀓𑀫𑀺𑀓𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚…𑀧𑁂… 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀔𑁄, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀽 𑀲𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺. 𑀢𑀢𑁆𑀣 𑀬𑁂 𑀢𑁂 𑀧𑀼𑀕𑁆𑀕𑀮𑀸 ‘𑀲𑀢𑁆𑀢𑁂 𑀓𑀫𑁆𑀫𑀁 𑀯𑀺𑀩𑀸𑀥𑀢𑀻’𑀢𑀺 𑀯𑀤𑁂𑀬𑁆𑀬𑀼𑀁, 𑀢𑁂 𑀇𑀫𑁂 𑀧𑀼𑀕𑁆𑀕𑀮𑀸 𑀲𑀢𑁆𑀢𑀓𑀸𑀭𑀡𑀁 𑀧𑀝𑀺𑀩𑀸𑀳𑀦𑁆𑀢𑀺. 𑀢𑁂𑀲𑀁 𑀢𑀁 𑀯𑀘𑀦𑀁 𑀫𑀺𑀘𑁆𑀙𑀸’’𑀢𑀺. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀜𑁆𑀘 𑀯𑀸𑀢𑀺𑀓𑀁 𑀬𑀜𑁆𑀘 𑀧𑀺𑀢𑁆𑀢𑀺𑀓𑀁 𑀬𑀜𑁆𑀘 𑀲𑁂𑀫𑁆𑀳𑀺𑀓𑀁 𑀬𑀜𑁆𑀘 𑀲𑀦𑁆𑀦𑀺𑀧𑀸𑀢𑀺𑀓𑀁 𑀬𑀜𑁆𑀘 𑀉𑀢𑀼𑀧𑀭𑀺𑀡𑀸𑀫𑀚𑀁 𑀬𑀜𑁆𑀘 𑀯𑀺𑀲𑀫𑀧𑀭𑀺𑀳𑀸𑀭𑀚𑀁 𑀬𑀜𑁆𑀘 𑀑𑀧𑀓𑁆𑀓𑀫𑀺𑀓𑀁, 𑀲𑀩𑁆𑀩𑁂𑀢𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀬𑁂𑀯, 𑀓𑀫𑁆𑀫𑁂𑀦𑁂𑀯 𑀢𑁂 𑀲𑀩𑁆𑀩𑁂 𑀲𑀫𑁆𑀪𑀯𑀦𑁆𑀢𑀻’’𑀢𑀺.

‘‘𑀬𑀤𑀺, 𑀫𑀳𑀸𑀭𑀸𑀚, 𑀢𑁂𑀧𑀺 𑀲𑀩𑁆𑀩𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀯 𑀆𑀩𑀸𑀥𑀸 𑀪𑀯𑁂𑀬𑁆𑀬𑀼𑀁, 𑀦 𑀢𑁂𑀲𑀁 𑀓𑁄𑀝𑁆𑀞𑀸𑀲𑀢𑁄 𑀮𑀓𑁆𑀔𑀡𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀯𑀸𑀢𑁄 𑀔𑁄, 𑀫𑀳𑀸𑀭𑀸𑀚, 𑀓𑀼𑀧𑁆𑀧𑀫𑀸𑀦𑁄 𑀤𑀲𑀯𑀺𑀥𑁂𑀦 𑀓𑀼𑀧𑁆𑀧𑀢𑀺 𑀲𑀻𑀢𑁂𑀦 𑀉𑀡𑁆𑀳𑁂𑀦 𑀚𑀺𑀖𑀘𑁆𑀙𑀸𑀬 𑀯𑀺𑀧𑀸𑀲𑀸𑀬 𑀅𑀢𑀺𑀪𑀼𑀢𑁆𑀢𑁂𑀦 𑀞𑀸𑀦𑁂𑀦 𑀧𑀥𑀸𑀦𑁂𑀦 𑀆𑀥𑀸𑀯𑀦𑁂𑀦 𑀉𑀧𑀓𑁆𑀓𑀫𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦. 𑀢𑀢𑁆𑀭 𑀬𑁂 𑀢𑁂 𑀦𑀯 𑀯𑀺𑀥𑀸, 𑀦 𑀢𑁂 𑀅𑀢𑀻𑀢𑁂, 𑀦 𑀅𑀦𑀸𑀕𑀢𑁂, 𑀯𑀢𑁆𑀢𑀫𑀸𑀦𑀓𑁂 𑀪𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀸 ‘𑀓𑀫𑁆𑀫𑀲𑀫𑁆𑀪𑀯𑀸 𑀲𑀩𑁆𑀩𑀸 𑀯𑁂𑀤𑀦𑀸’𑀢𑀺. 𑀧𑀺𑀢𑁆𑀢𑀁, 𑀫𑀳𑀸𑀭𑀸𑀚, 𑀓𑀼𑀧𑁆𑀧𑀫𑀸𑀦𑀁 𑀢𑀺𑀯𑀺𑀥𑁂𑀦 𑀓𑀼𑀧𑁆𑀧𑀢𑀺 𑀲𑀻𑀢𑁂𑀦 𑀉𑀡𑁆𑀳𑁂𑀦 𑀯𑀺𑀲𑀫𑀪𑁄𑀚𑀦𑁂𑀦. 𑀲𑁂𑀫𑁆𑀳𑀁, 𑀫𑀳𑀸𑀭𑀸𑀚, 𑀓𑀼𑀧𑁆𑀧𑀫𑀸𑀦𑀁 𑀢𑀺𑀯𑀺𑀥𑁂𑀦 𑀓𑀼𑀧𑁆𑀧𑀢𑀺 𑀲𑀻𑀢𑁂𑀦 𑀉𑀡𑁆𑀳𑁂𑀦 𑀅𑀦𑁆𑀦𑀧𑀸𑀦𑁂𑀦. 𑀬𑁄 𑀘, 𑀫𑀳𑀸𑀭𑀸𑀚, 𑀯𑀸𑀢𑁄 𑀬𑀜𑁆𑀘 𑀧𑀺𑀢𑁆𑀢𑀁 𑀬𑀜𑁆𑀘 𑀲𑁂𑀫𑁆𑀳𑀁, 𑀢𑁂𑀳𑀺 𑀢𑁂𑀳𑀺 𑀓𑁄𑀧𑁂𑀳𑀺 𑀓𑀼𑀧𑁆𑀧𑀺𑀢𑁆𑀯𑀸 𑀫𑀺𑀲𑁆𑀲𑀻 𑀳𑀼𑀢𑁆𑀯𑀸 𑀲𑀓𑀁 𑀲𑀓𑀁 𑀯𑁂𑀤𑀦𑀁 𑀆𑀓𑀟𑁆𑀠𑀢𑀺. 𑀉𑀢𑀼𑀧𑀭𑀺𑀡𑀸𑀫𑀚𑀸, 𑀫𑀳𑀸𑀭𑀸𑀚, 𑀯𑁂𑀤𑀦𑀸 𑀉𑀢𑀼𑀧𑀭𑀺𑀬𑀸𑀫𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀯𑁂𑀤𑀦𑀸 𑀯𑀺𑀲𑀫𑀧𑀭𑀺𑀳𑀸𑀭𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀑𑀧𑀓𑁆𑀓𑀫𑀺𑀓𑀸, 𑀫𑀳𑀸𑀭𑀸𑀚, 𑀯𑁂𑀤𑀦𑀸 𑀅𑀢𑁆𑀣𑀺 𑀓𑀺𑀭𑀺𑀬𑀸, 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑀸, 𑀓𑀫𑁆𑀫𑀯𑀺𑀧𑀸𑀓𑀚𑀸 𑀯𑁂𑀤𑀦𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀓𑀫𑁆𑀫𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀅𑀧𑁆𑀧𑀁 𑀓𑀫𑁆𑀫𑀯𑀺𑀧𑀸𑀓𑀚𑀁, 𑀩𑀳𑀼𑀢𑀭𑀁 𑀅𑀯𑀲𑁂𑀲𑀁. 𑀢𑀢𑁆𑀣 𑀩𑀸𑀮𑀸 ‘𑀲𑀩𑁆𑀩𑀁 𑀓𑀫𑁆𑀫𑀯𑀺𑀧𑀸𑀓𑀚𑀁 𑀬𑁂𑀯𑀸’𑀢𑀺 𑀅𑀢𑀺𑀥𑀸𑀯𑀦𑁆𑀢𑀺. 𑀢𑀁 𑀓𑀫𑁆𑀫𑀁 𑀦 𑀲𑀓𑁆𑀓𑀸 𑀯𑀺𑀦𑀸 𑀩𑀼𑀤𑁆𑀥𑀜𑀸𑀡𑁂𑀦 𑀯𑀯𑀢𑁆𑀣𑀸𑀦𑀁 𑀓𑀸𑀢𑀼𑀁.

‘‘𑀬𑀁 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄, 𑀢𑀁 𑀯𑁂𑀤𑀬𑀺𑀢𑀁 𑀦𑁂𑀯 𑀯𑀸𑀢𑀲𑀫𑀼𑀝𑁆𑀞𑀸𑀦𑀁, 𑀦 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀦 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀁, 𑀦 𑀲𑀦𑁆𑀦𑀺𑀧𑀸𑀢𑀺𑀓𑀁, 𑀦 𑀉𑀢𑀼𑀧𑀭𑀺𑀡𑀸𑀫𑀚𑀁, 𑀦 𑀯𑀺𑀲𑀫𑀧𑀭𑀺𑀳𑀸𑀭𑀚𑀁, 𑀦 𑀓𑀫𑁆𑀫𑀯𑀺𑀧𑀸𑀓𑀚𑀁, 𑀑𑀧𑀓𑁆𑀓𑀫𑀺𑀓𑀁 𑀬𑁂𑀯. 𑀤𑁂𑀯𑀤𑀢𑁆𑀢𑁄 𑀳𑀺, 𑀫𑀳𑀸𑀭𑀸𑀚, 𑀩𑀳𑀽𑀦𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀢𑀣𑀸𑀕𑀢𑁂 𑀆𑀖𑀸𑀢𑀁 𑀩𑀦𑁆𑀥𑀺, 𑀲𑁄 𑀢𑁂𑀦 𑀆𑀖𑀸𑀢𑁂𑀦 𑀫𑀳𑀢𑀺𑀁 𑀕𑀭𑀼𑀁 𑀲𑀺𑀮𑀁 𑀕𑀳𑁂𑀢𑁆𑀯𑀸 ‘𑀫𑀢𑁆𑀣𑀓𑁂 𑀧𑀸𑀢𑁂𑀲𑁆𑀲𑀸𑀫𑀻’𑀢𑀺 𑀫𑀼𑀜𑁆𑀘𑀺, 𑀅𑀣𑀜𑁆𑀜𑁂 𑀤𑁆𑀯𑁂 𑀲𑁂𑀮𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀲𑀺𑀮𑀁 𑀢𑀣𑀸𑀕𑀢𑀁 𑀅𑀲𑀫𑁆𑀧𑀢𑁆𑀢𑀁 𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀢𑀸𑀲𑀁 𑀧𑀳𑀸𑀭𑁂𑀦 𑀧𑀧𑀝𑀺𑀓𑀸 𑀪𑀺𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑁆𑀯𑀸 𑀭𑀼𑀳𑀺𑀭𑀁 [𑀦𑀺𑀧𑀢𑀺𑀢𑁆𑀯𑀸 𑀭𑀼𑀥𑀺𑀭𑀁 (𑀲𑁆𑀬𑀸.)] 𑀉𑀧𑁆𑀧𑀸𑀤𑁂𑀲𑀺, 𑀓𑀫𑁆𑀫𑀯𑀺𑀧𑀸𑀓𑀢𑁄 𑀯𑀸, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀏𑀲𑀸 𑀯𑁂𑀤𑀦𑀸 𑀦𑀺𑀩𑁆𑀩𑀢𑁆𑀢𑀸 𑀓𑀺𑀭𑀺𑀬𑀢𑁄 𑀯𑀸, 𑀢𑀢𑀼𑀤𑁆𑀥𑀁 𑀦𑀢𑁆𑀣𑀜𑁆𑀜𑀸 𑀯𑁂𑀤𑀦𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀤𑀼𑀝𑁆𑀞𑀢𑀸𑀬 𑀯𑀸 𑀩𑀻𑀚𑀁 𑀦 𑀲𑀫𑁆𑀪𑀯𑀢𑀺 𑀩𑀻𑀚𑀤𑀼𑀝𑁆𑀞𑀢𑀸𑀬 𑀯𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀫𑁆𑀫𑀯𑀺𑀧𑀸𑀓𑀢𑁄 𑀯𑀸 𑀪𑀕𑀯𑀢𑁄 𑀏𑀲𑀸 𑀯𑁂𑀤𑀦𑀸 𑀦𑀺𑀩𑁆𑀩𑀢𑁆𑀢𑀸 𑀓𑀺𑀭𑀺𑀬𑀢𑁄 𑀯𑀸, 𑀢𑀢𑀼𑀤𑁆𑀥𑀁 𑀦𑀢𑁆𑀣𑀜𑁆𑀜𑀸 𑀯𑁂𑀤𑀦𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀝𑁆𑀞𑀤𑀼𑀝𑁆𑀞𑀢𑀸𑀬 𑀯𑀸 𑀪𑁄𑀚𑀦𑀁 𑀯𑀺𑀲𑀫𑀁 𑀧𑀭𑀺𑀡𑀫𑀢𑀺 𑀆𑀳𑀸𑀭𑀤𑀼𑀝𑁆𑀞𑀢𑀸𑀬 𑀯𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀫𑁆𑀫𑀯𑀺𑀧𑀸𑀓𑀢𑁄 𑀯𑀸 𑀪𑀕𑀯𑀢𑁄 𑀏𑀲𑀸 𑀯𑁂𑀤𑀦𑀸 𑀦𑀺𑀩𑁆𑀩𑀢𑁆𑀢𑀸 𑀓𑀺𑀭𑀺𑀬𑀢𑁄 𑀯𑀸, 𑀢𑀢𑀼𑀤𑁆𑀥𑀁 𑀦𑀢𑁆𑀣𑀜𑁆𑀜𑀸 𑀯𑁂𑀤𑀦𑀸. 𑀅𑀧𑀺 𑀘, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀪𑀕𑀯𑀢𑁄 𑀓𑀫𑁆𑀫𑀯𑀺𑀧𑀸𑀓𑀚𑀸 𑀯𑁂𑀤𑀦𑀸, 𑀦𑀢𑁆𑀣𑀺 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀯𑁂𑀤𑀦𑀸, 𑀅𑀯𑀲𑁂𑀲𑁂𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀪𑀕𑀯𑀢𑁄 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀬 𑀘 𑀧𑀦 𑀯𑁂𑀤𑀦𑀸𑀬 𑀦 𑀲𑀓𑁆𑀓𑀸 𑀪𑀕𑀯𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁.

‘‘𑀦𑀺𑀧𑀢𑀦𑁆𑀢𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂 [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑁂 (𑀲𑀻.)] 𑀓𑀸𑀬𑁂 𑀇𑀝𑁆𑀞𑀸𑀦𑀺𑀝𑁆𑀞𑀸 𑀲𑀼𑀪𑀸𑀲𑀼𑀪𑀯𑁂𑀤𑀦𑀸. 𑀇𑀥, 𑀫𑀳𑀸𑀭𑀸𑀚, 𑀆𑀓𑀸𑀲𑁂 𑀔𑀺𑀢𑁆𑀢𑁄 𑀮𑁂𑀟𑁆𑀟𑀼 𑀫𑀳𑀸𑀧𑀣𑀯𑀺𑀬𑀸 𑀦𑀺𑀧𑀢𑀢𑀺, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀮𑁂𑀟𑁆𑀟𑀼 𑀧𑀼𑀩𑁆𑀩𑁂 𑀓𑀢𑁂𑀦 𑀫𑀳𑀸𑀧𑀣𑀯𑀺𑀬𑀸 𑀦𑀺𑀧𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀦𑀢𑁆𑀣𑀺 𑀲𑁄, 𑀪𑀦𑁆𑀢𑁂, 𑀳𑁂𑀢𑀼 𑀫𑀳𑀸𑀧𑀣𑀯𑀺𑀬𑀸, 𑀬𑁂𑀦 𑀳𑁂𑀢𑀼𑀦𑀸 𑀫𑀳𑀸𑀧𑀣𑀯𑀻 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦, 𑀪𑀦𑁆𑀢𑁂, 𑀅𑀓𑀫𑁆𑀫𑀓𑁂𑀦 𑀳𑁂𑀢𑀼𑀦𑀸 𑀲𑁄 𑀮𑁂𑀟𑁆𑀟𑀼 𑀫𑀳𑀸𑀧𑀣𑀯𑀺𑀬𑀁 𑀦𑀺𑀧𑀢𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻, 𑀏𑀯𑀁 𑀢𑀣𑀸𑀕𑀢𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀮𑁂𑀟𑁆𑀟𑀼 𑀧𑀼𑀩𑁆𑀩𑁂 𑀅𑀓𑀢𑁂𑀦 𑀫𑀳𑀸𑀧𑀣𑀯𑀺𑀬𑀁 𑀦𑀺𑀧𑀢𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀧𑀼𑀩𑁆𑀩𑁂 𑀅𑀓𑀢𑁂𑀦 𑀲𑀸 𑀲𑀓𑀮𑀺𑀓𑀸𑀧𑀸𑀤𑁂 𑀦𑀺𑀧𑀢𑀺𑀢𑀸.

‘‘𑀇𑀥 𑀧𑀦, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀫𑀳𑀸𑀧𑀣𑀯𑀺𑀁 𑀪𑀺𑀦𑁆𑀤𑀦𑁆𑀢𑀺 𑀘 𑀔𑀡𑀦𑁆𑀢𑀺 𑀘, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀫𑀳𑀸𑀧𑀣𑀯𑀺𑀁 𑀪𑀺𑀦𑁆𑀤𑀦𑁆𑀢𑀺 𑀘 𑀔𑀡𑀦𑁆𑀢𑀺 𑀘𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀸 𑀲𑀸 𑀲𑀓𑀮𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀦𑀺𑀧𑀢𑀺𑀢𑀸, 𑀦 𑀲𑀸 𑀲𑀓𑀮𑀺𑀓𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀦𑀺𑀧𑀢𑀺𑀢𑀸. 𑀬𑁄𑀧𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀲𑁄𑀧𑀺 𑀆𑀩𑀸𑀥𑁄 𑀦 𑀧𑀼𑀩𑁆𑀩𑁂 𑀓𑀢𑁂𑀦 𑀉𑀧𑁆𑀧𑀦𑁆𑀦𑁄, 𑀲𑀦𑁆𑀦𑀺𑀧𑀸𑀢𑀺𑀓𑁂𑀦𑁂𑀯 𑀉𑀧𑁆𑀧𑀦𑁆𑀦𑁄, 𑀬𑁂 𑀓𑁂𑀘𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀓𑀸𑀬𑀺𑀓𑀸 𑀆𑀩𑀸𑀥𑀸 𑀉𑀧𑁆𑀧𑀦𑁆𑀦𑀸, 𑀦 𑀢𑁂 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀙𑀦𑁆𑀦𑀁 𑀏𑀢𑁂𑀲𑀁 𑀲𑀫𑀼𑀝𑁆𑀞𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀦𑀺𑀩𑁆𑀩𑀢𑁆𑀢𑀸.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑀮𑀜𑁆𑀙𑀓𑁂 𑀫𑁄𑀴𑀺𑀬𑀲𑀻𑀯𑀓𑁂 [𑀫𑁄𑀮𑀺𑀬𑀲𑀺𑀯𑀓𑁂 (𑀲𑁆𑀬𑀸. 𑀓.) 𑀲𑀁. 𑀦𑀺. 𑁪.𑁨𑁬𑁯 𑀧𑀲𑁆𑀲𑀺𑀢𑀩𑁆𑀩𑀁] 𑀯𑁂𑀬𑁆𑀬𑀸𑀓𑀭𑀡𑁂 𑁋

‘‘‘𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀲𑀻𑀯𑀓, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀸𑀫𑀫𑁆𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀮𑁄𑀓𑀲𑁆𑀲𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀲𑀘𑁆𑀘𑀲𑀫𑁆𑀫𑀢𑀁, 𑀬𑀣𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀭, 𑀲𑀻𑀯𑀓, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 ‘‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂 𑀓𑀢𑀳𑁂𑀢𑀽’’𑀢𑀺. 𑀬𑀜𑁆𑀘 𑀲𑀸𑀫𑀁 𑀜𑀸𑀢𑀁, 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺, 𑀬𑀜𑁆𑀘 𑀮𑁄𑀓𑁂 𑀲𑀘𑁆𑀘𑀲𑀫𑁆𑀫𑀢𑀁, 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸𑀢𑀺 𑀯𑀤𑀸𑀫𑀺.

‘‘‘𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀲𑀻𑀯𑀓, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀑𑀧𑀓𑁆𑀓𑀫𑀺𑀓𑀸𑀦𑀺𑀧𑀺 𑀔𑁄, 𑀲𑀻𑀯𑀓…𑀧𑁂… 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀔𑁄, 𑀲𑀻𑀯𑀓, 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀸𑀫𑀫𑁆𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀮𑁄𑀓𑀲𑁆𑀲𑀧𑀺 𑀔𑁄 𑀏𑀢𑀁, 𑀲𑀻𑀯𑀓, 𑀲𑀘𑁆𑀘𑀲𑀫𑁆𑀫𑀢𑀁, 𑀬𑀣𑀸 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀺𑀧𑀺 𑀇𑀥𑁂𑀓𑀘𑁆𑀘𑀸𑀦𑀺 𑀯𑁂𑀤𑀬𑀺𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀭, 𑀲𑀻𑀯𑀓, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 ‘‘𑀬𑀁 𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂 𑀓𑀢𑀳𑁂𑀢𑀽’’𑀢𑀺. 𑀬𑀜𑁆𑀘 𑀲𑀸𑀫𑀁 𑀜𑀸𑀢𑀁, 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺, 𑀬𑀜𑁆𑀘 𑀮𑁄𑀓𑁂 𑀲𑀘𑁆𑀘𑀲𑀫𑁆𑀫𑀢𑀁, 𑀢𑀜𑁆𑀘 𑀅𑀢𑀺𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸𑀢𑀺 𑀯𑀤𑀸𑀫𑀻’’’𑀢𑀺.

‘‘𑀇𑀢𑀺𑀧𑀺, 𑀫𑀳𑀸𑀭𑀸𑀚, 𑀦 𑀲𑀩𑁆𑀩𑀸 𑀯𑁂𑀤𑀦𑀸 𑀓𑀫𑁆𑀫𑀯𑀺𑀧𑀸𑀓𑀚𑀸, 𑀲𑀩𑁆𑀩𑀁, 𑀫𑀳𑀸𑀭𑀸𑀚, 𑀅𑀓𑀼𑀲𑀮𑀁 𑀛𑀸𑀧𑁂𑀢𑁆𑀯𑀸 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺 𑀏𑀯𑀫𑁂𑀢𑀁 𑀥𑀸𑀭𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀓𑀼𑀲𑀮𑀘𑁆𑀙𑁂𑀤𑀦𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀉𑀢𑁆𑀢𑀭𑀺𑀓𑀭𑀡𑀻𑀬𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀬𑀁 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀢𑀣𑀸𑀕𑀢𑀲𑁆𑀲, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀬𑀸 𑀬𑁂𑀯 𑀫𑀽𑀮𑁂 𑀧𑀭𑀺𑀦𑀺𑀝𑁆𑀞𑀺𑀢𑀁, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀉𑀢𑁆𑀢𑀭𑀺𑀁 𑀓𑀭𑀡𑀻𑀬𑀁, 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄’𑀢𑀺, 𑀇𑀤𑀜𑁆𑀘 𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀸𑀦𑀁 𑀤𑀺𑀲𑁆𑀲𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀢𑀣𑀸𑀕𑀢𑀲𑁆𑀲, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀬𑀸 𑀬𑁂𑀯 𑀫𑀽𑀮𑁂 𑀧𑀭𑀺𑀦𑀺𑀝𑁆𑀞𑀺𑀢𑀁, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀉𑀢𑁆𑀢𑀭𑀺𑀁 𑀓𑀭𑀡𑀻𑀬𑀁, 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄, 𑀢𑁂𑀦 𑀳𑀺 ‘𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀦𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀦𑁄, 𑀢𑁂𑀦 𑀳𑀺 ‘𑀬𑀁 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁, 𑀢𑀣𑀸𑀕𑀢𑀲𑁆𑀲, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀬𑀸 𑀬𑁂𑀯 𑀫𑀽𑀮𑁂 𑀧𑀭𑀺𑀦𑀺𑀝𑁆𑀞𑀺𑀢’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀦𑀢𑁆𑀣𑀺 𑀓𑀢𑀓𑀭𑀡𑀻𑀬𑀲𑁆𑀲 𑀧𑀝𑀺𑀲𑀮𑁆𑀮𑀸𑀦𑀁, 𑀲𑀓𑀭𑀡𑀻𑀬𑀲𑁆𑀲𑁂𑀯 𑀧𑀝𑀺𑀲𑀮𑁆𑀮𑀸𑀦𑀁 𑀬𑀣𑀸 𑀦𑀸𑀫 𑀩𑁆𑀬𑀸𑀥𑀺𑀢𑀲𑁆𑀲𑁂𑀯 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑀁 𑀳𑁄𑀢𑀺, 𑀅𑀩𑁆𑀬𑀸𑀥𑀺𑀢𑀲𑁆𑀲 𑀓𑀺𑀁 𑀪𑁂𑀲𑀚𑁆𑀚𑁂𑀦. 𑀙𑀸𑀢𑀲𑁆𑀲𑁂𑀯 𑀪𑁄𑀚𑀦𑁂𑀦 𑀓𑀭𑀡𑀻𑀬𑀁 𑀳𑁄𑀢𑀺, 𑀅𑀙𑀸𑀢𑀲𑁆𑀲 𑀓𑀺𑀁 𑀪𑁄𑀚𑀦𑁂𑀦. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀢𑁆𑀣𑀺 𑀓𑀢𑀓𑀭𑀡𑀻𑀬𑀲𑁆𑀲 𑀧𑀝𑀺𑀲𑀮𑁆𑀮𑀸𑀦𑀁, 𑀲𑀓𑀭𑀡𑀻𑀬𑀲𑁆𑀲𑁂𑀯 𑀧𑀝𑀺𑀲𑀮𑁆𑀮𑀸𑀦𑀁. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀬𑀁 𑀓𑀺𑀜𑁆𑀘𑀺, 𑀫𑀳𑀸𑀭𑀸𑀚, 𑀓𑀭𑀡𑀻𑀬𑀁 𑀢𑀣𑀸𑀕𑀢𑀲𑁆𑀲, 𑀲𑀩𑁆𑀩𑀁 𑀢𑀁 𑀩𑁄𑀥𑀺𑀬𑀸 𑀬𑁂𑀯 𑀫𑀽𑀮𑁂 𑀧𑀭𑀺𑀦𑀺𑀝𑁆𑀞𑀺𑀢𑀁, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀉𑀢𑁆𑀢𑀭𑀺𑀁 𑀓𑀭𑀡𑀻𑀬𑀁, 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄, 𑀪𑀕𑀯𑀸 𑀘 𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀦𑁄, 𑀧𑀝𑀺𑀲𑀮𑁆𑀮𑀸𑀦𑀁 𑀔𑁄, 𑀫𑀳𑀸𑀭𑀸𑀚, 𑀩𑀳𑀼𑀕𑀼𑀡𑀁, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀸, 𑀢𑀁 𑀢𑁂 𑀲𑀼𑀓𑀢𑀕𑀼𑀡𑀫𑀦𑀼𑀲𑁆𑀲𑀭𑀦𑁆𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀮𑀤𑁆𑀥𑀯𑀭𑁄 𑀧𑀝𑀺𑀮𑀤𑁆𑀥𑀪𑁄𑀕𑁄 𑀢𑀁 𑀲𑀼𑀓𑀢𑀕𑀼𑀡𑀫𑀦𑀼𑀲𑁆𑀲𑀭𑀦𑁆𑀢𑁄 𑀅𑀧𑀭𑀸𑀧𑀭𑀁 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀏𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀸, 𑀢𑀁 𑀢𑁂 𑀲𑀼𑀓𑀢𑀕𑀼𑀡𑀫𑀦𑀼𑀲𑁆𑀲𑀭𑀦𑁆𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀆𑀢𑀼𑀭𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄 𑀪𑀺𑀲𑀓𑁆𑀓𑀫𑀼𑀧𑀲𑁂𑀯𑀺𑀢𑁆𑀯𑀸 𑀲𑁄𑀢𑁆𑀣𑀺𑀫𑀦𑀼𑀧𑁆𑀧𑀢𑁆𑀢𑁄 𑀢𑀁 𑀲𑀼𑀓𑀢𑀕𑀼𑀡𑀫𑀦𑀼𑀲𑁆𑀲𑀭𑀦𑁆𑀢𑁄 𑀅𑀧𑀭𑀸𑀧𑀭𑀁 𑀪𑀺𑀲𑀓𑁆𑀓𑀫𑀼𑀧𑀲𑁂𑀯𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀸, 𑀢𑀁 𑀢𑁂 𑀲𑀼𑀓𑀢𑀕𑀼𑀡𑀫𑀦𑀼𑀲𑁆𑀲𑀭𑀦𑁆𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺.

‘‘𑀅𑀝𑁆𑀞𑀯𑀻𑀲𑀢𑀺 𑀔𑁄 𑀧𑀦𑀺𑀫𑁂, 𑀫𑀳𑀸𑀭𑀸𑀚, 𑀧𑀝𑀺𑀲𑀮𑁆𑀮𑀸𑀦𑀕𑀼𑀡𑀸, 𑀬𑁂 𑀕𑀼𑀡𑁂 𑀲𑀫𑀦𑀼𑀲𑁆𑀲𑀭𑀦𑁆𑀢𑀸 [𑀲𑀫𑀦𑀼𑀧𑀲𑁆𑀲𑀦𑁆𑀢𑀸 (𑀲𑀻. 𑀧𑀻.)] 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞𑀯𑀻𑀲𑀢𑀺? 𑀇𑀥, 𑀫𑀳𑀸𑀭𑀸𑀚, 𑀧𑀝𑀺𑀲𑀮𑁆𑀮𑀸𑀦𑀁 𑀧𑀝𑀺𑀲𑀮𑁆𑀮𑀻𑀬𑀫𑀸𑀦𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺, 𑀆𑀬𑀼𑀁 𑀯𑀟𑁆𑀠𑁂𑀢𑀺, 𑀩𑀮𑀁 𑀤𑁂𑀢𑀺, 𑀯𑀚𑁆𑀚𑀁 𑀧𑀺𑀤𑀳𑀢𑀺, 𑀅𑀬𑀲𑀫𑀧𑀦𑁂𑀢𑀺, 𑀬𑀲𑀫𑀼𑀧𑀦𑁂𑀢𑀺, 𑀅𑀭𑀢𑀺𑀁 𑀯𑀺𑀦𑁄𑀤𑁂𑀢𑀺, 𑀭𑀢𑀺𑀫𑀼𑀧𑀤𑀳𑀢𑀺, 𑀪𑀬𑀫𑀧𑀦𑁂𑀢𑀺, 𑀯𑁂𑀲𑀸𑀭𑀚𑁆𑀚𑀁 𑀓𑀭𑁄𑀢𑀺, 𑀓𑁄𑀲𑀚𑁆𑀚𑀫𑀧𑀦𑁂𑀢𑀺, 𑀯𑀻𑀭𑀺𑀬𑀫𑀪𑀺𑀚𑀦𑁂𑀢𑀺, 𑀭𑀸𑀕𑀫𑀧𑀦𑁂𑀢𑀺, 𑀤𑁄𑀲𑀫𑀧𑀦𑁂𑀢𑀺, 𑀫𑁄𑀳𑀫𑀧𑀦𑁂𑀢𑀺, 𑀫𑀸𑀦𑀁 𑀦𑀺𑀳𑀦𑁆𑀢𑀺, 𑀯𑀺𑀢𑀓𑁆𑀓𑀁 𑀪𑀜𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀓𑀭𑁄𑀢𑀺, 𑀫𑀸𑀦𑀲𑀁 𑀲𑁆𑀦𑁂𑀳𑀬𑀢𑀺 [𑀲𑁄𑀪𑀬𑀢𑀺 (𑀲𑀻.)], 𑀳𑀸𑀲𑀁 𑀚𑀦𑁂𑀢𑀺, 𑀕𑀭𑀼𑀓𑀁 𑀓𑀭𑁄𑀢𑀺, 𑀮𑀸𑀪𑀫𑀼𑀧𑁆𑀧𑀸𑀤𑀬𑀢𑀺, 𑀦𑀫𑀲𑁆𑀲𑀺𑀬𑀁 𑀓𑀭𑁄𑀢𑀺, 𑀧𑀻𑀢𑀺𑀁 𑀧𑀸𑀧𑁂𑀢𑀺, 𑀧𑀸𑀫𑁄𑀚𑁆𑀚𑀁 𑀓𑀭𑁄𑀢𑀺, 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀁 𑀤𑀲𑁆𑀲𑀬𑀢𑀺, 𑀪𑀯𑀧𑁆𑀧𑀝𑀺𑀲𑀦𑁆𑀥𑀺𑀁 𑀉𑀕𑁆𑀖𑀸𑀝𑁂𑀢𑀺, 𑀲𑀩𑁆𑀩𑀲𑀸𑀫𑀜𑁆𑀜𑀁 𑀤𑁂𑀢𑀺. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀅𑀝𑁆𑀞𑀯𑀻𑀲𑀢𑀺 𑀧𑀝𑀺𑀲𑀮𑁆𑀮𑀸𑀦𑀕𑀼𑀡𑀸, 𑀬𑁂 𑀕𑀼𑀡𑁂 𑀲𑀫𑀦𑀼𑀲𑁆𑀲𑀭𑀦𑁆𑀢𑀸 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺.

‘‘𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀸 𑀲𑀦𑁆𑀢𑀁 𑀲𑀼𑀔𑀁 𑀲𑀫𑀸𑀧𑀢𑁆𑀢𑀺𑀭𑀢𑀺𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀸. 𑀘𑀢𑀽𑀳𑀺 𑀔𑁄, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀯𑀺𑀳𑀸𑀭𑀨𑀸𑀲𑀼𑀢𑀸𑀬𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺, 𑀅𑀦𑀯𑀚𑁆𑀚𑀕𑀼𑀡𑀩𑀳𑀼𑀮𑀢𑀸𑀬𑀧𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺, 𑀅𑀲𑁂𑀲𑀅𑀭𑀺𑀬𑀯𑀻𑀣𑀺𑀢𑁄𑀧𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺, 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀣𑀼𑀢𑀣𑁄𑀫𑀺𑀢𑀯𑀡𑁆𑀡𑀺𑀢𑀧𑀲𑀢𑁆𑀣𑀢𑁄𑀧𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺. 𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀺 𑀦 𑀲𑀓𑀭𑀡𑀻𑀬𑀢𑀸𑀬, 𑀦 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑀸𑀬, 𑀅𑀣 𑀔𑁄 𑀕𑀼𑀡𑀯𑀺𑀲𑁂𑀲𑀤𑀲𑁆𑀲𑀸𑀯𑀺𑀢𑀸𑀬 𑀢𑀣𑀸𑀕𑀢𑀸 𑀧𑀝𑀺𑀲𑀮𑁆𑀮𑀸𑀦𑀁 𑀲𑁂𑀯𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀉𑀢𑁆𑀢𑀭𑀺𑀓𑀭𑀡𑀻𑀬𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀇𑀤𑁆𑀥𑀺𑀩𑀮𑀤𑀲𑁆𑀲𑀦𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸…𑀧𑁂… 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺, 𑀢𑁂𑀦 𑀳𑀺 𑀢𑁂𑀫𑀸𑀲𑀧𑀭𑀺𑀘𑁆𑀙𑁂𑀤𑁄 𑀫𑀺𑀘𑁆𑀙𑀸. 𑀬𑀤𑀺, 𑀪𑀦𑁆𑀢𑁂, 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺, 𑀢𑁂𑀦 𑀳𑀺 ‘‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸…𑀧𑁂… 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀦𑀢𑁆𑀣𑀺 𑀢𑀣𑀸𑀕𑀢𑀸𑀦𑀁 𑀅𑀝𑁆𑀞𑀸𑀦𑁂 𑀕𑀚𑁆𑀚𑀺𑀢𑀁. 𑀅𑀫𑁄𑀖𑀯𑀘𑀦𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀢𑀣𑀯𑀘𑀦𑀸 𑀅𑀤𑁆𑀯𑁂𑀚𑁆𑀛𑀯𑀘𑀦𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀕𑀫𑁆𑀪𑀻𑀭𑁄 𑀲𑀼𑀦𑀺𑀧𑀼𑀡𑁄 𑀤𑀼𑀦𑁆𑀦𑀺𑀚𑁆𑀛𑀸𑀧𑀬𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀪𑀺𑀦𑁆𑀤𑁂𑀢𑀁 𑀤𑀺𑀝𑁆𑀞𑀺𑀚𑀸𑀮𑀁, 𑀏𑀓𑀁𑀲𑁂 𑀞𑀧𑀬, 𑀪𑀺𑀦𑁆𑀤 𑀧𑀭𑀯𑀸𑀤’’𑀦𑁆𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸…𑀧𑁂… 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺, 𑀢𑁂𑀫𑀸𑀲𑀧𑀭𑀺𑀘𑁆𑀙𑁂𑀤𑁄 𑀘 𑀪𑀡𑀺𑀢𑁄, 𑀲𑁄 𑀘 𑀧𑀦 𑀓𑀧𑁆𑀧𑁄 𑀆𑀬𑀼𑀓𑀧𑁆𑀧𑁄 𑀯𑀼𑀘𑁆𑀘𑀢𑀺. 𑀦, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀮𑀁 𑀓𑀺𑀢𑁆𑀢𑀬𑀫𑀸𑀦𑁄 𑀏𑀯𑀫𑀸𑀳, 𑀇𑀤𑁆𑀥𑀺𑀩𑀮𑀁 𑀧𑀦 𑀫𑀳𑀸𑀭𑀸𑀚, 𑀪𑀕𑀯𑀸 𑀧𑀭𑀺𑀓𑀺𑀢𑁆𑀢𑀬𑀫𑀸𑀦𑁄 𑀏𑀯𑀫𑀸𑀳 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸…𑀧𑁂… 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀪𑀯𑁂𑀬𑁆𑀬 𑀲𑀻𑀖𑀕𑀢𑀺 𑀅𑀦𑀺𑀮𑀚𑀯𑁄, 𑀢𑀲𑁆𑀲 𑀭𑀸𑀚𑀸 𑀚𑀯𑀩𑀮𑀁 𑀧𑀭𑀺𑀓𑀺𑀢𑁆𑀢𑀬𑀦𑁆𑀢𑁄 𑀲𑀦𑁂𑀕𑀫𑀚𑀸𑀦𑀧𑀤𑀪𑀝𑀩𑀮𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀅𑀫𑀘𑁆𑀘𑀚𑀦𑀫𑀚𑁆𑀛𑁂 𑀏𑀯𑀁 𑀯𑀤𑁂𑀬𑁆𑀬 ‘𑀆𑀓𑀗𑁆𑀔𑀫𑀸𑀦𑁄 𑀫𑁂, 𑀪𑁄, 𑀅𑀬𑀁 𑀳𑀬𑀯𑀭𑁄 𑀲𑀸𑀕𑀭𑀚𑀮𑀧𑀭𑀺𑀬𑀦𑁆𑀢𑀁 𑀫𑀳𑀺𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀔𑀡𑁂𑀦 𑀇𑀥𑀸𑀕𑀘𑁆𑀙𑁂𑀬𑁆𑀬𑀸’𑀢𑀺, 𑀦 𑀘 𑀢𑀁 𑀚𑀯𑀕𑀢𑀺𑀁 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀤𑀲𑁆𑀲𑁂𑀬𑁆𑀬, 𑀯𑀺𑀚𑁆𑀚𑀢𑀺 𑀘 𑀲𑁄 𑀚𑀯𑁄 𑀢𑀲𑁆𑀲, 𑀲𑀫𑀢𑁆𑀣𑁄 𑀘 𑀲𑁄 𑀔𑀡𑁂𑀦 𑀲𑀸𑀕𑀭𑀚𑀮𑀧𑀭𑀺𑀬𑀦𑁆𑀢𑀁 𑀫𑀳𑀺𑀁 𑀅𑀦𑀼𑀯𑀺𑀘𑀭𑀺𑀢𑀼𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑀁 𑀧𑀭𑀺𑀓𑀺𑀢𑁆𑀢𑀬𑀫𑀸𑀦𑁄 𑀏𑀯𑀫𑀸𑀳, 𑀢𑀫𑁆𑀧𑀺 𑀢𑁂𑀯𑀺𑀚𑁆𑀚𑀸𑀦𑀁 𑀙𑀴𑀪𑀺𑀜𑁆𑀜𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀯𑀺𑀫𑀮𑀔𑀻𑀡𑀸𑀲𑀯𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀜𑁆𑀘 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀡𑀺𑀢𑀁 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺. 𑀯𑀺𑀚𑁆𑀚𑀢𑀺 𑀘 𑀢𑀁, 𑀫𑀳𑀸𑀭𑀸𑀚, 𑀇𑀤𑁆𑀥𑀺𑀩𑀮𑀁 𑀪𑀕𑀯𑀢𑁄, 𑀲𑀫𑀢𑁆𑀣𑁄 𑀘 𑀪𑀕𑀯𑀸 𑀇𑀤𑁆𑀥𑀺𑀩𑀮𑁂𑀦 𑀓𑀧𑁆𑀧𑀁 𑀯𑀸 𑀞𑀸𑀢𑀼𑀁 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸, 𑀦 𑀘 𑀪𑀕𑀯𑀸 𑀢𑀁 𑀇𑀤𑁆𑀥𑀺𑀩𑀮𑀁 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀤𑀲𑁆𑀲𑁂𑀢𑀺, 𑀅𑀦𑀢𑁆𑀣𑀺𑀓𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀪𑀯𑁂𑀳𑀺, 𑀕𑀭𑀳𑀺𑀢𑀸 𑀘 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀪𑀯𑀸. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀽𑀣𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺. 𑀏𑀯𑀫𑁂𑀯 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀦 𑀯𑀡𑁆𑀡𑁂𑀫𑀺 𑀅𑀦𑁆𑀢𑀫𑀲𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀻’𑀢𑀺 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀪𑀯𑀕𑀢𑀺𑀬𑁄𑀦𑀺𑀬𑁄 𑀕𑀽𑀣𑀲𑀫𑀁 𑀤𑀺𑀲𑁆𑀯𑀸 𑀇𑀤𑁆𑀥𑀺𑀩𑀮𑀁 𑀦𑀺𑀲𑁆𑀲𑀸𑀬 𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑀁 𑀓𑀭𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀪𑀕𑀯𑀸 𑀇𑀤𑁆𑀥𑀺𑀩𑀮𑀁 𑀧𑀭𑀺𑀓𑀺𑀢𑁆𑀢𑀬𑀫𑀸𑀦𑁄 𑀏𑀯𑀭𑀽𑀧𑀁 𑀩𑀼𑀤𑁆𑀥𑀲𑀻𑀳𑀦𑀸𑀤𑀫𑀪𑀺𑀦𑀤𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀇𑀤𑁆𑀥𑀺𑀩𑀮𑀤𑀲𑁆𑀲𑀦𑀧𑀜𑁆𑀳𑁄 𑀤𑀲𑀫𑁄.

𑀇𑀤𑁆𑀥𑀺𑀩𑀮𑀯𑀕𑁆𑀕𑁄 𑀧𑀞𑀫𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀤𑀲 𑀧𑀜𑁆𑀳𑀸.

𑁨. 𑀅𑀪𑁂𑀚𑁆𑀚𑀯𑀕𑁆𑀕𑁄

𑁧. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀦𑁄 𑀅𑀦𑀪𑀺𑀜𑁆𑀜𑀸𑀬𑀸’𑀢𑀺. 𑀧𑀼𑀦 𑀘 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀏𑀯𑀁 𑀪𑀡𑀺𑀢𑀁 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀽’𑀢𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑀼𑀧𑁆𑀧𑀜𑁆𑀜𑀢𑁆𑀢𑀸𑀦𑀺, 𑀉𑀤𑀸𑀳𑀼 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀚𑀸𑀦𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀦𑀺, 𑀬𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀸𑀧𑁂𑀢𑀺? 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀦𑁄 𑀅𑀦𑀪𑀺𑀜𑁆𑀜𑀸𑀬𑀸’𑀢𑀺, 𑀢𑁂𑀦 𑀳𑀺 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀽’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀏𑀯𑀁 𑀪𑀡𑀺𑀢𑀁 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀽’𑀢𑀺 𑀢𑁂𑀦 𑀳𑀺 ‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀦𑁄 𑀅𑀦𑀪𑀺𑀜𑁆𑀜𑀸𑀬𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀲𑀼𑀔𑀼𑀫𑁄 𑀦𑀺𑀧𑀼𑀡𑁄 𑀕𑀫𑁆𑀪𑀻𑀭𑁄 𑀲𑀼𑀕𑀫𑁆𑀪𑀻𑀭𑁄 𑀤𑀼𑀦𑁆𑀦𑀺𑀚𑁆𑀛𑀸𑀧𑀬𑁄, 𑀲𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀢𑀢𑁆𑀣 𑀢𑁂 𑀜𑀸𑀡𑀩𑀮𑀯𑀺𑀧𑁆𑀨𑀸𑀭𑀁 𑀤𑀲𑁆𑀲𑁂𑀳𑀻’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀦𑁄 𑀅𑀦𑀪𑀺𑀜𑁆𑀜𑀸𑀬𑀸’𑀢𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀏𑀯𑀁 𑀪𑀡𑀺𑀢𑀁 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀽’𑀢𑀺, 𑀢𑀁 𑀧𑀦, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀪𑀺𑀓𑁆𑀔𑀽 𑀯𑀻𑀫𑀁𑀲𑀫𑀸𑀦𑁄 𑀆𑀳 ‘𑀉𑀓𑁆𑀓𑀮𑁂𑀲𑁆𑀲𑀦𑁆𑀢𑀺 [𑀉𑀓𑁆𑀓𑀟𑁆𑀠𑀺𑀲𑁆𑀲𑀦𑁆𑀢𑀺 (𑀲𑀻.), 𑀉𑀲𑁆𑀲𑀓𑁆𑀓𑀺𑀲𑁆𑀲𑀦𑁆𑀢𑀺 (𑀲𑁆𑀬𑀸.)] 𑀦𑀼 𑀔𑁄 𑀫𑀫 𑀲𑀸𑀯𑀓𑀸 𑀫𑀬𑀸 𑀯𑀺𑀲𑁆𑀲𑀚𑁆𑀚𑀸𑀧𑀻𑀬𑀫𑀸𑀦𑀸 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀉𑀤𑀸𑀳𑀼 𑀆𑀤𑀺𑀬𑀺𑀲𑁆𑀲𑀦𑁆𑀢𑀻’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀧𑀼𑀢𑁆𑀢𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑀁 𑀔𑁄, 𑀢𑀸𑀢𑀸, 𑀫𑀳𑀸𑀚𑀦𑀧𑀤𑁄 𑀲𑀩𑁆𑀩𑀤𑀺𑀲𑀸𑀲𑀼 𑀲𑀸𑀕𑀭𑀧𑀭𑀺𑀬𑀦𑁆𑀢𑁄, 𑀤𑀼𑀓𑁆𑀓𑀭𑁄, 𑀢𑀸𑀢𑀸, 𑀢𑀸𑀯𑀢𑀓𑁂𑀦 𑀩𑀮𑁂𑀦 𑀥𑀸𑀭𑁂𑀢𑀼𑀁, 𑀏𑀣 𑀢𑀼𑀫𑁆𑀳𑁂, 𑀢𑀸𑀢𑀸, 𑀫𑀫𑀘𑁆𑀘𑀬𑁂𑀦 𑀧𑀘𑁆𑀘𑀦𑁆𑀢𑁂 𑀧𑀘𑁆𑀘𑀦𑁆𑀢𑁂 𑀤𑁂𑀲𑁂 𑀧𑀚𑀳𑀣𑀸’𑀢𑀺. 𑀅𑀧𑀺 𑀦𑀼 𑀔𑁄 𑀢𑁂, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑀸 𑀧𑀺𑀢𑀼𑀅𑀘𑁆𑀘𑀬𑁂𑀦 𑀳𑀢𑁆𑀣𑀕𑀢𑁂 𑀚𑀦𑀧𑀤𑁂 𑀲𑀩𑁆𑀩𑁂 𑀢𑁂 𑀧𑀘𑁆𑀘𑀦𑁆𑀢𑁂 𑀧𑀘𑁆𑀘𑀦𑁆𑀢𑁂 𑀤𑁂𑀲𑁂 𑀫𑀼𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺? ‘‘𑀦 𑀳𑀺 𑀪𑀦𑁆𑀢𑁂, 𑀭𑀸𑀚𑀢𑁄 [𑀭𑀸𑀚𑀸𑀦𑁄 (𑀲𑀻. 𑀧𑀻.)], 𑀪𑀦𑁆𑀢𑁂, 𑀮𑀼𑀤𑁆𑀥𑀢𑀭𑀸 [𑀮𑀤𑁆𑀥𑀢𑀭𑀸 (𑀓.)] 𑀓𑀼𑀫𑀸𑀭𑀸 𑀭𑀚𑁆𑀚𑀮𑁄𑀪𑁂𑀦 𑀢𑀤𑀼𑀢𑁆𑀢𑀭𑀺𑀁 𑀤𑀺𑀕𑀼𑀡𑀢𑀺𑀕𑀼𑀡𑀁 𑀚𑀦𑀧𑀤𑀁 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀼𑀁 [𑀧𑀭𑀺𑀓𑀟𑁆𑀠𑁂𑀬𑁆𑀬𑀼𑀁 (𑀲𑀻. 𑀧𑀻.)], 𑀓𑀺𑀁 𑀧𑀦 𑀢𑁂 𑀳𑀢𑁆𑀣𑀕𑀢𑀁 𑀚𑀦𑀧𑀤𑀁 𑀫𑀼𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀪𑀺𑀓𑁆𑀔𑀽 𑀯𑀻𑀫𑀁𑀲𑀫𑀸𑀦𑁄 𑀏𑀯𑀫𑀸𑀳 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀽’𑀢𑀺. 𑀤𑀼𑀓𑁆𑀔𑀧𑀭𑀺𑀫𑀼𑀢𑁆𑀢𑀺𑀬𑀸, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀧𑀼𑀢𑁆𑀢𑀸 𑀥𑀫𑁆𑀫𑀮𑁄𑀪𑁂𑀦 𑀅𑀜𑁆𑀜𑀫𑁆𑀧𑀺 𑀉𑀢𑁆𑀢𑀭𑀺𑀁 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀁 𑀕𑁄𑀧𑁂𑀬𑁆𑀬𑀼𑀁, 𑀓𑀺𑀁 𑀧𑀦 𑀧𑀓𑀢𑀺𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀫𑀼𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺?

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀪𑀕𑀯𑀸 𑀆𑀳 ‘𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺, 𑀏𑀢𑁆𑀣𑀸𑀬𑀁 𑀚𑀦𑁄 𑀲𑀫𑁆𑀫𑀽𑀴𑁆𑀳𑁄 𑀯𑀺𑀫𑀢𑀺𑀚𑀸𑀢𑁄 𑀅𑀥𑀺𑀓𑀢𑁄 𑀲𑀁𑀲𑀬𑀧𑀓𑁆𑀔𑀦𑁆𑀤𑁄. 𑀓𑀢𑀫𑀸𑀦𑀺 𑀢𑀸𑀦𑀺 𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀓𑀢𑀫𑀸𑀦𑀺 𑀅𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺? 𑀤𑀼𑀓𑁆𑀓𑀝𑀁, 𑀫𑀳𑀸𑀭𑀸𑀚, 𑀔𑀼𑀤𑁆𑀤𑀓𑀁 𑀲𑀺𑀓𑁆𑀔𑀸𑀧𑀤𑀁, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀦𑀼𑀔𑀼𑀤𑁆𑀤𑀓𑀁 𑀲𑀺𑀓𑁆𑀔𑀸𑀧𑀤𑀁, 𑀇𑀫𑀸𑀦𑀺 𑀤𑁆𑀯𑁂 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀧𑀼𑀩𑁆𑀩𑀓𑁂𑀳𑀺𑀧𑀺, 𑀫𑀳𑀸𑀭𑀸𑀚, 𑀫𑀳𑀸𑀣𑁂𑀭𑁂𑀳𑀺 𑀏𑀢𑁆𑀣 𑀯𑀺𑀫𑀢𑀺 𑀉𑀧𑁆𑀧𑀸𑀤𑀺𑀢𑀸, 𑀢𑁂𑀳𑀺𑀧𑀺 𑀏𑀓𑀚𑁆𑀛𑀁 𑀦 𑀓𑀢𑁄 𑀥𑀫𑁆𑀫𑀲𑀡𑁆𑀞𑀺𑀢𑀺𑀧𑀭𑀺𑀬𑀸𑀬𑁂 𑀪𑀕𑀯𑀢𑀸 𑀏𑀲𑁄 𑀧𑀜𑁆𑀳𑁄 𑀉𑀧𑀤𑀺𑀝𑁆𑀞𑁄𑀢𑀺. 𑀘𑀺𑀭𑀦𑀺𑀓𑁆𑀔𑀺𑀢𑁆𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀺𑀦𑀭𑀳𑀲𑁆𑀲𑀁 𑀅𑀚𑁆𑀚𑁂𑀢𑀭𑀳𑀺 𑀮𑁄𑀓𑁂 𑀯𑀺𑀯𑀝𑀁 𑀧𑀸𑀓𑀝𑀁 𑀓𑀢’’𑀦𑁆𑀢𑀺.

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀧𑀜𑁆𑀳𑁄 𑀧𑀞𑀫𑁄.

𑁨. 𑀅𑀩𑁆𑀬𑀸𑀓𑀭𑀡𑀻𑀬𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀦𑀢𑁆𑀣𑀸𑀦𑀦𑁆𑀤 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀻’𑀢𑀺, 𑀧𑀼𑀦 𑀘 𑀣𑁂𑀭𑁂𑀦 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁂𑀦 [𑀫𑀸𑀮𑀼𑀗𑁆𑀓𑁆𑀬𑀧𑀼𑀢𑁆𑀢𑁂𑀦 (𑀲𑀻. 𑀲𑁆𑀬𑀸. 𑀧𑀻.) 𑀲𑀁. 𑀦𑀺. 𑁪.𑁯𑁫; 𑀅. 𑀦𑀺. 𑁧.𑁪.𑁨𑁫𑁭 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀸𑀲𑀺. 𑀏𑀲𑁄 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀤𑁆𑀯𑀬𑀦𑁆𑀢𑁄 [𑀤𑁆𑀯𑀬𑀢𑁄 (𑀲𑀻.)] 𑀏𑀓𑀦𑁆𑀢𑀦𑀺𑀲𑁆𑀲𑀺𑀢𑁄 𑀪𑀯𑀺𑀲𑁆𑀲𑀢𑀺 𑀅𑀚𑀸𑀦𑀦𑁂𑀦 𑀯𑀸 𑀕𑀼𑀬𑁆𑀳𑀓𑀭𑀡𑁂𑀦 𑀯𑀸. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀦𑀢𑁆𑀣𑀸𑀦𑀦𑁆𑀤 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀻’𑀢𑀺, 𑀢𑁂𑀦 𑀳𑀺 𑀣𑁂𑀭𑀲𑁆𑀲 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑁆𑀲 𑀅𑀚𑀸𑀦𑀦𑁆𑀢𑁂𑀦 𑀦 𑀩𑁆𑀬𑀸𑀓𑀢𑀁. 𑀬𑀤𑀺 𑀚𑀸𑀦𑀦𑁆𑀢𑁂𑀦 𑀦 𑀩𑁆𑀬𑀸𑀓𑀢𑀁, 𑀢𑁂𑀦 𑀳𑀺 𑀅𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀺. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀦𑀢𑁆𑀣𑀸𑀦𑀦𑁆𑀤 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀻’𑀢𑀺, 𑀅𑀩𑁆𑀬𑀸𑀓𑀢𑁄 𑀘 𑀣𑁂𑀭𑁂𑀦 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑁄, 𑀢𑀜𑁆𑀘 𑀧𑀦 𑀦 𑀅𑀚𑀸𑀦𑀦𑁆𑀢𑁂𑀦 𑀦 𑀕𑀼𑀬𑁆𑀳𑀓𑀭𑀡𑁂𑀦. 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄 𑀞𑀧𑀦𑀻𑀬𑁄 𑀧𑀜𑁆𑀳𑁄𑀢𑀺.

‘‘𑀓𑀢𑀫𑁄 𑀘, 𑀫𑀳𑀸𑀭𑀸𑀚, 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄? ‘𑀭𑀽𑀧𑀁 𑀅𑀦𑀺𑀘𑁆𑀘’𑀦𑁆𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, ‘𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’𑀢𑀺…𑀧𑁂… ‘𑀲𑀜𑁆𑀜𑀸 𑀅𑀦𑀺𑀘𑁆𑀘𑀸’𑀢𑀺…𑀧𑁂… ‘𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’𑀢𑀺…𑀧𑁂… ‘𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, 𑀅𑀬𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄.

‘‘𑀓𑀢𑀫𑁄 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄? ‘𑀅𑀦𑀺𑀘𑁆𑀘𑀁 𑀧𑀦 𑀭𑀽𑀧’𑀦𑁆𑀢𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, ‘𑀅𑀦𑀺𑀘𑁆𑀘𑀸 𑀧𑀦 𑀯𑁂𑀤𑀦𑀸’𑀢𑀺…𑀧𑁂… ‘𑀅𑀦𑀺𑀘𑁆𑀘𑀸 𑀧𑀦 𑀲𑀜𑁆𑀜𑀸’𑀢𑀺…𑀧𑁂… ‘𑀅𑀦𑀺𑀘𑁆𑀘𑀸 𑀧𑀦 𑀲𑀗𑁆𑀔𑀸𑀭𑀸’𑀢𑀺…𑀧𑁂… ‘𑀅𑀦𑀺𑀘𑁆𑀘𑀁 𑀧𑀦 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, 𑀅𑀬𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄.

‘‘𑀓𑀢𑀫𑁄 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄? ‘𑀓𑀺𑀁 𑀦𑀼 𑀔𑁄 𑀘𑀓𑁆𑀔𑀼𑀦𑀸 𑀲𑀩𑁆𑀩𑀁 𑀯𑀺𑀚𑀸𑀦𑀸𑀢𑀻’𑀢𑀺 𑀅𑀬𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄.

‘‘𑀓𑀢𑀫𑁄 𑀞𑀧𑀦𑀻𑀬𑁄 𑀧𑀜𑁆𑀳𑁄? ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀞𑀧𑀦𑀻𑀬𑁄 𑀧𑀜𑁆𑀳𑁄, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺. ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺. ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺. ‘𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀮𑁄𑀓𑁄’𑀢𑀺. ‘𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺. ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺. ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺. ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺. ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺. ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀞𑀧𑀦𑀻𑀬𑁄 𑀧𑀜𑁆𑀳𑁄, 𑀅𑀬𑀁 𑀞𑀧𑀦𑀻𑀬𑁄 𑀧𑀜𑁆𑀳𑁄.

‘‘𑀪𑀕𑀯𑀸, 𑀫𑀳𑀸𑀭𑀸𑀚, 𑀣𑁂𑀭𑀲𑁆𑀲 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑁆𑀲 𑀢𑀁 𑀞𑀧𑀦𑀻𑀬𑀁 𑀧𑀜𑁆𑀳𑀁 𑀦 𑀩𑁆𑀬𑀸𑀓𑀸𑀲𑀺. 𑀲𑁄 𑀧𑀦 𑀧𑀜𑁆𑀳𑁄 𑀓𑀺𑀁 𑀓𑀸𑀭𑀡𑀸 𑀞𑀧𑀦𑀻𑀬𑁄? 𑀦 𑀢𑀲𑁆𑀲 𑀤𑀻𑀧𑀦𑀸𑀬 𑀳𑁂𑀢𑀼 𑀯𑀸 𑀓𑀸𑀭𑀡𑀁 𑀯𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀧𑀜𑁆𑀳𑁄 𑀞𑀧𑀦𑀻𑀬𑁄. 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀓𑀸𑀭𑀡𑀫𑀳𑁂𑀢𑀼𑀓𑀁 𑀕𑀺𑀭𑀫𑀼𑀤𑀻𑀭𑀡’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀩𑁆𑀬𑀸𑀓𑀭𑀡𑀻𑀬𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀫𑀘𑁆𑀘𑀼𑀪𑀸𑀬𑀦𑀸𑀪𑀸𑀬𑀦𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺, 𑀧𑀼𑀦 𑀪𑀡𑀺𑀢𑀁 ‘𑀅𑀭𑀳𑀸 𑀲𑀩𑁆𑀩𑀪𑀬𑀫𑀢𑀺𑀓𑁆𑀓𑀦𑁆𑀢𑁄’𑀢𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀸 𑀤𑀡𑁆𑀟𑀪𑀬𑀸 𑀢𑀲𑀢𑀺, 𑀦𑀺𑀭𑀬𑁂 𑀯𑀸 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀚𑀮𑀺𑀢𑀸 𑀓𑀼𑀣𑀺𑀢𑀸 𑀢𑀢𑁆𑀢𑀸 𑀲𑀦𑁆𑀢𑀢𑁆𑀢𑀸 𑀢𑀫𑁆𑀳𑀸 𑀚𑀮𑀺𑀢𑀕𑁆𑀕𑀺𑀚𑀸𑀮𑀓𑀸 𑀫𑀳𑀸𑀦𑀺𑀭𑀬𑀸 𑀘𑀯𑀫𑀸𑀦𑀸 𑀫𑀘𑁆𑀘𑀼𑀦𑁄 𑀪𑀸𑀬𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺, 𑀢𑁂𑀦 𑀳𑀺 ‘𑀅𑀭𑀳𑀸 𑀲𑀩𑁆𑀩𑀪𑀬𑀫𑀢𑀺𑀓𑁆𑀓𑀦𑁆𑀢𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀭𑀳𑀸 𑀲𑀩𑁆𑀩𑀪𑀬𑀫𑀢𑀺𑀓𑁆𑀓𑀦𑁆𑀢𑁄’𑀢𑀺, 𑀢𑁂𑀦 𑀳𑀺 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀁 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀦𑁂𑀢𑀁, 𑀫𑀳𑀸𑀭𑀸𑀚, 𑀯𑀘𑀦𑀁 𑀪𑀕𑀯𑀢𑀸 𑀅𑀭𑀳𑀦𑁆𑀢𑁂 𑀉𑀧𑀸𑀤𑀸𑀬 𑀪𑀡𑀺𑀢𑀁 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺. 𑀞𑀧𑀺𑀢𑁄 𑀅𑀭𑀳𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁, 𑀲𑀫𑀽𑀳𑀢𑁄 𑀪𑀬𑀳𑁂𑀢𑀼 𑀅𑀭𑀳𑀢𑁄. 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀲𑀓𑀺𑀮𑁂𑀲𑀸, 𑀬𑁂𑀲𑀜𑁆𑀘 𑀅𑀥𑀺𑀫𑀢𑁆𑀢𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺, 𑀬𑁂 𑀘 𑀲𑀼𑀔𑀤𑀼𑀓𑁆𑀔𑁂𑀲𑀼 𑀉𑀦𑁆𑀦𑀢𑀸𑀯𑀦𑀢𑀸, 𑀢𑁂 𑀉𑀧𑀸𑀤𑀸𑀬 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺. 𑀅𑀭𑀳𑀢𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀕𑀢𑀺 𑀉𑀧𑀘𑁆𑀙𑀺𑀦𑁆𑀦𑀸, 𑀬𑁄𑀦𑀺 𑀯𑀺𑀤𑁆𑀥𑀁𑀲𑀺𑀢𑀸, 𑀧𑀝𑀺𑀲𑀦𑁆𑀥𑀺 𑀉𑀧𑀳𑀢𑀸, 𑀪𑀕𑁆𑀕𑀸 𑀨𑀸𑀲𑀼𑀓𑀸, 𑀲𑀫𑀽𑀳𑀢𑀸 𑀲𑀩𑁆𑀩𑀪𑀯𑀸𑀮𑀬𑀸, 𑀲𑀫𑀼𑀘𑁆𑀙𑀺𑀦𑁆𑀦𑀸 𑀲𑀩𑁆𑀩𑀲𑀗𑁆𑀔𑀸𑀭𑀸, 𑀳𑀢𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀯𑀺𑀳𑀢𑀸 𑀅𑀯𑀺𑀚𑁆𑀚𑀸, 𑀅𑀩𑀻𑀚𑀁 𑀯𑀺𑀜𑁆𑀜𑀸𑀡𑀁 𑀓𑀢𑀁, 𑀤𑀟𑁆𑀠𑀸 𑀲𑀩𑁆𑀩𑀓𑀺𑀮𑁂𑀲𑀸, 𑀅𑀢𑀺𑀯𑀢𑁆𑀢𑀸 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀅𑀭𑀳𑀸 𑀦 𑀢𑀲𑀢𑀺 𑀲𑀩𑁆𑀩𑀪𑀬𑁂𑀳𑀺.

‘‘𑀇𑀥, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀢𑁆𑀢𑀸𑀭𑁄 𑀫𑀳𑀸𑀫𑀢𑁆𑀢𑀸 𑀪𑀯𑁂𑀬𑁆𑀬𑀼𑀁 𑀅𑀦𑀼𑀭𑀓𑁆𑀔𑀸 𑀮𑀤𑁆𑀥𑀬𑀲𑀸 𑀯𑀺𑀲𑁆𑀲𑀸𑀲𑀺𑀓𑀸 𑀞𑀧𑀺𑀢𑀸 𑀫𑀳𑀢𑀺 𑀇𑀲𑁆𑀲𑀭𑀺𑀬𑁂 𑀞𑀸𑀦𑁂. 𑀅𑀣 𑀭𑀸𑀚𑀸 𑀓𑀺𑀲𑁆𑀫𑀺𑀜𑁆𑀘𑀺 𑀤𑁂𑀯 𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀬𑀸𑀯𑀢𑀸 𑀲𑀓𑀯𑀺𑀚𑀺𑀢𑁂 𑀲𑀩𑁆𑀩𑀚𑀦𑀲𑁆𑀲 𑀆𑀡𑀸𑀧𑁂𑀬𑁆𑀬 ‘𑀲𑀩𑁆𑀩𑁂𑀯 𑀫𑁂 𑀩𑀮𑀺𑀁 𑀓𑀭𑁄𑀦𑁆𑀢𑀼, 𑀲𑀸𑀥𑁂𑀣 𑀢𑀼𑀫𑁆𑀳𑁂 𑀘𑀢𑁆𑀢𑀸𑀭𑁄 𑀫𑀳𑀸𑀫𑀢𑁆𑀢𑀸 𑀢𑀁 𑀓𑀭𑀡𑀻𑀬’𑀦𑁆𑀢𑀺. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀫𑀳𑀸𑀫𑀢𑁆𑀢𑀸𑀦𑀁 𑀩𑀮𑀺𑀪𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦 𑀫𑀳𑀸𑀭𑀸𑀚𑀸’’𑀢𑀺. ‘‘𑀞𑀧𑀺𑀢𑀸 𑀢𑁂, 𑀪𑀦𑁆𑀢𑁂, 𑀭𑀜𑁆𑀜𑀸 𑀉𑀢𑁆𑀢𑀫𑀝𑁆𑀞𑀸𑀦𑁂, 𑀦𑀢𑁆𑀣𑀺 𑀢𑁂𑀲𑀁 𑀩𑀮𑀺, 𑀲𑀫𑀢𑀺𑀓𑁆𑀓𑀦𑁆𑀢𑀩𑀮𑀺𑀦𑁄 𑀢𑁂, 𑀅𑀯𑀲𑁂𑀲𑁂 𑀉𑀧𑀸𑀤𑀸𑀬 𑀭𑀜𑁆𑀜𑀸 𑀆𑀡𑀸𑀧𑀺𑀢𑀁 ‘𑀲𑀩𑁆𑀩𑁂𑀯 𑀫𑁂 𑀩𑀮𑀺𑀁 𑀓𑀭𑁄𑀦𑁆𑀢𑀽’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀢𑀁 𑀯𑀘𑀦𑀁 𑀪𑀕𑀯𑀢𑀸 𑀅𑀭𑀳𑀦𑁆𑀢𑁂 𑀉𑀧𑀸𑀤𑀸𑀬 𑀪𑀡𑀺𑀢𑀁, 𑀞𑀧𑀺𑀢𑁄 𑀅𑀭𑀳𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁, 𑀲𑀫𑀽𑀳𑀢𑁄 𑀪𑀬𑀳𑁂𑀢𑀼 𑀅𑀭𑀳𑀢𑁄, 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀲𑀓𑀺𑀮𑁂𑀲𑀸, 𑀬𑁂𑀲𑀜𑁆𑀘 𑀅𑀥𑀺𑀫𑀢𑁆𑀢𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺, 𑀬𑁂 𑀘 𑀲𑀼𑀔𑀤𑀼𑀓𑁆𑀔𑁂𑀲𑀼 𑀉𑀦𑁆𑀦𑀢𑀸𑀯𑀦𑀢𑀸, 𑀢𑁂 𑀉𑀧𑀸𑀤𑀸𑀬 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺. 𑀢𑀲𑁆𑀫𑀸 𑀅𑀭𑀳𑀸 𑀦 𑀢𑀲𑀢𑀺 𑀲𑀩𑁆𑀩𑀪𑀬𑁂𑀳𑀻’’𑀢𑀺.

‘‘𑀦𑁂𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀘𑀦𑀁 𑀲𑀸𑀯𑀲𑁂𑀲𑀁, 𑀦𑀺𑀭𑀯𑀲𑁂𑀲𑀯𑀘𑀦𑀫𑁂𑀢𑀁 ‘𑀲𑀩𑁆𑀩𑁂’𑀢𑀺. 𑀢𑀢𑁆𑀣 𑀫𑁂 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀩𑁆𑀭𑀽𑀳𑀺 𑀢𑀁 𑀯𑀘𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀼’’𑀦𑁆𑀢𑀺.

‘‘𑀇𑀥, 𑀫𑀳𑀸𑀭𑀸𑀚, 𑀕𑀸𑀫𑁂 𑀕𑀸𑀫𑀲𑁆𑀲𑀸𑀫𑀺𑀓𑁄 𑀆𑀡𑀸𑀧𑀓𑀁 𑀆𑀡𑀸𑀧𑁂𑀬𑁆𑀬 ‘𑀏𑀳𑀺, 𑀪𑁄 𑀆𑀡𑀸𑀧𑀓, 𑀬𑀸𑀯𑀢𑀸 𑀕𑀸𑀫𑁂 𑀕𑀸𑀫𑀺𑀓𑀸, 𑀢𑁂 𑀲𑀩𑁆𑀩𑁂 𑀲𑀻𑀖𑀁 𑀫𑀫 𑀲𑀦𑁆𑀢𑀺𑀓𑁂 𑀲𑀦𑁆𑀦𑀺𑀧𑀸𑀢𑁂𑀳𑀻’𑀢𑀺. 𑀲𑁄 ‘𑀲𑀸𑀥𑀼 𑀲𑀸𑀫𑀻’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀞𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀬𑁆𑀬 ‘𑀬𑀸𑀯𑀢𑀸 𑀕𑀸𑀫𑁂 𑀕𑀸𑀫𑀺𑀓𑀸, 𑀢𑁂 𑀲𑀩𑁆𑀩𑁂 𑀲𑀻𑀖𑀲𑀻𑀖𑀁 𑀲𑀸𑀫𑀺𑀦𑁄 𑀲𑀦𑁆𑀢𑀺𑀓𑁂 𑀲𑀦𑁆𑀦𑀺𑀧𑀢𑀦𑁆𑀢𑀽’𑀢𑀺. 𑀢𑀢𑁄 𑀢𑁂 𑀕𑀸𑀫𑀺𑀓𑀸 𑀆𑀡𑀸𑀧𑀓𑀲𑁆𑀲 𑀯𑀘𑀦𑁂𑀦 𑀢𑀼𑀭𑀺𑀢𑀢𑀼𑀭𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀕𑀸𑀫𑀲𑁆𑀲𑀸𑀫𑀺𑀓𑀲𑁆𑀲 𑀆𑀭𑁄𑀘𑁂𑀦𑁆𑀢𑀺 ‘𑀲𑀦𑁆𑀦𑀺𑀧𑀢𑀺𑀢𑀸, 𑀲𑀸𑀫𑀺, 𑀲𑀩𑁆𑀩𑁂 𑀕𑀸𑀫𑀺𑀓𑀸, 𑀬𑀁 𑀢𑁂 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’𑀢𑀺. 𑀇𑀢𑀺 𑀲𑁄, 𑀫𑀳𑀸𑀭𑀸𑀚, 𑀕𑀸𑀫𑀲𑁆𑀲𑀸𑀫𑀺𑀓𑁄 𑀓𑀼𑀝𑀺𑀧𑀼𑀭𑀺𑀲𑁂 𑀲𑀦𑁆𑀦𑀺𑀧𑀸𑀢𑁂𑀦𑁆𑀢𑁄 𑀲𑀩𑁆𑀩𑁂 𑀕𑀸𑀫𑀺𑀓𑁂 𑀆𑀡𑀸𑀧𑁂𑀢𑀺, 𑀢𑁂 𑀘 𑀆𑀡𑀢𑁆𑀢𑀸 𑀦 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀓𑀼𑀝𑀺𑀧𑀼𑀭𑀺𑀲𑀸 𑀬𑁂𑀯 𑀲𑀦𑁆𑀦𑀺𑀧𑀢𑀦𑁆𑀢𑀺, ‘𑀏𑀢𑁆𑀢𑀓𑀸 𑀬𑁂𑀯 𑀫𑁂 𑀕𑀸𑀫𑀺𑀓𑀸’𑀢𑀺 𑀕𑀸𑀫𑀲𑁆𑀲𑀸𑀫𑀺𑀓𑁄 𑀘 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀅𑀜𑁆𑀜𑁂 𑀩𑀳𑀼𑀢𑀭𑀸 𑀅𑀦𑀸𑀕𑀢𑀸 𑀇𑀢𑁆𑀣𑀺𑀧𑀼𑀭𑀺𑀲𑀸 𑀤𑀸𑀲𑀺𑀤𑀸𑀲𑀸 𑀪𑀢𑀓𑀸 𑀓𑀫𑁆𑀫𑀓𑀭𑀸 𑀕𑀸𑀫𑀺𑀓𑀸 𑀕𑀺𑀮𑀸𑀦𑀸 𑀕𑁄𑀫𑀳𑀺𑀁𑀲𑀸 𑀅𑀚𑁂𑀴𑀓𑀸 𑀲𑀼𑀯𑀸𑀦𑀸, 𑀬𑁂 𑀅𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀅𑀕𑀡𑀺𑀢𑀸, 𑀓𑀼𑀝𑀺𑀧𑀼𑀭𑀺𑀲𑁂 𑀬𑁂𑀯 𑀉𑀧𑀸𑀤𑀸𑀬 𑀆𑀡𑀸𑀧𑀺𑀢𑀢𑁆𑀢𑀸 ‘𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀽’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀢𑀁 𑀯𑀘𑀦𑀁 𑀪𑀕𑀯𑀢𑀸 𑀅𑀭𑀳𑀦𑁆𑀢𑁂 𑀉𑀧𑀸𑀤𑀸𑀬 𑀪𑀡𑀺𑀢𑀁, 𑀞𑀧𑀺𑀢𑁄 𑀅𑀭𑀳𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁, 𑀲𑀫𑀽𑀳𑀢𑁄 𑀪𑀬𑀳𑁂𑀢𑀼 𑀅𑀭𑀳𑀢𑁄, 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀲𑀓𑀺𑀮𑁂𑀲𑀸, 𑀬𑁂𑀲𑀜𑁆𑀘 𑀅𑀥𑀺𑀫𑀢𑁆𑀢𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺, 𑀬𑁂 𑀘 𑀲𑀼𑀔𑀤𑀼𑀓𑁆𑀔𑁂𑀲𑀼 𑀉𑀦𑁆𑀦𑀢𑀸𑀯𑀦𑀢𑀸, 𑀢𑁂 𑀉𑀧𑀸𑀤𑀸𑀬 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’𑀢𑀺. 𑀢𑀲𑁆𑀫𑀸 𑀅𑀭𑀳𑀸 𑀦 𑀢𑀲𑀢𑀺 𑀲𑀩𑁆𑀩𑀪𑀬𑁂𑀳𑀺.

‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀲𑀸𑀯𑀲𑁂𑀲𑀁 𑀯𑀘𑀦𑀁 𑀲𑀸𑀯𑀲𑁂𑀲𑁄 𑀅𑀢𑁆𑀣𑁄, 𑀅𑀢𑁆𑀣𑀺 𑀲𑀸𑀯𑀲𑁂𑀲𑀁 𑀯𑀘𑀦𑀁 𑀦𑀺𑀭𑀯𑀲𑁂𑀲𑁄 𑀅𑀢𑁆𑀣𑁄, 𑀅𑀢𑁆𑀣𑀺 𑀦𑀺𑀭𑀯𑀲𑁂𑀲𑀁 𑀯𑀘𑀦𑀁 𑀲𑀸𑀯𑀲𑁂𑀲𑁄 𑀅𑀢𑁆𑀣𑁄, 𑀅𑀢𑁆𑀣𑀺 𑀦𑀺𑀭𑀯𑀲𑁂𑀲𑀁 𑀯𑀘𑀦𑀁 𑀦𑀺𑀭𑀯𑀲𑁂𑀲𑁄 𑀅𑀢𑁆𑀣𑁄. 𑀢𑁂𑀦 𑀢𑁂𑀦 𑀅𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄.

‘‘𑀧𑀜𑁆𑀘𑀯𑀺𑀥𑁂𑀳𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀳𑀺 𑀅𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄 𑀆𑀳𑀘𑁆𑀘𑀧𑀤𑁂𑀦 𑀭𑀲𑁂𑀦 𑀆𑀘𑀭𑀺𑀬𑀯𑀁𑀲𑁂𑀦 [𑀆𑀘𑀭𑀺𑀬𑀯𑀁𑀲𑀢𑀸𑀬 (𑀧𑀻. 𑀓.)] 𑀅𑀥𑀺𑀧𑁆𑀧𑀸𑀬𑀸 𑀓𑀸𑀭𑀡𑀼𑀢𑁆𑀢𑀭𑀺𑀬𑀢𑀸𑀬. 𑀏𑀢𑁆𑀣 𑀳𑀺 𑀆𑀳𑀘𑁆𑀘𑀧𑀤𑀦𑁆𑀢𑀺 𑀲𑀼𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀭𑀲𑁄𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀆𑀘𑀭𑀺𑀬𑀯𑀁𑀲𑁄𑀢𑀺 𑀆𑀘𑀭𑀺𑀬𑀯𑀸𑀤𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀢𑀦𑁄 𑀫𑀢𑀺. 𑀓𑀸𑀭𑀡𑀼𑀢𑁆𑀢𑀭𑀺𑀬𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀫𑁂𑀦𑁆𑀢𑀁 [𑀲𑀫𑁂𑀢𑀁 (𑀲𑀻.)] 𑀓𑀸𑀭𑀡𑀁. 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀅𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄. 𑀏𑀯𑀫𑁂𑀲𑁄 𑀧𑀜𑁆𑀳𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀳𑁄𑀢𑀻’’𑀢𑀺.

‘‘𑀳𑁄𑀢𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸 𑀢𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀺. 𑀞𑀧𑀺𑀢𑁄 𑀳𑁄𑀢𑀼 𑀅𑀭𑀳𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁, 𑀢𑀲𑀦𑁆𑀢𑀼 𑀅𑀯𑀲𑁂𑀲𑀸 𑀲𑀢𑁆𑀢𑀸, 𑀦𑀺𑀭𑀬𑁂 𑀧𑀦 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀬𑀫𑀸𑀦𑀸 𑀚𑀮𑀺𑀢𑀧𑀚𑁆𑀚𑀮𑀺𑀢𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀸 𑀭𑀼𑀡𑁆𑀡𑀓𑀸𑀭𑀼𑀜𑁆𑀜𑀓𑀦𑁆𑀤𑀺𑀢𑀧𑀭𑀺𑀤𑁂𑀯𑀺𑀢𑀮𑀸𑀮𑀧𑁆𑀧𑀺𑀢𑀫𑀼𑀔𑀸 𑀅𑀲𑀬𑁆𑀳𑀢𑀺𑀩𑁆𑀩𑀤𑀼𑀓𑁆𑀔𑀸𑀪𑀺𑀪𑀽𑀢𑀸 𑀅𑀢𑀸𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸 𑀅𑀦𑀧𑁆𑀧𑀲𑁄𑀓𑀸𑀢𑀼𑀭𑀸 𑀅𑀦𑁆𑀢𑀺𑀫𑀧𑀘𑁆𑀙𑀺𑀫𑀕𑀢𑀺𑀓𑀸 𑀏𑀓𑀦𑁆𑀢𑀲𑁄𑀓𑀧𑀭𑀸𑀬𑀡𑀸 𑀉𑀡𑁆𑀳𑀢𑀺𑀔𑀺𑀡𑀘𑀡𑁆𑀟𑀔𑀭𑀢𑀧𑀦𑀢𑁂𑀚𑀯𑀦𑁆𑀢𑁄 𑀪𑀻𑀫𑀪𑀬𑀚𑀦𑀓𑀦𑀺𑀦𑀸𑀤𑀫𑀳𑀸𑀲𑀤𑁆𑀤𑀸 𑀲𑀁𑀲𑀺𑀩𑁆𑀩𑀺𑀢𑀙𑀩𑁆𑀩𑀺𑀥𑀚𑀸𑀮𑀸𑀫𑀸𑀮𑀸𑀓𑀼𑀮𑀸 𑀲𑀫𑀦𑁆𑀢𑀸 𑀲𑀢𑀬𑁄𑀚𑀦𑀸𑀦𑀼𑀨𑀭𑀡𑀘𑁆𑀘𑀺𑀯𑁂𑀕𑀸 𑀓𑀤𑀭𑀺𑀬𑀸 𑀢𑀧𑀦𑀸 𑀫𑀳𑀸𑀦𑀺𑀭𑀬𑀸 𑀘𑀯𑀫𑀸𑀦𑀸 𑀫𑀘𑁆𑀘𑀼𑀦𑁄 𑀪𑀸𑀬𑀦𑁆𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺.

‘‘𑀦𑀦𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀭𑀬𑁄 𑀏𑀓𑀦𑁆𑀢𑀤𑀼𑀓𑁆𑀔𑀯𑁂𑀤𑀦𑀻𑀬𑁄, 𑀓𑀺𑀲𑁆𑀲 𑀧𑀦 𑀢𑁂 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀏𑀓𑀦𑁆𑀢𑀤𑀼𑀓𑁆𑀔𑀯𑁂𑀤𑀦𑀻𑀬𑀸 𑀦𑀺𑀭𑀬𑀸 𑀘𑀯𑀫𑀸𑀦𑀸 𑀫𑀘𑁆𑀘𑀼𑀦𑁄 𑀪𑀸𑀬𑀦𑁆𑀢𑀺, 𑀓𑀺𑀲𑁆𑀲 𑀦𑀺𑀭𑀬𑁂 𑀭𑀫𑀦𑁆𑀢𑀻’’𑀢𑀺? ‘‘𑀦 𑀢𑁂, 𑀫𑀳𑀸𑀭𑀸𑀚, 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀦𑀺𑀭𑀬𑁂 𑀭𑀫𑀦𑁆𑀢𑀺, 𑀫𑀼𑀜𑁆𑀘𑀺𑀢𑀼𑀓𑀸𑀫𑀸𑀯 𑀢𑁂 𑀦𑀺𑀭𑀬𑀸. 𑀫𑀭𑀡𑀲𑁆𑀲𑁂𑀯 𑀲𑁄 [𑀫𑀭𑀡𑀲𑁆𑀲𑁂𑀲𑁄 (𑀲𑀻. 𑀧𑀻.)], 𑀫𑀳𑀸𑀭𑀸𑀚, 𑀆𑀦𑀼𑀪𑀸𑀯𑁄, 𑀬𑁂𑀦 𑀢𑁂𑀲𑀁 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀏𑀢𑀁 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀲𑀤𑁆𑀤𑀳𑀸𑀫𑀺, 𑀬𑀁 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀁 𑀘𑀼𑀢𑀺𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀳𑀸𑀲𑀦𑀻𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀁 𑀞𑀸𑀦𑀁, 𑀬𑀁 𑀢𑁂 𑀧𑀢𑁆𑀣𑀺𑀢𑀁 𑀮𑀪𑀦𑁆𑀢𑀺, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺.

‘‘𑀫𑀭𑀡𑀦𑁆𑀢𑀺 𑀔𑁄, 𑀫𑀳𑀸𑀭𑀸𑀚, 𑀏𑀢𑀁 𑀅𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀢𑀸𑀲𑀦𑀻𑀬𑀝𑁆𑀞𑀸𑀦𑀁, 𑀏𑀢𑁆𑀣𑀸𑀬𑀁 𑀚𑀦𑁄 𑀢𑀲𑀢𑀺 𑀘 𑀉𑀩𑁆𑀩𑀺𑀚𑁆𑀚𑀢𑀺 𑀘. 𑀬𑁄 𑀘, 𑀫𑀳𑀸𑀭𑀸𑀚, 𑀓𑀡𑁆𑀳𑀲𑀧𑁆𑀧𑀲𑁆𑀲 𑀪𑀸𑀬𑀢𑀺, 𑀲𑁄 𑀫𑀭𑀡𑀲𑁆𑀲 𑀪𑀸𑀬𑀦𑁆𑀢𑁄 𑀓𑀡𑁆𑀳𑀲𑀧𑁆𑀧𑀲𑁆𑀲 𑀪𑀸𑀬𑀢𑀺. 𑀬𑁄 𑀘 𑀳𑀢𑁆𑀣𑀺𑀲𑁆𑀲 𑀪𑀸𑀬𑀢𑀺…𑀧𑁂… 𑀲𑀻𑀳𑀲𑁆𑀲…𑀧𑁂… 𑀩𑁆𑀬𑀕𑁆𑀖𑀲𑁆𑀲…𑀧𑁂… 𑀤𑀻𑀧𑀺𑀲𑁆𑀲…𑀧𑁂… 𑀅𑀘𑁆𑀙𑀲𑁆𑀲…𑀧𑁂… 𑀢𑀭𑀘𑁆𑀙𑀲𑁆𑀲…𑀧𑁂… 𑀫𑀳𑀺𑀁𑀲𑀲𑁆𑀲…𑀧𑁂… 𑀕𑀯𑀬𑀲𑁆𑀲…𑀧𑁂… 𑀅𑀕𑁆𑀕𑀺𑀲𑁆𑀲…𑀧𑁂… 𑀉𑀤𑀓𑀲𑁆𑀲…𑀧𑁂… 𑀔𑀸𑀡𑀼𑀓𑀲𑁆𑀲…𑀧𑁂… 𑀓𑀡𑁆𑀝𑀓𑀲𑁆𑀲 𑀪𑀸𑀬𑀢𑀺. 𑀬𑁄 𑀘 𑀲𑀢𑁆𑀢𑀺𑀬𑀸 𑀪𑀸𑀬𑀢𑀺, 𑀲𑁄 𑀫𑀭𑀡𑀲𑁆𑀲 𑀪𑀸𑀬𑀦𑁆𑀢𑁄 𑀲𑀢𑁆𑀢𑀺𑀬𑀸 𑀪𑀸𑀬𑀢𑀺. 𑀫𑀭𑀡𑀲𑁆𑀲𑁂𑀯 𑀲𑁄 [𑀫𑀭𑀡𑀲𑁆𑀲𑁂𑀲𑁄 (𑀲𑀻. 𑀧𑀻.)], 𑀫𑀳𑀸𑀭𑀸𑀚, 𑀲𑀭𑀲𑀲𑀪𑀸𑀯𑀢𑁂𑀚𑁄 [𑀲𑀭𑀲𑀪𑀸𑀯𑀢𑁂𑀚𑁄 (𑀲𑀻. 𑀧𑀻.)], 𑀢𑀲𑁆𑀲 𑀲𑀭𑀲𑀲𑀪𑀸𑀯𑀢𑁂𑀚𑁂𑀦 𑀲𑀓𑀺𑀮𑁂𑀲𑀸 𑀲𑀢𑁆𑀢𑀸 𑀫𑀭𑀡𑀲𑁆𑀲 𑀢𑀲𑀦𑁆𑀢𑀺 𑀪𑀸𑀬𑀦𑁆𑀢𑀺, 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀧𑀺, 𑀫𑀳𑀸𑀭𑀸𑀚, 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀫𑀭𑀡𑀲𑁆𑀲 𑀢𑀲𑀦𑁆𑀢𑀺 𑀪𑀸𑀬𑀦𑁆𑀢𑀺.

‘‘𑀇𑀥, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀓𑀸𑀬𑁂 𑀫𑁂𑀤𑁄 𑀕𑀡𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀲𑁄 𑀢𑁂𑀦 𑀭𑁄𑀕𑁂𑀦 𑀤𑀼𑀓𑁆𑀔𑀺𑀢𑁄 𑀉𑀧𑀤𑁆𑀤𑀯𑀸 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀪𑀺𑀲𑀓𑁆𑀓𑀁 𑀲𑀮𑁆𑀮𑀓𑀢𑁆𑀢𑀁 𑀆𑀫𑀦𑁆𑀢𑀸𑀧𑁂𑀬𑁆𑀬. 𑀢𑀲𑁆𑀲 𑀯𑀘𑀦𑀁 𑀲𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀭𑁄𑀕𑀲𑁆𑀲 𑀉𑀤𑁆𑀥𑀭𑀡𑀸𑀬 𑀉𑀧𑀓𑀭𑀡𑀁 𑀉𑀧𑀝𑁆𑀞𑀸𑀧𑁂𑀬𑁆𑀬, 𑀲𑀢𑁆𑀣𑀓𑀁 𑀢𑀺𑀔𑀺𑀡𑀁 𑀓𑀭𑁂𑀬𑁆𑀬, 𑀬𑀫𑀓𑀲𑀮𑀸𑀓𑀸 [𑀤𑀳𑀦𑀲𑀮𑀸𑀓𑀁 (𑀓.)] 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀔𑀸𑀭𑀮𑀯𑀡𑀁 𑀦𑀺𑀲𑀤𑀸𑀬 𑀧𑀺𑀲𑀸𑀧𑁂𑀬𑁆𑀬, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀆𑀢𑀼𑀭𑀲𑁆𑀲 𑀢𑀺𑀔𑀺𑀡𑀲𑀢𑁆𑀣𑀓𑀘𑁆𑀙𑁂𑀤𑀦𑁂𑀦 𑀬𑀫𑀓𑀲𑀮𑀸𑀓𑀸𑀤𑀳𑀦𑁂𑀦 𑀔𑀸𑀭𑀮𑁄𑀡𑀧𑁆𑀧𑀯𑁂𑀲𑀦𑁂𑀦 𑀢𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀇𑀢𑀺, 𑀫𑀳𑀸𑀭𑀸𑀚, 𑀢𑀲𑁆𑀲 𑀆𑀢𑀼𑀭𑀲𑁆𑀲 𑀭𑁄𑀕𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀲𑁆𑀲𑀸𑀧𑀺 𑀯𑁂𑀤𑀦𑀸𑀪𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀭𑀬𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀫𑁆𑀧𑀺 𑀦𑁂𑀭𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀫𑀭𑀡𑀪𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺.

‘‘𑀇𑀥, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀇𑀲𑁆𑀲𑀭𑀸𑀧𑀭𑀸𑀥𑀺𑀓𑁄 𑀩𑀤𑁆𑀥𑁄 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀕𑀩𑁆𑀪𑁂 𑀧𑀓𑁆𑀔𑀺𑀢𑁆𑀢𑁄 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀅𑀲𑁆𑀲, 𑀢𑀫𑁂𑀦𑀁 𑀲𑁄 𑀇𑀲𑁆𑀲𑀭𑁄 𑀫𑁄𑀘𑁂𑀢𑀼𑀓𑀸𑀫𑁄 𑀧𑀓𑁆𑀓𑁄𑀲𑀸𑀧𑁂𑀬𑁆𑀬. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀇𑀲𑁆𑀲𑀭𑀸𑀧𑀭𑀸𑀥𑀺𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 ‘𑀓𑀢𑀤𑁄𑀲𑁄 𑀅𑀳’𑀦𑁆𑀢𑀺 𑀚𑀸𑀦𑀦𑁆𑀢𑀲𑁆𑀲 𑀇𑀲𑁆𑀲𑀭𑀤𑀲𑁆𑀲𑀦𑁂𑀦 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀇𑀢𑀺, 𑀫𑀳𑀸𑀭𑀸𑀚, 𑀢𑀲𑁆𑀲 𑀇𑀲𑁆𑀲𑀭𑀸𑀧𑀭𑀸𑀥𑀺𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀲𑁆𑀲𑀸𑀧𑀺 𑀇𑀲𑁆𑀲𑀭𑀪𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀭𑀬𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀫𑁆𑀧𑀺 𑀦𑁂𑀭𑀬𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀫𑀭𑀡𑀪𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀅𑀧𑀭𑀫𑁆𑀧𑀺, 𑀪𑀦𑁆𑀢𑁂, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀩𑁆𑀭𑀽𑀳𑀺, 𑀬𑁂𑀦𑀸𑀳𑀁 𑀓𑀸𑀭𑀡𑁂𑀦 𑀑𑀓𑀧𑁆𑀧𑁂𑀬𑁆𑀬’’𑀦𑁆𑀢𑀺. ‘‘𑀇𑀥, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀝𑁆𑀞𑀯𑀺𑀲𑁂𑀦 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑁄 𑀪𑀯𑁂𑀬𑁆𑀬, 𑀲𑁄 𑀢𑁂𑀦 𑀯𑀺𑀲𑀯𑀺𑀓𑀸𑀭𑁂𑀦 𑀧𑀢𑁂𑀬𑁆𑀬 𑀉𑀧𑁆𑀧𑀢𑁂𑀬𑁆𑀬 𑀯𑀝𑁆𑀝𑁂𑀬𑁆𑀬 𑀧𑀯𑀝𑁆𑀝𑁂𑀬𑁆𑀬, 𑀅𑀣𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀩𑀮𑀯𑀦𑁆𑀢𑁂𑀦 𑀫𑀦𑁆𑀢𑀧𑀤𑁂𑀦 𑀢𑀁 𑀤𑀝𑁆𑀞𑀯𑀺𑀲𑀁 𑀆𑀲𑀻𑀯𑀺𑀲𑀁 𑀆𑀦𑁂𑀢𑁆𑀯𑀸 𑀢𑀁 𑀤𑀝𑁆𑀞𑀯𑀺𑀲𑀁 𑀧𑀘𑁆𑀘𑀸𑀘𑀫𑀸𑀧𑁂𑀬𑁆𑀬, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀯𑀺𑀲𑀕𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀲𑁆𑀫𑀺𑀁 𑀤𑀝𑁆𑀞𑀯𑀺𑀲𑁂 𑀲𑀧𑁆𑀧𑁂 𑀲𑁄𑀢𑁆𑀣𑀺𑀳𑁂𑀢𑀼 𑀉𑀧𑀕𑀘𑁆𑀙𑀦𑁆𑀢𑁂 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. 𑀇𑀢𑀺, 𑀫𑀳𑀸𑀭𑀸𑀚, 𑀢𑀣𑀸𑀭𑀽𑀧𑁂 𑀅𑀳𑀺𑀫𑁆𑀳𑀺 𑀲𑁄𑀢𑁆𑀣𑀺𑀳𑁂𑀢𑀼𑀧𑀺 𑀉𑀧𑀕𑀘𑁆𑀙𑀦𑁆𑀢𑁂 𑀢𑀲𑁆𑀲 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀭𑀬𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀫𑁆𑀧𑀺 𑀦𑁂𑀭𑀬𑀺𑀓𑀸𑀦𑀁 𑀲𑀦𑁆𑀢𑀸𑀦𑀁 𑀫𑀭𑀡𑀪𑀬𑀸 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀺𑀝𑁆𑀞𑀁, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀭𑀡𑀁, 𑀢𑀲𑁆𑀫𑀸 𑀦𑁂𑀭𑀬𑀺𑀓𑀸 𑀲𑀢𑁆𑀢𑀸 𑀦𑀺𑀭𑀬𑀸 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀧𑀺 𑀫𑀘𑁆𑀘𑀼𑀦𑁄 𑀪𑀸𑀬𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀫𑀘𑁆𑀘𑀼𑀪𑀸𑀬𑀦𑀸𑀪𑀸𑀬𑀦𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀫𑀘𑁆𑀘𑀼𑀧𑀸𑀲𑀫𑀼𑀢𑁆𑀢𑀺𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋

‘‘‘𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀫𑀘𑁆𑀘𑀼𑀧𑀸𑀲𑀸’𑀢𑀺.

‘‘𑀧𑀼𑀦 𑀪𑀕𑀯𑀢𑀸 𑀧𑀭𑀺𑀢𑁆𑀢𑀸 𑀘 𑀉𑀤𑁆𑀤𑀺𑀝𑁆𑀞𑀸. 𑀲𑁂𑀬𑁆𑀬𑀣𑀺𑀤𑀁, 𑀭𑀢𑀦𑀲𑀼𑀢𑁆𑀢𑀁 𑀫𑁂𑀢𑁆𑀢𑀲𑀼𑀢𑁆𑀢𑀁 𑀔𑀦𑁆𑀥𑀧𑀭𑀺𑀢𑁆𑀢𑀁 𑀫𑁄𑀭𑀧𑀭𑀺𑀢𑁆𑀢𑀁 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 𑀅𑀗𑁆𑀕𑀼𑀮𑀺𑀫𑀸𑀮𑀧𑀭𑀺𑀢𑁆𑀢𑀁. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀆𑀓𑀸𑀲𑀕𑀢𑁄𑀧𑀺 𑀲𑀫𑀼𑀤𑁆𑀤𑀫𑀚𑁆𑀛𑀕𑀢𑁄𑀧𑀺 𑀧𑀸𑀲𑀸𑀤𑀓𑀼𑀝𑀺𑀮𑁂𑀡𑀕𑀼𑀳𑀸𑀧𑀩𑁆𑀪𑀸𑀭𑀤𑀭𑀺𑀩𑀺𑀮𑀕𑀺𑀭𑀺 𑀯𑀺𑀯𑀭𑀧𑀩𑁆𑀩𑀢𑀦𑁆𑀢𑀭𑀕𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺 𑀫𑀘𑁆𑀘𑀼𑀧𑀸𑀲𑀸, 𑀢𑁂𑀦 𑀳𑀺 𑀧𑀭𑀺𑀢𑁆𑀢𑀓𑀫𑁆𑀫𑀁 𑀫𑀺𑀘𑁆𑀙𑀸. 𑀬𑀤𑀺 𑀧𑀭𑀺𑀢𑁆𑀢𑀓𑀭𑀡𑁂𑀦 𑀫𑀘𑁆𑀘𑀼𑀧𑀸𑀲𑀸 𑀧𑀭𑀺𑀫𑀼𑀢𑁆𑀢𑀺 𑀪𑀯𑀢𑀺, 𑀢𑁂𑀦 𑀳𑀺 ‘𑀦 𑀅𑀦𑁆𑀢𑀮𑀺𑀓𑁆𑀔𑁂…𑀧𑁂… 𑀫𑀘𑁆𑀘𑀼𑀧𑀸𑀲𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀕𑀡𑁆𑀞𑀺𑀢𑁄𑀧𑀺 𑀕𑀡𑁆𑀞𑀺𑀢𑀭𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀦 𑀅𑀦𑁆𑀢𑀮𑀺𑀓𑁆𑀔𑁂…𑀧𑁂… 𑀫𑀘𑁆𑀘𑀼𑀧𑀸𑀲𑀸’𑀢𑀺, 𑀧𑀭𑀺𑀢𑁆𑀢𑀸 𑀘 𑀪𑀕𑀯𑀢𑀸 𑀉𑀤𑁆𑀤𑀺𑀝𑁆𑀞𑀸, 𑀢𑀜𑁆𑀘 𑀧𑀦 𑀲𑀸𑀯𑀲𑁂𑀲𑀸𑀬𑀼𑀓𑀲𑁆𑀲 𑀯𑀬𑀲𑀫𑁆𑀧𑀦𑁆𑀦𑀲𑁆𑀲 𑀅𑀧𑁂𑀢𑀓𑀫𑁆𑀫𑀸𑀯𑀭𑀡𑀲𑁆𑀲, 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀔𑀻𑀡𑀸𑀬𑀼𑀓𑀲𑁆𑀲 𑀞𑀺𑀢𑀺𑀬𑀸 𑀓𑀺𑀭𑀺𑀬𑀸 𑀯𑀸 𑀉𑀧𑀓𑁆𑀓𑀫𑁄 𑀯𑀸.

‘‘𑀬𑀣𑀸 𑀫𑀳𑀸𑀭𑀸𑀚 𑀫𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀼𑀓𑁆𑀔𑀲𑁆𑀲 𑀓𑁄𑀴𑀸𑀧𑀲𑁆𑀲 𑀦𑀺𑀲𑁆𑀦𑁂𑀳𑀲𑁆𑀲 𑀉𑀧𑀭𑀼𑀤𑁆𑀥𑀚𑀻𑀯𑀺𑀢𑀲𑁆𑀲 𑀕𑀢𑀸𑀬𑀼𑀲𑀗𑁆𑀔𑀸𑀭𑀲𑁆𑀲 𑀓𑀼𑀫𑁆𑀪𑀲𑀳𑀲𑁆𑀲𑁂𑀦𑀧𑀺 𑀉𑀤𑀓𑁂 𑀆𑀓𑀺𑀭𑀦𑁆𑀢𑁂 𑀅𑀮𑁆𑀮𑀢𑁆𑀢𑀁 𑀯𑀸 𑀧𑀮𑁆𑀮𑀯𑀺𑀢𑀳𑀭𑀺𑀢𑀪𑀸𑀯𑁄 𑀯𑀸 𑀦 𑀪𑀯𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑁂𑀲𑀚𑁆𑀚𑀧𑀭𑀺𑀢𑁆𑀢𑀓𑀫𑁆𑀫𑁂𑀦 𑀦𑀢𑁆𑀣𑀺 𑀔𑀻𑀡𑀸𑀬𑀼𑀓𑀲𑁆𑀲 𑀞𑀺𑀢𑀺𑀬𑀸 𑀓𑀺𑀭𑀺𑀬𑀸 𑀯𑀸 𑀉𑀧𑀓𑁆𑀓𑀫𑁄 𑀯𑀸, 𑀬𑀸𑀦𑀺 𑀢𑀸𑀦𑀺, 𑀫𑀳𑀸𑀭𑀸𑀚, 𑀫𑀳𑀺𑀬𑀸 𑀑𑀲𑀥𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀢𑀸𑀦𑀺𑀧𑀺 𑀔𑀻𑀡𑀸𑀬𑀼𑀓𑀲𑁆𑀲 𑀅𑀓𑀺𑀘𑁆𑀘𑀓𑀭𑀸𑀦𑀺 𑀪𑀯𑀦𑁆𑀢𑀺. 𑀲𑀸𑀯𑀲𑁂𑀲𑀸𑀬𑀼𑀓𑀁, 𑀫𑀳𑀸𑀭𑀸𑀚, 𑀯𑀬𑀲𑀫𑁆𑀧𑀦𑁆𑀦𑀁 𑀅𑀧𑁂𑀢𑀓𑀫𑁆𑀫𑀸𑀯𑀭𑀡𑀁 𑀧𑀭𑀺𑀢𑁆𑀢𑀁 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺, 𑀢𑀲𑁆𑀲𑀢𑁆𑀣𑀸𑀬 𑀪𑀕𑀯𑀢𑀸 𑀧𑀭𑀺𑀢𑁆𑀢𑀸 𑀉𑀤𑁆𑀤𑀺𑀝𑁆𑀞𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀧𑀭𑀺𑀧𑀓𑁆𑀓𑁂 𑀥𑀜𑁆𑀜𑁂 𑀫𑀢𑁂 𑀲𑀲𑁆𑀲𑀦𑀸𑀴𑁂 𑀉𑀤𑀓𑀧𑁆𑀧𑀯𑁂𑀲𑀦𑀁 𑀯𑀸𑀭𑁂𑀬𑁆𑀬, 𑀬𑀁 𑀧𑀦 𑀲𑀲𑁆𑀲𑀁 𑀢𑀭𑀼𑀡𑀁 𑀫𑁂𑀖𑀲𑀦𑁆𑀦𑀺𑀪𑀁 𑀯𑀬𑀲𑀫𑁆𑀧𑀦𑁆𑀦𑀁, 𑀢𑀁 𑀉𑀤𑀓𑀯𑀟𑁆𑀠𑀺𑀬𑀸 𑀯𑀟𑁆𑀠𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀔𑀻𑀡𑀸𑀬𑀼𑀓𑀲𑁆𑀲 𑀪𑁂𑀲𑀚𑁆𑀚𑀧𑀭𑀺𑀢𑁆𑀢𑀓𑀺𑀭𑀺𑀬𑀸 𑀞𑀧𑀺𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀬𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 𑀲𑀸𑀯𑀲𑁂𑀲𑀸𑀬𑀼𑀓𑀸 𑀯𑀬𑀲𑀫𑁆𑀧𑀦𑁆𑀦𑀸, 𑀢𑁂𑀲𑀁 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑀪𑁂𑀲𑀚𑁆𑀚𑀸𑀦𑀺 𑀪𑀡𑀺𑀢𑀸𑀦𑀺, 𑀢𑁂 𑀧𑀭𑀺𑀢𑁆𑀢𑀪𑁂𑀲𑀚𑁆𑀚𑁂𑀳𑀺 𑀯𑀟𑁆𑀠𑀦𑁆𑀢𑀻’’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀔𑀻𑀡𑀸𑀬𑀼𑀓𑁄 𑀫𑀭𑀢𑀺, 𑀲𑀸𑀯𑀲𑁂𑀲𑀸𑀬𑀼𑀓𑁄 𑀚𑀻𑀯𑀢𑀺, 𑀢𑁂𑀦 𑀳𑀺 𑀧𑀭𑀺𑀢𑁆𑀢𑀪𑁂𑀲𑀚𑁆𑀚𑀸𑀦𑀺 𑀦𑀺𑀭𑀢𑁆𑀣𑀓𑀸𑀦𑀺 𑀳𑁄𑀦𑁆𑀢𑀻’’𑀢𑀺? ‘‘𑀤𑀺𑀝𑁆𑀞𑀧𑀼𑀩𑁆𑀩𑁄 𑀧𑀦 𑀢𑀬𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀭𑁄𑀕𑁄 𑀪𑁂𑀲𑀚𑁆𑀚𑁂𑀳𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀦𑁂𑀓𑀲𑀢𑀸𑀦𑀺 𑀤𑀺𑀝𑁆𑀞𑀸𑀦𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, ‘𑀧𑀭𑀺𑀢𑁆𑀢𑀪𑁂𑀲𑀚𑁆𑀚𑀓𑀺𑀭𑀺𑀬𑀸 𑀦𑀺𑀭𑀢𑁆𑀣𑀓𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑀢𑀻’’𑀢𑀺.

‘‘𑀤𑀺𑀲𑁆𑀲𑀦𑁆𑀢𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑁂𑀚𑁆𑀚𑀸𑀦𑀁 𑀉𑀧𑀓𑁆𑀓𑀫𑀸 𑀪𑁂𑀲𑀚𑁆𑀚𑀧𑀸𑀦𑀸𑀦𑀼𑀮𑁂𑀧𑀸, 𑀢𑁂𑀦 𑀢𑁂𑀲𑀁 𑀉𑀧𑀓𑁆𑀓𑀫𑁂𑀦 𑀭𑁄𑀕𑁄 𑀧𑀝𑀺𑀦𑀺𑀯𑀢𑁆𑀢𑀢𑀻’’𑀢𑀺. ‘‘𑀧𑀭𑀺𑀢𑁆𑀢𑀸𑀦𑀫𑁆𑀧𑀺, 𑀫𑀳𑀸𑀭𑀸𑀚, 𑀧𑀯𑀢𑁆𑀢𑀻𑀬𑀫𑀸𑀦𑀸𑀦𑀁 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀚𑀺𑀯𑁆𑀳𑀸 𑀲𑀼𑀓𑁆𑀔𑀢𑀺, 𑀳𑀤𑀬𑀁 𑀩𑁆𑀬𑀸𑀯𑀝𑁆𑀝𑀢𑀺, 𑀓𑀡𑁆𑀞𑁄 𑀆𑀢𑀼𑀭𑀢𑀺. 𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑁂𑀦 𑀲𑀩𑁆𑀩𑁂 𑀩𑁆𑀬𑀸𑀥𑀬𑁄 𑀯𑀽𑀧𑀲𑀫𑀦𑁆𑀢𑀺, 𑀲𑀩𑁆𑀩𑀸 𑀈𑀢𑀺𑀬𑁄 𑀅𑀧𑀕𑀘𑁆𑀙𑀦𑁆𑀢𑀻𑀢𑀺.

‘‘𑀤𑀺𑀝𑁆𑀞𑀧𑀼𑀩𑁆𑀩𑁄 𑀧𑀦 𑀢𑀬𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀅𑀳𑀺𑀦𑀸 𑀤𑀝𑁆𑀞𑁄 𑀫𑀦𑁆𑀢𑀧𑀤𑁂𑀦 𑀯𑀺𑀲𑀁 𑀧𑀸𑀢𑀻𑀬𑀫𑀸𑀦𑁄 𑀯𑀺𑀲𑀁 𑀘𑀺𑀓𑁆𑀔𑀲𑁆𑀲𑀦𑁆𑀢𑁄 𑀉𑀤𑁆𑀥𑀫𑀥𑁄 𑀆𑀘𑀫𑀬𑀫𑀸𑀦𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀚𑁆𑀚𑁂𑀢𑀭𑀳𑀺𑀧𑀺 𑀢𑀁 𑀮𑁄𑀓𑁂 𑀯𑀢𑁆𑀢𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, ‘𑀧𑀭𑀺𑀢𑁆𑀢𑀪𑁂𑀲𑀚𑁆𑀚𑀓𑀺𑀭𑀺𑀬𑀸 𑀦𑀺𑀭𑀢𑁆𑀣𑀓𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑀢𑀺. 𑀓𑀢𑀧𑀭𑀺𑀢𑁆𑀢𑀜𑁆𑀳𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀁 𑀟𑀁𑀲𑀺𑀢𑀼𑀓𑀸𑀫𑁄 𑀅𑀳𑀺 𑀦 𑀟𑀁𑀲𑀢𑀺, 𑀯𑀺𑀯𑀝𑀁 𑀫𑀼𑀔𑀁 𑀧𑀺𑀤𑀳𑀢𑀺, 𑀘𑁄𑀭𑀸𑀦𑀁 𑀉𑀓𑁆𑀔𑀺𑀢𑁆𑀢𑀮𑀕𑀼𑀴𑀫𑁆𑀧𑀺 𑀦 𑀲𑀫𑁆𑀪𑀯𑀢𑀺, 𑀢𑁂 𑀮𑀕𑀼𑀴𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑁂𑀫𑀁 𑀓𑀭𑁄𑀦𑁆𑀢𑀺, 𑀓𑀼𑀧𑀺𑀢𑁄𑀧𑀺 𑀳𑀢𑁆𑀣𑀺𑀦𑀸𑀕𑁄 𑀲𑀫𑀸𑀕𑀦𑁆𑀢𑁆𑀯𑀸 𑀉𑀧𑀭𑀫𑀢𑀺, 𑀧𑀚𑁆𑀚𑀮𑀺𑀢𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀺 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺, 𑀯𑀺𑀲𑀁 𑀳𑀮𑀸𑀳𑀮𑀫𑁆𑀧𑀺 𑀔𑀸𑀬𑀺𑀢𑀁 𑀅𑀕𑀤𑀁 𑀲𑀫𑁆𑀧𑀚𑁆𑀚𑀢𑀺, 𑀆𑀳𑀸𑀭𑀢𑁆𑀣𑀁 𑀯𑀸 𑀨𑀭𑀢𑀺, 𑀯𑀥𑀓𑀸 𑀳𑀦𑁆𑀢𑀼𑀓𑀸𑀫𑀸 𑀉𑀧𑀕𑀦𑁆𑀢𑁆𑀯𑀸 𑀤𑀸𑀲𑀪𑀽𑀢𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀅𑀓𑁆𑀓𑀦𑁆𑀢𑁄𑀧𑀺 𑀧𑀸𑀲𑁄 𑀦 𑀲𑀁𑀯𑀭𑀢𑀺 [𑀦 𑀲𑀁𑀘𑀭𑀢𑀺 (𑀲𑀻.)].

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, ‘𑀫𑁄𑀭𑀲𑁆𑀲 𑀓𑀢𑀧𑀭𑀺𑀢𑁆𑀢𑀲𑁆𑀲 𑀲𑀢𑁆𑀢𑀯𑀲𑁆𑀲𑀲𑀢𑀸𑀦𑀺 𑀮𑀼𑀤𑁆𑀤𑀓𑁄 𑀦𑀸𑀲𑀓𑁆𑀔𑀺 𑀧𑀸𑀲𑀁 𑀉𑀧𑀦𑁂𑀢𑀼𑀁, 𑀅𑀓𑀢𑀧𑀭𑀺𑀢𑁆𑀢𑀲𑁆𑀲 𑀢𑀁 𑀬𑁂𑀯 𑀤𑀺𑀯𑀲𑀁 𑀧𑀸𑀲𑀁 𑀉𑀧𑀦𑁂𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺, 𑀅𑀩𑁆𑀪𑀼𑀕𑁆𑀕𑀢𑁄 𑀲𑁄 𑀲𑀤𑁆𑀤𑁄 𑀲𑀤𑁂𑀯𑀓𑁂 𑀮𑁄𑀓𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚 ‘𑀧𑀭𑀺𑀢𑁆𑀢𑀪𑁂𑀲𑀚𑁆𑀚𑀓𑀺𑀭𑀺𑀬𑀸 𑀦𑀺𑀭𑀢𑁆𑀣𑀓𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑀢𑀺.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, ‘𑀤𑀸𑀦𑀯𑁄 𑀪𑀭𑀺𑀬𑀁 𑀧𑀭𑀺𑀭𑀓𑁆𑀔𑀦𑁆𑀢𑁄 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀢𑀺, 𑀅𑀣𑁂𑀓𑁄 𑀯𑀺𑀚𑁆𑀚𑀸𑀥𑀭𑁄 𑀢𑀲𑁆𑀲 𑀤𑀸𑀦𑀯𑀲𑁆𑀲 𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀅𑀪𑀺𑀭𑀫𑀢𑀺, 𑀬𑀤𑀸 𑀲𑁄 𑀤𑀸𑀦𑀯𑁄 𑀅𑀜𑁆𑀜𑀸𑀲𑀺, 𑀅𑀣 𑀲𑀫𑀼𑀕𑁆𑀕𑀁 𑀯𑀫𑀺𑀢𑁆𑀯𑀸 𑀯𑀺𑀯𑀭𑀺, 𑀲𑀳 𑀲𑀫𑀼𑀕𑁆𑀕𑁂 𑀯𑀺𑀯𑀝𑁂 𑀯𑀺𑀚𑁆𑀚𑀸𑀥𑀭𑁄 𑀬𑀣𑀸𑀓𑀸𑀫𑀁 [𑀬𑁂𑀦 𑀓𑀸𑀫𑀁 (𑀓.)] 𑀧𑀓𑁆𑀓𑀸𑀫𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺, 𑀅𑀩𑁆𑀪𑀼𑀕𑁆𑀕𑀢𑁄 𑀲𑁄𑀧𑀺 𑀲𑀤𑁆𑀤𑁄 𑀲𑀤𑁂𑀯𑀓𑁂 𑀮𑁄𑀓𑁂’’𑀢𑀺. ‘‘𑀦𑀦𑀼 𑀲𑁄, 𑀫𑀳𑀸𑀭𑀸𑀚, 𑀯𑀺𑀚𑁆𑀚𑀸𑀥𑀭𑁄 𑀧𑀭𑀺𑀢𑁆𑀢𑀩𑀮𑁂𑀦 [𑀫𑀦𑁆𑀢𑀩𑀮𑁂𑀦 (?)] 𑀕𑀳𑀡𑀸 𑀫𑀼𑀢𑁆𑀢𑁄’’𑀢𑀺. ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀧𑀭𑀺𑀢𑁆𑀢𑀩𑀮𑀁.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, ‘𑀅𑀧𑀭𑁄𑀧𑀺 𑀯𑀺𑀚𑁆𑀚𑀸𑀥𑀭𑁄 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀫𑀳𑁂𑀲𑀺𑀬𑀸 𑀲𑀤𑁆𑀥𑀺𑀁 𑀲𑀫𑁆𑀧𑀤𑀼𑀝𑁆𑀞𑁄 [𑀲𑀁𑀲𑀝𑁆𑀞𑁄 (𑀲𑀻.)] 𑀕𑀳𑀡𑀧𑁆𑀧𑀢𑁆𑀢𑁄 𑀲𑀫𑀸𑀦𑁄 𑀔𑀡𑁂𑀦 𑀅𑀤𑀲𑁆𑀲𑀦𑀁 𑀕𑀢𑁄 𑀫𑀦𑁆𑀢𑀩𑀮𑁂𑀦𑀸’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀻’’𑀢𑀺. ‘‘𑀦𑀦𑀼 𑀲𑁄, 𑀫𑀳𑀸𑀭𑀸𑀚, 𑀯𑀺𑀚𑁆𑀚𑀸𑀥𑀭𑁄 𑀧𑀭𑀺𑀢𑁆𑀢𑀩𑀮𑁂𑀦 𑀕𑀳𑀡𑀸 𑀫𑀼𑀢𑁆𑀢𑁄’’𑀢𑀺? ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀧𑀭𑀺𑀢𑁆𑀢𑀩𑀮’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀺𑀁 𑀲𑀩𑁆𑀩𑁂 𑀬𑁂𑀯 𑀧𑀭𑀺𑀢𑁆𑀢𑀁 𑀭𑀓𑁆𑀔𑀢𑀻’𑀢𑀺? ‘‘𑀏𑀓𑀘𑁆𑀘𑁂, 𑀫𑀳𑀸𑀭𑀸𑀚, 𑀭𑀓𑁆𑀔𑀢𑀺, 𑀏𑀓𑀘𑁆𑀘𑁂 𑀦 𑀭𑀓𑁆𑀔𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀭𑀺𑀢𑁆𑀢𑀁 𑀦 𑀲𑀩𑁆𑀩𑀢𑁆𑀣𑀺𑀓’’𑀦𑁆𑀢𑀺? ‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀁 𑀭𑀓𑁆𑀔𑀢𑀻’’𑀢𑀺? ‘‘𑀏𑀓𑀘𑁆𑀘𑁂, 𑀪𑀦𑁆𑀢𑁂, 𑀭𑀓𑁆𑀔𑀢𑀺, 𑀏𑀓𑀘𑁆𑀘𑁂 𑀦 𑀭𑀓𑁆𑀔𑀢𑀻’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺. ‘‘𑀬𑀢𑁄, 𑀪𑀦𑁆𑀢𑁂, 𑀏𑀓𑀘𑁆𑀘𑁂 𑀢𑀁 𑀬𑁂𑀯 𑀪𑁄𑀚𑀦𑀁 𑀅𑀢𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀲𑀽𑀘𑀺𑀓𑀸𑀬 𑀫𑀭𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀦 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀁 𑀭𑀓𑁆𑀔𑀢𑀻’’𑀢𑀺? ‘‘𑀤𑁆𑀯𑀻𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀳𑀺 𑀪𑁄𑀚𑀦𑀁 𑀚𑀻𑀯𑀺𑀢𑀁 𑀳𑀭𑀢𑀺 𑀅𑀢𑀺𑀪𑀼𑀢𑁆𑀢𑁂𑀦 𑀯𑀸 𑀉𑀲𑁆𑀫𑀸𑀤𑀼𑀩𑁆𑀩𑀮𑀢𑀸𑀬 𑀯𑀸, 𑀆𑀬𑀼𑀤𑀤𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑁄𑀚𑀦𑀁 𑀤𑀼𑀭𑀼𑀧𑀘𑀸𑀭𑁂𑀦 𑀚𑀻𑀯𑀺𑀢𑀁 𑀳𑀭𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀁 𑀏𑀓𑀘𑁆𑀘𑁂 𑀭𑀓𑁆𑀔𑀢𑀺, 𑀏𑀓𑀘𑁆𑀘𑁂 𑀦 𑀭𑀓𑁆𑀔𑀢𑀺.

‘‘𑀢𑀻𑀳𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀳𑀺 𑀧𑀭𑀺𑀢𑁆𑀢𑀁 𑀦 𑀭𑀓𑁆𑀔𑀢𑀺 𑀓𑀫𑁆𑀫𑀸𑀯𑀭𑀡𑁂𑀦, 𑀓𑀺𑀮𑁂𑀲𑀸𑀯𑀭𑀡𑁂𑀦, 𑀅𑀲𑀤𑁆𑀤𑀳𑀦𑀢𑀸𑀬. 𑀲𑀢𑁆𑀢𑀸𑀦𑀼𑀭𑀓𑁆𑀔𑀡𑀁, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀦𑀸 𑀓𑀢𑁂𑀦 𑀆𑀭𑀓𑁆𑀔𑀁 𑀚𑀳𑀢𑀺, 𑀬𑀣𑀸, 𑀫𑀳𑀸𑀭𑀸𑀚, 𑀫𑀸𑀢𑀸 𑀧𑀼𑀢𑁆𑀢𑀁 𑀓𑀼𑀘𑁆𑀙𑀺𑀕𑀢𑀁 𑀧𑁄𑀲𑁂𑀢𑀺, 𑀳𑀺𑀢𑁂𑀦 𑀉𑀧𑀘𑀸𑀭𑁂𑀦 𑀚𑀦𑁂𑀢𑀺, 𑀚𑀦𑀬𑀺𑀢𑁆𑀯𑀸 𑀅𑀲𑀼𑀘𑀺𑀫𑀮𑀲𑀺𑀗𑁆𑀖𑀸𑀡𑀺𑀓𑀫𑀧𑀦𑁂𑀢𑁆𑀯𑀸 𑀉𑀢𑁆𑀢𑀫𑀯𑀭𑀲𑀼𑀕𑀦𑁆𑀥𑀁 𑀉𑀧𑀮𑀺𑀫𑁆𑀧𑀢𑀺, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀭𑁂𑀲𑀁 𑀧𑀼𑀢𑁆𑀢𑁂 𑀅𑀓𑁆𑀓𑁄𑀲𑀦𑁆𑀢𑁂 𑀯𑀸 𑀧𑀳𑀭𑀦𑁆𑀢𑁂 𑀯𑀸 𑀧𑀳𑀸𑀭𑀁 𑀤𑁂𑀢𑀺. 𑀢𑁂 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸 𑀧𑀭𑀺𑀲𑀸𑀬 𑀆𑀓𑀟𑁆𑀠𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀦𑁄 𑀉𑀧𑀦𑁂𑀦𑁆𑀢𑀺, 𑀬𑀤𑀺 𑀧𑀦 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀅𑀧𑀭𑀤𑁆𑀥𑁄 𑀳𑁄𑀢𑀺 𑀯𑁂𑀮𑀸𑀢𑀺𑀯𑀢𑁆𑀢𑁄. 𑀅𑀣 𑀦𑀁 𑀲𑀸𑀫𑀺𑀦𑁄 𑀫𑀦𑀼𑀲𑁆𑀲𑀸 𑀆𑀓𑀟𑁆𑀠𑀬𑀫𑀸𑀦𑀸 𑀤𑀡𑁆𑀟𑀫𑀼𑀕𑁆𑀕𑀭𑀚𑀸𑀡𑀼𑀫𑀼𑀝𑁆𑀞𑀻𑀳𑀺 𑀢𑀸𑀴𑁂𑀦𑁆𑀢𑀺 𑀧𑁄𑀣𑁂𑀦𑁆𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀫𑀸𑀢𑀸 𑀮𑀪𑀢𑀺 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀁 𑀕𑀸𑀳𑀁 𑀲𑀸𑀫𑀺𑀦𑁄 𑀉𑀧𑀦𑀬𑀦𑀁 𑀓𑀸𑀢𑀼’’𑀦𑁆𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦, 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀢𑁆𑀢𑀦𑁄, 𑀪𑀦𑁆𑀢𑁂, 𑀅𑀧𑀭𑀸𑀥𑁂𑀦𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑁆𑀢𑀸𑀦𑀁 𑀆𑀭𑀓𑁆𑀔𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀦𑁄 𑀅𑀧𑀭𑀸𑀥𑁂𑀦 𑀯𑀜𑁆𑀛𑀁 𑀓𑀭𑁄𑀢𑀻’’𑀢𑀺 [𑀓𑀸𑀭𑁂𑀢𑀻𑀢𑀺 (𑀲𑀻.)]. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀧𑀜𑁆𑀳𑁄, 𑀕𑀳𑀦𑀁 𑀅𑀕𑀳𑀦𑀁 𑀓𑀢𑀁, 𑀅𑀦𑁆𑀥𑀓𑀸𑀭𑁄 𑀆𑀮𑁄𑀓𑁄 𑀓𑀢𑁄, 𑀯𑀺𑀦𑀺𑀯𑁂𑀞𑀺𑀢𑀁 𑀤𑀺𑀝𑁆𑀞𑀺𑀚𑀸𑀮𑀁, 𑀢𑁆𑀯𑀁 𑀕𑀡𑀺𑀯𑀭𑀧𑀯𑀭𑀫𑀸𑀲𑀚𑁆𑀚𑀸’’𑀢𑀺.

𑀫𑀘𑁆𑀘𑀼𑀧𑀸𑀲𑀫𑀼𑀢𑁆𑀢𑀺𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀩𑀼𑀤𑁆𑀥𑀮𑀸𑀪𑀦𑁆𑀢𑀭𑀸𑀬𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀮𑀸𑀪𑀻 𑀢𑀣𑀸𑀕𑀢𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺. 𑀧𑀼𑀦 𑀘 𑀢𑀣𑀸𑀕𑀢𑁄 𑀧𑀜𑁆𑀘𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀮𑀪𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀦𑁆𑀢𑁄𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀢𑁂𑀦 𑀳𑀺 𑀧𑀜𑁆𑀘𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀮𑀪𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀦𑁆𑀢𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀧𑀜𑁆𑀘𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀮𑀪𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀦𑁆𑀢𑁄, 𑀢𑁂𑀦 𑀳𑀺 𑀮𑀸𑀪𑀻 𑀢𑀣𑀸𑀕𑀢𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀲𑀼𑀫𑀳𑀦𑁆𑀢𑁄 𑀤𑀼𑀦𑁆𑀦𑀺𑀩𑁆𑀩𑁂𑀞𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀮𑀸𑀪𑀻, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀧𑀜𑁆𑀘𑀲𑀸𑀮𑀜𑁆𑀘 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀮𑀪𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀦𑀺𑀓𑁆𑀔𑀦𑁆𑀢𑁄, 𑀢𑀜𑁆𑀘 𑀧𑀦 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀓𑀸𑀭𑀡𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀓𑀧𑁆𑀧𑁂 [𑀕𑀡𑀦𑀧𑀣𑀯𑀻𑀢𑀺𑀯𑀢𑁆𑀢𑁂 𑀓𑀧𑁆𑀧𑁂 (𑀲𑀻.)] 𑀅𑀪𑀺𑀲𑀗𑁆𑀔𑀢𑀁 𑀓𑀼𑀲𑀮𑀁 𑀓𑀺𑀦𑁆𑀢𑀺 𑀦𑀺𑀝𑁆𑀞𑀺𑀢𑀁, 𑀅𑀥𑀼𑀦𑀼𑀝𑁆𑀞𑀺𑀢𑁂𑀦 𑀫𑀸𑀭𑁂𑀦 𑀧𑀸𑀧𑀺𑀫𑀢𑀸 𑀢𑀲𑁆𑀲 𑀓𑀼𑀲𑀮𑀲𑁆𑀲 𑀩𑀮𑀯𑁂𑀕𑀁 [𑀢𑀁 𑀓𑀼𑀲𑀮𑀩𑀮𑀯𑁂𑀕𑀯𑀺𑀧𑁆𑀨𑀸𑀭𑀁 (𑀲𑀻.)] 𑀓𑀺𑀦𑁆𑀢𑀺 𑀧𑀺𑀳𑀺𑀢𑀁, 𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀉𑀧𑀯𑀸𑀤𑁄 𑀆𑀕𑀘𑁆𑀙𑀢𑀺, 𑀓𑀼𑀲𑀮𑀢𑁄𑀧𑀺 𑀅𑀓𑀼𑀲𑀮𑀁 𑀩𑀮𑀯𑀢𑀭𑀁 𑀳𑁄𑀢𑀺, 𑀩𑀼𑀤𑁆𑀥𑀩𑀮𑀢𑁄𑀧𑀺 𑀫𑀸𑀭𑀩𑀮𑀁 𑀩𑀮𑀯𑀢𑀭𑀁 𑀳𑁄𑀢𑀻𑀢𑀺, 𑀢𑁂𑀦 𑀳𑀺 𑀭𑀼𑀓𑁆𑀔𑀲𑁆𑀲 𑀫𑀽𑀮𑀢𑁄𑀧𑀺 𑀅𑀕𑁆𑀕𑀁 𑀪𑀸𑀭𑀢𑀭𑀁 𑀳𑁄𑀢𑀺, 𑀕𑀼𑀡𑀲𑀫𑁆𑀧𑀭𑀺𑀓𑀺𑀡𑁆𑀡𑀢𑁄𑀧𑀺 𑀧𑀸𑀧𑀺𑀬𑀁 𑀩𑀮𑀯𑀢𑀭𑀁 𑀳𑁄𑀢𑀻’’𑀢𑀺. ‘‘𑀦, 𑀫𑀳𑀸𑀭𑀸𑀚, 𑀢𑀸𑀯𑀢𑀓𑁂𑀦 𑀓𑀼𑀲𑀮𑀢𑁄𑀧𑀺 𑀅𑀓𑀼𑀲𑀮𑀁 𑀩𑀮𑀯𑀢𑀭𑀁 𑀦𑀸𑀫 𑀳𑁄𑀢𑀺, 𑀦 𑀩𑀼𑀤𑁆𑀥𑀩𑀮𑀢𑁄𑀧𑀺 𑀫𑀸𑀭𑀩𑀮𑀁 𑀩𑀮𑀯𑀢𑀭𑀁 𑀦𑀸𑀫 𑀳𑁄𑀢𑀺. 𑀅𑀧𑀺 𑀘𑁂𑀢𑁆𑀣 𑀓𑀸𑀭𑀡𑀁 𑀇𑀘𑁆𑀙𑀺𑀢𑀩𑁆𑀩𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀫𑀥𑀼𑀁 𑀯𑀸 𑀫𑀥𑀼𑀧𑀺𑀡𑁆𑀟𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀉𑀧𑀸𑀬𑀦𑀁 𑀅𑀪𑀺𑀳𑀭𑁂𑀬𑁆𑀬, 𑀢𑀫𑁂𑀦𑀁 𑀭𑀜𑁆𑀜𑁄 𑀤𑁆𑀯𑀸𑀭𑀧𑀸𑀮𑁄 𑀏𑀯𑀁 𑀯𑀤𑁂𑀬𑁆𑀬 ‘𑀅𑀓𑀸𑀮𑁄, 𑀪𑁄, 𑀅𑀬𑀁 𑀭𑀜𑁆𑀜𑁄 𑀤𑀲𑁆𑀲𑀦𑀸𑀬, 𑀢𑁂𑀦 𑀳𑀺, 𑀪𑁄, 𑀢𑀯 𑀉𑀧𑀸𑀬𑀦𑀁 𑀕𑀳𑁂𑀢𑁆𑀯𑀸 𑀲𑀻𑀖𑀲𑀻𑀖𑀁 𑀧𑀝𑀺𑀦𑀺𑀯𑀢𑁆𑀢, 𑀧𑀼𑀭𑁂 𑀢𑀯 𑀭𑀸𑀚𑀸 𑀤𑀡𑁆𑀟𑀁 𑀥𑀸𑀭𑁂𑀲𑁆𑀲𑀢𑀻’𑀢𑀺 [𑀫𑀸 𑀢𑁂 𑀭𑀸𑀚𑀸 𑀤𑀡𑁆𑀟𑀁 𑀧𑀸𑀧𑁂𑀬𑁆𑀬𑀸𑀢𑀺 (𑀲𑀻.)]. 𑀢𑀢𑁄 𑀲𑁄 𑀧𑀼𑀭𑀺𑀲𑁄 𑀤𑀡𑁆𑀟𑀪𑀬𑀸 𑀢𑀲𑀺𑀢𑁄 𑀉𑀩𑁆𑀩𑀺𑀕𑁆𑀕𑁄 𑀢𑀁 𑀉𑀧𑀸𑀬𑀦𑀁 𑀆𑀤𑀸𑀬 𑀲𑀻𑀖𑀲𑀻𑀖𑀁 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀸𑀯𑀢𑀓𑁂𑀦 𑀉𑀧𑀸𑀬𑀦𑀯𑀺𑀓𑀮𑀫𑀢𑁆𑀢𑀓𑁂𑀦 𑀤𑁆𑀯𑀸𑀭𑀧𑀸𑀮𑀢𑁄 𑀤𑀼𑀩𑁆𑀩𑀮𑀢𑀭𑁄 𑀦𑀸𑀫 𑀳𑁄𑀢𑀺, 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀉𑀧𑀸𑀬𑀦𑀁 𑀦 𑀮𑀪𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀇𑀲𑁆𑀲𑀸𑀧𑀓𑀢𑁄 𑀲𑁄, 𑀪𑀦𑁆𑀢𑁂, 𑀤𑁆𑀯𑀸𑀭𑀧𑀸𑀮𑁄 𑀉𑀧𑀸𑀬𑀦𑀁 𑀦𑀺𑀯𑀸𑀭𑁂𑀲𑀺, 𑀅𑀜𑁆𑀜𑁂𑀦 𑀧𑀦 𑀤𑁆𑀯𑀸𑀭𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑀫𑁆𑀧𑀺 𑀭𑀜𑁆𑀜𑁄 𑀉𑀧𑀸𑀬𑀦𑀁 𑀉𑀧𑁂𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀧𑀓𑀢𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺, 𑀅𑀜𑁆𑀜𑀸𑀦𑀺 𑀧𑀦 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀲𑀳𑀲𑁆𑀲𑀸𑀦𑀺 𑀅𑀫𑀢𑀁 𑀤𑀺𑀩𑁆𑀩𑀁 𑀑𑀚𑀁 𑀕𑀳𑁂𑀢𑁆𑀯𑀸 𑀉𑀧𑀕𑀢𑀸𑀦𑀺 ‘𑀪𑀕𑀯𑀢𑁄 𑀓𑀸𑀬𑁂 𑀑𑀚𑀁 𑀑𑀤𑀳𑀺𑀲𑁆𑀲𑀸𑀫𑀸’𑀢𑀺 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸𑀦𑀺 𑀧𑀜𑁆𑀚𑀮𑀺𑀓𑀸𑀦𑀺 𑀞𑀺𑀢𑀸𑀦𑀻’’𑀢𑀺.

‘‘𑀳𑁄𑀢𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀮𑀪𑀸 𑀪𑀕𑀯𑀢𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀮𑁄𑀓𑁂 𑀉𑀢𑁆𑀢𑀫𑀧𑀼𑀭𑀺𑀲𑀲𑁆𑀲, 𑀬𑀸𑀘𑀺𑀢𑁄𑀯 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁄𑀳𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀧𑀺 𑀘 𑀔𑁄 𑀧𑀦 𑀫𑀸𑀭𑀲𑁆𑀲 𑀬𑁄 𑀅𑀥𑀺𑀧𑁆𑀧𑀸𑀬𑁄, 𑀲𑁄 𑀢𑀸𑀯𑀢𑀓𑁂𑀦 𑀲𑀺𑀤𑁆𑀥𑁄, 𑀬𑀁 𑀲𑁄 𑀪𑀕𑀯𑀢𑁄 𑀪𑁄𑀚𑀦𑀲𑁆𑀲 𑀅𑀦𑁆𑀢𑀭𑀸𑀬𑀫𑀓𑀸𑀲𑀺. 𑀏𑀢𑁆𑀣 𑀫𑁂, 𑀪𑀦𑁆𑀢𑁂, 𑀓𑀗𑁆𑀔𑀸 𑀦 𑀙𑀺𑀚𑁆𑀚𑀢𑀺, 𑀯𑀺𑀫𑀢𑀺𑀚𑀸𑀢𑁄𑀳𑀁 𑀢𑀢𑁆𑀣 𑀲𑀁𑀲𑀬𑀧𑀓𑁆𑀔𑀦𑁆𑀤𑁄. 𑀦 𑀫𑁂 𑀢𑀢𑁆𑀣 𑀫𑀸𑀦𑀲𑀁 𑀧𑀓𑁆𑀔𑀦𑁆𑀤𑀢𑀺, 𑀬𑀁 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀯𑀭𑀲𑁆𑀲 𑀓𑀼𑀲𑀮𑀯𑀭𑀧𑀼𑀜𑁆𑀜𑀲𑀫𑁆𑀪𑀯𑀲𑁆𑀲 𑀅𑀲𑀫𑀲𑀫𑀲𑁆𑀲 𑀅𑀦𑀼𑀧𑀫𑀲𑁆𑀲 𑀅𑀧𑁆𑀧𑀝𑀺𑀲𑀫𑀲𑁆𑀲 𑀙𑀯𑀓𑀁 𑀮𑀸𑀫𑀓𑀁 𑀧𑀭𑀺𑀢𑁆𑀢𑀁 𑀧𑀸𑀧𑀁 𑀅𑀦𑀭𑀺𑀬𑀁 𑀯𑀺𑀧𑀦𑁆𑀦𑀁 𑀫𑀸𑀭𑁄 𑀮𑀸𑀪𑀦𑁆𑀢𑀭𑀸𑀬𑀫𑀓𑀸𑀲𑀻’’𑀢𑀺.

‘‘𑀘𑀢𑁆𑀢𑀸𑀭𑁄 𑀔𑁄, 𑀫𑀳𑀸𑀭𑀸𑀚, 𑀅𑀦𑁆𑀢𑀭𑀸𑀬𑀸 𑀅𑀤𑀺𑀝𑁆𑀞𑀦𑁆𑀢𑀭𑀸𑀬𑁄 𑀉𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀭𑀸𑀬𑁄 𑀉𑀧𑀓𑁆𑀔𑀝𑀦𑁆𑀢𑀭𑀸𑀬𑁄 𑀧𑀭𑀺𑀪𑁄𑀕𑀦𑁆𑀢𑀭𑀸𑀬𑁄𑀢𑀺. 𑀢𑀢𑁆𑀣 𑀓𑀢𑀫𑁄 𑀅𑀤𑀺𑀝𑁆𑀞𑀦𑁆𑀢𑀭𑀸𑀬𑁄? 𑀅𑀦𑁄𑀤𑀺𑀲𑁆𑀲 𑀅𑀤𑀲𑁆𑀲𑀦𑁂𑀦 𑀅𑀦𑀪𑀺𑀲𑀗𑁆𑀔𑀢𑀁 𑀓𑁄𑀘𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺 ‘𑀓𑀺𑀁 𑀧𑀭𑀲𑁆𑀲 𑀤𑀺𑀦𑁆𑀦𑁂𑀦𑀸’𑀢𑀺, 𑀅𑀬𑀁 𑀅𑀤𑀺𑀝𑁆𑀞𑀦𑁆𑀢𑀭𑀸𑀬𑁄 𑀦𑀸𑀫.

‘‘𑀓𑀢𑀫𑁄 𑀉𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀭𑀸𑀬𑁄? 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀉𑀧𑀤𑀺𑀲𑀺𑀢𑁆𑀯𑀸 𑀉𑀤𑁆𑀤𑀺𑀲𑁆𑀲 𑀪𑁄𑀚𑀦𑀁 𑀧𑀝𑀺𑀬𑀢𑁆𑀢𑀁 𑀳𑁄𑀢𑀺, 𑀢𑀁 𑀓𑁄𑀘𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀅𑀬𑀁 𑀉𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀭𑀸𑀬𑁄 𑀦𑀸𑀫.

‘‘𑀓𑀢𑀫𑁄 𑀉𑀧𑀓𑁆𑀔𑀝𑀦𑁆𑀢𑀭𑀸𑀬𑁄? 𑀇𑀥 𑀬𑀁 𑀓𑀺𑀜𑁆𑀘𑀺 𑀉𑀧𑀓𑁆𑀔𑀝𑀁 𑀳𑁄𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁, 𑀢𑀢𑁆𑀣 𑀓𑁄𑀘𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀅𑀬𑀁 𑀉𑀧𑀓𑁆𑀔𑀝𑀦𑁆𑀢𑀭𑀸𑀬𑁄 𑀦𑀸𑀫.

‘‘𑀓𑀢𑀫𑁄 𑀧𑀭𑀺𑀪𑁄𑀕𑀦𑁆𑀢𑀭𑀸𑀬𑁄? 𑀇𑀥 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀪𑁄𑀕𑀁, 𑀢𑀢𑁆𑀣 𑀓𑁄𑀘𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀅𑀬𑀁 𑀧𑀭𑀺𑀪𑁄𑀕𑀦𑁆𑀢𑀭𑀸𑀬𑁄 𑀦𑀸𑀫. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀭𑀸𑀬𑀸.

‘‘𑀬𑀁 𑀧𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺, 𑀢𑀁 𑀦𑁂𑀯 𑀪𑀕𑀯𑀢𑁄 𑀧𑀭𑀺𑀪𑁄𑀕𑀁 𑀦 𑀉𑀧𑀓𑁆𑀔𑀝𑀁 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁, 𑀅𑀦𑀸𑀕𑀢𑀁 𑀅𑀲𑀫𑁆𑀧𑀢𑁆𑀢𑀁 𑀅𑀤𑀲𑁆𑀲𑀦𑁂𑀦 𑀅𑀦𑁆𑀢𑀭𑀸𑀬𑀁 𑀓𑀢𑀁, 𑀢𑀁 𑀧𑀦 𑀦𑁂𑀓𑀲𑁆𑀲 𑀪𑀕𑀯𑀢𑁄 𑀬𑁂𑀯, 𑀅𑀣 𑀔𑁄 𑀬𑁂 𑀢𑁂 𑀢𑁂𑀦 𑀲𑀫𑀬𑁂𑀦 𑀦𑀺𑀓𑁆𑀔𑀦𑁆𑀢𑀸 𑀅𑀩𑁆𑀪𑀸𑀕𑀢𑀸, 𑀲𑀩𑁆𑀩𑁂𑀧𑀺 𑀢𑁂 𑀢𑀁 𑀤𑀺𑀯𑀲𑀁 𑀪𑁄𑀚𑀦𑀁 𑀦 𑀮𑀪𑀺𑀁𑀲𑀼, 𑀦𑀸𑀳𑀁 𑀢𑀁, 𑀫𑀳𑀸𑀭𑀸𑀚, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑁄 𑀢𑀲𑁆𑀲 𑀪𑀕𑀯𑀢𑁄 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀉𑀧𑀓𑁆𑀔𑀝𑀁 𑀧𑀭𑀺𑀪𑁄𑀕𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬. 𑀲𑀘𑁂 𑀓𑁄𑀘𑀺 𑀇𑀲𑁆𑀲𑀸𑀬 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀉𑀧𑀓𑁆𑀔𑀝𑀁 𑀧𑀭𑀺𑀪𑁄𑀕𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬, 𑀨𑀮𑁂𑀬𑁆𑀬 𑀢𑀲𑁆𑀲 𑀫𑀼𑀤𑁆𑀥𑀸 𑀲𑀢𑀥𑀸 𑀯𑀸 𑀲𑀳𑀲𑁆𑀲𑀥𑀸 𑀯𑀸.

‘‘𑀘𑀢𑁆𑀢𑀸𑀭𑁄𑀫𑁂, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀓𑁂𑀦𑀘𑀺 𑀅𑀦𑀸𑀯𑀭𑀡𑀻𑀬𑀸 𑀕𑀼𑀡𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀮𑀸𑀪𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀉𑀤𑁆𑀤𑀺𑀲𑁆𑀲 𑀓𑀢𑁄 𑀉𑀧𑀓𑁆𑀔𑀝𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁; 𑀲𑀭𑀻𑀭𑀸𑀦𑀼𑀕𑀢𑀸, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀩𑁆𑀬𑀸𑀫𑀧𑁆𑀧𑀪𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁; 𑀲𑀩𑁆𑀩𑀜𑁆𑀜𑀼𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀜𑀸𑀡𑀭𑀢𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁; 𑀚𑀻𑀯𑀺𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑁄 𑀢𑀣𑀸𑀕𑀢𑀲𑁆𑀲 𑀓𑁂𑀦𑀘𑀺 𑀅𑀦𑀸𑀯𑀭𑀡𑀻𑀬𑀸 𑀕𑀼𑀡𑀸, 𑀲𑀩𑁆𑀩𑁂𑀧𑁂𑀢𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀏𑀓𑀭𑀲𑀸 𑀅𑀭𑁄𑀕𑀸 𑀅𑀓𑀼𑀧𑁆𑀧𑀸 𑀅𑀧𑀭𑀽𑀧𑀓𑁆𑀓𑀫𑀸 𑀅𑀨𑀼𑀲𑀸𑀦𑀺 𑀓𑀺𑀭𑀺𑀬𑀸𑀦𑀺. 𑀅𑀤𑀲𑁆𑀲𑀦𑁂𑀦, 𑀫𑀳𑀸𑀭𑀸𑀚, 𑀫𑀸𑀭𑁄 𑀧𑀸𑀧𑀺𑀫𑀸 𑀦𑀺𑀮𑀻𑀬𑀺𑀢𑁆𑀯𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁂 𑀤𑁂𑀲𑁂 𑀯𑀺𑀲𑀫𑁂 𑀅𑀤𑀲𑁆𑀲𑀦𑁂𑀦 𑀦𑀺𑀮𑀻𑀬𑀺𑀢𑁆𑀯𑀸 𑀘𑁄𑀭𑀸 𑀧𑀦𑁆𑀣𑀁 𑀤𑀽𑀲𑁂𑀦𑁆𑀢𑀺. 𑀬𑀤𑀺 𑀧𑀦 𑀭𑀸𑀚𑀸 𑀢𑁂 𑀘𑁄𑀭𑁂 𑀧𑀲𑁆𑀲𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀢𑁂 𑀘𑁄𑀭𑀸 𑀲𑁄𑀢𑁆𑀣𑀺𑀁 𑀮𑀪𑁂𑀬𑁆𑀬𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀨𑀭𑀲𑀼𑀦𑀸 𑀨𑀸𑀮𑀸𑀧𑁂𑀬𑁆𑀬 𑀲𑀢𑀥𑀸 𑀯𑀸 𑀲𑀳𑀲𑁆𑀲𑀥𑀸 𑀯𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀤𑀲𑁆𑀲𑀦𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀦𑀺𑀮𑀻𑀬𑀺𑀢𑁆𑀯𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀲𑀧𑀢𑀺𑀓𑀸 𑀅𑀤𑀲𑁆𑀲𑀦𑁂𑀦 𑀦𑀺𑀮𑀻𑀬𑀺𑀢𑁆𑀯𑀸 𑀧𑀭𑀧𑀼𑀭𑀺𑀲𑀁 𑀲𑁂𑀯𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀤𑀲𑁆𑀲𑀦𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀦𑀺𑀮𑀻𑀬𑀺𑀢𑁆𑀯𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺. 𑀬𑀤𑀺, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀲𑀸𑀫𑀺𑀓𑀲𑁆𑀲 𑀲𑀫𑁆𑀫𑀼𑀔𑀸 𑀧𑀭𑀧𑀼𑀭𑀺𑀲𑀁 𑀲𑁂𑀯𑀢𑀺, 𑀅𑀧𑀺 𑀦𑀼 𑀔𑁄 𑀲𑀸 𑀇𑀢𑁆𑀣𑀻 𑀲𑁄𑀢𑁆𑀣𑀺𑀁 𑀮𑀪𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀳𑀦𑁂𑀬𑁆𑀬𑀸𑀧𑀺 𑀢𑀁, 𑀪𑀦𑁆𑀢𑁂, 𑀲𑀸𑀫𑀺𑀓𑁄 𑀯𑀥𑁂𑀬𑁆𑀬𑀸𑀧𑀺 𑀩𑀦𑁆𑀥𑁂𑀬𑁆𑀬𑀸𑀧𑀺 𑀤𑀸𑀲𑀺𑀢𑁆𑀢𑀁 𑀯𑀸 𑀉𑀧𑀦𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀤𑀲𑁆𑀲𑀦𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀦𑀺𑀮𑀻𑀬𑀺𑀢𑁆𑀯𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺. 𑀬𑀤𑀺, 𑀫𑀳𑀸𑀭𑀸𑀚, 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀉𑀧𑀓𑁆𑀔𑀝𑀁 𑀧𑀭𑀺𑀪𑁄𑀕𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬, 𑀨𑀮𑁂𑀬𑁆𑀬 𑀢𑀲𑁆𑀲 𑀫𑀼𑀤𑁆𑀥𑀸 𑀲𑀢𑀥𑀸 𑀯𑀸 𑀲𑀳𑀲𑁆𑀲𑀥𑀸 𑀯𑀸’’𑀢𑀺. ‘‘𑀏𑀯𑀫𑁂𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀘𑁄𑀭𑀺𑀓𑀸𑀬 𑀓𑀢𑀁 𑀫𑀸𑀭𑁂𑀦 𑀧𑀸𑀧𑀺𑀫𑀢𑀸, 𑀦𑀺𑀮𑀻𑀬𑀺𑀢𑁆𑀯𑀸 𑀫𑀸𑀭𑁄 𑀧𑀸𑀧𑀺𑀫𑀸 𑀧𑀜𑁆𑀘𑀲𑀸𑀮𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀅𑀦𑁆𑀯𑀸𑀯𑀺𑀲𑀺. 𑀲𑀘𑁂 𑀲𑁄, 𑀪𑀦𑁆𑀢𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀉𑀧𑀓𑁆𑀔𑀝𑀁 𑀧𑀭𑀺𑀪𑁄𑀕𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬, 𑀫𑀼𑀤𑁆𑀥𑀸 𑀯𑀸𑀲𑁆𑀲 𑀨𑀮𑁂𑀬𑁆𑀬 𑀲𑀢𑀥𑀸 𑀯𑀸 𑀲𑀳𑀲𑁆𑀲𑀥𑀸 𑀯𑀸, 𑀓𑀸𑀬𑁄 𑀯𑀸𑀲𑁆𑀲 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀓𑀺𑀭𑁂𑀬𑁆𑀬, 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀩𑀼𑀤𑁆𑀥𑀮𑀸𑀪𑀦𑁆𑀢𑀭𑀸𑀬𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀅𑀧𑀼𑀜𑁆𑀜𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀬𑁄 𑀅𑀚𑀸𑀦𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀢𑀺, 𑀲𑁄 𑀩𑀮𑀯𑀢𑀭𑀁 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’𑀢𑀺. 𑀧𑀼𑀦 𑀘 𑀪𑀕𑀯𑀢𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀪𑀡𑀺𑀢𑀁 ‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑀸’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀚𑀸𑀦𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑁄 𑀩𑀮𑀯𑀢𑀭𑀁 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀢𑁂𑀦 𑀳𑀺 ‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲, 𑀢𑁂𑀦 𑀳𑀺 ‘𑀅𑀚𑀸𑀦𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑁄 𑀩𑀮𑀯𑀢𑀭𑀁 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀤𑀼𑀭𑀼𑀢𑁆𑀢𑀭𑁄 𑀤𑀼𑀭𑀢𑀺𑀓𑁆𑀓𑀫𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀬𑁄 𑀅𑀚𑀸𑀦𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀢𑀺, 𑀲𑁄 𑀩𑀮𑀯𑀢𑀭𑀁 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’𑀢𑀺. 𑀧𑀼𑀦 𑀘 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑀸’𑀢𑀺. 𑀢𑀢𑁆𑀣 𑀅𑀢𑁆𑀣𑀦𑁆𑀢𑀭𑀁 𑀅𑀢𑁆𑀣𑀺. 𑀓𑀢𑀫𑀁 𑀅𑀢𑁆𑀣𑀦𑁆𑀢𑀭𑀁? 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀆𑀧𑀢𑁆𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸, 𑀅𑀢𑁆𑀣𑀺 𑀆𑀧𑀢𑁆𑀢𑀺 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀬𑀸𑀬𑀁, 𑀫𑀳𑀸𑀭𑀸𑀚, 𑀆𑀧𑀢𑁆𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸, 𑀢𑀁 𑀆𑀧𑀢𑁆𑀢𑀺𑀁 𑀆𑀭𑀩𑁆𑀪 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀧𑀼𑀜𑁆𑀜𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀳𑀭𑀡𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀦 𑀏𑀯𑀁 𑀳𑁄𑀢𑀺 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’’𑀢𑀺 𑀯𑀸, ‘‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀯𑀸’𑀢𑀺. 𑀧𑀼𑀦 𑀘 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄 𑀲𑀪𑀸𑀯𑀕𑀼𑀡𑀁 𑀧𑀭𑀺𑀤𑀻𑀧𑀬𑀫𑀸𑀦𑁂𑀦 𑀪𑀕𑀯𑀢𑀸 𑀏𑀯𑀁 𑀪𑀡𑀺𑀢𑀁 ‘‘𑀲𑁄 𑀅𑀦𑁂𑀓𑀲𑀳𑀲𑁆𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀳𑀁 𑀏𑀢𑀭𑀳𑀺 𑀅𑀦𑁂𑀓𑀲𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀸𑀫𑀻’’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀦 𑀏𑀯𑀁 𑀳𑁄𑀢𑀺 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸, ‘‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀯𑀸’𑀢𑀺, 𑀢𑁂𑀦 𑀳𑀺 𑀅𑀦𑁂𑀓𑀲𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀸𑀫𑀻𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀲𑁄 𑀅𑀦𑁂𑀓𑀲𑀳𑀲𑁆𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀳𑀁 𑀏𑀢𑀭𑀳𑀺 𑀅𑀦𑁂𑀓𑀲𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀸𑀫𑀻’𑀢𑀺, 𑀢𑁂𑀦 𑀳𑀺 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀦 𑀏𑀯𑀁 𑀳𑁄𑀢𑀺 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸, ‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑀯𑀸𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸, 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀦 𑀏𑀯𑀁 𑀳𑁄𑀢𑀺 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸, ‘‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀯𑀸’𑀢𑀺. 𑀧𑀼𑀦 𑀘 𑀫𑁂𑀢𑁆𑀢𑁂𑀬𑁆𑀬𑀲𑁆𑀲𑀸𑀧𑀺 𑀪𑀕𑀯𑀢𑁄 𑀲𑀪𑀸𑀯𑀕𑀼𑀡𑀁 𑀧𑀭𑀺𑀤𑀻𑀧𑀬𑀫𑀸𑀦𑁂𑀦 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑁄 𑀅𑀦𑁂𑀓𑀲𑀳𑀲𑁆𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀳𑀁 𑀏𑀢𑀭𑀳𑀺 𑀅𑀦𑁂𑀓𑀲𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀸𑀫𑀻’𑀢𑀺. 𑀏𑀢𑀲𑁆𑀫𑀺𑀜𑁆𑀘, 𑀫𑀳𑀸𑀭𑀸𑀚, 𑀧𑀜𑁆𑀳𑁂 𑀏𑀓𑁄 𑀅𑀢𑁆𑀣𑁄 𑀲𑀸𑀯𑀲𑁂𑀲𑁄, 𑀏𑀓𑁄 𑀅𑀢𑁆𑀣𑁄 𑀦𑀺𑀭𑀯𑀲𑁂𑀲𑁄. 𑀦, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀧𑀭𑀺𑀲𑀸𑀬 𑀅𑀦𑀼𑀕𑀸𑀫𑀺𑀓𑁄, 𑀧𑀭𑀺𑀲𑀸 𑀧𑀦 𑀢𑀣𑀸𑀕𑀢𑀲𑁆𑀲 𑀅𑀦𑀼𑀕𑀸𑀫𑀺𑀓𑀸. 𑀲𑀫𑁆𑀫𑀼𑀢𑀺, 𑀫𑀳𑀸𑀭𑀸𑀚, 𑀏𑀲𑀸 ‘𑀅𑀳’𑀦𑁆𑀢𑀺 ‘𑀫𑀫𑀸’𑀢𑀺, 𑀦 𑀧𑀭𑀫𑀢𑁆𑀣𑁄 𑀏𑀲𑁄, 𑀯𑀺𑀕𑀢𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀧𑁂𑀫𑀁, 𑀯𑀺𑀕𑀢𑁄 𑀲𑀺𑀦𑁂𑀳𑁄, ‘𑀫𑀬𑁆𑀳’𑀦𑁆𑀢𑀺𑀧𑀺 𑀢𑀣𑀸𑀕𑀢𑀲𑁆𑀲 𑀕𑀳𑀡𑀁 𑀦𑀢𑁆𑀣𑀺, 𑀉𑀧𑀸𑀤𑀸𑀬 𑀧𑀦 𑀅𑀯𑀲𑁆𑀲𑀬𑁄 𑀳𑁄𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀣𑀯𑀻 𑀪𑀽𑀫𑀝𑁆𑀞𑀸𑀦𑀁 𑀲𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺 𑀉𑀧𑀲𑁆𑀲𑀬𑀁, 𑀧𑀣𑀯𑀺𑀝𑁆𑀞𑀸 𑀘𑁂𑀢𑁂 𑀲𑀢𑁆𑀢𑀸, 𑀦 𑀘 𑀫𑀳𑀸𑀧𑀣𑀯𑀺𑀬𑀸 ‘𑀫𑀬𑁆𑀳𑁂𑀢𑁂’𑀢𑀺 𑀅𑀧𑁂𑀓𑁆𑀔𑀸 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺 𑀉𑀧𑀲𑁆𑀲𑀬𑀁, 𑀢𑀣𑀸𑀕𑀢𑀝𑁆𑀞𑀸 [𑀢𑀣𑀸𑀕𑀢𑀧𑀢𑀺𑀝𑁆𑀞𑀸 𑀏𑀯 (𑀲𑀻.)] 𑀘𑁂𑀢𑁂 𑀲𑀢𑁆𑀢𑀸, 𑀦 𑀘 𑀢𑀣𑀸𑀕𑀢𑀲𑁆𑀲 ‘𑀫𑀬𑁆𑀳𑁂𑀢𑁂’𑀢𑀺 𑀅𑀧𑁂𑀓𑁆𑀔𑀸 𑀳𑁄𑀢𑀺. 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀫𑁂𑀖𑁄 𑀅𑀪𑀺𑀯𑀲𑁆𑀲𑀦𑁆𑀢𑁄 𑀢𑀺𑀡𑀭𑀼𑀓𑁆𑀔𑀧𑀲𑀼𑀫𑀦𑀼𑀲𑁆𑀲𑀸𑀦𑀁 𑀯𑀼𑀟𑁆𑀠𑀺𑀁 𑀤𑁂𑀢𑀺 𑀲𑀦𑁆𑀢𑀢𑀺𑀁 𑀅𑀦𑀼𑀧𑀸𑀮𑁂𑀢𑀺. 𑀯𑀼𑀝𑁆𑀞𑀽𑀧𑀚𑀻𑀯𑀺𑀦𑁄 𑀘𑁂𑀢𑁂 𑀲𑀢𑁆𑀢𑀸 𑀲𑀩𑁆𑀩𑁂, 𑀦 𑀘 𑀫𑀳𑀸𑀫𑁂𑀖𑀲𑁆𑀲 ‘𑀫𑀬𑁆𑀳𑁂𑀢𑁂’𑀢𑀺 𑀅𑀧𑁂𑀓𑁆𑀔𑀸 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑁂 𑀚𑀦𑁂𑀢𑀺 𑀅𑀦𑀼𑀧𑀸𑀮𑁂𑀢𑀺, 𑀲𑀢𑁆𑀣𑀽𑀧𑀚𑀻𑀯𑀺𑀦𑁄 𑀘𑁂𑀢𑁂 𑀲𑀢𑁆𑀢𑀸 𑀲𑀩𑁆𑀩𑁂, 𑀦 𑀘 𑀢𑀣𑀸𑀕𑀢𑀲𑁆𑀲 ‘𑀫𑀬𑁆𑀳𑁂𑀢𑁂’𑀢𑀺 𑀅𑀧𑁂𑀓𑁆𑀔𑀸 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀢𑁆𑀢𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀦𑀺𑀩𑁆𑀩𑁂𑀞𑀺𑀢𑁄 𑀧𑀜𑁆𑀳𑁄 𑀩𑀳𑀼𑀯𑀺𑀥𑁂𑀳𑀺 𑀓𑀸𑀭𑀡𑁂𑀳𑀺, 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑀻𑀓𑀢𑁄, 𑀕𑀡𑁆𑀞𑀺 𑀪𑀺𑀦𑁆𑀦𑁄, 𑀕𑀳𑀦𑀁 𑀅𑀕𑀳𑀦𑀁 𑀓𑀢𑀁, 𑀅𑀦𑁆𑀥𑀓𑀸𑀭𑁄 𑀆𑀮𑁄𑀓𑁄 𑀓𑀢𑁄, 𑀪𑀕𑁆𑀕𑀸 𑀧𑀭𑀯𑀸𑀤𑀸, 𑀚𑀺𑀦𑀧𑀼𑀢𑁆𑀢𑀸𑀦𑀁 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑀺𑀢’’𑀦𑁆𑀢𑀺.

𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀳𑀭𑀡𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀅𑀪𑁂𑀚𑁆𑀚𑀧𑀭𑀺𑀲𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀢𑀣𑀸𑀕𑀢𑁄 𑀅𑀪𑁂𑀚𑁆𑀚𑀧𑀭𑀺𑀲𑁄’𑀢𑀺, 𑀧𑀼𑀦 𑀘 𑀪𑀡𑀣 ‘𑀤𑁂𑀯𑀤𑀢𑁆𑀢𑁂𑀦 𑀏𑀓𑀧𑁆𑀧𑀳𑀸𑀭𑀁 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑀺𑀦𑁆𑀦𑀸𑀦𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀅𑀪𑁂𑀚𑁆𑀚𑀧𑀭𑀺𑀲𑁄, 𑀢𑁂𑀦 𑀳𑀺 𑀤𑁂𑀯𑀤𑀢𑁆𑀢𑁂𑀦 𑀏𑀓𑀧𑁆𑀧𑀳𑀸𑀭𑀁 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑀺𑀦𑁆𑀦𑀸𑀦𑀻𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀤𑁂𑀯𑀤𑀢𑁆𑀢𑁂𑀦 𑀏𑀓𑀧𑁆𑀧𑀳𑀸𑀭𑀁 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀢𑁂𑀦 𑀳𑀺 ‘𑀢𑀣𑀸𑀕𑀢𑁄 𑀅𑀪𑁂𑀚𑁆𑀚𑀧𑀭𑀺𑀲𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀕𑀫𑁆𑀪𑀻𑀭𑁄 𑀤𑀼𑀦𑁆𑀦𑀺𑀯𑁂𑀞𑀺𑀬𑁄, 𑀕𑀡𑁆𑀞𑀺𑀢𑁄𑀧𑀺 𑀕𑀡𑁆𑀞𑀺𑀢𑀭𑁄, 𑀏𑀢𑁆𑀣𑀸𑀬𑀁 𑀚𑀦𑁄 𑀆𑀯𑀝𑁄 𑀦𑀺𑀯𑀼𑀢𑁄 𑀑𑀯𑀼𑀢𑁄 𑀧𑀺𑀳𑀺𑀢𑁄 𑀧𑀭𑀺𑀬𑁄𑀦𑀤𑁆𑀥𑁄, 𑀏𑀢𑁆𑀣 𑀢𑀯 𑀜𑀸𑀡𑀩𑀮𑀁 𑀤𑀲𑁆𑀲𑁂𑀳𑀺 𑀧𑀭𑀯𑀸𑀤𑁂𑀲𑀽’’𑀢𑀺.

‘‘𑀅𑀪𑁂𑀚𑁆𑀚𑀧𑀭𑀺𑀲𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄, 𑀤𑁂𑀯𑀤𑀢𑁆𑀢𑁂𑀦 𑀘 𑀏𑀓𑀧𑁆𑀧𑀳𑀸𑀭𑀁 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀢𑀜𑁆𑀘 𑀧𑀦 𑀪𑁂𑀤𑀓𑀲𑁆𑀲 𑀩𑀮𑁂𑀦, 𑀪𑁂𑀤𑀓𑁂 𑀯𑀺𑀚𑁆𑀚𑀫𑀸𑀦𑁂 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀪𑁂𑀚𑁆𑀚𑀁 𑀦𑀸𑀫. 𑀪𑁂𑀤𑀓𑁂 𑀲𑀢𑀺 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀪𑀺𑀚𑁆𑀚𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀪𑀺𑀚𑁆𑀚𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀪𑀺𑀚𑁆𑀚𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀪𑀺𑀚𑁆𑀚𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀪𑀺𑀚𑁆𑀚𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀪𑀺𑀚𑁆𑀚𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀪𑀺𑀚𑁆𑀚𑀢𑀺, 𑀦𑀸𑀯𑀸𑀧𑀺 𑀦𑀸𑀦𑀸𑀤𑀸𑀭𑀼𑀲𑀗𑁆𑀖𑀝𑀺𑀢𑀸 𑀊𑀫𑀺𑀯𑁂𑀕𑀲𑀫𑁆𑀧𑀳𑀸𑀭𑁂𑀦 𑀪𑀺𑀚𑁆𑀚𑀢𑀺, 𑀭𑀼𑀓𑁆𑀔𑁄𑀧𑀺 𑀫𑀥𑀼𑀓𑀧𑁆𑀧𑀲𑀫𑁆𑀧𑀦𑁆𑀦𑀨𑀮𑁄 𑀅𑀦𑀺𑀮𑀩𑀮𑀯𑁂𑀕𑀸𑀪𑀺𑀳𑀢𑁄 𑀪𑀺𑀚𑁆𑀚𑀢𑀺, 𑀲𑀼𑀯𑀡𑁆𑀡𑀫𑁆𑀧𑀺 𑀚𑀸𑀢𑀺𑀫𑀦𑁆𑀢𑀁 [𑀚𑀸𑀢𑀭𑀽𑀧𑀫𑁆𑀧𑀺 (𑀲𑀻.)] 𑀮𑁄𑀳𑁂𑀦 𑀪𑀺𑀚𑁆𑀚𑀢𑀺. 𑀅𑀧𑀺 𑀘, 𑀫𑀳𑀸𑀭𑀸𑀚, 𑀦𑁂𑀲𑁄 𑀅𑀥𑀺𑀧𑁆𑀧𑀸𑀬𑁄 𑀯𑀺𑀜𑁆𑀜𑀽𑀦𑀁, 𑀦𑁂𑀲𑀸 𑀩𑀼𑀤𑁆𑀥𑀸𑀦𑀁 𑀅𑀥𑀺𑀫𑀼𑀢𑁆𑀢𑀺, 𑀦𑁂𑀲𑁄 𑀧𑀡𑁆𑀟𑀺𑀢𑀸𑀦𑀁 𑀙𑀦𑁆𑀤𑁄 ‘𑀢𑀣𑀸𑀕𑀢𑁄 𑀪𑁂𑀚𑁆𑀚𑀧𑀭𑀺𑀲𑁄’𑀢𑀺. 𑀅𑀧𑀺 𑀘𑁂𑀢𑁆𑀣 𑀓𑀸𑀭𑀡𑀁 𑀅𑀢𑁆𑀣𑀺, 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀅𑀪𑁂𑀚𑁆𑀚𑀧𑀭𑀺𑀲𑁄’𑀢𑀺. 𑀓𑀢𑀫𑀁 𑀏𑀢𑁆𑀣 𑀓𑀸𑀭𑀡𑀁? 𑀢𑀣𑀸𑀕𑀢𑀲𑁆𑀲, 𑀫𑀳𑀸𑀭𑀸𑀚, 𑀓𑀢𑁂𑀦 𑀅𑀤𑀸𑀦𑁂𑀦 𑀯𑀸 𑀅𑀧𑁆𑀧𑀺𑀬𑀯𑀘𑀦𑁂𑀦 𑀯𑀸 𑀅𑀦𑀢𑁆𑀣𑀘𑀭𑀺𑀬𑀸𑀬 𑀯𑀸 𑀅𑀲𑀫𑀸𑀦𑀢𑁆𑀢𑀢𑀸𑀬 𑀯𑀸 𑀬𑀢𑁄 𑀓𑀼𑀢𑁄𑀘𑀺 𑀘𑀭𑀺𑀬𑀁 𑀘𑀭𑀦𑁆𑀢𑀲𑁆𑀲𑀧𑀺 𑀧𑀭𑀺𑀲𑀸 𑀪𑀺𑀦𑁆𑀦𑀸𑀢𑀺 𑀦 𑀲𑀼𑀢𑀧𑀼𑀩𑁆𑀩𑀁, 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀅𑀪𑁂𑀚𑁆𑀚𑀧𑀭𑀺𑀲𑁄’𑀢𑀺. 𑀢𑀬𑀸𑀧𑁂𑀢𑀁, 𑀫𑀳𑀸𑀭𑀸𑀚, 𑀜𑀸𑀢𑀩𑁆𑀩𑀁 ‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀦𑀯𑀗𑁆𑀕𑁂 𑀩𑀼𑀤𑁆𑀥𑀯𑀘𑀦𑁂 𑀲𑀼𑀢𑁆𑀢𑀸𑀕𑀢𑀁, 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀢𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀲𑀸 𑀪𑀺𑀦𑁆𑀦𑀸’𑀢𑀺? ‘‘𑀦𑀢𑁆𑀣𑀺 𑀪𑀦𑁆𑀢𑁂, 𑀦𑁄 𑀘𑁂𑀢𑀁 𑀮𑁄𑀓𑁂 𑀤𑀺𑀲𑁆𑀲𑀢𑀺 𑀦𑁄𑀧𑀺 𑀲𑀼𑀬𑁆𑀬𑀢𑀺. 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀪𑁂𑀚𑁆𑀚𑀧𑀭𑀺𑀲𑀧𑀜𑁆𑀳𑁄 𑀅𑀝𑁆𑀞𑀫𑁄.

𑀅𑀪𑁂𑀚𑁆𑀚𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀅𑀝𑁆𑀞 𑀧𑀜𑁆𑀳𑀸.

𑁩. 𑀧𑀡𑀸𑀫𑀺𑀢𑀯𑀕𑁆𑀕𑁄

𑁧. 𑀲𑁂𑀝𑁆𑀞𑀥𑀫𑁆𑀫𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘𑀸’𑀢𑀺. 𑀧𑀼𑀦 𑀘 ‘𑀉𑀧𑀸𑀲𑀓𑁄 𑀕𑀺𑀳𑀻 𑀲𑁄𑀢𑀸𑀧𑀦𑁆𑀦𑁄 𑀧𑀺𑀳𑀺𑀢𑀸𑀧𑀸𑀬𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀺 𑀧𑀘𑁆𑀘𑀼𑀝𑁆𑀞𑁂𑀢𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘𑀸’𑀢𑀺, 𑀢𑁂𑀦 𑀳𑀺 ‘𑀉𑀧𑀸𑀲𑀓𑁄 𑀕𑀺𑀳𑀻 𑀲𑁄𑀢𑀸𑀧𑀦𑁆𑀦𑁄 𑀧𑀺𑀳𑀺𑀢𑀸𑀧𑀸𑀬𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀺 𑀧𑀘𑁆𑀘𑀼𑀝𑁆𑀞𑁂𑀢𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 ‘𑀉𑀧𑀸𑀲𑀓𑁄 𑀕𑀺𑀳𑀻 𑀲𑁄𑀢𑀸𑀧𑀦𑁆𑀦𑁄 𑀧𑀺𑀳𑀺𑀢𑀸𑀧𑀸𑀬𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀺 𑀧𑀘𑁆𑀘𑀼𑀝𑁆𑀞𑁂𑀢𑀺’, 𑀢𑁂𑀦 𑀳𑀺 ‘𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘𑀸𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘𑀸’𑀢𑀺, ‘𑀉𑀧𑀸𑀲𑀓𑁄 𑀘 𑀕𑀺𑀳𑀻 𑀲𑁄𑀢𑀸𑀧𑀦𑁆𑀦𑁄 𑀧𑀺𑀳𑀺𑀢𑀸𑀧𑀸𑀬𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀺 𑀧𑀘𑁆𑀘𑀼𑀝𑁆𑀞𑁂𑀢𑀺’. 𑀢𑀢𑁆𑀣 𑀧𑀦 𑀓𑀸𑀭𑀡𑀁 𑀅𑀢𑁆𑀣𑀺. 𑀓𑀢𑀫𑀁 𑀢𑀁 𑀓𑀸𑀭𑀡𑀁?

‘‘𑀯𑀻𑀲𑀢𑀺 𑀔𑁄 𑀧𑀦𑀺𑀫𑁂, 𑀫𑀳𑀸𑀭𑀸𑀚, 𑀲𑀫𑀡𑀲𑁆𑀲 𑀲𑀫𑀡𑀓𑀭𑀡𑀸 𑀥𑀫𑁆𑀫𑀸 𑀤𑁆𑀯𑁂 𑀘 𑀮𑀺𑀗𑁆𑀕𑀸𑀦𑀺, 𑀬𑁂𑀳𑀺 𑀲𑀫𑀡𑁄 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀲𑀫𑀸𑀦𑀦𑀧𑀽𑀚𑀦𑀸𑀭𑀳𑁄 𑀳𑁄𑀢𑀺. 𑀓𑀢𑀫𑁂 𑀯𑀻𑀲𑀢𑀺 𑀲𑀫𑀡𑀲𑁆𑀲 𑀲𑀫𑀡𑀓𑀭𑀡𑀸 𑀥𑀫𑁆𑀫𑀸 𑀤𑁆𑀯𑁂 𑀘 𑀮𑀺𑀗𑁆𑀕𑀸𑀦𑀺? 𑀲𑁂𑀝𑁆𑀞𑁄 [𑀲𑁂𑀝𑁆𑀞𑀪𑀽𑀫𑀺𑀲𑀬𑁄 (𑀲𑀻. 𑀲𑁆𑀬𑀸.), 𑀲𑁂𑀝𑁆𑀞𑁄 𑀬𑀫𑁄 (𑀧𑀻.)] 𑀥𑀫𑁆𑀫𑀸𑀭𑀸𑀫𑁄, 𑀅𑀕𑁆𑀕𑁄 𑀦𑀺𑀬𑀫𑁄, 𑀘𑀸𑀭𑁄 𑀯𑀺𑀳𑀸𑀭𑁄 𑀲𑀁𑀬𑀫𑁄 𑀲𑀁𑀯𑀭𑁄 𑀔𑀦𑁆𑀢𑀺 𑀲𑁄𑀭𑀘𑁆𑀘𑀁 𑀏𑀓𑀢𑁆𑀢𑀘𑀭𑀺𑀬𑀸 𑀏𑀓𑀢𑁆𑀢𑀸𑀪𑀺𑀭𑀢𑀺 𑀧𑀝𑀺𑀲𑀮𑁆𑀮𑀸𑀦𑀁 𑀳𑀺𑀭𑀺𑀑𑀢𑁆𑀢𑀧𑁆𑀧𑀁 𑀯𑀻𑀭𑀺𑀬𑀁 𑀅𑀧𑁆𑀧𑀫𑀸𑀤𑁄 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 [𑀲𑀺𑀓𑁆𑀔𑀸𑀧𑀥𑀸𑀦𑀁 (𑀲𑀻. 𑀲𑁆𑀬𑀸.), 𑀲𑀼𑀓𑁆𑀓𑀸𑀯𑀤𑀸𑀦𑀁 (𑀓.)] 𑀉𑀤𑁆𑀤𑁂𑀲𑁄 𑀧𑀭𑀺𑀧𑀼𑀘𑁆𑀙𑀸 𑀲𑀻𑀮𑀸𑀤𑀺𑀅𑀪𑀺𑀭𑀢𑀺 𑀦𑀺𑀭𑀸𑀮𑀬𑀢𑀸 𑀲𑀺𑀓𑁆𑀔𑀸𑀧𑀤𑀧𑀸𑀭𑀺𑀧𑀽𑀭𑀺𑀢𑀸, 𑀓𑀸𑀲𑀸𑀯𑀥𑀸𑀭𑀡𑀁, 𑀪𑀡𑁆𑀟𑀼𑀪𑀸𑀯𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀯𑀻𑀲𑀢𑀺 𑀲𑀫𑀡𑀲𑁆𑀲 𑀲𑀫𑀡𑀓𑀭𑀡𑀸 𑀥𑀫𑁆𑀫𑀸 𑀤𑁆𑀯𑁂 𑀘 𑀮𑀺𑀗𑁆𑀕𑀸𑀦𑀺. 𑀏𑀢𑁂 𑀕𑀼𑀡𑁂 𑀪𑀺𑀓𑁆𑀔𑀼 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀲𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀽𑀦𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀲𑁂𑀓𑁆𑀔𑀪𑀽𑀫𑀺𑀁 𑀅𑀭𑀳𑀦𑁆𑀢𑀪𑀽𑀫𑀺𑀁 𑀑𑀓𑁆𑀓𑀫𑀢𑀺, 𑀲𑁂𑀝𑁆𑀞𑀁 𑀪𑀽𑀫𑀦𑁆𑀢𑀭𑀁 𑀑𑀓𑁆𑀓𑀫𑀢𑀺, 𑀅𑀭𑀳𑀢𑁆𑀢𑀸𑀲𑀦𑁆𑀦𑀕𑀢𑁄𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀔𑀻𑀡𑀸𑀲𑀯𑁂𑀳𑀺 𑀲𑁄 𑀲𑀸𑀫𑀜𑁆𑀜𑀁 𑀉𑀧𑀕𑀢𑁄, 𑀦𑀢𑁆𑀣𑀺 𑀫𑁂 𑀲𑁄 𑀲𑀫𑀬𑁄’𑀢𑀺 [𑀢𑀁 𑀲𑀸𑀫𑀜𑁆𑀜’’𑀦𑁆𑀢𑀺 (?)] 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀅𑀕𑁆𑀕𑀧𑀭𑀺𑀲𑀁 𑀲𑁄 𑀉𑀧𑀕𑀢𑁄, 𑀦𑀸𑀳𑀁 𑀢𑀁 𑀞𑀸𑀦𑀁 𑀉𑀧𑀕𑀢𑁄’𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀮𑀪𑀢𑀺 𑀲𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀲𑁄𑀢𑀼𑀁, 𑀦𑀸𑀳𑀁 𑀢𑀁 𑀮𑀪𑀸𑀫𑀺 𑀲𑁄𑀢𑀼’𑀦𑁆𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀲𑁄 𑀅𑀜𑁆𑀜𑁂 𑀧𑀩𑁆𑀩𑀸𑀚𑁂𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑀺 𑀚𑀺𑀦𑀲𑀸𑀲𑀦𑀁 𑀯𑀟𑁆𑀠𑁂𑀢𑀺, 𑀅𑀳𑀫𑁂𑀢𑀁 𑀦 𑀮𑀪𑀸𑀫𑀺 𑀓𑀸𑀢𑀼’𑀦𑁆𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀅𑀧𑁆𑀧𑀫𑀸𑀡𑁂𑀲𑀼 𑀲𑁄 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀢𑁆𑀢𑀓𑀸𑀭𑀻, 𑀦𑀸𑀳𑀁 𑀢𑁂𑀲𑀼 𑀯𑀢𑁆𑀢𑀸𑀫𑀻’𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀉𑀧𑀕𑀢𑁄 𑀲𑁄 𑀲𑀫𑀡𑀮𑀺𑀗𑁆𑀕𑀁, 𑀩𑀼𑀤𑁆𑀥𑀸𑀥𑀺𑀧𑁆𑀧𑀸𑀬𑁂 𑀞𑀺𑀢𑁄, 𑀢𑁂𑀦𑀸𑀳𑀁 𑀮𑀺𑀗𑁆𑀕𑁂𑀦 𑀤𑀽𑀭𑀫𑀧𑀕𑀢𑁄’𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘‘𑀧𑀭𑀽𑀴𑁆𑀳𑀓𑀘𑁆𑀙𑀮𑁄𑀫𑁄 𑀲𑁄 𑀅𑀦𑀜𑁆𑀚𑀺𑀢𑀅𑀫𑀡𑁆𑀟𑀺𑀢𑁄 𑀅𑀦𑀼𑀮𑀺𑀢𑁆𑀢𑀲𑀻𑀮𑀕𑀦𑁆𑀥𑁄, 𑀅𑀳𑀁 𑀧𑀦 𑀫𑀡𑁆𑀟𑀦𑀯𑀺𑀪𑀽𑀲𑀦𑀸𑀪𑀺𑀭𑀢𑁄’𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, ‘𑀬𑁂 𑀢𑁂 𑀯𑀻𑀲𑀢𑀺 𑀲𑀫𑀡𑀓𑀭𑀡𑀸 𑀥𑀫𑁆𑀫𑀸 𑀤𑁆𑀯𑁂 𑀘 𑀮𑀺𑀗𑁆𑀕𑀸𑀦𑀺, 𑀲𑀩𑁆𑀩𑁂𑀧𑁂𑀢𑁂 𑀥𑀫𑁆𑀫𑀸 𑀪𑀺𑀓𑁆𑀔𑀼𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀲𑁄 𑀬𑁂𑀯 𑀢𑁂 𑀥𑀫𑁆𑀫𑁂 𑀥𑀸𑀭𑁂𑀢𑀺, 𑀅𑀜𑁆𑀜𑁂𑀧𑀺 𑀢𑀢𑁆𑀣 𑀲𑀺𑀓𑁆𑀔𑀸𑀧𑁂𑀢𑀺, 𑀲𑁄 𑀫𑁂 𑀆𑀕𑀫𑁄 𑀲𑀺𑀓𑁆𑀔𑀸𑀧𑀦𑀜𑁆𑀘 𑀦𑀢𑁆𑀣𑀻’𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀸𑀚𑀓𑀼𑀫𑀸𑀭𑁄 𑀧𑀼𑀭𑁄𑀳𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀚𑁆𑀚𑀁 𑀅𑀥𑀻𑀬𑀢𑀺, 𑀔𑀢𑁆𑀢𑀺𑀬𑀥𑀫𑁆𑀫𑀁 𑀲𑀺𑀓𑁆𑀔𑀢𑀺, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀪𑀺𑀲𑀺𑀢𑁆𑀢𑁄 𑀆𑀘𑀭𑀺𑀬𑀁 𑀅𑀪𑀺𑀯𑀸𑀤𑁂𑀢𑀺 𑀧𑀘𑁆𑀘𑀼𑀝𑁆𑀞𑁂𑀢𑀺 ‘𑀲𑀺𑀓𑁆𑀔𑀸𑀧𑀓𑁄 𑀫𑁂 𑀅𑀬’𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, ‘𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀧𑀓𑁄 𑀯𑀁𑀲𑀥𑀭𑁄’𑀢𑀺 𑀅𑀭𑀳𑀢𑀺 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼𑀁 𑀧𑀼𑀣𑀼𑀚𑁆𑀚𑀦𑀁 𑀅𑀪𑀺𑀯𑀸𑀤𑁂𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀢𑀼𑀁.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀚𑀸𑀦𑀸𑀳𑀺 𑀪𑀺𑀓𑁆𑀔𑀼𑀪𑀽𑀫𑀺𑀬𑀸 𑀫𑀳𑀦𑁆𑀢𑀢𑀁 𑀅𑀲𑀫𑀯𑀺𑀧𑀼𑀮𑀪𑀸𑀯𑀁. 𑀬𑀤𑀺, 𑀫𑀳𑀸𑀭𑀸𑀚, 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀤𑁆𑀯𑁂𑀯 𑀢𑀲𑁆𑀲 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬 𑀯𑀸, 𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀉𑀧𑀕𑀘𑁆𑀙𑁂𑀬𑁆𑀬. 𑀅𑀘𑀮𑀸 𑀳𑀺 𑀲𑀸, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑁆𑀚𑀸, 𑀫𑀳𑀢𑀻 𑀅𑀘𑁆𑀘𑀼𑀕𑁆𑀕𑀢𑀸, 𑀬𑀤𑀺𑀤𑀁 𑀪𑀺𑀓𑁆𑀔𑀼𑀪𑀽𑀫𑀻’’𑀢𑀺. ‘‘𑀜𑀸𑀡𑀕𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀲𑀼𑀦𑀺𑀩𑁆𑀩𑁂𑀞𑀺𑀢𑁄 𑀩𑀮𑀯𑀢𑀸 𑀅𑀢𑀺𑀩𑀼𑀤𑁆𑀥𑀺𑀦𑀸 𑀢𑀬𑀸, 𑀦 𑀬𑀺𑀫𑀁 𑀧𑀜𑁆𑀳𑀁 𑀲𑀫𑀢𑁆𑀣𑁄 𑀅𑀜𑁆𑀜𑁄 𑀏𑀯𑀁 𑀯𑀺𑀦𑀺𑀯𑁂𑀞𑁂𑀢𑀼𑀁 𑀅𑀜𑁆𑀜𑀢𑁆𑀭 𑀢𑀯𑀸𑀤𑀺𑀲𑁂𑀦 𑀩𑀼𑀤𑁆𑀥𑀺𑀫𑀢𑀸’’𑀢𑀺.

𑀲𑁂𑀝𑁆𑀞𑀥𑀫𑁆𑀫𑀧𑀜𑁆𑀳𑁄 𑀧𑀞𑀫𑁄.

𑁨. 𑀲𑀩𑁆𑀩𑀲𑀢𑁆𑀢𑀳𑀺𑀢𑀨𑀭𑀡𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀢𑀣𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀳𑀺𑀢𑀫𑀧𑀦𑁂𑀢𑁆𑀯𑀸 𑀳𑀺𑀢𑀫𑀼𑀧𑀤𑀳𑀢𑀻’𑀢𑀺. 𑀧𑀼𑀦 𑀘 𑀪𑀡𑀣 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑁂 𑀥𑀫𑁆𑀫𑀧𑀭𑀺𑀬𑀸𑀬𑁂 𑀪𑀜𑁆𑀜𑀫𑀸𑀦𑁂 ‘𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢’𑀦𑁆𑀢𑀺. 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀁, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀦𑁆𑀢𑁂𑀦 𑀢𑀣𑀸𑀕𑀢𑁂𑀦 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀳𑀺𑀢𑀫𑀧𑀦𑁂𑀢𑁆𑀯𑀸 𑀅𑀳𑀺𑀢𑀫𑀼𑀧𑀤𑀳𑀺𑀢𑀁. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀳𑀺𑀢𑀫𑀧𑀦𑁂𑀢𑁆𑀯𑀸 𑀳𑀺𑀢𑀫𑀼𑀧𑀤𑀳𑀢𑀺, 𑀢𑁂𑀦 𑀳𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑁂 𑀥𑀫𑁆𑀫𑀧𑀭𑀺𑀬𑀸𑀬𑁂 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑁂 𑀥𑀫𑁆𑀫𑀧𑀭𑀺𑀬𑀸𑀬𑁂 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢𑀁, 𑀢𑁂𑀦 𑀳𑀺 𑀢𑀣𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀳𑀺𑀢𑀫𑀧𑀦𑁂𑀢𑁆𑀯𑀸 𑀳𑀺𑀢𑀫𑀼𑀧𑀤𑀳𑀢𑀻𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀢𑀣𑀸𑀕𑀢𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀳𑀺𑀢𑀫𑀧𑀦𑁂𑀢𑁆𑀯𑀸 𑀳𑀺𑀢𑀫𑀼𑀧𑀤𑀳𑀢𑀺, 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑁂 𑀥𑀫𑁆𑀫𑀧𑀭𑀺𑀬𑀸𑀬𑁂 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢𑀁, 𑀢𑀜𑁆𑀘 𑀧𑀦 𑀦 𑀢𑀣𑀸𑀕𑀢𑀲𑁆𑀲 𑀓𑀢𑁂𑀦, 𑀢𑁂𑀲𑀁 𑀬𑁂𑀯 𑀅𑀢𑁆𑀢𑀦𑁄 𑀓𑀢𑁂𑀦𑀸’’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀦 𑀪𑀸𑀲𑁂𑀬𑁆𑀬, 𑀅𑀧𑀺 𑀦𑀼 𑀢𑁂𑀲𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑁂𑀬𑁆𑀬𑀸𑀢𑀺, 𑀦 𑀳𑀺, 𑀫𑀳𑀸𑀭𑀸𑀚, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸𑀦𑀁 𑀢𑁂𑀲𑀁 𑀪𑀕𑀯𑀢𑁄 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀼𑀢𑁆𑀯𑀸 𑀧𑀭𑀺𑀴𑀸𑀳𑁄 𑀓𑀸𑀬𑁂 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀢𑁂𑀲𑀁 𑀧𑀭𑀺𑀴𑀸𑀳𑁂𑀦 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑀲𑁆𑀲𑁂𑀯 𑀓𑀢𑁂𑀦 𑀢𑁂𑀲𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢𑀁, 𑀢𑀣𑀸𑀕𑀢𑁄 𑀬𑁂𑀯 𑀢𑀢𑁆𑀣 𑀅𑀥𑀺𑀓𑀸𑀭𑁄 𑀢𑁂𑀲𑀁 𑀦𑀸𑀲𑀦𑀸𑀬, 𑀬𑀣𑀸 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀳𑀺 𑀯𑀫𑁆𑀫𑀺𑀓𑀁 𑀧𑀯𑀺𑀲𑁂𑀬𑁆𑀬, 𑀅𑀣𑀜𑁆𑀜𑀢𑀭𑁄 𑀧𑀁𑀲𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀫𑁆𑀫𑀺𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀁𑀲𑀼𑀁 𑀳𑀭𑁂𑀬𑁆𑀬, 𑀢𑀲𑁆𑀲 𑀧𑀁𑀲𑀼𑀳𑀭𑀡𑁂𑀦 𑀯𑀫𑁆𑀫𑀺𑀓𑀲𑁆𑀲 𑀲𑀼𑀲𑀺𑀭𑀁 𑀧𑀺𑀤𑀳𑁂𑀬𑁆𑀬, 𑀅𑀣 𑀢𑀢𑁆𑀣𑁂𑀯 𑀲𑁄 𑀅𑀲𑁆𑀲𑀸𑀲𑀁 𑀅𑀮𑀪𑀫𑀸𑀦𑁄 𑀫𑀭𑁂𑀬𑁆𑀬, 𑀦𑀦𑀼 𑀲𑁄, 𑀪𑀦𑁆𑀢𑁂, 𑀅𑀳𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀢𑁂𑀦 𑀫𑀭𑀡𑀧𑁆𑀧𑀢𑁆𑀢𑁄’’𑀢𑀺. ‘‘𑀆𑀫 𑀫𑀳𑀸𑀭𑀸𑀚𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀬𑁂𑀯 𑀢𑀢𑁆𑀣 𑀅𑀥𑀺𑀓𑀸𑀭𑁄 𑀢𑁂𑀲𑀁 𑀦𑀸𑀲𑀦𑀸𑀬𑀸’’𑀢𑀺.

‘‘𑀢𑀣𑀸𑀕𑀢𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁄 𑀅𑀦𑀼𑀦𑀬𑀧𑁆𑀧𑀝𑀺𑀖𑀁 𑀦 𑀓𑀭𑁄𑀢𑀺, 𑀅𑀦𑀼𑀦𑀬𑀧𑁆𑀧𑀝𑀺𑀖𑀯𑀺𑀧𑁆𑀧𑀫𑀼𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀏𑀯𑀁 𑀥𑀫𑁆𑀫𑁂 𑀤𑁂𑀲𑀻𑀬𑀫𑀸𑀦𑁂 𑀬𑁂 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀩𑀼𑀚𑁆𑀛𑀦𑁆𑀢𑀺. 𑀬𑁂 𑀧𑀦 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀧𑀢𑀦𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀁 𑀯𑀸 𑀚𑀫𑁆𑀩𑀼𑀁 𑀯𑀸 𑀫𑀥𑀼𑀓𑀁 𑀯𑀸 𑀘𑀸𑀮𑀬𑀫𑀸𑀦𑀲𑁆𑀲 𑀬𑀸𑀦𑀺 𑀢𑀢𑁆𑀣 𑀨𑀮𑀸𑀦𑀺 𑀲𑀸𑀭𑀸𑀦𑀺 𑀤𑀴𑁆𑀳𑀩𑀦𑁆𑀥𑀦𑀸𑀦𑀺, 𑀢𑀸𑀦𑀺 𑀢𑀢𑁆𑀣𑁂𑀯 𑀅𑀘𑁆𑀘𑀼𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀬𑀸𑀦𑀺 𑀢𑀢𑁆𑀣 𑀨𑀮𑀸𑀦𑀺 𑀧𑀽𑀢𑀺𑀯𑀡𑁆𑀝𑀫𑀽𑀮𑀸𑀦𑀺 𑀤𑀼𑀩𑁆𑀩𑀮𑀩𑀦𑁆𑀥𑀦𑀸𑀦𑀺, 𑀢𑀸𑀦𑀺 𑀧𑀢𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁄 𑀅𑀦𑀼𑀦𑀬𑀧𑁆𑀧𑀝𑀺𑀖𑀁 𑀦 𑀓𑀭𑁄𑀢𑀺, 𑀅𑀦𑀼𑀦𑀬𑀧𑁆𑀧𑀝𑀺𑀖𑀯𑀺𑀧𑁆𑀧𑀫𑀼𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀏𑀯𑀁 𑀥𑀫𑁆𑀫𑁂 𑀤𑁂𑀲𑀻𑀬𑀫𑀸𑀦𑁂 𑀬𑁂 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀩𑀼𑀚𑁆𑀛𑀦𑁆𑀢𑀺. 𑀬𑁂 𑀧𑀦 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀧𑀢𑀦𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀥𑀜𑁆𑀜𑀁 𑀭𑁄𑀧𑁂𑀢𑀼𑀓𑀸𑀫𑁄 𑀔𑁂𑀢𑁆𑀢𑀁 𑀓𑀲𑀢𑀺, 𑀢𑀲𑁆𑀲 𑀓𑀲𑀦𑁆𑀢𑀲𑁆𑀲 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀺 𑀢𑀺𑀡𑀸𑀦𑀺 𑀫𑀭𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀧𑀭𑀺𑀧𑀓𑁆𑀓𑀫𑀸𑀦𑀲𑁂 𑀲𑀢𑁆𑀢𑁂 𑀩𑁄𑀥𑁂𑀦𑁆𑀢𑁄 [𑀩𑁄𑀥𑁂𑀢𑀼𑀁 (𑀲𑀻.)] 𑀅𑀦𑀼𑀦𑀬𑀧𑁆𑀧𑀝𑀺𑀖𑀯𑀺𑀧𑁆𑀧𑀫𑀼𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀏𑀯𑀁 𑀥𑀫𑁆𑀫𑁂 𑀤𑁂𑀲𑀻𑀬𑀫𑀸𑀦𑁂 𑀬𑁂 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀩𑀼𑀚𑁆𑀛𑀦𑁆𑀢𑀺. 𑀬𑁂 𑀧𑀦 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀢𑀺𑀡𑀸𑀦𑀺 𑀯𑀺𑀬 𑀫𑀭𑀦𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀭𑀲𑀳𑁂𑀢𑀼 𑀬𑀦𑁆𑀢𑁂𑀦 𑀉𑀘𑁆𑀙𑀼𑀁 𑀧𑀻𑀴𑀬𑀦𑁆𑀢𑀺, 𑀢𑁂𑀲𑀁 𑀉𑀘𑁆𑀙𑀼𑀁 𑀧𑀻𑀴𑀬𑀫𑀸𑀦𑀸𑀦𑀁 𑀬𑁂 𑀢𑀢𑁆𑀣 𑀬𑀦𑁆𑀢𑀫𑀼𑀔𑀕𑀢𑀸 𑀓𑀺𑀫𑀬𑁄, 𑀢𑁂 𑀧𑀻𑀴𑀺𑀬𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀧𑀭𑀺𑀧𑀓𑁆𑀓𑀫𑀸𑀦𑀲𑁂 𑀲𑀢𑁆𑀢𑁂 𑀩𑁄𑀥𑁂𑀦𑁆𑀢𑁄 𑀥𑀫𑁆𑀫𑀬𑀦𑁆𑀢𑀫𑀪𑀺𑀧𑀻𑀴𑀬𑀢𑀺 [𑀥𑀫𑁆𑀫𑀬𑀦𑁆𑀢𑀫𑀢𑀺𑀧𑀻𑀴𑀬𑀢𑀺 (𑀓.)], 𑀬𑁂 𑀢𑀢𑁆𑀣 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀓𑀺𑀫𑀻 𑀯𑀺𑀬 𑀫𑀭𑀦𑁆𑀢𑀻’’𑀢𑀺.

‘‘𑀦𑀦𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁂 𑀪𑀺𑀓𑁆𑀔𑀽 𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀧𑀢𑀺𑀢𑀸’’𑀢𑀺? ‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀘𑁆𑀙𑀓𑁄 𑀭𑀼𑀓𑁆𑀔𑀁 𑀢𑀘𑁆𑀙𑀦𑁆𑀢𑁄 [𑀭𑀓𑁆𑀔𑀦𑁆𑀢𑁄 (𑀲𑀻. 𑀧𑀻.] 𑀉𑀚𑀼𑀓𑀁 𑀧𑀭𑀺𑀲𑀼𑀤𑁆𑀥𑀁 𑀓𑀭𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀯𑀚𑁆𑀚𑀦𑀻𑀬𑀁 𑀅𑀧𑀦𑁂𑀢𑁆𑀯𑀸 𑀢𑀘𑁆𑀙𑀓𑁄 𑀭𑀼𑀓𑁆𑀔𑀁 𑀉𑀚𑀼𑀓𑀁 𑀧𑀭𑀺𑀲𑀼𑀤𑁆𑀥𑀁 𑀓𑀭𑁄𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀧𑀭𑀺𑀲𑀁 𑀭𑀓𑁆𑀔𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀩𑁄𑀥𑀦𑁂𑀬𑁆𑀬𑁂 [𑀅𑀩𑁄𑀥𑀦𑀻𑀬𑁂 (𑀲𑁆𑀬𑀸.)] 𑀲𑀢𑁆𑀢𑁂 𑀩𑁄𑀥𑁂𑀢𑀼𑀁, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂 𑀧𑀦 𑀲𑀢𑁆𑀢𑁂 𑀅𑀧𑀦𑁂𑀢𑁆𑀯𑀸 𑀩𑁄𑀥𑀦𑁂𑀬𑁆𑀬𑁂 𑀲𑀢𑁆𑀢𑁂 𑀩𑁄𑀥𑁂𑀢𑀺, 𑀅𑀢𑁆𑀢𑀓𑀢𑁂𑀦 𑀧𑀦 𑀢𑁂, 𑀫𑀳𑀸𑀭𑀸𑀚, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸 𑀧𑀢𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀤𑀮𑀻 𑀯𑁂𑀴𑀼 𑀅𑀲𑁆𑀲𑀢𑀭𑀻 𑀅𑀢𑁆𑀢𑀚𑁂𑀦 [𑀅𑀢𑁆𑀢𑀚𑁂𑀦 𑀨𑀮𑁂𑀦 (𑀲𑀻.)] 𑀳𑀜𑁆𑀜𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀅𑀢𑁆𑀢𑀓𑀢𑁂𑀦 𑀳𑀜𑁆𑀜𑀦𑁆𑀢𑀺 𑀧𑀢𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀘𑁄𑀭𑀸 𑀅𑀢𑁆𑀢𑀓𑀢𑁂𑀦 𑀘𑀓𑁆𑀔𑀼𑀧𑁆𑀧𑀸𑀝𑀦𑀁 𑀲𑀽𑀮𑀸𑀭𑁄𑀧𑀦𑀁 𑀲𑀻𑀲𑀘𑁆𑀙𑁂𑀤𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸, 𑀢𑁂 𑀅𑀢𑁆𑀢𑀓𑀢𑁂𑀦 𑀳𑀜𑁆𑀜𑀦𑁆𑀢𑀺 𑀧𑀢𑀦𑁆𑀢𑀺 [𑀚𑀺𑀦𑀲𑀸𑀲𑀦𑀸 𑀧𑀢𑀦𑁆𑀢𑀺 (𑀲𑀻. 𑀧𑀻.)]. 𑀬𑁂𑀲𑀁, 𑀫𑀳𑀸𑀭𑀸𑀚, 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀢𑀁, 𑀢𑁂𑀲𑀁 𑀢𑀁 𑀦𑁂𑀯 𑀪𑀕𑀯𑀢𑁄 𑀓𑀢𑁂𑀦, 𑀦 𑀧𑀭𑁂𑀲𑀁 𑀓𑀢𑁂𑀦, 𑀅𑀣 𑀔𑁄 𑀅𑀢𑁆𑀢𑀦𑁄 𑀬𑁂𑀯 𑀓𑀢𑁂𑀦.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀩𑁆𑀩𑀚𑀦𑀲𑁆𑀲 𑀅𑀫𑀢𑀁 𑀤𑀤𑁂𑀬𑁆𑀬, 𑀢𑁂 𑀢𑀁 𑀅𑀫𑀢𑀁 𑀅𑀲𑀺𑀢𑁆𑀯𑀸 𑀅𑀭𑁄𑀕𑀸 𑀤𑀻𑀖𑀸𑀬𑀼𑀓𑀸 𑀲𑀩𑁆𑀩𑀻𑀢𑀺𑀢𑁄 [𑀲𑀩𑁆𑀩𑀻𑀢𑀺𑀬𑀸 (𑀲𑀻.)] 𑀧𑀭𑀺𑀫𑀼𑀘𑁆𑀘𑁂𑀬𑁆𑀬𑀼𑀁, 𑀅𑀣𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀤𑀼𑀭𑀼𑀧𑀘𑀸𑀭𑁂𑀦 𑀢𑀁 𑀅𑀲𑀺𑀢𑁆𑀯𑀸 𑀫𑀭𑀡𑀁 𑀧𑀸𑀧𑀼𑀡𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀅𑀫𑀢𑀤𑀸𑀬𑀓𑁄 𑀧𑀼𑀭𑀺𑀲𑁄 𑀢𑀢𑁄𑀦𑀺𑀤𑀸𑀦𑀁 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀫𑀢𑀁 𑀥𑀫𑁆𑀫𑀤𑀸𑀦𑀁 𑀤𑁂𑀢𑀺, 𑀬𑁂 𑀢𑁂 𑀲𑀢𑁆𑀢𑀸 𑀪𑀩𑁆𑀩𑀸, 𑀢𑁂 𑀥𑀫𑁆𑀫𑀸𑀫𑀢𑁂𑀦 𑀩𑀼𑀚𑁆𑀛𑀦𑁆𑀢𑀺. 𑀬𑁂 𑀧𑀦 𑀢𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸, 𑀢𑁂 𑀥𑀫𑁆𑀫𑀸𑀫𑀢𑁂𑀦 𑀳𑀜𑁆𑀜𑀦𑁆𑀢𑀺 𑀧𑀢𑀦𑁆𑀢𑀺. 𑀪𑁄𑀚𑀦𑀁, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀭𑀓𑁆𑀔𑀢𑀺, 𑀢𑀫𑁂𑀓𑀘𑁆𑀘𑁂 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀲𑀽𑀘𑀺𑀓𑀸𑀬 𑀫𑀭𑀦𑁆𑀢𑀺, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀪𑁄𑀚𑀦𑀤𑀸𑀬𑀓𑁄 𑀧𑀼𑀭𑀺𑀲𑁄 𑀢𑀢𑁄𑀦𑀺𑀤𑀸𑀦𑀁 𑀓𑀺𑀜𑁆𑀘𑀺 𑀅𑀧𑀼𑀜𑁆𑀜𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀫𑀢𑀁 𑀥𑀫𑁆𑀫𑀤𑀸𑀦𑀁 𑀤𑁂𑀢𑀺, 𑀬𑁂 𑀢𑁂 𑀲𑀢𑁆𑀢𑀸 𑀪𑀩𑁆𑀩𑀸, 𑀢𑁂 𑀥𑀫𑁆𑀫𑀸𑀫𑀢𑁂𑀦 𑀩𑀼𑀚𑁆𑀛𑀦𑁆𑀢𑀺. 𑀬𑁂 𑀧𑀦 𑀢𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸, 𑀢𑁂 𑀥𑀫𑁆𑀫𑀸𑀫𑀢𑁂𑀦 𑀳𑀜𑁆𑀜𑀦𑁆𑀢𑀺 𑀧𑀢𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀲𑀩𑁆𑀩𑀲𑀢𑁆𑀢𑀳𑀺𑀢𑀨𑀭𑀡𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀯𑀢𑁆𑀣𑀕𑀼𑀬𑁆𑀳𑀦𑀺𑀤𑀲𑁆𑀲𑀦𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀢𑀣𑀸𑀕𑀢𑁂𑀦 𑁋

‘‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼 [𑀥. 𑀧. 𑁩𑁬𑁧], 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄’𑀢𑀺.

‘‘𑀧𑀼𑀦 𑀘 𑀢𑀣𑀸𑀕𑀢𑁄 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀭𑀢𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁 𑀤𑀲𑁆𑀲𑁂𑀲𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀽’𑀢𑀺, 𑀢𑁂𑀦 𑀳𑀺 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁 𑀤𑀲𑁆𑀲𑁂𑀲𑀻𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀳𑀺 ‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀽’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀽’𑀢𑀺, 𑀲𑁂𑀮𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁 𑀤𑀲𑁆𑀲𑀺𑀢𑀁. 𑀬𑀲𑁆𑀲 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁂 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀩𑁄𑀥𑀦𑀢𑁆𑀣𑀸𑀬 𑀪𑀕𑀯𑀸 𑀇𑀤𑁆𑀥𑀺𑀬𑀸 𑀢𑀧𑁆𑀧𑀝𑀺𑀪𑀸𑀕𑀁 𑀓𑀸𑀬𑀁 𑀤𑀲𑁆𑀲𑁂𑀢𑀺, 𑀲𑁄 𑀬𑁂𑀯 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀢𑀻’’𑀢𑀺.

‘‘𑀓𑁄 𑀧𑀦𑁂𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀤𑁆𑀤𑀳𑀺𑀲𑁆𑀲𑀢𑀺, 𑀬𑀁 𑀧𑀭𑀺𑀲𑀕𑀢𑁄 𑀏𑀓𑁄 𑀬𑁂𑀯 𑀢𑀁 𑀕𑀼𑀬𑁆𑀳𑀁 𑀧𑀲𑁆𑀲𑀢𑀺, 𑀅𑀯𑀲𑁂𑀲𑀸 𑀢𑀢𑁆𑀣𑁂𑀯 𑀯𑀲𑀦𑁆𑀢𑀸 𑀦 𑀧𑀲𑁆𑀲𑀦𑁆𑀢𑀻𑀢𑀺. 𑀇𑀗𑁆𑀖 𑀫𑁂 𑀢𑁆𑀯𑀁 𑀢𑀢𑁆𑀣 𑀓𑀸𑀭𑀡𑀁 𑀉𑀧𑀤𑀺𑀲, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺. ‘‘𑀤𑀺𑀝𑁆𑀞𑀧𑀼𑀩𑁆𑀩𑁄 𑀧𑀦 𑀢𑀬𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀩𑁆𑀬𑀸𑀥𑀺𑀢𑁄 𑀧𑀼𑀭𑀺𑀲𑁄 𑀧𑀭𑀺𑀓𑀺𑀡𑁆𑀡𑁄 𑀜𑀸𑀢𑀺𑀫𑀺𑀢𑁆𑀢𑁂𑀳𑀻’’𑀢𑀺. ‘‘𑀆𑀫 𑀪𑀦𑁆𑀢𑁂’’𑀢𑀺. ‘‘𑀅𑀧𑀺 𑀦𑀼 𑀔𑁄 𑀲𑀸, 𑀫𑀳𑀸𑀭𑀸𑀚, 𑀧𑀭𑀺𑀲𑀸 𑀧𑀲𑁆𑀲𑀢𑁂𑀢𑀁 𑀯𑁂𑀤𑀦𑀁, 𑀬𑀸𑀬 𑀲𑁄 𑀧𑀼𑀭𑀺𑀲𑁄 𑀯𑁂𑀤𑀦𑀸𑀬 𑀯𑁂𑀤𑀬𑀢𑀻’’𑀢𑀺. ‘‘𑀦 𑀳𑀺 𑀪𑀦𑁆𑀢𑁂, 𑀅𑀢𑁆𑀢𑀦𑀸 𑀬𑁂𑀯 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀯𑁂𑀤𑀬𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀲𑁆𑀲𑁂𑀯 𑀢𑀣𑀸𑀕𑀢𑁂 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲𑁂𑀯 𑀢𑀣𑀸𑀕𑀢𑁄 𑀩𑁄𑀥𑀦𑀢𑁆𑀣𑀸𑀬 𑀇𑀤𑁆𑀥𑀺𑀬𑀸 𑀢𑀧𑁆𑀧𑀝𑀺𑀪𑀸𑀕𑀁 𑀓𑀸𑀬𑀁 𑀤𑀲𑁆𑀲𑁂𑀢𑀺, 𑀲𑁄 𑀬𑁂𑀯 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑀜𑁆𑀘𑀺𑀤𑁂𑀯 𑀧𑀼𑀭𑀺𑀲𑀁 𑀪𑀽𑀢𑁄 𑀆𑀯𑀺𑀲𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑀸, 𑀫𑀳𑀸𑀭𑀸𑀚, 𑀧𑀭𑀺𑀲𑀸 𑀧𑀲𑁆𑀲𑀢𑀺 𑀢𑀁 𑀪𑀽𑀢𑀸𑀕𑀫𑀦’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑁄 𑀬𑁂𑀯 𑀆𑀢𑀼𑀭𑁄 𑀢𑀲𑁆𑀲 𑀪𑀽𑀢𑀲𑁆𑀲 𑀆𑀕𑀫𑀦𑀁 𑀧𑀲𑁆𑀲𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀲𑁆𑀲𑁂𑀯 𑀢𑀣𑀸𑀕𑀢𑁂 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲𑁂𑀯 𑀢𑀣𑀸𑀕𑀢𑁄 𑀩𑁄𑀥𑀦𑀢𑁆𑀣𑀸𑀬 𑀇𑀤𑁆𑀥𑀺𑀬𑀸 𑀢𑀧𑁆𑀧𑀝𑀺𑀪𑀸𑀕𑀁 𑀓𑀸𑀬𑀁 𑀤𑀲𑁆𑀲𑁂𑀢𑀺, 𑀲𑁄 𑀬𑁂𑀯 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀢𑀻’’𑀢𑀺.

‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀓𑀢𑀁, 𑀬𑀁 𑀏𑀓𑀲𑁆𑀲𑀧𑀺 𑀅𑀤𑀲𑁆𑀲𑀦𑀻𑀬𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁂𑀦𑀸’’𑀢𑀺. ‘‘𑀦, 𑀫𑀳𑀸𑀭𑀸𑀚, 𑀪𑀕𑀯𑀸 𑀕𑀼𑀬𑁆𑀳𑀁 𑀤𑀲𑁆𑀲𑁂𑀲𑀺, 𑀇𑀤𑁆𑀥𑀺𑀬𑀸 𑀧𑀦 𑀙𑀸𑀬𑀁 𑀤𑀲𑁆𑀲𑁂𑀲𑀻’’𑀢𑀺. ‘‘𑀙𑀸𑀬𑀸𑀬𑀧𑀺, 𑀪𑀦𑁆𑀢𑁂, 𑀤𑀺𑀝𑁆𑀞𑀸𑀬 𑀤𑀺𑀝𑁆𑀞𑀁 𑀬𑁂𑀯 𑀳𑁄𑀢𑀺 𑀕𑀼𑀬𑁆𑀳𑀁, 𑀬𑀁 𑀤𑀺𑀲𑁆𑀯𑀸 𑀦𑀺𑀝𑁆𑀞𑀁 𑀕𑀢𑁄’’𑀢𑀺. ‘‘𑀤𑀼𑀓𑁆𑀓𑀭𑀜𑁆𑀘𑀸𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀓𑀭𑁄𑀢𑀺 𑀩𑁄𑀥𑀦𑁂𑀬𑁆𑀬𑁂 𑀲𑀢𑁆𑀢𑁂 𑀩𑁄𑀥𑁂𑀢𑀼𑀁. 𑀬𑀤𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀓𑀺𑀭𑀺𑀬𑀁 𑀳𑀸𑀧𑁂𑀬𑁆𑀬, 𑀩𑁄𑀥𑀦𑁂𑀬𑁆𑀬𑀸 𑀲𑀢𑁆𑀢𑀸 𑀦 𑀩𑀼𑀚𑁆𑀛𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀜𑁆𑀜𑀽 𑀢𑀣𑀸𑀕𑀢𑁄 𑀩𑁄𑀥𑀦𑁂𑀬𑁆𑀬𑁂 𑀲𑀢𑁆𑀢𑁂 𑀩𑁄𑀥𑁂𑀢𑀼𑀁, 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀬𑁂𑀦 𑀬𑁂𑀦 𑀬𑁄𑀕𑁂𑀦 𑀩𑁄𑀥𑀦𑁂𑀬𑁆𑀬𑀸 𑀩𑀼𑀚𑁆𑀛𑀦𑁆𑀢𑀺, 𑀢𑁂𑀦 𑀢𑁂𑀦 𑀬𑁄𑀕𑁂𑀦 𑀩𑁄𑀥𑀦𑁂𑀬𑁆𑀬𑁂 𑀩𑁄𑀥𑁂𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀬𑁂𑀦 𑀬𑁂𑀦 𑀪𑁂𑀲𑀚𑁆𑀚𑁂𑀦 𑀆𑀢𑀼𑀭𑁄 𑀅𑀭𑁄𑀕𑁄 𑀳𑁄𑀢𑀺, 𑀢𑁂𑀦 𑀢𑁂𑀦 𑀪𑁂𑀲𑀚𑁆𑀚𑁂𑀦 𑀆𑀢𑀼𑀭𑀁 𑀉𑀧𑀲𑀗𑁆𑀓𑀫𑀢𑀺, 𑀯𑀫𑀦𑀻𑀬𑀁 𑀯𑀫𑁂𑀢𑀺, 𑀯𑀺𑀭𑁂𑀘𑀦𑀻𑀬𑀁 𑀯𑀺𑀭𑁂𑀘𑁂𑀢𑀺, 𑀅𑀦𑀼𑀮𑁂𑀧𑀦𑀻𑀬𑀁 𑀅𑀦𑀼𑀮𑀺𑀫𑁆𑀧𑁂𑀢𑀺, 𑀅𑀦𑀼𑀯𑀸𑀲𑀦𑀻𑀬𑀁 𑀅𑀦𑀼𑀯𑀸𑀲𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀬𑁂𑀦 𑀬𑁂𑀦 𑀬𑁄𑀕𑁂𑀦 𑀩𑁄𑀥𑀦𑁂𑀬𑁆𑀬𑀸 𑀲𑀢𑁆𑀢𑀸 𑀩𑀼𑀚𑁆𑀛𑀦𑁆𑀢𑀺, 𑀢𑁂𑀦 𑀢𑁂𑀦 𑀬𑁄𑀕𑁂𑀦 𑀩𑁄𑀥𑁂𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀫𑀽𑀴𑁆𑀳𑀕𑀩𑁆𑀪𑀸 𑀪𑀺𑀲𑀓𑁆𑀓𑀲𑁆𑀲 𑀅𑀤𑀲𑁆𑀲𑀦𑀻𑀬𑀁 𑀕𑀼𑀬𑁆𑀳𑀁 𑀤𑀲𑁆𑀲𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀩𑁄𑀥𑀦𑁂𑀬𑁆𑀬𑁂 𑀲𑀢𑁆𑀢𑁂 𑀩𑁄𑀥𑁂𑀢𑀼𑀁 𑀅𑀤𑀲𑁆𑀲𑀦𑀻𑀬𑀁 𑀕𑀼𑀬𑁆𑀳𑀁 𑀇𑀤𑁆𑀥𑀺𑀬𑀸 𑀙𑀸𑀬𑀁 𑀤𑀲𑁆𑀲𑁂𑀲𑀺. 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀤𑀲𑁆𑀲𑀦𑀻𑀬𑁄 𑀦𑀸𑀫 𑀑𑀓𑀸𑀲𑁄 𑀧𑀼𑀕𑁆𑀕𑀮𑀁 𑀉𑀧𑀸𑀤𑀸𑀬. 𑀬𑀤𑀺, 𑀫𑀳𑀸𑀭𑀸𑀚, 𑀓𑁄𑀘𑀺 𑀪𑀕𑀯𑀢𑁄 𑀳𑀤𑀬𑀁 𑀤𑀺𑀲𑁆𑀯𑀸 𑀩𑀼𑀚𑁆𑀛𑁂𑀬𑁆𑀬, 𑀢𑀲𑁆𑀲𑀧𑀺 𑀪𑀕𑀯𑀸 𑀬𑁄𑀕𑁂𑀦 𑀳𑀤𑀬𑀁 𑀤𑀲𑁆𑀲𑁂𑀬𑁆𑀬, 𑀬𑁄𑀕𑀜𑁆𑀜𑀽, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀤𑁂𑀲𑀦𑀸𑀓𑀼𑀲𑀮𑁄.

‘‘𑀦𑀦𑀼, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀣𑁂𑀭𑀲𑁆𑀲 𑀦𑀦𑁆𑀤𑀲𑁆𑀲 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀢𑀁 𑀤𑁂𑀯𑀪𑀯𑀦𑀁 𑀦𑁂𑀢𑁆𑀯𑀸 𑀤𑁂𑀯𑀓𑀜𑁆𑀜𑀸𑀬𑁄 𑀤𑀲𑁆𑀲𑁂𑀲𑀺 ‘𑀇𑀫𑀺𑀦𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀩𑀼𑀚𑁆𑀛𑀺𑀲𑁆𑀲𑀢𑀻’𑀢𑀺, 𑀢𑁂𑀦 𑀘 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀩𑀼𑀚𑁆𑀛𑀺. 𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀼𑀪𑀦𑀺𑀫𑀺𑀢𑁆𑀢𑀁 𑀳𑀻𑀴𑁂𑀦𑁆𑀢𑁄 𑀕𑀭𑀳𑀦𑁆𑀢𑁄 𑀚𑀺𑀕𑀼𑀘𑁆𑀙𑀦𑁆𑀢𑁄 𑀢𑀲𑁆𑀲 𑀩𑁄𑀥𑀦𑀳𑁂𑀢𑀼 𑀓𑀓𑀼𑀝𑀧𑀸𑀤𑀺𑀦𑀺𑀬𑁄 𑀅𑀘𑁆𑀙𑀭𑀸𑀬𑁄 𑀤𑀲𑁆𑀲𑁂𑀲𑀺. 𑀏𑀯𑀫𑁆𑀧𑀺 𑀢𑀣𑀸𑀕𑀢𑁄 𑀬𑁄𑀕𑀜𑁆𑀜𑀽 𑀤𑁂𑀲𑀦𑀸𑀓𑀼𑀲𑀮𑁄.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀣𑁂𑀭𑀲𑁆𑀲 𑀘𑀽𑀴𑀧𑀦𑁆𑀣𑀓𑀲𑁆𑀲 𑀪𑀸𑀢𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑀲𑁆𑀲 𑀤𑀼𑀓𑁆𑀔𑀺𑀢𑀲𑁆𑀲 𑀤𑀼𑀫𑁆𑀫𑀦𑀲𑁆𑀲 𑀉𑀧𑀕𑀦𑁆𑀢𑁆𑀯𑀸 𑀲𑀼𑀔𑀼𑀫𑀁 𑀘𑁄𑀴𑀔𑀡𑁆𑀟𑀁 𑀅𑀤𑀸𑀲𑀺 ‘𑀇𑀫𑀺𑀦𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀩𑀼𑀚𑁆𑀛𑀺𑀲𑁆𑀲𑀢𑀻’𑀢𑀺, 𑀲𑁄 𑀘 𑀓𑀼𑀮𑀧𑀼𑀢𑁆𑀢𑁄 𑀢𑁂𑀦 𑀓𑀸𑀭𑀡𑁂𑀦 𑀚𑀺𑀦𑀲𑀸𑀲𑀦𑁂 𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀺. 𑀏𑀯𑀫𑁆𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀬𑁄𑀕𑀜𑁆𑀜𑀽 𑀤𑁂𑀲𑀦𑀸𑀓𑀼𑀲𑀮𑁄.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑁄𑀖𑀭𑀸𑀚𑀲𑁆𑀲 𑀬𑀸𑀯 𑀢𑀢𑀺𑀬𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀸𑀲𑀺 ‘𑀏𑀯𑀫𑀺𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀫𑀸𑀦𑁄 𑀉𑀧𑀲𑀫𑀺𑀲𑁆𑀲𑀢𑀺, 𑀫𑀸𑀦𑀽𑀧𑀲𑀫𑀸 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’𑀢𑀺, 𑀢𑁂𑀦 𑀘 𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀫𑀸𑀦𑁄 𑀉𑀧𑀲𑀫𑀺, 𑀫𑀸𑀦𑀽𑀧𑀲𑀫𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀺. 𑀏𑀯𑀫𑁆𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀬𑁄𑀕𑀜𑁆𑀜𑀽 𑀤𑁂𑀲𑀦𑀸𑀓𑀼𑀲𑀮𑁄’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀦𑀺𑀩𑁆𑀩𑁂𑀞𑀺𑀢𑁄 𑀧𑀜𑁆𑀳𑁄 𑀩𑀳𑀼𑀯𑀺𑀥𑁂𑀳𑀺 𑀓𑀸𑀭𑀡𑁂𑀳𑀺, 𑀕𑀳𑀦𑀁 𑀅𑀕𑀳𑀦𑀁 𑀓𑀢𑀁, 𑀅𑀦𑁆𑀥𑀓𑀸𑀭𑁄 𑀆𑀮𑁄𑀓𑁄 𑀓𑀢𑁄, 𑀕𑀡𑁆𑀞𑀺 𑀪𑀺𑀦𑁆𑀦𑁄, 𑀪𑀕𑁆𑀕𑀸 𑀧𑀭𑀯𑀸𑀤𑀸, 𑀚𑀺𑀦𑀧𑀼𑀢𑁆𑀢𑀸𑀦𑀁 𑀘𑀓𑁆𑀔𑀼𑀁 𑀢𑀬𑀸 𑀉𑀧𑁆𑀧𑀸𑀤𑀺𑀢𑀁, 𑀦𑀺𑀧𑁆𑀧𑀝𑀺𑀪𑀸𑀦𑀸 𑀢𑀺𑀢𑁆𑀣𑀺𑀬𑀸, 𑀢𑁆𑀯𑀁 𑀕𑀡𑀺𑀯𑀭𑀧𑀯𑀭𑀫𑀸𑀲𑀚𑁆𑀚𑀸’’𑀢𑀺.

𑀯𑀢𑁆𑀣𑀕𑀼𑀬𑁆𑀳𑀦𑀺𑀤𑀲𑁆𑀲𑀦𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀨𑀭𑀼𑀲𑀯𑀸𑀘𑀸𑀪𑀸𑀯𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄 𑀆𑀯𑀼𑀲𑁄 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀼𑀦 𑀘 𑀢𑀣𑀸𑀕𑀢𑁄 𑀣𑁂𑀭𑀲𑁆𑀲 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀅𑀧𑀭𑀸𑀥𑁂 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀺, 𑀢𑁂𑀦 𑀘 𑀲𑁄 𑀣𑁂𑀭𑁄 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀫𑀗𑁆𑀓𑀼𑀘𑀺𑀢𑁆𑀢𑀯𑀲𑁂𑀦 𑀭𑀼𑀦𑁆𑀥𑀺𑀢𑀢𑁆𑀢𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀦𑀸𑀲𑀓𑁆𑀔𑀺 𑀅𑀭𑀺𑀬𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑁂𑀦 𑀳𑀺 𑀢𑀣𑀸𑀕𑀢𑁂𑀦 𑀣𑁂𑀭𑀲𑁆𑀲 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀅𑀧𑀭𑀸𑀥𑁂 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀲𑀫𑀼𑀤𑀸𑀘𑀺𑀡𑁆𑀡𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀪𑀕𑀯𑀢𑀸 𑀣𑁂𑀭𑀲𑁆𑀲 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀅𑀧𑀭𑀸𑀥𑁂 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀲𑀫𑀼𑀤𑀸𑀘𑀺𑀡𑁆𑀡𑀁, 𑀢𑁂𑀦 𑀳𑀺 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄 𑀆𑀯𑀼𑀲𑁄 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀆𑀬𑀲𑁆𑀫𑀢𑁄 𑀘 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀅𑀧𑀭𑀸𑀥𑁂 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁂𑀦 𑀪𑀕𑀯𑀢𑀸 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀲𑀫𑀼𑀤𑀸𑀘𑀺𑀡𑁆𑀡𑀁, 𑀢𑀜𑁆𑀘 𑀧𑀦 𑀅𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀅𑀲𑀸𑀭𑀫𑁆𑀪𑁂𑀦 𑀬𑀸𑀣𑀸𑀯𑀮𑀓𑁆𑀔𑀡𑁂𑀦. 𑀓𑀺𑀜𑁆𑀘 𑀢𑀢𑁆𑀣 𑀬𑀸𑀣𑀸𑀯𑀮𑀓𑁆𑀔𑀡𑀁, 𑀬𑀲𑁆𑀲, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑀲𑁆𑀲 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀲 𑀧𑀼𑀭𑀺𑀲𑀢𑁆𑀢𑀦𑀁 𑀫𑁄𑀖𑀁 𑀅𑀜𑁆𑀜𑀁 𑀓𑀬𑀺𑀭𑀫𑀸𑀦𑀁 𑀅𑀜𑁆𑀜𑁂𑀦 𑀲𑀫𑁆𑀪𑀯𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀫𑁄𑀖𑀧𑀼𑀭𑀺𑀲𑁄’𑀢𑀺. 𑀇𑀢𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀢𑀸𑀯𑀯𑀘𑀦𑁂𑀦 𑀲𑀫𑀼𑀤𑀸𑀘𑀺𑀡𑁆𑀡𑀁, 𑀦𑁄 𑀅𑀪𑀽𑀢𑀯𑀸𑀤𑁂𑀦𑀸’’𑀢𑀺.

‘‘𑀲𑀪𑀸𑀯𑀫𑁆𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀅𑀓𑁆𑀓𑁄𑀲𑀦𑁆𑀢𑁄 𑀪𑀡𑀢𑀺, 𑀢𑀲𑁆𑀲 𑀫𑀬𑀁 𑀓𑀳𑀸𑀧𑀡𑀁 𑀤𑀡𑁆𑀟𑀁 𑀥𑀸𑀭𑁂𑀫, 𑀅𑀧𑀭𑀸𑀥𑁄 𑀬𑁂𑀯 𑀲𑁄 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀯𑀺𑀲𑀼𑀁 𑀯𑁄𑀳𑀸𑀭𑀁 𑀆𑀘𑀭𑀦𑁆𑀢𑁄 𑀅𑀓𑁆𑀓𑁄𑀲𑀢𑀻’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀲𑀼𑀢𑀧𑀼𑀩𑁆𑀩𑀁 𑀢𑀬𑀸 𑀔𑀮𑀺𑀢𑀲𑁆𑀲 𑀅𑀪𑀺𑀯𑀸𑀤𑀦𑀁 𑀯𑀸 𑀧𑀘𑁆𑀘𑀼𑀝𑁆𑀞𑀸𑀦𑀁 𑀯𑀸 𑀲𑀓𑁆𑀓𑀸𑀭𑀁 𑀯𑀸 𑀉𑀧𑀸𑀬𑀦𑀸𑀦𑀼𑀧𑁆𑀧𑀤𑀸𑀦𑀁 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀢𑁄 𑀓𑀼𑀢𑁄𑀘𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀔𑀮𑀺𑀢𑁄, 𑀲𑁄 𑀧𑀭𑀺𑀪𑀸𑀲𑀦𑀸𑀭𑀳𑁄 𑀳𑁄𑀢𑀺 𑀢𑀚𑁆𑀚𑀦𑀸𑀭𑀳𑁄, 𑀉𑀢𑁆𑀢𑀫𑀗𑁆𑀕𑀫𑁆𑀧𑀺𑀲𑁆𑀲 𑀙𑀺𑀦𑁆𑀤𑀦𑁆𑀢𑀺 𑀳𑀦𑀦𑁆𑀢𑀺𑀧𑀺 𑀩𑀦𑁆𑀥𑀦𑁆𑀢𑀺𑀧𑀺 𑀖𑀸𑀢𑁂𑀦𑁆𑀢𑀺𑀧𑀺 𑀛𑀸𑀧𑁂𑀦𑁆𑀢𑀺𑀧𑀻’’𑀢𑀺 [𑀚𑀸𑀧𑁂𑀦𑁆𑀢𑀺𑀧𑀻𑀢𑀺 (𑀲𑀻. 𑀧𑀻.)]. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀺𑀭𑀺𑀬𑀸 𑀬𑁂𑀯 𑀓𑀢𑀸, 𑀦𑁄 𑀅𑀓𑀺𑀭𑀺𑀬𑀸’’𑀢𑀺.

‘‘𑀓𑀺𑀭𑀺𑀬𑀫𑁆𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀼𑀭𑀼𑀫𑀸𑀦𑁂𑀦 𑀧𑀢𑀺𑀭𑀽𑀧𑁂𑀦 𑀓𑀸𑀢𑀩𑁆𑀩𑀁 𑀅𑀦𑀼𑀘𑁆𑀙𑀯𑀺𑀓𑁂𑀦, 𑀲𑀯𑀦𑁂𑀦𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑀲𑁆𑀲 𑀲𑀤𑁂𑀯𑀓𑁄 𑀮𑁄𑀓𑁄 𑀑𑀢𑁆𑀢𑀧𑁆𑀧𑀢𑀺 𑀳𑀺𑀭𑀺𑀬𑀢𑀺 𑀪𑀺𑀬𑁆𑀬𑁄 𑀤𑀲𑁆𑀲𑀦𑁂𑀦 𑀢𑀢𑀼𑀢𑁆𑀢𑀭𑀺𑀁 𑀉𑀧𑀲𑀗𑁆𑀓𑀫𑀦𑁂𑀦 𑀧𑀬𑀺𑀭𑀼𑀧𑀸𑀲𑀦𑁂𑀦𑀸’’𑀢𑀺. ‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀺𑀓𑀺𑀘𑁆𑀙𑀓𑁄 𑀅𑀪𑀺𑀲𑀦𑁆𑀦𑁂 𑀓𑀸𑀬𑁂 𑀓𑀼𑀧𑀺𑀢𑁂 𑀤𑁄𑀲𑁂 𑀲𑀺𑀦𑁂𑀳𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀤𑁂𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀢𑀺𑀡𑁆𑀳𑀸𑀦𑀺 𑀮𑁂𑀔𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀤𑁂𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀩𑁆𑀩𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑀸𑀬 𑀅𑀦𑀼𑀲𑀺𑀝𑁆𑀞𑀺𑀁 𑀤𑁂𑀢𑀺, 𑀨𑀭𑀼𑀲𑀸𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀯𑀸𑀘𑀸 𑀲𑀢𑁆𑀢𑁂 𑀲𑀺𑀦𑁂𑀳𑀬𑀢𑀺, 𑀫𑀼𑀤𑀼𑀓𑁂 𑀓𑀭𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀉𑀡𑁆𑀳𑀫𑁆𑀧𑀺 𑀉𑀤𑀓𑀁 𑀬𑀁 𑀓𑀺𑀜𑁆𑀘𑀺 𑀲𑀺𑀦𑁂𑀳𑀦𑀻𑀬𑀁 𑀲𑀺𑀦𑁂𑀳𑀬𑀢𑀺, 𑀫𑀼𑀤𑀼𑀓𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀨𑀭𑀼𑀲𑀸𑀧𑀺 𑀢𑀣𑀸𑀕𑀢𑀲𑁆𑀲 𑀯𑀸𑀘𑀸 𑀅𑀢𑁆𑀣𑀯𑀢𑀻 𑀳𑁄𑀢𑀺 𑀓𑀭𑀼𑀡𑀸𑀲𑀳𑀕𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀧𑀺𑀢𑀼𑀯𑀘𑀦𑀁 𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀯𑀦𑁆𑀢𑀁 𑀳𑁄𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀨𑀭𑀼𑀲𑀸𑀧𑀺 𑀢𑀣𑀸𑀕𑀢𑀲𑁆𑀲 𑀯𑀸𑀘𑀸 𑀅𑀢𑁆𑀣𑀯𑀢𑀻 𑀳𑁄𑀢𑀺 𑀓𑀭𑀼𑀡𑀸𑀲𑀳𑀕𑀢𑀸. 𑀨𑀭𑀼𑀲𑀸𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀯𑀸𑀘𑀸 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀸 [𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀬 (𑀲𑀻.)] 𑀳𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀤𑀼𑀕𑁆𑀕𑀦𑁆𑀥𑀫𑁆𑀧𑀺 𑀕𑁄𑀫𑀼𑀢𑁆𑀢𑀁 𑀧𑀻𑀢𑀁 𑀯𑀺𑀭𑀲𑀫𑁆𑀧𑀺 𑀅𑀕𑀤𑀁 𑀔𑀸𑀬𑀺𑀢𑀁 𑀲𑀢𑁆𑀢𑀸𑀦𑀁 𑀩𑁆𑀬𑀸𑀥𑀺𑀁 𑀳𑀦𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀨𑀭𑀼𑀲𑀸𑀧𑀺 𑀢𑀣𑀸𑀕𑀢𑀲𑁆𑀲 𑀯𑀸𑀘𑀸 𑀅𑀢𑁆𑀣𑀯𑀢𑀻 𑀓𑀭𑀼𑀡𑀸𑀲𑀳𑀕𑀢𑀸. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑁄𑀧𑀺 𑀢𑀽𑀮𑀧𑀼𑀜𑁆𑀚𑁄 [𑀢𑀽𑀮𑀧𑀺𑀘𑀼 (𑀲𑀻. 𑀲𑁆𑀬𑀸.)] 𑀧𑀭𑀲𑁆𑀲 𑀓𑀸𑀬𑁂 𑀦𑀺𑀧𑀢𑀺𑀢𑁆𑀯𑀸 𑀭𑀼𑀚𑀁 𑀦 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀨𑀭𑀼𑀲𑀸𑀧𑀺 𑀢𑀣𑀸𑀕𑀢𑀲𑁆𑀲 𑀯𑀸𑀘𑀸 𑀦 𑀓𑀲𑁆𑀲𑀘𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. ‘‘𑀲𑀼𑀯𑀺𑀦𑀺𑀘𑁆𑀙𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺, 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀨𑀭𑀼𑀲𑀯𑀸𑀘𑀸𑀪𑀸𑀯𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀭𑀼𑀓𑁆𑀔𑀅𑀘𑁂𑀢𑀦𑀸𑀪𑀸𑀯𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀢𑀣𑀸𑀕𑀢𑁂𑀦 𑁋

‘‘‘𑀅𑀘𑁂𑀢𑀦𑀁 𑀩𑁆𑀭𑀸𑀳𑁆𑀫𑀡 𑀅𑀲𑁆𑀲𑀼𑀡𑀦𑁆𑀢𑀁, 𑀚𑀸𑀦𑁄 𑀅𑀚𑀸𑀦𑀦𑁆𑀢𑀫𑀺𑀫𑀁 𑀧𑀮𑀸𑀲𑀁;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀥𑀼𑀯𑀁 𑀅𑀧𑁆𑀧𑀫𑀢𑁆𑀢𑁄, 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀲𑀺 𑀓𑀺𑀲𑁆𑀲 𑀳𑁂𑀢𑀽’𑀢𑀺 [𑀚𑀸. 𑁧.𑁪.𑁨𑁫].

𑀧𑀼𑀦 𑀘 𑀪𑀡𑀺𑀢𑀁 𑁋

‘‘‘𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀢𑀸𑀯𑀤𑁂 𑀅𑀚𑁆𑀛𑀪𑀸𑀲𑀣;

𑀫𑀬𑁆𑀳𑀫𑁆𑀧𑀺 𑀯𑀘𑀦𑀁 𑀅𑀢𑁆𑀣𑀺, 𑀪𑀸𑀭𑀤𑁆𑀯𑀸𑀚 𑀲𑀼𑀡𑁄𑀳𑀺 𑀫𑁂’𑀢𑀺 [𑀚𑀸. 𑁧.𑁧𑁩.𑁨𑁦].

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀼𑀓𑁆𑀔𑁄 𑀅𑀘𑁂𑀢𑀦𑁄, 𑀢𑁂𑀦 𑀳𑀺 𑀨𑀦𑁆𑀤𑀦𑁂𑀦 𑀭𑀼𑀓𑁆𑀔𑁂𑀦 𑀪𑀸𑀭𑀤𑁆𑀯𑀸𑀚𑁂𑀦 𑀲𑀳 𑀲𑀮𑁆𑀮𑀧𑀺𑀢𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀨𑀦𑁆𑀤𑀦𑁂𑀦 𑀭𑀼𑀓𑁆𑀔𑁂𑀦 𑀪𑀸𑀭𑀤𑁆𑀯𑀸𑀚𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀁, 𑀢𑁂𑀦 𑀳𑀺 𑀭𑀼𑀓𑁆𑀔𑁄 𑀅𑀘𑁂𑀢𑀦𑁄𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀭𑀼𑀓𑁆𑀔𑁄 𑀅𑀘𑁂𑀢𑀦𑁄’𑀢𑀺, 𑀨𑀦𑁆𑀤𑀦𑁂𑀦 𑀘 𑀭𑀼𑀓𑁆𑀔𑁂𑀦 𑀪𑀸𑀭𑀤𑁆𑀯𑀸𑀚𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀁, 𑀢𑀜𑁆𑀘 𑀧𑀦 𑀯𑀘𑀦𑀁 𑀮𑁄𑀓𑀲𑀫𑀜𑁆𑀜𑀸𑀬 𑀪𑀡𑀺𑀢𑀁. 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀘𑁂𑀢𑀦𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀮𑁆𑀮𑀸𑀧𑁄 𑀦𑀸𑀫, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁 𑀭𑀼𑀓𑁆𑀔𑁄𑀢𑀺, 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀻𑀢𑀺 𑀘𑁂𑀲𑀸 𑀮𑁄𑀓𑀧𑀡𑁆𑀡𑀢𑁆𑀢𑀺, 𑀬𑀣𑀸, 𑀫𑀳𑀸𑀭𑀸𑀚, 𑀲𑀓𑀝𑀁 𑀥𑀜𑁆𑀜𑀲𑁆𑀲 𑀧𑀭𑀺𑀧𑀽𑀭𑀺𑀢𑀁 𑀥𑀜𑁆𑀜𑀲𑀓𑀝𑀦𑁆𑀢𑀺 𑀚𑀦𑁄 𑀯𑁄𑀳𑀭𑀢𑀺, 𑀦 𑀘 𑀢𑀁 𑀥𑀜𑁆𑀜𑀫𑀬𑀁 𑀲𑀓𑀝𑀁, 𑀭𑀼𑀓𑁆𑀔𑀫𑀬𑀁 𑀲𑀓𑀝𑀁, 𑀢𑀲𑁆𑀫𑀺𑀁 𑀲𑀓𑀝𑁂 𑀥𑀜𑁆𑀜𑀲𑁆𑀲 𑀧𑀦 𑀆𑀓𑀺𑀭𑀺𑀢𑀢𑁆𑀢𑀸 𑀥𑀜𑁆𑀜𑀲𑀓𑀝𑀦𑁆𑀢𑀺 𑀚𑀦𑁄 𑀯𑁄𑀳𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀺, 𑀭𑀼𑀓𑁆𑀔𑁄 𑀅𑀘𑁂𑀢𑀦𑁄, 𑀬𑀸 𑀧𑀦 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, 𑀢𑀲𑁆𑀲𑀸 𑀬𑁂𑀯 𑀢𑀁 𑀅𑀥𑀺𑀯𑀘𑀦𑀁 𑀭𑀼𑀓𑁆𑀔𑁄𑀢𑀺, 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀻𑀢𑀺 𑀘𑁂𑀲𑀸 𑀮𑁄𑀓𑀧𑀡𑁆𑀡𑀢𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀤𑀥𑀺𑀁 𑀫𑀦𑁆𑀣𑀬𑀫𑀸𑀦𑁄 𑀢𑀓𑁆𑀓𑀁 𑀫𑀦𑁆𑀣𑁂𑀫𑀻𑀢𑀺 𑀯𑁄𑀳𑀭𑀢𑀺, 𑀦 𑀢𑀁 𑀢𑀓𑁆𑀓𑀁, 𑀬𑀁 𑀲𑁄 𑀫𑀦𑁆𑀣𑁂𑀢𑀺, 𑀤𑀥𑀺𑀁 𑀬𑁂𑀯 𑀲𑁄 𑀫𑀦𑁆𑀣𑁂𑀦𑁆𑀢𑁄 𑀢𑀓𑁆𑀓𑀁 𑀫𑀦𑁆𑀣𑁂𑀫𑀻𑀢𑀺 𑀯𑁄𑀳𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀺, 𑀭𑀼𑀓𑁆𑀔𑁄 𑀅𑀘𑁂𑀢𑀦𑁄. 𑀬𑀸 𑀧𑀦 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, 𑀢𑀲𑁆𑀲𑀸𑀬𑁂𑀯 𑀢𑀁 𑀅𑀥𑀺𑀯𑀘𑀦𑀁 𑀭𑀼𑀓𑁆𑀔𑁄𑀢𑀺, 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀻𑀢𑀺 𑀘𑁂𑀲𑀸 𑀮𑁄𑀓𑀧𑀡𑁆𑀡𑀢𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀲𑀦𑁆𑀢𑀁 𑀲𑀸𑀥𑁂𑀢𑀼𑀓𑀸𑀫𑁄 𑀲𑀦𑁆𑀢𑀁 𑀲𑀸𑀥𑁂𑀫𑀻𑀢𑀺 𑀯𑁄𑀳𑀭𑀢𑀺, 𑀅𑀲𑀺𑀤𑁆𑀥𑀁 𑀲𑀺𑀤𑁆𑀥𑀦𑁆𑀢𑀺 𑀯𑁄𑀳𑀭𑀢𑀺, 𑀏𑀯𑀫𑁂𑀲𑀸 𑀮𑁄𑀓𑀲𑀫𑀜𑁆𑀜𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀺, 𑀭𑀼𑀓𑁆𑀔𑁄 𑀅𑀘𑁂𑀢𑀦𑁄. 𑀬𑀸 𑀧𑀦 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, 𑀢𑀲𑁆𑀲𑀸𑀬𑁂𑀯 𑀢𑀁 𑀅𑀥𑀺𑀯𑀘𑀦𑀁 𑀭𑀼𑀓𑁆𑀔𑁄𑀢𑀺, 𑀭𑀼𑀓𑁆𑀔𑁄 𑀲𑀮𑁆𑀮𑀧𑀢𑀻𑀢𑀺 𑀘𑁂𑀲𑀸 𑀮𑁄𑀓𑀧𑀡𑁆𑀡𑀢𑁆𑀢𑀺, 𑀬𑀸𑀬, 𑀫𑀳𑀸𑀭𑀸𑀚, 𑀮𑁄𑀓𑀲𑀫𑀜𑁆𑀜𑀸𑀬 𑀚𑀦𑁄 𑀯𑁄𑀳𑀭𑀢𑀺, 𑀢𑀣𑀸𑀕𑀢𑁄𑀧𑀺 𑀢𑀸𑀬𑁂𑀯 𑀮𑁄𑀓𑀲𑀫𑀜𑁆𑀜𑀸𑀬 𑀲𑀢𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀭𑀼𑀓𑁆𑀔𑀅𑀘𑁂𑀢𑀦𑀸𑀪𑀸𑀯𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀧𑀺𑀡𑁆𑀟𑀧𑀸𑀢𑀫𑀳𑀧𑁆𑀨𑀮𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀥𑀫𑁆𑀫𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀣𑁂𑀭𑁂𑀳𑀺 𑁋

‘‘‘𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀓𑀫𑁆𑀫𑀸𑀭𑀲𑁆𑀲𑀸𑀢𑀺 𑀫𑁂 𑀲𑀼𑀢𑀁;

𑀆𑀩𑀸𑀥𑀁 𑀲𑀫𑁆𑀨𑀼𑀲𑀻 𑀥𑀻𑀭𑁄, 𑀧𑀩𑀸𑀴𑁆𑀳𑀁 𑀫𑀸𑀭𑀡𑀦𑁆𑀢𑀺𑀓’𑀦𑁆𑀢𑀺 [𑀤𑀻. 𑀦𑀺. 𑁨.𑁧𑁯𑁦].

‘‘𑀧𑀼𑀦 𑀘 𑀪𑀕𑀯𑀢𑀸 𑀪𑀡𑀺𑀢𑀁 ‘𑀤𑁆𑀯𑁂𑀫𑁂, 𑀆𑀦𑀦𑁆𑀤, 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘. 𑀓𑀢𑀫𑁂 𑀤𑁆𑀯𑁂? 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀫𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸, 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑁄 𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀢𑁆𑀢𑀸𑀯𑀺𑀲𑁆𑀲 [𑀪𑀼𑀜𑁆𑀚𑀺𑀢𑁆𑀯𑀸 (𑀲𑀻.)] 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀧𑀩𑀸𑀴𑁆𑀳𑀸 𑀘 𑀯𑁂𑀤𑀦𑀸 𑀧𑀯𑀢𑁆𑀢𑀸 𑀫𑀸𑀭𑀡𑀦𑁆𑀢𑀺𑀓𑀸, 𑀢𑁂𑀦 𑀳𑀺 ‘𑀤𑁆𑀯𑁂𑀫𑁂, 𑀆𑀦𑀦𑁆𑀤, 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀤𑁆𑀯𑁂𑀫𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘, 𑀢𑁂𑀦 𑀳𑀺 𑀪𑀕𑀯𑀢𑁄 𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀢𑁆𑀢𑀸𑀯𑀺𑀲𑁆𑀲 [𑀪𑀼𑀜𑁆𑀚𑀺𑀢𑁆𑀯𑀸 (𑀲𑀻.)] 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀧𑀩𑀸𑀴𑁆𑀳𑀸 𑀘 𑀯𑁂𑀤𑀦𑀸 𑀧𑀯𑀢𑁆𑀢𑀸 𑀫𑀸𑀭𑀡𑀦𑁆𑀢𑀺𑀓𑀸𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀓𑀺𑀁𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑁄 𑀧𑀺𑀡𑁆𑀟𑀧𑀸𑀢𑁄 𑀯𑀺𑀲𑀕𑀢𑀢𑀸𑀬 𑀫𑀳𑀧𑁆𑀨𑀮𑁄, 𑀭𑁄𑀕𑀼𑀧𑁆𑀧𑀸𑀤𑀓𑀢𑀸𑀬 𑀫𑀳𑀧𑁆𑀨𑀮𑁄, 𑀆𑀬𑀼𑀯𑀺𑀦𑀸𑀲𑀓𑀢𑀸𑀬 𑀫𑀳𑀧𑁆𑀨𑀮𑁄, 𑀪𑀕𑀯𑀢𑁄 𑀚𑀻𑀯𑀺𑀢𑀳𑀭𑀡𑀢𑀸𑀬 𑀫𑀳𑀧𑁆𑀨𑀮𑁄? 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀳𑀺 𑀧𑀭𑀯𑀸𑀤𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀏𑀢𑁆𑀣𑀸𑀬𑀁 𑀚𑀦𑁄 𑀲𑀫𑁆𑀫𑀽𑀴𑁆𑀳𑁄 𑀮𑁄𑀪𑀯𑀲𑁂𑀦 𑀅𑀢𑀺𑀩𑀳𑀼𑀁 𑀔𑀸𑀬𑀺𑀢𑁂𑀦 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀉𑀧𑁆𑀧𑀦𑁆𑀦𑀸𑀢𑀺. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀥𑀫𑁆𑀫𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀣𑁂𑀭𑁂𑀳𑀺 𑁋

‘‘‘𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀓𑀫𑁆𑀫𑀸𑀭𑀲𑁆𑀲𑀸𑀢𑀺 𑀫𑁂 𑀲𑀼𑀢𑀁;

𑀆𑀩𑀸𑀥𑀁 𑀲𑀫𑁆𑀨𑀼𑀲𑀻 𑀥𑀻𑀭𑁄, 𑀧𑀩𑀸𑀴𑁆𑀳𑀁 𑀫𑀸𑀭𑀡𑀦𑁆𑀢𑀺𑀓’𑀦𑁆𑀢𑀺.

‘‘𑀪𑀕𑀯𑀢𑀸 𑀘 𑀪𑀡𑀺𑀢𑀁 ‘𑀤𑁆𑀯𑁂𑀫𑁂, 𑀆𑀦𑀦𑁆𑀤, 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘. 𑀓𑀢𑀫𑁂 𑀤𑁆𑀯𑁂? 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 [𑀧𑀭𑀺𑀦𑀺𑀩𑁆𑀩𑀸𑀬𑀺 (𑀲𑀻.)], 𑀇𑀫𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸, 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’𑀢𑀺.

‘‘𑀲𑁄 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀩𑀳𑀼𑀕𑀼𑀡𑁄 𑀅𑀦𑁂𑀓𑀸𑀦𑀺𑀲𑀁𑀲𑁄. 𑀤𑁂𑀯𑀢𑀸, 𑀫𑀳𑀸𑀭𑀸𑀚, 𑀳𑀝𑁆𑀞𑀸 𑀧𑀲𑀦𑁆𑀦𑀫𑀸𑀦𑀲𑀸 ‘𑀅𑀬𑀁 𑀪𑀕𑀯𑀢𑁄 𑀧𑀘𑁆𑀙𑀺𑀫𑁄 𑀧𑀺𑀡𑁆𑀟𑀧𑀸𑀢𑁄’𑀢𑀺 𑀤𑀺𑀩𑁆𑀩𑀁 𑀑𑀚𑀁 𑀲𑀽𑀓𑀭𑀫𑀤𑁆𑀤𑀯𑁂 𑀆𑀓𑀺𑀭𑀺𑀁𑀲𑀼. 𑀢𑀜𑁆𑀘 𑀧𑀦 𑀲𑀫𑁆𑀫𑀸𑀧𑀸𑀓𑀁 𑀮𑀳𑀼𑀧𑀸𑀓𑀁 [𑀩𑀳𑀼𑀧𑀸𑀓𑀁 (𑀲𑀻.)] 𑀫𑀦𑀼𑀜𑁆𑀜𑀁 𑀩𑀳𑀼𑀭𑀲𑀁 𑀚𑀝𑁆𑀞𑀭𑀕𑁆𑀕𑀺𑀢𑁂𑀚𑀲𑁆𑀲 𑀳𑀺𑀢𑀁. 𑀦, 𑀫𑀳𑀸𑀭𑀸𑀚, 𑀢𑀢𑁄𑀦𑀺𑀤𑀸𑀦𑀁 𑀪𑀕𑀯𑀢𑁄 𑀓𑁄𑀘𑀺 𑀅𑀦𑀼𑀧𑁆𑀧𑀦𑁆𑀦𑁄 𑀭𑁄𑀕𑁄 𑀉𑀧𑁆𑀧𑀦𑁆𑀦𑁄, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀧𑀓𑀢𑀺𑀤𑀼𑀩𑁆𑀩𑀮𑁂 𑀲𑀭𑀻𑀭𑁂 𑀔𑀻𑀡𑁂 𑀆𑀬𑀼𑀲𑀗𑁆𑀔𑀸𑀭𑁂 𑀉𑀧𑁆𑀧𑀦𑁆𑀦𑁄 𑀭𑁄𑀕𑁄 𑀪𑀺𑀬𑁆𑀬𑁄 𑀅𑀪𑀺𑀯𑀟𑁆𑀠𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀓𑀢𑀺𑀬𑀸 𑀚𑀮𑀫𑀸𑀦𑁄 𑀅𑀕𑁆𑀕𑀺 𑀅𑀜𑁆𑀜𑀲𑁆𑀫𑀺𑀁 𑀉𑀧𑀸𑀤𑀸𑀦𑁂 𑀤𑀺𑀦𑁆𑀦𑁂 𑀪𑀺𑀬𑁆𑀬𑁄 𑀧𑀚𑁆𑀚𑀮𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀧𑀓𑀢𑀺𑀤𑀼𑀩𑁆𑀩𑀮𑁂 𑀲𑀭𑀻𑀭𑁂 𑀔𑀻𑀡𑁂 𑀆𑀬𑀼𑀲𑀗𑁆𑀔𑀸𑀭𑁂 𑀉𑀧𑁆𑀧𑀦𑁆𑀦𑁄 𑀭𑁄𑀕𑁄 𑀪𑀺𑀬𑁆𑀬𑁄 𑀅𑀪𑀺𑀯𑀟𑁆𑀠𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑁄𑀢𑁄 𑀧𑀓𑀢𑀺𑀬𑀸 𑀲𑀦𑁆𑀤𑀫𑀸𑀦𑁄 𑀅𑀪𑀺𑀯𑀼𑀝𑁆𑀞𑁂 𑀫𑀳𑀸𑀫𑁂𑀖𑁂 𑀪𑀺𑀬𑁆𑀬𑁄 𑀫𑀳𑁄𑀖𑁄 𑀉𑀤𑀓𑀯𑀸𑀳𑀓𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀧𑀓𑀢𑀺𑀤𑀼𑀩𑁆𑀩𑀮𑁂 𑀲𑀭𑀻𑀭𑁂 𑀔𑀻𑀡𑁂 𑀆𑀬𑀼𑀲𑀗𑁆𑀔𑀸𑀭𑁂 𑀉𑀧𑁆𑀧𑀦𑁆𑀦𑁄 𑀭𑁄𑀕𑁄 𑀪𑀺𑀬𑁆𑀬𑁄 𑀅𑀪𑀺𑀯𑀟𑁆𑀠𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀓𑀢𑀺𑀬𑀸 𑀅𑀪𑀺𑀲𑀦𑁆𑀦𑀥𑀸𑀢𑀼 𑀓𑀼𑀘𑁆𑀙𑀺 𑀅𑀜𑁆𑀜𑀲𑁆𑀫𑀺𑀁 𑀅𑀚𑁆𑀛𑁄𑀳𑀭𑀺𑀢𑁂 𑀪𑀺𑀬𑁆𑀬𑁄 𑀆𑀬𑀫𑁂𑀬𑁆𑀬 [𑀆𑀫𑀬𑁂𑀬𑁆𑀬 (𑀲𑀻.)], 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀧𑀓𑀢𑀺𑀤𑀼𑀩𑁆𑀩𑀮𑁂 𑀲𑀭𑀻𑀭𑁂 𑀔𑀻𑀡𑁂 𑀆𑀬𑀼𑀲𑀗𑁆𑀔𑀸𑀭𑁂 𑀉𑀧𑁆𑀧𑀦𑁆𑀦𑁄 𑀭𑁄𑀕𑁄 𑀪𑀺𑀬𑁆𑀬𑁄 𑀅𑀪𑀺𑀯𑀟𑁆𑀠𑀺, 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀢𑀲𑁆𑀫𑀺𑀁 𑀧𑀺𑀡𑁆𑀟𑀧𑀸𑀢𑁂 𑀤𑁄𑀲𑁄, 𑀦 𑀘 𑀢𑀲𑁆𑀲 𑀲𑀓𑁆𑀓𑀸 𑀤𑁄𑀲𑀁 𑀆𑀭𑁄𑀧𑁂𑀢𑀼’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀢𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’𑀢𑀺? ‘‘𑀥𑀫𑁆𑀫𑀸𑀦𑀼𑀫𑀚𑁆𑀚𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦, 𑀫𑀳𑀸𑀭𑀸𑀚, 𑀢𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀫𑀚𑁆𑀚𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀢𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’𑀢𑀺? ‘‘𑀦𑀯𑀦𑁆𑀦𑀁, 𑀫𑀳𑀸𑀭𑀸𑀚, 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀢𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁆𑀯𑀻𑀲𑀼 𑀬𑁂𑀯 𑀤𑀺𑀯𑀲𑁂𑀲𑀼 𑀅𑀥𑀺𑀫𑀢𑁆𑀢𑀁 𑀢𑀣𑀸𑀕𑀢𑁄 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀁 𑀲𑀫𑀸𑀧𑀚𑁆𑀚𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂 𑀦𑀸𑀕𑀲𑁂𑀦. 𑀬𑀁 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂 𑀅𑀲𑀤𑀺𑀲𑀁 𑀧𑀭𑀫𑀤𑀸𑀦𑀁, 𑀢𑀫𑁆𑀧𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀅𑀕𑀡𑀺𑀢𑀁. 𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦. 𑀬𑀸𑀯 𑀫𑀳𑀦𑁆𑀢𑀸 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘. 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀧𑀺𑀡𑁆𑀟𑀧𑀸𑀢𑀫𑀳𑀧𑁆𑀨𑀮𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀩𑀼𑀤𑁆𑀥𑀧𑀽𑀚𑀦𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀢𑀣𑀸𑀕𑀢𑁂𑀦 ‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬𑀸’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 𑁋

‘‘‘𑀧𑀽𑀚𑁂𑀣 𑀦𑀁 𑀧𑀽𑀚𑀦𑀺𑀬𑀲𑁆𑀲 𑀥𑀸𑀢𑀼𑀁;

𑀏𑀯𑀁 𑀓𑀺𑀭 𑀲𑀕𑁆𑀕𑀫𑀺𑀢𑁄 𑀕𑀫𑀺𑀲𑁆𑀲𑀣𑀸’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬𑀸’𑀢𑀺, 𑀢𑁂𑀦 𑀳𑀺 ‘𑀧𑀽𑀚𑁂𑀣 𑀦𑀁 𑀧𑀽𑀚𑀦𑀺𑀬𑀲𑁆𑀲 𑀥𑀸𑀢𑀼𑀁, 𑀏𑀯𑀁 𑀓𑀭𑀸 𑀲𑀕𑁆𑀕𑀫𑀺𑀢𑁄 𑀕𑀫𑀺𑀲𑁆𑀲𑀣𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀧𑀽𑀚𑁂𑀣 𑀦𑀁 𑀧𑀽𑀚𑀦𑀺𑀬𑀲𑁆𑀲 𑀥𑀸𑀢𑀼𑀁, 𑀏𑀯𑀁 𑀓𑀭𑀸 𑀲𑀕𑁆𑀕𑀫𑀺𑀢𑁄 𑀕𑀫𑀺𑀲𑁆𑀲𑀣𑀸’𑀢𑀺, 𑀢𑁂𑀦 𑀳𑀺 ‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬𑀸’𑀢𑀺, 𑀧𑀼𑀦 𑀘 𑀪𑀡𑀺𑀢𑀁 ‘𑀧𑀽𑀚𑁂𑀣 𑀦𑀁 𑀧𑀽𑀚𑀦𑀺𑀬𑀲𑁆𑀲 𑀥𑀸𑀢𑀼𑀁, 𑀏𑀯𑀁 𑀓𑀭𑀸 𑀲𑀕𑁆𑀕𑀫𑀺𑀢𑁄 𑀕𑀫𑀺𑀲𑁆𑀲𑀣𑀸’𑀢𑀺, 𑀢𑀜𑁆𑀘 𑀧𑀦 𑀦 𑀲𑀩𑁆𑀩𑁂𑀲𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀬𑁂𑀯 𑀆𑀭𑀩𑁆𑀪 𑀪𑀡𑀺𑀢𑀁 ‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬𑀸’𑀢𑀺. 𑀅𑀓𑀫𑁆𑀫𑀁 𑀳𑁂𑀢𑀁, 𑀫𑀳𑀸𑀭𑀸𑀚, 𑀚𑀺𑀦𑀧𑀼𑀢𑁆𑀢𑀸𑀦𑀁 𑀬𑀤𑀺𑀤𑀁 𑀧𑀽𑀚𑀸, 𑀲𑀫𑁆𑀫𑀲𑀦𑀁 𑀲𑀗𑁆𑀔𑀸𑀭𑀸𑀦𑀁, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀲𑀢𑀺𑀧𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀦𑀸, 𑀆𑀭𑀫𑁆𑀫𑀡𑀲𑀸𑀭𑀕𑁆𑀕𑀸𑀳𑁄, 𑀓𑀺𑀮𑁂𑀲𑀬𑀼𑀤𑁆𑀥𑀁, 𑀲𑀤𑀢𑁆𑀣𑀫𑀦𑀼𑀬𑀼𑀜𑁆𑀚𑀦𑀸, 𑀏𑀢𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀓𑀭𑀡𑀻𑀬𑀁, 𑀅𑀯𑀲𑁂𑀲𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀽𑀚𑀸 𑀓𑀭𑀡𑀻𑀬𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀺𑀬𑀸 𑀭𑀸𑀚𑀧𑀼𑀢𑁆𑀢𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀭𑀣𑀥𑀦𑀼𑀣𑀭𑀼𑀮𑁂𑀔𑀫𑀼𑀤𑁆𑀤𑀸𑀲𑀺𑀓𑁆𑀔𑀸𑀔𑀕𑁆𑀕𑀫𑀦𑁆𑀢𑀲𑀼𑀢𑀺- 𑀲𑀫𑁆𑀫𑀼𑀢𑀺𑀬𑀼𑀤𑁆𑀥𑀬𑀼𑀚𑁆𑀛𑀸𑀧𑀦𑀓𑀺𑀭𑀺𑀬𑀸 𑀓𑀭𑀡𑀻𑀬𑀸, 𑀅𑀯𑀲𑁂𑀲𑀸𑀦𑀁 𑀧𑀼𑀣𑀼𑀯𑁂𑀲𑁆𑀲𑀲𑀼𑀤𑁆𑀤𑀸𑀦𑀁 𑀓𑀲𑀺 𑀯𑀡𑀺𑀚𑁆𑀚𑀸 𑀕𑁄𑀭𑀓𑁆𑀔𑀸 𑀓𑀭𑀡𑀻𑀬𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀓𑀫𑁆𑀫𑀁 𑀳𑁂𑀢𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀬𑀤𑀺𑀤𑀁 𑀧𑀽𑀚𑀸, 𑀲𑀫𑁆𑀫𑀲𑀦𑀁 𑀲𑀗𑁆𑀔𑀸𑀭𑀸𑀦𑀁, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀲𑀢𑀺𑀧𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀦𑀸, 𑀆𑀭𑀫𑁆𑀫𑀡𑀲𑀸𑀭𑀕𑁆𑀕𑀸𑀳𑁄, 𑀓𑀺𑀮𑁂𑀲𑀬𑀼𑀤𑁆𑀥𑀁, 𑀲𑀤𑀢𑁆𑀣𑀫𑀦𑀼𑀬𑀼𑀜𑁆𑀚𑀦𑀸, 𑀏𑀢𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀓𑀭𑀡𑀻𑀬𑀁, 𑀅𑀯𑀲𑁂𑀲𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀽𑀚𑀸 𑀓𑀭𑀡𑀻𑀬𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑀓𑀸𑀦𑀁 𑀇𑀭𑀼𑀯𑁂𑀤𑀁 𑀬𑀚𑀼𑀯𑁂𑀤𑀁 𑀲𑀸𑀫𑀯𑁂𑀤𑀁 𑀅𑀣𑀩𑁆𑀩𑀡𑀯𑁂𑀤𑀁 𑀮𑀓𑁆𑀔𑀡𑀁 𑀇𑀢𑀺𑀳𑀸𑀲𑀁 𑀧𑀼𑀭𑀸𑀡𑀁 𑀦𑀺𑀖𑀡𑁆𑀟𑀼 𑀓𑁂𑀝𑀼𑀪𑀁 𑀅𑀓𑁆𑀔𑀭𑀧𑁆𑀧𑀪𑁂𑀤𑀁 𑀧𑀤𑀁 𑀯𑁂𑀬𑁆𑀬𑀸𑀓𑀭𑀡𑀁 𑀪𑀸𑀲𑀫𑀕𑁆𑀕𑀁 𑀉𑀧𑁆𑀧𑀸𑀢𑀁 𑀲𑀼𑀧𑀺𑀦𑀁 𑀦𑀺𑀫𑀺𑀢𑁆𑀢𑀁 𑀙𑀴𑀗𑁆𑀕𑀁 𑀘𑀦𑁆𑀤𑀕𑁆𑀕𑀸𑀳𑀁 𑀲𑀽𑀭𑀺𑀬𑀕𑁆𑀕𑀸𑀳𑀁 𑀲𑀼𑀓𑁆𑀓𑀭𑀸𑀳𑀼𑀘𑀭𑀺𑀢𑀁 𑀉𑀴𑀼𑀕𑁆𑀕𑀳𑀬𑀼𑀤𑁆𑀥𑀁 [𑀑𑀴𑀼𑀕𑁆𑀕𑀳𑀬𑀼𑀤𑁆𑀥𑀁 (𑀓.)] 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑁆𑀲𑀭𑀁 𑀑𑀓𑁆𑀓𑀦𑁆𑀢𑀺 𑀉𑀓𑁆𑀓𑀸𑀧𑀸𑀢𑀁 𑀪𑀽𑀫𑀺𑀓𑀫𑁆𑀫𑀁 [𑀪𑀽𑀫𑀺𑀓𑀫𑁆𑀧𑀁 (𑀲𑀻. 𑀧𑀻.)] 𑀤𑀺𑀲𑀸𑀤𑀸𑀳𑀁 𑀪𑀼𑀫𑁆𑀫𑀦𑁆𑀢𑀮𑀺𑀓𑁆𑀔𑀁 𑀚𑁄𑀢𑀺𑀲𑀁 𑀮𑁄𑀓𑀸𑀬𑀢𑀺𑀓𑀁 𑀲𑀸𑀘𑀓𑁆𑀓𑀁 𑀫𑀺𑀕𑀘𑀓𑁆𑀓𑀁 𑀅𑀦𑁆𑀢𑀭𑀘𑀓𑁆𑀓𑀁 𑀫𑀺𑀲𑁆𑀲𑀓𑀼𑀧𑁆𑀧𑀸𑀤𑀁 𑀲𑀓𑀼𑀡𑀭𑀼𑀢𑀭𑀯𑀺𑀢𑀁 [𑀲𑀓𑀼𑀡𑀭𑀼𑀢𑀁 (𑀲𑀻.)] 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸, 𑀅𑀯𑀲𑁂𑀲𑀸𑀦𑀁 𑀧𑀼𑀣𑀼𑀯𑁂𑀲𑁆𑀲𑀲𑀼𑀤𑁆𑀤𑀸𑀦𑀁 𑀓𑀲𑀺 𑀯𑀡𑀺𑀚𑁆𑀚𑀸 𑀕𑁄𑀭𑀓𑁆𑀔𑀸 𑀓𑀭𑀡𑀻𑀬𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀓𑀫𑁆𑀫𑀁 𑀳𑁂𑀢𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀬𑀤𑀺𑀤𑀁 𑀧𑀽𑀚𑀸, 𑀲𑀫𑁆𑀫𑀲𑀦𑀁 𑀲𑀗𑁆𑀔𑀸𑀭𑀸𑀦𑀁, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀲𑀢𑀺𑀧𑀝𑁆𑀞𑀸𑀦𑀸𑀦𑀼𑀧𑀲𑁆𑀲𑀦𑀸, 𑀆𑀭𑀫𑁆𑀫𑀡𑀲𑀸𑀭𑀕𑁆𑀕𑀸𑀳𑁄, 𑀓𑀺𑀮𑁂𑀲𑀬𑀼𑀤𑁆𑀥𑀁, 𑀲𑀤𑀢𑁆𑀣𑀫𑀦𑀼𑀬𑀼𑀜𑁆𑀚𑀦𑀸, 𑀏𑀢𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀓𑀭𑀡𑀻𑀬𑀁, 𑀅𑀯𑀲𑁂𑀲𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀽𑀚𑀸 𑀓𑀭𑀡𑀻𑀬𑀸, 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 ‘𑀫𑀸 𑀇𑀫𑁂 𑀅𑀓𑀫𑁆𑀫𑁂 𑀬𑀼𑀜𑁆𑀚𑀦𑁆𑀢𑀼, 𑀓𑀫𑁆𑀫𑁂 𑀇𑀫𑁂 𑀬𑀼𑀜𑁆𑀚𑀦𑁆𑀢𑀽’𑀢𑀺 𑀆𑀳 ‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬𑀸’𑀢𑀺. 𑀬𑀤𑁂𑀢𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀦 𑀪𑀡𑁂𑀬𑁆𑀬, 𑀧𑀢𑁆𑀢𑀘𑀻𑀯𑀭𑀫𑁆𑀧𑀺 𑀅𑀢𑁆𑀢𑀦𑁄 𑀧𑀭𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀩𑀼𑀤𑁆𑀥𑀧𑀽𑀚𑀁 𑀬𑁂𑀯 𑀓𑀭𑁂𑀬𑁆𑀬𑀼’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀩𑀼𑀤𑁆𑀥𑀧𑀽𑀚𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀧𑀸𑀤𑀲𑀓𑀮𑀺𑀓𑀸𑀳𑀢𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀪𑀕𑀯𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀅𑀬𑀁 𑀅𑀘𑁂𑀢𑀦𑀸 𑀫𑀳𑀸𑀧𑀣𑀯𑀻 𑀦𑀺𑀦𑁆𑀦𑀁 𑀉𑀦𑁆𑀦𑀫𑀢𑀺, 𑀉𑀦𑁆𑀦𑀢𑀁 𑀑𑀦𑀫𑀢𑀻’𑀢𑀺, 𑀧𑀼𑀦 𑀘 𑀪𑀡𑀣 ‘𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄’𑀢𑀺. 𑀬𑀸 𑀲𑀸 𑀲𑀓𑀮𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸, 𑀓𑀺𑀲𑁆𑀲 𑀧𑀦 𑀲𑀸 𑀲𑀓𑀮𑀺𑀓𑀸 𑀪𑀕𑀯𑀢𑁄 𑀧𑀸𑀤𑀸 𑀦 𑀦𑀺𑀯𑀢𑁆𑀢𑀸. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀅𑀬𑀁 𑀅𑀘𑁂𑀢𑀦𑀸 𑀫𑀳𑀸𑀧𑀣𑀯𑀻 𑀦𑀺𑀦𑁆𑀦𑀁 𑀉𑀦𑁆𑀦𑀫𑀢𑀺, 𑀉𑀦𑁆𑀦𑀢𑀁 𑀑𑀦𑀫𑀢𑀺, 𑀢𑁂𑀦 𑀳𑀺 ‘𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄, 𑀢𑁂𑀦 𑀳𑀺 ‘𑀪𑀕𑀯𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀅𑀬𑀁 𑀅𑀘𑁂𑀢𑀦𑀸 𑀫𑀳𑀸𑀧𑀣𑀯𑀻 𑀦𑀺𑀦𑁆𑀦𑀁 𑀉𑀦𑁆𑀦𑀫𑀢𑀺 𑀉𑀦𑁆𑀦𑀢𑀁 𑀑𑀦𑀫𑀢𑀻’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀲𑀘𑁆𑀘𑀁, 𑀫𑀳𑀸𑀭𑀸𑀚, 𑀅𑀢𑁆𑀣𑁂𑀢𑀁 𑀪𑀕𑀯𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀅𑀬𑀁 𑀅𑀘𑁂𑀢𑀦𑀸 𑀫𑀳𑀸𑀧𑀣𑀯𑀻 𑀦𑀺𑀦𑁆𑀦𑀁 𑀉𑀦𑁆𑀦𑀫𑀢𑀺 𑀉𑀦𑁆𑀦𑀢𑀁 𑀑𑀦𑀫𑀢𑀺, 𑀪𑀕𑀯𑀢𑁄 𑀘 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄, 𑀦 𑀘 𑀧𑀦 𑀲𑀸 𑀲𑀓𑀮𑀺𑀓𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀢𑀺𑀢𑀸, 𑀤𑁂𑀯𑀤𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀢𑀺𑀢𑀸. 𑀤𑁂𑀯𑀤𑀢𑁆𑀢𑁄, 𑀫𑀳𑀸𑀭𑀸𑀚, 𑀩𑀳𑀽𑀦𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺, 𑀲𑁄 𑀢𑁂𑀦 𑀆𑀖𑀸𑀢𑁂𑀦 ‘𑀫𑀳𑀦𑁆𑀢𑀁 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁 𑀧𑀸𑀲𑀸𑀡𑀁 𑀪𑀕𑀯𑀢𑁄 𑀉𑀧𑀭𑀺 𑀧𑀸𑀢𑁂𑀲𑁆𑀲𑀸𑀫𑀻’𑀢𑀺 𑀫𑀼𑀜𑁆𑀘𑀺. 𑀅𑀣 𑀤𑁆𑀯𑁂 𑀲𑁂𑀮𑀸 𑀧𑀣𑀯𑀺𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀢𑀁 𑀧𑀸𑀲𑀸𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀅𑀣 𑀦𑁂𑀲𑀁 𑀲𑀫𑁆𑀧𑀳𑀸𑀭𑁂𑀦 𑀧𑀸𑀲𑀸𑀡𑀢𑁄 𑀧𑀧𑀝𑀺𑀓𑀸 𑀪𑀺𑀚𑁆𑀚𑀺𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀦𑁆𑀢𑀻 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸’’𑀢𑀺.

‘‘𑀬𑀣𑀸 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁆𑀯𑁂 𑀲𑁂𑀮𑀸 𑀧𑀸𑀲𑀸𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀢𑀣𑁂𑀯 𑀧𑀧𑀝𑀺𑀓𑀸𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸’’𑀢𑀺? ‘‘𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑁆𑀧𑀺, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑀁 𑀧𑀕𑁆𑀖𑀭𑀢𑀺 𑀧𑀲𑀯𑀢𑀺 𑀦 𑀞𑀸𑀦𑀫𑀼𑀧𑀕𑀘𑁆𑀙𑀢𑀺, 𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁 𑀧𑀸𑀡𑀺𑀦𑀸 𑀕𑀳𑀺𑀢𑀁 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀧𑀕𑁆𑀖𑀭𑀢𑀺 𑀧𑀲𑀯𑀢𑀺 𑀦 𑀞𑀸𑀦𑀫𑀼𑀧𑀕𑀘𑁆𑀙𑀢𑀺, 𑀔𑀻𑀭𑀁 𑀢𑀓𑁆𑀓𑀁 𑀫𑀥𑀼𑀁 𑀲𑀧𑁆𑀧𑀺 𑀢𑁂𑀲𑀁 𑀫𑀘𑁆𑀙𑀭𑀲𑀁 𑀫𑀁𑀲𑀭𑀲𑀁 𑀧𑀸𑀡𑀺𑀦𑀸 𑀕𑀳𑀺𑀢𑀁 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀧𑀕𑁆𑀖𑀭𑀢𑀺 𑀧𑀲𑀯𑀢𑀺 𑀦 𑀞𑀸𑀦𑀫𑀼𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀉𑀧𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑁂𑀮𑀸𑀦𑀁 𑀲𑀫𑁆𑀧𑀳𑀸𑀭𑁂𑀦 𑀧𑀸𑀲𑀸𑀡𑀢𑁄 𑀧𑀧𑀝𑀺𑀓𑀸 𑀪𑀺𑀚𑁆𑀚𑀺𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀦𑁆𑀢𑀻 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀡𑁆𑀳𑀲𑀼𑀔𑀼𑀫𑀅𑀡𑀼𑀭𑀚𑀲𑀫𑀁 𑀧𑀼𑀴𑀺𑀦𑀁 𑀫𑀼𑀝𑁆𑀞𑀺𑀦𑀸 𑀕𑀳𑀺𑀢𑀁 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀧𑀕𑁆𑀖𑀭𑀢𑀺 𑀧𑀲𑀯𑀢𑀺 𑀦 𑀞𑀸𑀦𑀫𑀼𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀉𑀧𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑁂𑀮𑀸𑀦𑀁 𑀲𑀫𑁆𑀧𑀳𑀸𑀭𑁂𑀦 𑀧𑀸𑀲𑀸𑀡𑀢𑁄 𑀧𑀧𑀝𑀺𑀓𑀸 𑀪𑀺𑀚𑁆𑀚𑀺𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀦𑁆𑀢𑀻 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑀩𑀴𑁄 𑀫𑀼𑀔𑁂𑀦 𑀕𑀳𑀺𑀢𑁄 𑀇𑀥𑁂𑀓𑀘𑁆𑀘𑀲𑁆𑀲 𑀫𑀼𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀕𑁆𑀖𑀭𑀢𑀺 𑀧𑀲𑀯𑀢𑀺 𑀦 𑀞𑀸𑀦𑀫𑀼𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀉𑀧𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑁂𑀮𑀸𑀦𑀁 𑀲𑀫𑁆𑀧𑀳𑀸𑀭𑁂𑀦 𑀧𑀸𑀲𑀸𑀡𑀢𑁄 𑀧𑀧𑀝𑀺𑀓𑀸 𑀪𑀺𑀚𑁆𑀚𑀺𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀦𑁆𑀢𑀻 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸’’𑀢𑀺.

‘‘𑀳𑁄𑀢𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑁂𑀮𑁂𑀳𑀺 𑀧𑀸𑀲𑀸𑀡𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁄, 𑀅𑀣 𑀧𑀧𑀝𑀺𑀓𑀸𑀬𑀧𑀺 𑀅𑀧𑀘𑀺𑀢𑀺 𑀓𑀸𑀢𑀩𑁆𑀩𑀸 𑀬𑀣𑁂𑀯 𑀫𑀳𑀸𑀧𑀣𑀯𑀺𑀬𑀸’’𑀢𑀺? ‘‘𑀤𑁆𑀯𑀸𑀤𑀲𑀺𑀫𑁂, 𑀫𑀳𑀸𑀭𑀸𑀚, 𑀅𑀧𑀘𑀺𑀢𑀺𑀁 𑀦 𑀓𑀭𑁄𑀦𑁆𑀢𑀺. 𑀓𑀢𑀫𑁂 𑀤𑁆𑀯𑀸𑀤𑀲? 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀅𑀧𑀘𑀺𑀢𑀺𑀁 𑀦 𑀓𑀭𑁄𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦, 𑀉𑀦𑁆𑀦𑀢𑁄 𑀫𑀸𑀦𑀯𑀲𑁂𑀦, 𑀦𑀺𑀕𑁆𑀕𑀼𑀡𑁄 𑀅𑀯𑀺𑀲𑁂𑀲𑀢𑀸𑀬, 𑀅𑀢𑀺𑀣𑀤𑁆𑀥𑁄 𑀅𑀦𑀺𑀲𑁂𑀥𑀦𑀢𑀸𑀬, 𑀳𑀻𑀦𑁄 𑀳𑀻𑀦𑀲𑀪𑀸𑀯𑀢𑀸𑀬, 𑀯𑀘𑀦𑀓𑀭𑁄 𑀅𑀦𑀺𑀲𑁆𑀲𑀭𑀢𑀸𑀬, 𑀧𑀸𑀧𑁄 𑀓𑀤𑀭𑀺𑀬𑀢𑀸𑀬, 𑀤𑀼𑀓𑁆𑀔𑀸𑀧𑀺𑀢𑁄 𑀧𑀝𑀺𑀤𑀼𑀓𑁆𑀔𑀸𑀧𑀦𑀢𑀸𑀬, 𑀮𑀼𑀤𑁆𑀥𑁄 𑀮𑁄𑀪𑀸𑀪𑀺𑀪𑀽𑀢𑀢𑀸𑀬, 𑀆𑀬𑀽𑀳𑀺𑀢𑁄 𑀅𑀢𑁆𑀣𑀲𑀸𑀥𑀦𑀢𑀸𑀬 [𑀅𑀢𑁆𑀣𑀲𑀸𑀥𑀦𑁂𑀦 (𑀲𑁆𑀬𑀸. 𑀧𑀻. 𑀓.)] 𑀅𑀧𑀘𑀺𑀢𑀺𑀁 𑀦 𑀓𑀭𑁄𑀢𑀺. 𑀇𑀫𑁂 𑀔𑁄 𑀫𑀳𑀸𑀭𑀸𑀚 𑀤𑁆𑀯𑀸𑀤𑀲 𑀅𑀧𑀘𑀺𑀢𑀺𑀁 𑀦 𑀓𑀭𑁄𑀦𑁆𑀢𑀺. 𑀲𑀸 𑀘 𑀧𑀦 𑀧𑀧𑀝𑀺𑀓𑀸 𑀧𑀸𑀲𑀸𑀡𑀲𑀫𑁆𑀧𑀳𑀸𑀭𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀓𑀢𑀤𑀺𑀲𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀫𑀸𑀦𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀡𑁆𑀳𑀲𑀼𑀔𑀼𑀫𑀅𑀡𑀼𑀭𑀚𑁄 𑀅𑀦𑀺𑀮𑀩𑀮𑀲𑀫𑀸𑀳𑀢𑁄 𑀅𑀦𑀺𑀫𑀺𑀢𑁆𑀢𑀓𑀢𑀤𑀺𑀲𑁄 𑀬𑁂𑀦 𑀯𑀸 𑀢𑁂𑀦 𑀯𑀸 𑀅𑀪𑀺𑀓𑀺𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀸 𑀧𑀧𑀝𑀺𑀓𑀸 𑀧𑀸𑀲𑀸𑀡𑀲𑀫𑁆𑀧𑀳𑀸𑀭𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀓𑀢𑀤𑀺𑀲𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀫𑀸𑀦𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸. 𑀬𑀤𑀺 𑀧𑀦, 𑀫𑀳𑀸𑀭𑀸𑀚, 𑀲𑀸 𑀧𑀧𑀝𑀺𑀓𑀸 𑀧𑀸𑀲𑀸𑀡𑀢𑁄 𑀯𑀺𑀲𑀼𑀁 𑀦 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀢𑁂 𑀲𑁂𑀮𑀸 𑀧𑀸𑀲𑀸𑀡𑀧𑀧𑀝𑀺𑀓𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁. 𑀏𑀲𑀸 𑀧𑀦, 𑀫𑀳𑀸𑀭𑀸𑀚, 𑀧𑀧𑀝𑀺𑀓𑀸 𑀦 𑀪𑀽𑀫𑀝𑁆𑀞𑀸 𑀦 𑀆𑀓𑀸𑀲𑀝𑁆𑀞𑀸, 𑀧𑀸𑀲𑀸𑀡𑀲𑀫𑁆𑀧𑀳𑀸𑀭𑀯𑁂𑀕𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀓𑀢𑀤𑀺𑀲𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀫𑀸𑀦𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀯𑀸𑀢𑀫𑀡𑁆𑀟𑀮𑀺𑀓𑀸𑀬 𑀉𑀓𑁆𑀔𑀺𑀢𑁆𑀢𑀁 𑀧𑀼𑀭𑀸𑀡𑀧𑀡𑁆𑀡𑀁 𑀅𑀦𑀺𑀫𑀺𑀢𑁆𑀢𑀓𑀢𑀤𑀺𑀲𑀁 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀏𑀲𑀸 𑀧𑀧𑀝𑀺𑀓𑀸 𑀧𑀸𑀲𑀸𑀡𑀲𑀫𑁆𑀧𑀳𑀸𑀭𑀯𑁂𑀕𑁂𑀦 𑀅𑀦𑀺𑀫𑀺𑀢𑁆𑀢𑀓𑀢𑀤𑀺𑀲𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀢𑀫𑀸𑀦𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸. 𑀅𑀧𑀺 𑀘, 𑀫𑀳𑀸𑀭𑀸𑀚, 𑀅𑀓𑀢𑀜𑁆𑀜𑀼𑀲𑁆𑀲 𑀓𑀤𑀭𑀺𑀬𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀤𑀼𑀓𑁆𑀔𑀸𑀦𑀼𑀪𑀯𑀦𑀸𑀬 𑀧𑀧𑀝𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀧𑀢𑀺𑀢𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀧𑀸𑀤𑀲𑀓𑀮𑀺𑀓𑀸𑀳𑀢𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀅𑀕𑁆𑀕𑀕𑁆𑀕𑀲𑀫𑀡𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 𑁋

‘‘‘𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀁 𑀆𑀳𑀼 𑀮𑁄𑀓𑁂’𑀢𑀺.

𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀔𑀦𑁆𑀢𑀺 𑀅𑀧𑁆𑀧𑀸𑀳𑀸𑀭𑀢𑀸 𑀭𑀢𑀺𑀯𑀺𑀧𑁆𑀧𑀳𑀸𑀦𑀁 𑀆𑀓𑀺𑀜𑁆𑀘𑀜𑁆𑀜𑀁. 𑀲𑀩𑁆𑀩𑀸𑀦𑀺 𑀧𑀦𑁂𑀢𑀸𑀦𑀺 𑀅𑀧𑀭𑀺𑀓𑁆𑀔𑀻𑀡𑀸𑀲𑀯𑀲𑁆𑀲 𑀲𑀓𑀺𑀮𑁂𑀲𑀲𑁆𑀲𑁂𑀯 𑀳𑁄𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀺, 𑀢𑁂𑀦 𑀳𑀺 ‘𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀁 𑀆𑀳𑀼 𑀮𑁄𑀓𑁂’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄 𑀲𑀫𑀡𑁄 𑀳𑁄𑀢𑀺, 𑀢𑁂𑀦 𑀳𑀺 ‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸, 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀁 𑀆𑀳𑀼 𑀮𑁄𑀓𑁂’𑀢𑀺. 𑀢𑀤𑀺𑀤𑀁, 𑀫𑀳𑀸𑀭𑀸𑀚, 𑀯𑀘𑀦𑀁 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑀯𑀲𑁂𑀦 𑀪𑀡𑀺𑀢𑀁 ‘𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀁 𑀆𑀳𑀼 𑀮𑁄𑀓𑁂’𑀢𑀺, 𑀇𑀤𑀁 𑀧𑀦 𑀦𑀺𑀭𑀯𑀲𑁂𑀲𑀯𑀘𑀦𑀁 ‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’𑀢𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀓𑀺𑀮𑁂𑀲𑀽𑀧𑀲𑀫𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀩𑁆𑀩𑁂 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀲𑀫𑀡𑁄 𑀔𑀻𑀡𑀸𑀲𑀯𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀮𑀚𑀣𑀮𑀚𑀧𑀼𑀧𑁆𑀨𑀸𑀦𑀺, 𑀯𑀲𑁆𑀲𑀺𑀓𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀅𑀯𑀲𑁂𑀲𑀸𑀦𑀺 𑀬𑀸𑀦𑀺 𑀓𑀸𑀦𑀺𑀘𑀺 𑀯𑀺𑀯𑀺𑀥𑀸𑀦𑀺 𑀧𑀼𑀧𑁆𑀨𑀚𑀸𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀬𑁂𑀯, 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀧𑀦 𑀯𑀲𑁆𑀲𑀺𑀓𑀁 𑀬𑁂𑀯 𑀧𑀼𑀧𑁆𑀨𑀁 𑀚𑀦𑀲𑁆𑀲 𑀧𑀢𑁆𑀣𑀺𑀢𑀁 𑀧𑀺𑀳𑀬𑀺𑀢𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀓𑀺𑀮𑁂𑀲𑀽𑀧𑀲𑀫𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀩𑁆𑀩𑁂 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀲𑀫𑀡𑁄 𑀔𑀻𑀡𑀸𑀲𑀯𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀩𑁆𑀩𑀥𑀜𑁆𑀜𑀸𑀦𑀁 𑀲𑀸𑀮𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀸 𑀓𑀸𑀘𑀺 𑀅𑀯𑀲𑁂𑀲𑀸 𑀯𑀺𑀯𑀺𑀥𑀸 𑀥𑀜𑁆𑀜𑀚𑀸𑀢𑀺𑀬𑁄, 𑀢𑀸 𑀲𑀩𑁆𑀩𑀸 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀪𑁄𑀚𑀦𑀸𑀦𑀺 𑀲𑀭𑀻𑀭𑀬𑀸𑀧𑀦𑀸𑀬, 𑀲𑀸𑀮𑀺 𑀬𑁂𑀯 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀓𑀺𑀮𑁂𑀲𑀽𑀧𑀲𑀫𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀩𑁆𑀩𑁂 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀲𑀫𑀡𑁄 𑀔𑀻𑀡𑀸𑀲𑀯𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀕𑁆𑀕𑀕𑁆𑀕𑀲𑀫𑀡𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀯𑀡𑁆𑀡𑀪𑀡𑀦𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄, 𑀦 𑀲𑁄𑀫𑀦𑀲𑁆𑀲𑀁, 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬’𑀦𑁆𑀢𑀺 𑀧𑀼𑀦 𑀘 𑀢𑀣𑀸𑀕𑀢𑁄 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀆𑀦𑀦𑁆𑀤𑀺𑀢𑁄 𑀲𑀼𑀫𑀦𑁄 𑀉𑀧𑁆𑀧𑀺𑀮𑀸𑀯𑀺𑀢𑁄 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀁 𑀲𑀓𑀕𑀼𑀡𑀁 𑀧𑀓𑀺𑀢𑁆𑀢𑁂𑀲𑀺 𑁋

‘‘‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸𑀢𑀺, 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄;

𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺, 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬’𑀦𑁆𑀢𑀺 [𑀫. 𑀦𑀺. 𑁨.𑁩𑁯𑁯].

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄, 𑀦 𑀲𑁄𑀫𑀦𑀲𑁆𑀲𑀁, 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬’𑀦𑁆𑀢𑀺, 𑀢𑁂𑀦 𑀳𑀺 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀆𑀦𑀦𑁆𑀤𑀺𑀢𑁄 𑀲𑀼𑀫𑀦𑁄 𑀉𑀧𑁆𑀧𑀺𑀮𑀸𑀯𑀺𑀢𑁄 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀁 𑀲𑀓𑀕𑀼𑀡𑀁 𑀧𑀓𑀺𑀢𑁆𑀢𑁂𑀲𑀻𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀆𑀦𑀦𑁆𑀤𑀺𑀢𑁄 𑀲𑀼𑀫𑀦𑁄 𑀉𑀧𑁆𑀧𑀺𑀮𑀸𑀯𑀺𑀢𑁄 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀁 𑀲𑀓𑀕𑀼𑀡𑀁 𑀧𑀓𑀺𑀢𑁆𑀢𑁂𑀲𑀺, 𑀢𑁂𑀦 𑀳𑀺 ‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄, 𑀦 𑀲𑁄𑀫𑀦𑀲𑁆𑀲𑀁, 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄, 𑀦 𑀲𑁄𑀫𑀦𑀲𑁆𑀲𑀁, 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬’𑀦𑁆𑀢𑀺. 𑀲𑁂𑀮𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀁 𑀲𑀓𑀕𑀼𑀡𑀁 𑀧𑀓𑀺𑀢𑁆𑀢𑀺𑀢𑀁 𑁋

‘‘‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸𑀢𑀺, 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄;

𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺, 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬’𑀦𑁆𑀢𑀺.

‘‘𑀧𑀞𑀫𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀥𑀫𑁆𑀫𑀲𑁆𑀲 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀁 𑀲𑀪𑀸𑀯𑀁 𑀅𑀯𑀺𑀢𑀣𑀁 𑀪𑀽𑀢𑀁 𑀢𑀘𑁆𑀙𑀁 𑀢𑀣𑀢𑁆𑀣𑀁 𑀧𑀭𑀺𑀤𑀻𑀧𑀬𑀫𑀸𑀦𑁂𑀦 𑀪𑀡𑀺𑀢𑀁 ‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄, 𑀦 𑀲𑁄𑀫𑀦𑀲𑁆𑀲𑀁, 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬’𑀦𑁆𑀢𑀺. 𑀬𑀁 𑀧𑀦 𑀪𑀕𑀯𑀢𑀸 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀁 𑀲𑀓𑀕𑀼𑀡𑀁 𑀧𑀓𑀺𑀢𑁆𑀢𑀺𑀢𑀁 ‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸𑀢𑀺, 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄’𑀢𑀺 𑀢𑀁 𑀦 𑀮𑀸𑀪𑀳𑁂𑀢𑀼, 𑀦 𑀬𑀲𑀳𑁂𑀢𑀼, 𑀦 𑀅𑀢𑁆𑀢𑀳𑁂𑀢𑀼, 𑀦 𑀧𑀓𑁆𑀔𑀳𑁂𑀢𑀼, 𑀦 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀬𑀢𑀸𑀬, 𑀅𑀣 𑀔𑁄 𑀅𑀦𑀼𑀓𑀫𑁆𑀧𑀸𑀬 𑀓𑀸𑀭𑀼𑀜𑁆𑀜𑁂𑀦 𑀳𑀺𑀢𑀯𑀲𑁂𑀦 𑀏𑀯𑀁 𑀇𑀫𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺 𑀢𑀺𑀡𑁆𑀡𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀦𑁆𑀢𑀺, 𑀏𑀯𑀁 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀁 𑀲𑀓𑀕𑀼𑀡𑀁 𑀪𑀡𑀺𑀢𑀁 ‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸𑀢𑀺, 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀯𑀡𑁆𑀡𑀪𑀡𑀦𑀧𑀜𑁆𑀳𑁄 𑀤